CLOSE WINDOW

D4019
བོད་ཡིག

@##/ /rgya gar skad du/ Ar+ya lang+ka a ba tA ra nA ma mahA yA na sU tra br-it+ti ta thA ga ta hr-i da ya a lang+ka ra nA ma/ bod skad du/ 'phags pa lang kar gshegs pa zhes bya ba theg pa chen po'i mdo'i 'grel pa de bzhin gshegs pa'i snying po'i rgyan zhes bya ba/sangs rgyas dang byang chub sems dpa' thams cad la phyag 'tshal lo/ /gang zhig kun gzhi rgya mtsho dang ni dba' rlabs rnam shes sna tshogs snang ba gang //yongs gyur so so rang rig ye shes sprin med mkha' ltar spros bral dri med kyang / /thugs rjes 'gro rnams bdag tu lta ba'i brag 'joms gnam lcags sgra dang snang ba ldan//sdug bsngal chu bo'i gru gzings dgos 'dod 'byung ba'i gter chen sangs rgyas chos tshogs dang / /gang gi gsung gi 'od kyis bdag sogs blo yi pad ma kha 'byed cing / / ser skya la sogs log lta'i tshang tshing ma lus bsreg cing skrag mdzad pa/ /dkon mchog gsum gyi rtsa ba bla ma'i zhabs kyi pad mo la btud de/ /mtha' gnyis rnam spangs rnam rig dbu ma'i tshul lugs mdo don gsal bar bya//dgongs dang ldem por dgongs pa dang / /drang ba dang ni nges pa'i don/ /mgon pos mdo yi tshul bstan pa/ /rnam 'byed 'di ni nges pa'i don/ /de la bcom ldan 'das kyi mdo sde rin po che 'chad par byed pa rnams kyis re zhig dang por mdo'i dgos pa brjod par bya ste/ji skad du/ mdo don che ba nyid thos na/ /len pa dang ni 'dzin pa la/ /nyan pa po ni 'jug 'gyur bas/ /de phyir dgos pa brjod par bya//zhes sngon gyi slob dpon dag gis bshad pa'i phyir ro/ /de yang 'dir rnam pa bzhi'i sgo nas shes par bya ste/ brjod par bya ba dang / dgos pa dang / 'brel pa dang / dgos pa'i dgos pa'o/ /de la 'dir dgos 'brel de rnams dang ldan pa'i rjod byed mdo sde'i ngo bo gang zhe na/mdo sde 'dir gtogs pa'i ming tshig yi ge'i tshogs du mar 'brel bar yid kyi rnam par shes pa'am/ de gnas gyur pa ye shes kyi khyad par 'ga' zhig la snang ba la brten nas brjod bya'i don nges pa 'dren par nus pa ni rjod par byed pa'i mdo sde'i khyad par 'di nyid do//gzhan yang sgra dang yi ge'i rang gi mtshan nyid du ma 'brel par mig dang rna ba'i rnam par shes pa la snang ba rnam shes kyi ngo bor gyur pa la brten nas sgra dang yi ge'i spyi'i rnam par snang ba 'byung zhing /de las brgyud nas don nges pa 'dren par nus pas/ nye bar btags nas rjod byed nyid du nye bar gzhag ste/ brgyud nas brjod bya rtogs pa'i yan lag yin pa'i phyir ro/ /dngos su rjod par byed pa ni ma yin te/ sgra rnams kyis ni brdar btags ston/ /de ni tha snyad ched du byas/ /de tshe rang gi mtshan nyid med/ /des na de la brdar ma yin/ /zhes 'byung bas sgra dang don gyi rang gi mtshan nyid ni brjod bya rjod byed du mi 'thad de/ 'di'i don ni 'og nas zhib tu bstan par bya'o/ /gang dag ming dang tshig la sogs pa ldan pa ma yin pa'i 'du byed sems las tha dad pa nyid du 'dod pa ni grub pa'i mtha' ngan pas brtags pa ste/'og nas 'gegs par 'gyur ro/ /de bzhin du phyi rol gyi ngo bo 'byung ba las gyur pa'i gzugs kyi phung po'i khyad par du 'dod pa dang / rnam par rig pa tsam du smra ba rnam pa brdzun par 'dod pa gang dag 'di dngos po med pa nyid du smra ba yang mi 'thad de/'og nas bstan par bya'o/ /de lta bu'i ngo bor gyur pa'i mdo sde 'di'i brjod par bya ba ni rig pa dang stong pa zung du 'jug pa mtha' gnyis rnam par spang ba rnam par rig pa tsam gyi dbu ma ste/ de'i don yang kun nas nyon mongs pa dang rnam par byang ba'i chos thams cad sems kyi rnam par 'phrul pa yin pas sems las tha dad pa med cing sems nyid yin la/de yang kun rdzob tu myong rig tsam gyi rang bzhin yin zhing / don dam par stong pa nyid de/ de dag kyang phan tshun du rgyas btab pa zung du 'jug pa'i ngo bo ste/ zhib tu ni 'og nas bstan par bya'o/ /de la re zhig rjod byed kyi stobs kyis byung ba'i shes pa la rjod byed dang 'dren par spyi'i rnam pa'i tshul du snang ba ni dngos su brjod par bya ba yin la/ de la brten nas rtogs par bya ba'i don gyi rang gi mtshan nyid rig pa dang stong pa zung du 'jug pa 'phags pa rnams kyis so so rang gis rig par bya ba ni zhen pa'i brjod bya'o//brjod par bya ba de dag spyi'i rnam pa'i tshul du rtogs pa'am/ ji lta ba bzhin du nyams su myong ba ni dgos pa'o/ /dgos pa de nyid rjod byed mdo sde la rag las pa ni 'brel pa zhes bya'o/ /de ltar rtogs shing nyams su myong ba'i don yang nas yang du goms pa la brten nas/goms pa rab kyi mthar phyin pa dri ma thams cad bag chags dang bcas te spangs pa/ de bzhin nyid dang yang dag pa'i ye shes dbyer med pa/ yon tan thams cad kyi gter du gyur pa/ chos kyi sku'i ngo bo ni dgos pa'i dgos pa'o/ / gal te de lta na mdo'i dgos pa ston par khas blangs pa'i skabs su 'brel pa la sogs pa gzhan dag ston pa ni ma 'brel pa brjod pa nyid du 'gyur ro zhe na/ skyon med de/ dgos pa'i dgos pa ni mthar thug pa'i dgos pa yin pas brjod bya rtogs pa'i dgos pa de nyid don du gnyer ba'i skyes bu la nye bar mkho ba 'dod bya nyid du ston pa'i yan lag yin la/'brel pa bstan pa ni dgos pa de nyid mdo sde la rag las shing ldan par bstan pa'o/ /brjod bya'i khyad par bstan pa yang khyad par 'di lta bu rtogs pa'i dgos pa dang ldan no zhes dgos pa'i khyad par ngos gzung ba'i don du ste/ de ltar na thams cad dgos pa ston pa'i yan lag tu 'gyur ba'i phyir ma 'brel pa brjod pa'i go skabs ga la yod ces pa'o//gal te de lta na dgos pa de 'dra ba ni bcom ldan 'das kyi mdo sde'i phyogs gzhan gyis sgrub pas/ mdo sde 'di nyid nye bar bkod pa la dgos pa med do zhe na/ ma yin te/ gdul bya'i khyad par 'ga' zhig gis brjod par bya ba'i khyad par de 'dra ba da dung rtogs par ma gyur pa dang /gzhan yang rnam par rig pa tsam gyi dbu ma'i tshul 'di nyid rigs pa'i lam gyi rjes su 'brangs te rtogs pa ni 'di'i khyad par gyi dgos pa ste/ gzhan dag las 'di 'dra'i rigs pa'i tshul lugs gsal bar bstan pa med pa'i phyir ro//de ltar na 'di dgos 'brel gyi ngag bkod pa'i dgos pa'i don ni de las rtog pa dang ldan pa don du 'gyur ba'i the tshom skye zhing / de las mdo sde la 'jug par 'gyur ba dang / yang gzhan dag mdo sde 'di ni nye bar dgod par bya ba ma yin te/ dgos pa med pa'i phyir zhes skabs 'gog par byed pa'i log par rtog pa sel bar byed pa yin no//'di dag gi spros pa zhib tu ni rtog ge'i bstan bcos sam/ mdo'i 'brel pa mdzad pa gzhan dag gis gsungs pas de dag las shes par bya ste/ 'dir ni gzhung mangs kyis dgos pas mi spro'o/ /de ltar dgos pa dang ldan pa'i mdo sde rin po che bcom ldan 'das kyis gsungs pa ma nyams shing chud mi za bar bya ba'i phyir dang /de nyid kyis phyis kyi gdul bya rnams la phan par 'gyur ba'i don du sdud pa po'i ston pa rnams kyis dam pa'i chos nye bar sdud pa na/ thog mar 'di skad bdag gis thos zhes pa la sogs pa'i gleng gzhi nye bar 'god pa ni ston pa nyid kyi bka' la brten nas so//de la 'dir sdud pa po'i ston pa gang yin zhe na/ de bzhin gshegs pa'i gsang ba bsam gyis mi khyab pa bstan pa'i mdo las/ gsang ba'i bdag po dpal phyag na rdo rje sngon so so'i skye bor gyur pa'i gnas skabs su bskal pa bzang po'i sangs rgyas stong mngon par rdzogs par sangs rgyas nas chos kyi 'khor lo bskor bar 'gyur ba na/nga ni lag na rdo rje thogs nas sangs rgyas de rnams thams cad kyi sku dang dam pa'i chos bsrung bar 'gyur bar smon lam btab pas/ de nyid da ltar gsang ba'i bdag po nyid du 'gyur te/de rnams kyi sku dang chos bsrung bas chos mi nyams par bya ba'i don du des nye bar bsdus so zhes pa dang / gzhan yang rig pa 'dzin pa'i sde snod phyag na rdo rje dbang bskur ba'i rgyud las kyang sngar byang chub sems dpa' kun tu bzang po zhes bya bar grags pa la/ sangs rgyas thams cad kyis thugs rgyud mthun par ye shes kyi rdo rje rtse lnga pa byin gyis brlabs te/de'i lag tu gtad pas gzugs dang spobs pa khyad par can skyes te/ sngar gyi gnas skabs las snang ba gzhan du gyur nas mi rnams la gsang ba pa'i bdag po dpal phyag na rdo rje zhes bya bar snang zhing grags zhes pa la sogs pa ste/des rig pa 'dzin pa'i sde snod mang du bshad cing bsdus la/ de las gzhan pa mdo sde'i sde snod kyang bsdus pas 'dir sdud pa po'i ston pa ni de nyid yin no zhes sngon gyi slob dpon dag 'chad do/ /yang rnam pa gcig tu na de bzhin gshegs pa mya ngan las 'da' ba'i tshul ston pa na/de'i zham 'bring ba 'jig rten gyi tha snyad du yab mched po zhes kyang grags te/ tshe dang ldan pa kun dga' bo mang du thos pa dang ldan pa mya ngan gyi zug rngus non par gyur to/ /de la de bzhin gshegs pas khyod mya ngan ma byed par ma 'ongs pa'i dus na dam pa'i chos bsdu ba khyod la 'bab par 'gyur bas/nga'i mdo sde rnams sdud pa'i thog mar 'di skad bdag gis thos pa zhes pa la sogs pa dang / tha mar bcom ldan 'das kyis gsungs pa la mngon par bstod ces pa la sogs pa'i tshig chug la bsdus shig ces bcom ldan 'das kyis chos bsdu ba'i man ngag gnang ba dang mang du thos pa yang yin pa'i phyir/de nyid dus phyis dgra bcom pa'i 'bras bu thob par gyur pa na/ 'od srungs chen po la sogs pas/ chos kyi 'khor lo bskor ba'i mdo/ /bcom ldan 'das kyis gang du gsungs/ /shes rab chen po khyod kyis smros/ /bde gshegs sras po khyod smros shig /ces gsol ba btab pa'i rjes la des 'di skad bdag gis thos pa zhes pa la sogs pas chos bsdu ba mdzad do zhes gsung rab kyi phyogs 'ga' zhig las gsungs pa dang / gzhan yang 'phags pa brgyad stong pa'i yongs su gtad pa'i le'u las/ shes rab kyi pha rol tu phyin pa 'di 'dzam bu'i gling na spyod par 'gyur ba de ltar lan gnyis lan gsum gyi bar du kun dga' bo khyod la yongs su gtad do zhes gsungs pas/shes rab kyi pha rol tu phyin pa dang / de dang cha mthun pa'i theg pa chen po'i gsung rab rnams 'phags pa kun dga' bos bsdus so zhes kyang 'chad do//yang rig pa 'dzin pa'i sde snod 'ga' zhig las/ 'chad pa po nga chos kyang nga / /rang gi tshogs ldan nyan pa nga / /'jig rten ston pa bsgrub bya nga / /zhes pa la sogs pa gsungs pa dang / gzhan yang / e waM mA ya'i yi ge bzhi/ /chos kyi thogs sogs bstan pa ni//sangs rgyas dag pa'i dngos grub bskyed/ /phyag na rdo rje brjod med pa/ /'di ni nga yis bstan pa yin/ /zhes gsungs pas sdud pa po ni de bzhin gshegs pa nyid yin zhes kyang 'byung ste/ gal te de lta na 'di dag phan tshun 'gal bar 'gyur ro zhe na/ ma yin te kun dga' bo ni dpal phyag na rdo rje'o zhes slob dpon zla ba grags pas gsungs te/des na rig pa 'dzin pa'i sde snod sdud par byed pa na gsang ba'i bdag po'i gzugs su bstan la/ mdo sde rnams sdud pa'i dus su kun dga' bo'i gzugs su bstan pas 'gal ba med do zhes pa'o/ /'dir nges pa'i don du ni de bzhin gshegs pa nyid yin te/gsang ba'i bdag po la sogs pa de dag de bzhin gshegs pa las rgyud tha dad pa'i byang chub sems dpa' yin na yang / de bzhin gshegs pa'i byin gyi rlabs kyis gzungs dang spobs pa khyad par can skyes nas bsdu ba byas pa ni de bzhin gshegs pa nyid yin zhes pa'o//rnam pa gcig tu na de bzhin gshegs pa ni rnam par 'phrul ba bsam gyis mi khyab pa mnga' bas/ de dag gis 'dul ba'i sems can rjes su gzung ba'i don du de dag gi gzugs su snang ba sprul nas nye bar bsdus pa ste/ de lta na yang sdud pa po ni de bzhin gshegs pa nyid yin par rigs so//'dir shes par byed pa yang byang chub sems dpa' spyan ras gzigs dbang phyug gis dpal dus kyi 'khor lo'i rgyud kyi 'grel pa'i 'di skad bdag gis thos pa la sogs pa gleng gzhi'i tshig nye bar bkod pa ni de bzhin gshegs pa nyid kyi bka' yin zhing / de yang thams cad mthun par gre ba dang rkan la sogs pa las byung ba phyi rol gyi ngo bor gyur pa/phyogs gcig pa'i tshig gis ston pa ni mi 'thad de/ de ltar na thams cad mkhyen pa'i tshig tu mi 'gyur ro zhes gsungs so/ /de'i don yang thams cad mkhyen pa'i tshig ni/ lha yi skad dang klu dang gnod sbyin skad/ /grul bum dag dang mi yi skad rnams dang //'gro ba kun gyi skad rnams ji tsam par/ /thams cad skad du bdag gis chos bstan to/ /zhes gsungs pas/ de'i ye shes kyi bdag po'i rgyu las byung ba gdul bya rnams ji ltar mos pa'i gsung du snang ba/ rang rang gi sems kyi ngo bor gyur pa yin gyi/phyi rol gyi sgra'i ngo bor gyur pa ni ma yin te/ gcig la rnam pa 'gal ba mi 'thad pa'i phyir zhes pa'o/ /des na gdul bya'i bsam pa dang mthun par sku dang gsung la sogs pa'i snang ba 'phrul bar byed pa na 'ga' zhig tu ni e waM mA ya zhes pa la sogs pa lha rnams kyi skad du bstan la/yang gang gi tshe chu bo sI ta'i byang ngos tsam pa ka'i yul du grong khyer bye ba'i skad kyis chos bstan pa na/ a kar Shu khuSh+Na ka/ ga gan ku zhes pa la sogs pas bsdus shing chos bstan to/ /de bzhin du rug ma'i byang ngos su ra ma'i yul du grong khyer bye ba'i skad kyis chos bstan pa 'di lta ste/a ka ma la sad ta ba la da zhes pa la sogs pas bstan to/ /mdo sde 'di nyid du yang chos ston pa'i rjod par byed pa ni gcig tu nges pa med de/ 'jig rten gyi khams la lar smin ma bsgul bas chos ston pa dang / la lar mig rig rig byas pas chos ston to zhes pa la sogs pas gsungs pa'i phyir ro//chos yang dag par sdud pa'i mdo las/ dge slong dag 'di skad bdag gis thos pa zhes gyis la dam pa'i chos bsdu bar bya'o zhes gsungs pa ni phyogs 'ga' tsam la dgongs pa yin pas 'gal ba med do/ /de lta na gzhan dag 'di skad bdag gis thos pa zhes pa la sogs pa sdud pa po gzhan gyi tshig yin pas bka' ma yin pas de bzhin gshegs pa'i bka' bslad par 'gyur ro snyam pa'i dogs pa rgyang ring du spangs par gyur to//snga ma ltar tshul lugs 'di ltar dam pa'i chos bsdus shig ces de bzhin gshegs pa nyid kyis gnang bas/ de 'dra'i nyes pa med do zhes kyang slob dpon rnams kyis bshad do//gal te de bzhin gshegs pa nyid kyis bsdus na 'di skad bdag gis bshad pa zhes pa la sogs par rigs kyis/ bdag gis thos pa zhes pa'i tshig mi 'thad do zhe na/ skyon med de/ snga ma ltar gdul bya'i don du nyid las tha dad pa'i sku ru snang ba na tshig de nyid rigs par 'gyur gyi bdag gis bshad pa zhes pa ni ma yin te/thams cad mkhyen pa ma yin pas bstan pa la gzhan rnams yid ches par mi 'gyur ba'i phyir ro/ /gal te de lta na gzhan 'phags pa mya ngan las 'das pa chen po'i mdo las/sangs rgyas mya ngan las 'das pa'i tshul ston pa na/ tshe dang ldan pa dga' bo mya ngan gyi thibs kyis non par gyur pa'i tshe/ tshe dang ldan pa ma 'gags pas dga' bo la spro ba bskyed de/ mya ngan bsangs nas 'di skad ces smras so/ /khyod de ltar mya ngan ma byed cig /de bzhin gshegs pa mya ngan las 'da' ba'i dus la bab ste/deng bzhugs kyang sang mi bzhugs so/ /khyod kyis ngas smras pa bzhin du zhu ba rnam pa 'di bzhi zhus shig ces pa la sogs pa gsungs la/ zhu ba bzhi'i tha ma de bzhin gshegs pa mya ngan las 'das nas chos kyi sde snod bsdu ba na mdo sde thams cad kyi mgo nan la ji skad ces bya ba'i tshig gzhug ces zhus pa'i lan du/dga' bo khyod zhu ba ltar de bzhin gshegs pa mya ngan las 'das nas/ chos kyi mdzod bsdu ba'i mgo nan la 'di skad bdag gis thos pa dus gcig na/ bcom ldan 'das che ge mo zhig na 'khor rnam bzhi dang thabs cig tu bzhugs te/mdo sde 'di gsungs so zhes pa'i tshig thogs shig ces gsungs pa dang 'gal te/ de las tshe dang ldan pa dga' bo sdud pa po nyid du gsungs pa'i phyir ro zhe na/ skyon med de/ kun dga' bo dang dga' bo zhes pa'i mtshan ni phan tshun 'khrugs pa lta bur snang ste/ji ltar shes rab kyi pha rol tu phyin pa rgyas pa dang bar ma'i gleng gzhi'i skabs su ni gang zag gcig ma gtogs pa ni 'di lta ste/ tshe dang ldan pa dga' bo'o zhes gsungs la/ bsdus pa 'phags pa brgyad stong pa'i gleng gzhir ni/ gang zag gcig ma gtogs pa ni tshe dang ldan pa kun dga' bo zhes gsungs pa dang /gzhan yang mya ngan las 'das pa'i mdo sde de nyid las kyang nga'i nu bo kun dga' bo zhes gsungs la/ mdo sde gzhan dag nas gcung dga' bo zhes gsungs pa'i phyir ro/ /des na 'dir ming la zhen par mi bya ste/ don gyi rjes su 'brangs na sdud pa po nyid du snang ba ni de bzhin gshegs pa'i yab mched po nyid du 'jig rten na grags pa de nyid yin te/mang du thos pa'i yon tan dang ldan pa la sogs par snang ba'i phyir ro/ /nges pa'i don du ni sngar bstan pa ltar rigs so/ /de ltar sdud pa pos nye bar bkod pa'i gleng gzhi rnam par bshad pa ni rnam pa lnga'i sgo nas shes par bya ste/tshig nye bar dgod pa'i dgos pa'i don dang / bsdus pa'i don dang / tshig gi don dang / brgal ba dang brgal ba'i lan dang / mtshams sbyor ba'i sgo nas so/ /de skad du yang / mdo don smra bar 'dod pa yis/ /dgos pa bsdus pa'i don bcas dang //tshig don bcas dang brgal lan bcas/ /mtshams sbyor bcas te bsnyad par bya/ /zhes rnam par bshad pa'i rigs pa las gsungs pa'i phyir ro/ /de 'dir dgos pa'i don ni rnam pa gsum ste/ spyir phun sum tshogs pa'i bdag nyid kyi gleng gzhi nye bar bkod pa'i dgos pa dang / de yang legs par sbyar ba'i skad kyis gsungs pa'i dgos pa dang /bdag gis thos zhes pa'i khyad par gyi tshig gi dgos pa'o/ /de la dang po dgos don ni slob dpon phyogs kyi glang pos sdud pa po rang nyid yid ches pa'i skyes bur sgrub cing de ltar grub pas des bsdus pa'i mdo sde la gzhan dag 'jug par 'gyur ba'o zhes 'chad do//de'i don yang dus 'ga' zhig gi tshe gnas kyi khyad par de dang de dag tu 'khor 'di dag dang lhan cig tu de bzhin gshegs pa las kho bos mdo sde 'di thos so zhes dbang po'i 'khor la sogs pa dang bcas te bstan pas/ des smras pa'i don de ltar bden no zhes nges par 'gyur ba'o//yang 'dir slob dpon dri med bshes gnyen gyis sun 'byin pa ltar snang ba byed pa na 'di ni mi 'thad de/ de lta na ma 'ongs pa'i gdul byas dbang po'i 'khor rnams la don de ltar yin nam ma yin zhes dri bar mi nus pa rnams kyis sdud pa po yid ches pa'i skyes bu nyid du rtogs par mi 'gyur zhing /de nyid kyi phyir des bsdus pa'i mdo sde la 'jug par mi 'gyur bas don rtogs pa mi 'thad pa dang / gzhan yang gleng gzhi gang du 'khor gyi ming smos pa med pa der shin tu yang dbang po nyid du mi 'thad do zhes gsungs so//'di ni mi 'thad de/ ma 'ongs pa'i gdul bya rnam pa gnyis te/ dbang po rtul po dad pa'i rjes su 'brang ba dang / rnon po chos kyi rjes su 'brang ba'o/ /de la gang zag snga ma ni de ltar bstan pa'i tshig tsam las khyad par du yid ches par 'gyur la/ dbang po rnon po rtogs pa dang ldan pa yang de 'dra ba'i tshig las don du 'gyur ba'i the tshom skyes te/'di ni phal cher bden par smra ba'i skyes bu yin zhes rtogs par 'gyur zhing / de nyid kyis mdo sde la yang 'jug par 'gyur ba'o/ /yang ma 'ongs pa'i gdul bya mngon par shes pa thob pa rnams kyis ni dbang po'i 'khor rnams la dri bar yang nus pas nyes pa'i go skabs ga la yod ces pa'o//de skad du yang / ston pa dbang po'i 'khor dang ni/ /yul dang dus kyang nges bstan pa/ /dad ldan 'jug pa'i yan lag tu/ /smra po rang nyid tshad mar ni/ /rab bsgrub phyir yin 'jig rten na/ /yul dang dus sogs kyis mtshon cing //dbang por bcas tshig smra ba yi/ /smra po tshad mar rab tu rtogs/ /zhes gsungs so/ /dgos pa gnyis pa'i don ni e waM mA ya zhes pa la sogs pa legs par sbyar ba lha rnams kyi skad kyis bsdus pas lha rnams rjes su bzung ba'i don dang / yang phyi rol pa gang dag kho bo cag gi ston pa dbang phyug chen po la sogs pa ni sgra rig pa'i bstan bcos la mkhas pas e waM mA ya zhes pa la sogs pa legs par sbyar ba'i sgras sdud par byed la/dge sbyong gau ta ma ni de ma yin no zhes log par rtog par 'gyur bas de bsal ba'i don du'o/ / dgos pa gsum pa ni dam pa'i chos 'dul ba phran tshegs kyi lung las de bzhin gshegs pa mya ngan las 'das nas/ kun dga' bos dam pa'i chos sdud pa'i tshe/ gdan seng ge'i khri la bzhugs pa na/ mtshan dang dpe byad kyis brgyan cing de bzhin gshegs pa'i rnam pa lta bur gyur pas 'khor gyi skye bo gzhan rnams the tshom du gyur te/de bzhin gshegs pa shAkya thub pa nyid sngar mya ngan las 'das kyang thugs rje'i dbang gis sems can gyi don du slar byon pa yin nam snyam pa dang / 'jig rten gyi khams gzhan nas de bzhin gshegs pa gzhan zhig 'dir byon pa yin nam/'on te ma yin snyam du dogs pa dang / kun dga' bo nyid sngar las rnam pa gzhan du gyur te sangs rgyas nas gcan gyi tshab mar byon pa yin nam/ ci zhes dogs par 'gyur bas/ de rnams bcad pa'i don du 'di skad bdag gis thos zhes smos pa ste/ de bzhin gshegs pa de nyid slar byon pa'am gzhan nyid yin na/tshig 'di 'grig pa ma yin la/ kun dga' bo nyid sangs rgyas pa yin na yang chos kyi don mngon du gyur cing rtogs pa yin pas thos pa tsam ma yin te/ des na sngar gyi kun dga' bo nyid yin zhes pa'o/ de ltar dgos pa'i don bstan nas/bsdus pa'i don rnam pa lngas shes par bya ste/ yon tan gyi khyad par la sogs pa dang ldan pa'i sdud pa po dang / bshad pa'i dus dang ston pa dang gnas dang / 'khor phun sum tshogs pa'o/ /de la dang po ni 'di skad bdag gis thos pa zhes pas ston to/ /gnyis pa la sogs pa yang go rims bzhin du dus gcig na zhes pa dang /bcom ldan 'das zhes pa dang / lang ka'i grong rdal zhes pa la sogs pa dang / dge slong gi dge 'dun zhes pa la sogs pas ston to/ /yang gzhan dag ni tshig dang pos gleng bslang ba bstan la/dus gcig na zhes pa la sogs pas gleng gzhi ston to zhes kyang 'chad de/ de lta na yang 'gal ba med do/ /tshig gi don ni 'di skad thos zhes pas 'og nas bsdus te ston pa 'di kho na skad thos kyi/ bcom ldan 'das las thos pa las lhag pa dang chad pa med par bsdus zhes pa'o//don 'di yang bcom ldan 'das kyis kha sbyor thig le las bstan pa'o/ /bdag gis thos zhes pas ni bdag nyid kyis ston pa las dngos su thos kyi gzhan las brgyud de thos pa ma yin zhes pa'o/ /de ltar yon tan dang ldan pa'i sdud pa po bstan pa na gzhan dag khyod kyis gang gi tshe/gang las/ gang du/ gang dang lhan cig thos snyam du dogs na dus gcig na thos zhes gong ma la sbyar te 'di'i don yang spyir dus ni rnam pa bzhi ste/ byas pa'i dus dang / skyabs 'byung gi dus dang / gnyis gzhan gyi dus dang / rtsod pa'i dus so/ /de la 'dir ni rtsod pa'i dus nyid de/de bzhin gshegs pa 'di sangs rgyas nas chos kyi 'khor lo bskor ba ni/ shAkya thub pa rtsod dus la zhes 'og nas ston par 'gyur ba'i phyir ro/ /dus de nyid kyi khyad par yang ston pa la sogs pa rnam pa bzhi yin pa las/ de'i bye brag 'ga' zhig gi tshe thos zhes pa'o//des kyang mdo sde rin po che rnyed dka' ba nyid du bstan te/ dus 'ga' zhig gi tshe thos kyi thams cad du ma yin par gsungs pa'i phyir ro/ /yang dus gcig gi tshe na 'di thos la/ gzhan gyi tshe na gzhan dag kyang thos zhes don gyis bstan pas sdud pa po bdag nyid thos pa mang ba nyid du bstan to//rnam pa gcig tu na dus snga ma de rnams kyi khyad par skad cig gi dus de/ ji ltar lhas bstan pa'i rmi lam na dus cung zad cig la lo la sogs pa'i dus su snang zhing der yang 'dod pa'i longs spyod la sogs pa mang po la spyad par snang ba bzhin du sdud pa po bdag nyid tshogs yongs su rdzogs pa dang /de bzhin gshegs pa'i byin gyi rlabs kyis dus cung zad cig la mdo sde 'di'i tshig dang don ma lus par snang ba'i shes pa skye zhing / da ltar sdud par byed pa'i dus na yang brjod pa med ces pa ste/ des kyang bdag nyid rnam par thar pa bsam gyis mi khyab pa thob pa dang /ston pa byin rlabs dang ldan pa nyid du bstan to/ /gal te skad cig la mdo'i tshig dang don ma lus par snang ba'i shes pa skyes na yang phyis nyan pa mi 'thad do zhe na/ dam pa'i chos kyi bdud rtsi'i ros tshim pa med cing de la gus par bya ba nyid du ston pas skyon med do//yang gal te de lta na byang chub sems dpa'i 'khor gzhan rnams la yang de 'dra ba'i snang ba ci'i phyir mi 'byung zhe na/ ma yin te klu'i rgyal po rgya mtshos zhus pa'i mdo las/ byang chub sems dpa'i tshogs yongs su dag pa rnams la ni de 'dra ba'i snang ba 'byung gis/ thams cad la ni ma yin te/ tshogs yongs su ma rdzogs pas de lta bur snang ba'i skal ba med pa'i phyir ro zhes gsungs pas so/ /gal te de lta na de bzhin gshegs pa'i gsung gi rgyun gcig la/ gdul bya 'ga' zhig la ni cig car snang la/ 'ga' zhig la na rim gyis dus ring po dang 'brel par snang ba mi 'thad do zhe na/ma yin te/ 'dir de bzhin gshegs pa'i sku dang chos bstan pa'i phyi rol 'byung ba'i ngo bor gyur pa ni med de/ gdul bar bya ba la sogs pa'i sems kyi snang ba yin la/ de ni rang rang skal ba ji lta ba bzhin du cig car ram rim gyis snang ba mi 'gal lo//gang las thos snyam pa'i dogs pa sel ba ni bcom ldan 'das las zhes pa ste/ de yang dus gcig na bcom ldan 'das gnas kyi khyad par 'ga' zhig na bzhugs zhes sbyar bar bya'o/ /de'i don ni dus gzhan gyi tshe na gzhan dang gzhan dag na yang bzhugs zhes pa ste/de'i rgyu mtshan yang / yul gzhan gdul bar bya phyir dang / /der gnas skom pa skyed phyir dang / /nyan thos gnas mang bya phyir dang / /chags pa med par bstan pa dang / /yul rnams mchod rten bya phyir dang / /'gro ba'i bsod nams don nyid dang / /yams la sogs pa zhi don du//sangs rgyas rgyu bar mdzad pa yin/ /zhes gsungs pas so/ /gzhan yang de ltar bstan pas sngar dus gcig na thos zhes pa'i skabs su dus kyi khyad par de rnams bstan kyang dus can gyi dngos po 'ga' zhig gis ma mtshon na mkha' la 'phyo ba lta bur nges par zin pa med par 'gyur bas//de bzhin gshegs pas gnas kyi khyad par 'di 'dra ba na bzhugs pa'i dus de'i tshe thos zhes nges par 'dzin pa'o/ /de la 'dir b+ha ga bAn zhes pa'i don ni rnam pa gnyis su 'gyur te/ 'joms pa'am skal ba'o/ /snga ma ltar na bdud bzhi bcom pa'i don gyis na bcom ldan 'das zhes pa ste/phung po dang / nyon mongs pa dang / lha'i bu dang / 'chi bdag gi bdud ces pa ste/ de rnams kyis kyang rim pa bzhin du phung po lhag ma med pa'i mya ngan las 'das pa dang / lhag ma dang bcas pa'i mya ngan las 'das pa dang /yon tan khyad par can 'thob pa dang / srog yun ring du gnas pa'i bar du gcod pas bdud ces pa'o/ /de la dang po ni rnam par smin pa'i lus la sogs pa sdug bsngal kyi rten byed pa nyid de/ des lhag ma med pa'i mya ngan las 'das pa'i bar du gcod pa ste/ de ni sngon gyi las dang nyon mongs pas 'phangs pa'i phung po sdug bsngal gyi rten du gyur pa yang med la/ma 'ongs pa'i phung po gzhan de 'dra ba 'grub pa'i nyon mongs pa yang spangs pa yin pa'i phyir ro/ /de bzhin gshegs pas bdud de bcom pa'i rgyu mtshan yang / /sangs rgyas rnams ni chos kyi sku//zhes pa dang / sku la rus pa khrag med ces pa la sogs pa gsungs te/ de ni ye shes kyi sku nyid yin pa'i phyir ro/ nyon mongs pa'i bdud ni 'dod chags la sogs pa rtsa ba dang nye ba'i nyon mongs pa rnams te/ des kyang lhag ma dang bcas pa'i mya ngan las 'das pa'i bar du gcod de/de ni phung po gzhan 'grub pa'i nyon mongs pa spangs pa yin pa'i phyir ro/ /de 'dra ba'i bdud bcom pa yang rdo rje lta bu'i ting nge 'dzin gyis nyon mongs pa bag chags dang bcas te spangs pa'i phyir ro/ /lha'i bu'i bdud ni dga' rab dbang phyug la sogs pa gzhan 'phrul dbang byed kyi lha'i ris su gtogs pa ste/yul rnams la chags pa la sogs pa skyed par byed pas yon tan khyad par can thob par byed pa'i bar du gcod pa'o/ /de rnams bcom zhes pa'i don ni rdo rje gdan byang chub snying po'i shing drung du srod la bdud btul zhes pa la sogs pa'i don no/ /'chi bdag gi bdud ni nang ngam phyi rol gyi rkyen gyis dus ma yin par 'chi ba nyid de/des kyang srog yun ring du gnas pa'i bar du gcod la/ de bzhin gshegs pas bcom pa'i rgyu mtshan ni 'ga' zhig gi tshe dga' rab dbang phyug gis de bzhin gshegs pa la bdag gi don du mya ngan las 'das par zhu'o zhes gsol ba btab pa na des kun dga' bo la nga ni rdzu 'phrul gyi rkang pa'i ting nge 'dzin lan mang du bsten cing bsgoms pas bskal pa'am bskal pa las lhag par yang gnas par nus na/dga' rab dbang phyug gi don du mya ngan las 'da' 'am ji ltar bya zhes gsungs pas sku tshe la mnga' brnyes pa nyid kyi phyir ro//rnam pa gcig tu na nyon mongs pa'i kun nas nyon mongs pa ste/ 'dod chags la sogs pa ma zhi ba'i ngo bor byung ba dang / las kyi kun nas nyon mongs pa zag pa dang bcas pa'i las dge mi dge la sogs pa dang / skye ba'i kun nas nyon mongs pa snga ma rnams la brten nas zag pa dang bcas pa'i phung po la mngon par 'grub pa'o//gsum po de dag kyang / dang po brgyad dang dgu nyon mongs/ /gnyis dang bcu pa las yin te/ /lhag ma rnams ni tshe yin no/ /zhes gsungs pas srid pa'i yan lag bcu gnyis su gtogs pa ste de rnams bcom pa dang /gzhan yang nyon mongs pa'i sgrib pa dang shes bya'i sgrib pa ste/ nyon mongs pa can ma yin pa'i mi shes pa gzung 'dzin gyi rnam par rtog pa la sogs pa bcom pa dang / mdor na mi mthun pa'i phyogs thams cad bcom pas bcom ldan 'das zhes pa ste/de skad du yang rnal 'byor gyi rgyud dpal rdo rje rtse mo las/ nyon mongs las dang de bzhin skye/ /nyon mongs shes bya'i sgrib de bzhin/ /mi mthun phyogs kyi chos rnams kun/ /de bcom pas na bcom ldan brjod/ /ces gsungs pa'i phyir ro/ /gang yang 'phags pa mya ngan las 'das pa las kyang /nyon mongs pa thams cad bcom pa'i phyir na bcom ldan 'das zhes pa dang / dge ba'i chos thams cad dang ldan pa'i phyir dang / chos rnams kyi don la shin tu mkhas pa'i phyir yon tan chen po dang ldan pas gzhan gyis mi thub pa'i phyir zhes bya ba la sogs pa yang gsungs so//gzhan yang 'phags pa blo gros rgya mtshos zhus pa las/ de la sgyu ma'i chos su so sor rtog pas phung po'i bdud bcom mo/ /stong pa nyid nges par sems pa la so sor rtog pas nyon mongs pa'i bdud bcom mo/ /skye ba med pa dang 'byung ba med par so sor rtog pas 'chi bdag gi bdud bcom mo//nga rgyal gyis sgro btags pa thams cad 'gog par 'gyur ba'i lam gyis lha'i bu'i bdud bcom mo/ /gzhan yang sdug bsngal yongs su shes pa dang / kun 'byung ba spong ba dang / 'gog pa mngon sum du byed pa dang / lam sgom pas kyang go rims bzhin du bdud bzhi bcom mo/gzhan yang 'du byed thams cad la sdug bsngal du so sor rtog pa dang / mi rtag par so sor rtog pa dang / chos thams cad la bdag med par so sor rtog pa dang / mya ngan las 'das pa la zhi bar so sor rtog pas kyang go rims bzhin du bdud bzhi 'joms so zhes bdud bzhi bcom pa'i rgyu mtshan gsungs so//yang 'dir b+ha ga zhes pa'i don skal ba la byas pa'i tshe/ skal ba rnam pa drug dang ldan pas bcom ldan 'das zhes pa ste/ kha sbyor gyi thig le las/ dbang phyug dang ni gzugs bzang dang / /dpal dang grags dang ye shes dang //brtson 'grus phun sum tshogs pa ste/ /drug po rnams la skal zhes bya/ /zhes gsungs so/ /de'i don yang dbang phyug phun sum tshogs pa ni dbyings rnam par dag pa ste/ de bzhin nyid glo bur gyi dri ma dang bral bas na 'jig rten dang 'jig rten las 'das pa'i phun sum tshogs pa thams cad la dbang bsgyur ba'i phyir ro//gzugs bzang ba phun sum tshogs pa ni me long lta bu'i ye shes te/ de ni longs spyod rdzogs pa'i sangs rgyas nyid kyang yin pas mtshan dang dpe byad kyi rnam par yang snang ba'i phyir ro/ /grags pa dang dpal phun sum tshogs pa ni/mnyam pa nyid kyi ye shes te/ de ni byams pa dang snying rjes rab tu brgyan pas sems can gyi don 'byung zhing / de las bsod nams kyi tshogs rdzogs pa dang / 'jig rten kun la rab tu grags pa'i phyir ro/ /ye shes phun sum tshogs pa ni so sor rtog pa'i ye shes te/de ni 'khor gyi dkyil 'khor gyi the tshom thams cad gcod par byed pa shes rab kyi char gtogs pa yin te/ ye shes phun sum tshogs pa yang / /de nyid shes phyir ye shes te/ /zhes gsungs pa'i phyir ro/ /brtson 'grus phun sum tshogs pa ni bya ba grub pa'i ye shes te/ da ni sems can gyi don la spro ba brtson 'grus kyi char gtogs pa nyid kyi phyir ro//yang sgra nges par sbyar ba las/ /rang dbang shin tu sbyangs pa dang / /gzugs bzang ba dang grags pa dang / /dpal dang bdag nyid che tshogs pa/ /drug la skal ba zhes bshad do/ /zhes gsungs te/ don ni snga ma dang mthun bar snang mod kyi/slob dpon ngang tshul bzang pos nyon mongs pa gzhan gyi dbang du ma gyur pa'i phyir rang dbang nyid dang / ye shes kyi mes legs par yongs su sbyangs pa'i phyir shin tu sbyangs pa nyid dang / skyes bu chen po'i mtshan sum cu rtsa gnyis dang ldan pa'i phyir gzugs bzang ba nyid dang /yon tan thams cad phun sum tshogs pa'i phyir grags pa dang / 'gro ba thams cad kyi gtso bo yin pa'i phyir dpal dang / sems can thams cad la phan 'dogs pa'i phrin las nyams pa mi mnga' ba'i phyir bdag nyid chen po'i tshogs pa ste/ de dag 'di la mnga' bas na bcom ldan 'das so zhes gsungs te/shin tu 'grig pa nyid du snang ngo / /gnas gang du thos zhes pa'i dogs pa sel ba ni lho phyogs kyi rgya mtsho'i 'gram srin po'i bdag po lang ka mgrin bcu gnas pa'i grong rdal gyi dbus na/ ri ma la ya'i rtse mo rin po che'i rigs bai DUr+ya la sogs pa sna tshogs pa dang /me tog sna tshogs kyis brgyan par snang ba ste/ de dag gi bsod nams kyi dbang gis nang gi sems yongs su dag pa la de ltar snang ba ste/ gnas kyi khyad par der thos zhes pa'o/ /su dag dang lhan cig tu thos snyom du dogs pa sel ba dpang po'i 'khor ston pa la/ dang por nyan thos kyi dge 'dun bstan pa ni dge slong gi dge 'dun chen po dang zhes pa ste/de la ni dge slong ni rnam pa gnyis te/ bsnyen par rdzogs pa dang / nyon mongs pa spangs pa'o/ /de'i dang po yang rnam pa gnyis te/ gsol ba dang bzhi'i las kha na ma tho ba med pas bsnyen par rdzogs pa dang /de bzhin gshegs pa'i byin gyi rlabs kyis tshe dang ldan pa khyod tshur shog ces brjod pa tsam gyis skra dang kha spu rang byi zhing dge slong gi dngos por gyur pa'o/ /de la 'dir ni tshul de ltar bsnyen par rdzogs shing nyon mongs pa yang spangs par 'gyur ba'o/ / dge 'dun zhes pa ni mi phyed pa'i don te/ ston pa yang dag par rdzogs pa'i sangs rgyas ma yin pa 'jig rten pa'i lha gzhan mi tshol ba dang / bstan pa la rnam par dkar ba'i chos las gzhan srog gi mchod sbyin la sogs pa 'tshe ba chos su smra ba la mi bsten pa dang / grogs tshangs par spyod pa mtshungs pa las gzhan phyi rol mu stegs can gyi brtul zhugs spyod pa rnams dang mi 'grogs pa'o//de skad du yang 'phags pa sprin chen snying po'i mdo las/ /bdud rnams bye ba phrag brgyas kyang / /dge 'dun dbye bar mi nus te/ /sems can rnams la sman slad du//las kyi rgyu ba ston par mdzad/ /ces gsungs so/ /chen po zhes pa ni thams cad kyang dgra bcom pa zhes pa la sogs pa yon tan gyi sgo nas che ba'am/ stong nyis brgya lnga bcu zhes pa la sogs pa grangs kyi sgo nas che ba ste/ 'dir dngos su ma smos kyang don gyis blta bar bya'o//de yang nyan thos rnams la yang theg pa chen po nyan pa dang / ston pa'i skal ba yod do zhes bstan pas re zhig nyan thos kyi rigs can rnams theg pa chen po la 'jug par 'gyur ba la sogs pa'i don du gsungs shing / de 'dra ba'i 'khor 'dus par snang ba yang byang chub sems dpa' nyid nyan thos su sprul pa yin gyi/nyan thos rang rgyud pa ni ma yin te/ de ni theg pa chen po bstan pa'i gdul bya ma yin pa'i phyir ro/ /byang chub sems dpa'i 'khor bstan pa la/ byang chub sems dpa' zhes pa'i tshig gi don ni byang chub chos kyi sku'i ye shes nam mkha' ltar spros pa med pa yin la de thob par bya ba'i don du sems dpa' ste/ji skad du/ byang chub nam mkha'i mtshan nyid de/ /rtog pa thams cad spangs pa'o/ /gang zhig de ni thob 'dod pa/ /byang chub sems dpa' zhes su brjod/ /ces gsungs pa dang / gzhan yang / chags pa gcod byed kun la chags pa zad par 'dod//rgyal ba rnams kyi byang chub chags med gyur la reg /des na 'di ni byang chub sems dpa'i ming 'thob bo/ /zhes gsungs pas/ gzugs la sogs pa'i yul kun la phyin ci log gcod par byed pa dang / rgyal ba rnams kyi byang chub chags med gyur la reg /ces pa chos kyi sku'i ye shes la blos reg pa ste/ de thob par 'dod pa'o/ /sems dpa' chen po zhes pa'i don ni 'bras bu mthar thug pa chen po rnam pa gsum gyi ched du sems pa ste/ mchog nyid chen po dang / sgrib pa gnyis spangs pa chen po dang / ji lta ba dang ji snyed pa rtogs pa ste/rtogs pa chen po'o/ /de ltar chen po gsum gyi ched du sems shing lam pha rol tu phyin pa drug gi bsam pa rgya chen po dang ldan pa dang / lam dang 'bras bu'i bdag nyid kyi theg pa chen po la blo gros 'jug cing sems pa dang / gzhan gyi don du go cha chen po bgos pa ste/ sems can gyi don la sems shing bdud kyi byed pa sgyu ma lta bu 'joms par byed pa ste/ji skad du/ sems can tshogs rnams mang po'i mchog tu gyur pa dang / zhes pa la sogs pa dang / yang gtong ba che dang mthu che dang / /zhes pa la sogs pa shes rab kyi pha rol tu phyin pa sdud pa las gsungs pa'i phyir ro//tshogs chen po zhes pa ni sngar bstan pa bzhin du shes par bya'o/ /'dir nyan thos kyi 'khor sngon la smos pa ni/ de rnams de bzhin gshegs pa'i gtan du ba'i 'khor yin pa'i phyir ro/ /de'i rgyu mtshan yang de bzhin gshegs pa'i drung las gzhan du rgyu bar byed pa'i rgyu mtshan bcwa lnga dang bral ba ste/ji skad du/ nyes dmigs lnga dang ma 'byor dang / /mi dga' chags dang yid mi bde/ /'thab dang rnyed sogs sred dang 'dzag /brtse dang bla ma la gus dang / /ngo mtshar khyad par don phyir dang / /lhung dang dkon mchog rgyu dang ni/ /mchod rten la sogs phyag bya'i phyir//dge slong rgyu bar byed pa yin/ /zhes gsungs pas rgyu bar byed pa'i rgyu de rnams dang bral ba ste/ de'i drung na rtag tu gnas pa la 'gal ba'i rkyen nye bar gnas pa med cing mthun pa'i rkyen ma tshang ba med pa'i phyir ro/ /byang chub sems dpa' rnams ni re zhig pa'i 'khor yin te/'jig rten gyi khams gzhan na de bzhin gshegs pa gzhan zhig mdo sde rin po che zab mo 'chad pa na de thos par bya ba'i don du gzhan dang gzhan dag tu rgyu bar byed pa ste/ de skad du yang / mdo sde rin chen zab mo ni/ /dpag med nyan pa'i sred pa yis//mtha' yas 'jig rten khams rnams su/ /mkhas pa gang yin rgyu byed pas/ /de yi theg pa bshad nyid kyis/ /de dag mang po 'ong gyur te/ /des na mdo sde'i lung rnams su/ /rgyal ba'i sras rnams ma brjod do/ /zhes gsungs pa'i phyir ro/ /de nyid kyi phyir sangs rgyas kyi zhing sna tshogs nas 'dus zhes pa 'jig rten gyi khams 'dir mdo sde zab mo 'di 'chad pa na/gzhan na gnas pa rnams 'dir 'dus zhes pa'o/ /de la zhing ni longs spyod rdzogs pa'am sprul pa'i skus zhing 'dul ba'i zhing khams so/ ting nge 'dzin zhes pa la sogs pas de rnams kyi yon tan ston te/de la dge ba la rtse gcig pa'i ting nge 'dzin te/ dpa' bar 'gro ba dang / rin chen phyag rgya la sogs pa shes rab kyi pha rol tu phyin pa'i mdo las rgyas par bstan pa rnams so/ /de bzhin du dbang bcu dang / stobs lnga'am bcu dang / mngon par shes pa drug ste/ yul la sogs pas phye na rdzas du mar 'gyur bas du ma zhes pa'o//'di rnams kyi don zhib tu ni 'og nas bstan par bya'o/ /rnam par rol zhes pa ni rnam par rtse zhing longs spyod pa'o/ /blo gros chen po la sogs zhes pa ni 'khor gyi gtso bo'i ming smos pa ste/ mtha' gnyis spangs pa de kho na zab mo dang /thabs kyi yul yangs shing rgya che ba rtogs pa'i blo gros dang ldan pas blo gros chen po zhes pa'o/ /de rnams kyang zhing tha dad na gnas pa'i sangs rgyas rnams kyi phyag glang po'i sna lta bu dbu la gzhag cing gzungs dang spobs pa khyad par can du byin gyis brlabs pa ni dbang bskur ba ste 'og nas gsal bar ston par 'gyur ro//bdag gi sems snang ba zhes pa la sogs pa'i don ni/ sna tshogs su snang ba sems las phyi rol du gyur pa'i don med de/ kun rdzob tu sems nyid yin zhing sems kyi rang bzhin yang spros pa dang bral zhing 'od gsal ba ste/ de lta bu'i rang bzhin rtogs shing mngon du byas pa'o//des kyang rang gi don phun sum tshogs pa nyid bstan la/ sems can gyi zhes pa la sogs pas gzhan gyi don phun sum tshogs pa nyid ston te/ pha rol gyi sems 'dod chags dang bcas pa la 'dod chags dang bcas pa nyid ces bya bar yang dag pa ji lta ba bzhin du rab tu mkhyen pa zhes bya ba la sogs pa gsungs pas sems mngon du rgyu ba dang bag la nyal phra mo rnams mkhyen cing de rnams gzugs kyi rnam pa gang dang gang gis 'dul bar 'gyur ba dang /chos bstan pa'i tshul lugs mi 'dra ba sna tshogs kyis 'dul bar 'gyur ba'i 'dul ba'i rnam pa tha dad pa'i cha byad 'chang zhes pa ste/de 'dra ba sna tshogs su ston pa mkhyen pa'o/ /de ltar bstan pas kyang sngar gyi blo gros chen po zhes pa'i don gsal bar byas pa'o/ /gzhan yang chos lnga zhes pa la sogs pa ni 'og nas ston par 'gyur ro/ / khong du chud par rtogs zhes pa ni so so rang rig pa'i tshul du mngon du byas zhes pa'o/ /de 'dra ba'i byang chub sems dpa' dag gi tshogs chen po dang bcom ldan 'das thabs cig tu bzhugs zhes pa'o/ /de ltar tshig gi don bstan nas brgal ba dang lan ni phal cher rang rang gi don bshad pa'i skabs su bstan la/gzhan yang 'dir bdag gis thos pa zhes pa'i tshig mi 'thad de/ bcom ldan 'das kyis sum cu rtsa gsum la sogs pa lha'i yul dang / 'jig rten gyi khams gzhan du gsungs pa'i mdo sde yang yod la de ni rdzu 'phrul la sogs pa'i yon tan ma thob pa kun dga' bo'i yul ma yin la/'di skad bdag gis thos pa zhes pa la sogs pas sdud par byed pa ni de rnams thams cad kyi dbang du byas pa yin pa'i phyir ro zhe na/ skyon med de/ de bzhin gshegs pa'i byin gyi rlabs kyis shing dang sil snyan la sogs pa las chos kyi sgra byung ba yang des bstan pa yin pa ltar/gang zag gang dag gis de rnams thos pa yang de bzhin gshegs pa las thos pa ste/ de na de bzhin gshegs pas yul gzhan du gsungs pa'i mdo sde byang chub sems dpa' gzhan dag gis thos shing rtogs la/ de ltar rtogs pa yang khyad par du byin gyis brlabs shing /des bstan pa'i mdo sde kun dga' bos thos pa yang de bzhin gshegs pa nyid las thos pa'o/ /rnam pa gcig tu na kun dga' bo ni chos 'dzin pa'i mchog yin pa'i phyir sngar gzhan las thos pa'i don rnams nges pa nyid du bya ba'i phyir de bzhin gshegs pa nyid la zhus shing the tshom bcad pas bdag gis thos zhes pa'i don la mi 'thad pa med do//gzhan yang 'dir gang gi tshe gang las thos zhes pa la sogs pa'i dogs pa bsal ba'i don du dus dang gnas la sogs pa bstan pa ni gdul bya'i khyad par rjes su gzung ba'i don du sdud pa po'i ston pa de bzhin gshegs pa las tha dad pa nyid du bstan pa'i dbang du byas te bshad pa drang ba'i don gyi gleng gzhi yin pas sngar bstan pa ltar nges pa'i don gyi dbang du byas na de bzhin gshegs pa nyid kyis bsdus pa yin no zhes bstan pa dang 'gal ba med par shes par bya'o//gal te de ltar na gnas kyi khyad par de na de bzhin gshegs pa 'khor rnams dang lhan cig tu thog ma nyid nas bzhugs pa yin nam/ 'on te yul gzhan nas byon pa yin snyam du dogs pa bsal ba'i phyir yang de'i tshe na zhes pa la sogs pa ste/tshig gi mtshams sbyor ba nyid du shes par bya'o/ /de'i don yang sngar nas bzhugs pa ma yin gyi/ bcom ldan 'das kyis rgya mtsho klu'i yul du klu'i rgyal po rnams rjes su gzung ba'i don du zhag bdun bzhugs nas/ yang srin po'i rgyal po 'bod 'grogs la sogs pa rjes su gzung ba'i don du sngar gyi gnas de nas byon nas gnas kyi khyad par 'di nyid na bzhugs zhes pa'o//'di rnams kyis ni sngar gleng gzhi bstan pa'i rjes la mdo sde'i lus rnam par 'god pa ste/ de yang le'u rnam pa brgyad kyi sgo nas ston la/ de rnams kyi don bsdus pa ni rnam pa bzhi ste/shes par bya ba'i don rgyas par bstan pa dang / de rnams kyi don bsdus pa sems kyi chos nyid de bzhin gshegs pa'i snying po'am rigs nyid yin par bstan pa dang / de nyid kyi dri ma sbyong bar byed pa mngon par rtogs pa lam gyi bye brag bstan pa dang / sbyangs pas rnam par dag pa thob pa gnas skabs dang mthar thug pa'i 'bras bu'o//de las dang po 'bod 'grogs kyis gsol ba btab pa'i le'u ste/ 'dis kyang shes par bya ba'i rang bzhin nyid ston to/ /de la dang po de bzhin gshegs pas chos ston pa'i ltas bstan pa ni 'dzum pa mdzad do zhes pa'i bar gyis te/de la yang de'i tshe na zhes pa ni klu'i rgyal po la sogs pa gdul ba'i don du zab mo nye bar bstan nas yang srin po'i rgyal po gdul ba'i don du ston zhes pa bsdu ba'i tshig go/ /de'i tshe na zhes pa ni 'bod 'grogs la sogs pa 'dul ba'i dus la bab pa nyid du thugs su chud pa de'i tshe na zhes pa'o//tshig gi don gzhan ni shes par zad do/ /sngon gyi de bzhin gshegs pa zhes pa la sogs pa'i don ni sngon gyi dus su sangs rgyas pa ste/ de la de bzhin gshegs pa zhes pa ni sangs rgyas la thog ma med pa sngon 'das pa'i sangs rgyas rnams kyis sems can bsgral ba'i phyir mdo sde bcu gnyis kyi don rtogs shing gsungs pa de bzhin du de dag gi rjes su byung ba rnams kyis kyang rtogs shing gsungs pas na de bzhin gshegs pa zhes bya'o//yang sangs rgyas snga ma rnams pha rol tu phyin pa drug dang / byang chub kyi phyogs kyi chos sum cu rtsa bdun dang /stong pa nyid bcu gcig gi lam nas yongs su mya ngan las 'das pa chen por gshegs te/ phyi ma rnams kyang de bzhin du gshegs pa dang / yang snga ma rnams sems can 'dul ba'i thabs la mkhas pa de nyid kyis theg pa gsum la sogs pa ston cing sku tshe'i tshad kyang dpag tu med pa ste/phyi ma rnams kyang de bzhin du 'jug pas de bzhin gshegs pa'o/ /'di ni mi 'thad de/ de bzhin gshegs pa shAkya thub pa ni sku tshe'i tshad thung ba nyid kyi phyir ro zhe na/ ma yin te/[ (]star [,]sngar [)]bstan pa ltar 'chi bdag gi bdud bcom pas sku tshe la mnga' brnyes pa nyid kyi phyir ro//thung bar bstan pa ni gdul bya bye brag pa'i don du de ltar snang ba tsam 'ba' zhig tu zad do/ /dgra bcom pa zhes pa la 'dir 'jig rten pa'i chos thams cad ni dgra zhes bya ste/ de rnams bcom pa'i phyir ram/ yang na bdud bzhi ni dgra ste de rnams bcom pa'am/gzhan yang byang chub sems dpa'i tshe na nyon mongs pa tshad med pa rnams yongs su spangs pas na/ dgra bcom pa zhes bya'o/ /de la 'dir chos kyi sku'i ye shes mngon du byas pa'i dus na spang bya dang gnyen po la sogs pa'i spros pa dang bral bas sngar byang chub sems dpa'i tshe na nyon mongs pa tshad med pa rnams yongs su spangs zhes smos pa byas su zad kyi/de rnams spangs pa'i rgyun rgyud ni sangs rgyas pa'i gnas skabs na yang yod pa'o/ /gnas gzhan yang dgra ni sdug bsngal ba ste/ sngar byang chub sems dpa'i spyad pa spyod pa'i gnas skabs na sems can gyi don du sdug bsngal rnam pa sna tshogs pa myong yang mi bde ba med pa ste/rtag tu bde ba'o/ /sangs rgyas pa'i gnas skabs na yang de dang 'dra bas na dgra bcom pa zhes bya'o/ /yang 'dir a ra han zhes pa la a ra zhes pa'i don ni 'os pa nyid la 'jug la/des na lha dang bcas pa'i 'jig rten gyis me tog dang / phreng ba la sogs pa dang rol mo rnam pa sna tshogs kyis mchod par 'os shing mchod pas na dgra bcom pa zhes bya'o/ /yang dag pa zhes pa ni phyin ci ma log pa'o/ /rdzogs pa zhes pa ni rtag pa dang bde ba dang gtsang ba dang bdag tu phyin ci log pa rnam pa bzhi ma rtogs pa med cing de nyid kyi phyin ci ma log pa'i rtogs pa rdzogs pas na yang dag par rdzogs pa zhes pa'o//gzhan yang yang dag pa zhes pa ni 'jig rten tha mal pa'i gnas skabs na snang zhing grags pa rnams rang bzhin stong pa nyid du ro gcig cing / de ltar stong pa dang snang ba zung du 'jug pa 'jig rten pa'i dbu ma'o//rdzogs pa zhes bya ba ni de ltar spyi'i tshul du rtogs shing sgom pa lam la nan tan du byas na nges par bla na med pa yang dag par rdzogs par 'gyur ba'o/ /rnam pa gcig tu na yang dag par rdzogs pa ni phung po lnga dang skye mched bcu gnyis dang khams bcwa brgyad ces pa ste/nyan thos dang rang sangs rgyas kyis kyang de rnams kyi rnam grangs rnams rdzogs pa nyid du shes pas yang dag par rdzogs pa tsam yin la/ rnam pa thams cad du ji lta ba bzhin rdzogs par shes pa ni ma yin te/ bskal pa tshad med pa'i bar du gzugs kyi phung po gcig pu la rtogs kyang rdzogs par mi shes pas de dag ni yang dag par rdzogs pa zhes mi bya'o//sangs rgyas zhes pa ni tshor ba 'am rig pa'i don te/ bdag nyid kyang tshor la gzhan yang tshor bar byed pa'o/ /des na tshad med pa'i nyon mongs pa thams cad tshor te/ de ltar tshor pas nyon mongs pa thams cad kyis mi tshugs te/ji ltar 'ga' zhig gi khyim du rkun po 'ong ba tshor na des mi tshugs pa bzhin no/ /de bas na sangs rgyas zhes bya'o/ /de nyid kyi phyir skye rga na 'chi'i sdug bsngal spangs pa'i phyir na yang sangs rgyas zhes bya'o/ /skabs kyi bshad pa 'di rnams ni 'phags pa mya ngan las 'das pa chen po'i mdo las bcom ldan 'das nyid kyis bshad pa'o//gal te nyon mongs pas mi tshugs pa la sogs pa ni dgra bcom pa rang sangs rgyas rnams la yang yod pas de dag kyang sangs rgyas nyid du 'gyur ro zhe na/ ma yin te/ de dag gis ni ma rig pa'i gnas kyi sa'i nyon mongs pa ma spangs pa nyid du gsung rab kyi phyogs gzhan las bshad cing /'di nyid du yang / nyon mongs bag chags rnams dang 'brel/ /zhes 'og nas ston par 'gyur bas so/ /yang gal te dgra bcom pa lhag ma med par mya ngan las 'das pa na skye ba la sogs pa'i sdug bsngal med pa'i phyir sangs rgyas nyid du 'gyur ro zhe na skyon med de/de yang re zhig zag pa med pa'i dbyings na gnas shing nye bar zhi ba tsam yin gyi rtag tu de ltar gnas pa ni ma yin te/ 'di la mthar thug yod med cing / /zhes pa la sogs pa 'og nas ston pas so/ / yang de bzhin gshegs pa zhes pa'i don ni bdag nyid kyis chos kyi de kho na nyid ji lta ba bzhin du rtogs shing / gzhan la yang de bzhin du ston pas de bzhin gshegs pa ste/ ji skad du/ chos kyi de nyid yang dag rtogs/ /de nyid lam ni ston byed pa/ /de ni de bzhin gshegs par brjod//ces gsungs pa dang / dpal ldan de bzhin nyid gshegs shing / /de bzhin slar yang gshegs pa nyid/ /'dis ni shes rab rigs pa yis/ /de bzhin gshegs zhes brjod par bya/ /zhes gsang ba bla na med pa'i rgyud dag las gsungs pa'i phyir ro//yang sangs rgyas zhes pa'i don yang / gang gis chos rnams ma lus pa/ /dngos po med par rtags 'gyur zhing / /chos rnams gtsang bar rtogs gyur pa/ /de phyir sangs rgyas zhes su brjod/ /zhes mdo las gsungs te/ gtsang ma zhes pa'i don ni chos nyid glo bur gyi dri ma mtha' dag dang bral ba thugs su chud pa'o//des na spangs pa dang rtogs pa phun sum tshogs pa'i bdag nyid la sangs rgyas zhes bya'o/ /rnam par snang mdzad mngon par byang chub pa'i rgyud las kyang / sa bcu dag ni rab tu 'das/ /dbang gi rnam pa khong du chud/ /chos rnams stong pa mtshan med par//gang gis 'dir ni rab rtogs pa/ /de ni sangs rgyas zhes su brjod/ /ces gsungs so/ /kyang zhes pa ni bsdu ba'i don to/ /sa bon spangs pas sdig pa las ring du song ba'i phyir 'phags pa'o/ /sems las don gzhan du 'gyur ba'i chos med cing shes pa nyid kyang phan tshun tha dad pa ni myong ba med de/gzung ba dang 'dzin pa'i mtshan nyid dang mi ldan pa'i phyir ro/ /des na so so rang rang gi chos nyid spros pa dang bral zhing 'od gsal ba so so rang rig pa'i tshul du rtogs pas so so rang gis rig pa'i ye shes so/ /de skad du yang / de nyid shes phyir ye shes dang //zhes pa la sogs pa gsungs pa'i phyir ro/ /rgyas par ni 'og nas ston par 'gyur ro/ /de 'dra ba'i ye shes de nyid rtog ge'i lta ba mu stegs can chos kyi de kho na nyid ji lta ba bzhin du gzigs pa'i lung la mi brten par rgyu mtshan phyogs gcig pa la brten nas rang dga' ba'i 'dod pas gang zag gi bdag la sogs par lta ba'i mu stegs can dang /gzhan gyi sgra la brten nas rang nyid thar pa thob par 'dod cing / 'bras bu'i gnas skabs na yang thar pa thob pa nyid du rlom sems pa/ /phung po la sogs pa chos kyi bdag nyid du sgro 'dogs pa'i gdul bya rnams la sgra dang bcas pa'i chos ston pa ste/nyan thos sam thos sgrogs zhes kyang bya'o/ /rang sangs rgyas ni gzhan gyi sgra la ma brten par rang byang chub tu sangs rgyas pa/ gang zag gi bdag med pa dang gzung ba rang bzhin med par rtogs pa ste/ gzhan la yang brjod pa med par chos ston pa'o//'phags pa zhes pa ni sa bdun pa man chad kyi byang chub sems dpa' ste/ ji srid du nyon mongs pa can gyi yid gnas ma gyur pas cung zad bdag tu lta ba dang bcas pa la sogs pa chos thams cad kyi rang dang spyi'i mtshan nyid ji lta ba bzhin ma rtogs pa nyid du 'og nas ston par 'gyur te/des na de dag gi spyod yul ma yin pa'o/ /de dag gis bsgoms zhes pa ni sangs rgyas rnams kyis zhes pa dang sbyar te/ de dag gi so so rang rig pa'i tshul du bsgoms pa'i chos ri'i rtse mo 'dir bstan te/ ngas kyang gnas de nyid du gnod sbyin gyi bdag po 'bod 'grogs la sogs pas rtogs par bya ba'i phyir/so so rang rig gi chos de nyid bsnyad cing chos bstan zhes pa ste rnam grangs nyid du rtogs pa'o/ /yang na zab mo de nyid bsnyad cing gsung rab kyi chos kyi tshul bstan zhes pa'o/ /gal te de ni sgra dang rnam par rtog pa'i yul las 'das pas bsnyad cing ston pa mi 'thad do zhe na/bden mod kyi de ltar gdul bya rnams la ston pa'i sku dang gsung snang ba byung zhing / de las kyang gdul bya 'ga' zhig gis spyi'i rnam pa'i tshul du snang ba thos pa dang bsam pa'i shes rab las brgyud nas de kho na nyid ji lta ba bzhin rtogs par 'gyur la/'ga' zhig gis ni chos ston pa'i sgrar snang bas rkyen byas shing sngar bsgoms pa'i rgyu las so so rang rig pa'i de kho na nyid mngon sum du 'gyur bas te/ ji skad du chos kyi rnam grangs zab mo 'di bstan pa na byang chub sems dpa' grangs 'di snyed cig ni chos rnams la chos kyi mig rdul med cing dri ma dang bral ba thob bo zhes gsungs pa lta bu'o//gal te gnod sbyin 'bod 'grogs la sogs pa ni sha'i zas la mngon par dga' ba/ sems can 'tshe ba'i bsam pa can ma yin nam/ ji ltar na chos zab mo bstan pa'i snod du 'gyur zhe na/ma yin te/ 'bod 'grogs dang nor bu bzang po la sogs pa gnod sbyin gyi bdag po rnams ni sngon rgyal ba la bsnyen bkur byas shing tshogs yongs su bsags pa/ sgyu ma'i rnam par thar pa thob pa/ /gnas gsum du rnam par rgyal ba la sogs pa'i yon tan dang ldan pa/sa brgyad pa la sogs pa'i dbang phyug yin te/ de ltar na yang sa'i lhag ma rnams rtogs par bya ba'i phyir de dag la chos zab mo ston pa'o/ /de'i rgyu mtshan yang 'bod 'grogs kyis rang gi lus rags pa spangs nas/ in+d+ra nI la'i mgo glad can gyi pi wang gi khog par rang nyid zhugs te zhes pa la sogs pa gsungs pa'i phyir zhes slob dpon ye shes dpal bzang pos bshad do//gzhan yang lang ka'i bdag po gnas shin tu gyur zhes pa dang / mi skye ba'i chos la bzod pa thob pa nyid du thugs su chud ces gsungs pas 'di sa brgyad pa la sogs pa yin par mngon no//gal te de lta na sngon gyi dus su gtogs 'dod dga' ba can zhes par yang grags pa lha'i rgyal po rA ma Nas srin po'i rgyal po 'bod 'grogs bsad do zhes gtam rgyud rnying pa dag las grags shing grub pas mi 'thad do zhe na/ skyon med de/ de ni gtogs 'dod kyis 'dul ba'i sems can drag po la mngon par dga' ba rnams rjes su gzung ba'i don du gtogs 'dod nyid du'am de las gzhan pa'i sangs rgyas dang byang chub sems dpa' rnams kyis sprul pa ste/ji ltar gsang ba'i bdag po dpal phyag na rdo rje gnod sbyin gyi bdag po la sogs pa drag po'i gzugs nyid du gdul bya rnams la ston pa dang mtshungs so//gal te de ltar na 'bod 'grogs kyis 'jig rten pa'i lha chen po la mchod pa la sogs pa byed pa mi 'thad do zhe na/ /ma yin te/ byang chub sems dpa' sa bcu pa thob pa rnams ni dbang phyug chen po'i gzugs su ston pas de la 'bod 'grogs kyis mchod pa la sogs pa byed pa 'gal ba med do//de lta na lha mo u ma dang rol cing 'dod pa'i yon tan rnams la bag med par spyod pa mi 'thad do zhe na/ /sems can rjes su gzung ba'i don du de ltar 'phrul ba ston pa mi 'gal te/ji ltar de bzhin [(]gshes [,]gshegs [)]pa nyid kyis gzhon nu rol rtsed mdzad pa la sogs par ston pa dang mtshungs so/ /gzhan yang de ltar yin pa'i rgyu mtshan ni dbang phyug chen pos smras pa'i gzhung las/ dngos po med las thar bar smras/ /'ching ba dngos por rtogs pa las//de bas dngos po yongs spangs te/ /stong pa'i dngos pos gnas par bya/ /zhes zab mo'i don smras pa'i phyir ro/ /'dir drang srong 'bal mi ka la sogs pa phyi rol pa rnams kyis u ma'i bdag po 'dod pa'i yon tan la rjes su chags shing rol pa mthu dang ldan pa nyid du rang dgar brtags pa ni ma yin te/ji ltar de bzhin gshegs pa la rgyal po zas gtsang gi sras sa 'tsho ma'i bdag po la sogs par brtags pa ni de'i rang bzhin ma yin pa dang mtshungs so/ /gzhan yang 'bal mi ka'i tshig la yid ches par mi rung ste/ de'i gtsug lag las sngon gyi dus su khyab 'jug gi phyogs su gtogs pa rA ma Nas 'bod 'grogs kyi sde la dmag drangs pa na/rA ma Na'i phyogs su gtogs pa'i spre'u'i rgyal po rnams srin po'i phyogs kyis dum bur brlags pa brgya byin lha'i dbang po'i smon lam gyis sos par gyur cing / gnod sbyin dang srin po'i phyogs mtshon gyis [(]smas [,]rmas [)]pa rnams ni shi bar gyur to zhes smras pa la/de ni mi 'thad de/ de lta na dus 'ga' zhig gi tshe brgya byin rang yang srin pos bzung zhing bcings na/ de'i smon lam gyis srin po rnams ci'i phyir thog ma nyid du mi gsod de/ des na de'i tshig ni brdzun pa'o/ / yang gtogs 'dod nyid kyang rnam par shes pa dbu ma smra bas na/ /sa bdun pa'i dbang po yin par mngon te/ ji ltar des bkod pa'i gzhung gi ta na las 'byung ba/ /mi shes pas ni ye shes bsgribs/ /des na skye bo rmongs par 'gyur/ /ye shes kyis ni mi shes pa/ /gang dag gis ni bcom pa na//de dag ye shes nyi ma bzhin/ /mchog tu snang bar 'gyur ba ste/ /zhes pa la sogs pa'o/ /gzhan yang gtogs 'dod la sogs pa 'di rnams thams cad ni de bzhin gshegs pa'i ye shes chos kyi sku'i rnam par 'phrul pa nyid du 'phags pa de kho na nyid bsdus pa'i rgyud las gsungs te/ji skad du/ thog ma tha ma med cing zhi/ /ma rungs khro ba bzod pa che/ /gnod sbyin srin po dam pa bstan/ /gtogs 'dod khyab 'jug gu lang dang / /'byung chen sems can don rab byed/ /'jig rten skyong dang mkha' dang sa/ /zhes pa la sogs pa'o//de ltar na 'bod 'grogs la sogs pa zab mo bstan pa'i snod nyid du 'gal ba med do/ /de ltar chos ston pa'i ltas bstan pa na/ /'bod 'grogs rang gi sngon gyi dge ba'i rtsa ba dang de bzhin gshegs pa'i byin gyi rlabs kyis/ /bcom ldan 'das de ltar klu'i rgyal po'i gnas nas byung ste/chos bstan par dgongs shing bzhugs par thos shing shes nas ma zhum pa nyid du gsungs pa ni mdzes pa ma yin pas/ chos bstan pa rin po che dkon pa dang / de'i che ba nyid du byung bar bya ba'i don du bdag nyid song la zhu bar bya'o snyam du sems pa skyes pa ni de nas zhes pa la sogs pa'o//mdun du bdar zhes pa ni skor byed kyi 'khor rnams kyi mdun phyogs na snang ba'o/ /ji ltar rgya mtsho chen po rlung gis bskyod pa na rlabs sna tshogs 'byung ba bzhin du kun gzhi'i rnam par shes pa yul du snang ba'i bag chags kyi rlung gis bskyod pa na/'jug pa'i rnam par shes pa sna tshogs su snang zhing 'byung ba ste/ kun rdzob tsam du rnam par shes pa rnams kyi 'jug pa dang ldog pa'i tshul bstan pa'o/ /rgya mtsho'i rlabs la gzigs zhes pa lho phyogs kyi rgya mtsho'i 'gram na bzhugs shing de ltar gzigs par ston pa ste/ dpe la brten nas de lta bu'i don rtogs par 'gyur ba nyid du gdul bya rnams la ston pa'o//'di rnams kyi don zhib tu ni 'og nas ston par 'gyur ro/ /ched du brjod pa zhes pa ni gnas skabs der gdul bya rnams kyis don du ma gnyer yang 'dul ba'i dus la bab par gzigs nas chos bstan par dgongs pa'o//yun ring po'i don ni nges par legs pa'i 'bras bu'o/ /phan pa dang bde ba ni mngon par mtho ba ste/ 'phral du phan pa dang skye ba gzhan du bde ba'o/ /de ltar kun nas slong ba'i bsam pa mngon du btang ste/ mchod pa sngon du 'gro ba'i sgo nas zhu ba'i tshig mdo tsam bstan pa ni de nas zhes pa la sogs pa'o//de nyid rnam par 'phrul pa bsam gyis mi khyab pa dang ldan pas me tog gi gzhal med khang sprul nas der zhugs zhes pa la sogs pa shes par zad do/ /rang nyid gos ngur kha pri yang ku 'dra ba rin thang med pas lus g.yogs pa'i mchan du pi wang dpyangs te/'khor rnams kyang bdag po 'bod 'grogs dang de bzhin gshegs pa la dga' zhing spro bar byas nas/ glu'i dbyangs sha rdza dang zhes pa la sogs pa 'dir sngon gyi gtsug lag las/ rtse mo rlom par blang ba ni/ /lnga pa u ma'i dbyangs dag ste/ /dpa' bo drag po ngo mtshar du/ /drug skye khyu mchog de bzhin no//gan d+har ni sha'i dbyangs dag ni/ /snying rje'i ro la blang bar bya/ /'thab mo 'jigs dang bcas pa la/ /d+he 'bad dbyangs ni blang bar bya'o/ /zhes 'byung zhing / /de lta bas na 'bod 'grogs kyis/ don dang mthun par blangs pa ste zhes slob dpon ye shes dpal bzang pos bshad do//de'i don kyang de bzhin gshegs pas sngon btsun mo'i tshogs dang rtse zhing rol pa dang / rlom sems pa'i tshul du bstan la/ de dang mthun par ban tsa ma dang / ma d+ha ma'i glu blangs la/ gzhan yang des drag po'i gzugs su bstan cing bdud tshar gcod pa la sogs pa ngo mtshar gyi khyad par bstan pas de dang mthun par sha rdza la sogs pa ste drug las skyes pa dang khyu mchog go//de nyid snying rje'i ro dang ldan pas de dang mthun par gan d+ha ra dang ni sha da'o/ /gzhan yang de 'jig rten pa dang rtsod pa'i 'khor lo shom pa lta bur bstan te/ de dang mthun par de b+ha Ta'i dbyangs blangs zhes pa'o//kau shi ka ni lha'i drang srong gi khyad par gyi glu'o/ /de la sogs pa glu'i dbyangs mang po ste drang srong b+ha ra ta dang byi sha khi la'i gzhung las brtag par bya'o/ /gzhan yang / dbyangs bdun rnams dang grong gsum dang / /rgyal ba nyi shu rtsa gcig dang / /ta na bzhi bcu dgu rnams te//dbyangs kyi dkyil 'khor de tsam mo/ /zhes pa glu'i mtha' na dza ya ti dang ta na la sogs pa'i tshig de rnams yod pa'o/ /sbyar ba la sogs zhes pas ni rol mo'i tshogs gzhan bsdu'o/ /de ltar rang gi lus pi wang gi nang du chud par byas te/ de'i rgyud kyi sgra dang rjes su mthun par tshigs su bcad pa brjod pa'i dbyangs kyis glu blangs pa ni/sems kyi rang bzhin zhes pa la sogs pa ste/ /'dir grub pa'i mtha' dang bshad pa'i tshul las/ dang por grub pa'i mtha' ston pa ni so sor rang rig pa'i bar gyis te/ don ni srid gsum sems su 'dus shing sems kyi rang bzhin gyi tshul ni kun rdzob tu myong ba'i rang bzhin yin zhing don dam par stong pa ste/de yang sngar bstan pa ltar phan tshun zung du 'jug pa rig pa dang stong pa dbyer med pa'i rang bzhin kun gzhi'i rnam par shes pa'i mthar thug pa ste/ kun nas nyon mongs pa dang rnam par byang ba'i chos thams cad kyi gter du gyur pa'o/de nyid gang zag dang chos kyi bdag gis stong zhing de nyid kyis 'jig tshogs la lta ba la sogs pa lta bar gyur pa rnams kyi yul las 'das pas lta dang rnam bral zhes pa'o/ /dri ma med ces pa ni 'dod chags la sogs pa nyon mongs pa'i dri ma rnams rang bzhin gyis stong pa ste/rang bzhin rnam dag gi don la sbyar ro/ /de lta bu'i so so rang rig shes pa zhes pa ni grub pa'i mtha' phyin ci ma log pa'i don to/ /ston pa'i chos tshul zhes pa ni bshad pa'i tshul te/ gsung rab yan lag bcu gnyis sam dgus bsdus pa'o//de la 'dir ston pa zhes pa ni 'jig rten gyi ston pa ste/ de yang dge ba ston pa dang mi dge ba ston pa las 'dir ni dge bar gyur pa ston pa ste/ kye rigs kyi bu dag lus kyi mi dge ba'i las yongs su spang bar bya'o/ /de ci'i phyir zhe na/ lus kyi mi dge ba'i las yongs su spangs na rnam par grol bar 'gyur ro//de bas na chos 'di dag ni khyed la ston gyi mi dge ba'i las yongs su ma spangs par rnam par grol bar 'gyur ro zhes khyed la mi ston to zhes pa la sogs pa dang / ngag dang yid kyi las kyang de bzhin du rig par bya'o zhes ston pa'o/ /gzhan yang bdag nyid kyis sngon ma thob pa thob par 'gyur la/de ltar thob pa'i thabs rnams kyang sems can la ston pa dang / bdag nyid ma rig pa bcom pas sems can gyi ma rig pa 'joms pa dang / bdag nyid yongs su dag pa'i mig thob pas sems can gyi ldongs pa'i rab rib bsal nas yongs su dag pa'i mig thob par byed pa dang /bden pa gnyis shes pas sems can rnams la yang bden pa gnyis ston pa dang / bdag nyid rnam par grol bas sems can rnams la rnam par grol ba'i chos ston pa dang / bdag nyid mtha' med pa'i 'khor ba'i chu las brgal bas sems can thams cad kyang de las sgrol ba dang /bdag nyid 'jigs pa med par gyur pas sems can rnams la 'jigs pa med pa ston pa dang / bdag nyid yongs su mya ngan las 'das pas sems can rnams la mya ngan las 'das pa chen po ston pas te/ de yang bstan pa'i gdul bya'i gtso bo ni lha dang mi rnams yin te/de dag dge ba bcu'i las la 'jug cing byang chub mchog tu sems bskyed pa'i yon tan dang ldan pas/ lha dang mi rnams kyi ston pa zhes bya'o/ /de ltar yang mya ngan las 'das pa chen po las gsungs so/ /mgon po zhes pa ni sdug bsngal las skyob pa'i don gyis so//yang na 'di rnams kyi don ni sems kyi chos nyid de lta bu rtogs shing goms pas yang dag pa ma yin pa'i lta ba nyon mongs pa can ma yin pa'i mi shes pa dang bral zhing / nyon mongs pa'i dri ma glo bur yang spangs pa so sor rang rig pa'i ye shes mthar thug pa rtogs pa ste/ de bzhin gshegs pa la bstod pa'o//gzhan yang sbyin pa la sogs pa pha rol tu phyin pa drug gis bsdus pa'i dge ba'i chos kyis kun gzhi la zag pa med pa'i sa bon bsags pa'i dbang gis thob pa'i sku ste/ sku gsum gyi rang bzhin spyir bstan pa'o/ /gal te sprul pa'i sku ni gdul bya 'ba' zhig gi snang ba yin gyi sangs rgyas kyi ngo bo ma yin pas dge ba'i chos kyi 'bras bur mi 'thad do zhe na/ma yin te/ ye shes kyi bdag nyid kyi chos kyi sku gang gis gdul bya la sku de lta bu'i rnam pa ston nus pa'i rgyu de las byung bas de ltar bstan pa'o/ /bde gshegs zhes pa ni yang mya ngan las 'das pa chen po'i mdo las/ji skad du bde ba zhes pa ni sems dang po bskyed pa ste/ gzhan don sems pa'i bde ba'i ro dang ldan pas so/ /de nyid las ma nyams par mya ngan las 'das pa chen po thob pas/ de'i phyir bde bar gshegs pa zhes bya'o/ /yang bde ba ni sangs rgyas kyi rang bzhin mthong ba'o//de nyid las ma nyams par mya ngan las 'das pa chen po'i 'bras bu thob pa ste/ des na bde bar gshegs pa'o/ /yang sangs rgyas bcom ldan 'das rnams ni yongs su mya ngan las 'das pa chen po lhun gyis grub pa'i phyir bde bar gshegs pa zhes bya'o//'di rnams kyang 'jig rten gyi kun rdzob kyi don du yin gyi/ de kho na nyid du ni de 'dra ba'i spros pa dang bral ba'o zhes gsungs so/ /gzhan yang tshad ma rnam 'grel las/ spangs pa dang rtogs pa'i don las bshad pa yang 'dir blta bar bya ste/ skabs gzhan du shes par zad do/ / de nyid rnam par 'phrul ba bsam gyis mi khyab pa mnga' bas gdul bya ji ltar 'dul bar 'gyur ba'i sku dang gsung sna tshogs su ston pa ste/ de ltar gdul bya thams cad la snang ba ni sprul pa'i sku ste/ de yang mchog gi sprul pa dang bzo dang skye ba'i sprul pa ste/ rnam pa gsum du shes par bya'o//so sor rang rig rtogs pa'i chos dgyes pa zhes pa ni zag pa med pa'i bde ba dang ldan pa'i ye shes chos kyi sku'i rang bzhin no/ /de lta bu'i sangs rgyas ni sku la 'khrul pa mi mnga'/ gsung la ca co mi mnga'/ thugs mnyam par ma bzhag pa la sogs pa mi mnga' ste/ yang dag par bsdams pa'i sku can yin pas thub pa ste/yang dag par bstod pa'o/ /de ni lang kar gshegs pa'i dus zhes pa lang ka'i grong rdal du gshegs par 'os pa ste/ sems can rnams kyi don chen po nyid du 'gyur ba dang / sngon gyi rgyal ba sras dang bcas pa gdul bya'i don du gzugs sna tshogs su ston par nus pa rnams kyis kyang bzhugs shing chos bstan pa'i phyir ro//de ltar gshegs nas kyang bya ba ci byed ce na mgon po 'dir ni chos rab tu bshad du gsol zhes pa'o/ /bshad kyang don du mi 'gyur ro snyam na/ gzugs mang ldan pa'i gnod sbyin kun kyang nyan/ zhes pa ste/ rang rang gi las kyis grub pa'i gzugs mi 'dra ba dang ldan pa'am/'ga' zhig rdzu 'phrul thob pas re re yang gzugs mi 'dra ba du ma ston par nus pa'o/ /de ltar zhu ba mdor bstan nas/ rgyas par bshad pa ni/ de ltar lang ka'i zhes pa la sogs pa'o/ /to tha ka'i rgyu dang mthun par glu blangs nas yang tshigs su bcad pa'i dbyangs kyis kyang glu blangs zhes pa'o//'di rnams kyang de bzhin gshegs pas rjes su gnang ba sdud pa pos sngar mthong ba'i don bsdus te bstan pa'i tshig go/ /nges pa'i don du na sngar bstan pa ltar thams cad de bzhin gshegs pa nyid kyi tshig tu 'gyur ba'o//de la tshig gi don ni phal cher shes par zad do/ /ne tsos ra nas brgyan pa'i gnas sam lam der rdzu 'phrul gyis song zhes tshig sbyar bar bya'o/ /su dag song na gnod sbyin zhes pa la sogs pa'o/ /gnas gang du 'gro ba'i lam yin na/ mgon po gang na bzhugs par 'gro ba'i lam ste/de yang ljon shing dang skad snyan par sgrogs pa'i bya rnams kyis brgyan zhes pa'o/ /me tog gi bzhon pa ni khang pa'o/ /'dir de bzhin gshegs pa ni 'jig rten thams cad las mngon par 'phags shing khyad zhugs pa'i spobs pa dang gzi brjid dang ldan pas gdul bya rnams rang rang gi ming bsnyad cing zhu bar spobs pa dga' bas/de'i byin gyi rlabs kyis de ltar byung zhes pa'o/ /rgyal ba zhes pa ni spang bar bya ba'i g.yul las rgyal ba'am/ yon tan gyi bgo skal gyis rgyal ba ste/ de nyid 'jig rten dang 'jig rten las 'das pa'i phun sum tshogs pa thams cad la dbang brnyes pas dbang po zhes pa'o//bdag ni zhes pa la sogs pas ni sngon 'bod 'grogs kyis gsol ba btab pa'i tshig la sogs pa sdud pa pos mthong zhing thos pa rnams sdud pa pos bsdus shing bstan pa'o/ /lang kar rjes su bzung zhes pa ni sa phyogs kyang mchod pa'i gnas nyid du byin gyis rlobs shig pa'o//rdul med pa ni mu stegs smra ba la sogs pa'i nyes pas ma gos pa'o/ /gal te zab mo sgra dang blo'i yul du 'gyur ram zhe na/ /bshad pa'i tshul las rnam par grol/ /zhes pa la sogs pa ste don ni sngar bstan no/ /de ltar na gsung zhing 'chad pa mi 'thad do zhe na//sngar bstan pa de ltar snang ba mi 'gal zhes pa'o/ /gzhan dag rtog ge'i rjes su 'brangs nas rang gi mtshan nyid dngos su sgras brjod par bya ba ma yin yang brjod pa dang 'dres par snang ba'i spyi'i rnam pa sgra don yin la/ de dang rang gi mtshan nyid tha dad med par zhen pas dngos su spyi'i rnam pa brjod pa las brgyud nas rang gi mtshan nyid la sgro 'dogs chod pa nyid sgras bstan pa yin no zhes zer ba ni mi 'thad de/de ni rnam rtog gnas ma gyur pa rnams kyi dbang du byas pa yin gyi/ de bzhin gshegs pa rnam par rtog pa bag chags dang bcas te spangs pa la ni spyi'i rnam pa snang ba nyid med pas so//gal te snga ma rnams ni 'das nas med pa'i phyir de ltar gsungs pa'i shes byed med do zhe na/ de ltar bshad par dran pas te/ sngar gyi tshad ma'i byed pa yin pas de nyid kyis grub ces pa'o/ /des na snga ma rnams kyi tshul lugs rjes su skyong dgos pa khyed kyis kyang shod ces pa ste/bshad par 'os pa'i rgyu mtshan no/ /de nyid mngon par shes pa thob pas ma 'ongs pa lung ston pa ni ma 'ongs dus na zhes pa la sogs pa'o/ /'phrul gyi tshul zhes pa ston pa dang tshig la sogs par snang ba thams cad sems kyi rnam par 'phrul ba tsam yin zhes pa'o//gzhan yang 'phrul gyi lang ka zhes pa la sogs pas gnas kyi bsngags pa brjod pa ste/ thel sdings rdo stengs zhes pa ni 'chag cing nye bar spyod pa'i rdo leb nyams dga' bas brgyan pa'o/ /rnal 'byor zhes pa la sogs pas 'khor gyi bsngags pa brjod pa ste/ mtshan mar dmigs shing srid pa dang lta ba la sogs pa shas che ba'i bsam gtan dang ting nge 'dzin gyi nyes pa dang bral ba spros pa dang bral zhing 'od gsal ba so so rang rig pa'i don la sgom pa'i gnod sbyin dag ces pa la sogs pa ste/ bcom ldan zhes pa ni de la bod pa'o/ /yang na bcom ldan zhes pa yan chod rkang pa phyed dang gsum gyis de bzhin gshegs pa la bstod pa'o//gnod sbyin dag sangs rgyas snga mas mdzad srung zhes pa ni snga mas gdams ngag bstan pa mdzad pa rjes su srung zhing sgom pa'o/ /de lta na da ltar zhu ba mi 'thad do zhe na/ theg chen tshul la dad pas mngon par zhen pa ste/chos kyi ros tshim pa med cing khyad par gzhan rtogs par bya ba'i don du zhu ba'o/ /de la theg pa chen po ni mdor bsdu na rnam pa gnyis te/ lam gyi dus na thabs byang chub mchog tu sems bskyed pa dang / de kho na nyid shes pa'i shes rab gnyis dbyer med pa'i tshul du sgom par byed pa dang /'bras bu'i dus na yang / shes pas srid la mi gnas shing / /snying rjes zhi la mi gnas te/ zhes mi gnas pa'i mya ngan las 'das pa chen por gyur pa'o/ /de ltar rang nyid dad cing gzhan yang theg pa chen po la 'jug pa ste gzhan de dag kyang / gnod sbyin mo dang gnod sbyin bu zhes pa ste/sngar ma thos pa rnams kyi don du yang zhu bar gsol ba'o/ /bum sna la sogs pa zhes pa'i don ni 'brog gnas dang nor bu bzang po la sogs pa ste 'khor gyi bsngags pa brjod pa'o/ /khyim dang lha mo zhes pa la sogs pas rnyed pa dang bkur sti'i mchod pa ston no/ /bdag ni zhes pa la sogs pas grub pa'i mchod pa'o//de yi tshig de gsan pa dang / /srid gsum dbang pos gsungs pa ni/ /zhes pa sdud pa po'i mtshams sbyor ba bstan pa'o/ /gnod sbyin dbang po zhes pa la sogs pas bshad pa nyid du skabs phye ba ste/ dngos su de bzhin gshegs pa nyid kyis gsungs pa'o//'di ni rnal 'byor ldan pa dag /mthong ba'i chos la spyod pa'i gnas/ /zhes pa ni byin gyis brlabs pa'i gnas yin pas zhi gnas dang lhag mthong zung du 'brel ba'i rnal 'byor dang ldan pa rnams tshe de nyid la bde ba la reg par gnas par 'gyur zhes pa'o/ /bcom ldan gnang nas zhes pa la sogs pas ni sdud pa pos sngar mthong ba'i don bsdus te bstan pa'o//zhi ba'i blo ni nang du chos nyid la mnyam par gzhag pa'o/ /de nyid du zhes pa me tog gi khang pa de nyid du'o/ /'jigs pa med zhes pa ni/ sa thob 'jigs pa lnga dang bral/ /zhes pa'i don to/ /'tsho ba nyams pas 'jigs pa dang /bstod ra med pa'i 'jigs pa dang / 'chi ba'i 'jigs pa dang / ngan song gi 'jigs pa dang / 'khor gyi nang du bag tsha ba'i 'jigs pa ste/ de rnams dang bral bas sa dang po yan chad thob pa rnams so/ /'jigs pa de rnams med pa ci'i phyir zhe na/ 'di ltar de ni bdag gi 'du shes dang bral bas bdag phangs par sems pa yang med pa yin na/yo byad thams cad la phangs par sems pa lta ga la yod/ de'i phyir de la 'tsho ba med pas 'jigs pa med pa yin no/ /de ni su las kyang rim gro bya ba cung zad tsam yang re ba med kyi/ gzhan du na bdag nyid kyis sems can de dag la yo byad mang po thams cad kyis bsdu bar bya'o snyam du sems te/de'i phyir de la tshigs su bcad pa med pas 'jigs pa med pa yin no/ /de bdag tu lta ba dang bral bas bdag gi 'du shes med de/ de'i phyir de la 'chi ba'i 'jigs pa med pa yin no//bdag shi nas kyang gdon mi za bar sangs rgyas dang byang chub sems dpa' dag dang mi 'bral bar 'gyur ro snyam ste/ de'i phyir de la ngan 'gro'i 'jigs pa med pa yin no/ /bdag gis bsam pa dang mtshungs pa yang 'jig rten na su yang med na/ ches lhag pa lta ga la yod snyam ste/de'i phyir de la 'khor gyi nang du bag tsha bas 'jigs pa med pa yin no zhes 'phags pa sa bcu pa las gsungs pa'i phyir ro/ /'dir khyad par du 'jigs pa med ces smos pa ni las dang po pa'i byang chub sems dpa' la sogs pa rnams 'bod 'grogs drag po'i gzugs can yin pas 'jigs par 'gyur ba dag srid pas so//dga' ba'i grong rdal zhes pa la sogs pas yang snga ma las khyad par du mchod cing de bzhin gshegs pas kyang de dag gi tshogs rdzogs par bya ba'i don du mchod pa'i tshogs yongs su bzhes pa nyid du ston pa'o/ /de la 'bod 'grogs kyis kyang sangs rgyas 'jig rten gsum las rgyal ba dang /rgyal ba'i sras rnams kyi stod kyi yan lag la/ rin po ches brgyan pa'i se mo do btags zhes rnam par sbyar bar bya'o/ /gnod sbyin sde dang zhes pa la sogs pas ni 'khor gyi gtso bos ston pa la chos zhu ba nyid du gsol ba 'debs pa'o//ji lta bu'i chos zhu bar gsol ba 'debs she na/ rang rgyal nyan thos zhes pa la sogs pa ste/ bdag gi don 'ba' zhig sems pa dang gang zag dang chos su sgro 'dogs pa'i nyes pa las grol ba'i dbu ma'i don no/ /rtse mo rin chen zhes pa la sogs pas ni de bzhin gshegs pas sprul pa byin gyis brlabs pa dang /de dag nye bar bsdus te gdul bya rnams la de bzhin gshegs pas don gyis chos bstan pa nye bar sdud par byed pas bsdus te bstan pa'o/ /de dag gi don ni go skabs kyis gnas de nyid du khyad par du gyur pa'i gnas dang /de bzhin gshegs pa'i zhing khams dang / ston pa dang / gdul bya'i gtso bo la sogs pa du ma sprul cing / de dang 'gran pa'i lang ka zhes pa ste sngar nas gnas pa'i lang ka'i grong rdal dang 'gran pa zhes pa la sogs pa'o/ /stong phrag brgya pa'i mdo sde zhes pa ni de ltar chos ston pa po mang bas des bstan pa'i chos kyang sh+lo ka stong phrag brgya la sogs par snang ba ste/de rnams thams cad kyis kyang ji ltar grags pa bzhin du don byed par nus par nyams su myong ba'o/ /ston pa dang ni zhes pa la sogs pa rkang pa gnyis kyis de rnams nye bar bsdus pa'o//gnod sbyin 'bod 'grogs zhes pa la sogs pas de ltar bstan pa'i don du gdul bya'i gtso bos nye bar rtogs pa'i tshul bstan pa'o/ /de'i don kyang go skabs kyi yul gcig tu de 'dra ba'i 'gal ba rnam pa du ma snang ba ni rang rang gi sems kyi rnam pa las ma gtogs pa'i phyi rol gyi ngo bo bden par mi 'thad de/'gal ba'i don dngos po la mi srid pa'i phyir ro/ /gal te de lta na de ltar snang ba sems kyi ngo bo don dam pa nyid yin nam zhe na ma yin te/ ma byung ba las gang byung zhing / /byung nas kyang ni rnam 'jig pa/ /rkyen las yod dang med de dag /nga yi bstan la de mi gnas//zhes 'og nas ston par 'gyur bas/ de 'dra ba'i rten cing 'brel par 'byung bar snang ba dag dngos por grub pa ma yin zhes pa ste/ 'di'i don zhib tu ni 'og nas bstan par bya'o/ /bsam pa 'di go zhes pa la sogs pa ni 'bod 'grogs kyis sngar gyi rnam par 'phrul ba'i don la rjes su bsams shing rtogs pa'i rnam pa ston pa ste/de ltar snang ba 'di go zhes pa la sogs pa ste/ gang gis dang su yis zhes pa la sogs pa'i spang ba'i sgra'o/ /des na 'di rnams ni [(]sbyu [,]sgyu [)]ma'i dpe brgyad dang mtshungs par snang la bden pa'i dngos pos stong pa yin nam/ 'on te sems kyi spyod yul du gyur pa'i phyi rol bden pa'i ngo bor gyur pa'i chos nyid yin nam zhes rnam par dpyad pa'i tshul du bstan kyang the tshom gyi ngo bor gyur pa ni ma yin te/ji ltar rmi lam na khyim chung ngu'i nang na ri bo chen por snang ba ni sad pa'i gnas skabs na ci de bden nam brdzun zhes rtogs pa dang mtshungs so//rmi lam rod ces pa ni rmi lam gyi nyams kyi rnam pa'o/ /gzhan du zhes pa la sogs pas de ltar rtogs pa dang ma rtogs pa'i skyon dang yon tan ston pa ste shes par zad do/ /'di'i don mdo sde gzhan dag las kyang gsungs te/ ji skad du/ gang gis nga la gzugs su mthong / /gang gis nga la sgrar shes pa/ /'dun pa'i 'dod chags ldan pa ste/ /skye bo des ni nga mi shes/ /sangs rgyas rnams ni chos [(]gyi [,]kyi [)]sku/ /'dren pa rnams ni chos nyid blta/ /zhes pa la sogs pa'o/ /sangs rgyas mi mthong zhes pa dang mtshan dang dpe byad la sogs pa'i dngos por mi 'dzin cing don dam par ye shes kyi rgyun 'jug pa med pa sangs rgyas kyi rang bzhin yin par mthong na/de nyid sangs rgyas kyi rang bzhin mthong ba yin zhing / mthong ba po sangs rgyas nyid du 'gyur bas sangs rgyas zhes bya'o/ /lang ka'i bdag po zhes pa la sogs pa gdul bya'i gtso bo la bsngags pa brjod cing rjes su gdams pa ston te/gnas shin tu gyur zhes pa ni ji skad du/ yid dang 'dzin dang rnam par rtog /gyur phyir rnam par mi rtog dang / /zhing dang ye shes las dag la/ /dbang ni rnam pa bzhi yin no/ /dbang de mi g.yo la sogs pa'i//sa gsum la ni rnam bzhi ste/ /gcig la rnam gnyis gzhan dag la/ dbang ni re rer shes par bya/ /zhes pa la sogs pa sa bcu'i mgon pos gsungs te/ de'i don yang sa brgyad pa la nyon mongs pa can gyi yid gnas gyur pas rnam par mi rtog pa dang zhing yongs su dag pa la dbang thob par gyur cing /dgu pa dang bcu pa la go rims ji lta ba bzhin du sgo lnga'i rnam par shes pa dang / yid kyi rnam par shes pa gnas gyur pas/ so so yang dag par rig pa'i ye shes la dbang ba dang / mngon par shes pa'i las la dbang thob pa'o/ /'dir gnas gyur pa yang de rnams kyi snang ba phyin ci log spangs pa ni yin gyi sa bon spangs pa ni ma yin te/de rnams kyi bag chags dang ldan pa'i kun gzhi rnam par shes pa la brten nas rjes kyi gnas skabs su rnam par rtog pa 'byung ba'i phyir ro/ /de rnams kyi sa bon kun gzhi gnas gyur pa ni sangs rgyas kyi sa la ste/sa bon gzhan du gyur pa'i phyir/ gnas don lus su snang ba dag /gzhan du gyur pa zag med dbyings/ /zhes pa dang / yang / rten ni gzhan du gyur pa na/ /sangs rgyas dri med gnas la ni/ /mi gnas mya ngan 'das pa yi/ /'byor pa dam pa thob par 'gyur/ /zhes gsungs te/de ni lang ka'i bdag po la yod pa ma yin zhing / gnas gyur snga ma rnams ji ltar rigs pa bzhin du sbyar bar bya'o/ /gzhan yang des chos thams cad rang gi sems snang ba tsam du khong du chud cing sems kyi chos nyid stong pa nyid kyang so sor rang rig pa'i tshul du mnyam par gzhag pa'i gnas skabs na rtogs nas rjes la rnam par rtog pa'i rgyu ba la gnas zhes pa ste/de yang phyin ci log gi rtog pa ni sngar bstan pa ltar spangs pa'o/ /gzhan yang sngon gyi dge ba'i rtsa ba las mngon par grub pa/ rig pa'i gnas dang sgyu rtsal la sogs pa thams cad la mkhas pa de bzhin nyid ji lta ba bzhin du rtogs pa dang /theg pa chen po'i rnal 'byor pa la gzhan gyi dring mi 'jog pa ste/ de la rag ma lus pa'o/ /de'i rgyu mtshan yang rab rtsal sems kyis zhus pa las/ lha'i bu byang chub sems dpa'i chos bzhi dang ldan na theg pa chen po la gzhan gyi dring mi 'jog pa rnams yin te/bzhi gang zhe na/ thabs la mkhas pas mngon par bsgrubs pa'i shes rab dang / snying rje chen pos mngon par bsgrubs pa'i byams pa dang / don dang chos su mngon par bsgrubs pa'i spobs pa dang / byang chub kyi yan lag gi rnam pas mngon par bsgrubs pa'i mngon par shes pa lnga po dag ste zhes gsungs te/de rnams kyang 'bod 'grogs la ldan pa'o/ /yang shes rab kyi pha rol tu phyin pa'i 'grel pa las/ spyan lnga dang ldan na gzhan gyi dring la mi 'jog pa'o zhes kyang gsungs pa'o/ /gzhan yang bden pa gnyis kyi thabs la mkhas pa ste/ji skad du 'phags pa dkon mchog sprin las/ byang chub sems dpa'i thabs sgrub pa ni phan tshun 'gal bar snang ba'i don bden pa gnyis kyi thabs la mkhas pas mi 'gal bar sgrub pa ste/ don dam par sems can yang mi dmigs la/ rtag tu sems can yongs su smin par byed pa'i brtson pa yang byed do/ /don dam par chos thams cad kyi bri ba dang 'phel ba mi dmigs kyang kun rdzob tu sems can gyi dge ba la yi rang nas de las byung ba'i dge ba rdzogs pa'i byang chub tu bsngo zhing smon par byed do zhes pa la sogs pa gsungs so//khong du chud pa dang rtogs zhes pa la sogs pa ni rnam grangs su gyur pa'am/ khyad par du so so rang rig pa'i tshul du rtogs pa'o/ /'di 'dra ba'i tshig 'og nas 'byung ba rnams kyang de bzhin du blta bar bya'o/ /gong nas gong dus thams cad kyi rang gi mtshan nyid rtogs par bya ba la mkhas zhes pa ni sa dang po la sogs pa rtogs pa'i ye shes kyi bye brag rnams ji lta ba bzhin du nyams su myong bas te/'di rnams kyi mtshan nyid dang yongs su sbyong ba'i bye brag la sogs pa ni 'og nas bstan par bya'o/ /sems dang zhes pa la sogs pa la//sems ni kun gzhi rnam par shes/ /ngar sems nyid ni yid yin no/ /rnam par shes pas rnam par rig /lnga pos snang ba mthong bar 'gyur/ /zhes 'byung bas go rims bzhin du kun gzhi dang / nyon mongs pa can gyi yid dang yid kyi rnam par shes pa la sogs pa tshogs drug po rnams rang rang gi ngo bos stong pa nyid du rtogs shing /de lta bu'i rang bzhin la mngon par dga' ba dang / rgyud gsum chad par lta ba ste/ 'dus byas kyi mtshan nyid skye ba dang 'jig pa dang gnas pa rnam pa gsum dang bral bar lta ba yin no zhes kyang snga ma rnams kyis bshad la/ gzhan yang ma rig pa dang sred pa dang len pa ni nyon mongs pa'i rgyun mi 'chad pa'o/ /'du byed dang srid pa ni las kyi lam gyi rgyun mi 'chad pa'o/ /lhag ma rnams ni sdug bsngal gyi lam gyi rgyun mi 'chad pas rnam par phye ba'o zhes 'phags pa sa bcu pa las gsungs te/ 'di'i don ni srid pa'i yan lag bcu gnyis mdor bsdus pa nyon mongs pa'i kun nas nyon mongs pa dang /las kyi kun nas nyon mongs pa dang / skye ba'i kun nas nyon mongs pa'i rgyud gsum rnam par chad cing / de 'dra ba'i zad pa shes pa'i ye shes so/ /gzhan yang 'gro ba thams kyi byed pa po dbang phyug dang gtso bo la sogs pa yin no zhes rgyur lta ba dang /de las gzhan pa'i mu stegs can gang zag gi bdag tu lta ba la sogs pa'i nyes pa thams cad dang bral bar rtogs pa'i blo gros can/ de bzhin gshegs pa'i snying po sems kyi chos nyid spros pa dang bral zhing 'od gsal ba de nyid sangs rgyas kyi sa ste/de'i rgyu mthun pa'i rgyur gyur pa'o/ /de nyid la so so rang rig pa'i tshul gyis mnyam par gzhag cing de'i rgyu mtshan gyis blo'i me long dang ba la/ nam mkha' dang ba'i nang nas sangs rgyas skur snang zhing gsung thos pa ste/ thos pa'i gsung de yang gang zhe na/lang ka'i bdag po legs so legs so zhes pa ste/ de'i rtogs pa brjod pa la ngo mtshar bas lan gnyis smos pa'o/ /yang lang ka'i bdag po khyod ni legs so zhes pa ni gdul bya gzhan po rnams la yang phan par 'gyur bas shin tu legs so zhes pa'o/ /khyod kyis rtogs pa ltar gzhan rnams kyis kyang bslab par bya'o zhes nye bar gdams pa'o//de ltar mdo sde gzhan dag las kyang / khye'u byang chub sems dpa' chos bzhi dang ldan na myur du bla na med pa yang dag par rdzogs pa'i byang chub tu mngon par rdzogs par 'tshang rgya ba dang / zab mo'i chos rnams la yang bzod pa thob par 'gyur te/bzhi gang zhe na/ sangs rgyas la chos nyid du mthong gi gzugs su ma yin pa dang / chos la 'dod chags dang bral bar mthong gi yi ge dang nges pa'i tshig tu ma yin pa dang / dge 'dun la 'dus ma byas su mthong gi tshogs su ma yin pa dang /shes rab kyi mig yongs su dag par 'gyur ba ste/ bzhi po de dag go zhes pa la sogs pa gsungs so/ /de las gzhan du sku mtshan dang dpe byad kyi rnam pa dang gsung dbyangs yan lag drug cu la sogs pa'i dngos por bltas na/ de'i rang bzhin la sgro 'dogs pa'i mthar lhung bas sangs rgyas kyi rang bzhin ma mthong ngo zhes sngar bstan la/yang da ltar snang ba gdul bya'i sems kyi ngo bor gyur pa'am sangs rgyas kyi ye shes rgyun gyis 'jug pa kun rdzob tsam du yang med do zhes lta na ni/ de la skur pa 'debs pa chad pa'i mthar 'gyur ba'o/ /khyod kyis zhes pa la sogs pas gdul bya'i gtso bo la gdams pa ste/kun gzhi yongs su ma dag pa'i gnas skabs dang / 'jug pa'i rnam par shes pa dang bral ba ste/ de rnams gnas gyur zhing nang sems kyi chos nyid chos thams cad bsdus pa'i don la bsgom par bya'o zhes pa'o//tshig gi don gyi spyod yul du lhung ba'i lta ba dang / ting nge 'dzin du ma yin zhes pa ni/ brjod pa sna tshogs dang 'dres pa'i don gyi rnam pa du mar rtog pa'i lta ba dang / de 'dra ba'i mtshan ma sna tshogs la rtse gcig pa'i ting nge 'dzin la gnas par mi bya'o zhes pa'o//de skad du yang 'phags pa ting nge 'dzin gyi rgyal po las/ gang zhig sgra yis chos bstan pa/ /chos rnams mang po bsam mi khyab/ /sgra de la yang gang chags pa/ /dgongs pa'i bshad pa mi shes so/ /ci la dgongs te bshad pa yi/ /dgongs pa dag ni mi shes pa/ /chos nyid la ni ma bslabs pas/chos ma yin pa chos su 'chad/ /'jig rten khams ni stong dag tu/ /ngas ni mdo sde gang bshad pa/ /tshig 'bru tha dad don gcig ste/ /thams cad brjod par nus ma yin/ /tshig gcig rnam par bsgoms na ni/ /de dag thams cad bsgoms par 'gyur//sangs rgyas ji snyed thams cad kyis/ /chos rnams mang po rab bshad pa/ /chos rnams thams cad stong pa nyid/ /mi gang don la mkhas pa dag /tshig 'di bslabs par gyur pa la/ /sangs rgyas chos rnams dkon ma yin/ /zhes gsungs so/ /gzhan yang drang srong rgyas pa dang /'jug sel la sogs pas smras pa'i sngon gyi gtam rgyud dang sgrung la mngon par zhen par mi bya zhing / dbang phyug dang tshangs pa smra ba rnams kyis bstan pa'i rig byed kyi sgra rtag pa skyes bus ma byas pa don phyin ci ma log pa ston pa la sogs pa'i yon tan dang ldan pa nyid du gzung bar mi bya zhing /bdag ni srin po'i rgyal po zhes dregs shing nga rgyal bar yang mi bya/ bsam gtan drug la sogs pa la bsam gtan par ma yin zhes pa ste/ dmigs pa dang bcas pa'i bsam gtan drug po 'di lta ste/ bsam gtan dang po'i nyer bsdogs dang / dngos gzhi dang bsam gtan khyad par can dang /gnyis pa la sogs pa gsum gyi dngos gzhi zag pa med pa'am/ zag pa dang bcas pa rnams dang / nam mkha'i 'du shes la sogs pa gzugs med pa'i ting nge 'dzin mtshan mar dmigs pa rnams la bsam gtan par ma yin zhes pa'o/ / lang ka'i bdag po 'di ni zhes pa la sogs pas nye bar gdams pa'i don 'di nyid byang chub sems dpa' sems dpa' chen po rnams kyis 'da' bar bya ba ma yin pas/ de rnams kyi dam tshig nyid du ston pa'o/ /pha rol gyi rgol ba ni 'gal ba khas len pas rtsod pa nye bar 'god pa ste/de nyid chos dang mthun par tshar gcod cing lta ba ngan par gyur pa drug cu rtsa gnyis la sogs pa bstan pa thams cad kyi lta ba ni 'jig tshogs la lta ba ste/ bdag dang bdag gir lta ba yin la de rnam par bzlog pa la mkhas pas lta ba ngan pa thams cad sel ba'o/ /blo zhib cing zhes pa ni zab mo rtogs pa'o//rnam par shes pa shin tu 'gyur ba la mkhas pa zhes pa ni kun rdzob tu sems dang sems las byung ba'i bye brag ji lta ba bzhin du rtogs pa'o/ /de bzhin gshegs pa'i zhes pa la sogs pas de 'dra ba'i dam tshig la brtson par bya'o zhes gdams pa ste/de yang chos kyi sku'i ye shes la 'jug pa khong du chud par bya ba'i don du'o/ /de ltar shes pa la sogs pas de nyid kyi phan yon ston te/ de'i don ni rtse gcig pa'i ting nge 'dzin gyis yongs su bzung ba'i lam thabs dang shes rab dbyer med pa 'di ni phyir zhing gong nas gong du lam gyi mi mthun pa'i phyogs kun gzhi rnam par shes pa'i dri ma sbyangs pas myur du thams cad mkhyen pa nyid du nges par 'byung ba'o//de skad du yang / kun gzhi dri med bsod nams kyis/ /de bzhin gshegs par 'gyur ba'o/ /zhes 'phags pa stug po bkod pa'i rgyan las gsungs pa'i phyir ro//gzhan yang thabs dang shes rab ni 'dir lha'i bu rab rtsal sems kyis zhus pa las/ 'jam dpal ji ltar na byang chub sems dpa' thabs dang shes rab kyis nges par 'byung ba yin/ de nas 'jam dpal gzhon nur gyur pas lha'i bu rab rtsal sems la tshigs su bcad de smras pa//gang tshe sems ni chags med pa/ /bla med byang chub sems yin te/ /sems kyi rang bzhin mngon sum pa/ /de ni shes rab mtshan nyid do/ /sems rnams bskyed pa thams cad ni/ /byang chub tu ni yongs bsngo zhing / /byang chub sems la rab brtags pa//de ni thabs kyi tshul nyid do/ /zhes pa la sogs pa gsungs nas/ yang / shes rab thabs la mkhas pa yis/ /yan lag gnyis ldan lam 'di ni/ /shes ldan byang chub sems dpa' ste/ /des ni 'dren rnams nges par 'byung / /thabs dang mi ldan shes rab kyis//ma byung 'byung bar 'gyur ba med/ /shes rab med pa'i [(]thab [,]thabs [)]kyis ni/ /mkhas pa rab tu zhi mi 'gyur/ /shes rab dang ni thabs shes pa/ /de gnyis kun du 'dres gyur cing / /gnyis ka zung du 'jug gyur na/ /des ni dam pa rtogs par 'gyur/ / zhes pa la sogs pas lam de nyid kyi phan yon gong nas gong du rnam par sbyong ba nyid bstan to/ /ji ltar byis pa zhes pa la sogs pa nye bar gdams pa'i don de nyid mu stegs dang nyan thos la sogs pa'i spyod yul ma yin pa nyid du ston no/ /snang ba'i mtshan nyid la mngon par chags zhes pa ni bye brag tu smra ba la sogs pa gzung 'dzin khas len pa rnams kyi'o//zhi ba la sogs pa rnam par rig pa tsam du smra ba ni de lta ma yin no/ /'byung ba dang yon tan dang rdzas kyi rkyen du spyod pa zhes pa la rgyang 'phen pa rnams ni dngos po thams cad sa la sogs pa 'byung ba bzhi'i bdag nyid de/sems kyang 'byung ba bzhi las tha dad pa ma yin zhing / 'byung ba rnams sems dang bcas pa nyid du 'dod de/ de yang rnam pa gnyis las phyi rol gyi sa la sogs pa ni mngon par mi gsal ba'i sems can du 'dod la/ de nyid yongs su gyur cing 'phrod pa 'dus pa las byung ba sems can gyi lus su gtogs pa ni mngon par gsal ba'i sems pa can te/de nyid kyi phyir 'jig rten snga ma nas ma 'ongs shing phyi mar lus gzhan len pa ma yin te/ shi ba'i dus su gyur pa na mngon par mi gsal ba 'byung ba chen po nyid la nye bar zhi ba'o zhes pa'o//yang bye brag pa ni tshig gi don rnam pa drug ste/ rdzas dang yon tan las dang spyi/ /bye brag 'dul ba rnam pa drug /ces pa'o/ /de la rdzas ni rnam pa dgu ste/ 'byung ba bzhi mi rtag pa'i rdzas dang / bdag dang dus dang phyogs dang yid dang nam mkha' ste/ rtag pa'i rdzas rnam pa lnga'o//de la 'byung ba rnams kyang rags pa yan lag can gyi rdzas mi rtag la/ rdul phra mo'i rdzas ni rtag pa'o/ /yon tan rnams ni gzugs dang / sgra dang / dri dang / ro dang / reg bya dang / grangs dang bong tshod dang / tha dad pa dang sbyor ba dang / bral ba dang / gzhan dang gzhan ma yin pa dang /blo dang bde ba dang / sdug bsngal dang / sdang ba dang / 'dod pa dang / 'du bya ba'i shugs dang / 'bad pa dang / gsher ba dang / lci ba dang / snum pa dang / mthong ba dang / ma mthong ba ste nyi shu rtsa bzhi'o/ /las ni rnam pa lnga ste/ 'degs pa dang / 'jog pa dang / brkyang ba dang / bskum pa dang /'gro ba'o/ /spyi ni rnam pa gnyis te/ nyi tshe ba dang / chen po'o/ /nyi tshe ba ni ser zal la sogs pa rnams la ba lang nyid ces pa'i spyi gsal ba rnams dang mngon par 'du ba'i sgo nas 'brel pa gsal ba las tha dad pa'o/ /chen po ni dngos po thams cad yod pa nyid ces pa'am/gzhal bya nyid ces pa la sogs pa'i spyi'o/ /bye brag ni tshig gi don de rnams la bye brag gi blo skyed pa ste/ de rnams ma 'dres par byed pa'o/ /'du ba ni 'dir rdzas la sogs pa rnams la blo 'brel par byed pa ste/ 'di dang 'di'o zhes blo'i yul du byed pa'i chos kyi khyad par ro zhes kyang sngon gyi slob dpon dag gis bshad la/gzhan yang rdzas dang yon tan la sogs pa rten dang brten pa'i dngos po yul tha mi dad pa rnams la 'di la 'di zhes pa'i sgra'am blo zhig 'jug pa'i rgyur gyur pa 'brel pa can las rdzas tha dad pa ni 'du ba'i 'brel pa zhes bya'o//grangs can pa rnams kyis ni de kho na nyid nyi shu rtsa lngar 'dod de 'og tu bstan par bya'o/ /de 'dra ba mu stegs can gyi rjes su 'jug pa'i sgo zhes pa lam ste/ lam de'i spyod yul ma yin zhes pa'o/ /ma rig pa'i rkyen du lta ba la mngon par chags pa ni/ ma rig pa'i rkyen gyis 'du byed ces pa la sogs pa phyi dang /nang gi rten 'brel don dam pa'i dngos por zhen cing / 'di na bdag gam sems can med/ /chos 'di rgyu dang bcas pa ste/ /zhes bdag la sogs pas stong pa dang / de las gzhan pa'i rkyen las skye bar 'dzin pa'i sems rnam par g.yengs pa'am/yang spyir sgro 'dogs pa dang skur pa'i lta bas rnam par g.yengs pa yang dag pa ma yin pa'i kun du rtog pa gzhan gyi dbang gi mtshan nyid la mngon par chags pa dang / gzhan yang gzugs ni gzhig cing gzhom du rung ba'i mtshan nyid ces pa la sogs par 'dzin pa'i lta bar lhung ba'i bsam pas sna tshogs su brtags shing rtog pa nyan thos dang rang sangs rgyas kyi rjes su 'jug pa'i sgo'i spyod yul ma yin no zhes sbyar bar bya'o//lang ka'i bdag po zhes pa la sogs pas ni gdams pa'i don nyams su blangs pa'i phan yon ston no/ /theg pa chen po zhes pa lam gyi bdag nyid kyi'o//de las gdul bya ji lta bu 'dul bar 'gyur ba'i gzugs sna tshogs su ston par nus pa ni sangs rgyas dang byang chub sems dpa' chen po rnams kyi 'bras bu thob par byed cing / bye brag gi srid pa de 'khor los sgyur ba'i rgyal po la sogs pa 'jig rten pa'i 'gro ba khyad par can gyi lus 'grub pa'o//de skad du yang 'phags pa stug po bkod pa'i rgyan las/ /kun gzhi rnam par dag gyur na/ /sa yi rgyal por 'gyur ba yin/ /'dzam bu'i gling la dbang ba yin/ /'khor lo 'khor bar yang 'gyur ro/ /dga' ldan la sogs gzhal med du//mtshe ma rab kyi dbang por 'gyur/ /dbang po'i gnas su dbang por te/ /dbang sgyur gnas su de bzhin no/ /'dod pa'i khams kyi dbang po'i bdag /gzugs khams bdag po'ang de bzhin te/ /zhes pa la sogs pa gsungs so/ /khebs pa'i g.yogs ma rnam par shes pa sna tshogs kyi rlabs zlog par byed pa yin te zhes pa ni sems kyi de bzhin nyid la sgrib par byed pa 'jug pa'i rnam par shes pa sems las byung ba dang bcas pa sgrib pa gnyis kyis bsdus pa rnams sel bar byed pa'o//bdag tu lta ba la mngon par zhen pa las byung zhes pa ni de dag gi bdag gcig pa dang tha dad pa dang /sems dang bcas pa dang sems med pa la sogs par rang rang gi shes pas gtan la phab nas sgom par byed pa dang / srog dang rtsol ba bsdams pa la sogs pa'i thabs kyis dmigs pa dang bcas pa'i ting nge 'dzin cung zad bde ba la mi rtog pa zag pa'i gnyen por gyur pa ma yin pa skye ba ste/gnyis kyi don la chags zhes pa rtag pa dang mi rtag pa la sogs pa mtha' gnyis la chags pa'o/ /lang ka'i bdag po zhes pa la sogs pas mjug bsdu ba'i tshul gyis bsngags shing rjes su gdams pa'o/ /de nas de'i skabs su zhes pa la sogs pas ni 'bod 'grogs kyis gdams pa'i don nyams su blang ba nyid du go bgos pa sdud pa pos bsdus te bstan pa'o//'di snyam du sems te zhes pa ni ngag gi mthar snyam mo zhes bstan pa'i tshig dang sbrel lo/ /de la 'dir gang snyam du sems zhe na/ yang 'di ltar zhes pa la sogs pa'o/ /'phrul bas sprul pa dang bral zhes pa ni nyan thos la sogs pa gang dag mtshan dang dpe byad la sogs par snang ba la sangs rgyas kyi dngos po nyid du zhen pa ni/ de ltar bden pa ma yin zhing stong par sangs rgyas nyid kyis thugs su chud pa'o/ /blo gang gi phyir zhes pa ni de ltar thugs su chud pa mthar thug pa'i blo 'ga' zhig gi ched du lam gyi dus na zhi gnas dang lhag mthong zung du 'brel ba'i rnal 'byor bsgoms pas/de nyid mthar thug pa ni rnal 'byor can rnams kyi rnal 'byor gyi sgrar gdags pa ste/ rnal 'byor chen po mthar thug pa thugs su chud pa sangs rgyas kyi rang bzhin yin par 'bod 'grogs bdag gis don dam par mthong bar 'du byed pa'i mtshan nyid rnam par log pa'i rdzu 'phrul te/'bad pa dang rtsol ba med pa'i ting nge 'dzin dang shes rab kyi rnam par 'phrul bas de ltar blta'o snyam du sems pa'o/ /de la rnal 'byor can rnams rnal 'byor zhes pa ni ting nge 'dzin gyi bde ba la snyoms par 'jug pa rnams zhes pa dang sbyar te/zhi gnas kyi phyogs kyis bsdus pa'o/ /mngon par rtogs pa ni khong du chud par gyur zhes pa la sogs pa dang sbyar te/ lhag mthong gi phyogs kyis bsdus pa'o/ /de ltar zung du 'brel ba'i rnal 'byor goms pa'i stobs kyis mthar thug pa khong du chud pa'i phyir/sangs rgyas 'dis khong du chud do zhes rnal 'byor rnams kyi nang na yang mchog tu gyur pa'i rnal 'byor du gdags zhes pa'o/ /gzhan yang de ltar gyur pa de'i phyir 'bod 'grogs bdag gis mi dmigs pa'i thugs rje can gdul bya rnams kyi nyon mongs pa 'bar ba dang rnam par rtog pa ste/nyon mongs pa can ma yin pa'i mi shes pa 'byung ba'i rgyu bdag tu 'dzin pa bzlog pas de dag zad par byed cing / yang sems dang bsam pa'i rjes su zhugs zhes pa ni sems kyi rgyu ba dang de rnams kyi 'dod pas dmigs pa'i don ji lta ba bzhin mkhyen cing de dang mthun par sku la sogs pa ston pa'o//thams cad du khyab pa zhes pa ni ji ltar nam mkha'i ji tsam par chos kyi dbyings kyis kyang khyab la/ chos nyid ji snyed pa de tsam du sangs rgyas kyis kyang khyab pa ste/sku'i gsang ba bstan pa las/ /nam mkha'i tshad ni ji tsam pa/ /sangs rgyas gzugs kyang de tsam ste/ /'jig rten mgon pos dbu gtsug kyang / /nam mkha'i khams dang mtshungs pa lags/ /sku yis ji snyed khyab gyur pa/ /'od kyis kyang ni de snyed khyab//'od kyis ji snyed khyab gyur pa/ /gsung gis kyang ni de snyed khyab/ /gsung gis ji snyed khyab gyur pa/ /thugs kyis kyang ni de snyed khyab/ /ces pa la sogs pa gsungs so/ /thams cad mkhyen pa ni kun rdzob dang don dam pa'i rnam pa thams cad mkhyen pa'am/ yang na mkhyen pa gsum gyis bsdus pa ste shes rab kyi pha rol tu phyin pa'i mdo las 'byung ba bzhin no//byed pa'i mtshan nyid log ces pa ni sngar bstan pa ltar ram/ yang na thams cad mkhyen pa nyid mngon par 'du byed pa med cing lhun gyis grub pa thams cad las mngon par 'phags pa'i rdzu 'phrul gyis gnas pa yin no zhes de ltar lta ba'o//de mthong bas zhes pa la sogs pa snga ma de nyid kyi phan yon ston no/ /bde ba'i ting nge 'dzin zhes pa ni dpa' bar 'gro ba la sogs pa zag pa med pa'i bde ba dang ldan pa'i ting nge 'dzin no/ /snyoms par 'jug pa ni 'du shes dang tshor ba 'gog pa dang thod rgal gyi snyoms par 'jug pa'o//thugs su chud pa'i sa ni chos kyi sku'i ye shes so/ /tshig gi don gzhan ni shes par zad do/ /de ltar 'bod 'grogs la sogs pa'i gdul bya rnams la de bzhin gshegs pas don gyi chos bstan nas/ tshig gi sgo nas ston pa ni dang por yang sprul pa byin gyis brlabs pa dang /dngos su ston pa'i ltas bstan pa dang / de la 'khor rnams the tshom skyes pa dang / de nyid bsal ba'i don blo gros chen pos zhu bar gsol ba dang / de'i lan gsungs pa'o/ /de la dang po sprul pa byin gyis brlabs pa ni/ de nas bcom ldan 'das kyis zhes pa la sogs pa'o/ /lang ka'i bdag po ma skyes pa'i chos la bzod pa thob ces pa ni spyir gsung rab dag la gnas skabs rnam pa gsum du bshad de/ sbyor ba'i lam gyi gnas skabs na yang chos chen po la bzod pa'i phyir bzod pa zhes gsungs te/chos chen po ni ma skyes pa'i chos nyid 'di nyid la bshad do/ /yang sa dang po'i gnas skabs dang / brgyad pa'i gnas skabs su yang gsungs pa las 'dir ni brgyad pa yan chod kyis bsdus pa ste/ lang ka'i bdag po gnas shin tu gyur zhes pa la sogs pa gong du gsungs la/ de yang sa brgyad pa'i gnas skabs yan chod la 'thad pa'i phyir ro//bzod ces pa ni skye ba med pa'i chos nyid la sems gting tshugs shing / rgya mtsho chen po la gru gzings btang ba ltar chos nyid 'ba' zhig la mnyam par 'jog pa'o zhes sa bcu pa la sogs pa las kyang gsungs shing /mdo sde 'di nyid du yang gsal bar ston par 'gyur ro/ /de thob pa'i rgyu yang 'phags pa chos thams cad 'byung ba med par bstan pa las/ rigs kyi bu ngas kyang de bzhin gshegs pa mar me mdzad kyi drung du chos thams cad tshul gcig pa'o zhes bya ba'i don khong du chud par gyur nas/de'i 'og tu ngas mi skye ba'i chos la bzod pa thob po zhes gsungs so/ /gzhan yang sangs rgyas ni chos nyid du lta'i gzugs kyi skur ma yin zhes pa la sogs pa rgyu bzhi yang sngar bstan no/ /mthong ba myong ba ni tha dad pa lta bur mthong zhing / de yang sems kyi ngo bo nyid du rtogs pas myong zhes pa'o//tshig gi cha gzhan ni shes par zad do/ /de nas bcom ldan 'das kyis zhes pa la sogs pas chos ston pa la sogs pa'i ltas ston te/ sangs rgyas kyi sha'i spyan zhes pa ni gzugs can gyi dbang po 'di nyid gnas gyur pa 'am/gzhan yang mthu phul du byung ba dang ldan par gyur pas yul rnams 'dzin par snang ba ste/ de skad du yang / dbang po lnga rnams gzhan gyur na/ /don kun 'jug dang thams cad kyi/ /yon tan brgya phrag bcu gnyis 'byung / /'byor pa dam pa thob par 'gyur//zhes gsungs so/ /'dir don dam par ni ye shes kyi spyan nyid yin gyi/ gzugs can gyi dbang po ni 'thad pa ma yin te/ sangs rgyas rnams ni chos kyi sku/ /zhes gsungs pas so/ /tshig gi don gzhan ni shes par zad do/ /de nas byang chub sems dpa'i 'khor zhes pa la sogs pas gdul bya rnams the tshom skyes pa nyid du ston pa'o//sngon du zhes pa ni chos ston pa'i sngon du'o/ /ting nge 'dzin gyi bde ba la nang du mi gzigs par yul gzhan la rnam par g.yeng ba 'di ci zhig snyam du the tshom za ba'o/ /de nas zhes pa la sogs pas the tshom bsal ba'i don du zhus pa'o//rnam par spyod pa zhes pa ni khyad par du yang rnam par rtog pa'i rgyu ba'o/ /rnam par myos pa ni the tshom gyi dbang gis 'khrugs pa'o/ /rgyu dang rkyen zhes pa la rgyu ni nye bar len pa'i rgyu ste/ 'bras bu gang zhig skyed pa na/ /gtso bo lta bur snang ba'o//de yang rnam pa gnyis te/ 'bras bu 'ga' zhig rgyu gzhan du gtogs pa'i rgyu kho na las skye ba na/ 'bras bu bskyed nas rgyu'i rgyun ldog pa ni nye bar len pa'i rgyu ste/ ji ltar 'phags pa sA lu ljang pa'i mdo las bshad pa bzhin no/ /yang 'bras bu skyes kyang rgyu'i rgyan mi ldog pa rang gi rgyud du gtogs pa skyed par snang ba ni lhan cig byed pa'i rkyen te/de dag kyang rgyu'i gtso bo dang phal pa lta bur snang bas rgyu dang rkyen gyi dbye ba byas pa'o/ /yang 'ga' zhig rang gi rgyud du gtogs pa'i rgyu las kyang skye bar snang ba na 'bras bu rang dang 'dra ba skyed par byed pa ni nye bar len pa'i rgyu la mi 'dra ba ni lhan cig byed pa'i rkyen no//de la yang 'dra ba yang ngo shes pa'i blo tha mal pa'i yul du gyur pa'o/ /'dir de bzhin gshegs pas de dag gi lan gsungs pa ni rnam pa bzhi'i sgo nas ston pa las/ zhu ba po la bsngags par brjod cing 'dri bar bskul ba ni bcom ldan 'das zhes pa la sogs pa'o//de la 'jig rten gyi rang bzhin ni khams dang bag la nyal gyis bsdus pa'o/ /lta ba ngan pa ni 'jig tshogs la lta ba la sogs pa mngon du gyur pa'i khyad par rnams so/ /dus gsum gyi sems zhes pa ni sems dang sems las byung ba'i khyad par spyir bstan pa'o//gzhan ni shes par zad do/ /blo gros chen po zhes pa la sogs pas the tshom bsal ba'i thabs mdor bstan pa'o/ /de nas bcom ldan 'das kyis zhes pa la sogs pas gdul bya'i gtso bo la phan yon dang bcas pa'i chos bstan pas dris shig par bskul zhing bshad pa'i skabs dbye ba'o//de la mkhyen bzhin du zhes pa ni des 'dri ba nyid du mkhyen pa'o/ /cod pan rab tu g.yo ba ni lus kyi rgyan rnams kyi mchog tu gyur pa mgo bo'i cod pan yin la/ de yang de bzhin gshegs pa la 'dud cing phyag 'tshal ba la sogs pa'i stobs kyis rab tu g.yo ba'o//yang nang gi bdag nyid sems kyi rgyan rnams kyi mchog tu gyur pa ni shes rab yin zhing de yang yul la g.yo zhing 'jug pa'o/ /rnam par rtog pa'i gnas shin tu gyur nas zhes pa ni ji skad du/ rnam rtog gzhan du gyur na ni/ /dus rnams rtag tu ye shes dang //las rnams kun la thogs med la/ /'byor pa dam pa thob par 'gyur/ /zhes gsungs pa lta bu'o/ /sa'i mi mthun pa'i phyogs ni 'phags pa dgongs pa nges par 'grel pa las/ bcom ldan 'das kyis bka' stsal pa/ spyan ras gzigs dbang phyug kun du rmongs pa nyi shu rtsa gnyis dang /gnas ngan len mi mthun pa'i phyogs bcu gcig ste/ sa dang po la ni gang zag dang chos la mngon par zhen pa'i kun du rmongs pa dang / ngan song ba'i nyes pa la kun du rmongs pa dang / de'i gnas ngan len mi mthun pa'i phyogs so zhes gsungs te/mi mthun pa'i phyogs de yang 'jig rten chos kyi mchog gi gnas skabs man chod rgyu'i gnas skabs na yod pa ste/ ji skad du sa bcu'i mgon pos/ rnam rtog bzhi po ldan bsten pa/ /zhes bzod pa dang 'jig rten chos kyi mchog gi gnas skabs na go rims bzhin du skyes bu btags pa la brten pa'i rnam par rtog pa dang /gang zag rdzas la brten pa'i rnam par rtog pa gnyis dang ldan par gsungs pas so/ /de bzhin du ngan song ba'i nyes pa dang / de'i rgyur gyur pa'i bye brag 'ga' zhig la kun du rmongs pa dang /de'i gnas ngan len te 'phags pa'i shes rab kyis spangs pa ni bag chags dang bcas te spang ba nyid du gsungs pas bag chags kyi char gtogs pa 'am/ yang na gnas ngan len zag pa dang bcas pa'i phung po len par byed pa mthong bas spang bar bya ba'i nyon mongs pa nyid la sbyar bar bya'o//mi mthun pa'i phyogs zhes pa ni spang bya de rnams yod pa'i dus su sa dang po'i ye shes mi 'char zhing de rnams spangs pa'i rjes su 'byung bas so/ /sa gnyis pa la ni ltung ba phra mo'i 'khrul pa la kun du rmongs pa dang / las rnam pa sna tshogs la kun du rmongs pa dang /de'i gnas ngan len mi mthun pa'i phyogs so/ /'di rnams kyi don yang snga ma bzhin du shes par bya'o/ /gsum pa la ni 'dod pa'i 'dod chags kyi kun du rmongs pa dang / thos pa'i gzungs yongs su rdzogs pa la kun du rmongs pa dang / de'i gnas ngan len mi mthun pa'i phyogs so//bzhi pa la ni snyoms par 'jug pa la sred pa'i kun du rmongs pa dang / chos la sred pa'i kun du rmongs pa dang / de'i gnas ngan len mi mthun pa'i phyogs so/ /lnga pa la ni 'khor ba gcig tu mi phyogs pa nyid dang mngon du phyogs pa nyid yid la byed pa'i kun du rmongs pa dang /mya ngan las 'das pa la gcig tu mi phyogs pa nyid dang mngon du phyogs pa nyid yid la byed pa'i kun du rmongs pa dang / de'i gnas ngan len mi mthun pa'i phyogs so/ /drug pa la ni 'du byed kyi 'jug pa mngon sum du bya ba nyid la kun du rmongs pa dang / mtshan ma mang po kun du 'byung ba'i kun du rmongs pa dang / de'i gnas ngan len mi mthun pa'i phyogs so/ /bdun pa la ni mtshan ma phra mo kun du 'byung ba'i kun du rmongs pa dang / mtshan ma med pa gcig tu yid la byed pas thabs la kun du rmongs pa dang / de'i gnas ngan len mi mthun pa'i phyogs so//brgyad pa la ni mtshan ma med pa la rtsol ba'i kun du rmongs pa dang / mtshan ma rnams la mi dbang ba'i kun du rmongs pa dang / de'i gnas ngan len mi mthun pa'i phyogs so/ /dgu pa la ni chos bstan pa dpag tu med pa dang chos kyi tshig dang yi ge dpag tu med pa dang gong nas gong du shes rab dang spobs pa dang gzungs kyi dbang la kun du rmongs pa dang /spobs pa'i dbang la kun du rmongs pa dang / de'i gnas ngan len mi mthun pa'i phyogs so/ /yang 'phags pa gser 'od dam pa las/ gang chos ston pa tshad med pa dang tshig dang yi ge tshad med pa la mkhas par ma gyur pa'i rmongs pa dang /spobs pa la dbang ma thob pa'i rmongs pa dang / rmongs pa 'di gnyis sa dgu pa la sgrib po zhes gsungs so/ /yang mdo sde sa bcu pa las sa bcu pa la ni mngon par shes pa chen po la kun du rmongs pa dang / gsang ba phra mo la 'jug pa la kun du rmongs pa dang / de'i gnas ngan len mi mthun pa'i phyogs so/ /sangs rgyas kyi sa la ni shes bya thams cad la chags pa shin tu phra mo'i kun du rmongs pa dang / thogs pa'i kun du rmongs pa dang / de'i gnas ngan len mi mthun pa'i phyogs so zhes gsungs so//sa rnam par 'byed pa'i blos zhes pa la sa ni rtogs pa'i ye shes yin la/ de'i rgyun 'jug pa 'dra ba las dang po la sogs pa rnam par 'byed pa'i rgyu mtshan ni snga ma ltar mi mthun pa'i phyogs de dang de dag spangs pa'i sgo nas thob pa dang / rjes kyi gnas skabs kyi yongs su sbyong ba'i khyad par dang /sa gang la yon tan gyi rnam pa gang dang gang gtso bor ldan pa dang / nges pa'i tshig la sogs pa'i sgo nas te/ de la yongs su sbyong ba'i khyad par ni 'phags pa shes rab kyi pha rol tu phyin pa dang / sangs rgyas bgro ba las shes par bya'o/ / nges pa'i tshig ni dgongs pa nges par 'grel pa las/ sa dang po ni don che ba sngar 'dris pa ma yin pa 'jig rten las 'das pa'i sems thob nas dga' ba dang mchog tu dga' ba rgya che ba'i phyir rab tu dga' ba zhes bya'o/ /sa gnyis pa ni ltung ba phra mo dang 'chal pa'i tshul khrims kyi dri ma thams cad dang bral ba nyid kyi phyir dri ma med pa zhes bya'o//sa gsum pa ni ting nge 'dzin de dang thos pa'i gzungs de shes pa'i snang ba tshad med pa'i gnas nyid yin pa'i phyir 'od byed pa zhes bya'o/ /sa bzhi pa ni nyon mongs pa'i shing bsregs pa'i phyir byang chub kyi phyogs dang mthun pa'i chos sgom pa de ye shes kyi me 'od 'phro bar gyur pa'i phyir 'od 'phro can zhes bya'o//sa lnga pa ni byang chub kyi phyogs dang mthun pa'i chos de dag nyid thabs kyis sgom pa de las dbang bya bar dka' ba nyid kyi phyir shin tu sbyang dka' zhes bya'o//sa drug pa ni 'du byed kyi 'jug pa mngon sum du gyur pa nyid dang mtshan ma med pa mang du yid la byed pa mngon du gyur pa'i phyir mngon du gyur zhes bya'o/ /sa bdun pa ni mtshan ma med pa yid la byed pa bar chad med cing rgyun mi 'chad par ring du rjes su zhugs pa dang rnam par dag pa'i sa dang rjes su 'brel pa nyid kyi phyir ring du song ba zhes bya'o//sa brgyad pa ni mtshan ma med pa la lhun gyis grub pa nyid dang mtshan ma'i nyon mongs pa'i kun du 'byung bas mi bskyod pa nyid kyi phyir mi g.yo ba zhes bya'o/ /sa dgu pa ni rnam pa thams cad du/ chos ston pa'i dbang la kha na ma tho ba med pa'i blo gros shin tu yangs pa thob pa nyid kyi phyir legs pa'i blo gros zhes bya'o/ /sa bcu pa ni gnas ngan len gyi lus nam mkha' lta bu la chos kyi tshogs sprin chen po lta bus khyab cing khebs pa'i phyir chos kyi sprin zhes bya'o/ /sa bcu gcig pa ni nyon mongs pa dang shes bya'i sgrib pa shin tu phra mo spangs pa chags pa med cing thogs pa med par shes bya'i rnam pa thams cad mngon par rdzogs par byang chub pa nyid kyi phyir sangs rgyas kyi sa zhes bya'o zhes gsungs so//yang gser 'od dam pa las chos kyi sku nam mkha' lta bu la ye shes chen po'i sprin lta bus khyab par 'gengs pa'i phyir sa bcu pa ni chos kyi sprin zhes bya'o zhes kyang gsungs so//yang de nyid las/ rigs kyi bu de la byang chub sems dpa' sa dang po la gnas pa'i byang chub sems dpa' ni sbyin pa'i pha rol tu phyin pa gnon to zhes bya ba nas/go rims bzhin du sa bcu pa'i bar la pha rol tu phyin pa drug dang thabs la mkhas pa dang smon lam dang stobs dang ye shes kyi pha rol tu phyin pa gnon to zhes gsungs te/ de rnams kyang so so la gtso cher ldan pa yin te/ mdo sde gzhan dag las/byang chub sems dpa' sa dang po la gnas pa ni gtso bor sbyin pa'i pha rol tu phyin pa la sgrub ste/ lhag ma rnams kyang ci nus ci tshul gyis mi sgrub pa ma yin no zhes pa la sogs pa gsungs pas so/ /gzhan yang 'phags pa gser 'od dam pa las/ byang chub sems dpa'i sa dang po'i snga ltas ni stong gsum gyi stong chen po 'jig rten gyi khams gter bye ba khrag khrig brgya stong gis yongs su gang bar mthong ngo //sa gnyis pa'i snga ltas ni gang stong gsum gyi stong chen po 'jig rten gyi khams lag mthil lta bur gyur pa la/ rin po che bye ba khrag khrig brgya stong du mas legs par brgyan pa mthong ngo //sa gsum pa'i snga ltas ni bdag nyid dpa' zhing lag cha sra ba thogs nas phas kyi rgol ba thams cad 'dul bar mthong ngo / /sa bzhi pa'i snga ltas ni phyogs bzhi nas rlung gi dkyil 'khor bzhis thams cad dang ldan pa'i sa'i dkyil 'khor chen po la me tog sna tshogs kyis mngon du 'thor bar mthong ngo //sa lnga pa'i snga ltas ni rgyan thams cad kyis brgyan pa'i bud med kyi mgo la me tog tsam pa ka'i phreng ba 'dogs par mthong ngo / /sa drug pa'i snga ltas ni rdzing them skas bzhi dang ldan pa gser gyi bye ma brdal ba rnyog pa med cing dngas la yan lag brgyad dang ldan pa'i chus yongs su gang ba me tog ut+pa la dang ku mu ta dang pad ma dkar pos brgyan pa'i chu mthong ste/de la bdag nyid rtse dga' zhing yongs su spyod pa mthong ngo / /sa bdun pa'i snga ltas ni phyogs g.yas g.yon gnyis na sems can dmyal ba'i g.yang sa mthong ste/de nas bdag nyid ma smas ma nyams par slar ldog pa mthong ngo / /sa brgyad pa'i snga ltas ni phrag pa gnyis na ri dgas kyi rgyal po seng ge ral pa can cod pan thogs pa gcan gzan phra mo thams cad skrag par byed cing 'dug pa mthong ngo //sa dgu pa'i snga ltas ni 'khor los sgyur ba'i rgyal por mthong ste/ skye bo bye ba khrag khrig brgya stong du mas yongs su bskor cing mdun gyis bltas la/ mgo bo'i steng na rin po che sna tshogs kyis spras pa'i gdugs dkar po 'dzin pa mthong ngo //sa bcu pa'i snga ltas ni de bzhin gshegs pa'i sku mthong ste/ kha dog gser lta bu 'od 'dom gang ba tshangs pa bye ba khrag khrig brgya stong phrag du mas yongs su bskor cing mdun gyis bltas nas chos ston pa mthong ste zhes pa la sogs pa gsungs so/ /gzhan yang dgongs pa nges par 'grel pa las/bcom ldan 'das kyis bka' stsal pa/ spyan ras gzigs dbang phyugs de dag ni rnam par dag pa bzhi dang / yan lag bcu gcig gis bsdus par rig par bya'o/ /spyan ras gzigs dbang phyug de la sa dang po ni bsam pa rnam par dag pas bsdus pa'o//sa gnyis pa ni lhag pa'i tshul khrims rnam par dag pas so/ /sa gsum pa ni lhag pa'i sems rnam par dag pas so/ /sa bzhi pa nas bzung ste sangs rgyas kyi sa'i bar ni lhag pa'i shes rab rnam par dag pa gong nas gong du gya nom pas kyang ches gya nom par bsdus par rig par bya ste/de la yang mdo sde gzhan dag las/ bzhi pa la ni khyad par du byang chub kyi phyogs kyi chos sum cu rtsa bdun shes pa'i shes rab dang ldan la/ lnga pa la ni khyad par du bden pa bzhi rtogs pa'i shes rab bo/ /drug pa la ni khyad par du rten 'brel zab mo'i don rtogs pa'i shes rab dang ldan zhing /bdun pa la ni mtshan ma med cing rtsol ba dang bcas pa dang / brgyad pa yan chod ni mtshan ma med cing rtsol ba yang med pa'o zhes gsungs la dgongs pa nges par 'grel pa las kyang don gyi shugs kyis de ltar bstan pa'o//de la yan lag bcu gcig gang zhe na/ spyan ras gzigs dbang phyug mos pa spyod pa'i sa la byang chub sems dpa' chos spyod pa rnam pa bcu po dag la mos pa shin tu bsgoms pa'i phyir bzod pas sa de las yang dag par 'das nas byang chub sems dpa'i yang dag pa nyid skyon med pa la 'jug go//de yan lag des yongs su rdzogs pa yin yang ltung ba phra mo'i 'khrul pa kun du 'byung ba dag la shes bzhin du spyod par mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob bo//de yan lag des yongs su rdzogs pa yin yang 'jig rten pa'i ting nge 'dzin yongs su rdzogs pa la snyoms par 'jug pa dang / thos pa'i gzungs yongs su rdzogs pa thob par mi nus pas de la yan lag des yongs su ma rdzogs pa yin te/yan lag des yongs su rdzogs par bya ba'i phyir 'bad pas de yang thob po/ /de yan lag des yongs su rdzogs pa yin yang byang chub kyi phyogs dang mthun pa'i chos ji ltar thob pa dag gis de la mang du gnas par bya ba dang / snyoms par 'jug pa'i sred pa dang /chos la sred pa las sems lhag par btang snyoms su 'jog mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob po/ /de yan lag des yongs su rdzogs pa yin yang bden pa rnams rnam par spyad pa dang 'khor ba dang mya ngan las 'das pa dag la gcig tu mi phyogs pa nyid dang mngon par phyogs pa'i yid la byed pa lhag par btang snyoms su bzhag ste/thabs kyis yongs su zin pa'i byang chub kyi phyogs dang mthun pa'i chos rnams bsgom par mi nus pas de yan lag des yongs su ma rdzogs pa yin te/de yan lag des yongs su rdzogs par bya ba'i phyir 'bad pas de yang thob po/ /de yan lag des yongs su rdzogs pa yin yang 'du byed kyi 'jug pa ji lta ba bzhin mngon sum du byas nas de las skyo ba mang ba dang / mtshan ma med pa yid la byed pas mang du gnas par mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob po/ /de yan lag des yongs su rdzogs pa yin yang bar chad med pa dang /rgyun mi 'chad par mtshan ma med pa yid la byed pas mang du gnas par mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob po/ /de yan lag des yongs su rdzogs pa yin yang mtshan ma med par gnas pa de rtsol ba lhag par btang snyoms su bzhag pa dang /mtshan ma la dbang thob par mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob po/ /de yan lag des yongs su rdzogs pa yin yang rnam grangs dang mtshan nyid dang nges pa'i tshig dang /rab tu dbye bas rnam pa thams cad du chos ston pa la dbang thob par mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob pa'o//de yan lag des yongs su rdzogs pa yin yang chos kyi sku yongs su rdzogs pa so so yang dag par rig pa thob par mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob po//de yan lag des yongs su rdzogs pa yin yang shes bya thams cad la chags pa med pa dang / thogs pa med pa'i shes pa dang mthong ba thob par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang thob ste/de yan lag des yongs su rdzogs pa yin no/ /de yan lag des yongs su rdzogs pa'i phyir/ /yan lag thams cad yongs su rdzogs pa yin te/ spyan ras gzigs dbang phyug de dag ni yan lag bcu gcig po de dag gis bsdus par rig par bya'o zhes gsungs te/de ltar gsungs pa'i rim pa 'di nyid kyis byang chub sems dpa' dang / sangs rgyas kyi sa'i mtshan nyid kyang shes par bya ste/ sngar bstan pa'i yan lag de dang de dag gis thob cing rdzogs par byas pa ni sa de rnams kyi so so'i mtshan nyid do//gzhan yang sngar bstan pa ltar sa so so'i mi mthun pa'i phyogs de dang de dag spangs pas thob pa'i ye shes ni/ sa de rnams kyi so so'i mtshan nyid do/ /gzhan yang yongs su sbyong ba'i khyad par de rnams dang ldan pa dang / so so'i nges pa'i tshig la sogs pas kyang nye bar mtshon te/mtshan nyid rtogs par bya'o/ /'dir ji ltar rtog pa dang bral zhing ma 'khrul pa ni mngon sum yin no zhes rang gi ngo bo'i sgo nas mtshan nyid rnam par 'jog pa lta bur ni gzhag par ma nus te/ ye shes kyi rgyun rgyud gcig nyid yin pa'i phyir ro/ /'dir byang chub sems dpa'i tshogs dang mos pa spyod pa'i sa gang zhe na/'di lta ste/ theg pa chen po'i thar pa'i cha dang mthun pa'i dge bas bsdus pa/ thos pa dang bsam pa'i shes rab gtso bor gyur pa ni tshogs kyi sa yin la/ de nyid kyi nges par 'byed pa'i cha dang mthun pas bsdus pa 'jig rten pa'i bsgom pa las byung ba'i shes rab gtso bor gyur pa ni mos pa spyod pa'i sa'o//'di'i spros pa zhib tu ni 'phags pa shes rab kyi pha rol tu phyin pa'i mdo dang bstan bcos dag las shes par bya'o/ /gzhan yang nyan thos dang rang sangs rgyas kyi sa dang / khams gsum gyi sa'i rnam par gzhag pa yang gsung rab kyi phyogs gzhan las shes par bya ste/'dir gzhung mangs kyis dogs pas mi bri'o/ /byang chub sems dpa'i sa'i rnam par gzhag pa yang zhib tu ni 'phags pa sa bcu pa las shes par bya'o/ /'dir yang skabs kyi don ni byang chub sems dpa'i sa nyid yin par shes par bya'o//ting nge 'dzin gyi bde ba ni bsam gtan bzhi pas bsdus pa zag pa med pa'i bde ba ste/ ji skad du 'phags pa chos yang dag par bsdu ba las/ gnyen po'i sems dang / yid du 'ong ba'i sems dang / las su rung ba'i sems dang /'od gsal ba'i sems dang / drang ba'i sems so zhes gsungs pa lta bu'o/ /rnam par dpyod cing zhes pa ni rjes kyi gnas skabs na de'i rang bzhin ji lta ba bzhin du 'jal ba'o/ /ting nge 'dzin gyi sangs rgyas rnams kyis ni yongs su bzung zhes pa la/de'i don ni longs spyod rdzogs pa'i sku ni ting nge 'dzin gyi snang ba yin pas de'i bdag nyid yin la/ des sngar bstan pa bzhin du sku dang gsung dang thugs kyis byin gyis brlabs pa'o/ /gzhan yang sred pa la sogs pa mi mthun pa'i phyogs zhi ba'i bde ba las ni rnam par gnas pa ste/rjes kyi gnas skabs na yang ngo / /nyan thos dang rang sangs rgyas kyi ting nge 'dzin gyi nyes pa ni mi rtag pa dang mi gtsang ba la sogs pa mtshan mar dmigs shing thabs dam pa dang bral ba'o/ /mi g.yo ba dang zhes pa la sogs pa ni rnam par dag pa'i sa gsum bstan to//rin po che'i pad mo zhes pa la sogs pa sa bcu pa la longs spyod rdzogs pa'i sku'i sangs rgyas rnams kyis dbang bskur ba'i tshul ston to/ /de dang rjes su mthun zhes pa la sogs pa de nyid rgyas par ston pa'o/ /de'i don yang byang chub sems dpa' bdag nyid kyi rgyud yongs su dag pa dang /de bzhin gshegs pa'i byin gyi rlabs dang / chos kyi dbyings rnam par dag pa'i stobs kyis de lta bu'i rnam par snang ba 'byung ba'o/ /bsam gyis mi khyab pa'i yul zhes pa ni de 'dra ba'i rgyu dang rang bzhin la sogs pa nyan thos la sogs pa dang /sa bdun pa man chod kyi yul ma yin pa'i phyir ro/ /mngon par sgrub pa la mkhas pa zhes pa de nyid kyi don bshad pa ni/ spyod pa'i sa la gnas pa zhes pa la sogs pa ste/ ji skad du/ bsam gtan bzhi pa shin tu dag thob nas/ /mi rtog ye shes yongs su bzung ba dang //ji ltar rnam gnas yid la byed pa las/ /mthu grub pa yi dam pa thob par 'gyur/ /zhes gsungs pa'i don te/ bsam gtan bzhi pas thams cad kyis rung bar byas pa 'phel ba rab kyi mthar thug pa thob nas/ dngos por rnam par rtog pa med pa'i ye shes la gnas shing kun rdzob tu ji ltar ston pa bzhin du mos pa yid la byed pa ste/de nyid spyod pa'i sa la gnas zhes pas ston to/ /thabs la mkhas pa ni snga ma bzhin no/ /de 'dra ba'i rdzu 'phrul gyis zhing thams cad du song zhing sangs rgyas mchod pa dang / sems can smin par byas shing de rnams kyang sems snang ba'i rang bzhin tsam du rtogs pa'i ye shes kyi tshogs dang /tshogs gnyis mthar thug pas thob par 'gyur zhes pa'o/ /rnam pa gcig tu na/ byang chub sems dpa' rjes thob kyi gnas skabs su 'khor gsum sgyu ma lta bur rtogs pa'i shes rab kyis yongs su zin pa'i pha rol tu phyin pa rnams la spyod cing de nyid gong nas gong du yongs su rdzogs par byas pas thob par 'gyur zhes pa'o//de yang bden pa gnyis kyi thabs la mkhas pas yongs su bzung bas dngos por mi zhen cing de ltar spyod pa mi 'gal ba'o//gzhan ni shes par zad do/ /de nas lang ka'i bdag po zhes pa la sogs pas khyad par du mchod cing nyan pa dang mthun pa'i spyod lam phun sum tshogs pa ston to/ /me tog ces pa ni sil ma'o/ /phreng ba ni de nyid srad bus bsdus pa'am/ mu tig la sogs pa'i phreng ba'o//spos ni yongs su gyur pa'am sbyar ba las byung ba'i dri'o/ /bdug pa ni de nyid bsregs pa las byung ba'o/ /byug pa ni de nyid chu dang sbyar bas lus sam gos la byugs pa'o/ /gzhan ni shes par zad do/ /lha dang zhes pa la sogs pa la 'dir lha ni rnam pa gsum yod do zhes shes rab kyi pha rol tu phyin pa'i 'grel pa las bshad de/de la ming gi lha ni 'di lta ste/ 'khor los sgyur ba'i rgyal po la sogs pa'o/ /skye ba'i lha ni 'di lta ste/ rgyal chen bzhi'i rigs kyi lha nas srid pa'i rtse mo'i bar gyi lha rnams so//rnam par dag pa'i lha ni 'di lta ste/ sangs rgyas kyi chos kyi sku dang byang chub sems dpa' dang / rang sangs rgyas dang / dgra bcom pa rnams so zhes bshad do/ /gzhan yang de nyid las/ /lha ni rnam pa bzhi yod de/ ming gi lha ni ji ltar da ltar gyi mi'i rgyal po la lha zhes brjod pa lta bu'o//skye ba'i lha ni rgyal chen ris bzhi nas 'du shes med 'du shes med min gyi bar gyi lha rnams so/ /rnam par dag pa'i lha ni 'di lta ste/ mi'i gnas 'dir 'phags pa rnams 'byung ba gang yin pa'o/ /skye ba yongs su dag pa'i lha ni khams gsum pa'i lha'i nang nas 'phags pa rnams 'byung ba gang yin pa'o zhes 'byung ngo //de ltar gsum dang rnam pa bzhi bstan pa las/ 'dir ni ming dang skye ba'i lha rnams bzung ste/ ji skad du dam pa'i chos pad ma dkar po'i mdo las/ /nga yi zhing 'di shin tu bde//lha rnams kyis ni rtag tu gang / /zhes gsungs pa'i phyir ro/ /klu ni rnam pa bzhi ste/ lha'i klu ni lha'i gzhal med khang rnams 'dzin cing mi ltung bar byed pa'o/ /mi'i klu ni sprin 'byin cing char 'beb pa'o/ /yul gyi klu ni sa dang rgya mtsho yongs su 'dzin pa'o/ / rgyal po'i klu ni rgyal po'i rin po che'i bang mdzod bsrung ba'o/ /gnod sbyin zhes bya ba ni khro gtum che zhing dpa' ba 'jigs su rung ba zhes bya'o/ /de yang rnam pa gsum ste/ sa la gnas pa dang / nam mkha' la gnas pa dang / lha'i nang na gnas shing lha'i g.yog byed pa'o//dri za zhes bya ba ni rol mo byed pa ste/ dris 'tsho ba'i phyir dri za zhes bya'o/ /shes rab kyi pha rol tu phyin pa'i 'grel pa las/ 'di ni lha'i rol mo mkhan lha rnams kyi rjes su 'brang ba sems mnyen zhing nges pa bsod nams lha rnams pas chung ba ste/ rin po che sna bdun gyi ri'i bar na gnas pa'o/ /de la mi'am ci zhes bya ba ni lha glu la mkhas pa ste/ dri za rnams dang lhan cig tu lha rnams kyi g.yog byed de/ lha rnams gang du dgos pa'i tshe res kyis phyi bzhin du 'gro bar byed/ yang the tshom bskyed pa'i lha zhes kyang bya ste/lus dud 'gro yin la dbyibs mi 'dra zhing byad bzhin bzang ba dang / mgo bo la rwa gcig yod pas mis mthong ba'i tshe/ the tshom skyes nas mi yin nam 'di ci zhes dpyod par byed pas de ltar bstan pa'o/ /gzhan yang de mi'i gzugs su bsgyur nas chos nyan du 'ongs pa'i phyir mi'am ci zhes kyang bya'o//yang shA ri'i bus zhus pa'i mdo las/ lha 'dre sde brgyad thams cad kyang mi'am ci zhes kyang gsungs so/ /lto 'phye chen po ni sbrul chen po ste/ rkang pa med pas ltos 'phye zhing 'gro ba'i phyir lto 'phye zhes bya'o//de yang phal cher klu'i rigs su gtogs pa'o/ /srin po yang 'di nyid du bstan pa 'bod 'grogs la sogs pa ste/ gnod sbyin gyi rigs su gtogs pa'o/ /'phags pa mya ngan las 'das pa las/ lha zhes bya ba ni mya ngan med pa ste/ rtag tu bde ba'i phyir na lha zhes bya'o//de yang bde ba shas che ba la dgongs te bstan pa'o/ /gzhan yang lha zhes bya ba ni rang gi 'od kyis mun pa bcom nas snang ba chen por gyur pa'i phyir lha zhes bya'o zhes pa la sogs pa gsungs so/ /mi zhes bya ba ni don la mang du sems pa'o zhes bshad de/ de nyid bstan bcos dag la yid shas che ba'i don gyis na mi'o zhes gsungs pa'i don yin no/gal te 'dir sprul pa'i mchod pas ni bdag nyid yid tshim pa dang / tshogs yongs su rdzogs par mi 'thad de/ brdzun pa nyid kyi phyir ro zhe na/ ma yin te/ chos thams cad kyang de dang 'dra ba nyid yin zhing /de ltar rang nyid kyis rtogs pa dang gzhan la yang ston pas sgrub pa'i mchod pa nyid du yang 'gyur ba'i phyir ro/ /bcom ldan 'das kyis zhes pa la sogs pas dngos su dri ba'i tshig nye bar 'god pa'o/ /bstan pa brjod pa las kyang 'di ni zhes pa'i don gsung rab dag las/bdag gis dri ba'i don chos dang chos ma yin pa gnyis po 'di dang / 'di gnyis mi dmigs shing spang bar bya ba nyid du yang bshad ces pa'o/ /sprul pa rnams kyis bstan zhes pa ni de gdul bya sna tshogs kyi bsam pa dang bstun nas chos ston pa'i phyir chos dang chos ma yin pa'i bye brag sna tshogs su bshad pa'o//ngo bo'i de bzhin gshegs pa ni chos dang longs spyod rdzogs pa'i sku ste/ de la chos kyi sku ye shes kyi bdag nyid du gyur pas ni ting nge 'dzin gyi sgo'i spyod yul te/ so so rang rig pa'i ye shes kyi yul spros pa dang bral zhing 'od gsal ba nyid byang chub sems dpa' rnams la ston pa ste/des bdag po'i rkyen byas nas byang chub sems dpa' rnams la de lta bu'i rtogs pa 'char ba'o/ /longs spyod rdzogs pa'i sku ni gdul bya khyad par can rnams la sku mtshan dang dpe byad kyi rnam pa dang /gsung chos 'chad par snang ba na des rkyen byas shing sngon goms pa'i stobs kyis rnam par mi rtog pa'i ye shes so sor rang rig gi don rtogs pa nyid 'char gyi/ brjod pa dang 'dres par snang ba'i rnam par rtog pa'i phyogs su lhung ba ni mi ston zhes pa'o//tshig gi don gzhan ni shes par zad do/ /bcom ldan 'das kyis bka' stsal pa/ lang ka'i bdag po chos gnyis po smros shig ces pa ni lan gyi dmigs shes par bya ba'i don du 'bod 'grogs la slar dris pa'o/ /srin po'i dbang po zhes pa la sogs pas yang bsnan te zhus pa'o//rdo rje'i mchog ni rdo rje rin po che'o/ /chos nyid kyang spang bar bgyi na chos ma mchis pa lta ci smos zhes pa'i don ni/ shes rab kyi pha rol tu phyin pa la sogs pa nas/ de dag mi dmigs shing spang bar bya ba nyid du gsungs pa'i chos dang chos ma yin pa ni gang lags/tshul ji ltar spang bar bya ba nyid du 'gyur zhes pa'o/ /rtog pa'i mtshan nyid du lhung ba ni chos dang chos ma mchis pa rtog pas brtags pa'i mtshan nyid de/ rtog pa las gzhan ma yin zhing de nyid yin pas rtog pa'i mtshan nyid du lhung zhes pa ste/'di 'dra ba'i tshig 'og nas 'byung ba rnams kyang 'di bzhin du shes par bya'o/ /de nyid gzugs kyi phung po don gzhan du snang yang de ltar bden pa ma yin pas 'byung ba dang 'byung ba las gyur pa ma lags pa'o/ /de lta na ci'i phyir de ltar snang zhe na/thams cad kun gzhi rnam par shes pa'i rlabs nyid du ma rig pas de 'dra ba'i khyad par gyi mtshan nyid ma mchis pa skra shad 'dzings pa'i rang bzhin dang 'dra bar gnas pa/ shes pa 'khrul pa'i dri ma dang bcas shing kun rdzob tu zad par 'gyur ba'i yul can zhes pa ste/'khrul pa'i snang ba de nyid la 'khrul pa'i yul du gyur pa zhes pa'i chos dang ldan pas yul can zhes bya'o/ /de ltar 'khrul pa dang 'khrul pa'i yul te/ tha dad pa ma yin zhing gcig par gyur pa de rnams ji ltar spong bar 'gyur zhes pa'o//bcom ldan 'das kyis zhes pa la sogs pas lan rgyas par ston te/ de las re zhig shes pa gnyis la ltos nas chos dang chos ma mchis pa'i dbye ba 'thad pa dang mi 'thad pa nyid du ston te/ de'i don yang bum pa la sogs pa'i 'dus byas 'chags pa'i rang bzhin te/rags pa'i mi rtag pa dang / skad cig tu skye zhing 'jig pa'i chos can te/ de ltar mi rtag pa nyid kyi phyir don dam par rang bzhin med pa'o/ /de'i khyab pa'i don ni mi rtag pa yang rgyu med pa ni mi 'thad la/ rgyu dang bcas pa la yang skye ba rnam pa bzhi la sogs pas khyab la/de yang mi 'thad pa nyid du 'og nas ston pas so/ /de ltar rang bzhin med pa yin yang byis pa rnams kyi blo la tha dad par snang ba bzhin du spyir chos dang chos ma mchis pa'i dbye ba yang byis pa'i blo 'khrul pa'i don ji ste med ces pa'o/ /nye bar bzung zhes pa ni rnam rtog la brten cing gnas pa'i do gang na'o//yang de nyid 'phags pa rnams kyi yang dag pa'i ye shes kyi don ni yod pa ma yin zhes pa ste/ shes par zad do/ /lang ka'i bdag po zhes pa la sogs pas ni byis pa'i shes pa'i don rnam par dbye ba yod pa nyid dpe'i sgo nas rgyas par ston pa'o//de'i don ni/ bum pa dang snam bu la sogs pa rgyu rkyen phan tshun tha dad pa las byung ba'i dngos po rnams ni byis pa'i shes pa'i snang don tha dad pa yin gyi/ ye shes kyi don tha dad pa med pa 'ba' zhig tu ma zad kyi me nyid du rang bzhin gcig cing / me lce 'bar ba'i nye bar len pa'i rgyu snga ma rang bzhin mtshungs pa gcig las byung ba'i me lce'i 'od phyi ma rnams lhan cig byed pa'i rkyen khyim dang gnas la sogs pa'i shing gi bye brag tha dad pas 'od ring ba dang thung ba dang gsal mi gsal la sogs pa'i bye brag tu snang ba de bzhin du 'di la yang zhes pa byis pa'i shes pa'i snang ngo 'am/shes bya kun rdzob pa 'di la chos dang chos med pa tha dad pa'i bye brag yod par ci'i phyir mi bzung zhes bya'o/ /de la khyim ni tha mal pa rnams kyi'o/ /gnas ni dge 'dun la sogs pa'i'o//khang pa ni rgyal po'am khyim bdag 'byor pa can rnams kyi'o/ /de ltar rgyu 'dra yang rkyen gyi bye brag gis dus gcig tu 'bras bu'i bye brag tha dad pa 'ba' zhig tu ma zad kyi/ sa dang sa bon la sogs pa rgyu dang rkyen gcig las byung ba'i 'bras bu'i rgyun rgyud 'ga' zhig kyang snga phyi'i rnam pa tha dad par dmigs shing /de bzhin du phyi nang gi chos skye ba'i chos can te/ phyi rol gyi rten cing 'brel par 'byung ba 'o ma las zho la sogs pa dang / nang gi rten cing 'brel par 'byung ba ma rig pa'i rkyen gyis 'du byed la sogs pa phung po dang khams dang skye mched du gtogs pa thams cad dang /khams gsum du skyes pa'i sems can gyi rgyud kyis bsdus pa'i chos thams cad la bde ba'i khyad par te/ 'ga' zhig ni zag pa dang bcas pa 'dod pa'i yon tan gyi bde ba yin la/ 'ga' zhig ni bsam gtan dang po la sogs pas bsdus pa'i bde ba yin zhing 'ga' zhig ni zag pa med pa'i bde bar 'gyur ba'o//dbyibs ni ring po la sogs pa ste sems can dang sems can ma yin pa mthun par rtogs pa'o/ /de bzhin du rjod par byed de/ brjod par bya ba'i khyad par tha dad de/ 'og nas don rjod par byed pa'i bye brag sna tshogs ston par 'gyur ba'o//lha la sogs pa'i 'gro ba'i khyad par yang de bzhin te shes par zad do/ /gzhan yang dmigs pa rnam par rig pa tsam du mtshan nyid gcig pa'i rnam par shes pa yul la mngon par 'dzin pa rab tu 'jug pa'i khyad par rab dang 'bring dang tha ma ste/'ga' zhig ni shes bya ji lta ba dang ji snyed pa la gsal ba dang myur ba nyid du 'jug la/ gzhan ni de bas zhan pa dang ches zhan pa nyid du 'jug pa'o/ /de rnams ni phal cher kun nas nyon mongs pa'i khyad par tha dad pa nyid bstan pa yin la/ rnam par byang ba'i bye brag kyang de bzhin du shes par bya'o//gzhan yang rnal 'byor sgom pa rnams kyi rnal 'byor gyi lam yang goms pa dang dbang po la sogs pa'i bye brag gis gsal bar snang ba rab dang rab kyi mtha' la sogs par snang na/ byis pa so so'i rnam par rtog pa las byung ba ste 'phral du rtog nas sgro btags pa'am/rtog pa snga ma'i sa bon las byung ba'o/ /lang ka'i bdag po zhes pa la sogs pas ni don bsdus te bstan pa ste/ rtog pa'i mtshan nyid mi 'dra bas de'i gzung cha yang tha dad ces pa'o/ /lang ka'i bdag po de la zhes pa la sogs pas ni chos dang chos med pa'i rang bzhin dang /de rnams spong ba'i tshul rgyas par bstan pa'o/ /rgyu las yon tan dang rdzas kyis gzhi btsugs zhes pa ni mu stegs can rnams kyi dbang du byas na dbang phyug dang rdul phra rab kyi rgyu las sngar bstan pa bzhin du rtag pa dang mi rtag pa la sogs pa'i rdzas dang yon tan nyi shu rtsa bzhi dang /gzhan yang rdzas la brten pa'i las la sogs pa tshig gi don drug bye brag pas brtag pa rnams dang / yang yon tan gsum cha mnyam pa gtso bo'i rang bzhin dang / dbang phyug la sogs pa rnam 'gyur sna tshogs kyi rgyur brtag pa dang /de las rnam par 'gyur ba'i rdzas sna tshogs kyi rgyur brtag pa dang / de las rnam par 'gyur ba'i rdzas sna tshogs su grangs can la sogs pas brtag pa'o/ /nyan thos dang rang sangs rgyas kyi dbang du byas nas/ las dang nyon mongs pa'i rgyu las phung po la sogs pa'i rdzas dang /de la brten pa'i 'dod pa'i yon tan dang / gzhan yang rnam par byang ba'i rgyu lam gyi bden pa las 'phags pa rnams kyi yon tan dang / gang zag la sogs pa'i rdzas su btags pas gzhi btsugs zhes pa ste/ de la sogs pa 'di dang 'di lta bu'i rnam pa yin no yod do zhes sgrub pa'i rnam pa lta bu blo'i ngo na snang ba rnams ni chos zhes bya'o//de 'dra bar mngon par zhen pa'am zhen pa'i yul ni gnyen po dang rigs pa'i stobs kyis spang bar bya ba nyid de/ rang gi mtshan nyid bden pa nyid du so sor rnam par brtag pa mi bya'o//gal te de lta na rdza ma dang bum pa la sogs pa rtog pa med pa'i mngon sum gyi tshad ma la/ phyi rol tha dad pa'i rnam par snang ba mi 'thad do zhe na/ skyon med de/ thog ma med pa nas rtog pa'i bag chags kyis dkrugs shing bslad pa'i sems nyid de ltar snang ba na tha dad kyi dngos por zhen pa'o//lus su ma grub ces pa ni phyi rol tha dad pa'i ngo bor ma grub pa'o/ /de nyid ji ltar spang zhe na/ mi bden pa'i don blos bzhag pa de lta bur lhag mthong zhes pa ste/ yang dag pa'i shes rab kyis rab tu mthong zhing goms pas spong bar 'gyur ro//de lta bas na mdo sde 'di'i don ni 'di ltar shes par bya ste/ spyir rnam pa thams cad mkhyen pa nyid du nges par 'byung ba'i lam ni sngar bstan pa bzhin du thabs dang shes rab zung du 'brel pa yin la/ de dag las kyang shes rab kyi pha rol tu phyin pa ni lam gyi gtso bo yin te/'dir kun nas nyon mongs pa thams cad kyi rtsa ba ni ma rig pa dngos por mngon par zhen pa yin te/ ji skad du/ dngos por mngon gzhan yod na ni/ /'dod chags zhe sdang mi zad 'byung / /lta ba ma rungs yongs su 'dzin/ /de las byung ba'i rtsod par 'gyur//de ni lta ba kun gyi gzhi/ /zhes pa la sogs pa gsungs pas so/ /gzhan yang / sdug bsngal phyin ci log blo dang / /sred pa kun nas 'ching ba'i rgyu/ /skye bo gang la de med pa/ /'di yi skye ba mi 'byung ngo / /zhes gsungs te/ sdug bsngal la bde bar phyin ci log pa'i ma rig pa dang /bde ba la mngon par 'dod cing chags pa'i sred pa ni 'khor bar 'ching bar byed cing sdug bsngal bskyed pa'i rgyu nyid du gsungs te/ sbrang bu me lce'i tshogs la mngon par rgyug pa bzhin no/ /de 'dra ba'i ma rig pa la sogs pa spong bar byed pa ni yang dag pa'i shes rab yin gyi byams pa la sogs pa thabs kyi rnam pa'i blo ni de dang 'gal ba med pas gnyen po nyid du mi 'gyur te/ji skad du/ byams sogs rmongs dang 'gal med phyir/ /nyes kun de yis tshar gcod min/ /stong nyid lta bas grol 'gyur gyi//sgom pa lhag ma de don yin/ /zhes gsungs pas so/ /gzhan yang / yan lag 'di dag thams cad ni/ /thub pas shes rab don du gsungs/ /de yi phyir na sdug bsngal dag /zhi bar 'dod pas shes rab bskyed/ /ces kyang gsungs so/ /'phags pa shes rab kyi pha rol tu phyin pa las kyang /shes rab med na mig med pha rol phyin lnga 'di/ /dmigs bu med pas byang chub reg par nus ma yin/ /gang tshe shes rab [(]gyis [,]kyis [)]ni rab tu zin gyur na/ /de tshe mig rnyed gyur cing 'di yi ming thob po/ /zhes pa la sogs pa rgyas par gsungs so//yang 'phags pa dkon mchog brtsegs pa las kyang / byams pa byang chub sems dpa' sems dpa' chen po shes rab spyod pa rnams ni nyes pa thams cad kyi nang na lci ba byung du zin kyang / shes rab kyi stobs kyis rdul du rlog par byed de/ de'i rgyus log par ltung bar 'gro bar yang mi 'gyur ro//byams pa dper na me'i phung po 'bar ba la ni shing gi tshogs chen po bsnan/ ji lta ji ltar bsnan pa de lta de ltar de phyir zhing cher 'bar bar 'gyur gyi me shi bar mi 'gyur ro/ /byams pa de bzhin du byang chub sems dpa' shes rab spyod pa'i shes rab kyi me 'bar ba de la ni nyon mongs pa'i len pa ji lta ji ltar bsnan pa de lta de ltar de'i shes rab kyi me 'bar bar 'gyur gyi shi zhing zad par mi 'gyur ro//byams pa de lta bas na rnam grangs 'dis kyang 'di ltar byang chub sems dpa' shes rab spyod pa rnams kyi spyod pa ni/'jig rten thams cad dang mi mthun par rig par bya'o zhes rgya cher gsungs so/ /de'i don yang shes rab kyi stobs dang ldan pa rnams kyis rang gi rgyud la nyon mongs pa skyes pa na/ de nyid kyi rkyen gyis de'i rang bzhin spros pa dang bral zhing 'od gsal ba nyid du rtogs pas nyon mongs pa de nyid zhi bar byed pa'o//de skad du yang 'phags pa bden pa gnyis bstan pa las/ lha'i bu 'di lta ste dper na sbrul kha gdug pa'i rig sngags 'don pa des na/ sbrul kha gdug pa'i gdug pa rab tu zhi bar byed do/ /lha'i bu de bzhin du/ gang nyon mongs pa rnams kyi rigs rab tu shes pa de'i nyon mongs pa rnams shin tu mi dmigs pa'i tshul gyis rab tu zhi bar 'gyur ro/ /lha'i bus smras pa/ 'jam dpal nyon mongs pa'i rigs de gang yin/ 'jam dpal gyis smras pa/ lha'i bu don dam par na chos thams cad shin tu ma skyes ma byung dngos po med pa la/gang kun du rtog pa de ni nyon mongs pa rnams kyi rigs so zhes gsungs so/ /gzhan yang / rang bzhin stong pa nyid du rtogs pa'i shes rab ni lam gyi gtso bo yin par sku'i gsang ba bstan pa las kyang gsungs te/de skad du yang / sems can kun gyi bsod nams kyi/ /phung po ji snyed yongs gzung ba/ /de snyed byang chub sems dpa' yi/ /byang chub sems las rab tu 'byung / /byang chub sems dpa'i bsod nams kyi/ /phung po ji snyed brjod pa bas/ /dam pa'i chos ni yongs 'dzin na//de bas bsod nams ches mang ngo / /dam chos 'dzin pa'i bsod nams ni/ /sangs rgyas kun gyis nan tan du/ /bskal pa bye bar brjod mdzad kyang / /mthar yang phyin par 'gyur ma lags/ /dam pa'i chos ni 'dzin pa dang / /byang chub sems dpa'i bsod nams des//stong pa nyid la mos pa yi/ /bcu drug char yang mi ri lags/ /stong pa nyid la 'dir mos na/ /byang chub sems kyang mi gtong dang / /dam pa'i chos ni 'dzin bgyid pa/ /'di ni bsod nams sdud pa'o/ /zhes gsungs so/ /de la 'dir shes rab kyi dmigs pa'i yul la log par rtog pa dag snang bas de dag rnam par bzlog cing don ji lta ba bzhin du gtan la dbab par bya ba'i yin la/de yang rnal 'byor gyi dbang phyug 'phags pa'i ye shes thob pa rnams kyis ni/ mngon sum gyi tshad ma nyid kyis gtan la dbab par nus mod kyi/las dang po pa'i byang chub sems dpa' rnams kyis ji ltar rtogs par bya zhe na/ yang dag pa'i gsung rab thos pa dang / de la brten nas don ji lta ba bzhin du 'jal bar byed pa rjes su dpag pa'i tshad ma bsam pa las byung ba'i shes rab kyis gtan la dbab par bya ste/ji skad du/ de la sgro btags gcod byed pa/ /shes par byed pa'i gtan tshigs kyis/ /rnal 'byor dbang rnams mngon sum gsal/ /zhes gsungs so/ /shes rab kyi dmigs pa'i yul yang bden pa gnyis te/ shes bya thams cad des bsdus pa'i phyir ro//de la 'dir kun rdzob ni de'i dmigs pa'i yul du mi 'thad de/ 'phags pa ga ya mgo ri'i mdo las/ thabs ni chos tha dad pa shes pa'o zhes gsungs pa dang / yang sems can gyi dbang po dang spyod pa la 'jug pa shes pa'o zhes gsungs pas kun rdzob kyi bden pa ni thabs kyi yul yin la/yang shes rab ni chos kyi dbyings dbyer med pa shes pa'o/ /shes rab ni sems can dmigs su med pa shes pa'o zhes gsungs pas de'i yul ni don dam pa'i bden pa nyid yin no/ /gzhan yang sa bcu'i mgon po chen pos/ don dam shes pa'i phyir bshad do zhes shes rab kyi nges pa'i tshig gsungs pa'i phyir ro zhe na/skyon med de/ 'dir kun rdzob kyi de bzhin nyid shes rab kyi pha rol tu phyin pa'i yul yin la/ de'i de bzhin nyid kyang don dam par 'dus te/ ji skad du/ rab 'byor 'jig rten gyi kun rdzob kyang gzhan la/ don dam pa yang gzhan pa nyid ni ma yin te/ kun rdzob kyi de bzhin nyid gang yin pa de nyid don dam pa'i de bzhin nyid do zhes gsungs pa'i phyir ro/ /gzhan yang shes rab kyis ni kun rdzob la kun rdzob nyid du shes te/ de nyid don dam pa shes pa yang yin no/ /de la 'dir shes par bya ba phyi'i don dgag pa dang /snang ba sems tsam du sgrub pa dang / don dam par sems kyi rang bzhin stong pa nyid du gtan la dbab pa dang / de nyid de bzhin gshegs pa'i snying po'am rigs nyid du bstan pa dang / rigs de nyid sbyong bar byed pa'i lam gyi rim pa dang / sbyangs pas rnam par dag pa thob pa'i tshul/mdo'i brjod bya'i don rnam par phye ste gong du bstan pa de bzhin du shes par bya'o/ /re zhig phyi'i don dgag pa ni rnam pa lnga'i sgo nas shes par bya ste/ gtan tshigs 'jug pa'i rten chos can dang / rtags kyis dgag par bya ba dang / de rnam par bkag pa'i bsgrub bya dang /gtan tshigs dang / dpe'i tshul bstan pa'o/ /de'i dang po la rnam pa gnyis te/ pha rol pos brtags pa nyid chos can du 'jog pa dang / snang ba tsam chos can du 'jog pa'o/ /de las dang po ni rang gi rgyud gtan tshigs sbyor ba'i tshe 'thad pa ma yin te/brtags pa la de ltar blos ma shes na chos can du bzhag pa'i ldog pa de nyid tshad mas ma grub pas de la rten pa'i phyogs kyi chos ma grub par 'gyur ro/ /ji ste brtag pa la brtags pa nyid du shes na/ de ni mi bden pa'i don blos sgro btags pa yin pas de nyid kyi tshe/dgag bya khegs shing bsgrub bya sgrub pa'i phyir rtags kyi byed pa don med par 'gyur bas so/ /'dir thal ba'i gtan tshigs kyis gzhan gyi phyogs 'gog pa na de 'dra ba chos can nyid du 'thad de/ gzhan dag gis phyi'i don rdul phra rab cha shas med pa du ma 'dus pa nyid du khas blangs pa na/sngon gyi slob dpon dag gis/ drug gis cig char sbyar bas na/ /phra rab rdul cha drug tu 'gyur/ /drug po dag ni go gcig na/ /gong bu rdul phran tsam du 'gyur/ /zhes pha rol pos brtags shing khas blangs pa'i rdul phra rab de nyid chos can du bzhag nas/ de dag nyid kyis khas blangs pa'i gtan tshigs kyis gcig pa dang bsags pa nyid 'gog pa ste/ji ltar dbus na gnas pa'i rdul la/ phyogs bzhi dang steng dang 'og na gnas pa'i rdul gyis sbyar zhing bltas pa na/ shar phyogs kyi rdul gyis sbyar ba'am/ bltas pa'i phyogs de nyid du rdul gzhan rnams kyis sbyar zhing bltas par khas len na/shar phyogs kyi rdul de nyid kyi go sar thams cad thim pas/ gang du rdul phra rab kyi tshad tsam du 'gyur zhing / de nyid kyi phyir bsags pa mi 'thad ces pa'o/ /'on te rang rang gi phyogs so sor sbyar zhing bltas na/dbus kyi rdul cha drug tu 'gyur/ /zhes pa ste/ bsam par shes par zad do/ /des na rang gi rgyud kyi gtan tshigs kyis/ rang nyid dam gzhan dag la dgag pa rtogs par byed pa na/ 'dir chos can ni gzugs la sogs pa phyi rol chad pa'i rnam par rgol ba dang / phyir rgol ba la sogs pa la mthun par snang ba na chos can te/ snang tshod tsam mngon sum la sogs pa'i tshad mas grub pa chos can ma grub pa'i nyes pa las grol ba'o/ /dgag bya ni rnam par rig pa sgyu ma tsam du smra ba'i lugs kyis phyi rol bden pa'i dngos por yod pa 'gog pa'o//'dir la la dag bden pa'i dngos por yod pa ni dgag par mi nus so snyam du sems pa ni mi 'thad de/ 'di ni rigs pa'i stobs kyis dgag par bya ba yin la/ de yang dgag par bya ba'i yul grub pa cig ni 'gog pa ma yin te/ tshad ma dngos po'i phywa mkhan dngos po 'chos byed nyid du thal ba'i phyir ro//gal te dgag bya'i dngos po ma grub na 'gegs par byed pa'i don med do zhe na/ ma yin te/ dgag bya'i dngos po med pa la med pa nyid du rang ngam gzhan gyis sngar ma rtogs pa rtogs par byed pa tsam la bkag ces bya'o/ /byed pa'am bya ba gzhan ni yod pa ma yin no//'dir gzhan dag ji ltar snang ba'i chos can nyid dgag par bya ba yin te/ gzhan du na chos can gyi snang ba mi ldog pas mtshan ma zil gyis mi gnon cing / de'i phyir mtshan ma'i 'ching ba las mi grol ba la sogs pa'i skyon du 'gyur ba'i phyir ro zhes 'dod do//'di ni mi 'thad de/ chos can rigs pa'i stobs kyis bkag ces kyi de tsam gyis chos can du snang ba ldog pa ni ma yin te/ snga ma ltar tshad ma dngos po'i byed pa por 'gyur ba'i phyir ro/ /gzhan yang de skad du smra ba 'di ni tshad ma'i 'jug pa mi shes pa'i rnam par 'gyur ba nyid du gsal rab tu snang bas mkhas pa rnams kyis rgyang bsrings te spang bar bya'o//gzhan yang chos can du snang ba tsam ni mtshan ma'i 'ching bar 'gyur ba ma yin te/ de bzhin gshegs pa la yang rjes thob kyi snang ba de 'dra ba yod par gsungs pa'i phyir ro/ / gzhan yang snang ba tsam gyi chos can 'di nyid med ces 'gog na/ mngon sum gyi tshad ma dang 'gal bar 'gyur ro/ /gal te tha snyad pa'i mngon sum gyis gzugs la sogs pa snang tshod du yod par grub pa ni mi 'gog la 'di nyid rigs pa dam pa'i don yod pa 'gog ste/ de las bzlog pa snang ba rigs pa'i ngor yod pa ni tha snyad kyi mngon sum gyis grub pa ma yin te/ skye bo thams cad de kho na nyid mthong bar 'gyur ba'i phyir ro zhe na/ 'di ni mi 'thad de/ de lta na snang ba 'di'i rang bzhin rigs pa'i ngo na yod pa yin nam/ 'on te ma yin/snga ma ltar na ji ltar yin lugs tshad mas dgag par mi nus te/ sngar bstan pa ltar tshad ma dngos po'i phywa mkhan nyid du 'gyur ba'i phyir ro/ /gnyis pa ltar na phyi rol du snang ba'i chos can dang rigs pa'i ngor yod pa gnyis phan tshun gcig gi bdag nyid gcig ma yin pas/rigs ngor yod pa bkag kyang snang ba bkag par mi 'gyur te/ ji ltar rta bkag pas glang po bkag par mi 'gyur ba bzhin no/ /de ltar yang mdo 'di nyid du ston par 'gyur te/ blo gros chen po ba lang gi dngos po ni rta'i bdag nyid ma yin/ rta'i dngos po ni ba lang gi bdag nyid ma yin te/de gnyis ni rang gi mtshan nyid du med pa yang ma yin te/ de gnyis rang gi mtshan nyid du yod do/ /de bzhin du blo gros chen po chos thams cad mtshan nyid du med pa yang ma yin te/ de dag ni yod do/ /de bzhin du chos thams cad stong pa nyid dang skye ba med pa dang ngo bo nyid med pa yang rig par bya'o zhes gsungs so//de'i don yang chos thams cad ni rang rang gi ngo bo la gnas pas rang sel ba ni ma yin te/ des na snang ba tsam gyi chos can yang rigs pa'i don yod pa bden pa'i dngos pos stong yang snang ba tsam gyi rang bzhin med pa ni ma yin te/ji ltar ba lang rta'i dngos pos stong pa yang ba lang gi ngo bor med pa ma yin pa bzhin no/ /gal te 'dir snang ba bzhin nyid rigs pa'i ngor yod pa bden pa'i dngos po bkag pa ni snang ba bkag pa yin te/ bkag pa snang ba dang 'brel ba'i phyir ro zhe na/ma yin te/ de lta na ba lang nyid rta'i dngos por yod pa bkag pa yang ba lang bkag par 'gyur te/ bkag pa ba lang gi dngos po dang 'brel ba'i phyir ro/ /gal te ba lang dang de nyid rta'i dngos por yod pa ni gcig pa ma yin pas rta'i dngos por yod pa bkag kyang /ba lang bkag par mi 'gyur ro zhe na/ de ni sngar gyi don la yang mtshungs so/ /gzhan yang pha rol pos 'dod pa ltar na sgra lta bu'i chos can la/ de nyid rtag pa yin pa bkag pas kyang sgra bkag par 'gyur te/ sgra nyid rtag pa ma yin zhes bkag pa sgra dang 'brel pa'i phyir ro//gal te 'dir sgra lta bu'i chos can de nyid rtag pa yin na ni/ ji ltar yin pa bzhin du tshad mas dgag par mi nus la/ chos can de rtag pa'i bdag nyid min na sgra dang rtag pa gnyis phan tshun mi gcig pas rtag pa bkag pas sgra bkag par mi 'gyur ro zhe na/skabs kyi don yang de dang mtshungs pa nyid du sngar bstan no/ /gal te de lta na skabs kyi don 'di ni phan tshun gcig gis gcig stong pa mu stegs pa rnams kyi 'dod pa ste/ stong pa nyid thams cad kyi tha shal du 'og nas ston pa'i don de nyid du 'gyur ro zhe na/skyon med de/ ji ltar snang ba'i chos can de nyid phyi rol bden pa'i dngos po'am/ de las gzhan shes pa la sogs pa'i dngos por yod pa dang / med pa nyid du blo'i mdun du brtags pa'i mtha' thams cad rim gyis 'gog par 'gyur bas/ kun nas nyon mongs pa thams cad kyi sa bon 'gog cing /de nyid kyis de dag ldog par 'gyur bas/ rnam pa thams cad mkhyen pa nyid du nges par 'byung ba'i lam yin la/ phyi rol pa la sogs pas 'dod pa'i gcig gis gcig stong pa ni de ltar ma yin pas mi mtshungs pa nyid du gsal bar snang ngo //'dir bden pa'i don gyis stong pa'i snang ba tsam du gnas shing de ltar shes pas ni/ su yang 'ching ba nyid du mi 'gyur ba'o/ /yang gzhan dag snang ba tsam gyi chos can 'di nyid don dam pa'i bden pa gtan la 'bebs pa'i skabs su snang tshod du yang med ces 'gog ste/de la mngon sum gyis gnod par mi 'gyur te/ don dam pa'i bden pa gtan la 'bebs pa'i skabs su tha snyad kyi mngon sum gyi byed pa mi 'jug pa'i phyir ro/ /de'i byed pa ma brtags na nyams dga' ba kun rdzob tsam du 'jug pas/ kun rdzob gtan la 'bebs pa'i skabs su snang ba tsam gyi chos can mngon sum gyis grub ste/skabs der snang ba med ces 'gog pa ma yin pas mngon sum gyi gnod pa mi 'byung ngo zhe na/ de la yang dpyad pa snga ma nyid mtshungs te/ ji ltar snang ba 'di'i rang bzhin don dam gtan la 'bebs pa'i skabs su/snang tshod tsam du yod pa yin nam 'on te ma yin/ snga ma ltar na ji ltar yin pa bzhin du tshad mas dgag par mi nus la/ phyi ma ltar na chos can dang dgag bya gnyis mi gcig pas de 'dra ba'i dgag bya bkag kyang / phyi rol lta bur snang ba'i chos can bkag par mi 'gyur ro//gzhan yang chos can nyid dgag bya yin na dgag bya ni bsgrub par bya ba las bzlog pa mi mthun pa'i phyogs yin pas/ de la gtan tshigs yod na ni ci rigs par 'gal ba'am ma nges pa nyid du 'gyur la/ de la gtan tshigs med na yang ma grub pa nyid kyis nye bar 'gyur bas ni tshangs pas kyang spang bar mi nus so//des na 'dir gzugs la sogs pa phyi rol lta bur snang ba'i chos can la phyi rol bden pa'i dngos pos yod pa bkag kyang / snang ba tsam gyi rang bzhin ma 'gags pas sgyu ma'i glang po la sogs pa ltar snang ba dang stong pa zung du 'jug pa'i sgyu ma lta bu yin no zhes pa ni/dgag bya bkag pa'i bsgrub bya ste/ rnam par gcad pa tsam gyi med dgag ni ma yin te/ chos can de'i chos su mi 'thad pa'i phyir ro/ /tshul 'di nyid 'og nas zhib tu bstan par bya'o/ / de ltar yang rigs pa mthar thug gis grub cing de la tshad ma'i gnod pa gzhan yang mi 'byung ba ste/ 'og nas bstan par bya'o/ /de ltar sgrub par byed pa'i gtan tshigs ni mdo sde 'di nyid las kyang du ma bstan mod kyi/ re zhig gcig dang du ma dang bral ba'i phyir zhes/ gzugs ni rdul phran gzhig pa na//rdul phran cha ni yod ma yin/ /yang dag tu na gzugs med kyang / /rnam par shes pa gzugs ltar snang / /zhes gsungs pa dang sbyar ro/ /gal te gtan tshigs 'di ni ma grub ste/ mu stegs bye brag pa rnams ni gzugs la sogs par snang ba rags pa yan lag can gyi rdzas gcig gi bdag nyid yin te/de yang yan lag du ma la mngon par 'du ba'i sgo nas 'brel cing khyab pa yan lag gi rdzas ni gcig yin la/ yan lag ni du ma yin pa'i phyir ro/ /yang rang gi sde ba kha cig gi lugs kyis kyang 'dus pa rags pa ni du ma yin la/du ma rtsom par byed pa'i rdul phra rab so so ba ni gcig yin par 'dod do/ /gzhan yang grub pa'i mthas blo ma bsgyur ba gang dag khang bzangs gcig dang ri gcig ces pa 'am khang bzangs du ma zhes pa la sogs par rnam par 'jog ste/ des na gtan tshigs 'di ma grub po snyam du sems na skyon med de/re zhig mkhas pa rnams kyi dbang du byas na ri dang khang bzangs la sogs pa cha sna tshogs su snang ba'i mngon sum nyid kyis de nyid gcig yin pas khegs shing / gcig pa ma grub pa de 'dra ba bsags pa'i du ma nyid kyang khegs te/des na snang ba tsam gyi rang bzhin 'di nyid la gcig dang du ma bral bar mngon sum gyi tshad ma nyid kyis grub po/ /gal te cha sna tshogs su snang ba'i mngon sum 'di nyid don dam pa 'jal bar byed pa'i rigs pa mthar thug gcig yin nam/ 'on te tha snyad pa'i mngon sum kun rdzob 'jal bar byed pa yin/dang po ltar na de 'dra ba'i rigs pa mthar thug la sna tshogs su snang ba ni de bzhin du bden pas du ma dang bral ba nyid du mi 'grub po/ /phyogs gnyis pa ltar na yang tha snyad pa'i mngon sum don dam pa'i de kho na nyid la 'khrul bas/de la cha sna tshogs su snang yang dngos po'i rang bzhin gcig yin pas gcig dang bral ba nyid du mi 'grub po zhe na/ skyon med de/ cha sna tshogs su snang ba tha snyad pa'i mngon sum yin mod kyi de la de ltar snang ba bden na yang snang ba dang mthun par sna tshogs nyid du bden gyi snang ba sna tshogs su snang ba la bden pa de las gzhan gyi dngos por bden pa ni mi 'thad de/de lta na shes pa thams cad kyi gzung yul bden pa nyid du 'gyur te/ nam mkha' la zla ba gnyis su snang ba yang gnyis su snang ba las gzhan gcig gi dngos por bden pa dang / smig rgyu la chur snang ba la sogs pa yang de ltar snang ba las gzhan smig rgyu la sogs pa dngos por bden pa'i phyir ro/ /de'i phyir gzung yul bden pas blo 'khrul pa mi srid pa nyid du 'gyur ro/ /gal te 'dir zla ba gnyis su snang ba gcig tu ni bden mod kyi/de lta na yang snang ba dang mthun par