CLOSE WINDOW

D4003
བོད་ཡིག

/[ ]@##/ /rgya gar skad du/ Ar+ya a ti dz+nyA na sU tra byA khyA na/ bod skad du/ 'phags pa 'da' ka ye shes kyi mdo'i rnam par bshad pa/ dpal rnam par snang mdzad la phyag 'tshal lo/ /ma skyes stong pa'i rnam pa nyid/ /skye ba bstan pas snang mdzad pa/ /rnam par snang mdzad thugs rje can/ /longs spyod rdzogs sku phyag 'tshal te/ /nges pa don gyi mdo sde yi/ /rnam par bshad pa tsam bya yis/ /ma nor nges pa'i lam 'dod rnams//tshul 'di la ni 'jug par gyis/ /dgos 'brel gyi don klad du ma bstan na rtogs pa dang ldan pa dag 'jug par mi 'gyur bas de bstan te/ 'da' ka ye shes zhes bya ba de bzhin gshegs pa rnams kyi thugs kyi gsang ba'i mdzod 'di ni brjod par bya'o//de ston pa'i tshig gi tshogs ni rjod par byed pa'o/ /de brjod pas de'i don khong du chud pa ni dgos pa'o/ /de'i don khong du chud pas sems rtogs pa'i ye shes sangs rgyas nyid thob pa de ni dgos pa mthar phyin pa'o/ /'brel pa ni mi 'byung ba'i phyir de nyid shugs las shes par bya'o//'di skad bdag gis thos pa dus gcig na/ bcom ldan 'das 'og min lha'i rgyal po'i khang bzangs na bzhugs te/ 'khor thams cad la chos ston pa dang zhes bya bas ni phun sum tshogs pa'i gleng gzhi bstan te/ de la 'di skad bdag gis thos pa dus gcig na zhes bya ba ni/sdud pa po'i thos pa che ba nyid du bstan te/ bcom ldan 'das 'og min lha'i rgyal po'i khang bzangs na bzhugs te zhes pa ni/ ston pa phun sum tshogs pa dang / gnas kyi yan lag bstan te/ de yang ston pa ni longs spyod rdzogs pa'i skur shes par bya'o/ /de yang lang kar gshegs pa'i mdo las/lha yi pho brang 'og min po/ /sdig pa thams cad rnam spangs pa/ /rtag tu rnam par mi rtog ldan/ /sems dang sems las byung ba spangs/ /stobs dang mngon shes gang thob pa/ /de dag ting 'dzin dbang brnyes nas/ /rdzogs pa'i sangs rgyas de 'tshang rgya//sprul pa rnams ni 'dir 'tshang rgya/ /zhes gsungs pa'i phyir ro/ /'khor thams cad la chos ston pa'i skabs 'dir byang chub sems dpa' 'ba' zhig la ston gyi/ nyan thos kyi 'khor la ni ma yin no/ /byang chub sems dpa' nam mkha'i snying pos bcom ldan 'das la phyag btsal nas 'di skad ces gsol to//bcom ldan 'das byang chub sems dpa' nam 'chi ka ma'i tshe sems ji ltar blta bar bgyi zhes bya ba ni gleng bslang ba bstan te/ de yang 'dir 'khor gyi gleng bslang ba'o/ /de'i yan lag gi don ni las dang nyon mongs pa dang / shes bya'i sgrib pa byang zhing tshogs chen po gnyis rdzogs pas chub pa dang sems can re re'i don du bskal pa dpag tu med par dmyal ba la sogs par 'jug pa'i spyod pa 'am/chos zab mo la bzod pas ni byang chub sems dpa'o/ /nam mkha' lta bu'i chos nyid thugs su chud pa'i ye shes mnga' bas na nam mkha'i snying po ste zhu ba po'i ming ngo //rtog pa'i mtshan ma thams cad bcom zhing yang dag pa'i ye shes dang ldan la/ rtag chad la sogs pa'i mtha' thams cad las 'das pa'i bcom ldan 'das la lus ngag yid kyis phyag btsal te 'og nas zhus pa 'di skad ces zhus so//bcom ldan 'das ni snga ma bzhin no/ /byang