CLOSE WINDOW

D4004
བོད་ཡིག

@##/ /rgya gar skad du/ Ar+ya a ti dz+nyA na ma hA yA na sU tra br-it+ti/ bod skad du/ 'phags pa 'da' ka ye shes zhes bya ba theg pa chen po'i mdo'i 'grel pa/ sangs rgyas dang byang chub sems dpa' thams cad la phyag 'tshal lo/ /rang gzhan don grub dri med blo ldan pa/ / sku gnyis ldan pa'i 'dren pa de la phyag 'tshal nas/ /chos nyid don gsal 'da' ka ye shes kyi/ /don gsal phyir ni 'bad pa chen po bya/ /'di skad bdag gis thos pa'i dus gcig na zhes bya ba la sogs pa gsungs te/ de la nyan thos pa kha cig gis log par rtog pa bsal ba'i ched du tshig gi cha rnam pa bzhi dang ldan par bshad pa'o//bcom ldan 'das 'og min lha'i rgyal po'i khang bzangs na bzhugs te zhes bya ba la sogs pa gsungs te/ bcom ldan 'das ni nyon mongs pa dang nye ba'i nyon mongs pa thams cad bcom pas so/ /ldan pa ni yon tan drug dang ldan pas so//'das pa ni 'khor ba dang mya ngan las 'das pa gnyis ka la mi gnas pa ste/ mngon par rtogs pa las kyang / tshu rol pha rol mtha' la min/ /de dag bar na mi gnas shing / /dus rnams mnyam pa nyid shes pas/ /zhes bshad/ yang / 'khor ba dang ni mya ngan 'das/ /'di gnyis yod pa ma yin te/ /'khor ba yongs su shes pa la/ /mya ngan 'das zhes brjod pa yin/ /zhes gsungs pas na bcom ldan 'das so/ /kha cig ni/ ma rig gnyid las sangs phyir dang / /blo rgyas phyir nas sangs rgyas zhes pa dang yang mtshungs so//yang na bcom pa ni bdud la sogs pa bzhi bcom pa'am/ ldan pa yon tan dang ldan pas so/ /des ston pa bshad nas gnas ni 'og min ces pas te/ 'og min gyi gnas stug po bkod pa'i zhing khams de las lha'i rgyal po rtog pa dang bral ba'i lha bzhugs pas na de'i khang bzangs so //bzhugs pa'i spyod lam gyis so/ /yang na mnyam par gzhag pas zhes 'chad do/ /chos ston pa dang rnam par dkar ba'i chos gzhan ston pa la zhu ba po rten gyi gang zag bstan pa'i phyir yang de'i tshe byang chub sems dpa' sems dpa' chen po nam mkha'i snying pos so//de la ston pa dag pa bcom ldan 'das longs spyod rdzogs pa'i sku dang ldan pas gnas 'og min du zhu ba po dag pa byang chub sems dpas zhus pas de kho na nyid zung 'jug la sogs pa sngags kyi don du 'grel pa yang yod do/ /zhus pa'i tshig ni btsun pa bcom ldan 'das la byang chub sems dpa' nam 'chi ka ma'i sems ji ltar blta bar bgyi zhes gsol pa dang zhes bya ba smos te/de la bcom ldan 'das la sogs pa ha cang spros pas chog go/ /byang chub sems dpa' zhes pa ni/ /byang chub nam mkha'i mtshan nyid de/ /rtog pa thams cad spangs phyir ro/ / zhes bshad pa nas/ gtong ba che dang blo che ba dang mthu che dang / /rgyal ba rnams kyi theg chen mchog la zhugs pa dang / /go cha chen po bgos shing bdud kyi sgyu 'dul ba/ /de yi phyir na sems dpa' che zhes rab tu brjod/ /ces gsungs pas chen po'i don yang de yin te/ sems can gyi don la dpa' bas so zhes kyang bshad/'phags pa ni las dang nyon mongs pa las ring du gyur pas 'phags pa ste/ rten cing 'brel bar 'byung ba'i rtsibs bcom pas so/ /des na ar+hata kyi sgra las bshad do/ /ming gis mtshon nas nam mkha'i snying pos chos rtags kyi phyag rgya bzhi yis rgyas thebs pa'i sems can gyi nam 'chi ba ste/mi rtag par gyur pas rten cing 'brel bar 