CLOSE WINDOW

D3997
བོད་ཡིག

@##/ /rgya gar skad du/ Ar+ya bud+d+ha b+hU mi byA khyA na/ bod skad du/ 'phags pa sangs rgyas kyi sa'i rnam par bshad pa/ sangs rgyas dang byang chub sems dpa' thams cad la phyag 'tshal lo/ /gang dag chos dbyings ma lus thugs su chud gyur la/ /tshig gam yang na blo yis brjod par mi nus kyang //sa yi yon tan nyid skyes rnams la de 'chad pa/ /yon tan 'byung gnas de dag rnams la phyag 'tshal te/ /bla ma rnams kyi dgongs pa yid ches dag mthong nas/ /gang dag bdag pas blo zhan rnam par rmongs pa rnams/ /de dag rnam par dag pa mchog rab skyed pa'i phyir//thub pa rnams kyi sa ni rnam par dgrol bar bya/ /sangs rgyas zhing ni phun sum tshogs/ /yon tan dang ni phun sum tshogs/ /sangs rgyas sa rnams gzhag pa ste/ /de ltar mdo don bsdus pa yin/ /chos nyid ye shes me long dang //mnyam pa nyid dang so sor rtog /bya ba sgrub pa'i ye shes ni/ /sa yi bsdu ba nges pa yin/ /grangs rnams dang ni ming nyid dang / /bsdu dang rab tu dbye ba dang / /ye shes rdzogs la bye brag gis/ /sangs rgyas kyi ni sa bshad do/ /mdo sde 'di las/ mdor na bcom ldan 'das kyi gnas phun sum tshogs pa dang /yon tan phun sum tshogs pa dang / 'khor phun sum tshogs pa dang / sa rnam par gzhag pa yongs su bstan te/ gang na ci 'dra ba zhig ji lta bu dag dang bzhugs pa dang / sa ji ltar rnam par gzhag pa de rim gyis bstan pa'i phyir ro//gang zhe na/ gzhal med khang chen po na ste/ de'i phun sum tshogs pa ni rin po che sna bdun mchog tu 'bar ba bkod pa zhes bya ba la sogs pa yin no/ /ci 'dra ba zhig ce na/ bcom ldan 'das te/ de'i yon tan phun sum tshogs pa ni legs par thugs su chud pa'i blo dang ldan pa zhes bya ba la sogs pa yin no//ji lta bu dag dang zhe na/ de'i 'khor nyan thos chen po rnams dang / byang chub sems dpa' chen po rnams te/ mdo sde gzhan las dul ba/ 'khor dul ba/ grol ba/ 'khor grol ba zhes 'byung ba'i phyir dang / 'di las kyang nyan thos tshad med pa 'di dge 'dun dang / byang chub sems dpa' dpag tu med pa dag dang thabs cig go zhes 'byung ba'i phyir ro/ /de'i phun sum tshogs pa ni thams cad kyang cang shes pa zhes bya ba dang thams cad kyang gnas pa chen po la yang dag par zhugs pa zhes bya ba la sogs pa yin te/nyan thos dang byang chub sems dpa' rnams dang go rims bzhin no/ /sa rnam par gzhag pa'i chos lngas zhes bya ba la sogs pa yin no/ /sangs rgyas kyi sa zhes bya ba ni mdo'i ming don dang ldan par btags te/rten cing 'brel par 'byung ba lta bu dang / rin po che phrogs pa lta bur blta bar bya'o/ /de la gang du don rnam par nges par sbyin par byed cing sbyor bar byed pa'am phan tshun rnam par nges pa sbyin pa 'byung ba de ni gleng gzhi ste de nyid gnas yin no/ /de thog ma nyid du bstan pa'i dgos pa ni 'jig rten thams cad las 'das pa thams cad mkhyen pa'i gnas yin no zhes yang dag par bstan par bya ba'i phyir ro//de bstan pas yang gdul bya rnams de la mos pa bskyed pa'i phyir te/ sangs rgyas kyi zhing yongs su dag par skye bar smon lam 'debs par bya ba'i phyir dang /rgya chen po la mos pa'i byang chub sems dpa' rnams dga' ba yang dag par bskyed par bya ba'i phyir/ lhag pa'i bsam pa la mos pa rnams lhag pa'i bsam pa'i khams brtan par bya ba'i phyir dang / gang du bzhugs te chos rab tu ston par mdzad pa de yang dag par rab tu bstan pa'i phyir ro//gzhan du na gang du bzhugs te rab tu ston mi shes pa kun la the tshom du gyur pas de'i dbang du mdzad de/ 'di skad bdag gis thos pa zhes bya ba la sogs pa gsungs so/ /'di skad ces bya ba tshig phrad 'di ni dpe dang lung 'bogs pa dang /dris pa rnam par nges pa dang / dam bca' ba dang / tshig gi lan dag la 'byung ste/ dpe la ni rnam thos ltar phyug pa rnam thos dang 'dra bar shes pa lta bu'o/ /lung 'bogs pa la 'di skad thon cig ces bya ba lta bu'o//dris pa rnam par nges par bya ba la ni bdag gis 'di skad thos so/ /'di skad du bshad do zhes bya ba lta bu'o/ /dam bca' ba la ni de bzhin du bya'o zhes bya ba lta bu'o/ /tshig gi lan la ni de ltar yin no zhes bya ba lta bu'o/ /'di ni dam bca' ba kho na la blta bar bya ste/yang dag par sdud par byed pa'i byang chub sems dpa' rnams kyis khyod kyis ji skad thos pa de kho na bzhin du bshad par gsol zhes gsol ba btab pa dang / byang chub sems dpas bdag gis thos pa de kho na bzhin du smra bar bya'o khas 'ches pa'o/ / yang na ji skad du smras pa de kho na bzhin du bdag gis thos te/ de bzhin du bstan par bya'i gzhan du ma yin no zhes bstan pa ste/ yan lag gzhan gyis sgro 'dogs pa dang skur pa 'debs pa yongs su spangs nas snyam du dgongs pa'o/ /bdag gis zhes bya ba ni bdag nyid kyis bcom ldan 'das las mngon sum du yin gyi/gud nas gcig nas gcig tu brgyud de ma yin pa'o/ /thos pa ni nyan nus pa'i rna ba'i dbang pos zin pa'o/ /'dis kyang yan lag gzhan gyis sgro 'dogs pa dang / skur ba 'debs pa'i nyes pa yongs su spong ste/byis pa gang dag mi nus pa de dag ni yan lag la skur pa 'debs pa'am sgro 'dogs par byed do/ /dus gcig na zhes bya ba ni dus gcig gi tshe na ste/ nyan pa'i tshe bar chad med pa'i phyir rgyun chags pa kho nas dus gcig yin no/ /de lta ma yin na yi ge dang / tshig dang ngag 'dzin pa'i dus tha dad pa'i phyir ji ltar gcig tu 'gyur/yang na gzungs thob pas yi ge 'bru gcig la chos kyi rnam grangs thams cad yang dag par 'dzin pa'i phyir ro/ /yang na rna ba'i dbang po rnam par dag pa thob pas yi ge 'bru gcig yongs su bshad na gzhan la thogs pa med pa'i phyir ro//yang na dus ni tshogs pa yin te dus tshogs pa gcig na zhes bya ba'i tha tshig go/ /bcom ldan 'das zhes bya ba'i sgra ni rang dbang dang / shin tu sbyangs pa dang / gzugs bzang ba dang / grags pa dang / dpal dang bdag nyid chen po la 'byung ste/rang dbang shin tu sbyangs pa dang / /gzugs bzang ba dang grags pa dang / /dpal dang bdag nyid che stsogs pa/ /drug la skal ba zhes bshad do/ /zhes gang bshad pa'o/ /de dag thams cad kyang de bzhin gshegs pa la rnam pa thams cad dang mi 'bral bar mnga' bas/de bzhin gshegs pa ni bcom ldan 'das yin no/ /ji lta zhe na rang dbang nyid ni nyon mongs pa'i gzhan gyi dbang du gyur pa mi mnga' ba'i phyir ro/ /shin tu sbyangs pa nyid ni ye shes kyi me'i gdung bas yongs su sbyangs pa'i phyir ro//gzugs bzang ba 'di ni skyes bu chen po'i mtshan mchog sum cu rtsa gnyis la sogs pa mnga' ba'i phyir ro/ /grags pa ni yon tan gyi khyad par thams cad phun sum tshogs pa'i phyir ro/ /dpal ni 'gro ba thams cad kyis bsnyen par bya ba yin pa'i phyir ro/ / che ba nyid tshogs pa ni/ sems can thams cad la rnam pa thams cad du phan pa dang bde ba mdzad pa'i sbyor ba nyams pa mi mnga' ba'i phyir ro/ /rnam pa gcig tu na bdud bzhi bcom pas bcom ldan 'das te/ bdud bzhi ni phung po'i bdud dang / 'chi bdag gi bdud dang /nyon mongs pa'i bdud dang / lha'i bu'i bdud do/ /de la gnas phun sum tshogs pa ni sangs rgyas kyi zhing yongs su dag pa'o/ /de yang phun sum tshogs pa rnam pa bco brgyad kyis phun sum tshogs pa ste/ kha dog phun sum tshogs pa dang / dbyibs phun sum tshogs pa dang /tshad phun sum tshogs pa dang / yul phun sum tshogs pa dang / rgyu phun sum tshogs pa dang / 'bras bu phun sum tshogs pa dang / bdag po phun sum tshogs pa dang / phyogs phun sum tshogs pa dang / zham 'bring phun sum tshogs pa dang / ston pa phun sum tshogs pa dang / las phun sum tshogs pa dang / phan 'dogs pa phun sum tshogs pa dang / mi 'jigs pa phun sum tshogs pa dang / gnas yun sum tshogs pa dang / lam phun sum tshogs pa dang / bzhon pa phun sum tshogs pa dang / sgo phun sum tshogs pa dang / gzhi phun sum tshogs pa ste/ go rims bzhin du tshig bcu dgus yongs su bstan to/ /de la mchog tu 'bar ba zhes bya ba la sogs pa ni gang la rin po che sna bdun mchog tu 'bar ba dag gis bkod pa brgyan pa'i bye brag yod pa'o/ / yang na gzhal yas khang gi khyad par de nyid rin po che de dag gis mchog tu 'bar ba'o/ /rin po che sna bdun ni gser dang / dngul dang / bai DUr+ya dang / spug dang / rdo'i snying po mu tig dmar po ste/ dmar po ni srog chags kyi rigs so/ /de las byung ba'i phyir bye brag med par nye bar btags te/mu tig dmar po zhes bya'o/ /ke ke ru ni bdun pa ste/ de ltar na ni mchog tu 'bar ba'i gnas yin no/ /gang gi phyir 'jig rten gyi khams dpag tu med pa dag rgyas pas 'gengs pa khyab par byed pa des na 'od zer chen po dag rab tu 'byung ba ste/de nyid kyi phyir 'od zer rnams mnga' ba nyid do/ /de dag ni 'jig rten gyi khams dpag tu med pa rgyas par 'gengs pa yang yin la/ 'od zer chen po dag kyang yin te/ gang la de dag rab tu 'byung ba yod ces tshig rnam par sbyar ro/ /de lta bas na tshig 'di gnyis kyis kha dog phun sum tshogs pa bshad do//de ltar kha dog phun sum tshogs pa'i dbyibs ji lta bu zhe na/ gnas tha dad pa zhes bya ba la sogs pa gsungs so/ /gnas tha dad pa shin tu rnam par phye ba tshad med pa dag rnam par gnas pa ste/ 'di la rnam par gnas pa bye brag tu'am rnam pa sna tshogs su'am mchog tu gnas pa yod pas zhes bya bar sbyar ro//tshad med pa nyid ni grangs tshad med pa'i phyir dang yul tshad med pa'i phyir ro/ /shin tu rnam par phye ba ni blo sngon du btang ba'i cha rnam par gzhag pas bkod pa'i phyir ro/ /ji ltar na sangs rgyas kyi zhing yongs su dag pa'i ngo bo la blo sngon du btang ba'i cha rnam par gzhag pa srid ce na/de'i phyi rol gyi dngos po bsgrub pa la yongs su grub pa ni ma yin gyi/ bcom ldan 'das byang chub sems dpar gyur pas shes rab kyi rgyu mngon par 'du byed pa dang bcas par 'byung ba la spyod pa na/smon lam gyi dbang gis sangs rgyas kyi zhing de lta de ltar mngon par 'dus byas pa'i phyir ro/ /sngon mngon par 'dus byas pa'i dbang gis spros pa med pa'i gnas skabs na yang de kha na bzhin du 'byung ba'i phyir la/ sangs rgyas dang byang chub sems dpa' rnams la rnam par rig pa snang ba 'gal ba med de/de bzhin du gzhan la yang sbyar bar bya'o/ /de ltar dbyibs phun sum tshogs pa de'i tshe ji lta bu zhe na/ de'i dbang du mdzad nas rgya yongs su ma chad pa zhes bya ba gsungs te/ gang gi rgya 'di tsam mo zhes bya bar yongs su chad pa med pa'o//rgya ni kun nas khyon che ba yin no/ /yang na gang gis rgya srid la sogs pa'i tshad yongs su ma chad pa ste/ shar phyogs la sogs pa'i phyogs cha tha dad pa yongs su chad pa med pa'i phyir/ de skad ces bya'o/ /de ltar tshad yongs su chad pa de ci khams gsum na spyod pa zhig yin nam zhe na ma yin no//'o na ci zhe na/ khams gsum pa thams cad las yang dag par 'das pa'i spyod yul yin te/ gang la khams gsum pa las yang dag par 'das pa'i spyod yul lam gnas sam yul yod pa'o/ /khams gsum pa ni dmigs pa dang mtshungs par ldan pa'i sgo nas brtas par 'gyur ba'i phyir/rang gi sa pa'i sred pa dag gis bdag gis byas pa dang / de'i rnam par smin pa yin no/ /de ni des bdag gi ra ma byas pa'i phyir dang / de'i rnam par smin pa ma yin pa'i phyir ma yin te/ mya ngan las 'das pa bzhin no//'o na ni rgal ba de gzhal med khang rnam par smin pa'i sa las yang dag par 'das pa'i phyir de dang 'dra ba nyid du rgyu med pa can yin no/ /'on te rgyu dang ldan pa nyid yin na ni de'i khongs su 'dus par 'gyur ro/ /yang na ni de'i rgyu khams gsum pa la ma gtogs pa zhig brjod dgos so zhe na/bden te 'di'i rgyu ni khams gsum pa las 'das pa kho na yin no/ /rgyu de yang ci 'dra ba zhig ce na/ 'jig rten las 'das pa de'i bla ma'i dge ba'i rtsa ba las byung ba zhes bya ba gsungs te/ 'jig rten las 'das pa ni rnam par mi rtog pa'i ye shes so/ /de'i bla ma'i dge ba'i rtsa ba ni de'i rjes la thob pa ste/rgyu de las byung ba yin gyi rgyu med pa can yang ma yin la dbang phyug la sogs pa'i rgyu las byung ba yang ma yin no/ /ji ltar na rnam par mi rtog pa'i rjes las thob pa dag pa 'jig rten pa'i chos khams gsum pa las yang dag par 'das pa'i rnam par smin pa'i rgyu yin zhe na/rnam par smin pa'i rgyu yin zhes ni mi bya'o/ /'o na ci zhe na/ de las gzhan pa gang srid pa ste/ sdug bsngal la chos shes pa'i bzod pa'i tshogs kyi 'jig rten pa'i chos kyi mchog bzhin no/ /rnam pa gcig tu na 'jig rten las 'das pa ni nyan thos dang rang sangs rgyas rnams kyi lam mo//de'i bla ma dag ni de bzhin gshegs pa rnams kyi dge ba'i rtsa ba zag pa med pa rnams te/ rgyu de las byung ba ni de'i dbang gis zhes bya ba'i tha tshig go/ /de ltar rgyu phun sum tshogs pa'i 'bras bu ji 'dra zhe na/ shin tu rnam par dag cing dbang sgyur ba'i rnam par rig pa'i mtshan nyid ces bya ba gsungs te/shin tu rnam par dag cing dbang sgyur ba'i rnam par rig pa gang yin pa de ni 'di'i mtshan nyid yin no/ /de ni rnam par rig pa tsam du zad pa'i phyir rnam par rig pa la ma gtogs rin po che la sogs pa med pas rnam par rig pa shin tu rnam par byang ba de nyid de ltar snang ste sngar ji skad du bshad pa bzhin no//yul dang 'dra ba'i phyir 'bras bu yin te/ zad par sngon po la sogs pa'i snyoms par zhugs pa rnams kyis de'i rnam par rig pa bzhin no/ /gzhal med khang ni bdag pos yongs su bzung ba'i phyir de ltar 'bras bu phun sum tshogs pa'i bdag po gang yin zhe na/de bzhin gshegs pa'i gnas zhes bya ba gsungs te de ni bdag po'i khyad par sangs rgyas bcom ldan 'das kyi gnas yin gyi gzhan gyi ma yin pa'am/ des de byin gyis brlabs shing zhe la gzung ba yin gyis gzhan gyis ma yin pa'o/ / bdag po ni phyogs yongs su 'dzin pa'i phyir de ltar bdag po phun sum tshogs pa'i phyogs dgos pas byang chub sems dpa' dpag tu med pa'i dge 'dun rjes su song ba zhes bya ba gsungs te/ 'di ni byang chub sems dpa' dpag tu med pa'i dge 'dun rjes su song ba yod pa'o/ / gang zhig gang gi rjes su 'gro ba de ni de'i phyogs zhes bya ba la byang chub sems dpa' bgrang ba las 'das pa rnams kyang de'i rjes su 'gro ba yin no/ /de dag kho na dgra rnam pa thams cad du phyir bzlog nus pa de'i phyogs yin gyi nyan thos la sogs pa ni ma yin no//de ltar phyogs phun sum tshogs pa'i zham 'bring ba dgos pas de'i 'og tu lha la sogs pa bstan to/ /lto 'phye chen po ni sbrul chen po'o/ /'o na ji ltar khams gsum pa las yang dag par 'das pa'i spyod yul zhes bshad/ khams gsum pa las yang dag par 'das pa'i spyod yul na ni lha la sogs pa ni mi srid de/de dag ni khams gsum na spyod pa yin pa'i phyir ro zhe na/ de lta bu'i rnam pa rig pa snang ba yongs su 'dzin pa dang ldan pas 'gal ba med do/ /yang na de dag ni sprul pa yin la de ltar kun du bstan pa ni gdul bar bya ba'i sems can yongs su smin par bya ba'i phyir te/ka pi na gdul bar bya ba'i phyir 'khor los sgyur ba'i 'khor kun du bstan pa bzhin no/ /yang na de dag ni byang chub sems dpa' kho na yin te/ bcom ldan 'das la mchod pa bya ba'i phyir lha la sogs pa'i lus su mngon par sprul nas rnam par gnas par zad do//de ltar zham ring ba phun sum tshogs pa cis bstan pa yin zhe na/ chos kyi ro'i dga' ba dang bde ba chen pos bstan pa zhes bya ba gsungs te/ 'di na chos kyi ro'i dga' ba dang / bde ba chen pos bstan pa yod pas zhes tshig rnam par sbyar ro//zas ni gnas pa'i rgyu yin pa'i phyir ston pa ste/ des kyang gnas par 'gyur ro/ /khams gsum pa las yang dag par 'das pa'i spyod yul zhes bshad pa ma yin nam/ ji ltar na de'i zas yin/ zag pa med pa'i chos rnams kyang de'i zas yin no zhes brjod par rigs pa ma yin te/zas ni srid pa gso bar byed pa yin pa'i phyir la de dag ni srid pa spyod pa'i rgyu yin no zhe na/ 'di ni gzugs la sogs pa'i khams su zag pa med pa'i ting nge 'dzin la snyoms par zhugs pa dang 'dra bar 'gyur ro/ /de dag 'das pa'i zas kyis zas dang bcas pa zhes brjod pa yang rigs pa ma yin te/'das pa med pa'i phyir dang / 'di la yang de thal bar 'gyur ro/ /de lta bas na des de dag de na gnas par 'gyur bas/ gnas pa'i rgyu ma yin pa'i phyir/ nye bar ston pa phun sum tshogs pa zhes bya'o/ /de ltar ston pa phun sum tshogs pas phrin las ci mdzad ce na/sems can thams cad kyi don thams cad yang dag par thob par byed par nye bar gnas pa zhes bya ba gsungs so/ /'di ni sems can thams cad kyi don thams cad yang dag par thob par byed par nye bar gnas pa yod pa'i phyir ram don thams cad yang dag par sgrub par nye bar gnas pa yod pa'i phyir te/zhi ba'i ting nge 'dzin la snyoms par zhugs pa rnams kyang sngon mngon par 'du byed pa'i dbang gis sems can gyi don byed pa'i phyir ro/ /ji skad bshad pa'i phrin las phun sum tshogs pa'i phan thogs pa gang yin zhe na/ de yang dag par bstan pa'i phyir nyon mongs pa'i dri ma'i gnod pa thams cad dang bral ba zhes bya ba gsungs te/nyon mongs pa dag nyid dri ma yin no/ /de dag kyang gnod pa'i rgyu yin pas de med pa'i phyir de las gyur pa'i gnod pa med do/ /'o na de'i tshe ci zhig phan btags she na/ nyon mongs pa la gyur pa'i gnas pa med pa gang yin pa de nyid phan btags pa yin te/dper na jo bos phan ma btags kyang / gnod pa mi byed pa'i phyir bdag la jo bos phan btags so zhes tha dad 'dogs pa yin pa bzhin no/ /yang na nyon mongs pa'i dri ma las dben pa'i ye shes rnyed pa yin no/ /de ltar na ngag gi gnod pa med pas phan pa mdzad pa phun sum tshogs pa la phyi rol gyi 'jigs pa'i rgyu yang med pas/bdud thams cad yongs su spangs pa zhes 'jigs pa med pa nyid phun sum tshogs pa ston par mdzad do/ /bdud thams cad ni phung po dang / nyon mongs pa dang / 'chi bdag dang lha'i bu'i bdud rnams te de dag gis de yongs su spangs pa'am/gang gis de dag yongs su spangs pas zhes tshig rnam par sbyar ro/ /de dag kyang 'jigs pa'i rgyu yin te/ de dag thibs kyis mnan te rgyal bas na 'jigs pa med pa yin no/ /de ltar 'jigs pa med pa phun sum tshogs pa'i gnas kyi khyad par ci 'dra ba zhig ce na/thams cad kyi bkod pa las lhag pa de bzhin gshegs pa'i byin gyi rlabs kyis bkod pa zhes bya ba gsungs te/ 'di na byang chub sems dpa' thams cad dam/ gzhan dag gis bkod pa gang dag yin pa de dag pas lhag pa de bzhin gshegs pa'i byin gyi rlabs kyis bkod pa yod pas zhes tshig rnam par sbyar te/de'i byin gyi rlabs kho nas de ltar snang ngo zhes bya ba'i tha tshig go/ /gnas thams cad pas khyad par du 'phags pa'i phyir/ gnas phun sum tshogs pa'o/ /de ltar gnas phun sum tshogs pa der bgrod par bya ba'i lam ji lta bu zhig ce na/dran pa dang / blo gros dang / rtog pa chen po nges par 'byung ba yin pa zhes bya ba gsungs te/ 'dis nges par 'byung ba ni nges par 'byung ba'i lam mo/ /dran pa la sogs pa 'di dag gis de dag nges par 'byung bas na dran pa la sogs pa ni nges par 'byung ba yin no//de la dran pa chen po ni thos pa las byung ba'i shes rab ste/ thos nas don phyin ci ma log par mngon par brjod pa'i phyir ro/ /blo gros chen po ni bsams pa las byung ba'i shes rab ste/ thos pa rigs pas nges par sems pa'i sgo nas nges par 'thob pa'i phyir ro//rtog pa chen po ni bsgoms pa las byung ba'i shes rab ste/ bsgoms pa'i stobs kyis de kho na nyid rtogs pa'i phyir ro/ /dran pa la sogs pa'i chen po nyid ni theg pa chen po'i chos la dmigs pa las byung ba'i phyir de'i 'bras bu yin pa'i phyir dang /des bsdus pa'i phyir ro/ /de ltar lam phun sum tshogs pa nas gang la zhon te/ lam de nas 'gro ba'i bzhon pa de dgos pas de'i dbang du mdzad de/ zhi gnas dang lhag mthong chen po bzhon pa yin pa zhes bya ba gsungs so/ /zhi gnas ni ting nge 'dzin to//lhag mthong ni shes rab po/ /de gnyis rang gi ngang gis 'jug pa ni bzhon pa ste/ de gnyis de nas der 'gro ba'i phyir ro/ /chen po nyid ni snga ma bzhin no/ /de ltar bzhon pa phun sum tshogs pa gang gis na der 'jug par 'gyur ba'i sgo dgos pas/ de'i 'og tu sgo phun sum tshogs pa de'i dbang du mdzad de/ rnam par thar pa'i sgo chen po stong pa nyid dang / mtshan ma med pa dang smon pa med pa nas 'jug pa zhes bya ba gsungs te/ sgo ni sgo mo'o/ /rnam par thar pa ni rnam par grol ba ste/ mya ngan las 'das pa'o/ / stong pa nyid la sogs pa ni rnam par thar pa'i sgo yin te/ de la stong pa nyid ni chos la bdag med pa ste/ kun du brtags pa'i chos med pa'o/ /de la dmigs pa'i ting nge 'dzin ni rnam par thar pa'i sgo stong pa nyid yin no/ /mtshan ma ni gzugs dang sgra dang dri dang ro dang reg bya rnams dang / skyes pa dang bud med dang skye ba dang / rga ba dang 'chi ba ste/ mtshan ma 'di gang la med pa ni mtshan ma med pa'o/ /de yang mya ngan las 'das pa yin te/ de ni mtshan ma thams