CLOSE WINDOW

D4006
བོད་ཡིག

@##/ /rgya gar skad du/ bo d+hi s+yA pat+ti de shabr-it+te bo d+hi satwa shik+ShA kra ma nA ma/ bod skad du/ byang chub kyi ltung ba bshags pa'i 'grel pa byang chub sems dpa'i bslab pa'i rim pa zhes bya ba/ 'phags pa'i tshogs la phyag 'tshal lo/ /gang gis thams cad gzigs gyur pa'i//kun mkhyen nyid la phyag 'tshal nas/ /byang chub sems dpa'i bslab pa ni/ /bdag gis dad pas bri bar bya/ /de la gang dag byang chub tu sems bskyed nas nges par legs pa thob par 'dod pa rnams la/ nyes pa las ldog pa'i thabs shes par bya ba'i phyir 'di gsungs la/nyes pa de yang pham pa'i rigs su gtogs pa dang / nyes byas kyi rigs su gtogs pa'o/ /pham pa'i rigs su gtogs pa yang nyan thos dang thun mong dang / thun mong ma yin pa'i bye brag gis gnyis so/ /de rnams las ldog pa ni sems bskyed nas sdom pa gsum len pa'o//nyes pa las ldog pa ni gang zag gsum la bshags pa dang / gang zag gcig la bshags pa dang / sangs rgyas sum cu rtsa lnga la bshags pa 'di yin te/ thog mar re zhig rten khyad par can la skyabs su 'gro ba dang / de nas phyag 'tshal ba sdig pa bshags pa'o//de nas phyis sdom pa mi nyams par bya bar dam bca' ba'o/ /de nas dge ba'i rtsa ba thams cad bla na med pa'i byang chub tu bsngos la/ de la phyis gnas par bya ba'i phyir sdig pa bshags pa dang / bskul zhing gsol ba dang / dge ba'i rtsa ba bsngo ba dang / skyabs su 'gro ba'o/ /de ni bsdus pa'i don no/ /da ni yan lag gi don bshad par bya ste/ bdag ming 'di zhes bgyi ba zhes bya ba ni lha sbyin nam/ mchod sbyin la sogs pa che ge mo'o/ /sangs rgyas la skyabs su mchi'o/ /chos la skyabs su mchi'o/ / dge 'dun la skyabs su mchi'o/ /spangs pa dang ye shes dang ldan pas na sangs rgyas so/ /de ni sku gsum ste/ chos kyi sku dang / longs spyod rdzogs pa'i sku dang / sprul pa'i sku'o/ /la ni yul gyi la ste/ gnas bzhi'i bdun pa'o/ /skyabs su mchi ba ni nyon mongs pa la sogs pa'i 'tshe ba las skyob pa'o//chos ni lung gi chos dang / rtogs pa'i chos so/ /dge 'dun ni nyan thos dang / rang sangs rgyas dang byang chub sems dpa'o/ /nyan thos la yang zhugs pa bzhi dang / 'bras bu la gnas pa bzhi'o/ /rang sangs rgyas la yang gcig pur gnas pa dang / tshogs dang spyod pa'o//byang chub sems dpa' la yang nges pa dang ma nges pa'o/ /lhag ma ni bshad zin to/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phyag 'tshal lo/ /zhes bya ba ni bdud kyi dpung dang bcas pa thams cad kyi yul chen po 'joms pa'i phyir bcom ldan 'das nyid do//de bzhin gshegs pa ni de bzhin nyid phyin ci ma log par gsung ba'o/ /dgra bcom pa ni thob par bya ba'i don thams cad brnyes pa dang / bsod nams kyi zhing bla na med pa dang / mchod par 'os pa'o/ /chos rnams ji lta ba bzhin du don dam par thugs su chud pas na yang dag par rdzogs pa'i sangs rgyas zhes bya'o//shAkya thub pa ni nyon mongs pa thams cad spangs pa'i mthar phyin pa dang / tshig btsan pa dang / rigs phun sum tshogs pa dang / dbang phyug phun sum tshogs pa'o/ /rdo rje snying po rab tu 'joms pa zhes bya ba ni spros pa dang bral bas dngos por 'dzin pa 'joms pas rdo rje pha lam dang 'dra ba de nyid thams cad kyi snying po yang yin la rab tu 'joms pa yang yin no//yang na rdo rje ni rin po che'o/ /snying po ni dkyil lo/ /rab tu 'joms pa ni mthu'o/ /rin chen 'od 'phro ni nor bu rin po che