CLOSE WINDOW

D3993
བོད་ཡིག

@##/ /rgya gar skad du/ Ar+ya da sha b+hU mi byA khyA na/ bod skad du/ 'phags pa sa bcu pa'i rnam par bshad pa/ 'jam dpal gzhon nur gyur pa la phyag 'tshal lo/ /chos kyi rnam grangs 'di ni sus bshad dang / /gang dag rnams kyis 'chad du bcug rnams dang / / gang gis 'di don bstan dang de las ni/ /gang gis blangs nas bdag la rnam phye ba/ /de dag rnams dang chos mchog 'di la yang / /spyi bo sa la gtugs te phyag 'tshal nas/ /bdag dang gzhan don sgrub phyir de yi don/ /gnas par bya phyir bshad sbyar bya bar 'bad/ /sa bcu'i chos kyi rnam grangs las sa dang po'i bsdus pa ni gleng gzhi dang /snyoms par 'jug pa dang / byin gyi rlabs dang / ldang ba dang / bstan pa dang / bskul ba dang / bshad pa dang / khyad par ro/ /de la 'di skad bdag gis thos pa dus gcig na/ bcom ldan 'das mngon par rdzogs par sangs rgyas nas ring po ma lon te/zhag bdun pa gnyis pa'i tshe gzhan 'phrul dbang byed kyi lha rnams kyi nang na lha'i rgyal po dbang sgyur gyi gzhal med khang nor bu rin po che'i snying po can gyi khang bzangs na/ byang chub sems dpa'i tshogs chen po byang chub sems dpa' rdo rje'i snying po la sogs pa sangs rgyas kyi zhing sna tshogs nas 'dus pa dang thabs cig tu bzhugs te zhes bya ba ni gleng gzhi ste/yul dang dus la sogs pa bye brag brjod par bya ba'i phyir ro/ /chos kyi rnam grangs 'di mchog yin pas yul mchog yin pa nyid du dang por bshad do/ /yul de ni gnas dang /khang pa dang / gnas kyi khyad par mchog yin pas mchog go/ /ci'i phyir gzugs kyi khams su ma yin zhe na/ de'i 'bras bu 'dir mngon par grub pa'i phyir ro/ /ci'i phyir zhag bdun pa dang po la ma yin zhe na/ rten cing 'brel par 'byung bas gnas pas gnas pa'i phyir ro//gzhan gyi don du mngon par rdzogs par sangs rgyas pa ci'i phyir zhag bdun 'das par mdzad ce na/ bdag nyid chos kyi kun dgas dgyes pa'i che ba nyid bstan pa'i phyir ro/ /de yang ci'i phyir zhe na/ de bzhin gshegs pa la sems can rnams dga' ba dang / gus pa bskyed par bya ba'i phyir te/dgyes pa de lta bu de yang btang nas thugs brtse bas sems can rnams la chos ston to snyam pa'i phyir ro/ /ci'i phyir rten cing 'brel par 'byung ba'i gnas pa nyid kyis gnas she na/ de thugs su chud pa ni thun mong ma yin par bstan pa'i phyir ro/ /ci'i phyir chos kyi rnam grangs 'di byang chub sems dpas bshad ce na/byang chub sems dpa' rnams spro ba bskyed pa'i phyir ro/ /ci'i phyir rdo rje snying po kho nas bshad ce na/ gang gi phyir dge ba'i rtsa ba rdo rje ltar sra ba dang ldan pa'i chos kyi rnam grangs 'di nyon mongs pa thams cad kyis mi choms pa dang / 'joms par byed pa nyid kyi phyir te/ 'di ni mtshan de skad ces bya ba ma yin pas mi 'chad do/ /ci'i phyir rdo rje snying po zhes mtshan de skad gsol zhe na/ snying po'i sgra 'di ni sra ba la yang rig par bya ste/ dper na shing gi snying po zhes bya ba lta bu'o/ /skye ba'i gnas la yang bya ste/ dper na ma'i mngal zhes bya ba lta bu'o//de'i phyir snying po rdo rje dang 'dra bas rdo rje'i snying po ste/ de'i dge ba'i rtsa ba rnams gzhan gyi dge ba'i rtsa ba thams cad pas stobs dang ldan pa'i phyir ro/ /de'i skye ba'i gnas rdo rje lta bu ni skye ba'i rgyu ste/ lha dang mir 'gro bar 'gyur ba la bya ste/ de las gzhan pa'i skye ba'i rgyus mi shigs pa'i phyir rdo rje'i snying po'o//de nas yang de'i tshe/ byang chub sems dpa' sems dpa' chen po rdo rje'i snying po sangs rgyas kyi mthus byang chub sems dpa'i ting nge 'dzin theg pa chen po rab tu snang ba zhes bya ba la snyoms par zhugs so zhes bya ba ni ting nge 'dzin la snyoms par 'jug pa ston te/chos kyi rnam grangs 'di rtog ge'i spyod yul ma yin pa nyid du bstan pa'i phyir ro/ /byang chub sems dpa' rdo rje'i snying po snyoms par zhugs ma thag tu zhes bya ba ni byang chub sems dpa'i ting nge 'dzin theg pa chen po rab tu snang ba 'di la'o/ /de nas de'i tshe phyogs bcu dag gi 'jig rten gyi khams sangs rgyas kyi zhing bye ba phrag bcu'i rdul phra rab kyi rdul snyed kyi pha rol nas de bzhin gshegs pa sangs rgyas kyi zhing bye brag phrag bcu'i rdul phra rab kyi rdul snyed dag 'di lta ste mtshan rdo rje'i snying po zhes bya bar mthun pa sha stag gis zhal bstan te/sangs rgyas bcom ldan 'das de dag gis de la 'di skad ces bka' stsal to//kye rgyal ba'i bu khyod byang chub sems dpa'i ting nge 'dzin theg pa chen po rab tu snang ba 'di la snyoms par zhugs pa legs so legs so/ /rigs kyi bu yang khyod la phyogs bcu dag gi de bzhin gshegs pa sangs rgyas kyi zhing bye ba phrag bcu'i rdul snyed kun kyang mtshan rdo rje'i snying po zhes bya bar mthun pa sha stag gis bcom ldan 'das rnam par snang mdzad 'di nyid kyi sngon gyi smon lam dang /byin gyi rlabs zhes bya ba ni/ sangs rgyas mang pos byin gyis brlabs par yongs su ston te/ chos dang chos smra ba la gus pa rab tu cher bskyed pa'i phyir ro//ci'i phyir rdo rje'i snying po zhes bya ba sha stag kho nas byin gyis brlabs she na/ sangs rgyas kyi smon lam gyi phyir ro/ /ci'i phyir bcom ldan 'das kyis smon lam de skad btab ce na/ sangs rgyas mang po nyid du bstan pa'i phyir ro/ /ting nge 'dzin 'di'i chos nyid ni 'di yin te/ byang chub sems dpar gyur pa rdo rje'i snying po zhes bya ba gang dag gis chos kyi rnam grangs 'di bshad pa/de bzhin gshegs par gyur pa mtshan de skad ces bya ba de dag nyid kyis byin gyis rlob kyi/ gzhan dag gis ni ma yin te/ de dag gis byang chub sems dpa' de la rang gi mtshan yongs su brjod pas de dag dang mtshan mthun pa'i phyir dga' ba'i khyad par du 'gyur ro//ci'i phyir 'jig rten gyi khams tshad med pa dag gi pha rol nas zhes mi bya zhe na/ thabs la mkhas pas de mang ba nyid du bstan pa'i phyir ro/ /ci'i phyir sangs rgyas kyi zhing bye ba phrag bcur nges she na/ sa bcu'i skabs yin pa'i phyir te/de bas na 'dir bcu pa mang du ston to/ /bcom ldan 'das kyis sngon de dag gi de byin byis brlab par smon lam btab cing / rang gis kyang byin brlabs pa dang / gzhan dag gis kyang phyis mdzad de/ de'i phyir bcom ldan 'das kyi sngon gyi smon lam dang / byin gyi brlab kyis zhes bya'o//ci'i phyir chos kyi rnam grangs 'di bshad par byin gyis brlab pa dang / ji ltar byin gyis brlab pa brjod par bya ste / de la byang chub sems dpa' thams cad sangs rgyas kyi chos bsam gyis mi khyab pa snang ba brjod pas ye shes kyi sa la 'jug par bya ba'i phyir dang / dge ba'i rtsa ba thams cad yang dag par bsdu bar bya ba'i phyir dang /sangs rgyas kyi chos thams cad rab tu dbye ba la mkhas par bya ba'i phyir dang / chos la ye shes shin tu rgyas par bya ba'i phyir dang / legs par gnas pa'i chos bstan par bya ba'i phyir dang / ye shes tha mi dad pa rnam par byang bar bya ba'i phyir dang /'jig rten gyi chos thams cad kyis mi gos par bya ba'i phyir dang / 'jig rten las 'das pa'i dge ba'i rtsa ba yongs su dag par bya ba'i phyir dang / ye shes bsam gyis mi khyab pa'i yul khong du chud par bya ba'i phyir dang / thams cad mkhyen pa'i ye shes kyi yul gyi bar du khong du chud par bya ba'i phyir dang /gang 'di byang chub sems dpa'i sa bcu po dag la brtsam zhing thob par bya ba'i phyir dang / byang chub sems dpa'i sa ji lta ba bzhin du rnam par dgod pa la mkhas pas bstan par bya ba'i phyir dang / sangs rgyas kyi chos thams cad la lhag par dmigs par bya ba'i phyir dang /zag pa med pa'i chos bye brag gis bsgom par bya ba'i phyir dang / shin tu rnam par phye ba rnam par 'byed pa shes rab chen po snang ba la mkhas par bya ba'i phyir dang / shin tu brtags pa'i ye shes kyi sgo la 'jug par bya ba'i phyir dang / gnas gzhan ci rigs su rab tu brjod pa la bag 'chums pa med pa'i spobs pas snang bar bya ba'i phyir dang /so so yang dag par rig pa chen po'i sa shin tu rtogs par bya ba'i phyir dang / byang chub kyi sems kyis brjod pa med par bya ba'i phyir dang / sems can gyi khams thams cad yongs su smin par bya ba'i phyir dang / thams cad du zhugs pa'i rnam par gtan la 'bebs pa thob par bya ba'i phyir byin gyis brlab pa mdzad do zhes bya ba bcu pa de gnyis kyis byang chub sems dpa' rnams kyi rang gi don dang gzhan gyi don la brtsams te byin gyis brlabs so//ji ltar rang gi don la brtsams pa de lta bu ni bcu pa dang po'o/ /ji ltar gzhan gyi don la brtsams pa de lta bu ni bcu pa gnyis pa yin par rig par bya'o//de la byang chub sems dpa' thams cad ni gang su dag mos pas spyod pa la sogs pa'i sa la gnas pa rnams so/ /sangs rgyas kyi chos bsam gyis mi khyab pa rnams ni 'jig rten las 'das pa'i byang chub kyi phyogs pa gang yin pa dag go//snang ba ni de la rtog pa ste/ shes pa dang mthong ba dang / thob pa dang / mngon sum du byed pa'o/ /de brjod pa ni bstan pa dang rab tu bshad pa'o/ /de ni ye shes kyi sa bcu pa ji skad 'byung ba rnams te/ de dag gis de brjod pa'i phyir ro/ /de dag la 'jug pa ni dad pa dang / mos pa dang / rab tu dang ba dang / 'thob pa gang yin pa'o/ /de ni 'jug pa'i rtsa ba ste/ mdo'i tshig byang chub sems dpa' thams cad sangs rgyas kyi chos bsam gyis mi khyab pa snang ba brjod pas ye shes kyi sa la 'jug par bya ba'i phyir zhes bya ba 'dis ston to/ /rtsa ba'i 'jug pa de la brten nas 'jug pa gzhan rnam pa dgu ste/thos pa 'dzin pa'i sgo nas thos par gtogs pa'i dge ba'i rtsa ba thams cad bsdus pa'i phyir sdud pa'i 'jug pa ni gang gi phyir/ dge ba'i rtsa ba thams cad yang dag par bsdu bar bya ba'i phyir zhes gsungs pa'o/ /bsams pa las byung ba'i shes pas byang chub kyi phyogs pa thams cad la mkhas par byed pas don rtogs par byed pa'i 'jug pa ni gang gi phyir sangs rgyas kyi chos thams cad rab tu dbye ba la mkhas par bya ba'i phyir zhes gsungs so //don de dang de'i rnam grangs du ma shes par byed pas chos rtogs par byed pa'i 'jug pa ni 'di ltar chos la ye shes shin tu rgyas par bya ba'i phyir zhes gsungs pa'o//ji ltar rtogs pa'i don dang / tshig 'bru phun sum tshogs pa'i chos ston pas sems can yongs su smin par byed pa'i 'jug pa ni gang gi phyir legs par gnas pa'i chos bstan par bya ba'i phyir zhes gsungs pa'o/ /mthong ba'i lam gyi gnas skabs na chos thams cad mnyam pa nyid du shes pa yongs su sbyangs pas 'thob par byed pa'i 'jug pa ni gang gi phyir/ye shes tha mi dad pa rnam par byang bar bya ba'i phyir zhes gsungs pa'o/ /gzhan gyi don gyis yongs su bsdus pa'i phyir byang chub sems dpa' rnams kyi thob pa ni sangs rgyas nyid du 'gyur bar bstan pa'i phyir sems can yongs su smin par byed pa sngar bstan to//de nyid kyi phyir de dag gi gzhan gyi don la sbyor ba yang rang gi don kho na yin no/ /bsgom pa'i lam gyi gnas skabs na kun nas nyon mongs pa'i chos thams cad yongs su spong bas bag yod pa'i 'jug pa ni gang gi phyir/ 'jig rten gyi chos thams cad kyis mi gos par bya ba'i phyir zhes gsungs pa'o//'jig rten las 'das pa'i byang chub kyi phyogs dang mthun pa ma chags pa la sogs pa'i dge ba'i rtsa ba yongs su sbyong bas sa nas sar 'phar bar byed pa'i 'jug pa ni gang gi phyir/ 'jig rten las 'das pa'i dge ba'i rtsa ba yongs su dag par bya ba'i phyir zhes gsungs pa'o//yang de dag nyid kyi rgyu gang yin pa dge ba'i rtsa ba yin par rig par bya'o/ /sa bcu par de bzhin gshegs pa thams cad kyi gsang ba la sogs pa shes par byed pas/ byang chub sems dpa'i mthar phyin par byed pa'i 'jug pa ni gang gi phyir ye shes bsam gyis mi khyab pa'i yul khong du chud par bya ba'i phyir zhes gsungs pa'o//shes bya thams cad la sgrib pa med pa shes pa'i phyir sangs rgyas kyi mthar thug par byed pa'i 'jug pa ni gang gi phyir/ thams cad mkhyen pa'i ye shes kyi bar du khong du chud par bya ba'i phyir zhes gsungs pa'o//'jug pa 'di rnams kyi bye brag bstan pa'i phyir/ ming gzhan smos kyi rtsa ba'i 'jug pa ni ma yin no/ /bcu pa la sogs pa bstan pa thams cad la yan lag dang nye ba'i yan lag gi sgo nas rnam pa drug drug gis bshad par rig par bya ste/ dngos po nye bar dgod pa ni ma gtogs te/ der phung po dang khams dang skye mched kyi dngos po nye bar dgod pa ma gtogs so zhes bya ba'i tha tshig go/ /rnam pa drug po dag gang zhe na/ yan lag dang / nye ba'i yan lag dang / mtshan nyid 'dra ba dang / mtshan nyid mi 'dra ba dang / 'du ba dang / rgyas pa'o/ /de la yan lag ni 'jug pa'o/ / nye ba'i yan lag ni gzhan rnams te/ de la brten pa'i phyir dang / de yongs su rdzogs par byed pa'i phyir ro/ /de gnyis kyi 'jug pa nyid kyi phyir mtshan nyid dang 'dra ba nyid do/ /rnam pa gzhan nyid kyi phyir mtshan nyid mi 'dra ba nyid do/ /'du ba ni mdor bsdus pa ste/ yan lag bstan pa'i phyir ro/ /rgyas pa ni de rab tu dbye ba ste/nye ba'i yan lag bstan pa'i phyir te/ 'jig rten gyi khams 'jig pa dang chags pa bzhin no/ /bcu pa gzhan la yang de bzhin nyid du ci rigs par sbyar bar bya'o/ /de gang dag bzhi par ston par 'don pa dang / gang dag gsum par ston par 'don pa gnyis ka yang 'dir de nyid kyi phyir kho na yin par rig par bya'o//bcu pa gnyis pa dang gsum pa la yang de nyid kyi phyir yod do/ /bcu pa gnyis pa la gang 'di byang chub sems dpa'i sa bcu po dag la rtsom zhing thob par bya ba'i phyir zhes bya bas ni rtsom zhing thob pa'i rtsa ba bstan to/ /de la rtsom pa ni dad pa dang / 'dun pa dang / nye bar 'gro ba la sogs pa ste/yongs su tshol ba'o/ /'thob pa ni sa bcu po de dag 'dzin pa'o/ /yang na lung dang rtogs pa ste/ go rims bzhin no/ /'dir ni rnam grangs gong ma nyid yin par rig par bya'o/ /rtsom zhing 'thob pa'i rtsa ba 'di la brten nas rtsom zhing 'thob pa gzhan bcu ste/ bsams pa las byung ba'i shes pas ji ltar thos pa'i don legs par 'dzin pa dang / 'dzin du 'jug pas yang dag par 'dzin pa rtsom zhing 'thob pa ni gang gi phyir/ byang chub sems dpa'i sa ji lta ba bzhin du rnam par dgod pa la mkhas pas bstan par bya ba'i phyir zhes gsungs pa'o/ / sangs rgyas kyi chos thams cad rtogs par bya ba'i phyir/ 'dun pa rtsom zhing 'thob pa ni gang gi phyir/ sangs rgyas kyi chos thams cad lhag par dmigs par bya ba'i phyir zhes gsungs pa'o/ /de nyid kyi ched du nges par 'byed pa'i cha dang mthun pa'i gnas skabs na zag pa med pa'i byang chub kyi phyogs pa bye brag gis bsgom pa'i rnam pa khong du chud par byed pas sbyor ba rtsom zhing 'thob pa ni gang gi phyir/zag pa med pa'i chos bye brag gi bsgom par bya ba'i phyir zhes gsungs pa'o/ /mthong ba'i lam gyi gnas skabs na chos bdag med pa shes pa la mkhas par byed pas rtogs par byed pa rtsom zhing thob pa ni gang gi phyir shin tu rnam par phye ba rnam par 'byed pa shes rab chen po snang ba la mkhas par bya ba'i phyir zhes gsungs pa'o//de la shin tu rnam par phye ba zhes bya ba ni de'i pha rol na yang rnam par dbye bar bya ba med pa ste/ de ni chos bdag med pa'o/ /de rnam par 'byed pa ni shes pa'o/ / de ni shes rab chen po yang yin te/ theg pa dman pa las 'das pa'i phyir ro/ /de ni snang ba yang yin te/ de mi shes pa'i mun pa'i gnyen po yin pa'i phyir te/ de'i tshe na de la mkhas pa yin no/ /'jig rten las 'das pa'i ye shes kyi rjes la thob pa shes pas chos kyi rnam grangs kyi don rtogs par byed pas bsgom pa'i lam rtsom zhing 'thob pa ni gang gi phyir/shin tu brtags pa'i ye shes kyi sgo la 'jug par bya ba'i phyir zhes gsungs pa'o/ /de la gnas pa'i byang chub sems dpa' la byang chub mi 'thob pa'i nyes pa lnga yod de/ phas kyi rgol ba tshar gcod par mi nus pa ni gang gis na phas kyi rgol ba rnams kyis de yang rang gi phyogs las bsgyur du rung ba dang /pha rol yang gzhan du bkrir rung ba'o/ /dris pa'i lan 'debs mi nus pa ni gang gis dris na de rmongs pa dang / pha rol yang 'jug par mi byed pa'o/ /theg pa dman pa 'dod pa ni gang gis na bdag nyid kyang byang chub chen po mi 'thob la/gzhan gyi don yang yal bar 'dor ba'o/ /sems can yongs su smin par bya ba la le lo byed pa ni gang gis na gzhan gyi don gtong zhing bdag gi dge ba'i rtsa ba gzhan gyi don byed pa'i rgyu las byung ba yang mi thob pa'o/ /thabs mi shes pa ni gang gis na sems can yongs su smin par byed pa dang /byang chub kyi tshogs yongs su rdzogs par byed mi nus pa'o/ /de dag gi gnyen por rtsom zhing 'thob pa lnga yod par rig par bya ste/ rang gi phyogs kyi khyad par ci rigs par yongs su bstan pa la bag tshab med par lan 'debs pa'i spobs pa mun pa med pas phas kyi rgol ba tshar gcod nus pa rtsom zhing 'thob pa ni gang gi phyir gnas gzhan rigs su rab tu brjod pa la bag 'chums pa med pa'i spobs pas snang bar bya ba'i phyir zhes gsungs pa'o//so so yang dag par rig pa'i sa shes pas mngon sum du byed pa dris pas lan 'debs nus pa rtsom zhing 'thob pa ni gang gi phyir so so yang dag par rig pa chen po'i sa shin tu rtogs par bya ba'i phyir zhes gsungs pa'o//byang chub tu smon lam btab pa'i phyir byang chub dran pa chud mi gson pas theg pa dman par 'gro ba'i gnyen po rtsom zhing 'thob pa ni gang gi phyir/ byang chub kyi sems kyi dran pa brjed pa med par bya ba'i phyir zhes gsungs pa'o//sems can thams cad kyi don bya ba la yongs su mi skyo bas sems can gyi don bya ba la le lo byed pa'i gnyen po rtsom zhing 'thob pa ni gang gi phyir/ sems can gyi khams thams cad yongs su smin par bya ba'i phyir zhes gsungs pa'o/ /rig pa'i gnas lnga dag tu zhugs pa'i rnam par gtan la 'bebs pa rtogs par byed pas thabs mi shes pa'i gnyen por rtsom zhing 'thob pa ni gang gi phyir thams cad du zhugs pa'i rnam par gtan la 'bebs pa thob par bya ba'i phyir zhes gsungs pa'o//'di ni gang gi phyir byin gyis brlab pa bstan pa'o/ /ji ltar byin gyis brlab ce na/gsung dang / thugs dang / skus so/ /gsung gi byin gyis brlabs pa ji lta bu zhe na/ yang rigs kyi bu khyod chos rnams kyi sgo rab tu dbye ba la mkhas par 'gyur ba'i chos kyi rnam grangs 'di las sangs rgyas kyi mthus de bzhin gshegs pa ye shes snang ba'i byin gyi rlabs kyi dang /rang gi dge ba'i rtsa ba yongs su dag pa'i phyir dang / chos kyi dbyings sbyangs pa'i phyir dang / sems can gyi khams la phan 'dogs pa'i phyir dang / chos kyi sku ye shes kyi sku'i phyir dang / sangs rgyas thams cad kyis dbang bskur ba yang dag par nod pa'i phyir dang / 'jig rten thams cad las mngon par 'phags pa'i lus 'byung ba'i phyir dang /'jig rten gyi 'gro ba thams cad las yang dag par 'das pa'i phyir dang / 'jig rten las 'das pa'i chos kyi 'gro ba yongs su dag pa'i phyir dang / thams cad mkhyen pa'i ye shes yongs su rdzogs pa'i phyir spobs par gyis shig ces bya ba bcu pa 'dis so//de la spobs pa ni ji ltar 'dris pa'i chos kyi don ma brjed pa'o/ /chos rnams kyi sgo dag ni chos kyi rnam grangs rnams so/ /de dag gi rnam pa tha dad pa ni rab tu dbye ba'o/ /de la chos kyi rnam grangs 'dis mkhas par 'gyur bas de la mkhas pa'o/ / spobs pa'i rtsa ba de la brten nas/ spobs pa gzhan rnam pa gnyis te/ gzhan gyi mthus spobs pa dang / rang gi mthus spobs pa'o/ /de la gzhan gyi mthus spobs pa ni sangs rgyas kyi mthus te/ ji ltar sangs rgyas kyi mthus she na/ de bzhin gshegs pa'i ye shes kyi mun pa med par byin gyis brlabs pa ste/gang gi phyir de bzhin gshegs pa'i ye shes snang ba'i byin gyi rlabs kyis zhes gsungs so/ /de la rang gi mthus spobs pa ni rnam pa bzhi ste/ 'dus byas kyi dge ba'i rtsa ba'i chos yongs su dag pas spobs pa ni gang gi phyir rang gi dge ba'i rtsa ba yongs su dag pa'i phyir zhes gsungs pa'o//'dus ma byas kyi chos yongs su dag pas spobs pa ni gang gi phyir chos kyi dbyings yongs su sbyangs pa'i phyir zhes gsungs pa'o/ /sems can yongs su smin par byed pa'i yongs su dag pas spobs pa ni gang gi phyir sems can gyi khams phan 'dogs pa'i phyir zhes gsungs pa'o//gnas yongs su dag pas spobs pa ni gnas yongs su dag pa de yang mthar phyin pa rnam pa gsum gyis rab tu phye ba ste/ byang chub sems dpa'i mthar phyin pa phan yon gnyis dang ldan pa dang / nyan thos dang rang sangs rgyas dang / thun mong pa'i mthar phyin pa dang / de bzhin gshegs pa'i mthar phyin pa'o/ /de la mthar phyin pa dang po ni chos kyi sku sems dang yid dang / rnam par shes pa spangs pa ye shes 'ba' zhig gis gnas te gang gi phyir chos kyi sku ye shes kyi sku'i phyir zhes bya ba gsungs pa'o/ /de'i phan yon rnam pa gnyis ni tshe 'di la sangs rgyas kyis dbang bskur ba yang dag par nod pa dang /tshe phyi ma la dbang phyug chen po'i gnas su skye ba ste/ gang gi phyir sangs rgyas thams cad kyis dbang bskur ba yang dag par nod pa'i chos kyi 'gro ba yongs su dag pa'i phyir dang / 'jig rten thams cad las mngon par 'phags pa'i lus 'byung ba'i phyir zhes gsungs pa'o//mthar phyin pa gnyis pa ni 'gro ba lnga las yang dag par 'das pa dang / mya ngan las 'das pa'i las lam yongs su dag pa ste/ gang gi phyir 'jig rten gyi 'gro ba thams cad las yang dag par 'das pa'i phyir dang / 'jig rten las 'das pa'i chos kyi 'gro ba yongs su dag pa'i phyir zhes gsungs so //mthar phyin pa gsum pa ni shes bya thams cad la sgrib pa med pa'i ye shes yongs su rdzogs pa ste gang gi phyir thams cad mkhyen pa'i ye shes yongs su rdzogs pa'i phyir zhes gsungs pa'o/ /gong nas gong du rang gi mthus spobs pa khyad par du 'gyur bar rig par bya ste/gsung gis byin gyis brlabs pa ni de lta bu yin no/ /thugs kyis byin gyis brlabs pa ji lta bu zhe na/ de nas sangs rgyas bcom ldan 'das de dag gis byang chub sems dpa' rdo rje'i snying po la zil gyis mi non pa'i lus nyid nye bar sgrub par mdzad de/ thob pa med pa'i spobs pas ston pa dang /shin tu rnam par sbyangs pa'i ye shes kyis shin tu rnam par phye ba la 'jug pa dang / brjed pa med pa'i byin rlabs dang / shin tu rnam par nges pa'i blo gros la mkhas pa dang / thams cad kyi rjes su song ba'i blo mi 'dor ba nyid dang / yang dag par rdzogs pa'i sangs rgyas kyi stobs brdzi ba med pa nyid dang /de bzhin gshegs pa'i stobs dang / mi 'jigs pa zhum pa med pa nyid dang / thams cad mkhyen pa'i ye shes kyis so so yang dag par rig par rnam par dbye bas chos kyi tshul la rtog pa dang / de bzhin gshegs pa'i sku dang / gsung dang / thugs kyi rgyan shin tu rnam par phye ba thams cad mngon par sgrub par mdzad do zhes bya ba bcu pa 'dis so/ /zil gyis mi non pa'i lus de yang rnam pa gnyis te/ bla na med pa'i dpal gyis gzi brjid dang ldan zhing rang gi 'khor la rgyal po lta bu dang / spobs pa zil gyis mi non pa'i lus te/snga ma ni gzugs kyi sku'i bye brag gis so/ /phyi ma ni ming gi tshogs kyi bye brag gis so/ /de yang rnam pa dgu ste/ rgyun chags su thogs pa med pa ston pas thogs pa med pa'i spobs pa ni gang gi phyir/ thogs pa med pa'i spobs pas ston pa zhes gsungs pa'o/ / rig pa rnam pa bzhi shes pa shin tu rnam par byang bar byas pas rig pa gang gis gang rigs sam mi rigs pa de khong du chud pa'i phyir rigs pa'i spobs pa ni/ ltos pa dang ni chos nyid dang / /rgyu dang 'bras bu nyid dang yang / /'thad pas sgrub pa gang yin pa/ /rigs pa rnam pa bzhir dgongs so/ / zhes bya bar rigs pa rnam pa bzhi ste/ gang gi phyir/ shin tu rnam par sbyangs pa'i ye shes kyi rnam par phye ba la 'jug pa zhes gsungs pa'o/ /go rims la mi ltos par gtam gyis bar du gcod kyang ji ltar 'dod pa bzhin du de dang de nas tshig 'bru dang / don rjes su dran pas grol ba'i spobs pa ni gang gi phyir/brjed pa med pa'i byin gyi rlabs zhes gsungs pa ste/ brjed pa med pa'i byin gyi rlabs de ni gang gis de la byin gyis rlobs pa'o/ /gdul bya ji lta ba bzhin du rnam grangs dang dpe sna tshogs kyi the tshom gcod pas go bar byed pa'i spobs pa ni gang gi phyir/ shin tu rnam par nges pa'i blo gros la mkhas pa zhes gsungs pa'o//spyi'i mtshan nyid rnam pa gsum gyis rnam par shes pa rgyun mi 'chad par mngon du byed pas kun nas nyon mongs pa can ma yin pa'i spobs pa ni gang gi phyir/ thams cad kyi rjes su song ba'i blo mi 'dor ba zhes gsungs pa'o/ /sangs rgyas dang ldan pa'i stobs bcu po thogs pa med pas gdul bya'i kun nas nyon mongs pa yang dag par 'joms pas nges par 'byin pa'i gdams ngag gi spobs pa ni gang gi phyir/yang dag par rdzogs pa'i sangs rgyas kyi stobs brdzi ba med pa nyid ces gsungs pa'o/ /sangs rgyas la nges pa'i mi 'jigs pa zhum pa med pas phas kyi rgol bas mi 'jigs pa'i spobs pa ni gang gi phyir/de bzhin gshegs pa'i stobs dang / mi 'jigs pa zhum pa med pa nyid ces gsungs pa'o/ /sangs rgyas kyi ye shes su gtogs pa'i so so yang dag par rig pa'i rab tu dbye bas/ mdo'i sde la sogs pa'i chos rnams kyi tshul drug la rtog pas mi zad pa'i spobs pa ni gang gi phyir/thams cad mkhyen pa'i ye shes kyi so so yang dag par rig pa'i rnam par dbye bas chos kyi tshul la rtog pa zhes gsungs pa'o/ /sku la sogs pa'i cho 'phrul sangs rgyas dang 'brel pa gdul bya tha dad pas tha dad pa thams cad mngon du mdzad pa la mnga' pas cho 'phrul dang bcas pa'i spobs pas zil gyis mi non pa'i lus nyid ni/gang gi phyir de bzhin gshegs pa'i sku dang gsung dang thugs kyi rgyan shin tu rnam par phye ba thams cad mngon par sgrub pa nyid nye bar sgrub par mdzad do zhes gsungs pa'o/ /ci'i phyir sangs rgyas bcom ldan 'das de dag mthu mnga' zhing thugs brtse ba dang ldan yang de nyid la zil gyis mi non pa'i lus rnam pa bcu po de dag nye bar sgrub pa mdzad kyi/gzhan dag la ma yin zhe na/ 'di ltar de ni ting nge 'dzin 'di nyid kyi chos nyid thob pa zhes bya ba gsungs pa ste/ ting nge 'dzin gyi mthu thob pa de ni gzhan dag la med do//chos nyid thob pa de yang gnyis kyis rab tu phye ba ste/ sngon gyi mngon par 'du byed pas 'phangs pa ni/ gang gi phyir sngon gyi smon lam gyi mngon par bsgrub pa'i phyir zhes gsungs pa'o/ /ting nge 'dzin gyi rten gyi yon tan yongs su 'dzin pa ni ting nge 'dzin gyi rten gyi yon tan yongs su 'dzin pa de yang rang gi don dang /gzhan gyi don la brtsams nas rnam pa brgyad du rig par bya ste/ byang chub sems dpa'i mthar phyin pa'i lhag pa'i bsam pas gzhir rnam par dag pa ni gang gi phyir/ lhag pa'i bsam pa shin tu yongs su sbyangs pa'i phyir zhes gsungs pa'o/ / de la lhag pa'i bsam pa ni dad pa dang 'dun pa ste/ dge ba'i chos thams cad kyi gzhi yin pa'i phyir ro/ /byang chub sems dpa'i mthar phyin pa'i bsgom pa'i de bzhin nyid la dmigs pa'i ye shes kyis shes rab rnam par dag pa ni gang gi phyir ye shes kyi dkyil 'khor legs par sbyangs pa'i phyir zhes gsungs pa ste/ye shes de ni mnyam par gzhag pas nang du kun nas bzlums pa'i phyir dang / de bzhin nyid la dmigs pas 'od zer gcig tu sdug pa'i phyir dkyil 'khor zhes bya ste/ nyi ma'i dkyil 'khor bzhin no/ /tshe rabs gcig nas gcig tu brgyud pa dag na tshogs shin tu rdzogs par byas pas rgyud yongs su smin par rnam par dag pa ni gang gi phyir tshogs shin tu bsags pa zhes gsungs pa'o//nyon mongs pa kun tu 'byung ba las shin tu rgyal bas sems las su rung ba rnam par dag pa ni/ gang gi phyir yongs su sbyang ba legs pa byas pa'i phyir zhes gsungs pa'o//de bzhin gshegs pa'i gsang ba'i chos thams cad bstan pa 'dzin nus pas thos pa'i yongs su 'dzin pa rnam par dag pa ni gang gi phyir/ dran pa tshad med pa'i snod yin pa'i phyir zhes gsungs pa'o/ /mngon par shes pa sbyang ba la dbang thob pas mngon par shes pa rnam par dag pa ni/ gang gi phyir mos pa 'od gsal ba rnam par sbyangs pa'i phyir zhes gsungs pa ste/ mngon par shes pa rnams ni mos pas rab tu phye ba yin pa'i phyir de smos pas smos par 'gyur ro/ /gzungs kyi sgo 'gal ba med pa shin tu rtogs pas spobs pa rnam par dag pa ni gang gi phyir/ gzungs kyi sgo tha dad pa med pa legs par rtogs pa'i phyir zhes gsungs pa ste /de la yi ge'i phyi mo rnams ji snyed par gzungs kyi sgo rnams kyang de snyed do / /yi ge'i sgo de dang des sngon du 'gro ba'i ming dang tshig dang yi ge'i tshogs rnams 'dzin pa'i phyir ro / /de dag tha dad pa med pa ni snga phyi mi 'gal ba'o/ /don dam pa shes par bya ba'i gdams ngag bslu ba med pas mngon pa'i nga rgyal med pa yang rnam par dag pa ni gang gi phyir/chos kyi dbyings shes pa'i phyag rgyas legs par btab pa'i phyir ro zhes gsungs pa'o/ /de la rang gi don la brtsams pa ni ting nge 'dzin gyi rten gyi yon tan yongs su 'dzin pa rnam pa bzhi po gang yin pa lhag pa'i bsam pa shin tu yongs su sbyangs pa'i phyir dang /ye shes kyi dkyil 'khor legs par sbyangs pa'i phyir dang / tshogs shin tu bsags pa'i phyir dang / yongs su sbyangs pa'i legs par byas pa'i phyir zhes bya ba mdo tshig bzhi po de dag gis brtson 'grus rtsom pa'i rgyu dang /chud mi za ba'i rgyu dang / phun sum tshogs pa rgya chen po thob pa'i rgyu dang / de'i kun nas nyon mongs pa med pa'i rgyu bstan te/ go rims bzhin no/ /gzhan gyi don las brtsams pa rnam pa bzhi po gang yin pa de la dran pa tshad med pa'i snod yin pa'i phyir zhes bya ba ni the tshom gcod pa'i rgyu yin no//mos pa 'od gsal ba rnam par sbyangs pa'i phyir zhes bya ba ni 'dun par byed pa'i rgyu yin te/ mthu'i khyad par yang dag par bstan pas bsam gyis mi khyab pa'i gnas la mos pas 'jug par 'gyur ba'i phyir ro/ /gzungs kyi sgo tha dad pa med pa legs par rtogs pa'i phyir zhes bya ba ni tshul la 'jug pa'i rgyu yin te chos kyi tshul nub pa na/ston pa gzhan gyi gsung rab la 'jug pa'i phyir ro/ /chos kyi dbyings shes pa'i phyag rgyas legs par btab pa'i phyir zhes bya ba ni nges par 'byin pa'i gdams ngag gi rgyu yin te/ gdul bya rnams kyi rang gi don thob pa chud mi za ba'i phyir ro//thugs kyi byin gyis brlabs pa de ni de lta bu yin no/ /skus byin gyis brlabs pa ji lta bu zhe na/ phyag gis reg par mdzad pa ste gang gi phyir/ de nas sangs rgyas bcom ldan 'das de rnams de dag na bzhugs bzhin du rdzu 'phrul gyi mthus phyag g.yas pa rnam par brkyang ste/ byang chub sems dpa' rdo rje'i snying po'i mgo la nyug par mdzad do zhes gsungs pa'o//de dag na bzhugs bzhin du zhes bya ba ni mthu'i khyad par bstan pa'i phyir te/ 'di na bzhugs pa ni ngo mtshar mi che'o/ /rdzu 'phrul gyi mthus zhes bya ba ni/ mthu gzhan gyis ma yin pa dang / lhan cig byung ba rnam par smin pa'i rdzu 'phrul gyis kyang ma yin pa'o//sangs rgyas bcom ldan 'das de dag gis byang chub sems dpa' rdo rje'i snying po la reg ma thag tu de nas de'i mod la ting nge 'dzin de las langs nas byang chub sems dpa' de dag la smras pa/ kye rgyal ba'i sras dag byang chub sems dpa'i smon lam 'di ni shin tu rnam par nges pa ste/tha mi dad pa/ bltar mi mthong ba/ chos kyi dbyings shin tu rgyas pa/ nam mkha'i khams kyi mthas gtugs pa/ phyi ma'i mtha'i mur thug pa/ sems can gyi khams thams cad kyi dpung gnyen yin te/ kye rgyal ba'i sras dag des ni byang chub sems dpa' rnams 'das pa'i sangs rgyas kyi ye shes kyi sa la yang 'jug /ma byon pa'i sangs rgyas bcom ldan 'das rnams kyi ye shes kyi sa la yang 'jug /da ltar byung ba'i sangs rgyas bcom ldan 'das rnams kyi ye shes kyi sa la'ang 'jug go/ /kye rgyal ba'i sras dag bcu po 'di dag ni byang chub sems dpa' rnams kyi byang chub sems dpa'i sa rnams te/gang las bsams nas bdag gis de skad du smras pa de dag ni 'das pa dang / ma byon pa dang / de ltar byung ba'i sangs rgyas bcom ldan 'das rnams kyis gsungs so/ /gsung ngo / /gsung bar 'gyur ro/ /bcu gang zhe na/ 'di lta ste/ byang chub sems dpa'i sa rab tu dga' ba zhes bya ba dang /dri ma med pa zhes bya ba dang / 'od byed pa zhes bya ba dang / 'od 'phro can zhes bya ba dang / shin tu sbyang dka' zhes bya ba dang / mngon du gyur zhes bya ba dang / ring du song zhes bya ba dang / mi g.yo ba zhes bya ba dang / legs pa'i blo gros can zhes bya ba dang / byang chub sems dpa'i sa chos kyi sprin zhes bya ba ste/ kye rgyal ba'i sras dag gang dag 'das pa dang / ma byon pa dang / da ltar byung ba'i sangs rgyas bcom ldan 'das rnams kyis gsungs pa dang / gsung ba dang gsung bar 'gyur ba ni byang chub sems dpa' rnams kyi byang chub sems dpa'i sa bcu po 'di dag yin no//kye rgyal ba'i sras dag bdag gis ni gang na de bzhin gshegs pa rnams byang chub sems dpa'i sa bcu po 'di dag mi gsung ba'i sangs rgyas kyi zhing rab 'byam de ma mthong ngo / /de ci'i phyir zhe na/ kye rgyal ba'i sras dag gang 'dis rab tu dbye ba rnam par dgong par bstan pa byang chub sems dpa' sems dpa' chen po rnams kyi byang chub sems dpa'i lam yongs su sbyong ba chos kyi sgo snang ba 'di yang dag phul yin pa'i phyir ro//kye rgyal ba'i sras dag gang 'dis rnam par dgod pa shes pa'i gnas 'di ni bsam gyis mi khyab pa'o zhes bya ba la/ting nge 'dzin de las langs nas zhes bya ba ni mthu'i khyad par thob pas ting nge 'dzin gyi bya ba yongs su rdzogs pa'i phyir dang / bshad pa'i bya ba yang nye bar gnas pa'i phyir te/ mnyam par gzhag bzhin du 'chad mi nus so/ /ci'i phyir gsol ba ma btab par 'chad pa rtsom zhe na/de ltar ma byas na 'chad 'dod pa nyid yin pa dang / ci zhig 'chad 'dod par mi shes pa'i phyir ro/ /sa bshad pa de la sems bskyed pa smos pa/ gang yin pa de nyid bstan pa 'dir smon lam yin par rig par bya'o/ /'di ni zhes bya ba ni sa dang por chud pa yin gyi mos pas spyod pas bsdus pa ni ma yin no//shin tu rnam par nges pa ni don dam pa shes pa la gnas pa'i phyir ro/ /shin tu nges pa nyid shin tu rnam par nges pa'o/ /shin tu rnam par nges pa nyid kyang rnam pa drug tu rig par bya ste/ de bzhin nyid la dmigs pa ro gcig pa'i rnam pa yin pas dmigs pa'i rnam pa shin tu rnam par nges pa nyid ni gang gi phyir tha dad pa med pa zhes gsungs pa'o//'jig rten las 'das pa nyid yin pa'i phyir 'jig rten thams cad kyi yul ma yin pas ngo bo nyid kyis shin tu rnam par nges pa nyid ni/ gang gi phyir bltar mi mthong ba zhes gsungs pa'o/ /chos chen po'i dbyings nyid yin pas sangs rgyas kyi chos thams cad kyi rtsa ba yin pa'i phyir/gtso bor shin tu rnam par nges pa nyid ni gang gi phyir chos kyi dbyings shin tu rgyas pa zhes gsungs pa ste/ chen po dang / gtso bo dang / mchog dang / shin tu rgyas pa zhes bya ba ni rnam grangs dag go/ /chos ni mtshan nyid 'dzin pas chos thams cad chos zhes bya ba'i phyir ro//yang chos kyi dbyings la che ba ste/ so so'i skye bo la sogs pa de bzhin nyid la dmigs pa'i shes pa gzhan rnam pas mchog tu gyur pa'i phyir te/ rnam par dag pa'i chos la chos zhes bya ba'i phyir ro/ /yang de'i dbyings ni chos chen po ste/ yongs su snang bar bya ba'i sa'o//'di lta ste/ theg pa chen po ste/ bshad pa'i chos la chos zhes bya ba'i phyir ro/ /yang de'i dbyings ni chos chen po dkar po'i dbyings te/ dge pa'i phyir chos zhes bya ba'i phyir ro/ /rgyu nyid du shin tu rnam par nges pa nyid ni rnam pa gnyis so/ /rgyu nyid ni nam mkha' lta bu ste/ de la brten nas byung ba'i gzugs rnams kyis zad pa med pa'i phyir 'bras bu mi rtag pa sdug pa 'grub pa'i rgyu nyid du shin tu rnam par nges pa nyid ni gang gi phyir nam mkha'i mthas gtugs pa zhes gsungs pa'o//mya ngan las 'das pa la gzhol ba'i phyir 'bras bu rtag pa'i rgyu nyid du shin tu rnam par nges pa nyid ni gang gi phyir phyi ma'i mtha'i mur thug pa zhes gsungs pa'o//gzhan gyi don la zhugs pas che ba nyid du shin tu rnam par nges pa nyid ni gang gi phyir sems can gyi khams thams cad kyi dpung gnyen yin te zhes gsungs pa'o/ /shin tu rnam par nges pa brjod ma thag pa dang / 'di gnyis kyis ni smon lam de 'khor ba dang mya ngan las 'das pa la gcig tu nges par gnas pa ma yin pa nyid du bstan to/ /sangs rgyas thams cad kyi ye shes kyi sa la 'jug pa zhum pa med pas zhum pa med pa nyid du shin tu rnam par nges pa nyid de/ de ni byang chub sems dpa'i sa bcu po de dag kho na yin te/sangs rgyas kyi ye shes yang dag par 'grub pa'i rten yin pa'i phyir ro/ /'dir yang shin tu rnam par nges pa ni yan lag go/ /lhag ma ni nye ba'i yan lag go/ /de gnyis shin tu rnam par nges pa nyid kyi phyir mtshan nyid 'dra ba'o/ /rnam pa gzhan nyid kyi phyir mtshan nyid mi 'dra ba'o/ / 'du ba ni bsdus pa ste/ yan lag gi dngos po bstan pa'i phyir ro/ /rgyas pa ni rnam par dbye ba ste/ nye ba'i yan lag gi rnam pa bstan pa'i phyir te/ 'jig rten gyis khams 'jig pa dang 'chags pa bzhin no/ /ci'i phyir byang chub sems dpa' rnams kyi sa bcu po de dag rnam par gzhag ce na/ de mi mthun pa'i phyogs sa bcu po dag gi gnyen po bcu ste/ de mi mthun pa'i phyogs rnams gang zhe na/ so so'i skye bo nyid dang / lus la sogs pas sems can rnams la log par sgrub pa dang / thos pa dang / bsam pa dang / bsgom pa'i chos rnams brjed pas mun pa'i tshul can nyid dang /'jig tshogs la lta ba la sogs pas bsdus pa lhan cig skyes pa'i nyon mongs pa phra mo kun du 'byung ba de yang phra ba'i rnam pa yin pa'i phyir dang / rang gi yid la byed pa la dmigs pa yin pa'i phyir dang / kun du 'byung ba ring du song ba yin pa'i phyir phra bar rig par bya ba dang /theg pa dman pas yongs su mya ngan las 'da' ba dang / mtshan ma rags pa kun du 'byung ba dang / mtshan ma phra ba kun du 'byung ba dang / mtshan ma med pa nyid du mngon par 'du byed pa dang / sems can gyi don bya ba la mngon par 'du byed pa med pa dang / chos rnams la dbang ma thob pa'o//ci'i phyir sa bcu po rnams rab tu dga' ba zhes bya ba la sogs par rnam par gzhag ce na/ bdag dang gzhan gyi don phun sum tshogs pa'i gnas 'phags pa nyid bla na med pa thog mar thob pas mchog tu dga' ba rgya che ba'i phyir rab tu dga' ba'o/ /'chal ba'i tshul khrims kun nas slong ba nyon mongs pa'i dri ma thams cad sel ba'i tshul khrims rnam par dag pa'i phyir dri ma med pa'o//ji ltar thos pa la sogs pa'i chos snang bar 'gyur ba'i phyir 'od byed pa ste/ de ma brjed pa'i phyir ro/ /nyon mongs pa'i shing bsregs pa'i ye shes dang ldan pa'i phyir 'od 'phro ba can no//'jig rten las 'das pa'i chos thams cad la mkhas pas mnan par shin tu dka' ba'i phyir shin tu sbyang dka'o/ /shes rab kyi pha rol tu phyin pa la gnas pa mngon du byed de/ bar chad dang bcas par mang du mngon du byed pa'i phyir mngon du gyur to/ /mtshan ma med pa la gnas par sbyor ba'i mthar phyin par 'gro ba'i phyir dang /'jig rten pa dang 'jig rten las 'das pa'i lam dman pa las shin tu 'da' ba'i phyir ring du song ba'o/ /rnam par smin pa kho na ste/ rang gi ngang gis mtshan ma mi 'byung bas mi g.yo ba'o/ /so so yang dag par rig pa'i stobs kyis chos ston te/ gzhan gyi don byed pa dang ldan pa'i phyir legs pa'i blo gros can no//chos la dbang chen po'i gnas su gyur pa'i phyir chos kyi sprin te/ rgyal bu rgyal tshab tu dbang bskur pa dang rang gi rgyal srid la dbang thob pa ltar chos kyi rje nyid du dbang bskur ba'i phyir ro/ /de la gnas pa la yang shes bya'i sgrib pa'i bag yod pas rang dbang med pa ni mi mthun pa'i phyogs te/ de'i gnyen por de bzhin gshegs pa'i sa rnam par gzhag go//de las 'di dag ni sgrib pa dang bcas pa'i phyir byang chub sems dpa' rnams kyi sa bcu'i gnas skabs ni mngal na gnas pa'i gnas skabs dang 'dra ba'i rig par bya'o/ /shes bya'i spyod yul thams cad nyams su myong bas sangs rgyas kyi gnas skabs ni 'bras bu yongs su grub pas btsas pa'i gnas skabs dang 'dra ste/btsas pa ni dbang po'i spyod yul thams cad nyams su myong ba bzhin no/ /de la mngal na gnas pa'i gnas skabs bcu ni/ nur nur po'i lus kyi gnas skabs dang / mer mer po'i lus kyi gnas skabs dang / nyol nyol po'i lus kyi gnas skabs dang /sha ma khrang ba'i lus kyi gnas skabs dang / lus dang mthun pa'i lus kyi gnas skabs dang / rang bzhin dang mthun pa'i lus kyi gnas skabs dang / las dang bcas pa'i lus kyi gnas skabs dang / yongs su rdzogs pa'i lus kyi gnas skabs ni rnam pa gsum ste/dbang po yongs su rdzogs pa dang / mtshan yongs su rdzogs pa dang / chu zheng yongs su rdzogs pa ste/ sa rnams ni de dag dang 'dra bar rig par bya'o/ /kye rgyal ba'i sras dag bdag gis ni gang na de bzhin gshegs pa rnams byang chub sems dpa'i sa bcu po 'di dag mi gsung ba'i sangs rgyas kyi zhing rab 'byam de ma mthong ngo //de ci'i phyir zhe na/ kye rgyal ba'i sras dag gang 'dis rab tu dbye ba rnam par dgod pa bstan pa byang chub sems dpa' sems dpa' chen po rnams kyi byang chub sems dpa'i lam yongs su sbyong ba chos kyi sgo snang ba 'di yang dag phul yin pa'i phyir ro//kye rgyal ba'i sras dag gang 'dis rnam par dgod pa shes pa'i gnas 'di ni bsam gyis mi khyab pa'o/ /sangs rgyas thams cad kyis sangs rgyas kyi zhing rab 'byam thams cad na 'di rnams gsung ba nyid dang / chos kyi rnam grangs 'di yang dag phul nyid du brjod pa ste/ 'khor de mgu bar bya ba'i phyir ro//de la sangs rgyas kyi zhing ni der 'byung ba'i phyir te/ 'bras sA lu'i zhing bzhin no/ /rab 'byam yang de yin te/ sangs rgyas kyi mdzad pa'i don du de nas 'jig rten gyi khams gzhan dag tu rab tu shes pa'i phyir ro/ /gsung ba zhes bya ba ni gsung ba rnam pa gnyis te/ lung gi don du bstan pa dang / khong du chud par bya ba'i phyir dang / gdams ngag rjes su bstan pa'o/ /sems dpa' chen po ni chen po gsum du rig par bya ste/ go cha chen po dang / 'jug pa chen po dang / 'phags pa chen po'o/ /de la go cha ni smon lam 'debs pa'o//'jug pa ni byang chub chen po der zhugs pa'o/ /'phags pa ni lam der 'phags pa'i byang chub sems dpa'i lam yongs su sbyong ba zhes bya ba 'dis ni ji ltar yang dag phul du gyur pa de ston to/ /'di ni chos kyi sgo yang yin la chos kyi sgo gzhan rnams snang bar gyur pa yang yin te/ theg pa chen po'i don thams cad snang ba'i phyir chos kyi sgo snang ba'o/ /chos kyi sgo ni chos kyi rnam grangs yin par rig par bya'o/ /yang dag phul ni chos thams cad pas phul du phyin te mchog tu gyur pa'i phyir ro/ /gang 'dis rab tu dbye ba rnam par dgod pa zhes bya ba ni chos kyi rnam grangs 'jig rten pa'i shes pas shes par bya ba yin par ston to//gang 'dis rnam par dgod pa shes pa'i gnas 'di ni bsam gyis mi khyab pa'o zhes bya ba ni 'dir 'jig rten las 'das pa'i ye shes yin par ston to/ /'dis ci yongs su bstan pa yin zhe na/ sa rab tu dbye ba rnam par dgod pa tsam gyis ni 'di byang chub sems dpa'i sa yongs su sbyong ba ma yin par rig par bya bar ston to// // de nas byang chub sems dpa' rdo rje'i snying pos byang chub sems dpa'i sa bcu po de dag gi ming tsam zhig brjod de cang mi smra bar 'dug nas yang rab tu phye ste ma bshad pa dang / de nas byang chub sems dpa'i 'khor thams cad dang ldan pa de byang chub sems dpa'i sa bcu po de dag gi ming tsam zhig thos la/sa'i rnam par dbye ba ma brjod pas skom par gyur nas de dag 'di snyam du sems te/ 'di ltar byang chub sems dpa' rdo rje'i snying pos byang chub sems dpa'i sa bcu po de dag gi ming tsam zhig brjod de cang mi smra bar 'dug nas dus yol bar byed cing yang rab tu phye ste mi ston pas de la rgyu ni gang rkyen ni ci zhig yod snyam pa dang /de'i tshe byang chub sems dpa'i 'khor 'dus pa de na byang chub sems dpa' sems dpa' chen po rnam par grol ba'i zla ba zhes bya ba 'dus shing 'dug ste/ de nas byang chub sems dpa' rnam par grol ba'i zla bas byang chub sems dpa'i 'khor de'i sems kyi bsam pa'i rtog pa yongs su shes nas tshigs su bcad pa'i dbyangs kyis byang chub sems dpa' rdo rje'i snying po la dris pa/kun du rtog pa dag gyur ba/ /dran dang ye shes yon tan ldan/ /sa mchog brjod nas ci yi phyir//khyab bdag rab tu bshad mi bgyi/ /'di kun rnam par nges pa ste/ /byang chub sems dpa' grags chen ldan/ /ci phyir khyod kyis sa brjod nas/ /rnam par dbye ba bshad mi bgyi/ /rgyal ba'i sras po de dag kun/ /nyan par 'dod pas 'jigs pa med/ /sa rnams dag gi don gyi tshul//yang dag phye ste bshad pa mdzod/ /'khor 'di shin tu rnam dngas te / /le lo med cing mdzes dang ldan/ /dag pa snying por rab gnas pa/ /yon tan ye shes shin tu ldan/ /thams cad gus dang bcas gnas shing / /phan tshun gcig la gcig lta ste/ /sbrang ma'i sbrang rtsi bdud rtsi 'dra//spang bar bya min 'dod pa bzhin/ /ci'i phyir cang mi smra bar 'gyur zhe na/ byang chub sems dpa' rnams ni chos btsun par 'dzin pa ste/ skom par gyur pa rnams kyis bskul bas chos btsun par bya ba'i phyir ro/ /ci'i phyir rnam par grol ba'i zla bas thog ma nyid du bskul ba brtsams she na/de ni 'khor de'i gtso bo yin pa dang / gzhan du cal col du 'gyur ba dang / 'khor de yang 'dus par 'gyur ba'i phyir ro/ /ci'i phyir tshigs su bcad pa'i dbyangs kho na zhe na/ yi ge nyung ngu dag gis don mang du bsdu ba'i phyir dang / bstod pa dag ni phal cher tshigs su bcad de byed pa'i phyir ro/ / tshigs su bcad pa lngas ci zhig yongs su bstan zhe na/ 'chad pa po dang nyan pa po rnams la skyon gang yod na/ bshad pa'i 'os ma yin pa'i skyon med pa nyid ston to/ /de la 'chad pa po la skyon med pa ni/ kun tu rtog pa dag gyur pa/ /zhes bya bas ston to/ /nyan pa po chos mthun pa po rnams ni rnam par nges pa nyid kyi phyir dang /nyan 'dod pa'i phyir ro/ /gzhan dag ni sems rab tu dang ba'i phyir te/ 'di'i nang na gang su yang rung 'os su ma gyur la/ ma grags pa de gcig kyang med do zhes bstan pa'i phyir/ thams cad gus dang bcas gnas shing / /phan tshun gcig la gcig lta ste/ /zhes bya bas gsungs so//de la zhal nas gsungs pa'i tshigs su bcad pa'i gzhung ni phal cher dub pas gzhung gang gis de shes pa rnams kyis don de dmigs pa nyid gzhung yin no/ /kun du rtog pa dag gyur pa/ /dran dang ye shes yon tan ldan/ /sa mchog brjod nas ci yi phyir//khyab bdag rab tu bshad mi bgyi/ /zhes bya ba la/ ci'i phyir kun du rtog pa dag par 'gyur ba nyid kyis ston zhe na/ kun du rtog pa rnams bshad pa'i rgyu yin pa'i phyir ro/ /kun du rtog pa rnams ni rnam par rtog pa rnams te/ de dag ni gang du byed pa'o/ /de'i phyir bshad pa'i rgyu ni dag par gyur na ci'i phyir mi 'chad ces gsol ba 'debs so//kun du rtog pa dag pa de yang gnyen po yongs su 'dzin pa dang / nyes pa dang bral ba gnyis kyis rab tu phye ba yin te/ de la dran dang ye shes ldan pa nyid kyis ni kun du rtog pa nyon mongs pa can rnams dang / gzhi de las byung ba'i 'du shes rnams kyi gnyen po yongs su 'dzin pa ston to/ /dran pa nye par gzhag pa rnams ni kun du rtog pa nyon mongs pa can gyi gnyen po ste/ de dag ni dran pa smos pas ston to/ /de bzhin nyid la dmigs pa'i ye shes ni mtshan ma med pa'i phyir gzhi de las 'byung ba'i 'du shes kyi gnyen po ste/de ni ye shes smos pas ston to/ /lhag ma rnams kyis ni nyes pa dang bral ba ston to/ /de la gang gis 'chad par mi 'gyur ba'i nyes pa ni rnam pa gsum ste/ phrag dog dang / ser sna dang / chos 'chad pa na le lo nyid dang / sboms pa med pa'o/ /de la phrag dog ni/ gzhan dag gis shes pa mi bzod pa'o/ /ser sna ni sems kyis kun du 'dzin pa'o/ /de la yon tan ldan pa nyid kyis khro ba med pa la sogs pa'i yon tan dang ldan pas nyes pa dang po med par ston to/ /sa brjod nas zhes bya bas ni nyes pa gnyis pa med par ston to/ /khyab bdag ces bya bas ni nyes pa gsum pa med par ston to//de ltar kun du rtog pa dag pa rnam pa gnyis kyis 'chad pa po bstod nas nyan pa po rnams la bstod pa rtsom ste/ 'di kun rnam par nges pa ste/ /byang chub sems dpa' grags chen ldan/ /ci phyir khyod kyis sa brjod nas/ /rnam par dbye ba bshad mi bgyi/ / zhes bya ba'o/ /rnam par nges pa zhes bya ba ni mkhas pa ste/ blo byang ba dag go/ /rnam par nges pa nyid de yang rnam pa gsum du rig par bya ste/ byang chub chen por smon lam 'debs pas rgya chen po la rnam par nges pa nyid dang / gzhan dag gi de bzhin du yid ches pas rnam par grags par rnam par nges pa nyid dang /'chad pa po de nyid kyis de khong du chud pas yongs su zin par rnam par nges pa nyid do/ /de dag ni byang chub sems dpa' nyid dang / grags pa chen po dang ldan pa nyid dang / sa brjod pa nyid kyis go rims bzhin du bstan to/ /rnam par nges su zin kyang don du gnyer ba ma yin na 'chad pa'i snod du mi 'gyur te/de'i phyir/ rgyal ba'i sras po 'di dag kun/ /nyan par 'dod pa zhes bya bas gsungs so/ /lung la rnam par nges pa nyid yin gyi rtogs pa la rnam par nges pa nyid ma yin pa dang / don lkog tu gyur pa nyid yin te/ don lkog tu gyur pa nyid ma yin par ma gyur na bshad pa'i snod yongs su rdzogs par mi 'gyur te/de'i phyir de gnyis ka bstan pa'i phyir/ 'jigs pa med ces bya ba gsungs te/ chos mthong ba dang / don lkog tu ma gyur pa ni 'jigs pa med par 'gyur ro/ /de bas na snod yongs su rdzogs pa de dag rig nas/sa rnams dag gi don gyi tshul/ /yang dag phye ste bshad pa mdzod/ /ces bya bas bskul ma 'debs so/ /de ltar 'khor chos mthun pa rnam par nges pa dang / don du gnyer ba'i yon tan gnyis kyis bstod nas de las gzhan pa dag la bstod do/ /'khor 'di shin tu rnam dngas te / /le lo med cing mdzes dang ldan//dag pa'i snying por rab gnas pa/ /yon tan ye shes shin tu ldan/ /zhes bya ba'o/ /de la shin tu rnam dngas zhes bya ba ni dag pa ste/ rnyog pa can ma yin pa dag go/ /de la gang med na shin tu rnam par dag par 'gyur ba'i rnyog pa rnam pa drug ste/ don du mi gnyer brnyog pa dang / spyod lam rnyog pa dang sgrib pa rnyog pa dang / klan ka tshol ba dang / de skad rgol ba las thar bar bya ba'i bsam pa dang ldan pas bsam pa rnyog pa dang / gang gis bshad pa de la mngon par mi dga' ba ste/ dge ba'i rtsa bas ma brtan pas ma brtan pa rnyog pa dang / blun [(]pa [,]po [) la sogs pas gti mug rnyog pa ste/ de dag gi gnyen por rnyog pa med pa rnam pa drug yod par rig par bya'o/ /de la snying por rab gnas pa/ /zhes bya ba ni bstan pa 'di ni sgrub pa snying por byed pa'o/ /le lo med pa dang / mdzes pa dang ldan pa dang / dag pa dang / snying po la rab tu gnas pa dang / yon tan dang ldan pa dang /ye shes dang ldan pa zhes bya ba tshig drug po de dag gis ni de dag go rims bzhin du yongs su bstan to/ /de ltar tshigs su bcad pa gnyis kyis ni rang gi rigs yongs su dag pa bstan/ gcig gis ni rigs gzhan yongs su dag pa bstan nas de gnyis nyid kyi phan tshun lta ba yongs su dag pa ste /thams cad gus dang bcas gnas shing / /phan tshun gcig la gcig lta ste/ /zhes bya ba'o/ /de la gus bcas zhes bya ba 'dis ni phan tshun lta ba de nyid nyon mongs pa can ma yin par ston te/ chos la gus pas byas kyi de phrag dog gis byas pa ni ma yin no/ /sbrang ma'i sbrang rtsi bdud rtsi 'dra//spang bar bya min 'dod pa bzhin/ /zhes bya ba 'dis ni gus pa de nyid kyi mchog ston te/ 'di ltar ngo mi chod pas lta ba ma yin pa'o/ /tshigs su bcad pa 'di la phan tshun lta ba ni yan lag go/ /phan tshun lta ba nyon mongs pa can ma yin pa ni nye ba'i yan lag go/ /gzhan dag la yang de bzhin du dang po ni yan lag yin la/lhag ma ni nye ba'i yan lag yin par rig par bya'o/ /mtshan nyid 'dra ba dang / mtshan nyid mi 'dra ba dang / 'du ba dang rgyas pa yang snga ma bzhin no/ /shes rab chen po 'jigs med pa/ /rdo rje'i snying pos de thos nas/ /'khor rnams dga' bar bya ba'i phyir//bde bar gshegs pa'i sras la smras/ /zhes bya ba'i tshigs su bcad pa 'di la 'khor dga' ba'i phyir smras pa ni yan lag ste/ go bar byed pa'i mtshan nyid do/ /go bar byed pa de yang rnam pa gnyis te/ rig pas go bar byed pa dang / zhum pa med pas go bar byed pa'o/ /de ni shes rab chen po dang /'jigs pa med pa nyid gnyis kyis bstan te/ gcig po med na gzhan la go bar byed mi nus/ gnyis pa med na go bar byed pa nyid gsal bar byas par mi 'gyur te/ rang dang gzhan gyi sems kyi rgyud kyi nyes pa yongs su spangs pa'i phyir gnyi ga bstan to/ /go bar byed pa de yang gang zhe na/chos 'di bshad pa dang / mnyan par dka' ba'o/ /de la bshad par dka' ba nyid ces bstan pa'i phyir/ 'di ni dka' ba dam pa rmad byung ba/ /byang chub sems dpa'i spyod pa rab bstan pa/ /sa rgyu rnam par dbye ba mchog yin te/ /de las sangs rgyas dngos po yang dag 'thob/ / ces bya ba gsungs so/ /de la dka' ba ni bsgrub dka' ba'o/ /dka' ba nyid rnam pa gnyis te/ shin tu dka' ba nyid dang / ma 'dris pas dka' ba nyid do/ /de ni dam pa nyid dang / rmad du byung ba nyid kyis bstan to/ /ci'i phyir de de ltar dka' zhe na/ byang chub sems dpa'i spyod pa rab bstan pa//sa rgyu rnam par dbye ba mchog yin te/ /zhes bya ba gsungs pa'o/ /de la byang chub sems dpa' rnams kyi spyod pa ni rtogs pa'i ye shes so/ /de rab tu ston par byed pas rab tu bstan pa'o/ /sa rgyu rnam par dbye ba mchog yin te/ /zhes bya ba ni byang chub sems dpa'i spyod pa'i rgyu sa rnams bstan pa yang dag phul yin no//byang chub sems dpa'i spyod pa rab tu bstan pa ci 'dra ba zhig ce na/ de las sangs rgyas dngos po yang dag 'thob/ /ces gsungs pa'o/ /sangs rgyas kyi dngos po ni sangs rgyas nyid de/ sangs rgyas kyi ye shes so/ /bshad dka' ba nyid bstan nas/ji ltar de dka' ba nyid de'i rgyu ston to/ /de'i rgyu gang zhe na/ byang chub sems dpa'i spyod pa'i don de ji ltar gnas pa de bzhin du bshad par mi nus pa'o/ /don de gnas pa yang ji lta bu zhe na/ cha phra mthong dka' rnam par rtog pa spangs/ /sems kyi sa dang bral bas bsgrub par dka'//mkhas pa rnams kyis zag med spyod yul te/ /'gro bas thos nas der ni rmongs par 'gyur/ /zhes bya ba gsungs pa'o/ /de la bsgrub par dka' ba nyid ni yan lag go/ /lhag ma ni nye ba'i yan lag go/ /de la bsgrub par dka' ba ni thob par dka' ba ste/ rtogs par dka' ba'o/ / bsgrub par dka' ba nyid de yang rnam pa bzhi ste/ cha phra bas bsgrub par dka' ba nyid nas/ sems kyi sa dang bral bas bsgrub par dka' ba nyid kyi bar du'o/ /de la cha phra ba ni thos pa las byung ba'i shes rab kyis shes par bya ba ma yin te / rags pa ni bsam mi dgos pas shes par bya ba ma yin no/ /mthong dka' ba ni bsams pa las byung bas kyang shes par bya ba ma yin pa'o//rnam par rtog pa spangs pa ni 'jig rten pa'i bsgoms pa las byung bas kyang shes par bya ba ma yin pa ste/ rnam par rtog pa ni khams gsum pa'i sems dang sems las byung ba rnams yin pa'i phyir ro/ / 'dis ni re zhig 'jig rten pa'i sbyor ba las byung ba'i shes pa'i spyod yul ma yin pa nyid ston to/ /sems kyi sa dang bral zhes bya ba 'dis ni skyes nas thob pa rnam par smin pa las byung ba'i sems kyi bye brag gi spyod yul nyid kyang ma yin par ston te/ sems kyi spyod yul ni 'dir sems kyis yin par bya'o//'o na de su'i