chub sems dpa' ni gzhi sdom pa'i tshul khrims dang / dge ba chos sdud pa'i tshul khrims dang / sems can gyi don byed pa'i tshul khrims dang ldan pa'o/ /nam 'chi ka ma'i sems ni/ srog gi rlung phyir 'byung ba'i dus kyi tshe zhes gtso bor smos kyang rtag tu bsam par bya'o//ji ltar blta bar bgyi zhes bya ba ni sems 'dis don dam pa'i chos rnams ni ji ltar shes par bya/ sems de'i ngo bo ni gang / sems de'i rang bzhin ni ji lta bu/ de nas kun rdzob tu ji ltar bstan/ sems de'i rang bzhin rtogs nas ji ltar 'gyur snyam pa'o//bcom ldan 'das kyis bka' stsal pa/ nam mkha'i snying po byang chub sems dpa' nam 'chi ka ma'i tshe/ 'da' ka ye shes bsgom par bya'o zhes gsungs pa ni zhu ba'i lan te go sla bas ma bshad do/ /de la 'da' ka ye shes ni chos thams cad rang bzhin gyis rnam par dag pas na dngos po med pa'i 'du shes bsgom par bya'o zhes bya ba la sogs pas ni gzhung gi don rgyas par bka' stsal te/sems 'dis don dam pa'i chos ji ltar shes par bya snyam pa la/ de la chos thams cad rang bzhin gyis rnam par dag pas na dngos po med pa'i 'du shes bsgom par bya'o zhes gsungs te/de la zhes pa ni dmigs kyis bskyang ba'o/ /'da' ka ye shes zhes bya ba ni de bzhin gshegs pa rnams kyis sngon byang chub sems dpa'i spyad pa spyod pa ni 'og nas 'byung ba lta bur shes pa'i ye shes de la de skad ces bya'o//don dam pa phung po khams la sogs pas bsdus pa'i chos thams cad gdod ma nas ma skyes pa'i phyir rang bzhin gyis rnam par dag pa ste/ des na don gyi bya ba byed nus pa'i dngos po rnams rang bzhin gyis ma grub cing ngo bo nyid med pa'i 'du shes bsgom par bya'o/ /de yang lang kar gshegs pa las//gang phyir blo yis rab gzhigs na/ /rang bzhin dag ni mi dmigs te/ /de phyir de dag brjod du med/ /ngo bo nyid kyang med par bshad/ /ces gsungs pa dang / gzhan yang de nyid las/ yod dang med pa'i phyogs bral zhing / /rgyu dang rkyen gyis spangs pa yi//srid pa rgyu med rang mthong nas/ /sems kyi rgyud ni rnam par dag /ces gsungs so/ /de ltar rang bzhin gyis rnam par dag pas ci yang med na sna tshogs su snang ba gang yin snyam pa la/ thams cad byang chub kyi sems su 'dus pas na snying rje chen po'i 'du shes bsgom par bya'o zhes gsungs te/'khor ba dang mya ngan las 'das pa'i chos thams cad rang gi byang chub kyi sems nyid yin gyi/ phyi rol don du smra ba rnams 'dod pa ltar yod pa ma yin no/ /de ltar yang lang kar gshegs pa las/ ji ltar byis pas brtags pa yi/ /phyi rol gyi ni snang ba med//sems ni gzugs brnyan bzhin du snang / /bag chags kyis kyang mgo g.yung bslang / /zhes gsungs te/ de'i phyir ma rtogs pa rnams la sems can la dmigs pa'i snying rjes de dag gi sdug bsngal ba dang / chos la dmigs pa'i snying rjes chos thams cad mi rtag pa dang / sdug bsngal ba dang / stong pa dang / bdag med par bsgom pa dang / dmigs pa med pa'i snying rje dang stong pa nyid bsgom ste/ de ltar snying rje chen pos bsgoms na/ der sangs rgyas kyi chos thams cad 'dus te/ der yang chos yang dag par sdud