dang mtshungs pas de skad ces bya ste/lha rdzas kyi nor bu rin po che ni yang ba dang / 'od gsal ba dang / 'tshe ba thams cad zlog pa dang / yon tan 'byung ba dang / nyams dga' ba la sogs pa'i chos dang ldan pa de bzhin du yang dag pa'i rin po che yang yon tan thams cad kyi 'od 'phro bas phan 'dogs pa'o//klu dbang gi rgyal po zhes bya ba ni klu'i dbang po'i rgyal po'i rdzu 'phrul dang ldan pa ste/ de yang lo tog thams cad la char 'bebs pa'o/ /de'i dbang po ni bdag po'o/ /de rnams kyi rgyal po ni sangs rgyas bcom ldan 'das so/ /dpa' bo'i sde ni dpa' bo'i rigs te/mi mthun pa'i phyogs 'joms pa'o/ /de la dgyes pas na dpal dgyes so/ /rin chen me ni dgon pa dang / /rin che ba dang / dgos 'dod 'byung ba dang / nyon mongs pa'i bud shing sreg pa'o/ /rin chen zla 'od ni zla ba bzhin bsil ba ste/ ma rig pa'i mun nag dang bral ba'o//rnam par rtog pa'i tsha bas ma gdungs pa'o/ /mthong ba don yod ces bya ba ni gdul bya thams cad mngon du gzigs pa ste/ snod dang 'tsham par don mdzad nas 'dren pa'i phyir ro/ /rin chen zla ba ni kun du bzang po byang chub kyi sems so/ /lhag ma ni snga ma bzhin no/ /nyon mongs pa'i dri ma dang shes bya'i dri ma thams cad mthong ba dang bsgoms pas spangs pas dri ma med pa'o//zad pa shes pa'i don to/ /de nyid dpal du gyur pa ste/ phan pa bsgrub pa'i mchog go/ /sems can thams cad kyi phan pa sgrub pas dpas byin no/ /tshangs pa ni gzugs kyi khams bsam gtan dang po'i lha'o//de'i cha lugs can nam/ tshangs pa ni nyon mongs pa'i las zad pa'i mya ngan las 'das pa'o/ /de lta bu de gzhan la byin zhes dang po sbyar ba'am de lta bus byin zhes gsum par sbyar bas tshangs pas byin no/ /chu lha ni sems can gyi rgyud la nga rgyal gyis khengs shing zhe sdang gi mes gdungs la/ma rig pas mkhrigs shing nyon mongs pa sra bar gyur pa rnams brlan pa dang zhi bar byed pa'o/ /so so'i skye bo'i dus na gdugs mkhan yin pa des sangs rgyas rin chen mchod 'os la bsil yab cig phul nas/ chu lha'i lha ni phyogs skyong ba klu'i rigs su gtogs pa chu lha ste de zhi bar byed pa'o//dpal bzang ni gnyis su med pa'i ye shes te/ 'jig rten pa'i nyon mongs pa las bsgom pas khyad par du gyur pa'o/ /tsan+dan dpal te/ 'bru mang po pa'i bsdu ba'o/ /dper na tsan+dan gyi dri khyad par can lhan cig skyes pa yod pas sna'i dbang po la phan 'dogs pa lta bur sems can thams cad la phan 'dogs pa rtog pa med par rgyun du 'byung bas de nyid dpal lo//gzi brjid ni 'od zer te/ 'od zer gyis 'jig rten pa thams cad la snang bar mdzad pas de skad ces bya'o/ /'od dpal ni 'od kyis gsal ba ste/ thugs yang dag pa'i ye shes bsnyil ba mi mnga' ba thams cad la thogs pa med cing chags pa med par mkhyen pa'i dpal lo//mya ngan med pa'i dpal ni spangs pa dang ye shes dang ldan pa ste/ nyon mongs pa'i sgrib pa spangs pas gdung ba med pa/ shes bya'i sgrib pa spangs pas rtog pa med pa'i ye shes bzhi'i dpal lo//sred med kyi bu ni mthu dang ldan pas gzhan 'joms pa la grags pa'i ming can no/ /me tog dpal ni mdzes shing nyams dga' bar byed pa'o/ /de bzhin gshegs pa tshangs pa'i 'od zer rnam par rol pas mngon par mkhyen pa ni tshangs shing dag pa ste/ sgrib pa thams cad zad cing rtog pa'i dri ma dang bral ba'o//'od zer ni phan pa dang bde ba dang grol ba'i sgo ste/ rdzu 'phrul gyi cho 'phrul dang / kun brjod pa'i cho 