spyod yul zhe na/ mkhas pa rnams kyi zag med spyod yul te/ /zhes bya ba gsungs pa ste/ bden pa mthong ba rnams kyi zhes bya ba'i tha tshig go/ /ci'i phyir gzhan rnams kyi ma yin zhe na/ 'di ltar zag med ces bya ba ste/ 'jig rten las 'das pa zhes bya ba'i tha tshig go//de lta bas na 'jig rten pa'i shes pas shes par bya ba ma yin no/ /de ltar don zab pa de ji ltar nus pa de bzhin du bshad kyang dka' ste/ 'gro bas thos na der ni rmongs par 'gyur/ /zhes bya ba'o/ /rmongs par ji lta bu zhe na/ don la sgra ji bzhin du 'dzin pa'o/ / thos na zhes bya ba ni thos nas de bshad par dka' ba ni de lta bu yin no/ /da ni ji ltar mnyan par dka' ba ni/ /rdo rje lta bur bsam pa gzhag byas nas/ /sangs rgyas ye shes mchog la lhag mos shing / /sems kyi sa la bdag med rig nas ni/ /ye shes shin tu cha phra 'di mnyan nus/ /zhes gsungs pa'o//de la rdo rje lta bu zhes bya ba ni rdo rje ltar sra bar byas nas so/ /sra ba nyid ni rnam pa gnyis te/ mos pa sra ba nyid dang / rtogs pa sra ba nyid de/ tshig gsum gyis bstan to/ /de la sra ba nyid ni yan lag go/ /lhag ma ni nye ba'i yan lag go/ /sangs rgyas kyi ye shes mchog la mos pa ji lta bu zhe na/sangs rgyas kyi byang chub ni mtha' yas te/ mos pa dad pas sems can rnams la de bzhin gshegs pa rnams ni/ de bzhin gshegs pa rnams kyi chos bstan pa 'jug pas sangs rgyas nyid kyis mkhyen gyi bdag gis ni mi shes so zhes bya ba'o/ /sems kyi sa ni gang yin/ de la bdag med par rig pa ji lta bu zhe na/khams gsum gang du sems rnam par smin pa dang / chos thams cad la dmigs pas gang du sems de rgyu ba de ni sems kyi sa yin no/ /rnam pa de gnyis ka la yang gang zag dang chos la bdag med par yang dag pa ji lta ba bzhin du rig pa'o/ /shin tu cha phra ba zhes bya ba ni shin tu rtogs par dka' ba ste/ji ltar cha phra ba de ni sngar bstan pa yin no/ /da ni dpe smos pas ston te/ ji ltar bar snang tshon ris bri pa dang / /ji ltar nam mkha'i dbyings la rlung gnas pa/ /de ltar 'dir yang bcom ldan 'das rnams kyi/ /ye shes zag med rnam phye mthong bar dka'//zhes bya ba'o/ /de ni 'di skad ston te/ dper na nam mkha' la tshon gyis ri mo bris pa ni rtsig ngos la ji lta ba bzhin du de la mi gnas pa'i phyir bltar mi snang ba dang / dper na nam mkha' la ni lo ma ltar de la mi gnas pa'i phyir g.yo ba'i las kyis bltar mi snang ste/ nam mkha' la de gnyis mi 'byung ba yang ma yin no//de bzhin du nam mkha' lta bu'i dngos po brjod du med pa la ri mo bri ba dang / rlung lta bu'i bshad pa de de'i rang bzhin ma yin pas mi snang ste/ glo bur du byung ba yin pas de la mi gnas pa'i phyir ro/ /'on kyang der de mi 'byung ba yang ma yin no/ /de ltar sangs rgyas kyi ye shes de bshad pa'i rnam par dbye bas char phye ste/rnam par phye yang mthong bar dka' ba yin no/ /de la ri mo bris pas ni ming dang tshig dang / yi ge'i tshogs rnams ston te/ bshad pa'i skabs yin pa'i phyir ro/ /sgra'i gzhi rlung gis ni tshig ston te/ de gnyis ni bshad par bya ba dang / mnyan par bya ba yin no/ /gal te ji ltar yang mnyan par nus na de ltar mthong bar dka' yang ci'i phyir mi bshad ce na/ de la bdag gi blo ni 'di snyam du/ /'gro ba gang gis 'di rtogs 'gyur ba dang / /mchog 'dir su zhig dang ba dkon snyam nas/ /de yi phyir na 'di bshad spro ba med/ /ces bya ba gsungs pa'o//de la rtogs par 'gyur ba ni khong du chud par 'gyur ba'o/ /dang ba ni mos pa dang ldan pa'o/ /'dis ci zhig bstan zhe na/ rtogs pa dang mos pa gong du smos pa de gnyis dang ldan pa dag gis 'di mnyan par nus na de dag ni 'jig rten na dkon te/ de'i phyir mi bshad do snyam pa'o// //bam po gnyis pa/ de skad ces smras pa dang / byang chub sems dpa' rnam par grol ba'i zla bas byang chub sems dpa' rdo rje'i snying po la 'di skad ces smras so/ /kye rgyal ba'i sras kyi ma 'khor 'di ni shin tu yongs su dag pa ste/ byang chub sems dpa' lhag pa'i bsam pa shin tu yongs su sbyangs pa/kun du rtog pa shin tu yongs su sbyangs pa/ spyad par bya ba shin tu yongs su spyad pa/ sangs rgyas bye ba phrag mang po la bsnyen bkur byas pa/ tshogs shin tu bsags pa/ yon tan dpag tu med pa dang ldan pa/ yid gnyis dang / nem nur dang bral ba/ nyon mongs pa med pa/ lhag pa'i bsam pa dang mos pa la rab tu gnas pa/ sangs rgyas kyi chos 'di dag la gzhan gyi dring mi 'jog pa sha stag tshogs pa ste/ de bas na kye rgyal ba'i sras byang chub sems dpa' 'di dag ni gnas 'di la mngon sum du gnas pa sha stag yin gyi legs par bshad par mdzod cig ces bya ba la/ci'i phyir 'phags pa rnam par grol ba'i zla bas 'khor de dag bstod ce na/ gal te 'di lta bu de dag 'jig rten na dkon yang / 'khor 'di na mod do zhes bstan pa'i phyir ro/ /de la lhag pa'i bsam pa shin tu yongs su sbyangs pa zhes bya ba ni yan lag go//lhag pa'i bsam pa shin tu yongs su sbyangs pa de ni rnam pa gnyis su rig par bya ste/ lung yongs su dag pa dang / rtogs pa yongs su dag pa'o/ /de la lung yongs su dag pa yang rnam pa lnga ste/ ji ltar 'dod pa'i lung thob par bya ba'i thabs la kun du rtog pa'i phyir 'dun pa yongs su dag pa ni gang gi phyir/kun du rtog pa shin tu yongs su sbyangs pa zhes gsungs pa'o/ /de thob par bya ba dang mthun pa'i lus dang ngag gi spyad pa spyod pas kun du tshol ba yongs su dag pa ni gang gi phyir spyad par bya ba shin tu spyad pa zhes gsungs pa'o/ /thos pa phyin ci ma log pa mang po yun ring por 'dzin pas 'dzin pa yongs su dag pa ni gang gi phyir/sangs rgyas bye ba phrag mang po la bsnyen bkur byas pa zhes gsungs pa'o/ /smon lam gyi khyad par gyis phyi ma phyi mar tshe rabs khyad par du 'phags pas dran pa'i khyad par thob pa'i phyir skye bas thob pa yongs su dag pa ni gang gi phyir/tshogs shin tu bsags pa zhes gsungs pa'o/ /khong du chud par bya ba la brtson pa dge ba gang yin zhes tshol ba na 'dod pa chung ba la sogs pa'i yon tan mang po dang ldan pas sbyor ba yongs su dag pa ni gang gi phyir/ yon tan dpag tu med pa dang ldan pa zhes gsungs pa'o//rtogs pa yongs su dag pa ni rnam pa bzhi ste/ mngon sum gyi shes pas shin tu rnam par nges pa'i phyir rab tu rtogs pa yongs su dag pa ni gang gi phyir/ yid gnyis dang nem nur dang bral ba zhes gsungs pa'o/ /bsgom pa'i lam na nye ba'i nyon mongs pa thams cad mi 'byung bas/nyon mongs pa rab tu mi rgyu ba yongs su dag pa ni gang gi phyir/ nyon mongs pa med pa zhes gsungs pa'o/ /theg pa dman pa ni mi 'dod kyi gong ma'i khyad par thob par 'dod pas chog par mi 'dzin pa yongs su dag pa ni gang gi phyir/ lhag pa'i bsam pa dang mos pa la rab tu gnas pa zhes gsungs pa'o//de la lhag pa'i bsam pa ni dad pa dang 'dun pa'o/ /mos pa ni de dag gi dmigs pa la yon tan du 'dzin pa'o/ /mthar phyin par 'gro ba la bdag nyid kyis yang dag par zhugs pas/ gdams ngag rjes su bstan pa la gzhan la rag ma las pa yongs su dag pa ni gang gi phyir/sangs rgyas kyi chos 'di dag la gzhan gyi dring mi 'jog pa zhes gsungs pa'o/ /rdo rje'i snying pos smras pa/ kye rgyal ba'i sras 'khor 'di ni byang chub sems dpa' shin tu yongs su dag pa ste/ lhag pa'i bsam pa shin tu yongs su sbyangs pa/ kun du rtog pa shin tu yongs su sbyangs pa/spyad par bya ba shin tu spyad pa/ sangs rgyas bye ba phrag mang po la bsnyen bkur byas pa/ tshogs shin tu bsags pa/ yon tan dpag tu med pa dang ldan pa/ yid gnyis dang nem nur dang bral ba/ nyon mongs pa med pa/ lhag pa'i bsam pa dang / mos pa la rab tu gnas pa/sangs rgyas kyi chos 'di dag la gzhan gyi dring mi 'jog pa sha stag 'dus mod kyi/ 'on kyang gzhan dag bsam gyis mi khyab pa'i gnas 'di lta bu 'di thos par gyur la/ thos nas kyang yid gnyis dang nem nur skye bar gyur na/ de ni de dag la yun ring por phan pa med pa dang /gnod pa dang mi bde bar 'gyur te/ 'di lta zhig snying brtse bas de'i phyir bdag ni cang mi smra bar 'dug pa nyid du mos so zhes bya ba ni 'phags pa rdo rje'i snying pos de'i 'khor yongs su dag pa nyid de bzung nas/ thos nas kyang yid gnyis dang / nem nur skye bar 'gyur na zhes smos pa ni/bstan pa 'di'i snod du mi 'gyur ba'i nyes pa ston to/ /don gcig la nyes pa'i skyon gnyis chags pas yid gnyis dang / nem nur zhes rnam pa gnyis su bstan to / /drang po'i las dang mi mthun pa gnyis so/ /sems la dogs pa yod pa'i phyir dang / dge ba nyams par 'gyur bas dge ba sel ba'i phyir nem nur ro//de ltar mi 'gro ba'i rgyu nyid dang / 'gro ba las ldog pa'i rgyu nyid yongs su bstan pa yin no/ /de nas byang chub sems dpa' rnam par grol ba'i zla bas byang chub sems dpa' rdo rje'i snying po la don de nyid kyi phyir yang gsol ba btab pa/kye rgyal ba'i sras legs par bshad pa mdzod cig dang / de bzhin gshegs pa'i mthus bsam gyis mi khyab pa'i gnas 'di lta bu 'di dag shin tu bsrung ba dang / yid ches pa dag tu yang 'gyur/ de ci'i phyir zhe na/ 'di ltar kye rgyal ba'i sras sa bstan pa 'di bshad pa na chos nyid thob pa 'di yin te/'dir sangs rgyas thams cad dgongs par 'gyur ba dang / byang chub sems dpa' thams cad kyang ye shes kyi sa 'di nyid la srung bar spro bar byed pa'i phyir ro/ /de ci'i phyir zhe na/ kye rgyal ba'i sras 'di ni thog mar spyad pa ste/ 'di ni sangs rgyas kyi chos rnams yang dag par 'grub pa'i phyir ro//kye rgyal ba'i sras 'di lta ste/ dper na yi ge'i 'bru dang / yi ge dang grangs bstan pa thams cad kyi sngon du 'gro ba yang yi ge'i phyi mo yin la/ mthar phyin pa yang yi ge'i phyi mo yin te/ ri mo'i yi ge dang / yi ge'i 'bru dang / grangs bstan pa gang yin pa de ni yi ge'i phyi mo med par bstan pa med do//kye rgyal ba'i sras de bzhin du sangs rgyas kyi chos thams cad ni spyod pas 'grub pas sa de ni sngon du 'gro ba'o/ /rang byung gi ye shes kyi mthar thug par 'gyur bas ni mthar 'byin pa'o/ /de bas na kye rgyal ba'i sras shod cig dang / de bzhin gshegs pa dgra bcom pa yang dag par rdzogs pa'i sangs rgyas rnams kyang yongs su bsrung ba'i phyir byin gyis rlob pa mdzad do zhes bya ba ni 'phags pa rnam par grol ba'i zla bas de la nyes pa de yongs su bstsal nus pa dang /ma bshad na sangs rgyas kyi chos yang dag par mi 'grub pa'i nyes pa mang po ston to/ / gal te gnas 'di dag yid ches par mdzad pas sangs rgyas rnams la mthu mnga' na/ ci'i phyir 'di dag la kha cig khong khro ba skye bar 'gyur zhe na/ nges pa 'di rnam pa gnyis te/ rnam par smin pa myong bar nges pa dang / las byed par nges pa ste/ de la ni sangs rgyas rnams kyi mthus kyang mi smon to//'di ni thog mar spyad pa ste/ /zhes bya ba ni lung las dgongs nas gsungs pa'o/ /'di ni sangs rgyas kyi chos rnams yang dag par 'grub pa zhes bya ba ni rtogs pa'o/ /de la ri mo'i yi ge ni yi ge'i rgyu ste/ seng ge 'dra ba la sogs pa'o/ /yi ge'i 'bru ni a zhes bya ba la sogs pa yi ge'o//grangs ni ming dang tshig ste/ de gnyis kyis don bgrang ba'i phyir ro/ /bstan pa ni ngag go/ /yi ge'i phyi mo ni ri mo'i yi ge la sogs pa bstan pa rnams kyi rtsa ba yin to/ /de nas byang chub sems dpa' de dag thams cad kyis dbyangs kyi nga ro gcig gis tshigs su bcad pa'i dbyangs kyis byang chub sems dpa' rdo rje'i snying po la don de nyid kyi phyir de'i tshe gsol ba btab pa/rab mchog dam pa dri ma med pa'i blo/ /brjod na legs brjod spobs pa mtha' yas pa/ /snyan cing mchog tu gyur pa'i gsung dbyangs kyi / /dam pa'i don dang ldan pa bshad par mdzod//dran dang 'dzin pas rnam par dag pa'i blo/ /stobs bcu'i stobs thob bsam pa rnam dag pa/ /so so yang dag rig pas don rnams 'byed/ /sa bcu phul du byung ba bshad par mdzod/ /ces bya ba ste/ de dag thams cad kyis bstod pa dang bcas pa'i skul bas bskul to/ /de la tshigs su bcad pa dang pos ni rtogs pa'i mthu spobs pa phun sum tshogs pa dang /tshigs su bcad pa gnyis pas ni lung gi mthu phun sum tshogs pas bstod do/ /'di gnyis dang ldan na ston te / 'di ltar rtogs pa dang lung ngo / /de la rab mchog nyid ni yan lag ste/ /rab mchog nyid de yang rtogs pa'i mthu spobs pas rab tu phye ba'o//spobs pa ni gnas dang / rang bzhin dang / 'bras bu dang rnam pa gsum gyis ston te/ de la gnas ni nyan thos la sogs pa pas zag pa med pa'i shes rab khyad par du 'phags pa ste/ dam pa dri ma med pa'i blo dang ldan pa'i phyir ro//rang bzhin ni dris pa lung bstan pa la rigs pa'i spobs pa nyid zad mi shes pa'o/ /'bras bu ni yi ge dang don phun sum tshogs pas lung bstan pa ste/ de la snyan pa dang / rgya che ba nyid kyis ni yi ge phun sum tshogs pa nyid rig par bya'o/ /tshigs su bcad pa gnyis pa la lung gi mthu ni/dran dang 'dzin pas rnam par dag pa'i blo/ /zhes bya bas bstan to/ /len pa dang 'dzin pa gnyis kyis rab tu phye ba'i dran pa dang / 'dzin pa gnyis kyis ni lung de la de'i blo dri ma med pa ston te nem nur med pa'i phyir ro/ /de ltar rtogs pa dang lung gi nus pas bstod nas/ gzhan dag kyang rtogs par bya ba'i phyir dang / lung du bya ba'i phyir bshad par gsol ba btab ste/ sa la zhugs pa rnams ni de bzhin gshegs pa'i stobs rtogs par bya ba dang / sa la ma zhugs pa rnams ni sa la 'jug pa rtogs par bya ba'i phyir te/ rtogs par bya ba ni de lta bu'o/ / lung du bya ba ji lta bu zhe na/ don rnam par 'byed par 'gyur ba'i sa rnams 'dzin pa'i phyir ro/ /so so yang dag rig pas zhes bya ba ni lung dang rtogs pa las skyes pa'i rang gi nus pa dag gis so/ /de ltar 'chad pa po bstod nas/ yang 'khor kyang rtogs pa dang lung gi 'os su 'gyur ba'i 'dod pas bstod pa/zhi ba dul ba mi g.yeng dge ba'i yid/ /rgyags dang nga rgyal lta ba'i nyon mongs spangs/ /'khor 'di the tshom bral bar gyur pa ste/ /khyod kyis legs par bshad pa 'dod cing 'khod/ /ces de la 'dod pa nyid ni yan lag go/ /'dod pa de ni rnam pa gnyis su bstan te/ lung gi 'os su 'gyur ba'i 'dod pa dang /rtogs pa'i 'os su 'gyur ba'i 'dod pa'o/ /de la kun nas nyon mongs pa gnyis kyis lung gi 'os su mi 'gyur te/ rgyags pa dang nga rgyal gnyis kyis so/ /des non na chos dang chos smra ba la gus par mi 'gyur te/ go rims bzhin no/ /log par rtogs pa dang /bsam gyis mi khyab pa'i gnas la mi mos pa'i phyir/ lta ba dang the tshom gnyis kyis mi rtogs pa'i 'os su mi 'gyur ro/ /de la bag la nyal dang bcas pa'i lta ba ni lta ba'i kun nas nyon mongs par rig par bya'o/ /de'i gnyen po zhi ba dang dul ba gnyis kyis ni lung gi 'os su gyur te/ sems rnam par zhi ba dang / spyod lam dul bar gnas pa'i phyir ro/ /mi g.yeng ba dang yid dge ba dang ldan pa gnyis kyis ni rtogs pa'i 'os su 'gyur te/ bsam pa legs par bsam pa dang / mchog tu dga' ba thob pa'i phyir ro/ /mi g.yeng ba zhes bya ba ni gang mkhas pa la bya ste/ bsam pa legs par bsam pa'o/ /da ni dpe rnams kyi 'dod pa de nyid kyi mchog yongs su ston te/ skom par gyur pa chu grang 'dod pa dang / /bkres pas zas dang nad pa sman mchog dang / /bung ba'i tshogs rnams sbrang rtsi 'dod pa ltar/ /de bzhin 'khor rnams khyod kyi tshig la sdod/ /ces bya ba'o//de'i tshig bzhi ni don rnam pa bzhi'i sgo nas bshad pa de la 'dod pa nyid bstan pa'i phyir te/ don rnam pa bzhi gang zhe na/ len pa dang / rton pa dang / 'bral ba dang / bde bar gnas pa'o/ /dpe gang gis she na/ dper na chu ni ma bcas par ji ltar 'ongs pa bzhin med pa de bzhin du thob pa yang dang por ji ltar 'ongs pa bzhin du 'dzin to//dper na kha zas bcas na lus ton par 'gyur ba de bzhin du bsam pa'i shes pas thos pa dang bcas pa dge ba'i chos rton par 'gyur ro/ /dper na sman bzang po btang na nad dang bral bar 'gyur ba de bzhin du thos pa dang bsam pa dang ldan pa'i don sgrub pa bsgom pa la brtson na nyon mongs pa'i gnas ngan len gyi nad dang bral bar 'gyur ro//dper na bung ba rnams sbrang rtsi la brten nas bde bar gnas pa de bzhin du thos pa dang bsams pa dang / bsgoms pa'i 'bras bu la gnas nas 'phags pa rnams chos la mngon sum du dga' ba'i ro la yongs su spyod pas bde bar gnas so//de ltar 'chad pa po dang 'khor bsngags pa ldan pas bskul nas/ bshad pa'i bsngags pa dang ldan pas bkur bar byed de/ de bas bde gshegs bgrod pa stobs bcu ldan/ /chags pa med pa rab tu bstan pa'i phyir/ /dri med blo ldan sa yi khyad par ni//rdul med ma lus legs par bshad pa mdzod/ /ces bya ba'o/ /de la legs par shod ces bya ba ni/ bshad pa'i legs pa nyid de rigs pa'i tshul nyid du ston pa'o/ /legs pa nyid de yang rnam pa gsum du ston te/ gnas dang / rang bzhin dang / 'bras bu'o/ /de la gnas ni dri med blo ldan no/ /rang bzhin ni sa rnams kyis ma bshad pa dag ston pa zhes bya ba ste/ khyad par rdul med ces bya'o/ /rdul med pa ji lta bu zhe na/ don phyin ci ma log pa'o/ /bshad pa na don phyin ci log tu gyur pa la nyes pa gsum ste/ 'chad pa po kha na ma tho ba dang bcas pa dang /ston pa la skur pa 'debs pa dang / nyan pa rnams la slu ba'o/ /'bras bu ni sangs rgyas kyi byang chub stobs bcu dang ldan pa sgrib pa med pa'o/ /de ltar bskul kyang mi 'chad pa ci'i phyir zhe na/ bskul ba yongs su ma rdzogs pa'i phyir te/ rang gi rigs kyi gtso bos ni sngar bskul/'khor rnams kyis ni phyis bskul to/ /da ni 'khor gyi gtso bo chos kyi rje las bskul ba tshol te/ ci'i phyir zhe na/ chos kyi rnam grangs 'di nyid shin tu gtso bor gyur pa'i phyir ro/ /de nas de'i tshe bcom ldan 'das shAkya thub pa'i mdzod spu nas byang chub sems dpa'i stobs snang ba zhes bya ba'i 'od zer grangs med pa'i yang grangs med pa dang ldan pa byung ste/des phyogs bcu thams cad kyi 'jig rten gyi khams rab 'byam thams cad snang bar byas nas ngan song gi sdug bsngal thams cad rgyud bcad de/ bdud kyi khyim thams cad mog mog por byas nas sangs rgyas kyi 'khor gyi dkyil 'khor dpag tu med pa dag snang bar byas te/sangs rgyas kyi yul gyi rnam pa mthu dang / rdzu 'phrul gyi rnam par 'phrul pa bsam gyis mi khyab pa bstan nas/ phyogs bcu thams cad kyi 'jig rten gyi khams rab 'byam thams cad du/ de bzhin gshegs pa thams cad kyi 'khor gyi dkyil 'khor rnams su chos bstan par byin gyis brlabs pa'i byang chub sems dpa' snang bar byas te/steng gi bar snang la 'od zer stug po'i sprin gyi dra pa'i khang pa brtsegs pa chen po byas nas 'dug go/ /de bzhin du sangs rgyas bcom ldan 'das de dag gi mdzod spu dag nas kyang byang chub sems dpa'i stobs snang ba zhes bya ba'i 'od zer 'khor gyi 'od zer grangs med pa'i yang grangs med pa dang ldan pa dag byung bar gyur te/de dag gis kyang phyogs bcu thams cad kyi 'jig rten gyi khams rab 'byam thams cad snang bar byas nas/ ngan song gi sdug bsngal thams cad rgyun bcad de/bdud kyi khyim thams cad mog mog por byas nas sangs rgyas kyi 'khor gyi dkyil 'khor dpag tu med pa dag snang bar byas te/ sangs rgyas kyi yul gyi rnam pa mthu dang rdzu 'phrul gyi rnam par 'phrul pa bsam gyis mi khyab par bstan nas/ phyogs bcu thams cad kyi 'jig rten gyi khams rab 'byam thams cad du de bzhin gshegs pa thams cad kyi 'khor gyi dkyil 'khor rnams su chos bstan par byin gyi rlabs kyi byin gyis brlabs pa'i byang chub sems dpa' snang bar byas nas steng gi bar snang la 'od zer stug po'i sprin gyi dra ba'i khang pa brtsegs pa chen po byas te 'dug go//bcom ldan 'das shAkya thub pa'i mdzod spu nas byung ba'i 'od zer de dag gis 'jig rten gyi khams de dag dang / sangs rgyas kyi 'khor gyi dkyil 'khor rnams dang / byang chub sems dpa' de dag gi lus dang / stan rnams kun du gsal bar snang ngo //'jig rten gyi khams tshad med pa'i sangs rgyas bcom ldan 'das de dag gi mdzod spu dag nas byung ba'i 'od zer de dag gis stong gsum gyi stong chen po'i 'jig rten gyi khams 'di dang / bcom ldan 'das shAkya thub pa'i 'khor gyi dkyil 'khor 'di dang / byang chub sems dpa' rdo rje'i snying po'i lus dang /stan yang gsal bar kun du snang bar kun du snang ngo / /de nas sangs rgyas kyi mthus 'od zer stug po'i sprin gyi dra ba'i khang pa brtsegs pa chen po de las 'di lta bu'i sgra 'di 'byung ngo / /mi mnyam mnyam pa nam mkha' mnyam pa dag /ces bya ba la sogs pa'o/ /ci'i phyir bcom ldan 'das kyis 'od zer gyi cho 'phrul dang bcas pas skul ba mdzad ce na/bcom ldan 'das kyis de la sngar thugs kyis byin gyis brlabs kyi sangs rgyas gzhan dag ltar gsung dang skus ni ma yin te/ de bas na de gnyis kyis byin gyis brlabs par bzhed pa'o/ /ci'i phyir rang bzhin gyi gsung dang rang bzhin gyi skus byin gyis ma brlabs she na/ci nas kyang chos gtso bor byas par 'gyur ba dang / bdag mi btsun par ma byas par 'gyur ba'i phyir ro/ /'od zer de ni las rnam pa brgyad byed pa dang / lus gnyis yod par rig par bya ste/ las rnam pa brgyad ji lta bu zhe na/yang dag par go bar byed pa'i las byed pa ni/ 'di ltar des reg na byang chub sems dpa' rnams bdag nyid kyi stobs de bzhin gshegs pa'i byin gyis brlabs pa las byung ba la lta bar byed de/ gang gi phyir/ byang chub sems dpa' stobs snang ba zhes gsungs pa'o//'khor gyi 'od zer grangs med pa'i rgyu yin pas rgyu nyid kyi las byed pa ni gang gi phyir/ 'khor gyi 'od zer grangs med pa'i yang grangs med pa zhes gsungs pa'o/ /'jig rten gyi khams grangs med par yang 'gro zhing 'od 'dom gang tsam du 'du ba'i phyir/ rgyas pa dang 'du ba'i las byed pa ni gang gi phyir/des phyogs bcu thams cad kyi 'jig rten gyi khams rab 'byam thams cad snang bar byas nas zhes gsungs pa'o/ /ngan song gi sdug bsngal thams cad rab tu zhi bar byed pa'i phyir rab tu zhi bar byed pa'i las byed pa ni gang gi phyir/ ngan song gi sdug bsngal thams cad rgyun bcad ces gsungs pa'o//bdud kyi khyim thams cad 'od chung ngur byed pa'i phyir/ 'di ltar sdangs te brtabs nas gdul bya rnams la bgegs byed par mi 'gyur bas zil gyis gnon pa'i las byed pa ni gang gi phyir/ bdud kyi khyim thams cad mog mog por byas zhes gsungs pa'o//sangs rgyas kyi mthu bsam gyis mi khyab pa ston pa'i phyir/ 'dun par byed pa'i las byed pa ni gang gi phyir/ sangs rgyas kyi yul gyi rnam pa mthu dang / rdzu 'phrul gyi rnam par 'phrul pa bsam gyis mi khyab pa bstan zhes gsungs pa'o/ /'jig rten gyi khams thams cad du de bzhin gshegs pa'i 'khor gyi dkyil 'khor du des byin gyis brlabs pa'i byang chub sems dpa' kun du ston pa'i phyir kun du ston pa'i las byed pa ni gang gi phyir/phyogs bcu thams cad kyi 'jig rten gyi khams rab 'byam thams cad du de bzhin gshegs pa thams cad kyi 'khor gyi dkyil 'khor rnams su chos bstan par byin gyi rlabs kyis brlabs pa'i byang chub sems dpa' snang bar byas zhes gsungs pa'o//tshigs su bcad pa'i sgra 'byin pa'i phyir bskul ba'i las byed pa ni gang gi phyir/ 'od zer stug po'i sprin gyi dra ba'i khang pa brtsegs pa de las 'di lta bu'i sgra 'di 'byung ngo zhes gsungs pa'o//lus gnyis ji lta bu zhe na/ skar mda' lta bu'i lus ni gang gi tshe khams gzhan dag tu 'gro ba'o/ /nyi ma lta bu'i lus ni gang gi tshe sprin stug po'i dra ba'i khang pa brtsegs pa byas te 'dug nas rgya chen po gcig gis thams cad snang bar byed pa'o/ /de ltar 'khor gyi dkyil 'khor de dag na gcig tu gyur pa lta bur phan tshun lta bas bshad pa dang /mnyan pa sla bar gyur to/ /de la sangs rgyas kyis bskul ba ni 'di yin te/ mi mnyam mnyam pa nam mkha' mnyam pa dag /stobs bcu khyu mchog tshogs rab mtha' yas pa/ /lha dang mi yi nang na mchog rnams kyi //shAkya'i rigs skyes chos la byin rlab mdzad/ /bde bar gshegs pa rnams kyi mthu / /chos kyi rgyal po rnams kyi mdzod/ /spyod pa dam pa rgya chen dang / /ye shes sa rab phye ste shod/ /chos kyi rnam grangs gtso bo 'di/ /gang rnams rna lam grag de dag /bde gshegs rnams kyis byin gyis brlabs/ /byang chub sems dpa' rnams kyis bzung / /sa bcu rdul dang rnam bral ba/ /mthar gyis rdzogs par byas nas ni/ /stobs bcu dag kyang thob gyur nas/ /rgyal ba nyid du 'gyur ba yin/ /the tshom med par gyur pa dang / /rgya mtsho'i chu nang gnas gyur tam//sreg pa'i bskal tshe 'phos nas yang / /chos kyi rnam grangs 'di thos 'gyur/ /ye shes sa yi lam gyi mchog/ 'jug dang gnas dang 'phar ba dang / /spyod pa nyid kyi yul rnams ni/ /go rims bzhin du legs par shod/ /de la tshigs su bcad pa dang po dang /gnyis pas ni gang dag gis byin gyis brlabs pa dang / gang gi phyir byin gyis brlabs pa de dag gi bsngags pa mdzad na ni byin gyis brlabs pa ste/ ci zhig ston zhe na/ gtso bo rnams kyis ma bsgos sam/ mchog gi las byed du ma bcug na/ de byed par mi 'gyur ro//de la tshigs su bcad pa dang pos gang dag gis byin gyis brlabs pa'i bsngags pa ji ltar rig par bya zhe na/ gang gi phyir/ lha dang mi yi nang na mchog rnams kyis/ /byin rlab mdzad ces gsungs pa'o/ /lha dang mi'i mchog gang yin zhe na/ sangs rgyas bcom ldan 'das rnams so//ci'i phyir zhe na/ chos kyi rgyal por gyur pa'i phyir ro/ /ji ltar de dag chos kyi rgyal po nyid yin par rig par bya zhe na/ rgyal po'i phun sum tshogs pa ni rnam pa bzhi ste/ dbang phun sum tshogs pa dang / mthu phun sum tshogs pa dang / zhabs 'bring phun sum tshogs pa dang /rigs phun sum tshogs pa'o/ /sangs rgyas rnams kyi dbang phun sum tshogs pa gang zhe na/ nyon mongs pa dang shes bya'i sgrib pa las rnam par grol ba ste/ des de dag sems dang ye shes la dbang brnyes nas/ ji ltar bzhed pa bzhin du bde bar gnas pa bla na med pa sku nyams su bstar to//de 'dir ji skad du bstan pa yin zhe na/ thams cad mkhyen pa'i phyir mi mnyam pa dang mnyam pa nyid do/ /bag chags dang bcas pa'i nyon mongs pa legs par bcom pas/ 'jig rten gyi chos kyis mi gos pa'i phyir/ nam mkha' dang mnyam pa nyid do//mi mnyam pa ni sangs rgyas rnams te/ de las gzhan pa'i sems can rnams dang ngo / /mi mnyam pa de dag dang mnyam pa ni de dag ni chos kyi skus mnyam pa'o/ /mi mnyam pa rnams zhes ci'i phyir de skad mi bya zhe na/ de dag ni mnyam pa nyid du bstan pa'i phyir ro/ /sangs rgyas rnams kyi mthu phun sum tshogs pa gang zhe na/stobs bcu rnams te/ de rnams kyis ni de dag gis gzhan smra ba dang / bdud phyir rgol ba thams cad zil gyis gnon to/ /de 'dir ji skad bstan pa yin zhe na/ stobs bcu'i khyu mchog nyid kyis so/ /sangs rgyas rnams kyi zhabs 'bring ba phun sum tshogs pa gang zhe na/byang chub sems dpa' rnams dang / nyan thos ris bdun gyis bsdus pa rnams so/ /de 'dir ji skad du bstan pa yin zhe na/ tshogs rab mtha' yas pa nyid kyis so/ /de ni byang chub sems dpa' la sogs pa'i tshogs rnams so / /rab ni 'jig rten las khyad par du 'phags pa'i phyir ro//de dag mtha' yas pa ni grangs med pa'i phyir ro/ /sangs rgyas rnams kyi rigs phun sum tshogs pa gang zhe na/ gang rigs phun sum tshogs pa'o/ /de 'dir ji skad du bstan pa yin zhe na/ shAkya'i rigs skyes pa nyid kyis so/ /ci'i phyir bcom ldan 'das nyid kyis rigs brjod ce na/mngon sum nyid kyi phyir dang / 'di nyid kyi phyir chos la byin gyis brlabs so zhes sbyar ba'i phyir ro/ /chos la zhes bya ba ni chos la gnas pa zhes bya bar dgongs pa'o/ /de la byin gyis brlabs pa mdzad ces bya ba ni yan lag go/ /byin gyi rlabs de yang rnam pa gnyis su rig par bya ste/gnas phun sum tshogs pa'i byin gyis brlabs pa ni sangs rgyas kyis byin gyis brlabs pa yin pa'i phyir ro/ /'bras bu phun sum tshogs pa'i byin gyis brlabs pa ni chos smra ba 'bras bu yin pa'i phyir ro/ /lha dang mi yi mchog rnams zhes bya ba ni yan lag go//lhag ma ni nye ba'i yan lag go/ /'o na tshigs su bcad pa gnyis pas gang gi phyir byin gyis brlabs pa de'i bsngags pa ji ltar rig par bya zhe na/ chos kyi rgyal po de dag gis chos kyi mdzod rnam par 'byed par bya ba'i phyir byin gyis brlabs pa'o/ /'dir chos kyi mdzod de'i bsngags pa yang rnam pa gnyis su rig par bya ste/don phun sum tshogs pa dang / tshig 'bru phun sum tshogs pa'o/ /don phun sum tshogs pa ji lta bu zhe na/ gang gi phyir spyod pa dam pa rgya chen zhes gsungs pa'o/ /spyod pa zhes bya ba ni byang chub sems dpa' rnams kyi sgrub pa gang yin pa ste/ lam gang yin pa dang /tshogs gang yin pa'o/ /de yang don dam pa'i ye shes dang ldan pas dam pa'o/ /mthu'i khyad par dang ldan pas rgya che ba'o/ /de ltar 'di'i zab pa nyid dang / rgya che ba nyid kyang yongs su bstan pa yin no/ /tshig 'bru phun sum tshogs pa ji lta bu zhe na/ gang gi phyir ye shes sa rab phye ste zhes gsungs pa ste/ye shes kyi sa rab tu phye ba rnam pa bcu gcig po 'di dag gis so/ /tshigs su bcad pa 'di las sangs rgyas kyi mthu nyid kyis sangs rgyas kyi chos ston par yongs su bstan pa gang yin pa de ni kha cig sangs rgyas la bdag nyid la mthu med nas gzhan la tshol to snyam du dbang za ba yongs su spangs pa'i phyir ro//de ltar chos bshad par bskul nas bshad na dus gsum du gzhan dag gi phan yon ni tshigs su bcad pa gsum gyis ston te/ nyan pa'i dus dang / sgrub pa'i dus dang / tshe rabs brjes pa'i dus so/ /de la nyan pa'i dus na sangs rgyas kyi byin gyis brlabs pa nyid dang /de bzhin du byang chub sems dpa' rnams kyis kyang bzung ba nyid de don du na sangs rgyas so snyam du bzung ba ni phan yon no/ /sgrub pa'i dus na sa bcu po dag mthar gyis yongs su rdzogs par byed cing / yongs su rdzogs nas kyang stobs bcu brnyes pas bdag nyid sangs rgyas nyid du bskyed pa'o//tshe rabs brjes pa'i dus na ngan 'gro dang bde 'gro mi khom par skyes pa'i klu'i 'jig rten dang / lha tshe ring po'i 'od gsal la sogs pa gzugs na spyod pa rnams kyi nang du yang chos 'di rnyed pa'o/ /'di nyan pa thams cad kyis phan yon 'di 'thob pa'i skal ba yod dam/smras pa ma yin no/ /'o na ji lta bu zhe na/ the tshom med par gyur pa zhes bya ba ste/ nges pa'i chos 'di la mos pa'o/ /de ltar bskul ba dang / bshad pa'i phan yon brjod nas/ ye shes sa rab phye ste zhes gang gsungs pa de dmigs pa'i go rims dang /rtogs pa'i go rims dang / sgrub pa'i go rims dang / go rims rnam pa gsum gyis tshigs su bcad pa drug pa las lung stsal bar mdzad do/ /rtsa ba dang po gnyis pa dang / bzhi pa rnams kyis bstan to/ /go rims su shod cig ces bya ba ni thams cad du sbyar ro/ /de la ye shes kyi sa'i khams ni sa bcu bstan pa gang yin pa ste/gang la dmigs gang la brten nas sa de dag tu ye shes 'byung ba'o/ /'jug pa ni sa la 'jug pa'o/ /gnas pa ni ji srid du sa gzhan dag tu ma 'phar gyi bar du'o/ /'phar ba ni sa gzhan dag tu 'gro ba'o/ /spyod pa ni ji ltar sgrub pa ni de dag 'jug pa dang /gnas pa dang 'phar ba dang 'grub pa'o/ /spyod pa de nyid kyi rgyu ba rnam pa mang po ni spyad pa'i yul zhes bya'o/ /lung sbyin pa 'di ci dgos she na/ sangs rgyas kyis gsungs pa nyid thams cad bshad do zhes phyis yid ches pa bskyed pa'i phyir ro/ /de nas byang chub sems dpa' rdo rje'i snying pos phyogs bcur rnam par bltas nas 'khor rnams dad pa rgya cher bskyed pa'i phyir tshigs su bcad pa 'di dag smras so//phra zhing shes dka' drang srong chen po'i lam/ /zhes bya ba la sogs pa gsungs pa'o/ /ci'i phyir phyogs bcur rnam par blta zhe na/ bdag nyid nga rgyal med pa dang //nye mgon med par ston pa'o/ /'khor rnams dad pa rgya cher bskyed pa'i phyir tshigs su bcad pa smras zhes bya ba ni sa bstan pa mnyan par nyams bde ba bskyed pa'i phyir ro/ /de la dad pa zhes bya ba ni sems gsal ba ste/ rnyog pa med pa'o/ /de yang rnam pa gnyis su rig par bya ste/don gyi che ba nyid la dad pa ni don gang thob par bya ba'o/ /bstan pa'i che ba nyid la dad pa ni gang gis thob par byed pa'o/ /de la don gyi che ba nyid la dad pa ni tshigs su bcad pa lnga po dag gis rig par bya'o/ /don gyi che ba nyid ji lta bu zhe na/ de'i zab pa nyid gang yin pa'o/ / de bas na zab pa nyid de bstan pa'i phyir/ phra zhing shes dka' drang srong chen po'i lam/ /brtag med rtog bral shin tu reg par dka'/ /zhes bya ba 'di gsungs pa'o/ /ci'i dbang du byas nas gsungs she na/ ye shes kyi sa ste/ 'di ltar de nyid kyi dbang du byas pas 'og nas kyang ye shes mngon par sgrub ces gsungs so//de la phra zhes bya ba ji lta bu zhe na/ de ni shes dka' drang srong chen po'i lam/ /zhes gsungs pa ste/ 'di ltar bshad pa na shes par dka' la drang srong chen po rnams te/ sangs rgyas rnams kyi lam yang yin pas de'i phyir phra ba'o/ /lam ni rgyu ste/gang gi drang srong chen po'i dngos por 'gyur ba'o/ /phra ba de yang rnam pa gnyis su rig par bya ste/ bshad pa'i dus na phra ba nyid dang / thob pa'i dus na phra ba nyid de go rims bzhin no/ /ci'i phyir de shes par dka' zhe na/ 'di ltar de ni/ brtag med rtog bral zhes gsungs pa'o/ / de la brtag tu med pa ni rnam par rtog pa'i yul ma yin pa'i phyir ro/ /rtog bral ni rang gis rnam par mi rtog pa'i phyir ro/ gang gi phyir drang srong chen po'i lam du gyur pa de'i phyir phra ba zhes bya ba ci'i phyir zhe na/ 'di ltar de ni shin tu reg par dka' ba ste/ shin tu thob par dka' ba'o/ / 'di ni de'i phra ba nyid do/ /ci'i phyir de shin tu reg par dka' zhe na/ 'di ltar de ni/ gsal ba rig pa mkhas pas rtogs pa ste/ /rang bzhin zhi ba 'gog min 'byung ba ma yin/ /zhes bya'o/ /de la gsal ba ni shes bya la ma rig pa med pa ste/ ma rig pa'i bag la nyal yod pa'i shes pa ni mi gsal ba'o//rig pa mkhas pas rtogs pa ste/ /zhes bya ba ni de dag gis so so rang gi rig pas rtogs pa ste/ de dag la brten nas 'byung ba'i phyir ro/ /de la rig pa ni bden pa mthong ba rnams so/ /de dag nyid chos mngon pa dang / 'dul ba mngon pa la mkhas pa ni mkhas pa'o//yang na gzhan dag de las thob nas brda la mkhas pa ni mkhas pa yin par rig par bya'o/ /rang bzhin zhi ba ni rang bzhin gyis nyon mongs pa med pa ste/ nyon mongs pa dang bcas pa la phyis nyon mongs pa med par gyur pa ma yin no/ /'gog min pa ni 'di ltar zhi ba gcig pu bgrod pa ma yin pa ste/sems can gyi don bya ba la lta ba dang bcas pa'i phyir ro/ /'byung ba ma yin pa ni 'khor ba las yang dag par 'das pa'i phyir ro/ /de ltar ye shes de mya ngan las 'das pa dang / 'khor ba la mi gnas pa nyid yin par rig par bya'o/ / de ltar dmigs pa las byung ba phra ba nyid dang / gnas las byung ba phra ba nyid dang / rnam par dag pa phra ba nyid dang / yon tan phra ba nyid kyis kyang reg par dka' bar rig par bya'o/ /de la phra ba nyid dang po ni 'jig rten pa'i snyoms par 'jug pa po rnams dang thun mong ma yin pa nyid du rig par bya'o//gnyis pa dang gsum pa ni gzhan mu stegs can gyi gnas ston par khas 'che ba rnams dang thun mong ma yin pa nyid do/ /nyan thos dang rang sangs rgyas dang thun mong ma yin pa nyid do/ /de ltar tshigs su bcad pa 'di'i phra ba nyid ni yan lag go/ /phra ba nyid rnam pa gnyis ni nye ba'i yan lag go//de yang shin tu reg par dka' ba nyid kyis rab tu phye ba thob pa'i dus na phra ba nyid ni yan lag go/ /lhag ma rnam pa bzhi ni nye ba'i yan lag tu rig par bya'o/ /de ltar ye shes phra ba gang yin pa de'i mtshan nyid ji lta bu zhe na/ rang bzhin stong yod gnyis min zad mi shes/ /'gro las rnam grol mnyam brnyes mya ngan 'das//mtha' dang dbung min tshig gis brjod du med/ /dus gsum rnam las grol ba nam mkha' mnyam/ /zhes gsungs pa'o/ /de la ye shes de'i mtshan nyid ni rnam pa gnyis su rig par bya ste/ spyi'i mtshan nyid dang / spyi'i mtshan nyid ma yin pa'o//de la ye shes de'i mtshan nyid kyi spyi'i mtshan nyid ji lta bu zhe na/ rang bzhin stong zhes gsungs pa ste/ ye shes kyi bdag nyid kyis stong pa'o/ /de ji ltar spyi'i mtshan nyid yin zhe na/ chos thams cad ni ji skad brjod pa'i rang bzhin gyis stong pa'o/ /rang bzhin gyis stong pa'o zhes bstan pa ci ri bong gi rwa bzhin du med do zhes de ltar gzung bar bya ba'am smras pa ma yin no//ci stong pa de las ye shes gzhan la de las kyang stong pa nyid gzhan no zhes de ltar gzung bar bya'am / smras pa ma yin no/ /ci de'i rang bzhin de yod pa las de phyis 'gyur te zad pa 'gags pa zhes de ltar gzung bar bya'am/smras pa ma yin no/ /'o na ji lta bu zhe na/ stong pa nyid kyi rang bzhin de ni yod pa dang gnyis su med pa dang zad mi shes pa'o/ /de ltar de la yang dag pa ma yin par 'dzin pa rnam pa gsum rnam par spangs pas stong pa nyid yongs su bstan pa yin te/ skur pa 'debs pa yang dag pa ma yin par 'dzin pa rnam par spangs pa dang /tha dad pa yang dag pa ma yin par 'dzin pa rnam par spangs pa dang / 'gyur ba yang dag pa ma yin par 'dzin pa rnam par spangs pa'o/ /gang dag rab zhi gnyis min zad mi shes/ /zhes 'don pa de yang de rab tu zhi ba yod pa nyid du brjod pa yin te/med pa ni zhi bar mi 'gyur ro/ /med pa des kyang ji ltar zhi bar 'gyur te/ des ni nyon mongs pa rnams rab tu zhi bar byed de/ 'di ni de'i spyi'i mtshan nyid do/ /spyi'i mtshan nyid ma yin pa ni de'i rnam par byang ba'i mtshan nyid ni rnam par grol ba nyid do/ /de yang rnam pa gnyis su rig par bya ste/de gang las ji ltar rnam par grol ba'o/ /de gang las ji ltar rnam par grol zhe na/ 'gro las rnam par grol zhes gsungs pa ste/ des 'gro ba dang ldan pa'i nyon mongs pa dang / las dang skye ba'i kun nas nyon mongs pa rnams las rnam par grol bar ston to/ /ji ltar rnam par grol zhe na/mnyam brnyes mya ngan 'das zhes gsungs pa ste/ 'khor ba dang mya ngan las 'das pa mnyam pa nyid du 'dzin pas nyan thos ltar gcig tu 'khor ba la rgyab kyis phyogs pa ma yin no/ /ci ye shes de'i rgyun gyi thog mas zag pa zad par byas pa zhig gam/'on te bar dang tha mas zag pa zad par byas she na/ de ni de ltar zag pa zad par byed pa ma yin par rig par bya'o/ /'o na ji lta bu zhe na/ mar me'i 'od 'phro bas ras tshig pa tha ma dang bar mas ma yin pa bzhin no/ /mtha' smos pas ni thog ma yang smos par 'gyur te/sngon gyi mtha' yin pa'i phyir ro/ /ci de gzhan las sgra ji lta ba bzhin du dmigs su rung ngam/ smras pa ma yin no/ /'o na ji lta bu zhe na/ tshig gis brjod du med ces bya ba ste/ brjod du med pa'i phyir ro/ /ci de 'jig rten pa'i shes pa bzhin du 'jug pa la brten pa zhig gam/ smras pa ma yin no/ /'o na ji lta bu zhe na/ dus gsum rnams las grol zhes bya ba ste/ gnas gyur pa rtag pa la gnas pa'i phyir te/ ji ltar rkyen mi rtag pa la brten pas rnam par shes pa yang mi rtag pa nyid do zhes mdo sde gzhan dag las rnam par gzhag pa lta bu ni ma yin no/ / ci de nyan thos dang rang sangs rgyas kyi ye shes ltar sgrib pa dang bcas pa'i rnam par grol bas rnam par grol ba zhig gam/ smras pa ma yin no/ /'o na ji lta bu zhe na/ nam mkha' mnyam zhes bya ba ste/ shes bya'i sgrib pa thams cad med pa'i phyir ro/ /ji ltar dmigs pa yongs su shes pa dang / ji ltar nyon mongs pa rnams spong ba dang / dmigs pa ci 'dra ba la dmigs pa dang / gnas ci 'dra ba la gnas pa dang / rnam par grol ba ci 'dra bas rnam par grol ba de thams cad yongs su bstan pa yin no/ /'di la rang bzhin gyis stong pa nyid ni yan lag go/ /stong pa nyid rnam pa gsum ni nye ba'i yan lag go//rnam par grol ba nyid ni yan lag go/ /rnam par grol ba rnam pa lnga ni nye ba'i yan lag go/ /de'i 'og tu/ zhi zhing rab zhi bde bar gshegs pas mkhyen/ /smra ba'i lam rnams kun gyis brjod par dka'/ /sa dang spyod pa rnams kyang de 'dra ste/ /smra bar dka' na mnyan par ga la nus//zhes gsungs pa de ji ltar sbyar zhe na/ ye shes de'i bral ba'i yongs su mya ngan las 'das pa ni bstan zin la/ rang bzhin gyis yongs su mya ngan las 'das pa ni ma bstan te/ de bas na de yang bstan pa'i phyir/ zhi zhing rab zhi zhes bya ba gsungs so/ / de la zhi ba ni spyi'i mtshan nyid du ldan pas rang bzhin gyis yongs su mya ngan las 'das pa nyid do/ /rab zhi ba ni spyi'i mtshan nyid ma yin pa dang ldan pas 'bral ba'i yongs su mya ngan las 'das pa ste/ so sor brtags pas zhi ba ni rab tu zhi ba zhes bya ba'i phyir ro/ /rnam pa de lta bu'i ye shes de sus mngon sum du yang dag par thugs su chud ce na/bde bar gshegs pas mkhyen zhes gsungs pa'o/ /sus bshad sus mnyan zhe na/ smras pa sus kyang ma yin no/ /ci'i phyir zhe na/ 'di ltar de ni/ smra ba'i lam rnams kun gyis brjod par dka'/ /zhes bya ba'o / / smra ba'i lam ni tshig gi lam ste/ ming dang / tshig dang / yi ge'i tshogs rnams so/ /ci'i phyir brjod du med pa zhes mi bya zhe na/ de yang brjod pa'i bya ba med pa ma yin par bstan pa'i phyir ro/ /gal te ye shes ni brjod par dka' na/ sa dang spyod pa ci 'dra zhe na/ sa dang spyod pa rnams kyang de 'dra ste//smra bar dka' na mnyan par ga la nus/ /zhes gsungs pa ste/ de la sa ni yul te dmigs pa'o/ /spyod pa ni 'khor yin te/ sbyin pa'i pha rol tu phyin pa la sogs pa chos gang rnams dang lhan cig rgyu ba'o/ /ci'i phyir de ltar de brjod par dka' zhing mnyan par dka' zhe na/de ni bsam dang sems kyi lam rnams spangs/ /ye shes mngon sgrub thub pa'i dbang pos mkhyen/ /phung po skye mched khams kyis phyi ma yin/ /sems kyis mi shes yid kyis bsam ma yin/ /zhes gsungs pa'o / /ci ston zhe na/ sbyor ba las byung ba bsams pa las byung ba'i shes pa dang /skyes nas thob pa'i rnam par shes pa ci 'dra bas bstan par nus pa de gnyis kyi yul ni de ma yin te/ de dang mi 'dra ba sangs rgyas kyi mkhyen pas mngon sum du yang dag par thugs su chud pa'i phyir ro/ /de ni ji ltar phung po dang / khams dang / skye mched rnam par gzhag pas bstan pa de ltar med de/yi ge med pa'i phyir ro/ /de bas na brjod par bya bar mi nus so/ /'di ltar rna ba'i rnam par shes pas shes par bya ba ma yin la/ yid kyi rnam par shes pas rnam par brtag par bya ba ma yin te/ de bas na mnyan par yang mi nus so/ /de la ye shes mngon par bsgrub ces bya ba de ni sa'i ye shes su ston te/de'i mngon par bsgrub pa ni dmigs pa gang dang / grogs gang dag gis de mngon par bsgrub pa'o/ /da ni mngon par rdzogs par sangs rgyas kyang de ji ltar brjod pa dang / mnyan par mi nus pa dpes ston te/ ji ltar bar snang gnas kyi bya yi rjes//mkhas pas brjod mi nus la mi mthong ba/ /de ltar bde gshegs sras kyi sa rnams kyang / /brjod mi nus na mnyan par ga la nus/ /zhes bya ba'o/ /ci ston zha na/ dper na nam mkha'i yul ni bya'i rkang pa ltar yongs su bcad du med pa'i rang bzhin yin pas nam mkha' la bya 'gro ba'i rkang pa'i rjes brjod pa dang /mthong bar mi nus mod kyi / 'on kyang de la mi 'jog pa ma yin pa de bzhin du bya'i rkang pa lta bu'i ming dang / tshig dang / yi ge'i tshogs rnams kyi gnas su gyur pa byang chub sems dpa'i sa rtogs pa'i ye shes kyis bsdus pa rnams kyang sgra ji bzhin gyi ngo bo nyid ma yin pas brjod pa dang mnyan par mi nus mod kyi /'on kyang de dag la de mi 'jog pa ma yin te/ de ltar re zhig zab pas don gyi che ba bstan to/ /ci'i phyir bstan zhe na/ ngas bshad kyi khyod kyis sgra ji lta ba bzhin du don du gzung bar mi bya'o zhes bstan pa'i phyir ro//sgra ji bzhin du don bzung na ni nyes dmigs rnam pa lnga yod de/ mos pa'i gnas ma yin pa nyid kyi nyes pa dang / rtsol ba ma nyams par 'gyur ba'i nyes pa dang / gzhan la slu ba'i nyes pa dang / ston pa la skur pa 'debs pa'i nyes pa dang / chos spong bar byed pa'i nyes pa'o//de ltar bdag cag la nyes dmigs lnga med par shes nas/ don gyi zab pa bstan pas 'khor rnams rgya cher dad par 'gyur ro/ /da ni bstan pa'i che ba nyid kyis dad par mdzad par bzhed nas tshigs su bcad pa lnga gsungs te/ 'on kyang byams dang snying rje smon lam gyis/ / de las phyogs tsam rim pa'i tshul bzhin du/ /bshad bya sems kyi spyod yul rnams kyis min/ /bsam pa ji bzhin ye shes de rdzogs byed/ /de yi spyod yul de 'dra blta dka' ba/ /de ni rang sems gnas kyang brjod mi nus/ /'on kyang rgyal ba'i mthus ni rab brjod kyi / / thams cad nyon la mthun par gus bcas kyi/ /'di yis 'jug bya ye shes de 'dra ba/ /de ni bskal par brjod par mi nus te/ /chos don yang dag ma lus ji bzhin gnas/ /mdo tsam bdag gis bshad kyi mnyan par gyis/ /gus dang bcas pas sta gon gyis shig dang / /rgyal ba'i mthu yis bdag gis legs par bshad//dpe ldan 'thad pa yi ge mnyam pa yis/ /chos kyi dam pa sgras ni bshad par bya/ /de ni tshig gis shin tu brjod dka' yang / /bde bar gshegs mthu dpag med gang yin pa/ /'od zer lus can de ni bdag la zhugs/ / de yi mthus na bdag gis bshad par nus/ /zhes bya ba'o / /de la rgyal ba'i sras kyi sa thams cad brjod par mi nus so zhes gsungs la/ de las phyogs tsam bshad par bya zhes bya ba ji ltar sbyar zhe na/ sas bsdus pa'i ye shes de ni rnam pa gnyis te/ rgyur gyur pa dang / 'bras bur gyur pa'o//de bas na rgyur gyur pa bshad par bya ste/ khong du chud par bya'o zhes ston to/ /de ni 'bras bur gyur pa'i phyogs gcig go/ /bstan pa de'i che ba nyid rnam pa gsum du ston te/ rgyu phun sum tshogs pa'i che ba nyid dang / rgyu nyid phun sum tshogs pa'i che ba nyid dang / gdams ngag rab tu brjod pa phun sum tshogs pa'i che ba nyid do//de la byams dang snying rje smon lam gyis/ /zhes bya ba ni rgyu phun sum tshogs pa'o/ /de la 'char ka'i mdo bzhin du bde ba dang yid bde ba rgyu dang bcas pa sgrub pa'i bsam pa ni byams pa'o/ /sdug bsngal dang yid mi bde ba rgyu dang bcas pa bsal ba'i bsam pa ni snying rje'o//smon lam ni byang chub chen por sems skyed pa'o/ /de gnyis smos pas ni byams pa dang snying rje thun mong ma yin pa yun ring po nas bsgoms nas zhes bya bar ston to/ /rim pa'i tshul bzhin du zhes bya ba ni rgyu nyid phun sum tshogs pa ste/ bshad pa de thos pa las byung ba dang /bsams pa las byung ba la sogs pa shes pa'i rim pa gang gis 'jig rten las 'das pa'i ye shes kyi bar gyi rgyur 'gyur ba'o/ /gdams ngag rab tu brjod pa phun sum tshogs pa ni rnam pa gnyis te/ yongs su rdzogs par byed pa rab tu brjod pa dang /dmigs pa rab tu brjod pa'o/ /de la yongs su rdzogs par byed pa rab tu brjod pa ni gang gi phyir/ sems kyi spyod yul rnams kyis min/ /bsam pa ji bzhin ye shes de rdzogs byed/ /ces gsungs pa'o/ /ci ston zhe na/ thos pa las byung ba la sogs pa'i shes pa/sems kyi spyod yul du gyur pa de dag ni 'jig rten las 'das pa'i ye shes kyi rgyu tsam du 'gyur gyi/ de dag gis de dag yongs su rdzogs par byed pa ni ma yin te/ 'di ltar bsam pa dag pa rtogs pa'i ye shes 'jig rten las 'das pa de dag de rdzogs par byed do zhes ston to/ /de la dmigs pa rab tu brjod pa ni gang gi phyir/de yi spyod yul de 'dra mthong dka' ba/ /de ni rang sems gnas kyang brjod mi nus/ /zhes gsungs pa ste/ ci ston par 'gyur zhe na/ de'i spyod yul de 'dra mthong dka' ba rang gi bsam pa dag pa la yod pa gang yin pa de ni brjod par mi nus so/ / zhes ston to/ /de ltar bstan pa'i gdams ngag rab tu brjod pa phun sum tshogs kyang nyes pa gnyis kyis rtogs par mi 'gyur te/ 'chad pa po'i nyes pa dang / nyan pa po'i nyes pa'o/ /de la 'chad pa po'i nyes pa yang rnam pa gnyis te/ sangs rgyas kyis bka' ma stsal par 'chad pa dang / nye mgon byed pa'o/ /nyan pa po'i nyes pa yang rnam pa gnyis te/ ngas ni rigs kyi khyod kyis ni mi rigs so zhes mngon par zhen nas chos la du mar sems pa lta ba'i nyes pa dang / 'chad pa po la ma pa'i nyes pa'o/ /de la re zhig 'chad pa po bdag gi nyes pa med par ston to/ /bdag ni sangs rgyas kyis bka' ma stsal pa dang /nye mgon byed cing mi 'chad de/ 'on kyang rgyal ba'i mthu yis rab brjod kyi / /zhes gsungs pa'o/ /thams cad nyon la zhes gsungs pa'i phyir ro/ /de'i 'og tu nyan pa po'i nyes pa rnam pa gnyis yongs su spangs pa'i phyir/ de dag nyid la mthun par gus bcas kyi //zhes bya bas ston te/ go rims bzhin no/ /de ltar bshad do zhes dam bcas na ci rgya cher 'chad dam/ 'on kyang mdor 'chad ce na/ rgya cher 'chad mi nus la mdor 'chad de/ 'on kyang de'i don mtha' dag 'chad do zhes tshigs su bcad pa gsum pas dam bcas te/'di yi 'jug bya ye shes de 'dra ba/ /zhes bya ba'o/ /de la 'jug par bya ba'i ye shes ni sa bstan pa 'dis ye shes la 'jug pa gang yin pa'o/ /yang dag ma lus zhes bya ba smos pas ni rgya chen po de'i don ji lta ba dang ji snyed yod pa bsdus par ston to/ /ji bzhin gnas zhes bya ba ni de bzhin gshegs pas rnam par gzhag pa'i tshul gyis ji lta ba bzhin du gnas pa'o// gus pa dang bcas par nyon cig ces bya ba de ni bshad zin no/ ji ltar gus pa dang bcas par bya ba ma bshad pas de'i phyir de ston te/ gus dang bcas par sta gon gyis shig dang / /zhes bya ba'o//de la sta gon bya ba ni rnam pa gnyis su rig par bya'o/ /lus kyis sta gon bya ba ni spyod lam gang gis gnas te/ nyan pa'i 'os su gyur pa yin no/ /sems kyis sta gon bya ba ni sems rnam par mi g.yeng ba gang gis 'dzin pa'i 'os su 'gyur ba yin no/ /'dis ni lus kyis sta gon bya ba gus pa dang bcas par bya ba dang /sems kyis sta gon bya ba gus pa dang bcas pa dang / sta gon bya ba rnam pa gnyis la 'dzud do/ /bdag gis legs par bshad ces bya ba ni bdag nyid mngon pa'i nga rgyal med par ston to/ /rgyal ba'i mthus zhes bya ba ni nga rgyal med pa nyid do/ / tshigs su bcad pa'i phyed 'og ma/ dpe ldan 'thad la yi ge mnyam pa yis/ /chos kyi dam pa sgras ni bshad par bya/ /zhes bya bas ci ston zhe na/ gang bshad pa ste/ chos kyi dam pa dang / gang gis she na/ sgra dang / ji lta bur zhe na/ dpe dang / gtan tshigs dang ldan pa dang / gang la brten zhe na/ yi ge rnams la ste/ de thams cad legs par bshad par bya'o zhes ston to/ /de la 'thad pa zhes bya ba ni gtan tshigs dang ldan par rig par bya'o/ /yi ge mnyam ni rnam pa gnyis kyis te/ su'i skad ci 'dra ba des yi ge mnyam pa dang / tshig dang yi ge mang nyung med par ran pa ji snyed dag gis don go ba'o//rgyal ba'i mthus ni bstan zin na/ mthu de ci 'dra ba ma bstan te/ de'i phyir tshigs su bcad pa lnga pas de ston te/ de ni tshig gis shin tu brjod dka' yang / /bde bar gshegs mthu dpag med gang yin pa/ /'od zer lus can de ni bdag la zhugs//de yi mthus na bdag gis bshad par nus/ /zhes bya ba'o/ /de nas sa bshad par rtsom ste/ sa bshad pa 'di la ci zhig bstan par bya zhe na/ gnas pa dang / nges pa'i tshig dang / rab tu gnas pa'o/ /de la gnas gang yin pa dang / gang gi phyir dang /gzhi gang yin pa dang / ci 'dra ba'i sems skyes pas sa dang po la gnas par gyur pa de ni gnas pa yin no// //bam po gsum pa/ gnas de ni kye rgyal ba'i sras dag de la sems can dge ba'i rtsa ba shin tu bsags pa zhes bya ba de la sogs pa bcu pa phrag bzhis ston to//de la re zhig gnas gang yod na sems de skye ba de ni/ sems can dge ba'i rtsa ba shin tu bsags pa/ tshogs shin tu bsags pa / spyod pa shin tu spyad pa/ sangs rgyas 'byung ba shin tu bsnyen bkur byas pa/ chos dkar po shin tu bsdus pa/ dge ba'i bshes gnyen shin tu gzung ba/bsam pa shin tu rnam par dag pa/ lhag pa'i bsam pa rgya chen po dang ldan pa/ rgya chen po la mos pa dang ldan pa/ snying brtse ba dang / snying rje mngon du gyur pa zhes bya ba bcu pa 'dis ston to/ /bsags pa de yang rnam pa dgur rig par bya ste/ tshul khrims 'khor dang bcas pa legs par byas pa nyid kyi phyir/tshogs bsags pa ni gang gi phyir/ tshogs shin tu bsags pa zhes gsungs pa'o/ /ting nge 'dzin 'khor dang bcas pa legs par byas pa nyid kyi phyir spyod pa bsags pa ni gang gi phyir/ spyod pa shin tu spyad pa zhes gsungs pa ste/ dmigs pa la spyod pa'i skabs yin pas/ting nge 'dzin ni spyod pa zhes bya'o/ /thos pa las byung ba'i shes pa legs par byas pa nyid kyi phyir bsnyen bkur byas pa bsags pa ni gang gi phyir/ sangs rgyas 'byung ba shin tu bsnyen bkur byas pa zhes gsungs pa'o/ /bsams pa las byung ba'i shes pas pha rol tu phyin pa la sogs pa dge ba'i chos legs par brtags pa nyid kyi phyir yongs su bsdus pa bsags pa ni gang gi phyir/chos dkar po shin tu bsdus pa zhes gsungs pa'o/ /de kho na rtogs par sbyor ba'i bsgom pa la gdams ngag legs par rnyed pa nyid kyi phyir/ yongs su gzung ba bsags pa ni gang gi phyir/ dge ba'i bshes gnyen shin tu gzung ba zhes gsungs pa'o/ /de kho na rtogs pa thob pa nyid kyi phyir bsam pa rnam par dag pa bsags pa ni gang gi phyir/ bsam pa shin tu rnam par dag pa zhes gsungs pa'o/ /sems can thams cad kyi don bya ba'i lhag pa'i bsam pa nyid kyi phyir shin tu rgyas pa bsags pa ni gang gi phyir/lhag pa'i bsam pa rgya chen po dang ldan pa zhes gsungs pa'o/ /thams cad mkhyen pa nyid kyi ye shes 'dod pa nyid kyi phyir mos pa bsags pa ni gang gi phyir/ rgya chen po la mos pa dang ldan pa zhes gsungs pa'o//snying brtse ba dang snying rje la mang du gnas pa'i phyir mngon du gyur pa bsags pa ni gang gi phyir/ snying brtse ba dang / snying rje mngon du gyur pa zhes gsungs pa'o/ /de la sdug bsngal gyi sdug bsngal nyid dang / 'gyur ba'i sdug bsngal nyid las brtsams pa ni snying brtse ba yin par rig par bya'o//'du byed kyi sdug bsngal nyid la brtsams pa ni snying rje'o/ /de la tshul khrims 'khor dang bcas pa legs par byas pa nyid dang / ting nge 'dzin 'khor dang bcas pa legs par byas pa nyid kyi phyir tshogs bsags pa dang / spyad pa bsags pa dang / bsags pa gnyis ni lhag pa'i tshul khrims dang /lhag pa'i sems kyi bslab pas rab tu phye ba yin no/ /thos pa las byung ba'i shes pa legs par byas pa nyid kyi phyir/ bsnyen bkur byas pa bsags pa dang / bsams pa las byung ba'i shes pas pha rol tu phyin pa la sogs pa dge ba'i chos la legs par brtags pa nyid kyi phyir yongs su bsdus pa bsags pa dang /de kho na rtogs par sbyor ba'i bsgom pa la gdams ngag legs par rnyed pa nyid kyi phyir yongs su gzung ba bsags pa dang / de kho na rtogs pa thob pa nyid kyi phyir bsam pa rnam par dag pa bsags pa bzhi ni lhag pa'i shes rab kyi bslab pas rab tu phye ba yin no//sems can thams cad kyi don bya ba'i lhag pa'i bsam pa nyid kyi phyir shin tu rgyas pa bsags pa dang / thams cad mkhyen pa'i ye shes 'dod pa nyid kyi phyir mos pa bsags pa dang / snying brtse ba dang / snying rje la mang du gnas pa'i phyir/mngon du gyur pa'i bsags pa gsum ni bsam pa de nyid nyan thos dang rang sangs rgyas kyi bsam pa las khyad par du gyur pas rab tu phye ba yin no/ /bcu pa 'di la dge ba'i rtsa ba shin tu bsags pa ni yan lag go/ /bsags pa rnam pa dgu po ni de'i nye ba'i yan lag go//de gnyis ni bsags pa nyid du mtshan nyid 'dra ba'o/ /bsags pa'i rnam pa gzhan gyi phyir mtshan nyid mi 'dra ba'o/ /yan lag bstan pa ni 'du ba'o/ /nye ba'i yan lag bstan pa ni rgyas pa'o/ /de ltar re zhig gnas gang yod na sems skye ba de bstan nas da ni gang gi phyir skye ba de ni/sangs rgyas kyi ye shes la mngon par 'dod par bya ba'i phyir dang / stobs bcu'i stobs thob par bya ba'i phyir dang / mi 'jigs pa chen po thob par bya ba'i phyir dang / sangs rgyas kyi chos mnyam pa nyid thob par bya ba'i phyir dang / 'gro ba thams cad yongs su bskyab par bya ba'i phyir dang /snying brtse ba dang / snying rje chen po rnam par dag par bya ba'i phyir dang / phyogs bcu ma lus par shes par thob par bya ba'i phyir dang / sangs rgyas kyi zhing thams cad thogs pa med pas yongs su sbyang bar bya ba'i phyir dang / dus gsum skad cig gcig gis khong du chud par bya ba'i phyir dang /chos kyi 'khor lo chen po rab tu bskor ba la 'jigs pa med par bya ba'i phyir byang chub sems dpa' rnams kyi sems de skye bar 'gyur te zhes bya bas ston to/ /de la sangs rgyas kyi ye shes ni gang la yongs su shes pa dang / spong ba dang / mngon sum du byed pa dang /bsgom pa bla na med pa yod pa'o/ /gang 'dod pa'i phyir byang chub kyi sems de skye ba'i sangs rgyas kyi ye shes de yang las rnam pa dgu'i bye brag gis rnam pa dgur rig par bya ste/ sangs rgyas kyi stobs kyi ye shes ni dris pa lan 'debs pa'i las can no/ /de yang gnas dang / gnas ma yin pa shes pa'i stobs la de bzhin gshegs pa la zhu ba zhu'o zhes mdo sde'i tshig gi tshul gyis shes par bya ste/gang gi phyir stobs bcu'i stobs thob par bya ba'i phyir zhes gsungs pa'o/ /sangs rgyas kyi mi 'jigs pa'i ye shes ni phas kyi rgol ba tshar gcod pa'i las can te/ gang gi phyir mi 'jigs pa chen po thob par bya ba'i phyir zhes gsungs pa'o/ /sangs rgyas kyi mnyam pa nyid kyi ye shes ni gang zag dang chos la bdag med pa rtogs par bya ba'i phyir gdams ngag sbyin pa'i las can te/ gang gi phyir sangs rgyas kyi chos mnyam pa nyid thob par bya ba'i phyir zhes gsungs pa'o//sangs rgyas kyi yongs su bskyab pa'i ye shes ni bsdu ba'i dngos po bzhi pa dag gis sems can yongs su smin par byed pa'i las can te/ gang gi phyir 'gro ba thams cad yongs su bskyab par bya ba'i phyir zhes gsungs pa'o/ /sangs rgyas kyi rnam par sbyong ba'i ye shes ni de'i gzhi yongs su sbyong ba'i las can te/gang gi phyir snying brtse ba dang / snying rje chen po rnam par dag par bya ba'i phyir zhes gsungs pa'o/ /sangs rgyas kyi ma lus par mkhyen pa'i ye shes ni sangs rgyas kyi spyan gyis 'jig rten la nyin mtshan lan drug tu rnam par gzigs pa'i las can te/gang gi phyir phyogs bcu ma lus par shes pa thob par bya ba'i phyir zhes gsungs pa'o/ /sangs rgyas kyi yongs su sbyong ba'i ye shes ni ye shes dang sems thogs pa med pa'i phyir zhing thams cad du thogs pa med pa dang / nyon mongs pa can ma yin pa'i sprul pa 'jug par byed pa'i las can te/gang gi phyir sangs rgyas kyi zhing thams cad la thogs pa med pa yongs su sbyang bar bya ba'i phyir zhes gsungs pa'o/ /sangs rgyas kyis thugs su chud pa'i ye shes ni sems can de dag gi dus gsum gyi bsam pa dang / bag la nyal skad cig gcig gis mkhyen pa'i las can te/gang gi phyir dus gsum skad cig gcig gis khong du chud par bya ba'i phyir zhes gsungs pa'o/ /sangs rgyas kyi chos kyi 'khor lo rab tu bskor ba'i ye shes ni 'dzam bu'i gling bye ba phrag brgyar cig car du chos kyi 'khor lo rab tu bskor bas rnam par thar pa'i thabs la mkhas pa'i las can te/gang gi phyir chos kyi 'khor lo chen po rab tu bskor ba la 'jigs pa med par bya ba'i phyir zhes gsungs pa'o/ /sems de skye bar 'gyur zhes bya ba ni sngar bstan pa'i nang nas/ kye rgyal pa'i sras dag byang chub sems dpa'i smon lam 'di ni shin tu rnam par nges pa ste zhes gang 'byung ba de yin no//ci'i phyir de sems nyid la brjod kyi shes rab dang sems las byung ba'i chos gzhan la ma yin zhe na/ sems la yongs su shes pa la sogs pa rnam pa bzhi yod pa'i phyir ro/ /da ni gzhi gang las sems de skye bar 'gyur ba de ston te/ snying rje chen po sngon du 'gro ba can dang /shes rab dang ye shes kyi dbang du gyur pa dang / thabs mkhas pas yongs su gzung ba dang / bsam pa dang / lhag pa'i bsam pas rab tu bstan pa dang / de bzhin gshegs pa'i stobs dpag tu med pa dang ldan pa dang / snying stobs kyi stobs dang / blo'i stobs kyis shin tu rnam par phye ba'i rnam par 'byed pa dang /rang byung gi ye shes dang mthun pa dang / sangs rgyas kyi chos thams cad la shes rab dang / ye shes kyi gdams ngag yang dag par tshol ba dang / chos kyi dbyings kyis klas pa dang / nam mkha'i khams ltar gnas shing phyi ma'i mtha'i mur thug pa zhes bya ba bcu pa 'dis ston to//de la snying rje chen po sngon du 'gro ba can zhes bya ba ni snying rje chen po nyid rnam pa dgur rig par bya ste/ phra ba'i sdug bsngal nyid shes pa'i dbang gis skyes pa nyid kyi phyir dbang du gyur pa chen po nyid ni gang gi phyir shes rab dang ye shes kyi dbang du gyur pa zhes gsungs pa'o//de la skabs 'dir shes rab ni rang dang spyi'i mtshan nyid rab tu dbye ba'i rnam pa yin/ ye shes ni rgyu dang 'bras bu'i 'jug pa kun nas nyon mongs pa dang rnam par byang ba'i rnam pa yin par rig par bya'o/ /sems can sdug bsngal ba yongs su bskyab pa'i thabs la mkhas pa yongs su zin pa nyid kyi phyir/yongs su 'dzin pa chen po nyid ni gang gi phyir thabs mkhas pas yongs su gzung zhes gsungs pa'o/ /de'i dus dang 'khor ba ji srid par sems can gyi don bya bar khas blangs pas 'phel ba nyid kyi phyir rab tu rton pa chen po nyid ni gang gi phyir/ bsam pa dang lhag pa'i bsam pas rab tu brtan pa zhes gsungs pa'o//de bzhin gshegs pa'i stobs dpag tu med pa 'bras bur yongs su 'dzin pa nyid kyi phyir dpag tu med pa chen po nyid ni gang gi phyir/ de bzhin gshegs pa'i stobs dpag tu med pa dang ldan pa zhes gsungs pa'o/ /rgya chen po la mos pa dang zab mo shes pas mi mthun pa'i phyogs las rgyal ba nyid kyi phyir/shin tu rnam par phye pa'i rnam par 'byed pa chen po nyid ni gang gi phyir/ snying stobs kyi stobs dang / blo'i stobs kyis shin tu rnam par phye ba'i rnam par 'byed pa zhes gsungs pa'o/ /rang gi mngon par rdzogs par byang chub pa la gzhol ba nyid kyi phyir rjes su mthun pa chen po nyid ni gang gi phyir/rang byung gi ye shes dang mthun pa zhes gsungs pa'o/ /khyad par du 'gro ba'i man ngag yongs su tshol ba nyid kyi phyir yang dag par tshol ba chen po nyid ni gang gi phyir/ sangs rgyas kyi chos thams cad la shes rab dang /ye shes kyi gdams ngag yang dag par tshol ba zhes gsungs pa'o/ /yon tan yongs su 'dzin pa gtso bar byed pa nyid kyi phyir dam pa chen po nyid ni gang gi phyir/ chos kyi dbyings dam pa dang ldan pa zhes gsungs pa'o/ /'bras bu yid du 'ong pa'i rgyus zad mi shes pa dang / mya ngan las 'das pa la gzhol ba nyid kyi phyir gnas pa dang mthar phyin pa chen po nyid ni gang gi phyir/nam mkha'i khams ltar gnas shing phyi ma'i mtha'i mur thug pa zhes gsungs pa'o/ /da ni ci 'dra ba'i sems de skye bar 'gyur ba de ston to/ /'di 'dra ba'i sems de skye bar 'gyur ba ste/ sems skye ba de skyes ma thag tu byang chub sems dpa' so so'i skye bo las shin tu 'das pa yin/byang chub sems dpa'i skyon med par zhugs pa yin/ de bzhin gshegs pa'i rigs su skyes pa yin/ gnas brjod pas kha na ma tho ba med pa yin/ 'jig rten gyi 'gro ba thams cad las phyir log pa yin/ 'jig rten las 'das pa'i 'gro bar zhugs pa yin/ byang chub sems dpa'i chos nyid la gnas pa yin/ byang chub sems dpa'i sa la rab tu gnas pa yin/ dus gsum mnyam pa nyid du rtogs pa yin/ de bzhin gshegs pa'i rigs su nges shing rdzogs pa'i byang chub la gzhol ba yin zhes bya ba'o//de la so so'i skye bo'i sa las shin tu 'das pa ni 'phags pa nyid de 'jig rten las 'das pa'i lam thob par ston to/ /shin tu 'das pa de yang rnam pa brgyad du rig par bya ste/ mngal du zhugs pa dang 'dra bas 'jig rten las 'das pa'i sems dang por mngon par grub pa nyid kyi phyir/zhugs pas shin tu 'das pa ni gang gi phyir/ byang chub sems dpa'i skyon med par zhugs pa yin zhes gsungs pa'o/ /rigs su skyes pa dang 'dra bas rigs kyis shin tu 'das pa ni gang gi phyir/ de bzhin gshegs pa'i rigs su skyes pa yin zhes gsungs pa'o//'dra ba'i bu dang mthun pas theg pa chen po'i spyod pa las skyes pa ni gang gi phyir gnad brjod pas shin tu 'das pa ni gang gi phyir/ gnad brjod pas kha na ma tho ba med pa yin zhes gsungs pa'o/ /'gro ba gzhan du skyes pa dang mthun pas 'jig rten dang 'jig rten las 'das pa'i 'gro bsam bsdus la/bsdus pa'i phyir 'gro ba las shin tu 'das pa ni gang gi phyir/ 'jig rten gyi 'gro ba thams cad las phyir log pa yin/ 'jig rten las 'das pa'i 'gro bar zhugs pa yin zhes gsungs pa'o/ /lus kyi rang bzhin dang mthun pas snying rje'i bdag nyid kyis gzhan gyi dgos pa bdag gi dgos pa yin pa nyid kyi phyir chos nyid kyis shin tu 'das pa ni gang gi phyir/byang chub sems dpa'i chos nyid la gnas pa yin zhes gsungs pa'o/ /btsas nas gnas pa dang mthun pas 'khor ba yongs su mi gtong la kun nas nyon mongs pa med pa'i thabs la mkhas pas gnas pa nyid kyi phyir gnas pa shin tu 'das pa ni gang gi phyir/byang chub sems dpa'i gnas la rab tu gnas pa yin zhes gsungs pa'o/ /btsas nas 'tsho ba dang mthun pas stong pa nyid rtogs pa'i 'phags pa'i shes rab kyi phyir mnyam pa nyid kyis shin tu 'das pa ni gang gi phyir/ dus gsum mnyam pa nyid du rtogs pa yin zhes gsungs pa'o//phun sum tshogs pa dang mthun pas sangs rgyas kyi rigs las yongs su mi nyams shing mya ngan las 'das pa nyid kyi phyir nges pas shin tu 'das pa na gang gi phyir/ de bzhin gshegs pa'i rigs su nges shing rdzogs pa'i byang chub la gzhol ba ma yin zhes gsungs pa'o//de ltar thun mong ma yin pa nyid kyi phyir/ so so'i skye bo las byang chub sems dpa'i skye ba mngal du zhugs pa dang mi 'dra ba nyid du yang bstan te/ go rims bzhin du nyon mongs pa dang bcas pa dang nyon mongs pa med pa zhes bya ba'i tha tshig go/ /rigs mi 'dra ba nyid dang gnas btsun pa mi 'dra ba nyid dang /'gro ba mi 'dra ba nyid dang / lus mi 'dra ba nyid dang / gnas mi 'dra ba nyid dang / 'tsho ba mi 'dra ba nyid dang / phun sum tshogs pa mi 'dra ba nyid kyang de bzhin te/ 'di ni re zhig bshad pa 'di la gnas pa zhes bya'o/ /de skad du/ kye rgyal ba'i sras dag chos 'di lta bu la gnas pa'i byang chub sems dpa' ni byang chub sems dpa'i sa rab tu dga' ba la mi g.yo ba'i tshul gyis rab tu gnas pa yin no zhes gsungs so//da ni sa'i nges pa'i tshig ston te/ ji ltar ston zhe na/ mchog tu dga' ba mang bas rab tu dga' ba yin no zhes bstan pa'i phyir mchog tu dga' ba ci 'dra ba dang dmigs pa ci 'dra bas sa 'di la rab tu dga' ba yin pa de bcu pa gcig pa dang /gnyis kyis ston to/ /kye rgyal ba'i sras dag de la byang chub sems dpa'i sa rab tu dga' ba la gnas pa'i byang chub sems dpa' ni mchog tu dga' ba mang ba yin/dang ba mang ba yin/ dga' ba mang ba yin/ rangs pa mang ba yin/ mgu ba mang ba yin/ dga' rlabs mang ba yin/ spro ba mang ba yin/ mi 'khrugs pa mang ba yin/ rnam par 'tshe ba med pa mang ba yin/ khro ba med pa mang ba yin no/ /kye rgyal ba'i sras dag de ltar byang chub sems dpa'i sa rab tu dga' ba la gnas pa'i byang chub sems dpa' ni sangs rgyas bcom ldan 'das rnams dang /sangs rgyas kyi chos rnams dang / byang chub sems dpa' rnams dang / byang chub sems dpa'i spyod pa rnams dang / pha rol tu phyin pa rnam par dag pa dang / byang chub sems dpa'i sa'i khyad par dang /byang chub sems dpa'i mi 'phrogs pa nyid dang / de bzhin gshegs pa'i gdams ngag rjes su bstan pa dang / sems can gyi don rgya cher yang dag par 'thob par byed pa dang / de bzhin gshegs pa'i ye shes la 'jug pa'i sbyor ba rjes su dran zhing rab tu dga' ba yin no//phyir zhing mchog tu dga' ba dang ldan pa yin no/ /bdag ni 'gro ba thams cad kyi yul las phyir log go/ /bdag ni sangs rgyas dang nye ba la zhugs so/ /bdag ni byis pa so so'i skye bo'i sa las ring du gyur to/ /bdag ni ye shes kyis dang nye bar gyur to/ / bdag ni ngan song ngan 'gro log par ltung ba thams cad kyi rgyun chad pa'o/ /bdag ni sems can thams cad kyi ston par 'gyur ro/ /bdag ni de bzhin gshegs pa rnams mthong ba dang nye bar gyur to/ /bdag ni sangs rgyas kyi yul la yang dag par byung ngo / /bdag ni byang chub sems dpa' thams cad kyi mnyam pa nyid dang ldan par gyur to//bdag ni 'jigs pa dang / dngang ba dang / bag tsha ba dang bral lo zhes mchog tu dga' ba bskyed do zhes 'byung ngo / /mchog tu dga' ba zhes bya ba ni sems mgu ba dang / yid bde ba dang yid rangs pa'o/ /de yang rnam pa dgur rig par bya ste/ dkon mchog gsum po dag la dang ba'i mchog tu dga' ba ni gang gi phyir/ dang ba mang ba yin zhes gsungs pa'o/ /dmigs pa la dga' bas tshim pa nyid kyi phyir dga' ba'i mchog tu dga' ba ni gang gi phyir dga' ba mang ba yin zhes gsungs pa'o/ /bdag gi rtogs pa'i khyad par la rtog pa nyid kyi phyir rangs pa'i mchog tu dga' ba ni gang gi phyir/rangs pa mang ba yin zhes gsungs pa'o/ /rang gi lus dang sems la phan btags te/ brtas pa nyid kyi phyir mgu ba'i mchog tu dga' ba ni gang gi phyir/ mgu ba mang ba yin zhes gsungs pa'o/ /rang gi lus dang sems la khyab par phan btags pa nyid kyi phyir dga' rlabs kyi mchog tu dga' ba ni gang gi phyir/dga' rlabs mang ba yin zhes gsungs pa'o/ /byang chub la nye bar gyur par rtog pa nyid kyi phyir spro ba'i mchog tu dga' ba ni gang gi phyir/ spro ba mang ba yin zhes gsungs pa'o/ /rang gi sems kyi rgyud yongs su smin par bya ba'i phyir/'bel ba'i gtam rnam par gtan la 'bebs pa'i dus na 'khrugs pa med pa de nyid kyi phyir mi 'khrugs pa'i mchog tu dga' ba ni gang gi phyir/ mi 'khrugs pa mang ba yin zhes gsungs pa'o/ /gzhan yang yongs su smin par bya ba'i phyir sems can sdud pa'i dus na snying rje dang des pa gnyis kyis rnam par mi 'tshe ba'i mchog tu dga' ba ni gang gi phyir/rnam par 'tshe ba med pa mang ba yin zhes gsungs pa'o/ /de log par zhugs pa'i dus na bzod pas mi khro ba'i mchog tu dga' ba ni gang gi phyir/ khro ba med pa mang ba yin zhes gsungs pa'o/ / de'i 'og tu dmigs pa gang gis rab tu dga' ba yin pa de bcu pa gnyis pa dang / gsum pas ston to/ /dmigs pa de yang rnam pa gnyis te/ ma 'ongs pa na thob par bya ba dang da ltar byung ba na thob pa'o/ /de la ma 'ongs pa na thob par bya ba'i dbang du mdzad nas/ sangs rgyas bcom ldan 'das rnams rjes su dran zhing mchog tu dga' ba yin zhes rgya cher gsungs so//ji ltar rjes su dran zhe na/ sangs rgyas bcom ldan 'das rnams ni de 'dra ste/ bdag kyang de 'dra bar 'gyur ro snyam du yid la byed pa'o/ /sangs rgyas rjes su dran pa de yang rnam pa dgur rig par bya ste/chos las sangs rgyas rjes su dran pa ni gang gi phyir sangs rgyas kyi chos rnams zhes gsungs pa'o/ /byang chub sems dpa' las sangs rgyas rjes su dran pa ni gang gi phyir/ byang chub sems dpa' rnams zhes gsungs pa'o/ /spyod pa las sangs rgyas rjes su dran pa ni gang gi phyir/ byang chub sems dpa'i spyod pa rnams zhes gsungs pa'o/ /rnam par dag pa las sangs rgyas rjes su dran pa ni gang gi phyir/ pha rol tu phyin pa rnam par dag pa zhes gsungs pa'o/ /khyad par can nyid las sangs rgyas rjes su dran pa ni gang gi phyir/ byang chub sems dpa'i sa'i khyad par zhes gsungs pa'o//mi 'phrogs pa nyid las sangs rgyas rjes su dran pa ni gang gi phyir/ byang chub sems dpa' mi 'phrogs pa nyid ces gsungs pa'o/ /gdams ngag rjes su bstan pa las sangs rgyas rjes su dran pa ni gang gi phyir/ de bzhin gshegs pa'i gdams ngag rjes su bstan pa zhes gsungs pa'o//yang dag par thob par byed pa las sangs rgyas rjes su dran pa ni gang gi phyir/ sems can gyi don yang dag par thob par byed pa zhes gsungs pa'o/ /'jug pa las sangs rgyas rjes su dran pa ni gang gi phyir/ de bzhin gshegs pa'i ye shes la 'jug pa'i sbyor ba rjes su dran zhing mchog tu dga' ba yin zhes gsungs pa'o//de la rjes su dran pa dang po dang lhan cig pa'i dran pa gnyis ni sangs rgyas dang chos la ste/ sangs rgyas rnams ni de 'dra ste/ bdag kyang de 'dra bar 'gyur ro snyam du sems pa ni sangs rgyas rjes su dran pa'o/ / sangs rgyas kyi chos kyang rjes su dran pa ni sangs rgyas kyi chos rjes su dran pa'i phyir ro/ /gnyis ni de'i rigs la ste/ byang chub sems dpa' las sangs rgyas rjes su dran pa ni byang chub sems dpa' rjes su dran pa'i phyir ro/ /spyod pa las sangs rgyas rjes su dran pa ni byang chub sems dpa'i spyod pa rjes su dran pa'i phyir te/go rims bzhin no/ /lhag ma rnam par dag pa las sangs rgyas rjes su dran pa ni pha rol tu phyin pa rnam par dag pa rjes su dran pa'i phyir ro/ /khyad par can nyid las sangs rgyas rjes su dran pa ni byang chub sems dpa'i sa'i khyad par rjes su dran pa'i phyir ro/ /mi 'phrogs pa nyid las sangs rgyas rjes su dran pa ni byang chub sems dpa'i mi 'phrogs pa nyid rjes su dran pa'i phyir ro//gdams ngag rjes su bstan pa las sangs rgyas rjes su dran pa ni/ de bzhin gshegs pa'i gdams ngag rjes su bstan pa rjes su dran pa'i phyir ro/ /yang dag par thob par byed pa las sangs rgyas rjes su dran pa ni sems can gyi don yang dag par thob par byed pa rjes su dran pa'i phyir ro//'jug pa las sangs rgyas rjes su dran pa ni de bzhin gshegs pa'i ye shes la 'jug pa'i sbyor ba rjes su dran pa'i phyir ro/ /rab tu phye ba gang yin pa de ni byang chub sems dpa'i rigs kyi spyod pa'o//ji lta bus rab tu phye ba de ni rjes su dran pa rnams su rig par bya'o/ /gang gis rab tu phye zhe na/ de ni pha rol tu phyin pa rnam par dag pas rab tu phye ba'o/ /byang chub sems dpa'i spyod pa de ji ltar rab tu phye zhe na/ sa'i khyad par du 'gro ba dang / sa'i mthar phyin par 'gro ba dang /de la gdams ngag ma lus par rnyed pa dang / 'bras bur yod par sems can gyi don la sbyor ba dang / de bzhin gshegs pa'i sa la 'jug pa'i sbyor bas rab tu phye ba'o/ /'dir yang spyod pa la sangs rgyas rjes su dran pa ni yan lag dang / nye ba'i yan lag tu rig par bya'o/ /de'i 'og tu de ltar byung ba na thob pa'i dmigs pa'i dbang du mdzad nas phyir zhing mchog tu dga' ba dang ldan pa yin te/bdag ni so so'i skye bo thams cad kyi yul las phyir log go zhes rgya cher gsungs te/ so so'i skye bo longs spyod las phyir log pa'i phyir ro/ /phyir log pa de yang rnam pa dgu ste/'jug pas phyir log pa ni gang gi phyir/ bdag ni sangs rgyas dang nye ba la zhugs so zhes gsungs pa'o/ /ring ba'i dngos pos phyir log pa ni gang gi phyir/ bdag ni byis pa so so'i skye bo'i sa las ring du gyur to zhes gsungs pa'o/ /nye ba'i dngos pos phyir log pa ni gang gi phyir/ bdag ni ye shes kyis dang nye bar gyur to zhes gsungs pa'o/ /rgyun chad pas phyir log pa ni gang gi phyir/ bdag ni ngan song ngan 'gro log par ltung ba thams cad kyi rgyun chad pa'o zhes gsungs pa'o/ /ston pas phyir log pa ni gang gi phyir/ bdag ni sems can thams cad kyi ston par gyur to zhes gsungs pa'o//mthong ba dang nye bas phyir log pa ni gang gi phyir/ bdag ni de bzhin gshegs pa mthong ba dang nye bar gyur to zhes gsungs pa'o/ /'byung bas phyir log pa ni gang gi phyir/ bdag ni sangs rgyas kyi yul la yang byung ngo zhes gsungs pa'o/ /mnyam pa nyid kyi phyir log pa ni gang gi phyir/bdag ni byang chub sems dpa' thams cad kyi mnyam pa nyid dang ldan par gyur to zhes gsungs pa'o/ /bral bas phyir log pa ni gang gi phyir/ bdag ni 'jigs pa dang / bag tsha ba dang bral lo zhes gsungs pa'o/ /de la gcig ste 'jug pas phyir log pa ni longs spyod mi 'dra bas rab tu phye ba'o//gnyis te ring ba'i dngos pos phyir log pa dang / nye ba'i dngos pos phyir log pa ni lus mi 'dra bar rab tu phye ba'o/ /lhag ma drug po rgyun chad pas phyir log pa dang / ston pas phyir log pa dang / mthong ba dang nye bas phyir log pa dang / 'byung bas phyir log pa dang /mnyam pa nyid kyis phyir log pa dang / bral bas phyir log pa ni sgrub pa mi 'dra ba nyid dang / gcig gi grogs su gcig gyur pa'i dngos po mi 'dra ba nyid dang / gzhan gyi dbang du gyur pa mi 'dra ba nyid dang / yul mi 'dra ba nyid dang / 'tsho ba mi 'dra ba nyid dang / phun sum tshogs pa mi 'dra ba nyid kyis rab tu phye ba ste/go rims bzhin no/ /de la 'jigs pa ni mi 'dod par ltung du dogs pa ste/ sems pa yid mi bde ba dang mtshungs par ldan pa'o/ /de yang sems dang lus 'gyur bar byed pa'i bye brag gis dngang ba dang bag tsha ba zhes bya'o//de'i 'og tu 'jigs pa de dag gang yin pa dang / ji ltar de gzhi dang bral ba dang med pa de ston te/ kye rgyal ba'i sras dag ji ltar byang chub sems dpa' byang chub sems dpa'i sa rab tu dga' ba 'di thob ma thag tu 'jigs pa gang dag yin pa 'di lta ste/ 'tsho ba med pas 'jigs pa'am/tshigs su bcad pa med pas 'jigs pa'am/ 'chi bas 'jigs pa'am/ ngan 'gros 'jigs pa'am/ 'khor gyi nang du bag tsha bas 'jigs pa de dag thams cad de la med pa yin no/ /de ci'i phyir zhe na/ 'di ltar de ni bdag gi 'du shes dang bral bas/ bdag phongs par sems pa yang med na/yo byad thams cad la phongs par sems pa lta ga la yod de/ de'i phyir de la 'tsho ba med pas 'jigs pa med pa yin no/ /de ni su las kyang rim gror bya ba cung zad tsam yang re ba med kyi/ gzhan du na bdag nyid kyis sems can de dag la yo byad mang po thams cad kyis bsdu bar bya'o snyam du sems te/de'i phyir de la tshigs su bcad pa med pas 'jigs pa med pa yin no/ /de bdag tu lta ba dang bral bas bdag gi 'du shes med de/ de'i phyir de la 'chi bas 'jigs pa med pa yin no/ /bdag shi nas kyang gdon mi za bar sangs rgyas dang / byang chub sems dpa' dag dang mi 'bral bar 'gyur ro snyam ste/de'i phyir de la ngan 'gros 'jigs pa med pa yin no/ /bdag gi bsam pa dang mtshungs pa yang 'jig rten na su yang med na/ ches lhag par ltag la yod snyam ste/ de'i phyir de la 'khor gyi nang du bag tsha ba'i 'jigs pa med pa yin no zhes bya'o/ /'di dag ni sa'i mi mthun pa'i phyogs yin pa'i phyir dang /sa'i legs pa'i khyad par yongs su bstan pa'i phyir ro/ /'jigs pa de dag las dang po dang / gnyis pa dang / tha ma dang / gsum ni lus dang / ngag dang / sems kyis myong ba'i gnas yin no/ /gsum pa dang bzhi pa ni 'dod pa dang mi 'dod pa bde 'gro dang ngan 'gro'i lus dang 'bral ba dang /'phrad pa'i gnas yin pas lus kyi gnas te/ de'i phyir lnga kho na'o/ /brdeg pa dang bcing ba la sogs pa'i 'jigs pa rnams kyang 'di dag gi nang du 'dus pa'i phyir ro/ /'jigs pa'i gzhi ni mdor bsdu na gnyis su bstan te/ leg pa'i shes bya la mngon par zhen pa'i 'du shes dang /lta ba dang / sred pa la mngon par zhen pa'i mtshan nyid dang / dge ba'i rtsa ba chung ba nyid de/ de'i gnyen po ni 'di ltar de ni bdag gi 'du shes dang bral bas/ bdag la phangs par sems pa yang med na/ yo byad thams cad la phangs par sems pa ltag la yod ces bya ba dang /de ni su las kyang rim gror bya ba cung zad tsam yang re ba med kyi/ gzhan du na bdag nyid kyis sems can de dag la yo byad mang po thams cad kyis sdud par bya'o snyam du sems zhes bya ba dang / de bdag tu lta ba dang bral bas bdag gi 'du shes med ces bya ba dang / bdag shi nas kyang gdon mi za bar sangs rgyas dang /byang chub sems dpa' dag dang mi bral bar 'gyur snyam zhes bya ba dang bdag gi bsam pa dang mtshungs pa yang 'jig rten na su yang med na/ ches lhag pa lta ga la yod snyam zhes bya ba'o / /kye rgyal ba'i sras dag de ltar 'jigs pa dang / dngang ba dang / bag tsha ba dang /spu zing zhes byed pa med pa'i byang chub sems dpa' ni snying rje chen po sngon du 'gro ba'i phyir lhag pa'i bsam pa ma nyams pa dang / mi dma' bas dge ba'i rtsa ba thams cad yang dag par bsdu ba'i phyir rab tu sbyor bar byed de zhes bya ba la de ltar 'jigs pa dang / dngang ba dang / bag cha ba dang / spu zing zhes byed pa med ces bya bas ni sngar 'jigs pa bstan pa nyid kyi lus 'byung ba'i bye brag can ston to//ma nyams pa dang mi nyams zhes bya ba ni nyon mongs pa dang / theg pa dman pa yid la byed pa dang ma 'dres pa'i phyir ro/ /dge ba'i rtsa ba thams cad yang dag par bsdu ba'i phyir zhes bya ba ni gang dag sa des bsdus pa rnams so //sbyor bar byed pa de yang ji lta bu zhe na/ bsam pa phun sum tshogs pa dang / sbyor ba phun sum tshogs pa dang / yongs su bsngo ba phun sum tshogs pa dang / phun sum tshogs pa rnam pa gsum gyis te/ de ni bcu pa gsum gyis ston to/ /dad pa'i dbang gi phyir dang / dang ba mang ba'i phyir dang /mos pa rnam par dag pa'i phyir dang / srid par 'dzin pa mang ba'i phyir dang / snying brtse ba dang / snying rje mngon par bsgrub pa'i phyir dang / byams pa chen po dang ldan pa'i phyir dang / yid yongs su mi skyo ba'i phyir dang / ngo tsha shes shing khrel yod pa'i rgyan gyi phyir dang /bzod cing des pa dang ldan pa'i phyir dang / de bzhin gshegs pa dgra bcom pa yang dag par rdzogs pa'i sangs rgyas kyi bstan pa la gus shing rim gro byed pa mang ba'i phyir zhes bya ba bcu pa 'dis ni bsam pa phun sum tshogs pa ston to/ /de la dngos po gang dag la dad pa de dbang du byed pa de'i bye brag gis dbang de rnam pa dgur rig par bya ste/dkon mchog gsum po dag la dang ba'i dad pa'i dbang ni gang gi phyir dang ba mang ba'i phyir zhes gsungs pa'o/ /bdag gis rtogs pa la rnam par dag pa'i dad pa'i dbang ni gang gi phyir/ mos pa rnam par dag pa'i phyir zhes gsungs pa'o//gzhan gyis rtogs pa la srid par 'dzin pa'i dad pa'i dbang ni gang gi phyir srid par 'dzin pa mang ba'i phyir zhes gsungs pa'o/ /sems can yongs su smin par bya ba'i phyir brtse ba dang / snying rje'i dad pa'i dbang dang / byams pa'i dad pa'i dbang ni gang gi phyir/ snying brtse ba dang / snying rje mngon par bsgrub pa'i phyir dang /byams pa chen po dang ldan pa'i phyir zhes gsungs pa ste/ snying brtse ba dang / snying rje ni sdug bsngal sel ba'i rnam pa yin no/ /mngon par sgrub pa ni phyir zhing mngon sum du byed par rig par bya'o/ /byams pa ni bdag gis de dag bskyab bo snyam pa'i rnam pa de lta bu yin no//de yongs su smin par bya ba de lta bu tshe rabs du mar rab tu bsgrubs pa'i phyir yun ring du 'khor bar khas blangs pas yongs su mi skyo ba'i dad pa'i dbang ni gang gi phyir/ yid yongs su mi skyo ba'i phyir zhes gsungs pa'o/ /nyon mongs pa can ma yin par 'khor bar bya ba'i phyir/ ser sna la sogs pa pha rol tu phyin pa'i mi mthun pa'i phyogs kyi chos la 'dzem pas chu gang dang ngo tsha shes shing khrel yod pa'i dad pa'i dbang ni gang gi phyir/ngo tsha shes shing khrel yod pa'i rgyan gyi phyir zhes gsungs pa'o/ /chos mthun pa la rnam par tho mi 'tshams pas des pa'i dad pa'i dbang ni gang gi phyir bzod cing des pa dang ldan pa'i phyir zhes gsungs pa'o//de la bsti stang byed pas bstan pa la gus pa'i dad pa'i dbang ni gang gi phyir/ de bzhin gshegs pa dgra bcom pa yang dag par rdzogs pa'i sangs rgyas bstan pa la gus shing rim gro byed pa'i phyir zhes gsungs pa'o/ /tha ma'i gsum pos ni gang gis te pha rol tu phyin pa rnams dang /gang dag gis te grogs dag dang / gang la ste bstan pa la rab tu sbyor ba de yongs su bstan to/ /de lta bu re zhig bsam pa phun sum tshogs pas brtson par byed pa'o/ /sbyor ba phun sum tshogs pa ji lta bu zhe na/ nyin mtshan du dge ba'i rtsa ba sogs pas mi ngoms pa'i phyir dang /dge ba'i bshes gnyen la brten pa'i phyir dang / chos kyi kun dga' la dga' ba'i phyir dang / mang du thos pa tshol bas ngoms mi myong ba'i phyir dang / ji skad thos pa'i chos la tshul bzhin rtogs pa'i phyir dang / yid gnas med pa'i phyir dang / rnyed pa dang /bkur sti dang / tshigs su bcad pa la chags pa med pa'i phyir dang / yo byad la phangs par sems shing mngon par dga' ba med pa'i phyir dang / sems bskyed pa rin po che lta bu ngoms pa med par mngon par bsgrub pa'i phyir zhes bya ba 'dis sbyor ba phun sum tshogs pa ston to/ /dge ba'i rtsa ba sogs pa la rgyun mi 'chad par mngon par brtson pa nyid ni gang gi phyir/nyin mtshan du dge ba'i rtsa ba sogs pas mi ngoms pa'i zhes gsungs pa'o/ /sogs pa de yang rnam pa brgyad du rig par bya ste/ chud mi za bar bya ba'i phyir bsnyen bkur byed pa sogs pa ni gang gi phyir/ dge ba'i bshes gnyen la brtan pa'i phyir zhes gsungs pa'o//de nas 'bel ba'i gtam rnam par gtan la 'bebs pa'i dga' bas chos kyi kun dga' ba sogs pa ni gang gi phyir/ chos kyi kun dga' la dga' ba'i phyir zhes gsungs pa'o/ /mang du thos pa la sogs pa ni gang gi phyir/ mang du thos pa tshol ba la ngoms mi myong ba'i phyir zhes gsungs pa'o//rtog pa la sogs pa ni gang gi phyir/ ji skad thos pa'i chos la tshul bzhin rtog pa'i phyir zhes gsungs pa'o/ /gnas med pa la sogs pa ni gang gi phyir/ yid gnas med pa'i phyir zhes gsungs pa'o/ /mang du thos pa la sogs pa gsum bshad ma thag pa gsum po de dag ni thos pa dang /bsam pa dang bsgom pa rnams dang go rims bzhin no/ /gnas med pa ni 'dir bsam gtan gyi ro myang ba med par rig par bya'o/ /byang chub sems dpa'i bslab pa rnams la bar du gcod pa yongs su spang ba'i phyir/ rnyed pa dang /bkur sti thob pa dang / ma thob pa la lhag par chags pa med pa sogs pa dang / mngon par dga' ba med pa sogs pa ni gang gi phyir/ rnyed pa dang / bkur sti dang / tshigs su bcad pa la chags pa med pa'i phyir dang / yo byad la phangs par sems shing mngon par dga' ba med pa'i phyir zhes gsungs pa'o//'jig rten las 'das pa'i sems rgyun mi 'chad par mngon du byed pas rin po che lta bu'i sems sogs pa ni gang gi phyir/ sems bskyed pa rin po che lta bu ngoms pa med par mngon par bsgrub pa'i phyir zhes gsungs pa ste/de lta bu ni sbyor ba phun sum tshogs pas brtson par byed pa'o/ / yongs su bsngo ba phun sum tshogs pas brtson par byed pa ji lta bu zhe na/ thams cad mkhyen pa'i sa mngon par 'dod pa'i phyir dang / de bzhin gshegs pa'i stobs dang / mi 'jigs pa dang / sangs rgyas kyi chos ma 'dres pa dag la lhag par dmigs pa'i phyir dang /pha rol tu phyin pa chags pa med pa yongs su tshol ba'i phyir dang / sgyu dang g.yo yongs su spangs pa'i phyir dang / ji skad smras pa de ltar byed pa'i phyir dang / rtag tu rgyun mi 'chad par bden pa'i tshig lhur len pa'i phyir dang / de bzhin gshegs pa'i rigs sun par mi byed pa'i phyir dang / byang chub sems dpa'i bslab pa mi gtong ba dang / ri'i dbang po'i rgyal po ltar thams cad mkhyen pa nyid kyi sems mi g.yos pa'i phyir dang / 'jig rten pa'i bya ba thams cad kyang mi 'dod la/ 'jig rten las 'das pa'i lam dang yang ldan pa'i phyir dang /byang chub kyi yan lag gi tshogs sogs pa la chog mi shes pa'i phyir dang / rtag tu rgyun mi 'chad par gong nas gong du khyad par du 'phags pa yongs su tshol ba'i phyir ro zhes bya ba 'dis ni yongs su bsngo ba phun sum tshogs pa ston to/ /de la thams cad mkhyen pa'i sa mngon par 'dod pa ni yan lag go//de bzhin gshegs pa'i stobs la dmigs pas thams cad mkhyen pa'i sa mngon par 'dod pa dang / rnam par dag pas thams cad mkhyen pa'i sa mngon par 'dod pa dang / yongs su spong bas thams cad mkhyen pa'i sa mngon par 'dod pa dang / ji skad smras pa de ltar byed pa nyid kyis thams cad mkhyen pa'i sa mngon par 'dod pa dang / rjes su srung bas thams cad mkhyen pa'i sa mngon par 'dod pa dang / rigs sun par mi byed pas thams cad mkhyen pa'i sa mngon par 'dod pa dang / mi gtong bas thams cad mkhyen pa'i sa mngon par 'dod pa dang /mi g.yos pas thams cad mkhyen pa'i sa mngon par 'dod pa dang / mi 'dor la ldan pa nyid kyis thams cad mkhyen pa'i sa mngon par 'dod pa dang / sogs pas thams cad mkhyen pa'i sa mngon par 'dod pa dang / yongs su tshol bas thams cad mkhyen pa'i sa mngon par 'dod pa ni nye ba'i yan lag go//de la thams cad mkhyen pa'i sa mngon par 'dod pa ni gang mngon par 'dod pa'o/ /de bzhin gshegs pa'i stobs dang / mi 'jigs pa dang / sangs rgyas kyi chos ma 'dres pa la lhag par dmigs pa ci 'dra ba mngon par 'dod pa'o//pha rol tu phyin pa chags pa med pa yongs su tshol ba ni ji ltar mngon par 'dod pa'o/ /de dag la brten nas thams cad mkhyen pa'i sa mngon par 'dod pa la sogs pa mngon par 'dod pa gsum rig par bya'o/ /pha rol tu phyin pa chags pa med pa yongs su tshol ba ste/ ji ltar mngon par 'dod pa de'i rab tu dbye ba la brten nas mngon par 'dod pa gzhan rnams rig par bya'o//de la sbyin pa'i pha rol tu phyin pa'i dri ma ni gnyis te/ sgyu dang g.yo'o/ /des slong ba zlog par byed cing khas mi len to/ /ji skad smras pa bzhin du mi byed pa ni des na khas blangs kyang sbyin par mi byed de/de gnyis kyi gnyen por sgyu dang g.yo yongs su spangs pa'i phyir dang / ji skad smras pa de ltar byed pa'i phyir zhes bya ba gsungs so/ /tshul khrims kyi pha rol tu phyin pa'i dri ma ni gcig ste/ bden pa'i tshig rjes su mi bsrung ba'o/ /des ni yang dag par blangs te dam bcas pa yang zhig par byed la/zhig par byas pa yang 'chab par byed de/ de'i gnyen por rtag tu rgyun mi 'chad par bden pa'i tshig lhur len pa'i phyir zhes bya ba gsungs so/ /bzod pa'i pha rol tu phyin pa'i dri ma ni gcig ste/ de bzhin gshegs pa'i rigs sun par byed pa'o//ji ltar na byang chub sems dpa' de bzhin gshegs pa'i rigs sun par byed pa yin zhe na/ gzhan la rnam par tho 'tshams pa'i las kyis so/ /gzhan la snying brtse ba'i las can ni de bzhin gshegs pa'i rigs yin no/ /de bas gzhan la rnam par tho 'tshams pa ni de'i rigs can gyi las ngan pa yin par shes par bya ste/de'i gnyen por de bzhin gshegs pa'i rigs sun par mi byed pa'i phyir zhes bya ba gsungs so/ /brtson 'grus kyi pha rol tu phyin pa'i dri ma ni gcig ste/ byang chub sems dpa'i bslab pa mang ba bya dka' ba dus ring po la spro ba nyams pa'o/ /de'i gnyen por byang chub sems dpa'i bslab pa mi gtong ba'i phyir zhes bya ba gsungs so//bsam gtan gyi pha rol tu phyin pa'i dri ma ni gnyis te/ sems rnam par g.yeng ba dang / de'i rgyus zil gyis gnon pa'o/ /de'i gnyen por ri'i dbang po'i rgyal po de ltar thams cad mkhyen pa nyid kyi sems mi g.yos pa'i phyir zhes bya ba gsungs pa'o//shes rab kyi pha rol tu phyin pa'i dri ma ni gsum ste/ 'khor ba dang mya ngan las 'das pa la shin tu mi phyogs shing mngon du phyogs pa'i phyir/ thabs mi mkhas pa dag 'jig rten las 'das pa'i lam mi spogs pa dang / khyad par thob pas chog par 'dzin pa ste/de dag gi gnyen por 'jig rten gyi bya ba thams cad kyang mi 'dor la 'jig rten las 'das pa'i lam dang ldan pa'i phyir dang / byang chub kyi yan lag gi tshogs sogs pa la chog mi shes pa'i phyir dang / rtag tu rgyun mi 'chad par gong nas gong du khyad par du 'bogs pa yongs su tshol ba'i phyir ro zhes bya ba gsungs te go rims bzhin no//de lta bu ni yongs su bsngo ba phun sum tshogs pas yang dag par brtson par byed pa'o/ /'di ni sbyor bas bstan pa yin te/ sbyor ba ni rnam pa bzhi ste/ dad pa dang / 'dun pa dang / brtson 'grus dang / thabs so/ /bcu pa dang po las dad pa'i dbang zhes bya ba ste/dad pa'i dbang gis ni 'dun pa yang bsdus par 'gyur ro/ /gnyis pa las nyin mtshan du dge ba'i rtsa ba sogs pas ngoms mi myong ba ni brtson 'grus so/ /gsum pa las thams cad mkhyen pa'i sa mngon par 'dod pa zhes bya ba la sogs pa ni thabs yin no//'di ni sa bshad pa 'di la rab tu gnas pa zhes bya ste/ 'di ltar 'og nas/ kye rgyal ba'i sras dag sa yongs su sbyong ba'i chos kyi rnam pa 'di lta bu dag dang ldan pa'i byang chub sems dpa'i ni byang chub sems dpa'i sa rab tu dga' ba la rab tu gnas pa yin te zhes gsungs pa'o// //de ltar sa bshad nas sa 'di la gnas pa khyad par gang gis/ nyan thos dang rang sangs rgyas rnams las khyad par du 'phags pa de ston to/ /khyad par de ni rnam pa gsum ste/ 'dun pa'i khyad par dang / sgrub pa'i khyad par dang / 'bras bu'i phan yon gyi khyad par ro//de la 'dun pa'i khyad par ni smon lam chen po bcu po rnams te/ de dag gis bshad pa ni byang chub sems dpa'i sa rab tu dga' ba de la gnas shing / smon lam chen po rnam pa 'di lta bu 'di dag dang / brtson pa chen po dang / mngon par sgrub pa chen po dang / mngon par sgrub pa'o //'di lta ste/ sangs rgyas ma lus pa la mchod pa dang / rim gro lhag ma med pa mtha' dag bya ba'i phyir/ rnam pa thams cad mchog dang ldan par mos pa rgya chen pos rnam par dag pa/ chos kyi dbyings ltar rgya che ba/ nam mkha'i khams kyi mthas gtugs pa/ phyi ma'i mtha'i mur thug pa /bskal pa bgrangs pa dang / sangs rgyas 'byung ba 'grangs pa thams cad du mchod pa dang / rim gro chen po bya ba rgyun mi 'chad pa'i zhes bya ba ni dang po yin no/ /de la ma lus pa ni sangs rgyas rnams so/ /lhag ma med pa ni mchod pa'o/ /mtha' dag ni rim gro bya ba'o//de la sangs rgyas ni rnam pa gsum ste/ kun rdzob kyi sangs rgyas dang / gzugs kyi sku'i sangs rgyas dang / chos kyi sku'i sangs rgyas so/ /mchod pa la yang rnam pa gsum ste/ rnyed pa'i mchod pa ni na bza' dang / zhal zas la sogs pas so/ /bkur sti'i mchod pa ni gdugs dang rgyal mtshan dang ba dan la sogs pas so//sgrub pa'i mchod pa ni dad pa la sogs pa'i sgrub pas so/ /rim gro bya ba yang rnam pa gsum ste/ yang dag par tshol bas rim gro bya ba dang / bsnyen bkur bya bas rim gro bya ba dang / sgrub pas rim gro bya ba ste/ de'i phyir smon pas sangs rgyas ma lus pa la mchod pa dang / rim gro lhag ma med pa mtha' dag bya ba'i phyir zhes bya'o/ /rnam pa thams cad mchog dang ldan pa/ de ni dngos po sna tshogs mang ba'i phyir dang / dngos po gya nom pa'i phyir ro/ /mos pa rgya chen pos rnam par dag pa ni dang ba drag pa dang / byang chub tu yongs su bsngos pa'i mos pas so/ /chos kyi dbyings ltar rgya che ba ni/ /dge ba'i rtsa ba gzhan thams cad pas mchog tu gyur pa'i phyir ro/ /nam mkha'i khams kyi mthas gtugs pa ni 'bras bu 'dod pa ni mi rtag pa'i rgyu nyid du zad mi shes pa'i phyir ro/ /phyi ma'i mtha'i mur thug pa ni 'bras bu rtag pa mya ngan las 'das pa thob pa'i rgyur gyur pa'i phyir ro/bskal pa thams cad dang / sangs rgyas 'byung ba thams cad du rgyun mi 'chad pa'i smon lam dang po 'di lta bu 'di ni chen po rnam pa drug gi smon lam chen por yongs su bstan te/ gnas chen po ni gang gi phyir sangs rgyas ma lus pa la mchod pa dang rim gro lhag ma med pa mtha' dag bya ba'i phyir zhes gsungs pa'o//dngos po chen po ni gang gi phyir rnam pa thams cad mchog dang ldan pa zhes gsungs pa'o/ /bsam pa chen po ni gang gi phyir mos pa rgya chen pos rnam par dag ces gsungs pa'o/ /bsod nams yongs su 'dzin pa chen po ni gang gi phyir chos kyi dbyings ltar rab tu rgya che ba zhes gsungs pa'o//rgyu'i dngos po chen po ni gang gi phyir nam mkha'i khams kyi mthas gtugs pa zhes gsungs pa'o/ /dus chen po ni gang gi phyir phyi ma'i mtha'i mur thug pa zhes gsungs pa ste/ smon lam chen po mngon par sgrub bo/ /'di lta ste/de bzhin gshegs pa thams cad kyis gsungs pa'i chos kyi lugs yang dag par gzung ba'i phyir dang / sangs rgyas thams cad kyi byang chub yang dag par yongs su gzung ba'i phyir dang / yang dag par rdzogs pa'i sangs rgyas thams cad kyi bstan pa yongs su bsrung ba'i phyir/ chos kyi dbyings ltar rgya che ba/nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrangs pa dang / sangs rgyas 'byung ba bgrangs pa thams cad du dam pa'i chos yongs su gzung bar bya ba rgyun mi 'chad pa zhes bya ba ni gnyis pa'o/ /de la chos ni 'dir rnam pa gsum du rig par bya ste/de bzhin gshegs pa'i chos kyi lugs yang dag par gzung ba'i phyir zhes bya ba ni gsung rab kyi chos te mdo la sogs pa'o/ /de yang dag par gzung ba ni len pa dang / 'dzin pa dang / lung nod pa dang / kha ton bya ba sbyin pa'i phyir ro/ /sangs rgyas thams cad kyi byang chub yang dag par yongs su gzung ba'i phyir zhes bya ba ni thob pa'i chos te/byang chub rnam pa gsum mo/ /de yang dag par yongs su gzung ba ni thob par bya ba'i gdams ngag sbyin pa'i phyir ro/ /yang dag par rdzogs pa'i sangs rgyas thams cad kyi bstan pa yongs su bsrung ba'i phyir zhes bya ba sgrub pa'i chos te tshogs so//de yongs su bsrung ba ni sgrub pa dang ldan pa la gnod pa byed pa yongs su skyob pa'i phyir ro/ /chos kyi lung ni mdo la sogs pa'i lung gcig nas gcig tu brgyud pa'o/ /de bzhin gshegs pa ni bstan pa phun sum tshogs pa'i phyir ro/ /sangs rgyas dang yang dag par rdzogs pa'i sangs rgyas ni rtogs pa dang thugs su chud pa phun sum tshogs pa'i phyir te ji snyed pa dang /ji lta ba bzhin du mngon par thugs su chud pa'i phyir ro/ /de ltar phun sum tshogs pa rnam pa gsum yongs su bstan pa'i phyir mtshan gsum brjod do/ /'dir ni nyan thos dang rang sangs rgyas kyang sangs rgyas su rig par bya ste/smon lam chen po mngon par sgrub bo/ /'di lta ste/ sangs rgyas thams cad 'byung ba'i 'jig rten gyi khams rab 'byam ma lus pa thams cad du mchod pa dang / chos kyis yang dag par bsdu ba'i sbyor ba sngon du btang nas dga' ldan gyi pho brang na bzhugs pa nas bzung ste 'pho ba dang /gshegs pa dang / lhums na bzhugs pa dang / bltams pa dang / gzhon nu rol pa dang / btsun mo'i 'khor gyi nang na bzhugs pa dang / mngon par 'byung ba dang / dka' ba spyod pa dang / byang chub kyi snying por gshegs pa dang / bdud 'dul ba dang / mngon par rdzogs par byang chub pa dang /chos kyi 'khor lo bskor ba dang / yongs su mya ngan las 'das pa chen por mngon du gshegs par bya zhing thams cad du dus gcig tu bsgrub pa'i phyir chos kyi dbyings ltar rgya che ba/ nam mkha'i khams kyi mthas gtugs pa/ phyi ma'i mtha'i mur thug pa/bskal pa bgrangs pa dang / sangs rgyas 'byung ba bgrangs pa thams cad du mya ngan las 'das pa chen por gshegs pa'i bar du bya ba rgyun mi 'chad pa'i zhes bya ba ni gsum pa'o/ /de la sangs rgyas thams cad 'byung ba'i 'jig rten gyi khams rab 'byam ma lus pa thams cad du zhes bya ba ni sangs rgyas gang dag sprul pa'i sangs rgyas thams cad kyis rgyu ba dang /sems can rnams kyang phan tshun rgyu ba'i 'jig rten gyi khams rab 'byam zad par khyab pas ma lus pa thams cad du'o/ /ji ltar de dag gis sangs rgyas mchod pa'i sbyor ba dang / sangs rgyas rnams kyis kyang chos kyis yang dag par sgrub pa'i sbyor bas bsod nams dang /ye shes kyi tshogs sogs par 'gyur snyam du sems can de dag gnyid mchod pa dang / chos kyis yang dag par bsdu ba'i sbyor ba sngon du btang nas dga' ldan gyi pho brang nas bzhugs pa nas bzung ste/ mya ngan las 'das par gshegs pa'i bar du bya zhing thams cad du dus gcig tu sgrub pa'i phyir zhes bya bas ni rim gyis ma yin pa'o//ci'i phyir dga' ldan na bzhugs pa ston la/ gzugs dang gzugs med pa'i khams rnams su ma yin zhe na/ de mi ngal ba nas 'ongs kyis bdag cag gi phyir ma yin no snyam pa'i mi gus pa spang pa'i phyir ro//ci'i phyir dbang byed du ma yin zhe na/ mthu mnga' mod kyi sems can la thugs brtse ba'i phyir skye ba mchog bor te dga' ldan du skyes so zhes gus pa lhag par skyed pa'i phyir ro/ /ci'i phyir mi rnams kyi nang du ma yin zhe na/ bdag cag la thugs brtse ba'i phyir lha'i bde ba yang spangs nas mi'i nang du gshegs so zhes gus pa lhag par skyed pa'i phyir ro//ci'i phyir lhums na bzhugs pa ston zhe na/ rigs mthun pa rnams spro bar bya ba'i phyir ro/ /ci'i phyir sangs rgyas gzhan gyi man ngag med par bdag nyid kyis mngon par rdzogs par byang chub pa ston zhe na/gzhan la rag ma lus par 'grub bo zhes skyes bu'i byed pa la gzung ba'i phyir ro/ /ci'i phyir yongs su mya ngan las 'das par gshegs na/ slob par 'dzin pa rnams myur bar bya ba'i phyir te smon lam chen po mngon par sgrub po/ /'di lta ste/ byang chub sems dpa'i spyod pa thams cad rgya che ba chen por gyur pa/tshad med pa tha mi dad pa/ pha rol tu phyin pa thams cad kyis bsdus pa/ sa yongs su sbyong ba/ yan lag dang nye ba'i yan lag tu bcas par sgrub pa dang / mtshan nyid 'dra ba dang / mtshan nyid mi 'dra ba dang / 'du ba dang rgyas pa dang bcas pa/ byang chub sems dpa'i spyod pa lta bu sa'i lam ji lta ba bzhin du ston pas pha rol tu phyin pa yongs su sbyar bar bya ba'i gdams ngag rjes su bstan pa/rab tu sbyin pas bstan pa'i sems bskyed pa mngon par bsgrub pa'i phyir chos kyi dbyings ltar rgya che ba/ nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrangs pa dang / spyod pa bgrangs pa thams cad du sems bskyed pa mngon par bsgrub par bya ba rgyun mi 'chad pa'i zhes bya ba ni bzhi pa'o/ /sems bskyed pa ci 'dra ba zhig ce na/ byang chub sems dpa'i spyod pa'i gdams ngag rjes su bstan pa rab tu sbyin pas brtan pa'o//byang chub sems dpa'i spyod pa de'i rnam pa dang rang bzhin dang / las dang / thabs rnams la gdams ngag rjes su bstan pa de rig par bya'o/ /byang chub sems dpa'i spyod pa de'i rnam pa gang zhe na/ 'jig rten pa'i rnam pa gsum ste/ rgya che ba ni sa drug po dag la'o/ / chen por gyur pa ni bdun pa la'o/ /tshad med pa ni de'i gong ma la'o/ /chos bdag med pa'i rnam pa mnyam pa nyid kyi phyir/ tha mi dad pa ni 'jig rten las 'das pa ste/ gang gi phyir byang chub sems dpa'i spyod pa thams cad rgya che ba/ chen por gyur pa tshad med pa/ tha mi dad pa zhes gsungs pa'o//rang bzhin gang zhe na/ pha rol tu phyin pa thams cad kyis bsdus pa'o/ /las gang zhe na/ sa yongs su sbyong ba'o/ /thabs gang zhe na/ yan lag dang nye ba'i yan lag tu bcas pa sgrub pa dang / mtshan nyid 'dra ba dang / mtshan nyid mi 'dra ba dang / 'du ba dang / rgyas pa dang bcas pa/byang chub sems dpa'i spyod pa lta bu sa'i lam ji lta ba bzhin du ston pas/ pha rol tu phyin pa yongs su sbyang ba bya ba smon lam chen po mngon par sgrub bo/ /'di lta ste/ sems can gyi khams ma lus pa thams cad gzugs can dang / gzugs can ma yin pa dang /'du shes can dang / 'du shes can ma yin pa dang / 'du shes med 'du shes med min dang / sgo nga las skyes pa dang / mngal las skyes pa dang / drod gsher las skyes pa dang / rdzus te skyes pa dang / khams gsum du gtogs pa 'gro ba drug tu 'dus pa/ skye ba thams cad du gtogs pa/ming dang gzugs kyis bsdus pa'i sems can ma lus pa thams cad yongs su smin par bya bar sangs rgyas kyi chos la gzud pa'i phyir dang / 'gro ba grangs pa thams cad rnam par gcad pa'i phyir dang / thams cad mkhyen pa'i ye shes la rab tu dgod pa'i phyir/ chos kyi dbyings ltar rgya che ba/nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrangs pa dang / sems can gyi khams bgrangs pa thams cad du/ sems can thams cad yongs su smin par bya ba rgyun mi 'chad pa'i zhes bya ba ni sems can thams cad smin par bya ste/smon lam rgya chen po lnga pa'o/ /sems can de dag ni gang yin/ don ni gang la yongs su smin par bya ste/ sems can thams cad ni rags pa dang / phra bas rab tu dbye ba dang / skye ba'i gnas kyis rab tu dbye ba dang / ma dag pa dang / dag pa'i gnas kyis rab tu dbye ba dang /bde ba dang / sdug bsngal 'dzin pas rab tu dbye ba dang / lus sna tshogs kyi phyir las bdag gir bya bas rab tu dbye ba dang / rang bzhin gyis rab tu dbye bas rnam pa drug tu tha dad pa rnams so/ /de la rags pa rnams ni gzugs can rnams so/ /phra ba rnams ni gzugs can ma yin pa rnams so//gzugs can rnams las kyang rags pa rnams ni 'du shes can rnams so/ /phra ba rnams ni 'du shes can ma yin pa rnams so/ /gzugs can ma yin pa rnams las kyang / rags pa rnams ni 'du shes can rnams so/ /phra ba rnams ni 'du shes med 'du shes med min dag tu rig par bya'o//de ltar na 'di ni rags pa dang / phra bas rab tu dbye ba ste/ gzugs can dang / gzugs can ma yin pa dang / 'du shes can dang / 'du shes can ma yin pa dang / 'du shes med 'du shes med min bstan pas/ yongs su bstan pa yin no/ /skye ba'i gnas kyis rab tu dbye ba ni/sgo nga las skyes pa dang / mngal nas skyes pa dang / drod gsher las skyes pa dang / rdzus te skyes pa bstan pas yongs su bsten pa yin no/ /rdzus te skyes pa rnams skye ba'i gnas gang yin zhe na/ las de nyid las ni de dag gi skye gnas yin no/ /dag pa dang ma dag pa'i gnas kyis rab tu dbye ba ni/khams gsum du gtogs pa'i tshig gis yongs su bstan to/ /bde ba dang sdug bsngal 'dzin pas rab tu dbye ba ni 'gro ba drug tu 'dus pa'i tshig gis bstan to/ /lus sna tshogs kyi phyir las bdag gir bya ba nyid kyis rab tu dbye ba ni skye ba thams cad du gtogs pa'i tshig gis bstan to//rang bzhin gyis rab tu dbye ba ni/ ming dang gzugs kyis bsdus pa'i tshig gis ston to/ /sems can de lta bu dag don gang la sems can yongs su smin par byed ce na/ don gsum ste/ sangs rgyas kyis gsungs pa'i chos la gzud pa ni gang gi phyir sangs rgyas kyi chos la gzud pa'i phyir zhes gsungs pa'o//zhugs pa rnams byang chub gnyis la ni gang gi phyir/ 'gro ba bgrangs pa thams cad rnam par gcad pa'i phyir zhes gsungs pa'o/ /byang chub chen po la ni gang gi phyir/ thams cad mkhyen pa'i ye shes la dgod pa'i phyir zhes gsungs pa ste/smon lam chen po mngon par sgrub bo// //bam po bzhi pa/ 'di lta ste/ 'jig rten gyi khams shin tu rgyas pa dang / tha gru che ba dang / tshad med pa dang / phra ba dang / rigs pa dang / tshol ba dang / steng yogs med cing gzhi phyal ba dang 'jug pa'i khyim can dang /rnam par dbye ba mig 'phrul lta bu dang / phyogs bcu tshad med pa'i rnam par dbye ba ma lus pa la 'jug pa'i ye shes kyis khong du chud par bya zhing / mngon sum du 'gyur bar bya ba'i phyir/ chos kyi dbyings ltar rgya che ba/ nam mkha'i khams kyi mthas gtugs pa/ phyi ma'i mtha'i mur thug pa/bskal pa bgrangs pa dang / 'jig rten gyi khams bgrangs pa dang thams cad du 'jug pa rgyun mi 'chad pa'i zhes bya ba ni drug pa'o/ /de la 'jig rten gyi khams thams cad ni mtshan nyid gsum du ye shes kyi khong du chud par bya zhing / mngon sum du 'gyur bar bya ste/mtha' dag gi mtshan nyid dang / don dam pa'i mtshan nyid dang / dpag tu med pa'i mtshan nyid do/ /de la shin tu rgyas pa dang / tha gru che ba dang / tshod med pa zhes bya ba ni/ stong la sogs pa'i 'jig rten gyi khams gsum po dag go/ /phra ba ni gang dag na yid kyi lus rnams so//rags pa ni gang dag na yid kyi lus ma yin pa rnams so/ /chol pa ni go rims su mi gnas pa ma yin pa rnams so/ /steng yogs med cing gzhi phyal pa ni khyim na gnas pa ma byas pa rnams so/ /'jug pa'i khyim can ni khyim na gnas pa byas pa rnams te/ 'di na mtha' dag gi mtshan nyid do//rnam par dbye ba mig 'phrul lta bu ni don dam pa'i mtshan nyid de/ las sgyu ma las byung ba'i phyir ro/ /phyogs bcu tshad med pa'i rnam par dbye ba ma lus pa la 'jug pa ni dpag tu med pa'i mtshan nyid do/ / de la don dam pa'i mtshan nyid ni ye shes kyis khong du chud par bya ba'i phyir ro//de las gzhan pa'i mtshan nyid ni mngon sum nyid du 'gyur bar bya ba'i phyir te/ smon lam chen po mngon par sgrub po / /'di lta ste/ zhing thams cad zhing gcig dang / zhing gcig ltar zhing thams cad du mnyam par rgyu bas yongs su sbyong ba dang / sangs rgyas kyi zhing tshad med pa dang //'od dang rnam par bkod pa'i rgyan gyis rab tu brgyan pa dang / nyon mongs pa thams cad bsal bas yongs su dag pa'i lam dang ldan pa dang / sems can ye shes kyi 'byung gnas tshad med pas rab tu gang ba dang / sangs rgyas kyi yul rgya chen po la yang dag par gzhol ba dang / sems can gyi bsam pa ji lta ba bzhin du yang dag par bstan cing shin tu tshim par bya ba'i phyir/ chos kyi dbyings ltar rgya che ba/ nam mkha'i khams kyi mthas gtugs pa/ phyi ma'i mtha'i mur thug pa/ bskal ba bgrangs pa dang / sangs rgyas kyi zhing bgrangs pa thams cad du/ sangs rgyas kyi zhing thams cad yongs su sbyor ba rgyun mi 'chad pa'i zhes bya ba ni bdun pa'o//sangs rgyas kyi zhing yongs su dag pa/ de yang rnam pa bdun du rig par bya ste/ zhing thams cad zhing gcig nyid yin pa'i phyir/ thun mong ba yongs su dag pa dang / zhing gcig ltar zhing thams cad du mnyam par rgyu bas yongs su sbyong ba nyid kyi phyir dbang po yongs su dag pa dang /sangs rgyas kyi zhing tshad med pa dag 'od dang / rnam par bkod pa'i rgyan gyis rab tu brgyan pa nyid kyi phyir 'od kyi rgyan dang / gnas pa'i rgyan gyis mdzes pa yongs su dag pa dang / nyon mongs pa thams cad bsal bas yongs su dag pa'i lam dang ldan pa'i phyir yongs su spyad pa yongs su dag pa dang /sems can ye shes kyi 'byung gnas tshad med pas rab tu gang ba'i phyir gnas pa po'i sems can yongs su dag pa dang / sangs rgyas kyi yul rgya chen po la 'jug pa mngon par sgrub pa nyid kyi phyir rgyu yongs su dag pa dang /ye shes dang mthu gnyis kyis sems can gyi bsam pa ji lta ba bzhin du yang dag par ston cing / tshim par bya ba'i phyir 'bras bu yongs su dag pa ste/ smon lam chen po mngon par sgrub bo/ /'di lta ste/ byang chub sems dpa' thams cad dang / bsam pa dang sbyor ba gcig par bya ba'i phyir dang /'gran zla med pa'i dge ba'i rtsa ba bsags par bya ba'i phyir dang / byang chub sems dpa' thams cad dang dmigs pa gcig pas mnyam pa nyid du bya ba'i phyir dang / rtag tu rgyun mi 'chad par byang chub sems dpa' dang 'grogs shing mi 'bral bar bya ba'i phyir dang / sangs rgyas 'byung ba ci dgar bstan par bya ba'i phyir dang /rang gi sems bskyed pas de bzhin gshegs pa rab tu 'byed pa ye shes kyis khong du chud par bya ba'i phyir dang / ma nyams shing rjes su 'gro ba'i mngon par shes pa thob par bya ba'i phyir dang / 'jig rten gyi khams thams cad du rnam par rgyu bar bya ba'i phyir dang /'khor gyi dkyil 'khor thams cad du snang ba thob par bya ba'i phyir dang / skye ba thams cad du rang gi lus rjes su 'gro bar bya ba'i phyir dang / theg pa chen po bsam gyis mi khyab pa dang ldan par bya ba'i phyir dang / byang chub sems dpa'i spyod pa spyad par bya ba'i phyir/ chos kyi dbyings ltar rgya che ba/nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrangs pa dang / spyod pa bgrangs pa thams cad theg pa chen po la 'jug pa rgyun mi 'chad pa'i zhes bya ba ni brgyad pa'o/ /de ni byang chub sems dpa' thams cad dang /bsam pa dang / sbyor ba gcig pa nyid kyi phyir theg pa gzhan mi 'dod pa'i phyir te/ byang chub sems dpa'i spyod pa rnam pa bcus rab tu phye ba'o/ /rnam pa bcu gang zhe na/ 'gran zla med pa'i dge ba'i rtsa ba sogs pa dang / byang chub sems dpa' thams cad dang / dmigs pa gcig pa nyid dang /rtag tu rgyun mi 'chad par byang chub sems dpa' dang 'grogs shing mi 'bral ba nyid dang / sangs rgyas 'byung ba ci dgar ston