pa'i mdo las/ bcom ldan 'das dper bgyi na 'khor los sgyur ba'i 'khor lo rin po che gang mchis pa der dpung gi tshogs thams cad mchi'o//bcom ldan 'das de bzhin du byang chub sems dpa'i snying rje chen po gang du mchis pa der sangs rgyas kyi chos thams cad 'dus zhes gsungs so/ /'o na sems de'i rang bzhin ji lta bu snyam pa la/rang bzhin gyis 'od gsal bas na mi dmigs pa'i 'du shes bsgom par bya'o zhes gsungs te/ rang bzhin gyis 'od gsal ba'i phyir nam mkha' ltar ci la yang mi dmigs pa'i 'du shes bsgom par bya ste/ de ltar yang ye shes snang ba'i rgyan las/ sems ni rang bzhin gyis 'od gsal ba ste/glo bur gyi nye ba'i nyon mongs pas nyon mongs kyang rang bzhin ni kun nas nyon mongs par mi 'gyur zhes gsungs pa dang / yang de nyid las/ 'jam dpal byang chub ni sems kyi rang bzhin 'od gsal ba'i phyir rang bzhin gyis 'od gsal ba'o/ /ci'i phyir na/rang bzhin gyis 'od gsal ba zhes bya ste/ gang rang bzhin de ni kun nas nyon mongs pa med pas nam mkha' dang mtshungs te/ nam mkha'i rang bzhin can nam mkha' kun 'gro ba nam mkha' lta bu ste/ rab tu 'od gsal ba'i phyir ro zhes gsungs so/ /don dam pa de ltar yin na kun rdzob tsam du ji ltar blta snyam pa la/dngos po thams cad mi rtag pas na ci la yang mi chags pa'i 'du shes bsgom par bya'o zhes gsungs te/ rgyu dang rkyen gyis bskyed pa'i dngos po thams cad skad cig ma ste/ sems can mi gnas par 'gyur zhing 'pho bas na mi rtag pa'o//de'i phyir 'dod pa'i yon tan gang ci yang rung ba la byang chub sems dpa'i sems mi chags par de'i rang bzhin stong pa zhi ba'i bdag nyid can du bsgom par bya ste/ de yang mya ngan las 'das pa las/ kye ma 'dus byas rnams mi rtag /skye zhing 'jig pa'i chos can yin/ /skyes nas 'jig par 'gyur bas na//de bas myur du zhi ba bde/ /zhes gsungs so/ /sems de'i rang bzhin ji lta ba bzhin du rtogs na cir 'gyur snyam pa la/ sems rtogs na ye shes yin pas sangs rgyas gzhan du mi btsal ba'i 'du shes rab tu bsgom par bya'o zhes gsungs te/gong du gsungs pa lta bu'i sems rang bzhin gyis 'od gsal ba'i bdag nyid ji lta ba bzhin du shes pa'i ye shes de nyid las sangs rgyas zhes tha snyad nye bar btags kyi/ de las gzhan du sangs rgyas rnyed par mi 'gyur te/ de ltar yang rdo rje gcod pa las/ gang gis nga la gzugs su mthong / /gang gis nga la sgrar shes pa/ /log par spong bar shes pa ste/ /skye bo de yis nga mi mthong / /sangs rgyas rnams ni chos nyid lta/ /'dren pa rnams ni chos kyi sku/ /chos nyid shes par bya min pas/ /de dag rnam par shes mi nus/ /zhes gsungs pa dang /lang kar gshegs pa las/ /rtog pa spangs pa'i sems nyid ni/ /yid kyi rnam shes bzlog pa ste/ /chos rnams thams cad shes pa'i phyir/ /sems ni sangs rgyas zhes ngas 'chad/ /ces gsungs so/ /don bsdus pa la dga' ba rnams kyi phyir/bcom ldan 'das kyis tshigs su bcad pa de bka' stsal pa/ chos rnams rang bzhin rnam dag pas/ /dngos po med pa'i 'du shes bsgom/ /byang chub sems dang rab ldan pas/ /snying rje chen po'i 'du shes bsgom/ /rang