CLOSE WINDOW

D4002
བོད་ཡིག

/bsod nams kyis ni skye bo kun/ /chos don zab mo rtogs 'jug shog /'phags pa sA lu ljang pa'i mdo sde rgya cher 'grel pa slob dpon ka ma la shI las mdzad pa rdzogs so//[ @##/ /rgya gar skad du/ gA thA dwa ya byA khyA na/bod skad du/ tshigs su bcad pa gnyis pa'i bshad pa/ sangs rgyas dang byang chub sems dpa' thams cad la phyag 'tshal lo/ /sems ni mnyam par ma bzhag pa/ /da lta nyi tshe mthong ba rnams/ /theg pa chen po zab mo la/ /chen por 'phar bar ji ltar 'gyur//'on kyang rten la gnas bcas dang / /snga nas dge la goms byas pa'i/ /bsod nams kyis ni 'jig rten rnams/ /rnam pa kun mkhyen thob par 'gyur/ /sangs rgyas dang ni chos la brnyas pa dang / /le lo dang ni cung zad chog par 'dzin/ /'dod chags dang ni nga rgyal dpyod pa dang //'gyod pa dang ni ma nges 'byed pa rnams/ /sems can rnams kyi sgrib par 'gyur ba ste/ /de yi gnyen po theg pa mchog bstan pa/ /de yis bar du gcod pa de dag gi/ /nyes pa thams cad rab tu spang bar 'gyur/ /tshigs su bcad pa 'di gnyis theg pa chen po'i mdo sde phan tshun 'gal ba rnams kyang dgongs pa rnam pa bzhis sems can rnams kyi sgrib pa rnam pa brgyad spang ba'i phyir gnyen po la ldem por dgongs pa bstan pas mi 'gal bar khong du chud par bya'o//de la bcom ldan 'das kyis mdo las/'phags pa rnam par gzigs kyi sangs rgyas kyi sku tshe la sogs pa phun sum tshogs pa bsngags pa ni kha cig 'dod pa bskyed pa'i phyir yin la/ de la kha cig gis 'phags pa shAkya thub pa la brnyas pa'i sems bskyed de/ de bzhin gshegs pa gzhan dag ni bsod nams rdzogs pas mchog tu che bar grags pa yin la/bdag cag gi de bzhin gshegs pa 'di ni bsod nams chung bas na chung bar grags te/ 'di ltar 'di ni sku chung zhing sku tshe thung la 'od 'dom gang ba ste/ mu stegs can mang po dang / lha sbyin la sogs pa'i dgra yod pa dang /'di'i zhing g.yang sa dang mi gtsang ba dang / gseg ma dang / gyo mo dang / rdo dang / ri la sogs pas gang bar gyur to snyam pa de yang sgrib pa yin te/ yon gnas chen po 'jig rten gyi yid bzhin gyi nor bu lta bur dad par bya ba'i gnas kyi mchog la ni sems kyi nyes pa chung ngu bskyed pa yang ngan song gi rgyur 'gyur ba dang /de'i bstan pa ltar ma byas na/ mtho ris dang thar pa thob pa la gegs su 'gyur ba'i phyir te/ de bas na gdul bya rnams kyi sangs rgyas la brnyas pa'i bar du gcod pa'i nyes pa de yongs su gzhug pa'i phyir/ de bzhin gshegs pa thugs rje nas theg pa mchog bstan pa 'di gsungs te/ de'i tshe de'i dus na/ nga nyid yang dag par rdzogs pa'i sangs rgyas rnam par gzigs zhes bya ba de gyur to zhes bya ba lta bu'o/ /de ni mnyam pa nyid la dgongs nas gsungs te/ 'di ltar chos kyi sku gang yin pa de ni sgrib pa thams cad rnam par dag pa'i ngo bo nyid stobs dang /mi 'jigs pa dang / mngon par shes pa dang / tshad med pa la sogs pa'i yon tan mtha' yas pa dang ldan pa yin te/ mnyam pa nyid des na sangs rgyas nyid thams cad cung zad kyang khyad par med do/ / sde pa'i mdo sde las kyang / tshogs dang chos kyi sku dag dang / /'gro ba'i don ni spyod pa yis/ /sangs rgyas thams cad mnyam pa nyid/ /sku tshe rigs dang sku tshad min/ /zhes gsungs so/ /chos la brnyas pa zhes bya ba la/ chos ni gsung rab yan lag bcu gnyis so/ / de la kha cig gis brnyas te/ bud med dang phal pa dang thun mong du gyur pa/ mchog tu sla ba/ nyes par bshad pa/ las dang 'bras bu la skur pa 'debs pa/ rtog ges sbyar ba/ skye bo ngan pa mngon par dga' ba/ rnyed sla ba 'di ci dgos snyam pa de yang sgrib pa yin te/ sman gyi rgyal po bzhin du 'dod chags la sogs pa thams