pa nyid dang / rang gi sems bskyed pas de bzhin gshegs pa rab tu 'byed pa ye shes kyis khong du chud pa nyid dang / ma nyams shing rjes su 'gro ba'i mngon par shes pa thob pa nyid dang /'jig rten gyi khams thams cad du rnam par rgyu ba nyid dang / 'khor gyi dkyil 'khor thams cad du snang ba thob pa nyid dang / skye ba thams cad du rang gi lus rjes su 'gro ba nyid dang / theg pa chen po bsam gyis mi khyab pa dang ldan pa nyid do/ /de la dang po ni tshogs kyis rab tu phye ba'o//gnyis pa ni mthun par dmigs pas nang du yang dag 'jog pas so/ /gsum pa ni 'brel ba'i gtam rnam par gtan la 'bebs pas so/ /bzhi pa ni sangs rgyas 'byung ba ci dgar ston pa'o/ /lnga pa ni rang gi sems bskyed pa'i khyad par gyis de bzhin gshegs pa'i chos kyi sku rjes su dran pas so//drug pa ni mngon par shes pa shin tu thob pas so/ /lhag ma rnams ni mngon par shes pa'i las kyis rab tu phye ba ste/ 'jig rten gyi khams gzhan dag tu 'gro ba dang / bdag dang / gzhan dag dang / de dag phan tshun yang dag par ston pa dang / skal ba 'dra bar 'gro ba dang / theg pa chen po bsam gyis mi khyab pa la 'dzud pa ste/ smon lam chen po mngon par sgrub bo/ /'di lta ste/ phyir mi ldog pa'i 'khor lo la yang dag par gnas pa'i byang chub sems dpa'i spyod pa spyad par bya ba'i phyir dang / lus dang / ngag dang / yid kyi las don yod par bya ba'i phyir dang / mthong ma thag tu sangs rgyas kyi chos nyid du nges par bya ba'i phyir dang /tshig brjod ma thag tu ye shes khong du chud par bya ba'i phyir dang / dad par gyur ma thag tu nyon mongs pa ldog par bya ba'i phyir dang / sman gyi rgyal po chen po lta bu'i lus thob par bya ba'i phyir dang / yid bzhin gyi nor bu lta bu'i lus thob par bya ba'i phyir dang /byang chub sems dpa' chen po'i spyod pa spyad pa'i phyir/ chos kyi dbyings ltar rgya che ba/ nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrangs pa dang / spyod pa bgrangs pa thams cad du don yod pa/ rgyun mi 'chad pa'i zhes bya ba ni dgu pa'o//don yod pa de ni byang chub sems dpa' chen po'i spyod pa spyad pas rab tu phye ba'o/ /byang chub sems dpa'i spyod pa spyad pa de yang phyir mi ldog pa'i 'khor lo la yang dag par gnas pa'i byang chub sems dpa'i spyod pa spyad pas rab tu phye ba ste/ de yang don dam pa nyid rnam pa gnyis kyis rab tu phye ba'o//brtson 'grus don yod pa lus dang / ngag dang / yid kyi las don yod pa nyid ni de tshig gsum gyis go rims bzhin bstan par rig par bya ste/ mthong ma thag tu sangs rgyas kyi chos nyid du nges par bya ba ni lus kyi las don yod pa nyid do/ /tshig brjod ma thag tu ye shes khong du chud par bya ba ni ngag gi las don yod pa nyid do//dad par gyur ma thag tu nyon mongs pa ldog pa zhes bya ba ni/ yid kyi las don yod pa nyid do/ /don byed pa don yod pa nyid ni sems can rnams kyi rang bzhin gyis sdug bsngal ba dang / phongs pa las byung ba'i sdug bsngal gyi gnyen por sman gyi rgyal po chen po dang /yid bzhin gyi nor bu lta bu'i lus thob pa'i go rims bzhin te/ smon lam chen po mngon par sgrub bo/ /'di lta ste/ 'jig rten gyi khams thams cad du bla na med pa yang dag par rdzogs pa'i byang chub mngon par rdzogs par 'tshang rgya bar bya ba'i phyir dang / byis pa'i lam gcig dang tha mi dad par byis pa'i lam thams cad du skye ba 'byung ba dang /byang chub kyi snying po dang / chos kyi 'khor lo bskor ba dang / yongs su mya ngan las 'das pa chen po bstan par bya ba'i phyir dang / sangs rgyas kyi yul chen po mthu dang / ye shes kyi rjes su 'gro bas sems can gyi khams thams cad kyi bsam pa ji lta ba bzhin du sangs rgyas 'byung ba dal ba la rtog par byed/zhi bar byed/ thob par byed/ thob par gyur nas bstan par bya ba'i phyir dang / gcig mngon du yang dag par rtogs pas chos thams cad mya ngan las 'das pas rgyas par bya ba'i phyir dang /tshig gcig brjod pas sems can thams cad kyi sems tshim par bya ba'i phyir dang / yongs su mya ngan las 'das pa chen po bstan kyang / spyod pa'i stobs rgyun mi 'chad par bya ba'i phyir dang / ye shes chen po'i sa las chos thams cad rnam par gzhag pa bstan par bya ba'i phyir dang /chos shes pa dang / rdzu 'phrul dang / sgyu 'phrul gyi mngon par shes pas 'jig rten gyi khams thams cad rgyas par bya ba'i phyir/ chos kyi dbyings ltar rgya che ba/ nam mkha'i khams kyi mthas gtugs pa dang / phyi ma'i mtha'i mur thug pa/ bskal pa bgrangs pa dang /mngon par rdzogs par byang chub pa bgrangs pa thams cad ye shes chen po mngon par sgrub pa rgyun mi 'chad pa'i zhes bya ba ni bcu pa'o/ /theg pa chen po'i mngon par bsgrub pa de ni byang chub chen po ci 'dra ba dang / las gang gis de rab tu phye ba'o/ /de la byang chub chen po ni bla na med pa yang dag par rdzogs pa'i byang chub bo//de ni las bdun byed par rig par bya ste/ mngon par rdzogs par byang chub pa ston pa'i las byed pa dang / bden pa'i tshul ston pa'i las byed pa dang / 'thob pa'i gdams ngag gi las byed pa dang / chos sna tshogs ston pa'i las byed pa dang / / sangs rgyas kyi rigs rgyun mi 'chad pa'i las byed pa dang / yang chos kyi lugs gnas par byed pa'i las byed pa dang / dbang gi las byed pa'o/ /de la las dang po ni byis pa'i lam gcig dang tha mi dad par byis pa'i lam thams cad du skye ba 'byung ba la sogs pa yin par rig par bya ste/ 'dzam bu'i gling gcig dang dus mnyam du 'dzam bu'i gling thams cad du zhes bya ba'i tha tshig go//'dzam bu'i gling ni gdul bya byis pa rnams 'dul ba'i gnas kyi mchog tu gyur pas byis pa'i lam zhes bya'o/ /las gnyis pa de ni mi dal ba rnams ma gtogs par sangs rgyas kyi yul chen po'i mthu dang ye shes kyi rjes su 'gro bas/'jig rten gyi khams gzhan dag tu gdul bya thams cad kyi bsam pa ji lta ba bzhin du sangs rgyas 'byung ba sangs rgyas 'byung bar dal ba de dang der skyes pa rnams la sdug bsngal rtog par byed/ kun 'byung bzhi par byed/ 'gog pa thob par byed/ lam bstan par byed par rig par bya'o//las gsum pa ni gcig mngon du yang dag par rtogs pa/ chos la bdag med pa'i rnam par chos thams cad rang bzhin gyis mya ngan las 'das par mos pa yin par rig par bya'o/ /las bzhi pa ni tshig gcig brjod pas gdul bya mos pa tha dad pa rnams kyi sems la cig car go bar byed pa'o//las lnga pa ni yongs su mya ngan las 'das pa chen po bstan nas yang spyod pa'i stobs rgyun mi 'chad pa yin par rig par bya'o/ /las drug pa ni sangs rgyas kyi ye shes kyi sa las yang mdo la sogs pa'i chos thams cad dag pa ston pa yin par rig par bya'o/ /las bdun pa ni chos shes pa'i mngon par shes pas chos thams cad snang bar byed pa dang /rdzu 'phrul gyi mngon par shes pas ji ltar 'dod pa bzhin du da dung rang gi lus 'dzin pa dang / gnas pa dang / 'chi 'pho ba dang / sgyu 'phrul gyi mngon par shes pas phyi rol gyi dngos po rnams 'dod dgur sgyur ba yin par rig par bya'o//chos shes pa'i mngon par shes pa gcig gis ni 'khor ba la mi gnas par 'gyur ro/ /rdzu 'phrul gyi mngon par shes pa dang / sgyu 'phrul gyi mngon par shes pa gnyis ni zhi ba gcig pu bgrod pa ma yin par 'gyur ro/ /ci'i phyir smon lam chen po bcu kho na zhe na/gcig ni bsod nams kyi tshogs yongs su rdzogs par byed pa yin par rig par bya'o/ /gnyis pa ni ye shes kyi tshogs yongs su rdzogs par byed pa'o/ /lnga ni sems can yongs su smin par byed pa ste/ rten ci 'dra ba dang / sems ci 'dra ba dang / sems can gang dag dang / gang na gnas pa rnams dang /gang du gnas nas yongs su smin par bya ba'o / /gsum pa ni bdag po'i khyad par bya ba dang / byang chub sems dpa'i sa'i mthar phyin par bya ba dang / thams cad kyi mthar phyin par bya ba ste/ 'dis ni yang dag pa ji lta ba bzhin du yongs su smin par byed pa de lta bu yang yongs su bstan pa yin no//de la smon lam ni 'dod pa'i don mngon par 'du byed pa'o/ /brtson pa ni de grub par byed pa'i thabs so/ /mngon par bsgrub pa ni de grub par byed par rig par bya ste/ sa 'di la gnas pas 'di gsum rim gyis mngon par sgrub kyi cig car ni ma yin par rig par bya'o//smon lam chen po bcu po 'di rnams re re yang 'khor 'bum phrag grangs med pa dang ldan par rig par bya ste/ gang gi phyir kye rgyal ba'i sras dag de ltar rnam pa 'di lta bu'i smon lam chen po dang / brtson pa chen po dang / mngon par sgrub pa chen po'i smon lam gyi sgo bcu po 'di dag la sogs pa smon lam 'bum phrag grangs med pa phrag bcu tshang ba de dag byang chub sems dpa'i sa rab tu dga' ba la gnas pa'i byang chub sems dpas mngon par sgrub pa zhes gsungs pa'o//de'i phyir dge ba'i rtsa ba shin tu sbyangs shing mang bas smon lam chen po dag ces bya'o/ /byang chub sems dpa'i 'dun pa khyad par can de ni nyan thos la sogs pa'i 'dun pa las rnam pa gnyis kyis khyad par du 'phags te/shin tu sbyangs shing mang ba dang / sems can thams cad dang thun mong bas so/ /thun mong ba de yang mthar thug pa'i gnas rnams kyis yongs su ston te gang gi phyir smon lam de dag kyang mthar thug pa med pa'i gnas bcur mngon par sgrub ste/bcu gang zhe na/ 'di lta ste/ sems can gyi khams kyi mthar thug pa dang / 'jig rten gyi khams kyi mthar thug pa dang / nam mkha'i khams kyi mthar thug pa dang / chos kyi khams kyi mthar thug pa dang / mya ngan las 'das pa'i khams kyi mthar thug pa dang / sangs rgyas 'byung ba'i khams kyi mthar thug pa dang / de bzhin gshegs pa'i ye shes kyi khams kyi mthar thug pa dang / sems kyi dmigs pa'i mthar thug pa dang / sangs rgyas kyi yul gyi ye shes mngon par sgrub pa'i khams kyi mthar thug pa dang /'jig rten gyi rgyud dang / chos kyi rgyud dang / ye shes kyi rgyud kyi khams kyi mthar thug par ro/ /de ltar bdag gi smon lam chen po 'di dag sems can mtha' gang du thug pa de'i mthar thug par gyur cig /bdag gi smon lam chen po 'di dag ye shes kyi rgyud kyi khams kyi bar dag gi mtha' gang du thug pa de'i mthar thug par gyur cig /ji ltar sems can gyi khams kyi mthar thug pa med pa de ltar bdag gi dge ba'i rtsa ba 'di dag kyang mthar thug pa med par gyur cig /ye shes kyi rgyud kyi khams kyi bar dag gi mthar thug pa med pa ltar bdag gi dge ba'i rtsa ba 'di dag kyang mthar thug pa med par gyur cig ces gsungs pa'o//de la sems can gyi khams kyi mthar thug pa ni yan lag go/ /'jig rten gyi khams kyi mthar thug pa nas/ ye shes kyi rgyud kyi khams kyi mthar thug pa'i bar dag ni nye ba'i yan lag go/ /'dis ni sems can gyi khams gang yin pa ste/sems can gyi khams kyi mthar thug pa zhes bya ba dang / gang du gnas pa ste 'jig rten gyi khams kyi mthar thug pa zhes bya ba dang / ji snyed pa ste/ nam mkha'i khams kyi mthar thug pa zhes bya ba dang / chos bstan pa gang gis gdul bar bya ba ste/ chos kyi khams kyi mthar thug pa zhes bya ba dang /gang du gdul bar bya ba ste/ mya ngan las 'das pa'i mthar thug pa zhes bya ba dang / thabs la mkhas pa gang gis te/ sangs rgyas 'byung ba'i khams kyi mthar thug pa zhes bya ba dang / gdams ngag gang la brten nas te/ de bzhin gshegs pa'i ye shes kyi khams kyi mthar thug pa zhes bya ba dang /dmigs pa gang gis te/ sems kyi dmigs pa'i khams kyi mthar thug pa zhes bya ba dang / mngon par rtogs pa gang gis te/ sangs rgyas kyi yul gyi ye shes mngon par bsgrub pa'i khams kyi mthar thug pa zhes bya ba de yongs su bstan to//'dir rgyun gyi mthar thug pa yin par rig par bya'i/ skad cig gi mthar thug pa ni ma yin par bstan pa'i phyir mthar thug pa rnam pa dgu po 'di dag mdor bsdus te rgyud kyi mthar thug pa rnam pa gsum gyis ston to/ /mthar thug pa'i gnas 'di dag gi dbang gis sangs rgyas rnams sems can gyi don gtan du mdzad par rig par bya ste/de ltar 'dun pa'i khyad par gyis khyad par du 'phags pa yin no/ /sgrub pa'i khyad par gyis khyad par du 'phags pa ji lta bu zhe na/ gang gi phyir de de ltar smon lam shin tu bsgrubs te/ las su rung ba'i sems dang gnyen po'i sems su gyur pas dad pa mi 'phrogs pa dang ldan pa yin te/de ni de bzhin gshegs pa dgra bcom pa yang dag par rdzogs pa'i sangs rgyas rnams kyi sngon gyi mtha'i spyod pa la 'jug pa dang / pha rol tu phyin pa yang dag par 'grub pa dang / sa yang dag par 'grub pas bsgrub pa dang /mi 'jigs pa yongs su rdzogs pa dang / stobs dang / sangs rgyas kyi chos ma 'dres pa mi 'phrogs pa nyid dang / sangs rgyas kyi chos bsam gyis mi khyab pa nyid dang / de bzhin gshegs pa'i yul mtha' dang dbung med pa mngon par bsgrub pa dang / de bzhin gshegs pa'i spyod yul tshad med pa dang ldan pa la 'jug pa dang /'bras bu yongs su grub pa la yid ches pa yin te/ mdor bsdu na/ byang chub sems dpa'i spyod pa thams cad nas/ de bzhin gshegs pa'i sa'i bar du nges par bstan pa dang / 'dzin pa la mngon par yid ches pa yin no zhes gsungs pa'o/ / de ltar smon lam shin tu bsgrubs te/ dge ba'i rtsa ba de dag las dbang gi khyad par thob pas/ las su rung ba'i sems su gyur te/ bde bar gnas pa'i khyad par thob pas/ mnyan pa'i sems su gyur to/ /dad pa mi 'phrogs pa dang ldan pa yin te zhes rgya cher 'byung ba de la/ sngon gyi mtha'i spyod pa 'jug pa ni byang chub sems dpa'i spyod pa nas bzung ste/byang chub mngon par rdzogs par byang chub pa'i bar du'o/ /de la byang chub sems dpa'i spyod pas bsdus pa'i sngon gyi mtha'i spyod pa la ni rnam pa gnyis kyis mngon par yid ches te/ byang chub sems dpa'i spyod pa de gang yin pa dang / rim pa gang gis te/gang gi phyir pha rol tu phyin pa yang dag par 'grub pa dang / sa yang dag par 'grub pas 'grub pa zhes gsungs pa'o/ /byang chub kyis bsdus pa'i sngon gyi mtha'i spyod pa 'jug pa la ni khyad par rnam pa drug gis khyad par du 'phags par mngon par yid ches te/ mu stegs can dang / bdud dang phyir rgol ba'i gnyen po'i khyad par gnyis kyis khyad par du 'phags pa ni gang gi phyir mi 'jigs pa yongs su rdzogs pa dang /stobs dang / sangs rgyas kyi chos ma 'dres pa mi 'phrogs pa nyid ces gsungs pa'o/ /mthu bsam gyis mi khyab par rgya che ba'i khyad par gyis khyad par du 'phags pa ni gang gi phyir/ sangs rgyas kyi chos bsam gyis mi khyab ces gsungs pa'o//ye shes tha mi dad cing zab pa nyid kyi khyad par gyis khyad par du 'phags pa ni gang gi phyir/ de bzhin gshegs pa'i yul mtha' dang dbung med pa mngon par sgrub pa zhes gsungs pa'o/ /rnam pa thams cad mkhyen pa'i khyad par gyis khyad par du 'phags pa ni gang gi phyir/de bzhin gshegs pa'i spyod yul tshad med pa dang ldan pa la 'jug pa zhes gsungs pa'o/ /bag chags dang bcas pa'i nyes pa thams cad dang gtan du bral ba'i phyir/ bral ba'i khyad par gyis khyad par du 'phags pa ni gang gi phyir/ 'bras bu yongs su 'grub pa la yid ches pa yin zhes gsungs pa'o//yang mdor bsdus na sngon gyi mtha'i spyod pa la 'jug pa de/ byang chub sems dpa'i spyod pa thams cad nas de bzhin gshegs pa'i sa'i bar du nges par bstan pa dang / 'dzin pa la mngon par yid ches pa yin no zhes bya bas ston to/ /de la nges pa bstan pa ni bstan pa'o//'dzin pa ni rtogs pa yin par rig par bya'o/ /de rnam pa gsum gyi phyir/ sems can rnams la snying rje chen po 'jug par rig par bya ste/ don dam pa'i bde ba dang mi ldan pa dang / sdug bsngal dang ldan pa dang / de las bzlog pas so/ /don dam pa'i bde ba dang mi ldan pa ji lta bu zhe na/gang gi phyir de 'di snyam du sems te/ sangs rgyas kyi chos 'di dag ni 'di ltar zab/ 'di ltar dben/ 'di ltar zhi/ 'di ltar stong / 'di ltar mtshan ma med/ 'di ltar smon pa med/ 'di ltar gos pa med de 'di ltar tshad med cing / 'di ltar rgya che la sangs rgyas kyi chos 'di dag ni 'di ltar sgrub par dka' na zhes gsungs pa'o//sdug bsngal dang ldan pas ji lta bu zhe na/ 'on kyang byis pa so so'i skye bo 'di dag lta ba ngan par ltung ba'i sems kyi rgyud dang / ma rig pa'i mun pas kun nas khebs pa'i yid dang / nga rgyal gyi rgyal mtshan shin tu rtog pa rnams dang /sred pa'i dra bas mngon par 'dod pa'i yid la byed pa rnams dang / sgyu dang g.yo'i thibs po'i rjes su rgyu ba'i sems kyi bsam pa rnams dang / phrag dog dang / ser sna dang mtshungs par ldan pas 'gro bar skyed par sbyor ba rnams dang / 'dod chags dang / zhe sdang dang / gti mug la 'dris pa'i las la sogs pa rnams dang /khro ba dang khon du 'dzin pas spangs pa'i sems kyi me lce 'bar ba rnams dang / phyin ci log dang mtshungs par ldan pas las bya ba mngon par bsgrubs pa rnams dang / 'dod pa dang srid pa dang / ma rig pa'i zag pa dang 'brel pa'i sems yid dang /rnam par shes pa'i sa bon rnams kyis gang 'di khams gsum du ming dang gzugs dang lhan cig mi 'byung ba mi 'bral ba yang srid pa'i myu gu mngon par 'grub par byed do/ /ming dang gzugs de rnam par 'phel nas skye mched drug gi grong 'byung bar 'gyur ro/ / skye mched rnams byung nas phan tshun reg ste phrad pas tshor ba 'byung bar 'gyur ro/ /tshor ba de nyid la phyi phyir zhing mngon par dga' ba'i sred pa dang / len pa rnam par 'phel lo/ /nye bar len pa rnam par 'phel nas srid pa 'byung ngo / /byung nas skye ba dang / rga shi dang / mya ngan dang / smre sngags 'don pa dang /sdug bsngal ba dang / yid mi bde ba dang / 'khrug pa rnams 'byung bar 'gyur te/ de ltar sems can de dag gi sdug bsngal gyi phung po bdag dang bdag gi med pa/ gsob/ gsog /stong pa/ g.yo ba med pa/ byed pa med pa/ bems po/ /rtswa dang / shing dang /rtsig pa dang / mig yor lta bu mngon par 'grub kyang zhes gsungs pa ste/ de ltar sdug bsngal dang ldan pas so/ /ji ltar na de las bzlog pas she na/ gang gi phyir/ 'di ltar de khong du mi chud do zhes gsungs pa'o/ /de la sangs rgyas kyi chos rnams zab pa nyid rnam pa dgur rig par bya ste/dben pa zab pa nyid dang / zhi ba zab pa nyid dang / stong pa zab pa nyid dang / mtshan ma med pa zab pa nyid dang / smon pa med pa zab pa nyid dang / gos pa med pa zab pa nyid dang / tshad med pa zab pa nyid dang / rgya che ba zab pa nyid dang / bsgrub dka' ba zab pa nyid do//de la dben pa ni sgro 'dogs pa'i don dang / sgro btags pa'i don gyis so/ /zhi ba ni don gyi chos nyid kyis so/ /stong pa dang / mtshan ma med pa dang / smon pa med pa ni rnam par thar pa'i sgo gsum la dmigs pas mi mthun pa'i phyogs rnam pa gsum gyi gnyen po ste/ mi mthun pa'i phyogs rnam pa gsum ni rnam par rtog pa dang /mtshan ma dang ldan pa dang / bral ba la smon pa'o/ /gos pa med pa ni nyon mongs pa can gyi chos spong ba'i dmigs pa yin pa'i phyir ro/ /tshad med pa ni grangs med pa dang / brtag mi nus pa'i dge ba'i rtsa ba skye ba'i dmigs pa yin pa'i phyir ro/ / rgya che ba ni bdag dang gzhan gyi don byed par rtogs pa'i ye shes kyi dmigs pa yin pa'i phyir ro/ /bsgrub dka' ba ni bskal ba grangs med pa gsum gyis thob par bya ba'i ye shes kyi dmigs pa yin pa'i phyir ro/ /'on kyang sems can 'di dag ni lta ba ngan par ltung ba'i sems kyi rgyud ces bya ba ni lta ba ngan pa rnam pa dgur rig par bya ste/kun nas khebs pa'i yid kyi lta ba ngan pa ni gang gi phyir ma rig pa'i mun pas kun nas khebs pa'i yid ces gsungs pa'o/ /yid kyi kun du rtog pa'i lta ba ngan pa ni gang gi phyir/ nga rgyal gyi rgyal mtshan shin tu bsgreng ba'i kun du rtog pa rnams zhes gsungs pa'o/ / srid pa'i yid la byed pa'i lta ba ngan pa ni gang gi phyir/ sred pa'i dra bas mngon par 'dod pa'i yid la byed pa rnams zhes gsungs pa'o/ /sgyu dang g.yo'i bsam pa'i lta ba ngan pa ni gang gi phyir/ sgyu dang g.yo'i thibs po'i rjes su rgyu ba'i sems kyi bsam pa rnams zhes gsungs pa'o/ /phrag dog dang ser sna'i sbyor ba'i lta ba ngan pa ni gang gi phyir/phrag dog dang ser sna dang mtshungs par ldan pas 'gro bar skye ba sbyor ba rnams zhes gsungs pa'o/ /'dod chags dang zhe sdang dang gti mug la 'dris pa'i las la sogs pa'i lta ba ngan pa ni gang gi phyir/ 'dod chags dang zhe sdang dang gti mug la 'dris pa'i las la sogs pa rnams zhes gsungs pa'o//sbar ba'i sems kyi me lce 'bar ba'i sems kyi lta ba ngan pa ni gang gi phyir/ khro ba dang khon du 'dzin pas sbar ba'i sems kyi me lce 'bar ba rnams zhes gsungs pa'o/ /las bya ba mngon par bsgrub pa'i lta ba ngan pa ni gang gi phyir/ phyin ci log dang mtshungs par ldan pas las bya ba mngon par sgrub pa rnams zhes gsungs pa'o//sems dang / yid dang / rnam par shes pa'i sa bon gyi lta ba ngan pa ni gang gi phyir/ 'dod pa dang / srid pa dang / ma rig pa'i zag pa dang 'brel pa'i sems dang / yid dang / rnam par shes pa'i sa bon rnams kyis zhes gsungs pa'o//de la kun nas khebs pa'i yid kyi lta ba ngan pa dang / yid kyi kun du rtog pa'i lta ba ngan pa dang / sred pa'i yid la byed pa'i lta ba ngan pa dang / lta ba ngan pa gsum ni don gyi chos nyid dang / sgro 'dogs pa'i don dang / sgro btags pa las brtsams te go rims bzhin no//sgyu dang g.yo'i bsam pa'i lta ba ngan pa dang / phrag dog dang ser sna'i sbyor ba'i lta ba ngan pa gnyis ni yongs su tshol ba'i dus na bsam pa dang sbyor ba'i nyes pa ste/ de la phrag dog gi ni lus la sogs par sbyar ro/ /ser snas ni longs spyod rnams la ste/ 'di ltar 'gro ba gzhan dag tu lus dang longs spyod ngan par skye ba yongs su 'dzin to//drug pa ste 'dod chags dang zhe sdang dang gti mug la 'dris pa'i las la sogs pa'i lta ba ngan pa ni sdug pa dang mi sdug pa dang / gnyi ga las bzlog pa'i yul la yongs su spyod pa'i dus na'o/ /bdun pa ste sbar ba'i sems kyi me lce 'bar ba'i lta ba ngan pa ni phan tshun gnod pa byed pa dang mdud par 'dzin pa'i dus na'o//brgyad pa ste las bya ba mngon par sgrub pa'i lta ba ngan pa ni phan tshun gnod pa byed pa'i dus na'o/ /dgu pa ste/ sems dang / yid dang / rnam par shes pa'i sa bon gyi lta ba ngan pa ni/ sbyin pa dang / tshul khrims dang / bsgoms pa las byung ba'i dge ba'i las byed pa'i dus na'o/ /de la rten cing 'brel par 'byung ba ni rnam pa gsum du rig par bya ste/ rang gi mtshan nyid ni srid pa'i bar du'o/ /spyi'i mtshan nyid ni skye ba la sogs pa'i nyes dmigs rnams so/ /phyin ci log gi mtshan nyid ni bdag dang bdag gi med pa la sogs pa'o//de la rang gi mtshan nyid ni rnam pa gsum ste/ rnam par smin pa'i mtshan nyid ni ming dang gzugs dang lhan cig 'byung ba kun gzhi rnam par shes pa ste/ gang gi phyir gang 'di khams gsum du ming dang gzugs dang lhan cig 'byung ba mi 'bral ba yang srid pa'i myu gu mngon par grub par byed do zhes gsungs pa ste/ming dang gzugs dang / de lhan cig 'byung ba'i phyir ro/ /de rgyu nyid kyi mtshan nyid yin pa ni ming dang gzugs dang de mi 'bral bar gyur pa'i phyir/ de la rag lus nas 'byung ba ste/ gang gi phyir mi 'bral ba zhes gsungs pa'o/ /de'i 'bras bu'i rim gyi mtshan nyid ni srid pa'i bar du ste/gang gi phyir ming dang gzugs de rnam par 'phel nas/ skye mched drug gi grong 'byung bar 'gyur ro/ /skye mched rnams byung nas phan tshun reg ste/ phrad pas tshor ba 'byung bar 'gyur ro/ /tshor ba de nyid la phyi phyir zhing mngon par dga' ba'i sred pa dang / len pa rnam par 'phel lo//nye bar len pa rnam par 'phel nas/ srid pa 'byung ngo zhes gsungs pa'o/ /spyi'i mtshan nyid ni gang gi phyir/ byung nas skye ba dang / rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung bar 'gyur te/de ltar sems can de dag gi sdug bsngal gyi phung po mngon par 'grub ces gsungs pa'o/ /de la bdag dang bdag gi bral ba nyid kyis ni de gnyis kyis stong pa nyid du ston to/ /g.yo ba med pa nyid kyis ni rang gi bdag ma yin pa'o/ /de'i 'og tu g.yo ba med pa de nyid sems can ma yin pa'i grangs su 'gro ba g.yo ba dang /gnas pa'i dngos por bems po rtswa dang shing dang / rtsig pa dang / mig yor lta bu zhes bya bar ston te/ rkyen la rag las nas 'grub par 'dra ba'i phyir ro/ /sems can sdug bsngal gyi phung po las ma thar ba de lta bu dag mthong nas/ de'i phyir de'i snying rje chen po rgyas pa 'byung ste zhes bya ba la rgyas pa'i don ni rgyun gyi don dang /'byung ba'i don du rig par bya'o/ /sems can 'di dag ni bdag gis yongs su dgrol bar bya ba dag go/ /shin tu bde ba'i mya ngan las 'das pa la rab tu dgod par bya ba dag go snyam ste/ de'i byams pa chen po rgyas pa 'byung ngo zhes bya ba ni sdug bsngal gang dang ldan pa dang /bde ba gang dang bral ba ste sngar bshad zin to/ /kye rgyal ba'i sras dag de ltar byang chub sems dpa' snying rje dang / byams pa dang ldan pa'i lhag pa'i bsam pas sa dang po la gnas pa'i tshe/ dngos po thams cad la lta ba'i sems yongs su spangs nas sangs rgyas kyi ye shes kyi phyir/re ba dang / 'dod pa rlabs po che'i blos gtong ba chen po la rab tu brtson par byed do/ /gtang bar bya ba ni 'di dag ste/ 'di lta ste/ nor dang / 'bru dang / bang mdzod yongs su btang ba'am/ gser dang / nor bu dang / mu tig dang / bai DUr+ya dang / shang kha shi la dang /byi ru dang / dngul dang / sa le sbram yongs su btang ba'am/ rin po che'i rgyan dang / lhab lhub yongs su btang ba'am/ rta dang / glang po che dang / shing rta'i bzhon pa yongs su btang ba'am/ skyed mos tshal dang / dka' thub kyi nags tshal dang / gtsug lag khang yongs su btang ba'am/ bran pho dang / bran mo dang / las byed pa dang / zho shas 'tsho ba yongs su btang ba'am/ grong dang / grong khyer dang / grong rdal dang / yul dang / yul 'khor dang / pho brang 'khor yongs su btang ba'am/ chung ma dang / bu pho dang / bu mo yongs su btang ba'am/sdug cing yid du 'ong ba'i dngos po thams cad yongs su btang ba'am/ mgo dang / mig dang / rna ba dang / sna dang / lag pa dang / rkang pa dang / rang gi sha dang / khrag dang / rus pa dang / rkang dang / tshil dang / lpags shun dang / pags pa dang / snying dang /lus thams cad yongs su btang ba'i dngos po dag thams cad la mi lta bar byas nas/ sangs rgyas kyi ye shes la re ba dang / 'dod pa rlabs po che'i blos yongs su gtong ste/ de ltar byang chub sems dpa'i sa dang po la gnas pa de gtong pa chen por 'gyur ro zhes bya ba de la/ re ba dang 'dod pa rlabs po che'i blo zhes bya ba ni rlabs po che'i re bas so//de la dngos po thams cad ni mdor bsdu na rnam pa gnyis te/ phyi'i dang / nang gi'o/ /phyi'i yang mdor bsdu na rnam pa gsum ste/ zong du bya ba dang / yongs su spyad par bya ba dang / gzhag par bya ba ste / nor dang / 'bru dang / bang mdzod dang go rims bzhin no//rgyas par bya na rnam pa brgyad de/ gser la sogs pa'i nor nas sdug cing yid du 'ong ba'i dngos po thams cad kyi nor gyi bar du'o/ /nang gi ni rang gi lus kyis bsdus pa'o/ /de la phyi'i dngos po gtong ba dang po ni yan lag go/ /gtong ba lhag ma dgu ni nye ba'i yan lag ste/ dga' ba rnam pa gnyis las brtsams par rig par bya ste/gzhi yongs su bzung bas dga' ba dang / phan 'dogs pas dga' ba'o/ /de la gzhi yongs su bzung bas dga' ba ni gser la sogs pas so/ /phan 'dogs pas dga' ba ni rnam pa brgyad du rig par bya ste/ mdzes pa'i phan 'dogs pas dga' ba ni rin po che'i rgyan la sogs pas so //ngal ba yongs su spang ba'i phan 'dogs pas dga' ba ni rta dang glang po che dang / shing rta la sogs pas so/ /rtse ba dang dga' ba'i phan 'dogs pas dga' ba ni skyed mos tshal dang / dka' thub kyi nags tshal la sogs pa'o/ /bsnyen bkur bya ba'i nyon mongs pa yongs su spangs pa'i phan 'dogs pas dga' ba ni bran pho dang bran mo la sogs pas so//dbang bya ba'i phan 'dogs pas dga' ba ni grong dang grong khyer la sogs pas so/ /chung ma yongs su gzung bas phan 'dogs pas dga' ba ni chung ma la sogs pas so/ /snying po yongs su bzung bas phan 'dogs pas dga' ba ni sdug pa la sogs pa thams cad kyis so//re ba yongs su rdzogs par byed pa'i phan 'dogs pas dga' ba ni/ mgo dang mig la sogs pas so/ /de de ltar snying rje dang / byams pa dang / gtong ba'i bsam pa can du gyur nas sems can thams cad yongs su bskyab pa'i phyir/phyi phyir zhing 'jig rten pa dang / 'jig rten las 'das pa'i don yongs su tshol zhing don du gnyer ro/ /de yongs su tshol zhing don du gnyer ba'i tshe/ yongs su mi skyo ba'i sems mi skye ste/ de ltar de yongs su mi skyo bar 'gyur ro/ / yongs su skyo ba med pas bstan bcos thams cad la 'jigs pa med pa yin no/ /de'i phyir de ltar bstan bcos shes pa nyid yin te/ de ltar bstan bcos dang ldan pas bya ba dang / bya ba ma yin pa la rnam par brtag pa'i blos sems can tha ma dang / 'bring dang / mchog rnams la ci nus ci 'os su de bzhin nyid du sgrub bo//de'i phyir de 'jig rten shes pa yin te/ 'jig rten shes pas dus dang / tshod dang / ran par spyod cing ngo tsha shes pa dang / khrel yod pas shin tu brgyan pa'i sems kyi rgyud kyis/ bdag gi don dang gzhan gyi don la rab tu brtson par byed de/ de'i phyir ngo tsha shes shing khrel yod pa yin/sbyor ba de dag la yang mngon par 'byung bar spyod pa yin/ phyir mi ldog cing mi bzlogs pa'i stobs bskyed pa yang thob pa yin te/ de ltar de'i brtan pa'i stobs bskyed pa kun du bskyed pa yin/ brtan pa'i stobs bskyed pa thob pas de bzhin gshegs sa pa mchod pa dang / rim gro bya bar brtson zhing bstan pa la yang nan tan byed do//de ltar de'i sa bcu po de dag yongs su sbyong ba'i chos 'di lta ste/ dad pa dang / snying rje dang / byams pa dang / gtong ba dang / skyo ba bag la zha bar byed pa dang / bstan bcos shes pa dang / 'jig rten shes pa dang /ngo tsha shes pa dang / khrel yod pa dang / brtan pa'i stobs bskyed pa dang / de bzhin gshegs pa la mchod pa dang / rim gro bya ba kun du skyes pa yin no zhes bya ba de la/ de bzhin nyid du bsgrub bo zhes bya ba ni 'jig rten shes pa'i dbang du byas pa ste/ bstan bcos las 'byung ba bzhin no//ci nus su zhes bya ba ni bdag gis so/ /ci 'os su zhes bya ba ni gzhan dag la'o/ /ngo tsha shes pa dang / khrel yod pa'i dbang du byas nas dus dang / tshod dang / ran pa rnams kyis dus rnam pa gsum bstan te/ yid la bya ba'i dus dang / nyin zhag gi dus dang / 'bras bu yod par byed pa'i dus so//sbyor ba de dag la zhes bya ba ni/ brtan pa'i stobs bskyed pa'i dbang du byas pa ste/ de dag gi dad pa la sogs pa bstan pa rnams so/ /mngon par 'byung bar spyod pa yin/ /zhes bya ba ni rnam pa gnyis te/ phyir mi ldog pa'i stobs bskyed pas 'bri bar mi 'gyur ba dang / mi bzlogs pa'i stobs bskyed pas rgyun mi gcod pa'o/ /de bzhin gshegs pa la mchod pa dang / rim gro bya bar brtson zhing bstan pa la yang nan tan byed pa ni rnyed pa dang bkur sti'i mchod pa dang / bsgrub pa'i mchod pa ston to/ /bsgrub pa rnam pa bcu po 'dis phun sum tshogs pa rnam pa gnyis rab tu phye ba ste/bsam pa phun sum tshogs pa ni dad pa dang / snying rje dang / byams pa rnams kyis so/ /sbyor ba phun sum tshogs pa ni/ gtong ba dang / mi skyo ba dang / bstan bcos dang / 'jig rten shes pa dang / ngo tsha shes pa dang / khrel yod pa dang / brtan pa'i stobs bskyed pa dang / de bzhin gshegs pa la mchod pa dang /rim gro bya ba rnams kyis so/ /de la bdag gi don la brtsams pa ni dad pa ste/ byang chub sems dpa'i spyod pa dang / sangs rgyas kyi chos rnams la yod pa nyid dang / nus pa nyid du yid ches pa dang 'dod pa'o/ /gzhan gyi don la brtsams pa ni snying rje dang byams pa ste/phan pa dang bde ba'i bsam pas so/ /gtong ba ni gzhan dag zang zing gis sdud par sbyor ba'o/ /mi skyo ba ni mchog sdud par sbyor ba'o/ /bstan bcos shes pa dang / 'jig rten shes pa ni gzhan dag la chos kyis bsdu bar sbyor ba'o/ /lhag ma rnams ni bdun po 'di dag nyid kun du bsrung ba'i phyir sbyor ba gsum ste/ngo tsha shes pa dang / khrel yod pas dad pa la sogs pa'i mi mthun pa'i phyogs dang du mi len pa'i phyir dang du mi len pa'i sbyor ba dang / brtan pa'i stobs bskyed pas dad pa la sogs pa las bskyod par mi nus pa'i phyir mi bskyod pa'i sbyor ba dang / sangs rgyas la mchod pa dang / rim gro byed pas dad pa la sogs pa'i rtsa ba yongs su 'dzin pa'i phyir de dag gi rtsa ba rnam par dag pa'i gnas yongs su 'dzin par sbyor ba'o/ /de la mchod pa rnam pa gnyis kyis ni lus rnam pa gnyis mngon par 'grub par byed de/ de la rgya che ba ni des na mngon par 'gro bar bya ba yin no//sems las su rung ba ni des na rang bzhin gyis dge ba'i chos la dga' ba yin no/ /dad pa'i dbang zhes bya ba la sogs pa nas/ rtag tu rgyun mi 'chad par gong nas gong du khyad par yongs su tshol zhes bya ba'i bar du sum cu po snga ma ni rgya cher yongs su sbyong ba'o/ / dad pa la sogs pa tha ma sangs rgyas la mchod pa dang / rim gro bya ba 'di dag ni mdor bsdus pas yongs su sbyong bar rig par bya ste/ de lta bu ni sgrub pa'i khyad par gyis khyad par du 'phags pa'o/ /'bras bu'i khyad par gyis khyad par du 'phags pa ji lta bu zhe na/ gang gi phyir/ byang chub sems dpa'i sa rab tu dga' ba 'di la gnas pa de la mthong ba rgya chen po dang /smon lam gyi stobs kyis sangs rgyas mang po snang bar 'gyur te/ mthong ba rgya chen po dang / smon lam gyi stobs kyis sangs rgyas brgya phrag mang po dang / sangs rgyas stong phrag mang po dang / sangs rgyas 'bum phrag mang po dang /sangs rgyas khrag khrig 'bum phrag mang po dang / sangs rgyas bye ba phrag mang po dang / sangs rgyas bye ba brgya phrag mang po dang / sangs rgyas bye ba stong phrag mang po dang / sangs rgyas bye ba 'bum phrag mang po dang / sangs rgyas bye ba khrag khrig 'bum phrag mang po snang bar 'gyur ro/ /des de bzhin gshegs pa dgra bcom pa yang dag par rdzogs pa'i sangs rgyas de dag mthong nas lhag pa'i bsam pa rgya chen pos bsti stang byed do//btsun par byed do/ /ri mo byed do/ /mchod pa byed do/ /na bza' dang / zhal zas dang / gzims cha dang / snyun gyi gsos sman dang /yo byad dag kyang 'bul zhing / byang chub sems dpa'i bde bar sbyar ba yang nye bar sgrub bo/ /dge 'dun la yang tshogs pa'i yang dag pa'i ri mo byed de/ dge ba'i rtsa ba de dag kyang bla na med pa yang dag par rdzogs pa'i byang chub tu yongs su sngo bar byed do/ /des sangs rgyas bcom ldan 'das de dag la mchod pas sems can yongs su smin par bya ba kun du skyes pa yin te/de bsdu ba'i dngos po sbyin pa dang / snyan par smra bas sems can rnams yongs su smin par byed do/ /de'i mos pa'i stobs kyis bsdu ba'i dngos po 'og ma gnyis kyang rab tu skye bar gyur te/ ma lus par rtogs pa ni ma yin no//pha rol tu phyin pa bcu po dag las de'i sbyin pa'i pha rol tu phyin pa shas che ba yin te/ lhag ma rnams kyang ci nus ci 'os su yang dag par mi bsgrub pa ni ma yin no/ /de ji lta ji ltar sangs rgyas bcom ldan 'das rnams la mchod pa byed cing / sems can yongs su smin par bya ba la brtson pa dang /sa yongs su sbyong ba'i chos 'di dag yang dag par blangs te gnas pa de lta de ltar de'i dge ba'i rtsa ba thams cad mkhyen pa nyid du yongs su bsngos pa de dag de bas kyang shas cher rab tu byang ba dang / yongs su dag pa dang / ci dgar las su rung bar 'gyur ro/ / kye rgyal ba'i sras dag 'di lta ste dper na/ mgar ba mkhas pas gser gyi sa le sbram ji lta ji ltar mes bsregs pa de lta de ltar rab tu byang ba dang / yongs su dag pa dang / ci dgar las su rung bar 'gyur ro/ /kye rgyal ba'i sras dag de bzhin du byang chub sems dpa' rnams/ ji lta ji ltar sangs rgyas bcom ldan 'das rnams la mchod par byed pa dang /sems can yongs su smin par bya ba la brtson par byed pa dang / sa yongs su sbyong ba'i chos 'di dag yang dag par blangs te gnas pa de lta de ltar de'i dge ba'i rtsa ba thams cad mkhyen pa nyid du yongs su bsngos pa de dag rab tu byang ba dang / yongs su dag pa dang / ci dgar las su rung bar 'gyur ro zhes gsungs pa'o/ /de ltar na 'bras bu'i phan yon gyi khyad par rnam pa bzhir bstan pa yin te / las su rung ba 'bras bu'i phan yon gyi khyad par dang / 'jug pa 'bras bu'i phan yon gyi khyad par dang / rnam par smin pa yongs su 'dzin pa 'bras bu'i phan yon gyi khyad par dang /smon lam shes pa 'bras bu'i phan yon gyi khyad par ro/ /de la las su rung ba 'bras bu'i phan yon gyi khyad par ni/ gser gyi sa le sbram dang chos mthun pas rig par bya ste/ gser gyi sa le sbram lta bu ni dad pa la sogs pa dge ba'i chos gang dag yin pa'o//mer bsregs pa lta bu ni dgod pa rnam pa gsum ste/ sangs rgyas dang dge 'dun la mchod pa byed pas yon tan gyi zhing du dgod pa dang / sems can yongs su smin par bya ba byed pas snying rje'i zhing du dgod pa dang / byang chub tu yongs su sngo bar byed pas bla na med pa'i 'bras bur dgod pa'o//de la mthong ba rgya chen po ni mthu khyad par can gyis gzugs kyi sku mthong ba gang yin pa'o/ /smon lam gyi stobs kyis ni nang gi yang dag pa'i smon lam gyis chos kyi sku mthong ba'o/ /thabs la mkhas pas shin tu mang bar bstan pa'i phyir sangs rgyas brgya phrag mang po zhes bya ba nas/ sangs rgyas bye ba khrag khrig 'bum phrag mang po zhes bya ba'i bar gyis grangs smos so//bsti stang byed pa ni rnam pa gsum ste/ btsun par byed pas bsti stang byed pa ni bstod pa dang / bsngags pas de'i yon tan brjod pa'o/ /ri mor byed pas bsti stang byed pa ni gus par smra ba dang / phyag 'tshal ba la sogs pa'o//mchod pas bsti stang byed pa ni me tog dang / bdug pa dang / spos dang / gdugs dang / rgyal mtshan dang / ba dan la sogs pa'o/ /byang chub sems dpa'i bde bar sbyar ba ni byang chub sems dpa' rnams kyi yo byad 'jig rten dang thun mong ma yin par gyur pa gang yin pa'o/ /dge 'dun la yang tshogs pa'i yang dag pa'i ri mor byed do//kye rgyal ba'i sras dag gzhan yang byang chub sems dpa'i sa dang po 'di la gnas pa'i byang chub sems dpas byang chub sems dpa'i sa dang po de nyid kyi rnam pa dang / thob par bya ba dang / rgyu mthun pa dag sangs rgyas dang / byang chub sems dpa' dag dang /dge ba'i bshes gnyen rnams las yongs su btsal bar bya/ yongs su dri bar bya'o/ /sa'i yan lag yongs su sgrub pa'i phyir yang ngoms mi shes par bya ste/ de bzhin du sa gnyis pa nas/ byang chub sems dpa'i sa bcu pa'i bar gyi rnam pa dang / thob par bya ba dang /rgyu mthun pa dag sangs rgyas dang / byang chub sems dpa' dag dang / dge ba'i bshes gnyen rnams las yongs su btsal bar bya/ yongs su dri bar bya'o/ /sa'i yan lag yongs su sgrub pa'i phyir yang ngoms mi shes par bya'o/ /des sa'i mi mthun pa'i phyogs dang / gnyen po la mkhas par bya ste/ sa'i 'jigs pa dang / 'grub pa la mkhas pa dang / sa'i rnam pa dang / rgyu mthun pa la mkhas pa dang / sa thob pa rnam par sbyong ba la mkhas pa dang / sa'i yan lag yongs su sbyong ba la mkhas pa dang / sa nas sar 'phar ba la mkhas pa dang / sa dang sa la gnas pa la mkhas pa dang /sa dang sa'i khyad par shes pa la mkhas pa dang / sa dang sa thob nas phyir mi ldog pa la mkhas pa dang / byang chub sems dpa'i sa thams cad yongs su sbyang bas de bzhin gshegs pa'i sa gnon pa la mkhas par bya'o/ /kye rgyal ba'i sras dag de ltar byang chub sems dpa'i sa'i rnam pa mngon par sgrub pa la mkhas pa ni sa dang po las gyen du mi skyod par sa bcu pa'i bar du gnon cing thob par bya ba la thogs pa med de/thogs pa med par 'gro ba dang / sa shes pa'i snang ba sangs rgyas kyi ye shes snang ba yang 'thob bo/ /kye rgyal ba'i sras dag 'di lta ste dper na/ded dpon mkhas pas 'dron pa phal po che yongs su gdon pa'i bsam pa dang ldan pa grong khyer chen por phyin par bya bar 'dod pa ni thog ma nyid nas lam gyi yon tan dang / lam gol ba'i nyes pa dang / lam gyi bar gnas kyi khyad par dang / lam gyi bar gnas kyi gol ba'i nyes pa dang /lam rgyags dang / bya ba dang / bya ba ma yin pa rnams yongs su tshol zhing kun du 'dri'o/ /lam gyi bar gnas thog ma nyid nas ma 'phags pa nas grong khyer chen por phyin gyi bar la shin tu mkhas pa yin te/ lam gyi bar gnas thog ma nyid nas ma 'phags par shes pas rnam par brtags pa'i blo dang /rgyags dang / tshogs chen po phun sum tshogs pas 'dron pa phal po che rnams dang lhan cig tu mthar gyis grong khyer chen po'i bar du phyin par byed de/ 'brog dgon pa'i nyes pa rnams kyis bdag dang 'dron pa rnams las gnod par mi 'gyur bar byed do/ /kye rgyal ba'i sras dag de bzhin du byang chub sems dpa' ded dpon mkhas pa yang /gang gi tshe byang chub sems dpa'i sa dang po la gnas shing / sa'i mi mthun pa'i phyogs dang / gnyen po la mkhas pa dang / sa'i 'jigs pa dang 'grub pa la mkhas pa dang / sa'i rnam pa dang / rgyu mthun pa la mkhas pa dang /sa thob pa rnam par spyod pa la mkhas pa dang / sa'i yan lag yongs su sbyong ba la mkhas pa dang / sa nas sar 'phar ba la mkhas pa dang / sa dang lam la gnas pa la mkhas pa dang / sa dang sa'i khyad par shes pa la mkhas pa dang / sa dang sa thob nas phyir mi ldog pa la mkhas pa dang /byang chub sems dpa'i sa thams cad yongs su sbyangs pas/ de bzhin gshegs pa'i sa gnon pa la mkhas par gyur pa de'i tshe bsod nams kyi tshogs chen po'i rgyags yongs su gzung ba dang / ye shes kyi tshogs chen po la rnam par phye ba shin tu mkhas pa dang /sems can gyi 'dron pa phal po che yongs su gdon pa'i bsam pa dang ldan pas thams cad mkhyen pa nyid kyi grong khyer chen por phyin par bya bar 'dod cing / thog ma nyid nas sa'i lam gyi yon tan dang / sa'i lam gol ba'i nyes pa dang / sa'i lam gyi bar gnas kyi khyad par dang /sa'i lam gyi bar gnas kyi khyad par gol ba'i nyes pa dang / bsod nams kyi tshogs chen po'i rgyags bsham zhing / bsogs pa dag kyang sangs rgyas dang byang chub sems dpa' dag dang / dge ba'i bshes gnyen rnams las yongs su tshol zhing yongs su 'dri ste/ de lam gyi bar gnas dang po nas gyen du mi skyod par thams cad mkhyen pa nyid kyi grong khyer chen por phyin par bya ba'i bar la mkhas pa yin no//de de ltar ye shes kyis rnam par brtags pa'i blo dang / bsod nams dang / ye shes kyi tshogs chen po'i rgyags phun sum tshogs pas sems can gyi 'dron pa phal po che ji ltar yongs su smin par byas pa bzhin du mthar gyis 'khor ba'i 'brog dgon pa dang /mya ngan las bsgral te/ thams cad mkhyen pa nyid kyi ye shes kyi grong khyer chen po'i bar du phyin par byed cing / 'khor ba'i 'brog dgon pa'i nyes pa rnams kyis sems can gyi 'dron pa'am/bdag la gnod par yang mi 'gyur bar byed do/ /kye rgyal ba'i sras dag de lta bas na byang chub sems dpas yongs su mi skyo bar sa yongs su sbyang bar bya ba'i khyad par la brtson par bya'o/ /kye rgyal ba'i sras dag 'di ni byang chub sems dpa' rnams kyi byang chub sems dpa'i sa rab tu dga' ba'i sgor 'jug pa mdor bstan pa'o//de la gnas pa'i byang chub sems dpa' ni phal cher 'dzam bu'i gling gi dbang por 'gyur zhing dbang phyug chen po la dbang rab tu thob la/ chos rjes su srung zhing gtong ba chen pos sems can rnams sdud pa'i gtso bor gyur cing /sems can rnams kyi ser sna'i dri ma bzlog pa la mkhas pa yin/ gtong ba chen po rtsom pas yongs su dub par mi 'gyur ba yin no/ /sbyin pa'am snyan par smra ba'am don spyod pa'am/ don mthun pa las gang ci rtsom yang rung ste/ de thams cad sangs rgyas yid la bya ba dag dang / chos yid la bya ba dag dang /dge 'dun yid la bya ba dag dang / byang chub sems dpa' yid la bya ba dag dang / byang chub sems dpa'i spyod pa yid la bya ba dag dang / pha rol tu phyin pa yid la bya ba dag dang / sa yid la bya ba dag dang / stobs yid la bya ba dag dang / mi 'jigs pa yid la bya ba dag dang /sangs rgyas kyi chos ma 'dres pa yid la bya ba dag nas/ rnam pa thams cad kyi mchog dang ldan pa'i thams cad mkhyen pa'i ye shes kyi bar du yid la bya ba dang / mi 'bral ba yin te/ ji ltar na sems can thams cad kyi mchog tu 'gyur/ gtso bor 'gyur/ phul du 'gyur/ dam par 'gyur/rab mchog tu 'gyur/ gong mar 'gyur/ bla na med par 'gyur/ 'dren par 'gyur/ rnam par 'dren par 'gyur/ yongs su 'dren par 'gyur ba nas/ thams cad mkhyen pa'i ye shes la rton pa'i bar du 'gyur snyam du sems so/ /'dod na brtson 'grus rtsom pa rnam pa ji lta bus khyim dang /chung ma dang / longs spyod thams cad spangs te/ de bzhin gshegs pa'i bstan pa la rab tu 'byung ba dang / rab tu byung nas kyang skad cig thang cig yud tsam cig la ting nge 'dzin brgya rab tu thob cing snyoms par 'jug pa dang / sangs rgyas brgya mthong ba dang / de dag gi byin gyi rlabs yang dag par shes pa dang /'jig rten gyi khams brgya g.yo bar byed pa dang / zhing brgyar 'gro ba dang / 'jig rten gyi khams brgya snang bar byed pa dang / sems can brgya yongs su smin par byed pa dang / bskal pa brgyar gnas par byed pa dang / bskal pa brgya la sngon gyi mtha' dang /phyi ma'i mthar 'jug pa dang / chos kyi sgo brgya rnam par 'byed pa dang / lus brgya kun du ston pa dang / lus re re yang 'khor byang chub sems dpa' brgya brgya dang ldan par kun du ston pa'i brtson 'grus rnam pa de lta bu rtsom mo/ /de yan chad byang chub sems dpa' smon lam gyi stobs can rnams smon lam khyad par can gyi rnam par 'phrul te/de dag gi lus sam/ 'od dam/ rdzu 'phrul lam/ mig gam/ spyod yul lam/ dbyangs sam/ spyod pa'am/ bkod pa'am/ byin gyi rlabs sam/ mos pa'am/ mngon par 'du byed pa dag kyang bskal pa bye ba khrag khrig 'bum phrag ji snyed pa de snyed du yang brjod par sla ba ma yin no zhes bya ba de la rnam pa ni sa gang gi mi mthun pa'i phyogs dang /gnyen po'i rnam pa gang dag yin pa'o/ /thob par bya ba ni 'jig rten las 'das pa'i ye shes thob pa'o/ /rgyu mthun pa ni de'i rjes las thob pa'i 'jig rten pa dang /'jig rten las 'das pa'i ye shes so/ /sa'i yan lag rnams ni dad pa la sogs par rig par bya'o/ /de yongs su sgrub pa'i phyir zhes bya ba ni/ mkhas pa lngar rig par bya ste/ brtag pa la mkhas pa dang / 'thob pa la mkhas pa dang / 'phel ba la mkhas pa dang / yongs su mi nyams pa la mkhas pa dang / mthar thug par 'gro ba la mkhas pa'o/ /de la dang po ni mi mthun pa'i phyogs dang / gnyen po dang / 'jigs pa dang / 'grub pa la mkhas pa ste/ gang gi phyir des mi mthun pa'i phyogs dang / gnyen po la mkhas pa sa'i 'jigs pa dang / 'grub pa la mkhas pa zhes gsungs pa'o/ /de la sa'i mi mthun pa'i phyogs rnam pa bcu'i gnyen por sa bcu ni sngar bstan pa yin te/ de dag dang 'bral ba dang / yang dag par 'grub pa ni 'jigs pa dang 'grub pa ste/ go rims bzhin du rig par bya'o/ /gnyis pa ni 'jug pa'i thabs dang /zhugs pa dang / de'i khyad par la mkhas pa ste/ gang gi phyir sa'i rnam pa dang / rgyu mthun pa la mkhas pa dang / sa thob pa rnam par spyod pa la mkhas pa dang / sa'i yan lag yongs su sbyangs pa la mkhas par bya zhes gsungs pa'o/ /gsum pa ni sa/ / gzhan du 'pho ba dang / gnas pa dang / 'phel ba la mkhas pa ste/ gang gi phyir sa nas sar 'phar ba la mkhas pa dang / sa dang sa la gnas pa la mkhas pa dang / sa dang sa'i khyad par shes pa la mkhas par bya zhes gsungs pa'o/ /bzhi pa ni phyir mi ldog pa la mkhas pa ste/ gang gi phyir sa thob nas phyir mi ldog pa la mkhas par bya zhes gsungs pa'o//lnga pa ni byang chub sems dpa'i sa'i mthar phyin nas/ de bzhin gshegs pa'i sa la 'jug pa la mkhas pa ste/ gang gi phyir byang chub sems dpa'i sa thams cad yongs su sbyangs pas/ de bzhin gshegs pa'i sa la ye shes kyis sa gnon pa la mkhas par bya'o zhes gsungs pa'o//de la 'jug pa'i 'bras bu'i phan yon ni ded dpon chen por gyur pas sems can gyi 'dron pa phal po che thams cad mkhyen pa nyid kyi grong khyer chen por phyin par bya ba'i phyir yang dag par sbyor ba'o/ /de la ded dpon mkhas pa ni rnam pa gnyis su rig par bya ste/mi nor bar mkhas pa dang / lam dang de'i gol ba dang / lam gyi bar gnas dang / de'i gol ba la mkhas pa ste/ gang gi phyir lam gyi yon tan dang / lam gol ba'i nyes pa dang / lam gyi bar gnas kyi khyad par dang / lam gyi bar gnas kyi gol ba'i nyes pa zhes gsungs pa'o//rton pa la mkhas pa ni gang gi phyir/ lam rgyags dang / bya ba dang / bya ba ma yin pa rnams zhes gsungs pa'o/ /de la rnam par smin pa yongs su 'dzin pa dang 'bras bu'i phan yon gyi khyad par ni rnam pa gnyis te/ lus rgya che ba ni 'dzam bu'i gling gi dbang phyug nyid du 'gyur ba la sogs pa ste gang gi phyir/de la gnas pa'i byang chub sems dpa' ni phal cher 'dzam bu'i gling gi dbang por 'gyur zhes bya ba la sogs pa gsungs pa'o/ /rgyu mthun pa rgya che ba ni ser sna 'dul ba la mkhas pa la sogs pa ste/ gang gi phyir sems can rnams kyi ser sna'i dri ma bzlog pa la mkhas pa yin zhes bya ba la sogs pa nas/ting nge 'dzin brgya rab tu thob ces bya ba'i bar du gsungs pa'o/ /de la gtong ba chen pos sems can rnams sdud pa'i gtso bor gyur zhes bya ba ni yang dag par 'ged pa dang / byed du 'jug pas bdag gis sbyin pa dang / sbyin du gzhug pa'o//sems can rnams kyi ser sna'i dri ma bzlog pa la mkhas pa zhes bya ba ni thabs mkhas pas bsdu ba'i dngos po rnams kyis sems can gyi don byed pa'o/ /sangs rgyas la sogs pa yid la bya ba dag gis ni rang gi don dang mi 'bral te/ de'i yid la byed pa de dag ni las de la 'jug pa la dang /rgya chen po byed pa dang / kun nas nyon mongs pa yongs su spong ba byed par 'gyur ro/ /de ni mdor bsdu na yid la bya ba rnam pa bzhir rig par bya ste/ mchog yid la bya ba ni dkon mchog gsum yid la bya ba gang yin pa'o/ /chos mthun pa yid la bya ba ni/ byang chub sems dpa' yid la bya ba gang yin pa'o//yon tan yid la bya ba ni bdag dang gzhan gyi byang chub sems dpa'i spyod pa rang bzhin dang bcas pa'i rim pa yid la byed pa gang yin pa'o/ /'dod pa'i don yid la bya ba ni stobs la sogs pa yid la bya ba gang yin pa'o/ /sangs rgyas la sogs pa'i chos nyid yid la bya ba gang yin pa de ni sangs rgyas la sogs pa yid la bya ba don dam pa ste/gang gi bdag gis sbyin no / /de la sbyin no/ /'di la sbyin no/ /de'i phyir sbyin no snyam pa'i rlom sems med pa'o/ /de bzhin du las thams cad la byed pa po dang / gnas dang bya ba dang / bya ba'i 'bras bu la rlom sems med pa'o//de thams cad kyang byang chub tu sngo bar byed do/ /de ci'i phyir zhe na/ sems can thams cad kyi mchog tu 'gyur zhes rgya cher 'byung ba'o/ /de la mchog ni rnam pa gnyis te/ yon tan sbyangs pas gtso bor 'gyur ba mchog dang / zla med pas phul du 'gyur ba mchog go/ /de la rnam pa gnyis kyis gtso bor 'gyur bar rig par bya ste/ye shes phun sum tshogs pas dam par 'gyur ba dang / spobs pa phun sum tshogs pas rab mchog tu 'gyur ba'o/ /rnam pa gnyis kyis phul du 'gyur bar rig par bya ste/ mtshungs pa med pas gong mar 'gyur ba dang / lhag ma med pas bla na med par 'gyur ba'o/ /de ltar rang bzhin gyi yon tan gyis sangs rgyas brjod nas las kyi yon tan gyis brjod de/ 'dren pa zhes bya ba la sogs pa'o/ /de la lung gi don du chos gzhag pa'i tshul ston pas 'dren pa'o/ /thob pa'i don du nyon mongs pa 'dul ba dang / lam bzang po la 'jug pa'i gdams ngag sbyin pas rnam par 'dren pa dang / yongs su 'dren pa ste go rims bzhin no/ /gang dag thams cad mkhyen pa'i ye shes la rton pa'i bar du 'gyur snyam du sems so zhes bya ba ni byang chub sems dpa' chen po'i lam ston pa'i phyir ro/ /'di ni re zhig byang chub sems dpa' khyim pa'i rnam par smin pa yongs su 'dzin pa 'bras bu'i phan yon gyi khyad par ro//byang chub sems dpa' rab tu byung ba ni bsam gtan gyi las gtso bo ste/ rnam par smin pa yongs su 'dzin pa dang / 'bras bu'i phan yon gyi khyad par rnam pa gnyis su rig par bya'o/ /'di lta ste/ ting nge 'dzin ni skad cig gcig la ting nge 'dzin brgya la dbang thob pa'i phyir ro//ting nge 'dzin gyi las ni sangs rgyas brgya mthong ba la sogs pa ste/ de sangs rgyas rnams dang / sangs rgyas kyis byin gyis brlabs pa'i byang chub sems dpa' rnams las ye shes tshol bar byed do/ /g.yo bar byed pa nyid kyis ni gdul bya rnams 'dun par byed do//'gro ba dang snang bar byed pa gnyis kyis song ste mthong nas yongs su smin par byed do/ /skye ba'i khyad par yongs su 'dzin pas ni bskal pa brgyar gnas par byed do/ /sems can rnams kyi sngon gyi mtha' dang phyi ma'i mtha' la sdig pa dang bral ba'i dbang du byas te/ las kyi rgyud ston to/ /rang gi blo yongs su smin par bya ba'i phyir chos kyi rnam grangs dag gi don sems so/ /lus brgya kun du ston pa dang / /lus re re yang 'khor byang chub sems dpa' brgya brgya dang ldan par ston pas ni de'i don mang du byed par sbyor ba dang / don myur bar byed par sbyor bar rig par bya'o/ / de yan chad ni smon lam shes pa'i 'bras bu'i phan yon gyi khyad par du rig par bya'o/ /de la lus ni byang chub sems dpa'i spyod pa thams cad kyi gnas te/ de las 'od dang rdzu 'phrul lo/ /'di la brten nas lha'i mig dang de'i yul te/ spyan lnga po thams cad yin par rig par bya'o/ /rdzu 'phrul la brten nas dbyangs dang /spyod pa dang / bkod pa dang / byin gyi rlabs so/ /de la dbyangs ni sprul pa'i ngag go/ /spyod pa ni 'gro ba'o/ /bkod pa ni sprul pa'o/ /byin gyi rlabs ni gang gis gzhan byin gyis rlob pa'o/ /de'i 'og tu ting nge 'dzin gyi sgo la brten nas mos pa ji lta ba bzhin du mthu'i bya ba'i don sgrub bo//shes rab kyi spyan gyis bsdus pa'i gzungs kyi sgo la brten nas chos ston par 'du byed do/ /mdor bsdu na sa thams cad ni rgyu'i lus dang 'bras bu'i mtshan nyid du rig par bya'o/ /'phags pa sa bcu pa las/ sa dang po'i rnam par bshad pa rdzogs so// // bam po lnga pa/ mngon par rtogs pa dang ldan pa'i byang chub sems dpa' 'jig rten las 'das pa'i lam la gnas te tshul khrims rnam par dag pa'i dbang du byas nas sa gnyis pa rnam par gzhag par rig par bya'o/ /tshul khrims rnam par dag pa de yang rnam pa gnyis su rig par bya ba ste/ 'byung bar byed pa rnam par dag pa dang / rang bzhin rnam par dag pa'o/ /de la 'byung bar byed pa rnam par dag pa ni sems kyi bsam pa bcus yongs su bstan te/ gang gi phyir kye rgyal ba'i sras dag byang chub sems dpa'i sa dang po legs par yongs su sbyang ba byas pa'i byang chub sems dpa' de byang chub sems dpa'i sa gnyis pa la mngon par 'dod pa yin te/de'i sems kyi bsam pa bcu 'byung ngo / /bcu gang zhe na/ 'di lta ste/ drang po'i bsam pa dang / 'jam pa'i bsam pa dang / las su rung ba'i bsam pa dang / dul ba'i bsam pa dang / zhi ba'i bsam pa dang / dge ba'i bsam pa dang /ma 'dres pa'i bsam pa dang / mi lta ba'i bsam pa dang / rlabs po che'i bsam pa dang / che ba nyid kyi bsam pa zhes gsungs pa'o/ /rang bzhin rnam par dag pa ni tshul khrims rnam par dag pa gsum ste/ ldog pa'i tshul khrims dang / dge ba'i