bden pa ma yin pas/ de ltar snang ba'i blo 'khrul ba nyid du 'jog la/ zla ba gcig tu snang ba ni snang ba dang mthun par gcig nyid du bden pas blo ma 'khrul pa zhes bya'o/ /shes pa'i bye brag gzhan yang de bzhin du shes par bya'o zhe na/ma yin te/ 'dir snang ba dang mi mthun par bden zhes pa ni 'gal ba nyid du 'gyur te/ 'di ltar zla ba gnyis su snang ba de nyid gcig tu bden zhes pa'i don ni gnyis su snang ba de'i rang bzhin gcig nyid yin zhes par 'gyur la/ gnyis su snang ba gcig dang mi mthun zhes pa'i don ni de'i rang bzhin gcig ma yin zhing rnam par mi mthun pa'o//des na mi mthun par bden pa zhes pa ni de'i rang bzhin ma yin pa yin zhes pa ste/ rang gi tshig dang 'gal bar 'gyur ba'o/ /yang tha snyad pa'i mngon sum la cha sna tshogs su snang ba de kho na nyid kyi dngos por med pa ni mi 'gal te/de lta na yang gcig gi dngos por bden pa 'gal bas phyogs gnyis las gang yin yang rung ste gcig pa'i dngos por yin pa ni khegs par 'gyur ba'o/ /yang gal te 'dir cha sna tshogs su snang ba'i mngon sum gyi snang ba de nyid gcig yin pa khegs kyang /sna tshogs de rnams rtsom par byed pa'i rdul phra rab gcig po de 'dra ba yod pa ni mi khegs te/ ji ltar du mar snang ba'i mngon sum gyi snang ba de nyid me yin pa khegs kyang / de skyed par byed pa'i me gzhan la rgyab na yod pa mi khegs pa dang mtshungs so//de'i phyir de de 'dra ba'i gcig po des brtsams pa'i du mar snang ba 'di yang snang ba dang mthun par du ma nyid yin pa yang mi khegs so zhe na/ skyon med de/ de 'dra ba'i rdul phra rab gcig po ni sngar bstan pa ltar sngon gyi slob dpon dag gis thal bar gyur pa'i gtan tshigs kyis dgag pa 'am/gzhan yang / bsags mi rung phyir rdul gcig min/ zhes gsungs pa ltar rang rgyud kyi gtan tshigs kyang sbyar bar nus te/ rdul phra rab 'dus par snang ba ni chos can yin la/ de nyid snang ba dang mthun par gcig gi dngos por bden pa ma yin te/bden na bsags par mi rung ba'i phyir zhes pa'o/ /khyab pa la sogs pa'i don ni sngar bstan pa bzhin du shes par bya'o/ /yang rnam pa gzhan du na/ rdul phra rab tu snang ba ni/ gcig gi dngos por bden pa ma yin te/ bsags par snang ba'i phyir ro zhes gtan tshigs la sogs pa sbyar bar bya ste/ gzhan gyi sgra la sogs pa la brten nas de 'dra ba'i don khas mi len pa rnams la yang / de ltar snang ba 'char ba nyid de/ ji ltar rtag pa dang gtso bo la sogs pa snang ba 'byung ba bzhin no//des na 'dir phyogs chos ni rang rig pa'i mngon sum nyid kyis grub par zad do/ /khyab pa'i don yang de dag bsags par snang ba'i don med ci mi bden na ni/ /gcig gi dngos por 'gal la/ de ltar snang ba bden na yang / snang ba dang mthun par bsags pa'i dngos po nyid du bden te/sngar bstan pa bzhin no/ /de yang gcig pa nyid dang 'gal te/ sngar gnas pa'i rdul gang zhig la rdul gzhan dang gzhan gyis sbyar zhing bsags pa na/ bdag nyid thams cad kyis sbyar na ni snga ma de nyid la thim zhing yul rgyas par khegs pa mi 'thad pas bsags pa nyid mi 'thad la/phyogs kyi phyogs gcig gi sbyar na/ 'byar ba dang ma 'byar ba'i cha gnyis su 'gyur bas gcig pa nyid 'gal ba'o/ /gal te 'dir rdul gcig pa ni khas mi len te/ de dag kyang du ma nyid 'ba' zhig yin pas rags pa rtsom par byed pa ni rdul du ma thug pa med pa nyid du 'gyur ro zhe na/ma yin te/ de lta na shin tu rags pa'i gzugs ri bo la sogs pa dang / phra ba nyi zer gyi rdul lta bu la de dag rtsom par byed pa'i rdul mang nyung gi khyad par med dam/ 'on te yod ces brtag par bya'o/ /dang po ltar na des brtsams pa'i gzugs la che chung med par thal te 'bru'i phung po bzhin no//gnyis pa ltar na mang ba dang nyung ba'i mtha' ni grangs kyi tshad kyis bsdus pas/ nyi zer gyi rdul ni rtsom par byed pa'i rdul grangs brgya chad pa 'di snyed cig las med do zhes khas len dgos la/ de'i mtha' ni gcig pa nyid du khas len dgos pa ste/mig tshums la rtse gcig tu soms shig ces pa'o/ /gzhan yang shin tu phra ba'i rdul la yang / /lus can gyi dngos por thogs pa dang bcas pa tshad med pa nyid du khas len pa ni/ blo gros rags pa'i rnam par 'gyur ba 'ba' zhig tu zad do//gzhan yang bye brag pas yan lag can gyi rdzas gcig tu 'dod pa ni/ g.yo ba dang mi g.yo ba la sogs pa'i 'gal ba du ma'i sgo nas kyang / sngon gyi slob dpon dag gis bkag pas 'dir mi spro'o/ /de skad du gsung rab kyi phyogs gzhan las kyang / cha shas su ni rnam phye na/ / gzugs zhes bya ba yod ma yin/ /cha shas de yang rnam phye na/ /cha zhes bya ba'ang yod ma yin/ /zhes pa la sogs pas gsungs so/ /gtan tshigs 'di'i khyab pa yang / /gcig dang du ma ni dngos pos bsdus pa'i phyogs la/ rnam gcod yongs gcod kyi 'gal ba nyid yin te/gang yang rung ba cig bkag pa gzhan grub pa la rag las pa'i phyir/ /rtag pa dang mi rtag pa nyid bzhin no/ /des na dngos po la gcig dang du mas khyab cing / de 'dra ba'i khyab byed bkag pa'i ngo bo ste/ yang dag gi gcig dang du ma dang bral zhing / tha snyad du gcig dang du mar snang ba'i ngo bo la/bden pa'i dngos pos stong zhing snang ba ma 'gags pa sgyu ma lta bu'i rang bzhin gyis khyab ste/ 'di'i don zhib tu ni dbu ma snang ba'i rnam par bshad pa de kho na nyid kyi sgron ma las shes par bya'o/ /gtan tshigs sbyor ba'i tshul yang / gang gcig dang du ma dang bral ba'i ngo bo de ni sgyu ma nyid yin te/dper na sgyu ma'i glang po la sogs pa bzhin no/ /gzugs la sogs pa'i phyi rol gyi rnam pa snang ba yang gcig dang du ma dang bral ba'i ngo bo yin pa'i phyir zhes pa ste/ rang bzhin gyi gtan tshigs sam rnam grangs kyis na khyab byed mi dmigs par yang 'gyur te/ ji skad du slob dpon ka ma la shI las bshad pa bzhin no/ /gal te 'dir sgyu ma'i glang po la sogs pa ni rnam par shes pa'i ngo bo bden pas/ dpe ma grub po zhe na/ de ltar bden pa nyid ni 'og nas 'gog par 'gyur mod kyi/ 'dir ni re zhig de ltar snang ba phyi rol gyi dngos por gzhag pa'i cha nas bden pa ma yin zhing /de 'dra ba'i gcig dang du mas stong pa nyid dper byed pa'o/ /de la 'dir gzhan dag tshul de ltar phyi rol gyi don bkag pa ni/ don dam pa nyid bkag pa yin la/ kun rdzob tu ni rnam par shes pa bzhin du phyi rol gyi don kyang yod do/ /gzugs la sogs pa don byed nus pa'i rang bzhin sems las tha dad pa'i rnam pa nyid du mngon sum gyis grub pa'am/yang 'ga' zhig /du ba las ni mer shes te/ /chu skyar las ni chu bzhin du/ /blo ldan byang chub sems dpa' yi/ /rigs ni mtshan ma dag las shes/ /zhes gsungs pa'i tshul du/ la rgyab kyi me la sogs pa rjes su dpag pa'i tshad mas grub pa'i phyir ro zhe na/ mi 'thad de/ de ni thog ma med pa'i dus nas gnyis su rtog pa'i bag chags kyis bslad pa'i sems nyid de ltar snang ba ste/ ji ltar rmi lam gyi gnas skabs na grong la sogs pa snang ba bzhin no//don zhib tu ni 'og nas ston par 'gyur ro/ /gzhan yang kun rdzob tu phyi'i don yod na/ ji ltar bye brag tu smra ba 'dod pa ltar/ gzugs la sogs pa snang ba 'di nyid phyi'i don yin nam/ gzhan du na mdo sde ba rnams kyis gzugs la sogs par snang ba ni don gyis gzhag pa shes pa'i ngo bo nyid du gyur pa'i rnam pa yin gyi/don ni de 'dra ba'i rnam pa 'jog pa snang ba las gzhan du gyur par khas len pa bzhin du/ 'dir yang kun rdzob tu de 'dra ba'i snang ba 'jog pa snang ba las gzhan du gyur pa nyid du 'dod ces brtag par bya'o/ /de la dang po gzugs la sogs par snang ba 'di phyi'i don yin na/rnam pa med pa'i phyogs khas blangs pas shes pa las so so la rnam par 'byed pa mi 'thad pa dang / don rig pa'i shes pa dang / shes pa rang nyid rig pa'i shes pa gnyis khyad par med par thal ba dang / kun rdzob tu yang sgo lnga'i rnam par shes pa mi 'thad par 'gyur ba'o//dang po'i don ni gzugs la sogs pa'i rnam par snang ba phyi'i don nyid yin zhing shes pa de 'dra ba'i rnam pas kha ma bsgyur ba myang ba tsam gyi rang bzhin yin pas/ 'di ni gzugs rig pa'i shes pa yin gyi sgra rig pa la sogs pa ni ma yin no zhes pa la sogs pa'i rnam par dbye ba mi 'thad de/de ltar rnam par 'byed pa'i rgyu mtshan gzugs la sogs pa'i rnam par snang ba med pa'i phyir ro/ /gal te myong ba'i rang bzhin yin pa'i phyir gzugs nyid rig pa yin no/ /zhe na ma yin te/de lta myong ba'i rang bzhin yin pas sgra rig par yang ci ste mi 'gyur/ des na myong ba'i rang bzhin tsam ni don bye brag pa la nye ba'i rgyu med pas/ bye brag 'ga' rtogs par 'jog pa'i rgyu mtshan du mi 'thad do/ /gal te shes pas sngon po la sogs pa'i gzugs bzung ba'i phyir/gzugs rig par 'jog go zhe na/ de ci ma grub nas ma grub pa sgrub par ji ltar 'gyur te/ don de nyid gzung ba nyid du sgrub par byed pa'i skabs yin pa'i phyir ro/ /gzhan yang don gyis bzhag pa'i myong ba'i khyad par 'ga' zhig la brten nas/ don gyi khyad par 'ga' zhig rtogs par 'jog go zhe na/rnam pa las ma gtogs pa'i myong ba'i khyad par de 'dra ba ni grub pa med do zhes tshad ma rnam par gtan la dbab pa las bshad pa'i rjes su 'brangs te rtogs par bya'o/ /'dir rnam pa'i khyad par khas len na ni shes pa sngon po'i rnam par snang ba las sngon po nyid rtogs kyi gzhan ni ma yin no zhes kun rdzob tsam du rnam par dbye ba 'thad par 'gyur ba'o//yang gnyis pa'i don ni shes pa la yul gyi rnam pa snang ba med na/ myong rig tsam gyi rang bzhin du rang dang gzhan la khyad par med pas/ 'di ni don rig pa yin la 'di ni rang rig pa yin no zhes pa'i khyad par mi 'thad de/ sngar bstan pa nyid kyi rjes su 'brangs te rtogs par bya'o/ /gsum pa'i don ni gzugs dang sgra la sogs pa snang ba phyi'i don yin na/ de las ma gtogs pa'i mig gi rnam par shes pa la sogs pa ni/sems rab tu btud de bltas kyang myong ba med do/ /gal te 'dir don de rnams la 'dzin pa dga' gdung la sogs pa'i rnam par nang du nyams su myong ba 'di nyid do zhe na/ ma yin te/ de ni gcig tu rang rig pa 'ba' zhig yin gyi dbang po sgo lnga'i rnam shes gzhan rig pa'i shes pa ni de ma yin no//rnam pa gzhan du na rang nyid 'ba' zhig rig pa'i shes pa rgyun chad par thal bar 'gyur ba'i phyir ro/ /de ltar na snang ba 'di nyid phyi'i don du mi 'thad do/ /phyogs gnyis pa yang rigs pa ma yin te/ snang ba las gzhan du gyur pa la/ ji ltar snang ba 'di kho na/kun rdzob ces sngon gyi slob dpon dag gis kun rdzob kyi mtshan nyid rnam par gzhag pa de 'dra ba med pas kun rdzob nyid du mi 'thad do/ /gzhan yang / blo ni kun rdzob yin par 'dod/ ces sgra'i blo'i yul du gyur pa kun rdzob yin par gsungs pa dang / mdo sde 'di nyid las kyang / dam pa'i don du rang bzhin med/ /rang bzhin med las 'khrul pa gang / /de ni kun rdzob bden pa yin/ /zhes gsungs pas/ de kho na nyid kyi don las phyin ci log tu 'khrul pa'am/ 'khrul pa'i yul kun rdzob nyid du gsungs te/ de la yang snang zhing myong ba nyid kyis khyab pas/snang ba las gzhan du gyur pa ni kun rdzob nyid du mi 'thad do/ /gzhan yang 'dir kun rdzob tu yod ces pa'i don ni/ ma brtags na nyams dga' ba blo'i ngo na snang ba tsam yon gyi yod ces pa'i sgra'i don gzhan ni grub pa med do/ /de'i phyir snang ba las 'das pa ni kun rdzob tu yod ces byar mi rung ngo //gal te de 'dra ba'i rigs pas dpyad pas/ phyi'i don kun rdzob pa 'gog na/ rnam par shes pa la yang mtshungs te/ de yang gcig dang du ma'i rang bzhin du dpyad na ma grub pa'i phyir ro zhe na/ de ltar mtshungs pa ma yin te/'dir rnam par shes pa don dam par gcig dang du ma'i rang bzhin dang bral ba'i phyir kun rdzob tu yang med do zhes 'jog na ni khyab pa ma grub la/ kun rdzob tu gcig dang du ma'i rang bzhin dang bral ba'i phyir zhes gtan tshigs su sbyor na ni/ de 'dra ba'i gtan tshigs ma grub ste/chags sdang la sogs pa'am/ gzugs dang sgra la sogs pa sna tshogs su snang ba'i shes pa ni tha snyad pa'i mngon sum gyi tshad ma nyid kyis don byed pa'i rang bzhin tha dad pa nyid du myong bas du ma nyid yin la/ gang gi tshe yul gyi rnam pa snang ba med pa/ nang gi bde ba de ltar skyes la ma 'gags pa ni/ don byed pa'i rang bzhin gcig nyid du rang rig pa'i mngon sum gyi tshad mas myong bas gcig pa nyid de/ des na kun rdzob tu gcig dang du ma dang bral ba'i phyir zhes pa ma grub po/ /gal te de lta na phyi'i don kyang don dam par snang ba dang snang ba las gzhan du mi 'thad pa'i phyir kun rdzob tu'ang med ces 'jog na ni/gtan tshigs khyab par ma grub pa nyid du 'gyur la kun rdzob tu snang ba dang snang ba las gzhan du mi 'thad pa'i phyir zhes 'god na yang gtan tshigs ma grub ste/ kun rdzob tu ni tha snyad pa'i mngon sum gyi tshad ma la/gzugs la sogs par snang ba nyid phyi rol don byed pa'i ngo bo nyid du snang ba'i phyir ro zhe na/ skyon med de/ de lta na yang dag pa'i kun rdzob tsam du yang sgo lnga'i rnam par shes pa mi 'thad pa nyid du sngar bstan pa dang / yang kun rdzob tsam du shes pa las so so las rnam par 'byed pa pha rol po nyid kyis khas blangs pa mi 'thad par 'gyur ba la sogs pa'i nyes pa snga ma rnams spang dgos so//yang gal te de lta na gzugs dang sgra la sogs par snang ba ni kun rdzob tu du ma nyid yin na/ gcig pa nyid mi 'thad par 'gyur bas nyes pa mtshungs so zhe na/de ci gzugs sgra la sogs par snang ba gcig nyid du snang ba med pas kun rdzob tu yang gcig pa nyid du mi 'thad la/ thams cad du gcig med par 'gyur ba ni ma yin te/ snga ma ltar nang gi bde ba da ltar bar myong ba cha sna tshogs su myong ba med cing don byed pa'i rang bzhin gcig nyid du myong bas kun rdzob tu gcig ces bya'o//des na 'di ni mi mtshungs pa nyid du gsal rab tu snang ngo / /gal te de lta na gzugs la sogs pa snang ba ni myong ba'i rang bzhin spangs pa dang / dbyibs dang kha dog gi rang bzhin dang / yul dang phyogs kyis bsdus pa dang / shes pa las chad pa'i rnam par snang zhing sems dang mi mthun pa'i phyi rol nyid du snang bas/kun rdzob tu phyi rol nyid yin gyi/ shes pa ni ma yin te shes pa'i bdag nyid du mi snang ba'i phyir ro/ /de yang ji ltar gzugs sgra la sogs par snang ba snang tshod du mar snang bas gcig nyid ma yin pa bzhin no zhe na/skyon med de gzugs la sogs par snang ba ni/ gsal bar snang ba nyid kyis myong ba'i rang bzhin spangs par snang ba ma yin te/ gsal ba dang myong ba ni rnam grangs su gtogs pa'i phyir ro/ /yang kha dog dang dbyibs la sogs par snang ba ni/ rnam par shes pa'i khyad par sgo lnga'i rnam par shes pa nyid de/shes pa'i khyad par 'ga' zhig ni dga' gdung la sogs par nang nyid du myong la/ 'ga' zhig ni yul la bkram pa lta bur phyi rol chad pa'i rnam par snang mod kyi/ sems dang mi mthun par snang ba ni ma yin no/ /sems kyi khyad par nang du myong ba 'ga' zhig dang mi mthun par snang mod kyi/de nang du myong ba'i sems su khas mi len pas skyon med do/ /gzugs sgra la sogs pa'i rnam pa sna tshogs su snang ba ni gcig gi rnam pa dang mi mthun zhing / gcig nyid kyi khyad par du mi 'thad pa nyid du rab tu gsal lo//'dir gzugs la sogs pa sna tshogs su snang ba don dam par sems dang mi mthun par snang bas/ sems kyi ngo bo don dam pa nyid du khas mi len pa kho na'o/ /de ltar yang dag pa'i kun rdzob tsam du yang phyi'i don mi 'thad pa nyid du bstan pa na/ de ltar snang ba 'di ci yin snyam du sems na/kun rdzob tu snang ba sems tsam du sgrub ste/ de yang gtan tshigs rnam pa gnyis yin pa las/ dang po rig pa'i gtan tshigs kyi dbang du byas na/ gtan tshigs kyi don dgod pa dang / brtsad pa spangs pa'o/ /de'i dang po yang gzugs sgra la sogs par snang ba ni kun rdzob tu sems nyid yin te/gsal bar snang ba'i phyir dper na bde ba la sogs pa myong ba bzhin no zhes pa'o/ /brtsad pa spang ba ni gzhan dag gtan tshigs 'di ni khyab pa ma grub pa yin te/ de ltar gsal bar snang ba yang sems dang mi mthun pa nyid du snang ba'i phyir/ sems nyid du mi 'gyur ro zhe na/ ma yin te/ sngar bstan pa ltar kun rdzob tu sems dang mi mthun par snang ba ma yin zhing / don dam par sems kyi chos nyid dang mi mthun par snang yang / don dam par sems kyi ngo bor mi sgrub pa'i phyir skyon med pa'o/ / gzhan yang / gsal ba ni sems kyi mtshan nyid yin pas/ mtshan nyid de dang ldan pas sems yin zhes pa ni/ mtshan nyid gtan tshigs su bkod pa tha snyad rab tu sgrub pa'i rtags skyon med pa yin te/ lkog shal la sogs pa dang ldan pa'i phyir/ ba lang gi tha snyad du byar rung zhes pa dang mtshungs so//gzhan dag gsal bar snang ba tsam ni sems kyi mtshan nyid ma yin te/ 'on kyang nang du yongs su gsal ba'o/ /de ni gzugs la sogs pa snang ba la med pas/ de dag sems su bsgrub par mi nus so zhe na/ ma yin te/ de lta na sgo lnga'i rnam par shes pa gzugs la sogs par snang ba la/sems kyi mtshan nyid med pas sems nyid ma yin par 'gyur ro/ /de'i phyir gsal bar snang ba'i spyi ci tsam sems kyi mtshan nyid du rigs so/ /yang gal te sems kyi mtshan nyid ni myong ba dang rig pa yin la/ de ni gzugs la sogs par snang ba la med do zhe na/de lta na yang sgo lnga'i rnam par shes pa sems ma yin par 'gyur ba'i nyes pa so na 'dug go/ /de'i phyir myong ba'am rig pa ni sems kyi mtshan nyid yin mod kyi/ de ni gzugs la sogs pa gsal ba la yang mtshungs pa nyid de/ myong ba spangs pa'i gsal ba ni mi 'thad de/bems po 'am dngos po med kyang rung ste/ myong ba'i ngo bo ma yin pa de dag ni gsal ba'i bdag nyid kyang min pas ji ltar gsal zhes pa'o/ /yang gal te de 'dra ba'i mtshan nyid ni kun gzhi rnam par shes pa dang / nyon mongs pa can gyi yid ces bstan pa gang yin pa de la med pas mtshan nyid ma khyab par 'gyur ro zhe na/ma yin te/ de lta na me'i mtshan nyid tsha zhing sreg pa yang / me'i rdul phra mo kun la med pas ma khyab pa nyid du 'gyur zhing / chu'i gsher ba nyid kyang chu'i rdul phra mo la med pas/ ma khyab pa nyid du 'gyur ro zhes ci ste mi brjod/gal te der chu'i dkyil 'khor rgyas pa lta bu'i gsher zhing rlan pa med kyang / gzugs kyi gnas skabs phra mo de dang rjes su mthun pa'i gsher ba tsam yod pas skyon med do zhe na/ snga ma de bzhin te/ sgo lnga'i rnam par shes pa la sogs pa dmigs pa dang rnam pa rgya chad pa'i gsal bar snang ba lta bu med kyang /gnas skabs de dang rjes su mthun pa'i gsal ba'am myong ba'i rang bzhin tsam yod pas so/ /'dir gsal ba'i phyir zhes pa'i gtan tshigs ni rang rig pa'i mngon sum gyis grub pa'o/ /gtan tshigs gnyis pa'i dbang du bya ste/yang gtan tshigs kyi don dgod pa ni/ snga ma ltar gzugs la sogs par snang ba ni kun rdzob tu sems nyid yin te/ sems dang lhan cig dmigs pa nges pa'i phyir zhes pa'o/ /'dir gtan tshigs kyi don ni gzugs la sogs pa gzung ba'i rnam par snang ba dmigs pa la/de la 'dzin pa'i sems dmigs pa khyab cing / der 'dzin pa'i shes pa dmigs pa la yang de 'dra ba'i gzung ba dmigs pa khyab pas dmigs pa phan tshun mi 'khrul pa nyid do/ /'dir yang gzung 'dzin gnyis grub pa ni ma yin te/ mi mkhas pa'i rtog pa'i ngo na/nga'i mig rnam par shes pas sngon po mthong ngo zhes gzung ba dang 'dzin pa nyid du rlom ste bstan pa'i rjes su 'brangs nas/ dmigs pa phan tshun mi 'khrul zhes bstan pa tsam du zad do/ /don ni gzugs la sogs pa'i rnam par dmigs pa nyid/ mig gi rnam par shes pa la sogs pa dmigs pa yin la de 'dra ba'i shes pa dmigs pa yang don gyi rnam par dmigs pa nyid do//de nyid kyi phyir gtan tshigs bsgrub bya la mi 'khrul ba yang yin no/ /de la brtsad pa spang ba ni/ gzhan dag gtan tshigs 'di ni ma nges te/ thams cad mkhyen pa'i ye shes la/'gro ba tha mal pa'i sems rgyud snang ba na/ dmigs par bya ba tha mal pa'i sems rgyud dmigs pa la/ de ltar snang ba'i ye shes dmigs pas khyab pa/ ye shes dmigs pa la de'i gzung cha tha mal pa'i shes pa dmigs pas khyab pas/ dmigs pa phan tshun mi 'khrul pa'i gtan tshigs yod mod kyi/tha mal pa'i sems rgyud thams cad mkhyen pa'i ye shes kyi rang bzhin ma yin pas/ gtan tshigs 'di 'khrul par 'gyur ro zhe na/ skyon med de/ thams cad mkhyen pa'i ye shes la tha mal pa'i sems kyi rnam par snang ba ni ye shes kyi rang bzhin yin pas/mthun pa'i phyogs nyid du gtogs pa'i phyir ro/ /gal te de 'dra ba lta na de 'dra ba'i rnam pa 'jog byed tha mal pa'i sems rgyud ye shes las tha dad pa kun rdzob tu yod pa bzhin du/ gzugs la sogs pa'i rnam pa 'jog par byed pa tha dad pa yod pas/kun rdzob sems tsam du bsgrub par mi nus so zhe na/ ma yin te/ de 'dra ba'i rnam par snang ba las ma gtogs pa'i phyi rol don dam pa ni sngar bkag la kun rdzob tu yod pa yang mi 'thad de/ ji ltar snang ba 'di kho na zhes pa la sogs pa kun rdzob kyi mtshan nyid mi 'thad pa nyid du sngar bstan no//ye shes la rnam par 'jog pa'i tha mal pa'i rgyud ni rang rang gi rgyud la so sor snang zhing myong bas kun rdzob nyid du 'thad pa'o/ /snang ba las gzhan du gyur pa'i bems po ni myong ba'i rang bzhin spangs pas/ rang nyid rig cing myong ba yang ma yin la/ snang ba las 'das pa nyid kyi phyir blo gzhan la snang ba yang ma yin pas/ de dag mtshungs pa ma yin no/ /yang gal te gzugs la sogs par snang ba sems dang lhan cig dmigs pa nges pas sems nyid yin pa ltar/ sems kyang gzugs la sogs par snang ba dang / lhan cig dmigs pa nges pa'i phyir snang ba'i bdag nyid du 'gyur ro//de'i don yang de dag lhan cig dmigs pa nges pa ni gnyis ka'i thun mong ba ste/ snang ba ni sems dang lhan cig dmigs pa nges la/ sems ni snang ba dang lhan cig dmigs pa nges pa ma yin no zhes pa ni mi 'thad pa'o zhe na/sems kyang snang ba'i rang bzhin du 'dod pas skyon med pa nyid do/ /yang lhan cig gi sgra'i don ni gnyis nyid yin pas gtan tshigs 'di 'gal bar 'gyur ro zhe na/ ma yin te/ phyir rgol mi mkhas pa'i bsam pa dang sbyar nas lhan cig brjod du zad kyang / don ni sngar bstan pa ltar yin pas nyes pa med do//gal te 'dir zhib tu rnam par dpyad pa'i sgo nas gzugs la sogs pa snang ba/ phyi'i don yin pa 'gog pa na/ de ni rnam par shes pa la yang mtshungs par 'gyur la/ ji ltar snang ba tsam gyi dbang du byas na ni gzugs la sogs par snang ba phyi'i don nyid du byis pa yan chod kyi shes pa la rab tu grags pas/mtshungs pa ma yin nam snyam du sems na/ bden mod kyi ji ltar lkog shal la sogs pa dang ldan par snang ba'i gong bu ni/ de kho na nyid du rnam par dpyad na ba lang dang rta la sogs pa'i rang bzhin 'gar yang ma grub mod kyi/rnam par gzhag pa tsam du ba lang gi mtshan nyid dang ldan par snang bas/ ba lang nyid du rnam par 'jog pa ltar gzugs la sogs par snang ba yang kun rdzob tsam du sems kyi mtshan nyid dang 'brel par snang bas/ sems nyid du rnam par gzhag go//gal te 'dir thogs pa dang bcas pa nyid ni/ sems las gzhan bems po'i mtshan nyid yin la/ gzugs la sogs pa yang de dang 'brel bar snang bas/ phyi'i don bems po nyid du 'gyur ro zhe na/ ma yin te/ thogs pa dang bcas pa ni bdag nyid kyi yul du gzhan 'byung ba'i gegs byed pa yin la/gzugs la sogs par snang ba ni de lta ma yin te/ ji ltar dung dkar po'i rnam par snang ba'i go skabs de nyid du gzhan dag la ser po'i rnam par snang ba nyid du 'gyur zhing / de las gzhan ro dang kha dog la sogs pa 'ga' zhig la yang 'dod bya'i rnam par snang ba'i go skabs de nyid du/gzhan la de dang 'gal ba'i rnam par snang ba'i phyir ro/ /gzhan yang 'phags pa ting nge 'dzin gyi rgyal po'i sangs rgyas kyi chos bsam gyis mi khyab par bstan pa'i le'u las/ skra gcig khyon la sangs rgyas mang po ni/ /gang gA'i klung gi bye ma ji snyed yod//rgyal ba de dag zhing yang de snyed de/ /de dag mtshan nyid mi 'dra skal mi mnyam/ /skra yi khyon la 'gro ba lnga rnams te/ /sems can dmyal dang dud 'gro'i 'gro ba dang / /gshin rje'i 'jig rten lha dang mi rnams bzhugs/ /'dres pa med cing gnod par 'gyur ba med/ / de yi gnas su mtsho dang rgya mtshor bcas/ /chu klung de bzhin mtshe'u dang lteng ka rnams/ /'dres pa med cing gnod par 'gyur ba med/ /ces pa la sogs pa gsungs so/ /yang don de nyid 'phags pa thogs med kyis/ yi dags dud 'gro mi rnams dang / /lha rnams ji ltar rigs rigs bzhin//dngos gcig yid ni tha dad phyir/ /don ma grub par 'dod pa yin/ /zhes gsungs so/ /gzhan yang sna tshogs sems kyi bdag nyid yin par ni/ dgongs pa nges par 'grel pa dang / sa bcu pa las kyang / kye rgyal ba'i sras dag khams gsum pa ni sems tsam mo zhes gsungs pa dang /mdo sde 'di nyid du rnam grangs du ma'i sgo nas bstan pas/ gzhan dag /yid ches lung dang mi ldan par/ /chos rnams ston par byed pa ni/ /mtshan nyid rnam par rtog pa yis/ /bdag nyid chud zos gzhan chud gson/ /zhes 'phags pa stug po bkod pa'i rgyan las gsungs pa bzhin du 'dir sems tsam du ston pa la yid ches pa'i lung med do snyam du dogs par mi bya'o//gal te phyi'i don kun rdzob tsam du yang med na/ las dang 'bras bu'i 'brel pa mi 'thad par 'gyur te/ 'di ltar re zhig lus dang ngag gi ngo bo nyid kyang med na/de dag gi las dge ba dang mi dge ba la sogs pa ji ltar 'thad cing / de'i rnam par smin pa lha dang dmyal ba la sogs pa'i gnas dang lus la sogs pa tshor ba bde ba dang sdug bsngal dang 'brel bar snang ba nyid mi 'thad do zhe na/ ma yin te/ kun rdzob tu thams cad sems kyi snang ba nyid la 'jog ste/'di ltar bdag cag rnams kyi lus dang ngag tu snang ba'i rnam rig /gzhan lha sbyin la sogs pa'i lus su snang ba la/ mtshon cha la sogs pa bsnun pa snang ba dang / de dag la yang de ltar snang bas sems rgyud sdug bsngal gyi tshor ba dang 'brel bar myong zhing /srid pa nying mtshams 'brel bar myong ba na/ srog gcod pa zhes rab tu grags pa'i lus kyi las mi dge ba nyid du 'jog ste/ des ni rnam par rig pa tsam nyid lus su snang ba la lus kyi las nyid du 'jog gi/ phyi rol bems po'i bdag nyid du gyur pa'i lus kyi las ni khas mi len pa nyid do//ma byin par len pa la sogs pa lus ngag gi las mi dge ba dang dge ba la sogs pa'i khyad par gzhan yang de bzhin du shes par bya'o/ /las de rnams kyi rnam par smin pa yang de 'dra ba'i las su snang zhing myong ba las/ dus gzhan du de'i sems rgyud sdug bsngal gyi tshor ba dang 'brel bar myong ba la sogs pa ste/ji ltar sems can dmyal ba'i lcags kyi khang pa 'bar bar snang zhing rang gi lus su snang ba'i rnam par rig pa nyid mes bsregs par myong ba la sogs pa dang / lha rnams kyi 'dod pa'i yon tan la sogs pa dang 'brel bar nyams su myong ba bzhin no//gal te 'dir las dang 'bras bu'i bye brag de nyid sgrub pa la tshad ma ci yod ce na/ de bzhin gshegs pa'i lung las bshad pa'am/ yang na dngos po stobs kyis zhugs pa'i tshad ma yang yod de/ ji ltar mtho ris kyi rgyud kyis bsdus pa'i mi rnams kyi phung po'i rgyun 'ga' zhig gi dang po mi nyid du grub cing tha snyad mtho ris kyi bde ba dang 'brel ba ni chos can nyid yin la/de nyid dge ba'i sems pa sngon du song ba yin te/ de las gzhan pa rgyur mi 'thad pa'i dngos po yin pa'i phyir/ dper na zhing stengs kyi myu gu'i khyad par bzhin zhes pa ste/rang bzhin gyi gtan tshigs nyid yin no/ /gal te 'dir khyab pa'i don la brtsad pa med mod kyi gtan tshigs nyid mi 'thad de/ 'di ltar lung du ma bstan pa dang / mi dge ba'i sems pa dang / des kun nas slong ba'i 'dod chags la sogs pa nyon mongs pa rnams de 'dra ba'i phung po mngon par 'grub pa'i rgyur 'gyur ba srid do snyam du sems na/ma yin te/ dud 'gro la sogs pa 'gro ba'i khyad par de dang der snang ba rnams ni phal cher srog gcod pa la sogs pa nyes par spyod pa'i lus dang ngag gi rig byed dang 'brel bar snang ba na/de dag kun nas slong ba'i mi dge ba'i las dang nyon mongs pa dang / rjes su 'brel par dpag par nus shing / gzhan yang lung du ma bstan pa'i lus ngag gi rig byed du snang ba las kyang / de dag kun nas slong ba'i lung du ma bstan pa'i sems pa nyid dpag par nus te/ ji ltar bdag cag rnams kyi rgyud la de 'dra ba'i lus ngag gi rig byed du snang ba ni/de 'dra ba'i sems pa la sogs pa sngon du 'gro ba nyid du grub pa bzhin no/ /de lta na 'gro ba'i khyad par de rnams su snang ba ni shin tu ches cher mi dge ba dang / lung du ma bstan pa'i sems pa la sogs pa dang ldan par grub mod kyi/mtho ris kyi phung po ni de'i drung na shin tu nyung zad tsam du dmigs pas/ /de rnams 'phel ba dang 'grib pa'i rjes su mi byed ces pa'o/ /gal te 'dir rmi lam gyi gnas skabs na skyes bu'i khyad par 'ga' zhig snang ba dang sgyu ma'i skyes bu la de 'dra ba'i lus ngag gi rig byed du snang ba dmigs kyang /las dang nyon mongs pa de dag sngon du song ba ma yin pas de 'dra ba'i rtags 'khrul pa nyid du 'gyur ro zhe na/ ma yin te/ de dag ni skye bo thams cad la mthun par snang ba dang / rjes su 'brel bar yun ring du snang ba ma yin te/ gnyid kyis bslad pa'i skyes bu 'ga' zhig la skyes bu'i khyab par gzhan zhig srog gcod pa la sogs pa nyes par spyod pa'i rig byed dang 'brel par snang zhing /de yang 'chol pa'am mi gsal ba la sogs pa'i rnam par snang ba'o/ /gzhan yang sgyu ma'i skyes bu yang / mig ma bslad pa rnams kyis ni//de ltar de dag ma mthong phyir/ /zhes gsungs pa'i tshul du mthun par snang ba ma yin zhing / de 'dra ba'i nyes par spyod pa'i las dang rjes su 'brel bar rgyun ring du snang ba ma yin pa'i phyir ro/ /sngar bstan pa'i gtan tshigs kyi don ni skye bo thams cad la mthun par snang ba dang /rjes su 'brel par rgyun ring du snang ba nyid kyi khyad par du byas pa yin pas/ 'khrul par 'gyur ba'i skyon med ces pa'o/ /gzhan dag sems tsam pa la rgyud gzhan grub pa mi 'thad pas/ de dag gi don du byams pa dang snying rje sngon du 'gro ba can gyi byang chub mchog tu sems bskyed pa dang /sbyin pa la sogs pa'i byang chub sems dpa'i spyod pa mi 'thad do zhes rgol ba'i lan du yang 'di nyid sbyor bar bya ste/ ji skad du/ rang lus blo sngon 'gro ba yis/ /bya ba mthong nas gzhan la de/ /'dzin phyir gal te blo shes 'gyur/ /sems tsam la yang tshul 'di mtshungs//zhes gsungs pa lta bu ste/ 'dir phyi'i don du smra ba rnams rang gi rgyud la 'gro ba dang / smra bar bya'o snyam pa'i blo sngon du 'gro ba can gyis lus dang ngag gi rnam par rig byed 'ga' zhig mthong nas/ gzhan lha sbyin la sogs pa la yang de 'dra ba'i lus ngag gi bya ba mthong ba'i sgo nas/kun nas slong ba'i blo rjes su dpog pa ltar/ sems tsam gyi lus la yang de 'dra ba'i lus ngag gi rig byed du snang ba las/ de dang 'brel bar snang ba'i chos can 'ga' zhig de 'dra ba'i kun nas slong ba'i blo sngon du song ba nyid du dpog par byed de/ sngar bstan pa'i rjes su 'brangs te rtogs par bya'o//gal te 'dir sngar gyi rtsa ba'i gtan tshigs nyid ma grub ste/ mtho ris kyi phung po de 'dra ba mngon par 'grub pa'i rgyu ni pha dang ma la sogs pa'i 'byung ba'i rdzas yin pa'i phyir ro zhe na/ skyon med de/ 'dir rdzus te skyes pa'i 'gro ba'i khyad par 'ba' zhig ma gtogs pa gzhan ni 'byung bas kyang mngon par 'grub pa'i rkyen byed mod kyi/gtan tshigs kyi don ni dge ba'i sems pa dang / de kun nas slong ba ma chags pa'i dge ba'i rtsa ba la sogs pa la ma ltos par/ gzhan 'ga' zhig rgyur mi 'thad ces pa'o//yang dag pa'i don du na 'dir sems las gzhan pa'i 'byung ba nyid sngar bkag pas skyon med pa 'ba' zhig go/ /gal te yang mi dge ba dang lung du ma bstan pa'i sems pa la sogs pa dang / mtho ris kyi rgyud kyis bsdus pa'i phung po 'phel ba dang 'grib pa'i rjes su byed mod kyi/de 'dra ba'i 'bras bu bdag cag rnams kyis mthong ba'i yul du ma gyur pa snod kyi 'jig rten gzhan du skyes pas/ ma dmigs pa 'ba' zhig tu zad do zhe na/ ma yin te/ snga ma ltar phyi'i don mi 'thad pas sems kyi snang ba las ma gtogs pa'i snod kyi 'jig rten nyid mi 'thad pa'i phyir ro//lung las kyang / skra tsam khyon la 'gro ba lnga rnams te/ /zhes pa la sogs pa'i don sngar bstan to/ /yang gal te phyi'i don yod du zin kyang 'di ni rigs pa ma yin te/ phung po 'grub pa'i khyad par 'ga' zhig snod kyi 'jig rten gzhan du skye bar srid kyang /thams cad dam/ phal cher ni de ltar 'gyur ba'i rgyu mtshan med de/ de ltar na snod kyi 'jig rten 'dir mtho ris kyi phung po skye ba'i mthun rkyen ma tshang ba 'am/ 'gal rkyen nye bar gnas pa las yin grang na/ de ni rigs pa ma yin te/ de ltar mngon du gyur pa'i mtho ris kyi phung po 'di rnams kyang med pa nyid du 'gyur ba'i phyir ro//de'i phyir/ las rnams sogs par byed pa dang / /de yi 'bras bu longs spyod pa/ /snod kyi 'jig rten tha dad na/ /'ga' zhig de ltar srid mod kyi/ /thams cad de ltar nges pa'i rgyu ni 'thad pa ma yin te/byed po'i yul ni spyod 'gyur ba/ /byed po'i rgyun du 'gal ba med/ /ces pa'o/ /gal te sems las gzhan pa'i snod kyi 'jig rten yod dam med kyang sla ste/ de 'dra ba'i las kyis bskyed pa'i phung po thams cad khyed kyis mthong ba'i yul du 'gyur ba'i nges pa med do zhe na/ma yin te/ de 'dra ba'i las mthun par bsags pa'i 'gro ba rnams ni las kyi dbang gis byung ba'i snod kyi 'jig rten thun mong bar snang ba dang / lus dang longs spyod thun mong bar snang ba 'ba' zhig la spyod par rigs te/ ji ltar las mtshungs pa las byung ba'i mi'i 'gro bar gtogs pa phan tshun tha dad pa 'di rnams nyid bzhin no//gzhan du na tha snyad pa'i rgyu dang 'bras bu thams cad 'tshol ba nyid du 'gyur te/ ji ltar sa dang sa bon la sogs pa rnams kyi 'bras bu yang du ma nyid yin no zhes ci ste mi brjod do/ /der yang sa bon gyi dngos po du ma yin pa bzhin du de'i 'bras bu yang du ma nyid skyes mod kyi/'o skol rnams kyis mthong ba'i yul du ma gyur pas/ 'phel ba dang 'grib pa'i rjes su byed pa dgag par mi nus so/ /de la sogs pa rgyu dang 'bras bu'i khyad par thams cad rnam par gzhag pa mi 'thad pa nyid du 'gyur bas 'di ni rigs pa ma yin no//de bzhin du ngan song gi rgyud kyis bsdus pa'i phung po sdug bsngal gyi tshor ba dang 'brel ba gsar du skyes pa rnams kyang mi dge ba'i sems pa dang de kun nas slong ba'i nyon mongs pa sngon du song ba yin te/ de las ma rtogs pa rgyu gzhan mi 'thad pa'i dngos po yin pa'i phyir zhes pa ste sngar bstan pa'i rjes su 'brangs te rtogs par bya'o//gzhan yang da ltar gyi dus na sems can gyi phung pos bsdus pa'i dad pa dang / shes rab la sogs pa dang / chags pa dang sdang ba la sogs pa nyon mongs pa'i rnam pa gsal bar myong ba ni rang gi rigs goms pa dge mi dge'i sems pa kun nas slong bar byed pa sngon du 'gro ba nyid du rang rang gi rgyud la grub pa na/gzhan dud 'gro'i skye gnas su gtogs pa phal che ba gsar du skyes pa rnams la yang sngar bstan pa bzhin du lus dang ngag gi nyes par spyod pa'i las dang 'brel bar snang ba las/ chags pa dang sdang ba la sogs pa'i nyon mongs pa mi dge ba'i sems pa kun nas slong bar byed pa dang 'brel ba nyid du rtogs shing /de yang de 'dra ba'i rigs mthun goms pa snga ma sngon du song ba nyid du grub la/ de ltar goms pa yang skye ba der gtogs pa'i rten la ma rdzogs pas skye ba snga ma gzhan gcig la yin pa'i phyir 'jig rten snga ma nyid kyang dngos po stobs kyis zhugs pa'i tshad mas grub cing /de la ltos te da ltar ba 'di nyid phyi ma yin pas/ 'jig rten phyi ma yang de bzhin du grub po/ /yang de nyid kyis ngan song gi phung por gtogs pa de 'dra ba ni las dang nyon mongs pa sngon du 'gro ba nyid du grub pa'i sgo nas kyang /las dang 'bras bu'i 'brel pa bcom ldan 'das kyis ji ltar gsungs pa bzhin du tshad mas kyang 'thad ces pa'o/ /de bzhin du mtho ris kyi phung po gsar du skyes pa la sogs pa rnams kyi rgyud la yang legs par spyod pa'i lus ngag gi rig byed dang 'brel bar snang ba la brten nas/dad pa dang ma chags pa la sogs pa dge ba'i sems pa kun nas slong bar byed pa sngon du song ba nyid du grub cing / de yang rang gi rigs goms pa snga ma sngon du song ba nyid du grub pas/ yang 'jig rten snga phyi dang las dang 'bras bu'i 'brel pa'i khyad par ji ltar gsungs pa bzhin du grub ces pa'o//'di ni khyad par du yang rgyu mthun pa'i rgyu dang 'bras bu rnam par gzhag pa'o/ /gal te 'phel ba dang 'grib pa'i rjes su mi byed pas rgyu dang 'bras bur mi 'thad pa de ltar na/ rab tu grags pa'i 'gro ba rnams la mtho ris kyi phung po 'grub pa la sogs pa ni/ches shin tu nyung zhing / mtho ris kyi phung po ni de bas mang ba'i phyir 'khrul pa nyid du 'gyur ro zhe na/ ma yin te/ ngan song gi rten de dag las de 'dra ba 'grub par byed pa'i sngon gyi las ni 'bras bu phyung bas zad cing las sar pa gzhan dag kyang ma bsags la/yang sngon gyi dge ba'i las kyi sa bon 'ba' zhig sad pa na rten de las 'phos nas mtho ris dag tu skye bar 'gyur ba'i phyir ro/ /rigs pa 'di rnams kyi don ni tshad ma rnam par gtan la dbab pa las/ sbyin pa dang 'tshe ba spang ba'i sems pa ni mngon par mtho ba'i 'bras bu 'byung ba la tshad ma ci yod ce na zhes brtsad pa'i lan du/de nyid kyi phyir the tshom za ba'am/ yang na tshad ma srid pas mi spong ngo zhes gsungs pa'i don de nyid yin no/ /gzhan yang mang du thos pa'i slob dpon ye shes dpal bzang pos mdo sde 'di nyid kyi 'grel par gsungs pas the tshom mi bya'o//yang khyad par du sbyin pa'i sems pa la brten nas longs spyod phun sum tshogs pa thob pa dang / tshul khrims kyis bde 'gror 'gyur ba la sogs pa yang rigs pa 'di nyid kyi rjes su 'brangs la yid ches par bya'o/ /gal te phyi'i don med kyang lus dang ngag gi rnam par rig byed du snang ba la brten nas de ltar las dang 'bras bu'i 'brel ba 'jog na/rmi lam la sogs pa'i gnas skabs na srog gcod pa la sogs pa snang ba las kyang / las sog cing rnam par smin pa 'byin par 'gyur ro zhe na/ gnas skabs der yang chags sdang la sogs pa'i nyon mongs pas kun nas bslangs nas gzhan lha sbyin lta bu 'ga' zhig gsad par bya'o snyam du sems shing /de la brten nas bdag gis mtshon bsnun par snang zhing de nyid shi ba lta bur yang snang ba las/ gnyid sad pa na rjes kyi shes pas kye ma legs par byas so zhes sngar gyi sems pa'i sa bon gsos pa na/las cung zad sog pa ni 'dod pa yin la/ 'on kyang sad pa'i gnas skabs dang mi 'dra ste/ kun nas slong ba'i bsam pa khyad med kyang / dngos gzhi'i gnas skabs na gzhan gyi sems rgyud sdug bsngal gyi tshor ba dang 'brel par byas pa la sogs pa med pa dang /gnyid kyis bslad pa'i gnas skabs yin pas so/ /de skad du yang / rmi lam sems ni gnyid kyis nyams/ /des na 'bras bu 'dra ma yin/ /zhes sa bcu'i mgon pos gsungs shing / shes rab kyi pha rol tu phyin pa'i mdo las kyang don de nyid rgya cher gsungs pa'i phyir ro//sgyu ma'i skyes bu gsad sogs la/ /sems med phyir na sdig med de/ /zhes sdig pa gtan med par bstan pa ni/ de nyid sgyu ma nyid du shes shing kun nas slong ba'i nyon mongs pa dang / gsod pa'i sems pa yang med la/ rjes kyi gnas skabs na yang de la mngon par dga' ba med de/de ltar snang ba tsam nyid du shes pas nyes pa med pa'o/ /gal te de ltar na gzhan rig pa'i cha'i shes pa thams cad kyi yul 'gog par khyad par med pa'i phyir/ rmi lam la sogs pa'i gnas skabs na gzugs la sogs par snang ba dang /smig rgyu la chur snang ba ni tshad ma ma yin la/ chu klung dang lteng ka la sogs pa chur snang ba ni tshad ma yin no zhes tshad ma dang tshad ma ma yin pa'i rnam par dbye ba mi 'thad do zhe na/ de ltar yang bden mod kyi/ 'dir smig rgyu la chur snang ba las chu don du gnyer ba'i skyes bu 'ga' zhig zhugs pa na/'khrul pa'i bag chags mi brten pa'i phyir/ chu dang phrad cing btung ngoms su snang ba ma byung bas/ 'jig rten tha snyad la yid mi rton cing blo de 'dra ba 'khrul pa nyid du 'jog ste/ de'i phyir tshad ma ma yin zhes pa'o/ /gzhan chu klung la sogs pa chur snang ba na don du gnyer ba'i skyes bu zhugs pas 'khrul pa'i bag chags brtan pa'i phyir phrad par snang ba la sogs pa byung bas tshad ma nyid du rnam par 'jog ste/de ltar na tha snyad tsam du gzhan rig pa'i cha'i tshad ma dang tshad ma ma yin pa'i dbye ba ni de dag tsam du zad do//rmi lam la sogs pa'i khyad par 'ga' zhig kyang de dang mtshungs pa nyid do/ /yang rmi lam gyi gnas skabs 'ga' zhig na glu dbyangs la sogs pa'i sgra'am rol mo la sogs pa'i gzugs su snang ba dang / chu la sogs par snang ba las/ don du gnyer ba'i skyes bu'i 'dod pa yongs su rdzogs shing /btung ngoms la sogs par snang ba na sad pa'i gnas skabs dang khyad par med pa 'ba' zhig tu zad de/ de ltar na yul la mngon par zhen pa ci'i phyir mi ldog snyam du sems so/ /gzhan yang phyi'i don kun rdzob tsam du yang med na/bcom ldan 'das kyis gzugs ni gzhig cing gzhom du rung ba'i mtshan nyid de zhes pa la sogs pa gzugs kyi phung po'i mtshan nyid dang / phyi dang nang gi skye mched gzugs can be+ems po nyid du gsungs te/ ji skad du 'phags pa ting nge 'dzin gyi rgyal po las/mig dang rna ba sna yang tshad ma min/ /zhes pa la sogs pa dang / gal te dbang po 'di dag tshad yin na/ /'phags pa'i lam gyis su la ci zhig bya/ /de phyir ngo bo nyid kyis bems po lung ma bstan/ /zhes gsungs so/ /gzhan yang 'phags pa sa bcu pa las kyang / sa bcu pa la gnas pa'i byang chub sems dpas 'jig rten gyi khams kyi rdul phra rab thams cad shes par gsungs pas/ phyi'i don med na de ltar shes pa 'khrul pa nyid du 'gyur ba'i phyir/ lung dang 'gal ba nyid du 'gyur ro/ /gzhan yang 'gro ba rnams kyi snod kyi 'jig rten gyi tshad dang /rnam pa'i khyad par rnams gsungs pas/ phyi'i don kun rdzob tu med na de ltar gsungs pa dang 'gal lo zhe na/ skyon med de/ gsung rab dag las de ltar yod pa dang med pa'i phyogs gnyis ka gsungs mod kyi/ gsung rab kyi tshul ni dgongs pa rnam pa bzhi dang ldem por dgongs pa bzhi'i sgo nas gtan la dbab par bya'o zhes mgon po byams pas gsungs pa dang /de rnams kyang bsdu na rnam pa gnyis te/ drang ba'i don dang / nges pa'i don no/ /de la nges pa'i don ni tshad mas grub pa'i don dam pa'i bden pa ston pa ste/ ji ltar mdo nas bstan pa'i don de kho na ltar nges kyi/de las gzhan du gzhag par mi nus pas nges pa'i don zhes bya'o/ /drang ba'i don ni dgongs pa can zhes kyang bya ste/ mtshan nyid snga ma las bzlog pa ji ltar dngos su bstan pa las de kho na nyid kyi don gzhan du 'gyur ba'o/ /de skad du yang 'phags pa blo gros mi zad pas bstan pa las/de la nges pa'i don gyi mdo sde ni gang / drang ba'i don gyi mdo sde ni gang zhe na/ mdo sde gang dag don dam pa'i bden pa ston pa de dag ni nges pa'i don zhes bya la/ mdo sde gang dag kun rdzob kyi bden pa ston pa de dag ni drang ba'i don zhes bya'o zhes bya ba la sogs pa rgyas par gsungs so//des na gzugs la sogs pa phyi'i don yod par bstan pa'i don la/ sngar bshad pa'i tshad mas gnod pa'i phyir tshad ma ma grub pa'i don dam pa ston pa ma yin pas/ nges pa'i don gyi mdo ma yin zhing drang ba'i don zhes bya ste/ de yang rang rang gi sems kyi rnam pa de ltar snang ba la dgongs nas phyi'i don la mngon par zhen pa'i byis pa rnams skrag pa spong zhing rim gyis sangs rgyas kyi theg pa la gzud par bya ba'i don du gsungs pa ste/ji skad du/ gzugs sogs skye mched yod par ni/ /des 'dul ba yi skye bo la//dgongs pa'i dbang gis gsungs pa ste/ /brdzus te byung ba'i sems can bzhin/ /zhes pa la sogs pa gsungs pa lta bu'o/ /gzhan yang chu bo dga' skyed kyi 'gram du gang zag gi bdag tu lta ba'i kun tu rgyu lnga brgya sangs rgyas kyi theg pa la gzud par bya ba'i don du bcom ldan 'das kyis de bzhin gshegs pa'i snying po kun gzhi rnam par shes pa la dgongs te/nga ni sems can thams cad la de bzhin gshegs pa'i snying po rtag pa dang gtsang ba dang / bdag gi ngo bor gyur pa la sogs pa yod par 'dod do zhes gsungs pa lta bu'o/ / de bzhin du gsung rab kyi phyogs 'ga' zhig las/ dge slong dag las dang las kyi khur khyer ba'i gang zag dag yod do zhes kyang gsungs so/ /gzhan yang 'gro ba rnams kyi snod kyi khyad par bstan pa yang / las mthun par bsags pa'i sems can rnams la las kyi dbang gis gnas kyi khyad par mthun par snang ba na/de rnams kyi snang ba thun mong ba la dgongs nas/ snod kyi 'jig rten gyi tshad la sogs pa'i tshul lugs 'ga' zhig rnam par bzhag la/ yang de dag dang las mi mthun par bsags pa rnams la/ snod kyi 'jig rten gyi rnam pa gzhan du snang bas snga ma las gzhan du bshad de/ji ltar chos mngon pa'i mdo sde 'ga' zhig dang / theg pa chen po'i gsung rab dag las phan tshun mi mthun par bshad pa dang / rig pa 'dzin pa'i sde snod shI kA la tsa kra las kyang gzhan du bshad de/des na phyi'i don yang dag pa'i kun rdzob tu yod na de rnams 'gal ba nyid du gyur to/ /rang rang gi sems kyi snang ba yin pa la ni sngar bshad pa ltar nyes pa med pa kho na'o/ /de'i phyir kA la tsa kra las chos mngon pa dang 'gal bar 'gyur ro zhes pa'i brtsad pa bkod nas/ lan du de rnams phyi rol gyi dngos por grub pa ni ma yin gyi/sems can rnams kyi rang rang gi sems kyi snang ba tsam yin la/ de'i snang ba phyogs re la dgongs te gsungs pa yin pas nyes pa med do zhes bshad do/ /gzhan du sems can dmyal ba'i lcags sregs kyi sa gzhi la sogs pa phyi rol gyi ngo bor grub na/mthu dang thugs rje phun sum tshogs pa'i sangs rgyas dang byang chub sems dpa' rnams kyis ci'i phyir de dag 'joms shing rdul du rlog par mi byed ces bsam par bya'o/ /de'i phyir gzhom par bya ba'i rgyu'i phyi rol gyi ngo bo grub pa med cing rang gi sems kyi nyes pa yin par sngar bstan pa'i skyon med de/ji ltar byis pa dag smyo bas yid 'khrugs pa na/ rang gi mdun du sdig pa dang sbrul gyi rnam pa snang bas skrag cing ngu bar gyur la/ de'i pha stobs dang ldan pa zhig gis sbrul la sogs pa phyi rol na yod na gzhom par nus mod kyi/ de ltar grub pa med cing byis pa'i rang gi sems kyi nyes pa yin pas cir yang byar med pa bzhin no//gal te der yang pha mas byis pa'i sems kyi nyes pa 'chos pa bzhin du/ sems can de rnams kyi sems kyi nyes pa ci'i phyir rdul du rlog par mi byed ces dpyad pa mtshungs so zhe na/ ma yin te/ sems can rnams kyi sems kyi nyes pa rgyu dang rkyen nges pa med pa khams dang bag la nyal sna tshogs pa rnams ni tshad med pa nyid kyi phyir/ cig car gzhom par mi nus pas/ de bzhin gshegs pas lha dang tshangs pa'i theg pa la sogs pa sna tshogs bstan pa'i sgo nas rim gyis 'joms par byed pa'o//snod kyi 'jig rten ni sems can du ma'i thun mong pa'i gnas cig yin pas/ de yod na cig car nyid du ci'i phyir 'joms par mi byed ces pa ste/ de ni gzhom par sla ba'i phyir ro/ /don 'di nyid kyang [(]'bags [,]'phags [)]pa dgongs pa nges par 'grel pa las bcom ldan 'das gal te byang chub sems dpa' rnams longs spyod mi zad pa yod cing snying rje can lags na/ci'i slad du 'jig rten na dbul po gda' lags zhes zhus pa'i lan du/ bcom ldan 'das kyis spyan ras gzigs dbang phyug de ni sems can rnams kyi rang gi las kyi nyes pa kho na yin te/dper na yi dags lus skom pas gdungs pa rnams kyis rgya mtsho'i chu skams par mthong ba de ni rgya mtsho'i nyes pa ma yin gyi/ yi dags de nyid kyi rang gi las kyi 'bras bu'i nyes pa yin no/ /de bzhin du 'bras bu med par gyur pa gang yin pa de ni/ byang chub sems dpa'i sbyin pa dag gi rgya mtsho lta bur gyur pa rnams kyi nyes pa ma yin gyi/ sems can rang gis nyes pa byas pa yi dags lta bu rnams kyi las kyi nyes pa yin no zhes gsungs pa yin no/ /de ltar phyi'i don dgag pa dang / snang ba sems tsam nyid du sgrub pa dang / de la brtsad pa spang ba rgyas par bstan nas/don dam par sems nyid rang bzhin med par gtan la dbab par bya ste/ de yang gzhan phyi rol pa gzung 'dzin gnyis med par smra ba kha cig don dam par sems nyid rig pa rtag pa'i ngo bo yin zhing / de las gzhan phyi'i don grub pa med de/ ji skad du/rnam rig tsam ni rtag tu rnam par dag/ /'di ltar sangs rgyas rtag tu grol ba nyid/ /blang dang dor bya med ces rab bstan pa/ /tshangs pa mya ngan med ces rtag gnas byos/ /zhes pa'o/ /gzhan yang zhi ba pa rnams kyi 'dod pa lha chen pos smras pa ni/ ji ltar shing la me yod dang / / sa yi nang du chu yod pa/ /de ltar thams cad lus gnas su/ /zhi ba dag pa rnam par gnas/ /thams cad 'di ni zhi bdag ste/ /zhi ba las ni rab tu 'byung / /'byung po kun la zhi ba yod/ /zhi ba gang yin de nga nyid/ /brtan zhing byin 'gro de bzhin du/ /cung zad gang ni sa la yod/ /de kun mchog gi dbang po yis//bdag nyid khyab ste rab tu gnas/ /zhes pa la sogs pa bstan pa ste/ de'i don yang dbang phyug gi rang bzhin bdag shes pa rig pa gnyis su med pa'i don de nyid zhi ba ste/ thams cad kyi bdag nyid yin zhes pa'o/ /'di ni mi 'thad de/ de ltar rtag par snang ba chos can dngos po la med de/ rim dang cig car gyis don byed pa'i nus pas stong pa'i phyir zhes khyab byed mi dmigs pa'i gtan tshigs kyis rtag pa nyid spyir bkag pa'i phyir ro/ /'di'i spros pa zhib tu ni rigs pa'i bstan bcos dag las shes par bya'o//yang rang gi sde pa rnam rig tsam du smra ba kha cig phyi'i don ni kun rdzob tu yang med la/ des na khams gsum pa ni sems nyid rig pa skad cig ma'i ngo bo snga ma rnams la rag las te/ phyi ma rnams 'byung ba gzhan gyi dbang dang / de nyid gzung 'dzin la sogs pa'i ngo bor brtags pas dben pa ni/yongs su grub pa'i ngo bo ste don dam pa'i dngos por 'dod do/ /de ltar na bcom ldan 'das kyis 'phags pa shes rab kyi pha rol tu phyin pa la sogs par/ chos thams cad ngo bo nyid med pa ma skyes pa ma 'gags pa gzod ma nas zhi ba rang bzhin gyis mya ngan las 'das pa'o zhes bya ba la sogs pa gsungs pa dang 'gal lo zhe na/skyon med de/ de ni dgongs pa can yin par 'phags pa dgongs pa nges par 'grel pa'i mdo las gsungs te/ dgongs pa'i don yang kun brtags mtshan nyid ngo bo nyid med pa dang //gzhan dbang skye ba ngo bo nyid med pa dang / yongs su grub pa don dam pa ngo bo nyid med pa la dgongs pa'o/ /de skad du yang / don dam yang dag 'phags de la chos rnams kyi mtshan nyid ngo bo nyid med pa gang zhe na/ kun du brtags pa'i mtshan nyid de/ de ming dang brdar rnam par gzhag pa'i mtshan nyid yin gyi/rang gi mtshan nyid kyis rnam par gnas pa ni ma yin pas/ de'i phyir mtshan nyid ngo bo nyid med pa zhes bya'o/ /don dam yang dag 'phags de la chos rnams kyi skye ba ngo bo nyid med pa gang zhe na/ gzhan gyi dbang gi mtshan nyid de/ de ni rgyu rkyen gzhan gyi dbang gis skye'i/bdag nyid kyis ni ma yin pas de'i phyir skye ba ngo bo nyid med pa zhes bya'o/ /de la sogs pa dpe dang bcas te rgyas par bstan to/ /de ltar byas na sems nyid rig pa'i gzhan dbang dang yongs su grub pa rgyu rkyen gzhan las skyes pa nyid du bstan pas 'di ni med pa ma yin la/med pa dang ma skyes pa la sogs par bstan pa'i dgongs don ni sngar bstan pa bzhin du med pa rnam pa gsum yin zhes pa'o/ /'di ni mi 'thad de/ mdo sde de nyid las sgyu ma byas pa ji lta ba bzhin du skye ba ngo bo nyid med pa blta bar bya'o zhes gsungs pas/sgyu ma bzhin kun rdzob tu rgyu rkyen gzhan gyi dbang gis skye'i bdag nyid las skye ba ma yin la/ don dam par ni rang ngam gzhan gang las kyang skye ba mi 'thad pas gzhan gyi dbang gi mtshan nyid kyang med par bstan to/ /gzhan yang ngo bo nyid med pa la sogs pa'i dgongs don de ltar bshad pa rang yang /dgongs pa can gyi mdo yin te/ sngar shes rab kyi pha rol tu phyin pa la sogs par bden pa gnyis kyi rnam par dbye ba la sogs pa ma byas par ngo bo nyid med pa la sogs pa bstan pa la/ dmigs pa can gyi skye bo skrag par 'gyur bas de dag gi skrag pa bsal ba'i don du'o//de ltar yin pa'i rgyu mtshan yang sems kyi ngo bo don dam pa'i dngos por yod pa la/ gnod par byed pa'i tshad ma du ma mdo sde 'di nyid du ston par 'gyur zhing / bstan bcos dag las kyang bshad de/ skabs su bab pa na bstan par bya'o/ / gal te de rnam pa bden par smra ba dag gzugs dang sgra la sogs pa sna tshogs kyi rnam par snang ba ni/ don dam par sems kyi ngo bo nyid yin te/ sems dang lhan cig dmigs pa nges pa'i phyir zhes sngar bstan pa ltar/ gtan tshigs nyid du sbyor bar byed cing / gzhan yang gsal bar snang ba nyid kyi phyir/snang ba sems kyi ngo bo nyid du grub po zhe na/ mi 'thad de/ don dam par sems kyi ngo bor sgrub pa la ltos te/ 'di dag gtan tshigs nyid du mi 'thad de/ de la dang po'i dbang du byas na thams cad mkhyen pa'i ye shes la/ tha mal pa'i sems kyi rnam par snang ba'i tshe/de ltar snang ba'i rnam pa ye shes kyi ngo bo don dam pa pa yin yang / de la rnam pa 'jog par byed pa'i tha mal pa'i sems rgyud tha dad pa dgag par mi nus pa bzhin du gzugs dang sgra la sogs pa'i rnam par snang ba 'jog par byed pa'i phyi rol tha dad don dam pa'i dngos por yod pa dgag par mi nus pas/thams cad sems tsam nyid du gzhag par mi nus so/ /gal te de 'dra ba'i phyi rol sngar bstan pa ltar gcig dang du ma dang bral ba la sogs pa'i gtan tshigs kyis 'gog go zhe na/ de ni sems la yang mtshungs pas de don dam pa'i dngos por 'jog pa mi 'thad do//kun rdzob sems su sgrub pa la ni de 'dra ba'i dpyad pa mi mtshungs te/ sngar bstan pa bzhin no/ /gtan tshigs gnyis pa yang mi 'thad de/ gsal ba tsam gtan tshigs su 'god na ni sems nyid don dam pa'i dngos por sgrub pa la 'khrul pa nyid du 'gyur zhing /don dam pa'i dngos por gsal ba'i phyir zhes gtan tshigs su 'god na yang ma grub par 'gyur ba'i phyir ro/ /yang khyad par du rnam pa brdzun pa rnams kyi dbang du byas na gzugs la sogs pa'i rnam pa sems las gzhan pa bkag pa'i med par dgag pa nyid bsgrub byar 'dod la/de lta na lhan cig dmigs pa nges pa ni ji ltar gzung ba'i rnam pa sems dang lhan cig dmigs pa'ang nges pa bzhin du sems kyang gzung ba'i rnam pa dang lhan cig dmigs pa nges par 'gyur te/ sngar bstan pa bzhin no/ /de'i phyir sems kyang gzung ba'i rnam pa las gzhan bkag pa tsam gyi med par dgag pa nyid du 'gyur bas/sems tsam dngos por mi 'thad do/ /de lta ma yin na gtan tshigs 'di ma nges pa nyid du 'gyur bar shin tu gsal rab pa nyid do/ /gzhan yang rnam pa sems las gzhan yin pa khegs kyang /de las ma gtogs pa phyi rol gyi ngo bo yod pa mi khegs te/ ji ltar thams cad mkhyen pa'i ye shes la tha mal pa'i sems kyi rnam pa snang ba na de 'dra ba'i rnam pa ye shes las gzhan ma yin yang / tha mal pa'i sems rgyud ye shes las tha dad pa dgag pa mi nus pa bzhin no//gal te shes pa ni rang rig pa'i mngon sum nyid kyis grub la/ sems rgyud tha dad pa yang rnal 'byor pa rnams kyis ni gzhan rig pa'i chos mngon sum gyis grub cing / phal pa rnams kyis kyang rjes su dpag pa'i sgo nas grub po zhe na/ kun rdzob tu de ltar yin mod kyi/don dam par rang rig pa nyid mi 'thad de/ skabs su bab pa na bstan par bya'o/ /de ltar sgrub byed med cing gnod byed yod pas sems nyid rig pa don dam pa'i dngos por mi 'thad do/ /de skad du yang / 'phags pa dge ba'i rtsa ba yongs su 'dzin pa las/ yang dag tu na rnam par shes/ /lus kyi nang na mi gnas te/ /lus kyi phyi rol dag na yang / /rnam par shes pa mi srid do/ /chos rnams kun la rnam kun du/ /rnam par shes pa mi srid de/ /'di yi gnas dang gnas med dang / /'pho ba yang ni mi shes so/ /zhes pa la sogs pa rgyas par gsungs so//'phags pa stug po bkod pa'i rgyan las kyang sems tsam du bstan pa'i rjes la/ sems med tsam po'ang yod ma yin/ /tshad dang gzhal dang gnyis ka med/ /ces pa la sogs pa gsungs so/ /'phags pa zung gi mdo las kyang /lha'i bu de la ji ltar byang chub sems dpa' sems dpa' chen pos chos thams cad nam mkha' dang 'dra bar shes she na/ lha'i bu khams gsum pa ni sems tsam du zad la/ sems de yang gzugs med pa bstan du med pa/ thogs pa med pa rnam par rig par byed pa ma yin pa sgyu ma lta bu ste/sems de yang sems kyi chos nyid kyis yongs su btsal kyang mi rnyed do/ /sems gang gis sems yongs su chol ba'i sems de yang mi rnyed do/ /de sems mi dmigs pas chos thams cad mi dmigs so zhes pa la sogs pa gsungs so//de bzhin du khungs kyi mdo ni du ma nyid snang mod kyi gzhung mangs kyis dogs pas mi bri'o/ /gal te de lta na sngar bstan pa ltar khams gsum sems tsam du bstan pa dang / mdo gzhan dag las kyang / 'jig rten sems kyis bris pa ste/ /sems kyis sems ni mi mthong ngo //dge ba'am 'on te mi dge ba'i/ /las ni sems kyis bsags pa yin/ /sems ni mgal me bzhin du 'khor/ /sems ni rta ltar 'khyams pa ste/ /sems ni nags kyi me bzhin sreg /sems ni chu chen bzhin du skyed/ /ces pa la sogs pa bstan pa dang /mdo sde 'di nyid las kyang / sems tsam dngos po nyid du bstan pa dang 'gal lo zhe na/ skyon med de/ de dag ni kun rdzob pa la dgongs te bstan pas so/ /de skad du yang mdo sde de dag nyid las/ sems kyis sems ni mi mthong ngo / /zhes gsungs pa dang / sngar bstan pa ltar stug po bkod pa'i rgyan la sogs pa'i rjes su 'brangs te rtogs par bya'o//mdo 'di nyid las bstan pa'i don ni skabs su bab pa na bshad par bya'o/ /des na 'dir bsdus pa'i don ni 'di yin te/ phyi'i don ni kun rdzob tsam du yang med cing snang ba thams cad sems tsam nyid yin la/sems kyi rang bzhin de yang gang zhe na/ kun rdzob tu ni myong zhing rig pa tsam yin te/ sems thams cad la rjes su 'brang zhing gzhan la med pa'i phyir/ me la tsha ba nyid bzhin no/ /dad pa dang 'dod chags la sogs pa rnams ni res 'ga' ba nyid du dmigs pa'i phyir sems kyi gnas skabs glo bur ba yin te/ji ltar chu'i rnyog ma la sogs pa bzhin no/ /de skad du yang 'phags pa snang ba bsam gyis mi khyab pa las khye'us gsol pa/ rnam rtog mang po ci 'tshal te/ /sems ni rang bzhin 'od gsal zhing / /de la nyon mongs mi 'byung ste//nams kyang nyon mongs de mi 'gyur/ /bcom ldan 'das kyis bka' stsal pa/ ji skad smras pa de bzhin te/ /sems ni rtag tu 'od gsal kyang / /glo bur nye ba'i nyon mongs kyis/ /so so'i skye bo nyon mongs 'gyur/ zhes gsungs so/ /mdo 'di nyid las kyang / sems ni rang bzhin dang ba ste//rnyog par byed pa yid yin no/ /zhes pa la sogs pa gsungs so/ /don dam par ni sems kyi rang bzhin stong pa nyid yin te/ de ltar rig pa dang stong pa yang phan tshun khyab pa ste/ de'i phyir rig pa dang stong pa zung du 'jug pa rnam rig sgyu ma lta bu'o/ /de skad du yang 'phags pa dkon mchog brtsegs pa las/rnam shes de ni sgyu ma mtshungs/ /zhes pa dang / 'phags pa zung gi mdo dang shes rab kyi pha rol tu phyin pa las kyang sems nyid sgyu ma lta bur gsungs pas so/ /'dir rigs pa'i stobs kyis kyang grub pa nyid de/ chos can dang dgag bya la sogs pa ni sngar bstan pa'i rjes su 'brangs te rtogs par bya'o//gtan tshigs sbyor ba'i tshul yang / gang gcig dang du ma dang bral ba'i ngo bo de ni sgyu ma nyid yin te/ dper na sgyu ma'i rta glang nyid bzhin no/ /ji ltar snang zhing myong ba'i sems kyang / /gcig dang du ma dang bral ba'i ngo bo nyid yin pa'i phyir zhes pa ste/khyab par byed pa mi dmigs pa'am/ rang bzhin gyi gtan tshigs nyid yin no/ /sngar gzugs la sogs par snang ba sgyu ma nyid du bsgrubs pas kyang / sems nyid sgyu ma lta bur bsgrubs pa yin te/ snang ba tsam gyi chos can sems nyid yin pa'i phyir ro//'dir gzhan dag phyi rol lam/ sems gang yin yang rung ste/ sgyu ma nyid du rigs pas grub cing mi gnod na/ de nyid yang dag pa nyid du 'gyur te/ rigs pas grub lugs de bzhin du bden pa nyid kyi phyir ro/ /gzhan yang ji ltar snang zhing myong ba sgyu mar rigs pas grub cing mi gnod pa yin na/de nyid yang dag nyid du yod ces kyang ci'i phyir na khas mi blang ste/ rgyu mtshan mtshungs pa'i phyir ro zhe na/ skyon med de/ ji ltar rigs pas grub pa'i tshul de ltar yang dag nyid du 'gyur ba ni 'dod pa nyid yin no/ / de lta na dgag bya nyid du 'gyur ro zhe na/ yang dag yin pa tsam gyis dgag byar 'gyur ba ni/ khyab pa nyid ma grub ste/ dgag bya ni yang dag gi dngos po nyid yin pa'i phyir ro/ /gal te rigs pas grub cing mi gnod pa'i phyir yang dag gi dngos po nyid du 'gyur ro zhe na/de yang khyab pa ma grub ste/ /bden pa'i dngos min myong ba tsam/ /rig stong dbyer med ngo bo gang / /rnam rig dbu ma'i tshul lugs la/ /de bzhin rigs pas rtogs pa'i phyir/ /bden pa'i dngos por 'gyur na ni/ /tshad ma dngos po'i byed pa ru/ /ci'i phyir na mi 'gyur smros//gal te de ltar 'dod ce na/ /shes pa'i byed pa zhugs pa na/ /shes bya gzhan du 'gyur ba dang / /byed pa ma skyes sngon rol na/ /tshad mar tha snyad gdags pa yi/ /rten med phyir na tshad ma nyid/ /thams cad du ni med par 'gyur/ /gal te sgyu ma dang yang dag pa nyid ni 'gal te/sgyu ma'i don ni gsob nyid dang / gsog nyid snying po med pa yin la/ yang dag pa ni de las bzlog pa'i phyir ro zhe na/ skyon med de/ ji ltar sgyu ma ma yin pa la sgyu mar btags pa ni/ sgyu ma yang dag pa ma yin gyi/ sgyu ma nyid la sgyu mar rnam par gzhag pa ni/de ltar bden pas sgyu ma yang dag pa zhes bya ste/ 'phags pa dkon mchog brtsegs pa las/ ji ltar sgyu ma mkhan bzang pos/ sprul pa'i sgyu ma ni sgyu ma yang dag pa ma yin gyi/ de bzhin gshegs pas chos thams cad sgyu ma lta bur gsungs pa'i sgyu ma na/sgyu ma yang dag pa yin no zhes gsungs pa'i phyir ro/ /brtsad pa gnyis pa yang mi 'thad de/ snang zhing myong ba yang dag pa'i dngos por yod pa la/ yang dag gi gcig dang du mas khyab pa las/ de 'dra ba'i khyab byed mi 'thad pa'i phyir ro/ /'dir sgyu mar rigs pas grub cing mi gnod pa la ni/de ltar 'gyur ba ma yin te/ sngar bstan pa tshad ma dngos po 'chos par byed pa'i byed pa po ma yin pas/ bden pa'i dngos por ma grub pa'i sgyu ma la/ de ltar tshad mas rtogs kyang yang dag gi dngos por mi 'gyur bas yang dag gi gcig dang du ma la sogs pa'i dpyad pa mi 'jug ces pa'o//yang gzhan dag ji ltar snang zhing myong ba sgyu ma nyid yin zhing / de yang don dam pa'i bden par khas len na/ sngon gyi slob dpon dag gis bshad pa'i yang dag pa'i kun rdzob dang khyad par med par 'gyur te/ ji skad du/ brtags pa'i don gyis dben 'gyur zhing / /dngos tsam brten nas gang skyes pa/ /yang dag kun rdzob shes par bya/ /zhes gsungs pa'o/ /de'i don kyang yang dag pa'i kun rdzob ni gzugs la sogs par snang ba 'di nyid/ don dam par skye'o 'gag go zhes pa la sogs par brtags pa'i don gyis dben pa dang /dngos po tsam du grub pa dang / rgyu dang rkyen la brten nas skyes pa'o/ /de ni ji ltar khyed kyis 'dod pa'i rnam rig sgyu ma tsam la yang mtshungs pa nyid du snang ngo zhe na/ skyon med de/ 'dir sgyu ma lta bu'i don ni dngos po tsam dang / rgyu dang rkyen la brten nas skye bar snang yang /skye ba don dam pa'i dngos po la sogs pas/ stong pa zung du 'jug pa'i rang bzhin yin la/ yang dag pa'i kun rdzob ni de lta bus khyad par du ma byas pa'i dngos po tsam la sogs pa yin pa'i phyir ro/ /brtags pa'i don gyis dben zhes pa ni/ de ltar rtog pa'i gzung ba ma yin pa la bya'i/de ltar brtags pa'i zhen yul skye ba la sogs pa'i dngos pos stong pa ni 'dir ched che ba ma yin no/ /gal te yang dag pa'i kun rdzob gzugs la sogs par snang ba 'di'i rang bzhin de kho na nyid ni/ de lta bu'i skye ba la sogs pas stong pa'i phyir mtshungs par 'gyur ro zhe na/de ci'i phyir kun rdzob kyi rang bzhin de kho na nyid don dam pa dang khyad med par 'gyur ba ni 'dod pa nyid do/ ji skad du/ kun rdzob kyi de bzhin nyid gang yin pa de nyid don dam pa'i de bzhin nyid do zhes pa la sogs pa sngar bstan pa bzhin no/ /de ltar bshad pa'i sgo nas kyang brtsad pa spang bar nus mod kyi/'on kyang 'di ni rnam pa gzhan yin te/ ji skad du/ dngos rnams skye ba kun rdzob tu/ /dam pa'i don du rang bzhin med/ /rang bzhin med la 'khrul pa gang / /de ni kun rdzob bden pa yin/ /zhes 'og nas ston par 'gyur la/ de'i don yang shes bya ji ltar snang zhing myong ba 'di rnams kyi rang bzhin de kho na nyid ni/ don dam pa'i bden pa yin la/ de las phyin ci log tu 'khrul pa'am 'khrul pa'i snang ba ni/ kun rdzob kyi bden pa ste/ 'dir rnam rig sgyu ma lta bu'i tshul ni de lta ma yin pas/ yang dag pa'i kun rdzob nyid du mi 'gyur ro//gal te yang sgyu ma ni dngos po'i cha byad 'dzin pas/ de ltar rigs pa'i stobs kyis grub cing mi gnod na/ bden pa'i dngos po nyid du 'gyur ro snyam du sems na/ blo gros 'di ni log pa ste/ stong pa spangs pa'i dngos po 'ba' zhig gi ldog pa nas/rigs pas grub pa nyid du su yang khas mi len la/ dngos po tsam dang bden pa'i dngos pos stong pa zung du 'jug pa'i don rigs pas grub pa nyid du 'dod de/ de la ni sngar bstan pa ltar nyes pas gos pa ma yin no/ /yang gzhan dag gal te don dam par stong pa nyid du khas len na/'phags pa shes rab kyi pha rol tu phyin pa las/ phung 'di stong zhes rtog na'ang byang chub sems dpa' ni/ /mtshan ma la spyod skye med gnas la dad ma yin/ /zhes gsungs pa dang / skabs kyi don chos dang chos min pa ni shes rab kyis spang bar bya bar gsungs pa dang /'og nas kyang / de bas yod par mi brtag cing / /med pa nyid du'ang brtag mi bya/ /zhes pa la sogs pa gsungs pa dang / yang 'phags pa dkon mchog brtsegs pa las kyang / 'od srungs gang zag tu lta ba ri rab tsam ni bla'i/ mngon pa'i nga rgyal can stong pa nyid du lta ba ni/ de lta ma yin no zhes gsungs te/ de la sogs pa mdo sde du ma dang 'gal bar 'gyur zhing / 'phags pa klu sgrub kyi zhal snga nas kyang / rgyal bas stong nyid lta ba kun/ /lta kun nges par 'joms par gsungs/ /gang dag stong pa nyid lta ba/ /'di ni gso ru med par gsungs/ /zhes bstan pa dang yang 'gal bar 'gyur la/yang / dgag bya yod pa ma yin pas/ /yang dag tu na bkag med gsal/ /zhes bstan pa'i rigs pa'i stobs kyis kyang gnod par 'gyur ro snyam du sems na/ skyon med de/ 'dir stong pa nyid 'ba' zhig ni khas len pa ma yin te/ kun rdzob tu ni thams cad yod cing 'og nas ston pas snga ma ltar rig pa dang stong pa zung du 'jug pa sgyu ma lta bu'i don nyid/ snang zhing myong ba'i chos can la brten nas de kho na nyid spyod pa'i skabs su khas len pa'o/ /de lta na yang don dam par stong zhing med pa yin mod kyi/ mdo sde dag gi don ni dngos po sngon du song ba'am/dngos po'i zla'o la ltos nas blo'i byed pas sgro btags pa'i stong pa 'am med pa de 'dra ba dang / der sgro 'dogs kyi blo dgag par bya ba'i phyir gsungs pa yin gyi/ zung du 'jug pa'i don rang bzhin stong pa nyid ni theg pa chen po'i mdo sde thams cad kyi snying po'i don yin zhing /de ltar ston pa'i gzhung yang du ma yod mod kyi/ 'dir khungs nyid du mi bri ste shes par zad do/ /des na rtog pa dang bcas pa'i blo'i spros pa'i mtha' thams cad dang bral ba'o zhes brtags shing yul du byas kyang / de ni spros pa dang bral ba zab mo'i don kho na nyid ma yin te/blo de ni brjod pa dang 'dre rung ba'i don sgro btags pa phyi'i rnam pa nyid yul du byed pa'i phyir ro/ /de'i phyir 'dir rjes su dpag pa'i tshad mas sems kyi chos nyid spros pa dang bral zhing 'od gsal ba/ rig pa dang stong pa zung du 'jug pa'i don la 'jal ba na/de nyid kyi mngon pa'i nga rgyal gyis sems kyi chos nyid rtogs par rlom yang / de'i chos nyid ji lta ba bzhin rtogs pa ni ma yin no/ /de lta na yang dngos po la sogs par sgro 'dogs pa'i spros pa phyogs re gcod pas/ rtogs pa dang ldan pa rnams kyis btsal zhing gtan la dbab par bya ba nyid do//gal te de lta na de nyid gang gi yul du 'gyur zhe na/ 'phags pa rnams kyi rnam par mi rtog pa'i ye shes kyis rig par bya ba nyid do/ /yang gal te dgag bya'i dngos po med pas de bkag pa'i med pa'am/ stong pa nyid mi 'thad ces pa yang dpyad par bya ste/'dir dgag bya'i dngos po med de/ dngos por snang ba ma 'gags pa tsam gyi rang bzhin stong pa nyid chos rnams kyi chos nyid du khas len te/ de ni ma grub pa ma yin te/ gzhan du na pha rol po nyid kyi gtan tshigs kyang ma grub par 'gyur ba'i phyir ro/ /yang dngos po sngon du song ba'am/ de la ltos nas brtags pa'i bkag pa ni khas mi len pa'i phyir/'di ni gyi na tsam du zad do/ /des na dbu ma par smra ba kha cig gsung rab kyi phyogs 'ga' zhig gam/ 'dir ni yod nyid 'gog nyid kyi/ /med nyid sgrub par byed pa min/ /zhes pa dang / gzhan yang / yod dang med dang yod med ces//khas mi len pa gang yin pa/ /de la nan tan ldan pas kyang / /cir yang klan ka bya mi nus/ /zhes slob dpon klu sgrub la sogs pas bshad pa'i gzhung la brten nas/ ji ltar snang ba tsam gyi chos can la/ de kho na nyid du yod med dpyod pa'i skabs su/ dgag par bya ba ni gang zhig rigs pas grub cing mi gnod pa yin la/dgag bya rnam par bkag pa las gzhan bsgrub par bya ba ni khas mi len te/ des na de kho na nyid du yod pa dang / med pa la sogs pa'i mtha' thams cad dang bral zhing / mngon par 'dod pa'i bsgrub par bya ba ni cung zad tsam yang med de/khas len thams cad dang bral ba'o zhes zer ro/ /'di ni mi 'thad de/ bsgrub par bya ba la sogs pa don dam pa'i dngos por ni dbu ma pa su yang khas mi len pas/ 'di ni kun rdzob rnam par gzhag pa tsam du yang med par 'dod pa yin la/ de lta na bsgrub bya shes par 'dod pa med pas/shes par 'dod pa'i bye brag dang ldan pa'i chos can ma grub pa'i phyir/ de la brten pa'i gtan tshigs kyi mtshan nyid tshul dang po kun rdzob tsam du yang med par 'gyur ro/ /de'i phyir rang gi rgyud kyi gtan tshigs khas len pa mi 'thad do/ /gal te rang la 'dod pa'i bsgrub bya med kyang gzhan gyi phyogs dgag par 'dod pa kun rdzob tsam du yod cing /de'i rten de nyid shes 'dod kyi chos can yin pas skyon med do zhe na/ de lta na de nyid bsgrub byar 'gyur te/ gzhan gyi phyogs dgag par 'dod pa ni rgol ba de nyid kyi mngon par 'dod pa yin te/gzhan du mkha' la 'phyo ba lta bu gang zag gi rgyud dang ma 'brel ba gcig ni mi 'thad do/ /de nyid kyi phyir kho bo cag la 'dod pa med ces pa yang / rang gi tshig dang 'gal ba la kun du spyod par snang ngo / /de ltar bsgrub bya'i mtshan nyid rgol ba bdag nyid kyis 'dod pa dang yang ldan zhing /'dod pa'i don de nyid phyir rgol ba gzhan la yang grub na ni/ rtags 'god pa la sogs pa'i byed pa don med par 'gyur te/ de'i phyir 'dod pa'i don de nyid phyir rgol ba la ma grub cing / yang mngon par 'dod pa'i don la mngon sum la sogs pa'i bsal ba la 'jug par gyur na ni/gzhan gyi phyogs dgag par mi nus pas/ de'i phyir ma bsal ba nyid kyang yin no/ /de lta na bsgrub par bya ba'i mtshan nyid ni rigs mi mthun par sel bar byed la/ rang gi ngo bo dang / bsgrub par bya ba nyid du 'dod pa dang / ma bsal ba dang rnam pa gsum gyis mtshon par nus shing / tshogs pa nyid du rigs pa'i bstan bcos dag las bshad pas/ 'dir gzhan gyi phyogs dgag par 'dod pa'i don de nyid bsgrub par bya ba nyid du 'gyur ro/ /gal te 'dir gzhan gyi phyogs 'gegs kyi/ bsgrub pa nyid du khas mi len pas/ de 'dra ba grub pa dang ma grub pa nyid du brtags nas sun 'byin pa mi 'thad do zhe na/skyon med de/ 'di ltar dgag par bya ba gzhan gyi phyogs de nyid yod dam med ces brtag par bya'o/ /de la dang po ltar na dgag par mi nus la/ gnyis pa ltar na dgag mi dgos so zhes bstan par bya'o/ /gal te dgag par bya ba med pa nyid du gzhan gyis ma rtogs pas/de ltar shes par byed pa nyid dgag pa'i don yin pas skyon med do zhe na/ mi 'thad de/ ma shes pa dang ma grub ces pa ni rnam grangs nyid yin pa'i phyir/ dam bca' ba'i mtshan nyid rang gi ngo bo dang ldan zhing / de ltar shes par 'dod pa nyid rgol bas bsgrub byar 'dod pa yang yin la/'dod pa'i don la ma bsal ba yang yin pas nyes pa snga ma nyid son 'dug go/ /gzhan yang rang gi rgyud kyi gtan tshigs ni bsgrub par bya ba la ltos te 'jog pas/ de kun rdzob tu med na de la ltos pa'i gtan tshigs kyang kun rdzob tsam du yang med par 'gyur ro//gzhan yang gtan tshigs kyis bsgrub par bya ba nyid rtags las rtogs pa'i rjes su dpag pa'i gzhal bya yin pas/ de med na rjes dpag gzhal bya dang mi ldan pas tshad ma ma yin pa nyid du 'gyur ro/ /gal te 'dir slob dpon zla ba'i grags pa rjes 'brang dang bcas pa rnams rang gi rgyud kyi gtan tshigs dang tshad ma khas mi len pas de ltar 'dod pa nyid yin la/'on kyang gzhan gyi phyogs na thal bar 'gyur ba'i gtan tshigs kyi sgo nas 'gog par byed pa yin no zhe na/ ma yin te/ bsgrub bya khas blangs pa nyid du 'gyur ba ni snga ma dang mtshungs la/gzhan yang 'dir dgag par bya ba gzhan gyi phyogs de nyid yod pa 'am/ 'on te med pa nyid du 'gyur ba 'am/ the tshom gyi gnas nyid du khas len zhe na/ rnam pa gsum du brtag par bya'o/ /de la dang po dang tha ma'i phyogs ltar na dgag pa mi 'thad de don go bar zad do//bar pa ltar na yang gzhan gyi phyogs med pa nyid du tshad ma'am tshad ma ma yin pa'i blo gang gis rtogs zhes brtag par bya'o/ /de la tshad ma ma yin pa ni don la sgro 'dogs gcod pa'i byed pa dang mi ldan pas rtogs byed kyi yan lag ma yin no/ /tshad mas rtogs na yang skabs kyi don nyams par 'gyur zhing /gzhan yang ji ltar snang ba tsam gyi chos can 'di nyid de kho na nyid du yod pa 'am med pas dben pa ni/ tshu rol mthong ba rnams kyi mngon sum gyi tshad mas ni rtogs par mi nus pas/ rjes su dpag pa'i tshad ma nyid khas len dgos la/ de'i phyir de'i rgyu mtshan rang gi rgyud kyi gtan tshigs kyang ci'i phyir khas mi len snyam du bsams pa'o/ /gzhan yang sangs rgyas thob par byed pa'i lam gyi gtso bo ni sngar bstan pa ltar/ de kho na nyid shes pa'i shes rab kyi pha rol tu phyin pa yin la/ de yang tshad ma 'am tshad ma'i rgyun rgyud 'ga' zhig yin pas de khas mi len na lam la skur pa 'debs par 'gyur zhing /de nyid kyi 'bras bu la yang skur pa 'debs par 'gyur ro/ /gzhan yang thams cad mkhyen pa'i ye shes ni rnal 'byor gyi mngon sum tshad ma mthar thug pa nyid yin pas de nyid kyang med par 'gyur te/ de'i phyir 'di ni phyin ci log gis gang ba'i rgya mtshor 'jug pa 'ba' zhig tu zad do/ /yang gzhan dag skabs 'dir dgag bya ni rigs pas dpyad pa'i ngo na rnyed pa'i shes bya'am dngos po nyid yin la/ de 'dra ba'i dngos po rnam par bkag pa tsam gyi med par dgag pa ni bsgrub par bya ba nyid yin te/des na nyes pa snga ma rnams las grol lo zhe na/ 'di ni snga ma la ltos na ches bzang mod kyi/ 'on kyang rnam par gcad pa tsam gyi med dgag ni nyams su myong ba'i chos can yang dag pa'i kun rdzob tu yod pa 'di'i chos ma yin te/ kun rdzob tu yod pa dang med pa ni 'gal bar 'gyur ba'i phyir ro//don 'di yang rgyas par ni tshad ma rnam 'grel las bstan to/ /gzhan yang de ltar na gtan tshigs kyang gcig dang du ma la sogs pa rnam par bkag pa tsam gyi med dgag yin la/ de'i phyir ji ltar ri bong gi rwa med pa dang / mo gsham gyi bu med pa las/ med pa 'di dag la khyad par 'ga' zhig yod na ni khyad par dngos po'i chos yin pas dgag tu mi 'thad la/ khyad par med na yang / ri bong gi rwa med pa dang / mo gsham gyi bu med pa la/ gtan tshigs dang bsgrub bya mi 'thad pa bzhin du 'dir yang ci ste mi 'gyur/ gal te bkag pa tsam gyi rang bzhin la khyad par med mod kyi/de las bzlog pa'i skabs su ri bong gi rwa dang mo gsham gyi bu la 'brel pa med pas/ ma 'brel pa gzhan bkag pa ni/ cig shos gzhan bkag pa la 'khrul par 'gyur bas/ gtan tshigs dang bsgrub bya mi 'thad la/ 'dir ni dngos po'i ngo bo yod pa la gcig dang du ma la sogs pas khyab pas/khyab byed bkag pa khyab bya bkag pa la mi 'khrul pa'i phyir/ gtan tshigs dang bsgrub byar 'thad do zhe na yang / 'dir yang rnam par dpyad na mi 'thad pa nyid de/ de ltar bzlog pa'i 'brel pa'i khyad par gyis/ rnal ma gtan tshigs dang bsgrub bya la med pa/gzhan de dag las khyad par cung zhig yod na ni/ nyes pa snga ma nyid du 'gyur la/ khyab par med na yang gang la gtan tshigs dang bsgrub bya 'jog pa'i rnal ma'i don de nyid snga ma dang mtshungs pas nyes pa snga ma nyid du 'gyur ba'o/ /gzhan yang 'dir snang zhing myong ba'i chos can la brten nas/'di nyid de kho na nyid du yod dam med ces dpyod pa'i skabs su dngos po med pa min na yod pa nyid du ci'i phyir mi 'gyur te/ yod pa dang med pa ni rnam gcod yongs gcod kyi 'gal ba yin pas/ gcig bkag pa gzhan sgrub pa la ltos pa'i phyir ro//de skad du yang / dgag pa bkag pa sgrub pa yin/ /dngos yod med la yod yin la/ /dngos po med pa yod min zhes/ /blun po yi ni spyod la ltos/ /zhes mkhas pa rnams kyis gsungs so/ /de nyid kyi phyir ji ltar snang ba tsam gyi chos can ni khas len dgos la/ de kho na nyid du yod pa'am med pa'i phyogs gang yang ma yin na/ de dag rnam gcod yongs gcod kyi 'gal ba nyid du mi 'gyur te/ gnyis ka ma yin pa'i phung po gsum pa byung ba'i phyir ro/ /gal te yang don dam pa'i bden pa gtan la 'bebs pa'i skabs su/ yod med gnyis ka ma yin pa'i snang ba tsam byung ba'i phyir zhes gtan tshigs su 'god na ma grub pa nyid de/der ni snang ba nyid kyang khas mi len no/ /yang kun rdzob gtan la 'bebs pa'i skabs su/ gnyis ka ma yin pa'i snang ba tsam byung ba'i phyir zhes nye bar 'god na/ de yang ma grub ste/ skabs der ni snang ba tsam gyi chos can yod pa dang med pa'i phyogs thams cad dang bral ba'o zhes khas mi len pa'i phyir ro zhe na/skyon med de/ snang zhing myong ba'i chos can la brten nas/ rtog ge tha mal pa rnams de kho na nyid du yod pa dang med par dpyod pa'i skabs 'di nyid/ don dam pa dang kun rdzob gtan la 'bebs pa'i skabs gang yin kyang bla ste/gnas skabs der snang ba tsam gyi chos can khas blangs nas/ yod pa dang med pa'i phyogs gang yang med ces zer na ni nyes pa snga ma nyid du 'gyur la/ de lta ma yin te phyogs 'ga' zhig 'jog na yang dngos po yod pa'i phyogs ni tshad ma snga ma rnams kyi gnod pas/don dam pa'i dngos por med cing snang ba tsam ni ma bkag pas zung du 'jug pa'i don sgyu ma lta bu nyid rnam par gnas pa'o/ /yang de 'dra ba'i phyogs gzhan dag khas len pa la gnod byed kyi tshad ma med pas/ gzhan gyi khas len 'gog ces pa yang 'thad pa ma yin no//don 'di yang 'phags pa dad pa cher 'byung gi mdo las/ dam pa ma yin pa'i lta ba nyi shu rtsa brgyad bshad pa'i nang nas/ lta ba khas mi len pa'i lta ba zhes bya ba 'di nyid yin te/ de skad du yang / mdo de nyid las/ de la khas mi len par lta ba ni/gang med pa'i mtshan ma la lta ba'i byang chub sems dpa' da 'di snyam du sems te/ chos thams cad med pa nyid 'di la/ gzhan dang rtsod par gyur pa na/ bdag gis phyogs gang yang khas mi blang ste/ bdag gis mi gzung ba 'ba' zhig tu bya'o snyam mo/ /de'i phyir khas mi len par lta ba zhes bya'o zhes gsungs so//sgrub min bsgrub bya'i mtshan nyid can/ /'dod med 'dod pa'i lcags kyus gzung / /khas len med par khas len pa'i/ /kun slong sgyu ma'i zhags pas bcings/ /zhes pa'o/ /de ltar sems nyid don dam pa bden pa'i dngos po bkag cing myong ba tsam du grub pa spros pa dang bral zhing 'od gsal ba de nyid/de bzhin gshegs pa'i snying por ston cing / de sbyong bar byed pa lam gyi rim pa la sogs pa ni 'og nas ston par 'gyur ro/ /'dir shes par bya ba'i don bsdus te bstan pa ni de dag tsam du zad do/ /da ni gzhung nyid la 'jug par bya ste/de la chos med pa rnams gang zhe na/ gang de dag bdag nyid du ma red pa yin te zhes pa'i don ni rgyu dang yon tan la sogs par snang ba de dag dngos po'i bdag nyid du ma red pa ste/ de 'dra ba'i dngos po ma yin zhing med do zhes dgag pa'i rnam pa can du rnam par rtog pa can gyi blo'i mdun na gnas pa gang yin pa'o//gal te chos dang chos med pa de rnams dgag pa'i rten gang yin zhe na/ mtshan nyid kyi rnam par rtog pa rgyu ba med pa'i chos don gyi rgyu las byung ba de dag ces pa ste/ sgyu ma lta bu'i gzhan dbang so so rang gis rig pa rnams so/ / de la yang dag pa ste chos kyi dngos po bden pa dang / yang dag pa ma yin pa ste/ chos med par blos brtags shing rtog pa 'jug pa med par mthong nas/ de'i phyir chos med par rnam par rtog pa spong bar 'gyur ro/ /'dir chos smos pa ni zhar la byung ba tsam du zad do/ /mtshan nyid ni gzhig cing //gzhom du rung ba la sogs pa'o/ /yang bdag nyid du me red pa zhes pa la sogs pas ni chos med pa'i rnam grangs gzhan ston te/ yang dag pa'i kun rdzob tsam du yang med pa nyid du grags pa ri bong gi rwa la sogs par brtags pa'o/ /dpyod pa'i don ni blo'i snang ba tsam mo//bum pa la sogs pa ltar mngon par chags pas ni ma yin zhes pa ni/ de dag 'jig rten gyi kun rdzob tu don byed par snang bas/ yod par 'jog pa ltar ri bong gi rwa la sogs par snang ba ma yin zhes pa'o/ /gal te chos dang chos med pa rnam par rtog pa'i yul yin zhing spang bar bya ba nyid du 'gyur ba de lta na/rnam par rtog pa nyid yod cing spang bar bya ba ma yin nam zhe na/ ji ltar de dag ces pa la sogs pa smos te/ chos dang chos med pa de dag ma 'khrul pa'i shes pas gzung du med pa'i phyir/ spang bar bya ba de bzhin du/ rnam par rtog pa'i dngos po rnams kyang spang bar bya ba yin te/de ni brtag bya la ltos nas 'jog pa dang / chos dang chos med pa nyid du 'dus pa'i phyir ro/ /de'i phyir zhes pa la sogs pas ni don bsdus te bstan pa'o/ /gang yang lang ka'i bdag po zhes pa la sogs pas 'bod 'grogs la tshul gzhan gyi sgo nas gdams pa'o//de yang rnam pa gnyis kyi sgo nas ston pa las/ dang por sangs rgyas kyi rang bzhin la gdams pa ste/ de la sngon zhes bya ba ni 'di ni rnam par rtog pas brtags pa'i tshig bla dgas te zhes pa'i don ni 'das pa'i don gyi spyi'i rnam par rtog pas brtags pa ste/de yang sngar bstan pa ltar rtog pa nyid kyi bdag nyid yin pas rnam par rtog pa ste/ de 'dra ba ston byed kyi tshig glo bur du brdar gdags pas bla dgas zhes pa'o/ /'das pa zhes pa la sogs pas rtog pa de nyid kyi rnam grangs ston pa'o/ /de bzhin gshegs pa zhes pa la sogs pas/de bzhin gshegs pa'i rang bzhin dang / khyod kyis 'das pa la sogs par rnam par brtags pa'i mi mthun pa nyid du ston te/ /de'i rang bzhin ni dbyings dang ye shes dbyer med pa'i chos nyid yin pas rtog pa dang / brtag par bya ba'i spros pa las 'das pa ste/ ji ltar byis pa'i skye bo'i gzugs la sogs pa'i ngo bo la 'di dang 'di lta bu zhes brtags shing rtog pa lta bu ni ma yin gyi/de las gzhan du so so rang rig pa'i ye shes mngon du mdzad pa/ zag pa med pa'i bde ba'i don du zhes pa ste/ de 'dra ba'i don la mtshan ma med pa la spyod pa'i shes rab kyis rnam par bsgom pa ni mi g.yo ba'i tshul gyis rnam par gnas pa'o//de bzhin gshegs pa'i rang bzhin de ltar yin pa de'i phyir de ni ye shes kyi bdag nyid ye shes kyi sku ste brtag par mi bya'o/ /gang gis mi brtag ce na/ yid kyis te/ de nyid rgyas par ston pa ni/ yul gyi don gyi rgyu las byung ba'i yid kyi rnam par shes pa zhes pa'o//de yang tha snyad tsam du don du snang ba dang / dngos sam brgyud pa'i sgo nas 'brel pa'o/ /ji ltar mi brtag ce na zhes pa'i don ni rnam pa gnyis te/ de bzhin gshegs pa la gang zag gi bdag tu mi brtag pa ni/ bdag dang srog dang gang zag tu mi brtag go zhes pa'o//de la nga rgyal srung ba'i don gyis na bdag ste de las nga rgyal bskyed cing srung bar byed pa'i phyir ro/ /srog gi dbang po'i stobs kyis rigs mthun pa'i skal ba yongs su rdzogs kyi bar du gnas par byed pas na srog go/ /dge mi dge la sogs pa'i las la brten cing khams gsum du zag par byed pas gang zag ces pa ste/thams cad gang zag gi rnam grangs su gtogs pa'o/ /ji ltar gzugs kyi zhes pa la sogs pas de la chos kyi bdag tu mi brtag pa ste/ gzugs kyi mtshan nyid ni gzhig cing gzhom du rung ba ste/ de la ngan sems kyis khrag phyung ngo zhes pa la sogs pa dang /dbyibs te sku ni n+ya gro d+ha ltar chu zheng gab ces pa la sogs pa dang kha dog la sogs pa'i rnam par mi brtag ces pa ste/ don 'di nyid mdo sde gzhan las kyang gsungs te sngar bstan par zad do/ /de bas na zhes pa la sogs pas skabs kyi don bsdus pa'o//lang ka'i bdag po zhes pa la sogs pas 'jig rten pa'i chos kyi rang bzhin la gdams pa'o/ /sems can gyi spyod pa ni sems kyi snang ba'i chos rnams so/ /de rnams ni rtsig pa'i ri mo'i gzugs la mthon dman med kyang mthon dman du snang ba dang 'dra ba'o//'jig rten gnas zhes pa ni phung po lngas bsdus pa'i 'jig rten kun rdzob tu gnas pa 'di ni/ de kho na nyid du sems pa'i g.yo ba med pa ste/ de nyid kyi phyir des kun nas bslang ba'i lus ngag gi las dang byed pas te/ phyi rol pas brtags pa'i sgrub par byed pa/byed pa po'i gzhan gyi dbang du 'gyur ba dang / rang nyid bya ba dang ldan pa dang gtsor gyur pa'i bsgrub bya la nye bar sbyor ba ste/ ji ltar sta res shing gcod pa'i bya ba byed pa na/ byed pa po skyes bu gzhan gyi dbang du gyur pa dang / rang nyid gyen du lding ba dang thur du 'bab pa'i bya ba dang ldan pa dang gtsor gyur pa'i bsgrub bya shing dum bur byed pa la sbyor ba lta bu'o//yang sangs rgyas rnams ni de 'dra ba'i byed pa dang bral mod kyi gang gi mjug thogs su gang skye bar nges pa'i rten cing 'brel par 'byung ba don dam par 'dod de de 'dra ba'i byed pa dang yang bral ba'o/ /'di la zhes pa la sogs pas de nyid kyi phyogs gcig pa'i dpe ston te/de bzhin du lta ba'am blta bar bya ba la sogs pa med ces pa'o/ /gal te de lta na de dag tshad ma la snang ba mi 'thad do zhe na/ 'jig rten gnas pa zhes pa la sogs pa ste shes par zad do/ /lang ka'i bdag po zhes pa la sogs pas gdams pa'i don rtogs pa'i phan yon ston te/mdo sde gzhan dag las kyang 'ga' yang mthong ba med pa ni de kho na nyid mthong ba'o zhes gsungs so/ /de las gzhan du mthong ba phyin ci log gi rnam par rtog pa la spyod cing / de nyid kyis gzung 'dzin gnyis su yang rtog ste/ji ltar gzugs brnyan la sogs pa dang / de 'jog par byed pa gzugs kyi dngos po gnyis med pa la/ de lta bur rtog pa dang mtshungs par gzugs la sogs pa'i chos thams cad la bdag gi rnam par rtog pa'i gzung ba rab tu gzung zhes pa ste/ de phyin ci log gi snang ba nyid du ma shes par phyi rol tha dad pa'i ngo bor gzung ste/chos dang chos min par rnam par rtog ces pa'o/ /bdag gi lus kyi grib ma zhes pa ni 'od kyi khyad par de dag la lus kyi grib ma snang ba ni thogs pa dang bcas pa'i lus kyis stong yang byis pa dag de lta bur rtog pa'o/ /gzhan yang zhes pa ni de rnams dang mtshungs pa'i don gzhan yang zhes pa'o//spong ba la mi spyod ces pa ni sngar bstan pa ltar lhag mthong gi shes rab kyis de rnams stong pa nyid du rtogs shing sgom par mi byed ces pa'o/ /spyod do zhes pa la sogs pas ni de las bzlog pa'i mtshan ma la spyod ces pa ste/ gcig gis gcig bshad pa 'am rnam grangs su gtogs pa'o//de yang de bzhin gshegs pas chos so so yang dag par rig pa'i ye shes brnyes pas don gcig rnam grangs du ma'i sgo nas ston mkhyen te/ de'i dgos pa yang de'i tshe nye bar gyur pa'i gdul bya rnams la 'ga' zhig ni dbang po rtul zhing rnam par g.yengs pa yin la/'ga' zhig ni de las bzlog pa'o/ /de la don gcig ming gi rnam grangs mi 'dra ba'i sgo nas bstan pas/ dbang po rtul zhing g.yengs pa rnams kyis kyang tshig gang yang rung ba cig zin pas don gyi bya ba byed par 'gyur zhing / dbang po rno zhing ma g.yengs pa rnams kyang de bzhin gshegs pas gsungs pa la mnga' brnyes pa nyid du rtogs pas gus pa nyid du 'gyur ba'o//de las gzhan du tshig gcig tsam gsungs na ni 'ga' zhig gis gzung bar mi nus shing / tshig mthun pa du ma bstan na yang gzhan dag ma gus par 'gyur ba'o//'di 'dra ba'i rang bzhin can gyi gzhung 'og nas ston par 'gyur ba rnams kyang 'di bzhin du shes par bya'o/ /rab tu zhi ba ni phyin ci log spangs pa'o/ /de ltar ston pa'i gzhung 'di tshig rtse gcig pa ste nges pa don gyi mdo sde'o/ /de la brten nas thos pa dang bsam pa'i shes pa la sogs pa'i rim gyis de bzhin gshegs pa'i snying po la 'jug ces pa ste shes par zad do//'phags pa lang kar gshegs pa'i 'grel pa de bzhin gshegs pa'i snying po'i rgyan las 'bod 'grogs kyis gsol ba btab pa'i le'u ste dang po'i rnam par bshad pa rdzogs so// //de ltar gdul bya'i gtso bos zhus pa'i lan du brjod bya'i don bsdus te bstan nas/ gdul bya rnams kyi the tshom so sor bsal ba'i don du le'u lhag ma rnams kyis don de nyid rgyas par ston pa ni rnam pa gnyis te/ zhus pa dang lan no/ /de la zhu ba ni rnam pa bzhi'i sgo nas shes par bya ste/de bzhin gshegs pa la bstod pa dang / dri ba'i tshig mdor bsdus te bstan pa dang / bshad par skabs dbye ba dang / dri ba'i tshig rgyas par bstan pa'o/ /de la dang po ni de nas zhes pa la sogs pas ston te/ zhing thams cad du rgyu ba ni/ mtha' yas 'jig rten khams rnams su//mkhas pa gang phyir rgyu bar byed/ /ces pa la sogs pa gleng gzhi'i skabs su bstan pa bzhin du shes par bya'o/ /yang blo gros chen po zhes pa ni 'phags pa sdong pos brgyan pa las nor bzangs kyis 'jam dpal la bstod pa/ blo gros chen po mtha' yas spyod yul can//zhes gsungs pas 'phags pa 'jam dpal yin zhes kyang grag go/ /ga la ba de logs su zhes pa ni gang na bzhugs pa'i phyogs der ro/ /'dir bstod pa'i tshig nye bar 'god pa la/ mtshan ma med pas rtag tu dag /ces pa'i bar gyis ni de bzhin gshegs pa la spangs pa dang ye shes kyi cha nas bstod pa yin la/de man chad kyis ni dbyings kyi cha la bstod pa'o/ /de ltar skye 'jig spangs pa'i zhes pa la sogs pas ni yon tan de lta bu dang ldan pa'i sangs rgyas kyi rang bzhin rtog pa'i phan yon no/ /de las dang po'i don bshad pa la/ 'jig rten skye 'jig ma mchis te/ /nam mkha'i me tog rab tu 'dra/ /zhes pa'i don ni phung po lngas bsdus pa'i 'jig rten skye ba dang 'jig pa'i chos can du byis pas brtags pa rnams ni nam mkha'i me tog dang 'dra zhes pa ste/ /ye shes kyi yul bstan pa'o/ /gal te ye shes kyis de ltar mkhyen na med pa'i mthar 'gyur ro zhe na/khyod kyi shes rab thugs rje yis/ /khyod kyis yod dam med ma dmigs/ /zhes pa ste sngar bstan pa ltar/ rig pa dang stong pa zung du 'jug pa'i don dam pa shes pa'i shes rab kyi yul des bsdus pa'i 'jig rten de kho na nyid du yod par mi dmigs shing snang ba tsam du med par mi dmigs zhes pa'o//gzhan yang dmigs pa med pa'i thugs rjes kyang de bzhin du yod pa dang med par ma dmigs zhes pa ste/ bden pa gnyis la ltos nas bstan pa'o/ /rnam pa gcig tu na shes rab kyis ni 'jig rten yod par ma dmigs la thugs rjes med par ma dmigs zhes pa ste/stong pa nyid kyi mtha' mngon du mi byed par kun rdzob tu 'jig rten blos dmigs shing sdug bsngal las grol bar byed pa'o/ /yod pa dang med pa nyid kyi mtha' dang bral ba nyid kyi phyir/ chos rnams thams cad sgyu ma bzhin/ /sems dang rnam par shes pa spangs//zhes pa ste/ chos thams cad sems kyi rnam par 'khrul pa yin pas sems nyid yin la/ de yang sgyu ma lta bu ste sngar rgyas par bstan pa bzhin no/ /de la sems dang rnam par shes pa ni go rims bzhin du kun gzhi dang 'jug pa'i rnam par shes pa'o/ / yang na rnam grangs nyid du gtogs pa'o/ /spangs zhes pa ni bden pa'i dngos por ma grub pa'o/ /yang na rnam par shes pa'i tshogs brgyad sems las byung ba dang bcas pa rnams bag chags dang bcas te gnas gyur pa'o/ /de ltar khyad par du sgro 'dogs pa'i rten sems kyi ngo bo nyid dang / der rtogs pa spangs pas khyad par du sgro 'dogs pa med cing de nyid kyis skur pa'i mtha' las kyang grol bar ston pa ni/ khyod kyi shes rab thugs rje yis/ /khyod kyis yod dang med ma dmigs/ /zhes pa ste/ snga ma nyid rjes su brjod pa yin la/ de nyid kyi phyir/ 'jig rten rtag dang chad pa spangs/ / khor zug rmi lam 'dra ba ste/ /zhes pa la/ dngos yod rtag dang mi rtag 'gyur/ /zhes gsungs pa'am/ yang / gal te rang bzhin gyis yod na/ /de ni med pa nyid mi 'gyur/ /zhes gsungs pa'i tshul du 'jig rten yod par dmigs na rtag pa'i mthar 'gyur la/ med par dmigs na yang med pa yod par 'gyur ba mi 'thad pas rtag tu med pa nyid du 'gyur ba'i phyir chad pa'i mthar 'gyur ba las/de bzhin gshegs pas yod med kyi mtha' dang bral bar rtogs pas de ltar ma yin zhes pa'o/ /khor zug ces pa ni lo la sogs pas bsdus pa'i dus khor mor te/ rtag tu rmi lam dang 'dra ba'o//de ltar mthar 'dzin pa spangs shing 'jig rten thams cad rmi lam dang 'dra bar sems kyi snang ba tsam du rtogs pa'o/ /yang shes rab dang thugs rjes yod med kyi mthar dmigs pa med pas bdag med pa gnyis rtogs shing de nyid kyis nyon mongs pa dang shes bya'i sgrib pa ste/ sems ma zhi ba'i ngo bor 'dug pa 'dod chags la sogs pa dang /nyon mongs pa can ma yin pa'i mi shes pa gzung 'dzin gyi rnam par rtog pa la sogs pa shes rab dang thugs rjes mthar thug cing / de nyid kyis mtshan ma med pa'i ye shes thugs su chud pas sa bon dang bcas te spangs pa'o/ /yang na 'di rnams kyi don ni rnam pa gsum gyi sgo nas shes par bya ste//de la tshigs su bcad pa dang pos skye ba dang 'jig pa la sogs par brtags pa'i kun brtags mtshan nyid ngo bo nyid med par thugs su chud pa ste/ de yang dgongs pa nges par 'grel pa las/ nam mkha'i me tog ji lta ba de ltar ni/ mtshan nyid ngo bo nyid med pa nyid blta bar bya'o zhes gsungs te//de ltar rkang pa dang po gnyis kyis ni yul bstan la/ 'og ma gnyis kyis ni yul can ye shes so/ /de nas tshigs su bcad pa gnyis kyis ni gzhan dbang skye ba ngo bo nyid med par thugs su chud par ston te/ de la tshig rkang pa dang po gnyis kyis sems dang sems las byung ba'i gzhan dbang sgyu ma lta bur ston te/ji skad du sgyu ma byas pa ji lta ba de ltar gzhan gyi dbang gi ngo bo nyid blta bar bya'o zhes gsungs pas so/ /de nas rkang pa gnyis kyis de ltar rtogs pa'i ye shes ston to/ / yang de nas rkang pa gnyis kyis gzhan dbang gi 'jig rten rtag pa dang chad pa'i mtha' dang bral ba rtag tu rmi lam dang 'dra ba ste/ sems snang ba tsam zhes pa'i don to/ /de nas rkang pa gnyis kyis de ltar thugs su chud pa'i ye shes ston to/ /de nas tshigs su bcad pa gcig gis yongs grub don dam pa ngo bo nyid med par thugs su chud cing /ye shes de rnams kyis sgrib pa gnyis spangs par ston to/ /de skad du yang / don dam yang dag 'phags/ chos rnams kyi chos bdag med pa gang yin pa de ni de dag gi ngo bo nyid med pa zhes bya ste/ de ni don dam pa yin la don dam pa ni chos thams cad kyi ngo bo nyid med pa nyid kyis rab tu phye ba yin pas de'i phyir don dam pa ngo bo nyid med pa nyid ces bya'o zhes gsungs pas so//de la 'dir/ chos dang gang zag bdag med dang / /zhes pa ni shes rab dang thugs rje'i yul yin la/ de ltar rtogs pas sgrib pa gnyis spang zhes pa ste shes par zad do//dbyings kyi cha la bstod pa yang rkang pa dang po gnyis kyis brtsad pa dgod pa ste/ sgyu ma rmi lam rang bzhin gyi chos kyi sku spros pa thams cad dang bral ba la bstod pa mi 'thad de/ /bstod pa ni yon tan gyi khyad par brjod pa yin pa las 'dir de 'dra ba'i khyad par grub pa med pa'i phyir zhes pa'o//dngos po'i zhes pa la sogs pas de'i lan ston te/ dngos po'i rang bzhin skye ba la sogs pa'i spros pa dang bral ba la de ltar mi rtog cing spros pa dang bral ba nyid de la bstod pa'o/ /de ltar na ri bong gi rwa la sogs pa dang mtshungs pas bstod par mi 'gyur ro zhe na/ dbang po don dang rnam bral zhing //snang med de yi gzigs pa bas/ /zhes pa ste/ gzung 'dzin gnyis su snang ba dang bral zhing snang ba med pa'i ye shes so so rang rig gi tshul du mngon du byas pas spros pa dang bral ba med dgag tsam ma yin zhes pa'o/ /de nyid kyi phyir ye shes de nyid sgra dang blo'i yul las 'das par ston pa ni/gal te bstod dam smad kyang rung / /thub pa de la ji skad brjod/ /ces pa ste/ skyon dang yon tan brjod pa'i sgo nas bstod pa dang smad pa ni byis pa rnams kyis rnam par rtog pas brtags pa yin gyi sangs rgyas kyi rang bzhin la de 'dra ba med ces pa'o/ /mya ngan mi 'da' 'da' la min//khyod la mya ngan 'da' mi gnas/ /zhes pas ni snying rjes zhi ba la mi gnas pa nyid du ston te/ stong pa nyid kyi mtha' mngon du byas nas sems can gyi don rgyun mi gcod pa'o/ /sprul pa'i sku mya ngan las 'da' ba'i tshul ston pa ni/ gdul bya rnams kyis rtag par 'dzin pa spang ba'i don du yin gyi sangs rgyas kyi rang bzhin la ni de 'dra ba med do//de ltar yang mdo 'di nyid las/ /mtshan nyid dang ni bya ba dang / /dngos por mya ngan nga mi 'da'/ /zhes pa la sogs pas ston to/ /mdo sde gzhan las kyang / /sangs rgyas mya ngan yod mi 'da'/ /zhes pa la sogs pa gsungs so//'da' la min zhes pa mya ngan las 'das pa'i mtha' mngon du mi byed pa'o/ /khyod la mya ngan 'da' mi gnas/ /zhes pas de nyid gsal bar bstan pa'o/ /blo dang rig pa bgyi dang bral/ /yod dang med pa'i phyogs kyang spangs/ /zhes pas shes pas srid pa la mi gnas pa'am/yang de'i rang bzhin shes pa'i yul las 'das shing / mtha' thams cad dang bral ba nyid du bstan te/ rgyas par ni 'og nas ston par 'gyur ro/ /de ltar rtogs pa'i phan yon bstan pa ni phal cher shes par zad do/ /chags med nyer len ma mchis pa/ / zhes pa ni sred pa dang ma rig pa la sogs pa med pas phung po nying mtshams 'brel par byed pa med ces pa'o/ /dri ba'i tshig mdor bstan pa ni shes par zad do/ /bshad par skabs dbye ba la/ thams cad 'khor la rnam gzigs nas/ /zhes pa ni 'khor rnams 'dul ba'i dus la bab pa nyid du rtogs pa'o//gzhan ni shes par zad do/ /dri ba'i tshig rgyas par bstan pa la dang por rtog ge'i tshul 'dri ba ni/ ji ltar zhes pa la sogs pa ste/ ji skad du phyi'i don ni kun rdzob tsam du yang med cing snang ba sems kyi rang bzhin yin la/ don dam par sems kyang med na de bzhin gshegs pa 'jig rten du 'tshang rgya ba'i tshul ma bstan pa'i sngon rol lam/sangs rgyas nas kyang rung ste/ chos kyi rang bzhin ji lta ba bzhin mthong ba med par rgyu mtshan 'ga' zhig la brten nas shes bya rnams la dpyod cing 'jal ba ni/ rtog ge zhes pa ste tha snyad pa'i mngon sum dang rjes su dpag pa yin la/de nyid rnam par dag pa ni de kho na nyid gzigs pa'i lung la brten nas mngon sum la sogs pa'i mtshan nyid rnam par gzhag pa/ sangs rgyas pa rnams kyi gtsug lag ste/ ji ltar bcom ldan 'das kyis dge slong dag gzugs shes pa'i shes pa ni rnam pa gnyis te/mig dang de'i rjes su byung ba'i yod do zhes pa la sogs pas mngon sum gyi rnam par dbye ba dang / gzhan yang mig gi rnam par shes pa dang ldan pas sngon po shes kyi sngon po'o snyam du ni ma yin no zhes pa la sogs pa gsungs pas de'i mtshan nyid rtog pa dang bral zhing ma 'khrul pa yang gsungs te/de la brten nas mngon sum gyi tshad ma dang / de'i yul gzugs la sogs pa'i rang gi mtshan nyid rdul phra rab la sogs pa du ma bsdus pa'i rang bzhin gyi phung po dang skye mched la sogs pa gsungs pa dang / gzhan yang / du ba las ni mer shes te/ chu skyar las ni chu yin no//zhes pa la sogs pas 'bras bu'i rtags las rtogs pa'i rjes su dpag pa'i tshad ma dang / de'i yul me la sogs pa rdul phra rab 'dus pa rdzas gcig gi bdag nyid kyis dben pa la sogs pa gsungs shing / yang dge slong dag kun 'byung ba'i chos can gang yin pa de ni 'gog pa'i chos can zhes bya ba'i rtags la brten nas 'du byed skad cig ma nyid du rtogs pa rang bzhin gyi rtags las 'byung ba'i rjes su dpag pa dang /des gzhal bar bya ba nyid gsungs shing / de bzhin du/ dge slong dag gang zag gis gang zag la tshod gzung bar mi bya ste/ gang zag gis gang zag la tshod 'dzin pa ni nyams par 'gyur ba'o//de ltar 'dzin na nga'am nga 'dra ba yod pa des gzung bar bya'o zhes gsungs pas mi snang ba mi dmigs pa ni dgag pa go bar byed pa ma yin gyi/ rgyu dang khyab byed la sogs pa bkag pas 'bras bu dang khyab bya la sogs par 'gog pa snang ba mi dmigs pa nyid dgag pa go bar byed pa nyid du gsungs te/de'i phyir ji ltar snang ba tsam gyi chos can yang dag pa'i dngos por yod na/ de la yang dag gi gcig dang du mas khyab pas de 'dra ba'i khyab byed log pa na khyab bya'i dngos po med par rtogs shing / de ltar goms pas 'phags pa rnams kyi so so rang rig pa'i ye shes don dam pa'i yul can skye bar 'gyur ba dang /gzhan yang tshad ma snga ma rnams la brten nas kyang / ji ltar skad cig mtha' yod ltar/ /thog ma dbus kyang brtag par gyis/ /zhes pa la sogs pa dang / /gzugs ni rdul phran gzhig pa na/ /rdul phran cha ni yod ma yin//zhes pa la sogs par rtogs pa'i rim gyis de kho na nyid 'jal ba'i tshad ma skye bar 'gyur te/ de'i phyir sangs rgyas pa rnams kyi rtog ge'i tshul ni de kho na nyid gzigs pa'i lung la brten cing brgyud nas de kho na nyid rtogs pa'i yan lag yin pas rnam par dag pa'o/ /phyi rol pa rnams kyi ni de las bzlog pa ste/nor ba nyid du shes par bya'o/ /de yang kha cig gis ni ngo shes kyi blo mngon sum gyi tshad mar 'dod cing / de nyid kyis sngon gyi lha sbyin gang yin pa de ni 'di'o zhes rtag pa'am/ spyi'i dngos por gyur pa mngon sum gyi tshad mas grub par 'dod la/ yang bye brag pa rnams bdag ni thams cad na khyab pa ste/bdag gi yon tan bde sdug yul kun na dmigs pa'i phyir zhes ma grub pa'i gtan tshigs ltar snang ba yang dag pa'i gtan tshigs su 'dod cing de las bdag grub par 'dod do/ /de la sogs pa tshad ma dang gzhal bya phyin ci log tu rnam par gzhag pa de rnams ni de kho na nyid rtogs pa'i yan lag tu mi 'gyur bas log pa'i rtog ge zhes bya ste/thams cad ngo bo nyid med na 'di rnams thams cad mi 'thad ces brtsad pa'i tshul du 'dri ba ste/ des kyang gdul bya rnams kyi log par rtogs pa sel bar 'gyur ba'o/ /yang na nor ba zhes pa ni byis pa'i skye bo rnams kyi shes pa phal cher de kho na nyid kyi don la log par zhugs pa rnams so//'og nas ston par 'gyur ba'i dri ba thams cad kyi rgyu mtshan yang phal cher 'di nyid yin te/ kun rdzob tu sems yin zhing don dam par sems kyang ngo bo nyid med na 'di dang 'di lta bu'i bye brag rnams mi 'thad ces sbyar bar bya'o//ji lta bu zhes pa ni shes par byed pa'i rgyu'o/ /ci'i slad du zhes pa ni nor ba skyed par byed pa'i rgyu'o/ /de rnams ni dri ba'i ngag gcig nyid de rjes su 'brel ba'i phyir ro/ /ci'i slad du zhes pa la sogs pa phal cher rnam byung gi phyogs la brten pa'i dri ba ste/zhing sna tshogs su sprul pa'i sku sna tshogs ston pa dang / sngar snang ba med pa las lha chen po dang gtogs 'dod la sogs pa mu stegs kyi ston pa rnams kyi gzugs dang / de'i 'og tu khyod nyid mtshan sum cu rtsa gnyis kyis brgyan pa'i sku ru snang ba'i go rims mi 'thad ces brtsad pa dang /khyod kyi rgyal sras las sam rgyu gang las byung zhes pa dang / 'khor ba'i gnas su sred pa'i srad bu la sogs pas bcings pa las thabs gang gis grol zhing grol ba'i gnas kyi khyad par gang zhig tu 'gro bar 'gyur zhes pa ste/ phyi rol pa la sogs pas 'dod pa ltar 'jig rten thams cad kyi steng na/dpag tshad bye ba'i khyon tsam gyi thar pa'i gnas yod cing grol ba rnams der 'gro zhes pa la sogs pa'o/ /byis pa nyer spyod kyi bsam gtan la sogs pa'i yul gzugs la sogs pa mi rtag pa dang mi gtsang ba la sogs pa'i rnam pa dang /lam dang 'bras bu'i theg pa gsum rnam par gzhag pa dang / lam gyis spang bar bya ba las dang nyon mongs pa la sogs pa'i rkyen gyis skye ba srid pa'i yan lag rgyu dang 'bras bus bsdus pa rnams dang / yod pa dang med pa la sogs pa rnam gcod yongs gcod kyi 'gal ba yin pas gcig bkag pa gzhan sgrub pa la rag las pa'i phyir gang yang rung ba cig tu bden pas gnyis ka yang phyin ci log g.yang sa'i gnas kyi mtha' nyid du mi rigs zhes pa dang /'jig rten pa dang thun mong ba gzugs med pa'i snyoms par 'jug pa dang / nyan thos la sogs pa dang thun mong ba'i tshogs bdun la sogs pa 'gog pa dang byang chub sems dpa' rnams kyi 'du shes dang tshor ba 'gog pa'i snyoms par 'jug pa ste/tshig gsum dang rim pa bzhin sbyor ro/ /yang na tshig tha ma ni 'du shes med pa'i snyoms par 'jug pa dang / 'du shes med pa dang sbyar bar bya'o//snyoms 'jug de rnams las sad pa dang / de las sad nas ris lnga 'am drug gi 'gro ba'i lus 'dzin cing nying mtshams 'brel bar byed pa'i bya ba dang / yang rjes kyi gnas skabs na ji ltar snang ba tsam gyi rang bzhin la tshul ji ltar sgom pa dang / bsgoms pa'i stobs kyis dkar po rnam par mthong ba la sogs pa'i sa la ji ltar 'jug pa dang /de'i dbang gis mi slob pa'i gnas skabs na srid pa gsum gyi nyon mongs pa spangs shing gnas sam lus kyi khyad par ji lta ba 'dzin pa dang / /de las sangs rgyas kyi byin gyi rlabs la sogs pas byang chub mchog tu sems bskyed nas gnas dang 'gro ba'i khyad par 'ga' zhig tu skye ba blangs shing sems can gyi don byed pa'i rgyal ba'i sras su ji ltar 'gyur ba dang /der yang rim gyis dbang bcu la sogs pa thob par 'gyur ba dang / khyad par du byang chub sems dpa'i sa brgyad pa la sogs par sems chos nyid la mnyam par 'jog par 'gyur ba ste/de ltar dri ba nyi shu dang po'i don dang nyi shu rtsa gcig po de rnams/ rgyal ba khyu mchog bdag la gsungs/ /zhes pa ste 'khor gyi nang na khyu mchog lta bur 'dug pa'o/ /'dir slob dpon ye shes dpal bzang pos snang med rim pa zhes pa'i don ni thog mar phung po la sogs pa bstan zhing /de nas sems tsam nyid du ston pa'i rim pa'am/ yang snang ba dang bcas pa'i ting nge 'dzin dang snang ba med pa'i ting nge 'dzin gyi rim pa'o zhes kyang 'chad do/ /'gro ba dang ni zhes pa'i don yang 'du byed thams cad skad cig ma yin pas yul gang na gnas pa ni de nyid du 'gag pas yul gzhan du 'gro ba mi 'thad de/des na 'gro ba'i bya ba mi 'thad do zhes 'dri ba'i tshig tu sbyar ro/ /yid dang shes pa la sogs pas gtso bor kun nas nyon mongs pa'i phyogs la brten pa'i dri ba ston te/ rnam par shes pa'i tshogs brgyad dam yang na nyon mongs pa can gyi yid ma gtogs pa bdun po rnams ji ltar tha dad du snang ba'i yul la 'jug ces pa dang / ji ltar de las ldog pa dang / sems can rnams la thar pa'i rigs yod pa 'am med par ji ltar 'gyur zhes pa ste/ dri ba gsum mo/ / sems tsam zhes pa la sogs pas grub pa'i mtha' la brten pa'i dri ba ston te/ mdo sde'i phyogs gzhan nam 'di nyid las kyang sngar sems tsam du bstan pa dang / chos rnams kyi mtshan nyid so sor 'god cing bdag gam sems can med par ston pa 'gal zhes pa dang /gzugs la sogs pa yang dag pa'i kun rdzob kyi rnam par dbye ba bshad pa dang / de 'dra ba'i dbye ba yod na/ dngos yod rtag dang mi rtag 'gyur/ /zhes pa'i tshul gyis de kho na nyid du rtag chad kyi lta ba ji ltar mi 'gyur zhes pa dang chos kyi mtshan nyid mi 'dra ba khas len pas de kho na nyid du mu stegs rnams dang ji ste 'gal bar mi 'gyur zhes pa'o//'dir de kho na nyid smos pa ni tha snyad tsam du mtha' gnyis su lta zhing 'gal ba nyid du 'gyur ba 'dod pa'i phyir ro/ /yang grub mtha' mi 'dra ba'i sgo nas khyed nyid mya ngan las 'das pa'i 'og tu sde pa bzhi la sogs pa 'byung ba dang / stong pa nyid rnam par dbye ba dang /'du byed skad cig tu skye zhing 'jig pa dang / de bzhin gshegs pa'i snying po ji ltar 'byung ba dang / 'jig rten phyi rol pa dang rang gi sde pas brtags pa'i byed pa med pa dang / 'jig rten rmi lam la sogs pa 'dra ba dang / byang chub kyi yan lag bdun la sogs te byang chub kyi phyogs rnams rgyu ci las byung ba dang /yang phyi rol pa rnams dang lta ba la rtsod cing 'khrug pa 'am kla klo'i rjes la mtshon gyis 'khrug ces pa ste/ yul dang mi rnams phan tshun 'khrug cing sa la sogs pa'i 'byung ba ji ltar lta bar 'gyur zhes pa dang / kun brtags pa'i chos rnams mi skye mi 'gag cing nam mkha' dang 'dra ba dang /de ltar na de bzhin gshegs pas 'jig rten thugs su chud par 'gal ba dang / chos thams cad tshig dang yi ge med par gzhan la yang sgra'i sgo nas ston pa 'gal ba dang / thabs gang gis rnam par mi rtog pa'i ye shes su 'gyur ba dang /ye shes spros pa dang bral bas nam mkha' dang 'dra ba dang / de bzhin nyid kyi rnam par dbye ba'i grangs dang / sems dang pha rol tu phyin pa du zhes pa ste kun gzhi rnam par shes pa la sogs pa'i grangs dang / sbyin pa la sogs pa'i grangs 'dri ba ste/ don tha dad kyang 'dri ba'i tshig gcig tu sbyar ro//yang rgyu mtshan gang gis rab tu dga' ba la sogs pa'i byang chub sems dpa'i sa'i rim par 'gyur ba dang / snang ba med pa'i ye shes rgyun gyis 'jug pa dang / chos dang gang zag la ji ltar bdag med par 'gyur ba dang / de ltar rtogs shing goms pas shes bya'i sgrib pa ji ltar 'dag pa dang /ji lta ba dang ji snyed mkhyen pa'i ye shes kyi rnam pa dang / yang dag pa 'am log pa'i tshul khrims dang brtul zhugs dang / sems can gyi 'byung gnas su gyur pa zag pa dang bcas pa'i las dge mi dge la sogs pa'i bye brag du yin zhes pa ste/ de gsum don tha dad kyang dri ba'i ngag gcig tu sbyar bar bya ste/de ltar na grub pa'i mtha' la brten pa'i dri ba nyi shu rtsa lnga'o/ /nor bu mu tig ces pa la sogs pas zab pa dang bcas pa'i bsod nams kyi snang ba la brten pa'i dri ba ste/ rin po che'i rigs de lta bur snang ba rnams su zhig gis rab tu phyung zhes pa dang /lha sbyin dang mchod sbyin la sogs pa sems can re re'i rnam grangs tha dad cing / de lta bu la sogs par mngon par brjod pa'i tha snyad su bskyed ces pa dang / spyir rig pa'i gnas lnga dang khyad par du bzo'i rig pa dang / sreg d+ha ra dang me tog phreng 'dzin la sogs pa'i tshigs su bcad pa dang /tshigs bcad rkyang pa ste sgra'i rig pa dang / rig pa rnam pa du zhes pa bya ba byed pa dang ltos pa dang chos nyid dang 'thad pa sgrub pa'i rigs pa ste/ gtan tshigs kyi rig par gtogs pa rnams rig pa'i gnas zhes pa'i spyi nyid du 'dus pas dri ba'i ngag gcig nyid du sbyar ba dang /don de rnams gdul bya'i bsam pa la ltos te tshul ji ltar bshad pa dang / 'dod pa'i yon tan gyi bde ba ji ltar 'byung bar 'gyur ba dang / de la longs spyod pa'i 'khor los sgyur ba'i rgyal po rin po che sna bdun dang ldan zhing 'dzam bu'i gling la sogs pa la dbang bsgyur ba'am/yul khams kyi bdag po ste rgyal phran rnams ji ltar lags zhes pas dri ba'i ngag gcig go/ /de dag dmag dpon rin po che la sogs pa 'am gzhan yang ma rungs pa tshar gcod pa'i sgo nas rgyal srid ji ltar bsrung ba dang / lha'i rigs la rnam pa du//zhes pa dang / lha dang mi rnams kyi gnas pa dang skar ma'i tshogs dang nyi ma dang zla ba'i gzhal med khang ji lta bu zhes pa ste/ ngag gcig tu sbyar bar bya'o/ /gzhan yang mya ngan las 'das pa'i dbye ba dang / rtse gcig pa'i ting nge 'dzin dang ldan pa'i rnam par dbye ba dang / rig pa'i gnas la slob pa'i dbye ba dang /de la slob pa'i slob dpon gyi mtshan nyid ji ltar yin pa dang / sangs rgyas kyi dbye ba dang / de nyid sngon spyad pa spyod pa na 'gro ba'i rigs gang dang gang du skyes pa'i dbye ba dang / bar du gcod pa'i bdud dang / rang dang gzhan gyi gzhung lugs la gnas pa rnams kyi brtul zhugs me lnga bstan pa dang /g.yang du mchong ba la sogs pa dang rdzu 'phrul gyi khyad par te/ ya mtshan can rnam pa du yod ces pa dang / ma skyes pa dang ma 'gags pa la sogs pa sangs rgyas kyi rang bzhin rnam par dbye ba dang / ri mo rnam pa du zhig mchis/ /zhes pa ste/ gong ma rnams la mchod cing bsnyen bkur ba'i ri mor bya ba rnam pa du zhig mchis zhes pa'o//'dir slob dpon ye shes dpal gyis bshad pa ni/ sems ni rnam pa du zhig mchis/ /zhes gzhung 'don te/ de ltar na sngar gyi sems dang pha rol tu phyin pa du zhes pa'i sems ni sbyin pa la sogs pa kun nas slong ba'i sems pa la sbyar bar byas te/gzhan du na zlos par 'gyur ba'i phyir ro/ /brtags pa tsam yang ji lta bu/ /zhes pa ni gzugs la sogs par snang ba'i rang bzhin la phung po la sogs par brtags shing phung po la sogs pa'i rgyun rgyud la gang zag gi bdag tu brtags pa'o/ / gzhan yang mi rnams kyi bsod nams las grub pa char la sogs pa'i rgyu nam mkha'i sprin rlung ci las gyur zhes pa dang / 'dris pa'i dngos po mi brjed pa'i dran pa dang / de las byung ba'i ting nge 'dzin dang brtson 'grus kyi char gtogs pa'i yid gzhungs pa ji ltar byung zhes pa dri ba'i tshig gcig tu sbyar ro//yang bsod nams kyi snang bar gyur pa me tog dang 'bras bur bcas pa'i nags spa la sogs pa'i 'khri shing dang bcas pa ji ltar mchis zhes pa'o/ /de ltar dri ba nyi shu rtsa gnyis so/ /glang po zhes pa la sogs pas bsod nams dang bsod nams ma yin pa'i snang ba la brten pa'i dri ba ston te/ dud 'gro'i khyad par de rnams mi rnams kyis gzung du rung zhing bkol spyad byed pa dang /ngan pa'i mi rnams bzang po rnams kyis bkol spyad byed pa ste/ dud 'gro dang ngan pa'i mi rnams la ltos te bsod nams ma yin pa'i snang ba yin la/ de dag gi bdag po la ltos te/ bsod nams kyi snang ba'o//gzhan yang sems can gyi lus la 'byung ba bzhi dang nam mkha' dang rnam par shes pa'i khams drug 'dzin pa ji lta bu zhes pa dang / so so'i skye bo'am byang chub sems dpa'i 'dod chen par yang ji ltar 'gyur zhes pa dang / skyes pa bud med ma ning rnams/ /ji ltar skye 'gyur bdag la gsungs//zhes pa dang / zhi gnas dang lhag mthong zung du 'brel pa'i rnal 'byor las ji ltar ldang ba dang / de la ji ltar 'jug pa dang / zhugs nas kyang skyes bu mchog rnams ji ltar rigs pa bzhin mnyam par 'jog pa'o/ /'dir skyes bu zhes pa ni 'phags pa mya ngan las 'das pa las rnam pa bzhi ste/dge ba'i bshes gnyen tshol ba dang / de las dam pa'i chos nyan pa dang / yang dag pa ji lta ba bzhin yid la byed pa dang / ji skad smras pa bzhin du byed pa'o zhes gsungs so/ /gzhan yang / 'gro bar phyin pa'i sems can gyi/ /mtshan nyid mtshan ma ji lta bu//zhes pa ni bgrod par bya ba'i 'bras bu rgyun du zhugs pa la sogs pa thob pa rnams kyi nges pa'am ma nges pa'i mtshan rtags ji lta bu zhes pa'o/ /'dir slob dpon ye shes dpal bzang pos ni 'gro ba'i rigs gsar du skyes pa rnams la 'jig pa dang 'dod chags la sogs pa'i mtshan ma'am rtags las skye ba gzhan du yang de 'dra ba goms pa dpog par byed pa'i gtan tshigs te/ji skad du/ sngar las dang 'bras bu'i 'brel pa bsgrub pa'i skabs su bshad pa bzhin du bzhed do/ /gzhan yang las gang gis zang zing ngam dad pa la sogs pa'i yon tan gyis phyug por 'gyur zhes pa ste/de ltar na dri ba rnam pa bcu'o/ /ji ltar ci yis zhes pa la sogs pas ye shes sam gdul bya'i bsod nams kyi snang ba la brten pa'i dri ba ston te/ sngon ser skya'i gnas su rgyal rigs gzhon nu rnams kyis sring mo chung mar len par spobs pas/ shAkya zhes pa'i ming byung ngo //de dag las rgyal rigs gzhon nu 'ga' zhig rab tu byung nas gnas pa la/ de'i gnas su rkun po zhig byung ba'i chad par de gsal shing gis phug pa dang / de'i mkhan po dka' thub can yun rings bka' thub gling skyes zhes bya ba des de mthong nas mkhan bu la de ci zhes dris pa dang /ji ltar yin pa'i lugs mkhan po la smras pa'i 'og tu/ mkhan pos mu stegs can gyi lta bar smras pa/ 'jig rten na bu med pa la ni 'gro ba'i rgyud med pas bu skyed par gyis shig /des ji ltar bya zhes smras pa dang sngon gyi 'dod pa rjes su dran par bya ste/ khu ba 'byin par gyis shig ces bsgo zhing / des kyang de bzhin du byas pa las khu ba thig le gnyis byung ba bu ram shing gi ra bar bzhag cing nyi mas sros pa las/ bu gnyis su red pa drang srong gis gsos te/ de'i phyir bu ram shing skyes zhes ming du gyur to/ /de'i rigs las rab tu byung ba khyod nyid kyis sngon spyad pa spyod pa'i dus su dka' thub ji ltar spyad cing /gzhan yang nai rany+dza na'i 'gram du ji ltar dka' thub la spyod pa'i tshul bstan pa dang / zhing sna tshogs su sems can ji ltar 'dul bar 'gyur ba'i mtshan dang gzugs sna tshogs pa rgyal ba'i sras kyis bskor bar snang ba dang /sha rnams bkag cing bzar mi rung ba dang / sha za'i rigs su skyes pa rnams sha la rngam zhing za ba dang / ji ltar zhing rnams nyi zla'i dbyibs/ /ri rab pad mo 'dra ba dang / /dpal be'u seng ge'i dbyibs 'dra ba/ /ci yis bslad pa bdag la gsungs/ /zhes pa ste zhing du skyes pa'i sems can rnams kyi snang ba la/zhing gi spyi'i dbyibs sam dbyibs de 'dra ba'i khyad par mdzes pas brgyan pa ci'i slad du byung zhes pa'o/ /go 'dun dang ni spyi gtsug dang / /mig 'phrul 'dra ba ji lta bu/ /zhes pa ni ji skad du sangs rgyas phal po che las/ bcom ldan 'das rnam par snang mdzad gang chen mtsho'i sku'i 'gram pa g.yas g.yon na ngos phyal pa zhes bya ba'i 'jig rten gyi khams 'phred la gnas pa yod la/ko sko'i 'og na spyi gtsug gi 'jig rten gyi khams zhes pa kha thur du bltas pa yod ces pa dang / gzhan yang sngar sprul pa byin gyis brlabs pa'i skabs su bstan pa bzhin mig 'phrul ltar phral la sprul pa'i zhing khams rnams ji lta bu zhes pa ste dri ba gcig go//slob dpon ye shes dpal gyis ni steng dang 'og tu bkod pa dag ces gzhung 'don par byed pa ste de ltar tshig gi don sla bar zad do/ /gzhan yang sangs rgyas mi 'khrugs pa'i zhing gi bkod pa lta bu gser ram bai DUr+ya las grub pa rnams ji ltar byung zhes pa dang /pi wang dang rnga'i dbyibs 'dra ba dang / 'bras bu me tog sna tshogs 'dra ba ste de ltar ljon shing gcig gi khongs su gtogs pa'i me tog dang 'bras bu g.yas g.yon dang steng 'og la sogs par sna tshogs su gnas pa ltar stong gsum gcig gi khongs su gtogs pa'i gling gi bye brag rnams sna tshogs su snang ba'o//nyi zla dag dang rnam bral ba/ /zhes pa ni de dag gi 'od med kyang sems can gyi lus kyi 'od kyis bya ba byed pa'o/ /de 'dra ba'i bye brag ci'i slad du 'byung zhes pa ste/ dri ba'i ngag gcig go//yang / la lar sprul pa'i sangs rgyas dang / /sangs rgyas la la rnam smin 'byung / /yang dag ye shes sangs rgyas rnams/ /ci slad ji ltar bdag la gsungs/ /zhes pa ste/ longs spyod rdzogs pa'i sku mtshan dang dpe byad kyi rnam par snang ba ni sngon bla ma skyel ba la sogs pa las kyi rnam par smin pa las byung ba ste ji skad du shes rab kyi pha rol tu phyin pa las rgyas par bstan pa bzhin no//yang dag ye shes sangs rgyas zhes pa ni chos kyi sku ste/ de rnams kyang dri ba'i ngag gcig tu sbyar ro/ /gzhan yang de 'dra ba'i longs spyod rdzogs pa'i 'dod pa'i khams su 'tshang mi rgya bar 'og min gyi gnas 'dod chags dang bral ba'i khrod du sangs rgyas pa'i tshul ston pa ci'i phyir zhes pa dang /sprul pa'i sku mya ngan las 'da' ba'i tshul bstan nas de'i 'og tu bstan pa su zhig gis gnas par byed pa dang / ston pa lo'i grangs ji srid kyi bar du bzhugs pa dang / chos bstan pa'i tshul ji srid kyi bar du gnas pa dang / khyod nyid kyis gdul bya'i bsam pa la ltos te grub pa'i mtha' dang lta ba rnam pa du ru bstan zhes pa ste/ de la grub pa'i mtha' ni kun rdzob tsam du gdul bya rnams kyi blang bar bya ba dang / dor bya dang btang snyoms su bya ba ni 'di dang 'di lta bu zhes rnam par 'jog pa'o//lta ba ni shes par bya ba'i de kho na nyid 'di lta bu zhes dbang po'i bye brag dang bstun nas rnam par gzhag pa'o/ /de dag kyang dri ba gcig tu sbyor ro/ /dge slong dngos dang 'dul ba yang / /ci slad ji ltar bdag la gsungs/ /zhes pa ni gsol ba dang bzhi'i las kyis bsnyen par rdzogs par gyur pa la sogs pa dang /so sor thar pa'i ris bdun nam brgyad kyis bsdus pa'i 'dul ba ste/ ltung ba sde lnga gzhi gang las ji ltar bcas pa dang / tshul ji ltar 'byung ba dang byung ba las ldang ba'i thabs bstan pa ste/ dri ba gcig tu sbyar bar bya'o//rang rgyal rgyal sras nyan thos kyi/ /ci slad 'gyur ba brgya po dang / /snang ba med pa brgya po yang / /ci'i slad du bdag la gsungs/ /zhes des dri ba'i ngag gcig tu sbyar te/ 'gyur ba brgya ni 'phags pa rnams kyi mthong bas spang bar bya ba'i nyon mongs pa rnam par 'gyur ba gsal bar nyams su myong ba rnams so//de'i don yang mthong ba'i lam ni bden pa bzhi 'am de'i chos nyid sngar ma mthong ba mthong ba yin la des spang bar bya ba'i nyon mongs pa yang bden pa la log par zhugs pa yin pas bden pa bzhi la brten te rnam par 'byed pa na re zhig 'dod pa'i khams na bden pa re re la ltos te/'dod chags dang khong khro dang nga rgyal dang ma rig pa dang the tshom dang / 'jig tshogs la lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa ste rnam pa bcu ru 'gyur ba'o//de la 'dir ma rig pa ni khams gsum gyi mi shes pa'o zhes 'byung bas rnam par 'gyur ba gsal bar myong ba med pa ste/ ji ltar sdug bsngal gyi bden pa mi rtag pa dang / sdug bsngal la sogs par ma gtogs pa tsam mo/ /'dir don la log par 'dzin pa rnam par 'gyur ba gsal bar myong ba rnams de'i 'bras bur gyur pa lta ba'i bye brag rnams su gtogs pa'o//de ltar na ma rig pa ma gtogs pa bden pa re re la rnam pa dgu dgu ste sum cu rtsa drug yin la/ khams gong ma gnyis na khong khro yang med pas bden pa re re la rnam pa brgyad brgyad de de ltar na sum cu rtsa gnyis pa phrag gnyis su 'gyur ba'o//de ltar thams cad bsdoms pas brgya nyid du 'gyur ba'o/ /'dir bsgom pas spang bar bya ba'i nyon mongs pa ni shes bya la log par zhugs pa yin las bden pa la brten pa'i rnam par dbye ba mi byed cing / de yang nyon mongs pa lhan cig skyes pa'i rigs su gtogs pa rnam pa bcu drug yin no zhes chos mngon pa'i bstan bcos las 'byung ste/de rnams las nyon mongs pa mngon du gyur pa ni mthong ba'i lam gyi mnyam par gzhag pa'i ye shes dang 'gal bas de nyid kyis spang bar bya ba'i rigs su 'dus la/ bag la nyal ba ni rnam 'gyur gsal bar nyams su myong ba med pas 'dir ma smos so//gzhan yang nyon mongs pa can ma yin pa'i mi shes pa gzung 'dzin gyi rnam par rtog pa la sogs pa ni nyan thos dang rang sangs rgyas kyi lam gyis spang bar bya ba ma yin pas de yang 'dir ma smos te des na snga ma de dag tsam du zad do//'di rnams kyi don zhib tu ni lan 'debs pa'i skabs su bstan par bya'o/ /snang ba med pa brgya zhes pa ni de rnams kyi gnyen po mnyam par gzhag pa'i ye shes de bzhin nyid yul du byed pa'o/ /de yang spang bya la ltos nas rnam pa brgya'o zhes bzhag ste/ ji ltar lha sbyin nam sna tshogs bshes gnyen gang 'ong yang rung ste/do zla'i gyad ni nga'am nga'o zhes zla'o la ltos na bdag nyid rnam pa gnyis su 'jog pa lta bu'o/ /de las gzhan du snang ba med pa'i chos nyid dam/ de ltar rtogs pa'i ye shes la tha dad pa'i dbye ba ji ltar 'thad ces pa'o/ /don de nyid slob dpon ye shes dpal bzang pos 'chad pa na/'khrul pa gnas 'pho ba brgya ni gnyis su med pa'i don dam pa'i bden pa'i rigs pas spang ngo / /brgya ni mtha' med pas nye bar brtag par byed pa ste grangs mtshon pa tsam yin gyi/ de nyid du brgya chad pa ni ma yin te/ ji skad du chos kyi phung po brgyad khri bzhi stong zhes bstan pa la sogs pa dang mtshungs pa'o zhes so//gzhan yang 'jig rten gyi mngon par shes pa lnga po sngon gyi las sam/ 'phral gyi 'du byed pa gang gis byung zhing de rnams kyi steng du zag pa zad pa'i mngon par shes pa dang drug ste/ 'jig rten las 'das pa'i mngon par shes pa yang ji ltar byung zhes pa ste dri ba gcig tu sbyar ro//rnam par shes pa'i tshogs gnas ma gyur pa'i byang chub sems dpa'i sa bdun po rnams ji ltar byung zhes pa dang / yang / khyod kyi dge 'dun rnam pa du/ /ji ltar dge 'dun dbyen du 'gyur/ /zhes dri ba'i ngag gcig tu sbyar te/ nyan thos dang byang chub sems dpa'i dge 'dun gyi rnam par dbye ba dur 'gyur zhing de rnams grub pa'i mtha' dang /longs spyod la sogs pa'i sgo nas phan tshun 'byed par byed pa'i dbyen dang / de las gzhan mtshams med pa'i las rnams su ji ltar 'gyur zhes pa'o/ /gzhan yang sems can rnams kyi lus ngag yid gsum gyi nad gso bar byed pa'i gtsug lag rnams yin nam ji ltar yin zhes pa dang //'od srungs log par dad sel dang / /gser thub kyang ni nga yin zhes/ /rgyal ba'i sras la gsungs pa de/ /thub pa chen po ci slad gsungs/ /zhes dri ba'i ngag gcig tu sbyar te don ni shes par zad do//yang las sam las kyi khur khyer ba'i bdag gam sems can de bzhin gshegs pa nyid kyis kyang gsungs shing / tshad mas kyang grub bzhin du med ces ci'i phyir brjod ces pa dang / de bzhin nyid rtag pa dang 'jig par bshad pa'i gtam ji ltar mi 'gal zhes pa dang /nyams su myong ba'i tshad mas grub pas sems nyid rig pa don dam pa'i dngos por mdo sde thams cad du ci'i phyir na mi bshad ces pa ste/ de ltar na dri ba nyi shu rtsa bzhi'o/ /ci slad ces pa la sogs pas khyad par du yang phyi'i don med ces pa la brtsad pa'i tshul gyis 'dri ba ste/ kun rdzob tsam du yang phyi'i don med na/ skyes bu rnams kha dog dang reg bya la sogs pa'i khyad par las bde bar 'gyur zhing de la mngon par 'dod pa dang / a ru ra dang skyu ru'i tshal/ /ke la sa dang khor yug ri/ /rdo rje sra ba 'ang ji lta bu/ /zhes pa dri ba'i ngag gcig ste/ don ni skye dgu rnams kyi lus la phan 'dogs par byed pa'i sman gyi tshal dang /ke la sa ste ti se'i byang ngos kyi ri'i khyad par ro zhes glegs bam las 'byung ngo / /khor yug gi ri ni gling bzhi dang rgya mtsho'i phyi rol du gyur pa'i rin po che'i ris bskor ba'o/ /de nyid rdo rje'i ri zhes kyang dus kyi 'khor lo las bshad do//de'i nang nas zhes pa la sogs pa 'ang dri ba'i ngag gcig ste khor yug gi nang na man dA ra ba dang / gser gyi ri la sogs pas brgyan cing / drang srong dri zas kun bkang ba/ /ji ltar ci slad ces pa ste mi 'thad par brtsad pa'o/ /de ltar thams cad bsdoms nas dri ba brgya rtsa brgyad du 'gyur ba'o//theg pa che tshul zhes pa la sogs pas zhu ba po la bsngags pa brjod cing skabs dbye ba ste/ dri ba de rnams thams cad kyang theg pa chen po'i tshul gtan la 'bebs pa/ sangs rgyas rnams kyi thugs la mnga' ba yin la/ de nyid de bzhin gshegs pas gsan pa dang zhes pa gdul bya'i don du tshul de ltar bstan pa'o//gzhan ni phal cher shes par zad do/ /de ni rim gyis ngas bshad ces pa dri ba'i go rims dang bstun pa ni ma yin gyi 'on kyang gdul bya'i khyad par rnams la rim gyis ston par snang ba'o/ /skye dang skye ba med pa dang / /zhes pa la sogs pas dri ba'i don de nyid khyad par du bshad pa dang bcas te rjes su brjod pa'o//de yang phal cher sngar bstan pa'i rjes su 'brang bas rtogs par sla'o/ /'pho ba dang zhes pa ni/ /ji ltar sa la 'jug par 'gyur/ /zhes pa dang sbyar ro/ /nyan thos rgyal ba'i sras zhes pa de yang rim gyis byang chub sems dpa' nyid du 'gyur ba'o//lha ma yin ni sngar gyi 'gro ba'i khyad par ro/ /rnam par thar pa ni brgyad do/ /de bzhin du stobs lnga dang rdzu 'phrul gyi rkang pa bzhi ste byang chub kyi phyogs kyis bsdus pa'o/ /yang stobs rnam pa bcu ste byang chub sems dpa' la yang ldan par mdo sde dag las bshad do//tshogs kyi lam la sogs pa'i lam rnams kyang de bzhin no/ /tshad med rnams dang bsam gtan zhes pa 'jig rten pa'i lam mo/ /'gro 'ong zhes pa ni grol ba gang du 'gro bar 'gyur zhe'am/ 'gro ba gzhan nas 'ongs nas 'dir lus 'dzin cing 'di nas gzhan du 'gro ba dang sbyar ro//snyoms par 'jug pa ni 'du shes med pa'i snyoms par 'jug pa'o/ /'gog pa ni nyan thos rnams kyi'o/ /yang na snyoms par 'jug pa nyid 'gog pa ste gcig tu bsdu'o/ /chos lnga dang rang bzhin gsum ste sngar gyi mtshan rnams rnam par 'god pa'am/rig pa'i gnas zhes pa de nyid du bsdu'o/ /rtog pa dang brtag par bya ba ni gzhan gyi dbang dang kun du brtags pa'i rang bzhin no/ /lta ba gnyis ni rtag pa dang chad par ro/ /sangs rgyas gcig dang dkrugs ma zhes pa ni 'jig rten gyi khams gcig tu dang por mngon par byang chub pa dang /tha mar mya ngan las 'das pa ston pa sprul pa'i sku'i sangs rgyas dang longs spyod rdzogs pa'i sangs rgyas ni gcig yin la/ zhing gzhan nas glo bur du 'dus pa ni dkrugs ma ste du ma'o/ /gzhan yang shes pa dang shes bya'i ngo bor red cing 'byung ba thob ces pa'o//dpe dang rgyu rnams ldan zhes pa shes byed kyi rgyu gtan tshigs dang / de'i khyab pa sgrub byed kyi yan lag dpe dang bcas pa'i grub pa'i mtha' zhes pa'o/ /tshul ni rtog gi rnam par dag pa'o/ /de ltar dri ba rjes su brjod nas sems tsam ni zhes pa de rnams thams cad sems kyi snang ba yin pas sems nyid la rnam par 'jog ces pa ste/sngar sems tsam gyi tshul la rtsod pa spang ba'i skabs su rgyas par bstan pa bzhin no/ /snang ba med ces pa dang / /sa rnams la yang rim pa med/ /ces pa ni de kho na nyid sems kyi khyad par rang yang grub pa med ces pa'o//de bzhin te zhes pas chos kyi khyad par brgya po ci phyir bdag la gsungs zhes dris pa'i don dang gso ba'i gtsug lag la sogs pa de rnams kyang kun rdzob tu sems nyid yin zhing don dam par ngo bo nyid med ces sngar bstan pa de bzhin te shes pa'o/ /gal te kun rdzob tu sems nyid yin pa de lta na yang /de rnams kyi bye brag ji ltar dris pa bzhin du bstan par rigs so zhe na ma yin te/ nor bu mu tig gser 'byung ba/ /zhes pa la sogs pa dri ba'i don gdul bya la skabs su nye bar mkho ba med pa ni dri bar mi rigs shing de bzhin du lan yang gdab par mi 'os pa'o//gal te da ltar nye bar mkho ba ma yin kyang dus gzhan na gdul bya la nye bar mkho ba nyid du 'gyur te/ dngos sam brgyud pas rang ngam gzhan gyi don du mi 'gyur ba'i dngos po cung zad kyang med pa'i phyir ro zhe na/ ma yin te/ de ltar na/ /ri bo de bzhin ri rnams dang / /sa'i tshad kyang zhes pa la sogs pa'i don 'di rnams kyang dus gzhan du sems can la nye bar mkho bar 'gyur bas/ci'i phyir na mi 'dri ste dri bar rigs pa nyid du 'gyur zhes pa'o/ /tshig gi don ni phal cher shes par zad do/ /bdag la gsungs zhes pa la sogs pa'i tshig 'di rnams kyi don ni 'dri ba pos bdag la gsungs zhes ci'i phyir mi 'dri ste 'dri bar 'os zhes pa'o//rab dang 'bring ni lus che chung gi sgo nas rdul mang nyung du 'gyur ba'o/ /'bum dang zhes pa la sogs pas ni khal gcig la rdul phran 'bum phrag du yod ces pa la sogs pa'o/ /dbang po gcig cing rdul phran du zhes pa la sogs pa ni gzugs can gyi dbang por grags pa re re la yang rdul phra rab kyi grangs du yod ces pa dang /sems can gyi lus la smin ma dang spu'i khung bu'i grangs du yod ces ci'i phyir mi 'dri zhes pa'o/ /gal te skabs su nye bar mkho ba med na dus gzhan du nye bar mkho ba nyid du 'gyur yang de 'dra ba'i dngos po thams cad ni dri bar mi nus shing /dris pa la dgos pa yang med de/ thams cad bsdus pa'i don sems kyi chos nyid stong pa nyid gtan la phab cing goms pa la brten nas chos kyi khyad par thams cad rtogs par 'gyur ba'i phyir ro/ /de skad du yang /'jig rten khams ni stong dag tu/ /ngas ni mdo sde gang bshad pa/ /tshig 'bru tha dad don gcig ste/ /thams cad brjod par nus ma yin/ /tshig gcig rnam par bsgoms pa yis/ /de dag thams cad bsgom par 'gyur/ /zhes pa la sogs pa sngar bstan pa bzhin no snyam du gdul bya'i khyad par 'ga' zhig dgos na mi 'thad de/de lta na sngar gyi dri ba rgyas pa rnams kyang dri bar mi 'os pa nyid du 'gyur ro zhes ston pa ni/ phyug po'i mi rnams ci las 'gyur/ /zhes pa la sogs pa'o/ /tshig gi don ni phal cher sngar gyi dri ba dang sbyar bas shes par zad do//gang du sprin rnams 'byung bar 'gyur/ /zhes pa la sogs pa ni yul lam sog la sogs pa'i dus gang du zhes pa'o/ /dus kyi rnams zhes pa yang dus de nyid kyi dbye ba'o/ /rgyal ba'i sras kyis mdzes zhes pa de bzhin gshegs pa la rgyal ba'i sras kyis bskor ba'o/ /byed pa ci yi 'byung zhes pa ni/'gro ba dag dang lus 'dzin pa/ /ci yi slad du bya ba 'byung / zhes pa dang sbyar ro/ /ci'i phyir bdag la gsungs zhes pa ni/ zhu ba po khyod bdag la gsungs/ zhes ci'i phyir 'dri ste/ dri bar mi 'os zhes pa'o/ /gal te de ltar na byang chub sems dpa' dri ba'i ngag skyon dang bcas pa nyid du 'gyur ram zhe na/mi 'gyur te/ de lta bu'i brgal ba dang lan brgyud pa la brten nas skabs su nye bar mkho ba med pa'i don ni mkhas pa rnams kyis gtso bor gtan la dbab par bya ba ma yin la/ gtso bor gtan la dbab par bya ba'i don ni thams cad bsdus pa sems kyi chos nyid de bzhin nyid yin no zhes rtogs par 'gyur ba'i dgos pa dang ldan pas so//de la sngar gyi dri ba'i don yang phal cher de nyid gtan la 'bebs pa'i yan lag tu 'gyur bas 'og nas lan rgyas par bstan par bya zhing / 'ga' zhig ni lan gdab par bya ba ma yin zhes pa'o//de rnams kyang byang chub sems dpas dris pa'i dgos pa ni snga ma ltar rtogs pa skyed pa nyid yin te des na dgos pa dang ldan pa'i phyir skyon med ces pa'o/ /'di dang gzhan yang zhes pa la sogs pas sngar dris pa dang / 'og nas 'dri bar 'gyur ba thams cad kyi don gyi de kho na nyid bsdus pa sems kyi chos nyid bshad par dam bca' zhing //nyon cig par gdams pa'o/ /re rer mtshan dang rab ldan zhing / /zhes pa la sogs pa'i don ni dri ba'i don so sor re rer dngos po'i mtshan nyid mi 'dra ba dang ldan zhing / de lta bu'i dngos por 'dzin pa'i lta ba'i nyes pa rnams spangs te/thams cad sems kyi chos nyid de bzhin nyid du phyogs gcig tu grub pa'i mtha' nga yis bstan par bya yis khyod cag nga la nyan par gyis zhes pa'o/ /rnam pa gcig tu na dri ba rnams kyis gnas skabs su nye bar mkho ba'i don rnams kun rdzob tu so sor mtshan nyid ma 'dres pa lta ba phyin ci log gis brtags pa'i nyes pa spangs te/phyin ci ma log pa'i phyogs kyi grub pa'i mtha' nga yis bshad ces pa la sogs pa'o/ /tshig rnams bkod pa zhes pa la sogs pa'i don ni dri ba la sogs pa de dag thams cad tshig tsam yin gyis don grub pa med par ston pa'i tshig dgod ces pa la sogs pa ste shes par zad do//de ltar dri ba'i lan shin tu bsdus pa dang dri bar mi 'os pa la sogs pa'i tshul gzhan gyi sgo nas bsdus te bstan pa dang / yang de las tshul gzhan gyi sgo nas bshad par dam bcas shing nyan par gdams par bstan nas/ de nyid la dri ba'i tshig 'god pa ni de nas zhes pa la sogs pa'o//gal te 'dir dri ba dang lan gyi tshig brgya rtsa brgyad nyid du ston par byed pa'i rgyu mtshan ni mi 'thad de/ dri ba la sogs pa'i don skabs su nye bar mkho ba 'am gzhan yang rung ste rdzogs par ston pa yin na ni ches shin tu nyung bar 'gyur la/ phyogs 'ga' zhig tsam ston pa yin na ni mangs par yang 'gyur ro zhe na/skyon med de/ 'di ni gdul bya nye ba nyid kyi bsam pa la dgongs nas shes rab kyi dmigs pa'i yul gtso bor gtan la 'bebs pa ni 'di nyid tsam bstan pas gdul bya rnams rjes su 'dzin par 'gyur bas de ltar dri ba dang lan gyi tshig 'di dag tsam bkod pa'o//'di dag gi go rims nges pa'i rgyu mtshan yang de nyid yin te/ de las gzhan pa'i go rims nges pa'i rgyu mtshan ni cung zad kyang med do/ /de la skye ba'i tshig ces pa la sogs pa dgag pa'i yul brjod pa thams cad ni sgrub pa'i rnam pa nyid du dngos su blo la snang ba'am/de la zhen nas rtogs par bya ba'i rang bzhin te le'u dang por chos zhes pa'i sgras bstan par bya ba'i don dang sbyar bar bya'o/ /don 'di rnams thams cad kyang sngar bstan pa'i rigs pa'am/ 'og nas kyang gtan tshigs du ma'i sgo nas 'gog pas bden pa'i don ni cung zad kyang med de/de ltar bstan pa ni tshig tsam nyid yin zhes pa'o/ /de'i phyir de la ltos nas gzhag pa'i bkag pa'i chos blo'i ngo na snang ba thams cad kyang sngar gyi chos med pa zhes pa'i tshig gi don dang sbyar te/ de yang ltos pa ma grub pa'i phyir de la ltos te gzhag pa rnams brdzun pa nyid kyi phyir don grub pa med pas tshig tsam yin zhes pa'o//de skad du yang mdo sde gzhan dag las/ 'di dag thams cad ming tsam ste/ /'du shes tsam la rab tu gnas/ /rjod par byed las ma gtogs pa/ /brjod par bya ba yod ma yin/ /zhes gsungs pa'i phyir ro//de ltar na brjod pa'i tshig yod dam zhe na/ ma yin te de yang don la ltos te brtags pa'i phyir ltos sam grub pas mi 'thad ces pa'o/ /de skad du yang / yod pa'i zlas drangs med pa ste/ /zhes pa la sogs pa 'og nas ston par 'gyur ro/ / de ltar na tshig dang don du snang zhing bshad pa nyid mi 'thad do zhe na/ de ltar snang ba kun rdzob tu sems nyid yin gyi tha dad pa'i don grub pa med do/ /de skad du yang / chos 'chad pa dang nyan dang bshad bya gang yin pa/ /de kun sgyu ma lta bur de bzhin gshegs pas bstan/ /zhes gsungs so/ /tshig so so'i don ni sngar gyi dri ba dang /lan bsdus te bstan pa'i tshig dang sbyar bas rtogs par sla ba nyid du zad do/ /dgag pa'i tshig thams cad ni/ sems tsam de ni snang ba med/ /sa rnams la yang rim pa med/ /ces lan bsdus te bstan pa'i tshig dang sbyar bar bya zhing / gzhan yang sngar gyi dgag pa ston pa'i tshig gi khyad par dang yang sbyar bar bya'o//mi skye ba dang mi rtag pa ni skye ba dang rtag pa bkag pa yin gyi yongs gcod kyi cha ston pa ni ma yin no/ /mtshan nyid kyi tshig ni mtshan nyid rnam par dgod pa zhes pa dang sbyar ro/ /gnas gzhan du 'gyur ba ni ji ltar sa la 'jug ces pa dang ngo //rang bzhin yod pa ni chos lnga dang rang bzhin zhes pa dang ngo / /sems kyi tshig ni yid dang rnam par shes pa zhes pa la sogs pa dang ngo / /dbu ma'i tshig ni sems tsam ni snang ba med ces pa dang sbyar te/ yod med kyi mtha' dang bral ba rnam par rig pa tsam gyi dbu ma'o/ /ther zug pa'i tshig ni snying po ji ltar 'byung zhes pa dang ste/de bzhin gshegs pa'i snying po 'gyur ba med pa'o/ /nyon mongs pa ni ci slad 'gyur ba brgya zhes pa dang ngo / /sred pa'i tshig ni ci slad skyes bu na chung sha 'tshal bar yang ji ltar 'gyur zhes dang ngo / /thabs kyi tshig ni mtshan dang de bzhin gzugs sna tshogs zhes pa dang sbyar te/sems can 'dul ba'i thabs su ji ltar mos pa'i gzugs su ston pa'o/ /mkhas pa'i tshig ni/ gang gis ji ltar rab tu bshad/ /ces pa dang sbyar te/ mkhas pa gang gis zhes pa'o/ /smon pa'i tshig dang 'khor gsum gyi tshig dang mtshan ma'i tshig ni ting nge 'dzin zhes pa dang sbyar te/rnam par thar pa'i sgo gsum ting nge 'dzin gyi dgag bya khams gsum la smon pa la sogs pa'o/ /'khor gsum ni bya ba thams cad la byed pa po dang / las dang bya ba gsum du btags pa'o/ /yod med kyi phyogs ni gnyis kyi mtha' brjod ces pa dang ste/gang yang rung ba cig gi mthar 'dzin pa'o/ /gnyi ga'i tshig ces pa ni de lta bu'i mtha' gnyis ka tshogs pa'o/ /mthong ba'i chos la bde ba'i tshig ni/ de dag 'di dang slad mar yang / /chags med nyer len ma mchis 'gyur/ /zhes pa dang sbyar ro/ /'gog pa'i snyoms par 'jug pa la sogs pa la yang snga ma rnams kyis bshad do//chu'i tshig ni khams drug 'dzin pa dang zhes pa 'am chu'i zla ba 'dra ba zhes pa dang ngo / /rmongs pa'i tshig ni glang po ri dgas rta blun zhes pa dang ngo / /yang dag pa'i tshig ni/ ci phyir sems tsam yang dag nyid/ /zhes pa la sogs pa dang ngo //skyo ba'i tshig ni bcings pa su lags zhes pa 'am/ bsam gtan pa'i yul dang sbyar bar bya'o/ /stug po'i tshig ni shing gi 'khri shing zhes pa dang ngo / /sgyu rtsal dang rig pa dang bzo'i tshig ni tshig gsum du dbye bar bya'o/ /sems kyi tshig ni sems dang pha rol phyin pa zhes pa 'am/ yang sems dang sa rnam bdun zhes pa dang sbyar ro/ /blo'i tshig ni/ blo dang rig pa bgyi dang bral/ /zhes pa'i dgag bya ston pa'i tshig dang ngo / /'khor lo'i tshig ni sgyu ma'i dpe rnams ston pa'i skabs su mgal me'i 'khor lo don gyis bstan pa 'am/ yang na khor yug gi ri zhes pa dang sbyar ro//nyi zla dang skar ma'i tshig kyang rnam pa gnyis su dbye ba'o/ /bden pa'i tshig ni/ de bzhin nyid ni rnam pa du/ /zhes pa dang ngo / /yan lag gi tshig ni byang chub yan lag ces pa dang ngo / /sgyu rtsal rig pa ni yul can gyi shes pa yin pas snga ma dang zlos pa med do/ /nor ba'i tshig ni ci'i slad du nor pa zhes pa dang ngo //bsrung ba ni rgyal srid bsrung ba'o/ /rus kyi tshig ni shAkya'i rigs zhes pa dang ngo / /gzung ba'i tshig ni snang la ji ltar 'jug ces pa dang ngo / /g.yo ba'i tshig ni 'gro ba dag dang zhes pa 'am rnam par shes pa yul la g.yo ba'o/ /'og ma'i tshig ni khams 'og ma ste 'dod pa'i khams so//rgyu dang 'bras bu'i tshig ni rnam pa gnyis su dbye ba'o/ /bstan pa gzud pa ni/ /bshad pa dag kyang ji ltar 'gyur/ /zhes pa dang ngo / /byin gyi rlabs ni ye shes dang thugs rje'i byin gyi rlabs kyis zhing thams cad du mtshan dang gzugs sna tshogs ston zhes pa dang ngo //yang sangs rgyas kyi mthus stan las langs zhes pa dang yang sbyar ro/ /de ltar na tshig brgya rtsa brgyad po 'di rnams kyi don ni dngos su sngar gyi dri ba brgya rtsa brgyad dang sbyar zhing de nyid kyis de'i rigs su gyur pa gsung rab la sogs pa nas bstan pa'i tshig thams cad kyang shes par bya ste/tshig tsam nyid yin gyi sgrub pa 'am dgag pa'i don ni cung zad kyang med do zhes sngar bstan pa bzhin no/ /sngon gyi sangs rgyas kyis brjod ces pa ni de dag gis gsungs shing / da ltar ngas kyang bstan zhes pa'o/ /de ltar dgongs pa can gyi tshig gzhan gyi sgo nas dris pa'i lan bsdus te bstan nas de nyid shin tu rgyas par 'chad pa ni de nas yang zhes pa la sogs pa'o//de las dang po chos thams cad bsdus pa'i le'u la yang don rnam pa lnga'i sgo nas ston pa las/ /dang po shes par bya ba'i rang bzhin ston te/ de yang don rnam pa bcu'i sgo nas ston pa las dang por gzhan gyi dbang rnam par shes pa rnams kyi skye ba dang 'gag pa la sogs pa'i tshul ston to//de las dang po'i dris lan gyi tshul gyis mdo tsam du bstan pa ni/ de nas yang zhes pa nas mtshan nyid gnas pa'o zhes pa'i bar ro/ /de yang gzhan gyi dbang ni 'dus byas pa yin la/'dus byas kyi mtshan nyid kyang skye ba dang gnas pa dang 'gag pa dang rnam pa gsum yin par 'phags pa klu sgrub kyi zhal snga nas gsungs la/ mdzod kyi bstan bcos las rnam pa bzhir bshad pa ni tshul lugs gzhan yin pas/ de dang 'gal ba'i nyes par mi 'gyur ro/ /de la rgyu ni rang rang gi rigs kyi rgyu dang 'bras bu du mar 'brel ba'o//mtshan nyid ni 'dir rnam par shes pa rnams kyi mtshan nyid sngar bstan pa ste/ mdor bsdu na rtogs pa'i rang bzhin nyid yin te/ de ltar mtshan nyid dngos sam mtshan nyid dang ldan pa'i dngos po la yang mtshan nyid ces bya'o/ /de ci'i phyir rgyun kyang mtshan nyid kyis bsdus mod kyi de'i khyad par gyi ldog pa gzhan yin pas gnyis su phye ba'o//blo gros chen po zhes pa la sogs pa ni dbye ba la sogs pa'i sgo nas rgyas par ston te/ /de las dang po'i dbye ba'i tshul ni rnam par shes pa rags pa 'am gsal bar 'jug pa dang / de'i gnas kyi dbang du byas te dbye na rnam pa gsum ste/ 'jug pa'i mtshan nyid dang las kyi mtshan nyid dang / rigs kyi mtshan nyid do/ /de la dang po ni sgo lnga'i rnam par shes pa yul so so la 'jug pa'o/ /gnyis pa ni yid kyi rnam par shes pa ste de yang nye bar gnas pa las byung ba dang /tshol ba pa dang nges pa'o zhes chos mngon pa las bshad pa las/ 'dir ni tshol ba dang nges pa gnyis yin te/ des kyang lus ngag tu snang ba'i las kun nas slong bar byed pa 'am/ kun gzhi la rnam par shes pa thams cad kyi bag chags 'jog par byed pa 'am/ don 'di ltar yin gyi gzhan du ma yin zhes gtan la 'bebs pa'i bya ba byed pas las kyi mtshan nyid ces bya'o//yang las kyi mtshan nyid ni de'i las su gyur pa kun gzhi la yod pa'i bag chags kyang yin no/ /gsum pa ni gnyis po de rnams kyi gnas kun gzhi rnam par shes pa ste de rnams kyi rigs mthun pa'i rgyu yin pas rigs kyi mtshan nyid ces so//gal te de ltar na theg pa chen po'i gsung rab las rnam par shes pa brgyad nyid du gsungs pa ma yin nam zhe na/ de ltar yang srid tshad kyi dbang du byas nas rgyas par phye na/ de rnams kyi steng du yang nyon mongs pa can gyi yid dang brgyad du 'gyur ba'o//rnam par shes pa rnams kyi so so'i rang rang gi ngo bo la sogs pa cung zad brjod par bya ste/ re zhig sgo lnga'i rnam par shes pa'i rang rang gi ngo bo ni lung du ma bstan pa nyid yin la/ so so'i mtshan nyid las mig gi rnam par shes pa'i mtshan nyid ni/ bdag po'i rkyen mig gi dbang po la brten nas gzugs kyi rnam par gsal ba'o//de lta na de dang mtshungs par ldan pa'i sems las byung ba la khyab ches par 'gyur ro zhe na/ skyon med de/ de nas sems las rdzas tha dad pa ma yin zhing de nyid kyi khyad par du gtogs pa'i phyir te/ ji ltar ba lang gi mtshan nyid lkog shal la sogs pa dang ldan pa ser zal la zhugs pa'i khyab ches par mi 'gyur ba bzhin no//sems dang sems las byung ba rdzas tha dad med pa'i don 'di yang 'og nas bstan par bya'o/ /gal te mig gi dbang po nyid gang zhe na/ 'dir gzugs can gyi dbang po zar ma'i me tog lta bu zhes pa la sogs pa ni sde pa rnams kyis brtags pa yin gyi don du grub pa ni med do//'on kyang mig gi dbang po zhes bya bar grags shing snang ba 'am/ de la brten pa'i nus pa'i khyad par sems kyi ngo bor gyur pa'o/ /de nyid ji ltar grub ce na/ mngon sum nyid [(]gyis [,]kyis [)]grub pa 'am/yang na rkyen gsum tshang yang res 'ga' ma dmigs pa'i phyir zhes pa'i gtan tshigs la brten nas rkyen gsum las ma gtogs pa'i mig gi rnam shes skyed pa'i nus pa'i khyad par 'ga' zhig mig tu grags pa'i phyogs 'di nyid na yod do zhes rtags las rtogs par gyur pa ste/ji ltar tshad ma rnam 'grel las bshad pa bzhin no/ /de nyid bdag po'i rkyen du 'gyur ba ni rnam shes don du snang ba'i phyogs su 'phro zhing 'jug pa ni rkyen gzhan tshang ba'i gnas skabs na mig phye btsums kyi rjes su 'gro ldog byed pas des bskyed de/ ji ltar rigs pa'i bstan bcos dag las/de ma thag pa'i rkyen gyis ni mig gi rnam par shes pa rtogs pa'i bdag nyid du skyed la dbang pos ni yul la 'dzin nus su skyed ces pa la sogs pa gsungs pa lta bu'o/ /'dir yul ni da ltar ba'i gzugs la sogs pa'i rang gi mtshan nyid kyi skad cig ma yin zhes mngon pa'i bstan bcos las bshad pa ni nyan thos sde pa rnams kyi grub mtha' dang bstun pa yin gyi/de lta bu'i yul grub pa ni med de/ 'on kyang gzugs kyi rnam par snang ba sems kyi ngo bor gyur pa nyid mig gi rnam par shes pa'i yul zhes bya'o/ /de skad du/ rang gi sa bon gang las de'i//rnam rig snang ba gang byung ba/ /de dag de yi skye mched ni/ /rnam pa gnyis su thub pas gsungs/ /zhes pa'o/ /gzhan yang snga ma ltar na zla ba gnyis snang la sogs pa 'khrul pa'i shes pa rnams kyi yul ni rang gi mtshan nyid ma yin pas ma khyab pa nyid du yang 'gyur ro/ /rna ba'i rnam par shes pa la sogs pa'i mtshan nyid dang yul yang 'di nyid kyi rjes su 'brangs te rtogs par bya'o//yid kyi rnam par shes pa'i ngo bo ni dge mi dge la sogs pa ci rigs par 'gyur ro/ /mtshan nyid ni bdag po'i rkyen yid la brten nas yul gyi rnam par snang ba'o/ /yid kyang drug po 'das ma thag pa yi//rnam shes gang yin de yid do/ /zhes pa'am/ rang gi rigs kyi skad cig ma snga ma'o/ /'di'i yul ni dus gsum gyis bsdus pa'i chos 'dus byas dang 'dus ma byas pa'i spyi yin la/ yang nye bar gnas pa las byung ba ni rang gi mtshan nyid la dmigs pa yin no zhes kyang 'chad de/tshad mas grub pa ni med do/ /gzhan yang yid goms pa'i stobs kyis rang gi mtshan nyid kyi don gsal bar snang ba yang phyi'i don gyi tshul khas len pa rnams 'dod mod kyi/ yang dag par ni ma yin no zhes sngar bstan to/ /'di rnams kyi las dang mtshungs par ldan pa la sogs pa chos mngon pa'i bstan bcos las bshad pa ni mdo sde pa la sogs pa'i bstan bcos dang bstun nas kun rdzob kyi tshul rnam par gzhag pa spros te bstan pa yin la/'dir ni don la gzhol ba nges pa'i don nyid bstan pa yin pas mi spro'o/ /yang kun gzhi la rnam par shes pa'i ngo bo ni ma bsgribs la lung du ma bstan pa yin la mtshan nyid ni rnam par shes pa thams cad kyi sa bon du gyur pa ste/ji skad du stug po bkod pa'i rgyan las/ thams cad sa bon kun gzhi la/ /rnam par shes pa kun kyang gnas/ /rnam shes bdun po kun gzhi las/ /rab tu 'byung ngo phan tshun gnas/ /zhes gsungs pa'i phyir ro/ /de'i don yang rnam par shes pa bdun po rnams 'gag pa na rang gi rigs mthun phyi ma skyed nus kyi bag chags kun gzhi la bsgos pa'o//de nyid kyi phyir de ni rgyu mthun pa'i bag chags zhes kyang bya la/ rnam shes sna tshogs su snang zhing spros pa'i bag chags zhes kyang bya'o/ /gzung 'dzin gnyis su snang ba la sogs pa'i bag chags dang ldan pas 'dzin pa gnyis kyi bag chags zhes pa la sogs pa rnam grangs du ma lung las bshad pa'o//rnam shes bdun po rnams ni phan tshun nam rang rang gi bag chags bsgo ba'i rten du mi 'thad de/ /rgyun mi brten pas sa bon chud zos par 'gyur ba ste/ ji ltar rgyun mi brten pa'i skyes bu la nor bcol na chud zos par 'gyur ba bzhin no//kun gzhi ni rgyun dang ldan pas de lta bu'i nyes pa las grol ba'o/ /yang kun gzhi de nyid la rnam par smin pa'i rnam par shes pa zhes kyang bya ste/ rnam par smin pa ni rgyu zag pa dang bcas pa'i dge ba dang mi dge ba las byung zhing /de yang rgyu dang dus gzhan gyis chod pa'i 'og tu byung ba dang / sems can gyi rgyud kyis bsdus pa dang / rang gi ngo bo lung du ma bstan pa'o zhes bstan bcos dag las bshad do/ /gzhan yang de nyid la len pa'i rnam par shes pa zhes kyang bya ste/ 'di ltar des lus 'di gzung zhing blangs pa'i phyir ro zhes dgongs pa nges par 'grel pa las bshad pas so//de bzhin gshegs pa'i snying po zhes kyang mdo sde 'di nyid las ston par 'gyur zhing / mya ngan las 'das pa la sogs pa'i mdo sde gzhan las kyang gsungs te skabs su bab pa na bshad par bya'o/ /'di'i dmigs pa'i yul ni 'og nas ston par 'gyur ro//ldog pa'i dus la rigs chad pa khas len pa rnams ni de 'dra ba'i gang zag la ltos te ldog pa'i dus med de/ phyi ma'i mthar thug pa med pa'o zhes 'dod do/ /mi 'thad pa nyid du 'og nas ston to/ /des na 'dir sa bon gyi cha dang rnam par smin pa'i cha las dang po sa bon la yang gnyis te zag pa dang bcas pa'i sa bon dang /zag pa med pa'i sa bon no/ /de la zag pa dang bcas pa'i sa bon kyang gnyis yin pa las/ dang po mthong bas spang bar bya ba'i nyon mongs pa ni mthong ba'i lam skyes pa'i dus na ldog la/ bsgom pas spang bar bya ba yang sgom pa mthar thug pa'i dus na ldog pa'o//zag pa med pa'i sa bon ni ldog pa mi 'thad de/ sangs rgyas pa'i gnas skabs na yang zag pa med pa'i chos rnams kyi rten du gyur pa me long lta bu'i ye shes rgyun dang ldan pa ste/ ji skad du/ me long ye shes mi g.yos te/ /ye shes gsum ni de la brten//zhes pa la sogs pa gsungs so/ /gzhan yang sa bon de rnams kyi rten du gyur pa kun gzhi'i ngo bor gyur pa'i rtogs pa'i rang bzhin ni rgyun mi 'chad pa ste/ rtogs pa'i bdag nyid ni de 'dra ba'i rang bzhin gyi 'bras bu phyi ma phyi ma rnams skyed pa la/ rgyu ma tshang ba med pa nyid du da ltar nyams su myong bas grub la/de'i phyir/ ma tshang med rgyu de la ni/ /'bras bu gang gis ldog par 'gyur/ /zhes pa ste ldog pa nyid mi 'thad ces pa'o/ /rnam par smin pa'i cha ni me long lta bu'i ye shes thob pa'i dus na ldog ces bshad pa'o/ /gal te de lta na longs spyod rdzogs pa'i sku ye shes kyi bdag nyid du gyur pa ni rnam par smin pa'i sangs rgyas zhes 'og nas ston pa dang 'gal lo zhe na/skyon med de/ sngon dge ba goms pa'i bag chags las brgyud nas skyes pas rnam par smin pa zhes btags su zad kyi/ rnam par smin pa dngos ni ma yin te/ zag pa dang bcas pa'i las kyis ma bsgrubs pa'i phyir ro//'di'i sgrub par byed pa'i tshad ma yang 'og nas ston par 'gyur ro/ /nyon mongs pa can gyi yid kyi ngo bo ni bsgribs la lung du ma bstan pa yin te/ ngar 'dzin pa phra mo dang ldan pa'i dus na de kho na nyid kyi ye shes 'char ba'i bgegs byed pa'i phyir ro//mtshan nyid ni kun gzhi la nga yir 'dzin pa dang bcas pa ste/ ji skad du/ ngar sems nyid ni yid yin no/ /zhes pa dang / yid ni bdag la bdag ces te/ ngar 'dzin rab tu 'jug pa yin/ /zhes gsungs pa'i phyir ro/ /'di'i dmigs pa'i yul ni kun gzhi rnam par shes pa'o//de yang sa bon gyi cha ni dge mi dges bsdus pas de la dmigs par mi nus la/ 'on kyang rnam par smin pa'i cha las dmigs pa yin zhing / de yang rnam par 'jog pa'i tshul gyis dmigs pa ni ma yin gyi 'khrul pa'i gzhir gyur pa'i sgo nas dmigs pa yin no zhes 'chad pa ni mi 'thad de/kun gzhi ni lung ma bstan gyi sa bon kyang yin te/ sngar bstan pa ltar/ thams cad sa bon kun gzhi la/ /zhes pa la sogs pa gsungs pa'i phyir ro/ /des na sa bon ni dge mi dges bsdus pa ma yin no/ /de ltar yin yang 'khrul pa'i gzhir gyur pa'i sgo nas dmigs pa'i yul yin pa la ni 'gal ba cung zad kyang med do//'di'i ldog pa'i dus ni rnam pa gsum ste/ 'jig rten 'das pa'i lam la med/ /'gog pa'i snyoms par 'jug la med/ /dgra bcom nyid ni de ldog go/ /zhes gsungs so/ /de la 'jig rten las 'das pa'i mthong ba'i lam la sogs pa dang /'gog pa'i snyoms par 'jug pa la med pa ni rang gi ngo bo grol ba ste/ re zhig mngon du rgyu ba log pa yin gyi sa bon spangs pa'i sgo nas gtan du log pa gang zag gi rgyud grol ba ni ma yin no/ /dgra bcom pa'i rgyud la ldog pa ni sa bon dang bcas te spangs pa gtan du ldog pa'o zhes chos mngon pa'i bstan bcos las bshad mod kyi/'di yang mi 'thad pa nyid du 'og nas ston par 'gyur ro/ /de'i phyir sa bon dang bcas te gtan du ldog pa ni byang chub sems dpa'i sa brgyad pa yan chod dam yang na sangs rgyas pa nyid kyi gnas skabs so//'di'i sgrub par byed pa ni yid ches pa'i lung las gzhan dngos po stobs kyis zhugs pa'i tshad ma ni ma mthong ngo / /de ltar rgyas par phye na brgyad du gsungs pa'i rnam par shes pa ni gsal bar ram rags par 'jug pa'i dbang du byas te/ mdor bsdus nas rnam par phye na rnam pa gnyis te/snang ba'i rnam par shes pa dang / dngos po so sor rtog pa'i rnam par shes pa'o/ /de ltar dbye ba'i tshul bstan nas so so'i rang bzhin dang 'jug pa'i tshul la sogs pa ston pa ni blo gros chen po zhes pa la sogs pa'o/ /ji ltar me long la gzugs brnyan snang ba ni phyi rol rdzas su grub pa med pa bzhin du/gzugs dang sgra la sogs pa yang phyi rol rdzas su grub pa ni med de/ sems nyid kyi rnam pa'o/ /de 'dra ba la 'dzin pa ni sgo lnga'i rnam par shes pa ste/ snang ba'i rnam par shes pa zhes gcig tu bstan pa'o/ /dngos po so sor rnam par rtog pa ni tshol ba dang nges pa'i yid kyi rnam par shes pa ste/don 'di ni 'di ltar yin gyi gzhan du ma yin zhes nges pa'am/ the tshom gyi rnam pa can gyi blo'o/ /de gnyis kyang rtogs pa'i bdag nyid kyi spyi'i mtshan nyid tha mi dad cing phan tshun gcig gi rgyu gcig yin te/ de'i don yang sgo lnga'i rnam par shes pa'i rgyun gyi thog ma ni yid kyi rnam par shes pas de ma thag pa'i rkyen byas nas skye bar 'gyur la/ yang mig gi rnam par shes pa la sogs pa don gyi rnam par snang ba na des de ma thag pa'i rkyen byas nas de'i rjes thogs su ci don 'di 'di ltar yin nam gzhan du yin zhes tshol ba la sogs pa'i yid kyi rnam par shes pa skye bar 'gyur ba'o//yang rnam par shes pa snga ma'i rgyu'i rkyen ni kun gzhi rnam par shes pa la yod pa'i rigs mthun pa la sogs pa'i bag chags nyan thos la sogs pa'i bsam pa'i yul las 'das pas bsam gyis mi khyab pa yin la/de nyid yongs su smin cing sad pa'i rgyu las byung ba ste/ des rgyu'i rkyen byas pa'i tshul gyis bskyed pa'o/ /bdag po'i rkyen ni sngar bstan pa ltar ro/ /dmigs pa'i rkyen sems las tha dad pa ni khas mi len te/ don 'di yang sngar bstan pa bzhin no/ /rnam par shes pa gnyis pa'i da ma thag pa'i rkyen ni snga ma ltar snang ba'i rnam par shes pa yang yin la/yul la rnam par rtog pa'i rgyu ste rang gi rigs snga ma las kyang byung ba'o/ /gzhan yang rgyu'i rkyen ni thog ma med pa'i zhes pa la sogs pa ste/ rigs mthun pa'i rgyu la thog ma med pa spros pa sna tshogs kyi bag chags kun gzhi la yod pa'o//bdag po'i rkyen ni sngar bstan pa'o/ /gal te de lta na bdag po'i rkyen dang de ma thag pa'i rkyen gnyis khyad par med par 'gyur ro zhe na/ skyon med de/ dngos po gcig nyid yid kyi rnam par shes pa rtogs pa'i bdag nyid du bskyed pa'i cha nas ni//de ma thag pa'i rkyen zhes bya la/ yul la 'dzin nus su bskyed pa'i cha nas bdag po'i rkyen zhes kyang bya ste/ dngos po tha dad pa ni khas mi len pa'i phyir ro/ /dmigs pa'i rkyen ni snga ma dang mtshungs so/ /de la blo gros chen po zhes pa la sogs pas ni de rnams kyi 'gag pa'i tshul ston te/dbang po drug gi rnam par shes pa thams cad 'gag par 'gyur ba'i rgyu mtshan ni kun gzhi la yod pa'i bag chags rgyu'i rkyen 'gags pa ste/ de yang bag chags ni rnam shes skyed nus pa'i khyad par 'ga' zhig yin la/ de yang nus pa can kun gzhi las tha dad pa ma yin pas 'dir kun gzhi dang bag chags gzhi mthun pa'i bsdu ba byas pa'o//gal te 'dir rtog pas dben pa snang ba'i bag chags kyang rnam par shes pa de rnams kyi rgyu'i rkyen ma yin nam/ yang dag pa ma yin pa'i kun du rtog ces de nyid 'ba' zhig ci ste brjod ce na/ bden mod kyi/ rtogs pa'i byed pas dben pa'i snang ba tsam gyis ni rang gi rigs mthun phyi ma skyed nus pa'i bag chags 'jog par mi nus zhes 'og nas ston pas bag chags 'jog pa la rtog pa'i byed pa 'jug pa'i phyir de skad smras pa'o//de la mtshan nyid 'gag ces pa ni las kyi mtshan nyid de/bag chags sam de dang tha mi dad pa'i kun gzhi'i skad cig ma dang / gzhan yang rnam par shes pa de rnams kyi rgyun la yang mtshan nyid kyis khyab pas de rnams 'gag pa ni mtshan nyid 'gag pa'o/ /de la rgyun 'gag ces pa'i rgyun ni sngar bstan pa ltar rang rang gi rigs kyi 'bras bur gyur pa'i skad cig ma du ma gang las rgyun du 'byung ba yin te/de la gang las zhes bya ba ni gang la gnas pa kun gzhi la yod pa'i bag chags rgyu'i rkyen dang / gang la dmigs pa ste/ shes pa'i bdag nyid du gyur pa gzugs la sogs pa'i rnam pa dmigs pa nyid du sngar bstan pa'o//gal te 'dir 'jug pa'i rnam par shes pa rnams dang / de'i gnas kun gzhi rnam par shes pa gcig gam tha dad ce na/ blo gros chen po zhes pa la sogs pa smos te/ tshig gi don ni phal cher shes par zad do/ /de dag las brtsams pa ma yin par 'gyur na zhes pa'i don ni 'jim pa'i gang bu 'jim pa'i rdul phra rab kyi bkod pa ma yin par 'gyur ba las/de'i bkod pa yin pa'i phyir bkod pa dang bkod pa can tha dad par 'gal te/ ji ltar na ngar ba'i ring po bzhin no/ /de ste gcig pa yin na yang de dag phyogs thams cad nas khyad par med pa'i phyir/ 'jim pa'i gong bus bya ba gang byed pa de nyid rdul phra rab so so bas kyang byed par 'gyur ro//de bzhin du gser dang gser gyi sde bu yang bdag nyid thams cad nas gcig par gyur na nyes pa 'di nyid du 'gyur ba'o/ /rigs kyi mtshan nyid ces pa ni de rnam par shes pa thams cad kyi rjes su mthun pa'i rgyur gyur pa 'am//yang na de nyid kyi rgyun la rigs zhes bya'o/ /de dag tha dad na de'i rgyu las 'byung bar mi 'gyur zhes pa'i don ni de kho na nyid du bsams na tha dad dus mnyam pa dang mi mnyam pa gnyis ka rgyur mi 'thad ces 'og nas ston par 'gyur ba'o/ /de