cad rab tu zhi ba'i thabs ston pa dang / 'gro ba thams cad kyi kun nas nyon mongs pa'i nad thams cad zad par bya ba'i phyir/ nye bar gnas pa la brnyas pa ni ngan song gi rgyur gyur pa dang / mi nyan pa la sogs pa dang / de la ma brten pas nad med pa'i mchog la gegs su 'gyur ba'i phyir te/ de bas na bar du gcod pa'i nyes pa de zlog pa'i phyir theg pa mchog 'di bstan te/ de bzhin gshegs pa gang gA'i klung gi bye ma snyed la bsnyen bkur byas na theg pa chen po la shes pa skye bar 'gyur ro zhes 'byung ba lta bu'o//'o na da ltar gyi mang du thos pa rnams kyis kyang mi rtogs pa ma yin la/ sangs rgyas gcig la bsnyen bkur byas pa'i mtshan ma 'di dag la med pas 'gal lo zhe na/ de yang don gzhan la dgongs nas gsungs te/ don dam pa zag pa med pa'i ye shes rtogs pa'i don gzhan la dgongs te gsungs pa yin la/de yang bskal pa grangs med pa gcig gi bar du sangs rgyas mang po 'byung ba mnyes par byas nas gdod rab tu dga' ba'i sa'i gnas skabs skye ba'i phyir 'gal ba med do/ /de la le lo zhes bya ba ni 'dod pa spyod pa ma yin/ 'jig rten gyi bya ba mang po'am/ bdag khyad du bsad de/ gnas 'di ni skyes bu byed pa'i rtsal chen pos sgrub dgos la/ de la ni bdag gis mi nus so snyam nas dge ba'i phyogs la spro ba med pa de yang bde 'gro dang / byang chub gsum po rtogs par bya ba sgrib pa yin no/ /de'i gnyen por theg pa mchog 'di bstan te/bde ba can du smon lam 'debs pa gang yin pa de dag ni des skye bar 'gyur ba dang / rin chen mang gi mtshan brjod pa tsam gyis bla na med pa yang dag par rdzogs pa'i byang chub tu nges par 'gyur ro zhes bya ba la sogs pa mang du 'byung ngo //'di la yang 'gal ba yod de/ bde ba can du ni sa la zhugs pa'i byang chub sems dpa' skye bo zhes gzhan las gsungs la/ blo ma sbyangs pa mang po dag kyang der smon lam 'debs pa dang / byang chub tu nges par chud pa ni mi g.yo ba'am/ rab tu dga' ba la gnas pa yin la/rin chen mang gi mtshan ni bdag cag la sogs pa yang brjod na/ de ji lta bu zhig ce na de ni le lo can rnams la khyad par du 'phags pa'i 'bras bu yang dag par bstan pas/ re zhig de'i sa bon du gyur pa'i dge ba chung ngu tsam la yang 'jug par bya ba'i phyir/ dus gzhan la dgongs nas bstan te/de dag der smon pa'i sems kyis sems kyi rgyud sgom na/ de dang mthun pa'i dge ba la mngon par dga' ba'i phyir/ de ston pa'i sangs rgyas la sogs pa bshes gnyen mchog mnyes par bya ba lhur len te/ tshe rabs re rer bsod nams dang ye shes kyi tshogs mang po rdzogs par byed pa nas/mthar bskal pa grangs med pa dang po la 'phags pa'i sa thob kyi bar du dus gzhan du der skye bar 'gyur ro/ /de bas na 'di ltar de tsam gyis skye ba yang ma yin la/ des ma skyes pa yang ma yin te/ dge ba thams cad skye ba ni de la rag las pa'i phyir ro//dper na 'bras bu 'byung ba ni sa bon dang / myu gu dang / lo ma dang / sbu gu dang / sdong bu dang / me tog dang / sa dang / chu dang / dus tshigs dang / rlung dang / nyi ma la rag las mod kyi/ 'on kyang sa bon dag la skyes so zhes zer te/ myu gu la sogs pa de la rag las te skyes pa'i phyir dang /gtso bo yin pa'i phyir te/ 'dir yang de dang 'dra'o/ /cung tsam chog par 'dzin zhes bya ba ni/ dge ba chung ngu bsags pa tsam gyis chog par 'dzin pa gang yin pa ste/ sbyin pa tsam mam/ tshul khrims tsam mam/ bzod pa tsam gyis bdag ni 'di tsam gyis chog ste/de las mi dgos so snyam pa de yang bla na med pa'i byang chub la sgrib pa yin te/ 'di ltar de ni de 'jig rten pa dang 'jig rten las 'das pa'i bsod nams dang ye shes kyi tshogs ma lus pa thams cad yongs su rdzogs pas thob