bzhin mi dmigs 'od gsal bas/ / mi dmigs pa yi 'du shes bsgom/ /dngos po thams cad mi rtag pas/ /dngos po ci la'ang mi chags bsgom/ /sems ni ye shes 'byung ba'i rgyu/ /sangs rgyas gzhan du ma tshol cig /ces gsungs te/ chos thams cad rang bzhin gyis rnam par dag pa'i phyir/ dngos po'i mtshan nyid du yod de/ma byang ba dngos por 'du shes bskyed pa ni skyes bu glen pa gang zhig smig rgyu'i chu la khrus bya ba dang / btung bar 'dod pa bzhin te/ byang chub sems dpas de ltar mi blta'o/ /de ltar yang lang kar gshegs pa las/ sems slu ba yi smig rgyu la/ / ji ltar dpyid ka g.yo ba ni/ /ri dgas rnams ni chu 'dzin te/ /de la dngos po yod pa min/ /zhes gsungs pa lta bu'o/ /don dam par na byang chub kyi sems gdod ma nas ma skyes pa'i phyir de ltar ma rtogs pa'i 'gro ba rnams la sgyu ma'i skyes bu la sgyu ma'i skyes bu gzhan gnyis pa snying rje bskyed pa ltar snying rje chen po bsgom par bya ste/de ltar yang lang kar gshegs pa las/ /rtswa dang shing dang gyo mo las/ /sgyu ma rnam par mdzes gyur kyang / /sgyu ma de ni med pa ste/ /chos kyi rang bzhin de bzhin no/ /zhes gsungs te/ de ltar bsgoms na dmigs pa med pa'i snying rje skye ste/snying rje'i mchog yin no/ /de ni rang bzhin gyis gsal bas nam mkha' ltar dmigs su med pa'i phyir rang gi rnam par rtog pa tsam las logs na grub pa'i dngos po med pa bzhin du byis pa rmongs pa rnams mo gsham gyi bu dang / rmi lam lta bu la 'dod chags pa ltar byang chub sems dpas zhen pa'i chags pa mi skyed do//de yang lang kar gshegs pa las/ /rnam par rtog las gud na ni/ /'dus byas 'dus ma byas med na/ /rmi lam mo gsham bu bzhin du/ /byis pa phyogs bslad 'dzin par byed/ /ces gsungs so/ /sems rnam par rtog pa'i dri ma dag pa nyid yang dag pa'i ye shes zhes bya ste/de nyid sangs rgyas zhes bya yi/ /mtshan dang dpe byad kyis brgyan pa'i/ /gzugs kyi sku ni de lta ma yin no/ /de ltar lang kar gshegs pa las/ /mngon par 'du byed mtshan rnams kyis/ /sangs rgyas mtshan ldan ma yin te//de dag 'khor los sgyur yin bstan/ /des ni sangs rgyas mi brjod do/ /sangs rgyas mtshan ni ye shes te/ /lta ba'i nyes pa rnam spangs pa/ /so so rang rig lta ba rtogs/ /nyes pa so sor rnam 'joms pa'o/ /zhes gsungs so/ /'o na sangs rgyas des 'gro ba'i don ji ltar mdzad snyam pa la/de yang lang kar gshegs pa las/ /nyi ma zla ba me yi 'od/ /de bzhin 'byung ba nor bu rnams/ /rnam par mi rtog shin tu 'byung / /de bzhin sangs rgyas sangs rgyas nyid/ /ces gsungs pa lta bu'o/ /mjug bsdu ba'i phyir/ bcom ldan 'das kyis de skad ces bka' stsal pa dang / byang chub sems dpa' nam mkha'i snying po la sogs pa 'khor thams cad rab tu dga' nas bcom ldan 'das kyis gsungs pa la mngon par bstod do zhes pa go sla bas ma bshad do/ /shes rab dang ldan gang dag cig /'khor gyi rgya mtsho skad cig gis/ /sgrol byed mdo sde 'di bshad pas/ /'gro kun rang sems rtogs par shog /'phags pa 'da' ka ye shes kyi mdo'i rnam par bshad pa/ slob dpon pradz+nyA sa mu dras mdzad pa rdzogs so// //