ste tha dad ma yin zhes pa bdag nyid thams cad nas gcig pa nyid yin na zhes pa la sogs pa ste tshig gi don ni phal cher shes par zad do//rnam par shes pa rnams kyi rang gi rigs kyi mtshan nyid ni de rnams kyi rigs mthun pa'i rgyur gyur pa/ kun gzhi rnam par shes pa ste/ de dang tha mi dad pa zag pa med pa'i chos kyi sa bon ni sngar bstan pa ltar rgyun 'gag par mi 'gyur la las kyi mtshan nyid de 'jug pa'i rnam par shes pas bsgos pa'i bag chags zag pa dang bcas pa'i sa bon ni ci rigs par 'gags pa'o//gal te de lta na kun gzhi rnam par shes pa gnas gyur pa ni me long lta bu'i ye shes so zhes bshad pa dang 'gal lo zhe na/skyon med de/ zag pa dang bcas pa'i sa bon dang / rnam par smin pa'i cha glo bur gyi dri ma rnams gnas gyur pa yin gyi/ de'i rang bzhin la sogs pa ni snga ma ltar rgyur 'gyur ba ma yin te/ ji ltar chom rkun gyur par grags pa'i skyes bu sngar gyi nyes par spyod pa dang / khyim pa'i rtags spangs pa na skyes bu de nyid gzhan du 'gyur zhes brjod kyi de'i rang bzhin 'gags pa ma yin pa bzhin no//'jug pa'i rnam par shes pa rnams kyi rigs kyi mtshan nyid dam rgyun ni 'gal rkyen dang mthun pa'i rkyen rnams kyi nus pa'i bye brag gis skad cig gnyis dang gsum nas lo dang bskal pa la sogs pa'i bar du ci rigs par 'gag par 'gyur la/yang rnam par shes pa thams cad kyi mtshan nyid dang ldan pa'i skad cig gi dngos po ni rang nyid skye ba'i dus las skad cig gnyis phan chad mi gnas te 'gag par 'gyur ba'o/ /'gag pa'i tshul bstan pa 'di nyid kyis rnam par shes pa rnams kyi gnas pa dang skye ba'i tshul yang shes par bya ste/de la rkyen rnams kyi nus pa'i bye brag gis rnam par shes pa 'ga' zhig ni skad cig gcig pa'i ngo bor skye la/ 'ga' zhig ni skad cig ma gnyis dang gsum la sogs pa'i rgyun dang ldan par skye ba'o/ / 'dir thams cad du rkyen bzhi'i bye brag tha dad pa ni byis pa'i skye bo rnams la tshad mas grub pa med pas khas blang bar mi bya'o/ /de ltar na rnam par shes pa rnams kyi rgyun na skad cig las tha dad par rdzas su grub pa med pas skad cig gi mthar thug la/ skad cig kyang thog ma dang dbus la sogs pa'i bye brag gis tha dad pa ste sngar bstan pa bzhin no//de nyid kyi phyir gzhan gyi dbang gi rang bzhin 'dus byas pa'i dngos po ni don dam par stong pa nyid ces bya'o/ /gzhan yang 'jug pa'i rnam par shes pa dang / rten kun gzhi rnam par shes pa gcig dang tha dad las grol ba nyid kyi phyir don dam par ngo bo nyid med pa ste/skabs kyi don 'di rnams kyang / sngar gyi rkyen gyis skye ba ji lta bu/ /'bras bu ci lags rgyu ni ci lags gang / /zhes rgol ba'i lan du sbyar te/ kun rdzob dang don dam pa'i tshul ji ltar bstan pa bzhin no/ /yang 'dir gal te kun gzhi'i rgyun 'gags pa na de la brten pa'i rnam par shes pa thams cad rgya mtsho dang rlabs bzhin du 'gag par 'gyur te/de lta na chad par smra ba'i mu stegs rgyang 'phen pa dag sems can gyi lus ni chang dang / chang gi nus pa ltar sems las tha dad pa ma yin zhing / de nyid kyi phyir mngon par gsal ba'i sems pa can zhes bya ba la/de yang 'chi ba'i dus byas pa na mngon par mi gsal ba'i sems pa can 'byung ba bzhi'i bag la zha bar 'gyur te/ de las gzhan 'jig rten snga phyis bsdus pa'i 'khor ba dang / mya ngan las 'das pa dang / las dang 'bras bu'i 'brel ba ni med do zhes smra ba dang khyad par med par 'gyur zhes pa'o//'dir yul la 'dzin pa ni mngon par gsal ba'i sems pa'o/ /rgyun chad pas mig la sogs pa'i rnam par shes pa des bsdus pa thams cad rgyun chad par 'gyur zhes pa'o/ /thog ma med pa'i dus kyi rgyun ni 'khor ba ste/gnyen po goms pa med par rgyun chad par 'gyur zhes pa'o/ /de la thog ma med pa ni gzhan gyi lugs rjes su brjod pa yin gyi de dag gi lugs kyis ni 'khor ba la thog ma med par mi 'dod do/ /gal te de las gzhan pa'i mu stegs pa rnams kyi rnam par shes pa skye ba la sogs pa'i tshul ji ltar 'dod ce na/blo gros chen po zhes pa la sogs pa ste/ de la gzugs dang snang ba ni nye bar mtshon pa tsam ste/ sngar bstan pa'i rkyen rnams las shes pa'o/ /de dag gi rgyu ni yon tan gsum cha mnyam pa'i gtso bo mig gi blo la sogs pa rnam par 'gyur ba thams cad kyi byed pa por 'dod pa dang /nang gi skyes bu rig pa'i bdag nyid du gyur pa yul 'dzin cing longs spyod pa'i byed pa por 'dod pa dang / yang rig byed kyi mtha' pa dag sna tshogs pa thams cad skyes bu'i rnam par rig pa tsam nyid kyi rnam par 'phrul pa ste/ de nyid kyi rgyu las byung bar 'dod pa dang /gzhan yang rig pa can dang bye brag pa rnams dbang phyug gi byin gyi rlabs kyis bdag dang yid kun du sbyor ba las shes pa skye bar 'dod pa dang / 'ga' zhig gnas dang lus dang longs spyod du snang ba rnams khyad par du 'phags pa'i blo dbang phyug sngon du song bar 'dod pa dang / dngos po thams cad dus kyi dbang gis 'byung bar 'dod pa dang / rigs mthun pas rdul phan tshun sbyor ba las rags pa yan lag can gyi rdzas rtsom par 'dod cing / de las yon tan la sogs pa skye ba 'dod pa ste/ rgyu dang 'bras bu'i tshul 'di dag ni yang dag pa'i kun rdzob nyid du yang mi 'thad par 'og nas bstan par bya'o//gzhan yang blo gros chen po zhes pa la sogs pas sngar gyi rkyen gyis skye ba'i khyad par sdug bsngal dang kun 'byung gi bden pa gnyis kyis bsdus pa/ srid pa'i yan lag bcu gnyis kyi tshul mdor bsdus te bstan pa 'am/ yang / sems can dngos po'i rnam grangs dang /mngon par brjod pa su yis bskyed/ /ces pa'i lan bsdus te bstan pa'o/ /de las 'du ba'i dngos po'i rang bzhin ni rgyu kun 'byung gi bden pa ste/ las dang nyon mongs pa la sogs pa'i rgyu rkyen phan tshun 'du zhing sbyor ba'i dngos po'o/ /dngos po'i rang bzhin gyi dngos po ni de las da ltar gyi ming dang gzugs la sogs pa'i phung po mngon par 'grub pa sdug bsngal gyi bden par rtogs pa'o//mtshan nyid kyi dngos po ni da ltar gyi phung pos bsdus pa'i tshor ba 'am tshor ba'i rgyu la mngon par chags pa'i sred pa dang / len pa dang / de dag gis ma 'ongs pa'i phung po 'grub par byed pa'i 'du byed kyi sa bon mthu dang ldan par byas pa ste/srid pa zhes grags pa'o/ /de rnams kyang sdug bsngal dang kun 'byung gnyi ga'i char gtogs pa ste/ sngon gyi las dang nyon mongs pa'i 'bras bur gyur pa dang / ma 'ongs pa'i zag pa dang bcas pa'i phung po 'grub par byed pa'i rgyur gyur pa'o//de nyid kyi phyir de ni kun nas nyon mongs pa'i mtshan nyid yin pas mtshan nyid kyi dngos po zhes bya'o/ /'byung ba chen po'i rang bzhin gyi dngos po ni de dag gis bsdus pa phyi dang nang gi 'byung ba ste/ sems can gyi skye ba'i gnas kyis bsdus pa'o//de yang sems kyi snang ba las ma gtogs pa bems po'i ngo bo ni grub pa med ces bstan to/ /rgyu'i dngos po ni 'du byed kyi sa bon dang ldan pa kun gzhi rnam par shes pa ste/ ma rtogs na 'khor ba'i nye bar len pa'i rgyur 'gyur ba'o/ /rkyen gyi dngos po ni ma rig pa dang 'du byed dang sred pa la sogs pa ste/sngar gyi 'du ba'i don nyid kyang gsal bar bstan pa ste/ 'on kyang da ltar gyi gnas skabs las ma 'ongs pa'i phung po 'grub par byed pa'i rgyu dang rkyen la sbyor bas zlos pa'i nyes par 'gyur ba ni ma yin no/ /'grub pa'i dngos po ni rgyu rkyen de dag la brten nas skye ba dang rga shis bsdus pa dang /ma 'ongs pa'i phung po 'grub pa ste/ de ltar na sred pa'i yan lag rnams kyang tshe gsum gyis bsdus pa ste/ zhib tu ni 'og nas bstan par bya'o/ /yang blo gros chen po zhes pa la sogs pas ni rten 'brel de rnams kyi rang bzhin stong pa nyid don dam pa'i bden pa ston te/sngar gyi de bzhin nyid ni rnam pa du zhes pa'i lan du sbyar bar bya'o/ /de la sems kyi spyod yul ni de bzhin nyid la dmigs pa'i thos pa dang bsam pa las byung ba'i shes rab spros pa gcod byed kyi rjes su dpag pa'i tshad ma'i yul lo//de yang slu ba med pas rigs pa ni/ /don dam yin te zhes pa dang / des gtan la phab pa'i don dam pa ste zhes gsungs pa'o/ /ye shes kyi spyod yul ni 'jig rten pa'i bsgom pa las byung ba'i shes rab drod dang rtse mo'i gnas skabs kyis bsdus pa cung zad rnam par mi rtog pa'i ye shes dang /de'i yul du gyur pa'i de bzhin nyid de/ de skad du yang ye shes kyi tshogs ni drod dang rtse mo'i gnas skabs yan chad la shes rab kyi pha rol tu phyin pa'i 'grel pa las bshad pas so/ /lta ba gnyis kyi spyod yul ni gang zag dang chos kyi bdag tu lta ba dang bcas pa bzod pa dang 'jig rten chos kyi mchog gi gnas skabs kyi ye shes dang /de'i yul du gyur pa'i de bzhin nyid de/ de skad du yang / gang zag dang chos kyi bdag la kun du rmongs pas sa dang po la sgrib po zhes sngar bstan pa dang / shes rab kyi pha rol tu phyin pa las kyang bzod pa dang 'jig rten chos kyi mchog gi gnas skabs na go rims bzhin du/gang zag rdzas la brten pa dang / skyes bu btags pa la brten pa'i 'dzin pa'i rtog pa gnyis dang ldan no zhes gsungs pa'i phyir ro/ /lta ba gnyis las 'das pa'i spyod yul ni de 'dra ba'i rnam rtog rags pa spangs pa mthong lam yan chod kyi ye shes dang /de'i yul du gyur pa'i de bzhin nyid spros pa thams cad dang bral ba'o/ /de skad du yang / sngar gyi lta ba gnyis la sogs pa mthong ba dang / bsgom pa'i lam gyis spang bar bya ba nyid du gsungs pa dang de 'dra ba'i rmongs pa'i sgrib pa spangs pas sa dang po thob pa nyid du gsungs pas so//snang ba med pa'i spyod yul ni mdo sde 'di nyid las/ /snang ba med pa brgyad pa ste/ /zhes gsungs pas khyad par du sa brgyad pa yan chad kyi ye shes dang de'i yul lo/ /sras kyi sa las 'da' ba'i spyod yul ni sangs rgyas kyi sa la 'jug pa dpa' bar 'gro ba 'am/rdo rje lta bu'i ting nge 'dzin gyi gnas skabs kyi ye shes dang de'i yul lo/ /de bzhin gshegs pa so so rang gis rig pa'i spyod yul ni sangs rgyas kyi sas bsdus pa chos kyi sku'i ye shes mnyam par gzhag pa dang rjes kyi gnas skabs dang de'i yul du 'gyur ba'o//'dir thams cad du yang yul dang yul can tha dad pa ni min te/ 'on kyang so so rang rig pa'i tshul du rang rang gi chos nyid la sgro 'dogs gcod pa'o/ /gal te de lta na thog mar bstan pa rjes su dpag pa'i tshad ma rtog med du 'gyur ro zhe na/rang gi rang bzhin du gyur pa'i snang ba la phyin ci log gi sgro 'dogs gcod pa'i cha nas rtog pa med cing ma 'khrul pa nyid du 'gyur ba ni 'dod pa nyid yin no/ /'on kyang rang gi snang ba don ma yin pa la don du mngon par zhen cing spyi'i rnam pa sgro btags la 'dzin pa'i cha nas rtog pa dang bcas shing 'khrul ba nyid yin pas rnam par mi rtog pa'i ye shes dang mi 'dra bar bstan pa'o//de yang ji ltar tha mal pa rnams kyi rnam par rtog pa rang gi rang bzhin la ltos te rang rig pa mngon sum gyi tshad ma yin kyang sgra don spyi'i rnam pa tha dad pa lta bur snang zhing zhen pa pas de nyid rtog pa'i bdag nyid yin zhing /de nyid kyi phyir de 'dra ba'i gang zag rnam par mi rtog pa'i ye shes dang ldan pa'o zhes mi brjod pa bzhin no/ /de skad du yang / shes gang gang la sgra don 'dzin/ /de ni de la rtog par 'dod/ /rang gi ngo bo'i sgra don min/ /de phyir de la kun mngon sum/ / zhes tshad ma rnam 'grel las bstan pa dang rjes su mthun par 'dir yang rkang pa gnyis kyi rjes su/ spros bral chos nyid sgra don min/ /de phyir de la rtog med 'gyur/ /zhes ci ste mi brjod/ /de lta na yang tha mal pa'i mngon sum de lta bu dang rjes su dpag par grags pa ni phyin ci log gi bdag nyid yin pas/yang dag pa'i ye shes min yang spros pa gcod par byed pa'i rjes su dpag pa ni ji snyed pa'i spros pa gcod pa'i cha nas yang dag pa'i tshad ma yin zhing / des spros pa bkag pa'i don yang don dam pa dang mthun pa'i don dam zhes bya'o/ /de rnams kyis kyang lam dang 'gog pa'i bden pa bsdus te/de ltar na dngos po'i rang bzhin dang / don dam pa'i bden pa'i rnam grangs bstan pas ni shes bya bden pa bzhi bstan cing / de yang kun rdzob dang don dam pa'i bden pa gnyis su 'dus la/ de ltar bden pa gnyis kyis bsdus pa'i rnam pa thams cad mkhyen pa'i shes rab kyi pha rol tu phyin pa dang ldan pas dus gsum gyi sangs rgyas rnams chos kyi 'khor lo bskor ba yin no zhes de rnams rtogs pa'i phan yon ston pa ni/'di dag ni zhes pa la sogs pa'o/ /sangs rgyas rnams kyi dngos po'i rang bzhin zhes pa la sogs pa ni de rnams kyi rtogs pa'i dngos po'i rang bzhin zhes pa la sogs pa'o//de dang ldan zhes pa yang rtogs bya nyid du ldan pa'o/ /'jig rten ni byis pa'i skye bo rnams so/ /'jig rten las 'das pa ni 'phags pa nyan thos dang rang rgyal ba'o/ /'jig rten las 'das pa mchog ni yang dag pa'i sa la gnas pa'i byang chub sems dpa' dang sangs rgyas so//de rnams kyis bsdus pa'i chos dge ba dang mi dge ba dang lung du ma bstan pa'i chos snga ma ltar bden pa gnyis kyis bsdus pa rang dang spyi'i mtshan nyid du rtogs pa ste/ de la spyi'i mtshan nyid ni 'dus byas thams cad ni skye ba dang gnas pa dang mi rtag ces pa 'am/rang rang gi mtshan nyid de/ gzugs ni gzhig cing gzhom du rung / /zhes pa la sogs pa'o/ /shes rab kyi spyan ni rnam pa thams cad mkhyen pa nyid kyi ye shes so/ /rnam par 'god pa ni rigs dang skal ba ji lta ba bzhin du blang bya dang dor bya la sogs pa'i bye brag ma 'dres par ston pa'o//tshul ji ltar 'god ce na/ mu stegs byed kyi zhes pa la sogs pa'o/ /de la thog mar dbang po dman pa rnams la ston pa ni/ mu stegs byed kyi smra ba dang lta ba ngan pa ste/ grub pa'i mtha' yis blo ma bsgyur ba'i 'jig tshogs la lta ba la sogs pa dang thun mong du mi 'gyur ba ste/de dag dang ma 'dres shing de dag gi gnyen po nyid du 'gyur ba'i chos ston pa'o/ /ji ltar na de rnams dang thun mong ma yin par 'gyur zhe na/ 'di lta ste zhes pa la sogs pa gsungs te/ rnam par shes pa rnams kyi rang bzhin du gyur pa'i yul la tha dad pa bden par rnam par rtog pa'i lta ba khong du ma chud pa ste/de'i yul yang sems las tha dad med par ma shes shing / tha dad du rtogs pa phyin ci log pa nyid du khong du ma chud ces pa'o/ /bdag gi sems snang ba tsam zhes pa ni de ltar snang ba kun rdzob tu sems nyid yin no zhes yongs gcod kyi cha la mi 'jug pa ste blos ma rtogs pa'o//de'i phyir byis pa so so'i skye bo rnams las mu stegs pa'i sems tsam smra ba kha cig bdag rig pa gnyis med kyi ngo bo ni dngos por yod la/ de las gzhan pa thams cad ni dngos por med ces pa dang /de la sogs pa phyi rol pa dang tha mal pa rnams kyis bden pa gnyis kyi rnam par dbye ba la mi ltos par dngos po dang dngos po med pa'i rang bzhin don dam par lta ba'i lta ba gnyis su ltung bar 'gyur te/ de'i phyir de rnams ni srid pa'i yan lag bcu gnyis las mi ldog cing /gzhan yang phyin ci log gi rnam par rtog pa srid pa gsum gyi sdug bsngal gyi rtsa ba las kyang mi ldog ste/ des na de dag rnam par bzlog pa'i phyir de rnams kyi lta ba dang ma 'dres par rang gi sems snang ba'i yul sgyu ma ste/ sngar bstan pa ltar rnam par rig pa tsam gyi dbu ma'i tshul rjes su mthong bar 'gyur ba'i thabs gang zag gi bdag gis stong pa phung po la sogs pa'i rang dang spyi'i mtshan nyid la sogs pa bshad par bya'o zhes pa'o//de ltar bstan pas rim gyis dbang po cung zad dag cing stong pa nyid bshad pa'i skal ba dang ldan pa rnams la stong pa nyid zab mo dngos su ston pa ste/de'i dbang du byas nas lta ba ngan pa ni/ 'phags pa nyan thos dang rang rgyal ba gzung 'dzin dngos por 'dod pa dang / gnyis su med pa'i rang rig don dam pa'i dngos por smra ba rnams kyang ste/ 'ching ba'i rgyu nyid du khyad par med cing yul la gnod byed kyi tshad ma yod pa'i phyir ro//de skad du yang / de nyid tshol la thog mar ni/ /thams cad yod ces brjod par bya/ /don rnams rtogs shing chags med la/ /phyis ni rnam par dben pa nyid/ /ces gsungs so/ /yang de ltar stong pa nyid bstan pas stong pa nyid kyi mtshan mar 'dzin cing /las dang 'bras bu'i 'brel pa la sogs pa la skur pa nyid du la la dag 'gyur bas de rnam par bzlog pa'i don du rnam par rig pa tsam gyi dbu ma mtha' gnyis dang bral ba'i de kho na nyid zab mo mdo sde 'di nyid dam/ 'di'i rigs can rnams kyis bshad par bya'o zhes ston te/de'i dbang du byas nas lta ba ngan pa ni stong pa nyid kyi mtshan mar 'dzin pa ste/ ji skad du/ rnam par dben don mi shes par/ /thos pa tsam la 'jug byed cing / /mi gang bsod nams mi byed pa/ skyes bu tha shal de dag brlag/ /ces gsungs pa dang / gzhan yang gang zag tu lta ba ri rab tsam ni bla'i zhes pa la sogs pa sngar bstan to//dngos po dang dngos po med pa'i rang bzhin zhes pa la sogs pa dang / rnam par rtog pa srid pa gsum gyi sdug bsngal zhes pa yang gnas skabs gnyis po la yang ji ltar rigs pa bzhin du sbyar bar bya'o/ /bshad par bya'o zhes pa ni sangs rgyas gzhan dag gis bshad pa ltar da lta ngas kyang bshad par bya zhes pa'o//blo gros chen po dge sbyong ngam zhes pa la sogs pas gzhan dang thun mong ma yin pa nyid rgyas par ston te/ de la dge sbyong ni/ /sdig pa ci yang mi bya ste/ /dge ba phun sum tshogs par spyad//ces pa'i dge sbyong gi tshul lam phyi rol pa'i bstan pa la rab tu byung ba rnams kyang ngo / /de dag gi ltar na dngos po rnams kyi rten 'brel don dam pa'i dngos po nyid du 'dod de/ de la 'ga' zhig ni 'bras bu rgyu'i dus sam de'i sngon rol na med pa zhig rgyu'i byed pa'i 'og rol du skye bar 'dod la/grangs can pa rnams las mngon par gsal bar smra ba rnams 'bras bu rgyu'i gnas skabs na yang yod mod kyi 'on kyang mngon par mi gsal ba yin la/ de'i rgyu'i byed pa las mngon par gsal bar 'gyur zhing / 'bras bu la yang rgyu nyid rjes su 'jug ste/de ltar rgyu dang 'bras bu phan tshun bdag nyid du gyur pa skye bar 'dod do/ /'di dag ni mi 'thad de/ re zhig 'bras bu med pa skye/ /zhes pa ni 'gal ba nyid du 'gyur te/ skye ba dngos po'i chos nyid yin pas med pa yod ces par 'gyur na/ de ni 'bras bu'i rang bzhin gcig la ci'i phyir mi 'gal zhes pa'o//gal te yod pa dang med pa ni gcig la cig car 'gal bar 'gyur gyi/ rim gyis ni mi 'gal te/ de'i phyir 'bras bu 'ga' zhig sngar rgyu'i dus la sogs par ni med la/ phyis yod par mi 'gal lo zhe na/ mi 'thad de/ dngos po yod pa ni med pa'i spyi dang 'gal bas sngar med ces pa'i khyad par dang yang 'gal bar 'gyur la/de bzhin du dngos po med pa yang yod pa'i spyi dang 'gal bas phyis yod ces pa'i khyad par dang yang 'gal bar 'gyur ro/ /gal te de ltar yod pa dang med pa'i spyi dang khyad par 'gal bar 'gyur ba de lta na yang /sngar med ces med pa'i khyad par dang / phyis yod ces yod pa'i khyad par ni 'gal ba med de/ ji ltar bum pa lta bu'i rdzas kyi dngos po khang bzangs kyi phyi rol na ni med la nang na ni yod do zhes yod pa dang / med pa'i khyad par mi 'gal ba bzhin no/ /gzhan du na bde ba la sogs pa da ltar nyams su myong ba 'di nyid sngar gyi dus na yod dam med ces dbu ma pa rnams la dris shing brtsad pa na/sngar nas yod ces ni brjod par mi nus la/ de'i phyir da ltar yod pa 'di nyid sngar med ces ston pas yod pa dang med pa dus snga phyi la ltos te mi 'gal ba nyid du ci ste mi 'gyur zhe na/ma yin te/ sngar med ces dgag pa'i don ni rnam pa gnyis su 'gyur te/ yod pa bkag pa tsam gyi med dgag ri bong gi rwa lta bu dang / ma yin par dgag pa'o/ /de la ri bong gi rwa lta bu'i med par dgag pa ni yod pa'i spyi dang 'gal bas da ltar yod ces pa'i khyad par dang yang 'gal la/khyad par de yang med pa'i spyi dang 'gal bas sngar med ces pa'i med dgag gi khyad par dang 'gal bar ci ste mi 'gyur/ yang ma yin par dgag pa yang gnyis su 'gyur te/ sngar med ces sngar gyi dus bsdus pa dang / da ltar yod pa 'di nyid sngar gyi med pa yin zhes da ltar ba'i chos su bskor ba'o//de la snga ma ltar na snga phyi dus 'gal bar dus de dag gis bsdus pa'i yod pa dang med pa yang 'gal bar 'gyur te/ yod med rang bzhin 'gal ba la dus 'gal ba bsnan pas ni 'gal ba snga ma spong bar mi 'gyur zhing ches shin tu 'gal ba nyid du ji ltar mi 'gyur ba soms shig/gzhan yang gnyis pa ltar na da ltar yod pa 'di nyid sngar med pa'o zhes sngar med pa da ltar yod pa'i chos su bsdus pa ni mi 'gal mod kyi/ de ni med pa'i ming gis brjod kyang yod pa nyid yin pas de 'dra ba rgyu las skye bar 'dod pa ni 'bras bu yod pa skye ba'i phyogs la brten par 'gyur ro//yul gyi dpe yang phyogs kyi khongs su 'dus pa'i phyir ma grub pa nyid de/ ji ltar phyi rol na med pa nyid nang na yod pa'i bdag nyid do zhes yod pa'i chos su bskor ba ni med pa'i ming gis brjod kyang don byed nus pa'i phyir dngos po nyid yin la/gzhan yang yod pa dang med pa phyi dang nang gi yul gyi chos su bsdus pa ni yul 'gal ba nyid kyi phyir/ snga ma ltar yod med rang bzhin 'gal ba la/ yul 'gal ba bsnan pas phyir zhing shin tu 'gal bar 'gyur ro/ /yang phyi rol na med ces pa'i med dgag gi khyad par ri bong gi rwa lta bu ni yod pa'i spyi dang 'gal bas yod pa'i khyad par nang na yod pa dang yang 'gal bar 'gyur zhes pa la sogs pa snga ma bzhin du shes par bya'o//de ltar med pa skye ba'i phyogs bkag nas phyogs gnyis pa dgag pa ni 'bras bu snga nas yod pa ni/bdag nyid thams cad kyis rdzogs zin pas skye bar mi 'thad de/ skye zhes pa'i don ni grub zin pa ma yin pa 'grub par 'gyur ba'i rang bzhin yin la/ yod pa ni grub zin pa yin pas yod pa skye zhes pa yang ci'i phyir na 'gal bar mi 'gyur/ gal te mngon par gsal ba'i bdag nyid sngar ma grub pa rgyu'i byed pa'i rjes su byung bas rgyu las skye ba 'thad do zhe na/de ltar na gsal ba nyid 'bras bur 'gyur te/ 'bras bu'i mtshan nyid dang ldan pa'i phyir ro/ /de ltar 'dod do zhe na/ de sngar med pas yod pa skye ba'i phyogs nyams par 'gyur ro/ / gzhan yang gsal ba dang bum pa la sogs pa'i dngos po'i bdag nyid gcig par khas len na ni bum pa sngar nas yod pa bzhin du gsal ba yang sngar nas yod par 'gyur ba 'am/ gsal ba'i bdag nyid sngar med pa ltar bum pa yang sngar med pa nyid du 'gyur ro/ /gal te de dag tha dad par 'dod na rgyu'i byed pa gsal ba nyid la sbyor bas bum pa'i dngos po rgyu med pa nyid du 'gyur ro//de ltar na 'bras bu sngar nas yod pa'i skye ba'i phyogs kyang mi 'thad do/ /don 'di nyid mdo sde gzhan las kyang gsungs te/ ji skad du/ lha mo phung po lnga la chos kyi dbyings ji ltar gdags she na/phung po lnga po de ni rgyu dang rkyen gyis ma bskyed pa ste/ de yang gal te rgyu dang rkyen las skye ba zhig yin na ni/ skyes zin la skye'am ma skyes pa skye zhes bya/ gal te skyes zin pa skye na ni rgyu dang rkyen kyang mi dgos par rigs so/ /gal te ma skyes pa skye na ni skye ba dmigs su med par 'gyur ro//de ci'i phyir zhe na/ gang ma skyes pa'i chos rnams ni yod pa ma yin pa nyid pas ming med pa/ mtshan ma med pa/ gzhal ba dang / dpag pa dang / dper bya bas mi brjod pa ste/ rgyu dang rkyen gyis skyed par byed pa ma yin no zhes pa la sogs pa rgyas par gsungs so/ / de ltar 'bras bu'i bdag nyid sngar med pa ni yod pa nyid du mi 'gyur te/ rtag tu med pa nyid du 'gyur ba'i phyir dngos po gang dang yang rjes su 'gro ba'am ldog pa grub pa med de/ dper na ri bong gi rwa bzhin no/ /'dir rgyu dang 'bras bu ni rjes su 'gro ba dang ldog pa'i sgo nas rtogs par bya ba yin te/de lta na rjes su dpag pa la sogs pa'i sgo nas rgyu dang 'bras bu'i dngos po don dam par grub pa med do/ /gzhan yang mngon sum dang mi dmigs pa ste/ des dben de yi rnam pa can/ /mngon sum rnam pa gnyis kyis ni/ /rgyu dang 'bras bu'i dngos po 'grub/ /ces pa yang don 'di la mi 'thad de/'di ltar mi dmigs pa sngon du song ba'i mngon sum rnam pa gnyis te/ rgyu med pa'i phyogs 'ga' zhig tu 'bras bu snang du rung ba las mi dmigs pa las/ rgyur mngon par 'dod pa 'ga' zhig dmigs la/ de'i mjug thogs su 'bras bu dmigs pa la brten nas de dag rgyu dang 'bras bu'i dngos por rtogs pa yin na/sngar bshad pa ltar rtag tu med pa la ni sngar snang du rung ba'i mi dmigs pa las gang dag dmigs na dmigs zhes pa'i rgyun gyi thog ma mthong ba med pa'i phyir mi 'thad do/ /de bzhin du mngon sum sngon du song ba'i mi dmigs pa ste/gnyis ka dmigs pa las rgyur mngon par 'dod pa 'ga' zhig mi dmigs na/ de'i rjes su 'bras bur mngon par 'dod pa 'ga' zhig kyang mi dmigs pa'o/ /de lta bu yang rtag tu med pa la 'thad pa ma yin te/ gnyis ka dmigs pa dang deng phyin chad mi dmigs zhes pa'i mi dmigs pa'i thog ma mthong ba med pa'i phyir ro//de bzhin du yod pa yang sngon dang phyi ma'i dus su med par 'gal bas rtag tu yod pa nyid du 'gyur ba'i phyir ro/ /dngos po gang dang yang rjes su 'gro ba'am ldog par rtogs pa med de/ dper na ri bo la sogs pa bzhin no//gzhan yang mngon sum dang mi dmigs pa'i sgo nas grub pa yang mi 'thad de/ gang dag dmigs na dmigs zhes pa'i rgyun gyi thog ma mthong ba med pa'i phyir ro/ /mngon sum sngon du song ba'i mi dmigs pa yang mi 'thad de/ de dag las gcig mi dmigs na mi dmigs zhes pa dang /mi dmigs pa'i thog ma mthong ba med pa'i phyir ro/ /gzhan yang med pa yod par 'gyur ba 'gal bas med pa skye zhes pa ni rang gi tshig dang 'gal bar 'gyur te/ skye ba dngos po'i chos yin pa'i phyir ro/ /de bzhin du yod pa ni grub zin pa yin la/ skye ba ni 'grub par 'gyur ba da ltar ma grub pa'i bdag nyid yin pas yod pa skye zhes gzhi gcig la bsdu ba yang /rang gi tshig dang 'gal bar 'gyur te/ de ltar na phyogs gnyi ga ltar na yang dam bcas pa las nyams pa dang / gzhan yang ji ltar rgyu'i dus na myu gu med pa dang / du ba med pa dang /ri bong gi rwa med ces pa la sogs pa'i med pa rnams la khyad par du gyur pa'i chos 'ga' zhig khas len na ni dngos po nyid du 'gyur te/ khyad par dngos po'i chos kho na yin pa'i phyir ro/ /khyad par med na yang sngar gyi dus na du ba med pa me dang shing gi tshogs pa las skye ba bzhin du/myu gu med pa yang de las skye ba nyid du 'gyur te/ /skye bar 'dod pa'i med pa dang khyad par med pa'i phyir ro/ /de bzhin du myu gu med pa sa dang sa bon gyi tshogs pa las skye ba bzhin du du ba med pa yang de las skye bar 'gyur te/ skye bar 'dod pa'i med pa dang khyad par med pa'i phyir ro//gzhan yang ri bong gi rwa med pa la sogs pa yang rgyu de dag las skye bar 'gyur te/ sngar bstan pa ltar rgyu mtshan mtshungs pa nyid kyi phyir ro/ /gal te ri bong gi rwa med pa ni sa bon la sogs pa'i byed pa'i rjes thogs su byung ba'i myu gu la sogs par 'gyur ba 'gal bas/de dag las skye ba ma yin no zhe na/ ma yin te/ sngar bstan pa ltar myu gu la sogs pa med pa yang phyis kyi yod par 'gyur ba 'gal bas de dag las skye bar mi 'thad do/ /de'i phyir myu gu med pa ni sa bon la sogs pa'i tshogs pa kho na las skye'i/ me la sogs pa'i tshogs pa las mi skye'o zhes pa'i nges pa dang /ri bong gi rwa med pa yang de dag las mi skye zhes pa dang yang rgyu rnams kyi dbang du byas te sa bon la sogs pas med pa'i myu gu skyed par nus kyi/ du ba la sogs pa skyed par mi nus la/ me dang shing gi tshogs pas kyang med pa'i du ba skyed par nus kyi myu gu la sogs pa skyed par mi nus zhes pa'i nges pa las kyang 'gal bar 'gyur ro//gzhan yang med par khyad par med pa'i phyir rus sbal gyi rgyab las spu dang / bye ma las kyang 'bru mar 'byung bar 'gyur ro/ /gal te med pa nyid du khyad par med kyang bye ma dang /rus sbal gyi rgyab las spu dang 'bru mar skyed pa'i nus pa med pas 'byung bar mi 'thad la/ me la sogs pa la ni med pa'i du ba la sogs pa skyed pa'i nus pa yod pas mi mtshungs so zhe na/ ma yin te/ sngar bstan pa ltar med pa yod par 'gyur ba ni 'gal bas de 'dra ba'i don mi srid la/gal te mi srid pa'i don la nus na rus sbal gyi spu la sogs pa la yang ci'i phyir na mi nus te nus pa nyid du 'gyur ro snyam du dgongs pa'o/ /gzhan yang don dam par gang gis rjes thogs su 'ga' zhig kho na 'byung bar nges pa'i gzhan gyi dbang nyid mi 'thad pas khyad par du phyi rol pa la sogs pas byed pa sta re lta bu dang /de la yod pa'i bya ba gyen du lding ba dang thur du 'bab pa ste byed pa las don gzhan du gyur pa dang / de nyid byed pa po'i gzhan gyi dbang du gyur pa dang / las su bya ba shing dum bur byed pa ste/ chos kyi bye brag du mar btags pa thams cad kyang don med par 'gyur te/gzhi ma grub pa'i khyad par mi 'thad pa'i phyir ro/ /de nyid kyi phyir sngon gyi slob dpon dag phyi rol pas brtags pa'i byed pa dang byed pa po la sogs pa ni mi 'thad cing / gang gi tshe na rgyu'i skad cig yod pa de'i tshe 'bras bu'i skad cig ma med de/ des na dngos po dang dngos po med pa 'brel pa med mod kyi/'on kyang snga ma'i 'og tu 'di yod na 'di 'byung zhes rten cing 'brel par 'byung ba so sor nges pa nyid ni yod de/ de'i phyir las dang 'bras bu'i 'brel pa kun nas nyon mongs pa dang rnam par byang bas bsdus pa la ni skur pa nyid du mi 'gyur ro zhes gzhan gyi dbang don dam pa'i dngos por 'dod pa ni/bcom ldan 'das kyis bstan pa'i rigs pa'i rnam grangs 'di dag la sogs pas rgyang ring du spong bar 'gyur te/ mdo'i don dang mi mthun pa nyid du gsal lo/ /gzhan yang sngar bstan pa'i rgyu mtshan de nyid kyis gzhan dag sngar ni med la phyis yod pa ste/yod med gnyi ga'i bdag nyid du gyur pa'am/ gnyig ma yin pa'i 'bras bu 'ga' zhig skye bar 'dod pa yang bsal ba ste/ de ltar 'bras bu skye ba'i phyogs rnam pa bzhi dang bral ba'i phyir gzhan gyi dbang gi ngo bo nyid don dam par yod pa mi 'thad ces pa'o//ma skyes pa'i dngos por yod pa ni shin tu dgag par sla ba nyid do/ /gtan tshigs 'di'i chos can dang dgag bya la sogs pa ni sngar bstan pa'i rjes su 'brangs te rtogs par bya'o/ /'dir tshig gi don ni sngar ma byung ba'i 'bras bu rgyu las byung ba dang / bum pa dang zho la sogs pa'i 'bras bu sngar nas yod pa 'o ma la sogs pa'i rgyu las mngon pa dang zhes pa ste/rgyu'i byed pa las mngon par gsal ba ste/ grangs can pa kha cig 'dod do/ /rgyu dang 'bras bu de dag kyang phan tshun rjes su 'gro ba'i tshul gyis yun du gnas pa ste rtag par gnas zhes pa'o//yang rang gi sde pa nyan thos gnas ma bu ba 'ga' zhig las dang nyon mongs pa la sogs pa'i skye mched rnams thog mar skye ba dang / de nyid 'jig pa'i rgyu dang ma phrad kyi bar la gnas pa dang / 'jig pa'i rgyu dang phrad nas 'jig par 'dod do//gzhan yang 'ga' zhig gi lugs kyis ma byung ba'i skye ba dang / skye ba rang gi dus las gzhan du mi gnas par 'dod de/ 'dir phung po zhes pa'i don ni spungs pa'i don te/ rdul phra rab bam skad cig ma du ma 'dus pa'o/ /khams zhes pa ni rigs kyi don nam byed pa med pa la rang gi mtshan nyid 'dzin pa'i don gyis te/phal cher phung po nyid kyis bsdus par rig par bya'o/ /skye mched ni rnam par shes pa skye ba'i sgo byed pa'i don gyis te/ phyi dang nang gis bsdus pa'o/ /de la gzugs can gyi phung po dang khams dang skye mched ni kun rdzob tsam du yang sems las tha dad pa'i ngo bor grub pa med de/sems kyi snang ba nyid la rnam par gzhag go/ /'di dag gi rnam par dbye ba la sogs pa cung zad ni 'og nas ston par 'gyur la/ grangs dang go rims la sogs pa'i spros pa zhib tu ni chos mngon pa'i mdo dang bstan bcos dag las shes par bya ste/'dir ni don gtso bor gtan la 'bebs pas mi spro'o/ /blo gros chen po de ltar 'bras bu yod pa dang med pa'i bdag nyid du bden pa 'ga' zhig don dam par rgyu dang rkyen las skye bar 'dod pa de dag gi rgyun dang bya ba dang skye ba ste/ rang gi rgyud du gtogs pa'i rgyu dang 'bras bu'i skad cig du mar 'brel pa dang / sngar bstan pa ltar phyi rol pa la sogs pas bstan pa'i bya ba dang rgyu 'di las skye zhes pa'i rgyu'i chos su gyur pa dang / 'bras bu 'di skye zhes pa 'bras bu'i rang bzhin du gyur pa'i chos dang / srid pa ste kun nas nyon mongs pa rgyu 'bras dang /mya ngan las 'das pa dang lam zhes pa go rims bzhin rnam par byang ba'i 'bras bu dang rgyur gyur pa'o/ /las dang 'bras bu ni zag pa dang bcas pa dang / zag pa med pa ste/ ji ltar rigs pa bzhin du kun nas nyon mongs pa dang rnam par byang bas bsdus pa'o//de dag thams cad kyang bden pa bzhis bsdus pa ste/ de rnams 'jig pa dang / chad par lta ba ste/ skur pa 'debs pa'i mtha' nyid du 'gyur zhes pa'o/ /gal te kun rdzob tsam du 'bras bu sngar med pa skye bar ni theg pa chen po pa khyed cag gis kyang 'dod pa ma yin nam/des na kho bo cag la chad par lta ba'i nyes par 'gyur ba ci'i phyir zhe na/ mngon sum dang zhes pa la sogs pa ste/ don ni sngar bstan zin to/ /'dir de dag dang mtshungs par mi 'gyur ba ni snga ma ltar yod pa dang med pa'i bdag nyid du bden pa'i 'bras bu don dam par skye bar 'dod pa ni/tshad mas gnod par 'gyur la/ de las gzhan kun rdzob pa'i skye ba ni khas mi len pas skur pa 'debs pa'i lta bar 'gyur la/ kho bo cag ni ji ltar snang bzhin pa'i skye ba shes pa'i bdag nyid du gyur pa kun rdzob pa nyid du khas len te/ de la ni sngar med par snang ba las gang gis mjug thogs su gang zhig nges par snang ba nyid du dmigs te/ sngar bstan pa lta bu'i spyad pa las grol bas rkyen med ces dgongs pa'o/ /de ltar gzhung gi cha de rnams kyis ni pha rol po'i phyogs skur pa 'debs pa'i mtha' nyid du bstan nas/ de nyid kyi phyir rang gi lugs kyi don dam pa'i skye ba med ces bstan pa ni/blo gros chen po 'di lta ste zhes pa la sogs pa'o/ /'gags pa dang zhes pa la sogs pa gsum ni gnas ma bu'i sde ba ltar byung ba'i rgyun 'gags pa dang / 'gag pa de dag gi lugs kyi 'jig pa'i rgyu dang ma phrad na gnas par 'dod pa ni skad cig gi dbang du byas nas 'gag pa nyid yin pas 'gag pa zhes bya'o//'gag par 'gyur ba ni rgyun 'gag par 'gyur ba'o/ /skad cig gi dbang du byas nas 'gags pa dang / 'gag par 'gyur ba las gzhan 'gag pa'i bya ba dang ldan pa da ltar ba ni grub pa med do//bdag gi sems snang ba rang gi sems nyid yin la/ sems de yang snang ba las tha dad kyis dngos por rtog pa ste/ de 'dra ba'i rtog pa nyid mthong zhing myong ba'i rgyu las phung po la sogs pa 'gags pa la sogs par snang ba byung ba ste/ 'phral du rtogs pa nyid kyis sgro btags pa'am/yang sngar brtags pa'i sa bon sad pa las de 'dra ba'i snang ba byung ba ste/ mi bden pa'i don blos bzhag pa'o/ /de'i phyir sa bon tshig pa la sogs pa bzhin du 'bras bu skyed pa'i nus pas stong pas de dag ni rgyun mi 'chad par 'byung ba med ces pa'o//de ltar blos brtags pa nyid yin zhing / nus pas stong pa nyid ni sngar bstan pa'i gtan tshigs rnams kyis so/ /blo gros chen po zhes pa la sogs pas ni yod pa dang med pa'i phyogs skye ba dgag pa'i 'thad pa'i rnam grangs gzhan ston te/ don ni sngar bshad zin to/ /yod pa las zhes pa ni grangs can gyi lugs te 'bras bu snga nas yod pa'i rang bzhin las skye ba'o/ /gsum phrad pa ni dbang po dang don dang rnam par shes pa snga ma'o/ /gzhan ni shes par zad do/ /gal te de 'dra ba'i phyin ci log ni de dag gi rang dga'i rnam par rtog pas brtags pa yin nam/snga rabs gzhan gyi tshig la brten pa yin zhe na/ drang srong ser skya la sogs pa gzhan gyi tshig la brten pa yin no zhes log par rtogs pa brgyud pa nyid du ston pa ni/ blo gros chen po de dag la'ang zhes pa la sogs pa ste/ rang gi mtshan nyid ni rang gi ngo bo ste/de lta bur ston pa'i bla ma 'ga' zhig yod ces pa'o/ /de dag gis tshul ji ltar ston ce na/ 'das pa dang zhes pa la sogs pa ste/ sngar bstan pa ltar des dben de'i rnam pa can gyi mngon sum la sogs pa'i rigs pa'i yul rgyu dang 'bras bu ma 'ongs nas med pa'i mtshan nyid dang /de'i rjes su rgyu dmigs shing de'i rjes su 'bras bu yang mthong ba ste/ da ltar byung ba'i dngos po yod pa dang / de dag las rgyur mngon par 'dod pa cig ma dmigs na 'bras bu yang mi dmigs zhes pa'i don 'das nas med pa'i mtshan nyid rjes su 'gro ba dang ldog pa'i mtshan nyid can gyi rgyu 'bras yod par de 'dra ba'i rigs pa dang /yid ches pa'i gzhung gis brtag cing gzhal bar bya ba'i sa la gnas shing zhes pa ste/ de lta bu'i yul la brten cing rang gi lta ba'i nyes pa'i bag chags kyis ston pa ste/ji ltar snang ba tsam gyi don la bden pa'i dngos por phyin ci log tu lta ba'i nyes pa'i bag chags la brten nas/ snga ma ltar rgyu dang 'bras bu'i dngos po don dam par yod ces ston pa'o/ /blo gros chen po zhes pa la sogs pas ni de ltar phyin ci log gis bstan pa la byis pa'i skye bo rnams ser skya la sogs pa'i thams cad mkhyen pas bstan to zhes yid ches par 'gyur ba nyid du ston to//mi mnyam pa'i blo can zhes pa ni dngos po'i mtshan ma sna tshogs su 'dzin pa'o/ /mi shes pa ni ston pa snga ma rnams la sbyar bar bya'o/ /blo gros chen po zhes pa la sogs pas phyin ci log las bzlog pa'i phan yon ston te//de ltar skye ba la sogs pa'i dngos po'i rang bzhin med pa sgyu ma'i dpe brgyad du snang ba dang 'dra bar zung du 'jug pa'i don nyid du rtogs zhes pa ste/ tshig gi don ni phal cher shes par zad do/ /sprin dang zhes pa ni snying po med pa'i dpe'o//ma skyes pa ni gzugs brnyan nam mig yor te gzugs kyi dngos por ma skyes pa'o/ /phyi rol gyi sems kyi snang ba yang dpe de rnams dang 'dra bar rtog pas brtags pa'am thog ma med pa'i dus kyi spros pa brtags pa las byung ba'i snang ba tsam du mthong zhes pa'o//rkyen phyir ldog pa med ces pa ni phyin ci log gnas ma gyur gyi bar la rgyun chags su 'byung ba'o/ /mtshan nyid dang mtshan gzhi ni mtshon par byed pa'i mtshan nyid dang / de dang ldan pa'i dngos po'o/ /lus ni dbang po dang bcas pa sems can gyi lus so/ /longs spyod ni 'dod pa'i yon tan lnga'o//gnas ni snod kyi 'jig rten no/ /yul ni de dag la sogs pa yul gyi ngo bo nyid do/ /de nyid gzung ba'i chos kyi mtshan nyid dang / blo ni 'dzin pa'i mtshan nyid du btags pa dang bral ba ste/ gnyis kyi rnam par snang ba yin pas so so rang rig pa'i spyod yul don dam par 'dus byas kyi mtshan nyid spangs pa sgyu ma lta bu'i gzhan gyi dbang rnam par rig pa tsam gyi dbu ma'i don sgom par 'gyur te/de ltar bsgom pa'i byang chub sems dpa' de dag ni ring po mi thogs par tshogs dang mos pas spyod pa'i sa las 'das na/ 'khor ba dang mya ngan las 'das pa mnyam pa nyid du rtogs pa thob pa ste/ji skad du/ sa dang po la gnas pa'i byang chub sems dpa'/ chos dang sems can rnams dang ni/ /de yi bya ba sangs rgyas nyid/ /mchog la sems mnyam rnyed pa'i phyir/ /de yi rab dga' khyad par 'phags/ /zhes gsungs pa lta bu'o/ /yang khyad par du ni sa brgyad pa la bshad de/ji skad du/ zhing ni rnam par sbyong ba dang / /mi gnas mya ngan 'das pa zhes/ /'khor ba dang mya ngan las 'das pa ro gcig pa nyid du rtogs par gsungs so/ /lhun gyis grub pa'i sbyor ba yang sems can smin pa dang / rang gi sangs rgyas kyi chos sgom pa'i sbyor ba ste/sa brgyad pa yan chad do/ /phyi rol du lta bas mtshan ma med ces pa ni de lta bu'i tshul gyis mtshan mar 'dzin pa med pa'o/ /rim gyis sa'i rim pa zhes pa ni sa dang po la sogs pa bgrod pa'i rim gyis zhes pa ste/ shes par zad do/ /'dir gzung ba dang 'dzin pa'i mtshan nyid dang mi ldan pa ni mdo ji lta ba bzhin du 'og nas bstan par bya'o//sgyu ma lta bu'i ting nge 'dzin kyang khyad par du sa brgyad pa la'o/ /bdag gi sems snang ba zhes pa la sogs pas ni de nas rim gyis sangs rgyas kyi sa'i bar du thob pa'o/ /skye ba dang bya ba ni yid kyi rang bzhin gyi lus len pa 'am sems can gyi don du bsams bzhin du srid par skye ba dang /der yang sems can smin pa'i bya ba byed pa'o/ /ting nge 'dzin rdo rje lta bu'i gzugs ni khyad par du sa bcu pa'i gnas skabs te/ rnam par rtog pa la sogs pas ni mi shigs shing / de rnams nyid 'joms par byed pas rdo rje dang chos mthun pa'o//de nyid chos kyi sku'i rjes su 'jug pa de bzhin nyid rtogs shing / de'i rang bzhin du gyur pa'i sprul pa dpag tu med pa 'gyed pa stobs bcu dang / mngon par shes pa drug dang / dbang bcu dang / snying brtse ba ste sbyor ba med pa'i snying rje dang /snying rje ba ste sbyor ba dang bcas pa'o/ /de ltar stobs la sogs pa ni 'phags pa rnam par 'phrul pa'i rgyal pos zhus pa las ji skad du/ bcom ldan 'das byang chub sems dpa' rnams la yang byang chub sems dpa'i stobs bcu dang / byang chub sems dpa'i mi 'jigs pa bzhi dang /byang chub sems dpa'i chos ma 'dres pa bco brgyad kyang mchis lags sam/ bcom ldan 'das kyis bka' stsal pa/ rnam par 'phrul pa'i rgyal po byang chub sems dpa' gang yongs su sbyang ba byas shing / phyir mi ldog pa'i bzod pa thob pa/sa brgyad pa la gnas shing sa dgu la 'phar ba/ shes rab kyi pha rol tu phyin pa dang thabs mkhas pas yongs su zin pa de dag la yod de zhes byang chub sems dpa'i stobs dang mi 'jigs pa la sogs pa shin tu rgyas par bstan to/ /gzhan yang 'phags pa chos yang dag par sdud pa las kyang /sa brgyad pa yan chod kyi byang chub sems dpa' la de bzhin gshegs pa'i stobs bcu la sogs pa'i yon tan gyi rigs dang ldan par gsungs te/ 'on kyang de dag rdzogs pa dang ma rdzogs pa dang / rnam par dag pa dang ma dag pa'i khyad par ni yod do zhes pa'o//sangs rgyas thams cad kyi zhing gi mu stegs can gyi gnas su nye bar 'gro zhes pa ni nus pa dang shes rab la sogs pas de rnams rjes su gzung ba'i don du nye bar 'gro ba ste/ sngon gyi las dang smon lam la sogs pa'i stobs kyis kyang khyad par du de rnams 'dul bar 'gyur ba'o//rim gyis gnas 'pho zhes pa ni/ rnam par shes pa rnams sngar bshad pa ltar rim gyis gnas par 'gyur ba'o/ /blo gros chen po zhes pa la sogs pas ni yon tan de lta bu dang ldan pa'i don sgom pa nyid du gdams pa'o/ /de bzhin gshegs pa'i sku'i rjes su 'brang ba rab tu thob ces pa ni thos pa dang bsam pa'i shes rab kyis de kho na nyid kyi don rtogs pa'o//sems dang rgyu zhes pa la sems nyid rgyu zhes gcig tu bsdus te/ sngar bshad pa ltar kun gzhi rnam par shes pa'o/ /rjes su 'brang bar bya ba ni bsgom par bya'o zhes pa'o/ /gzhan yang srid pa gsum du snang ba ni bag chags kyis byung ba'o//gzugs sna tshogs kyi nor bu dang 'dra zhes pa ni shel yongs su dag pas sngon po la sogs pa'i nye bar bsgyur ba'i rkyen gyis kha dog sna tshogs su snang ba dang 'dra bar de bzhin gshegs pa'i ye shes yongs su dag pa yang gdul bya'i bsam pa'i bye brag gis gzugs sna tshogs su snang ba'o//phra ba ni de rnams kyi rang bzhin rtogs par dka' ba'o/ /sems tsam du 'jug pa ni snang ba sems su rtogs pa'o/ /rab tu 'jog pa ni rang gis rtogs shing gzhan la yang ston pa'o/ /'di rnams kyang sngar gyi dri ba ji ltar sa la 'jug par 'gyur zhes pa'am/gang gis sa'i rim par zhes pa'i lan du yang sbyar bar bya'o/ /de ltar shes bya'i don gtan la 'bebs pa na/ rnam par shes pa rnams kyi skye ba dang 'gag pa'i tshul bstan pa dang / shes bya bden pa bzhi rtogs pa phan yon dang bcas te bstan nas/ da ni/ /yid dang rnam par shes pa dang / /kun gzhi de yang ji lta bur/ /ji ltar snang la 'jug par 'gyur/ /ci yi slad du snang las ldog /ces dris pa'i lan du rnam par shes pa de rnams kyi 'jug pa dang ldog pa'i tshul ston te/ de la re zhig de nas yang zhes pa la sogs pas zhu ba'i tshig bstan pa'o//rang bzhin gsum la sogs pa'i mtshan nyid de/ kun rdzob bam don dam pa'i de kho na nyid sangs rgyas dang byang chub sems dpa' rnams de nyid rjes su rtogs pa'i tshul gyis khyad par du 'gro ba'i bdag gi sems snang ba'i spyod yul dang / rnam par bral ba'i gnyis su snang ba'i mtshan ma dang bral bar byed pa'o//rjod pa dang brjod par bya ba'i de kho na nyid kyi mtshan nyid de/ de ltar snang ba'i rnam par rtog pa dang / tha snyad pa'i mngon sum la sogs pa'i rigs pa dang / de'i yul du gyur pa'i de kho na nyid kyi mtshan nyid rnam par 'jig ces pa ste/shes pa dang shes bya'i rgyu ba bkag pa'o/ /de yang med par dgag pa'i bdag nyid ma yin gyis/ sangs rgyas thams cad kyi gsung rab kyi snying po sems kyi chos nyid spros pa dang bral zhing 'od gsal ba don dam pa'i chos kyi rnam grangs mkhas pa dga' ba skyed par byed pas me tog dang 'dra ba'o//lang ka'i grong rdal zhes pa la sogs pas yang bsnan te zhus pa'o/ /kun gzhi rnam par shes pa'i spyod yul zhes pa ni de'i de bzhin nyid sangs rgyas rnams kyis rtogs par bya ba'i yul yin pa ste/ gzhi mthun pa'i drug pa nyid du sbyar bar bya'o//de nyid rgya mtsho dang 'dra bas rgya mtsho zhes nye bar gdags te/ chos kyi sku'i rigs sam de bzhin gshegs pa'i snying po yin pas chos kyi sku zhes kyang bya'o/ /rlabs lta bu ni 'jug pa'i rnam par shes pa ste/ de rnams kyang sangs rgyas kyi mnyam pa nyid kyi ye shes la sogs pa gnas gyur gyi rgyu yin pas/chos kyi sku zhes nye bar gdags te/ de rnams kyi 'jug pa dang ldog pa'i tshul de bzhin gshegs pa snga ma rnams kyis rjes su gsungs pa/ de bzhin gshegs pa nyid kyis khyad par du bshad du gsol zhes pa'o//de nas zhes pa la sogs pas dang po sgo lnga'i rnam par shes pa 'jug pa'i tshul ston to/ /de ltar rang gi sems snang ba la 'dzin par khong du ma chud ces pa'i don ni/ kun rdzob tu mig gi rnam par shes pa rang gi snang ba tsam la 'dzin cing / don dam par stong pa nyid du ma rtogs pa ste/zag pa dang bcas pa mig gi rnam shes skye ba'i 'gal rkyen med pa nyid du bstan pa'o/ /spros pa'i gnas ngan len gyis bsdus pa gzugs sna tshogs su snang ba'i bag chags dang / de'i rten kun gzhi rnam par shes pa la dngos por mngon par zhen pa ste/rgyu'i rkyen la mngon par zhen pa'o/ /rnam par shes pa'i rang bzhin gyi ngo bo nyid ni de ma thag pa'i rkyen gyi ngo bo ste/ de la ngo mtshar du 'dzin cing dngos por zhen pa'o/ /gzugs rnam pa sna tshogs kyi mtshan nyid ni phyi rol gyi kha dog dang dbyibs la sogs pa'i rnam par snang ba la ngo mtshar du 'dzin pa ste/mos pa'i khyad par du gtogs pa de ltar mngon par zhen pa'i yid kyi rnam par shes pas bsdus pa ste/ dmigs pa'i rkyen la dngos por zhen pa'o/ /yang nang gi gzugs rnam pa sna tshogs te/ gzugs can gyi dbang por grags pa la snga ma ltar ngo mtshar du 'dzin pa ste/bdag po'i rkyen la mngon par zhen pa'o/ /'di dag gi bsdus pa'i don ni zag pa dang bcas pa'i mig gi rnam par shes pa skye ba la rkyen bzhir grags pa las/ 'di rnams kyi rang bzhin stong pa nyid ji lta ba bzhin du rtogs na zag pa dang bcas pa'i rnam par shes pa skye bar mi 'gyur te/ji ltar gnas gyur pa'i gnas skabs nyid bzhin no/ /de las gzhan du de rnams dngos po'i bdag nyid du mngon par zhen pa'i mthun rkyen gyis gsos btab pa na zag pa dang bcas pa'i rnam par shes pa skye bar 'gyur zhes pa'o/ /de'i phyir tshig dang pos 'gal rkyen med pa nyid bstan la/gzhan rnams kyis ni mthun pa'i rkyen tshogs pa nyid bstan pa'o/ /'di rnams zag pa dang bcas pa nyid yin pa yang 'phags pa mya ngan las 'das pa chen po las/ 'od srungs kyis gsol pa/ bcom ldan 'das sems can gyi rnam par shes pa lnga ni zag pa dang bcas pa yin la/phyin ci log ma lags la/ sems rtse gcig pa yang ma lags na/ ci'i slad du yongs su dag pa'i tshangs par spyod pa zhes mi bgyi/ bcom ldan 'das kyis bka' stsal pa/ rigs kyi bu sems can gyi rnam par shes pa lnga ni/sems rtse gcig pa ma yin yang / zag pa dang bcas pa yin la/ phyin ci log kyang yin te/ zag pa rnams skyed pa'i phyir zag pa dang bcas pa zhes bya'o/ /ngo bo nyid kyis yang dag pa ma yin te/ 'du shes la chags pas phyin ci log pa zhes bya'o zhes gsungs so//'dir slob dpon ye shes dpal bzang pos rnam par shes pa ni 'jug pa'i rnam par shes pa yin la/ rang bzhin ni rgyu ste kun gzhi rnam par shes pa'o/ /gzugs rnam pa sna tshogs kyi mtshan nyid la ngo mtshar du 'dzin pa yang mig gi rnam par shes pa'i rgyun thog mar 'byung ba'i rgyu ste/de la ngo mtshar du 'dzin pas mig phye ba na rnam par shes pa skye ba'i phyir ro zhes 'chad do/ /snga ma ltar na de ma thag pa'i rkyen ma bsdus pas khyab chung ba nyid du 'gyur ro/ /dbang po thams cad kyi rdul phra rab ces pa ni gzugs can gyi dbang po rdul phra rab tu 'dus par snang ba tsam yin gyi phyi rol gyi rdul ni grub pa med ces sngar bstan to//spu'i khung bu ni khyad par du lus kyi dbang por snang ba'i ba spu'i khung bu'o/ /de rnams kyang sgra la sogs pa rang gi sems kyi snang ba la 'dzin par khong du ma chud pa dang / gnas ngan len gyis bsdus pa sgra la sogs par snang ba'i bag chags la mngon par zhen pa dang /rnam par shes pa'i rang bzhin gyi ngo bo nyid dang / sgra dang dri la sogs pa rnam pa sna tshogs kyi mtshan nyid la ngo mtshar du 'dzin pa dang / yang nang gi gzugs dbang po thams cad kyi rdul phra rab dang /spu'i khung bu rnams la ngo mtshar du 'dzin cing dngos por zhen pa'i rgyu las byung ba'o/ /de dag las yul gyi rnam par snang ba yang / ji ltar me long la cig car gzugs kyi rkyen mang po nye bar gnas pa na rdzas su ma grub pa'i gzugs brnyan mang por cig car snang zhing / rkyen rim gyis nye bar gnas pa na/ gzugs brnyan yang rim gyis snang ba bzhin du lnga char gyi rkyen cig car gnas pa na/ rdzas su ma grub pa'i yul lnga ru snang ba cig car 'byung la/ rkyen rnams rim gyis nye ba na rim gyis 'byung ba'o/ /gcig dang tha dad las grol ba ni kun gzhi dang 'jug pa'i rnam par shes pa'am/'jug pa'i rnam par shes pa phan tshun yang rung ste/ don dam par gcig dang tha dad las grol ba ste/ rang bzhin gyis stong pa'o/ /kun rdzob tu yul so sor rnam par 'jog pa'i las dang / rigs kyi mtshan nyid ces pa rang gi rgyud du gtogs pa'i rgyu'i mtshan nyid dang /shin tu 'brel pa'i rang bzhin la bdag nyid kyis de lta bu'i ngo bo nyid du khong du mi chud pa/ rnam par shes pa'i tshogs lnga 'jug ces pa'o/ /blo gros chen po zhes pa la sogs pas yid kyi rnam par shes pa 'jug pa'i tshul ston te/ lnga po de dag dang lhan cig ces pa ni/gang zag gcig gi rgyud kyis bsdus pa'i dus dang spyod yul mtshungs par rgyu ba'o/ /de skad du yang 'phags pa dgongs pa nges par 'grel pa las/ mig gi rnam par shes pa de dang lhan cig tu rjes su 'jug pa dus mtshungs pa spyod yul mtshungs pa rnam par rtog pa'i yid kyi rnam par shes pa yang 'byung ngo zhes pa la sogs pa rgyas par gsungs so//gal te rnam par rtog pa'i yul ni sgro btags spyi'i rnam pa yin la/ dbang po'i shes pa'i yul ni sgro ma btags pa'i rang gi mtshan nyid ma yin nam/ ji ltar de dag yul mtshungs par 'gyur zhe na/skyon med de/ phyi rol du gyur pa'i rang gi mtshan nyid ni yod pa ma yin la/ shes pa'i bdag nyid du gyur pa'i rang rang gi rnam pa ni mtshungs pa nyid du snang ba'i phyir ro/ /rgyu dang yul bye brag 'byed pa ni don 'di ni rgyu 'di lta bu las gyur pa yin la rang gi rang bzhin ni 'di dang 'di lta bu zhes tha snyad 'dogs par byed pa ste/de nyid tsam la khong du chud par byed pa zhes kyang bya ste/ nges pa'i rnam pa can [(]kyi [,]gyi [)]blo yin pas so/ /yid kyi rnam par shes pa de dag gi rgyu ni sgo lnga'i rnam par shes pa'o/ /gal te de ltar na rgyu dang 'bras bu dus mtshungs par mi 'thad do zhe na/skyon med de/ de rnams phan tshun gnyis ka yang rkyen du gyur pa yin mod kyi/ spyir rgyun la ltos te dus mtshungs pa mi 'gal te/ ji ltar ro dang gzugs la sogs pa bzhin no/ /de dag dang de zhes pa la sogs pas ni sgo lnga'i rnam par shes pa de dag dang /yid kyi rnam par shes pa des de rnams rang rang gi 'jug pa mi rtogs pa nyid du ston to/ /'on kyang zhes pa la sogs pas kun gzhi dang / de la brten pa'i nyon mongs pa can gyi 'jug pa ni rtogs par dka' ba nyid du ston to/ phan tshun tha mi dad pa ni spyi'i mtshan nyid de/ sngar bstan pa bzhin no/ /rnam par rig pa'i yul bye brag 'byed pa ni sgo lnga'i rnam par shes pa yul la tha snyad 'dogs pa ste/ sngar bstan pa'i don nyid rjes su brjod pa'o/ /de la 'dir sgo lnga'i rnam par shes pa cig car byung ba na/ de dang rjes su mthun pa rtog pa dang bcas pa yid kyi rnam par shes pa rang bzhin tha dad pa lnga 'byung ngam//'on te gcig nyid 'byung bar 'gyur/ /snga ma ltar ni mi 'thad de/ /rtog pa du ma cig car 'jug pa med par nyams su myong ba'i tshad mas grub pa dang / gzhan yang / 'di ltar rnam par rtog pa rnams//rim gyis 'byung bar yang dag rtogs/ /zhes sngon gyi mkhas pas gsungs pa'i phyir ro/ /gnyis pa ltar na yang yul lnga'i rnam pa 'gal bar snang ba ni gcig pa nyid du mi 'thad do zhe na/ skyon med de/ 'dir dus mnyam pa nyid du yid kyi rnam par rtog pa du ma 'byung ba ni ma yin te/sngar bstan pa'i tshad mas gnod pa dang / 'phags pa dgongs pa nges par 'grel pa las kyang lnga char lhan cig byung na yang der rnam par shes pa'i tshogs lnga po dag dang spyod yul mtshungs pa rnam par rtog pa'i yid kyi rnam par shes pa yang gcig kho na lan cig 'byung ngo zhes gsungs pa'i phyir ro//de lta na gcig po de yul lnga char gyi rnam par snang ba na ni sngar bstan pa ltar rnam pa 'gal bas gcig pa nyid du mi rung la/ yul gang yang rung ba'i rnam par snang na ni/ lnga po dag dang spyod yul mtshungs zhes pa'i mdo'i don mi 'thad do zhe na/ma yin te de ni sngar gyi yul gang la goms pa la sogs pa'i yul de nyid kyi rnam par snang la/ lnga po dag dang mtshungs zhes pa'i don ni lnga po de rnams las 'di kho na dang spyod yul mtshungs par snang ngo zhes pa'i nges pa med de/ goms pa la sogs pa'i rkyen dang ldan pa gang yung rung ba dang spyod yul mtshungs par snang ba'o//'dir nye bar gyur pa las byung ba'i yid rnam par rtog pa med pa ni du ma rnams kyang 'byung bar srid mod kyi/ sgrub par byed pa'i tshad ma ni ma mthong ngo / /de ltar sngar gyi don rjes su brjod nas skabs kyi don nyid ston pa ni/de ltar 'jug pa'i tshe zhes pa la sogs pa ste/ rnam par shes pa'i tshogs drug de ltar 'jug pa'i tshe 'gog pa'i snyoms par 'jug pa la sogs pa la mnyam par gzhag pa'i rnal 'byor can gyis kyang 'jug pa'i rnam par shes pa'i bag chags kun gzhi la yod pa de'i bdag nyid du gyur pa rgyun gyis 'jug pa rnams shin tu phra ba'i phyir mi rtogs te/ji skad du/ /len pa'i rnam par shes pa zab cing phra/ /sa bon thams cad chu bo'i klung ltar 'bab/ /bdag tu rtog par gyur na mi rung zhes/ /byis pa rnams la ngas ni de ma bstan/ /zhes gsungs pa lta bu'o//de ltar na de 'dra ba'i rnal 'byor thob pa rnams ni 'di ltar bdag cag ni yul la 'jug pa'i rnam par shes pa bkag nas snyoms par 'jug ces pa la sogs pa'i don ni shes par zad do/ /blo gros chen po zhes pa la sogs pas ni de rtogs par nus pa'i gang zag gi khyad par ston te/sa la rab tu gnas pa ni yang dag pa'i sa ste/ rab tu dga' ba yan chod la gnas pa'o/ /de ltar yang / so so skye bo phyin ci log /bden pa mthong bas ldog bya ste/ /zhes gsungs pa dang / gzhan yang / 'jig rten chos mchog man chod nas/rjes su mthun la phyin ci log nyid du gsungs pa'i phyir ro/ /'dir de bzhin gshegs pa'i snying po kun gzhi rnam par shes pa'i tshul lugs bdag nyid thams cad nas ji lta ba bzhin du rtogs pa ni de bzhin gshegs pa nyid yin te/ ji skad du/ dper na mar srubs zho la yang //de na mar yod mi snang ba/ /srubs pa'i tshul gyis mthong bar 'gyur/ /de bzhin kun gzhi rnam par shes/ /rnam shes bdun dang ldan pa yang / /rnam par srubs shing stug spyod pa'i/ /thub dbang rnams kyis mthong bar 'gyur/ /zhes gsungs pa'i phyir ro//khong du chud pa ni thos pa dang bsam pa'i shes rab kyis so/ /ting nge 'dzin dang shes rab kyi stobs zhes pa ni zhi gnas dang lhag mthong zung du 'brel pa bsgoms pa las byung ba'i shes pa'o/ /'dir so so'i skye bo'i byang chub sems dpa' rnams kyis ni thos pa dang bsam pa'i shes pas spyi'i rnam pa'i tshul du rtogs par 'gyur ba'o//de ltar rtogs pa'i don gong nas gong du goms shing tshogs khyad par can bsags pa la brten nas/ de'i rang gi mtshan nyid rtogs par 'gyur ro zhes sngar gyi don nyid gsal bar bshad pa ni/blo gros chen po gzhan du na zhes pa la sogs pa ste tshig rab tu phye ba la rnam par gdon mi za zhes pa ni thos pa dang bsams pa las byung ba'i shes rab po/ /rgyal ba rnams la mtha' yas pa'i/ /dge ba'i rtsa ba bsags pa ni rnyed pa dang bkur sti dang sgrub pa'i mchod pa de dag mnyes par byas pa ste/ji skad du/ /bskal pa grangs med nges 'byung zhing / /mos pa rnam par 'phel byed pa/ /ji ltar chu yis rgya mtsho bzhin/ /dge chos rnams kyis yang dag gang / /zhes gsungs pa lta bu'o/ /rang gi sems snang ba la phyi rol la sogs pa'i rnam par rtog pa'i spros pa dang bral ba ste/shes rab dang ye shes la mkhas zhes sngar bstan pa dang sbyar te/ zhi gnas dang 'brel pa'i shes rab bsgoms pa las byung ba'o/ /nags tshal stug po dang / phug dang shing khrod na gnas shing zhes pa ni 'du 'dzi spangs shing lus rnam par dben pa ste/zhi gnas kyi yan lag go/ /de skad du yang 'phags pa sa'i snying po'i mdo las/ ting nge 'dzin bsgom pa dag gal te ting nge 'dzin mang po ma grub na/ nam gyi stod dang nam gyi smad la mi nyal bar bya ste/ brtson 'grus su bslab cing bsgom pa dang / 'du 'dzi yongs su spangs te/'dod pa chung zhing chog shes par bya ba dang zhes pa la sogs pa gsungs shing / gzhan yang / ting 'dzin bsgoms pas the tshom gcod 'gyur te/ /de ma rtogs par gzhan gyis nus ma yin/ /zhes yang dag pa'i shes rab kyang ting nge 'dzin la rag las pa nyid du gsungs so//yang rnam pa gcig tu na/ 'dis ni nyan thos dang rang sangs rgyas kyi rnam par rtog pa dang bral ba sems rnam par dben pa nyid mtshon par zad de/ yang dag pa'i sa la zhugs pa'i byang chub sems dpa' rnams ni zhi gnas kyi dmigs pa rnyed zin pas lus rnam par dben pa la ched cher byed pa ma yin te/ji skad du/ rtag tu grong dang yul 'khor grong rdal gnas byed cing / /sems can smin byed byang chub brtson pa ma gtogs par/ /de na dgra bcom rang rgyal 'dod pa gzhan mi skyed/ /'di ni bde bar gshegs pa'i sras kyis dben par gsungs//gang zhig dpag tshad lnga brgya yod pa'i ri yi sul/ /sbrul gyis gang bar lo mang bye bar gnas byed kyang / /dben pa 'di mi shes pa'i byang chub sems dpa' ni/ /lhag pa'i nga rgyal rnyed nas 'dre bar gnas pa yin/ /zhes pa la sogs pa gsungs pa'i phyir ro/ /shing khrod ces pa ni shing gcig la sogs pa'i drung ngo //rnal 'byor rab dang 'bring dang tha ma ni rnam par rtog pa dang bcas pa'i gzugs brnyan lhag mthong gi dmigs pa dang / rnam par rtog pa'i gzugs brnyan zhi gnas kyi dmigs pa ste/ dmigs pa gnyis po tsam thob pa 'jig rten chos mchog man chad kyi gnas skabs dang /de dag zung du 'brel cing dngos po mtha'i dmigs pa thob pa mthong ba'i lam nas sa brgyad pa'i bar dang / sa brgyad pa nas sa bcu pa'i bar dgos pa yongs su 'grub pa'i dmigs pa thob pa'i gnas skabs te/ de ltar rnam pa gsum dang go rims las bzlog pa'i tshul gyis sbyar bar bya'o/ /yang na 'dres pa chung ngu'i chos la dmigs pa'i zhi gnas dang lhag mthong ste/ gsung rab yan lag bcu gnyis kyi don dang tshig rnams gcig tu bsdus pa'i de bzhin nyid la dmigs pa dang / 'dres pa chen por gyur pa'i chos la dmigs pa'i zhi gnas dang lhag mthong de dag nyid kyi tshig don thos pa dang bsam pa'i shes pas bzung zhing bsam pa'i don rnams kyis de bzhin nyid la dmigs pa dang / 'dres pa tshad ma mchis pa'i chos la dmigs pa'i zhi gnas dang lhag mthong de bzhin gshegs pa rnams kyis chos bstan pa so so yang dag par rig pa'i ye shes dang /de'i yul thams cad shes shing don dam par de rnams kyi de bzhin nyid dbyer med pa mngon sum du rtogs pa ste/ de rnams gsum dang go rims bzlog pa'i tshul gyis sbyar bar bya'o//'dir bshad pa snga ma'i shes par byed pa ni/ ji skad du 'phags pa dgongs pa nges par 'grel pa las/ des sngar zhi gnas dang lhag mthong thob pas ni rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan gyi dmigs pa rnam pa gnyis thob pa yin no//de ltar mthong ba'i lam thob pas dngos po mtha'i dmigs pa thob pa yin te/ des gong ma gong ma rnams su bsgom pa'i lam la zhugs shing dmigs pa rnam pa gsum po de dag nyid yid la byed pa ni/ 'di lta ste/ dper na la la zhig khyi gu ches phra mos khyi gu ches sbom po 'byin pa de bzhin du nang gi mtshan ma'i rnam par sel bar byed pa nyid kyis kun nas nyon mongs pa'i cha dang mthun pa'i mtshan ma thams cad rnam par sel bar byed de/mtshan ma rnam par sel ba na gnas ngan len rnams kyang sel bar byed do//mtshan ma dang gnas ngan len thams cad legs par bcom pas rim gyis sa gong ma gong ma rnams su gser lta bur sems rnam par sbyong bar byed la/ bla na med pa yang dag par rdzogs pa'i byang chub kyi bar du mngon par rdzogs par 'tshang rgya zhing / dgongs pa yongs su grub pa'i dmigs pa yang thob ste zhes gsungs pa'o//bshad pa gnyis pa'i shes byed kyang mdo de nyid las 'dres pa chung ngu'i chos la dmigs pa ni gang lags zhes dris pa la sogs pa'i lan du/ byams pa mdo'i sde nas shin tu rgyas pa'i sde dang / rmad du byung ba'i chos kyi sde dang /gtan la dbab par bstan pa'i sde'i bar dag so sor gcig tu bzlums te/ yid la byed pa'i zhi gnas dang lhag mthong ni 'dres pa chung ngu'i chos la dmigs pa yin par shes par bya'o zhes pa la sogs pa gsungs te/ mdo de nyid kyi rjes su 'brangs te rtogs par bya'o//tshig gi don gzhan ni phal cher sngar bstan pa rnams kyi rjes su 'brangs te rtogs par bya'o/ /blo gros chen po dge ba'i bshes gnyen zhes pa la sogs pas ni bshad pa dang 'chad par 'gyur ba'i phan yon dang ldan pas/ sangs rgyas dang byang chub sems dpa'i dge ba'i bshes gnyen la brten par bya ba nyid du ston te/ji skad du/ sangs rgyas byang chub mchog zhugs byang chub sems dpa' dag /pha rol phyin dang bcas te dge ba'i bshes su bstan/ /zhes gsungs pa dang / de yang chos bzhi dang ldan pa ste/ ji skad du/ bstan pa'i blo gros chos gzhan bzhi dang ldan pa ni dge ba'i bshes gnyen du rig par bya ste/bzhi gang zhe na/ tshar gcod pa'i tshig dang ldan pa yin/ chos zab mo la sbyor bar byed pa nyid yin/ dus dus su gdams ngag gi tshig dang ldan pa nyid yin/ dus dus su yal bar 'jog pa nyid yin te/chos bzhi po de dag dang ldan pa ni dge ba'i bshes gnyen du rig par bya'o/ /zhes pa dang / gzhan yang chos bzhi dang ldan pa ste/ bzhi gang zhe na/ bstan pa'i blo gros 'di la dge ba'i bshes gnyen ni mngon par 'byung ba la sbyor du 'jug pa yin/ don zab mo la nges par sems pa la sbyor du 'jug pa yin/bsam gtan gyi dmigs pa thams cad la ma chags pa nyid la sbyor du 'jug pa yin/ mtshan ma med pa'i dmigs pa nyid la sbyor du 'jug pa yin te/ bzhi po de dag go zhes pa la sogs pa rgyas par gsungs so/ /don de rnams nyid lhag ma dang bcas te tshigs su bcad pa'i sgo nas bsdus te bstan pa las/dang por tshigs su bcad pa gnyis kyis rgya mtsho dang rlabs lta bur 'jug pa'i rnam par shes pa ni kun gzhi'i yongs su 'gyur ba'am/ gnas skabs lta bur bstan te/ de la gar cing zhes pa ni myur du sna tshogs su bsgyur zhing g.yo ba'o//rnam par chad pa med ces pa ni rgyu rkyen tshogs pa na'o/ /sngon po dmar po zhes pa la sogs pas dpe gzhan du ma'i sgo nas kun gzhi dang 'jug pa'i rnam par shes pa gcig dang tha dad pa las grol ba nyid du ston te/ de'i don ni sngar bstan la/ gzhan yang ji ltar dba' rlabs rgya mtsho las gzhan ma yin zhing /dba' rlabs dang rgya mtsho bdag nyid thams cad nas khyad par med cing gcig pa nyid kyang ma yin te/ rgya mtsho'i mching g.yo ba med pa bzhin du dba' rlabs kyang g.yo ba med par 'gyur ba'i phyir ro/ /de bzhin du kun gzhi rigs kyi mtshan nyid las 'jug pa'i rnam par shes pa tha dad pa ma yin zhing /yang bdag nyid thams cad nas khyad par med cing gcig pa yang ma yin te/ rgyun 'gag pa med pa'i kun gzhi rnam par shes pa de ltar gnas zhes pa'o/ /de nyid kyi phyir rnam par shes pa'i tshogs brgyad du bstan pa ni 'gal ba med pa'o//'dir tshig gi don ni me tog ut+pa la dang de'i sngon po dang / pad ma dang pad ma'i dmar po dang / lan tshwa dang de'i ro dang / dung dang dung gi dkar po dang / 'o ma dang / kha ra dang / de dag gi mngar ba dang / bska ba'i 'bras bu a ru ra la sogs pa dang /de dag gi bska ba'i ro dang / nyi ma dang nyi ma'i 'od zer la sogs pa bdag nyid thams cad nas gcig cing khyad par med pa yang ma yin la/ rnam pa thams cad du tha dad pa ma yin zhes pa'o/ /yang 'dir don dam par ni rnam par shes pa'i dngos po nyid ma grub pas shin tu yang gcig dang tha dad pa las grol ba'o//rgya mtsho yongs su gyur zhes pa la sogs pas sngar gyi don bsdus te bstan pa'o/ /sems dang yid dang zhes pa la sogs pas ni rnam par shes pa brgyad kyi tshogs rnams kyang don dam par gcig dang tha dad pa las grol ba nyid du bstan pa na gzhan dag de ltar rnam par phye ste bstan pa mi 'thad do snyam du dogs pa sel ba ste/de'i don ni kun rdzob tu rnam par shes pa brgyad kyi mtshan nyid ma 'dres shing tha dad par gnas la/ de ltar byis pa rnams la bstan pa'i don du rab tu brtag cing bshad pa'o//don dam par ni mtshan nyid med pa'i mtshan nyid can du ro gcig cing tha dad pa ma yin zhes pa'o/ /de la yongs su gyur pa mi rnyed ces pa ni/ kun gzhi yongs su gyur pa'i rnam shes tha dad pa don dam par ma grub ces pa'o/ /sems ni las rnams sogs ces pa la sogs pas ni kun rdzob tu tha dad pa'i tshul bstan pa ste/kun gzhi ni bag chags kyi rten byed pa'i sgo nas sogs par byed pa yin la/ nyon mongs pa can gyi yid dam/ drug po 'das ma thag pa'i yid kyang rung ste/ bag chags bsgos par byed pa'i sgo nas sogs pa'o//yang rnam par shes pa'i tshogs drug gis ni yul rnam par rig pa ste/ de yang sgo lnga'i rnam par shes pa da ltar ba'i rang gi mtshan nyid kyi rnam par snang la/ yid kyi rnam par shes pas de la ngo bo nyid dam khyad par du rtogs par byed pa'o/ / ji ltar snang zhe na/ sngon po dmar po'i rnam par ni/ /mig gi rnam par shes par gda'/ /zhes pa ste/ nye bar mtshon pa tsam du zad de/ gzugs dang sgra la sogs pa'i rnam par snang zhes pa'o/ /gal te 'jug pa'i rnam par shes pa'i dba' rlabs rnams kyang kun gzhi rnam par shes pa'i yongs su 'gyur ba 'am/rigs nyid yin zhing de dang mthun par ji ltar 'gyur zhes rgol ba ni/ dba' rlabs zhes pa la sogs pa'o/ /rgol ba'i don ni dba' rlabs yul gyi rnam par gsal bar snang ba dang / kun gzhi de las bzlog pa ji ltar mtshungs zhes pa'o/ / lan gyi don ni don dam par sngon po dang / dmar po la sogs pa'i rnam par snang ba rnams mig gi rnam par shes pa la sogs pa'i dba' rlabs dag la ma mchis zhes pa ste/ de'i don yang gal te sngon po la sogs pa'i rnam pa rnams mig gi rnam par shes pa la sogs pa'i bdag la yod la/rnam par shes pa gcig gi bdag nyid du yod dam 'on te du mar yod ces brtag par bya'o/ /de la 'dir rnam bden pa sna tshogs gnyis su med par smra ba rnams ni sngar bstan pa ltar lhan cig dmigs pa nges pa la sogs pa'i gtan tshigs kyis sngon po la sogs pa'i rnam pa sems nyid du grub cing /sems kyang gcig pa nyid du grub ste/ sna tshogs su snang ba nyid kyi phyir zhes pa'o/ /de'i khyad par gyi don ni dkar dmar sna tshogs su snang ba shes pa du ma'i bdag nyid yin na/ rang rang gi rang bzhin tsam myong gi phan tshun gyi rnam pa myong ba med pas sna tshogs su snang ba mi 'thad de/ji ltar skyes bu lngas kha dog rnam pa lnga la so sor bltas pa na/ so sor snang ba'i blo du ma yin pas/ khra bo'am sna tshogs su snang ba mi 'thad de/ 'ga' zhig la dkar por snang ba'i blos rnam pa de nyid myong gi gzhan ma myong ba'i phyir ro/ / snang ba gzhan yang de dang mtshungs/ /zhes pa'o/ /'di ni mi 'thad de/ lhan cig dmigs pa nges pa la sogs pa'i gtan tshigs kyis don dam par sems su grub pa ni mi 'thad pa nyid du sngar bstan la/ gzhan yang sngon po la sogs pa sna tshogs su snang ba shes pa gcig nyid yin na/de nyid phyi rol gyi rdzas gcig nyid yin zhes kyang ci ste mi brtsad/ gal te cha sna tshogs su snang ba'i phyir phyi rol gcig gi bdag nyid min no zhe na/ de nyid kyi phyir shes pa gcig gi bdag nyid kyang ma yin te/ don 'di ni sngar phyi rol gcig pa nyid 'gog pa'i skabs su rgyas par bstan no//gal te 'dir phyi rol gyi rdzas gcig gi bdag nyid 'gog pa ni tshon gyis bsgyur ba dang / ma bsgyur ba la sogs pa'i chos 'gal bar gnas pa'i sgo nas 'gog la/ de nyid shes pa gcig tu khas len pa la ni mi mtshungs te/ shes pa ni tshon gyis bsgyur bar mi 'thad pa'i phyir ro zhe na/de ci shes par khas blangs zhes kyi de tsam gyis shes pa'i ngo bo don dam par grub bam zhes dri bar bya'o/ /de ltar ma grub po zhe na/ de nyid kyi phyir/ sngon po la sogs pa sna tshogs su snang ba'i chos can don dang shes pa'i khyad par du ma byas pa la/ tshon gyis bsgyur ba dang ma bsgyur ba'i 'gal ba'i gtan tshigs gcig nyid grub na/de shes par khas blangs pa'i tshe gtan tshigs ma grub ces ni brjod par mi nus te/ chos can dang gtan tshigs snga ma nyid las ma 'phos pa'i phyir ro/ /de yang ji ltar lha sbyin gyi mdog sngo bsangs nyid du tshad mas grub pa na/de dmangs rigs nyid du khas blangs pas sngo bsangs nyid du mi gyur pa ni ma yin te/ rigs kyi khyad par gang du khas blangs kyang kha dog sngo bsangs nyid du tshad mas grub pa bzhin du mi 'gyur ba bzhin no/ /de lta ma yin na/ phyi rol gcig pa nyid du khas len pas de la tshon gyis bsgyur ba dang ma bsgyur ba'i 'gal ba mi 'thad do zhes ci ste mi brjod//gal te gcig tu khas blangs pa tsam gyis gcig tu 'gyur ba ni ma yin la/ ji ltar sngon po la sogs par snang ba'i chos can la ni gtan tshigs de ma grub pa ma yin no zhe na/de bzhin du shes par khas blangs pa tsam gyis kyang shes pa nyid du ni mi 'gyur la/ de ltar snang ba'i chos can la ni gtan tshigs de grub pas ci'i phyir ni mi mtshungs snyam du sems pa'o/ /gzhan yang sna tshogs pa snang ba nyid kyi phyir/ shes pa gcig gi bdag nyid yin/zhes pa ni bsgrub bya las bzlog pa'i chos kyis khyab pa'i phyir gtan tshigs 'gal ba nyid yin pa 'am/ yang don dam par sna tshogs su snang ba'i phyir zhes gtan tshigs su 'god na ni ma grub la/ kun rdzob tu sna tshogs su snang ba'i phyir don dam par de ltar snang ba'i shes pa gcig nyid du sgrub na/khyab pa ma grub po zhes spyir bstan par bya'o/ /de ltar sna tshogs gnyis su med pa'i phyogs bkag nas gzhan dag sna tshogs kyi rnam par snang ba ni shes pa du ma'i bdag nyid du yod do zhe na/ 'di yang mi 'thad de/ du ma rtsom par byed pa'i sngo snang la sogs pa'i shes pa so so ba gcig nyid yin nam/'on te du ma zhig tshe thug pa med par khas len/ dang po ltar na rdul phra rab kyi dpyad pa mtshungs te/ ji ltar dbus phyogs su dkar por snang ba la/ de'i shar phyogs su sngon por snang ba bltas shing sbyar ba'i phyogs de nyid du lho phyogs la sogs par so sor snang ba rnams kyis bltas shing sbyar na/thams cad shar phyogs kyi gogs nyid du snang bar 'gyur la/ 'on te de dag gis phyogs so sor bltas shing sbyar ro zhe na/ de lta na dbus kyi dkar por snang ba de nyid cha bzhir 'gyur bas gcig pa nyid nyams so//gal te rdul phra rab lus can gyis dpyad la/ sems lus can ma yin pas mi mtshungs te/ de ni yul dang phyogs kyis ma bsdus pa'i phyir ro zhe na/ ma yin te/ sngar bstan pa ltar sems su khas blangs kyang don dam par sems su grub pa ni med la/sngon po la sogs pa'i rnam par snang ba ni yul dang phyogs la sogs pas bsdus par snang bas ci'i phyir na dpyad pa mi 'jug ces pa'o/ /de lta ma yin na/ rdul phra rab cha shas med pa las shar dang lho la sogs pa'i cha mi 'thad pas rnam rig tsam du smra ba rnams kyis drug gis cig car sbyar ba la sogs pa'i brtag pa byas pa yang mi 'jug go//gal te cha med par khas blangs kyang de ltar grub pa ni ma yin la/ 'on kyang rdul phra rab rnams 'dab chags su gnas pa las rags pa rtsom par khas len pa na/ don gyis shar la sogs par khas len dgos pas de lta bu'i dpyad pa 'jug go zhe na/'dir shes par khas blangs pa tsam gyis shes par grub pa ni ma min la/ 'on kyang rdul sngon po la sogs pa'i rnam pa 'dab chags su snang ba las rags par snang la rtsom par khas len pa na de lta bu'i dpyad pa ci ste mi 'jug ces pa'o//gal te shes pa'i phra rab du ma nyi tsher khas len na/ sa'i dkyil 'khor rgyas par snang ba dang / skra'i rtse mo'i khyon tsam du snang ba gnyis rnam pa che chung gi khyad par med par thal te/ rtsom byed kyi shes pa'i rdul phra rab la mang nyung gi khyad par med pa'i phyir ro zhes pa la sogs pa sngar rdul phra rab la dpyad pa byas pa dang mtshungs par blta bar bya'o/de ltar sngon po la sogs pa'i rnam pa rnams 'jug pa'i rnam par shes pa'i dba' rlabs la med cing / rnam pa las ma gtogs pa'i dba' rlabs kyang grub pa med pas don dam par kun gzhi dang mthun pa ste/kun gzhi yang sngar bstan pa ltar don dam pa'i ngo bor ma grub pa'i phyir ro/ /de lta na de rnams kyi 'jug pa bstan pa dang 'gal lo zhe na/ mtshan nyid don du zhes pa la sogs pas lan bstan to/ don dam par ni rnam par shes pa'i chos nyid de bzhin nyid la/ rgyun gyis 'jug pa med la/yul la 'jug pa ni kun rdzob tu yang med de/ gzung ba'i yul med pa'i phyir ro/ /gal te gzung ba'i phyi rol gyi bdag nyid med kyang shes pa'i nang du gtogs pa'i gzung ba ni kun rdzob tu yod do zhe na/ ma yin te/ de yang gzung ba'i mtshan nyid du grub pa ma yin te/gzung dang 'dzin pas stong pa'i phyir/ /de ni de ltar rang nyid gsal/ /zhes gsungs pa lta bu'o/ /gal te gzung ba'i yul 'ga' zhig yod na/ de'i ltos sar gyur pa 'dzin pa'i dba' rlabs kyang de ltar snang ba dang / mthun par grub par 'gyur ba zhig na/ gzung ba nyid med pa'i phyir de la ltos pa'i 'dzin pa mi 'thad do zhes pa'o//de ltar kun rdzob tu chos thams cad sems tsam nyid yin zhing / don dam par sems kyi ngo bo yang ma grub pa med do zhes sngar rgyas par bstan la/ 'dir ni khyad par du rnam pa bden pa'i phyogs bkag pa'o/ /yang rnam pa brdzun pa'i phyogs kyang 'og nas 'gog par 'gyur ro//lus dang zhes pa la sogs pas kun rdzob tu dba' rlabs sems dang mthun zhing / sems kyi 'jug pa yang dba' rlabs dang 'dra bar ston pa ste/ 'di'i don zhib tu ni 'og nas bstan par bya'o/ /dba' rlabs dngos por zhen pa la sogs pas ni dpe bstan pa'i sgo nas byis pa rnams kyis kyang de dag gi 'jug pa spyi'i tshul du rtogs par rigs shing /de nyid kyi phyir dpe yang nye bar dgod pa yin zhes pa'o/ /sngar rtogs par dka' ba nyid du bstan pa ni rang gi mtshan nyid ji lta ba yin pas 'gal ba'i nyes par mi 'gyur ro//'dir dba' rlabs dngos po zhes pa ni dpe'i dbang du byas te bstan pa yin la/ sngar bstan pa'i dba' rlabs zhes pa rnams ni dpes mtshon pa'i don gyi dbang du byas pa'o/ /skye bo bzang ngan zhes pa la sogs pas ni sangs rgyas rnams kyi chos bshad pa 'jug pa'i bye brag gdul bya'i khyad par gyis mi 'dra ba nyid du ston te/de la dang por rgol ba'i don ni de bzhin gshegs pa la thugs rje chen po phyogs ris med pa mnga' bas/ /thams cad la yang dag pa'i don mtshungs pa nyid du ston par rigs te/ ji ltar nyi ma'i dkyil 'khor sems can rnams la mnyam por 'char ba bzhin no//gal te thams cad la yang dag pa'i de bzhin nyid du gsungs na/ /gsung rab dag las sems tsam dngos por bstan pa 'am/ /phyi'i don la bstan pa la de bzhin nyid ma mchis zhes pa ste/ bstan pa'i don la tshad mas gnod pas de bzhin nyid kyi ngo bor ma grub ces pa'o//chos la rab tu bzhugs mdzad cing / /zhes pa ni rang nyid chos kyi dbyings las ma g.yos pa'am/ sangs rgyas nyid kyi chos te mi gnas pa'i mya ngan las 'das pa chen po thabs dang shes rab dbyer med pa'i bdag nyid la rtag tu bzhugs nas zhes pa'o//tshig 'di bstan pa'i dgos pa yang thugs rjes sems can gyi don byed pa na rang nyid chos kyi dbyings las g.yengs par 'gyur bar srid pas de 'dra ba dgag pa'i don du'o/ /ji ltar rgya mtsho zhes pa la sogs pas lan ston te//de la dang por kun rdzob tu rnam par shes pa'i 'jug tshul gzhan gyi sgo nas bstan te/ de'i don yang ji ltar me long gi ngos la rdzas su ma grub pa'i gzugs snang ba dang / rmi lam la sogs pa'i gnas skabs na yang dngos po la med pa'i gzugs la sogs pa rim mam cig car gyis snang ba bzhin du rnam par shes pa rnams kyang rang gi spyod yul du snang ba las/rdzas su grub pa'i yul dang mi ldan yang rim mam cig car gyis 'jug cing snang ba ste/ /de la rnam par shes pa ni kun gzhi dang yid kyi rnam par shes pa'am/ /yang na rnam pa drug gi bdag nyid do//yid kyis de bzhin snyems par byed/ /ces pa ni nyon mongs pa can gyi yid kun gzhi la nga yir 'dzin pa ste/ /bdag tu nga rgyal ba'o/ /nang du mnyam par gzhag pa'i gnas skabs na ni de 'dra ba'i 'jug pa'i rim pa med ces pa'o/ /de ltar na yul dang yul can gyi ngo bo sna tshogs su bshad pa ni don dam par grub pa med ces ri mo'i dpe'i sgo nas ston par byed de/de yang / /tshon la ri mo yod ma yin/ /zhes pas dpe nyid gsal bar 'chad de/ /ji ltar tshon rtsi gcig pu la ri mo skyed pa'i nus pa yod pa ma yin te/ rkyen gzhan don med pa nyid du 'gyur ba'i phyir ro//de bzhin du pir dang snod dang skyes bu'i rtsol ba dag la yang sbyar bar bya'o/ /gal te de rnams re re la 'bras bu skyed nus pa med kyang / /de rnams tshogs pa la yod do zhe na/ tshogs pa can re re ba rnams ma gtogs pa'i tshogs ni grub pa med de/ /de'i don zhib tu 'og nas ston par 'gyur ro//de ltar dpyad pa'i don ma grub kyang / /ma brtags na nyams dga' ba tsam du tshon la sogs las ri mo skyed par snang zhing / /de ltar rnam par brtag par bya bzhin du shes pa dang shes bya'i bdag nyid sna tshogs su bshad pa yang / so so ba dang 'dus pa'i rkyen las skye ba ma yin zhing /ma skyes pa'i ngo bor yang grub pa ma yin mod kyi/ kun rdzob rnam par gzhag pa tsam du de ltar snang ba dang / dmigs pa can gyi sems can rnams drang ba'i don du de ltar bstan pa'o/ /yang dag pa'i don la ni brjod bya rjod byed kyi chos thams cad med cing / /yod par bstan pa ni phyin ci log yin mod kyi//sems can rnams drang ba'i don du bstan pa yin pas/ de bzhin gshegs pa la brdzun gsungs pa'i nyes pa mi mnga'o/ /de lta na yang dag pa'i don su la ston zhe na/ chos rnams la ni zhes pa la sogs pa'o/ /ji ltar sgyu ma zhes pa la sogs pas ni sngar gyi don nyid bsdus te bstan pa'o//de ltar gdul bya'i bye brag mi 'dra bas bshad pa 'jug pa'i bye brag kyang mi 'dra ba nyid du dpe'i sgo nas gsal bar bstan pa ni/ /gzhan la gang zhig ces pa la sogs pa'o/ /sems tsam du yang zhes pa ni mtshon pa tsam ste/ gdul bya'i khyad par la gang zag dang phyi'i don yang yod par ston pa'o//de ltar bstan pa'i don de nyid dbang po mchog dang ldan pa/ theg pa chen po'i rigs can la ni ma yin zhes pa ste/ shes par zad do/ /de ltar rnam par shes pa rnams yul la ji ltar 'jug pa dang ldog pa'i tshul bstan nas/gnyis kyi mtha' brjod ji lta bu/ zhes pa la sogs pa'i lan du yod pa dang med pa la sogs pa'i mtshan ma blo'i mdun du byas pa ni g.yang sa'i gnas su gyur pa'i mtha' nyid yin pas de rnams rnam par bkag pa'i de bzhin nyid ston te/ de la dang por de bzhin nyid rtogs pa'i yan lag dang ldan par bya'o zhes de bzhin gshegs pas gdams pa'i tshul du ston pa ni/blo gros chen po zhes pa la sogs pa ste/ de la gzung ba dang 'dzin pa'i rnam par snang ba ni rang gi sems kyi rnam par rtog pa nyid yin zhing tha dad pa'i spyod yul grub pa med pa la de bzhin du rtogs shing don dam par sems kyi rnam par rtog pa nyid kyang ngo bo nyid med par rtogs par 'dod pas/'du ba dang 'du 'dzi ste/ rnyed pa dang bkur sti mang po dang / g.yog 'khor la sogs pa skye bo mang po'i tshogs dang / gnyid dang rmugs pa dang / rgod pa dang 'gyod pa dang /'dod pa dang / 'dun pa dang / gnod sems dang the tshom du gyur pa'i sgrib pa lnga spang bar bya zhing / de nyid kyis srod dang tho rangs dang nam gyi gung la mi nyal zhing rnal 'byor la brtson par bya'o zhes pa la sogs pa shes par zad do/ / sems ni de bzhin gshegs pa'i snying po kun gzhi rnam par shes pa ste/ sangs rgyas kyi rigs sam/ /rang bzhin la sogs pa nyid du bstan to/ /shes rab dang ye shes kyi mtshan nyid ni 'dir go rims bzhin du chos kyi dbye ba rab tu shes pa dang / /de rnams kyi de kho na nyid shes pa ste//de 'dra ba'i mtshan nyid rnam par dgod pa la gnas zhes pa ste/ /de rnams ji lta ba bzhin du rtogs pa sa bdun pa man chod kyi gnas skabs kyis bsdus pa'o/ /gong du zhes pa ni de las lhag tu ste/ /yon tan khyad par can mngon du byed pa'o/ /de nyid gang zhe na/ snang ba med pa'i mtshan nyid de//sa brgyad pa'i gnas kyis bsdus pa gnyis su snang ba la sogs pa'i mtshan ma med pa zhi ba'i bsam gtan la mnyam par gzhag pa'o/ /sangs rgyas thams cad kyi rang gi smon lam gyi byin gyi rlabs kyi mtshan nyid ni de rnams kyis sngon tshogs bsags shing /smon lam btab pa dang / byang chub sems dpa' bdag nyid kyis kyang de bzhin du tshogs bsags shing / smon lam btab pa'i stobs kyis longs spyod rdzogs pa'i sangs rgyas rnams kyi phyag glang po'i sna lta bu'o/ /de mgo la bzhag cing tshig tu brjod par snang ba'i sgo nas kyang sangs rgyas nyid thob pa'i tshogs rdzogs par bya ba'i don du zhi ba'i bsam gtan las bslangs nas sems can gyi don la sogs pa la sbyor ba'o//de ltar yang / sa bdun dag ni sems yin te/ /snang ba med pa brgyad pa'o/ /zhes gsungs pa dang / gzhan yang 'phags pas bcu pa las/sa brgyad pa la zhi ba'i bsam gtan la snyoms par zhugs pa nas sangs rgyas rnams kyis de las bslangs nas sems can gyi don la bskul ba nyid du gsungs pas so/ /'phags pa so so rang gi ye shes kyi mtshan nyid ni de ltar sems can gyi don la sogs pa la sbyar ba na yang de rnams sems snang ba tsam gyi rang bzhin du rtogs shing /de'i de bzhin nyid ji lta ba bzhin du rtogs pa las mi g.yo ba'o/ /bong bu theng po lta bu zhes pa la sogs pa'i don ni sa bdun pa man chod du rnam par shes pa'i tshogs rnams gnas ma gyur cing / mtshan ma 'am rtsol ba dang bcas pa'i gnas skabs yin pas/bgrod par bya ba'i gnas ji lta bar 'gro ba la cung zad thogs par gyur pa'o/ /de'i phyir sngar bstan pa'i mtshan nyid gsum khong du chud pas sngar gyi dman pa'i gnas skabs spangs te/ rgyal ba'i sras kyis brgyad pa thob nas dgu pa la sogs pa la sbyor ba'i rim gyis sangs rgyas nyid du 'gyur ba'o//'dir de'i gong du zhes pa ni sa brgyad pa la sogs pa'i sngon rol lo/ /de la zhes pa la sogs pas sngar gyi mtshan nyid gsum po ji ltar 'byung ba'i tshul ston to/ /de la dang po'i don ni slob dpon ye shes dpal bzang pos mu stegs la sogs pa rnams la yang /srog dang rtsol ba bsdams pa'am/ /bgrang dang rjes 'gro ldog pa dang / /zhes pa la sogs pa srog gi rlung la bslabs pa'i dbang gis rnam par rtog pa la sogs pa'i snang ba med pa'i ting nge 'dzin yod la/ byang chub sems dpa' rnams kyis kyang de dang rjes su mthun pa'i thabs la bslabs shing 'dris par byas pas de 'dra ba'i ting nge 'dzin thob po zhes gsungs so//'dir de dag dang byang chub sems dpa'i khyad par ni ji ltar skyes bu mig btsums pa na/ bum pa la sogs pa'i gzugs mi snang ba dang / mig dang ldan pas dbang po legs par byas pa na bum pa la sogs pa'i gzugs snang du rung ba las ma dmigs pas yod pa'i sgro 'dogs chod cing /med par rtogs pa lta bu ste/ byang chub sems dpa' chen po rnams kyis ni mtshan ma'i chos thams cad stong pa nyid du rtogs pas de 'dra ba'i snang ba med pas zhi gnas dang lhag mthong zung du 'brel pa nyid yin la/gzhan ni de las bzlog pa'o/ /yang rnam pa gcig tu na nyan thos la sogs pa'i gang zag dang / chos kyi bdag tu dmigs pa dang bcas pa'i bsam gtan dang de'i yul la ji lta ba bzhin rnam par 'byed pa'i shes rab kyis yongs su dpyod cing 'dris par byas pa las/de rnams stong pa nyid du rtogs pas snang ba med pa'i ting nge 'dzin 'byung ba ste/ ji skad du/ spyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa nyid bshad pa lta bu'o/ /gnyis pa'i don ni shes par sla'o/ /'dir smon lam ni sngar bstan pa ltar byang chub sems dpa' bdag nyid kyi smon lam yang de'i rgyu nyid du gyur pa'o//de la 'dir byin gyi rlabs ni de dag gi mthu yin la/ mtshan nyid ni de'i 'bras bur gyur pa tshogs gnyis rdzogs par byed pa'o/ /gsum pa'i don la sangs rgyas kyi chos thams cad ces pa sa brgyad pa yan chad du stobs dang mi 'jigs pa la sogs pa sangs rgyas kyi chos kyi rigs thams cad thob par gsungs pa dang /phung po la sogs pa'i mtshan nyid thams cad la mngon par zhen pa med pa dang / sgyu ma lta bu'i ting nge 'dzin gyi lus te/ yid kyi rang bzhin gyi lus sgyu ma lta bu thob pas/sangs rgyas kyi ye shes khong du chud par 'gyur ba'i rtogs pa'i rgyun gong nas gong du 'jug pa las 'byung zhes pa'o/ /blo gros chen po zhes pa la sogs pa skabs kyi don bsdus te bstan pa'o/ /de ltar de bzhin gshegs pas spyi'i tshul du gdams pa'i don 'khor gyi gtso bos zhus pa ni/de nas sangs rgyas thams cad kyis zhes pa la sogs pa ste/ tshig gi don ni phal cher shes par zad do/ /'dir 'phags pa'i ye shes kyi dngos po tsam smos kyi de'i yul ma smos pa mi 'thad de/ de la yang gzhan dag rmongs par 'gyur ba'i phyir ro zhe na/skyon med de/ ye shes las tha dad pa'i gzung ba'i yul grub pa med pa'i phyir ro/ /gang la gnas zhes pa ni dbyings dang nam mkha' dbyer med pa chos kyi sku'i rang bzhin la gnas pa'o/ /gang zag dang chos la bdag med pa'i rab tu rgyu ba zhes pa ni bdag med gnyis rtogs pa'i shes rab kyi rgyun rgyud de/de nyid kyi dri ma sa bon dang bcas te sbyangs pa'o/ /chos lnga dang rang bzhin rtogs pa las rnam par log pa ni de dag gi rnam par dbye ba rtogs pa kun rdzob mkhyen pa'i ye shes snang ba dang bcas pa las log pa chos kyi sku shes rab dang ye shes shin tu 'brel pa ste/ye shes rig pa dang / dbyings dang stong pa nyid dbyer med pa'i tshul du rtogs pa chos thams cad sgyu ma lta bu'i spyod yul mngon par rtogs shing goms pa'i sgo nas mngon par grub pa ste/ ye shes kyi tshogs bstan pa'o/ /sangs rgyas kyi zhing thams cad dang zhes pa la sogs pas ni zhing dang gnas de dag tu rdzu 'phrul gyis song zhing /sangs rgyas la mchod pa dang / sems can gyi don byas pas bsod nams kyi tshogs rdzogs par bya ste/ sngar bstan pa ltar mthar gyis 'og min gyi gnas su nye bar song ste/ de bzhin gshesas pa'i longs spyod rdzogs pa'i sku rab tu thob par 'gyur ba'i 'phags pa'i ye shes kyi dngos po rab tu 'byed pa'i rang bzhin zab mo'i chos kyi rnam grangs sngar bstan pa dgag bya dang de dgag par brjod pa'i tshig brgya rtsa brgyad shin tu phye ba'i gnas te de dag thams cad la bden pa'i don grub pa med pas tshig tsam nyid yin zhing /tshig nyid kyang don la ltos pas dngos por mi 'thad ces pa'o/ /de'i phyir dgag bya dang / bkag pa'i chos kyi mtshan mar 'dzin pa ni mtha' nyid du 'gyur ba de ltar bdag la bshad du gsol zhes pa'o/ /bcom ldan 'das zhes pa la sogs pas lan ldon par byed de/re zhig dang por mtha' gnyis su 'dzin pa'i tshul ni phyi rol pa'am rang gi sde pa yang rung ste/ log par lta ba can thams cad mu stegs nyid du 'og nas ston par 'gyur la/ /de dag las kyang 'ga' zhig snga na med pa dang / zhig nas med pa dang /bum pa dang snam bu la sogs pa phan tshun gcig la gcig med pa dang / ri bong gi rwa la sogs pa gtan nas med pa'o zhes med pa'i mtshan mar 'dzin la/ dgag par bya ba'i don de dag gis dben pa'am/ de dag gis bzlog zlar gyur pa ri bong gi mgo bo dang / glang gi rwa la sogs pa ni dngos po yod pa'o zhes yod pa'i mthar rnam par rtog pa'o//de la mu stegs kyi lta ba can zhes pa ni de dag ni grub pa'i mtha' la brten pa'o/ /mu stegs can zhes pa ni grub pa'i mtha' ma thos kyang rang bzhin gyis phyin ci log pa'o/ /de ltar mngon par zhen pa'i rgyu mtshan yang ri bong gi rwar rnam par rtog pa la sogs pa'i blo de 'dra ba'i rnam par snang ba med pa'i phyir/de'i yul ri bong la rwa med do snyam ste/ de bzhin du gzugs la sogs pa'i chos thams cad la yang phan tshun gyi bdag nyid med pa dang / sngon dang phyi ma'i gnas skabs su med do zhes rnam par rtog go//rgyu zad pa'i rang bzhin zhes pa ni de 'dra ba'i rtog pa la sogs pa 'byung ba'i rgyu rkyen gzhan zad pa'i dbang gis med pa yin gyi/ rwa med pa'i mtshan ma ji ltar bzung ba bzhin gnas pa la brten nas de 'dra ba'i blo med par 'gyur ba ni ma yin no zhes pa'o//blo gros chen po gzhan yang zhes pa la sogs pas yod pa'i mthar rtog pa'i tshul ston te/ de la dpe'i tshul gyi khyad par ni ba lang gi rwa la sogs pa yod par 'jog pa'i gtan tshigs don byed par nus pa dang / gang zhig don byed par nus pa de ni yod pa yin te/dper na bum pa bzhin zhes pa la sogs pa'o/ /de'i phyir de las bzlog pa'i ri bong gi rwa med par mngon par chags shing zhen pa rnams de dang mi mthun pa ba lang gi rwa yod do snyam du rnam par rtog pa'o/ /blo gros chen po mtha' gnyis zhes pa la sogs pas de 'dra ba'i lta ba 'or cig par gdams pa'o//sems kyi khams nyid rnam par rtog pa ste/ khams kyi don ni rgyu'am dbyings so/ /de'i phyir lus dang longs spyod dang / gnas dang 'gro ba rnams su rnam par rtog par brtags pa ni rtog pa'i rang bzhin nam/ de'i rgyu las byung ba ste/ des sgro btags pa'o/ /de lta bu'i rang bzhin gyi ri bong gi rwa med do zhes rnam par rtog pa'i blo'i mdun du med pa'i mtshan mar sgro btags pa/ de kho na nyid du yod pa dang med pa'i mtshan ma las rnam par log pa la med pa'i mtshan mar brtag par mi bya zhes pa'o/ /de bzhin du chos thams cad kyang yod pa dang /med pa la sogs pa'i mtshan mar rnam par rtog pa'i blo yis bcos shing brtags pa las log pa ste/ de lta de ltar brtag par mi bya ste/ ji skad du/ rnam rtog ma rig chen po ste/ 'khor ba'i rgya mtshor ltung bar byed/ /ces gsungs pa'i phyir ro/ / 'di nyid du yang sngar bstan pa ste/ de ltar rnam par rtog pa'i blo yis spros pa thams cad dang bral ba'o zhes mtshan mar bzung zhing mdun du byas na/ de yang phyin ci log nyid du 'gyur ba'o zhes bstan te/ de'i phyir chos thams cad kyi rang bzhin stong pa nyid dam/ ri bong gi rwa dang / nam mkha'i pad ma la sogs pa kun rdzob tsam du yang dngos po'i ngo bo bkag pa tsam ni de ltar bden mod kyi/de dag med pa'o zhes rnam par rtog pa'i blo yis mdun du byas shing mtshan mar bzung ba ni phyin ci log g.yang sa'i mtha' zhes bya'o/ /med pa las rnam par log zhes pa yang de 'dra ba'i rang bzhin gyi med pa las log pa ste/gzhan du na/ dgag pa bkag pa sgrub par 'gyur/ /zhes pa la sogs pa'i nyes pa sngar bstan no/ /blo gros chen po gang yang zhes pa la sogs pas phyin ci log la gnas pa rnams de ltar rtog mod kyi/ yang dag par na de dag gis ri bong gi rwa med cing /ba lang gi rwa la sogs pa yod ces brtag par mi bya ste/ yod pa dang med pa phan tshun ltos pa'i rgyu'i phyir ro/ /gal te de lta na yang ltos par bya ba ba lang gi rwa la sogs pa yod pa'i phyir/ de las bzlog pa ri bong gi rwa med pa nyid du brtag par 'os so zhe na/blo gros chen po zhes pa la sogs pa smos te/ 'phags pa'i ye shes kyi spyod yul las rnam par log ces pa'i don ni thams cad mkhyen pa'i mkhyen pa la yang mi snang ba'i phyir ro zhes bden pa gnyis kyi rab tu byed pa las bshad pa'am/ gzhan yang gzugs rnams mi mthong tshor ba dag kyang mi mthong zhing /'du shes mthong ba med pa la sogs pa shes rab kyi pha rol phyin pa las bshad pa bzhin no/ /de nas zhes pa la sogs pa gdul bya'i the tshom bcad par bya ba'i don du zhus pa ste/ de'i don ni ri bong gi rwar rnam par rtog cing snang ba'i blo ma dmigs pas blo'i yul du gyur pa de las tha dad pa phyi rol gyi ngo bor gyur pa'i ri bong gi rwa med do zhes dpag par bya ste/ji ltar phyi rol gyi ngo bor gyur pa'i dngos po 'ga' zhig yod na/ de ltar snang ba'i blo dmigs par 'gyur te/ glang gi rwa la sogs pa bzhin no snyam du sems pa'o//lan gyi don ni gal te ri bong gi rwa la sogs pa'i dngos po yod na der snang ba'i yul can gyi blo ni 'bras bu nyid du 'gyur na/ yul ni rgyu nyid du 'gyur ba ste/ ji skad du/ tshad ma rnam par gtan la dbab pa las/ rnam par rtog par nus pa'i phyir/ shes pa'i yul ni rgyu nyid yin la/rgyu ma yin pa ni yul du mi 'gyur ro zhes gsungs pa dang / rnam 'grel las kyang / rgyu min yul yang ji ltar rung / /zhes gsungs pa lta bu'o/ /de'i phyir ri bong gi rwar rnam par rtog pa la sogs pa yul can gyi blo 'bras bur gyur pa bkag pas rgyu bkag pa ni 'khrul pa nyid de/ji ltar sa phyogs su sha zar snang ba'i blo bkag pas sha za dgag par mi nus pa lta bu'o/ /'dir de ni zhes bya ba'i don ni gal te phyi rol gyi dngos por gyur pa'i ri bong gi rwa la sogs pa yod na/ de nyid der snang ba'i yul can rnam par rtog pa'i blo la sogs pa'i rgyu yin te/de la brten te blo byung zhes pa'o/ /gal te 'dir sha za la sogs pa ni rang bzhin gyi skal ba yin pas yod kyang der snang ba'i blo mi 'gyur la/ ri bong gi rwa ni yod par gyur na yul dang dus dang rang bzhin gyis ma bskal zhing mig gi dbang po la sogs pa dmigs pa'i rkyen gzhan dag kyang tshang bas dmigs pa kho nar 'gyur te glang gi rwa la sogs pa bzhin no zhe na/de ltar bden mod kyi/ 'dir ri bong gi rwa med ces rnam pa thams cad du med par bkag pa'i don dang / der snang ba'i blo bkag pa tsam gyi med par dgag pa la ni go bya go byed du mi 'thad pa nyid du sngar rgyas par bstan la/gzhan yang med do zhes rnam par rtog pa'i blo'i mdun du mtshan mar bzung ba dang / der snang ba'i rnam par rtog pa la sogs pa'i blo med ces mtshan mar bzung ba ni sgro btags pa'i don te/ ji ltar btags pa bzhin mi bden pas khyad par du yang go bya dang go byed mi 'thad pa nyid do//gal te de lta na gcig dang du ma dang bral ba'i ngo bo nyid yin pa'i phyir/ ji ltar snang ba sgyu ma yin no zhes rnam par gzhag pa yang mi 'thad do zhe na/ 'dir yang sgyu ma la sogs pa'i mtshan mar rnam par rtog pa'i blos brtags pa ni de ltar bden pa ma yin no zhes sngar bstan la/go bya go byed du 'gyur ba'i tshul don dam pa'i de kho na nyid kyang sngar rgyas par gtan la phab bo/ /skabs su bab pa'i don 'dir yang ri bong gi rwa la sogs pa'i dngos po bkag pa de'i mgo la sogs par snang ba'i chos can gyi chos su bskor ba sgyu ma lta bu'i don dang /de ltar dmigs pa'i blo bkag pa'i ngo bo ni go bya go byed du 'thad cing sgyu ma don dam pa'i ngo bo nyid med ces bya'o/ /'dir mi 'thad pa nyid du bstan pa'i don ni ri bong gi rwa med ces rnam par rtog pa'i blos mdun du byas shing mtshan mar bzung ba'i don te/de 'dra ba'i dngos po bkag pa tsam blo'i byed pas sgro ma btags pa ni de bzhin du bden pa'o/ /de nyid kyi phyir gzhan dag skabs kyi mdo 'di rnams kyi don yod pa dang med pa la sogs pa'i phyogs thams cad dang bral ba rab tu mi gnas pa'i don nyid bstan pa yin no zhes smra ba'i log par rtogs pa bsal ba'o//tha dad pa dang zhes pa la sogs pas ni ji ltar ba lang gi rwa dang mtshungs par ri bong gi rwa yod par gyur na yang don dam pa'i de kho na nyid du bsams na/ rwa dang de ltar rnam par rtog pa'i blo gnyis gcig dang tha dad pa las grol ba'i phyir/ de 'dra ba'i blo yod pa ma yin pas de la ltos te ri bong gi rwa med do zhes rnam par rtog pa'i blo yis mtshan mar bzung ba ni mi bden zhes pa'o//de'i don yang ri bong gi rwa dang der snang ba'i rnam par rtog pa la sogs pa'i blo gal te tha dad na ni blo rwa'i rgyu las byung ba ma yin par 'gyur te/ tha dad pa dus mnyam pa dang mi mnyam pa gnyis ka yang rgyur mi 'thad pa'i phyir ro//de ste tha dad pa ma yin na ni de'i rgyu las byung ba ste/ tha dad pa sa yin pa'i rtags las rtogs pa'i rjes su dpag pas blo de yang med par 'gyur zhes rtogs pa'am/ pha rol la thal ba'i don du sbyor bas te/ de'i rgyu mtshan ma yang rwa dang tha dad pa ma yin pa'i phyir zhes pa'o//de'i khyab pa'i don ni glang gi rwa dang mtshungs pa'i ri bong gi rwa yang rigs pa dam pas rdul phra rab kyi bar du brtags na mi dmigs pas zhes pa ste/ med pa dang tha dad med pa'i phyir med pa nyid du 'gyur zhes pa'o/ /de ltar na blo dang rwa gnyis ka'i dngos po med na/rgyu mtshan gang gis phan tshun gcig la gcig ltos te/ med pa nyid du 'gyur te/ de 'dra ba'i mtshan ma grub par mi 'gyur zhes pa'o/ /gal te ba lang gi rwa yod pa la ltos te ri bong gi rwa med pa nyid du 'gyur ro zhe na/ blo gros chen po zhes bya ba la sogs pa smos te/de 'dra ba'i ltos pa ma grub pas de la ltos pa med pa'i mtshan mar bzung bar bya ba'i don grub pa med ces pa'o/ /de'i phyir gang dag ri bong gi mgo bo rwa dang ldan par bskyed pa'i rgyu ni med la/ ba lang gi rwa la sogs pa ni de las bzlog pas rgyu mi mnyam pa'i phyir zhes pa la sogs pa ste shes par zad do/blo gros chen po gzhan yang zhes pa la sogs pas ni de'i rang bzhin can gzhan la sbyar ba ste/ phyin ci log tu lta ba'i mu stegs can gang dag thogs pa dang bcas pa'i gzugs yod pa la ltos te/ de las bzlog pa nam mkha' thogs par byed pa'i dngos po med pa'o zhes mtshan mar 'dzin pa'am/de la sogs pa 'dus ma byas rdzas su grub par 'dod pa nam mkha'i rang bzhin yongs su rtog pa la mi mkhas pa ste/ gzugs kyang nam mkha'i ngo bo dang bral ba'i dngos po yod par rtog par byed pa ni phyin ci log pa nyid yin te/don dam par gzugs rnams kyi 'byung ba'i rjes su zhugs zhes pa ste/ 'byung ba dang 'byung ba las gyur pa'i gzugs su snang ba ni rang rang gi ngo bos stong pa'i phyir nam mkha' dang mtshungs pa'am de'i bdag nyid yin te/ gzugs nyid kyang nam mkha' ste zhes pa dang sbyar ro//de nyid kyi phyir nam mkha' nyid kyang gzugs te/ don dam par de dag dbyer med pa'i phyir/ phan tshun 'gal ba'i ngo bo nyid du gcig la gcig ltos pa'i dbang gis brtag par mi bya'o/ /de skad du yang 'phags pa shes rab kyi pha rol tu phyin pa las byang chub sems dpa' sems dpa' chen po des gzugs la gnas par mi bya'o//de ci'i phyir zhe na/ gzugs gzugs kyi ngo bos stong pa'i phyir ro zhes pa la sogs pa gsungs pa dang / rigs pas kyang de bzhin du grub pa'i phyir ro/ /gal te de lta na gzugs dang nam mkha' phan tshun 'gal ba nyid du dmigs pa ji ltar zhe na/kun rdzob tu de ltar rnam par gzhag pa'i rgyu tha dad pa ni gzhag pa dang gzhi'i tshul du gyur par yid ches par bya'o zhes pa ste/ ji ltar gzhag par bya ba bum pa dang / de'i gzhi sa phyogs dang 'dra bar ri dang sa gzhi la sogs pa'i gzugs gzhir gyur pa dang / de la rten cing 'byar bar snang ba nam mkha' ste/kun rdzob tsam du phan tshun 'gal ba'o/ /yang nam mkha'i go skabs na gnas pa'i gzugs bya dang gnam du 'phangs pa la sogs pa ni gzhag pa zhes bya la/ nam mkha' ni de dag gi gzhi'i tshul du blta bar bya'o/ /gzhan yang kun rdzob tsam du 'byung ba rnams skye ba ni phan tshun du rang gi mtshan nyid kyi bye brag gis tha dad pa ste/tsha zhing sreg pa dang gsher ba la sogs pa'i khyad par gyis tha dad pa'o/ /nam mkha' la yang mi gnas zhes pa de'i rang bzhin gyis mi gnas pa'o/ /de dag la yang nam mkha' med/ /ces pa ste/ de dag gi bdag nyid kyi tshul du med pa'o//de ltar na gzugs dang nam mkha' kun rdzob tsam du phan tshun 'gal ba nyid du blta bar bya'o/ /blo gros chen po zhes pa la sogs pas de nyid sngar gyi don la sbyar te bstan pa'o/ /ri bong gi rwa med do zhes pa'i mtshan mar bzung ba ni ba lang gi rwa yod pa la ltos zhes pa'o//de ste gzhan la ltos zhes pa bum pa la sogs pa yod pa'i chos can gzhan la'o/ /de yang de lta bu zhes pa ni rdul phra rab kyi bar du brtags na ma grub pa'o/ /skabs kyi don 'di rnams sngar bstan pa'i chos dang chos med pa rnam par bkag pa dang yang sbyar bar bya'o//de nas bcom ldan 'das zhes pa la sogs pas nye bar gdams pa'i tshul gyis bsdus te bstan pa'o/ /tshigs su bcad pa'i don ni phal cher shes par zad do/ /gal te snang ba med na de las sems 'byung ba mi 'thad do zhe na/ phyi rol gyi dngos po med kyang kun rdzob tu sems kyi ngo bor yod cing /de 'dra ba'i sa bon snga ma las byung ba'o/ /'dra ba ni de 'dra ba'i rnam par snang ba'o/ /dag pa zhes pa ni de dag la phyin ci log tu sgro btags pa'i dri ma'o/ /'brel zhes pa ni snga ma ltar phan tshun ltos pa'i tshul du'o/ /de nyid kyi don gsal bar bstan pa ni ring dang zhes pa la sogs pa ste/ring po sgrub pa thung ngu la ltos zhes pa la sogs pa go bar zad do/ /rnam par brtag mi bya zhes pa ni brtag bya'i yul grub pa med pas gzugs kyi dngos por mi rtag pa'o/ /kun rdzob sems tsam gyi tshul du gzhag pa ni ngan pa'i lta ba la gnas pa rnams kyis rtogs par ma nus zhes pa'o//de nas bcom ldan 'das la zhes pa la sogs pas bshad pa dag kyang ji ltar 'gyur zhes dris pa'i lan/ gdul bya'i sems rgyud rnam par sbyang ba'i don du de bzhin gshegs pa'i bshad pa 'jug pa'i tshul du ston te/ de la dang por gdul bya khams dang mos pa dman pa zab mo bshad pa'i skal ba dang mi ldan pa rnams la/thog mar gang zag dang phung po la sogs pa yod par bstan pa'i rim gyis sems brid cing de kho na nyid zab mo la brgyud nas sbyor bar byed de/ ji skad du/ de nyid tshol la thog mar ni/thams cad yod ces brjod par bya'o/ /zhes pa la sogs pa lta bu'o/ /yang gang dag dbang po yongs su smin pa de kho na nyid bshad pa'i skal ba dang ldan pa rnams la/ de nyid cig car bstan pa'i sgo nas de dag gi sems kyi rgyud rnam par sbyong bar byed de/ chos rnams la ni gnas bcas shing //rnal 'byor can la yang dag bstan/ /rgyal ba'i sras la 'di bstan gyi/ /byis pa rnams la bshad ma yin/ /zhes sngar bstan pa'am/ don rnams rtogs shing chags med la/ /phyis ni rnam par dben pa nyid/ /ces gsungs pa lta bu'o/ /rang gi sems snang ba'i rgyud ni sngar bstan pa ltar sna tshogs su snang ba rang rang gi sems kyi ngo bor gyur pa ste/sems kyi de bzhin nyid rang bzhin gyis rnam par dag pa de bzhin gshegs pa'i snying por gyur pa rnam par dag par bya ba'i phyir/ /bshad pa'i bye brag ji ltar 'byung / /zhes gsol ba btab pa'o//cig car ram rim gyis 'jug ces pa ni zab mo cig car ram rim gyis zhes pa ni shes par zad do/ /blo gros chen po 'di lta ste/ /me long gi nang du zhes pa la sogs pas ni snga ma ltar gdul bya'i khyad par la cig car bshad pa 'jug pa'i tshul bstan pa'o/ /gzugs su snang ba du ma'i rkyen cig car tshogs pa na//de ltar snang bar bya'o snyam pa'i rtog pa med kyang cig car snang zhes pa'o/ /sems can thams cad kyi zhes pa ni dbang po yongs su smin pa thams cad de/ /rnam par mi rtog cing gnyis kyi rnam par snang ba med pa so so rang rig pa'i spyod yul rnams cig car zab mo bstan pa'i sgo nas sbyong ba'o//gnas ngan len gyi bag chags dang bral ba ni mthong ba dang bsgom pa'i lam gyis spang bar bya ba'i nyon mongs pa la sogs pa ji ltar rigs pa bzhin bag chags dang bcas nas spangs pa ste/ /ji skad du/ /dge slong dag 'phags pa'i shes rab kyi mig gis spangs pa ni spangs pa'o zhes gsungs pas mthong ba'i lam thob pa yan chod kyi spang bya spangs pa ni bag chags dang bcas te spangs pa'o//de rnams la rgyal ba'i ye shes nyan thos la sogs pa'i bsam pa'i yul ma yin pa'i yul dang spyod yul zhes pas te/ go rims bzhin du de kho na nyid kyi don dang /kun rdzob kyi rnam par dbye ba'o/ /blo gros chen po 'di lta ste zhes pa la sogs pas khyad par du sku gsum gyi bdag nyid kyi sangs rgyas rnams kyi bstan pa 'jug pa'i bye brag ston te/ de la rgyu 'dra ba'i sangs rgyas ni longs spyod rdzogs pa'i sku ste/ dbyings dang ye shes dbyer med pa'i bdag nyid chos kyi sku'i rgyu las byung ba ste/ de nyid kyang rdul phra rab bsags pa'i bdag nyid kyi sku ma yin gyi/ ye shes kyi bdag nyid yin pas rgyu 'dra zhes pa'o/ /de ni gdul bya sa bcu'i byang chub sems dpa' rnams la/ theg pa chen po'i don zab mo cig car bstan pa'i sgo nas yongs su smin par byas pa ste/mi mthun pa'i phyogs spong du rung ba dang / gnyen po ye shes skyed du rung bar byas pa ni yongs su smin pa'o zhes sa bcu'i mgon pos gsungs pa'i phyir ro/ /de yang ji ltar dgongs pa nges par 'grel pa la sogs pa dag las/chos kyi rnam grangs zab mo 'di bstan pa na byang chub sems dpa' bdun khri lnga stong gis ni mi skye ba'i chos la bzod pa thob par gyur to zhes pa 'am/ rnal 'byor chen po'i yid la byed pa thob par gyur to zhes pa la sogs pa gsungs pa lta bu'o//'og min gyi pho brang dang gzhal med khang na rnam grangs nyid du rtogs pa'am/ spyi dang bye brag ste gnas khyad par can de lta bur snang ba'o/ /rnal 'byor gyi rnal 'byor can du gzhag go zhes pa'i don ni/ chags med mnyam par gzhag pa ste/mthar gyis stug por bzhugs nas su/ /rnam par sangs rgyas sangs rgyas sar/ /chos kyi dbang por bdag gyur te/ /stug po'i dkyil na sras dang bcas/ /chos kyi bdag por rnam par mdzes/ /zhes pa la sogs pa stug po bkod pa'i rgyan las bshad pa ltar longs spyod rdzogs pa'i sangs rgyas sam/de'i sras su gyur pa'i sa la rnam par 'jog pa'o/ /gzhan yang blo gros chen po zhes pa la sogs pas ni chos kyi sku'i rang bzhin gyi sangs rgyas dang / de'i rgyu mthun pa'i rgyur gyur pa'i lam gyis bsdus pa so so rang rig pa'i ye shes ni go rims bzhin du gzugs sku gnyis su snang bas sems can gyi don byed par nus pa dang /mtha' gnyis su lta ba thams cad cig car rnam par spangs pa'i sgo nas mdzes shing brgyan par gyur pa'o/ /gzhan yang blo gros chen po zhes pa la sogs pas chos nyid kyi sangs rgyas chos kyi sku'i ngo bo nyid dang 'dra bar byung ba longs spyod rdzogs pa'i sku'i sangs rgyas kyi bshad pa 'jug pa'i tshul gsal bar ston te/de'i don ni yang dag pa'i sa la zhugs pa'i byang chub sems dpa' rnams la/ rang bzhin gsum rnam par phye ste phyin ci ma log par gsungs pa'o//de la 'dir gzhung gi don ni 'dra bar byung ba'i sangs rgyas ni ston to zhes 'og tu 'brel bar bya'o/ /tshul ji ltar ston zhe na/ sgyu ma'i yan lag ces pa la sogs pa smos te/ ji ltar rtswa dang shing la sogs pa'i sgyu ma'i rkyen gyi yan lag mang pos bsgrubs pa'i skyes bu yang dag par skyes bu'i bdag nyid ma yin pa sna tshogs la/ltad mo'i skye bo rnams de'i bdag nyid du mngon par zhen pa'o/ /bdag nyid ma yin pa ci'i phyir zhe na/ mi dmigs pa'i phyir zhes pa ste/ phyin ci ma log pa'i blo'i ngo na de ltar ma dmigs pa'i phyir zhes pa'o/ /de bzhin du rang dang spyi'i mtshan nyid du gtogs pa'i chos thams cad brtags pa'i rang bzhin la dngos por mngon par zhen pa'i rgyu las byung ba ste/de 'dra ba'i zhen pas dngos su sgro btags pa'am/ /brtags pa'i dbang gis de ltar snang ba'o zhes ston to/ /mngon par zhen pa de nyid gang las byung zhe na/ rang gi sems snang ba zhes pa la sogs pa ste/de 'dra ba'i bag chags rgyu'i nyid dam/ mngon par zhen pa'i skad cig ma dang 'brel pa ste/ de dag gi dbang gis byang zhes pa'o/ /de lta na brtags pa'i rang bzhin ji ltar byung zhe na/ blo gros chen po zhes pa la sogs pa smos te/ 'dir rnam grangs kyis na kun du brtags pa yang gzhan gyi dbang nyid du 'gyur te/ji ltar rnam par rtog pa'i snang ba ni de ltar rtogs par byed pa'i blo nyid kyi bdag nyid yin la/ de yang blo snga ma'am bag chags kyis gzhan gyi dbang nyid du 'gyur ba'o/ /gal te rtog pa'i snang ba blo dang mi mthun par snang ba blo'i bdag nyid du bden na/sngar shes pa la snang ba bden na snang ba dang mthun pa nyid du bden la/ snang gzhan du snang ba la bden gzhan du bden pa ni mi 'thad do zhes pa la sogs pa bshad pa dang 'gal lo zhe na/ skyon med de rnam par rtog pa la gzugs la sogs par snang ba dang /snang ba de nyid la phyi rol lam dngos po'i bdag nyid du zhen cing sgro btags pa ni mi 'dra ba nyid de/ ji ltar de 'dra ba'i snang ba phyi rol lam dngos po'i ngo bo don dam pas dben pa nyid du rtogs pa rnams yang / de lta bu'i rnam par snang ba mi 'gal te/ dper na rtag pa dang bdag la sogs pas dben pa nyid du tshad mas rtogs pa rnams la yang /de ltar brjod pa la sogs pa'i dbang gis de lta bu'i rnam par snang ba mi 'gal ba bzhin no/ /des na gzugs la sogs pa'i spyi'i rnam par snang ba ni de ltar snang ba'i rtog pa'i blo nyid yin te/ de las tha dad pa'i rtog pa ni gnas skabs der grub pa med cing /rtog pa las tha dad pa'am dngos po med pa'i snang ba'ang mi 'thad de/ sngar bstan pa ltar gsal ba sems kyi mtshan nyid dang 'brel pas sems nyid yin la/ rtog pa de nyid las gzhan pa'i sems su yang mi 'thad pa'i phyir ro/ / de'i phyir de ltar snang ba ni rtog pa'i sems dang mi mthun par snang ba ma yin pas/ rtog pa'i sems nyid du bden pa la 'gal ba med ces pa'o/ /yang gcig tu dga' ba dang yongs su gdung ba la sogs pa nang nyid du nyams su myong ba'i blo dang / mi mthun par snang mod kyi de 'dra ba'i blo'i bdag nyid du bden par yang mi 'dod pas skyon med do//rtog pa'i snang ba de nyid la phyi rol dang dngos po'i ngo bo yang dag par sgro btags pa ni de bzhin du bden pa ma yin zhing / de las gzhan shes pa'i dngos por kyang bden pa ma yin te/de'i phyir de 'dra ba ni kun du brtags pa nyid ces bya'o/ /yang rnam rtog gzugs la sogs pa'i rnam par snang ba ni/ rtog pa'i gzung ba yin pas kun brtags pa zhes kyang bya la/ /sngar bstan pa ltar rnam grangs 'ga' zhig nas gzhan gyi dbang du yang 'gyur ba'o//gzhan gyi dbang de nyid sgro btags pa'i ngo bos stong zhing myong ba ma 'gags pa'i bdag nyid rig pa dang stong pa zung du 'jug pa'i don ni rnam par dag pa'i dmigs yul phyin ci ma log pa'i yongs su grub pa zhes kyang bya'o/ /de bzhin du dngos su rtog pa med pa'i shes pa la gzugs la sogs pa'i rnam par snang ba yang /de ltar snang ba nyid mig la sogs pa'i rnam par shes pa yin pas shes pa dang mi mthun par snang ba ma yin zhing / /de'i phyir shes pa nyid du bden cing de yang sgyu ma lta bu'i gzhan gyi dbang nyid do/ / 'dir rtog pa med pa'i 'khrul pa zla ba gnyis la sogs par snang ba'i yul kun du brtags pa 'am/ /'on te gzhan gyi dbang yin zhe na/ de la phyi rol gnyis kyi dngos por brtags pa ni mi bden pa'i don blo'i brtags pas kun du brtags pa zhes bya la/ de 'dra ba'i khyad par gang du yang sgro btags pa med cing /snang ba tsam ni blo nyid kyi bdag nyid yin pas gzhan gyi dbang zhes kyang bya'o/ /gzhan yang ma brtags pa'i snang ba tsam la kun tu brtags zhes pa'i sgra'i don mi 'thad pas dngos su ni kun du brtags pa zhes mi bya'o/ /gzhan gyi dbang gi rang bzhin la mngon par zhen pa las byung zhes pa ni gzhan dbang stong par ma rtogs shing /dngos por zhen pas gsos btab nas byung ba'o/ /blo gros chen po 'di lta ste zhes pa la sogs pas ni snga ma'i don nyid rgyas par 'chad pa'o/ /mir ldan zhes pa ni mi'i rtsol ba dang ngo / kun brtags pa'i rang bzhin nyid rnam par rtog pa'i sems nyid yin zhing /de nyid gzhan gyi dbang gi rang bzhin gyi rtog pa la snang zhes pa'o/ /gzhan ni shes par zad do/ /blo gros chen po chos nyid kyi zhes pa la sogs pas chos kyi sku spros pa dang bral ba ni zhal dang tshems la sogs pa'i sgros su snang zhing ngag gi rig byed du snang ba'i sgo nas chos ston pa ni mi 'thad la 'on kyang de'i byin gyi rlabs kyis byang chub sems dpa' rnams la de bzhin nyid kyi rtog pa 'char bar byed pa'i sgo nas ston zhes bya'o//blo gros chen po 'phrul bas sprul zhes pa la sogs pa ni sprul pa'i sku yis bshad pa'i tshul ston to//de'i gdul bya ni sems can sna tshogs pa nyid yin pas theg pa sna tshogs pa nyid ston pa ste/ ji skad du/ lha yi theg dang tshangs pa'i theg/ /ces pa la sogs pa 'og nas ston par 'gyur ba bzhin no/ /de nyid kyi phyir slob dpon ye shes dpal bzang pos rgyu dang 'dra ba'i sangs rgyas zhes pa sprul pa'i sku nyid de/de ni longs spyod rdzogs pa'i sku la brten pas rgyu de dang 'dra ba mtshan dang dpe byad la sogs pa'i rnam par snang ba'o zhes 'chad pa ni mi 'thad de/ rgyu dang 'dra ba'i sangs rgyas kyi bshad pa ni sngar bstan pa ltar gdul bya khyad par can la theg pa chen po'i don rang bzhin gsum gyi de kho na nyid yin par bstan la/sprul pa'i sku'i bshad pa ni theg pa sna tshogs pa nyid du gsungs pa'i phyir ro/ /de la sbyin pa ni lus dang longs spyod la sogs pa gtong ba'i sems pa'o/ / bsam gtan ni dge ba rtse gcig pa ste dang po dang gnyis pa la sogs pa 'jig rten pa yang yin no/ /tshul khrims ni sgo gsum gyi spyod pa ngan pa spong ba'i sems pa'o/ /ting nge 'dzin ni rnam par thar pa'i sgo gsum la sogs pa'i ting nge 'dzin te/ nyan thos la sogs pa rnams dang thun mong ba'o//rnam par thar pa ni nang gzugs can gyi 'du shes kyis phyi rol gyi gzugs la lta ba la sogs pa rnam pa brgyad kyis bsdus pa'o/ /rnam par shes pa 'jug pa'i mtshan nyid ces pa la sogs pa ni sngar bstan pa ltar ro/ / mu stegs can gyi lta ba bas zhes pa la sogs pa'i don ni zhi ba pa la sogs pas phyi'i don gzugs la sogs pa ni med kyi/ bdag rig pa gnyis su med pa yin la/ bdag de nyid thar par bya ba'i don du gzugs med pa'i ting nge 'dzin nam/ bsam gtan bsgom par 'dod pa dang rjes su mthun par de dag gi don du bdag gam gang zag la sogs pa yod cing /de rnams thar pa'i thabs bsam gtan dang gzugs med kyi ting nge 'dzin gyi rim pa yang ston zhes pa'o/ /blo gros chen po chos nyid kyi zhes pa la sogs pas chos kyi sku yis bstan pa'i tshul nyid gsal bar 'chad pa ste/mig la sogs pa'i dbang po'i yul ma yin zhing / tha snyad pa'i tshad ma'i yul las log pa'o/ /yang blo gros chen po zhes pa la sogs pas chos nyid kyi sangs rgyas kyis bstan pa'i don nyid nges pa'i don mthar thug pa nyid yin pas de la brtson par bya'o zhes gdams pa'o//'di rnams kyang / /sangs rgyas rnam pa du ru brjod/ /ces pa'i lan du yang sbyar bar bya'o/ /blo gros chen po gzhan yang zhes pa la sogs pas/ nyan thos kyi theg pa bshad pa'i tshul rnam par dbye ba ste/ rang sangs rgyas la ni sde snod kyi tshul bshad pa de las tha dad pa med ces pa'o//'di rnams kyi don yang 'phags pa nyan thos dang rang sangs rgyas rnams sdug bsngal dang kun 'byung gi bden pa las skyo zhing yid 'byung bas de dag rnam par zad par 'gyur ba'i lam bsgoms pa'i dbang gis kun 'byung ba zad pa dang sdug bsngal gyi skye ba med pa'i ye shes 'gog pa'i bden pa mngon du byas te/zag pa med pa'i dbyings rnam par rtog pa med pa'i ting nge 'dzin la yun ring du gnas pa ni de'i so sor rang gis rig pa'i khyad par yin la/ gzhan yang lam gyis bsdus pa'i mi rtog pa'i ting nge 'dzin dang 'gog pa'i snyoms par 'jug pa yang de bzhin du blta bar bya'o//de yang byang chub sems dpa' rnams kyis spyi'i tshul du shes par bya'o/ /ji lta bzhin du mngon du bya ba ni ma yin te/ ji skad du 'phags pa shes rab kyi pha rol tu phyin pa las/ byang chub sems mkhas nyan thos yon tan gang dag dang //de bzhin rang rgyal yon tan kun la slob byed cing / /de dag de la mi gnas 'dod pa mi skye ste/ /'di ni bdag gi bslab bya yin snyam de phyir slob/ /ces gsungs pa lta bu'o/ /gzhan yang phung po la sogs pa'i chos dbang phyug la sogs pas ma byas shing / rang rang gi rgyu dang rkyen gyis skad cig ma gcig nas gcig tu brgyud pa las byung ba ni rigs pa dang lung shin tu gsal ba'i sgo nas grub pa'i phyir/dngos po'i ngo bor yod pa'o/ /zhes chos kyi bdag tu mngon par zhen pa ste/ de ni nyan thos la sogs pa rnams kyis dngos por rnam par rtog pa'i rang bzhin la mngon par zhen pa ste/byang chub sems dpa' rnams kyis de ltar shes nas spang bar bya'o zhes pa'o/ /'dir tshig gi don ni sdug bsngal gyi bden pa'i dbang du byas te bdag gi bas stong pa dang / bdag rang gi ngo bor gyur pa med pa dang / skye ba dang rgas pa la sogs pa sdug bsngal brgyad dang 'brel pa'am/skye zhing 'jig pa'i don gyis mi rtag pa'o/ /de 'dra ba'i sdug bsngal kun 'byung ba'i rgyur gyur pa kun 'byung gi bden pa'i dbang du byas te/ rgyu dang kun 'byung ba dang / rab tu skye ba dang rkyen gyi rnam pa ste/ de 'dra ba'i bden pa gnyis la skyo ba dang yid 'byung zhes pa'o//de 'dra ba'i rang bzhin rgyun chad pas zag pa dang bcas pa'i phung po dang khams dang skye mched rang dang spyi'i mtshan nyid kyis bsdus pa phyi rol pa rnam par 'jig pa med ces pa ste/ mnyam par ma bzhag pa'i gnas skabs kyi yul skye zhing 'jig pa'i bdag nyid rgyun chad nas zhi bar gnas pa'i 'gog pa'i rang bzhin mngon du byas nas gnas zhes pa'o//de nyid kyi dus na bsam gtan la sogs pa la/ 'di ltar rnam par gzhag ces pa la sogs pa'i spros pa dang bral ba'am/ yang na mnyam par bzhag pa'i bsam gtan dang /rnam par thar pa dang / ting nge 'dzin thob pa dang / mthong ba'i lam la sogs pa dang / rgyun du zhugs pa la sogs pa'i 'bras bu mngon du byas pa dang / 'gog pa'i snyoms par 'jug pa la sogs pa sbyangs pa dang / gnyi ga'i cha las rnam par grol ba ste/ shes rab kyis nyon mongs pa'i sgrib pa rnam par spangs pa dang / ting nge 'dzin gyis snyoms par 'jug pa'i sgrib pa spangs pa/ rdzu 'phrul la sogs pa'i yon tan dang ldan pa'i dgra bcom pa rgyan dang bcas pa'o/ /bag chags bsam gyis mi khyab pa yongs su bsgyur ba'i 'chi 'pho ba dang bral ba/'phags pa so so rang gis rig pa'i bde ba la gnas pa lhag par rtogs par 'gyur zhes pa ni de 'dra ba'i ting nge 'dzin gyi bde ba la gnas pa de srid du skye ba dang 'chi 'pho ba med pa'o/ /yang na sems can gyi don du de 'dra ba ston pa de bzhin gshegs pa dang byang chub sems dpa' la mnga' ba de lta bu ma thob pa'o//bag chags zhes pa ni skye ba dang 'chi 'pho ba'i bag chags rnam par 'gyur ba la bya'i nyon mongs pa la sogs pa'i bag chags dang bral ba ni ma yin zhing / 'dra ba'i 'chi 'pho ba dang yang gtan du bral ba ma yin te/nyon mongs bag chags rnams dang ldan/ /zhes pa la sogs pa 'og nas ston par 'gyur ro/ /'dir rnam pa gcig tu na de dag gi mngon pa'i nga rgyal dang sbyar nas de rnams dang bral zhes bstan pa'o/ /bdag gi smon lam ni sems bskyed pa'i yul lo//rigs pa dang zhes pa ni bya ba byed pa dang / ltos pa dang chos nyid kyi rigs pa ste/ dngos po rnams kyi rgyu dang 'bras bu dang rang gi ngo bos bsdus pa'o/ /lung ni bden pa bzhi'i chos kyi 'khor lo'o/ /tshad ma ni 'thad pa sgrub pa'i rigs pa ste/ phung po la sogs pa mngon sum dang rjes su dpag pa'i tshad mas ji lta ba bzhin du grub ces pa'o//gang zag la bdag med pa'i mtshan nyid du lta ba phyir bzlog ste zhes pa ni gang zag la bdag med pa tsam du phung po la sogs pa'i chos su lta ba phyir bzlog ces pa'o// //de ltar bshad pa 'jug pa'i tshul bstan nas/bdag dang 'jig rten cis med brjod/ /rtag dang 'jig gtam ji lta bu/ /zhes pa la sogs pa dris pa'i lan du/ de bzhin gshegs pa'i gnas zab mo gzhan dang thun mong ma yin pa nyid du ston te/ de la dang po don gyi dri ba 'god pa ni/ de nas bcom ldan 'das zhes pa la sogs pa'o//rtag pa bsam gyis mi khyab par bshad ces pa ni mdo 'di nyid dam gzhan las kyang de bzhin gshegs pa'i snying po rtag pa dang bdag dang / gtsang ba dang bde ba'i rang bzhin nyan thos la sogs pa'i bsam pa'i yul las 'das pa nyid du bstan pa'o/ / de bzhin du mu stegs byed dag kyang rnam gyur thams cad kyi rgyur gyur pa gtso bo'i rang bzhin rtag pa dang / bsam gyis mi khyab par 'dod de/ yon tan gsum gyi rang bzhin mchog /mthong ba'i lam du 'gro ma yin/ /zhes bstan pa'o/ /gzhan yang yul longs spyod pa'i rgyur gyur pa bdag shes pa ni rtag pa dang bsam gyis mi khyab pa nyid du 'dod cing gzhan yang dbang phyug 'gro ba thams cad kyi rgyur gyur pa dang /zhi ba la sogs pa gnyis med par smra ba rnams grol ba'i rgyur gyur pa/ bdag rig pa gnyis su med pa ni rtag pa dang bsam gyis mi khyab pa nyid du 'dod ces pa ste/mtshon pa tsam du zad do/ /de rnams las de bzhin gshegs pa'i gnas zab mo bstan pa 'di la khyad par ci mchis zhes don gyis zhus pa'o/ /len gyi don ni de dag gis ther zug pa'i rtag pa dang / bsam gyis mi khyab pa'i dngos po yang dag par khas len te/'on kyang de 'dra ba'i bdag nyid du 'grub par ni mi 'gyur ro/ /de ci'i phyir zhe na/ de dag rgyu dang rkyen gyi byed pas ma bsgrubs na/ 'bras bu skyed pa'i don byed pa yang mi 'thad pas de 'dra ba'i dngos por mi rigs ste/ ri bong gi rwa la sogs pa bzhin no/ /'di'i spros pa zhib tu ni rigs pa'i bstan bcos dag las shes par bya'o//gal te de dag rgyu dang rkyen gyis byas pa yin na yang mi rtag pa nyid du 'gyur te/ dper na bum pa la sogs pa bzhin zhes pa'o/ /blo gros chen po nga'i zhes pa la sogs pas ni de bzhin gshegs pas bstan pa'i phyogs la mi mtshungs pa nyid du ston te/rig pa sgyu ma'i rang bzhin don dam pa'i dngos por yod pa dang / tha snyad tsam du med pa'i mtha' gnyis spangs pa rig pa dang stong pa zung du 'jug pa'i dbu ma'i don ni de 'dra ba'i rang bzhin gyi rgyu'i mtshan nyid snga ma snga ma rnams la byung bas/rnam pa thams cad du med pa ma yin la/ rgyu dang ldan zhing de 'dra ba'i chos nyid gzhan du mi 'gyur bas rtag pa zhes kyang bya'o/ /bsam gyis mi khyab pa'i don ni sngar bstan no/ /kun rdzob tu rig pa skad cig ma nyid du khas len pas rgyu dang ldan pa nyid mi 'gal lo/ /skabs kyi don 'di nyid la brten nas/slob dpon ye shes dpal gyis rang rig pa rten cing 'brel par 'byung ba'i dngos po nyid du 'jog pa ni 'khrul pa ste/ 'dir don dam pa'i dngos po'i rgyu'i mtshan nyid ces smos pa med pa dang / rgyu dang 'bras bu 'gog pa'i tshad ma du ma 'di nyid las bstan pa'i phyir ro//mya ngan las 'das pa ni so sor brtags pa'i 'gog pa'o/ /'gag pa zhes pa so sor brtags min gyi 'gog pa ste/ 'dus ma byas gsum po rtag pa nyid du gzhan la grags pa dper byed pa'o/ /blo gros chen po zhes pa la sogs pas de 'dra ba'i gnas zab mo khong du chud par bya ba nyid du gdams pa'o//yang blo gros chen po zhes pa la sogs pas gzhan gyi phyogs mi 'thad pa nyid du tshul gzhan gyi sgo nas ston to/ /bde ba dang sdug bsngal dang btang snyoms kyi ngo bor gyur pa'o/ /'dod chags dang zhe sdang dang gti mug gi rang bzhin yon tan gsum nyid du pha rol pos 'dod pa rnams ni mi rtag pa'i mtshan nyid kyi rgyu rkyen snga ma las byung bas mi rtag pa nyid du 'gyur la/de bzhin du bdag rig pa tsam gyi bdag nyid kyang mi rtag pa'i mtshan nyid kyi rgyu rig pa snga ma la sogs pa'i rgyu dang rkyen gyis byung bas de ltar 'gyur ba'o//yang bdag gis byas zhes pa ni grangs can pa rnams kyis 'o ma nyid zho'i bdag nyid yin pas de las zho skye ba ni bdag las skye ba'o zhes 'dod pa ste/ de yang mi 'thad pa nyid de/ rgyur mngon par 'dod pa'i bdag nyid grub pa ni 'bras bu yang grub zin pas skye bar 'gal lo//rgyu'i bdag nyid ma grub pa ni nus pa thams cad kyis stong pa'i phyir/ shin tu yang 'bras bu skyed par 'gal lo/ /des na bdag gis byas pa'i rgyu'i mtshan nyid kyis rab tu phye bas zhes pa ni de ltar khas len pa'i rgyu mtshan nyid la brten nas de rtag pa'i dngos po ma yin pa nyid du phye zhing gsal bar byas pa'o//gzhan yang bdag gi rang bzhin gcig nyid la 'ga' zhig ni 'bras bu'o zhes ma 'chol ba nyid du dbye ba mi 'thad de/ phan tshun rgyu 'bras 'chol ba nyid du 'gyur te rgyu mtshan mtshungs pa nyid kyi phyir ro/ /blo gros chen po de ste zhes pa la sogs pas ni de dag gi rtag pa dang bsam gyis mi khyab pa ni don dam par rgyu dang rkyen gyis ma byas shing /byas pa'i dngos po yang dag par med pas de 'dra ba'i chos nyid 'gyur ba med pas rtag pa nyid du mthong nas rjes su dpog pa'i blo yis de ltar rtogs pa dag snga ma nyid bshad pa'o//de ltar 'dod pa ni kho bo cag gi phyogs dang mtshungs zhes pa ste/ shes par zad do/ /yang blo gros chen po de ste zhes pa la sogs pas na de nyid don dam par rgyu dang mtshan nyid dang ldan pa'i dngos po gcig tu khas len na ni de 'dra ba tshad mas bkag pas de ltar 'jog pa ni tshig tsam la brten pa'i rnam par rtog pa'i snang ba la de ltar brtags pa 'ba' zhig go//blo gros chen po zhes pa la sogs pas ni skabs kyi don bsdus te bstan pa'o/ /dngos po dang dngos po med pa rnam par spangs pas na rtag zhes pa'i don ni rig pa dang stong pa zung du 'jug pa'i chos nyid de las gzhan du mi 'gyur bas rtag ces pa'o//phyi rol gyi zhes pa la sogs pas gzhan gyi lugs ston te/ zhes pa la sogs pa rnam par shes pa tsam du smra ba'i lugs kyis bdag dam pa de nyid gzhig cing gzhom du rung ba'i phyi rol gyi dngos po med pas mi rtag la/rtag pa las rjes su dpog pa ste/ rtag pa nyid kyi phyir bsam gyis mi khyab pa'o zhes rjes su dpog pa'o/ /dpog pa'i phyir rtag pa min zhes pa ni pha rol pos tshul de ltar 'dod pa ni yang dag pa ma yin te/ phyi rol gyi dngos po med kyang rtag pa ma yin pa 'am/mi rtag pa nyid du 'gyur ba la 'gal ba med de/ khyab pa nyid ma grub ces pa'o/ /blo gros chen po zhes pa la sogs pas ngag snga ma nyid kyi don rgyas par bshad pa'o/ /gang gi ba des ni zhes pa la snga ma de 'dra ba'i don khas len pa'i gang zag des ni/rtag pa dang bsam gyis mi khyab pa'i gnas lugs ji lta ba bzhin ma rtogs shing / phyin ci log tu gyur pas gtam byar rung ba ma yin zhes pa ste/ ji skad du/ sdig pa'i grogs po spang bar bya/ /zhes pa la sogs pa lta bu'o/ /de ltar gnas zab mo gzhan dang thun mong ma yin pa nyid du bstan nas/rigs dang theg pa la sogs pa'i bye brag spyir bstan pa ni/ blo gros chen po gzhan yang zhes pa la sogs pa'o/ /de la re zhig nyan thos la sogs pa'i rigs can dngos po'i 'du shes can rnams/ mya ngan las 'das pa dang 'khor ba'i khyad par mi shes pa ste/rang bzhin gyis mya ngan las 'das pa ni 'khor ba nyid kyi rang bzhin de bzhin nyid yin te/ ji skad du/ srid dang zhi ba mnyam nyid dang / zhes pa dang / 'khor ba spangs nas gzhan du ni/ /mya ngan 'das pa rtogs mi 'gyur/ zhes gsungs pa dang /don de nyid 'phags pa dkon mchog brtsegs pa las kyang gsungs pa'i phyir ro/ /gzhan yang 'bras bu'i bdag nyid kyi theg pa rtogs pa'i mya ngan las 'das pa ni 'khor ba'i sdug bsngal don dam pa'i dngos por gyur pa/ rang gi rnam par rtog pas de bzhin nyid du brtags pas 'jigs shing skrag pa dang /de 'dra ba 'gags pa'i mya ngan las 'das pa bdag nyid 'ba' zhig bde bar gnas pa lhag ma dang bcas pa dang lhag ma med pa yongs su tshol te/ ting nge 'dzin gyi myos pas myos pa 'am/ lhag ma med pa'i mya ngan las 'das pa'i dbyings su rnam par rtog pa thams cad med pa dang /de nyid kyi tshe dbang po rnams kyi yul ma 'ongs pa rgyun chad ces pa ste/ yul dang yul can 'du byed kyi 'jug pa thams cad rgyun chad pas so/ /mya ngan 'da' bar rnam par rtog/ ces pa ni mya ngan las 'das pa ma yin pa la de'i 'du shes su 'gyur ba ste/zhib tu ni 'og nas ston par 'gyur ro/ /de ltar phyin ci log tu rtog gi so so rang gis rig pa'i ye shes kun gzhi zag pa dang bcas pa'i sa bon dang / rnam par smin pa'i cha thams cad gnas gyur pa sngon du song ba sangs rgyas kyi sas bsdus pa mi gnas pa'i mya ngan las 'das pa chen po 'ba' zhig mya ngan las 'das pa yin no zhes rtogs par gyur pa ni ma yin no//de'i phyir skyes bu blun po de dag 'bras bu'i bdag nyid kyi theg pa ni byang chub gsum gyis bsdus pa so sor nges pa'i ngo bo rnam pa gsum yin zhing / de rnams thob par byed pa'i lam gyi bdag nyid kyi theg pa yang /so sor nges par tha dad pa gsum du smra ba'o/ /theg pa de rnams kyi yul yang phung po la sogs pa'i dngos po dang / der snang ba sems tsam gyi dngos po nyid du rtog gi/ don dam par sems kyi ngo bor nyid kyang dmigs pa med par mi smra'o/ /de'i phyir de dag ni dus gsum gyi de bzhin gshegs pa rnams kyis bstan pa'i nges pa'i don gzugs la sogs par snang ba kun rdzob tu sems nyid yin zhing /don dam par sems kyi rang bzhin stong pa nyid du mi shes te/ de rnams sems kyi spyod yul tha dad pa nyid du mngon par zhen pa la sogs pa dag /'khor ba'i 'gro ba'i 'khor lor rab tu 'khor/ /zhes pa ste/ ji skad du/ dngos por mngon par zhen yod na/ /'dod chags zhe sdang mi bzad 'byung / /zhes pa la sogs pa sngar rgyas par bstan pa bzhin no/ /de ltar na de bzhin gshegs pa rnams kyis bstan pa'i nges pa'i don gang yin zhe na/chos thams cad ma skyes pa nyid du ston pa ste/ rnam par shes pa tsam gyi gzhan gyi dbang nyid kyang don dam par mi 'thad ces pa'o/ /gal te de ni nyams su myong ba'i tshad mas grub pa dang / gsung rab kyi phyogs gzhan las kyang gsungs pa ma yin nam/ci'i phyir de ltar ston ce na/ 'di lta ste blo gros chen po rang gi sems snang ba'i dngos po med pa dang zhes pa la/ de'i don ni sngar bshad pa ltar/ de ltar snang ba shes pa gcig dang du ma'i dngos por grub pa med pa dang / tshad ma gzhan gyi sgo nas kyang bkag pas/ skye rgyu'i dngos po med pa'i phyir/don dam par ma skyes zhes pa'o/ /gzhan yang yod pa dang med pa las skye ba med pa'i phyir dngos po thams cad ni ma skyes pa ste/ de la dngos po rnams rgyu med pa las skye ba ni mi 'thad pa nyid de/ med pa nus pa thams cad kyis stong pa'i phyir ro//yod pa las skye ba'i phyogs kyang rnam pa gnyis su 'gyur te/ 'bras bu rang gi rang bzhin du yod pa las skye ba dang / de las gzhan gyi dngos por yod pa las so/ /de la rang gi bdag nyid las skye ba ni grangs can rnams kyi 'dod pa ste sngar bkag go/ /gzhan las skye ba yang rnam pa gnyis te/rtag pa dang mi rtag pa las skye ba'o/ /rtag pa las skye bar 'dod pa ni phyi rol pa kha cig gnas dang lus dang longs spyod kyis bsdus pa'i 'gro ba thams cad dbang phyug rtag pa mthu thogs pa med pa'i rang bzhin las skye bar 'dod do/ / ji skad du/ skye ba po 'di shes pa yod min te/ /bdag gi bde sdug bdag la rang dbang med/ /dbang phyug gis kyang yang na mtho ris sam/ /g.yang sa dag tu 'gro ba kho nar nges/ /zhes pa'o/ /'di yang mi 'thad de/ de lta na rtag pa dang mthu thogs pa med pa ni rang gi bdag nyid la ma tshang ba med pa dang /'bras bu skyed pa rkyen gzhan la ltos pa mi 'thad pas de'i 'bras bur gyur pa'i 'gro ba thams cad cig car grub pa nyid du 'gyur ro/ /gal te rkyen la ltos pa med par ma grub ste/ 'gro ba rnams kyi rang rang gi las la sogs pa'i rkyen 'ga' zhig la ltos so zhe na/ma yin te/ rkyen gyis dbang phyug la rang gi ngo bor gyur pa'i phan pa 'ba' zhig byed na ni/ de sngar gyi gnas skabs las gzhan du 'gyur bas mi rtag pa nyid du thal la/ de 'dra ba'i phan pa mi byed na yang ltos par 'gal te/ thams cad thams cad la ltos pa nyid du 'gyur ba'i phyir ro//gzhan yang rkyen ma tshang ba'i dus na dbang phyug 'bras bu 'ga' zhig skyed par 'dod kyang / mi skye bas mthu thogs pa med pa'i rang dbang can nyid nyams so/ /yang rkyen gzhan po de nyid dbang phyug gis bskyed par bya ba yin na ni rang gis skyed pa'i 'bras bu la ltos pa nyid 'gal la/ma yin na yang thams cad dbang phyug gis bskyed par bya ba nyid nyams so/ /gal te 'di 'bras bu skyed pa na rkyen gzhan la ltos pa ma yin mod kyi/ 'bras bu rim gyis skye ba ni de nyid kyi 'dod pa'i dbang gis te/ gang zhig de ltar skyed par 'dod pa'i 'dod pa yod pa ni da ltar nyid du skye la/de 'dra ba'i 'dod pa med par de'i rjes thogs la sogs par skyed par 'dod pa yang de bzhin du 'gyur bas so zhe na/ de ci 'dod pa dang dbang phyug gcig gam tha dad ces brtag par bya'o/ /gal te gcig pa nyid yin na ni dbang phyug rtag tu gnas pa ltar 'dod pa yang gnas pas 'dod pa med pa'i dbang gis 'bras bu 'ga' zhig da ltar mi skye ba 'gal lo//tha dad na yang 'bras bu skye ba rang las gzhan du gyur pa'i 'dod pa la rag las pas rang dbang can mthu thogs pa med pa nyid nyams so/ /gzhan yang de 'dra ba'i 'dod pa dbang phyug gis skyed na yang /rang gis bskyed pa'i 'bras bu la ltos nas 'bras bu gzhan skyed pa 'gal la/ ma skyed na yang thams cad dbang phyug gis bskyed pa nyid nyams so/ /gzhan yang 'gro ba gang zhig dbang phyug mnyes pa'i las byed pa dang / de la gnod par 'gyur zhing ma dad pa'i las byed pa'i las de dag dbang phyug la rag las na ni/rang la gnod cing ma dad pa'i las byed du 'jug pa mi 'thad do/ /ji ltar shes bzhin du rang gis rang 'tshog pa mi 'thad pa bzhin no/ /gal te de 'dra ba'i las rang la gnod pa nyid du ma shes so zhe na/ de thams cad mkhyen pa nyid du khas blangs pa nyams so//gzhan yang dbang phyug la gnod pa'i las dbang phyug nyid kyis byas nas de'i 'bras bu ngan song gi sdug bsngal la sogs pa 'gro ba gzhan la smin pa mi 'thad de/ ji ltar gzhan gyis spod btab pa'i zas zos pas/ gzhan skom pas 'chi ba mi 'thad pa bzhin no//gal te de 'dra ba'i las dbang phyug la rag las pa ma yin na/ thams cad dbang phyug gis byas pa nyid nyams par 'gyur ro/ /gal te dbang phyug la yang rag las mod kyi/ de 'dra ba'i las byed pa 'gro ba de rnams nyid kyi 'dod pa la sogs pa'i rkyen la ltos pas de dag gi 'bras bu 'gro ba rnams la yang smin par 'gyur ro zhe na/de lta na yang / 'gro ba bzang ngan la sogs pa'i 'bras bu med pa la/ dbang phyug mthu thogs pa med cing rang dbang can nyid nyams so/ /gzhan yang 'gro ba da dag gi 'dod pa la sogs pa'i rkyen kyang dbang phyug gis byas sam ma byas zhes pa la sogs pa'i rtag pa mtshungs te/don go bar zad do/ /gzhan yang tha snyad tsam du myu gu sa bon la sogs pa'i tshogs pa las skye ba dang / du ba la sogs pa me la sogs pa las skye bar mthong zhing / mtho ris dang ngan 'gro'i bde ba dang sdug bsngal yang las kyi bye brag 'ga' zhig las skye bar sngar bstan pas/de las gzhan dbang phyug la sogs pa rtag pa'i dngos po las skye ba ni mi 'thad do/ /gzhan du gyur pa mi rtag pa las skye ba 'gog pa yang rnam pa gsum ste/ de la 'das pa zhig pa las skye ba dang /ma 'ongs pa las skye bar 'dod pa ni bye brag pa rnams kyi lugs te/ de ni dgag pa nyid du sla'o/ /da ltar dus mnyam pa las skye ba yang mi 'thad de/ rgyur mngon par 'dod pa grub pa'i dus na 'bras bu yang grub zin pas skye bar mi 'thad la/ rgyu ma grub pa yang nus pa thams cad kyis stong pas de las 'bras bu skye ba ni mi 'thad de/rang las skye ba dgag pa dang mtshungs so/ /gzhan yang rwa g.yas pa dang g.yon pa ltar dus mnyam du grub pa'i dngos po gnyis la/ 'di ni rgyu la 'di ni 'bras bu zhes pa'i nges pa mi 'thad de/ rgyu mtshan mtshungs pa'i phyir phan tshun 'chol pa nyid du 'gyur ro/ /de'i phyir da ltar ba 'bras bu'i dus la ltos pa'i sngon rol de ma thag pa bar med pa las skye bar 'dod pa ni tha snyad kyi tshul la mkhas pa rnams kyi gtsug lag ste/ bcom ldan 'das kyis kyang 'phags pa sA lu ljang pa'i mdo las/rten cing 'brel bar 'byung ba zhes bya ba ni/ 'di lta ste/ 'di yod pas 'di 'byung zhes pa'am/ 'di skyes pa'i phyir 'di skye zhes pa ste/ gang 'di ma rig pa'i rkyen gyis 'du byed rnams zhes bya ba lta bu'o/ /zhes gsungs so/ /'di yang dpyad na mi 'thad de/rgyu dang 'bras bu'i skad cig gnyis bdag nyid thams cad nas bar ma chod de/ rgyu'i skad cig de nyid kyi rgyur gyur pa'i skad cig snga ma la nye zhing 'byor ba'i phyogs dang 'bras bur gyur pa'i skad cig gi rang gi 'bras bu la nye ba'i phyogs gnyis kyang ma chod na ni de dag dus mnyam pa nyid du 'gyur la/gal te de dag ni bar du chod mod kyi rgyur gyur pa'i skad cig gi rang gi 'bras bu la nye ba'i phyogs dang / 'bras bu yang rang gi rgyu la nye ba'i phyogs gnyis bar ma chod pa'o/ /zhe na/ rgyu dang 'bras bu'i skad cig re re yang chod pa dang ma chod pa'i cha dang bcas pas skad cig gcig nyid nyams so//gal te rgyu'i dus na 'bras bu ma skyes nas med pa'i phyir med pa dang / phyogs gcig mtha' dag gi brtag pa mi 'jug la/ 'bras bu'i dus na yang rgyu 'gags nas med pa'i phyir med pa dang phyogs gcig dang mtha' dag gi brtag pa mi 'jug go zhe na/skyon med de/ khyad par mtha' dag spangs pa'i spyi mi 'thad de/ gcig dang du ma dang bral ba'i dngos po mi 'thad pa bzhin no/ /de'i phyir ma chod pa nyid du khas blangs na khyad par de dag las gang yang rung ba cig gis khyab la de dag la gcig tu nges pa med pa na 'di 'am 'di zhes ci'i phyir brtag pa mi 'jug zhes pa'o//gzhan du na rgyu'i dus na 'bras bu ma skyes nas med pas med pa dang gnyis bar du ma chod ces pa'i khyab bya brtag pa'i gzhi khas len pa yang mi 'thad do/ /gal te ma chod pa'i dngos po ni khas mi len mod kyi/ bar med pa tsam nyid la ma chod pa zhes brtags su zad do zhe na/ de lta na rgyu dang 'bras bu'i dngos po khas len pa yang mi 'thad la/ gzhan yang bdag nyid thams cad nas bar med dam phyogs kyi phyogs gcig nas bar med pa'i brtag pa yang mtshungs so/ /skabs kyi don 'di ni ji ltar nyin par dang mtshan mo'i dus gnyis bdag nyid thams cad nas bar du ma chod de/nyin bar gyi snga dro'i phyogs de nyid kyi sngon rol gyi mtshan mo'i dus dang nye bar gyur pa'i phyogs dang / mtshan mo'i rjes thogs phyis byung ba'i nyin par dang nye bar gyur pa'i phyogs gnyis kyang ma chod na nyin mtshan de dag dus mnyam pa nyid du 'gyur la/gal te de dag ni bar du chod mod kyi/ nyin par gyi phyi dro dang / de dang nye bar gyur pa'i mtshan mo'i dus ni ma chod do zhe na/ nyin mtshan de dag so so re re yang chod pa dang ma chod pa'i cha dang bcas par 'gyur ba bzhin no//gzhan yang phyi'i don khas len pa rnams kyis shar dang nub kyi rdul bar du ma chod cing 'byar bar khas blangs pa na bdag nyid thams cad nas ma chod de/ shar gyi shar ngos dang nub kyi nub ngos kyang ma chod na ni de dag yul gcig nyid du 'gyur la/ de dag ni bar du chod mod kyi/shar gyi nub ngos dang nub kyi shar ngos gnyis ma chod do zhe na/ rdul de dag re re la yang chod pa dang ma chod pa'i cha gnyis dang bcas pas rdul gcig pa nyid nyams par 'gyur ba dang yang mtshungs so/ /gzhan yang snga ma ltar gcig yod pa'i dus na/ cig shos med pas phyogs gcig dang mtha' dag gi brtag pa mi 'jug na/'dir yang shar phyogs kyi rdul gyi yul na nub ngos kyi rdul med pas med pa dang phyogs gcig mtha' dag gi brtag pa mi 'jug la/ nub [(]gyi [,]kyi [)]rdul gyi yul na yang shar phyogs kyi rdul med pas de bzhin du 'gyur ro zhes cis te mi brtsad/gal te gcig gi yul na gcig med kyang dus mnyam du phan tshun 'dab 'byor pa nyid du yod pas de 'dra ba'i brtag pa 'jug go zhe na/ gcig gi dus na gcig med kyang yul gcig na dus 'dab 'byor pa nyid du yod pas snga ma ltar brtag pa 'jug pa nyid do/ /gzhan yang rgyur gyur pa'i skad cig la de nyid rang gi rgyur gyur pa'i skad cig dang /bdag nyid thams cad kyis bar du ma chod na de nyid la thim par 'gyur zhing / phyogs gcig nas ma chod na cha dang bcas pas skad cig pa nyid nyams te/ de'i phyir rgyu dang 'bras bu'i dngos po skad cig gcig pa nyid du khas len cing bar du ma chod pa nyid du yang 'dod na bskal pa yang skad cig gi tshad tsam nyid du 'gyur ba ni legs par bsams pas go bar zad de/ji ltar nyin par gyi dus 'ga' zhig la/ de'i snga phyir gyur pa'i mtshan mo'i dus bdag nyid thams cad nas bar du ma chod na/nyin par gyi dus de nyid la thim par 'gyur zhing / de bzhin du de dag gi snga phyir gyur pa'i nyin mo'i dus kyang bdag nyid thams cad nas bar du ma chod na/ de la thim par 'gyur bas ri rab la sogs pa yang rdul phra rab kyi tshad tsam du 'gyur ba dang mtshungs so/ /'dir gal te rgyu dang 'bras bu'i skad cig kyang cha dang bcas pa ste/du ma nyi tshe'o zhe na/ skad cig ces pa dus kyi mtha' nyid du yang mi 'thad la/ gzhan yang dus rgyas pa bskal pa'i dus la sogs pa ni dus thung ngu ma yin skad cig mang po mthud nas brtsams pa yin la/ 'dir bskal pa lta bu'i dus dang se gol gtogs pa'i dus lta bu la rtsom byed kyi dus kyi skad cig mang nyung med na ni des brtsams pa'i dus la ring thung med par 'gyur la/'on te yod na ni mang nyung tshad kyi mthar thug la/ de'i mtha' yang gcig tu khas len dgos te/ sngar rdul phra rab kyi skabs su bstan pa bzhin no//gal te skad cig cha shas med pa la phyogs gcig dang mtha' dag gi brtag pa mi 'thad do zhe na/ rdul phra rab cha shas med pa la yang shar dang lho la sogs pa'i phyogs cha'i brtag pa mi 'thad pas/ /drug gis cig car sbyar ba na/ /zhes pa la sogs pa'i nyes pa las grol lo//gal te cha shas med par khas blangs zhes kyi/ de tsam gyis de ltar grub pa ni ma yin la/ gzhan yang de dag gis de 'dra ba'i rdul du ma 'dus pa las/ gzugs rags pa rtsom pa nyid du khas blangs pa na/ rdul 'ga' zhig la 'dab chags su kun nas bskor ba nyid du khas len dgos pas de 'dra ba'i brtag pa 'jug go zhe na/de bzhin du rgyu dang 'bras bu'i skad cig gcig pa'i dngos por khas blangs mod kyi/ de tsam gyis de ltar 'grub pa ni ma yin la/ de 'dra ba'i skad cig mthud pa las dus ring por rtsom par 'dod pa na/ ci'i phyir de 'dra ba'i brtag pa mi 'jug ces bya ste/gzu bor gnas shing don la 'jug pa'i blo yis bsam par bya'o/ /don 'di rnams nyid lung bstan pa'i slob dpon 'phags pa klu sgrub kyis/ bdag las ma yin gzhan las min/ /gnyis las ma yin rgyu med min/ /dngos po gang dang gang na yang //skye ba nam yang yod ma yin/ /zhes gsungs pa dang / gzhan yang 'phags pa stug po bkod pa'i rgyan las/ /'byung ba med cing 'jig pa med/ /bdag las ma yin gzhan las min/ /rtag dang chad las rnam par grol/ /gzung dang 'dzin pa rnam par spangs/ / 'jig rten gces pas byas ma yin/ /rdul gyi rkyen las byung ba'ang med/ /rgyu med pas dang byas ma yin/ /ngo bo nyid kyis byung ba'ang min/ /zhes pa dang / gzhan yang / 'di ltar dri za'i khang pa dag /khang pa ma yin khang par snang / rgyu med par yang mi snang ste/ /bdag dang gzhan dang gnyi ga las//rtog pas rnam par brtag byas na/ /dngos nyid mi 'grub dngos rnams kyi/ /rang bzhin kun du brtag pa'o/ /rgyu las dngos po mi 'byung ste/ rgyu med las kyang ma yin no/ /zhes gsungs so/ /de ltar skye ba rnam pa bzhi dang bral ba'i sgo nas dngos po'i ngo bo don dam pa ba 'gog ste/'dir chos can dang dgag bya la sogs pa'i don ni sngar bstan pa bzhin du shes par bya'o/ /gal te skye ba med pa'i ri bong gi rwa la sogs pa dang mtshungs na mngon sum la sogs pa'i tshad ma dang 'gal bar 'gyur ro zhe na/ blo gros chen po zhes pa la sogs pa smos te/ ji ltar byis pas phyi rol dang /yang dag pa'i dngos por brtags pa bzhin du ma skyes pa ni ri bong gi rwa la sogs pa dang mtshungs te/ gzhan du na mtshan nyid yongs su chad pa'i kun brtags kyang gzhan gyi dbang nyid du 'gyur ro/ /sngar rnam grangs kyis na kun du brtags pa yang gzhan gyi dbang nyid du 'gyur zhes pa ni rnam grangs sam ltos pa'i kun brtags yin pas 'gal ba med do//rnam par brtags pa'i phyir zhes pa la 'dir phyir zhes pa'i don ni rnam par brtags pa'i tshul de ltar/ dngos po thams cad ma skyes zhes pa ste/ gtan tshigs sam ched du bya ba'i don ni ma yin no/ / des na skye ba la sogs pa tshad mas grub pa ni 'phags pa so so rang gis rig pa'i spyod yul sems nyid rig pa'i gzhan gyi dbang nyid sgyu ma lta bur skye ba yin gyi/ byis pa rnams kyi gzung 'dzin gnyis kyi dngos po yang dag par rtog pa'i spyod yul gyi sgo nas ni skye ba ma yin te/ de ni yang dag pa'i kun rdzob tu yang mi 'thad pa'i phyir ro//blo gros chen po zhes pa la sogs pas phyin ci log spang ba'i don du gdams pa ste/ gnas kyi rnam par snang ba'i rang bzhin nyid mtshan nyid de/ gzhi mthun par gyur pa'o/ /gzung ba dang 'dzin pa'i mtshan nyid du 'jug pa ni sngar bstan pa ltar ro//gnyis su ltung zhes pa ni 'dus byas kyi mtshan nyid gsum dang ldan pa de nyid la/ gzung 'dzin gnyis kyi dngos por lta ba'i phyogs su ltung ba'o/ /'di la khyod kyis brtson par bya/ /zhes pa ni phyin ci log gi lta ba 'ching ba'i rgyu yin pas de 'dra ba spang ba'i don du brtson par bya zhes pa'o//blo gros chen po gzhan yang zhes pa la sogs pas ni lam gyi theg pas sbyang bar bya ba mya ngan las 'das pa thob pa'i nye bar len pa'i rgyu rigs kyi rnam par dbye ba ston te/ de la rigs med pa la mngon par rtogs par 'gyur ba'i rigs zhes ji ltar brjod ce na/ de yang lha dang tshangs pa'i theg pa mngon par rtogs par 'gyur ba'i rigs yin pas/de ltar bstan pa'o/ /rigs med ces pa ni thar pa'i rigs med pa'o/ /theg pa mngon par rtogs zhes pa yang / lam dang 'bras bu'i theg pa so so rang rig pa'i tshul du rtogs pa ste/ thob par 'gyur ba'o//de la nyan thos kyi rigs ni phung po la sogs pa'i rang dang spyi'i mtshan nyid gang zag gi bdag gis stong par shes pa dang / de nyid kyis myur du rang nyid srid pa'i sdug bsngal las thar pa nyid du bstan pa na/ de la mos pa'i sgo nas lus kyi spu ldang zhing / de'i blo phung po la sogs pa'i mtshan nyid gang zag gi bdag gis stong pa'i don la 'dris shing goms par bya ba'i shes pa la 'jug pa ste/sgrub pa'i bye brag go/ /de las gzhan rten cing 'brel bar 'byung ba zab mo'i don dang / thams cad sems su gcig cing de yang stong pa nyid du ro gcig pa'i mtshan nyid la mos pa dang sgrub pa mi byed pa'o//de'i 'bras bu'i bye brag ni de lta bu'i theg pa mngon par rtogs pa'i lta bas sa drug dang lnga dag tu kun nas ldang ba'i nyon mongs pa rab tu spangs zhes pa la sogs pa'o/ /sa lnga'am drug ni de dag gi rigs kyi sa dang / brgyad pa dang / mthong ba'i sa dang /bsrabs pa'i sa dang / 'dod chags dang bral ba'i sa ste rnam pa lnga'am/ gzhan yang byas pa rtogs pa'i sa dang drug gi bar dag tu ci rigs par mthong ba dang bsgom pas spang bar bya ba'i nyon mongs pa kun nas ldang ba rnams spangs zhes pa'o/ /drug po de rnams kyang go rims bzhin du nyan thos kyi rigs su nges pa ste/bzod pa chen po yan chad dang / rgyun du zhugs pa'i 'bras bu la zhugs pa dang / 'bras bu de la gnas pa dang / lan cig phyir 'ong ba dang phyir mi 'ong ba 'dod pa'i 'dod chags dang bral ba dang / zad pa dang mi skye ba shes pa'i ye shes thob pa dgra bcom pa rnams dang sbyar bar bya ste/shes rab kyi pha rol tu phyin pa'i 'grel pa las bshad pa bzhin no/ /'dir bzod pa chen po yan chad nas de'i rigs su nges pa ni/ gnyis slob rigs las log nas ni/ /sangs rgyas su 'gyur gzhan gsum yang / / zhes gsungs pas nges 'byed gsum pa bzod pa 'bring po yan chad du yang dge ba'i bshes gnyen la sogs pa'i rkyen gyis rang gi rigs las bzlog nas rang sangs rgyas su 'gyur srid pas de'i rigs su ma nges zhes pa'o/ /bdag gi skye ba zad do zhes pa ni kun 'byung ba zad pa dang /de nyid kyis srid par skye ba'i phung po'i lhag ma ni 'di nyid tsam yin gyi/ gzhan len pa med pas zad pa'o zhes shes pa'o/ /tshangs par spyod pa la gnas zhes pa ni nyes skyon dang bral ba ste/ ji skad du/ yon tan bzhi dang ldan pa'i tshangs par spyod pa ste/ ma 'dres pa/ yongs su rdzogs pa/yongs su dag pa/ yongs su byang ba zhes gsungs pa lta bu'o/ /de la ma 'dres pa ni nyan thos kyi theg pa de nyid mu stegs dang ma 'dres pa'o/ /yongs su rdzogs pa ni khams gsum gyi nyon mongs pa'i gnyen po rdzogs pa'o/ /yongs su dag pa ni de'i sems ngo bo nyid kyis rnam par dag pa'i sgo nas zag pa med pa'o//yongs su byang ba ni dgra bcom pa'i gnas skabs na nyon mongs pa'i dri ma rnam par dag pas zag pa zad pa'o/ /de ltar yang / gzhan dang thun mong ma yin ldan pa dang / /khams gsum nyon mongs rnam spang rdzogs byed dang / ngo bo nyid dag dri ma dag pa ste//tshangs spyod yon tan bzhi ldan yin par 'dod/ ces gsungs pa'i phyir ro/ /bya ba byas so zhes pa ni sdug bsngal shes pa dang / kun 'byung ba spangs pa dang / 'gog pa mngon du byas pa dang / lam bsgom pa rnams byas zin pa ste/ der phyin chad shes par byar med cing spang du med la mngon du byar med cing bsgom du med ces pa'o//seng ge'i sgra ni 'jigs pa med pa'o/ /de la sogs pa tha ba bcom pa dang kun du sbyor ba spangs zhes pa'o/ /blor 'gyur zhes pa ni mya ngan las 'das pa ma yin pa ma yin pa la/ de'i blor 'gyur ba'o/ /blo gros chen po zhes pa la sogs pas thar pa'i rigs med pa nyid ston te/las sog cing rnam par smin pa myong bar 'gyur ba'i gang zag gis bdag yod par khong du chud pas de nyid sdug bsngal las thar pa'i mya ngan las 'das pa thob pa'i don du 'jig rten pa'i bsam gtan dang / gzugs med pa'i ting nge 'dzin bsgom zhing / me lnga bsten pa la sogs pa log pa'i brtul zhugs spyod par byed pa'o/ /de la gso ba ni bdag de nyid kham du byas pa'i zas kyis rgyas par byed pas so/ /skyes bu ni de nyid lus la brten pas so/ /gang zag ni de nyid dge mi dge'i chos kyis gang zhig khams gsum du skye bar 'gyur bas so//dngos po thams cad rgyu la rag las zhes pa ni sems can dang snod kyi 'jig rten gyi dngos po bzang po dang / ngan par gyur pa thams cad dbang phyug la sogs pa'i rgyu la rag lus par mthong nas de la srog gi mchod sbyin la sogs pas mnyes par byas pa'i sgo nas mya ngan las 'das pa thob par 'dod pa'o//chos la bdag med pa'i de kho na nyid ma rtogs pa de dag gis thar pa mi 'thad pa ni sngar rgyas par bstan no/ /blo gros chen po de la zhes pa la sogs pa'i don ni rang nyid gcig pu thar par bya ba'i don du rten 'brel zab mo'i don mngon par rtogs pa bstan pa dang /sangs rgyas dang nyan thos la sogs pa 'du 'dzi'i rkyen med par dben pa la gnas pas rten cing 'brel bar 'byung ba rnam par shes pa tsam gyi dngos po la mngon par zhen pa'i tshul du sgrub pa ste de las gzhan gyi phyi rol gyi ngo bor gyur pa'i rten 'brel la ni dngos por zhen pa med de/ji skad du/ /gzung bar rtog pa nyams phyir dang / /'dzin pa ma spangs phyir dang ni/ /rten gyis bse ru lta bu'i lam/ /yang dag bsdus par shes par bya/ /zhes gsungs pa'i phyir ro/ / lam dang 'bras bu'i gnas skabs na grong du bsod snyoms la gshegs pa'i tshe/ su dag gis ma gus pa'i spyod pa byas pa na dus de nyid kyi tshe'am phyis mya ngan las 'da' ba'i gnas skabs kyang rung ste/ de dag gi nyes pa bshags par bya ba'i don du mdun gyi nam mkha' la mngon par 'phags nas rang gi lus las me'i khams phyung ste/mya ngan las 'da' ba ston pa dang / zung gi cho 'phrul te me 'bar ba dang chu 'brub pa la sogs pa 'gal ba'i rnam pa ston pa'i 'bras bu 'di lta bu dag yod do zhes bshad pa na/ thog mar mos pa nyid du 'gyur zhing / de'i rjes su snga ma ltar 'du 'dzi med pa'i rkyen gyis sgrub pa ni rang sangs rgyas kyi rigs can no//theg pa chen po'i rigs ni rtogs pa'i bdag nyid so so rang gis rig pa'i ye shes mngon par rtogs par 'gyur ba dang / de nyid rang gi rang bzhin don dam pa bas stong pa'i chos kyi dbyings mngon par rtogs par 'gyur ba dang /sangs rgyas kyi zhing khams phun sum tshogs par snang zhing / der bdag nyid mtshan dang dpe byad kyis brgyan pa'i longs spyod rdzogs pa'i skur snang ba mngon par rtogs par 'gyur ba ste/ de la sku mtshan dang dpe byad kyi rnam par snang ba ni ye shes kyi bdag nyid las tha dad pa rdul phra rab 'dus pa las grub pa ma yin zhing /ye shes nyid kyi bdag nyid yin la/ de yang chos kyi dbyings stong pa nyid las gzhan ma yin te de ltar na de gsum dbyer med pa'i rang bzhin so so rang rig pa'i tshul gyis mngon par rtogs par 'gyur ba ste/ thob par 'gyur ba'o/ /de 'dra ba'i rigs mtshon pa'i rtags kyang de gsum las gang yang rung ba gcig bstan pa dang / sngar bstan pa ltar kun gzhi rnam par shes pa'i 'jug pa'i tshul kun rdzob pa dang / de'i de bzhin nyid bstan pa na mi 'jigs mi skrag skrag par mi 'gyur ba ste/ thog mar sems spa gong ba dang /de'i rjes la skrag pa dang yun ring du skrag par mi 'gyur zhing / de la mos par 'gyur ba dang / de bzhin du sgrub par byed pa'o/ /'dir tshig gi don bshad pa la/ rang bzhin gyis rang bzhin med ces pa ni rang rang gi rang bzhin bden pa bas stong pa'o/ /khong du chud pa ni rtogs pa'i bdag nyid du gyur pa'i ye shes so//phyi rol spangs pa zhes pa ni phyi rol lta bur snang ba longs spyod rdzogs pa'i sku'i zhing khams so/ /sprul pa'i sku ni gdul bya 'ba' zhig gi snang ba yin pas thob par bya ba'i don sku gnyis las tha dad pa med do/ /yang gdul bya la de ltar ston pa'i nus pa ni ye shes nyid yin no//gzhan yang 'dir de 'dra ba'i rigs kyi rtags ni/ sbyor ba'i sngon du snying rje dang / /mos pa dang ni bzod pa dang / /dge ba yang dag spyod pa ni/ /rigs kyi rtags tu nges par bshad/ /ces kyang gsungs te/ dge ba'i bshes gnyen la sogs pa las snying rje la sogs pa'i phan yon thos pa med par dang po nyid nas snying rje dang ldan pa dang /theg pa chen po'i chos la mos pa dang / dka' ba spyod pa bzod pa dang / pha rol tu phyin pa'i rang bzhin gyi dge ba'i rtsa ba yang dag par spyod pa'o/ /gzhan yang sngar gyi rigs so so ba yod par rtogs pa'i rtags kyang /khams rnams dang ni mos pa dang / /sgrub pa tha dad dbye ba dang / /zhes pa la sogs pa gsungs te/ sngar bstan pa bzhin gzhung dang sbyar bar bya'o/ /ma nges pa'i rigs can ni theg pa gsum gyi yon tan so sor bstan pa na/ ji ltar bstan pa de la mos par 'gyur zhing /de bzhin du sgrub par byed pa'o/ /de yang yon tan gsum char thos par 'gyur ba'i tshe/ gang la dga' ba shas che ba de las rjes su sbyar bar bya'o/ /de la rigs zhes pa ni rgyu dang 'bras bu'i gnas skabs gnyis char la 'jug ste/ ji ltar rgyal po'i rigs la sogs pa bzhin no//spyir de ltar yin mod kyi/ 'dir rigs rnam par dgod par byas pa ni yongs su sbyang ba'i sa ste/ rgyu'i gnas skabs sems can gyi rgyud kyis bsdus pa'i kun gzhi rnam par shes pa la yod pa'i sa bon gya bye brag ste/ de yang rgyud nas snang ba med pa'i sa ste/ byang chub sems dpa'i sa dang po'am brgyad pa yan chad la 'jug par bya ba'i phyir rnam par dgod pa'o//yang rnam pa gcig tu na/ nyan thos la sogs pa rang rang gi snang ba med pa'i ting nge 'dzin la yang sbyar bar bya'o/ /bshad pa snga ma ltar na rim gyis so so rang rang gi kun gzhi la nyon mongs pa'i bag chags dag nas chos la bdag med pa mthong zhing des shes bya'i sgrib pa yang spang bar bya ba'i phyir/ting nge 'dzin gyi bde ba la gnas pa thob nas de las langs te byang chub mchog tu sems bskyed nas sems can gyi don du srid par skye ba blangs te/ tshogs gnyis su kha bskang nas nyan thos dgra bcom pa rnams kyang rgyal ba'i sku nyid rab tu thob par 'gyur ro//de ltar na 'dir de bzhin gshegs pa'i rigs ni sems kyi chos nyid spros pa dang bral zhing 'od gsal ba de yang kun gzhi rnam par shes pa'i mthar thug pa nyid yin te/ ji skad du/ shes rab kyi pha rol tu phyin pa las/ sgrub pa yi ni rten gyur pa//chos kyi dbyings kyi rang bzhin dang / /zhes gsungs pa'o/ /de ni de bzhin gshegs pa'i snying po zhes kyang bya ste/ chos kyi sku'i rgyu mthun pas so/ /chos kyi sku'i nye bar len pa zhes kyang bya ste/ de nyid dri ma sna tshogs dang bcas pa'i dus na sems can gyi khams yin zhing / dri ma phyogs 'ga' dang bral ba'i dus na byang chub sems dpa' zhes bya la/mtha' dag bag chags dang bcas te spangs pa'i dus na chos kyi sku nyid yin pa'i phyir ro/ /de'i don ni da ltar gyi sems kyi rang bzhin spros bral 'od gsal 'di nyid kyi rgyun rgyud dri ma mtha' dag bag chags dang bcas te spangs pa'i dus na chos kyi sku yin gyi gzhan nas thob pa ma yin pas rang gi rgyud du gtogs pa'i rgyu yin zhes pa'o//de ltar ni de ni khams dang sa bon zhes kyang sa bcu'i mgon pos bshad de/ rnam grangs su gtogs pa'o/ /gal te sgrub pa yi ni rten gyur pa/ /chos kyi dbyings kyi rang bzhin zhes spyir bstan pa las/sems kyi rang bzhin la rigs sam de bzhin gshegs pa'i snying po la sogs par bstan pa med do zhe na/ ma yin te/ sems las ma gtogs pa'i chos med pa dang / gzhan yang chos kyi dbyings stong pa nyid 'ba' zhig gi ldog pa ni rgyu dang 'bras bu'i khyad par bral ba'i phyir/rigs nyid du mi 'thad pas chos can gyi rnam par 'gyur ba dang / chos nyid zung du 'jug pa sgyu ma lta bu'i chos nyid de nyid rigs la sogs par 'thad do/ /de skad du yang / rang bzhin gtso bor gyur pa ni rigs yin la/ rnam 'gyur gtso bor gyur pa ni dmigs pa yin te/ 'on kyang gnyi gar gnyi ga khas len dgos so zhes 'phags pa rnam grol sdes bshad do/ /de'i phyir sems las ma gtogs pa bems po'i chos can 'ga' zhig kun rdzob tu yod kyang de dang de'i chos nyid zung du 'jug pa ni/ sangs rgyas kyi rigs nyid ma yin te/ mtshan nyid shin tu 'gal ba'i phyir/rta ba lang gi rigs ma yin pa bzhin no/ /de yang sems can thams cad la yod de/ ji skad du 'phags pa mya ngan las 'das pa las/ don de lta bas na ngas rtag tu sems can thams cad la sangs rgyas kyi rang bzhin yod pas na log sred can gyi bar du sangs rgyas kyi rang bzhin yod do zhes gsungs so//gzhan yang log sred can la sogs pa la dge ba'i chos rnams med kyang / sangs rgyas kyi rang bzhin nyid dge ba ste/ ma 'ongs pa'i dus na yod par 'gyur ba'i phyir ro zhes gsungs so/ /gzhan yang log sred can la sogs pa la sangs rgyas kyi rang bzhin yod do//de ci'i phyir zhe na/ log sred can dag gdon mi zar bar bla na med pa yang dag par rdzogs pa'i byang chub mngon par rdzogs par sangs rgyas pa'i phyir ro/ /rigs kyi bu dper na mi 'ga' zhig gi khyim na 'o ma dang zho yod pa las/ yang mi zhig gis khyod la mar yod dam zhes dris pas/des smras pa bdag la mar yod do zhes smras kyang / 'di ltar zho ni yang dag par mar ma yin mod kyi/ thabs la mkhas pas gdon mi za bar thob par 'gyur ba'i phyir mar yod do zhes smras so/ /sems can dag kyang de dang 'dra ste/ kun la sems yod do//gang sems yod pa ni gdon mi za bar bla na med pa yang dag par rdzogs pa'i byang chub thob par 'gyur ba'o/ /don de lta bas na ngas rtag tu sems can thams cad la sangs rgyas kyi rang bzhin yod do zhes gsungs so zhes bstan pa dang / gzhan yang rigs kyi bu de bzhin gshegs pa'i snying po ni sems can thams cad la yod pa mthong bar mi nus pa tsam du zad de/bud med dbul mo de nyid la gter yod pa dang 'dra'o/ /rigs kyi bu ngas sems can thams cad la de bzhin gshegs pa'i snying po yod do zhes yang dag par bstan par bya ste/ ji ltar dbul mo des gter chen po yod par bstan kyang mi shes pa bzhin du/sems can thams cad la de bzhin gshegs pa'i snying po yod pa yang nyon mongs pa'i rnam pas bsgribs pas sems can rnams kyis mi shes shing ma mthong nas de dag la de bzhin gshegs pas bstan te/ de dag mgu nas de bzhin gshegs pa la skyabs su 'gro'o zhes pa la sogs pa gsungs so//'phags pa ting nge 'dzin gyi rgyal po las kyang / 'gro ba 'di dag ma lus sangs rgyas 'gyur/ /'di na snod min sems can gang yang med/ /zhes pa la sogs pa gsungs so/ /de bzhin gshegs pa'i snying po bstan pa las kyang //ji ltar dri ngas smad pa'i gos dag gi/ /yongs su dkris pa