'phrul dang / rjes su bstan pa'i cho 'phrul gyi sgo nas rnam par rol cing shes bya thams cad dus gcig tu mngon sum du mkhyen pa'o/ / de bzhin gshegs pa pad+ma'i 'od zer rnam par rol pa ni pad+ma ltar nyes pas ma gos pa'o/ /lhag ma ni snga ma bzhin no/ /nor dpal ni nor bdun gyi dpal rtogs pa ste/ dad pa dang 'phags pa'i tshul khrims dang / thos pa dang / gtong ba dang / ngo tsha shes pa dang / khrel yod pa dang / shes rab kyi ngo bo nyid do/ /dran pa'i dpal ni dran pa nye bar gzhag pa lus dang / sems dang / tshor ba dang / chos bzhi'i dpal te/ tshig bar mi mngon par byas pa'o/ /mtshan dpal shin tu yongs grags ni mtshan sum cu rtsa gnyis mnga' bas shin tu dag par 'jig rten gyi khams su yongs su grags pa'o//dbang po tog gi rgyal mtshan gyi rgyal po ni/ dbang po lnga dad pa dang / brtson 'grus dang / dran pa dang / ting nge 'dzin dang / shes rab kyi dbang po'o/ /tog ni mngon par shes pa ste/ rdzu 'phrul dang / lha'i rna ba dang / sems kyi rnam grangs dang / sngon gyi gnas rjes su shes pa dang /'chi 'pho dang skye ba shes pa dang / zag pa zad pa shes pa'o/ /dbang po dang mngon shes kyi rgyal mtshan dang ldan pa'i 'khor los sgyur ba'i rgyal po'o/ /shin tu rnam par gnon pa'i dpal ni khyad par du gnon pa ni shin tu rnam par gnod pa ste rtsa ba nas 'byin pa'o/ /rnam par ni rnam par rtog pa ste/nyon mongs pa'i rnam par rtog pa rtsa ba nas 'byin pa'o/ /g.yul las shin tu rnam par rgyal ba ni dgra bo'i tshogs te bdud bzhi las rgyal ba'o/ /rnam pa ni bye brag ste thams cad las rgyal ba'o/ /rnam par gnon pas gshegs pa'i dpal ni gnod pa bcom pa'i stobs kyis 'jig rten gyi khams thams cad du gdul bya ji lta ba bzhin du don mdzad pa'o//kun nas snang ba bkod pa'i dpal ni/ mdzes par gshegs pa ste na chung brgyan pa bzhin no/ /rin chen pad+mas rnam par gnon pa ni dgos 'dod skong yang 'khor ba'i skyon gyis ma gos pas zil gyis gnon pa'o/ /dgos 'dod skong ba chags pa'i nyes pas ma gos pa la bzhugs pa ni 'jigs pa dang bral ba'i ri'i rgyal po ri rab ltar gnon pa'o//sdig pa bshags pa ni/ nyes pa'i dri ma 'khru ba ste/ phyag 'tshal ba de dag la sogs pa ste/ 'tsho zhing gzhes pa nyid phyogs bcu gzhan na bzhugs pa thams cad do/ /de nyid ji snyed bzhugs pa'o//gzhan dag ni go sla'o/ /dgongs su gsol ba ni/ thugs gtad du zhes pa'o/ /bdag da ltar skye ba blangs la ma zad pa dang / 'khor ba thog ma med pa nas skye ba blangs pa mang ba dang / drod gsher dang / rdzus pa dang / sgo nga las skyes pa thams cad ni 'di las gzhan no/ / sdig pa ni mi dge ba yin pas sdig pa'i las zhes pa ste/ lus ngag yid gsum gyis byas pa'o/ /rang gis byas pa dang / gzhan dag la bcol ba dang / gzhan byed pa la dga' bar byas pa phyir bshags pa'o/ /mchod rten ni sku gzugs dang / gsung rab dang / ring bsrel dang /lha khang la sogs pa'o/ /dge 'dun ni sde pa'o/ /phyogs bcu'i dge 'dun ni gzhan 'dron po'o/ /de rnams kyi dkor phrogs na dmyal bar 'gro ste/ de yang mchod rten dang gtsug lag khang bshig pa dang / dkon mchog gsum gyi dkor sbas nas bdag nyid kyi phyir yongs su spyod pa gang yin pa de ni tshe 'phos nas dmyal ba chen po mnar med par ltung ngo zhes gsungs pa dang /dge 'dun gyi dkor brkus pas rang 'thag 'dren pa'i glang dang bong bur skye bar 'gyur ro/ /dge 'dun gyi dkor la nan gyis slong zhing gsang skyon byed na