par bya ba yin pa'i phyir ro/ /de bas na de bzhin gshegs pa'i spu'i khung bu gcig 'grub par byed pa yang /dge ba rgya mtsho dpag tu med pas bya dgos na/ de ji ltar le los thob par nus te/ zan tsam gyis chog par 'dzin cing / rang gi khyim du mngon par dga' ba rnams kyis ni/ seng ge'i khri la mngon par 'jug mi nus so//de bas na bar du gcod pa de'i gnyen por theg pa mchog 'di bstan te/ gzhan las bcom ldan 'das kyis sbyin pa bsngags nas/ yang smad par mdzad la/ de bzhin du tshul khrims bsngags nas/ gzhan la smad pa mdzad de/ pha rol tu phyin pa thams cad la yang de bzhin du sbyar ro//'di la yang snga phyi 'gal ba yod de/ gal te sbyin pa yon tan can zhig yin na/ ci'i phyir smad ce na/ gang zag gi bsam pa la dgongs nas gsungs pas na 'gal ba med de/ ser sna can ha cang 'jungs ches pa gang yin pa de dag sbyin pa la 'jug par bya ba'i phyir sbyin pa'i bsngags pa mdzad de/sbyin pa ni phyi bzhin 'brang ba'i gter chen po gtan gyi bshes gnyen gyi mchog go/ /gos sbyin pa la yon tan bcu yod do/ /zas sbyin pa la yon tan bcu yod do/ /zhes bya ba la sogs pa mdo dag las mang du 'byung ste/de yang med pa ma yin na 'on kyang de tsam gyis chog par 'dzin te/ tshul khrims dang / thos pa la sogs pa'i tshogs la mi 'jug pa gang yin pa de dag la ni smad par mdzad de/ 'khor ba'i sdug bsngal gyi 'bras bu can dang / zag pa'i chos can gyi sbyin pa ni mi dgos so//sbyin pa dang ldan pa yang tshul khrims 'chal na ngan song dag tu skye bar 'gyur te/ tshul khrims ni mtho ris kyi rgyu yin pa'i phyir gtso bo yin no/ /yon tan thams cad bskyed pa'i rgyu yin pa'i phyir sa gzhi lta bu yang yin no/ /thos pa yang de dang 'dra ste/ ye shes gsal ba'i rgyu yin pa'i phyir nyon mongs pa'i nad rab tu zhi bar byed pa zhes bya ba la sogs pa lta bu ste/de bas na 'di ltar sbyin pa la sogs pa yang kha cig gi sgo nas ni skyon yang yin la/ kha cig gi sgo nas yon tan yang yin te/ gdul bar bya ba'i bsam pa la ltos nas dgongs pa'i dbang gis bstan pa'i phyir de bzhin gshegs pa rnams la nyes pa med de/'di ltar sman pas mkhris pa'i rims kyis thebs pa la ni 'o ma dang kha ra bsngags la/ bad kan gyi rims kyis thebs pa la ni smad pa dang 'dra ba'i phyir ro/ /'dod chags dang ni nga rgyal spyod pa dang zhes bya ba la 'dod chags la spyod pa ni ma 'ongs par 'dod chags kun du spyod pa'o//de bzhin du nga rgyal la spyod pa yang nga rgyal kun du spyod pa ste/ 'di gnyis kyang so sor sgrib pa yin no/ /de la khyim dang / zhing dang / bu dang / chung ma dang / nor dang / 'bru dang /gos dang / rgyan dang / glang po che dang / rta la sogs pa phun sum tshogs pa dag la ha cang chags pas de dag spangs te/ dge ba yang dag par mi len pa gang yin pa de dag ni de las nges par 'byung ba'i bsam pa dang / rab tu 'byung ba dang / byang chub kyi phyogs la sgom pa la bar du gcod par byed pa'i phyir sred pa spyod pa sgrib pa yin no//bar du gcod pa de'i gnyen po theg pa mchog 'di bstan te/ gzhan las sangs rgyas kyi zhing rnam par dag pa 'di lta ste/ bde ba can gyi bkod pa la sogs pa shin tu bsngags te/ de dag gis ma mthong ma thos pa'i 'byor pa rgya chen po de thos nas/rang gi phun sum tshogs pa la phongs pa kho nar 'dzin to/ /de nas der yid smon par byed de de dag thams cad bor nas de thob par bya ba'i phyir 'bad par 'gyur bas na/ de ni gang zag gi bsam pa la dgongs nas gsungs so/ /de la mi dang /lha dang / lha ma yin la sogs pa gang dag kha dog dang / stobs dang / mthu dang / 'od dang / skal ba dang ldan pa dang / skad kyi gdangs snyan pa dang / ldog skyen pa dang / shes pa dang / rigs dang / tshe dang / longs spyod dang / 'khor la sogs pa phun sum tshogs pa'i sgo nas bdag dang mtshungs pa ma mthong nas nga rgyal gyis khengs shing myos te/de bzhin gshegs pa la bsnyen bkur mi byed pa de dag ni nga rgyal spyod pa ste/ de ni phun sum tshogs pa thams cad kyi rgyu de bzhin gshegs pa 'byung ba mnyes par bya ba dang / byang chub tu smon lam 'debs pa la sgrib pa yin te//de bas na bar du gcod pa'i nyes pa de'i gnyen por theg pa mchog 'di bstan te/ gzhan las bcom ldan 'das kyis sangs rgyas gang gi phun sum tshogs pa lhag par bsngags pa mdzad de/ de bzhin gshegs pa 'phags pa 'od dpag med ces bya ba de'i sku tshe dpag tu med do//rang bzhin gyi 'od kyi dkyil 'khor yang dpag tu med do/ /de bzhin du sangs rgyas gzhan dag gi sku dang / snod phun sum tshogs pa rnams kyi bsngags pa mdzad do/ /de nas de dag gis de thos nas bdag cag pas kyang ches rgyang chad pas khyad du 'phags pa'i de bzhin gshegs pa rnam pa thams cad du mdzes pa dag kyang yod do snyam nas nga rgyal gyi ri grum ste/blo yon tan bskyed pa'i snod du 'gyur ro/ /'gyod pa ni yid la gcags pa ste/ yon tan dang ldan pa rnams dang / phan 'dogs pa rnams la gnod pa byas nas phyis ci zhig ltar yid la gcags par 'gyur te/mya ngan gyi zug rngu de kho nas yun ring por sems mi bde zhing yid 'khrugs la/ lus shig shig por gyur cing ro bzhin du 'dug la/ bsod nams bya ba btang ste sa la nyal nas rang gi lus kyi bsam pa la yang spro ba med par 'dug pa gang yin pa de dag gi 'gyod pa de ni bshags pa dang /bsdam par bya ba dang / bsod nams la sbyor ba la bar du gcod par byed pa'i phyir sgrib pa yin te/ shes rab can gyis ni bdag cag gi 'di ma legs so snyam du rig nas/ de'i 'og tu bshags pa dang /bsdam par bya ba dang / dge ba'i rtsa ba rnam pa sna tshogs mang po'i sman gnod sel la goms pas zad par byed cing / ma byas pa la yang dran pa dang / shes bzhin dang / skyes bu dam pa la mnyan pa la sogs pa dang / bsten pa la sogs pa mi bya bar bsgrim par byed do//'phags pa dpa' bos gsungs pa'i skyes rabs las kyang / yid chad rgud pa'i ngo lon thabs ma yin/ /de phyir mi dgar 'dzin pa gtang bar bya/ /dgos pa sgrub la mkhas rnams sran thub pas/ /dka' ba rnams kyang dga' ba med par rgal//de phyir yid chad mi dga' spangs nas ni/ /don gyi skabs dbye ba la bsnyen par gyis/ shes pa'i gzi byin sran gyis spar ba ni/ /don kun grub 'dzin lags pa'i mchog yin no/ /zhes gsungs pa lta bu'o/ /de bas na de'i yun ring po'i 'gyod pa chen po'i bar du gcod pa'i nyes pa de'i gnyen por theg pa mchog 'di bstan te//sangs rgyas dang byang chub sems dpa' rnams la ni gnod pa byed pa gang yin pa de dag thams cad kyang mtho ris su 'gro bar 'gyur ro zhes 'byung ste/ 'di ni gang zag gi bsam pa la dgongs nas gsungs te/ gang zag la la ni shin tu 'gyod pa'i dug gis brgyal ba'i bsam pa can gyi 'gyod pa de las 'byung bar 'gyur ba de la dgongs nas gsungs pa'i phyir ro//gnod pa byas pas ji ltar mtho ris su skye bar 'gyur zhe na/ de kho nas skye bo zhes mi zer te/ 'on kyang de'i rgyu las byung ba'i 'gyod pa la sogs pa dge ba spel bar byed pas skye bar 'gyur ro//gzhan yang de dag la gnod pa byed pa'i tshe nges par de mthong ba dang / thos pa dang / dran pa dang / 'grogs pa la sogs par 'gyur la/ sangs rgyas dang byang chub sems dpa' rnams ni/ gzhi de dag tu don yod pa yin te/'phags pa de bzhin gshegs pa 'byung ba srid pa bstan pa las kyang / kye rgyal ba'i sras de bzhin gshegs pa mthong ba dang / thos pa dang / dran pa dang / reg pa dang / 'grogs pa'i dge