bde bar gshegs pa'i gzugs/ /zhes pa la sogs pas dper na gos rul gyis dkris pa'i rgyal ba'i sku gzugs mi mthong ba bzhin du/ sems can thams cad la sangs rgyas kyi rang bzhin yod mod kyi nyon mongs pa'i dri mas dkris pas mthong bar mi nus la/de nyid bsal na mthong bar 'gyur zhing sangs rgyas kyi ming 'thob po zhes don 'di nyid rgyas par gsungs so/ /de la sogs pa drang srong gi gtsug lag gi gzhung du ma snang mod kyi tshig mangs su dogs pas mi spro'o/ / de nyid kyi phyir sems can thams cad rim gyis brgyud nas sangs rgyas nyid du 'gyur bas 'bras bu mthar thug pa yang gcig yin zhing / de thob par byed pa'i lam dang / lam gyis sbyang bar bya ba'i rigs kyang mthar thug gi dbang du byas na gcig nyid de/ sangs rgyas kyi rigs so/ /'on kyang gnas skabs kyi dbang du byas na/ji srid pa'i sdug bsngal ngal so ba'i bsti gnas nyan thos kyi byang chub la sogs pa du ma yod cing de thob par byed pa'i lam dang / lam gyis sbyang bar bya ba'i rigs kyi gnas skabs tha dad par 'gyur ba'o/ /gal te de lta na 'phags pa mya ngan las 'das pa'i mdo de nyid las/dper na rdo rje rin po che gzi brjid chen po ni cis kyang bcag par mi nus la/ rnam grangs gzhan thams cad ni des chom par 'gyur mod kyi/ lug gi rwa ni mi chod do/ /de bzhin du yongs su mya ngan las 'das pa'i mdo chen po 'dis kyang / shin du sdig pa'i las byed pa 'dod chen po ni byang chub tu gzhag par mi nus te/rgyu med pa'i phyir rdo rjes lug gi rwa la mi tshugs pa bzhin no zhes rigs chad kyi gang zag kyang gsungs la/ gzhan yang theg pa chen po mdo sde'i rgyan las kyang / dkar po dman pa yod pa rgyu dang bral/ /zhes rgyu dang bral ba gtan du ba'i rigs chad gsungs pa dang /shes rab kyi pha rol tu phyin pa la sogs pa'i mdo sde du ma las theg pa gsum gyi rigs tha dad par gsungs pa dang / de sbyong bar byed pa'i lam dang 'bras bu'i bdag nyid kyi theg pa gsum du bstan pa dang 'gal bar 'gyur ro/ /gzhan yang ba ru ra'i phung po'i mdo las/dge slong dag rgya dang rngams su dpag tshad tsam yod pa'i ba ru ra'i phung po las lo brgya brgya zhing re re phyung na zad par 'gyur la/ sems can rnams kyi khams ni mi zad pa'o zhes gsungs pa dang / ji ltar na 'gal bar mi 'gyur te/ de'i phyir rigs kyi ngo bo ni kun gzhi rnam par shes pa la yod pa'i zad pa med pa'i chos kyi sa bon dngos por gyur la/thog ma med pa nas gcig nas gcig tu brgyud de 'ongs pa 'am/ glo bur du thos pa dang bsam pa la sogs pa'i rkyen gyis bsgos pa 'ga' zhig yin la/ de yang khyad par du nyan thos kyi zag pa med pa'i chos kyi sa bon ni nyan thos kyi rigs nyid du nges shing /de las nyan thos kyi byang chub kho na 'byung gi gzhan ni ma yin zhes bya'o/ /de bzhin du rigs kyi khyad par gzhan rnams kyang shes par bya'o/ /de ltar na rigs so sor nges pa dang / de sbyang bar byed pa'i lam gyis bdag nyid kyi theg pa yang tha dad pa gsum du nges shing /des sbyangs pa'i 'bras bu mthar thug pa yang byang chub tha dad pa gsum du nges te/ byang chub dman pa rnams las 'das nas mthar thug par sangs rgyas nyid du 'gyur ba ni ma yin no zhes 'dod do/ /de nyid kyi phyir rigs dang theg pa gcig nyid du bstan pa ni dgongs pa can yin te/ji ltar mdo sde 'di nyid las 'og nas ston par 'gyur ba dang / sa bcu'i mgon po chen pos kyang / /chos dang gang zag grol ba dag /mtshungs phyir rigs ni tha dad phyir/ /bsam gnyis thob phyir sprul pa'i phyir/ /mthar thug phyir na theg gcig nyid//ces pa la sogs pas theg pa gcig nyid du bstan pa ni nyan thos la sogs pa'i chos kyi dbyings mtshungs pa'i phyir theg pa gcig nyid de/ de yang bgrod par bya bas na theg pa chen po'o zhes pa dang / gzhan yang nyan thos la sogs pa'i gang zag rnams gang zag gi bdag med par mtshungs pas theg pa gcig pa nyid du bstan te/de yang 'gro ba po yin pas theg pa zhes bya'o/ /zhes pa la sogs pas rigs dang theg pa gcig pa ni dgongs pa can nyid du bstan pa dang 'gal zhes pa'o/ /'di ni mi 'thad de sa bon don dam pa'i dngos por 'dod pa ni lung dang rigs pa du ma'i sgo nas bkag la/gzhan yang de 'dra ba'i dngos por bstan pa ni kun rdzob pa la dgongs shing dngos por zhen pa'i byis pa rnams drang ba'i don du gsungs pa'o/ dbye ba tha dad pa so sor nges pa nyid du bstan pa yang gnas skabs tha dad pa la dgongs shing / de ltar bstan pas 'dul ba'i sems can gyi don du gsungs pa ste/de'i don ni gnas skabs kyi dbang du byas na sngar bstan pa ltar srid pa'i sdug bsngal dbugs phyung ba'i bsti gnas nyan thos kyi byang chub la sogs pa tha dad cing / de rnams thob par byed pa'i lam gyi gnas skabs kyang tha dad pa dang /lam dang 'bras bus bsdus pa'i yon tan gyi bye brag tha dad pa'i rten du gyur pa'i sgo nas sems kyi chos nyid spros pa dang bral zhing 'od gsal ba de nyid nyan thos la sogs pa'i rigs tha dad pa nyid du 'jog ste/ ji ltar gzhan gyi sgra la brten nas rang nyid thar pa thob par 'dod cing / gang zag gi bdag med pa tsam du rtogs par nus pa'i shes rab kyi yon tan brten pa'i cha nas nyan thos kyi rigs nyid du rnam par 'jog pa de las gzhan du gzhan gyis bstan pa la mi ltos par rang nyid thar pa thob par 'dod pa dang / gang zag gi bdag med pa dang / gzung ba rang bzhin med par rtogs pa'i shes rab kyi yon tan brten pa'i cha nas rang sangs rgyas kyi rigs nyid du 'jog cing /sems can thams cad kyi don du rdzogs pa'i sangs rgyas thob par 'dod pa dang / bdag med gnyis kyi de kho na nyid rtogs par nus pa'i shes rab ste/ thabs dang shes rab kyi yon tan phun sum tshogs pa'i rten du 'dug pa'i sgo nas sems kyi chos nyid de la sangs rgyas kyi rigs zhes rnam par 'jog pa yin no//gzhan yang sems kyi chos nyid de nyid sngar bstan pa'i mos pa dang bsgrub pa la sogs pa'i gnas skabs kyi rtags kyi yon tan de rnams dang 'brel pas kyang rigs tha dad pa nyid du rnam par 'jog pa'o//de skad du yang / chos kyi dbyings la dbyer med phyir/ /rigs ni tha dad rung ma yin/ /zhes brtsad pa'i len du/ /rten pa'i chos kyi dbye ba yis/ /de yis dbye ba yongs su brjod/ /ces gsungs so/ /gzhan yang 'phags pa dam pa'i chos pad ma dkar po las//ji ltar kham snod rdza mkhan gyis/ /'jim pa mtshungs pa las byas pa/ /de las snod du gyur pa ni/ /bu ram 'o ma mar dang chu/ /yang na la la mi gtsang dang / /kha cig zho yi snod du gyur/ /kham pa sna gcig de blangs te/ /rdzas kyis kyang ni snod du byas//ji ltar dngos po bcug pa bzhin/ /de ni snod kyang so sor rtogs/ /de bzhin sems can bye brag med/ /tha dad mos pas de bzhin gshegs/ /theg pa tha dad rab ston kyang / /theg pa sangs rgyas theg par nges/ /zhes gsungs te/ /de dag gi don yang sems can thams cad kyi sems kyi rang bzhin spros pa dang bral zhing rig pa gsal ba tsam du mtshungs pas thams cad theg pa chen po'i rigs can gcig nyid yin zhing /de nyid kyis na lam dang 'bras bu'i theg pa yang gcig nyid yin mod kyi/ /ji ltar rdza mkhan gcig gis 'jim pa mtshungs pa cig las snod rnam pa mtshungs pa du ma byas pa na//de rnams la rnam pa 'am rang bzhin gyis dbye ba med mod kyi/ de rnams kyi nang du sbrang rtsi dang li khar la sogs pa so sor blugs pa na/ /yon tan de rnams kyi dbye bas 'ga' zhig ni sbrang rtsi'i bum pa'o/ /'di ni li kha ra'i bum pa'o zhes so sor 'jog pa de bzhin du//sems can [(]kyi [,]gyi [)]sems kyi rang bzhin gyi rigs la dbye ba med kyang sngar bstan pa ltar gnas skabs kyi yon tan de rnams kyang so sor 'brel pas rigs tha dad par 'jog cing / /de sbyong bar byed pa'i lam dang 'bras bu'i bdag nyid kyi theg pa yang tha dad par bstan pa'o//rigs chad pa bstan pa yang ji ltar byang chub sems dpa'i sde snod theg pa chen po'i mdo sde la 'di dag ni thar pa dang mthun pa'i mdo dang 'dul ba ma yin no zhes skur pa btab pas/ /sngar bsags pa'i dge ba'i rtsa ba thams cad kyi 'bras bu 'byin mi nus par byas pa'i sgo nas bcom pa ste//de 'dra ba'i log par lta ba dang bcas pa'i rigs la thar pa thob mi nus pa la dgongs shing / sems can rnams de 'dra ba'i lta ba skyes pa spang bar 'gyur zhing / ma skyes pa rnams mi skyed par bya ba'i don du gsungs pa ste/ gzhan du na mdo sde 'di nyid dang / mya ngan las 'das pa las bstan pa dang 'gal bar 'gyur ro//gzhan yang theg pa gcig tu bstan pa dgongs pa can nyid du gsungs pa ni/ gnas skabs dang mthar thug pa dang kun rdzob dang don dam pa'i rnam par dbye ba la ma ltos par gcig pa kho na'o zhes bstan pa ni dgongs pa can yin pas de ltar bstan pa'am/gzhan yang gnas skabs tha dad pa la dgongs shing de ltar bstan pas 'dul ba'i sems can gyi don du gsungs pa yin pas skyon med do/ /yang sngar bstan pa'i rigs kyi rtags rnams kyang gang zag gi rgyud rnams la rtag tu ldan par nges pa med do/ /ji ltar snying rje med cing rang nyid 'ba' zhig grol bar 'dod pa dang /phung po la sogs pa'i rang dang spyi'i mtshan nyid la mngon par zhen pa rnams kyang theg pa chen po'i dge ba'i bshes gnyen dang phrad pa'am/ rkyen nges pa med pa gang yang rung ba la brten nas/ snying rje dang ldan zhing bdag med pa gnyis kyi de kho na nyid rtogs pa dang /de 'dra ba'i rang bzhin la mos pa lta bur snang la/ yang snying rje dang ldan zhing sems can gyi don byed pa'i dka' ba'i spyod pa bzod pa rnams kyang rkyen gang yang rung ba 'ga' zhig la brten nas de las bzlog pa'i chos dang ldan pa nyid du myong ba'i tshad mas grub pa dang /bstan bcos dbu ma'i snang ba las kyang de ltar bshad pa'i phyir ro/ /gzhan yang gsung rab dag las phyogs du mas gsungs mod kyi/ mthar thug la rigs gcig nyid yin par tshad ma'i stobs kyis kyang gzhag par nus te/ sems kyi chos nyid spros pa dang bral zhing rig pa gsal ba tsam gyi rang bzhin ni sngar bstan pa ltar sangs rgyas nyid kyi rigs yin la/de yang sems can thams cad la yod pa nyid du sgrub ste/ ji ltar 'dod chags la sogs pa'i nyon mongs pa rnams dang / gzung 'dzin gyi rnam par rtog pa la sogs pa nyon mongs pa can ma yin pa'i ming shes pa rnams dang /dad pa la sogs pa sems las byung ba'i dge ba'i chos rnams res 'ga' ba nyid du dmigs pas kun rdzob tsam du yang sems kyi rang bzhin ma yin la/ myong zhing rig pa tsam ni rtag tu sems la rjes su 'brang ba nyid du grub pas kun rdzob tu sems kyi rang bzhin yin te/me la tsha ba bzhin no/ /don dam par stong pa nyid ni rigs pa'i stobs kyis sngar bstan pa ltar grub ste/ rig pa dang stong pa de dag kyang phan tshun zung du 'jug pa dbyer med pa'i rang bzhin yin la/ de ltar na dri ma rnams glo bur ba phyin ci log gi yul can yin pas de dang 'gal ba yang dag pa'i yul can gyi ye shes sems kyi rang bzhin du gyur pa'i gnyen po goms shing mngon du byas pa na/sa bon dang bcas te spangs par nus la/ de dag spangs pa'i sems kyi rang bzhin ji lta ba bzhin mngon du byas pa ni chos kyi sku zhes bya ste/ de'i phyir de 'dra ba'i sa bon dang ldan pa nyid du bdag nyid so so la grub ste/de bzhin du sems can thams cad kyi rang bzhin yang kun rdzob tu myong ba rig pa tsam yin te/ ji ltar bdag nyid kyi myong ba'i khyad par 'ga' zhig mdun du byas nas/ sems nyid du tha snyad 'dogs pa na/ bde ba dang sdug bsngal la sogs pa'i khyad par gang yin yang bla ste/spyir myong rig tsam gyi ldog pa mdun du byas nas sems su tha snyad btags par myong ba'i tshad ma nyid kyis grub ste/ de'i phyir sems can gzhan gyi sems rgyud kyang gal te sems nyid yin na myong rig gi rang bzhin yin la/ de lta ma yin na sems su gdags pa'i don med pas sems nyid ma yin par zad do/'di ni so sor nges pa'i dngos po la brten nas mtshan nyid spyi'i tshul du rtogs pa tshad ma gcig gi byed pa ste/ gtan tshigs thams cad kyi khyab pa sgrub pa'i tshul yang 'di nyid yin no/ /de yang dper na mdun du byas pa'i dngos po 'ga' zhig la mer tha snyad byed pas na gsal zhing 'bar ba 'am/chen po la sogs pa'i khyad par gyi ldog pa 'ga' zhig mdun du byas nas mer tha snyad byas pa ni ma yin gyi/ 'on kyang khyad par de rnams gang yin yang bla ste/ spyir tsha zhing sreg pa tsam gyi ldog pa de nyid mdun du byas nas mer tha snyad btags pa nyid du nyams su myong ba'i tshad ma nyid kyis grub la/de nyid kyis ma mthong ba'i yul gzhan na yod pa'i me thams cad kyang / gal te me yin na tsha zhing sreg pa'i rang bzhin yin la/ da lta yin na mer tha snyad gdags pa'i don med pas ma yin no zhes sngar so sor nges pa'i dngos po la brten nas zhugs pa'i tshad ma de nyid kyis rtogs pa bzhin no//don dam par stong pa nyid kyi rang bzhin yin pa ni sngar bstan pa'i rigs pa'i rjes su 'brangs te rtogs par bya'o/ /de ltar na rig pa dang stong pa zung du 'jug pa spros pa dang bral zhing 'od gsal ba de 'dra ba ni sems can thams cad la yod pa nyid du grub pas thams cad sangs rgyas kyi rigs can zhes bya'o//de skad du yang 'jam dpal rnam par 'phrul pa las/ khye'u byang chub sems dpas rang gi sems rtogs par bya ba las ma rtogs pa khong du chud par bya ba las gzhan ci yang med do//rang gi sems rtogs pa gang yin pa de nyid sems can thams cad kyi sems rtogs pa yin no rang gi sems dben pas sems can thams cad [(]gyi [,]kyi [)]sems dben no/ /rang gi sems kyi rang bzhin gyis sems can thams cad kyi rang bzhin no/ / rang gi sems rnam par dag pas sems can thams cad kyi sems rnam par dag pa zhes bya ba la sogs pa gsungs so/ /gal te dri ma dang bral ba'i sems kyi rang bzhin re zhig mngon du byas pa de lta na yang / phyis de las nyams par 'gyur bas de ni chos kyi sku'i ye shes ma yin no zhe na/ ma yin te/ spyir ye shes rgyun chad pa nyid mi 'thad pa ni 'og nas ston par 'gyur la/ dri ma rnams kyang 'byung ba yang mi 'thad de/ de dang 'gal ba'i gnyen po goms shing mthar thug pas de rnams kyi rtsa bar 'gyur ba bdag tu 'dzin pa sa bon dang bcas nas spang ba'i phyir te/ ji skad du/ bdag lta'i sa bon spang ba'i phyir/slar mi gshegs pa nyid yin no/ /gsungs pa dang / gzhan yang / /'tshe ba med dang yang dag don/ /rang bzhin las ni phyir log na/ /'bad du zin kyang mi zlogs te/ /blo ni de phyogs 'dzin phyir ro/ /zhes gsungs pa lta bu'o/ /de'i don yang bdag med par rtogs pa so so rang gi rig pa'i ye shes mthar thug de 'dra ba ni yang dag pa'i yul can yin pa dang //sems kyi rang bzhin nyid yin pas phyin ci log gis tshur la gzhom mi nus shing / yang sdug bsngal gyi 'tshe ba dang / phyin ci log dang skyo ba'i 'tshe ba med pas ched du'i gnyen po gzhan bsgom pa'i sgo nas bzlog pa yang mi 'thad ces pa'o//de bzhin du theg pa gcig nyid kyang rigs pa'i stobs kyis grub pa nyid de/ 'dir de kho na nyid rtogs pa'i shes rab lam gyi gtso bo yin par sngar bsgrubs la/ de kho na nyid kyang 'gal ba du ma mi 'thad de/ gcig nyid yin pas de rtogs pa'i shes rab kyang gcig nyid yin te/des na lam mthar thug pa ni gcig nyid yin zhing / de'i phyir 'bras bu mthar thug pa yang gcig nyid do/ /gal te mthar thug pa gcig nyid yin zhes kyi de tsam gyis theg pa gcig tu 'gyur ba ni ma yin te/ ji ltar rigs mthar thug pa rgyal po'i rigs gcig nyid yin mod kyi/de tsam gyis mi rnams rigs gcig du gyur pa ni ma yin pa bzhin no zhe na/ skyon med de/ 'dir gang zag gi bdag med pa tsam rtogs shing / rang nyid thar pa thob par bya ba'i don du de ltar bsgoms pa de nyid rim gyis bdag med pa gnyis rtogs shing /byang chub mchog tu sems bskyed nas tshogs gnyis rdzogs par byas te sangs rgyas nyid du 'gyur bas/ dman pa'i lam de dag kyang theg pa chen po'i lam gyi rgyun gcig gi thog ma de nyid kyi yan lag yin pas mthar thug la theg pa chen po'i lam gcig nyid yin zhes pa ste/ ji ltar tshul khrims dang bag yod kyi yan lag la sogs pa theg pa chen po'i lam gyi yan lag yin pas de nyid du 'dus pa bzhin no//'dir theg pa dman pa'i lam de dag las byang chub dman pa nyid thob nas de nyid du mthar thug cing theg pa chen por bgrod du med pa ni ma yin no//mi rnams kyi rigs so sor nges shing dmangs rigs las rim gyis rgyal po nyid du 'gro ba ma yin pas tha dad pa nyid du nges pa'o/ /de skad du yang / /de nyid tshol la thog mar ni/ /thams cad yod ces brjod par bya/ zhes pa la sogs pa gsungs so/ /gzhan yang theg pa gsum du nges par bstan pa ni dgongs pa can yin par gsungs te/ji skad du/ shA ri'i bu de bzhin gshegs pa la ni brdzun gsungs pa mi mnga'o/ /theg pa ni gcig kho nar zad de/ 'di lta ste/ sangs rgyas kyi theg pa'o zhes gsungs so/ /gzhan yang / mi mkhas gang zhig dman la mngon dga' zhing //sangs rgyas bye ba mang la spyad ma spyad/ /'khor ba la ni chags shing sdug bsngal ba/ /de dag rnams la mya ngan 'das pa bstan/ /sangs rgyas ye shes rab tu rtogs bya'i phyir/ /thabs 'di rang byung gis ni mdzad 'gyur gyi/ /de dag rnams la khyed cag sangs rgyas su 'gyur ro zhes pa ni nam yang mi gsung ngo //ci phyir zhe na skyob pa dus la gzigs/ /dal ba gzigs nas de yi 'og tu gsungs/ zhes pa la sogs pas dgra bcom pa rnams kyang sangs rgyas nyid du 'gyur bar lung bstan pa dang / /yang / theg pa gcig ste gnyis pa yod ma yin//gsum pa nam yang yod min 'jig rten na/ /skyes bu mchog rnams thabs kyi theg pa gang / /sna tshogs nye bar ston par mdzad ma gtogs/ /zhes gsungs so/ /gzhan yang 'phags pa byang chub sems dpa'i spyod yul rnam par 'phrul ba las/ sangs rgyas ye shes mtshungs med bsgrub bya ba//byang chub brnyes nas de srid nga yi tshe/ /bar ma dor ni mya ngan 'da' ba med/ /'on kyang mya ngan 'da' bar ngas bstan te/ /rtag pa'i 'du shes can rnams mi rtag bstan/ /lhag ma lus pa ltar yang ngas bstan te/ /de yi tshe na phyi ma'i mthar btags so/ /nga yi mya ngan 'da' gcig theg pa gcig /nga yi theg pa tha dad med pa ste/ /yang dag du na theg pa gcig tu bstan/ /de ni thabs kyi yul du shes par gyis/ /rgyud gzhan bsam pa chung ba'i skye bo dag /'phral du thos pas 'jigs par 'gyur srid ces/ /de dag rnams la theg pa gsum bstan gyi/ /zhes pa la sogs pas theg pa gsum dang /lhag ma dang bcas pa dang / lhag ma med pa'i mya ngan las 'das pa bstan pa ni dgongs pa can nyid du gsungs so/ /des na theg pa gsum du nges par bstan pa ni/ dman pa la mos pa rnams kyis kyang rim gyis theg pa chen po nyid rtogs par bya ba'i don du gsungs kyi/dman pa'i 'bras bu de nyid la rnam par gzhog cing mthar thug par bya ba'i don du gsungs pa ni ma yin te/ de dag la theg pa chen po'i rigs yod bzhin du dman pa'i 'bras bu la 'jog par byed na/ de bzhin gshegs pa chos la ser sna byed pa dang /sems can rnams la thugs mnyam par mi gzigs pa la sogs pa'i nyes par 'gyur bas so/ /de skad du yang / 'phags pa dam pa'i chos pad ma dkar po las/ rdul bral byang chub khyad par can reg nas/ /gal te nga yis theg pa dman pa la/ /sems can 'ga' zhig bkod par gyur na yang //nga la ser sna'i nyes 'gyur legs ma yin/ /zhes gsungs so/ /'phags pa bden pa'i le'u las kyang / 'jam dpal sangs rgyas kyi zhing de ni theg pa gcig gis nges par 'byung ba'i phyir theg pa'i snying po dang ldan par 'gyur ro/ / nga la ni nyan thos dang rang sangs rgyas kyi theg pa rnam par 'jog pa med do/ /de ci'i phyir zhe na/ de bzhin gshegs pa ni 'du shes tha dad pa dang bral ba'i phyir ro/ /'jam dpal gal te de bzhin gshegs pas kha cig la ni theg pa chen po ston par 'gyur la/ kha cig la ni rang sangs rgyas kyi theg pa/kha cig la ni nyan thos kyi theg pa ston par 'gyur na/ de bzhin gshegs pa yongs su ma dag par yang 'gyur zhing / mngon par zhen pa'i nyes par yang 'gyur/ thugs rje chen po nyi tshe bar yang 'gyur la/ 'du shes tha dad par 'gyur chos la slob dpon gyis dpe mkhyud byas par yang 'gyur ro//'jam dpal gzhan yang nga ni sems can rnams la chos gang dang gang ston pa de thams cad byang chub la gzhol ba/ theg pa chen po la 'bab pa/ thams cad mkhyen pa nyid du 'dren par byed pa/ phyogs gcig thob par byed pa ste/'di lta ste/ thams cad mkhyen pa nyid thob par byed pa yin no zhes pa la sogs pa gsungs so/ /byang chub sems dpa'i spyod yul rnam par 'phrul pa las kyang / 'dren pa sems can kun la mnyam pa'i sems/ /nga la tha dad 'du shes nam yang med/ /theg pa dman pa gzhan la ngas bstan na//de ni nga la ser sna'i skyon du 'gyur/ /zhes gsungs so/ /de ltar na mdo sde 'dis bstan par bya ba nges pa'i don ni 'di yin te/ ji ltar kun rdzob dang don dam pa'i bden pa dang / gnas skabs dang mthar thug pa'i dbye ba la ma ltos par theg pa chen po gcig nyid yin zhes pa yang drang ba'i don te/don dam par theg pa med cing / de la brten nas 'gro ba'i gang zag la sogs pa med pa dang / kun rdzob tu gnas skabs kyi lam dang 'bras bu mi 'dra ba'i phyir ro/ /yang theg pa gsum du nges pa yang sngar bstan pa ltar dgongs pa can yin zhing / gzhan yang gnas skabs kyi dbang du byas na/ lha dang tshangs pa'i theg pa la sogs pa du ma nyid du 'gyur ba'i phyir ro/ /du ma nyid du nges pa yang ma yin te/ sngar bstan pa ltar rnam par grol ba'i 'bras bu'i rigs gsum du 'dus shing / de thob byed kyi lam yang gsum du 'dus zhes pa la sogs pa shes par zad do//de'i phyir de rnams las bzlog pa'i don ni nges pa'i don zhes bya'o/ /tshigs su bcad pa'i don ni nyan thos rgyun du zhugs pa mthong bas spang bar bya ba'i nyon mongs pa sa bon dang bcas te spangs zhes pa nas sngar bstan pa ltar dgra bcom pa'i zad pa dang mi skye ba shes pa'i ye shes la sogs pa 'khrul pa yin zhing /de rnams la de ltar 'dzin pa'i blo gzhan yang 'khrul pa'o/ /de'i rgyu mtshan yang de dag gis phyin ci log gi rtsa ba dngos por mngon par zhen pa nyid ma spangs pa'i phyir te/ ji skad du/ dmigs pa dang ni bcas pa'i sems//'gags pa slar yang skye 'gyur te/ /zhes gsungs pa 'am/ sems ni dmigs dang bcas rnams kyi/ /mya ngan 'das pa dka' bar gnas/ /zhes gsungs pa lta bu'o/ /gzhan yang 'phags pa dam pa'i chos pad ma dkar po las/ dge slong ngam dge slong ma gang la la zhig dgra bcom pa nyid du khas 'che zhing /bla na med pa yang dag par rdzogs pa'i byang chub tu smon lam yongs su mi 'dzin par bdag ni sangs rgyas kyi theg pa la re ba med do zhes smra zhing / bdag gi lus kyi mya ngan las 'das pa'i tha ma ni 'di tsam du zad do zhes smras na/ shA ri'i bu mngon pa'i nga rgyal can yin par shes par bya'o zhes gsungs so//yang 'phags pa shes rab kyi pha rol tu phyin pa las kyang / /des dgra bcom pa nyid thob nas yang dag par rdzogs pa'i byang chub don du gnyer na/ skye ba ma mchis pa ji ltar thob par 'gyur lags/ bcom ldan 'das [(]gyis [,]kyis [)]mkhyen bzhin du 'di'i skye ba lung ma bstan lags so zhes pa'i lan du bcom ldan 'das kyis bka' stsal pa/byams pa nga ni las dang nyon mongs pa'i dbang du bsngo ba'i skye ba 'dogs par mi mdzad mod kyi/ 'on kyang 'di'i skye ba bsam gyis mi khyab pa'i mya ngan las 'das par bsngos pa yin par 'dogs par mdzad do zhes gsungs so//'phags pa chos bcu pa las kyang / bcom ldan 'das nyan thos zag pa ma mchis pa srid pa kun tu sbyor ba yang dag par chad pa rnams rigs mchis su lags kyang / ji ltar bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur lags/bcom ldan 'das kyis bka' stsal pa/ rigs kyi bu de'i phyir dpe nyon cig /rigs kyi bu 'di lta ste/ dper na rgyal po rgyal rigs spyi bo nas dbang bskur ba'i bu zhig bzo'i gnas thams cad la slob par 'gyur la/de yang dbang po rtul la dbang po rno ba ma yin pas phyir bslab par bya ba gang yin pa de ni sngar slob/ sngar bslab par bya ba gang yin pa de ni phyis slob par 'gyur na/ rigs kyi bu de ji snyam du sems/ 'on kyang gzhi des/ de rgyal po'i bu ma yin no zhes bya bar brjod dam/bcom ldan 'das de lta ma lags so/ /bde bar gshegs pa de lta ma lags te/ rgyal po'i bu zhes brjod par bgyi lags so/ /bcom ldan 'das kyis bka' stsal pa/ rigs kyi bu de bzhin du byang chub sems dpa' dbang po rtul po rigs dang ldan pa/sngar bsgom pa'i lam gyis nyon mongs pa zad par byed cing / phyis bla na med pa yang dag par rdzogs pa'i byang chub mngon par rdzogs par 'tshang rgya zhes bya ba la sogs pa rgyas par gsungs so/ /gzhan yang lha mo dpal phreng gis zhus pa las kyang /bcom ldan 'das de ltar lags pas dgra bcom pa rnams dang rang sangs rgyas rnams kyang mya ngan las 'das pa'i dbyings dang ring ba lags so/ /bcom ldan 'das dgra bcom pa rnams dang rang sangs rgyas rnams kyis rnam par grol ba la so sor rtog pa'i ye shes kyi mtha' dbugs phyin pa rjes su dran pa bzhi po gang lags pa de dag kyang /bcom ldan 'das dgongs pa can dang / lhag ma dang bcas pa dang / drang ba'i don dang / rnam par phye ste lung bstan par bgyi ba lags so/ /de ci'i slad du zhe na/ bcom ldan 'das 'chi 'pho ni 'di gnyis lags te/gnyis gang zhe na/ rgyun chad pa'i 'chi 'pho dang / yongs su bsngos pa bsam gyis mi khyab pa'i 'chi 'pho lags so/ /bcom ldan 'das de la rgyun chad pa'i 'chi 'pho ni nying mtshams sbyor ba dang bcas pa'i sems can rnams kyi lags so//bcom ldan 'das yongs su bsngo ba bsam gyis mi khyab pa'i 'chi 'pho ni dgra bcom pa rnams dang / rang sangs rgyas rnams dang / byang chub sems dpa' sems dpa' chen po dbang thob pa dang / yid kyi lus rnams lags te/ byang chub kyi snying po la thug gi bar du lags so//bcom ldan 'das de la 'chi 'pho 'di gnyis las rgyun chad pa'i 'chi 'pho'i dbang du bgyis te/ bdag gi skye ba zad do snyam du dgra bcom pa rnams dang / rang sangs rgyas rnams kyi shes pa 'byung ba lags so/ /bcom ldan 'das de ltar lhag ma dang bcas pa'i 'bras bu mngon sum du bgyis pa la brten nas/bdag gis tshangs par spyod pa bstan to snyam du dgra bcom pa rnams dang / rang sangs rgyas rnams kyi shes pa 'byung ba lags so/ /byis pa so so'i skye bo dang / lha dang mir bgyi ba dang bcas pa thams cad dang / slob pa bdun po dag gis nying mtshams sbyor ba dang bcas pa'i nyon mongs pa rnams spangs pa sngon ma bgyis pa de spangs pa la brten nas/bya ba byas so snyam du dgra bcom pa rnams dang / rang sangs rgyas rnams kyi shes pa 'byung ba lags so zhes pa la sogs pa dang / de rnams kyi rgyu mtshan dris pa na/bcom ldan 'das dgra bcom pa rnams dang rang sangs rgyas rnams la yang / nyon mongs pa rnams ma spangs pa dang / skye ba'i nyon mongs pa rnams yongs su ma 'tshal ba yang mchis pa'i slad du'o/ /bcom ldan 'das nyon mongs pa dag ni rnam pa gnyis te/gnas kyi sa'i nyon mongs pa dang / kun nas ldang ba'i nyon mongs pa rnams so/ /bcom ldan 'das gnas kyi sa yang rnam pa bzhi ste/ bzhi gang zhe na/ 'di ltar lta ba gcig la gnas pa'i gnas kyi sa dang / 'dod pa'i 'dod chags la gnas pa'i gnas kyi sa dang /gzugs kyi 'dod chags la gnas pa'i gnas kyis dang / srid pa'i 'dod chags la gnas pa'i gnas kyi sa ste/ bcom ldan 'das gnas kyi sa bzhi po de dag gis nyon mongs pa kun nas ldang ba thams cad bskyed lags so/ /bcom ldan 'das de dag kyang skad cig pa ste/sems kyi skad cig pa dang mtshungs par ldan pa lags so/ /bcom ldan 'das ma rig pa'i gnas kyis thog ma mchis pa'i dus nas mchis pa ni sems dang mi ldan pa lags so/ /bcom ldan 'das gnas kyis bzhi po 'di dag gi nang na stobs che ba gang lags pa de ni/nye ba'i nyon mongs pa thams cad kyi gzhir gyur pa/ ma rig pa'i gnas kyi sa stobs che ba'i grangs sam/ cha 'am bgrang ba 'am dpe 'am rgyur yang mi bzod pa lags so/ /bcom ldan 'das de ltar ma rig pa'i gnas kyi sa ni stobs che ba lags te/ srid pa'i 'dod chags la gnas pa'i sa zhes kyang bgyi'o/ /bcom ldan 'das dper na bdud sdig can ni gzhan 'phrul dbang byed kyi lha'i nang du gtogs kyang / 'di ltar gzugs dang / kha dog dang / gzi brjid dang / stobs dang / 'khor dang / dbang phyug gis gzhan 'phrul dbang byed kyi lha rnams zil gyis gnon to//bcom ldan 'das de bzhin du ma rig pa'i gnas kyi sa srid pa'i 'dod chags la gnas pa'i gnas kyi sa zhes bgyi bas kyang / gnas kyi sa bzhi po 'di dag zil gyis gnon to/ /nye ba'i nyon mongs pa gang gA'i klung gi bye ma las 'das pa snyed kyi rten du gyur pa dang /nyon mongs pa bzhi dang yang yun ring po nas lhan cig gnas pa dang / nyan thos dang rang sangs rgyas kyi shes pas mi brdzi ba dang / de bzhin gshegs pa'i byang chub kyi ye shes kyis gzhom pa lags te/ bcom ldan 'das ma rig pa'i gnas kyi sa ni stobs che ba lags so//bcom ldan 'das dper na len pa'i rkyen gyis zag pa dang bcas pa'i las kyi rgyu las byung ba'i srid pa gsum 'byung ba de bzhin du/ bcom ldan 'das ma rig pa'i gnas kyi rkyen gyis zag pa ma mchis pa'i las kyi rgyu las byung ba'i dgra bcom pa rnams dang /rang sangs rgyas rnams dang / /byang chub sems dpa' dbang thob pa rnams kyi yid kyi lus gsum 'byung ba ste/ bcom ldan 'das ma rig pa'i gnas kyis ni sa gsum po 'di dag tu yid kyi lus gsum po 'di dag 'byung ba dang /zag pa ma mchis pa'i las mngon par 'grub pa'i rten lags so zhes pa la sogs pa rgyas par gsungs nas/ gzhan yang de dag gi dbugs phyung ba bzhi po lhag ma dang bcas pa nyid du gsungs te/ bcom ldan 'das sdug bsngal yongs su 'tshal ba lhag ma dang bcas pa lags so//kun 'byung ba spang bar bya ba lhag ma dang bcas pa lags so/ /sdug bsngal 'gog pa mngon du bgyis pa lhag ma dang bcas pa lags so/ /sdug bsngal 'gog par 'gro ba'i lam bsgoms pa lhag ma dang bcas pa lags so zhes pa la sogs pa rgyas par gsungs pa'i phyir ro//de ltar na nyan thos kyi theg pa la sogs pa bstan pa ci zhe na/ byis pa blo zhen rnams la zhes pa la sogs pa gsungs te/ don ni sngar bstan no/ /theg pa'ang zhes pa ni du ma nyid kyang bstan pa zhes pa'o/ /theg pa med pa su la ston zhe na/'phags pa rnams la zhes pa la sogs pa gsungs te/ gnyis su med pa'i rang rig pa don dam par stong pa nyid ni dam pa'i don te/ chos kyi sku'i ye shes la 'jug pa'i sgo 'am thabs zhes pa'o/ /yang na dam pa'i don ni mthar thug pa'i chos kyi dbyings nyid yin la/snga ma ni de'i sgo 'am thabs zhes pa'o/ /des na gnyis su snang ba la sogs pa'i spros pa dang bral ba 'phags pa so so rang gis rig par bya ba'i don la/ theg pa gsum la sogs pa med ces pa'o/ /de bzhin du bsam gtan dang tshad med pa la sogs pa'i lam gyi khyad par dang /de dag gi 'bras bur gyur pa'i theg pa'i bye brag rnams kyang rnam par rig pa tsam gyi dbu ma don dam pa'i de kho na nyid la yod pa ma yin zhes pa'o/ /blo gros chen po de la 'dod chen pa rnams kyi zhes pa'i don ni gang dag srid pa'i longs spyod 'dod pa'i yon tan gyi bde ba la mngon par chags pa ste/ji skad du/ bin da'i gnas ni nyams dga' bar/ /wa nyid gyur kyang mchog yin gyi/ /go tam yul rnams spangs pa yi/ /thar pa nam yang mi 'tshal lo/ /zhes zer ba lta bu'am/ gzhan yang bsam gtan dang gzugs med kyi srid pa'i bde ba tsam mngon par 'dod pa ste/de dag gi don du bsod nams mngon par 'dus byas pa yang / byang chub sems dpa'i sde snod la skur pa btab pas spangs pa ste/ 'bras bu 'byin par mi nus pa nyid du byas pa'o/ /byang chub sems dpa'i 'dod chen pa ni spyir byang chub sems dpa' rnams kyi skye ba'i tshul rnam pa bzhi ste ji skad du//blo ldan rnams kyi las dang ni/ /gzhan yang smon lam dag dang ni/ /ting nge 'dzin dang dbang 'byor ba'i/ /dbang gis skye bar 'dod pa yin/ /zhes gsungs te/ de la las kyi dbang gis skye ba ni mos pas spyod pa'i sa la gnas pa rnams bsod nams kyi las kyis gang 'dod pa'i gnas su skye ba'o//smon lam gyi dbang gis skye ba ni sa la zhugs pa rnams smon lam gyi stobs kyis sems can yongs su smin par bya ba'i phyir/ dud 'gro la sogs pa'i gnas dman par yang skye ba gang yin pa'o//ting nge 'dzin gyi dbang gis skye ba ni bsam gtan bsgom yang de'i dbang gis bsam gtan gyi lha'i skye ba mi 'dzin par sems can gyi don du 'dod pa'i khams su skye ba'o/ /dbang 'byor pa'i dbang gis skye ba ni sprul pa dag gis dga' ldan gyi gnas la sogs par skye ba kun du ston pa gang yin pa'o//de la 'dir ni srid par smon lam dang thabs sngon du btang bas zhes pas te/ smon lam gyi skye ba la sogs pa gsum po rnams dang sbyar bar bya'o/ /de yang sems can gyi don du srid par skye ba nyid du smon lam btab pa dang /bden pa gnyis kyi thabs la mkhas pas bsam gtan bsgom yang / don dam par de dag gi yul dang / bde ba'i ro la mi chags te/ stong pa nyid du rtogs pa dang / 'dod pa'i khams su skyes kyang de dag gi rang bzhin stong par rtogs pas 'dod pa'i 'dod chags kyis mi gos shing kun rdzob tu snang ba dang bcas pa'i blos de dag gi don byed pa ste/'di'i don ni sngar bstan no/ /gzhan yang thabs la mkhas pa gdul bya ji ltar 'dul bar 'gyur ba'i skur sprul nas kyang sems can gyi don byed ces pa'o/ /rang gi mtshan nyid ni mtshan nyid dang / ldan pa'i dngos po'o/ /de nyid kyi phyir de'i tshul rab tu thob pa ste/ /de'i chos dang ldan pa'o/ /de la byang chub sems dpa'i 'dod chen po ni don dam par chos thams cad thog ma nas mya ngan las 'das par shes shing / /gzod mya ngan las 'da' bar bya ba la sogs pa'i chos ma mthong nas shin du mya ngan las mi 'da' zhing /kun rdzob tu yang sems can gyi don la mngon par zhen pas mya ngan las mi 'da' zhes pa'o/ /gal te de lta na sems can gyi don ni/ sangs rgyas nas chos kyi sku'i ye shes spros pa dang bral ba mngon du byas pa de lta na yang / rjes thob la gzugs sku gnyis su snang ba la sogs pas byed par ji ste mi 'gyur zhe na/bden mod kyi sems can gyi don la mngon par zhen pas sprul pa 'ba' zhig gis dman pa rnams kyi don byas kyang yid ches par mi 'gyur bas de dang de dag tu skye ba len pa'am/ gzhan yang rung ste dngos su rang nyid kyis don byed par 'gyur ba'o//brgya la gal te na zhes pa la sogs pa'i don ni/ de dag la yang de bzhin gshegs pa'i snying po kun gzhi rnam par shes pa'i bdag nyid yod cing / de la dge ba'i rtsa ba'i sa bon yod pa cung zad sad pa'i dus la bab pa dang / de bzhin gshegs pa'i thugs rje la sogs pa'i byin gyi rlabs tshogs pas/de'i dri ma sbyong bar 'gyur ba'o/ /skabs kyi don 'di rnams kyis kyang sngar gyi dri ba ji ltar theg pa gsum du 'gyur/ rigs dang rigs med ji ltar cis/ /'dod chen por yang ji ltar 'gyur/ /ma skyes pa dang ma 'gags pa//ji ltar nam mkha'i me tog 'dra/ /zhes pa'i lan du sbyar bar bya ste/ /spyir shes par bya ba'i tshul du gtan la phab pa'o/ /gzhan yang blo gros chen po zhes pa la sogs pas/ bdag med pa dang chos lnga dang / /rang bzhin rtogs dang brtag pa dang / /zhes pa la sogs pa dris pa'i lan du/shes par bya ba'i gnas theg pa chen po'i don bsdus pa snga ma las tshul gzhan du gyur pa nyid ston te/ de la sngar bstan pa ltar rtog pa'i gzung bar gyur pa'i kun brtags pa/ rtogs pa'i blo nyid du gyur pa'i bdag nyid ni gzhan gyi dbang gi mtshan ma las byung ba'o//gal te brtags pa ni dngos po med pa'i phyir/ ji ltar mtshan ma las 'byung zhe na/ 'di ltar kun brtags pa de 'dra ba ni rnam grangs kyis gzhan gyi dbang nyid du yang 'gyur bas 'gal ba med ces pa'o/ /de las gzhan gyi dbang ni dngos po'i mtshan ma'i mtshan nyid du snang ba'am zhen pa blo'i ngo bor gyur pa'o//de ltar zhen pa yang rnam pa gnyis su 'gyur te/ zhen pa'i yul dang / blo'i bdag nyid do/ yul ni kun brtags pa 'ba' zhig ste/ de yang sangs rgyas rnams kyis/ 'di ni gzugs so zhes pa la sogs pa ming la mngon par zhen pa'i mtshan nyid dang /de 'dra ba'i brda mi shes pa rnams kyis kyang / gzugs la sogs pa'i don spyi'i dngos po'i mtshan ma la mngon par zhen pa'i mtshan nyid kyi sgo nas kun brtags pa'i rang bzhin gnyis dang /da ltar rtog cing zhen pa'i gzhan gyi dbang ste/ de ltar rnam pa gnyis su 'jog ces sbyar bar bya'o/ /nang dang phyi'i chos ni phyi dang nang gi skye mched rnams so/ /yongs su shes shing khong du chud zhes pa yang zhen pa dang bcas pa'i blos spyi'i tshul du sgro 'dogs pa'o//gal te de lta na dngos po'i mtshan ma la mngon par zhen pa'i mtshan nyid dang mtshan ma'i mtshan nyid la mngon par zhen pa gnyis tshul tha dad pas de'i dbye ba nyid du mi 'thad do zhe na/ skyon med de/ ji ltar shing dang sha pa mtshan nyid mi 'dra yang / sha pa shing gi bdag nyid du gyur pa'i khyad par yin pas de'i dbye bar 'thad pa bzhin du/dngos po'i mtshan ma la mngon par zhen pa yang mtshan ma'i mtshan nyid la mngon par zhan pas khyab cing de'i bdag nyid yin pas de'i dbye bar bstan pa'o/ /gal te ba lang gi mtshan nyid khong du ma chud cing mngon par zhen pa med pas kyang ba lang gi dngos po'i mtshan ma la mngon par zhen pa bzhin du/nang dang phyi'i chos rnams kyi mtshan ma'i mtshan nyid khong du ma chud cing mngon par zhen pa med kyang / chos de dag gi mtshan ma la mngon par zhen pas de ltar zhen pa ni mtshan ma'i mtshan nyid la mngon par zhen pas khyab cing /de'i bdag nyid du gyur pa'i khyad par du mi 'thad do zhe na/ skyon med de/ mtshan ma'i mtshan nyid kyi tha snyad ma thogs pa de lta na yang don ni ji lta ba bzhin du mngon par zhen cing khong du chud pa ste/ ji ltar blun pos ba lang gi dngos po'i mtshan nyid mngon par zhen cing khong du chud pa na/lkog shal la sogs pa dang ldan pa de'i mtshan nyid kyi tha snyad ma thogs shing mngon par zhen pa med kyang / de 'dra ba'i don khong du chud cing mngon par zhen pa bzhin no/ /de bzhin du ming la mngon par zhen pa yang ming don dang sbyar nas mngon par zhen gyi/don dang ma 'brel ba'i ming du mngon par zhen pa mi 'thad pas mtshan ma'i mtshan nyid la mngon par zhen pa'i dbye bar 'thad pa'o/ /blo gros chen po de ni zhes pa mtshan ma'i mtshan nyid la mngon par zhen pa'i bdag nyid du gyur pa ming dang dngos po'i mtshan ma la mngon par zhen pa'i yul de ni sngar bstan pa ltar kun brtags pa'i rang bzhin gyis mtshan nyid gnyis so//de 'dra ba'i kun brtags ni mtshan nyid yongs su chud pa kun brtags pa 'ba' zhig yin pas mtshan ma las skye ba mi 'thad la/ /mtshan ma las skye ba ni sngar bstan pa ltar rnam grangs kyi kun brtags pa'o//rnam pa gcig tu na de ni zhes pa'i don dngos po'i mtshan ma la mngon par zhen pa ste/ /kun brtags pa'i rang bzhin gyi mtshan nyid sngar bstan pa las gnyis pa'o zhes pa ste grangs gnyis pa'o/ /de la gnas shing dmigs pa las byung zhes pa ni rnam grangs kyi kun brtags rtog pa'i gzung ba de la gnas shing dmigs pa'i blo snga ma las byung ba ste/de ltar snang ba'i blo phyi ma gzhan gyi dbang gi bdag nyid do/ /yongs su grub pa'i mtshan nyid ni/ 'phags pa so so rang gis rig pa'i ye shes kyi spyod yul te/ye shes rang gi rang bzhin du gyur pa'i chos nyid 'gyur ba med pa'i yongs su grub pa dang / de ltar rtog pa'i rigs pa'i cha phyin ci log pa'i yongs su grub pa ste/ ji ltar rnam par gzhag pa de ltar bden cing grub pas yongs su grub pa zhes bya'o//gzhan yang 'dir rnam par rig pa tsam gyi dbu ma'i dbang du byas na kun du rtog pa 'am gzhan yang rung ste/ sems nyid rig pa rang gi rigs snga ma la rag las te/ byung ba sgyu ma lta bu ni gzhan gyi dbang yin la/ de nyid la yod pa dang med pa la sogs pa'i chos su rnam par rtog pa'i blos sgro btags shing zhen par byas pa'i don ni kun du brtags pa nyid yin zhing /de ltar zhen cing sgro btags pa'i don gyis stong pa'i gzhan dbang rigs pa dang stong pa zung du 'jug pa ni yongs su grub pa ste/ dbyings dang ye shes kyi ldog pas go rims bzhin du 'gyur ba med pa dang /phyin ci ma log pa'i yongs su grub pa zhes dbus dang mtha' rnam par 'byed pa las gsungs pa lta bu'o/ /gzhan gyi dbang yang ma dag pa dang rnam par dag pa ste/ kun nas nyon mongs pa dang rnam par byang bas bsdus pa rnam pa gnyis su 'gyur ro//kun brtags pa ni snga ma ltar mtshan nyid yongs su chad pa dang / rnam grangs dang ltos pa'i kun brtags te/ ji skad du/ yod pa'i zla la ltos nas 'di ni med pa 'ba' zhig go zhes pa 'am/ ring ba dang thung ba la sogs pa phan tshun ltos pa'i dbang gis blos sgro btags pa ste/mtshan nyid cha dang rnam grangs dang / /ltos pa'i kun brtags rnam pa gsum/ /zhes gsungs pa lta bu'o/ /rang bzhin gsum po de rnams kyis kyang chos lnga bsdus pa nyid du tshigs su bcad pa'i sgo nas ston te/ de la ming dang rgyu mtshan dang / rnam par rtog pa ni kun du brtags pa dang /gzhan gyi dbang gi rang bzhin gyis bsdus te/ de yang mtshan mar rnam par rtog pa'i gzung ba ni de ltar rtogs pa'i blo'i bdag nyid yin pas gzhan gyi dbang gis kyang bsdus la/ rnam grangs kyis na phyin ci log tu sgro 'dogs pa'i gzhi yin pas kun du brtags pa zhes kyang bya'o//ming du snang ba ni sngar bstan pa ltar 'di bum pa zhes don dang 'brel pa'i bdag nyid kho nar zhen gyi/ de 'dra ba'i khyad par gyi chos su zhen pa med par spyi rnam par snang ba mi 'thad pas kun du brtags pa 'ba' zhig go/ /yang dag pa'i ye shes dang / de bzhin nyid ni sngar bstan pa ltar yongs su grub pa gnyis kyis bsdus pa'o//de ltar chos kyi bye brag sna tshogs su rnam par gzhag pa yang / sems can las tha dad pa med pas 'phags pa so so rang gis rig pa'i spyod yul zhes pa'o/ /rang bzhin gsum po nyid kyang bdag med pa gnyis kyis bsdus la/de la gang zag gi bdag med pa shes pa ni kun nas nyon mongs pa'i chos sdug bsngal dang kun 'byung gi bden pas bsdus pa rnams mi rtag pa dang / sdug bsngal ba la sogs par shes shing / phyi rol pas brtags pa'i rtag pa dang / bdag dang /gtsang ba la sogs pas dben par shes par bya'o/ /'dir rnam par byang ba'i phyogs kyang phyi rol pas brtags pa'i bdag la sogs pas dben pa yin mod kyi/ de mi gtsang ba dang sdug bsngal la sogs pa thog ma nyid du yid 'byung ba'i gnas ma yin pas de dag shes pa ni gang zag la bdag med par shes pa'i khyad par nyid du ma gsungs pa'o//'dir tshig gi don ni ming dang gzugs la sogs pa gzung ba dang 'dzin pa'i dngos po la mngon par zhen pa'i bag chags la sogs pa'i stobs kyis dbang po thams cad las rnam par shes pa 'byung ba ni shes par byed de zhes 'og tu sbyar bar bya'o//gang zhig rnam par shes par byed ce na/ 'di lta ste zhes pa la sogs pa gsungs so/ /ji ltar shes par byed ce na/ phung po la sogs pa ri gzar gyi chu 'bab pa dang / sa bon gyi skad cig 'gag par 'gyur ba dang zhes pa la sogs pa ste shes par zad do//g.yo ba spre'u dang 'dra zhes pa ste/ rgyun mi brten pa'am rnam shes yul la g.yo ba'o/ /sbrang ma lta bur rang nyid mi gtsang zhing yul mi gtsang ba la spyod pa ste/ mi gtsang ba'i rdzas sum cu rtsa gnyis kyis gang ba la sogs par gsungs pa lta bu'o//mgon med pa ste bsod nams kyi snang ba las ma gtogs pa dbang phyug lta bu'i skyabs kyi gnas med pa ste/ 'dis kyang 'gro ba sdug bsngal ba nyid du bstan to/ /me 'bar ba ltar yul la 'dod pa mched cing chog mi shes pa 'am/ de'i reg bya la zhen cing chog mi shes pa dang mtshungs zhes pa'o//zo chun ltar 'khor ba nyid gsal bar bshad pa ni/ srid pa'i 'gro ba zhes pa la sogs pa'o/ /de 'dra ba'i lus 'byung zhing 'jug pa la rang dbang thob pa'i sems yod dam zhe na/ sgyu ma dang ro langs dang / shing gi 'khrul 'khor dang 'dra bar de kho na nyid du dbang bsgyur ba'i sems med ces pa'o/ /nyan thos la sogs pa'i rigs can gyis de 'dra ba'i gang zag la bdag med pa shes pa ni thog ma nyid du 'khor ba la yid byung nas mya ngan las 'das pa'i lam la 'jug par 'gyur ba'i dgongs pa dang ldan pa'o//de ltar rtogs pas kyang rim gyis chos la bdag med pa rtogs pa ste/ phung po 'dus pa tsam zhes pa ming dang gzugs 'dus pa ste/ zag pa dang bcas pa'i las kyi sa bon sred pa'i brlan gyis btsas pa'i srad bu lta bus de rnams bsdus shing sbrel ba/mdung khyim ltar phan tshun rkyen du gyur pas g.yo ba med par 'byung zhes pa ni ji srid gnas ma gyur gyi bar du rgyun nyams pa med pa'o/ /byang chub sems dpa' sems dpa' chen po zhes pa la sogs pas de ltar rtogs pa'i phan yon 'chad de/snang ba med par rab tu rtogs pa ni bzod pa dang 'jig rten chos kyi mchog gi gnas skabs na gzung ba dang 'dzin pa'i snang bas med par rtogs pa'o/ /sgyu ma'i rang bzhin gyi spyod yul rab tu 'byed pa ni sgyu ma lta bur rtogs pa'i shes rab dang ting nge 'dzin mthar thug pas sangs rgyas rnams kyis dbang bskur bar snang ba 'byung zhes pa'o//gzhan ni shes par zad do/ /de nas yang bcom ldan 'das la zhes pa la sogs pas/ /ji ltar rtag dang chad pa yi/ /lta ba rab tu 'byung mi 'gyur/ /zhes pa'am/ gnyis kyi mtha' brjod ji lta bur//zhes dris pa'i lan tshul gzhan gyi sgo nas gsungs te/ khyod kyi sangs rgyas kyi tshul zhes pa ni sangs rgyas kyi rang bzhin mtha' gnyis spangs pa'i dbu ma'i don to/ /de 'dra ba'i bdag nyid kyi sems nyid rig pa tsam la mtha' gnyis su brtags pa'i don yod pa ma yin la/gang dag lus la sogs par snang ba'i sems kun gzhi'i bdag nyid du gyur pa mi shes pa ni mtha' gnyis la spyod ces bya'o/ /mi dmigs par rab tu 'byed pa med pa ni sgro 'dogs kyi lta ba ngan pa'i yul rigs pa dam pa'i don med cing mi dmigs so zhes rtogs pa'i shes rab med pas snang tshod tsam du yang med do zhes skur pa'i mthar 'gyur ba'o//med pa'i mtshan nyid la sgro 'dogs pa ni chos kyi bdag tu sgro 'dogs pa'o/ /med pa'i lta bar sgro 'dogs pa ni gang zag gi bdag tu sgro 'dogs pa'o/ /med pa'i rgyur sgro 'dogs pa ni 'dus byas kyi chos su sgro 'dogs pa ste/med pa'i mtshan nyid la sgro 'dogs pa'i khyad par ro/ /sgyu ma lta bur zhes pa ni don de ltar yin zhes pa ste/ /sgro 'dogs kyi blo'i rnam par ni ma yin pa'o/ /dran pa ni sngar mthong ba dran pas da ltar yang mthong bar 'dod pa yid kyis 'jug pa'o//med pa'i dngos por sgro 'dogs pa ni 'dus ma byas su sgro 'dogs pa'o/ /kun du brtags pa ni rnga mo'i rwa la sogs pa bzhin du med pas de rnams dper byed pa'o/ /rnga mo'i rwa la sogs par snang ba ni blo'i ngo bor yod pas med pa'i phyogs dang bral ba'o/ /yang na med pa'i mtshan mar bzung ba de ni bden pas med pa'i phyogs dang bral ba'o//blo gros chen po gzhan yang zhes pa la sogs pas mtha' gnyis su lta ba dang bral zhing bdag med pa rtogs pa la sogs pa'i phan yon ston te/ gzhan gyi dbang la gnas pa zhes pa la sogs pa'i don ni rnam par rig pa tsam gyi gzhan dbang sgyu ma lta bu la rnam par gnas nas/rnam grangs kyi kun du brtags pa sna tshogs su snang ba ltar/ sna tshogs kyi gzugs su ston cing yid bzhin gyi nor bu ltar rtogs pa med par sems can rnams kyi dgos 'dod sgrub pa'o//thams cad dang zhes pa ni sgyu ma lta bu la sogs par bstan pa'i chos thams cad do/ /skye ba dang zhes pa la sogs pa'i don ni smon lam la sogs pa'i dbang gis skye gnas gang du skyes pa de dag dang / 'gro ba'i gnas kyi bye brag la sogs pa de dag du dkon mchog gsum gyi legs pa brjod pa'o//de'i tshe tshogs su gyur pa'i sku/ /gzas shing byed pa kun spangs pa/ /zhes pa'i don ni dam par phung po lnga 'dus pa'am/ rdul phra rab 'dus pa'i rang bzhin gyi sku/ 'di dang 'di ltar bya'o zhes rnam par rtog pa sngon du btong nas/sems can gyi don byed pa spangs pa'o/ /de ltar mtha' gnyis su rnam par lta ba bkag nas/ ci slad ji ltar stong pa nyid/ /ces pa la sogs pa dris pa'i lan du stong pa nyid kyi rnam grangs dang rang bzhin gsungs pa ni/ de nas yang bcom ldan 'das la zhes pa la sogs pas so//de'i don yang stong pa nyid dang mi skye ba la zhes pa la sogs pa ni yod pa dang med pa'i mtha' dang bral ba zung du 'jug pa sgyu ma lta bu'i bdag nyid de/ de yang gang dang gang gis stong pa dgag bya'i rang bzhin ni kun du brtags pa ste/sgyu ma lta bu'i gzhan dbang la/ yod pa dang med pa la sogs pa'i chos don dam par kun brtags pas stong pa'o/ /de la med pa'i mthar 'dzin pa gang dag de 'dra ba'i kun brtags pa la mngon par zhen pas stong pa nyid la sogs pa'i dngos por smra ba ste/ gzung ba dang 'dzin pa'i dngos pos stong pa'i bdag rtag pa'am/ rig pa skad cig ma'i dngos po la sogs pa smra ba'o/ /dngos po med pa dang rang bzhin med pa zhes pa yang dngos po nyid khas blangs nas dngos po'i phyi'i phyogs gzhan gyis stong pas te/ nyi tshe ba'i stong pa'o/ /rnam pa gcig du na 'di rnams kyi don ni/stong pa dang med pa la sogs pa'i mtshan mar rnam par rtog pa la snang ba la med pa'i rang bzhin bden pa'i don nyid du sgro 'dogs pa'o/ /de bzhin du dngos po yod par kun brtags pa yang stong zhes bya'o/ /gzhan yang 'di rnams kyi don ni byis pa'i skye bo kun brtags pa'i rang bzhin la mngon par zhen pas/de'i gnyen por stong pa la sogs pa'i dngos por smra ba yin zhes pa ste/ don dam pa'i dngos pos stong pa sgyu ma lta bu'i dngos por de bzhin gshegs pas gsungs zhes pa'o/ /'dus pa phan tshun ltos pa dang / rab tu dbye ba'i khyad par med pa'i phyir zhes pa ni ming dang gzugs la sogs pa 'dus pa'am/ rdul phra rab la sogs pa 'dus pa ni 'dus pa can rab tu dbye ba'i khyad par las logs shig na med na/ rab tu dbye ba'i khyad par rnams kyang cha shas su phye ba na yod pa ma yin te/ gzugs ni rdul phran gzhig pa na/ /rdul phran cha ni yod ma yin/ /zhes pa'am/ skad cig gsum gyi rang bzhin gyis/ /'jig rten skad cig la mi gnas/ /zhes gsungs pa lta bu'o/ /phan tshun ltos pa yang rgyu dang 'bras bu'i khyad par te/ dgag pa'i tshul rgyas par bstan zin to//de nyid kyi phyir rgyas par phung po lnga'i rgyun rgyud 'ga' zhig ni bdag yin pa dang / 'ga' zhig ni de la ltos pa'i pha rol gzhan nyid ces pa la sogs pa mi 'thad pa'i phyir mtshan nyid gnas pa med ces pa'o/ de la 'dir gtan tshigs 'og ma ni snga ma'i khyab pa sgrub pa'i yan yag du sbyar ba 'am/rang rgyud pa nyid yin pa la yang 'gal ba med do/ /rang dang rang bzhin gyi dngos po skye ba med pa'i phyir zhes pa ni rang bzhin gyis dngos po med ces pa dang / rang bzhin gyis skye ba med ces pa ste/ de la rang bzhin smos pa ni dngos po'am skye ba'i khyad par gzhan bkag pa ma yin gyi/rang rang gi rang bzhin bden pa'i dngos por yod pa'am skye ba'i ngo bor grub pa bkag pa'o/ /rnam pa gcig tu na rang dang rang zhes bzlog pa'i sgra'i sbyor bas dngos po skye ba'i khyad par du ma mtshon pa ste/ de rnams thams cad med ces pa'o/ / 'dir khyab pa'i don ni de 'dra ba'i skye ba bkag pa na ma skyes pa'i bdag nyid du yod pa ni shin tu yang mi 'thad pas thams cad dngos po'i rang bzhin gyis stong pa'o/ /srid pa'i stong pa nyid ni sgyu ma lta bu'i gzhan dbang gang zag gi bdag dang bdag gi bas stong pa ste/ sgyu ma tsam du srid pas srid pa'i stong pa nyid ces bya'o//de la rgyu ni kun gzhi rnam par shes pa'o/ /rigs pa ni bya ba byed pa dang ltos pa ste/ ji ltar me dang shing gi tshogs pa ni du ba skyed pa'i bya ba byed par rigs kyi gzhan du ma yin zhes pa dang / du ba yang me dang shing gi tshogs pa la ltos par rigs kyi gzhan du ma yin zhes dngos po'i rang bzhin de ltar gnas pas 'ga' zhig las 'ga' zhig nyid skye bar 'thad pa'o//byed pa dang las ni sems pa'i las dang / lus ngag gi las so/ /'byor pa ni de rnams tshogs shing 'phrod pa 'du ba las kun rdzob tsam du skye bar snang ba'o//gang du rgyu dang ldan pa'o zhes gzhung 'don par byed pa'i skabs su ni rgyu dang 'brel pa ste/ tshig gi don rtogs par sla'o/ /phung po rnams la zhes pa ni sngar gyi zag pa bcas pa'i phung po la/ mya ngan las 'das pa mi srid ces pa ste/ snga na med pa'i khyad par ro/'dir 'khor ba dang mya ngan las 'das par gcig pa nyid du bstan pa ni rang bzhin gyis mya ngan las 'das pa'i dbang du byas pas skyon med do/ /chos thams cad brjod du med ces pa ni 'di dag thams cad ming tsam ste zhes pa dang tshig brgya rtsa brgyad la sogs pa gsungs pas thams cad brjod pa'i dngos por zhen pa'am gzhan yang brjod pa nyid brjod bya'i rang bzhin du zhen pa na/de ni kun brtags pa'i rang bzhin yin pas de 'dra ba'i bdag nyid kyis stong pa'o/ /lta ba dang nyes pa'i bag chags thams cad kyis stong pa ni 'jig tshogs la lta ba la sogs pa dang //de las gzhan sgrib pa gnyis kyi bag chags glo bur gyi dri mas kun rdzob tsam du yang stong pa 'am/ gcig gis gcig stong pa ni phan tshun bdag nyid dam rten du gyur pa'i tshul gyis stong pa ste/ shes par sla'o/ /stong pa nyid 'di ni kun gyi tha shal te/ de ni khyod kyis yongs su spang bar bya'o zhes pa'o zhes pa'i don ni de 'dra ba'i stong pa nyid ni byis pa'i skye bo thams cad kyis rtogs shing goms kyang kun nas nyon mongs pa'i phyogs spong zhing /skyes bu la nye bar mkho ba'i don thob pa la mi phan pas de 'dra ba gtan la phab pa ni dgos pa med ces pa'o//gal te de ltar na mi srid pa'i stong pa nyid kyang phyi rol pa rnams kyi 'dod pa'i stong pa nyid bzhi ste/ snga na med pa dang / zhig nas med pa dang / gcig la gcig med pa dang gtan nas med pa bshad pa las/ snga na med pa'i khyad par nyi tshe ba'i stong pa nyid yin te de 'dre ba gtan la phab pa la yang dgos pa med do zhe na/skyon med de/ de 'dra ba nyi tshe ba'i stong ba'i khyad par bstan pas byis pa'i skye bo rnams zag pa dang bcas pa'i phung po la/ mya ngan las 'das pa zhi ba dang bsal bar gnas pa'i bde ba med do zhes skyo zhing yid byung bas de spangs pa'i mya ngan las 'das pa'i lam la 'jug par 'gyur ba la sogs pa dang gzhan yang mya ngan las 'das pa sngar nas yod pa'i rtag pa ther zug pa'i dngos por phyin ci log spong ba'o//gal te gzugs la sogs pa'i dngos po yang grub mtha' phyin ci log gis bslang ba kha cig gtso bo'i rang bzhin du gcig pa'am/spyi'i sgo nas gcig pa nyid du phyin ci log pa ma yin nam/ des na de dag phan tshun stong par bstan pas de 'dra ba'i phyin ci log bsal ba'i dgos pa yod do zhe na/ ma yin te/ de dag gis kyang gzugs la sogs pa'i gnas skabs dang / bsal ba'i bye brag phan tshun gcig gis gcig stong pa nyid kyi don rtogs pa 'ba' zhig tu zad do/ /gzhan yang de 'dra ba'i stong par rtogs pa dang / de ltar ma rtogs shing gcig tu 'dzin pa ni 'ching ba'i rgyu nyid du mtshungs pas gcig tu 'dzin pa bkag nas tha dad pa'i dngos por bstan pa la dgos pa cung zad kyang med ces pa'o//gzhan yang blo gros chen po zhes pa la sogs pas de nyid kyi rnam grangs mi ston te/ de'i don yang ting nge 'dzin gyi gnas 'gog pa'i snyoms par 'jug pa la sogs pa'i dus na 'jug pa'i rnam par shes pa rnams kun rdzob tu yang mi skye la/de las gzhan pa'i gnas skabs su rnam par shes pa dang ye shes rnams don dam par rgyu med par rang 'byung ba'i tshul du yang mi skye la/ yang zhes pas bsdus pa bdag dang gzhan dang gnyis ka las kyang mi skye zhing / kun rdzob tu sgyu ma lta bur rgyu rkyen gzhan gyi dbang gis skye bas mi skye ba yang ma yin zhes pa ste/de'i phyir mi skye ba'i don yang zung 'jug sgyu ma lta bu 'ba' zhig go/ /de'i phyir zhes pa ni zung du 'jug pa'i don de ltar yin pas don dam par ma skyes pa la sogs pa la dgongs te/ dngos po thams cad rang bzhin med par bstan zhes pa'o//don dam pa rang bzhin med pa'i rgyu mtshan yang gzhan dbang skad cig ma'i rgyun rgyud ni skad cig ma'i bkod pa yin pas bkod pa tsam gyi skad cig las logs na med la/ skad cig gcig pa nyid kyang sngar bstan pa ltar med pa dang / yang gzhan gyi dbang gi dngos por ni gzhan du 'gyur bar snang ba'i phyir chos thams cad rang bzhin med zhes pa ste/'dir khyab pa'i don ni sngar bstan pa ltar gzhan du 'gyur bar snang ba ni de las gzhan rtag pa 'gyur ba med pa'i dngos por mi 'thad la/ gzhan du 'gyur ba'i dngos por bden pa yang 'gal te/sngar gyi bdag nyid de nyid ma spangs par gzhan du 'gyur na ni dus gcig tu dngos po gcig nyid ldog par gzhan la ma ltos par de nyid dang gzhan yin pa mi 'gal ba nyid du 'gyur ro/ /gal te sngar gyi rang bzhin de nyid spangs nas gzhan du 'gyur na ni/snga ma bdag nyid thams cad kyis 'gags la/ phyi ma la glo bur ba gzhan skyes pas snga ma de nyid gzhan du 'gyur ba ma yin te/ ji ltar lha sbyin shi nas mchod sbyin skyes pas ni lha sbyin du gyur pa ma yin pa bzhin no/ /skabs kyi don 'di yang sngar yod med skye 'gag gi skabs su yod pa dang med pa ni gcig la rim gyis kyang 'gal lo zhes bstan pa dang mtshungs te/bsams pas go bar zad do/ /slob dpon gyis kyang / /rang bzhin gzhan du 'gyur ba ni/ /nam yang 'thad pa ma yin te/ /zhes pa la sogs pa gsungs so/ / gnyis su med pa'i don yang 'khor ba dang mya ngan las 'das pa ltar/ don dam par gnyis kyi dngos por ma grub la/ kun rdzob du gnyis su snang ba tha dad pa ste/ sgyu ma lta bu'i don 'ba' zhig bstan pa'o/ /grib ma dang nyi ma la sogs pa'i dpe gzhan yang de bzhin du sbyar bar bya'o/ / gal te 'khor ba dang mya ngan las 'das pa kun rdzob [(]du [,]tu [)]ji ltar tha dad ce na/ blo gros chen po zhes pa la sogs pa gsungs pa ste/ don go bar zad do/ /rtag tu stong pa nyid bshad kyang / /las ni rnam par mi 'jig go/ /zhes pa'i don ni don dam par stong nyid rang bzhin gyis mya ngan las 'das par bstan kyang kun rdzob du zab pa dang bcas pa'i las dang /de'i 'bras bu zag pa dang bcas pa'i phung po 'khor ba'i rang bzhin yod ces pa'o/ /de lta na yang byis pa'i skye bo 'ga' zhig de dag stong par bstan pa la brten nas med pa'i mthar rtog pa'o/ /yang la la dag rang bzhin gyis mya ngan las 'das pa dang /nam mkha' dang so sor brtags par 'gog pa ste gnyen po'i stobs kyis spang bya spangs pa dang / brtags min gyi 'gog pa ste/ skye bar 'gyur rgyu'i chos ma skyed pa rnams 'dus ma byas pa'i rdzas dngos po'i rang bzhin nyid du rtog la/ 'phags pa de de dag gis mthar rtog pa spangs pa'o//de nas yang zhes pa la sogs pas skabs kyi don de nyid gsung rab dag las stong pa nyid la sogs pa don dam pa'i rnam grangs bstan pa thams cad la sbyar bar bya zhes pa'o/ /de ltar bden pa gnyis su rnam par phye ba las/ don dam pa'i dbang du byas te/stong pa nyid la sogs par bstan pa ma yin pa spyir stong pa nyid la sogs par bstan pa dang / theg pa chung ngu'i gsung rab dag las kun rdzob kyi dbang du byas te/ yod pa dang skye ba la sogs par bstan pa ma yin pa spyir phung po la sogs pa yod pa dang skye ba la sogs par bstan pa ni/sems can gyi bsam pa la ltos nas bstan pa don 'khrul pa yin te/ kun rdzob tu gzhan gyi dbang gi ngo bor grub pa dang / don dam par grub pa med pa'i phyir/ bden pa gnyis kyi rnam par dbye ba la ma ltos par yod pa dang med pa 'ba' zhig gi mthar rtog pa ni mi bden zhes pa'o//gzhan yang phung po la sogs pa kun rdzob pa'i dngos por yang stong zhes pa dang / yang don dam pa'i dngos por yang yod do zhes pa la sogs par bstan pa ni shin du yang drang ba'i don 'khrul pa zhes bya'o/ /de ltar na nges pa'i don ni sngar bstan pa ltar zung du 'jug pa'i dbu ma gzhan gyi dbang gis bsdus pa'i chos rnams//kun rdzob tu ni thams cad yod/ /dam pa'i don du yod ma yin/ /zhes bstan pa 'ba' zhig go/ /snga ma ltar bstan pa rnams ni 'phags pa'i ye shes kyi yul don dam pa'i de kho na nyid rnam par dgod pa'i gtam ma yin zhes pa'o//de lta bas na 'phags pa blo gros mi zad pa'i mdo las/ rton pa rnam pa bzhis gsungs te/ ji skad du/ nges pa'i don la rton gyi drang ba'i don la mi rton ces pa dang / ye shes la rton gyi rnam par shes pa la mi rton pa dang chos la rton gyi gang zag la mi rton pa dang /don la rton gyi tshig 'bru la mi rton par bya'o zhes gsungs pa'i rjes su 'brang bar bya'o/ /de nas byang chub sems dpa' zhes pa la sogs pas sngar bstan pa ltar shes bya thams cad sems su 'dus shing / sems kyi chos nyid kyang stong pa nyid kyi rnam grangs de bzhin gshegs pa'i snying por bstan pas gzhan dag gi log par rtog pa sel bar mdzad de/de'i don ni bcom ldan 'das kyis de bzhin gshegs pa'i snying po bstan pa dang / mya ngan las 'das pa'i mdo la sogs pa las de bzhin gshegs pa'i snying po spros pa dang bral zhing rang bzhin gyis 'od gsal ba glo bur gyi dri ma rnam par dag pa dang /thog ma nas rnam par dag pa ste rang bzhin gyis kyang dag pa gdul bya la mtshan sum cu rtsa gnyis la sogs par ston par nus pa/ sems can thams cad kyi lus kyi nang na mchis par brjod de/phung po la sogs pa ni 'bras bur gyur pa sdug bsngal gyi bden pas bsdus pa'o/ /'dod chags la sogs pa ni kun 'byung ba las dang nyon mongs pa'o/ /yongs su rtog pa ni shes bya'i sgrib pa'o/ /rtag pa dang bdag la sogs pa'i dngos por gsungs te/ji skad du chu bo dga' skyed kyi drung du kun tu rgyu lnga brgya rjes su gzung ba'i don du gsungs pa lta bu'o/ /de lta na mu stegs byed rnams kyang lus can thams cad la thar pa'am grol ba'i rgyur gyur pa bdag dam pa gnyis su med pa'i don yod par 'dod de/ji skad du/ 'byung po kun la zhi ba yod/ /zhi ba gang yin de nga nyid/ /ces pa 'am/ lus can kun la bdag yod de/ /zhes pa la sogs pa smra ba dang / ci'i phyir mi mtshungs zhes pa'o/ /de la rtag pa byed pa yon tan med pa khyab pa mi 'jigs pa'o zhes pa ni bdag rtag pa shes pa rigs pa de nyid yul la longs spyod pa'i bya ba byed pa'am/de la brten nas thar pa thob pa'o/ /yon [(]rtan [,]tan [)]med pa ni gzugs dang bde ba la sogs pa'i yon tan gyis stong pa'o/ /khyab pa ni lus can so so la bdag tha dad pa re gnas par 'dod pa dang /thams cad la thun mong ba'i bdag gcig tu gyur pa yod par 'dod pa'o/ /lan gyi don ni nga yis bstan pa de bzhin gshegs pa'i snying po ni kun gzhi rnam par shes pa'i mthar thug pa don dam par stong zhing kun rdzob tu myong ba tsam gyi bdag nyid kyi rnam grangs su gtogs pa rang bzhin gyis rnam par dag pa ste/ther zug pa'i dngos po don dam pa nyid du khas mi len pas gzhan dang mi mtshungs zhes pa'o/ /snying po zhes yod pa'i sgrar bstan pa ni byis pa rnams bdag med pas chad pa'i lta bas 'jigs pa rnams la bstan pa'o/ /gzhan yang gdul bya'i khyad par 'ga' zhig la ni sngar bstan pa ltar bdag la sogs pa rang gi ming gis kyang bstan no//yang gsung rab dag las phal cher byis pa'i skye bo bdag rtogs par 'gyur bas de ltar ma gsungs te ji skad du/ /bdag tu rtogs par gyur na mi rung zhes/ 'di ni byis pa rnams la ngas ma bstan//zhes gsungs pa'am/ gzhan yang 'phags pa mya ngan las 'das pa las/ de 'dra ba bshad pa na sems can thams cad la/ bdag 'di lta bu 'di 'dra ba cig yod do snyam ste log par mthong nas shes rab med pa rnams la rmi lam du rmis pa bzhin ston par byed de/'jig rten pa de dag gis kyang de skad du thos nas rang gi lus la bdag yod do snyam du rtog par byed la/ de dag gis bdag de'i rang bzhin ni mi shes so/ /de ltar byang chub sems dpa'i tshig thos nas log par bzung ste/ 'jig rten pa rnams skyes bu mthe bong tsam zhes bya ba dang /ldum bu sha ma ka'i 'bras bu tsam dang / 'bras kyi 'bru tsam zhig snying la gnas te 'bar ro zhes log par rtog par byed do zhes pa la sogs par gsungs pa dang / yang la la dag bdag gzugs can ma yin pa rnam par shes pa tsam gyi rang bzhin 'ga' zhig snying gi phyogs na gnas shing 'bar ro zhes log par rtog pa nyid du gsungs so//de la stong pa nyid ni mya ngan las 'das pa las/ srid pa nyi shu rtsa lnga la bden pa gcig tsam yang yod par ma mthong zhes pa'o/ /smon pa med pa ni de rnams stong pa dang kun rdzob tu nyes skyon dang bcas pas smon pa dang 'tshol bar byed pa'o//mtshan ma med pa ni mtshan ma bcu med pa ste/ gang zhe na/ gzugs la sogs pa yul lnga'i mtshan ma dang skye 'jig gnas pa gsum gyi mtshan ma dang / pho dang mo'i mtshan ma med pa ste/ de rnams kyis kyang lus dang longs spyod dang gnas kyi mtshan ma gsum spangs pa'o//yang dag pa'i mtha' ni yang dag pa'i don gang gi mthar thug pa'i gnas lugs de bzhin nyid do/ /mya ngan la 'das pa ni rang bzhin gyis mya ngan las 'das pa'o/ / de la sogs pa de bzhin nyid dang chos kyi dbyings zhes pa la sogs pa ste/ don dam pa'i rnam grangs su gtogs pa'i snying po'i sgo ni dngos po lta bur bstan pa'i thabs te/ des snang ba med pa'i ye shes kyi yul spros pa dang bral zhing 'od gsal ba nyid ston to//bzo ni rig pa'i khyad par ro/ /nan tan ni yid gzhungs pa'o/ /ji ltar rdza mkhan gyi dpe dang 'dra bar de bzhin gshegs pa yang 'jim pa lta bu'i de bzhin gshegs pa'i snying po las/ de kho na nyid shes pa'i shes rab dang / sems can 'dul ba'i thabs la mkhas pa sna tshogs kyis de bzhin gshegs pa'i snying por bstan pa 'am/yang bdag tu smra bas 'jigs pa dang bdag tu phyin ci log du 'gyur ba spang ba'i don du gang zag gis bdag med par bstan pas kyang rung ste/ sems can so so la grags pa'i tshig dang yi ge'i rnam grangs rnam pa sna tshogs kyis dngos sam brgyud pa'i sgo nas snying po de nyid rtogs par byed cing /gnas skabs kyi lam mi 'dra ba la brten nas rigs gcig po de nyid las gnas skabs kyi 'bras bu mi 'dra ba sna tshogs byed pa'o/ /snying po bstan pas snying po ston zhes pa ni/ dngos po'i sgrar bstan pa'i thabs kyi snying po yang dag rtogs par byed pa'o/ /mngon par 'tshang rgya bar ji ltar 'gyur zhes te/ blo gros chen po zhes pa la sogs pa'i don ni/ ji ltar 'gyur zhes dgongs pa'i tshul bstan nas 'tshang rgya bar bya ba'i don du snying po'i sgrar bstan zhes pa'o//gang zag rgyun ni phyi rol pa rnams kyis brtags pa lta bu'am/ rang gi sde pa gang dag rtag pa dang mi rtag pa la sogs pa'i khyad par gang du yang brjod du med pa'i gang zag las dang las kyi khur khyer ba yod par 'dod pa lta bu'o/ /rkyen ni ma rig pa la sogs pa'o/ /rdul ni rang gi sde pas 'dod pa 'am/yang phyi rol pas rdul phra rab rtag pa nyid du 'dod pa'o/ /don 'di rnams kyang / snying po ji ltar 'byung bar 'gyur/ /zhes pa'i lan du yang sbyar bar bya'o/ /de nas byang chub sems dpa' zhes pa la sogs pas/ rnal 'byor las ni ji ltar ldog /rnal 'byor la yang ji ltar 'jug /ci 'dra'i skyes bu ci tshul du/ /rnal 'byor gzhag pa bdag la gsungs/ /zhes dris pa'i lan btab pa'i sgo nas de bzhin gshegs pa'i snying po sbyong bar byed pa'i thabs ston pa'o/ /de la g.yo ba med pa ni de kho na nyid du sems kyi 'jug pa 'am/mi rtag pa dngos por yang grub pa med pa'o/ /bag chags la mngon par zhen pas bsgos pa/ khams gsum gyi gzugs rnam pa sna tshogs la nye bar spyod pas 'brel pa zhes pa ni khams gsum po bag chags kyis gzhag cing / de yang khams gsum gyis bsdus pa'i tshul lugs rnam pa sna tshogs 'dod pa'i dga' ba dang /bsam gtan dang ting nge 'dzin gyi ro la mngon par zhen pa'i tshul gyis spyod pas 'khor bar rjes su 'brel pa'o/ /sgyu ma la sogs pa'i gzugs skye ba dang 'dra bar zhes pa la sogs pa'i don ni gzugs de dag la rang dang gzhan dang gnyis kar gyur pa'i rgyu med pa'i phyir/mi skye ba dang 'dra bar dngos po thams cad mi skye zhes pa ste/ ji ltar sngar bstan pa bzhin no/ /gzhan yang srid pa'i yan lag gi rkyen rnams kyi rdul phra rab bam/skad cig ma 'dus pa'i phung po dang / dbang phyug la sogs pa gang dag gis ched du spangs pa med par mthong nas kun rdzob tu rang dga' ba'i rtogs pas brtags pa nyid du shes pa'o/ /rtogs pa rab tu gyur pa khong du chud ces pa ni rtogs pa de nyid khyad par du gyur pa so so rang rig pa'i tshul gyis mngon du byas pa ste/der rnam par shes pa rnams kyi snang ba yang gnas par gyur pa'o/ /yang 'dir phyi rol gyi dngos po la sogs pa rang bzhin med par mthong bas de 'dra ba'i phyin ci log sa bon dang bcas te spangs pa so so rang gi ye shes kyi yul dang / yul can chos kyi sku'i ye shes la mngon par mos pa'o/ /'dis ni thabs byang chub mchog tu sems bskyed pa nyid bstan la/ snga ma gsum gyis ni rtse gcig pa'i ting nge 'dzin dang mtshungs par ldan pa shes rab zhi gnas dang lhag mthong zung du 'brel pa'i rnal 'byor bstan te/de ltar thabs dang shes rab zung du 'brel pa'i lam ni 'phags pa'i rigs sbyong bar byed cing / sangs rgyas kyi byang chub 'dren par byed pa ste/ sngar ji skad bstan pa bzhin no/ /de nas bcom ldan 'das la zhes pa la sogs pas kyang / 'gro ba dag dang lus 'dzin pa/ ci yi slad du bya ba 'byung / /zhes pa dang / rkyen gyis skye ba ji lta bu 'bras bu gang lags rgyu ni ci zhes dris pa'i lan ni sngar bstan pa las tshul gzhan pa'i sgo nas rgyas par 'chad de/ de yang rgyu dang rkyen gyi mtshan nyid rtogs pas don dam pa chos kyi dbyings kyi rang bzhin la 'jug par 'gyur ba ste/ji skad du/ rten cing 'brel par 'byung ba la 'jug pas chos kyi dbyings la 'jug par 'gyur ro zhes gsungs pa lta bu'o/ /de la phyi ni phyi rol du snang ba'o/ /nang gi rten cing 'brel par 'byung ba bstan pa la/ ma rig pa dang sred pa dang las dang chos 'di dag la sogs pa ni zhes pa la/ len pa dang srid pa dang rnam par shes pa rgyus bsdus pa yang ste/ de la srid pa la sogs pa gsum ni ma rig pa'i rkyen gyis las mngon par 'du byas kyang / sred pa la sogs pa'i rkyen gyis ma zin na/yang srid pa mngon par 'grub par mi 'gyur bas 'dir smos pa'o/ /rten cing 'brel pa zhes bya ba'i ming thob zhes bya ba ni rgyus bsdus pa drug gam rnam pa lnga'o/ /blo gros chen po 'di dag las skyes pa'i phung po dang zhes pa la sogs pas ni 'bras bus bsdus pa'i rnam par shes pa 'am/ming dang gzugs la sogs pa 'bras bus bsdus pa drug gam/ yang na bdun nyid do/ /'di rnams kyi don cung zad bsdus te gsal ba bstan pa ni 'phags pa sa bcu pa'i mdo las rnam pa bcu'i sgo nas gsungs te/ 'di ltar srid pa'i yan lag rjes su 'brel pa dang /sems gcig tu yang dag par 'du ba dang / rang gi las ma 'dres pa dang / tha dad pa ma yin pa ste/ kun nas nyon mongs pa'i rgyud du gcig pa 'am/ rang rang gi 'bras bu rgyun mi 'chad pa dang / rton par byed pa nyid du mtshungs pa dang / lam gsum gyi rgyud du 'brang ba dang /sngon gyi mtha' dang da ltar byung ba dang phyi ma'i mtha' la ltos pa dang / sdug bsngal gsum kun du 'byung ba dang / rgyu dang rkyen las byung ba dang / skye ba dang 'jig pa dang 'brel pa dang / med pas zad par so sor rtogs pa'o/ /de las dang po pa'i dbang du byas te/ma rig pa ni bden pa rnams mngon par mi shes pa ste/ de yang kun du brtags pa'i ma rig pa'o/ /'du byed sems pa dang bsam pa'i las so/ /rnam par shes pa ni gtso bor kun gzhi rnam par shes pa'o/ /ming dang gzugs ni dbang po ma dod pa'i gnas skabs so//skye mched drug ni dbang po thams cad rdzogs pa'i gnas skabs so/ /reg pa ni bde ba la sogs pa myong bar 'gyur ba'i yul gyi rnam pa yongs su gcod pa'o/ /de yang sdug bsngal dang bde ba'i bye brag mi phyed pa ni reg pa'o zhes mya ngan las 'das pa las gsungs so//tshor ba ni nyams su myong ba'o/ /srid pa ni tshor ba la chags pa'o/ /len pa ni tshor ba'i rgyu la chags pa'o/ /srid pa ni ming dang gzugs kyi sa bon kun gzhi la yod pa len pas gsos btab ste/ mthu dang ldan par song ba'o/ /skye ba ni ming dang gzugs la sogs pa de nyid dang thog mar byung ba'o//rga shi ni ming dang gzugs la sogs pa de nyid gnas skabs gzhan du gyur pa dang rgyun chad pa'o/ /yang rgas pa ni phung po yongs su smin pa'o/ /zhes kyang gsungs so/ /spyi'i nges pa'i tshig ni snga ma snga ma rnams la rten cing 'brel te phyi ma rnams 'byung bas so//so so'i dbye ba la ma rig pa ni gnyis te/ las rgyu 'bras la rmongs pa srog gi mchod sbyin la sogs pas thar par 'dod pa dang / de kho na nyid la rmongs pa bdag dang bdag gi la sogs par phyin ci log pa dang de rnams ji lta ba bzhin ma rtogs pa'o//'du byed la gsum ste/ bsod nams dang bsod nams ma yin pa dang / mi g.yo ba'i las so/ /yang na sgo gsum gyi las gsum mo/ /rnam par shes pa ni rgyu dang / 'bras bus bsdus pa gnyis so/ /ming dang gzugs ni rnam pa lnga'o//skye mched ni drug go/ /reg pa yang mig gi 'dus te reg pa la sogs pa drug go/ /tshor ba yang de nyid dang rjes su mthun pa'am/ rnam pa gsum mam lnga'o/ /sred pa ni gsum ste/ 'dod pa dang / gzugs dang / gzugs med pa'i sred pa'o/ /len pa ni bzhi ste/ 'dod pa nye bar len pa dang / bdag tu smra ba nye bar len pa dang / lta ba nye bar len pa dang / tshul khrims dang brtul zhugs nye bar len pa'o/ /'dir nye bar len zhes pa ni de dag la chags pa'o/ /srid pa yang rnam pa bzhi ste/ sngon dus kyi srid pa dang / 'chi ba'i srid pa dang / bar ma do'i srid pa dang / skye ba'i srid pa'o/ /'dir ni de rnams kyis bsdus pa'i ming dang gzugs kyi sa bon len pas mthu dang ldan par byas pa'o/ /skye ba dang rga shi las skye ba ni gsum ste/ skad cig gi skye ba dang / mngon par 'grub pa'i skye ba dang / nying mtshams sbyor ba'i skye ba'o//rgas pa yang gsum ste/ nye bar spyad pas rgas pa dang / gzhan nyid kyis rgas pa dang / gzhan du 'gyur bas rgas pa'o/ /gnyis pa de rnams sems gcig tu yang dag par 'du ba ni/ sngar bstan pa ltar kun rdzob tu thams cad sems nyid yin la/ de yang spyir kun gzhi rnam par shes pa gcig nyid de/ rgya mtsho dang dba' rlabs bzhin zhes sngar bstan to/ /gzhan yang rgyun dang ldan pa'i kun gzhi ni thams cad kyi sa bon du gyur pas der 'du shes pa'o/ /de skad du yang / de dag thams cad kyang sems gcig la gnas pa dag go zhes gsungs so//rang gi las ma 'dres pa ni dang por ma rig pa'i dbang du byas na rnam pa gnyis te/ sems can rnams dmigs pa la kun du rmongs par byed pa dang / 'du byed mngon par 'grub pa'i rgyu yang 'byin pa'o/ /'du byed rnams kyang bya ba gnyis su nye bar gnas pa ma yin te/ma 'ongs pa'i rnam par smin pa yang mngon par 'grub par byed pa dang / rnam par shes pa mngon par 'grub pa'i rgyu yang 'byin pa'o/ /de bzhin du yan lag lhag ma rnams kyis kyang / rang rang gi 'bras bu phyi ma rnams mngon par 'grub pa'i rgyu 'byin pa dang /khyad par du rnam par shes pas srid pa nying mtshams sbyor bar yang byed pa dang / ming dang gzugs kyis phan tshun ston par byed pa dang / skye mched drug gis rang gi yul rnams phye ba yang ston pa dang / reg pas dmigs pa la reg par med pa dang /tshor bas yid du 'ong ba dang yid du mi 'ong ba dang gnyi ga las rnam par grol ba myong bar yang byed pa dang / sred pas chags par gyur pa'i dngos po la kun du chags par yang byed pa dang / len pas kun nas nyon mongs pa dang 'brel bar yang byed pa dang / srid pas srid pa'i rgyud gzhan yang gnas par byed pa dang /skye bas phung po 'byung bar byed pa dang / rga bas dbang po yongs su 'gyur bar byed pa dang / 'chi bas 'du byed 'jig par byed pa dang / yongs su mi shes pa rgyun mi 'chad pa'i rgyu yang 'byin pa'o zhes gsungs te/ rten cing 'brel par 'byung ba'i de kho na nyid ma rtogs pas tshe rabs gzhan dang gzhan gyi rgyur yang 'gyur ba'i phyir ro//de la byed pa 'di rnams kyi don ni ji ltar dngos po'i mtshan nyid ni don byed nus zhes pa dang / tshad ma ni yul la sgro 'dogs gcod par byed ces pa lta bu ste/ byed pa rang gi ngo bor gyur pa yin gyi don gzhan du gyur pa ni ma yin no//tha dad pa ma yin pa'i don ni ma rig pa'i rkyen gyis 'du byed rnams so zhes pa ma rig pa'i rkyen gyis 'du byed rnams rgyun mi 'chad pa dang / rton par byed pa ste/ de yang ma rig pa ni sa bon gyi gnas skabs dang / 'bras bu'i gnas skabs gnyis so/ /de la sa bon gyi gnas skabs kyis ni/ 'du byed rgyun mi 'chad par byed do/ /sa bon ma spangs pa de srid du 'du byed kyi rgyun 'byung ba'i phyir ro/ /'bras bu'i gnas skabs kyis ni skyed cing rton par byed de/ de skyes pas de yang rjes thogs su skye ba'i phyir ro//don 'di gnyis kyang 'di yod pas 'di 'byung zhes pa dang / 'di skyes pa'i phyir 'di skyes zhes bya ba'i don rnam pa gnyis bstan to/ /yan lag lhag ma rnams kyang de bzhin du shes par bya'o/ /lam gsum gyi rgyun du 'brang ba ni de la ma rig pa dang sred pa dang len pa ni nyon mongs pa'i lam gyi rgyun mi 'chad pa dang /nyon mongs pa'i kun nas nyon mongs pa'o/ /'du byed dang srid pa ni las kyi lam gyi rgyun mi 'chad pa ste/ las kyi kun nas nyon mongs pa'o/ /lhag ma rnams ni sdug bsngal gyi rgyun mi 'chad par rab tu phye ba ste/skye ba'i kun nas nyon mongs pa'o/ /de nyid sa bcu'i mgon pos kyang / /dang po brgyad dang dgu nyon mongs/ /gnyis dang bcu pa las yin te/ /lhag ma dag ni tshe yin no/ /zhes gsungs te/ 'dis kyang da ltar gyi nyon mongs pa'i kun nas nyon mongs pa dang /des kun nas bslang ba'i las kyi kun nas nyon mongs pa la brten nas ma 'ongs pa'i skye ba mngon par 'grub cing de dag tu yang snga ma bzhin du nyon mongs pas kun nas bslang zhing / las mngon par 'dus byas pas yang gzhan du skye ba mngon par 'grub pa ste/sdug bsngal kyi phung po 'ba' zhig 'byung zhes pa'o/ /dus gsum la ltos pa yang ma rig pa dang 'du byed ni sngon gyi mtha'i ltos pa ste/ da ltar gyi phung po'i rgyu nyid du gyur pa'o/ /rnam par shes pa nas tshor ba'i bar ni da ltar byung ba'i ltos pa ste/ snga ma la ltos pa'i 'bras bu dang /phyi ma'i rgyur gyur pas ltos pa'o/ /sred pa la sogs pa gsum ni phyi ma'i mtha'i ltos pa ste/ ma 'ongs pa'i skye ba la sogs pas bsdus pa ming dang gzugs la sogs pa'i rgyur gyur pa'o/ /de ltar bstan pas kyang srid pa'i rgyu dang 'bras bu'i tshul du go rims su bstan pa 'di rnams tshe gsum la rdzogs pa ste/dang po gnyis ni snga ma lnga'o/ /de nas rnam pa brgyad ni tshe 'di nyid la rdzogs pa ste/ sred pa la sogs pa gsum phyi ma'i mtha'i ltos pa'o zhes gsungs pa ni de'i nye ba'i rgyur gyur pa ste/ tshe'i dbang du byas na da ltar bas bsdus pa'o//skye ba dang rga shi ni tshe phyi mas bsdus pa'o/ /phyi ma phan chad du yang de bzhin du rab tu 'byung ba ste/ phyi ma nyid kyi dus mngon du gyur pa na de la ltos te/ de ltar ba ni sngon gyi mtha' la ltos zhes pa ste/ shes par zad do/ de nyid kyi phyir rgyu dang 'bras bu yang tshar gnyis kyis bsdus pa ste/dang po gnyis ni rgyu la/ de nas rnam pa lnga ni 'bras bur gyur pa'o/ /yang sred pa la sogs pa gsum ni phyi ma'i rgyur gyur pa yin la/ skye ba dang rga shi ni 'bras bur gyur pa'o/ /gzhan yang 'di rnams kyis ni gang dag ma rig pa dang 'du byed la sogs pa'i rgyu khyad par med pa'i phyir/sems can thams cad kyi lus cig car 'grub par thal zhes pa dang / gzhan yang gang zag gi bdag med par 'du byed thams cad skad cig mar gyur pa de'i tshe/ byed pa po med pas las bdag gir bya ba med par 'gyur te/ji skad du/ /las byas nas ni zhig pa na/ /su yi las su 'gyur zhe na/ /zhes pa ste/ rnam par smin pa'i dus na las byed pa po 'gags nas med pas des rnam par smin pa myong ba med cing / gzhan la smin par 'gyur bar byas pa chud zos pa dang / ma byas pa dang phrad pa'i nyes par 'gyur zhes pa'o//gzhan yang sngon gyi las ni 'bras bu ma bskyed par 'gags pas phyis 'bras bu skyed pa'i dus na med pa'i phyir las rnams chud zos pa'i nyes par 'gyur ro zhe na/ skyon med de/ spyir las byas pa dang / byas kyang 'bras bu bskyed zin pa dang /byas shing 'bras bu ma bskyed kyang gnyen po rnyed pas spangs zin pa na yang srid pa mngon par 'grub pa mi 'thad la/ de'i phyir las 'ga' zhig ni byas la 'ga' zhig ni ma byas pa 'am/ byas pa yang 'ga' zhig gis ni 'bras bu bskyed zin pa 'am/ /'ga' zhig gis ma bskyed pa 'am/ma bskyed pa yang 'ga' zhig ni gnyen pos spangs pa 'am/ 'ga' zhig ni ma spangs pa ste/ de'i phyir thams cad kyi lus cig car mngon par 'grub par mi 'gyur te/ las ma byas pa 'am byas pa'am byas kyang 'bras bu bskyed zin pa 'am/ byas la ma bskyed kyang gnyen po mngon par thob pa rnams kyi 'bras bu ni 'byung bar mi 'gyur la/de las bzlog pa rnams kyi 'bras bu rnam par smin pa ni 'byung bar 'gyur ba ste/ des na rgyu las khyad par med pa'i phyir zhes pa'i gtan tshigs ma grub pas nyes pa dang po las grol lo//gnyis pa yang mi 'thad de/ kun gzhi rnam par shes pa rgyun dang ldan pas de'i rang bzhin du gyur pa'i sa bon gyi kun nas bslang ba'i rnam par shes pas las bsags shing / las kyi skad cig 'gags pa na yang de'i sa bon kun gzhi la bsgos pa/gcig nas gcig tu brgyud pa rnams las byung ba'i rnam par shes pa zag pa dang bcas pa'i phung pos bsdus pa dang lhan cig pa'i kun gzhi rnam par shes par red cing smin pa ste/ gnas dang lus la sogs pa 'dod bya dang 'dod bya ma yin pa'i rnam par snang ba rgyu ba cha phra ba ste/de'i phyir/ rgyun gcig la ni brten nas su/ /byed po spyod pa zhes byar bstan/ /zhes pa'o/ /des na 'dir kun gzhi rnam par shes pa nyid 'khor gyi de med par gyur na 'jug pa'i rnam par shes pa rnams la ni 'khor ba mi 'thad do zhes 'og nas ston par 'gyur te/pha rol pos brjod pa'i nyes pa dang 'brel bar 'gyur ba'i phyir ro/ /gzhan yang 'bras bu ma bskyed par las zad pa de lta na yang / las kyis bsgos pa'i sa bon kun gzhi rnam par shes pa la rgyun chags su gnas pa de nyid las 'bras bu 'byung bas las chud zos pa'i nyes pa las kyang grol te/lus can rnams kyi las rnams ni/ /bskal pa brgyar yang chud mi za/ /tshogs shing dus la bab pa na/ /'bras bu nyid du smin par 'gyur/ /zhes gsungs so/ /de yang gnyen po ma thob pa'i gang zag gi dbang du byas pa'o//des na las 'ga' zhig ni mthong ba'i chos la myong bar 'gyur ba ste/ tshe de nyid la 'bras bu bskyed zin pas phyi ma la skye bar mi 'gyur ba'o/ /'ga' zhig ni sred pa dang len pa'i rkyen tshang zhing gnyen po ma thob pas skyes nas 'bras bu myong bar 'gyur ba'o//'ga' zhig ni lan grangs gzhan la myong bar 'gyur la/ 'ga' zhig myong bar ma nges te/ gnyen po'i stobs kyis zad par 'gyur ba dag kyang srid do/ /'dir chos mngon pa'i bstan bcos dag las/ srid pa'i yan lag bcu gnyis su grangs nges pa'i rgyu mtshan ni 'di rnams la rgyus bsdus pa dang /'bras bus bsdus pa gnyis las/ rgyus bsdus pa yang rnam pa gnyis te/ 'phen par byed pa'i rgyu ring bar gyur pa dang / mngon par 'grub pa'i rgyu nye bar 'gyur ba'i rgyu'o/ /de la 'phen par byed pa ni ma rig pa dang /'du byed dang / rnam par shes pa rgyus bsdus pa ste/ de yang gang la brten te 'phen pa dang / gang gis 'phen pa dang / tshul ji ltar 'phen te/ rnam pa gsum dang go rims bzhin du sbyar ro/ /de ltar 'phen par byed pa yang de rnams las mang ba mi dgos shing / nyung na yan lag ma tshang bar 'gyur bas de dag tsam du grangs nges pa'o/ /mngon par 'grub pa'i rgyu la yang / rnam pa gsum ste/ gang la brten te 'grub pa dang / gang gis 'grub pa dang / ji ltar 'grub ste/ rim pa bzhin sred len srid pa gsum dang sbyar ro/ / 'bras bu'i dbang du byas te 'phen par byed pas 'phangs pa ring ba'i 'bras bu ni bzhi ste/ lus thob pa dang / thob pa gang las longs spyod pa las/ dang po ni gnyis te/ thog ma nyid du thob pa dang / thob pa yongs su rdzogs pa ste/ ming dang gzugs dang skye mched drug dang rim pa bzhin du sbyar bar bya'o//gnyis pa'i dbang du byas nas thob pa yul la longs spyod pa reg pa dang / las kyi rnam par smin pa la longs spyod pa tshor ba'o/ /de ltar na rnam pa bzhir nges so/ /mngon par 'grub pa'i 'bras bu ni rnam pa gnyis te/ rten gyi dbang du byas pa skye ba dang / brten pa'i dbang du byas nas rga shi'o//gzhan yang 'dus byas kyi mtshan nyid gsum mam bzhi las/ gnas pa ma smos pa ni srid pa'i yan lag byang chub sems dpa' rnams kyis brtag par bya ba'i don 'di rnams bstan pa ni cung zad 'khor ba las skyo ba skyed pa'i phyir yin la/ gnas pa ni skyo ba skyed pa'i yan lag tu mi 'gyur bas ma smos pa'o//rgas pa dang shi ba gnyis yan lag gcig tu gzhag pa yang / ma rgas par 'chi ba yod pas de la yan lag 'ga' zhig ma tshang bar 'gyur ba srid pa'i phyir ro/ /gal te de lta na rdzus te skye ba dang / drod gsher las skye ba la ming dang gzugs med pa'i skye mched drug yod pas de gnyis kyang gcig tu gzhag par rigs so zhe na/de ci nur nur po la sogs pa'i gnas skabs med mod kyi/ de tsam gyis ming dang gzugs la sogs pa med par ji ltar 'gyur/ gzhan yang 'di ni gtso bor mngal nas skye ba dang /sgo nga las skye ba'i dbang du byas te rnam par gzhag pas nyes pa med do/ /srid pa'i yan lag 'di rnams kyi go rims ni skye ba'i rim pa'o/ /gzhan yang dbus dang mtha' rnam par 'byed pa las/ ma rig pa dang / 'du byed dang / sred pa dang / len pa dang / srid pa ste/lnga ni rgyu yis bsdus pa la/ lhag ma rnams ni 'bras bu'o/ /zhes gsungs pa dang / 'phags pa thogs med kyis/ lnga po de rnams las lhag tu rnam par shes pa yang rgyus bsdus pa ste/ de ltar na rgyu dang 'bras bu rnam pa drug tu nges pa'o zhes gsungs te/ de ltar rgyu 'bras tshar gcig gis bsdus pa'o//de dag kyang tshe gnyis kyis bsdus pa ste/ snga ma nas 'dir 'pho ba'i dbang du byas na rgyu drug ni tshe snga ma la rdzogs shing des bsdus pa yin la/ 'bras bu drug ni tshe 'di nyid la'o/ /'di nas phyi mar 'pho ba'i dbang du byas na yang de bzhin du shes par bya'o zhes gsungs so//'di rnams ni cung zad dpyad par bya ba ste/ srid pa ni yan lag bcu gnyis po 'di rnams mdo las gsungs pa bzhin du snga ma snga ma rnams kyi rkyen gyis phyi ma phyi ma 'byung ba/ don gyi go rims su bstan pa de ltar na sred pa dang len pa la sogs pa gsum ni tshe snga ma la bsdus par mi 'thad de/tshor ba da ltar ba yin pa'i phyir ro/ /gzhan du na da ltar ba'i tshor ba'i rkyen gyis tshe snga mas bsdus pa'i sred pa skyed pas ma 'ongs pa rgyu nyid du thal ba'i phyir ro/ /gal te tshor ba yang sred pa'i sngon du 'gro ba'i tshe snga mas bsdus pa nyid do zhe na/de lta na de'i rgyur gyur pa'i reg pa la sogs pa yang tshe snga ma nyid kyis bsdus pas 'bras bu de rnams da ltar ba'i sred pas bsdus pa nyams par 'gyur ro/ /gzhan yang de ltar na 'phen par byed pa'i rgyu dang / mngon par 'grub pa'i rgyu dang /de rnams kyis 'phangs pa'i 'bras bu dang / mngon par bsgrub pa'i 'bras bu'i bye brag rnam par gzhag pa yang mi 'thad de/ mngon par bsgrub pa'i 'bras bu skye ba dang rga shi de dag tshe 'di nyid kyis bsdus pa'i ming dang gzugs la sogs pa'i bdag nyid yin nam/'on te 'di'i 'og ro la tshe phyi mas bsdus pa gcig yin zhes brtag par bya'o/ /dang po ltar na 'phen byed kyis 'phangs pa'i ming dang gzugs la sogs pa dang / mngon par bsgrub pa'i 'bras bu gcig nyid yin pas ming dang gzugs la sogs pa ni 'phen byed kyi rgyus 'phangs pa'i 'bras bu'i bar du chod pa yin la/skye ba dang rga shi ni de las bzlog pa mngon par 'grub pa'i rgyus mngon par bsgrub pa'i 'bras bu bar du mchod pa yin zhes pa mi 'thad de/ cha shas kyi bskyed bya skyed byed nyid du 'gyur ba'i phyir ro/ /des na ming dang gzugs la sogs pa 'phen byed kyi rgyus 'phangs shing bskyed pa bzhin du/skye ba dang rga shi yang 'phangs shing skyed par 'gyur la/ skye ba dang rga shi mngon par 'grub par byed pa'i rgyus bsgrubs shing bskyed pa ltar/ ming dang gzugs la sogs pa yang skyed par 'gyur ba'o/ /phyogs gnyis pa ltar na yang /skye ba dang rga shi mngon par 'grub pa'i rgyu la ltos te/ bar du ma chod pa'i 'bras bu nyid du mi 'thad cing / de rnams tshe gsum la rdzogs pa'i phyogs nyid du 'gyur ro/ /des na mdo sde dag las bstan pa srid pa'i yan lag skye ba'i go rims su bstan pa rnams ni kho bos sngar bstan pa ltar 'thad kyi gzhan du ma yin no//spyir sred pa'i yan lag 'di rnams kyi rigs tsam gyi dbang du byas na khams gsum po skye ba rnam pa bzhis bsdus pa rnams kyi tshe re re la yang phal cher rdzogs pa ste/ ma rig pa dang 'du byed la sogs pas rnam par shes pa la sogs pa skyes pa na yang sred pa la sogs pa'i rkyen tshang dgos te/ji skad du 'phags pas bcu pa las/ 'du byed de dag gis yongs su bsgos pa'i sems kyi sa bon zag pa dang bcas pa nye bar len pa dang bcas pa ni phyi ma la skye ba dang rga shi rang bzhin yang srid pa dang /mngon par 'grub pa 'byung bar 'gyur ba ma yin te/ las kyi zhing gi gzhi dang / ma rig pa'i mun pa dang / srid pa'i rlan dang / nga'o snyam pa'i nga rgyal gyis brlan pa dang / lta bar gyur pa'i dra ba rab tu 'phel bas ming dang gzugs kyi myu gu 'byung bas te zhes pa la sogs pa gsungs pa'i phyir ro//yang ming dang gzugs la sogs pa'i gnas skabs na yang ma rig pa la sogs pa rjes su 'brel bar 'byung ba'o/ /gzhung 'dis ni rnam par shes pa rgyu'i phyogs kyis bsdus pa nyid gsal bar bstan te/ ji skad du/ sems kyi sa bon nye bar len pa dang bcas pa ni phyi ma la skye ba dang rga shi mngon par 'grub pa nyid du gsungs pas so/ sngar bstan pa ltar ma rig pa dang 'du byed ni sngon gyi mtha'i ltos pa yin pa dang / rnam par shes pa la sogs pa da ltar ba'i ltos pa nyid du gsungs pas ni rnam par shes pa 'bras bus bsdus pa nyid du gsungs pa ste/gang yin kyang 'gal ba med do/ /'phags pa mya ngan las 'das pa las kyang / rigs kyi bu rten cing 'brel te 'byung ba bcu gnyis po 'di dag ni sems can thams cad la mnyam par yod de/ phyi nang gnyis so/ bcu gnyis po gang zhe na/ 'das pa'i nyon mongs pa ni ma rig pa'o/ /'das pa'i las ni 'du byed do/ /da ltar gyi dus na thog mar mngal du 'jug pa ni rnam par shes pa'o zhes pa la sogs pa dang / gzhan yang rigs kyi bu sems can thams cad la rten cing 'brel te 'byung ba 'di dag yod mod kyi yongs su ma rdzogs te/nur nur por 'dug pa'i tshe shi ba la skye mched drug la sogs pa mi 'thad pa dang / gzugs kyi khams kyi sems can la tshor ba rnam pa gsum dang / reg pa rnam pa gsum dang / sred pa rnams dang /rga ba dang shi ba med kyang rnam pa bcu gnyis dang ldan zhes bya'o/ /gzugs med pa'i khams kyi sems can de dag gzugs med pa nas rga shi'i bar du med kyang rnam pa bcu gnyis po dang ldan zhes bya ste/ de ni nges par thob par 'gyur ba'i phyir ro/ /des na sems can kun la mnyam par rten cing 'brel te 'byung ba bcu gnyis dang ldan pa yod pa zhes bya'o zhes gsungs so//'dir gzugs kyi khams bsam gtan bzhi la so so'i skye bo'i sas bsdus pa la tshor ba btang snyoms las ma gtogs pa rnams bzhi ka med mod kyi/ btang snyoms nyid dang gsal ba dang / gnyen po la sogs pa'i yon tan dang ldan pas yid bde ba nyid du chos yang dag par sdud pa'i mdo las gsungs pa/ btang snyoms dang yid bde ba las ma gtogs pa tshor ba gsum dang / kham gyi zas dang bral bas lce'i 'dus te reg pa dang /sna'i 'dus te reg pa dang / rnam par shes pa de nyid kyi rjes su byung ba de dag gi yul la mngon par zhen pa'i yid kyi 'dus te reg pa ste/ reg pa gsum dang / 'dod pa'i sred pa dang / khams 'og mas bsdus pa'i rgas pa dang de dang 'brel ba'i shi ba de lta bu med ces pa'o//'di rnams kyang mnyam par gzhag pa'i gnas skabs na med cing shas chung ba tsam la dgongs pa yin gyi/ rnam pa thams cad du med pa ni ma yin te/ sngar bstan pa ltar de rnams kyang de bzhin gshegs pa'i yon tan la dbang bsgyur du med pa la sogs pa'i sdug bsngal gyis sdug bsngal ba yin zhes mdo gzhan las gsungs pa dang /gzugs med pa rnams kyang sa thams cad kyi ting nge 'dzin la dbang mi byed pa'i sdug bsngal gyis sdug bsngal ba dang / dam pa'i chos mi thob pa'i sdug bsngal [(]kyis [,]gyis [)]sdug bsngal ba la sogs pa gsungs so//de nyid kyi phyir de 'dra ba'i yon tan thob par 'dod pa dang / ting nge 'dzin gyi ro la chags pa'i sred pa la sogs pa ci'i phyir na med ces pa'o/ /gzhan yang mdo 'di'i don ni rdzas su grub pa'i gzugs sems las tha dad pa ni gang na yang med la/ gzugs su snang ba tsam gyi dbang du byas na/ gzugs med pa rnams la yang shin tu phra ba'i gzugs su snang ba cung zad yod pa ste/ phra ba'i phyir med ces bstan par zad do/ /des na der skyes pa'i sems can rnams la yang spyir ming dang gzugs la sogs pa thams cad yod cing /phung po yongs su smin pa'i rgas pa dang / shi ba yang yod de/ de rnams 'chi 'pho'i sdug bsngal gyis sdug bsngal ba nyid du gsungs pa'i phyir ro/ /yang sngar rgas pa dang shi ba med par bstan pa ni bsam gtan bzhi pa'i 'phags pa'i gnas gzhan po rnams la rnam par chad pa'i 'chi 'pho ba la sogs pa med pa la dgongs te yang gsungs pa'o//'dir lan grangs gzhan la myong bar 'gyur ba'am/ mthong ba'i chos la myong bar 'gyur ba'i las kyi dbang du byas te/ tshe gsum la rdzogs pa la sogs pa'i rnam par gzhag pa byas pa ni ma yin gyi/'on kyang skyes nas myong bar 'gyur ba'i las la sogs pa'i dbang du byas te bstan pas skyon med do/ /de ltar sngon gyi mtha'i ltos pa la sogs pa spros pa dang bcas te bstan nas/ mdor na sdug bsngal gyi phung po 'di 'ba' zhig 'byung zhes pa'i don de rnams kyang sdug bsngal gsum gyis bsdus par ston te/de la ma rig pa nas skye mched drug gi bar ni 'du byed kyi sdug bsngal lo/ /reg pa dang tshor ba ni sdug bsngal nyid du gsungs te/ de'i don yang srid pa'i yan lag 'di rnams byis pa rnams 'khor ba la yid 'byung bar bya ba'i don du gtso bor ngan song gi phung po dang 'brel pa nyid bstan pa ste/des na de dag gi reg pa dang tshor ba ni sdug bsngal nyid shas che bas de ltar bstan pa'o/ /gzhan du na mtho ris kyi phung po mngon par 'grub pa'i las kun nas slong ba ni ma rig pa nyid yin pa'i nges pa med/dad pa dang las dang 'bras bu'i bye brag ji lta ba bzhin shes pa'i shes rab kyis kyang / zag pa dang bcas pa'i las dge ba kun nas slong bar byed pa'o/ /sred pa la sogs pa lhag ma rnams ni 'gyur ba'i sdug bsngal te/ cung zad bde ba dang mtshungs par ldan pas so//rgyu dang rkyen las byung zhes pa ni 'bras bu phyi ma mngon par 'grub pa la ji skad bstan pa 'ba' zhig tu ma zad kyi/ kun gzhi rnam par shes pa'i rgyu dang / sred pa la sogs pa'i rkyen tshogs pa las 'byung ba'o/ /skye ba dang 'jig pa dang 'brel pa ni yan lag de rnams sngar nas yod pa'i don rgyu dang rkyen gyis gsal bar byas pa'am/phyis kyang nyams par mi 'gyur ba lta bu ma yin te/ rkyen gyis glo bur du skyed cing / yang ma rig pa 'gags pas 'du byed 'gag ces pa la sogs pa lugs las ldog pa'i chos dang ldan pa'o//med pas zag par so sor rtog /ces pa ni dgra bcom pa dang rang sangs rgyas zad pa dang mi skye ba'i ye shes thob pa la sogs pa rnams la de dag med pa'o/ /yang de rnams la yang ma rig pa'i bag chags kyi sa'i rkyen la sogs pa rnam par byang ba'i rten 'brel ni yod pa nyid du gsungs so//gal te 'dir sred pa'i yan lag 'di rnams su grangs nges pa'i rgyu mtshan sngar bstan pa ltar mi 'thad na de las gzhan du rnam par 'jog dgos so zhe na/ bden te/ 'dir ni 'khor gdul bya nye ba'i bsam pa nyid la ltos nas de dag tsam bstan par zad kyi/de las gzhan pa'i rgyu mtshan ni ma mthong ngo / /yang chos mngon pa'i bstan bcos dag las khams gsum du skye ba mngon par 'grub pa'i tshul rnam pa dgu ste/ khams gsum nas 'phos nas 'dod pa'i khams su skye ba'i tshul gsum dang /gzugs khams su skye ba gsum dang / gzugs med par skye ba gsum ste/ de ltar rnam pa dgu'o/ /de la ma rig pa ma gtogs pa'i yan lag gzhan thams cad ni gang du skye bar 'gyur ba'i khams sam sa der gtogs pa yin la/ ma rig pa'i dbang du byas na 'dod pa'i khams su skye ba gsum ma gtogs pa gzhan ni sa mi mtshungs pa nyid de/gang du skye bar 'gyur ba'i khams dang sa der mi gtogs pa'o/ /de yang 'di ltar 'dod pa'i khams nas 'phos nas bsam gtan dang po'i lhar skyes pa na/ de 'dra ba'i lus 'grub par byed pa'i las ni 'dod pa'i 'dod chags spong bar byed pa'i bar chad med pa'i lam gsum pa yin la/de kun nas slong ba'i ma rig pa ni bsam gtan dang po'i sas bsdus pa ma yin te khams 'og ma 'dod pa'i 'dod chags dang ma bral ba ni de'i rgyu las gong ma'i nyon mongs pa mngon du rgyu skye ba mi 'thad la/bral na yang de spong ba'i bar chad med pa'i lam sngon du song bas de'i rjes su byung ba bsam gtan dang po'i sas bsdus pa'i ma rig pas sngar gyi las kun nas slong ba mi 'thad de/ ma 'ongs pa rgyu nyid du 'gyur ba'i phyir ro/ /des na las de 'dra ba kun nas slong ba'i ma rig pa ni 'dod pa'i khams de nyid du gtogs pa'o//de bzhin du srid pa'i rtse mo'i bar du gong nas gong du skye bar 'gyur ba thams cad kyi tshul yang shes par bya'o/ /yang rang gi sar skye bas te/ bsam gtan dang po nas 'phos nas dang po pa nyid du skye ba'i las ni sngar 'dod pa'i khams mnyam par ma bzhag pa'i sa de nyid la/las gcig gis lus du ma 'grub par byed pa'i las zhi rags kyi rnam par bsgom pa/ 'dod pa'i 'dod chags spong bar byed pa'i bar chad med pa'i lam nyid yin la/ de kun nas slong ba'i ma rig pa yang 'dod pa'i khams su gtogs pa yin gyi/phyis byung ba bsam gtan gyi sar gtogs pa ni ma yin te/ ma 'ongs pa rgyu nyid du 'gyur ba'i phyir ro/ /'dir de 'dra ba'i las med par bsam gtan dang po nas 'phos nas yang dang po'i lhar skye ba mi 'thad de/ de la zhi rags kyi rnam pa bsgom pa med par ni der skye ba mi 'thad la/de ltar bsgom pa yang gnas skabs der mi 'thad de/ 'dod pa'i khams la rags pa dang / bsam gtan dang po la zhi bar bsgom pa ni mi dgos te/ sngon de ltar bsgoms pas bsam gtan dang po nyid thob pa'i phyir ro/ /dang po de nyid la zhi rags kyi rnam par bsgom pa ni 'gal bar 'gyur zhing /de la rags pa dang gnyis pa yan chod la zhi bar bsgoms pas ni bsam gtan dang po'i lhar skye ba mi 'thad pas snga ma ltar 'dod pa'i khams la brten pa'o/ /de bzhin du srid pa'i rtse mo'i bar gyi rang gi sar skye ba thams cad kyang blta bar bya'o//gzhan yang 'og mar skye ba'i dbang du byas te/ bsam gtan gnyis pa nas 'phos nas/ dang po'i lhar skye ba na de 'dra ba'i lus 'grub pa'i las ni/ sngar gyi dus mnyam par ma bzhag pa'i sa la brten nas zhi rags kyi rnam par bsgom pa'i las rnying pa de nyid yin pas de kun nas slong bar byed pa'i ma rig pa yang sa de nyid kyis bsdus pa'o//de bzhin du srid pa'i rtse mo nas bsam gtan dang po'i bar du 'og mar skye ba'i tshul thams cad blta bar bya'o zhes 'chad pa ni shin du mi 'thad de/ spyir bde 'gro'i rigs de dag du skye ba'i zag pa dang bcas pa'i dge ba'i las sam/khyad par du mi g.yo ba'i las kun nas slong bar byed pa ni ma rig pa nyid yin par ma nges te/ sngar bstan pa ltar shes rab dang dad pa la sogs pa'i sgo nas kyang kun nas slong bar 'gyur ba'i phyir ro/ /gal te ma rig pas slong ba de ltar yang bsam gtan dang po'i lus su 'grub pa'i las ni rgyu snyoms 'jug gi bsam gtan te/bsam gtan dang po'i ting nge 'dzin mi g.yo ba'i las de nyid yin la/ de yang dus kyi mthar gyur pa'i skad cig gnyis dang gsum la sogs par gnas pa tsam la ni/ bsam gtan nyid du tha snyad gdags par bya ba'i don med do/ /de'i ngo bo ni sems rtse gcig par gnas pa yin pa'i phyir ro/ /gzhan du na mnyam par gzhag pa'i sems kyang bsam gtan nyid du 'gyur te/ skad cig gnyis dang gsum la sogs par dmigs pa la rtse gcig pa ni de dag la yang yod pa'i phyir ro//de nas de 'dra ba'i bsam gtan la dus ji ltar rigs pa bzhin mnyam par bzhag nas tshe 'phos te bsam gtan dang po'i lus mngon par 'grub pa na/ de'i sngon rol du gyur pa'i bsam gtan mi g.yo ba'i las skyed par byed pa ni sa de nyid du gtogs pa'i ma rig pa yin pa la 'gal ba med do//'di ni bsam gtan thob pa'i de ma thag tu tshe 'pho ba nyid du bsams nas smras pa 'ba' zhig tu zad do/ /de bzhin du bsam gtan dang po nas 'phos nas dang por skye ba'i las ni sngon mnyam par ma bzhag pa'i sa la las gcig gis lus su ma grub pa'i las bsags pa ma yin te/de ni 'bras bu skye ba'i dus na 'gags nas med pas rgyu nyid du mi 'thad pa'i phyir ro/ /gzhan du na 'das pa zhig pa rnams rgyur 'gyur la/ de ltar na kun gzhi rnam par shes pa sgrub pa yang mi 'thad par 'gyur ro//'phen par byed pa'i rgyu gsungs pa yang rgyu'i rgyu yin pas rgyur btags su zad kyi rgyu'i dngos ni ma yin no/ /gzhan yang dus gzhan gyis bar chod pa de rnams la 'di yod pas 'di 'byung / 'di skyes pa'i phyir 'di skye zhes pa'i rten cing 'brel par 'byung ba'i don mi 'thad de/'di zhes pa ni nye ba mngon sum pa'i tshig nyid yin pa'i phyir ro/ /des na de 'dra ba'i don la de 'gags nas 'di 'byung zhes bya ba tsam du 'gyur ro/ /gzhan yang bsam gtan dang po las ma nyams par tshe 'phos nas dang por skye ba'i las ni bsam gtan gyi sa de nyid yin te/las ma zad pa nyid kyi phyir ro/ /ji ltar 'dod pa'i khams su mir skye ba'i bsod nams kyi las ma zad par tshe zad nas de nas 'phos te/ mir skye bar 'gyur ba'i las ni sngar gyi las de nyid yin pa bzhin no/ /gzhan yang bsam gtan gyis de nyid la brten nas khams 'og ma la rags par bsgom pa dang de nyid la zhi bar bsgom pa la yang gnod pa med de/de las nyams nas khams 'og mar skye ba srid pas de ltar 'gyur du dgos pa'i phyir de ltar bsgom pa'o/ /yang bsam gtan gnyis pa nas dang por skye ba na/de'i lus 'grub par byed pa sngon gyi las rnying pa yin zhes pa yang de bzhin du mi 'thad par rig par bya'o/ /gal te las 'gags pa de lta na yang des bsgos pa'i bag chags gcig nas gcig tu brgyud pa kun gzhi la yod pa ma 'gags shing de ma thag pa de las de 'dra ba'i lus 'grub pa yin no zhe na/de lta na de kun nas slong ba'i ma rig pa yang sngon gyi gnas skabs su mi 'thad de/ don go bar zad do/ /de dag ni khyad par med pa las byis pa rnams kyis brtags zhes pa ni phyi dang nang gi chos de dag kun rdzob tu sems su gcig cing don dam par stong pa nyid du khyad par med pa'o//blo gros chen po zhes pa la sogs pas rten cing 'brel par 'byung ba'i spyi'i dbye ba ston te/ de dag las byung ba'i rgyu ni sngar bstan pa ltar myu gu dang bum pa la sogs pa phyi'i chos dang / 'du byed la sogs pa nang gi chos rnams kyi rang gi ngo bo skyed pa'i phyir/ rgyu'i bya ba byed pa ste/rten cing 'brel par 'byung ba sngar bstan pa rnams las rgyu'i char gtogs pa'o/ /'bras bu yang de nyid kyi shugs la bstan pa'o/ /'brel pa'i rgyu ni phyi nang gi phung po la sogs pa dang / sa bon la sogs par snang ba 'byung ba'i phyir dmigs pa'i bya ba byed pa ste/ shes pa yul gyi rnam par snang ba'i rgyu'i rkyen la sogs pa'o//'dir dmigs pa'i rkyen dang bdag po'i rkyen gyi don ji ltar yin pa ni sngar bstan no/ /mtshan nyid kyi rgyu ni mtshan nyid grub pa'i de ma thag tu mtshon bya'i tha snyad rnam par 'jog par byed pa'i mtshan nyid dang 'brel ba'o/ /de yang mtshan nyid rtags su bkod pa las mtshon bya'i tha snyad rnams par 'jog pa ste/tsha zhing sreg pa'i phyir 'di ni mer tha snyad du byar rung ba'o zhes bya ba lta bu'o/ /byed pa'i rgyu ni dbang bar gtogs pa'i bya ba byed pa ste 'khor los sgyur ba'i rgyal po bzhin no zhes bya ba ni sems dang ldan pa'i skyes bus rang dbang thob pa'i yul la ji ltar 'dod pa bzhin byed pa ste/'khor los sgyur ba'i rgyal po yul khams la dbang bsgyur ba bzhin no/ /snang bar byed pa'i rgyu ni rnam par rtog pa'am brtag par bya ba'i dngos po skyes zin pa'i mtshan nyid snang ba'i bya ba byed pa ste/gtan tshigs dang lus ngag gi brda dang / mar me la sogs pa'i snang bas don gsal bar byed pa lta bu'o/ /sngar bstan pa'i snang zhing dmigs pa ni blo'i bdag nyid yin la/ 'dir snang ba'am gsal ba ni yul gyi chos su zhen par byas pa'o/ /ltos pa'i rgyu ni mi mthun pa'i khyad par skyed pa lhan cig mi gnas pa'i 'gal bas bsdus pa ste ji ltar gnyen pos lam gyi spang bya'i chos spangs nas de dag ldog pa'i dus na gnyen po rnam par mi rtog pa'i ye shes 'byung ba'i phyir/shes pa'i rgyun gyi bya ba mi 'chad par byed pa'o/ /gzhan yang spyir 'dus byas kyi rgyun gyi bya ba mi 'chad pa ste/rigs mthun pa'i dngos po 'ga' zhig 'gags kyang de'i yul du de dag nyid kyis skyed pa'i rigs mi mthun pa'i dngos po gzhan dang gzhan skye ba rgyun mi 'chad pa'i phyir ro/ /'dir slob dpon ye shes dpal gyis/'byung ba'i rgyu ni phyi dang nang gi chos rnams skyed pa'i sngon gyi las yin no zhes 'chad do/ /'di dag ni zhes pa la sogs pas de rnams gzhan gyi dbang sgyu ma lta bu yin gyi/ don dam pa'i dngos por gzhag pa ni byis pa rnams kyis kun brtags pa nyid du ston te/ 'dir dus mnyam pa la rgyu 'bras kyi mtshan nyid mi 'thad par yang sngar bstan la/de bzhin du rim gyis 'byung ba yang mi 'thad par bstan cing / gzhan yang rim gyis 'byung ba'i phyogs la rgyur tha snyad gdags pa'i don ni 'bras bu la ltos nas 'jog pa las 'bras bu ma skyes pa'i dus na ltos pa med pa'i phyir rgyu'i tha snyad kyi don mi 'thad pas 'bras bu nyid kyang gang las 'byung zhes pa'o//de yang ji ltar bu ma skyes par pha'i tha snyad kyi don mi 'thad la/ de ma grub na bu nyid kyang 'byung ba mi 'thad pa bzhin no/ /des na rgyu 'bras kyi tshul 'di ni rtog ge ba rnams kyis brtags pa ste/de kho na nyid du ma grub ces pa'o/ /gal te chos mngon pa'i mdo las rkyen bzhis rnam par shes pa skyed par gsungs pa ma yin nam zhe na/ de ni sgyu ma lta bu'i gzhan dbang la dgongs nas dmigs pa can gyi skye bo rnams skrag pa spang ba'i don du gsungs kyi/don dam par ni ma yin no/ /de dag las gsungs pa'i don yang rgyu'i rkyen ni rnam par shes pa'i rigs mthun pa'i sa bon du gyur pa 'bras bu'i rang gi ngo bo skyed par byed pa yin la/ dmigs pa'i rkyen ni rang snang ba'i yan lag dang / skyed par byed pa'i yan lag gnyis dang ldan pa shes pa'i rnam par 'jog par byed pa'o 'dir mtshan nyid ni shes pa'i rnam par 'jog pa'o zhes byed pas nye bar mtshon pa'i mtshan nyid du sbyar kyang 'gal ba med de/rigs pa'i bstan bcos dag las de ltar bstan pa'i phyir ro/ /mtshungs pa de ma thag pa'i rkyen ni rang gi ngo bo shes par 'dug pa dang /rgyu dang 'bras bu gnyis char rgyud gcig gis bsdus shing bar du ma chod pa dang / snga ma 'gags pas go phyi nas phyi ma skyed par byed pa ste/ de nas de'i las kyang go 'byed pa dang / rtogs pa'i bdag nyid du skyed pa ste/ rigs pa'i bstan bcos dag las kyang de ma thag pa'i rkyen gyi rnam par shes pas mig gi rnam par shes pa rtogs pa'i bdag nyid du skyed ces pa la sogs pa gsungs so//bdag po'i rkyen ni rkyen gsum las gzhan du gyur pa rnam shes don la 'dzin nus su skyed pa'o/ /rim gyis 'jug pas mi skyed ces pa ni byis pa'i skye bos brtags shing gsung rab dag las bshad pa de bzhin du skye ba don dam pa mi 'thad ces pa'o//blo gros chen po zhes pa la sogs pas shes pa'i bdag nyid du gtogs pa'i rgyu 'bras dngos po yang dag par gzhag pa yang / brtags pa'i rang bzhin la mngon par zhen pa tsam nyid yin pa'i phyir don dam par mi skye la/sems snang ba las ma gtogs pa'i phyi rol med pa'i phyir phyi rol gyi skye ba ni yang dag pa'i kun rdzob nyid du yang mi 'thad ces ston pa'o/ /brtags pa'i phyir rnam par rtog pa 'byung zhes pa ni shes par rtogs pa'i rten 'brel ni kun rdzob tsam du 'thad pa'o//brtags pa'i rkyen rnams kho na ni skye zhing 'gags par 'gyur ba yin no zhes pa ni don dam par rkyen gyis skye ba dang 'gag par gzhag pa ni brtags pa yin gyi gzhan du mi 'thad ces pa'o/ /yang skye ba 'jig rten las 'brel pa sems kyi ngo bor gyur pa kun rdzob pa ni bzlog par bya ba ma yin te/snga ma ltar byis pa'i rtog pas brtags pa nyid bzlog par bya'o/ /de nyid rgyas par bstan pa ni/ bag chags rnams kyis zhes pa la sogs pa ste/ bag chags kyis bslad pa'i sems nyid sna tshogs su snang gi bden pa'i dngos po grub pa med ces pa'o/ / rkyen rnams dang ni gang dag kyang / /zhes pa la sogs pa'i tshig gsum ni rkyen gyi rang gi ngo bo dang / yul dang dus dang sbyar te/ rang gi ngo bo gang yang med cing / yul gang dag dang 'brel ba yang yod pa ma yin la/ dus gang gi tshe yang yod pa ma yin zhes pa'o/ /spyod pa ni snang ba dang bcas pa blo'i yul te/blo'i ngo na de ltar snang zhes pa'o/ /de nas bcom ldan 'das la zhes pa la sogs pas/ /yi ge med par ji ltar gsungs/ /zhes pa 'am/ /mngon par brjod pa gang gis skyed/ /ces dris pa'i lan du/ rten cing 'brel bar 'byung ba'i khyad par snang bar byed pa'i rgyu'i bye brag tshig dang /tshig gis brjod par bya ba'i rang bzhin de kho na nyid ston te/ zhu ba'i skabs su tshig gi rnam par rtog pa'i mtshan nyid kyi snying po tha dad pa'i bye brag shin du rtogs pa gang gis zhes pa ni rjod byed kyi tshig rnam par rtog pa la snang ba ni rnam par rtog pa'i mtshan nyid yin la/de'i snying po ni rang bzhin de kho na nyid kyi bye brag ste/ de lta bu rtogs pas bdag dang gzhan rnams rjod pa dang / brjod bya'i don gyis stong pa'i chos nyid khong du chud cing goms pas myur du sangs rgyas nas/ gzhan la yang de 'dra ba'i chos ston par 'gyur zhes pa'o//don gnyis zhes pa ni dgag bya gnyis la ltos nas rnam par gzhag pa ste/ stong pa nyid bco brgyad ces pa lta bu'o/ /tha dad pa'i bye brag ni gzhan dang thun mong ma yin pa'o/ /de la mtshan nyid kyi tshig ni mtshan nyid dang ldan pa'i dngos po'i mtshan ma gzugs dang sgra la sogs par snang ba la/'di nyid gzhan la bstan par bya ba la sogs par mngon par zhen pa las byung ba 'di ni gzugs so/ /'di ni sgra'o zhes pa la sogs pa ste/ rgyu'i sgo nas mtshon te bstan pa'o/ /rmi lam gyi tshig ni nyid kyis bslad pa'i gnas skabs na lha sbyin la sogs par snang ba la sngon gyi de nyid 'di yin no zhes myong ba mtshams sbyar nas rjes su dran pa dang /de las sad pa'i gnas skabs na de ltar rtog cing snang ba'i yul med par shes pa las byung ba ste/ de ltar snang ba ni rmi lam mo zhes brjod pa'i tshig go/ /'di ni mtshon pa tsam ste sgyu ma'i dpe gzhan rnams dang /chos thams cad du snang ba ni rmi lam dang 'dra ba ste/ dngos po med pa'i snang ba'o zhes rjod par byed pa'i tshig go/ /gnas ngan len gyi rnam par rtog pa'i tshig ni sngon dgras byas pa'i las rjes su dran pa ste/ gang dag gis gnod pa byas pa dang / des nye bar mtshon pa su dag gis phan pa byas pa dran pa la sogs pa ste/mdor na nyon mongs pa'i rkyen nye bar gnas pa la brten nas byung ba'i tshig ste/ tshig rtsub po 'byin pa la sogs pa'o/ /thog ma med pa'i dus nas rnam par rtog pa'i tshig ni thog ma med pa'i spros pa sna tshogs la mngon par zhen pa'i gnas ngan len gyi rang gi sa bon zhes pa ste/gnas ngan len de nyid rnam par rtog pa sna tshogs kyi sa bon te/ de las byung ba'i tshig go/ /de yang ji ltar kha ton bya ba 'don pa ltar 'phral la don spyi'i rnam par snang ba med kyang sngon goms pa'i bag chags kyis byung ba'i tshig ste/'di yang shes bya'i sgrib par gtogs pa'i kun nas bslong ba'i tshig go/ /sngar bstan pa'i mtshan nyid kyi tshig ni 'phral du gzugs la sogs pa'i don du snang zhing zhen pa las byung ba yin pas/ 'di dag mi mtshungs pa nyid do/ /de la rmi lam gyi tshig ni gnyen po'i phyogs kyis bsdus pa'i tshig yin la/gzhan gsum ni mi mthun pa'i phyogs kyis bsdus pa'i tshig go/ /de'i phyir sngar gyi tshig brgya rtsa brgyad la sogs pa yang 'di dag nyid kyis bsdus par shes par bya'o/ /de nas yang bcom ldan 'das la zhes pa la sogs pas tshig gi rgyu ni de dag tsam du 'dus pa ma yin pa rgyu gzhan dag yod pa rnams zhus pa'o//tshig rnam par rig pa rtog pa zhes pa ni tshig gi rnam par rig byed snga ma ltar rtog pa'i bdag nyid du gyur pa 'am/ yang na rnam par rig pa ni mngon pa'i spyod yul zhes pa dang sbyar te/ rtog pa med pa'i shes pas yul du byas pa shes pa de'i bdag tu gyur pa'o//de yang yul lam dus gang du/ rgyu ci las/ rnam pa ji ltar/ rkyen gang gis 'byung ba zhes tshig rnam par sbyar ro/ /lan gyi don ni rgyu dang rkyen ni sngar bstan pa ltar don spyi'i rnam par snang ba 'am de'i bag chags kyi bdag nyid du gyur pa dang /brjod par 'dod pa dang rkan dang lce la sogs pa'i gnas yin la/ yul lam dus kyang rgyu rkyen tshogs pa'i yul lam dus nyid do/ /rnam pa ni yi ge'i go rims bkod pa'i tshul du'o/ /de ltar rten cing 'brel par 'byung ba ni don dam par stong pa'o zhes bstan pa'i don du/blo gros chen pos gsol ba zhes pa la sogs pa'o/ /gcig pa zhig yin na ni don gsal bar byed par mi 'gyur zhes pa ni bdag nyid la bya ba dang byed pa 'gag pas so/ /de ltar tshig dang tshig kun nas slong ba'i rnam par rtog pa don dam par de nyid dang gzhan du brjod du med pa'i phyir rang bzhin med ces pa ste/sngar tshig gi snying po dris pa'i len du sbyar bar bya'o/ /yang blo gros chen pos gsol pa zhes pa la sogs pas ni tshul gzhan gyi sgo nas kyang tshig gam/ tshig gis bstan par bya ba'i yul don dam pa nyid 'gog pa ste/phyi rol pa gang dag gi tshig dang yi ge nyid don dam par khas len te/ ji skad du/ thog med dus kyi tshangs pa rtag /yang dag sgra ni yig 'bru gang / /zhes pa dang / gzhan yang / oM zhes yi ge gcig po tshangs/ gang gis brjod cing nga la ni/ /rjes su dran par gyur pa de//lus 'di yongs su spangs nas su/ /'gro ba mchog tu 'gro bar 'gyur/ /zhes pa ste/ sna tshogs thams cad sgra'i tshangs pa don dam pa mchog tu bden pa ste/ des na sgra dang don kyang gcig par 'dod do/ /yang gzhan dag sgra ni dngos po ji lta ba bzhin du rjod par byed pa dngos po'i dbang gis zhugs pa ste/des na de'i don ni don dam pa'i rang gi mtshan nyid do zhes zer ro/ /'dir sangs rgyas pa rnams kyang / a zhes bya ba ni ma skyes pa'i phyir chos thams cad kyi sgo'o/ /ra zhes bya ba ni rdul dang bral ba ba'i phyir chos thams cad kyi sgo'o/ /pa zhes bya ba ni don dam pa ston pa'i phyir chos thams cad kyi sgo'o zhes bya ba la sogs pa gsungs pa dang /yang / a ni yig 'bru kun gyi mchog /don chen yi ge dam pa yin/ khong nas 'byung ba skye ba med/ /ces pa la sogs pa gsungs pas de dag gam de dag gis brjod par bya ba'i don ni don dam pa nyid du 'dod de/de'i phyir de dag so sor rnam par brtags shing dris nas sun 'byin pa'o/ /de la tshig nyid don dam pa yin te/ tshig gis 'phags pa'i ye shes don dam pa'i bden pa ste/ zag pa med pa'i bde ba don dam pa'i rang bzhin spyi'i rnam pa'i tshul du brjod pas de nyid spyi'i rnam pa'i tshul du rtogs shing rtogs pa'i don goms pa las/don dam pa'i de kho na nyid la rim gyis 'jug pa'i yan lag yin pa'i phyir te ji ltar lam ni grong khyer du 'jug pa'i yan lag yin pas grong khyer nyid ma yin pa bzhin no/ /spyi'i rnam pa'i tshul du brjod ces pa yang rtog pa'i gzung ba la sgro btags pa nyid brjod pa la/snang ba dang brtags pa gcig tu zhen nas don dam pa'i rang gi mtshan nyid brjod par zhen pa'o/ /tshig gis brjod pa'i bya ba yang don dam pa ma yin te/ tshig gi rnam par rtag pa las byung ba'i blo'i spyod yul ma yin pa'i phyir ro//de'i don yang blo de 'dra ba'i yul ni brjod pa dang 'dres par snang ba'i sgro btags pa nyid yin la/ don dam pa 'phags pa so so rang gis rig pa'i ye shes kyi yul yin pa'i phyir ro/ /don 'di nyid kyang / /sgra gang zhig ni brjod pa na/ /rtogs pa'i don gang yin pa de/ / de ni sgra yi brjod bya ste/ /zhes pa la sogs pa bstan to/ /rnam par rtog pa ni zhes pa'i tshig gi rnam par rtog pa'o/ /gzhan yang sgra'i rang gi mtshan nyid ni skye zhing 'jig pa mi rtag pa'i rang bzhin yin pas don dam pa'i rang gi mtshan nyid rjod par mi byed de/ de ni de la brdar ma byas pa'i phyir ro/ /de skad du yang / sgra rnams kyis ni brdar btags ston/ de ni tha snyad ched du byas/ /zhes pa la sogs pa sngar bstan to/ /gzhan yang rgyu dang rkyen las byung ba don dam pa'i dngos por ma grub pas de kho na nyid du don dam pa brjod par mi 'thad ces pa'o/ /gzhan yang brjod bya rjod byed kyis bsdus pa rang dang gzhan gyi mtshan nyid med pa'i phyir yang de 'dra ba mi 'thad ces pa'o//gzhan yang sgra las byung ba'i rnam par rtog pa la ni phyi rol gyi rang gi mtshan nyid mi snang ste/ de nyid kyi phyir sgra ni rang gi mtshan nyid kyi don dam pa rjod par byed pa ma yin no/ /yang sna tshogs sgra'i bdag nyid yin te/sgra dang don gcig par gyur na/ ji ltar me zhes brjod pas skyes bu'i kha'i nye 'khor na gnas pas de'i don me yang de nyid na gnas pa'i phyir kha tshig pa'i nyes par 'gyur ba dang / gzhan yang de 'dra ba'i sgra nyan pa po'i rna ba'i dbang po'i nye 'khor na gnas pas kyang de bzhin du 'gyur ba'o//gal te sgra ni thams cad du khyab par gnas pa brtags pa'o zhe na/ ma yin te de lta na yang phyogs thams cad sreg pa'i nyes par 'gyur ba dang / res 'ga' bar dmigs pa mi 'thad do/ /dngos po ji lta ba bzhin du brjod par 'dod pa ni 'og nas 'gegs par 'gyur ro//snga ma ltar de bzhin gshegs pas gsungs pa'i don ni yi ge de rnams kyi rang bzhin skye ba med pa la sogs pa yin pa dang / chos kyi bdag po nyid kyis don de rnams la ltos te/ yi ge de dag rjod byed nyid du brdar bkod pa na yang de bzhin du ston par nus pa ste/'dir de ltar mtha' gcig tu nges pa ni ma yin te/ don de nyid tshig dang yi ge gzhan gyis bstan par mi nus pa dang / tshig dang yi ge de rnams kyis kyang don gzhan ston par mi nus pa ni ma yin te/ skyes bu'i 'dod pas ji ltar brdar sbyar ba bzhin du don go bar mi nus pa'i phyir ro//de ltar dgongs pa'i don dang dgos pa 'ga' zhig la brten nas/ tshig dang yi ge de rnams kyis don dam pa nyid du gsungs kyi/ dngos su ni de dag don dam pa ma yin te/ 'di nyid las gsungs pa'i tshad mas gnod pa'i phyir ro/ / stong pa nyid dam zhes pa ni tshig go/ /byis pas ma mthong rnam par rgyug /ces pa ni tshig la sogs pa dngos por gzung zhing de yang rang gi mtshan nyid kyi dngos po brjod pa nyid du bzung nas de las de lta bu'i dngos po tshol bar byed pa'o/ /dngos po thams cad ces pa la sogs pas ni rkang pa dang po gnyis kyi don 'chad pa'o//mi 'khor mya ngan 'da' mi bya/ /zhes pa ni brjod bya rjod byed kyi chos thams cad stong par rtogs pas shes pas srid pa la mi gnas pa dang / sprul pa lta bur 'gro ba rnams mthong zhing / de yang sdug bsngal gyis gzir ba nyid du rtogs pas snying rjes zhi ba la mi gnas pa'o//snying po ni chu shing gi snying po'o/ /de lta na phung po la sogs pa'i mtshan nyid yod par bstan pa mi 'thad do zhe na/ ji ltar zhes pa la sogs pa gsungs so/ /de nas yang bcom ldan 'das la zhes pa la sogs pas yang gnyis kyi mtha' brjod pa ji lta ba zhes pa dang //ji ltar rtag dang chad pa yi/ /lta ba rab tu 'byung mi 'gyur/ /zhes pa'i dri ba tshig gis 'phangs pa/ mtha' bzhi'i tshul dgag pa rgyas par ston te/ rtogs pa rnam par phye ba'i mtshan nyid ces pa ni rtogs pa nyid rnam par phye ba ste/ ji lta ba bzhin rtogs pa'i yul la mchis pa dang ma mchis pa la sogs pa'i mthar 'dzin pa spangs pa de nyid kyi phyir mu stegs can gyi rtog pa mi rgyu ba/'phags pa so so rang gi ye shes kyis mkhyen pa zhes pa la sogs pa sbyar bar bya'o/ /de la gcig pa dang tha dad pa ni phyi rol pa gang dag dngos po thams cad rang bzhin nas gcig la/gnas skabs nas tha dad ces pa 'am yan lag gi rdzas ni gcig la/ yan lag tha dad ces pa la sogs pa dang / de nyid kyi phyir gnyis ka dang gnyis ka ma lags pa yang lta ba de nyid la sbyar bar bya ste go bar zad do/ /de la sogs pa rang gi sde pa gang dag rdul phra rab dang skad cig so so ba ni gcig la/du ma 'dus pa ni tha dad ces pa la sogs pa'o/ /mchis pa yang ma lags zhes pa'i don ni mu stegs pa'i sems tsam pa dag shes pa gzung 'dzin gnyis kyi dngos por yod pa ma yin zhing / gnyis med pa rtag pa'i dngos por med pa yang ma yin zhes pa la sogs pa ste/mdor na dngos po'i phyogs khas len pa thams cad la lta ba 'di rnams rjes su 'jug pa'o/ /de dag thams cad mu stegs can zhes kyang 'og nas ston par 'gyur ro/ /yul mtha' yas pa'i mtshan nyid lhun gyis grub ces pa ni de dag ji lta ba bzhin du mkhyen cing dbang bsgyur ba'i ye shes dang nus pa lhun gyis grub pa'o//gzhan ni shes par zad do/ /phan pa dang bde ba ni byams pa'i las so/ /lha dang mi rnams ni dal 'byor gyi rten phun sum tshogs pa yin pas/ de rnams la phan pa dang bde ba byas pa ni 'gro ba phal po che'i don du 'gyur ba'o//dri za'i grong khyer de ni dri za'i grong khyer med pa'ang ma yin zhes pa de ltar snang ba tsam gyi rang bzhin kun rdzob tu sems kyi ngo bor grub pa'o/ /grong khyer rin po che rjes su dran zhes pa ni de rnams grong khyer gyi dngos po sngar mthong ba dang 'dra bar 'dzin cing /sngar ma mthong ba yang dngos po'i tshul du dran pa'o/ /med pa pa zhes pa ni chad par lta ba la gnas pa'o zhes zer ba'o/ /de nyid gsal bar bstan pa ni/ /skye ba med par smra zhes pa la sogs pa'o/ /mthong ba dang ma mthong ba ni dbang po bslad pas mthong bas sems kyi ngo bor yod ces pa la sogs pa'o//blo gros chen po gzhan yang tshad ma gsum zhes pa la sogs pa ni sems tsam pa gang dag mngon sum dang rjes su dpag pa dang / yid ches pa'i lung ste/ don nges par byed pa'i yan lag so sor rnam par phye zhing gzhag ste/ de rnams la brten nas 'phags pa so so rang gis rig par bya ba'i ye shes sam/de'i rigs sems can thams cad la yod pa'i sems rang bzhin gyis 'od gsal ba ni rang rig pa'i mngon sum nyid kyis grub pa 'am/ yang rtogs pa'i rang bzhin gyi rnam par shes pa tsam ni myong ba'i tshad mas grub la/ de nyid gzung 'dzin gnyis kyi rang bzhin yin pa la gnod byed kyi tshad ma yod pas gnyis med pa'i rang rig pa don dam pa'i dngos por yod ces slob dpon dkon mchog 'bangs kyis bstan pa 'am/ gzhan yang sngar bstan pa ltar lhan cig dmigs pa nges pa la sogs pa'i gtan tshigs kyis/shes pa gnyis med kyi ngo bo don dam par grub pa dang / lung las kyang de ltar bstan pa'i phyir/ de 'dra ba'i dngos por yod ces pa'o/ /dngos po dang dngos po med pa'i 'du shes ni shes pa gnyis med kyi phyir dngos po yod cing / gzung 'dzin la sogs pa'i dngos po med ces pa'o//de nyid de dag gi bdag tu 'dzin pa la sogs par 'gyur ba ni/ gal te rang bzhin gyis yod na/ de ni med pa nyid mi 'gyur/ /zhes sngar bstan pa'i rig pas de ni rtag tu yod pa'i rang bzhin la brten cing gnas pas shes pa rig pa tsam gyi rang bzhin rtag pa la sogs par khas len dgos pa'o//gal te de lta na rnam par shes pa dang phyi'i don la sogs pa yod par bstan pa dang 'gal lo zhe na/ de ltar bstan pa ni sprul pa'i sangs rgyas kyis sems can rnams brid pa'i don du bstan pa ste/ drang ba'i don nyid yin no/ /de ni chos nyid kyi sangs rgyas sam/ting nge 'dzin gyi sangs rgyas te longs spyod rdzogs pa'i sku bstan pa ma yin no/ /de ltar phyi nang gi chos rnam par 'jog pa ni mi brjod do zhes tshig phyi ma la sbyar bar bya'o/ /su zhig mi brjod ce na/ rtogs pa'i rang bzhin gyi chos 'phags pa'i ye shes so so rang gis rig pa'i ting nge 'dzin gyi bde ba la gnas pa longs spyod rdzogs pa'i sku dang /chos kyi sku'i sangs rgyas ni de 'dra ba mi brjod ces pa ste/ 'di'i don zhib tu ni sngar bstan no/ /blo gros chen po zhes pa la sogs pas dpe'i rnam grangs du ma'i sgo nas kyang don de nyid ston te/ shing gi grib ma ni de'i gzugs brnyan no/ /de ni shing gi dbyibs su snang ba shes pa'i ngo bor yod pas/ grib ma ma yin pa yang ma yin la/ dngos por gyur pa'i phyi rol gyi dbyibs med pa'i phyir/ rdzas su grub pa'i grib ma 'ang ma yin zhes pa'o/ /gzhan yang brag ca ni ming dang 'bab chu dang rlung gi sgra dang /ri rong la sogs pa phrad pa las byung zhing / phyi rol na grag ste/ de ni byis pa mi mkhas pa rnams la phyi rol gyi sgra bden par grag cing / mkhas pa rnams la de 'dra ba ma yin par grag pa'o/ /de dag ni chags pa dang zhes pa skom pas gdungs pa'i ri dgas la chu ru snang zhing de la chags pa'o//dngos 'dzin byis pas 'phangs blangs pa zhes pa la sogs pa'i don ni byis pa rnams kyis bdag rtag pa la sogs pa dngos por zhen pa dam du bzung ba rnams/ ji ltar shing la sogs pa'i gzer chen po gzer phra mos 'byin par byed pa ltar/ de 'dra ba'i phyin ci log rags pa rnams kyang mi rtag pa la sogs pa dngos por bstan pas rim gyis brid de rnam par rtog pa phra mos rags pa rnams zlog par byed pa'o/ /sgyu ma ro langs 'khrul 'khor ni sems pa'i g.yo ba med pa'i dpe'o/ /rmi lam la sogs pa ni med bzhin du snang ba'am/ mi rtag pa nyid kyi dpe'o/ /rgyud gsum chad pa ni zad pa dang mi skye ba ste/ de 'dra ba'i ye shes thob pa na thar par 'gyur ba'o/ /gal te rgyud gsum sems kyi dngos por grub pa ma yin nam zhe na/ 'di la rnam rig gang yang med/ /ces pa la sogs pa'o/ /cung zad du yang khas blangs med/ ces pa ni yod med la sogs pa'i mtshan mar brtags pa rnams de bzhin du grub pa med pa de 'dra ba'i phyogs rnam par 'jog pa med ces pa'o/ /rnam rig 'di ni zhes pa la sogs pas snga ma de nyid gsal bar 'chad do/ /gang la zhes pa myong ba'i rang bzhin tsam la/dngos po'i ngo bor btags pa ni mi bden zhes pa'o/ /de ltar na de bzhin gshegs pa thams cad kyi nges pa'i don bstan pas ni/ mtha' bzhi las rnam par grol ba rigs pa dang stong pa zung du 'jug pa'i don nyid do/ /gal te de lta na phung po la sogs pa yod par bstan pa mi 'thad do zhe na/de ni gnas zab mo rtogs par bya ba'i don du thog mar zhen pa dang bcas pa'i skye bo rnams la drang ba'i don nyid bstan pa'o/ /de la bden pa dang zhes pa la sogs pa'i don ni bden pa bzhi sngar bstan pa ltar kun nas nyon mongs pas bsdus pa'i rten cing 'brel bar 'byung ba dang /lam dang 'gog pas bsdus pa rnam par byang ba'i phyogs kyi rten 'brel dang rnam par thar pa'o/ /sgo gsum gyi bsten pa 'jug pa sngon du btang ste/ de la brten nas rim gyis gnas zab mo rtogs par byed do/ /de las/ gzhan du gtso bo'i rang bzhin dang / zhes pa la sogs pa shes par zad do/ /rgyu med pa nyid 'dod rgyal ba'am/ yang na 'dod par dga' ba'i stobs kyis 'bras bu 'byung ba ste/ ji ltar tshangs pa'i gzhal med khang stong par thog ma nyid du skyes pa'i sems can 'ga' zhig gi 'dod pa'i stobs kyis lha gzhan gnyis pa dang gsum pa la sogs pa skyes so snyam du sems shing khas len pa lta bu'o//de bzhin du dus dang rang bzhin rgyur smra ba la sogs pa ste/ de 'dra ba ston par byed pa ma yin zhes pa'o/ /blo gros chen po zhes pa la sogs pas ni chos bstan pa 'jug pa'i rim pa nyid tshul gzhan gyi sgo nas rgyas par ston te/sgrib pa gnyis kyi gnyen por rim gyis chos ston pa ni ji ltar ded dpon 'ga' zhig 'jim pa'i ri dgas kyis bu rnams 'drid pa ste/ sngar bstan pa bzhin no/ /de bzhin du nyon mongs pa'i sgrib pas bsdus par 'gyur ba brgya'i gnyen por sngar bshad pa ltar/ snang ba med pa brgya po nyid thog mar bstan la/ de'i rjes su shes bya'i sgrib pas bsdus pa gzung 'dzin gyi rnam par rtog pa brgyad de/ ji skad du/ /mthong dang bsgom pa'i lam dag la/ /gzung dang 'dzin pa'i rnam rtog rnams/ /nye bar zhi bar bya ba'i phyir/ /gnyen po rnam pa brgyad ces bya//zhes gsungs pa lta bu'o/ /de la gzung 'dzin gyi rnam par rtog pa rags pa rnam pa bzhi ni mthong ba'i lam gyis spang bar bya ba ste/ gzung ba'i rnam par rtog pa dang kun nas nyon mongs pa'i gzhi'i rten can dang / gnyis pa gnyen po'i rten can gyi rtog pa'o/ /de ltar yang /gzhi dang de yi gnyen po yis/ /gzung ba'i rtog pa rnam pa gnyis/ /zhes gsungs so/ /'dzin pa'i rnam par rtog pa yang gnyis te/ gang zag rdzas la brten pa dang / /skyes bu btags pa la brten pa'o/ /de skad du yang / rdzas dang btags pa'i rten can gyis/ 'dzin pa rnam pa gnyis su 'dod//ces gsungs so/ /de ltar rags pa bzhi ni byang chub sems dpa'i snang ba med pa'i ye shes mthong ba'i lam gyis spang bar bya ba yin la/ phra ba rnam pa bzhi ni de'i bsgom pa'i lam gyis spang bar bya ba'o/ /de lta na lam gnyis kyis bsdus pa spang bya la ltos te/rnam par phye ba brgya rtsa brgyad dang / lam dang 'bras bus bsdus pa'i theg pa dang / de rnams kyi bdag nyid du rtogs pa'i ye shes yon tan bskyed pa'i gzhir gyur pas sa zhes pa ste/ thog mar nyan thos kyi theg pa la sogs pa bstan pa'i rim gyis rab tu 'jug go/ /blo gros chen po gzhan yang zhes pa la sogs pas snang ba med pa'i ting nge 'dzin de rnams tshul lugs rnam pa bzhir bsdus pa'i sgo nas gsal bar ston te/bsam gtan pa yi yul de gang / /rnal 'byor rnam pa du ru brjod/ ces dris pa'i lan du yang sbyar bar bya'o/ /dang po nas gang nas gang du zhes pa ni de ltar dmigs pa dang bcas pa'i sems kyis 'khor ba la yid 'byung ba sngon du btang nas rim gyis 'du shes dang tshor ba 'gog pa ste/snang ba med pa'i ting nge 'dzin zhes bya ba'o/ /de la byis pa nye bar spyod pa zhes pa ni de kho na nyid rtogs pa'i lhag mthong dang bral bas 'jig rten pa'i bsam gtan dang mtshungs zhes pa'o//don rab tu 'byed pa'i bsam gtan ni gang zag la bdag med pa'i mtshan ma la sogs pa dang / bdag dang gzhan gyi mtshan mar gzung ba thams cad shes rab kyis rnam par gzhigs nas blo'i ngo na med par byas te/ chos la bdag med par rtogs pa'i sa'i mtshan nyid kyis don rab tu 'byed pa'i go rims can te/byang chub sems dpa'i sa dang po dang gnyis pa la sogs pas bsdus pa'i mnyam par gzhag pa'i ye shes snang ba med pa'i ting nge 'dzin no/ /de bzhin nyid la dmigs pa'i bsam gtan ni bdag med pa gnyis kyi mtshan mar sgro btags pa yang /kun du brtags pa nyid yin pas/ de 'dra ba'i rnam par yang mi rtog pa sems kyi chos nyid yang dag pa ji lta ba bzhin du rtogs pa snang ba med pa'i ting nge 'dzin gyis bsdus pa'o/ /de bzhin gshegs pa'i bsam gtan ni de bzhin gshegs pa'i sa'i rnam par 'jug pa ste/chos kyi sku'i ye shes sngon du byed pa'i lam rdo rje lta bu'i ting nge 'dzin gyis bsdus pa'am/ yang na chos kyi sku'i ye shes la rgyun gyis 'jug pa ste/ chos kyi sku nyid kyis bsdus pa'o/ /mtshan nyid gsum gyis bde ba ni zab pa med pa'i bde ba dang /spros pa dang bral ba dang / mi 'gyur ba'i bde ba ste/ dang po gnyis kyis ni rim pa bzhin du sgrib pa gnyis bag chags dang bcas te spang bar bstan la/ mi 'gyur bas ni mthar thug pa dang chos kyi dbyings kyi rang bzhin yin pas nyams pa med pa'o//de 'dra ba'i bsam gtan thob par bya ba'i don du/ rnal 'byor cung zad thob pa rnams kyis yang nas yang du brtson par byas na bsam gtan gyi mtshan ma/ nyi ma zla ba'i dbyibs 'dra dang / /'od dang pad ma lta bu dang / /ri mo nam mkha'i me 'dra mthong / /zhes pa ste/ shrI kA la tsakra'i 'grel par nyin mo'i rnal 'byor gyi rtags bstan pa ste/ nam mkha' la nyi ma dang zla ba'i dbyibs dang kha dog rnam pa lta bur mthong ba dang / pad mo'i dbyibs dang 'od lta bur snang ba dang / sprin med pa'i nam mkha'i me 'bar ba'i rnam par mthong ba dang / gzhan yang ri mo'i rnam par snang ba ste/rnam par snang mdzad 'od chen po/ /'gro ba'i mar me ye shes sgron/ /gzi brjid chen po 'od gsal ba/ /shes rab ye shes me bo che/ /zhes gsungs pa dang sbyar te bstan pa lta bu'o/ /gzhan yang 'phags pa rnam par grol ba'i sdes shes rab kyi pha rol tu phyin pa'i 'grel par zad par gyi skye mched kyi mtshan ma bshad pa dang yang sbyar bar bya'o//de la mtshan ma de dag mthong ba'i tshe yang dag pa nyid du 'dzin cing bdag tu nga rgyal ba dang bcas par gyur na/ mu stegs can gyi lam du khrid par byed pa ste/ thar pa las ring du 'gyur ba'o/ / gzhan yang yang dag pa'i mtshan mar 'dzin cing gang zag gi bdag tu rlom pa med pa de ltar na yang nyan thos dang rang sangs rgyas kyi spyod yul du lhung bar byed pa ste/ dmigs pa dang bcas pa'i lam dang de 'dra ba'i 'bras bu la spyod par byed pa'o/ /de'i phyir de lta bu'i mtshan mar zhen pa las log ste/de ltar snang ba yang rdzas su ma grub pa'i snang ba sems tsam nyid du shes shing / de dang 'dra bar chos thams cad kyang rtogs par gyur pa na/ rim gyis snang ba tsam yang gnas gyur te/ /snang ba med pa'i ting nge 'dzin la gnas pa de'i tshe sangs rgyas rnams kyis byin gyis rlob pa ste/'og nas ston par 'gyur ro/ /yang dag pa'i rjes su 'gro ba ni de la blo gros 'jug pa'o/ /de nas yang bcom ldan 'das la zhes pa la sogs pas ni lam gyi bye brag de rnams kyi de bzhin gshegs pa'i snying po rnam par sbyang bas thob par 'gyur ba'i 'bras bu mya ngan las 'das pa nyid du rgyas par ston pa'o//de yang rang bzhin gyis mya ngan las 'das pa dang nyan thos dang rang sangs rgyas rnams kyis 'dod pa'i phung po lhag ma dang bcas pa dang / lhag ma med pa dang / sangs rgyas rnams kyi mi gnas pa'i mya ngan las 'das pa chen po las 'dir ni re zhig mi gnas pa'i mya ngan las 'das pa ston te/de yang rnam par shes pa'i bdag nyid thams cad kyi bag chags kun gzhi dang zhes pa/ bag chags nyid kun gzhi ste/ nus pa dang nus pa can tha dad pa med pa'i phyir ro/ /yid dang yid kyi rnam par shes pa'i lta ba'i bag chags zhes pa ni 'jig tshogs la lta ba la sogs pa'i bag chags te/sa bon gzhan du gyur ces pa la sogs pa sngar bstan no/ /mya ngan las 'das pa'i tshul zhes pa la sogs pas ni mi gnas pa'i mya ngan las 'das pa'i tshul lugs phyin ci ma log pa/ rang bzhin gyis stong pa ste dbyings ye shes dbyer med pa'i chos kyi sku las dbyings kyi cha gtso bor bstan pa'o//sangs rgyas rnams dang nga yis brjod/ /ces pa mdo sde 'di dang 'phags pa dkon mchog sprin la sogs par gsungs pa ste/ ji skad du/ bcom ldan 'das mya ngan las 'das pa zhes bgyi ba ni yang dag pa ma lags pa'i yongs su rtog pa rab tu zhi ba'i tshig bla dgas lags so zhes pa la sogs pa gsungs so//gzhan yang zhes pa la sogs pas ni ye shes kyi cha gtso bor ston pa'o/ /rang dang spyi'i mtshan nyid du rnam par rtog pa spangs pas de'i phyir rtag pa ma yin zhes pa ni de dag gi dngos po yod par rtog na/de ni rtag tu de nyid kyi rang bzhin la brten cing gnas pa ste/ med pa nyid du mi 'gyur bas rtag par 'dzin pa'i mthar 'gyur ba las/ /'dir ni de ltar ma yin zhes pa'o/ /chad pa ma yin pa ni 'di lta ste/'das pa dang zhes pa la sogs pa gsungs pa la/ de la 'das pa ni sngar nyid du chos kyi sku'i ye shes mngon du byas shing / de las gzugs sku gnyis su snang bas sems can gyi don byas nas sprul pa'i sku yul lam dus kyi khyad par 'ga' zhig tu/ mya ngan las 'das pa'i tshul bstan pa ste/mya ngan las 'das pa de yang rnam par chad pa'i 'chi 'pho ba lta bu'o/ /da ltar byung ba ni da ltar chos kyi sku'i ye shes mngon du byas shing / de las byung ba'i gzugs kyi sku yang / chos kyi 'khor lo bskor ba la sogs par snang ba'o/ /ma 'ongs pa ni don go bar zad do//so so rang gis rtogs par byed/ /ces pa de rnams kyi ye shes rgyun mi 'chad par gdul bya rnams kyi the tshom sel ba la sogs pa'i bya ba byed pa'o/ /de nyid kyi phyir blo gros phyin ci log tu gyur pa gang dag 'phags pa rnams kyi ye shes ni sangs rgyas pa'i gnas skabs sam/lhag ma med pa'i mya ngan las 'das pa'i dbyings su ldog par 'gyur ba ste/ de'i rgyu mtshan yang rdo rje lta bu'i ting nge 'dzin gyis yod pa dang med pa la sogs pa'i mtshan ma'i chos thams cad stong pa nyid du rtogs pas shes par bya ba'i yul yang dag pa'i kun rdzob tu yang med pa'i phyir de shes pa'i ye shes mi 'thad ces pa'o//de skad du yang / 'gro ba'i chos kun rnam shes kyi/ /me yi bud shing yin par 'dod/ /de dag ji bzhin rnam 'byed pa'i/ /me yis bsregs nas nyer zhir 'dod/ /ces gsungs pa'i phyir ro/ /de yang dper na shing gnyis drud pa las me byung nas shing de nyid sreg pa ltar/gnyen po rdo rje lta bu'i ting nge 'dzin las re zhig chos kyi sku'i ye shes kyi me byung nas des mtshan ma'i chos thams cad bsregs shing mi dmigs pas de la dmigs pa'i ye shes de nyid kyang rgyun ldog pa'o/ /rnam pa gcig tu na rdo rje lta bu'i sngon rol gyi gnyen po la brten nas rdo rje lta bus bsdus pa'i ye shes kyi mes mtshan ma'i bud shing bsregs nas de'i rjes su ye shes kyi rgyun gzhan 'byung ba med pa'o//bstan bcos dag las kyang / /gang tshe dngos dang dngos med dag /blo yis mdun na mi gnas pa//de tshe rnam pa gzhan med pas/ /dmigs pa med par rab tu zhi/ /zhes gsungs so/ /gzhan yang sangs rgyas kyi ye shes rgyun dang ldan par yod na de nyid 'khrul pa dang bcas pa nyid du 'gyur te/ 'di ltar des rang ngam gzhan gang yang ma rig pa'i shes pa ni mi 'thad la//de dag rig par khas len te/ rjes thob kyi ye shes gzugs kyi sku dang / zhing khams kyi rnam par snang ba nyid du khas len na snang ba'i yul de rnams phyi rol gyi dngos por med bzhin du snang ba'i phyir blo 'khrul pa nyid du ci'i phyir mi 'gyur/ gal te nyes pa der 'gyur du'o zhes te/rjes thob kyi ye shes ni khas mi len la/ mnyam par gzhag pa'i ye shes rang rig pa 'ba' zhig go zhe na/ de lta na yang rig par bya ba rang gi rang bzhin don dam par med bzhin du rig cing snang bas ci'i phyir 'khrul par mi 'gyur te/ brtags pa snga ma nyid mtshungs so//de'i phyir sangs rgyas kyi ye shes mi 'thad do zhe na/ 'di ni rigs pa ma yin te/ de lta na mthong ba'i lam gyis bsdus pa'i mnyam par gzhag pa'i ye shes kyis kyang yod med la sogs pa'i chos kyi mtshan ma thams cad stong pa nyid du rtogs pas ye shes de'i don dmigs bya'i chos kyi mtshan ma kun rdzob tu yang med pa'i phyir/de dag la dmigs pa'i ye shes gnas skabs de nyid nas rgyun chad par 'gyur ro/ /gal te mtshan ma'i chos de rnams med mod kyi/ mtshan ma med pa so so rang gis rig par bya ba/rig pa dang stong pa zung du 'jug pa'i don kun rdzob tu gnas pas de nyid rig pa'i ye shes rgyun chad pa mi 'thad do zhe na/ de ni phyis kyi gnas skabs cig shos la yang mtshungs pa'i phyir ro/ /gzhan yang rjes thob kyi ye shes la snang ba gzugs kyi sku la sogs pa'i phyi rol dngos por med bzhin du phyi rol gyi dngos por snang ba'i phyir zhes gtan tshigs su sbyor ba na ni gtan tshigs 'di ma grub pa nyid du 'gyur ro//'o na ji ltar snang zhe na/ phyi rol gyi dngos po med cing sems nyid de ltar snang ba ste/ de yang bden pa'i dngos po'i stong pa nyid du snang zhing rtogs pas shes bya ji ltar yin lugs bzhin du snang ba'i ji ltar 'khrul par 'gyur zhes bsam pa'o//'dir gal te gzugs la sogs par snang ba'i phyir zhes de dag tsam gtan tshigs su 'god na yang khyab pa ma grub pa nyid du 'gyur ro/ /de bzhin du ye shes rang gi bdag nyid don dam par med pa la/de las bzlog ste yod par snang ba'i phyir zhes gtan tshigs su sbyor na ma grub pa nyid du 'gyur la/ don dam pa med par shes shing myong ba tsam ma 'gags pa rig pa dang stong pa zung du 'jug pa'i rang bzhin nyid du snang zhing shes pa'i phyir zhes gtan tshigs su 'god na ni gtan tshigs 'di 'gal ba nyid du 'gyur te/shes bya ji ltar yin lugs bzhin du snang ba la/ 'khrul pa las bzlog pa'i chos kyis khyab pa'i phyir ro/ /spyir de ltar snang zhing rig pa tsam du gtan tshigs su gtong na yang khyab pa ma grub pa'o/ /gzhan yang 'di skad smra ba ni mdo sde dang rgyud sde thams cad dang 'gal bar snang ngo //de dag ji bzhin rnam 'byed pa'i/ /me yis bsregs nas nyer zhir 'dod/ /ces pa'i don yang phyin ci log gi mtshan ma nye bar zhi ba'i don la bzhed par gsal ba nyid pas khungs nyid du mi rung ngo / /yang chos kyi sku ye shes kyi rang bzhin med pa de lta na gzugs kyi sku rnam pa gnyis ni gdul bya'i snang ba tsam yin gyi/sangs rgyas kyi rang bzhin ma yin par gser 'od dam pa la sogs pa'i mdo sde du ma las gsungs pas/ sangs rgyas la skur pa 'debs pa/ dge ba'i lo tog gi ser ba/ legs 'dod rnams kyis rgyang bsrings te spang bar bya ba kho na yin no//gal te sngar bstan pa ltar rgyun dang mi ldan yang ye shes kyi skad cig pa tsam khas len cing / de nyid kyi bdag po la brten nas gzugs kyi sku gnyis su snang bas sems can gyi don byed pas nyes pa'i go skabs 'di lta bur mi 'gyur zhe na/de ltar skad cig po de nyid kyang sngar bstan pa ltar 'khrul pas sangs rgyas 'khrul pa dang bcas pa nyid du 'gyur ro/ /gzhan yang rgyu mtshan mtshungs pa'i phyir/ /rdo rje lta bu'i gnas skabs sam/ /mthong ba'i lam gyi gnas skabs nyid na yang dmigs par bya ba mtshan ma'i bud shing bsregs pas de'i rjes su de dag la dmigs pa'i ye shes 'byung ba mi 'thad pa'i phyir ro/yang de ltar na nyan thos kyi lhag ma med pa'i mya ngan las 'das pa dang khyad par med par yang 'gyur ro/ /gal te de ni sems can gyi don gyi sbyor ba rgyun chad pa ma yin la/cig shos ni sangs rgyas pa'i gnas skabs na ye shes med kyang / sngar byang chub sems dpa'i gnas skabs kyi ye shes dang smon lam la brten nas gzugs sku gnyis su snang zhing sems can gyi don 'byung bas de dag mtshungs pa ma yin no/ /de skad du/ dper na nam mkha' lding gi ni//mchod sdong bsgrubs nas 'das gyur pa/ /de 'das yun ring lon yang de/ /dug la sogs pa zhi byed ltar/ /byang chub spyod dang rjes mthun par/ /rgyal ba'i mchod sdong bsgrubs pa yang / /byang chub sems dpa' mya ngan las/ /'das kyang don rnams thams cad byed//ces gsungs pa lta bu'o zhe na/ de ci 'o thug mngar ba'i ro dang 'brel zhes kyi/ de tsam gyis chu yang de ltar 'gyur ram/ 'dir byang chub sems dpa'i ye shes la sogs pa yod cing / de la brten nas sems can gyi don byas kyang /de ni byang chub sems dpa' nyid kyi dgra bcom pa dang mi 'dra ba'i khyad par du 'gyur gyi sangs rgyas kun rdzob tu yang med pa'i yon tan gyi khyad par du 'gyur ba ni ma yin no/ /byang chub sems dpa' mya ngan las 'das zhes pa'i lung gi don yang snga ma ltar yang dag pa ma yin pa'i rtog pa zhi ba de nyid yin gyi/ye shes rgyun chad pa ni ma yin no/ /gzhan yang ye shes rgyun chad pa ma yin pa'i sgrub par byed pa'i tshad ma dag kyang yod de/ ye shes gang gi rgyun gyi tha mar 'dod pa de nyid ni/ rigs mthun pa'i ye shes gzhan gyi nying mtshams sbyor bar byed pa yin te/'gal rkyen med la mthun rkyen tshang ba'i phyir zhes bya'o/ /de la mthun rkyen tshang ba nyid ni/ de ltar sems can so so'i rgyud la nyams su myong ba'i shes pa 'di nyid gzugs su snang ba dang sgra ru snang ba la sogs pa dang / bde sdug la sogs pa'i khyad par du skye ba ni snga ma'i myong rig las ma gtogs pa'i rgyu'i khyad par 'ga' zhig la ltos kyang /shes pa phyi ma myong rig tsam du skyed pa la ltos te/ snga ma'i myong rig de nyid rgyu ma tshang ba med pa nyid du grub la/ de bzhin du ye shes gang gi rgyun gyi tha mar 'dod pa yang myong rig tsam gyi rang bzhin du gyur pa'i ye shes yin pas rang gi rgyud du gtogs pa'i 'bras bu skyed par nus pa'o//'dir 'gal ba'i rkyen med pa ni/ gal te ye shes kyi 'gal rkyen gcig srid na de ni phyin ci log nyid yin te/ de yang mi bden pa'i don can glo bur ba nyid yin pas de kho na nyid kyi yul can sems kyi rang bzhin du gyur pa'i ye shes de ni des bzlog par mi nus so//gzhan yang phyin ci log sa bon dang bcas te spangs pas ye shes dang ldan pa'i rgyud la yang 'byung bar rigs pa ma yin no/ /da ltar gyi gnas skabs brgyal ba dang gnyid mthug po la sogs pa'i dus su rnam par shes pa'i tshogs drug gi ngo bo ldog pa ni mig la sogs pa'i mthun rkyen ma tshang ba'am/gnyid kyis bslad pa dang / gnad mi bzad pa'i gnas su bsnun pa la sogs pa'i 'gal ba'i rkyen gyis ldog pa'o/ /gzhan yang bum pa'i skad cig ma gang zhig rang gi rigs phyi ma bskyed pa la rgyu ma tshang ba med par gnas kyang ldog par 'gyur ba ni thob pa la sogs pa 'gal ba'i rkyen gyis yin la/'dir ni de 'dra ba'i 'gal rkyen med ces pa'o/ /gzhan yang de 'dra ba'i ye shes 'khrul pa yin nam 'khrul pa'i blo mi srid pas lam dang 'bras bu thams cad gtan mi srid par yang 'gyur ro//de ltar sgrub byed med cing gnod byed yod pas mi gnas pa'i mya ngan las 'das pa'i rang bzhin du gyur pa'i ye shes de ni rgyun chad pa ma yin zhes pa'o/ /'chi ba ni rnam par chad pa'i 'pho ba'o/ /da 'dra ba dang ldan na de nyid da rung skye ba'i rgyud du yang 'gyur la/de ni sdug bsngal thams cad kyi rtsa ba yin pas/ ji ltar mya ngan las 'das zhes pa'o/ /des na rnal 'byor rab tu gyur pa rnams shi 'pho ba dang bral ba 'gro ba rnams kyi skyabs kyi gnas mngon du byed pa'o/ /de ltar na de kho na nyid du spangs pa dang thob pa'i yon tan dang ldan pa cig yin nam zhe na/ma yin te thob bya dang spang bya'i chos grub pa med pa'i phyir ro/ /de nyid kyi phyir spros pa thams cad dang bral bas gcig dang tha dad pa las grol ba'o/ /gal te de lta na yang dag pa ma yin pa'i yongs su rtog pa nye bar zhi ba med pas/nyan thos la sogs pa'i mya ngan las 'das pas ni mya ngan las 'das pa ma yin par 'gyur ro zhe na/ de ltar 'dod pa nyid kyi phyir skyon med do/ /yul la phyin ci log pa ni rtag pa dang gtsang ba la sogs par 'dzin pa'i phyin ci log bzhi'o/ /gzhan yang dgra bcom pa'i sems kyi tha ma yang sngar bstan pa ltar/myong ba'i rang bzhin gyi sems nyid yin pa'i phyir sems gzhan gyi nying mtshams 'brel bar byed pa yin te/ de'i phyir lhag ma med pa nyid ni dgongs pa can yin no zhes gsungs so/ /tshad ma rnam 'grel las kyang / tha ma'i sems ni sems gzhan dang /mtshams sbyor ba la 'gal ci yod/ /ces gsungs so/ /yang nyan thos la sogs pa de dag la rang bzhin gnyis kyi mtshan nyid la mngon par zhen pa'i phyin ci log yod pas mya ngan las 'das pa mtshan nyid la ma yin no/ / blo gros chen po gzhan yang zhes pa la sogs pas de bzhin gshegs pa'i snying po rnam par sbyangs pas theg pa chen po'i rigs 'ba' zhig tu nges shing byang chub dman par mi ltung ba'i sa mtshams dang / de lta bu'i rgyu nyid ston te/ de yang tshogs dang mos pas spyod pa'i sa la byang chub sems dpa' rnams kyis tshogs gnyis khyad par du bsags pa dang /de bzhin gshegs pa'i byin gyis brlabs pa'o/ /sangs rgyas kyi byin gyi rlabs kyis byin du brlabs nas zhes pa ni ting nge 'dzin nam 'od zer gyis so/ /de'i dbang gis byang chub sems dpa' rnams kyang theg pa chen po'i don rab tu snang ba zhes bya ba'i ting nge 'dzin la snyoms par 'jug go//rdo rje snying po la byin gyis rlob pa ni/ ji ltar sa bcu pa las byang chub sems dpa' de'i lus la sangs rgyas rnams kyis 'od zer rab tu bstims pas rtogs pa khyad par can skyes pa ste/ ji skad du/ phra shing shes dka' drang srong chen po'i lam/ /rtag med rtog bral shin tu reg par dka'/ /de ni tshig gis shin tu brjod dka' yang / /bde bar gshegs mthu dpag med gang yin pa/ /'od zer lus can de ni bdag la yang dag zhugs/ de yis mthus na bdag gis shes par nus//zhes gsungs pa lta bu'o/ /'dir sangs rgyas ni longs spyod rdzogs pa'i sku'o/ /de'i zhal du lta zhing the tshom gyi gnas thams cad 'dri ba'o/ /rdzu 'phrul dang bstan pa'i rnam pa gang ci spobs kyang zhes pa ni sngar ma rtogs pa'i chos rnams kyang 'phral du rtogs par 'gyur zhing /de nyid kyis gdul bya rnams kyi the tshom sel bar byed pa'i chos ston par nus pa spobs pa so so yang dag par rig pa dang / rdzu 'phrul la sogs pa'i mthu rnams so/ /de ltar rang rang gis tshogs bsags shing sangs rgyas kyi byin gyi rlabs med par yang / de 'dra ba'i spongs pa la sogs pa 'byung na ni/byis pa'i skye bo thams cad la yang 'byung bar 'gyur te/ rgyu med pa nyid du mtshungs pa'i phyir ro/ /blo gros chen po zhes pa la sogs pas byin gyis rlob par nus pa'i rgyu mtshan ston to/ /sgra 'byin zhes pa ni chos ston pa'i sgra ste/ mi'am ci'i rgyal po ljon pas zhus pa las gsungs pa lta bu'o//gal te de lta na sems can thams cad la ci'i phyir de ltar byin gyis mi rlob ste/ thugs rje chen po nyi tshe ba mi mnga' ba'i phyir ro zhe na/ /tshogs ma bsags pa'i sems can rnams la byin gyi rlabs mi 'jug ste/ ji skad du/lha yi rgyal pos char phab kyang / /sa bon mi rung mi 'khrung ltar/ /sangs rgyas rnams ni byung gyur kyang / /skal ba med pas bzang mi myong / /zhes gsungs pa lta bu'o/ /shing la sogs pa las chos kyi sgra 'byung bar snang ba yang sems can tshogs bsags pa rnams la/de bzhin gshegs pa'i byin gyi rlabs kyis de ltar snang ba tsam du zad kyi/ phyi rol de lta bu'i ngo bor gyur pa ni med do/ /ting nge 'dzin la gnas pa'i dus ni sa dang po la sogs pas bsdus pa yin la/ khyad par gyi sa ni bcu pa'o/ /de las dngos po la sogs pa'i gnas skabs su byin gyis rlob pa'i rgyu mtshan ni byang chub sems dpa' rnams sa bdun gyi bar la nyon mongs pa can gyi yid kun gzhi rnam par shes pa la dmigs shing /bdag tu nga rgyal ba la sogs pa dang mtshungs par ldan pa gnas ma gyur pas sems kyi ngo bo de 'dra ba'i nyon mongs pas cung zad dkrugs shing /de nyid kyis da ltar dang ma 'ongs pa'i don las cung zad nyams par byed pa'i bdud kyi las srid pa dang / de'i phyir re zhig sems can gyi don btang snyoms su 'jog cing rang nyid ting nge 'dzin gyi bde ba la gnas pa/ nyan thos kyi bsam gtan la sogs pa dang mthun par lhung ba srid de/rmi lam lung bstan pa'i mdo las/ byang chub sems dpa' sems dpa' chen po rnams kyis sa bdun pa man chod du/ bdud dam bdud kyi las kyang rig par bya'o zhes gsungs pa'i phyir ro/ /yang 'dir dman pa'i lam sngon du song ba'i byang chub sems dpa' 'ga' zhig sa brgyad pa la sogs pa'i gnas skabs na yang /nyan thos la sogs pa dang mthun pa'i ting nge 'dzin la snyoms par 'jug cing / de nyid la mya ngan las 'das pa'i 'du shes can du 'gyur bar 'di nyid kyi 'og nas ston to/ /de bzhin gshegs pa zhes pa la sogs pas ni sa dang po la sogs pa la gnas pa dang /bcu pa la gnas pa'i thun mong ba'i dgos pa'o/ /de la thob pa ni yon tan gyi khyad par te/ sa dang po la sprul pa brgya 'gyed par nus zhes pa la sogs pa dang / sa bcu'i bar du yon gyi khyad par rgyas par gsungs pa rnams so//khong du chud pa ni rtogs pa'i chos so/ /de ltar byin gyis ma brlabs pa ni yang dag pa'i sa la zhugs pa 'am/ gzhan yang rung ste/ tshogs dang mos pa dman zhing dbang po rtul ba rnams/ da ltar dang ma 'ongs pa'i don las 'byed par byed pa'i bdud kyi dbang du 'gyur zhing /de nyid kyis mu stegs can gyi bsam pa ste/ lha dang tshangs pa la sogs pa thob par bya ba'i don du/ bsam gtan dang gzugs med kyi ting nge 'dzin bsgom zhing / de dag gi ro la chags par 'gyur ba'o/ /nyan thos kyi bsam pa yang sngar bstan pa ltar ram gzhan yang bdud sangs rgyas kyi cha byad la sogs par byas nas/khyod la byang chub mchog tu sems bskyed pa la sogs pas ci zhig bya ste/ de ni bskal pa dpag tu med par sdug bsngal mang po myong bar 'gyur bas 'di nyid du rang gi srid pa'i sdug bsngal mthar phyung shig ces pa la sogs pa bstan pas sems bskyed pa las ldog pa ste/'phags pa shes rab kyi pha rol tu phyin pa dang / gtsug tor chen po bdud kyi le'u las ji ltar gsungs pa bzhin no/ /'di yang yang dag pa'i sa la zhugs pa rnams la ni mi srid de/ chos nyid kyis thob pa'i sems skyes pa'i phyir dang / chos kyi dbyings kun du 'gro ba la sogs pa'i don du rtogs pa'i phyir ro/ /'di rnams kyang / gang gis sa yi rim par 'gyur/ /zhes dris pa la sogs pa'i lan du sbyar bar bya'o/ /de nas yang zhes pa la sogs pas sngar rten 'brel gyi don bstan pa la brtsad pa spangs pa ste/dri ba'i don ni de ltar rten cing 'brel bar 'byung ba bstan pas ni rgyu dang 'bras bu'i dngos po yod par bstan gyi/ chos thams cad skye ba med pa de bzhin gshegs pa nyid kyi tshul lugs zab mo bstan pa'i sgo nas dmigs pa can [(]kyi [,]gyi [)]skye bo phyin ci log las bzlog nas//rang gi tshul lugs zab mo gzung ba'i gtam ma gsungs te/ des na phyi rol ba rnams dang khyad par med pas 'ga' zhig ni/ sgro 'dogs pa'i mthar ltung ba la/ gang yang bcom ldan 'das kyis zhes pa la sogs pa 'ga' zhig skur pa 'debs pa'i mthar ltung ste/rgyu dang 'bras bu don dam pa'i dngos por gsungs kyi/ sgyu ma lta bur bstan pa med la/ don dam pa'i dngos po yang sngar bstan pa'i tshad mas gnod pas mi 'thad cing / sgyu ma lta bu'i tshul du ma yang ma gsungs pas rgyu dang 'bras bu med pa'i phyogs nyid bstan par 'gyur ro snyam du dogs pa'o//gzhan yang 'di yod na 'di yod ces pa'i rten 'brel gyi tshig gi don yang mngon sum brjod par byed pa nyid yin pas gdugs dang grib ma ltar dus mnyam pa la 'thad kyi/ rim gyis 'byung ba la mi 'thad de/rgyu 'di yod na 'bras bu ma skyes pas 'di zhes pa mi 'thad la/ 'bras bu skyes pa na rgyu 'gags pas 'di zhes pa mi 'thad do/ /des na mu stegs byed kyis rnam par brjod pa nyid bzang gi zhes pa ni grangs can pa rnams kyis 'bras bu sngar nas yod pa rgyu'i bdag nyid du gyur pa nyid skye bar 'dod pa la/'di yod na 'di yod ces pa 'thad kyi khyod phyogs la mi 'thad ces pa'o/ /rten cing 'brel bar 'byung ba ma lags pa'i rgyus 'bras bu mngon par sgrub ces pa ni gtso bo dang dbang phyug la sogs pa de rnams nyid rgyu las ma skyes te rtag tu gnas pa yin la/de las 'bras bu 'byung bar 'dod pa dang / gzhan yang 'bras bu rgyu'i bdag nyid du gyur pa sngar nas gnas pa nyid mi gsal ba la gsal bar gyur pa tsam mo zhes khas len pa'o/ /gzhan yang tha dad dus mnyam pa la yang rgyu 'bras 'tshol ba nyid du 'gyur bas/ rgyu dang 'bras bu'i dbye ba nges pa nyid du mi 'thad do//yang rten cing 'brel par 'byung ba rgyud pa du mar khas len pa ni/ sngar bstan pa ltar phan tshun ltos pas/ rgyu dang rkyen yang 'dres zhes pa ni/ 'bras bu dang 'dres pa ste de dag nyid kyang 'bras bur 'gyur ba'o/ /de bzhin du 'bras bu yang 'bras bu gzhan gyi rgyur 'gyur la/de la rgyu'i tha snyad rnam par 'jog pa ni de nyid kyi 'bras bu la ltos la/ de 'bras bur grub pa yang rgyu la ltos shing / 'bras bu de yang gzhan gyi rgyur khas len dgos la/ de la rgyur tha snyad 'jog pa yang de nyid kyi 'bras bu grub pa la ltos shing /de grub pa yang rgyu drug pa la ltos pas phan tshun brten pa thug pa ma mchis par 'gyur ba'o/ /de'i phyir 'di yod na 'di yod ces rten 'brel dngos po'i ngo bor brjod pa ni phyir zhing de nyid dgag pa byas pa nyid du 'gyur ro/ /lan gyi don ni kho bo cag gi rten cing 'brel bar 'byung ba ni kun rdzob tu rang gi sems snang ba tsam yin zhing don dam par sems kyi ngo bor grub pa yang ma yin te/rkyen nyid 'di pa tsam sgyu ma lta bu nyid du 'dod pas/ 'di yod pas 'di yod ces brjod kyang rgyu dang byed pa don dam pa'i dngos por smra ba/ phyi rol pa la sogs pa dang mtshungs pa ma yin la/kun rdzob tu gang gi mjug thogs su gang zhig nges par 'byung ba'i rgyu dang 'bras bu ma 'dres pa nyid du snang bas rgyu rkyen 'bras bu dang 'dres pa ste/ phan tshun 'chol pa nyid du 'gyur ba'i skyon yang med de/ de'i phyir skur pa'i mthar yang mi ltung ngo //don dam par dpyad na de 'dra ba'i nyes pa la sogs pa dang 'brel bas rgyu 'bras yang dag pa'i dngos por khas mi len pa'o/ /de ltar mtha' gnyis su 'gyur ba ni/ phyi'i don dngos por khas len pa 'am/ sems nyid yang dag pa'i dngos por khas len pa la rigs kyi/ nga'i lugs la ni rigs pa ma yin no//blo gros chen pos yang gsol pa zhes pa la sogs pas ni ngo bo nyid med pa'i don la brtsad pa spang ba ste/ phyi rol pa gang dag sgra dngos po'i stobs kyis 'jug pas de lta bu'i brjod par yod pas brjod par bya ba'i don kyang yod do/ /gal te de lta na chu klung gi 'gram na bu ram gyi shing rta brdal ba dag yod do zhes pa don gyis stong pa'i sgra dag dmigs so zhe na/bden te/ de 'dra ba'i ngag gi sgra yul dang dus dang bcas pa brjod pa ni rang gi brjod par bya ba la 'khrul mod kyi/ tshig gi rang bzhin gyi sgra yul dang dus kyi khyad par du ma byas pa bum pa zhes brjod bya'i don la mi 'khrul ba ste/de 'dra ba'i tshig gi don yul lam dus gang yang rung ba na med pa mi srid pa'i phyir ro zhes 'dod pa dgag pa'i don du zhu ba pos gleng bslang ba'o/ /brjod pa ni sangs rgyas kyi zhing thams cad du grags pa yang ma yin zhes pa ni lus dang ngag gi rig byed 'ga' zhig sangs rgyas kyi zhing 'ga' zhig tu don 'ga' zhig la brdar grags pa de nyid zhing thams cad du mthun par brdar grags pa ma yin te/brda ni skyes bu'i 'dod pa la ltos nas ji ltar brda byas pa de bzhin du de dag gi don go bar nus pa'i phyir ro//de la snol zhes pa ni lus ngag gi snol lam zur tsam bstan pa'o/ /zhing dran pa ni sems kyi rgyu ba rags pa ste/ gzhan gyi sems shes pa rnams la des mtshon nas zab mo'i don gzhan ston pa'o/ /mig mi 'dzums par bltas pas mi skye ba'i chos la bzod pa la sogs pa thob pas de nyid de thob pa'i brdar 'gyur ba'o//don ston byed kyi brda nges pa med pa de ni/ 'jig rten 'di nyid na yang snang ste/ srin bu dang sbrang ma la sogs pa rnams mi rnams la brdar grags pa'i brjod pa med par lus kyi rig byed la sogs pa gzhan gyis phan tshun 'du ba la sogs par rang rang gi don ston pa'i bya ba byed pa'o//de nas yang byang chub sems dpa' zhes pa la sogs pas de bzhin gshegs pa'i snying po de nyid rnam grangs gzhan gyi sgo nas rgyas par ston te/ dri ba'i don mdo sde 'di dang / mya ngan las 'das pa la sogs pa las de bzhin gshegs pa'i snying po rtag pa dang bdag la sogs pa'i rang bzhin du gyur pa sems can thams cad la yod par gsungs pa rtag pa zhes pa la sogs pa'i sgra'i don gang yin zhes pa'o//lan gyi don ni byis pa'i skye bo'i sems phyin ci log gi gzung yul ni de ltar snang ba phyin ci log gi blo nyid kyi bdag nyid yin la/de'i de kho na nyid kyang 'phags pa rnams la snang ba ste/ de rnams la snang ba yang kun rdzob tu blo nyid kyi bdag nyid yin zhing / blo yang don dam pa'i dngos pos stong la/ de ltar snang zhing myong ba ma 'gags pa ste/ rig pa dang stong pa zung du 'jug pa'i de bzhin nyid do//de ni de las gzhan du mi 'gyur bas rtag pa zhes kyang bya la/ byis pa'i skye bo la sogs pa rnams la de las gzhan du snang bas/ de dag gi blo nor pa phyin ci log ces kyang bya'o/ /de ltar na phyin ci log gi de bzhin nyid rtag pa dang / de yang ma rtogs na 'khor ba'i rgyur 'gyur zhing /phyogs 'ga' rtogs pa'am ji lta ba bzhin bdag nyid thams cad nas rtogs na/ ci rigs par byang chub gsum gyi rgyur 'gyur bas mya ngan las 'das pa'i rigs zhes kyang bya'o/ /de yang gsum gyi rgyur 'gyur ba ni gnas skabs la dgongs te/ gsungs pa yin no zhes pa la sogs pa rgyas par bstan to//'di lta ste zhes pa la sogs pas don de nyid rgyas par 'chad de/ de la dpe'i don ni/ mi mkhas pa dag gis smig rgyu la sogs pa la chu la sogs pa'i dngos por yang dag pa par 'dzin pas nor pa phyin ci log ces kyang bya la/ yang de ltar snang ba de nyid chu la sogs pa yang dag pa'i dngos pos stong la/ de ltar snang ba ma 'gags pa zung du 'jug pa sgyu ma tsam du rtogs te/ de ltar rtogs pa ni snang ba de'i de bzhin nyid gzhan du mi 'gyur ba'i chos nyid mi 'gyur ba bzhin du zhes pa'o/ /mig gi skye bu ni mig yor gyi khyad par skyes bur snang ba'o//blo gros chen po zhes pa la sogs pas dpes mtshon pa'i don byis pa'i skye bo la sogs pa'i blo nor pa dang rtag pa nyid du bsgrubs pa ste/ de la nor pa ni 'phags pa rnams dang mi mthun par don gcig la 'gal ba'i rnam pa du mar snang bas so//de'i de bzhin nyid rtag pa ni/ dngos po dang dngos po med pa rnam par spangs pa'i phyir zhes pa ste/ nor pa phyin ci log gi blo de nyid don dam pa'i dngos por ma grub cing / de ltar snang ba tsam ma 'gags pas sngar bstan pa ltar zung du 'jug pa'i sgyu ma lta bu'i chos nyid yin la/de ni de las gzhan du mi 'gyur bas rtag ces pa'o/ /de lta na rtag pa'o zhes mi ston par mi rtag par mi byed ces ston pa ci'i phyir zhe na 'dir rtag pa ther zug pa'i dngos por grub pa ma yin gyi/ mi rtag pa'i dngos