phug ron du skye bar 'gyur ro/ /dge 'dun gyi tshod lum zos na tshod ma nang gi srin bur skye bar 'gyur ro zhes gsungs so//de yang rang gis byas pa dang / gzhan la bcol ba dang / gzhan byed pa la yi rang ba bshags so/ /mtshams med pa lnga ni pha ma dang dgra bcom pa gsod pa dang / de bzhin gshegs pa la ngan sems kyis khrag bton pa dang / dge 'dun mthun pa'i nang du dbyen byed pa'o//de rnams byas na bar mtshams med par dmyal bar 'gro'o/ /mi dge ba bcu ni srog gcod pa dang / ma byin par len pa dang / mi tshangs par spyod pa dang / brdzun du smra ba dang / tshig phra ma dang / tshig rtsub po dang / ngag 'khyal ba dang / brnab sems dang / gnod sems dang / log par lta ba'o/ /de rnams sems mtshams med par spyad na dmyal bar 'gro'o/ /dud 'gror 'gro'o/ /tha ma yi dags su skye'o/ /las tshabs chung la dge ba gzhan gyi dbang gis mir skyes na yang / srog bcad pas tshe thung ba dang / nad mang ba'o/ /ma byin par blangs pas ni dbul zhing phongs pa dang nor gzhan gyis rang dbang med par spyod pa'o//mi tshangs par spyad pas ni mngal gyi gnas min pa mi len pa dang / lus mi tshangs pa'o/ /'dod pa log par g.yem pa ni chung ma la gzhan spyod pa dang / chung ma dang 'thab cing bsams bzhin du mi btub pa'o/ /brdzun du smra bas ni skur pa mang ba dang / gzhan gyis bslus par 'gyur ro/ /phra mas ni 'khor mi tshang ba dang / mdza' ba dang 'byed pa'o/ /tshig rtsub pos ni sgra mi snyan pa thos pa dang / ci smras pa rtsod par 'gyur ba'o/ /tshig 'khyal pas ni gzhan yid mi ches pa dang / gzhan gyis mi go ba'o/ /brnab sems kyis ni brkam zhing chog mi shes pa dang /btsal bas mi rnyed pa'o/ /gnod sems kyis ni gzhan glags tshol ba dang / gzhan la gnod pa byed pa'o/ /log par lta bas ni g.yo sgyu dang bcas pa dang / log par zhugs pa'i rigs su skye'o/ /de dag nyid las kyi lam ste gzhi mthun pa'i drug pa'o/ /yang dag par blang ba ni de dag la dga' zhing de'i gnyen po la mi 'bad pa'o//de las gzhan pha rol tu phyin pa drug gi mi mthun pa'i phyogs dang / log pa rnam pa brgyad dang / mnar sems dgu la sogs pa byang chub sems dpa'i sde snod la sogs pa rnams las mang zhing bshad pa dag kyang 'dir gsungs pa nyid do/ /de las 'bras bu mi khom pa brgyad 'byung bas/las kyi sgrib pa gang gis dang po dang gnyis ka'o/ /sngar bshad pa'i gang yang rung ba'i dge slong ma sun bton pa'am/ chos la skur pa'am/ mkhan po la sogs pa la lus ngag gis chad pa'i las byas pa yang dngos so/ /nyon mongs pa drag pos dmyal ba/ 'bring gis dud 'gro/ tha mas yi dags brgyud pa dang cha phra bas yul mtha' 'khob la sogs pa'o/ /de yang mchod rten bshig pa dang / gtsug lag khang bshig pa dang / dkon mchog gsum gyi nor sbas nas bdag nyid kyi phyir yongs su spyod pa gang yin pa de ni shi 'phos nas dmyal ba mnar med par ltung bar 'gyur ro//gal te de las thar bar gyur yang / yang dud 'gro'i skye gnas kyi lus 'di lta ste/ phug ron dang / mchil pa dang / ngur pa dang / ne tsho dang / bye'u sngon po dang / nya dang / rus sbal dang / spre'u dang / ri dgas kyi lus len par 'gyur ro/ /brgya la mi'i lus thob par gyur na yang /ma ning dang bud med dang / mtshan gnyis pa dang / dbang po med pa dang / smad 'tshong ma dag tu 'gyur ro zhes gsungs pa dang / yang gsungs pa/ tshe 'di la mchod rten dran nas nub mo zas zos pa gang yin pa de ni/ yi dags