CLOSE WINDOW

D4015
བོད་ཡིག

@##/ /rgya gar skad du/ Ar+ya b+ha dra tsAr+ya pra Ni d+ha na TI kA / bod skad du/ 'phags pa bzang po spyod pa'i smon lam gyi 'grel pa/ 'phags pa kun du bzang po la phyag 'tshal lo/ /'phags ma sgrol ma la phyag 'tshal lo/ /kun du bzang po spyod pa'i smon lam chen po yang dag pa'i bsdus pa'i don bcu ni 'di lta ste/de bzhin gshegs pa la phyag 'tshal ba dang / de la mchod pa dang / sdig pa bshags pa dang / bsod nams kyi rjes su yi rang ba dang / chos kyi 'khor lo bskor bar gsol ba gdab pa dang / yongs su mya ngan las mi 'da' bar zhugs su gsol ba dang /dge ba'i rtsa ba yongs su bsngo ba dang / de'i rab tu dbye ba dang / de'i mthar thug pa dang / de'i phan yon shes pa'o/ /de la dang por bye brag tu ma phye bar spyir phyogs thams cad kyi zhing na/ dus gsum du bzhugs pa'i sangs rgyas bcom ldan 'das dag la/ lus dang ngag dang yid dag gis mngon par phyag 'tshal ba'i dbang du byas te gsungs pa/ji snyed ces pa la sogs pa la/ ji snyed ces pa ni ji snyed pa ste/ grangs ji snyed pa'o/ /des kyang tshad yongs su bcad par 'gyur bas/ de'i phyir spyi'i sgra dpag tu med pa'i sangs rgyas bcom ldan 'das dag bstan par gsungs pa ni/su dag ces pa ste grangs bgrang du med pa zhes pa'i don to/ /phyogs bcu zhes pa ni phyogs bcu na'o/ /'jig rten zhes pa ni 'gro ba'o/ /dus gsum gshegs pa kun zhes pa ni dus gsum du son pa ste/ 'jig rten gsum du zhes pa'i bar du'o/ /mi yi seng ge zhes pa la/gang gi phyir seng ge zhes bya bas thams cad skrag cing rang ni gang la yang 'jigs pa med pa'o/ /sangs rgyas bcom ldan 'das kyang lha dang bcas pa'i 'jig rten la de dang 'dra ba yin pas de'i phyir seng ge dang 'dra bas na seng ge ste/ mi'i skye ba yang dag par bstan pa'o/ /mi yang de/ seng ge yang de yin pas na mi'i seng ge ste/sangs rgyas bcom ldan 'das so/ /de la bdag gis phyag 'tshal ba ni btud pa'o/ /thams cad ces pa ni smra ba'i bsam pa'i dbang gi phyogs gcig la yang thams cad kyi sgra mthong bas ma lus par yongs su gzung ba'i don du ma lus zhes gsungs so//lus dang ngag dang yid dang bas zhes pa ni mchog tu dad pa skyes pas so/ /rab tu dang ba'i sems kyis bslang ba'i phyir lus dang ngag rab tu dang ba'o/ /da ni so sor rnam par phye nas lus la sogs pa'i phyag 'tshal ba gsungs pa la/ dang por re zhig lus kyis phyag 'tshal ba ni/ bzang por spyod pa'i smon lam stobs kyis ni//zhes bya ba la sogs pa la bzang po ni dge ba'o/ /bzang po yang de/ spyod pa yang de ste byang chub sems dpa'i spyod pa zhes bya ba'i don to/ /de'i don tu smon lam ni smon pa dang don du gnyer ba'o/ /de'i stobs ni bdud la sogs pas zil gyis mi non cing mi mthun pa'i phyogs las rgyal ba ste/de'i phyir de'i stobs zhes pa'o/ /'di lta bur gyur pa'i rnam pa las gzhan pas ni bya ba 'grub par mi 'gyur ro/ /sangs rgyas gcig la sems kyis dmigs pa'i phyir/ ji ltar sangs rgyas kyi zhing la rdul dang mnyam pa'i lus kho na yid kyis bstod pas gzhan phyag tu ji ltar 'gyur zhe na/ gsungs pa/ rgyal ba thams cad yid kyis mngon sum du/ /zhes te/ de bzhin gshegs pa thams cad re re yang sems kyis mngon sum du zhes pa'i don to/ /zhing gi rdul snyed ces bya ba la sogs pa la sangs rgyas kyi zhing gi rdul dang mnyam pa'i lus kyis phyag 'tshal ba'o/ /snyed ces pa'i sgras ni mtshungs pa'i rnam grangs te/bye brag med par phyogs bcu dus gsum na bzhugs pa ma lus pa'i sangs rgyas kyi zhing gi rdul dang mnyam pa'i de'i grangs kyi lus kyis phyag 'tshal ba'o/ /rgyal ba kun la rab tu phyag 'tshal lo/ /zhes pa la/ rgyal ba ni nyon mongs pa'i sgra 'am/ bdud las rgyal ba ste sangs rgyas bcom ldan 'das la de skad du brjod do//ji skad gsungs pa/ sdig pa mi dge'i chos las nga rgyal te / /de bas nyer 'gro nga ni rgyal ba yin/ /zhes bya ba la sogs pa ste/ rgyal ba de dag thams cad dus gsum du bzhugs pa la phyag bgyi ba'o/ /de bzhin du yid kyi phyag ni/rdul gcig ces bya ba la sogs pa la/ rdul gcig gi steng du ni rdul gcig gi rtse mo'o/ /rdul snyed sangs rgyas zhes pa ni bye brag tu ma byas pa'i phyir 'dir yang phyogs bcu dus gsum na bzhugs pa ma lus pa'i sangs rgyas kyi zhing gi rdul dang mnyam pa'i bde bar gshegs pa'o//sangs rgyas sras kyi dbus zhes pa ni re re yang dpag tu med pa'i byang chub sems dpa'i tshogs kyi dbus na bzhugs pa ste mos zhes 'chad do/ /ji ltar rdul gcig gi rtse mo la ji lta ba de ltar rigs pa 'di nyid kyis ma lus pa thams cad kyang blta ba'o/ /chos kyi dbyings zhes pa la chos thams cad bdag gi rang bzhin ni chos nyid de bzhin nyid kyi dbyings te/chos kyi dbyings zhes pa'o/ /de lta bu'i rnam pa kho nas nam mkha'i mthar thug pa'i chos kyi dbyings su re re yang dpag tu med pa'i byang chub pa'i byang chub sems dpa'i tshogs kyis yongs su bskor ba'i sangs rgyas bcom ldan 'das rdul gyi steng du gnas pa dag yongs su rdzogs pa rgyun ma chad par khyab par yid kyis mos par bya'o//lus dang ngag gi las ni yid kyis kun nas bslang ba'i phyir bar du yid kyi las bstan to/ /da ni ngag gi phyag bstan pa ni/ de dag bsngags pa mi zad ces bya ba la sogs pa la /de dag ces pa ni de dag gi de bzhin du mos pa ste/ nyams pa dang mthar thug pa med pa dang zag pa med pa de ni bsngags pa mi zad rgya mtsho ste yon tan rgya mtsho'o/ /gang de dag gi bsngags pa mi zad rgya mtsho'o/ /'dir bsngags pa'i sgra ni yon tan gyi rnam grangs yin la/ rgya mtsho'i sgra ni mang po'i tshogs su blta bar bya ste/ de dag gi zad pa med pa'i yon tan rgya mtsho'o/ /dbyangs kyi yan lag rgya mtsho sgra kun gyis / /zhes pa dang yan lag gi sgra ni 'dir yon tan gyi rnams grangs so/ /gang zhe na/ gang gi phyir/ /yan lag lnga dang ldan pa'i bcom ldan 'das kyi gsung zhes nyan thos kyi theg pa las gsungs so//theg pa chen po las ni yan lag drug cu dang ldan pa dang stong phrag brgya dang ldan pa dang / dpag tu med pa'i yon tan dang ldan par brjod do/ /de la yang yan lag lnga dang ldan pa zhes bya ba la sogs pa go bar bya'o/ /thams cad ni dbyangs kyi yon tan rgya mtsho dang ldan pa'i sgra ste gang dbyangs de'o//rgyal ba kun gyi zhes bya ba la sogs pa la/ rgyal ba kun gyi yon tan ni gang byang chub tu sems bskyed pa nas bzung ste/ dpag tu med pa'i thun mong ma yin pa lus dang ngag dang yid kyi rang bzhin no/ /de brjod pa ni mngon par rdzogs pa ste rab tu bsgrags pa'o/ /bde bar gshegs pa re re'i mdun du/gnas nas bdag gis thams cad bstod pa'o/ /yang na bsngags pa mi zad rgya mtsho zhes pa ni gzhi mthun pa ste 'di ni yon tan gyi khyad par ro/ /bde bar gshegs pa dag gis bsngags pa mi zad pa'i yon tan rgya mtsho brjod do zhes bya ba'i don to/ /de ni sangs rgyas bcom ldan 'das de dag nyid kyi bla dang bcas pa dang /bla na med pa'i mchod pa rnam pa gnyis gsungs pa las bla dang bcas pa'i tshigs su bcad pa gnyis ni/ me tog dam pa zhes bya ba la sogs pa gang gsungs pa mchog tu gyur pa dag ni me tog dam pa dang / phreng ba dam pa dang / rol mo dam pa'o/ / byug pa dam pa ni tsan+dan dang gur gum la sogs pa'o/ /gdugs kyi mchog dang / mar me'i mchog dang / spos kyi mchog dang / gos kyi mchog go/ /bdug pa'i mchog ni dri zhim pa sna tshogs sbyor bar gyur pa'o/ /phye ma'i phur ma ni sna tshogs pa'i tsan+dan dang gur gum dang / ga pur dang / a ga ru'i rang bzhin ri rab dang mnyam pa'o/ /bkod pa'i khyad par 'phags pa mchog dag gis/ /zhes pa ni bkod pa'i mchog go/ /bkod pa'i sga ni 'dir yang mang po'i rnam grangs te/ lha dang mi'i rnam pa thams cad kyi mchog dang ldan pa de dag nyid kyis rgyal ba de dag nyid la mchod par bgyi zhes pa'o//bla na med pa'i mchod pa gsungs so / /mchod pa gang rnams bla med rgya che ba/ /zhes bya ba la sogs pa la/ gang dag bla na med pa rgya che ba'i mchod pa byang chub sems dpa'i ting nge 'dzin gyi khyad par gyi mthu las skyes pa sangs rgyas kyi zhing thams cad du spro ba/ chos kyi dbyings kyi mchog tu gyur par bdag gi sems kyi lhag par mos pas rgyal ba de dag nyid la mchod par bgyi zhes pa'o/ /bzang po spyod la dad pa'i stobs kyis ni/ /zhes pa la/ bzang po spyod pa la mos pa dang / lhag par mos pa dang / mngon par yid ches pa dang / nges pa'i stobs kyis so/ /de la bzang po'i spyod pa ni mdo sde du ma dag las byang chub sems dpas 'di lta bu'i mchod pa byas so zhes thos so/ /da ni ji skad du bshad pa'i phyag 'tshal ba dang / mchod pa'i nye bar bsdus pa gsungs pa/ rgyal ba kun la phyag 'tshal mchod par bgyi/ /zhes pa ni rgyal ba thams cad la phyag dang mchod pa bya'o //rgyu mtshan gang gis dang / gang gi sgo nas dang rang bzhin te rnam pa gsum gyis sdig pa bshags pa gsungs pa/ 'dod chags zhes pa la sogs pa ste / de la rgyu mtshan gang gis she na/ 'dod chags dang zhe sdang dang gti mug gi rgyu mtshan gyis so/ /gang gi sgo nas she na/ lus dang ngag dang yid kyi sgo nas so//rang bzhin ni/ gang yang skye ba 'di'am/ skye