cad bsal ba'i ngo bo yin pa'i phyir ro/ /de la dmigs pa'i ting nge 'dzin ni rnam par thar pa'i sgo mtshan ma med pa yin no//smon pa ni smon lam ste/ don du gnyer ba'o/ /khams gsum pa sdug bsngal nyid du lta na mi smon te/ 'di la smon pa med pas na smon pa med pa'o/ /de la dmigs pa'i ting nge 'dzin ni rnam par thar pa'i sgo smon pa med pa yin no/ /'di la stong pa nyid la sogs pa rnam par thar pa'i sgo de dag gi 'jug pa yod pas zhes tshig rnam par sbyar te/de dag gis der 'jug pa'i phyir ro/ /chen po nyid ni snga ma bzhin no/ /de ltar sgo phun sum tshogs pa'i gzhal med khang phral bzhin du de gang la brten pa'i gzhi dgos pas de'i phyir 'og tu gzhi phun sum tshogs pa de'i dbang du mdzad nas rin po che'i pad+ma'i rgyal po chen po yon tan gyi tshogs tshad med pas brgyan pa'i bkod pa la brten pa zhes bya ba gsungs so//dper na sa'i dkyil 'khor la sogs pa chu'i dkyil 'khor la sogs pa la brten pa'am/ 'jig rten pa'i gzhal med khang sa la brten pa de bzhin du/rin po che chen po'i pad+ma'i rgyal po chen po yon tan gyi tshogs tshad med pas brgyan pa gang yin pa de'i bkod pa chen po 'di ni gzhag pa'i khyad par te/ de ni 'di'i rten yin no/ /chen po nyid ni de las gzhan pa'i bkod pa la ltos pa'i phyir te/ de ni rin po che chen po'i rgyu las byung ba'i pad+ma'i rgyal po chen po de la brten pa yin no//yang na pad+ma chen po ni byang chub sems dpa' la sogs pa'i byin gyi rlabs las byung ba rnams yin la/ de dag gi rgyal po ste/ de'i bla ma'i dge ba'i rtsa ba las byung ba'i phyir ro/ /de bzhin gshegs pa ni chos kyi rgyal po yin la/ de ni de'i dge ba'i rtsa ba las byung bas de dag gi bdag po yin no/ /de nyid dkon pa'i phyir dang / rin po che thams cad las khyad par du 'phags pa'i phyir rin po che chen po yin no/ /de rin po che chen po yang yin la/ pad+ma'i rgyal po yang yin te/ de'i bkod pa chen po'o/ /de la brten pa'i gzhal med khang na/bcom ldan 'das bzhugs te zhes bya bar sbyar ro/ /de'i 'og tu de las gzhan pa'i ston pa rnams las khyad par du bya ba'i phyir dang / gzhan dag rab tu dang ba bskyed pa'i phyir bcom ldan 'das kyi yon tan pa de'i phun sum tshogs pa las brtsams nas/ yon tan gyi khyad par rnam pa nyi shu rtsa gcig yongs su bstan to//legs par thugs su chud pa'i blo dang ldan pa zhes bya ba 'dis ni mngon par rdzogs par byang chub pa'i yon tan gyi khyad par ston te/ 'di la 'dus byas dang / 'dus ma byas thugs su chud par bya ba ji snyed yod pa de snyed thugs su chud pas thugs su chud par bya ba la legs par rdzogs par ma lus par thugs su chud pa'i blo mnga' ba'i phyir dang /ji lta ba bzhin du yod pa dang / snying rje yod pas thugs su chud pa'i phyir ro/ /kun du spyod pa gnyis mi mnga' ba zhes bya ba ni sgrib pa med pa'i yon tan gyi khyad par ston te/ byis pa dang nyan thos kyi kun du spyod pa sgrib pa gnyis yod pa'i phyir ro//de la byis pa'i kun du spyod pa ni 'khor ba'i kun nas nyon mongs pa ste/ de'i bdag nyid du gnas pa'i phyir ro/ /nyan thos kyi kun du spyod pa ni mya ngan las 'das pa la gcig tu nges pa nyid de/ gzhan gyi don bya ba la rgyab kyis phyogs pa'i phyir ro/ / 'di la ni kun du spyod pa gnyis mi mnga'o/ /mtshan nyid med pa'i chos la mchog tu gzhol bar mdzad pa zhes bya ba 'dis ni 'dul ba'i thabs kyi yon tan ston te/ mtshan nyid med pa'i chos 'di mya ngan las 'das pa yin par bzhed la/ der theg pa gsum gyis sems can skal ba ji lta ba bzhin du gdul ba'i thabs yongs su mkhyen pa'i phyir dang /de bzhin du yang ston pa'i phyir te/ 'di la mtshan nyid med pa'i chos la mchog tu 'gro bar mdzad pa yod pa'i phyir ro/ /sangs rgyas kyi gnas pas gnas pa zhes bya ba 'dis ni gdul bya la so so rtog pa'i yon tan gyi khyad par ston te/ thugs rje chen pos nyin mtshan lan drug tu 'jig rten la gzigs pa'i phyir ro//sangs rgyas thams cad dang mnyam nyid brnyes pa zhes bya ba 'dis ni sangs rgyas thams cad dang / phrin las mdzad pa 'dra ba'i yon tan gyi khyad par ston te/ sangs rgyas thams cad dang phrin las 'dra ba mdzad pa'i phyir de dag dang mnyam pa nyid brnyes pa yin no//sgrib pa med pa'i rtog pa thugs su chud pa zhes bya ba 'dis ni mi mthun pa'i phyogs spangs pa'i yon tan gyi khyad par ston te/ nyon mongs pa dang / shes bya'i sgrib pa ma lus pa las dben pa'i ye shes mngon sum du mdzad pa'i phyir dang / sgrib pa ma lus par spangs pa'i phyir ro//phyir mi ldog pa'i chos dang ldan pa zhes bya ba 'dis ni mu stegs can zil gyis gnon pa'i yon tan gyi khyad par bstan te/ de dag gis phyir bzlog mi nus pa'i phyir dang / de dag zil gyis mnan nas yang dag pa'i lam rab tu ston pa'i phyir ro/ /spyod yul gyis mi 'phrogs pa zhes bya ba 'dis ni bdud zil gyis gnon pa'i yon tan gyi khyad par ston te/spyod yul ni yul te/ gzugs la sogs pa'o/ /yul de nyid sems 'khrul par byed pa'i rgyu yin pa'i phyir dge ba'i bar chad byed pa nyid kyis bdud ces bya'o/ /bcom ldan 'das la ni yul shin tu yid du 'ong bas kyang bar chad byed par mi nus la/de dag ni zil gyis gnon pa'i skye mched shin tu yongs su rdzogs pa dag zil gyis gnon te/ spyod yul gyis dbrog mi nus pas spyod yul gyis mi 'phrogs pa zhes bya'o/ /bsam gyis mi khyab pa rnam par 'jog pa zhes bya ba 'dis ni chos bstan pa rnam par 'jog pa'i yon tan gyi khyad par ston te/ rtog ge'i spyod yul las shin tu 'das pa rnam par 'jog pa'i phyir ro//dus gsum la mnyam pa nyid tshar phyin pa zhes bya ba 'dis dus lung ston pa'i yon tan gyi khyad par te/ da ltar byung ba'i dus 'das pa dang ma 'ongs pa'i dus lung ston pa la thogs pa mi mnga' ba'i phyir ro/ /'jig rten gyi khams thams cad du zhugs pa'i sku dang ldan pa zhes bya ba 'dis ni dga' ldan gyi gnas nas gshegs pa kun du ston pa'i yon tan gyi khyad par ston te/gling bzhi pa'i 'jig rten gyi khams thams cad du cig char sprul pa'i skus khyab par mdzad pa'i phyir ro/ /chos thams cad la the tshom med pa'i mkhyen pa mnga' ba zhes bya ba 'dis the tshom gyi rnam pa thams cad gcod pa'i yon tan gyi khyad par ston te/chos thams cad la the tshom ma lus par bsal ba'i ye shes brnyes pa'i phyir ro/ /spyod pa thams cad dang ldan pa'i blo mnga' ba zhes bya ba 'dis theg pa thams cad kyis gdul bar bya ba la/ de dang 'dra ba'i sku kun du ston pa'i yon tan gyi khyad par ston te/sems can thams cad kyi spyod pa yongs su mkhyen pa'i phyir dang / de bzhin du yang sku kun du ston pa'i phyir ro/ /chos mkhyen pa la nem nur mi mnga' ba zhes bya ba 'dis ni shin tu rnam par nges pa'i ye shes kyis ci rigs par gdams ngag stsol ba'i yon tan gyi khyad par ston te/chos rnams la ne ma nur dang ldan pa ni ci rigs par gdams ngag sbyin mi nus pa'i phyir ro/ /gang zhig chos 'di thugs su chud cing de mkhyen pa la shin tu rnam par nges pa yin pa de ni gdams ngag phyin ci ma log par ston nus kyi gzhan ni ma yin no/ / rnam par ma brtags pa'i sku mnga' ba zhes bya ba 'dis ni kun nas nyon mongs pa mi mnga' ba'i sku yongs su 'dzin pa'i yon tan gyi khyad par ston te/ sku rnam par rtog pa las ma 'khrul ba'i phyir nyon mongs pa dang / las dang skye ba'i kun nas nyon mongs pa mi mnga' bas 'di la kun nas nyon mongs pa rnams kyis rnam par ma brtags pa'i sku mnga' ba'i phyir ro//byang chub sems dpa' thams cad kyis ye shes yang dag par blangs pa zhes bya ba 'dis ni sangs rgyas kyi gdung rgyun mi 'chad par sbyor ba'i yon tan gyi khyad par ston te/ byang chub sems dpa' rnams sangs rgyas kyi rigs rgyun mi 'chad par bya ba'i phyir sbyor gyi gzhan dag ni ma yin no//de'i phyir de dag kho na ye shes yang dag par len to/ /sangs rgyas kyi gnas pa gnyis su med pa dam pa'i pha rol tu phyin pa zhes bya ba 'dis ni sangs rgyas kyi rang bzhin pa'i skus bzhugs pa'i yon tan gyi khyad par ston te/ de bzhin gshegs pa'i chos kyi sku'i mtshan nyid ni tha dad pa ma yin pa'i phyir ro/ /sangs rgyas kyi gnas pa gnyis su med pa ni chos kyi sku ste/ de bzhin nyid do de mtshan nyid tha dad pa ma yin pa nyid kyis gnyis su rnam par rtog pa kun du 'byung ba ma lus pa byed pa'i phyir te/ de la dmigs pa'i ting nge 'dzin gyis rtag tu gnas pa'i phyir dang /de'i yang pha rol tu phyin pa'i phyir ro/ /de bzhin gshegs pa ma 'dres pa'i rnam par thar par mdzad pa'i ye shes kyi mthar phyin pa zhes bya ba 'dis ni de bzhin gshegs pa longs spyod rdzogs pa'i skus bzhugs pa'i yon tan gyi khyad par ston te/so so'i rgyud kyi sgo nas longs spyod rdzogs pa'i skus/ de bzhin gshegs pa ma 'dres pa rnams kyis sems can thams cad rnam par thar par mdzad pa'i ye shes gang yin pa'i ye shes de'i mthar phyin pa'i phyir ro/ /sangs rgyas kyi longs spyod rdzogs pa'i sku ni sangs rgyas kyi zhing yongs su dag pa dag tu 'khor gyi dkyil 'khor rnams su/byang chub sems dpa' rnams kyis chos kyi longs spyod rdzogs pa so sor nyams su myong bar mdzad pa'i ye shes gang yin pa ste/ de'i mthar phyin pa'i phyir de skad ces bya'o/ /mtha' dang dbus med pa'i sangs rgyas kyis mnyam pa nyid thugs su chud pa zhes bya ba 'dis ni mtshan nyid kyi yon tan gyi khyad par ston te//mtha' dang dbus med pa ni de bzhin gshegs pa yin te/ 'dus byas dang 'dus ma byas kyi mtha' yongs su spangs pa'i mtshan nyid kyi phyir dang / yul yongs su ma chad pa'i mtshan nyid kyi phyir ro//mnyam pa nyid thugs su chud pa ni 'dus byas dang 'dus ma byas yongs su mkhyen pa'i phyir dang / de la yang kun nas nyon mongs pa yang med pa'i phyir ro/ /chos kyi dbyings dam pa can zhes bya ba 'dis ni 'bras bu thob pa'i yon tan gyi khyad par ston te/ 'di la chos kyi dam pa rnam par dag pa yod pa ste/de ni lam bsgoms pa'i 'bras bu yin pa'i phyir ro/ /yon tan rnams mi zad pa nyid du bstan pa'i phyir/ nam mkha'i khams kyi mthas gtugs pa/ phyi ma'i mtha'i mur thug pa zhes bya ba ste/ bdag dang gzhan la phan pa'i gzhi yin pa'i phyir yon tan mi zad pa nyid kyi yon tan gyi khyad par ro//ji ltar nam mkha' 'jig pa dang / chags pa dag na zad mi shes pa nyid de bzhin du 'di'i yon tan rnams gtan du mi zad pa nyid kyi phyir te/ 'khor ba'i mtha' ji srid par sems can gyi don mdzad pa'i phyir ro//rnam pa gzhan du bstan pa dang bshad pa'i sgo nas ston te/ dang po bstan pa'i don lhag ma rnams kyis bshad pa'i phyir ro/ /de ltar na yon tan gyi khyad par nyi shus ni legs par thugs su chud pa'i blo dang ldan pa zhes bya ba yin pas chos nyid legs par bshad pa yin te/shes bya la gcig tu sgrib pa med pa yon tan gyi khyad par gyis ni ji ltar nyan thos rnams kyi shes pa yul dang dus kyis bskal pa'i don rnams dang / sangs rgyas kyi chos rab tu dbye ba mtha' yas pa dag pa la shes pa ma 'jug pa'i phyir la/ la lar thogs pa ltar de bzhin gshegs pa pa rnams kyi ni yul dang dus dang rnam pa tha dad pa'i dngos po mtha' yas pa thams cad la chags pa mi mnga' ba dang thogs pa mi mnga' bar 'jug pa'i phyir de lta ma yin te/'di ltar dngos po'i rang gi ngo bo yongs su shes pa dang / yongs su mi shes pa dang / kun du spyod pa gnyis mi mnga' ba'i phyir kun du spyod pa gnyis mi mnga' ba yin te/des na legs par thugs su chud pa'i blo dang ldan pa'o/ /mchog tu rnam par dag pa khong du chud pa'i yon tan gyis ni dngos po dang / dngos po med pa gnyis kyi mtshan nyid kyis dri ma ma lus pa las dben pa'i de bzhin nyid rnam par rtog pa thams cad bsal ba'i ngo bo bdag nyid kyis rtogs nas gzhan dag la yang khong du chud par byed pa'o//sangs rgyas mdzad pa rgyun mi gcod pa'i yon tan gyis sems can gyi don mdzad pa dag rgyun mi gcod par lhun gyis grub par 'phags pa dang / lha dang tshangs pa'i gnas pa dag gis gnas pa'i phyir ro//chos kyi sku la brten pa dang / dgongs pa dang phrin las khyad par mi mnga' ba'i yon tan gyis ni sangs rgyas thams cad kyi de bzhin nyid ni rnam par dag pa'i ye shes dang / sems can thams cad la phan pa dang bde ba'i dgongs pa can dang / longs spyod rdzogs pa dang sprul pa'i sku gnyis kyis gzhan gyi don mdzad pa la/khyad par mi mnga' ba'i phyir ro/ /sgrib pa thams cad kyi gnyen po bsgoms pa'i yon tan gyis ni nyon mongs pa dang shes bya'i sgrib pa thams cad kyi gnyen po 'phags pa'i lam goms pa'i sgrib pa thams cad las dben pa'i rtogs pa khong du chud ces bya ba thugs su chud pa brnyes pa'i phyir ro//mu stegs can thams cad kyis mi thub pa'i yon tan gyis ni bstan pa dang thugs su chud pa'i chos gzhan dag gis phyir bzlog mi nus pa'i phyir ro/ /'jig rten du skyes na ni 'jig rten gyi chos kyis mi 'phrogs pa'i yon tan gyi rnyed pa dang ma rnyed pa la sogs pa 'jig rten gyi chos brgyad kyis 'phrogs par mi nus pa'i phyir ro//chos rnam par 'jog pa'i yon tan gyis ni gsung rab yan lag bcu gnyis kyi chos/ rtog ge las 'das pa byis pa'i blos khong du chud par bya ba ma yin pa/ rang dang spyi'i mtshan nyid brjod pas rnam par 'jog pa'i phyir ro//lung ston pa'i yon tan gyis ni dus gsum na yod pa'i dngos po rnams kyi byung ba dang 'byung bar 'gyur ba zhes bya ba tshe rabs brgyud pa lung ston pa'i phyir ro/ /'jig rten gyi khams thams cad du longs spyod rdzogs pa dang / sprul pa'i sku kun du ston pa'i yon tan gyis ni 'jig rten gyi khams thams cad du gdul ba ji lta ba bzhin du sku bai DUr+ya la sogs pa'i mdog lta bu kun du ston pa'i phyir ro//the tshom gcod pa'i yon tan gyis bdag la nges pa bzhin gzhan la nges pa skyed pa'i rgyu mtshan yin pa'i phyir ro/ /spyod pa sna tshogs dag gis mdzad pa'i yon tan gyis ni gdul ba ji lta ba bzhin du skal ba 'dra ba'i lus kun du ston pas 'dzud pa'i phyir ro//ma 'ongs pa na chos 'byung ba'i mkhyen pa'i yon tan gyis ni rdo phrag gser gyi sa bon yod pa lta bu/ dge ba'i rtsa ba'i sa bon phra mo nyan thos la sogs pa'i yul las 'das pa yang phyin ci ma log pa'i rnam par yongs su mkhyen pa'i phyir ro//mos pa ji lta ba bzhin du kun du ston pa'i yon tan gyis ni yid bzhin gyi nor bu ltar mi rtog kyang / de bzhin gshegs pa'i byin gyi rlabs dang / rang gi mos pa'i dbang gis de bzhin gshegs pa'i sku gser gyi mdog la sogs pa lta bu mthong ste/mdo las ji skad du de bzhin gshegs pa ni rtog par mi mdzad rnam par rtog par mi mdzad ces bya ba la sogs pa 'byung ba lta bu'o/ /lus tshad med pas sems can gdul bar bya ba'i yon tan gyis ni byang chub sems dpa'i lus tshad med pa dag gis sems can gdul ba'i phyir sbyor ba gang yin pa de de bzhin gshegs pa'i dbang gis dam pa'i chos nyan pa dang /sems pa dang bsgom pa'i rim gyis ye shes kyi khyad par thob pa'i byang chub sems dpa' rnams la phan btags pa dang yongs su gtad pa dag gis rgyun mi 'chad par brgyud mar byung ba'i phyir ro//chos kyi sku la pha rol tu phyin pa mnyam pa nyid du grub pa'i yon tan gyis ni chos kyi sku gnyis su med par sangs rgyas kyi sa la sbyin pa la sogs pa pha rol tu phyin pa thams cad mtshungs par grub pa'i phyir ro/ /sangs rgyas kyi zhing ma 'dres pa mos pa ji lta bu bzhin du ston pa'i yon tan gyis ni sems can gyi mos pa la ltos nas sangs rgyas kyi zhing gser la sogs pa'i rang bzhin ma 'dres pa 'dres pa med par kun du ston pa'i phyir ro//sangs rgyas kyi sku gsum char yang yul yongs su ma chad pa'i yon tan gyis ni/ thog ma dang bar dang tha ma dang bral ba'i sangs rgyas kyi sku gsum gyi bdag nyid rnams sangs rgyas kyi zhing rnams su thams cad du yul yongs su chad pa med par mnyam pa nyid du gshegs pa'i phyir ro//'khor ba'i mtha' ji srid par sems can thams cad la phan pa dang bde ba mdzad par nye bar gnas pa'i yon tan gyis ni chos kyi dbyings shin tu rnam par dag pa 'khor ba ji srid par gnas pa'i phyir/de rgyu mthun pa mdo la sogs pa'i chos rnams gdul ba rnams kyi dus ji lta ba bzhin du phyis dang / de'i tshe nye bar gnas pa'i phyir ro/ /mi zad pa nyid kyi yon tan gyis ni chos kyi dbyings kyis rnam par bkod pa'i yon tan rnams nam mkha' bzhin du mtha' med pa'i phyir te/chos kyi dbyings las 'khor ba ji srid par 'gro ba mtha' yas kyi don byed pa'i sbyor ba rgyun mi 'chad pa'i phyir yon tan mi zad pa nyid do/ /mi zad kyi yon tan des na legs par thugs su chud pa'i blo dang ldan pa zhes bya ba ste bar ma chad pa la yang de bzhin du sbyar ro//'khor phun sum tshogs pa'i dbang du mdzad nas/ nyan thos kyi dge 'dun thog mar smos pa ni theg pa chen po la the tshom za ba rnams kyi the tshom bsal ba'i phyir dang / byang chub sems dpa' ma nges pa'i rigs can rnams kyi rkyen nye bar bsgrub pa'i phyir dang /'khor na spyod pa rnams btul bas/ de'i sgo nas dul bar 'khor rnams dul bar 'gyur ba'i phyir dang / nyan thos rnam par dag pa rnams bdag nyid nga rgyal byed pa spangs pa'i phyir dang / byang chub sems dpas ni/ nyan thos rnams la gus par mi bya ba yang ma yin no zhes 'byung ba'i phyir byang chub sems dpa' rnams nyan thos dag la gus pa bskyed pa'i phyir de nyid kyi phyir de las gzhan pa dag kyang de la gus pa bskyed par bya ba'i phyir de dag yon tan brjod do//shin tu rnam par dag cing dbang sgyur ba'i rnam par rig pa'i mtshan nyid ces bshad pa ma yin nam/ji ltar na de na nyan thos rnams srid de/ 'gal ba'i phyir ro zhe na/ 'gal ba ci yod byang chub sems dpa' rnams dang mtshungs par mthong bar thal bar 'gyur ro zhe na/ gal te de dag gis kyang mthong ngo zhes bshad par gyur na ni 'gal bar 'gyur ba zhig na/ de dag de na 'khod mod kyi 'on kyang de mthong bar 'gyur ba'i tshogs dang bral ba'i phyir long ba bzhin du 'byor pa de lta bu de mi mthong bas 'gal ba med de/gser la sogs pa la sol ba la sogs par mthong ba de bzhin du/ rang gis gzhan mthong ba'i phyir ro/ /yang na sangs rgyas kyi byin rlabs kyi sa cung zad cig mthong ngo //cang shes pa ni bslab pa rnams 'gal bar mi byed pa rnams kyis dmu rgod ma yin pa'i phyir te/ rta cang shes bzhin no/ /sangs rgyas kyi sras ni de bzhin gshegs pa'i lung gi stobs kyis 'phags pa'i lam skyes pa'i phyir yin gyi/de'i rigs 'tsho ba pa'i phyir ni ma yin gyi/ bcom ldan 'das kyi sras gsung las skyes pa chos las nges par skyes pa zhes 'byung ba'i phyir ro/ /sems shin tu rnam par grol ba ni khams gsum pa'i 'dod chags las rnam par grol ba'i phyir te/ 'dod chags la 'dod chags dang bral ba'i sems rnam par grol ba'o zhes 'byung ba'i phyir ro//shes rab shin tu rnam par grol ba ni nyon mongs pa can gyi ma rig pa thams cad las rnam par grol ba'i phyir te/ ma rig pa 'gags pas shes rab rnam par grol ba'o zhes 'byung ba'i phyir te/tshul khrims shin tu rnam par dag pa ni yan lag drug gi tshul khrims kyis te/ yan lag drug ni tshul khrims dang ldan par gnas pa dang / so sor thar pa'i sdom pas bsdams pa dang / cho ga dang spyod yul phun sum tshogs pa dang / kha na ma tho ba phra rab tsam dag la 'jigs par lta ba dang /bslab pa'i gzhi rnams la yang dag par blangs te/ slob pa zhes mdo las ji skad du 'byung ba'o/ /rnam pa gcig tu na zag pa med pa'i tshul khrims thob pa'i phyir ro/ /chos 'dod pa rnams bde bar phrad pa ni klan ka tshol ba'i bsam pa med pa'i phyir dang /spyod lam ngan pa yongs su spangs pa'i phyir ro/ /thos pa mang po ni mdo sde du ma dang po dang bar dang tha mar thos shing bzung ba'i phyir ro/ /thos pa kun du 'dzin pa ni de'i don kun du 'dzin pa'i phyir te/ thos pa'i don kun du 'dzin par byed pa'i phyir ro/ /thos pa'i don bsam pa ni gnyis kas tshig dang /don bstan par byed pa'i phyir ro/ /legs par bsam pa sems pa/ legs par smra ba brjod pa/ legs par bya ba'i las byed pa ni byis pa rnams ni nyes par bsam pa sems pa nyes par smra ba brjod pa nyes par byed pa'i las byed pa dag yin na/ 'phags pa rnams de'i chos las 'das pas de med par bshad do//shes rab myur ba ni de bzhin gshegs pa'i chos 'dul ba la myur du 'jug pa'i phyir ro/ /shes rab mgyogs pa ni de nyid kyi don mang po la 'jug pa'i phyir te/ mang po la 'gro ba ni mgyogs pa zhes bya'o/ /shes rab rno ba ni don cha phra ba la 'jug pa'i phyir ro//nges par 'byung ba'i shes rab ni 'khor ba las nges par 'byung ba'i shes rab 'thob pa'i phyir ro/ /nges par rtogs pa'i shes rab can ni dgongs pa mya ngan las 'das pa can yin pa'i phyir ro/ /gtan la dbab par rtogs pa ni nges par rtogs pa ste/ mya ngan las 'das pa'o/ / gang dag la de dgongs pa can nges par rtogs pa'i shes rab yod pa de dag la 'di skad ces bya'o/ /shes rab che ba ni dris pa rnam par gtan la dbab pa la yongs su gtugs pa med pa'i