po bkag pa sgyu ma lta bu'i chos nyid mi 'gyur ba tsam bstan pa'i don du yin no//ji ltar na zhes pa la sogs pas ni sngar gyi gtan tshigs ma grub par brtsad pa spangs pa ste/ ji ltar rgya mtsho'i rlabs dang gang gA'i chu la yi dags rnams kyis rnag khrag tu mthong zhing chur mi mthong ba dang / mi la sogs pa rnams kyis chur mthong zhing rnag khrag tu mi mthong ba'i phyir/de ltar snang ba ni bden pa'i dngos po spangs pa ste/ don gcig la 'gal ba du ma mi srid pa'i phyir ro/ /yang rang rang gi shes pa'i ngo na snang zhing don byed pas/ dngos po med pa rnam par spangs pa'o/ /deng de bzhin du byis pa thams cad spyod yul sna tshogs kyi phyir ro zhes pa ste/blo dang blo'i yul ji ltar snang zhing myong ba 'di nyid la kha cig gis ni phyi rol rdul phra rab 'dus pa'i bdag nyid du 'dzin la kha cig gis ni rags pa yan lag can gyi rdzas gcig tu 'dzin cing / 'ga' zhig gis shes pa'i dngos po'i don dam par 'dzin la/gzhan dag gis dngos po med pa'i snang ba tsam du rtogs pas 'gal ba 'du ba mi srid pa'i phyir/ nor pa ni dngos po ma yin la rang rang gi blo'i ngo na de ltar snang zhing myong la/ de yang kun rdzob tu grub pas dngos po med pa yang ma yin zhes pa'o//'di ltar chu de bzhin du snang bas na zhes pa ni/ 'di lta ste yi dags rnams kyis mthong ba dang mi mthong ba'i phyir zhes pa dang sbyar te don ni sngar bstan to/ /de ltar nor pa ni zhes pa la sogs pas ni skabs kyi don bsdus pa ste/ phyin ci log rnam par spangs pa ni byis pa ltar dngos po sna tshogs su 'dzin pa spangs pa'o//phyin ci log ma yin pa rnam par spangs pa ni snang zhing myong ba tsam ma 'gags pa'i phyir ro/ /des na ye shes de'i ngo na dngos po dang dngos po med pa rnam par spangs pa'o/ /de ltar gtan tshigs nyid bsgrubs nas skabs kyi bsgrub bya la sbyor ba ni/de ltar yang zhes pa la sogs pa ste/ nor pa'i de bzhin nyid dngos po dang dngos po med pa'i mtha' gnyis spangs pa zung du 'jug pa'i mtshan nyid yin pas/ mtshan ma'i mtshan nyid tha dad pa ma yin zhes pa/ nor pa'i chos nyid yul dang dus la sogs pa tha dad pa ma yin pas rtag pa'o//blo gros chen po zhes pa la sogs pas don de nyid rgyas par 'chad pa'o/ /blo gros chen po ji ltar na zhes pa la sogs pas nor pa de kho na nyid du sgrub pa ste/ snga ma ltar nor pa 'phags pa rnams kyi yul du byas pa ltar/ de'i chos nyid de bzhin nyid yin te/ des na de'i chos nyid gzhan du mi 'gyur ba'i de kho na nyid yin zhes pa'o/ /de yang ji ltar 'phags pa shes rab kyi pha rol tu phyin pa las gzugs ni de bzhin nyid kyi phyir zab po zhes pa'am/ gzugs kyi de bzhin nyid ji lta ba bzhin du gzugs zab po zhes pa la sogs pa gsungs pa lta bu'o//de la phyin ci log gi blo yang mi 'jug ces pa ni byis pa'i skye bo ltar dngos po sna tshogs su min zhes pa'o/ /de bzhin du snang zhing myong ba tsam la skur pa mi 'debs pas phyin ci ma log pa'i blor yang mi 'gyur te/ des na 'phags pa rnams ni nor pa la rig pa dang stong pa zung du 'jug pa gyi na'am sgyu ma lta bur rtogs pa'o/ /'dir gyi na zhes blo'i mdun du byas pa'i mtshan ma de nyid bden nam zhe na/ ma yin te/ de ni byis pa rnams kyis brjod pa'i rjes su 'brangs nas btags pa tsam du zad de/'di'i don zhib du ni sngar bstan zin to/ /blo gros chen po nor pa de yang zhes pa la sogs pas de nyid 'khor ba dang mya ngan las 'das pa'i rgyu'am rigs nyid du ston te/ byis pa'i skye bo'i sems phyin ci log de nyid byis pa rnams kyis phyin ci log sna tshogs su brtags pas 'khor ba nyid mngon par 'grub par byed pa dang /phyin ci ma log pa ste bdag nyid thams cad phyogs 'ga' zhig nas ji lta ba bzhin rtogs na 'phags pa'i rigs nyid du 'gyur zhing / byang chub rnam pa gsum thob par byed pa'o/ /rang dang spyi'i mtshan nyid la mngon par zhen pa ni phyin ci log de nyid kyi rang dang spyi'i mtshan nyid gang zag gi bdag med pa mi rtag pa du ma'i dngos por zhen cing /gzhan gyi sgra la brten nas rang nyid 'ba' zhig grol ba don du gnyer bas ni/ nyan thos kyi rigs su 'gyur ba'o/ /rang gi sems snang ba tsam du khong du chud ces pa ni phyin ci log dang de'i snang ba thams cad sems tsam nyid du rtogs shing /sems kyang don dam pa'i dngos po med pa nyid du rnam par mi rtog pa'i shes rab kyis rtogs pa ste/ ji lta ba bzhin bdag nyid thams cad nas rtogs pa'o/ /'khor ba'i theg pa'i rigs thob par byed pa yang /de kho na nyid la rmongs pa'i ma rig pas phyin ci log pa gang zag gi bdag rtag pa ther zug pa'i dngos por brtags shing / las dang 'bras bu'i 'brel ba la ni phyin ci ma log pa ste/ lha dang tshangs pa la sogs pa'i don du sbyin pa dang snyan par smra ba la sogs pa dang /bsam gtan dang tshad med pa la sogs pa bsgoms pas de dag nyid thob par 'gyur te/ lha'i theg dang tshangs pa'i theg pa zhes pa la sogs pa ston par 'gyur ro/ /'ga' zhig gis ni las dang 'bras bu'i 'brel pa yang phyin ci log sna tshogs su brtags pas ngan song gi 'gro ba rnams su 'gyur ba'o//blo gros chen po zhes pa la sogs pas don bsdus pa ste/ rnam par brtags pa ni de'i rang bzhin ji lta ba bzhin du'o/ /gnas ngan len gyi bag chags gzhan du gyur pas ni chos kyi sku'i ye shes thob par 'gyur la des na de ni mthar thug pa la de bzhin gshegs pa'i rigs yin zhing /de rnams kyis kyang de nyid ji lta bu bzhin du rtogs te/ rtogs pa'i don de nyid nor pa'i de bzhin nyid ces bya'o/ /tshig 'di nyid ces pa'i tshig gi don to/ /rtog pa rnams kyis kyang rnam par spangs pa ni phyin ci log gi chos nyid brtag bya'i yul las 'das pa'o//smras pa yin no zhes pa ni rtog dang brtag pa spangs zhes pa la sogs pa mdo sde 'di nyid dang / phyogs gzhan yang ngo / mtshan nyid la mngon par zhen pa ni dngos por sgro btags pa ste/ de dang mthun par yod pa ma yin pa'o//de bzhin du 'gyur zhes pa ni de dag gis skye ba don dam pa nyid du brtags pa dang mthun par 'gyur ba'o/ /blo gros chen po zhes pa la sogs pas ni/ nor pa sgyu ma lta bu yin na sgyu ma ni rkyen las skyes pa don byed pa'i rang bzhin yin pa dang 'dra bar/'di yang nor pa gzhan dang gzhan gyi rgyur 'gyur bas thar pa nyid 'thad par mi 'gyur zhes pa'o/ /lan gyi don ni sgyu ma nyid du rtogs shing / dngos po'i bdag nyid du rnam par ma brtags na/ gnas ngan len gyi nyes pa thob par mi byed de/ nyon mongs pa'am de'i bag chags kun nas slong par mi byed pa'o//de skad du yang / dper na sgyu ma'i mkhan po 'ga'/ /sprul pa thar par bya phyir brtson/ /gang phyir 'di de mngon shes pas/ /de ni sprul la chags pa med/ /ces gsungs pa'i phyir ro/ /blo gros chen po sgyu ma ni zhes pa la sogs pas dpe'i sgyu ma ni sems dang mi ldan pas de nyid kyang /gnas ngan len gyi bag chags kyi mthu las byung ba ma yin zhing / de 'dra ba gzhan yang thob par mi byed pas rtag tu 'khor bar skye ba ma yin pa bzhin du/ 'dir yang 'gyur ba'o/ /de ni blo gros chen po zhes pa la sogs pas nor pa gzhan gyi rgyur 'gyur ba ni/gang ci yang rung mngon par chags pa ma yin no/ /zhes ston to/ /nor pa mi mthong ba zhes pa ni byis pas mthong ba dang mthun par mi mthong zhing / yang dag pa'i dngos por yang 'phags pa'i gnas skabs der mthong ba min no/ /gal te mtshan mar skyer zin na zhes pa ni sngar bstan pa ltar sgyu ma'am gyi na zhes pa'i mtshan mar sgro 'dogs pa'o//gzhan yang zhes pa la sogs pas thams cad sgyu ma lta bu'i don nyid gsal bar ston te/ sgyu ma'i glang po la sogs pa sgyu mar med pa ma yin zhing / yang dag pa'i dngos por yod pa ma yin pa dang chos mthun par mthong ba'o//sgyu ma sna tshogs la mngon par chags pa'i mtshan nyid kyis chos thams cad sgyu ma lta bu lags sam/ des te log pa la mngon par chags pa'i mtshan nyid kyis lags zhes pa la sogs pa'i don ni/ sgyu ma sna tshogs la dngos po'i bdag nyid yang dag pa pa la sogs par sgro btags pa bzhin du/de ltar kun brtags pa'i rang bzhin de nyid nas sgyu ma lta bu yin nam/ 'on te de ltar sgro 'dogs pa phyin ci log gi blo la de ltar snang zhing myong ba gzhan gyi dbang gi mtshan nyid las/ /sgyu ma lta bu lags zhes rtogs pa'o//de la phyogs dang po ni mi 'thad de/ sgyu ma ni rten cing 'brel bar 'byung ba yin la/ gzugs la sogs pa yang dag pa'i dngos po'i mtshan nyid sna tshogs pa'i kun brtags ni rgyu med par tshad mas mthong ba'i phyir ro/ /gal te 'dir rgyu yod na de yang gzhan gyi dbang nyid du 'gyur ro//de la log pa la mngon par chags zhes pa ni de ltar snang zhing myong ba tsam yin gyi don dam pa'i dngos po la sogs par mngon par brtags pa ni ma yin no/ /mtshan nyid kyis zhes pa'i tshig 'di rnams kyi don to/ /chags pa dang rjes su mthun par de ltar snang zhing brtags pa la sogs pa'i ldog pa de nyid nas zhes pa'o//sgyu ma lta bu lags na ni zhes pa ni de ltar bzhed na zhes pa'i don to/ /bcom ldan 'das gang gis zhes pa la sogs pas don snga ma nyid rgyas par 'chad pa'o/ /phyogs gnyis pa la ni dngos su nyes pa ma brjod kyi/sems tsam pa dag de ni dngos po'i ngo bo don dam pa ma yin pas sgyu mar mi 'thad ces don gyis rgol ba'o/ /lan gyi don ni phyogs dang po ni khas mi len la/ gnyis pa'i dbang du byas te phyin ci log ni kun rdzob tu myur ba'i glog dang 'dra bar skad cig ma'i bdag nyid snga ma snga ma rnams kyi dbang gis 'byung ba yin la/don dam par de 'dra ba'i ngo bo'i mi 'thad pas tshul de nyid nas sgyu ma la bu zhes pa'o/ /glog 'gyu ba skad cig du 'jig pa de bzhin du/ 'du byed rnams kyang zhig par lta ba'i rnal 'byor pa rnams kyis mthong ba ni/ byis pa rnams la mi snang ste/'dra ba gzhan 'byung dang yod pa dmigs pa la sogs pa'i 'khrul pa'i rgyu mtshan gyis bsgribs pa'i phyir ro/ /de bzhin du dngos por snang ba thams cad rang gi rnam par rtog pa'i gzung ba spyi'i mtshan nyid yin la/ de la de bzhin du rnam par 'byed pa ste/[ (]kun kun [,]kun [)]rdzob tu rnam par rtog pa'i bdag nyid yin zhing /don dam par stong pa nyid du rtogs pa med pa dang / gzugs la sogs pa'i mtshan nyid la mngon par zhen pa'i dbang gis de ltar snang ba ste/ don dam pa'i dngos por ma grub cing kun rdzob tu sems nyid yin pas rnam par rig pa sgyu ma lta bu'i bdag nyid do//yang blo gros chen pos gsol ba zhes pa la sogs pas de nyid la brtsad pa spangs pa ston te/ sgyu ma ni rten 'brel yin pas ma skyes par gsungs pa dang 'gal la/ gzhan yang dngos po ni rgyu med par mi 'thad kyang ma skyes par gsungs pa dang 'gal zhes pa'o//lan gyi don ni kun tu skye ba dang skye ba med par snang ba sems tsam du rtogs shing de la phyi rol gyi dngos po med par sngar bstan pa ltar rgyu yod pa dang med pa las mi skye bar mthong bas phyi rol gyi ngo bor ma skyes pa yang yin la/ rig pa sgyu ma lta bu yin pas 'gal ba med cing /don dam par sems nyid rig pa'i skye ba yang mi 'thad la/ /kun rdzob tu skye bar grub pas ma skyes pa dang sgyu ma lta bu la 'gal ba med pa'o/ /mu stegs byed kyis 'dod pa'i rgyu dang 'bras bu ni don dam pa pa'o/ /yang dngos por bstan pa ni kun rdzob pa'i dngos po kun rdzob tu rgyu las skye ba yin pas don dam par ma skyes pa dang 'gal ba med pa nyid du gsal lo//de ltar bstan pa'i dgos pa la 'khor ba yongs su bzung ba ni/ nga'i slob ma rnams zhes pa la sogs pas ston te/ sems nyid rig pa tsam gyi rgyun dngos por yod cing las dang 'bras bu'i bye brag la la sogs pa bstan pas/'ga' zhig ni skye ba gzhan du rang gi sems rgyud sdug bsngal dang 'brel pas 'jigs nas de las ldog pa'i don du zag pa dang bcas pa'i las dge ba'am/ mi g.yo ba'i las sna tshogs gyis lha la sogs pa skye ba'i gnas yongs su 'dzin la/'ga' zhig ni gzhan sdug bsngal las thar pa'i don du/ las dang smon lam la sogs pas 'khor bar skye ba yongs su 'dzin pa ste/ de'i don du dngos po'i sgra la smos pa'o/ /yang dag pa'i gnas ji lta ba ni yang dag pa'i gnas lugs ji lta ba ste/de dang mi mthun par mthong ba'o/ /bzlog pa ni don dam pa'i dngos po'i rang bzhin la sogs par 'dzin pa'o/ /glan pa ni phyin ci log las bzlog nas yang dag pa'i lta ba la 'god pa'o/ /gzhan yang blo gros chen po zhes pa la sogs pas de bzhin gshegs pa'i snying po sbyong bar byed pa'i lam zhi gnas dang lhag mthong gi rgyu mtshan gsungs pa ste/de la rab tu rtogs pa ni de rnams la brten nas dran pa dang shes rab kyi cha ru gtogs pa chos zab mo la bzod pa'i rgyur gyur pa'i gzungs thob pa ste/ de nyid kyang zhi gnas dang lhag mthong gi dmigs pa dang / dngos po mtha'i dmigs pa dang gsum thob par gyur pa'o/ /rjes su mi 'brang ba ni de rnams la brten nas mtshan ma sna tshogs su mi rtog pa'o/ /de las zhes pa la sogs pas rnam par gzhag pa tsam du de rnams kyi bye brag ma 'dres par ston te/ de la ming gi tshogs ni bum pa la sogs pa'i dngos po 'ga' zhig mdun du byas te/de nyid tha snyad kyi dus su go bar bya ba'i phyir 'di ni bum pa zhes ming du btags pa dang / de 'dra ba'i rigs can rnams so/ /dngos po zhes pa ni dngos po tsam mo/ /tshig gi tshogs ni tshig gi don mang po ste/ ming la sogs pa du ma 'dus pa don du gnyer ba'i skyes bu'i 'jug ldog gi yul ston pa phyogs che ge mo zhig na bum pa yod ces pa la sogs pa lta bu'o//don mang po bden pa ni kun rdzob tu'o/ /gdon mi za ba ni tshig gi don de ltar yin gyi gzhan du ma yin zhes the tsom gyi gnas spangs pa'o/ / thug pa ni don de dag tsam du zad pa'o/ /dmigs pa zhes pa ni tshig dang 'dres par snang ba'o/ /'dir tshig gi don la tshig gi tshogs zhes ston pa ni tshig las tha dad pa'i don grub pa med ces rtogs par bya ba'i don du ste/ ji ltar sngar bstan pa bzhin no/ /yi ge'i tshogs ni yi ge go rims su bkod pa'i khyad par gang gis ming dang tshig rnams 'grub par byed cing snang bar byed pa ste/yi ge dang mtshan rtags dang / don nges par ston pa'i mtshan ma dang / don dang 'brel bar dmigs pa dang / rang gi don la 'di'o zhes 'dogs pa ste rnam grangs su gtogs pa'o//gzhan yang zhes pa la sogs pas de rnams nyid tshul gzhan gyi sgo nas 'chad pa ste/ /de la tshig thug pa ni yi ge dpag tu med pa du ma 'brel ba gnas thug pa med pa nyid ma yin te/ cung zad tsam du rgya chad pa'o/ /a dang ha'i bar ni dbyangs dang gsal byed kyi yi ge gzhan rnams so//yi ge'i mjug ni dbyangs kyi tha ma/ aH drag po 'am a nyid dam yi ge k+Sha zhes pa'o/ /gzhan yang glang po dang rta la sogs pa phung po gzugs can dang 'brel ba rnams te/ de bzhin gshegs pa'i brdar gyur pa'o/ / sa la 'gro ba rnams zhes pa ni res 'ga' mkha' la rgyu ba bya'i skye gnas rnams kyang ste/ de rnams kyang phal cher sa la 'gro bas so/ /yang ming bzhi'i phung po ni ming gis brjod pa 'am/ ming ltar thogs pa med pa'i phyir ming ngo / /yi ge'i rang gi mtshan nyid kyis snang ba byed ces pa ni de las yi ge spyi'i rnam par snang ba 'byung zhing de las don go bar byed pa yin gyi/dngos su yi ge rang gi mtshan nyid ni don rjod par byed pa ma yin te/ skabs gzhan du shes par zad do/ /de lta na phung po gzugs can dang 'brel ba rnams kyang ming gis brjod par bya zhing yi ge'i rang gi mtshan nyid kyis snang bar byed pa ma yin nam zhe na/de ltar bden mod kyi de ni rgyu ba rags pa nyid kyi phyir/ ming la sogs pas ma mtshon kyang blun po rnams kyis rtogs par 'gyur bas de dag tsam la dgongs te de ltar ma gsungs pa'o/ /de la khyod kyis 'dris par bya zhes pa'i don ni thog mar zhi gnas kyi rgyu mtshan nyid du a la sogs pa'i yi ge re re'am/du ma 'dus pa ste ming dang tshig gi bdag nyid a pa ra tsa na zhes pa la sogs pa dbyibs su bris pa'i yi ge la sems 'dris par bya ba ste/ de yang / dmigs pa la ni sems gtad nas//de rgyun rnam par g.yeng mi bya/ /rnam g.yeng myur du shes byas nas/ /de la slar yang glan par bya/ /zhes pa la sogs pa'i tshul du'o/ /de ltar dmigs pa brtan par gyur pa dang spro ba dang bsdu ba la bslab par bya zhing / brjod pa'i yi ge la yang bslab par bya'o/ /de rnams la rtse gcig pa'i ting nge 'dzin thob pa ni rnam par mi rtog pa'i gzugs brnyan zhi gnas kyi dmigs pa rnyed pa'o//de nas a la sogs pa'i don skye ba med pa la bslab par bya ste/ de dag nyid sngar thos pa dang bsams pa'i shes rab kyis spyi'i tshul du rtogs pa'i don dang yang sbyar bar bya'o/ /de ltar skye ba med pa'i don la rtse gcig tu gyur pa ni dngos po'i mtha'i dmigs pa yang thob par 'gyur ba'o//de'i sngon rol du don de nyid spyi'i tshul du rtogs pa ni rnam par rtog pa dang bcas pa'i gzugs brnyan lhag mthong gi dmigs pa rnyed pa'o/ /de ltar dmigs pa gsum thob pa nyid gong nas gong du bsgoms pas de bzhin gshegs pa'i snying po sbyangs par gyur pa na dgos pa yongs su 'grub pa'i dmigs pa thob cing /chos kyi sku'i ye shes mngon du byed pa'o/ /de ltar 'phags pa shes rab kyi pha rol tu phyin pa'i gzungs kyi tshogs bstan pa las/ a zhes bya ba ni ma skyes pa'i phyir chos thams cad kyi sgo'o/ /ra zhes bya ba ni rdul dang bral ba'i phyir chos thams cad kyi sgo'o zhes pa la sogs pa gsungs so//gzhan dag las kyang / a ni yi ge kun gyi mchog /ces pa la sogs pa dang / yi ge drug po rdo rje'i sgra/ /'jam dbyangs chen po sgra chen po/ /zhes pa la sogs pa gsungs te/ 'di'i don zhib tu ni bla ma'i kha las shes par bya'o/ /de skad du yang / byang chub sems dpa' dang po'i las kyi sar gnas gang / /lhag pa'i bsam pas sangs rgyas byang chub mchog zhugs pa/ /slob ma bzang po bla ma gus ldan de dag gis/ /bla ma mkhas pa rnams la rtag tu brten par bya/ /zhes pa la sogs pa gsungs pa'i phyir ro/ /'di rnams kyang / yi ge med par ji ltar gsungs/ / ci yis rnam par mi rtog 'gyur/ /zhes dris pa'i lan du sbyar bar bya'o/ /gzhan yang blo gros chen po zhes pa la sogs pas mi mkhas pa gang dag sngar yod pa dang / med pa la sogs pa'i mtshan mar rnam par rtog pa'i blos sgro btags pa ni g.yang sa'i gnas kyi mtha' nyid du gsungs pa la brten nas/ gzhan du khyad par gyi gzhi 'ga' zhig khas blangs nas de nyid yod pa dang med pa la sogs pa'i chos gang gis bsdus pa khyad par de rnams gang yin zhes dris pa'i dus su/de dag ni lung bstan par 'os pa ma yin te/ mtha' nyid du 'gyur ba'o zhes zer te/ de yang bdag nyid rigs pa mi shes pas gang yang rung ba cig tu lung bstan pa na pha rol mkhas pas skyon brjod kyis dogs pa'o//de 'dra ba dgag par bya ba'i don du lung bstan par bya ba'i dbye ba nyid du gsungs pa'o/ /de la lta ba'i mtshan nyid ni de rnams kyi mtshan mar sgro 'dogs pa'o/ /mtha' gnyis kyi tshul ni snga ma ltar khyad par gang yang rung ba cig tu lung bstan par 'os pas 'ga' zhig ni mthar mi 'gyur la/mi bden pa'i don sgro 'dogs pa 'ga' zhig ni mthar 'gyur ba'i tshul lugs phyin ci ma log pa'o/ /de nyid dris pa na mngon sum la sogs pa'i rigs pa dang dpe dang gtan tshigs la sogs pa shes byed kyi rgyu dang / spyir don ji lta ba bzhin 'byed pa'i blo med pas pha rol gyis nyes pa brjod pas 'jigs pas don 'di ni dri bar mi 'os shing /de nyid kyis lan gyi bye brag 'ga' zhig kyang lung bstan par 'os pa ma yin no zhes zer ro/ /'di lta ste zhes pa la sogs pas ni gzugs la sogs par snang ba'i gzhi 'ga' zhig khas blangs nas/ de dag nyid mi rtag pa dang gcig pa 'am tha dad pa gang rung gis bsdus pas/de dag gang yin zhes dris pa dang gang yang rung ba cig tu lung bstan par 'os pa las de ltar mi ston cing bstan par 'os pa ma yin zhes de 'dra ba'i grub mtha' rnam par 'jog pa'o/ /'du byed ni 'khor ba'o/ /mtshan las zhes pa ni mtshan nyid do/ /yon tan ni 'o thug gi mngar ba dang /dung gi dkar po la sogs pa'o/ /mthong ba ni mthong ba'i yul lo/ /rnal 'byor can ni zhi gnas sam de dang ldan pa'i gang zag go/ /lung bstan pa rnams zhes pa ni snga ma ltar bstan par 'os pa'o/ /lung ma bstan pa'o zhes pa ni de ltar ma bstan cing / bstan par bya ba ma yin pa nyid du bcom ldan 'das kyis gsungs so zhes mi mkhas pa dag zer ba'o//skyes bu zhes pa la sogs pas de nyid sun 'byin pa ste/ de'i don yang ji ltar nyan pa po'i sems can rnams blo dang mi ldan pas khyad par 'ga' zhig lung bstan pa na skrag par 'gyur bas skrag pa'i gnas de nyid spangs pa'i phyir/ gang zag gi khyad par de la lung du mi bstan par 'os pa rnams lung du mi ston to zhes de bzhin gshegs pas gsungs pa la/skyes bu gti mug de dag ni rnam pa thams cad du lung ma bstan cing bstan par mi 'os pa nyid du de bzhin gshegs pas gsungs so zhes log par rtog pa'o/ /de bzhin gshegs pas ni mu stegs byed de ltar 'dod pa'i lta ba ngan pa gzhig pa'i phyir/de dag lung bstan par bya ba nyid du gsungs kyi/ mi bya ba nyid du ni ma bshad do/ /'di rnams kyi gzhung gi don ni cung zad dkrugs te shes par bya'o/ /mu stegs byed kyi lta ba ngan pa gang zhe na/ blo gros chen po zhes pa la sogs pas gsungs te/ gcer bu pa rnams/'du ba dang ni rgyas pa dang / /srog ni lus kyi tshad can te/ /zhes pa la sogs pa smra ste/ de'i don ni srog ni rtag pa gcig pu la sogs pa'i yon tan dang ldan pa lus kyi tshad dang mnyam pa lus la gnas so zhes 'dod la/ de lta na lus dang srog gcig gam tha dad ces dris pa na/ gal te gcig par khas blangs na lus mi rtag pa bzhin du srog kyang mi rtag par 'gyur zhes pa'i nyes pa dang /tha dad na yang de ltar dmigs par 'gyur ro zhes pa la sogs pa'i nyes pas 'jigs nas de dag gang du yang lung bstan par bya ba ma yin no zhes de 'dra ba'i don khas len pa'o/ /de la sogs pa gzhan yang grangs can pa rnams rang bzhin dang gnas skabs gcig pa dang tha dad pa gang du yang lung bstan par mi 'os pa'i don khas len pa dang /bye brag pa rnams rdul phra rab dang des brtsams pa'i rags pa yan lag can gyi rdzas gcig pa dang tha dad par lung bstan par bya ba ma yin no zhes pa la sogs pa'o/ /blo gros chen po zhes pa la sogs pas de dag las bzlog pas/de bzhin gshegs pa nyid kyis phyogs gsal bar gsungs pa'o/ /de'i don yang mu stegs pa rnams rgyu dang rigs pa la kun tu rmongs pas 'gal ba'i don khas blangs pa na khyad par de dag tu lung bstan pa la/ rigs pa'i gnod pa 'jug pas des 'jigs nas lung mi ston pa yin la/nga'i gsung rab kyi nges pa'i don gnyis su med pa'i rang rig pa'i don dam pa'i dngos po la sogs pa'i spros pa dang bral ba la ni rnam par rtog pa yang mi 'jug ste/ brtag bya'i yul las 'das pa'i phyir ro/ /de 'dra ba de dag la gzhag par bya ba nyid du sgro btags pa'i don lta ga la yod ces pa'o//gzhan yang dngos po'i phyogs khas len pa rnams la ni gcig tu yod dam du mar yod ces pa la sogs pa khyad par gang dag gis bsdus pa'i khyad par gyi chos gang yin zhes dris pa na/ gang du lung bstan kyang nyes pa dang 'brel pas de ltar bstan par bya ba ma yin te/ 'di ni gzhag par bya'o zhes don phyin ci log [(]du [,]tu [)]brtags pa yod ces pa'o/ /blo gros chen po zhes pa la sogs pas sngar gyi don nyid rgyas par 'chad pa'o/ /ngas dus gzhan du bstan par bya zhes pa ni gdul bya'i khyad par gang las sngar bstan par bya ba ma yin pa de nyid kyang gdul bya de nyid phyis dbang po yongs su smin pa na bstan par bya zhing /gzhan yang gdul bya'i khyad par gzhan rnams la ni dus de nyid kyi tshe yang bstan par bya ba'o/ /de nyid kyi phyir ji ltar snang zhing myong ba'i chos kun rdzob du khas blangs pa 'di rnams ni de kho na nyid du skyes pa dang ma skyes pa dang yod pa dang med pa la sogs pa'i khyad par de dag tsam gyis bsdus shing /phung po gzhan mi 'thad pas de 'dra ba'i khyad par dris pa'am/ ma dris kyang rung ste gdul bya'i the tshom bcad pa'i don du 'di rnams ni don dam par ma skyes shing ngo bo nyid med pa'o zhes rang bzhin stong pa nyid du lung bstan par 'os shing de ltar bstan pa nyid kyang yin te/chos de rnams khyad par de dag gis bsdus pa dang / skye ba dang dngos po la sogs pa'i phyogs la gnod byed kyi tshad ma yod pa'i phyir ro/ /gzhan du na/ dgag pa bkag pa bsgrub pa yin/ /zhes pa la sogs pa'i nyes pa sngar rgyas par bstan zin no/ /bya ba dang byed pa ni rgyu dang 'bras bu'o/ /de ltar na sngar mtha' gnyis dgag pa gsungs pa dang 'gal lo zhe na/ma yin te/ de ni yod pa dang med pa la sogs pa'i chos su rnam par rtog pas sgro btags pa'i mtha' nyid bkag pa yin la/ 'dir ni rang bzhin gyis ma skyes pa la sogs pa chos rnams kyi chos nyid ji lta ba bzhin bstan pas 'gal ba med de rgyas par sngar bstan pa bzhin no//des na rab tu mi gnas par smra ba'i ming la mngon par zhen pa rnams kyis ji ltar bstan pa ni phyin ci log nyid du shes par bya'o/ /chos thams cad mi rtag ces pa ni kun rdzob pa'i don lung bstan pa'o/ /mtshan nyid skye ba mi skye ba/ /zhes pa ni skye bar snang ba kun rdzob pa 'di nyid don dam par mi skye ba ste/mi skye ba'i chos nyid de nyid 'gyur ba med pas rtag ces pa'o/ /tshig gi don gzhan ni shes par zad do/ /de la mgo gcig tu lan gdab pa ni pha rol po'i dri ba mang po la tshig gcig gis lan 'debs pa ste/ kha cig 'di skad du/ skye ba thams cad gdon mi za bar 'gag par 'gyur ba yin nam dkon mchog gsum bsod nams kyi zhing gshin pa yin nam zhes pa la sogs pa dris pa la/de ltar yin no zhes lung bstan pa lta bu'o/ /rnam par phye nas lung bstan pa ni kha cig 'di skad du/ ci 'gags pa thams cad yang skye bar 'gyur ram/ dkon mchog gsum gcig kho nar zad dam zhes dris pa la sogs pa la/don 'di ni de ltar ma nges te/ 'gags pa rnams kyi rgyun slar skye ba yang yod de/ byis pa rnams kyi nye bar len pa'i phung po bzhin no/ /mi skye ba yang yod de dgra bcom pa'i phung po tha ma 'gags pa bzhin no/ /dkon mchog gsum gcig pa yang yod de/ 'gog pa'i chos mthar thug pa dang /sangs rgyas dkon mchog gam lam gyi chos dang dge 'dun dkon mchog lta bu'o/ /tha dad pa yang yod de sangs rgyas dang dge 'dun la sogs pa bzhin no zhes ston pa lta bu'o/ /dris nas lung ston pa ni ji ltar kha cig 'di skad du/ byang chub sems dpa'i sa bcu mchog yin nam/ 'on te ma yin zhes pa la sogs pa dris pa la khyod gang la ltos te 'dri zhes slar phar la dris nas ci rigs par lung ston pa lta bu'o//cang mi smra bar bzhag pas lung bstan pa ni ji skad du kha cig bdag ces bya ba'i dngos po ci dge ba zhig gam 'on te mi dge ba zhig ces 'dri ba dang / mo gsham gyi bu mdog dkar ba zhig gam 'on te gnag pa zhig ces 'dri ba la sogs pa la cang mi smra bar bzhag pas lung bstan pa ste/ji ltar 'phags pa sangs rgyas kyi sa'i 'grel pa las gsungs pa lta bu'o/ /gzhan yang rgya cher ni bstan bcos rnal 'byor spyod pa'i sa dang / 'phags pa shes rab kyi pha rol du phyin pa'i 'grel pa la sogs pa las shes par bya'o//gal te ci yang mi smra bar bzhag pas lung bstan pa nyid du ji ltar 'gyur zhing / gzhan yang de lta na sngar rnam pa thams cad du gzhag par bya ba ni mi 'thad de/ gang zag gi khyad par 'ga' zhig la re zhig la bzhag pa tsam du zad do zhes gsungs pa dang 'gal lo zhe na/ skyon med de/de 'dra ba'i dri ba la mi smra bar bzhag pa nyid kyis gzhi ma grub pa la khyad par gyi dpyad pa mi 'jug ces de 'dra ba'i chos can ma grub pa nyid du rtogs par 'gyur bas cang mi smra ba nyid lung ston par 'gyur ba ste/ ji skad du/ 'phags pa li ts+tsha bI dri ma med par grags pa la 'phags pa 'jam dpal gyis rigs kyi bu bdag cag gis ni rang rang gi rtogs pa brjod zin gyis/khyed kyang gnyis su med pa'i chos kyi sgo bstan pa la spobs par mdzod cig ces dris pa dang / dge bsnyen chen pos de kho na nyid kyi don sgra'i brjod du med pa nyid du rtogs shing / gzhan la yang bstan par bya ba'i don du cang mi smra bar bzhugs pa dang /'jam dpal gyis kyang de bzhin du rtogs nas rigs kyi bu legs so legs so zhes pa la sogs pa gsungs pa lta bu'o/ /de ltar bzhag pa nyid kyis don ston par 'gyur bas rnam pa thams cad du bstan par bya ba ma yin zhing bzhag pa med do zhes gsungs pa dang 'gal ba med pa'o//gzhan yang gang dag rnam par brtsad pa'i tshul gyis dri ba la/ de lta na rang gi grub pa'i mtha' la yang de ltar 'gyur ro zhes lan 'debs pa yang mgo gcig tu lung bstan pa'o/ /'dir mu stegs byed kyi smra ba gang zhe na/ yod dang med las zhes pa la sogs pa ste/blo yis rnam par gzhigs na yang / /zhes pa la sogs pas gzhan gyis 'dod pa dngos po'i phyogs thams cad 'gog pa ste/ ji lta ba bzhin rnam par 'byed pa blos gzhigs na dngos por grub pa'i rang bzhin bden pa med cing / ngo bo nyid kyang med ces pas te/ med pa la sogs pa'i chos su sgro btags pa'i mtshan ma'i ngo bo yang med ces pa'o//de nas yang byang chub sems dpa' zhes pa la sogs pas ni de bzhin gshegs pa'i snying po sbyong bar byed pa'i lam dang / gnas skabs kyi 'bras bu la gnas pa'i gang zag gi khyad par rgyas par ston te/ 'di yang / bcings pa su lags gang gis dgrol//zhes pa la sogs pa dang / srid gsum choms gnas pa de su/ /zhes pa la sogs pa dris pa'i lan du sbyar bar bya'o/ /'gro ba ni gang zag gi khyad par ro/ /rgyun tu zhugs pa ni de'i 'bras bu la gnas pa'o/ /thabs kyi mtshan nyid ni de rnams nyid thob par 'gyur ba'am/ yang de la brten nas theg pa chen po mngon par rtogs par 'gyur ba'i thabs kyi mtshan nyid do//de mngon par rtogs pas kyang rang dang gzhan gyi sgrib pa gnyis rnam par sbyong ba la sogs pa'o/ /'gro ba la 'dod pa bzhin du longs spyod pa ni sems can rnams la dbang bsgyur ba'o/ /de la rgyun du zhugs pa'i 'bras bu la gnas pa ni 'phags pa nyan thos rnams kyi dbang du byas nas mthong ba'i lam gyis bsdus pa'i ye shes skad cig ma bcu drug rgyun chags su 'byung ba las thams cad yongs su rdzogs pa'i gnas skabs yin la/skad cig bco lnga pa man chod ni 'bras bu de la zhugs pa'o/ /ye shes skad cig ma bcu drug kyang sdug bsngal la chos shes pa'i bzod pa dang /sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa ste/ sdug bsngal gyi bden pa la mi rtag pa dang / sdug bsngal ba dang / stong pa dang / bdag med pa nyid du mngon sum du rtogs pa ste/rnam pa bzhi dang go rims bzhin du sbyar bar bya'o/ /de bzhin du kun 'byung la chos shes pa'i bzod pa la sogs pa rnam pa bzhi ste/ kun 'byung gi bden pa la rgyu dang / kun 'byung ba dang / rab tu skye ba dang / rkyen gyis rnam par rtog pa rnam pa bzhi dang / rim pa bzhin du sbyar bar bya'o//de bzhin du 'gog pa la chos shes pa'i bzod pa la sogs pa bzhi ni 'gog pa'i bden pa la 'gog pa dang / zhi ba dang / gya nom pa dang / nges par 'byung ba nyid du rtogs pa bzhi dang sbyar ro/ /yang lam la chos shes pa'i bzod pa la sogs pa bzhi ni lam gyi bden pa la lam nyid dang / rigs pa dang /bsgrubs pa dang / nges par 'byin pa nyid du rtogs pa ste/ rnam pa bzhi dang rim pa bzhin du sbyar bar bya'o/ /rnam pa gcig tu na 'dod pa'i khams su gtogs pa'i sdug bsngal gyi bden pa la mi rtag pa la sogs pa rnam pa bzhi'i tshul du rtogs pas khams der gtogs pa'i sdug bsngal mthong bas spang bar bya ba'i nyon mongs pa spong bar byed pa'i bar chad med pa'i lam ni sdug bsngal la chos shes pa'i bzod pa yin la/de spangs pa'i rnam grol gyi lam ni sdug bsngal la chos shes pa'o/ /khams gong ma gnyis kyis bsdus pa'i sdug bsngal gyi bden pa la snga ma ltar rtogs pas de dag gis bsdus pa'i sdug bsngal mthong bas spang bar bya ba'i nyon mongs pa rnams spong bar byed pa'i bar chad med pa'i lam ni sdug bsngal la rjes su shes pa'i bzod pa yin la/de rnams spangs pa'i rnam grol gyi lam ni sdug bsngal la rjes su shes pa'o/ /de bzhin du kun 'byung la chos shes pa'i bzod pa la sogs pa lhag ma rnams la yang sbyar bar bya'o zhes bstan pa'o//skad cig gis ni rnam par dbye ba yang 'phags pa stug po bkod pa'i rgyan las ji skad du/ sdug bsngal chos nyid shes pa dang / sdug bsngal gyis su so sor rtogs/ /sdug bsngal nyid kyi rjes su shes//'dus pa rnams kyis chos shes dang / /'dus pa la ni kun rtog dang / /'dus la rjes su 'gro shes dang / /'gog pa dag las chos shes dang / /'gog pa dag la rtogs pa dang / /'gog la rjes su 'gro shes dang / /lam la chos kyi shes pa dang / /lam la so sor rtog pa dang //lam la rjes su 'gro ba shes/ /zhes gsungs pa lta bu'o/ /'dir mthong ba'i lam gyi ye shes skad cig ma rnams kyang bden pa so so'i yul can nyid du gsungs pas des spang bar bya ba'i nyon mongs pa yang bden pa so so la sogs par zhugs pa yin pas bden pa la brten nas rnam par dbye ste/de la 'dod pa'i khams na sdug bsngal gyi bden pa la mi rtag pa dang / sdug bsngal ba la sogs pa'i bdag nyid du ma rtogs pa'i ma rig pa dang mi rtag pa la sogs par the tshom za ba dang / nyer len gyi phung po lnga 'bras bur gyur pa rnams la bdag dang bdag gir 'dzin pa 'jig tshogs la lta ba dang /bdag de nyid rtag pa dang chad pa'i mtha' gnyis su 'dzin pa dang / sdug bsngal gyi bden pa med do zhes log par lta bas te/ de ltar rnam pa lnga ni sdug bsngal gyi bden pa la dngos su log par zhugs pa yin la/ lta ba de dag la rjes su chags pa'i 'dod chags dang /des sems khengs pa'i nga rgyal dang / de dag la mchog dang gtso bo la sogs par 'dzin pa ste/ lta ba mchog tu 'dzin pa dang / lta ba dman pa des yongs su zin pa'i log pa'i tshul khrims dang brtul zhugs la mchog dang gtso bo la sogs par 'dzin pa ste/ de ltar rnam pa bzhi ni log par zhugs pa la log par zhugs pa'o//de ltar chags shing mchog tu bzung ba'i yul la gzhan gyi nyes pa brjod pa na de la kun nas mnar sems pa'i khong khro ni log par zhugs pa'i dbang gis log par zhugs pa'o/ /de bzhin du kun 'byung gi bden pa rgyur gyur pa'i phung po lnga la rgyu dang kun 'byung ba la sogs par ma rtogs pa dang /the tshom za ba dang / de la bdag dang bdag gir 'dzin pa dang / bdag de nyid rtag pa dang chad pa'i mthar 'dzin pa dang / kun 'byung gi bden pa de 'dra ba med ces dngos su log par zhugs pa lnga dang / lta ba de dag la rjes su chags pa dang /de dag gis sems khengs pa'i nga rgyal dang / snga ma ltar mchog tu 'dzin pa rnam pa gnyis te/ de ltar bzhi ni log par zhugs pa la log par zhugs pa'o/ /log par zhugs pa'i dbang gis log par zhugs pa yang snga ma bzhin du shes par bya'o/ /de bzhin du 'gog pa dang lam gyi bden pa la yang sbyar bar bya'o//gal te 'jig tshogs la lta ba ni phung po lnga la bdag dang bdag gir 'dzin pa yin pa la/ 'gog pa'i bden pa ni phung po nye bar zhi ba tsam yin pas de la log par zhugs pa nyid du mi 'thad cing de nyid kyis mthar 'dzin pa yang mi 'thad do zhe na/ de ltar bden mod kyi 'dir 'gog pa ni phung po nye bar zhi ba tsam gyi med par dgag pa nyid du mi 'thad de/'on kyang dri ma dang bral ba'i sems kyi gnas skabs yin pas de la bdag dang bdag gir 'dzin pa dang / bdag de nyid rtag pa dang chad pa'i mthar 'dzin pa 'thad do/ /yang nyan thos sde pa 'ga' zhig gis med par dgag pa tsam la 'gog par 'dod pa'i dbang du byas te/bsdu ba rnam par gtan la dbab pa las lta ba gnyis po de dag 'gog pa la log par zhugs pa nyid du ma gsungs so/ /gzhan yang de nyid las lta ba gnyis po de dag sdug bsngal dang kun 'byung gi bden pa la/ log par zhugs pa nyid du ma gsungs pa yang /der sdug bsngal gyi bden pa ni sems can skye ba dang skye ba'i gnas yin la/ kun 'byung ni las dang nyon mongs pa nyid du rnam par bzhag pas de la bdag dang bdag gir 'dzin pa la sogs pa mi 'thad pa'i phyir ro zhes bla ma dag 'chad do/ /snga ma ltar bstan pa ni chos mngon pa kun las bsdus pa las/sdug bsngal dang kun 'byung gi bden pa phung po'i rgyun la bzhag pa'i dus su de ltar 'thad pas so/ /de ltar 'dod pa'i khams na bcu tshan bzhir 'gyur la/ khams gong ma gnyis na khong khro ba med pas bden pa re re la rnam pa dgu dgur shes par bya'o//de ltar na sum cu rtsa drug pa phrag gnyis te/ thams cad bsdoms pas mthong bas spang bar bya ba'i nyon mongs pa brgya dang bcu gnyis su 'gyur ba'o/ /gal te de ltar na de rnams mtha' dag spangs pas rgyun du zhugs pa nyid 'gyur ba ma yin nam/mdo sde 'di dang shes rab kyi pha rol tu phyin pa las kun du sbyor ba gsum spangs pa'i phyir rgyun du zhugs pa'o zhes ci'i phyir gsungs she na/ 'di mthong bas spang bar bya ba'i kun du sbyor ba'i gtso bos bsdus pa ni gsum po 'di rnams yin no zhes shes par bya ba'i don du'o/ / ji ltar na gtso bo nyid du 'gyur zhe na/ 'jig tshogs la lta bas phung po lnga sdug bsngal gyi gnas la mngon par dga' bas sdug bsngal las mi 'phags pa dang / gzhan yang de ni lta ba dang nyon mongs pa thams cad kyi rtsa bar gyur pas so/ /tshul khrims dang brtul zhugs mchog tu 'dzin pas ni sdug bsngal las cung zad 'phags kyang log pa'i lam gyis nges par 'byung ba'i rgyur 'gyur ba ste/yang dag pa ma yin pa'i lta bas zin pa'i log pa'i brtul zhugs pa la sogs pa la mchog tu 'dzin cing nan tan du bsgrubs pa'i phyir ro/ /the tshom gyis ni yang dag pa'i lam la the tshom za bas lam des nges par mi 'byung ba'i rgyur 'gyur bas so//gzhan yang 'jig tshogs la lta ba ni/ shes bya'i yul phung po lnga la phyin ci log par sgro 'dogs pa'i rgyu yin la/ gnyis pa ni lta ba gsum yang dag pa ma yin pa la yang dag pa nyid du sgro 'dogs pa'i rgyu yin pa dang /the tshom ni gnyen po la log par sgro 'dogs pa'i rgyu yin pa'i phyir ro zhes chos mngon pa'i bstan bcos dag las gsungs so/ /de la rgyun tu zhugs pa'i 'bras bu rnam par dbye ba la khyad par can ma yin pa ni snga ma de nyid tsam ste/ mya ngan las 'das pa'i lam gyi rgyun la zhugs pas rgyun du zhugs pa zhes pa'o//'bras bu khyad par can ni 'dir rnam pa gsum ste/ dbang po tha mar gyur pa ni de ltar thogs na 'dod pa'i khams kyi lha dang mi rnams kyi nang du tshe'i srid pa lan bdun blangs nas mya ngan las 'da' ba ste rang gi sdug bsngal mthar byed pa'o/ /de'i don yang dang por mi'i rten lta bu gcig la rgyun tu zhugs pa'i 'bras bu thob nas/de nas 'dod pa'i khams kyi lha'i ris drug du tshe'i srid pa lan drug blangs nas/ yang dang po'i rten mi'i srid pa de nyid du skye ba blangs te/ rten de nyid la khams gsum gyi bsgom pas spang bar bya ba'i nyon mongs pa thams cad spangs nas dgra bcom pa'i 'bras bu mngon du byed pa'o//de bzhin du lha'i ris drug po gang yang rung ba'i rten la dang por rgyun du zhugs pa thob nas/ de nas de las gnas gzhan drug tu skye ba blangs te/ yang dang po de nyid du skye ba nas gnyen po rdo rje lta bu mngon du bya ste/ khams gsum gyi bsgom pas spang bar bya ba thams cad spong ba'o//de lta na skye ba bdun phrag du ma nyid du 'gyur ro zhe na/ skyon med de/ de ni gang zag du ma'i dbang du byas pa yin la/ gang zag gcig gi dbang du byas na skye ba lan bdun las mi len pa'i phyir ro/ /de la 'dir khams gsum gyi bsgom pas spang bar bya ba'i nyon mongs pa rim gyis spong ba'i dbang du byas nas dang por 'dod pa'i khams kyi bsgom pas spang bar bya ba'i nyon mongs pa chen po'i chen po nas 'bring gi chen po'i bar du spangs pa ni mi dang lha'i rigs nas rigs su skye ba'o zhes chos mngon pa'i bstan bcos dag las bshad de/de lta na yang 'dir skye ba lan bdun gyi bar la ci rigs par de rnams spangs nas bdun gyi tha mar gyur pa la snga ma ltar gnyen po mngon du byas te mya ngan las 'da' ba'o//bar ma dang mchog kyang tshul de nyid kyi rjes su 'brangs te rtogs par bya'o/ /gal te de ltar na gang zag de nyid la lan cig phyir 'ong ba la sogs pa'i spangs pa dang thob pa'i yon tan rdzogs pa'i rgyun du zhugs pa'i dbye bar mi 'thad do zhe na/skyon med de/ dang por rgyun du zhugs par rtogs pa'i tshe de nyid las ma 'phos pas de rnams rgyun du zhugs pa'i dbye bar bstan pa'o/ /yang gal te tshe'i srid pa bdun pa'am/ lnga pa la sogs pa'i bar la snga ma ltar nyon mongs pa gsum pa'am bzhi pa'i bar du spangs nas de nas spang bya'i nyon mongs pa gzhan ma spangs par tshe 'phos par gyur nas nyon mongs pa lnga pa spong ba la zhugs nas brgyad pa man chad spangs pa de dag ni 'phags pa lan cig phyir 'ong ba ste/spang bya'i lhag ma lus pas de nas tshe 'phos nas 'dod khams kyi lha dang mi'i nang du skye ba lan re len pa'o//de lta na yang gang rung cig tu lan cig las mi skye bas lan cig phyir 'ong ba zhes bya'o/ /de ltar skye ba gnyis kyi tha ma la gnyen po mngon du byas nas mya ngan las 'da' ba'o//yang gal te de nyid spang bya'i lhag ma ma spangs par tshe mi 'phos te/ de nas dgu pa spong ba'i lam la zhugs pa nas lan ji srid pa'i rtse mo'i nyon mongs pa brgyad pa spang ba'i bar ni lan cig phyir mi 'ong ba zhes bya ste/ 'dod pa'i khams kyi kun du sbyor ba spangs pas der skye ba mi len pa'o//de nyid kyi rten la gnyen po mngon du byas nas mya ngan las 'da' ba yang yod la/ yang de la spang bya'i lhag ma srid pa'i rtse mo'i nyon mongs pa dgu pa las par gyur pa na tshe 'phos shing de nyid nas de'i gnyen po bsgoms pas de yang spangs par gyur pa na dgra bcom pa zhes bya'o//yang gal te/ sa dgu la ni chen po yi/ /chen po la sogs dri ma rnams/ /gnyen po chung ngu'i chung ngu la/ /sogs pa'i lam ni dag par 'dod/ /zhes gsungs pa dang mthun par khams gsum gyi bsgom pas spang bar bya ba'i nyon mongs pa rnams cig char spong ba ste/ khams gsum du gtogs pa'i bden pa bzhi'i chos bsgoms pas chos nyid la log par zhugs pa'i khams gsum gyi nyon mongs pa rnams snga ma ltar rnam par phye nas rim gyis spong ba ni ma yin te/de rnams gcig tu bsdoms shing de yang chen po dang 'bring dang chung ngu rnam pa gsum du 'gyur la/ de rnams re re yang chen po'i chen po dang / chen po'i 'bring la sogs pa gsum gsum du phye bas dgur 'gyur ba'o/ /de nas dang po chen po'i chung ngu'am/ 'bring gi chen po'i bar rnam pa bzhi skye ba bdun gyi bar la ci rigs par spangs nas snga ma ltar mya ngan las 'da' ba'am/ gsum dang lnga'i bar la de rnams spangs nas/che'i tha ma de nyid la gnyen po mngon du byas te mya ngan las 'da' ba 'am/ dang po'i tshe gcig po de nyid la gnyen po mngon du byas nas mya ngan las 'da' ba'o/ /yang tshe de'am tshe'i tha ma de rnams la gnyen po ma rdzogs shing / de nyid kyis spang bar bya ba'i nyon mongs pa 'bring gi 'bring po la sogs pa las par gyur pa na de nyid tshe 'phos te/chung ngu'i 'bring gi bar spangs par gyur pa ni lan cig phyir 'ong ba zhes bya ste/ snga ma bzhin no/ /yang de nyid la spang bya'i lhag ma ma spangs par tshe 'phos nas 'phos pa'i rten de la dgu pa spong ba'i lam la zhugs shing de spangs par gyur pa na khams gsum gyi nyon mongs pa cig char spangs pas gsum char phyir mi 'ong ba'o//de nyid ni dgra bcom pa yang yin mod kyi/ re zhig phung po'i lhag ma yod pa de srid du phyir mi 'ong ba zhes bya la/ de nyid spangs par gyur pa lhag ma med pa ni dgra bcom pa zhes bya'o/ /de la bsgom pas spang bar bya ba'i nyon mongs pa ni rnam pa bcu drug ste/de'i rgyu mtshan yang bsgom pa'i lam ni bden pa rnam par ma phye ba de rnams kyi chos nyid de bzhin nyid la dmigs pa yin pas de spang bar bya ba yang chos can bden pa la log par zhugs pa ma yin gyi 'on kyang chos nyid la log par zhugs pa'o//de'i phyir de la ni snga ma ltar bden pa la brten pa'i dbye ba mi 'thad do/ /gzhan yang log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom dang rnam pa bzhi ni mthong bas spang bar bya ba nyid yin te//de rnams ni nyon mongs pa kun du brtags pa 'ba' zhig yin pa'i phyir ro/ /de rnams las ma gtogs pa'i 'dod pa'i khams na 'dod chags la sogs pa'i nyon mongs pa drug dang / khams gong ma gnyis na khong khro ba ma gtogs pa rnam pa lnga lngar 'gyur la/ de ltar na thams cad bsdoms pas bcu drug nyid du 'gyur ba'o//blo gros chen po zhes pa la sogs pas de rnams kyi spang bar bya ba'i gtso bo gsungs pa ste/ kun nas sbyor zhes pa ni srid pa dang skyes bur kun du sbyor ba 'am/ yang sdug bsngal dang kun nas sbyor ba zhes kyang bshad do/ /chen po dang bar ma dang chung ngu ni sngar bstan pa'i gang zag tha ma ni dbang po rtul zhing 'bras bu ma thob pa'i dus na nyon mongs de rnams shas che ba'o//'bring ni dbang po dang nyon mongs pa 'bring du gyur pa'o/ /mchog ni dbang po rno zhing nyon mongs pa chung ba'o/ /snyems pa ni bdag nyid mchog tu gyur pa de rnams la gnas pas sems khengs pa'o//bye brag gis gong nas gong du zhes pa la sogs pa'i don ni snga ma ltar bsgom pas spang bar bya ba'i nyon mongs pa spangs pa'i bye brag gis gong nas gong du lan cig phyir 'ong ba nas dgra bcom pa'i bar du 'gyur ba'o/ /de la zhes pa la sogs pas 'jig tshogs la lta ba ni mthong ba dang bsgom pas spang ba'i bye brag gis rnam pa gnyis su gsungs te/de la yongs su brtags pa ni thog ma med pa nas phyin ci log gi sa bon bsags pa dang 'phral du mi dge ba'i grogs po dang 'grogs shing / phyin ci log gi bstan bcos mnyan pa la sogs pa'i rkyen gyis byung ba dag rig pa'i bdag nyid dang /rtag pa dang gcig pu la sogs pa'i khyad par du sgro 'dogs shing / bdag gi ba yang de nyid kyis longs spyad par bya ba la sogs pa'i khyad par du sgro 'dogs pa'o/ /lhan cig skyes pa ni de 'dra ba'i khyad par sgro 'dogs pa med pa phyin ci log gi sa bon bsags pa tsam las byung ba grub pa'i mtha'i ma bsgyur ba'i sems can thams cad la thun mong du yod pa'o//de las dang po'i dbang du byas te/ dpe nye bar 'god pa ni gzhan gyi dbang gi zhes pa la sogs pa'o/ /de nyid rgyas par 'chad pa ni/ 'di lta ste zhes pa la sogs pa'o/ /de rnams kyi don ni ji ltar snang ba rig pa sgyu ma lta bu'i gzhan gyi dbang yin pa las byis pa rnams kyis phyi rol gyi don rdul phra rab 'dus pa'i dngos po'am/rdzas gcig gi bdag nyid dam/ sems kyi ngo bo don dam pa la sogs par kun brtags pa'i rang bzhin la mngon par zhen cing rtog pa ltar phung po lnga ru snang ba sems nyid sgyu ma lta bu la yang sngar bstan pa ltar bdag dang bdag gi dngos por rtog pa'o//de la yod pa yang ma yin zhes pa la sogs pa'i don de rnams kyi mtshan mar brtags pa med pa'am/ yang na rtog mkhan gyi blo'i ngo na med pa yang ma yin zhes pa'o/ /de ni rgyun du zhugs pa'i kun brtags pa'i 'jig tshogs la lta ba zhes pa ni des thob pa mthong ba'i lam gyis spang bar bya ba'o//de nyid gsal bar bstan pa ni/ de yang zhes pa la sogs pa ste/ gang zag la bdag med pa bden pa bzhi chos bcu drug gi rnam par rtog pas bdag tu 'dzin pa med pa'i ye shes kyis spangs pa'o/ /lhan cig skyes pa ni bsgom pa'i lam gyis spang bar bya ba ste/de yang 'dir gnyen po'i sgo nas mtshon te bstan pa'o/ /de la bdag dang gzhan gyi lus mnyam pa nyid ces pa la sogs pas ni 'jig tshogs la lta ba'i rten bdag dang gzhan gyi rgyud kyis bsdus pa'i phung po rnams sems tsam du mnyam zhing / sems kyang don dam par stong pa nyid du mnyam pa dang /gzhan yang de nyid kyi rgyu mtshan ming bzhi'i phung po dang / gzugs su snang ba tsam gyi gzugs te phung po lnga'i rgyun rgyud skye ba rgyun chags su 'byung ba dang / khyad par du 'byung ba dang 'byung ba las gyur pa'i gzugs rnams phan tshun du rgyu'i mtshan nyid kyi phyir zhes pa spyir ming dang gzugs kyang phan tshun rten dang brten par gyur pa dang /gzugs dang ro la sogs pa'am/ 'byung ba rnams kyang phan tshun rgyu dang 'bras bur gyur pa rten cing 'brel par 'byung ba nyid kyi phyir don dam par 'byung ba med pa'i stong pa nyid ces bya'o/ /de'i don yang rten cing 'brel par 'byung bar snang ba ni de ltar snang ba las gzhan ma skyes pa rtag pa'i dngos por yod pa ni mi 'thad la snang ba dang mthun par rgyu las skye ba'i dngos po yang dag par mi 'thad de/sngar bstan pa ltar 'bras bu yod pa dang med pa la sogs pa skye ba mi 'thad pa'i phyir ro/ /des na 'dir rten cing 'brel par 'byung ba'i gtan tshigs kyis ni dngos po'i phyogs rtag pa'i bdag nyid du yod pa bkag la/de las gzhan mi rtag pa'i bdag nyid du yod pa ni yod med skye 'gag la sogs pa'i gtan tshigs rnams kyis bkag pas gtan tshigs de rnams ni dngos po'i mtha' gzhan bkag pas mthar thug pa'i don la stong pa nyid sgyu ma lta bur gtan la 'bebs pa'o//de skad du yang / gang zhig rkyen las skyes pa de ma skyes/ /rkyen la rag las gang de stong par bshad/ /ces pa la sogs pa mdo sde gzhan dag las kyang gsungs so/ /phung po rnams kyi rang bzhin de ltar yin pa la nyan thos rgyun du zhugs pas yod pa dang med pa'i phyogs su lta ba mthong ba ste rten cing 'brel par 'byung ba ni rtag pa du ma'i bdag nyid du yod la/bdag dang bdag gi ba'i rang bzhin du med do zhes de 'dra ba'i phyogs su rtogs shing goms pa'i stobs kyis sgom pa yongs su rdzogs pa na/ de 'dra ba spangs shing de nyid kyis bsgom pas spang bar bya ba'i nyon mongs pa gzhan rnams kyang spangs pas dgra bcom pa nyid du 'gyur ba'o//yang rnam pa gcig tu na nyan thos dbang po rnon po rnams kyis chos kyi bdag med pa rtogs par slob dpon b+ha byas bshad de/ de'i rjes su 'brangs na sngar gyi don phyin ci ma log pa de nyid rgyun du zhugs pa dbang pa rnon po rnams kyis rig pa sgyu ma lta bu'i bdag nyid du yod cing don dam pa'i dngos por med do zhes zung 'jug sgyu ma lta bu'i phyogs su lta zhing /mthong ngo zhes pa la sogs pa snga ma bzhin no/ /de ltar bshad pa 'di ni mi 'thad pa ma yin te/'phags pa shes rab kyi pha rol tu phyin pa las kyang / shes rab kyi pha rol tu phyin pa zab mo 'di la bslabs shing / rgyun tu zhugs pa rnams kyang byung ngo / /'byung ngo / /'byung bar 'gyur ro zhes pa nas dgra bcom pa rnams byung ngo / /'byung ngo 'byung bar 'gyur zhes pa la sogs pa gsungs pa dang /gzhan yang / nyan thos kyi sa la slob par 'dod pa rnams kyis kyang / shes rab kyi pha rol tu phyin pa zab mo 'di nyid mnyan par bya/ gzung bar bya zhes pa la sogs pa gsungs pa'i phyir ro/ /gal te de lta na byang chub sems dpa' nyid du 'gyur gyi nyan thos su mi 'thad do zhe na/ma yin te/ byams pa dang snying rje shas chung bas byang chub mchog tu sems bskyed pa med de/ dman pa nyid du sems bskyed pa'i phyir ro/ /'di'i don zhib [(]du [,]tu [)]ni dbu ma snang ba'i rnam par bshad pa de kho na nyid kyi sgron ma las shes par bya'o/ /de bas na zhes pa la sogs pas lta ba de ni lta ba dang nyon mongs pa thams cad kyi rtsa ba yin pas de spangs par gyur na/de rnams thams cad mi 'byung ba'o/ /khong du chud pa thob pa de ni bden pa bzhi'i don thos pa dang bsam pa'i shes rab kyis rtogs pa'o/ /shin tu mthong ba ni goms pas mngon du gyur pa'o/ /lta ba gnyis ni bdag dang bdag gi ba gnyis su rtogs pa ste/de rnams spangs pas bden pa bzhis bsdus pa'i chos rnams la the tsom med par 'gyur te/ de'i phyir seng ge dang 'phrog byed dang dbyig gi snying po la sogs pa ston pa gzhan rnams la 'di rnams ni phyin ci log gi dri ma dag pa'am ma dag pa zhes rtogs pa'i sgo nas de rnams la brten par bya ba'i 'du shes mi 'byung ba'o//de skad du yang / dge sbyong dag dang bram ze gzhan la brten mi byed/ /zhes pa'am/ rang gi sa la dogs med rtag tu ri rab 'dra/ /zhes gsungs so/ /rgyal ba'i yum bar ma dang rgyas pa las kyang / rgyun du zhugs pa rgyun du zhugs pa'i sa la gnas pa ni rang gi sa la nem nur med cing the tsom mi za'o zhes pa la sogs pa gsungs pa'i phyir ro//de ltar na the tsom yang gnyen po'i sgo nas mtshon te bstan pa'o/ /tshul khrims dang brtul zhugs mi snyems pa'i rgyu mtshan ni phyi rol pa rnams kyi tshul khrims dang dka' thub me lnga bsten pa dang mdung rtse la mchong ba dang /chu bo 'dus pa'i mtshams su lus 'dor ba la sogs pa dang / log pa'i brtul zhugs kyi spyod pa khyi dang rma bya'i brtul zhugs la sogs pa dang / srog gi mchod sbyin la sogs pa ni skye ba 'di dang gzhan du sdug bsngal 'byung ba'i gnas nyid du rab tu mthong ba dang /de las gzhan pa yang dag pa'i tshul khrims kyis kyang mi snyems pa ste bdag med pa nyid du rtogs pa'i phyir ro/ /mi 'gyur ba dag gis zhes pa ni las sogs par byed pa'i bdag rtag pa nyid kyi phyir/ las kyi 'bras bu so so'i skye bo'i longs spyod dang bsam gtan la sogs pa'i bde ba 'dod pa rnams bde ba de rnams dang ldan pa'i lha dang mir skye ba don du gnyer te/de dag thob par byed pa'i tshul khrims la sogs pa dang bdag cag ldan no zhes snyems shing nga rgyal ba'o/ /des mi snyems so zhes pa ni 'phags pa rnams de ltar mi snyems pa'o/ /gzhan du bdag gis zhes pa la sogs pa'i don ni srid pa'i longs spyod pa la sogs pa las gzhan du so so rang gis rig pa'i khyad par chos kyi sku'i ye shes thob par bya ba'i don du sdod cing don dam par de rnams su mngon par zhen pa med pa'o//tshul khrims kyi yan lag gis zhes pa la sogs pa ni snga ma de nyid bshad pa'o//blo gros chen po zhes pa la sogs pas de rnams spangs pa'i phan yon gsungs so/ /blo gros chen pos gsol pa zhes pa la sogs pas ni rgyun du zhugs pa nyid kyi gnas skabs na 'dod chags gang spangs pa nyid ston te/ yul la lus kyi dbang po'i 'dod chags zhes pa ni gzugs dang reg bya la sogs pa'i yul la de nyid dang lus kyi dbang po la sogs pa las yul der snang ba byung zhing de'i rjes su skyes pa'i bde ba la mngon par zhen pa'o//da ltar bde la ma 'ongs pa na sdug bsngal skye ba'i rgyur gyur pa ni ji skad du 'phags pa ting nge 'dzin gyi rgyal po las/bud med las 'byung 'dod chags gang / /'dod chags nang na 'di che ste/ /bud med chags pas yid bcings pa/ /phyi nas me yis sreg par byed/ /ces gsungs pa'i phyir ro/ /khu tshur dang thal mo ni rjes su chags pas rtsed mo'i don du'o/ /ting nge 'dzin gyi bde ba la gnas pa thob pas spangs zhes pa ni phul du byung bas 'dod chags dang bral ba'o//yang nyes dmigs mthong ba la sogs pa gnyen po gzhan yang ngo / /de las gzhan mya ngan las 'das pa rtogs par 'dod pa'am/ ting nge 'dzin gyi bde ba 'dod pa la sogs pa ni ma spangs pa'o/ / lan cig phyir 'ong ba yang rnam pa gsum du 'gyur te/ 'dod khams kyi nyon mongs pa lnga pa man chod spangs pa phyir mi 'ong ba'i 'bras bu la zhugs pa dang / drug pa spangs pas 'bras bu khyad par can ma yin pa dang / bdun pa dang brgyad pa'i bar spangs pa 'bras bu khyad par can bar chad gcig pa'o//de'i don yang 'phags pa phyir mi 'ong ba dang nyon mongs pa gcig las bar na med do/ /tshig gi don bshad pa ni/ 'di lta ste spyi dang bye brag gi mtshan mar lta ba'i don gzugs la sogs pa mtshan gyi gzhi dang / de rnams kyi mtshan nyid med pa zhes pa ni mtshan gzhi dang mtshan nyid med pa'i phyir zhes pa ste/des bsgrub par bya ba'i don ni de dag med bzhin du gzugs la sogs pa'i mtshan nyid du snang zhing zhen pa ni rnam par rtog pa nyid yin zhes pa'o/ /de 'dra ba'i rtog pa lan cig 'byung zhing de nyid kyi phyir 'dod pa'i 'dod chags ma spangs pas tshe brjes nas kyang 'dod pa'i khams kyi 'jig rten 'dir lan cig 'ongs nas zhes pa ste/mi dang lha rnams kyi nang du skye ba lan re re blangs nas bsam gtan gyi yul gyi mtshan nyid mngon du mthong ba ste/ dbang po rtul po'i dbang du byas na/ sngar bstan pa byis pa nyer spyod kyi bsam gtan gyi yul gang zag la bdag med pa tsam mthong bas rang nyid kyi sdug bsngal mthar dbyung ba'i phyir yongs su mya ngan las 'da' ba'o//dbang po rnon po'i dbang du byas na mtshan gzhi dang mtshan nyid med pa la de ltar rtogs pas mtshan nyid la sogs par snang ba'i rnam par rtog pa lan cig byung zhing /'dod pa'i 'dod chags ma spangs pas snga ma ltar 'jig rten 'dir lan cig 'ongs nas bsam gtan gyi yul gyi mtshan nyid chos la bdag med pa'i de kho na nyid rab tu mthong bas rang gi sdug bsngal mthar 'byin pa'o/ /yang 'phags pa phyir mi 'ong ba ni 'dod pa'i khams kyi nyon mongs pa dgu pa spangs pas de nas tshe brjes kyang 'dod pa'i khams su skye ba mi len pa'o//de yang 'phags pa mya ngan las 'das pa'i mdo las/ rgyas par phye na rnam pa bdun du gsungs te/ de ltar 'dod pa'i khams kyi rten la phyir mi 'ong ba'i 'bras bu thob nas brtson 'grus nan tan du byas pas khams gsum gyi nyon mongs pa spangs te mya ngan las 'das pa ste/de yang bstan bcos dag las/ mthong ba'i chos la zhi ba zhes bstan pa'o/ /yang gzugs kyi rten la phyir mi 'ong ba'i 'bras bu thob nas snga ma ltar mya ngan las 'da' ba dang / bar ma dor mya ngan las 'da' ba dang /skyes nas mya ngan las 'da' ba dang / spyod pa dang bcas pas mya ngan las 'da' ba dang / spyod pa med pas mya ngan las 'da' ba dang / rgyun rab kyis mya ngan las 'da' ba'o/ /de la spyod pas yongs su mya ngan las 'da' ba la yang rnam pa gnyis te/gzugs kyi khams su skye ba gnyis blangs nas mya ngan las 'da' ba dang skye ba bzhi len pa'o/ /de la snga ma ni dbang po rnon po'o/ /gnyis pa ni dbang po rtul ba zhes bya'o/ /de la sogs pa'i dbye ba'i tshul gzhan yang bstan to/ /spyod pa dang spyod pa med pa de dag ni mngon par 'du byed pa dang bcas pa dang /'du byed pa med pa zhes kyang bya'o/ /de la bar ma dor mya ngan las 'da' ba ni byed pa'i las dang / skye ba len pa'i las gnyis las/ skye ba len pa'i las ni spangs shing byed pa'i las 'ba' zhig la brten nas 'dod pa'i khams kyi phung po spangs nas gzugs khams su skye ba'i bar du gnyen po mngon du byas nas mya ngan las 'da' ba ste/de yang dbang po rno bar gyur pa'o/ /de skad du yang / rigs kyi bu 'dod pa'i khams dang / gzugs kyi khams kyi sems can rnams la las rnam pa gnyis yod de/byed pa'i las dang / skye ba len pa'i las so/ /bar du mya ngan las 'da' ba ni byed pa'i las 'ba' zhig yod de/ skye ba len pa'i las med do/ /de bas na bar du yongs su mya ngan las 'da' ba zhes bya ste/ 'dod pa'i khams kyi phung po ni bor dbang po rno ba'i phyir gzugs kyi khams su ma phyin par mya ngan las 'da' bar 'gyur te/de ni bar du mya ngan las 'da' ba'o zhes bya ba la sogs pa gsungs so/ /las de dag nyid la mngon par 'grub pa'i kun du sbyor ba dang / skye ba'i kun du sbyor ba zhes kyang bstan bcos dag las bshad do/ /phung po blangs nas mya ngan las 'da' ba ni las de dag gnyis ka ma spangs pas des 'dod khams kyi phung po bor nas gzugs kyi phung po len te/der lam la brtson 'grus nan tan du byas pas mya ngan las 'da' ba'o/ /spyod pas yongs su mya ngan las 'da' ba ni sngar bstan pa ltar gzugs khams kyi skye ba gnyis sam bzhi po de rnams kyi bar la rtag tu lam la nan tan byed de/'dus byas kyi ting nge 'dzin gyi shugs kyis nyon mongs pa yongs su bcad nas mya ngan las 'da' ba'o/ /spyod pa med par yongs su mya ngan las 'da' ba ni gang zag des nges par mya ngan las 'da' bar shes nas de'i phyir le lo byed do/ / des kyang 'dus byas kyi ting nge 'dzin gyi shugs kyis nyon mongs pa spangs shing tshe'i dus byas nas mya ngan las 'da' bar 'gyur ba'o/ /rgyun rab kyis mya ngan las 'da' ba ni gang zhig bsam gtan bzhi thob nas rkyen 'ga' zhig gis bsam gtan de rnams las nyams te/ yang bsam gtan dang po la dga' ba'i sems skyes te/de ltar nan tan du byas pas bsam gtan dang po thob cing / de nas tshe 'phos nas bsam gtan dang po'i lhar skye ba dang / de la bsam gtan gnyis pa thob cing / de 'dra ba'i lam gyi rgyun gyis bsam gtan gnyis pa nas bzhi pa'i bar du skye bar 'gyur ro//bsam gtan bzhi pa de la yang rnam pa gnyis te/ gzugs med pa'i khams su 'gro ba dang / gnas gtsang ma'i ris lngar 'gro ba'o/ /de'i rgyu mtshan yang ting nge 'dzin la dga' ba ni nam mkha' mtha' yas kyi skye mched la sogs pa mngon du byas nas de nas tshe 'phos shing srid pa'i rtse mo'i bar gyi gnas gzhan bzhi po de rnams su skye bar 'gyur zhing /de'i rjes la mya ngan las 'da' ba'o/ /de nyid bstan bcos dag las srid pa'i rtse mo'i mthar thug par 'gro ba zhes bshad do/ /gnyis pa ni shes rab la mngon par dga' ba ste/shes rab kyis yongs su zin pa'i zag pa med pa'i bsam gtan gtso bor bsgoms pas 'phags pa'i gnas de rnams su skye bar 'gyur ba'o/ /de yang bsam gtan bzhi'i khyad par sngar bsgom pa ste/ tha ma dang / 'bring dang / rab dang / rab kyi 'bring dang / rab kyi yang rab bo//de rnams kyis kyang go rims bzhin du mi che ba la sogs pa rnam pa lnga ru skye bar 'gyur ba'o/ /de yang bstan chos dag las/ bsam gtan zag pa dang bcas pa dang zag pa med pa spel mar bsgom pa ste/ ji skad du/ gsum du spel ba dang / drug tu spel ba dang / dgu dang bcu gnyis dang bco lnga'i bar du ste/zag pa dang bcas pa ni sum char bsgom zhing / zag med sum gnyis su bya ste spel mar bsgom pa'o zhes bshad do/ /de ltar de gnyis kyang gcig ni smra ba la dga' ba dang / gcig ni zhi ba la dga' ba'o/ /de la zhi ba la dga' ba ni gzugs med pa'i khams su 'gro ba'o//smra ba la dga' ba ni gnas gtsang ma'i ris lngar 'gro'o/ /de'i don ni rang nyid de kho na nyid rtogs pa'i shes rab dang ldan zhing / gzhan la yang de 'dra ba'i lam smra ba la dga' ba'o/ /yang gzugs med pa'i khams su 'gro ba ni bsam gtan bzhi dang khyad par lnga bsgom mi nus so//de ltar bsgom par nus pa ni 'og min gyi mthar thug par 'gro ba ste/ de yang bstan bcos dag las/ 'phar ba dang / phyed du 'phar ba dang / gnas thams cad du 'chi 'pho ba dang rnam pa gsum du gsungs pa las 'di ni tha ma'i dbang du byas pa'o//gnyis po yang don gyis blta bar bya'o/ /de la bsam gtan gyi gnas gzhan bcu gnyis las/ tshangs pa chen po ni gtso bo gcig tu nges pa'i sa dang / lta ba ngan pa'i gnas yin pas 'phags pa rnams der skye ba mi len la/ de las gzhan pa'i bcu gcig dang /gnas lngar brgyud nas mya ngan las 'da' ba'o/ /gal te 'dir bar ma dor mya ngan las 'da' ba dbang po rnon po yin na/ ci'i slad du da ltar gyi dus 'dod pa'i khams kyi rten 'di nyid la mya ngan las mi 'da' zhes pa dang / gzhan yang / 'dod pa'i khams nas gzugs kyi khams su 'pho ba la bar du mya ngan las 'da' ba mchis la/gzugs kyi khams nas gzhan du 'pho ba la bar du mya ngan las 'da' ba ma mchis pa ci'i slad du lags zhes byang chub sems dpa' 'od srungs kyis zhus pa dang / bcom ldan 'das kyis bka' stsal pa/ rigs kyi bu de ni da ltar gyi dus na chen po bzhi zhan pas lam bsgom mi nus te/dge slong dag chen po bzhi po de yang gnas khang dang / bsod snyoms dang / gos dang mal cha dang / nad kyi rkyen sman la sogs pa'i yo byad rnams so/ /de dang mi ldan na da ltar gyi dus su mya ngan las 'da' bar mi 'gyur ro zhes sngon gyi gleng gzhi dang bcas te rgyas par gsungs so//gzhan yang / da ltar 'dod pa'i khams kyi rten la sems can de dag gi phan pa'i don mang po byed pa la dga' bas brel te/ ting nge 'dzin thob par ma gyur pas da ltar mya ngan las 'das par ma gyur to zhes pa dang / yang brtsad pa gnyis pa'i lan du 'dod pa'i khams pa'i sems can rnams la sred pa rnam pa gnyis te/ 'dod pa la srad pa dang / gzugs la srad pa'o/ /de la sred pa de gnyis kyi nyes skyon la sogs pa rtogs nas sems rtse gcig tu de dag la smod par 'gyur te/ de ltar smad nas de'i bar du mya ngan las 'da' bar 'gyur ba'o//gzhan yang / 'dod pa'i khams na nyon mongs pa sbom po smad pa'i gnas su gyur pa 'dod chags dang zhe sdang dang khrel ba med pa dang 'dzem pa med pa ste/ de rnams la smod cing yid byung bas de nas 'pho ba'i bar du mya ngan las 'das pa thob par 'gyur ba'o//gzugs kyi khams na ni de lta bu'i nyon mongs pa sbom po dang / 'dod pa la sred pa la sogs pa'i nyes dmigs rtogs par 'gyur ba'i rkyen de dag med de/ bsam gtan gyi bde ba la gnas pa de dag gi gnyen po bsgom pa med pa'i phyir de nas gzhan du 'pho ba'i bar du mya ngan las 'da' ba mi 'thad ces pa la sogs pa gsungs so//yang bar du mya ngan las 'da' ba la dbye na rnam pa gsum ste/ rab dang / 'bring dang / tha ma'o/ /de la rab ni phung po spangs nas 'dod pa'i khams dang ma bral bar yongs su mya ngan las 'da' ba'o//'bring ni 'dod pa'i khams dang bral ma thag la gzugs kyi khams su ma phyin par yongs su mya ngan las 'da' ba'o/ /tha ma ni 'dod pa'i khams dang bral nas gzugs kyi khams la bsnyen te mya ngan las 'das pa'o zhes gsungs so/ /yang 'phags pa stug po bkod pa'i rgyan las/shes pa rnams dang slob pa bcu/ /brgyad pa mang na lan bdun dang / /rigs nas rigs dang lan cig 'ong / /bar chad gcig pa'i gang zag dang / /bar mar mya ngan 'da' ba dang / /gzhan skyes mya ngan las 'da' ba/ /mngon par 'du byed ma byas pa/ / steng ma'i rgyud kyang de bzhin te/ /zhes gsungs te/ de la shes pa rnams zad pa dang / mi skye ba shes pa'i ye shes thob pa'i dgra bcom pa dang / rang sangs rgyas mi slob pa rnams yin la/ slob pa bcu las brgyad pa ni sngar bstan pa ltar rgyun du zhugs pa'i 'bras bu la zhugs pa yin la/rigs nas rigs ni snga ma ltar lha dang mi rnams kyi nang du skye ba gsum mam/ lnga blangs nas mya ngan las 'da' ba'o/ /lan cig phyir 'ong ba'i 'bras bu la zhugs pa 'dir ma gsungs pa ni nyon mongs pa lnga pa spangs pa yang lan cig phyir 'ong ba nyid du 'dus par dgongs pa'o//brgyad pa ni de ltar ma yin te/ 'bras bu mngon du ma byas pas der ma 'dus pa'o/ /gzhan yang phyir mi 'ong ba'i 'bras bu la zhugs pa nyon mongs pa brgyad pa man chad spangs pa yin no zhes chos mngon pa kun las bsdus pa las bshad pa ni 'dir bar chad gcig pa'i gang zag tu 'dus pas mdo sde dag las logs su bshad pa med do//yang mdzod kyi bstan bcos las ni/ dgu pa spang ba'i don du lam la brtson 'grus nan tan du byed pa ni phyir mi 'ong ba'i 'bras bu la zhugs pa'o zhes bshad de/ de lta na bar chad gcig pa dang mi 'dra bas tha dad du bstan kyang 'gal ba med do/ /steng ma'i rgyud kyang zhes pa'i sngar bstan pa'i rgyun rab kyis mya ngan las 'da' ba nyid do/ /gal te 'dir 'dod pa'i khams kyi nyon mongs pa mtha' dag spangs pa 'phags pa phyir mi 'ong ba nyid du 'gyur ba yin na/shes rab kyi pha rol tu phyin pa'i mdo las/ tha ma'i cha can gyi kun du sbyor ba lnga spangs pas phyir mi 'ong ba'o zhes gsungs pa dang 'gal lo zhe na/ skyon med de/ de ni sngar bstan pa ltar gtso bo nye bar bsdu ba'i don du ste/ ci'i phyir de rnams gtso bo nyid du 'gyur zhe na/ 'gro ba tha ma dang khams tha ma'i rgyur gyur pa'i phyir ro//de la dang po 'jig tshogs la lta ba dang / tshul khrims dang brtul zhugs mchog tu 'dzin pa dang / the tsom gyis ni 'gro ba tha ma ngan song gsum las mi 'da' bas de'i rgyu nyid do/ /'dod pa la 'dun pa dang / gnod sems gnyis kyis ni khams tha ma 'dod pa'i khams las mi 'da' bas/de'i rgyu nyid yin pa'i phyir zhes/ chos mngon pa'i bstan chos dag las bshad do/ /'phags pa dgra bcom pa ni khams gsum gyi nyon mongs pa spangs pa ste/ de la cig car spong ba'i dbang du byas ni lan cig phyir mi 'ong ba dang mi 'dra ba'i khyad par ni sngar bstan pa ltar ram/yang na khams gsum gyi nyon mongs pa dgu spong ba'i lam la zhugs pa ste/ de'i don du brtson par byed pa ni 'phags pa phyir mi 'ong ba zhes bya ste/ de yang bstan bcos dag las dgra bcom pa'i 'bras bu la zhugs pa zhes kyang bstan to//de spangs pa'i rnam par grol ba thob pa ni dgra bcom pa'o/ /gzhan 'dir bsam gtan du bya ba la sogs pa'i rnam par rtog pa med pas dgra bcom pa zhes pa'i don ni dbang po rtul po'i dbang du byas na de dag gi mtshan mar rtog pa la nyes dmigs su lta ba'i sgo nas/de ltar rtog pa med pa'i ting nge 'dzin zag pa med pa'i dbyings na gnas pa'o/ /dbang po rnon po'i dbang du byas nas byang chub sems dpa' rnams dang mthun par brtag bya'i yul stong pa nyid du rtogs pas rnam par rtog pa med pa'o/ /bsam gtan du bya ba ni de'i dmigs pa'i yul lo//nyon mongs pa dang sdug bsngal la rtog pa med pa ni de dag nye bar spangs pa'i sgo nas so/ /gal te 'dir khams gsum gyi nyon mongs pa thams cad spangs pas dgra bcom pa nyid du 'gyur na/ shes rab kyi pha rol tu phyin pa'i mdo las/ gong ma'i cha can gyi kun du sbyor ba lnga spangs pa dgra bcom pa'o zhes gsungs pa dang 'gal lo zhe na/skyon med do/ /sngar bstan pa ltar gtso bo nye bar bsdu ba'i don du'o/ /de rnams gtso bor 'gyur ba yang khams gong ma nye bar len pa dang / blangs pa mi gtong ba'i phyir ro/ /de la gong ma nye bar len pa ni gzugs dang gzugs med pa'i 'dod chags te/de dag gis khams de dag tu skyed pa'o/ /blangs pa mi gtong ba ni rgod pa dang / nga rgyal dang / ma rig pa ste de rnams kyis sred pa dang / nga rgyal dang / the tsom shas che ba'i bsam gtan la gnas shing / des khams de dag pa kun nas nyon mongs par 'gyur ba'i phyir ro//gal te 'dir gsung rab dag las dgra bcom pa rnam pa gsum du bka' stsal na/ skabs 'dir bstan pa ni de rnams kyi nang nas gang zhig lags zhes zhus pa la/ de rnams kyi don yang zhi ba phyogs gcig gi lam rab tu thob pa ni nyon mongs pa'i sgrib pa 'ba' zhig nye bar zhi ba'o//lam zhes pa ni de gnas skabs kyi 'bras bu tsam yin gyi mthar thug pa ma yin pas so/ /byang chub tu smon lam goms par dge ba'i rtsa ba la rmongs pa ni byang chub chen por sems bskyed cing smon lam btab kyang / de thob par byed pa'i dge ba'i rtsa ba 'khor gsum sgyu ma lta bur rtogs pa'i shes rab kyis zin pa'i pha rol tu phyin pa rnams dang mi ldan zhing /gang zag la bdag med pa tsam rtogs pas re zhig dgra bcom pa'i 'bras bu mngon par 'du byas pa'o/ /'phrul pas sprul pa ni byang chub sems dpa' nyid sems can gyi don du nyan thos su sprul pa ste/gnas brtan shA ri'i bu la sogs pa lta bu'o/ /lan gyi don ni 'dir zhi ba phyogs gcig pa nyid yin te/ de ni dus yun ring du zag pa med pa'i dbyings na gnas shing / srid par nyid mtshams 'brel bar byed pa'i phyir ro//de skad du yang / ting nge 'dzin gyi myos pas myos pa bskal pa'i bar du mi sad do zhes pa la sogs pa 'og nas kyang ston par 'gyur ro/ /de las gzhan byang chub sems dpa'i spyod pa spyad par smra ba ni sngar bstan pa'i smon lam goms pa ste/ smon lam sngon du 'gro zhes pa dang sbyar bar bya'o//'phrul pas sprul pa ni bden pa gnyis kyi thabs la mkhas pa'o/ /de dag ni sangs rgyas kyi 'khor gyi dkyil 'khor mdzes par bya ba ste/ nyan thos dang byang chub sems dpa'i dge 'dun gyis spang ba'o/ /gzhan yang zhing de dag la gnas pa'i gdul bya'i khyad par rnams rjes su gzung ba'i don du nyan thos la sogs pa'i gzugs su skye zhing nying mtshams 'brel pa lta bur ston pa'o//spyod pa spyad par smra zhes pa ni yang dag pa'i shes rab kyis zin pa med pas byang chub sems dpa'i spyod pa dngos ni ma yin zhes pa'o/ / sangs rgyas kyi 'phrul pas sprul zhes pa ni byang chub sems dpa' de rnams bdag nyid kyi mthu yang yin mod kyi de bzhin gshegs pa'i byin gyi rlabs kyis kyang mthu dang spobs pa la sogs pa khyad par can du gyur pa'i nyan thos kyi gzugs su bstan pa'o/ /blo gros chen po zhes pa la sogs pa ni 'phags pa nyan thos de rnams kyis kyang chos kyi bdag med pa ma rtogs shing /gzung ba dang 'dzin pa la sogs pa'i dngos por zhen pas na mya ngan las 'das pa'i 'bras bu thob pa mi 'thad pas de dag tu zhen pa las ldog par bya'o zhes gsungs pas te/ de la 'bras bu thob par bya ba ni 'jig rten pa rnams kyi skye ba'i bsam gtan dang po la sogs pa dang /rgyun du zhugs pa la sogs pa'o/ /bsam gtan pa ni de la snyoms par 'jug pa'i gang zag go/ /de ltar 'khor gsum du snang ba ni bden pa'i dngos por med cing rang gi sems snang ba tsam du rtogs shing khas len pas 'bras bu thob pa'i mtshan nyid 'di bstan to zhes pa ste/mya ngan las 'das pa'i 'bras bu des thob par nus kyi gzhan du ma yin zhes pa'o/ /de nyid gsal bar bstan pa ni/ gzhan yang zhes pa la sogs pa ste/ gnyis su 'gyur zhes pa ni spang bya dang spang byas dben pa'i gang zag gnyis su rtogs pas de nyid de'i bdag tu lta ba la sogs par ltung bar 'gyur te/sngar bstan pa bzhin no/ /rgyun du zhugs pa la sbyar ba ji lta ba bzhin du dgra bcom par khas len pa rnams kyi zad pa shes pa dang / mi skye ba shes pa'i ye shes kyang phyin ci log nyid du 'gyur ba'o//gal te de lta na sems snang ba tsam gyi bdag nyid don dam pa'i dngos por grub cing / der 'dzin pa phyin ci ma log pa'i lam ma yin pa snyam du sems na/ gzhan yang zhes pa la sogs pa smos te/ de yang phyin ci log yin pas sems khams gsum las 'da' bar 'dod pa rnams de las 'da' bar bya ba'i phyir/rang gi sems snang ba'i mtshan nyid don dam pa'i dngos por 'dzin pa las kyang ldog par bya ste/ de'i phyir snyoms par 'jug pa'i khyad par rnams dang / bsam gtan dang ting nge 'dzin la sogs pa thams cad kyang sems kyi ngo bor gyur pa'i chos yin pas de rnams de kho na nyid du grub pa ma yin no zhes shes par bya'o//sems tsam la ni yod pa min/ /zhes pa ni de rnams kun rdzob tu sems nyid yin mod kyi/ de kho na nyid du myong rig tsam gyi sems kun rdzob pa 'di la yod pa ma yin te/rang gi rang bzhin don dam par stong pa'o/ /spong dang bden pa mthong ba dang / /zhes pa ni snga ma ltar bden pa bzhi'i chos bcu drug gi rnam par mthong bas spang bar bya ba'i nyon mongs pa rnams spong ba'o/ /'di rnams kyang / rang rgyal rgyal sras nyan thos kyi//ci slad 'gyur ba brgya po dang / /snang ba med pa brgya po yang / /ci slad 'gyur ba bdag la gsungs/ /zhes dris pa'i lan du yang don gyis sbyar bar bya ste/ brgya nyid du 'gyur ba'i tshul ni 'dri ba'i tshig gi skabs su bstan to/ /gzhan yang blo gros chen po zhes pa la sogs pas shes bya ji ltar rnam par dag ces dris pa'i lan du shes bya'i gnas thams cad ni re zhig bden pa gnyis su 'dus la/de dag gi rang bzhin ji lta ba bzhin du shes shing goms pas de dag nyid kyi dri ma spong ba'o/ /de la rnam par rtog pa'i mtshan nyid 'dzin pa la zhes pa ni gzhan gyi dbang gi rnam par rtog pa don du snang zhing 'dzin pa la/mngon par chags pas rab tu 'jog pa'i blo zhes pa ste/ kun rdzob tu don dang rjes su mthun pa'i blo 'ga' zhig gis kun rdzob kyi tshul rnam par 'jog pa'o/ /blo gang gis zhes pa ni de kho na nyid rnam par 'byed pa'i shes rab gang gis zhes pa'o//mtha' bzhi dang bral ba mi dmigs zhes pa ni mtha' bzhir 'dzin pa dang bral ba la mi dmigs pa'o/ /mtha' bzhi po 'dis chos thams cad yongs su brtag pa la rab tu sbyar bar bya'o zhes pa ni mtha' bzhir rnam par brtags la de rnams mi dmigs pa'i sgo nas don dam par stong pa nyid du brtag cing sbyar bar bya'o//rnam pa gcig tu na rnam par rtog pa'i zhes pa ni don dang mthun pa'i rnam par rtog pa'i blo ste/ de nyid kyis kun rdzob tu tsha zhing gsher ba la sogs pa rang rang gi mtshan nyid 'dzin pa'i dngos po rnams la de dang mthun par mngon par chags pa'i blo gang gis zhes sbyar bar bya'o//yongs su rtogs pa'i mtshan nyid ces pa ni de rnams rtogs pa'i blo las gzhan ma yin pa'o/ /rgyu ni de rnams blo'i bdag nyid du grub pa'i gtan tshigs te/ lhan cig dmigs pa nges pa la sogs pa'o//mtshan nyid ni de ltar snang ba'i blo'i mtshan nyid dang ldan pa'o/ /dpe yang sngar bstan pa ltar chos gnyis dang ldan pa'i dpe'o/ /de dag la mngon par chags pas sems kyi ngo bo nyid yang dag pa'i dngos por sgro 'dogs pa'i tshul gyis sgro 'dogs pa ste/ chos thams cad sems tsam nyid du rnam par 'jog pa'o/ /de ltar kun rdzob tu sems nyid yin pa dang / don dam par sems nyid sgyu ma lta bur 'jog pa'i blo gnyis kyi mtshan nyid gang dang ldan pas zhes pa la sogs pa ste don go bar zad do/ /snang ba med pa ni mnyam par gzhag pa'i ye shes so so rang rig pa'o//spyod pa'i sa ni snang ba dang bcas pa'i gnas skabs so/ /bskal pa brgyar thog ma'i mtha' dang tha ma'i mthar 'jug pa zhes pa ni dus de snyed kyi bar du rang dang gzhan gyi tshe rabs snga ma dang phyi ma shes pa'o/ /sangs rgyas kyi zhing brgya yang 'od kyis snang bar byed pa dang /sprul pa brgya 'gyed par nus pa la sogs pa 'phags pa sa bcu pa las rgyas par gsungs pa bzhin du blta'o/ /sa'i mtshan nyid kyi cho ga ni go rims so/ /smon lam gyi bye brag gis zhes pa ni sa dang po la smon lam chen po bcu grub cing de nyid kyang gong nas gong du khyad par du 'gyur ba'o//mthar thug pa'i gnas bcu ni de bzhin gshegs pa'i stobs bcu yongs su rdzogs pa'o/ /skabs kyi don 'di dang 'di'i rang bzhin can sngar bstan pa thams cad kyang ji ltar sa la 'jug par 'gyur/ gang gis sa'i rim par 'gyur zhes dris pa'i lan du yang sbyar bar bya'o//blo gros chen po zhes pa la sogs pas ni sngar bstan pa'i tsha ba dang gsher ba la sogs pa'i 'byung ba dang 'byung ba las gyur pa rnams ni kun rdzob tu sems nyid yin zhing / don dam par sems kyi ngo bo grub pa med par rgyas par 'chad de/ming dang rnam par rtog pa tsam zhes pa de nyid gsal bar bstan pa ni/ ming dang rang gi sems zhes pa la sogs pa'o/ /de'i don ni ming dang rnam par rtog pa nyid kyang mtha' bzhi dang bral bas stong pa nyid ces pa'o/ /rang gi mtshan nyid kyi gnas yang dag pa ji lta ba ni rig pa dang stong pa zung du 'jug pa'i gnas lugs don dam pa'i dngos por ma skyes pa'o//rab tu mthong ngo zhes pa ni ji ltar na mkhas pa yin zhes dris pa'i lan du sbyar te/ tshul lugs de ltar mthong zhes mkhas pa yin zhes pa'o/ /de la blo gros chen po zhes pa la sogs pas ni de rnams ngo bo nyid med pa yin na/'byung ba dang 'byung ba las gyur pa'i gzugs de bzhin gshegs pas gsungs shing / rab tu grags pa 'di nyid mi 'thad do snyam na/ skyon med de/ de ltar snang zhing grags pa ni rtog pa'i sa bon yongs su smin pa las byung ba blo nyid kyi rang bzhin du gyur pa'o zhes gsungs pa ste/gsher bar rnam par rtog pa nyid 'byung ba chen po ni zhes pa de ltar rnam par rtog pa nyid 'byung ba chen po yin gyi/ rtog pa las tha dad pa phyi rol gyi ngo bor gyur pa ni med ces pa'o/ /de 'dra ba'i rtog pa'i sa bon yongs su smin pa las phyi dang nang sems can gyi rgyud kyis bsdus pa'i chu'i khams su snang ba sgrub pa'o//gzugs kyi bye brag 'byed pa rnam par rtog pa 'byung ba chen po ni ji ltar ri dang khang bzangs dang shing la sogs pa nam mkha' stong pas bar du chod pas de rnams tha dad pa nyid du bye brag 'byed pa rnam par rtog pa'i 'byung ba chen po zhes pa ste snga ma bzhin no//log pa la bden pa zhes pa la sogs pas ni sems can gyi rgyud kyis bsdus pa'i phung po lnga dang / 'byung ba las gyur pa gzugs dang reg pa rnam pa ji ltar byung ba'i tshul bstan pa ste/ ma rig pa'i rkyen gyis 'du byed zhes pa la sogs pa sngar gsungs pa dang mtshungs so//de nyid gsal bar bstan pa ni/ blo gros chen po zhes pa la sogs pa'o/ /mngon par chags shing 'dod pa ni sred pa dang len pa ste/ 'du byed mthu dang ldan par byed pa'o/ /sa'i 'byung ba zhes pa la sogs pas de rnams su snang ba la phyi rol tha dad pa 'gog pa'i rgyu mtshan nyid ston te/sa'i 'byung ba dang 'byung ba las gyur pa nyid du snang ba rnams la ni rgyu 'byung ba chen po ste/ sngar gsungs pa ltar gsher ba dang tsha bar rnam par rtog pa'i bdag nyid du gyur pa'i 'byung ba chen po rnams rgyu nyid du yod kyi phyi rol gyi ngo bor gyur pa'i 'byung ba chen po rnams ni med do//de ci'i phyir zhe na/ dngos po dang mtshan ma dang zhes pa la sogs pa gsungs te/ rdul phra rab bam rags pa'i dngos po dang / de rnams mtshon par byed pa'i mtshan ma glo bur ba ste/ ji ltar bya rog chags pa ni lha sbyin gyi khang pa'o zhes pa lta bu dang /rang gi rang bzhin du gyur pa'i chos thun mong ma yin pa'i mtshan nyid gsher ba dang tsha ba la sogs pa dang / gru bzhi la sogs pa'i dbyibs dang / smin pa dang sdud pa la sogs pa'i bya ba'i bdag nyid de/ de rnams tshogs pa 'am rdul phra rab rnams sbyor zhing 'phrod pa dang 'du ba med pa'i phyir ro//de'i don yang rdul phra rab rnams phyogs gcig dang mtha' dag gis sbyor ba mi 'thad pa nyid du rgyas par bstan to/ /yang bye brag pa rnams ni rdul phra mo rtag pa'i rdzas rnams las rags pa yan lag can gyi rdzas rtsom pa na thog mar bya ba dang 'brel te rtsom pa las 'dis bya ba'i bdag nyid dang sbyor ba med pas zhes pa de dang 'brel pa med pas rtsom pa mi 'thad ces pa'o//dngos po dang zhes pa la sogs pas ni de nyid rjes su 'gro ba'i sgo nas ston to/ /bya ba 'dus pa las skye zhes pa ni las su bya ba ste/ 'bras bu nyid la sbyar ro//mtshan ma dang mi ldan zhes pa ni dngos po dang mtshan ma la sogs pa tshogs shing sbyor ba med par 'byung ba chen po rnams mi skye ba ste/ ldog pa'i sgo nas bstan pa'o/ /gzhan yang blo gros chen po zhes pa la sogs pas ni kun rdzob tsam du phung po la sogs pa'i rnam par gzhag pa ji ltar yin pa gsungs so//de rang bzhin ni kun rdzob tsam du mtshan gzhi gzugs la sogs pa'i dngos po'o/ /yang rnam pa gcig tu na de rnams kyi rang bzhin de kho na nyid skye ba med pa dang / mtshan nyid med pa dang / mtshan nyid kyang don dam par mtshan nyid med pa'i mtshan nyid de/ji skad du shes rab kyi pha rol tu phyin pa las/ gzugs ni gzhig cing gzhom du rung ba'i mtshan nyid de/ de ni mtshan nyid med par de bzhin gshegs pas mngon par rdzogs par sangs rgyas so zhes pa nas/ de bzhin du tshor ba ni nyams su myong ba'i mtshan nyid dang /'du shes ni mtshan mar 'dzin pa'i mtshan nyid dang / 'du byed ni sems mngon par 'du byed pa'i mtshan nyid dang / rnam par shes pa ni dmigs pa rnam par rig pa'i mtshan nyid de/ de ni mtshan nyid med par de bzhin gshegs pas mngon par rdzogs par sangs rgyas so zhes pa'i bar du gsungs pa lta bu'o//de la phung po bzhi ni ming bzhi'i phung po'o/ /'byung ba bzhi las gyur pa ni phyi dang nang gi skye mched gzugs can nyid du grags pa rnam pa bcu'o/ /rnam par rig byed ma yin pa ni ha cang yang 'khrul par gyur pa'i sde pa rnams kyis brtags pas te/'dir smos par bya ba ma yin no/ /phan tshun du mtshan nyid mi mthun pa ni gsher ba dang sreg pa la sogs pa'o/ /gzugs med pa la bzhir bgrang ba med ces pa'i don ni ji ltar gzugs rags par 'jug pa rtogs par sla ba nyid kyis 'di dang de'o zhes bgrang bar nus pa ltar gzugs med pa rnams ni ma yin zhes pa'o//yang don dam par ni phung po lnga po thams cad nam mkha' dang 'dra zhing spros pa dang bral bas gcig dang gnyis la sogs pa'i grangs dang / bgrang bya'i dngos po las 'das pa'o/ /de ltar yin kyang byis pa rnams kyis thogs par byed pa'i dngos po dang bral ba gcig ni nam mkha'o zhes rnam par rtog pa de bzhin du 'di ni tshor ba dang zhes pa la sogs par grangs dang bgrang bya'i dngos por brjod pa'o//gnas gzhan du ma yin zhes pa ni rmi lam dang gzugs brnyan gyi skyes bu ltar don dam par phung po 'dus pa'i sems can gyi skye gnas gzhan tha dad pa ma yin kyang /'phags pa'i ye shes ma thob pa'i byis pa rnams la/ de 'dra ba'i phung po'i rnam par rtog pa'i blo nyid rnam par rtog pa'o/ /blo gros chen po zhes pa la sogs pas ni de 'dra ba'i rnam par rtog pa spangs la/rang dang gzhan gyi don la sbyar bar bya'o zhes gdams pa'o/ /rab tu dben pa'i chos bstan pa byas pas ni chos la bdag med pa mthong ba rnam par dag par 'gyur zhes pa ni de ltar goms shing tshogs bsags pas sa dang po la bden pa bzhi'i chos nyid mthong ba gong nas gong du rnam par dag par 'gyur zhing /sa bdun pa ring du song ba'i sa la yang rab tu 'jug par 'gyur ba'o/ /des de la rab tu zhugs pas ting nge 'dzin du ma la dbang bsgyur zhing yid kyi lus rab tu thob pas sa brgyad pa la sgyu ma lta bu'i ting nge 'dzin rab tu thob po//gzhan yang sa de nyid la de bzhin gshegs pa'i stobs bcu dang / mngon par shes pa drug dang / dbang bcu po rnams rtogs par khong du chud pa ste/ de rnams so so rang rig pa'i tshul gyis rtogs pa'o/ /de la de bzhin gshegs pa'i stobs dang mi 'jigs pa la sogs pa'i yon tan gyi rigs rnams byang chub sems dpa'i sa brgyad pa la thob kyang /de rnams rnam par dag cing yongs su rdzogs pa ni ma yin no/ /gzhan yang byang chub sems dpa' nyid kyi stobs bcu la sogs pa yang 'phags pa rnam par 'phrul pa'i rgyal pos zhus pa las bstan te sngar bshad pa bzhin no//mngon par shes pa rnams kyi yul dang mtshan nyid la sogs pa yang chos mngon pa'i bstan bcos dang / 'phags pa shes rab kyi pha rol tu phyin pa las shes par bya'o/ /de rnams thob pa'i rgyu ni 'phral gyi mngon par 'du byed pa dang /sngon gyi las te de la dang po ni bsam gtan bzhi pas thams cad kyis rung bar byas pa 'phel ba rab kyi mthar thug pa ste/ ji ltar bsam gtan dang po nas srid pa'i rtse mo'i bar bsam gtan bzhi dang / gzugs med pa bzhi la go rims bzhin du lugs dang mthun par snyoms par 'jug cing /yang srid pa'i rtse mo nas bsam gtan dang po'i bar du go rims bzhin du lugs las ldog pa'i tshul gyis snyoms par zhugs te/ de nas bsam gtan bzhi pa'i bar du go rims bzhin snyoms par zhugs shing / bsam gtan bzhi pa de la brten nas rdzu 'phrul thob par 'dod pa na/rang gi lus shing bal lta bur yang ba nyid du yid la byed pa dang / mig dang rna ba'i mngon par shes pa la sogs pa thob par 'dod pa na/ gzugs dang sgra la sogs pa'i yul rnams dbang po'i nye 'khor na gnas par yid la byed cing / de'i rjes su de rnams kyi ngo bor mi rtog pa'i ye shes la gnas nas de las langs pa'i rjes kyi shes pa la de rnams ji lta ba bzhin du shes pa'i mngon par shes pa 'byung ba'o/ /de skad du yang / bsam gtan bzhi pa shin du dag thob nas/ /mi rtog ye shes yongs su bzung ba dang / /ji ltar rnam gnas yid la byed pa las//mthu grub pa yi dam pa thob par 'gyur/ /zhes gsungs pas so/ /gzhan yang 'di rnams sngon gyi las kyi dbang gis kyang 'byung bar gsungs te/ de skad du 'phags pa dkon mchog brtsegs pa las/ ji ltar lha yi mig thob 'gyur/ /lha yi rna ba ji ltar thob//sems can 'chi 'pho skye ba dag /'dren pa gang gis 'tshal bar 'gyur/ /zhes dris pa'i lan du 'dren pa yang dag par rdzogs pa'i sangs rgyas kyis/ mar me byin pas mig thob 'gyur/ /rol mo sgra yis rna ba dag /'chi 'pho skye ba ye shes kyis//de dag de ltar 'grub par 'gyur/ /zhes gsungs nas yang / 'dren pa byang chub sems dpa' yi/ /zag pa gang gis bas par 'gyur/ /tshe rabs snga dran cis 'gyur lags/ /rdzu 'phrul ci yis thob par 'gyur/ /zhes dris pa'i lan du/ bzhon pa byin pas rdzu 'phrul 'thob//dran pa bsgoms pas rjes su dran/ /mtha' gnyis rab tu spangs byas nas/ /zag pa zad pa reg par 'gyur/ /zhes rgya cher gsungs so/ /'di rnams kyang / 'jig rten mngon shes ji ltar 'byung / /'jig rten 'das kyi'ang ji lta bu/ /zhes dris pa'i lan du sbyar bar bya ste/de la mngon par shes pa lnga ni 'jig rten pa rnams dang thun mong pa'o/ /zag pa zad pa ni 'phags pa nyan thos la sogs pa slob pa'i sa las 'das pa'am/ byang chub sems dpa' sa brgyad pa yan chod kyi gnas skabs kyis bsdus pa'o/ /de la dbang rnam pa bcu ni 'phags pa chos yang dag par sdud pa las ji skad du/tshe la dbang ba dang / sems la dbang ba dang / yo byad la dbang ba dang / las la dbang ba dang / skye ba la dbang ba dang / rdzu 'phrul la dbang ba dang / mos pa la dbang ba dang / smon lam la dbang ba dang / ye shes la dbang ba dang /chos la dbang ba ste de dag ni dbang bcu'o/ /de la bdud rtsi thob pa'i phyir tshe la dbang ba'o/ /sems tsam du yongs su shes pa'i phyir sems la dbang ba'o/ /lag na rin po che dang nam mkha' mdzod kyi ting nge 'dzin rab tu rnyed pa'i phyir yo byad la dbang ba'o/ /bag chags dang bcas pa'i las kyi lam kun chad pa'i phyir las la dbang ba'o//ting nge 'dzin rnams bzlog pa'i bsam gtan rnyed pa'i phyir skye ba la dbang ba'o/ /lhun gyis grub par bya ba la 'jug pa thob pa'i phyir rdzu 'phrul la dbang ba'o/ /zad par gyi skye mched thob par bya ba'i phyir mos pa la dbang ba'o//bsam pa tsam gyis don thob par 'gyur ba'i phyir smon lam la dbang ba'o/ /ye shes sngon du 'gro ba'i lus dang ngag dang yid kyi las thob pa'i phyir ye shes la dbang ba'o/ /de bzhin nyid dang chos kyi dbyings dang yang dag pa'i mtha' mnyam pa'i ye shes dri ma med pa'i phyir chos la dbang ba'o//gzhan yang rigs kyi bu 'jig rten ni 'chi bas 'jigs skrag ste/ de'i gnyen por tshe la dbang ba'o/ /'jig rten ni sems kun nas nyon mongs pas 'jigs skrag ste/ de'i gnyen por sems la dbang ba'o/ /'jig rten ni yo byad kyis 'jigs skrag ste/de'i gnyen por yo byad la dbang ba'o/ /'jig rten ni nyes par spyod pas 'jigs skrag ste/ de'i gnyen por las la dbang ba'o/ /'jig rten ni ngan 'gros 'jigs skrag ste/ de'i gnyen por skye ba la dbang ba'o/ /'jig rten ni kun nas tshol ba'i rtsol bas 'jigs skrag ste/de'i gnyen por rdzu 'phrul la dbang ba'o/ /'jig rten ni dam pa'i chos kyis 'phongs par 'gyur ba'i las kyis 'jigs skrag ste/ de'i gnyen por mos pa la dbang ba'o/ /'jig rten ni 'dod pa'i 'ching bas 'jigs skrag ste/de'i gnyen por smon lam la dbang ba'o/ /'jig rten ni the tsom gyi zug rngus 'jigs skrag ste/ de'i gnyen por ye shes la dbang ba'o/ /'jig rten ni 'khor gyi nang na bag tsha bas 'jigs skrag ste/ de'i gnyen por chos la dbang ba'o/ /gzhan yang rigs kyi bu srog gcod pa spangs shing sems can thams cad la khong khro ba'i sems med pa ni tshe la dbang ba thob par bya ba'i rgyu'o//bde ba rnams la sgrib pa med pa'i byams pa chen po dang / sdug bsngal ba rnams la sgrib pa med pa'i snying rje chen po ni sems la dbang ba thob pa'i rgyu'o/ /sems snyoms shing dngos po thams cad yongs su gtong ba byang chub tu bsngo ba ni yo byad la dbang ba thob par bya ba'i rgyu'o//las dang bya ba la zhugs nas lus dang ngag dang yid yongs su dag pa'i las kyis las kyi bya ba/ las bdag gir bya ba la 'jug par ston pa ni las la dbang ba thob par bya ba'i rgyu'o//byang chub kyi sems kyis yang dag par bsdus pa'i dge ba bcu'i las kyi lam ni skye ba la dbang ba thob par bya ba'i rgyu'o/ /rnyed pa dang bkur sti dang tshigs su bcad pa thams cad sbyin pa dang / bzhon pa sbyin pa ni rdzu 'phrul la dbang ba thob par bya ba'i rgyu'o//sems can thams cad dkon mchog gsum la bkod cing 'dzud de mos par byed pa ni mos pa la dbang ba thob par bya ba'i rgyu'o/ /sems can thams cad kyi lus dang ngag dang / yid yongs su dag pa sgrub pa ni smon lam la dbang thob par bya ba'i rgyu'o//zang zing med pa'i sems kyis chos sbyin pa ni ye shes la dbang ba thob par bya ba'i rgyu'o/ /sems can thams cad la chos mnyan pa nyid khong du chud par byed pa dang / chos mtshungs par ston pa dang / de bzhin gshegs pa'i sku ni chos kyi sku ste zang zing gi sku ma yin no zhes yongs su 'byed pa ni chos la dbang ba thob par bya ba'i rgyu'o//rigs kyi bu 'di dag ni byang chub sems dpa' rnams kyi dbang bcu'o zhes gsungs te/ de rnams spang bya gang gi gnyen po yin pa dang / rgyu gang las mngon par grub pa ste/ de yang sngon gyi las dang 'phral gyi 'du bya ba gnyis su shes par bya ste/mngon par shes pa'i skabs su ji ltar bstan pa bzhin no/ /de ltar byang chub sems dpa' sems can thams cad kyi 'tsho bar gyur pa ni sangs rgyas kyi mi gnas pa'i mya ngan las 'das pa'i rjes su mthun par 'gyur ba ste/ de yang byang chub sems dpa'i sa brgyad pa nas thob par 'gyur te/ji skad du/ sa brgyad pa la mi gnas mya ngan las 'das pa dang zhes pa la sogs pa gsungs pa'i phyir ro/ /de ltar na rang dang gzhan gyi sde pa rnams kyis 'dod pa'i mya ngan las 'das pa'i rnam par dbye ba dang / de'i rang bzhin phyin ci ma log pa gang yin snyam du dogs pa bsal ba'i don du de nyid ston pa ni/gzhan yang blo gros chen po zhes pa la sogs pa'o/ /de la dngos po'i rang bzhin med pa'i mya ngan las 'das pa ni gang gi tshe na rnal 'byor can rnams kyis zhi ba ro gcig pa'i ting nge 'dzin thob pa de'i tshe/ bdag dang bdag gi mtshan mar brtags pa'i dngos po'i rang bzhin med pa ste/de ltar brtags pa dang rtog pa'i mtshan ma zhi ba/ bdag rtag pa gcig pu'i rang bzhin mngon du byas pa ste/ de 'dra ba'i dngos po ni khas len pa'o zhes slob dpon ye shes dpal gyis gsungs so/ /mtshan nyid sna tshogs kyi dngos po med pa'i mya ngan las 'das pa ni tshangs pa smra ba rnams kyis don dam pa'i tshangs pa smra ba rnam rig gnyis su med pa rtag pa gcig pu'i rang bzhin mngon du byas pa na de las gzhan mtshan nyid sna tshogs kyi dngos po med pa ste/ji skad du/ bu zhig tshangs pa mchog tu bden//rig pa'i dbang phyug mun mtha' yas/ /'ga' zhig yod pa nyid smra ba/ /de yang zhags par rab tu brjod/ /ces bstan pa dang / gzhan yang / rnam rig tsam ni rtag tu rnam par dag /ces pa la sogs pa sngar bstan pa lta bu'o/ /rang gi mtshan nyid kyi dngos po med par rtogs pa ni grangs can pa rnams kyis ji ltar skyes bu shes pa rig pas yon tan gsum cha mnyam pa gtso bo'i rang bzhin yul du byas pa na/mi mnyam pa'i rang gi mtshan nyid kyi dngos po sna tshogs med par rtogs pa'o/ /yang rang gi sde pa rnams kyi dbang du byas na/ dngos po'i rang bzhin med pa ni nyan thos sde pa rnams kyis 'du byed kyi 'jug pa thams cad rgyun chad nas med pa ni mya ngan las 'das pa ste/ ji skad du/ ma zhum pa yi sems kyis ni/ /tshor ba dang du blang mi bya/ /mar me shi bar gyur pa bzhin/ /de yi sems ni rnam par zhi//zhes bstan pa lta bu'o/ /gzhan yang sangs rgyas kyi ye shes rgyun chad par 'dod pa rnams kyang 'di nyid dang rjes su mthun pa'o/ /gnyis pa'i don ni sems tsam rnam pa brdzun par smra ba gang dag /da ltar so so skye bo'i dus na gzung 'dzin gyi rnam pa sna tshogs su snang ba ni brdzun pa nyid de/ji skad du/ rig bya rig byed rnam pa med/ /skra sogs shes pa'i tha dad bzhin/ /gang tshe gzung 'dzin rnam phye ba'i/ /mtshan nyid rnam par bslad pa can/ /zhes gsungs pa lta bu'o/ /de'i phyir de ltar snang ba ni thog ma med pa'i 'khrul pa'i bag chags kyi dbang gis te/des na bag chags thams cad spangs pa yang dag par rdzogs pa'i sangs rgyas la ni mtshan nyid sna tshogs su snang ba'i rnam pas dben pa gnyis su med pa'i rang rig pa 'ba' zhig ste/ de 'dra ba ni sangs rgyas kyi mya ngan las 'das pa zhes khas len pa'o//de yang sems tsam gyi gnas skabs ni shes pa gnyis med kyi ngo bo yul gyi rnam pas kha ma bsgyur ba don dam pa'i dngos por 'dod de/ de yang skad cig gi bdag nyid pas na phyi rol pa rnams dang mi mtshungs pa'o/ /'di ni mi 'thad de/ shel sgong dag pa 'dra ba yi//shes pa rab tu tshor ba med/ /ces gsungs pa de 'dra ba la sgrub byed med pa dang / skad cig gi dngos po ni rgyu med pa mi 'thad la/ rgyu las skye ba'i phyogs kyang sngar bkag zin pa'i phyir ro/ /rang gi mtshan nyid kyi dngos po med par rtogs pa ni rnam par rig pa tsam du smra ba rnams kyis gzugs la sogs pa phyi rol gyi ngo bor gyur pa'i rang gi mtshan nyid kyi dngos po med par mngon sum du rtogs pa'i ye shes don dam pa dngos por gyur pa spangs pa dang /rtog pa rab kyi mthar thug pas phye ba ni sangs rgyas kyi mya ngan las 'das pa nyid du 'dod pa'o//phung po rnams kyi rang dang spyi'i mtshan nyid kyi rgyud kyi rgyun chad pa ni nyan thos sde pa rnams kyis zag pa dang bcas pa'i phung po'i rgyu rgyun chad pa zag pa med pa'i dbyings na ting nge 'dzin gyi lus tsam du gnas pa ni mya ngan las 'das pa'o zhes khas len pa'o/ /de dag ni blo gros chen po mu stegs byed rnams kyis 'dod pa'i mya ngan las 'das pa yin te/nga'i gsung rab la ni ma yin no zhes pa la 'dir mu stegs byed ni grub pa'i mtha' phyin ci log pa thams cad do zhes 'og nas ston par 'gyur ro/ /de rnams mya ngan las 'das pa ma yin pa'i rgyu mtshan yang /dngos por mngon zhen yod na ni/ /'dod chags zhe sdang mi bzad 'byung / /zhes pa la sogs pa sngar rgyas par bstan no/ /ji ltar yid kyi rnam par shes pa ldog par 'gyur la zhes pa'i don ni ji ltar byis pa'i skye bo'i rnam par shes pa'i tshogs brgyad log cing gnas par gyur pa mya ngan las 'das pa'o zhes mi gsung bar/rtog pa dang bcas pa'i yid kyi rnam par shes pa 'ba' zhig log par mya ngan las 'das pa'o zhes dmigs kyis bsal ba dang bcas te gsungs pa dang mi 'thad ces rgol ba'o/ /lam gyi don ni 'dir nyon mongs pa can gyi yid dang lhan cig pa'i yid kyi rnam par shes pa kun gzhi las byung zhing kun gzhi la dmigs pa/sgo lnga'i rnam par shes pa dang / de dag gi yul la bye brag 'byed cing / dngos po'i rang bzhin du rnam par rtog pa ni kun gzhi la rnam par shes pa thams cad kyi bag chags 'jog cing rgyas par byed pas de la brten nas 'jug pa'i rnam par shes pa thams cad 'byung zhing /de nyid bzlog pa rnam par shes pa bdun po thams cad kyang ldog par 'gyur bas de nyid log pa mya ngan las 'das pa yin no zhes dmigs kyis bstan pa ste/ phyin ci log gi rnam par shes pa de 'dra ba log cing yang dag pa'i shes rab kyis rnam par shes pa de rnams kyi rang bzhin stong pa nyid du rtogs na bag chags la sogs par mi byed pas phyin ci log gi rnam par shes pa thams cad ldog pa'o//'dir tshig gi don bshad pa la de'i rgyu dang dmigs pa'i phyir zhes pa ni 'jug pa'i rnam par shes pa de'i rgyu dang dmigs pa ni kun gzhi yin pa'i phyir de'i phyir de la brten nas bdun po rnams 'byung ba'o//tshul ji ltar 'byung zhe na/ blo gros chen po zhes pa la sogs pa ste/ sngar bstan pa ltar yid kyi rnam par shes pas de rnams dngos po'i rang bzhin du brtags pas kun gzhi la bag chags rgyas par byas pa'i tshul gyis 'byung ba'o//de nyid gsal bar bstan pa ni yid dang zhes pa la sogs pa ste/ nyon mongs pa can gyi yid dang yid kyi rnam par shes pa lhan cig tu kun gzhi la bdag dang bdag gir mngon par chags pas ngar sems pa ste/nyon mongs pa can gyi yid dang mthun par rjes su 'jug pa'o/ /de ltar 'jug pa'i dbang gis kun gzhi la bag chags rgyas par byas pas kun gzhi rnam par shes pa de nyid rnam par shes pa thams cad kyi rgyu dang dmigs par gyur pa'o/ / lus tha dad pa ma yin zhes pa ni sngar bstan pa ltar rgya mtsho dang rlabs bzhin du gnas pa'o/ /gcig gi rgyur gcig gyur pa ni bag chags dang bcas pa'i kun gzhi yang 'jug pa'i rnam par shes pas skyed la/ de las kyang 'jug pa'i rnam par shes pa 'byung ba dang /'jug pa'i rnam par shes pa rnams kyang phan tshun gcig gi rgyur gcig 'gyur ba ste/ don zhib tu ni sngar bstan no/ /bya ba dang ni mtshan nyid dang / /dngos por mya ngan nga mi 'da'/ /zhes pa'i don ni ji ltar sprul pa'i sku mya ngan las 'da' ba yang sems can gyi don byed pa'i bya ba phrin las nyid yin la gzhan yang tshe'i dus byed pa lta bur ston pa'i mtshan nyid dang /de la sogs pa pur zhugs la bzhen pa dang / sku gdung la sogs pa'i dngos por ston pa ni gdul bya'i snang ba nyid yin gyi/ sangs rgyas kyi rang bzhin la de 'dra ba med ces pa'o//de rgyu de la dmigs zhes pa la sogs pas ni kun gzhi de nyid rnam par shes pa thams cad kyi rgyu dang dmigs pa ste/ de nyid kyi phyir de la brten nas nyon mongs pa can dang / yid kyi rnam par shes pa'i rgyud kyang rgyun chags su gnas pa'o/ /sems kyi rgyu rnams de 'byin zhes pa ni sa bon dang bcas pa'i kun gzhis 'jug pa'i rnam par shes pa rnams 'byin pa ste/des na rnam par shes pa'i rgyun kyang rab tu gnas shing 'byung ba'o/ /rnam pa sna tshogs kyang 'gags pa zhes pa ni sa bon sna tshogs so/ /de ltar na rtog pa dang bcas pa'i yid kyi rnam par shes pas kun brtags pa'i rang bzhin rab tu dbye ba'i tshul ji ltar 'gyur zhe na/gzhan yang blo gros chen po zhes pa la sogs pa ste/ kun brtags pa'i rang bzhin sngar bstan pa de nyid rab tu dbye ba'i sgo nas rgyas par ston to/ /de ltar bstan pas kyang kun brtags pa'i rang bzhin ji lta ba bzhin rtogs pas de ltar rtog pa'i blo nyid ldog par 'gyur ba'o//gang la gnas te brjod par 'jug par 'gyur zhes pa ni shes bya gang la dmigs te brjod pa 'jug par 'gyur ba'i brjod bya yod do zhes pa'o/ /rgyu'i mtshan nyid la skye ba yod pa dang med pa snang bar byed pa ni rjes su 'gro ba dang ldog pa nyid du dmigs pa'o//yang na sngar nas yod pa'i dngos po rgyu dang rkyen gyis gsal bar byed pa'am/ sngar med pa nyid rgyu dang rkyen gyis snang bar byed pa ste/ grangs can dang bye brag pa la sogs pas 'dod pa bzhin no//rig pa la rnam par rtog pa ni ji ltar bdag rtag pa'i ngo bo 'ga' zhig med na/ las dang 'bras bu'i 'brel pa mi 'thad par 'gyur ba las de nyid yod pa'i phyir gang zag gi bdag yod cing / de la ltos nas bzhag pa bdag gi ba'i mtshan nyid kyang yod de/ de ltar 'jog pa ni rigs pa dam pa yin no zhes rnam par rtog pa'o/ /skye ba la rtog pa ni 'bras bu'i phyogs nas so/ /mi skye ba la rnam par rtog pa ni rgyang 'phen pa rnams kyis sems can gyi rgyud kyis bsdus pa'i dngos po thams cad sngon gyi las dang nyon mongs pa'i rgyus skyed pa ni ma yin gyi/'on kyang sngar med pa las sa la sogs pa'i 'byung ba 'dus pa'i rkyen gyis spang las sha mo rdol ba'i tshul du glo bur du byung ba'o zhes rtog pa'o/ /de ltar na rgyu la rnam par rtog pa dang / skye ba la rnam par rtog pa dang / mi skye ba la rnam par rtog pa gsum ni ldog pa mi 'dra ba'i sgo nas so sor bstan kyang rgyu 'bras la rnam par rtog pa gcig nyid du 'dus pa'o//'brel pa ni bdag nyid gcig pa dang de las byung ba'am/ yang phyi rol pa rnams kyis brtags pa'i sbyor ba dang / 'du ba'i 'brel ba la sogs pa'o/ /bcings pa dang ma bcings pa la rnam par rtog pa ni 'khor ba dang mya ngan las 'das pa'am/de las gzhan 'jig rten gyi tha snyad du bya ba'i bcings pa dang ma bcings pa'o/ /blo gros chen po de dag ni zhes pa rnam par rtog pa de rnams kyis brtags pa'o/ /'dir kun brtags pa'i rang bzhin gyi rnam par dbye ba 'di rnams las mang ba'am nyung ba nyid du mi ston par 'di rnams 'ba' zhig tsam bstan pa ni gdul bya nye ba'i bsam pa la dgongs pa ste/'di dag tsam bstan pas gdul ba nyid du gzigs pa'o/ /de las gzhan pa'i grangs nges pa'i rgyu mtshan ni ma mthong ngo //gal te kun brtags pa'i rang bzhin ni rnam pa thams cad du med pa ma yin nam/ de'i phyir byis pa'i skye bo mngon par chags pa'i yul du mi 'thad do zhe na/ blo gros chen po gzhan gyi dbang gi mtshan nyid la zhes pa la sogs pa smos te/ sngar bshad pa ltar rnam grangs kyi kun du brtags pa blo'i snang ba de nyid blo'i bdag nyid du gyur pa'i gzhan gyi dbang yang de yin te/de nyid la mngon par chags shing rtog pa'o/ /de yang ji ltar sgyu mas sprul pa'i gnas sna tshogs su snang ba la phyi rol gyi rta dang glang po la sogs par mthong ba bzhin du byis pa rnams kyis sems nyid rig pa'i sgyu ma la gzung 'dzin gyi rnam pa sna tshogs su mthong zhing zhen pa'i blos rnam par rtog ste/blo gros chen po de la rnam pa sna tshogs su snang ba dang / sems nyid rig pa'i sgyu ma ni gcig pa ma yin te/ sngar rnam pa bden pa'i phyogs dgag pa rgyas par bstan no//yang rnam pa sna tshogs sems las tha dad pa'i phyi rol gyi ngo bor gyur pa yang ma yin te/ rnam pa sna tshogs su snang ba sems kyi rgyu las byung ba ma yin par 'gyur te/ khyab pa'i don ni sngar bstan no/ /de ste sna tshogs dang sgyu ma tha mi dad pa de gcig nyid yin na ni/ de dag bye brag med par 'gyur te/ji skad du/ gang phyir sna tshogs ngo bo ru/ /snang ba can gyi dngos por gcig /rnam pa rnams bden ji ltar 'gyur/ /gcig pa nyid de nyams phyir ro/ /zhes pa la sogs pa gsungs pa'i phyir ro/ /de'i don yang pha rol po sna tshogs gnyis su med par smra ba rnams kyis rnam pa sna tshogs su snang ba ni shes pa gcig gi bdag nyid du bden par 'dod pa la de lta na shes pa gcig po nyid du mar 'gyur te du ma dang tha mi dad pa'i phyir/dper na skar ma'i dkar po bzhin no/ /de bzhin du rnam pa rnams kyang gcig nyid du 'gyur te gcig dang tha mi dad pa'i phyir ro//gal te rnam pa rnams gcig tu 'gyur ba ni 'dod pa nyid yin la/ shes pa du ma nyid du 'gyur ba la du ma dngos dang tha mi dad pa'i phyir zhes gtan tshigs su sbyor na ni gtan tshigs 'di ma grub par 'gyur la/ du mar snang ba dang tha mi dad pa'i phyir zhes gtan tshigs su sbyor na ni khyab pa ma grub ste du mar snang ba ni du mar bden pa ma yin zhing rang bzhin gcig nyid yin pa'i phyir ro zhe na/ma yin te/ du mar snang ba dngos po'i bdag nyid du bden pa dang / skye 'gag gi rnam par 'gal ba ste/ ji ltar dkar po'i rnam par snang ba 'gags kyang dmar po'i rnam par snang ba mi 'gag cing /de bzhin du de 'gags kyang cig shos mi 'gag la gcig skyes kyang gzhan mi skye bas de rnams su snang ba ni du ma nyid yin zhing / de dang tha mi dad pas du ma nyid du 'gyur ba'o/ /de nyid kyi phyir sna tshogs su snang ba gcig nyid du 'dod pa la yang mngon sum la sogs pa'i bsam pa 'jug pas/de ltar rigs pa ma yin no/ /de nyid kyi phyir sgyu ma dang sna tshogs kyi bye brag mthong bas na gcig pa yang ma yin la snga ma ltar rgyu 'bras nyid du mi 'thad pas tha dad pa yang ma yin no/ /sems ni yul dang kun du 'brel//zhes pa la sogs pa'i tshigs su bcad pa gcig gis ni rnam par shes pa 'jug pa'i tshul ston te/ de la kun gzhi rnam par shes pa ni lus dang longs spyod la sogs par snang yul dang 'brel zhing / de las gzhan pa'i rnam par shes pa rnams kyang rtog pas brtags pa'i don la 'dzin pa'o//snang ba med dang bye brag la/ /shes rab yang dag rab tu 'jug /ces pa ni/ snang ba med pa'i de bzhin nyid la ni don dam pa shes pa'i shes rab 'jug par 'gyur la/ gzhan gyi dbang gis bsdus pa kun rdzob pa'i bye brag la ni kun rdzob shes pa'i shes rab 'jug pa'o//kun brtags pa'i rang bzhin zhes pa la sogs pas ni/ gzhan dbang don dam pa nyid 'gog pa ste/ de la sngar bstan pa ltar rnam grangs kyi kun brtags rtog pa'i gzung ba ni kun rdzob tu rtog pa'i blo nyid du yod cing blo'i ngo bor gyur pa'i gzhan dbang ni de kho na nyid du med pa ste/de lta na blo'i ngo bo don dam pa nyid du myong ba mi 'thad do zhe na/ nor pa dag gis brtags pa snang / /zhes pa ste/ de ltar snang ba ni phyin ci log gi blos brtags pa nyid rtog pa'i blo'i ngo na snang ba ste/ phyin ci log yin pa'i phyir de la de ltar mi brtag ces nye bar gdams pa'o//de yang ji ltar sngags dang sman la sogs pa'i yan lag mang pos grub pa'i sgyu ma'i glang po la sogs par snang ba dbang po ma bslad pa rnams kyi blo'i ngo na ma grub pa de bzhin du gzhan gyi dbang gi mtshan ma sna tshogs kyang /yang dag pa'i rigs pas brtags na mi 'grub pa'o/ /de nyid gzhan gyi dbang du ji ltar 'gyur zhe na/ mtshan ma gnas ngan len gyi dngos zhes pa la sogs pa gsungs te/ rnam par rtog pa'i mtshan ma dang / des bsgos pa'i bag chags kyis byis pa'i skye bo 'ching bar byed pa ni/sems nyid snga ma rnams las byung bas kun rdzob tu gzhan gyi dbang nyid yin la/ de nyid mi shes pa rnams kyis don dam pa'i dngos por gzhag pa ni kun brtags pa ste/ gzhan gyi dbang don dam pa nyid du rnam par rtog pas brtags pa'i phyir ro/ /gal te kun du brtags pa blo'i ngo bor yod na/de nyid rgyu med pa mi 'thad pas gzhan gyi dbang du 'gyur ro zhe na/ rnam grangs kyis na 'gyur ba'o zhes ston pa ni gang 'di zhes pa la sogs pa ste/ tshigs su bcad pa phyed snga ma ni phyed phyi mas bshad pa'o/ /kun rdzob dang ni zhes pa la sogs pas ni ngo bo nyid gsum ka yang don dam pa'i dngos por ma grub pa nyid du gsungs te/de la don dam pa ni de bcad 'phags pa'i spyod yul zhes pa gzhan gyi dbang la kun brtags pa'i rang bzhin gyis stong pa/ 'phags pa so so rang gis rig pa'i spyod yul don dam pa yongs su grub pa'i ngo bo nyid do//rgyu las skye ba ni gzhan gyi dbang ngo / /rnal 'byor can gyis zhes pa la sogs pas kun du brtags pa dngos po med pa nyid du ston te/ de la rnal 'byor can gyi dngos po ni gnyis su med pa'i rang gi rig pa'i don dam la sems rtse gcig tu gnas pa ste/de ltar gnas pa na sna tshogs su snang ba shes pa'i rang bzhin gcig nyid du rnam par mdzes kyang zhes pa ste/ rang bzhin gcig nyid la sna tshogs su snang ba'i rnam pas spras shing snang ba'o/ /de ltar snang yang shes pa'i rang bzhin la sna tshogs yod pa ma yin pa de bzhin du brtags pa'i mtshan nyid kyang med pa'o//ji ltar zhes pa la sogs pas gzhan gyi dbang ngo bo nyid med par ston te/ ji ltar rab rib kyis dbang po nyams pa rnams la skra shad la sogs par snang ba'i gzugs la/ de ltar bden pa'i gzugs sna tshogs su brtags pa na rtog pa'i gzung ba de dag bden pa'i gzugs ma yin zhing de ltar snang ba shes pa'i ngo bor yod pas rnam pa thams cad du med pa yang ma yin pa de bzhin du/mkhas pa rnams kyis gzhan gyi dbang zung 'jug sgyu ma lta bur rtogs par bya'o/ /ji ltar zhes pa la sogs pas yongs grub dngos por mi 'thad pa nyid ston te/gser la sogs pa glo bur gyi dri ma spangs pa bzhin du sems nyid rig pa'i de bzhin nyid glo bur gyi dri ma don dam pa'i dngos por gyur pa sngar nas gnas pa dang bral ba'i ngo bo nyid du brtags pa ni de ltar mi bden zhes pa'o/ /brtags pa la ni zhes pa la sogs pas ngo bo nyid gnyis kyi rang bzhin ji lta ba nyid ston te/yongs su grub pa la de ltar brtags pa'am/ gzhan yang rung ste kun brtags pa ni/ ji ltar brtags pa bzhin dngos por med la gzhan gyi dbang ni sgyu ma lta bur yod pa ste/ de dag las bzlog ste sgro 'dogs pa dang skur ba 'debs pa ni skye ba gzhan du bde 'gro dang thar pa thob pa las nyams par byed pa'o//'dir gzhung nyid kyang sgro 'dogs pa dang skur ba 'debs pa'i mthar rtog pa ni rlag par 'gyur zhes 'don par byed do/ /yang gzhung 'di ltar na mtha' gnyis su brtags pa'i don rigs pas rnam par brtags na 'jig par 'gyur zhes pa'o//gal te zhes pa la sogs pas brtags pa rnam pa thams cad du med cing / gzhan dbang don dam pa pa dgag pa nyid du tshul gzhan gyi sgo nas ston te/ de'i don yang rnam grangs kyi kun tu brtags pa dang /gzhan gyi dbang ni ngo bo gcig pa dang / yang snga phyir gyur pa rnams phan tshun rgyu dang 'bras bu nyid du yang sngar gsungs te/ des na de dag gcig pas brtags pa dngos po med par gzhan gyi dbang gi dngos po nyid 'gyur ba'am/ de bzhin du dngos po nyid du yang dngos po med par 'gyur ba ste/'gal ba bdag nyid gcig tu 'gyur/ /zhes pa'o/ /gzhan yang de dag rgyu 'bras nyid yin pa'i phyir dngos po med pa las dngos po skye bar 'gyur ba'am/ ming dang mtshan mas 'brel pa'i gzhan gyi dbang gi dngos po las kun brtags pa'i dngos po med pa skye bar 'gyur ba'o//kun brtags pa la gnas nas ni/ /gzhan gyi dbang ni nye bar dmigs/ /zhes pa ni rgyu 'bras kyi don nyid gsal bar bstan pa ste/ sngar bshad pa bzhin no/ /ming dang mtshan ma 'brel zhes pa ni brjod pa dang 'dres par snang ba rtog pa'i gzung ba ste/rtog pa nyid kyi bdag nyid du gyur pa'i gzhan gyi dbang ngo / /brtags pa shin du ma grub ste/ gzhan las 'byung ba ni ma yin no zhes pa ni thal ba las bzlog pa'i don te/ nam mkha'i pad+ma ltar shin du ma grub pa ni gzhan las 'byung ba'i 'bras bur mi 'thad ces pa'o//de'i phyir rnam grangs kyi kun du brtags pa ni kun rdzob tu blo'i bdag nyid du yod la/ blo'i ngo bor gyur pa'i gzhan dbang yang don dam pa'i dngos por mi 'thad de/ sngar bstan pa bzhin no/ /yang 'di dag gi khyad par ni mtshan nyid yongs su chad pa'i kun du brtags pa ni kun rdzob tsam du yang med la/gzhan gyi dbang ni yod pa ste sngar bstan pa dang 'gal ba med pa ni rtogs par sla'o/ /thal ba las bzlog pa'i gtan tshigs gzhan yang dngos po dngos po med par 'gyur ba med pa yin pa dang / dngos po med pa las dngos po skye ba mi 'thad pa'i phyir yang rnam grangs kyi kun brtags kun rdzob tu yang med la/ gzhan dbang bden par yod pa mi 'thad ces pa'o/ /de tshe don dam rang bzhin ni/ /zhes pa la sogs pas don de ltar rtogs pa'i phan yon 'chad do/ /de nas tshig rkang gnyis kyis de dag gi dbye ba ston to//sngar bstan pa ltar kun du brtags pa gsum ni rgyu 'bras su brtags pa gcig nyid du 'dus pas bcu gnyis su gsungs pa dang mi 'gal lo/ /gal te theg pa chen po'i tshul la rnam par shes pa'i tshogs brgyad nyid du khas len pas gzhan gyi dbang drug tu mi 'thad do zhe na/de ltar bden mod kyi kun gzhi dang nyon mongs pa can gyi yid ni rgyu ba cha phra ba rnam pa gsal ba med pas 'dir ma smos pa tsam du zad do/ /so so rang gis zhes pa la sogs pas so so rang gis rig pa'i de bzhin nyid la de 'dra ba'i bye brag tu dbye ba mi 'thad pa nyid du ston te/sna tshogs su rnam par gzhag pa ni de bzhin nyid kyi ngo bor ro gcig cing / de nyid rnal 'byor can rnams kyis rtogs shing / goms na de bzhin nyid mngon du gyur pa chos sku'i rang bzhin thob pa las mi 'da' ba'o/ /gal te brjod pa dang 'dres par snang ba gzhan gyi dbang nyid du 'gyur na/ming dang mtshan ma dag mtshungs pa yin nam snyam du sems na ni mtshan ma dag ni zhes pa la sogs pa ste/ 'di'i don ni sngar bstan no/ /kun brtags pa zhes pa la sogs pas ni sngar bstan pa ltar rnam grangs kyi kun du brtags pa dang /mtshan ma ni gzhan gyi dbang snga ma rnams las 'byung ba'o/ /blos zhes pa la sogs pas ni ngo bo nyid gsum dngos la med pa nyid du bsdus te bstan pa'o/ /ci zhig rnam par brtag ces pa ni khyad par gyi chos ci dang ci 'dra bar rnam par brtag ste/brtag bya'i don de 'dra ba grub pa med ces pa'o/ /gal te 'dir yod pa dang med pa'i mtha' gnyis spangs pa'i grub pa'i dngos po rnam par rig pa tsam gyis dbu ma don dam pa'i dngos por yod do zhe na/ de 'dra ba 'gal te yod pa dang med pa ni rnam gcod dang yongs gcod kyi 'gal ba yin pas gcig bkag pas gzhan grub pa la ltos pa'i phyir/de dag gnyis las grol ba ni phyir zhing gnyis ka'i bdag nyid du 'gyur na de 'dra ba ni mi srid pa'o/ /de lta na de 'dra ba'i 'gal ba gang la srid ce na/ kun brtags pa yi rang bzhin la/ /rang bzhin gnyis ni rab gnas te//zhes pa de ltar rtog pa'i blo phyin ci log gi ngo na yod pa'o/ /de ltar 'gal ba sna tshogs su snang ba ni brtags pa yin la/ de 'dra ba'i phyin ci log rnam par dag pa 'phags pa rnams kyis so so rang gis rig par bya ba yongs su grub pa'o/ / brtags pa sna tshogs su snang ba'i blo ni gzhan gyi dbang sgyu ma lta bu ste/ de ltar na kun rdzob tu ngo bo nyid gsum gyi tshul ma 'dres par rnam par gzhag pa'o/ /rnam pa gzhan du zhes pa la sogs pa ni gzhan gyi dbang sgyu ma las gzhan don dam pa'i dngos por brtags na ni phyin ci log nyid du 'gyur ba'o//de'i phyir de ltar rtogs pas gzhag pa ni brtags pa ste/ ji ltar brtags pa bzhin du ma grub la/ rtog pa'i blo ni mthong zhing myong ba'i phyir kun rdzob tu rgyu las byung ba'i gzhan dbang ngo / /rnam rtog gnyis las grol ba ste/ mtha' gnyis su rtog pa spangs pa'i rigs pa sgyu ma lta bu ni yongs su grub pa'i mtshan nyid do//yang blo gros chen po zhes pa la sogs pas ni de bzhin gshegs pa'i snying po sbyong bar byed pa'i lam dang / 'bras bu'i bdag nyid kyi theg pa gcig nyid rgyas par ston pa ste/ de la 'phags pa so so rang gi ye shes ni lam gyis rtogs par bya ba'am thob par bya ba'i 'bras bu'o//sangs rgyas kyi chos thams cad la gzhan gyi dring la mi 'jog ces pa ni theg pa chen po'i tshul lugs rtogs pa nyid sangs rgyas kyi chos thams cad rtogs pa ste/ sngar gsungs pa ltar thams cad kyang de nyid rtogs pa'i yan lag tu gsungs pa'i phyir ro//'dir lan gyi don la dang po 'phags pa so so rang gi ye shes rtogs pa ni rjes su dpag pa la sogs pa'i tshad ma dang / yid ches pa'i lung gis de bzhin nyid kyi don spyi'i tshul du gtan la phab nas/ zhi gnas kyi rgyu mtshan nam yan lag tu gcig pu dben par song ste sngar bstan pa ltar dran pa dang shes rab kyi char gtogs pa chos zab mo la bzod pa'i rgyur gyur pa'i gzungs thob par 'gyur ba'i thabs 'ga' zhig la brten nas de bzhin nyid kyi spyi'i rnam par sgro 'dogs pa'i rnam par rtog pa'i dri ma zhi bar bya ste/rnam par rtog pa med pa'i shes rab kyis ji lta ba bzhin du yul du byas nas sgom par byed pa ste/de ltar bsgoms pa'i stobs yongs su rdzogs pa na thob par 'gyur ba'i ye shes so/ /theg pa gcig po rtogs pa'i mtshan nyid ni theg pa chen po gcig gi lam rig cing khong du chud pas theg pa gcig po rtogs pa zhes bya'o//de nyid rig cing khong du chud pa gang zhe na/ 'di lta ste zhes pa la sogs pa gsungs te/ gzung ba dang 'dzin pa la sogs pa'i rnam par snang zhing rtogs pa'i blo las ma gtogs pa chos gzhan ni sngar bstan pa ltar kun rdzob tsam du yang mi srid la//blo de nyid kyis de bzhin nyid yang dag pa ji lta ba bzhin du rtogs pas/ sna tshogs kyi rnam par rtog pa mi 'byung ba'i phyir/ theg pa gcig po khong du chud par byas pa yin no/ /de'i don yang de ltar rtogs par bya ba'i don ni rtogs pa sna tshogs kyis dben pa'i chos kyi dbyings dbyer med pa yin la/de la de bzhin nyid du rtogs pas rnam par rtog pa mi 'byung zhing / de yang dbyer med pa'i rang bzhin mthar thug pa'i don gcig nyid yin pas de ltar rtogs pa'i lam gyi bdag nyid kyi theg pa yang mthar thug pa gcig yin zhes khong du chud par byas pa'o/ /ji lta ba bzhin du gnas pa ni rtogs pa'i don no//khong du chud pa 'di ni zhes pa ji lta ba bzhin du rtogs pa mthar thug pa'o/ /des na de'i phyir zhes pa ni nyan thos dang rang sangs rgyas la sogs pas thob pa'i rtogs pa la brten nas 'bras bu mthar thug par 'byin ma nus pas/ de dag gi rtogs pa ni mthar thug pa'i lam ma yin zhing theg pa chen po'i lam gyi yan lag nyid du 'gyur gyi gzhan du ma yin pas theg pa gcig ces pa ste/ 'di'i don zhib tu ni sngar bstan no/ /blo gros chen pos gsol pa zhes pa la sogs pas de nyid la rtsod pa spangs pa gsungs te/'di dag gi don ni nyan thos pa la sogs pa theg pa gsum du bstan pas 'dul bar 'gyur gyi gzhan du ma yin pa ste/ rgyas par sngar gtan la phab po/ /de bzhin gshegs pa'i 'dul ba dang zhes pa la sogs pa'i don ni gdul bya'i bsam pa la ltos nas chos 'dul ba sna tshogs thabs kyi bye brag bstan pa dang /'du 'dzi la sogs pas dben pa'i rnal 'byor gyi lung gis grol ba ste/ khyad par du rang sangs rgyas rnams kyi dbang du byas pa'o/ /rang gis ma yin zhes pa de bzhin gshegs pa'i bstan pa la ma ltos par/rang gi shes rab kyis grol zhing mya ngan las 'da' ba ma yin pa'o/ /las kyi bag chags ma spangs zhes pa ni ji skad du/ nyon mongs med kyang de dag la/ /las kyi nyes pa mthong ba bzhin/ /zhes gsungs pa lta bu dang / gzhan yang nyon mongs pa'i bag la nyal yang ma spangs pa'o//bsam gyis mi khyab par yongs su bsgyur ba'i shi 'pho ma thob ces pa la/ de nyid thob pa dang ma thob pa'i bye brag ni sngar bstan pa ltar shes par bya'o/ /yang 'jig rten gyi dang zhes pa la sogs pa'i don ni dag pa 'jig rten pa rjes kyis shes pas sbyin pa la sogs pa'i tshogs rdzogs par byed pa'o//'jig rten las 'das pa zag pa med pa ni mnyam par gzhag pa'i ye shes so/ /de la/ lha dang tshangs pa'i theg pa ni/ /snyan par smra zhing khro mi bya/ /slong na chung yang sbyin par bya/ /rnam pa 'di gsum gnas pas ni//lhar skye ba yi rgyu yin no/ /zhes gsungs pa lta bu'am/ gzhan yang bsam gtan dang gzugs med kyi ting nge 'dzin bsgoms pa dang / de dag gi 'bras bu'o/ /tshangs pa'i theg pa ni khyad par du yang ting nge 'dzin gyis yongs su gzung ba'i tshad med pa rnams so//ji srid sems rnams 'jug gi bar/ /zhes pa ni phyin ci log gi sa bon dang bcas pa'i kun gzhi 'jug pa'i bar la de las byung ba'i gnas skabs kyi lam dang / 'bras bu'i gnas thug pa med pa'o/ /de 'dra ba gnas gyur cing snang ba med pa'i ye shes mngon du byas pa'i spyod yul la ni theg pa med cing /de la brten nas grol ba'i gang zag la sogs pa'i spros pa nye bar zhi ba'o/ /de ltar na sna tshogs su gsungs pa ci zhe na/ theg pa rnam par gzhag ces pa la sogs pa gsungs so/ /de la rnam par grol ba gsum ni nyon mongs pa spangs pa nyid du mtshungs pa'i byang chub rnam pa gsum mo//chos la bdag med de nyid dang / /zhes pa la sogs pas ni don dam pa'i de bzhin nyid dang / de rtogs pa'i ye shes nyon mongs pa las grol zhing shes bya'i sgrib pa yang spangs pas te/ 'bras bu'i bdag nyid kyi theg pa chen po'o//nyan thos rnams kyis de dag spangs pas ma yin pa nyid du gsungs pa ni/ ji ltar zhes pa la sogs pa ste/ de la mtshan nyid rnams kyis rab tu g.yengs zhes pa ni phung po la sogs pa'i rang dang spyi'i mtshan nyid sna tshogs su rtogs pas g.yengs pa ste/ shes bya'i sgrib pa ma spangs pa'o//de bzhin nyid du nyon mongs pa'i sgrib pa mngon du rgyu ba spangs mod kyi/ bag la nyal ba ma spangs pa'o/ /de rnams kyang tshor ba dang / 'du shes la skyon du lta ba'i sgo nas de dag nye bar zhi ba'i thabs 'ga' zhig la brten te/ de kho na nyid rtogs pa'i shes rab dang bral ba'i ting nge 'dzin gyi myos pas myos shing /nyon mongs pa mngon rgyu spangs pas/ zag pa med pa'i dbyings na 'khod pa'o/ /de nyid rang gi 'bras bu mthar thug pa yin nam zhe na/ mthar mar phyin pa de las med ces pa'o/ /de lta na phyir zhing 'khor bar ldog gam snyam na/phyir kyang de las mi ldog ste/ gang zag gi bdag med pa 'du byed pa skad cig ma nyid du rtogs pa dang / bdag nyid bya ba byas pa nyid du shes pas 'khor bar skye ba'i las sog pa med pa dang / sred pa dang len pa mngon du rgyu ba'i rkyen nyid ma tshang ba'i phyir te/ ji ltar rgya mtshor bskyur ba'i shing gting du mi nub pa dang /yul gcig na gnas shing nges pa ma yin pa bzhin no/ /zag pa med pa'i dbyings na dus ji srid kyi bar du 'khod cing gnas snyam na/ ting nge 'dzin gyi zhes pa la sogs pa gsungs so/ /de na de dag nga yi yang / /zhes pa la sogs pa ni sngar bstan pa ltar de dag nyid kyi dge ba'i rtsa ba'i sa bon dang /de bzhin gshegs pa'i byin gyi rlabs kyis nam zhig na zag pa med pa'i dbyings nas sad nas byang chub mchog tu sems bskyed de/ tshogs gnyis su kha bskangs nas/ chos kyi sku thob par 'gyur ba'o//'phags pa lang kar gshegs pa las chos thams cad bsdus pa zhes bya ba'i le'u ste gnyis pa'i bshad pa rdzogs so// //de la le'u lhag ma 'di rnams kyis kyang chos thams cad bsdus pa'i don shes par bya ba'i gnas dang / de rnams kyi de kho na nyid de bzhin gshegs pa'i snying por 'gyur ba dang /de sbyong bar byed pa'i lam dang / lam gyis thob par bya ba'i 'bras bu ste/ bzhi po de rnams nyid rtsod pa spangs pa la sogs pa'i sgo nas rgyas par ston te/ des na mdo sde 'di'i don ni rnam pa bzhi po de rnams su 'dus shing de rnams kyang kun rdzob tu sems kyi rnam par 'phrul pa yin pa la/don dam par stong pa nyid de/ de ltar na rig pa dang stong pa zung du 'jug pa rnam par rig pa tsam gyis dbu ma nyid 'di'i brjod par bya ba yin no zhes sngar bstan no/ /de la le'u gsum pa 'di ni don rnam pa bcu bzhis ston pa las/dang po sngar bstan pa'i yid kyi lus nyid rgyas par ston pa ni/ de nas yang zhes pa la sogs pa'o/ /de yang don rnam pa drug gi sgo nas shes par bya ste/ de la dang po yid kyi lus thob par byed pa'i rgyu ni ting nge 'dzin khyad par can te/ de yang sa gsum pa la byang chub sems dpa' rnams ting nge 'dzin dang thos pa'i gzungs khyad par du 'phags pa thob par gsungs pas yid kyi lus kyang dang por thob pa'i sa mtshams ni gnas skabs de nyid nas yin par shes par bya'o//'di'i rang gi ngo bo yang rdul phra rab 'dus pa ma yin pa ting nge 'dzin dang ye shes kyi ngo bor gyur pa'o//rnam pa ni mtshan gyi me tog gis brgyan par 'byung ba dang 'byung ba las gyur pa lta bur kha dog dang dbyibs kyi rnam par snang ba'o/ /nges pa'i tshig gam sgra bshad pa'i rgyu mtshan ni sngar bshad pa ltar yid ltar mgyogs shing thogs pa med pa dang / cha shas 'dus pas yid kyi lus zhes pa'o//rnam par dbye ba ni gsum du 'gyur ba las/ dang po ting nge 'dzin gyi bde ba la snyoms par 'jug pa'i yid kyi lus ni sa gsum pa nas bdun pa'i bar la rnam par shes pa'i tshogs brgyad gnas ma gyur pa rnam pa mang por snang ba/ rang rang gi ngo bos dben par rtogs shing bsgoms pa kun gzhi'i rgya mtsho la 'jug pa'i rnam par shes pa'i rlabs kyi mtshan nyid zag pa dang bcas pa'i bde ba la snyoms par 'jug pa'i yid mi 'byung ste/srid pa shas che ba la sogs pa'i bsam gtan nyon mongs pa can spang ba'o/ /des na zag pa med pa'i ting nge 'dzin gyi bde ba la reg par gnas pa ste/rang gi sems snang ba'i spyod yul kun rdzob sems kyi dngos por yod pa dang / don dam pa'i dngos por med pa ste/ zung 'jug gi don shes pa'i shes rab dang ting nge 'dzin gyi chos su gyur pas yid kyi lus zhes bya'o/ /glegs bam 'ga' zhig las/bde ba la snyoms par 'jug pa'i yid kyi lus 'byung ste zhes ston pa'i skabs su ni/ gnas skabs der rnam par shes pa'i gnas ma gyur pa dang / dben par rtogs pa'i shes rab dang ting nge 'dzin thob pas de 'dra ba'i bde ba la snyoms par 'jug pa'i yid kyi lus thob ces pa'o//gzhan yang 'dir sa gsum dang zhes pa ni/ dang po nas gsum pa'i bar te/ sa dang po la yang nam mkha' mdzod [(]gyi [,]kyi [)]ting nge 'dzin la sogs pa thob par gsungs pas gnas skabs de nyid nas yid kyi lus thob par 'gyur ba la yang 'gal ba med de/ ji skad du/ 'phags pa shes rab kyi pha rol tu phyin pa las/ mthong ba'i lam thob pa'i byang chub sems dpa' la ni/ mig gi nad la sogs pa 'byung bar mi 'gyur ro zhes gsungs pa'i phyir ro/ /de la chos kyi ngo bo nyid rtogs pa'i yid kyi lus ni/ khyad par du byang chub sems dpa' sa brgyad pa la snang ba med pa'i ting nge 'dzin thob nas/de ltar zhi ba'i bsam gtan la snyoms par zhugs pa na/ sangs rgyas rnams kyis de'i tshogs gnyis rdzogs par bya ba'i don du/ ting nge 'dzin las langs nas rjes kyi shes pa la chos thams cad sgyu ma la sogs pa dang 'dra bar rtogs pa dang /stobs dang / mi 'jigs pa la sogs pa sangs rgyas kyi chos thams cad kyi rigs thob cing / de rnams kyi rang bzhin ji lta ba bzhin du rtogs pa dang / de 'dra ba'i lus kyis sangs rgyas kyi zhing thams cad du song zhing / de rnams las the tshom gyi gnas thams cad bcad pas chos kyi ngo bo nyid ji lta ba bzhin rtogs pa'o//de skad du yang / sa bdun dag ni sems yin te/ /snang ba med pas brgyad pa'o/ /zhes gsungs pa'i phyir ro/ /'dir sgyu ma la sogs pa'i chos la snang ba med pa'i rab tu rnam par 'byed zhes pa ni snga ma ltar snang ba med pa las langs nas rjes kyi gnas skabs na sgyu ma la sogs pa'i chos la rab tu rnam par 'byed pa'o//sems kyi gnas ni rnam par shes pa rnams kyi ma dag pa'i snang ba gnas gyur pa'o/ /ting nge 'dzin gyi sgo gzhan ni thod rgal gyi ting nge 'dzin la sogs pa'o//gzhan yang mtshan sum cu rtsa gnyis dang / dbang bcu la sogs pa'i me tog gi rgyan gyis rgyas par bya'o/ /de la ris su lhan cig skyes pa'i 'du byed kyi bya ba'i yid kyi lus ni sa brgyad pa de nyid la byang chub sems dpa' theg pa gzhan dang ma 'dres pa sangs rgyas nyid kyi ris su lhan cig skyes pa/mtshan ma dang rtsol ba med cing lhun gyis grub par sems can gyi bya ba la sogs pa byed pa'i ting nge 'dzin gyi tshogs su gyur pa'o/ /sangs rgyas kyi chos thams cad rang gis rig pa ni sngar bstan pa ltar sangs rgyas kyi stobs la sogs pa'i yon tan gyi rigs rnams thob pa'o//'dir sa brgyad pa nas theg pa gzhan dang ma 'dres pa yang / shes rab kyi pha rol tu phyin pa'i 'grel pa las sa brgyad pa yan chod ni byang chub sems dpa' rnams kyi thun mong ma yin pa'i lam nyid du gsungs pa'i phyir ro/ /tshigs su bcad pa'i don ni bden pa gnyis la ltos te shes par bya'o//de nas yang byang chub sems dpa' zhes pa la sogs pas sngar bstan pa'i dgongs pa can gyi mdo'i don gsal bar 'chad de/ de yang rnam pa bzhir 'gyur ba las dang po don gzhan la dgongs pa ni gang du bcom ldan 'das kyis mtshams med pa lnga'i las byas na rnam par shes par gsungs pa lta bu 'am/gzhan yang mtshams med pa lnga'i las byas kyang sangs rgyas dang byang chub sems dpa'i byin gyi rlabs kyis thar pa la mi sgrib pa nyid du gsungs pa lta bu'o/ /de la ngag dang po'i dgongs gzhi ni sred pa dang ma rig pa la sogs pa ma dang pha la sogs pa dang cung zad chos mthun pa stong pa nyid du rtogs pa'i shes rab kyis bcad cing bsad par gyur pa'o//dgongs pa ni gang la la dag gis mi dge ba ru gtogs pa'i phyi rol gyi mtshams med pa'i las byas shing / 'gyod pa chen pos yid zil gyis mnan te/gnyen po bsgom pa la brtson par mi byed par gnas pa nas de dag la mtshams med pa'i las byas nas phyir zhing grol bar 'gyur ro zhes bstan pas thog ma nyid du dbugs 'byin pa ste mya ngan gyi gdung ba sel ba'o/ /yang de dag gis dgongs don thos par gyur pa na/phyir zhing skrag par 'gyur ba'am/ de las gzhan yang rung ste/ sprul pa'i nyan thos 'ga' zhig gi mthus/ phyi rol gyi mtshams med pa byas kyang sangs rgyas dang byang chub sems dpa'i byin gyi rlabs kyis de dag gis sgrib par mi 'gyur zhing / phyir zhing mngon par rtogs pa thob par 'gyur ro zhes ston pa la sogs pa ste/de yang ji ltar rgyal po ma skyes dgra'i 'gyod pa bsal ba las/ ji ltar rgyal po des bcom ldan 'das la pha bsad pa'i 'gyod pa bsal ba'i thabs zhus pa dang / bcom ldan 'das kyis 'gyod pa la sogs pa de dag 'phags pa 'jam dpal gyis lhag ma ma lus par sel nus pa nyid du dgongs nas/sangs rgyas kyi mthus tshe dang ldan pa shA ri'i bus/ rgyal po ma skyes dgra la 'di skad ces smras so/ /rgyal po chen po 'jam dpal gzhon nur gyur pa sang bshos la spyan drangs shig dang /des khyod kyi the tshom ngan pa de yang bsal bar 'gyur ro zhes pa la sogs pa dang / rgyal po des kyang shA ri'i bus ji ltar bsgos pa bzhin du spyan drangs shing bshos drangs nas 'phags pa 'jam dpal bdag gi 'gyod pa de bsal du gsol zhes byas pa dang / 'jam dpal gyis smras pa/ khyod kyi 'gyod pa de ni sangs rgyas gang gA'i klung gi bye ma snyed kyis kyang bsal bar mi nus so zhes gsungs so/ /de nas rgyal po de shing bcad pa bzhin du sa chen po 'di la 'gyel bar gyur to/ /de nas gnas brtan 'od srungs chen pos rgyal po la 'di skad ces smras te/rgyal po chen po ma 'jigs ma skrag cig /'jam dpal gzhon nur gyur pa ni dgongs pa'i bshad pa la mkhas pa yin gyis 'di ci la dgongs te de skad du ston ces zhus shig /de nas rgyal po des sa'i steng nas slar langs te/ de bzhin du zhus pa dang 'jam dpal gyis smras pa/rgyal po chen po de ji snyam du sems/ chos gang chos gang gis kyang skyed par mi 'gyur ba'i chos des chos gang yang bsal bar nus sam/ gsol pa/ 'jam dpal de ma lags so/ /'jam dpal gyis smras pa/ ngas de la dgongs te sangs rgyas de snyed kyis khyod kyi 'gyod pa de bsal bar mi nus so zhes de skad smra'o zhes pa la sogs pa'i bar rgyas par gsungs te/ don dam pa'i de bzhin nyid la bsal bar bya rgyu la sogs pa med pas bsal mi nus so zhes zab mo bstan pas des snang ba med pa'i ting nge 'dzin thob cing /gzhan yang bstan pa 'di bstan pa'i tshe rgyal po ma skyes dgras mthun pa'i chos la bzod pa thob par gyur to zhes pa la sogs pa rgyas par gsungs te/ de dag gi 'gyod pa la sogs pa bsal te mthar gyis bskal pa mthong na dga' zhes bya ba la/ 'jig rten gyi khams 'dam gyi rnyog pa med par de bzhin gshegs pa dgra bcom pa yang dag par rdzogs pa'i sangs rgyas yul rnam par dag pa zhes bya bar 'gyur te zhes pa la sogs pa gsungs pa lta bu'o//shA ri'i bu la sogs pa yang sprul pa'i nyan thos su sngar bstan no/ /de la 'dir tshig gi don bshad pa la/dga' ba'i 'dod chags dang ldan pa ni dga' ba la mngon par zhen pa'am/ de dang lhan cig pa'i 'dod chags te/ de dang 'brel ba'i sems rgyud yang srid pa mngon par 'grub pa'i rgyur gyur pa'i sred pa ste/ 'dod chags nyid dang sbyar bar bya'o/ /de yang bu la rjes su chags par gyur pa'i ma dang chos mthun pas ma zhes bya'o//ji ltar pha ni bu rnams la kha zas dang grong khyer skyed cing gtod par byed pa ltar ma rig pas kyang zag pa dang bcas pa'i las mngon par 'du byas pa'i sgo nas skye mched kyi grong skyed cing gtod par byed pas pha zhes pa'o/ /de gnyis shin tu rtsa ba nas bcad pa ni stong pa nyid du rtogs pa'i shes rab kyi ral gris so//sgrib pa gnyis kyi bag la nyal ba ni skabs su bab pa na sdug bsngal skyed par byed pas dgra dang mtshungs pa ste/ dpe gzhan yang skyes bu'i lus la byi ba'i dug zhugs pa na/ de ma thag tu sdug bsngal skyed par byed pa ma yin kyang /dus phyis 'byung ba chen po'i rkyen gzhan dang tshogs pa na sdug bsngal skyed par byed pa bzhin du las dang nyon mongs pa'i bag chags rnams kyang ste/ ji skad du/ lus can rnams kyi las rnams ni/ /bskal pa brgyar yang chud mi za/ /zhes pa la sogs pa gsungs pa lta bu'o//de dag bcom pa ni snga ma ltar ro/ /dge 'dun gyi dbyen ni phung po phan tshun mtshan nyid mi mthun pa'i las dang srid pa'i srad bus bsdus shing tshogs nyid du byas pa ste/ ji ltar tshogs su gyur pa'i mchog dge 'dun no zhes bstan pa lta bu'o/ /de rnam par phye zhing dengs par byas pa ni yang dag pa'i shes rab kyis so//de bzhin gshegs pa ni phung po la sogs pa'i rang dang spyi'i mtshan nyid shes pa'am/ de rnams rang gi sems snang ba tsam du shes par byed pa dang tha mal pa'i shes pa gzugs la sogs pa'i ngo bo tsam 'dzin pa/ rnam par shes pa brgyad kyi tshogs te/shes bya'i yul rigs pas de bzhin gshegs pa dang rjes su mthun pa'o/ /de rnams rnam par thar pa'i sgo gsum rtogs pa/ zag pa med pa'i ting nge 'dzin dang shes rab kyi gnod sems kyis bcom zhing khrag phyung ba'o/ /mngon par rtogs pa'i chos can ni bden pa mngon par rtogs pa ste rnam par grol ba'o//de ltar chos mthun pa la dgongs te tshig de skad du gsungs pa'i dgos pa ni sngar bstan pa ltar ro/ /de ltar dgongs don thos pa nyid kyis la la dag phyir zhing skrag par 'gyur ba la sogs pa dang / mi dge bar gtogs pa phyi rol gyi ngo bor gyur pa'i mtshams med pa gang yin zhes the tshom la sogs pas rmongs par gyur pa na de nyid bsal ba'i phyir gzhan yang zhes pa la sogs pa gsungs so//sprul pa'i byin gyi rlabs kyis mngon par rtogs pa ni ma rtogs so zhes pa la/ don ni sprul pa'i nyan thos kyi byin gyi rlabs kyis gang la las kyis phyi rol gyi mtshams med pa rnams byas kyang mngon par rtogs par 'gyur ba'o//de nyid gsal bar bstan pa ni/ blo gros chen po zhes pa la sogs pa ste/ de'i byin gyi rlabs kyis tshul ji ltar mngon par rtogs par 'gyur snyam na/ nyan thos de nyid gang zag gang la la mtshams med pa byas pa 'gyod pas yid zil gyis non pa rnams kyi thad du song ste/ de'i 'gyod pa bsal zhing slar rab tu spro bar byed par 'gyur snyam nas/ de la 'di skad du/ byang chub sems dpa'i byin rlabs sam/ de bzhin gshegs pa'i byin gyi rlabs kyis khyod kyi sdig pa 'di dag las grol zhing myur du thar par 'gyur bas de dag gi thad du song zhing tshogs sog la thabs zhus shig ces rab tu bstan pas so//blo gros chen po mtshams med pa zhes pa la sogs pas de 'dra ba'i tshig kyang de ltar bden pa'i don can ma yin te/'ga' zhig de ltar 'gyur ba srid pa tsam la dgongs pa'o/ /gal te brgya lam na zhes pa ni sprul pa'i nyan thos kyis bstan pa'am/ de las gzhan pa'i sangs rgyas dang byang chub sems dpa' la sogs pa'i dge ba'i bshes gnyen dang phrad pa las chos thams cad dben par rtogs pa na nyes pa las grol bar 'gyur ro//mtshams med par ni mtshams bcad pas zhes pa ni 'jam dpal mtshams med pa zhes bgyi ba ni chos kyi dbyings su mtshams ma mchis pa'i tshig bla dgas so zhes pa la sogs pa gsungs so/ /gzhan yang gnyen po ye shes kyi rgyun rgyud la phyin ci log gi bar mtshams med pa/de 'dra ba'i bar mtshams bcad pas de ni mtshams med pa'i las zhes bya ste/ thun mong gi nges pa'i tshig go/ /yang blo gros chen po zhes pa la sogs pas sngar bshad pa ltar theg pa gcig pa 'ba' zhig tu bstan pa ni dgongs pa can nyid du ston te/de'i dgongs gzhi yang nyan thos dang rang sangs rgyas rnams kyang mthar gyis chos dang gang zag la bdag med par rtogs pa la sogs pa'i yon tan thob pa na sangs rgyas nyid du 'gyur bas mthar thug gi theg pa chen po gcig nyid du 'gyur ba'o/ / sangs rgyas pa nyid ces pa ni sangs rgyas pa'i tshul lugs so/ /shi 'pho gnyis ni rnam par chad pa las gyis 'chi 'pho ba dang / bsam gyis mi khyab pa yongs su bsgyur ba'i 'chi 'pho ba'o/ /de la dang po nyid sangs rgyas nyid thob pa'i yan lag tu ji ltar 'gyur zhe na/ ji ltar 'phags pa byang chub sems dpa' rnams las kyi lhag ma 'ga' zhig gis 'chi 'pho ba na/gang sems can gyi don du 'gyur ba'i gnas de nyid du skye bar smon lam btab nas/ sems can gyi don byas pas tshogs rdzogs par byas te sangs rgyas thob par 'gyur ba ltar/ nyan thos dang rang sangs rgyas rnams kyang ngo //bsam gyis mi khyab pa yongs su bsgyur ba ni skye ba dang 'chi ba la dbang thob pa'i sgo nas snga ma ltar sems can gyi don byed pa'o/ /nyon mongs pa gnyis ni bag la nyal dang kun nas ldang ba'o/ /chos de dag nyid khong du chud pas zhes pa la sogs pa'i don ni nyan thos dang rang sangs rgyas rnams kyis kyang rim gyis chos de dag khong du chud pa dang /thob pa dang / spangs pa'i phyir sangs rgyas pa nyid de/ de skad du dpal phreng seng ge'i nga ro'i mdo las/ nyan thos su 'gyur zhing rang sangs rgyas su yang 'gyur la/ phyis ni yang dag par rdzogs pa'i sangs rgyas su yang 'gyur ro zhes gsungs pa lta bu'o//'di'i don zhib tu ni sngar bstan no/ /de ltar don gzhan la dgongs pa nyid bstan nas mnyam pa nyid la dgongs pa ni/ de nas yang zhes pa la sogs pa gsungs te/ sngar dris pa'i skabs su/ 'od srungs log par dad sel dang / /zhes pa la sogs pa bstan pa dang sbyar bar bya'o/ /gsung gi rnam par rtog pa ni gdul bya rnams la de ltar snang zhing brtags pa ni rtogs pa'i blo nyid kyi bdag nyid du gyur pa'o/ /rnam pa drug cu rtsa bzhi ni/ gsang ba'i bdag pos bstan pa las gsungs te/zhi ba'i blo gros de bzhin gshegs pa'i gsung ni rnam pa drug cu rtsa bzhi dang ldan pa 'byung ste/ rnam pa drug cu rtsa bzhi gang zhe na/ 'di lta ste/ mnyen pa'i gsung 'byung ba dang / 'jam pa dang / yid du 'ong ba dang / yid du 'thad pa dang / dag pa dang / dri ma med pa dang / 'od gsal ba dang / snyan cing 'jebs pa dang / mnyan par 'os pa dang / mi tshugs pa dang / snyan pa dang / dul ba dang / mi rtsub pa dang / mi brlang ba dang / rab tu dul ba dang / rnar snyan pa dang / lus sim par byed pa dang / sems tshim par byed pa dang /snying dga' bar byed pa dang / dga' bde skyed pa dang / yongs su gdung ba med pa dang / kun shes par bya ba dang / rnam par rig par bya ba dang / rnam par gsal ba dang / dga' bar byed pa dang / mngon par dga' bar byed pa dang / kun shes par byed pa dang /rnam par rig par byed pa dang / rigs pa dang 'brel pa dang / zlos pa'i skyon med pa dang / seng ge'i sgra'i shugs can dang / glang po che'i sgra skad dang / 'brug gi sgra dbyangs dang / klu'i dbang po'i sgra dang / dri za'i glu dbyangs dang / bya ka la ping ka'i sgra dbyangs dang /tshangs pa'i sgra dbyangs bsgrags pa dang / shang shang te'u'i sgra dbyangs su bsgrags pa dang / lha'i dbang po'i sgra dbyangs ltar snyan pa dang / rnga'i sgra dang / ma khengs pa dang / mi dma' ba dang / sgra thams cad kyi rjes su zhugs pa dang / tshig zur chags pa med pa dang //ma tshang ba med pa dang / ma zhum pa dang / mi zhan pa dang / rab tu dga' ba dang / khyab pa dang / chub pa dang / rgyun chags pa dang / 'brel pa dang / sgra thams cad rdzogs par byed pa dang / dbang po thams cad tshim par byed pa dang / ma smad pa dang / mi 'gyur ba dang / ma brtags pa dang /'khor kun du grag pa dang / 'dod chags zhi bar byed pa dang / zhe sdang 'dul ba dang / gti mug sel ba dang / bdud tshar gcod pa dang / rnam pa thams cad kyi mchog dang ldan par 'byung ba ste/ zhi ba'i blo gros de bzhin gshegs pa'i gsung ni yan lag drug cu rtsa bzhi po de dag dang ldan par 'byung ngo zhes gsungs pa dang sbyar ro//ka la ping ka ni rgya mtsho chen po'i gling la gnas pa'i bya'i khyad par ro/ /'dir gsung mtshungs pa yang 'dul ba'i dbang gis de bzhin gshegs pa rnams gsung sna tshogs su ston pa ni ma gtogs so zhes 'dir yang sbyar te/'on kyang 'dul ba'i dbang gis sku dang gsung sna tshogs su ston pa yang sangs rgyas gcig gis ston pa bzhin du gzhan gyis kyang ston par spyod pas mtshungs pa nyid ces bya'o/ /'dir de ltar bstan pa'i dgos pa ni dbang po dman pa gang dag sangs rgyas shAkya thub pa ni snyigs ma lnga'i dus su 'khrungs pa/sangs rgyas gzhan rnams las sku tshe thung zhing bsod nams dman pa'o snyam du dogs pa sel ba'o/ /yang blo gros chen po zhes pa la sogs pas don gzhan la dgongs pa ste/ yi ge med par ji ltar gsungs zhes pa'i lan du yang sbyar bar bya'o/ / 'di'i don ni gsung rab kyi phyogs 'ga' zhig las/ de bzhin gshegs pas tshig dang gang gi rnam par rig byed kyi sgo nas zhal dang ljags kyi dbang pos chos bstan pa med pa ste/ de 'dra ba ni ngag kun nas slong ba'i rnam par rtog pa la ltos shing / de bzhin gshegs pa la ni rnam par rtog pa mi mnga' ba'i phyir ro zhes pa la sogs pa gsungs pas 'dir yan lag drug cu rtsa bzhi par gsungs pa dang 'gal bar mi 'gyur ram/de'i phyir de rnams gang la dgongs te gsungs pa yin zhes dris pa'i lan du rnam pa gnyis la dgongs te gsungs pa'o//de la dang po'i don ni de bzhin gshegs pa de dag gis thugs su chud pa so so rang rig pa'i ye shes kyi cha ni/ sngar bstan pa ltar sgra dang rnam par rtog pa'i yul ma yin pas/ de la dgongs te sgra'i sgo nas chos bstan pa med ces pa'o/ /gnyis pa'i don ni yang sangs rgyas rnams kyis thugs su chud pa'i chos rnams kyi sngon gyi lugs kyi chos nyid ni/stong pa nyid spros pa thams cad dang bral ba shin tu yang sgra'i yul ma yin pa'i phyir/ sgra'i sgo nas bstan pa med ces pa'o/ /'dir nges pa'i don ni sprul pa'i sku'i sangs rgyas mtshan dang dpe byad kyi rnam par snang ba dang /gsung chos 'chad par snang ba ni gdul bya 'ba' zhig gi snang ba yin gyi sangs rgyas kyi rang bzhin la med pas/ de 'dra ba'i chos ston pa'i sgrar snang ba ni sangs rgyas kyis gsungs pa ma yin la/ chos kyi sku yang de 'dra ba'i spros pa dang bral bas sgra'i sgo nas chos ston pa med do//'on kyang 'dir longs spyod rdzogs pa'i sku mtshan dang dpe byad kyi rnam par snang ba dang / gsung chos ston par snang ba ni sangs rgyas nyid kyi ye shes la yod cing / de yang ye shes de nyid kyi bdag nyid yin pas gsung dbyangs yan lag drug cu pa la sogs pas bstan pa ni kun rdzob tu yod de/de'i phyir med par bstan pas ni snga ma ltar dgongs pa can yin zhes pa'o/ /gzhan yang chos kyi sku dang sprul pa'i sku la sngar bstan pa ltar bshad pa mi 'thad pas de la dgongs nas kyang yi ge gcig kyang ma bshad ces pa la sogs pa gsungs so//de ltar bstan pa'i dgongs pa yang byis pa'i skye bo gang dag sangs rgyas rnams kyi gsung phan tshun 'gal ba'am/ gcig la zab mo bstan pa ni nged cag la ma bstan pas thugs rje chen po nyi tshe bar 'gyur ram snyam pa la sogs pa'i dogs pa sel ba'o//de gnyis yul las rnam par grol ba ni rang gi mtshan nyid brjod bya rjod byed kyi yul las 'das pa'o/ /lhag chad med par khong du chud ces pa ni sangs rgyas snga ma rnams kyis rtogs pa bzhin du ste/ de 'dra ba ni sgra'i yul ma yin no//sngon gyi lugs kyi chos nyid mi 'gyur zhing de rtogs shing goms pa las/ yon tan thams cad 'byung ba ni rin po che'i 'byung khungs sam/ grong khyer snying po'i lam dang mtshungs pa'o/ /de'i chos nyid dang chos kyi gnas nyid ni chos rnams kyi stong pa nyid dang /de nyid rtogs shing goms pas yon tan thams cad 'byung ba'i gnas su gyur pa'o/ /gang la yongs su mya ngan las 'das zhes pa ni sprul pa'i sku tshe'i dus byas nas mya ngan las 'da' bar bstan pa'o/ /sangs rgyas kyi rang bzhin la ni de 'dra ba yod pa ma yin te/ji skad du/ sangs rgyas mya ngan yongs mi 'da'/ /zhes pa la sogs pa gsungs pa'i phyir ro/ /so so rang rig chos lugs rnams/ /zhes bya ba ni so so rang gi rig pa dang / sngon gyi chos nyid kyi chos lugs so/ /cung zad bye brag byas pa med/ /ces pa ni chos nyid la khyad par tha dad pa byas pa med pa'o//de nas yang byang chub sems dpa' zhes pa la sogs pas ni mtha' gnyis rnam par bkag pa nyid tshul gzhan gyi sgo nas rgyas par ston pa'o/ /yod pa dang med pa la gnas zhes pa ni de dag gi mtshan mar 'dzin cing blo'i mdun du byed pa'o//skye ba dang mi skye ba la mos pa yang de dag nyid dang go rims bzhin du sbyar ro/ /yod pa skye ba skye ste med pa ma yin no zhes pa ni grangs can pa rnams kyi 'dod pa ltar thog ma nas yod pa'am/ yang 'ga' zhig gi lugs kyis phyis 'bras bu'i dus na yod pa thog ma nyid du skye zhing de nyid kyi rigs mthun pa rgyun chags su 'jug pas skye ba skye zhes tshig gnyis smos pa'o//blo gros chen po de de skad du rgyu dang 'bras bu'i dngos po dag don dam par yod par smra na/ phyir zhing rgyu dang 'bras bu'i dngos po bkag pa yin te/ don dam pa'i dngos por yod pa la sngar bstan pa'i tshad ma'i gnod pa 'jug pa dang /skye ba sgyu ma lta bu khas mi len pa'i phyir ro/ /de nas rgyu dang rkyen rnams kyang med cing rab tu grags pa'i 'jig rten gyi ngo bo yang rgyu med pa las yod par smra ba nyid du 'gyur te/ de 'dra ba ni mi 'thad do/ / med pa la gnas pa ni nyan thos dang rang sangs rgyas gang dag sngar gnyen po ma skyes pa'i dus na/ 'dod chags la sogs pa'i spang bya don dam pa'i dngos por yod pa nyid du khas blangs nas/ phyis gnyen po skye ba'i dus na de rnams med pa nyid du rnam par rtog pa ste/ 'di yang mi 'thad pa nyid do//ci'i phyir zhe na/ blo gros chen po zhes pa la sogs pa gsungs te/ dbu ma pa gang dag kun nas nyon mongs pa dang rnam par byang ba'i dngos po rnams/ dngos por snang ba nyid kyi dus na rang rang gi mtshan nyid don dam pa pas stong pas don dam pa'i dngos po yod par khas mi len pa dang /sngar bden pa'i dngos por yod pa phyis gnyen pos de rnams spangs nas dben pa'i phyir de dag yod par khas mi len te/ de lta na sngar ni yod pa la phyis ni med ces smras pa dang / sngar bstan pa ltar dbu ma pa rang bzhin gyis dben par smra ba 'di gnyis las/dngos po 'jig par byed pa'i lta ba gang yin zhes brtag par bya'o/ /blo gros chen po zhes pa la sogs pa'i don ni go bar bshad do/ /med pa 'ba' zhig rnam par 'jig par byed pa ma yin zhes pa ni sngar gyi spang bya'i dngos po phyis med ces pa'i dgag bya'i don sngar yod pa 'ba' zhig rnam par 'jig par byed pa ma yin te/'on kyang byang chub rnam pa gsum yang 'jig par byed pa ste/ phyin ci log gi lta bar gyur pa'i phyir ro/ /de'i don yang nyon mongs pa rnams don dam par gcig dang du ma dang bral zhing / lus kyi nang dang phyi rol du btsal na ma rnyed pa'i phyir don dam pa'i dngos por med cing / de nyid kyi phyir de sngon du song ba'i dngos po med pa yang mi bden pas de ltar 'dzin pa ni log par lta ba'o/ /de skad du yang / nyon mongs pa rnams ni sems kyi chos yin la de yang / yang dag [(]du [,]tu [)]na rnam par shes//lus kyi nang na'ang yod ma yin/ /zhes pa la sogs pa sngar bstan no/ /gzhan yang 'dod chags la sogs pa rnam pa dang bcas pa'i lus ris su yongs su bcad pa med pa'i phyir nang dang phyi rol tu mi dmigs pa'o/ /blo gros chen po zhes pa la sogs pas skabs kyi don bsdu ba'o//bcing bar bya ba dang zhes pa la sogs pas de nyid rnam grangs gzhan gyi sgo nas ston pa ste/ don dam par de 'dra ba'i nyon mongs pas bcing bar bya ba'i sems can gyi rgyu dang / bcing ba'i rgyu med pa'i phyir bcings pa med pas de sngon du song ba'i phyir grol ba yang med de/des na rang bzhin gyis rnam par grol zhing mya ngan las 'das pa'o/ /de'i phyir bcings pa dang grol ba'i dngos por smra ba yang byang chub gsum 'jig par byed pa'o/ /de ltar na yod pa dang med pa'i phyogs la gnas pa gnyis ka yang kun nas nyon mongs pa dang rnam par byang bas bsdus pa'i bden pa rnam par 'jig par byed pa yin te/don 'di nyid sngar yang bstan pa yin no/ /blo gros chen po ngas de la dgongs nas zhes pa la sogs pa'i don ni 'phags pa dkon mchog brtsegs pa las/ gang zag tu lta ba ri rab tsam yang bla'i yod pa dang med pa nyid du mngon pa'i nga rgyal can stong pa nyid du lta ba ni ma yin no zhes bshad pa ste/ji ltar gang zag gi bdag tu lta ba chen po ni de'i yul rags pa rtogs par sla ba nyid kyis myur du de las bzlog par nus pas thar pa'i gegs chen po ma yin la/'di 'dra ba'i stong pa nyid du 'dzin pa ni phyin ci log yin zhing de yang ldog par dka' ba nyid kyis thar pa'i gegs chen por 'gyur ba'o/ /mngon pa'i nga rgyal can ni yang dag pa'i lta ba thob par bya rgyu ma thob bzhin du thob par 'dzin pa'i sgo nas sems khengs pa'o//yang zhes pa ni phan tshun bsdu ba'i don to/ /gal te de ltar na 'phags pa rnams kyis nyon mongs pa la sogs pa spong ba'i tshul ji lta zhe na/ spyod yul rnam par spangs nas ni/ /sems kyang yang dag 'gag par 'gyur/ /zhes pa la sogs pa gsungs te//kun rdzob tsam du mtha' gnyis su rtogs pa'i yul spangs na kun nas nyon mongs pa'i sa bon dang bcas pa'i sems 'gag par 'gyur zhing / de nyid kyis yul la 'dzin pa'i phyin ci log la sogs pa 'gog pa med pa ma yin te/ kun rdzob tu ni thams cad yod//ces ston par 'gyur ro/ /des na mtha' gnyis spangs pa de bzhin nyid kyi gnas 'phags pa'i spyod yul ni de bzhin du bden pa'o/ /de las gzhan du don dam par rkyen gyis yod pa ste/ sngar ma byung ba las rkyen gyi rjes thogs su gang zhig skye zhing / yang rkyen gyis med pa ste byung nas 'gal rkyen gyis 'jig par 'gyur ba nyid du khas len pa ni nga'i bstan pa'i de kho na nyid la blo gros mi gnas pa ste/de kho na nyid ma rtogs pa'o/ /'dir glegs bam 'ga' zhig las/ ma byung ba las gang byung zhing / /byung nas kyang ni rnam 'jig pa/ / rkyen las yod dang med de dag /nga yi bstan la de mi gnas/ /zhes 'byung ba der ni tshig gi don shin tu yang 'grig par 'gyur ba'o/ /rkyen gyis yod par ma bsgrubs ces pa ni don dam par yod pa nyid du bsgrub pa'i mthu med pas so/ /de nyid kyis na yod pa sngon du song ba'i med pa yang mi 'thad ces pa la sogs pa ste/don go bar zad do/ /de ltar stong pa nyid du lta ba bkag pa ni dgongs pa can nyid du gsungs pas sngar bstan pa ltar chos thams cad kyi rang bzhin stong pa nyid ni nges pa'i don phyin ci ma log pa'o/ /'dir dgongs pa dang ldem por dgongs pa'i rnam par dbye ba zhib tu ni theg pa chen po mdo sde'i rgyan la sogs pa las gsungs pas de dag gi rnam par bshad pa'i rjes su 'brangs te rtogs par bya'o//de nas yang byang chub sems dpa' zhes pa la sogs pa sngar bstan pa'i grub pa'i mtha' dang /bshad pa'i tshul rnam pa gzhan gyi sgo nas ston te/ de yang / khyod kyi grub mtha' rnam pa du/ /lta ba dag kyang rnam pa du/ /zhes dris pa'i lan du sbyar bar bya ste/ zhib tu ni 'og nas ston par 'gyur ro/ /'dir bsgrub pa'i mtha'i bye brag ji lta ba bzhin du rtogs pas sangs rgyas pa rnams kyi rtog ge pa dang /mu stegs byed la sogs pa gzhan gyis bstan pa la rag ma las pa ste/ ston pa gzhan la mi rten pa'o/ /so so rang gis rig pa'i bye brag gi mtshan nyid de zhes pa la sogs pa'i don ni chos kyi dbyings kyi phyogs 'ga' zhig gang zag la bdag med pa dang /gzung ba ngo bo nyid med par mngon sum du rtogs pa'i ye shes so so rang gis rig par bya ba'i don sgra dang rnam par rtog pa'i yul las 'das pa ni nyan thos dang rang sangs rgyas rnams kyis bsgrub pa'i mtha'i tshul yin la/ sems kyi chos nyid ji lta ba bzhin du bdag nyid thams cad nas rtogs pa'i ye shes mthar thug pa'i don ni sangs rgyas rnams kyi'o//zag pa med pa'i dbyings rtogs pa thob par byed pa ni so so rang rang gis mi slob pa'i 'bras bu thob par byed pa'o/ /mu stegs can dang bdud thams cad spangs pa ni de rnams bcom pa ste/gang zag tu lta ba spangs pa dang mthar gyis mi gnas pa'i mya ngan las 'das pa thob par 'gyur gyi/ 'khor bar ldog pa med pa ste/ /phyir ldog pa yang yod ma yin/ /zhes pa la sogs pa sngar bstan pa'o/ /gzhan yang so so'i skye bo'i gnas skabs na rtog pa dang bcas pa'i tshad mas gang zag gi bdag med pa la sogs pa spyi'i tshul du gtan la 'bebs pa thos pa dang bsam pa'i shes rab kyis bsdus pa yang rjes su mthun pa'i grub pa'i mtha' ste rang rang gi 'dod pa'i don ji lta ba bzhin du rtogs pa ni ma yin no//de la bshad pa'i tshul ni bstan pa'i chos gsung rab yan lag dgu gdul bya'i mos pa ji lta ba bzhin du sna tshogs su bshad pa'o//de la gsung rab yan lag dgu ni 'phags pa mya ngan las 'das pa las kyang dgu nyid du gsungs te/ mdo'i sde dang / dbyangs kyis bsnyad pa'i sde dang / lung du bstan pa'i sde dang /tshigs su bcad pa'i sde dang / ched du brjod pa'i sde dang / de lta bu byung ba'i sde dang / skyes pa'i rabs kyi sde dang / shin tu rgyas pa'i sde dang / rmad du byung ba'i chos kyi sde rnams so zhes gsungs so/ /gal te de lta na gsung rab yan lag bcu gnyis su bstan pa ji ltar zhe na/de ni rgyas pa dang / bsdus pa'i sgo nas phye ba ste/ shin tu spros na chos kyi phung po brgyad khri bzhi stong la sogs pas kyang bstan la/ shin tu bsdus na sde snod gsum du yang 'du bar 'gyur ba'o/ /de la yan lag bcu gnyis kyi dbang du byas na mdo'i sde ni 'di skad bdag gis thos pa zhes pa nas dga' nas rjes su yi rang ngo zhes pa'i bar du chos mdor bsdus te bstan pa ste/de ltar bstan pa'i dgongs pa yang bsdus te bstan pa'i don de nyid go rims bzhin du so sor phye ste don rnam par 'jog pa na/ sdud pa po'i ston pa la sogs pas gzhag par sla ba dang /phyi rabs kyi 'chad pa po dang nyan pa po rnams kyis bshad pa dang gzung bar sla ba la sogs pa'i phan yon rnam pa bcu 'phags pa thogs med kyis gsungs pa'i phyir ro/ /dbyangs kyis bsnyad pa'i sde ni mdo'i sde de nyid du dbus dang tha mar tshigs su bcad de dbyangs kyis bsnyad pa ste/sngon bcom ldan 'das kyis dge slong rnams la bden pa bzhi phan yon dang bcas pa ston pa'i mdo sde gsungs nas de'i tshe na skye bo dbang po rnon po dag de'i 'og tu chos nyan pa'i phyir sangs rgyas kyi spyan sngar lhags te/ gzhan dag la 'di skad du bcom ldan 'das kyi spyan snga 'dir ci zhig mdzad ces dris pa dang /bcom ldan 'das mkhyen bzhin du mdo sde sngar gsungs pa las yang tshigs su bcad de 'di skad du/ ngas sngon khyed dang 'dra bar ni/ /bden pa bzhi po ma mthong ste/ /de bas 'khor bar yongs su 'khor//sdug bsngal chen po'i rgya mtshor lhung / /gang gis bden pa bzhi rtogs na/ /'khor ba yongs su gcod par 'gyur/ /skye ba'i srid pa kun zad na/ /srid pa thams cad len mi srid/ /ces gsungs pa dang / de 'dra ba'i rigs can dag go//yang drang ba'i don gyi mdo sde rtogs par byed pas dbyangs kyis bsnyad pa'o zhes kyang bstan bcos dag las gsungs so/ /lung du bstan pa'i sde ni mdo sde dang 'dul ba las lha dang mi rnams sangs rgyas su lung bstan pa ste/ ji ltar byams pa lung bstan pa la sogs pa lta bu'o//gzhan yang nyan thos 'das te shi ba'i dus byas pa dang 'byung ba lung bstan pa dang / nges pa'i don gyi mdo sde yang yin te/ des nges pa'i don nyid lung ston pa'i phyir ro/ /tshigs su bcad pa'i sde ni mdo sde dang 'dul ba gang las lhag par tshigs su bcad pa'i tshig bzhi pa 'di dag smos pa ste/sdig pa thams cad yongs su spang / /dge ba'i chos ni rdzogs par bya/ /bdag gi sems kyang yongs su 'dul/ /'di ni sangs rgyas bstan pa'o/ /zhes smos pa dang / de'i rang bzhin can rnams so/ /snga ma dang gnyis kyi khyad par bstan pa la/snga ma ni 'khor thams cad 'phral du dga' bar 'gyur ba yin la/ 'di ni 'phral du snyan nam/ mi snyan yang bla'i yul du phan par 'gyur ba'o/ /ched du brjod pa'i sde ni sus kyang zhus pa med par de bzhin gshegs pa nyid rjes su yi rangs nas brjod pa ste/ ji skad du/dge slong dag 'di ltar shes par bya'o/ /lhar skyes pa thams cad ni shin tu yang tshe ring ngo / /dge slong khyed la pha rol po gzhan gyi phyir rnyed pa mi 'tshol ba legs so/ /'dod pa nyung ba legs so/ /chog shes pa legs so/ /dur khrod na gnas pa yang legs so zhes gsungs pa lta bu'o//[(]gling [,]gleng [)]gzhi'i sde ni mdo sde las nyes pa 'byung ba dgag pa'i don du tshigs su bcad pa gsungs pa sngon gyi gleng gzhi dang bcas te 'byed cing bstan pa ste/ de yang sngon mnyan du yod pa na skyes bu gcig gis bya rgyas bya bzung nas gsel por bcug ste/ chu dang 'bras bsnyod nas phyir btang ngo / /bcom ldan 'das kyis de'i rgyu dang rkyen mkhyen pas de gleng gzhir byas te tshigs su bcad pa/ sdig pa phra mo chung ngu la/ /mi gnod snyam du brnyas mi bya/ /chu yi thigs pa zag pa yang / /snod chen yongs su gang bar 'gyur/ /zhes gsungs pa lta bu'o//rtogs pa brjod pa zhes bya ba ni 'dul ba las dpe bstan pa rnams te/ rtogs pa'i don dpe du ma gsal bar byed pa'o/ /de lta bur byung ba zhes bya ba ni bcom ldan 'das kyis dge slong dag 'di ltar rig par bya'o/ /nga 'jig rten du gshegs te gsungs pa rnams ni khams kyi mdo zhes bya ba de lta bur byung ba dang /bcom ldan 'das bsod skyabs 'jig rten du gshegs te gsungs pa ni bdud rtsi lnga sgra zhes pa dang / sangs rgyas rnam par gzigs 'jig rten du gshegs te gsungs pa ni chos kyi me long zhes pa dang /bcom ldan 'das 'od srungs 'jig rten du gshegs te gsungs pa ni stong pa rnam par 'byed pa zhes bya ba de lta bu byung ngo zhes pa ste/ de 'dra ba'i rang bzhin can sngon gyi sbyor ba ston pa'o/ /skyes pa'i rabs zhes bya ba ni bcom ldan 'das sngon byang chub sems dpa'i spyad pa spyod pa na skye ba'i gnas 'di dang 'di dag tu skyes shing dka' ba'i spyod pa 'di dag spyod ces ston pa ste/ri bong gi lus dang / rgyal po'i lus la sogs pa blangs zhes gsungs pa lta bu'o/ /shin tu rgyas pa zhes bya ba ni theg pa chen po shin tu rgyas pa'i mdo sde don shin tu rgya che la yangs pa nam mkha' dang 'dra ba ston pa rnams so//rmad du byung ba zhes bya ba ni nyan thos dang / rang sangs rgyas dang / yang dag par rdzogs pa'i sangs rgyas rnams kyi ngo mtshar rmad du byung ba'i bstan pa ste/ ji skad du/ byang chub sems dpa' thog ma btsas ma thag tu sus kyang ma bstan par gom pa bdun song ba dang /spre'us sbrang rtsi phul ba la sogs pa bstan pa lta bu'o/ /gtan la phab par bstan pa zhes bya ba ni ji tsam du don la 'bab par bye brag phye ste mtshan nyid bstan pa'o zhes gsungs so/ /de la mdo sde 'di dang / mya ngan las 'das par dgur bstan pa ni rtogs pa brjod pa dang / gleng gzhi ni de lta bu byung ba'i sde nyid du bsdus te/ nga'i rtogs pa de dang de lta bur byung zhes pa dang / sngon gyi dus na gzhi 'di las nyes pa 'di ltar byung bas zhes ston pa'i phyir ro/ / gtan la phab pa ni shin tu rgyas pa nyid kyi nang du bsdus te/ des shin tu rgyas pa shes rab kyi pha rol tu phyin pa'i dgongs don 'ga' zhig 'chad pa'i phyir ro/ /de yang mdo sde 'di dang / dgongs pa nges par 'grel pa la sogs pa lta bu'o/ /'di rnams sde snod gsum du 'dus te/ 'di ltar mdo'i sde dang / dbyangs kyis bsnyed pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde gang yin pa 'di ni nyan thos kyi mdo sde'i sde