ba gzhan du sdig pa bdag gis byas pa 'am/ byed du bcug pa dang / rjes su yi rang ba ste/ de thams cad rgyal ba rnams sras dang bcas pa'i mdun du gnas nas skrag pa'i sems kyis skad cig skad cig la bshags par bgyi ste slar yang mi bgyid do zhes pa'o/ /da ni bsod nams kyi rjes su yi rang ba gsungs pa/phyogs bcu'i rgyal ba rnams dang zhes bya ba la sogs pa la/ gang yang sangs rgyas bcom ldan 'das dus gsum na bzhugs pa brdar gyur pa'i byang chub tu sems skyed pa nas bzung ste/ sa dang pha rol tu phyin pa la sogs pa'i nges par 'byung ba re re'i dus gsum gyi 'jig rten dang /'jig rten las 'das pa'i bsod nams kyi tshogs dpag tu med pa dang / bsam gyis mi khyab pa'i sangs rgyas kyi ye shes kyi spyod yul du gyur pa dang / gang yang dang po byang chub tu sems bskyed pa nas bzung ba'i byang chub sems dpa' thams cad kyi dang / gang yang rang rgyal ba rnam pa gnyis la bse ru ltar gcig pur spyod pa dang /tshogs shing spyod pa dag gi yang dus gsum gyi 'jig rten dang 'jig rten las 'das pa'i bsod nams dang / gang yang slob pa'i gang zag bdun po dag dang / gang yang mi slob pa dgra bcom pa dang / gang yang phyogs bcu'i 'gro ba thams cad kyi sbyin pa dang tshul khrims dang /bsgom pa'i rang bzhin gyi dus gsum gyi bsod nams te/ de dag thams cad skad cig skad cig bdag gis rjes su yi rang bar bgyi'o/ /'gro ba'i sgra ni ma lus pa'i tshig yin pa'i phyir slob pa la sogs pa'i bsod nams kyang 'di'i nang du 'dus par grub na/ci'i phyir so sor bstan zhe na/ de ni ma yin te/ 'gro ba zhes bya ba ni 'gro ba ste/ shin tu sred pa dang bcas pas 'khor bar 'gro ba zhes bya ba'i don to / /de la kha cig ni shin tu 'gro ba med pa dang / gcig ni 'gro ba med pa nyid pas 'gro ba'i sgras brjod par mi bya'o zhes pas dbye ba bstan to//da ni chos kyi 'khor lo bskor bar gsol pa gdab pa gsungs pa/ gang yang phyogs bcu zhes bya ba la sogs pa la/ gang yang phyogs bcu'i 'jig rten gyi sgron ma ni 'gro ba'i sgron ma ste 'jig rten gyi phyi dang nang gi bdag nyid can gyi mun pa'i tshogs sel ba'i phyir sangs rgyas bcom ldan 'das ni 'jig rten gyi sgron ma'o//byang chub brnyes zhes pa ni bla na med pa yang dag par rdzogs pa'i byang chub mngon sum du yang dag par rtogs pa'o/ /ma chags brnyes zhes pa chags pa med pa'i mngon par byang chub pa'i stobs kyis/ dngos po ma lus pa'i don thams cad kyi rang bzhin yongs su shes pas chags pa thams cad yang dag par bsal nas zab mo'i chos kyang rtogs pa ste/gzhan don du gnyer ba la sogs ba dang ldan pa dag gis ni dka' ba rtogs par 'gyur ro zhes bya'o / /gang yang chos 'chad par mi bzhed par 'jig rten gyi khams du ma na/ byang chub kyi shing mchog gi drung na bzhugs pa de dag thams cad la/bdag gis 'jig rten gyi mgon po gcig pu 'gro ba mi shes pa'i mun nag gis g.yogs pa la bla na med pa'i ye shes kyi snang ba mdzad pa'i bla na med pa'i chos kyi 'khor lo bskor bar pus mo sa la btsugs nas thal mo sbyar ba byas te/ mdun du gnas nas so sor 'di lta bur gsol ba gdab par bya'o zhes pa'o//mya ngan las mi 'da' bar bzhugs par gsol ba gdab pa ni/ mya ngan 'da' ston gang bzhed ces bya ba la sogs pa la/ gang yang zhes pas bye brag tu ma byas pa ni/ 'phral du bstan pa yin pa'i phyir phyogs bcu'i 'jig rten sgron ma zhes pa nyid dang 'brel to //gang yang phyogs bcu'i 'jig rten gyi sangs rgyas bcom ldan 'das mya ngan las 'da' bas yongs su mya ngan las 'da' bar ston par bzhed pa de dag thams cad la bdag gis thal mo rab tu sbyar bar 'gyur bas yun ring por bzhugs par gsol ba 'debs so//dus ji tsam du zhe na/ dus gsum po thams cad kyi rdul dang mnyam pa'i bskal par bzhugs bar ro/ /ci'i don du zhe na/ mgon thams cad med par gyur pa'i 'gro ba la phan pa dang bde ba'i don du'o/ /de la phan pa ni shin tu phul du byung ba'i bde ba mya ngan las 'das pa'i lam thob pa'o//bde ba ni mngon par mtho ba thob pa'o/ /da ni ji skad du bshad pa'i brjod bya phyag 'tshal ba la sogs pas bskyed pa'i bsod nams kyi phung po yongs su bsngo ba ni/ phyag 'tshal ba dang mchod cing zhes bya ba la sogs pa la/ phyag 'tshal ba dang / mchod pa dang / sdig pa bshags pa dang /bsod nams kyi rjes su yi rang ba dang / de bzhin gshegs pa la bskul ba dang / de bzhin gshegs pa la gsol ba btab pa'i dge ba gang bdag gis bsags shing bskyed pa de thams cad bla na med pa yang dag par rdzogs pa'i byang chub tu bsngo bar bgyi'o zhes pa'o/ /da ni brgyad pa ste de'i rab tu dbye ba yin pa la/de ni kun du bzang po'i smon lam gyi cha shas dang bcas pa'i dbye ba ste de'i rab tu dbye ba'o/ /de yang rnam pa bcu drug go/ /'di lta ste bsam pa dang / byang chub kyi sems mi brjed pa dang / ma gos par rab tu sbyor ba dang / sems can la phan pa dang / go cha dang / phan par 'dod pa'i byang chub sems dpa'i grogs dang 'grogs pa dang / dge ba'i bshes gnyen mnyes par bya ba dang / de bzhin gshegs pa mngon sum du bsgom pa dang / dam pa'i chos yongs su gzung ba dang / mi zad pa'i mdzod yang dag par dmigs pa dang /'jug pa dang / stobs dang / gnyen po dang / las dang / rjes su bslab par yongs su bsngo ba dang / bsdus pa zhes pa'o/ /de la rnam pa dang po ni bsam pa'o / /de yang rnam pa gsum ste/ de bzhin gshegs pa la mchod par bsam pa yongs su bskang ba'i bsam pa ni/ 'das pa'i sangs rgyas rnams dang zhes bya ba la sogs pa la/ mchod par gyur pa'i bla na med pa'i mchod pas gang 'das pa mya ngan las 'das pa'i sangs rgyas bcom ldan 'das dag dang / gang yang da ltar phyogs bcu'i 'jig rten gyi khams sna tshogs pa na/ 'tsho zhing gzhes pas 'gro ba la phan pa dang /bde ba mchog gi rgyu ru gnas pa de dag thams cad kyang de bzhin du mchod par gyur cig /gang yang ma 'ongs pa nas 'byung bar 'gyur ba de yang yid la bsam pa'i don yongs su rdzogs par myur ba myur bar sangs rgyas kyi byang chub thob par gyur cig pa'o/ /dang po'i phyed kyis ni de bzhin gshegs pa la mchod pa'i bsam pa'o//phyis kyi phyed kyis ni bsam pa yongs su bskang bar bstan to zhes pa'o/ /sangs rgyas kyi zhing yongs su dag pa'i bsam pa gang gsungs pa ni/ phyogs bcu ga la zhes bya ba la sogs pa la/ ji snyed ces pa ni gang dag ste/ phyogs bcu'i sangs rgyas kyi zhing yod pa de thams cad yongs su dag cing bde ba can dang 'dra bar rgya che ba dang /dpag tu med pa'i 'jig rten gyi khams su rgya che bar so sor gnas par gyur cig pa'o/ /byang chub shing dbang drung gshegs rgyal ba dang / /ces pa ni/ byang chub kyi shing gi dbang po'i drung du bzhugs pa'i sangs rgyas bcom ldan 'das dag byang chub sems dpas kyang yongs su gang bar mnyam par rgyun ma chad par khyab par gyur cig pa'o//sems can la bde ba ster ba'i bsam pa yang gang gsungs pa ni/ phyogs bcu'i sems can gang rnams ji snyed pa/ /zhes bya ba la sogs pa la/gang dag ji snyed phyogs bcu'i 'jig rten gyi khams kyi skye gnas bzhis bsdus pa'i 'gro ba drug gi sems can de dag zag pa med pa'i bde ba mchog gis bde ba mngon du byed par gyur cig /lus dang sems kyi nad kyang med par ro/ /rtag tu ni rgyun du gyur cig pa'o/ /de dag kyang chos dang ldan pa'i rnyed pa'i yon de dang rjes su mthun par rnyed par gyur cig /chos dang ldan pa'i bsam pa kho nas 'gro ba thams cad rtag tu phun sum tshogs par gyur cig pa'o/ /da ni mi mthun pa'i phyogs spang ba nye bar bstan pa'i tshigs su bcad pa bzhis byang chub kyi sems mi brjed pa rnam pa gnyis pa gsungs pa ni/byang chub spyod pa dag ni zhes bya ba nas brtsams nas ma lus yongs su byang bar shog ces pa'i bar du'o/ /byang chub ces pa ni bla na med pa yang dag par rdzogs pa'i byang chub bo/ /de'i don du spyod pa ni byang chub spyod pa'o/ /de bdag gis spyad pa ni rtogs par gyur nas 'gro ba thams cad du mi brjed par gyur cig pa'o// tshe rabs kun du 'chi 'pho skye ba na/ /zhes pa ni/ 'chi ba dang skye ba dag na yang rtag tu bdag rab tu 'byung bar gyur cig ces pa'o/ /skye ba dang 'chi bas dbus kyi gnas pa brjod par don gyis blta bar bya'o/ /'di ni byang chub kyi sems mi brjed pa'i rgyu dang po'o//rgyal ba kun gyi rjes su slob 'gyur te/ /zhes bya ba la sogs pa la/ rgyal ba dus gsum du bzhugs pa thams cad kyi bslab pa la slob pa ni bzang po spyod pa la'o/ /bzang po spyod pa yongs su rdzogs byed cing / /zhes pa la/ yongs su rdzogs pa ni phun sum tshogs pa'o/ /ji ltar bya zhe na/tshul khrims spyod pa dri med yongs dag pa/ /rtag tu ma nyams skyon med spyod par shog /ces pa'o/ /ji ltar dper na yid bzhin gyi nor bu rin po che glo bur gyi dri mas ma gos pas dri ma med pa'i phyir dri ma med pa ste/ g.ya' dang 'dra ba'i skyon gyis ma gos pa'i phyir rang bzhin gyis yongs su dag pa'o//de nyid kyis na ma nyams skyon med pa ste/ 'dod pa thams cad phun sum tshogs par byed pa/ gdung ba thams cad yongs su zhi bar byed pa/ nad thams cad sel bar byed pa / dus ma yin par 'chi ba zlog par byed pa/ gzhan gyi