ltogs pa bkres pa dag tu skyes te lo brgya stong mang por bza' ba dang /ltung ba thob par mi 'gyur ro/ /'gro ba'i tshe lhu tshigs kun du me 'bar bar 'gyur ro zhes gsungs pa dang / yang lkugs pa ni chos la skur pa btab pa las 'byung ba yin no/ /'on pa ni chos thos pa la mi dga' bas yin no/ /dbang po ma tshang ba ni tshul khrims 'chal pa las 'gyur ro//lce dig pa ni dben par bla ma la mi snyan pa brjod pa'o/ /mda' gzhu dang gzhon chos la dga' ba ni kla klo can du skye'o/ /rkang lag zha ba ni mkhan po dang bla ma mthong yang mi ldang ba'o/ /gnya' ba thung ba ni bla ma mthong na mgo g.yogs te bros pa'o zhes gsungs pa'o/ /byams ma'i bu gang po 'jig rten pa ni sgra'i don la mngon par zhen pas phal cher ngan song du skye ste/de dag thams cad kyang phal cher bde bar gshegs pa'i gsung rab las 'byung ba'i don byang chub tu sems bskyed pa dang / sems can gyi don bya ba dang / bsdu ba'i dngos po bzhis bsdu bar bya ba dang / sbyin pa la sogs pa pha rol tu phyin pa rnams spangs pa dang /sa dang lam rnams spang zhing byang chub kyi spyod pa spangs nas/ log pa'i don la mngon par zhen pa yod de de'i rgyus ngan song du skye'o/ /bka' las 'byung ba'i chos rnams spyod pa ni de'i gnyen po'o zhes gsungs pa'o/ /yang gzhan gyi khyim rnams su byang chub sems dpa' la phrag dog dang ser sna byed na des de'i tshe ring zhing de las 'jigs pa chen po gsum ste/gang zhe na/ sems can dmyal bar skye bas 'jigs pa dang / dmus long gis 'jigs pa dang / yul mtha' 'khob du skye bas 'jigs pa ste gsum mo zhes pa dang / yang dge slong ma sun bton na sems can dmyal ba'i gnas su mun nag yod par skye'o//srog bcad pas ral gri'i lo ma can du skye'o/ /rngon byed pas thig nag tu sogs les 'dra'o/ /'dod pa log par g.yem pas zangs kyi khang pa rab tu 'bar ba la 'jug pa dang / lcags kyi khri rab tu tsha ba la nyal bar skye'o/ /chang 'thungs nas myos pa ni lcags chang 'thungs pa'i sems can dmyal bar skye'o//dge 'dun gyi shing thog brkus pas lcags kyi thu lum 'bar ba za bar skye'o/ /rgyu ma dang sha zos pas ljan ljin gyis gang ba'i dmyal bar skye'o/ /phra ma byas te dkrugs pas lcags kyi thang gshol gyis lce rmo ba'i dmyal bar skye'o/ / tshig mi snyan pa brjod pas lce rab tu 'byin pa'i dmyal bar skye'o/ /brdzun mang du smras pas lce la lcags kyi gzer gyis 'debs pa'i sems can dmyal bar skye'o/ /srog bcad nas log pa'i lha la mchod sbyin byas pas lcags kyi gtun gyis brdung ba'i dmyal bar skye'o zhes gsungs so/ /'di skad du gang zag gnyis ni ma gtogs te/gcig ni phyogs snyoms chos la skur/ /gnyis po de na 'dod che ba/ /zhes gsungs so/ /de dag thams cad sangs rgyas bcom ldan 'das ye shes su gyur pa/ spyan du gyur pa/ dpang du gyur pa/ tshad mar gyur pa/ mkhyen cing gzigs pa zhes bya ba ni/ nyes pa'i tshogs thams cad bshags pa'o//rnam pa thams cad mkhyen pa dang / mngon sum du gzigs pa dang / gnya' drag mdzad pa dang / brdzun mi smra ba dang / mdzad pa dang / thugs rje che ba ste/ de bzhin gshegs pa'i yon tan rnam pa drug go/ /lhag ma ni go bar zad do/ /slan chad kyang sdom par zhes pa ni khas len pa'o//nyes par byung na bshags par bya/ /snying rje byams pa zhugs gyur na/ /sngar byas nyes pa 'di yis dag /bshags kyang phyir zhing mi sdom na/ /bshags kyang dri ma 'dag pa med/ /ces bshad do/ /sangs rgyas bcom ldan 'das