ba'i rtsa ba don yod par shog cig ces 'byung ba lta bu yin no/ /de ni chos nyid yin pas ci byar yang med de/gnod pa byed pa la yang phan par 'gyur ba yod do/ /'phags pa gdon mi za ba'i zhags pa'i snying po las/ dper na mi la las tsan dan dang / gur kum dang / ga bur dang / gla rtsi yang rung ste/ spyos shing mtshang brus nas lus la byugs kyang / tsan dan la sogs pa 'di snyam du 'dis bdag spyos kyis 'di la dri zhim par mi bya'o snyam du mi sems te/ rtog pa ma mchis pa'i slad du chos nyid kyis dri zhim po kho nar bgyid lags so/ /bcom ldan 'das de bzhin du bdag gis gdon mi za ba'i zhags pa'i snying po yang khros te dran nam/bton kyang de la yang bsrung ba dang / bskyab pa dang / sbed par 'gyid pa lags so zhes bya ba la sogs pa 'byung ba lta bu yin no/ /bcom ldan 'das kyang sngon dge ba'i rtsa ba dang / smon lam la sogs pas bdag nyid de lta bur yang dag par sbyangs te/ khyod kyis legs par spyad rnams kyis//ci nas bdag nyid rgyas par mdzad/ /ces gsungs pa lta bu yin no/ /de bas na de'i 'bras bu zad nas dus gzhan du rgyu de kho nas mtho ris su 'gro bar 'gyur te/ dper na bcud kyis len la la'i rang bzhin gang gi cho dang po zos na mgo 'khor ba dang /ngal ba dang / brgyal ba dang / skyug pa dang / 'khru ba dang / lus la srin bu 'byung ba dang / skra dang spu 'byi ba dang / so ldeg pa dang / sen mo 'byung ba la sogs pa'i sdug bsngal rnam pa mang po bskyed nas phyis yun ring mo zhig na snod bcud kyis len du 'gyur ba lta bu ste/de bzhin du 'di yang dgongs te gsungs pa yin no/ /'o na de lta na ni gnod pa byas pa kho nar 'gyur te/ 'di ltar dgongs pa ma shes nas 'khrul pa de dag mtho ris 'dod pas rgyun mi 'chad par de dag la/ gnod pa bya ba 'ba' zhig la 'jug par 'gyur te/de ltar na snang ba bya'o snyam pa las mun pa byas pa kho nar 'gyur ro zhe na/ de ltar mi 'gyur te/ 'di na thabs su 'gyur ro/ /de bas na ches che ba'i mchog tu dga' ba'i zug rngu gzhan zhig gis ma byas kyi bar du mya ngan gyi zug rngu tshabs po che las 'byung bar mi nus te/ mya ngan gyi gnyen po ni dga' ba yin pa'i phyir ro/ /de bzhin gshegs pa rnams kyis kyang / de'i tshe gdul bar bya ba de'i mchog tu dga' ba'i de lta bu gzhan ma gzigs te/ sdig pa de bkru ba'i phyir ro snyam du dgongs nas de skad gsungs par zad do/ /de 'gyod pa'i sgrib pa dang bral nas chos ston pa'i snod du rung bar byas la/de nas de bzhin du de la chos ston te/ des na las dang 'bras bu la yid ches pa bskyed pas legs par spyod pa 'ba' zhig la 'jug par 'gyur te/ de bzhin gshegs pa rnams kyis ni snga nas kyang mya ngan gyi zug rngu 'di bsal nas/ las dang 'bras bu la skur pa 'debs pa'i zug rngu 'byin par byed pa'i zug rngu 'di nyid kyang dbyung du rung ngo snyam du mkhyen to//dper na mdzes ldan ma la shas cher chags pas mi sdug pa'i ting nge 'dzin mi nus nas de bas khyad par du 'phags pa'i lha'i bu mo la kun du chags pa bskyed pas de bsal nas phyis de yang thabs gzhan gyis bsal te/ gtan du thams cad las 'dod chags dang bral ba'i bar du mdzad pa lta bu'o//dper na sbrul gyis zin pa la sngags mkhan gyi dug 'dis 'gro ba'i dug 'di nges par bsal nas/ dug de nyid kyang med par 'gyur ro snyam du gdeng bcas dug zar bcug pa lta bu ste/ de bzhin gshegs pa rnams kyang de dang 'dra'o//de bzhin du 'phags pa dkon mchog sprin gyi mdo las kyang / sems can gang mtshams med pa byed pa de shin tu sdug bsngal ba byang chub sems dpas mthong na/ de la 'di skad du ma bsad pa 'dis thams cad nges par ngan song du skye ba ma yin no zhes zer ba la sogs pa gsungs pa lta bu'o//ma