snod do/ /gleng gzhi dang / rtogs pa brjod pa dang / de lta bu byung ba dang / skyes pa'i rabs ni 'dul ba'i sde snod do//shin tu rgyas pa dang / rmad du byung ba ni byang chub sems dpa'i mdo sde'i sde snod do/ /gtan la phab pa ni gnyis ka'i chos mngon pa'i sde snod do/ /de las sde snod gsum gyi tshul so sor rnam par gzhag pa yang gang zhig gtso cher the tshom gyi gnyen por gsungs pa ni mdo sde'i sde snod yin la/de bzhin du rang gi lta ba mchog tu 'dzin pa'i gnyen por gsungs pa ni mngon pa'i sde snod do/ /'dod pa bsod snyoms kyi mtha' dang / ngal cing dub pa'i mtha' ste/ de ltar mtha' gnyis kyi gnyen por gsungs pa ni 'dul ba'i sde snod do/ /gzhan yang / gnas rnams dang ni mtshan nyid dang / /chos don smos phyir mdo yin no/ /zhes pa la sogs pa sa bcu'i dbang phyug chen pos gsungs pa rnams kyang 'dir sbyar bar bya'o/ /de la phyogs spangs pa ni de kho na nyid kyi don no/ /tha dad shes pa ni sus mthong zhes pa ni de rnams kyi bye brag ma 'dres par rtogs pa'o//ji ltar thar pa dngos med par/ /zhes pa ni mya ngan las 'das pa don dam pa'i dngos por med pa phyin ci log nye bar zhi ba tsam du rtog ge pa rnams kyis ma rtogs pa'o/ /lta ba gnyis ni sgro 'dogs pa dang skur ba'i lta ba'o/ /yid spangs pa ni rtog pa dang bcas pa'i yid spangs pa'o//de nas yang byang chub sems dpa' zhes pa la sogs pas yongs su rtog pa 'byung ba dang ldog pa'i de bzhin nyid rgyas par ston te/ don la ji ltar ci zhig ces pa la sogs pa'i don ni tshul ji ltar rang gi ngo bo ci zhig /rgyu dang rkyen gang gis gang zag su'i yang dag pa ma yin par yongs su rtog pa 'byung ba 'byung zhes zlos pa'i sgras rgyun chags su 'byung ba nyid ston to//bcom ldan 'das zhes pa la sogs pas rang gi ngo bo ci zhig ces pa'i don bstan to/ /ci la zhes pa la sogs pas yul gang la brtags pas rgyun chags su 'byung bar 'gyur ba'i rgyu ston to//lan gyi don ni gzung ba dang 'dzin pa sna tshogs su snang ba'i don la yang dag pa'i dngos por brtags shing / brtags pa'i don la rgyun chags su zhen pa'i tshul gyis phyin ci log gi rnam par rtog pa rgyun chags su 'byung ba'o/ /blo gros chen po gzung ba dang zhes pa la sogs pas snga ma'i don rgyas par 'chad de/de la rang gi sems snang ba tsam du ma rtogs shing / gzung 'dzin la mngon par chags pa ni nyan thos kyi rigs can rnams te/ de ltar chags pa'i bag chags shin tu rgyas pa rnams phyi rol gyi don sna tshogs dmigs pa la mngon par chags pa dang zhes 'og tu sbyar bar bya'o//yod pa dang med par lta ba'i phyogs su lhung ba mu stegs byed kyi lta ba la so sor rnam par rtog pa'i bag chags shin tu rgyas pa rnams bdag dang bdag gir mngon par chags zhes sbyar bar bya'o/ /sems ni yid kyi rnam par shes pa'i khyad par ro//sems las byung ba ni dad pa dang / khong khro ba la sogs pa rnam par rtog pa'i phyogs kyis bsdus pa'o/ /blo gros chen po zhes pa la sogs pas don de nyid brtsad pa spang ba'i sgo nas de'i de bzhin nyid rgyas par 'chad pa'o/ /de la brtsad pa'i don ni gal te de ltar rnam par rtog pa 'byung bar 'gyur na kun nas nyon mongs pa'i phyogs mi ldog pa nyid du 'gyur ro//ji ste phyi'i dngos po dang dngos po med pa sna tshogs su brtags pa'i don yang dag pa'i shes rab kyis rnam par bzlog ste/ gnyis su med pa'i rang rig pa don dam pa'i bden pa rtogs pas de ltar rnam par rtog pa'i rgyun las bzlog par bya ba yin zhing 'dogs par 'gyur bas nyes pa snga ma las grol lo zhe na/de lta na bcom ldan 'das gnyis su med pa'i rang rig pa don dam pa yang spyir tshad ma'i yul las bzlog pa dang /khyad par du dbang po'i yul las 'das pa ste/ ji skad du/ mig dang rna ba sna yang tshad ma min/ /zhes pa la sogs pa gsungs pas don dam pa'i de kho na nyid de 'dra ba dbang po'i mngon sum la sogs pas ma grub cing / shes byed kyi rgyu tshul gsum dang ldan pa'i rtags dang /gtan tshigs kyi yan lag dpe las 'das pas rjes su dpag pa'i yul yang ma yin la/ yang cha shas las rnam par log pa ste/ sna tshogs su snang ba'i rnam pa'am/ shes pa skad cig ma'i cha shas las log pa ste/ gnod par byed pa'i tshad ma sngar bstan pa lta bu'o//de'i phyir de 'dra ba'i yul rnam par bzlog pa na de ltar rtog cing 'jal ba'i shes rab nyid du 'dod pa yang bzlog par bya zhing ldog pa nyid du 'gyur ro/ /gal te de 'dra ba'i don dam pa las rnam par rtog pa mi 'byung zhing de nyid kyis bzlog par bya ba med do zhe na/bcom ldan 'das phyi'i don sna tshogs su snang ba la rtog cing zhen pa'i tshul gyis rnam par rtog pa 'byung bar 'gyur la/ don dam pa'i mtshan nyid la chags shing rtogs pas ni rnam rtog rgyun chags su mi 'byung ba'i khyad par gyi rgyu mtshan khas len dgos par 'gyur na/de yang mi 'thad ces pa'o/ /de'i phyir phyin ci log gam yang dag pa'i shes rab kyis bsdus pa'i shes pa yang rung ste/ sngar ma byung ba las byung zhing byung nas kyang 'jig pa nyid don dam pa'i dngos por khas len na/ 'di ni 'jig rten rgyang 'phen pa'i phyogs la brten par 'gyur te/de dag gis mngon par gsal ba'i sems can sngar med pa las 'byung ba 'dus pa'i stobs kyis byung zhing de nyid yang ldog pa nyid du 'dod pa dang / thar pa mya ngan las 'das pa khas mi len pa dang mtshungs par 'gyur ba'i phyir ro zhes pa'o//lan gyi don ni don dam pa'i de kho na nyid du phyin ci log gam yang dag pa'i shes rab kyang rung ste/ sems kyi ngo bo ma byung ba las byung ba dang / ldog pa nyid du khas mi len pas de 'dra ba'i nyes pa las grol ba'o/ /gzhan yang phyi'i don ni sngar bstan pa ltar yang dag pa'i kun rdzob tu yang ma grub pas de ltar 'dzin pa'i blo ni phyin ci log yin pa dang /log pa gzhan gyi yang rgyur 'gyur la/ de'i rang bzhin shes pas ldog par 'gyur gyi/ don dam pa'i mtshan nyid ni phyin ci ma log pa so so rang rig pa'i ye shes sgyu ma lta bu yin la de'i phyir phyin ci log pa'am ma log pa gzhan gyi rgyur mi 'thad cing rgyun las nyams par mi 'gyur bas mtshungs pa ma yin no//'dir tshig gi don ni 'byung ba 'byung na zhes pa yan chad kyis ni de bzhin gshegs pa'i tshul lugs rjes su brjod nas de lta na kun nas nyon mongs pa'i phyogs ldog par mi 'gyur ro zhes brtsad pa dang /de'i lan gyi don sngar bstan pa ltar rnam par rtog pa bzlog par bya zhing ldog pa nyid du bstan pa la/ yod pa dang med pa ni gzugs la sogs pa rang rang gi bdag nyid du yod cing / phan tshun gyi bdag nyid du med par lta ba'i phyogs su ltung ba de 'dra ba'i dngos po dang dngos po med par 'dzin pa las dben pa de ltar lta ba'i mtshan nyid las ji ltar bzlog pa ste/de'i yul bkag pa'i sgo nas bzlog pa'o/ /gcig la zhes pa ni phyi'i don no/ /yod pa dang med pa'i phyogs ni sngar bstan pa bzhin no//khyod la zhes pa ni khyod kyi grub pa'i mtha' phyogs la'o/ /yang dag pa ma yin zhes pa la sogs pas sngar gyi don bsdus te bstan pa'o/ /sgyu ma'i yan lag gi skyes bu ni yan lag 'dus pa'i skyes pa dang bud med la sogs par snang ba'o/ / tha dad pa rnam pa sna tshogs ni sngags dang sman la sogs pa'i rgyu rkyen no/ /de rnams las sgyu ma'i gzugs gcig grub cing / yang ldog par 'gyur ba de bzhin du rtog pas sna tshogs su brtags pa la brten nas dngos po dang dngos po med par rnam par rtog pa rgyun chags su 'byung ba las/sngar bstan pa ltar de'i yul bkag pa'i sgo nas rtog pa'i rgyun bzlog pa'i phyir rgyang 'phen pa dang mtshungs zhes pa'o/ /'dir sgyu ma dper byas pa ni byang chub sems dpa' blo gros chen pos 'byung ba dang / ldog pa sgyu ma dang 'dra bar rtogs shing /shugs la de ltar ston pa'o/ /gzhan du na zhes pa la sogs pa'i don ni 'byung ba dang ldog pa sgyu ma lta bur ston pa'o/ /lo rgyus las byung ba sngon du 'gro zhes pa ni nang gi mngon par chags pa'i sa bon dang / phyi rol du snang ba mi dge ba'i grogs po la sogs pas bstan pa'i sgra las thog mar rnam par rtog pa 'byung zhing /de sngon du 'gro ba can gyi rgyun gzhan yang 'byung ba'o/ /ji ltar na zhes pa la sogs pa kun rdzob tu rnam par rtog pa la ldog pa'i tshul gsungs pa'o/ /'bras bu'i nyes pa na de dag tu sgro 'dogs pa'o/ /gzhan ni phal cher go bar zad do//gang na'ang yod med yod min nang / /zhes pa ni yod pa dang med pa'i rang gi ngo bo nyid kyang ma grub pa'o/ /sems kyang rnam rtog zhes pa ni sa bon spangs pas phyin ci log gi sems med pa'o/ /gang phyir rkyen las byung bas na/ /zhes pa la sogs pa'i don ni rten cing 'brel par 'byung ba'i gtan tshigs kyi rgyu dang 'bras bu'i dngos po don dam pa pa 'gog pa ste/'di'i chos can dang dgag bya la sogs pa ni/ sngar bstan pa bzhin no/ /gtan tshigs kyi don ni rkyen las skye bar snang ba sgyu ma lta bu'i rten 'brel te/ mngon sum la sogs pa'i tshad mas grub pa'o//gtan tshigs nyid du nye bar 'god pa na/ sgyu ma la sogs pas khyad par du ma byas par rkyen las skya bar snang ba'i phyir zhes pa'o/ /de nyid la don dam par ma skyes pas khyab pa grub pa'i tshul ni/ rkyen rnams thams cad ces pa la sogs pa ste/gang 'ga' zhig kho na'i rjes thogs su 'ga' zhig byung ba ni snga ma de'i 'bras bu ste/ des na 'bras bu'i mtshan nyid ni ltos pa yin la/ 'bras bu 'bras bu'i dus su ma grub na/ rgyu snga ma de nyid gang gi rgyur 'gyur te/ de la ltos pa'i rgyu'i ngo bor mi 'thad do//des ni de nyid rgyu'i ngo bor grub pa 'bras bu la ltos pas/ de'i 'bras bu nyid du 'gyur ro/ /gal te de lta na yang 'bras bu ma skyes nas med pa'i dus su/ rgyu rang gi rgyu snga ma las grub pa'i phyir/ de la ltos pa ma yin no zhe na/ de bzhin du rgyu 'gags nas med pa'i dus na/'bras bu rang gi 'bras bu phyi ma la ltos nas grub pa'i phyir/ de la ltos pa ma yin par 'gyur ro/ /gal te rang gi 'bras bu phyi ma ma skyes nas med pa'i phyir/ de la ltos nas grub pa mi 'thad do zhe na/ de bzhin du rang gi rgyu snga ma yang 'gags nas med pa'i phyir de la ltos nas grub pa mi 'thad do//gzhan yang gal te/ 'dir 'bras bu phyi ma'i dus na/ rgyu 'gags nas med kyang sngar rgyu'i dus na yod pa la brten nas/ 'bras bu phyi ma grub pa yin la/ rgyu sngar gyi dus na med na 'bras bu yang phyi ma'i dus su mi 'byung bas/ de la ltos par 'thad la/rgyu ni de ltar 'bras bu la ltos pa ma yin no zhe na/ mtshungs te/ 'bras bu phyis kyi dus su yod pas rgyu sngar gyi dus su byung zhing / gal te 'bras bu phyis kyi dus su ma grub na/ rgyu yang sngar gyi dus su mi 'grub pas/ de yang 'bras bu la ltos pa nyid du mtshungs so/ /de ltar na rkyen rnams ni rang gi 'bras bu las skye bar 'gyur na/de ni skye ba mi srid de/ 'bras bu de nyid kyang rgyu dang 'bras bu gnyis su 'gyur la/ de bzhin du rgyu yang gnyis su 'gyur bas so/ /de ni 'dod pa nyid yin te/ 'bras bu gcig po de nyid snga ma'i 'bras bur 'gyur la//phyi ma'i rgyur 'gyur bas so zhe na/ ma yin te/ 'dir 'bras bur 'dod pa gcig po de nyid dus gcig tu rang gi rgyu snga ma gcig po la ltos te/ rgyu dang 'bras bu gnyi gar 'gyur la/ rgyu snga ma gcig po yang 'bras bu phyi ma gcig po la ltos te/ dus gcig tu rgyu 'bras gnyis kar 'gyur na/de 'dra ba ni 'gal bas mi srid ces pa'o/ /des na 'dir khyab pa'i don ni/ rten cing 'brel par snang ba don dam par bden na/ snang ba dang mthun par rgyu dang rkyen las skye bas khyab la/ de yang rgyu dang 'bras bu phan tshun ma 'chol bas khyab pa las/'dir rgyu 'bras 'chol bar 'gyur ba'i phyir/ rgyu 'bras don dam pa par mi 'thad ces pa'o/ /dmigs pa dang / dmigs bya zhes pa la sogs pas sems nyid rig pa'i gzhan gyi dbang sgyu ma lta bur ston te/ de las dang po rnam par dag pa mthar thug pa sems tsam ni kun rdzob tu dri ma rnams sa bon dang bcas te spangs pa gnyis su med pa rang rig pa tsam gyi ngo bo ye shes bzhis bsdus pa'o//sems med pa'i sems tsam zhes pa ni sngar bstan pa ltar zung 'jug gi don no/ /gal te 'di tsam zhes pa de las gzhan pa'i dngos por ni ma grub la/de nyid bden pa'i dngos por yod pa ma yin nam zhe na/ tsam de ngo bo nyid kyi dbyings/ /zhes pa ste/ don dam par chos nyid stong pa nyid kyi rang bzhin du 'gyur ba'o/ /de nyid gsal bar ston pa ni/ rkyen dang dngos po spangs zhes pa'o/ /mthar thug dngos po tshangs pa'i mchog /ces pa ni ye shes mthar thug pa dri ma thams cad sa bon dang bcas te spangs pa'o/ /bden par zhes pa la sogs pas ni gnas skabs thams cad du bdag med pa nyid du ston pa ste/ de la gang zag gi bdag ni phung po lnga'i rgyun rgyud la btags pa yin gyi/rdzas su grub pa ma yin no/ /de bzhin du phung po nyid kyang de ltar snang ba tsam gyi rang bzhin la btags pa yin gyi rdzas su grub pa med do/ /de'i phyir 'dus byas thams cad mnyam pa nyid rnam pa bzhis mnyam pa ste/ kun rdzob tu skye ba dang gnas pa dang 'jig pa'i mtshan nyid kyis mnyam pa dang /rgyu dang rkyen gyi dngos po las byung bar mnyam pa dang / don dam par bdag med par mnyam pa ste/ shes bya'i dbang du byas pa'o/ /bzhi pa ni snga ma ltar rnal 'byor pa'i ye shes mthar thug pa 'jig tshogs la lta ba la sogs pa'i dri ma dang / rtog pa dang rtog pa'i gzung ba sna tshogs su snang ba spangs pa ste/mthar thug pa'i sems tsam mo/ /dngos po med ces pa la sogs pas ni spyir de kho na nyid kyi sems tsam ston te/ don dam pa'i dngos por med cing ri bong gi rwa ltar rnam pa thams cad du med pa yang ma yin te/ rig pa ma 'gags pa zung 'jug gi bdag nyid de/ sngar bstan pa bzhin no/ /de bzhin nyid ces pa la sogs pas stong pa nyid kyi rnam grangs sems tsam du ston pa'o/ /mtha' ni yang dag pa'i mtha'o/ /rnam rtog ces pa la sogs pas 'jig rten pa'i sems tsam ston te/ dri ma dang bcas pa'i gnas skabs na rnam par rtog pa'i bag chags kyi dbang gis sna tshogs su snang ba ni sems nyid de/'on kyang 'jig rten pas de ltar ma rtogs zhes pa'o/ /gzhan ni shes par zad do/ /yang 'dir rnam par rtog pa 'byung ba'i tshul la brtsad pa spangs pa'i gzhung gi don ni phyi rol gyi don sna tshogs su snang ba la rtog cing chags pas rnam par rtog pa rgyun chags su 'byung ba 'byung na/bcom ldan 'das gcig la yang dag pa ma yin pa'i don sna tshogs su zhes pa la sogs pa'i gzhung gi dum bu 'og ma dang sbyar bar bya ste/ de'i don ni phyi rol gyi don sna tshogs su snang ba la rtog cing chags pas rnam par rtog pa 'byung na/don dam pa'i mtshan nyid la chags shing rtog pas kyang ji ltar mi 'byung zhes pa la sogs pa snga ma bzhin te/ des na kun nas nyon mongs pa'i phyogs ldog par mi 'gyur ba'o/ /yang bcom ldan 'das phyi rol gyi don sna tshogs zhes pa la sogs pas de ltar brtags shing zhen pa las rnam par rtog pa 'byung yang /de'i yul bkag pa'i sgo nas bzlog par bya zhing lhag pa nyid du 'gyur ro zhe na ni/ de bzhin du bcom ldan 'das zhes pa la sogs pa'i don snga ma bzhin no//dpe dang rgyu'i mtshan nyid las rnam par bzlog pa na/ de ltar ldog pa'i phyir 'jig rten rgyang 'phen gyi lta ba dang bsam par lhung bar 'gyur zhes 'og ma dang sbyar bar bya'o/ /de'i don ni phyin ci log gi rnam par rtog pa dang / de'i gnyen po yang dag pa'i shes rab tu khas len pa'i rnam pa gnyis char kyang ma byung ba las byung ba dang /byung nas kyang bzlog par bya ba nyid du mtshungs shing ldog par 'gyur bas rgyang 'phen pa dang mtshungs zhes pa'o/ /de nas yang byang chub sems dpa' zhes pa la sogs pas sngar bstan pa gsal byed kyis rkyen gyi khyad par tshul gzhan gyi sgo nas rgyas par 'chad pa ste/de la tshig dang yi ger phrad pa ni go rims kyi tshul gyis 'dus pa'o/ /bag chags kyi rgyu las skyes pa ni de las don du snang ba'i bsam pa dang de las brjod par 'dod pa la sogs pa'o/ /rang gi blo ni mthong ba dang bsgom pa'i lam ste/de mthong ba dang bsgom pas spang bar bya ba'i bag chags kyis gnas rab tu gyur zhes pa la sogs pa'o/ /'dir don la mkhas pa'i yul de nyid don ji lta ba yin pas dris pa'i lan du 'gyur ba'o/ /sgra'i don la mkhas zhes pa ni sgra dang don gnyis ka'i don la mkhas pa ste/de dag don dam par de nyid dang gzhan du brjod du med pas stong pa nyid de/ de ltar rtogs pa'o/ /sgra dang don gcig pa dgag pa ni rgyas par sngar bstan no/ /gzhan yang blo gros chen po zhes pa la sogs pas sgra ji bzhin du mngon par zhen pa'i nyes pa ston te/sgyu ma sna tshogs mthong ba'i rnam par rtog pa lta bur zhes pa sgyu ma'i glang po la sogs pa sna tshogs su snang ba la rta glang yang dag par sgro 'dogs pa lta bur gzugs la sogs pa sna tshogs su snang ba la yang dag pa du mar sgro 'dogs pa dang / snang zhing myong ba tsam yang med//ces skur ba ste/ shes bya'i rang bzhin rnam pa gzhan du gnas pa la rnam pa gzhan du rtogs pa'o/ /rnam pa gzhan du lta ba yin zhes pa mkhas pa rnams byis pa dang mi mthun par lta ba'o/ /phung po rnams la bdag med de/ /zhes pa de rnams bdag gi rang bzhin ma yin te/bdag dang mtshan nyid mi mthun pa'i phyir ro/ /de'i don bdag ni rtag pa dang gcig pu la sogs pa'i bdag nyid yin la/ phung po rnams ni de las bzlog pas so/ /de nyid kyi phyir de la brten pa'i tshul du yang med la/ phung po rnams kyang bdag la brten pa'am/de'i bdag nyid kyi tshul gyis med pas te/ byis pas rtog pa bzhin du de dag med pa'o/ /yang bdag tu brtags pa'i rten phung por snang ba ni kun rdzob tu med pa ma yin no/ /de las gzhan du byis pas brtags pa bzhin dngos po bden na/ byis pa'i skye bo thams cad yang dag pa'i don mthong bar 'gyur ro//phung po la sogs par snang ba sems kyi ngo bor gyur pa kun rdzob pa tsam yang med na/ kun nas nyon mongs pa dang rnam par byang ba med par 'gyur te/ sems nyid dri ma dang bcas pa dang / de dang bral ba la de ltar rnam par 'jog pa'i phyir ro//rkang pa gnyis kyis ni don bsdus pa bstan pa'o/ /gzhan yang blo gros chen po zhes pa la sogs pas sngar rnam par shes pa dang ye shes bstan pa la/ gdul bya rnams kyis de dag gi bye brag ma rtogs shing the tshom du gyur pas de dgag pa'i don du de dag gi bye brag gsal bar ston to//skyes nas 'jig pa ni ji ltar rigs pa bzhin rgyun dang skad cig gi dbang du byas pa ste/ sngar rgyas pa nyid du bstan no/ /ma skyes mi 'jig pa ni ye shes so zhes pa la/ gzhan dag de lta na ye shes rgyu las skye ba gzhan gyi dbang nyid du sngar bstan pa dang / de bzhin du rigs pas kyang grub pa ma yin nam/gal te ye shes kyi chos nyid de bzhin nyid ma skyes shing mi 'jig pas de ltar bstan no zhe na/ de ltar rnam par shes pa'i chos nyid kyang ma skyes shing mi 'jig pas mtshungs pa nyid du 'gyur ro zhe na/ skyon med de/ 'dir me long lta bu'i ye shes chos kyi sku'i rang bzhin gyi dbang du byas pa ste/de'i rigs tsam thog ma med pa nas yod pas glo bur du snga na med pa'i rgyun gzhan gyis bskyed pa ma yin la/ rtag tu rgyun dang ldan pas mi 'jig pa ste/ ji skad du/ slar yang gzhan du mi 'gyur zhing / /rtag dang chad pa spong byed pa'i//'chi med de nyid ye shes brjod/ /ces gsungs pa'am/ ye shes 'chi med dam pa de las gzhal med thob/ /ces gsungs pa lta bu'o/ /yang rnam grangs gcig tu na skye 'gag la sogs pa'i mtshan mar 'dzin pa med pas de ltar bstan pa'o/ / rnam par shes pa ni de ltar ma yin te/ de dag gi mtshan mar 'dzin pa'o/ /mtshan ma med par lhung zhes pa ni mtshan ma med pa'i mtshan mar 'dzin pa'i phyogs su lhung ba ste/ yid kyi rnam par shes pa la sogs pa'i mtshan nyid ni kun gzhi bag chags thams cad kyi rten du gyur pa'am/'jug pa'i rnam shes gzung ba dang 'dzin pa'i rnam pa sna tshogs 'dus pa'o/ /bri ba'i mtshan nyid ni zag pa dang bcas pa'i sa bon bri zhing 'gag pa'o/ /rang dang spyi'i mtshan nyid la sogs pa'i rnam par dbye ba rags par rtogs pa ni/ grub pa'i mthas blo ma bsgyur ba rnams kyi rnam par shes pa yin la de dag gi bye brag zhib tu rtogs pa ste/gzugs ni gzhig cing gzhom du rung ba'i mtshan nyid ces pa nas/ 'du byed skad cig la skye zhing 'jig pa dang don dam par skye ba med pa la sogs par spyi'i tshul du rtog par byed pa byis pa'i skye bo rnams kyi rgyud kyis bsdus pa ni grub mthas bsgyur ba'i rnam par shes pa'o//yod dang med pa'i phyogs la mngon par chags pa ni phyi rol pa rnams kyis bdag rtag pa'i ngo bor ni yod la/ de las gzhan gzugs la sogs pa'i dngos por med pa'am/ gzhan yang byis pa'i skye bo rnams kyis dngos po rnams rang rang gi ngo bor yod la/phan tshun gyi dngos por med do zhes mngon par zhen pa dang bcas pa'i ye shes ni 'jig rten pa'i'o/ /gal te de lta na de ni rnam par shes pa dang mtshungs pa nyid du 'gyur zhing / gzhan yang de 'dra ba ye shes nyid du mi 'thad de/ de nyid shes phyir ye shes dang //zhes pa la sogs pa gsungs pa'i phyir ro/ /de ltar bden mod kyi/ 'dir rnam par shes pa rnams kyis kyang phyi rol gyi don tha dad pa'am/ dngos po med pa'i ri bong gi rwa lta bur 'dzin cing rig pa ni ma yin zhing / 'on kyang rang gi rang bzhin kun rdzob pa 'dzin cing rig pa yin la/de yang sgyu ma lta bur don dam pa'i bden pa dang dbyer med cing gcig pas/ don gyi rang gi ngo bo gcig /bdag nyid mngon sum yin pa la/ /tshad ma rnams kyis brtag bya gang / /ma mthong cha gzhan ci zhig yod/ /ces gsungs pa'i tshul du shes pa'i rang gi ngo bo rig cing snang ba na de dang tha dad pa ma yin pa'i de bzhin nyid kyang rig cing snang bas de 'dra ba'i ldog pa nas 'jig rten pa'i ye shes zhes kyang bya la/yang de bzhin nyid la phyin ci log gi sgro 'dogs gcod par mi nus shing / chos can kun rdzob kyi ngo bo rig pa'i cha nas rnam par shes pa zhes bya ste/ de la sgro 'dogs pa yang ji skad du/ gzugs chos mthun pa mthong ba las/ /nya phyis la dngul rnam pa ltar/ /gal te 'khrul pa'i rgyu mtshan gyis/ /yon tan gzhan sbyor zhes pa la sogs pa gsungs pa lta bu'o/ /de ltar sgro 'dogs pa'i ldog pa nas rang ngam gzhan gang yang rig pa med pas shes pa nyid dang ma yin la/'on kyang rang gi bdag nyid rig pa'i cha nas shes pa nyid du rnam par gzhag go/ /de ltar na byis pa dang 'phags pa'i ye shes kyi khyad par ni myong ba'i don la sgro 'dogs pa sel bar nus pa dang / mi nus pa'i sgo nas rnam par gzhag go//yang 'phags pa nyan thos la sogs pa dang / byang chub sems dpa' la sogs pa'i khyad par ni/ sgro 'dogs phyogs gcig gam mtha' dag sa bon dang bcas te sel ba'i sgo nas so/ /gzhan yang rnam par shes pas de'i de bzhin nyid 'dzin par gsungs te//rnam shes yul 'dzin pa yi chos/ /de ni ji ltar yod pa bzhin/ /'dzin 'gyur zhes pa la sogs pa gsungs so/ /rang dang spyi'i mtshan nyid du lhung zhes pa la/ phung po la sogs pa'i rang gi mtshan nyid dang / de rnams nyid mi rtag pa dang sdug bsngal ba la sogs pa gang zag gi bdag med pa dang /bzung ba ngo bo nyid med pa'i chos nyid ji lta ba bzhin du rtogs shing phyin ci log gi sgro 'dogs dgag pa ste/ des na 'jig rten pa'i ye shes dang mtshungs pa ma yin no/ /gzhan yang zhes pa la sogs pa sngar bstan pa ye shes dang rnam shes khyad med par dogs pa sel ba'o//gal te ye shes snga ma de nyid gnyis kyang yul sna tshogs la chags pa ma yin nam zhe na/ de ltar chags pa'i sems dang 'brel mod kyi gang la ye shes su 'gro ba'i ldog pa de nyid nas mngon par chags pa'i mtshan nyid ma yin no/ / mngon par chags pa de yang khyad par du yid kyi rnam par shes pa'o/ /gsum 'dus pa ni dbang po dang yul dang yid la byed pa snga ma ste/ de rnams kyi las su bya ba skyes pa dang ldan pa'i mtshan nyid ni sgo lnga'i rnam par shes pa'o/ /thob pa med pa'i mtshan nyid ni sngar bstan pa ltar me long lta bu'i ye shes kyi rigs thog ma med pa nas yod pas lam gyi stobs kyis glo bur du thob pa ma yin pa'o//'on kyang phyin ci log gi dri ma glo bur ba lam gyis sbyangs pa 'ba' zhig tu zad do/ /des na de 'dra ba'i ye shes glo bur du 'jug cing ldog pa med pa ste/chu la zla ba'i dkyil 'khor glo bur du zhugs shing ldog pa med pa dang mtshungs so/ /tshigs su bcad pa'i don ni kun gzhi dang yid kyi rnam par shes pa la sogs pas sngar bstan pa ltar las sog cing rnam par smin pa 'byin par byed la/ ye shes kyis de rnams kyi rang bzhin stong pa nyid du rtogs pas ji lta ba bzhin rnam par 'byed cing las chud zos par byed pa'o//ye shes dang shes rab ni rnam grangs su gtogs pa'am/ yang na sngar bshad pa ltar ro/ /de ltar na shes rab kyis snang ba med pa'i ye shes chos kyi sku'i ngo bo thob par byed cing / de las sems can gyi don byed pa'i mthu yang rab tu thob par byed pa'o//yang na ye shes ni sngar bstan pa'i skye ba med pa dang 'gag pa med par spyi'i tshul du rtogs pa med par shes pas bsdus pa'o/ /sems kyi las ji ltar sog ce na/ yul sna tshogs su snang ba dang 'brel cing de ltar brtags pas so//ye shes kyis rnam par 'byed pa yang / de ltar brtags pa'i don la ji lta ba bzhin shes pa'i ye shes 'jug pa'o/ /yang don dam pa shes pa'i shes rab ni snang ba med pa'i de bzhin nyid la 'jug cing / kun rdzob shes pa ni chos kyi bye brag ma 'dres pa la 'jug pa'o//snang ba med par rtogs pa'i shes rab dang ye shes ni/ sems dang yid la sogs pa spangs pa ste/ 'jig rten las 'das pa mchog gi ye shes so/ /gzung 'dzin du rtog pa'i chos dang 'brel pa ni nyan thos la sogs pa'i ye shes so/ /gal te de lta na nyan thos la sogs pa rnams kyang rnam par mi rtog pa'i ye shes dang ldan pa nyid du sngar gsungs pa ma yin nam zhe na/ma yin te/ de ni rnam par rtog pa la skyon du lta ba'i sgo nas man ngag gi stobs kyis de 'dra ba bkag cing mnyam par gzhag pa'i gnas skabs su yin la/ brtag bya'i yul stong par ma rtogs pas rjes kyi ye shes la ni rnam par rtog pa 'byung ba'o/ /zhi dang bzod pa'i zhes pa la sogs pas de bzhin gshegs pa'i ye shes khyad par 'phags par ston pa ste/ gong nas gong du phyin ci log zhi ba dang / zab mo'i don la bzod pa'i ye shes khyad par du gyur cing mthar thug pas khyad par du 'phags pa'o//dge ba ni nyes pa'i bag chags thams cad dang bral ba ste/ gzhan las bye brag tu gyur pa'i don nyid du skyes pa/ mtshan ma dang nyon mongs pa'i kun du spyod pa spangs pa'o/ /shes rab rnam pa gsum ni 'phags pa'i gang zag gi bye brag shes pa dang /chos kyi mtshan nyid ji lta bar rtogs pa dang / dngos po'i bye brag ji snyed pa shes pa'o/ /thos pa dang bsam pa dang bsgom pa'i shes rab gsum la yang slob dpon ye shes dpal gyis bshad de/ de ltar na nga yis sngar sbyangs pa'am bshad pa'i shes rab ces sbyar bar bya'o//de 'dra ba'i shes rab de nyid nyan thos dang rang sangs rgyas kyi theg pa gnyis dang mi ldan zhing gnyis su snang ba rnam par spangs pa ste/ 'jig rten las 'das pa mchog gi ye shes so/ /tshig gzhan ni shes par zad do/ /gzhan yang zhes pa la sogs pa 'jig rten pa'i ye shes kyi khyad par mu stegs byed rnams kyi 'dod pa 'gyur bar lta ba ston te/de la mtshan nyid ni mtshan ma ste kha dog la sogs pa'i mtshan ma gzhan du 'gyur ba'o/ /rgyu ni phyi rol pas brtags pa'i byed pa ste/ 'bras bu byung ba'i tshe gzhan du 'gyur ba'o//sbyor ba ni rkyen mang po 'dus pa ste des dri dang ro la sogs pa gzhan du 'gyur ba'o/ /lta ba ni mthong ba'i rnam pa ste yul 'ga' zhig 'dod bya'i rnam par mthong ba las phyis 'dod bya ma yin pa'i rnam par snang ba lta bu'o/ /skye ba ni sa bon gyi dus na myu gu mi snang zhing ma skyes pa las de'i rjes thogs su skye zhing /de yang gzhan dang gzhan du skye zhing 'gyur ba'o/ /dngos por 'gyur ba ni ljon shing ngam 'gro ba gzhon nu'i lus rim gyis ches cher 'phel ba ni/ sngar gyi de kho na nyid yin no zhes ngo shes kyi blo'i yul du byed pa lta bu'o//rkyen snang bar byed pa 'gyur ba ni ji ltar shing gtsubs pa las me dang / til rnams las mar 'byung ba la sogs pa lta bu'o/ /bya ba snang bar byed pa'i 'gyur ba ni ji ltar sbrul gyi sos skyes bu'i lus la gzung bas nyams pa la/ sngags dang sman la sogs pas srog chags snang bar byed cing dbugs 'byin pa la sogs par byed pa'i 'gyur ba'o zhes slob dpon ye shes dpal gyis bshad do//yang mtshan nyid 'gyur ba ni ji ltar gdu bu la sogs pa'i dbyibs 'gyur ba na/ de dag gi mtshams nyid kyang gzhan du 'gyur ba'o//rigs pa 'gyur ba ni ji ltar nye bar 'jal ba'i tshad mas ba men ni ba lang 'dra'o zhes pa'i tshig las bzho dgal gyi bya bar byed par rtogs pa la/ phyis de mngon sum du mthong ba na sngar gyi tshad ma las gzhan du 'gyur ba'am/ la rgyab kyi me rjes su dpag pa'i tshad mas rtogs pa las de'i drung du phyin pas me mngon sum du rtog pa na/gang zag de'i sems kyi rang bzhin la 'gyur ba med kyang don de rtogs pa'i tshad ma snga ma las gzhan mngon sum nyid du 'gyur ba la sogs pa lta bu'o/ /rkyen snang bar byed pa ni sgron ma dang / nyi ma dang zla ba la sogs pa'i rang bzhin la 'gyur ba med kyang yul gzhan dang gzhan du 'pho zhing /dngos po gzhan dang gzhan snang bar byed pa lta bu'o/ /bya ba snang bar byed pa ni ji ltar sta res shing gcod par byed pa'am/ rdza mkhan gyis bum pa byed pa na/ de dag gi bya ba gyen du lding ba dang thur du 'bab pa dang / lag pa'i 'du byed gzhan du 'gyur zhing /de'i las su bya ba yang gzhan du 'gyur ba lta bu'o/ /de rnams kyang gnas skabs 'gyur ba nyid du 'dod pa yin gyi rang bzhin ni 'gyur ba ma yin no zhes grub mtha' smra ba phal cher de ltar 'dod pa'o/ /de dag la bsams nas grangs can pa rnams ni 'bras bu'i rang bzhin sngar nas yod pa dang /gnas skabs med pa las glo bur du skye bar 'gyur ba nyid du smra la/ yang rgyu'i rang bzhin rtag tu yod pa dang / gnas skabs 'bras bu'i dus na med pa las 'bras bu skye bar smra ba'o/ /gzhan yang sngar bstan pa ltar yod pa dang med pa las ji ltar rigs pa bzhin 'bras bu skye bar smra ba ste/gtso cher 'bras bu'i phyogs la yang dag pa'i dngos por rtogs pa'o/ /'di lta ste zhes pa la sogs pas ngag snga ma'i don gsal bar ston pa'o/ /mu stegs byed kha cig ces pa grangs can la sogs pa'o/ /kha cig ni rgyu la rtog ces pa rgyu yod pa gtso bo'i rang bzhin dang dbang phyug la sogs pa'am/dus dang rang bzhin gyis 'bras bu bskyed pa ste/ gtso bor rgyu'i phyogs la dngos por rtog pa'o/ /de ltar rgyu dang 'bras bu la rtog pa de dag ni/ yongs su brtag par bya ba'i don blo yis nyes par bzung nas/rgyu dang 'bras bu de dag ni gnas skabs mi gsal ba'i sgo nas tha dad pas de bzhin du gcig pa nyid kyang ma yin la/ rang bzhin nam spyi'i sgo nas gcig pas gzhan du tha dad pa yang ma yin no zhes rtogs par byed pa'o/ /de la chang dang chang gi myos pa dang de'i rgyur gyur pa dang / me tog dang 'bras bu dang / 'jim pa dang bum pa la sogs pa de dag ni mu stegs byed pa dag gis 'gyur ba re re rnam par brtags te de la phyi rol gyi ngo bor gyur pa'i 'gyur ba ni kun rdzob tsam du yang mi 'thad la/ zho dang 'o ma la sogs par snang ba shes pa'i ngo bo gyur pa yang re re ba nyid du mi 'thad de/shes pa'i bdag nyid skad cig tu skye zhing 'gag par 'gyur ro/ /skad cig ma nyid du yang sngar bshad pa ltar don dam par grub pa med do/ /de bzhin du zhes pa la sogs pa'i don ni phyi rol bzhin du rnam par rtog pa'i bdag nyid goms pa rgyun gyis 'jug cing sdog pa yang don dam par ngo bo nyid med par blta ste/blo gros chen po ji ltar sgyu ma dang rmi lam gyi gzugs 'byung ba dang ldog pa mthong ba bzhin du phyi rol gyi ngo bo'am rnam par rtog pa'i bdag nyid du snang ba 'di la/ chos gang 'jug pa'am ldog pa med do/ /tshigs su bcad pa'i don ni sa la sogs pa'i 'byung ba dang /'byung ba las gyur pa gzugs la sogs pa'i phyi'i skye mched dang / nang gi skye mched rnams dang / dus kyi dbang gis khyad par du 'gyur ba'o/ /de las gzhan pa'i rgyus khyad par du 'gyur ba'o/ /de bzhin du gru bzhi la sogs pa'i dbyibs dang /dbyibs kyi 'gyur ba la sogs pa sngar bstan pa rnams dang / srid pa bar ma bsdu ba ste/ sems can rnams kyi sems rgyud 'gro ba gzhan du nying mtshams 'brel par byed pa na skye gnas gzhan nas 'phos te bar do'i phung po 'grub pa dang /de las las ji lta ba bzhin du 'gro ba gzhan du nying mtshams 'brel bar byed pa'o/ /de la bsdu ba ni sems kyi rgyud la 'brel pa'o/ /yang na de nyid bsdus te/ tshe 'pho ba'o/ /de 'dra ba la sogs pa'i dngos por rtog pa ni phyin ci log pa'o/ /de nas tshigs su bcad pa gcig gis ni 'gyur ba dang bcas pa'i rten 'brel sgyu ma lta bur ston to//de rnams kyang ji ltar khyed kyi skad cig 'jig ces dris pa'i lan du sbyar te/ zhib tu ni 'og nas kyang ston par 'gyur ro/ /de nas yang byang chub sems dpa' zhes pa la sogs pas rten 'brel gyis bsdus pa mtshams sbyor ba 'jug pa dang /ldog pa'i tshul rgyas par ston to/ /'di rnams kyang bcings pa su lags gang gis grol zhes dris pa'i lan du sbyar bar bya'o/ /de la mtshams sbyor ba ni gang gis rigs phyi ma skyed par byed pa ste/ 'dir chos thams cad ni sems tsam du 'dus la/ de yang phyin ci log dang phyin ci log ma yin pa gnyis las/ phyin ci log gi rnam par rtog pa gang gis rigs phyi ma nying mtshams 'brel par byas shing srid pa'i yan lag lugs su 'jug par 'gyur la/ phyin ci ma log pa'i sems gang gis de'i rang bzhin yongs su shes pa ni srid pa'i yan lag lugs las ldog cing mtshams sbyor ba med par 'gyur ba'o//mtshams sbyor ba dang mtshams sbyor ba ma lags pa thams cad kyi thabs la mkhas pa ni gal te sems can gyi don du srid par nying mtshams sbyor ba de lta na yang bden pa gnyis kyi thabs la mkhas pas bdag nyid 'ching bar mi 'gyur ba'o//sgra ji bzhin gyi don ni phung po la sogs pa yod par bstan pa'i don la'o/ /stobs ni rnam pa bcu ste de yang sngar bstan pa ltar/ de bzhin gshegs pa'i stobs dang mi 'jigs pa la sogs pa'i rigs tsam byang chub sems dpa'i sa brgyad pa nas thob par gsungs pa'am/gzhan yang 'phags pa rnam par 'phrul pa'i rgyal pos zhus pa las byang chub sems dpa' nyid kyi stobs bcu la sogs pa gsungs so/ /gzungs kyi phyag rgyas btab pa ni gang gis ji lta de kho na nyid kyi don ji lta ba bzhin du rtogs pa rnams chud mi gson cing 'dzin pa ste/dran pa dang shes rab kyis bsdus pa'i phyag rgyas rgyas btab pa'o/ /de nyid rim gyis mthar thug pa'i gnas bcu dang shin tu 'brel pa'i blo ste/ chos kyi sku'i ye shes la brten nas zla ba dang nyi ma la sogs pa ltar rtogs pa med cing / lhun gyis grub par sprul pa'i 'od zer sna tshogs kyis sems can gyi don byed cing /chos thams cad la rang gi rnam par rtog pa zhes pa la sogs pa sbyar bar bya'o/ /sangs rgyas kyi sa yang chos kyi sku'i ye shes de nyid do/ /sgra gzhan gyi rnam grangs la 'jug pa'i gnas kyis rab tu 'god par 'gyur zhes pa ni chos so so yang dag par rig pa'am/nges pa'i tshig so so yang dag par rig pas go rims bzhin du don gcig nyid rnam grangs du ma'i sgo nas ston par mkhyen pa dang / 'gro ba sna tshogs kyi skad mkhyen pa'i sgo nas so so'i skad du chos ston pa ste/ ji skad du/ 'gro ba kun gyi skad rnams ji tsam par//thams cad skad du bdag gis chos bstan to/ /zhes gsungs pa lta bu'o/ /yang gdul bya'i mos pa ji lta ba bzhin du don sna tshogs ston pa'i sgra sna tshogs bstan pa'i sgo nas kyang ngo / /de la gnas ni de ltar mkhyen par spyod pa'i ye shes so/ /lam gyi skabs su sems can rnams kyi log pa'i lam la mtha' med mod kyi/de dag las phyogs 'ga' tsam bstan pa ni/ mtshan nyid la mngon par chags pa zhes pa la sogs pa ste/ don go bar zad do/ /rang gi rnam par rtog pa mngon par rtogs pa'i mtshams sbyor ba dang / theg pa mngon par rtogs pa rnam par rtog pa'i mtshams sbyor ba ni/ gnyen po la mngon par zhen pa'i rtog pa'o/ /yod pa dang med pa'i phyogs mu stegs can gyi gnas ni sngar bstan pa ltar bdag rtag pa zhi ba'i ngo bor ni yod la de las gzhan pa'i ngo bor med ces rtog pa'o/ / mtshams sbyor ba de dag la mtshams sbyar zhes pa ni rang gi rigs kyi rgyu snga ma de dag la mtshams sbyar nas rigs mthun pa'i rtog pa phyi ma rnams mtshams sbyor ba'i mtshan nyid la yang dngos po dang dngos po med par mngon par chags shing zhen pas ji ltar dar gyi srin bu rang gi lus las byung ba'i spu yis bcings pa ltar rtog pa'i ngo bor gyur pa'i rnam par shes pa las byung ba'i rnam par rtog pas rang nyid bcings shing gzhan yang 'ching bar 'gyur ba'o//gal te de ltar na thar pa nyid mi 'thad do zhe na/ blo gros chen po zhes pa la sogs pa smos te/ rtog pa dang brtag par bya ba'i don dben par mthong bas de dag las grol ba'o//chos thams cad la dben par lta zhing gnas zhes pa ni don dam par shes pa'i bdag nyid du gyur pa'i chos kyang dben par lta zhing / yun ring du bsgom par bya'o/ /gzhan yang zhes pa la sogs pa la don ni phyi'i don yang dag pa'i kun rdzob tsam du yang dben pa nyid du mthong zhing goms pas mtshams sbyor ba ldog pa'o//gzhan yang blo gros chen po zhes pa la sogs pas nyon mongs pa'i phyogs kyis bsdus pas 'gro ba gzhan dang gzhan du nying mtshams 'brel par byed pa gsungs te/ 'dod chags la sogs pa ni go rims bzhin du khams gsum gyi mngon par zhen pa dang /sdug bsngal lam sdug bsngal gyi gnas su snang ba la/ sems khong nas 'khrugs pa kun nas mnar sems can dang / ma rtogs pa dang / log par rtogs pa dang / the tshom gyis bsdus pa khams gsum gyi mi shes pa'o//nyon mongs pa de rnams kyis kun nas bslang ba'i mi dge ba'i las sam/ las kyi sa bon la dga' ba'i 'dod chags dang ldan pa yang srid pa can gyi srid pas mthu dang ldan par byas pa dang / de bzhin du ma rig pa'i rkyen gyis zag pa dang bcas pa'i las dge ba la sogs pa la yang sbyar bar bya ste/de lta na sa bon dang ldan pa'i kun gzhi la sogs pa gang la mtshams sbyar nas 'gro ba rnams kyi mtshams sbyor bar 'byung ba ste/ 'bras bus bsdus pa'i rnam par shes pa dang / ming dang gzugs la sogs pa mngon par grub pa'o/ /de ltar na thar par mi 'thad do zhe na/blo gros chen po zhes pa la sogs pa gsungs so/ /yang dag pa'i shes rab kyis gti mug rnam par bzlog ste/ chags sdang la sogs pa'i yul stong pa nyid du rtogs pa na de 'dra ba'i mtshams sbyor ba chad nas thar par 'gyur ba'o/ /gzhan yang blo gros chen po zhes pa la sogs pas da ltar ba'i tshe 'di nyid las ma 'ongs pa'i tshe gzhan du mtshams sbyor ba ston te/yul dang dbang po dang / rnam par shes pa gsum 'dus pa'i tshul gyis yul yongs su gcod pa'i reg pa dang / de'i bya ba sbyor ba ste/ reg pa'i rkyen gyis byung ba'i tshor ba dang /tshor ba'i rgyu la mngon par chags pa'i srid pa dang len pas ma 'ongs pa'i skye ba 'grub pa'i las mthu dang ldan par byas pa'i srid pas ma 'ongs pa'i skye ba la sogs pa 'grub pa'i tshul gyis mtshams sbyor ba ste/ de ltar na kun nas nyon mongs pa rnam pa gsum gyi tshul gyis bar chad med par sred pa mtshams sbyor bar 'gyur ro//de'i phyir mdo 'dis kyang rten cing 'brel par 'byung ba tshe gsum la rdzogs pa nyid du bstan te/ 'di'i don rgyas par ni sngar bstan to/ /rnam par shes pa rnams kyis zhes pa la sogs pas de dag lugs las bzlog pa nyid ston te/ don sngar bstan pa bzhin shes par bya'o//tshigs su bcad pa'i don ni phal cher go bar zad do/ /dngos por shes pa'i sgra 'dzin pas zhes pa ni sgra dang 'dres pa'i don 'dzin pa'am/ yang na sgra las ma gtogs pa'i dngos po med pas de ltar 'dzin pa ni ming gi rang bzhin gyi sgra nyid 'dzin pa'o/ /yang blo gros chen po zhes pa la sogs pas brtsad pa spong ba'i sgo nas sngar bstan pa'i don rgyas par 'chad de/mtshan nyid mi rig ces pa ni rtog pa'i blo yis so/ /bcom ldan 'das kyis de skad bka' stsal zhes pa la sogs pa'i don ni le'u dang por 'bod 'grogs la gsungs pa'o/ /de la 'phags pa'i ye shes la sogs pa gsum ni go rims bzhin du sangs rgyas kyi spyan chos thams cad kyi yul can dang /chos kyi spyan 'phags pa'i gang zag gi rnam par dbye ba rtogs pa dang / shes rab kyi spyan dang sbyar bar bya'o/ /yang na ye shes dang mthong ba ni 'khrul pa med pa dang /rtog pa med pa ste rtog pa dang bral zhing ma 'khrul pa'i ye shes so/ /de nyid don ji lta ba bzhin du rtogs pas shes rab ces kyang bya'o/ /yang rnal 'byor spyod pa'i sa las shes pa ni rab tu 'byed pa'i don to/ /mthong ba ni rab tu tshol ba'i don te/ 'di ltar zag pa med pa 'phags pa'i ye shes kyis rab tu rnam par 'byed cing /yongs su tshol ba'i phyir 'phags pa'i shes pa dang mthong ba zhes bya'o zhes gsungs so/ /gzhan yang shes rab kyi pha rol tu phyin pa rdo rje gcod pa'i 'grel pa las slob dpon dbyig gnyen gyis/ 'phags pa'i ye shes mngon sum gyi tshad ma ni shes pa dang mthong ba zhes pa'o//shes pa 'ba' zhig bstan pa gang yin pa de ni 'di lta ste/ shes pa 'di yis shes par 'gyur ba'o/ /des kyang tha mal pa'i mig gis blta ba las kyang rnam par 'byed do/ /mthong ba kho na bstan pa gang yin pa de ni 'di lta ste/sha'i mig la sogs pas mthong bar 'gyur ba'o/ /des kyang rjes su dpag pa'i shes pa las rnam par 'byed do zhes gsungs te/ 'dir ni de rnams rjes su 'brel pa ma yin te/ gzhung dang mi mthun pas so/ /blo gros chen pos gsol pa zhes pa la sogs pas ni sangs rgyas kyis gsungs pa'i don rjes su brjod pa ste/de la 'phrul gyi mig ni lha'i spyan te/ gtso bor sngon gyi rnam par smin pa las byung zhing ye shes la brten pa ste/ ji skad du/ shes rab kyi pha rol tu phyin pa las/ byang chub sems dpa' lha'i spyan gyis ni sum cu rtsa gsum pa la sogs pa'i lha rnams kyi lha'i mig shes la/lha rnams kyi mig gis ni byang chub sems dpa'i lha'i spyan shes par mi nus so zhes pa la sogs pa gsungs pa lta bu'o/ /sha'i mig ni ji skad du/ 'phags pa nyan thos rnams kyi dbang du byas na/ stong gsum gyi stong chen po'i 'jig rten gyi khams la thug pa'i bar du mthong ba dang /dbang po la brten pa'o zhes gsungs pa lta bu'o/ /de dag gis mthong ba ma yin pa 'phags pa'i ye shes la sogs pas dngos po'i ngo bo nyid rtogs pa de bzhin du bden gyi/ byis pa'i skye bos ji ltar brtags pa de ltar ma lags na zhes sngar gsungs pa'i don rjes su brjod pa'o//bcom ldan 'das zhes pa la sogs pas byis pa'i skye bo'i dogs pa dang bstun nas/ de nyid bsal ba'i don du skyon brjod pa'o/ /de'i don yang ji ltar byis pas 'phags pas rtogs par bya ba'i ngo bo khong du ma chud pa'i phyir phyin ci log gi rnam par rtog pa ldog par mi 'gyur ba dang /gzhan yang de lta na byis pa'i blo phyin ci log 'ba' zhig tu ma nges te/ 'phags pas rtogs par bya ba'i dngos po'i ngo bo'i rang bzhin khong du ma chud pas phyin ci ma log pa yang ma lags shing / yang kun nas nyon mongs pa'i gzhan dbang rnam par rtog pa'i bdag nyid yod pa dang med pa'i mtha' gnyis las log pa so so rang gi rig pa'i phyir/phyin ci log pa yang ma lags zhes pa'o/ /gal te de lta na byis pa'i skye bo thams cad grol ba nyid du 'gyur ro zhe na/ ma yin te/ dngos po'i ngo bo ji lta ba bzhin du rig cing yul du byas mod kyi/sngar bstan pa ltar/ gzugs chos mthun pa mthong ba las/ /nya phyis la dngul rnam pa ltar/ /phyin ci log gi sgro 'dogs ma chod pa'i phyir ro/ /bcom ldan 'das zhes pa la sogs pas ni 'phags pa nyan thos la sogs pa rnams kyis phung po la sogs pa'i dngos po mi rtag pa dang du ma'i rang bzhin la sogs par rnam par brtags shing /de ltar rtogs pa'i blo yang / rang gi mtshan nyid don dam pa'i yul la/ spyod yul du byed cing rtogs pa ma lags pa'i phyir/ ji ltar brtags pa de bzhin du bden par mi 'gyur ba'o/ /bcom ldan 'das zhes pa la sogs pas byis pa dang 'phags pa de dag gis yul du byas pa'i gzhan gyi dbang gi dngos po'i rang bzhin dang /mtshan nyid de yang rgyu ma bstan pas zhes pa ste/ rnam grangs kyi kun du brtags pa'i rang bzhin sgyu ma lta bu'i rgyu las byung gi /dngos po yang dag pa'i rgyu las ma byung ba la/de ltar ma bstan cing ma rtogs te/ dngos po yang dag pa'i rgyu las byung ba nyid du kun brtags pas mi bden pa'i don blo yis gzhag pa'i phyir kun brtags pa'i rang bzhin nyid snang ba'o/ /de ltar na dngos po'i mtshan nyid la lta bar lhung bas phyin ci log pa'i blo las gzhan dag gi spyod yul du 'gyur te/de'i phyir de ltar 'dzin pa'i blo yis dngos po'i rang gi mtshan nyid khong du ma chud pa'i phyir phyin ci log phyi ma'i mtha'i thug pa ma mchis par 'gyur te/ rnam pa thams cad du ldog pa med par 'gyur zhes pa'o/ /bcom ldan 'das zhes pa la sogs pa don de rnams nyid rgyas par ston te/kun brtags pa'i rang bzhin gyi rgyu las skyes pa ni sngar bshad pa ltar rnam grangs kyi kun du brtags pa ste/ de ltar rtog pa'i gzhan dbang snga ma rnams kyi rgyu las skyes pa don dam pa'i dngos po'i rang bzhin gyi mtshan nyid ma lags pa na zhes pa'o//de ltar ma lags bzhin du yang dag pa'i dngos po'i rgyu las skyes shing / de 'dra ba'i dngos por kun brtags pas ji ltar na kun brtags pa'i rang bzhin du mi 'gyur te/ de 'dra ba'i gzhan dbang ni kun du brtags pa 'ba' zhig tu 'gyur ba'o/ /de'i don yang sgyu ma lta bu'i gzhan dbang la don dam pa'i dngos por brtags pa ni mi bden pa'i don blos brtags pa'i phyir/brtags pa 'ba' zhig tu 'gyur zhes pa'o/ /brtags pa ji lta bur/ brtags pa de bzhin zhes pa ni don gcig pa ste snga ma'i bshad pa nyid du phyi ma sbyar bar bya ba'o/ /bcom ldan 'das zhes pa la sogs pas ni sgyu ma lta bu'i gzhan dbang don dam pa'i dngos po'i rang bzhin ma yin te/de dag rgyu mi mthun pa'i phyir zhes pa'o/ /de'i don ni sgyu ma lta bu'i gzhan dbang rnam par rtog pa snga ma las byung ba dang / dngos po'i rang bzhin don dam pa pa yod na don dam pa'i rgyu las 'byung bar 'thad pa'i phyir ro//de la 'dir byis pa so so'i skye bo rnams kyis sgyu ma lta bu'i gzhan dbang so sor rnam par rtog pa'i mtshan nyid kyang / don dam pa'i dngos po'i rang bzhin gyi mtshan nyid du brtags la/ de yang so sor rnam par rtog pa'i mtshan nyid du brtags pa na phan tshun du ji ltar brtags pa 'ba' zhig tu 'gyur te/mi bden pa'i don blo yis sgro btags pa'i phyir ro zhes skabs kyi don bstan par bya'o/ /'di ltar zhes pa la sogs pas brtsad pa'i don bsdu ba ste/ phyin ci log gi rtog pa bzlog pa'i don du ji ltar 'phags pa'i ye shes la sogs pa'i yul yod pa nyid du so sor rnam par rtog pas brtags pa de bzhin du med do zhes bgyi'am/gzhan yang sngar bya rgod phung po'i ri la yod pa dang med pa'i mtha' gnyis su lta ba bzlog pa ste/ yang mdo sde 'di dang dgongs pa nges par 'grel pa la sogs pas dngos po'i rang bzhin la mngon par chags pa ste/byis pa'i skye bo rnams kyi spyod yul rnam par rtog pa'i gzhan dbang yod par bstan pas de la mngon par chags pa dang / 'phags pa'i ye shes kyi spyod yul dang / yul yod par bstan pas yod par lta ba la 'god cing / ye shes kyi ngo bo nyid kyang yod par bstan pas sngar rab tu dben pa'i chos bstan pa ma mchis par bgyi'am ci lags zhes ma rangs pa'i tshul gyis brtsad pa'o//lan gyi don ni de ltar bstan pa ni gzhug pa la ldem por dgongs pa yin gyi/ sgra ji bzhin gyi don du ma yin zhes pa'o/ /rnam pa gcig tu na 'phags pa'i shes rab kyi mig gis dngos po'i rang bzhin ji ltar rtogs pa de lta bur dngos po'i rang bzhin no zhes pa'i don ni dngos por snang ba rnams kyi rang bzhin sgyu ma lta bur rtogs pa de lta bur dngos po'i chos nyid yin no zhes sgra ji bzhin gyi don du yang 'gyur mod kyi/'on kyang dngos po'i sgra smos pas don dam pa'i dngos por yang byis pa'i skye bo dag dogs par 'gyur bas/de 'dra ba'i sgra ni dgongs pa can nyid yin zhes pa'o/ /mngon par chags pa'i mtshan nyid du lta bas rab tu bden pa'i chos ston zhes pa ni de 'dra ba'i thabs la brten nas mthar gyis rab tu dben pa rtogs par byed ces pa ste/'di'i don ni sngar rgyas par bstan no/ /dngos po'i rang bzhin bstan pa ni ma byas mod kyi zhes pa la/ de nyid mthar thug pa'i don yin zhing de 'dra ba'i rtogs pa la dgod par bya ba'i don du ma bstan zhes pa'o/ /blo gros chen po zhes pa la sogs pas de bzhin gshegs pa bdag nyid kyis dben pa'i chos rtogs pa na yang /thog mar dngos por 'dzin pa'i thabs la brten nas/ mthar gyis dben pa'i chos rtogs pas gzhan la yang de bzhin du ston pa ste/ ji skad du/ skyob pa nyid gzigs lam gsung ba/ /'bras med phyir na brdzun mi gsung //zhes gsungs pa lta bu'o/ /gzhan yang blo gros chen po zhes pa la sogs pas sngar chos thams cad skye ba med pa la sogs par dam bcas pa na byis pa'i skye bo dag de ltar na mngon sum la sogs pa dang 'gal bar 'gyur ro snyam du dogs pas de dag bsal ba'i don du de bzhin gshegs pas kun rdzob kyi skye ba la sogs pa med do zhes dam bca' bar mi bya ba ste/byis pa'i smra ba bden par 'gyur ba'i phyir ro zhes nye bar gdams pa'o/ /de'i don ni dam bca' ba'am/ dam bca' ba'i tshig kyang chos thams cad kyi nang du 'dus pas kun rdzob du yang ma skyes par 'gyur ba dang /yang dam bca' ba'i don de ltar shes shing 'dod pa'i rgyu yis tshig 'jug par 'dod pas shugs la skye ba khas blangs pa'i phyir/ dngos kyi dam bca' ba dang / shugs kyi dam bca' ba gnyis 'gal bar 'gyur bas dam bcas pa las nyams pa'o/ /gzhan yang dam bca' ba'i tshig las pha rol po la rtogs pa skye bar 'dod la/de yang chos thams cad kyi nang du 'dus pas ma skyes par yang khas blangs pa'i phyir bdag nyid kyi tshig 'gal bas dam bcas pa las nyams pa'o/ /dam bcas pa'ang zhes pa la sogs pas don de nyid rgyas par ston te//dam bca' ba'i tshig dam bca' ba'i don shes pa dang de ltar bstan par 'dod pa las byung bar don gyis khas blangs pas zhes pa ste/ sngar bstan pa bzhin no/ /de ste zhes pa la sogs pas dam bca' ba'am/ de'i tshig kun rdzob tu ma skyes par 'dod na/ de dag rang gi ngo bo ma thob pa'i nyams pa nyid du 'gyur ba ste/bdag nyid la bdag nyid slu bar byed pa 'ba' zhig tu zad do/ /dam bcas pa yang mtshan nyid tha mi dad zhes pa ni chos thams cad kyi nang du 'dus pas de rnams las mtshan nyid gzhan med pa'o/ /dam bca' ba'i yan lag gi rgyus zhes pa la sogs pas na don de nyid rnam par phye ste ston pa'o//de'i don ni dam bca' ba'i yan lag dang / gtan tshigs kyi yan lag dang / dpe'i yan lag ste rnam pa gsum las/ 'dir dam bca' ba'i yan lag ste/ chos thams cad ni yod pa dang med pa las ma skyes so zhes dam bca' ba yin la/ de nyid rgyu mtshan gyi rgyu yang yin pas yan lag gi rgyus zhes gzhi mthun pa'i bsdu ba nyid du sbyar bar bya'o/ /rgyu mtshan des na ma thob pa'i nyams pa'am/ 'gal ba khas blangs pas nyams pa nyid du 'gyur ba'o/ /blo gros chen po zhes pa la sogs pas dam bca' ba'i don de ltar 'dod pa'i blo dang /dam bca' ba'i tshig ma skyes pa de yis dngos po thams cad ma skyes pa'o zhes dam bca' bar byed na zhes pa dam bca' ba'i don 'jog cing rtogs pa skyed par byed pa na yang / dam bcas pa las nyams par 'gyur te/ skye ba'i khyad par blangs pa'i phyir ro/ /dam bcas pa zhes pa la sogs pas ni gzhan dag dam bcas pa'i tshig la sogs pa ma skyes pa'i dngos po'i mtshan nyid du grub pas ma thob pa'i nyams par mi 'gyur ro zhe na/ma skyes pa'i dngos po ni 'gal bas de ltar dam bca' bar mi bya zhes pa'o/ /blo gros chen po zhes pa la sogs pas de nyid rgyas par 'chad pa'o//yan lag phan tshun zhes pa la sogs pa'i don ni de ltar dam bcas pa'i yan lag las gtan tshigs dang dpe'i yan lag 'jug cing / de dag las kyang dam bca' ba'i yan lag gi don rtogs pa dang / de 'dra ba'i tshig 'jug pa'i phyir/ phan tshun du rgyur gyur pa'i mtshan nyid mi 'dra ba dang /de dag gis kyang 'bras bu'i bye brag mi 'dra bar byas shing / de ltar khas len pa'i phyir 'gal bar 'gyur bas yan lag rnams dam bca' bar mi bya'o zhes gdams pa'o/ /gal te de lta na de bzhin gshegs pa nyid kyis sngar gsungs pa dang 'gal lo zhe na/ blo gros chen po zhes pa la sogs pa gsungs te/de ltar kun rdzob tsam du yang chos thams cad ma skyes pa dang stong pa la sogs par dam bca' bar mi bya mod kyi sngar bstan pa'i don ni sgyu ma la sogs pa ltar don dam pa'i dngos por ma skyes shing ngo bo nyid med pa la sogs pa dang / kun rdzob tu de ltar snang ba ste/zung du 'jug pa nyid du bstan pa'o/ /gzhan du na zhes pa la sogs pa'i don ni kun rdzob tu ma skyes pa la sogs pa las gzhan no/ /don dam par ma skyes pa la sogs par bstan pas byis pa rnams yod par 'dzin pa'i phyogs su lhung ba de dag skrag par mi 'gyur ba dang / med par 'dzin pa'i phyogs su lhung ba rnams kyang skrag par mi 'gyur ba'o/ /yang na kun rdzob dang don dam pa la dgongs te/ skye ba dang skye ba med pa la sogs par bstan pas byis pa rnams go rims bzhin du yod pa dang med par 'dzin pa'i skrag pa spong bar 'gyur ba'o/ / snang ba dang mi snang ba'i mtshan nyid zhes pa ni gzhan gyi dbang gi bdag nyid kun rdzob tsam du snang ba dang / rigs pas dpyad pa'i don mi snang ba'i mtshan nyid yin pa'i phyir/ de 'dra bas bsdus pa'i chos thams cad sgyu ma dang rmi lam lta bu'o/ /lta ba dang blo slu bar byed pa ni gzhan gyi dbang la dngos po'i bdag nyid du lta ba dang /de ltar 'dzin pa'i blo slu bar byed pa'i phyir yang chos thams cad sgyu ma lta bu zhes pa la sogs pa'o/ /tshigs su bcad pa'i don ni phal cher shes par zad do/ /rang bzhin ni kun du brtags pa la sogs pa gsum mo/ /dngos po ni phyi dang nang gi skye mched gzugs can no//med kyang de ltar snang ba ni shes rab kyi g.yo ba med pas/ ro dang 'dra ba'i byis pa log pa'i rtog pa can rnams kyis brtags pa'o/ /gal te de ltar na/ rnam rtog rjes su 'brel pa las/ /don gsal snang ba yod ma yin/ /zhes gsungs pas brtags pa yin na/gsal bar snang ba mi 'thad do zhe na/ skyon med do gsal bar snang ba ni dngos su brtags pa ma yin zhing brtags pa'i dbang gis snang bar 'dod pa'i phyir ro/ /gzhan yang bden pa gnyis kyi dbye ba la ma ltos par/ chos thams cad ma skyes pa la sogs par bstan pa ni don dam par skye ba nyid du lta ba'i mu stegs can gyi blo bzlog pa'i phyir bstan pa dang /gzhan yang don dam par rkyen las skye ba med pas so/ /yang kun rdzob tu dngos po thams cad mi skye bar dam bca' ba'i don la bden pa nyid du mi brtags te/ de 'dra ba'i dam bca' ba 'grub pa'am/de'i tshig rgyu dang ldan par 'dod pa'i phyir 'gal ba'am/ gal te tshig dang dam bca' ba'i don 'grub par 'dod na/ de dag blo yang nyams par 'gyur zhes pa ste/ ma thob pa'i nyams pa'o/ /de bzhin gshegs pas sgyu ma la sogs pa bzhin du ma skyes par bstan pa la ni 'gal ba'i skyon med de/don dam par ma skyes shing kun rdzob tu de'i tshig la sogs pa skye bar 'dod pa mi 'gal ba'i phyir ro/ /ji ltar zhes pa la sogs pas med bzhin du snang ba dpe'i sgo nas ston pa'o/ /rnam par thar pa gsum ni stong pa nyid la sogs pa'i ting nge 'dzin dang shes rab ste/de goms pa las dag pa skyes pa'o/ /ji ltar dngos po dngos med dang / /mnyam pa nyid du ji ltar byed/ /ces pa ni dngos po dang dngos po med pa'i mtshan mar 'dzin pa spangs shing / rig pa dang stong pa zung du 'jug par rtogs shing / 'od gsal ba'i rang bzhin du ji ltar 'gyur zhes dris pa'o//'jig par byed pa ni phyin ci log gi dmigs pa dang / dmigs par bya ba'i mtshan ma nye bar zhi ba'o/ /blo gros chen po zhes pa la sogs pas dmigs bya dmigs byed la sogs pa'i mtshan ma med pa'i rnam par rig pa tsam la brtsad pa spang ba'o/ / de la tha mi dad par khong du ma chud pa ni sna tshogs sems su ro gcig pa dang / de yang stong pa nyid du ma rtogs pa'o/ /gzhan yang mtshan nyid sna tshogs su snang bas shes pa gnyis su med pa'i ngo bo nyid zil gyis mnan nas shes pas mi dmigs pa ste/ ji ltar nyin mo'i dus na skar ma sna tshogs yod bzhin du nyi ma'i 'od zer gyis zil gyis mnan nas mi dmigs pa lta bu'o//yang na 'di rnams kyi don ni rang dang spyi'i mtshan nyid sna tshogs su snang ba/ gtso bo'am bdag shes pa rig pa tsam du rig par khong du ma chud pa'am/ de 'dra ba la sogs pa'i dngos po'i ngo bo 'ga' zhig gis mtshan nyid sna tshogs kyis zil du brlag pa'i phyir mi dmigs zhes sbyar bar bya'o//shes pa ma lags zhes pa'i don ni gal te shes bya yod bzhin du shes pas mi dmigs pa ste/ dmigs pa bkag pa'i med dgag nam mkha'i pad ma lta bu yin na de shes pa nyid du mi 'thad la/yang dmigs pa med pa'i myong rig tsam gyi ngo bo yin yang yul de la ltos te/ shes pa nyid du mi 'thad de/ yul yod bzhin du ma shes pa'i phyir ro/ /gal te myong ba'i ngo bo yin pas shes par 'thad do zhe na/ de ltar na bden mod kyi/ de kho na nyid ji lta ba bzhin du shes pa med pas yang dag pa'i shes rab kyis bsdus pa lam dang 'bras bu mthar thug pa nyid du mi 'thad ces pa'o//bcom ldan 'das zhes pa la sogs pas yul med pa la/ de ltar snang ba'i blo byung ba yang med pa'i yul de la ltos te/ shes pa nyid du mi 'thad de/ ci yang shes pa med pa'i phyir ro/ /des na yul ji lta ba bzhin shes pa ni shes bya'i don ji lta ba dang ldan pas shes pa zhes bya'o/ /blo ma tshang zhes pa ni blo'i 'gal rkyen nye bar gnas pa'am/ mthun rkyen ma tshang bas so/ /'dir lan gyi don ni gnyis su med pa'i ye shes de nyid de ltar bstan pa'i rgyu mtshan gyi sgo nas mi shes pa ma yin te/blo gros chen po ngas shes bya'i don yod bzhin du shes pas mi dmigs pa la dgongs te/ dmigs bya'i don shes pas mi dmigs pa'i tshe rnam par rig pa tsam du gzhag pa yin no zhes ma bshad de/ 'on kyang dmigs bya'i don dam pa stong pa nyid du rtogs pas mi dmigs shing myong ba 'gags pa ni rnam par rig pa tsam mo//yod pa dang med pa las phyi rol gyi dngos po med ces pa ni de dag las skye ba'i tshul gyis phyi'i dngos po grub pa med pa'o/ /rtog pa can zhes pa la sogs pas rang gi sde pa phyi'i don du mngon par zhen pa rnams kyis de ltar mi rtogs shing /ma rtogs pas phyi rol yan lag can gyi rdzas la sogs pa ni med do zhes rtogs par byas nas/ de 'dra ba'i rtog pa mi 'byung ba ni sems tsam du ston to/ /de dag ni rtag pa dang chad pa'i mtha' gnyis su ltung bar 'gyur ro zhes ston pa ni/bdag dang zhes pa la sogs pa'o/ /rnam par 'byed pa mi dmigs zhes pa ni 'byed pa'i shes rab mi dmigs pa'o/ /tshigs su bcad pa'i don ni phal cher go bar zad do/ /de dag rtog can rnams kyi tshul/ /gzhan min zhes mtshams bcad de/ de 'dra ba log pa'i rtog ges brtags pa'i tshul yin gyi/gnyis su med pa'i shes pa ma yin te/ de'i mtshan nyid med pa'i phyir ro/ /log pa'i shes pa zhes pa ni shes bya la ji lta ba bzhin du shes pa 'jug pa log pa'o/ /gzhan yang blo gros chen po zhes pa la sogs pas grub pa'i mtha' dang bshad pa'i tshul shin du rgyas par ston te/de la thog ma med pa'i dus kyi spros pa lus kyi gnas ngan len ni zag pa dang bcas pa'i lus kyi gnas ngan pa len par byed pa/ rang gi so sor rnam par rtog pa rgya mtsho'i rlabs ltar sna tshogs su 'jug cing / gar thabs su gar byed pa'o//thabs su bstan pa ni dben par rtogs pa'i yan lag tu bdag dang phung po la sogs pa yod par bstan pa la sogs pa'o/ /slu bar mi 'gyur ba ni log pa'i lam la 'jug par mi 'gyur ba'o/ /sna tshogs kyi mdo ni sngar bshad pa ltar gsung rab yan lag dgu'i chos bstan pa la sogs pa'o//rgyu dang lta ba dang rig pa'i mtshan nyid ni phyi rol pa la sogs pas brtags pa'i dbang phyug la sogs pa 'gro ba thams cad kyi rgyur 'dod pa'am/ de las gzhan pa rnams kyis kyang rung ste rgyu don dam pa nyid du brtags pa'o/ /lta ba ni 'jig tshogs la lta ba la sogs pa'o//rigs pa ni tha snyad pa'i tshad ma ste/ de'i yul las bzlog pa'o/ /de nas yang zhes pa la sogs pas grub pa'i mtha' phyin ci log dgag pa rgyas par ston te/ de la sngags dang spobs pa sna tshogs ni ke ba lang sna tshogs smra ba thod le kor kyi rig pa dang / de las gzhan shes rab la sogs pa'i mthu sna tshogs so/ /rgyu dang tshig ces pa la sogs pa ni log pa'i gtan tshigs dang dpe sna tshogs dang / tshig dang yi ge rnar snyan pa sna tshogs so/ /rigs pa dang ldan pa ni 'brel pa'i rtsa ba can gyi tshul gsum dang ldan pa'i rtags tshad mas grub pa ste/ de 'dra ba med ces pa'o/ /tshig dang yi ge rnams kyang bden pa'i don dang ldan pa ma yin te/ yang dag pa'i tshul la rab tu 'jug pas ma yin gyi log pa'i tshul la 'jug par byed pa'o/ /gzhan yang zlos pa'i mya ngan ni 'chi zhing 'bral ba'i tshe/ myos shing chags par 'gyur bas sems yongs su gdungs pa'o//mya ngan las byung ba'i tshig tu brjod pa ni smre sngags 'don pa'o/ /dbang po lnga'i nyams su bab pa ni sdug bsngal lo/ /yid kyi yul la lta ba'i nyams su bab pa ni yid mi bde ba'o/ /sdug bsngal dang yid mi bde ba mang po byung ba ni 'khrug pa ste/ de la sogs pa srid pa'i yan lag rnams so//gtsug lag mang po la mkhas pa ni rig pa'i gnas dang sgyu rtsal la sogs pa la mkhas par byed pa ste/ lha rnams kyi dbang po brgya byin no/ /de'i 'khor 'dus pa'i nang du rdzu 'phrul gyis song ste/ kho bo rtsod pa las rgyal bar gyur na khyod kyi shing rta rtsib ma stong dang ldan pa bcag par bya zhing /khyed rgyal bar gyur na nga'i lus re re nas gcad do zhes so sor dam bcas pa'o/ /chos dang ldan pa ni tshig dor dang ltag chod la sogs pa ma yin te/ rig pa'i sgo nas so/ /byol song las bslabs pa ni klu'i skye gnas ni byol song gi 'gro bar gtogs pas so//blo gros chen po zhes pa la sogs pas ni de'i grub pa'i mtha' dang bshad pa'i tshul ston to/ /de la rab tu grags pa'i 'jig rten rgyang pan pa ni/ chang dang chang gi nus pa ltar sems can gyi lus nyid sems kyi rang bzhin du gsal ba 'jig rten snga ma nas ma 'phos pa/phyi mar mi 'gro ba'o/ /blo ni de dang tha mi dad pa mig gi blo la sogs pa'o/ /yul ni mngon par mi gsal ba'i sems can phyi'i 'byung ba chen po bzhi'o/ /de las gzhan pa'i skye ba dang 'gag pa'i khyad par khas len pa'am/ gzhan yang rung ste grub pa'i mtha' phyin ci log khas len pa thams cad ni nye bar brtags pa'i sgo nas 'jig rten rgyang pan pa zhes bya ste/'du ba dang zad par khas len par mthun pa dang / phyin ci log tu gyur pa nyid kyis mya ngan las mi 'da' ba nyid kyi phyir ro/ /de'i phyir de 'dra ba'i 'jig rten rgyang pan pa ni 'bum zhes pa nye bar mtshon pa ste/grangs mang ba nyid do/ /lnga brgya tha ma ni de bzhin gshegs pa'i bstan pa lo lnga brgya phrag brgyad dam bzhir gnas pa las de'i tha mar gyur pa ste/ de yang bzhi'i tha mar gyur pa la sbyar na 'grig par snang ngo / /de la ngan pa'i rtog ge pa rnams kyis 'byung ba 'phrod pa 'du ba'i rgyur lta ba bstan pas snga ma lta bu'i lus bsdus par gyur pa la/de nyid shi ba'i dus su gyes shing dengs par 'gyur ro zhes rang gi slob ma rnams la ston cing / sngar slob ma ma yin pa rnams kyang tshig dang yi ge snyan pas yongs su bzung nas de ltar ston pa'o/ /de yang rgyang pan pa dngos kyi bstan pa'i tshul lo//gzhan ni de dang rjes su mthun pa mya ngan las 'da' ba'i gegs su 'gyur ba ston par byed do/ /rnam pa gcig tu na/ rgyur lta ba bstan pas nyan pa po'i 'khor bsdus shing gyes par 'gyur zhes pa ste/ de bzhin gshegs pas chos ston pa na lha la sogs pa'i 'khor 'dus shing slar rang rang gi gnas su gyes par 'gyur ba lta bu'o//'jig rten rgyang pan gyi zhes pa la sogs pa'i don ni de'i tshig sna tshogs su 'brel pas snga ma ltar 'phrod pa 'du ba'i rgyu las sems can gyi lus bsdus shing gyes par bstan pa de nyid/ rang gi rgyu la chags shing zhen pa'i mu stegs byed rnams 'chad de/de dang rjes su mthun pa ston pa'o/ /de rnams kyang rang rang gi grub pa'i mtha'i tshul ni 'jig rten snga phyi yod cing / mtho ris dang mya ngan las 'das pa yang khas len mod kyang / de dang 'dra bar mya ngan las 'das pa nyid mi thob pas rang gi tshul las nyams shing rgyang pan pa dang mthun par 'gyur ba'o//blo gros chen po zhes pa la sogs pas de nyid rgyas par 'chad de/ rgyu'i sgo ni rgyu mtshan gyi rgyu'am/ skyed pa'i rgyu'i khyad par du ma'i sgo nas dngos po sna tshogs 'du zhing skyed pa dang / zad par 'gyur ba nyid du ston pa'o/ /blo gros chen po zhes pa la sogs pas de nyid la brtsad pa spong ba ste/gzhan dag de lta na de bzhin gshegs pa yang las dang nyon mongs pa'i rgyu las/ zag pa dang bcas pa'i phung po skye ba dang / de nyid 'jig pa la sogs pa phyi dang nang gi rten 'brel gsungs pas 'jig rten rgyang pan pa nyid du 'gyur zhes pa'o//lan gyi don ni de 'dra ba'i rgyu 'bras don dam pa'i dngos por khas mi len pas/ skyon med ces pa'o/ /'dus pa 'ong ba las 'byung zhes pa ni snga ma nas 'dir 'ong ba'i tshul gyis 'byung ba'o/ /'jug pa rnam pa gnyis ni dngos po med pa'am/ yang na gnas pa dang 'jug pa gnyis la sbyar bar bya'o//blo gros chen po ngas zhes pa la sogs pas/ phyin ci log gleng gzhi dang bcas te bstan pa'o/ /'thad pa'i gtan tshigs sna tshogs pa ni spyi gcig rjes su 'gro ba'am/ nges shes kyi blo 'jug pa dmigs pa'i phyir/ thams cad gcig pa'am/gzhan yang gnas skabs dang gsal ba'i bye brag 'gal bar dmigs pas tha dad pa'am/ de nyid kyi phyir dngos po rnams spyi dang rang bzhin gyi sgo nas gcig pa yang yin la/ gnas skabs sam gsal ba'i sgo nas tha dad pa yang yin pas gnyis ka zhes pa'o/ / gnyis ka ma yin pa yang de nyid las mtshon pas shes par zad do/ /lung bstan pa ni gcig dang tha dad pa la sogs par dris pa la lung ston pa'o/ /thams cad lung ma bstan pa ni sngar bstan pa ltar ram/ yang na mtha' gcig tu nges par lung bstan du med pas dris pa la lung bstan par bya ba ma yin zhes pa'o//'jig rten pha rol yod med gnyi ga zhes pa ni sngar gnyid kyis log pa las sad pa na sngar gyi gnas skabs de nyid kyang pha rol gyi grangs su gtogs pa'am/ yang tshe snga mas bsdus pa'i pha rol med pa yod med gnyis ka zhes pa'o/ /kye bram ze zhes pa la sogs pas kun rdzob tu skye ba dang 'gag pa'i tshul gsungs pa ste/de la phyi rol gyi dngos por 'gyur ba'i dmigs pa'i yul med pas de las skye ba ma yin pa'o/ /'di gnyi ga yang zhes pa ni rgyu las skyes pa'i dngos po'am/ rgyu med pa'i mtshan mar 'dzin pa'o/ /yid la rnam par g.yos pa ni sems nyid gnyug mar gnas pa'i chos nyid las so//de ltar na de kho na nyid kyi don las phyin ci log tu gyur pa thams cad ni sngar bstan pa ltar nye bar brtags pa'i sgo nas 'jig rten rgyang pan pa zhes bya'o/ /gal te de lta na nyan thos dang rang sangs rgyas rnams la thar pa mi 'thad par 'gyur ro zhe na/ sems ni dmigs dang bcas rnams kyi//mya ngan 'das pa dka' bar gnas/ /zhes gsungs pas mthar thug pa'i mya ngan las 'das pa mi thob pa'o/ /yang blo gros chen po zhes pa la sogs pas tshul gzhan gyi sgo nas brtsad pa spang ba ste/ de'i don ni bram ze rgyang pan pa gang dag gi grags pa ste/ grub pa'i don bsdus pa dang gyes pa ni mu stegs byed thams cad kyis dpe dang gtan tshigs du mas nye bar sgrub pa'i sgo nas ston pa ste/tshad mas grub pa'i don nyid ston pa yin la/ de 'dra ba ston pa yang 'jig rten rgyang pan pa yin na rgyang pan pa ma yin pa gang yang yod dam zhes 'khyog po'i dri ba ste/ thams cad kyang rgyang pan par 'gyur ro zhes brtsad pa'o/ /lan gyi don ni khyod kyi tshad mas grub par 'dod pa de 'dra ba yang ma yin la/ rnam pa thams cad du tshad mas ma grub cing tshig dang yi ge sna tshogs kyis nye bar bris nas tshad mas grub pa'i don mi ston pa yang ma yin la/ de 'dra ba ston pa'i theg pa chen po'i gsung rab don dang mi ldan pa yang ma yin te/don dang yang ldan pa yod la de 'dra ba'i don du mu stegs byed thams cad dang / khyod kyi blo yis mi rtogs pa rig pa dang stong pa zung du 'jug pa'i don spros pa dang bral zhing 'od gsal ba ni de bzhin du bden pa yin la/ de 'dra ba rnam par 'jog pa ni rgyang pan pa nyid du ji ltar 'gyur zhes pa'o//de la 'jig rten rgyang pan ni gang tshad mas ma grub cing gnod pa'i don ston pa de 'dra ba ma yin nam zhes pa ste/ de yang 'khyog po'i dri ba yin pas tshad mas gnod pa de 'dra ba ston pa ni rgyang pan pa yin la/ kho bo cag ni de 'dra ba ston pa ma yin pas de ltar mi 'gyur ba'o//'gro ba dang zhes pa la sogs pas 'gro ba lnga'am drug gi bye brag la sogs pa dngos po'i chos thams cad du 'du ba dang zad pas bsdus pa ston par byed pa ni rgyang pan pa nyid do/ /'dod pa ni 'dun pa'o/ /snyems pa ni sems khengs pa'o/ /bram ze de nyid 'jig rten pha rol ma yin nam zhes pa'i don ni gling de yang snod kyi 'jig rten gzhan yin la/de la gnas pa'i dus kyi khyod kyi phung po yang da ltar gyi phung po las gzhan yin pas de nyid dang de ltar gyi 'jig rten la ltos nas 'jig rten pha rol zhes bya'o/ /gal te de 'dra ba'i pha rol ni yod med kyi tshe snga mas bsdus pa'i pha rol ni med do zhe na/ma yin te/ de yang sngar bsgrubs zin to/ /nga la ma dris par zhes pa la sogs pas ni gzhan gyi tshul gsungs pa ste/ gzhan po de dag gi bsam pa'i tshul ni nga la ma dris par dge sbyong gau ta ma rang gi grub mtha'i tshul so sor rnam par gzhag pa brjod par sems te/de ni nga'i tshul lugs zab mo las phyi rol tu gyur pa'i don te/ nyon mongs sdug ge de ni 'jug pa med pa la sogs par smra zhing rang gi rnam par rtog pa'i mtshan nyid khong du chud par rlom pas rnam par rtog pa mi 'jug pa zab mo'i don la/ rang gis rtogs shing gzhan la smra ba'o snyam du sems pa'o//gzhan yang blo gros chen po khyod kyang ci'i phyir de ltar nga la 'dri zhes pa'i don ni rgyang pan pa bsnyen cing bstan na zang zing sdud kyi chos sdud pa min no zhes gsungs te/ ci'i phyir de ltar gsungs zhes nga la 'dri ste/ dri bar mi 'os zhes pa'o/ / bcom ldan 'das zhes pa la sogs pas ni chos dang zang zing gi bye brag so sor ston pa'o/ /zang zing dang zhes pa ni spyir 'du 'dzi sna tshogs pa'o/ /reg pa dang zhes pa la sogs pas 'khrig pa'i 'dod chags kyis kun nas bslang ba'i zang zing ste/ yul la lus kyis reg pa dang / lag pas 'dren pa dang / thal mos nyug pa dang thob pa bdag gir byas pas sems khengs pa dang / de dag gi bde ba'i ro myong ba dang / de las gzhan phyi'i yul sna tshogs la mngon par chags pa'o/ /ye shes su dbang bskur ba ni chos kyi rgyal po'i rgyal tshab tu dbang bskur ba rang rig pa'i tshul gyis rtogs pa ste thob pa'o/ /de bzhin du shes bya'i gnas thug pa med pa mkhyen pa dang /'jig rten dang 'jig rten las 'das pa'i chos thams cad la ji ltar 'dod pa bzhin lhun gyis grub par dbang byed pa'o/ /rgyu'i dngos po med pa'i phyir 'bras bu'i rgyun kyang ldog pas chad par lta ba dang / de 'dra ba'i 'dus byas kyi mtshan nyid skye ba la sogs pas mi mthong ba ni chos zhes bya'o//tshigs su bcad pa'i don ni/ bsdu ba'i dngos po bzhi la dang po sbyin pa dang snyan par smra bas ni sems can 'dul ba ste/ dang pos snod du rung bar byas shing de la pha rol tu phyin pa drug gi chos bstan pa'i sgo nas so/ /tshul khrims dang shes rab ni don mthun pa dang don spyod pa mtshon pa ste/de la tshul khrims kyis ni gzhan la ston pa ji lta ba bzhin du rang nyid bsgrub pas sems can dbang du byed pa'am/ de las ting nge 'dzin skye bas rang gi sems dbang du byed pa'o/ /shes rab kyis ni rang dang gzhan gyi lta ba phyin ci log 'joms par byed la/ rnam thar sgo gsum gyi ting nge 'dzin nam shes rab goms pas de nyid shin tu spel ba'o//de rnams kyis kyang rim pa bzhin du ma bsdus pa sdud pa dang / bsdus pa smin pa dang / smin pa grol bar byed pa nyid du yang gsungs so/ /de las gzhan sngar bstan pa'i tshul 'di kun 'jig rten rgyang pan pa zhes pa la sogs pa ste phal cher go bar zad do//rtag dang chad pa spangs pa yi/ /sems ni gzung dang 'dzin pa yi/ /dngos po rnam pa gnyis su snang / /zhes sbyar bar bya'o/ /sems 'jug pa ni rtog pa dang bcas pa'i yid kyi g.yo ba sna tshogs pa'o/ /de nas yang zhes pa la sogs pas thob bya'i 'bras bu mya ngan las 'das pa nyid du rgyas par ston te/ji skad du/ rgyang pan pa las gzhan pa'i mu stegs byed rnams kyang mya ngan las 'das pa khas len na/ de dag gi mya ngan las 'das pa dang / de bzhin gshegs pa nyid kyi mya ngan las 'das pa'i tshul ji ltar lags zhes zhus pa las/ lan gyi skabs su mu stegs byed ni sngar bstan pa ltar grub mtha' phyin ci log khas len pa thams cad yin la/de ltar na nyan thos dang rang sangs rgyas rnams ni zag pa dang bcas pa'i phung po la sogs pa sdug bsngal gyi bden pa 'gog pa dang / yul la 'dod chags dang bral ba ste/ rgyu kun 'byung gi bden pa spangs pa dang /de dag spong ba'i rgyu rtag pa dang chos mi mthun pa/ mi rtag pa la sogs pa chos bcu drug gi rnam pa mthong bas kun nas nyon mongs pa dang mtshungs par ldan pa'i sems dang sems las byung ba mang po mi 'byung ba ste/ dus gsum gyi yul las dran pa'i rnam par rtog pa mi 'byung ba'o//de yang mar me shi bar gyur pa la sogs pa bzhin du rgyu zad pas mi 'byung ba yin gyi/ brtag bya'i yul stong pa nyid du rtogs pas ni ma yin no/ /de yang sngar bden pa'i dngos por yod pa'i sdug bsngal dang kun 'byung glo bur du zad pa dang / mi skye ba'o zhes zad pa dang mi skye ba shes pa'i ye shes kyi dngos po 'jig par lta bas/phyin ci log tu gyur pa'i phyir mya ngan las 'das pa ma yin no/ /gzhan yang lam gyi dus na yang / de dag 'jig par lta bas phyin ci log tu gyur pa'i phyir mya ngan las mi 'da' ba'o/ /gzhan dag ni man ngag gi stobs kyi yul las rnam par rtog pa zad pas mda' dang rlung bzhin du bdag dam pa yul gzhan gyi gnas su song ste/ji skad du/ phyi rol pa rnams kyis khams gsum po thams cad kyi steng na thar pa'i gnas dpag tshad 'bum phrag bzhi bcu rtsa lnga pa gdugs lta bu yod do zhes te/ der song bas thar par 'dod pa la sogs pa lta bu'o//blo dang rig par bya ba ni gzung 'dzin sna tshogs pa ste/ de lta bur snang ba med pas bdag rtag pa thar par 'dod pa ste/ zhi ba pa rnams kyis 'dod pa'am/ sngar bstan pa'i mtshan ma sna tshogs kyi dngos po med pas mya ngan las 'das pa'o zhes gsungs pa dang yang sbyar bar bya'o//rtag pa dang mi rtag par mthong bas ni bdag la sogs pa 'ga' zhig ni rtag la/ gzhan gyi gzugs la sogs pa mi rtag par mthong ba'o/ /gzhan yang 'phags pa tshangs pa'i dra bas zhus pa'i mdo las/ kha cig rtag par rtog pa'i lta ba rnam pa bzhi gsungs pa dang yang sbyar bar bya'o//mtshan ma mthong bas bde ba 'dod/ /ces pa la sogs pas ni mtshan ma rnam par rtog pa ni skran dang zug rngu la sogs pa lta bur mthong bas des 'jigs pas de rnams spangs pa'i bdag rtag pa ni mchog tu dga' ba'i gnas kyi mya ngan las 'das par rig byed kyi mtha' gsang bar smra ba rnams rtog go//'dod pa'i phyir zhes pa ni 'dod pa'i yul de 'dra ba la mya ngan las 'das pa'i blo 'gyur ba'o/ /yang kha cig ste zhi ba pa dang gtogs 'dod pa dang / tshangs pa la sogs par smra ba rnams kyis dus gsum gyis bsdus pa'i bdag gi dngos po mi 'jig ste yod pa yin la/de 'dra ba su dag gis rig pa ni mya ngan las 'das pa ste/ ji skad du/ gtogs 'dod kyis yang smras pa/ 'byung po kun la bdag gnas pa/ /bdag la'ang 'byung po thams cad de/ /bdag ldan de ltar sus rig pa/ /kun du mnyam par mthong ba'o//gzhan yang / thams cad 'di ni zhi bdag ste/ /zhi ba nyid las rab tu byung / /'byung po kun la zhi ba ste/ /gang zhi de ni bdag nyid do/ /zhes pa dang / bstan pa byin 'gro de bzhin du/ /zhes pa la sogs pa gsungs pa'o/ /gzhan yang rang gi sde pa bye brag tu smra ba rnams kyang phyi nang gi chos rnams kyi rang dang spyi'i mtshan nyid khong du chud cing /de dag kyang dus gsum gyis bsdus la/ dus gsum yang rdzas su grub pa ste/ 'das pa ni 'das pa'i sa na yod cing / ma 'ongs pa yang ma 'ongs pa las na yod pas de dag 'jig pa ma yin te/ 'on kyang byed pa zhig pa dang ma skyes pa'i sgo nas 'das pa dang ma 'ongs pa nyid du 'jog cing /byed pa da ltar ba ni da ltar ba nyid de de 'dra bar su yis rtogs pa ni mya ngan las 'das pa nyid du rtog go/ /chos thams cad mi 'jig ces pa ni thams cad bdag rtag pa'i rang bzhin yin pas mi 'jig pa'o/ /de ltar su yis rtogs shing rig pa ni/mya ngan las 'das pa'o zhes rtog pa'o/ /yang grangs can gtso bo dbang phyug dang bcas par smra ba rnams ni/ rang bzhin nyi shu rtsa bzhi dang / skyes bu'i bye brag mthong ba dang / yon tan sum cha mnyam pa gtso bo'i rang bzhin dang / dbang phyug rtag pa rnam 'gyur sna tshogs kyi byed pa po yin la/de ltar rig cing dbang phyug mnyes par byas pa ni/ mya ngan las 'das par rtog pa'o/ /yang kha cig ni bdag [(]du [,]tu [)]dmigs pa dang bcas pa'i rnal 'byor sgom zhing / de las gzhan rig sngags dang mchod sbyin dang / gdol bu dang sme sha can dang bram ze la sogs pa de ni da ltar bden pa ma yin no zhes rtogs pa'i shes rab kyis/bsod nams dang bsod nams ma yin pa'i las su dmigs pa'i mtshan ma yongs su bsregs shing zad par gyur pa ste/ ji ltar gtsub shing dang gtsub gtan la me phyung zhing / me de dag nyid kyis de dag bsregs pa bzhin no//de ltar zad pas mya ngan las 'das par rtog pa'o/ /kha cig ni shes rab kyis de kho na nyid ji lta ba bzhin rtogs pa med par srid pa'i rtse mo'i bar gyi sems thob pas/ ci yang med pa'i skye mched kyi bar la 'dod chags dang bral ba na/ kho bo ni nyon mongs pa thams cad spangs pa'o zhes shes pas mya ngan las 'das par rtog ste/phyi rol gyi 'dod chags dang bral ba rnams kyi ye shes so/ /de ni mya ngan las 'das pa ma yin te/ ji skad du/ srid pa chags med bsam gtan pa/ /srid pa'i rtse mor phyin pa yang / /nga rgyal lcags kyus drangs nas su//sems can dmyal bar yang lhung ngo / /zhes gsungs pa lta bu'o/ /kha cig ni thams cad dang dbang phyug gis byas par mthong nas de mnyes par byas pas mya ngan las 'das par rtog go/ /kha cig ni 'jig rten gyi 'byung ba 'di ni gcig gis gcig zhugs pa ste/ bdag las de'i yon tan ldang ba dang 'dod pa la sogs pa'i nyon mongs par 'gyur zhing /de yis las bsags pa las tshe len par 'gyur ba'o/ /de las gzhan dbang phyug la sogs pa'i rgyu las ma yin no zhes de 'dra ba'i rgyu la mngon par chags bzhin du gti mug las/ 'jig rten dang 'jig rten las 'das pa'i rgyu yang dag pa ji lta ba bzhin khong du mi chud de/ de khong du ma chud pas mya ngan las 'das par rtog pa ste/ de 'dra ba phyin ci log pa'o/ /ci zhig las mya ngan las 'das par rtog ce na/ bdag sdang ba dang 'dod pa la sogs pa'i yon tan dang bral ba la'o/ /de 'dra ba ni tshad mas gnod pas phyin ci log pa'o//rnam pa gcig tu na 'di rnams kyi don ni de ltar rgyu gzhan las byung ba ma yin zhes rgyu gzhan med bzhin du/ de 'dra ba'i rgyu la mngon par chags pa'i tshul gyis gti mug pas de kho na nyid ji lta ba bzhin khong du mi chud de/ de'i phyir mya ngan las 'das pa mi thob la yang sngar gyi tshul ji lta ba bzhin khong du chud pas mya ngan las 'das par rtog pa'o//yang kha cig ni bden pa dang lam khong du chud pas mya ngan las 'das par rtog pa ste/ bden pa bzhi dang de dag rtogs pa'i lam khong du chud pa ste/ bden pa ni rgyud gzhan dang 'brel pa'i tshul du yang rtogs la/lam ni rang rig pa'i tshul gyis khong du chud pa'o/ /yang 'dir bden pa'i lam zhes gzhung 'don par byed de/ rigs pa can rnams kyis tshig gi don bcu drug rtogs pas mya ngan las 'das par 'dod pa lta bu'o/ /kha cig ni yon tan nyi shu rtsa bzhi dang yon tan can rdzas dgu'i bdag nyid la sogs pa khong du chud cing spyi'i sgo nas gcig pa dang /bye brag gi sgo nas tha dad pa dang / de nyid kyis gnyis ka dang gnyis ka ma yin par yang 'gyur te/ de ltar mthong ba'am gzhan yang khyad par du bdag gi yon tan dgu rtsa ba nas bcad na/ yon tan can gyi bdag thar pa'o zhes bye brag pas rtog pa lta bu'o//kha cig ni dngos po thams cad rgyu med pa rang bzhin las byung bar mthong bas mya ngan las 'das par rtog go/ /'di yang 'jig rten rgyang pan pa'i lugs yin no zhes slob dpon ye shes dpal gyis bshad de/ de ni rgyu las skye bar 'dod pas ha cang 'grig pa ma yin no//grangs can dbang phyug khas mi len pa rnams ni/ de kho na nyid nyi shu rtsa lnga khong du chud pas mya ngan las 'da' bar 'dod de/ de tsam nyi shu lnga shes na/ /gnas ni gang dang gar gnas shing / /ral pa'am spyi 'bur gnas kyang rung / /grol ba der ni gdon mi za/ /zhes bstan pa'o//de kho na nyid nyi shu rtsa lnga la/ skyes bu ni sems pa can gyi rang bzhin nang na gnas pa'o/ /rang bzhin nyi shu rtsa bzhi las dang po rdul dang mun pa/ snying stobs rnam pa gsum ste/ zhe sdang dang / gti mug dang / 'dod chags rnam pa gsum po'am/ yang tshor ba'i dbang du byas na sdug bsngal dang btang snyoms dang /bde ba ste/ de gsum cha mnyam pa'i gnas skabs ni gtso bo'i rang bzhin no/ /gtso bo las chen po ste de ni blo'i rnam grangs kyang yin la/ de las nga rgyal lo/ /nga rgyal las sgra la sogs pa'i yul lnga ste/ de tsam lnga zhes pa'o/ /de tsam lnga las 'byung ba lnga ste/ nam mkha' yang 'byung bar 'dod pa'o/ /yang blo'i dbang po lnga ste/ mig dang / rna ba dang / sna dang / lce dang reg pa ste lus kyi blo dang rnam pa lnga'o/ /las kyi dbang po lnga ste/ lag pa dang / rkang pa dang / kha dang / skra dang / pho dang mo'i dbang po'o/ /gzhan yang sems mnyam pa'i dbang po ste/ de la yid ces kyang bya'o/ /de ltar na chos nyi shu rtsa gcig po 'di'i rtsa ba ni sngar bstan pa ltar yon tan rnam pa gsum ste/ de yang 'phags pa mya ngan las 'das pa las/ zhen pa zhes bgyi ba 'di ni 'dod pa'o/ /rdul zhes bgyi ba 'di ni zhe sdang ngo / /nag po zhes bgyi ba 'di ni ma rig pa'o/ / gau ta ma chos nyi shu lnga po 'di ni thams cad kyi rang bzhin las skyes so/ /bka' stsal pa/ bram ze chen po la sogs pa'i chos 'di dag rtag pa yin nam/ mi rtag pa yin/ gsol pa/ gau ta ma bdag gi chos kyi rang bzhin ni rtag pa lags kyi/ chen po la sogs pa'i chos thams cad mi rtag pa'o zhes gsungs so//bstan bcos dag las ni/ skra las kyi dbang po nyid du ma gsungs te/ gzhan du gsang khung zhes pa ste/ bshang ba'i lam nyid las kyi dbang por ston to/ /kha cig ni skye dgu skyong ba ste/ byams pa dang snying rjes gzhan gyi don gtso bor bsgrub pa dang / yon tan drug bstan pa 'dzin pa ste/snying rjes ma rungs pa tshar gcod pa na de dag dang rang gi phyogs kyi sde gnyis su gcod cing 'dzin pa dang / de nas de dag tshar gcod pa'i don du g.yul ngor chas pa dang 'thab pa dang / dus la ma bab pa na rang bzhin du 'khod pa dang / 'khor dang rdzong la zhen pa na de dag gzhom pa'i thabs shes pa dang /legs par phebs pa na 'jal sdums byed pa ste/ rgyal po snying rje can la sogs pa'i spyod pa de 'dra bas rang gi bstan pa 'dzin pas mya ngan las 'das par rtog pa'o/ /kha cig gi ni/ dus kyis 'byung ba rnams 'jig cing / / dus kyis gnyid log sad par byed/ /ces bstan pa la sogs pa'i tshul gyis thams cad kyi byed pa po dus yin par mthong bas mya ngan las 'das par rtog go/ /kha cig ni srid pa ste/ ji skad du 'phags pa tshangs pa'i dra bas zhus pa las/ la la dag 'dod pa'i khams kyi rten 'di nyid la bsam gtan la sogs pa ma bsgoms par/rtse dga' spyad pa tsam gyis mthong ba'i chos la mya ngan las 'das par rtog pa dang / de bzhin du rten de nyid la bsam gtan dang po dang / gnyis pa dang gsum pa dang / bzhi pa bsgrubs te mthong ba'i chos la mya ngan las 'da' bar 'dod pa ste/ lam de 'dra ba ni srid pa nyid kyi rang bzhin las ma 'das pa'o//yang la la dag srid pa'i bde ba mthar thug pa nyid mya ngan las 'das par 'dod cing / de las gzhan pa'i mya ngan las 'das pa ni khas mi len te/ ji skad du/ bin da'i gnas ni nyams dga' bar/ /zhes pa la sogs pa sngar bstan pa lta bu'o//kha cig ni gang zag gam chos kyi bdag tu sgro 'dogs pa ni ma spangs la/ srid pa med pas mya ngan las 'das par 'dod pa'o/ /'dir slob dpon ye shes dpal gyis ni byed pa po'i dus yin zhes pa srog rtsol mnyam par sbyor ba ste/ ji ltar gtogs 'dod kyis smras pa/ srog dang srog min dbugs mnyam nas/ /sna yi nang du rgyu bar te/ /dbang po yid dang blo yang bsdums/ /thug pa'i thar pa gnas pa'o/ /zhes bstan pa'o/ /srid pa zhes pa ni mchod sbyin gyi thar par 'dod pa ste/ gang 'dir rta'i mchod sbyin gyis ni mtho ris su 'gro ba dang / gos sbyin pas nyi ma dang lhan cig 'grogs pa dang /gser dang dngul byin pas ni de kho na nyid kyi bdud rtsi za zhing tshe'i tshad kyang mtha' med pa'o/ /srid pa med pas so zhes pa ni khrus dang sbyin sreg la sogs pas thar par rtog pa'am/ gzhan yang gang gA dang pra yag 'dus pa'am/ de dag dang rgya mtsho 'dus pa'i mtshams su lus dor bar mya ngan las 'da' bar 'dod pa ste/gang gA chu dang de bzhin mchong / /gang gA rgya mtsho 'dres par ni/ /khrus byed de dag mtho ris 'gro/ /shi ba de dag yang srid med/ /gzhan yang / yid lta dpa' bor gnas shing ni/ /rnal 'byor brtson pa'i 'gro ba gang //gang gA ya mun 'dres pa la/ /srog 'dor de yi 'gro ba de/ /nam zhig dus kyi rnam grangs kyis/ /bA rA Na sIr gal te 'gro/ /rdo bas rkang pa gnyis bcag ste/ /de nyid du ni 'chi bar bya/ /bram ze gsod la sogs pa'i mi/ /der bkrus nas ni rnam par grol//gang srid phye ma leb rnams kyang / /shi ba grol bar gdon mi za/ /zhes rtog pa'o/ /srid pa dang srid pa med pa yongs su shes pa ni de dag gi de kho na nyid lha chen po ste/ de'i rang bzhin shes pas mya ngan las 'das par rtog pa'o/ /de skad du yang / lha chen pos smras pa/ 'jig rten rgyu dang mi rgyu ba//chang 'thung la sogs skyon rnams kyis/ /mi rigs par ni byas na yang / /yang dag rig nyid mi dgos so/ /tshangs spyod sogs pas lus la ni/ /gdung bar ci phyir bya zhig gu/ /yongs shes pas ni de dag grol/ /zhes pa'o/ /srid pa dang mya ngan las 'das pa bye brag med par mthong bas mya ngan las 'das par rtog pa ni theg pa chen po 'di nyid kyi lugs te/slob dpon klu sgrub kyis kyang / mya ngan 'das pa'i mtha' gang yin/ /'khor ba'i mtha' yang gang yin pa/ /de gnyis bar na cung zad kyang / /shin tu phra ba yod pa min/ /zhes gsungs pa dang / sa bcu'i mgon po chen pos kyang //srid dang zhi ba mnyam nyid dang / /zhes pa la sogs pa gsungs te/ khyad par du yang byang chub sems dpa'i sa brgyad pa la/ 'khor ba dang mya ngan las 'das pa ro gcig tu rtogs shing / rim gyis tshogs gnyis rdzogs par byas pas mi gnas pa'i mya ngan las 'das pa chen po thob pa'o//blo gros chen po zhes pa la sogs pas de nyid tshul gzhan gyi sgo nas gsal bar ston pa'o/ /de kho na nyid ni don dam pa'i dngos po'o/ /so so rang gis 'phags pa'i chos ni rang gi sems kyi chos nyid do/ /sgyu ma la sogs pa'i ting nge 'dzin ni dag pa 'jig rten pa snang ba dang bcas pa'i ting nge 'dzin te/byang chub sems dpa' sa brgyad pa la gnas pa yan chad kyang / bya ba gang dang gang byed pa na de'i sems de dag gis mi 'phrogs pa ste/ de bzhin nyid las mi g.yengs pas ting nge 'dzin zhes bya'o/ /mkhas pas spangs pa ni/de dag gis mya ngan las 'das pa dang / de'i lam dang / lam gyi yul rtag pa dang / chad pa/ yod pa dang med pa la sogs pa'i mtha' brtags pa la/ sngar gsungs pa'i tshad mas gnod pas de rnams yang dag pa ma yin zhes pa'o/ /'jug pa dang ldog pa ni mya ngan las 'das pa'i grong khyer du 'jug pa dang /'khor ba las ldog pa de kho na nyid du med cing / de dag gi lugs la kun rdzob tsam du yang med pa'o/ /de lta mod kyi 'on kyang de 'dra ba ni rang gi gtsug lag la mos pa ste/ gzhung lugs ngan pa la mngon par zhen pas brtags pa yin zhing / de yang yang dag pa'i rgyu mtshan sna tshogs kyis yongs su brtags na 'khrul pa'o//'ong ba dang 'gro ba la sogs pa'i dngos por phyin ci log tu brtags pa'i phyir mya ngan las 'das pa med ces pa'o/ /thabs rnam par spangs zhes pa ni de kho na nyid du yod pa ma yin zhing / gzhan gyi lugs la kun rdzob tsam du yang grol ba'i thabs med ces pa'o//du mar tha dad bral bar snang / /zhes pa ni/ de dag gi tshul lugs tha dad pa du mar brtags shing spang bya dang bral bar snang mod kyi/ phyin ci log tu gyur pa de'i phyir thar pa med ces pa'o/ /blo gros yangs pa ni phyin ci log dang the tsom gyi 'dzer dog med pa'o/ /tshig tu smra ba ni rnam rtog sna tshogs kyis kun nas bslang bas sdug bsngal bskyed par bya'o//bag chags dag gi me long la/ /zhes pa la sogs pas ni bag chags dang ldan pa'i kun gzhi'i me long la byis pa rnams kyi sems gzung ba dang 'dzin pa'i rnam pa gnyis su mthong ba ste/ de la brten nas de ltar snang ba 'byung ba'o//de ltar snang ba kun rdzob tu sems kyi rnam pa yin la/ don dam pa stong pa nyid du mi shes pas gzung 'dzin gyi dngos por rtog pa gnyis skye ba'o/ /ming dang 'du shes zhes pa la sogs pas ni ming dang mtshan mar snang ba'i bye brag gis sna tshogs su brtags pa yin no zhes mdo sde de dang de dag las bshad de/de yang ming dang brjod pa las ma gtogs pa brjod par bya ba'i don tha dad pa rig cing rtogs par bya ba ni med ces pa'o/ /de nas byang chub sems dpa' zhes pa la sogs pas mthar thug gi mya ngan las 'das pa sangs rgyas kyi rang bzhin ston te/ ji ltar khyod kyis bzod pa de bzhin du zhes pa ni de'i rang bzhin zab mo bstan pa la mi skrag cing gting tshugs par 'gyur ba de bzhin du'o/ /tshig nges pa ni mtha' gcig tu nges pa'i sgra ste/ sgra de'i don phyogs rer brtags pa de rnams las gang zhig lags zhes pa'o/ /blo gros chen po gal te zhes pa la sogs pa'i don ni de bzhin gshegs pa don dam pa'i dngos por byas pa zhig yin na ni/de nyid mi rtag pa'i dngos por yang 'gyur na/ de 'dra ba ni tshad mas gnod pas phyin ci log yin pa'i phyir/ de bzhin gshegs par mi 'thad la/ de ltar tshad mas gnod pa bzhin du yang de bzhin gshegs par 'gyur na/'bras bu'o cog thams cad kyang de bzhin gshegs par 'gyur ba'o/ /de ste kun rdzob tsam du yang rgyu dang rkyen gyis ma byas pa yin na ni ri bong gi rwa la sogs pa dang mtshungs pas de'i don du tshogs sog pa yang don med par 'gyur la/ de bzhin gshegs pa la skur pa 'debs pa'i mthar lhung bar yang 'gyur ro//des na de'i don ni kun rdzob tu ye shes skad cig ma snga ma rnams la rag lus te byung ba yin la/ don dam par de lta bu'i ngo bos stong pa zung 'jug sgyu ma lta bu'o/ /blo gros chen po gang yang zhes pa la sogs pas de'i rang bzhin spros pa dang bral ba nyid du gsungs te/de bzhin gshegs pa ni don dam par rgyu 'bras la sogs pa'i spros pa thams cad las 'das pa'o/ /mtha' bzhi'i phyi rol ni de rnams dang bral ba'o/ /de rnams ni 'jig rten phyin ci log gi spyod yul lo/ /tshig tsam du 'gyur ro zhes pa ni don dam par bsams na tshig tsam yin gyi/de las ma gtogs pa'i don gzhan grub pa med pa'o/ /tshig nyid kyang de ltar snang ba tsam las rang bzhin grub pa med ces sngar bstan no/ /gal te mo gsham gyi bu la sogs pa ni mthar ltung ba ma yin nam zhe na/ de ni rtog pa'i gzung ba med do zhes pa'i sgra'i don nyid yin gyi/de'i rang bzhin blo'i yul las 'das pa ni mtha' bzhir lhung ba ma yin pa'o/ /mkhas pa rnams la tshad ma ma yin zhes pa yod pa'i sgro 'dogs rnam par bkag pa las ma gtogs pa tshad ma'i blo yis 'di dang 'di 'dra'o zhes yul du byar med pa'o//blo gros chen po zhes pa la sogs pas de'i rang bzhin can gzhan la sbyar bar gsungs te/ de'i don yang ji ltar snang zhing myong ba'i chos thams cad don dam pa'i dngos po la sogs par brtags pa'i bdag gis stong pa nyid bdag med pa'i don yin gyi/ snang ba tsam gyi rang bzhin gyis stong pa ni ma yin te/de ltar na snang ba dang stong pa zung du 'jug pa'i don sgyu ma lta bu nyid kyis bdag med pa'i don yin zhes pa ste/ dper na rta dang ba lang gi dngos po ni phan tshun gcig gi bdag nyid gcig ma yin la/ rang rang gi ngo bor grub bzhin du snang zhing myong ba'i chos dang / brtags pa'i bdag nyid kyang phan tshun gcig gi bdag nyid gcig ma yin la/ snang ba tsam po rang gi ngo bor ma grub pa yin te/ de'i phyir snang ba tsam gyi chos can nyid dgag bya ma yin par sngar bstan to/ /gal te de lta na 'phags pa shes rab kyi pha rol tu phyin pa las/ gzugs gzugs kyi ngo bos stong zhes pa la sogs pa dang /gzhan yang / gzugs ni gzhig cing gzhom du rung ba'i mtshan nyid de/ de ni mtshan nyid med par de bzhin gshegs pas mngon par rdzogs par sangs rgyas so zhes bya ba la sogs pa gsungs pa dang 'gal lo zhe na/ skyon med de/ de yang gzugs sam gzugs kyi mtshan nyid du snang ba ni de 'dra ba'i ngo bo bden par brtags pas stong pa nyid du gsungs kyi/de ltar snang ba tsam gyis stong pa rang sel ba ni ma yin te/ de ni tshad ma la sogs pas gnod pa'i phyir ro/ /bdag med pa'i dngos po zhes pa ni brtags pa'i bdag gis stong pa'i dngos po ste/ snang tshod tsam du dngos por grub pa'o/ /de bas na byis pa so so'i skye bo zhes pa la sogs pas ni snang zhing myong ba'i chos thams cad snang ba tsam gyi mtshan nyid du yod pa de bas na/ byis pa rnams kyis dngos po'i bdag nyid la sogs par rtog cing brtags pa nyid dgag bya'i rang bzhin du nye bar bzung nas/de 'dra ba'i bdag med par khong du chud par bya ste/ rnam par mi rtog pa'i blo la snang ba/ snang ba'i bdag nyid kyis dben pa'i sgo nas bdag med par bstan pa ni ma yin no/ /de bzhin du rtog pa'i gzung ba de la snang ba'i bdag nyid kyang snang tshod tsam du med pa ma yin te/ de yang sgra 'jug pa nyid phyir//yod ces tha snyad rten par 'dod/ /ces gsungs pa dang / so so rang gis rig pa'i don spangs par 'os pa ma yin pa ni chos can no zhes gsungs pa'i phyir ro/ /'o na de nyid dgag bya gang gis dben pa yin zhe na/ phyi rol gyi rtag pa dang gtso bo la sogs par byis pas brtags pa'i chos kyis dben pa'o//de bzhin du chos thams cad stong pa la sogs pa yang sbyar bar bya'o/ /go bar zad do de bzhin du zhes pa la sogs pa skabs su bab pa'i don nyid gsal bar gsungs pa'o/ /'di rnams kyi don kyang de kho na nyid du gcig dang tha dad pa la sogs pa las grol ba spros pa thams cad dang bral ba'o//rnam par gzhag pa tsam du ni zag pa med pa'i phung po bsdus pa'i bdag nyid do/ /gnyis yod na zhes pa ni bden pa'i dngos po gnyis yod na zhes pa'o/ /de la dngos po thams cad ni de kho na nyid stong pa nyid du 'dra bas na/ tha dad pa ma yin no//yang kun rdzob tsam du ring po dang thung ngu la sogs pa phan tshun ldog pa'i ngo bor grub pa la ltos nas tha dad pa nyid ces bya'o/ /de bzhin du zag pa dang bcas pa'i phung po rnams dang / de bzhin gshegs pa yang blta bar bya'o/ /yang thar pa dang de bzhin gshegs pa tha dad na thar pa ni zag pa dang bcas pa'i gzugs kyi mtshan nyid las 'das pa yin la de las de bzhin gshegs pa log pa na/de 'dra ba'i gzugs kyi mtshan nyid dang ldan par 'gyur ba'o/ /yang bdag nyid thams cad nas thar pa dang gcig na ni nyan thos la sogs pa'i rnal 'byor can rnams kyi 'bras bu thob pa'i mtshan nyid bye brag med par 'gyur ro//de ltar 'dod pa yang mi 'thad de/ rnal 'byor can rnams kyi thob pa dang spangs pa mi 'dra ba'i bye brag mthong ba'i phyir ro/ /dmigs pa med ces pa ni shes pa thams cad kyis mi dmigs pa'o/ /tshad ma dang dbang po ni rjes su dpag pa la sogs pa'i spyi dang /dbang po'i mngon sum gyi yul ma yin pa'o/ /phung por brten nas ces pa ni de rgyur byas pa'am/ blo'i mdun du byas pa'o/ /phung po ma yin phung dang min/ /zhes pa la sogs pa'i don ni phung po'i ngo bo ma yin pa dang / de dang 'brel ba yang ma yin la/gzhan tha dad pa la sogs pa yang ma yin te/ thams cad chos nyid [(]gyi [,]kyi [)]ngo bor 'dres pa'i phyir ro/ /gang rnams zhes pa la sogs pa'i don ni ji ltar brtags pa'i bdag nyid du snang ba rtog pa'i gzung ba de yang sngar bstan pa ltar snang tshod du med pa ma yin zhes pa'o/ /yod pa'i zhes pa la sogs pas ni phan tshun ldog pa la ltos nas brtags pa'i tha dad pa yang de kho na nyid du mi 'thad pa'o//sgra tsam la 'jug pa ni yod pa dang med pa la sogs par bstan pa ni sgra ji bzhin gyi mtshan mar 'dzin pa'i tshul gyis 'jug pa ni mtha' gnyis su ltung bas bdag nyid kyang skye ba gzhan du bde 'gro dang thar pa las nyams par 'gyur zhing /byis pa gzhan yang nyams par byed pas na rlag par byed ces pa'o/ /nyes pa kun las grol ba ni sgra ji bzhin ma yin pa mtha' gnyis spangs pa'i dbu ma'o/ /de 'dra bar rtogs pa ni 'dren pa dag la mi smod cing gus par 'gyur la/ de las gzhan sgra ji bzhin du 'dzin pa rnams ni de bzhin gshegs pa la chad par lta ba'o zhes pa la sogs pa'i sgo nas smod par 'gyur ba'o//de nas byang chub sems dpa' zhes pa la sogs pas de bzhin gshegs pa'i don dang ldan pa'i mtshan gyi rnam grangs ston te/ skye ba med pa dang 'gag pa med pa 'di ni de bzhin gshegs pa'i tshig bla dgas so zhes gsungs pa ni/rtag tu skye med chos ni de bzhin gshegs/ /chos rnams kun dang de bzhin gshegs dang 'dra/ /zhes pa la sogs pa gsungs pa'o/ /de ltar gsungs pa'i don de skye ba la sogs pa kun rdzob tu yang med pa ri bong gi rwa lta bu yin la/ des na de bzhin gshegs pa ni kun rdzob tu yang med pa nyid du ston pa yin nam/ 'on te 'di de bzhin gshegs pa'i ye shes sgyu ma ston pa'i ming gi rnam grangs gcig lags/ de la phyogs dang po ltar na/ chos rnams kun dang de bzhin gshegs dang 'dra/ /zhes gsungs pas chos thams cad dang de'i skye ba la sogs pa yang kun rdzob tsam du yang med par 'gyur la/de lta na chos thams cad ces pa'i chos can dgag gzhi smos pa yang mi 'thad de/ de 'dra ba'i gzhi kun rdzob tu ma grub pas/ de la skye ba la sogs pa bkag pa'i chos dang 'bral ba rtogs pa mi 'thad de/ ji ltar snang ba tsam po 'gog pa rang sel ba nyid mi 'thad par sngar bstan pa bzhin no//'dir tshig gi don bstan pa la dngos po ma mchis pa ni kun rdzob tsam du yang ngo / /de bzhin gshegs pa'i rnam grangs ni ye shes sgyu ma tsam du ston pa'i ming gi rnam grangs so/ /phyogs mi mthong ba ni blo'i mdun du ma byas shing snang tshod du yang ma grub pa'o//ma skyes pa'i phyir zhes pa kun rdzob tu yang ma skyes pa'i phyir chos thams cad ces smos pa mi 'thad pa'o/ /de dang 'dra bar de bzhin gshegs pa yang ma skyes zhes ston pa'i skabs su/ de bzhin gshegs pa zhes skye ba bkag pa'i rten smos pa mi 'thad do/ /chos la la zhig gi zhes pa ni ye shes sgyu ma lta bu'o//lan gyi don brtag pa'i phyogs dang po khas mi len la/ 'on kyang skye ba med ces pa la sogs pa'i don ni don dam par rgyu dang rkyen la ltos pa ma yin zhing / kun rdzob tu ye shes sgyu ma lta bu rkyen la rag las pa'o/ /smos pa yang ma yin ces pa ni skye 'gag kun rdzob tsam du yang med par de'i rten chos thams cad ces smos pa ma yin pa'o//don med pa ni don mi bden pa'o/ /yid kyi rang bzhin ni ye shes so/ /sa bdun la gnas pa'i byang chub sems dpa' rnams kyis/ de bzhin gshegs pa'i stobs dang mi 'jigs pa la sogs pa yon tan gyi rigs tsam mngon du ma byas shing dbang po rtul bas/chos thams cad kyi rang dang spyi'i mtshan nyid ji lta ba bzhin ma rtogs pas de'i spyod yul du mi 'gyur ba'o/ /'di lta ste zhes pa la sogs pas don de nyid dpe'i sgo nas rgyas par ston te/ de la brgya byin dang dbang po dang / grong khyer 'jig ces pa ni/ lha'i dbang po'i rnam grangs su gtogs pa'o/ /de bzhin du lag pa dang byed pa dang spyod pa rnams kyang ngo / /yang lus dang 'dus pa dang / gzugs rnams ni rnam grangs su gtogs pa'o/ /de bzhin dus dang / gnas dang / nor 'dzin kyang ngo //yang nam mkha' dang / go 'byed pa dang / 'od rgyu zhes pa ste/ de la sogs pa dngos po re re la rnam grangs kyi tshig mang po 'jug pa ltar zhes pa'o/ /rang bzhin ma yin par yang mi 'gyur zhes pa ni don dang mi ldan pa'i ming sgra bshad pa'i rgyu mtshan med pa ni ma yin zhes pa'o/ /de bzhin du blo gros chen po nga yang mi mjed kyi 'jig rten gyi khams zhes pa ste/gling bzhi dang ni nyi zla dang / /ri rab dang ni 'dod lha dang / /tshangs pa'i 'jig rten stong la ni/ /stong ni spyi phud yin par 'dod/ /de stong la ni stong gnyis pa/ /bar ma'i 'jig rten khams yin no/ /de stong la ni stong gsum ste//mnyam du 'jig cing 'byung ba yin/ /zhes gsungs pa ste/ sems can rnams kyi rang rang gi sems nyid de ltar snang ba'o/ /de las gzhan pa'i 'jig rten gyi khams kyang rung ste/ de rnams su ming grangs med pa brgya stong phrag gsum du byis pa rnams kyi rna lam du grag pa ste/ sems can rnams ji ltar 'dul bar 'gyur ba'i sku dang gsung sna tshogs su bstan pas mtshan kyang sna tshogs su grag pa'o/ /de la grangs med pa ni gnas gzhan drug cu las 'das pa'o/ /de 'dra ba brgya stong phrag gsum zhes pa ste mtshon pa tsam du zad do/ /ming gi rnam grangs su mi shes pa ni rang rang so so la grags pas phan tshun mi shes pa'o//de la rang byung ba ni srid pa tha ma'i gnas skabs na gzhan gyis bstan pa la mi ltos pa'o/ /'dren pa ni sems can rnams kyi 'dren pa ste/ gong nas gong gi bye brag gis rnam pa gsum du 'gyur ba'o/ /khyu mchog dang 'dra bas khyu mchog go//tshangs pa la sogs pa phyi rol pa'i gzugs kyis 'dul ba rnams la de 'dra ba'i gzugs la sogs par bstan pas de rnams kyi ming du grags pa'o/ /gzhan la las ni zhes pa la gdul bya rgyud smin pa rnams la de bzhin gshegs pa nyid kyis nga'i rang bzhin ni skye ba med pa'o zhes pa la sogs pa gsungs pas de rnams la don dam pa'i ming gi rnam grangs 'di rnams su grags pa'o//gzhan yang kun rdzob tu sems bskyed pa la sogs pa'i rkyen las sangs rgyas su 'gyur ba'i rgyu bstan cing ston pa yin zhes pa dang / rnam par thar pa dang / lam dang / bden pa rnams ston pa dang zhes pa la sogs pa sbyar bar bya'o//zhugs pa yang med ces pa la sogs pas ni 'jig rten gyi khams de dag tu 'jug pa dang ldog pa med pa'o/ /ri mor byed pa ni gzhan las thun mong ma yin pa'i rim gror byed pa'o/ /mchod pa ni rnyed pa dang bkur sti dang bsgrub pa'i mchod pa'o/ /tshig gi don dang nges pa'i tshig ni don gang la brdar byas pa'i don dang /sgra bshad pa'i rgyu mtshan no/ /ming tha dad pa ma yin zhes pa ni don gyi rang bzhin tha dad pa ma yin pa'i ming mi 'dra ba ste/ de yang sgrar bshad pa'i rgyu mtshan dang ldan pa'i ming gi rnam grangs nyid du mi shes pa'o/ /bshad pa'i sgra dang brjod pa ni rjod byed dang brjod bya'o//rang gi tshul so sor 'jog pa ni de bzhin gshegs pa'i bstan pa'i gnas zab mo mtha' gnyis spangs pa'i dbu ma'i don no/ /blo gros chen po skyes bu blun pos zhes pa la sogs pas sngar gyi dgongs pa can gyi tshig don lhag ma dang bcas te rgyas par ston pa las dang por re zhig gzhan dag don sna tshogs thams cad ni ngag tu lhung ba yi ge'i rnam pa can gyi sgra'i rnam par 'gyur ba yin te/de'i phyir don dang sgra la tha dad med par 'dod pa 'gog pa'o/ /don la lus med ces pa ni yi ge'i rnam pa can gyi sgra las ma gtogs pa/ thogs pa dang bcas pa'i lus tha dad pa med ces pa'o//grub mtha' smra ba de dag gis kyang sgra'i rang bzhin kun rdzob pa dang / de'i de bzhin nyid don dam pa'i tshul lugs mi shes pas/ ji ltar sgra ni kun rdzob tsam du skyes bu'i brjod par 'dod pa dang / gnas dang byed pa la sogs pa'i dbang gis skye zhing / de dag log pa na 'jig par 'gyur gyi don ni de ltar ma yin pa'i 'gal ba nyid mi shes pas de dag gcig tu rtog ste/de yang de lta bu'i 'gal ba'i chos dang ldan pa'i phyir gcig pa nyid du mi 'thad ces pa'o/ /gzhan yang bdag tu lhung ba'i sgra ni yi ge re re ba 'am du ma 'dus pa ste/ yi ger ltung ba yin la/don ni de ltar ma yin pa'i phyir na yang de dag gcig pa nyid du 'gal lo/ /yang sgra ni smra ba po kha'i sgo dang nye 'khor na gnas pas de dang tha mi dad pa'i don yang de ltar 'gyur la/ de lta na yang me zhes mngon par brjod pa'i tshe/ smra ba po'i kha tshig par 'gyur ro/ /de bzhin du de 'dra ba'i sgra ni nyan pa po rna ba'i dbang po dang /de'i nye 'khor dag na gnas pas/ de dag gi rna ba'i dbang po tshig par 'gyur ro zhes kyang shrI kA la tsakra'i 'grel pa las bshad do/ /gzhan yang don ni dngos po dang dngos po med pa rnam par spangs pa'i phyir skye ba med cing lus med ces pa ste/don dam pa'i dbang du byas pa'o/ /gal te don dam par na sgra yang de bzhin du 'gyur ro zhe na/ bden mod kyi/ de ltar spros pa dang bral ba'i rang bzhin la/ gcig gi dngos po mi 'thad pa nyid du shin tu gsal lo/ /blo gros chen po yi ge zhes pa la sogs pas sngar gyi tshig dang sbyar ba nyid dngos su ston te/de la yi ger lhung bas chos mi ston zhes pa ni phyi rol gyi ngo bor gyur pa'i yi ge nyid rnam pa thams cad du mi 'thad pa'am/ don dam par sems kyi ngo bo yang grub pa med pa'i phyir zhes pa'o/ /gzhan yang so so rang gis rig pa'i chos la yi ge med pa ste/ sngar bshad pa ltar de yi ge'i yul ma yin pa'o//yi ge'i rnam pa can gyi sgra dang 'dres shing gcig pa ma yin pa la/ yi ger lhung ba'i sgra yis chos 'chad par 'dod pa ni de 'dra ba'i sgra dang don 'dres shing gcig par 'dod pas 'khyal ba ste/ phyin ci log nyid yin zhes pa'o/ /de 'dra ba'i don dam spros pa dang bral ba'i chos nyid la dgongs nas/nga dang sangs rgyas dang byang chub sems dpa' gzhan dag gis yi ge gcig kyang ma bshad/ 'chad par mi 'gyur ro zhes pa ste/ 'di rnams kyi don ni sngar bstan zin to/ /'di lta ste zhes pa la sogs pa ni de'i phyir zhes pa'i don nyid rgyas par bshad pa'o//don dang mi ldan par yang mi 'chad ces pa la sogs pas de nyid sgra ji bzhin pa nyid du mi 'thad pa ston te/ de'i don ni de bzhin gshegs pa nyid kyi ye shes la/ longs spyod rdzogs pa'i sku mtshan dang dpe byad kyi rnam par snang ba dang / yi ge'i rnam pa can gyi sgra yis chos 'chad par snang ba kun rdzob tu ye shes kyi ngo bor gyur pa ni yod pas rnam pa thams cad du yi ge gcig kyang ma bshad ces pa la sogs pa ni dgongs pa can yin gyi/sgra ji bzhin par mi 'thad ces pa'o/ /de ltar de bzhin gshegs pas skye ba med pa la sogs par bshad pa yang / don dang mi ldan par mi 'chad de/de ltar sa bcu'i byang chub sems dpa' rnams la yi ge'i rnam pa can gyi sgra yis chos ston par snang ba las don ji lta bar rtogs pa'i ye shes 'char zhing de 'dra ba'i sgra don dang ldan zhes pa'o/ /yang byang chub sems dpa' dang byis pa'i skye bo la sogs pa rnam par rtog pa gnas ma gyur pa rnams ni de 'dra ba'i sgra ru snang ba la brten nas de dang 'dres pa don spyi'i rnam par snang ba byung ba na/de nyid rtogs bya'i don gyi rang gi mtshan nyid du zhen nas de la 'jug cing sgro 'dogs gcod pa ste/ de yang sgra'i dngos kyi don mi bden kyang zhen par byas pa'i don bden pas don dang ldan par 'gyur gyi mi ldan par mi 'chad ces pa'o//rnam par rtog pa bzung zhes pa ni rtog pa'i snang ba la don nyid du bdag gir byas pa'o/ /de 'dra ba'i chos bstan pa kun rdzob pa de yang med na ni bstan pa 'jig par 'gyur te/ bstan pa zhig na ni nges par 'byung ba'i lam med pas sangs rgyas la sogs pa med par 'gyur la/de dag med na yang su la ci zhig bshad de bstan pa 'jig par 'gyur zhes pa'o/ /tshig gi tshul 'di ni 'jig rten na bya med na sgo nga mi 'byung la/ sgo nga med par yang bya mi 'byung ngo zhes pa dang mtshungs so/ /des na zhes pa la sogs pas nye bar gdams pa nyid ston te/kun rdzob tsam du de 'dra ba'i bshad pa'i tshul 'thad cing / de kho na nyid du phyi rol la ma shes pa'i ngo bor gyur pa mi 'thad cing / gzhan yang don dang 'dres pa'i brjod pa mi 'thad pas bshad pa brjod pa'i sgra la phyin ci log tu mngon par ma chags par bya zhing /de'i rang bzhin ji lta ba bzhin du shes par bya zhes pa'o/ /blo gros chen po bshad pa'i brjod pa zhes pa la sogs pas ni khyad par du sprul pa'i sku yis ngo bo nyid med pa dang / phung po la sogs gang zag dang / /yi ge gcig kyang ma bshad ces brjod pa la sogs pa ni/sems can rnams kyi bsam pa bzhin du zhugs pas 'khrul ba yin te/ de'i don ni 'ga' zhig thog ma med pa nas dngos por zhen pas de dag gi skrag pa spang ba'i don du phung po la sogs pa yod par brjod cing / yang dngos por zhen pa spangs pa'am ngo bo nyid med pa la sogs par bstan pas 'dul bar gyur pa'i gang zag 'ga' zhig gi don du ngo bo nyid med pa la sogs par brjod la/bshad pa'i sgra la mngon par zhen pa spang ba'i phyir yi ge gcig kyang ma bshad ces gsungs pa ste/ de'i phyir de dag la sgra ji bzhin gyi don du zhen pa ni 'khrul pa yin no/ /nga dang zhes pa la sogs pas don de nyid rgyas par 'chad de/yid kyi rnam par shes pa bzlog ces pa ni snga ma ltar yi ge'i rnam pa can gyi sgra la mngon par zhen pa'i yid kyi rnam par rtog pa la sogs pa bzlog pa'i phyir chos sna tshogs brjod par bya'o/ /chos thams cad la gzung ba dang 'dzin pa gnyis kyi rnam par snang zhing sgro 'dogs pa med cing /rang gi sems snang ba tsam du khong du chud pas rnam par rtog pa mang po log pa ste/ khyad par du sa brgyad pa yan chad kyi byang chub sems dpa' bdag gis so so rang gis rig par bya ba/ 'phags pa'i ye shes kyi de kho na nyid longs spyod rdzogs pa'i sangs rgyas kyis yi ge'i rnam pa can gyi gsung gis rkyen byas nas rtogs par bya ba'i don yang bden pa ma yin zhing /de 'dra ba'i rnam pa can gyi gsung yang med la de ltar snang ba yang rtogs bya'i don dang ldan pa ma yin no zhes de 'dra ba bzlog pa'i don du/ nga yis yi ge gcig kyang ma bshad ces gsungs pa ni ma yin no//yang na de 'dra ba'i sgra la mngon par zhen pa ni rnam par shes pa rnams gnas gyur pa'i ye shes thob pa'i gegs yin pas de 'dra ba bzlog pa'i don du bstan gyi zhes pa la sogs pa sbyar bar bya'o/ /brjod pa gzhan yang sngar bstan pa ltar gdul bya'i bsam pa la ltos te brjod pa'o/ / blo gros chen po zhes pa la sogs pas de bzhin du byang chub sems dpa' rnams la nye bar gdams pa'o/ /don la brtan par bya'i yi ge la brtan par mi bya'o zhes pa ni don gang la dgongs te bshad pa'i dgongs don rigs pas 'thad pa'i don nyid la yid ches par bya'i/ yi ge'i rnam pa can gyi sgra yis dngos su brjod pa'i don la yid ches par mi bya zhes pa'o//de skad du yang / sgra de la ni gang chags pa/ dgongs te bshad pa mi shes so/ /zhes pa la sogs pa sngar bstan no/ /de ltar sgra ji bzhin gyi don du mngon par zhen pa ni sgro 'dogs dang skur 'debs kyi mtha' gnyis kyi lta bar lhung bas bdag nyid kyang mtha' gnyis spangs pa'i dbu ma'i don gyi rtogs pa las nyams par byed cing /gzhan gyis kyang de 'dra ba khong du chud par mi byed do/ /tshig dang nges pa'i sgra ni sngar bshad pa ltar de bzhin gshegs pa'i tshig gi rnam grangs skye ba med pa dang / 'gag pa med pa dang / bde bar gshegs pa zhes pa la sogs pa'o//gzhan ni shes par zad do/ /rang gi phyogs zhes pa ni skye ba med pa la sogs pa sgra ji bzhin gyi don du bzung nas skur pa 'debs pa'i lta ba'i phyogs sgrogs par byed pa dang / sgro 'dogs kyi lta ba'i phyogs sgrogs par byed pa'o/ /de ste zhes pa la sogs pas de las bzlog pa'i phan yon ston te/tshig gi don ni phal cher shes par zad do/ /yang dag pa mtshan ma med pa'i bde ba ni phyin ci ma log cing zag pa med pa'i bde ba dang ldan pa'i theg pa chen po'o/ /de 'dra ba'i theg pa chen po la brten cing gnas na/ de las nges par legs pa'i thabs rnams 'byung bas de 'dra ba'i 'bras bu rgyun ma chad par 'byung zhes pa'o//yongs su bzung bas ni de las mi nyams pa'o/ /sems can thams cad bzung ba ni ngan 'gro dang srid pa'i sdug bsngal las skyob cing / de 'dra ba'i go 'phang thob par byed pa'o/ /de ltar thob pas kyang dam pa'i chos rgyun mi 'chad pas chos yongs su bzung ba yin no zhes pa la sogs pa ste/ji ltar bya las sgo ngar 'gyur zhing / sgo nga las kyang bya zhes 'jig rten na grags pa dang mtshungs pa'o/ /skye gnas kyi bye brag ni 'gro ba la phan par 'gyur ba'i 'khor los sgyur ba'i rgyal po la sogs par 'gyur ba'o//gzugs dang cha byad ces pa la gzugs ni 'gro ba sna tshogs kyi gzugs so/ /cha byad ni gdul bya ji ltar 'dul bar 'gyur ba'i rnam grangs kyi cha byad sna tshogs pa'o/ /sems can gyi cha byad rtogs zhes 'og ma dang sbyar bar bya ste/ gang gis 'dul bar 'gyur ba'i cha byad du ston pa'i mkhyen pa'o//de bzhin nyid du chos ston zhes pa ni gdul bya'i khams dang / dbang po'i bye brag ji lta ba bzhin du'o/ /de la gang dag theg pa chen po'i rigs can dbang po rnon po rnams la ni/ de kho na nyid kyi rnam grangs rnams ston te/ so so'i tshig gi don ni sngar bshad zin to/ /blo gros chen po zhes pa la sogs pas ni de 'dra ba'i zab mo'i don gyi de kho na nyid la/ yi ge dang 'brel pa'i sgro btags spyi'i rnam pa med pa'i phyir/ de kho na nyid la sgra ji bzhin gyi don du chags pa la mkhas par mi bya zhes pa ste/ de ltar chags shing zhen par mi bya ba'o//'dir dpe'i don ni la las byis pa gzhon nu rnams la sor mo'i rtse mos nam mkha'i zla ba bstan pa na/ gzhon nu de sor mo'i rtse mo nyid la lta zhing zhen par 'gyur gyi/ des mtshon par bya ba'i zla ba mi mthong ba lta bur tshig gis bstan par bya ba'i don gyis de kho na nyid mi rtogs par sgra dang 'dres pa'i spyi'i rnam pa la rtog cing zhen par 'gyur ba'o//yang rnam pa gcig tu na/ dgongs pa can gyi tshig gis brgyud nas rtogs par bya ba'i dgongs don zab mo la mi lta bar sgra ji bzhin gyi don la chags shing lta bar 'gyur zhes pa'o/ /byis pa'i rang bzhin can lta bur zhes pa ni byis pa gzhon nu lta bur zhes pa'o//'di lta ste blo gros chen po zhes pa la sogs pas ni de 'dra ba'i de kho na nyid rtogs par bya ba la shes rab kyi mngon par 'du byed pas mngon par 'du bya zhing rtogs par bya zhes pa'o/ /de smyon par brtags par 'gyur ro zhes pa ni zas skom rnams mngon par 'du byed pa'i sgo nas g.yos su ma byas par zos na nad la sogs pa'i rgyur 'gyur bas log pa'i lam rtogs par sla ba nyid kyang mi shes pa'i phyir smyon pa dang 'dra zhes pa'o//de bzhin du skye ba med pa dang 'gag pa med pa'i dgongs don yang shes rab kyi mngon par 'du byed pas mngon par 'dus ma byas te dgongs don legs par rtogs na rnam pa thams cad du med do zhes skur pa'i mthar 'gyur bas mdzes pa nyid du mi 'gyur zhes pa'o//de'i phyir dgongs pa can gyi don zab mo rtogs pa la brtson par bya'o/ /rab tu dben zhes pa la sgro 'dogs dang skur pa 'debs pa'i mtha' dang bral ba'o/ / sgra ni rnam par rtog pa dang 'brel zhes pa rtog pas brtags shing rtog pa nyid kyi rang bzhin du gyur pa'o/ /des kyang 'khor ba thob par byed pa ste/ ji skad du/ rnam rtog ma rig chen po ste/ /'khor ba'i rgya mtshor ltung bar byed/ /ces gsungs pa'i phyir ro/ /don gyi rtogs pa de nyid ji ltar thob ce na/ mang du thos pa las thob par 'gyur te/ji skad du/ thos pas shes rab kun du 'phel/ /thos pas lta ba drang por 'gyur/ /zhes pa la sogs pa gsungs pa'i phyir ro/ /mang du thos pas yang dngos sam brgyud pa'i tshul gyis sgra yis bstan par bya ba'i don la mkhas par bya ba yin gyi/ sgra brjod pa'i bye brag la mkhas pa tsam ni ma yin no//mu stegs byed kyi smra ba ni grub mtha' phyin ci log pa thams cad de/ de dag dang ma 'dres par lta ba ni don la mkhas pa ste/ rang dang gzhan mtha' gnyis kyi lta bar mi ltung ba'o/ /don 'dod pas de dag la brten par bya zhes pa ni don gyi rtogs pa mthar thug pa 'dod pas de'i thabs la brtson par bya zhes pa'o//de las bzlog pa ni don gyi rtogs pa las nyams pa'o/ /blo gros chen po zhes pa la sogs pas ni sngar gyi phyi rol pa dang mtshungs par brtsad pa nyid tshul gzhan gyi sgo nas ston te/ de'i don ni de bzhin gshegs pas kyang 'dus ma byas kyi chos kyi khyad par 'ga' zhig ma skyes pa dang ma 'gags pa la sogs par bstan cing /de las gzhan phyi dang nang gi rten cing 'brel par 'byung ba dngos po yod pa nyid du gsungs la/ phyi rol pa rnams kyang de bzhin du dbang phyug dang / gtso bo la sogs pa 'gro ba thams cad dang / rnam 'gyur sna tshogs kyi rgyur gyur pa rnams ma skyes pa dang ma 'gags pa nyid du brjod cing /de las gzhan pa'i rten cing 'brel par 'byung ba dngos po'i rang bzhin nyid du khas len pas mtshungs pa nyid du 'gyur zhes pa'o/ /byed pa dang rkyen gyi rgyu zhes pa ni 'du byed dang ma rig pa nyid la bya ba'am/ rnam pa gcig tu na/ khyad par du 'phags pa'i blo dbang phyug gi 'dod pa dang /rdul phra rab la sogs pa'i rkyen las 'gro ba rnams 'byung bar brjod pa'o/ /bcom ldan 'das kyis kyang ma rig pa dang 'du byed la sogs pa'i rgyu de nyid la brten to zhes bgyi bar phyi rol pa dang mi mthun par ming gi bye brag gzhan btags pa ste/ ma rig pa'i rkyen gyis 'du byed/ 'du byed kyi rkyen gyis rnam par shes pa zhes pa la sogs pa gsungs so/ /rdul phra mo dang zhes pa la sogs pas ni rgyu nyid gsal bar ston pa ste/ rdzas rags pa rtsom par byed pa'i rgyu rdul phra mor 'dod pa'o/ /skye dgu'i bdag po ni tshangs pa ste/ de las thams cad byung bar 'dod pa'o//sogs pa bsdus pa'i don ni dus rtag par rgyur smra ba la sogs pa'o/ /gal te rdzas dgu la mi rtag pa'i rdzas 'byung ba bzhi rnams ma skyes ma 'gags par ji ltar 'gyur zhe na/ rags pa'i rdzas ni mi rtag pa yin mod kyi/ rdul phra mo'i rdzas rtag pas ma skyes ma 'gags zhes bya'o//bcom ldan 'das zhes pa la sogs pas rnam grangs gzhan du bcom ldan 'das kyis dngos po thams cad kyi rang bzhin yod pa dang med pa'i mtha' dang bral bas ma skyes ma 'gags pa'o zhes gsungs pas/ phyi rol pa dang mi mtshungs so snyam du dogs na/ mtshungs pa nyid de phyi rol pa rnams kyang sngar bstan pa ltar 'byung ba'i rang bzhin mi 'jig pas na mi skye mi 'gag par 'dod de/'byung ba de dag gi kha dog dang dbyibs kyi rnam pa gzhan du gyur kyang / 'byung ba rnams kyi rang bzhin mi 'gyur zhes pa'o/ /yang bcom ldan 'das kyis phyi'i 'byung ba ni rdzas su ma grub pas mi skye mi 'gag cing 'gyur ba med la/de dag 'gyur bar snang ba ni de la dmigs pa'i rnam par rtog pa nyid yin par gsungs la/ mu stegs byed thams cad kyis kyang de'i rang bzhin 'gyur bar snang ba ni rnam par rtog pa nyid yin par brtags shing bzhag ste/ des na mtshungs pa nyid du 'gyur zhes pa'o//de lta na yang skye ba med pa dang 'gag pa med pa rgyur gyur pa zhes pa ste/ de 'dra ba'i de kho na nyid rtogs shing goms pas sangs rgyas su 'gyur la/ de ni mu stegs pa rnams la yang khyad par med pas de rnams kyang sangs rgyas su 'gyur ba'o/ /yang na tshig gi don ni/ rtag tu skye med chos ni de bzhin gshegs/ /zhes gsungs pas de 'dra ba sangs rgyas kyi rang bzhin yin la/ de ni dbang phyug dang skye dgu'i bdag po la yang khyad par med pas sangs rgyas nyid du 'gyur ba'o/ /de ltar 'dod pa yang mi 'thad de/ bcom ldan 'das kyis 'jig rten gyi khams gcig tu de bzhin gshegs pa dang 'khor los sgyur ba'i rgyal po mang po 'byung ba ni gnas med do zhes gsungs pa dang 'gal bas so//'bras bu yod pa dang med pas ni go rims bzhin du rten cing 'brel par 'byung ba zhal gyis bzhes pas rgyu 'bras yod pa dang / yang chos 'ga' zhig ma skyes pa ma 'gags pa rgyu dang 'bras bu las 'das pa'o//lan gyi don ni de ltar mtshungs pa ma yin te/ de dag ni rgyu dbang phyug la sogs pa ni ma skyes pa mi 'gyur ba'i mtshan nyid dang ldan pa rtag pa ther zug pa'i dngos po yod pa nyid du khas len cing rten 'brel yang don dam pa'i dngos po nyid du 'dod pa'i phyir ro//snang ba dang gzung ba dang mi snang ba dang gzung du med ces tshig so sor sbyar bar bya ste/ blo 'khrul pa la ltos te snang zhing gzung ba dang ma 'khrul pa la ltos te de las bzlog pa'o/ /'jig rten rang la gnas zhes pa ni kun rdzob tu sems nyid rig pa'i skad cig ma/ rang rang gi ngo bo la gnas shing phyi rol pas brtags pa'i bskyed par bya ba dang /byed pa tha dad kyi ngo bo med ces pa ste/ ji skad du/ 'du byed thams cad skad cig ma/ /mi gnas bya ba ga la yod/ /ces gsungs pa lta bu'o/ /don dam ni rang gi chos nyid la gnas shing shin du yang bya ba med pa'o/ /blo gros chen po de ni zhes pa byis pa de ni yang dag pa ma yin pa'i don la rnam par rtog pas myos zhes sbyar bar bya'o//dge ba yin te zhes pa ni lam gyi dus na phyin ci log nye bar zhi ba dang / 'bras bu'i dus na sdug bsngal dang 'tshe ba zhi ba'i phyir ro/ /yang dag pa gnas pa ji lta ba zhes pa ni yang dag pa'i gnas lugs te/de nyid ji lta ba bzhin du mthong ba'o/ /sngar drangs pa zhes pa ni phyin ci log gnas gyur pa sngon du song ba'o/ /tshig gi don gzhan ni shes par zad do/ /de la zhes pa la sogs pas sngar gyi don de nyid lhag ma dang bcas te bsdus nas ston pa las dang por re zhig skye ba med pa la sogs pa'i de kho na nyid bstan pa ni/sgyu ma'i dpe brgyad dang 'dra bar don dam par ma skyes shing / kun rdzob tu skye bar snang ba ma 'gags pas te/ rig pa dang stong pa zung du 'jug pa'i don sngar rgyas par bstan pa de nyid yin no/ /rgyu med pa yi dngos po yod/ /ces pa la sogs pas ni phyi rol pas 'dod pa'i dbang phyug la sogs pa rgyu med pa'i dngos por yod pa dang /de las gzhan de bzhin gshegs pas gsungs pa'i tshul lugs ji lta ba bzhin du blo gros chen po bdag la gsungs zhes pa'o/ /'dus pa dag ni zhes pa la sogs pas de'i don gsal bar ston te/rdul phra rab bam shes pa'i phra rab 'dus pa las ma gtogs par bum pa la sogs pa'i dngos po phyin ci ma log pa'i blo yis mi rig cing mi dmigs pa ste/ de'i phyir ma skyes zhes pa la sogs pa'o/ /gal te 'dus pa las ma gtogs pa'i dngos po mi dmigs kyang / 'dus pa can gyi dngos po re re ba 'dab chags sam 'brel par gnas pa nyid bum pa la sogs pa'i dngos po yin no zhe na/de 'dra ba yang rigs pa'i don snang ba med cing mi dmigs pas yod pa ma yin te/ ji skad du/ gzugs ni rdul phran gzhigs pa na/ /rdul phran cha ni yod ma yin/ /zhes gsungs pa lta bu'o//skabs 'dir 'dus pa rags pa yan lag can gyi rdzas mu stegs bye brag pas 'dod pa ltar 'jig cing rdul phra rab kyi dngos por 'gyur ba tsam ni med pa'am stong pa'i don ma yin no/ /de las gzhan du sgyu ma'i dpe brgyad dang mtshungs pa nyid/ rang bzhin med pa la sogs pa'i don yin zhes pa'o//rgyu med smras pas zhes pa la sogs pas ni don de ltar yin pa de nyid kyi phyir phyi rol pa rnams dang mi mtshungs shing de dag gi yul la yin par ston te/ dbang phyug la sogs pa rgyu med par smra bas mtshungs pa nyid du brtsad par bya ste/ de spangs pa'i don du ma skyes pa sgyu ma nyid du bsgrubs pa na/nga'i grub pa'i mtha'i tshul ni de 'dra ba'i brtsad pas mi gnod cing mi 'jig pa'o/ /de ltar don dam pa rgyu med pa'am phyi rol pas brtags pa'i bya ba dang byed pa'i rang bzhin med par smra ba'i tshul lugs bstan pa na dngos por zhen pa'i skye bo rnams de lta na myu gu la sogs pa'i dngos po rnams rnam pa ji ltar skye bar 'gyur zhing /yul lam dus gang du rgyu med par 'gyur te/ rgyu med pa la yul dang / dus dang / rang bzhin nges pa mi 'thad ces pa'o/ /gzhan yang rgyu med na myu gu la sogs pa rgyu ci las skye ba dang / rkyen ji dag gis skyes te//de ltar skye bar mi dmigs pa nyid mi 'thad de/ rgyu med pa nyid kyi phyir nam mkha'i pad ma bzhin zhes pa'o/ /de ltar 'dod pa yang mi 'thad de mngon sum la sogs pa dang 'gal bar 'gyur ba'i phyir ro zhes mu stegs can rnams 'jigs shing skrag par 'gyur ba'o/ /'dir ni de 'dra ba'i nyes pa dang 'brel ba ma yin te/rgyu 'bras kun rdzob pa ni mi 'gog la/ don dam par yul dang dus nges pa la sogs pa khas mi len pa'i phyir ro/ /dngos po med pa zhes pa la sogs pas skye ba med pa la sogs pa'i don gzhan gyis brtags pa ltar khas mi len zhes pa'o/ /de'i don yang skye ba med ces pa ri bong gi rwa la sogs pa ltar kun rdzob tsam du yang med pa ma yin zhing /rkyen las skye ba'i dngos po nyid la de 'dra ba'i ming btags pa yang ma yin la/ dngos po gzhan zhig gi ming gi rnam grangs kyang ma yin zhing / don med pa'i ming tsam yang ma yin zhes pa'o/ /nyan thos dang ni zhes pa la sogs pas skye ba med pa'i rnam grangs ston te/ma skyes pa'i don rig pa dang stong pa zung du 'jug pa mtha' gnyis dang bral ba'i dbu ma'i don ni/ sa bdun pa'i byang chub sems dpa' man chod kyi spyod yul ma yin te/ de dag ni mtshan ma dang bcas shing dbang po dman pa'i phyir ro/ / byed pa dag ni zhes pa phyi rol pas brtags pa'i byed pa'o/ /sems ni snang las rnam grol ba/ /zhes pa la sogs pa'i don ni gzung 'dzin gnyis su snang ba las grol zhing / rtag chad la sogs pa'i mtha' gnyis pa thams cad spangs pa/ tshogs brgyad gnas gyur pas rab tu che ba sa brgyad yan chod kyi ye shes kyis so so rang gis rig par bya ba ni/skye ba med pa'i don yin zhes pa'o/ /phyi rol dngos po zhes pa la sogs pa'i don ni phyi rol tu snang ba sems nyid kyi ngo bor grub pas rnam pa thams cad du med pa yin la/ don dam par sems nyid kyang gzung ba'am 'dzin pa'i ngo bor grub pa med ces pa la sogs pa'o//de bzhin stong pa zhes pa la sogs pas rnam grangs gzhan la sbyar ba ste/ stong pa la sogs pa'i don yang zung 'jug dbu ma'i don nyid du brtag cing gzhag par bya ba'o/ /stong pas stong ma yin zhes pa ni de 'dra ba'i chos nyid kyis thams cad du khyab pa'o//rkyen gyi rnam pa 'dus zhes pa la sogs pas skye ba med pa la sogs par 'jal ba'i rigs pa nyid dgod pa'o/ /de'i don yang ma rig pa dang sred pa la sogs pa'i rkyen gyis rnam pa 'dus pa las srid pa'i yan lag rnams lugs su 'jug cing / de dag 'gags pas ldog par 'gyur ba ste/de kho na nyid du skye ba dang 'gag pa de 'dus pa las logs shig na grub pa yang med la/ 'dus pa nyid kyi bdag nyid kyang ma yin te/ 'di'i don zhib tu ni sngar bstan no/ /gcig pa dang ni zhes pa la sogs pas de nyid rgyas par ston te/ ji ltar grangs can la sogs pas rgyu dang 'bras bu rang bzhin gcig cing gnas skabs tha dad pa dang /bye brag pas de dag rang bzhin tha dad pa dang gzhan yang dngos po thams cad spyi'i sgo nas gcig pa dang / gsal ba'i sgo nas tha dad par rtogs pa bzhin du 'dir rgyu dang 'bras bu la sogs pa'i dngos po tha dad pa ma yin zhes pa la sogs pa'o//gzhan yang 'bras bu yod pa dang med pa skye ba mi 'thad pa nyid du sngar rgyas par bstan cing / de gnyis ka ma yin pa yang yul lam dus gang na yang med do/ /des na don dam par skye ba mi 'thad pa'i phyir/ de las gzhan kun rdzob tsam du 'bras bu'i bdag nyid rdul du ma 'dus pa'am/shes pa'i phra rab 'dus pa ni rgyu yang de 'dra ba'i 'dus pa las 'jug cing ldog par 'gyur ba'o/ /'dus pa nyid dngos po ma yin nam zhe na/ de ni 'dus pa can gyi dngos po 'brel chags su gnas pa nyid la brtags shing 'dus pa can rang yang de ltar snang ba tsam la brtags kyi sngar bstan pa ltar dngos por grub pa med pa'o//phan tshun ltos la 'brel pa'o/ /zhes pa ni 'dus pa phan tshun ltos shing 'brel pa ste/ de nyid kyi phyir na yang 'di dag don dam par mi 'thad pa'o/ /yang na 'di rnams kyi don ni rgyu dang 'bras bu rnam par gzhag pa ni brtags pa tsam nyid de/phan tshun ltos pa'i sgo nas 'brel pa ste/ de nyid kyi phyir don dam par ma grub ces sngar rgyas par bstan pa'o/ /rkyen rnams 'brel las zhes pa la sogs pa'i don ni kun rdzob tu ma rig pa dang 'du byed la sogs pa'i rkyen rnams gang gi mjug thogs su gang nges par 'byung ba nyid de rnams kyi 'brel pa ste/de las logs shig ni bskyed par bya ba'i don 'bras bu'i dngos po las tha dad pa'i chos su phyi rol pas brtags pa ni med ces pa'o/ /des na de ltar rtog pa'i mu stegs can gyi nyes pa spangs shing nyes pa de dang ma 'brel pa'o//gang na zhes pa la sogs pas ni nyes pa dang bcas pa dang mu stegs can gyi lugs dgag pa'o/ /'brel pa rnam par 'jig pa ste zhes pa'i don ni dngos po gang gi rjes su gang zhig nges par byung ba de dang 'brel pa'i 'bras bu'i dngos po las tha dad pa'i bskyed par bya ba'i chos gcig khas len na/'dir 'bras bu'i dngos po bskyed dam ma bskyed ces brtag par bya'o/ /gal te bskyed na de nyid bskyed par bya ba'i dngos po yin gyi/ de las gzhan rtog pa don med do/ /de ltar rtog na yang de la yang gzhan dang gzhan rtog pas thug pa med pa nyid du 'gyur ro//de ste 'bras bu'i dngos po ma bskyed na de dang rgyur 'dod pa gnyis la 'brel pa med de/ tha dad pas bdag nyid gcig par mi 'thad cing ma bskyed pas de las byung ba'i 'brel pa yang med pas 'brel pa rnam par 'jig cing 'bras bu rgyu med pa nyid du smra bar 'gyur zhes pa'o//gzhan yang grangs can pa rnams kyi zho dang 'o ma la sogs pa rgyu dang 'bras bu'i dngos por khas len pa na/ 'o ma dang 'brel pa zho'i rang bzhin ni sngar nas yod cing / 'o ma las tha dad pa ma yin pas bskyed par bya ba ma yin la/ 'on kyang de nyid sngar mi gsal ba las gsal ba'i gnas skabs su rgyu dang rkyen gyis bskyed par bya ba'i dngos po de 'dra ba yod ces pa ni/'brel pa rnam par 'jig pa ste/ gsal ba'i gnas skabs gzhan pa nyid rgyu dang rkyen gyis bskyed par bya bar 'gyur gyi/ zho la sogs pa'i rang bzhin skye ba mi 'thad pa'i phyir ro//des na rgyu med par smra ba nyid du yang 'gyur ro/ /gal te gsal ba'i gnas skabs rgyu dang bcas pas skyon med do zhe na/ de 'dra ba'i gnas skabs rgyu'i dus na med par 'dod na ni/ 'bras bu rgyu'i dus na yod pa nyid nyams par 'gyur la/ yod na yang skyes zin pas skye ba mi 'thad pa'i phyir rgyu dang 'bras bu'i 'brel pa 'jig pa dang /rgyu med par smra ba nyid du 'gyur ba'o/ /dngos po su la yod ces pa bskyed bya'i dngos po su'i lugs la yod pa'am/ 'bras bu'i dngos po su la yod na zhes sbyar bar bya'o/ /de lta na mar mes mun khung na yod pa'i bum pa sngar med pa skyed pa ni ma yin gyi/yod pa'i don nyid gsal bar byas pa tsam la/ de dag 'brel pa 'jog pa bzhin du zho dang bum pa la sogs pa'i rdzas kyi rigs rnams/ 'o ma dang 'jim gong la sogs pa la 'brel par 'jog pa dang sngar med pa skyed pa ni ma yin gyi/yod pa'i don nyid gsal bar byed par 'gyur zhes pa'o/ /gzhan yang 'bras bu'i dngos po las bskyed par bya ba'i dngos po gzhan du khas len na/ mun pa'i nang gi bum pa sngar nas yod pa la mar mes ci yang skyed pa med cing / 'on kyang de nyid gsal ba'i blo'i chos su 'gyur ba 'ga' zhig bskyed pa na/mi mkhas pas gsal ba nyid bum pa dang tha dad med par zhen pas bum pa yang mar me'i bskyed bya nyid du 'brel par snang ba bzhin du 'bras bu'i dngos po'i rdzas kyi rigs rnams la rgyu yis ci yang ma byas mod kyi/ bskyed par bya ba'i chos gzhan zhig byas pas de dang 'bras bu'i dngos po tha dad med par zhen pas de yang rgyu la 'brel bar snang bar byed par 'gyur zhes pa'o//ma skyes ngo bo nyid med ces pa ni kun rdzob tsam du yang med pa'o/ /'phags pas zhes pa la sogs pas ni 'phags pas rtogs pa'i chos nyid ston te/ de'i don ni 'phags pas rtogs shing mngon du byas pa'i chos nyid skye ba med pa ni kun rdzob kyi skye ba bkag pa las/gzhan rig pa dang stong pa zung du 'jug pa rnam par mi rtog pa'i ye shes kyis so so rang rig par bya'o/ /skye ba mi 'byung zhes pa ni de 'dra ba'i rnam par rtog pa mi 'byung zhing / mi skye ba'i chos la bzod pa'i ye shes kyis so so rang rig par bya ba'o//de ltar don dam par skye ba med cing kun rdzob tu rten cing 'brel par 'byung ba tsam du mthong ba na/ sems mnyam par 'jog pa ste/ sa brgyad pa yan chod kyi ye shes chos nyid las gzhan du mi g.yeng pa'o/ /mi shes zhes pa la sogs pas kun rdzob tu rten cing 'brel par 'byung ba'i dbye ba bstan pa'o//de yang 'khor lo dang 'jim pa la sogs pa las bum pa 'byung ba dang / chu dang sa bon la sogs pa las myu gu 'byung zhing / shing dang me la sogs pa las du ba 'byung ba la sogs pa ni/ phyi rol gyi rten 'brel te/phyi rol du snang ba nyid la 'jog gi phyi rol dngos ni grub pa med pa'o/ /'brel pa tsam zhes pa la sogs pas ni tshul gzhan gyi sgo nas pha rol po'i 'dod pa 'gog pa'o/ /'brel pa tsam ni 'di dag zhes pa ma brtags na nyams dga' ba sgyu ma lta bu'i rten 'brel ma yin te/ rkyen las skye ba don dam pa'i dngos por 'dod pa ste/ de ni rigs pa dang lung la mi gnas pa ste/ de dag gis gnod par 'gyur ba'o/ /gal te zhes pa la sogs pa'i don ni/ gzhan dag de ltar bskyed bya skyed byed kyi dngos po med na/ de ltar rtogs pa'i blo yang gang gi rkyen las byung ste mi 'thad pa nyid pas de ltar rtogs par mi rigs zhes rgol ba'o//lan gyi don ni rtogs bya'i don dam par skye ba med cing / kun rdzob tu skye bar snang ba dang / de ltar 'jal ba'i blo ni phan tshun bskyed pa ste/ de dag dbyer med kyang rgyun rgyud phyi ma rnams phan tshun bskyed pa ste/ don ni sngar rgyas par bstan no//de'i phyir blo skye ba 'thad pas don de dag kyang kun rdzob tsam du rkyen yin zhing / don dam par skye ba med par shes pa'o/ /drod gsher zhes pa la sogs pas ni phyi'i 'byung ba la sogs pa brtags pa nyid du ston pa ste go bar zad do/ /nad pa'i zhes pa la sogs pas ni rten 'brel dngos po nyid du bstan pa'i dgongs don 'chad pa'o//de'i don ni ji ltar nad kyi bye brag mi 'dra ba rnams gso bar bya ba'i don du sman pas sman gyi sbyor ba'i bye brag tha dad pa ston mod kyi/ de la gtsug lag tha dad pa ste/ don du gnyer bya'i 'bras bu'i tha dad pa med pa de bzhin du/ngas kyang sems can rnams kyi nyon mongs pa dang dbang po rno rtul gyi bye brag shes nas dbang po rtul po rnams la rten 'brel la sogs pa dngos po'i ngo bo nyid du yod do zhes ston cing / 'ga' zhig la khyad par du rnam par rig pa 'ga' zhig gi rten 'brel bshad mod kyi/mthar thug gi rtogs par bya ba'i don ni theg pa chen po gcig nyid yin zhes pa'o/ /yan lag brgyad ldan zhes pa ni yang dag pa'i lta ba dang rtog pa la sogs pa 'phags pa'i lam yan lag brgyad po rnams so/ /zhi ba ni phyin ci log nye bar zhi ba'o/ /'di rnams kyi don zhib tu ni sngar bstan no//de nas yang zhes pa la sogs pas ni sngar gyi mi rtag pa nyid phan tshun gzhan gyi sgo nas ston pa'o/ /yang dag pa'am log pa zhes pa ni de bzhin gshegs pa nyid kyi tshul lugs phyin ci ma log pa dang / gzhan gyis brtags pa'o/ /gzugs nyid mi rtag ces me lce dang glog la sogs pa'i gzugs nyid mi rtag pa yin gyi/de las gzhan pa rnams ni rtag par 'dod pa'o zhes sngon gyi slob dpon dag gis bshad do/ /yang phyi rol pa kha cig shes pa ni bdag rtag pa gnyis su med par 'dod la/ de las gzhan gzugs nyid mi rtag pa'o zhes zer ro//chos thams cad bar chad med par rgyun du rang gi ngang gis 'jig pa 'grol ba zhes pa ni sangs rgyas pa rnams kyi 'dod pa skad cig ma'i mi rtag pa yin la/ 'grol ba ni de las 'das nas gzhan du bum pa la sogs pa'i dngos po thams cad la sngar gyi gnas skabs mi mthong ba dang / rags pa'i 'jig pa nyid 'jug cing 'brel pa'o/ /dngos po'i dngos po med pa ni gyo mo la sogs pa'i gnas skabs na/ bum pa'i dngos po med pa mi rtag pa nyid du 'dod pa'o/ /snga ma ni gyo mo la sogs pa'i dngos por gyur pa nyid mi rtag par 'dod pas mi mtshungs so/ /yang chos can dngos por gyur pa ni mi rtag pa ma yin la/de'i chos kyi khyad par gzhan du 'gyur zhing med pa ni mi rtag pa'o zhes snga rabs dag gis bshad do/ /mi rtag pa yang de yi nang du 'dus/ /zhes pa ni skye ba med pa'i chos nyid kyis de la khyab pa'o/ /'di ni de bzhin gshegs pa nyid kyis bzhed pa'i don yin la/gzhan de las bzlog ste skye ba'i dngos po nyid mi rtag pa don dam pa nyid du 'dod pa'o/ /de la zhes pa la sogs pas de rnams kyi don rgyas par 'chad de/ ngo bo nyid mi 'jug ces pa ni de'i rgyun 'jug pa med pa'o/ /rtag tu mi rtag pa dang yod pa dang med pa las mi 'byung ba dang /chos thams cad mi mthong ba dang zhes pa la sogs pa'i don ni kun rdzob tu 'du byed skad cig ma nyid ma yin pas rtag tu mi rtag pa yin la/ don dam par rgyu yod pa dang med pa las mi 'byung ba dang / 'bras bu yang yod pa dang med pa 'byung ba mi 'thad pa dang / chos thams cad rdul phra rab dang skad cig ma'i bar du brtags na mi mthong ngo zhes brjod pa 'di ni mi skye ba'i tshig bla dgas yin gyi/skye ba ni ma yin no/ /de ltar na don dam par skye ba med cing kun rdzob tu skad cig ma'i rang bzhin snga ma rnams la rag las te/ phyi ma skye ba'i mtshan nyid zung du 'jug pa'i don 'di nyid mi rtag pa yin zhes pa'o//skye ba mi rtag par smra zhes pa la don 'di ni de bzhin gshegs pa nyid kyis kyang / 'du byed thams cad skad cig ma/ /zhes pa la sogs pa gsungs pa ma yin nam zhe na/ ma yin te/ de ni kun rdzob pa'i tshul bstan pa yin gyi/ don dam pa'i de kho na nyid du mi bzhed la/gzhan ni don dam pa'i dngos por 'dod pas mi 'thad pa'o/ /gzhan yang zhes pa la sogs pas dngos po mi rtag par 'dod pa 'gog ste/ de la dngos po rtag pa yang ma yin mi rtag pa yang ma yin zhes pa mi 'thad de/ de dag ni rnam gcod yongs gcod kyi 'gal ba yin pas gcig bkag pa gzhan bsgrub pa la ltos pa'i phyir ro zhe na/skyon med de/ dngos po'i ngo bor grub pa 'ga' zhig rtag pa dang mi rtag pa gnyi ga ma yin par 'gal gyi/ 'dir dngos po'i ngo bo bden pa grub pa ni med kyi/ dngos por snang ba tsam nyid de kho na nyid du rtag pa dang mi rtag pa gnyi ga ma yin zhing /dngos po nyid du yang grub pa med ces pa'o/ /des na dngos po rtag pa dang mi rtag pa ma yin pa bzhin du de dag kyang dngos po ma yin zhes pa'o/ /de la rtag pa dngos po yin pa ni dgag par sla mod kyi/ mi rtag pa dngos po yin pa ji ltar 'gog ce na/ mi rtag pa ni res 'ga' ba yin pas/rgyu las skye bas khyab la/ de yang skye ba rnam pa bzhi la sogs pas khyab pa las/ de kho na nyid du de 'dra ba'i khyab byed mi 'thad pa'i phyir mi rtag pa dngos po nyid du mi 'thad cing / de nyid kyi phyir dngos po yang mi rtag par bdag nyid ma yin te/ phan tshun bdag nyid ma yin par mtshungs pa'i phyir ro//gal te 'dir mi rtag pa rtsol ba las byung ba'i bdag nyid ma yin kyang / rtsol byung mi rtag pa'i bdag nyid yin pa las/ phan tshun bdag nyid ma yin par mtshungs pa mi 'thad do zhe na/ skyon med de/ glog dang nags kyi me tog la yod pa'i mi rtag pa rtsol byung gi bdag nyid ma yin pa ltar/rtsol byung yang mi rtag pa de 'dra ba'i bdag nyid ma yin par mtshungs pa'i phyir ro/ /'di las zhes pa la sogs pas kun rdzob tu mi rtag pa la sogs pa 'thad cing / de nyid 'ga' zhig gi rgyu nyid du ston pa'o/ /de'i don yang kun rdzob pa'i dngos po thams cad kyi dngos po med pa ste/don dam pa'i dngos por med cing kun rdzob pa'i dngos po nyid du gnas pa ni mi rtag pa'i 'bras bu yin te/ de las gzhan dngos po med pa'am rtag pa ni nus pa thams cad kyis stong pa'i phyir de'i rgyur mi 'thad pa'o/ /de nyid dpe'i sgo nas gsal bar ston pa ni/ bcag par bya ba bum pa gyo mo'i gnas skabs su song ba ni dbyig pa la sogs pa med na mi 'byung bas de'i 'bras bu nyid du 'jog pa dang mtshungs pa'o/ /phan tshun bye brag med ces pa ni dpe don phan tshun bye brag med pa'o/ /dngos po thams cad kyi zhes pa'i khyad par smos pa ni/ dngos po med pa'i med par dgag pa tsam 'bras bur mi 'thad pa'i phyir ro//'di ni zhes pa la sogs pas de 'dra ba'i rgyu 'bras don dam par ma grub ces ston pa'o/ /de'i don ni dngos po thams cad kyi nang du mi rtag pa nyid kyang 'dus pas/ de yang don dam par ngo bo nyid med pa'i phyir/ rgyu dang 'bras bu bye brag tu 'jog pa'i rgyu mtshan med pa'i phyir/ de dag gi bye brag med ces pa'o/ /de ltar rgyu med pa'i phyir dngos po thams cad med ces pa ni de 'dra ba'i chos nyid la 'gyur ba med pa'o/ /des na tshig snga phyi 'gal bar 'gyur ba yang med cing / don dam pa'i dngos po 'ga' zhig mi rtag pa nyid du 'gyur ba yang ma yin no//de ltar don dam par rgyu med cing kun rdzob tu rgyu las skye ba zung du 'jug pa'i don ni byis pa'i skye bo rnams kyis khong du mi chud ces sbyar bar bya'o/ /rgyu ni zhes pa la sogs pas kun rdzob tsam du rgyu 'dra ba las 'bras bu mi 'dra ba 'byung ba mi 'thad de/de ltar 'byung du zin na ni dngos po de dag thams cad kyi mi rtag pas 'bras bu mi 'dra ba bskyed par 'gyur te/ 'ga' zhig dngos po med pa'i ngo bor bskyed la/ 'ga' zhig ni don dam pa'i dngos po nyid du bskyed par 'gyur ro/ /de lta na yang dngos po rnams kyi 'bras bu 'dra ba dang /mi 'dra ba nyid rgyu med pa can du 'gyur te/ rgyu 'dra ba dang mi 'dra ba gnyis kas ma bskyed pa'i phyir ro/ /de la re zhig dngos po rnams kyi mi 'dra ba rgyu 'dra bas bskyed pa ma yin te/ nas dang sran ma la sogs pa'i myu gu la/ rgyu 'dra ba med kyang 'bras bu mi 'dra ba nyid du 'gyur bas ldog pa 'khrul pa'i phyir ro//de bzhin du 'bras bu mi 'dra ba de nyid rgyu mi 'dra bas bskyed pa yang ma yin te/ gnas skabs 'dir rgyu las mi 'dra ba med kyang 'bras bu mi 'dra ba byung bas ldog pa 'khrul pa'i phyir ro/ /de bzhin du 'bras bu 'dra ba yang rgyu 'dra ba dang mi 'dra bas ma bskyed de/de la re zhig rgyu 'dra bas ni ma bskyed de/ gnas skabs 'dir rgyu la 'dra ba yod kyang 'bras bu 'dra ba ma byung bas rjes su 'gro ba 'khrul pa'i phyir ro/ /de nyid rgyu mi 'dra bas kyang bskyed pa ma yin te/ ji ltar nas kyi myu gu sngon po rnams la rgyu mi 'dra ba med kyang /'bras bu 'dra ba nyid byung bas ldog pa 'khrul pa'i phyir ro/ /de ltar dngos po thams cad rgyu med pas rgyu dang 'bras bu bye brag med par 'gyur la/ de ltar 'dod pa yang mi 'thad de/ kun rdzob tu rgyu dang 'bras bu'i bye brag kyang mthong ba'i phyir ro/ /de'i phyir rgyu 'dra ba las 'bras bu mi 'dra ba 'byung ba 'gal bas mi rtag pa'i rgyu 'dra bas snga ma ltar 'bras bu mi 'dra ba bskyed pa mi 'thad cing /de ltar na yang 'ga' zhig dngos po'i ngo bo don dam pa par bskyed pa 'gal ba'o/ /'di'i spros pa zhib tu ni rigs pa'i bstan bcos dag las shes par bya'o/ /yang na gzhung 'di rnams kyi don ni/dngos po thams cad kyi dngos po med par rtogs pa ni mi rtag pa'i 'bras bu ste/ de ni de'i shes par byed pa'i rgyu'o/ /'di'i khyab pa yang snga ma ltar mi rtag pa ni rgyu la ltos pas khyab la de yang skye ba rnam bzhir 'gyur las/ de 'dra'i khyab byed mi 'thad pa'i phyir mi rtag pa ni don dam pa'i dngos po med pa'i ngo bo nyid kyis khyab pa'o//mi rtag pa med par dngos po thams cad ngo bo nyid med pa mi dmigs pa zhes pa'i don ni thams cad du de ltar nges pa ma yin kyang / gnas skabs 'ga' zhig gi tshe de ltar 'gyur ba ste/ ji ltar la rgyab tu du ba mthong ba med na/me mi rtogs pa lta bu'o/ /dbyig pa dang zhes pa la sogs pa'i don ni bshad pa snga ma'i rjes su 'brangs te rtogs par bya'o/ /'di ni zhes pa la sogs pas shes byed kyi rgyu mi rtag pa la/ shes bya'i don dngos po med pa'i ngo bo nyid kyis khyab pas rgyu dang 'bras bu'i bye brag med pa ste/snga ma nyid kyi rjes su 'brangs te rtogs par bya'o/ /gal te zhes pa la sogs pas ni mi rtag pa dngos po nyid yin pa 'gog ste/ de'i don yang dngos po ni rgyu med par 'gal bas 'ga' zhig gi las su bya ba 'bras bu nyid du 'gyur zhing / don byed nus pa'i phyir/ 'ga' zhig gi rgyu'i ngo bor yang 'gyur la/rang gi mtshan nyid 'dzin pas de 'dra ba'i chos gsum dang ldan pa'i dngos po nyid du 'gyur la/ de'i phyir mi rtag pa'i dngos po bdag nyid kyang mi rtag pa nyid du 'gyur ro/ /de nyid mi rtag na yang mi rtag pa'i rang bzhin las nyams pas dngos po thams cad rtag par 'gyur te/ ther zug pa'i dngos po nyid dam/ 'gyur ba bkag pa'i med pa tsam nyid du 'gyur zhes pa'o/ /de ste mi rtag pa'i dngos po nyid du rtag pa ma yin na ni/ dngos po thams cad mi rtag pa nyid nyams par 'gyur ro/ /rtag pa nyid du 'gyur zhes pa ni rtag pa kho nar 'gyur zhes mnan pa'i don to/ /de ste mi rtag ces pa la sogs pa ni mi rtag pa nyid gzugs la sogs pa dngos po re re ba'am/dngos po thams cad la rdzogs pa ste/ de dag thams cad la mi rtag pas khyab pa yin na/ dngos po thams cad dus gsum gyis bsdus par 'gyur la/ de yang don dam par mi 'thad de/ 'das pa'i gzugs ni 'das pa'i dus ni 'gags pa bzhin du de dang lhan cig tu zhig pa'o//ma 'ongs pas bsdus pa yang ma 'ongs pa nyid kyi phyir ma skyes pa'o/ /da ltar ba'i dus kyang dus can gzugs dang mtshan nyid tha mi dad de/ de yang thog ma skye ba'i cha dang gnas pa dang / 'gag par 'gyur ba'i cha gsum gyis bsdus par 'gyur ba'i gcig pa nyid du mi 'thad la/de dag re re ba yang de bzhin du 'gyur te/ ji ltar skad cig mtha' yod ltar/ /thog ma dbus kyang brtag par gyis/ /zhes pa la sogs pa sngar rdo rje gzegs ma'i skabs su rgyas par bstan no/ /de la gzugs nyid gang zhe na/'byung ba chen po'i gnas kyi bye brag ste/ 'byung ba dang 'byung ba las gyur pa'i gzugs rnams gzugs kyi phung pos rab tu phye zhing de la brten pa'o/ /de rnams kyi rang bzhin de bzhin nyid ni mi 'jig go/ /de nyid gsal bar ston pa ni/ mu stegs byed ces pa la sogs pa ste/grub mtha' phyin ci log pa rnams kyi gcig dang tha dad pa spangs pa'i phyir zhes pa ni don dam pa gcig dang du ma dang bral ba'i phyir mi 'jig ces pa'o/ /srid pa gsum po thams cad ces pa ni de rnams kyis bsdus pa'i gzugs yin la/ de ni skye ba la sogs par brtags pa tsam yin gyi de kho na nyid du grub pa med de/sngar bstan pa ltar re re yang cha sna tshogs su 'gyur bas ngo bo nyid grub pa med pa'i phyir ro/ /yang na 'dir mu stegs byed ces pa ni bye brag pa dang grangs can la sogs pas rdzas gcig pa dang tha dad par brtags pa spangs pa'i phyir zhes sbyar bar bya'o//'dir 'byung ba dang 'byung ba las gyur pa dang tha dad pa'i mi rtag pa gzhan gang yod ces pa ni mi 'thad de/ de las tha dad pa'i sems nyid mi rtag par grub pa'i phyir ro zhe na/ skyon med de/ don dam par tha dad pa'i dngos po de 'dra bar grub pa med cing / de nyid kyi phyir mi rtag pa'i ngo bo don dam par yang grub pa med pa'i phyir ro//de ltar na de 'dra ba yang grub pa med cing 'byung ba rnams kyi chos nyid de bzhin nyid kyang mi 'jig pas na 'jug pa dang ldog pa la sogs pa don dam par med de/ des na mi rtag pa dngos po nyid du mi 'thad do/ /'byung ba rnams 'byung ba gzhan mi rtsom mo zhes pa la sogs pa'i don ni lhan cig mi gnas pa'i 'gal bar gtogs pa me dang chu la sogs pa'i 'byung ba rnams phan tshun mi mthun pa'i rang gi mtshan nyid bskyed pa'i phyir phan par 'gyur ba'i bye brag mi rtsom ste/phan tshun phan pa mi bskyed pa'o/ /de ltar na phan pa'i 'bras bu log pa dang /yang phan tshun mthun pa dang rang gi rgyud du gtogs pa'i phan pa sngar bskyed zin pa yang phyir zhing bskyar nas mi rtsom pas/ de lta bu'i chos gnyis dang ldan pa'i phyir mi rtsom pa la mi rtag pa'i blor 'gyur zhes pa ste/ de kho na nyid du phan pa sngar skyes zin pa la sogs pa'i mi 'thad pa dang /phan tshun mi mthun par gyur pa rnams la phan pa'i bye brag mi 'byed pa yang / gzod ma nyid nas de ltar yin gyi glo bur du byed pa log pa ma yin pas mi rtag pas mi rtag pa nyid mi 'thad kyi rang gi blo'i snang ba nyid yin ces pa'o/ /rab tu 'byed cing yongs su rtog /ces pa ni thob pa la sogs par 'joms par byed pa dang / blo yis so sor rtog pa'o/ /'jig pa ni zhes pa la sogs pas don de nyid gsal bar ston pa ste/ de la dbyibs gzhan du mthong ba ni bum pa'i dbyibs gyo mo la sogs pa'i rnam pa gzhan du mthong ba'i phyir/ sngar gyi ring po dang thung ngu la sogs pa mi dmigs shing de las gzhan du dmigs pa'o//'byung ba rnams 'jig pa'i phyir rdul phra mo 'byung ba rnams la ni ma yin no zhes pa ni 'byung ba rags pa rnams la 'jig par gnas pa'i tshul gyis de dag mthun par rdul phra mo rnams 'jig pa ma yin te/ des ni 'joms pa dang blo yis gzhig par mi nus pa'i phyir ro zhes gnas ma'i bu'i sde pa dang /bye brag pas 'dod pa'o/ /'di ni mi 'thad de/ rab tu 'jig pa ste bum pa la sogs pa gyo mo la sogs pa'i gnas skabs su gyur pa'i sngon rol de dag tu mi 'jig pa dang / mthar 'jig pa yang tho ba la sogs pa'i rgyu la ltos pa yin na/bum pa thog mar grub pa'i dus dang / phyis 'jig ka ma'i gnas skabs gnyis la mi 'dra ba'i khyad par 'ga' zhig yod na ni/ snga ma las gzhan du 'gyur bas gnas skabs de nyid kyi tshe yang mi rtag par 'gyur la/ khyad par med na yang sngar gyi de nyid kyis zla ba dang lo la sogs pa'i dus ji snyed cig tu gnas pa bzhin du de dang khyad par med pa'i phyis kyi dngos po yang de snyed cig tu gnas par 'gyur la/de yang de bzhin du 'gyur bas dngos po gtan mi 'jig pa nyid du 'gyur ro zhes tshad ma rnam par gtan la dbab pa la sogs pa las bstan no/ / gzhan yang 'jig pa rgyu la ltos pa yin na/ rgyu rnams dang rang gi rgyu dang rkyen la ltos nas nye bar 'gyur ba'i phyir ma tshang ba srid pas dngos po 'ga' zhig mi 'jig par yang 'gyur la/ des na 'du byed thams cad dus kyi mtha' ru 'jig par 'dod pa mi 'thad par 'gyur ro/ /gzhan yang bum pa la sogs pa'i dbyibs kyi gnas skabs ldog par 'gyur gyi/de'i rang bzhin mi ldog par 'dod na/ grangs can gyi sma ba ltung zhing / de la yang nyes pa brjod zin to/ /su la gzugs nyid mi rtag pa de la zhes pa la sogs pa'i don du ni grub mtha' smra ba su'i lugs la'am/ 'byung ba las gyur pa'i gzugs gang su zhig la kha dog dang dbyibs dang rnam par rig byed kyi bdag nyid mi rtag pa dang /dbyibs mi rtag pa nyid gnas kyi/ 'byung ba rnams kyi mtshan nyid ni mi rtag pa ma yin no/ /de ste 'byung ba rnams kyi mtshan nyid mi rtag pa ste/ kha dog dang dbyibs kyi rnam pa snga ma las gzhan du mi 'gyur kyang mtshan nyid gzhan du 'gyur ba yin na ni/rab tu grags pa'i 'jig rten na gzhal bya dang / tshad ma dang / tshad ma'i 'bras bu'i tha snyad rnam par gzhag pa nges pa nyid mi 'thad de/ de'i don yang gzhal bar bya ba'i rang bzhin 'di ni sa yin gyi chu la sogs pa ma yin zhes tha dad rnam par gzhag pa dang /shes rab 'di ni sa nyid 'jal bar byed pa'i tshad ma yin no zhes tha dad pa'i tha snyad rnam par gzhag pa mi 'thad de/ sa la sogs pa rang gi mtshan nyid la brten cing gnas pa med de/ de las gzhan gyi ngo bor 'gyur ba'i phyir ro/ /de nyid kyi phyir de dag gi 'bras bu don du gnyer ba rnams de ltar 'jal bar byed pa'i tshad ma 'ga' zhig la brten nas zhugs pa na/de 'dra ba'i don thob pa mi 'thad de/ de'i rang bzhin gzhan du 'gyur ba'i phyir ro/ /de lta na yang sa dang chu la sogs pa'i 'byung ba'i dngos por gzhag pa thams cad don gyis stong pa'i tshig tsam nyid du 'gyur ro//de ltar 'dod pa yang mi 'thad de/ de ltar na rang gi mtshan nyid 'gags nas yang skye bar mthong la/ de yang rgyu nges pa med pa las glo bur du 'byung bar 'dod pas rgyang pan pa'i lta bar ltung bar 'gyur zhes pa'o/ /de ltar na 'byung ba'i rang bzhin gzhan du 'gyur ba mi 'thad mod kyi/de kho na nyid du rtag pa'i dngos por yod pa ma yin te/ sngar bstan pa'i tshad mas gnod pa'i phyir ro/ /kun rdzob tu ni dbyibs la sogs pa mi rtag pa nyid kyis de dang 'brel par 'byung ba'i rang bzhin kyang mi rtag par 'gyur ba'o/ /gzugs gzhan du 'gyur ba mthong zhes pa ni ji ltar rdzas skya bo'i bum pa me yis bsregs pa na/dmar po'i kha dog tu 'gyur bar mthong ba ste/ dbyibs la sogs pa dang de'i rten 'byung ba rnam pa rnams ni 'gyur ba ma yin no/ /gser gyi zhes pa la sogs pa ni kha dog la sogs pa mi 'gyur kyang dbyibs 'gyur ba nyid 'di'i dper byed pa'o//de nyid kyis na snga ma dang mi zlos pa nyid do/ /'di rnams sun 'byin pa yang snga ma bzhin du shes par bya'o/ /de 'dra ba'i rnam par 'gyur bar lta ba'i phyogs su lhung ba'i de la sogs pa ste/ phyi rol pa gang dag sgra dang rlung la sogs pa ni mi rtag pa'o/ / rdo rje dang ri bo la sogs pa ni rtag pa'o zhes yang dag pa'i don las gzhan dang gzhan du de 'dra ba la sogs pa'i rnam pa du mas rtog par byed pa'o/ /'byung ba rnams ni rang gi mtshan nyid la brten cing gnas pa'i phyir mes bsregs kyang mi tshig pa ste/ de'i don ni bud shing la mes bsregs pa na/kha dog dang dbyibs la sogs pa gzhan du 'gyur bas 'tshig par tha snyad byed kyang sa'i mtshan nyid sra ba nyid mi 'dor ba la bsams te bstan pa yin no/ /blo gros chen po zhes pa la sogs pas de dag thams cad don dam par stong pa nyid kyi phyir gzod ma nas mi dmigs shing chad par 'gyur zhes pa'o//de nyid kyi phyir nga ni phyi rol gyi 'byung ba dang 'byung ba las gyur pa rnams rtag pa dang mi rtag pa'i mtha' gnyis dang bral ba ste/ phyi rol gyi dngos po khas mi len pa dang / de ltar snang ba sems tsam du ston cing / sreg pa la sogs pa'i mtshan nyid sna tshogs khas mi len pa'i phyir ro//tshig gi don gzhan ni phal cher shes par zad do/ /yongs su shes pa dang zhes pa ni rtog pa'i yul dang rang gi ngo bo nyid stong pa nyid du rtogs pa'o/ /de lta na byis pa'i skye bo'i rnam par rtog pa ji ltar byung zhe na/ rnam par rtog pa ni rtog pa snga ma rnams kyi mngon par 'du byed pa ste/ rtsol ba las byung ba'o//gtam gyi skyes bu sngon ma grub/ /ces pa la sogs pa'i don ni 'jig rten pa so so'i skye bo dang / 'jig rten las 'das pa 'phags pa'i skyes bu dang / 'jig rten las 'das pa'i mchog tu gyur pa de bzhin gshegs pa skyes bu chen po zhes rnam par gzhag pa ni brjod pa'i gtam tsam yin gyi de kho na nyid du de 'dra ba'i don grub pa med ces pa'o//blo gros chen po zhes pa la sogs pas don de nyid rgyas par ston pa'o/ /mtshan nyid rnam pa gsum ni 'jig rten pa la sogs pa gsum gyis bsdus pa'i chos so/ /de la zhes pa la sogs pas de rnams kyi don bsdus te bstan pa'o//'byung ba 'byung ba'i dngos rtag na/ /ci la mi rtag nyid du rtog /ces pa ni phyi rol pas 'dod pa ltar de kho na nyid du 'byung ba'i dngos po rtag na/ de las gzhan mi rtag pa nyid du rtag par bya ba'i don mi 'thad de/ rgyu mtshan mtshungs pa'i phyir ro/ /tshig gi don gzhan shes par zad do//'phags pa lang kar gshegs pa'i 'grel pa de bzhin gshegs pa'i snying po'i rgyan ces bya ba las mi rtag pa'i le'u ste gsum pa'i bshad pa rdzogs so// //bzhi pa mngon par rtogs pa'i le'us ni de bzhin gshegs pa'i snying po sbyong bar byed pa'i lam gyi rim pa dang /sbyangs pas rnam par dag pa thob pa nyid tshul gzhan gyi sgo nas cung zad bsdus nas ston te/ des kyang sngar dri ba'i skabs su 'gog pa de yang ji lta bu zhes pa la sogs pa'i lan du sbyar bar bya'o/ /de las dang po zhu ba'i tshig ni de nas yang zhes pa la sogs pa ste/ 'gog pa'i go rims kyi mtshams sbyor ba'i mtshan nyid ni spyir nyan thos la sogs pa'i sa'i rim pa gang dang gang la/spang bya gang dang gang 'gog pa'i go rims dang / de rnams spangs pa'i sa'i mtshams sbyor ba'i mtshan nyid dang / khyad par du sa gang nas bzung ste 'gog pa la snyoms par 'jug pa dang /de'i rjes su snyoms par 'jug pa la mkhas par 'gyur ba'i go rims dang mtshams sbyor ba'i mtshan nyid do/ /rmongs par mi ltung bar 'gyur zhes pa ni rtag tu rmongs par mi 'gyur ba'o/ /'dir lan gyi skabs su 'gog pa'i snyoms par 'jug pa ni rnam pa gnyis te/nyan thos kyi dbang du byas pa dang / byang chub sems dpa'i dbang du byas pa'o/ /de'i dang po la bdun te/ rten gyi gang zag dang / khams gang du snyoms par 'jug pa dang / sa gang la brten pa dang / yid la byed pa gang gis snyoms par 'jug pa dang //dgag bya gang 'gog pa dang / 'gog pa'i rang gi ngo bo dang / dus ji srid du 'jug pa'o/ /de la rten gyi gang zag ni 'jig rten pa dang / 'phags pa rgyun du zhugs pa dang / lan cig phyir 'ong ba rnams kyis ni 'gog pa la snyoms par 'jug par mi nus te/ de la bdag med par rtogs pa'i 'jig rten las 'das pa'i shes rab dgos par gsungs pa la/'jig rten pa srid pa'i rtse mo'i bar du thogs pa rnams la yang de 'dra ba'i shes rab med pa'i phyir dang / gzhan yang zhi gnas mthar thug pa srid pa'i rtse mo'i sems thob dgos pa las/ 'phags pa'i gang zag gnyis po de la de 'dra ba mi 'thad de/srid pa'i rtse mo'i sems thob na/ khams 'og ma gnyis kyi nyon mongs pa spangs pas de dag tu skye ba mi 'thad pa'i phyir ro/ /lan cig phyir mi 'ong ba khyad par can ma yin pa rnams kyang 'dod chags dang bral ba tsam yin kyang / bsam gtan bzhi pa'i dngos gzhi ma thob cing /sred pa'i rtse mo'i sems ma thob pas snyoms par 'jug mi nus la/ de dag thob pa'i phyir mi 'ong ba khyad par can ni de la snyoms par 'jug nus pas 'di'i rten gyi gang zag tu 'thad do/ /'phags pa dgra bcom pa rgyan med snyoms par 'jug pa la ma sbyangs pa rnams kyang /bsam gtan gyi dngos gzhi ma thob pas snyoms par 'jug pa'i sgrib pa dang ldan pa'i phyir 'gog pa la snyoms par 'jug mi nus so/ /des na dgra bcom pa rgyan can srid pa'i rtse mo'i bar gyi sems thob pa rnams ni 'di'i rten nyid du 'thad do/ /khams gang du snyoms par 'jug pa ni gang zag de gnyis ka yang 'dod pa'i khams gling gsum gyi mi'i nang du dang po thob pa thob par byed cing /thob nas zhi ba dang bde bar gnas shing snyoms par 'jug pa ni khams gzhan du yang ngo / /'dod pa'i khams su thob par byed pa'i rgyu mtshan yang khams de ni 'du shes dang tshor ba rags pas sdug bsngal dang skyo ba shas che zhing /de nyid kyis myur du 'di rnams zhi ba'i 'gog pa la snyoms par 'jug par bya snyam pas da ltar thob par byed pa'o/ /sa ni srid pa'i rtse mo la brten pa ste/ de nyid 'du shes dang tshor ba cha phra bas dgag par sla ba'i phyir ro/ /de ltar na sngar 'dod pa'i khams pa ni de dag rags pa'i rgyu mtshan gyis skyo ba shas che bas snyoms par 'jug pa nyid du bstan pa dang 'gal lo zhe na/skyon med de/ rten de la sngar srid pa'i rtse mo'i sems ma thob pa'i dus na/ de dag rags pas skyo bar 'gyur zhing / myur du de rnams zhi ba'i 'gog pa thob par bya snyam pa ste/de thob byed kyi yan lag tsam yin la de'i rjes su 'bad pa dang rtsol bas srid pa'i rtse mo'i sems mngon du byas nas de la brten te/ 'gog pa la snyoms par 'jug pa'o/ /des na dus snga phyi la ltos te phra ba dang rags pa mi 'gal ba'o/ /'dir yid la byed pa ni mthong ba'i chos la zhi ba dang bde bar gnas par bya'o snyam pa'i sgo nas snyoms par 'jug gi /'du shes med pa'i snyoms 'jug ltar 'khor ba las nges par 'byung ba'i sems kyis ni ma yin te/ 'di ni 'phags pa'i 'khor ba las nges par 'byung zin pa'i phyir ro/ /dgag par bya ba ni dgra bcom pa rnams kyi dbang du byas na 'dod pa'i khams su snyoms par 'jug pa na/tshogs drug sems la 'byung ba'ang bcas pa 'gog la/ gzugs kyi khams su ni sna dang lce'i rnam par shes pa sngar nas 'gags zin pas/ de dag las ma gtogs pa bzhi 'gog la/ gzugs med par ni yid kyi rnam par shes pa 'ba' zhig 'gog pa'o//nyon mongs pa can gyi yid ni/ dgra bcom nyid ni de ldog go/ /zhes gsungs pas sngar nyid du 'gags pa'i phyir dus der 'gog pa ma yin no/ /phyir mi 'ong ba'i dbang du byas na/ 'dod pa'i khams su ni tshogs bdun sems las byung ba dang bcas pa 'gog la khams gong ma gnyis su yang snga ma'i rjes su 'brangs te shes par bya'o//yang na nyan thos rnam par shes pa'i tshogs brgyad khas mi len pa rnams kyi dbang du byas nas/ go rims bzhin du 'dod pa la sogs pa'i khams gsum dang drug dang bzhi dang gcig 'gog par 'dod de/de dag gi grub mtha' phyin ci log yin gyi/ kun gzhi dang nyon mongs pa can gyi yid ni tshad ma dang lung gis grub pa'o/ /rang gi ngo bo ni tshogs bdun dang drug la sogs pa dang bral ba'i dbang po dang bcas pa'i lus kyi gnas skabs la 'dod do/ /dus ni bskal pa gcig gam