phyir ro/ /shes rab yangs pa ni mngon par shes pa rgya chen po yongs su rdzogs pa'i phyir ro/ /shes rab zab pa ni gzhan dag gis gting dpag dka' ba'i phyir ro//shes rab mnyam pa med pa ni nyan thos dbang po rtul po rnams las khyad par du 'phags pa'i phyir ro/ /shes rab rin po che dang 'dra ba ni don gyi mchog thob par byed pas/ rin po che dang 'dra ba'i phyir ro/ /rig pa gsum dang ldan pa ni mi slob pa'i rig pa gsum thob pa'i phyir te/mi slob pa'i rig pa gsum ni sngon gyi gnas rjes su dran pa shes pa mngon sum du byed pa'i mngon par shes pa'i rig pa dang / 'chi 'pho ba dang / skye ba shes pa mngon sum du byed pa'i mngon par shes pa'i rig pa dang / zag pa zad pa shes pa mngon sum du byed pa'i mngon par shes pa'i rig pa'o//tshig 'di la bde bar gnas pa'i mchog thob pa ni yongs su nyams par mi 'gyur ba'i bsam gtan thob pa'i phyir ro/ /zhing gshin pa bzhin du 'bras bu myur zhing mtha' bzang ba'i phyir dang / spyod lam thams cad du shes bzhin du gnas pa'i phyir dang /sdug bsngal bzod pa nyid kyis 'drogs na/ bde ba'i phyir dang / bslab pa rnams la yongs su rdzogs par byed pa'i phyir go rims bzhin du yon yongs su sbyangs pa chen po/ /spyod lam rab tu zhi ba phun sum tshogs pa/ bzod pa dang nges pa chen po dang ldan pa/bde bar gshegs pa'i bka' la shin tu zhugs pa zhes bya ba'i tshig rnams kyis rab tu dbye bar rig par bya'o// //byang chub sems dpa'i yon tan bstan pa'i dgos pa ni/ nyan thos tshangs par spyod pa yun ring du spyad pa rnams kyis kyang byang chub sems dpa' rnams la 'dud par bya'o zhes gsungs pa'i phyir de dag la kha cig brnyas pa bzlog pa'i phyir dang /re zhig byang chub sems dpa' kho na yang de lta bur gyur pa yin na/ de bzhin gshegs pa rnams lta smos kyang ci dgos zhes skad cig rab tu dang ba bskyed pa'i phyir ro/ /de la byang chub sems dpa' bsngags par bya ba la che ba nyid gsum gyis byang chub sems dpa' rnams kyi chen po nyid brjod de/grangs phal che ba nyid kyis ni dpag tu med pa nyid kyi phyir ro/ /yon tan che ba nyid kyis gnas chen po la yang dag par zhugs pa zhes bya ba la sogs pa 'byung ba'i phyir ro/ /las che ba nyid kyis ni sems can thams cad kyi gnod pa thams cad rab tu zhi bar byed pa nyid kyi phyir te/byang chub sems dpa' rnams kyi sa las ni sems can thams cad kyi don byed pa yin pas so/ /sangs rgyas tha dad pa nas 'dus pa smos pa ni don du mi gnyer ba dang / le lo dang nga rgyal gyi dbang gis chos nyan du nye bar mi 'gro ba de'i gnyen por byas pa'i phyir te/chos nyan pa don du gnyer ba nyid kyi phyir bdag nyid gzhan dang gzhan nas 'ongs kyi/ gzhan gyi ngo mi chogs pa ni ma yin la/ 'jig rten gyi khams gzhan dag nas thag ring po nas kyang 'ongs shing /mthu chen po yang yin na gzhan dag ji ltar nye bar 'gro bar mi bya bar lta smos kyang ci dgos snyam pa'o/ /yon tan che ba nyid ni chen po nyid rnam pa dgus rig par bya ste/ brtson 'grus chen po nyid kyis ni sems can thams cad yongs su bskyab pa'i phyir gnas chen po la yang dag par zhugs pa'i phyir te/byang chub sems dpa' chen po rnams kyi gang yin pa'o/ /de yang theg pa chen po yin no/ /yang dag par zhugs pa'i brtson 'grus ni de'i ched yin pa'i phyir ro/ /rgyu chen po nyid kyis ni theg pa chen po'i chos sa bcu la sogs pa mnyan pa dang / bsam pa dang bsgom pa'i rim gyis nges par 'byung ba'i phyir ro/ /dmigs pa chen po nyid kyis ni sems can thams cad la bdag dang gzhan mnyam pa nyid thob pas/ byams pa la sogs pas mnyam par sbyor ba'i phyir ro/ /dus chen po nyid kyis ni dus thams cad la skad cig ma gcig bzhin du 'jug pas/bskal pa dang bskal pa ma yin par rnam par rtog pa thams cad spangs pa'i phyir ro/ /'dod pa med pa nyid chen po nyid kyis ni yongs su gzung ba thams cad btang bas bdud thams cad bcom pa'i phyir te/ blo gros rgya mtsho byang chub sems dpa' gang gi tshe yongs su gzung ba thams cad don du mi gnyer ba yin pa de'i tshe bdud kyi phyir rgol ba bcom pa yin no zhes bya ba la sogs pa 'byung ba'i phyir ro//yid la byed pa chen po nyid kyis ni theg pa dman pa yid la byed pa rgyangs bcad de spangs pa'i phyir ro/ /nye bar ston pa chen po nyid ni theg pa chen po'i chos kyi ro'i dga' ba dang bde bas nye bar bstan pa'i phyir ro//yongs su dag pa chen po nyid kyis ni las rnam pa gsum yongs su dag pas 'jigs pa thams cad las yang dag par 'das pa'i phyir te/ ngan song gi 'jigs pa la sogs pa'i rgyu 'chal ba'i tshul/ khrims la sogs pa med pa'i phyir ro/ /'jigs pa lnga ni 'tsho ba med pa'i 'jigs pa dang / tshigs su bcad pa med pa'i 'jigs pa dang / 'chi ba'i 'jigs pa dang / ngan 'gro'i 'jigs pa dang / 'khor gyi nang du bag tsha ba'i 'jigs pa ste/ de dag ni lhag pa'i bsam pa dag pa'i sa thob pa kho nas med par 'gyur ro//rtog pa chen po nyid kyis ni/ thams cad mkhyen pa nyid du lung bstan pa'i sa thob pas bgrod pa gcig tu gyur pa'i phyir te/ byang chub sems dpa'i sa bdun po dag la ni mngon par 'du byed pa dang bcas par 'byung ba'i phyir bgrod pa gcig tu gyur pa ma yin no//bgrod pa ni lam mo/ /de thob pa'i phyir de las gzhan pa'i byang chub sems dpa' rnams dang / bgrod pa gcig tu gyur pa yin te/ gang la la dag la phyir mi ldog pa'i sa bgrod pa gcig tu gyur pa yod pa zhes tshig rnam par sbyar ro/ /gang dag la 'di nas gang gis sems can thams cad kyi gnod pa gang gi rgyu rgyu mtshan can la sogs pa gang dag yin pa de dag ni rab tu zhi bar byed pa mngon sum du gyur pa yod pa'o//sa de ni snying rje chen po dang byams pa chen po ste/ de gnyis kyis gnod pa bsal ba la sogs pa'i gnod pa thams cad rab tu zhi bar byed pa'i phyir dang /dbul ba la sogs pa'i sdug bsngal rab tu zhi bar byed pa'i phyir ro/ /de gnyis kyis phal cher sems can gyi don bya ba byed pas de thob pa las chen po nyid yin no/ /yon tan kun du rdzogs pa'i ting nge 'dzin shin du 'dus so/ /de thob pa'i phyir byang chub sems dpa'i mtshan yang de skad ces bya ste/mtshan ni chos nyid kyis rab tu phye ba'i phyir byams pa bzhin no/ /de'i mtshan bstan pa ni/ de ni 'khor de'i nang na gtso bo yin pa'i phyir ro/ /byang chub sems dpa'i shin tu 'dus pa la bka' stsal pa de ni bshad pa'i gnas yin pa'i phyir ro//ci'i phyir/ nyan thos rnams gnas ma yin zhe na/ byang chub sems dpa' rnams ni thams cad mkhyen pa'i go 'phang mngon par 'dod pas chos kyi rnam pa de lta bu de la mos par byed/ 'jug par byed/ nan tan du byed cing nan tan gyis kyang bsgrub par bya ba yang byed kyi nyan thos ni thams cad mkhyen pa nyid kyi skal ba med pa'i phyir mos su zin kyang nan tan gyis bsgrub mi nus so//'o na ci'i phyir de bzhin du bshad pa'i gnas su 'gyur zhe na/ 'khor de'i nang du che ba nyid brjod pa'i phyir te/ ji skad du sngar bshad pa bzhin no/ /yang na der ming de zhes bya ba'i byang chub sems dpa' rnams kyi dbang du mdzad pa yin pas 'gal ba med do/sangs rgyas kyi sa ni grangs dang ming dang bsdus pa dang rnam par gtan la dbab pa'i rab tu dbye ba dang rnam pa bzhis rnam par gzhag go/ /rang gi ngo bo bstan pa kho nas grangs kyi bye brag nges par zin mod kyi/yang smos pa ni nyung ngu dang mang pos ma yin gyi lnga kho nas so zhes bstan par bya ba'i phyir ro/ /chos ni rang gi mtshan nyid 'dzin pa'i don gyis yin gyi/ 'bras bu rnam par smin pa sdug pa skyed pa'i don gyis ni ma yin no/ /sangs rgyas ni don dam pa dang / longs spyod rdzogs pa dang /sprul pa dang rnam pa gsum ste de dag ni 'og nas 'chad do/ /de dag gi sa ni bgrod pa'i yul te/ rang gi ngo bo dang / 'bras bu rnam par gzhag pa mi dbye bar chos thams cad de dag gi yul yin pa'i phyir ro/ /de nyid kyi phyir bsdus pa zhes bshad de/ de'i bdag nyid du gnas pa'i phyir ro//gcig tu bya ba ni rang gi mtshan nyid kyis bsdus pa yin no/ /de la dran pa nye bar gzhag pa bzhi po dag ni so sor rtog pa'i ye shes kyis bsdus te/ lus la sogs pa la so sor rtog pa'i phyir ro/ /yang dag par spong ba bzhi ni brtson 'grus kyi rang bzhin yin pa'i phyir la brtson 'grus rnams kyang de bzhin gshegs pa rnams kyi shes rab kyis yongs su bsdus/dor ba med cing gzhag pa med pa'i mtshan nyid yin pas mnyam pa nyid kyi ye shes kyis bsdus so/ /tshad med pa bzhi dang rdzu 'phrul gyi rkang pa bzhi ni ting nge 'dzin gyi rang bzhin yin pa'i phyir so sor rtog pa'i ye shes kyis bsdus te/ting nge 'dzin gyi sgo rnams kyi gnas yin no zhes 'byung ba'i phyir ro/ /gzhan gang dag bsam gtan dang / rnam par thar pa dang / ting nge 'dzin dang / snyoms par 'jug pa rnams dang / ting nge 'dzin dang / gzungs kyi sgo rnams dang / zag pa zad pa mkhyen pa dang / rdzu 'phrul gyi mngon par shes pa dag ma gtogs pa mngon par shes pa rnams dang / de bzhin du nyon mongs pa med pa dang / smon nas mkhyen pa dang / so so yang dag par rig pa dang / bsnyel ba mi mnga' ba dang / sangs rgyas kyi chos ma 'dres pa bco brgyad dang /lam mkhyen pa dang / thams cad du 'gro ba dang / zag pa zad pa mkhyen pa'i stobs dag ma gtogs pa rnams kyang so sor rtog pa'i ye shes kyis bsdus so/ /rdzu 'phrul gyi mngon par shes pa ni bya ba sgrub pa'i ye shes kyis bsdus so/ /zag pa zad pa mkhyen pa'i mngon par shes pa dang /zag pa zad pa mkhyen pa'i stobs ni zag pa zad pa'i rgyud la brjod par 'dod na ni/ 'di la zag pa rnams zad pa yod pas zhes bya ba yin pas ye shes bzhi char gyis bsdus so/ /gal te mya ngan las 'das pa'o zhe na ni/ zag pa rnams zad pa yin pas/ me long lta bu dang /mnyam pa nyid kyi ye shes dag gis bsdus so/ /thams cad du 'gro ba'i lam mkhyen pa'i stobs ni ye shes bzhi char gyis bsdus so/ /shes rab kyi dbang po dang shes rab kyi stobs ni me long lta bu dang mnyam pa nyid kyi ye shes dag gis bsdus so/ /byang chub kyi yan lag dang lam gyi yan lag ni mnyam pa nyid kyi ye shes kyis bsdus so//shes pa bcu po sdug bsngal shes pa la sogs pa gang dag yin pa dang zag pa med pa gang dag yin pa de dag ni me long lta bu dang mnyam pa nyid kyi ye shes kyis bsdus so/ /bsnyel ba mi mnga' ba'i chos nyid ni me long lta bu'i ye shes kyis bsdus so//bag chags kyi mtshams sbyor ba thams cad spangs pa ni chos kyi dbyings rnam par dag pa dang / me long lta bu'i ye shes kyis bsdus so/ /pha rol tu phyin pa zag pa med pa rnams kyang chos kyi dbyings rnam par dag pa dang / me long lta bu'i ye shes kyis bsdus so//zag pa dang bcas pa rnams ni ye shes tha ma gnyis kyis bsdus so/ /mtshan dang / dpe byad bzang po rnams ni bya ba sgrub pa'i ye shes kyis bsdus so/ /ye shes rnams kyis nye bar mtshon pa'i sems dang sems las byung ba'i tshogs smos pa'i phyir de las gzhan pa'i sangs rgyas kyi chos rnams kyang sbyar bar bya'o//chos lnga po dag ni rgyu dang 'bras bu dang / de'i rab tu dbye ba'i sgo nas rnam par gzhag ste/ de las rgyu ni 'phags pa'i chos skye ba'i rgyu mtshan yin pa'i phyir chos kyi dbyings rnam par dag pa yin no/ /'bras bu ni 'phags pa'i ye shes te/ de la dmigs nas skye ba'i phyir dang /de la brten pa'i phyir ro/ /de'i rab tu dbye ba ni rnam pa bzhi'o/ /de dag kyang ji ltar 'byung ba'i sgo nas rnam par gzhag ste/ chos kyi dbyings la dmigs pas thos pa ma lus par 'dzin pa dang / sems can thams cad la bdag dang / gzhan mnyam pa nyid brnyes pa dang / yang dag pa'i chos rab tu ston pa'i thabs dang gzhan la phan 'dogs pa'i rgyu'o//rnam pa gcig tu na de bzhin gshegs pa ngo bo nyid dang / rgyu dang 'bras bu'i sgo nas rnam par gzhag ste/ de bzhin gshegs pa'i ngo bo nyid ni de bzhin nyid rnam par dag pa'i mtshan nyid dang / de la dmigs pa rnam par mi rtog pa'i ye shes mchog tu gyur pa'i mtshan nyid gang yin pa'o//rgyu ni sems can thams cad la mnyam pa nyid kyi ye shes mchog tu gyur pa tshad med pa'i rjes su song ba yin no/ /'bras bu ni gzhan la phan 'dogs pa'o/ /de yang sems can skal ba yod pa dang / skal ba med pa la so sor rtog pa dang de dang mthun pa'i bya ba sgrub po//rnam pa gcig tu na sangs rgyas thams cad rnam par gzhag pa'i sgo nas rim par byas pas/ rang bzhin dang longs spyod rdzogs pa dang / bya ba sgrub pa'i sangs rgyas te/ gnyis dang / gnyis dang / gcig dang go rims bzhin no/ /mnyam pa nyid kyi ye shes de ni/nyon mongs pa can gyi yid gyur pa'i mtshan nyid yin pa'i phyir me long lta bu'i ye shes la dmigs pa yin mod kyi/ 'on kyang longs spyod rdzogs pa'i sku kho nas bsdus pa yin la me long lta bu'i ye shes ni mi g.yo ba nyid kyis chos kyi sku bsdus pa de'i phyir mnyam pa nyid dang / so sor rtog pa'i ye shes ni longs spyod rdzogs pa'i rgyu yin no/ /de la sangs rgyas kyi sa ni 'bras bu'i gnas skabs te/ 'bras bu de yang ye shes dang spangs pa'i bdag nyid do/ /spangs pa de yang chos kyi dbyings rnam par dag pa ste/ de yang sgrib pa ma lus par spangs pa'i phyir ro/ / ye shes ni rnam pa bzhi ste me long lta bu'i ye shes la sogs pa'o/ /'di la sangs rgyas kyi chos mtha' dag ma lus par rnam par gzhag pa'i phyir/ sangs rgyas kyi sa ni 'di snyed cig kho nar zad de/ ji skad du sngar bshad pa bzhin de la chos kyi rnam grangs mtha' dag thos pa'i bag chags yongs su smin pas ma lus pa bsgoms pa rgyur gyur pa/rtag tu sems can thams cad la phan pa dang bde ba nyid bskyed par bya ba'i phyir nye bar gnas pa ting nge 'dzin dang / gzungs kyi sgo dang bsod nams dang ye shes kyi tshogs gzhal du med pa dang ldan pa/ shes bya dang nyon mongs pa'i sgrib pa thams cad las dben pa chos kyi dbyings rnam par dag pa ni chos thams cad kyi de bzhin nyid phyin ci ma log pa'i rang bzhin 'phags pa'i chos thams cad nye bar bskyed pa'i rgyu ste/de bzhin gshegs pa thams cad kyi bdag nyid yin no/ /me long lta bu'i ye shes ni ngar 'dzin pa dang /nga yir 'dzin pa dang / gzung ba dang 'dzin pa'i rnam par rtog pa las dben pa/ dmigs pa dang / rnam pa yongs su ma chad pa/ nyon mongs pa'i dri ma dang / rnam par rtog pa mtha' dag dang bral ba mi g.yo ba ye shes ma lus pa'i gnas dmigs pa ma lus pa bsnyel ba mi mnga' ba shes bya dang /rnam pa tha dad par ma zhugs pa/ shes pa'i gzugs brnyan 'byung ba'i rgyu mtshan shes pa thams cad kyi rten du gyur pa/ rnam par rtog pa'i gnas yongs su gyur pa'i ngo bo de bzhin nyid la dmigs pa ste/ rnam par mi rtog pa'i ye shes so/ /mnyam pa nyid kyi ye shes ni byang chub sems dpas mngon par rtogs pa'i dus na/bdag dang gzhan mnyam pa nyid kyi ye shes thob pa de la dmigs pa gang yin pa de nyid gong nas gong dus bsgom pa khyad par zhugs pa dang ldan pas byams pa dang snying rje chen po dang ldan pa sangs rgyas kyis la mi gnas pa'i mya ngan las 'das par zhugs pa/gzugs dang kha dog sna tshogs pa'i sku kun du ston pa'i thabs su rnam par gzhag ste/ nyon mongs pa can gyi yid yongs su gyur pa'i ngo bo de nyid kyi phyir me long lta bu'i ye shes dang bye brag yod do/ /so sor rtog pa'i ye shes ni gzungs dang bsam gtan dang ting nge 'dzin dang /snyoms par 'jug pa thams cad kyi 'byung gnas/ shes bya'i rnam pa tha dad pa thams cad la thogs pa med par 'jug pa/ sku bai DUr+ya lta bu la sogs pa kun du ston pa'i thabs su gyur pa ste/ the tshom thams cad gcod pa'i rgyu'i chos rab tu ston pa'o//bya ba sgrub pa'i ye shes ni 'jig rten gyi khams thams cad du gdul bya'i sems can ji lta ba bzhin du yongs su smin par bya ba'i phyir/ thabs sna tshogs dpag tu med cing bsam gyis mi khyab pa dag gis gzhan la phan 'dogs pa la gcig tu gtso bor gyur pa'o/ /chos kyi dbyings rnam par dag pa'i mtshan nyid kyi dbang du byas nas chos kyi dbyings rnam par gtan la dbab pa'i rab tu dbye ba brgal ba dang /lan du bcas pa ni gal te/ de bzhin gshegs pa ni chos kyi dbyings kyi rang bzhin yin la chos kyi dbyings ni de bzhin gshegs pa nyid yin te/ de ni chos thams cad kyi spyi'i mtshan nyid yin la/de chos thams cad ni tha dad na de dang ldan pa'i chos kyi dbyings ji ltar sna tshogs su mi 'gyur/ sna tshogs yin na ni ji ltar yongs su dag ste/ shel sna tshogs nye bar gzhag pa dang 'brel pa'i phyir sna tshogs ma yin pa ni ma yin no zhes bya ba ni brgal ba yin no/ /de yongs su spangs pa'i phyir nam mkha'i dpe dang po ste/gzugs su gyur pa sna tshogs kyi rnam pa thams cad la kun nas yod kyang des brjod par bya ba ma yin pa'o/ /sna tshogs ni rigs mthun pa dang rigs mi mthun pa'i tha dad pa'i bye brag gis so/ /rnam pa ni 'dra bar byed pa'i phyir te/ blo la rang gi ngo bo lta bu 'god par byed pa'i phyir zhes bya ba'i tha tshig go//gzugs su gyur pa ni gzugs kyi rnam pa ste/ gyur pa dang tshul zhes bya ba la sogs pa ni rnam pa'i don dag yin no/ /kun na yod pa ni lus dang ldan pa thams cad la khyab pa'i phyir ro/ /des brjod par bya ba ma yin pa ni gzugs su gyur pa sna tshogs kyi rnam pa des brjod par bya ba ste/brjod par 'os pa'am/ brjod par nus pa'am/ brnyes par bya ba ma yin pa'o/ /des shes bya ba'i gsum pa ni rgyu'am de lta bu'i dngos po ste/ gzugs sna tshogs ni nam mkha' sna tshogs su tha snyad gdags pa'i rgyu mtshan yang ma yin la/ des de sna tshogs su mtshon pa yang ma yin te/ de ni de lta bu'i rnam pa ma yin pa'i phyir ro/ /'on te nam mkha' sna tshogs su snang ngo zhes tha snyad 'dogs pa mthong bas sna tshogs su 'dod do zhe na/ dbyug pa la sogs pa bzhin du tha snyad btags pa bzhin du 'gyur gyi dngos ni ma yin no/ / tha snyad btags pa tsam gyis ni de ltar mi 'gyur te/ ji lta zhe na de ni kun na yod pa yin yang sna tshogs ma yin te ro gcig go/ /gzugs sna tshogs su 'brel pas kyang sna tshogs su mi 'gyur la/ rang gi ngo bo ste/ ngo bo nyid gcig pa yang mi 'dor ro/ /ro ni snying po dang ngo bo nyid de/ mtshan nyid tha dad pa ma yin pa nyid do zhes bya ba'i tha tshig go/ /de bzhin du de bzhin gshegs pa rnams kyi chos kyi dbyings rnam par dag pa yang zhes bya ba ni dper na nam mkha' dngos po yin yang rung ma yin yang rung ste/ lus can thams cad dang yang ldan lus can gyis tha dad par yang mi 'gyur la/de tha snyad du gdags par yang mi nus so/ /tha snyad 'dogs pa yod du zin kyang de kho na tsam du 'gyur gyi/ 'di rang gi ngo bo 'dor zhing ngo bo gzhan nye bar len pa ni ma yin te/ ji skad du nam mkha' nam mkha' zhes brjod mod kyi/ nam mkha' ni brjod par bya ba ni ma yin no/ /de bzhin du stong pa nyid stong pa nyid ces brjod mod kyi/stong pa nyid ni brjod par bya ba ma yin no zhes gsungs pa lta bu'o/ /de la shes bya sna tshogs kyi rnam pa dang 'brel ba'i phyir chos kyi dbyings shel bzhin du sna tshogs su 'gyur ro zhes gang smras pa ma nges pa yin te/ nam mkha' sna tshogs ma yin pa la yang gzugs sna tshogs dang 'brel pa mthong ba'i phyir ro//ji ste nam mkha' yang du ba dang / khug rna dang sprin la sogs pa dang 'brel ba'i phyir sna tshogs kho nar snang ngo zhe na/ de yang mi rung ste/ rang gi rtog pa'i dbang gis du ba dang / khug rna la sogs pa snang ba gang yin pa de nyid sna tshogs yin gyi/nam mkha' ni ma yin te/ de ni mi snang ba'i phyir ro/ /de bzhin du rang gi rtog pas sgro btags pa'i dbang gis gzugs la sogs pa snang ba gang yin pa de nyid sna tshogs yin gyi chos kyi dbyings rnam par dag pa ni ma yin no/ /chos kyi dbyings sna tshogs ma yin zhing brjod par bya ba ma yin yang de'i yul can gyi chos ston pa sna tshogs kyang 'jug la/de sna tshogs yin pa'i phyir sna tshogs nyid du yang thal bar mi 'gyur te/ brjod par bya ba ma yin pa'i phyir dang / brjod pa ni btags pa'i yul can yin pa'i phyir ro/ /de rtogs pa'i rgyu mtshan yin pa'i phyir bstan pa'i chos don med pa nyid du thal bar mi 'gyur te/spring yig gi yi ge mthong nas rgyu des don go ba bzhin no/ /de bzhin gshegs pa rnams kyi thugs rje chen po'i rgyu mthun pa brjod par bya ba ma yin pa'i don brjod pas brjod par mdzad pa gang yin pa 'di ni nam mkha' la ri mo sna tshogs 'dri ba bzhin ngo mtshar che ste/ji skad du blo gros rgya mtsho 'di lta ste/ dper na skyes bu la la zhig nam mkha' gzugs med pa bstan du med pa/ thogs pa med pa rnam par rig par mi byed pa 'di la tshon sna tshogs kyis ri mo 'bri bar byed pa/ de bas kyang blo gros rgya mtsho/sangs rgyas bcom ldan 'das rnams gang brjod par bya ba ma yin pa'i chos mngon par rdzogs par sangs rgyas nas sems can gzhan rnams dang gang zag gzhan rnams la brjod pas rnam par rig par mdzad pa ni ches dka' ba mdzad do zhes bya ba la sogs pa gsungs pa lta bu'o/ / shel kyang chos kyi dbyings kyi