nges 'byed pa zhes bya ba ni ma nges pa rnams 'byed pa rnams ldog pa'o/ /gang las she na/ byang chub chen po las te/ rigs ma nges pa'i byang chub sems dpa' gang dag pha rol tu phyin pa rnams la mi brtson pa/ bsam pa mi brten pa skad cig re re la sems can gyis log par sgrub pa'i sdug bsngal drag pos bskyod pas nyan thos la sogs pa'i mya ngan las 'das pa 'dod par byed pa rnams dang /nyan thos la sogs pa'i rigs su ma nges pa gang dag theg pa de la 'bad pa de ni de dag gi 'gro ba thams cad du thogs pa med pa'i dbang dang ldan pa'i byang chub chen po'i seng ge'i khri la 'dug pa la sgrib pa yin no//de bas na bar du gcod pa'i nyes pa brgyad pa 'di'i gnyen por nyan thos chen po rnams sangs rgyas su lung bstan pa bshad pa dang / theg pa gcig bshad pa'i theg pa mchog 'di bstan te/ de dag gis de thos nas 'di snyam du sems te/nyan thos kyi theg pas thag ring du song yang theg pa chen po kho na la 'jug dgos na nyis las 'di ci dgos thog ma nyid nas 'dir zhugs pa sla'o snyam ste/ 'di skad du mdo sde'i rgyan las/ kha cig drang ba'i phyir dang ni/ /kha cig yongs su gzung ba'i phyir//rdzogs pa'i sangs rgyas rnams kyis ni/ /ma nges rnams la theg gcig bstan/ /zhes gsungs pa lta bu'o/ /'di la brdzun du smra ba'i nyes par yang mi 'gyur te/ snying rje chen pos 'gro ba'i don sgrub pa dang / gnod pa bsal ba'i bsam pa can yin pa'i phyir ro//'di la su yang brid pa yang med de/ gnas brtan de dag gis kyang / bdag cag ni sangs rgyas su mi 'gyur mod gyi/ 'on kyang bcom ldan 'das kyis de la dgongs nas ston par mdzad do snyam du shes te/ de dag thams cad zlos gar mkhan gyis 'gro ba dga' bar byed pa bzhin du brda byas pa yin la/brdzun du smra ba ni 'drid pa'i bdag nyid yin pa'i phyir ro/ /gcig tu ni de dag ni byang chub sems dpa' nyid yin te/ nyan thos kyis gdul bar bya ba'i sems can rnams la phan par bya ba'i phyir de'i cha lugs byas par zad de/ don de kho na'i phyir de las gzhan pa'i de bzhin gshegs pa rnams kyis 'jig rten gyi khams gzhan dag nas bskul nas/de lta bu'i cha lugs can gyi byang chub sems dpa' rnams 'ongs pa yin no/ /nyan thos dang byang chub sems dpa' rnams ni bdag med par mnyam pa nyid kyis tha mi dad pa'i phyir dang /mthar phyin pa yin pa'i phyir yang theg pa gcig par bstan to dper na la la na re rgyal po ni 'di lta ste/ 'khor los sgyur ba gcig pur zad de/ phun sum tshogs pa thams cad kyis mthar phyin pa'i phyir dang / de'i gang na rje dpon med pa'i phyir ro zhes zer na/'on kyang rgyal phran la sogs pa med pa ni ma yin no/ /de bzhin du theg pa ni gcig kho na ste/ 'di lta ste/ theg pa chen po gcig tu zad de/ bgrod par bya ba thams cad kyis phun sum tshogs pa'i mthar phyin pa'i phyir dang / de'i gang na khyad par du 'phags pa med pa'i phyir ro//theg pa gzhan ni yod du zin kyang bgrod par bya ba lhag ma yod pa dang gong na yod pa lta ci dgos zhes bstan to/ /sems can rnams kyi sgrib pa zhes bya ba ni/ ji skad bstan pa'i sangs rgyas la brnyas pa la sogs pa rnam pa brgyad do/ /de'i gnyen po zhes bya ba ni sgrib pa de nyid kyi gnyen po ste/de dag kyang gang zhe na theg pa mchog bstan pa'o/ /theg pa mchog gi theg pa mchog ste/ pha rol tu phyin pa drug dang / byang chub po/ /de bstan pa ni theg pa chen po'i mdo sde rnams yang dag pa dang thams cad bstan pa ste bstan zhes bya ba'i tshig gsal ba yin no zhes 'byung ba'i phyir ro//de'i gnyen por 'gyur ba'i gtan tshigs su gang gi phyir/ de'i bar du gcod pa de dag gis nyes pa thams cad rab tu spang bar 'gyur zhes gsungs pa de'i phyir theg pa mchog bstan