CLOSE WINDOW

D4012
བོད་ཡིག

/[ @##/ /rgya gar skad du/ sa man+ta b+ha dra tsar+ya pra Ni d+hA nar+tha saM gra ha kri ti A tsAr+ya dika nA ga pA de na/ bod skad du/ kun du bzang po'i spyod pa'i smon lam gyi don kun bsdus te/slob dpon phyogs kyi glang po'i zhabs kyis mdzad pa/ sangs rgyas dang byang chub sems dpa' thams cad la phyag 'tshal lo/ /kun du bzang po'i spyod pa'i smon lam la don rnam pa bcu yod do / /'di lta ste/ de bzhin gshegs pa la phyag bya ba dang / de la mchod pa dang /nyes pa bshags pa dang / bsod nams kyi rjes su yi rang ba dang / chos kyi 'khor lo rab tu bskor bar bskul ba dang / de bzhin gshegs pa bzhugs par gsol ba dang / dge ba'i rtsa ba rab tu bsags pa yongs su bsngo ba dang / de'i rab tu dbye ba dang / de'i mtha' dang /de'i legs pa'o/ /de la phyogs bcu'i zhing dang dus thams cad du gshegs pa'i sangs rgyas rnams la lus dang ngag dang yid kyis phyag bya ba las brtsams te gsungs pa/ ji snyed su dag phyogs bcu'i zhes bya ba la sogs pa'o/ /lus kyis ni zhing gi rdul snyed la sogs pa'o//yid kyis ni rdul gcig steng na rdul snyed la sogs pa'o/ /ngag gis ni de dag bsngags pa mi zad rgya mtsho zhes bya ba la sogs pa'o/ /mchod pa ni rnam pa gnyis te/ bla na yod pa dang / bla na med pa'o/ /bla na yod pa ni/ tshigs su bcad pa gnyis kyis bstan te/ me tog dam pa zhes bya ba la sogs pa'o//bla na med pa ni mchod pa gang rnams bla na med ces bya ba la sogs pa'o/ /rang bzhin dang gzhi dang gnas kyi nyes pa bshags pa las brtsams te gsungs pa/ 'dod chags zhe sdang gti mug ces bya ba la sogs pa'o/ /bsod nams kyi rjes su yi rang ba'i dbang du byas te gsungs pa/phyogs bcu'i zhes bya ba la sogs pa'o/ /de bzhin gshegs pa thams cad la chos kyi 'khor lo rab tu bskor bar bskul ba las brtsams te gsungs pa/ gang rnams phyogs bcu'i 'jig rten sgron ma zhes bya ba la sogs pa'o/ /de bzhin gshegs pa bzhugs par gsol ba ni/mya ngan 'das ston gang bzhed ces bya ba la sogs pa'o/ /dge ba'i rtsa ba rab tu bsags pa yongs su bsngo ba ni/ phyag 'tshal ba dang zhes bya ba la sogs pa gsungs pa'o/ /kun du bzang po'i smon lam rab tu dbye ba ni rnam pa bcu drug go/ /'di lta ste/ bsam pa dang / byang chub kyi sems mi brjed pa dang / mi chags pa'i sbyor ba dang / sems can la phan gdags pa dang / go cha dang / skal pa mnyam pa'i byang chub sems dpa' dang / 'grogs pa dang / dag pa'i bshes gnyen dang 'grogs pa dang / de bzhin gshegs pa mngon du 'gyur ba dang /dam pa'i chos yongs su gzung ba dang / mi zad pa'i mdzod rab tu rnyed pa dang / 'jug pa dang / stobs dang / gnyen po dang / las dang / rjes su slob par bsngo ba dang / bsdu ba'o/ /de la bsam pa ni rnam pa gsum ste/ de bzhin gshegs pa'i dgongs pa yongs su bskang ba'i bsam pa ni gang gsungs pa/'das pa'i sangs rgyas rnams dang zhes bya ba la sogs pa'o/ /sangs rgyas kyi zhing yongs su sbyang ba'i bsam pa ni/ phyogs bcu ga la'i zhing zhes bya ba la sogs pa'o/ /sems can la phan pa dang bde ba'i bsam pa ni gang gsungs pa/phyogs bcu'i sems can zhes bya ba la sogs pa'o/ /gnyen po dang bcas pas mi mthun pa'i phyogs spang ba bstan pa ni byang chub kyi sems mi nyams pa ste/ gang gsungs pa/ byang chub spyod pa dag ni bdag spyod cing / /zhes bya ba la sogs pa'o/ /gang las ci la ji ltar mi chags pa'i sbyor ba de bstan pa'i phyir gsungs pa/las dang nyon mongs bdud kyi las zhes bya ba la sogs pa'o/ /tshe 'di dang gzhan du sems can la phan pa'i dbang du byas te gsungs pa/ ngan song sdug bsngal rab tu zhi bar byed/ /ces bya ba la sogs pa'o/ /sems can gyi spyod pa'i rjes su 'jug pa dang /sangs rgyas kyi chos yongs su bskang ba dang / dam pa'i chos rab tu bstan pas go cha rnam pa gsum ste/ gang gsungs pa/ sems can rnams kyi spyod pa dang mthun par 'jug ces bya ba la sogs pa'o/ /lus dang ngag dang spyod pa dang smon lam gyi skal ba mnyam pa'i byang chub sems dpa' dang 'grogs pa ste/gang gsungs pa/ bdag gi spyod dang mthun par gang spyod pa/ /zhes bya ba la sogs pa'o/ /phan pa'i bsam pa bstan pa dang nan tan gyis dge ba'i bshes gnyen gyi dbang du mdzad nas gang gsungs pa/ bdag la phan par 'dod pa'i grogs po dag /ces bya ba la sogs pa'o/ /dus dang 'khor dang mchod pa byed pa la yongs su mi skyo bas de bzhin gshegs pa mngon du 'gyur ba ste/ gang gsungs pa/ mngon sum rtag tu bdag gis rgyal ba blta/ /zhes bya ba la sogs pa'o/ /'dzin pa dang yongs su sbyong ba dang bshad pas dam pa'i chos yongs su gzung bar gsungs pa/rgyal ba rnams kyi dam pa'i chos 'dzin cing / /zhes bya ba la sogs pa'o/ /bsod nams dang ye shes la sogs pa tshogs bsgrubs pas mi zad pa'i mdzod rab tu rnyed par gang gsungs pa/ srid pa thams cad du ni 'khor ba na/ /zhes bya ba la sogs pa'o/ /'jug pa ni rnam pa brgyad de/ sangs rgyas dang de'i zhing mthong ba la 'jug pa'i tshigs su bcad pa gnyis kyis bstan te/ gang gsungs pa/ rdul gcig steng na rdul snyed zhing rnams zhes bya ba la sogs pa'o/ / sangs rgyas kyi gsung la 'jug pa ni gang gsungs pa/ gsung gcig yan lag rgya mtsho zhes bya ba la sogs pa'o/ /chos kyi 'khor lo rab tu bskor ba la 'jug par gsungs pa ni/ de dag gi yang gsung dbyangs zhes bya ba la sogs pa'o/ /bskal par rab tu 'jug pa ni gang gsungs pa/ma 'ongs bskal pa thams cad ces bya ba la sogs pa'o/ /de bzhin gshegs pa'i spyod yul la 'jug pa ni gang gsungs pa/ dus gsum gshegs pa mi'i seng ge zhes bya ba la sogs pa'o/ /sangs rgyas kyi zhing sgrub pa la 'jug par gang gsungs pa/ gang yang dus gsum dag gi zhing gi rgyan//zhes bya ba la sogs pa'o/ /de bzhin gshegs pa'i drung du 'gro bar 'jug pa brgyad pa ni gang gsungs pa/ gang yang ma byon 'jig rten sgron ma dag /ces bya ba la sogs pa'o/ /stobs ni rnam pa bcu ste/ tshigs su bcad pa gnyis las rdzu 'phrul la sogs pa'o//kun du myur ba'i rdzu 'phrul stobs zhes bya ba la sogs pa'o/ /gnyen po ni las dang nyon mongs pa dang bdud kyi stobs mi mthun pa'i phyogs rab tu gzhom pa'i phyir rnam pa gsum du gang gsungs pa/ las kyi stobs rnams yongs su dag byed cing / /zhes bya ba la sogs pa'o/ /sangs rgyas kyi zhing rgya mtsho yongs su sbyang ba la sogs pa las ni rnam pa brgyad de/tshigs su bcad pa gnyis kyis gsungs pa/ zhing rnams rgya mtsho rnam par dag byed cing / /zhes bya ba la sogs pa'o/ /sangs rgyas dang byang chub sems dpa'i rjes su slob par yongs su bsngo ba ni rnam pa gnyis te/ de la de bzhin gshegs pa'i rjes su slob par bsngo ba ni/gang yang dus gsum gshegs pa rgyal ba yi/ /zhes bya ba la sogs pa'o/ /lus dang ngag dang yid kyi spyod pa dang zhing dang smon lam rnam par dag pas 'phags pa kun du bzang po la sogs pa byang chub sems dpa' rnams kyi rjes su slob par bsngo ba ni tshigs su bcad pa gsum gyis gsungs pa/rgyal ba kun gyi sras kyi thu bo pa/ /zhes bya ba la sogs pa'o/ /tshad dang sbyor ba dang yon tan dang spyod pa dang gnas kyi bye brag gis kun du bsdu ba gsungs pa/ spyod pa dag ni tshad yod ma gyur cig /ces bya ba la sogs pa'o//de la smon lam gyi mtha' med pa'i dpe ni rnam pa bzhir gsungs te/ nam mkha'i mthar thug gyur pa zhes bya ba la sogs pa'o/ /smon lam gyi legs pa ni yon tan rnam pa gnyis te/ tshe 'di dang / phyi ma'o / /de la tshe 'di'i rnam pa bzhi ni 'di lta ste/ bsod nams kyi tshogs yongs su gzung ba dang /de bzhin gshegs pa mthong ba dang / byang chub sems dpa' dang skal ba mnyam pa rnyed pa dang / las kyi sgrib pa yongs su zad pa'o/ /de la mang po dang / rgya che ba dang / sna tshogs pa dang / rjes su gzung ba dang / dngos po dang / zhing dam pa'i bsod nams kyi dpe dang / byang chub 'dod pa dang / smon lam la mos pas bsod nams kyi mchog dam pa yongs su 'dzin par gsungs pa ste/ gang yang phyogs bcu'i zhing rnams mtha' yas pa/ /zhes bya ba la sogs pa'o/ /ngan song dang log pa'i grogs po yongs su spangs pas de bzhin gshegs pa mthong bar 'gyur te/des ni ngan song thams cad spang bar 'gyur/ /zhes bya ba la sogs pa'o/ /rab tu bsngags pa rnyed pa 'tsho ba'i tshe 'thob pas byang chub sems dpa' dang skal ba mnyam pa rnyed par gsungs te/ de dag rnyed pa rab rnyed bde bar 'tsho//zhes bya ba la sogs pa'o/ /las kyi sgrib pa yongs su zad pa'i yon tan legs pa bzhi pa ni gang gsungs pa/ mtshams med lnga po dag gi sdig pa rnams/ /zhes bya ba la sogs pa'o/ /phyi ma'i yang rnam pa gnyis te/ rgyus bsdus pa dang / 'bras bus bsdus pa'o/ /de la rgyus bsdus pa ni//ye shes dang mtshan dang dpe byad bzang po'i lus dang nad med pa'i lus kyi mtshan nyid du gang gsungs pa/ ye shes dang ni gzugs dang mtshan zhes bya ba la sogs pa'o/ /'bras bus bsdus pa ni byang chub kyi snying por 'gro ba dang / seng ge'i khri la 'dug par ston pa dang /bdud rnams rab tu pham pa dang / mngon par rdzogs par 'tshang rgya ba dang / chos kyi 'khor lo bskor ba la sogs pa'i mtshan nyid du gsungs pa/ byang chub shing dbang drung du de myur zhes bya ba la sogs pa'o/ /mdor na 'jig rten gyi dang 'jig rten las 'das pa'i sbyor ba thob pa ni legs pa'o//gang yang bzang po spyod pa'i smon lam 'di/ /zhes bya ba la sogs pa'o/ /'di man chad kyi bsngo ba gsum ni byang chub sems dpa' de bzhin gshegs pas gsungs pa'i sgrib pa med pas pha rol tu phyin pa dang mthun pa'i lus 'dzin cing smon lam yongs su rdzogs pas 'jig rten na gnas te sems can gyis don sgrub par gsungs pa/'jam dpal ji