de dag thams cad bdag la dgongs su gsol/ bdag gis skye ba 'di dang skye ba thog ma dang tha ma ma mchis zhes bya ba ni dge ba'i rtsa ba bsngo ba'i phyir thugs gtod pa ste/ gang zhe na/ 'di la byas pa dang / gzhan du byas pa'o/ /tha ma ni thog ma'i mtha'o/ /sangs rgyas kyi zhing gi yon tan bkod pa'i mdo las/ /'khor ba'i mtha' ni med pa las/ /sngon gyi mtha' ni ji srid pa//sems can de srid phan don du/ /spyod pa dpag yas spyad par bya/ /zhes gsungs so/ /de yang dang po tshe rabs dpag tu med pa nas byas pa thams cad bsngos nas 'khor ba nas 'khor ba'i tshe skye ba gzhan du lha dang mi dang / yi dags dang dud 'gro dang / dmyal ba la sogs pa'i 'khor ba rnams su skyes pa na/sbyin pa chung ngu sbyin pa'i sems can rnams ni tha na dud 'gro'i skye gnas su skyes pa rnams la kham gcig tsam stsal ba ste/ cher byin pa lta ci smos/ yang rten khyad par can la phul ba dang / sbyin pa mang po dang / bzang pos sbyin pa'o/ /sbyin nus pa la tshul khrims bsrung ba'i sems 'byung bas sdom pa len te tha na bsnyen gnas kyi'o//dge bsnyen nam/ dge tshul lam/ dge slong ci nus pa bsrungs pa thams cad do/ /khyad par can gyi dbang du byas na/ tshangs par spyod pa la gnas pa'i dge ba smos so/ /de yang bcom ldan 'das kyis dud 'gro'i skye gnas su song ba rnams la sbyin pa btang na brgya 'gyur thob par 'gyur ro//mi phal pa gcig la btang na stong 'gyur thob par 'gyur ro/ /tshul khrims dang ldan pa'i dge slong la btang na khri 'gyur 'thob par 'gyur ro/ /de nyid chos smra ba la btang na tshad med pa 'thob par 'gyur ro zhes gsungs pa dang / yang de bzhin gshegs pa dang / pha ma dang / nad pa rnams la zas za gcig btang na 'bras bu tshad med pa 'thob par 'gyur ro zhes gsungs pa dang / 'phags pa rab tu zhi ba rnam par nges pa'i cho 'phrul gyi ting nge 'dzin zhes bya ba theg pa chen po'i mdo las/ byang chub sems dpa' bsod snyoms blangs te/rid pa dang / phongs pa dang / sprang po dang / slob ma rnams la bgos te byin na dge ba'i rtsa ba des tshe brjes nas 'khor los sgyur ba'i rgyal po rdzu 'phrul chen po dang ldan par 'gyur ro zhes gsungs pa dang / dbang po drug tshang ba gang yin pa de ni tshul khrims bsrungs pa las 'gyur ba yin no/ / zhes gsungs pa dang / 'od zer kun nas 'gyed pa bstan pa'i mdo las/ res 'ga' 'od zer gcig las ni/ /kha dog rnam pa bcu 'byung ba/ /so so rab 'bring tha ma yang / /sbyin pa las ni skyes pa yin/ /res 'ga' 'dres pa gcig las ni/ /kha dog nyi shu gang byung ba/ so so rab 'bring tha ma yang / /tshul khrims bsrungs pa las skyes yin//zhes gsungs so/ /tshul khrims sdom pa'i dge tshul dang / /rnam dag khrims 'dzin dge slong dag/ /zla ba phyed cing gso sbyong bya/ /chos gos btags pa rnams gyon te/ /lhung bzed 'khar gsil sogs bskur zhing / /dag pas bsod snyoms yang blang bya/ /lha rnams thams cad dgar 'gyur te//gus pas thal sbyar phyag 'tshal nas/ /lha rnams nged kyi mi 'di dag/ /de yi mngag gzhug bsgrub par bya/ /dper na lha dbang brgya byin la/ /sum cu rtsa gsum lha gzhan rnams/ /rim gro gus byed tshul bzhin du/ /tshe 'dir legs nyid thob pa ste/ tshe rabs gzhan gyi bsam mi khyab//rab tu byung zhing tshul khrims sdom/ /sangs rgyas bka' drin lan bsgrubs yin/ /zhes gsungs so/ /de ltar so so thar pa'i sdom pa la legs par bslabs la byang chub tu sems bskyed pa ni/ sdom pa rgya chen