don phun sum tshogs pa kho na la gcig tu 'jug pa'o//de bzhin du 'dir yang byang chub sems dpa'i tshul khrims rin po che dang 'dra ba'i rin po che ste/ glo bur gyi dri ma las dang nyon mongs pa'i dri ma dang bral bar dri ma med pa ste/ nyan thos dang rang sangs rgyas kyi theg pa'i sems bskyed pa g.ya' dang 'dra ba'i skyon dang bral ba'i phyir ro//med na mi 'byung ba nyid kyi phyir yang thams cad mkhyen pa sems bskyed pa rin po che'i rang bzhin yin pa'i phyir ro/ /yongs su ni kun nas so/ /dag pa ni yongs su dag pa ste/ byang chub sems dpa'i bslab pa thams cad la brtson par byed pas na/ ltung bas ma gos pa'i bslab pa ni nyams pa med pas na ma nyams pa'o//'das pa'i yul nyams su myong ba la ltos pa'i sred pa skyes pa dang / yang ma 'ongs pa dang skye ba 'di la chags pa la mngon par dga' ba'i sred pa dang / da ltar byung ba la mngon par zhen pa'i sred pa ste/ dus gsum po 'di dag gi sred pa'i khab dag gi cung zad tsam yang ma phug pas na skyon med pa'o//sa dang 'dra bar sangs rgyas dang byang chub sems dpa' thams cad kyi yon tan gyi gzhir gyur pa'i phyir 'gro ba thams cad kyi 'dod pa phun sum tshogs par byed pa'o/ /gdung ba rab tu sel ba dang / nad thams cad rab tu zhi ba dang /lha dang mi thams cad kyi tshe dpag tu med par byed pa gzhan gyi don phun sum tshogs pa kho na la gcig tu 'jug pa kho na ste/ nges pa'i tshig tu ni lus dang sems kyi gdung ba thams cad sel ba'o/ /tshul khrims zhes pa ni bsil bar byed pas na tshul khrims te/ tshul khrims spyod pa yin pas tshul khrims spyod pa'o//spyod pa ni spyod par byed pa'o/ /rnam pa de lta bu nyid kyis tshul khrims kyi spyod pa dri ma med pa yongs su dag pa/ ma nyams pa/ skyon med pa rgyun du spyod pa ni byang chub kyi bar zhes pa'o/ /da ni byang chub kyi sems mi brjed pa'i rgyu gnyis pa / lha yi skad dang zhes bya ba la sogs pa la/ lha la yod pa'i skad ni lha'i skad do/ /klu dang gnod sbyin dang grul bum dang mi dag ste/ de'i skad ni de dag gi skad do/ /mdor bsdu na ji srid du 'gro ba thams cad kyi skad de dang des/ de dang de la chos bstan pa ste/ byang chub kyi snying po'i bar du'o zhes pa'o//'di ni rnam pa gsum pa ste/ des shing zhes bya ba la sogs pa la/ des pa ni mnyen pa dang zhi ba'o/ /pha rol tu phyin pa ni sbyin pa la sogs pa bcu ste/ de la mngon par brtson pa ni/ bdag nyid rnam pa thams cad du brtson pa dang ldan pa ma dub pa'i yid kyis so/ /ma gyur ces pa ni cung zad tsam yang bdag nyid kyi byang chub kyi sems so//brjed par ma gyur pa 'di mi brjed par gyur pa ste byang chub kyi snying po'i bar du'o zhes pa'o/ /tshigs su bcad pa phyed dang bzhis gang byang chub tu sems bskyed pa'i phyogs su gyur pa'i sgrib pa dang / de dag gi gnyen po'i phyogs nye bar bstan par byas nas 'di ni rgyu bzhi pa ste/da ni tshig rkang pa gnyis kyis mi mthun pa'i phyogs spang bar bya bar bstan pa gang gsungs pa/ sdig pa gang rnams sgrib par gyur pa zhes bya ba la sogs pa la/ gang sdig pa sgrib par gyur pa ni byang chub kyi sems kyi bar du gcod pa ste/ de dag ma lus pa thams cad kyi thams cad du yongs su zad par spong bar gyur cig ces pa'o//da ni ma gos pa'i sbyor ba rnam pa gsum pa ste/ rgyu gsum pa dag gang las/ gang du/ gang ltar gsungs pa ni/ las dang nyon mongs pa zhes bya ba la sogs pa la/ gang las zhes pa ni las dang nyon mongs pa dang bdud kyi lam spang ngo //las de yang bye brag tu ma byas pa'i phyir dge ba dang / mi dge ba dang / mi g.yo ba'i bye brag gis gsum char yang gzung ngo / /de las mi dge ba'i las dang nyon mongs dang bdud kyi lam dag las ni rnam par grol ba ni des ma gos par rtag tu spyod pa'o//gang du zhe na/ 'jig rten lha la sogs par ro/ /ji lta bur zhe na/ ji ltar pad+ma chus mi chags pa bzhin/ /zhes pa ste/ ji ltar pad+ma chu las skyes kyang chus mi gos so/ /de dang 'dra bar sdig pa'i las dang / nyon mongs pa dang bdud kyi lam 'jig rten pa'i chos dag gis ma gos par spyod pa spyad do zhes pa'o//de bzhin du dge ba dang mi g.yo ba'i las kyi rnam par smin pa'i 'bras bu la mi chags par 'gro ba thams cad la phan pa dang / bde ba 'ba' zhig kho na'i phyir spyad pa ste/ byang chub sems dpa'i spyod pa zhes bya ba khong nas 'byung ngo / /ci dang 'dra bar zhe na/ nyi zla nam mkhar thogs pa med ltar spyod/ /ces pa ste/ ji ltar zla ba dang nyi ma dag 'jig rten na yid bzhin gyi nor bu dang 'dra bar gzhan gyi don byed pa gcig bus 'jug pa'i phyir ro/ /bdag gi don la ni cung zad tsam yang chags pa med par nyin dang mtshan du nam mkha' la rgyu ba dang 'dra bar zhes pa'o//de la bdud ces bya ba ni gang gi phyir dge ba'i bar du gcod par byed cing / byang chub kyi lam la 'gog pa/ yang dag pa'i lam las bzlog pa ste/ nges pa'i tshig tu ni chos kyi srog gi bar du gcod par byed pa'i rgyu yin pas bdud la bdud ces brjod do/ /de yi lam 'gog pa ni phan pa'i dngos po rgyu yis slu ba ste/skye ba 'di'am gzhan thams cad la'o/ /da ni rnam pa bzhi pa sems can la phan par byed pa gang gsungs pa ni/ ngan song sdug bsngal zhes pa la sogs pa la/ 'gro ba'i sdug bsngal thams cad ni ngan song gi sdug bsngal te/ ngan song gsum du skyes pa de'i rab tu zhi ba'o//ci'i phyir ngan song gi sdug bsngal kho na rab tu zhi ba zhes brjod ce na/ de dag ni shin tu sdug bsngal ba'i bdag nyid yin pa'i phyir dngos su bstan te/ 'khor ba'i sdug bsngal thams cad kyang rab tu zhi bar byed par rtogs par blta'o / /'gro ba thams cad kyang bla na med pa'i bde ba la rab tu gzhog bar byed pa'o//ji ltar bya zhe na/ 'gro ba thams cad nyid la phan pa dang / bde ba'i bsam pas sbyor ba gzhan mi byed par ji srid bla na med pa'i ye shes ma thob kyi bar du yongs su ma dub pa'i yid kyis spyod pa'o/ /dus ji tsam du zhe na gsungs pa/ zhing gi khyon dang phyogs rnams ji tsam par//zhes pa ste / ji tsam par zhes pa ni zhing gi khyon ji tsam par zhes bya ba ste/ ji srid du sangs rgyas kyi zhing gi rgyun bskal pa gcig nas gcig tu brgyud par gyur pa ste/ phyogs zhes pa la phyogs bcu de snyed du spyod do zhes bya bar 'brel to / /rnam pa lnga pa ste go cha gsungs pa la/de yang rnam pa gsum ste/ sems can gyi spyod pa'i rjes su 'jug pa dang / sangs rgyas kyi chos yongs su rdzogs pa dang / dam pa'i chos gsal bar bstan pa'o/ /gang gsungs pa/ sems can dag gi spyod pa dang zhes bya ba la sogs pa la/ sems can dag gi skye ba dang skye bar rang bzhin gyis g.yo sgyu med pas bde bar dri ba dang /sems dang spyod pa yongs su shes nas rjes su 'jug pa ste/ rjes su mthun par gyur pas so/ /byang chub spyod pa yongs su rdzogs byed cing / /zhes bya ba la/ byang chub kyi don du spyod pa ni byang chub kyi spyod pa'o/ /de yongs su rdzogs pa ni sangs rgyas kyi chos yongs su 'phel ba'i bar du'o//bzang po spyod pa'i smon lam stobs kyis ni/ /zhes pa la/ bzang po spyod pa yang 'dir chos ston pa'i rang bzhin du yongs su bzung ste/ smra bar 'dod pa'i bsam pas gsung rab kyi tshig la bzang po spyod pa zhes nye bar btags pa ste/ ma 'ongs pa'i bskal pa mthar thug pa'i bar du mi skyo ba'i yid kyis spyod par bya'o zhes pa'o//lus dang ngag dang yid kyi spyod pa mtshungs pa'i byang chub sems dpa'i grogs po dang 'grogs pa ni rnam pa drug pa ste/ gang gsungs pa/ bdag gi spyod dang mtshungs pa zhes bya ba la sogs pa la/ gang yang spyod pa mtshungs pa bdag dang 'dra ba'i byang chub sems dpa'o//spyod ces pa ni spyod pa des lhan cig tu mtshungs par byang chub kyi bar du rtag tu 'grogs par gyur cig pa'o/ /lus dang ngag dang yid kyis kyang de nyid dang lhan cig tu byang chub sems dpa' gcig pu'i smon lam spyod cing nyon mongs pa med par gnas so zhes pa'o//phan pa'i bsam pas gdams ngag ston pa'i dge ba'i bshes gnyen bsten pa ni rnam pa bdun te / gang gsungs pa/ bdag la phan par 'dod pa'i zhes bya ba la sogs pa la/ gang yang dge ba'i bshes gnyen phan par 'dod pa/ bzang po'i spyod pa rab tu ston pa/chos kyi gtam byad pa de dang lhan cig mtshungs par rtag tu 'grogs par gyur cig pa'o/ /dus dang 'khor dang mchod pa'i bya ba la ngal ba med par de bzhin gshegs pa mngon sum du bsgom pa rnam pa brgyad gang gsungs pa ni/ sangs rgyas sras kyis bskor ba zhes bya ba dag la phyogs bcu po kun gyi rgyal ba sangs rgyas bcom ldan 'das dag byang chub sems dpa'i tshogs kyis yongs su bskor ba'i mgon po 'gro ba'i gnyen gcig pu ma bsgribs pa'i mig gis rtag tu blta'o//de dag la yang skad cig skad cig la so sor rnam pa thams cad kyi mchog dang ldan pa/rgya che ba nam mkha'i dbyings dang mtshungs pa/ chos kyi dbyings khyab pas mchod par bya'o/ /dus ji srid du zhe na/ ma 'ongs pa'i bskal pa thams cad kyi mthar thug par nub pa med pa'i sems kyis zhes pa'o/ /'dzin pa dang ston pa'i las dag gis dam pa'i chos yongs su 'dzin pa rnam pa dgu pa gang gsungs pa ni/rgyal ba rnams kyi dam pa'i chos 'dzin cing / /zhes