rang bzhin yang yongs su dag pa yin pa'i phyir dper mi rung ngo / /gtan tshigs kyang gnyis ka 'am gang yang rung ba la ma grub bo/ /gal te chos kyi dbyings rnam par dag pa shes bya thams cad la yod pa nyid yin no/ 'dod chags la sogs pa'i nyon mongs pa'i dri ma dang 'brel pa'i phyir ji ltar rnam par ma dag par mi 'gyur te/de las gzhan pa'i sems dang / sems las byung ba'i tshogs bzhin no zhes bya ba ni brgal ba'o/ /de yongs su spangs pa'i phyir nam mkha'i dpe gnyis pa ste/ 'di lta ste dper na nam mkha' ni zhes bya ba la sogs pa yin no/ /tha mi dad par zhugs pa zhes bya ba tha mi dad pa ni so so ma yin pa ste/de'i khongs su gtogs pa nyid de tha dad pa ltar ni de nyid dang gzhan dag du brjod par bya ba ma yin pa nyid do/ /tha mi dad par gyur na ni lus can nyid dang mi rtog pa nyid du thal bar 'gyur ro/ /dper na nam mkha' gzugs can thams cad na yod kyang gzugs kyi nyes pa rnams kyis ma gos te gzugs kyi nyes pa ni 'dod chags dang khong khro ba nye bar spyod pa'i rgyu ste sngon po la sogs pa sna tshogs yin no//rnam pa gcig tu na sprin dang khug rna dang gzugs nag nog du 'dug pa la sogs pa ni yongs su ma dag pa nyid kyis yongs su spang bar bya ba yin pa'i phyir dang /mthong ba rnam par dag pa skye ba'i bgegs su gyur pa'i phyir nyes pa yin no/ /rnam pa gcig tu na gzhan la grags pa'i ngor shes pa la yod pa shes bya la sgro gdags te/ ngo bo nyid kyis rnam par dag pa'i phyir des kyang mi gos pa ltar chos kyi dbyings yongs su dag pa yang de dang 'dra'o//sems can thams cad dang sems mnyam pa nyid kyis yongs su grub pas tha mi dad par zhugs zhes bya ba ni rang gi sems kyis yongs su grub pa rnam par dag pa rtag tu rang bzhin gyis 'od gsal zhing rang bzhin yongs su dag pa ci 'dra ba sems can thams cad kyi sems par gyur pa rang bzhin gyis yongs su dag pa yang de dang 'dra ba ste/sems kyi rang bzhin de ni de bzhin nyid do/ /des de dag mnyam pa yin te/ ji skad du 'di gang gis mnyam zhe na/ stong pa nyid du mnyam pas 'di mnyam mo zhes bya ba la sogs pa gsungs pa lta bu'o/ /sems kyi rang bzhin yang sems kyi chos nyid yin te/de nyid kyi phyir de'i chos nyid yin par bstan pa'i phyir sems mnyam pa nyid ces ngo bo'i skyon du byas pa yin no/ /de'i gyur pa ni yongs su gyur pa ste/ yongs su dag pa yin no/ /de ni rang bzhin gyis yongs su dag pa yin no/ /de ni rang bzhin gyis yongs su dag pa yin mod kyi/ de'i tshe glo bur gyi dri ma dang bral ba las rnam par gzhag go/ /rnam pa gcig tu na sems mnyam pa kho na yongs su grub pa yin te/ yongs su grub pa'i ngo bo nyid yin pa'i phyir ro/ /gsum pa ni de lta bu'i ngo bor yin te/ sems can thams cad dang sems mnyam pa nyid kyi yongs su grub pa'i mtshan nyid de lta bur 'di sems can thams cad kyi sems dag la tha mi dad par mtshon par byed do//rnam pa gcig tu na ngo bor yin te/ yongs su grub pa'i mtshan nyid du sems can thams cad kyi sems dag la ngo bo tha mi dad par 'jug par mtshon par byed de/ tha dad pa ma yin par brjod par bya ba nyid kyis sems can gyi nyes pa rnams kyis kyang mi gos te/rang bzhin gyis rnam par dag pa'i phyir ro/ /nyes pa ni 'dod chags la sogs pa ste/ sems la skyon chags par byed pa'i phyir dang / dri ma can du byed pa'i phyir ro/ /de dag kyang rtog pa'i dbang gis byung bas/ de'i rang bzhin ma yin pa'i phyir glo bur ba dag yin no//de nyid kyi phyir de dag spang bar bya ste/ rang bzhin ni spang bar mi nus pa'i phyir ro/ /de nyid las dgongs te chos nyid kyi sems la sems kyi sgrar btags nas/ 'di ni rang bzhin gyis 'od gsal ba'o zhes gsungs te/ chos nyid kyi sems ma gtogs par rang bzhin gyis 'od gsal ba'i sems gzhan med pa'i phyir ro//'o na ji ltar sems can dag la 'dod chags la sogs pa yod ce na/ rang gi rtog pa'i stobs bskyed pa'i phyir te/ de yang phyin ci log ma spangs pa'i phyir la/ de yang ma rig pa'i dbang gis so/ /'di skad du ji ltar nam mkha' rang bzhin gyis yongs su dag kyang mig rnam par dag pa rnams la rab rib la sogs pa'i gnod pas rnam par ma dag par snang ba de bzhin du chos kyi dbyings rnam par dag pa yang rang gi rtog pas kun nas bslang ba'i 'dod chags la sogs pa'i rgyus ma rig pa'i rab rib kyis gnod par byas pa'i mig can rnams la rang bzhin gyis yongs su dag kyang /phyin ci log tu snang gi rnam pa thams cad du yongs su dag pa'i shes rab kyi mig can rnams ni de ltar mi gos so zhes bshad pa yin no/ /chos kyi dbyings rnam par dag pa de yang rnam pa thams cad du yongs su dag cing de bzhin gshegs pa thams cad kyi khyad par med par chos kyi skur brjod par bya ste/de nyid dus thams cad du de kho na bzhin du yod pa'i phyir/ don dam par de bzhin gshegs pa zhes bya'o/ /de nyid kyi phyir sems can thams cad kyi sems kyi rgyu la yang yod pas sems can thams cad ni de bzhin gshegs pa'i snying po can no zhes gsungs so//de ni thams cad la yod kyang sems can rnams kyi rang gi skyid pa'i stobs bskyed pas dmus long gis nyi ma bzhin du ma mthong ste ji skad du snod chag pa'i zla ba bzhin/ sems can nyes pas mi snang ngo zhes gsungs pa lta bu'o/ /de la chos kyi dbyings ni 'dod chags la sogs pa'i dri ma dang 'brel pa'i phyir rnam par dag pa ma yin no//sems dang sems las byung ba bzhin no zhes gang smras pa/ nam mkha' gzugs la sogs pa'i dri ma dang 'brel kyang rnam par ma dag pa med pas ma nges pa yin no/ /de bzhin du sems la sogs pa'i chos nyid kyang 'dod chags la sogs pa dang 'brel pa'i phyir rnam par ma dag pa yang ma yin pas dper mi rung ngo //bsam pa rnam par ma dag pa'i don ni de'i ngo bo mi gsal ba'i phyir chos kyi dbyings rnam par ma dag pa nyid du yang 'dod do/ /bsam pa rnam par dag pa rnams ni 'dod chags la sogs pa'i dri ma 'brel pa dang bral ba'i phyir de ltar mi gos so zhes bshad zin to//'dis ni nam mkha' la sogs pa bzhin du chos kyi dbyings thams cad ni yod pa'i phyir/ sems can gyi nyes pa dag gis mi gos so zhes bshad pa yin no/ /brtags pa'i chos kyis dben pa thams cad ni yod pa nyid ni kun nas yod pa'i phyir bsgrub mi dgos so//gal te de bzhin gshegs pa rnams chos kyi dbyings rnam par dag pa'i rang bzhin pa/ de yang spros pa med pa'i ngo bo nyid yin pa'i phyir rtsol ba med na sems can gyi don bya ba rgyu mtshan ye shes rnams ji ltar 'byung 'on te de 'byung na ni rtsol ba dang bcas pa'i phyir ji ltar de bzhin gshegs pa de bzhin nyid kyi mtshan nyid yin zhe na/de'i lan gdab pa'i phyir/ dper na nam mkha' ni lus dang ngag dang yid kyi las su gyur pa thams cad kyi go 'byed kyang zhes bya ba 'di gsungs so/ /re zhig lus dang ngag gi las ni lus can yin pa'i phyir/ go 'byed pa yang rigs na/yid kyi las la go rims ji ltar te/ lus can ma yin pa la ni gang gis na go 'byed par 'gyur ba thogs pa med do zhe na/ de skye ba la bgegs mi byed pa gang yin pa de nyid go 'byed pa yin no/ /thogs pa dang bcas pa la yang skye ba la bgegs mi byed pa nyid nam mkha' go 'byed pa yin te/gang gi phyir de skye ba na/ sgrib pa med par skye ba de'i phyir de go 'byed ces bshad do/ /rnam pa gcig tu na thogs pa dang bcas pa'i dngos po de nas bsal te/ gzhan gyis go 'byed pas de la yod pa'i chos nam mkha' la nye bar 'dogs pa de bzhin du yid kyi las kyang 'gag pa na gzhan gyi go 'byed pas de la yod pa'i chos nam mkha' la ci'i phyir nye bar mi gdags/de ltar ma yin na thams cad na yod pa'i dngos pos ji zhig go 'byed yod/ nam mkha' ni rtsol ba yang med mngon par 'du byed pa yang med cing bya ba ni nam mkha' la 'di la ni go dbye'o//'di la ni go mi dbye'o snyam du rnam par rtog pa med do/ /de bzhin du zla ba dang nyi ma dang sgron ma la sogs pa'i 'od zer dag kyang 'byung ba na de'i rtsol ba med bzhin du byung nas gzugs la sogs pa rab tu gsal bar byed la/ yid bzhin gyi nor bu rnams kyang rtsol ba dang bral ba sems can gyi bsam pa ji lta ba bzhin du re ba yongs su skong bar byed do//nam mkha' smos pa ni dpe tsam du zad pas 'di thams cad la sbyar bar bya'o/ /de bzhin du de bzhin gshegs pa'i chos kyi dbyings rnam par dag pa la de'i bdag nyid du gnas pa na yang rtsol ba mi mnga' bar sems can gyi don mdzad par rnam par gshegs te/de'i phyir de bzhin gshegs pa rnams kyi dbyings rnam par dag pa dang ye shes dang sprul pa dang sems can gyi bya ba sgrub pa thams cad kyi go 'byed kyang zhes bya ba la/ ye shes thams cad ni me lta bu'i ye shes la sogs pa'o//sprul pa thams cad ni sku dang gsung dang / thugs sprul pa rnams so/ /sems can thams cad kyi bya ba sgrub pa dag ni sems can gang gi bya ba ste dgos pa gang yin pa de sgrub cing grub par byed pa'o/ /de dag go 'byed pa ni de dag skye ba la rgyu mtshan gyi dngos po nye bar 'gro ba'i phyir ro//rtsol ba yang med mngon par 'du byed pa yang med ces bya ba la sogs pa ni yid la byed pa ste/ sems dmigs pa las dmigs pa gzhan la 'gro ba gang yin pa'o/ /mngon par 'du byed pa ni sems kyi yongs su g.yo ba'o/ /rnam pa gcig tu na ye shes kyi sprul pa longs spyod rdzogs pa dang /sprul pa'i sku'i bdag nyid sems can gyi bya ba sgrub pa'i rgyu mtshan thams cad kyi go 'byed ces bya ste/ mi zad pa nyid kyis rgya che ba'i phyir dang / thogs pa med pa'i phyir/ rnam par mi rtog pa bzhin du yang de'i dbang gis 'byung ba'i phyir ro//'di skad du ji ltar nam mkha' la sogs pa gzugs la sogs pa'i skye ba'i go 'byed pa la sogs pa'i bya ba la 'jug pa rnams ngar 'dzin pa dang / nga yir 'dzin pa la rtsol ba la sogs pa'i spros pa med mod kyi 'on kyang bya ba'i bye brag thams cad mngon pa de bzhin du de bzhin gshegs pa zag pa med pa'i dbyings la rnam pa thams cad du ngar 'dzin pa dang nga yir 'dzin pa'i rtsol ba'i spros pa dang bral ba rnams kyis ye shes dang sprul pa dang /sems can gyi bya ba sgrub pa thams cad kyang / sngon mngon par 'du mdzad pa'i dbang gis 'byung ngo zhes bshad pa yin no/ / gang mtshan dang dpe byad bzang po'i yo byad thams cad dang ldan par 'khor ba'i mtha'i bskal pa ji srid bzhugs shing chos kyi skur bzhugs pa'i phyir rnam par rtog pa mi mnga' yang / sngon gyi smon lam gyi stobs bskyed pas ye shes kyi sprul pa thams cad kyis sems can gyi don byed pa 'di nyid de/de bzhin gshegs pa rnams kyi mchog tu bsam gyis mi khyab pa'i ngo bo yin no/ /de'i tshe de bzhin gshegs pa las 'di ni mdzad do/ /'di ni mi mdzad do snyam pa la sogs pa'i rnam par rtog pa mi mnga' mod kyi/ 'on kyang sngon 'phangs pa'i dbang gis bsam nas gnyid kyis log pa las sad pa dang /'gog pa'i snyoms par 'jug pa las ldang ba bzhin du ji skad bshad pa'i bya ba rnams kyang mngon te/ ji skad du 'phags pa blo gros rgya mtshos bstan pa las dper na dge slong gaN+DI brdung ba la bab kyi bar du byin gyis brlabs te/ 'gog pa la snyoms par zhugs pa de'i rna lam du gaN+DI'i sgra mi grag pa rnam par rtog pa yang mi byed mod kyi/'on kyang ldan par 'gyur ro zhes bya ba gsungs pa lta bu'o/ /gal te chos kyi dbyings rnam par dag pa shes bya thams cad kyi rjes su song zhing tha mi dad par 'dug pa yin na/ de dang tha mi dad pa'i phyir de yang de dang 'dra ba kho nar skye ba dang 'jig pa dag tu 'gyur ba'am/skye ba dang 'jig pa med pa'i phyir/ de shes bya dang tha mi dad par 'dug pa ma yin no zhe na/ dper na nam mkha' la gzugs kyi rnam pa sna tshogs pa rnams kyi skye ba yang snang 'jig pa yang snang zhes bya ba la sogs pa gsungs te/'di skad du ji ltar gzugs la sogs pa skye ba dang 'gag pa yod kyang / de dang tha mi dad par 'dug cing de'i go 'byed pa'i mtshan nyid nam mkha' la ni skye ba dang 'gag pa dag med pa de bzhin du chos kyi dbyings rnam par dag pa ye shes dang / sprul pa dang / sems can gyi bya ba sgrub pa thams cad kyi go 'byed pa la zhugs shing de dang tha mi dad par 'dug pa la yang skye ba dang 'gag pa dag med do zhes bshad pa yin no//de nyid la dgongs nas 'jam dpal skye ba med pa dang / 'gag pa med pa zhes bya ba 'di ni de bzhin gshegs pa'i tshig bla dgas so zhes bya ba la sogs pa gsungs so//gzugs la sogs pa yang don dam par de bzhin nyid kyi ngo bo yin pa'i phyir skye ba la sogs pa ni med kyi kun rdzob tu rnam par gzhag go/ /de nyid kyi phyir snang zhes gsungs te/ kun rdzob tu yin gyi don dam pa ni ma yin no snyam du dgongs te/ ye shes kyi sprul pa la sogs pa thams cad kyang de dang 'dra'o//gal te chos kyi dbyings rnam pa thams cad du 'gro ba yin na/ de bzhin gshegs pa'i bstan pa yang 'phel ba dang nub pa snang bas de yang tha mi dad pa'i phyir de kho na bzhin du 'phel ba dang 'grib pa dag tu 'gyur te/ de'i phyir rnam par dag pa med par thal bar 'gyur ro zhe na/dper na nam mkha' la gzugs kyi rnam pa sna tshogs rnams kyi 'phel ba yang snang 'grib pa yang snang zhes bya ba la sogs pa gsungs so/ /de dang 'dra bar de bzhin gshegs pa'i bstan pa'i nying khu ni de bzhin gshegs pa bstan pa nyid de las gzhan pa mu stegs can gyi bstan pa la ltos na/shin tu mchog tu gyur pa nyid kyis snying por gyur pa'i phyir snying khu yin te mar gyi snying khu bzhin no/ /chos kyi dbyings rnam par dag pa la ni 'phel ba yang med 'grib pa yang med do zhes bya ba ni de bzhin gshegs pa'i bstan pa la yang don dam par na chos kyi dbyings kyi rang bzhin yin pa'i phyir 'phel ba dang 'grib pa dag med do//kun rdzob kyi tshul du ni gzugs la sogs pa bzhin du yod do/ /de dag kyang chos kyi dbyings kyi rang bzhin rnams ni yang dag par na med pa'i ngo bo yin pa'i phyir nam mkha' bzhin du 'phel ba dang 'grib pa dag med do/ /de nyid kyi phyir snang zhes gsungs te/der snang ba'i rnam par shes pa'i skye ba med pa'i phyir kun rdzob tu snang ba yin gyi/ yang dag par na chos kyi dbyings spros pa med pa'i ngo bo la ni ma yin no/ /gal te de bzhin gshegs pa yang sems can rnams la phan pa dang nye bar sgrub pa'i phyir bzhud cing byon na go chos kyi dbyings kyang de dang tha mi dad pa'i phyir 'gro ba dang 'ong bar thal bar 'gyur bas phal pa bzhin du rnam par dag pa med pa dang /skye ba dang sogs pa thal bar 'gyur ba 'am/ de med na phyogs gzhan dag tu sems can rnams la phan pa dang bde ba nye bar gnas pa yang med do zhe na/dper na nam mkha' mthar thug pa med pa'i phyir/ nam mkha' la phyogs bcu na gzugs su gyur pa g.yo ba rnams mtha' yas mu med kyang nam mkha' ni 'gro ba'am zhes bya ba la sogs pa gsungs te/ ji ltar na nam mkha' mtha' thug pa med pa de bzhin du 'jig rten gyi khams kyang mtha' thug pa med do//de'i phyir gzugs su gyur pa gzugs kyi rnam pa rnams mtha' yas pa ni phyogs gcig gi sgo nas so/ /mu med pa ni thams cad du'o/ /yang na dus sam yul gyi sgo nas so/ /yang nam mkha' ni thams cad na yod pa'i phyir dang / byed pa med pa'i phyir sgo dbye ba'i phyir 'gro ba'am 'ong ba yang med do//de bzhin du chos kyi dbyings rnam par dag pa mtha' thug pa med pa'i phyir/ chos kyi dbyings rnam par dag pa mu thug pa med pa'i phyir de bzhin gshegs pa rnams kyi chos kyi dbyings rnam par dag pa la sogs pa sems can la phan pa dang bde ba nye bar gnas pa'i bya ba gang dag yin pa de dag kyang mu med pa de snga ma bzhin no//'gro ba med kyang 'jig rten gyi khams mtha' yas pa dag tu sems can gyi don mdzad pa mtha' yas pa dag 'byung ngo / /'gro ba zhes bya ba ni 'di nas gzhan du'o//'ong ba zhes bya ba ni gzhan nas 'dir ro/ /g.yo ba 'am 'gul ba zhes bya ba ni bstan pa dang bshad pa dag go/ /de dag med pa ni chos kyi dbyings mu med pa'i phyir ro/ /gang zhig lus yod pa de ni yul gzhan dag tu 'byung ba'i phyir 'gro'o zhes bya ba la sogs pa'i tha snyad 'thob kyi lus med pa ni ma yin te/nam mkha' la sogs pa bzhin no/ /'di skad du de bzhin gshegs pa ni don dam par chos kyi dbyings rang bzhin kho na yin la chos kyi dbyings kyang sems can thams cad kyi rgyud la sogs pas sems can de dag kyang rang gi sa bon yongs su smin pa'i dbang dang /de'i byin gyis de lta bu'i spyod par snang ba'i rnam par rig pa skyes na gang gis na de bzhin gshegs pas sems can gyi don mdzad pa mdzad do zhes bya ba de lta bu'i tha snyad 'dogs pa 'byung ngo zhes bshad pa yin no/ /de bzhin gshegs pa la ni byin tsam nyid ma gtogs par gang gis na de lta bu'i mdzad par 'gyur ba'i spyod pa gzhan mi mnga' ste/ji skad du rigs kyi bu de bzhin gshegs pa ni gang du'ang bzhugs pa'am byon pa mi mnga'o zhes bya ba la sogs pa gsungs pa lta bu'o/ /sprul pa'i sku las dgongs nas de bzhin gshegs pa bzhud do zhes bya ba la sogs pa gsungs pa 'gal ba med do//gal te chos kyi dbyings rnam par dag pa 'gro ba dang 'ong ba med na yang yul der 'gro ba med par ji ltar mngon par rdzogs par byang chub pa dang / yongs su mya ngan las 'das par 'gyur ba'am/ 'gro ba dang 'ong ba yod na ni de nyid nyes pa yin no zhe na ma yin te/'jig rten gyi khams la yang 'jig pa dang chags pa dag yod kyang nam mkha' la med pa de dag med pa de bzhin du chos kyi dbyings rnam par dag pa la gang gi na de'i don du der 'gro bar 'gyur ba mngon par rdzogs par byang chub pa dang / mya ngan las 'da' ba med de/dper na nam mkha' la 'jig rten gyi khams 'jig pa ste rnam par 'jig pa dang chags pa ste/ 'byung ba kun rdzob tu mngon gyi de dag kyang nam mkha' 'dra bar stong pa'i phyir yang dag par ni ma yin pa de bzhin du/ chos kyi dbyings rnam par dag pa la rnam pa thams cad mngon par rdzogs par byang chub pa dang /yongs su mya ngan las 'das pa dpag tu med pa snang ba yang kun rdzob tu mngon gyi yang dag par ni ma yin te/ mngon par rdzogs par byang chub pa po dang / yongs su mya ngan las 'da' ba po dag med pa'i phyir ro/ /phung po rnams ni rten cing 'brel par 'byung ba nyid kyis de'i bdag nyid ma yin pa'i phyir ro//gal te de gnyis ka yang dag pa nyid du yin no zhe na/ yang dag pa ni rang gi ngo bo la ma nyams pa yin na/ mngon par rdzogs par byang chub pa'i gnas skabs nyams na/ mngon par rdzogs par byang chub la yongs su mya ngan las ma 'das pa'i gnas skabs nyams na yongs su mya ngan las 'das par 'dod pa'i phyir ro//'on te yang 'di snyam du mngon par rdzogs par byang chub pa yang nam yang mngon par rdzogs par byang chub pa ma yin par mi 'gyur la/ yongs su mya ngan las 'das pa yang nam yongs su mya ngan las ma 'das pa ma yin no zhes bya ba 'di nyid yang dag pa yin no snyam du sems na/'di la yang de dang 'dra bar 'gyur te/ 'jig pa yang nam yang 'chags pa ma yin zhing / 'chags pa yang nam yang 'jig pa ma yin la bum pa la sogs pa yang nam yang bum pa la sogs pa ma yin pa ma yin no//de'i phyir rnal 'byor pa rnams 'jig rten gyi khams me la sogs pas yongs su gang ba brgal te/ 'gro bar yang mi 'gyur te/ de dag dang 'brel na tshig pa la sogs pa thal bar 'gyur ba'i phyir la/ mos pa'i dbang gis sa la sogs pa gser la sogs pa'i dngos por yang mi 'gyur ro//ting nge 'dzin gyi stobs kyis mngon par rdzogs par byang chub pa ma yin par mi 'gyur ro/ /de lta bas na mngon par rdzogs par byang chub pa dang yongs su mya ngan las 'das pa'i gnas skabs kyi sngon rol dang / de'i tshe yang de bzhin nyid ma nyams pa'i ngo bo yin pa'i phyir chos kyi dbyings rnam par dag pa ni mngon par rdzogs par 'tshang rgya ba yang med/yongs su mya ngan las 'das pa yang med do/ /de gnyis ni de la sgro btags pa'i ngo bo yin pas yang dag pa ma yin te/ byed pa po dang bya ba dag ni kun brtags pa'i ngo bo nyid yin pas med pa'i phyir ro//chos thams cad thugs su chud pa ni byang chub yin no zhes gsungs pa gang yin pa de yang mi rtog pa'i ye shes las dgongs pa yin te/ de bzhin nyid la dmigs pa'i ye shes de yang gnyis su rnam par rtog pa kun du mi 'byung ba'i phyir/de'i tshe yang mngon par rdzogs par 'tshang rgya ba yang ma yin la/ yongs su mya ngan las 'da' ba yang ma yin no/ /de nyid la dgongs nas lha'i bu chos thams cad 'byung ba med pa ni de bzhin gshegs pa 'byung ba'o zhes bya ba dang / de bzhin du thob pa med pa dang mngon par rdzogs pa med pa ni zhes bya ba la sogs pa gsungs te/kun brtags pa med pa'i phyir dang / skye ba la sogs pa rnam par rtog pa med pa'i phyir ro/ /kun rdzob tu mi de gnyis ka mngon te/ de bzhin gshegs pa sprul pa'i skus de ltar kun du bstan pas 'dul bar 'gyur ba'i sems can gyi ngor de gnyi ga ston par mdzad do//gal te chos dbyings sems can thams cad dang ldan na/ de dag ji ltar log par sgrub pa yin chos kyi dbyings la ni log par sgrub pa dag med de yongs su dag