po'i rten zhes pa lta bu'o/ /de yang smon pa'i sems dang 'jug pa'i sems kyi rab tu dbye ba gnyis so//sdong po bkod pa'i mdo las/ rigs kyi bu sems can gyi tshogs las gang bla na med pa yang dag par rdzogs pa'i byang chub kyi sems smon pa ni rnyed par dka'o/ /de bas kyang sems can bla na med pa yang dag par rdzogs pa'i byang chub las mngon par zhugs pa ni ches rnyed par dka'o zhes gsungs so/ / dkon mchog ta la la'i mdo las/ gang dag rgyal ba rnams kyis byin brlabs pa/ /de dag byang chub sems bskyed don gnyer ba/ /gang dag byang chub don du sems skye ba/ /de dag drang srong mchog gi yon tan sgrub/ /ces gsungs pa dang / 'phags pa phung po gsum pa'i mdo las kyang / byang chub kyi sems des ma khyab pa'i chos kyi dbyings de gang yang ma mchis so//byang chub tu sems bskyed pa'i dge ba'i rtsa ba des dus gsum du ma khyab pa cung zad kyang ma mchis so zhes pa dang / yang gang du sems bskyed ma thag pa'i bsod nams kyi phung po ni rab tu mang gi/ sems can thams cad 'khor los sgyur ba dang / 'jig rten skyong ba dang /brgya byin dang / tshangs pa dang / nyan thos dang / rang sangs rgyas su gyur pa rnams kyi bsod nams kyi phung po ni de tsam ma lags so zhes gsungs so/ /de yang / bla ma sdom la gnas shing mkhas/ /nus dang ldan las blang bar bya/ /zhes gsungs so/ /de lta bu med na sangs rgyas dkon mchog las blang bar bya'o//de ni thog ma'i dus 'phags pa'i gnas lta bur byung ba'i dus so/ /de nas thos pa dang / bsams pa dang / bsgoms pa la sogs pas bdag yongs su smin pa des sems can yongs su smin par bgyis pa ste/ nyan thos kyi rigs can nyan thos kyi byang chub la dgod par bgyi'o/ /rang sangs rgyas kyi rigs can rang sangs rgyas kyi lam la dgod par bgyi'o//byang chub sems dpa'i rigs can bla na med pa'i byang chub la dgod par bgyi'o zhes gsungs pa dang / sbyin pa la sogs pa'i mi mthun pa'i phyogs nyams pa dang / rnam par mi rtog pa'i ye shes dang / 'dod pa thams cad rdzogs par byed pa dang /sems can thams cad yongs su smin par byed pas byang chub rnam pa gsum 'grub po zhes bya bas gsungs so/ /de nas mthar rnam par mi rtog pa'i ye shes kyi yul don dam pa byang chub kyi sems ni bla na med pa'i ye shes kyi dge ba'i rtsa ba'o/ /de yang 'od zer kun 'gyed pa'i mdo las/gang zhig mdo sde 'di la rab mos shing / /mi zad ngo bo nyid ni mngon par rtogs/ /des ni ting 'dzin mngon par bsgrub pa ni/ /bla med ye shes mngon byed dka' ba med/ /ces gsungs pa dang / yang / dge slong dag ni gang zhig gis/ /bla med ye shes btsal ba'i phyir/ /shin tu dad pa'i sems kyis ni/ / mdo sde 'di la gang dag brtson/ /zhes pa dang / bla med ye shes gang tshol ba/ /'khor ba dag la 'jigs pa med/ /des ni sdig pa rnam spangs nas/ /phan yon mchog ni thob par 'gyur/ /zhes gsungs so/ /gang lags pa de dag thams cad ces bya ba ni smras pa dang / ma smras pa ste/ de yang gang zhe na/ pha rol tu phyin pa bcu dang /dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / bden pa bzhi dang / tshad med pa bzhi dang / bsdu ba'i dngos po bzhi dang /bsam gtan dang / rnam par thar pa la sogs pa blang bar bya ba thams cad do/ /gcig tu bsdus shing bzlums te bsdoms nas zhes pa ni tshe 'di'i ched du ma bsngos pas bsdus pa/ 'jig rten gyi phun sum tshogs par ma bsngos par bzlums nas/ nyan thos dang rang sangs rgyas su ma bsngos pas