bya ba la sogs pa la dus gsum du rgyal ba thams cad kyis gang gsungs pa gsung rab yan lag bcu gnyis kyi chos bstan pa dang / de 'dzin pa'i stobs kyis 'dzin pa dang / nan tan du bya'o/ /byang chub kyi spyod pa yang chos ston pa'i rang bzhin te/ 'gro ba la rab tu gsal bar byed pa la zhes pa'o/ /gsal bar byed pa ni yang dag par gsal bar bstan pa'o/ /'dir yang byang chub kyi spyod pa zhes bya ni de gsal bar ston pa'i tshig la mngon par brjod do/ /bzang po spyod pa rnam par spyod pa yang //zhes pa la/ bzang po spyod pa ni byang chub sems dpa'i spyod pa'o/ /de rnam par sbyang ba ni dri ma med par bya ba ste/ ma lus par bkrus nas ring du byed pas ma 'ongs pa'i bskal pa kun du spyod pa ni nan tan du bya ba'o/ /bsod nams dang ye shes la sogs pa'i tshogs bsags pas mi zad pa'i mdzod yang dag par dmigs pa rnam pa bcu pa gang gsungs pa ni srid pa thams cad du ni zhes bya ba la sogs pa la/'dod pa'i khams la sogs pa'i srid pa thams cad du sems can gyi don gyi dbang gis 'khor ba nas 'khor bar skye ba dang / zad mi shes pa'i bsod nams kyi tshogs dang yang dag par ldan par 'gyur ba dang /de bzhin du thabs dang shes rab dag dang / ting nge 'dzin nam mkha' mdzod dang / dri ma med pa'i phyag rgya la sogs pa dag dang de bzhin du byang chub sems dpa'i rnam par thar pa snying rje chen po'i dmigs pa sgyu mar gyur pa la sogs pa dang /ji srid du byang chub sems dpa'i yon tan thun mong dang thun mong ma yin pa mi zad pa'i mdzod zad mi shes pa'i yon tan gyi gter du/ 'gro ba ma lus pa la phan pa dang bde ba'i rgyur gyur cig ces pa'o/ /rnam pa bcu gcig pa ni 'jug pa ste/ de yang rnam pa brgyad do//'di lta ste/ sangs rgyas kyi zhing lta ba la 'jug pa rnam pa gnyis dang / sangs rgyas kyi gsung la 'jug pa dang / chos kyi 'khor lo bskor ba la 'jug pa dang / bskal bar gnas pa la 'jug pa dang / de bzhin gshegs pa la blta ba'i spyod yul la 'jug pa dang / sangs rgyas kyi zhing du bkod pa dag lta ba la 'jug pa dang /de bzhin gshegs pa'i drung du 'gro ba ste brgyad do/ /de la sangs rgyas kyi zhing la 'jug pa rnam pa gnyis tshigs su bcad pa rnam pa gnyis kyis gang gsungs pa ni/ rdul gcig ces bya ba la sogs pa la/ rdul gcig gi rtse mo la phyogs bcu dus gsum gyi sangs rgyas kyi zhing rdul dang mnyam pa'i sangs rgyas kyi zhing ngo //de la yang zhing zhes pa ni zhing dang zhing ngo / /bsam gyis mi khyab pa zhes pa ni bsam gyis mi khyab cing bsam pa las 'das pa'i sangs rgyas bcom ldan 'das dag dang / sangs rgyas kyi sras zhes pa ni byang chub sems dpa' ste/de dag gi dbus na bzhugs pa zhes pa ni bzhugs par gyur pa'o/ /byang chub spyad pa spyod cing zhes pa la/ byang chub kyi spyad pa la spyod pa ste/ rtogs nas spyod pa'o/ /blta zhes pa ni blta ba la 'jug pa'o/ /de lta bur gyur pa'i smon pa ni mi srid pas byang chub sems dpa'i smon lam gyi 'bras bu med pa 'di ltar rtogs te/gang gi phyir sangs rgyas kyi zhing gcig rnam par dbye ba yang rdul gcig gi rtse mo la blta bar mi srid pa na/ de ji ltar dus gsum na bzhugs pa ma lus pa'i sangs rgyas kyi zhing gi rdul dang mnyam pa'i sangs rgyas kyi zhing na/ grangs dpag tu med pa'i sangs rgyas bcom ldan 'das dag byang chub sems dpa'i 'khor gyi dbus na bzhugs pas yongs su gang ba/so so'i rnam par dbye ba rdul gcig gi rtse mo la blta zhes pa'i smon lam ji lta zhe na/ de ni ma yin te/ gang gi phyir bsam gyis mi khyab pa'i las kyi sprul pa'i 'jig rten gyi khams sna tshogs pas steng dang 'og dang thad kar tha dad pa ji lta ba de bzhin du/bsam gyis mi khyab pa'i ye shes kyi sprul pas rdul gcig gi rtse mo la 'di lta bu ci'i phyir srid par mi 'gyur/ bsam gyis mi khyab pa yang gang gsungs pa/ ngo mtshar cung zad yod par ni/ /'jig rten mkhas pas ma mthong ste/ /dbang pos mngon du gyur pa nyid//de la ngo mtshar ci zhig yod/ /bsam gtan pa las klu dag dang / /sangs rgyas mthu yi bdag nyid che/ /'jig rten mgon po skyob pa yis / /bzhi po bsam mi khyab par gsungs/ /zhes so/ /de ltar yang 'di dag sangs rgyas kun gyi gsung la blo zhan pa dag mi srid pa'i don la yang de bzhin kho na yin no zhes shin tu dad par byed do//'di yang shin tu gsal bar rab tu bsgrubs zin to/ /lkog don sangs rgyas kyi gsungs la / /gang blo the tshom skye 'gyur ba / /des ni 'dir ni yid ches pas/ /stong pa nyid la rab tu bya/ /'jig rten na yang ji srid du snod shin tu chung ba chu dwangs pas yongs su gang ba la nam mkha' la brgyan pa'i gza' dang rgyu skar la sogs pa thams cad mthong ba nyid do//de nyid kyi phyir bcom ldan 'das kyis gsungs pa/ chos rnams brag ca dang mtshungs pa/ /rab rib rmi lam mtshan nyid dang / /sgyu ma smig rgyu 'dra ba dang / /dri za'i grong khyer lta bu'o/ / zhes so/ /'di dag kyang gang yang dus gsum dag gi zhing bkod pa'i tshigs su bcad pas phyis gsal bar ston par 'gyur ro/ /de ltar ma lus zhes bya ba la sogs pa la/ ji ltar rdul gcig gi rtse mo de lta bur ma lus shing lus pa med pa'i phyogs thams cad kyi'o/ /skra tsam khyon zhes pa ni skra'i rtse mo'i'o //'di skad bstan par 'gyur te/ skra'i rtse mo tsam gyi khyon gyi tshad la/ dus gsum du bzhugs pa'i sangs rgyas bcom ldan 'das rgya mtsho dang de dag gi zhing rgya mtsho'o/ /spyad pa zhes bya ba la/ spyad pa de sngon du bya ba ste/ ma 'ongs pa'i bskal pa rgya mtsho'i bar du 'jug pa'o/ /sangs rgyas kyi gsung la 'jug pa yang gang gsungs pa/gsung gcig yan lag ces bya ba la sogs pa la sangs rgyas kyi gsung gcig gis chos bstan pas / grangs las 'das pa'i skye bo mang po'i bye brag gi don gzhan dang tshig dang yi ge gzhan dang gzhan dpag tu med pa cig car du dpag tu med pa'i gsung gi yan lag rgya mtsho dang ldan pa'i sgra thos so//phyogs bcu dus gsum na bzhugs pa'i rgyal ba thams cad kyi yang de bzhin du chos ston pa'i dbyangs kyi yan lag rnam par dag pa dpag tu med pa nyan pa'i skye bo dag gi 'dod pa ji lta ba bzhin du rnam pa de lta bur sangs rgyas kyi gsung bsgribs pa med par thos so//de la de bzhin gshegs pa re re'i dbyangs kyi yan lag rgya mtsho'i sgra la rtag tu 'jug par bya zhing ma lus par yid la bya'o zhes pa'o/ /de bzhin du yang gsungs pa/ de'i phyir ngo mtshar mi che ste/ /'di ni shin tu ngo mtshar che/ /mang po nye bar 'dug pa la/ /gang de mos pa'i dbang gis ni//tshig gcig gi ni bshad pa yang / /du ma nyid du mtshon nas ni/ /bdag nyid la ni ston to zhes/ /skye bo mang pos go bar 'gyur/ /zhes so/ /de bzhin du sdong po bkod pa'i mdo byams pa'i rnam par thar pa las kyang gsungs te/ gang phyogs bcu'i bde bar gshegs pa'i chos kyi sprin stan gcig la gnas te ma rmongs par 'thung bas bskal pa bye ba khrag khrig gi bar du sems ngoms pa med par blo chen po rgya mtsho dang mtshungs par bdag gnas par bya'o zhes so//dang po'i tshigs su bcad pa phyed kyis ni ston pa po'i che ba'i bdag nyid do/ /phyis kyi tshigs su bcad pa phyed kyis ni nyan pa'i skye bo'i bdag nyid kyi che ba bstan to//gang zhes pa ni bdun pa ste/ gcig gi tshig tu brjod pa'o/ /gsung gcig yan lag rgya mtsho'i sgra kun gyis/ /zhes pa la/ sgra kun gyis zhes pa ni tshig gi kha skong du blta bar bya'o/ /chos kyi 'khor lo bskor ba la 'jug pa yang gang gsungs pa/dus gsum gshegs pa zhes bya ba la sogs pa la/ de dag kyang dus gsum du bzhugs pa'i rgyal ba thams cad dag chos kyi 'khor lo bskor ba la 'jug pa dang ldan pa gang mi zad pa grangs las 'das pa'i dbyangs kyis so / /blo'i stobs kyis zhes pa ni ye shes kyi mthu'i bdag nyid kyis cig car 'jug pa ste 'jug par bya ba'o //thabs gang dang gang gis gang dang gang la chos ston par / dus gang la dang yul gang la mos pa du ma'i sems can gdul bya la 'gro ba ste/ 'dir yang tshul de ltar blta bar bya'o/ /dbyangs kyi sgra ni 'dir yang tshig kha bskang ba'i don to//bskal par gnas pa la 'jug pa yang gsungs pa/ ma 'ongs bskal pa zhes bya ba la sogs pa la/ ye shes kyi skad cig gis phyogs bcur bzhugs pa ma 'ongs bskal par 'jug pa ste/ mdor bsdu na bskal pa gcig nas gcig tu brgyud par bdag gis 'jug par bgyi ba'o/ / gang yang bskal pa dus gsum tshad de dag /ces pa ni sna tshogs pa dus gsum gyi grangs las 'das pa de thams cad ye shes skad cig ma gcig gis mthar te/ gcig ces pa ni ye shes skad cig ma gcig gi phyogs gcig go/ /'jug ces pa ni nang du 'dus par bya'o zhes pa'o/ / de bzhin gshegs pa la blta ba dang / de'i spyod yul la 'jug pa gang gsungs pa/ dus gsum gshegs pa mi yi seng ge gang / /zhes bya ba la sogs pa la gang yang phyogs bcu dus gsum du bzhugs pa'i mi'i seng ge sangs rgyas bcom ldan 'das de la bdag gis ye shes skad cig ma gcig gis so//blta zhes pa ni blta bar bya'o / /de dag gi spyod yul ni yul lo/ /sgyu mar gyur pa'i rnam thar stobs kyi 'jug /ces pa ni sgyu mar gyur pa'i zhes bya ba'i byang chub sems dpa'i rnam par thar pa ye shes kyi rang bzhin de'i stobs kyi rgyun 'jug par bya'o