pa'i phyir ro/ /de'i phyir bslab pa'i gzhi bca' ba don med par thal bar 'gyur te sems can rnams kyis log par sgrub pa med pa'i phyir ram/nyan thos bzhin du yongs su skye ba dang / yongs su dag pa med par ji ltar 'gyur zhe na ma yin te nam mkha' bzhin no/ /dper na rtswa la sogs pa gzugs kyi rnam pa nam mkha' la brten pa rnams la snang ba la sogs pa 'gyur ba sna tshogs dmigs kyang nam mkha' ni de'i khongs su gtogs kyang nam mkha' ni gzhan du mi 'gyur ba'i phyir de dag gi 'gyur ba yang med la snang ba la sogs pa'i sdug bsngal gyis mi gnod pa'i phyir yongs su skyo ba yang med do//de bzhin du sems can gyi khams chos kyi dbyings rnam par dag pa la brten pa la chos kyi dbyings kyi khongs su gtogs pa'i sems can rnams la yang rang gi rnam par rtog pa kun nas bslang ba'i lus dang ngag dang /yid kyi las log par sgrub pa mi dge ba la sogs pa la stsogs pa rnam pa sna tshogs khyim pa dang /rab tu byung ba rnams la ci rigs par dmigs pa de dag bzlog pa'i phyir kun rdzob tu bslab pa'i gzhi bca' ba dang / de las 'das pa'i ngo bo log par sgrub pa yang dmigs mod kyi chos kyi dbyings rnam par dag pa ni gzhan du 'gyur ba med pa'i phyir log par sgrub pa de dag gis 'gyur ba yang med la mi gnod pa'i phyir yongs su skyo ba yang med do//gang zhig sdug bsngal rnams kyis gnod pa ni de mi bzod pa nyid kyis nyan thos bzhin du yongs su skyo bar 'gyur gyi chos kyi dbyings rnam par dag pa ni ma yin te/ nam mkha' bzhin du thams cad bzod pa'i phyir ro//ji ltar nam mkha' la gzugs la sogs pa'i gnod pa la sogs pa kun rdzob tu yin gyi yang dag par ni mi 'dod pa de bzhin du bslab pa la sogs pa bca' ba dang / log par sgrub pa rnams kyang rnam par gzhag pa'i chos kyi dbyings rnam par dag pa la de dag yod pa ni ma yin no//'di ltar lus la sogs pa'i las ni mtshungs par ldan pa dang / kun nas slong ba'i dbang gis mi dge ba la sogs pa nyid yin gyi rang gi ngo bos ni ma yin zhing / des kun nas bslang ba'i bong ba la sogs pa nyid ni yang mi dge ba nyid du khas blang bar yang mi nus la/lus kyang sa la sogs pa gnas pa yin pa'i phyir de dang chos mthun pa yin no/ /ngag gi las kyang rnga bo che la sogs pa'i sgra bzhin du mi dge ba la sogs pa nyid mi srid do/ /rnam par rig byed ma yin pa de ltar gyur pa yang yod pa ma yin te/ de ni mi byed pa tsam du zad pa'i phyir ro/ /de dang mtshungs par ldan pa'i sems pa yang dag pa la sogs pa dang mtshungs par ldan pa bzhin du mi dge ba la sogs pa nyid mi srid do//de'i 'bras bu yang de kho na dang 'dra'o/ /chos kyi dbyings rnam par dag pa la ni las dang 'bras bu dag yod pa ma yin te/ de gnyis ni brtags pa yin pa'i phyir ro//kun rdzob du der snang ba'i rnam par rig pa skyes na mngon de ji ltar mngon pa de ltar yang rnam par bzhag go/ /gal te chos kyi dbyings rnam par dag pa thams cad ldan pa yin na/ tshul khrims kyi phung po la sogs pa'i mtshan nyid du thal bar 'gyur ba 'am/ de dang tha mi dad pa'i phyir de dag kyang de kho na bzhin du phung po'i bdag nyid ma yin pa nyid du 'gyur ro zhe na ma yin te/nam mkha' bzhin no/ /dper na nam mkha' la brten pa'i sa chen po la sogs pa yang dmigs/ nyi ma la sogs pa rgyu ba yang dmigs mod kyi nam mkha' ni sa la sogs pa'i phung po dang 'brel pa'i phyir de'i bdag nyid ma yin pa ltar chos kyi dbyings rnam par dag pa la tshul khrims kyi phung po la sogs pa dmigs pa yang de dang 'dra'o//de la tshul khrims kyi phung po ni zag pa med pa'i tshul khrims kyi phung po la/ ting nge 'dzin dang shes rab kyi phung po dag ni zag pa med pa'i bsam gtan dang /shes rab po/ /rnam par grol ba'i phung po ni mi slob pa'i rnam par grol ba'o/ /rnam par grol ba'i ye shes mthong ba'i phung po ni mi slob pa'i yang dag pa'i lta ba'o/ /phung po lnga po 'di dag chos kyi dbyings rnam par dag pa dang ldan yang chos kyi dbyings rnam par dag pa ni de dag dang ldan du zin kyang de dag gi mtshan nyid ma yin no//tshul khrims kyi phung po la sogs pa'i rang bzhin ma yin no/ /de bzhin du nye bar len pa'i phung po lnga'i rang bzhin can ma yin no zhes brjod par bya ste/ tshul khrims kyi phung po la sogs pa smos pa ni zag pa med pa'i chos mthun pas so//gal te sangs rgyas thams cad chos kyi dbyings rnam par dag pa'i bdag nyid yin na/ khyod kyi nga'i zhes bya ba'i rtsol ba med par 'khor gyi dkyil 'khor tha dad par ji ltar 'gyur/ rtsol ba yod na ni chos kyi dbyings ltar yongs su dag pa yin zhe na/ ma yin te/ nam mkha' bzhin no/ /dper na nam mkha' la rang gi rgyu dang rkyen las yang dag par 'byung ba'i stong gsum la sogs pa'i 'jig rten gyi khams su chud pa'i rlung gi dkyil 'khor la sogs pa dmigs kyang nam mkha' la ni nga yir 'dzin pa'i tha dad pa yang med la de rnam par mi rtog kyang 'jig rten gyi khams kyi dkyil 'khor tha dad pa rnams kyi go yang 'byed do//de bzhin du de bzhin gshegs pa rnams kyi chos kyi dbyings rnam par dag pa la rang gi las kyi dbang gis yang dag par byung ba'i rnam pa thams cad phun sum tshogs pa thams cad mkhyen pa nyid du dbang bskur ba'i sa thob pa'i byang chub sems dpa' rnams gcig tu 'dus pa'i sangs rgyas kyi 'khor gyi dkyil 'khor rang gi rgyu dang rkyen gzhan dag las byung ba rnams dmigs te sangs rgyas kyi 'khor gyi dkyil 'khor gcig gi rgyu gang yin pa de nyid gnyis pa'am gsum pa'i rgyu yin no//gang gi dbang du mdzad nas mdo gzhan las sangs rgyas de dag gi sangs rgyas kyi zhing tha dad pa nyid dang / 'khor gyi dkyil 'khor tha dad pa nyid ni snang ba 'ba' zhig du zad do zhes gsungs pa ni chos kyi dbyings rnam par dag pa la ni ngar 'dzin pa dang / nga yir 'dzin pa'i ngo bo'i rtsol ba dang gzung ba dang 'dzin pa rnam par rtog pa'i mngon par 'du byed pa yang med pa'o//'di skad du de bzhin gshegs pa chos kyi skus tha mi dad cing spros pa med ngo bo rnams kyang sngon gyi smon lam gyi dbang gis longs spyod rdzogs pa dang / sprul pa'i skus tha dad pa'i sangs rgyas bcom ldan 'das rnams kyi 'khor gyi dkyil 'khor rang gi 'du byed pa'i dbang gis byung ba'i rnam pa thams cad phun sum tshogs pa rnams kyang dmigs la/sangs rgyas kyi zhing sna tshogs kyi bkod pa sna tshogs pa nyid kyang dmigs so zhes bshad par 'gyur te/ 'khor los sgyur ba'i bud med rin po che la sogs pa bzhin du de lta bu'i rnam par rig pa dag snang ngo zhes bya ba'i tha tshig go//snga ma ni ye shes 'byung ba dang gzhan gyi don byed pa la mngon par 'du byed pa med par bshad pa yin gyi/ 'di ni chos la rdzogs par longs spyod par bya ba'i phyir/ rang gi las kyi 'byung ba'i sangs rgyas kyi 'khor gyi dkyil 'khor sna tshogs la tha dad par rnam par rtog pa med pa yin pas bye brag yod do//'dis ni chos kyi dbyings kyi mtshan nyid zab pa dang / las zab pa dang / gnas zab pa bshad do/ /de la mtshan nyid zab pa ni rnam par ma dag pa'i nyes pa bcu yongs su spang bar rnam par dag pa'i mtshan nyid bcu kho nar blta bar bya ste/rnam par ma dag pa'i nyes pa bcu ni sna tshogs kyi nyes pa dang / kun nas nyon mongs pa'i nyes pa dang / mngon par 'du byed pa dang bcas pa'i nyes pa dang / 'dus byas kyi mtshan nyid kyi nyes pa dang /'phel ba dang zad pa'i nyes pa dang / 'ong ba dang 'gro ba'i nyes pa dang / rtag pa dang chad pa'i nyes pa dang / yongs su skyo ba'i nyes pa dang / ril po'i nyes pa dang / 'dzin pa'i nyes pa'o/ /rnam par dag pa'i mtshan nyid bcu ni sna tshogs yin pa'i mtshan nyid dang / kun nas nyon mongs pa med pa'i mtshan nyid dang /mngon par 'du bya ba med pa'i mtshan nyid dang / 'dus ma byas kyi mtshan nyid dang / 'phel ba med pa dang / zad pa med pa'i mtshan nyid dang / 'ong ba dang 'gro ba med pa'i mtshan nyid dang / rtag pa med pa dang chad pa med pa'i mtshan nyid dang / yongs su skyo ba med pa'i mtshan nyid dang / ril po ma yin pa'i mtshan nyid dang / nga yir 'dzin pa med pa'i mtshan nyid dang go rims bzhin no/ /las zab pa ni sprul pa la sogs pa'i las kyi sgo nas rig par bya'o/ /gnas zab pa ni 'ong ba dang / 'gro ba med pa'i sgo dang / rnam pa thams cad phun sum tshogs pa'i sangs rgyas kyi 'khor gyi dkyil 'khor gyi sgo nas rig par bya'o//chos kyi dbyings kyi rnam pa thams cad nam mkha' dang chos mthun par bstan pa'i phyir thams cad du nam mkha' dper mdzad de/ 'di skad du 'di lta ste/ nam mkha' dpe gcig pu ma gtogs pa gang gis de bzhin gshegs pa'i tshul khrims kyi bar la 'jal bar byed pa'i dper bkod pa ji snyed pa'i dper dgod pa de dag thams cad ni de bzhin gshegs pa la skur pa 'debs pa yin te/nam mkha' ji tsam pa de bzhin gshegs pa'i tshul khrims kyang de tsam mo zhes bya ba la sogs pa gsungs pa lta bu'o//spangs pa rnam par gzhag nas/ ye shes rnam par gzhag pa'i dbang du mdzad nas/ shin tu 'dus me long lta bu'i ye shes ni zhes bya ba la sogs pa gsungs te/ dpes ni me long lta bu'i ye shes kyi 'jug pa'i rgyu mtshan ston par byed do/ /de bzhin gshegs pa'i ye shes nyid me long gi dkyil 'khor lta bu yin te/me long gi dkyil 'khor dang chos mthun par shes pa'i gzugs brnyan 'byung ba'i rgyu mtshan yin pa'i phyir ro/ /skye mched rnams ni mig la sogs pa'i nang gi drug po rnams so/ /de'i yul rnams ni de dag yul te/ mig la sogs pa de dag gi yul gzugs la sogs pa phyi'i drug go//skye mched rnams dang de'i yul rnams te/ de dag gi rnam par shes pa dag ni gang dag dmigs pa des skye ba rnams so/ /de dag nyid gzugs brnyan dag yin te/ thams cad du shes pa rgyu mtshan nyid du bshad pa'i phyir ro/ / mnyam pa nyid kyi ye shes ni rten cing 'brel par 'byung ba'i dngos po tsam gyis yul can me long lta bu'i ye shes la dmigs pa yin no/ /so sor rtog pa'i ye shes ni rang dang spyi'i mtshan nyid kyi yul can te/ bya ba sgrub pa'i ye shes kyang de dang 'dra'o/ /skye mched dang de'i yul te/ gzung ba'i yul thams cad shes pa'i gzugs brnyan dang spyi'i mtshan nyid snang ba de bzhin gshegs pa'i me long lta bu'i ye shes kyi dkyil 'khor la brten nas byung ba 'di gsum snang ste yongs su gcod do//sus she na/ de bzhin gshegs pa kho nas so/ /yang na de ni mnyam pa nyid kyi ye shes la sogs pa'i bdag nyid yin pa'i phyir/de dag rang rig pa'i rnam par shes pa skye ba na blos tha dad par phye nas/ de bzhin gshegs pas rab tu mkhyen to zhes tha snyad 'dogs so/ /yang na me long lta bu'i ye shes kyis de dag rab tu mkhyen te/ de la brten nas gzugs brnyan tsam gyi tshul du 'byung ba de la snang bar 'gyur ba'i phyir ro//yang na tshig gsum gyi zlas dbye ba yin te/ skye mched rnams dang / de'i yul rnams dang / rnam par shes pa rnams so/ /de dag nyid gzugs brnyan dag yin te/ de dag kyang de bzhin gshegs pas de bzhin gshegs pa'i me long lta bu'i ye shes la brten nas byung ba so sor rtog pa'i ye shes la sogs pa ji snyed yod pa nyid dang /ji lta ba bzhin du yod pa nyid du rab tu mkhyen te snga ma bzhin no/ /yang na me long lta bu'i ye shes la brten nas rnyed nas rab tu mkhyen te/ me long lta bu'i ye shes skye ba na/ shes bya thams cad yul gyi ngo bor gyur pa yin la/de la skye mched la sogs pa gzugs brnyan lta bur snang ba de dag me long lta bu'i ye shes de nyid kyis de'i rnam pa nye bar 'dzin pa'i rnam par rtog pa med kyi 'on kyang me long lta bu'i ye shes de shes bya thams cad la khyad par skye ba na de bzhin gshegs pa yang de'i bdag nyid yin pa'i phyir de bzhin gshegs pas gzung ba dang 'dzin pa'i rnam par rtog pa dang bral bas rang dang spyi'i mtshan nyid kyi rjes su song ba de dag rang rig pa'i rnam par rab tu mkhyen to//de nyid kyi phyir de bzhin gshegs pa bsnyel ba mi mnga' ba'i chos nyid du rgyu ste/shes bya mtha' dag bsnyel ba mi mnga' ba'i phyir ro/ /de lta ma yin te/ me long lta bu'i ye shes mi mnga' na/ de bzhin gshegs pa ji ltar thams cad mkhyen pa nyid yin/ rgyun gyi spyod pa'i phyir 'gyur te/ ji skad du/ dper na rgyun gyis nus pa'i phyir/ /me yis thams cad bsreg 'dod ltar/ /de bzhin thams cad mkhyen 'dod kyi//cig char thams cad mkhyen phyir min/ /zhes bshad pa lta bu'o zhe na/ de yang 'di lta ste/ gzhan gyi sems shes pa la sogs pa rdzas gcig 'dzin pa'i dus na/ de las gzhan pa'i rdzas mi 'dzin pa'i phyir ma gtogs pa kho nas 'das pas rgyun gyis kyang 'dzin par mi srid la thams cad mkhyen pa yang brtag par 'gyur gyis dngos ni ma yin no//thams cad mkhyen pa ma yin pa la thams cad mkhyen par nye bar brtags par ni thams cad mkhyen par mi 'gyur ro/ /yang na de bzhin gshegs pa'i me long lta bu'i ye shes kyi dkyil 'khor la brten nas/ 'jig rten na'am 'jig rten gyi rgyud gzhan dag la yang skye mched dang /de'i yul dang / rnam par shes pa'i gzugs brnyan rnams snang ste/ de med na de dag mi snang ba'i phyir ro/ /'byung ba'i dus nyid na rig pas de'i phyir/ 'di skad du de bzhin gshegs pa'i me long lta bu'i ye shes kyi dkyil 'khor la brten nas skye mched dang /de'i yul dang rnam par shes pa'i gzugs brnyan rnams snang ngo zhes gsungs so/ /de'i dbang gis 'byung ngo snyam du dgongs pa ste/ sa bon yod kyang sa la sogs pa med pa'i phyir/ myu gu mi skye ba lta bu dang / gzugs yod kyang me long med na gzugs brnyan mi 'byung ba bzhin no/ /'bras bu thams cad skyed pa la de'i spyi'i rgyur khas blangs pa'i phyir bcom ldan 'das dbang phyug la sogs pa'i lta ba dang lta ba mthun par thal bar 'gyur ba ma yin nam zhe na/ thal bar 'gyur ba med de/ 'di ltar de skye ba la de'i bdag po'i rkyen tsam nyid yin gyi/byed pa po nyid ni ma yin la/ de ni dus dpag tu med pa nas bsod nams dang ye shes kyi tshogs bstsags pa las yang dag par 'gyur ba'i phyir/ mi rtag pa yang yin/ dbang phyug la sogs pa'i byed pa po yang yin la/ ther zug [(]gyi [,]gi [)]rtag pa nyid kyis rtag pa nyid kyang yin pas 'dir ni mi mthun no//'o na ni rang gi gzugs brnyan rdzas gzhan med pa'i ltar na/ de ji ltar dper rung ste/ 'di ltar rgyu mtshan du gyur pa me long yod na gzugs nyid de lta bur snang ngo zhe na/ de la yang mngon par zhen pa'i bag chags yongs su smin pa'i dbang gis rnam par shes pa nang na gnas pa nyid de ltar snang ste/des na 'jig rten gzugs brnyan mthong ngo zhes de snyam du nga rgyal skye'o/ /de nyid kyi phyir snang ngo zhes bshad kyi skye'o zhes ni ma bshad do/ /de bzhin du shes bya gzhan yang shes bya nang gi yin par lta ba de 'dra bar lta'o/ /'dra ba mnyam pa ni mnyam pa ste/me long dang de bzhin gshegs pa'i me long lta bu'i ye shes kyi dkyil 'khor de dag gzugs brnyan 'byung ba'i rgyu mtshan tsam dang rnam par mi rtog pas mnyam mo/ /des na zhes bya ba ni rgyu'i gsum pa yin te/ de'i phyir me long lta bu'i ye shes zhes bya ba'i tha snyad 'thob po//chos kyi dbyings rnam par dag pa nyid gnas yin te/ de la dmigs pa'i sgo nas der gzhag pa yin no/ /der gzhan pas rgyun mi 'chad pa nyid kyi phyir/ 'khor ba ji srid par rgyun gyi rgyun mi 'chad par de'i rjes su 'gro ba'i phyir ro/ /de nyid kyi phyir mi g.yo mi 'gul te/ rnam par rtog pa'i g.yo ba thams cad dang bral ba'i phyir dang /rtag tu rgyun gyis rjes su 'gro ba'i phyir ro zhes bshad pa yin no/ /mnyam pa nyid kyi ye shes la sogs pa gsum res 'ga' ba yin pa'i phyir g.yo ba dag yin no/ /ci'i phyir gzhag ce na sems can rnams kun nas nyon mongs pa dang rnam par byang ba la so sor rtog par bya ba'i ched du'o//ci'i phyir so sor brtag ce na sems can rnams kyi kun nas nyon mongs pa dang rnam par byang ba bstsal zhing skyed pa'i phyir te kun nas nyon mongs pa ni nyon mongs pa dang / las dang skye ba'i kun nas nyon mongs pa'i mtshan nyid do//de bsal ba ni 'jig pa dang 'jig rten las 'das pa'i lam dag gis dus re zhig dang gtan du spangs pa'o/ /rnam par byang ba ni dge ba gang gis sems can rnams kyi sems rnam par byang bar 'gyur ba'o/ /de bskyed pa ni ji ltar smon pa'i theg pas sa bon 'jog pa dang /gsos 'debs pa dang yongs su smin pa dang rnam par grol ba dag tu 'gyur ba'o/ /'di skad du de bzhin gshegs pa rnams mngon par byang chub sems dpa'i gnas skabs na sems can gyi don mdzad pa rnam pa thams cad 'grub par bya ba'i phyir sems can thams cad la phan pa dang bde ba'i lhag pa'i bsam pa dang ldan pa'i rgyud kyis bsod nams dang ye shes kyi tshogs ji ltar bstsags pa rnams yongs su bsngo ba la mkhas pas chos kyi dbyings su 'jog ste/des na de dag spros pa med pa'i bdag nyid du gnas kyang de dag gi dbang gis ji ltar smon lam btab pa bzhin du theg pa rnam par gzhag pa'i rjes su 'brang zhing 'jug pa'i sems can rnams dge ba'i rtsa ba'i sa bon bskyed pa dang /gsos 'debs pa dang / yongs su smin pa dang / rnam par grol ba dag bshad pa yin no/ /gsal ba ni rang bzhin gyis rnam par dag pa'i phyir ro//rnam par dag pa ni glo bur gyi dri ma dang bral bas khyad par du rnam par dag pa'i phyir ro/ /g.yo ba med pa ni kun nas dri ma rnam par dag pas gnyi ga rnam par dag pa'i phyir ro/ /lam ni rnam par dag pa'i dang po'i phyir ro/ /thal le ni rnam par dang ba'i phyir ro/ /lhang nge ni g.ya' med pas gnyi ga rnam par dag pa'i phyir ro//nyon mongs pa'i sgrib pa nyid sangs rgyas kyi ye shes kyi dri ma yin no/ /de bsal ba ni bral ba dang spangs pa ste/ de'i phyir ram 'di la dri ma bsal ba de yod na/ me long lta bu'i ye shes shin tu sbyangs pa yin no zhes bya bar sbyar ro//nyon mongs pa'i sgrib pa 'di 'dod chags la sogs pa'i nyon mongs pa zil gyis gnon pa dang / kun nas dkris pa dang / bag la nyal gyi gnas skabs rtag tu kun du 'byung ba rnams yin te/ 'phags pa'i lam skye ba'i bgegs byed pa'i phyir ro/ /shes bya'i sgrib pa ni nyon mongs pa can ma yin pa'i mi shes pa ste/thams cad mkhyen pa'i ye shes kyi bgegs yin no/ /mya ngan las 'das pa'i ni ma yin te/ de yod kyang nyan thos la sogs pa mya ngan las 'da' ba mthong ba'i phyir ro/ /sgrib pa de nyid dri ma yin te ye shes rnam par dag pa skye ba'i bgegs byed pa'i phyir ro//de bsal ba ni bral ba ste/ gnyen po rnyed pas glo bur ba yang gtan du mi 'byung ba'o/ /sgrib pa de dang bral bas de'i tshe me long lta bu'i ye shes shin tu rnam par dag cing shin tu sbyangs pa yin no/ /gang gis she na/ der brten pa'i ting nge 'dzin yongs su bzung ba de de la brten pa ni der brten pa'o//me long lta bu'i ye shes de la ste/ de la brten nas skye ba'i phyir ro/ /'di na re brten pa yang yin la ting nge 'dzin yang yin pas zhes tshig rnam par sbyar ro/ /yang na ye shes ting nge 'dzin de la brten pa ste/ de'i mjug thogs su rnam par grol ba'i lam ches rnam par dag pa skye ba'i phyir ro//ting nge 'dzin gyi khyad par de ni rdo rje lta bu yin te/ de'i stobs kyis sgrib pa spong ba'i phyir ro/ /de yongs su gzung ba'am des ye shes te/ yongs su gzung ba ste/ de'i mjug thogs su skye ba'i phyir ro/ /de'i stobs kyis me long lta bu'i ye shes shin tu yongs su dag pa/ rnam par rtog par gyur pa'i ngo bo rnam par mi rtog pa 'byung ngo //gsal ba ni ngo bo nyid kyis so/ /rnam par dang ba ni nyon mongs pa'i sgrib pa med pa'i phyir ro/ /rnyog pa med pa ni shes bya'i sgrib pa las dben pa'i phyir ro/ /lam me ba ni gsal ba'i phyir te/ ngo bo nyid kyis yongs su dag pa'i phyir ro/ / thal le lhang nge ba ni nyon mongs pa dang / shes bya'i sgrib pa dang bral ba'i phyir te/ go rims bzhin no/ /me long gi dkyil 'khor gdong gi skyon dang / yon tan kun ston pa'i phyir legs par phyis pa ni snang ba'i phyir lam me zhes byar rung na/ de go mi snang ba yin na ji ltar shin tu sbyangs pa lam me zhes bya zhe na/sems can thams cad kyi bya ba thams cad sgrub pa'i phyir te/ de mi snang du zin kyang de'i dbang gis 'byung ba sprul pa'i skus sems can thams cad kyi bya ba thams cad sgrub pas de snang ba'i phyir te/ des na 'bras bu'i sgo nas de la lam me thal le lhang nge'o/ / me long gi dkyil 'khor yang de'i rnam pa can gyi shes pa skye ba'i rgyu mtshan gyi dngos por 'gyur ba kho na'i phyir te/ de skad du tha snyad gdags kyi gzhan du ni ma yin no/ /gal te shes pa skye ba'i rgyu mtshan yin na/ de'i rnam pa tha dad par yang ji ltar mi 'gyur rgyu mtshan rtag tu nye ba'i phyir de la rag lus te/ skye ba'i shes pa'i gzugs brnyan rnams srog chags thams cad la cig car dang rtag tu skye bar thal bar yang ji ltar mi 'gyur zhe na/ 'di lta ste dper na/ me long gi dkyil 'khor ni gzugs kyi rkyen la ltos nas/ gzugs brnyan sna tshogs 'byung ba'i rgyu mtshan du 'gyur/ yang gzugs brnyan tha dad par yang mi 'gyur