'byung ba yan lag bcu gnyis su 'khor ba'i sems can de mi rtag pa ste / srog 'joms pa 'chi ka ma rgyal po la gdams pa'i mdo la sogs pa las 'byung ba'i dus su sems ji ltar blta bar bya zhes zhus pa dang /bcom ldan 'das kyis bka' stsal pa/ nam mkha'i snying po khyod kyis nga la zhus pa de legs te yid dang ba'i sgo nas nyon cig /ngas legs par bshad par bya yi zhes bka' stsal te/ thog ma nas rang gi sems ma rtogs pas 'khor bar 'khyam pas na de la skye rga na 'chi rnams dang bral ba mi srid do //rten cing 'brel ba'i chos las ma 'das pa'i phyir ro/ /de'i phyir na skye rga na 'chi dang 'bral bar 'dod pas 'da' ka'i ye shes lhun gyis grub pa spros pa dang bral ba de bsgom par bya'o/ /dus las mtshon nas nam 'chi ka ma'i bsgom par bya'o//de yang / bya ba sgrub par byed pa la/ /brtun pas 'grub pas skyes bu dang / /mgo la me shor ji bzhin no/ /zhes gsungs pas rab tu bsgom par bya'o zhes gang bsgom pa'i dngos po dang bcas pas bstan nas/ de ni de dag gi ngo bo nyid spros pa dang bcas pa 'chad par 'dod nas dri bas 'da' ka ma'i ye shes zhes bya ba de gang zhe na zhes dris pa dang /de la zhes yul du byas te ye shes bsgom pa de'o/ /ji ltar bsgom na/ chos thams cad rang bzhin gyis rnam par dag pas na dngos po med pa'i 'du shes rab tu bsgom par bya'o zhes bya ba ni/chos thams cad ces pa ni grangs dang dngos po'i thams cad de ma lus pa'o/ /chos ni mtshan nyid 'dzin phyir chos zhes bya zhes gsungs pas khyab par bya ba'i khyab bya la ma khyab pa med pas na chos thams cad rang bzhin nam ngo bo nyid kyis rnam par dag pa ste/dkon brtsegs las/ chos rnams thams cad dag pa ste/ /nyes skyon la sogs dmigs pa med/ /de bas rang bzhin ngo bo la/ /dngos sogs 'dzin pa ga la srid/ /ces gsungs pas na rang dang spyi'i chos de thams cad dngos po med pas don ngo bo nyid kyis stong pa brjod du med pa'i gsal snang ngo bo nyid las 'das par bshad do//de'i phyir na/ nam mkha' mthong zhes sems can tshig tu rab brjod pa/ /nam mkha' ji ltar mthong ste don 'di brtag par bgyi/ /de ltar chos mthong ba yang de bzhin gshegs pas bstan/ /ces dpe don sbyar ba yang yang bshad do//des dngos po don dam mtshan nyid la gnas pa bshad nas gang zag la ltos pa bstan pa'i phyir kun rdzob rgya chad med pa bstan pa'i phyir kun rdzob la rgyu 'bras la gnod pa med pa spang ba'i phyir/ chos thams cad byang chub sems su 'dus pas na snying rje chen po'i 'du shes rab tu bsgom par bya'o zhes bya ba gsungs te/gang zag shes rab shas chung ba blo tha ma la bslab pa rnams la ltos nas snang ba 'di med pa ma yin te/ chos thams cad kyi rtsa ba gzhan las mi gnod pas khyad par du bya bar theg pa rnam gnyis kyang khas len par snang na de las 'di rab tu mi gnas pa don gsal stong par gnas pas na /stong pa kho na yang min te/ stong nyid snying rje'i snying po can/ /zhes bshad/ theg pa gong ma rnams mi gnod pa tsam yod pas min te / phan 'dogs dang bcas pas gnas pas theg pa rin chen gsal las kyang /byang chub sems la rab gnas pa / /stong nyid la sogs thag mi ring / /thabs dang shes rab zung 'brel na/ /spyod tshul gang ltar gnas kyang ste/ /kho na nyid la 'gyur ba med/ /ces gsungs pa dang / dbu ma de kho na