bsdoms pa'o//yang na 'jig rten pa dang / theg pa chung ngu dang / bdag nyid kyi don du la sogs pa ste go rims bzhin no/ /'phags pa phung po gsum pa'i mdo las/ bdag gi dge ba'i rtsa ba thog ma dang tha ma ma mchis pa nas bgyis pa thams cad mkhyen par yongs su bsngos pa gang lags pa dang / bdag gi dge ba'i rtsa ba 'dus byas kyi yo byad 'tshal bas mngon par bsgrubs pa gang lags pa dang / bdag gi dge ba'i rtsa ba nyan thos dang rang sangs rgyas kyis mngon par bsgrubs pa'i dge ba'i rtsa ba gang lags pa dang / bdag gi dge ba'i las kyis bsgrubs pa'i dus thams cad du bsags pa de bzhin gshegs pa'i ye shes kyis mkhyen pa gang lags pa de dag thams cad yongs su bsdus pa'i zlum por sdom par bgyi'o zhes gsungs pa dang /yang de dag thams cad bsdus na bla na med pa yang dag par rdzogs pa'i byang chub tu bsngos pa'o zhes gsungs pa'i phyir ro/ /bla na ma mchis pa dang / gong na ma mchis pa dang /gong ma'i yang gong ma bla na med pa yang dag par rdzogs pa'i byang chub tu yongs su bsngo bar bgyi'o zhes pa ni/ bsngo ba yongs su dge ba'o/ /mchog nyid kyis gzhan bla ma lta bu med la/ bgrod par bya ba mthar thug pas gong ma yang med pa nyid gzhan bla ma thams cad kyi bla ma dang gong ma ste/de nyid ni mthar thug pa'o/ /mya ngan las 'das pa ni gong ma ste/ 'phags pa nyan thos dang rang sangs rgyas so/ /de rnams kyi gong ma theg pa chen po'i byang chub po/ /byang chub sems dpa'i bla ma ste/ 'gro ba thams cad kyi don mdzad pa de'i bla ma sangs rgyas bcom ldan 'das so/ /yang dag pa'i yon tan thams cad rdzogs pa'i chos kyi sku ni byang chub pa ste/shes brjod las 'das pas/ spros pa thams cad nye bar zhi ba so so rang gis rig pa'i ye shes dam pa'i yul du gyur pa'o/ /'phags pa 'od zer bkye ba bstan pa'i mdo las/ gzugs med 'gro dang 'ong ba med/ /phyogs mtshams phyogs kyang yod ma yin//mtshan ma med cing brjod dang bral/ spros pa dag las yang dag 'das/ /byang chub sems dpas bsgrub byas na/ /mthar thug bsil ba 'thob par 'gyur/ /zhes pa dang / yang / dge ba'i stobs kyi mthu yis ni/ /nyon mongs rab bcom nyer zhir gnas/ /khyad 'phags phan yon 'thob par byed//yon tan dang ni shes rab dag /shin tu rgya che rgya mtsho 'dra/ /bzod pa dag ni sgrub par byed/ /sems ni rab bde g.yo med 'gyur/ /byang chub sems dpa' rtag tu bsgom/ /mkhas pa dag gis rab tu bsngags/ /zhes gsungs so/ /ji ltar 'das pa'i sangs rgyas bcom ldan 'das rnams kyis yongs su bsngos pa dang /ji ltar ma byon pa'i sangs rgyas bcom ldan 'das rnams yongs su bsngo bar 'gyur ba dang / ji ltar da ltar bzhugs pa'i sangs rgyas bcom ldan 'das rnams da ltar yongs su bsngo ba mdzad pa de ltar bdag gis kyang yongs su bsngo bar bgyi'o/ /sdig pa thams cad ni so sor bshags so//bsod nams thams cad la rjes su yi rang ngo / /sangs rgyas thams cad la bskul zhing gsol ba 'debs so/ /bdag bla na med pa'i ye shes kyi mchog dam pa thob par gyur cig /mi mchog rgyal ba gang dag da ltar bzhugs pa dang / /gang dag 'das pa dag dang de bzhin gang ma byon//yon tan bsngags pa mtha' yas rgya mtsho 'dra kun la/ /thal mo sbyar bar bgyi ste skyabs su nye bar mchi/ /zhes pa ni go sla bas ma bshad do/ /byang chub kyi ltung ba bshags pa'i 'grel pa byang chub sems dpa'i slob pa'i rim pa zhes bya ba/ /slob dpon dze tA rI dgra las rnam par rgyal bas mdzad pa rdzogs so/