zhes pa'o/ /sangs rgyas kyi zhing du bkod pa yang gang gsungs pa/gang yang dus gsum zhes bya ba la sogs pa la/ gang yang dus gsum bkod pa ste zhing mang po'o/ /de dag mngon par bsgrub pa ni rdzu 'phrul gyi stobs kyis rdul gcig gi rtse mo la'o/ /de ltar ma lus phyogs rnams thams cad du/ /zhes pa ni de ltar phyogs bcu ma lus pa'i rdul gyi rtse mo la de dang 'dra bar sangs rgyas kyi zhing bkod pa du ma la ye shes kyi skad cig gcig gis 'jug par bgyi zhes pa'o//da ltar ba nyid la yang ji srid du sangs rgyas kyi zhing dag gi rang bzhin dang / tshad dang / kha dog dang / dbyibs kyi bye brag gis bye brag tu byas pa so sor rdul gcig gi rtse mo'i gnas skabs su mi srid na/yang ci'i phyir dus gsum du bzhugs pa ma lus pa'i sangs rgyas kyi zhing dag de bzhin du rang bzhin la sogs pa'i dbye bas phye bas / so sor rdul gcig gi rtse mo la phyogs bcu'i rgyun ma chad par so sor gnas par 'gyur ba de ji ltar rtogs par 'gyur zhe na/de la yid ches par gyis shig dang 'dir brjod par bya ste/ gang gi phyir chos thams cad ni yongs su ma grub pa/ rang bzhin med pa sgyu ma dang 'dra ba/ rmi lam dang 'dra ba/ ma skyes pa/ ma 'gags pa/ skra shad 'dzings pa dang 'dra ba/ gdod ma nas zhi ba/ rang bzhin gyis mya ngan las 'das pa/ji ltar mos pa'i rnam par rtog pa tsam gyis bskyed pa/ sna tshogs pa du ma'i ngo bo ste/ rang gis goms pa sna tshogs pa mang po dag gi ting nge 'dzin gyis mos pa'i khyad par gyis bsam gyis mi khyab par spros nas/ mngon par bsgrub pa'i nyams su myong bar gyur pa 'di dag rang bzhin gyis bsgoms pa'i las kyis gsal bar rtogs par 'gyur ro//'jig rten na yang cung zad yongs su sbyangs pa las byung ba'i mthus/ sgyu ma ngo mtshar can sna tshogs pa mig 'phrul mkhan gyis rab tu bsgrub pa mthong bas/ de lta bas na ji skad du bstan pa de thams cad la yid ches par byas te /'di la cung zad tsam yang the tshom mi bya'o/ /bde bar gshegs pa'i drung du 'gro ba la 'jug pa brgyad pa gang gsungs pa ni gang yang ma byon zhes bya ba la sogs pa la/ gang yang ma byon pa'i mthar thug par bzhugs pa'i 'jig rten gyi sgron ma sangs rgyas bcom ldan 'das phyogs bcu'i 'jig rten gyi khams gzhan dang gzhan na nam mkha'i khams kyi mthar thug pa'i bar gyi bgrang gis mi lang ba'i sangs rgyas kyi ye shes kyi spyod yul skad cig la dus gcig nyid du bla na med pa yang dag par rdzogs pa'i byang chub mngon du gyur cig /de bzhin du gzhan yang dus gcig la chos kyi 'khor lo bskor bar 'gyur ba dang /de bzhin du gzhan yongs su mya ngan las 'da' bar ston par 'gyur ba de'i phyir gsungs pa ni/ de dag byang chub 'tshang rgya la sogs pa la/ de dag ces pa ni mngon par byang chub pa de dag de bzhin du chos kyi 'khor lo bskor bar 'gyur ba dang /de bzhin du gzhan yongs su mya ngan las 'da' bar ston pa gang yang 'jig rten gyi mgon po de dag thams cad kyi zhabs kyi drung du cig car du yid mgyogs pa dang / kun du 'gro ba'i rdzu 'phrul gyi stobs kyis lus kyi sprin phyogs bcur spros nas mchod pa'i sprin nam mkha' khyab pa dag thams cad du so sor khyad par du 'phags pa grangs las 'das pa re re la mchod pa dang /bstod pa byed pa dang / lan brgya stong gi bar du g.yas phyogs su bskor ba byed pa 'khor ba'i mthar thug par ro/ /mchi'o zhes pa ni nye bar 'gro ba ste/ dus gcig nyid la zhes bya'o / / byang chub ces pa ni mngon par byang chub pa dang mya ngan las 'da' ba ston pa yang ngo / /'di nyid ni zhi mtha' zhes pa ni tshig kha bskang ba'i don du rnam grangs kyis mtshon to zhes pa ste/ gtso bo nyid brjod pa'o/ /'on kyang chu'i zla ba'i snang ba dang 'dra bar dga' ldan gyi gnas na bzhugs pa dang /'pho ba bstan pa dang / mngal na gnas pa dang / skye ba dang / lhas phyag byas pa dang / sgyu rtsal bstan pa dang / khab nas byung ba dang / rab tu byung ba dang / dka' ba spyod pa dang / byang chub kyi snying por 'gro ba dang / byang chub kyi shing gi rgyal por seng ge'i gdan la bzhugs nas bdud pham par byas pa'i dus te/de dang 'dra ba nyid du 'gro bar byas la de dag nyid kyi zhabs kyi drung du cig car du zhes pa'i don to/ /de bzhin du yang gsungs pa/ 'jig rten khams ni tha dad par/ /gang de sems can gzhal yas par / /skad cig gis ni rtogs min zhes/ / zhum pa'i sems su mi bya'o/ /zhes pa'o/ /rnam pa bcu gnyis pa ni stobs so / /de yang rnam pa bcu ste tshigs su bcad pa gnyis kyis gang gsungs pa ni/ kun du myur ba'i zhes bya ba sogs pa la/ /kun du zhes bya ba ni ji ltar byang chub sems dpa' gzhan du mi 'gro ba/ kun du myur ba'i rdzu 'phrul gyis cig car du phyogs bcur 'gro ba ste 'gro ba de dang 'dra ba nyid du shes pa'o//rdzu 'phrul zhes pa la rdzu 'phrul ni phun sum tshogs pa ste/ ji ltar 'dod pa'i rdzu 'phrul phun sum tshogs pa byed do zhes pa'i bar du'o/ /rdzu 'phrul ji ltar rtogs par bya zhe na/ sems can so so yid dga' bar byed pa ni rdzu 'phrul zhes pa'o//de'i stobs ni don yod pa ste/ des na rdzu 'phrul gyi stobs so/ /kun nas sgo zhes pa la/ ji ltar kun nas sgo zhe na/ de'i gnas skabs cung zad dang / de la dmigs pa yang med pa dang / gang la byang chub sems bskyed pa med pa dang / sems can thams cad la phan pa dang bde ba 'dod pa yang med par mi 'gyur ba ste/de yang 'phags pa spyod yul yongs su dag pa'i mdo la blta bar bya'o/ /theg pa'i stobs zhes pa ni theg pa chen po'i stobs te/ 'dis 'dong bar byed pas na theg pa chen po ste/ theg pa yang de yin la chen po yang de yin pas na theg pa chen po'o/ /chen po ni sangs rgyas dang byang chub sems dpa' dag gi theg pa yin pas na theg pa chen po'o//rang bzhin ci zhe na/ sangs rgyas kyi byang chub thob par byed pa'i lam bsod nams dang ye shes kyi tshogs ston pa'i theg pa chen po ste/ pha rol tu phyin pa'i dbang du byas pa'i sa bcu ni theg pa chen po'o/ /de'i stobs ni mi mthun pa'i phyogs 'joms pa zhes bya ba'i bar du'o//kun du yon tan zhes pa ni thog ma dang bar ma dang tha mar dge ba'o/ /spyod pa'i stobs zhes pa ni bye brag ma bstan pa'i phyir spyod pa gnyi ga'i stobs kyis te/ byang chub sems dpa'i spyod pa'i stobs dang bzang po spyod pa'i smon lam gyi stobs kyang ngo //kun du khyab pa zhes bya ba ni phyogs bcur 'gro ba'o/ /byams pa'i stobs ni sems can gyi khams thams cad bde ba'i bsam pa spro ba'o/ /bsod nams stobs zhes pa la/ bsod nams ni dag par byed pas na bsod nams sam/ yang dag par mchog thob pa la sbyor bas bsod nams so//de'i stobs ni byang chub tu sems bskyed pa bsgoms pa las 'gyur ro/ /ji skad du gsungs pa / byang chub sems ni bskyed pa yi/ /bsod nams gal te gzugs gyur na/ /nam mkha'i khams kun gang ba dang / /de bas kyang ni lhag par 'gyur/ /zhes so/ /de bzhin du theg pa chen po la yang dag par brtson pa zab pa rgya che'i dam pa'i chos 'dzin pa dang klog pa dang ston pa la mos pa dang /tshigs su bcad pa gnyis kyi gzungs kyis yang dag par rdzogs pa'i byang chub tu yongs su bsngo bas kyang 'gyur te/ des na bsod nams kyi stobs ni kun gyi dge ba ste zhes te/ sems can thams cad la phan pa dang bde ba'i bsam pa kho nas skye ba'i phyir ro/ /chags pa med pa zhes dus gsum la ma bsgribs pa'i phyir ro/ /ye shes stobs zhes pa ni shes bya thams cad ji lta ba'i ye shes yin pa'i phyir ro/ /shes rab stobs zhes pa ni don thams cad rtogs par 'gyur ba'i phyir ro/ / thabs kyi stobs zhes pa la thabs ni thabs te bsgrub pa'o/ /de'i stobs ni don yod pa'o/ /ting 'dzin stobs zhes pa la/ ting 'dzin du byed pas na ting 'dzin te/ bsam gtan de'i stobs kyis 'gro ba thams cad kyi don byed pa dang / mngon par shes pa la sogs pa'i yon tan dag thogs pa med par mngon du byed pa des na ting nge 'dzin gyi stobs so//byang chub stobs zhes pa la/ byang chub ni bla na med pa yang dag par rdzogs pa'i byang chub bo/ /de'i don du stobs ni nus pa'o/ /de yongs su rdzogs par byed pa zhes pa ni de'i tshogs gnas par bya ba'o/ /rnam pa bcu gsum pa ni gnyen po'i stobs te/de yang las dang nyon mongs pa dang bdud kyi stobs kyi mi mthun pa'i phyogs rnam pa gsum ste gang gsungs pa/ las kyi stobs rnams yongs su rdzogs byed cing / /zhes pa la/ bye brag tu ma phye ba'i phyir dge ba dang / mi dge ba dang mi g.yo ba'i bye brag gis de yang rnam pa gsum mo//de la mi dge ba'i las ni nges par myong bar 'gyur la ji srid du ngan 'gro gsum gyi 'bras bu 'byin pa'i nus pa dang ldan pa'o/ /de yongs su dag par byed pa ni spong ba dang sdom par byed pa ste/ gnyen po la sogs pa'i stobs kyis so/ /ji skad du gsungs pa/ las byas pas ni shin tu skrag pa yis//bdag la rnam smad pas ni chung 'gyur te/ /de dag bshags dang sdom par byas pa yis/ /shin tu rtsad nas 'byin par nga smra'o/ /zhes so/ /gnyen po'i stobs kyis kyang yongs su dag pa ni/ ji ltar bu mo byams mas zhing khyad par can ma la ngan pa byas pas bslang ba'i mi dge ba'i las/ mthong ba'i chos nyid la 'bras bu 'byin par byed pa yang cung zad