nyid las/ snying rje'i yul du sems can te//de rgyu byang chub sems las byung / /zhes pas na 'gal ba med pa dang / /bslab btus las kyang / byang chub tu yang blo brtan bya/ /zhes gsungs pas na gang mtha' gnyis su mi lhung bar bya ba'i ched du gsungs so/ /de'i phyir na sngon gyi slob dpon rnams kyang mtha' gnyis las ma ltos pas 'jug par bya zhes gsungs so//des na tshig don ni rtogs sla bas ha cang ma spros so/ /des chad lta la sogs pa rnam par bkag nas/ da ni dngos kyi don snang ba thams cad kyi rigs don la bsgom pa 'chad pa ni/ chos thams cad rang bzhin gyis 'od gsal bas na mi dmigs pa'i 'du shes bsgom par bya'o zhes bstan pa ste /de yang rang la snang ba'i chos 'di thams cad ngo bo nyid la rtog pa dang bral bas sgrib byed med de/ dper na nam mkha' rang bzhin gyis dag pa bzhin no/ /de bas na chos thams cad 'od gsal ba ste /dper na nyi ma'i 'od zer bzhin no/ /de la kha cig na re khyed kyi dpe la gnod pa yod de/ nam mkha' dag pa la nyi ma snang ba la 'od zer gsal kyang sprin la sogs pas sgrib g.yogs yod na mi gsal ba bzhin dpe ma grub ste/gnod do zhe na/ des mi gnod de/ nyi ma'i 'od zer la ni nam yang sgrib g.yogs yod pas mi gsal ba dang med pas gsal ba la sogs pa dang ste spyi sems can gyi snang ba la snang ba'i phyir ro/ /des na chos rnams kyi rang bzhin la 'od gsal ba sgrib pa med pa dang / mi gsal ba sgrib bcas med pas na sems can gyi snang ba la yin te/nyon mongs pa'i sgrib pa la sogs pa gsal bas kyang chos kyi ngo bo nyid la gsal ba med la/ sgrib pas mi gsal ba med par/ yang dbu ma rigs pa brtag pa las/ chos kyi dngos po gnas pa la / /dus dang che chung gsal mi gsal//'byed par gyur pa'i gang zag de/ nga yi 'khor du ji ste rigs/ /de bas 'od gsal stong ba yin/ /zhes bshad do/ /des na dngos po la dmigs pa med pa snang tsam nyid na stong pas na yul mi dmigs te 'dzin pa'i shes pa mi dmigs pas na dmigs bya dmigs byed gnyi ga la/grub pa gnas med pa'i phyir mi dmigs pa'i 'du shes rab tu bsgom par bya'o/ /de yang skabs kyi tshig gi bsgom pa'i dngos po des 'chi ka ma'i tshe zhes thams cad la sbyar bar rig par bya'o/ /'o na gal te 'chi kha kho na bsgom gyi gzhan du ma yin nam zhe na//de'i rgol ba la skabs med de/ 'chi kha zhes pa ni dngos po dang dus la nges par gzung ba med de/ dbu ma sgrub pa chen po las/ /mi rtag 'gyur la gnas dang dus/ /gang 'di yod par ngas ma mthong / /de bas skyes pa kho na nas/ /'chi bdag kha na gnas pa yin//zhes slob dpon klu sgrub kyis gsungs pa dang / nam zhig sangs rgyas ma gtogs par/ /mi rtag la sogs gnas pa yin/ /zhes pa dang / yang slob dpon klu sgrub kyis rang la 'chi ba'i dus nges pa med pas thar pa'i don du 'bad pa ni brtson 'grus chen po dang ldan pas bya'o zhes gsungs pas na 'chi kha ma zhes rgyal po la gdams pa'i mdo sogs ni dpe tsam yin te skyes nas 'chi kha ma yin pa'i phyir ro zhes 'chad do//kha cig ni rgol ba la 'dod pas sgrub pa yang snang ste/ bsgom pa la 'chi khar bsgom la yang rtog pa med ces 'chad do//'di ni ngan te 'chi kha'i gnas skabs na sdug bsngal gyi tshor ba la sogs pas gzir bas skabs su sems la ting nge 'dzin mi skye ba med / theg pa che la zhugs pa ste / /ji srid