ltar mkhyen cing dpa' ba zhes bya ba nas bzung ste/ 'jig rten ji srid sems can phan par bgyi/ /zhes bya ba'i bar rnams so/ /kun du bzang po'i spyod pa'i smon lam gyi don kun bsdus pa rdzogs so// //sangs rgyas dang byang chub sems dpa' thams cad la phyag 'tshal lo/ /bzang po spyod pa'i smon lam gyi bsdus pa'i don ni rnam pa bcu'o/ /'di lta ste/ de bzhin gshegs pa la phyag bya ba dang / de la mchod pa dang /sdig pa bshags pa dang / bsod nams kyi rjes su yi rang ba dang / chos kyi 'khor lo bskor bar bskul ba dang / de bzhin gshegs pa bzhugs par gsol ba dang / dge ba'i rtsa ba yongs su bsngo ba dang / de'i rab tu dbye ba dang / de'i mtha' dang / de dag gi legs pa rnams so//de la mi dbye ba'i spyis ni phyogs bcu'i dus gsum gyi zhing thams cad kyi sangs rgyas bcom ldan 'das rnams la lus dang ngag dang yid kyis phyag bya ba'i phyir/ ji snyed su dag ces bya ba la sogs pa bshad do/ /ji snyed ces bya ba ni grangs ji tsam pa'i tshad de/ de dag gi tshad chad par ma gyur pas na sangs rgyas bcom ldan 'das rnams spyir bstan pa'i phyir/su dag ces bya ba bshad de/ grangs chad pa med pa'o zhes bya ba'i tha tshig go/ /phyogs bcu zhes bya ba ni phyogs bcu'o/ /'jig rten gyi zhes bya ba ni 'gro ba rnams so/ /dus gsum gshegs pa zhes bya ba ni dus gsum gyi kun chub pas te/dus gsum gyi zhes bya ba'i tha tshig go/ /mi yi seng ge zhes bya ba la seng ge ni thams cad du bag brkyang zhing gar yang dogs pa med la/ de dang 'dra ba lhar bcas pa'i 'jig rten na sangs rgyas bcom ldan 'das seng ge dang yang 'dra la/mi yi tshe yang ston pa'i phyir mi yang yin la seng ge yang yin pas mi'i seng ge'o/ /bdag gi ma lus de dag thams cad la/ /zhes bya ba la thams cad ces bya ba ni phyogs gcig tu yang brjod du rung bas na 'dir ni ma lus zhes bya ba brjod do/ /lus dang ngag yid dang bas phyag bgyi'o//zhes bya ba ni mchog tu dang ba bskyed pa ste/ sems dang ba des bskyed pas na lus dang ngag kyang dang ba'o/ /da ni lus la sogs pas phyag bya ba so sor phye ste bshad do/ /de la lus kyi phyag bya ba ni/ zhing gi rdul snyed ces bya ba la sogs pa ste/ sangs rgyas kyi zhing gi rdul snyed kyi lus kyis phyag bya ba'o//snyed ces bya ba ni dpe'i rnam grangs te/ phyogs bcu dus gsum du gshegs pa'o sangs rgyas kyi zhing ji snyed kyi lus rab tu btud pas phyag bya ba'o/ /rgyal ba kun la rab tu phyag 'tshal lo/ /zhes bya ba ni nyon mongs pa'i dgra dang bdud las rgyal bas na sangs rgyas bcom ldan 'das la rgyal ba zhes bya ste/sangs rgyas bcom ldan 'das kyis 'di skad du/ sdig pa'i chos rnams las rgyal bas/ /nyer 'grong ni rgyal ba yin/ /zhes gsungs pa la sogs pa'o/ /de ltar dus gsum du gshegs pa'i rgyal ba thams cad la phyag bya'o//bcom ldan 'das gcig la sems kyis dmigs pa na/ gzhan la ma khyab par 'gyur ro snyam pa la/ rgyal ba thams cad yid kyis mngon sum du/ /zhes bya ba bshad do/ /de bzhin gshegs pa thams cad re re zhing yang mngon sum du bsam pa'i don to//bzang po spyod pa'i smon lam stobs dag gis/ /zhes bya ba la/ bzang po ni dge ba'o/ /bzang po yang yin la spyod pa yang yin pas na bzang po spyod pa ste/ byang chub sems dpa'i spyod pa zhes bya ba'i tha tshig go/ /der smon pa'i smon lam yin pas na smon lam zhes bya'o/ / de'i stobs kyis nyon mongs pa la sogs pas zil gyis mi non cing mi mthun pa'i phyogs bcom pas na stobs dag gis zhes bya ba ste/ rnam pa gzhan las ni 'di lta bu'i byed pa mi 'byung ba'i phyir ro/ /da ni yid kyis phyag bya ba ste/ rdul gcig steng na rdul snyed ces bya ba la sogs pa'o//rdul gcig gi steng du rdul snyed kyi sangs rgyas rnam pa zhes bya ba ni khyad par du ma smos pa'i phyir phyogs bcu dus gsum du gshegs pa'i sangs rgyas rnams kyi zhing gi rdul snyed kyis bde bar gshegs pa rnams so/ /sangs rgyas sras kyi dbus na bzhugs pa dag /ces bya ba ni re re zhing yang byang chub sems dpa' grangs med pa'i tshogs kyi dbus na bzhugs pa'o//rdul gcig gi steng du ji ltar bsams pa de bzhin du thams cad du bsam par bya ba'i phyir ro/ /de ltar chos kyi dbyings rnams ma lus pa/ /zhes bya ba bshad de/ chos kyi dbyings ni thams cad du khyab par byed pa'i phyir nam mkha'i mthas klas pa thams cad yang rdul gcig gi steng na rdul snyed kyi sangs rgyas re re la yang byang chub sems dpa' grangs med pa'i tshogs kyis kun nas bskor ba rnams kyis gang zhing bar mtshams med par khyab par yid kyis mos par bya'o//lus dang ngag gi las rnams yid kyis bskyed pas na bar du yid kyi las bshad do/ /da ni ngag gis phyag bya ba ni/ de dag bsngags pa mi zad ces bya ba la sogs pa'o/ /de dag ces bya ba ni ji ltar mos par bya ba dag go/ /mthar yang 'god pa med pas na de mi zad pa'o/ / bsngags pa rgya mtsho zhes bya ba ni yon tan rgya mtsho ste/ de dag gi bsngags pa rgya mtsho bzhin mi zad pa'o/ /bsngags pa zhes bya ba ni yon tan gyi rnam grangs so/ /rgya mtsho zhes bya ba ni mang po'i don du rig par bya'o/ /dbyangs kyi yan lag rgya mtsho'i sgra kun gyis/ /zhes bya ba la/yan lag ces bya ba ni yon tan gyi rnam grangs so/ /ji lta zhe na/ 'di lta ste/ nyan thos kyi theg pa las/ bcom ldan 'das kyi dbyangs ni yan lag lnga dang ldan zhes 'byung ba dang / theg pa chen po las yan lag drug cu dang ldan la/ yan lag stong phrag bcu drug dang ldan pa //tshad med pa'i yan lag dang ldan zhes 'byung ste/ de ltar yon tan lnga la sogs pa dang ldan par rig par bya'o/ / da ni sangs rgyas bcom ldan 'das de dag la bla na yod pa dang bla na med pa'i mchod pa rnam pa gnyis las bla na yod pa'i tshigs su bcad pa gnyis te/me tog dam pa zhes bya ba la sogs pa'o/ /me tog la sogs pa dam pa gang yin pa de dag ni me tog dam pa dang / phreng ba dam pa dang / sil snyan dam pa dang / ba dan dang / tsan dan dang / gur gum la sogs pa'i byug pa dam pa dang / gdugs dam pa dang / mar me dam pa dang /bdug pa dam pa dang / na bza' dam pa dang / spos sna tshogs sbyar ba'i dri dam pa dang / tsan dan dang / gur gum dang / ga bur dang / a ga ru la sogs pa'i phyi ma'i phur ma ri rab dang mnyam pa rnams kyis so/ /khyad par can gyi rgyan mchog thams cad kyis/ /zhes bya ba la rgyan mchog ces bya ba ni mang po'i rnam grangs so//lha dang mi'i rnam pa thams cad dang ldan pa'i dam pa rnams kyis rgyal ba de dag thams cad la mchod par bgyi'o/ /da ni bla na med pa'i mchod pa bshad par bya ste/ mchod pa gang rnams bla med ces bya ba la sogs pa ste/ bla na med pa'i mchod pa rgya che ba ni byang chub sems dpa'i ting nge 'dzin gyi khyad par gyi mthu las skyes pa sangs rgyas kyi zhing thams cad du khyab par chos kyi dbyings dam pas rgyal ba de dag kun la bdag gi bsam pas so //bzang po spyod la dad pa'i stobs dag gis//zhes bya ba ni bzang po spyod pa la mos pa dang / dad cing nges par yid ches pa de'i stobs kyis so/ /bzang po spyod pa ni mdo sde du ma nas byang chub sems dpa'i mchod pa rnam pa sna tshogs 'byung ba'o/ /da ni ji ltar bshad pa'i phyag bya ba dang / mchod pa rnams mjug brtul ba'i phyir/rgyal ba kun la phyag 'tshal mchod par bgyi/ /zhes bya ba bshad de/ rgyal ba thams cad la phyag bya zhing mchod par bya'o/ /rang bzhin dang rgyu dang gnas te gsum gyi sdig pa bshags par bshad de/ 'dod chags zhe sdang gti mug dbang gis zhes bya ba la sogs pa'o//de la rang bzhin ni/ /sdig pa bdag gis bgyis pa ci mchis pa/ /zhes bya ba ste/ tshe 'di dang tshe gzhan du byas pa dang / byed du bcug pa dang / rjes su yi rang ba rnams so/ /rgyu gang gis she na/ 'dod chags zhe sdang gti mug dbang gis so/ /gnas gang zhe na/lus dang ngag dang yid la gnas nas so/ /de lta bu de dag thams cad rgyal ba kun dang de'i sras rnams kyi spyan sngar 'dug pa bzhin du shin tu 'gyod pa'i yid kyis skad cig re re la yang bshags shing smyur te skyug par bya'o/ /da ni bsod nams kyi rjes su yi rang ba bshad de/phyogs bcu'i zhes bya ba la sogs pa'o/ /phyogs bcu'i 'gro ba thams cad kyi sbyin pa dang tshul khrims dang bsgom pa las byung ba'i bsod nams dang / dus gsum du gang slob pa'i gang zag bdun dang / gang mi slob pa'i dgra bcom pa dang / gang rang rgyal ba'i rnam pa ste /de yang bse ru lta bu dang / sdes rgyu ba dang rnam pa gnyis kyi 'jig rten dang 'jig rten las 'das pa'i dus gsum gyi bsod nams dang / gang thog mar sems bskyed pa rnams nas bzung ste/ byang chub sems dpa' thams cad kyi dang /sangs rgyas bcom ldan 'das gang dus gsum du gshegs pa rnams kyi dang / byang chub tu sems bskyed par rtogs pa pha rol tu phyin pa dang sa la sogs pa las skyes pa dang / dus gsum du gshegs pa 'jig rten gyi dang / 'jig rten las 'das pa re re'i bsod nams kyi tshogs tshad med pa bsam du med pa dang /sangs rgyas kyi ye shes kyi spyod yul du gyur pa de dag thams cad la skad cig re re zhing yang rjes su yi rang bar bya'o/ /'gro ba zhes bya ba'i tshig ni ma lus par snyegs pas slob pa la sogs pa'i bsod nams kyang 'dus na ci'i phyir tha dad du smos she na de lta ma yin te/'gro bas na 'gro ba ste sred pa dang bcas pas 'khor bar 'khor ro zhes bya ba'i tha tshig go/ /de la gang yang 'gro ba med na ji ltar 'gro ba zhes bya/ de bas na so sor bstan to/ /da ni chos kyi 'khor lo bskor bar bskul ba bshad de/ gang rnams phyogs bcu'i zhes bya ba la sogs pa'o//gang rnams phyogs bcu'i 'jig rten sgron ma dag /ces bya ba ni 'gro ba'i sgron ma ste/ /'jig rten