la/gzugs brnyan rtag tu 'byung bar yang mi byed de/ gzugs kyi rkyen la ltos pa'i phyir ro/ /de bzhin du me long lta bu'i ye shes kyang sems can gyi dus kyi rkyen la ltos nas shes bya'i gzugs brnyan sna tshogs 'byung ba'i rgyu mtshan du 'gyur yang sngon po la sogs pa bzhin du tha dad par mi 'gyur ba'i phyir/de tha dad pas rnam pa yang mi 'gyur la/ sems can rnams kyi shes pa skye ba'i dus kyi rkyen la ltos pa'i phyir thams cad la shes pa'i gzugs brnyan cig car dang rtag tu skyed par yang mi byed do/ /gal te shes pa de dag yod na ni ji ltar na de la brten te skye/'on te med na ni shes pa med pa skye ba'i rgyu mtshan gyis ye shes ji ltar rtsol ba med pa nyid yin te/ bum pa la sogs pa med pa'i skye ba'i rgyu mtshan rdza mkhan la sogs pa'i shes pa rtsol ba nyid ni mthong ngo zhe na/ dper na me long gi dkyil 'khor rgyu mtshan du gyur pa la rnam pa du ma zhes bya ba ni rnam pa du ma nyid yin pa'o//rnam pa sna tshogs zhes bya ba ni rigs tha dad pa ste/ rigs mthun pa la ltos pa'i phyir ro/ /yang ngo zhes bya ba ni grangs phal che bas so/ /gcig nyid rnam par bcad nas rnam pa du ma zhes bya ba smos la rigs tha dad pa dang / phal che ba la ltos nas rnam pa sna tshogs mang po zhes bya ba smos so/ /gzugs brnyan skye ba de la me long gi dkyil 'khor de rtsol ba ste/ rnam par rtog pa yang med do/ /de bzhin du me long lta bu'i ye shes rgyu mtshan du gyur pa la rnam pa du ma zhes bya ba la sogs pa ni rigs mthun pa dang / rigs mi mthun pa dang /grangs phal che ba la ltos nas te/ de ltar med pa kho na'i shes pa'i gzugs brnyan rnams 'byung yang / de rtsol ba ste/ rnam par rtog pa yang med do/ /'di skad du dper na me long gi dkyil 'khor rnam par rtog pa med par gzugs brnyan sna tshogs 'byung ba'i rgyu mtshan yin pa de bzhin du me long lta bu'i ye shes kyang ngar 'dzin pa dang /nga yir 'dzin pa dang / gzung ba dang 'dzin pa'i rtsol ba mngon par 'du byed pa'i rnam par rtog pa med par shes pa'i gzugs brnyan sna tshogs 'byung ba'i rgyu mtshan yin no zhes bshad pa yin no/ /gal te shes pa'i gzugs brnyan rnams dang 'brel na de'i phyir de dag tha dad na de ji ltar tha dad pa ma yin/'on te ma 'brel na ni ji ltar na ni rgyu mtshan gyi dngos po yin te/ 'bras bu dang ma 'brel ba'i sa bon la sogs pa myu gu la sogs pa'i rgyu mtshan gyi dngos po yin pa yang ma mthong la rdo thal la sogs pa dang mi ldan pa'i nyi ma'i 'od zer rnams kyang de dag bsal ba thabs kyi dngos por mi 'gyur ro zhe na/dper na me long gi dkyil 'khor gzugs brnyan 'byung ba'i rgyu mtshan yin yang de dag 'byung ba'i sngon rol na med pa nyid kyis mi nye ba'i phyir de dag dang ldan pa yang ma yin te/ nye ba dang mi nye ba gnyis ldan pa med pa'i phyir ro//mi nye ba yang ma yin te/ de dag 'byung ba'i rgyu mtshan gyi dngos po yin pa'i phyir/ de yod na de dag yod pa gang yin pa de nyid 'brel pa yin te/ de dag gi rgyu mtshan gyi dngos por gyur pas de tha dad pa yang ma yin no/ /de bzhin du me long lta bu'i ye shes kyang shes pa'i gzugs brnyan 'byung ba'i rgyu mtshan yin yang /de dag dang ldan pa yang ma yin mi ldan pa yang ma yin te/ de dag dang mi nye ba dag dang bsnyil ba mi mnga' ba'i chos nyid kyi phyir ro/ /de dag 'byung ba'i sngon rol na med pa nyid kyis mi nye ba'i phyir ldan pa yang ma yin la/ bsnyel ba mi mnga' ba'i chos nyid kyi phyir mi ldan pa yang ma yin te/de yod na de dag gi shes pa'i gzugs brnyan rnams 'byung la med na mi 'byung ba'i phyir ro/ /bsnyel ba ni 'jigs pa med pa nyid do/ /bsnyel ba mi mnga' ba ni yod pa nyid do/ /yang na dmigs pa mi brjed pa ni bsnyel pa mi mnga' ba'o//'di ltar shes bya'i tshogs mtha' dag rang gi ngo bo bzhin pa de la rab tu gsal te srog chags thams cad kyi dus gsum pa'i shes pa yang des thugs su ma chud par mi skye'i/ thugs su chud pa kho nas skye'o/ /de'i phyir shes bya mtha' dag bsnyel ba mi mnga' ba'i ngo bo yin pa'i phyir mi ldan pa yang ma yin no//de dag 'byung ba'i rgyu mtshan gyi dngos por gyur pas tha dad par 'gyur ba yang ma yin te/ me long lta bu kho nar tha dad pa med par 'byung ba'i phyir ro/ /'di skad du dper na me long gi dkyil 'khor gzugs brnyan rnams dang ldan pa dang mi ldan pa'i bye brag gis 'dus te reg pas dben yang dag 'byung ba'i rgyu mtshan gyi dngos por 'gyur ba de bzhin du me long lta bu'i ye shes kyang de gnyis ka'i ngo bo'i bye brag gis 'dus te reg pas dben yang shes pa'i gzugs brnyan 'byung ba'i rgyu mtshan gyi dngos por 'gyur ro zhes bshad pa yin no//sa bon la sogs pa yang 'bras bu dang gnyis kar brjod par bya ba ma yin pa'i ngo bo dag ste 'bras bu skye ba'i rgyu mtshan gyi dngos por 'gyur la/ snang ba'i yan lag kyang gzugs la sogs pa dang ldan pa yang ma yin te/ de nye ba las gzugs la sogs pa'i rnam pa shes pa'i blo dag rab tu skye'o//de bas na thams cad du yang gnyi ga'i ngo bo'i 'dus te reg pas dben par rgyu mtshan gyi dngos por mthong gi rgyu dang 'bras bu dag phrad pa'i mtshan nyid kyi ldan pa ni med do/ /ngos thams cad nas legs par phyis pa ni dngos po yang dag par bstan pa'i phyir sgrub pa'i thabs kyis ngos thams cad nas legs par phyis pa'o//kun nas gzugs brnyan 'byung ba'i rgyu mtshan du 'gyur ro zhes bya ba 'di'i rnam par dbye ba ni 'dun dang zhes bya ba la sogs pa yin no/ /rnam pa yongs su ma chad cing tshad med pa shin tu sbyangs pa zhes bya ba la rnam pa yongs su chad pa ni yul gyi sgo nas yongs su chad pa med pa'i phyir ro//rnam pa tshad med pa'i dus kyi sgo nas te/ thams cad du dang rtag tu dri ma'i rnyog pa thams cad las dben pa'i ye shes 'byung ba'i phyir ro/ /shin tu sbyangs pa ni ji skad bshad pa'i ting nge 'dzin gyi khyad par gyis sgrib pa ma lus par spangs pa'i phyir ro/ /nges pa'i rigs can rnams ni rang gi theg pas nges par 'byung bar bya ba'i phyir la/ma nges pa'i rigs can rnams ni theg pa chen po'am/ cig shos kyis yongs su mya ngan las 'da' ba'i phyir te/ mngon sum dang brgyud nas rang gi dge ba'i rtsa ba yongs su smin pa'i khyad par gyis 'byung ba'i lam skye ba'i rgyu mtshan gyi dngos por 'gyur ro/ /kun nas zhes bya ba ni ting nge 'dzin thams cad kyis shin tu sbyangs pa'o//yang na phyogs thams cad na ste/ de la phyogs gang gis shes pa'i gzugs brnyan skye ba'i rgyu mtshan gyi dngos por mi 'gyur ba'i phyogs 'ga' yang med pa'o/ /'o na me long lta bu kho nar gzugs brnyan 'byung ba'i rgyu mtshan yin pa'i phyir/ tshad yongs su chad par thal bar 'gyur ro zhe na/de lta ma yin te/ dper na me long sa la sogs pa'i gzugs brnyan 'byung ba'i rgyu mtshan gyi dngos po yin yang me long chung ngu la yang ri la sogs pa'i gzugs brnyan chen po dang mang po dag dmigs pas/ de dag gi tshad kyang med la me long gi dkyil 'khor yang /grangs kyi tshad dam lus kyi tshad de dag tshad du mi 'gyur ro/ /de bzhin du me long lta bu'i ye shes kyang 'jig rten pa dang 'jig rten las 'das pa'i gzugs brnyan thams cad skye ba'i rgyu mtshan gyi dngos po yin yang / yul gyi sgo nas sam/ grangs kyi sgo nas tshad yongs su chad pa 'ga' yang med de lus tshad med pa'i phyir dang /rgyu mtshan las byung ba'i grangs kyi bye brag tu mi 'gyur ba'i phyir ro/ /de nyid kyi phyir 'jig rten pa dang 'jig rten las 'das pa'i shes pa'i 'byung gnas su gyur pas sangs rgyas rnams ni shes pa'i 'byung gnas chen po zhes bya ste/ ji skad du sangs rgyas bcom ldan 'das rnams ni shes pa'i rnam pa thams cad kyi gnas kyi ye shes dang ldan pa'i phyir shes pa'i 'byung gnas chen po zhes gsungs pa lta bu'o//gal te de theg pa gsum gyis nges par 'byung bar bya ba'i phyir shes pa skye ba'i rgyu mtshan yin na de skye ba'i rgyu mtshan nye ba'i phyir mu stegs can rnams la yang dag pa'i shes pa ji ltar mi skye de'i phyir de dag la phyin ci log med par thal bar 'gyur ro zhe na ma yin te/de'i rgyu mtshan ma yin pa'i phyir ro/ /dper na me long gi dkyil 'khor ni rtsig pa la sogs pa gzugs gzhan gyis bsgribs pa'i gzugs rnams la gzugs brnyan 'byung ba'i rgyu mtshan du mi 'gyur ro//de bzhin du de bzhin gshegs pa'i me long lta bu'i ye shes kyang sems can grogs po ngan pas yongs su zin pa dam pa ma yin pa'i chos nyan pas bsgribs pa dag la dam pa'i chos nyan pa'i phyir shes pa'am gzugs brnyan 'byung ba'i rgyu mtshan du mi 'gyur ro//de'i mu stegs can rnams la 'phags pa'i lam mi skye bas phyin ci log rnams 'byung ngo / /dper na phyi rol gyi rkyen gyis bsgribs pa dag ni mi 'byung ba ltar nang gi ma rig pa'i mun pas bsgribs pa dag la yang de dang 'dra'o//de bzhin du rkyen gnyis ka'i stobs kyis dam pa'i chos spong ba'i lam gang yin pa de ni dam pa'i chos kyis phongs par 'gyur ba'i las yin no/ /des bsgribs na yun ring por yang dam pa'i chos mnyan pa mi rnyed de des bsgribs pa de nyid phongs pa yin no/ /ji ltar na de'i 'bras bu dam pa'i chos mnyan pa med pa yin/mnyan pa med pa ni brjod par bya ba med pa'i phyir ro zhe na/ de nyid 'bras bu yin no zhes ni mi zer ro/ /'on kyang dam pa'i chos mnyan mi nus pa'i lus thob ste dbang po ma tshang ba la sogs pa yin no/ /'dod pa can ma yin pa dag ni yongs su mya ngan las mi 'da' ba'i chos can sa bon med pa rnams te/de dag thams cad kyang rgyud yongs su ma dag pa'i phyir/ dus re zhig dang / gtan du snod ma yin pa dag go/ /dper na 'dam rdzab la sogs pas rnyog par byas pa'i chu'i snod kyi nang du zla ba'i dkyil 'khor gyi gzugs brnyan 'byung ba de bzhin du ye shes de yang de dag la shes pa skye'i rgyu mtshan du mi 'gyur ro//'dis ni de ma yin pa'i shes pa dag las me long lta bu'i ye shes kyi khyad par rnam pa brgyad bshad de/ nges pa'i tshig dang / rnam par mi rtog pa dang / sgrib pa rnam par dag pa dang /shes pa'i gzugs brnyan 'byung ba'i rgyu mtshan dang / nga'i yongs su 'dzin par med pa dang shes bya thams cad bsnyel ba mi mnga' ba dang / thams cad du rtag tu 'byung ba dang / shes pa thams cad kyi 'byung gnas dang / snod ma yin pa dag la 'byung ba'i rgyu mtshan gyi dngos po ma yin pa'o//snod ma yin pa de dag kyang gsum yin te/ mi dge ba'i grogs po dang phrad pas dam pa ma yin pa'i chos ma nyan pas bsgribs pas dus de dag tu snod ma yin pa'i phyir dang / gang dag nyon mongs pa'i sgrib pas bsgribs pa rnams dang / gang dag las kyi sgrib pa mi bzad pas bsgribs pa rnams dang /sa bon med pa rnams yun ring po dang dus thams cad du snod ma yin pa'i phyir ro/ /mnyam pa nyid kyi ye shes ni sa bcu bsgoms pa'i 'bras bu yin pa'i phyir yongs su grub pa rnam pa bcu las rig par bya'o/ /mtshan rnams kyi mnyam pa nyid ni skyes bu chen po'i mtshan thams cad kun brtags pa'i mtshan nyid kyis dben par mnyam par skyes bu chen po'i mtshan gang dag yin pa de dag mtshan med par de bzhin gshegs pas bstan te/des na skyes bu chen po'i mtshan rnams zhes bya'o zhes 'byung ba'i phyir ro/ /bdag po ni dbang phyug ste/gzugs la sogs pa'i phung po rnams ni so sor dbang phyug ma yin pa'i phyir la/ chos rnams ni rang bzhin mi 'dor bas de dag 'dus pa yang de'i bdag nyid du mi 'thad pa'i phyir ro/ /de dag la ma gtogs pa'i gang zag gi rdzas kyang med pas de'i phyir kun brtags pa'i bdag pos dben pa thams cad kyi bdag pa mnyam pa nyid de/ji skad du bcom ldan 'das de la bdag ni phyug pa'am dbul ba gang yang ma mchis so snyam bgyid do zhes gsungs pa lta bu'o/ /dga' ba ni yid bde ba ste/ de'i gnas kyi chos rnams la ni kun du rtog pa'i dbang gis dga' ba skye'o/ /de las bzlog pa dag la ni yid mi bde ba skye'o//de dag med pas sems can thams cad la kun brtags pa'i dga' ba dang bral ba'i phyir dga' ba mnyam pa nyid do/ /mtshan dang bdag po dang dga' ba mnyam pa nyid do/ /khong du chud pa ni rtogs pa ste/ byang chub sems dpa'i sa dang po kho na la de khong du chud do//sa gong ma gong ma bsgom par khyad zhugs pa'i tshul gyis mtha' sangs rgyas kyi sa la phul du phyin pa brnyes te/ de las lhag pa yongs su grub pa ni med pas yongs su grub pa des mnyam pa nyid kyi ye shes yongs su grub par rig par bya'o/ /yongs su grub pa las ni yongs su grub pas te thams cad du gsum pa'i gnas su mnga' bar byas pa yin no//rten cing 'brel par 'byung ba ni rnam pa gnyis te nang gi dang phyi'i'o/ /nang gi ni ma rig pa la sogs pa yan lag bcu gnyis so/ /phyi'i ni 'di yod na ni 'di 'byung 'di med na 'di mi 'byung ngo zhes bya ba rgyu yod na 'bras bu 'byung ba de/'di lta ste sa bon yod na myu gu 'byung ngo zhes bya ba la sogs pa yin no/ /nang gi ni lugs dang mthun pa dang / lugs dang mi mthun pa'i rnam par kun nas nyon mongs pa dang / rnam par byang ba'i yan lag rnams la nye bar btags te bsgoms la phyi'i yang rgyu yod na 'bras bu 'byung ngo zhes bya ba la sogs pas bsgoms te/rten cing 'brel par 'byung ba thams cad la yang gang gi tshe g.yo ba med pa'i don rten cing 'brel par 'byung ba'i don dang / stong pa'i don dang / gang zag med pa'i don rten cing 'brel par 'byung ba'i don du mthong ba de'i tshe 'di de'i ngo bor nyams su myong ba yin te/myong ba yin pa'i phyir ro/ /de mnyam pa nyid ni g.yo ba med pa nyid dang gang zag med pa nyid dang / stong pa nyid dang / bdag med pa nyid dang / kun brtags pa'i rten cing 'brel par 'byung bas dben pa nyid de/ chos thams cad rten cing 'brel par 'byung ba'i chos nyid de lta bur khong du chud pa'o//yongs su grub pa las ni snga ma bzhin te/ ji skad du tshangs pa chos thams cad ni rten cing 'brel par 'byung ba'o/ /rten cing 'brel par 'byung ba khong du chud pa ni byang chub ste/ tshangs pa de bzhin gshegs pas chos thams cad ji lta bur gzigs pa ltar chos rnams ni de lta bu kho na yin no zhes gsungs pa lta bu dang yang rten cing 'brel par 'byung ba'i chos nyid la rten cing 'brel par 'byung ba'i sgrar btags nas rten cing 'brel par 'byung ba la ma gtogs pa'i chos gang yin pa de ni cung zad kyang yang dag par rjes su ma mthong ngo zhes gsungs pa lta bu'o//de nyid la dgongs nas sus rten cing 'brel par 'byung ba des chos mthong ngo / /sus chos mthong bas sangs rgyas mthong ngo zhes gsungs so/ /don dam pa'i chos dang don dam pa'i sangs rgyas yin pa'i phyir te/ de ni thams cad du tha dad pa med do/ /gzugs la sogs pa'i mtshan nyid gzugs su rung bas ni gzugs so zhes bya ba la sogs pa mtshan nyid dben par gyur cing ma 'brel pa nye bar gzhag pa gang yin pa de ni de dag gi spyi'i mtshan nyid yin gyi/de la sgro btags pa'i ngo bo yin pa'i phyir rang gi mtshan nyid ni ma yin no/ /de lta bas na de dag ni mtshan nyid dang mi mthun zhing mtshan nyid dang mi 'dra ba dag yin no//yang de dag gi mtshan nyid gang yin zhe na/ mtshan nyid med pa nyid mtshan nyid yin te/ chos thams cad ni mtshan nyid med par mtshan nyid gcig go zhes 'byung ba'i phyir ro/ /chos thams cad kun brtags pa'i mtshan kyis dben par mnyam pa khong du chud pa yongs su grub pa las so//byams pa ni rnam pa gsum ste/ sems can la dmigs pa dang / chos la dmigs pa dang / dmigs pa med pa'o/ /de la byang chub sems dpa' sems dang po bskyed pa rnams kyi byams pa ni sems can rnams la dmigs pa ste/kun rdzob tu yod pa'i yul can yin pa'i phyir zag pa dang bcas pa yin no/ /byang chub sems dpa' spyod pa la zhugs pa rnams kyi ni chos la dmigs pa ste/ theg pa chen po bstan pa'i chos kyi yul can yin pa'i phyir zag pa dang bcas pa kho na'o/ /byang chub sems dpa' mi skye ba'i chos la bzod pa thob pa rnams kyi ni dmigs pa med pa ste/mig la sogs pa bzhin du rnam par smin par gyur pa/ mngon par 'du bya ba med par 'byung ba mnyam pa nyid kyi ye shes dang mtshungs par ldan pa chos kyi dbyings kyi yul can dmigs pa med pa ste/ rnam par rtog pa med pa'i phyir dang /chos thams cad la mi dmigs pa'i phyir dmigs pa med pa zhes bya'o/ /mnyam pa nyid kyi ye shes dang mtshungs par ldan pa'i byams pa de nyid sangs rgyas kyi sa la de bzhin gshegs pa rnams la rnam pa thams cad yongs su grub cing rtag tu ldan pa yin no//byams pa gzhan gnyis ma smos kyang de bzhin gshegs pa la 'grub po/ /de bzhin gshegs pa'i byams pa rnam pa gsum ni sems can thams cad yongs su skyob pa'i rnam pa yin gyi bde ba nye bar sgrub pa ni rnam pa 'ba' zhig ni ma yin no/ /sems can mthun pa dag dang mi mthun pa dag dang /mthun pa dang mi mthun pa thams cad la snyoms pa dang rtag tu ldan pa yin gyi/ nyan thos dag gi lta bur res 'ga' ba dang / nyi tshe bar 'byung ba dang yongs su mi skyob pa'i rnam pa dag ni ma yin no/ /de nyid kyi phyir 'di ni nyan thos la sogs pa'i byams pa dag las khyad par du 'phags pa'i phyir chen po nyid yin pas yongs su skyob pa'i rnam pa'i byams pa chen po'o//de'i mnyam pa nyid ni thams cad du khyad par med par 'byung ba'i phyir te/ de'i chos nyid do zhes tha dad par brjod do/ /yang na yongs su skyob pa'i rnam pa'i byams pa chen po de nyid mnyam pa nyid de/mnyam pa de nyid du dmigs pa'i phyir ro/ /de'i mnyam pa nyid yongs su grub pa las so/ /nyan thos rnam pa'i snying rje ni sems can 'don pa'i rnam pa ma yin pa/ 'dod pa na spyod pa'i sems can la dmigs pa nyi tshe bar 'gyur ba res 'ga' yin gyi/de bzhin gshegs pa rnams kyi thugs rje chen po ni khams gsum pa'i sems can gyi yul can yal bar mi 'dor ba'i rnam pa ste/ sdug bsngal nyid gsum gyis ci rigs par sdug bsngal ba'i sems can yongs su skyob pa'i phyir ro/ /'byung zhing sems can thams cad la tshong dpon bu gcig pa la byams pa bzhin du snyoms par 'byung ba'i phyir yal bar mi 'dor ro//rtag tu ldan pa yang yin te/ sems can gyi khams mtha' yas pas sems can yongs su smin par bya ba'i dus rnams kyang rgyun mi 'chad la sems can yongs su smin par bya ba'i dus las mi 'da' ba'i phyir ro//de dang ldan pa'i phyir de bzhin gshegs pa rnams yin te/ ji skad du rigs kyi bu sangs rgyas bcom ldan 'das rnams kyi thugs rje chen po ni sems can rnams la skye'o/ /mi 'byung ngo zhes brjod par mi bya'o/ /de ci'i phyir zhe na/ sangs rgyas bcom ldan 'das rnams kyi thugs rje chen po ni rtag tu 'byung ba kho na ste zhes bya ba nas de bzhin gshegs pas ni rtsa ba med pa gzhi med pa'i byang chub mngon par rdzogs par sangs rgyas pas na sems can 'di dag chos 'di dag thams cad rtsa ba med pa dang /gzhi med pas khong du mi chud kyis de dag khong du chud par bya'o zhes sems can rnams la de bzhin gshegs pa'i thugs rje chen po skye'o zhes bya ba'i bar rgyas par gsungs pa lta bu'o//des na de bzhin gshegs pa nyin dus gsum mtshan dus gsum du 'jig rten la gzigs par mdzad do/ /'o na ji ltar rtag tu ldan pa yin zhe na/ mdzad pa'i rgyun mi 'chad pa'i phyir bshad pas 'gal ba med de/ de'i mnyam pa nyid yongs su grub pa las so//sems can gang dag de bzhin gshegs pa'i gzugs kyi sku kun du bstan pas ji ltar mos pa de dag gis de bzhin gshegs pa spros pa mi mnga' bar bzhugs kyang / mnyam pa nyid kyi ye shes kyi dbang gis de bzhin gshegs pa'i gzugs kyi sku bai DUr+ya'i rang bzhin la sogs pa lta bur mthong ste/ji skad du lha dang mi kha cig gis ni de bzhin gshegs pa gser gyi kha dog lta bur mthong ngo zhes bya ba la sogs pa gsungs pa lta bu'o/ /de'i rnam pa kun du ston pa mnyam pa nyid yongs su grub pa las te/ ji skad du nor bu rin po che bai DUr+ya'i gzugs kun nas ston pas 'dul ba'i sems can rnams la de bzhin gshegs pa nor bu rin po che bai DUr+ya'i mdog tu ston pa la thogs pa mi mnga'o zhes bya ba la sogs pa gsungs pa lta bu'o//tshig gzung bar 'os pas ni gsung ba'i phrin las ji lta bus sems can rnams yongs su smin par 'gyur ba dang / dga' ba dang / dang ba dang /mchog tu dga' ba thob par 'gyur ba de kho na lta bu'i de bzhin gshegs pa'i gsung rang gi mos pa'i dbang gis thos pa ste/ de bzhin gshegs pa ni spros pa mi mnga' ba'i ngo bo nyid yin pa'i phyir rtog par mi mdzad do/ /de ltar na lha'am mi 'ga' yang de bzhin gshegs pa'i bka' las mi 'da' bas tshig gzung bar 'os pa nyid do//de nyid kyi phyir bka' bzhin du 'gyur ba mi mnga' bas sangs rgyas bcom ldan 'das rnams ni phyin ci ma log par gsungs pa zhes bya ste/ de'i mnyam pa nyid yongs su grub pa las so/ /'jig rten zhes bya ba ni phung po lnga po dag ste 'jig pa'i phyir ro/ /de nye bar zhi ba ni gang gis dang gang du ste lam dang mya ngan las 'das pa'o//de gnyis ro gcig pa ni kun brtags pa med pa'i phyir yongs su grub pa'i ngo bo nyid do/ /de bas na rang bzhin gyis nye bar