gson par las grub nas/ /'chi ba'i dus su dga' bas 'gro/ /zhes gsungs pas na 'chi kha ma ni skyes tsam nyid na 'chi kha mar gnas pa yin no zhes 'chad pa bzang ngo //rang ni rang bzhin gyis stong pa 'am/ gnas pa'i don bshad nas re zhig phyi nang gi nye du dang nor rdzas la sogs pa la yang chags par mi rigs par ston pa ni/ dngos po thams cad mi rtag pas na ci la yang mi chags pa'i 'du shes rab tu bsgom par bya'o zhes bya ba la sogs pa gsungs te/de la dngos po ni phyir brten par snang ba thams cad dang / nang g.yo bar snang ba snod bcud thams cad kyang mi rtag ste/ 'dus byas thams cad mi rtag pa/ /zhes pa dang / dngos po la sogs rtag par ngas ma mthong //de bas chags pa'i blo ma 'jug /ces pa dang / skabs dang sbyar na dbu ma rigs pa brtag pa las/ gang la chags pa de nyid spangs / des ni 'ching bar 'gyur ba'i phyir/ /khyad par bu dang bu mo sogs/ /spang ba'i yul du bya bar rigs/ /zhes bshad pas na/gnas skabs brje bas na de la chags pa'i gnas med pas nam yang chags par mi bya ste/ de'i gnas skabs ni mi rtag pa'i rnam par ngo bo nyid la gnas pas bya ba med de/ des na chags pa med de/ nang sems can dang / phyi yo byad la yang chags pa med par bya'o zhes bstan pa'i don to //de yang blo rab 'bring gi bye brag gis gzhan la btang ba mi dmigs pas zin pa'i ma chags pa dang / dngos po la ma chags kyang de'i 'dod pa'i yul la chags pa dang ma chags pa 'dra yang dmigs med kyi rgyas ma thebs pas ma bral ba'i blo can gyis rim pa bzhin blo la snang bar mkhas pas bshad pas na 'dir ni dngos po yul gang zag thams cad la mi dmigs pas shes rab dang ma bral bar gnas pas ma chags pa'i gtso bo'am mchog de yin pas na skabs don yang de yin par rig par bya'o zhes bshad do //de las gzhan pa bstan bcos rnam gnyis la sogs pa'i rang bzhin ni btang ba dang ldan pa'i chags pa med pa ma yin pa'i phyir na/slob dpon klu sgrub kyis/ chags pa'i yul la dngos med par/ /de la chags pa skye ba de/ /rigs sam gal te ri bong rwa/ /de la'ang chags pa skye bar rigs/ /zhes gsungs pa dang mthun pas na chags pa med de mi rtag par gnas pas zhes skabs don dang yang sbyar ro//'du shes ni de la thabs kyis gnas pas na bsgom pa'am de la dngos po de gnas pas na de'i khyab pa sgrub pa'i tshul du bya'o zhes bshad do/ /brten pa dang rten du rgyu tshogs pas 'bras bu 'byung ba de'i phyir 'dir yang de kho na bzhin 'byung ngam snyam na re zhig dam pa'i don la de mi snang ste/sems rtogs na ye shes yin pas na sangs rgyas gzhan mi btsal ba'i 'du shes bsgom par bya'o zhes gsungs te/ de'i dngos po ni nyan thos pa dang / sems tsam pa dang / dbu ma pa la sogs pa'i lta ba dang bstun na yang sems tsam pa yin par shes pa kha cig ni yod par mngon pas na de ni ma yin te/sems rtogs na zhes pa ni don ni rtogs par bya ba'i ye shes sam sems de gang yang med pas na sems rtogs na zhes bshad pas 'gegs pa'i na'am/ yang na sems rtogs na zhes pa ye shes la snang ba'i sems rtogs na de kho na ye shes yin pas na ye shes yin pa'o zhes 'chad pas na nyan thos la sogs par gnas pa med do //des na mdo sde las kyang / sems nyid ye nas med pa la/ /de la rtogs pa'i blo mi 'jug /ma zhugs pa de de shes yin//de shes