gyi phyi dang nang gi mun pa mang po rnam par sel bas na sangs rgyas bcom ldan 'das 'jig rten gyi sgron ma'o/ /byang chub rim par sangs rgyas zhes bya ba ni bla na med pa'i byang chub tu mngon par sangs rgyas pa'o//ma chags brnyes zhes bya ba ni mngon par byang chub pa'i stobs kyis dngos po thams cad kyi rang bzhin ma lus par yongs su mkhyen pas chags par gyur pa thams cad las 'das pa'o//chos zab mo rtogs par bya ba la gzhan dag mi 'dod cing / brtson 'grus rtsom pas khong du chud par bya bar dka' bas na chos 'chad pa'i phyir spro ba mi mdzad par 'jig rten sna tshogs pa'i byang chub kyi shing dam pa'i drung du bzhugs pa'i 'jig rten gyi mgon po thams cad la 'gro ba rnams kyi mi shes pa'i mun gnag bsal bar bya zhing bla na med pa'i ye shes kyi snang bar bya bar bla na med pa'i chos kyi 'khor lo bskor ba'i phyir pus mo gnyis sa la btsugs nas thal mo sbyar te mdun na 'dug pa bzhin du bskul bar bya'o//da ni de bzhin gshegs pa bzhugs par gsol ba gdab pa ni/mya ngan 'da' ston gang bzhed ces bya ba la sogs pa ste/ gang zhes bya ba khyad par du ma brjod kyang / /gang rnams phyogs bcu'i 'jig rten sgron ma dag /ces bya ba dang sbyar ro/ /phyogs bcu na sangs rgyas bcom ldan 'das bzhugs pa rnams mya ngan las 'da' zhing mya ngan las 'da' ba ston par byed pa gang dag yin pa de dag thams cad la bdag gis thal mo sbyar te yun ring du bzhugs par gsol ba gdab po//ci'i phyir zhe na/ mgon med par gyur pa'i 'gro ba thams cad la phan pa dang bde ba'i phyir te/de la phan pa zhes bya ba ni bde ba dang ldan pa'i mya ngan las 'das pa'i lam 'thob par byed pa'o/ /bde ba zhes bya ba ni lha'i longs spyod thob par byed pa'o/ /dus ji srid du zhe na/ dus gsum du gshegs pa'i sangs rgyas thams cad kyi zhing gi rdul snyed kyi bskal par bzhugs su gsol ba'o//da ni ji ltar bshad pa'i phyag bya ba la sogs pa tshad med pa las byung ba'i bsod nams ma lus pa rnams yongs su bsngo bar bya ste/ phyag 'tshal ba dang / mchod cing bshags pa dang / bsod nams kyi rjes su yi rang ba dang /chos kyi 'khor lo bskor bar bskul ba dang bde bar gshegs pa bzhugs par gsol ba rnams kyi dge ba cung zad bdag gis ci bsags pa de dag thams cad bdag gis bla na med pa yang dag par rdzogs pa'i byang chub tu yongs su bsngo bar bya'o/ /da ni de'i rab tu dbye ba ste brgyad pa'o//de yang bzang po spyod pa'i smon lam gyi yan lag rab tu dbye ba ste/ de dag ni rnam pa bcu drug go/ /'di lta ste/ bsam pa dang / byang chub kyi sems mi brjed pa dang / chags pa med par sbyor ba dang / sems can la phan gdags pa dang / go cha bgo ba dang /skal ba mthun pa'i byang chub sems dpa' bsten pa dang / dge ba'i bshes gnyen mgu bar byed pa dang / de bzhin gshegs pa mngon sum du bya ba dang / dam pa'i chos yongs su bsdu ba dang / mi zad pa'i mdzod rnyed pa dang / 'jug par bya ba dang / stobs dang / gnyen po dang / las dang / rjes su slob cing bsngo ba dang / bsdu bar bya ba rnams so/ /de la bsam pa ni rnam pa dang po ste/ de yang rnam pa gsum mo/ /de bzhin gshegs pa la mchod cing dgongs pa yongs su rdzogs par bya ba'i bsam pa ni/ 'das pa'i sangs rgyas rnams dang zhes bya ba la sogs pa'o//mchod par gyur cig ces bya ba ni bla na med pa'i mchod pas so/ /'das par bstan pa ni sangs rgyas bcom ldan 'das mya ngan las 'das pa rnams so/ /gang da ltar phyogs bcu'i 'jig rten na gnas shing bzhugs pa 'jig rten gyi khams sna tshogs ni 'gro ba thams cad la phan pa dang bde ba la stobs pa la brtson pa de dag la yang de bzhin du mchod par gyur cig pa'o//gang phyis 'byon par 'gyur ba de dag gi bsam pa kun rdzogs nas sangs rgyas kyi byang chub myur du gyur cig pa'o//de la phyed yan chad ni de bzhin gshegs pa la mchod par bsam mo/ /phyed man chad ni dgongs pa rdzogs par bsam pa bstan pa'o/ /sangs rgyas kyi zhing yongs su rdzogs par bsam pa ni/ phyogs bcu ga la'i zhing rnams zhes bya ba la sogs pa ste/ga la'i zhes bya ba ni gang na yang rung ba'o/ /ji snyed pa zhes bya ba ni gang dag yod pa'o / /bde ba can gyi 'jig rten bzhin du phyogs bcu'i sangs rgyas kyi zhing ji snyed yod pa de dag thams cad yongs su dag par gyur cig pa dang snang ba mtha' yas ci bzhin du 'jig rten gyi khams tha dad pa gzhan yang yangs par gyur cig pa'o//byang chub kyi shing drung du gshegs pa'i rgyal ba bcom ldan 'das rnams dang byang chub sems dpa' rnams kyis kyang kun tu gang zhing bar mtshams med par gyur cig pa'o/ / sems can thams cad la phan zhing bde ba'i bsam pa ni/ phyogs bcu'i sems can gang rnams ji snyed pa/ /zhes bya ba la sogs pa ste/ phyogs bcu'i 'jig rten gang na skye ba rnam pa bzhir bsdus pa dang / rgyud drug gi sems can de dag yun du bde ba'i mchog gis bde bar gyur cig pa'o//nad med pa ni lus dang sems kyi nad dang rtag par bral bar gyur cig pa'o/ /de ltar chos kyi rnyed pa dang mthun pa ni ldan par gyur pa'o/ /'gro ba chos kyi bsam pa can thams cad 'di ltar rtag tu grub pa dang phun sum tshogs pa dang ldan par gyur cig pa'o//byang chub kyi sems mi brjed pa ni gnyen po dang bcas pa dang / mi mthun pa'i phyogs spang bar bstan par rnam pa gnyis te/ de dag ni tshigs su bcad pa bzhi ste/ byang chub spyod pa zhes bya ba nas bzung ste/ de dag ma lus yongs su byang bar shog /zhes bya ba'i bar du'o/ /byang chub ces bya ba ni bla na med pa yang dag par rdzogs par byang chub bo/ /de ltar spyod pa'i byang chub kyi spyod pa ste/ de dag spyod cing sgrub pas na 'gro ba kun du yang tshe rabs dran par gyur cig /tshe rabs kun du 'chi 'pho skye ba na/ /zhes bya ba ni shi zhing skyes pa na yang rtag tu bdag rab tu 'byung bar gyur cig pa'o//skyes nas shi ba'i bar la bshad par blta ba'o/ /'di ni byang chub kyi sems mi nyams pa'i rgyu dang dngos po dang po'o/ /'di ltar/ rgyal ba kun gyi rjes su slob gyur te/ /zhes bya ba ni rgyal ba dus gsum du gshegs pa thams cad kyis bslab pa'i rjes su slob ba'o//bzang po spyod pa yongs su rdzogs par bya ba'o/ /rdzogs par ji ltar bya zhe na/ tshul khrims spyod pa dri med yongs dag par/ /rtag tu ma nyams skyon med spyod par shog /ces bya ba ni dper na yid bzhin gyi nor bu rin po che glo bur gyi dri ma dang bral bas na dri ma med pa'o//g.ya'i skyon kun bsal bas na rang bzhin gyis yongs su dag pa ste/ de lta bas na ma nyams skyon med pa zhes bya ba ste/ 'dod pa kun phun sum ldan par byed/ gdung ba kun yongs su med par byed/ nad thams cad dang bral bar byed pa'o//de ltar byang chub sems dpa'i tshul khrims kyang rin po che bzhin du glo bur gyi las dang nyon mongs pa dang ma 'dres pas na dri ma dang bral ba ste dri ma med pa'o/ /nyan thos dang rang sangs rgyas kyi theg par sems bskyed pa'i g.ya'i skyon dang bral zhing thams cad mkhyen pa'i sems bskyed pa rin po che bzhin du kun du dag pas na yongs su dag pa'o//byang chub sems dpa'i slob pa la shin tu gus par byas nas nyes pa mi spyod pas na nyams pa med pa'i phyir nyams pa med pa'o/ /'das pa'i yul la re ba'i sred pa skye ba dang /ma 'ongs pa dang tshe phyi ma rnams su smon pa'i sred pa dang / de ltar byung ba la zhen pa'i sred pa ste/ dus gsum gyi sred pa'i khab kyis cung zad du yang ma gtses pas na skyon med pa'o/ /sa bzhin du sangs rgyas dang byang chub sems dpa' thams cad kyi 'dod pa phun sum ldan par byed pa dang /thams cad kyi gdung ba yongs su sel ba dang / thams cad kyi nad 'joms pa dang / lha dang mi rnams kyi don tshad med par bsgrub pa 'ba' zhig pa la 'jug pa ste/ sgra'i tshul du'ang lus dang sems kyi gdung ba bsil bar byed pas na tshul khrims so//tshul khrims ni spyad par bya ba yin pas na spyod pa zhes bya ba'o/ /de ltar rtag par nam byang chub kyi bar du spyod pa ni tshul khrims spyod pa dri ma med pa yongs su dag pa'am ma nyams pa skyon med par spyod pa ste/ 'di ni byang chub kyi sems mi brjed pa'i rgyu gnyis pa'o//lha yi skad dang zhes bya ba la sogs pa ni lha la ni lha'i skad kyis so/ /klu dang gnod sbyin dang grul bum dang mi rnams la yang so so'i skad kyis so/ /mdor na 'gro ba ji snyed pa thams cad kyi skad du de dag thams cad la de lta bu'i skad du chos bshad pa ni nam byang chub kyi bar du'o//'di ni rgyu gsum pa'o/ /des shing zhes bya ba la sogs pa la des pa ni sems kyi rgyud mnyen pa'o/ /pha rol tu phyin pa ni sbyin pa la sogs pa bcu po'o / /de la rab tu brtson pa ni mi skyo ba'i yid kyis yongs su brtson par byed pa'o//byang chub kyi sems ni nam du gar yang mi 'dor bar bya ba ste/ mi 'dor bar ni nam byang chub pa'i bar du ste/ 'di ni rgyu bzhi pa'o/ /tshigs su bcad pa phyed dang bzhi pos ni byang chub kyi sems la mi mthun pa'i phyogs kyis bsgribs par gyur pa de dag gi gnyen po bstan pa'o//da tshigs bcad phyed kyis ni mi mthun pa'i phyogs rab tu spong bar ston te/ gang zhe na/ sdig pa gang rnams sgrib par gyur pa dag /ces bya ba la sogs pa'o/ /sdig pa sgrib par gyur pa byang chub kyi sems la bar chad byed pa de dag thams cad kun yongs su zad cing spong bar gyur cig pa'o//da ni chags pa med par sbyor ba ni rnam pa gsum pa ste/ gang las dang /gang na dang / ji ltar dang gsum mo/ /las dang nyon mongs zhes bya ba la sogs pa'o/ /gang las she na/ las dang nyon mongs pa dang bdud kyi las rnams las so/ /las de dmigs kyis ma phyed pa na dge ba dang mi dge ba dang mi g.yo ba dang rnam pa gsum char