pa ni/ de'i gnyen po yin no zhes bya ba'i tha tshig go//bar du gcod pa ni gags byed pa'o/ /bar du gcod pa nyid nyes pa yin pas bar du gcod pa'i nyes pa'o/ /de dag ni thams cad kyang yin la/ bar du gcod pa'i nyes pa yang yin pa'i phyir/ bar du gcod pa'i nyes pa thams cad ces tshig rnam par sbyar bar bya'o/ /spong ba ni zad pa'o//gang dag gi zhe na/ ji skad bstan pa de dag nyid kyi'o/ /gcig tu na de dag gi zhes bya ba ni 'dod pa la sogs pa rnams kyi ste/ bar du gcod pa'i nyes pa brgyad po bstan pa gang yin pa'o zhes sbyar bar bya'o/ /de ma yin pa'i tshigs su bcad pa gsum gyis ni tshigs su bcad pa 'di gnyis kyi phan yon bstan te/tshigs su bcad pa gnyis kyi gzungs la ni/ /tshig gam don gyi sgo nas gang sbyar ba/ /sems can dam pa blo dang ldan pa de/ phan yon rnam pa bcu dag thob par 'gyur/ /khams rnams mtha' dag rgyas par 'gyur ba dang / /'chi ba'i tshe na mchog dga' dam pa 'thob//ji ltar 'dod pa bzhin du skye ba dang / /thams cad du ni tshe rabs dran par 'gyur/ /sangs rgyas rnams dang phrad par 'gyur ba dang / /de bzhin de dag las ni theg mchog thos/ /mos par 'gyur ba blo dang bcas pa dang / /sgo gnyis dang ni byang chub myur du 'thob/ / tshigs su bcad pa dang po'i don ni tshigs su bcad pa gnyis pa 'di nyid kyi don ma rtogs kyang tshig tsam shes pa dang / tshig mi shes kyang don tsam shes pa'i phan yon rnam pa bcu bstan to/ /de lta bu theg pa chen po'i dgongs pa zab mo ston pa mtha' dag ni sems can tha mal pa'am/blo zhan pa dag gis ni shes par mi 'gyur ba'i phyir sems can dam pa blo dang ldan pa zhes gsungs te/ sems can thams cad kyi dam par ni byang chub sems dpa'i rigs can yin la/ de yang gal te blo dang ldan pa dang / blo sbyang ba zhig yin na/ gdod des 'di yang dag par shes par 'gyur gyi/gzhan gyis ni ma yin no/ /de la khams rnams mtha' dag rgyas par 'gyur ba ni phan yon gcig ste/ khams rgyas pa ni brtas par 'gyur ba'o/ /khams rnams ni sa bon rnams so/ /mtha' dag ni ma lus pa'o/ /'di skad ces bya ba yin te byang chub kyi sems dang /pha rol tu phyin pa dang sa bcu dang / byang chub kyi phyogs dang / stobs la sogs pa'i rang bzhin can gyi theg pa chen po thams cad kyi sa bon gang yin pa rnams ni byang chub sems dpa'i rigs la rag las la/ de dag kyang tshigs su bcad pa gnyis la goms pa 'dis rang gi 'bras bu bskyed pa la mngon du phyogs par byed de/de ni de dang ldan pa'i ston pa'i dgongs pa ldem por dgongs pa sdud pa yin pa'i phyir ro/ /dper na 'dod chags dang ldan pa'i snyan ngag gi tshig las 'dod chags kyi sa bon brtas par 'gyur ba dang 'dra'o/ /gcig tu ni theg pa chen po'i mdo sde ma lus pa'i yul la mos pa gang yin pa ste/re zhig khams de rgyas pa tsam 'thob pa'o/ /'chi ba'i tshe na mchog dga' dam pa 'thob/ /ces bya ba la/ mchog tu dga' ba ni mgu ba'o/ /dam pa ni dge ba rgya chen po yin pa'i phyir ro/ /de 'chi ba'i tshe nges par sangs rgyas dang byang chub sems dpa' rnams kyi yon tan rjes su dran pa dang /dam pa'i chos 'dzin pa dang / sangs rgyas dang / de'i sras dang / bde 'gro'i rtags la sogs pa mthong ba'i phyir ram/ gnad 'chad pa med pa'i phyir dga' ba skye ba ni gnyis pa ste/ de gnyis ni tshe 'di nyid kyi yin par rig par bya'o//lhag ma brgyad ni tshe rabs gzhan dag tu mthar gyis dge ba'i tshogs sogs pa yin no/ /ji ltar 'dod pa bzhin du skye ba zhes bya ba ni gsum pa'o/ /thams cad du ni tshe rabs dran par 'gyur/ /zhes bya ba ni bzhi pa ste/ thams cad du zhes bya ba tshe rabs thams cad du'o//sangs rgyas rnams dang phrad par 'gyur ba ni lnga pa'o/ /de bzhin de dag las