ye shes bla na med/ /ces gsungs pa yang snga ma'i khongs su 'gro'o/ /dkon brtsegs las kyang / 'od srungs sems ni yongs su btsal nas mi rnyed do/ /gang mi rnyed pa de mi dmigs pa yin pa'o/ /gang mi dmigs pa de 'das pa'am/ da ltar ram/ ma 'ongs pa ma yin pas na/ /zhes rgya cher gsungs so/ /yang sems gang gis yongs su rtogs pa de yang stong pa/ yongs su rtogs pa de yang stong pa zhes bya ba la sogs pa gsungs pas na dngos po rtogs rgyu med pa zhes bshad/ de rtogs pa de la ye shes bla na med pa zhes bya ste/ sangs rgyas gzhan nas btsal bya ma yin te/btsal bya yin na sems can tha dad pa'i skyon yang gnas pa'i phyir ro/ /de bas na gzhan na btsal bya med ces bya ba rtogs pa'i mdo las kyang / 'di tsam snang ba log pa la/ /ye shes bla na med pa yin/ /de phyir sangs rgyas sgra tsam zhig /gzhan du btsal lam dngos 'dzin min//sgra la btsal bar bya min te/ /rtogs pa de nyid rang la yin/ /zhes gsungs so/ /de bas na rnam par rtog pa goms pas gnas pas ma rtogs pa de la tha dad par rtogs pa ni mtha' gnyis ma spangs pa'i gang zag tu shes par bya'o/ /tshig gi go cha dang pos ni don snang ba'i rang bzhin la/gnyis pas ni kun rdzob dang bstun no/ /de'i 'og mas ni stong pa dang bstun la/ de'i 'og mas ni rnam par rtog pa dang bstun no/ /de'i 'og mas ni mthar thug la gzung 'dzin la mi dmigs pas na sangs rgyas pa la dus dang snga phyi dang / che chung dang bzang ngan med de/dper na mar me mdzad dang da ltar gyi sems can tha mal pa la yang khyad med par mnyam pa nyid du gnas pa yin no zhes ngo bo nyid la gnas pa'i don bshad pa yin zhes mkhas pa yan chad gsungs la/ kho bos kyang de la sems pa phra ba skyes pa 'di brjod pas kha cig skrag pa dang dngang ba la sogs pa'i yul can la 'di ni bstan par bya ba ma yin te/gsang ba'i le'u dang po las/ gang la chos nyid gnas pa de/ /legs par rtogs dang de la mos/ /de la cung zhig sbyin par bya/ /de las bzlog la de mi sbyin/ /zhes gsungs pas de ni dam pa'i don la gnas pa'o zhes 'chad par 'gyur ro/ / de bas de dag gi bsdu ba'i tshigs su bcad pa ni/ bcom ldan 'das kyis tshigs su bcad de bka' stsal pa zhes bya ba la sogs pa nas sangs rgyas gzhan du ma tshol gyi bar gyis don bsdus nas nam mkha'i snying po la yid gzung ba'i phyir du bskyar ba'am/ bstan pa'i tshul du bstan pa ste/ / de ni bsdus pa'i khyad par las don la khyad par med de zhes 'chad pas na yang dag par rdzogs pa'i sangs rgyas kyis gsungs pa dang 'khor rnams dga' ba skyes pa ni/ bcom ldan 'das kyis de skad ces bka' stsal nas zhes pa'o/ /'khor dga' ba skyes pa ni byang chub sems dpa' nam mkha'i snying po dang /de la sogs pa'i 'khor lha ma srin sde brgyad la sogs pa rnams yi rang nas/ bcom ldan 'das kyis gsungs pa la yi rang bar gyur nas bstod pa la sogs pa mdzad do zhes 'chad do/ /bdag 'dra sdeb sbyor gsal ldan ma yin kyang / /don la mos pa'i gang zag rang bas dman pa dang //chos nyid mthong la log par rtog pa ci yod kyi/ /don du bdag gis byas pa yin/ /de las byung ba'i dge ba des/ /bdag dang mtha' yas ma rig pa/ /mi mthun shes rab kyis 'joms shog /don la mos pa'i mtha' gnyis med par shog /'phags pa 'da' ka ye shes kyi mdo'i don gsal ba zhes bya ba/