tsam yong bar gyur pa dang /bsam pa khyad par can bskyed nas sems can gyi don du smon pa'i sems bskyed pa nyid kyis ma lus thams cad med par gyur to zhes so/ /sems can gyi don du smon lam gyi sems ji lta bu zhig bskyed ce na/ gsungs pa/ 'gro ba 'di dag thams cad nyid na sems can gang cung zad rnam pa 'di ltar ma'i yul la bdag lta bu'i las byed par 'gyur ba de dag thams cad nyid kyis byas pas bdag nyid spyi bo la 'khor lo 'khor ba'i sdug bsngal kun nas bsdus pa rgyun mi 'chad par nyams su myong bar gyur cing 'khor ba'i sems can 'ga' zhig kyang 'di lta bu mi myong bar gyur cig ces pa'o//rten pa'i stobs kyang ji lta bar phag mo'i rtogs pa brjod pa las/ lha'i bu zhig 'chi ba'i dus byas nas phag mo'i mngal du skye ba myong par 'gyur ba'i las kyi 'bras bu mngon du byed pa/ gsum la skyabs su 'gro ba tsam gyis thams cad rtsa ba nas bton nas/sum cu rtsa gsum pa'i lha dag gi nang nas shi 'phos te/ dga' ldan gyi lha dag gi nang du skyes so/ /chos thams cad bdag med par yang dag par rtogs pas kyang shin tu rtsad nas 'byin te ji skad du las kyi sgrib pa rnam par dag pa'i mdo las kyang gsungs pa/dge slong zhig la mi tshangs par spyod pa dang / mi gsad pa'i pham pa gnyis byung ba la / phyis 'gyod pa'i sems kyis gdungs nas/ snying 'bar bar gyur te smyon pa lta bur lha khang nas lha khang dang / grong nas grong dang / yul 'khor la sogs par song nas skye bo mang po'i mdun du sdig pa bsal bar byed de/ha ha brkus so/ /brkus so zhes yang dang yang sdig pa bshags pa'i stobs kyis spangs zhing ji srid de'i las de chung bar byed par gnas te/ de'i don kho nas yid gdungs par gyur pa dang / de las gzhan mngon par shes pa dang ldan pa'i byung chub sems dpas de dang de bzhin du zab mo'i chos bstan pas/gang gis de'i sdig pa rnam pa thams cad byang nas chos la bdag med par yang dag par rtogs te/ mi skye ba'i chos la bzod pa thob par gyur to zhes so/ /ltung ba'i 'gyod pa thams cad sel bar byed pa dag las kyi sgrib pa thams cad dag par byed pa yin pas/zab mo'i chos 'di la mos pa dang dad par bya'o/ /ji skad du 'phags pa de bzhin gshegs pa'i mdzod las rgyas par gsungs te/ 'od srungs gang phar yang gyur la rang sangs rgyas kyang yin pa de'i srog bcad na 'di ni srog gcod pa'i nang na lci ba'o//ma byin pa len pa'i nang na lci ba ni 'di lta ste/ dkon mchog gsum gyi dkor phrogs pa'o/ /mi tshangs par spyod pa'i nang na lci ba ni 'di lta ste/ ma yang yin la dgra bcom ma yang yin pa de la spyod pa'o/ /brdzun du smra ba'i nang na lci ba ni 'di lta ste/ de bzhin gshegs pa la skur pa'o/ /phra ma'i nang na lci ba ni 'di lta ste/dge 'dun gyi dbyen no/ /tshig rtsub po'i nang na lci ba ni 'di lta ste/ 'phags pa la tshig ngan par smras pa'o / /ngag 'khyal pa rnams kyi nang na lci ba ni 'di lta ste/ chos 'dod pa g.yeng bar byed pa'o/ /brnab sems kyi nang na lci ba ni 'di lta ste/ yang dag par zhugs pa'i rnyed pa la brnab sems so//gnod sems kyi nang na lci ba ni 'di lta ste/ mtshams med pa byed pa'i sems so/ /log par lta ba rnams kyi nang na lci ba ni 'di lta ste/ shin tu thibs pa'i lta ba ste/ 'di ltar mi dge ba'i las kyi lam bcu po thams cad kha na ma tho ba chen po dang bcas pa ste/ 'od srungs de la gal te sems can gcig brgya lam na 'di lta bu'i kha na ma tho ba chen po dang bcas pa dag gi mi dge ba'i las kyi lam bcu po dang ldan par gyur na/de yang de bzhin gshegs pas rgyu rkyen dang yang dag par ldan pa'i chos bstan pas grol bar 'gyur te/ de la cung zad bdag gam/ sems can nam/srog gam/ gang zag gam/ byed pa po'am/ myong ba po ni 'ga' yang med do zhes yid la byas shing mngon par 'dus nas/ nyon mongs pa med pa sgyu ma lta bu'i chos nyid/ chos thams cad rang bzhin gyis gsal bar 'gro bar 'gyur ba'o/ /gdod ma nas rnam par dag pa'i chos thams cad la/ dad pa dang ldan pas mos pa'i sems can de ngan song du 'gro bar mi 'gyur ro zhes nga smra'o//de ci'i phyir zhe na/ nyon mongs pa'i phung po la dngos po med pa ste/ nyon mongs pa thams cad skye ba dang 'jig pas so/ /rgyu rkyen tshogs pa'i sbyor ba las skyes pa de yang skyes pa tsam nyid na 'gags pa'o/ / sems gang skyes pa dang 'gags pa de nyid ni nyon mongs pa yang 'gags pa'o/ /gang de lta bur mos pa de ltung ba dang ltung ba ma yin pa cung zad kyi gnas ma yin no/ /gang gnas med pa go skabs med pa/ sgrib pa med pa'i gnas la ni ltung ba gnas pa yod pa ma yin no zhes so/ /de bzhin du byang chub tu sems bskyed pa 'di sngon du byas pa nyid kyis mi dge bas kun nas bslang ba'i ltung ba thams cad las shin tu 'don par 'gyur ste/ji skad du/ 'phags pa u pA lis zhus pa'i mdo las/ gal te byang chub sems dpa' de la snga dro'i dus su ltung ba byung bar gyur na/ gung gi dus su byang chub kyi sems mngon du bya'o//de ltar na byang chub sems dpa' de'i tshul khrims kyi phung po phyin ci ma log par rig par bya'o/ /de ltar gung gi dus su ltung ba byung bar gyur na ni phyi dro'i dus su byang chub kyi sems mngon du bya'o/ /de ltar na byang chub sems dpa' de'i tshul khrims kyi phung po phyin ci ma log par rig par bya'o zhes pa la sogs pa'o//ji skad du/ sdong po bkod pa'i mdo las kyang gsungs te/ rigs kyi bu byang chub kyi sems ni bskal pa chen po'i me lta bu ste/ nyes byas thams cad sreg pa'o zhes bya ba la sogs pa'o/ /sum brgya ba las kyang gsungs pa/ gang yang rab 'byor rigs kyi bu 'am/ rigs kyi bu mo rnam pa 'di lta bu'i tshul gyis mdo 'di len par byed pa dang / 'dzin par 'gyur ba dang / klog par 'gyur ba dang / tshul bzhin du yid la byed par de yongs su 'gyur ba dang / shin tu yongs su dag par 'gyur ro/ / ci'i phyir zhe na/ gang sems can de dag gis skye ba snga mar mi dge ba'i las byas pas ngan song du skye bar nges pa mthong ba'i chos nyid la myong bar 'gyur ba skye ba sngon ma'i mi dge ba'i las yongs su zad par 'gyur ro zhes pa la sogs pas sdig pa'i las gang nges par myong bar 'gyur ba shin tu yongs su byang bar byed par 'gyur ro zhes pa'o//kha cig 'di skad du smra ste/ tha ma 'bring gi sdig pa'i las su gyur pa ni bshags pa la sogs pa'i stobs kyis kyang rtsa ba nas 'gyur na/ lci ba'i las mtshams med pa thams cad kyi thams cad du rtsa ba nas 'byin pa ji ltar 'gyur zhe na/ de la brjod par bya ste/ ma skyes dgra la sogs pa mtshams med pa byas pa dag chung ngu dang / 'bring dang chen po'i bsam pa'i dbye ba la sogs pas mnar med par bskal par cung zad mchog pa 'am/ phyed du gnas par ji ltar 'gyur te/ de dag shin tu 'gyod pas sems gdungs pa'i shugs dang / bshags pa la sogs pa'i stobs kyis de'i las bsrabs par gyur nas/ gang las de pho long 'phongs pa tsam gyi dus su las kyi 'bras bu myong ngo zhes so//ci de srid du de'i las de rtsa ba nas phyung bar ma gyur tam/ zhing nyag ma gcig ma brngas pas zhing thams cad ma brngas par gyur pa ni ma yin no/ /yang ma nges pa'i las kyi phung po ji ltar zad par 'gyur zhe na/ sbrang bu'i rkang pa'i lhag ma tsam gyi khyad par yang mi 'gyur ro//de yang gang gi phyir gnyen po'i phyogs kyi sems bskyed pa la zhugs pas yongs su zad par 'gyur ba kho na'o/ /gang 'di skad du gsungs pa/ bskal pa bye ba brgya ru yang / /las ni chud zos mi 'gyur te/ /tshogs pa'i dus su 'bras bu ni/ /lus can la ni smin par 'gyur/ /zhes pa la sogs pa de ji ltar ma nges she na/smad pa la sogs pa kun du spyad pa'i stobs kyis las bsal ba dang chung bar ma byas pa de dag las 'di bstan par blta bar bya'o/ /de bzhin du yang gsungs pa/ mi mkhas sdig pa chung ngu byas kyang 'og tu 'gro/ /mkhas pas chen po byas kyang des ni don med gnod pa spong //lcags kyi gong bu chung yang chu yi 'og tu 'bying / /snod byas na ni chen po yang ni steng du lding / /zhes so/ /sdig pa'i las myong bar 'gyur bar ma nges pa dus gsum gyi grangs las 'das pa de yang las kyi dbang gis phyogs kun du dus gcig kho nas 'khor ba ji srid pa'i rgyun du ngan 'gror skyes pa'i sems can dag la phan pa dang bde ba'i tshogs thob pa'i don du de dang grogs mthun pa rigs dang kha dog dang dbyibs dang tshad kyi dbye ba dbyer med pa'i rnam par smin pa'i 'bras bu nges par byed pa'o//dge ba'i las kyang srid pa'i 'bras bu 'byin pa'i nus pa dang ldan pas de yang yongs su sbyong bar byed do //ji ltar zhe na / rnam par smin pa'i 'bras bu bsal nas byang chub nyid du smon lam gyi stobs kyis yongs su bsngo bar nges par bya'o/ /gzugs dang gzugs med pa na spyod pa'i mi g.yo ba'i las kyang bsam gtan dang snyoms par 'jug pas bslang ba de'i stobs ni de nyid yin te /de yang spangs nas las kyi dbang gis sems can gyi don du ji ltar 'dod pa bzhin du nges par sbyor ba ste/ 'di ni 'dir sbyor ba'o/ /nyon mongs stobs rnams rab tu 'joms byed cing / /zhes pa la/ lus dang sems kyi rgyud nyon mongs par byed pas na nyon mongs pa ste/ 'dod chags la sogs pa'o//de dag gi stobs ni mthu ste/ 'gro ba dag