gzung ngo / /de la mi dge ba'i las dang nyon mongs pa dang bdud kyi las rnams las rnam par grol zhing de dag la mi chags par rtag tu spyod pa ste/gang zhe na/ lha la sogs pa'i 'jig rten 'gro ba na gnas pa'i tshe'o/ /ji lta bu zhe na/ ji ltar pad+mo chus mi chags pa bzhin/ /zhes bya ba ste/ ji ltar pad+ma chu las skyes kyang chus mi chags pa de bzhin du las dang nyon mongs pa dang bdud kyi las la sogs pa 'jig rten gyi chos rnams kyis mi chags par spyod pa'o//de ltar dge ba dang mi g.yo ba gnyis las kyang 'bras bu rnam par smin pa la re ba med par bya zhing chags pa med par bya ste/ 'gro ba thams cad la phan zhing bde ba 'ba' zhig spyod cing sgrub pa ni byang chub sems dpa'i spyod pa yin par brjod do//ji ltar zhe na/ dper na/ nyi zla nam mkhar thogs pa med ltar spyad/ /ces bya ba ste/ nyi ma dang zla ba ni 'jig rten na yid bzhin gyi nor bu bzhin du gzhan gyi don byed pa la bzhugs shing bdag gi cung zad la'ang mi chags par nyin mtshan du nam mkha' la rgyu ba de dang 'dra bar ro//de la bdud ces bya ba ni dge ba'i srog gi bar chad byed pas byang chub dang mi mthun par byed cing dam pa'i lam las zlog pa ste/ sgra'i tshul du'ang chos kyis 'tsho ba'i bar chad byed cing gsod pas na bdud ces bya'o/ / de'i las ni phan pa'i dngos po la rgyus 'tshe ba'o/ /tshe 'di dang phyi ma la sems can thams cad la phan gdags pa ste rnam pa bzhi pa'o/ /de yang gang zhe na/ ngan song sdug bsngal zhes bya ba la sogs pa'o/ /'gro ba thams cad sdig pas sdug bsngal zhing ngan song rnam pa gsum du skyes pa de dag rab tu zhi bar bya'o//de la yang ci'i phyir ngan song gi sdug bsngal 'ba' zhig zhi ba zhes bya zhe na/ de dag gis shin tu gnod par byed pas na gtso bor bshad pa yin gyis / 'khor ba thams cad kyi sdug bsngal yang de bzhin du rab tu zhi bar bya bar rig par bya'o//ci'i phyir 'gro ba thams cad mchog tu bde ba la 'god par bya zhe na/ de ltar 'gro ba thams cad la phan par spyod par bya ba ste/ bla na med pa'i ye shes thob kyi bar du yongs su mi skyo ba'i yid kyis gzhan du mi sbyor bar spyod par bya ba'o/ /ji srid kyi bar du zhe na/zhing gi khyon dang phyogs rnams ji tsam par zhes bya ba ste/ ji tsam par zhes bya ba ni ji srid pa'o/ /zhing gi khyon zhes bya ba ni sangs rgyas kyi zhing gi khyon ji tsam pa ste/ bskal ba gcig nas gcig tu gnas pa'o/ /phyogs zhes bya ba ni phyogs bcur sbyar bar bya'o//go cha bgos pa ni rnam pa lnga ste/ de yang rnam pa gsum mo/ /sems can gyi spyod pa'i rjes su 'jug pa dang / sangs rgyas kyi chos yongs su rdzogs par byed pa dang / dam pa'i chos rab tu bsgrags pa rnams te/ de yang gang zhe na/sems can dag gi spyod dang mthun par 'jug /ces bya ba la sogs pa'o/ /sems can rnams la rgyu med pa'i rang bzhin spyod pa dang / bde bar gnas pa dang sems kyi rjes su mthun par 'dzin cing spyod pa'o/ /byang chub spyod pa yongs su rdzogs byed cing //zhes bya ba ni byang chub pa'i don du spyod pa ni byang chub kyi spyod pa ste/ de yongs su rdzogs pa ni sangs rgyas kyi chos rnams 'grub par byed pa'o/ /bzang po spyod pa dag ni rab ston cing / /zhes bya ba la 'dir bzang po spyod pa zhes bya ba ni dam pa'i chos 'chad pa nyid gzung ste thabs kyis sgro btags pa dang /'chad pa dang / ston pa'o/ /ma 'ongs bskal pa kun du spyod par gyur/ /ces bya ba ni ma 'ongs pa'i bskal pa mtha' yas pa thams cad du mi skyo ba'i yid kyis spyod pa'o/ /lus dang ngag dang yid kyi spyod pa dang /smon lam gyis skal ba mnyam pa'i byang chub sems dpa' dang mthun par bstan pa ste de ni rnam pa drug pa'o/ /de yang gang zhe na/ bdag gi spyod dang mtshungs par gang spyod pa/ /zhes bya ba la sogs pa'o/ /bdag gi byang chub sems dpa'i spyod pa dang mthun par gang spyod pa de dag dang rtag par nam byang chub pa'i bar du 'grogs pa dang /lus dang ngag dang yid kyis byang chub sems dpa'i spyod pa dang / smon lam de dang lhan cig tu spyod par shog shig pa'o/ /phan par bsam pa'i man ngag sgrub pa ni dge ba'i bshes gnyen mgu par byed pa ste/de ni rnam pa bdun pa'o/ /de yang gang zhe na/ bdag la phan par 'dod pa'i grogs po zhes bya ba la sogs pa'o/ /dge ba'i bshes gnyen gang phan par 'dod pas bzang po spyod pa ston pa dang / 'chad pa dang / chos kyi gtam zer ba dang /bdag rtag par lhan cig tu mtshungs par spyod par gyur cig pa'o/ /de dag bdag gis nams kyang ste gzhar yang yid dbyung bar mi bya ste/ nam byang chub pa'i bar du rtag par de dang mthun par gyur cig pa'o/ /dus dang 'khor dang mchod pa bya ba la skyo ba med pa ni de bzhin gshegs pa mngon du byed pa ste de ni rnam pa brgyad pa'o//de yang gang zhe na/ sangs rgyas sras kyis bskor ba'i mgon po rnams/ /zhes bya ba la sogs pa'o/ /mngon sum zhes bya ba ni mngon sum du bya ba ste phyogs bcu kun gyi'o/ /rgyal ba ni sangs rgyas bcom ldan 'das te/byang chub sems dpa'i 'khor gyis bskor ba'o/ /mgon po zhes bya ba ni 'gro ba thams cad kyi gnyen gcig pur gyur pa'o/ /rtag tu blta zhes bya ba ni skyon med pa'i mig gis so/ /de dag kun re re la yang rnam pa thams cad dang ldan pa rgya chen po nam mkha' dang mnyam pa chos kyi dbyings kun du khyab pa'i mchod pas mchod par bya'o//ji srid kyi bar du zhe na/ ma 'ongs bskal pa kun du mi skyo bar/ /zhes bya ba ste/ skyo ba med pa'i yid kyis ma 'ongs pa'i bskal pa thams cad kyi mthar thug pa'i bar du'o/ / 'dzin pa dang / bshad pa dang / yongs su sbyang ba dang gsum ni dam pa'i chos yongs su bsdu ba ste de ni rnam pa dgu pa'o/ /de yang gang zhe na/ rgyal ba rnams kyi dam pa'i chos 'dzin cing / /zhes bya ba la sogs pa ni dus gsum du gshegs pa'i rgyal ba thams cad kyi gsung rab yan lag bcu gnyis po bshad pa'i chos de dag gzungs kyi stobs kyis 'dzin pas na 'dzin cing zhes bya ba'o //byang chub spyod pa ni bsgrag par bya ba'i chos nyid de / kun du snang bar byed ces bya ba ni 'gro ba rnams la yongs su bsgrags shing rab tu bstan pa'o/ /bzang po spyod pa rnam par sbyang ba yang //zhes bya ba ni byang chub sems dpa'i spyod pa'o/ /de rnams rnam par sbyang ba ni dri ma med par bya ba ste/ nyes pa thams cad ring du spong ba'o/ /ma 'ongs bskal pa kun du spyad par bgyi/ /zhes bya ba ni de ltar brtsal ba'o/ /bsod nams dang ye shes kyi tshogs la sogs pa'i tshogs thob pas mi zad pa'i mdzod rnyed pa ste 'di ni rnam pa bcu pa'o//de yang gang zhe na/ srid pa thams cad du ni zhes bya ba la sogs pa'o/ /'dod pa la sogs pa'i srid pa thams cad na sems can gyi don du 'khor bar 'khor zhing skye bar bsod nams dang ye shes kyi tshogs mi zad pa thob pas ldan par gyur cig /de ltar shes rab dang / thabs dang / ting nge 'dzin nam mkha'i mdzod dang dri ma med pa'i phyag rgya rnams dang / de ltar byang chub sems dpa' rnam par thar pa 'di lta ste/ snying rje chen po thogs pa med pa dang /sgyu mar gyur pa dang / sangs rgyas dang byang chub sems dpa'i yon tan thun mong ba dang / thun mong ma yin pa'i mdzod mi zad pa dang / mi zad pa'i yon tan gyi gter du 'gro ba thams cad la bde zhing phan pa'i phyir gyur cig pa'o/ /'jug pa ni rnam pa bcu gcig pa ste/de yang rnam pa brgyad do/ /'di lta ste/ sangs rgyas dang de'i zhing blta bar 'jug pa rnam pa gnyis dang / sangs rgyas kyi gsung la 'jug pa dang / chos kyi 'khor lo bskor bar 'jug pa dang / bskal par 'jug pa dang /de bzhin gshegs pa la blta ba dang / de'i spyod yul la 'jug pa dang / sangs rgyas kyi zhing mngon par sgrub par 'jug pa dang / de bzhin gshegs pa la bsnyen bkur bya bar 'jug pa dang brgyad do/ /de la sangs rgyas dang de'i zhing blta bar 'jug pa rnam pa gnyis ni tshigs bcad rnam pa gnyis kyis te/de yang gang zhe na/ rdul gcig steng na zhes bya ba la sogs pa'o/ /rdul gcig gi steng du phyogs bcu'i dus gsum du gshegs pa'i sangs rgyas kyi zhing gi rdul snyed kyi sangs rgyas kyi zhing rnams te/ zhing der zhes bya ba ni zhing de dang der ro//bsam gyis mi khyab ces bya ba ni bsam yas pa ste/ sangs rgyas bcom ldan 'das rnams so/ /sangs rgyas sras kyi zhes bya ba ni byang chub sems dpa' rnams kyi'o/ /dbus na bzhugs zhes bya ba ni dbus na bzhugs pa'o/ /byang chub spyad pa spyod cing zhes bya ba ni byang chub spyad pa spyod cing spyad pa rab tu sgrub pa na'o//blta bar bgyi zhes bya ba ni 'jug pa'o/ /byang chub sems dpa'i smon lam mi srid par btab na don med par 'gyur ro/ /ji lta zhe na/ 'di lta ste/ sangs rgyas kyi zhing gi phyogs cha gcig kyang rdul gcig gi steng du chud par bstan mi srid na ji ltar dus gsum du gshegs pa'i sangs rgyas kyi zhing gi rdul snyed kyi sangs rgyas thams cad kyi zhing re re na yang grangs med pa'i sangs rgyas bcom ldan 'das re re yang byang chub sems dpa'i 'khor gyi dbus na bzhugs pas kun du gang ba de snyed du rdul gcig gi steng du so sor blta zhing smon pa ji ltar bya zhes brgal ba dang /de ltar ma yin te/ 'di ltar bsam gyis mi khyab pa'i las 'jig rten gyi khams sna tshogs pa bla 'og snrel zhi la sogs pa sprul pa bzhin te/ de ltar bsam du med pa'i ye shes kyis sprul na rdul gcig gi steng du ci'i phyir mi srid de/bsam gyis mi khyab par lung las kyang bshad pa/ mkhas pa dag gis sa 'di la/ /ngo mtshar 'gyur ba cung zad med/ /sgyu ma'i rnam par gyur pa la/ /ya mtshan du ni su zhig 'dzin/ /bsam gtan las dang klu rnams dang //sangs rgyas rnams kyi che ba nyid/ /'jig rten mgon po 'dren pa des/ /bsam gyis mi khyab rnam bzhir bshad/ /de lta bas na sangs rgyas thams cad kyi gsung rab la mi srid par 'dzin pa de dag kyang 'dis yid ches par gyis shig /'jig rten na yang shin tu chung ba'i snod du chu dngas pas gang ba la/gza' skar la sogs pa nam mkha'i rgyan thams cad snang ba bzhin no/ /de ltar yang bcom ldan 'das kyis gsungs pa/ gzugs brnyan bzhin pa chos rnams te/ /rab rib rmi lam mtshan nyid de / /sgyu ma smig rgyu 'dra ba dang //de 'drar ma lus thams cad do/ /zhes bya ba la sogs pa ni ji ltar rdul gcig gi steng na bzhugs zhes bya ba la sogs pa bzhin no/ /de ltar ma lus zhes bya ba ni ma lus pa'i phyogs thams cad do/ /skra tsam khyon zhes bya ba ni skra'i tshad tsam ste/ de yang bshad par bya ba ni skra'i rtse mo tsam gyi khyon to//dus gsum ni dus gsum du gshegs pa rnams kyi'o/ /sangs rgyas rgya mtsho zhes bya ba ni de dag gi zhing rgya mtshor yang / bskal ba rgya mtshor spyod cing rab tu 'jug /ces bya ba ni de srid du byang chub kyi spyad pa na mthong bar shog shig pa'o//sangs rgyas kyi gsung la 'jug pa de gang zhe na/ gsung gcig yan lag ces bya ba la sogs pa'o/ /de bzhin gshegs pa gcig gis chos bshad pa la nyan pa grangs med pa mos pa tha dad pa dag las don tha dad pa dang tshig dang yi ge 'bru tha dad pa tshad med pa rnams su go bar 'gyur bas na rgya mtsho zhes bya ste/de ltar rgyal ba dus gsum du gshegs pa thams cad kyis de bzhin du chos bshad pa'i gsung sgra rnam par dag pas nyan pa'i 'khor grangs med pa'i 'gro ba rnams ji ltar 'dod pa 'gro ba ltar sangs rgyas kyis gsung sgra skyon med pa'i rna bas de dag gi gsung sgra rgya mtsho kun la rtag par 'jug par bya ste ma lus par yid la bya'o//lung las kyang 'di skad du gsungs te/ 'khor bar 'khor ba mang po rnams/ /dad pa'i rnam pa sna tshogs la//gsung gcig tu ni bshad mod kyi / /du ma'i rnam par go bar gyur/ /bdag la nyi tsher 'chad do snyam/ /'gro ba kun gyis ji ltar go/ /ya mtshan de las ci zhig che/ /de ltar ngo mtshar ci zhig yod pa 'di lta ste/ /sdong pos brgyan pa'i mdo sde 'phags pa byams pa'i rnam par thar ba las bshad pa/phyogs bcu'i bde bar gshegs pa rnams kyi chos sprin la/ /gnas gcig 'dug nas rmongs pa med par gyur te nyan/ /bskal ba bye ba mang por sems kyis ngoms pa med/ /blo chen rgya mtsho dang ni mnyam par spyod par shog /tshigs su bcad pa snga ma gnyis kyis ni 'chad pa'i che ba nyid bstan pa'o/ /tshigs su bcad pa 'og mas ni nyan pa'i che ba nyid bstan to/ /chos kyi 'khor lo bskor bar 'jug pa ste/ /de yang gang zhe na/ de dag gi yang gsung dbyangs mi zad la zhes bya ba la sogs pa'o//de dag gi zhes bya ba ni dus gsum du gshegs pa rgyal ba thams cad kyi'o/ /chos kyi 'khor lo bskor ba ni de la 'jug pa'o/ /mi zad pa ni bgrang ba las 'das pa'i gsung sgra'o/ /de la blo yi stobs kyis zhes bya ba ni ye shes kyi mthu chen pos skad cig tu 'jug cing rtogs pa'o//tshul rnams zhes bya ba ni gang dang gang gis thabs kyis gang dang gang la chos 'chad pa ni dus gang dang yul gang du dad pa sna tshogs kyi sems can dag la 'dul bar 'jug pa'o/ /bskal par 'jug pa ste de yang gang zhe na/skad cig gcig gis zhes bya ba la sogs pa ste/ skad cig ma'i ye shes gcig gis phyogs bcu rnams kyi'o/ /ma 'ongs bskal ba thams cad 'jug par yang / /zhes bya ba ni bskal ba gcig nas gcig tu bdag 'jug pa'o/ /mdor na/ gang yang bskal ba dus gsum tshad de dag /ces bya ba la sogs pa ste/ dus gsum du bgrang ba de dag thams cad skad cig ma'i ye shes gcig gi cha shas kyis rtogs par bya'o/ /de bzhin gshegs pa lta zhing de'i spyod yul la 'jug pa ste/ de yang gang zhe na/ dus gsum gshegs pa mi yi seng+ge gang //zhes bya ba la sogs pa ste/ gang phyogs bcu dus gsum du gshegs pa'i mi'i seng ge sangs rgyas bcom ldan 'das so/ /de dag bdag gis skad cig ma'i ye shes gcig gis blta bar bya ba ni mthong bar bya ba'o / /de dag gi spyod yul ni de dag gi spyod yul lo//sgyu mar gyur pa'i rnam thar stobs kyis 'jug /ces bya ba ni sgyu mar gyur pa zhes bya ba ni byang chub sems dpa'i rnam par thar ba ye shes kyi bdag nyid de'i mthus rtag par 'jug pa'o/ /sangs rgyas kyi zhing mngon par sgrub par 'jug pa ste/de yang gang zhe na/ gang yang dus gsum dag gi zhing zhes bya ba la sogs pa'o/ /gang yang dus gsum dag gi zhing gi rgyan ni zhing mang po ste/ de dag mngon par bsgrub ces bya ba ni rdzu 'phrul gyi stobs kyis rdul gcig gi steng du mngon par bsgrub pa'o//de ltar ma lus phyogs rnams thams cad du/ /zhes bya ba ni ji ltar ma lus pa'i phyogs kyi rdul gyi steng du sgrub pa de bzhin du ye shes kyi skad cig ma gcig gis zhing mang po rnams mngon par bsgrubs nas 'jug pa'o/ /da ltar gyi sangs rgyas kyi zhing thams cad kyi ngo bo nyid dang /tshad dang / kha dog dang / dbyibs dag so sor tha dad pa mang po ma 'dres pa rnams kyang rdul gcig gi steng du bzhag par mi rung na/ so sor tha dad pa mang po rnams rdul gcig gi steng du phyogs bcu mtshams med cing ma 'dres par ji ltar gzhag par bya / de lta bas na 'di la ji ltar yid ches par bya snyam pa la/de'i lan du de bas na chos thams cad ni yongs su ma rdzogs pa ste/ ngo bo nyid med pa sgyu ma lta bu ma skyes pa/ ma 'gags pa/ skra shad 'dzings pa lta bur thog ma nas zhi zhing rang bzhin gyis sems las 'das pa la ji ltar mos par brtags pa tsam gyis 'byung ba ni rnam pa sna tshogs du ma'i gzugs su rab tu bsgoms pas rnam pa mang po'i ting nge 'dzin dang /rnam par grol ba'i khyad par gyis bsam gyis mi khyab pa'i rnam pa sna tshogs myong bas na dngos po 'di dag par du gsal bar snang ngo //'jig rten na yang sngags cung zad tsam las mthu skyes pa'i mig 'phrul gyis rab tu bsgrubs na ngo mtshar dang ldan pa'i sgyu ma'i mdzes pa yang snang ngo / /de lta bas na 'di dag thams cad ni ji ltar smras pa bzhin yid ches par bya ste / 'di ltar yid gnyis ni cung zad kyang ma byed cig /de bzhin gshegs pa la bsnyen bkur bya bar 'jug pa dang brgyad de/ de yang gang zhe na/ gang yang ma byon zhes bya ba la sogs pa ste/ gang ma byon pa ni phyi ma ma 'ongs pa'i mthar thug pa rnams so/ /'jig rten sgron ma zhes bya ba ni sangs rgyas bcom ldan 'das rnams te/phyogs bcu'i 'jig rten gyi khams gzhan dang gzhan na nam mkha'i mtha' klas pa na bzhugs pa bgrang ba las 'das pa'i sangs rgyas kyi ye shes kyi spyod yul gyis skad cig gis dus mnyam par bla na med pa yang dag par rdzogs pa'i byang chub tu mngon par rdzogs par sangs rgyas pa ste/de nas 'di bzhin du dus mnyam par chos kyi 'khor lo bskor bar 'gyur ba dang / de bzhin du mya ngan las 'das pa ston par bshad de/ de dag mngon sum du byang chub ces bya ba la sogs pa'o/ /de dag ces bya ba ni de ltar mngon par rdzogs par byang chub par mdzad pa dang /de de bzhin du chos kyi 'khor lo bskor bar mdzad pa dang / mya ngan las 'das pa rnam pa rab tu ston pa'i mgon po thams cad kyi zhabs kyi drung du yid myur ba dang / kun du myur ba zhes bya ba'i rdzu 'phrul gyi stobs gnyis kyi mthus lus kyi sprin gyis phyogs bcu bkang ste/mchod pa'i sprin nam mkha' khebs pa'i dam pa bgrang ba las 'das pa thams cad kyis mchod pa dang / bstod cing brjod pa dang / bskor ba brgya stong du ma byed cing 'khor ba'i mtha'i bar 'gro ba ni bsnyen par 'jug pa'o/ /rim par 'tshang rgya zhes bya ba ni mngon par byang chub pa'o//mya ngan las 'das pa ston pa zhes bya'am / rab tu zhi mtha' zhes bya ba ni tshig kha bskang ba'i phyir rnam grangs su rig par bya ste gtso bor bshad pa'o/ /de yang chu zla'i gzugs brnyan bzhin du dga' ldan gnas kyi gzhal med khang na bzhugs pa las 'chi 'pho bstan pa dang /mngal na gnas pa'i tshe dang / lhas phyag byas pa dang / bzo bstan pa dang / mngon par byung nas rab tu byung ste dka' ba spyod pa dang / byang chub kyi snying por bzhud nas byang chub kyi shing drung du seng ge'i gdan la bzhugs pas bdud pham par mdzad pa'i dus su gong ma bzhin nye bar 'gro ba ni de dag gi zhabs kyi drung du yud tsam gyis so//stobs de rnam pa bcu gnyis pa'o/ /de dag kyang rnam pa bcu ste tshigs bcad gnyis kyis so/ /de yang gang zhe na/ rdzu 'phrul stobs rnams dang zhes bya ba la sogs pa ste/ 'phrul par byed pas rdzu 'phrul zhes bya bas na ji ltar 'dod pa phun sum tshogs par byed pa ste/cho 'phrul zhes bya ba'i tha tshig go/ /rdzu 'phrul ji ltar cho 'phrul du shes par bya zhe na/ so so'i sems can rnams kyi yid 'phrog cing mgu bar byed pas na cho 'phrul lo/ /de'i stobs kyis gdon mi za bas na rdzu 'phrul gyi stobs so//kun du myur ba'i zhes bya ba ni byang chub sems dpa'i gzhan du 'gro ba'o/ /'gro ba na kun du myur ba'i rdzu 'phrul gyis skad cig gis phyogs bcur mi thogs par 'gro ba'o/ /theg pa'i stobs zhes bya ba ni theg pa chen po'i stobs kyis te/ de bas na theg pa chen po des theg pas na theg pa chen po'o//yang na byang chub sems dpa' chen po'i theg pa yin pas na/ theg pa chen po ste/ dngos su na sangs rgyas kyi byang chub thob par byed pa'i lam bsod nams dang ye shes kyi tshogs gnyis la theg pa zhes bya'o/ /yang na pha rol tu phyin pa rnams dang bcas pa la theg pa chen po zhes bya'o//de dag gi stobs ni mi mthun pa'i phyogs kyi stobs ji snyed pas mi chom pa'o/ /kun nas sgo'i zhes bya ba ni kun gyi sgo ste/ ji lta zhe na/ de'i lus dang dmigs pa ni byang chub tu sems bskyed cing gzhan la phan par mi byed pa gang yang med