gnyis la sogs pa dus ring du snyoms par 'jug pa'o//'dir byang chub sems dpa' rnams kyi dbang du byas nas/ sa drug pa yan chad kyi byang chub sems dpa' ni rten thun mong ba yin la/ khyad par du sems kyi skad cig re re la snyoms par 'jug pa ni sa bdun pa yan chod do//khams ni 'dod pa dang gzugs kyi khams su snyoms par 'jug gi/ gzugs med par ni ma yin te/ byang chub yon tan pha rol phyin nyams 'gyur 'ong zhes/ /gzugs med khams su skye ba don du gnyer mi byed/ /ces gsungs pa'i phyir ro/ /sa ni thams cad la brten pa ste/ ji skad du/ 'dod par gtogs pa'i rnam par shes/ /mnyam gzhag min pas mtshams bzung ste/ /zhes pa la sogs pa gsungs te/ de'i don ni mdo las/ mnyam par ma bzhag pa'i sems mngon du byed do/ /mnyam par ma bzhag pa las 'gog pa la snyoms par 'jug go zhes pa la sogs pa gsungs pa'o//yid la byed pa ni de 'dra ba'i snyoms 'jug sbyang zhing shes par bya snyam pa'i sgo nas te/ ji skad du 'phags pa dkon mchog sprin las/ de'i gong na gang sems kyi mtshan ma med pa/ rgyu ba thams cad 'gag pa/ sgrib pa thams cad dang bral ba 'di ni 'gog pa'o zhes bya ba ste/ de ni shes par bya'o snyam nas byang chub sems dpa' snyoms par 'jug gi zhes bya ba la sogs pa gsungs pa'i phyir ro//dgag par bya ba yang mdo 'di nyid las gsungs pa'i don nam/ gzhan yang 'phags pa nyi ma'i snying po dang / sa'i snying po las/ byis pa so so'i skye bo dang / nyan thos dang rang sangs rgyas kyi tshor ba gsum dang /'du shes gsum la sogs pa thams cad 'gog par gsungs so/ /rang gi ngo bo ni dgag bya de rnams dang bral ba'i kun gzhi rnam par shes pa rig pa stong pa zung du 'jug pa'i bdag nyid do/ /dus ni nyi ma gcig nas bdun gyi bar yin no zhes kyang bla ma dag 'chad do//gzhan yang 'phags pa sa'i snying po las/ byang chub sems dpa' de'i tshe yang 'di snyam du chos thams cad dang / gzugs thams cad kyang sgyu ma dang 'dra ste/ yang dag pa ma yin pas bdag gis tshor ba rnam pa gsum dang / 'du shes gsum la sogs pa thams cad lhag ma ma lus par thams cad gcod do snyam nas/'gog pa'i ting nge 'dzin la snyoms par zhugs so/ /ting nge 'dzin de la gnas nas blo sngon du btang ba bzhin du/ thams cad yongs su gcad de/ ting nge 'dzin gyi ro'i zas kyis 'tsho'o/ /gal te na zhag bdun nam/ zhag bdun gnyis sam/bdun gsum mam/ bzhi'am/ lnga'am/ drug gam/ bdun nam/ brgyad dam/ gal te bskal pa tshad med pa bye ba khrag khrig brgya stong gi bar du ci nus su gnas te/ ting nge 'dzin gyi zas za'o/ /ting nge 'dzin de las langs nas sems rab tu zhi bas ci la yang ma chags te/ bde bar gnas so zhes gsungs so/ /mdo gzhan dag las kyang / byang chub sems dpa' chen po skye ba gcig gis thog pa ni bar gyi bskal pa bcu ru yang 'gog pa la snyoms par 'jug go zhes gsungs so/ /gal te de lta na pha rol tu phyin pa lnga bstan pa las/ bcom ldan 'das byang chub sems dpa' sems dpa' chen pos don gyi dbang gang yang dag par mthong bas 'gog pa'i snyoms par 'jug pa la mnyam par 'jog par mi bgyid/bcom ldan 'das kyis bka' stsal pa/ sha ra dwa ti'i bu 'di la byang chub sems dpa' sems dpa' chen po nyan thos kyi sa'am rang sangs rgyas kyi sar ltung du dogs pa'i phyir/'du shes dang tshor ba 'gog pa'i snyoms par 'jug pa'i bde ba la mnyam par mi 'jog ste/ 'du shes dang tshor ba 'gog pa'i snyoms par 'jug pa la mnyam par gzhag na ni/ dgra bcom pa'i 'bras bu mngon sum du byed par 'gyur bar shes par bya ste/sha ra dwa ti'i bu don gyi dbang 'di yang dag par mthong nas byang chub sems dpa' sems dpa' chen po 'du shes dang tshor ba 'gog pa'i snyoms par 'jug pa la mnyam par mi 'jog go zhes gsungs pa dang / mdo sde 'di nyid las dus cung zad tsam snyoms par 'jug pa nyid du gsungs pas 'di rnams phan tshun 'gal ba nyid du cis mi 'gyur zhe na/skyon med de/ de ltar bstan pa'i don ni byang chub sems dpa' dbang po rnon po nyan thos dang rang sangs rgyas kyi byang chub sngon du ma song ba rnams te/ myur du sems can smin par byed pa la sogs pa'i tshogs rdzogs par bya ste/sangs rgyas par 'dod pas 'gog pa'i bde ba la yun ring du snyoms par zhugs na/ sems can smin par byed pa'i spyod pa las nyams pas/ re zhig nyan thos la sogs pa'i byang chub dang 'dra bar 'gyur bas de yun ring du snyoms par 'jug par mi byed pa la dgongs te bstan pa yin la/de las gzhan du gsungs pa ni nyan thos la sogs pa'i byang chub dman pa sngon du song nas/ de las langs te byang chub mchog tu sems bskyed pa'i byang chub sems dpa' rnams ni byang chub sems dpa'i sa brgyad pa la sogs pa'i gnas skabs su yang sngon goms pa'i rjes su 'jug pas dus yun ring du 'gog pa'i bde ba la snyoms par 'jug pa ste/ji ltar grog shun la sogs pa'i dngos po yun ring du bltab nas skyes bu'i rtsol bas 'then te brkyang ba las/ slar btang ba na snga ma'i rjes su 'jug pa bzhin no/ /de lta na yang de rnams gnas skabs der yang sprul pas sems can gyi don cung zad byed cing /phyis de las langs te tshogs rdzogs par byas nas dus ring mo na mngon par rdzogs par 'tshang rgya bar 'gyur ba'o/ /'phags pa rang sangs rgyas rnams kyang mi slob pa'i sa mthar thug pa thob pa na/ myur du lhag ma med pa'i mya ngan las 'das pa mngon du bya snyam pa'i sgo nas 'gog pa la snyoms par mi 'jug kyang /slob pa'i gnas skabs srid pa'i rtse mo'i sems thob pa rnams ni gnas pa'i 'du shes kyis de la snyoms par 'jug pa'o/ /bdun la ni zhes pa la sogs pas byang chub sems dpa' dang /nyan thos la sogs pa'i khyad par ston te/ de la sems kyi skad cig ni bya ba rdzogs pa'i skad cig ste/ dus cung zad tsam mtshon par byed pa'i tshig go/ /dngos po thams cad kyi ngo bo nyid kyi mtshan nyid gsal zhes pa ni de rnams kyi rang bzhin stong pa nyid du rtogs pas de 'dra ba'i mtshan ma dang /spros pa bkag pa'o/ /nyan thos dang sangs rgyas rnams ni mngon par 'du byed pa can gzung ba dang 'dzin pa'i mtshan nyid du ltung ba ste/ 'jug pa'i rnam par shes pa dang de'i yul stong pa nyid du rtogs pa med par 'du shes dang tshor ba rags pas skyo nas 'bad pa dang rtsol ba'i sgo nas de 'dra ba 'gog pa ste/thal bas g.yogs pa'i me bzhin du gzung 'dzin du rtog pa'i sa bon dang bcas pa'o/ /de bas na de dag ni chos thams cad kun rdzob tu sems su gcig cing / don dam par stong pa nyid du bye brag med pa'i mtshan nyid dang / chos sna tshogs kyi mtshan nyid med par ma rtogs pa'o//mi rung zhes pa'i don ni sna tshogs kyi mtshan nyid med pa la sogs par 'gyur na/ de dag gi grub pa'i mtha' dang 'gal ba'i skyon med du 'gyur ba'o/ /de'i phyir de dag ni sa bdun la khyad par du snyoms par 'jug par mi nus pa'o/ /de las drug dang bdun la sogs pa ni nyan thos rnams kyi dbang du byas na/dkar po rnam par mthong ba'i sa dang / rigs kyi sa dang / brgyad pa dang mthong ba dang / bsrabs pa'i sa dang / 'dod chags dang bral ba'i sa dang / byas pa rtogs pa'i sa dang / de ltar bdun du 'gyur la/ yang gsung rab dag las nyan thos kyi sa zhes smos pa ni bdun po de dag tu 'dus pa'am/de las tha dad par yang 'gyur ba ste/ de ltar na rnam pa brgyad do/ /de la dkar po rnam par mthong ba ni mos pas spyod pa'i sa la gnas pa'i tshe drod dang rtse mo zhes bya ba'i ting nge 'dzin thob pa na/ dang po rnam par byang ba'i chos dkar po mthong ba'i phyir de dag ni dkar po rnam par mthong ba'o zhes sngon gyi slob dpon dag gis bshad de/tshogs kyis ma bsdus pa'i phyir ha cang 'grig pa ma yin no/ /gzhan dag ni tshogs kyi lam gyi gnas skabs na bsams pa las byung ba'i shes rab rjes su dpag pa'i tshad mas bdag med pa gnyis rtogs pa lhag mthong gi ngo bor gyur pa nyid yin no zhes 'chad do//mos pas spyod pa'i sas bsdus pa bzod pa 'bring po'i bar du yang sa de nyid kyis bsdus par lta'o/ /rigs kyis ni nyan thos kyi dbang du byas na bzod pa chen po nas rang gi rigs su nges pa ste/gzhan du drod dang rtse mo'i gnas skabs gnyis la ni rang gi rigs las bzlog nas sangs rgyas su 'gyur ba srid la/ gzhan rang sangs rgyas su ni bzod pa 'bring po man chad du yang 'gyur bar srid pas de rnams kyi gnas skabs su rang gi rigs su ma nges pa'o//de skad du yang / gnyis slob rigs las bzlog nas ni/ /sangs rgyas su 'gyur gzhan gsum yang / /zhes mdzod kyi bstan bcos las gsungs pa'o/ /byang chub sems dpa' dang rang sangs rgyas dbang po rnon po ni drod nas kyang rang gi rigs su nges par bshad do//brgyad pa ni rgyun du zhugs pa'i 'bras bu la zhugs pa ste/ mthar thug pa dgra bcom pa'i 'bras bu nas mar bcal ba'i grangs kyi gnas brgyad pa nyid du 'gyur ba'o/ /mthong ba'i sa ni 'phags pa'i gang zag gi 'bras bu sngar ma mthong ba mthong ba ste/ rgyun du zhugs pa'i 'bras bu la gnas pa'o//bsrabs pa ni 'dod pa'i 'dod chags dang gnod sems la sogs pa bsrabs pa ste/ lan cig phyir 'ong ba'i 'bras bu la gnas pa'o/ /'dod chags dang bral ba ni 'dod pa'i 'dod chags dang gnod sems la sogs pa spangs pa ste/ phyir mi 'ong ba'i 'bras bu la gnas pa'o//de ltar na 'di nyid nyan thos kyi sa drug pa yang yin la/ de la gnas pa'i 'phags pa phyir mi 'ong ba dang khyad par can ni sngar bstan pa ltar 'gog pa la snyoms par 'jug pa'o/ /byas pa rtogs pa ni dgra bcom pa ste/ bya ba byas so byed pa byas so zhes rtogs pa zad pa zhes pa dang mi skye ba shes pa'i ye shes thob pa'i phyir ro//de la 'dir 'bras bu gnyis pa dang / gsum pa dang / bzhi pa la zhugs pa gsum gcig tu bsdoms te nyan thos kyi sa nyid du rnam par gzhag pa na sa'i grangs brgyad du 'gyur ro/ /mngon par rtogs pa'i go rims ni gtso bo nyid rgyu mtshan du byas te dgra bcom pa'i sngon rol nyid du gzhag go//yang zhugs pa rnam pa gsum 'bras bu la gnas pa'i khong du bsdus shing / nyan thos kyi sa zhes pa thams cad la khyab pa thun mong pa nyid du gzhag pa na/ grangs bdun du 'gyur te/ de'i phyir shes rab kyi pha rol tu phyin pa rgyas pa la sogs pa nas tshul de ltar bdun du bshad do//yang 'phags pa rnam par grol ba'i sdes ni/ dkar po rnam par mthong ba ma smos par rigs kyi sa la sogs pa bdun du bshad de/ thams cad bsdoms pas brgyad nyid du 'gyur ba'o/ /rang sangs rgyas rnams kyi yang de dang cha mthun pa las/spangs pa dang rtogs pa'i rnam par thar pa cung zad tsam zhig gis lhag pa'o/ /gzhan yang de dag gis ni chos thams cad kyi dge ba dang mi dge ba'i rang gi mtshan nyid khong du ma chud ces pa ste/ thabs la mkhas pas yongs su bzung nas rang dang gzhan gyi don du 'dod pa'i yon tan la spyod pa dang /ma rungs pa tshar gcod pa ni dge ba nyid yin pa la de ltar ma rtogs pa dang / mya ngan las 'das pa la gcig tu mngon par phyogs pa dang / 'khor ba la rgyab kyis phyogs pa ni mi dge ba nyid yin pa la de ltar ma rtogs pa ste/ kun rdzob kyi dbang du byas pa'o/ /don dam par de rnams kyi chos nyid de bzhin nyid ma rtogs pa'o//de bas na zhes pa la sogs pas ni don bsdus pa ston to/ /gang gis zhes pa ni bden pa gnyis kyi thabs la mkhas pas so/ /blo gros chen po zhes pa la sogs pas ni de rnams kyi re zhig rnam par rtog pa ldog pa'i dus bstan pa'o/ /de'i don yang nyan thos dang rang sangs rgyas rnams ni dus yun ring por ting nge 'dzin gyi bde bas myos pas rnam par rtog pa ldog pa'o//de dag rang gi lugs kyis ni lhag ma med pa'i mya ngan las 'das pa'i dbyings su rnam par rtog pa gtan du ldog par yang 'dod do/ /byang chub sems dpa' rnams ni re zhig zhi ba'i bsam gtan la snyoms par zhugs pas dus cung zad du rnam par ldog pa'i rigs mtha' dag ldog pa'o//'du shes ni rtog pa'i khyad par ro/ /sa dang po dang zhes pa la sogs pas ni sa bdun la gnas pa'i byang chub sems dpa' dang byis pa'i skye bo la sogs pa rnams kyi rtog pa'i khyad par ston te/de rnams ni rang gi sems nyid gzung ba dang 'dzin par snang ba las/ de ltar ma shes shing gzung ba dang 'dzin pa'i dngos por rtog pa'o/ /blo gros chen po zhes pa la sogs pas ni btags pa pa'i mya ngan las 'das pa nyid ston te/ de la sa brgyad pa ni sngar bstan pa ltar nyan thos la sogs pa'i dbang du byas na byas pa rtogs pa'i sa ste/mngon par rtogs pa'i go rims dang sbyar na de nyid grangs kyi gnas brgyad pa yin pa'i phyir ro/ /byang chub sems dpa' rnams ni snying rje la sogs pa'i rgyu mtshan gang gis sems can gyi don gyi sbyor ba bshol nas/ting nge 'dzin gyi bde ba la yun ring du mi gnas par longs spyod rdzogs pa'i sku'i sangs rgyas rnams kyi phyag glang po'i sna lta bu de'i mgo la gzhag pa dang / 'od zer la sogs pa'i sgo nas ting nge 'dzin de las sad par byed pa'o/ /de lta ma yin na sems can smin par byed pa la sogs pa'i tshogs ma rdzogs pas/de bzhin gshegs pa'i chos kyi sku'i ye shes ma rdzogs pa'i phyir/ sems can gyi bya ba yang rgyun chad par 'gyur ba dang de bzhin gshegs pa'i rigs kyi gdung yang chad par 'gyur te/ yang dag pa'i lam gcig nas gcig tu brgyud pa med pas 'jig rten gyi khams sna tshogs su sangs rgyas du ma mngon par rdzogs par 'tshang rgya ba med pas byang chub sems dpa' de rnams snga ma ltar rjes su 'dzin pa'o//gzhan yang sangs rgyas du ma mngon par rdzogs par sangs rgyas pa de rnams kyang / sangs rgyas kyi che ba ste/cho 'phrul rnam pa gsum mngon du 'gro ba'i sgo nas theg pa sna tshogs kyi lam ston pa ste/ de'i phyir de 'dra ba'i dgos pa las mi nyams par bya ba'i don du/ de dag yongs su mya ngan las mi 'da' bar 'dzin pa'o/ /bde bas 'phrogs par 'gyur ba ni sems de'i dbang du 'gyur zhing de nyid la yun ring du gnas pa'o//de yang mya ngan las 'das pa mtshan nyid pa ni ma yin te/ 'di la mthar thug yod min te/ /zhes pa la sogs pa sngar bstan no/ /des na de dag nyid kyi mngon pa'i nga rgyal gyi sgo nas mya ngan las 'das pa'i blor 'gyur ba'o/ /blo gros chen po zhes pa la sogs pas ni sa bdun la gnas pa'i byang chub sems dpa' dbang po rtul po rnams sangs rgyas kyis rjes su 'dzin pa'i tshul ston te/de'i don ni sa bdun pa man chod du nyon mongs pa can gyi yid gnas par ma gyur zhing / de yang kun gzhi la dmigs nas bdag tu lta ba dang / bdag tu chags pa dang / bdag tu nga rgyal ba dang / bdag tu rmongs pa dang mtshungs par ldan pa yin pas chos thams cad kyi rang dang spyi'i mtshan nyid la sogs pa mi shes pa dang / mu stegs byed kyi bdag tu lta ba dang / lam ste ting nge 'dzin dang / brtul zhugs la sogs par ltung na mi rung ngo snyam du dgongs nas/sems dang yid la sogs pa de rnams kyi kun rdzob pa'i mtshan nyid dang / 'jug pa la sogs pa la 'dris par bya ba dang / don dam par de rnams kyi yul dang rang bzhin stong pa bdag med pa la sogs pa la 'dris par bya ba'i don du/ de rnams kyi bye brag ji lta ba bzhin du bstan pa yang nga yis byas zhes pa'o//de ltar rtogs par bya ba'i phyir sa'i go rims la sogs pa rnam par gzhag par bya ste/ de kho na nyid du go rims dang 'jug pa la sogs pa thams cad mi 'thad pa'o/ /de ltar yin mod kyi de las gzhan du byis pa'i skye bo la sogs pa rnams kyis 'jig rten dang 'jig rten las 'das pa'i sa'i go rims dang mtshams sbyor ba la sogs pa sna tshogs kyi dngos por brtags te/de yang phyin ci log pa nyid kyis khams gsum par rtogs pa'o/ /de ltar brtags pa 'di ni kun rdzob tu rang gi sems snang ba tsam ste byis pa rnams kyis khong du mi chud ces pa la sogs pa'o//de'i phyir byis pa'i skye bo dang 'phags pa de dag gis rtogs par bya ba'i don du sa'i go rims kyi mtshams sbyor ba la sogs pa phyin ci ma log par nga dang sangs rgyas rnams kyis bstan cing rnam par gzhag pa ste/ gsal bar byas pa'o/ / gal te 'dir sa thob pa'i byang chub sems dpa' rnams mu stegs kyi lta ba dang lam du 'gyur ba ni mi srid de/ de ltar na de dag 'khor ba'i sdug bsngal dang yang 'brel par 'gyur bas sngar bstan pa ltar 'jig pa rnam pa lnga dang bral bar mi 'thad cing / gzhan yang sa dang po la chos kyi dbyings kun du 'gro ba rtogs pa mi 'thad do zhe na/skyon med de/ de 'dra ba'i log par ltung ba nyid du mi 'gyur mod kyi/ sngar bstan pa ltar bsgoms pas spang bar bya ba lhan cig skyes pa'i 'jig tshogs la lta ba la sogs pa la brten nas rjes kyi gnas skabs cung zad 'phel bar 'gyur zhing /phyi rol pa rnams dang / phyogs 'ga' zhig nas mtshungs par 'gyur ba srid pas so/ /gzhan yang blo gros chen po zhes pa la sogs pa ni sngar bstan pa ltar/ byang chub dman pa gnyis sngon du song ba'i byang chub sems dpa' rnams kyi rnam par thar pa 'ga' zhig ston te/de'i don yang nyan thos kyi rigs can 'ga' zhig gis dang por nyan thos kyi byang chub mngon du byas shing / de nas rnam par thar pa cung zad kyis lhag par rang rgyal ba'i byang chub rtogs par 'gyur la/ de'i rjes su byang chub mchog tu sems bskyed nas/ byang chub sems dpa'i sa brgyad kyi bar du yongs su rdzogs par byas pa'am/yang byang chub dman pa de dag mngon du byas pa las de'i rjes thogs la so sor byang chub mchog tu sems bskyed nas/ byang chub sems dpa'i sa brgyad kyi bar yongs su rdzogs par byas pa'o/ /sngar gyi don de ltar yin pa yang 'phags pa dpal phreng gi mdo las/nyan thos su 'gyur zhing rang sangs rgyas su yang 'gyur la/ phyis ni yang dag par rdzogs pa'i sangs rgyas nyid du yang 'gyur zhes gsungs pa'i phyir ro/ /de ltar na sngar nyan thos dang rang sangs rgyas nyid yin pas byang chub sems dpa'i sa brgyad pa yongs su rdzogs pa'i gnas skabs na yang /de dag gi ming gis brtags pa'o/ /de 'dra ba ni sngar bstan pa ltar goms pa'i rjes su 'jug pas dus ring por ting nge 'dzin gyi bde bas myos pa'o/ /rang gi sems snang ba tsam yin la mi mkhas zhes pa ni rab tu dben pa'i chos la mos la mos pa'i blo ni ma yin zhes pa dang sbyar te/rig pa dang stong pa dang zung du 'jug pa mtha' gnyis spangs pa'i dbu ma'i don ma rtogs pa zhes pa'o/ /rang dang spyi'i mtshan nyid kyi sgrib pa ni shes bya'i sgrib pa'o/ /bdag med pa gnyis rtogs pa ni byang chub sems dpa'i lam la zhugs pa ste/ de ltar na yang cung zad stong pa nyid kyi mthar ltung zhes pa'o//de 'dra ba ni rang gi mngon pa'i nga rgyal dang bcas pa'i rnam par rtog pas de 'dra ba'i bde ba la mya ngan las 'das par mos pa'o/ /blo gros chen po zhes pa la sogs pas byang chub dman pa sngon du song ba'i byang chub sems dpa' rnams ni 'gog pa'i ting nge 'dzin gyi bde ba'i sgo mthong ba ste/lan cig mngon du byas nas de las 'da' ba'o/ /de'i rgyu mtshan yang rang gi sngon gyi smon lam la sogs pa dang / de bzhin gshegs pa'i byin gyi rlabs kyis de las sad nas mthar thug pa'i gnas chos kyi sku'i ye shes la 'jug pa'i thabs kyi rnam par shes pas ting nge 'dzin gyi bde ba la yun ring du mi gnas zhes pa'o//gal te rnam par rtog pa'i rigs thams cad spangs pa ni yin nam zhe na/ de dag gis zhes pa la sogs pa gsungs so/ /chos thams cad zhes pa la sogs pas ni mthar thug pa'i gnas la 'jug pa'i tshul ston te/ mi 'jug pa yang ma yin te zhes pa las ni de dag la kun rdzob tsam du thob bya'i rang bzhin du rtog cing de'i don du 'jug pa'o//'jug pa'i tshul yang ye shes de nyid thob par bya ba'i phyir de dag thams cad sgyu ma lta bur rtogs pa'i ye shes sngon du 'gro ba ste/ des zin par byas nas 'jug pa'o/ /de yang ji ltar rmi lam na 'ga' zhig gis 'bad pa dang rtsol ba drag pos chu la rgal bar rmi ba las/gnas skabs de nyid kyis gnyid sad nas de'i de ma thag tu ci 'di bden nam brdzun zhes rtog go/ /de'i rjes thogs su de 'dra ba ni bden pa yang ma yin la/ de la ltos nas brtags pa'i brdzun pa yang ma yin te/de las gzhan du mngon te 'dra ba mthong ba la sogs pa'i rnam par rtog pa'i bag chags las de ltar snang ba'i yid kyi rnam par shes pa brdzun pa nyid snang ngo snyam du sems te/ de bzhin du zhes pa la sogs pa phal cher shes par zad do/ /dang po nas bdun du 'pho zhes pa ni sa bdun gyi bar la dbang po rnon pos chos thams cad sems kyi snang ba tsam du mngon par rtogs shing /sems kyang sgyu ma la sogs pa dang mtshungs par rtogs la/ de nyid kyis gzung ba dang / 'dzin pa'i dngos por rtog pa dang bral ba'i sems dang sems las byung ba'i rnam par rtog pa rgyu ba mthong zhes pa ste/dgag pa'i rnam pa can gyi rtog pa ste/ bzang po'i rtog pa rgyu ba mthong nas de 'dra ba'i rtog pa dang bcas pa'i shes rab kyis sangs rgyas kyi chos rnams la rab tu sbyor ba'o/ /de 'dra ba'i rnam par rtog pa ni mya ngan las 'das pa khong du chud par byed pa'i sbyor ba ste lam yin gyi/de 'dra ba'i lam 'jig par byed pa ni ma yin no/ /sems dang zhes pa la sogs pas ni sngar bstan pa'i sa brgyad pa la rnam par rtog pa mi 'jug par mthong zhes pa nyid ni rgyas par ston pa'o/ /chos bstan zhes pa ni snga ma rnams kyis bstan pa las rtog pa med pa'i ye shes khong du chud pa'o//de 'dra ba spros pa dang bral ba'i don dam pa 'di la go rims dang mtshams sbyor ba'i rnam par dbye ba mi 'thad de/ de dag ni rjes kyi gnas skabs na ji ltar snang ba kun rdzob kyi bden pa la brten nas bstan pa'o/ /de la zhes pa la sogs pas don lhag ma dang bcas te bsdus nas bstan pa'o//de la dang po tshig rkang pa lnga yis ni don mdo tsam du ston cing / de nas tshigs su bcad pa bzhis ni de dag gi don rgyas par 'chad pa'o/ /de nas tshigs su bcad pa gnyis kyis sa dang sa la gnas pa'i gang zag gi dbye ba la ma rmongs par bya ba'i don du rgyas pa dang bsdus pa la sogs pa'i dbye ba ston pa'o//de la/ sa bdun dag ni sems yin te/ /zhes pa la sogs pa'i tshig gi don ni byang chub sems dpa'i sa bdun la rnam par shes pa'i tshogs brgyad gnas ma gyur pas sems kyi sa zhes bya'o/ /sa brgyad pa la mnyam par gzhag pa'i gnas skabs na gzung ba dang 'dzin pa gnyis kyi rnam par snang ba med cing rjes kyi gnas skabs na yang rnam par mi rtog pa la dbang thob pas de dag tu zhen pa dang med pa'i phyir snang ba med pa zhes bya'o//de nas dgu pa dang bcu pa gnyis ni chos kyi sku ye shes kyi bdag gi nye ba'i rgyur gyur pas gnas zhes pa'am/ yang so so yang dag par rig pa'i ye shes la dbang ba dang /dbang mngon par shes pa'i las la dbang bas chos ston pa dang / phrin las sna tshogs la dbang sbyor ba'i gnas yin pas/ de dag ni gnas [(]gyi [,]kyi [)]sa zhes pa'o/ /de rnams las gzhan sa bcu gcig pa ni/ sangs rgyas kyi rang bzhin gyi sa ste sgrib pa gnyis bag chags dang bcas te dag pa dang /de bzhin nyid so so rang gis rig pa ste/ spangs pa dang rtogs pa'i yon tan mthar thug pa 'di ni sangs rgyas pa'i rang bzhin zhes pa'o/ /des kyang chos kyi sku'i rang bzhin gtso bor bstan la longs spyod rdzogs pa'i sku'i gnas ni dbang phyug chen po zhes pa la sogs pa ste/sku mtshan dang dpe [(]byed [,]byad [)]la sogs pa'i rnam par snang ba ye shes kyi rang bzhin du gyur pa/ 'jig rten dang 'jig rten las 'das pa'i phun sum tshogs pa thams cad la dbang 'byor pa ste/ de nyid kyi zhing khams su snang ba gzhi rin po che las grub cing rin po che sna tshogs kyis brgyan cing mdzes par snang ba/ji ltar me'i phung po la me lce dang 'od zer sna tshogs 'byung ba bzhin du rin po che'i 'od zer sna tshogs pa yid du 'ong ba der skyes pa rnams kyi bsod nams kyi snang ba yin pas 'tshe ba'am mi mthun pa med par gyur pa ni zhi ba'o/ /yang ye shes kyi rang bzhin gyi sku de nyid las sa bcu'i byang chub sems dpa' rnams la/theg pa chen po'i chos kyi 'od zer sna tshogs pa yid du 'ong ba zhi ba rab tu 'byung zhes kyang sbyar bar bya'o/ /de 'dra ba'i ye shes de dag gis ma 'ongs pa'i dus su yang srid pa gsum po sprul par byed cing / da ltar gyi dus su yang sprul pa dang sngar 'das pa'i dus su sprul zhes pa'o//gal te srid pa gsum po ni sems can de rnams kyi las dang nyon mongs pa'i sprul pa ma yin nam/ ji ltar na ye shes des sprul pa yin zhe na/ bden mod kyi ye shes de'i rang bzhin du gyur pa de bzhin gshegs pa'i snying po sems can thams cad kyi sems kyi chos nyid spros pa dang bral zhing 'od gsal ba/de nyid kyi rnam par 'gyur ba las srid pa gsum po sna tshogs su snang ba la dgongs te bstan pa'o/ /de ltar yang / rang gi rig pa'i 'gyur ba las/ /dman pa las ni las bskyed de/ /rang gis 'phrog cing rang gis byed//rang gi rgyal po rang gtso bo/ /zhes gsungs pa lta bu'o/ /de lta bu'i gnas khyad par can du snang ba der dngos su theg pa chen po 'ba' zhig ston cing / de las brgyud pa'i sprul pa'i sgo nas theg pa sna tshogs ston par byed pa de ni de'i rang bzhin gyis te/ ye shes de nyid kyi bdag nyid yin gyi/de las gzhan phyi rol gyi ngo bor grub pa med ces pa'o/ /de ltar na sa dang theg pa'am/ de la gnas pa'i gang zag gi rnam par dbye ba mi 'dra ba du ma mdo 'di nyid dam/ gzhan las gsungs pas gdul bya rnams ci nges pa'i don ni gang yin zhes the tshom mam phyin ci log tu gyur pas de dag bsal ba'i don du/bcu po pa ni zhes pa la sogs pa smos te/ sngar bstan pa'i tshul gyis nyan thos kyi rigs can 'ga' zhig gis go rims bzhin du nyan thos dang rang rgyal ba'i byang chub mngon du byas shing / de nas byang chub mchog tu sems bskyed de/byang chub sems dpa'i sa brgyad kyi bar du yongs su rdzogs par byas nas/ de ni sngar gyi dman pa'i sa gnyis dang / byang chub sems dpa'i sa brgyad de/ de ltar sa bcu yongs su rdzogs par byas pa yin pas bcu po pa zhes kyang bya la/ de nyid sngar gyi dus na nyan thos yin la/de yang mya ngan las 'das pa'i lam dang 'bras bu la zhugs pa'i dang po yin pas dang po pa zhes bya'o/ /de'i don yang sa bcu po yongs su rdzogs pa'i dus na nyan thos ma yin yang / sngar gyi ming snying mthun gyis btags nas de ltar bstan pa'o/ /yang de 'dra ba'i nyan thos mtshan nyid pa de'i sa dang /sa la gnas pa'i gang zag ni rgyas par phye na sngar bstan pa ltar dkar po rnam par mthong ba nas/ byas pa rtogs pa'i bar rnam pa brgyad do/ /dgu po yang ni bdun pa ste/ /zhes pa ni nyan thos kyi rigs can gang zhig nyan thos kyi byang chub mngon du byas nas/ rang sangs rgyas kyi sa ma bgrod par byang chub mchog tu sems bskyed nas snga ma ltar sa brgyad kyi bar yongs su rdzogs par byas pa ni/dgu po'am dgu po pa yin la/ de yang bdun pa ste sngar bstan pa ltar/ nyan thos kyi sa logs su ma bgrangs par bdun du bsdus pa'i dus su de'i grangs kyi gnas bdun pa ni byas pa rtogs pa ste dgra bcom pa yin la/de yang sngar bstan pa ltar sa dgu yongs su rdzogs pa'i dus na/ byang chub sems dpa' yin kyang sngar gyi ming gis btags nas de ltar bstan pa'o/ /yang / bdun po pa yang brgyad po yin/ /zhes pa ni de ltar bsdus na sa bdun dang de la gnas pa'i gang zag bdun po yang /rnam par spros na snga ma ltar brgyad du 'gyur ba'o/ /yang dgu po zhes pa rang sangs rgyas kyi rigs can 'ga' zhig gis rang gi byang chub mngon du byas nas byang chub mchog tu sems bskyed de sa brgyad kyi bar du yongs su rdzogs par byas pa yang /sngar gyi tshul de nyid kyi rjes su 'brangs te rtogs par bya'o/ /gnyis po pa ni gsum po yin/ /zhes pa ni sa bdun gyi gnas skabs na sems kyi skad cig re re la 'gog pa la snyoms par 'jug par nus pa dang / mi nus pa gnyis po ni rgyas par phye na gsum du 'gyur ba ste/ de ltar mi nus pa nyan thos dang rang sangs rgyas gnyis su phye bas so//de ltar gsum po re re yang dbang po rtul po dang rnon po gnyis gnyis su phye bas rnam pa drug tu 'gyur ba'o/ /bzhi po yang ni lnga po yin/ /zhes pa ni theg pa chen pos bsdus pa'i sa dang sa la gnas pa'i gang zag rnam pa bzhi ste/sems kyi sa dang / snang ba med pa dang / gnas kyi sa dang / sangs rgyas kyi sa'o/ /de yang gnas kyi sa ni dgu pa dang bcu pa gnyis su 'gyur bas rgyas par phye na lnga nyid yin zhes pa'o/ /de ltar na rnam par dbye ba ni gcig tu nges pa med de/ rnal 'byor pa'i kun rdzob dag pa 'jig rten pa'i ye shes kyi ngo bo na rgyas pa dang bsdus pa la sogs pa'i sgo nas phye na gang ltar yang yin zhes pa'o//yang don dam par snang ba med pa'i ye shes sam de'i yul de bzhin nyid la ni/ de 'dra ba'i rim pa'am dbye ba mi 'thad ces pa'o/ /yang 'di rnams kyi don ni mdo sde 'di dang brjod bya'i don gcig tu ston pa/'phags pa stug po bkod pa'i rgyan las/ shes pa rnams dang slob pa bcu/ /brgyad pa mang na lan bdun dang / /rigs nas rigs dang lan cig 'ong / /bar chad gcig pa'i gang zag dang / /bar mar mya ngan 'da' ba dang / /gzhan skyes mya ngan 'da' ba dang //mngon par 'du byed 'du mi byed/ /steng ma'i rgyun kyang de bzhin te/ /zhes gsungs pas de 'dra ba slob pa'i gang zag bcu ni/ dang po nyan thos kyi theg pa pa yin te/ de yang / de nyid tshol la thog mar ni/ /thams cad yod ces brjod par bya/ /zhes gsungs pas/de bzhin gshegs pas thog ma nyid du gsungs pa'i lam la nan tan du byed pa nyan thos kyi gang zag ste/ gong du bstan pa'i sa de dang de rnams la gnas pa'o/ /de 'dra ba'i dang po pa ni rnam par phye na brgyad de/ rgyun du zhugs pa rgyu 'bras nas dgra bcom pa rgyu 'bras kyi bar du'o/ / gal te thog mar bstan pa'i lam nyams su len pa ni rang sangs rgyas kyang ma yin nam zhe na/ de ltar bden pas rang sangs rgyas dang lhan cig 'phags pa'i gang zag dgu ru 'gyur la/ de yang bsdu na rnam pa bdun te/ rgyun du zhugs pa dang / lan cig phyir 'ong ba dang //phyir mi 'ong ba dang / dgra bcom pa rgyan dang bcas pa dang / rgyan med pa dang / rang sangs rgyas bse ru lta bu dang / tshogs na spyod pa'o/ /'dir bdun pa zhes pa ni de dag spyir bstan pa yin gyi/ snga ma ltar grangs kyi gnas 'dzin pa'i tshig tu sbyar ba ma yin no/ /de 'dra ba'i bdun po pa yang tshogs na spyod pa la dbang po 'bring dang rtul po gnyis su phye bas brgyad du 'gyur ba'o//gnyis po pa ni gsum po yin/ /zhes pa ni brgyad pa dang rgyun du zhugs pa'i 'bras bu la gnas pa gnyis ni gsum du 'gyur te/ po zos na srid pa lan bdun pa la sogs pa rab dang 'bring dang tha ma rnam pa gsum sngar ji skad du bstan pa bzhin no//'di yang gnyis po re re zhing phye na gsum du 'gyur ba la dgongs pa yin gyi/ nges pa'i don du na rnam pa drug tu 'gyur ba'o/ /de nyid kyi phyir/ gsum po yang ni drug yin no/ /zhes 'og tu gsungs pa ste/ sngar gyi gsum po re re la yang gnyis gnyis su 'gyur ba'o//yang na byas pa rtogs pa'i sa zhes pas mtshon pa/ zad pa shes pa dang mi skye ba shes pa'i ye shes dang skye ba gnyis ni gsum du 'gyur te/ nyan thos dang / rang sangs rgyas kyi sa dang / de bzhin gshegs pa'i sa'o/ /de la snga ma gnyis ni phyin ci log pa yin la/de bzhin gshegs pa ni phyin ci ma log pa ste/ ji skad du/ dri ma zad dang mi skye ba'i/ /ye shes byang chub ces brjod de/ /zad med skye med phyir de dag /go rims bzhin du shes par bya/ /zhes gsungs pa lta bu'o/ /bzhi po yang ni lnga po yin/ /zhes pa ni spyir 'phags pa'i gang zag sde bzhi ste/nyan thos dang / rang sangs rgyas dang / byang chub sems dpa' dang / yang dag par rdzogs pa'i sangs rgyas so/ /de la nyan thos ni sngar 'di nyid du gsungs pa ltar zhi ba bgrod pa gcig pu pa dang / byang chub chen por yongs su bsngos pa ste/ de ltar na rnam pa lnga ru 'gyur ba'o//gal te de ltar na sprul pa'i nyan thos kyang sngar gsungs pa ma yin nam zhe na/ de ni byang chub sems dpa' nyid yin no zhes sngar bstan no/ /'dir dngos su gang zag gi dbye ba bstan pas kyang de rnams gang la gnas pa'i sa dang / theg pa'i dbye ba yang bstan pa'o/ / sa dang theg pa yang rtogs pa'i ye shes kyi bye brag nyid la 'jog pas tha dad pa nyid du bsam par mi bya'o/ /'phags pa lang kar gshegs pa'i 'grel pa de bzhin gshegs pa'i snying po'i rgyan las le'u bzhi pa'i rnam par bshad pa rdzogs so// //de nas yang zhes pa la sogs pas thob par bya ba'i 'bras bu sangs rgyas kyi rang bzhin sngar bstan pa de nyid tshul gzhan gyi sgo nas bsdus te ston pa las/dang por dri ba dgod pa'o/ /bcom ldan 'das kyis zhes pa la sogs pas lan rgyas par bstan te/ de'i don yang de bzhin gshegs pa ni rtag pa'i dngos por mi 'thad de/de lta na gzhan dag gis dbang phyug rtag pa thams cad mkhyen cing byed pas 'gro ba thams cad kyi rgyur brtags pa la sogs pa dang khyad par med par 'gyur ba'o/ /gal te 'dir de dang 'dra ba ni 'bras bu rim pa can la sbyor bar byed pa dang / shes bya'i yul rim pa can la 'jug pas rtag pa dang gcig pu'i bdag nyid du mi 'thad de/'bras bu rim can nyid sbyor bas/ /rtag rnams gcig pu'i bdag nyid min/ /zhes gsungs pa lta bu'o zhe na/ ma yin te/ de ni de bzhin gshegs pa thams cad mkhyen cing 'gro ba thams cad kyi don byed par khas len pa la yang mtshungs pa'i phyir ro//ma byas pa rtag pa'i phyir zhes pa ni de 'dra ba'i rang bzhin du gzhan las khyad par med par 'gyur ba'i phyir/ de bzhin gshegs pa ni rtag pa'ang ma yin zhes pa'o/ /yang gzhan dag de bzhin gshegs pa ni grong khyer rtswa mchog shing sA la zung gi tshal du lhag ma med par mya ngan las 'da' bar 'gyur ba mi rtag pa'i rang bzhin yin no snyam na ma yin te/de ltar na 'dus byas pa'i mi rtag pa dus kyi mthar 'jig pa dang / dang po nyid nas skad cig ma'i dngos por 'gyur te/ de'i phyir de bzhin gshegs pa'i zag pa med pa'i phung por grags pa dang /mtshan nyid dang ldan pa'i mtshan [(]bzhi [,]gzhi [)]rnams zhig pas med pa'i phyir chad par 'gyur zhes pa'o/ /de ltar 'dod pa'o zhe na/ mi 'thad de/ de lta na de'i don du bskal pa du mar tshogs rdzogs par byed pa don med par 'gyur ba'i phyir ro/ /gzhan yang de dag ni 'chi bdag gi bdud la sogs pa bcom pas tshul de ltar mya ngan las 'da' ba ma yin te/ji skad du/ mya ngan mi 'da' 'da' la min/ /zhes pa la sogs pa sngar bstan pa bzhin no/ /gal te 'dir gzhan dag byas pa ni mi rtag par 'gyur ba'i nges pa med de/ rdo rje dang ri la sogs pa bzhin no snyam du sems na/blo gros chen po zhes pa la sogs pa lan du sbyar bar bya'o/ /gzhan yang de bzhin gshegs pa byams pas mi rtag cing rgyun chad par 'gyur ba'i phyir/ de'i ched du bsod nams dang ye shes kyi tshogs rdzogs par byed pa yang don med par 'gyur ro/ /yang na ngag 'di'i don ni de bzhin gshegs pa rang bzhin gyis yod na sngar bstan pa ltar med pa nyid du 'gyur ba mi 'thad pa las/de ltar med par 'gyur na rang bzhin gyis yod pa ma yin pas de'i ye shes chos kyi sku'i tshogs rnams don med pa ste/ bden pa'i don nyid du ma grub par 'gyur zhes pa'o//gzhan yang 'khor los sgyur ba'i rgyal po la sogs pa 'dus byas pa'i dngos po gzhan las/ 'ga' zhig kho na de bzhin gshegs par 'dod pa'i bye brag gi gtan tshigs med pa'i phyir/ thams cad khyad par med par de bzhin gshegs par 'gyur ro/ /gal te bye brag gi gtan tshigs med pa ni ma yin te/de bzhin gshegs pa ni tshogs gnyis rdzogs pa las byung ba spangs pa dang thob pa'i yon tan mthar thug pa'i phyir/ gzhan dang mtshungs pa ma yin no zhe na/ ma yin te sngar bstan pa ltar dus kyi mthar 'chi ba'i chos can du 'gyur bas rdo rje lta bu'i sku thob pa med pa'i phyir phung po dang 'chi bdag gi bdud la sogs pa bcom pa med cing /tshe la dbang ba la sogs pa mi thob pas spangs pa dang thob pa'i yon tan mthar thug pa med pa'i phyir/ ji ltar na gzhan dang mi mtshungs zhes pa'o/ /gzhan yang rtag pa ni 'bras bus mi 'thad pa'i phyir/ de'i don du tshogs sog pa mi 'thad do/ /gzhan yang zhes pa la sogs pas de bzhin gshegs pa spros pa thams cad dang bral ba med par dgag pa'i rang bzhin 'gyur ba med pa tsam la rtag pa nyid du khas len pa mi 'thad ces pa ste/ gzhung gi don ni shes par zad do/ /gzhan yang blo gros chen po rnam grangs gang gis zhes pa la sogs pas de bzhin gshegs pa'i chos kyi sku ye shes kyi bdag nyid ni rgyun la nyams pa med pas rtag pa'o//gal te de ni rgyu tshogs gnyis kyis mngon par 'du byas pa'i phyir rtag par 'gal lo zhe na/ ma yin te/ tshogs gnyis rdzogs par byas pas ni de'i mi mthun pa'i phyogs glo bur gyi dri ma sbyangs pa 'ba' zhig tu zad kyi/de'i rang bzhin spros pa dang bral zhing 'od gsal ba ni/ de bzhin gshegs pa rnams byung yang rung ma byung yang rung ste/ dang po nyid nas thams cad kyi sems la ldan cing gnas pa'o/ /'dir mngon par rtogs pa rnams zhes pa ni de dag gi sems so//chos nyid ni ye shes kyi de bzhin nyid don dam par stong pa'o/ /chos mi 'gyur ba ni don dam par stong yang myong zhing rig pa ma 'gags pa ste/ rig pa dang stong pa zung du 'jug pa'o/ /chos gnas pa ni de nyid kyi rnam grangs so/ /'dug ces pa ni rtag tu thams cad kyi sems la gnas pa'o//des na nam mkha' la thogs par byed pa'i dngos po dang bral ba'i chos nyid ni gnas skabs thams cad du mi 'gyur ba dang mtshungs pa ste/ byis pa'i skye bo rnams kyis khong du mi chud ces pa'o/ /blo gros chen po zhes pa la sogs pas ni de bzhin gshegs pa'i rang bzhin bsdus te bstan pa'o//rab tu phye zhes pa ni de dag gis khyab cing de'i rang bzhin du gyur pa'o/ /gzhan ni shes par zad do/ /blo gros chen po gnyis yod na zhes pa la sogs pas tshul gzhan gyi sgo nas rtag pa dang / mi rtag pa nyid du 'gyur ba 'gog pa ste/spyir khyab par byed pa gnyis pa'i chos gcig dang ldan na/ khyab par bya ba rtag pa nyid du 'gyur ba yang mi srid pa las/ de 'dra ba'i khyab byed mi 'thad pas gnyis po dben pa ste/ de bzhin gshegs pa gnyis su snang yang gnyis kyi dngos po don dam pa bas dben pa'o//blo gros chen po rnam par rtog pa zhes pa la sogs pas ni phyin ci log gi rtog pa zad pas de 'dra ba'i lta ba ldog par 'gyur gyi/ dben par rtogs pa'i shes rab kyi blo zad pas ni phyin ci log gi lta ba ldog pa ni ma yin te/ shes rab kyi blo ni phyin ci log gi lta ba'i gnyen por 'gyur ba'o//de la zhes pa la sogs pas don bsdus te ston pa'o/ /rtag dang mi rtag rab phye bar/ /zhes pa ni ye shes rgyun dang ldan pas rtag pa'am/ de'i chos nyid 'gyur ba med pas rtag pa dang / yang kun rdzob tu ye shes skad cig ma nyid yin pas de dag gis rab tu phye zhing khyab par gnas zhes pa'o//de dag lta ba'i dbang mi 'gro/ /zhes pa ni sems log par lta ba'i dbang du mi 'gro ba'o/ /rtag pa dang zhes pa la sogs pa'i don ni rtag pa dang mi rtag pa gang yin yang rung ste/ rang rang gi rgyud la tshogs gnyis sdud cing sogs pa don med par 'gyur ba'o/ /ji srid du yang zhes pa la sogs pas ni de kho na nyid du phyogs cha 'ga' zhig khas len pa de srid du log pa'i mu stegs can la sogs pa dang 'dres par 'gyur zhes pa'o//rtsod pa brtsad par mi bya zhes pa ni de 'dra ba'i don zab mo la the tshom mi za ba nyid du gdams pa'o/ /'phags pa lang kar gshegs pa'i 'grel pa de bzhin gshegs pa'i snying po'i rgyan las le'u lnga pa'i 'grel pa rdzogs so// //de nas yang zhes pa la sogs pas sngar bstan pa de bzhin gshegs pa'i snying po nyid tshul gzhan gyi sgo nas rgyas par ston pa las/ dang por dri ba'i don ni/ sems can rnams la rtag pa'i rang bzhin 'ga' zhig ma mchis na/gang zhig 'khor bar 'jug pa dang ldog par 'gyur te/ sems kyi rang bzhin skad cig ma ni zag pa dang bcas pa'i las mngon par 'du byas pa na 'jig par 'gyur ba'i phyir med pas skye ba gzhan du rnam par smin pa'i lus len pa mi 'thad cing /yang 'khor ba'i gnyen po mngon par 'dus byas pa na yang zhig nas med pa'i phyir des skye ba gzhan du 'khor ba las ldog cing mya ngan las 'das pa'i bde ba thob pa mi 'thad ces pa'o/ /byis pa rnams ni 'jug pa dang ldog pa la gnas pas zhes pa las so/ /dus phyis gnyen po mngon du byas pa'i dus na 'khor ba las ldog pas de ltar 'dug pa dang ldog pa'i rten bdag rtag pa 'ga' zhig sems can rnams la yod ces pa'o//sdug bsngal zad pa khong du ma chud ces pa ni 'khor bar 'jug pa'i phyogs la gnas pas byis pa rnams la zad pa dang mi skye ba shes pa'i ye shes mya ngan las 'das pa med ces pa'o//rnam pa gcig tu na 'jug pa dang ldog pa ni 'gro ba'i khyad par de dang de dag gi lus len cing 'dor ba ste/ de ltar na sdug bsngal zad pa khong du ma chud ces pa'i don shin tu 'grig par 'gyur ro/ /'dir lan gyi don ni bdag rtag pa'i ngo bo med kyang de bzhin gshegs pa'i snying po kun gzhi rnam par shes pa thog ma med pa'i dus na gnas shing rgyun dang ldan pa ni sems can thams cad la yod pas de la brten nas ma rig pa'i rkyen gyi las mngon par 'du byas shing /de nyid sred pa'i rlan gyis btsas pas na skye ba gzhan du zag pa dang bcas pa'i phung po mngon par 'grub cing /rnam par smin pa myong ba ste/ las kun nas slong ba kun gzhi rnam par shes pa'i skad cig ma 'gags su zin kyang / de'i rgyun rgyud ma 'gags shing de nyid kyis rnam par smin pa myong bas 'khor bar 'jug pa 'thad de/ rgyun gcig la ni brten nas su/ /byed pa spyod pa zhes byar bstan//zhes gsungs pa lta bu'o/ /'khor ba las ldog cing mya ngan las 'das pa thob pa'i tshul yang de bzhin du shes par bya'o/ /yang 'dir don dam par na rgyun can gyi skad cig ma las ma gtogs pa rgyun gcig pa ni 'ga' yang med mod kyi/ de ltar rnam par dpyad pa'i don ni 'jug pa dang ldog pa'i chos gang yang khas mi len la/rnam par gzhag pa tsam du snga ma ltar skyon med pa'o/ /dge ba dang mi dag ba'i rgyur gyur pa zhes pa la sogs pa'i don ni de 'dra ba'i las kun nas slong bar byed pa ste/ de yang las kyi bag chags dang ldan pas so//de las dus gzhan du skye ba rnam pa bzhi dang / 'gro ba lnga 'am drug gi lus thams cad 'dzin par byed pa dang / yang kun gzhi de nyid phyi rol pa rnams kyis bdag tu 'dzin pa'i gzhi yin pa la de 'dra ba'i rang bzhin spangs shing / de la 'jug pa'i rnam par shes pa sna tshogs myur du 'jug cing /de nyid kyis 'gro ba nyam nga ba ste/ ngan song gsum gyi rten la sogs par 'jug pa'o/ /de ltar kun gzhi'i rang bzhin spros pa dang bral zhing 'od gsal ba khong du ma chud cing / kun rdzob tsam du de 'dra ba'i nye bar len pa la brten nas/ dang po ma rig pa nas bzung ste gsum 'dus pa'i rkyen gyi bya ba reg pa dang /tshor ba la sogs pa srid pa'i yan lag bcu gnyis kyi tshul gyis 'khor bar 'jug pa yin pa la/ dbang phyug la sogs pa'i rgyu la mngon par zhen pa'i mu stegs can rnams kyis khong du mi chud de/ skye 'gro thams cad dbang phyug la sogs pas byas par smra ba'o//thog ma med pa zhes pa la sogs pas ni sngar gyi don de nyid rgyas par ston pa ste/ ma rig pa'i gnas ni ma rig pas bsdus pa rnam par shes pa rnams kyi bag chags so/ /gzhan ni phal cher sngar bshad zin to/ /lus rgyun mi 'chad ces pa ni kun gzhi nyid kyi lus sam/skye 'gro ba'i lus so/ /de ltar rgyun mi 'chad pa nyid kyis mi rtag pa'i nyes pa dang bral ba ste/ mi rtag pa nyid kyi phyir 'khor bar 'jug pa la sogs pa mi 'thad ces pa'i nyes pa las grol ba'o/ /bdag tu smra ba las rnam par log pa ni bdag dang bdag gi spangs pa zhes pa dang sbyar ro//de nyid de bzhin gshegs pa'i snying po rang bzhin gyis rnam par dag cing / glo bur gyi dri ma dang bcas pa'o/ /de ltar kun gzhi rgyun dang ldan pas 'khor bar 'jug pa la sogs pa 'thad kyi/ de ma yin pa 'jug pa'i rnam par shes pa ni rgyun dang mi ldan pas sngar gyi nyes par 'gyur ba'i phyir 'khor bar 'jug pa la sogs pa mi 'thad ces pa'o//skad cig ma yin ces pa'i don ni dus kyi mtha'i skad cig pa dang / bya ba rdzogs pa'i skad cig gnyis char dang 'brel pa'o/ /dbyibs kyi cha byad ces pa ni dbyibs kyi cha byad do/ /bde ba dang sdug bsngal mi myong bar thar pa'i rgyu ma yin zhes pa ni mya ngan las 'das pa tshor ba btang snyoms kyis yongs su zin pas bde sdug mi myong ba yin la/de 'dra ba'i rgyur 'jug pa'i rnam par shes pa mi 'thad ces pa ste/ nyer len du mi 'thad pa'o/ /bskyed cing skyed par byed ces pa ni sngar rnam par shes pa rnams kyi rkyen bzhi bstan pa de dag gi yongs su gtogs pa'i rkyen de dag gis sngar skyed cing phyis kyang skyed par byed pa'o//de'i rgyu la dmigs zhes pa ni 'jug pa'i rnam par shes pa rnams kyi rgyu ni kun gzhi yin la/ de nyid la dmigs pa nyid du yang sngar bstan pa'o/ / zin pa'i zhes pa la sogs pas ni 'khor ba las ldog pa btags pa'i rang bzhin gyi mya ngan las 'das pa ston pa ste/ de la zin pa'i dbang po zhes bya ba ni nyan thos la sogs pa rnams kyis dbang du byas na sems kyis zin pa'i phyir gzugs can gyi dbang po dang / de la brten pa'i rnam shes lnga'i tshogs dang /yid kyi rnam par shes pa rnams 'du shes med pa'i snyoms par 'jug pa dang / 'du shes med pa'am/ 'gog pa'i snyoms par 'jug pa'i dus su 'gags shing zad nas/ de ma thag tu de dag gi rigs kyang mi skye zhing / de las gzhan dag kyang mi 'jug pa'i phyir rang gi blo'i rnam par rtog pa bde ba dang sdug bsngal mi myong ba ste/mig la sogs pa'i blo dang / yid kyi rnam par rtog pa'i bdag nyid du gyur pa'am/ de las byung ba'i bde sdug mi myong ba ste/ de 'dra ba'i 'gog pa la snyoms par zhugs pa la rnam par thar pa'i blor 'gyur zhes pa ste/sngar bstan pa ltar mya ngan las 'das pa'i blor 'gyur ba'o/ /su zhig de ltar 'gyur snyam du sems na/ bsam gtan bzhi dang zhes pa la sogs pa'o/ /de la 'dir 'jig rten pa'i bsam gtan la mkhas pa 'ga' zhig ni 'du shes med pa la yang thar pa'i blor 'gyur ba'o//yang 'dir byang chub sems dpa' theg pa chen po pa rnams kyi dbang du byas na rnam par shes pa'i bdag nyid du gyur pa'i dbang po'i byed pa dang / 'jug pa'i rnam par shes pa 'gags nas zhes pa la sogs pa snga ma bzhin du sbyar bar bya'o/ /de la bsam gtan bzhi ni dang po dang gnyis pa la sogs pa yin la/de yang 'dir rnam pa gsum gyi sgo nas shes par byas te/ de rnams gang las thob pa'i rgyu bsam gtan gyi nyer bsdogs dang / de rnams rnam par 'byed pa'i rgyu mtshan yan lag dang / yan lag nye bar bsdu ba'o/ /de la dang po nyer bsdogs ni re re la yang rnam pa drug drug gi sgo nas shes par bya ste/mtshan nyid rab tu rig pa'i yid la byed pa dang / mos pa las byung ba dang / rab tu dben pa yid la byed pa dang / dga' ba sdud pa dang / dpyod pa pa dang / sbyor ba'i mtha'o/ /de la dang po'i don ni bsam gtan dang po'i dbang du byas na 'dod pa'i khams la rags sogs kyi rnam par yid la byed cing /bsam gtan dang po la zhi ba'i rnam par sgom pa 'dod pa'i khams kyi thos pa dang / bsam pa'i shes rab dang 'dres pas te/ shes rab de nyid kyi zhi rags kyi mtshan nyid ji lta ba bzhin rig pas mtshan nyid rab tu rig pa zhes bya'o//rags pa dang zhi ba yang go rims bzhin du khams 'og ma ni tshe thung zhing sdug bsngal dang nyon mongs pa mang la/ gong ma ni de las bzlog pa'o/ /'dir byang chub sems dpa' rnams kyis de ltar sgom pa mi 'thad do zhe na/ skyon med de/ kun rdzob tu de ltar yid la byed cing don dam par de 'dra ba'i dngos por mi zhen pa'o//yid la byed pa 'dis kyang khams 'og ma la skyo zhing gong ma la mngon par 'dod pas de'i thabs la 'jug pa'i yan lag tsam du 'gyur gyi/ dngos su ni dbugs 'byung rngub rjes su dran pa la sogs pa zhi gnas kyi rgyu mtshan yid la byed pa las de 'dra ba'i bsam gtan thob par gsung rab dgu las bshad do//mos pa las byung ba ni thos bsam gyi shes rab dang ma 'dres par rtse gcig pa'i ting nge 'dzin 'ba' zhig pa'o/ /de 'dra ba'i yid la byed pa las 'dod pa'i khams kyi bsgom pas spang bar bya ba'i nyon mongs pa chen po spong zhing des dben pa'i yid la byed pa ni rab tu dben pa'o//de ltar dben pa las skyes pa'i dga' ba dang bde bas reg pas spong bar dga' zhing spong ba la phan yon du mthong nas dad pas yid la byed pa sgom pa ni dga' ba sdud pa zhes bya ste/ nyon mongs pa 'bring po spong bar byed pa'o//de'i rjes la nyon mongs pa thams cad spang bar 'dod pas de rnams spangs pa dang ma spangs pa brtag par bya ba'i don du nyon mongs pa skye ba dang rjes su mthun pa'i yul yid la byed pas sgom par 'gyur zhing dpyod pa yid la byed pa ni dpyod pa pa'o/ /der nyon mongs pa skye ba'i mtshan ma mthong nas de dag spang bar bya ba'i don du snga ma ltar zhi rags kyi rnam par sgom pa ni sbyor ba'i mtha' pa'o//sbyor ba'i mtha'i 'bras bu ni de rnams kyis thob par bya ba dngos gzhi nyid kyi khongs su gtogs pa'o/ /'dir rtse gcig pa'i ting nge 'dzin gyi rgyun 'ga' zhig la dang po dang gnyis pa la sogs par rnam pa 'byed pa mi 'thad do zhe na/de'i yan lag gi sgo nas rnam par dbye bar bya ste/ de la dang po ni rtog pa dang dpyod pa dang / dga' ba dang bde ba dang / rtse gcig pa ste/ yan lag rnam pa lnga dang ldan pa'o/ /de la rtog pa dang dpyod pa ni/ sems pa dang shes rab kyi char gtogs pa tshol ba pa dang /nges pa'i rnam pa can yin no zhes mngon pa'i bstan bcos dag las bshad do/ /'phags pa chos yang dag par sdud pa las ni/ bsam gtan dang po dang rjes su mthun pa'i rtog pa ste/ cho ga bzhin du rtog cing de dag kyang 'dul bas na rtog pa zhes bya ste zhes pa la sogs pa bshad nas rtog pa de nyid la dpyod pa dang /rnam par dpyod pa la sogs pa ni dpyod pa'o zhes gsungs so/ /dga' ba dang bde ba ni go rims bzhin du sems dang lus kyi bde ba ste/ de yang 'dod pa'i 'dod chags kyi dben pa las skyes pa'o//rtse gcig pa ni de dag gi gnas kyi yan lag ste/ gang yang rung ba'i dmigs pa la rtse gcig tu gnas pa'o/ /bsam gtan gnyis pa ni yan lag rnam pa bzhi dang ldan pa ste/ ting nge 'dzin las skyes pa'i dga' ba dang bde ba dang / nang rab tu dang ba dang rtse gcig pa'o//nad rab tu dang ba ni mngon pa'i bstan bcos dag las/ btang snyoms dang dran pa dang shes bzhin gsum la yang bshad la/ chos yang dag par sdud pa las ni/ dkon mchog gsum la dga' ba skye ba ste/ de dkon mchog gsum la dga' bas dge ba'i chos rnams rdzogs par 'gyur ro zhes gsungs so//nang rab tu dang ba yang mdo sde de nyid las rtog dpyod kyi dri ma la sogs pa dang bas sems kyi rgyud gcig tu gyur pa ste/ ji ltar rgya mtsho chen por 'bab pa'i chu rnams lan tshwa'i ror gcig pa bzhin du ro gcig tu gyur te/ ting nge 'dzin du byed pa'o/ / ting nge 'dzin de las dkon mchog la dga' ba skyed pa nyid du gsungs so/ /bsam gtan gsum pa la ni yan lag lnga dang ldan pa ste/ btang snyoms dang dran pa dang / shes bzhin dang / dga' ba med pa'i bde ba dang / rtse gcig pa'o/ /de la btang snyoms ni nyon mongs pa med par gnas pas/'bad pa dang rtsol ba med par sems rnal du 'jug pa'o/ /dran pa ni sngar myong ba'i dngos po mi brjed pa'o/ /shes bzhin ni bya ba dang bya ba ma yin pa'i cha yongs su shes pa'o/ /bzhi pa ni dag pa yal yal ba med pa'i bde ba'o/ /bsam gtan bzhi yan lag bzhi dang ldan pa ste/sdug bsngal yang ma yin bde ba yang ma yin pa'i btang snyoms tsam pa ste/ lus dang sems la phan pa dang gnod par mi 'gyur ba dang / btang snyoms yongs su dag pa dang / dran pa yongs su dag pa dang / rtse gcig pa'o/ /de la yongs su dag pa ni bde ba dang sdug bsngal dang /yid bde ba dang yid mi bde ba la sogs pa'i dri ma dag cing / mnyen pa'i sems dang / yid du 'ong ba'i sems dang / las su rung ba'i sems dang / dri ma med pa'i sems su 'dug pa'o zhes mdo las bshad pa'o/ /gzhan yang yongs su dag pa ni spang bya spong ba'i bya ba dang bcas pa dang /spangs pa'i rnal grol gyi lam mo/ /lam de'i rgyun la gnas pa ni btang snyoms so zhes kyang bshad do/ /yan lag rnam par dbye ba ni dang po'i dbang du byas na/ rtog pa dang dpyod pa ni 'dod pa'i khams kyi nyon mongs pa spong ba'i gnyen po'i yan lag go//dga' ba dang bde ba ni phan yon gyi yan lag ces bya'o/ /rtse gcig pa ni gnas kyi yan lag go/ /gnyis pa'i dbang du byas na nang rab tu dang ba ni rtog dpyod la sogs pa 'og ma'i nyes pa spong ba'i gnyen po yin la/ dga' bde ni phan yon no/ /rtse gcig pa zhes pa ni thams cad kyang snga ma dang mtshungs so//gsum pa'i dbang du byas na/ btang snyoms dang / dran pa dang shes bzhin ni snga ma ltar gnyen po yin la/ dga' ba med pa'i bde ba ni phan yon yin no/ /bzhi pa la btang snyoms yongs su dag pa dang / dran pa yongs su dag pa ni 'og ma'i nyes pa spong ba'i gnyen po yin la/btang snyoms tsam po ni nyes pa de rnams kyis dben pa phan yon gyi yan lag go/ /'dir bsam gtan gyi nyer bsdogs 'di rnams ni/ gzugs med pa'i snyoms par 'jug pa la yang sbyar bar bya'o/ /'di rnams kyi yan lag ni btang snyoms dang rtse gcig pa'am/yang na bsam gtan bzhi pa'i yan lag ji snyed pa ni 'di rnams kyi yan lag tu 'gyur ba'o/ /'di rnams kyi dbye ba ni sngar bstan pa ltar dmigs pa'i sgo nas rab tu phye ba'o/ /'di rnams kyi spros pa zhib tu ni chos mngon pa'i bstan bcos las shes par bya'o/ /yang nyan thos kyi sa dang mnyam par gzhag pa'i sa las bshad pa ni/bsam gtan bzhi po de dag nyid thob par byed pa'i yan lag bsam gtan gyi nyer bsdogs dang / bsam gtan nyon mongs pa can dang / dag pa 'jig rten pa'i bsam gtan dang / 'jig rten las 'das pa zag pa med pa'i bsam gtan te/ rnam pa bzhi'o/ /de la dang po ni bsam gtan re re la yang yan lag drug drug ste/ sngar bstan pa bzhin no/ /gnyis pa'i don ni sred pa dang lta ba dang / nga rgyal dang ma rig pa shas che ba'i bsam gtan te/ 'phags pa rnams kyis bsgom par bya ba ma yin no/ /gsum pa ni de 'dra ba'i nyes pa las bzlog pa nges 'byed dang /mngon par shes pa dang / tshad med pa la sogs pa yon tan dang ldan pa'o/ /bzhi pa ni rnam par thar pa'i sgo gsum dang ldan pa ste/ stong pa nyid dang / mtshan ma med pa dang / smon pa med pa'i don la rtse gcig tu gnas pa'o/ /stong pa nyid la sogs pa yang nyan thos dang byang chub sems dpa' la sogs pa'i bye brag gis tha dad par 'gyur ba ste/skabs gzhan du shes par bya'o/ /de bzhin du bden pa bzhi dang rnam par thar pa brgyad dam gsum la mkhas pa ste/ nyan thos la sogs pa'i bye brag gis ci rigs par sbyar bar bya'o//de bzhin gshegs pa'i snying po zhes pa la sogs pas ni/ de 'dra ba'i 'gog pa la snyoms par zhugs pa mya ngan las 'das pa dngos yin pa 'gog pa ste/ de'i don ni kun gzhi rnam par shes pa gnas ma gyur na/ 'jug pa'i rnam par shes pas bsdus pa'i 'du shes dang tshor ba la sogs pa mngon du rgyu ba 'gags kyang de rnams kyi sa bon dang ldan pa'i kun gzhi la brten nas slar 'byung bas/mya ngan las 'das pa mtshan nyid par mi 'thad ces pa'o/ /gal te nyan thos la sogs pa rnams kyis sa bon dang ldan pa'i kun gzhi nyid kyang spang ba ma yin nam zhe na/ma yin te/ kun gzhi'i rang bzhin ji lta ba bzhin du rtogs shing goms pa med pas/ spangs pa mi 'thad pa'o/ /de skad du yang / rang sems khong du ma chud pas/ /yul la gzhol ba'i rnam par shes/ /rab tu 'jug dang ldog par 'gyur/ /zhes pa la sogs pa gsungs pa'i phyir ro//de'i rang bzhin mi rtogs pa'i rgyu mtshan yang / de ni bdag med pa gnyis kyis bsdus pa spros pa dang bral zhing 'od gsal ba/ /de bzhin gshegs pa'i snying po nyid yin la/ gang zag de rnams la ni ci ltar rigs pa bzhin du bdag med pa gnyis rtogs pa med pas so/ /phung po dang zhes pa la sogs pas chos kyi bdag tu sgro 'dogs pa nyid bstan no/yongs su gzung bas zhes pa ni gzung ba'i phyir zhes pa ste/ mi rtogs pa nyid kyi gtan tshigs su sbyar ro/ /de ltar na de rnams la de bzhin gshegs pa'i snying po med dam zhe na/ de bzhin gshegs pa'i snying po 'jug ces pa ste de rnams la yang rgyu dang ldan par 'jug cing yod pa'o//yang na yongs su gzung bas de bzhin gshegs pa'i snying po 'jug pa ste/ chos kyi bdag tu sgro 'dogs shing / gang zag gi bdag med par rtogs pa phyogs gcig pa'i sgo nas de bzhin gshegs pa'i snying po la 'jug pa ste/phyogs thams cad nas rtogs pa med ces sngar bstan pa bzhin du shes par bya'o/ /chos lnga dang zhes pa la sogs pas de bzhin gshegs pa'i snying po sbyangs pas 'khor ba las ldog cing / mya ngan las 'das pa la 'jug pa'i tshul ston te/ /de bzhin gshegs pa'i snying po 'jug ste zhes pa'i tshig mar kyang gdags te/de lta bu'i snying po sbyong ba yang dang po'i gnas skabs su chos la bdag med pa la sogs pa mthong bas/ gong nas gong du sa'i rim pa mtshams sbyar ba gzhan dang gzhan du 'phos pa ste/ brgyad pa la sogs pa'i gnas skabs na kun gzhi'i snang ba dang /'jug pa'i rnam par shes pa ldog par 'gyur te/ gzhan mu stegs can gyi lam gyi yul gang zag la sogs pa'i mtshan mar 'dzin pas bskyod par mi nus so/ /de'i phyir byang chub sems dpa' sa brgyad pa la gnas pa ni/ ting nge 'dzin bden pa'i sgo'i lam bcu rab tu thob par 'gyur te zhes pa la/bden pa ni phyin ci ma log pa'i yul can te/ de bzhin nyid la dmigs pa'o/ /de nyid sangs rgyas kyi chos rnams thob pa'i sgor 'jug pa'i lam yin pas/ bden pa'i sgo zhes pa ste gzhi mthun pa'i bsdu ba'o/ /bcu zhes pa ni mthar gyis gnas pa'i snyoms par 'jug pa dgu yongs su rdzogs pa dang /sgyu ma lta bu'i ting nge 'dzin rdzogs pa'o/ /de la snyoms par 'jug pa dgu ni sngar bstan pa'i bsam gtan bzhi dang / gzugs med kyi snyoms par 'jug pa bzhi dang / 'gog pa'i snyoms par 'jug pa bzhi ni byang chub sems dpa' rnams kyi dbang du byas na/gzugs kyi 'du shes la sogs pa rnam par bsal zhing thams cad nam mkha'o zhes/ nam mkhar 'du shes shing goms pa la brten nas byung ba'i ting nge 'dzin de bzhin nyid kyi yul can no/ /de bzhin du nam mkhar 'du shes pa ni rnam par shes pa ste/kun rdzob tu rnam par shes pa tsam mo zhes 'du shes pa dang / gzhan yang ci yang med pa ste/ de la ci yang zhes pa ni 'dod chags dang zhe sdang dang / gti mug dang / rtog pa dang rnam par rtog pa dang / rnam par dpyod pa dang / de la sogs pa 'dus byas kyi chos ji snyed pa yang dag pa ma yin par yongs su rtog pa'i rgyu las byung ba thams cad do//med ces bya ba ni de rnams kyang kun rdzob tu chung zhing phra ba ste de 'dra ba'i mtshan mar 'dzin pa dang / yang 'du shes yod pa ma yin te/ stong pa nyid kyi phyir ro/ /med pa ma yin te rten cing 'brel par 'byung ba'i phyir ro zhes de 'dra ba'i mtshan mar 'dzin pa goms pa las byung ba/de bzhin nyid kyi yul can te de ltar rnam pa gsum dang rim pa bzhin sbyar ro/ /mtshan mar 'dzin pa goms pa las de bzhin nyid kyi yul can gyi ting nge 'dzin skye ba yang / ji skad du/ dmigs pa la ni brten nas su//mi dmigs pa rnams rab tu skye/ /zhes gsungs pa ste/ rten cing 'brel bar 'byung ba'i che ba'o/ /byang chub sems dpa' rnams kyi bsam gtan bzhi yang / de bzhin nyid la dmigs pa bden pa'i yul can no/ /'gog pa'i snyoms par 'jug pa ni/ sngar bstan no/ /gzhan yang 'phags pa chos yang dag par sdud pa las ni/ rigs kyi bu 'gog pa zhes bya ba ni/ glo bur gyi sgrib pa med pa/ yang dag pa ma yin pa/ yod pa ma yin pa/ kun du brtags pa ste/ nam yang dag pa ma yin pa de la/ kun du mi rtog pa de ni 'gog pa'o zhes gsungs pa'o//gzhan yang rigs kyi bu bcom ldan 'das kyis byang chub sems dpa' 'gog pa mngon du mi byed do/ /byang chub sems dpa' gang 'gog pa mngon sum du byed pa de ni nyan thos dang rang sangs rgyas kyi sar ltung ngo zhes gsungs na bcom ldan 'das kyis de ci la dgongs te gsungs/smras pa/ rigs kyi bu mngon sum du mi byed ces bya ba 'di ni bstan du med pa mngon sum du mthong ba'i tshig bla dgas so/ /bcom ldan 'das kyis kyang 'gog pa ni bstan du med pa'i chos so zhes gsungs so/ /chos gang bstan du med pa de ni mngon sum du bya bar mi nus so/ / de bas na bcom ldan 'das kyis byang chub sems dpa' 'gog pa mngon sum du mi byed mi mthong ngo zhes gsungs te/ de la dgongs te byang chub sems dpa' ni 'gog pa mngon du mi byed do/ /nyan thos ni chos la mtshan mar 'dzin pa'i blo yis 'gog pa mngon sum du byed do/ /gnas so/ / kun shes so zhes gsungs so/ /de ltar dgongs don bstan pas kyang mdo 'di las byang chub sems dpa' 'gog pa'i sgo cung zad mngon du byed par gsungs pa ni/ mdo sde gzhan dang mi 'gal bar bstan to/ /'dir ting nge 'dzin bcu de ltar yin pa'i rgyu mtshan yang / gsung rab dag las byang chub sems dpa' sa brgyad pa yan chod thob pa ni mthar gyis gnas pa'i snyoms par 'jug pa dgu la ji ltar 'dod pa bzhin snyoms par 'jug go zhes gsungs pa dang mdo 'di nyid las kyang sa brgyad pa la 'gog pa'i snyoms par 'jug pa la sogs pa'i ting nge 'dzin gyi bde ba la gnas pa na/sangs rgyas rnams kyis rjes su 'dzin pa ste/ de las sad par byed pa nyid du gsungs pa'i phyir ro/ /gzhan yang 'phags pa chos yang dag par sdud pa las kyang / mthar gyis gnas pa'i snyoms par 'jug pa dgu rdzogs pa'am/ rdzogs pa la nye ba'i gnas skabs na mi skye ba'i chos la bzod pa rdzogs pa'am/rnam par dag pa nyid du gsungs pa la de 'dra ba yang sa brgyad pa la sogs pa'i gnas skabs yin pas so/ /sgyu ma lta bu'i ting nge 'dzin kyang shes rab kyi pha rol tu phyin pa'i mdo dang bstan bcos las/ khyad par du sa brgyad pa'i gnas skabs nas thob par bshad de/dbang po shes dang rgyal ba yi/ /zhing sbyong sgyu ma ltar gnas dang / /zhes gsungs pa lta bu'o/ /gzhan yang sa brgyad pa la gnas pa'i byang chub sems dpa' de sngon sems can thams cad kyi don du sangs rgyas kyi chos bsam gyis mi khyab pa thob par bya'o zhes sems bskyed cing smon lam btab pa la/rnam par lta ba ste/ smon lam dran pas ting nge 'dzin gyi sgo yang dag pa'i mtha' las bzlog pa ste/ stong pa nyid kyi mtha' mngon du byed pa las langs nas rjes kyi gnas skabs su bdag gi 'phags pa so so rang gis rig pas shes par bya ba gzhan dang thun mong ma yin pa'i rnal 'byor gyi lam ste snang la zhen pa med pa'i shes rab kyis sems can smin par byed cing sangs rgyas la mchod pa la sogs pa'i sgo nas tshogs rdzogs par byed pa dang /yang mnyam par gzhag pa'i rnal 'byor spel mar bsgoms pas/'phags pa'i rigs dang de bzhin gshegs pa'i snying po sbyong bar byed pa'i lam bcu ste/ sa bcu yongs su rdzogs pa'o/ /gzhan yang so so yang dag par rig pa'i ye shes dang zhes pa la sogs pa sa bcu'i gnas skabs nyid la sbyar ba'am/ de bzhin gshegs pa'i ye shes mthar thug pa la sogs pa la sbyar bar bya'o//de lta bas na zhes pa la sogs pa ni de 'dra ba'i yon tan khyad par can thob par 'dod pas de bzhin gshegs pa'i snying po kun gzhi rnam par shes pa sbyang bar bya'o zhes gdams pa'o/ /de la rnam par shes pa'i tshogs brgyad las kun gzhi nyid de bzhin gshegs pa'i snying por gyur pa'i rgyu mtshan ni lus can thams cad rtag tu de bzhin gshegs pa'i snying po can nyid du gsungs pas 'jug pa'i rnam par shes pa ni rgyu dang mi ldan pa'i phyir snying po nyid du mi 'thad ces pa'o// gal te sems can gyi gnas skabs na yang rgyun las nyams par 'gyur ba ni dus gzhan gyis chod pa'i 'og rol du sangs rgyas kyi ye shes kyi rgyur mi 'thad la/ de lta na yang nyon mongs pa can gyi yid gnas gyur pa ni/ mnyam pa nyid kyi ye shes yin la/ yid kyi rnam shes dang sgo lnga'i rnam shes gnas gyur pa ni go rims bzhin du so sor rtog pa dang /bya ba grub pa'i ye shes yin no zhes pa'i dbye ba mi 'thad do zhe na/ skyon med de/ rnam par shes pa rgyun 'gag par gyur pa na/ de rnams kyis rang gi rigs mthun phyi ma skyed par gyur pa'i sa bon sems kyi ngo bor gyur pa kun gzhi rnam par shes pa la bsgos shing /de las kyang rnam par shes pa dang / yang de la 'gags par gyur pa na sa bon la sogs pa'i skad cig gzhan dang gzhan 'byung ba na/ de rnams las bar du ma chod par ye shes kyi khyad par de rnams 'byung bas so sor nges pa'i rgyud nyid du 'thad cing de nyid kyis gnas gyur pa'i bye brag so sor nges pa la 'gal ba med do//gal te de lta na 'jug pa'i rnam par shes pa rnams kyang sangs rgyas kyi ye shes skye ba'i rgyur 'gyur bas de bzhin gshegs pa'i snying po'am rigs nyid du 'gyur ba mtshungs so zhe na/ ma yin te/ chos kyi sku'i rang bzhin ni me long lta bu'i ye shes spros pa thams cad dang bral ba yin la/de yang kun gzhi rnam par shes pa gnas gyur pas rab tu phye ba nyid do zhes gsungs pas de nyid sangs rgyas kyi snying po'am rigs nyid du 'thad kyi/ de las gzhan ye shes gsum po ni ye shes snga ma de la brten pa'i gnas skabs glo bur ba yin pas de rnams kyi rgyur gyur pa'i 'jug pa'i rnam par shes pa yang de bzhin gshegs pa'i snying po la sogs par mi 'thad pa'o//de las gnas gyur zhes pa'i don ni spang bya sa bon dang bcas pa spangs nas gnyug mar gnas pa'i ye shes sa bon dang bcas pa 'ba' zhig pa'o//'di rnams kyi don zhib tu sngar bstan zin to/ /blo gros chen po zhes pa la sogs pas ni 'jig rten tha mal pa rnams la kun gzhi sgrub par byed pa'i gtan tshigs ston te/ 'di'i don yang 'jug pa'i tshogs drug rgyun gyis 'jug pa las brgyal ba dang gnyid mthug po log pa la sogs pa'i gnas skabs su/re zhig ldog cing yang de las sad nas rgyun gyis 'jug pa ste/ de'i rgyun gyi thog ma de nyid ni sa bon thams cad dang ldan pa'i sems 'jug pa'i rnam par shes pa las gzhan pa 'ga' zhig sngon du song ba yin te/ res 'ga' ba nyid du 'jug cing dmigs pa'i phyir zhes gtan tshigs su sbyar ro//gal te res 'ga' ba nyid du dmigs pa ni/ myong ba'i tshad mas grub pa de lta na yang de 'dra ba'i sems sngon du song ba nyid du ji ltar 'gyur te/ khyab pa ma grub po zhe na/ skyon med de/ res 'ga' ba yin pa'i phyir rgyu med par ni 'gal la/rgyu yang bems po dang rig pa las/ sems las tha dad pa'i bems po ni yang dag pa'i kun rdzob tsam du yang mi 'thad do zhes sngar bstan la/ rig pa yang rang gi rgyud du gtogs pa dang / rgyud gzhan gyis bsdus pa las dang po rang gi rgyud du gtogs pa'i rnam par shes pa'i tshogs drug ni 'gags nas med pa'i phyir de'i rgyur mi 'thad la/bar du chos snga ma yang 'bras bu skyed pa'i dus na zhig nas med pa'i phyir rgyur mi 'thad ces pa'o/ /gal te nyon mongs pa can gyi yid de'i rgyur 'gyur ro zhe na/ mi 'thad de/ de 'dra ba lung las bshad pa ni/kun gzhi la brten cing / de la dmigs pa nyid yin pas/ de grub na kun gzhi yang grub pa nyid du 'gyur la/ de las gzhan pa 'jug pa'i rnam par shes pa'i sa bon dang ldan pa'i sems 'ga' zhig yin par rtogs na ni/ de kun gzhi rnam par shes pa'i mtshan nyid dang ldan pas kun gzhi nyid yin te/ming ni ji ltar yang 'dogs la rag go/ /gnyis pa rgyud gzhan gyis bsdus pa'i sems kyang de'i rgyur mi 'thad de/ de nyid 'ba' zhig rgyu yin na ni/ brgyal ba la sogs pa'i gnas skabs su yang tshogs drug ldog pa mi 'thad de/ de'i rgyu la ma tshang ba med pa'i phyir ro//'on te de la yang ltos pa tsam du khas len na ni skabs kyi don la gnod pa med pa ste/ des kyang 'jug pa'i rnam par shes pa'i rkyen byed cing / de las gzhan rang gi rgyud du gtogs pa sa bon dang ldan pa'i sems de 'dra ba sngon du song ba nyid du yang grub pa'i phyir ro//'di yang gtan tshigs bsgrub par bya ba'i bdag nyid yin pas/ rang bzhin gyi gtan tshigs nyid du 'gyur ba'o/ /slob dpon snga ma dag gis ni chad nas 'byung ba'i phyir/ kun gzhi rnam par shes pa yod do zhes lung la brten pa'i gtan tshigs sam rjes su dpag par 'dod de/ma rtogs pa'i nyes pa 'ba' zhig tu zad do/ /yang 'dir gtan tshigs sbyor ba'i tshul ni/ bdag cag rnams kyi phung po'i rgyun rgyud 'ga' zhig chos can du bzhag nas/ de la 'jug pa'i rnam par shes pa las ma gtogs pa'i sa bon dang bcas pa'i sems 'ga' zhig yod de/ rnam par shes pa'i tshogs drug rjes su 'jug cing ldog pa'i phyir ro zhes gtan tshigs su sbyar ro//de la 'jug pa dang ldog pa ni sngar bstan pa ltar brgyal ba la sogs pa'i gnas skabs su sngar gyi rgyun ldog cing / de las sad pa na yang 'jug par 'gyur ba ste/ 'di'i khyab pa'i don ni sngar bstan pa bzhin du shes par bya'o//rnam grangs gzhan du sbyar ba yang 'di ltar bdag cag rnams kyi phung po'i rgyun gyi chos can la/ sa bon thams cad dang ldan pa'i sems 'ga' zhig yod de/ 'khor ba 'jug pa dang de las ldog pa'i phyir zhes pa ste/ 'di yang dngos po'i stobs kyis zhugs pa'i gtan tshigs so//gal te byis pa'i skye bo rnams la 'khor bar 'jug pa dang ldog pa'i gtan tshigs ji ltar grub ce na/ 'di ltar sems can gyi skye gnas gzhan dang gzhan len cing / de las ldog pa 'ba' zhig ni 'khor bar 'jug pa dang ldog pa'i don ma yin gyi/ da ltar gyi gnas skabs na yang las dang nyon mongs pa'i rgyun rgyud rgyun chags su 'jug pa las/de'i gnyen po byams pa dang snying rje la sogs pa dang / bdag med par rtogs pa'i shes rab rgyud la skyed cing / de'i rgyun rgyud goms par byas pa na sngar gyi nyon mongs pa la sogs pa ldog par 'gyur ba nyid du nyams su myong ba'i tshad mas grub la/de nyid kyang re zhig 'khor bar 'jug pa dang ldog pa nyid yin pa'i phyir ro/ /'di'i khyab pa'i don yang chags sdang la sogs pa'i nyon mongs pa dang / byams pa la sogs pa dang bdag med par rtogs pa'i shes rab bstan zhing gsal bar 'jug pa ni/ rang gi rigs pa goms pa'am/goms pa'i sa bon 'ga' zhig sngon du 'gro bar nyams su myong ba'i tshad mas grub ste/ 'di'i don ni sngar bstan no/ /de'i phyir chags sdang la sogs pa'i nyon mongs pa dang / des kun nas bslang ba mi dge ba'i sems pa'i rgyun rgyud log nas/ byams pa la sogs pa dang /bdag med par rtogs pa'i shes rab kyi rgyun rgyud skye bar 'gyur ba'i thog ma de nyid ni/ de 'dra ba skyed par nus pa'i sa bon dang ldan pa'i sems 'jug pa'i rnam par shes pa las gzhan pa 'ga' zhig sngon du song ba yin te/ res 'ga' bar dmigs pa'i phyir zhes pa la sogs pa sngar bstan pa'i rjes su 'brangs te rtogs par bya'o//gal te 'dir rnam par shes pa'i tshogs drug po nyid de'i rgyur 'gyur bas/ kun gzhi sgrub pa mi 'thad do zhe na/ skyon med de/ tshogs drug po de ni sgra dang rlung la sogs pa bzhin du shin tu rgyun mi brten pas/ byams pa la sogs pa'i sa bon bsgo ba'i rten du mi 'thad de/ de lta na sa bon nyid kyang ldog par 'gyur bas/ 'bras bu de 'dra ba 'byung ba mi 'thad do/ /de ltar 'khor ba las ldog pa'i khyad par grub pa de nyid la brten nas/ kun gzhi rnam par shes pa 'grub pa ni/ de nyid kyi shugs la 'khor ba'i chos thams cad las log cing /mya ngan las 'das pa thob par 'gyur ba na/ yang tshul 'di nyid kyi rjes su 'brangs la rtogs par bya ste/ ji ltar tshang mang gi me tsha zhing sreg pa'i mtshan nyid du grub pa na/ de'i rang bzhin can de ltar rtogs par 'gyur ba ni tshad ma gcig gi byed pa yin par sngar bstan pa bzhin no//yang 'khor bar 'jug pa ni sngar gyi gnyen po'i rgyun 'gags nas/ chags sdang la sogs pa'i nyon mongs pa'i rgyun rgyud skyes pa na/ de'i rgyun gyi thog ma nyid sngar bstan pa ltar 'jug pa'i rnam par shes pa las tha dad pa sa bon thams cad dang ldan pa'i sems rgyud 'ga' zhig sngon du song zhes pa ste/sngar bstan pa'i rjes su 'brangs te rtogs par bya'o/ /gzhan yang 'khor bar 'jug pa'i tshul las dang 'bras bu'i 'brel pa dang / 'jig rten snga ma dang phyi ma ni sngar bstan pa ltar tshad ma'i stobs kyis grub pa ste/de'i phyir 'jig rten snga mas bsdus pa'i las dang nyon mongs pa'i rgyun rgyud 'ga' zhig las/ da ltar gyi phung po chags sdang la sogs pa'i nyon mongs pa dang lhan cig pa grub pa na/ de 'dra ba ni rang gi rigs goms pa'am/ goms pa'i sa bon 'ga' zhig sngon du song ba yin la/de la goms pa mngon du rgyu ba ni/ res 'ga' ba yin pas rtag tu ldan par ma nges la/ sngar gyi goms pa yang zhig pas rgyu nyid du mi 'thad de/ de'i phyir de 'dra ba'i sa bon sngon du song ba yin la/ sa bon gyi rten kyang kun gzhi las gzhan du mi 'thad pas de nyid tshad ma'i stobs kyis grub pa'o//gzhan yang chags sdang la sogs pa'i nyon mongs pa dang / des kun nas bslang ba'i mi dge ba'i sems pa ni/ byams pa la sogs pa'i gnyen po'i phyogs kyis spong ba nyid du tshad mas grub la/ de yang spang bya dang bcas pa'i rgyud la gnyen po 'jug cing skye dgos pa'o/ / de ltar gnyen po skye ba yang spang bya sngon du rgyu ba yod pa'i dus su mi 'thad de/ rnam pa 'gal ba'i phyir/ ji ltar tsha ba'i reg pas khyab pa'i phyogs su grang ba'i reg pa mi 'jug pa bzhin no/ /yang spang bya dang sa bon dang bcas te 'gags na yang / gnyen po don med par 'gyur bas/ de'i phyir sa bon dang bcas pa'i rgyud la gnyen po 'jug cing /sa bon gyi rten kyang kun gzhi las gzhan du mi 'thad pas/ de nyid tshad ma'i stobs kyis grub pa'o/ /'dir gzhan dag snyoms 'jug rnam pa gsum las ldang ba'i phyir/ kun gzhi'i rnam par shes pa yod ces pa la sogs pa lung la brten pa'i rjes su dpag pas grub po zhes pa ni lung nyid kyi mthar thug pas don cung zad kyang rgyas par mi byed pa'o//byis pa dang 'phags pa rnams la 'jug pa dang ldog pa yod pas ces pa ni byis pa 'khor bar 'jug pa dang / 'phags pa de las ldog pa'o/ /tshul ji ltar ldog ce na/rnal 'byor can zhes pa la sogs pa gsungs so/ /blo gros chen po zhes pa la sogs pas ni de bzhin gshegs pa'i snying po rtogs par dka' ba nyid rgyas par ston to/ /rnam par dpyod pa'i lta ba ni mtshan ma sna tshogs la chags pa'o/ /gal te kun gzhi rang bzhin gyis rnam par dag pas/sbyong ba mi 'thad do zhe na/ rang bzhin zhes pa la sogs pa gsungs so/ /ma dag pa ltar snang ste zhes pa ni rang bzhin de kho na nyid la/ ma dag pa'i dri ma med kyang blo 'khrul pa la de ltar snang ba'o/ /de bzhin gshegs pa'i snying po de 'dra ba yang / lha mo dpal phreng ma dang / gzhan yang byang chub sems dpa' phyin ci log gi dri ma med cing /zab mo'i don la blo gros 'jug pa dang / the tshom la sogs pa'i 'dzer dog med pas yangs shing mkhas pa rnams rang rang gi rtogs pa khyad par du 'gyur ba dang / gdul bya'i khyad par 'ga' zhig gi ched du/ de bzhin gshegs pa las 'di 'dra ba'i don zab mo zhus shing /de bzhin gshegs pas kyang gsung rab kyi chos bstan pa brjod pa la don de nyid bshad ces pa'o/ /mngon par chags pa'i nyan thos zhes pa ni/ log pa'i dge ba'i bshes gnyen la sogs pa'i rkyen gyis/ log par chags shing zhen kyang dbang po rnon po'i rigs yin pas/chos la bdag med pa'i mtshan nyid can de bzhin gshegs pa'i snying po rtogs par 'gyur ba'o/ /yang na nyan thos la sogs pa dbang po rtul po rnams kyi yul ma yin no/ /tshig gi don gzhan ni shes par zad do/ /de lta bas na zhes pa la sogs pas nye bar bsdus pa'i tshul gyis gdams pa'o//thos pa tsam gyis ni chog par ni mi bya'o zhes pa ni/ gal te thos pa tsam gyis don mthong 'gyur na bsgom pa don med 'gyur zhes sa bcu'i mgon pos bstan pa'i nyes par 'gyur ba'i phyir ro/ /de la zhes pa la sogs pas ni don bsdus te bstan pa'o//'dzin pa gnyis kyis rab 'jug ste zhes pa ni de rnams la gzung ba dang 'dzin pa'i dngos por brtags pa'i sgo nas/ rgyun dang ldan par 'jug cing / de rnams kyi rang bzhin stong pa nyid du rtogs pas rgyun las ldog par 'gyur ba'o/ /tshul ji ltar du 'jug ce na/ji ltar me long gi ngos la rdzas su ma grub pa'i gzugs brnyan snang ba la/ byis pa rnams kyis dngos por 'dzin pa bzhin du gzugs la sogs pa'i yul snang ba la/ tha dad kyi dngos por 'dzin pa'i tshul gyis 'jug pa ste/ de yang thog ma med pa nas gnyis su rtog pa'i bag chags kyis yongs su bsgos pa'i dbang gis de ltar snang ba'o//gal te tha dad par snang ba'i don ni mthun par snang ba dang / don byed nus pa'i phyir bden pa ma yin nam zhe na ma yin te/ yang dag pa ji lta ba bzhin du rigs pa mthar thug pas rnam par bltas shing gcal na/don gyi rnam par snang yang bden pa'i don med de/ rgyas par sngar bstan pa bzhin no/ /ji ltar zhes pa la sogs pas ni/ bstan pa brjod pa'i sgra la zhen pas yang dag nyid mi rtogs zhes pa ste/ 'di'i don sngar bstan no/ /sems can ni zhes pa la sogs pa yang rnam par shes pa rnams kyi 'jug pa'i tshul gsal bar ston te/kun gzhi rnam par shes pa yul du snang ba'i rlung gis bskyod nas/ gar mkhan nam chu rlabs bzhin du/ de las rnam shes sna tshogs myur du 'jug pa'o/ /rnam shes sna tshogs kyi snang ba de nyid la yid kyi rnam par shes pas 'di dang 'di lta bu zhes tha snyad 'dogs shing gsal bar byed pas bzhad gad pa dang 'dra'o//lnga dang bcas pa'i rnam par shes pa ni grangs lngar tshang ba sgo lnga'i rnam par shes pa'i snang ba ni/ sna tshogs shing gsal ba nyid yin pas tshon gyi ri mo dang 'dra bar rtog pa ste/ rtog pa'i bag chags las byung ba'o//dngos su ni de rnams rtog pa ma yin te skabs gzhan du shes par bya'o/ /yang na sgo lnga'i rnam par shes pa dang lhan cig pa'i yid kyi rnam par shes pa ni sgo lnga'i rnam shes kyi snang ba sna tshogs la de dang 'dra ba rtog ces pa ste/ tshig snga ma nyid rnam par bshad pa'o/ / 'di rnams kyang / 'gro ba dag dang lus 'dzin pa/ /ci yi slad du bya ba 'byung / /zhes dris pa'i lan du yang sbyar bar bya'o/ /de nas yang zhes pa la sogs pas thams cad bsdus pa chos lnga'i rang bzhin tshul gzhan gyi sgo nas gsal bar ston te/ dri ba gang gi lan du sbyar ba ni sngar bstan pa'i rjes su 'brangs te rtogs par bya'o//sangs rgyas kyi chos thams cad kyi rjes su 'jug pa ste zhes pa ni/ stobs dang mi 'jigs pa la sogs pa'i rigs rnams thob pa sa brgyad pa yan chod do/ /bcom ldan 'das kyis zhes pa la sogs pas chos lnga la sogs pa rtogs pa'i phan yon ston te/tshig gi don ni shes par zad do/ /de la zhes pa la sogs pas ma rtogs pa'i nyes dmigs stan te/ shin du 'dod chags zhes pa ni de nyid rgyun ring du gsal bar 'jug pa'o/ /de 'dra ba gang zag de rnams kyang ji ltar dar gyi srin bu rang gi lus las byung ba'i spu yis/rang nyid 'ching ba bzhin du/ rang gi kun gzhi las byung ba'i las dang nyon mongs pas/ bdag nyid dkris shing 'ching ba'o/ /tshig gi don gzhan ni shes par zad do/ /de la blo gros chen po zhes pa la sogs pas chos lnga po so so'i rang bzhin ston te/ gzugs la sogs par snang ba las logs shig na rnam par shes pa med pas/snang ba dang snang ba'i rnam par shes pa thams cad mtshan ma'o/ /gal te rtog pa med pa ni shes pa de 'dra ba'i mtshan mar 'dzin pa mi 'thad de/ de lta na de bzhin gshegs pa yang rjes thob kyi snang ba dang ldan pas mtshan ma dang bcas par 'gyur ba'i phyir ro zhe na/ma yin te/ 'di ni rnam par rtog pas kun nas bslang ba ma dag pa'i snang ba ste/ de 'dra ba yod ring la mya ngan las 'das pa la sgrib pas mtshan ma zhes bya'o/ /gang gis ming du brjod ces pa la sogs pa'i don ni blo gang gis ming du brjod cing ming gis khyad par du byas nas/mtshan ma gsal bar byed pa'i blo de ni rnam par rtog pa ma yin la/ khyad par du byed pa'i chos ni ming ngo / /phan tshun glo bur du byung zhes pa ni ming yang don la glo bur du btags shing / don yang ming la glo bur du btags pa'i phyir med cing mi dmigs pa'o//de 'dra ba'i ye shes des ming dang mtshan ma dngos po sgro mi 'dogs shing / dngos po med ces skur bar yang mi byed pa'o/ /shes pa de lta bu ni de bzhin nyid yin la zhes pa'i don yang / shes pa de lta bu ni yul de bzhin nyid yin la/ de kho na nyid du yul dang yul can gnyis med pas shes pa de lta bu de bzhin nyid du bstan pa'o//blo gros chen po zhes pa la sogs pas de bzhin nyid rtogs pa'i phan yon ston te/ sgyu ma la sogs pa sngon du 'gro zhes pa na de 'dra ba'i rang bzhin gyis khyab pa'o/ /de bzhin gshegs pa'i sa'i bar du rab tu thob par 'gyur ro zhes bya ba yan chod kyis ni rang gi don phun sum tshogs pa bstan nas de thob nas zhes pa la sogs pas gzhan gyi don phun sum tshogs pa ston te/de yang chu lteng dang ba sna tshogs kyi nang du zla ba'i gzugs sna tshogs snang ba bzhin du/ grangs thug pa med pa'i bar du gdul bya'i rgyud dang ba rnams la yang /shin du 'brel pa'i chos can te ji ltar mos pa'i skur snang bas/ de rnams kyi rgyud dang mthun cing 'brel pa'i chos can zhes bya'o/ /mos pa tha dad ces pa ni gsung gang dang gang la mos pa mi 'dra ba rnams la/ de dang mthun par chos ston pa'o/ / yang blo gros chen po zhes pa la sogs pas de rnams phan tshun bsdu ba'i tshul ston te/ don ni phal cher sngar bstan zin no/ /de la 'dir sems dang sems las byung ba rdzas gcig gam tha dad ce na/ kun rdzob tu rdzas gcig pa nyid de/ ji skad du/ de dang de min rang bzhin can/ /de de min dngos rgyu las skyes//de shes tha dad med rgyus skyed/ /bde sogs ci phyir shes ma yin/ /zhes slob dpon d+harma kIrtis bshad de/ ji ltar mig gi rnam par shes pa dang lhan cig pa'i bde ba la sogs pa rnams/ mig gi rnam par shes pa dang tha dad med pa'i rgyu yis skyed pa'i phyir//mig gi rnam par shes pa nyid yin ces pa ste/ 'dir rgyu tha dad med pa'i don yang / tshogs pa gcig pa dang nyer len gcig pa gnyi ga gtan tshigs kyi yin te/ de dag sgrub pa'i tshul lugs rgyas par ni tshad ma rnam par nges pa'i rgyan las shes par bya'o/ /gtan tshigs 'di yang mi mkhas pa yin la/bde sdug rnam par shes pa'i bdag nyid yin pa'i tha snyad tsam sgrub par byed pa yin te/ don ni mngon sum nyid kyis grub pa'o/ /yang mkhas pa rnams la ni don dang tha snyad gnyis ka yang mngon sum nyid kyis grub ste/ de la dga' ba dang yongs su gdung ba la sogs pa gcig tu nyams su myong ba'i bdag nyid du mthong ngo zhes gsungs pa lta bu'o//gal te bde sdug myong ba'i bdag nyid du ni thams cad kyis 'dod mod kyi/ de lta na yang gtso bo'i rnam par shes pa dang rdzas gcig pa ma yin no zhe na/ de ci gtso bo rnam par shes pa brgyad kyi bdag nyid las ma gtogs pa'i myong ba'i rdzas 'ga' zhig 'dod na ni ji ltar lung rnams dang 'gal bar mi 'gyur zhes pa'o//gzhan yang sngar bstan pa'i gtan tshigs ni gtso bo'i rnam par shes par 'dod pa de nyid dang rgyun gcig tu bsgrubs pas/ de nyid kyi bdag nyid du 'gyur ba'o//gzhan yang sngon gyi slob dpon bzang mdog dang / btsun pa rtogs pa'i lhas kyang de dag rdzas tha dad med par gsungs pas de nyid kyi rjes su 'brang bar bya'o/ /gzhan yang shes rab kyi pha rol tu phyin pa'i mdo dang bstan bcos dag las sems bskyed pa ston pa'i skabs su/ sems dang sems las byung ba 'dun pa gnyis tha dad med par gsungs te/ sems bskyed pa ni gzhan don phyir/ /yang dag rdzogs pa'i byang chub 'dod/ /ces sems bskyed pa'i ngo bo 'dun pa las bshad cing / mdo las kyang shA ri'i bu de la chos thams cad rnam pa thams cad du mngon par rdzogs par 'tshang rgya bar 'dod pas/shes rab kyi pha rol tu phyin pa la brtson par bya'o zhes sems bskyed pa'i ngo bo thob par 'dod pa'am/ don du gnyer ba'i 'dun pa nyid la bshad pa'i phyir ro/ /gal te de ltar na nyi ma dang 'od zer lhan cig pa bzhin du/ dus gcig tu byung zhes pa mi 'thad de/lhan cig pa'i sgra'i don ni tha dad pa la 'jug pa'i phyir ro zhe na/ skyon med de/ rtogs pa'i bdag nyid kyi sems dang sems las byung ba ni/ rang bzhin dang gnas skabs kyi ldog pa ni mi 'dra ba gnyis yin pas de ltar bstan pa'o/ /de nyid kyi phyir sngon gyi slob dpon dag gis/lnga nyid 'thad pa med phyir dang / /byed rgyu bye brag med phyir dang / /de yi gnas skabs skyon phyir dang / /lung dang 'gal bar 'gyur phyir ro/ /zhes gsungs pas de dag rdzas tha dad na phung po lngar dbye ba mi 'thad ces pa la sogs pa'i skyon yang thag ring du spangs te/ ldog pa mi 'dra ba la ltos nas sngar rnam par dbye ba dang /byed rgyu'i bye brag la sogs pa 'jog pa'i phyir ro/ /rnam par rtog pa khong du chud par byed ces pa ni/ de yang rtogs pa'i bdag nyid yin pas so/ /rnam pa brgyad du phye zhes pa ni/ de kho na nyid du ma grub kyang byis pa rnams kyis brtags shing snang ba'i ngo na rnam par shes pa'i tshogs brgyad du phye ba'o//rnam pa lnga po 'di rnams kyi nang du chos thams cad 'dus pa'i don ni/ kun nas nyon mongs pa ji snyed pa thams cad ni/ ming dang mtshan ma dang rnam par rtog pa gsum gyis bsdus la/ rnam par byang ba'i phyogs ji snyed pa thams cad ni/de bzhin nyid dang yang dag pa'i ye shes kyis bsdus pa'o/ /gzhan yang blo gros chen po zhes pa la sogs pas ni/ chos lnga po'i rang bzhin snga ma las tshul gzhan gyi sgo nas rgyas par ston te/ de la mtshan ma gsal bar byed ces pa ni/ sngar bstan pa ltar ming gis khyad par du byas nas gsal bar byed pa'o//phan tshun myong ba med ces pa ni gzung ba dang 'dzin pa spangs pa'o/ /glo bur du gzhig gi bar du zhes pa ni yang dag pa'i shes rab kyis gzhig pa'i dus na mi dmigs pa'o/ /rang gi blo la mkhas par bya/ /zhes pa ni/ mdo sde gzhan las kyang byang chub sems dpa' sems dpa' chen pos rang gi sems rtogs par bya ba las ma gtogs pa/khong du chud par bya ba'i chos gzhan med do zhes gsungs te/ 'di'i don zhib tu ni sngar bstan no/ /bsdu ba'i tshigs su bcad pa yang sngar bshad zin to/ /de nas yang zhes pa la sogs pas de bzhin gshegs pa'i rang bzhin tshul gzhan gyi sgo nas gsal bar ston to//dri ba gang gi lan du sbyar ba ni/ snga ma'i rjes su 'brangs te rtogs par bya'o/ /de la 'di rnams kyi don ni/ du mar bstan pa'i dpe yang dgongs pa can yin te/ gang gA'i klung gi bye ma'i tshad kyis ni dus gsum gang yang rung ba gcig gis bsdus pa'i/sangs rgyas kyi tshad du yang mi 'gyur ba'i phyir ro/ /gal te 'das pa dang ma 'ongs pa ni tshad med pa ni phyir de ltar 'gyur mod kyi/ da ltar gyi dus kyis bsdus pa ni dus cung zad tsam dang 'brel pas de ltar 'gyur ba ma yin no zhe na/ skyon med de/ de ltar phyogs bcu tshad med pa rnams na bzhugs pa'i sangs rgyas rnams kyang tshad med pa'i phyir ro//de 'dra ba'i dpe las 'das pa'i rgyu mtshan yang / 'jig rten na grags shing grub pa'i phul las 'das pa rtag pa'i mtha' bzung ba'i dpe 'ga' zhig dang 'dra ba lta bur snang yang 'jig rten na grags pa rnams ni de bzhin gshegs pa dang phal cher mi 'dra ba'i phyir/de 'dra ba'i dpe ni yang dag pa'i dpe ma yin zhes pa'o/ /de ltar na yang de 'dra ba'i dpe bstan pa'i sgo nas 'khor ba'i sdug bsngal las thar cing / mya ngan las 'das pa'i bde ba mthar thug pa dang ldan pa'i sangs rgyas du ma nyid du bstan pas/gdul bya'i khyad par 'ga' zhig 'khor ba'i sdug bsngal las skyo zhing / sdug bsngal zhi ba'i sangs rgyas nyid thob par sla ba nyid du mthong nas/ brtson 'grus khyad par can rtsom par 'gyur bas/ de ltar bstan pa'o/ /de'i phyir thob par dka' ba'i dpe bstan pa yang dgongs pa can nyid yin te/de bzhin gshegs pa rnams rang rang gi rtogs pa'i tshul phyin ci ma log pa rnam par bzhag pa'i gtam ste/ nges don gyi gsung rab kyi dbang du byas na zhes pa la sogs pa shes par zad do/ /de la rang gi tshul 'jig rten gyi phul las 'das pa rtag pa mtha' bzung gi dpe 'ga' zhig ni dpe nyid du rigs mod kyi/gdul bya'i khyad par 'ga' zhig ni yid ches par mi 'gyur bas dpe nyid du mi sbyor ro/ /don dam pa'i de kho na nyid ni spros pa thams cad dang bral bas dper bya kun las 'das pa'o/ /mdo sde gzhan dag las kyang / gang zhig sangs rgyas chos rnams la//dper gzhag ji snyed byed pa ni/ /de dag sangs rgyas ma 'tshal te/ /des ni rgyal ba smad pa yin/ /zhes gsungs so/ /gal te de lta na ngag de nyid kyi rgyun las/ 'di la dpe cig yang dag ste/ /de ni nam mkha'i khams su brjod/ /ces 'jig rten na grags pa nyid dper byas pa dang 'gal lo zhe na/de ni phyogs gcig 'dra ba'i sgo nas dper byas pa ste/ mdo 'di nyid las kyang / de ltar dper sbyar ba'i don rgyas par ston pa ni/ de kho na nyid ni de bzhin gshegs pa rnams yin te zhes pa la sogs pa'o/ /tshig gi don ni phal cher shes par zad do//me'i khams dang 'brel pa'i phyir sa ni mi tshig ste zhes pa'i don ni/ de dang 'brel pa'i dbang gis mi 'tshig ces pa ste/ sa'i rang bzhin mi 'dor ba'o/ /don 'di yang sngar bstan zin to/ /rnam pa gcig tu ni smin par byed pa me'i khams kyang sa la tshang ba'i phyir zhes pa'o//rang bzhin gzhan du mi rtsom ste zhes pa ni de dang lhan cig mi gnas pa'i 'gal ba'i tshul gyis gnas pa rnams la phan mi 'dogs pa ste/ bye ma rnams ni bye ma'i gnas nyid do zhes pa rang dang rjes su mthun pa'i 'bras bu rnams kyi gnas yin zhes pa'o/ /gzhan yang gang gA'i klung gi bye ma ni phri ba dang bsnan pas bri ba dang 'phel bar mi mngon pa'o//chos ni ye shes kyi rang bzhin du gyur pa'i chos so/ /sems can gyi sdug bsngal dag gis gzir zhes pa ni/ ji ltar bu gcig pa na ba'i pha ma lta bur ro/ /chos kyi dbyings kyi rang gi ngang gis smon lam gyi bde ba mi 'dor ro zhes pa ni thugs chos kyi dbyings las ma g.yengs par lhun gyis grub pa'i smon lam gyi bde ba mi 'dor te/sems can gyi sdug bsngal la mtshan mar dmigs pa med pa'i phyir ro/ /mya ngan las 'das pa la 'bab zhes pa ni lha dang tshangs pa'i theg pa la sogs pa bstan pa rnams kyang brgyud nas mya ngan las 'das pa mthar thug pa la/gzhol zhing 'bab par ston pa'o/ /blo gros chen po zhes pa la sogs pas ni sangs rgyas kyi mya ngan las 'das pa rtag pa yin pas/ 'khor ba 'dus byas rnams la ldan pa'i don 'ga' zhig/ de bzhin gshegs pa rnams la dpe nyid du mi 'jug par ston pa'o//de'i don yang 'khor ba'i 'dus byas pa yin pas/ 'jig pa'i chos can nyid de dag la ldan pa'i don yin la/ de 'dra ba ni de bzhin gshegs pa la med ces pa'o/ /gal te de ltar na 'khor ba'i thog ma'i mtha' zhes pa ste/ de la thog ma ni sngon gyi mtha' yin la/thog ma de'i mtha' ni phyi ma'i mtha' ste de dag shes pa med de/ de'i phyir 'khor ba la thog ma dang tha ma med pas/ ji ltar 'jig pa nyid 'khor ba la ldan pa'i don du bshad de/ tha ma med pa'i phyir ro zhe na/ skyon med de/ spyir rigs tsam la thog ma dang tha ma med kyang /dngos po'i dbang du byas na skye zhing 'jig pa'i chos dang 'brel pas so/ /chad pa ni 'jig pa nyid kyi rnam grangs so/ /blo gros chen po zhes pa la sogs pas 'khor ba la phyi ma'i mtha' med na/ ji ltar srog chags rnams thar pa mya ngan las 'das pa thob par 'gyur zhes rgol ba'o//lan gyi don ni khams gsum spyi tsam gyi dbang du byas na 'khor ba tshad med pas phyi ma'i mtha' med kyang / gang zag bye brag pa 'ga' zhig gi dbang du byas na thar pa mthong la/ de yang phyin ci log nye bar zhi ba tsam du ma byas pa yin pas/ 'jig pa'i chos dang 'brel pa ma yin no//da bas na rnam pa thams cad du 'khor ba la mtha' med ces bya ba'i gtam ni cir yang dgos pa ma yin te/ don gyis stong pa'i phyir ro/ /don dam par na de dag thams cad rtogs pas brtags pa'i rnam grangs yin zhes pa ste shes par zad do/ /gang gis gang gA'i bye mnyam du//zhes pa ni/ sngar bstan pa ltar phyogs 'ga' zhig nas 'dra ba'o/ /'jigs med tshul gyis mthar thug pa ni mi gnas pa'i mya ngan las 'das pa rtag pa'o/ /nyes pa thams cad ni rtog pa la sogs pa'o/ /de nas yang zhes pa la sogs pas ni/ mi rtag pa nyid tshul gzhan gyi sgo nas gsal bar ston te/de'i don yang chos thams cad ni 'di lta ste dge ba dang mi dge zhes pa la/ dge ba ni pha la phar 'dzin pa dang / dge sbyong la dge sbyong du 'dzin pa la sogs pa 'dzin pa'i chos dge ba nas bzung ste/ sangs rgyas kyi chos ma 'dres pa bco brgyad kyi bar du shes rab kyi pha rol tu phyin pa'i mdo las ji skad du bshad pa rnams te/'tsho ba nye bar zhi bar byed pas dge ba'o/ /mi dge ba ni de bzlog pa mi dge ba bcu yis bsdus pa rnams so/ /de la sogs pa rgyu dang rkyen gyis mngon par 'dus byas pa dang / de las bzlog pa dang / 'jig cing mi rtag pas 'jig rten te/nye bar len pa'i phung po lnga dang / de las bzlog pa dang / rang bzhin dang bcas pa'i kha na ma tho ba dang 'brel pa dang / de las bzlog pa dang 'dod pa'i zag pa la sogs pa gsum mam bzhi dang bcas pa dang / de las bzlog pa dang / sems kyis zin pa'i dbang po dang /de las bzlog pa rnams so/ /blo gros chen po zhes pa la sogs pas de rnams kyi don rgyas par 'chad de/ len pa'i phung po lnga las byis pas dge ba dang mi dge bar brtags pa ni tha snyad tsam du 'jig rten pa'i chos dge ba dang mi dge ba'o/ / blo gros chen po zhes pa la sogs pas ni 'jig rten las 'das pa'i dge ba'o/ /snyoms par 'jug pa ni 'gog pa'i snyoms par 'jug pa la sogs pa'o/ /kun gzhi rnam par shes pa dge ba dang mi dge ba nyid du bstan pa'i don ni/ de'i dge ba dang mi dge ba'i sa bon dang 'brel pas na re zhig de dag dang tha dad med pas/dge ba dang mi dge ba nyid du rnam par gzhag pa'o/ /nyon mongs pa can gyi yid kyang sa bon de dag dang ldan pa'i kun gzhi la dmigs pas/ ci rigs su dge ba dang mi dge bar gzhag go/ /mu stegs can gyis brjod ces pa phyin ci log gi lta bas gang zag dang chos kyi bdag tu sgro btags pa'i sgo lnga'i rnam par shes pa skad cig ma du ma 'dus pa rnams kyang /rtog pa dang bcas pa'i yid kyis dge ba'i rkyen du bsgyur ba ni dge ba zhes bya la/ mi dge ba'i rkyen du bsgyur ba ni mi dge ba zhes bya ste/ de ltar na rnam pa brgyad po thams cad kyang dge ba dang mi dge bar 'gyur ba'o//des na 'brel pa can gyi chos gzhan la ltos nas de ltar 'gyur gyi rang gi ngo bo ni snga ma ltar ming du bstan pa la sogs pa yin pas 'gal ba med pa'o/ /'dir dge ba la sogs pa'i bye brag chos mngon pa'i bstan bcos las bshad pa rnams kyang rjes su mi 'jug pa ma yin mod kyi/de dag nyid kyi gzhung las shes par bya'o/ /mdo sde 'di ni gtso bor shes rab kyi pha rol tu phyin pa'i don gtan la 'bebs pas rgyas par ni mdo de nyid kyi rjes su 'brangs te rtogs par bya'o/ /de ltar skad cig ma'i chos dang ldan pa'i chos can bstan nas/da la yod pa'i chos skad cig ma nyid ston pa ni/ blo gros chen po zhes pa la sogs pa'o/ /rgyud kyi rgyun ni lus tha mi dad ces pa ni/ de dag kyang rgyud gcig cing rgyun chags su 'byung zhing 'byung la/ byung nas kyang 'jig par 'gyur ba ste/ rags pa'i 'jig pa'am/ / skad cig re re la 'jig pa'o/ /gal te 'gags ma thag tu rnam par shes pa gzhan 'byung ba'i nges pa ni med de/ brgyal ba la sogs pa'i gnas skabs su tshogs drug 'gags pa ni de ma thag tu 'byung ba med par ston pa bzhin no zhe na/ ma yin te/ 'gal bar 'gyur ba de dag gis de ma thag tu kun gzhi rnam par shes pa la/rang rang gi bag chags shes pa'i bdag nyid du gyur pa gzhan dang gzhan skyed pa'i phyir ro/ /skad cig gi dus su mi gnas zhes pa ni rang gi dus las ma gtogs pa'i skad cig tu mi gnas pa'o/ /bag chags kyi skad cig pa yin zhes pa ni zag pa dang bcas pa'i bag chags dang ldan pa kun rdzob tu yod pa'i bdag nyid ni skad cig ma yin zhes pa ste/'di rnams thams cad skad cig ma nyid du byis pa'i skye bo rnams la yid ches par byed pa'i rgyu mtshan yang / byas pa'am yod pa la sogs pa'i gtan tshigs las te/ rgyas par ni rigs pa'i bstan bcos dag las shes par bya'o//zag pa med pa'i bag chags kyis zhes pa la sogs pas ni zag pa'i gnyen por gyur pa spros pa dang bral ba don dam pa'i rang bzhin gyis ni skad cig ma yin pa'o/ /de ltar byis pa'i skye bos kun rdzob tu skad cig pa dang / don dam par skad cig pa ma yin pa zung du 'jug pa'i don ma rtogs pas/la la dag sems nyid rig pa skad cig pa'i don kun rdzob tsam du yang med do zhes chad par lta ba nyid du 'gyur la/ 'ga' zhig ni de las bzlog pa sgro 'dogs pa'i mthar 'gyur te/ de'i phyir mya ngan las 'das pa 'dus ma byas kyi chos rnams kyang 'jig par byed de/ma thob pa'i nyams par 'gyur ba'o/ /blo gros chen po zhes pa la sogs pas rnam par shes pa de rnams la ldan pa dang mi ldan pa'i chos kyi khyad par ston te/ de la sgo lnga'i rnam par shes pa ni sngar bstan pa ltar rgyun dang mi ldan pa'i phyir 'khor ba dang mya ngan las 'das pa'i rgyu ma yin zhing /de nyid kyi phyir bde ba dang sdug bsngal gyi rnam par smin pa yang myong ba ma yin no/ /kun gzhi rnam par shes pa ni bde ba dang sdug bsngal mi myong ba'i rgyu dang bcas pa zhes pa'am/ mya ngan las 'das pa ni tshor ba btang snyoms par 'ba' zhig dang lhan cig pa yin pas/de 'dra ba'i mya ngan las 'das pa'i rgyur yang 'gyur la/ yang 'dod pa'i zag pa la sogs pa 'og nas ston par 'gyur ba bzhi'i bag chags dang ldan pas/ 'khor bar 'jug cing mya ngan las 'das pa'i rgyur mi 'gyur bas/da las ldog pa yang yin no/ /blo gros chen po zhes pa la sogs pas ni rgyun brtan pa'i dngos po byis pas skad cig ma ma yin pa'i dngos por brtags pa'i khyab par ston te/ khyad par dag ces pa ni tshigs su bcad pas 'og nas ston par 'gyur ro/ /de la mngon par rtogs pa thob pa ni mthong ba'i lam gyi ye shes la sogs pa ste/de rnams 'jig pa'i chos can skad cig pa yin na/ 'phags pa rnams 'phags pa ma yin par 'gyur te/ mya ngan las 'das pa rtag pa gtsang ba'i go 'phang ma thob pa'i phyir ro/ /tshig 'og ma ni thal ba las bzlog pa'o//ldem po'i ngag tu bshad pa la mi mkhas zhes pa ni dngos po thams cad skad cig mar gsungs pa ni byis pa'i skye bo rnams 'khor ba la skyo ba skyed pa'i don du gsungs pa la de ltar ma shes pa'o/ /ji ltar brtag ces pa ni spong ba'i sgra ste/ de ltar brtag par mi rigs pa'o/ /gal te de lta na gang byas pa'am yod pa de ni skad cig ma yin te zhes bstan pa mi 'thad par 'gyur ro zhe na/bden mod kyi ngag 'di rnams kyi don ni/ don dam par skad cig gi ngo bor yang grub pa med la/ kun rdzob ni rnam pa gnyis te/ 'jig rten pa'i kun rdzob dang / rnal 'byor pa'i kun rdzob po/ /de la dang po ni 'jig rten tha mal pa'i snang ba ste/de dag gi snang ngo na gser dang rdo rje la sogs pa skad cig ma yin par 'gyur ba med pa'i ngo bo nyid du snang bas/ kun rdzob tu de dag rtag ces bya'o/ /rnal 'byor pa'i kun rdzob ni de dag gi snang ba ste/ de'i ngo na thams cad skad cig pa nyid du dmigs pas/de ltar rnam par gzhag pa'o/ /de la 'dir 'jig rten gyi kun rdzob de 'dra ba ni log pa'i kun rdzob ces kyang bya ste/ 'on kyang de dag yid tshim par bya ba'i don du bcom ldan 'das kyis kyang de dang mthun par gsungs pa'o/ /yang blo gros chen po zhes pa la sogs pas pha rol tu phyin pa du zhes sngar dris pa'i lan du/lam pha rol tu phyin pa drug ston pa ste/ snying po sbyong bar byed pa'i lam nyid du bsdu'o/ /srid par skye ba'i gnas sna tshogs kyi phyir zhes pa ni 'khor los sgyur ba la sogs pa thob par bya ba'i don du sbyin pa rdzogs par byed pa ste/ de dag kyang gzugs la sogs pa 'dod pa'i yon tan lnga la mngon par dga' ba'o//mngon par shes pa dag kyang mngon par grub ces pa ni de 'dra ba'i bya ba dang ldan pa'i bsam gtan gyi ting nge 'dzin dang byams pa la sogs pa mngon par bsgrub pa'o/ /de dag kyang rang rang gi bsam pa la ltos nas pha rol tu phyin pa nyid du btags mod kyi/thabs dang shes rab dam pas ma zin pa'i phyir pha rol tu phyin pa dngos ni ma yin no/ /len pa la 'dzin pa med ces pa ni kun gzhi rnam par shes pa'am/ nye bar len pa'i phung po'o/ /de nyid gsal bar ston pa ni rang gi sems dang zhes pa la sogs pa'o/ /rnam par rtog pa mi 'jug pa ni nyan thos dang rang sangs rgyas la sogs pa'i rnam par rtog pa rgyu ba ngan pa spangs pas tshul khrims kyi pha rol tu phyin pa rdzogs pa'o//gang gzung ba dang 'dzin pa'i dngos po stong pa nyid du rtogs pas/ de 'dra ba'i chos zab mo la bzod pa ni/ chos la nges par sems pa'i bzod pa'i pha rol tu phyin pa'o//rnal 'byor dang mthun par mthong ba ni ting nge 'dzin gyi dmigs pa de kho na nyid dang mthun par rtog pa'o/ /mu stegs can gyi mya ngan las 'das par 'dzin par mi ltung ba ste/ kun rdzob tu rnam pa thams cad mkhyen pa nyid la dmigs pa'i sems rtse gcig pa ni bsam gtan gyi pha rol tu phyin pa'o//shes rab kyi pha rol tu phyin pa ni rnam par rtog pa med pa'i blos bden pa gnyis kyi chos rab tu phye na/ mtha' gnyis su 'dzin pa spangs shing / gnas gyur pa sngon du 'gro ba ste/ sa brgyad pa yan chod kyi shes rab bam ye shes rgyun las nyams pa med pa chos kyi sku thob par bya ba'i don du rab tu sbyong ba ste/sbyin pa la sogs pa thams cad kyang 'khor gsum sgyu ma lta bur rtogs pa'i shes rab dang / bsngo ba la sogs pa'i thabs la mkhas pas zin pa ste/ ji skad du/ gang tshe shes rab kyis ni rab tu zin gyur na/ /de tshe mig rnyed gyur cing de yi ming thob po//zhes gsungs pa dang / mdo sde gzhan dag las kyang rnam pa thams cad mkhyen pa nyid du ma bsngos pa'i sbyin pas ni sbyin pa'i pha rol tu phyin pa'i ming mi thob bo zhes pa la sogs pa gsungs pa'i phyir ro/ /'di'i don zhib tu ni 'phags pa shes rab kyi pha rol tu phyin pa'i mdo dang /dgongs pa nges par 'grel pa la sogs pa las shes par bya ste/ 'dir ni gzhung mangs kyis 'jigs pas ma spros so/ /tshigs su bcad pa'i don ni phal cher shes par zad do/ /byed pa ni phyi rol pas brtags pa'i byed pa ste/ de 'dra ba med cing snga phyi phan tshun byed pa'am/don dam pa'i dngos pos dben pa'o/ /skye ba med ces pa la sogs pa'i dgag pa rnams ni thams cad dang don dam pa la dgongs pa'o/ /dngos po rnams kyis rnam rtog pa/ /zhes pa la sogs pas ni kun rdzob tu rnam par rtog pa'i gzhan dbang skad cig ma la sogs par bstan pa ste/de 'dra ba'i sems 'byung bar byed pa'i rgyu ni ma rig pa thog ma med pa nas brgyud pa yin te/ des gzugs la sogs pa'i de kho na nyid du rtogs pa de srid kyi bar du de gnas ci zhes pa gnas sam 'on te/ ma yin zhes pa ste/ kun rdzob tu rgyun ni gnas la skad cig ni 'jig pa'o/ / gzugs ni dus su zhes pa la sogs pas don dam par gzugs dang ma rig pa la sogs pa'i rgyu med pas/ de rnams mi 'thad ces pa'o/ /dus su mi gnas zhes pa ni don dam par rang yod pa'i dus su yang mi gnas pa ste/ gzugs gzugs kyi ngo bos stong pa'o/ /log pa'i rgyu ni ma rig pa'o//ji ltar skad cig 'jig par rig /ces pa ni 'jig par dmigs shing grub pa med pa'o/ /rnal 'byor can gyi snyoms 'jug ces pa la sogs pas ni rtag pa nyid du brtags pa'i khyad par te/ 'gog pa'i snyoms par 'jug pa la sogs pa'o/ /'od snang gnas kyi gzhal med khang ni bsam gtan gnyis pa'i gzhal med khang ste/'jig rten pa'i nang gi skyon rtog pa dang dpyod pa med pas phyi rol gyi me'i bskal pas kyang 'jig pa med ces pa ste/ bsam gtan dang po man chod me yis lan bdun du zhig kyang de ni mi 'jig pa'o/ /gnas pa rnams ni rgyun du zhugs pa la sogs pa'i gang zag ste nyon mongs pa spangs pas dge slong zhes kyang bya'o//thob pa'i chos ni mthong ba'i lam gyi ye shes nas sangs rgyas kyi ye shes kyi bar du rtogs pa thob pa rnams skad cig ma nyid du tha mal pa rnams kyis ma mthong bas de'i ngor rtog ces pa'o/ /yang dag par ni de rnams thams cad sgyu ma'i dpe brgyad dang 'dra bar/kun rdzob tu skad cig ma yin zhing don dam par stong pa'o/ /'byung po de dag ces pa ni sems can gyi rgyud kyis bsdus pa ste/ don dam par gang nas kyang 'ongs pa med cing / gang du yang song ba med pa'o/ /'phags pa lang kar gshegs pa'i 'grel pa de bzhin gshegs pa'i snying po'i rgyan las le'u drug pa'i rnam par bshad pa rdzogs so// //de nas yang zhes pa la sogs pas sngar gyi dgongs pa can gyi don nyid tshul gzhan gyi sgo nas gsal bar ston te/ 'khor gyi the tshom bsal ba'i phyir dri ba'i don ni dgra bcom pa sangs rgyas nyid du 'gyur ba mi 'thad de/de ni tshogs rdzogs par bya ba'i don du srid par skye ba len dgos pa las/ dgra bcom pa ni srid pa kun du sbyor ba zad pa'i phyir ro/ /yang 'dod chen pa rnams ni mngon par mtho ba thob pa'i dge ba'i rtsa ba yang bcad pa'i phyir/ sangs rgyas nyid du 'gyur ba lta ci smos zhes pa'o//gzhan yang de bzhin gshegs pas yi ge gcig kyang ma gsungs na/ gsung dbyangs yan lag drug cu dang tshig 'bru bzang po zhes pa la sogs pa mi 'thad pas de ltar bstan pa ni don ci yin zhes pa'o/ /rdzu 'phrul sprul pa la sogs pa'i bya ba byed pa ni/kun nas slong ba'i blo sngon du 'gro bas rtog pa med par de 'dra bar mi 'thad ces pa dang / kun gzhi rnam par shes pa la sogs pa snga phyi tha dad pa'i bdag nyid du ma dmigs pas de ltar bstan pa'i don gang yin zhes pa dang / de bzhin gshegs pa'i sku ni nyes pa thams cad spangs shing yon tan thams cad rdzogs pas/lag na rdo rje rtag tu phyi bzhin du 'brang zhing bsrung ba mi 'thad na/ gsung rab dag las de ltar bstan pa'i don ci yin zhes pa dang / sngar bstan pa ltar 'khor ba'i tha ma med pa dang / mya ngan las 'das pa 'gal bas de'i don gang yin pa dang / lha sbyin ni yun ring po nas de bzhin gshegs pa'i gshed ma dang dgra bor gyur to zhes pa la sogs pa'i bdud dang /de dag gis byas pa'i las te/ de bzhin gshegs pa'i zhabs la bdud kyis 'phangs pa'i sgyogs kyi zer phog go zhes pa dang / gzhan yang sngon gyi las kyi nyes pas zhabs la seng ldeng gi tshal pa zug ces pa dang /bram ze'i bu mo tsan tsas shing gi gzhong khung lte bar bcug nas dge sbyong khyod kyis nga sbrum du bcug go zhes skur pa btab pa la sogs pa dang / bsod snyoms kyi phyir bram ze'i grong sA la can du gshegs pa las/ bsod snyoms ma rnyed nas lhung bzed bkrus te phyir byung ngo zhes pa la sogs pa 'phags pa chos bcu pa'i mdo las gsungs pa rnams kyi don ji ltar 'thad do//de 'dra ba'i nyes pa dag ma spangs par rnam pa thams cad mkhyen pa nyid thob par 'gal ba'i phyir ro/ /lan gyi skabs su dgra bcom pa rnams sangs rgyas nyid du lung bstan pa ni/de rnams phung po lhag ma ma lus pa'i mya ngan las 'das pa'i dbyings te zag pa med pa'i dbyings la yun ring du gnas pa na/ rang gi dge ba'i sa bon dang / de bzhin gshegs pa'i byin gyi rlabs [(]gyis[,]kyis[)]/ de las sad nas byang chub mchog tu sems bskyed de tshogs rdzogs par byas nas sangs rgyas pa la dgongs pa ste/rgyas par ni sngar bstan to/ /gzhan yang de ltar bstan pa'i dgos pa ni byang chub sems dpa' dbang po rtul po sngar byang chub mchog tu sems bskyed nas/ byang chub sems dpa'i spyod pa spyad pa rnams lam de yis skyo nas/ nyan thos kyi theg pas yongs su mya ngan las 'da' bar 'dod pa yod de/de dag las bzlog nas theg pa chen po la rab tu spro bar bya ba'i phyir/ gnas brtan 'od srungs la sogs pa sprul pa'i nyan thos rnams la sprul pa'i sku dag gis sangs rgyas su lung bstan te/ nyan thos kyi byang chub de nyid du mthar thug pa ma yin zhing /sangs rgyas nyid du bgrod par bya ba yin pas theg pa chen po'i lam de nyid la brtson par 'gyur ba'o/ /gal te de lta na dgra bcom pa rnams sangs rgyas su lung bstan pa dgongs pa can yin pas sngar bstan pa'i rnam par gzhag pa dang 'gal lo zhe na/ skyon med de/dgra bcom pa rnams zag pa med pa'i dbyings la bskal pa'am bskal pa las lhag par gnas nas/ sngar bstan pa ltar sangs rgyas nyid du 'gyur ba ni nges pa'i don yin pas sngar bstan pa dang 'gal ba med pa'o/ /de las gzhan du zag pa med pa'i ting nge 'dzin gyi sgo mthong bar byas nas byang chub sems dpa' rnams dang mtshungs par myur du tshogs gnyis rdzogs par byas te/sangs rgyas pa ni shin tu yang rigs pa ma yin la/ gzhan yang snga ma ltar dus dang rkyen gyi dbye ba ma byas par dgra bcom pa rnams sangs rgyas nyid du 'gyur ro zhes bstan pa yang dgongs pa can gyi tshig yin te//ji skad du/ don dam pa dang / gnas skabs dang / mthar thug pa'i dbye ba ma byas par theg pa chen po gcig nyid yin zhes bstan pa'i dgongs pa can gyi tshig nyid du sngar bstan pa bzhin du'o/ /des na skabs kyi don 'di ni sngar bstan pa dang 'gal bar mi 'gyur ba'o/ /gzhan yang gal te sprul pa'i nyan thos rnams la de ltar lung bstan to zhes dmigs kyis bsal ba byas pas de las gzhan zhi ba bgrod pa gcig pu pa rnams sangs rgyas nyid du mi 'gyur bas sngar bstan pa dang 'gal lo zhe na ma yin te/'di ni dam pa'i chos pad ma dkar po las 'od srungs chen po la sogs pa sangs rgyas su lung bstan pa ni sprul pa'i nyan thos yin no zhes gsungs kyi/gsung rab kyi phyogs gzhan dag las nyan thos thams cad sangs rgyas nyid du lung mi ston pa ni ma yin no/ /des na 'dir dgra bcom pa dang rang sangs rgyas rnams byang chub dman pa de dag tsam du mthar thug cing / de las gong du bgrod du med par bstan pa yang drang ba'i don yin la/ khyad par du lhag ma med pa'i mya ngan las 'das pa sngon gyi las dang nyon mongs pas 'phangs pa'i phung po zad na/ nam mkha' la sprin dengs pa ltar 'du byed kyi 'jug pa thams cad rgyun chad par 'dod pa ni shin tu yang mi 'thad pa nyid du sngar rgyas par bstan to//gal te de ltar byang chub dman pa dang mchog nyid 'jog pa de lta na de dag la spangs pa dang rtogs pa'i khyad par ci yod snyam du dogs na/ blo gros chen po zhes pa la sogs pa gsungs te/ de'i don ni nyon mongs pa'i sgrib pa mngon du rgyu spangs par sangs rgyas dang bye brag med pa yin gyi/bag chags spangs pa ni ma yin no zhes sngar bstan to/ /shes bya'i sgrib pa ni chos la bdag med pa ste/ sems kyi chos nyid de bzhin nyid rnam par mi rtog pa'i shes rab kyis mthong zhing goms pa kun gzhi rnam par shes pa la yod pa'i ma rig pa'i bag chags thams cad bzlog pa'i phyir spong bar 'gyur ba'o//'dir gang zag la bdag med pa ni bden pa bzhi chos bcu drug gi rnam pa ste/ de ltar mthong ba'i bye brag gis rnam par dag par 'gyur ba'o/ /de'i don yang phung po lnga la rtag pa dang bde ba la sogs par phyin ci log pa la brten nas chags sdang la sogs pa'i nyon mongs pa rnams 'byung ba las/de las bzlog ste mi rtag pa dang sdug bsngal ba la sogs par mthong zhing goms pas mngon du rgyu ba spong bar 'gyur ba'o/ /yid kyi rnam par shes pa bzlog pa'i phyir zhes pa yang rtag pa la sogs par phyin ci log pa'i yid kyi rnam par shes pa bzlog pa'o//chos kyi sgrib pa ni chos rnams mthong ba la sgrib pa ste/ shes bya'i sgrib pa'o/ /gzhan yang ngas yi ge gcig kyang ma gsungs zhes pa'i don ni 'das pa dang ma 'ongs pa'i sangs rgyas rnams kyis gsungs pa'i tshig dang yi ge las ma gtogs pa'i lhag pa cung zad kyang gsungs pa med pa'o//de las gzhan pa'i dgongs don gnyis kyang sngar bstan to/ /mi rtog mi dpyod pa 'phrul pa sprul pa la sogs pa bstan pa'i don kyang sngon gyi smon lam la sogs pa dang / ye shes kyi dbang gis rtog pa med kyang de ltar ston pa la 'gal ba med pa'o/ /mkhyen bzhin du zhes pa ni sems can rnams kyi khams dang mos pa ji lta ba bzhin du mkhyen nas de dag gi don mdzad pa'o//gal te dran pa ni sngar 'dris pa'i dngos po nye ba ma yin pa'i don la 'dzin pa yin pas rtog pa dang bcas pa nyid du 'gyur ro zhe na/ ma yin te/ 'das pa'i don la phyin ci log gi sgro 'dogs bkag pa tsam yin gyi/de 'dra ba'i rnam pa snang ba ma yin pa'i phyir ro/ /shi 'phos gnyis ni sngar bstan to/ /rnam par shes pa rnams skad cig tu bstan pa dang / 'khor ba thog mtha' med pa la sogs pa bstan pa'i don ni byis pa'i skye bo rnams kyi 'jug pa'i rnam par shes pa ni dge ba zag pa med pa'i phyogs dang bral ba ste/de rnams las zag pa 'phel zhing rgyas par byed pa'i phyir ro/ /de ltar yang 'phags pa mya ngan las 'das pa chen po las/ bcom ldan 'das kyis bka' stsal pa/ rigs kyi bu sems can gyi rnam par shes pa lnga ni sems rtse gcig pa ma yin zhing zag pa dang bcas pa yin la/phyin ci log kyang yin te/ zag pa rnams bskyed pa'i phyir zag pa dang bcas pa zhes bya'o/ /ngo bo nyid kyis yang dag pa ma yin te/ 'du shes la chags pas phyin ci log pa zhes bya'o zhes gsungs pa'i phyir ro/ /de nyid kyi phyir 'di rnams mya ngan las 'das pa'i rgyu ma yin la/sngar bstan pa ltar rgyun dang mi ldan pas 'khor ba yang ma yin no/ /yang bag chags kyi rgyu las byung ba'i phyir kun rdzob tu skad cig ma nyid yin te de la dgongs nas skad cig ma bden pa lta bur bstan pa'o/ /de lta na gang 'khor bar 'gyur snyam na kun gzhi rnam par shes pa nyid mi rtogs na 'khor ba'i rgyur 'gyur zhing /rtogs na mya ngan las 'das pa'i rgyur 'gyur ba ste/ 'di'i don ni sngar bstan zin to/ /stong pa nyid kyis g.yengs zhes pa ni mtshon pa tsam ste/ chad pa dang rtag pa'i mthar 'dzin pa'i blo can rnams kyis dbu ma'i don rang bzhin gyis rnam par dag pa'i de kho na nyid mi shes pa'o//gzhan yang lag na rdo rje de bzhin gshegs pa'i phyi bzhin du 'brang bar byis pa'i skye bo la sogs pa rnams kyis mthong ba ni sprul pa'i sangs rgyas nyid yin gyi ngo bo nyid kyi sangs rgyas ni ma yin te/ de ni de dag gis mthong ba'i yul la 'das pa'i phyir ro/ / sprul pa'i sangs rgyas kyi sku la de phyi bzhin du 'brang zhing bsrung bar bstan pa ni lag na rdo rjes 'dul ba'i sems can rjes su bzung ba'am/ de'i sngon gyi smon lam la sogs pa 'bras bu dang ldan pa nyid du ston pa'o/ /gal te de lta na ngo bo'i sangs rgyas gang gi spyod yul du 'gyur zhe na/ tshe 'di la zhes pa la sogs pa gsungs te/mthong ba'i chos la ting nge 'dzin gyi bde bar gnas pa dang / bden pa bzhi'i de kho na nyid mngon par rtogs pa sdug bsngal la chos shes pa'i bzod pa la sogs pa dang ldan pa sa dang po yan chod kyi byang chub sems dpas rtogs par byed pa ste//de yang longs spyod rdzogs pa'i sku'i dbang du byas pa'o/ /chos kyi sku'i ngo bo ni sa brgyad pa yan chod du spyi'i rnam pa'i tshul gyis yul du byed la/ ji lta ba bzhin du rtogs pa ni sangs rgyas nyag gcig go/ /chos shes pa'i bzod pas dang po'i gnas skabs yin par yang shes rab kyi pha rol tu phyin pa'i mdo dang bstan bcos dag las bshad de/rgyun du zhugs pa'i shes pa dang spong ba gang ji snyed pa de ni/ byang chub sems dpa' sems dpa' chen po mi skye ba'i chos la bzod pa thob pa'i bzod par 'dus te zhes pa la sogs pa gsungs pa dang / bzod pa de yang 'phags pa rnam par grol ba'i sde yis sdug bsngal la chos shes pa'i bzod par gsungs pas so//yang las kyi nyes pa gang ldan par bstan pa ni nges pa'i don du de ltar ma yin te/ sprul pa'i sangs rgyas ni gdul bya 'ba' zhig gi snang ba yin gyi/ de dag la yang de bzhin gshegs pa'i rang bzhin med la/don dam par de las gzhan na yang de bzhin gshegs pa med de/ de ltar na de ni sangs rgyas nyid min pas de las kyi nyes pa dang 'brel par snang yang sangs rgyas ni de ltar ma yin pa'o/ /sprul pa nyid las kyi nyes pa dang 'brel par bstan pa'i dgos pa yang byis pa'i skye bo rnams rnam par smin pa'i lus la skyo ba skyed pa ste/de bzhin gshegs pa la yang 'di 'dra ba'i sdug bsngal yod na/ gzhan rnams lta ci smos snyam du 'gyur ba'o/ /khyad par du lhung bzed bkrus te phyir 'byung ba nyid du bstan pa ni bsod nams chung ba'i nyan thos rnams kyi yi chad pa spang ba'i don du'o//tsan tsas skur pa btab pa bstan pa yang bsod nams chung zhing skur pa mang pa'i dge slong rnams kyi yi chad pa spang bar bya ba'i don du'o/ /lha sbyin dgrar 'gyur ba la sogs par bstan pa yang de bzhin gshegs pa'i che ba dbyung ba'i don du bstan pa ste/'di rnams kyi don zhib tu 'phags pa chos bcu pa'i rjes su 'brangs te rtogs par bya'o/ /rdza mkhan gyi dmigs pa la sogs pa ni de'i bzo rig pa dang / 'khor lo la sogs pa'i rkyen gyis snod sna tshogs 'byung bar snang ba bzhin du/ sprul pa'i sangs rgyas kyang gdul bya sna tshogs kyi don du bya ba sna tshogs ston cing /mtshan dang ldan par yang ston mod kyi nges pa'i don gyi gtam bdag gi 'phags pa so so rang gis rig par bya ba'i spyod yul sems kyi chos nyid de bzhin nyid ni mi ston te/ sprul pa'i gdul bya ni tha mal pa sna tshogs yin pas de ltar bstan pas 'dul bar mi 'gyur ba'i phyir ro//'di rnams kyi don zhib tu ni sngar bstan no/ /blo gros chen po zhes pa la sogs pas sprul pa'i gdul bya'i khyad par ston te/ rgyang pan pa la sogs pa 'ga' zhig rnam par shes pa drug las ma gtogs pa gzhan ni khas mi len la/ drug po rnams kyang 'chi ba'i dus na 'gags pas chad par lta ba ste/'jig rten snga phyi med ces pa la sogs pa'o/ /yang grangs can pa la sogs pas kun gzhi'i 'jug pa kun rdzob tu skad cig pa yin zhing / don dam stong pa nyid du ma rtogs pa'i phyir rtag pa'i dngos por lta ba'o/ /de la sogs pa lta ba sna tshogs pa'i gnyen por bshad pa sna tshogs pa ston par snang ba'o//blo gros chen po rang gi blo'i zhes pa la sogs pas 'khor ba thog ma dang tha ma med pa dang / mya ngan las 'das pa bstan pa mi 'gal ba nyid du ston te/ don zhib tu ni sngar bstan no/ /rang gi blo'i shes pa la sogs pas byis pa'i skye bos de'i thog ma dang bar ma dang tha ma shes par mi rung ba nyid du ston pa'o//thar pa de nyid bag chags kyis gzhi spangs pa'o/ /tshigs su bcad pa'i don ni gnas skabs dang mthar thug pa la sogs pa'i dbye ba la ma ltos par theg pa gsum dang / theg pa med pa dang / theg pa gcig nyid du nges par ston pa dang / mya ngan las 'das pa'i bye brag ma phye bar sangs rgyas la mya ngan las 'da' ba med ces pa dang / mya ngan las 'da'o zhes phyogs gcig tu nges par ston pa dang / dus dang rkyen gyi dbye ba ma byas par 'gro ba thams cad sangs rgyas nyid du lung ston pa dang /dgra bcom pa rnams nyon mongs pa'i bag chags la sogs pa'i nyes pa thams cad dang bral bar bshad pa dang / yang gsung rab dag las dus dang rkyen gyi dbye ba la ma ltos par dgra bcom pa dang / rang sangs rgyas rnams mngon par rtogs pa mthar thug pa'i ye shes thob par lung bstan pa dang /dgra bcom pa rnams kyis srid par skye ba len pa med par rtogs pa ste/ zag pa dang mi skye ba shes pa'i ye shes thob par bshad pa rnams ni zhum pa rnams kyang spro bar bya ba'i phyir zhes pa ste/ snga ma ltar rdzogs pa'i byang chub la sems zhum nas nyan thos kyi theg pas mya ngan las 'da' bar 'dod pa rnams spro bar bya ba dang /gzhan yang rdzogs pa'i byang chub thob par dka' ba nyid du ston pas/ thar pa la sems zhum pa rnams spro ba bskyed pa ste/ myur ba srid pa gsum gyis grol ba nyan thos kyi byang chub kyang yod do zhes spro ba bskyed pa la sogs pa'i don du dgongs te bshad pa'o//de dag gi dgongs don la sogs pa'i bye brag zhib tu ni sngar rgyas par bstan no/ /sangs rgyas dag gis zhes pa la sogs pas ni de la nyan thos sam byis pa'i skye bos btags pa ltar/ rnam par smin pa'i lus 'dor zhing 'grongs pa lta bu'i mya ngan las 'das pa med par ston te/sangs rgyas nyid kyis tshogs yongs su rdzogs par byas nas chos kyi sku'i ye shes rgyun dang ldan par skyed cing / ye shes de nyid kyis gzigs pa'i lam bshad cing / gdul bya rnams kyang mthar thug pa'i lam de nyid nas 'gro zhing /sangs rgyas nyid thob par 'gyur ba ste/ de'i phyir mya ngan las mi 'da' ste/ ji skad du/ ye shes 'chi med dam pa de las gzhan med thob/ /ces gsungs pa lta bu'o/ /gzhan yang tshig 'di rnams kyis mthar thug la theg pa gcig nyid yin pas gsum la sogs par bstan pa dgongs pa can nyid du yang ston no//yang 'dis sangs rgyas rnams mi gnas pa'i mya ngan las 'das pa chen po thob par bstan pas/ mya ngan las mi 'da' zhes mtha' gcig tu bstan pa yang dgongs pa can nyid du ston pa'o/ /yang sngar bstan pa'i bag chags bzhi po rnams gang yin pa dang /gang la brten pa la sogs pa ni srid pa zhes pa la sogs pa ste/ srid pa'i zag pa dang / 'dod pa'i zag pa dang / gzugs kyi zag pa dang / lta ba'i zag pa ste/ 'di rnams kyi don ni sngar bstan no/ /de rnams kyi bag chags rnam pa bzhi kun gzhi rnam par shes pa la yid kyi rnam par shes pas dngos por brtags pa'i dbang gis bsgos shing gzhag pa'o//yid la gnas zhes pa ni de dang 'brel pa'i tshul gyis so/ /yid kyi rnam par shes zhes pa la sogs pa ni shes par zad do/ /thog ma med pa ni kun gzhi'o/ /mya ngan las 'da' ba la mos pa ni nyan thos la sogs pa'i mya ngan las 'da' ba'am/phyi rol pas brtags pa'i thar pa la bden par 'dzin cing mngon par 'dod pa'o/ /'dod pa chen po rnams sangs rgyas nyid du bstan pa yang dus dang rkyen gyi bye brag la sogs pa la ma ltos par de ltar bstan pa ni dgongs pa can yin la/dus ring mo zhig na rang gi las kyi sa bon dang de bzhin gshegs pa'i byin gyi rlabs kyis de ltar 'gyur ba ni nges pa'i don yin pas sngar bstan pa dang mi 'gal lo/ /de la 'dir sangs rgyas nyid du nges par 'byung ba'i lam mdor bsdus na rnam pa gnyis yin pa las shes rab kyi pha rol tu phyin pa'i phyogs rgyas par bstan nas/da ni byams pa dang snying rje sngon du song ba'i byang chub mchog tu sems bskyed nas/ byang chub sems dpa'i spyod pa thabs la mkhas pa'i phyogs cung zad bsdus te ston pa ni/ de nas byang chub sems dpa' zhes pa la sogs pa ste/de yang sgrub pa dang / dgag pa'i spyod pa rnam pa gnyis las 'dir khyad par du sha'i zas la dga' ba'i srin po rnams rjes su gzung ba'i don du/ sha za ba'i nyes dmigs rgyas par bstan pa'i sgo nas snying rje can gyis de nyid dgag par bya ba nyid du ston pa'o/ /'di rnams dri ba gang gi lan du sbyar ba ni/tshigs su bcad pa rnams kyis zhus nas zhes pa ste/ sngar dri ba brgya rtsa brgyad kyi skabs su zhus nas zhes pa'o/ /chos kyi ro'i zas la mos pas zhes pa ni nang du ting nge 'dzin la mnyam par gzhag pa'i bde ba'i ro dang / rjes thob kyi gnas skabs na/ gzhan don sems dang de yi thabs rnyed dang //zhes pa la sogs pa theg pa chen po'i ro'i zas so/ /phan tshun du byams pa thob pa ni khyad par du sa dang po la sogs pa'i gnas skabs te/ chos dang sems can rnams dang ni/ /de yi bya ba sangs rgyas nyid/ /mchog la sems mnyam rnyed pa'i phyir//zhes gsungs pa'i phyir ro/ /sa rnams su sbyang bar byas zhes pa ni thabs dang shes rab kyis kun gzhi la yod pa'i lam gyi dri ma sbyangs nas myur du 'tshang rgya ba ste/ dman pa'i lam sngon du ma song ba'i byang chub sems dpa' rnams kyi dbang du byas pa'o/ /nyan thos dang rang sangs rgyas kyi sar ngal so ba ni dman pa'i lam sngon du song ba'i byang chub sems dpa'o//chos bshad par zhes pa ni bshad pa'i chos rnams las sha za ba'i nyes pa bshad du gsol zhes pa'o/ /mu stegs can rnams kyis kyang sha za ba bkag ste/ drang srong su ges smras pa/ khyod kyis phyugs ni sngon bsad de//khrag gi 'dam rdzab tu byas pas/ /gal te mtho ris 'gro 'gyur na/ /gang gis dmyal bar 'gro bar 'gyur/ /zhes bstan pa dang / gzhan yang drang srong bya sas smras pa/ gang gis gang gi sha za ba/ /de dag gnyis kyi khyad par ltos/ /gcig ni skad cig 'grangs par 'gyur//gcig ni gtan du srog dang 'bral/ /'chi'o snyom pa'i sdug bsngal gang / /skyes bu la ni skye 'gyur ba/ /rjes su dpag pa de yis ni/ /gzhan yang bsrung bar 'os pa'o/ /zhes pa la sogs pa rnam pa du ma smras pa'o/ /'jig rten gyi mgon po khyod kyis bstan pa zhes pa ni de yis bstan pa lam dang 'bras bu'i theg pa dmigs pa med pa'i thugs rjes ro gcig tu gyur pa'o//'tshal ba mi bzlog ces pa ni gzhan za ba'o/ /rgyu tshad med pa ni bza' bar mi 'os pa'i rgyu mtshan no/ /'di las zhes pa la sogs par thams cad pha dang ma la sogs par ma gyur pa med pas bza' bar mi 'os pa nyid du ston te/gnyen bshes ni chung ma la sogs pa'o/ /blo gros chen po spyod pa dang zhes pa la sogs pas ni mi gtsang ba la gtsang ba la sogs par 'khrul pa'i rgyu mtshan gyis mi bza' ba nyid du bstan pa'o/ /gzhan yang 'byung po rnams sdang bar byed pa dang /dam pa rnams kyis spangs pa dang / kha na ma tho ba spangs pa dang / bsams na dbang po dang mi 'phrod pa dang / dngos grub dang / thar pa'i gegs su 'gyur ba dang / 'khrig pa'i chags pa la sogs pa 'phel ba dang / 'jig rten skyong ba la sogs pa'i lha rnams kyis spong ba dang /mthong ba'i chos la nyes dmigs mang po dang 'brel pas bza' bar ma gnang zhing bkag ces pa'o/ /de las rig sngags 'chang ba rig sngags sgrub par 'dod pa ni bya ba'i rgyud la sogs pa'i rjes su 'brang ba/ rig sngags dang gzungs sngags la sogs pa sgrub par 'dod pa'o//ngas kha zas ni bu'i sha dang sman bzhin du bshad la zhes pa ni/ sha'i zas bu'i sha dang 'dra ba dang / de las gzhan dang drang srong gi zas 'o ma dang 'bras chan la sogs pa ni phan 'dogs pas sman dang 'dra ba ste/ de yang ro la chags pa'i 'du shes kyis ni mi bza' ste/skye ba 'di dang gzhan du phan pa'i 'du shes kyis bza' ba'o/ /hwags dang zhes pa ni 'bru mar skol ba las skyags so pa'o/ /khaN+Da ni ting krol du byas pa'o/ /blo gros chen po sngon 'das pa'i zhes pa la sogs pas gdul bya'i khyad par 'ga' zhig yid ches par bya ba'i don du sngon gyi gtam rgyud bstan pa'o//mi 'os par bstan pa ni bza' bar mi 'os pa bstan pa'o/ /de la dbang pos kyang zhes pa la sogs pa'i don ni lha'i dbang pos sngon khra'i gzugs su byas pas/ rgyal po zhi ldan gyi bsam pa brtag par bya ba'i don du phug ron gtses par gyur te/de rgyal po la skyabs su song ba dang / khra'i gzugs des smras pa/ 'di ni nga'i zas skal te/ 'di med na nga ni 'chi ba'i dus la bab po zhes rgyal po de gzir ba dang / rgyal pos 'di'i sha dang mnyam pa'i srang tshad la gcal te khyod la sbyin no zhes pa la sogs pa gsung rab kyi phyogs 'ga' zhig las gsungs pa bzhin no//srog gi rim gro'i phyir zhes pa ni seng ge mo dang ma 'grogs na de yis gsod par 'gyur bas de dang 'grogs pa'o/ /khyim bdun pa'i grogs zhes pa ni de bzhin gshegs pa'i bstan pa'i rjes su 'brang ba/ las dang po pa rnams kyis 'gro bar bya ba ma yin pa'i gnas shan pa'i khyim dang /chang tshong dang / smad 'tshong ma dang / bya pa dang / nya pa dang / rgyal po'i pho brang dang / de las gzhan rngon pa la sogs pa rigs ngan gyi khyim mam/ yang na log par lta ba'i mu stegs srog gi mchod sbyin la dga' ba'i khyim ste bdun po de dag yod pa'i grong khyer na/sha la shin tu brkam zhing / de las gzhan yang brten par mi 'os pa'i 'dod pa'i yon tan rnams brten na/ mi'i sha za ba'i phra men pha dang phra men ma ste/ gnod sbyin gyi rigs su gtogs pa'i 'gro ba'i khyad par ro//sha za ba'i nyes pa yang zhes pa la sogs pas ni re zhig za ba la sogs pa'i nyes pa yang de 'dra ba yin na/ rtag tu bsten cing bsnyen pa'i nyes pa chen por 'gyur ba dag lta smos kyang ci dgos zhes pa'o/ /blo gros chen po zhes pa la sogs pas mi bza' ba'i rgyu mtshan bsdus pa dang /gzhan dag za bar 'gyur ba'i rgyu mtshan ston te/ gsod par mi 'gyur zhes pa ni phal che ba la dgongs pa ste/ ngag gi rgyun 'og ma rnams kyis bstan pa'o/ /blo gros chen po gang nye bar bzung ste zhes bya ba ni rnam pa gsum dag pa'i sha gang zhig la dgongs te/ nyan thos rnams la gnang ba bdag nyid kyis srog ma bcad pa dang /gzhan gcod du ma bcug pa dang / ma bsams shing blo yis yul du ma byas par lhung bzed la sogs pa'i snod du/ sbyin bdag la sogs pas bskur pa ste/ de 'dra ba yang dngos sam brgyud pas sems can rnams la gnod par 'gyur bas rung ba ma yin zhes pa'o//shAkya'i sras kyi yin no zhes pa ni shAkya'i sras kyi dge sbyong yin no zhes khas len pa'o/ /rnam pa mang por rtog pa ni don 'byung ba'i gleng gzhi de dang de dag la brtags nas zhes pa dang sbyar te/ bslab pa bca' ba la sogs pa'i dgos pa ston par byed pa'i gtam rgyud de dag la brtags pa ste/de bzhin gshegs pas kun dga' bo la bslab pa phra mo bag yangs su byar yod kyis/ nga mya ngan las 'da' ba'i dus su khyod kyis nga la dris shig ces gsungs pas sha'i zas la sogs pa bslab pa phra mo rnams ni bcom ldan 'das kyis gnang ngo zhes smra'o//sha za ba'i gtan tshigs su snang ba zhes pa yang don 'di nyid dang sbyar bar bya'o/ /yang na don 'byung ba zhes pa de dag gi mngon par 'dod pa'i don nyid la sbyar bar bya'o/ /gzhan yang de bzhin gshegs pas gnang zhing rung ba yin na sha thams cad za ba gcad par mi bya ba nyid du 'gyur ba las/de ltar byas pa'i phyir mi rung zhes pa'o/ /de ltar na cung zad gnang ba yang med dam snyam du dogs na/ bden pa bzhi'i chos kyi 'khor lo nas/ rig pa 'dzin pa'i sde snod kyi bar gyi bstan pa brjod pa de dang de dag las/ so sor thar pa dang / byang chub sems dpa' dang / rig pa 'dzin pa'i bslab pa'i gzhi mas rim gyis bca' ba skas kyi gdang bu bre ba'i tshul du rnam pa gsum bcas nas don chen po dang ldan pa gong ma rnams mi nyams par bya ba'i don du nyan thos rnams la gnang ba byas pa'i rnam gsum dag pa'i sha la sogs pa yang theg pa gong ma rnams su bkag ste/de'i phyir rang bzhin gyis shi ba bcu'i sha ni mi bkag mod kyi/'dir srin po la sogs pa rjes su gzung ba'am/ dngos sam brgyud pas sems can la gnod pa thag bsring bar bya ba'i don du srog chags thams cad kyi sha thams cad dus sam gnas skabs thams cad du kun dga' yang bza' ba'i thabs med par ril gyis bkag pa'o//de la rang bzhin gyis shi ba bcu ni nyan thos sam/ byang chub sems dpa' la sogs pa 'ga' zhig za ba'i dbang gis shi ba ma yin pa/ sems can rnams kyi srog yun ring du gnas pa'i 'gal ba'i rkyen phyi dang nang gis bsdus pa ste/ de la phyi'i dbang du byas na sems can dang /sems can ma yin pa'i gnod pa rnam pa gnyis so/ /sems can ma yin pa yang sa la sogs pa'i 'byung ba bzhir snang bas srog la gnod pa ste/ de ltar na phyi rol gyi 'gal rkyen rnam pa lnga'o/ /nang gi dbang du byas na rlung las gyur pa dang / mkhris pa las gyur pa dang //bad kan las gyur pa dang / 'dus pa las gyur pa'i nad rnams te/ de ltar 'gal rkyen rnam pa bzhi dang / tshe zad nas 'chi ba ste mthun rkyen ma tshang ba'o/ /de ltar na nang gi dbang du byas pa rnam pa lnga ste/ thams cad bsdoms pas bcu ru 'gyur ba'o/ /de yang ji ltar mi rnams mi'i sha mi za yang 'chi ba'i rkyen rnam pa bcu po de rnams kyis mi rnams 'chi ba bzhin no//rnam pa gsum dag pa dang / rig pa 'dzin pa'i sde snod las na dang ga ha dang po la sogs pa bza' bar bshad pa yang 'di rnams kyi nang du 'dus par zad do/ /nges pa'i don de ni de ltar yin mod kyi/'dir ni sha'i zas za ba tsam la brten nas sems can la gnod par 'gyur ba srid pa dang / snga ma ltar srin po la sogs pa rjes su gzung ba'i don du thams cad bkag pa'o/ /chos kyi zas za ste zang zing gi zas ma yin zhes pa ting nge 'dzin gyi bde ba thob pa rnams kyi dbang du byas pa'o//thams cad mkhyen pa thams cad gzigs pa zhes pa ni mkhyen kyang thugs mngon du mi gtod pas mi gzigs pa dag kyang srid pas de lta bu ma yin te/ sems can thams cad la gzigs pa'o/ /tshigs su bcad pa rnams kyis ni don snga ma las lhag pa yang ston pas zhu ba lhag tu byas pa'o//'bru mar gyis kyang byug pa yang / /zhes pa la sogs pa'i don ni des lus rgyags par 'gyur ba'am/ long 'chos nyid du 'gyur bas so/ /gzhan yang shing la sogs pa las byas pa'i khri dra mig tu byas pa rnams kyi steng du nyal bar mi bya ste/ dra mig de dag na gnas pa'i srog chags phra mo rnams de'i bsgul bskyod dang skad kyis 'jigs par 'gyur ba'i phyir ro//dregs pa ni nga rgyal dang rgyags pa'i cha ru gtogs pa'o/ /rtog pa ni mdor phan 'dogs pa'am sdug pa'i mtshan mar 'dzin pa'o/ /'dod chags kyis ni sems rmongs byed/ /ces pa la sogs pa'i don ni/'dod pas ldongs la khrel med ngo tsha med/ /ces pa la sogs pa'am/ gzhan yang / 'dod pas yongs su bslus pa dag /rgya mtsho'i chu nang 'jug par byed/ /mtshon cha thibs por 'bab pa yi/ /g.yul du yang dag 'jug par byed/ /ces pa la sogs pa gsungs pa ste/ blang bya dang dor bya'i bye brag la rmongs pas zag pa dang bcas pa'i phung po 'du bar rab tu 'gyur te/ de lta bur skye ba len cing grol bar mi 'gyur ba'o/ /de dag gnyis ka zhes pa ni bsad nas 'tshong ba dang / nyo ba gnyis ka'o 'jig rten gnyis zhes pa yang de dag dang sbyar ro/ / yod med pas zhes pa ni spyir sha za ba'i nyes pas dngos su ma bskul yang / brgyud nas bskul bar 'gyur bas so/ /de la/ nga dang sangs rgyas dag gis bshad/ /ces pa gsung rab kyi phyogs gang las bshad snyam nas/ glang po'i rtsal dang sprin chen dang / /zhes pa la sogs pa'o//mthong dang thos dang zhes pa la sogs pa ni de 'dra ba'i nyes pa mthong ba dang thos pa la sogs pa'o/ /'dod chags thar pa la bar chad byed ces pa ni khyad par du 'khrig pa'i 'dod chags te/ bud med chags pas yid bcings pa/ /phyi nas me yis sreg par byed/ /ces gsungs pa'i phyir ro//sha dang chang la sogs pa la chags shing bsten pa yang de dang mtshungs par 'gyur ba'o/ /ran pa dang ni mi 'phrod par/ /zhes pa la sngar bstan pa ltar sman dang 'dra ba drang srong gi zas rnams kyang ran pa tsam du bza' zhing / sha'i zas la ni mi 'phrod pa'i 'du shes kyis spang bar bya'o//wa la sogs dang 'grogs bya bas/ /zhes pa ni de de dag tu skye zhing de'i rigs dang 'grogs pa'o/ /'di ni 'phags pa'i rgyal mtshan no/ /zhes pa ni tshul khrims kyis brgyan cing / pha rol bdud las rgyal ba'i mtshan ma'o/ /'phags pa lang kar gshegs pa'i 'grel pa de bzhin gshegs pa'i snying po'i rgyan las le'u bdun pa'i 'grel pa rdzogs so// //de nas zhes bya ba la sogs pas byang chub sems dpa' thabs dang shes rab zung du 'jug pa'i lam gyis sangs rgyas nyid du nges par 'gyur ba la/ bar chad 'byung ba bzlog par bya ba'i don du nus pa dang ldan pa'i sngags ston te/de yang man+tA ces pa'i don ni yid can skyob par byed pa dang / de kho na nyid kyi rtogs pa srung bar byed pa dang bsgrub bya 'gugs par byed pas sngags zhes bya ste/ lam gyi yan lag nyid du 'gyur ba'o/ /'dir bdud kyi byed pa yang sa bdun pa man chod du byang chub sems dpa' rnams mngon par rtogs pa myur du 'jug pa la gegs byed pa dag srid de/ji skad du/ sa bdun pa man chod du bdud dam bdud kyi las kyang rig par bya'o zhes gsungs pa'i phyir ro/ /de la skabs mi rnyed ces pa ni nyes pa'i go skabs mi rnyed pa'o/ /nam mkha' lding ni dud 'gro'i rigs su gtogs pa nam mkha' la spyod cing klu rnams zas su za ba ste/yang dag dbyangs la sogs pa shes rab kyi pha rol tu phyin pa'i 'grel pa las slob dpon klu sgrub kyis ji skad du gsungs pa lta bu'o/ /'byung po ni byang shar gyi mtshams na gnas pa'i 'byung po dbang ldan no//lha ma yin ni lha'i 'gro bar gtogs pa gdug rtsub dang g.yo sgyu shas che bas 'di dag ni lha ma yin zhes tha snyad du byed pa ste/ ji ltar ngan pa'i las byed pa'i mi rnams la/ 'di ni mi ma yin no zhes zer ba lta bu ste/ sgra gcan 'dzin dang / mgul phreng dang /rab rgod la sogs pa'o/ /grul bum la sogs pa ni phal cher yi dags kyi 'gro bar gtogs pa las kyi dbang gis dman pa'i yi dags rnams las khyad par du mthu dang rdzu 'phrul du ldan pa/ gzhan la gnod pa'i bsam pa dang rjes su 'brel pa'o/ /de la grul bum ni 'bras bu che ba ste bum pa'i tshad tsam dang ldan pa'o//sha za ba ni rdul khrod dam chab khung gi gnas na gnas pa sha'i zas la dga' ba'o/ /gnon po ni mi rnams kyi gzi brjid dam yid 'grib pa dang gnod par byed pa'o/ /brjed byed ni dran pa 'phrog par byed pa'o/ /mdangs 'phrogs pa ni khrag dang khu ba 'dren par byed pas gzi mdangs la gnod pa'o//lus srul po ni lus mi 'dra ba du ma bzung zhing gzhan la gnod par zhugs pa'o/ /gzhan ni sngar bshad zin to/ /gzhan yang sngags kyi tshig 'di rnams de bzhin gshegs pa chos kyi mnga' bdag chen por gyur pas/ sngar bstan pa'i mdo'i brjod bya'i don zab mo ston pa'i tshig tu yang byin gyis brlabs shing brdar byas pa dang /byang chub sems dpa' rnams rjes su 'dzin pas/ 'di dag klog par byed pa de yis lang kar gshegs pa'i mdo thams cad bklags par 'gyur ba'o/ /khyad par du yang sngags kyi tshig 'di dag ni bcom ldan 'das kyis srin po rnam par bzlog pa'i phyir gsungs zhes pa ste/'bod 'grogs kyi 'khor de rnams la chos bshad pa'i skal ba dang ldan pa rnams ni rjes su 'dzin la/ de las gzhan pa ma rungs pa'i sems dang ldan pa rnams ni re zhig tshar gcad pa la sogs pa byed pa'o//de ltar na 'di ni sha la dga' ba'i srin po rnams rjes su 'dzin cing tshar gcod pas le'u snga ma nyid kyi yan lag tu sbyar bar bya'o// //de ltar dris pa dang lan dag gi sgo nas brjod par bya ba'i de kho na nyid rgyas par bstan nas/ da ni dri ba'i don sngar bstan pa rnams bstan par bya ba dang /bstan pa rnams tshigs su bcad pa'i sgo nas bsdus te bde blag tu rtogs par bya ba'i phyir 'khor gyi gtso bos sngar bstan pa'i tshigs su bcad pas slar yang bstod cing / don gyis zhus pa ni/ de nas bcom ldan 'das zhes pa'o/ /'dir dgos pa lhag pa dang ldan pa dang / zhu ba po de bzhin gshegs pa la dad pa khyad par can skyes shing /de'i yon tan gyi khyad par rnams snga ma de dag tsam du 'dus so zhes bstan par bya ba'i phyir/ tshig snga ma de dag nyid bkod pas zlos pa'i nyes par 'gyur ba ni ma yin no/ /sems slu ba'i smig rgyu ba zhes pa la sogs pas rnam par shes pa 'jug pa'i tshul dang /chos rnams kyi dbu ma'i don gsal bar ston te/ 'di rnams kyi don ni sngar bstan zin to/ /rtag tu bag chags dag gis bskyed/ /ces bya ba la sogs pa'i don ni kun gzhi la bsgos pa'i bag chags dag gis 'jug pa'i rnam par shes pa sna tshogs su snang ba skyed la/bag chags kyang thog ma med pa'i dus nas goms pas rtsa ba zug cing / de'i rten kun gzhi yang rgyun dang ldan pas bstan pa'o/ /rnam par shes pa'i tshogs de dag kyang bag chags kyi stobs kyis spyod yul sna tshogs su 'khyam zhing g.yo ba ste/ khab len gyis lcags g.yo ba bzhin no//kun gzhi de yang sems can thams cad la gnas shing / de bzhin gshegs pa'i rigs kyi sa ste de'i snying po rtog dang brtag par bya ba las 'das pa'o/ /shes dang shes bya rnams spangs shing / /zhes pa la sogs pas de rnams gnas gyur nas 'bras bu thob pa'i tshul ston te/sa bcu las ni rnam byung ba/ /zhes pa la sogs pa'i don ni sa bcu'i ye shes goms pa las byung ba sgyu ma lta bu'i ting nge 'dzin dang / phyin ci log spangs pa'i sems kyi chos nyid spros pa dang bral zhing 'od gsal ba la 'dris shing goms par bya ste/ de las rang dang gzhan gyi don phun sum tshogs pa 'byung ba'o//lhun gyis grub ces bya ba la sogs pas ni mdzad pa lhun gyis grub cing rgyun mi 'chad par gzhan gyi don byed pa ste/ 'di rnams thams cad kyi tshig gi don ni phal cher sngar bstan zin to/ /rnam par rtog las gud na ni/ /zhes bya ba la sogs pas ni chos rnams kyi de kho na nyid mtha' gnyis dang bral ba dbu ma'i don la/byis pa'i skye bo phyin ci log pa nyid du ston te/ phyogs bslad ces bya ba ni bden pa dang / brdzun pa'i phyogs 'khrugs shing log par 'dzin pa'o/ /yang na yod pa dang med pa la sogs pa'i phyogs su 'dzin pa'i bag chags kyis sems kyi rgyud bslad pa rnams yod pa dang med pa la sogs pa'i mtha' gnyis su 'dzin par byed pa'o//gal te yod pa dang med pa'i phyogs sangs rgyas nyid kyis bstan pa ma yin nam zhe na/ rang bzhin med ces pa la sogs pa gsungs te/ bden pa gnyis kyi dbye ba la ma brten par med pa dang yod pa'i phyogs bstan pa ni dgongs pa can yin gyi nges pa'i don ma yin zhes pa'o//rkyen ni rten cing 'brel par 'byung ba'o/ /srid pa dang mi srid pa'i stong pa la sogs pa yang sngar bstan zin to/ /thams cad mkhyen pa dang zhes pa la sogs pas ni chos thams cad kyi dbu ma'i don de bzhin nyid la thams cad grub pa med pas de kho na nyid du thams cad mkhyen pa grub pa med mod kyi/byis pa'i skye bo rnams ni thams cad mkhyen pa 'jig rten gyi ston pa sangs rgyas ni 'di'o zhes mtshan dang dpe byad la sogs pa'i rnam pa bden pa nyid du phyin ci log pa'o//brtags pa 'di ni ming tsam ste/ /zhes pa la sogs pas brtags pa dang gzhan gyi dbang gi chos nyid bstan pa'o/ /nam mkha'i me tog ces pa la sogs pas phyin ci log ldog par 'gyur ba'i tshul dang / de log pa nyid mya ngan las 'das par ston pa'o/ /stong pa ngo bo nyid med pa//zhes pa la sogs pas ni chos rnams kyi de kho na nyid dang / de nyid rtogs pa'i phan yon ston pa'o/ /de la rtog ge'i mtshan ma rig pa'i mtshan mar 'dzin pa'i tshad ma dang / gzhal bya la sogs pa'i spros pa dang bral ba de nyid 'phags pa lha'i spyod yul te rnam par dag pa'i lha sangs rgyas dang /byang chub sems dpa' rnams kyi spyod yul yongs su grub pa'i mtshan nyid de/ kun brtags pa dang / gzhan gyi dbang gi rang bzhin gnyis spangs pa'o/ /de la/ rnam rig gang yang med pa las/ /zhes bya ba la sogs pas ni de kho na nyid mthong ba dpe'i sgo nas rgyas par ston pa ste/srog dang rtsol ba bsdams pa la sogs pa'i dbang gis mun khung du srin bu me khyer la sogs pa'i rnam par snang ba med kyang myos pa'i dbang gis sna tshogs su snang zhes pa'o/ /rkyen rnams yod dang med pa las/ /zhes bya ba la sogs pas ni ngo bo nyid med par bsgrub pa'i gtan tshigs la sogs pa ston pa'o//lus kyi mthar 'gro ba dang / 'jig rten gtso dang zhes pa ni go rims bzhin du ngan 'gro'i lus dang / mtho ris khyad par can no/ /de dag la sogs pa byed pa po dang las sna tshogs su brtags pa ni rmi lam la sogs pa'i dpe dang mtshungs pa'o//sems 'di zhes bya ba la sogs pas ni kun rdzob tu khams gsum du snang ba sems kyi rnam par 'phrul pa nyid du ston pa'o/ /'di dang pha rol zhes pa ni skye ba 'di dang pha rol te/ sems las tha dad pa'i 'jig rten med pa'i phyir de ltar mi rtag ces pa'o/ /mi gtsang gnas kyi tha mar phyin par 'gyur//zhes pa ni 'khor ba'i tha ma mya ngan las 'das pa nyid du 'gyur ba'o/ /de nyid kyang gang zhe na/ lha'i pho brang 'og min pa'o/ /zhes pa la sogs pa gsungs te/ skye ba'i lha'am/ skye ba rnam par dag pa'i lha ste longs spyod rdzogs pa'i sangs rgyas so/ /gnas de 'am de na gnas pa rnams sdig pa thams cad spangs shing bsod nams 'ba' zhig gi snang bar gyur pa'o//rdzogs pa'i sangs rgyas ni longs spyod rdzogs pa'i 'o/ /'di zhes pa ni rdo rje'i gdan byang chub kyi snying po'i shing gi drung 'dir dus phyis 'tshang rgya ba'i tshul ston pa ste/ don 'di nyid gsung rab kyi phyogs gzhan dag las kyang rgyas par gsungs so//de la sogs pa'i sprul pa dpag tu med pa yang longs spyod rdzogs pa'i sku de nyid las 'byung bar 'gyur ba'o/ /sna tshogs med las sna tshogs 'byung / /zhes pa ni phyi rol gyi ngo bor gyur pa'i sku dang gsung sna tshogs med kyang gdul bya'i snang ba la sna tshogs byung ba'o//de la byis pa'i skye bo rnams ni rnam par rig pa'i rigs su gtogs pa phyin ci log gi rtog pas bsgribs nas phyi rol gyi ngo bor rtogs shing sangs rgyas kyi rang bzhin mi shes pa'o/ /gzhan yang lus can kun la gnas pa'i de bzhin gshegs pa'i snying po yang de 'dra ba'i rtog pas g.yogs nas mi mthong ba'o//gal te de lta na da 'dra ba'i rtog pa rgyun mi 'chad pas mya ngan las 'das pa mi 'thad do zhe na/ sgyu ma nor pa yod mod kyi/ /sgyu ma nor ba'i sgyu ma yin/ /zhes gsungs te/ phyin ci log gi rtog pa sgyu ma lta bu de ni rtog pa phyi ma skyed pa'i rgyu ma tshang ba med pa'am/nus pa thogs pa med pa ma yin te/ de dag gnyen pos gzhom par nus pa'o/ /'jig rten dag na zhes pa'i don ni sems slu ba'i sa bon cung zad kun rdzob tu yod pa de ni brtags pa la rtog pa ste/ de 'dra ba'i rang bzhin gnyis kyis kun gzhi la sa bon bsgos nas/de las phyin ci log sna tshogs su sprul zhing skyed pa'o/ /gzhan yang rnam par rig pa tsam gyi rang bzhin myong bas grub pas dngos po rtog cing rig pa de nyid dang / phung po la sogs par snang ba la 'jig rten pa rnams kyis gang zag dang chos su brtags shing goms par byed pa ni phyin ci log yin no zhes rtogs shing goms pas phyin ci log gnas shin tu gyur pa na nga'i sras yon tan thams cad mngon par rdzogs pa yin zhes pa'o//drod dang zhes pas byis pa rnams kyis phyin ci log dang / de nyid 'jug pa'i rgyu ston to/ /de la/ 'khor bar mi bya mya ngan 'das mi bya//zhes pa ni shes rab kyis srid pa la mi gnas shing / snying rjes zhi ba la mi gnas pa'o/ /sna tshogs sa bon zhes pa la sogs pas ni kun gzhi rnam par shes pa'i dba' rlabs nyid spyod yul sna tshogs su snang ba ste/ de la gzung ba dang 'dzin pa gnyis su mngon par chags pa'i byis pa rnams ni skye ba la sogs par rtog pa'o//rtog pas grub pa ma yin no/ /zhes pa ni rtog pas nor pa phyin ci log tu brtags kyang bden par ma grub pa'o/ /nam zhig lus la mi gnas na/ /zhes pa la sogs pa'i don ni sdug bsngal gyi rten du gyur pa'i phung po la mngon par mi zhen cing / de 'dra ba spangs par gyur pa na nga'i spyod yul ma yin te/ theg pa sna tshogs bstan pa'i gdul bya ma yin zhing / nges pa'i don 'ba' zhig bstan par bya ba'o/ /ji ltar rgyal po zhes pas ni theg pa sna tshogs ston pa'i rgyu mtshan dpe'i sgo nas ston pa'o/ /de'i don kyang ri dgas kyi gzugs 'dra ba'i rtsed mo'i bye brag sna tshogs kyis bu rnams brid cing khyim du rtser 'jug pa ste/phyi rol gyi 'tshe ba la sogs pas 'jigs pa'i phyir ro/ /de nas de dag cher skyes pa dang khyim gyi phyi rol du khrid nas nags kyi ri dgas dngos dang phrad par byed pa ltar/ theg pa sna tshogs kyis brid nas mthar thug pa la so so rang rig pa'i don phyin ci ma log pa nyid ston pa ste/sngar rgyas par bshad zin to/ /ji ltar zhes pa la sogs pas kun gzhi'i 'jug pa nyid rgyas par ston par ste/ tshig gi don ni sngar bstan zin to/ /phung po la ni bdag med de/ /zhes pa la sogs pas bdag med pa'i don bsdus te bstan pa'o//shes rab kyis ni yod ma yin/ /zhes pas ni shes rab kyis rnam par phye ba'i tshe na med pa'o/ /rkyen dang gtan tshigs dpe rnams dang / /zhes pa'i don ni skye ba rnam bzhi dang bral ba la sogs pa'i gtan tshigs dang / rmi lam la sogs pa'i dpe dang / dam bca' ba ste/ de ltar yan lag gsum la brten nas rkyen dang rgyu rnams kyis skye ba de ni ngas bzlog go zhes tshig rnam par sbyar bar bya'o/ /gal te dam bca' ba'i tshig ni bsgrub bya rtogs pa'i yan lag tu ji ltar 'gyur zhe na/ de las gtan tshigs la sogs pa'i tshig 'jug pas bsgrub bya rtogs pa'i yan lag tsam du 'gyur ba'o//nyi zla'i 'od dang myu gu la sogs pa'i dpe'i don ni nyi zla la sogs pa'i 'od la myu gu dang skyes bu la sogs pa'i grib ma snang ba na/ de 'dra ba'i grib ma ni grib ma 'jog mkhan gyi skyes bu la sogs pa'i las skye bar snang yang thogs pa dang bcas shing rdzas su grub pa'i gzugs skye ba med pa'o//'jig rten gsum la mi gnas pa ni de ltar snang ba yang bden pa'i rang bzhin la brten cing gnas pa ma yin pa'o/ /mi skye bzod pas ni sa dang po nas so/ /phyi rol snang ba'i gzugs can gyi zhes bya ba la sogs pas ni kun rdzob tu rnam par shes pa tsam gyi tshul rgyas par ston te/gzugs can gyi ngo bo phyi rol tu snang ba ni sems nyid yin pas sems la sems nyid rang snang ba ste/ rang rig pa 'ba' zhig pa'o/ /'brel pa ni phyi'i rten 'brel lo/ /shin tu bslabs pas rnam rig gis/ /'gro ba sna tshogs byin gyis rlob/ / ces pa ni rnam rig tsam gyi tshul la goms par byas pas goms pa mthar thug ste/ thams cad sems kyi snang bar shes pa na/ ji ltar 'dod pa bzhin du sprul par byed pa'o/ /gzhan yang lus la sogs pa'i gzung ba 'dzin cing rnam par rig pa ni gsum ste/ de la yid ni rnam par rtog pa med pa'i yid do//'dzin pa'i rnam rig ni sgo lnga dang kun gzhi rnam par shes pa'o/ /rnam par rtog pa ni yid kyi rnam par shes pa'i khyad par ro/ /mtshan med gnas shing ngal yang so/ /zhes pa ni cung zad tsam ting nge 'dzin gyi bde ba la gnas shing / srid pa'i sdug bsngal las ngal so ba'o//bya gag snag tshas bskus pa la/ /zhes bya ba la sogs pa ni theg pa gsum rnam par gzhag pa yang dgongs pa can nyid du ston pa'o/ /chos dang gang zag 'phos pa'i phyir/ /zhes pa la sogs pas ni de ltar 'dzin pa'i phyin ci log gnas gyur pa ni de bzhin nyid kyi ye shes te nyi ma la sogs pa las 'od 'byung ba dang /nor bu rin po che las dgos 'dod 'byung ba bzhin du/ rnam par rtog pa med kyang 'gro ba'i don sna tshogs 'byung ba'o/ /ji ltar rab rib can dag gis/ /zhes pa la sogs pas log par 'dzin pa'i rgyu mtshan dpe'i sgo nas ston te/ de la ji ltar 'ga' zhig gis d+ha du ra'i 'bras bu zos pas myos shing 'khrug pa na/sa dang 'gro ba la sogs pa gser du snang ba bzhin zhes pa'o/ /sa bon gcig dang zhes pa la sogs pas phyin ci log tu snang ba'i bag chags kyi dbye ba ston te/ de la sa bon gcig pa ni sems kyi chos nyid rtogs shing goms pa mthar thug pas/bsgom pas spang bar bya ba'i nyon mongs pa chung ngu'i chung ngu yang rnam par dag pa ste/ rdo rje lta bu'i ting nge 'dzin gyi gnas skabs na gnas ngan len gyi lhag ma tsam lus pa ni sa bon gcig pa'o/ /de nyid kyang spangs shing kun gzhi zag pa dang bcas pa'i sa bon gnas gyur pa me long lta bu'i ye shes mngon du byas pa ni sa bon med pa'o//de nyid kyi tshe spros pa thams cad dang bral zhing mi rtogs pas sa bon thams cad mnyam pa'o/ /yang byis pa'i skye bo la sogs pa'i gnas skabs na zag pa dang bcas pa'i sa bon shas che bas tshe rabs 'dres pa ste/srid par skye ba len pa'o/ /gzhan yang byis pa'i skye bo zag pa dang bcas pa'i sa bon 'ba' zhig kun gzhi la 'debs pas na/ de ni sa bon thams cad pa zhes pa'o/ /yang 'di rnams kyi don ni zag pa dang bcas pa'i sa bon rnam par dag pa'i dus na zag pa med pa'i sa bon 'ba' zhig pa ni sa bon gcig pa yin la/yang shin tu gyur pa chos kyi sku spros pa thams cad dang bral ba'i tshe na sa bon med cing mnyam pa'o/ /zag pa med pa'i sa bon shas che zhing zag pa dang bcas pa'i sa bon cung zad yod pa'i tshe na byang chub sems dpa' rnams sems can gyi don du srid par skye ba len pas tshe rabs 'dres pa'o//dngos po'i rang bzhin shes 'dod la/ /nor pa dag ni mi rtogs so/ /zhes pa ni rtog ge pa dag mngon pa'i nga rgyal gyis dngos po'i rang bzhin rtogs par 'dod kyang de ltar ma rtogs shing / rang gi blo nor pa nyid kyang mi rtogs zhes pa'o/ /sgyu ma med pa dang zhes pa la sogs pas ni rig pa sgyu ma lta bu'i rang bzhin du ston te/de yang don dam par dngos po med par snang ba yin pa dang / kun rdzob tu glog ltar mi rtag pas sgyu ma zhes pa'o/ /de nyid kyi phyir skye 'jig tu snang ba tsam ni bzlog par bya ba ma yin zhing / bden pa'i dngos por brtag pa nyid bzlog par bya ba'o//rang bzhin med cing zhes pa la sogs pas ni rnam par rig pa'i de kho na nyid rtogs pa'i phan yon ston te/ de tshe ris su gtogs pa'i lus/ /bya ba'i 'du byed spangs pa ste/ /zhes pas ni chos kyi sku'i ris su gtogs pa'i ye shes kyi lus 'dus ma byas pa mngon du byas pa'o//thams cad gzugs su snang ba ni ji ltar mos pa'i sku sna tshogs su ston pa'o/ /nor sems thog ma med pa zhes pa la sogs pas ni ye shes kyi lus thob pa de'i tshe rnal 'byor can gyis rnam par shes pa'i chos nyid rtogs pas 'gro ba sna tshogs su snang ba med pa'i ting nge 'dzin thob cing /thog ma med pa nas bsags pa'i nor pa'i sems bzlog pa'o/ /sgyu ma dri za'i grong khyer dang / /zhes pa la sogs pas ni phyin ci log 'byung ba dang ldog pa'i tshul bsdus te bstan pa'o/ /rnam pa sna tshogs dmigs pa'i sems/ /zhes pa la sogs pas ni byis pa dang //'phags pa rnams kyi sems dang mngon par rtogs pa 'jug pa'i tshul ston te/ kun rdzob tu sems yul sna tshogs la 'jug pa bzhin du sems kyi chos nyid nam mkha' ltar stong pa nyid kyang rtsig pa la sogs pa'i chos rnams la ci'i phyir mi 'jug ste/ chos kyi dbyings las ma gtogs pa//'di ltar chos yod ma yin no/ /zhes gsungs pa'i phyir ro/ /gal te phyi rol gyi mtshan ma 'ga' zhig la dmigs nas sems 'jug par 'gyur na/ sems tsam nyid du mi 'thad pa'o/ /de'i phyir sems kyis sems nyid la 'dzin gyi phyi rol gyi dmigs pa'i rgyu ni gang yang med pa'o//yang don dam par sems kyi chos nyid rang bzhin gyis rnam par dag pa'i stong pa nyid yin pas bag chags la sogs pas gos pa med pa'o/ /yid ni gnyis kar rgyu ba ste/ /zhes pas ni nyon mongs pa can gyi yid ni lung du ma bstan pa yin la/ yid kyi rnam par shes pa ni dge mi dger yang 'gyur ba'o//lus dang zhes pa la sogs pa'i tshig bzlas te gsungs pa ni gzhan yang de bzhin gshegs pas glo bur du lhags pa'i gdul bya rnams kyi don du sngar bstan pa nyid bzlas te gsungs la sdud pa pos kyang de bzhin du bsdus pas zlos pa'i skyon du 'gyur ba ma yin no/ /mdo'i skabs gzhan du yang de bzhin du shes par bya'o//'dir mngon par rtogs pa bstan pa'i don du yin pas zlos pa'i nyes par 'gyur ba med pa'o/ /de las gzhan yang sgyu ma'i dpe la sogs pas zab mo'i don rnam grangs du mar bstan pa yang skabs su bab pa'i khyad par de dang de dag la the tshom bsal ba la sogs pa'i don du yin pas zlos par 'gyur ba ma yin no//zhing du 'pho dang zhes pa la sogs pas ni/ snang ba med la rim ci yod/ /ces pas don 'chad de/ stug po bkod pa'i zhing du 'pho ba'i tshul bstan cing sangs rgyas pa'i rtogs pa ste/ mnyam par gzhag pa'i ye shes dang / sa brgyad pa yan chad kyi snang ba med pa'i ye shes kyi don dus gsum gyis bsdus pa'i sa'i rim pa med de/ de yang sems tsam du dmigs pa las 'das nas snang ba med pa'i ting nge 'dzin la gnas pa'i 'bras bu ste/ sangs rgyas nyid kyi rtogs pa'o/ /rnam pa sna tshogs zhes pa la sogs pa kun rdzob tu yod pa dang /med par snang ba byis pa'i shes pa 'jug pa'i tshul bstan pa'o/ /nam zhig rnam par mi rtog pa'i ye shes kyi don dngos por ma grub cing / gzugs la sogs par dmigs pa med pa de'i phyir rnam par rtog pa'i rgyun ldog pa'o/ /byis pa rnams ni 'dus byas la/ / zhes pa la sogs pas ni skad cig ma'i don bstan pa'o/ /yod dang med las zhes pa la sogs pas phyi rol pa'i lugs dgag pa bstan pa'o/ /kun rdzob tu ni zhes pa la sogs pas rnam par phye ste lung bstan pa'i khyad par ro/ /de'i don yang yod med kyi mtha' gnyis spangs pa zung du 'jug pa'i don nyid de kho na nyid kyi don yin la/de las gzhan du rang bzhin rnam par bkag pa tsam la/ dam pa'i don du 'dod na ni/ dmigs pa rang bzhin med pa ste/ snang la rang bzhin med pa'i sgyu ma lta bu nyid kun rdzob tu bstan pa yin na/ 'di ni mi 'thad pa nyid sngar rgyas par bstan no/ /dngos po brjod pa'i rgyus byung ba zhes pa la sogs pas ni brtsad pa spang ba nyid gsal bar ston te/chos thams cad dngos por med do zhes dam bca' ba brjod pa'i tshig dang / de las gtan tshigs kyi tshig 'jug pa dang / de las don gyi rtogs pas skyes pa'i dngos po brjod pa'am brjod pa'i rgyu las byung ba rnams gal te rang bzhin yod par 'dod na ni/de yang chos thams cad kyi nang du 'dus pas thams cad dngos po la med ces bya ba nyams par 'gyur ba'o/ /'dir brjod pa dag las byung ba'i dngos po ni brjod pa'i stobs kyis skye bar 'dod pa gtan tshigs kyi tshig dang / de las don rtogs pa'i dngos po yin la/de yang dngos po thams cad kyi nang du 'dus pas med par bstan pa ni/ de dag rang bzhin yod par khas blangs pa nyams pa ste/ med ces pa'i tshig tha mas bstan to/ /gal te de dag rang bzhin yod par khas mi len na ni/ thams cad med ces dam bca' ba'i tshig brjod pa don med par 'gyur ba'o//lan gyi don ni de 'dra ba'i brjod pa don gyi spyi dang 'dres par snang ba'am/ phyi rol gyi ngo bor gyur pa ni kun rdzob tu yang yod pa ma yin la/ brjod par snang ba'i sems kyang don dam par yod pa ma yin zhing / de las gtan tshigs kyi tshig 'jug pa la sogs pa yang de bzhin te/de lta na yang kun rdzob tu brjod pa ni kun rdzob tsam du gtan tshigs kyi tshig 'jug cing de las rtog pa skye ba yod par 'dod pas brjod pa don med pa yang ma yin no/ /phyin ci log ni dngos yin pas/ /dmigs pa yod pa ma yin no/ / zhes pa la sogs pa'i don ni gzhan gyi dbang phyin ci log gi sems kun rdzob tu dngos po yin pas/ de'i dmigs pa'i yul yod pa ma yin te/ gal te yod na dmigs pa'i blo phyin ci log tu gyur pa mi 'thad pa'i phyir ro/ /yang gal te phyin ci log don dam pa'i dngos por yod na/ don dam par thams cad ngo bo nyid med ces pa nyams par 'gyur ba'o//phyin ci log ni zhes pa la sogs pas sngar gyi rkang pa gnyis kyi don gsal bar 'chad par 'gyur ba'o/ /mi rtog rnam par rtog pa yis/ /zhes pa ni zhi gnas dang rtog pa dang bcas pa'i lhag mthong ngo / /sgyu ma'i glang po zhes pa la sogs pas ni log par snang ba'i dpe bstan te/d+ha du ras myos pa rnams la lo ma la sogs pa gser du snang ba'o/ /gal te mtshan ma skyer zin na/ /zhes pa ni stong pa la sogs pa'i mtshan mar 'dzin pa'o/ /'ching dang bcings pa zhes pa la sogs pas mi rtog pas 'ching ba la sogs pa ste/de 'dra ba'i bcings pa la ltos nas byis pa rnams kyi thar par brtags pa'i phyir/ drug po 'di dag thar pa'i rgyu/ /zhes pa'o/ /de ltar na de kho na nyid du bcings pa med pas de la ltos nas brtags pa'i thar pa yang med ces ston pa ni/ sa rnams med cing de'i yul bden pa la sogs pa med ces pa'o//gang zag rgyun dang zhes pa la sogs pas ni rnam par rig pa'i de kho na nyid bsdus te bstan pa'o/ /de la rnam par shes pa'i tshogs drug ni dmigs pa dang rnam par gsal ba'i sgo nas 'jug pas sna tshogs su 'dzin la/sems kyi rigs ni rang gi rgyud du gtogs pa'i rgyu dang 'bras bu ste/ rnam par shes pa brgyad po thams cad de/ don dam par mtshan nyid grub pa med pa'o/ /phung po rnams la zhes pa la sogs pas bdag med pa'i don gsal bar 'chad pa'o/ /gal te 'dir dngos po thams cad kun rdzob tu yang med pa ni kun nas nyon mongs pa dang rnam par byang ba la skur par 'gyur bas ji ltar byis pas mthong zhing brtags pa bzhin med la/snang tshod tsam du med pa ma yin zhes pa'o/ /kun rtog ces pa la sogs pa rang bzhin gsum bsdus te bstan pa'o/ /de la ming ni don dang bsres nas btags pas rnam par brtags pa'o//rkyen des bag chags la sogs pa'o/ /de la mi 'byung zhes pa ni yang dag pa'i ye shes la mtshan ma de dag mi 'byung ba'o/ /rnam par smin pa'i sangs rgyas dang zhes pas ni thams cad gnyug mar gnas pa'i ye shes sam/ mthar thug pa'i ye shes kyi rnam par 'phrul pa nyid du ston te/de la sems can ni gnyug ma'i ye shes so so rang rig pa'i rnam par 'phrul pa ste/ rang gi rig pa'i 'gyur ba las/ /dman pa las ni las skyes te/ /zhes pa la sogs pa gsungs pa'i phyir ro/ /phyogs phyogs zhing ni sprul pa'i sku'i zhing khams so//sgyu 'dra'i chos dang zhes pa la sogs pas ni brjod bya rjod byed kyi chos sgyu ma dang brag ca lta bu dang / gcig tu 'gyur zhing mang por 'gyur ba la sogs pa'i rdzu 'phrul dang / mchog gi sprul pa rnams kyis sprul pa ste bzo ba dang skye ba la sogs pa'i sprul pa'o//de kun snang ba mtha' yas kyi/ /bde ba can nas byung ba'o/ /zhes pa'i don ni bde ba can gyi 'jig rten gyi khams de ni longs spyod rdzogs pa'i zhing khams sngar bstan pa'i 'og min gyi gnas yin la/ der longs spyod rdzogs pa'i sku'i ngo bor sangs rgyas pa ste/ mthar gyis stug por zhugs nas kyang //rnam par sangs rgyas sangs rgyas par/ /zhes gsungs pa'i phyir ro/ /des na rnam par smin pa'i sangs rgyas kyang bde ba can nas byung ba'o/ /yang rnam pa gcig du na de 'dra ba'i zhing khams su sangs rgyas kyi ye shes la snang ba ni ye shes de nyid kyi bdag nyid yin zhing de 'dra ba'i ye shes las longs spyod rdzogs pa'i sku mtshan dang dpe byad kyi rnam par snang ba byung bas de ltar bstan pa'o//gal te de ni sangs rgyas mi 'khrugs pa la sogs pa'i zhing khams gzhan la yang mtshungs pas de dag nas byung ba nyid du yang ci'i phyir mi ston ce na/de ltar bden mod kyi 'di ni mtshon pa tsam du zad pa'am/ yang na sangs rgyas snang ba mtha' yas ni khyad par du yang so sor rtog pa'i ye shes kyi bdag nyid du rig pa 'dzin pa'i sde snod las bshad la/ so sor rtog pa'i ye shes kyang / /shes bya kun la rtag mi thogs//'khor gyi dkyil 'khor thams cad du/ /'byor pa thams cad mdzad pa dang / /the tshom thams cad gcod pa yi/ /chos chen char ni rab tu 'bebs/ /zhes sa bcu'i mgon po dang / 'phags pa sangs rgyas kyi sa'i mdo las gsungs pas sku dang gsung sna tshogs su snang zhing don byed pa la sogs pa ni ye shes de'i bdag nyid du gyur pa'i zhing khams de nyid nas byung ba'o//de'i dgongs pa shes par gyis/ /zhes pas ni ngag 'di rnams kyi dgongs don yang shes par gyis shig ces shugs la bstan pa'o/ /gang yang 'dren pa rnams kyis bshad/ /ces pa ni spyir byang chub sems dpa' rnams kyis bshad pa ste/rgyal ba'i bu ni nye ba'i sras rnams yin pas zlos par mi 'gyur ba'o/ /sprul pa dag gis zhes pa ni skye ba'i sprul pa la sogs pa nyid sprul rnams so/ /chos 'di rnams ni ma skyes pa/ /zhes pa la sogs pas don dam par ma skyes shing /kun rdzob tu bcings pa dang thar pa la sogs pa thams cad sems nyid yin par ston pa'o/ /rab tu bsdus pa ni kun gzhi la bag chags thams cad bsgos pa'o/ /don du snang la rnam shes te/ /ye shes yang dag spyod yul can/ /zhes pa ni don du snang la rnam par shes pa'i de kho na nyid rtogs pa ni ye shes te/yang dag pa'i yul can no/ /'phags pa'i spyod yul zhes pa ni so so rang gi rig pa'i de kho na nyid do/ /don rab 'byed pa'i zhes pa la sogs pas ni de rnams thob par 'gyur ba'i lam ston pa'o/ /thams cad chos ni zhes pa la sogs pas ni rang bzhin gsum tshul gzhan gyi sgo nas bstan pa ste/nam zhig ces pa la sogs pas yongs su grub pa ston pa'o/ /de bzhin nyid kyi rjes su 'gro ba'i ltas zhes pa ni chos kyi sku mngon du 'gyur ba'i rtags so/ /gang phyir zhes pa la sogs pas ni dngos por 'dzin pa dang bcas pa la grol ba mi 'thad pa nyid du ston te/dngos po kun gyi smra ba ni phung po la sogs pa la grangs dang go rims la sogs pa'i dngos pos dngos po nyid bden par smra ba'am/ tha mal pa rnams kyis skyes pa dang bud med la sogs pa'i dngos por phye ba'i sgo nas/ dngos por rtog pa rnams rtag tu tshe rabs gzhan dang gzhan dag tu skyes pa na yang /phan tshun gcig la gcig sdug pa dang mi sdug pa la sogs pa'i rnam par rtog cing / de las skye ba gzhan du 'khor bar 'gyur ba'o/ /ming ni [(]brjad [,]brjod [)]pa ma byas na/ /zhes pa la sogs pas ni sngar bstan pa ltar/ kun rdzob tu ngo bo nyid med pa la sogs pa'i chos brjod par snang ba ma byas na bstan pa nub par 'gyur bas/'jig rten rmongs par 'gyur zhes ston pa'o/ /ming dang zhes pa la sogs pas ngo bo nyid gsum dbye ba'i sgo nas gsal bar bstan pa'o/ /de yang bum pa la sogs pa'i ming du rtog pa dang / de dag gi don la rtog pa dang /gtsang ba dang / bde ba dang / bdag la sogs par phyin ci log tu rtog pa dang / gtan tshigs la sogs pa'i rkyen rnams kyi lkog tu gyur pa'i don la rtog pa ste/ rjes su dpag pa'i rtog pa dang gsum gyi sgo nas byis pa rnams dngos por rtog pa'o/ /yang 'gag pa med pa la sogs pa'i rang bzhin la de dag dang mi mthun par brtags pa ni kun tu brtags pa'i mtshan nyid do//sgyu ma'i dpe rnams dang 'dra ba'i de bzhin nyid dang gnyis su med pa la sogs pa ni 'gyur ba med pa dang phyin ci ma log pa'i yongs su grub pa'o/ /lus dang ngag gi spyod yul brdzun//zhes pas ni de dag gi rnam par rig byed dam/ de dag gi las su bya ba phyi rol gyi ngo bo ni kun rdzob tu yang med la rnam par mi rtog pa'i shes rab dang / des rtogs par bya ba'i don ni bden pa ste/ de nyid kyis gnyis kyi mthar 'dzin pa rnams spong pa'o/ /rigs pas rnam par gzhigs na ni/gzung ba dang ni 'dzin pa 'gag /ces pa la sogs pa'i don ni shes pas don 'dzin par 'jog pa'i rgyu mtshan mi 'thad de/ ji skad du myong ba yod pa de don 'dzin par ji ltar 'gyur zhes brtags pa na/ skyes pa dang 'dra ba dag gis so/ /gzung 'dzin khas len pa rnams kyis smras pa'i tshe/de ltar na yul mtshungs pa'i shes pa de ma thag pa yang yul du 'gyur ro zhes pa la sogs pa slob dpon d+harma kIrtis bshad pa lta bu'o/ /de'i don yang shes pa don las skyes shing don dang 'dra ba'i sgo nas don 'dzin par 'dod pa mi 'thad de/de ltar na sngon por snang ba'i blo rgyun chags su 'jug pa na/ blo snga ma rnams phyi ma'i yul du 'gyur te/ snga ma las skyes pa dang de 'dra ba'i phyir ro/ /de la sogs pa rigs pa'i bstan bcos dag las bshad pa rnams skabs 'dir shes par bya'o/ /gal te don du snang ba log pa nyid yin na/snang ba sems kyi ngo bor yang mi 'thad dam snyam na/ ji ltar byis pas phyi rol gyi ngo bor brtags pa ltar mi bden gyi/ kun rdzob tu snang ba sems su bden pa'o/ /pha ma phrad par 'gyur zhes pa la sogs pas 'khor bar 'jug pa'i tshul ston te/ pha ma phrad cing chags par gyur pa dang //de'i dus kyi khu ba dang khrag gi nang du kun gzhi rnam par shes pa skye gnas la chags pa'i yid dang lhan cig la 'jug par 'gyur zhing / re zhig de las mi thon pa ste mar gyi bum pa'i nang du byi ba zhugs pa bzhin no/ /de las rim gyis nur nur po la sogs pa dang / gzugs dman zhing chu la 'bras mi sdug pa ste/rkang lag 'gyus shing dbang po ma dod pa'i gnas skabs so/ /de dag kyang sngon gyi las las byung ba'i rlung rnams kyi khyad par du 'gyur ba ste/ rgyas par ni dga' bo mngal du 'jug pa bstan pa las shes par bya'o/ /lnga dang zhes pa la sogs pas ni dbang po lnga dang /yul lnga dang / don snying lnga'o/ /yid ni kun gzhi dang lhan cig tu 'jug cing re zhig brgyal bar 'gyur ro zhes kyang bstan to/ /gzhan yang rnam par rtog pas don spyi'i rnam par rig cing / de las brjod par 'dod pa dang / rkan dang mchu'i byed pa la sogs pa las tshig tu rnam par brtags pa 'byung ba'o//mu stegs smra la brten pa ni lhan cig skyes pa'i 'jig tshogs la lta ba dang ldan pa'o/ /gnas skabs der theg pa chen po'i snod dang ldan pa ni ma yin te/ de'i phyir gang zag dang phung po la sogs pa tsam ston pa ste/ sems can gyi bsam pa dang bstun pa yin gyi/ngan par lta ba'i gnas de dag bden pa ni ma yin pa'o/ /mgon po zhes bya ba la sogs pas de kho na nyid zab mo gsal bar byed pa'i gang zag ma 'ongs pa'i dus su ji ltar 'byung ba sngar dris shing / yang bsnan te dris pa dang de'i lan gsal bar ston pa'o//dus dag 'das nas zhes pa ni lo grangs nyis brgya 'das nas zhes gsung rab kyi phyogs 'ga' zhig las bstan to/ /dpal ldan zhes pa ni gnyis su med pa'i ye shes sam bsod nams kyi tshogs bsags pa'o/ /klu ni ming gi dang po ste klu sgrub snying po'o/ /'gro ba kun du zhes pa la sogs pas slob dpon de nyid srid pa'i sdug bsngal las yid byung ba la sogs pa ste/shes par zad do/ /de lta na theg pa chen po'i rigs can ma yin par 'gyur ro zhe na ma yin te/ de yis skyo bas rang dang gzhan sdug bsngal las thar bar bya ba'i don du byang chub mchog tu sems bskyed pa'i phyir ro//rnal 'byor can gyis zhes pa la sogs pas ni bsam gtan gyi mtshan ma dang / de dag la log par mi 'gyur ba'i tshul ston te/ tshig gi don ni phal cher sngar bstan to/ /'phags pa rnams kyi spyod yul ltar/ /zhes pa la sogs pas ni 'phags pas yul du byas pa bzhin du/de bzhin nyid kyi don bden pa'o/ /yongs su gyur dang zhes pa la sogs pas ni rten 'brel gyi de kho na nyid ston te/ grangs can la sogs pa thams cad gtso bo'i yongs su 'gyur bar 'dod pa la sogs pa ste/ don go bar zad do/ / bar ma do dag bsdu ba ni srid pa bar ma'i sems can la sogs pa sngar bstan pa rnams gsung rab kyi brjod bya nyid du bsdus shing bstan pa la/ dngos por rtog pa ni de kho na nyid kyi don la mkhas pa ma yin te/ don dam par rten cing 'brel par 'byung ba ni rgyal bas ma gsungs te/ 'on kyang ji ltar snang ba tsam gyi rten 'brel 'di yod na 'di 'byung zhes bya ba la sogs pa ni don dam pa'i chos stong pa nyid mtshon pa'i brda ste/ji skad du/ rten cing 'brel par 'byung ba la 'jug pas chos kyi dbyings la 'jug par 'gyur ro zhes gsungs pa'i phyir ro/ /des na rten 'brel du snang ba'i brda las tha dad du gyur pa'i dngos po ni ma skyes shing ma 'gags pa'o//gzugs brnyan chu bo'i chu 'dra bar/ /zhes pa ni rdzas su ma grub cing rgyun chags su 'byung ba'o/ /theg chen nga yi theg pa min/ /zhes pa la sogs pas ni de kho na nyid du/ theg pa med cing 'gro ba med/ /ces pa la sogs pa'o/ /bden pa ma yin thar pa min/ /zhes pa ni bden pa dang bden pa mngon par rtogs pa'i thar pa ma grub pa'o/ /'on kyang kun rdzob tu ni theg pa chen po'i theg pa ste/ de 'dra ba'i lam nas 'ongs shing de nyid la gnas pa'o/ /skye ba dag ni mdor bshad de//'gog pa nyid ni rgyas par ro/ /zhes pa ni skye ba ni blo rags pa'i yul du bsdus te bstan nas/ de nyid don dam par 'gog pa ni rtogs par dka' bas theg pa chen po'i gsung rab las rgyas par bstan pa'o/ /skye ba bkag pa'i stong pa nyid ni gnyis su 'gyur te/ mi skye ba'i stong pa rnam pa thams cad kyi mchog dang ldan pa'i phyin ci ma log pa'i don dang /yang sems tsam pa la sogs pas rten 'brel don dam pa'i dngos por grub pa nyid gzung 'dzin la sogs pas stong par 'dod pa ste/ de 'dra ba ni tshad ma'i gnod pa yod pas 'jig cing mi bden pa'o/ /mdo sde 'dul ba zhes pa la sogs pas sde snod gsum gyis bsdus pa gsung rab yan lag bcu gnyis kyi tshig gis brjod pa'i brtags pa sna tshogs la brten nas/kun gzhi'i dri ma rnam par dag par rtog cing / bdag med pa'i don rtogs shing goms pa las rnam par dag par mi 'dod pa rnams ni phyin ci log yin pas bdag med pa'i de kho na nyid rnam par dag pa'i don la blo gros mi gnas shing mi 'thob pa'o//de skad du yang / gang zhig sgra yis chos bstan pa'i/ /sgra de la ni gang chags pa/ /zhes pa la sogs pa sngar bstan pa'i phyir ro/ /rkyen gyis yod par ma bsgrubs zhes pa la/dngos por smra ba 'ga' zhig de ltar 'dod pa ma yin nam zhe na/ de'i 'dod pas de ltar 'grub pa ma yin no/ /de ltar yod par ma grub pas de la ltos pa'i med pa yang mi 'grub cing / gal te yod pa sgrub na de'i ltos pa med pa yang grub par 'gyur ro/ /de la yod med nyer mi 'gro//zhes pa ni yod med kyi mthar 'dzin pa nyid du mi ltung ba'o/ /de la 'ga' zhig ni snang ba'i ri bong gi rwa bzhin med pa'i mthar rtog pa yod la/ gzhan ni yod pa'i mthar rtog pa ste/ de dag gnyis ka yang nor ba'o/ /zab yangs zhes pa la sogs pas ni bshad pa 'jug pa'i tshul ston te/de la zab pa dang rgya che ba'i ye shes ni go rims bzhin du ji lta ba dang ji snyed pa mkhyen pa'i ye shes so/ /yangs pa ni de gnyis ka yang the tshom la sogs pa'i 'dzer dog med pa'o/ /phun sum tshogs pa'i zhing ni longs spyod rdzogs pa'i sku'i zhing khams ye shes dag pa'i snang ba'o//rgyu med pa'i rnam rtog ni de kho na nyid du gzhan dbang gi rnam rtog rgyu las ma skyes pas/ de lta bu'i ngo bor ma grub pa'o/ /snang la byis pa rnams zhes pa la sogs pas ni byis pa rnams kyis snang ba la rtag pa dang bdag la sogs par brtags la/ 'phags pa nyan thos la sogs pa rnams ni de las bye brag tu mi rtag pa la sogs par lta ba ste/ byis pa la ltos na 'phags pa'i lta ba dag pa ste/ de yang rnam par thar pa gsum thos bsam gyi rtogs pa las byung ba'o/ /de la de dag gi lugs kyis rnam par thar pa gsum las stong pa nyid ni sdug bsngal gyi bden pa'i rnam pa stong pa dang bdag med pa gnyis yin la/mtshan ma med pa ni lam dang 'gog pa'i rnam pa brgyad de/ gang mtshan ma med pa 'gog pa dang gang gis mtshan ma med pa lam gyi rnam pa'o/ /smon pa med pa ni kun 'byung gi bden pa'i rnam pa bzhi dang /sdug bsngal gyi bden pa'i rnam pa lhag ma gnyis so/ /thams cad chos la ma chags pa ni kun nas nyon mongs pa'i chos la'o/ /ma brtags pa'i 'bras bu ni gzung ba'i rtog pa spangs pas thob pa'o/ /de nyid kyi phyir rang rgyal ba rnams ni phyi rol gzung ba'i rang bzhin ni brtags pa yin la/gzhan gyi dbang ni grangs can gyi 'dod pa ltar bdag las skye bar 'khrul pa ma yin zhing / gzhan las skye bar 'dod pa'o/ /de'i phyir 'dzin pa'i sems 'ba' zhig rgyun chags su 'jug pa'o/ /'di dag ni byang chub sems dpa' rnams la yang sbyar te/de rnams kyang phyi'i don kun rdzob tu mi 'thad cing rnam par rig pa tsam gyi gzhan dbang kun rdzob tu gzhan las rgyun chags su 'byung bar 'dod pa'i phyir ro/ /nyan thos la sogs pa'i gang zag gi rnam par dbye ba la log par rtogs pa sel ba ni bcu po pa ni zhes pa la sogs pa ste/sngar rgyas par bstan to/ /dngos po rnams ni zhes pa la sogs pas ni snang ba med pa'i ting nge 'dzin thob pa'i thabs ston te/ dngos po'i snang ba med na/ de la ltos pa'i dngos med du snang ba yang med de/ de dag mnyam zhing phan tshun rgyas btab pa'o/ /gal te dngos po dang dngos po med pa 'gal ba ji ltar de dag mnyam pa nyid du byed ce na/gang gi tshe na zhes pa la sogs pa gsungs te/ phyi nang gi yul la g.yo ba'i sems mi shes pa ste/ de 'dra ba'i sems mi dmigs pa de'i tshe dngos po dang dngos po med par 'dzin pa 'jig par byed cing sems kyi mnyam pa nyid kyang thob pa'o//gzhan yang kun rdzob pa'i dngos po nyid don dam pa'i dngos por med pas de dag 'gal ba ma yin no/ /yang dngos por 'dzin pa ji ltar ldog ce na/ thog ma med ldan zhes pa la sogs pa gsungs te/ byis pa rnams gang zag gi bdag tu 'dzin pas sems kyi rgyud g.yogs pa la/gzer chung ngus gzer chen po 'byin pa ltar/ phung po la sogs pa'i dngos por bstan pas brid nas/ gang zag tu 'dzin pa rnam par bzlog la/ phung po la sogs par 'dzin pa yang stong pa nyid du bstan pas bzlog cing / stong pa'i mtshan mar 'dzin pa yang nges pa'i don gyi mdo 'dir zung 'jug sgyu ma lta bu'i don bstan pas bzlog pa'o//de'i rgyu can de la dmigs/ /zhes pas ni rnam shes 'jug pa'i tshul rgyas par ston te/ 'jug pa'i rnam par shes pa rnams ni kun gzhi las byung zhing kun gzhi la dmigs pa'o/ /yid ni nyon mongs pa can no/ /sems ni rnam par shes pa drug gi tshogs te/de'i rgyu kun gzhi rang gi rigs phyi ma yang des 'byin par byed ces pa la sogs pa'o/ /rnam par smin skyes zhes pa la sogs pas ni rnam par shes pa'i khyad par rnam par smin pa las byung ba'i mngon par shes pa ste/ ji skad du/ mar me phul bas spyan dang ldan//rol mo'i sgra yis rna thob 'gyur/ /zhes pa la sogs pa sngar bstan pa rnams so/ /byin rlabs ni sangs rgyas rnams kyis gnang ba ste/ de'i byin gyi rlabs kyis thob pa'i mngon shes so/ /ris dang 'gro ba rnams dang byung / /zhes pa ni 'gro ba'i ris sna tshogs rnams kyang kun gzhi las byung zhing /de rnams la las kyis thob pa'i mngon par shes pa yang de las byung ba'o/ /rmi lam du ni gang rnyed dang / /zhes pa ni gnas gtsang ma'i lha la sogs pa'i byin gyi rlabs kyis gnyid kyis bslad pa'i gnas skabs na yang don ji lta ba bzhin snang ba'i mngon par shes pa ste/de ltar mngon shes rnam pa bzhi'o/ /gang yang zhes pa la sogs pas de dag nyid gsal bar bstan pa'o/ /mngon shes rnam smin skyes de min/ /zhes pa ni mngon shes de dang 'gro ba'i ris rnams la yod pa sngon gyi las las byung ba gnyis gcig pa nyid du dogs pa sel ba ste/las las thob pa ni bsod nams kyi las ma yin pa gang yang rung ba rnams las thob pa ste/ dmyal ba dang yi dags rnams la yang pha rol po'i sems dang / chod pa la sogs pa'i don shes pa 'byung ba'o/ /rnam par smin pa las skyes pa ni sngon gyi bsod nams kyi las dang 'phral gyi 'du byed pa las byung ba ste/mngon par shes pa lnga po rnams so/ /de rnams kyi las kyi sa bon dang de dag gis byin gyis brlabs pa'i las kyi sa bon kyang kun gzhi la bsgos shing de las byung ba'o/ /zag pa zad pa'i mngon shes ni sa brgyad pa yan chod kyi gnas skabs yin pas/de las byung ba'i nges pa med do/ /gzhan yang kun gzhi las de rnams 'byung ba'i tshul rgyas par bstan pa ni/ bag chags kyis ni zhes pa la sogs pa'o/ /snang ba dag ni mi snang ba/ /zhes pa de kho na nyid du gnyis kyi rnam pa la sogs par snang ba med de/ gang zag gi snang ba dang / rgyu ci las byung ba dang / yul ci zhig snang ba'am/ rang gi ngo bo ci zhig zhes brtags na ma grub pa'o/ /de ltar gnyis snang gi dri ma med pa'i phyir/ sems ni rang bzhin dang ba ste/ /zhes pa la sogs pa'o/ /kun gzhi yis ni 'dor bar byed/ /ces pa la sogs pa'i don ni de la las kyi bag chags yod pa rnams yul du snang ba'i phyin ci log la mngon par chags shing 'gro ba rnams su smon par byed pa'i sred pa'i rlan gyis gsos btab nas byis pa'i skye bo 'khor ba'i gnas su 'dren par byed pa'o//nga'i sems ni zhes pa la sogs pas ni gdams pa'i tshul gyis de kho na nyid bstan pa'o//bsam gtan pa'i yul dang zhes pa la sogs pas ni de ltar las sna tshogs kyis 'gro ba sna tshogs mngon par 'grub pa dang / de dag gi gnyen po bsam gtan bsgom pa'i dmigs pa'i yul dang / de rnams ston pa'i sangs rgyas kyi che ba ni bsam gyis mi khyab ces pa'o//ma 'ongs zhes pa la sogs pas rdzas su ma grub pa'i don rnams kyang kun rdzob nyid du bshad cing / de las gzhan rdzas su grub par snang ba rnams kun rdzob tu yod pa lta ci smos zhes ston pa'o/ /de la mya ngan las 'das pa ni phyin ci log nye bar zhi ba tsam yin pas rdzas su ma grub pa'o//ris su gtogs dang zhes pa la sogs pas ni gang zag dang chos su lta ba'i gang zag ston te/ ris su gtogs pa sangs rgyas pa'i skye bo dang / mu stegs can rnams kyi gang zag gi bdag tu lta ba'i lta ba gcig la gnas shing / yang kun rdzob sems tsam gyi tshul la rmongs pa rnams ni/phyi rol gyi dngos po la rtog pa ste/ chos kyi bdag tu rtog pa'o/ /rmi lam na ni zhes pa la sogs pas de las bzlog pa byang chub sems dpa' rnams kyi phyir mi ldog pa'i rtags ston te/ de'i don yang dbang bskur ba ni byang chub sems dpa'i sa bcu pa ste/de nyid sangs rgyas zhes kyang bya ste/ ji skad du/ sa dgu 'das nas ye shes ni/ /gang gis sangs rgyas sar gnas pa/ /de ni byang chub sems dpa'i sa/ /bcu pa yin par shes par bya/ /zhes gsungs pa dang / gzhan yang sa bcu pa la byang chub sems dpa' rnams sangs rgyas zhes bya'i yang dag par rdzogs pa'i sangs rgyas ni ma yin no zhes pa dang /stug po bkod pa'i rgyan las kyang / /brgyad pa yan chad dag 'gyur te/ /dgu la bsam gtan spyod yul lo/ /bcu la sangs rgyas sangs rgyas kyis/ /dbang bskur rgyal bar 'gyur ba'o//zhes gsungs pa'i phyir ro/ /de rnams rmi lam du mthong na byang chub kyi sa bon 'phel ba ste phyir mi ldog pa'i rtags so/ /de skad du yang / khams gsum dag la rmi lam na yang mi 'dod cing / /sangs rgyas rnams mthong 'gro la chos kyang ston byed pa/ /de ni mi ldog lung bstan yin par rig par bya//zhes pa la sogs pa gsungs pa'i phyir ro/ /gal te rang rgyal ba la sogs pa rnam pa bzhir mthong ba de dag dngos po la yod dam zhe na/ yod pa ma yin te/ yul lam dus gang na 'phags pa de dag rnam pa ji ltar yod pa dang / rgyu gang las byung ba dang /de ltar yin pa ci'i phyir zhes pa ste/ de 'dra ba'i shes byed kyi tshad ma la sogs pa ma grub pas de ltar mthong ba ni/ sems nyid sgyu ma lta bu'i rnam pa bzhi yin zhes pa'o/ /de la rgyu la rmongs pa ni las rgyu 'bras la rmongs pa'i ma rig pa'o/ /rang bzhin med pa dang stong pa ni nye tshe ba'i stong pa yin pas de skad smra ba ni/skye bar smra ba'i lta ba'o/ /'gro gcig tha dad gnyi gar yang / /zhes pa la sogs pa'i don ni phyi rol pa rnams kyis 'gro ba thams cad rgyud gcig pa'am/ tha dad par 'dod la de yang dbang phyug la sogs pa'i rkyen gyis bskyed pa'am/'dod rgyal ba nyid du khas len pa ni brtags pa ste/ kun rdzob tu yang ma grub pa'o/ /de lta na kun rdzob tu de rnams gang las byung zhe na/ 'khor ba'i sa bon zhes pa la sogs pa gsungs so/ /phyi dang nang zhes pa la phyi ni phung po la sogs pa phyi'i chos rnams so/ / nang ni rkyen te srid pa'i yan lag rnams so/ /de rnams kyi chos nyid la rnal 'byor gyis bsgom zhes pa'o/ /'dir rnam par shes pa'i sa bon las ji ltar 'byung zhe na/ bag chags kyi bye brag mi 'dra ba dag gis 'bras bu sems kyi bye brag mi 'dra ba bskyed cing / bag chags dang bag chags kyi rten kun gzhi ni tha mi dad pa'o//rnyog pa spangs pa'i sems ni glo bur gyi dri ma dang bral ba so so rang rig pa'i ye shes te/ chos thams cad bsdus pa'i don shes pa'i phyir/ sangs rgyas nyid yin zhing phyin ci log gi yid zlog par byed pa'o/ /mya ngan las 'das pa ni yongs su dag pa'i zhing ngo //lus 'di nyid du bshad pa yin/ /zhes pa ni sems kyi lus sam tshogs yin pa'o/ /mtshan nyid dang ni rtogs pa de/ /nga yi skye ba rnam gnyis so/ /zhes pa ni longs spyod rdzogs pa'i sku mtshan dang dpe byad kyi ngo bo nyid dang / chos kyi sku rtogs pa'i ye shes gnyis ni de bzhin gshegs pa'i skye ba yin la/sprul pa'i sku ni gdul bya 'ba' zhig gi snang ba yin pas ma smos pa'o/ /bshad pa'i tshul bstan pa ni rnam pa bzhi ste/ rigs par bstan pa gcig dang / grub pa'i mtha' gsum mo/ /de la rigs pa gcig ni mthar thug gi theg pa gcig pa dang /don dam par theg pa med pa ste/ de bzhin du rigs pas gcig nyid du bsdu'o/ /grub pa'i mtha' ni theg pa gsum ste/ gdul bya'i bsam pa bzhin bshad kyi/ de ltar rigs pa ni ma yin pa'i phyir ro/ /gal te gnas skabs kyi dbang du byas na gsum du rigs pa ma yin nam zhe na/ma yin te/ gnas skabs kyi dbang du byas na/ lha dang tshangs pa'i theg pa la sogs pa grangs thug pa med pa nyid du sngar gsungs pa'i phyir ro/ /rtag pa ther zug zhes pa la sogs pas ni de bzhin gshegs pa'i snying po chos kyi sku'i rigs dngos po'i ngo bo nyid phyin ci ma log pa ni 'gyur ba med pas rtag pa ther zug pa yin la/de yang sems dang rnam par shes pa las grol ba'o/ /dngos po med na zhes pa la sogs pas ni kun rdzob tu de bzhin gshegs pa'i snying po de 'dra ba med na rnam par dag pa dang kun nas nyon mongs pa mi 'thad pa ston pa'o/ /de bzhin nyid ni nor pa tsam//zhes pa la sogs pas ni phyin ci log la sogs pa'i chos dang / de bzhin nyid chos nyid ni de nyid dang gzhan du brjod du med par ston pa'o/ /'du byed mthong ba ni de rnams kyi de bzhin nyid mthong bas phyin ci log spong bar 'gyur ba'o/ /de ltar spong bar 'gyur ba'i tshul bsdus te bstan pa yang /sems tsam la ni zhes pa la sogs pa'o/ /'di rnams kyi don ni drod dang rtse mo'i gnas skabs na gzung ba rang bzhin med pa'i sems tsam gyi rtog pa la gnas nas/ phyi'i don la mi brtag cing yang rim gyis mthong ba'i lam gyi gnas skabs na/ 'dzin pa'i sems kyang don dam par ngo bo nyid med pa yang dag pa'i dmigs pa la gnas nas 'dzin pa'i sems su mngon par zhen pa las 'da' bar bya ba'o/ /sems tsam las 'das nas mthong ba'i lam la sogs pa'i mnyam par gzhag pa'i ye shes snang ba med pa la re zhig gnas de las kyang 'da' bar bya ba ste/rjes thob kyi gnas skabs su sa'i yongs su sbyang ba la sogs pas sa de dang de dag rdzogs par bya'o/ /de las gzhan rtag tu snang ba med pa'i ting nge 'dzin la gnas na/ nyan thos ltar sems can smin par byed pa la sogs pa'i bsod nams kyi tshogs ma rdzogs pas 'bras bu'i bdag nyid kyi theg pa chen po mi mthong ba ste/mi thob ces pa'o/ /des na rjes kyi gnas skabs su sgyu ma lta bur rtogs pa'i ye shes lhun gyis grub cing / phyin ci log zhi ba dang / de 'dra bas yongs su zin pa'i khyad par du sems bskyed pa dang / smon lam dag gis kun gzhi'i dri ma sbyangs nas/bdag med pa'i ye shes mchog tu gyur pa chos kyi sku spros pa dang bral ba mngon du byas pa de'i tshe mtshan ma thams cad mi mthong ba'o/ /yang ji lta ba phyi'i don la mi rtog cing sems tsam las 'da' bar bya zhe na/ sems kyi spyod yul phyi rol lta bur snang ba la yang dag pa'i shes rab kyis blta bar bya ste/de ltar bltas pas phyi'i don brdzun pa nyid du mthong ba na de la mi rtog pa'o/ /yang so so rang rig pa'i ye shes kyi spyod yul sems kyi rang bzhin la yang / shes rab kyis de bzhin du bltas pas sems kyis chos nyid stong pa nyid shes rab kyi spyod yul ji lta ba bzhin mthong ba na/chos kyi mtshan nyid de kho na nyid la mi rmongs pas sems tsam du dmigs pa las 'da'o/ /de dag gi spyod yul gang yin zhe na/ sdug bsngal gyi bden par rtogs pa sems can skye ba dang skye ba'i gnas phyi rol lta bur snang ba ni/sems kyi spyod yul yin la/ sems pa'i las dang nyon mongs pa kun 'byung gi bden par rtogs pa sems kyi ngo bor gyur pa ni ye shes kyi spyod yul lo/ /'bras bu thob pa ni rgyun tu zhugs pa la sogs pa'i 'bras bu'o/ /mig dang zhes pa la sogs pas kun rdzob tu rnam shes skye ba'i rgyu ste/de la nam mkhas ni go skabs phye ba'i sgo nas rnam par shes pa skye ba'o/ /'dzin pa dang 'dzin byed ni go rims bzhin du rnam par shes pa dang dbang po'o/ /de la ming ni mi 'byung ste/ /zhes pa la sogs pas ni ming dang don rang dga'i 'dod pa'i sbrel ba tsam du zad kyi/de las gzhan phan tshun du 'brel pa ni med ces pa'o/ /rgyu dang rgyu med pa las byung ba'i dngos por rnam par rtog pas brtags pa'i don la bden pa nyid du mi rtag ces pa'o/ /stong pa dang ni stong pa'i don/ /byis pas ma mthong rnam par rgyug / ces pa ni stong pa'i bdag nyid du gyur pa'i gzugs la sogs pa la byis pas de ltar mi rtogs pas mngon par 'dod cing tshol ba'o/ /gzhan yang byis pa'i skye bo la sogs pa rnams kyi bshad pa 'jug pa yang rang rang gi mngon pa'i nga rgyal gyis bden pa de kho na nyid kyi don tshig gis rnam par 'god cing ston pa nyid du mthong bas na brtags pa'i ni bshad pa yin zhes pa ste/rtog pa'i gzung ba sgro gtags su bshad pa la bden pa'i rang gi mtshan nyid bshad par zhen pa'o/ /gcig po rnam pa lngar grub ces pa la sogs pas ni phung po zhes gcig tu rnam par gzhag pa yang rnam pa lngar 'gyur la/de rnams re re yang sngar bstan pa ltar du mar 'gyur bas bden pa'i rang bzhin spangs pa'o/ /de ltar ma grub bzhin sna tshogs su spro zhing rtog pa ni bdud kyis yongs su gzung ba'o/ /yang gzhan dag dbang phyug rtag pa la sogs pa 'gro ba skyed par byed pa dang bcas par 'dod pa ni 'gal ba khas blangs pas rtsod pa 'jug pa'i rten yin no//des na bden pa'i mchog mtha' gnyis spangs pa'i dbu ma'i don sgra dang rnam rtog gi yul ma yin pa ni phyin ci log mtha' dag 'gags pa na mthong bar 'gyur ba yin no/ / yid dang mtshan nyid dngos po la/ /rtag dang mi rtag rlom sems med/ /ces pa ni de dag la rtag pa dang mi rtag pa la sogs pa'i dngos por bzung ba'i sgo nas sems kyi khengs pa med pa'o/ /de bzhin du skye ba dang mi skye ba la sogs pa'i mtshan mar bzung ba'i sgo nas/ rnal 'byor pa ni rlom sems pa med pa'o//don gnyis ni gzung ba dang 'dzin pa'o/ /yang kun gzhi la byung ba'i sems kyi don gcig la/ sems gnyis kyis ni mi shes mi 'gyur zhes pa ste/ gzung 'dzin gnyis kyi ngo bor ma grub cing mi dmigs pa'o/ /yang na sems gnyis pa gzhan zhig gis mi 'dzin pa ste/de yi myong ba gzhan yod min/ /gzung dang 'dzin pas stong pa'i phyir/ /zhes sngar bshad pa bzhin no/ /lta ba'i dra ba ni sdud cing 'ching bar byed pas dra ba ste/ lta ba drug cu rtsa gnyis la sogs pa'o/ /lta ba de rnams kyis bden par brtags pa'i ma rig pa la sogs pa'i rkyen rnams gang nas kyang 'ong ba med cing /gang du yang 'gro ba med la phyi rol pas brtags pa dbang phyug dang rang gi sde pas 'dod pa'i phung po la sogs pa med pa'o/ /'dod chags med cing zhes pa la sogs pas ni ma rig pa'i rkyen gyis las 'dus byas pa dang / las kyi sa bon sred pas mthu dang ldan par byas pa yang med de/sngon yang med ces pas ni de dag tshe snga mas bsdus pa yang med ces pa'o/ /las med byed med ces pas ni phyi rol pas brtags pa rnams kyang med pa'o/ /byas pa med cing 'dus byas med/ /ces pas ni da ltar gyi dus na rnam par shes pa dang /ming dang gzugs la sogs pa'i dngos po dang / de rnams snga ma snga ma rnams kyis 'dus byas pa med pa'o/ /mtha' yang med cing chags pa med pa ni phyi ma'i mtha' ste sred pa dang len pas ma 'ongs pa'i ming dang gzugs 'grub par byed pa'i sa bon mthu dang ldan par byas pa dang /de las ma 'ongs pa'i phung po 'grub pa la sogs pa med pa'o/ /thar pa ni srid pa lugs las bzlog pa'o/ /chos ma yin pa ni mi dge ba'o/ /dus med mya ngan 'das pa med/ /ces pa ni phyi rol pas brtags pa'i dus dang mya ngan las 'das pa'i med pa'o//log dang mya ngan 'das pa med/ /ces pa ni 'khor ba las log cing mya ngan las 'das pa ste/ sangs rgyas pa rnams kyis brtags pa'o/ /lta ba thams cad spangs pa ni lta ba'i yul bkag pas sna tshogs su brtags pa thams cad sems yin zhes pa'o/ /lus ni sdug bsngal gyi bden pa'o//nyon mongs pa dang las kyi lam ni kun 'byung ngo / /lus la sogs pa rmi lam la sogs pa dang 'dra bas de ltar snang ba sems yin zhing / sems yang don dam par ma grub pa'o/ /de 'dra ba'i sems kyi chos nyid rtogs pa'i phyir mtha' gnyis su brtags pa phyin ci log nyid du mthong bar 'gyur ba'o//sa snang rgyu byung nges pa ni/ /zhes pa ni sa la sogs pa kha dog dang dbyibs kyi rnam par nges pa dang / yul dang dus nges par mi rnams la snang ba ni bag chags la sogs pa'i rgyu yis byung ba ste/ kun rdzob tsam du sems kyi ngo bo bden pa'o//sems ni snang ba med pas byung / /zhes pa la sogs pas ni khyad par du kun gzhi rnam par shes pa ni rnam pa gsal ba med pa'i rang gi rigs snga ma las byung ba'o/ /mi rnams kyi ni zhes pa la sogs pas snga ma de nyid rgyas par 'chad pa'o/ /gzhan yang sems rang bzhin gyis rnam par dag pa ni bag chags la sogs pa glo bur gyi dri mas mi mdzes pa ste/dkar po'i ras la dri ma snang zhing mi mdzes la/ dri ma la ni dkar po med cing mi snang ba dang mtshungs pa'o/ /gzhan yang nam mkha' glo bur gyi sprin gyis bsgribs shing mi snang ba bzhin du sems kyi chos nyid kyang mi mthong bar byas pa'o//de ltar sems la bag chags kyis bsgos shing de nyid ji ltar ldog par 'gyur snyam na/ sems ni zhes pa la sogs pa ste/ tshig gi don ni sngar bstan to/ /byang chub sems dpa' rnam pa gsum/ /zhes pa ni byang chub dman pa sngon du btang nas dus ring mo zhig nas sangs rgyas par 'gyur ba dang /dbang po rnon po de 'dra ba sngon du ma song bar myur du tshogs rdzogs par byas nas/ 'tshang rgya ba dang / 'dod chen pa dang gsum du 'gyur ba'o/ /rnam grangs gzhan du yang sngar bshad zin to/ /skar ma dang ni sprin lta bur/ /zhes pa la sogs pas ni sprin gyis ma bsgribs pa'i dus na skar ma dang nyi zla'i gzugs dang 'od snang bar 'gyur ba dang 'dra bar bag chags las byung ba'i sems nyid sna tshogs su snang la/de 'dra ba'i dri mas bsgribs pa ni sems kyi de bzhin nyid mi snang ste/ sprin gyis bsgribs pa na/ nyi zla la sogs pa mi snang ba bzhin no//smig rgyu ba dang lnga yin no/ /zhes pa la sogs pas ni chos kyi rab tu dbye ba nyid ji lta ba bzhin du song ste/ de la 'dir sgyu ma la sogs pa'i dpe rnam pa bzhi dang / de rnams kyis mtshon pa rdzas dang btags pa'i gzugs te/ lnga po de dag gis sgyu ma la sogs par chos mtshungs pa'o//yang rnam pa gcig tu na 'byung ba bzhi'i gzugs dang / nam mkha' kha dog gcig pa ste/ rdzas dang btags pa'i gzugs rnam pa lnga ni sgyu ma la sogs pa dang mtshungs pa'o/ /'dod pa can ni rnam pa lnga/ /zhes pa la sogs pas ni gnas skabs kyi rigs can lnga po de nyid khams gsum gyi bde ba dang /mya ngan las 'das pa thob par 'dod pas/ 'dod pa can lngar 'gyur zhing / de 'dra ba'i 'dod pa thob par byed cing rigs sbyong bar byed pa'i theg pa yang lnga ste/ lha dang tshangs pa'i theg pa la sogs pa sngar bstan pa rnams so/ / mya ngan las 'das pa rnam pa drug ni nyan thos dang / rang rgyal ba dang / de bzhin gshegs pa'i mya ngan las 'das pa gsum la/ phung po'i lhag ma dang bcas pa dang / lhag ma med pa gnyis gnyis su phye bas rnam pa drug tu 'gyur ba'o/ /gal te de bzhin gshegs pa la de ltar 'byed pa mi 'thad do snyam na skyon med de/'phags pa gser 'od dam pa las/ de bzhin gshegs pa yang gzugs kyi sku rnam pa gnyis la brten nas/ phung po lhag ma dang bcas pa'i mya ngan las 'das pa zhes bya la/ chos kyi sku la brten nas ni lhag ma med pa'o zhes gsungs pa'i phyir ro//phung po tha dad nyi shu bzhi/ /zhes pa ni gzugs kyi phung po brgyad dang / rnam par shes pa'i tshogs brgyad dang / mig gi 'dus te reg pa'i rkyen gyis tshor ba la sogs pa tshor ba drug dang / 'du shes dang / 'du byed kyi phung po rnam pa gnyis te/ de ltar na nyi shu rtsa bzhir 'gyur ba'o//gal te gzugs kyi phung po ni mngon pa'i bstan bcos la sogs pa nas bco lnga la sogs par gsungs pa ma yin nam zhe na/ skyon med de/ 'dir rgyur gyur pa'i gzugs rnam pa bzhi dang / 'byung ba las gyur pa'i gzugs rnam pa bzhi ste/ nang gzugs can gyi dbang po rnams kyang gzugs dang /dri dang ro dang reg byas bsdus pas de dag tsam du zad de/ sgra ni 'dir gzugs su bgrang bar bya ba ma yin no/ /de ltar yang 'phags pa chos yang dag par sdud pa'i mdo las kyang gsungs pa'i phyir the tshom mi bya'o/ /de las gzhan du bstan pa ni cung zad spros te rnam par phye ba'am/grub pa'i mtha' ngan pas brtags pa yin no/ /de ltar phung po nyi shu rtsa bzhi po de rnams nyid sangs rgyas nyi shu rtsa bzhi yin te/ de'i don yang chos thams cad ma skyes pa dang / ma 'gags pa ni rang bzhin gyis mya ngan las 'das pa'i sangs rgyas nyid kyi rnam grangs su sngar bstan pa dang /mdo sde gzhan dag las kyang / rtag tu skye med chos ni de bzhin gshegs/ /chos rnams kun kyang de bzhin gshegs dang 'dra/ /zhes gsungs pas phung po 'di rnams kyi rang bzhin ma skyes pa dang / ma 'gags pa nyid rang bzhin gyis mya ngan las 'das pa'i sangs rgyas yin pas de ltar gsungs pa'o//yang sbyangs pas rnam par dag pa'i sangs rgyas ni sku gsum gyi bdag nyid sngar bstan pa rnams te/ sangs rgyas rnam pa du ru brjod/ /khyod kyi rang bzhin ji lta bu/ /zhes dris pa'i lan du yang sbyar bar bya'o/ /rgyal po'i sras ni rnam pa gnyis/ / zhes pa ni rigs la gnas shing sems bskyed pa so so'i skye bo'i byang chub sems dpa' dang / sa la zhugs pa'o/ /tshul brgya rtsa brgyad ni sngar bstan pa'i tshig gi tshul brgya rtsa brgyad do/ /nyan thos rnam pa gsum ni sngar bstan to/ /sangs rgyas rnams kyi zhing gcig ste/ /zhes pa la sogs pas ni sbyangs pas rnam par dag pa'i sangs rgyas rnams kyi zhing ni ye shes yongs su dag pa'i snang ba ste/ye shes kyi rang bzhin du gcig pa'o/ /de bzhin du sangs rgyas nyid kyang sku sna tshogs su snang ba yang sangs rgyas kyi rang bzhin ma skyes pa yin pas de'i rang bzhin ni dbyings dang ye shes dbyer med pa gcig nyid do//don dam par ni gcig dang tha dad pa la sogs pa'i spros pa dang bral ba'o/ /de bzhin du rang bzhin gyis mya ngan las 'das pa'i sangs rgyas kyang chos kyi dbyings kyi rang bzhin la dbye ba mi 'thad pas gcig nyid du 'gyur zhing / nyi shu rtsa bzhir phye ba ni chos can tha dad la ltos te/kun rdzob tu bstan pa'o/ /rnam par grol ba de bzhin gsum/ /zhes pa la sogs pa'i don ni sems nyon mongs pa'i sgrib pa las rnam par grol ba ni byang chub rnam pa gsum yin la/ sems kyi rgyud ni rnam pa bzhi yin te/ kun gzhi dang / nyon mongs pa can gyi yid dang /yid kyi rnam par shes pa dang / sgo lnga'i rnam par shes pa'o/ /nga yis bstan pa'i bdag med pa rnam pa drug ni bdag tu sgro 'dogs pa'i gzhi ni rnam par shes pa'i tshogs drug ste/ kun gzhi dang nyon mongs pa can ni rgyu cha phra bas byis pa'i skye bo'i yul ma yin pa'i phyir/ bdag tu sgro 'dogs pa'i gzhi ma yin no//de ltar dgag bya sgro 'dogs pa'i rten drug yin pas de dag bkag pa'i chos kyang rnam pa drug ces bya'o/ /shes par bya ba bzhi ni 'phags pa'i bden pa bzhi ste/ shes bya thams cad de rnams su 'dus pa dang / gzhan yang spang bya rgyu 'bras dang / blang bar bya ba'i rgyu 'bras shes pas 'phags pa rnams kyi dgongs pa yongs su rdzogs par 'gyur ba'i phyir shes par bya ba ni de dag tsam du zad do/ /rgyu rnams dang ni 'bral 'gyur ba/ /zhes pa la sogs pas ni phyi rol pas brtags pa'i rgyu la sogs pa'i nyes pa dang bral ba theg pa chen po'i rang bzhin bstan pa'o//skye ba dang ni mi skye ba/ /rnam pa brgyad dang rnam dgur 'gyur/ /zhes pa ni 'phags pa nyan thos slob pa bdun te/ 'bras bu dang po la zhugs pa nas dgra bcom pa'i 'bras bu la zhugs pa'i bar bdun po rnams ni kun du sbyor ba thams cad spangs pa med pas srid par skye ba len pa yin la/dgra bcom pa'i 'bras bu la gnas pa ni kun du sbyor ba thams cad spangs pas mi skye ba nyid du pha rol pos brtags pa ste/ de ltar rnam pa brgyad dang / rang sangs rgyas mi slob pa yang mi skye ba ste/ dgu ru 'gyur ba'o/ /gcig dang rim gyis rtogs pa ste//grub pa'i mtha' yang gcig nyid do/ /ces pa ni dbang po rnon po de kho na nyid zab mo cig car bstan pas rtogs par 'gyur ba dang / dbang po rtul po gang zag la bdag med pa la sogs pa'i rim gyis rtogs par 'gyur ba ste/ de ltar dngos sam brgyud pa'i sgo nas rtogs par bya ba'i don mthar thug pa ni rig pa dang stong pa dang zung du 'jug pa'i don gcig nyid yin no//gzugs med khams ni rnam pa brgyad/ /bsam gtan tha dad rnam pa drug /ces pa ni rgyu snyoms 'jug gis bsdus pa rnam pa bzhi dang / 'bras bu skye bar gtogs pa rnam pa bzhi ste/de ltar brgyad du 'gyur la/ bsam gtan gyi dbang du byas na nyer bsdogs dang / bsam gtan khyad par can dang / dbang po la sogs pa'i dngos gzhi rnam pa bzhi ste/ rnam pa drug tu 'gyur ba'o/ /de las sngar bstan pa'i byis pa nyer spyod kyi bsam gtan la sogs pa bzhi ni bsam gtan khyad par can gyis bsdus pa'o//rang rgyal sras po rnams kyi ni/ /'byung ba rnam pa bdun du 'gyur/ /zhes pa ni rang rgyal ba rnams kyang mthar thug pa la sangs rgyas kyi gdung sob par byed pas sras po nyid ces bya la/ des mya ngan las 'das par 'byung ba'i lam ni bdun te/tshogs kyi lam dang / sbyor ba'i lam nges par 'byed pa'i cha bzhi dang / mthong ba dang bsgom pa'i lam ste rnam pa bdun du 'gyur ba'o/ /dus gsum po yang yod ma yin/ /zhes pa la sogs pas gang zag la sogs pa rnam par phye ste bstan pa de rnams thams cad kyi de bzhin nyid ston te/de rnams thams cad kyang dus gsum gyis bsdus pa don dam par yod pa ma yin pa'o/ /de lta na de rnams kyi snang ba yin pas sems kyi ngo bor ston nam zhe na/ sems kyi snang ba dang bral zhes pa la sogs pa gsungs so/ /gzhan yang sprul pa'i sangs rgyas yum gyi rum du 'jug pa dang /rum nas skye ba dang / chos kyi 'khor lo bskor ba dang / skye rga na 'chi la yid byung nas khyim nas mngon par 'byung ba dang / de dag gi sngon du dga' ldan gyi gnas na dam pa tog dkar po'i tshul du bzhugs pa dang / sangs rgyas kyi zhing gzhan du gshegs par snang ba yang de ltar bden pa ma yin zhes pa'o//gzhan yang bya rgod phung po la sogs pa'i gnas phan tshun du 'pho bar snang ba dang / grong khyer du ljongs rgyu zhing sems can gyi drung du gshegs shing de dag 'dul bar 'gyur ba'i chos ston pa dang / tha mar grong khyer rtswa mchog tu mya ngan las 'da' ba ston pa dang /bden pa mngon par rtogs pa dang / 'dul bar bya ba'i zhing rtogs pa rnams kun rdzob tu zag pa med pa'i las sam/ bsod nams kyi las kyis 'phangs pa'o/ /gzhan yang stong gsum gyi stong chen po'i 'jig rten gyi khams kyi bar du sku 'chag pa lta bur ston pa dang //dka' thub kyi nags tshal du gshegs shing der snyoms par 'jug pa khyad par du sbyong bar ston pa dang / de 'dra ba'i mu stegs sam/ gzhan yang rangs byed kyi bu lhag spyod la sogs pa'i drung du gshegs shing / der bsam gtan dang gzugs med kyi ting nge 'dzin thob par ston pa dang /de dag nas 'phos nas bdag med par rtogs pa dang / theg pa'i bye brag gong nas gong du thob pa dang / 'bras bu mthar thug pa thob par bstan pa'i spyod yul ni bsam gyis mi khyab ste/ don dam par de lta bu'i ngo bor grub pa med pa'o/ /zla ba skar ma zhes pa la sogs pas ni/sa dang skar tshogs ji lta bu/ /rgyal po 'khor los sgyur rnams dang / /drang srong dri zas kun bkang ba/ /zhes pa la sogs pa dris pa'i lan du sbyar bar bya'o/ /yang gzhan dag dgra bcom pa la sogs pa las dang sred pa'i rgyu las ma byung ngo snyam du sems na/de dag kyang bsam gyis mi khyab bsgyur ba'i 'chi 'pho ba dang ldan pa de srid du zag pa med pa'i las mngon par 'du byed pa dang / nyon mongs pa'i bag chags las byung ba'o/ /ba lang lug dang zhes pa la sogs pas byang chub sems dpa' rnams kyi thabs la mkhas pas yongs su bzung ba'i spyod pa'i khyad par sngar bstan pa las lhag tu ston te/de yang rab tu byung ba'i phyogs kyis bsdus pa'i spyod pa'i khyad par ro/ /zhing gi dngos por rnam par rtog /ces pa ni zhing rmod pa la sogs pa ste/ dge slong la sogs pas de dag thams cad spang bar bya ba'o//sa la yang ni mi bsku'o/ /zhes pa ni mi rnams yongs su spyod pa dang / dkon mchog gi pho brang la sogs par dri ma ngan pa mi 'dor ba'o/ /gzhan yang khyim pa'i rtags spang bar bya ba'i don du/ snam bu sngon por btsos pa dang / ba lang gi lci ba dang sa dang 'bras bu dang /lo ma la sogs pa'i tshon gyis dkar po'i gos rnams ngur smrig gi kha dog du bsgyur ba'o/ /de bzhin du rnal 'byor bsgom pa'i gegs su 'gyur ba'i bzo dang sgyu rtsal la sogs pa bslab par mi bya ba'o/ /'on kyang de dag ni 'dod pa'i yon tan la mngon par dga' ba'i khyim pa rnams kyis bya ste/de yang thabs dang shes rab kyis zin par bya ba'o/ /gos gsum ni bla gos dang / mthang gos dang / chos gos snam sbyar ro/ /bde bar byin pa ni nan gyis blangs pa ma yin pa ste/ gos kyi rin du sbyor bar bya'o/ /'dres par gyur pa'i 'tsho ba ni rtsod pa'i gzhi yin pas spang bar bya ba'o//shi ba dang byis pa btsas pa'i khyim du shid zan dang / dga' ston gyi zas bza' bar mi bya ste/ gdung ba dang chags pas g.yeng bar 'gyur ba'i phyir ro/ /yang du ba 'thul ba'i gtsug lag khang rnams su rim gyis zas kyi don du rtag tu bsten cing don du gnyer ba spang bar bya'o//de dag la sogs pa bdag gi 'dod pa bsgrub par bya ba'i don du bya ba gang byed pa rnams ni mi rung ba ste/ byang chub sems dpa' rnams kyi bya ba thams cad ni gzhan gyi don du bya bar rigs pa'i phyir ro/ /'di rnams kyang / rnal 'byor la ni ji ltar 'jug /ces pa la sogs pa'i lan du sbyar bar bya'o/ /'jig rten zhes pa la sogs pas ni de rnams la zhen pa spang ba nyid du ston te/ 'jig rten rgyu rkyen las byung zhes pa la sogs pas ni rang gi sde pas brtags pa'i phyogs spangs pa'o/ /bsam pa med par zhes pas ni mtshan mar 'dzin pa'i bsam pa spangs pa'o//gzhan yang sde snod dag las bshad pa rnams kyi nang nas rigs pas 'thad pa'i don las yang dag pa'i de kho na nyid bsdus nas bsgom par bya ba'o/ /de ltar bsgoms pa'i ting nge 'dzin gyi mtshan ma la sogs pa bstan pa ni dgos pa'i don gzhan dang ldan pas sngar bstan pa dang zlos par mi 'gyur ba'o//rgyu med pa las zhes pa la sogs pas ni gzhan dag rtag pa dang chad pa la sogs pa'i mtha' gnyis dang bral ba'i dbu ma'i don rgyu dang rkyen gyis ma bskyed pa'i dngos po yod par smra ba ste/ rgyu med par smra bas ni chad par lta ba skur pa'i mthar 'gyur la/dngos po yod par smra bas ni sgro 'dogs pa'i mthar 'gyur ba'o/ /gzhan yang phyi rol gyi dngos po sems snang ba tsam ngo bo nyid med par ma rtogs par chad pa'i lta bas 'jigs nas phyi rol la sogs pa'i dngos por 'dzin pa yang sgro 'dogs kyi mthar gyur pa ste/de ltar mtha' gnyis su ltung bzhin du/ dbu ma'i don ston pa'o zhes khas 'che zhing rlom sems pa ni shin du phyin ci log pa'o/ /sems tsam du ni zhes pa la sogs pas ni dbu ma'i don phyin ci ma log pa ston te/ snang ba med ces pa ni snang ba sems kyi ngo bor gyur pa yang don dam par med pa'o//skye ba dang zhes pa la sogs pas mtha' gnyis po de dag tu mi brtags par gdams pa'o/ /rnam par rtog pa 'jug med pas/ /zhes pa la sogs pas sems kyi 'jug pa'i chos nyid ma rtogs par re zhig rnam par rtog pa 'jug pa med pa tsam gyis thar par 'dod pa ni mi 'thad de/gzung ba dang 'dzin pa gnyis su rtogs pa'i sa bon ma spangs pa'i phyir de dag spong bar mi 'gyur ba'o/ /spong dang yongs su 'dzin pa ni blang bya dang dor bya nyid du rtogs pa ste/ rnam rtog mi 'jig cing rgyun gyis 'jug pa'o/ /gzhan yang mu stegs can gyi bdag tu lta ba la sogs pa'i nyes pa spangs kyang sems kyi 'jug pa'i mtshan mar 'dzin na phan tshun ltos pa'i phyir ldog pa'i mtshan mar kyang 'dzin pas/de dag tu 'dzin pa spangs te/ mkhas pa dag gis sems kyi chos nyid de bzhin nyid gzung zhing rtogs par bya ba'o/ / mi skye ba la zhes pa la sogs pas ni de ltar rtogs pa'i phan yon ston te/ srid par skye ba dang shi 'pho ba la sogs pa med kyang sems can gyi don du skye ba sna tshogs pa la sogs par ston pa ste/ nyon mongs bsal bar gyur kyang skye ba ston par byed/ /rga dang na dang 'chi ba med kyang 'chi 'pho ston/ / zhes gsungs pa bzhin no/ /sems la sems kyir gyur nas ni/ /zhes pa la sogs pas ni sems kyi chos nyid ji lta ba bzhin rtogs par gyur nas/ gdul bya'i khyad par 'ga' zhig la/ /sems tsam du yang smra ba'o/ /de nyid gsal bar bstan pa ni/ /sems rnams la zhes pa la sogs pa ste/kun rdzob tu rnam par shes pa'i tshogs rnams la sems tsam du smra zhing / don dam par sems med pa dang / med bzhin du kun rdzob tu sems las rnam pa sna tshogs su 'byung bar ston pa ste/ gzugs dang dbyibs la sogs pa sna tshogs sems kyi rnam par 'phrul pa nyid du ston cing de ltar rig pa'o//rnam pa mang po'i gzugs gzhan gyis/ /zhes pa la sogs pa'i don ni ji ltar 'dul ba'i gzugs sna tshogs kyis sems tsam du ston cing / rdzas su grub pa'i gzugs med pa ye shes kyi rang bzhin de nyid gzugs med pa'i gzugs sna tshogs su ston te/rmi lam gyi gzugs la sogs pa bzhin no/ /sems tsam gyi ni rgyu dag dang / /zhes pa ni kun rdzob tu'o/ /de dag shin tu gyur pa ni sems gnas gyur pa'o/ /rang bzhin gnyis ni kun du brtags pa dang / gzhan gyi dbang ste/ gzhan dbang don dam par brtags pa yang kun du brtags pa yin pas gnyi ga yang kun du brtags pa'i rang bzhin las phye ba'o//rnam pa gzhan du rtog ces pa ni rig pa sgyu ma lta bu las gzhan don dam pa'i skye ba la sogs par rtog pa'o/ /rtog pa brtags zhes bshad pa ste/ /zhes pa ni gzhan dbang gi rtog pa don dam pa'i dngos por zhen pa ni brtags pa'o//kun rdzob tu ni rnam par rtog pa la sogs pa mthong zhing myong ba'i phyir/ rgyu las byung ba'i gzhan gyi dbang ngo / /zhing dang zhes pa la sogs pas ni de bzhin nyid zab mo tshul gzhan gyi sgo nas ston pa ste/ sangs rgyas bye brag sum cu drug /ces pa ni sngar bstan pa'i sangs rgyas nyi shu rtsa bzhi dang /slob pa dang / mi slob pa dang / mi slob pa'i nyan thos dang / rang sangs rgyas dgu dang / rang sangs rgyas slob pa dang / sngar bstan pa'i byang chub sems dpa' rnam pa gnyis te/ sum cu drug go/ /de rnams las bye brag tu rang sangs rgyas mi slob pa dang /dgra bcom pa ma gtogs pa gang zag rnam pa bcu dang / sems can so so'i sems rgyud rnams ni sangs rgyas rnams kyis gdul bar bya ba'i zhing gi snod yin no/ /'phags pa mi slob pa ste/ gnyis ni re zhig zag pa med pa'i dbyings na gnas shing / ting nge 'dzin gyi myos pas myos pa'i phyir gdul bar bya ba'i zhing ma yin pa'o//mthar thug pa la ni de dag kyang sangs rgyas nyid du 'gyur ro zhes sngar bstan to/ /'gro bar de bzhin zhes pa la sogs pa'i don ni 'gro ba'i gnas rnams su chos kyi sku ye shes kyi bdag nyid dang / de'i ngo bor gyur pa'i longs spyod rdzogs pa'i sku ste/chos nyid kyi sangs rgyas las ma gtogs pa 'gro ba tha mal pa rnams la gzugs kya sku sna tshogs su snang ba ni sangs rgyas snga ma de dag gi sprul pa ste/ sems can rang rang gi dge ba'i bag chags dang bcas pa'i sems kyi rgyud las sangs rgyas kyi gzugs su mthong ngo //de ltar mthong ba'i mtshan ma dang 'brel pa las/ mtshan ma sangs rgyas kyi ngo bor nor pa phyin ci log gi rtog pa 'jug mod kyi/ ngo bo'i sangs rgyas ni snga ma de dag tsam du zad do/ /da ltar rtog pa yang mtshan ma las gzhan ma yin zhing / de bzhin nyid kyang rnam par rtog pa las gzhan ma yin pa ste/chos can dang chos nyid dbyer med pa'o/ /rang bzhin gyi dang zhes pa la sogs pas sbyangs pa'i rnam par dag pa'i sangs rgyas ston te/ chos kyi sangs rgyas pa zhes pa la sogs pa'o/ /sangs rgyas mang po sum cu drug /rang bzhin gyis ni sangs rgyas yin/ / zhes pa'i don ni sngar bstan pa'i phung po tha dad nyi shu bzhi yang sems kyi snang ba sems nyid yin la/ de rnams kyi chos nyid skye ba med pa la sogs pa dang / don dam par ma skyes bzhin du de ltar myong ba ma 'gags pa ste/ rig pa dang stong pa zung du 'jug pa ni sangs rgyas kyi rang bzhin nyid du rgyas par sngar bstan to//gang zag rnam pa bcu gnyis kyi sems kyi chos nyid kyang de nyid dang mtshungs shing / glo bur gyi dri ma yang ci rigs par spangs pas/ rang bzhin gyis sangs rgyas zhes bya'o/ /sngon po zhes bya ba la sogs pas sngar bstan pa'i don kyang gsal bar byed cing /phung po la sogs pa'i chos nyid dang chos can de rnams kyang de nyid dang gzhan du brjod du med par ston te/ tshig gi don ni sngar bstan zin to/ /nor pa rnam pa gnyis ni brtags pa dang / gzhan dbang ngo / /gsum pa ni yongs su grub pa'o/ /gang las nor pa 'byung ba dang / /zhes pa la sogs pa'i don ni kun gzhi rnam par shes pa las ma rig pa la sogs pa gzhan dbang gi rang bzhin bcu gnyis dang /khams bco brgyad de/ de dag gi bag chags sam rigs rnams 'byung ba'o/ /gang la brten te 'byung ba ni nang gi skye mched drug dang / dmigs pa'i rkyen phyi'i skye mched drug la brten te rnam par shes pa'i khyad par rnams 'byung ba'o//de'i phyir na ngas bshad ces pa ni kun rdzob tu de ltar gnas pas bshad pa'o/ /brtag byar 'jug pa ni shes rab kyi byed pa 'jug pa'o/ /skar dang skrar gzung zhes pa ni chu la skar ma'i gzugs dang / bar snang la skra shad du gzung ba'o/ /mtshan nyid kyis ni gsum du 'gyur/ /zhes pa ni kun rdzob tu mtshan nyid rnam par gzhag pa'i dbang du byas nas rang bzhin gsum ma 'dres pa'o/ /de la dge bar byam yin/ /zhes pas ni sems kyi chos nyid spros pa dang bral ba ni dge mi dge la sogs pa'i bag chags kyis bdag nyid du bskyed par bya ba ma yin pa'o//mngon par shes dang dbang gis dag /ces pa ni kun rdzob tu glo bur ba'i dri ma dag pa'o/ /'di rnams kyis kyang sangs rgyas kyi rigs su nges pa'i gnas skabs ston te/ sa bdun pa yan chad do/ /sangs rgyas nyid kyi sa ni rigs mthar thug pa'o//chos kyi sprin ni de bzhin gshegs pa zhes bya ste/ de'i rgyu mtshan yang sngar bstan to/ /de dag sangs rgyas rnams kyi rigs/ /zhes pa de'i rigs su nges pa'o/ /lhag ma ste sa drug pa man chod ni de'i rigs su ma nges pa'o/ /nyan thos dang rang sangs rgyas kyi theg pa gnyis thob par byed pa'o//de'i don ni byang chub sems dpa' dbang po rtul zhing mos pa dman pa dag sa drug pa'i gnas skabs na rten 'brel lugs su 'byung ba dang lugs las bzlog pa'i don cung zad rtogs shing 'khor ba dang mya ngan las 'das pa'i chos 'ga' zhig mngon du byas pas 'khor ba las skyo zhing myur du mya ngan las 'da' bar 'dod pa dang /sems can gyi don gyi sbyor ba re zhig rgyun chad nas ting nge 'dzin gyi bde ba la yun ring du gnas pa ni byang chub gnyis po dang chos mthun pas de dag thob par byed ces gsungs pa'o/ / ting nge 'dzin gyi bde ba yang 'gog pa'i snyoms par 'jug pa ste/ sa drug pa nas thob pa nyid du sngar bstan to/ /gal te de lta na/ sa thob 'jigs pa lnga dang bral/ /zhes gsungs pa dang 'gal lo zhe na/ ma yin te/ de ni byang chub sems dpa' dbang po rtul po ma yin pa'i dbang du byas pa'am/yang na de 'dra ba'i sdug bsngal rags pa med kyang sems can gyi don byed pa'i dka' ba'i spyod pas 'jigs shing sdug bsngal phra mo yod pa 'gal ba med pa'i phyir ro/ /yang / sems can rgyud kyi bye brag dang / /zhes pa la sogs pas ni sa bdun pa'i gnas skabs na yang byang chub sems dpa' dbang po shin tu rtul zhing /khams dang mos pa shin tu dman pa rnams chos rnams kyi rang dang spyi'i mtshan nyid ji lta ba bzhin du mi shes pa dang / sa'i go rims dang mtshams sbyor ba la mi mkhas pas mu stegs byed kyi lta ba dang / lam du ltung bar gyur na mi rung zhes de dag rnams la sa'i mtshan nyid la sogs pa rnam par phye zhing gsal bar bya ba'i phyir yang /sems kyi dbang du 'gro ba'i sa/ /bdun po sangs rgyas rnams kyis bshad/ /ces pa ste/ de dag la sems kyi tshogs brgyad gnas ma gyur pa snga ma ltar sems can gyi don gyi sbyor ba la skyo ba dang / ting nge 'dzin gyi bde ba la yun ring du gnas pas de'i sems dbang du byas te tshogs yongs su rdzogs pa dang / mngon par rtogs pa bul bas de 'dra ba'i skyon dang bcas pa'i sa bdun po rnams bshad pa'o/ /gal te de ltar na sa bdun pa yan chod sangs rgyas kyi rigs su nges par bstan pa 'gal lo zhe na/skyon med de/ de ni phal che ba la dgongs te bstan pas so/ /rnam pa thams cad du sangs rgyas kyi rigs su nges pa ni sa brgyad pa yan chod yin par gsung rab dag las bshad do/ /rnam pa gcig tu na 'di rnams kyi don ni sngar bstan pa ltar sa bdun pa yan chod sangs rgyas kyi rigs su nges pa yin na mdo sde 'di dang gzhan dag las kyang sa bdun pa man chod sangs rgyas kyi rigs su ma nges par bshad pa 'gal lo zhe na/skyon med de/ sems can gyi rgyud kyi bye brag ste/ byis pa'i skye bo 'ga' zhig de ltar bstan pas 'dul bar 'gyur ba dang /kun rdzob tu sa de dag gi mtshan nyid ma 'dres par gzhag pa'i don du bshad pas so/ /gzhan yang byis pa'i skye bo dag rtogs par mngon pa'i nga rgyal gyis kho bo ni sangs rgyas kyi rigs su nges pa ste/ bdud kyi las spangs pa'o snyam nas brtson 'grus zhan par 'gyur bas nyes pa de 'dra ba spang ba'i don du sa bdun pa man chad du yang sangs rgyas kyi rigs su ma nges pa nyid du bshad pa'o//de ltar bstan pa'i dgongs gzhi yang / dbang po rtul po rnams cung zad mngon par rtogs pa bul ba la sogs pa'i nyes pa dang 'brel pa'o/ /ngag lus zhes pa la sogs pas ni de rnams la sgo gsum gyi mi dge ba'i bag chags mi 'jug cing sa brgyad pa la ni de 'dra ba'i bag chags kyi gnas kun gzhi dang /kun gzhi'i snang ba la sogs pa rmi lam lta bur rtogs shing / rtogs pa'i ye shes lhun gyis grub cing rgyun mi 'chad pas chu bo dang mtshungs shing 'dra ba'o//sa brgyad dang ni zhes pa la sogs pas ni byang chub sems dpa' dbang po rnon po rnams sa dang po la sogs pa'i rjes thob kyi gnas skabs na bzo dang rig pa'i gnas thams cad la mkhas par byed cing / gzhan la yang de bzhin du ston pa dang / 'khor los sgyur ba'i rgyal po'i lus bzung nas sems can gyi don byed pa ste/'phags pa sa bcu pa las sa dang po la gnas pa'i byang chub sems dpa' ni 'dzam bu'i gling la dbang ba'i 'khor los sgyur ba'i rgyal po'i lus 'dzin par byed ces pa dang / sa gnyis pa la gnas pa ni gling bzhi la dbang ba'i lus 'dzin par byed ces pa la sogs pa gsungs pa'i phyir ro//stug po bkod pa'i rgyan las kyang de bzhin du gsungs pa'o/ /sa brgyad dang ni rnam lnga zhes khyad par du gsungs pa ni brgyad pa la sangs rgyas rnams kyis rjes su bzung nas sems can gyi don la sbyor ba dang / lnga pa la shes bya thams cad bsdus pa bden pa bzhi rtogs pa'i shes rab dang ldan pas de ltar bstan pa ste/sa gzhan dag la yang de ltar mi slob pa ni ma yin no/ /skye dang mi skye zhes pa la sogs pas mtha' gnyis su 'dzin pa spangs par gdams pa'o/ /de ltar mtha' gnyis su bstan pa ni rang rgyal dang nyan thos rnams la bshad pa'o//kun rdzob tu ni dngos rnams yod/ /don dam du ni rang bzhin med/ /ces pa la sogs pa gsungs pa la 'dir bden pa gnyis su dbye ba'i gzhi ni shes bya'i gnas su gyur pa'i spyi tsam yin la/ de dag so so'i mtshan nyid la don dam pa'i bden pa ni rigs pa yul dang yul can gyis bsdus pa'o//kun rdzob ni 'khrul pa yul dang yul can gyis bsdus pa ste/ de'ang gzhan dag snang ba dang bcas pa'i blo thams cad ni 'khrul pa yin zhing / de'i yul can phyin ci log pa'o zhes ston pa ni mi 'thad de/ de lta na de bzhin gshegs pa la yang rjes thob kyi gnas skabs na sku dang zhing khams la sogs pa'i rnam par snang ba yod pas 'khrul pa dang bcas pa nyid du 'gyur ro//gal te nyes pa der gyur du dogs pas rjes thob kyi snang ba med de/ mnyam par gzhag pa'i ye shes 'ba' zhig tsam mo zhe na/ mi 'thad de/ de la rang ngam gzhan gyi rnam par sbyang zhing snang ba med na ye shes nyid du mi 'thad la/de ltar myong zhing snang ba yang 'khrul pa dang bcas pa nyid du 'gyur ro/ /gal te 'dir ye shes kyi rang bzhin don dam par med pa la/ yod pa nyid du myong na 'khrul pa nyid du 'gyur ba las/ de ltar ma myong ste/ med pa la med pa nyid du rtogs shing kun rdzob tu myong ba ma 'gags pa tsam yin pas 'khrul par mi 'gyur ro zhe na/de bzhin du sku dang zhing khams la sogs pa'i rnam pa yang ye shes las tha dad du gyur pa med cing ye shes nyid kyi dngos po bden par yang ma grub pa la/ de ltar yod par 'dzin na 'khrul pa nyid du 'gyur ba las/de ltar mi 'dzin cing don dam par med pa la med pa nyid du rtogs shing kun rdzob tu de ltar snang ba ma 'gags pa tsam yin pa'i phyir ro/ /yang gzhan dag mnyam par gzhag pa'i ye shes nyid kyang med par khas len pa ni skur pa 'debs pa'i mtha' log par lta ba chen po nyid du sngar rgyas par bstan to//yang gzhan dag de bzhin gshegs pas 'khrul pa la 'khrul pa nyid du mkhyen pas 'khrul pa ma yin zhes pa yang mi 'thad de/ de ltar mkhyen kyang snang ba mi ldog cing de yang 'khrul pa nyid yin par khas blangs pa'i phyir ro/ /gzhan yang 'khrul pa la 'khrul par mkhyen pas 'khrul pa ldog na de ltar mkhyen pa'i ye shes nyid 'khrul par 'gyur te/ye shes skyes pa na gzhal bya'i yul mi bden pa'i phyir dang / ma skyes pa'i dus na ye shes med pa'i phyir ro/ /de'i phyir yod pa dang med pa la sogs pa'i khyad par gang du yang sgro 'dogs pa med pa'i snang ba tsam ni dngos su 'khrul pa ma yin la/yang bden pa'i dngos po med pa'i myong ba rang snang ba tsam du rtogs pa yang 'khrul pa ma yin no/ /de lta na yang phyin ci log gnas ma gyur pa byis pa'i skye bo la sogs pa'i snang ba ni phyin ci log gis kun nas bslang ba de kho na nyid la sgrib par byed pa 'ching ba'i rgyu nyid yin pas kun rdzob ces bya'o//phyin ci log gnas gyur pa sangs rgyas dang byang chub sems dpa' chen po rnams kyi snang ba ni/ de las bzlog par rigs pa dang rigs pa'i yul yin pas don dam pa zhes bya'o/ /gal te 'dir don dam pa ni spros pa thams cad dang bral zhing shes brjod kyi yul las 'das pa ma yin nam/ji ltar na rigs pa'i yul du 'gyur/ gzhan yang rigs pa ni sems kyi rgyu ba yin la/ de yang kun rdzob nyid du gsungs te/ don dam pa ni gang la sems kyi rgyu ba yang med na zhes gsungs pa'i phyir ro zhe na/skyon med de/ don dam pa'i de kho na nyid spros pa thams cad dang bral ba la rnam par mi rtog pa'i ye shes kyis kyang de 'dra ba'i spros pa rnam par bkag pas ye shes dang / shes bya mthun pa tsam la rigs pa'i yul zhes bya ba'i mtshan ma dang bcas pa'i tshul du yul du byas pa med pa'i phyir ro//rnam pa gcig tu na don dam pa sems kyi chos nyid spros pa dang bral zhing 'od gsal ba de nyid rnam par mi rtog pa'i ye shes kyi so so rang rig pa'i tshul du rtogs pa yin gyi/ mtshan ma'i bye brag sna tshogs su bzung zhing spros pa ni ma yin pa'i phyir ro/ /sems kyi rgyu ba don dam pa la med pa nyid du gsungs pa yang de bzhin te de las bzlog nas yod pa nyid du brtags pa ni kun rdzob nyid du 'gyur ba'o//des na kun rdzob tu sems kyi rgyu ma 'gags shing phyin ci log gi spros pa gcod pa dang / don dam pa'i dngos po ma grub pa ste/ rig pa dang stong pa zung du 'jug pa ni don dam pa nyid do zhes rgyas par bstan zin to//de skad du yang / so so rang rig mtshan med spyod yul ba/ /zhes pa la sogs pa gsungs pa'i phyir ro/ /'dir byis pa'i skye bo rnams kyi spros pa gcod par byed pa'i rjes su dpag pa yang phyin ci log gi spros pa gcod pa'i ldog pa nas don dam pa'i bden pa yin zhing de nas gtan la phab pa'i don kyang don dam pa yin la/brjod pa dang 'dres rung gi rnam par sgro 'dogs pa'i cha nas ni yang dag pa'i rigs pa ma yin te phyin ci log nyid yin zhing / de'i yul yang kun rdzob kyi bden pa'o/ /gal te sngar bstan pa ltar khyad par gyi chos su sgro 'dogs pa med pa'i snang ba 'ga' zhig 'khrul pa ma yin na/de dag kun rdzob tu yang mi 'thad de/ de'i mtshan nyid med pa'i phyir ro zhe na/ de ltar bden mod kyi 'dir mtshan nyid kyang 'khrul pa yul dang yul can dang / des kun nas bslang ba'i snang bar 'dug pa yin la/ de 'dra ba'i mtshan nyid ni snga ma de la yang yod pa'i phyir skyon med do//gzhan yang 'dir shes bya'i de kho na nyid ji lta ba ni don dam pa'i bden pa yin la/ de las gzhan du rnam par gzhag pa ni kun rdzob kyi bden pa'o/ /de dag gnyis su dbye ba'i don ni de kho na nyid du dngos po gcig pa dang tha dad pa las grol ba ste//dngos po'i ngo bo nyid ma grub pa'i phyir ro/ /des na de nyid dang gzhan du brjod du med pa ste/ dgongs pa nges par 'grel pa las ji skad gsungs pa bzhin no/ /kun rdzob tu gnyis su phye ba'i don ni sngar bstan pa ltar mtshan nyid mi 'dra ba'o/ /shes rab kyi pha rol tu phyin pa'i mdo las gcig tu bstan pa ni dbyer med pa tsam las dgongs pa'o//gnyis su 'byed pa'i rgyu mtshan ni shes ngo gnyis la ltos pa ste/ blo 'khrul pa'am 'khrul pas kun nas bslang ba'i shes pa la slong ba'i cha nas ni kun rdzob kyi bden pa yin la/ de nyid rigs pa dam pas btsal ba'i don ma grub pas de la ltos te/don dam par 'jog pa'o/ /so so'i dbye ba ni rnam pa gnyis gnyis su 'gyur ba ste/ de la log pa'i kun rdzob ni snang la don byed nus pas stong pa'o/ /yang dag pa'i kun rdzob ni snang la don byed nus pa ste/ 'dir phyi'i don sems las tha dad pa nyid du brtags pa ni log pa'i kun rdzob yin la/de lta na de dag kyang btung ngoms la sogs pa'i don byed par 'grub pas yang dag pa'i kun rdzob kyi mtshan nyid khyab ches par 'gyur ro zhe na/ ma yin te 'khrul pa'i bag chags bstan pa'i phyir don du snang ba las/de dang phrad cing don byed par snang ba sems kyi ngo bor gyur pa yin gyi/ de las tha dad pa'i phyi rol gyi don byed pa ni kun rdzob tu yang med do zhes sngar rgyas par bstan no/ /don dam pa'i bden pa yang rnam pa gnyis las/ rnam grangs kyi don dam pa'i bden pa ni skye ba la sogs pa'i spros pa phyogs re bkab pa tsam ste/don dam pa dang mthun pa'i phyir don dam pa zhes kyang bya la/ spros pa'i phyogs gzhan ma bkag pas phyin ci log tu yang 'gyur ba'i phyir kun rdzob kyang yin te/ de'i phyir ldog pa'i rnam grangs 'ga' zhig nas don dam par 'gyur la/ 'ga' zhig nas kun rdzob tu 'gyur bas rnam grangs kyi don dam pa'i bden pa zhes bya'o//de lta na spros pas gcod par byed pa'i rjes su dpag pa yang rnam grangs kyi don dam par 'gyur ram zhe na/ de ltar 'dod pa nyid do/ /rnam grangs ma yin pa'i don dam pa'i bden pa ni spros pa thams cad dang bral zhing 'od gsal ba'o//'dir kun rdzob kyi nges pa'i tshig ni de kho na nyid kyi rtogs pa la sgrib par byed pa'o/ /bden pa zhes pa ni kun rdzob tu bden pas so/ /don dam pa ni dam pa rnams kyis don du gnyer zhing gtan la dbab par bya ba yin pas don ces bya la/ mi slu bas na dam pa'o/ / don dam par bden pas na don dam pa'i bden pa zhes tshig bsdus te rnam par sbyar bar bya'o/ /'di dag gi spros pa zhib tu ni de kho na nyid kyi sgron ma la sogs pa las shes par bya'o/ /tshig gi don bshad pa la/ don dam du ni rang bzhin med/ /ces pa rang bzhin bkag pa tsam gyi med par dgag pa na ri bong gi rwa dang khyad par med par 'gyur bas shes bya ji ltar snang ba'i chos nyid don dam pa'i bden pa ma yin te/des na don dam pa'i dngos por ma grub cing / snang zhing rig pa ma 'gags pa ste zung 'jug sgyu ma lta bu'o/ /de las phyin ci log tu nor pa dang nor pas kun nas bslang ba'i blo dang blo'i yul ni kun rdzob kyi bden pa'o//chos rnams thams cad ces pa la sogs pas kun rdzob nyid rgyas par bstan pa'o/ /brjod las byung ba'i dngos po'i zhes pa la sogs pas ni kun rdzob tu don dang mthun pa'i gtam brjod pa las byung ba'i blo'i spyod yul te/ zhen yul rang gi mtshan nyid yang dag pa'i kun rdzob tu yod pa'o/ /yang na don dam pa dang mthun pa'i gtam brjod pa las de nyid kyi spyi'i rnam par snang ba'i blo 'byung zhing / des gtan la phab pa'i don goms pa las rnam par mi rtog pa'i ye shes skye bar 'gyur zhing / de'i don du gyur pa'i spyod yul ni de ltar bden pa'o//lta bas yod pa min zhes pa ni de dag la don dam pa'i dngos po la sogs par lta ba'i sgo nas ni yod pa ma yin no/ /rtsig pa med par zhes pa la sogs pas phyin ci log 'byung ba'i rgyu la sogs pa ston te/ sdong dum la sogs pa med par grib ma mi 'byung ba ltar/kun gzhi med na 'jug pa'i rnam shes mi 'byung zhing / de yod na de rnams 'byung la/ de rnams sam de rnams kyi bag chags kyis kyang kun gzhi dri ma can du byas pas mi mdzes pa'o/ /de dag ngo bo'i sangs rgyas zhes pa ni rgyu dang rgyu 'dra ba gnyis so/ / tshig gi don gzhan ni sngar bstan to/ /dang po dang ni bcu par zhes pa ni sa dang po dang bcu pa la zhal la sogs pa bstan pas byin gyis rlob pa ste rgyas par sngar bstan to/ /tshe dang drod dang srog gi dbang po ni rnam grangs nyid du rtogs pa'am/ yang na tshe ni srog gi rlung yin la/ drod ni de dag la brten pa'i drod kyi khyad par ro//rtag tu rlom sems pa ni nyon mongs pa can gyi yid do/ /sgo lnga'i rnam par shes pa ni rang gi yul la 'dzin pa de dang bcas pa'i yid kyi rnam par shes pas bye brag 'byed pa'o/ /sred pa dag ni zhes pa la sogs pas da rnams gcod cing rnam par 'byed pa ni dgongs te bstan pa'i mtshams med pa nyid du ston pa'o//bdag ni rdzas dang 'dra bar yod/ /ces pa pha rol pos khas blangs pa yin la/ de nyid 'gog pa ni phung po rnams zhes pa la sogs pa ste/ bdag tu brtags pa'i rten phung po nyid kyang kun rdzob tsam du yod kyi/don dam par med na de la bdag yod pa lta ga la srid ces pa'o/ /de lta na sangs rgyas nyid kyis kyang bdag yod par gsungs pa ma yin nam zhe na/ de ni dgongs pa can yin te/ /ngas ni de dag bar du yang / /cung zad bstan pa yod ma yin/ /zhes gsungs pa dang mtshungs te/de'i phyir tshig 'di rnams kyang dbang po lta bur bstan pa'o/ /gang gi rgyu dang zhes pa la sogs pas ni gzhan gyis skye bar brtags pa 'gog pa ste/ gang dag rgyu dang rkyen gyis 'jig rten rab tu 'byung zhing / de yang tshul ji ltar 'byung zhe na/ mtha' bzhi'i tshul gyis 'byung bar rigs pas grub pa'o//de'i don ni 'bras bu phyis kyi dus su yod pa dang / sngar rgyu'i dus la sogs par med pa dang / de nyid kyi phyir yod med gnyi gar gyur pa dang / sngar ni yod pa ma yin la/ phyis ni med pa ma yin pas gnyi ga ma yin pa ste/ mtha' bzhi'i tshul dang ldan pa rgyu rkyen las skye bar tshad mas grub ces pa'o//'di rnams dgag pa ni sngar bstan no/ /gang phyir rkyen las byung bas na/ /zhes pa la sogs pas ni rten 'brel gyi gtan tshigs te sngar bstan to/ /gang gi tshe na zhes pa la sogs pas skye ba med pa'i tshul de nyid sems tsam gyi tshul la sbyar ba'o//'jig rten pa'i sems tsam zhes pa ni gnas skabs de 'dra ba ni 'jig rten las ma 'das pa'o/ /nyan thos zad pa'i ye shes dang / /zhes pa la sogs pas ni mya ngan las 'das pa la sogs pa sgyu ma lta bur yod pa nyid du ston pa'o/ /sangs rgyas rnams kyi skye ba ni/mtshan dang de bzhin rtogs pa dang / yang skye ba rnam pa gnyis zhes sngar bstan pa'o/ /mtha' bzhi'i sbyar ba'i gtan tshigs ni sngar bstan pa de nyid de skye bar tshad mas grub pa'i phyir de ltar bden no zhes gtan tshigs nyid du sbyar ba'o/ /blun po dag gis bzlog ces pa dbu ma'i tshul lugs 'gog pa'o//yang na 'di rnams kyi don ni skye ba rnam bzhi dang bral ba'i phyir blun po dag gis kun rdzob kyi skye ba zlog par byed pa'o/ /rang gi sems ni don rgyud de/ /ces pa ni sems nyid don gyi rgyud rgyun chags su snang ba'o/ /phan tshun ma gyes 'brel pa yi/ /bag chags gcig gi rgyu las byung //zhes pa ni kun gzhi la bag chags bsdus shing sred pa'i srad bus bcings pa'i rgyu las byung ba'o/ /gnyis po ni rnam grangs kyi kun du brtags pa dang / gzhan gyi dbang ngo / /snang ba'i sa bon ldan pa'i phyir/ /skye mched rnams ni bcu gnyis so/ /zhes pa ni kun gzhi la phyi nang gi skye mched du snang ba'i sa bon sems kyi bdag nyid du gyur pa yod pa ste/de las gzhan bems po'i ngo bor gyur pa ni mi 'thad ces bstan to/ /de ltar med bzhin du gnas dang dmigs bya ste/ nang dang phyi rol gyi skye mched dang ldan pa'i tshig brjod pa ni bden pa'i don dang mi ldan pas lo rgyus su nga yis bshad pa ste/tshig tsam nyid ces pa'o/ /gang la gang gi dngos por yang / /zhes pa la sogs pas ni rnam rig sgyu ma lta bu'i gzhan dbang la de lta bu'i ngo bor brtags na sgyu ma tsam du mi dmigs pa ma yin pa de ni de ltar bden pa'o/ /de las gzhan du yod mod kyi mtshan mar brtags pa ni mi bden pa'o//thog mar med ldan zhes pa la sogs pas ni dogs pa bsal ba'i tshul gyis sngar gyi don de nyid rgyas par bstan pa'o/ /de'i don yang rnam rig sgyu ma lta bu'i gzhan dbang thog ma med pa nas gnas pa la/ dngos po'i ngo bor rtog pa ni nor pa yin na/ de las gzhan pa'i dngos po bden pa nyid rgyu rkyen su zhig gis 'khor bar bya ste/'di'i don thub pa chen pos bdag la gsungs zhes pa'o/ /lan gyi don ni dngos po bden pa gcig ni 'khor ba med kyi/ kun gzhi'i bdag nyid du gyur pa'i rig pa sgyu ma lta bu nyid 'khor zhes pa'o/ /de las rnam pa gzhan yod na zhes pa la sogs pa ni byis pas dngos por brtags pa las gzhan rig pa sgyu ma lta bur yod kyang byis pa'i blos de ltar rtogs par mi rung ngo //gal te 'phags pa rnams la ye shes sgyu ma lta bu de yod na byis pas brtags pa ma yin la/ med na yang 'phags pa dang byis pa mnyam par 'gyur ba'o//gang phyir zhes pa la sogs pas de dag mi mnyam pa nyid du ston pa'o/ /de ltar na phung po la sogs pa yod par ston pa mi 'thad do zhe na/ mkha' la zhes pa la sogs pa gsungs te/ brtags pa'i 'bras bu ni phung po la sogs pa brtan pa dang / de'i 'bras bu nyan thos kyi byang chub la sogs pa'o//gang gi ma byung zhes pa la sogs pas sngar ma byung ba'i 'bras bu rkyen rnams kyis skye bar 'dod na/ de dag 'brel pa mi 'thad de/ gcig yod pa na cig shos med pa'i phyir ro/ /gzhan yang yod med rim gyis kyang 'gal bas med pa 'bras bu'i dngos po'i bdag nyid du red pa med ces pa'o//de lta bu yi mdor mthong na/ /zhes pa ni de lta bu'i don mdo rnams su bshad pa mthong zhing rtogs na zhes pa'o/ /mu stegs can rnams zhes pa la sogs pa'i don ni skye ba dngos por rtogs pa dag /byis pa'i 'khong rnams la rkyen du mas 'bras bu gcig pa dang /tha dad pa skyed pa dang / yang rkyen gcig gis 'bras bu gcig pa dang tha dad pa skyed pa'i gtam rgyud sna tshogs tha snyad pa'i tshad ma la brten nas zer kyang don dam par 'gro ba'i rmi lam la sogs pa dang 'dra ba ste/ skye ba med pa la de ltar ma rtogs pa'o/ / 'di'i don ni gzhan dag rgyu mig dang gzugs la sogs pa du ma las 'bras bu mig gi rnam par shes pa gcig skye bar 'dod pa dang / yang rgyu gcig las 'bras bu gcig skye ste/ de ltar gyi bum pa'i skad cig gcig nyid rang gi rigs kyi skad cig ma snga ma gcig las skye ba'o/ /yang rgyu tha dad pas 'bras bu tha dad pa skyed de/nas dang sran ma'i sa bon tha dad pa las 'bras bu myu gu tha dad pa skyed pa lta bu'o/ /rgyu tha mi dad pas kyang 'bras bu tha dad pa skyed de/ mig gi dbang po las rang gi rigs phyi ma dang / rnam par shes pa skyed pa lta bu'o/ /de ltar rgyu dang 'bras bu'i rigs ni de dag tsam du zad de/ji ltar rigs pa bzhin du skyed pa'i tshul so sor bden par 'dod pa'o/ /'di ni don dam par mi 'thad de/ rgyu mig dang gzugs la sogs pa du ma las 'bras bu mig gi rnam par shes pa gcig skye bar 'dod na/ dngos po rnams kyi 'bras bu tha dad ma yin pa rgyu med pa can du 'gyur te/rgyu tha dad dang tha mi dad gnyis char gyis ma bskyed pa'i phyir ro/ /de la dang po 'bras bu tha dad pa ni rgyu tha dad pas ma byas te/ mig dang gzugs la sogs pa'i skabs su rgyu la tha dad yod kyang / 'bras bu mig gi rnam shes tha dad du ma byung bas rjes su 'gro ba 'khrul pa'i phyir ro//yang de 'dra ba ni rgyu tha mi dad kyis ma byas te/ nas dang sran ma'i sa bon gyi skabs su rgyu la tha mi dad med kyang 'bras bu tha dad du byung bas ldog pa 'khrul pa'i phyir ro/ /de bzhin du 'bras bu tha mi dad pa yang rgyu tha mi dad kyis ma byas te/ mig dang gzugs la sogs pa'i skabs su mig gi rgyu tha mi dad med kyang 'bras bu mig gi rnam shes tha mi dad du byung bas ldog pa 'khrul pa'i phyir ro//yang de 'dra ba ni rgyu tha dad kyis ma byas te/ nas dang sran ma'i skabs su rgyu la tha dad yod kyang 'bras bu tha mi dad ma byung bas rjes su 'gro ba 'khrul pa'i phyir ro/ /de la gal te gzhan dag 'di ni mi 'thad de/mig dang gzugs la sogs pa'i skabs su rgyu la tha dad yod kyang / 'bras bu mig gi rnam shes tha dad pa ma byung bas de 'dra ba thun mong pa'i 'bras bu tha dad du mi byed ces pa ni grub pa la sgrub pa'am/ 'dod pa nyid yin no/ /yang nas dang sran ma'i skabs su rgyu la tha dad yod kyang /'bras bu tha dad ma byung ba'i phyir tha dad kyis tha dad mi skyed ces zer na ni gtan tshigs nyid ma grub pa'o/ /yang tha dad rgyu tha mi dad kyis ma byas te/ ldog pa 'khrul pa'i phyir zhes pa la/ nas dang sran ma'i myu gu tha dad pa gzhir bzhag nas rgyu tha mi dad pa dang ldog pa 'khrul pa'i phyir tha mi dad kyis ma byas so zhes zer ba ni/de ltar 'dod pa nyid yin la/ dbang po dang rnam par shes pa'i tha dad pa lta bu gzhir bzhag nas rgyu tha mi dad kyis ma byas te/ tha mi dad med kyang byung bas ldog pa 'khrul pa'i phyir zhes zer na ni gtan tshigs ma grub ste/de dag gi rgyu dbang po snga ma gcig nyid yin pa'i phyir ro/ /yang 'bras bu tha mi dad rgyu tha mi dad kyis ma byas te/ ldog pa 'khrul pa'i phyir zhes pa yang mi 'thad de/ mig gi rnam shes tha mi dad pa lta bu gzhir bzhag nas rgyu tha mi dad med kyang byung ba'i phyir tha mi dad kyis ma byas so zhes zer na ni/de ltar 'dod pa nyid yin la/ da ltar gyi bum pa'i skad cig lta bu gzhir bzhag nas rgyu tha mi dad med kyang byung ba'i phyir tha mi dad kyis ma byas so zhes zer na ni/ gtan tshigs ma grub pa'o/ /yang 'bras bu tha mi dad rgyu tha dad kyis ma byas te/ nas dang sran ma'i skabs su rgyu la tha dad yod kyang 'bras bu tha mi dad ma byung ba'i phyir zhes zer na ni/de 'dra ba'i tha dad 'bras bu tha mi dad skyed par mi 'dod pas grub pa la sgrub pa nyid yin la/ skabs der rjes 'gro 'khrul pas skabs gzhan du yang tha dad kyis tha mi dad mi skyed do zhes zer na ni khyab pa ma grub po zhes zer ro//'di ni mi 'thad de/ dang po mig dang / gzugs la sogs pa'i skabs su rgyu la tha dad yod kyang / 'bras bu tha dad ma byung bas phyir rjes su 'gro ba 'khrul pa'i phyir/ nas dang sran ma'i myu gu tha dad pa yang rgyu tha dad kyis ma byas pa nyid du 'gyur zhes 'dir thal ba'i don du 'god pa'o/ / gal te de 'dra ba'i tha dad pa'am mig dang gzugs dang rnam par shes pa'i lta bu'o/ /tha dad pa rgyu tha dad kyis byas na tha dad khyad par med par mig gi rnam shes la yang yod pas de tha dad pa nyid du ci'i phyir mi 'gyur zhes pa'o/ /rgyu tha mi dad pa nyid kyang skabs der med pa'i phyir/ de 'dra ba'i myu gu tha dad pa ni tha dad dang tha mi dad gnyis char gyis ma byas pas rgyu med pa nyid du 'gyur ba'o//gal te mig dang gzugs la sogs pa'i rang gi rigs phyi mar gyur pa'i 'bras bu la ltos te/ mig dang gzugs la sogs pa'i skad cig ma snga ma rnams rgyu'i tshogs pa tha dad pa yin te/ rang gi rigs kyi 'bras bu phyi ma bskyed pa la phan tshun ltos pa med pa'i phyir ro//thun mong gi 'bras bu mig gi rnam par shes pa la ni de rnams rgyu'i tshogs pa gcig pa ste/ gang yang rung ba cig ma tshang yang mig gi rnam shes mi 'byung ba'i phyir ro/ /de'i phyir mig gi rnam shes la ltos te/ de dag lhan cig byed pa tha dad pa tsam yin gyi/ tshogs pa tha dad pa ma yin pas tha dad khyad par med pa'i phyir zhes pa'i gtan tshigs ma grub pa'o/ /nas dang sran ma'i tha dad pa yang de bzhin du shes par bya'o/ /de'i phyir rgyu'i tshogs pa tha dad pas 'bras bu tha dad nyid du bskyed cing tshogs pa tha mi dad pas 'bras bu gcig pa nyid du skyed de/'di ni mtha' gcig tu nges pa'o/ /lhan cig byed pa ni nges pa med de gcig las tha dad pa dang / tha dad pas kyang gcig la sogs pa sna tshogs su 'gyur ro zhe na/ mi 'thad de/ 'dir mig dang gzugs la sogs pa'i tshogs pa dang /tshogs pa can gyis lhan cig byed pa rnams gcig gam tha dad ces brtag par bya'o/ /gal te tha dad ces zer na de dag 'brel par yod dam med/ gal te med par 'dod na rnam par shes pa gcig gi rgyu tshogs pa gcig pa kho na yin pas lhan cig byed pa tha dad pa rnams rgyu ma yin pa'i phyir de rnams la mi ltos par thal lo//gal te 'brel par 'dod na tha dad pa'i 'brel pa la rgyu dang 'bras bu las gzhan mi 'thad la/ de las tshogs pa gcig pa tshogs pa can lhan cig byed pa tha dad pa'i 'bras bur khas len dgos pas tha dad dang tha dad ma yin pa rgyu med par thal ba'i nyes pa snga ma nyid so na 'dug go//gal te tshogs pa gcig pa'i 'bras bu skyed pa ltos te/ yang de rnams tshogs pa gcig pa yin pas skyon med do zhe na/ de 'dra ba'i tshogs pa gcig pa de la yang brtag pa snga ma nyid mtshungs pas rkyen rnams tshogs pa gcig pa nyi tshe la sbyor ba'i phyir/ mig gi rnam shes rgyu med pa nyid du 'gyur te/ bsams pas go bar zad do/ /gal te tshogs pa dang tshogs pa can gcig pa yin na ni/ tshogs pa can lhan cig byed pa tha dad pa bzhin du tshogs pa yang tha dad par 'gyur te/ tha dad dang gcig pa'i phyir/ dper na skar ma'i dkar po nyid bzhin no//de bzhin du tshogs pa can rnams kyang gcig nyid du 'gyur te/ gcig dang tha mi dad pa'i phyir ro/ /gzhan yang 'bras bu tha dad pa rgyu tha mi dad kyis ma byas te/ ldog pa 'khrul pa'i phyir zhes pa yang dbang po dang rnam par shes pa'i tha dad pa yang rgyu tha mi dad kyis ma byas pa nyid du 'gyur te/gal te de 'dra ba'i tha dad pa rgyu tha mi dad kyis byas na/ gang du rgyu tha mi dad log pa der 'bras bu tha dad ldog par 'gyur ba las/ nas dang sran ma'i skabs su rgyu tha mi dad log kyang / 'bras bu tha dad ma log pa'i phyir ro/ /de'i phyir dbang po dang rnam par shes pa'i tha dad pa ni rgyu tha mi dad kyis ma byas la/tha dad pa yang skabs der khas mi len pas rgyu med pa nyid du 'gyur zhes pa'o/ /yang 'bras bu tha mi dad rgyu tha mi dad kyis ma byas te/ ldog pa 'khrul pa'i phyir zhes pa'i don yang de lta ba'i bum pa'i skad cig gcig po de nyid rgyu tha mi dad kyis ma byas par thal te/tha mi dad dang ldog pa 'khrul pa'i phyir zhes pa'o/ /yang de 'dra ba ni rgyu tha dad pas kyang ma byas pa'i phyir rnam pa thams cad du rgyu med par 'gyur ba'o/ /yang 'bras bu tha mi dad rgyu tha dad kyis ma byas te/ rjes 'gro 'khrul pa'i phyir zhes pa'i don yang mig gi rnam shes tha mi dad de/ de nyid rgyu tha dad kyis ma byas par thal te 'gro ba 'khrul pa'i phyir ro/ /gal te de 'dra ba'i tha mi dad rgyu tha dad kyis byas nas nas dang sran ma'i skabs su yang rgyu tha dad khyad par med par yod pas 'bras bu tha mi dad nyid du 'gyur ba'o//de'i phyir mig gi rnam shes gcig po de nyid rgyu tha dad dang tha mi dad gnyis char gyis ma byas pa'i phyir rgyu med pa nyid du 'gyur ro/ /gal te nas dang sran ma'i tha dad pa ni tshogs pa tha dad pa yin la/ mig dang gzugs la sogs pa ni sngar bstan pa ltar lhan cig byed pa tha dad pa tsam yin pas tha dad pa khyad par med pa'i phyir zhes pa'i gtan tshigs ma grub po zhe na/'di'i lan ni sngar bstan no/ /de ltar rgyu du mas 'bras bu gcig bskyed pa'i phyogs bkag nas yang du mas du ma bskyed pa yang mi 'thad de/ rgyu du ma de rnams phan tshun ltos nas 'bras bu re re skyed par byed na ni du mas gcig skyed pa'i phyogs su 'gyur la/ma ltos par so sos re re skyed na yang gcig gis gcig skyed pa'i phyogs su 'gyur na de yang mi 'thad de/ mig la sogs pa'i dbang po gang yang rung ba cig gis rang gi rigs phyi ma kho na skyed na rnam par shes pa ma bskyed pa'i phyir 'gro ba thams cad 'on pa dang long bar 'gyur ro//gal te rnam par shes pa gcig nyid skyed do zhe na/ rang gi rigs phyi ma ma bskyed pas skad cig gnyis phyin chad rnam par shes pa mi 'byung bas yang 'gro ba 'on pa dang long ba la sogs par 'gyur te/ dbang po med pa'i rnam par shes pa mi 'thad pa'i phyir ro//gal te dbang po lta bu gcig gis ni 'bras bu gcig bskyed par khas mi len te/ gzhan du bum pa lta bu'i skad cig snga ma gcig nyid kyis 'bras bu'i skad cig ma phyi ma gcig skyed do zhe na/ mi 'thad de/ de yang tha na dbang po'i shes pa du ma la phan 'dogs pa'i phyir gcig gis gcig kho na skyed pa ni gnas skabs gang du yang mi srid do//yang gcig gis du ma skyed pa yang mi 'thad de/ sngar bstan pa ltar dngos po rnams kyi tha dad dang tha dad ma yin pa rgyu med pa nyid du 'gyur te/ sngar bstan pa'i rjes su 'brangs te rtogs par bya'o//sngar bstan pa'i mtha' bzhir sbyar ba'i gtan tshigs kyang 'di nyid yin te/ 'on kyang de yis don dam pa'i skye ba 'gog pa las kun rdzob pa ni dgag par mi nus te/ kun rdzob la rigs pa'i dpyad pa mi 'jug pa'i phyir ro/ /'dir kyang zhes pa'i tshig ni 'gal ba'i rgyan te/ de ltar rkyen gyis gcig dang tha dad pa mi skyed par rnam par 'jog mod kyi sgyu ma lta bu'i rten 'brel ni ma gtogs zhes pa'o/ /de ltar skye ba la sogs pa dngos por med na/ thog ma nyid du de dag yod par ston pa mi 'thad do zhe na/ brjod pa'i yul gyi zhes pa la sogs pa gsungs te/ de dag yod par ston pa'i theg pa ni theg pa chen po rtogs par bya ba'i don du bstan pa'o//mtshan nyid dang ni dngos dbyibs dang / /zhes pa ni gzugs kyi phung po yin la/ ming ni ming bzhi'i phung po'o/ /gang rnams zhes pa la sogs pas sras kyi sa la gnas pa'i gang zag ston te/ phyag rgya zhes pa ni grol ba nyid du mtshon pa'i rtags dang mtshan ma'o//gzugs kyi rnam shes zhes pa la sogs pas der 'dzin pa'i phyin ci log spangs nas zag pa dang bcas pa'i las 'jig par 'gyur na mtha' gnyis su 'dzin pa ldog cing / 'khor ba dag kyang med par 'gyur ba'o/ /ldog pa'i tshe ni zhes pa la sogs pas don de nyid rgyas par 'chad de/yod med nyes dang bral ba'i las/ /kun gzhi la ni rab tu gnas/ /zhes pa ni mtha' gnyis su 'dzin pa dang bral ba zag pa med pa'i las kyi sa bon kun gzhi la gnas pa ste/ des rnam par shes pa khu khrag gi nang du rkyal zhing 'gro ba'i gzugs sna tshogs su ltung bar mi 'gyur ba'o//yang gzugs dang rnam shes 'brel pa ste gzugs kyi mtshan mar 'dzin pa rnams kyi zag pa dang bcas pa'i las 'jig par mi 'gyur ro/ /de dag 'brel zhes pa ni mtshan mar 'dzin pa dang 'brel pa'o/ /gal te de 'dra ba'i las zhig kyang sems dang lhan cig tu 'khor ba'i lus 'grub par 'gyur ro zhe na/de 'dra ba'i lus ni sems tsam dang 'brel pa'i phyir de dag tha mi dad pa'i tshul gyis rtag tu 'byung bar 'gyur na de ni mi 'thad pa'o/ /sems dang gzugs su rnam par rtog pa ste/ rtog pa'i rang bzhin du gyur pa'i gzugs su snang ba dang gcig dang tha dad las grol ba ste don dam pa'i dbang du byas pa'o//kun tu brtags dang zhes pa la sogs pas ni rnam grangs kyi kun du brtags pa dang gzhan gyi dbang ni gcig nyid yin la de yang sgyu ma lta bur yod pa nyid du ston to/ /de yang don dam par gcig dang tha dad las grol ba'i brtags pa la brtags pa nyid du khong du ma chud na/yod dang med par ji ltar 'gyur te/ de 'dra ba'i blo'i don gzhan gyi dbang ni yod la/ kun du brtags pa ni med do zhes rnam par dbye ba mi 'thad de/ gzugs dang mi rtag par dbye ba mi 'thad pa bzhin no//gal te brtags pa la brtags pa nyid du shes na ni de ni med la/ gzhan gyi dbang ni yod do zhes rnam par dbye ba 'thad pa'o/ /gzhan yang brtags pa nyid du mthong na de 'dra ba'i dngos por rtog pa'i gzhan gyi dbang kun rdzob tu yang mi skye ba'o/ /yang gzhan gyi dbang sgyu ma lta bur mthong na rnam grangs kyi kun du brtags pa yang de dang tha dad med pas de bzhin nyid sgyu ma lta bur rtogs par 'gyur ba'o//rtog pa rnam par 'jig cing zhes pa la sogs pas gzhan dbang la skur pa 'debs pa'i mtha' 'gog pa'o/ /sgro 'dogs pa ni gzhan dbang dngos po'i ngo bo don dam par rtog pa'o//nga'i tshul ni mtha' gnyis spangs pa'i dbu ma'o/ /de ltar nga'i tshul lugs sun 'byin pa dang / mkhas pa rnams lam gcig nas mi 'gro zhing gtam mi bya ba ste/ de dag rjes su mi bzung bar mi nus pa'i tshe'o/ /dge slong gi don ni 'ga' zhig bsnyen par rdzogs pa'i phrin las te de dang lhan cig mi bya ba'o//de dag sdud pa ni 'khor dang yid gcugs nyid du byed pa'o/ /gzhan yang rnam par 'jig pa ni yang dag pa'i rtogs pa las nyams par byed pa'o/ /mu tig nor bu zhes pa la sogs pas ni dgongs pa can gyi tshig ston te/ de las med par bstan pa ni don dam pa la dgongs pa ste/nor bu mu tig gser 'byung rnams/ /zhes pa la sogs pa dris pa'i len du yang sbyar bar bya'o/ /ji ltar zhes pa la sogs pas ni yod par ston pa'i tshig ste kun rdzob la dgongs pa'o/ /gal te de lta na/ ji ltar byis pas brtags pa ltar/ / dngos po rnams ni yod pa min/ /zhes bstan pa dang 'gal lo zhe na/ skyon med de/ de ni dngos po'i ngo bo don dam par ma grub pa yin la/ 'dir ni rtog pa'i gzung ba nyid du gyur pa'i brtags pa kun rdzob tu rtog pa'i bdag nyid du yod pa'o/ /rnam par thar pa gsum spyod ces pa la sogs pas de rnams don dam par med pa nyid du ston pa'o//'byor pa ni mngon par shes pa la sogs pa'i yon tan 'byor pa'o/ /nga'i bstan la zhes pa la sogs pas ni lung bstan gyi khyad par te/ khyed kyi lung bstan rnam pa du zhes dris pa'i lan du sbyar bar bya'o/ /'phags pa'i spyod yul ni rten 'brel gyi de kho na nyid do//gzegs zan ni 'bras kyi gzegs ma tsam la longs spyod pa dka' thub kyi cha 'dzin pa'i drang srong ste/ bye brag pa'i ston pa'o/ /'bras bu med par smra ba ni las dang 'bras bu'i 'brel pa 'jig par byed pa'o/ /de dag ni rigs mthun pa'i rdul phra rab 'dus pa las/'gro ba'i lus dang snod kyi 'jig rten byung la/ rdul phra rab ni rtag pa rgyu med par 'dod pa'o/ /rdzas rnams kyis ni rdzas rtsom zhes pa la sogs pas ni rdul phra rab kyi rdzas kyis rags pa'i rdzas rtsom la/ gzugs la sogs pa'i yon tan gyi skad cig snga ma phyi ma rnams skyed pa'o//dngos po dag gi dngos nyid gzhan/ /zhes pa ni rig pa sgyu ma lta bur yod pa gang zag gi bdag med pa ni 'jig par byed pa'o/ /gzhan yang 'gro ba'i rigs sngar ma byung ba 'byung bar 'gyur na/ 'khor ba'i thog ma yod par thal ba'o/ /de ltar 'dod pa ni mi 'thad de/ma rig pa dang lhan cig pa'i sems nyid kun rdzob tu rgyu med pa mi 'thad la rgyu yang phyi rol gyi dngos po'am/ phyin ci ma log pa'i ye shes ni mi 'thad pas rang gi rigs snga ma snga ma rnams sngon du 'gro ba ste/ de'i phyir 'khor ba la thog ma med pa'o/ /med pa skye ba 'gog pa ni sngar rgyas par bstan no//gcig po las gcig 'byung na zhes pa ni rtsi rkyang lta bu gcig po las med pa'i re lde gcig nyid 'byung bar 'dod na/ de las gzhan pa'i rkyen 'jim pa'i gong bu la sogs pa rnams las kyang med pa'i re lde ci'i phyir mi 'byung ste//med par khyad par med pa'i phyir ro/ /don zhib tu ni sngar bstan no/ /'tsho ba ni srog gi dbang po'o/ /de lta na sangs rgyas nyid kyis kyang med pa skye ba'i phyogs gsungs pa ma yin nam zhe na/ de ni phyogs snga ma nyid gzhan gyi lugs bstan pa'o/ /de ltar bstan pa'i dgos pa yang dngos por zhen pa'i skye bo gang dag rtag tu de ltar 'gyur ba bzlog pa'i don du de dang mthun pa'i don bstan pas brid nas skye ba med pa'i de kho na nyid rtogs par byed pa'o//gzhan yang yan lag ser skya zhes pa grangs can gyi ston pa drang srong ser skya'o/ /gang gi dngos po zhes pa la sogs pas kun rdzob tu rig pa rgyu dang bcas par ston to//dngos po la ni dmigs byas zhes pa ni sems kyi bdag nyid du gyur pa'i dngos po gzugs la sogs par snang ba'o/ /'phags pa'i dngos po'i tshul zhes pa ni 'phags pa so so rang gis rig par bya ba'i don la/ yod par sgro 'dogs pa dang med par skur pa 'debs pa ni nga'i tshul la mi mkhas pa'o//'jig rten pa'i sems zhes pa ni 'jig rten pas brtags pa ste/ sems tsam yang dag pa nyid ma yin no/ /rmi lam dang 'dra bar skye ba ni gnyis su snang ba sems nyid ces pa'o/ /mtshan nyid med pa ni don dam par ro/ /ji ltar zhes pa la sogs pas ni/rang rig don dam par yod pa 'gog pa ste/ ji ltar ral gri'i sos rang nyid mi gcod pa dang / mdzub mos rang gi rtse mo la reg par mi 'gyur ba bzhin du sems kyis kyang rang nyid mi rig pa'o/ /'di'i don yang rang snang bas stong pa'i phyir zhes pa'o/ / gal te rang snang bar khas len na ni rang nyid la rnam par 'jog pa dang / des gzhag pa'i rnam pa dang gnyis su 'gyur ro/ /gal te 'dir rang la rang gi rnam pa snang ba'i sgo nas rang rig pa ni ma yin gyi/ 'on kyang bems po'am dngos po med pa las log ste/ rig pa'i rang bzhin du skyes pa nyid rang rig pa yin no zhe na/de ltar na dngos po rnams rgyu gzhan med par rang nyid skye'o zhes kyang ci'i phyir na mi brjod de/ der yang dngos po ma skyes pa las log nas/ skyes pa'i ngo bor byung ba nyid rang gis skyed pa'am/ rang skye ba'o/ /gal te der rang gi rang bzhin gcig nyid la bskyed bya dang /skyed byed mi 'thad do zhe na/ de bzhin du gcig la rig bya dang rig byed kyang mi 'thad do/ /gal te skyed byed gzhan la ma ltos par rang skye ba ni mi 'thad do/ /de lta na rtag tu yod pa'am med pa nyid du 'gyur gyi/ res 'ga' bar 'gal ba'i phyir ro zhe na/ rig byed gzhan la ma ltos par rang rig pa yang mi 'thad de/res 'ga' bar 'gal ba'i phyir ro/ /gzhan yang sems kyis sems ni mi mthong zhes pa dang / sgyu ma lta bu dang / rnam par mi rig pa ste zhes pa la sogs pa mdo sde gzhan dag las kyang gsungs pa'i phyir ro/ /des na sems nyid rig pa'i gzhan dbang yang mi 'thad do//skyed par byed la dgongs zhes pa ni don dam par med pa la dgongs pa'o/ /rnam pa sna tshogs zhes pa la sogs pas rnam rtog kun rdzob tsam du yang med na/ sna tshogs kyi don du snang ba yang mi 'thad de/ ri bong gi rwa la sogs pa yang de ltar 'gyur ba'i phyir zhes pa'o//gal te ma brtags zhes pa la sogs pas sems las tha dad kyi dngos po la sogs par ma brtags pa'i don kun rdzob tu sems kyi ngo bor yod na/ sems kyang don du snang bar 'gyur ba'o/ /thog ma med ldan zhes pa la sogs pas kun rdzob tu sems med na don du snang ba mi 'thad pa'o//ji ltar da ltar zhes pa la sogs pas don da ltar med pa bzhin du sngon yang med la/ de bzhin du sems kyang med pas/ don du snang ba'i sems rgyun gyi 'jug pa mi 'thad pa'o/ /de ltar na stong pa nyid la sogs par bstan pa mi 'thad do zhe na/ de bzhin nyid dang zhes pa la sogs pa gsungs te/ de dag don dam pa la dgongs te bstan pa'o/ /snang ba med par sems mngon zhes pa ni de kho na nyid du med par sna tshogs su snang ba ste/ de 'dra ba'i bye brag thog ma med pa'i bag chags las byung ba'o/ /gal te thog ma med pa nas don kyang med la/de bzhin du sems kyang med na bye brag rgyas par 'gyur ba mi 'thad pa'o/ /don med ji ltar zhes pa la sogs pas ni don med na der snang ba'i sems skye ba mi 'thad pa nyid du mtshungs par brtsad pa'o/ /lan gyi don ni don dam par mi skye ba ni 'dod pa yin la/kun rdzob tu ni sems kyi sa bon la sogs pa yod par 'dod pas mi mtshungs zhes pa'o/ /'di dag thams cad ces pa la sogs pas skye ba med pa la sogs pa'i de kho na nyid ston te tshig gi don ni sngar bstan zin to/ /'dus pa mu stegs lta ba ltar/ /zhes pas ni bye brag tu smra bas rags pa'i rdzas 'jig pas med par 'gyur la/rdul phra rab ni rtag pa'i dngos por khas len pa mi 'thad pa'o/ /dngos po med pas zhes pa la sogs pas ni skye ba med pa la sogs pa'i rnam grangs kyis don ston pa'o/ /rdza dang snam bu zhes pa la sogs pas yod med kyi mtshan ma phan tshun ltos te brtags pa nyid du ston pa'o//med pa med par mi rung ngo zhes pa ni med pa'i ltos pa ma grub na yod pa nyid du rtog pa mi 'thad pa'o/ /rgyu med pa ste rgyu med min/ /zhes pa ni zung du 'jug pa'i phyir don no/ /de yang gzhan la snang 'gyur zhes pa ni/ rten gzhan po de yang cig shos la brten par 'gyur na/phan tshun rten pa thug pa med pa nyid du 'gyur te/ de yang dngos por mi 'thad ces pa'o/ /sgyu ma med pas gnas mthong zhes pa ni sgyu ma'i rnam par snang ba med na/ shing dang gyo mo la sogs pa'i gnas lugs gnyis mthong ba'o/ /de bzhin du gnyis su snang ba la sogs pa'i phyin ci log gis de kho na nyid bsgribs shing de lta bu'i snang ba med na de bzhin nyid mthong bar 'gyur ba'o//sems tsam du ni mi rung ngo / /zhes pa ni don dam par sems kyi ngo bor ma grub pa'o/ /de lta na phung po la sogs pa yod par bstan pa mi 'thad do zhe na/ bsam pa tha dad la dgongs te bstan pa yin la/ de'i phyir de 'dra ba'i don bsgoms kyang thar pa mi 'thob pa'o/ /bag chags kyis ni mgo yung bslad/ /ces pa ni bag chags kyis bslad pa'i sems nyid sna tshogs su snang ba'o/ /rtog pa rnams kyi zhes pa ni rtog ge pa rnams kyis de ltar ma rtogs pa'o//sems ni 'phags par nyer 'gro zhing / /zhes pa ni 'phags pa'i go 'phang thob pa na/ sems kyi mtshan ma zhi zhing gnas gyur pa'o/ /gal te 'di kun zhes pa la sogs pas ni thams cad sems yin gyi phyi'i don med na/ sa la sogs pa snod kyi 'jig rten la spyod cing 'gro ba la sogs pa mi 'thad ces pa'o//lan gyi don ni de ltar rtog pa'i dbang gis brtags pa'i smin pa la spyod pa ste/ de yang rang gi sems kyi snang ba nyid do/ /mi brtson rnams la zhes pa ni gnyen po bsgom pa la mi brtson pa'o/ /yul las 'byung zhes pa ni yul du snang ba las so//brtags pa'i ming ni ming bral zhes pa ni chos thams cad ming tsam yin la/ ming nyid kyang ming tsam ste/ ming gi ngo bo bden pas stong pa'o/ /chos lnga rnams dang zhes pa la sogs pas ni shes par bya ba de tsam ste zhes pa'i lan du sbyar bar bya'o/ /gzugs med pa yi phung po bzhi/ / de dag la ni bgrang ba med/ /ces pa ni kha dog dang dbyibs kyi rnam pa 'di dang 'di'o zhes bgrang du med pa'o/ /gzugs kyi phung po ni sa la sogs pa'i 'byung ba tha dad pa'i mtshan nyid can gyi gzugs rnam pa mang por 'gyur ba ste/ de yang sems las tha dad pa'i phyi rol gyi mtshan nyid grub pa med pa'i phyir 'byung ba dang 'byung ba las gyur pa'i yod pa ma yin no//'on te mtshan nyid gzhan gzugs na/ /phung po rnams kyis cir mi skye/ /zhes pa ni phyi rol rdzas su grub pa'i mtshan nyid las gzhan de lta bu'i rnam par snang ba 'ja' tshon ltar thogs pa med pa de 'dra ba cig gzugs kyi phung po yin na/ming bzhi'i phung po rnams kyis kyang de 'dra bar snang ba'i gzugs ci'i phyir mi skyed de/ de'i phyir gzugs med pa rnams la yang shin tu phra ba'i gzugs yod ces pa la sogs pa sngar bstan to/ /yul dang dbang po tha dad phyir/ /zhes pa la sogs pas ni phyi nang gi skye mched du snang ba'i sa bon tha dad kun gzhi la yod pa'o//mtshan nyid kyis ni gsum yin zhes pa ni mtshan nyid bsdus nas phye na sems dang yid dang rnam par shes pa gsum du 'gyur ba'o/ /snang ba med la ldog par 'gyur ba ni sa brgyad pa yan chod du de rnams gnas gyur pa'o/ / kun gzhi yid kyi bdag yin te/ /shes pa nyid ni bdag gi yin/ /zhes pa ni kun gzhi nyon mongs pa can gyi yid kyis nga yi bar gzung ba yin la/ yang de 'dra ba'i kun gzhi ni bdag tu sgro btags pa'i gzhir yang 'gyur ba'o/ /de ltar bdag dang bdag gir 'dzin pa gnyis kyi sgo nas rgyun 'jug pa'o//yang rnam pa gcig tu na nyon mongs pa can gyi yid rang nyid la bdag tu 'dzin la/ kun gzhi la bdag gi bar 'dzin pa'o/ /ma zhugs par zhes pa ni de ltar 'dzin pa'i blo ma zhugs par ro/ /sems kyi snang ba shes pa dang sems kyis don gzhan gzung ba'i phyir zhes pa ni 'dzin pa'i shes pa dang /de'i gzung ba don gzhan du gzung ba'i phyir/ mthong ba lta bur rnam par brtags zhes pa ste/ don snga ma'i gtan tshigs nyid du sbyar ro/ /blo yis gang tshe ma mthong zhes pa ni snang ba kun rdzob tsam du yang ma mthong zhing med par 'dzin na skur pa'i lta bar 'gyur la/sems kyi dngos po bden par 'dzin na sgro 'dogs pa'i mthar 'gyur ba'o/ /rnam rtog dngos min zhes pa la sogs pas ni sems kyi rang bzhin zung du 'jug pa nyid ston to/ /rnam par rtog pa mi 'jug pa/ /rab tu gyur pa gnas med pa'o/ / zhes pa ni rnam par rtog pa gnas gyur cing de dag gi bag chags spangs pa'o/ /gzhi yi phyogs rnams phyir bzlog cing / /gal te dngos po rgyu can na/ /zhes pa la sogs pa'i don ni bag chags kyi gzhi kun gzhi rnam par shes pa yang med par smra zhing / rnam par rtog pa la sogs pa'i dngos po rgyu dang bcas par 'dod na/kun gzhi med do zhes pa ni de 'dra ba'i dngos po nyid la med do zhes bya ba'i ming gi bye brag gzhan du btags par zad de/ de ltar ming gzhan tu btags pa tsam gyis kun gzhi med par bsgrubs pa ni ma yin no/ /rgyu dang rkyen rnams 'dus pa dang / /rgyu ni bkag par gyur pa'i phyir//de dag don gyis dpog par 'gyur/ /zhes pa ni rgyu dang rkyen tshogs pa dang / rgyu kha yar ba bkag pa'i phyir/ rnam par rtog pa la sogs pa don dam par 'byung ba med do zhes don gyis dpog par 'gyur ba'o/ /yang na rgyu las 'byung bar 'gyur ba ni kun rdzob tu'o//gal te rkyen rnams mi rtag na/ /zhes pa la sogs pa'i don ni kun rdzob tu rkyen rnams mi rtag pa'i phyir/ don dam par 'byung ba dang 'jig pa med ces pa ste/ khyab pa'i don ni mi rtag pa ni res 'ga' ba yin pas rgyu med par 'gal la/ rgyu las skye ba la yang sngar bstan pa ltar skye ba'i tshul rnam pa bzhis khyab pa las/don dam par de 'dra ba mi 'thad pa'i phyir skye ba med la/ de nyid kyi phyir mi rtag par snang ba'i dus nyid na yang mi rtag pa bden pa'i dngos pos stong pa'o/ /rtag pa'i nyes las grol zhes pa ni rtag pa don byed nus pas stong pas 'bras bu bskyed par mi 'thad ces pa la sogs pa'i nyes pa las grol ba'o//byis pa rnams zhes pa ni byis pa'i shes ngo na mi rtag par snang ba'o/ /gang yang 'jig par 'gyur bzhin du/ /rgyur 'gyur ba ni mi snang ngo / /zhes pa ni don dam par mi rtag pa dang / de nyid dngos po gzhan gyi rgyur 'gyur ba rigs pas btsal na ma mthong ba'o//de ltar ma mthong ba'i srid pa ni mi rtag pa las rnam pa ji ltar 'byung zhing rgyu ci yis 'byung ste/ de 'dra ba mi srid ces pa'o/ /bsdu ba dag gis zhes pa la sogs pas ni byang chub sems dpa'i spyod pa'i tshul phyin ci ma log pa ston to/ /'di kun zhes pa la sogs pas yod med kyi mthar 'dzin pa 'jig rten rgyang pan pa nyid du ston te/tshig gi don ni sngar bshad do/ /lha dang lha ma yin dang mi/ /zhes pa la sogs pas kun rdzob tu dge ba bcu'i las rab dang 'bring dang tha mar spyad pa las go rims bzhin du lha la sogs pa'i 'gro ba rnams su skye bar 'gyur la/mi dge ba bcus ni ngan song gi gnas gsum du skye ba ste/ rgyang pan pas las dang 'bras bu'i 'brel pa khas mi len pa 'gog pa'o/ /gshin rje'i gnas ni dmyal dpon gyi gnas so/ /dge ba thams cad bsrungs pa ni zag pa dang bcas pa dang //zag pa med pa'i dge ba thams cad bsgrubs na lha'i dbang po la sogs pa'i 'gro ba khyad par can nam/ thar pa nyid thob par 'gyur ba'o/ /khyod kyis zhes pa la sogs pas ni dris pa dang lan gyi sgo nas de kho na nyid phyin ci ma log par gtan la 'bebs pa'o/ /ji ltar zhes pa la sogs pas skye zhing 'jig par bstan pa'i dgongs gzhi 'chad de/kun rdzob tu gzugs su snang ba snga ma nas/ phyi ma gzhan skye zhing 'jig pa dang sems kyang rgyu rkyen 'dus nas skye zhing 'jig par snang ba'o/ /rnam par rtog pa ni khyad par du kun nas nyon mongs pa'i gzhan dbang ston pa'o//rnam par rtog pa gzhan med ces pa ni phyi ma skyes pa na gzhan snga ma 'gags nas med pa'o/ /de ltar kun rdzob pa la dgongs te bshad pa'o/ /gzugs su 'dzin pa rnams spangs pa/ /zhes pa la sogs pas don dam par med ces pa'o/ /rkyen dang rkyen las zhes pa la sogs pas ni ma rig pa dang 'du byed la sogs pa'i rkyen rnams dang /de rnams kyi chos nyid de bzhin nyid dang stong pa la sogs pa dbyer med pa'i tshul gyis 'jig pa ste/ rten 'brel sgyu ma lta bu'i rgyun gyis 'jug pa'o/ /rkyen dang zhes pa la sogs pas ni de ltar rten 'brel gyi chos can dang /de'i chos nyid de bzhin nyid la sogs pa dbyer med cing gcig pa yin na/ rtag pa dang gtsang ba la sogs pa'i chos nyid kyang rkyen gyi 'bras bur 'gyur la/ chos nyid kyi ngo bor gyur pa'i rkyen rnams kyang rtag pa la sogs pa'i rgyur 'gyur ro/ /de 'dra ba'i rgyu dang 'bras bu'i phyogs khyed dang sangs rgyas rnams kyis gzung zhing gsungs pa ni/grangs can pa rnams kyis sngar nas yod pa'i rtag pa 'bras bur khas len pa dang khyad med par 'gyur zhes pa'o/ /lan gyi don ni kho bo cag don dam pa'i skye ba la sogs pa khas mi len pas mtshungs pa ma yin no/ /kun rdzob tu 'dom gang tsam gyi lus te/nye bar len pa'i phung po rnams la/ 'jig rten kun 'byung 'jig rten dang / /zhes pa rgyu kun 'byung gi bden pa dang / 'bras bu sdug bsngal gyi bden pa srid pa'i yan lag bcu gnyis kyis bsdus pa khas len te/ de yang zag pa dang bcas pa'i rgyun rgyud 'di nyid ma 'ongs pa'i phung po de 'dra ba 'grub pa'i rgyur gyur pa'i cha nas ni rgyu kun 'byung gi bden pa yin la/sngon gyi las dang nyon mongs pa'i 'bras bur 'dug pa'i cha nas ni sdug bsngal gyi bden pa'o/ /'gog par 'gro ba'i lam gyi rnams/ zhes pa ni rnam par byang ba rgyu 'bras so/ / rang bzhin gsum la zhes pa la sogs pas ni skye ba la sogs pa'i dngos por bstan pa'i dgos pa ston te/ dngos por 'dzin pa'i skye bo rnams brid pa'i don du'o/ /rang bzhin gsum ni bya ba dang / byed pa dang / byed pa po ste/ de ltar gsum du rtog pa'o/ /de phyir zhes pa la sogs pas ni de dag rjes su bzung ba'i don du thog mar chos kyi 'khor lo bskor ba na/blta bya ste gzung ba dang 'dzin pas bsdus pa phung po la sogs pa'i rang bzhin smos pa'o/ /lta ba rnams ni zhes pa la sogs pas ni phyis de rnams bzlog pa'i phyir mtshan nyid med pa'i chos bstan pa'o/ /nyams pa'i nyes phyir sdom pa med//ces pa ni thar pa'i lam las nyams par 'gyur ba'i phyir snga phyi la sogs pa sdom pa ste/ bdag rtag par 'dzin pa'am/ sgra dang don du sbyar ba la sogs pa byang chub sems dpa' rnams la med pa'o/ /mthar thug med dang zhes pa la sogs pas ni de kho na nyid du srid pa'i yan lag rnams 'dus kyis rgyu snga ma las mi skye ste/gal te skye bar khas len na srid pa'i yan lag mthar thug cing zad pa'i mya ngan las 'das pa mi 'thad de/ de rnams skye ba la sogs pa'i dngos por shes shing goms pas ni de nyid spong ba'i gnyen por mi 'gro la/ skye ba med par sgom pa yang phyin ci log yin pas de'i gnyen po nyid du mi 'gyur ba'o/ /des na mthar thug pa med pa'i phyir srid pa byas las mi skye ba'o/ /yang byas pa snang ba nyid kyi phyir de kho na nyid du byas pa'i tshul gyis mi skye ba'o/ /'jig pa rnam pa bzhi ni 'og nas ston par 'gyur ro/ / rnam par rtog pa gnyis ni gang zag dang chos su rtog pa'o/ /mthong nas zhes pa ni lta ba gnyis kyi yul stong pa nyid du mthong ba'o/ /ma skyes pa'i dngos po ni kun du brtags pa'i ngo bo ste/ de la yang blo 'jug ste de nyid phyin ci log yin la/ de dang 'dra bar sgyu ma lta bu'i gzhan dbang la yang don dam pa'i dngos por mi brtag ste/phyin ci log 'ching ba'i rgyu yin pa'i phyir ro/ /ji ltar zhes pa la sogs pa'i don ni bdag dang byang chub sems dpa' gzhan rnams yod med du lta ba phyin ci log dang mi 'dre bar de rnams bzlog pa'i rigs pa bstan du gsol zhes pa'o/ / rgyal sras rnams ni mi 'jigs phyir/ /zhes pa la sogs pas ni zab mo'i don la mi skrag cing / de bzhin gshegs pas rtogs pa'i don la spyod cing sgom pa dag rnam par thar pa dang zhes pa la sogs pa ste go bar zad do/ /rnam grangs kyis ni de dag bslu/ /zhes pa ni rnam grangs sna tshogs su snang ba la dngos por zhen pas so//de dag gzugs kyi ming yin te/ /zhes pa la sogs pas ni de ltar brjod pa rnams ni gzugs la sogs pa rnams kyi ming yin la brjod pa'i don ni de rnams kyi chos nyid de/ gzugs la sogs par snang ba dang stong pa nyid zung du 'jug pa sgyu ma lta bu'o//de'i phyir de dag ri bong gi rwa bzhin du dngos po med par mi brtag go/ /de bzhin dngos po thams cad kyi/ /rang bzhin brtag par mi bya'o/ /zhes pa ni thams cad kyi rang bzhin skye ba med pa la sogs pa de bzhin gshegs pa dang gzugs la sogs pa'i rnam grangs yin pas chos can dang chos nyid tha dad par brtag par mi bya'o//lta ba'i nyes par rab 'gyur zhes pa la sogs pas ni gzugs la sogs pa'i chos can skye ba med pa las gzhan du skye ba la sogs pa'i dngos por rtog na nyes par 'gyur ba'o/ /kun du rtog pa ni sna tshogs su snang ba'o/ / yongs su rtog pa ni bye brag 'byed pa'o/ /gang yang mu stegs mi skye dang / /zhes pa la sogs pas ni des skye ba med pa gzugs la sogs pa las gzhan du rtog pa ltar de las gzhan pa rnams kyang nga'i tshul lugs zab mo la de dang 'dra bar rtog pa ni khyad med pa'o/ /dgos dang zhes pa la sogs pas skye ba med pa la sogs pa'i dgongs don rtogs pa'i gang zag gi khyad par ston te/de la skye ba med par bstan pa'i dgos pa ni des 'dul ba'i gang zag rjes su 'dzin pa yin la/ dgongs gzhi ni skye ba med pa'i don nyid ces pa ste/ don dam par ma skyes pa'o/ /dgongs pa lta zhes pa la sogs pas don de nyid ston te/dgongs pa ni dgongs gzhi'o/ /don gnyis ni dgongs pa dang dgongs gzhi ste/ de dag shes pa ni skye ba med pa rtog par ngas bshad do/ /dngos po ma skyes zhes pa la sogs pas ma skyes pa dngos po yod pa gcig gi rnam grangs lags sam/ 'on te de 'dra bam lags kyi/'on kyang ri bong gi rwa bzhin du med pa gcig lags zhes rtog pa'o/ /mi mnyam pa ni chos nyid kyi ngo bor ro gcig cing mnyam pa ma yin te/ dngos po yod pa'i mtha' 'dzin pa'o/ /de dag dang khyed kyis bstan pa'i chos rnams 'dres shing khyad med par 'gyur te/ skye ba med pa la sogs pa yang snga ma ltar yod med kyi mtha' gcig tu 'gyur ba'i phyir zhes pa'o//rgyu med ces pa la sogs pas lan ston te go bar zad do/ /lta ba'i rgyu ni phyin ci log gi bag chags so/ /lhun gyis grub la bya ba med/ /ces pa la sogs pas ni mtshan ma med pa'i ye shes lhun gyis grub pa la/bya ba dang byed pa la sogs pa'i lta ba med de/ de 'dra ba yod na ni mu stegs byed dang 'dres par 'gyur ba'o/ /gal te bya ba med na sems bskyed dang / smon lam la sogs pas tshogs yongs su rdzogs par bya zhing / de bzhin gshegs pa'i snying po sbyang bar bya ba nyid du lta ba ni snga ma dang mi 'gal bar 'gyur ba'i tshul bdag la gsungs zhes pa'o//gzhan yang / chos rnams thams cad med pa'i phyir/ /ji lta bur na dkyil 'khor skye/ /zhes pa ste/ de bzhin gshegs pa'i snying po spros pa dang bral zhing 'od gsal ba rtogs pa lam gyi gtso bo dang //sems bskyed la sogs pa lam gyi 'khor skye ba mi 'thad ces pa'o/ /yang na rkang pa gnyis po 'di ni lan du sbyar bar bya ste/ de ltar dkyil 'khor skye bar khas mi len pas/ sngar gyi bya ba med par bstan pa dang 'gal ba med ces pa'o/ /dngos po las ni zhes pa la sogs pas ni sa bon la sogs pa'i dngos po las myu gu la sogs pa'i dngos po gzhan skye bar mthong bas ji ltar skye ba med par 'gyur zhes pa'o//gzhan yang sems can du dmigs pa med pa dang / sems can bsgral ba'i phyir sems bskyed par bshad pa dang / byang chub med cing byang chub tu sems bskyed pa la sogs pa thub pa chen pos bshad pa thams cad la snga phyi 'gal ba dang /mi mnyam rgyu med spangs pa ste/ yod med 'dzin pa spangs pa dang / 'jug pa dang ni ldog pa ste/ khyed nyid kyis kyang yod med kyi phyogs gsungs pa mi 'gal ba nyid du bdag la bstan du gsol zhes pa'o//rgyu dang 'bras bu mi 'jig pa'i sa'i rim pa'i mtshams sbyor ba ste/ rgyu 'bras yod par bstan pa dang yod pa las rnam par grol ba yang ci'i phyir mi 'gal zhes pa'o/ /'jig rten zhes pa la sogs pas lan ston to/ /zhi ba yi ni rgyu mi rtogs//zhes pa phyin ci log zhi ba'i gnyen po ma rtogs pa'o/ /nga la dkyil 'khor gang yang med/ /ces pa la sogs pas de kho na nyid du snying po rtogs pa lam gyi gtso bo la sogs pa khas mi len cing / chos nyid 'di dang 'di lta bu zhes mi 'chad cing yod med kyi dngos po bden pa nyid du khas mi len pa'i phyir nyes pa de rnams las grol ba'o//spros pa rnams kyis bsdus pa ni rnam par rtog pa sna tshogs kyis brtags pa'o/ /'phags pa'i rigs dang mthun pa yi/ /sems ni mngon par mi 'jug go/ /zhes pa ni de 'dra ba'i sems skyes pa na rtog pa mngon par mi 'jug cing ldog pa'o//'byung ba ni rgyu dang rkyen las 'byung ba'o/ /sgyu ma rgyu med ces pa la sogs pas ni sgyu ma la sgyu ma tsam gyi rgyu med par smra ba ni grub mtha' phyin ci ma log pa las 'das shing nyams pa'o/ /thog ma med ces pa la sogs pas ni phyin ci log 'byung ba'i rgyu ston te/don ni sngar bstan no/ /bdag dang chos su brtags pa yis/ /zhes pa la sogs pas ni phyi rol pa dang nyan thos pa la sogs pas gang zag dang chos kyi bdag tu brtags pa'i sgo nas rang gi rnam par rtog pa rdzas su grub pa'i gang zag gam skyes bu lta bur snang ba'i 'jug pa rnam pa gnyis kyis 'jug pa'o//ma tshang ba dang zhes pa la sogs pas ni 'phags pa nyan thos lam dang 'bras bu'i yon tan ma rdzogs pa dang / ma rig pa dang sred pa la sogs pa'i rkyen gyis srid par skye ba ste/ rgyun tu zhugs pa la sogs pa gsum dang / dgra bcom pa gnyi ga'i cha las rnam par grol ba rdzu 'phrul la sogs pa [(]sten [,]ston [)]pa na/bdag nyid kyi ting nge 'dzin gyi mthu la rag las pa ste rgyan dang ldan pa dang rgyan med pa de bzhin gshegs pa'i mthu la rag lus pa ste/ de ni rang gi ting nge 'dzin dang rdzu 'phrul gyi mthu yis pha rol gyi gnod pa ldog mi nus par/de bzhin gshegs pa nyid la skyabs su 'gro ba ste/ de ltar nyan thos rnam pa lnga'o/ /dus gzhan du zhig pa ni rgyu zad pa'i stobs kyis zhig pa'o/ /don dam pa ni skad cig gi 'jig pa ste/ gang zag la bdag med pa'i chos nyid do/ /phan tshun dang zhes pa ni lhan cig mi gnas pa'i 'gal ba'i tshul gyis phan tshun bzlog pa ste/de yang cig shos rgyun las bzlog pa'i 'jig pa dang / de'i yul du cig shos 'phos pa yang 'jig pa ste/ de ltar gnyis su 'gyur bas mi rtag pa rnam pa bzhi'o/ /yang na 'gal ba stobs mtshungs pa ste/ phan tshun gcig gis gcig gi nus pa bcom pas 'jig pa gnyis su 'gyur ba'o//'byung ba mtshan nyid mi mthun pa/ /zhes pa la sogs pas ni 'byung ba dang 'byung ba las gyur pa rjes su mthun pa'i rgyu 'bras bu 'dod pa 'gog pa'o/ /rnam par shes pa dang zhes pa la sogs pas phung po lngar grangs nges pa 'gog pa ste//sngar bstan pa ltar sems dang sems byung rdzas tha dad med pas tshor ba la sogs pa gsum rnam shes su 'dus pa'i phyir rnam par shes dang gzugs kyi phung po gnyis su 'gyur ba'o/ /gzugs kyi rnam pa 'dres pa ste/ /zhes pas ni de rnams sems su 'dres shing sems kyang stong pa nyid du ro gcig pa'o//rtog ge can gyis ma bsgrubs so/ /zhes pa ni rang dga'i rtog pas brtags kyang / dngos po 'dra ba'i bdag nyid du ma grub pa'o/ /sems dang zhes pa la sogs pas rnam par shes pa rnams brtags pa'i bdag kun gzhi dang ldan pa'am/ yang na bdag tu 'dzin pa dang ldan par ston pa'o//sems dang lhan cig ldan pa ste/ /zhes pa la sogs pas ni byis pa'i skye bo dang byang chub sems dpa' sa bdun la gnas pa ni kun gzhi rnam shes dang rtag tu ldan pa yin la/ yid kyi rnam par shes pa la sogs pa dang / rtag tu ldan pa'i nges pa med de/de rnams rgyun mi bstan pa'i phyir zhes pa'o/ /glo bur gyi dri ma rnam par dag pa'i 'phags pa rnams ni rtag tu ye shes dang lhan cig gnas pa'o/ /gzugs dang zhes pa la sogs pas nye bar len pa'i phung po lnga don dam par med pa nyid du ston to/ /de la gzugs ni gzugs kyi phung po'o//las ni 'du byed do/ /phung po yul gyi rgyu yis byung ba ni rnam par shes pa la sogs pa gsum mo/ /de ltar phung po dang bcas pa'i sems can rnams kyang don dam par nye bar len pa'i phung pos stong pa'o/ /gzugs med pa ni mi gnas so zhes pa ni de'i gnas pa zhes pa la sogs pas 'chad de/bdag dang chos su gdags pa'i rten tshor ba la sogs pa bzhi po rnams gzugs med par yod pa mi 'thad ces pa'o/ /gal te rnam par shes pa'i ngo bor yod do zhe na/ phyi nang dngos po med ces pa la sogs pa gsungs so/ /sems can med ces pa la sogs pas ni gang zag gi bdag gi rnam grangs sems can la sogs pa med par 'gyur ba'o//gal te kun rdzob tu yang rnam par shes pa med pas chos kyi bdag kyang med par smra na chad pa'i lta bar 'gyur ba'o/ /srid pa bar ma'i phung po rnams zhes pa la sogs pas ni bar do'i gzugs dbang po tshang zhing thogs pa med pa rdzas su ma grub pa'i ngo bor yod pa bzhin du gzugs med pa'i sems can rnams la yang yod mod kyi 'on kyang phra ba dang dman pas gzugs med pa'o zhes sngar bstan to//sems can rnam shes med na ni/ /zhes pa la sogs pas kun rdzob tu byis pa'i skye bo rnams kyi phyin ci log gi sems med na/thams cad 'bad pa med par grol bar 'gyur la/ de'i phyir mu stegs kyi smra ba rnam rig tsam ni rtag tu rnam par dag ces pa la sogs pa bden pa nyid du 'gyur ro/ /de na zhes pa ni gzugs med pa'i khams na'o/ /lta ba med ces pa ni gzugs shin tu phra ba dang dman pa'i phyir mthong ba dang thos pa la sogs pa'i shes pa gsal bar 'jug pa yang med pas dam pa'i chos ma thos pa'i phyir grub pa'i mtha' dang /theg pa'i bye brag dang / de la brten nas 'gro ba med pa ste/ ji skad du/ de dam pa'i chos mi thos pa'i sdug bsngal gyis sdug bsngal ba yin zhes pa dang /byang chub yon tan pha rol phyin nyams 'gyur 'ong zhes/ /gzugs med khams su skye ba don du gnyer mi byed/ /ces gsungs pa'i phyir ro/ /dbang po rnams dang zhes pa la sogs pas dbang po rnams dang bag chags dang /rnam par shes pa'i bag chags las byung ba'i rnam par shes pa rnams kyi nang nas kun gzhi dang nyon mongs pa can gyi yid ni skad cig tsam du yang rang gi yul gyi rnam pa gsal ba'i sgo nas 'dzin pa med de/ rtag tu phra rab 'jug pa'i phyir/ /zhes pa'o/ /ji ltar zhes pa la sogs pas gzugs la sogs par snang ba'i skad cig rnams skad cig gnyis phan chad du mi 'jug pa ste/rang gi dus las gzhan du mi gnas par ston pa'o/ /gzugs ni rtog par ma gyur par/ /zhes pa la sogs pa kun rdzob tu rnam shes med par khas len pa 'gog pa'o/ / skyes ma thag tu zhes pa la sogs pas ni rnam par shes pa'i khyad par rgyun dang ldan par ston pa'o/ /mkhas la ma yin blun po la/ /zhes pa ni mkhas pas de ltar mi zhen cing blun pos de ltar rtog pa'o/ /drug po la ni nyer len med/ /ces pa la sogs pas ni rnam par shes pa'i tshogs drug shin tu rgyun mi brten pas srid pa nye bar len pa med la/nye bar len pa dang bcas pa'i kun gzhi ni rgyu ba cha phra bas mi rtogs zhes pa'o/ /yod pa'i zhes pa la sogs pas 'phags pas chos rnams don dam par med par rtogs pa'i phyir chos kyi bye brag mi 'byed la/ chos rab tu rnam par 'byed pa'i shes rab med pa'i rtog ge ba 'ga' zhig kyang /rtag pa dang chad pa la sogs pa'i mthar lhung du dogs pa dang / shes rab med pa nyid kyis bye brag mi phyed cing 'byed par mi byed pa'o/ /gcig pa la yang sbyin pa yod/ /ces pa la sogs pas ni rnam par shes pa rnams las rnam par smin pa'i phung po star bar byed cing 'byin pa'i nus pa yod par ston te/de la gcig pa ni kun gzhi rnam par shes pa ste/ des ma rig pa dang las kun nas bslang zhing / las kyi sa bon chud ma zos par byas pa'i sgo nas rnam par smin pa'i phung po sbyin par byed pa'i nus pa yod do//tha dad pa ni yid kyi rnam par shes pa dang / ma rig pa dang sred pa la sogs pa rnams te/ de rnams la yang snga ma ltar sbyin pa'i nus pa yod pa'o/ /gal te de rnams byis pa'i skye bo la rtag tu ldan nam zhe na/ sems dang lhan cig gcig pa ste/kun gzhi dang rtag tu ldan la yid la sogs pa dang tha dad pa ste/ rtag tu ldan pa'i nges pa med pa'o/ /sems dang zhes pa la sogs pas ni sems dang sems las byung ba zhes bya bar bsgrags shing grub pa ma rig pa dang 'du byed la sogs pa de rnams kyi rnam par smin pa ster ba'i nus pa dang ldan pa'i dngos po de rnams nye bar len pa'i phung po las tha dad du dbyer yod na ni de rnams zag pa dang bcas pa'i phung po'i khongs su ma 'dus pas de rnams phung po dang ji ltar na gcig pa nyid du khong du chud par bya ste/de ltar khong du chud par byar med pa'o/ /de'i phyir de rnams zag pa dang bcas pa'i phung por 'dus shing yang phung po gzhan dang gzhan ster bar byed pa'o//de ltar na srid pa nye bar len pa'i nus pa dang bcas pa'i dmigs pa ste/ phung po'i bdag nyid du gyur pa byis pa'i skye bo la snang ba rnams ni las kyi kun nas nyon mongs pa dang / tshe'i kun nas nyon mongs pa dang /las kun nas slong bar byed pa'i ma rig pa dang sred pa la sogs pa'i tshul du 'dra dang mi 'dra ba'i tshul rnams kyis zhes pa ste/ 'gro ba'i rigs 'dra ba dang mi 'dra ba'i rnam pa'i sgo nas de dag gi phung po sgrub par byed pa ste/ ji ltar bsreg bya sreg pa la/ me dang phrad pa na cig car sreg pa bzhin du nye bar len pa dang bcas pa'i dmigs pa'i bdag nyid du gyur pas kyang /de 'dra ba'i phung po 'grub par byed pa nyid du ci'i phyir yang dag pa'i rtog ge dang ldan pa rnams mi ston te bstan par rigs pa'o/ /rtag tu skyes dang ma skyes dang / /zhes pa la sogs pas ni brtags pa'i bdag de bzhin gshegs pa'i snying po kun gzhi'i ngo bor gyur pa/sems can thams cad la yod kyang byis pa'i skye bos mi rtogs pa nyid du rgyas par ston te/ de la rtag tu skyes pa ni kun rdzob tu skad cig gi rang bzhin rgyun dang ldan par skye ba'o/ /de don dam par ma skyes pa dang spros pa dang bral zhing 'od gsal ba'i chos nyid mi 'gyur bar gnas pa na/bdag dang mtshungs pas bdag sgrub pa'i dpe nyid du ci'i phyir mi ston te/ chos mthun pas dper bstan par rigs zhes pa'o/ /de lta na yang log pa'i rtog ge can rnams kyis de 'dra ba'i rang bzhin ma rtogs pas de'i dper byed pa ma yin te/sems can rnams la bdag rtag pa ther zug pa'i dngos po nyid yod par ston pa'o/ /de'i phyir de dag ni mtha' gnyis spangs pa'i dbu ma'i tshul ma rtogs shing rmongs pa dag /bdag rtag pa'i dngos po khas len par 'dod pas de'i sgrub byed dang dpe la sogs pa tshol bar byed kyi/rnam par dag pa'i bdag de bzhin gshegs pa'i snying po ni de dag gis mi rtogs pa'o/ /nyer len nye bar len byed kyi bye brag ni srid pa nye bar len pa'i nus pa yin la/ phung po ni nus pa'i rten chos can no/ /de rnams ji lta ba bzhin du rtogs na mtha' gnyis spangs pa'i tshul lugs zab mo rtogs pa'i ye shes skye bar 'gyur ro//mu stegs zhes pa la sogs pas ni kun gzhi'i snying po dang phyogs 'ga' zhig nas 'dra ba'i bdag rtag pa'i dngos por bsams shing brtags la/ rnam par dag pa'i bdag 'gyur ba med pa'i chos nyid dang lhan cig ldan pa ste/brjod bya nyid du ldan pa'i chos ni de dag gis brjod pa ma byas shing ma bstan pa'o/ /de dag rab tu phye ba ni phyi rol pas brtags pa dang / rnam par dag pa'i bdag gi bye brag ji lta ba bzhin du shes pa ste/ de las rnam par thar pa la sogs pa'i phan yon 'byung ba'o//bsgom pas spang bar bya ba'i nyon mongs pa ni lhan cig skyes pa'i sde tshan te/ log par lta ba dang / tshul khrims dang brtul zhugs mchog tu 'dzin pa dang lta ba mchog tu 'dzin pa dang / the tshom dang rnam pa bzhi po de rnams ma gtogs pa nyon mongs pa rnam pa drug ste/ de yang khams gong ma gnyis na khong khro med pas rnam pa lnga lnga ste/ de ltar na bsdoms pas rnam pa bcu drug tu 'gyur ba'o/ /mthong bas spang bar bya ba ni sngar bstan to/ /phung po rnams la sems can no/ /zhes pa ni zag pa dang bcas pa'i phung po rnams la de bzhin gshegs pa'i snying po yod pa yang sems can rnams kyis phung po'i dri ma sbyangs nas mthong bar 'gyur ba'o//bdag dang lhan cig ces pa ni bdag tu 'dzin pa'i phyin ci log go/ /sems kyi rang bzhin 'od gsal ba/ /zhes pa ni gnyug ma'i ye shes rig pa'i cha'o/ /da las gzhan pa ni de'i chos nyid stong pa ste/de dag kyang phan tshun zung du 'jug pa'o/ /de dag la glo bur gyi dri ma phyin ci log tu mngon par zhen pa 'byung zhing de yis las bsags pa la brten nas de gnyis te/ chos can dang / chos nyid kyi ldog pa gnyis nyon mongs par 'gyur te/ dar gyi srin bu la sogs pa bzhin no zhes sngar bstan to//thog ma med pa'i glo bur zhes pa ni rigs mthun pa'i rgyu la thog ma med la/ dngos po'i ngo bo ni glo bur ba nam mkha'i sprin lta bu'o/ /gnas shing 'jig par mi 'gyur ba ni chos nyid la 'gyur ba med pa'o/ /rnga'am zhes pa la sogs pas ni btags pa'i bdag de bzhin gshegs pa'i snying po sems can thams cad la yod kyang rtogs par mi nus par dpe du ma'i sgo nas ston te/'tshol bar byed pa ni shing dang pags pa la sogs pa'i dngos po re re la sgra brnyan gyi dngos po tshol bar byed pa ste/ de ltar btsal kyang mi rnyed pa de bzhin du de bzhin gshegs pa'i snying po yang phung po rnams la btsal na mi rnyed pa'o//'di rnams kyis ni phyin ci log gi bdag phung po la btsal kyang mi rnyed pa'i dpe nyid du yang sbyar bar bya'o/ /gzhan yang bdag gi yon tan te de bzhin gshegs pa'i snying po las/ 'jig rten dang 'jig rten las 'das pa'i phun sum tshogs pa thams cad 'byung ba'i nus pa ni sems dang sems las byung ba la sogs pa'i phung po la ldan kyang mi shes pa de bzhin du zhes pa la sogs pa go bar zad do//sman gyi bsod pa ni phan pa'i khyad par ro/ /sa dang zhes pa la sogs pas de bzhin gshegs pa'i snying po med na yon tan phun sum tshogs pa mi thob par ston pa'o//gang tshe zhes pa la sogs pas ni brtsad pa spang ba'i thabs ston te/ 'jig byed ni sangs rgyas kyi chos 'jig par byed pa rgyang pan pa'i slob ma klu'i gzugs 'dzin pa'o/ /bdag med smra ba ni de bzhin gshegs pa'i snying po la skur pa 'debs pa dang /de dag ston pa'i theg pa chen po ni chos kyi tshul yang dag pa ma yin zhes smra ba'o/ /de dag dang 'grogs pa spangs shing / de bzhin gshegs pa'i snying po sbyangs pa la brten nas de 'dra ba'i bdag med ces skur pa 'debs pa dang / gzhan yang log par lta ba la sogs pa'i tshang tshing sreg par byed cing /de bzhin gshegs pa'i snying po nyid mngon du 'gyur ba'o/ /kha 'da' zhes pa la sogs pas dpe'i rnam pa gzhan ston pa'o/ /rnam pa lngar zhes pa ni gzugs de bzhin gshegs pa'i snying po yin nam zhes pa la sogs par bzung zhing btsal ba'o/ /rig sngags la sogs dpe rnams kyis//zhes pa ni rgyang pan pa'i rig sngags la sogs pa dang / gtan tshigs dang dpe'o/ /gang la gang phyir gang don du/ /'dus pa rnams ni ma gtogs so/ /zhes pa ni de bzhin gshegs pa'i snying po gang la thabs dang shes rab la sogs rgyu gang gi dbang gis 'phags pa'i go 'phang gang thob par bya ba'i don du zag pa med pa'i sa bon bsgos shing 'dus pa rnams mi rtogs pa'o//yang kun gzhi gang la ma rig pa dang srid pa la sogs pa'i rgyu yis zag bcas kyi phung po bskyed par bya ba'i don du de 'dra ba'i sa bon bsgos shing 'dus pa rnams mi rtogs pa'o//chos rnams zhes pa la sogs pas mtshan nyid sna tshogs su snang ba sems gcig tu 'dus pa mi rtogs pa ste/ snga ma de nyid bshad pa'o/ /rgyu med ces pa la sogs pas kun rdzob tu yang med par smra ba la tshad ma dang lung dang 'gal ba'i nyes par 'gyur zhes pa'o/ /sems kyi rjes lta zhes pa la sogs pas sems kyi rang bzhin gcig dang du ma dang phyi dang nang du btsal kyang ma mthong ba ste/de nyid sems kyi chos nyid mthong ba'o/ /'di ltar bstan pas kyang rnam pa brdzun par smra ba gang dag sna tshogs su snang ba'i rnam pa'i tshogs ni brdzun pa nyid yin la/ de 'dra ba'i rnam pas kha ma bsgyur ba'i shes pa gnyis su med pa'i rang rig pa shel dag pa lta bu ni dngos po'i ngo bor grub pa'o zhes 'dod pa 'gog ste/gcig dang du ma la sogs par btsal na ma rnyed pas gnod byed kyi tshad ma yod pa dang / shel sgong dag pa lta bu'o/ /shes pa rab tu tshor ba med//ces pa ste sgrub byed med pa'o/ /de ltar med bzhin du rtog na ni rtag pa dang mi rtag pa la sogs pa'i khyad par gang du yang brjod du med pa'i gang zag las dang las kyi khur khyer ba 'ga' zhig kyang yod do zhes ci'i phyir mi brjod de mtshungs par zad do/ /gal te de 'dra ba mi 'thad kyang gzugs la sogs pa'i rnam par mthong bar byed pa ni snang ba'i rgyu las byung ngo zhe na snang ba ci'i rgyu las byung zhes pa ste/mi 'thad pa nyid du bstan zin to/ /nga ni kA t+yA ya na'i rigs/ /zhes pa la sogs pas ni mchog gi sprul pa dang longs spyod rdzogs pa'i sku gnas gang du sangs rgyas pa'i tshul ston te/de la nga zhes pa ni dri med rgyal ba zhes gdul bya tha mal pa rnams la snang ba mchog gi sprul pa yin la/ de nyid sangs rgyas kyi ye shes la yang snang ba ye shes kyi ngo bor gyur pa ni longs spyod rdzogs pa'i sku yang yin te/ 'phags pa gser 'od dam pa las longs spyod rdzogs pa'i sku yang yin la sprul pa'i sku yang yin pa'i mu bzhi pa gsungs pa'i phyir ro//de nyid kA t+yA ya na'i rigs/ /zhes pa ste sangs rgyas snga ma'i ye shes kyi rigs su skyes pa'o/ /de yang ji ltar 'phags pa klu sgrub kyis/ bcom ldan dngos dang dngos med pa//ston pas kA t+yA ya na yi/ /gdams ngag las ni yod pa dang / /med pa gnyis ka gdags par mdzad/ /ces gsungs pa ste/ kA t+yA ya nas 'jig rten thams cad ni gnyis la brten pa ste/ yod pa dang med pa la'o/ /de la brten nas mya ngan dang smre sngags 'don pa la sogs pa 'byung ngo zhes gsungs te/de 'dra ba ston pa'i sangs rgyas kyi khyad par ro/ /gtsang ma'i gnas nas byung zhes pa ni gtsang ma'i gnas kyi bye brag 'og min du longs spyod rdzogs pa'i skur sangs rgyas pa'o/ /stong phrag gsum gyi mdo rnams kyis/ /zhes pa ni mdo sde 'di nyid yin te/ji skad du/ lang kar gshegs pa'i mdo sde ni sangs rgyas snga mas gsungs zhes pa'o zhes bstan pa'i phyir ro/ /longs spyod rdzogs pa'i sku 'og min du sangs rgya ba'i rgyu mtshan yang / de'i zhing khams ni ye shes yongs su dag pa'i snang ba yin la/ khams gsum po gzhan ni byis pa'i skye bo rnams kyi sems nyid ma dag pa'i snang ba yin zhing / gtsang ma'i gnas gzhan yang 'phags pa rnams kyi ye shes phyogs 'ga' tsam dag pa'i snang ba yin te/ rnam pa thams cad du dag pa'i snang ba min pas de rnams su sangs mi rgya ba'o/ / 'dir phyi rol gyi dngos por gyur pa'i zhing la sogs pa ni yod pa ma yin no zhes rgyas par bstan to/ /sngar gyi dri ba'i lan du sbyar ba ni shes par zad do/ /gal te de lta bu'i zhing khams phun sum tshogs pa ni 'dod pa'i yon tan khyad par can dang ldan pas 'ching ba'i rgyu ma yin nam zhe na/ ma yin te/ 'ching ba'i rgyu 'dod chags la sogs pa'i nyon mongs pa ni yul du snang ba sems kyi ngo bor gyur pa'i chos nyid stong pa nyid la 'ching zhing der thim pa'o/ /de'i phyir de ltar rtogs pa'i ye shes kyis nyon mongs pa 'joms pa ste/ ye shes de ni brtul zhugs dang ldan pa rnams kyi ral gri'i so dang 'dra ba'o//bdag med nyid ni ji ltar med/ /ces pa ni de sgyu ma lta bur yod pa'o/ /rgyu yi rnams ni ma skyes te/ /rkyen rnams de dag byas pa'o/ /zhes pa ni/ 'dir d+hA tu zhes pa rgyu'am dbyings nyid la 'jug pas 'dir ni chos kyi dbyings la bya ste/ de 'dra ba'i rang bzhin ma skyes pa dang sgyu ma lta bu'i gzhan dbang ni kun rdzob tu rgyu yis byas pa'o//de gnyis zhes pa gzhan dbang dang chos kyi dbyings gnyi ga yang don dam par skyes pa ma yin pa'o/ /snang dang slob ma rdzas sogs kyis/ /zhes pa ni snang ba phyi'i skye mched dang / dbang po la sogs pa'i rdzas nang gi skye mched kyi rnam par shes pa skyed cing / rig pa'i gnas la bslabs pa'i rgyu yis de rnams la mkhas pa'i gnas skabs su bskyed pa'o/ /mngon par 'du byed ces pa la sogs pas phyi rol gyi ngo bor gyur pa'i gzugs kyi sku yang dag pa'i sangs rgyas ma yin par ston te/de yang kha dog dang dbyibs kyi rnam pas bsdus pa'i mtshan sum cu rtsa gnyis dang ldan pas ni sangs rgyas su 'gyur ba ni ma yin te/ de ni 'khor los sgyur ba'i rgyal po la yang yod pa'i phyir ro/ /des na sangs rgyas nyid du 'jog pa'i rgyu mtshan ni rnam pa thams cad mkhyen pa'i ye shes te/ji skad du 'phags pa shes rab kyi pha rol tu phyin pa las/ dge slong dag nga'i sku thob pas de bzhin gshegs pa de bzhin gshegs pa'i grangs su 'gro ba ni ma yin gyi/ 'on kyang rnam pa thams cad mkhyen pa'i ye shes brnyes pas de bzhin gshegs pa'i grangs su 'gro'o zhes gsungs pa'i phyir ro//'on lkugs long ba zhar ba dang / /zhes pa la sogs pas ni tshangs par spyod pa'i rten khyad par can ston te/ de la shar gnyer ba ni srog dang longs spyod la gnod pa byas pa rnams la/khon du 'dzin pa'i sgo nas lan glen par 'dod pa ste/ nyon mongs pas dkrugs pas de'i rten ma yin pa'o/ /rgan po dang byis pa yang rten ma yin te/ rang bzhin gyis 'dod chags chung ba rnams la tshangs par spyod pa brtul zhugs can zhes nga mi smra'o zhes 'phags pa dkon mchog brtsegs pa las gsungs pa'i phyir ro//gzhan ni mdzes pa'i bar chad nyid du dam pa'i chos 'dul ba las bshad do/ /bsgribs dang zhes pa la sogs pas mtshan gyi bye brag ston te/ de la bsgribs pa ni mi'i 'khor los sgyur ba'i rgyal po'i mtshan te/ cung zad mi gsal ba dang yon po la sogs par 'dug pa'o//gsal ba ni de bzhin gshegs pa'i mtshan te/ thub mtshan yul na gnas pa dang / /gsal ba rdzogs pa 'phags pa yin/ /zhes gsungs pa lta bu'o/ /de bzhin du lha'i rgyal po rnams kyi mtshan dang ldan pas lha rnams kyi 'khor los sgyur ba'o/ / gsal ba la la rab tu 'byung / /zhes pa ni de bzhin gshegs pa ste/ 'dod pa'i yon tan spangs shing rab tu 'byung ba'i tshul bstan pa'o/ /de las gzhan lha dang mi'i 'khor los sgyur ba ni bag med pa ste/ 'dod pa'i yon tan la spyod pa'o/ /rgyas dang gzegs can khyu mchog dang / / zhes pa la sogs pas ni khyed kyis lung bstan pa ni du zhes dris pa'i lan du ma 'ongs pa lung ston pa ste/ de ltar bstan pa'i dgos pa yang mu stegs kyi drang srong la sogs pa yang dag pa ma yin pa'i lam ston pa dang / de bzhin gshegs pa rnams yang dag pa'i lam ston pa dang de'i chos bsrung ba'i rgyal po la sogs pa 'di ltar 'byung ngo zhes bstan pas/de'i dus su skyes pa'i sems can rnams kyis blang bya dang dor bya'i bye brag ji lta ba bzhin du rtogs par 'gyur ba dang / ston pa la yid ches pa'i dad pa skye bar 'gyur ba'o/ /skyabs 'og tu zhes pa ni skyabs 'byung gi dus kyi 'og rol lam/de nyid kyi dus kyang rung ste kla klo stag gzig gi rgyal po 'byung ba'o/ /de'i rjes la mtshon gyi 'khrug pa ste/ khyab 'jug dang gnod sbyin gyi sde rnams phan tshun mtshon gyis gcod cing gsod par byed pa'o/ /'di nyid yul 'khrug pa dang khrag khrug dang zhes pa la sogs pa'i lan du yang sbyar bar bya'o//de la sogs pa 'das pa dag /'gro ba 'khor lo bzhin du 'khor/ /zhes pa ni/ de nas yar skye mar 'grib pa'i/ /bskal pa gzhan ni bco brgyad 'byung / /zhes pa dang sbyar bar bya'o/ /me dang nyi mar phrad pa zhes pa ni bar gyi bskal pa nyi shu 'das pa'i 'og rol du snod kyi 'jig rten 'di nyid la me'i khams yod pa dang /nyi ma'i dkyil 'khor bdun shar ba la sogs pa'i stobs kyis 'dod pa'i khams dang / bsam gtan dang po'i bar du sreg pa ste/ 'jig pa dang po dmyal ba'o/ /srid pa med nas snod zad pa//zhes pa dang sbyar ro/ /gang la zhes pa la sogs pas ni chags pa dang po rlung nas ni zhes pa la sogs pa ste/ lha rdzas kyi gnas ni bsod nams kyi snang ba ste/ 'byor pa phun sum tshogs pa dang ldan pa'o/ /rigs bzhi'i mi mgon dbang po dang / /zhes pa ni mar 'grib pa'i dus su mang pos bkur ba'i rgyal po byung ba ste/'dzin bcas rnams kyis zhing dpon bstabs/ /zhes pa dang sbyar ro/ /drang srong rnams dang chos zhes pa ni sangs rgyas 'byung ba'i sngon rol du 'jig rten pa'i chos dang / de las gzhan rig byed rtag pa skyes bus ma byas par 'dod pa dang /srog gi mchod sbyin dang sbyin sreg la sogs pa 'byung bar 'gyur ba'o/ /gtam ni sngon gyi gtam rgyud do/ /rkyang pa rtogs byed 'brel pa ni sgra'i mdo dang de 'chad pa'i 'grel pa'o/ /'di skad bdag gis thos sogs pas/ /zhes pa ni gleng gzhi dang bcas pa'i chos mi mthun pa sna tshogs bstan pas 'jig rten rmongs par 'gyur ba'o//shin tu btsos zhes pa la sogs pas ni mu stegs la sogs pa'i rtags spangs pa de bzhin gshegs pa'i rgyal mtshan ston te/ sprul pa'i sku yis bstan pa'o/ /steng nas zhes pa ni kha dog bsgyur ba'i gos steng nas bgo ba'o//'dam sogs zhes pa ni tshos rtsi ste sngar bstan pa dang sbyar ro/ /bri ba dang bkra ba ni kha dog gsal bar byas pa'o/ /rked pa'i srad bu ni rked 'ching gnon par byed pa'i srad bu'o/ /mtho ris nas ni lha rdzas 'byung / /zhes pa ni lha'i bdud rtsi ste/ tshogs rdzogs pa'i de bzhin gshegs pa la lha rnams kyis 'bul bar snang ba'o/ /gnyis po ni dman pa'i zas dang slong mo'o/ /rin chen zhes pa la sogs pas rin po che sna bdun dang mtshan sum cu rtsa gnyis dang ldan pas 'khor los sgyur ba'i rgyal po mtho ris thob par byed pa'i chos ston pa gling bzhi la dbang byas nas mthar gyis sum cu rtsa gsum du zhugs pa dang /sred pa'i dbang gis lha'i dbang po la ngan sems bskyed pas slar 'dzam bu'i gling 'di nyid du lhung bar 'gyur ba ste/ rgyal po grags pa mtha' yas kyi gtam rgyud dkon mchog brtsegs pa las 'byung ba bzhin blta bar bya'o//lhar skyes pa'i zhes pa ni lha rnams kyi 'khor los sgyur ba'am/ yang na mi'i rgyal po nyid la ming gi lha zhes sngar bstan no/ /byas pa'i dus dang zhes pa la sogs pas ni de rnams 'byung ba'i dus kyi bye brag ston te/ de la byas pa'i dus ni rigs bzhi'i mi rnams kyi mgon po mang po bkur bas sa rnams bgo ba byas pa nas bzung ste/sangs rgyas kyis bstan pa'i chos gcig kyang ma nyams pa'i bar te/ bskal pa rdzogs ldan gyi dus zhes kyang dus kyi 'khor lo las bshad do/ /de yang mi rnams kyi lo grangs ni lnga stong dang bzhi brgya'o/ / skyabs 'byung gi dus ni sangs rgyas kyis bstan pa'i chos rnams tshigs su bcad pa'i sde tshan du byas pa las/ rkang pa gcig nyams nas gsum lus pa ste/ gsum ldan gyi dus zhes kyang bya la/ de'i dus su sems can rnams la cung zad 'jigs pa 'byung bas skyabs 'tshol ba ste/ de'i phyir skyabs 'byung zhes bya ba'o//de'i lo grangs kyang snga ma bzhin no/ /gnyis gzhan gyi dus ni rkang pa gnyis lus nas gnyis nyams par gyur pa ste/ gnyis ldan gyi dus zhes bya la lo grangs snga ma bzhin no/ /rtsod pa'i dus ni lo grangs snga ma dang 'dra ba las bstan pa'i chos rkang pa gcig tsam lus pa ste/de'i dus na skye dgu rnams nyon mongs pa mang bas rtsod pa 'phel ba'i phyir rtsod pa'i dus zhes bya'o/ /nga dang gzhan ni byas dus la/ /shAkya seng ge rtsod pa'i dus/ /zhes pa ni dus de dag tu de rnams su sangs rgyas pa'o/ /gal te 'dir nga zhes bya ba ni mdo sde 'di nyid gsungs pa'i shAkya seng ge nyid la 'jug pa ma yin nam/ci'i phyir de las tha dad pa sngar nyid du sangs rgyas pa dang / de yis shAkya seng ge lung ston par byed ce na/ bden mod kyi sngar bstan pa ltar shAkya seng ge dang dri med rgyal ba la sogs pa'i mchog gi sprul pa sangs rgyas nyid kyi ye shes la snang ba ni ye shes kyi bdag nyid du gyur pa'i longs spyod rdzogs pa'i sku yin la/de yang ye shes kyi rgyun rgyud gcig nyid yin pas nga zhes pa'i tshig smos pa yin la/ yang dus dang rnam pa la sogs pa mi 'dra bas tha dad pa lung ston pa lta bur gsungs pa'o/ /de yang / ji ltar skyes bu gcig nyid kyis//gos dang rgyan gyi rnam pa gang / /snga las gzhan du bsgyur byas te/ /brjod pa'i rnam pa mthun pa'am/ /cung zad gzhan du bstan kyang rung / /'ga' zhig gis ni gzung bya ste/ /yi ger bkod pa ji bzhin du/ /tshul 'dir rab tu rtogs par bya/ /zhes pa'o//de ltar lung bstan pa'i dgos pa yang sangs rgyas de dag sprul pa'i sku 'ba' zhig ni ma yin gyi snga ma ltar longs spyod rdzogs pa'i skur yang 'gyur la/ de yang ye shes rgyun gcig nyid du rtogs par bya ba dang / shAkya seng ge las gzhan dag 'di ni sangs rgyas pa ma yin gyi/ g.yo dang sgyu yis 'jig rten 'drid par byed pa'o//zhes zer ba'i dogs pa sel ba'o/ /rnam pa gcig tu na 'di dag gi don ni sngar bstan pa ltar/ lang kar gshegs pa'i mdo sde ni sangs rgyas snga mas gsungs pa'o zhes 'byung bas rgyud tha dad pa'i sangs rgyas snga ma gcig gis kyang tshul 'di nyid kyi mdo sde 'di gsungs shing khyad par du ma 'ongs pa lung bstan pa'o//de ltar snga phyir gsungs pa thams cad kyang sdud pa pos thos shing de bzhin du bsdus te bstan pas 'gal ba med ces bya'o/ /'di skad bdag gis thos pa la sogs pa ni phyi rol pa la sogs pas kyang ma bstan pa ni ma yin mod kyi/'on kyang stsogs pa'i tshig gis bsdus pa'i chos kyi khyad par 'ga' zhig ni phyi rol la sogs pas ma bstan pa'o/ /sngon chad byung ba ni sngon gyi gtam rgyud do/ /'byin par byed pa ni rig byed de/ yi ger ma bris par kha nas 'don pa byed pa'o//nga'i zhes pa la sogs pas tha mal pa la snang ba sprul pa'i sku'i rigs dang gnas la sogs pa ston pa'o/ /zla ba skyabs zhes pa ni rab tu ma byung ba'i mtshan no/ /zla ba'i rigs las skyes pa ni tha mal pa'i snang ngo / /na thig le las byung ba dang / nges pa'i don du shes rab kyi pha rol tu phyin pa las skyes pa'o//thar par zhugs zhes pa la sogs pas ni rab tu byung ba dang / dka' thub spyod cing 'tshang rgya ba'i tshul bstan nas/ chos kyi tshul sna tshogs bshad nas byang chub sems dpa' blo gros chen po la 'od zer la sogs pas dbang bskur te/ma 'ongs pa na mdo sde 'di'i don zab mo zhu ba nyid du lung bstan nas mya ngan las 'da' ba'o/ /gzhan yang mtho ris dang thar pa thob pa'i chos la skye dgu rnams kyi blo gtod par byed cing / chos kyi me sgron gyis gdul bya'i rgyud snang bar byed pa'o/ /de nas rim gyis chos kyi snang ba la slob pa zhan par gyur cing snang ba nub pa na/bskal pa'i mtha' sngar bstan pa'i tshul gyis 'jig par 'gyur ba'o/ /'od srungs zhes pa la sogs pas ni/ nga dang gzhan ni byas dus la/ /zhes pa'i don 'chad pa'o/ /de'i 'og tu byas dus la zhes pa la sogs pas ni gzhan dag dang zhes pa'i don nyid bstan pa'o//shes bya lnga ni dus gsum gyis bsdus pa'i 'dus byas dang / nam mkha' dang 'gog pa la sogs pa 'dus ma byas dang / de dag gi chos nyid brjod du med pa'o/ /de ltar gsum du yang 'dus mod kyi dus gsum du phye bas lngar 'gyur ba'o//gal te sangs rgyas kyis bstan pa'i chos ma nyams par sangs rgyas gzhan 'byung ba mi 'thad do zhe na/ skyon med de/ tshig ma nyams kyang sgrub pa la sogs pa'i sbyor ba nyams pas de dag gi don du gzhan 'byung ba'o/ /gnyis gzhan la min skyob 'byung med//ces pa ni sangs rgyas de rnams de dag gi dus su ma 'byung ba'o/ /rtsod pa'i dus kyi tha ma la yang gdul bya med pas mi 'byung ba'o/ /mi 'phrogs pa dang zhes pa la sogs pas ni nye bar gdams pa ston te/ 'gyur ba med pa'i chos kyi sku mngon du bya zhing de'i don du tshogs gnyis rdzogs par bya ba ste/de la ma bris zhes pa la sogs pas ni sku gzugs la sogs pa'i rten la rdul gyis ma gos par bya ba'i don du steng du yid du 'ong ba'i bla re bre ba'o/ /de las gzhan du bris pa ni skyes pa dang bud med la sogs pa'i gzugs bris pa'o/ /dus mtshams gsum ni brgyad dang bcu bzhi dang bco lnga la lha'i tshogs chen po 'du bas smyung bar gnas pa'am mchod par bya ba'o//de bzhin du mar ngo'i brgyad dang bcu bzhi dang bco lnga la yang mkha' 'gro'i tshogs 'du bas mchod pa bya ba la sogs pa theg pa gzhan las 'byung ba bzhin du'o//sdom pa gsum ni so sor thar pa la sogs pa gsum mo/ /yang na sdom pa la sogs pa gsum bstan pa las 'byung ba bzhin du lus ngag yid gsum gyi nyes pa sdom pa'o/ /mda' dang zhes pa la sogs pas kun rdzob tu 'du byed skad cig mar bstan pa'o/ /de la dge dang mi dge de bzhin zhes pa ni de dag gi skad cig phyi ma skyes pa ni snga ma rnams ldog par 'gyur ba'o//gcig pu mang po ma yin te zhes pa la sogs pas ni ye shes kyi tshogs kyi yan lag tu rten 'brel don dam pa pa 'gog pa'o/ /de yang rtog ge rnams kyi rgyu gcig las 'bras bu mang po 'byung bar khas lan pa mi 'thad de de lta na rgyu 'bras mi 'dra ba'i mtshan nyid dang ldan pa'i phyir/dngos po mtha' dag gis sna tshogs ma byas par 'gyur zhes pa ste/ ji skad du sngar dngos po rnams kyi tha dad dang tha dad ma yin pa rgyu med pa nyid du 'gyur te/ rgyu tha dad dang tha mi dad kyis ma byas pa'i phyir zhes pa la sogs pa rgyas par bstan to//len pa kun ni rlung dang 'dra/ /sbyin par byed pa zhing bzhin no/ /zhes pa ni go rims bzhin du kun gzhi rnam par smin pa'i cha dang sa bon gyi cha ston pa'o/ /de la dang po zag bcas kyi phung po len pa ni myur du 'pho bas rlung dang 'dra ba'o//yang sa bon chud ma zos par byed pas zhing dang 'dra ba'o/ /'di ni rtog ge can gyi tshul/ /zhes pa ni gcig las mang po skye ba dang / skyes nas 'jig pa la sogs pa rtog ge pas brtags pa'o/ /de ni me mar sa bon 'dra//zhes pa ni/ de lta bur na mang du 'gyur/ /de ni rtog ge'i tshul zhes pas ston te/ mar me gcig las stong du 'gyur ba dang / sa bon gcig las 'bras bu mang po 'byung / /zhes pa ni rtog ges brtags pa'o/ /'dra phyir mang du ga la 'gyur/ /zhes pa ni til las zhes pa la sogs pas rgyas par 'chad de/de'i don ni rgyu dang 'bras bu 'dra ba nyid du rigs pa'i phyir rgyu gcig las 'bras bu mang por ga la 'gyur te/ til dang bal sran mi 'dra bas rgyu 'bras bu mi 'thad pa la sogs pa dang mtshungs so/ /gro dang zhes pa la sogs pas ni don de nyid bsdus te ston pa'o//sgra byed pa ni zhes pa la sogs pas ma 'ongs pas khyad par gzhan lung bstan pa'o/ /tshe dbang ni dbang phyug chen po'o/ /'jig rten rgyang pan byed pa ni rang gi tshul 'dor ba ste/ sngar zhib tu bstan to/ /mdo byed pa ni sgra'i rtsa ba la sogs pa byed pa'o/ /skar mkhan ni gza' dang skar ma la sogs pa'i rtsis byed pa'o//gzhan yang skye dgu rnams kyi bsod nams kyi dbang gis chos srung bar byed pa'i rgyal po stobs can zhes bya ba 'byung ste/ rang gi mnga' ris kyang chos kyi don du gtong ba'o/ /tshig stobs can ni lha'i drang srong dmod pa 'dor ba la sogs pa'o//nags kyi gnas na 'dug pa'i tshe/ /zhes pa la sogs pas ni bdag nyid kyis sngar dang phyi ma'i dus su 'byung bar 'gyur ba'i khyad par du lung ston te/ de la nga nyid nags kyi nang na dka' thub spyod pa'i tshe/ dbyu gu'i shing zhes pa g.yas dang g.yon dang rgyab nas rten par byed pa'i dbyug pa gsum mo//pags pa ni kriSh+Na sa le'i pags pa ste dka' thub dang ting nge 'dzin gyi yan lag tu 'gyur ba'o/ /tshangs pa brgya rnams zhes pa ni de'i 'khor ro/ /dbang po lha dang bcas zhes pa yang lha'i 'khor dang bcas pa ste/ ka shi ka la sogs pa sna tshogs kyi gos rnams nga la 'bul ba'o//rgyal po chen po bzhi ni slong ba'i snod lhung bzed 'bul ba'o/ /mi skyer smra ba'i rgyur 'dod pa/ /zhes pa la sogs pas ni don dam par ma skyes shing kun rdzob tu rten 'brel khas len pa rnams 'ga' zhig skyes pa'am skye bar 'gyur yang rung ste/don dam par ni skye ba med par grub la/ des na skye ba la sogs pa ni tshig tsam nyid du brjod pa'o/ /sems de 'byung bar byed ces pa la sogs pas kun rdzob kyi rten 'brel nyid rgyas par ston te/ tshig gi don ni sngar bshad zin to/ /grangs can smra ba rnams kyi gnyis/ /zhes pa ni dbang phyug khas len pa dang /mi len pa gnyis te/ 'di rnams kyi don kyang sngar bstan to/ /'bras bu bdag nyid rab tu sgrub/ /ces pa ni gtso bo'i bdag nyid dam rgyu nyid kyi bdag nyid du khas len pa'o/ /rgyu dang 'bras bu sna tshogs par 'gyur ba la ni byed pa yin zhes pa ni rnam par 'gyur ba rnams 'ga' zhig gi ni rgyu la 'ga' zhig gi ni 'bras bu'o zhes sna tshogs su rtog par byed pa'o//de ltar sna tshogs su brtags kyang sems kyi chos nyid de de bzhin gshegs pa'i snying po ni gzhan du mi 'gyur zhing rang bzhin gyis rnam par dag pa ste/ ji ltar dngul chu dag ces pa la sogs pas ston to//shing kun dri dang zhes pa la sogs pas de dag la dri yod kyang mnye ba dang brdung ba la sogs pa ma byas par mi tshor ba dang / sa bon la myu gu skyed pa'i nus pa yod kyang rtog par mi 'gyur ba dang mtshungs zhes pa ste rgyas par sngar bstan to/ /de nyid dang ni tha dad ces pa la sogs pas de bzhin gshegs pa'i snying po de nyid phung po 'dus byas dang gcig pa tha dad pa la sogs pa mtha' bzhi las grol bar ston pa'o//gzhan yang de nyid phung po la brten pa'i tshul gyis yod pa yang ma yin la kun rdzob tu med pa yang ma yin te/ sems can thams cad la de bzhin gshegs pa'i snying po yod par gsungs pa'i phyir ro//des na snying po de ni rta dang 'dra bar yod pa ste/ ji lta ba bzhin du rtogs shing de la brten na myur du thar pa'i gnas su phyin par byed pa'i phyir ro/ /de nyid kyi phyir blun pa'i bdag nyid du gyur pa'i phung po ba lang gi ngo bo spangs pa'o//lung dang zhes pa la sogs pas ni phyin ci log gi lung dang rigs pa la brten nas gang zag gi bdag tu mthong ba rtog ge'i lta bas de bzhin gshegs pa'i snying po de nyid bsgribs pa'o/ /phye ba med par bdag tu smra/ /zhes pa ni gang zag dang phung po gnyis mtshan nyid mi mthun pas gcig pa nyid ma yin pa la/de ltar ma phyed pas phung po nyid bdag tu smra ba'o/ /rgyu med ma yin gzhan na med/ /ces pa la sogs pas ni phung po kun rdzob tu rgyu med pa ma yin zhing / de las gzhan don dam pa'i rgyu yang med pa ste/ de dag gi nyes pa bsal nas phung po bdag tu mi bsgom zhes pa phung po la brten te/ de dag bdag gi rang bzhin la sogs par mi bsgom pa'o/ /me long zhes pa la sogs pas de rnams dang de rnams la snang ba'i gzugs brnyan gcig dang tha dad la grol ba bzhin du gang zag dang phung po yang blta bar bya zhes pa'o//bsgom dang zhes pa la sogs pa'i tshig gsum ni lam dang zhes pa la sogs pa gsum dang sbyar te/ spyir lam bsgom pa dang khyad par du bden pa rnam par bsgom pa ste/ kun rdzob tu mi rtag pa dang sdug bsngal la sogs pa dang / don dam pa ngo bo nyid med par rnam par bsgom pas mngon sum du mthong ba'i bsam gtan pa ste/gang zag gi khyad par ro/ /de gsum sgyu ma lta bur bsgom na lta ba ngan pa las grol bar 'gyur ba'o/ /ji ltar mthong na zhes pa la sogs pas/ khyim mig gi bu ga phyogs thams cad na yod par glog gi 'od byung nas 'jig pa dang 'dra bar 'du byed skad cig mar gnas pa la rtag pa la sogs pa'i dngos por mi rtag ces pa'o//dngos po med ces pa la sogs pas 'du byed kyi 'jug pa rgyun chad pa lhag ma med pa'i mya ngan las 'das pa khas len pa ni sngar bstan pa ltar tshad mas gnod pa'i phyir/byis pa rmongs par byed pa'o/ /ji ltar 'dug bzhin mthong zhes pa la sogs pas rten 'brel sgyu ma lta bur bsgom par bya ba nyid du gdams pa'o/ /mi dang zhes pa la sogs pas khyad par du sems kyi chos nyid sgyu ma lta bur bsgom zhes pa'o/ /reg pa dang ni zhes pa la sogs pas bde sdug nyams su myong ba'i lus snang ba ni sems las byung ba yin gyi bems po'i lus med par ston pa'o//de la reg pa ni bde ba'i tshor bas reg pa ste lha'i lus so/ /gzir ba ni sdug bsngal gyis gzir ba ste dmyal ba pa'i'o/ /mngal sgo zhes pa la sogs pas gnas 'phos nas skye gnas bzhir skye bar 'gyur ba'i bar ma do'i sems can mang po'i lus su snang ba rdzas su ma grub pa bzhin du/'gro ba sna tshogs kyi lus kyang de dang 'dra ba'o/ /nyon mongs phyogs dang zad thob byed/ /ces pa ni sngar nyon mongs pa dngos po'i ngo bor khas blangs nas phyis gnyen po skyes pa'i dus su med par rtog pa'o//thog mar nye bar len pa las/ /bdag ni phye bas bye brag dbye/ /zhes pa ni snga ma ltar bdag dang phung po mtshan nyid mi mthun pas gcig nyid ma yin par shes par bya ba'o/ /ma phye bye brag 'byed pa ni/ / zhes pa ni de dag tha dad kyi dngos por yang dbyer med pa ste/ mo gsham gyi bu la bye brag dbyer med pa bzhin no/ /'phrul gyis mthong zhes pa la sogs pas ni 'phags pa'i ye shes kyis gzigs pa/ sems can rnams kyi sha'i mig dang / log pa'i shes rab rnam par spangs pa dang / gzhan yang gzugs la sogs pa 'du byed kyi phung po spangs pa ste/ de'i yul yang kha dog bzang dang zhes pa la sogs pa'o/ /lha rdzas kyi 'du byed ni lha'i gnas na yod pa'i 'du [(]byad [,]byed [)]kyi khyad par tha mal pa la lkog tu gyur pa rnams so/ /'gro ba'i mtshams su zhes pa la sogs pas ni bar ma do'i phung po rtog ge tha mal pa rnams kyi yul min pa bzhin du sangs rgyas kyi rang bzhin kyang de dag gi yul las 'das zhes pa'o//bdag med yin la zhes pa la sogs pas ni sgyu ma lta bu'i gzhan dbang 'gog pa mi 'thad pa'o/ /dus gsum dang ni zhes pa la sogs pas ni shes bya lnga'o//shes pa 'du byed rgyus byung ba/ /zhes pa la sogs pas ni rten 'brel de kho na nyid du ma grub pa'o/ /rkyen rnams la ni rgyu med ces pa don dam par rgyu'i mtshan nyid med pa'o/ /gsal bar byed pa ni grangs can pa'i'o/ /rlung gi zhes pa la sogs pas ni 'byung ba phan tshun phan 'dogs pa mi 'thad pa bzhin du sems can gyi skye ba yang ston par byed pa'o//me ni rlung la bsgrub par yang / /zhes pa ni mes rlung la phan mi 'dogs pa'o/ /phan tshun stobs dang mthu yi phyir/ /zhes pa ni skyes bu'i rtsol ba dang gtsub shing la sogs pas mi rnams kyi nye bar spyod pa'i me 'byung bar 'gyur na/de dang 'dra ba'i sems can rnams gang gis 'byung zhes 'dri ba'o/ /yid la sogs pas ni kun gzhi la sogs pa'o/ /bdag med rtag tu 'gron mang bzhin/ /sems dang bcas te rab tu 'jug / ces pa ni bdag med kyang 'gron po rgyu ba bzhin du kun gzhi dang lhan cig tu yid de nyid 'gro ba'i gnas de dang de dag tu 'jug pa'o/ /don dam par ni de gnyis spros pa dang bral zhing 'od gsal ba'o/ /yid la sogs pa'i nyes pa yis/ /nyon mongs mkha' bzhin tha dad min/ /zhes pa ni yid la sogs pa glo bur ba'i nyon mongs pas ni bdag de bzhin gshegs pa'i snying po kun gzhi de nyid nyon mongs pas 'gyur la nyes pa de dag kun gzhi nam mkha' bzhin du gcig dang tha dad pa las grol ba'o//gzhan yang de bzhin gshegs pa'i snying po de ni glang po'i ma la sogs pa bzhin du yod pa ste/ji ltar ma ni bu rnams skyed cing rten par byed pa bzhin du snying po kun gzhi des kyang 'jug pa'i rnam par shes pa rnams skyed cing rten par byed pa'o/ /me la sogs pas rnam par sbyangs/ /zhes pa la sogs pas ni ye shes kyi me yis lta ba'i dri ma la sogs sbyangs shing /ma rig pa'i thibs po rnam par spangs pa'o/ /shes dang shes bya'i bye brag gis/ /zhes pa la sogs pas ni kun gzhi ni dmigs pa'i yul yin la/ yid kyi rnam par shes pa ni de dag la dmigs pa'o zhes de 'dra ba'i bye brag gis de gnyis tha dad mi brtag cing /de nyid dang gzhan du brjod du med pa yin la/ blo ngan rnams kyis ni de ltar ma rtogs te/ brjod du med pa la tha dad du smra ba'o/ /de yang ji ltar tsan dan gyi rnga ni tsan dan las gzhan du rtog par byed pa dang / tsan dan la sogs pa'i dri yang de dag las gzhan du rtog pa dang 'dra bar kun gzhi dang yid kyi shes pa yang rtog ge ngan pas tha dad du [(]rtag [,]rtog [)]pa'o//langs nas zhes pa la sogs pas ni rab tu byung ba rnams kyi spyod pa'i khyad par sngar bshad pa rnams kyi sde tshan ston te/ langs nas mi bza' ba dang / yang yang blangs nas mi bza' ba dang / gzhan yang lhung bzed kyi stegs dang de'i kha gabs phying pa bcang ba'o//yang na gos la chags pa spang ba'i don du phying pa pa ste sbyangs pa'i yon tan no/ /yang g.yas dang g.yon du lta zhing za ba la sogs pa'i nyes pa dag pas zas la spyad par bya ba'o/ /su zhig tshul 'di rigs pas dpog byed pa//zhes pa ni de kho na nyid dang spyod pa'i tshul bstan pa rnams rigs pas dpog cing bden pa nyid du 'jog pa'o/ /chos kyi rnam pa gser bzhin bshad par bya/ /ces pa ni lam dang 'bras bus bsdus pa'i chos rnams gser bzhin du rnam par dag cing mi 'gyur ba'o//blun po rnams srid pa'i rkyen te nang gi rten 'brel dang / mi srid pa'i rkyen phyi'i rten 'brel dngos por rtog pa ni lta ba ngan pa'i dra ba ste sdud par byed pa dang / kun gzhi'i dri mar gyur pa'o/ /'dod chags zhe sdang zhes pa la sogs pas chos kyi rnam pa gser bzhin bshad ces pa'i don ston te/'di rnams kyis kyang de bzhin gshegs pa'i snying po sbyangs par rnam par dag pa thob pa'i 'bras bu nyid rgyas par bstan pa'o/ /de ltar na tshigs su bcad pa 'di rnams kyis kyang sngar bstan pa ltar shes bya thams cad bsdus pa sems kyi chos nyid dang /de nyid de bzhin gshegs pa'i snying por bstan pa dang / de sbyor bar byed pa'i lam dang sbyangs pas rnam par dag pa'i 'bras bu dang / de rnams la brtsad pa spang ba rgyas par ston to/ /yi ge so so dang sbyar ba ni bsams pas go bar 'gyur ba'i phyir ma smos so//de la thob bya'i 'bras bu bsdus te bstan pa ni sngar kyang byas mod kyi/ 'dir rgyas par ston pas zlos pa'i nyes par 'gyur ba ma yin no/ /de la nyon mongs pa rnams ldog par 'gyur ba ni sbyangs pas rnam par dag pa thob par 'gyur ba'o/ /mu stegs pa zhes pa la sogs pas ni sbyangs rgyu'i dri ma'i khyad par ston te/rgyu'i phyogs ni dbang phyug la sogs pa rgyur rtog pa'o/ /rkyen gyis zhes pa ni ma rig pa la sogs pa'i rkyen du rtog pa'o/ /gzhan dag ni dngos po rgyu med par byung ba ste/ de ltar na gang gi don du 'bad pa byed pa don med par 'gyur ba'o//yid dang zhes pa la sogs pas rnam par shes pa skye ba'i tshul sna tshogs su rtog pa'o/ /rnam par shes pa yid las byung / /zhes pa ni de ma thag pa'i rkyen byas pa'i tshul gyis so/ /thams cad bag chags rgyu las byung / /zhes pa ni kun gzhi la bag chags bsgos pa'i rgyu las so//de 'ga' zhig tu ma zad kyi ma rig pa dang sred pa'i rkyen gzhan dag yang yod pas rkyen bzhin du ni 'byung ba'o/ /'brel pas sprel ba ni de las byung ba'i 'brel pa'o/ /thog ma med nas nyes par 'brel/ /zhes pa ni phyin ci log gi rigs la thog ma med pa'o//mu stegs lta ba bzlog pa'i zhes pa la sogs pas ni dbang phyug las skye ba la sogs pa bzlog pa'i don du/ kun gzhi la sogs pa'i rgyu yis 'byung bar bstan la/ de'i rgyu las byung ba'i shes pa gzhan rnams kyang kun gzhi la dmigs nas 'jug par 'gyur ba'o//de lta bas na lta ba shes pa ste blta bya'i dngos po de dag la dmigs pas 'khor bar rgyun ring du 'jug pa'o/ /dngos po rmi lam zhes pa la sogs pas de rnams kyi gnyen po bsgom par gdams pa'o/ /'jug pa'i rnam pas de bzhin nyid/ yang dag ye shes zhes pa ni/ bsgoms pa'i dbang gis sa dang sa la 'jug pa'i rnam pas/ de bzhin nyid dang yang dag pa'i ye shes chos kyi sku'i ngo bo thob par 'gyur ba'o/ /de'i gnas sgyu ma dpa' bar 'gro/ /zhes pa la sogs pas ni chos kyi sku thob pa'i gnas sgyu ma lta bu'i ting nge 'dzin la sogs pa yin par bstan pa'o//de la dpa' bar 'gro ba'i ting nge 'dzin la sogs pa ni ji skad du/ dpa' bar 'gro ba'i ting nge 'dzin ni ting nge 'dzin de la gnas shing / ting nge 'dzin thams cad kyi spyod yul nyams su myong bar byed pa'o zhes pa la sogs pa shes rab kyi pha rol tu phyin pa'i mdo las rgyas par gsungs pa rnams so//gang tshe 'gro ba rnam rtog mthong / /zhes bya ba ni sna tshogs brtags pa nyid du mthong bas phyin ci log gi sems ldog par 'gyur ba'o/ /sa ni rab tu dga' ba zhes pa la sogs pas sa la 'jug pa'i rim pa ste sngar rgyas par bstan to//sna tshogs nor bu bzhin zhes pa la sogs pas ni gdul bya ji ltar mos pa'i gzugs sna tshogs su ston pa dang / gzugs brnyan bzhin du rdzas su ma grub pa dang / yod med la sogs pa'i mtha' dang bral ba'i sangs rgyas nyid thob par 'gyur ba'o/ /sa bdun pa ni sems kyi sa bdun te/sngar bstan to/ /so so rang chos mthong ba ni rang gi sems kyi chos nyid mthong ba'o/ /yang dag pa'i sa ni dang po yan chad do/ /phyi rol mu stegs rnams spangs zhes pa la sogs pas ni phyin ci log spangs pa'i theg pa chen po'i tshul lugs skal ba dang ldan pa rnams la bshad par bya ba'o//shi 'pho 'jig pa spangs pa ni skye rga la sogs pa'i sdug bsngal bzhi spangs pa'o/ /gal te byang chub sems dpa' rnams nyon mongs pa rnam pa thams cad du ma spangs pa'i phyir shi 'pho ba sogs pa spangs pa mi 'thad do zhe na/ ri bong spu yi nor bu bzhin//zhes pa ste/ de'i spu las byas pa'i mgul chings ni rdzas snyi bar gyur pa yin pas bcings par snang yang 'ching ba'i bya ba mi byed pa bzhin du/ byang chub sems dpa' rnams kyi nyon mongs pa yang 'ching ba'i bya ba mi byed de/ 'grol bar 'gyur bas de rnams la chos kyi tshul zab mo bshad pa'o//gal te zab mo tshig gi yul ma yin no zhe na/ ji ltar tshig la tshig rnam pa/ /gal te rigs la rigs de bzhin/ /zhes pa la sogs pa gsungs te/ ji ltar phung po la sogs pa'i chos thams cad tshig tsam yin gyi/ don grub pa med pa la de nyid tshig rnam pa sna tshogs kyi ston pa dang /gzhan yang de 'dra ba'i chos nyid de bzhin du rigs shing gnas pa la/ de rtogs byed kyi chos kyi rigs pa sna tshogs kyis rtogs par byed pa bzhin du/ spyi'i rnam pa'i sgo nas 'tsho nas de kho na nyid 'chad pa'o/ /de'i phyir don rigs pa nyid 'jal ba'i rigs pa ma yin te/des gtan la phab pa de bzhin du bden pas de las gzhan du ma rtogs shig ces pa'o/ /des na mig la sogs pa sna tshogs su brtags pa rnams ni de bzhin nyid tshul ji lta ba bzhin gnas pa ma yin pa'o/ /rnyog pa'i yid ni khyad par du phyin ci log gi yid de/ de rnams de kho na nyid du ma grub pa'o//'phags pa lang kar gshegs pa zhes bya ba theg pa chen po'i mdo ji snyed pa'i bgrel pa de bzhin gshegs pa'i snying po'i rgyan ces bya ba las tshigs su bcad pa'i le'u tha ma'i 'grel pa rdzogs so// //so so rang rig mtshan med ye shes spyod yul mkha' ltar rnam dag pa//mtha' bzhi las ni rnam grol sems kyi chos nyid bde gshegs snying po gang / /glo bur rtog pa'i dba' rlabs dang ni nyon mongs thibs pos bsgribs gyur pa/ /de dag sbyong byed shes rab me dpung thabs kyi zer gyis brgyan pa dang / /bgrod med bgrod pa'i lam dang mthar thug 'bras gnas gang zag rnams//blo zhan brtson pa nyams pas deng sang rtogs pa'i mthu med kyang / /'phags pa ye shes rgyu mthun chos kyi snang ba skyed pa'i phyir/ /'bad pas nongs par gyur pa skye bo mkhas rnams bzod par mdzod/ /bsnams na rab dku myangs na zhim pa lang kar gshegs pa'i mdo//'di don ma lus rtogs pa'i skye bo deng sang 'ga' tsam srid/ /phrag dog lta ba'i nyes spangs bstan bcos ro la myangs gyur na/ /zag med ye shes bdud rtsi ro yis tshim zhing rgyas par 'gyur/ /dam chos bdud rtsi'i chu rgyun longs spyod bstan ldan par/ /skyes bur snyan pa rab grags bsod nams mtha' can gyis//snying po'i don la gzhol ba'i rnal 'byor thun mtshams su/ /tha mal rnam rtog bzlog phyir bzang rtog phreng ba bkod/ /de la de sems sngon song zhing / /des zin sbyor ba'i 'bad pa dang / /de rjes dga' ba'i bsod nams kyis/ /kun gyis de nyid don rtogs shog /'phags pa lang kar gshegs pa zhes bya ba theg pa chen po'i mdo'i 'grel pa de bzhin gshegs pa'i snying po'i rgyan zhes bya ba rgya'i mkhan po dz+nyA na badzras mdzad pa rdzogs so// //