gang gi dbang du gyur pa'i dus nyid na/ bgrod pa dang bgrod pa yang ma yin pa dang / phan pa dang mi phan pa dang / yang ba dang lci ba la sogs pa thams cad mi shes pa ste/ de dag mi sdug pa la sogs pa bsgom pa 'jig rten pa'i lam gyis 'joms pa ni zil gyis gnon pa'o//mdor bsdu na nyon mongs pa de nyid dbang du byas nas byang chub kyi yan lag tu sgom pa'o / /bdud kyi stobs rnams stobs med rab byed cing / /zhes pa la/ bdud ces pa ni lha'i bu la sogs pa'o/ /de dag gi stobs ni byang chub sems dpa'i spyod pa'i bar du gcod pa'i nus pa ste/de yang ye shes kyi stobs kyis stobs med pa dang / nus pa med pa dang / mi gnas par byed pa'o / /bzang po spyod pa'i stobs ni rdzogs par byed/ ces pa la/ bzang po spyod pa'i stobs kyis mi mthun pa'i phyogs zil gyis mnan nas mngon par 'du bya ba med par byed pa ste/de thams cad ma lus par yongs su rdzogs par bya'o zhes pa'o/ /rdzu 'phrul la sogs pa'i stobs rnam pa bcu gong du bstan pa dang / 'di nyid kyis yang de ma thag tu bstan pa'i gnyen po rnam pa gsum yang bstan nas/ da ni gang byang chub sems dpa' dag gi las rnam pa bcu bzhi rgyas par ston pa las/las de yang rnam pa brgyad de / sangs rgyas kyi zhing yongs su dag pa la sogs pa'i tshigs su bcad pa gnyis kyis gang gsungs pa/ zhing rnams rgya mtsho zhes pa la sogs pa la/ sangs rgyas kyi zhing rgya mtsho dag bde ba can dang pad+ma can dang 'dra bar skad cig la yongs su dag par bya'o //de bzhin du 'khor ba'i btson ra na nyon mongs pa'i lcags sgrog gi bcing bas bcings pa'i sems can rgya mtsho dag rdzu 'phrul dang kun brjod pa'i cho 'phrul gnyis kyis dad par byas nas/ rjes su bstan pa'i cho 'phrul gyis skad cig la dag par byed pa'o/ /chos rnams rgya mtsho zhes pa ni bstan pa'i chos rgya mtsho dang /rtogs pa'i chos rgya mtsho ste/ shes rab kyi mig gis skad cig la mthong ba'i lta ba'o/ /shes bya mtha' yas pa'i phyir ye shes kyang mtha' yas pa ste/ de'i phyir gsungs pa/ ye shes rgya mtsho zhes so/ /de skad cig la ye shes rgya mtsho rtogs pa ni yid kyis rtogs par bya ba'o zhes pa'i bar du'o//spyod pa rgya mtsho zhes bya ba la/ byang chub sems dpa'i spyod pa rgya mtsho dang / bzang po spyod pa'i spyod pa rgya mtsho ste/ bye brag tu ma byas pa'i phyir na gnyi ga yang nye bar bstan pa'o/ /de la byang chub kyi spyod pa ni sangs rgyas kyi chos 'phel bar byed pa ye shes kyi tshogs so//bzang po spyod pa yang 'gro ba thams cad la phan pa dang bde ba skyed pa bsod nams kyi tshogs so/ /'on kyang bzang po spyod pa yang byang chub kyi spyod pa nyid de / gnyi ga yang byang chub thob par byed pa'i phyir ro/ /'on kyang dngos dang brgyud pa'i bye brag nyid do/ /de spyod pa rgya mtsho ni mngon par shes pa'i stobs kyis skad cig la dag par byed pa ste/dri ma med par byed pa'o/ /smon lam rgya mtsho ni skad cig gcig la tshul khrims dang / ting nge 'dzin gyi stobs kyis yongs su rdzogs par byed pa'o/ /sangs rgyas rgya mtsho ni phyogs bcu na bzhugs pa'i sangs rgyas rgya mtsho la mchod pa'i sprin nam mkha' khyab pa dag gis skad cig la mchod par bya ba'o//bskal pa rgya mtshor mi skyo spyad pa ni mi skyo ba'i yid kyis bya ba'o/ /sangs rgyas dang byang chub sems dpa'i rjes su bslab par yongs su bsngo bar ni rnam pa bco lnga pa ste/ de yang rnam pa gnyis las/de la de bzhin gshegs pa'i rjes su yongs su bsngo bar bslab par gang gsungs pa ni/ gang yang dus gsum gshegs pa rgyal ba yis / /zhes bya ba la/ gang yang dus gsum bzhugs pa rgyal ba yi zhes byang chub sems dpa'i spyod pa ni/ smon lam khyad par can de thams cad ma lus par bdag gis yongs su rdzogs par bgyi zhes pa ni/yongs su rdzogs par bya ba'o/ /bzang po spyod pa zhes pa ni bzang po spyod pa'o/ /byang chub sangs rgyas zhes pa ni/ bla na med pa yang dag par rdzogs pa'i byang chub tu'o/ /lus dang ngag dang yid kyi spyod pa dang zhing rnam par dag pa'i smon lam rnam par dag pa dag /'phags pa byang chub sems dpa' kun du bzang po'i rjes su bslab pa dang / yongs su bsngo ba'i tshigs su bcad pa gsum gyis gang gsungs pa ni/ sras kyi thu bo zhes bya ba la / gang kun du bzang po'i spyod pa'i byang chub sems dpa' dag /de bzhin du ji srid du byang chub sems dpa'i rnam par thar pa dang / ji srid du ting nge 'dzin dang / mdor bsdus na ji srid du byang chub sems dpa'i yon tan 'di dag ma lus pa de srid du thams cad nyid las byang chub sems dpa' 'phags pa kun du bzang po mchog tu gyur pa des na thu bo zhes gsungs so//rgyal ba thams cad kyi sras kyi thu bo 'phags pa kun du bzang po zhes bya ba byang chub sems dpa' de la mkhas pa zhes so/ /de nyid mkhas pa ste/ gang de dang mtshungs par spyad pa'i zhes pa ni mnyam du spyad pa'o/ /de ltar dge ba'i rtsa ba ji ltar bstan pa de skad cig la de yongs su bsngo zhes pa ni yongs su bsdo bar bya'o//lus dang ngag rnams dang ni sems kyis zhes bya ba ni lus dang ngag dang yid rnam par dag pa dang / spyod pa rnam par dag pa dang zhing yongs su dag pa'o/ /gang dang 'dra bar zhe na/ gang gi ming ni zhes pa ste ming gang yongs su bsngo ba/ bzang po la mkhas pa zhes pa ste/ 'phags pa kun du bzang po ni bzang po la mkhas pa'o/ /de 'drar zhes pa ni de dang mtshungs pa nyid du bdag gyur cig pa'o/ /mtshungs zhes pa ni 'dra bar ro/ /des na zhes pa ni 'phags pa kun du bzang po'o/ /bzang po spyod pa zhes te bzang po'i spyod pa'o/ /kun nas dge ba zhes pa ni thog ma dang bar ma dang thar mar ro//'jam dpal gyi smon lam zhes pa ni 'phags pa 'jam dpal gyi smon lam gyi spyod pa'o/ /de'i smon lam ji lta bu zhe na/ 'phags pa 'jam dpal chos kyi rgyal por gyur pa na gsungs pa/ ji srid dang po'i mtha' nas ni/ /'khor ba'i mtha' ma spangs pa ru//de srid sems can phan pa nyid/ /bdag ni spyod pa spyod par shog /ces pa la sogs pa rgyas par gsungs so / /ma 'ongs bskal pa kun du mi skyo bar/ /zhes pa ni/ ma 'ongs pa'i bskal pa ma lus pa thams cad du yang ma dub pa'i sems kyi bsam pas bya ba'o/ /de dag sangs rgyas dang byang chub sems dpa'i bya ba'i las yongs su rdzogs par bya ba ni phun sum tshogs par bya ba'o zhes pa'o//tshad med pa dang / sbyor ba dang / yon tan dang / spyod pa dang / gnas skabs kyi khyad par gyis bsdus pa rnam pa bcu drug po gang gsungs pa ni/ spyod pa dag ni zhes bya ba la sogs pa la/ bdag gi spyod pa tshad yod par ma gyur pa dang /yon tan tshad gzung du med par gyur pa dang / spyod pa tshad med par gyur pa dang / yon tan tshad med par gyur pa la gnas nas/ sangs rgyas dang byang chub sems dpa' de dag gi rnam par 'phrul pa rdzu 'phrul la sogs pa gang ngo mtshar du gyur pa rnam pa thams cad kyi thams cad du 'tshal bar bgyi'o zhes so//'di ni de'i rab tu dbye ba rnam pa bcu drug ste don brgyad pa'o/ /da ni de'i mthar thug pa'i don dgu pa ste/ de ni kun du bzang po'i smon lam gyi mthar thug pa ste/ nam mkha'i mthar thug pa zhes bya ba la sogs pa gang gsungs pa/ nam mkha'i khams mthar thug pa zhes bya ba la sogs pa la/ji srid du nam mkha'i khams kyi mthar thug par gyur pa/ sems can gyi khams kyi mthar thug pa de srid dang / las dang nyon mongs pa yang 'gro ba ji srid pa'i mthar thug pa de srid kyi bar du/ bdag gis kun du bzang po'i spyod pa'i smon lam 'di yang gyur cig pa'o//nam mkha' mthar thug pa med pa dang yongs su rdzogs pa med pa de bzhin du/ bdag gi smon lam yang mthar thug pa med pa dang / yongs su rdzogs pa med par gyur cig ces pa'o/ /don bcu pa ni smon lam gyi phan yon no/ /de yang rnam pa gnyis te mthong ba'i chos dang / pha rol gyi'o//de la mthong ba'i chos la bzhi ste/ 'di lta ste/ bsod nams khyad par can yongs su gzung ba dang / de bzhin gshegs pa blta ba dang / byang chub sems dpa'i grogs mthun pa rnyed pa dang / las kyi sgrib pa thams cad yongs su zad pa'o/ /de la rab tu mang bar gyur pa rgya che ba rnam pa sna tshogs pa'i rjes su bzung ba'i dngos po zhing khyad par du 'phags pa'i gtam byang chub kyi don du gyur pa'i smon lam la/mos pa'i mchog khyad par du 'phags pa'i bsod nams yongs su bsngo ba gang gsungs pa ni/ gang yang phyogs bcu'i zhing rnams zhes bya ba la sogs pa la/gang yang rigs kyi bu'am rigs kyi bu mo gang gis phyogs bcu'i mtha' yas pa mthar thug pa'i sangs rgyas kyi zhing sna tshogs pa/ rin po che dang / gos dang / bla re dang / gdugs dang / rgyal mtshan dang / ba dan dang / rol mo dang / rin po che'i dril bu dang / phreng ba dang / dri dang / me tog dang /mar me'i phreng ba dag mi dang lha'i dag las shin tu 'das pas brgyan pa/ lha dang mi dag gi khyad par du 'phags pa'i bza' ba dang btung ba la sogs pa ro lnga brgya dang ldan pa mchog tu bde ba skyed par byed pa/ sangs rgyas kyi zhing rdul dang mnyam pa'i bskal pa dang sangs rgyas bcom ldan 'das dag la dbul bar bya'o//gang yang gzhan 'di lta bu'i bsngo ba'i rgyal po 'di thos nas lan cig tsam yang mos pa ste/ mngon par yid ches pa nyid kyis 'di nyid nges pa skyes nas gang byed pa'o/ /de gang zhe na/ byang chub mchog gi rjes su rab mos te/ /zhes pa ni theg pa chen pa pa'o / /de yang bsngo bas bzang ba'i bsod nams khyad par du 'phags pa 'di thob par 'gyur ba'o//'gyur ro zhes bya bar bstan pa ni de dag gi don grub pa'i rnam par dbye bar yongs su 'gyur ba ste/ de'i bsod nams kyi mchog khyad par du 'phags pa 'di lta bur 'gyur ba'o/ /sdig pa'i grogs po ngan pa spong ba dang / de bzhin gshegs pa la blta ba gang gsungs//grogs po ngan pa spangs pa yin/ /zhes bya ba la sogs pa la/ grogs po ngan pa ni mi dge ba'i bshes gnyen te nyan thos la sogs pa'o/ /'chi ba'i dus na nges par bcom ldan 'das snang ba mtha' yas de bzhin gshegs pa myur du mthong ba'o/ /gang gis mthong zhe na/ gang 'di lta bu'i bzang po spyod pa'i smon lam gyi snying por gyur pa'i gzhung dang don dag blo la gnas pa'o//skye ba 'di thob pa la bsngags pa'i grogs po byang chub sems dpa' dang gang phrad par gsungs pa ni/ rnyed pa rab rnyed ces bya ba la sogs pa la/ rnyed pa ni bla na med pa'i smon lam rin po che rnyed pa'o/ /rab tu rnyed pa ni des bde bar 'tsho ba dang /de dag smon lam rin po che 'di nyid rnyed pa ste/ 'di nyid kyis kyang skye ba na mchog tu gyur pa thob par bya ba'i dngos po thob pa'i phyir ro/ /legs par 'ongs pa ni mi'i skye bar ro/ /gang 'phags pa kun du bzang po'i spyod pa de ci 'dra bar de yang myur ba nyid du de bzhin du de dang 'dra bar gyur cig ces ba'o/ / las kyi sgrib pa yongs su zad pa'i phan yon bzhi pa gang gsungs pa ni mtshams med pa lnga po zhes bya ba la sogs pa la/ mtshams med pa lnga ni ma bsad pa la sogs pa ste/ gang mi shes pa'i dbang gis byas pa'o/ /mi shes pa rtsa bar gyur pa'i phyir na/ gzhan 'dod chags la sogs pa yang mi shes pa'i dbang gis zhes brjod do//de kun du bzang po'i spyod pa'i smon lam ji skad du bshad pa 'di 'don pa la dad pa'i chus snying gang bar gyur pas/ 'don pa dang / ston pa dang / yid kyis mos pa dang / klog pa dang / 'dzin pa dang / bsgom pa la skrag pa'i shugs kyis nyin mtshan du yi dam du byed na mtshams med pa yang myur du ma lus par yongs su zad pa ste rtsa nas 'byin pa'o//pha rol gyi ni rnam pa gnyis te/ pha rol gyi rgyu dang 'bras bu'o/ /de la ye shes dang mtshan dang dpe byad dang rigs kyi mi mthun pa'i phyogs kyis ma bcings par gyur ba'i mtshan nyid gang gsungs pa/ ye shes dang ni gzugs dang zhes bya ba la sogs pa la/ ye shes zhes pa ni ye shes kyi spyod pa rgya mtshos 'gro ba'i gzugs zhes pa ni/gzugs yid du 'ong ba'o/ /mtshan zhes bya ba ni skyes bu chen po'i mtshan sum cu rtsa gnyis te/ spyi gtsug bltar mi mngon pa la sogs pa dag dang mtshan gyi 'khor dpe byad dag ste/ gzhan la med pa de dang ldan par gyur pa zhes go bar bya'o//rigs zhes pa ni bram ze dang / rje'u rigs dang / gzhan pa'i rigs so/ /rus zhes pa ni rtogs pa khyad par can mngon par shes pa la sogs pa'o/ /'gyur zhes pa ni 'gyur ba ste skye bar ro/ /ldan zhes pa ni yang dag par ldan par gyur pa'o/ /bdud dang mu stegs mang pos de mi thub/ / ces pa ni mu stegs kyi tshogs dang bdud kyi tshogs kyis kyang mi thub ste/ zil gyis mi non zhing ngo / /'jig rten gsum po thams cad kyis kyang mchod par 'gyur ba'o/ /gang kun du bzang po'i spyod pa'i smon lam 'di 'dzin par byed pa dang / klog par byed pa dang / ston par byed pa'i 'bras bu yang dag par bsdus pa ni/byang chub kyi snying por song nas seng ge'i gdan la 'dug ste/ bdud pham par byas nas mngon par byang chub ste/ chos kyi 'khor lo bskor ba la sogs pa'i mtshan nyid gang gsungs pa ni/ myur du 'gro zhes bya ba la sogs pa la/ gang kun du bzang po'i spyod pa rin po che bla na med pa 'di'i yang dag par sdud pa ni/bsod nams dang ye shes kyi tshogs kyis myur du 'gro ba zhes pa ste/ byang chub kyi shing gi rgyal po'o/ /song nas kyang skyil mo krung gis 'gro ba thams cad la phan pa dang / bde ba'i don du seng ge'i gdan la bzhugs pa'o/ /gzhugs nas kyang bdud kyi dpung pham par byas nas/de'i rjes su bla na med pa yang dag par rdzogs pa'i byang chub tu mngon par rdzogs par sangs rgyas nas/ bla na med pa'i chos kyi 'khor lo bskor ba ste/ ston par byed pa zhes bya ba'i bar du'o/ /yang mdor bsdus nas 'jig rten dang 'jig rten las 'das pa'i ma lus pa'i phun sum tshogs pa'i phan yon gang gsungs ba/gang gis bzang po spyod pa zhes bya ba la sogs pa'o/ /gang bzang po spyod pa'i smon lam 'di 'dzin pa dang / klog pa dang / gang zhig ston pa de'i rnam par smon pa de sangs rgyas bcom ldan 'das rje btsun gyis mkhyen gyi/ gzhan nyan thos dang rang sangs rgyas la sogs pas ni ma yin no//smon lam rin po che 'di'i rnam par smin pa ji lta bu zhig mkhyen zhe na/ gsungs pa/ byang chub mchog ste bla na med pa yang dag par rdzogs pa'i byang chub kyi 'bras bu 'jig rten las 'das pa ma lus pa'i phun sum tshogs pa rtogs pa dang / de nyid kyi phan yon 'di yang brjod pa go bar bya ste/de med na mi 'byung ba'i phyir 'di las 'jig rten gyi phun sum tshogs pa 'thob par 'gyur ro / /de'i phyir smon lam gyi rgyal po 'di la yid gnyis bskyed par mi bya'o/ /da ni gang klog pa'i yongs su bsngo ba gsungs pa/ 'jam dpal ji ltar mkhyen zhing zhes bya ba la sogs pa la/'phags pa 'jam dpal gyis ji ltar mkhyen pa dang / byang chub sems dpa' chen po kun du bzang po 'di yang de bzhin zhes pa'o/ /de dag gi rjes su bdag gis bslab par bya ba ni/ dge ba'i phung po 'di dag byang chub sems dpa' 'di ltar yongs su bsngo ba'o/ /da ni de bzhin gshegs pa'i yongs su bsngo ba gnyis pa ni/dus gsum gshegs pa rgyal ba thams cad kyis / /zhes bya ba la sogs pa la/ dus gsum du bzhugs pa'i rgyal ba bcom ldan 'das dag gis gang yongs su bsngo ba bsngags shing bstod pa mchog tu gyur pa bla na med pa des so/ / bdag gis zhes pa ni bdag gis kyang yongs su bsngo bar bya ba ste/ bsod nams kyi phung po bsags pa 'di dag thams cad spyod pa bla na med pa bzang po'i spyod pas so/ /da ni tshigs su bcad pa phyed kyis ni sgrib pa spangs pa dang / gzhan phyed kyis ni pha rol tu phyin pa dang rjes su mthun pa'i bdag nyid du bsgom pa'i yongs su gzung ba gang gsungs pa ni/dus byed ces bya ba la sogs pa la/ dus byed pa ni 'chi ba'o/ /de'i dus byed pa ni 'chi ba'i dus na'o/ /gang cung zad sgrib pa yong ba de dag bzang po'i spyod pas de thams cad ma lus bsal ba'o/ /mngon sum mthong zhes pa ni bcom ldan 'das snang ba mtha' yas mthong ba'o//der zhes pa ni bde ba can gyi sangs rgyas kyi zhing der ro/ /'gro ba zhes pa ni de ru 'gro ba zhes pa'o/ /de ltar bde ba can gyi sangs rgyas kyi zhing der song nas kyang rnam pa 'di lta bu'i ji skad bstan pa'i smon lam gyi tshogs bdag gis mngon du gyur cig pa'o //sems can ma lus pa thams cad nyid la phan par bya ba'i phyir/ de dag thams cad bdag gis yongs su rdzogs par bya ba'o/ /dus ji srid du zhe na/ gsungs pa 'jig rten ji srid ces pa ste/ 'jig rten ji srid pa'i 'gro ba zhes pa'i don to/ / lung bstan pa yang dag par thob pa dang / sems can gyi don phun sum tshogs pa mchog tu bya ba ni/ rgyal ba'i dkyil 'khor zhes bya ba la sogs pa la der zhes pa ni de la'o/ /rgyal ba'i dkyil 'khor zhes pa ni/ de bzhin gshegs pa'i 'khor gyi dkyil 'khor ro / /bzang zhes pa ni mdzes pa yid du 'ong zhing yid dang 'thad pa'o//pad+ma dam pa zhes pa ni pad+ma'i mchog ste/ rin po che sna tshogs pas spras pa'i rang bzhin mdzes pa yid du 'ong ba/ 'od gsal ba sna tshogs pa'i 'od zer mang po 'phro ba'o/ skyes zhes pa ni 'byung bar 'gyur ba'o/ /lung bstan zhes pa ni lung ston par byed pa ste/ 'dis lung ston pa'o//'di'i dus su 'jig rten gyi khams che ge mo zhig tu/ de bzhin gshegs pa dgra bcom pa yang dag par rdzogs pa'i sangs rgyas/ ming 'di zhes bya bar 'gyur ro zhes rnam pa 'di lta bur lung bstan pa'o/ de las bdag gis lung bstan pa thob pa ni/ bcom ldan 'das snang ba mtha' yas de'i mngon sum du dngos su'o//der ni zhes pa ni bcom ldan 'das snang ba mtha' yas las lung bstan pa thob nas/ de nas sprul pa bye ba brgya'i sprul pa'i sprin du mas phyogs bcu thams cad khyab par byas nas/ 'gro ba sems can 'di dag la phan pa mang po grangs las 'das pa skad cig la bya'o/ /nye bar bsdus pa ni/phyogs bcur byed pa dang / 'khor ba ma stongs kyi bar du'o/ /blo yi stobs zhes pa ni ye shes kyi stobs te/ ye shes kyi che ba'i bdag nyid do/ /chags pa med par spyad par bya'o zhes bya ba'i bar du'o/ /smon lam rgyal po 'di'i 'grel ba byas pa yis/ /bsod nams bdag gis thob las 'gro ba'i don grub cing //yang dang yang du dge ba 'di ni byed pa dang / /'di yi rgyu mthun sbyin par yongs su bsngo bar shog / 'phags pa bzang po spyod pa'i 'grel pa slob dpon dbyig gnyen gyis mdzad pa rdzogs so// //rgya gar gyi mkhan po paN+Di ta A tsar+ya A nan+da dang lo tsA ba dge slong b+ha dra pA las bsgyur ba'o// //