pa'o//de ni 'phags pa spyod yul yongs su dag pa'i mdo la ltos shig /spyod pa'i stobs rnams zhes bya ba ni spyod pa gnyis ka bye brag med pa'i stobs te/ byang chub sems dpa'i spyod pa'i stobs dang / kun du bzang po'i spyod pa'i stobs kyis so / / kun du yon tan zhes bya ba ni thog ma dang bar ma dang tha mar dge ba'o/ /byams pa dag gi stobs zhes bya ba ni sems can gyi khams thams cad la bde bar sems pas khyab pa'o/ /kun du khyab pa zhes bya ba ni phyogs bcur khyab pa'o/ /bsod nams stobs zhes bya ba ni dag cing gtsang bar byed pas na bsod nams so//yang na phyi phyir zhes bsod par 'gyur bas na bsod nams so/ /de'i stobs ni byang chub tu sems bskyed pa bsgoms pa las byung ba ste/ 'di skad du/ byang chub sems kyi bsod nams gang / /gal te de ni gzugs gyur na/ /nam mkha'i khams kyang gang gyur cing //de bas de ni lhag par 'gyur/ /zhes gsungs so/ /de bas na theg pa chen po dang ldan pa'i dam pa'i chos zab cing rgya che ba rnams 'dzin pa dang / klog pa dang / 'chad pa dang / mos nas tshigs bcad gnyis tsam yang bzung nas yang dag par rdzogs pa'i byang chub tu bsngo bar gyur par de'i bsod nams kyi stobs so//kun nas dge ba'i zhes bya ba ni sems can thams cad la dge ba dang phan pa sems shing sgrub pa'i phyir ro/ /ye shes stobs zhes bya ba ni shes par bya ba thams cad la shes par byed pa ni ye shes so//chags pa med par gyur pa'i zhes bya ba ni dus gsum du mi thogs pa'o/ /shes rab kyi stobs zhes bya ba ni dngos po rnams ji lta ba bzhin rtogs pa'o/ /thabs kyi stobs zhes bya ba ni bsgrub par bya ba'i rigs pa ni thabs te sgrub pa'i stobs la thogs pa med pa'o//ting 'dzin stobs zhes bya ba ni stobs dang byed pa'i ting nge 'dzin te bsam gtan no/ /de'i mthus 'gro ba thams cad kyi don bya ba'i phyir mngon par shes pa la sogs pa'i yon tan sdud pa la mi thogs pa de ni ting nge 'dzin gyi stobs so/ /byang chub stobs rnams zhes bya ba ni byang chub bla na med pa yang dag par rdzogs pa'i byang chub pa ste/de thob par byed pa ni stobs so/ /yang dag sgrub par byed ces bya ba ni de'i tshogs sgrub pa'o/ /gnyen po ste rnam pa bcu gsum pa'o/ /de yang mi mthun pa'i phyogs las dang nyon mongs pa dang bdud kyi stobs rnams 'joms pa ste rnam pa gsum mo//de yang gang zhe na/ las kyi stobs rnams yongs su dag byed cing / /zhes bya ba la sogs pa ste/ dge ba dang mi dge ba dang mi g.yo ba'i las rnams dmigs kyis ma phye bas na las de yang rnam pa gsum mo//de la mi dge ba'i las kyis gdon mi za bar myong bar gyur pa ni ngan song gsum du 'bras bu smin par 'gyur ba'i stobs te/ de sbyong ba ni sman pa la sogs pa'i mthus skyugs pa lta bu ste/ 'di skad du/ ma rung ba yi las byas pa/ /bdag gis 'gyod pas bsrabs par 'gyur/ / bshags nas bsdams pa byas na ni/ /de dag rtsa nas 'don par bshad/ /gnyen po'i stobs kyis kyang kun du 'byung bar byed de / dper na mdza' bo'i bu mos ma la brnyas pa'i rgyus mi dge ba'i las ni zhing gi khyad par gyis tshe 'di nyid la 'bras bu rnam par smin par gyur kyang 'bras bu cung zhig smin nas de'i bsam pa'i khyad par gyis sems can gyi don du smon lam dang sems bskyed pas ma lus par shin du rtsa ba nas phyung nas bcom mo//de la sems can gyi don du smon lam dang sems bskyed pa ji ltar zhe na/ smras pa/ 'di ltar gang 'gro ba'i sems can thams cad kyis 'di ltar bdag bzhin du ma la brnyas pa'i las byas pa de dag thams cad bdag nyid kyi mgo la 'khor lo bskor ba'i sdug bsngal gyi phung po chen po mtshams med pa rnams nam 'khor ba'i mtha'i bar du bdag gis myong bar gyur la/sems can gzhan sus kyang myong bar ma gyur cig ces sems bskyed pa'o/ /rten gyi stobs kyis kyang ji ltar ched du brjod pa'i sde las / 'pho bar 'dod pa'i lha'i bu gzhan zhig btsog pa phag gi mngal du skye bar nges pa'i las kyi 'bras bu mngon par gyur nas/ gsum la skyabs su song ba tsam gyis thams cad sbyangs te sum cu rtsa gsum gnam gyi lha las shi 'phos nas dga' ldan gnas su skyes so//chos thams cad la bdag med par rtogs pas kyang shin tu rtsa ba nas 'byung bar 'gyur te/ 'di skad du las kyi sgrib pa so sor sbyong ba'i mdo las kyang 'di lta ste/dge slong gzhan zhig gis mi tshangs par spyod pa dang / ma bsad pa'i phas pham pa gnyis byung nas 'gyod de mi dga' bas yid gdungs te smyon pa bzhin du gtsug lag khang nas gtsug lag khang gzhan du/ grong nas grong gzhan du/tshong dus la sogs par song nas sdig pa de dag 'gro ba thams cad kyi mdun du 'chags te/ e ma'o bdag nyams so/ /bdag nyams so/ /zhes phyi phyir smras pa ste / sdig pa bshags pa'i dkrugs shing gis drung nas ji tsam nas las de bsrabs par gyur kyang / de'i phyir de shin tu sems la gdung zhing 'dug pa de la mngon par shes pa thob pa'i byang chub sems dpa' gzhan zhig gis zab mo'i chos ji lta ji lta bar bshad de/ gang gis de'i sdig pa thams cad kyi thams cad du rtsa ba nas phyung nas chos thams cad bdag med par rtogs nas mi skye ba'i chos la bzod pa thob par gyur to//ngan song thams cad kyi nyes pa thams cad kyi the tshom sel ba dang / sgrib pa'i chos thams cad sbyong ba ni zab mo'i chos la mos pa 'di yin te/ 'di bzhin du mos par byos shig ces gsungs so / /ji ltar 'phags pa de bzhin gshegs pa'i mdzod kyi mdo las kyang /'od srungs gang zhig gi pha yang yin la rang sangs rgyas kyang yin pa de 'tsho ba dang bral na 'di ni srog gcod pa'i nang na mchog go/ /ma byin par len pa'i mchog ni 'di lta ste/ dkon mchog gsum gyis dkor rku ba'o//'dod pas log par g.yem pa'i mchog ni 'di lta ste/ ma yang yin la dgra bcom ma yang yin pa la nyal ba'o/ /brdzun du smra ba'i mchog ni 'di lta ste/ de bzhin gshegs pa la skur ba'o/ /phra ma'i nang na mchog ni 'di lta ste/ dge 'dun gyi dbyen byed pa'o//tshig rtsub mo'i nang na mchog ni 'di lta ste/ 'phags pa rnams la 'phya ba'o/ /tshig kyal ba'i nang na mchog ni 'di lta ste/ chos 'dod pa rnams rnam par g.yeng bar byed pa'o/ /chags pa'i mchog ni 'di lta ste/ yang dag par song ba dang yang dag par zhugs pa rnams kyi rnyed pa 'phrog par sems pa'o//ngan sems kyi nang na mchog ni 'di lta ste/ 'phags pa rnams la mi brten pa'o/ /log par lta ba'i nang na mchog ni 'di lta ste/ lta ba la shin du zhen pa'o/ /mi dge ba bcu'i las kyi lam 'di dag thams cad ni kha na ma tho ba chen po ste/'od srungs gal te sems can 'ga' zhig gis kha na ma tho ba chen po mi dge ba bcu'i las kyi lam 'di dag dang ldan par gyur pa des de bzhin gshegs pas rgyu dang rkyen du ldan pa'i chos bshad pa la zhugs nas/ 'di la bdag gam/sems can nam/ 'tsho ba'am/ gang zag gam/ byed pa'am/ so sor myong bar byed pa gang yang med de/ de bas na chos thams cad ni ma byas pa/ mngon par 'dus ma byas pa/ sgyu ma'i chos nyid nyon mongs pa med pa/ rang bzhin gyis yongs su dag pa la 'jug cing /thog ma nas rnam par dag pa'i chos thams cad la mngon par dad cing shin tu mos pa'i sems can de ni ngan song du 'gro bar ngas ma smras so/ /de ci'i phyir zhe na/ nyon mongs pa rnams la phung po'i dngos po med de/ nyon mongs pa thams cad ni byung nas zhig ste med par 'gyur ro//rgyu dang rkyen 'dus nas tshogs shing skye la / skyes ma thag tu yang 'gag par 'gyur ro/ /bcom ldan 'das gang sems bskyed pa zhi ba de bzhin du nyon mongs pa thams cad kyang zhi bar gyur cing / gang 'di bzhin du shin tu mos pa de ni nam yang sdig pa'i rgyur mi 'gyur te/gang gi phyir sgrib pa med pa la sdig par 'gyur ba'i gnas med cing skabs med do zhes gsungs so/ /de ltar byang chub tu sems bskyed pa mngon du byas na nyes pa thams cad kyi rgyur gyur pa'i mi dge ba shin tu 'byang bar 'gyur te/ji skad du 'phags pa u pA lis dris pa'i mdo las gsungs pa de ste byang chub sems dpa' snga dro nyes pa byung na nyi ma gung la byang chub kyi sems mngon du byas na de'i tshul khrims kyi phung po mtha' yas par rig par bya'o/ /de bzhin du nyi ma gung la nyes pa byung na phyi dro byang chub kyi sems mngon du byas na de'i tshul khrims kyi phung po mi zad par rig par bya'o zhes bya ba la sogs pa'o//de las yang gsungs pa/ rigs kyi bu byang chub kyi sems ni nyes byas thams cad sreg pa'i bskal pa'i me lta bur 'gyur ba'o zhes bya ba la sogs pa'o//sum brgya pa las gsungs pa/ rab 'byor rigs kyi bu'am rigs kyi bu mo gang gis 'di lta bu'i mdo sde 'chang ba dang / 'dzin pa dang / klog pa dang / kun chub par byed pa de la yongs kyis brnyas par 'gyur shin tu yongs kyis brnyas par 'gyur ro//de ci'i phyir zhe na/ gang sems can de dag gis tshe rabs snga ma la mi dge ba'i las byas te/ gang ngan song du skye bar 'gyur ba de dag tshe 'di la yongs kyis brnyas pas tshe rabs snga ma'i las mi dge ba de dag 'byang bar 'gyur ro zhes bya ba la sogs pa bshad do//kha cig 'di skad du sdig pa'i las chung ngu dang 'bring po dag ni bshags pa la sogs pa'i mthus byang bar 'gyur grang na/ mtshams med pa la sogs pa lci ba rnams thams cad kyi thams cad du 'byang ba ji ltar 'gyur zhes zer ba de dag kyang yod do//de'i lan du ma skyes dgra la sogs pas mtshams med pa byas pas bsam pa chung ngu dang 'bring po dang chen po'i rim pas mnar med par bskal pa chung ngu'am nyung ngu'am phyed du gnas par 'gyur ba las de dag phyis shin tu 'gyod pa'i mes gdungs pa'i sems kyis 'gyod nas bshags pa'i mthus las de bsrabs par gyur te/gang pho long brdabs pa'i dus tsam du sdug bsngal gyi 'bras bu myong bar gyur