ni theg mchog thos/ /zhes bya ba ni drug pa ste/ de bzhin zhes bya ba ni ji ltar tshe rabs thams cad du skye ba dran pa de bzhin du sangs rgyas rnams dang phrad pa dang theg pa chen po thos pa yang de dang 'dra bar 'gyur ro//mos par 'gyur ba zhes bya ba ni 'dun pa'o/ /mos pa ni dad pa ste/ 'di ni 'di lta bu yin gyi gzhan ni ma yin no zhes nges par 'dzin pa'o/ /de yang sgrib pa thams cad dang bral ba'i phyir theg pa chen po'i chos zab mo yang dgongs pa ldem por dgongs pa rtogs pas mos pa skye bar 'gyur ro//blo dang bcas pa zhes bya ba ni brgyad pa ste/ mos pa blo dang bcas pa thob par 'gyur gyi gcig pu ni ma yin no/ /de la blo ni theg pa chen po'i chos dang de ma yin pa'i bstan bcos la sogs pa phyin ci ma log par khong du chud pa'o//sgo gnyis zhes bya ba ni dgu pa ste/ 'di la sgo gnyis yod pas na gang zag sgo gnyis pa'o/ /de'i ngo bo nyid ni gnyis pa ste/ de yang gang zhe na/ ting nge 'dzin gyi sgo rnams dang / gzungs kyi sgo rnams te/ de dang ldan pas na sgo gnyis pa'o/ /de la ting nge 'dzin ni mtha' yas te/byang chub sems dpa' dag gis nam mkha'i mdzod dang / lag na rin chen dang / gzugs thams cad kun du ston pa la sogs pa'o/ /de dag gi sgo ni de dag mngon par sgrub pa'i thabs te/ bsam gtan dang gzugs med pa rnams so/ / gcig tu na ting nge 'dzin ni bsam gtan dang / gzugs med pas bsdus pa ste/ de nyid sgo dang / kha dang / thabs yin no/ /gang gi zhe na/ yon tan thams cad mngon par sgrub pa yin no/ /gzungs ni rnam pa gnyis te/ tshig gi gzungs dang / don gyi gzungs so//de yang gang zhe na/ dran pa ste/ 'dis tshig dang / don 'dzin pa'i phyir ro/ /de'i sgo ni yi ge rnams te/ 'di ltar yi ge'i 'bru gcig tu mdo sde 'bum pa rnams bsdus nas 'dzin pa'i phyir ro/ /gcig tu na gzungs nyid brjed ngas pa med pa'i sgo yin no/ /yang na 'dzin pa nyid gzungs yin te/de yang gang zhe na/ brjed ngas pa med pa'o/ /de'i sgo yang dran pa nyid do/ /byang chub myur du 'thob ces bya ba ni phan yon bcu pa ste/ myur du bla na med pa yang dag par rdzogs pa'i byang chub 'thob pa'o/ /ci'i phyir zhe na/ dgu po 'di dag nyid kyi phyir te/gang gi phyir khams thams cad rgyas pa nas sgo gnyis 'thob par 'gyur ba'i bar gyi phyir te/ de dag ni byang chub bskyed pa yin pa'i phyir ro/ /de bas kyang de mjug tu smos te/ khams rgyas na mchog tu dga' ba dam pa 'thob bo/ /de bas na de bzhin du dge ba'i bsam pas 'chi ba na gar 'dod par skye ba'o//ji ltar smon pa bzhin du skye ba grub na tshe rabs dran par 'gyur ro/ /tshe rabs dran pas de bzhin gshegs pa la bskyed pa'i dge ba'i rtsa ba don yod par mngon sum du gyur nas/ sangs rgyas kyi zhing thams cad du 'gro bar 'gyur ro//sangs rgyas 'byung ba med na yang de dang phrad pa'i smon lam 'debs pa'i phyir sangs rgyas dang phrad par 'gyur ro/ /de nas de la theg pa chen po thob par 'gyur ro/ /de nas de'i 'og tu mngon sum du thos nas/ skyes bu 'di ni ye shes chen po dang ldan no snyam du the tshom med par mos par 'gyur ro//mos pa drag po rgyun mi 'chad par chos yongs su tshol ba lhur len pas blo rnyed par 'gyur ro/ /blo rnam par dag na sgo sgrub par byed do/ /de nas nam mkha' mdzod la sogs pa'i ting nge 'dzin la brten nas sbyin pa la sogs pa'i tshogs yongs su rdzogs par byed pa dang /gzungs la brten nas skad cig re re la de bzhin gshegs pa thams cad kyis gsungs pa 'dzin pa dang / 'chang bas ye shes kyi tshogs mang po kun du rdzogs par byas te/ thams cad mkhyen pa gang chen mtshor 'gyur ro/ /tshigs su bcad pa gnyis pa'i bshad pa slob dpon chen po mdzes bkod kyis mdzad pa rdzogs so/