chos sdud pa'i tshul khrims dang /sems can gyi don bya ba'i tshul khrims so/ /de la ldog pa'i tshul khrims rnam par dag pa ni dge ba bcu'i las kyi lam yang dag par lta ba'i mthar thug pa rnams kyis yongs su bstan te/ gang gi phyir srog gcod pa spangs pa yang yin te zhes bya ba nas/ gang gi phyir log par lta ba spangs pa yang yin te zhes bya ba'i bar du gsungs pa'o//ldog pa'i tshul khrims rnam par dag pa de ni sdom pa'i tshul khrims rnam par dag par yang rig par bya'o/ /dge ba'i chos sdud pa'i tshul khrims rnam par dag pa ni de'i 'og nas/ de lta bas na bdag gis mngon par sgrub tu 'dra ba la rnam pa thams cad yongs su sbyang zhing mngon par bsgrub pa nyid la brtson par bya'o snyam nas zhes bya ba'i bar 'dis yongs su bstan to//sems can gyi don bya ba'i tshul khrims rnam par dag pa ni de'i 'og nas/ de sems can rnams la de bas shas cher phan pa'i sems bskyed ces bya ba'i bcu pa'i bar gyis yongs su bstan to//de la bsam pa bcu po dag las drang ba'i bsam pa ni so sor brtags pa'i bya ba med pas tshul khrims rnam par dag pa'i dbang du byas par rig par bya ste/ ji ltar 'gro bar bya ba de bzhin du 'gro ba'i phyir ro/ /de yang rnam pa dgur rig par bya ste/'jam pa drang ba'i bsam pa ni bde ba dang / yid bde ba dang ldan pas tshul khrims la 'jug pa'i phyir ro/ /las su rung ba drang ba'i bsam pa ni rang dbang du rang gi ngang gis 'jug pas tshul khrims kyi mi mthun pa'i phyogs nyon mongs pa dang ma 'dres pa'i phyir ro/ /dul ba drang ba'i bsam pa ni brjed kyang nyes par 'khrul pa med pa ste/rta shin tu dul ba mi 'gyur ba bzhin no/ /zhi ba drang ba'i bsam pa ni nga rgyal med pas des khengs par mi 'gyur ba'i phyir ro/ /dge ba drang ba'i bsam pa ni 'khrug pa la ji mi snyam pas gser bzang po bzhin no/ /ma 'dres pa las drang ba'i bsam pa ni de tsam gyis chog par mi 'dzin pa ste/tshul khrims rnam par dag pa la gnas nas sems rnam par dag par bya ba'i phyir rab tu dben pa 'dod pa'i phyir ro/ /mi lta ba drang ba'i bsam pa ni srid pa dang longs spyod phun sum tshogs pa la mi smon pa'i phyir ro/ /rlabs po che'i drang ba'i bsam pa ni sems can gyi don du srid pa rgyun mi 'chad par smon pa'i phyir ro//che ba nyid drang ba'i bsam pa ni de'i 'bras bu 'byung ba kun nas nyon mongs pa med pa'i phyir ro/ /de la las kyi lam bshad pa ni srog gcod pa spangs pa yang yin te zhes bya ba'o/ /yang smos pa ni spong ba khyad par can yang 'thob par bstan pa'i phyir ro//de la srog gcod pa spong ba'i dbang du byas nas spong ba rnam pa gsum yongs su bstan te/ rgyu spong ba ni gang gi phyir/ dbyig pa spang / mtshon cha spang / khon du 'dzin pa spangs nas 'dzem pa dang ldan zhing snying rje la zhugs pa zhes gsungs pa'o/ /gnyen pos spong ba ni gang gi phyir/srog chags 'byung po thams cad la phan pa dang / bde ba dang / snying brtse ba dang / byams pa'i sems dang ldan te zhes gsungs pa'o/ /'bras bu spong ba ni gang gi phyir dang / de kun du rtog pa tsam gyis kyang srog chags rnams la rnam par 'tshe bar mi byed na/ sems can gzhan la sems can du 'du shes shing ched du bsams te/lus kyis rnam par tho 'tshams pa chen po bya ba lta ci smos zhes gsungs pa'o/ /de la srog gcod pa'i rgyu ni rnam pa gnyis te/ nye bar len pa'i rgyu dang / 'byung bar byed pa'i rgyu'o/ /de la nye bar len pa'i rgyu ni rnam pa gnyis te/ gnod par byed pa'i dngos po dbyig pa dang / gcod pa'i dngos po mtshon cha'o/ /de gnyis spong ba ni dbyig pa spangs/ mtshon cha spangs zhes bya'o/ /sngags dang / sman dang / khams mi mnyam par byed pa'i gnod pa'i bar dag kyang gnod par byed pa nyid du shes par bya'o/ /'byung bar byed pa'i rgyu yang rnam pa gnyis te/zhe sdang dang 'dod pa'o/ /'dod pa yang rnam pa gnyis te/ longs spyod 'dod pa ni des na longs spyod kyi phyir phyi ma la bdag yongs su 'dor bas mi 'dzem pa ste/ de'i gnyen por gang gi phyir 'dzem pa dang ldan zhes gsungs pa'o/ /srog chags kyi yan lag dang de gsad par mngon par dga' ba'i 'dod pa de'i gnyen por gang gi phyir/snying rje la zhugs pas zhes gsungs pa ste/ de las ldog pa ni rgyu spong ba'o/ /de la gnyen po ni rnam pa gnyis te/ bde 'gro dang mya ngan las 'das pa'i rgyu dge ba yang dag par 'dzin du 'jug pas sems can thams cad la phan pa dang /snying brtse ba dang / de dag 'bras bu de thob par smon pas byams pa'i sems te/ gang gi phyir srog chags 'byung po thams cad la phan pa dang / bde ba dang / snying brtse ba dang / byams pa'i sems dang ldan te zhes gsungs pa'o/ /de ltar phyin ci ma log par rgyu dang 'bras bu 'dod pas/gti mug las byung ba mchod sbyin byed pa la sogs pas byas pa'i cho ga'i srog gcod pa spong bar bstan pa yin te/ 'dis spong bar byed pas spong ba nyid gnyen po ste/ gnyen pos spong ba'o/ /srog chags dang 'byung po smos pas ni sems can rnams rtag pa ma yin pa chad pa ma yin pa yongs su ston te/srog gi dbang po dang ldan pas tshe ji srid bar gnas pa'i phyir dang / shi ba rnams kyang las dang nyon mongs pa'i dbang gis yang 'byung ba'i phyir ro/ /de la srog gcod pa'i rgyu'i 'bras bu ni kun du spyod pa'o/ /de yang rnam pa gnyis te chung ba ni/ sems kyis rnam par 'tshe ba'o//che ba ni lus kyis rnam par 'tshe ba ste/ gang gi phyir kun du rtog pa tsam gyis kyang srog chags la rnam par 'tshe bar mi byed na sems can gzhan la sems can du 'du shes shing ched du bsams te/ lus kyis rnam par tho 'tshams pa chen po bya ba lta ci smos zhes gsungs pa'o/ / kun du spyod pa chen po ni rnam pa lngas yongs su bstan te gzhan smos pas brgyud pa dang / sems can smos pas dngos po dang / sems can du 'du shes pa smos pas 'du shes dang / ched du bsams pa smos pas mngon par 'du byed pa dang / lus kyi rnam par tho 'tshams pa chen po zhes bya ba smos pas rang bzhin gyis ston to//ma byin par len pa spang ba'i dbang du byas nas spong ba rnam pa gsum yongs su bstan te/ rgyu spong ba dang / gnyen po spong ba dang / 'bras bu spong ba'o/ /de la rgyu ni bdag gi longs spyod kyis chog mi shes pa ste/ de'i gnyen por bdag gi longs spyod kyis chog shes zhes bya ba gsungs so//gnyen po ni bdag gi longs spyod la chags pa yang gtong bas sbyin pa ste/ des phyi ma gzhan na longs spyod la mi slu ba yin te/ gang gi phyir gzhan gyi longs spyod la bag byed pa zhes gsungs pa'o/ /'bras bu ni kun du spyod pa'o/ /de yang rnam pa gnyis te/ chung ba ni dngos po chung ngu len pa'o//che ba ni de las gzhan pa'i dngos po len pa'o/ /de gnyis ni rnam pa lngas yongs su bstan te/ gzhan smos pas rgyu dang / yongs su gzung ba'i dngos po smos pas dngos po dang / der 'du shes pa smos pas 'du shes dang / rku sems nye bar gzhag pa smos pas mngon par 'du byed pa dang rang bzhin gyis ston to//tha na rtswa dang / lo ma yang ma byin par mi len na 'tsho ba'i yo byad gzhan dag lta ci smos zhes bya ba ni chung ba dang che ba'o/ /'dod pa la log par g.yem pa spong ba'i dbang du byas nas spong ba rnam pa gsum yongs su bstan te/ de la rgyu ni bdag gi chung mas chog mi shes pa ste/de'i gnyen por bdag gi chung mas chog shes zhes bya ba gsungs so/ /gnyen po ni phyi ma gzhan na tshangs par spyod 'dod pas chung ma 'dod pa med pa ste/ gang gi phyir gzhan gyi chung ma la 'dod pa med pa zhes gsungs pa'o/ /'bras bu ni kun du spyod pa'o/ / de yang rnam pa gnyis te/ chung ba ni sems so/ /che ba ni lus kyis te/ rnam par rig byed rnam pa gnyis so/ /de ni 'jug par bya ba ma yin pa dang / dus ma yin pa dang / gnas ma yin par 'gro bas yongs su bstan te/ de la 'jug pa ma yin par 'gro ba ni gzhan gyis yongs su bzung ba'i bud med thun mong ba rnams la ste/de la thun mong ba ni gzhan gyis yongs su bzung ba dag go/ /thun mong ma yin pa dag ni gzhan gyi chung ma rnams te/ gang gi phyir gzhan gyis yongs su bzung ba'i bud med dang gzhan gyi chung ma zhes gsungs pa'o/ /pha ma dang 'brel pa dang / bu mo gzhan sbyin par byas pas mtshan ma lta bu yang de bzhin te/gang gi phyir rus dang mtshan mas srung ba zhes gsungs pa'o/ /bud med smos pas ni sems can ma yin pa'i grangs su 'gro ba'i bud med ces bya ba bsal ba'i phyir ro/ /dus ma yin par 'gro ba ni dus nges pa dag gi tshe ste/ gang gi phyir chos kyis bsrungs pa rnams la zhes gsungs pa'o/ /gnas ma yin par 'gro ba ni yan lag ma yin pa'i rnam par rig byed de/ gang gi phyir yan lag ma yin pa'i rnam par rig byed ces gsungs pa'o/ /chung ba dang che ba 'dir yang yid kyi las dang / lus kyi las spang bar rig par bya ste/gang gi phyir chags sems kyang mi skye na/ gnyis kyis dbang po gnyis spod pa lta ci smos zhes gsungs pa'o/ /brdzun du smras pa spong ba'i dbang du byas nas/ gnyen po spong ba dang / 'bras bu spong ba yongs su bstan te/ gnyen pos spong ba nyid rgyu spong ba'o//ci'i phyir zhe na/ lus kyi las ltar brdzun du smra ba 'di la phyi rol gyi dngos po med pa dang / gzhi dang khyad par med pa'i phyir ro/ /ji ltar srog gcod pa spong ba la nye bar len pa'i rgyu rnam pa gnyis su bshad de/ phyi rol gyi dngos po gnod pa byed pa'i dngos po dbyug pa dang / gcod pa'i dngos po mtshon cha dang rnam pa gnyis spong bar bshad de/dbyug pa spangs/ mtshon cha spangs zhes gsungs pa de ltar brdzun du smra ba spong ba la phyi rol gyi dngos po med de/ de bas na lus kyi las ltar 'di la phyi rol gyi dngos po med ces bshad do/ /gzhi dang khyad par med pa'i phyir zhes bya ba la gzhi ni rgyu ste srog gcod pa'i rgyu ni chags pa dang /zhe sdang dang / gti mug rnams so/ /brdzun du smra ba'i rgyu ni pha rol slu ba'i bsam pa ste/ de las ldog pa'i rgyu spong ba'o/ / de ni bden par smra ba nyid kyis 'gyur te/ bden par smra ba de nyid ni pha rol slu ba'i bsam pa'i gnyen po yin te/ de la brten nas de 'byung ba'i phyir de ni de'i rgyu yin no//de bas na gzhi dang khyad par med ces bshad de/ de ltar na gnyen pos spong ba nyid rgyu spong bar bshad pa yin no/ /gnyen pos spong ba yang rnam pa gsum gyis yongs su bstan te/ 'du shes ji lta ba bzhin du smra ba ni gang gi phyir/ bden par smra zhes gsungs pa'o//brtags nas dngos po ji lta ba bzhin du smra ba ni gang gi phyir/ yang dag par smra zhes gsungs pa'o/ /smra bar bya ba'i dus su smra ba ni gang gi tshe bdag dang gzhan la mi phan par mi 'gyur ba yin te/ gang gi phyir dus su smra zhes gsungs pa'o/ /'bras bu ni kun du 'byung ba chung ba dang che ba ste/ gang gi phyir de'i tha na rmi lam na yang lta ba dang /bzod pa dang / 'dod pa dang / rab tu rtog pa bsgyur te/ slu ba'i bsam pas brdzun gyi tshig mi smra na/ ched du bsams te brjod pa lta ci smos zhes gsungs pa'o/ /de la rmi lam na zhes bya ba ni chung ba'o/ /ched du bsams te zhes bya ni che ba'o/ /lta ba dang /bzod pa dang / 'dod pa dang / rab tu rtog pa rnams ni bshad pa'i mtshams sbyar bar rig par bya ste/ shes rab kyis mthong ba ni rab tu rtog pa'o/ /phra ma spong ba'i dbang du byas nas spong ba rnam pa gnyis yongs su bstan te/ gnyen pos spong ba dang / 'bras bus spong ba'o/ /de la gnyen pos spong ba na dbyen mi byed cing rnam par tho mi 'tshams ba la zhugs pa ste/sgrub pa gang gis gzhan dag la phan pa ma yin pa'i dbyen mi byed pa ste/ gang gi phyir sems can rnams la dbyen mi byed cing rnam par mi 'tshe ba la zhugs pa zhes gsungs pa'o/ /'bras bu ni kun du spyod pa ste/de las ldog pa ni 'bras bu spong ba'o/ /'bras bu kun du spyod pa de yang phyogs dang / las dang / bsam pa dang / rab tu dbye bas yongs su bstan te/ gang las thos nas gang la brjod pa de ni phyogs rnam pa gnyis so/ /len pa dang / brjod pa ni las so/ /dbye ba'i phyir zhes bya ba ni bsam pa ste gang gi phyir des de dag dbye ba'i phyir tshu bi las thos nas pha bir snyod pa ma yin/de dag dbye ba'i phyir pha bi las thos nas tshu bi la snyod pa ma yin te zhes gsungs pa'o/ /rab tu dbye ba ni 'byed pa dang / bsam pa dang las su rig par bya'o/ /'byed pa ni rnam pa gnyis te/sngon ma bye ba dang / sngon bye ba la'o/ /de'i gnyen por 'dus pa rnams mi 'byed cing bye ba rnams la yang mi snon te zhes gsungs pa'o/ /bsam pa yang rnam pa gnyis te/ 'dum pa la mi dga' ba dang / mi 'dum pa la mngon par dga' ba ste/ de'i gnyen por mi 'dum pa la mi dga' zhing 'dum pa la mos pa yin pas zhes gsungs so//las kyang bden pa dang / brdzun pa'i don tha dad pa'i tshig gis rnam pa gnyis te/ chung ba dang che ba'o/ /de'i gnyen por bden nam brdzun yang rung mi 'dum par bya ba'i tshig mi smra'o zhes gsungs so/ /tshig rtsub po spang ba'i dbang du byas nas/spong ba rnam pa gnyis yongs su bstan te/ 'bras bu spong ba dang / gnyen po spong ba'o/ /de la 'bras bu ni kun du spyod pa ste/ zher 'debs pa dang / brlang ba dang / gzhan la gnod pa dang / gzhan gyi mtshang 'dru ba ste/ gzhan gyi mtshang 'dru ba ni gang gis pha rol 'khrug par byed pa'o//'di dag ni brjod pa'i mtshams sbyar ba yin par rig pa ste/ snga phyi rnam grangs su gtogs pa'i tshig ces bya ba'i tha tshig go/ /de yang tshogs par mi 'byung ba mngon sum dang / lkog na rgyun du sbyor ba ni gang gi phyir/ grong mi'i tshig dang / ma rabs kyi tshig ngor brjod pa dang /tshig mi brjod pa zhes gsungs pa'o/ /de la mngon sum dang / rgyun du 'byung ba ni che ba'o/ /lkog na brjod pa rgyun du mi 'byung ba ni chung ba'o/ /de brjod na tshul khrims dang 'gal ba dang / gzhan dag la sdug bsngal bskyod par 'gyur zhing / des gzhan 'khrug par 'gyur te/ gang gi tshe brdzun dang rnar mi snyan pa zhes gsungs pa'o/ /gnod par byed pa'i rgyu dang / phrag dog las byung ba'i phyir tshul khrims dang 'gal te/ gang gi phyir khro zhing rngam pa las byung ba zhes gsungs pa'o/ /gzhan gyi mtshang 'dru bar byed pa na gnod pa rnam pa gnyis byed de/ de dag dang khon ma byung ba 'byin pas thos pa dang /dran pa'i dus na mi snyan pa dang / yid la mi 'thad pa gnyis kyi snying dang / sems mi dga' bar byed pa'i phyir ro/ /dga' ba bskyed pa med par byed pa ni bdag mi phyogs pa dang / gzhan dag kyang mi phyogs par byed pa de/ gang gi phyir mi snyan pa dang / yid la mi 'thad pas snying na bar byed pa dang /yid gdung bar byed pa dang / rang gi sems kyi rgyud dang / gzhan gyi sems kyi rgyud ma rung bar byed pa'i tshig ces gsungs pa'o/ /de las ldog pa ni 'bras bu spong ba'o/ /gnyen pos spong ba ni 'jam por smra ba nyid do/ /de yang rnam pa gnyis te/ gya tshom ma yin pa dang /mngon par 'dod par bya ba ste/ gang gi phyir mnyen pa dang yid la 'thad pa dang zhes gsungs pa'o/ /de la gya tshom ma yin pa ni tshul khrims kyi yan lag tu gtogs pa'i phyir te/ brdzun ma yin pas sdom pa'i rgyun mi 'chad pa'i phyir ro/ /mngon par 'dod par bya ba de ni mngon par mtho ba dang /mya ngan las 'das pa'i grong khyer dang mthun pas bde ba yid du 'ong ba dang / phan pa yid du 'ong ba dang / yid du 'ong ba gnyis kyi phyir te/ gang gi phyir brdzun ma yin pa dang / rnar snyan pa dang / snying la 'bab pa dang / grong khyer pa zhes gsungs pa'o/ /de yang mdza' ba dang /mi mdza' ba dang / skye bo tha mal pas thos pa dang / dran pa'i dus na 'dod pa ste/ gang gi phyir skye bo mang po dga' ba dang / skye bo mang po yid la 'bab pa zhes gsungs pa'o/ /de ltar gyur pa de don rnam pa gnyis byed de/ ting nge 'dzin 'grub pas mchog tu dga' ba'i bde ba skyed pa'i phyir gzhan dag la khon ma byung ba mi 'byin pa dang /bdag kyang mngon du phyogs la gzhan yang mngon du phyogs par byed pa'i phyir/ dga' ba ma skyes pa bskyed pa ste/ gang gi phyir yid dga' bar byed pa dang / yid tshim par byed pas rang gi sems kyi rgyud dang / gzhan gyi sems kyi rgyud dang bar byed pa zhes gsungs pa'o//tshig 'khyal pa spong ba'i dbang du byas nas gnyen pos spong ba dang / 'bras bu spong ba yongs su bstan to/ /gnyen po ni phan tshun smra bar bya ba'i dbang du byas nas/ gleng bar sbyor ba'i tshe lan 'debs par glon pa'i tshig dang / gang gi tshe mi dge ba'i gnas las bslang ste/dge ba'i gnas la 'jog nus par mthong ba de'i tshe smra ba ste/ gang gi phyir lan legs par glon pa'i tshig dang / dus su smra ba zhes gsungs pa'o/ /phyin ci ma log pa'i tshig ni gang gi phyir yang dag par smra ba zhes gsungs pa'o/ /phan tshun gdams ngag rjes su bstan pa'i dbang du byas nas gdams ngag la sbyor ba'i tshe/don gyi tshig dang / chos kyi tshig ni gang gi phyir don smra ba dang chos smra ba zhes gsungs pa'o/ /phan tshun ltung ba las 'byin pa'i dbang du byas nas/ rtsod pa zhi bar byed par sbyor ba'i tshe rigs par smra ba dang / lung smra ba ni gang gi phyir 'dul bar smra ba zhes gsungs pa'o//sdud par 'gyur ba'i tshig gis chos ston pas sdud par sbyor ba dang / mnyan par 'os pa'i spyod lam gyis gnas pa rnams la smra ba dang / gleng bslang ba dang bcas par smra ba ni gang gi phyir bzod pa dang ldan pa dang / dus dang rmang dang bcas pa'i tshig smra ba yin zhes gsungs pa'o/ /'bras bu ni kun du spyod pa ste/chung ba dang che ba'o/ /de las ldog pa ni 'bras bu spong ba ste/ chung ba dang che ba nyid ni gang gi phyir de tha na bzhad gad du bya ba'i tshig yongs su spang bar bya ba yang yongs su spong na tshig gis rnam par g.yengs pa lta ci smos zhes gsungs pa'o/ /brnab sems med pa ni dngos po dang /rang bzhin dang / rab tu dbye ba dang / rnam pa gsum gyis yongs su bstan to/ /dngos po yang yongs su gzung ba dang rang bzhin no/ /yongs su gzung ba'ang rnam pa gnyis te/ bdag gir byas pas yongs su bzung ba dang spyod pas yongs su bzung ba ste gang gi phyir de gzhan gyi nor dang gzhan gyi 'dod pa zhes gsungs pa'o//rang bzhin yang rnam pa gnyis te/ zong gi dngos po 'gron bu dang / gser la sogs pa dang / yongs su spyad pa ste gang gi phyir gzhan gyi rdzas dang yo byad ces gsungs pa'o/ /brnab sems med pa'i rang bzhin ni gnyen po gang gis brnab sems mi bskyed pa ste/gang gi phyir brnab sems mi skyed ces gsungs pa'o/ /de'i rab tu dbye ba ni brnab sems rnam pa gsum gyi gnyen por rig par bya ste/ brnab sems rnam pa gsum ni bslang ba'i sgo dang / thob par smon pa'i sgo dang / rku ba'i sgo nas 'byung ba ste/ de'i gnyen por 'dod par mi byed cing mi smon chags pa'i sems mi bskyed do zhes bya ba gsungs pa'o//de ltar gong ma gnyis ni chung ba'o/ /gsum pa ni che ba'o/ /gnod sems med pa ni mi mthun pa'i phyogs kyi gnyen por sems can rnam pa lnga la yongs su bstan te/ gnod par byed pa rnams la ni gang gi phyir byams pa'i sems zhes gsungs pa'o//nyes par spyad pa spyod pa rnams la ni gang gi phyir phan pa'i sems zhes gsungs pa'o/ /sdug bsngal zhing slong ba rnams la ni gang gi phyir snying rje'i sems dang bde ba'i sems zhes gsungs pa'o/ /bde ba'i phrag dog byed pa rnams la ni gang gi phyir 'jam pa'i sems zhes gsungs pa'o//byang chub kyi sems yongs su bzung ba rtsol ba shin tu mang pos sgyid lug pa'i dngos po rnams la ni gang gi phyir skye bo thams cad la phan 'dogs pa'i sems dang ldan pa zhes gsungs pa'o/ /mi mthun pa'i phyogs ni rnam pa drug go/ /de ni byams pa la sogs pa'i sems la bye brag med par shes par bya'i/re re la ni ma yin par bstan te/ gang gi khon ma byung ba 'byin pa dang / gang gis byung ba'i rjes su 'brang ba'am/ 'phel bar byed pa'am/ gang gis rang gi sems kyi rgyud la dge ba'i lo tog ma skyes pa mi skyed cing skyes pa yang yongs su 'grib par byed pa dang /gang gis mi dge ba ma skyes pa skyed cing / skyes pa yang 'phel bar byed pa dang / gang gis gzhan gyi sems kyi rgyud la mi sdug pa ma skyes pa skyed cing skyes pa yang 'phel bar byed pa dang / gang gis sdug pa ma skyes pa mi skyed cing skyes pa la yang rjes su mi sems pa ste/ de ni khro ba dang /khon du 'dzin pa dang / tha ba dang / dri ma dang / gnod sems dang / khong khro ba sngon du 'gro ba gang dag yin pa de dag spangs te zhes bya ba'i tshig de dag dang go rims bzhin du bstan par rig par bya'o/ /khro ba la sogs pa de dag ni nyes par spyod pa gzhan gyi sngon du 'gro ba yin te/ de bas na sngon du 'gro ba dag ces bya'o/ /de dag spangs na gzhan gyi sems kyang de ni byams pa dang ldan pa nyid sems de gang gi phyir byams pa dang ldan pa gang dag yin pa de dag la rtogs pa yin no zhes gsungs pa'o/ /yang dag pa'i lta ba ni lta ba rnam pa bdun gyi gnyen por yongs su bstan te/ lta ba rnam pa bdun ni theg pa gzhan la lta ba de'i gnyen por yang dag pa'i lam la gnas zhes bya ba gsungs so//yongs su rtogs pa bzang po ma yin pa'i lta ba dang / tshul khrims tsam gyis rnam par dag par lta ba de'i gnyen por dge mtshan dang / bkra shis rnam pa sna tshogs dang / tshul khrims ngan pa'i lta ba dang bral ba zhes gsungs pa'o//de la tshul khrims tsam gyis rnam par dag pa lta ba ni bdag tu lta ba mchog tu 'dzin pa'i tshul khrims yin par rig par bya'o/ /bdag gi mchog tu 'dzin pa'i lta ba de'i gnyen por lta ba drang zhes gsungs so/ /'chang ba'i lta ba dang / brdzun du brjod pa'i lta ba de'i gnyen por g.yo med la sgyu med pas zhes bya ba gsungs so/ /'jig rten pa'i ma dag pa'i lta ba de'i gnyen por sangs rgyas dang / chos dang / dge 'dun la bsam pa nges pa yin no zhes bya ba gsungs so/ /de ltar rnam pa thams cad spangs pa'i tshul khrims yongs su bstan nas/rtag tu rgyun mi 'chad par rjes su srung bas de nyid kyi skyon med pa yongs su ston te/ gang gi phyir de dge ba bcu'i las kyi lam 'di dag rtag tu rgyun mi 'chad par srung zhes bya ba gsungs so/ /'di lta ste rnam pa thams cad dang / skyon med pas ni de ltar rang bzhin gyi tshul khrims nyid yongs su bstan pa yin no//de'i 'og tu dge ba'i chos sdud pa'i tshul khrims rnam par dag pa yongs su bstan pa'i phyir sems kyi bsam pa mngon par sgrub pa la sogs pa'i rim pa ston te/ 'di ltar sems can gyi bsam pa mngon par bsgrub ste/ sems can rnams kyi ngan song dang /ngan 'gro dang / rnam par ltung ba yod pa gang yang rung ste/ de dag thams cad mi dge ba bcu'i las kyi lam rnams yang dag par blangs pa'i rgyu las byung gi / /bdag gis ni 'di ltar bdag nyid yang dag par sgrub pa la gnas te/ gzhan dag kyang yang dag par sgrub pa la dgod par bya'o//de ci'i phyir zhe na/ 'di ni gnas ma yin zhing go skabs med de/ gang bdag log par sgrub pa la gnas shing / gzhan dag yang dag par sgrub pa la dgod par bya ba 'di ni gnas med do snyam nas zhes bya ba de la ngan song dang / ngan 'gro dang / log par ltung ba gdags pa ni don rnam pa gsum gyis rig par bya ste/nyes par spyod pas 'gro ba'i don dang / sdug bsngal gyi gnas lus mngon par 'grub pa'i don dang / gnod pa sna tshogs su rtag tu ltung ba'i don to/ /kha na ma tho ba dang / grangs dang / 'bras bu thob par byed pas bsdus pa'i phyir mi dge ba bcu'i las kyi lam gyi tshig tu rig par bya'o//de la kha na ma tho ba dang / grangs dang / 'bras bu thob par byed pas bsdus pa'i phyir mi dge ba bcu'i las kyi lam du bstan par rig par bya zhes bya ba la/ kha na ma tho bas bsdus pa'i phyir mi dge ba zhes bya ba ste/ kha na ma tho ba ni 'bras bu ngan song dang / ngan 'gro dang / rnam par ltung ba rnams smad pa'i phyir ro/ /grangs kyis bsdus pa'i phyir bcu zhes bya'o/ /'bras bu thob par byed pas bsdus pa'i phyir las kyi lam rnams shes par bya'o/ /yang dag par blangs pa'i rgyus zhes bya ba la/ yang dag par blangs pa ni kun du spyod pa'o/ /de ltar rgyu med pa dang mi 'dra ba'i rgyu bsal te/las bdag gir bya ba nyid yin par rtogs nas sems can log par sgrub pa la gnas pa rnams bdag nyid de 'dra bas ni de dang 'bral mi nus par rig nas de dag yongs su bskyab pa'i phyir bdag mngon par spro'o/ /de'i 'og tu mi mthun pa'i phyogs dang / gnyen por gyur pa 'bras bu dang bcas pa'i las kyi lam rnams dang /dge ba'i las kyi lam gong nas gong du rnam par dag pa 'bras bu dang bcas pa la rab tu brtags nas/ mchog mngon par sgrub par sbyor bar 'dod pas/ dge ba'i chos sdud pa'i tshul khrims rnam par dag pas sgrub par byed de/ gang gi phyir de 'di ltar rnam par spyod de/mi dge ba bcu'i las kyi lam 'di dag yang dag par blangs pa'i rgyus sems can dmyal ba dang / dud 'gro'i skye gnas dang / gshin rje'i 'jig rten gyi 'gro ba rnams yod par gyur to/ /dge ba bcu'i las kyi lam rnams yang dag par blangs pa'i rgyus ni lha dang mir skye ba la sogs pa srid pa'i rtse mo'i bar du skye ba yod par gyur to //de'i gong du dge ba bcu'i las kyi lam 'di dag nyi tshe ba'i sems dang / khams gsum pas skrag pa'i yid dang / snying rje chen po med pa dang / gzhan las thos pa'i rjes su 'gro ste/ sgra'i rjes su 'brang bas shes rab kyi rnam pas yongs su bsgoms na nyan thos kyi theg pa 'grub par byed do zhes gsungs pa ste/shes rab kyi rnam pa ni 'dir bden pa'i rnam pa yin par rig par bya ste/ ngan 'gro rnams ni sdug bsngal lo/ /mi dge ba'i las kyi lam rnams ni kun 'byung ba'o/ /de spangs pa ni 'gog pa'o/ /de'i gnyen po ni lam mo//bde 'gro ni sdug bsngal ba'o/ /dge ba'i las kyi lam rnams ni kun 'byung ba'o/ /bag la nyal spangs pa ni 'gog pa'o/ /de'i gnyen po ni lam mo/ /shes rab kyi rnam par yongs su bsgom par 'dra ba la nyan thos rnams kyi theg pa ni rgyu bsags pa dang / 'jig pa dang / mi lta ba dang / rten dang / dmigs pa dang / rnam pa lngas tha dad par bstan to/ /de dag las nyi tshe ba nyan thos kyi theg pa'i sems can ni rgyu yin te/ dge ba'i rtsa ba dpag tu yod pa mngon par sgrub pa'i skabs yin pa'i phyir dang / bdag gi don 'ba' zhig byed pa'i phyir / gang gi phyir nyi tshe ba'i sems zhes gsungs pa'o//sdug bsngal gyis 'jigs pa ni gang gi phyir khams gsum pas skrag pa'i yid ces gsungs pa'o/ /sems can rnams la mi lta ba ni gang gi phyir snying rje chen po med pa zhes gsungs pa'o/ /slob dpon gyi man ngag ni rten to/ /sgra ni dmigs pa'o/ /sgra ni gang zhe na/ bdag dang sems can la sogs par 'dogs pa ste/de ltar de dag sgra tsam du rtogs nas gang zag la bdag med pa la 'jug ste/ gang gi phyir gzhan las thos pa'i rjes su 'gro ste/ sgra'i rjes su 'brang ba zhes gsungs pa'o/ /rang sangs rgyas rnams kyi ni mngon par rdzogs par 'tshang rgya ba dang / bshad pa la mi phyogs pa dang / gnas pa dang rnam pa gsum gyis bstan to/ /de dag ni ston pa'am/ rjes su ston pa la ma brten par mngon par rdzogs par 'tshang rgya ste/ gang gi phyir gzhan gyi dring mi 'jog pa dang / rang mngon par rdzogs par 'tshang rgya ba zhes gsungs pa'o/ /chos ston par mi 'dod de/mi ston pa ni gang gi phyir snying rje chen po dang thabs la mkhas pa med pa zhes gsungs pa'o/ /rten cing 'brel par 'byung ba la gnas pa shin tu cha phra bas mang du gnas pa ni gang gi phyir/ rkyen 'di nyid pa zab mo khong du chud pas/ yongs su sbyangs na rang sangs rgyas kyi theg pa 'grub par byed do zhes gsungs pa'o//rgyu chung ngu bsags pa dang / sdug bsngal gyis 'jigs pa dang / sems can la mi lta ba yang de dag la yod do/ /bye brag gang yin pa de ni bshad zin to/ /byang chub sems dpa' rnams kyi ni rgyu bsags pa dang / dgos pa dang / des nus pa dang /sa dang rnam pa bzhis bstan te/ dge ba'i rtsa ba thams cad mngon par sgrub pa'i skabs yin pa'i phyir dang / sems can thams cad kyi don byed pa'i skabs yin pa'i phyir theg pa chen po'i sems shin tu rgyas shing tshad med pa ni rgyu yin par rig par bya ste/ gang gi phyir de'i gong du shin tu rgya che zhing /tshad med pa'i sems kyis yongs su sbyangs nas zhes gsungs pa'o/ /sdug bsngal gyi rgyu dang / sdug bsngal bar gyur pa'i sems can rnams la ni snying brtse ba dang / snying rje bar rig par bya ste/ de dang ldan pas sems can gyi don ni byang chub sems dpa'i dgos pa yin par rig par bya ste/gang gi phyir snying brtse ba dang snying rje dang ldan pa zhes gsungs pa'o/ /de nus pa ni bsdu ba'i dngos po bzhi po dag ste/ gang gi phyir thabs la mkhas pas bsdus pa zhes gsungs pa'o/ /sa ni rnam pa gsum ste/ lhag pa'i bsam pa dag pa'i sa ni smon lam chen po bcus rab tu phye ba yin te/gang gi phyir smon lam chen po shin tu btab pa zhes gsungs pa'o/ /phyir mi ldog pa'i sa ni gang thob nas/ zhi bar gnas kyang sems can rnams yongs su mi gtong ba ste/ gang gi phyir sems can thams cad yongs su mi gtong ba zhes gsungs pa'o/ /dbang bskur ba chen po'i sa ni gang la sangs rgyas kyi ye shes shin tu rgyas pa rtogs pa chen po 'dod pa ste/gang gi phyir sangs rgyas kyi ye shes shin tu rgyas pa la dmigs pas zhes gsungs pa'o/ /byang chub sems dpa'i sa yongs su dag pa dang / pha rol tu phyin pa yongs su dag pa'i spyod pa rgya chen po 'grub par byed do zhes bya ba la/'dir byang chub sems dpa'i spyod pa shin tu rgyas pa sgrub bo zhes brjod pas chog pa 'dras kyang sa dang pha rol tu phyin pa yongs su dag pa'i tshig gis gong nas gong du rnam par dag pa'i phyir dang / chos kyi mchog rnam par dag pa'i phyir byang chub sems dpa'i spyod pa de shin tu rgyas par yongs su ston te/pha rol tu phyin pa'i don ni mchog gi don to / /de'i gong du zhes bya ba ni spong ba dang / dbang byed pa dang / yongs su spong zhing mkhas pa dang / chog mi shes pa dang / rnam pa bzhis gong nyid yin par rig par bya ste mi dge ba'i las kyi lam rnams bag chags dang bcas par spong ba'i phyir dang /dge ba thams cad la dbang byed pa'i phyir dang / nyan thos dang rang sangs rgyas kyi theg pa yongs su spong zhing / byang chub sems dpa'i theg pa la mkhas pa'i phyir dang / lhag ma dang bcas pas chog mi shes pa'i phyir ro/ /shes bya thams cad shes pa la dbang bas rnam pa thams cad yongs su sbyang bar rig par bya ste/gang gi phyir de'i gong du rnam pa thams cad ces yongs su sbyangs pas stobs bcu'i stobs dang / sangs rgyas kyi chos thams cad yang dag par 'grub pa'i bar du'o/ /de lta bas na bdag gis mngon par bsgrub tu 'dra ba la rnam pa thams cad yongs su spyod zhing mngon par sgrub pa nyid la brtson par bya'o zhes gsungs pa ste/bdud phyir rgol ba dang / theg pa dman pa dag sel bar byed pa'i skabs yin pas stobs dang / sangs rgyas kyi chos smos par rig par bya ste / de'i 'og tu snying rje la gnas te/ sems can gyi don byed pa'i tshul khrims kyi dbang du byas nas don lnga yongs su bstan te/yongs su shes pa dang / smon lam dang / sgrub pa dang / rgyu mthun pa dang / rgyu mthun pa'i 'bras bu'o/ /de la yongs su shes pa ni gnas skabs kyi bye brag dang / rnam par smin pa'i 'bras bu'i bye brag dang / rgyu mthun pa'i 'bras bu'i bye brag dang / rnam pa gsum gyis yongs su bstan to/ /gnas skabs kyi bye brag ni mi dge ba'i las kyi lam rnams las brtsams nas rgyu dang 'bras bu chen po dang / 'bring dang / chung ngu'i bye brag ste/ gang gi phyir de 'di ltar yang dag par slob ste/ mi dge ba bcu'i las kyi lam 'di dag la brten pa dang /bsgoms pa dang / mang du byas pa'i shas che bas ni sems can dmyal ba'i rgyur 'gyur ro/ /'bring gis ni dud 'gro'i skye gnas kyi rgyur 'gyur ro/ chung ngus ni gshin rje'i 'jig rten gyi rgyur 'gyur te zhes gsungs pa ste/ gong du ni ngan song gi rgyu tha dad pa med par rnam par spyad kyi da ni tha dad par spyad do//rnam par smin pa'i 'bras bu ni thams cad kyang ngan song rnams te/ gang gi phyir srog gcod pa nas/ log par lta ba'i bar gyis sems can dmyal ba'i bar du khrid do/ /dud 'gro'i skye gnas su khrid do/ /gshin rje'i 'jig rten du khrid do zhes gsungs pa'o//rgyu mthun pa'i 'bras bu ni mi rnams kyi nang du skyes na yang / so so'i rnam pa gnyis gnyis te/ de nas gal te mi rnams kyi nang du skyes na yang rnam par smin pa gnyis mngon par sgrub ste/ tshe thung ba dang / nad mang bar 'gyur ba'o zhes bya ba ni srog gcod pa'i'o/ /longs spyod chung ba dang /thun mong gi longs spyod du 'gyur ba'o zhes bya ba ni ma byin par len pa'i 'o/ /g.yog 'khor yid brtan du mi rung ba dang / 'gran zla dang bcas pa'i chung mar 'gyur ba'o zhes bya ba ni 'dod pa log par g.yem pa'i'o/ /skur pa mang ba dang / gzhan gyis bslu bar 'gyur ba'o zhes bya ba ni brdzun du smra ba'i'o//g.yog 'khor mi 'dum pa dang / g.yog 'khor ngan par 'gyur ba'o zhes bya ba ni phra ma zer ba'i 'o/ /yid du mi 'ong ba thos pa dang / 'thab mo'i tshig tu 'gyur ba'o zhes bya ba ni tshig rtsub po'i'o/ /gzung bar 'os pa'i tshig ma yin pa dang / ma nges pa'i spobs par 'gyur ba'o zhes bya ba ni tshig 'khyal pa'i'o//chog mi shes pa dang / 'dod pa che bar 'gyur ba'o zhes bya ba ni brnab sems kyi'o/ /phan pa mi 'tshol ba dang gzhan gyis gnod pa bya bar 'gyur ba'o zhes bya ba ni gnod sems kyi'o/ /lta ba ngan par ltung ba dang / g.yo sgyu can du 'gyur ba'o zhes bya ba ni log par lta ba'i'o/ /de la gnas skabs dang /rnam par smin pa tha dad pa gnyis kyis ni sdug bsngal mi bzad pa nyid yongs su ston to/ /ji lta zhe na/ chung ngu rnams kyis ni gshin rje'i 'jig rten mi bzad pa'o/ /'bring rnams kyis ni rab tu mi bzad pa'o/ / chen po rnams kyis ni mchog tu mi bzad pa'o/ /rgyu mthun pa'i 'bras bu'i bye brag ni bde 'gro'i bar du yang rjes su 'brel pas khyab pa nyid do//re re dang mtha' dag gi ni ngan song rnams su sdug bsngal che ba dang / tshad med par 'gyur bar rig par bya ste/ gang gi phyir de ltar na mi dge ba bcu'i las kyi lam 'di dag ni sdug bsngal gyi phung po chen po tshad med pa sdud par 'gyur gyis zhes gsungs pa'o//smon lam ni sems can gyi don bya ba'i don du dge ba'i chos bsdu ba'i phyir theg pa chen po'i chos la mngon par dga' ba nyid kyi bsam pa ste/ gang gi phyir mi dge ba bcu'i las kyi lam 'di dag bdag gis spangs te/ chos kyi kun dga' la dga' bas dga' bar gnas par bya'o snyam nas zhes gsungs pa'o//sgrub pa ni dge ba'i las kyi lam la gnas par byed cing / de'i mi mthun pa'i phyogs spong bar sbyor la/ gzhan dag kyang de la gzhog pa ste/ gang gi phyir de mi dge ba bcu'i las kyi lam 'di dag spangs te/ dge ba bcu'i las kyi lam la gnas shing / gzhan rnams kyang de dag nyid la 'god do zhes gsungs pa'o//rgyu mthun pa ni snying rje skyes pa la brten nas/ sems can rnams la de bas kyang shas cher sems rnam pa bcu bskyed pa'o/ /de ni sems can rnam pa brgyad la rig par bya ste/ nyes par spyod pa la zhugs pa rnams la ni legs par spyad pa la 'jug par smon pa ste/gang gi phyir de sems can rnams la de bas kyang shas cher phan pa'i sems nyid bskyed ces gsungs pa'o/ /legs par spyad pa la zhugs pa rnams la ni de'i 'bras bu thob par smon pa ste/ gang gi phyir bde ba'i sems nyid ces gsungs pa'o/ /phan tshun regs pa'i 'phrod pa rnams la ni 'dum par smon pa ste/gang gi phyir byams pa'i sems nyid ces gsungs pa'o/ /sdug bsngal ba rnams la ni de dang 'brel bar smon pa ste/ gang gi phyir snying brtse ba'i sems nyid ces gsungs pa'o/ /bde ba rnams la ni bag yod par smon pa ste/ gang gi phyir snying rje'i sems nyid ces gsungs pa'o//mu stegs can la ni 'jug par phan gdags par bya ba la mngon par phyogs pa ste/ gang gi phyir phan gdags pa'i sems nyid ces gsungs pa'o/ /chos 'di pa rnams la ni/ yongs su mi nyams par smon pa ste/ gang gi phyir kun du bsrung ba'i sems nyid ces gsungs pa'o//byang chub tu smon pa yongs su bzung ba'i sems can thams cad la ni bdag gi lus nyid du 'dzin pas sems can de dag ni bdag gi lus so snyam pa ste/ gang gi phyir mnyam pa'i sems nyid ces gsungs pa'o/ /sems bskyed pa tha ma gnyis ni de dag nyid ltos pas theg pa chen po'i lam du zhugs pa dang /bsod nams dang ye shes kyi tshogs sogs par rig par bya ste/ gang gi phyir slob dpon gyi sems nyid dang / ston pa'i sems nyid bskyed ces gsungs pa'o/ /rgyu mthun pa'i 'bras bu ni snying rje'i khyad par gyis yongs su zin pa'i 'dun pa'i khyad par ro//de ni phyin ci log gi dbang du byas nas 'dod pa dang / srid pa dang / tshangs par spyod pa tshol bar gyur pa'i sems can rnams la blta bar bya ste/ 'dod pa tshol bar gyur pa'i sems can dag ni rnam pa gnyis te/ yongs su spyod pa'i gnas skabs dang / kun du tshol ba'i gnas skabs so//yongs su spyod pa yang rnam pa gsum ste/ thun mong ma yin pa'i yongs su spyod pa dang / chog mi shes par yongs su spyod pa dang / sogs 'jog byed pa'i yongs su spyod pa'o/ /kun du tshol ba yang rnam pa gnyis te/ nyes par spyad pa la sbyor bas tshe 'di kun du tshol ba dang /legs par spyad pa la sbyor bas tshe rabs gzhan kun du tshol ba'o/ /srid pa tshol ba yang 'gro ba dang / khams kyi bye brag gis rnam pa gnyis so/ /tshangs par spyod pa tshol ba yang rnam pa gnyis te/ gzhan mu stegs can rnams kyi log pa dang chos 'di pa rnams kyi theg pa dman pas yang dag pa nyid de/de la gnas pa'i sems can de dag dang mthun pa'i gnyen po la dgod par bya'o/ /de la lta ba ngan pa ni phyin ci log bzhi ste/ de dag las gnyis ni nges par sems pa las byung ba'i phyir blo gros mi nyams pas rab tu phye ba'o/ /bdag dang gtsang bar 'du shes pa gnyis ni nges par sems pa med par yang 'byung ba'i phyir bsam pa mi mnyam pas rab tu phye ba ste/de dag gi rgyu ni lam gol ba thibs por rgyu ba nyid yin no/ / lam gol ba ni nyon mongs pa'o/ /thibs po ni nyon mongs pa'i bag la nyal yin te/ gang gi phyir 'di snyam du sems te/ kye ma sems can 'di dag ni lta ba ngan par ltung ba blo gros mi mnyam zhing /bsam pa mi mnyam pa/ lam gol ba'i thibs por rgyu ba yin gyis zhes gsungs pa'o/ /de dag dang mthun pa'i gnyen po dam pa'i chos dang / tshul bzhin yid la byed pa dang / yang dag pa'i lta ba 'jig rten las 'das pa ste/ gang gi phyir de dag bdag gis ma nor ba'i lam dang /yang dag pa'i lam dang / ji lta ba na de bzhin nyid la dgod par bya'o zhes gsungs pa'o/ /thun mong ma yin pa yongs su spyod pa las brtsams te/ phan tshun regs mi 'phrod pa rnams kyi mi mthun pa ni dgrar byed pa'i sems dang / 'thab pa'i tshig dang gnyis kyis rab tu phye ba'o//de ltar regs mi 'phrod pa ni gnod par bya ba mngon par 'du byed pas 'bar bar byed pa ste/ gang gi phyir kye ma sems can 'di ni regs mi 'phrod pa mi mthun par 'dzin cing / rtsod pa la zhugs pa rtag tu rgyun mi 'chad par khro ba dang / khon du 'dzin pas 'bar bar gyur pa yin zhes gsungs pa'o//dgrar byed pa nyid ni sems kyis byed de/ mi mthun par 'dzin zhes bya ba'i tshig gis byed par ston to/ /'thab pa ni rtsod pa la zhugs pa zhes bya ba'i tshig gis ston to/ /gnod pa bya ba mngon par 'du byed pa ni khro ba dang / khon du 'dzin pa zhes bya ba'i tshig gis ston to/ /de dag dang mthun pa'i gnyen po ni byams pa chen po nye bar sgrub pa ste/gang gi phyir de dag bdag gis bla na med pa'i byams pa chen po nye bar sgrub pa la dgod par bya'o zhes gsungs pa'o/ /chog mi shes par yongs su spyod pa las brtsams te ngoms mi myong ba ni brnab sems te/ sems kyis dang / rku ba dang / gzhal lugs la g.yo byed pa dang / brdzun smra ba la sogs pa'i sbyor ba ste/ lus dang ngag dang gnyis kyis rab tu phye ba yin te/ gang gi phyir kye ma sems can 'di dag ni/ ngoms mi myong zhing gzhan gyi nor la mngon par 'dod pa can ya nga ba'i 'tsho bas rjes su spyod pa yin gyis zhes gsungs pa'o//de dag dang mthun pa'i gnyen po ni/ lus dang ngag dang yid kyi las kyi mtha' yongs su dag pas 'tsho ba ste/ gang gi phyir de dag bdag gis lus dang ngag dang yid kyi las kyi mtha' yongs su dag pas 'tsho ba la dgod par bya'o zhes gsungs pa'o/ / sogs 'jog byed pas yongs su spyod pa las brtsams te sogs pa'i tshe/ de la mngon par chags pa dang / de'i dgra bo la zhe sdang ba dang / de la yon tan du 'dzin pas 'dod chags la sogs pa'i gzhi'i nyes pa dang yongs su spyod pa'i tshe/ yul la nyon mongs pa'i sgo mang po nas rgyun mi 'chad par yongs su gdung ba'i nyes pa dang /de'i nyes dmigs ma mthong ba rnams nges par 'byung ba mi tshol ba'i nyes pa ste/ gang gi phyir kye ma sems can 'di dag ni 'dod chags dang / zhe sdang dang / gti mug gi gzhi dang ldan pa/ nyon mongs pa sna tshogs kyi me lce rtag tu rgyun mi 'chad par kun du 'bar bar gyur kyang de las nges par 'byung ba'i thabs yongs su mi tshol ba yin gyis zhes gsungs pa'o//de dag dang mthun pa'i gnyen po ni nyon mongs pa thams cad shin tu zhi ba la dgod pa ste/ gang gi phyir de dag bdag gis nyon mongs pa thams cad rab tu zhi ba/ 'tshe ba med pa'i mya ngan las 'das pa la dgod par bya'o zhes gsungs pa'o//tshe 'di la kun du tshol ba'i nyes par spyad pa la zhugs pa rnams kyi nyes pa ni/ log pa la bde bar mthong ba dang / tshe rabs gzhan gyi nyes dmigs yod yang dag pa mi mthong ba dang / tshe 'di'i nyes dmigs yod yang dag pa shin tu mi mthong ba'i phyir/gti mug gi mun pa'i rab rib dang / ling tog dang mun nag tu gyur pas bsgribs pa ste/ gang gi phyir kye ma sems can 'di dag ni gti mug gi mun pa'i rab rib dang / ling tog dang mun nag gis bsgribs pa zhes gsungs pa'o/ /de la log pa la bde bar mthong bas gang gi phyir gti mug gi mun pa'i rab rib ces bya'o//tshe rabs gzhan gyi nyes dmigs yod yang dag pa mi mthong bas ling tog ces bya'o/ /tshe 'di'i nyes dmigs yod yang dag pa shin tu mi mthong bas mun nag ces bya'o/ /gti mug de'i rgyu bag la nyal brtas par gyur pa dang / de'i tshogs legs par spyad pa'i mi mthun pa'i phyogs la zhugs pas zag pa med pa'i shes rab las ring du gyur pa yang nyes pa ste/ gang gi phyir mun nag gi thibs po chen por zhugs pa shes rab kyi snang ba dang ring du gyur pa zhes gsungs pa'o/ /thibs po zhes bya ba'i sgra ni gti mug gi rgyu bag la nyal la bya'o//de'i brtas pa ni chen po zhes bya ba'i sgras yongs su ston to/ /gnod pa chen po'i gnas ngan song du 'gro ba yang nyes pa ste/ gang gi phyir mun pa nag po'i nang na 'thoms pa zhes gsungs pa'o/ /de la gnod pa ni mun nag gi sgras yongs su bstan te / mun nag gi nang na gang du rgyu ba der gnod par 'gyur te/de dang chos mthun pas ngan song rnams ni gnod pa chen po'i gnas su gyur pa'o/ /der 'gro ba ni 'thoms pa zhes bya ba bstan to/ /sdig pa byas pa'i mtshan ma mthong bas/ 'gyod pa dang bcas pa'i mthong bas 'chi ba yang nyes pa ste/ gang gi phyir yang ba mthong bar zhugs pa yin gyis zhes gsungs pa'o//sngon sdig pa byas pa'i mtshan ma mthong ba dang / gnyen po yang dag par ma bsgrubs pa'i phyir 'gyod pa'i lta ba ni yang ba mthong ba yin no/ /zhugs pa zhes bya ba ni 'chi ba'i dus na'o/ /de dag dang mthun pa po ni sgrib pa med pa'i shes rab kyi mig yongs su sbyang ba ste/de dag bdag gis ci nas kyang chos thams cad kyi ji lta ba de bzhin nyid gzhan gyi dring mi 'jog pa thob par 'gyur bar shes rab kyi mig sgrib pa med pa rnam par sbyang bar bya'o zhes gsungs pa'o/ /tshe rabs gzhan kun du tshol ba na legs par spyad pa la zhugs pa rnams kyi nyes pa ni lam ya nga bar zhugs pa yin te/gang gi phyir kye ma sems can 'di dag ni 'khor ba'i lam ya nga bar zhugs pa zhes gsungs pa ste/ lam ya nga ba de ni rang bzhin dang / gegs dang / chud za bar bstan par rig par bya'o/ /rang bzhin ni phongs pa'i gzhir gyur pa'i phyir 'khor ba'o/ /de la nges par 'byung ba'i gegs ni rnam pa brgyad do//ngan song dang mthun pa'i phyir g.yang sa la mngon du phyogs pa ste/ gang gi phyir sems can dmyal ba dang / dud 'gro'i skye gnas dang / gshin rje'i 'jig rten gyi g.yang sa la mngon du phyogs pa zhes gsungs pa'o/ /'bras bu sdug bsngal ba bde bar lta ba la gnas pas rgya'i nang du zhugs pa ni gang gi phyir /lta ba ngan pa'i rgya nyam nga bar zhugs pa zhes gsungs pa'o/ /de'i rgyu gti mug gi bag la nyal gyis khebs pa'i phyir thibs po'i kun nas yogs pa'o/ /des na brjod du zin kyang sdug bsngal de khong du mi chud pa ste/ gang gi phyir gti mug thibs pos kun nas yogs pa zhes gsungs pa'o/ /don dam pa'i bde ba la lam log par zhugs pa'i phyir/ log pa'i lam du zhugs pa ni gang gi phyir lam log par gol ba'i lam du zhugs pa zhes gsungs pa'o/ /thob pa'i 'bras bu yongs su spyod pa la 'dod chags kyis ldongs pa'i phyir/ldongs par gyur pa ni gang gi phyir ldongs par gyur pa zhes gsungs pa'o/ /mi khom par skyes pa dang / bag med pa'i nyes pa gnyis kyis sangs rgyas 'byung ba mnyes par mi byed pas ston pa dang bral ba ni gang gi phyir yongs su 'dren pa med pa zhes gsungs pa'o/ /bram ze la sogs pa tshangs pa'i 'jig rten la sogs pa la nges par 'byung bar lta bas/gang du 'gro bar bsams pa de las de'i blo gzhan du gyur pa ni nges par 'byung ba ma yin pa la/ nges par 'byung bar lta ba zhes gsungs pa'o/ /bdud kyi yul 'dod pa la kun du chags pa ni bsod nams zad pa dang / mi sogs pa gnyis kyis bcom pa'i phyir chom pos zin pa ni gang gi phyir bdud kyi lam gyi chom pos zin pa zhes gsungs pa'o//chud za ba ni rnam pa gsum ste/ sa ngan pa la gnas pa'i phyir ston pa mkhas pa med pa ni gang gi phyir/ yongs su 'dren pa mkhas pa dang bral ba zhes gsungs pa'o/ /dgra'i sa na gnas pa ni gang gi phyir bdud kyi bsam pa'i thibs por zhugs pa zhes gsungs pa'o//zun gyi sa las ring du gyur pa ni gang gi phyir sangs rgyas la bsams pa las ring du gyur pa yin gyis zhes gsungs pa'o/ /de dag dang mthun pa'i gnyen po ni 'khor ba las bsgral ba dang / thams cad mkhyen pa nyid la dgod pa ste gang gi phyir de dag bdag gis rnam pa de lta bu'i 'khor ba'i nags khung ya nga ba bgrod par dka' ba las bsgral bar bya/'jigs pa med pa'i gnas thams cad mkhyen pa nyid kyi grong khyer chen por dgod par bya'o zhes gsungs pa'o/ /'gro ba'i sgo nas srid pa tshol ba ni klung chen por bying ba nyid kyi nyes pa ste gang gi phyir kye ma sems can 'di dag ni klung rlabs chen po'i nang du bying ba zhes gsungs pa'o//de ni rang bzhin dang / gnod pa 'byung bar byed pa dang / chud za bas bstan par rig par bya'o/ /de la rnam pa lngas rang bzhin bstan te/ chu bo'i klung che ba'i phyir/ zab pa ni gang gi phyir 'dod pa dang /srid pa dang / ma rig pa dang / lta ba'i chu bor zhugs pa zhes gsungs pa'o/ /'khor ba'i rgyun gyis rjes su bdas pa'i phyir/ bdas pa ni gang gi phyir 'khor ba'i rgyun gyis bdas pa zhes gsungs pa'o/ /sred pa zhes bya ba'i phyir/ ming ni gang gi phyir sred pa'i chu klung du zhugs pa zhes gsungs pa'o//skad cig tsam yang mi sdod pa dang / 'gram blta bar mi nus pa'i phyir/ shugs drag pa ni gang gi phyir shugs drag pos bdas te lta ba'i mthu med pa zhes gsungs pa'o/ /'dod pa la sogs pa'i rnam par rtog pa mang po'i rjes su 'gro bas rgyas pa nyid ni gang gi phyir 'dod pa dang /gnod sems dang / rnam par 'tshe ba'i rnam par rtog pa mang po'i rjes su rgyu ba zhes gsungs pa'o/ /gnod pa 'byung bar byed pa yang rnam pa bzhi ste/ ngar 'dzin pa dang / nga yir 'dzin pa gnyis kyis khyim gyi gnas las mi 'phags pa'i phyir/ chu srin gyis zin pa ni gang gi phyir 'jig tshogs la lta ba'i chu'i srin pos zin pa zhes gsungs pa'o//bor nas kyang 'dod pa rjes su dran pas 'dod pa rnams su skor ba'i phyir/ klong du chud pa ni gang gi phyir 'dod pa'i thibs po'i klong du zhugs pa zhes gsungs pa'o/ /yongs su spyod pa'i dus na dga' ba can dang / 'dod chags kyis bde ba'i 'dam du thogs pa'i phyir/dkyil du thogs pa ni gang gi phyir dga' ba can dang / 'dod chags kyi dkyil du kun du thogs pa zhes gsungs pa'o/ /tha snyad kyi dus na nga drag go snyam pa la sogs pa nga rgyal rnam pa gsum gyis khengs par gyur pa'i phyir/ gling gi thang la thon pa ni gang gi phyir nga'o snyam pa'i nga rgyal gyi thang la 'thon pa zhes gsungs pa'o//chud za ba yang rnam pa gsum ste/ ngan song rnams na skyabs med pa'i phyir 'chi bas chud za ba ni gang gi phyir dpung gnyen med pa zhes gsungs pa'o/ /bde 'gror mi 'phags pa'i phyir/ mi 'gro bas chud za ba ni gang gi phyir skye mched kyi grong nas ma 'phags pa zhes gsungs pa'o//mi khom par skyes te sangs rgyas 'byung ba dang bral ba'i phyir/ gzhan du 'gro bas chud za ba ni gang gi phyir sgrol ba mkhas pa dang bral ba yin gyi zhes gsungs pa'o/ /de rnams las bzlog pa de dag dang mthun pa'i gnyen po ni thams cad mkhyen pa nyid kyi gling la dgod pa ste gang gi phyir de dag bdag gis snying rje chen po dang /dge ba'i rtsa ba'i stobs kyis bton te/ thams cad mkhyen pa nyid kyi gling 'tshe ba med pa/ rdul med pa/ 'jigs pa dang skrag pa thams cad med pa la rab tu dgod par bya'o zhes gsungs pa'o//khams kyi sgo nas srid pa tshol ba ni/ btson rar bcug pa'i nyes pa ste gang gi phyir kye ma sems can 'di dag ni 'khor ba'i btson rar bcug pa zhes gsungs pa'o/ /btson rar bcug pa de yang sdug bsngal ba nyid dang / longs spyod zad pa dang / sdug pa dang bral ba dang / bcing ba dang sgrib pa'i nyes pa lnga dang ldan par rig par bya'o//de dag ni phongs pa rnam pa lngar rig par bya ste/ nad dang / sdug bsngal ba dang / yid mi bde ba dang / 'khrug pa rnam pa mang po'i phyir nad med pa med pas phongs pa ni gang gi phyir/ sdug bsngal ba dang / yid mi bde ba dang / 'khrug pa mang po mang ba zhes gsungs pa'o//phun sum tshogs pa spangs pa yang mi sdug pa/ rgud pa dang 'brel pa'i phyir longs spyod kyis phongs pa ni gang gi phyir sdug pa dang mi sdug par 'brel pa zhes gsungs pa'o/ /der rgud pa dang bral ba mya ngan byed pa'i phyir/ nye dus phongs pa ni gang gi phyir/ mya ngan dang smre sngags 'don pa dang bcas pa'i rjes su rgyu ba zhes gsungs pa'o//gzugs dang gzugs med pa'i khams su skyes pa 'chal pa'i tshul khrims spangs pa rnams la yang / tshul khrims kyi sdom pa dang mi mthun pa 'dod pa la sred pa'i bag la nyal rjes su 'brel pa'i phyir/ tshul khrims kyis phongs pa ni gang gi phyir srid pa'i sgrog tu bcug pa zhes gsungs pa'o//'jig rten pa'i shes pa thob pa rnams kyi de dang mi mthun pa ma rig pa'i bag la nyal gyis khebs pa'i phyir/ lta bas phongs pa ni gang gi phyir khams gsum ma rig pa'i thibs pos kun nas khebs pa yin gyis zhes gsungs pa'o//de rnams las bzlog pa de dag dang mthun pa'i gnyen po ni gang gi phyir/ de dag bdag gis khams gsum pa thams cad las dben pa 'jigs pa med pa'i grong khyer sdug bsngal thams cad nye bar zhi ba/ sgrib pa med pa'i mya ngan las 'das pa la dgod par bya'o zhes gsungs pa'o//log pa'i tshangs par spyod pa tshol ba la bdag tu mngon par zhen pa nyid ni de lta ba gzhan rnams kyi rtsa ba yin pa'i phyir nyes pa ste/ gang gi phyir kye ma sems can 'di dag ni bdag tu mngon par zhen pa zhes gsungs pa'o/ /des na mya ngan las 'das pa'i grong khyer du 'gro 'dod pa rnams phung po'i gnas las mi 'phags te/gang gi phyir phung po'i gnas la ma 'phags pa zhes gsungs pa'o/ /lam bzang por 'gro 'dod pa rnams phyin ci log gis lam ngan par 'gro ste/ gang gi phyir phyin ci log bzhis 'gro ba zhes gsungs pa'o/ /bdag tu dmigs nas de yongs su mya ngan las 'da' bar bya ba'i phyir/'gro 'dod pa rnams bdag tu lta ba dngos po med pas skye mched drug gi grong stong pa la dmigs pa ste/ gang gi phyir skye mched drug gi grong stong pa na gnas pa zhes gsungs pa'o/ /na ba dang / rga ba dang / 'chi ba dang / de las byung ba'i sdug bsngal las yongs su thar bar 'dod pa rnams de'i gnas 'byung ba mi mnyam pa rjes su 'brel pa'i phyir yongs su mi 'grol te/gang gi phyir 'byung ba chen po bzhi'i sbrul gyis gtses pa zhes gsungs pa'o/ /phung po'i gshed ma rjes su 'brang ba ni gang gi phyir phung po'i gshed ma'i chom pos bcom pa zhes gsungs pa'o//sdug bsngal sna tshogs rjes su 'brel pa ni gang gi phyir sdug bsngal dpag tu med pa myong bar 'gyur ba yin gyi zhes gsungs pa'o/ /de dag dang mthun pa'i gnyen po ni sgrib pa thams cad spangs pa'i mya ngan las 'das pa la dgod pa ste/ gang gi phyir de dag bdag gis mchog tu bde ba gnas thams cad dang bral ba 'di lta ste/sgrib pa thams cad spangs pa'i mya ngan las 'das pa la dgod par bya'o zhes gsungs pa'o/ /yang dag pa'i tshangs par spyod pa tshol ba na mos pa dman pa ni nyes pa'o/ /dman pa de yang mang ba dang gsal ba de gnyis chos rgya chen por gyur pa rtogs par bya ba la zhum pas dma' ba dang /sems can mtha' yas pa'i don bya ba la yongs su skyo bas zhen pa dang / rnam pa gnyis kyis phye ba ste gang gi phyir kye ma sems can 'di dag ni zhum zhing zhen pas mos pa dman pa zhes gsungs pa'o / /mos pa dman pa de la brten nas theg pa dman pa la smon pas smon lam gyi nyes pa ste gang gi phyir thams cad mkhyen pa'i ye shes mchog gi sems mi bdog pa zhes gsungs pa'o//bsgrub pa'i nyes pa ni ma nges pa'i tshogs la gnas pa rnams theg pa mchog gi nges par 'byung ba yod bzhin du theg pa dman pa bsgrub par rig par bya ste gang gi phyir theg pa mchog gi nges par 'byung ba yod bzhin du nyan thos dang rang sangs rgyas kyi theg par ltung ba yin gyis zhes gsungs pa'o//de dag dang mthun pa'i gnyen po ni sangs rgyas kyi chos rgya chen po blo gros rgyas pas dmigs pa la 'god pa ste/ gang gi phyir de dag bdag gis sangs rgyas kyi chos rgya chen po blo gros rnam par rgyas pas dmigs pa la dgod par bya'o snyam mo zhes gsungs pa'o//sdom pa'i tshul khrims kyi dbang du byas nas/ tshul khrims kyi stobs bskyed pa thob la dge ba'i chos bsdu bar bya ba dang / sems can gyi don byed pa'i dbang du byas nas bya ba mngon par bsgrub pa la mkhas par rig par bya ste/gang gi phyir kye rgyal ba'i sras dag de ltar tshul khrims kyi stobs bskyed pa de lta bu dang ldan pa/ bya ba mngon par sgrub pa la mkhas pa'i byang chub sems dpa' byang chub sems dpa'i sa dri ma med pa la gnas pa de la zhes bya ba gsungs pa'o//'di man chad sangs rgyas mang po snang bar 'gyur zhes bya ba la sogs pa'i tshig gis 'bras bu'i phan yon gyi khyad par ston te/ sa dang po la ji lta ba bzhin du 'dir yang ci rigs su rig par bya'o/ /bskal pa mang por ser sna dang 'chal ba'i tshul khrims kyi dri ma bsal bas gtong ba dang /tshul khrims rnam par dag pa yang dag par 'grub bo zhes bya ba 'di ni khyad par ro/ /sa dang po la ni tshul khrims rnam par ma dag pas gtong ba yang rnam par ma dag go/ /de ltar sbyin pa'i pha rol tu phyin pa'i shas che bar ci'i phyir gsungs she na/ de ma yin pa dag shas chung ba'i phyir ro//de yang 'dir ches yongs su dag par rig par bya'o/ /rnam par dag pa yang dag par 'grub pa des ser sna dang / 'chal ba'i tshul khrims kyi dri ma dang bral ba'i phyir sa 'di dri ma med pa'o zhes nges pa'i tshig yongs su ston to/ /sa dang po la ni gser gyi sa le sbram mer bsregs pas phyi rol gyi lcags la sogs pa'i g.ya' nyi tshe med pa'i dpes bstan gyi/'dir ni