zhi ba'i phyir te/ de'i mnyam pa nyid yongs su grub pa las so/ /'jig rten gyi chos ni rnyed pa dang ma rnyed pa la sogs pa brgyad do//de dag ro gcig pa ni rnyed pas dregs pa med pa dang ma rnyed pas sro shi ba med pa nas/ de bzhin bde bas rjes su chags pa med pa dang / sdug bsngal gyis khong khro ba med pa'i bar du ste/ 'phags pa rnams la ni ste'u dang tsan+dan du mtshungs so zhes 'byung ba'i phyir ro/ /rnam par brtags pa'i 'jig rten gyi chos kyis dben pa ni thams cad du ro gcig pa'i phyir ro//ro gcig pa de'i mnyam pa nyid yongs su grub pa las so/ /yon tan ni byang chub kyi phyogs dang mthun pa la sogs pa'i chos rnams so/ /de dag gi sa bon 'jog pa dang / gsos 'debs pa dang / yongs su smin pa dang / rnam par grol ba'i sgo nas bskyed pa ste/ de bzhin gyi nor bu ltar rnam par mi rtog kyang / de bzhin gshegs pa'i dbang gis rgyud gzhan dag la de rnams skye bas de skad ces bya'o/ /shin tu zhes bya ba smos pa ni bskyed ma thag pa gsum gyis thar pa'i rgyu mtshan yin pa'i phyir te/ gzhan ni ma smos kyang grub pa kho na'o//de'i mnyam pa nyid yongs su grub pa la sogs so sor rtog pa'i ye shes ni rgyu'i rab tu dbye ba rnam pa bcu kas blangs nas rig par bya ste/ rgyu rnam pa bcu ni gnas kyi rgyu dang / skye ba'i rgyu dang / dga' ba'i rgyu dang / rab tu rnam par dbye ba'i rgyu dang / rdzogs par longs spyod pa'i rgyu dang / 'gro ba dang khams gsum yongs su gcod pa'i bye brag gis/yongs su gcod pa'i rgyu rnam pa gnyis dang / chos kyi char chen po 'bebs pa'i rgyu dang / phyir rgol ba nges par 'joms pa'i rgyu dang / the tshom thams cad rnam par gcod pa'i rgyu'o/ /de la gnas kyi rgyu ni gzungs kyi sgo thams cad yang dag par 'dzin pa'i phyir ro//gzungs ni mi zad pa'i za ma tog la sogs pa ste/ rnam pa gcig tu chos thams cad yang dag par 'dzin pa'i phyir mi zad pa'i za ma tog ces bya ste/ tshig dang don gyi gzungs gzhan dag kyang de bzhin du brjod par bya'o/ /ting nge 'dzin dag ni dpa' bar 'gro ba la sogs pa'o//'jig rten pa dang 'jig rten las 'das pa'i ting nge 'dzin thams cad thibs kyis gnon la/ gzhan dag gis thibs kyis gnon mi nus pas dpa' bar 'gro ba'i ting nge 'dzin ces bya ste/ de bzhin du ting nge 'dzin dag kyang mdo dang mthun par brjod par bya'o/ /gzugs dang ting nge 'dzin dag nyid sgo yin te/rnam par thar pa'i sgo bzhin no/ /thams cad ces bya ba'i sgra ni re re dang sbyar ro/ /so so yang dag par rig pa dag ni chos dang / don dang / nges pa'i tshig dang / spobs pa rnams so/ /sangs rgyas kyi chos rnams ni stobs dang mi 'jigs pa la sogs pa'o/ / yang na gzungs la sogs pa de de dag nyid yin te/ de dag yang dag par 'dzin pa'i phyir ro/ /skye ba'i rgyu ni shes bya thams cad la cig car rig pa rnam par rig pa sna tshogs can skye ba'i rgyu mtshan yin pa'i phyir te/ 'jig rten gyi khams ni snod kyi 'jig rten gyi khams so/ /ji ltar gzugs sna tshogs rnam par rig pa rnam pa sna tshogs can skye ba'i rgyu mtshan nyid du rgyu yin pa de ltar so so'i ye shes kyang shes bya thams cad la cig car kho nar nam mkha' ltar thogs pa med pa'i rnam par rig pa rnam pa sna tshogs can ngo bo sna tshogs la dmigs pa'i rgyu yin te/'byung ba'i rgyu yin pa'i phyir ro/ /ji skad du sna tshogs kyi ngo bo dang /cig shos te/ shes bya tha dad pa'i dngos po ma lus pa ni de bzhin gshegs pa'i ye shes lan cig 'byung ba'i gzung ba yin te/ sna tshogs yin pa'i phyir gzugs sna tshogs bzhin no zhes bshad pa yin no/ /dga' ba'i rgyu ni pha rol tu phyin pa la sogs pa'i chos rnams gyis nyams dga' ba rnam pa sna tshogs pa ni byang chub sems dpa' rnams shin tu rnam par mngon par dga' ba'i rgyu yin pa'i phyir te/de la byang chub sems dpa' rnams kun du dga' bas so/ /'di nyid kyi phyir pha rol tu phyin pa la sogs pa chos sna tshogs rab tu ston pas/ lam me thal le lhang nge'o/ /rab tu rnam par dbye ba'i rgyu ni shin tu rnam par nges pa'i rnam pa ste/chos de dag ji ltar ma 'dres pa'i rnam par che ba de bzhin du ma 'dres pa'i rnam par so sor rtog pa'i phyir ro/ /rdzogs par longs spyod pa'i rgyu ni longs spyod rdzogs pa'i skus 'byor pa sna tshogs pa kun du bstan pa'i sgo nas so/ /byang chub sems dpa' chen po rnams dang chos la rdzogs par longs spyod pa so sor sku nyams su bstar ba'i phyir ro//'gro ba yongs su gcod pa'i rgyu ni 'gro ba lnga po yul yin pa'i phyir te/ 'gro ba lnga po de la snang ba ni yul nyid du snang gi rten nyid du ni ma yin no/ /khams yongs su gcod pa'i rgyu ni khams gsum pa yul yin pa'i phyir te/ 'jig rten gyi khams ni snod kyi 'jig rten no/ / ji rigs par 'dod pa la sogs pa'i khams dang / sems can gyi 'jig rten gyis bsdus pa rnams yin te/ snod kyi 'jig rten ni sems can dang / snod kyi 'jig rten dag gi rten yin no/ /sems can gyi 'jig rten ni sems can gyi yin no/ /de nyid kyi phyir gzugs med pa'i khams na gzugs med pa'i khams snang ngo //khams gsum pa rnam pa rab tu dbye ba mtha' yas pa dag snang ba ni so sor rtog pa'i ye shes la yul nyid du snang ba'o/ /'di skad du de bzhin gshegs pa rnams la gzung ba dang 'dzin par rnam par rtog pa mi mnga' yang / me long lta bu'i ye shes kyi dbang gis so sor rtog pa'i ye shes las/sems dang sems las byung ba'i rgyu dang 'bras bus bsdus pa khams dang 'gro ba dang skye gnas 'grub par 'gyur ba'i 'du byed yongs su smin pas 'phangs pa mtha' yas pa snang ba 'byung ste/ 'di ltar de'i dbang gis rtogs pa po rnams smon lam gyi shes pa yongs su gzung bas sam/ shes pa'i khyad par gzhan gyis de lta bu'i rnam par rtog pa nye bar 'god do zhes bshad pa yin no/ /ye shes de nyid nyon mongs pa'i dri ma'i rnyog pa thams cad las dben pa yin te/ des na shes bya'i dngos po mtha' dag me long yongs su dag pa'i dkyil 'khor la gzugs brnyan bzhin du de la snang ngo / / de me long lta bu'i ye shes dang khyad par med pa yang thal bar mi 'gyur te/ de rnam par rtog pa yin pa'i phyir ro/ /rnam par rtog pa la ni rgyu dang 'bras bu la sogs pa la so sor rtog pa mi srid la/ me long lta bu'i ye shes ni rnam par mi rtog pa kho nar bshad do/ /chos kyi char chen po 'bebs pa'i rgyu ni sangs rgyas dang byang chub sems dpa'i mthu yang dag par rab tu ston pa'i phyir ro//sangs rgyas dang byang chub sems dpa' rnams kyi mthu ni ston pa gang dag gis na dbang phyug ces bya ba ste/ de dang ldan pa de dang 'brel pa de las rab tu byung ba de dag snang ngo / /phyir rgol ba nges par 'joms pa'i rgyu ni chos kyi dbyings zab mo ston pa'i phyir ro//gzhan mu stegs can rnams ni lta ba la gnas pa dag yin la stong pa nyid ni lta bar gyur pa thams cad las dben pa yin te/ de'i phyir stong pa nyid bstan pa gzhan dag gis gting mi dpogs pa'i phyir zab la dkrugs par mi nus so/ /de nyid kyi phyir snga ma las khyad par yod do/ / shes bya'i rnam pa thams cad yang dag par rab tu ston pa'i rgyu mtshan yin pa'i phyir so sor rtog pa'i ye shes la zhes rgyu'i bdun pa bstan te/ de nyid kyi phyir shes bya'i rnam pa thams cad yang dag par rab tu ston pa'i phyir sangs rgyas bcom ldan 'das rnams ni ye shes kyi nyi ma chen po zhes gsungs so/ /the tshom thams cad rnam par gcod pa'i rgyu ni rang dang spyi'i mtshan nyid kyi yul la kun du rmongs pa sel ba'i phyir te/yul la rang dang spyi'i mtshan nyid kyi yul rnam pa kun tu rmongs pa med cing des chos rab tu ston par mdzad pa'i phyir 'jig rten gyi the tshom thams cad rnam par gcod pa'i rgyu mtshan yin no//rang dang spyi'i mtshan nyid kyi rnam pa thams cad la kun du rmongs pa ni the tshom gyi rgyu yin te/ de las dben pa kun du rmongs pa med pa/ the tshom thams cad spangs pa'i ye shes kyis yongs su bskor/ yongs su dkris/ yongs su bsrungs pa yin no/ /de yang me long lta bu'i ye shes yin te/ de ni nyon mongs pa dang /shes bya'i sgrib pa dang bral bas rang dang spyi'i mtshan nyid kyi yul thams cad la kun du rmongs pa med pa'i phyir ro/ /des yongs su bskor ba ste/ de'i dbang gis byung ba de ni chos sna tshogs ston pas srog chags thams cad kyi the tshom thams cad rnam par gcod pa'i nus pa yin no//bya ba sgrub pa'i ye shes ni de bzhin gshegs pa rnams kyi sprul pa'i sku'o/ /de yang rnam pa gsum ste/ sku sprul pa dang gsung sprul pa dang / thugs sprul pa'o/ /de la sku sprul pa ni rnam pa gsum ste/ rdzu 'phrul kun du ston pa dang / skye ba kun du ston pa dang / las kyi rnam par smin pa kun du ston pa'o//rdzu 'phrul kun du ston pa ni bzo la sogs pa kun du ston par rig par bya'o/ /rtsol ba ni sems mngon par spro ba ste/ de las byung ba des kun nas bslang ba'i sku'i phrin las so/ /bya ba sgrub par mdzad pa'i ye shes brtson 'grus dang ldan pa ste/ de nyid rtsol ba las byung ba yin no//sku sprul pa'i phrin las ni sku ltar snang ba kun du ston pa'i phyir ro/ /las dang bzo'i gnas thams cad kun du ston pa ni byang chub sems dpar gyur pas rdza mkhan la sogs pa'i gzugs bstan pa gang yin pa'o/ /thabs la mkhas pa ni shes rab dang snying rje mnyam du 'byung ba'i lam mo//dad par mdzad pa ni dang ba yang dag par bskyed pa'i sgo nas dang por mngon du phyogs pa bskyed pa'i phyir ro/ /yongs su smin par mdzad pa ni dge ba'i rtsa ba brtas par mdzad pa'i sgo nas sems las su rung bar mdzad pa'i phyir ro/ /rnam par grol bar mdzad pa ni khams gsum pa dang ngan song las te/de'i man ngag gi stobs kyis 'phags pa'i lam skyed pa'i phyir dang / 'od zer rab tu dgye ba la sogs pas sngon gyi dge ba'i rtsa ba rnams rjes su dran par byas nas sdug bsngal nye bar zhi bar byas te/ bde 'gro la dgod pa'i phyir ro/ /de ltar na rdzu 'phrul kun du bstan pas/ chu bo 'od srungs la sogs pa dang ba la sogs pa mdzad pa yin no//skye ba kun du ston pas ni skye ba'i skye mched thams cad du cig car skye ba kun ston pa las rig par bya'o/ /yongs su spyod pa'i rgyu mtshan ni yongs su spyod par 'gyur ba'o/ /yongs su spyod pa ni dbang po rnams rang gi yul dang phrad pa'o/ /bya ba sgrub pa'i ye shes nyid skye ba nyid du ston pa yongs su spyod pa'i rgyu mtshan yin pa'i phyir yongs su spyod par 'gyur ba yin no//skye ba'i skye mched ji snyed pa'i skye ba'i skye mched thams cad du ste/ gling thams cad dang lha'i rigs thams cad du rgyal rigs la sogs pa'i rigs su de dag dang / skye ba mnyam pa nyid du de dag dang 'dra ba nyid du nye bar ston par mdzad de de dag dang 'dra bar kun du bstan pas/sems can yongs su smin par bya ba'i phyir ro/ /'dzud par mdzad ces bya ba la sogs pa'i tshig rnams ni snga ma bzhin du rnam par bshad do/ /las kyi rnam par smin pa kun du ston pa ni las kyi rnam pa kun du ston pa las rig par bya'o/ /lus nyid la yin pas lus kyi las te/ sngon gyi las kyi 'bras bu ni las kyi lus yin pa'i phyir ro/ /nyams su myong bar 'gyur ba ni las kyi 'bras bu 'dod pa dang / mi 'dod pa la nye bar spyod pa'i rgyu mtshan yin pa'i phyir ro/ /lus kyi tshor ba bde ba dang / sdug bsngal ni sngon gyi las kyi 'bras bu yin te/ de la brtan nas 'byung ngo / /bya ba sgrub pa'i ye shes nyid sku nyams su bstar ba'i rgyu mtshan yin pa'i phyir/sku nyams su bstar bar 'gyur ba yin no/ /sku sprul pa'i phrin las ni sku ltar snang ba'i rnam par shes pa skye ba'i rgyu mtshan yin pa'i phyir ro/ /de lta bur byung ba'i sde ni sngon gyi gtam nges par bstan pa'o/ /skyes pa'i rabs kyi sde ni kun gyi mchog la sogs pa'o//dka' ba spyod pa ni byang chub kyi sngon rol du'o/ /de thams cad ni sprul pa'i skus ston te/ srog chags rnams dge ba dang mi dge ba'i lam la 'jug pa dang / bzlog par bya ba'i phyir de dag dang skal ba mnyam par kun du bstan pas gdul bar bya ba'i phyir ro//dka' ba spyod pa kun du ston pa ni de lta bu kun du bstan pas 'dul bar 'gyur ba rnams gdul ba'i phyir dang / tshul khrims dang brtul zhugs tsam gyis dag pa ma yin gyi/ ye shes kyis 'dag go zhes rab tu bstan pa'i phyir ro/ /dge sbyong mgo reg la byang chub ga la yod byang chub ni mchog tu dka' ba yin no zhes byas pa de'i 'bras bu yin no zhes bka' stsal pa ni ngag gis nyes par spyod pa bzlog pa'i phyir te/de lta ma yin na skye ba gcig gis thogs pa sangs rgyas du ma bsnyen bkur byas pa'i dge ba'i rtsa ba rang bzhin gyis tshe rabs dran pa la ngag gis nyes par spyod pa rnam pa de lta bu ji ltar srid par nus/de la de skad du smras pa ni tshig de lta bus 'dul bar 'gyur ba rnams de bzhin gshegs pa'i drung du 'gro ba'i phyir ro/ /gsung sprul pa yang rnam pa gsum ste/ yang dag par dga' bar 'gyur ba zhes bya ba la yang dag par dga' ba ni mgu ba ste/ rangs pa'i bye brag go/ /de'i rgyu mtshan yin pas yang dag par dga' bar 'gyur ba ste/ gang zhig thos nas phan tshun mgu ba skye ba'o/ /don bzang po ni tshig gi don grags pa'i phyir ro/ /tshig 'bru bzang po ni gsal ba nyid kyis mnyan par 'os pa'i phyir ro/ /thos pa tsam kho nas kyang /sems can byis pa'i shes rab can dang ces bya ba ni yan lag drug cu dang ldan pa'i phyir/ de bzhin gshegs pa'i gsung byis pa'i shes rab can rnams kyis kyang thos nas dad pa skyes na/ don shes pa gzhan dag lta smos kyang ci dgos pa'o/ /bya ba sgrub pa'i ye shes nyid yang dag par dga' bar 'gyur ba yin te/sems can rnams rangs pa skye ba'i rgyu mtshan yin pa'i phyir ro/ /gzhan gyis tshig kyang gang gis na chos kyi gting ma dpogs pa rnams kyang sangs rgyas kyi gsung gis ston pa zab mor 'jug par byed pa de lta bur sprul pa mdzad de/ dper na gnas brtan rab 'byor la sogs pa lta bu'o//de bzhin du sil snyan gyi rnam pa thams cad dang / gzugs su snang ba thams cad dang / nam mkha' las kyang zhes bya ba brjod par bya'o/ /sbyor bar 'gyur ba ni che ge mo zhig bya ba rnams la 'jug pa'i sbyor ba'o/ /sems can bag med pa la sogs pa de dag nyid kyi don gyis sam/thugs rjes de bzhin gshegs pa bslab pa'i gzhi la sogs pa rnam par gzhag pa'i phyir sbyor ba la/ de bzhin gshegs pas kyang de dag 'bras bu 'jug pa dang / ldog pa can gyi bya ba dag la sbyor ba'o/ /de'i mtshan nyid rgyu mtshan yin pa'i phyir sbyor bar gyur pa ste/mi 'dod pa la ldog pa dang / dge ba la 'jug pa dang / 'phags pa'i lam gyi gnas skabs kyi bye brag la sbyor ba'i phyir ro/ /yang dag par go bar 'gyur ba yang / don go ba'i rgyu mtshan yin pa'i phyir ro/ /des na sems can bsam pa tha dad pa don sna tshogs la kun du rmongs pa'i blo can rnams sgra gcig lan gcig brjod pas don yang dag par go bar 'gyur ba'i phyir/the tshom thams cad sel ba ste/ ji skad gcig ni bka' stsal na/ gsung la du mar go ba yin/ /zhes bya ba la sogs pa gsungs pa lta bu'o/ /thugs sprul pa ni rnam pa bzhi ste/ rnam par nges par 'gyur ba ni sems can gyi spyod pa rnam par nges pa'i rgyu mtshan yin pa'i phyir ro//mngon par 'du mdzad par 'gyur ba ni sems can gyi spyod pa ji ltar spyad pa bzhin du yon tan dang nges pa skyed pa dang / dor ba'i gnyen po mngon par 'du mdzad pa'i rgyu mtshan yin pa'i phyir te/ de bzhin gshegs pa thams cad rtsol ba mi mnga' ba yin mod kyi/'on kyang gzhan dag gi rnam par shes pa la so sor snang ba yongs su 'dzin pa'i tshul bshad do/ /kun nas slong bar 'gyur ba zhes bya ba la kun nas slong ba ni kun nas ldang ba ste/ lus dang ngag gi bya ba ste/ de'i rgyu mtshan yin pa'i phyir ro/ /yang na shes pa gang gis de kun nas slong bar byed pa de ni kun nas slong ba ste/de las byung ba'i phyir kun nas slong bar 'gyur ba'o/ /de'i gnyen po bstan pa ni sems can thams cad kyi spyod pa de'i'o/ /de'i phyir ming gi tshogs la sogs pa gang dag yin pa ste/ bstan pa'i chos ni de'i bdag nyid yin pa'i phyir ro/ /gdul ba rnams la ming gi tshogs la sogs par snang ba'i rnam par rig pa skye ba'i rgyu mtshan yin pa'i phyir ro//de bzhin gshegs pa rnams dga' bar mdzad de de la dga' ba bskyed par mdzad do/ /nyams su myong bar 'gyur ba zhes bya ba la nyams su myong ba ni bde ba dang sdug bsngal yang dag par tshor ba'o/ /de'i rgyu mtshan yin pa'i phyir nyams su myong bar 'gyur ba'o//bya ba sgrub pa'i ye shes nyid 'dri ba lung bstan pa'i don sku nyams su bstar ba'i rgyu mtshan yin pa'i phyir thugs sprul pa'i phrin las sku nyams su bstar bar 'gyur ba yin te/ 'dri ba lung bstan par bya ba bzhi po dag la ci rigs par 'di ni mgo gcig tu lung bstan par bya ba'i 'dri ba'o zhes bya ba nas/gzhag par bya ba'i 'dri ba'o zhes bya ba'i bar mkhyen nas/ re re'i 'dri ba'i yul du gyur pa dus gsum pa'i don rnams ci rigs par don gang gi ngo bo gang yin pa de'i bdag nyid sku nyams su bstar zhing rab tu mkhyen to/ /mkhyen nas kyang de bzhin du lung ston par mdzad do//de la sku gsung thugs sprul pa ni bdag dang gzhan gyi lus 'brel pa dang lus ma 'brel pa yin no/ /thugs sprul pa ni rang dang gzhan dang 'brel pa kho na yin no/ /'dis ni cho 'phrul rnam pa gsum po rdzu 'phrul dang / rjes su bstan pa dang /kun brjod pa'i cho 'phrul rnam par bshad pa yin no/ /sangs rgyas kyi sprul pa de yang rnam pa thams cad du rtag tu ldan pa dang / bsam gyis mi khyab par rig par bya ste/ mdzad pa mdzad pa dang / grangs dang zhing gi bye brag gi sgo nas bsam gyis mi khyab pa'i phyir dang /sems can gyi don mdzad pa'i nyams pa mi mnga' bar 'jug pa'i phyir ro/ /de bzhin gshegs pa rnams kyi sprul pa rnam pa gsum char yang sems can yongs su smin par bya ba'i sngon du 'gro ba yin pa'i phyir thabs kyi dam pa yin no/ /de nyid kyi phyir sangs rgyas bcom ldan 'das rnams ni nyon mongs pa'i nad thams cad rab tu zhi bar mdzad pa'i phyir ro//ye shes kyi sman chen po zhes gsungs so/ /ye shes rdzogs par longs spyad pa'i bye brag gi dbang du byas nas zhu ba ste/ byang chub sems dpa' shin tu 'dus sangs rgyas kyis rab tu dbye ba la me long gi dpes de la rtsol ba yang med mngon par 'du byed pa yang med do zhes 'byung ba'i phyir/de bzhin gshegs pa rtsol ba mi mnga' ba rnams kyi ro gcig pa 'dres pa ngo bo nyid gcig pa ye shes rdzogs par longs spyod pa ni de bzhin gshegs pa rnams kho na yin no zhes nges par bzung ste bshad pa byang chub sems dpa' rnams kyi yang yin par 'dod do snyam du sems shing bcom ldan 'das la zhu ba yin no//rnam pa gcig tu na chos lngas sangs rgyas kyi sa bsdus par rig par bya'o zhes bshad pa la chos kyi dbyings rnam par dag pa la dmigs pa med pa me long lta bu'i ye shes ni ngo bo gcig pa yin la/de la brten te byung ba mnyam pa nyid kyi ye shes de yang de bzhin nyid la dmigs pa'i phyir ngo bo gcig pa kho na yin te gnyis su rnam par rtog pa dang bral ba'i phyir ro/ /rnam par shes pa gzhan gnyis ni gzhan la phan 'dogs pa gcig tu gces par byed pa yin pa'i phyir ro//gcig pa yang yin la de dag kyang sangs rgyas rnams kho na yin zhes nges par bzung ba'i phyir zhu ba yin no/ /chos kyi dbyings rnam par dag pa na 'dres pa nye bar 'dres pa 'bras bu ro gcig pa ye shes rdzogs par longs spyad pa zhes 'byung ba'i phyir gzhan ni ro gcig pa ma yin par mngon no//'dres pa ni gcig tu gyur pa'o/ /gcig tu gyur kyang res 'ga' tha dad du bya ba yod na de ni nams kyang tha dad du bya ba med pas nye bar 'dres pa ste dmigs par byas pa dang / dmigs par byed pa gnyis shin tu 'dres pas mnyam par gyur pa'i phyir ro//'bras bu ro gcig pa zhes bya ba la ro ni snying po ste/ ngo bo nyid do/ /ye shes rdzogs par longs spyad pa ni yul te/ rdzogs par spyod pa yin pa'i phyir ro/ /des na ye shes ni 'dir me long lta bu'i ye shes dang / mnyam pa nyid kyi ye shes yin par dgongs pa'o//de'i yul ni chos kyi dbyings te ye shes rdzogs par longs spyod pa gang la 'bras bu dgos pa ro gcig pa yod pa zhes bya bas rnam par sbyar ro/ /yang na ye shes de nyid ro gcig pa yin te/ rnam par mi rtog pa'i phyir ro/ /chos kyi dbyings kyi 'bras bu yang yin te/ de la dmigs nas skye ba'i phyir ro//rnam pa gcig tu na rdzogs par longs spyod pa ni kun du spyad pa ste tshor ba'o de ni des kun du spyad par bya ba yin pa'i phyir de ni de'i rdzogs par longs spyod pa yin no/ /de yang btang snyoms te de la bde ba dang sdug bsngal gyi bye brag med pas ngo bo nyid gcig pa'i phyir ro gcig pa'o/ /de yang de'i 'bras bu yin te/de dang mtshungs par ldan pa nyid du de'i stobs kyis skye ba'i phyir ro/ /yang na 'du byed pa btang snyoms pa ste/ thams cad rtsol ba med pa'i mtshan nyid du ngo bo nyid gcig par 'jug pa'i phyir 'bras bu ro gcig pa ye shes rdzogs par longs spyad pa'o/ /rnam pa gcig tu na ye shes nyid rdzogs par longs