to zhes gsungs na de ci de tsam gyis kyang las rnams shin tu rtsa ba nas 'byung bar mi 'gyur ba ma yin te 'gyur ro//ci sog ma gcig chod pas sog ma kun brdabs par 'gyur ram/ gang gsungs pa/ bskal pa brgya dag snyed du yang / /las rnams chud zar mi 'gyur te/ /tshogs dang dus dang ldan pa na/ /lus can rnams la 'bras bur smin//zhes bya ba la sogs pa de ji ltar shes par bya zhe na/ rnam par 'gyod pa la sogs pa spyod pa'i mthus las gang dag mngon par ma sbyangs shing bsrabs par ma byas pa de dag ni bshad pa'i chos 'di yin par rig par bya'o/ /de ltar yang gsungs pa/ mi shes pas ni sdig pa chung byas 'og tu 'gro//mkhas pas nyes pa che byas kyang ni yang bar 'gyur/ /bsgongs pa'i lcags ni chung yang chu yi 'og tu 'byings / /de nyid snod du byas na che yang steng na 'phyo/ /zhe'o/ /nges par mi myong ba'i dus gsum gyi sdig pa'i las bgrang ba las 'das pa de yang las kyi dbang gis phyogs bcu kun du skad cig gis 'khor ba'i mtha'i bar du rgyun du ngan song gsum du skyes pa'i sems can rnams la phan pa dang bde ba'i phyir de dag gi ris dang rgya dang kha dog dang dbyibs dang tshad rnams tha dad par 'bras bu rnam par smin par gdon mi za bar ro myong bar mi byed do//dge ba'i las kyis kyang sogs pa'i 'bras bu smin par bya nus pa'i mthu 'di ltar yongs su 'byung ngo / /ji lta zhe na/ 'bras bu rnam par smin par 'gyur ba las byang chub nyid du smon lam gyi mthus bsngos shing / gdon mi za bar byed pa'o/ /gzugs dang gzugs med pa na spyod pa'i mi g.yo ba'i las bsam gtan la snyoms par 'jug pa'i rgyu de'i stobs nyid kyang de las bzlog ste/ las la dbang bas sems can gyi don du gar dga' bar sbyor ba ste/ 'di ni dag par byed pa'o/ / nyon mongs stobs rnams kun du 'joms par byed/ /ces bya ba ni lus dang sems kyi rgyud snyon rmongs par byed pa ni nyon mongs pa ste 'dod chags la sogs pa'o/ /de dag gi stobs lhag par che bas de'i mthus 'gro ba thams cad la rigs pa dang mi rigs pa dang / phan pa dang /mi phan pa dang / lci ba dang yang ba la sogs pa thams cad mi shes pa la sogs pa de la mi gtsang ba la sogs pa bsgoms pas 'jig rten gyi lam gyis yongs su sbyangs pa ste/ mngon par gzhil ba'o/ /mdor na nyon mongs pa la dbang bas byang chub kyi yan lag gi dngos por 'gyur ba'o//bdud kyi stobs rnams stobs med rab byed cing / /zhes bya ba la bdud ni lha'i bu la sogs pa ste/ de dag gi stobs kyis byang chub sems dpa'i spyod pa'i bar chad byed nus pa de la mngon par shes pa'i stobs kyis stobs med pa dang /mthu med pa dang / gnas med par byed pa'o/ /bzang po spyod pa'i stobs kun rdzogs par bgyi/ /zhes bya ba ni bzang po spyod pa'i stobs ni gnyen po'i mi mthun phyogs rnams kyis mi tshugs shing / mngon par 'du shes mi byed pa'o/ /de dag kun ma lus par rdzogs par bya ba ni gong du bshad pa'i rdzu 'phrul la sogs pa stobs bcu bshad pa dang /gang du smos pa'i gnyen po rnam gsum mo/ /gang yang byang chub sems dpa'i las ni rnam pa bcu bzhi pa ste/ las de yang rnam pa brgyad do/ /zhing rnams rgya mtsho rnam par dag byed cing / / zhes bya ba la sogs pa tshigs su bcad pa rnam pa gnyis te/ de yang gang zhe na/ zhing rnams rgya mtsho zhes bya ba la sogs pa ste/ de yang sangs rgyas kyi zhing rgya mtsho bde ba can dang pad mo can ltar dag par byed pa'o/ /de bzhin du 'khor ba na rgyu nyon mongs pa'i lcags sgrog gis bcings pa'i sems can rgya mtsho snyed la rdzu 'phrul dang kun brjod pa'i cho 'phrul rnam pa gnyis kyis mgu bar byas nas rjes su bstan pa'i cho 'phrul gyis skad cig tu rnam par grol bar byed pa'o//chos rnams rgya mtsho rab tu mthong byed cing / /zhes bya ba ni thob par bya ba'i chos rgya mtsho snyed dang /bshad pa'i chos rgya mtsho snyed shes rab kyi mig gis skad cig re re la yang mthong bar bya'o/ /shes par bya ba mtha' yas pas na ye shes kyang mtha' yas pa ste/ de bas na ye shes rgya mtsho zhes bya ba ste/ rab tu rtogs par byed ces bya ba ni khong du chud par bya ste/rtogs par byed do zhes bya ba'i tha tshig go/ /spyod pa rgya mtsho zhes bya ba ni byang chub sems dpa'i spyod pa dang / bzang po spyod pa gnyis dmigs kyis ma phye bas na gnyi ga gzung bar rig par bya'o/ /de la byang chub kyi spyod pa ni sangs rgyas kyi chos rnams sgrub pa ste ye shes kyi tshogs so//bzang po spyod pa yang 'gro ba thams cad la phan pa dang bde bar byed pa ste bsod nams kyi tshogs so/ /bzang po spyod pa dang / byang chub kyi spyod pa gnyi ga yang byang chub bsgrub pa yin mod kyi/ mngon sum dang gcig nas gcig tu brgyud pa tsam zhig bye brag yod do//spyod pa rgya mtsho dag mngon par shes pa'i stobs kyis skad cig ma re res rnam par dag par byed pa ni dri ma med par byed pa'o/ /smon lam rgya mtsho zhes bya ba ni skad cig ma re re la tshul khrims dang / ting nge 'dzin gyi mthus rdzogs par byed pa'o//sangs rgyas rgya mtsho phyogs bcu nas mchod pa'i sprin gyis nam mkha' khyab par skad cig gis rab tu mchod pa'o/ /bskal pa rgya mtshor mi skyo spyad par bgyi/ /zhes bya ba ni mi skyo ba'i yid kyis so/ /sangs rgyas dang byang chub sems dpa'i rjes su slob par bsngo ba ni rnam pa bco lnga pa ste/de yang rnam pa gnyis so/ /de la de bzhin gshegs pa'i rjes su slob par bsngo ba gang zhe na/ gang yang dus gsum gshegs pa'i rgyal ba yi/ /zhes bya ba la sogs pa ste/ gang rgyal ba dus gsum du gshegs pa rnams kyi byang chub kyi spyod pa dang smon lam gyi khyad par de dag thams cad bdag gis ma lus par rdzogs par bgyi'o zhes bya ba ste/yongs su rdzogs shing rab tu chud par bya'o/ /bzang po spyod pas zhes bya ba ni bzang po spyod pas so/ /byang chub sangs rgyas nas zhes bya ba ni bla na med pa'i byang chub tu sangs rgyas par bya ba'o //lus dang ngag dang yid rnams kyi spyod pa dang zhing dang smon lam rnams rnam par dag pas 'phags pa kun du bzang po la sogs pa byang chub sems dpa' rnams kyi rjes su slob par bsngo ba ste/ tshigs bcad gsum mo/ /de yang gang zhe na/ sras kyi thu bo pa zhes bya ba la sogs pa ste/byang chub sems dpa' rnams kyi bzang po spyod pa gang yin pa dang / de ltar byang chub sems dpa'i rnam par thar pa ji snyed pa dang / ting nge 'dzin ji snyed pa dang / mdor na byang chub sems dpa'i yon tan la sogs pa ji snyed pa de dag thams cad kyi mthar phyin pa ni 'phags pa kun du bzang po byang chub sems dpa' ste/de bas na sras kyi thu bo zhes bya ba la sogs pa'o/ /de ltar/ /rgyal ba kun gyi sras kyi thu bo ni/ /'phags pa kun du bzang po zhes bya ba byang chub sems dpa' chen po'o/ /mkhas pa de dang zhes bya ba ni de nyid la mkhas pa'o//mtshungs par spyad pa'i phyir zhes bya ba ni mthun par spyad pa ste/ ji ltar bstan pa'i dge ba'i rtsa ba 'di dag thams cad skad cig re re la yongs su bsngo bar bya ba'o/ /lus dang ngag dang yid kyang rnam dag cing / /zhes bya ba ni lus dang ngag dang yid rnams kyi spyod pa rnam par dag pa dang zhing rnams rnam par dag pa ste/bsngo ba bzang po mkhas pa zhes bya ba ni 'phags pa kun du bzang po mkhas pa'o/ /ci 'dra bar zhes bya ba ni ji lta bu yin par ro/ /de 'drar zhes bya ba ni de 'dra bar bdag kyang gyur cig pa'o/ /mtshungs par zhes bya ba ni 'dra bar ro//kun nas dge ba bzang po spyad pa'i phyir/ /zhes bya ba ni thog ma dang tha ma dang bar du dge ba'o/ /'jam dpal gyi ni smon lam spyad par bgyi / /zhes bya ba ni tshad med pa 'jam dpal gyi smon lam spyod par shog shig pa'o/ /de'i smon lam ji lta bu zhe na/gzhung las/ 'phags pa 'jam dpal nam mkha' zhes bya ba'i rgyal por gyur pa'i tshe 'khor ba thog ma dang tha ma dang bral ba ji srid pa de srid du sems can rnams la tshad med pa'i phan pa spyad do zhes bya ba la sogs pa rgya chen po rnams so/ /ma 'ongs bskal pa kun du mi skyo bar//zhes bya ba ni ma 'ongs pa'i bskal pa thams cad du ma lus par mi skyo ba'i yid kyis gzhan du mi sems par sangs rgyas dang / byang chub sems dpa' de dag gi bya ba'i las ma lus pa yongs su rdzogs par bya zhing rab tu bsgrub par bgyi'o/ /sbyor ba dang yon tan dang spyod pa dang gnas dang tshad med pa'i khyad par bsdu ba ni rnam pa bcu drug pa ste/de yang gang zhe na/ spyod pa dag ni tshad yod ma gyur cig /ces bya ba la sogs pa'o/ /bdag gi spyod pa yang tshad yod ma gyur ces bya ba ni tshad med par gyur cig pa ste/ tshad med pa'i spyod pa dang / tshad med pa'i yon tan la gnas pas de ltar sangs rgyas dang byang chub sems dpa' rnam par sprul pa'i 'phrul gyi ya mtshan thams cad yongs su shes par gyur cig pa'o/ /de'i bye brag rnam pa bcu drug ste/ de yang brgyad pa'o/ /da ni de'i mtha' ste rnam pa dgu pa'o/ /bzang po spyod pa'i smon lam gyi mtha' de yang nam mkha' la sogs pa dper brjod pa rnam pa bzhi ste/de yang gang zhe na/ nam mkha'i mthar thug gyur pa ji tsam pa/ /zhes bya ba la sogs pa'o/ /ji tsam zhes bya ba ni nam mkha'i mtha' ji tsam pa ste/ nam mkha'i mtha' tsam du gyur cig pa'o//sems can kun gyi mtha' ji tsam pa dang / 'gro ba rnams kyi las dang nyon mongs pa'i mtha' ji tsam par bdag gi bzang po spyod pa'i smon lam gyi mtha' yang de tsam du gyur cig pa'o/ /nam mkha' la sogs pa la yang yongs su zad cing thug pa med de/ de ltar bdag gi smon lam 'di'i mtha' yang zad cing thug pa med par gyur cig pa'o//smon lam gyi yon tan ni rnam pa bcu pa ste/ tshe 'di dang pha rol gyi rnam pa gnyis so/ /de la tshe 'di'i ni rnam pa bzhi ste/ 'di lta