nag tshur du bcug na rang bzhin gyi dri ma 'od gsal ba ma yin pa bsal nas/ rang bzhin gyis bzang bas rang bzhin gyi tshul khrims yongs su dag par bstan to/ /'phags pa sa bcu pa las sa gnyis pa'i rnam par bshad pa rdzogs so// //bam po drug pa/ sa gsum pa ni 'dod chags dang bral bar sbyor ba 'byung bar byed pa dang / 'dod chags dang 'bral bar sbyor ba dang / 'dod chags dang bral ba dang / 'dod chags dang bral ba'i 'bras bu'i dbang du byas par rig par bya'o//de la 'dod chags dang bral bar sbyor ba 'byung par byed pa ni/ sems kyi bsam pa yid la byed pa bcu pa dag go/ /'dod chags dang 'bral bar sbyor ba ni bsam gtan bsgrubs te gnas par ma gyur gyi bar du'o/ /'dod chags dang bral ba ni bsam gtan dang / gzugs med pa'i snyoms par 'jug pa rnams so//'dod chags dang bral ba'i 'bras bu ni tshad med pa la sogs pa'o/ /de la 'dod chags dang bral ba'i sems kyi bsam pa ni dag pa'i sems kyi bsam pa yin par rig par bya'o/ /de'i rgyu yid la byed pa ni dag pa'i sems kyi bsam pa yid la byed pa ste/gang gi phyir gyi rgyal ba'i sras dag byang chub sems dpa'i sa gnyis pa la lhag pa'i bsam pa shin tu yongs su sbyangs pa'i byang chub sems dpa' de byang chub sems dpa'i sa gsum pa gnon te/ des sems kyi bsam pa yid la byed pa rnam pa bcus gnon to/ /bcu gang zhe na/ 'di lta ste dag pa'i sems kyi bsam pa yid la byed ces gsungs pa'o//dag pa'i sems kyi bsam pa yongs su mi nyams pa de nyid kyi dbang du byas nas gnyis pa ste/ gang gi phyir brtan pa'i sems kyi bsam pa yid la byed pa zhes gsungs pa'o/ /thob par bya ba'i thabs ni de'i mi mthun pa'i phyogs ma 'ongs pa'i 'dod pa sun 'byin pa dang /da ltar byung ba'i 'dod pa la ma chags pa'i dbang du byas nas gsum pa dang bzhi pa ste/ gang gi phyir skyo ba'i sems kyi bsam pa yid la byed pa dang / 'dod chags dang bral ba'i sems kyi bsam pa yid la byed pa zhes gsungs pa'o/ / rang gi theg pa mi 'dor ba'i dbang du byas nas lnga pa ste/ gang gi phyir phyir mi ldog pa'i sems kyi bsam pa yid la byed pa zhes gsungs pa'o/ /rang gi sa pa'i nyon mongs pas mi shigs pa'i dbang du byas nas drug pa ste/ gang gi phyir sra ba'i sems kyi bsam pa yid la byed pa zhes gsungs pa'o//snyoms par 'jug pa la dbang ba'i dbang du byas nas bdun pa ste/ gang gi phyir sbyangs pa'i sems kyi bsam pa yid la byed pa zhes gsungs pa'o/ /'og mar skye ba dang yongs su mi nyams pa gnyis kyis/ bsam gtan bzlog nus pa nyid kyi dbang du byas nas brgyad pa ste/ gang gi phyir rang dbang gi sems kyi bsam pa yid la byed pa zhes gsungs pa'o//der skyes kyang kun nas nyon mongs pa med pa nyid kyi dbang du byas nas dgu pa ste/ gang gi phyir rlabs po che'i sems kyi bsam pa yid la byed pa zhes gsungs pa'o/ /sems can gyi don bya ba'i phyir/ srid pa'i rgyun gcod pa'i dbang du byas nas sems kyi bsam pa yid la byed pa bcu par rig par bya ste/gang gi phyir che ba nyid ni sems kyi bsam pa la byed pa zhes gsungs pa'o/ /'dod chags dang bral bar sbyor ba ni rnam pa gsum ste/ kun nas nyon mongs pa las bsrung ba'i sbyor ba dang / theg pa dman pa las kun du bsrung ba'i sbyor ba dang /thabs yongs su bzung ba'i sbyor ba'o/ /de la kun nas nyon mongs pa las kun du bsrung ba'i sbyor ba ni 'du byed du gyur pa thams cad la mi rtag pa nyid dang / mngon du bstan par bya ba ma yin par bcu pa gnyis kyi yongs su brtag pa ste/ de la mdor na tshe'i 'du byed mi gnas pa nyid yin pas mi rtag par yongs su rtogs pa ste/gang gi phyir kye rgyal ba'i sras dag byang chub sems dpa'i sa gsum pa la gnas pa'i byang chub sems dpa' de 'du byed du gyur pa thams cad la mi rtag par so sor rtog ces gsungs pa'o / /de'i 'og tu mi rtag pa nyid de ji lta bu yin pa dang /gang yin pa de yongs su rtog ste mi rtag pa nyid de ji lta bu zhe na/ lus kyi gnas skabs 'gyur ba'i dbang gis sdug bsngal nyid rnam pa gsum dang ldan pa ste/ gang gi phyir sdug bsngal ba zhes gsungs pa'o/ /zas kyis gnas pa'i dbang gis mdog mi sdug pa la sogs par gyur pa ni/gang gi phyir mi sdug pa zhes gsungs pa'o/ /mi mthun pa yongs su ma spangs pa'i dbang gis dus ma yin par 'chi ba ni/ gang gi phyir yid brtan du mi rung ba zhes gsungs pa'o/ /snod rnams 'jig pa'i dbang gis 'jig pa ni gang gi phyir rnam par 'jig pa zhes gsungs pa'o/ / longs spyod rnams kyi bdag po nges pa med pa'i dbang gis gcig dang mi gnas pa ni gang gi phyir ring du mi gnas pa zhes gsungs pa'o/ /mi rtag pa de gang zhe na/ de ni rnam pa gnyis te myur ba'i dus ni gang gi phyir skye ba dang 'gag pa nyid skad cig pa zhes gsungs pa'o/ /rang bzhin yongs su grub pa med de/'das pa dang / ma 'ongs pa dang / da ltar byung ba'i dus rnams su ma byung ba dang / mi 'pho ba dang / 'gag pa ni gang gi phyir sngon gyi mthar ma byung ba dang / phyi ma'i mthar 'pho ba med pa dang / da ltar byung ba la mi gnas par so sor rtog go zhes gsungs pa'o/ /de ltar 'du byed du gyur pa mi rtag pa la ci 'du byed du gyur pa la brten par bya ba'i phyir/mngon du rten du rung ba 'ga' zhig yod dam snyam na/ thams cad mngon du bsten par bya ba ma yin par mthong ste/ gang gi phyir de 'du byed du gyur pa de lta bu thams cad la yang dag par rtog pa'i tshe mngon du bsten par bya ba ma yin pa zhes bcu pa gnyis pa las gsungs pa'o//mngon du bsten par bya ba ma yin pa de yang rnam pa dgur rig par bya ste/ mi rtag pa nyid du ma gyur pa ston pa ma yin pa ni gang gi phyir gsol 'dru'i gnas med pa zhes gsungs pa'o/ /gyur pa ni dpung gnyen med pas de gyur pa'i phyir/thog mar sdug bsngal bar gyur pas mya ngan dang bcas pa ni gang gi phyir mya ngan dang bcas pa zhes gsungs pa'o/ /bar du smre ba dang bcas pa ni gang gi phyir smre sngags 'don pa dang bcas pa zhes gsungs pa'o/ /chung bar gyur pa na 'khrug pa dang bcas pas dman pa tsam rjes su 'brang ba ni gang gi phyir 'khrug pa dang bcas pa zhes gsungs pa'o//longs spyod rnams yongs su tshol ba'i dus na bdag la sdug par 'gyur gyi/ mi sdug par mi 'gyur grang snyam du/ tsher ma rnams kyi sdug pa dang / mi sdug par 'brel pa ni gang gi phyir sdug pa dang mi sdug par 'brel pa zhes gsungs pa'o//yongs su spyod pa'i dus na bde ba chung la sdug bsngal mang ba ni gang gi phyir/ sdug bsngal ba dang / yid mi bde ba dang / 'khrug pa mang po mang ba zhes gsungs pa'o/ /lus rgas pa'i gnas skabs na byis pa la sogs pa'i gnas skabs snga ma gnas pa ni gang gi phyir bsags pa med par gyur pa zhes gsungs pa'o//lang tsho la bab pa'i gnas skabs na tshor ba rnam pa gsum dang ldan pas/ 'dod chags la sogs pa'i me rab tu 'bar ba ni gang gi phyir 'dod chags dang / zhe sdang dang / gti mug gi me rab tu 'bar ba zhes gsungs pa'o//ches 'gras kyi gnas skabs na nad du ma rnam par 'phel ba ni gang gi phyir nad du ma rnam par 'phel ba'i lus mthong nas zhes gsungs pa'o/ /lus ni 'das ma thag pa'i tshig gsum char dang sbyar bar bya'o/ /thog mar ma smos pa ni lus de yang dang yang bstan par 'gyur ba'i phyir ro/ / de la theg pa dman pa las kun du bsrung ba'i sbyor ba ni 'du byed du gyur pa las sems bskyod nas/ che ba nyid rnam pa gnyis kun du bstan pas de bzhin gshegs pa'i ye shes la yang dag par gtong ba dang / sems can rnams la sems kyi bsam pa bcu nye bar 'jog pa dang / de dag yongs su bskyab pa'i phyir brtson 'grus rtsom pa ste/'dis ni gang la brten nas gang gi phyir/ ji ltar rab tu sbyor bar byed pa de yongs su bstan pa yin te/ gang gi phyir de 'du byed du gyur pa thams cad las de bas kyang shas cher sems bskyod cing de bzhin gshegs pa'i ye shes la yang dag par gtong ngo zhes gsungs pa'o/ /de bzhin gshegs pa'i ye shes kyi che ba nyid ni rnam pa gnyis te/yon tan yongs su 'dzin pa che ba nyid dang / rnam par dag pa che ba nyid do / /yon tan yongs su 'dzin pa yang rnam pa lngar rig par bya ste/ brtag mi nus pa'i phyir/ mthu'i yon tan yongs su 'dzin pa ni gang gi phyir de bzhin gshegs pa'i ye shes bsam gyis mi khyab pa nyid du yang dag par mthong ste zhes gsungs pa'o//zla med pa'i phyir mngon par rdzogs par byang chub pa'i yon tan yongs su 'dzin pa ni gang gi phyir mtshungs pa med pa nyid ces gsungs pa'o/ /sems can dpag tu med pa'i don bya ba'i phyir/ don chen po'i yon tan yongs su 'dzin pa ni gang gi phyir dpag tu med pa nyid ces gsungs pa'o//dkon pa'i phyir tshad gzung du med pa'i yon tan yongs su 'dzin pa ni gang gi phyir rnyed dka' ba nyid ces gsungs pa'o/ /mu stegs can dang ma 'dres pa'i phyir thun mong ma yin pa'i yon tan yongs su 'dzin pa ni gang gi phyir ma 'dres pa nyid ces gsungs pa'o//rnam par dag pa ni nyon mongs pa dang / sdug bsngal dang bral ba dang / mya ngan las 'das pa thob pa yin par rig par bya'o/ /nyon mongs pa dang bral ba ni bag chags dang bcas pa'i nyon mongs pa dang ma 'dres par rig par bya ste/ gang gi phyir gnod pa med pa nyid ces gsungs pa'o/ /sdug bsngal dang bral ba ni sdug bsngal dang /de'i gzhi las byung ba mya ngan zad par rig par bya ste/ gang gi phyir 'khrug pa med pa nyid ces gsungs pa'o/ /mya ngan las 'das pa thob pa ni nyon mongs pa dang / nye ba'i nyon mongs pa'i 'jigs pa thams cad med par rig par bya ste/ gang gi phyir 'jigs pa med pa'i grong khyer du 'gro ba nyid ces gsungs pa'o//de yang byang chub sems dpa'i phyir 'ong ba med pa dang / sems can gyi don byed pa gnyis kyis 'jig rten pa dang / 'jig rten las 'das pa'i mya ngan las 'das pa thob pa la khyad par du 'phags par rig par bya ste/ gang gi phyir phyir mi ldog pa nyid dang skye bo mang po yongs su skyob pa nyid du yang dag par mthong ngo zhes gsungs pa'o//sems kyi bsam pa bcu ni sems can mgon med pa rnams las brtsams pa ste/ des de bzhin gshegs pa'i ye shes de ltar tshang ba yang dag par mthong ste/ 'du byed du gyur pa de ltar gnod pa mang po dang ldan par yongs su rtog pa na sems can rnams la de bas kyang shas cher sems kyi bsam pa bcu nye bar 'jog ste/bcu gang zhe na/ /'di lta ste/ mgon med cing rton pa med pa'i sems kyi bsam pa nyid ces rgya cher gsungs pa'o / /de la rton pa med pa nyid ni mgon med pa nyid do/ /de yang rnam pa dgur rig par bya ste/ rtag tu dbul te mgon med pa nyid dang /'dod chags dang / zhe sdang dang gti mug gi me rab tu 'bar te mgon med pa nyid dang / srid pa'i btson rar chud de mgon med pa nyid dang / rtag tu rgyun mi 'chad par nyon mongs pa thibs pos bsgribs te mgon med pa nyid dang / lta ba'i mthu med de mgon med pa nyid dang /dge ba'i chos la 'dun pa dang bral te mgon med pa nyid dang / sangs rgyas kyi chos chud zos te mgon med pa nyid dang / 'khor ba'i rgyun gyis bdas te mgon med pa nyid dang / thar pa'i thabs chud zos te mgon med pa nyid du'o/ /de la 'dod pa tshol ba'i dbang du byas nas ngoms mi myong ba dang /rab tu ma zhib yongs su spyod pa gnyis rig par bya ste/ gang gi phyir rtag tu 'bul ba'i sems kyi bsam pa nyid dang / 'dod chags dang zhe sdang dang gti mug gi me rab tu 'bar ba'i sems kyi bsam pa nyid ces gsungs pa'o/ /srid pa tshol ba'i dbang du byas nas 'gro ba drug gi 'khor ba na yongs su 'phyan pa nyid dang /de'i rgyu nyon mongs pas khebs pa nyid dang / mi dal bar skye ba ni gsum dang go rims bzhin du rig par bya ste/ gang gi phyir srid pa'i btson rar chud pa'i sems kyi bsam pa nyid dang / rtag tu rgyun mi 'chad par nyon mongs pa thibs pos bsgribs pa'i sems kyi bsam pa nyid dang /lta ba'i mthu med pa'i sems kyi bsam pa nyid ces gsungs pa'o/ /tshangs par spyod pa'i dbang du byas nas/ mi brtson pa rnams dang / mngon pa'i nga rgyal can rnams dang / yongs su mya ngan las mi 'da' ba'i chos can rnams dang / log pa la brtson pa gzhan mu stegs can rnams ni bzhi dang go rims bzhin du rig par bya ste/gang gi phyir dge ba'i chos la 'dun pa dang bral ba'i sems kyi bsam pa nyid dang / sangs rgyas kyi chos chud zos pa'i sems kyi bsam pa nyid dang / 'khor ba'i rgyun gyis bdas pa'i sems kyi bsam pa nyid dang / thar pa'i thabs chud zos pa'i sems kyi bsam pa nyid ces gsungs pa'o//sems can yongs su skyob pa'i phyir/ brtson 'grus rtsom pa ni gang gi phyir des de ltar sems can gyi khams gnod pa mang po can mthong nas brtson 'grus 'di ltar rtsom ste/ sems can 'di dag ni bdag gis yongs su bskyab par bya zhes rgya cher gsungs pa'o//de la gang las ji ltar yongs su bskyab par bya ba dang / ji ltar na yongs su bskyab pa por 'gyur ba de'i rab tu dbye bas yongs su skyob pa'i rab tu dbye ba ston te/ gang las yongs su bskyab par bya zhe na/ las kyi kun nas nyon mongs pa dang / nyon mongs pa'i kun nas nyon mongs pa dang /skye ba'i kun nas nyon mongs pa las te / gang gi phyir yongs su dgrol bar bya/ yongs su sbyang bar bya/ yongs su gdon par bya zhes gsungs pa ste go rims bzhin no/ /ji ltar yongs su bskyab par bya zhe na/ tshul khrims la gzhag pa dang / ting nge 'dzin dang shes rab la dgod pas bslab pa gsum gyis bsdu ba ste/gang gi phyir gnas par bya/ dgod par bya zhes gsungs pa ste go rims bzhin no/ /mnyam par gzhag pa'i sa yin pas ting nge 'dzin dang / shes rab ni gcig tu bstan to/ /rnam pa gnyis kyis tshul khrims la gnas par bya ste/the tshom sel bas 'jug par bya ba ni/ gang gi phyir yongs su tshim par bya zhes gsungs pa'o/ /zhugs pa rnams mngon par dga' ba 'dzin du 'jug pas mi g.yo ba nyid kyis gzhag pa ni/ gang gi phyir yang dag par gzhag par bya zhes gsungs pa'o/ /ting nge 'dzin dang shes rab la dgod pa ni/nye ba'i nyon mongs pa zhum pa dang rgod pa 'dul ba ste/ gang gi phyir gdul bar bya zhes gsungs pa'o/ /ji ltar na yongs su skyob pa por 'gyur zhe na/ mya ngan las 'das pa'i dbyings rnam pa gnyis thob par byed pa ste/ gang gi phyir yongs su mya ngan las 'da' bar bya'o snyam nas zhes gsungs pa'o//de de ltar 'du byed du gyur pa thams cad la yid 'byung ba dang ldan zhing / sems can thams cad la lta ba dang ldan la thams cad mkhyen pa'i ye shes la phan yon dang ldan par rab tu gnas shing de bzhin gshegs pa'i ye shes la rton pas sems can yongs su bskyab par bya ba la brtson zhing 'di ltar yongs su rtog ste /lam gang gis 'di ltar sdug bsngal ba dang / nye ba'i nyon mongs pa mang por lhung ba'i sems can 'di dag mngon par gdon pa dang / mya ngan las 'das pa shin tu bde ba la dgod par nus sam snyam nas zhes bya ba 'di la yid byung ba dang / lta ba dang / phan yon dang ldan pa gnyis kyis ni rgyu rnam pa gsum dang ldan pa nyid du yongs su ston te/ rgyu rnam pa gsum la kun nas nyon mongs pa las ldog pa'i rgyu ni yid byung ba dang ldan pa'i phyir ro/ /'khor ba yongs su mi gtong ba'i rgyu ni sems can thams cad la lta ba dang ldan pa'i phyir ro/ /brtson 'grus rtsom pa'i rgyu ni thams cad mkhyen pa'i ye shes la phan yon du shes pa dang ldan pa'i phyir ro//des na gang la phan yon dang ldan pa de'i lam sgom par byed cing gang dag la lta ba dang ldan pa de dag yongs su smin par byed de/ de bzhin gshegs pa'i ye shes la rton pas sems can yongs su bskyab pa la brtson pa zhes gsungs pa'i phyir ro//thabs yongs su bzung ba'i sbyor ba las brtsams te/ gang gi phyir thabs kyi lam gang gis 'di ltar sdug bsngal ba dang / nye ba'i nyon mongs pa mang por lhung ba'i sems can 'di dag mngon par gdon pa dang / mya ngan las 'das pa shin tu bde ba la dgod par nus snyam nas zhes gsungs pa'o//de la sdug bsngal dang nye ba'i nyon mongs pa mang por lhung ba zhes bya ba la sdug bsngal ni skye ba'i kun nas nyon mongs pa'o/ /nye ba'i nyon mongs pa ni nyon mongs pa dang / las kyi kun nas nyon mongs pa'o/ /mya ngan las 'das pa shin tu bde ba ni theg pa rnam pa gsum gyis so//de la thabs yongs su bzung ba'i sbyor ba ni mdor bsdu na rnam pa gsum du rig par bya ste/ mthar phyin pa rtogs pa dang / mthar phyin pa sgrub pa'i gong nas gong ma rtogs pa dang / de sgrub pa'i gnas la sbyor ba rtogs pa'o/ /de la mthar phyin pa ni sgrib pa med pa'i ye shes kyi rnam par thar pa la gnas pa ste/gang gi phyir de byang chub sems dpa' 'di snyam du sems te/ sgrib pa med pa'i ye shes kyi rnam par thar pa la gnas pa ma gtogs par gzhan gyis ma yin no zhes gsungs pa'o/ /mthar phyin pa de ni khong du chud pas mthar phyin pa sgrub pa'i phyir/ de bzhin gshegs pas rnam par gzhag pa'i chos thams cad yang dag pa ji lta ba bzhin du khong du chud pas sgrub pa ste/gang gi phyir sgrib pa med pa'i ye shes kyi rnam par thar pa la gnas pa de yang chos thams cad ji lta ba bzhin du khong du chud pa ma gtogs par gzhan gyis ma yin no zhes gsungs pa'o/ /khong du chud pa de'i ni rang dang spyi'i mtshan nyid la rnam par mi rtog pa'i rjes su rgyu ba'i shes rab ste/gang gi phyir chos thams cad ji lta ba bzhin du khong du chud pa de yang shes rab rgyu ba med cing skye ba med pa'i rgyu ba can ma gtogs par gzhan gyis ma yin no/ /shes rab kyi snang ba de yang bsam gtan la mkhas pa la rnam par nges pa blos so sor rtog pa ma gtogs par gzhan gyis ma yin no zhes gsungs pa'o//'dir shes rab kyi snang ba de gsungs pa ni de gnas yin pa'i phyir sa 'di 'od byed pa'o zhes nges pa'i tshig yongs su bstan pa'i phyir ro/ /de rtogs pa ni bsam gtan la mkhas pa la rnam par nges pa blos so sor rtog pa'o/ /bsam gtan la mkhas pa la rnam par nges pa'i blos so sor rtog pa de yang /thos pa la mkhas pa ma gtogs pa gzhan gyis ni ma yin no snyam mo zhes bya ba la bsam gtan la mkhas pa de ni khyad par can gyi bsam gtan thob par bya ba'i phyir ro/ /rnam par nges pa ni gzhan las so/ /blos so sor rtog pa ni rang gis so//'di ni mthar phyin pa sgrub pa'i gong nas gong ma rtogs pa'o/ /de ltar blos so sor rtog pa de yang thos pa la mkhas par 'gyur te/ 'di ni rtogs pa sgrub pa'i gnas la sbyor ba ste/ thos pa la mkhas pa ni de bsgrub pa'i gnas so/ /de'i phyir sbyor ba ni de sgrub pa'i gnas la sbyor ba'o/ / de la tshig dang don gyi dbang du byas nas dam pa'i chos yongs su tshol ba la brtson pa dang / nyin mtshan du chos nyan pa don du gnyer ba'i go rims bzhin du sbyar te/ gang gi phyir de de ltar so sor rtog pa'i shes pa dang ldan pa de bas kyang shas cher dam pa'i chos yongs su tshol ba la mngon par brtson par gnas pa dang /nyin mtshan du chos nyan pa don du gnyer ba zhes gsungs pa'o/ /tshig dang don de dag nyid kyi dbang du byas nas/ chos 'dod pa dang / chos la dga' ba zhes bya ba gsungs te/ klan ka btsal ba dang / de skad smra ba las thar pa'i phan yon gyi bsam pa ma yin no zhes bya ba'i tha tshig go/ /chen po bstan pa la ston pas rang gi lta ba mchog tu 'dzin pa rnam par 'jig pa'i phyir/chos la ston pa zhes bya ba gsungs so/ /lung nod cing kha ton bya ba dang / gzhan la yang dag par bshad par bya ba dang / dben par 'dug ste don sems pa'i dbang du byas nas/ chos la gzhol ba dang /chos la 'bab pa dang / chos la bab pa zhes bya ba gsungs so/ /mnyam par gzhag ste bsgom pa'i dbang du byas nas/ chos la phyogs pa zhes bya ba gsungs so/ /'jig rten las 'das pa'i shes rab kyi dbang du byas nas/ chos la gnas su 'dzin pa dang / chos la skyabs su 'dzin pa zhes bya ba gsungs so//rnam par grol ba'i dbang du byas nas/ chos kyi rjes su mthun pa'i chos spyod pa yin no zhes bya ba gsungs te/ de bzhin gshegs pa rnams kyi rnam par grol ba'i chos gang yin pa de'i rjes su mthun pa'i chos spyod pa'i phyir ro/ /de la dam pa'i chos yongs su tshol ba la brtson pa dang /nyin mtshan du chos mnyan pa don du gnyer ba zhes bya ba'i tshig dang po gnyis kyis ni rtag tu sbyor ba ston to/ /chos 'dod pa zhes bya ba la sogs pa tshig lhag ma dgu po dag gis ni yang dag par sbyor ba ston to/ /de ni rtag tu sbyor ba de'i rgyu gang yin zhe na/ chos la rim gro byed pa khyad zhugs pa yin par yongs su ston te/de ni nor dang / rgyal srid dang / mtho ris su skye ba dang / 'jig rten pa'i rnam par dag pa dang / lus pas kyang chos la rim gro cher byed de/ ji ltar nor bas kyang rim gro byed ce na/ de ni chos kyi phyir nor yang thams cad yongs su gtong ste/ gang gi phyir sangs rgyas kyi chos yongs su tshol ba la mngon par brtson pa de rdzas kyi rnam pa'am/nor dang / 'bru dang / bang mdzod kyi rnam pa gang yongs su mi gtong ba de gang yang med de/ de la bya dka' bar 'du shes pa ma yin gyi gzhan du na chos smra ba'i gang zag de la bya dka' ba'i 'du shes su 'gyur ba de ni ma gtogs so zhes gsungs pa'o//phyi rol gyi dngos po zhing la sogs pa gang las nor rnyed par 'gyur ba de yang yongs su gtong ste gang gi phyir/ phyi rol gyi dngos po nye bar gzung ba gang yongs su mi gtong ba de gang yang med do zhes gsungs so/ /nor gang gi dngos po gang gi phyir yin pa de yang yongs su gtong ste gang gi phyir nang gi dngos po gang yongs su mi gtong ba de gang yang med do zhes gsungs pa'o//gang gi phyir nor yongs su gtong ba lus kyi bsnyen bkur bya ba de dag kyang nyams su len te/ gang gi phyir bla ma la bsnyen bkur bya ba dang rim gro bya ba gang nyams su mi len pa de gang yang med do zhes gsungs pa'o//nor rnyed pa de gang gis yongs su gtong ba'i snyems pa de yang yongs su gtong ste/ gang gi phyir nga rgyal dang lhag pa'i nga rgyal spangs te/ nga rgyal med par nye bar spyad par bya ba gang nyams su mi len pa de gang yang med do zhes gsungs pa'o/ /gang yongs su spong pa'i phyir nor yongs su gtong ba lus kyi gnod pa de dag kyang nyams su len te/gang gi phyir lus kyi gnod pa gang nyams su mi len pa de gang yang med do zhes gsungs pa'o/ /nor mang zhing gces pa rnyed pa bas kyang des ches dga' bar 'gyur ba ni/ gang gi phyir de ma thos pa'i chos kyi tshig gcig thos pa nor che bar 'dzin gyi stong gsum gyi stong chen po'i 'jig rten gyi khams snyed kyi rin po che'i phung po rnyed pa ni ma yin no zhes gsungs pa ste/de ltar nor bas kyang rim gro cher byed do/ /rgyal srid la sogs pa bas kyang ji ltar rim gro cher byed ce na/ de ni chos kyis rab tu dga' ba yin gyi 'khor los sgyur ba'i rgyal srid dang /brgya byin dang tshangs pa rnams kyis ni ma yin te/ gang gi phyir de legs par bshad pa'i tshigs su bcad pa gcig thos pa nor che bar 'dzin gyi 'khor los sgyur ba'i rgyal srid thob pas ni ma yin no/ /de byang chub sems dpa'i spyod pa yongs su spyod pa'i chos thos pa ni nor che bar 'dzin gyi brgya byin dang tshangs pa thob pas bskal pa 'bum phrag mang po'i mthar thug pas ni ma yin no zhes gsungs pa'o//chos kyi don du stong gsum mes rab tu gang bar bdag dor ba dang / sems can dmyal ba'i sdug bsngal dang du len pa spro ba ni/ gang gi phyir gal te la la zhig de la 'di skad ces zer te/gal te khyod kyis me'i 'obs chen po kun du 'bar ba/ rab tu 'bar ba/ kun du rab tu mched cing 'bar ba/ me lce gcig tu gyur pa'i nang du bdag por te/ sdug bsngal gyi tshor ba chen po rang gi lus kyis nyams su blang ba lta na/ ngas khyod la chos kyi tshig yang dag par rdzogs pa'i sangs rgyas kyis bstan pa/byang chub sems dpa'i spyod pa yongs su sbyong ba 'di bshad par bya'o zhe na yang / de 'di snyam du sems te/ yang dag par rdzogs pa'i sangs rgyas kyis bstan pa/ byang chub sems dpa'i spyod pa yongs su sbyong ba'i chos kyi tshig gcig gi don du yang stong gsum gyi stong chen po'i 'jig rten gyi khams mes gang bar tshangs pa'i 'jig rten nas/bdag gis bdag dor bar mos na/ me'i 'obs tha mal par bdag dor ba lta ci smos/ sems can dmyal ba dang ngan song gi sdug bsngal thams cad nyams su bab kyang /bdag gis chos btsal bar bya na mi'i sdug bsngal dang 'grogs pa lta ci smos kyi snyam nas zhes gsungs pa'o/ /de la chos kyi tshig thos pas ni yi ge'i chos kyi tshig tsam thos par yongs su ston to/ /tshigs su bcad pa thos pas ni tshigs su bcad pa tsam gyis chos thos par ston to//byang chub sems dpa'i spyod pa yongs su sbyong ba'i chos thos pas ni don thos pa ston to/ /da ni yang dag par sbyong ba de'i rgyu gang zhe na/ tshul bzhin so sor rtog pa'i rang bzhin can du yongs su ston te / gang gi phyir de rnam pa de lta bu'i brtson 'grus rtsom pas chos yongs su tshol zhing ji skad thos pa'i chos rnams la yang tshul bzhin so so rtog pa'i rang bzhin can yin te zhes gsungs pa'o//de chos kyi rjes su mthun pa'i chos bsgrubs pas sangs rgyas kyi chos rnams rnyed par rig nas gdon mi za bar bya ba yin pas bsam gtan dang / gzugs med pa'i snyoms par 'jug pa dang / tshad med pa dang / mngon par shes pa rnams la snyoms par 'jug cing / de dag kyang mngon par dga' ba'i gzhi'i gnas ma yin pas de dag gis kun nas nyon mongs pa ma yin te/ gang gi phyir chos de dag thos nas kyang rang gi sems la nges par sems pas gcig tu dben par 'dug ste/ 'di ltar dpyad do/ /chos kyi rjes su mthun pa'i chos bsgrubs pas sangs rgyas kyi chos 'di dag khong du chud par bya'i/tshig gi las yongs su dag pa 'ba' zhig gis ni ma yin no snyam ste/ de chos kyi rjes su mthun pa'i chos sgrub pa'i rgyur 'dod pa rnams las dben pa/ sdig pa mi dge ba'i chos rnams las dben pa/ rtog pa dang bcas pa/ dpyod pa dang bcas pa/ dben pa las skyes pa'i dga' ba dang bde ba can bsam gtan dang po bsgrubs te gnas so/ /de rtog pa dang dpyod pa dang bral bas nang yongs su dngas te / sems kyi rgyud gcig tu gyur pas rtog pa med pa/ dpyod pa med pa/ ting nge 'dzin las skyes pa'i dga' ba dang bde ba can bsam gtan gnyis par bsgrubs te gnas so//de dga' ba'i 'dod chags dang bral bas btang snyoms la gnas shing / dran pa dang shes bzhin can yin te/ bde ba yang lus kyis myong la 'phags pa rnams kyis gang de dran pa dang ldan pa bde ba la gnas pa btang snyoms pa'o zhes brjod pa ste/dga' ba med pa bsam gtan gsum pa bsgrubs te gnas so/ /de bde ba yang spangs te sdug bsngal yang spangs shing / snga nas yid bde ba dang yid mi bde ba yang nub pas sdug bsngal yang ma yin bde ba yang ma yin pa btang snyoms kyi dran pa yongs su dag pa bsam gtan bzhi pa bsgrubs te gnas so//de rnam pa thams cad du gzugs kyi 'du shes rnams las yang dag par 'das te/ thogs pa'i 'du shes rnams nub par gyur cing / sna tshogs kyi 'du shes rnams yid la mi byed pas nam mkha' mtha' yas so snyam nas/ nam mkha' mtha' yas bsgrubs te gnas so/ /de rnam pa thams cad du nam mkha' mtha' yas skye mched las yang dag par 'das te/rnam shes mtha' yas so snyam nas/ rnam shes mtha' yas skye mched bsgrubs te gnas so/ /de rnam pa thams cad du rnam shes mtha' yas skye mched las yang dag par 'das te/ ci yang med do snyam nas/ ci yang med pa'i skye mched bsgrubs te gnas so//de rnam pa thams cad du ci yang med pa'i skye mched las yang dag par 'das nas/ 'du shes med 'du shes med min ma yin snyam ste/ 'du shes med 'du shes med min skye mched bsgrubs nas gnas so/ /chos kyi rjes su mthun pa'i chos sgrub pa ma gtogs par de yang mngon par dge ba'i gzhi'i gnas ma yin pas/de byams pa dang ldan pa'i sems yangs pa chen por gyur pa mi gnyis pa tshad med pa/ khon med pa/ 'gran zla med pa/ sgrib pa med pa/ gnod pa med pa thams cad du khyab pas 'jig rten chos kyi dbyings kyis klas pa / nam mkha'i khams kyi mthas gtugs pa'i 'jig rten thams cad khyab par byas nas bsgrubs te gnas so//de bzhin du snying rje dang ldan pa dang / dga' ba dang ldan pa dang / btang snyoms dang ldan pa'i sems yangs pa chen por gyur pa mi gnyis pa/ tshad med pa/ khon med pa/ 'gran zla med pa/ sgrib pa med pa/ gnod pa med pa thams cad du khyab pas 'jig rten chos kyi dbyings kyis klas pa/ nam mkha'i khams kyi mthas gtugs pa'i 'jig rten gyi khams thams cad khyab par byas nas bsgrubs te gnas so/ /de rdzu 'phrul bya ba rnam pa du ma myong bar byed de / sa yang g.yo bar byed do/ /gcig tu gyur pa mang por 'gyur ro/ /mang por gyur nas gcig tu 'gyur ro/ /snang bar gyur cing mi snang bar 'gyur ro/ /rtsig pa la yang thad kar 'gro/ /ra ba la yang thad kar 'gro/ /ri la yang mi thogs par thad kar 'gro ste/ dper na nam mkha' la bya ba bzhin no//nam mkha' la yang skyil mo krung gis 'gro ste/ dper na 'dab chags bya bzhin no/ /sa la yang steng du 'byung ba dang bye'u 'dzul byed de/ dper na chu la bya ba bzhin no/ /chu la yang mi nub par 'gro ste/ dper na sa la bya ba bzhin no/ /du ba 'thul bar yang byed/ 'bar bar yang byed de/dper na me'i phung po chen po bzhin no/ /bdag gi lus las chu'i rgyun chen po 'byin te/ dper na sprin chen po bzhin no/ /chu'i rgyun de dag gis kyang stong gsum gyi stong chen po'i 'jig rten gyi khams 'di dag kun du 'bar zhing rab tu 'bar la / kun du rab tu mched cing 'bar te me lce gcig tu gyur pa zhi bar byed do//zla ba dang nyi ma 'di ltar rdzu 'phrul che ba/ 'di ltar mthu che ba 'di gnyis la yang lag pas 'dzin cing kun du nyug par byed do/ /tshangs pa'i 'jig rten gyi bar du yang lus kyis dbang sgyur ro/ /de lha'i rna ba'i khams rnam par dag pa mi'i las 'das pa/ lha dang mi gnyis ka'i sgra yang thos so//gang dag ring yang rung / nye yang rung / tha na sbrang bu dang / sha sbrang dang / bung ba dang / srin bu rnams kyi sgra yang thos so/ /de sems can gzhan dag dang / gang zag gzhan rnams kyi sems kyang sems kyis yang dag pa ji lta ba bzhin du rab tu shes te/ 'dod chags dang bcas pa'i sems la yang 'dod chags dang bcas pa'i sems su yang dag pa ji lta ba bzhin rab tu shes so//'dod chags dang bral ba'i sems la yang 'dod chags dang bral ba'i sems su yang dag pa ji lta ba bzhin du rab tu shes so/ /de bzhin du zhe sdang dang bcas pa dang / zhe sdang dang bral ba dang /gti mug dang bcas pa dang / gti mug dang bral ba dang / nyon mongs pa dang bcas pa dang / nyon mongs pa med pa dang / chung ba dang / yangs pa dang / chen por gyur pa dang / tshad med pa dang / bsdus pa dang / spros pa dang / mnyam par bzhag pa dang / mnyam par ma bzhag pa dang /rnam par grol ba dang / rnam par ma grol ba dang / skyon can dang / skyon med pa dang / sems rags pa la yang sems rags pa'o zhes yang dag pa ji lta ba bzhin du rab tu shes so/ /sems rags pa ma yin pa yang sems rags pa ma yin pa'o zhes yang dag pa ji lta ba bzhin du rab tu shes so//de ltar na sems can gzhan dag dang / gang zag gzhan rnams kyi sems sems kyis yang dag pa ji lta ba bzhin du rab tu shes so/ /de sngon gyi gnas rnam pa du ma rjes su dran te/ tshe rabs gcig kyang rjes su dran no/ /tshe rabs gnyis dang / gsum dang /bzhi dang / lnga dang / bcu dang / nyi shu dang / sum cu dang / bzhi bcu dang / lnga bcu dang / brgya yang rjes su dran no/ /tshe rabs brgya phrag du ma dang / tshe rabs stong phrag du ma dang / tshe rabs 'bum phrag du ma dang / 'jig pa'i bskal pa dang / 'chags pa'i bskal ba dang / 'jig pa dang 'chags pa'i bskal pa du ma yang rjes su dran no//bskal pa brgya yang rjes su dran no/ /bskal pa stong yang rjes su dran no/ /bskal pa 'bum dang / bskal pa bye ba dang / bskal pa bye ba phrag brgya dang / bskal pa bye ba phrag stong dang / bskal ba bye ba phrag 'bum nas bskal pa bye ba khrag khrig 'bum phrag du ma'i bar du rjes su dran no//che ge mo zhig na bdag gi ming ni 'di zhes bya bar gyur/ rus ni 'di zhes bya/ rigs ni 'di zhes bya/ kha zas ni 'di lta bu zhig za za/ tshe ni 'di tsam zhig thub/ yun ni 'di srid cig gnas gnas / bde ba dang sdug bsngal ni 'di lta bu zhig myong /de nas shi 'phos nas che ge mo zhig tu skyes/ de nas shi 'phos nas yang 'dir skyes so zhes rnam pa dang bcas/ dan rtags dang bcas/ rgyu mtshan dang bcas par sngon gyi gnas rnam pa du ma rjes su dran no/ /des lha'i mig rnam par dag pa mi'i las 'das pas sems can 'chi 'pho ba dang /skye ba dang / mdog sdug pa dang / mdog mi sdug pa dang / bde bar song ba dang / ngan par song ba dang / bzang po dang ngan pa rnams mthong ngo / /las ji lta ba bzhin du nye bar 'gro ba'i sems can rnams yang dag pa ji lta ba bzhin du rab tu shes so//kye ma sems can 'di dag ni lus kyis nyes par spyod pa dang ldan pa/ ngag gis nyes par spyod pa dang ldan pa/ yid kyis nyes par spyod pa dang ldan pa/ 'phags pa rnams la skur ba 'debs pa/ log par lta ba can dag ste/ log par lta ba'i las yang dag par blangs pa'i rgyus lus zhig ste/shi ba'i 'og tu ngan song ngan 'gro log par ltung ba sems can dmyal ba rnams su skye'o zhes bya ba dang / kye ma sems can 'di dag ni lus kyis legs par spyod pa dang ldan pa/ ngag gis legs par spyod pa dang ldan pa/ yid kyis legs par spyod pa dang ldan pa/'phags pa rnams la skur ba mi 'debs pa/ yang dag par lta ba can dag ste/ yang dag par lta ba'i las yang dag par blangs pa'i rgyus lus zhig ste/ shi ba'i 'og tu bde 'gro mtho ris kyi 'jig rten du lha rnams kyi nang du skye'o zhes bya bar rab tu shes te/ de ltar na lha'i mig rnam par dag pa mi'i las 'das pas sems can 'chi 'pho ba dang /skye ba dang / mdog sdug pa dang / mdog mi sdug pa dang / bde bar song ba dang / ngan par song ba dang / bzang po dang ngan pa thams cad rnam pa dang bcas/ dan rtags dang bcas/ rgyu mtshan dang bcas par mthong ste/ las ji lta ba bzhin du nye bar 'gro ba'i sems can rnams kyang rab tu shes so/ /de bsam gtan dang / rnam par thar pa dang / ting nge 'dzin dang / snyoms par 'jug pa 'di dag la snyoms par 'jug cing / rnam par ldang yang gang du byang chub kyi yan lag yongs su rdzogs par 'gyur bar mthong ba der ched du bsam ste /smon lam btab pa'i dbang gis skye ba ma gtogs par de dag gi dbang gis mi skye'o zhes gsungs pa'o/ /ci'i phyir gang gis bsam gtan dang / gzugs med pa dang / tshad med pa dang / mngon par shes pa rnams la snyoms par 'jug ce na/ sems can rnam pa lnga'i dbang du byas pa'i phyir te/bsam gtan rnams ni bde ba'o snyam du mngon pa'i nga rgyal can gyi sems can rnams kyi dbang du byas pa'o/ /gzugs med pa rnams ni thar pa'o snyam du mngon pa'i nga rgyal can rnams kyi dbang du byas pa'o/ /byams pa dang snying rje ni sdug bsngal pa rnams kyi dbang du byas pa ste/'di dag sdug bsngal bar mi 'gyur bar bdag gis de dag sdug bsngal ba las dgrol bar bya'o snyam du sems pa'o/ /dga' ba dang btang snyoms ni grol ba rnams kyi dbang du byas pa'o/ /mngon par shes pa rnams ni ngan pa'i skyabs su zhugs pa'i dbang du byas pa ste/ mthu'i khyad par gyis gzud pa'i phyir ro/ /sa 'di ni mi nyams pa'i bsam gtan la sogs pas thob pas de dag gis rab tu phye ba yin no/ /sa snga ma gnyis la yang snyoms par 'jug pa de med pa ni ma yin no/ /de la bsam gtan dang gzugs med pa ni rnam pa bzhis rnam par gzhag par rig par bya ste/mi mthun pa'i phyogs nyams pa dang / gnyen po bsgom pa dang / bsgoms pa'i phan yon dang de gnyis ka'i gnas so/ /de la 'dod pa dang sdig pa mi dge ba'i chos las dben pas ni/ bsam gtan dang po'i mi mthun pa'i phyogs nyams par ston te/ gang gi phyir 'dod pa rnams las dben pa/sdig pa mi dge ba'i chos rnams las dben pa zhes gsungs pa'o/ /rtog pa dang bcas shing dpyod pa dang bcas pa ni gnyen po bsgom pa ston te/ gang gi phyir rtog pa dang bcas pa/ dpyod pa dang bcas pa zhes gsungs pa'o/ /dga' ba dang bde bas ni bsgoms pa'i phan yon ston te/gang gi phyir dben pa la skyes pa'i dga' ba dang bde bas zhes gsungs pa'o/ /bsam gtan gyis ni de gnyi ga'i gnas kyi ting nge 'dzin ston te/ gang gi phyir bsam gtan bzhi pa bsgrubs te gnas so zhes gsungs pa'o/ /gzugs med pa'i snyoms par 'jug pa rnams la yang mi mthun pa'i phyogs nyams pa dang /gnyen po bsgom pa dang / bsgoms pa'i phan yon dang / de gnyi ga'i gnas rnams ci rigs su sbyar bar bya ste/ de rnam pa thams cad du gzugs kyi 'du shes rnams las yang dag par 'das te zhes bya ba ni mig gi rnam par shes pa dang mtshungs par ldan pa'i 'du shes las yang dag par 'das pa'o//thogs pa'i 'du shes rnams nub par gyur ces bya ba ni/ rna ba dang / sna dang / lce dang / lus dang mtshungs par ldan pa'i 'du shes nub pa'o/ /sna tshogs kyi 'du shes rnams yid la mi byed ces bya ba ni yid kyi rnam par shes pa dang mtshungs par ldan pa'i 'du shes rnams yid la mi byed pa'o//yid kyi rnam par shes pa ni rnam par rtog pa can yin pas/ sna tshogs nyid kyi 'du shes rnams zhes bya ste/ 'di ni mi mthun pa'i phyogs nyams pa'o/ /tha dad du dbye ba'i tshul gyis gzugs la sogs pa'i yul bdag med par mthong ba'i phyir/gnyen po gang gi gzugs la sogs pa'i yul gyi 'du shes las yang dag par 'das pa de ni/ gnyen po bsgom pa yin par shes par bya'o/ /nam mkha' mtha' yas so snyam nas zhes bya ba ni bsgoms pa'i phan yon no/ /nam mkha' mtha' yas skye mched bsgrubs te gnas so zhes bya ba la nam mkha' mtha' yas skye mched kyis de gnyis ka'i gnas kyi ting nge 'dzin yongs su bstan to//de rnam pa thams cad du nam mkha' mtha' yas skye mched las yang dag par 'das nas zhes bya ba 'dis ni mi mthun pa'i phyogs nyams pa bstan to//phyi rol gyi dmigs pa la rags pa nyid du yongs su rtog pas nyes par mthong ba'i phyir / gnyen po gang gis de las yang dag par 'das pa de ni gnyen po bsgom pa yin par rig par bya'o/ /rnam par shes pa mtha' yas so snyam nas zhes bya bas ni bsgoms pa'i phan yon yongs su bstan to//rnam shes mtha' yas skye mched bsgrubs te gnas so zhes bya bas ni de gnyi ga'i gnas kyi ting nge 'dzin bstan to/ /de rnam pa thams cad du rnam shes mtha' yas skye mched las yang dag par 'das zhes bya ba 'dis ni mi mthun pa'i phyogs nyams pa bstan to/ /rnam par shes pa mtha' yas so snyam zhes bya ba ni 'dir rags pa nyid du yongs su rtog pas nyes par mthong ba'i phyir gnyen po gang gi de las yang dag par de ni gnyen po bsgom pa yin par shes par bya'o//ci yang med do snyam zhes bya ba 'dis ni bsgoms pa'i phan yon yongs su bstan to/ /ci yang med pa'i skye mched bsgrubs te gnas so zhes bya ba 'dis ni gnyis ka'i gnas kyi ting nge 'dzin yongs su bstan to//de rnam pa thams cad du ci yang med pa'i skye mched las yang dag par 'das zhes bya ba 'dis ni mi mthun pa'i phyogs nyams pa bstan to/ /ci yang med do snyam zhes bya ba 'dis ni rags pa nyid yongs su rtog pas nyes par mthong ba'i phyir gnyen po gang gis de las yang dag par 'das pa de ni gnyen po bsgom pa yin par rig par bya'o//'du shes med 'du shes med pa ma yin no snyam zhes bya bas ni bsgoms pa'i phan yon bstan to/ /'du shes med 'du shes med min skye mched bsgrubs te gnas so zhes bya ba la 'du shes med 'du shes med min skye mched kyis ni de gnyi ga'i gnas kyi ting nge 'dzin bstan to//gzugs med pa'i snyoms par 'jug pa rnams la yang mi mthun pa'i phyogs nyams pa dang / gnyen po bsgom pa dang / de'i phan yon dang / de gnyi ga'i gnas rnams ni ci rigs su sbyar zin to//tshad med pa rnams ni rnam pa gsum ste/ sems can la dmigs pa dang / chos la dmigs pa dang dmigs pa med pa rnams so/ /de la sems can la dmigs pa ni rnam pa bzhis rnam par gzhag ste nye bar sgrub pa dang / mi mthun pa'i phyogs kyi gnyen po dang /rnam par dag pa dang 'bras bu yongs su 'dzin pa'o/ /nye bar sgrub pa ji lta bu zhe na/ 'dod pa na spyod pa dang / gzugs na spyod pa dga' ba dang bcas pa dang / dga' ba med pa'i bde ba rnam pa gsum sgrub pa'i phyir ro/ /de ni sdug bsngal dang dga' ba dang bral ba'i phyir gnyis su med pa'o//de nyid tshad med pa yin te/ gang gi phyir de la byams pa dang ldan pa'i sems yangs pa rgya chen por gyur pa mi gnyis pa tshad med pa zhes bya ba nas/ snying rje dang / dga' ba dang / btang snyoms dang ldan pa zhes gsungs pa'i bar du'o/ /mi mthun pa'i phyogs kyi gnyen po ji lta bu zhe na/mi 'dod pa nye bar sgrub pa dang / 'dod pa nye bar sgrub pa'i gegs byed pa gnod par sems pa'i gnyen po ni gang gi phyir khon med pa 'gran zla med pa zhes gsungs pa'o/ /rnam par dag pa ji lta bu zhe na/ sgrib pa rmugs pa dang / gnyid dang / rgod pa dang 'gyod pa gnyis yang dag par shin tu bsal ba'i phyir te/ gang gi phyir sgrib pa med pa zhes gsungs pa'o/ /'bras bu yongs su 'dzin pa ji lta bu zhe na/ gzugs dang 'dod pa'i khams su rnam par smin pa dang / rgyu mthun pa'i gnod pa med pa'i 'bras bu nyid yongs su 'dzin pa'i phyir te/gang gi phyir gnod pa med pa zhes gsungs pa'o/ /chos la dmigs pa ni thams cad du khyab pa'o/ /'dod pa dang / gzugs dang / gzugs med pa na spyod pa'i so so'i skye bo dang / slob pa'i so so'i skye bo'i sems can ji snyed pa ni chos rnams te/ gang dag la sems can du 'dogs pa med pa de la dmigs pa ste/gang gi phyir thams cad du khyab pa zhes gsungs pa'o/ /dmigs pa med pa ni rnam pa gnyis kyis bstan te/ rang gi mtshan nyid la mi dmigs pa ni chos la bdag med pa mchog tu gyur pa'i 'jig rten la ste/ gang gi phyir 'jig rten chos kyi dbyings dam pa zhes gsungs pa'o//mtha' yongs su ma chad pa ni gang gi phyir nam mkha'i khams kyi mthas gtugs pa zhes gsungs pa'o/ /'jig rten thams cad ces bya ba ni 'jig rten gyi khams thams cad de/ gang gi phyir 'jig rten thams cad khyab par byas nas bsgrubs te gnas so zhes gsungs pa'o//mngon par shes pa rnams las bzhi ni shes pas rab tu phye ba'o/ /lnga pa ni mthong bas rab tu phye ba'o/ /rdzu 'phrul mngon par shes pa gcig gis ni/ lus kyi las yongs su dag go/ /lha'i rna ba dang / pha rol gyi sems shes pa'i mngon par zhen pa gnyis kyis ni ngag gi las yongs su dag go//sngon gyi gnas rjes su dran pa dang / 'chi 'pho dang / skye ba mngon par shes pa gnyis kyis ni yid kyi las yongs su dag go/ /gcig gis ni sems can gyi gan du 'gro'o/ /gnyis kyis ni chos ston te / sgra dang don so sor yang dag par rig cing sems shes la skad gzhan gyi don shes te/don de'i dbang du byas nas de dag gis tshig 'di brjod do snyam pa'o/ /gnyis kyis ni 'ong ba dang 'gro ba shes te/ sems can rnams kyi sngon gyi mtha' dang / phyi ma'i mtha' yongs su smin pa shes so/ /de la rdzu 'phrul mngon par shes pa ni dbang nyid thob par rig par bya'o//dbang nyid kyang rnam pa gsum ste/ zhing la dbang ba nyid ni 'jig rten gyi khams kyi sa g.yo bar byed pa ste/ gang gi phyir rdzu 'phrul bya ba rnam pa du ma myong bar byed de/ sa yang g.yo bar byed do zhes gsungs pa'o/ /lus la dbang ba nyid ni de bsdus pa dang / spros pa dang / snang ba dang mi snang bar byed pa ste/gang gi phyir gcig tu gyur nas mang por 'gyur ro/ /mang por gyur nas gcig tu 'gyur ro/ /snang bar gyur cing mi snang bar 'gyur ro zhes gsungs pa'o/ /byed pa la dbang ba nyid ni rnam pa brgyad de/ rtsig pa la sogs pa la thad kar 'gro ba ni gang gi phyir/ rtsig pa la thad kar 'gro/ ra ba la yang thad kar 'gro/ /ri la yang mi thogs par thad kar 'gro ste/ dper na nam mkha' la bya ba bzhin no zhes gsungs pa'o/ /steng du nam mkha' la yang 'gro ba ni gang gi phyir/ nam mkha' la yang skyil mo krung gis 'gro ste / dper na 'dab chags bya bzhin no zhes gsungs pa'o//sa la yang steng dang 'og tu 'gro ba ni gang gi phyir/ sa la yang steng du 'byung ba dang bye'u zul byed de/ dper na chu la bya ba bzhin no zhes gsungs pa'o/ /chu la'ang 'og tu mi 'bying ba ni gang gi phyir/ chu la'ang mi nub par 'gro ste / dper na sa la bya ba bzhin no zhes gsungs pa'o//rab tu 'bar bar byed pa ni gang gi phyir du ba 'thul bar yang byed/ 'bar bar yang byed de / dper na me'i phung po chen po bzhin no zhes gsungs pa'o/ /chu 'byin par byed pa ni gang gi phyir bdag gi lus las chu'i rgyun chen po 'byin te/ dper na sprin chen po bzhin no zhes gsungs pa'o//lag pas nyug par byed pa ni gang gi phyir zla ba dang nyi ma 'di ltar rdzu 'phrul che ba / 'di ltar mthu che ba 'di gnyis la yang / lag pas 'dzin cing kun du nyug par byed do zhes gsungs pa'o/ /tshangs pa'i 'jig rten gyi bar gyi snod dang sems can gyi 'jig rten la dbang byed de/ 'dod dgur sgyur zhing byed par dbang ba ni gang gi phyir/tshangs pa'i 'jig rten gyi bar du yang lus kyis dbang bsgyur ro zhes gsungs pa'o/ /lha'i rna ba'i mngon par shes pas ni gang gis ji ltar gyur pas gang thos pas de yongs su bstan te/ rnam par dag pas ni gsal bar thos pa'o//mi las 'das pa ni thag ring po thos pa ste/ mi'i sgra las kyang shin tu 'das nas 'og tu mnar med pa yan chod kyi sgra thos par nus pa ste/ gang gi phyir de lha'i rna ba'i khams rnam par dag pa mi'i las 'das pas lha dang mi gnyis ka'i sgra yang thos so zhes bya ba gsungs pa ste/gang na bya ba byed pa der gtod cing nyan pa'o/ /tha na sbrang bu la sogs pa'i sgra zhes bya ba ni chung ngu yang thos so zhes yongs su ston to / /gang gi phyir gang dag ring yang rung nye yang rung tha na sbrang bu dang sha sbrang dang / bung ba dang srin bu rnams kyi sgra yang thos so zhes gsungs pa'o/ /sems kyi rnam grangs kyi mngon par shes pa ni sems tha dad pa ste/kun nas dkris pa dang / bag la nyal dang / skye ba dang / ting nge 'dzin la sbyor ba dang / ting nge 'dzin thob pa dang / rnam par grol ba dang / log pa dang / yang dag par sgrub pa dang / rags pa dang / rags pa ma yin par rab tu dbye bar shes par bya'o//de la kun nas dkris pa ni 'dod chags dang bcas pa la sogs pa ste/ gang gi phyir 'dod chags dang bcas pa'i sems la yang 'dod chags dang bcas pa'i sems su yang dag pa ji lta ba bzhin du rab tu shes so/ /'dod chags dang bral ba'i sems la yang 'dod chags dang bral ba'i sems su yang dag pa ji lta ba bzhin du rab tu shes so//zhe sdang dang bcas pa dang / zhe sdang dang bral ba dang / gti mug dang bcas pa dang / gti mug dang bral ba zhes gsungs pa'o/ /bag la nyal ni nyon mongs pa dang bcas pa dang / nyon mongs pa med pa ste/ gang gi phyir nyon mongs pa dang bcas pa dang / nyon mongs pa med pa zhes gsungs pa'o/ /skye ba ni mi rnams kyi ni chung ba'o/ /'dod pa na spyod pa'i lha rnams kyi ni yangs pa'o/ /gzugs na spyod pa'i lha rnams kyi ni rgya chen por gyur pa'o/ /gzugs med pa gnyis kyi ni tshad med pa ste/ gang gi phyir chung ba dang /yangs pa dang / rgya chen por gyur pa dang tshad med pa zhes gsungs pa'o/ /ting nge 'dzin la sbyor ba ni bsdus pa dang spros pa ste/ gang gi phyir bsdus pa dang spros pa zhes gsungs pa'o/ /ting nge 'dzin thob pa ni snyoms par zhugs pa dang / langs pa rnams kyi mnyam par bzhag pa dang mnyam par ma bzhag pa ste/gang gi phyir mnyam par bzhag pa dang mnyam par ma bzhag pa zhes gsungs pa'o/ /rnam par grol ba ni rnam par grol ba dang rnam par ma grol ba ste/ gang gi phyir rnam par grol ba dang rnam par ma grol ba zhes gsungs pa'o/ /log pa dang yang dag par bsgrub pa rnams la ni grags pa rnams la 'dod pas spyod pa'i rigs pa ma yin pa dang rigs pa ste/gang gi phyir skyon can dang skyon med pa zhes gsungs pa'o/ /so so'i skye bo mngon pa'i nga rgyal can gzhan rnams kyi nyon mongs pa rags pa dang cha phra ba kun du 'byung ba ni/ gang gi phyir sems rags pa la yang sems rags pa'o zhes yang dag pa ji lta ba bzhin rab tu shes so//sems rags pa ma yin pa la yang sems rags pa ma yin pa'o zhes yang dag pa ji lta ba bzhin du rab tu shes so zhes gsungs pa'o/ /sngon gyi gnas rjes su dran pa'i mngon par shes pas ni dran pa gang gis dran pa ste/gang gi phyir de sngon gyi gnas rnam pa du ma rjes su dran te zhes gsungs pa'o/ /gang dran pa ni gang gi phyir tshe rabs gcig kyang rjes su dran no/ /tshe rabs gnyis dang gsum nas bskal ba bye ba khrag khrig 'bum phrag du ma'i bar du rjes su dran no zhes gsungs pa'o/ /ji ltar dran pa ste tha snyad kyi rgyu tha dad pa ni gang gi phyir che ge mo zhig na bdag ming ni 'di zhes bya bar gyur ces gsungs pa'o//rus tha dad pa ni gang gi phyir rus ni 'di zhes bya zhes gsungs pa'o/ /ya rabs dang ma rabs tha dad pa ni gang gi phyir rigs ni 'di zhes bya zhes gsungs pa'o/ /rton pa tha dad pa ni gang gi phyir kha zas ni 'di lta bu zhig za za zhes gsungs pa'o//'du byed tha dad pa ni gang gi phyir tshe 'di lta bu zhig thub/ yun 'di srid cig gnas gnas zhes gsungs pa'o/ /dar ba dang rgud pa tha dad pa ni gang gi phyir bde ba dang sdug bsngal ni 'di lta bu zhig myong zhes gsungs pa ste/ de dag yongs su bstan to//de la rus tha dad pa ni pha dang ma tha dad pa'o/ /ya rabs dang ma rabs tha dad pa ni bram ze dang rgyal rigs la sogs pa tha dad pa'o/ /'du byed tha dad pa ni tshe'i tshad dang / dus ma yin pa dang dus su 'chi ba'o/ /de la rnam pa ni de dag thams cad tha dad pa ste/ gang gi phyir rnam pa dang bcas zhes gsungs pa'o/ /dan rtags ni ming ste gang gi phyir dan rtags dang bcas zhes gsungs pa'o/ /rgyu mtshan ni rigs la sogs pa ste/ rgyu mtshan dang bcas par zhes gsungs pa'o/ /rnam grangs gzhan du tshe rabs gcig dang gnyis dang gsum zhes bya ba la sogs pa ni rnam pa dag go//dan rtags ni ming la sogs pa'o/ /rgyu mtshan ni bdag de nas shi 'phos nas che ge mo zhig tu skyes so zhes bya'o / /skye ba'i rgyu mtshan ni gang gis bskyed pa'o/ /'chi 'pho ba dang skye ba'i mngon par shes pa ni gang gis mthong zhe na/ lha'i mig la sogs pa ste gang gi phyir lha'i mig rnam par dag pa mi'i las 'das pas zhes gsungs pa'o//gang mthong zhe na/ sems can rnams 'chi 'pho ba mthong ba ste/ gang gi phyir sems can 'chi 'pho ba dang / skye ba dang / mdog sdug pa dang / mdog mi sdug pa dang / bde bar song ba dang / ngan par song ba dang /bzang po dang ngan pa rnams mthong ngo / /las ji lta ba bzhin du nye bar 'gro ba'i sems can rnams yang dag pa ji lta ba bzhin du rab tu shes so zhes gsungs pa'o/ /ji ltar mthong ba ni kye ma sems can 'di dag ni lus kyis nyes par spyod pa dang ldan pa/ ngag gis nyes par spyod pa dang ldan pa/yid kyis nyes par spyod pa dang ldan pa/ 'phags pa rnams la skur pa 'debs pa/ log par lta ba can dag ste/ log par lta ba'i las yang dag par blangs pa'i rgyus lus zhig ste/ shi ba'i 'og tu ngan song ngan 'gro log par lhung ba sems can dmyal ba rnams su skye'o zhes bya ba dang /kye ma sems can 'di dag ni lus kyis legs par spyod pa dang ldan pa zhes bzlog pa nas bde 'gro mtho ris kyi 'jig rten du lha rnams kyi nang du skye'o zhes bya bar rab tu shes pa de yongs su bstan to/ /lhag ma ni nyan thos kyi theg pa las 'byung ba dang / thun mong bas rnam par ma phye ba'o//de bsam gtan dang / rnam par thar pa dang / ting nge 'dzin dang / snyoms par 'jug pa 'di dag la snyoms par 'jug cing rnam par ldang yang gang du byang chub kyi yan lag yongs su rdzogs par 'gyur bar mthong ba der ched du bsams te/ smon lam btab pa'i dbang gis skye ba ma gtogs par de dag gi dbang gis mi skye'o zhes bya ba de la bsam gtan rnams ni ji skad bstan pa rnams so//rnam par thar pa ni gzugs med pa dag go/ /ting nge 'dzin dag ni tshad med pa rnams so/ /snyoms par 'jug pa rnams ni mngon par shes pa rnams te byung ba dang dus mnyam du ji ltar bsam pa'i bya ba sgrub pa'i phyir ro//bsam gtan dang gzugs med pa de dag gi dbang gis mi skye zhes bya ba ni rang dbang gi sems kyi bsam pa de yang dag par sgrub bo/ /gang du byang chub kyi yan lag yongs su rdzogs par 'gyur bar mthong ba zhes bya ba ni gang na sangs rgyas rnams dang / byang chub sems dpa' chen po rnams dang 'grogs pa'o//chos thams cad rnam par dag par 'pho ba med pa nyid dang / kun nas nyon mongs par rnam par 'jig pa med pa nyid du mthong ste/ rten cing 'brel par 'byung ba'i phyir ro/ /rnam par dag pa der yang ci yang gzhag pa med la/ kun nas nyon mongs pa las kyang ci yang bsal ba med de/gnyen po la brten nas kun nas nyon mongs pa rnam par ldog cing / rnam par dag pa yang mngon te/ gang gi phyir chos thams cad rkyen la brten pa nyid yin pas 'pho ba med pa nyid dang / rnam par 'jig pa med pa nyid du rtogs pas zhes gsungs pa'o//de'i kun 'byung ba ring du gyur pas/ de bas kyang shas cher 'dod pa dang / gzugs dang gzugs med pa dang ldan pa'i nyon mongs pa bsgoms pas spang bar bya ba thams cad de'i rgyur gyur pa ma rig pa dang bcas par bsrabs par 'gyur ro/ /lta ba rnams ni sa dang po nyid du mthong ba'i lam gyis spangs pa yin te/gang gi phyir de de bas kyang shas cher 'dod pa'i 'ching ba thams cad bsrabs par 'gyur ro/ /gzugs kyi 'ching ba thams cad dang / srid pa'i 'ching ba thams cad dang / ma rig pa'i 'ching ba thams cad spangs par 'gyur ro/ /de'i lta bar gyur pa'i 'ching ba rnams ni snga nas kyang spangs pa yin no zhes gsungs pa'o//log pa'i 'dod chags la sogs pa 'grib par bya ba ma yin par spong bar 'gyur zhes bya ba la mi dge ba'i rtsa ba rnams kyi bag la nyal spong ba yin gyi/ sngar bsal ba'i phyir kun du 'byung ba sel bar ni ma yin te/gang gi phyir byang chub sems dpa'i sa 'od byed pa 'di la gnas pa'i byang chub sems dpa' de ni bskal pa brgya phrag du ma nas/ bskal pa bye ba khrag khrig 'bum phrag du mar log pa'i 'dod chags 'grib par bya ba ma yin par spong bar 'gyur ro/ /log pa'i zhe sdang 'grib par bya ba ma yin pa dang /log pa'i gti mug 'grib par bya ba ma yin par spong bar 'gyur ro zhes gsungs so / /gser gyi sa le sbram gyi dpes ni gron med de srang ka thub pas sa 'og ma la dbang byed de/ sa 'di la 'dod chags dang bral bar 'gro ba nyams pa med par yongs su ston te/gang gi phyir kye rgyal ba'i sras dag 'di lta ste/ dper na gser gyi sa le sbram de nyid mgar ba mkhas pa'i lag na bsrel na srang grangs kyi tshad bzhin du 'dug go/ /kye rgyal ba'i sras dag de bzhin du byang chub sems dpa'i sa 'od byed pa 'di la gnas pa'i byang chub sems dpa' yang /bskal pa brgya phrag du ma nas bskal pa bye ba khrag khrig 'bum phrag du ma'i bar du log pa'i 'dod chags 'grib par bya ba ma yin par spong bar 'gyur ro zhes gsungs pa ste snga ma bzhin no/ /de gnod pa byed pa la mi 'khrugs pa dang / gzhan gyi sems rjes su srung ba'i phyir/bzod pa dang des pa'i bsam pa shas cher yongs su dag pa yin te/ gang gi phyir de'i bzod pa dang des pa'i bsam pa yang de bas shas cher yongs su dag par 'gyur zhes gsungs pa'o/ /de ni gnod pa byed pa'i bye brag gis tha dad par yongs su ston te / gnod pa byed du dogs pa la ni bshes pa nyid snyan pa'i tshig gis sbyor te gang gi phyir bshes shing 'jam pa'i bsam pa nyid ces gsungs pa'o//gnod pa byed pa la ni mi 'khrugs pa dang / phyir mi gshe ba la sogs pa dang yid mi bde ba mi bskyed pa ni gang gi phyir mi g.yo ba'i bsam pa nyid dang mi 'khrugs pa'i bsam pa nyid dang g.yo ba med pa'i bsam pa nyid ces gsungs pa'o//'das pa la nga rgyal