spyad pa yin te/rang rig pa'i rnam par rdzogs par longs spyad par bya ba yin pa'i phyir ro/ /ye shes de ni ro gcig pa yang yin te/ bdag dang gzhan la sogs pa gnyis su rnam par rtog pa med pa'i phyir ro/ /'bras bu yang yin te/ rtag tu las gnyis su 'du shes pa las dben par 'byung ba'i phyir ro//byang chub sems dpa' rnams kyi yang zhes bya ba ni de bzhin gshegs pa rnams kho na ni yin no zhes de ltar nges par bzung ba ni ma yin no snyam du dgongs pa'o/ /byang chub sems dpa' rnams kyi yang de lta bu yin no/ / 'o na ji ltar sangs rgyas kyi sa chos lngas bsdus pa yin zhe na/ sangs rgyas kyi sa ni chos lnga kho nas zhes nges par bzung ba'i phyir sangs rgyas kho na'i 'o zhes bya ba ni ma yin pas/ byang chub sems dpa'i sa rnams kyang 'di dag gis bsdus pa'i phyir ro/ /byang chub sems dpa' mngon par 'du byed pa dang bcas par 'byung ba'i lam la gnas pa rnams la/'bras bu ro gcig pa ye shes rdzogs par longs spyod pa med pas/ gang dag gi lags zhes zhu'o/ /mi skye ba'i chos la bzod pa thob pa rnams kyi zhes bya ba la byang chub sems dpa' ni rnam pa gsum ste/ byang chub sems dpa'i skyon med par zhugs pas sems dang po bskyed pa rnams dang / sa gong ma drug po dag tu bsgom pa'i lam thob pa'i phyir spyod pa la zhugs pa rnams dang / sa gong ma gsum dag tu bsgom pa'i lam kho na ste/ phyir mi ldog pa rnams so/ /de la sa brgyad pa la chos thams cad gzod ma nas ma byung ba gzod ma nas ma skyes pa zhes bya ba'i bzod pa chen po gcig tu yongs su dag pas zad pa med pa lhun gyis grub pa 'byung bar skye'o//de thob pa'i phyir mi skye ba'i chos la bzod pa thob pa dag ces bya ste/ sa brgyad las 'di skad du de yan chad byang chub sems dpa' gnyis su 'du shes pa dang bral ba yin no zhes gsungs pa lta bu'o//gnyis ni nga dang nga'i dang / yod pa dang med pa dang / rtag pa dang mi rtag pa dang / byung ba dang ma byung ba dang / skyes pa dang ma skyes pa dang / bdag dang gzhan zhes bya ba la sogs pa'o//de dag gi gnyen por thams cad du sems mnyam pa nyid thob ste/ de yan chad gnyis su 'du shes pa dang bral bas tshor ba thams cad dang bral ba zag pa med pa gcig tu yongs su dag pa lhun gyis grub par 'byung ba rnam par mi rtog pa'i ye shes thob pa'i phyir 'bras bu ro gcig pa ye shes rdzogs par longs spyod pa yin no//byang chub sems dpa'i sa dang po kho na la bdag dang gzhan mnyam pa nyid thob pa yin mod kyi 'on kyang rtsol ba dang bcas par 'byung ba nyid kyis yongs su ma dag pa'i phyir rnam par dag par mi gzhag go/ /don de bstan pa'i phyir 'dres pa'i tshal gyi dpe ste/ji srid du 'dres pa'i tshal du zhugs par ma gyur pa de srid du lha'i longs spyod 'dres pa nye bar 'dres pa rnams kun du mi gnas kyi zhes bya bar sbyar ro/ /dngos po'i sgo nas tha dad pa ni gzhal med khang dang / rgyan la sogs pas tha dad pa'o/ /nyams su myong ba'i sgo nas ni bde ba dang sdug bsngal tha dad pa dang rab dang rab mchog tha dad pa'o//nga yir 'dzin pa'i sgo nas tha dad pa ni 'di ni khyod kyi 'di ni nga zhes bya ba ste/ der zhugs pa rnams la de dag med do/ /de nyid kyi phyir 'dres pa'i tshal zhes bya ste/ der zhugs pa'i lha rnams kyi longs spyod 'dres pa yin pa'i phyir ro/ /'dres pa ni tshol ba yin no//ji srid du thob par ma gyur pa de srid du mi 'thob po zhes bya bar sbyar te/ sa 'og ma pa rnams kyi lam ni rtsol ba dang bcas par 'byung ba'i phyir btang snyoms yongs su ma dag pa yin pas gnyis su 'du shes pa dang bral bas kun du mi gnas so zhes bya bar sbyar ro/ /thun mong ma yin pa ni theg pa dman pa rnams dang /byang chub sems dpa'i sa 'og ma pa rnams la yang med pa'i phyir ro/ /gal te 'bras bu tshul gcig pa'i ye shes rdzogs par longs spyod pa sangs rgyas rnams kho na'i yin no zhes nges par bzung du zin kyang de lta na yang nyes pa med do zhes bstan pa'i phyir rgya chen po'i dpe ste/ de bzhin gshegs pa'i ye shes ni rnam pa thams cad du yongs su dag pa'i phyir sems can thams cad kyi don thams cad rnam pa thams cad du bya ba la mkhas pa'i phyir 'bras bu ro gcig pa ye shes rdzogs par longs spyad pa de dag kho na'i yin par rnam par gzhag par rigs pa dang ldan gyi/byang chub sems dpa' rnams kyi ni ma yin te/ sgrib pa lhag ma dang bcas pa nyid kyi ye shes yongs su ma dag pa'i phyir ro//'o na 'dres pa nye bar 'dres pa 'bras bu ro gcig pa ye shes rdzogs par longs spyod pa byang chub sems dpa' mi skye ba'i chos la bzod pa thob pa rnams kyi yin no zhes 'byung ba ji ltar mi 'gal zhe na/ lhun gyis grub pa'i ye shes la spyir dgongs nas gsungs pa'i phyir 'gal ba med de/gzhan du yang nges par gzung du rung bar bshad do/ /chu bo ni gang gA la sogs pa bzhi'o/ /chu bran ni de las gzhan pa dag go/ /gnas tha dad pa ni sa phyogs tha dad pa la brten pa'i phyir ro/ /chu chen tha dad pa ni rnyog pa can dang /kha dog skya bo dang / lan tshwa bro ba dang chu mngar ba tha dad pa'o/ /chu chung ba ni rgya mtsho chen po la ltos pa'i phyir ro/ /chu skye 'bri yod pa ni char che ba dang / char chung ba'i dus na'o/ /so so rang gi bya ba sgrub pa'i las can gyi chu ni ro bro ba dang / mthu dang rnam par smin pa tha dad pas so/ /nyung ngu dag ces bya ba ni grangs nyung ba nyid dang bong chung ba nyid kyis nyung ba'i phyir ro//gnas tha dad pa ma yin pa zhes bya ba la sogs pa thams cad ni ji skad bshad pa las bzlog ste/ brjod par bya'o/ /phal po che chen po rnams zhes bya ba ni grangs phal che ba dang / bong che ba'i dbang du mdzad nas so//gnas tha dad pa ni de bzhin gshegs pa tha dad pa la brten pa'i phyir ro/ /ye shes tha dad pa ni rnam par grol ba tha dad pas rab tu phye ba'i phyir ro/ /ye shes chung ba ni de bzhin gshegs pa'i ye shes la ltos nas so/ /ye shes 'phel 'grib yod pa ni sa gong nas gong du khyad zhugs pa la ltos pa'i phyir dang /ting nge 'dzin khyad zhugs pa la ltos pa'i phyir ro/ /so so rang gi bya ba sgrub pa'i las can gyi ye shes ni byang chub sems dpa'i ting nge 'dzin rnams kyi bya ba tha dad pa'i phyir/ byang chub sems dpa'i rnam par thar pa gang gi yul sems can gyi khams ji snyed cig yin pa de las phan tshun mi 'jug pa'i phyir ro//nyung ngu dag ces bya ba ni grangs nyung ba nyid la dgongs pa yin gyi bong chung ba nyid ni ma yin no/ /de dag yongs su smin par 'gyur ba'i rtsa ba gang yin pa de'i gnas yin te/ de'i dbang gis de dag yongs su smin par 'gyur ba'i phyir ro//de bzhin gshegs pa'i ting nge 'dzin la ltos na/ byang chub sems dpa'i ting nge 'dzin rnam grangs dpag tu yod pa'i phyir/ sems can dpag tu yod pa rnams kyi don byed pa yin no/ /nam de bzhin gshegs pa rnams kyi chos kyi dbyings rnam par dag pa'i rgya mtsho chen por zhugs par gyur pa na sangs rgyas kyis sgrib pa thams cad kyi dri ma med pa mngon sum du mdzad pa'i phyir gnas tha dad pa ma yin pa dag ste/de bzhin gshegs pa thams cad kyi gnas de bzhin nyid yongs su dag pa la tha dad pa med pa'i phyir ro/ /de nyid kyi phyir zag pa med pa'i dbyings la sangs rgyas rnams du ma nyid du rnam par mi gzhag go//ye shes tha dad pa ma yin pa ni thams cad kyi me long lta bu'i ye shes bdag dang gzhan du 'byed pa mi mnga' bas mtshungs pa'i phyir ro/ /ye shes tshad med pa ni shes bya tshad med pa'i yul can yin pa nyid kyi phyir ro/ /ye shes 'phel 'grib med pa ni yongs su dag pa mtshungs pa'i phyir dang /yul nyung ngu dang / ches mang po la ma khyab pa mi mnga' ba'i phyir ro/ /'dres pa nye bar 'dres par mdzad pa ro gcig pa'i ye shes ni thams cad kyi mnyam pa nyid kyi ye shes la sogs pa'i mdzad pa mtshungs pa'i phyir ro/ /tshad med pa dag ni grangs tshad med pa'i phyir te/bsod nams dang ye shes kyi tshogs zad mi shes pa mtshungs pa'i phyir chos kyi skus 'khor ba ji srid par sems can rnams yongs su smin par byed pa'i dge ba'i rtsa ba'i gnas su 'gyur ro/ /tshigs su bcad pa bzhis ni chos kyi dbyings rnam par dag pa'i mtshan nyid kyi mdor bsdus nas ston par mdzad de/chos rnams kun gyi de bzhin nyid/ /sgrib gnyis ldan dag mtshan nyid can/ /zhes bya ba ni 'di la yan lag gnyis yod pa'o/ /de nyid sgrib pa gnyis te/ spyir bstan pa yin no/ /sgrib par byed pa ni sgrib pa ste 'di la gnyis yod pa'o/ /de'i phyir de bzhin nyid kyi sgra dang gzhi mthun pa yin no//'di la zag pa dang bcas pa dang / zag pa med pa'i chos thams cad kyi de bzhin nyid sgrib gnyis dang ldan de dag rnam par dag pa'i mtshan nyid yod pas zhes bya bar tshig rnam par sbyar ro/ /don ni chos thams cad kyi de bzhin du yod pa ni de bzhin nyid de/ chos thams cad kyi phyin ci ma log pa'i ngo bo de kho na nyid dang /stong pa nyid yin la chos thams cad kyi de bzhin nyid de/ nyon mongs pa dang shes bya'i sgrib pa gnyis las rnam par dag cing de las dben pa ste/ chos kyi dbyings ni de'i mtshan nyid can yin no zhes bya ba yin no/ /'dis ni de bzhin nyid gnas yongs su gyur pa bstan te/de yang 'jig rten las 'das pa'i ye shes kyi lam shin tu rnam par dag pa thob pas sgrib pa gnyis kyi sa bon gtan du bral na chos kyi dbyings yongs su dag pa yin te/ rdo rje lta bu'i 'og tu de bzhin nyid gnas gyur pa zhes bya'o/ /dngos po shes pa de dmigs pa/ / dbang zad mi shes mtshan nyid can/ /zhes bya ba la dngos po ni gzhan gyi dbang gi ngo bo nyid do/ /dngos po de shes pa ni dngos po shes pa'o/ /de yang me long lta bu'i ye shes te/ de'i dmigs pa ni gzhan gyi dbang gi ngo bo nyid yin no/ /dmigs pa ni dmigs par bya bar bya ba'o/ /'di la dmigs pa de yod pas na de dmigs pa ste/de zhes bya ba'i sgra ni chos kyi dbyings dang sbyar gyi dngos po shes pa ni ma yin no/ /rab tu mchod pa la yang 'brel pa ma mthong ba'i phyir te/ dper na/ ut+pa la sngon po'i 'dab ma 'dra ba'i spyan mnga' ba/ /khyod kyi zhal ras de yi ngad dang dri mtshungs 'dri/ /zhes bya ba lta bu'o//me long lta bu'i ye shes kyi dmigs pa ni chos kyi dbyings kyang yin te/ so so rang rig pa nyid du de la dmigs pa'i 'khor ba ji srid par gnas pa'i phyir ro/ /de ni dngos po shes pa yang yin la/ de dmigs pa yang yin pas zhes gzhi mthun par bsdu'o/ / de ltar na chos thams cad me long lta bu'i ye shes kyi dmigs pa nyid du bstan pa yin te/ rang dang spyi'i mtshan nyid la dmigs pa'i phyir ro/ /rnam pa gcig tu na dngos po shes pa dang / de dmigs pa zhes bya ba zlas dbye ba yin te/ gnas ngan len mtha' dag gi gnas kun gzhi rnam par shes pa gnyen po'i stobs kyis gnas ngan len ma lus pa dang bral bas yongs su gyur pa me long lta bu'i ye shes zhes bya ba gzhan gyi dbang dag pa zhes tha snyad gdags pa sems kyi rnam par rtog pa thams cad med pa'i ngo bo la 'di ni dngos po tsam mo zhes spyi'i rnam par sgro btags nas/dngos po'i sgra brjod do/ /me long lta bu'i ye shes dmigs par bya ba dang / dmigs pa mnyam pa'i rnam pa yang gnas ngan len gyi gnas yongs su gyur na de ltar rnam par gzhag go/ /dngos po de shes pa ni dngos po shes pa ste/ de la dmigs pa zhes bya ba'i tha tshig go//de yang mnyam pa nyid kyi ye shes yin no/ /de'i rjes la thob pa dag la 'jig rten pa rang gi rtog pa yongs su gcod pa'i rnam pa gang yin pa de'i spyod yul yang gzhan gyi dbang gi ngo bo nyid yongs su gyur pa yin no/ /rjes las thob pa'i ye shes de ni so sor rtog pa'i ye shes kho na yin te/ de rang gis rtogs pa la so sor rtog pa'i tshe/ de gnyis yul yin pa'i phyir ro/ /de la'am de gnyis la dbang ba ste/ 'di de la zad mi shes pa'i mtshan nyid yod pas zhes bya bar tshig rnam par sbyar ro/ /'dis mtshon par byed shes par byed pas na zhes byed pa'i byed pa por byas pa'i phyir ro//dngos po shes pa de dmigs pa/ /de la'ang dngos po shes pa dang / /de dmigs pa de gnyis la dbang zad mi shes pa'i mtshan nyid ces bya ba'i tha tshig ste/ 'dis ni lam gnas yongs su gyur pa yang bstan pa yin no/ /nyon mongs pa can gyi yid yongs su gyur na/ me long lta bu'i ye shes chos kyi dbyings la dmigs pa la dmigs nas mnyam pa nyid kyi ye shes skye ste/de bzhin yongs su dag na de la yang dbang zad mi shes pa 'thob po/ /me long lta bu'i ye shes ni rgyun gyis rtag pa nyid kyis 'khor ba ji srid par gnas pa'i phyir dbang zad mi shes pa thob pa'i yang rigs na/ mnyam pa nyid kyi ye shes so//ci de kho na dang 'dra bar rtag pa'i phyir mi zad pa nyid gcig yin nam zhe na ma yin no/ /'o na ji lta bu zhe na bzhed dgur mngon par 'gyur ba'i phyir te/ rtsol ba mi mnga' bas bzhed pa tsam gyis mngon sum du mdzad pa gang yin pa de nyid de la mi zad pa de nyid yin no/ /de'i rjes la thob pa'i ye shes kyang de bzhin du gzhan gyi dbang gi ngo bo nyid dag pa dngos po tsam de la dbang zad mi shes pa 'thob po ji lta zhe na/phyin ci log ma yin pa'i don gyis te/ ji ltar gzhan gyi dbang gi ngo bo nyid dag dngos te phyin ci log thams cad med pa'i ngo bo yin pa ltar de'i rjes la thob pa'i ye shes kyang de dang 'dra'o/ /de nyid kyi phyir phyin ci ma log par yongs su grub pa'i phyir de ni de la dmigs pa yin no//'o na ji ltar 'jig rten pa yin zhe na/ rnam par rtog pa dang bcas pa'i rnam pa yin pa'i phyir ro/ /'o na ji ltar de la dmigs pa yin zhe na/ rang rig pa'i rnam par ro/ /ji skad du rang rig pa dang mthun par skye ba'i phyir/ rang gis rtogs pa yongs su gcod pa'i rnam pa phyin ci ma log par snang ste/des na de la dmigs pa zhes bya ba'i tha snyad 'thob po/ /de bzhin nyid shes thams cad nas/ /bsgoms pas yang dag grub pa can/ /de la de bzhin nyid la dmigs pa'i ye shes bsgom pa gang yin pa de las yang dag par 'grub pa yod pas zhes bya bar tshig rnam par sbyar ro//de bzhin nyid ces ni rnam par mi rtog pa'i ye shes te/ sa dang po thob pa'i tshe thob pa yin no/ /de bsgoms pa ni sa lhag ma rnams te/ de bzhin nyid shes pa de thams cad nas chos kyi rnam grangs 'di thams cad nas thos pa dang bsam pa dang / bsgom pa la sogs pa'i rim gyis sbyor ba la sogs pa'i gnas skabs dag tu ji lta ji ltar/bsgoms pa de lta de ltar sa re re la nyon mongs pa can ma yin pa'i mun pa dang bral ba'i phyir chos kyi dbyings rnam par dag pa'i rgyur 'gyur te/ sangs rgyas kyi sa la chos kyi dbyings rnam pa thams cad yongs su dag pa gsal ba'i bar du 'gyur ro//'dis ni mnyam nyid kyi ye shes bstan te/ de yang de yongs su dag pa'i rgyu yin pa'i phyir ro/ /sems can kun gyi gnyis bskyed pa/ /gtan du mi zad 'bras bu can/ /'di la sems can thams cad la rnam pa thams cad du phan pa dang / bde ba gnyis bskyed pa mi zad pa'i 'bras bu yod pas zhes bya bar rnam par sbyar te/ sems can thams cad la phan pa skyed pa ni dge ba bskyed pa'o/ /bde ba bskyed pa ni 'phral du'o/ /de gnyis ni 'di'i stobs kyis 'khor ba ji srid par mdzad pas 'di gnyis mi zad pa ni 'di'i 'bras bu yin te/chos kyi dbyings yongs su dag pa ni de'i phyed yin pa'i phyir ro/ /'dis ni so sor rtog pa'i ye shes bstan te/ de yang de'i 'bras bu yin pa'i phyir ro/ /sku dang gsung dang thugs sprul pa/ /sbyor ba'i thabs kyi phrin las can/ 'di la sku dang gsung dang thugs sprul pa rnams sbyor bar byed pa'i thabs gang yin pa de nyid kyi phrin las mnga' bas zhes bya bar sbyar ro//de'i thabs yongs su mkhyen pa'i phyir/ de'i phrin las can zhes bya'o/ /sku sprul pa ni rnam pa gsum ste/ rang dang gzhan gyi lus dang 'brel pa dang ma 'brel pa'o/ /rang gi lus dang 'brel pa 'di bdag nyid 'khor los sgyur ba la sogs pa'i gzugs su kun du ston pa'o//gzhan gyi lus dang 'brel pa ni bdud la sogs pa sangs rgyas pa'i gzugs su kun du ston pa'o/ /ma 'brel pa ni sa la sogs pa'i rin po che sna bdun gyi rang bzhin du kun du ston pa'o/ /sangs rgyas kyi sku yongs su gzung ba dpag tu med pa kun du ston pa gang yin pa yang yin te/ji skad du sngar bshad pa bzhin no/ /'od zer rab tu dgye bas 'jig rten gyi khams mtha' yas pa snang ba mdzad pa gang yin pa de yang sku sprul pa kho na yin te/ des kyang sems can gyi don mdzad pa'i phyir ro/ /skye ba la sogs pa kun du ston pa gang yin pa yang yin no//de bzhin du gsung sprul pa yang rang gi lus dang 'brel pa ni tshangs pa'i dbyangs kyis 'jig rten gyi khams mtha' yas par go bar mdzad pa'o/ /gzhan gyi lus dang 'brel pa ni gang gis na nyan thos la sogs pa'i yang / sangs rgyas kyi gsung dbyangs kyis theg pa chen po'i chos bstan par mdzad pa'o//ma 'brel pa ni nam mkha' la sogs pa dag las chos ston pa'i sgra 'byung zhes bya ba la sogs pa'o/ /thugs sprul pa ni bdag dang gzhan dang 'brel pa ste/ bdag nyid chos thams cad thugs su chud la/ gzhan yang gang gis na shes rab chung ngus kyang chos zab mo yang khong du chud par 'gyur ba de lta bu'i sems nges par 'dzin par mdzad pa dang /dran pa nyams pa rnams kyang dran pa slar rnyed do zhes bya ba la sogs pa'o/ /'di ni bya ba sgrub pa'i ye shes bstan pa yin te/ ji skad du sngar bshad pa bzhin no/ /ting nge 'dzin dang gzungs kyi sgo dang //dpag tu med pa gnyis dang ldan/ sgo ni sgo mo'o/ /dpag tu med pa gnyis ni bsod nams dang ye shes kyi tshogs dag go/ /ting nge 'dzin dang gzungs kyi sgo dang bsod nams dang ye shes kyi tshogs dpag tu med pa dang ldan pa ste yang dag par ldan pa dang 'byor pa zhes bya ba'i tha tshig go/ /rang bzhin chos rdzogs longs spyod dang //sprul pas tha dad 'jug pa can/ 'di la rang bzhin pa dang / longs spyod rdzogs pa dang / sprul pa'i sku dag gis tha snyad du 'jug pa yod pas zhes bya bar tshig rnam par sbyar ro/ /de bzhin gshegs pa rnams kyi sku chos kyi dbyings rnam par dag pa tha dad pa ma yin mod kyi/'on kyang sku gsum gyi bye brag gis 'jug pa'i phyir 'di la tha dad du 'jug pa yod pas zhes bya'o/ /sku gsum po 'di dag gis ni rang dang gzhan gyi don rten dang bcas pa ston te/ de la rang bzhin pa ni chos kyi sku ste/ gnas yongs su gyur pa'i mtshan nyid 'byor pa thams cad kyi gnas chos dkar po thams cad la mnga' mdzad pa/sangs rgyas thams cad kyi sku'i gnas de bzhin gshegs pa thams cad kyi mtshungs pa phra zhing shes par dka' ba yin no/ /de'i dbang du mdzad nas gzhan las brtags par bya ba ma yin pa rtog ge'i spyod yul ma yin pa rtog ge'i lam las yang dag par 'das pa zhes bya ba la sogs pa gsungs so//longs spyod rdzogs pa ni de'i dbang gis 'byung ba'i shes rab rnam par mi rtog pa'i ye shes kyi rjes la thob pa ste/ shel la sogs pa'i rang bzhin gyis sangs rgyas kyi zhing rnams su 'khor gyi dkyil 'khor sna tshogs kyi nang dag tu sar zhugs pa'i byang chub sems dpa' chen po rnams dang thabs cig tu chos la rdzogs par longs spyod pa'i rgyu mtshan yin no//sprul pa du ma gdul ba'i sems can ji lta ba rnams la gzugs kyi sku la sogs pa kun du bstan pas yongs su smin par 'gyur ba dang mthun pa ste/de'i rjes la thob pa'i shes rab kho na yin no/ /sprul pa pa ni nyan thos la sogs pa'i yul yin gyi longs spyod rdzogs pa pa ni ma yin no/ /de yang de bzhin gshegs pa rnams kyi don chen po ste/ gzugs sna tshogs kun du ston pas rtag tu sems can yongs su smin par bya ba'i phyir nye bar gnas pa yin no//longs spyod rdzogs pa pa ni rang gi don mdzad pa yin gyi/ 'di ni gzhan gyi don mdzad pa kho na yin no/ /gzhan nas sangs rgyas kyi rab tu dbye ba bcu gsungs pa gang dag yin pa mngon par rdzogs par byang chub pa'i sangs rgyas dang / smon lam gyi sangs rgyas dang / las kyi rnam par smin pa'i sangs rgyas dang / byin gyi rlabs kyi sangs rgyas dang / sprul pa'i sangs rgyas dang / chos kyi dbyings kyi sangs rgyas dang / sems kyi sangs rgyas dang / ting nge 'dzin gyi sangs rgyas dang / rang bzhin gyi sangs rgyas dang / bsam pa ji lta ba bzhin gyi sangs rgyas dang zhes bya ba de dag kyang gsum po 'di dag kho na'i khongs su 'dus te/de la dang po lnga ni kun rdzob kyi sangs rgyas yin no/ /'og ma lnga ni don dam pa'i sangs rgyas yin no/ /sangs rgyas rnams kyi chos kyi dbyings/ /rnam dag 'di ni yang dag brjod/ /yongs su dag pa'i mtshan nyid ji skad bshad pas sangs rgyas rnams kyi chos kyi dbyings su yongs su dag pa gang yin pa 'di ni yang dag par brjod zin par tshigs su bcad pa bzhis ni go rims bzhin du rang bzhin gyi mtshan nyid dang rgyu dag dang phrin las dang ldan pa dang 'jug pa'i don gyi sa sangs rgyas kyi sa'i rnam par dbye ba de mdor bsdus te ston par byed do//mdo sde rnam par bshad byas nas/ /bsod nams bdag gis gang bskyed pa/ /des ni 'jig rten sangs rgyas sa/ /dam pa mchog ni thob par shog /slob dpon ngang tshul bzang pos mdzad pa rdzogs so// //