ste/ bsod nams khyad par can yongs su sdud pa dang / de bzhin gshegs pa mthong ba dang /byang chub sems dpa' dang skal ba mthun pa thob pa dang / las kyi sgrib pa 'byang ba rnams so/ /de dngos po che ba dang rgya che ba dang / sna tshogs kyi dngos po bsdu ba dang / zhing khyad par can gyi dpe dang / gang gis byang chub thob par bya ba'i phyir smon lam 'di la dad pas bsod nams khyad par can yongs su sdud par 'gyur te/de yang gang zhe na/ gang yang phyogs bcu'i zhing rnams mtha' yas pa/ /zhes bya ba la sogs pa'o/ /'di ltar rigs kyi bu pho'am rigs kyi bu mo gang gis phyogs bcu mtha' yas pa mu med pa na sangs rgyas kyi zhing rnams rin po che sna tshogs dang /na bza' dang / bla re dang / gdugs dang / rgyal mtshan dang / ba dan dang / rin po che'i dril bu'i phreng ba dang spos dang / me tog dang / bdug pa dang / mar me dang / phreng ba la sogs pa dang / sil snyan mi'i las 'das pa 'phrul gyi rgyan rnams kyis rab tu brgyan pa dang /mi'i ma yin pa'i 'phrul kyi zhal zas ro lnga brgya dang ldan pa mchog tu bde ba bskyed pa rnams sangs rgyas kyi zhing gi rdul dang mnyam pa'i bskal par sangs rgyas bcom ldan 'das la gsol zhing phul ba bas/ gang gis bsngo ba'i rgyal po 'di thos nas/ /lan cig tsam yang dad pa bskyed pa ni/ /zhes bya ba ste/ 'di ni 'di nyid do zhes nges pa bskyed par byas pa ste/ de yang gang zhe na/ byang chub mchog gi rjes su rab mos shing / /zhes bya ba theg pa chen po la zhugs pa des snga ma'i sbyin pa'i bsod nams pas 'di'i bsod nams khyad par can du 'gyur ro//sdig pa'i grogs po yongs su spangs pas de bzhin gshegs pa mthong ba ste/ de yang gang zhe na/ des ni ngan song thams cad spang bar 'gyur/ /zhes bya ba la sogs pa'o/ /des spang bar bya ba ni sdig pa dang ngan song gsum mo//des ni grogs po ngan pa spang bar 'gyur/ /zhes bya ba ni nyan thos la sogs pa mi dge ba'i bshes gnyen rnams so/ /'chi ba'i tshe bcom ldan 'das snang ba mtha' yas de bzhin gshegs pa de yang des myur du gdon mi za bar mthong bar 'gyur te/gang gis mthong zhe na/ gang gis 'di ltar bzang po spyod pa'i smon lam 'di'i don dang tshig bcas par sems kyis chub pa'o/ /tshe'i 'tsho ba dge ba thob pa ni byang chub sems dpa' dang skal pa mthun pa thob pa ste de yang gang zhe na/ de gang rnyed pa rab rnyed bde bar 'tsho//zhes bya ba la sogs pa'o/ /bla na med pa'i smon lam rin po che thob pa ni rab tu rnyed pa ste/ bde bar 'tsho ba rnyed pa yang smon lam rin po che 'di lta bu thob pas so/ /de lta bas na tshe'i mchog thob par bya ba'i dngos po thob par 'gyur ba'i phyir ro/ /mi tshe 'dir yang de dag legs par 'ong //zhes bya ba ni dge bar 'ongs pa'o/ /kun du bzang po de yang ci 'dra bar/ /zhes bya ba ni de ltar ring bor mi thogs par 'gyur ba'o/ /las kyi sgrib pa yongs su 'byang ba'i yon tan ni rnam pa bzhi pa ste/ de yang gang zhe na/ mtshams med lnga po dag gi sdig pa rnams/ / zhes bya ba la sogs pa'o/ /sdig pa mtshams med pa lnga ni ma bsad pa la sogs pa'o/ /gang gis mi shes dbang gis byas pa dag /ces bya ba ni mi shes pa'i rtsa ba las byung ba'i phyir 'dod chags la sogs pa gzhan dag la yang mi shes pa'i dbang gis zhes bya ba'o//de'i kun du bzang po spyod pa'i smon lam 'di gong ma bzhin du bzung nas dad pa'i chus sems brlan par byas te brjod pa dang / 'chad pa dang / mos par byed pa dang / klog pa dang / 'chang ba dang / sgom pa rnams byas na mtshams med pa'i sdig pa yang myur du ma lus par yongs su byang bar 'gyur ro//tshe phyi ma'i yang rnam pa gnyis te/ rgyus ba sdus pa dang 'bras bus bsdus pa'o/ /de la rgyus bsdus pa ni ye shes dang / mtshan dang dpe byad kyis lus brgyan pa dang / nad med pa'i mchog gi mtshan rnams te/ de yang gang zhe na/ye shes dang ni gzugs dang zhes bya ba la sogs pa'o/ /ye shes zhes bya ba ni shes pa ste/ spyod pa thams cad dang ldan pa'o/ /gzugs zhes bya ba ni gzugs yid 'phrog pa'o/ /mtshan zhes bya ba ni skyes bu chen po'i mtshan sum cu gnyis dbu'i gtsug tor la sogs pa'o//mtshan gyi 'khor dpe byad yin pas na de dang yang ldan par rig par bya'o/ /rigs dang zhes bya ba ni bram ze dang rje'u rigs la sogs pa gzhan dag kyang ngo / /kha dog ces bya ba ni rus chen po btsun pa rnams so/ /ldan par zhes bya ba ni kun dang ldan pa'o/ /'gyur zhes bya ba ni de ltar 'gyur pa'o//bdud dang mu stegs mang pos de mi thub/ /ces bya ba ni bdud mang po dang mu stegs can mang pos mi tshugs shing zil gyis mi non pa'o/ /mchod par gyur cig ces bya ba ni khams gsum pa thams cad kyis mchod par gyur cig pa ste/ gang gis kun du bzang po'i spyod pa smon lam 'dzin cing ston pa'o //'bras bus bsdus pa ni byang chub kyi snying por song ba dang / seng ge'i gdan la bzhugs par bstan pa dang / bdud rnams rab tu btul ba dang / mngon par byang chub pa ste/ chos kyi 'khor lo bskor ba la sogs pa'i mtshan nyid do//de yang gang zhe na/ byang chub shing dbang drung du de myur 'gro/ /zhes bya ba la sogs pa ste/ bzang po spyod pa bla na med pa 'dis shin tu bsags pa'i bsod nams dang ye shes kyi tshogs kyis myur du 'gro'o/ /byang chub shing dbang drung zhes bya ba ni byang chub shing dbang gi drung du'o//song nas kyang skyil mo krung bcas te seng ge'i gdan la 'gro ba thams cad la bde zhing phan pa'i phyir 'dug nas bdud sde dang bcas par btul te/ de nas bla na med pa yang dag par byang chub tu sangs rgyas nas bla na med pa'i chos kyi 'khor lo bskor bar mdzad do zhes bya ba'i tha tshig go//mdor na 'jig rten dang 'jig rten las 'das pa'i yon tan phun sum tshogs pa ma lus par bstan to/ /de yang gang zhe na/ gang yang bzang po spyod pa'i smon lam 'di/ /zhes bya ba la sogs pa'o/ /gang gis bzang po spyod pa'i smon lam 'di 'chang ba dang /ston pa dang / klog pa'i rnam par smin pa ni su gang gis shes she na/ nyan thos dang / rang sangs rgyas la sogs pa gzhan gyis ni ma yin te/ gtso bo sangs rgyas bcom ldan 'das kyis mkhyen te/ smon lam rin po che'i rnam par smin pa ji ltar mkhyen ce na/byang chub mchog la zhes bya ba ste/ bla na med pa'i byang chub mchog gi 'bras bu'o/ /'jig rten gyi phun sum tshogs pa'i yon tan yang ma lus par 'dir bshad par rig par bya ste/ 'jig rten gyi phun sum tshogs pa'i yon tan ni 'di'i zhar gyis 'byung bar rig par bya'o//de bas na smon lam 'di la dogs pa dang som nyi ma byed cig ces bya'o / /da ni bsngo ba bstan pa zhes bya ba ste/ 'jam dpal dpa' bos ji ltar mkhyen zhes bya ba la sogs pa'o/ /'jam dpal gyis ji ltar mkhyen pa dang /byang chub sems dpa' kun du bzang pos kyang de bzhin du ste/ dge ba'i phung po 'di dag thams cad de dag gi rjes su bsngo zhing slob pa ni byang chub sems dpa'i bsngo ba'o/ /'di ni de bzhin gshegs pa'i bsngo ba ste/ dus gsum gshegs pa'i rgyal ba ba thams cad kyis//zhes bya ba la sogs pa'o/ /dus gsum gshegs pa'i rgyal ba bcom ldan 'das thams cad kyis bla na med pa mchog tu bsngo bar bsngags shing bstod pa ste/ de ltar bdag gis bsngo ba ni bla na med pa mchog kun du bzang po'i spyod pa'i dge ba'i tshogs 'di kun kyang de ltar ro//'di la tshigs su bcad pa phyed kyis ni sdig pa'i sgrib pa spong ba'o/ /phyed kyis ni pha rol tu phyin pa dang mthun pa'i lus yongs su gzung ba'o/ /de yang gang zhe na/ bdag ni 'chi ba'i dus byed ces bya ba la sogs pa'o/ /'chi bar byed pa ni 'chi ba ste/ 'chi ba'i dus su bzang po spyod pa la gang gis bsgribs par 'gyur ba'i sgrib pa de thams cad phyir bsal ba'o/ /mngon par mthong zhes bya ba ni bcom ldan 'das snang ba mtha' yas mngon sum du mthong ba'o/ /der zhes bya ba ni bde ba can gyi 'jig rten du 'gro ba la bya'o/ /der song nas zhes bya ba ni bde ba can gyi sangs rgyas kyi zhing der song ba ste/ji ltar smras pa bzhin smon lam du gdab pa de kun bdag gis mngon sum du rdzogs par gyur cig pa'o/ /de dag ma lus bdag gis yongs su bskang / /ces bya ba ni/ sems can thams cad la 'di lta bu phan par bya ba'o//ji srid du zhe na/ 'jig rten ji srid ces bya ba ste/ 'jig rten ji srid par 'gro ba rnams kyi don bya ba'o/ /lhag ma ni lung bstan pa thob pa dang / sems can gyi don sgrub pa ste/ gang zhe na/ rgyal ba'i dkyil 'khor zhes bya ba la sogs pa ste/ rgyal ba'i dkyil 'khor zhes bya ba ni de bzhin gshegs pa'i 'khor 'dus pa'o//bzang po zhes bya ba ni mdzes pa'o/ /dga' ba zhes bya ba ni yid dga' bar 'gyur ba'o/ /pad+mo dam pa zhes bya ba ni/ pad+mo dam pa'o/ /mdzes zhes bya ba ni rin po che sna tshogs las byas pas 'tsher ba'o//skyes zhes bya ba ni mngon du byung ba'o/ /lung bstan zhes bya ba ni lung bstan pas na lung ston pa ste/ dus 'di na 'jig rten gyi khams che ge mo zhig tu de bzhin gshegs pa dgra bcom pa yang dag par rdzogs pa'i 'tshang rgya bar lung ston pa ste/ bcom ldan 'das snang ba mtha' yas las bdag gis lung bstan pa mngon sum du thob par bya'o snyam pa'o//der ni zhes bya ba ni bcom ldan 'das snang ba mtha' yas las lung bstan pa rab tu thob nas/ bye ba brgya phrag du mar sprul pa'i cho 'phrul gyi sprin gyis phyogs bcu kun du khyab par sprul nas/sems can thams cad la phan pa'i rnam pa mang po grangs med tshad med pa skad cig gis so sor thams cad du byed pa ste/ blo yi stobs kyis zhes bya ba ni ye shes kyi mthu chen po ste/ mi chags shing thogs pa med pa zhes bya ba'i tha tshig go/ /'phags pa bzang po spyod pa'i smon lam gyi rgyal po'i bshad pa/