med pas bdag gis bshad kyis 'chags pa ni gang gi phyir/ mtho dman med pa'i bsam pa nyid/ /ces gsungs pa'o/ /gzhan las 'dud pa'i bya ba la mi smon pa ni gang gi phyir sems can gyis byas pa la 'dod pa med pa'i bsam pa nyid ces gsungs pa'o//lan du phan 'dogs par byed par smon pa ni gang gi phyir byas pa la phyir byed par re ba med pa'i bsam pa nyid ces gsungs pa'o/ /bcos pa ma yin par phan gdags par spyod pa sbyor ba dang / nye mgon med de mnyam par phan 'dogs par 'jug pa ni gang gi phyir g.yo med cing sgyu med pa'i bsam pa nyid ces gsungs pa'o//mi dga' ba chung ngu dang yang 'brel pa med pa ni gang gi phyir/ thibs po med pa'i bsam pa nyid/ /ces gsungs pa'o/ /sa 'di'i lhag ma ni snga ma'i tshul bzhin du rig par bya'o/ /'phags pa sa bcu pa las/sa gsum pa'i rnam par bshad pa rdzogs so// //bam po bdun pa/ sa bzhi pa ni ting nge 'dzin rnam par dag pa la brten nas/ thos pa gzung ba yang dag pa ji lta ba bzhin du shes pa rnam par dag pas rab tu phye ba'o/ /de yang rnam pa bzhis rnam par gzhag par rig par bya ste/rnam par dag pa dang gnyen po bsgom pa 'phel ba'i rgyu rnam par gzhag pa dang / rnam par dag pa 'phel ba rnam par gzhag pa dang / gnyen po bsgom pa 'phel ba rnam par gzhag pa dang / de'i 'bras bu rnam par gzhag pas so/ /de la rnam par dag pa dang gnyen po bsgom pa 'phel ba'i rgyu ni chos la snang bas 'jug pa bcu ste/gang gi phyir kye rgyal ba'i sras dag byang chub sems dpa'i sa gsum pa la snang ba shin tu yongs su dag pa'i byang chub sems dpa' de byang chub sems dpa'i sa bzhi pa non te/ des chos la snang ba'i 'jug pa bcus gnon to zhes gsungs pa'o//snang ba na rtogs pa'i ye shes te des der rtogs pa la de bzhin gshegs pas bstan pa'i chos rnams la 'jug pas ye shes de ni chos la snang bas 'jug pa'o/ /de dag dang de mtshungs par rtog pa ste/ shes bya ji lta ba bzhin du gnyi ga 'byung ba'i phyir ro/ /de ni rnam par dpyad pa'i bye brag rnam pa bcus rig par bya ste/rnam par dpyad pa'i bye brag la sems can rnams gdags pa'i bye brag ni/ gang gi phyir sems can gyi khams rnam par dpyad pa la snang bas 'jug pa zhes gsungs pa'o/ /gnas kyi bye brag ni gang gi phyir 'jig rten gyi khams rnam par dpyad pa la snang bas 'jug pa zhes gsungs pa'o//rang bzhin gyi bye brag ni gang gi phyir chos kyi dbyings rnam par dpyad pa la snang bas 'jug pa zhes gsungs pa'o/ /mtha'i bye brag ni gang gi phyir nam mkha' rnam par dpyad pa la snang bas 'jug pa zhes gsungs pa'o/ /kun nas nyon mongs pa dang rnam par byang ba'i gnas kyi bye brag ni gang gi phyir rnam par shes pa'i khams rnam par dpyad pa la snang bas 'jug pa zhes gsungs pa'o//kun nas nyon mongs pa'i bye brag ni gang gi phyir 'dod pa'i khams rnam par dpyad pa la snang bas 'jug pa dang / gzugs kyi khams rnam par dpyad pa la snang bas 'jug pa dang /gzugs med pa'i khams rnam par dpyad pa la snang bas 'jug pa zhes gsungs pa'o/ /rnam par byang ba'i bye brag ni gang gi phyir bsam pa rlabs po che'i mos pa'i rnam par dpyad pa la snang bas 'jug pa dang / che ba nyid kyi bsam pa mos pa'i khams rnam par dpyad pa la snang bas 'jug pa zhes gsungs pa'o//de la kun nas nyon mongs pa ni khams gsum po dag go/ /rnam par byang ba ni rnam pa gnyis te/ kun nas nyon mongs pa med pa dang sems can yongs su mi gtong ba'i dbang du byas nas/ nyan thos la sogs pa dang thun mong dang thun mong ma yin pa'i phyir ro/ /de la rnam par dag pa 'phel ba ni de bzhin gshegs pa'i rigs su yang dag par 'grub pa ste/gang gi phyir kye rgyal ba'i sras dag de la byang chub sems dpa'i sa 'od 'phro ba can thob ma thag tu byang chub sems dpa' de bzhin gshegs pa'i rigs su de'i bdag nyid kyi chos thob pa'i phyir ye shes yongs su smin par byed pa'i chos bcus yang dag par 'grub pa yin no zhes gsungs pa'o//ji ltar na de bzhin gshegs pa'i rigs su yang dag par grub pa yin zhe na/ mang du thos pa'i gnas kyis ye shes khyad zhugs par gyur pas/ shes bya'i sgrib pa spong ba yongs su 'dzin pa'i khyad par gyi phyir te/rnam par dag pa'i khyad par de 'dra ba de ni de bzhin gshegs pa'i rigs so/ /de bas na de'i bdag nyid kyi chos thob pa'i phyir zhes gsungs pa ste/ de bzhin gshegs pa'i bdag nyid kyi chos gang dag yin pa ni gang dag gis de bzhin gshegs pas rab tu phye ba'o/ /ye shes yongs su smin par byed pa'i chos bcus zhes bya ba ni chos la snang bas 'jug pa dang /dus mnyam du thos pa dag gis zhes bya bar rig par bya'o/ /de dag ni ye shes rnam pa bzhis yongs su smin par byed pas ye shes yongs su smin par byed pa ste/ ye shes rnam pa bzhi la rang gi gnas la gnas pa ni gang gi phyir/ phyir mi ldog pa'i bsam pa nyid ces gsungs pa'o/ /dkon mchog gsum la dad pa dang ldan pa ni gang gi phyir/ dkon mchog gsum la dad pa mi phyed pa'i mthar thug par 'gro ba zhes gsungs pa'o/ /de bzhin nyid shes pa ni gang gi phyir/ 'du byed kyi skye ba dang 'jig pa la rnam par 'jig pa dang rang bzhin gyis ma skyes par rnam par 'jig pa zhes gsungs pa'o//rnam par gzhag pa shes pa ni gang gi phyir 'jig rten 'byung ba la rnam par 'jig pa dang / las kyi srid pa skye ba la rnam par 'jig pa dang / 'khor ba dang mya ngan las 'das pa la rnam par 'jig pa dang / zhing du las kyis sems can la rnam par 'jig pa dang /sngon gyi mtha' dang phyi ma'i mtha' la rnam par 'jig pa dang / dngos po med pa dang zad pa med par rnam par 'jig pa zhes gsungs pa'o/ /rang gi gnas ni byang chub sems dpa'i theg pa chen po yin par rig par bya'o/ /de la chos dang po gnyis po phyir mi ldog pa'i bsam pa nyid dang /dkon mchog gsum la dad pa mi phyed pa mthar thug par 'gro ba ni shes pa gong ma gnyis po rang gi gnas la gnas pa dang dkon mchog gsum la dad pa dang ldan pa yongs su smin par byed pa'o/ /chos gnyis po 'du byed kyi skye ba dang / 'jig pa la rnam par 'jig pa dang / rang bzhin gyis ma skyes par rnam par 'jig pa ni de bzhin nyid shes pa gang zag dang / chos la bdag med pa la dmigs pa yongs su smin pa ste go rims bzhin no/ /rnam par 'jig pa ni rtog pa yin par rig par bya'o/ /lhag ma rnams ni rnam par gzhag pa'i shes pa yongs su smin par bya ste/ de dag kyang kun nas nyon mongs pa dang rnam par byang ba'i dbang du byas nas/ji ltar kun nas nyon mongs pa dang / kun nas nyon mongs pa gang yin pa dang / rnam par byang ba gang yin pa dang / ji ltar rnam par byang ba de tha dad pas rig par bya'o/ /ji ltar kun nas nyon mongs she na/snod kyi 'jig rten 'byung ba'i phyir te/ 'jig rten 'byung ba la rnam par 'jig pa zhes bya ba'i tshig 'dis ston to/ /sems can gyi 'jig rten 'byung ba'i phyir yang yin te rgyu dang bcas pa'i skye ba yongs su smos pa'i phyir dang / las kyi srid pa skye ba la rnam par 'jig pa zhes bya ba 'dis ston to//kun nas nyon mongs pa gang yin zhe na/ 'khor ba'o/ /rnam par byang ba gang yin zhe na/ mya ngan las 'das pa'o/ /de ni 'khor ba dang mya ngan las 'das pa la rnam par 'jig pa zhes bya ba'i tshig 'dis ston to/ /ji ltar rnam par byang zhe na/ sangs rgyas kyi zhing rnams su las rnams kyis sems can rnams yongs su smin par byed pa ste/zhing du las kyis sems can la rnam par 'jig pa zhes bya ba 'dis ston to/ /kun nas nyon mongs pa dang rnam par byang ba ni snga phyi ste/ sngon gyi mtha' dang phyi ma'i mtha' la rnam par 'jig pa zhes bya ba 'dis ston to / /de dag nyid sngon gyi mtha' dang phyi ma'i mtha'o//gzhag pa med pa dang / dor ba med pa ni dngos po med pa dang / zad pa med par rnam par 'jig pa zhes bya ba 'dis ston te/ rnam par byang ba la 'phel ba'i tshul gyis dngos por mi mthong la/ kun nas nyon mongs pa la 'bri ba'i tshul gyis zad par mi mthong ngo / /de la gnyen po bsgom pa 'phel ba ni kun nas nyon mongs pa las kun du bsrung ba'i phyir byang chub kyi phyogs sgom pa ste/gang gi phyir kye rgyal ba'i sras dag byang chub sems dpa'i sa 'od 'phro ba can 'di la gnas pa'i byang chub sems dpa' de ni brtun pa dang / shes bzhin dang dran pa dang ldan par gyur nas 'jig rten la brnab sems dang yid mi bde ba rnam par spangs te/nang gi lus la lus kyi rjes su lta zhing gnas so/ /brtun pa dang / shes bzhin dang / dran pa dang ldan par gyur nas/ 'jig rten la brnab sems dang yid mi bde ba rnam par spangs te/ phyi'i lus la lus kyi rjes su lta zhing gnas so/ / brtun pa dang / shes bzhin dang dran pa dang ldan par gyur nas/ 'jig rten la brnab sems dang yid mi bde ba rnam par spangs te/ nang dang phyi'i lus la lus kyi rjes su lta zhing gnas so/ /de bzhin du brtun pa dang / shes bzhin dang dran pa dang ldan par gyur nas 'jig rten la brnab sems dang / yid mi bde ba rnam par spangs te/ nang gi tshor ba rnams dang / phyi'i tshor ba rnams dang / de bzhin du nang dang phyi'i tshor ba rnams dang / de bzhin du nang gi sems dang / phyi'i sems dang / nang dang phyi'i sems dang / de bzhin du nang gi chos rnams dang / phyi'i chos rnams dang / nang dang phyi'i chos rnams la chos kyi rjes su lta zhing gnas so//de sdig pa mi dge ba'i chos ma skyes pa rnams mi skyed pa'i phyir 'dun pa skyed do/ /'bad do/ /brtson 'grus rtsom mo/ /sems rab tu 'dzin to/ /yang dag par rab tu 'jog go/ /sdig pa mi dge ba'i chos skyes pa rnams spangs pa'i phyir 'dun pa skyed do//'bad do/ /brtson 'grus rtsom mo/ /sems rab tu 'dzin to/ /yang dag par rab tu 'jog go/ /dge ba'i chos ma skyes pa rnams skyed pa'i phyir 'dun pa skyed do/ /'bad do/ /brtson 'grus rtsom mo/ /sems rab tu 'dzin to/ /yang dag par rab tu 'jog go/ /dge ba'i chos skyes pa rnams gnas pa dang /mi nyams pa dang / rgyas par 'gyur ba dang / phyir zhing 'byung ba dang rab tu rdzogs par bya ba'i phyir 'dun pa skyed do/ /'bad do/ /brtson 'grus rtsom mo/ /sems rab tu 'dzin to/ /yang dag par rab tu 'jog go/ /de 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dben pa la gnas pa/'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /brtson 'grus kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dben pa la gnas pa/ 'dod chags dang bral ba la gnas pa/'gog pa la gnas pa/ rnam par spong bas yongs su bsgyur ba bsgom mo/ /sems kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo//dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /de dad pa'i dbang po dben pa la gnas pa/'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /brtson 'grus kyi dbang po dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo//dran pa'i dbang po dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /ting nge 'dzin gyi dbang po dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /shes rab kyi dbang po dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /de dad pa'i stobs dben pa la gnas pa/ 'dod chags dang bral ba la gnas pa/'gog pa la gnas pa/ rnam par spong bas yongs su bsgyur ba bsgom mo/ /brtson 'grus kyi stobs dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /dran pa'i stobs dben pa la gnas pa/ 'dod chags dang bral ba la gnas pa/'gog pa la gnas pa/ rnam par spong bas yongs su bsgyur ba bsgom mo/ /ting nge 'dzin gyi stobs dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /shes rab kyi stobs dben pa la gnas pa/'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /de dran pa yang dag byang chub kyi yan lag dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo//chos rnam par 'byed pa yang dag byang chub kyi yan lag dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /brtson 'grus yang dag byang chub kyi yan lag dben pa la gnas pa/'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /dga' ba yang dag byang chub kyi yan lag dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo//shin tu sbyangs pa yang dag byang chub kyi yan lag dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /ting nge 'dzin yang dag byang chub kyi yan lag dben pa la gnas pa/ 'dod chags dang bral ba la gnas pa/'gog pa la gnas pa/ rnam par spong bas yongs su bsgyur ba bsgom mo/ /btang snyoms yang dag byang chub kyi yan lag dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ / yang dag pa'i lta ba dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /yang dag pa'i rtog pa dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo//yang dag pa'i ngag dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /yang dag pa'i las kyi mtha' dben pa la gnas pa/ 'dod chags dang bral ba la gnas pa/ 'gog pa la gnas pa/rnam par spong bas yongs su bsgyur ba bsgom mo/ /yang dag pa'i 'tsho ba dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /yang dag pa'i rtsol ba dben pa la gnas pa/ 'dod chags dang bral ba la gnas pa/'gog pa la gnas pa/ rnam par spong bas yongs su bsgyur ba bsgom mo/ /yang dag pa'i dran pa dben pa la gnas pa/ 'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo/ /yang dag pa'i ting nge 'dzin dben pa la gnas pa/'dod chags dang bral ba la gnas pa/ 'gog pa la gnas pa/ rnam par spong bas yongs su bsgyur ba bsgom mo zhes gsungs pa'o/ /theg pa chung ngu las kun du bsrung ba'i phyir byang chub kyi phyogs pa de dag sems can thams cad la lta ba dang bcas pas bsgom par yongs su ston te/gang gi phyir de dag kyang sems can thams cad la lta ba dang bcas pa zhes gsungs pa'o/ /sems can thams cad la lta ba dang bcas pa de yang 'phangs pa ni/ gang gi phyir sngon smon lam mngon par bsgrubs pas nye bar bstan pa de yang gsungs pa'o/ /snying brtse ba ni gang gi phyir snying rje chen po sngon du 'gro ba dang /byams pa chen po dang ldan pa zhes gsungs pa'o/ /'dun pa ni gang gi phyir/ thams cad mkhyen pa'i ye shes la lhag par dmigs pa zhes gsungs pa'o/ /sgrub pa ni gang gi phyir sangs rgyas kyi zhing gi rgyan rnam par sgrub pa mngon par sgrub pa dang / de bzhin gshegs pa'i stobs dang / mi 'jigs pa dang / sangs rgyas kyi chos ma 'dres pa dang / mtshan dang dpe byad bzang po dang / gsung dbyangs phun sum tshogs pa mngon par sgrub pa dang / gong nas gong du khyad par can gyi chos yongs su tshol ba dang / sangs rgyas kyi chos zab mo rnam par thar pa mnyan pa'i rjes su 'gro ba dang /thabs la mkhas pa chen pos rnam par spyod pas so zhes gsungs pa'o/ /de ltar sems can thams cad la lta ba dang bcas pa nyid de ni kun nas nyon mongs pa las kun du bsrung ba dang / theg pa dman pa las kun du bsrung bas byang chub kyi phyogs pa bsgom pa la gnyen po bsgom pa 'phel ba ni 'phangs pa dang /snying brtse ba dang / 'dun pa dang sgrub pas yongs su bstan te/ de la byams pa dang snying rje gnyis kyis ni snying brtse ba'o/ /sangs rgyas kyi ye shes thob par mngon par 'dod pas ni 'dun pa'o/ /sgrub pa ni rnam pa lnga ste/ zhing yongs su dag par byed pa'i sgrub pa dang /sangs rgyas kyi chos mngon par sgrub pa'i sgrub pa dang / de'i thabs kyi dbang du byas nas sa la chog par mi 'dzin par sgrub pa dang / phyir mi ldog pa'i sa gnon pa'i sgrub pa dang / sems can yongs su smin par byed pa'i sgrub pa ste/ gsung dbyangs ni chos kyi dung yin par rig par bya'o//de la gnyen po bsgom pa 'phel ba'i 'bras bu ni bdag gis shes so/ /bdag gi shes pa'o/ /bdag sgom par byed do/ /bdag gi bsgom pa'o zhes bya ba la sogs pas lhag par g.yo ba dang / 'bral bar g.yo ba rnams spangs pa ste/ ting nge 'dzin las ldang bar byed pa'i phyir lhag par g.yo ba rnams so//ting nge 'dzin dang 'gal bar byed pa'i phyir 'bral bar g.yo ba rnams so/ /de dag gis 'phangs pa rnams dang / mngon par 'du byed pa dang / sbyor ba dang / yongs su 'dzin pa dang nyes dmigs kyis bstan par rig par bya'o/ / de la 'phangs pa ni 'jig tshogs la lta ba la gnas te/ sngon gang zag dang chos la mngon par zhen pas 'phangs pa ste/ gang gi phyir de 'jig tshogs la lta ba sngon du 'gro ba'i bdag dang / sems can dang / srog dang / gso ba dang / skyes bu dang / gang zag dang / phung po dang / khams dang skye mched la mngon par zhen pas kun nas bslang ba'i g.yo ba'i lhag par g.yo ba dang 'bral bar g.yo ba rnams zhes gsungs pa'o/ /yang dag pa ma yin par bsam pa'i phyir mngon par 'du byed de/ gang gi phyir rnam par brtags pa zhes gsungs pa'o/ /gzhan go bar bya ba la rnam par dpyod pas sbyor ba ste/gang gi phyir rnam par dpyad pa rnams zhes gsungs pa'o/ /yang dang yang so sor rtog pa'i phyir dang / bdag gi nyid du khas len pa'i phyir dang / 'dzin pa'i phyir yongs su 'dzin pa ste/ gang gi phyir rtag par 'dzin pa rnams dang / bdag gir 'dzin pa rnams dang / nor du 'dzin pa rnams zhes gsungs pa'o//sems 'dogs pa'i gnas yin pas nyes dmigs te/ gang gi phyir rten gyi gnas rnams zhes gsungs pa'o/ /de lhag par g.yo ba dang / 'bral bar g.yo ba rnam pa de lta bu de dag spangs pa yin te/ gang gi phyir de dag thams cad dang bral ba yin no zhes gsungs pa'o//'di ni re zhig nyon mongs pa'i kun nas nyon mongs pa'i rnam par spangs pa'i dbang du byas pa'i 'bras bu'o/ /de bya ba'i cha ma yin pa'i las yang dag par rdzogs pa'i sangs rgyas kyis smad pa/ kun nas nyon mongs pa dang ldan pa gang dag yin pa de dag thams cad kyi thams cad du spong ngo //las gang dag bya bar 'os pa byang chub sems dpa'i lam gyi tshogs dang mthun pa de bzhin gshegs pas bsngags pa de dag yang dag par blangs te gnas so zhes bya ba ni las kyi kun nas nyon mongs pa'i rnam par spangs pa'i dbang du byas pa'o/ /de dag kyang rnam pa gnyis kyis bya ba'i cha ma yin pa rnams zhes bya ste/sangs rgyas kyis smad pa'i phyir ston pa la gus pa dang / kun nas nyon mongs pa dang ldan pa'i phyir/ kha na ma tho bas 'jigs pa'o/ /rnam pa gnyis kyis na bya bar 'os pa ste/ byang chub sems dpa'i lam gyi tshogs dang mthun pa'i phyir/kha na ma tho ba med pa'i phan yon mthong ba dang / de bzhin gshegs pas bsngags pa'i phyir ston pa la gus pas so/ /de de bas kyang ji lta ji ltar thabs dang shes rab kyis mngon par sgrub pa'i lam yang dag par bsgrub pa'i phyir / lam gyi yan lag rnams bsgoms pa de lta de ltar 'jam pa'i sems dang ldan pa yin zhes bya ba bcu pa phrag bzhis 'bras bu rnam pa bzhi yongs su ston te/khyad par thob par bya ba'i phyir 'dun pa drag po dang / de ston pa'i ston pa la byas pa gzo ba dang / de'i thabs la sbyor ba la brtson 'grus brtsams pa dang / de sngon du 'gro ba'i khams brtas pa'o//de la ji lta ji ltar thabs dang shes rab kyis mngon par bsgrubs pa ni/ sems can thams cad la lta ba dang bcas pas bsgom pa ste/ sngar ji skad bstan pa bzhin no/ /lam gyi yan lag rnams zhes bya ba ni byang chub kyi phyogs pa thams cad la lam gyi yan lag rnams zhes bya'o//de lta de ltar 'jam pa'i sems dang ldan pa yin zhes bya ba ni 'dun pa dang / chags pa dang / dga' ba dang / dad pa drag pos so/ /'jam pa'i sems nyid de yang rgyu gsum gyis ston te / bde bar gnas pa'i khyad par ni gang gi phyir mnyan pa'i sems dang ldan pa zhes gsungs pa'o//ting nge 'dzin la dbang ba'i khyad par ni gang gi phyir las su rung ba'i sems dang ldan pa yin zhes gsungs pa'o/ /nyes pa rnam par 'bri zhing spong ba'i gnyen po'i khyad par ni gang gi phyir phan pa dang bde ba skyed pa'i sems dang ldan pa yin zhes gsungs pa'o/ /nyes pa de yang rnam pa drug tu rig par bya ste/chos bstan pa'i dus na zang zing dang bcas pa la nyon mongs pa'am klan ka tshol ba la nyon mongs pa ste/ de'i gnyen por yongs su nyon mongs pa can ma yin pa'i sems dang ldan pa yin zhes gsungs pa'o/ /sbyin pa la sogs pa dang 'dod pa chung ba la sogs pa'i yon tan rnams dang ye shes kyis chog par 'dzin pa ni nyes pa ste/de'i gnyen por gong nas gong du khyad par yongs su tshol ba'i sems dang ldan pa yin/ ye shes kyi khyad par mngon par 'dod pa'i sems dang ldan pa yin zhes gsungs pa'o/ /sems can yongs su smin par byed pa na skyo ba ni nyes pa ste/ de'i gnyen por 'gro ba thams cad yongs su skyob pa'i sems dang ldan pa yin zhes bya ba gsungs so / /bla mas lung phog pa na rang gi lta ba mchog tu 'dzin pa ni nyes pa ste/ de'i gnyen por bla ma la gus pa dang mthun pa'i sems dang ldan pa yin zhes bya ba gsungs so/ /sgrub pa na brtson pa 'dor ba ni nyes pa ste/de'i gnyen por ji skad thos pa'i chos sgrub pa'i sems dang ldan pa yin no zhes bya ba gsungs te/ de lta bu ni re zhig 'jam pa'i sems dang ldan pa yin no/ /ji skad thos pa'i chos sgrub pa'i sems dang ldan pa yin no zhes bya ba'i bar gyi bcu pa 'dis ni 'bras bu khyad par thob par bya ba'i phyir 'dun pa drag po nyid yang dag par bstan to//de ni de byas pa gzo ba nyid yin zhes bya ba bcu pa gnyis pas de ston pa'i ston pa la byas pa gzo ba nyid ston to/ /de la de byas pa gzo ba nyid yin zhes bya ba ni/ lan du phan 'dogs par zhugs pa nyid yin no/ /byas pa gzo ba nyid de yang rnam pa dgus ston te/ston pa'i dbang du byas nas phan gdags pa yid la byed pa ni gang gi phyir byas pa tshor ba zhes gsungs pa'o/ /chos mthun pa'i dbang du byas nas sems srung ba ni gang gi phyir des pa zhes gsungs pa'o/ /chos la rdzogs par longs spyod pa'i dbang du byas nas ji skad bstan pa bzhin du sgrub pa ni gang gi phyir 'grogs na bde ba zhes gsungs pa'o//nyes pa gleng ba dang dris pas 'khrug pa bzod par byed pa ni gang gi phyir drang ba dang mnyan pa zhes gsungs pa'o/ /zang zing la rdzogs par longs spyod pa'i dbang du byas nas/ sbyin bdag rnams rang gi nyes pa yang dag par mi 'chab pa dang /yang dag pa ma yin pa'i yon tan mi brjod pa ni gang gi phyir thibs po med par spyod pa dang sgyu med pa zhes gsungs pa'o/ /rang gi yon tan gyi khyad par gyi dbang du byas nas khengs par mi 'gyur ba ni gang gi phyir nga rgyal med pa zhes gsungs pa'o/ / rjes su bstan pa'i dbang du byas nas tshig brjod pa ni gang gi phyir bka' blo bde ba zhes gsungs pa'o/ /gdams ngag gi dbang du byas nas ma nor bar 'dzin pa ni gang gi phyir mthun par 'dzin pa yin no zhes gsungs pa'o/ /de ltar na de ston pa la lan du phan 'dogs par zhugs pa yin no/ /de de ltar dul ba dang ldan pa yin zhes bya ba na gnyen po bsgom pa 'phel ba dang ldan pa'i phyir ro//de ltar zhib dang ldan zhes bya ba ni de'i 'bras bu gong ma dang ldan pa'i phyir ro/ /de ltar dul ba dang zhi ba dang ldan pa zhes bya ba ni de'i 'bras bu 'og ma rnams dang ldan pa'i phyir te/ de dag ni gnyi gas rab tu phye ba'i phyir ro//de ltar bcu pa gnyis pas de ston pa'i ston pa la byas pa gzo ba nyid bstan nas/ rgyun mi gcod pa'i brtson 'grus dang ldan pa yin zhes bya ba bcu pa gsum pas de'i thabs la sbyor ba la brtson 'grus brtsams pa nyid ston to/ /rgyun mi gcod pa'i brtson 'grus dang ldan pa zhes bya ba ni brtson 'grus mi nyams pa'o//rgyun mi gcod pa'i brtson 'grus de yang rnam pa dgus yang dag par ston te/ brtson 'grus de mtshungs pa nyid du 'jug pa ni gang gi phyir yongs su nyon mongs pa can ma yin pa'i brtson 'grus dang ldan pa yin zhes gsungs pa ste/ yongs su nyon mongs pa can zhes bya ba ni/ha cang brtun pa dang / ha cang g.yel ba gnyis kyis dub pa dang bcas pa dang / nye ba'i nyon mongs pa dang bcas pa'o/ /rang gi theg pa las mi g.yo ba nyid ni gang gi phyir phyir mi ldog pa'i brtson 'grus dang ldan pa yin zhes gsungs pa'o/ /shin tu rgyas pa la dmigs pa nyid ni gang gi phyir shin tu rgyas pa'i brtson 'grus dang ldan pa yin zhes gsungs pa'o//sems can dpag tu med pa'i don bya ba'i smon lam yongs su 'dzin pa nyid ni gang gi phyir mtha' yas pa'i brtson 'grus dang ldan pa yin zhes gsungs pa'o/ /rtag tu gus pas 'jug pa nyid ni gang gi phyir shin tu sbyangs pa'i brtson 'grus dang ldan pa yin zhes gsungs pa'o//de las gzhan pa'i brtson 'grus zil gyis gnon pa nyid ni gang gi phyir mtshungs pa med pa'i brtson 'grus dang ldan pa yin zhes gsungs pa'o/ /bdud dang nyon mongs pa kun du 'byung ba thams cad kyis rgyun mi chod pa nyid ni gang gi phyir mi 'phrogs pa'i brtson 'grus dang ldan pa yin zhes gsungs pa'o//yang dag par sdud par byed pa nyid ni gang gi phyir sems can thams cad yongs su smin par byed pa'i brtson 'grus dang ldan pa yin zhes gsungs pa'o/ /the tshom gcod pa dang phas kyi rgol ba tshar gcod pa dang shin tu ldan pa nyid ni gang gi phyir tshul dang tshul ma yin pa rnam par 'byed pa'i brtson 'grus dang ldan pa yin zhes gsungs pa'o//de ltar bcu pa gsum pas de'i thabs la sbyor ba la brtson 'grus brtsam pa bstan nas/ de de bas kyang shas cher bsam pa'i khams yongs su dag par 'gyur ro zhes bya ba bcu pa bzhi pas de sngon du 'gro ba'i khams brtas pa ston to//khams brtas pa byang chub kyi bsam pa'i dbang du byas pa ni tshig dang po yongs su bstan to/ /de'i lam sgrub pa'i bsam pa ni gang gi phyir lhag pa'i bsam pa'i khams dang mi 'bral lo zhes gsungs pa'o/ / khyad par rtogs par bya ba la nges pa shin tu gsal ba 'byung ba ni gang gi phyir mos pa'i khams shin tu byang bar 'gyur ro/ /rgyu de las byung ba'i gnyen po 'phel ba ni gang gi phyir dge ba'i rtsa ba rnam par 'phel ba yang kun du skye'o zhes gsungs pa'o/ /mi mthun pa'i phyogs rnam par 'bri ba ni gang gi phyir 'jig rten gyi dri ma'i nag nog dang yang bral bar 'gyur ro zhes gsungs pa'o//sa de'i gsang ba la the tshom za ba ldog pa ni gang gi phyir the tshom dang / yid gnyis dang / nem nur yang rgyun 'chad par 'gyur ro zhes gsungs pa'o/ /de log na the tshom gyi gnas gzhan la yang mos pa ni gang gi phyir som nyi med pa mngon du 'gyur ba yang yongs su rdzogs par 'gyur ro zhes gsungs pa'o//bde bar gnas pa'i khyad par ni gang gi phyir dga' ba dang shin tu sbyangs pa yang yang dag par 'grub bo zhes gsungs pa'o/ /sems can gyi don yongs su smin par byed nus pa ni gang gi phyir de bzhin gshegs pa'i byin gyi rlabs kyang mngon sum du 'gyur ro zhes gsungs pa'o//shes bya'i sgrib pa rnam par dag par bya ba'i phyir ting nge 'dzin dpag tu med pa mngon par sgrub pa'i bsam pa'i dbang du byas pa ni gang gi phyir/ sems kyi bsam pa tshad med pa yang yang dag par 'grub bo zhes gsungs pa'o//de de bas kyang shas cher bsam pa dang / lhag pa'i bsam pa dang / mos pa mnyam pa nyid du rnam par dag par 'gyur ba ni yongs su dag pa de'i sa pa de las gzhan pa'i byang chub sems dpa' rnams dang mtshungs pa nyid du rnam par dag par 'gyur ba'o//gser gyi sa le sbram rgyan du byas pa'i dpes ni lung gis khong du chud par byed pas rtogs pa'i ye shes mngon par 'dus byas pa nyid du ston te/ gang gi phyir kye rgyal ba'i sras dag 'di lta ste dper na gser gyi sa le sbram de nyid mgar ba mkhas pas rgyan du byas pa ni de ma yin pa'i gser gyi sa le sbram rgyan du ma byas pa rnams kyis mi 'phrogs pa yin no zhes gsungs pa'o//nor bu rin po che 'od 'byung ba'i dpes ni chos kyi sgo du ma'i don la 'jug pas rtogs pa'i ye shes chos la snang ba nor bu rin po che lta bu lung gi snang ba rab tu gtong ba de 'od lta bu'i ye shes rgyas pa dang ldan par yongs su ston te /de dang ldan pas sa 'di 'od 'phro ba can no zhes nges pa'i tshig yongs su bstan pa'i phyir te/ gang gi phyir kye rgyal ba'i sras dag 'di lta ste dper na nor bu rin po che 'od 'byung ba 'od zer gyi dkyil 'khor yongs su dag pa can snang ba rab tu gtong ba ni de las gzhan pa'i rin po che'i rnam pa 'od yongs su ma dag pa rnams kyis mi 'phrogs pa zhes gsungs pa'o//de la 'od 'byung ba ni 'od dang ldan pa'i phyir ro/ /'od zer gyi dkyil 'khor yongs su dag pa can ni 'od kyi dkyil 'khor dri ma med pa'i phyir ro/ /sems can rnams kyi 'jig tshogs la lta ba yang dag par 'joms pa la mkhas pa dang /gtso bo yin zhing zhes bya ba la mkhas pa ni 'dir byed pa la bya'o/ /gtso bo ni mthu'o/ /lhag ma rnams ni snga ma bzhin du ci rigs su khong du chud par bya'o/ /'phags pa sa bcu pa las sa bzhi pa'i rnam par bshad pa rdzogs so// // sa lnga pa ni rnam pa gsum gyis rnam par gzhag par rig par bya ste/ nga rgyal gyi gnyen po rnam par gzhag pa dang / mi gnas pa'i lam sgrub pa'i khyad par rnam par gzhag pa dang / de'i 'bras bu rnam par gzhag pas so/ /de la nga rgyal gyi khyad par gyi gnyen po ni rnam par dag pa la sems kyi bsam pa mnyam pa nyid bcu po yid la bya ba phyir mi ldog pa dang bcas pa'o//sngar ni chos rtogs pa'i nga rgyal gyi gnyen por bstan gyi/ sa 'di la ni sems kyi rgyud rnam par dag pa/ tha dad pa'i mngon pa'i nga rgyal gyi gnyen po ston to/ /de la rnam par dag pa la sems kyi bsam pa mnyam pa nyid ni rnam par dag pa la sems kyi bsam pa mnyam pa nyid do//de yang rnam par dag pa'i bye brag gis rnam pa bcur rig par bya ste/ rnam par dag pa bcu ni sangs rgyas kyi chos gang dag yin pa dag dang / ji ltar sangs rgyas kyi chos rnams su 'gyur ba de'i bye brag gis rig par bya'o/ / sangs rgyas kyi chos rnams gang dag yin zhe na/ dus gsum gyi stobs la sogs pa ste/ gang gi phyir kye rgyal ba'i sras dag byang chub sems dpa'i sa bzhi pa la lam yongs su rdzogs par byas pa'i byang chub sems dpa' de byang chub sems dpa'i sa lnga pa la 'jug ste/ de rnam par dag pa la sems kyi bsam pa mnyam pa nyid bcus 'jug go//bcu gang zhe na/ 'di lta ste/ 'das pa'i sangs rgyas kyi chos rnam par dag pa la bsam pa mnyam pa nyid dang / ma byon pa'i sangs rgyas kyi chos rnam par dag pa la bsam pa mnyam pa nyid dang / da ltar byung ba'i sangs rgyas kyi chos rnam par dag pa la bsam pa mnyam pa nyid ces gsungs pa'o//de ltar dus gsum gyi stobs la sogs pa sangs rgyas kyi chos gang dag yin pa de dag bstan nas/ tshul khrims dang / ting nge 'dzin dang / shes rab dang / sems can yongs su smin par byed pa dang bcas pa rnams kyis ji ltar sangs rgyas kyi chos su 'gyur ba de dag ston to//de la tshul khrims kyi dbang du byas na tshul khrims rnam par dag pa la bsam pa mnyam pa nyid ces gsungs pa'o/ /ting nge 'dzin gyi dbang du byas na sems rnam par dag pa la bsam pa mnyam pa nyid ces bya ba gsungs so//shes rab kyi dbang du byas na lta ba dang som nyi dang / yid gnyis dang 'gyod pa sel ba rnam par dag pa la bsam pa mnyam pa nyid dang / lam dang lam ma yin pa shes pa rnam par dag pa la bsam pa mnyam pa nyid dang / lam shes pa rnam par dag pa la bsam pa mnyam pa nyid dang / byang chub kyi phyogs pa'i chos thams cad gong ma gong mas rnam par 'jig pa rnam par dag pa la bsam pa mnyam pa nyid ces bya ba gsungs so / /de la lam ni spor bar shes pa'o/ /byang chub kyi phyogs pa'i chos thams cad gong ma gong mas rnam par 'jig pa la ni yid tsam spong ba'i don du bstan to//sems can yongs su smin par byed pa'i dbang du byas na sems can thams cad yongs su smin par byed pa rnam par dag pa la bsam pa mnyam pa nyid ces bya ba gsungs so / /kye rgyal ba'i sras dag byang chub sems dpa' sa lnga pa thob pa'i byang chub sems dpa' de lam gyi yan lag byang chub kyi phyogs pa de dag nyid yongs su sbyangs pa shin tu byas pa'i phyir dang /lhag pa'i bsam pa shin tu yongs su sbyang ba'i phyir yang de'i gong du lam gyi khyad par tshol zhing / de bzhin nyid kyi rjes su zhugs pa zhes bya ba 'di la yongs su sbyang ba shin tu byas pa'i phyir zhes bya ba ni sa bzhi pa la byang chub kyi phyogs pa bsgoms pa'i phyir ro//lhag pa'i bsam pa shin tu yongs su sbyangs pa'i phyir zhes bya ba ni de nyid na bsam pa'i khams rnam par dag pa la sogs pas so/ /lam gyi khyad par tshol zhes bya ba ni mi gnas pa'i lam sgrub pa'i khyad par te/ de'i nga rgyal kun du gzhom pa'i phyir ro/ /de bzhin nyid kyi rjes su zhugs pas rnam par dag pa la sems kyi bsam pa mnyam pa nyid de mngon par bsgrub pa'i phyir/yid la byed pa phyir mi ldog par 'gyur ro/ /rnam par dag pa mnyam pa nyid de ji ltar gnas pa de bzhin du de la sems kyi bsam pa 'jog pa'i phyir de bzhin nyid kyi rjes su zhugs pa zhes bya'o//de bzhin nyid kyi rjes su zhugs pa de yang rgyu brgyad kyis yongs su bstan te/ byang chub kyi sems goms par byas pa ni gang gi phyir smon lam gyi stobs bskyed pa'i phyir zhes gsungs pa'o/ /theg pa las mi g.yo ba ni gang gi phyir snying rje dang byams pas sems can thams cad yongs su mi gtong ba'i phyir zhes gsungs pa'o//dge ba'i rtsa bas stobs bskyed pa ni gang gi phyir bsod nams dang ye shes kyi tshogs bsags pa'i phyir zhes gsungs pa'o/ /brtson pa ma bor ba ni gang gi phyir rgyun ma bcad pa'i phyir zhes gsungs pa'o/ /yang dag pa'i sbyor ba ni gang gi phyir thabs la mkhas pa mngon par bsgrub pa'i phyir zhes gsungs pa'o//chog par mi 'dzin pa ni gang gi phyir gong ma gong ma'i sa'i snang ba la blta ba'i phyir zhes gsungs pa'o/ /mthu'i khyad par bla thabs thob pa ni gang gi phyir de bzhin gshegs pa'i byin gyi rlabs yang dag par blangs pa'i phyir zhes gsungs pa'o//dran pa la sogs pa khyad par du 'phags pa'i shes rab rnam pa gsum gyis so so rang gi mthu'i khyad par thob pa ni/ gang gi phyir dran pa dang blo gros dang rtogs pa'i blo'i stobs skyed pa'i phyir yid la bya ba phyir mi ldog par gyur nas zhes gsungs pa ste/ dmigs pa la thogs pa med pa'i phyir bsgoms pa las byung ba'i shes rab ni rtogs pa'i sgras bye brag tu byas so/ /de la mi gnas pa'i lam sgrub pa'i khyad par ni shes bya la shes pa rnam par dag pa'i khyad par dang / sems can la snying rtse nas rtsol ba'i khyad par dang / rnam pa gnyis kyis yongs su bstan te/de gnyis kyis 'khor ba dang mya ngan las 'das pa la mi gnas so/ /shes pa rnam par dag pa de yang rnam pa gnyis su rig par bya ste/ bden pa bzhi rab tu shes pa'i phyir bden pa'i chos nyid rnam par gzhag pa ni/ gang gi phyir des 'di ni sdug bsngal 'phags pa'i bden pa'o zhes yang dag pa ji lta ba bzhin du rab tu shes so//'di ni sdug bsngal kun 'byung ba'o/ /'di ni sdug bsngal 'gog pa'o/ /'di ni sdug bsngal 'gog par 'gro ba'i lam 'phags pa'i bden pa'o zhes yang dag pa ji lta ba bzhin du rab tu shes so zhes gsungs pa'o/ /bden pa bcu la mkhas pa'i phyir sems can yongs su dgrol ba'i thabs rnam par gzhag pa ni gang gi phyir/de kun rdzob kyi bden pa la mkhas pa yin/ don dam pa'i bden pa la mkhas pa yin/ mtshan nyid kyi bden pa la mkhas pa yin/ rnam par dbye ba'i bden pa la mkhas pa yin/phye ste rtogs pa'i bden pa la mkhas pa yin/ dngos po'i bden pa la mkhas pa yin/ rab tu skye ba'i bden pa la mkhas pa yin/ zad pa dang mi skye ba shes pa'i bden pa la mkhas pa yin/ lam shes pa'i bden pa la mkhas pa yin/ byang chub sems dpa'i sa'i go rims thams cad kyi mtshams sbyor bsgrub pa nas/de bzhin gshegs pa'i ye shes yang dag par 'byung ba'i bar gyi bden pa la mkhas pa yin zhes gsungs pa'o/ /de la bden pa'i chos nyid ni de bzhin gshegs pa rnams byung yang rung ma byung yang rung ste/'bras bu dang rgyu'i bye brag gi bden pa gnyis ni kun nas nyon mongs pa'i chos nyid do/ /gnyis ni rnam par byang ba'i chos nyid do/ /sems can rnam par dgrol ba'i thabs rnam par gzhag pa yang gdul bya'i bye brag gis rig par bya ste/ gdul bya dag ni rnam pa bdun no/ / nyan thos kyi gdul bya ni rnam pa drug ste/ yongs su ma smin pa de'i don du kun rdzob kyi bden pa la mkhas so/ /yongs su smin pa de'i don du don dam pa'i bden pa la mkhas so/ /chos nyid zab mo nyid la kun du rmongs pa de'i don du mtshan nyid kyi bden pa la mkhas so / /dgongs pa zab mo nyid la kun du rmongs pa de'i don du rnam par dbye ba'i bden pa la mkhas so//tshul bzhin yid la byed pa dang mi ldan pa de'i don du phye ste rtogs pa'i bden pa la mkhas so/ /yang dag pa'i lta ba dang bral ba de'i don du dngos po'i bden pa la mkhas / rab tu skye ba'i bden pa la mkhas/zad pa dang mi skye ba shes pa'i bden pa la mkhas/ lam shes pa la 'jug pa'i bden pa la mkhas te/ dngos po'i bden pa la sogs pas ni sdug bsngal gyi bden pa la sogs pa bsdus so/ /theg pa chen pos gdul bya bdun pa de'i don du byang chub sems dpa'i sa'i go rims thams cad kyi mtshams sbyar ba sgrub pa nas/de bzhin gshegs pa'i ye shes yang dag par 'byung ba'i bden pa'i bar la mkhas pa bcu pa ste/ gang gi phyir des sems can gzhan dag gi bsam pa ji lta ba bzhin du tshim par byed pas kun rdzob kyi bden pa rab tu shes so/ / bgrod pa theg pa gcig pu la yang dag par gzhol bas don dam pa'i bden pa rab tu shes so/ /rang dang spyi'i mtshan nyid rtogs pas mtshan nyid kyi bden pa rab tu shes so/ /chos rnam par dbye ba rnam par gzhag pa rtogs pas rnam par dbye ba'i bden pa rab tu shes so/ /phung po dang / khams dang skye mched rnam par gzhag pa rtogs pas phye ste rtogs pa'i bden pa rab tu shes so/ /lus dang sems la nod pa nyams su 'bab pas dngos po'i bden pa rab tu shes so/ /'gro bar mtshams sbyor ba rtogs pas rab tu skye ba'i bden pa rab tu shes so/ /rims nad kyis yongs su gdung ba thams cad shin tu zhi bas zad pa dang /mi skye ba shes pa'i bden pa rab tu shes so / /mi gnyis pa mngon par bsgrubs pas lam shes pa la 'jug pa'i bden pa rab tu shes so/ /rnam pa thams cad mngon par rdzogs par khong du chud pas byang chub sems dpa'i sa thams cad kyi go rims mtshams sbyar bas sgrub pa nas/de bzhin gshegs pa'i ye shes yang dag par 'byung ba'i bar gyi bden pa rab tu shes te/ de yang mos pas shes pa'i stobs bskyed pas shes kyi/ ma lus par shes pa ni ma yin no zhes gsungs pa'o/ /de las gzhan gyi go rims ni rang gi sa rnams la mtshams sbyor ba yin par rig par bya'o//skye ba thams cad du lus dang sems la sdug bsngal nyams su 'bab pas dngos po'i bden pa rab tu shes te/ tshor ba gang ci yang rung ba de ni 'dir sdug bsngal ba'o zhes 'byung ba'i phyir ro/ /mi gnyis pa mngon par bsgrubs pas zhes bya ba ni lam gcig tu bgrod pa yin pa'i phyir ro//rnam pa thams cad mngon par rdzogs par khong du chud pas zhes bya ba ni rig pa'i gnas lnga la mkhas pa'i phyir ro/ /mos pa'i shes pa'i stobs bskyed pas zhes bya ba ni gzugs brnyan la dmigs pa'i shes pa'i stobs bskyed pa'i phyir yin gyi/dgos pa yongs su grub pa la dmigs pa'i shes pas ni ma yin pa'i phyir ro// //bam po brgyad pa/ de ltar shes bya la ye shes rnam par dag pa bstan nas/ 'dus byas thams cad brdzun pa la sogs pa'i mtshan nyid du rig pas snying brtse ba'i phyir/sems can la snying brtse bas rtsol ba ston te/ gang gi phyir de ltar bden pa la mkhas pas mngon par bsgrubs pa'i blos 'dus byas thams cad brdzun pa dang / bslu ba'i chos can dang / dku byed pa dang / byis pa 'drid par yang dag pa ji lta ba bzhin rab tu shes te/de de bas kyang shas cher sems can rnams la snying rje chen po mngon du 'gyur zhing / byams pa chen po'i snang ba yang rab tu 'byung ngo zhes gsungs pa'o/ /de la kun brtags pa rtag pa la sogs pa'i mtshan nyid med pas brdzun pa'o/ / rtag pa la sogs par mngon par zhen pa'i gzhi yin pas bslu ba'i chos can no/ /dar ba'i mtha' ni rgud pa yin pas dku byed pa'o/ /phun sum tshogs pas skye bo blun po 'phrogs pa'i phyir byis pa 'drid pa'o/ /de ltar rtag pa la sogs pa'i mtshan nyid med pas brdzun nyid de/ mtshan nyid dang rtag pa la sogs par mngon par zhen pa'i gzhi yin pas slu ba'i chos can te/mngon par zhen pa dang / dar ba'i mtha' ni rgud pa yin pas dku byed pa ste/ nyis dmigs dang phun sum tshogs pas skye bo blun po phrogs pa'i phyir byis pa 'drid pa ste/ gnas kyi tshig de dag gi don rig par bya ste/byis pa ni de la mngon par zhen pa'i gnas yin no/ /snying rje chen po dang byams pa chen po'i snang bas ni snying brtse ba de'i khyad par ston to/ /sa snga ma las snying rje khyad par du 'phags pa'i phyir snying rje chen po'o/ /mi gnas pa'i lam sgrub pa'i khyad par gyis yongs su bskyab pa'i thabs shes pa dang ldan pa'i phyir byams pa chen po'i snang ba zhes bya'o//de de ltar ye shes kyi stobs bskyed pa thob ste zhes bya ba ni ji skad bstan ma thag pa'o/ /sems can thams cad la lta ba dang bcas pa zhes bya ba ni snying rje chen po dang byams pa chen po'i snang bas so/ /sangs rgyas kyi ye shes mngon par 'dod pas zhes bya ba ni sems can yongs su bskyab pa'i phyir ro//'du byed du gyur pa thams cad kyi sngon gyi mtha' dang phyi ma'i mtha' la so sor rtog ste zhes bya ba ni snying rje chen po de ji ltar 'byung ba de yongs su ston te/ rnam pa gnyis kyis ston to/ /rten cing 'brel par 'byung ba la so sor rtag pas sdug bsngal la yang dag pa ji lta ba bzhin du dmigs pa ni sngon gyi mtha' ma rig pa dang sred pa las byung ba'i sems can 'khor ba'i rgyun gyi rjes su zhugs pa phung po'i gnas las ma bskyod pa rnams kyi sdug bsngal gyi phung po bdag med pa/srog med pa/ gang zag med pa/ bdag dang bdag gi dang bral ba ji ltar 'grub pa de yang dag pa ji lta ba bzhin du rab tu shes so/ /ma 'ongs pa med pa la rmongs pa dang mngon par 'dod pa de nyid ji ltar rgyun chad pa dang / mthar 'gyur ba dang / nges par 'byung ba med pa dang / yod pa de yang yang dag pa ji lta ba bzhin du shes so zhes gsungs so //de la sngon gyi mtha' ma rig pa dang sred pa las byung ba zhes bya ba'i bye brag ni byang chub sems dpa' ma yin zhes bya ba'i tha tshig ste/ de dag ni thabs mkhas pa las byung ba'o/ /ma rig pa dang / sred pa smos pas ni srid pa'i yan lag gi rtsa ba yin pa'i phyir ro//de las byung ba la sogs pas sems can rnam pa gsum bstan pa ni 'dod pa tshol bar gyur pa rnams dang / log pa'i tshangs par spyod pa tshol bar gyur pa rnams dang / srid pa'i rtse mo'i bar dag thob pa srid pa tshol bar gyur pa rnams kyi dbang du byas pa'o/ /sdug bsngal gyi phung po bdag med pa nyid ni don dam par de la yang bdag med pa dang /de yang bdag ma yin pa'i phyir ro/ /de ltar bdag med du zin kyang / srog gi dbang po'i dbang gis gnas pa dang / yang dang yang 'gro bar 'gro bas sems can gyi rgyun la rtag pa dang chad pa med par yongs su bstan pa'i phyir de la srog dang gang zag tu 'dogs par byed de/de la mngon par zhen pa spang ba'i phyir/ srog med pa/ gang zag med pa zhes gsungs so/ /za ba po dang bza' bar 'dogs pa la mngon par zhen pa spang ba'i phyir/ bdag dang bdag gi dang bral ba zhes gsungs so/ /rgyu gang gis sngon gyi mtha' las sems can ci 'dra ba rnams kyi sdug bsngal ci 'dra ba 'byung ba de so sor brtags nas ma 'ongs pa'i sdug bsngal gyi rgyu ma rig pa dang sred pa zhes bya ba 'di nyid ji ltar 'gag pa 'jig rten pa'i 'gog pa las khyad par du 'phags pa dang /sdug bsngal de las nges par 'byung ba'i lam med pa ni de ltar yang dag pa ji lta ba bzhin du rab tu mi shes pa'i phyir ro/ /yod pa ni de ltar yang dag pa ji lta ba bzhin du shes pa'i phyir te/ de ltar so sor rtog go/ /rten cing 'brel par 'byung ba la rtog pa rnam pa 'di gcig gis snying rje de sdug bsngal yang dag pa ji lta ba bzhin du dmigs pa nyid du yongs su bstan to//da ni dus ring po nas 'brel pa'i sdug bsngal rnam pa sna tshogs la so sor rtog pa rnam pa gnyis pas sdug bsngal bzod brlag pa la dmigs pa nyid du yongs su ston te/ gang gi phyir de 'di snyam du sems te/kye ma byis pa so so'i skye bo 'di dag ni mi shes pa rmongs pa dag ste/ de dag gi lus grangs med pa 'gags la/ 'gag par 'gyur zhing 'gag bzhin te/ de ltar 'chi yang lus la yid 'byung ba mi skyed cing sdug bsngal gyi 'khrul 'khor je bas je 'phel du byed/'khor ba'i rgyud la mi ldog/ phung po'i gnas mi 'dor/ khams kyi sprul dag gis skyo bar mi 'gyur/ nga rgyal dang lta ba'i zug rngu mi 'byin/ 'dod chags dang zhe sdang dang gti mug gi me lce 'bar bzhi par mi byed/ ma rig pa'i mun pa mi sel/ sred pa'i rgya mtsho mi skems stobs bcu'i ded dpon yongs su mi tshol zhing bdud kyi bsam pa thibs po'i rjes su song ste/'khor ba'i rgya mtsho mi dge ba'i rnam par rtog pa sna tshogs kyi chu srin 'dzin khris dkrugs pas yongs su g.yengs shing / rton pa med kyang yid 'byung bar mi byed la 'di lta ste/ skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang 'khrugs pa'i sdug bsngal rnam pa mang po nyams su myong ba ngo mtshar che zhes gsungs pa'o/ /de la dus ring po nas 'brel pa dang sna tshogs kyis snying rje sdug bsngal bzod brlag pa la dmigs pa nyid du yongs su bstan to//lus grangs med pa 'gags zhes bya bas ni yun ring po nas 'brel pa'i phyir ro/ /sna tshogs kyis ji lta bu zhe na/ skye ba'i sdug bsngal dang / de'i kun 'byung ba dang / de 'gog pa dang lam dang bral bas sdug bsngal ba nyid du so sor rtog pa'i phyir dang /na ba dang / rga ba dang / 'chi ba'i sdug bsngal dang / de'i kun 'byung ba dang / de 'gog pa dang bral ba dang / de'i lam dang bral bas sdug bsngal ba nyid du so sor rtog pa'i phyir ro/ /de la lus ni rkyen gyi kha na las te 'grub pas sdug bsngal gyi 'khrul 'khor te/tshig des skye ba'i sdug bsngal yongs su ston to / /'khor ba'i rgyud las mi ldog ces bya ba ni kun 'byung ba ste srid pa'o/ /phung po'i gnas mi 'dor zhes bya ba'i tshig gis ni 'gog pa dang lam dang bral ba'o/ /khams kyi sbrul dag gis skyo bar mi 'gyur zhes bya ba ni/rga ba dang na ba dang 'chi ba'i sdug bsngal te/ de mi mnyam pa las 'byung ba'i phyir ro/ /log pa'i tshangs par spyod pa tshol bar gyur pa rnams dang / 'dod pa tshol bar gyur pa 'dod pa la nye bar spyod pa rnams dang / nye bar spyad pa spyod pa rnams dang / srid pa tshol bar gyur pa rnams ni nga rgyal dang /lta ba'i zug ngu mi 'byin/ 'dod chags dang zhe sdang dang gti mug gi me lce 'bar ba zhi bar mi byed/ ma rig pa'i mun pa mi sel/ srid pa'i rgya mtsho mi skems zhes bya ba'i tshig rnams dang go rims bzhin te/ de'i kun 'byung ba yongs su ston to//zhi ba'i phyogs su phyin par byed pa stobs bcu'i ded dpon yongs su mi tshol zhes bya ba'i tshig gis ni de 'gog pa dang bral ba'o/ /bdud kyi thibs po zhes bya ba'i phyir rgol ba'i lam du 'gro ba'i tshig gis ni lam dang bral ba'o/ /rnam par rtog pa rnam pa sna tshogs kyi chu srin 'dzin khris dkrugs pas zhes bya ba la khams gsum pa'i sems dang sems las byung ba'i mtshan nyid ni rnam par rtog pa yin par rig par bya'o//'di man chad ni byams pa chen po'i snang ba ji ltar 'byung ba de rab tu ston te/ gang gi phyir sems can de ltar sdug bsngal gyis nyam thag pa mgon med pa/dpung gnyen med pa/ skyabs med pa/ gnas med pa/ gzhi med pa/ rten med pa/ long par gyur pa/ ma rig pa'i sgo nga'i sbubs dang / pris yog pa mun pas zil gyis gnon pa de dag gi don du gcig pu gnyis su med par gyur nas bsod nams dang ye shes kyi tshogs bsag par bya ba rnams ji lta bus sems can de dag shin tu rnam pa dag pa thob par 'gyur ba nas/stobs bcu'i stobs kyi ye shes chags pa med pa'i bar gyi mtha' thug pa thob par 'gyur ba rnam pa de lta bu'i bsod nams dang ye shes kyi tshogs bsag par bya'o snyam mo zhes gsungs so//de la de ltar sdug bsngal gyis nyam thag ces bya ba ni ji skad smos pa'o/ /mgon med pa zhes bya ba ni de las yongs su thar bar byed pa med pa'i phyir ro/ /mgon med pa de yang sdug bsngal bar gyur pa dang ma gyur pa la dpung gnyen med pa/ skyabs med pa gnyis su rig par bya'o//skyes bu dam pa la brten pa dang bral ba'i phyir gnas med pa'o/ /dam pa'i chos mnyan pa dang bral ba'i phyir gzhi med pa'o/ /tshul bzhin yid la byed pa dang bral ba'i phyir rten med pa'o/ /yang dag pa'i lta ba dang bral ba'i phyir long bar gyur pa'o/ /de dag gi mi mthun pa'i phyogs gnyug ma dang /glo bur ba'i tshul bzhin ma yin pa yid la byed pa dang / dam pa'i chos ma yin pa nyan pa dag dang ldan pas/ ma rig pa'i sgo nga'i sbubs dang / pris yog pa mun pas zil gyis non pa de dag gi don du zhes bya'o/ /gcig pu gnyis su med ces rgya cher 'byung ba ni rtsol ba'i khyad par de ston to//bsod nams dang ye shes kyi tshogs bsags pa zhes bya ba ni mngon par mtho ba dang / nges par legs pa'i rgyu bstan pa'i phyir ro/ /shin tu rnam par dag pa zhes bya ba ni 'jig rten pa'i rnam par dag pa las khyad par du bya ba'i phyir ro/ / stobs bcu'i stobs zhes bya ba ni de'i dgras bdud pham pa'i phyir ro/ /ye shes chags pa med pa'i mthar thug pa zhes bya ba ni nyan thos kyi rnam par dag pa las khyad par du bya ba'i phyir ro/ /de de ltar shin tu brtags pa'i ye shes pas mngon par sgrub pa'i blos sbyin pa dang / snyan par smra ba dang / don spyod pa dang /don mthun pa dang dge ba'i rtsa ba gang ci rtsom yang de dag kun sems can thams cad yongs su bskyab pa'i phyir/ rtsom zhes bya ba rgya cher 'byung ba de la shin tu brtags pa shes pas mngon par sgrub pa zhes bya ba ni shin tu so sor brtags pa'i shes pas dbang byas pa'i phyir ro/ / sems can thams cad yongs su bskyab pa zhes bya ba ni sdug bsngal las mngon par gdon pa'i phyir ro/ /yongs su bskyab pa de yang rnam pa dgur rig par bya ste/ mi dge ba la gnas pa rnams dge ba la dgod par 'dod pa ni/ gang gi phyir sems can thams cad la phan par 'dod pa zhes gsungs pa'o//dge ba la gnas pa rnams de'i 'bras bu thob par 'dod pa ni gang gi phyir sems can thams cad la bde bar 'dod pa zhes gsungs pa'o/ /phongs pa rnams la yo byad kyis sdud pa ni gang gi phyir sems can thams cad la snying brtse ba zhes gsungs pa'o/ /nad dang gzhan gyis gtang ba'i nad dang /'dres pa rnams la de zhi bar bya ba ni gang gi phyir sems can thams cad la brtse ba med pa zhes gsungs pa'o/ /'khor bar bcings pa rnams de las thar bar bya ba ni gang gi phyir sems can thams cad yongs su dgrol ba zhes gsungs pa rnam pa bzhi ste/ mu stegs can rnams dam pa'i chos la gzud pa ni gang gi phyir sems can thams cad grang ba zhes gsungs pa'o//dogs pa can rnams nges pa bskyed pa ni gang gi phyir sems can thams cad dad par bya ba zhes gsungs pa'o/ /dogs pa med pa rnams bslab pa gsum la gzud pa ni gang gi phyir/ sems can thams cad gdul ba zhes gsungs pa'o/ /der btsud pa rnams mya ngan las 'das pa rnam pa gnyis thob par bya ba ni gang gi phyir sems can thams cad yongs su mya ngan las 'da' pa'i phyir rtsom ste zhes gsungs pa'o/ /de la sdug bsngal las yongs su bskyab pa'i tshig dgu po de dag las/dang po gnyis ni tshe rabs gzhan gyi don to/ /lhag ma rnams ni tshe 'di'i don to/ /'di man chad ni mi gnas pa'i lam sgrub pa'i khyad par gyi 'bras bu ste/ yon tan yongs su 'dzin pa'i khyad par rnam par gzhag pa dang / sgrub pa'i khyad par rnam par gzhag pa dang / sems can yongs su smin par byed pa rnam par gzhag pa dang /de dang mthun par 'jig rten pa'i shes pa mngon par sgrub pa'i khyad par rnam par gzhag pa rnam pa bzhir rig par bya'o/ /de la yon tan yongs su 'dzin pa'i khyad par ni thos pa dang / tshul khrims dang shes pa yongs su 'dzin pa'i khyad par rig par bya'o//thos pa yongs su 'dzin pa'i khyad par ni thos pa dang / bsams pa dang bsgoms pa las byung ba'i shes rab khyad par can no/ /shes rab kyi khyad par de yang ji ltar yongs su bstan zhe na/ gang gi phyir byang chub sems dpa'i sa lnga pa shin tu sbyang dka' ba 'di la gnas pa'i byang chub sems dpa' de ni de bas kyang shas cher brjed par mi 'gyur ba'i chos nyid kyis dran pa dang ldan pa yin/shin tu nges pa'i shes pas blo gros dang ldan pa yin/ mdo'i tshul dgongs te gsungs pa khong du chud par rtogs pa dang ldan pa yin zhes gsungs pa'o//de la dran pa dang ldan pa ni thos pa las byung ba'i shes rab khyad par du 'phags so/ /blo gros dang ldan pas ni bsams pa las byung ba'i shes rab bo/ /rtogs pa dang ldan pas ni bsgoms pa las byung ba'i shes rab bo/ /rnam grangs gzhan dun dran pa dang ldan pas ni thos pa 'dzin pa khyad par du 'phags/blo gros dang ldan pas ni chos nyid zab mo khyad par du 'phags/ rtogs pa dang ldan pas ni dgongs pa zab mo khyad par du 'phags te/ tshig 'di dag go rims bzhin no/ /'di ni chos la mkhas pa dang / don la mkhas pa mdor bsdus pa yin no/ /tshul khrims yongs su 'dzin pa'i khyad par ni bzod pa dang des pa'i khyad par dang /tshul khrims las mi 'da' ba'i khyad par dang rnam pa gnyis su rig par bya ste/ gang gi phyir bdag dang gzhan rjes su bsrungs pas ngo tsha shes pa dang ldan pa yin/ sdom pa'i cho ga mi 'dor bas brtun pa dang ldan pa yin zhes gsungs pa'o//shes pa yongs su 'dzin pa'i khyad par ni rnam pa lngas yongs su 'dzin pa'i khyad par te/ shes pa rnam pa lnga la rgyu med pa dang / mi 'dra ba rgyur lta ba'i gnyen por rten cing 'brel par 'byung ba shes pa ni/ gnas dang gnas ma yin pa la mkhas pas rnam par dpyad pas blo dang ldan pa yin zhes gsungs pa'o//bdud kyi las kyi gnyen por rtog pa'i shes pa ni/ gang gi phyir gzhan gyis mi bkri ba'i shes pa dang ldan pa yin no zhes gsungs pa'o/ /nag po bsten pa'i gnyen por lhad bcug pa shes shing / don gyi tshig dang / don ma yin pa'i tshig dang /'dres pa'i tshig la mkhas pa ni gang gi phyir don dang don ma yin pa dang 'dres pa'i tshig la mkhas pas shes rab dang ldan pa yin zhes gsungs pa'o/ /skyabs ngan pa bsgrub pa'i gnyen por mthu shes pa ni gang gi phyir/ bsgom pa sgrub pa la mkhas pas mngon par shes pa mngon par sgrub pa thob pa yin zhes gsungs pa'o//bsdu ba'i dngos po la mkhas pas sems can yongs su smin par bya ba shes pa ni/ gang gi phyir 'jig rten dang mthun par 'jug pas thabs la mkhas pa yin zhes gsungs pa'o/ /de la sgrub pa'i khyad par ni sgrub pa rnam pa bcu'i khyad par du rig par bya ste/sgrub pa rnam pa bcu la mngon par mtho ba'i rgyu sgrub pa ni gang gi phyir bsod nams kyi tshogs bsags pas ngoms mi shes pa yin zhes gsungs pa'o/ /nges par legs pa'i rgyu sgrub pa ni gang gi phyir ye shes kyi tshogs yongs su tshol bas brtson 'grus rgyun mi 'chad pa yin zhes gsungs pa'o//sems can yongs su smin par byed pas yongs su mi skyo bar sgrub pa ni gang gi phyir byams pa dang snying rje chen po'i tshogs bsags pas yongs su mi skyo ba'i bsam pa dang ldan pa yin no zhes gsungs pa'o/ /sangs rgyas kyi chos mngon par bsgrub pa sgrub pa ni gang gi phyir de bzhin gshegs pa'i stobs dang /mi 'jigs pa dang / sangs rgyas kyi chos ma 'dres pa yongs su tshol bas snyom las med par yongs su tshol ba la brtson pa yin zhes gsungs pa'o/ /zhing yongs su dag par bya ba mngon par bsgrub pa sgrub pa ni gang gi phyir sangs rgyas kyi zhing gi rgyan rnam par sgrub pa mngon par sgrubs pas legs par mngon par bsgrub pa'i yid la byed pa dang ldan pa yin zhes gsungs pa'o//de'i rgyan ni kun nas nyon mongs pa med pa'i dngos po dang / ye shes [(]gyi [,]kyi [)]khyad zhugs pa thob pa'i sems can gyi gnas dang / sangs rgyas kyi chos rnams kyis spud pa'o//sangs rgyas kyi chos la gnas pa mngon par bsgrub pa sgrub pa ni gang gi phyir mtshan dang dpe byad bzang po yang dag par bsgrubs pas dge ba sna tshogs bya ba la brtson pa yin zhes gsungs pa'o/ /sangs rgyas kyi chos la gnas par bya ba mngon par bsgrub pa sgrub pa ni gang gi phyir de bzhin gshegs pa'i sku dang /gsung dang thugs kyi rgyan yongs su tshol bas rtag tu rgyun mi 'chad par shin tu mngon par brtson pa yin zhes gsungs pa'o/ /chos la gus pa'i sgrub pa ni gang gi phyir byang chub sems dpa' dang chos smra ba thams cad la rim gro byed pas bsnyen bkur dang sri zhu chen po'i ngang tshul can yin zhes gsungs pa'o//ched du bsam ste srid pa yongs su 'dzin pa'i sgrub pa ni gang gi phyir thabs la mkhas pa chen pos 'jig rten du mtshams sbyor bar 'jug pas smon lam shin tu btab pa'i sems dang ldan pa yin zhes gsungs pa'o//theg pa chung ngus rnam par g.yengs pa med pa'i sgrub pa ni gang gi phyir sems can thams cad yongs su smin par byed pa la brtson pas nyin mtshan du sems can gzhan yongs su spangs pa yin te zhes gsungs pa'o/ /de la bsdu ba'i dngos po bzhi po dag gis sems can yongs su smin par byed pa'i khyad par ni gang gi phyir de de ltar mngon par brtson pas sbyin pas kyang sems can rnams yongs su smin par byed do//snyan par smra ba dang / don spyod pa dang don mthun pa zhes gsungs pa'o/ /rang gi rigs la chags pa rnams la sprul pa rnams kyis skal ba 'dra bar mthun par 'jug pa ni/gang gi phyir gzugs kyi lus kun du bstan pa zhes gsungs pa'o/ /the tshom za ba rnams la rigs pa yongs su brjod pa ni gang gi phyir chos bshad pa zhes gsungs pa'o/ /byang chub la thabs 'khrul pa rnams la ni gang gi phyir/ byang chub sems dpa'i spyod pa brjod pa zhes gsungs pa'o//theg pa chen pos yongs su skyo ba rnams ni gang gi phyir de bzhin gshegs pa'i che ba nyid smos pa zhes gsungs pa'o/ /'khor ba la mngon par dga' ba rnams la ni gang gi phyir 'khor ba'i nyes pa bstan pa zhes gsungs pa'o/ /theg pa chen po la mi 'jug pa rnams la ni gang gi phyir/sangs rgyas kyi ye shes kyi phan yon yongs su bsnyad pa zhes gsungs pa'o/ /blo chung ba mthu la mos pa rnams la gcig tu gyur nas kyang rnam pa du mar 'gyur zhes bya ba la sogs pa rdzu 'phrul gyi rnam par 'phrul pa chen po mngon par bsgrubs pas/nye bar spyad pa sna tshogs kyi bya ba sbyor ba ni gang gi phyir rdzu 'phrul gyi rnam par 'phrul pa chen po mngon par bsgrubs pas nye bar spyad pa'i bya ba la sbyor ba rnams kyis kyang sems can rnams yongs su smin par byed do zhes gsungs pa'o/ /de de ltar sems can yongs su smin par bya ba la mngon par brtson pas zhes bya ba ni ji skad du bstan pa de'o//sangs rgyas kyi ye shes kyi rjes su song ba'i sems kyi rgyud dang ldan zhing zhes bya ba ni sangs rgyas kyi ye shes yongs su smin par byed nus pa'i khyad par 'dod pa'i phyir ro/ /dge ba'i rtsa ba la sbyor ba phyir mi ldog pa yin te zhes bya ba ni yon tan gang dag la zhugs pa'o//khyad par can gyi chos yongs su btsal ba la mngon par brtson pas zhes bya ba ni khyad par de 'dod pa'i phyir ro/ /'di man chad ni sems can yongs su smin par byed pa dang / mthun pa 'jig rten pa'i shes pa mngon par sgrub pa'i khyad par du rig par bya ste/gnod pa dang nye ba'i nyon mongs pa'i gnyen por gang gi phyir de sems can la phan par bya ba'i phyir/ 'jig rten ni yi ge dang / bstan bcos dang / rgya dang / rtsis dang / shod thabs la sogs pa gang dag yod pa de dag mngon par bsgrub bo zhes gsungs pa ste/de la yi ge la sogs pa ni gnod pa rnam pa bzhi'i gnyen por mngon par bsgrub ste/ gnod pa rnam pa bzhi la don dang bya ba brjed pa'i gnod pa ste/ byin pa dang blangs pa ste / gzhag pa dang thos pa dang / bsam pa'i don dang / byas pa dang / ma byas pa dang /bya ba dang bya ba ma yin pa'i phyir de'i gnyen por yi ge'o/ /lta ba ngan pa dang blo chung ba'i gnod pa de gnyis gtan tshigs dang / sgra'i bstan bcos gnyis kyis gsal ba'i phyir bstan bcos so/ /yongs su blangs pa'i nor ma sbas pa de'i gnyen por rgya'o/ /'du ba dang 'god pa la rmongs pa de'i gnyen por rtsis dang shod thabs te/de la rtsis ni gnyis gnyis bzhi zhes bya ba la sogs pa'o/ /shod thabs ni gzhag pa'o/ /nor bsgyur ba'i dpyad ni dbul ba'i gnod pa'i gnyen po'o/ /gso ba'i dpyad rnams ni khams mi mnyam pa dang / sems can dang / dug dang / rgyu las byung ba'i nad kyi gnod pa'i gnyen po ste / gang gi phyir nor bsgyur ba'i dpyad dang / gso ba'i dpyad skem pa dang / brjed byed dang / 'byung po'i gdon bsal ba dang / dug dang / ro langs kyi sbyor ba bsal ba zhes gsungs pa'o/ /de la skem pa dang brjed byed ni khams mi mnyam pa'i gnod pa'o//'byung po'i gdon ni sems can gyi gnod pa'o/ /dug sbyor ba ni dug gi gnod pa'o/ /rgyu las byung ba'i gnad kyi gnod pa ni ro langs kyi sbyor ba'o/ /snyan dngags dang / gar thabs dang / gtam rgyud dang / rol mo dang sngon byung bas rab tu dga' bar bya ba ni yid mi bde ba'i gnod pa'i gnyen po'o//grong dang grong khyer dang / skyed mos tshal dang / 'bab chu dang / mtsho dang / mtshe'u dang / rdzing dang / me tog dang / 'bras bu dang / sman dang nags tshal mngon par sgrub pa ni gnas la mngon par mi dga' ba'i gnod pa'i gnyen po'o//gser dang / dngul dang / nor bu dang / mu tig dang / bai DUr+ya dang / d+ha ka shi la dang / byi ru dang / rin po che'i 'byung khungs bstan pa ni gsad pa dang / bcing ba dang chad pa la sogs pa'i gnod pa'i gnyen po'o/ /zla ba dang / nyi ma dang /gza' dang / skar ma dang / rgyu skar dang / sa g.yo ba dang / gcan gzan gyi la nye dang / bya'i la nye dang / rmi ltas kyi ltas ston pa shes pa dang / yan lag dang nying lag thams cad kyi mtshan dang spyod tshul gyi sbyor ba ni mthong ba dang / rnam par smin pas thob pa'i yan lag gi nyes pa las gyur pa'i rnam par 'tshe ba'i gnod pa'i gnyen po'o//zla ba la sogs pa rmi lam yan chad dang / gza' la sogs pa'i ltas mthong bas mi 'dod pa dang / 'dod pa'i las kyi 'bras bu shes par 'gyur ba'i phyir ro/ /yan lag dang nying lag thams cad kyi mtshan gyis kyang mi 'dod pa dang /'dod pa'i 'bras bu shes pa'i phyir ro/ /sdom pa'i mchog dang gnas pa dang / bsam gtan dang / mngon par shes pa dang / tshad med pa dang gzugs med pa'i gnas rnams ni nye ba'i nyon mongs pa lnga'i gnyen po ste/ nye ba'i nyon mongs pa rnam pa lnga ni/'chal pa'i tshul khrims nye ba'i nyon mongs pa dang / 'dod pa la 'dod chags nye ba'i nyon mongs pa dang / skyabs ngan pa nye ba'i nyon mongs pa dang / log pa'i bsod nams la sbyor ba nye ba'i nyon mongs pa dang / log pa'i thar pa la sbyor ba nye ba'i nyon mongs pa'o//'jig rten pa'i shes pa mngon par sgrub pa de yang rgyu bzhi dang ldan par yongs su ston te/ gnod pa gzhan gyis gnod pa bya ba med pa ni gang gi phyir/ gzhan yang gang rnam par tho 'tshams pa med pa dang ldan pa zhes gsungs pa'o/ /kha na ma tho ba med pa'i bde ba skyed pa ni gang gi phyir sems can thams cad la phan pa dang bde bar 'gyur ba de dag ces gsungs pa'o//'byung bar byed par rnam par dag pa ni gang gi phyir snying rje dang ldan pa zhes gsungs pa'o/ /dgos pa rnam par dag pa ni gang gi phyir mthar gyis sangs rgyas kyi chos la dgod pa'i phyir mngon par sgrub pa'o zhes gsungs pa'o//de de bas kyang shas cher thos pa'i rnam pa'i gzungs thob pa'i chos smra bar 'gyur ro zhes bya ba ni don gyi gzungs thob pa ma yin pa'o/ /rnam par dag pa la sems kyi bsam pa mnyam pa nyid rnams bya bar shin tu dka' ba'i phyir dang / 'jig rten las 'das pa'i ye shes la yang mngon par dga' la/'jig rten pa'i shes pa la yang mngon par phyogs par bya ba dang / thos pa'i gzungs thob par shin tu dka' ba'i phyir sa 'di ni shin tu sbyang dka' ba yin par rig par bya'o/ /gser gyi sa le sbram spug gis phyis pa'i dpes ni 'jig rten pa'i shes pa mngon par sgrub pa dang ldan pas sa ye shes ches byang bar yongs su ston te/gang gi phyir kye rgyal ba'i sras dag 'di lta ste/ dper na gser gyi sa le sbram de nyid spug gis phyis na/ de bas kyang ches rab tu byang ba dang / yongs su dag pa dang / shin tu 'od gsal bar 'gyur ro//kye rgyal ba'i sras dag de bzhin du byang chub sems dpa'i sa shin tu sbyang dka' ba 'di la gnas pa'i byang chub sems dpa'i dge ba'i rtsa ba thabs dang shes rab kyis rnam par dpyad pa de dag kyang ches rab tu byang ba dang / yongs su dag pa dang /shin tu 'od gsal ba yin no zhes gsungs pa'o/ /zla ba dang nyi ma la sogs pa'i dkyil 'khor gyi dpes ni lung la brten pa'i shes pa rab tu 'phel bas sa snga ma'i shes pa las mchog tu gyur pa yongs su ston te/ gang gi phyir kye rgyal ba'i sras dag 'di lta ste/ dper na nyi ma dang / zla ba dang / gza' dang / skar ma dang rgyu skar rnams kyi gzhal med khang gi 'od snang ba ni rlung gi dkyil 'khor rnams kyis mi 'phrogs shing / rlung dmar dang thun mong ma yin no/ /kye rgyal ba'i sras dag de bzhin du byang chub sems dpa'i sa shin tu sbyang dka' ba 'di la gnas pa'i byang chub sems dpa'i dge ba'i rtsa ba thabs dang shes rab kyis rnam par dpyad pa de dag kyang nyan thos dang rang sangs rgyas thams cad kyis mi 'phrogs shing /'jig rten thams cad dang thun mong ma yin no zhes gsungs pa'o/ /'phags pa sa bcu pa las/ sa lnga pa'i rnam par bshad pa rdzogs so// //nga rgyal gyi khyad par gyi gnyen po rnam par gzhag pa dang / mi gnas pa'i lam sgrub pa'i khyad par rnam par gzhag pa dang / de'i 'bras bu rnam par gzhag pa rnam pa gsum po gang dag kho nas sa lnga pa rnam par gzhag pa de dag nyid kyis drug pa yang rnam par gzhag par rig par bya ste/khyad par du na sa bzhi pa dang lnga pa la ni gang zag la mngon par zhen pas 'phangs pa'i chos khong du chud pa'i mngon pa'i nga rgyal dang / rnam par dag pa la rgyud tha dad pa'i mngon pa'i nga rgyal gyi gnyen po bstan gyi/sa 'di la ni chos la mngon par zhen pa las gyur pa'i kun nas nyon mongs pa dang / rnam par byang ba la tha dad pa'i mngon pa'i nga rgyal gyi gnyen po chos mnyam pa nyid bcu ston te/ gang gi phyir kye rgyal ba'i sras dag byang chub sems dpa'i sa lnga pa la lam shin tu yongs su rdzogs pa'i byang chub sems dpa' de byang chub sems dpa'i sa drug pa la 'jug ste/de chos mnyam pa nyid bcus 'jug go/ /bcu gang zhe na 'di lta ste/ chos thams cad mtshan ma med pas mnyam pa nyid ces gsungs pa'o/ /de la skye mched bcu gnyis po rnams kyi kun brtags pa'i ngo bo nyid med par mnyam pa nyid ni chos thams cad mtshan ma med par mnyam pa nyid do//de yang mtshan ma tha dad pa'i gnyen por rnam pa dgur dbye ste/ skye mched bcu gnyis po rnams kyi mtshan ma rnam pa dgu la/ rang gi mtshan nyid kyi mtshan ma ni gang gi phyir chos thams cad mtshan nyid med par mnyam pa nyid ces gsungs pa'o//skad cig gcig nas gcig tu 'byung ba'i mtshan ma ni gang gi phyir chos thams cad 'byung ba med par mnyam pa zhes gsungs pa'o/ /skye ba gcig nas gcig tu 'byung ba'i mtshan ma ni gang gi phyir chos thams cad skye ba med par mnyam pa nyid ces gsungs pa'o//kun nas nyon mongs pa'i mtshan ma ni gang gi phyir chos thams cad dben par mnyam pa nyid ces gsungs pa'o/ /rnam par byang ba'i mtshan ma ni gang gi phyir chos thams cad gzod ma nas rnam par dag par mnyam pa nyid ces gsungs pa'o/ /tha snyad kyi mtshan ma ni gang gi phyir chos thams cad spros pa med par mnyam pa nyid ces gsungs pa'o//skye ba dang 'chi 'pho ba'i mtshan ma ni gang gi phyir chos thams cad blang ba med pa dang dor ba med par mnyam pa nyid ces gsungs pa'o/ /gang zag la mngon par zhen pa'i mtshan ma ni gang gi phyir chos thams cad sgyu ma dang /rmi lam dang / mig yor dang / brag ca dang / chu zla dang / gzugs brnyan dang / sprul pa lta bur mnyam pa nyid ces gsungs pa'o/ /dar ba dang rgud pa'i mtshan ma ni gang gi phyir chos thams cad dngos po dang dngos po med pa gnyis su med par mnyam pa nyid ces gsungs pa'o//de chos thams cad kyi rang bzhin de ltar rab tu rtog pa na rno zhing rjes su mthun pa'i bzod pas byi dor byed/ rjes su mthun par byed de/ mi mthun par mi byed pas byang chub sems dpa'i sa drug pa mngon du gyur pa rjes su thob ste/ de tsam gyis mi skye ba'i chos la bzod pa'i sgo rjes su thob pa ni ma yin no zhes bya ba de la rno ba zhes bya ba ni nga rgyal cha phra ba'i gnyen po yin pa'i phyir te/sa snga ma gnyis ni rags pa dang / 'bring gi gnyen po bzod pa chung ngu dang 'bring gis rab tu phye ba'o/ /rjes su mthun pa zhes bya ba ni de ma thob bo zhes bya ba'i tshig gis na mi skye ba'i chos la bzod pa'i sgo dang mthun pa ste/'di nyid ni mi skye ba'i chos la bzod pa yin par shes par 'gyur du 'ong ba'i phyir ro/ /byi dor byed ces bya ba ni de'i mi mthun pa'i phyogs kyi dri ma sel ba'i phyir ro/ /rjes su mthun par byed ces bya ba ni mnyam pa nyid du mos pa'i phyir ro//mi mthun par mi byed ces bya ba ni de la rnam par mi rtog pa'i phyir ro/ /'di yan chad ni re zhig nga rgyal gyi khyad par gyi gnyen po yongs su ston to/ /de chos thams cad kyi rang bzhin de ltar rtog pa na zhes bya ba ni khyad par du 'gro ba ste/ 'di nas bzung nas sems can thams cad la lta ba dang bcas pas 'das pa dang /ma 'ongs pa dang / da ltar byung ba'i snying rje'i khyad par yongs su 'dzin pas/ sems can la lta ba dang bcas pa dang rten cing 'brel bar 'byung ba cha phra ba'i rnam pa thams cad la so sor rtog pa'i phyir shes bya la ye shes rnam par dag pas 'khor ba dang mya ngan las 'das pa la mi gnas pa'i phyir/mi gnas pa'i lam sgrub pa'i khyad par yongs su ston to / /gang gi phyir de de bas kyang shas cher snying rje chen po sngon du 'gro ba dang / snying rje chen po la dbang bya ba dang / snying rje chen po yongs su rdzogs par bya ba'i phyir/ 'jig rten gyi 'byung ba dang 'jig pa la rnam par lta ba'o/ /de'i 'jig rten gyi 'byung ba dang 'jig pa la rnam par lta ba'i tshe/ 'di snyam du sems te 'jig rten du 'dogs pa 'byung ba ji snyed pa de dag thams cad ni/ bdag tu mngon par zhen pa las 'byung ste/ bdag tu mngon par zhen pa dang bral na 'byung ba yang med par 'gyur ro snyam mo zhes gsungs pa'o//de la 'jig rten du 'dogs su 'byung ba zhes bya ba ni 'gro ba lngar 'byung ba gang yin pa dag la 'jig rten zhes 'dogs pa'o/ /rten cing 'brel par 'byung ba de yang sgrub pa dang / brgal ba'i lan dang / mtshan nyid rnam par gzhag pa dang /don dam pa'i bden pa rnam par gzhag pa dang / kun rdzob kyi bden pa rnam par gzhag pa dang / sgo gsum nas yongs su brtag par rig par bya'o/ /sgrub pa rnam par gzhag pa ji lta bu zhe na/ thog ma kho nar re zhig rten cing 'brel par 'byung ba la bdag med par bsgrub par bya ba'o//de ni 'jig rten 'byung ba thams cad bdag tu mngon par zhen pa las 'byung la/ de dang bral nas 'byung ba med par sgrub bo/ /bdag don dam par yod du zin na ni bdag tu mngon par zhen pa yang don dam pa'i ye shes yin pas/ de las 'jig rten 'byung bar mi 'gyur la/de dang bral nas yang 'byung ba med par mi 'gyur ba zhig na bzlog pa nyid du gyur te/ gang gi phyir 'jig rten du 'dogs pa 'byung ba ji snyed pa de dag thams cad ni bdag tu mngon par zhen pa las 'byung ste/ bdag tu mngon par zhen pa dang bral ba na 'byung ba yang med par 'gyur ro zhes gsungs te /don 'di yongs su ston to/ /brgal ba'i lan rnam par gzhag pa ji lta bu zhe na/ bdag med du zin na bdag tu mngon par zhen pa ji ltar 'byung zhes rgol bar gyur pa la lan 'debs pa ni byis pa'i blo can du gyur pas bdag tu mngon par zhen to zhes ston te/gang gi phyir de 'di snyam du sems te/ byis pa'i blo can bdag tu mngon par zhen pa zhes gsungs pa'o/ /de'i 'og tu bdag med du zin kyang tshul gang gis na bdag tu mngon par zhen pa las 'jig rten 'byung ba yod pa de ston to/ /mi shes pa'i rab rib kyis sgrib pa yod pa dang med pa la mngon par 'dod pa can zhes bya ba de lta bu ni brgal ba'i lan rnam par gzhag pa'o//de la mi shes pa dang rtag pa dang chad pa la mngon par 'dod pa smos pa ni ma rig pa dang / sred pa srid pa'i yan lag gi rtsa ba yin pa'i phyir ro/ /tshul bzhin ma yin pa yid la byed pa las byung ba lam log par zhugs pa/log pa'i rjes su 'brang ba de dag ni bsod nams dang bsod nams ma yin pa dang / mi g.yo ba'i 'du byed rnams kyang sogs te zhes bya ba la tshul bzhin ma yin pa yid la byed pa smos pa ni ma rig pa'i rgyu yongs su bstan pa'i phyir ro//lam log par zhugs pa ni thar pa dang mi mthun par 'gro ba'i phyir ro/ /log pa'i rjes su 'brang ba zhes bya ba ni bye brag ste/ byang chub sems dpa' ma rtogs pa'i don te/ de dag ni srid pa 'dzin kyang log pa'i rjes su 'brang ba ma yin no/ / 'du byed de dag gis yongs su bsgos pa'i sems kyi sa bon zag pa dang bcas pa nye bar len pa dang bcas pa ni phyi ma la skye ba dang rga shi'i rang bzhin yang srid pa dang / mngon par 'grub pas 'byung bar 'gro ba yin te/ las kyi zhing gi gzhi dang / ma rig pa'i mun pa dang / srid pa'i rlan dang nga'o snyam pa'i nga rgyal gyis brlan pa dang /lta bar gyur pa'i dra ba rab tu 'phel bas/ ming dang gzugs kyi myu gu 'byung ste/ byung nas rnam par 'phel lo/ /ming dang gzugs kyi myu gu rnam par 'phel nas/ dbang po lnga 'byung bar 'gyur ro/ /dbang po lnga byung nas phan tshun 'dus pas reg par 'gyur ro//reg pa 'dus pas tshor ba 'byung ngo / /tshor nas de'i 'og tu mngon par dga' bas sred pa 'byung ngo / /sred pas ni len pa rnam par 'phel bar byed do/ /len pa rnam par 'phel bas srid pa 'byung bar 'gyur ro/ /srid pa byung nas phung po lnga 'byung bar 'gyur te/phung po lnga byung nas 'gro ba lngar rim gyis dengs par 'gyur ro/ /dengs nas bral bar 'gyur ro/ /dengs shing bral nas rims nad kyis yongs su gdung bar 'gyur ro/ /rims nad kyis yongs su gdungs pa las mya ngan dang / smre sngags 'don pa dang /sdug bsngal ba dang / yid mi bde ba dang 'khrugs pa thams cad 'byung bar 'gyur yang de dag la su yang 'byung bar byed pa med do/ /rang bzhin dang bsal ba med par 'jig par 'gyur yang de dag la/ 'jig par byed pa su yang med do zhes de ltar byang chub sems dpa' lugs su 'byung ba'i rnam par rten cing 'brel par 'byung ba la so sor rtog go zhes bya ba de la sems kyi sa bon ni skye ba dang rga shi'i rang bzhin yang srid pa dang bar ma do'i srid pa 'byung bas bsdus pa la nye bar 'gro ba'i phyir de la nye bar song ba yin no//bsod nams la sogs pa'i 'du byed rnams ni las kyi zhing ngo //gong du smos pa'i mi shes pa ni ma rig pa'i mun pa'o/ /yod pa dang med pa la mngon par 'dod pa ni srid pa'i rlan to/ /de ltar gyur pa'i nga'o snyam du de ltar sems pa gang yin pa de ni nga rgyal lo/ /'byung bar 'gyur ram/ 'byung bar mi 'gyur zhig gu snyam du sems pa la sogs pa ni lta bar gyur pa'i dra ba'o//rang bzhin dang bsal ba med par 'jig ces bya ba ni bdag nyid dang blo sngon du gtong ba med pa'o/ /de lta bu ni brgal ba'i lan yin no/ /mtshan nyid rnam par gzhag pa ji lta bu zhe na/ brgal ba'i lan dang bcas pas rten cing 'brel par 'byung ba la bdag med par bsgrubs nas mtshan nyid gang gis gnas shing 'byung ba de rnam par 'jog ste/de 'di snyam du sems te/ bden pa rnams mi shes pa ni don dam par ma rig pa'o/ /ma rig pas byas pa'i las kyi rnam par smin pa ni 'du byed rnams so/ / 'du byed la brten pa'i sems dang po ni rnam par shes pa'o/ /rnam par shes pa dang lhan cig skyes pa nye bar len pa'i phung po bzhi ni ming dang gzugs so/ /ming dang gzugs rnam par 'phel ba ni skye mched drug go/ /dbang po dang yul dang rnam par shes pa gsum phrad pa zag pa dang bcas pa ni reg pa'o//reg pa dang lhan cig skyes pa ni tshor ba'o/ /tshor ba la chags pa ni sred pa'o/ /sred pa rnam par 'phel ba ni len pa'o/ /len pa las byung ba'i las zag pa dang bcas pa ni srid pa'o/ /las kyi rgyu mthun pa ni skye ba ste phung po 'byung ba'o/ /phung po yongs su smin pa ni rga ba'o//rgas nas phung po 'jig pa ni 'chi ba'o/ /'chi zhing 'bral ba'i tshe myos shing chags par gyur nas sems yongs su gdung ba ni mya ngan no / /mya ngan las byung ba'i tshig tu brjod pa ni smre sngags 'don pa'o/ /dbang po lnga'i nyams su bab pa ni sdug bsngal lo//yid kyi lta ba'i nyams su bab pa ni yid mi bde ba'o/ /sdug bsngal ba dang yid mi bde ba mang po 'byung ba ni 'khrugs pa ste/ de ltar na sdug bsngal gyi ljon pa byed pa po med pa 'ba' zhig po 'di mngon par 'grub par 'gyur ro snyam mo/ /de 'di snyam du sems te/ byed pa po la mngon par zhen pas bya ba rnams mngon par gyur to//gong na byed pa po med pa de na don dam par bya ba yang mi dmigs so snyam mo zhes bya ba de la/ ma rig pas byas pa'i las kyi rnam par smin pa ni 'du byed rnams so zhes bya ba ni ming dang gzugs su ston to//de'i 'og tu de la rnam par shes pa brten pa dang / ming dang gzugs dang rnam par shes pa lhan cig byung bar yongs su bstan pas rnam par shes pa dang / ming dang gzugs gcig la gcig brten pa nyid du ston to/ /gang na byed pa po med pa de na don dam par bya ba yang mi dmigs so snyam mo zhes bya ba ni srid pa'i yan lag 'di dag bdag nyid kyis bya ba med par yongs su ston te/'di ni srid pa'i yan lag rjes su 'brel pas/ rten cing 'brel bar 'byung ba la yongs su brtag par rig par bya'o// //bam po dgu pa/ don dam pa'i bden pa rnam par gzhag pa ji lta bu zhe na/ji ltar de yongs su shes pas grol bar 'gyur ba de yongs su brtags pa ste/ gang gi phyir de 'di snyam du sems te/ 'di ltar khams gsum pa 'di ni sems tsam ste zhes gsungs pa ste/ khams gsum pa ni sems gyur pa tsam du zad pa'i phyir ro//kun rdzob kyi bden pa rnam par gzhag pa ji lta bu zhe na/ ji ltar yongs su rtogs pas don dam pa'i bden pa la 'jug pa'o/ /de yang rnam pa drug tu yongs su brtag par rig par bya ste/ 'dis gang kun nas nyon mongs pa shes nas kun nas nyon mongs pa'i gnas yongs su brtag pa dang /rgyu nyid du yongs su brtag pa dang / nyes dmigs bsdus par yongs su brtag pa dang / nyes pa spang bar yongs su brtag pa dang / yid mi 'byung ba dang / yid 'byung ba'i rgyu yongs su brtag pa dang / zab pa nyid du yongs su brtag pa'o/ / de la kun nas nyon mongs pa'i gnas yongs su brtag pa ni srid pa'i yan lag rnams bdag dang bral ba'i sems tsam la brten pas sems gcig la brten pa'i phyir te/ gang gi phyir srid pa'i yan lag bcu gnyis po gang dag de bzhin gshegs pas rab tu phye ste bka' stsal pa de dag thams cad kyang sems gcig la gnas pa dag go//de ci'i phyir zhe na/ gzhi gang la 'dod chags dang ldan pa'i sems skyes pa de ni rnam par shes pa'o/ /gzhi ni 'du byed rnams so/ /'du byed la kun du rmongs pa gang yin pa de ni ma rig pa'o/ /ma rig pa'i sems dang lhan cig skyes pa de ni ming dang gzugs so//ming dang gzugs rnam par 'phel ba ni skye mched drug go/ /skye mched drug gi cha dang mthun pa ni reg pa'o/ /reg pa dang lhan cig skyes pa ni tshor ba'o/ /tshor ba la mi ngoms pa ni srid pa'o/ /sred pas g.yen spyo nas sdud cing yongs su mi gtong ba ni len pa'o//srid pa'i yan lag 'di dag 'byung ba ni srid pa'o/ /srid pa 'byung ba ni skye ba'o/ /skye ba yongs su smin pa ni rga ba'o/ /rga ba yongs su 'gyur ba ni 'chi ba'o zhes gsungs pa ste/ 'di ni bden pa gnyis rnam par gzhag pas/ sems gcig tu yang dag par 'du bar rten cing 'brel par 'byung ba yongs su brtag par rig pa'o//rgyu nyid du yongs su brtag pa ni rnam pa gnyis te/ rang gi bya ba byed pas yan lag gzhan gyi rgyu nyid du yongs su brtag pa'i phyir gzhan gyi rgyur yongs su brtag pa ni gang gi phyir/ de la ma rig pa ni bya ba gnyis su nye bar gnas pa yin te/sems can rnams kyang dmigs pa la rmongs par byed pa dang / 'du byed mngon par 'grub pa'i rgyu yang 'byin pa'o/ /'du byed rnams kyang bya ba gnyis su nye bar gnas pa yin te/ ma 'ongs pa'i rnam par smin pa yang mngon par 'grub par byed pa dang / rnam par shes pa mngon par 'grub pa'i rgyu yang 'byin pa'o//rnam par shes pa yang bya ba gnyis su nye bar gnas pa yin te/ srid pa'i nying mtshams sbyor bar yang byed pa dang / ming dang gzugs mngon par 'grub pa'i rgyu yang 'byin pa'o/ /ming dang gzugs kyang bya ba gnyis su nye bar gnas pa yin te/phan tshun rtog par yang byed pa dang / skye mched drug mngon par 'grub pa'i rgyu yang 'byin pa'o/ /skye mched drug kyang bya ba gnyis su nye bar gnas pa yin te/ rang gi yul rnam par phye ba yang ston pa dang / reg pa mngon par 'grub pa'i rgyu yang 'byin pa'o/ /reg pa yang bya ba gnyis su nye bar gnas pa yin te/dmigs pa la reg par yang byed pa dang / tshor ba mngon par 'grub pa'i rgyu yang 'byin pa'o/ /tshor ba yang bya ba gnyis su nye bar gnas pa yin te/ yid du 'ong ba dang / yid du mi 'ong ba dang / gnyis ka las rnam par grol ba myong bar byed pa dang /sred pa mngon par 'grub pa'i rgyu yang 'byin pa'o/ /sred pa yang bya ba gnyis su nye bar gnas pa yin te/ chags par 'gyur ba'i dngos po la kun du chags par yang byed pa dang / len pa mngon par 'grub pa'i rgyu yang 'byin pa'o/ /len pa yang bya ba gnyis su nye bar gnas pa yin te/kun nas nyon mongs pa dang 'brel par yang byed pa dang / srid pa mngon par 'grub pa'i rgyu yang 'byin pa'o/ /srid pa yang bya ba gnyis su nye bar gnas pa yin te/ srid pa'i rgyu gzhan yang gnas par byed pa dang / skye ba mngon par 'grub pa'i rgyu yang 'byin pa'o//skye ba yang bya ba gnyis su nye bar gnas pa yin te/ phung po 'byung bar yang byed pa dang / rga ba mngon par 'grub pa'i rgyu yang 'byin pa'o/ /rga ba yang bya ba gnyis su nye bar gnas pa yin te/ dbang po yongs su 'gyur bar yang byed pa dang / 'chi ba dang phrad pa mngon par 'grub pa'i rgyu yang 'byin pa'o//'chi ba yang bya ba gnyis su nye bar gnas pa yin te/ 'du byed 'jig par yang byed pa dang yongs su mi shes pas rgyun mi 'chad pa'i rgyu yang 'byin pa'o zhes gsungs pa ste/ tshe rabs gzhan gyi rgyu yin pa'i phyir ro/ /yongs su mi shes pa ni 'du byed zhig nas tshe rabs gzhan gyi rgyur 'gyur zhes bya ba'i tha tshig go//ma rig pa la sogs pa rang gi rigs rgyu'i dngos por rkyen du yongs su brtag pa'i phyir bdag rgyu nyid du yongs su brtag pa ni 'du byed rnams ji ltar ma rig pa'i rkyen can nyid yin zhe na/ rgyun mi 'chad pa dang ston pa ste/gang gi phyir de la ma rig pa'i rkyen gyis 'du byed rnams so zhes bya ba ni ma rig pa'i rkyen gyis 'du byed rnams rgyun mi 'chad pa dang rton pa'o zhes gsungs pa ste/ ma rig pa ni sa bon gyi gnas skabs dang / 'bras bu'i gnas skabs rnam pa gnyis so/ /de la sa bon gyi gnas skabs kyis ni 'du byed rgyun mi 'chad par byed de/de ma spangs par mi spongs pa'i phyir ro/ /'bras bu'i gnas skabs kyis ni ston par byed de/ de skyes pas de skye ba'i phyir ro/ /'di gnyis kyis ni 'di yod pas 'di 'byung ngo / /'di skyes pa'i phyir 'di skye ba zhes bya ba don rnam pa gnyis kyis de'i rkyen nyid du yongs su ston te/yan lag lhag ma rnams kyi rang gi rigs kyi rgyus don rnam pa gnyis kyis rkyen nyid du 'gyur ba yang de bzhin du sbyar bar bya'o/ /yan lag snga ma med na yan lag phyi ma mi 'byung bar yongs su brtags pas tha dad pa ma yin pa'i phyir bdag rgyur yongs su brtag ste/yan lag snga ma med par yan lag phyi ma mi 'byung bar yongs su brtag pa'i phyir zhes bya ba'i tha tshig ste/ ma rig pa med par 'du byed rnams rtag tu yod par mi 'gyur ro/ /gal te 'gyur na ni ma rig pa 'du byed rnams kyi rkyen du mi 'gyur ro//gang dag gang med par mi 'byung ba de dag de las gzhan ma yin te/ dper na/ gang las brten te gang 'byung ba/ /de ni de nyid ma yin la/ /de las gzhan pa'ang ma yin te/ /de bas chad min rtag ma yin/ /zhes bshad pa lta bu'o/ /rang gi rigs su 'dus pa'i rkyen du yongs su brtags pas zhes bya ba ni ji skad sngar smos pa ma rig pa ni sa bon gyi gnas skabs dang /'bras bu'i gnas skabs dang / bya ba rnam pa gnyis so zhes bya ba'o/ /'du byed la sogs pa la'ang de bzhin du sbyar bar bya'o/ /de la sdug bsngal gyi rgyu dang / sdug bsngal gyis bsdus pa'i lam gsum gyi nyes dmigs bsdus pas yongs su brtag pa ni/gang gi phyir de lam rig pa dang / sred pa dang len pa ni nyon mongs pa'i lam gyi rgyun mi 'chad pa'o/ /'du byed dang srid pa ni lam gyi rgyun mi 'chad pa'o/ /lhag ma rnams ni sdug bsngal gyi lam gyi rgyun mi 'chad par rab tu rnam par phye ba'o//sngon gyi mtha' dang / phyi ma'i mtha' 'gags na lam rgyun yang 'chad do zhes gsungs pa ste/ sngon gyi mtha' dang phyi ma'i mtha' 'gags pas da ltar byung ba yang med de/ de bas na de ma smos te/ de ltar lam 'di gsum ni bdag med pa dang / bdag dang bdag gi dang bral ba 'byung zhing 'jig pa ste/ rang bzhin gyis mdung khyim lta bu'o zhes bya ba'o / /de la nyes pa yongs su spangs par brtag pa ni rten cing 'brel par 'byung ba smra ba la nyes pa rnam pa gsum yongs su rtog ste/ rgyu bye brag med pa'i phyir thams cad kyi lus cig car mngon par 'grub pa'i nyes pa dang /byed pa po med pas las bdag gir bya ba med par 'gyur ba'i nyes pa dang / 'bras bu ma bskyed par 'gags pas las rnams chud za ba'i nyes pa'o/ /nyes pa rnam pa de gsum yang sngon gyi mtha' la sogs pa'i rgyu'i khyad par la ltos pas skyes nas myong bar 'gyur ba la sogs pa tha dad pa'i phyir yongs su spong ste/gang gi phyir yang ma rig pa'i rkyen gyis 'du byed rnams zhes bya ba gang yin pa de ni sngon gyi mtha' pa'i ltos pa'o/ /rnam par shes pa nas tshor ba zhes bya ba'i bar de ni da ltar byung ba'i ltos pa'o//sred pa nas srid pa zhes bya ba'i bar de ni phyi ma'i mtha' pa'i ltos pa ste/ de yan chad du yang de dag rab tu 'byung ngo / /ma rig pa 'gags pas 'du byed rnams 'gag ces bya ba de ni ltos pa rgyun chad pa ste zhes gsungs pa'o/ /de la ma rig pa'i rkyen gyis 'du byed rnams zhes bya ba de ni sngon gyi mtha' pa'i ltos pa zhes bya ba ni tshe 'di'i phyir sngar byas pa'i phyir ro//da ltar byung ba ni ma 'ongs pa'i sngon gyi mtha'o/ /ltos pa'i don rgyu'i don du rig par bya'o/ /rnam par shes pa nas tshor ba zhes bya ba'i bar de ni da ltar byung ba'i ltos pa'o zhes bya ba ni don gang la tshe rabs snga ma'i las gang yin pa de'i 'bras bu rnam par shes pa la sogs pa de dag 'dir 'bras bu skyes zin pas phyi ma la 'bras bur bskyed pa'i mthu med pa'i phyir ro//sred pa nas srid pa zhes bya ba'i bar de ni phyi ma'i mtha' pa'i ltos pa ste zhes bya ba ni yang srid pa mngon par 'grub par gcig tu nges par byed pa'i phyir ro//de phan chad du yang de dag rab tu 'byung ngo zhes bya ba ni ltos pa las yang srid pa mngon par 'grub pa'i phyir ro/ /'di ci zhig yongs su ston zhe na/ byas par mi 'gyur ba dang / 'bras bu bskyed zin pa dang / gnyen po rnyed pas spangs zin pa dang / rgyu gsum gyis yang srid pa'i las rnam par smin pa mi skyed par ston te/ de la ma rig pa'i rkyen gyis 'du byed rnams zhes bya bas ni byas pa nyid dang 'bras bu ma rnyed pa nyid du ston to/ /rnam par shes pa la sogs pas ni byas pa nyid dang 'bras bu bskyed zin pa nyid ston to/ /srid pa la sogs pas ma spangs par ston to//sred pa dang len pa zad na ma rig pa'i rkyen gyis 'du byed byas kyang srid pa 'byung bar mi 'gyur ro/ /'di ltar gang gi phyir la la ni byas pa la ni ma byas/ la la ni 'bras bu bskyed zin/ la la ni ma bskyed/ la la ni spangs/ la la ni ma spangs pa de'i phyir/lus thams cad cig car mngon par 'grub pa'i nyes pa mi 'gyur te/ las thams cad skyes nas myong bar 'gyur ba'am/ myong bar mi 'gyur bar cig car du yang mi 'gyur ro/ /gang gi phyir ma byas pa rnam par smin par mi 'gyur ba de'i phyir/ gzhan gyi rgyud la las de'i rnam par smin pa med pas las bdag gir bya ba med pa'i nyes pa med de/gzhan gyi sems kyi rgyud la de ma byas pa'i phyir ro/ /rgyu gsum po med na gdon mi za bar 'bras bu bskyed pas las rnams chud za ba'i nyes pa yang med de/ de ltar nyes pa rnam pa gsum po yongs su spangs par gyur pa yin no//de la yid mi 'byung ba dang / yid 'byung ba'i rgyur yongs su brtag pa la/ sdug bsngal cha phra ba nyid kyi rnam pa ni yid 'byung bar mi 'gyur ba ste/ tshor ba gang ci yang rung / de ni 'dir sdug bsngal ba'o zhes 'byung ba'i phyir ro/ /sdug bsngal nyid rags pa'i rnam pa ni yid las 'byung bar 'gyur ba ste/gang gi phyir yang srid pa'i yan lag bcu gnyis po dag gi rgyus sdug bsngal nyid gsum 'byung ste/ de la ma rig pa'i rkyen gyis 'du byed rnams zhes bya ba nas skye mched drug ces bya ba'i bar de ni 'du byed kyi sdug bsngal nyid do/ /reg pa dang tshor ba zhes bya ba de ni sdug bsngal gyi sdug bsngal nyid do//srid pa'i yan lag lhag ma de dag ni 'gyur ba'i sdug bsngal nyid do/ /ma rig pa 'gags pas 'du byed 'gag ces bya ba de ni sdug bsngal ba gsum gyi rgyun 'chad pa'o zhes gsungs pa'o/ /de la zab pa nyid yongs su brtag pa ni rnam pa bzhi ste/rang gi rgyud las byung ba'i srid pa'i yan lag rnams gzhan gyis ma byas pa dang / rkyen las byung ba'i phyir bdag nyid kyis ma byas pa ni gang gi phyir/ ma rig pa'i rkyen gyis 'du byed rnams zhes bya ba ni 'du byed rnams rgyu dang rkyen las byung ba ste/lhag ma rnams kyang de bzhin no/ /ma rig pa 'gags pas 'du byed 'gag ces bya ba ni 'du byed rnams med pa ste/ lhag ma rnams kyang de bzhin no zhes gsungs pa'o/ /bya ba'i dus na mi gnas pas byed pa med pa'i phyir/ skye ba tsam dang 'brel pa'i phyir gnyi gas ma byas pa ni gang gi phyir/ma rig pa'i rkyen gyis 'du byed rnams zhes bya ba de ni skye ba dang 'brel ba ste/ lhag ma rnams kyang de bzhin no/ /ma rig pa 'gags pas 'du byed 'gag ces bya ba de ni 'jig rten dang 'brel pa ste/ lhag ma rnams kyang de bzhin no zhes gsungs pa'o//srid pa'i lugs dang mthun pa'i phyir/ rgyu med pa las 'byung ba'ang ma yin pa ni gang gi phyir/ ma rig pa'i rkyen gyis 'du byed rnams zhes bya ba de ni srid pa'i lugs su 'byung bar yongs su brtag pa ste/ lhag ma rnams kyang de bzhin no/ /ma rig pa 'gags pas 'du byed 'gag ces bya ba de ni zad pa'i rjes su mthun par yongs su brtag pa ste/lhag ma rnams kyang de bzhin no zhes gsungs pa'o/ /rgyu med pa yin du zin na ni 'byung ba dang mi 'byung ba gnyi ga rgyu med pa las byung ba'i phyir/ nges pa'i rgyu med pas 'byung bar 'gyur gyi mi 'byung bar mi 'gyur ba de dag la yod de de ni mi 'dod do//de bas na rgyu yod pa las srid pa'i lugs su 'byung bar 'gyur gyi/ gzhan du na srid pa'i rjes su mthun par mi 'gyur ro/ /rten cing 'brel par 'byung ba la rnam pa bcur so sor rtog pa 'di ni mtshan nyid dang / bden pa rnam par gzhag pas yongs su brtag pas bstan te/gang gi phyir de 'di ltar rten cing 'brel par 'byung ba la lugs su 'byung ba dang / lugs su 'byung ba ma yin par so sor rtog ste/ 'di ltar srid pa'i yan lag rjes su 'brel ba dang / sems gcig tu yang dag par 'du ba dang / rang gi las ma 'dres pa dang /tha dad pa ma yin pa dang / lam gsum gyi rgyud du 'brang ba dang / sngon gyi mtha' dang / da ltar byung ba dang / phyi ma'i mtha' ba'i ltos pa dang / sdug bsngal gsum kun 'byung ba dang / rgyu dang rkyen las byung ba'o/ /skye ba dang 'jig pa dang 'brel pa dang med pas zad par so sor rtog pa zhes gsungs pa'o//yang rnam grangs gzhan gnyis kyis te/ snying rje dang mthun par yongs su rtog pa dang / rnam pa thams cad yongs su rtog pas 'di so sor rtog par rig par bya'o/ /de la snying rje dang mthun par yongs su brtag pa ni rnam pa bzhi ste/kun du rmongs pa dang / phyin ci log pa dang / gzhan las thar pa yongs su tshol ba dang / rnam pa gzhan gyis yongs su tshol ba dang / thar pa gzhan yongs su tshol ba'o/ /kun du rmongs pa dang / phyin ci log ji lta bu zhe na/ ji ltar gang la kun du rmongs pa dang /phyin ci log de la so sor rtog pa ste/ bdag tu mngon par zhen pa la srid pa thams cad 'byung gi / de dang bral na 'byung ba yang med par mi shes pa'i phyir/ kun du rmongs pa dang gang gi phyir/ de 'jig rten gyi 'byung ba dang 'jig pa la rnam par lta ba'i tshe 'di snyam du sems te/'jig rten du 'dogs pa 'byung ba ji snyed pa de dag thams cad ni bdag tu mngon par zhen pa las 'byung ste/ bdag tu mngon par zhen pa dang bral na/ 'byung ba yang med par 'gyur ro snyam mo zhes gsungs pa'o/ /byis pa'i blo can bdag tu mngon par zhen pa zhes bya ba de lta bu ni phyin ci log go//srid pa'i yan lag gi mtshan nyid la kun du rmongs pa dang / phyin ci log ni gang gi phyir de 'di snyam du sems te/ byis pa'i blo can bdag tu mngon par zhen pa zhes gsungs pa la sogs pa'o/ /gzhan las thar pa yongs su tshol ba ji lta bu zhe na/kun gzhi dang 'jug pa'i rnam par shes pa rnams las thar pa yongs su btsal bar bya ba'i rig pa las/ de ltar kun du rmongs shing phyin ci log tu gyur pa de dag gzhan du bdag las yongs su tshol te/ de'i gnyen por 'di ltar khams gsum po 'di ni sems tsam pa ste/ srid pa'i yan lag bcu gnyis gang dag de bzhin gshegs pas rab tu phye ste bka' stsal pa de dag thams cad kyang / sems gcig la gnas pa dag go zhes gsungs pa la sogs pa'o/ /rnam pa gzhan gyis yongs su tshol ba ji lta bu zhe na/ mi 'dra ba'i rgyu rnam pa gsum ste/rang bzhin dang / dbang phyug dang / brtul zhugs drag po'i rgyud dang rgyu med pas tshol ba ste/ de ltar yongs su btsal bar ni mi bya'o/ /de ci'i phyir zhe na/ srid pa'i yan lag rnams ni las rnam pa gnyis su nye bar gnas pa'i phyir te gang gi phyir de la ma rig pa ni bya ba gnyis su nye bar gnas pa yin te/sems can rnams kyang dmigs pa la rmongs par byed pa dang / 'du byed mngon par 'grub pa'i rgyu yang 'byin pa'o zhes gsungs pa la sogs pa'o/ /rang gi rigs kyi rgyu las byung ba ni gang gi phyir de la ma rig pa'i rkyen gyis 'du byed rnams so zhes bya ba ni ma rig pa'i rkyen gyis 'du byed rnams rgyun mi 'chad pa dang rton pa'o zhes gsungs pa la sogs pa'o//nyon mongs pa dang las kyis kun nas nyon mongs pa'i rgyu las byung ba'i phyir/ bde ba'i rgyu las byung ba ma yin pa ni gang gi phyir de la ma rig pa dang /sred pa dang / len pa ni nyon mongs pa'i lam gyi rgyun mi 'chad pa'o/ /'du byed dang srid pa ni las kyi lam gyi rgyun mi 'chad pa'o/ /lhag ma rnams ni sdug bsngal gyi lam gyi rgyun mi 'chad ces gsungs pa la sogs pa'o/ /sngon gyi mtha'i bar dang / phyi ma'i mtha' gnyis ni sngon dang phyi ma'i mtha'i bar gyi rgyu las byung ba ste/gang gi phyir ma rig pa'i rkyen gyis 'du byed rnams zhes bya ba gang yin pa de ni sngon gyi mtha' pa'i ltos pa'o zhes bya ba la sogs pa gsungs pa ste/ gzhan du ni sems can sna tshogs su mi 'gyur ro/ /thar pa gzhan yongs su tshol ba ji lta bu zhe na/thar pa ni sdug bsngal thams cad nye bar zhi ba'i mtshan nyid dang / 'dus ma byas pa'i mtshan nyid dang / kun nas nyon mongs pa dang bral ba'i mtshan nyid dang / 'jig rten las 'das pa'i mtshan nyid yin na de dag ni 'du byed kyi sdug bsngal nyid dang 'brel pa'i rgyu dang rkyen las rab tu skye ba yang kun nas nyon mongs pa 'byung ba dang /'brel pa srid pa'i rjes su mthun pa / gzugs med pa'i srid pa las thar pa yongs su tshol te/ 'du byed kyi sdug bsngal nyid dang 'brel pa'i gzugs med pa'i srid pa las thar pa yongs su tshol ba ni gang gi phyir/ de la ma rig pa'i rkyen gyis 'du byed rnams zhes bya ba nas/skye mched drug ces bya ba'i bar de ni 'du byed kyi sdug bsngal nyid do zhes gsungs pa'i phyir ro/ /rgyu dang rkyen las rab tu skye ba de yang de bzhin te/ ma rig pa'i rkyen gyis 'du byed rnams zhes bya ba de ni 'du byed rnams rgyu dang rkyen las 'byung ba ste/lhag ma rnams kyang de bzhin no zhes gsungs pa'i phyir ro/ /yang kun nas nyon mongs pa 'byung ba dang 'brel pa yang de bzhin te/ ma rig pa'i rkyen gyis 'du byed rnams zhes bya ba de ni skye ba dang 'brel pa ste/ lhag ma rnams kyang de bzhin no zhes gsungs pa'i phyir ro/ / srid pa'i lugs su 'byung ba gzugs med pa'i srid pa'i thar pa yongs su tshol ba yang de bzhin te/ ma rig pa'i rkyen gyis 'du byed rnams zhes bya ba de ni srid pa'i lugs su 'byung bar yongs su brtag pa ste/ lhag ma rnams kyang de bzhin no zhes gsungs pa'i phyir ro/ /de ltar na snying rje dang mthun par yongs su brtags pas rten cing 'brel par 'byung ba la so sor rtog pa bstan nas/rnam pa thams cad yongs su brtag pa ston to/ /de la rnam pa thams cad yongs su brtag pa ni rnam pa dgu ste/ bdag tu mngon par zhen pa dang mngon par ma zhen pa gnyis kyis kun nas nyon mongs pa dang /rnam par byang bar 'gyur ba'i phyir kun nas nyon mongs pa dang / rnam par byang ba rab tu dbye bar yongs su brtag pa ni gang gi phyir/ 'jig rten gyi 'byung ba dang / 'jig pa la rnam par lta ba'i tshe 'di snyam du sems te/ 'jig rten du 'dogs pa 'byung ba ji snyed pa de dag thams cad ni bdag tu mngon par zhen pa las 'byung ste/mngon par zhen pa dang bral na 'byung ba yang med do zhes gsungs pa la sogs pa'o/ /rten cing 'brel par 'byung ba ni ci la brten te 'byung zhes rten yongs su brtag pa ni gang gi phyir de 'di snyam du sems te/ khams gsum pa 'di ni sems tsam ste/srid pa'i yan lag bcu gnyis gang dag de bzhin gshegs pas rab tu phye ste bka' stsal pa de dag thams cad kyang sems gcig la gnas pa dag go snyam mo zhes gsungs pa la sogs pa'o/ /srid pa'i yan lag rnams las rnam pa gnyis su nye bar gnas pa'i phyir thabs yongs su brtag pa ni de la ma rig pa ni bya ba gnyis nye bar gnas pa yin te/sems can rnams kyang dmigs pa la rmongs par byed pa dang / 'du byed mngon par 'grub pa'i rgyu yang 'byin pa'o zhes gsungs pa la sogs pa'o/ /srid pa'i yan lag rnams g.yo ba med pa'i phyir/rkyen gyi mtshan nyid yongs su brtag pa ni de la ma rig pa'i rkyen gyis 'du byed rnams so zhes bya ba ni/ ma rig pa'i rkyen gyis 'du byed rnams rgyun mi 'chad pa dang / rton pa'o zhes gsungs pa la sogs pa'o/ /lam gsum gyi sdug bsngal dang / kun 'byung ba'i bden par 'gyur ba'i phyir bden pa la 'jug pa yongs su rtog pa ni de la ma rig pa dang /sred pa dang / len pa ni nyon mongs pa'i lam gyi rgyun mi 'chad pa'o/ /'du byed dang srid pa ni las kyi lam gyi rgyun mi 'chad pa'o/ /lhag ma rnams ni sdug bsngal gyi lam gyi rgyun mi 'chad ces gsungs pa la sogs pa'o//sngon dang mtha'i bar dang / phyi ma'i mtha' yongs su smin par bya ba'i khyad par gyi phyir nus pa dang / mi nus pa'i gnas la 'jug par yongs su brtag pa ni gang gi phyir/ ma rig pa'i rkyen gyis 'du byed rnams zhes bya ba de ni sngon gyi mtha'i ltos pa'o//rnam par shes pa nas tshor ba zhes bya ba'i bar de ni de ltar byung ba'i ltos pa'o/ /sred pa nas srid pa zhes bya ba'i bar de ni phyi ma'i mtha'i ltos pa ste zhes gsungs pa la sogs pa'o/ /sdug bsngal nyid cha phra ba yongs su mi shes pa dang / yongs su shes pa mngon pa'i nga rgyal byed pa'i phyir mngon pa'i nga rgyal can mngon pa'i nga rgyal med pa la 'jug pa yongs su brtag pa ni gang gi phyir de la ma rig pa'i rkyen gyis 'du byed rnams zhes bya ba nas/ skye mched drug gi bar de ni 'du byed kyi sdug bsngal nyid do zhes gsungs pa la sogs pa'o//mtha'i bar yang rgyu rkyen las byung ba'i phyir la / phyi ma'i mtha' yang skye ba dang 'brel pa'i phyir thog ma med pa nyid du yongs su brtag pa ni gang gi phyir/ ma rig pa'i rkyen gyis 'du byed rnams zhes bya ba ni 'du byed rnams rgyu dang rkyen las 'byung ba ste/ lhag ma rnams kyang de bzhin no zhes bya ba dang /ma rig pa'i rkyen gyis 'du byed rnams zhes bya ba de ni skye ba dang 'brel pa ste/ lhag ma rnams kyang de bzhin no zhes bya ba la sogs pa'o/ /'dod pa dang / gzugs dang / gzugs med pa'i sred pa rnams kyis srid pa'i lugs su 'byung ba'i phyir sna tshogs nyid du yongs su brtag pa ni/gang gi phyir ma rig pa'i rkyen gyis 'du byed rnams zhes bya ba de ni srid pa'i lugs su 'byung bar yongs su brtag pa ste/ lhag ma rnams kyang de bzhin no zhes gsungs pa la sogs pa'o/ /de ltar mi gnas pa'i lam sgrub pa'i khyad par bstan nas/ gnyen po'i khyad par thob pa dang / mi mthun pa'i phyogs nyams pa'i khyad par dang / sgrub pa dang gnas pa'i khyad par thob pa dang / ting nge 'dzin gyi khyad par thob pa dang / bsam pa'i khyad par thob pa dang / nus pa'i khyad par thob pa dang / rnam pa lngas de'i 'bras bu'i khyad par yongs su ston te/de la gnyen po'i khyad par ni rnam par thar pa'i sgo gsum mo/ /de la rnam par thar pa'i sgo stong pa nyid ni gang zag la bdag med par mthong ba dang / chos la bdag med par mthong ba dang / de gnyi ga'i bya ba med pas byed pa po med par mthong ba dang / rnam pa gsum gyis yongs su ston te/gang gi phyir de de ltar rten cing 'brel par 'byung ba la rnam pa bcur so sor rtog cing bdag med pa dang / srog med pa dang / gang zag med pa dang / ngo bo nyid kyis stong pa dang / byed pa po dang / tshor ba po med par so sor rtog pa'i tshe/ stong pa nyid kyi rnam par thar pa'i sgo skyes ba yin no zhes gsungs pa'o//de la gang zag la bdag med par mthong ba ni bdag med pa dang / srog med pa dang gang zag med pa zhes gsungs pa'i phyir ro/ /chos la bdag med par mthong ba ni ngo bo nyid kyi stong pa zhes gsungs pa'i phyir ro/ /gang zag dang chos de gnyis ka yang g.yo ba med de/ bya ba med pas byed pa po med par mthong ba ni byed pa po dang / tshor ba po med pa zhes gsungs pa'i phyir ro/ /mtshan ma med pa ni mi mthun pa'i phyogs yid tsam nyams pa dang / gnyen po rnyed pa dang / mtshan ma kun du mi 'byung ba dang rnam pa gsum gyis yongs su ston te/ gang gi phyir de srid pa'i yan lag de dag gi rang bzhin 'gags shing rnam par thar pa las shin tu nye bar gnas pas chos kyi mtshan ma gang yang mi skye ste/ de'i phyir mtshan ma med pa'i rnam par thar pa'i sgo skye ba yin no zhes gsungs pa'o/ /de la mi mthun pa'i phyogs yid tsam nyams pa ni srid pa'i yan lag rnams kyi rang bzhin 'gag ces gsungs pa'i phyir ro//gnyen po rnyed pa ni rnam par thar pa shin tu nye bar gnas pas zhes gsungs pa'i phyir ro/ /mtshan ma kun du mi 'byung ba ni chos kyi mtshan ma gang yang mi skye zhes gsungs pa'i phyir ro/ /smon pa med pa ni gnas dang /rang bzhin dang / khyad par dang rnam pa gsum gyis rig par bya ste/ gang gi phyir de de ltar stong pa nyid dang / mtshan ma med pa la zhugs pas snying rje chen po sngon du gtong zhing sems can yongs su smin par bya ba ma gtogs par 'dod pa gang yang mi skye ste/ de ltar de'i smon pa med pa'i rnam par thar pa'i sgo skyes pa yin no zhes gsungs pa'o//de la stong pa nyid dang mtshan ma med pa la 'jug pa'i gnas kyi smon pa med pa sgrub pa'i phyir/ stong pa nyid dang mtshan ma med pa la 'jug pa ni gnas so/ /mngon par 'dod pa mi skye ba ni rang bzhin te smon pa med pa'i rang bzhin ni mngon par 'dod pa med pa'o//snying rje chen po sngon du gtong zhing sems can yongs su smin par bya ba ni mngon par 'dod pa khyad par can te nyan thos kyi smon pa med pa'i rang bzhin yang mngon par 'dod pa med pa yin mod kyi/ de ni sems can yongs su smin par bya ba'i mngon par 'dod pa spangs pa'o//de la mi mthun pa'i phyogs nyams pa'i khyad par ni 'du shes rnam pa gsum dang bral ba ste/ gang gi phyir de rnam par thar pa'i sgo gsum po 'di dag bsgoms pas bdag dang gzhan gyi 'du shes dang bral ba dang / byed pa po dang tshor ba po'i 'du shes dang bral ba dang /yod pa dang med pa'i 'du shes dang bral bas zhes gsungs pa ste/ de yang sa lnga pa la sems kyi bsam pa mnyam pa nyid rnams dang / sa bzhi pa las lhag par g.yo ba la sogs pa dang bral ba dang / sa drug pa 'di la chos mnyam pa nyid rnams dang go rims bzhin du rig par bya'o//de la sgrub pa'i khyad par ni rnam pa gnyis te/ go cha'i sgrub pa dang skyes bu'i byed pa'i sgrub pa'o/ /go cha'i sgrub pa 'dus byas la nyes pa mang po'i skyon chags par yongs su shes pas las dang nyon mongs pa'i 'ching ba dang / skye ba'i tshogs pa spong ba sems can gyi don byed pa khyad par can te/gang gi phyir de byang chub kyi yan lag yongs su ma grub pa rnams yongs su grub par bya ba'i phyir dang / snying rje chen po sngon du btang ste/ de bas kyang shas cher shin tu brtson par byed do/ /de 'di snyam du sems te/ kun du sbyor ba las ni 'dus byas 'byung ngo / /bral ba las ni 'dus byas mi 'byung ngo //tshogs pa las ni 'dus byas 'byung ngo / /ma tshogs pa las ni 'dus byas mi 'byung ngo / /de ltas bdag gis 'dus byas pa nyes pa mang po'i skyon chags pa de lta bu 'di shes par byas la kun du sbyor ba 'di dang tshogs pa 'di'i rgyun gcad par yang mi bya zhing /sems can yongs su smin par bya ba'i phyir 'du byed rnams shin tu zhi ba thob par yang mi bya'o snyam mo zhes gsungs pa'o/ /skyes bu'i byed pa'i sgrub pa ni rnam par sun 'byin pa'i gnyen pos nyes pa mang po'i skyon chags par so sor rtog pa dang / spong ba'i gnyen pos rang dang spyi'i mtshan nyid rang bzhin gyis med pa so sor rtog par rig par bya ste/gang gi phyir kye rgyal ba'i sras dag de de ltar 'du byed du gyur pa nyes pa mang po'i skyon chags shing rang bzhin gyi ngo bo nyid med pa dang / ma skyes ma 'gags par so sor rtog pa na zhes gsungs pa'o/ /de la gnas pa'i khyad par ni ye shes dang /snying rje'i khyad par dang ldan pas mi gnas pa'i lam la brten nas chags pa med pa'i ye shes mngon du gyur pa shes rab kyi pha rol tu phyin pa la gnas pa mngon du gyur ba yin pa dang / 'dus byas dang mya ngan las 'das pa gnyis mnyam pa nyid du rtogs pa yin par rig par bya ste/de dang mi 'grogs shing mi gnas te/ de'i tshogs yongs su ma rdzogs pa'i phyir te/ gang gi phyir snying rje chen po mngon par sgrub pa dang / sems can gyi tshogs yongs su mi gtong bas chags pa med pa'i ye shes la mngon par phyogs pa zhes bya ba shes rab kyi pha rol tu phyin pa gnas pa snang ba'i tshul gyis mngon sum du 'gyur ro//de ye shes de lta bu dang ldan zhing shes rab kyi pha rol tu phyin pa la gnas pa snang bar gyur nas byang chub kyi yan lag sdud pa'i rkyen rnams kyang nye bar bsgrubs la 'dus byas dang 'grogs par yang mi gnas so/ /'du byed rnams la rang bzhin gyis zhi bar yang so sor rtog la/byang chub kyi yan lag yongs su ma rdzogs pa'i phyir/ de la yang mi gnas te zhes gsungs pa'o/ /de la chags pa med pa'i ye shes ni de bzhin gshegs pa'i ye shes su rig par bya'o/ /yongs su ma grub pa'i phyir snang ba'i tshul gyis zhes bya'o//de la ting nge 'dzin gyi khyad par ni stong pa nyid kyi ting nge 'dzin de'i 'khor dang bcas pa rnam pa bcu ste/ byang chub sems dpa'i sa mngon du gyur pa 'di la gnas pa'i byang chub sems dpa' 'di la 'jug pa stong pa zhes bya ba'i ting nge 'dzin skye bar 'gyur ro/ /ngo bo nyid stong pa nyid dang don dam pa stong pa nyid dang /chen po stong pa nyid dang mtshungs par ldan pa stong pa nyid dang / mngon par sgrub pa stong pa nyid dang / ji lta ba bzhin du rnam par mi rtog pa stong pa nyid dang / lta ba dang bcas pa stong pa nyid dang / bral ba dang ma bral ba stong pa nyid dang zhes bya ba'i ting nge 'dzin skye bar 'gyur te/de dag la sogs pa stong pa nyid kyi sgo'i ting nge 'dzin sa ya dag de la mngon sum du 'gyur ro/ /de bzhin du mtshan ma med pa'i sgo'i ting nge 'dzin sa ya dag dang / smon pa med pa'i ting nge 'dzin sa ya dag mngon du 'gyur ro zhes gsungs pa'o/ /stong pa nyid kyi ting nge 'dzin de yang rgyu bzhis rnam par gzhag par rig par bya ste/dmigs pas ni bzhi pa ma gtogs pa lnga po dag ste/ gang zag la bdag med pa la dmigs pas 'jug pa stong pa nyid do/ /chos la bdag med pa la dmigs pas rang bzhin stong pa nyid do/ /de la 'dzin pa stong pa nyid la dmigs pas don dam pa stong pa nyid do//de'i gnas kun gzhi rnam par shes pa la dmigs pas chen po stong pa nyid do/ /'jug pa'i rnam par shes pa la dmigs pas mtshungs par ldan pa stong pa nyid do/ /bag yod pa yongs su 'dzin pas bzhi pa rnam par gzhag ste/ shin tu bsgom pa'i phyir bsgoms pas chog mi shes pas dam pa stong pa nyid do/ /khyad par zhugs pa thob pas ni bdun pa ste/ yon tan khyad par zhugs pas thob par byed pas mngon par sgrub pa stong pa nyid kyi ting nge 'dzin to/ /rgyu nyid kyis ni lhag ma rnams te shes bya'i sgrib pa rnam par dag pa'i rgyur gyur pas ji lta ba bzhin du rnam par dag pa'i mi rtog pa stong pa nyid kyi ting nge 'dzin to//sems can yongs su smin par byed pa'i rgyur gyur pas lta ba dang bcas pa'i stong pa nyid kyi ting nge 'dzin to/ /bsams bzhin du srid pa yongs su 'dzin pa'i rgyur gyur pas bral ba dang /ma bral ba stong pa nyid kyi ting nge 'dzin te srid pa yongs su 'dzin pa de lta bu de ni kun nas nyon mongs pa dang mi ldan pa dang / srid pa'i mtshan nyid dang mi ldan pa ma yin pas/ de'i phyir bral ba dang ma bral bas rab tu phye'o / /de la bsam pa'i khyad par ni brtan pa'i phyir mi phyed pa'i bsam pa ste/gang gi phyir byang chub sems dpa'i sa mngon du gyur pa 'di la gnas pa'i byang chub sems dpa' de bas kyang shes cher mi phyed pa'i bsam pa nyid yongs su rdzogs par 'gyur ro zhes gsungs pa'o/ /mi phyed pa'i bsam pa nyid de yang don rnam pa dgur rig par bya ste/dmigs pa la mos pa nges pa ni gang gi phyir nges pa'i bsam pa nyid ces gsungs pa'o/ /'khrug pa la mi brjed pa ni gang gi phyir dge ba'i bsam pa nyid ces gsungs pa'o/ /gsang ba'i gnas la mi skrag pa ni gang gi phyir zab pa'i bsam pa nyid ces gsungs pa'o/ /theg pa las mi g.yo ba ni gang gi phyir phyir mi ldog pa'i bsam pa nyid ces gsungs pa'o//brtson 'grus rtsom pa ni gang gi phyir rgyun mi 'chad pa'i bsam pa nyid ces gsungs pa'o/ /ser sna dang 'chal ba'i tshul khrims [(]gyi [,]kyi [)]dri ma dang bral ba ni gang gi phyir dri ma med pa'i bsam pa nyid ces gsungs pa'o//sems can gyi don byed pa ni gang gi phyir mtha' yas pa'i bsam pa nyid ces gsungs pa'o/ /rnam par thar pa mchog 'dod pa ni gang gi phyir ye shes la mngon par dad pa'i bsam pa nyid ces gsungs pa'o/ /sems can yongs su smin par byed pa'i sbyor ba ni gang gi phyir thabs dang shes rab dang ldan pa'i bsam pa nyid yongs su rdzogs par 'gyur te zhes gsungs pa'o//de ni byang chub sems dpa'i bsam pa de dag ni de bzhin gshegs pa'i byang chub la shin tu song ba yin no zhes bya ba ni shes rab kyi pha rol tu phyin pa la gnas pa'i khyad par thob pas ring du zhugs pa'i phyir ro//de la nus pa'i khyad par ni rnam pa dgur rig par bya ste nus pa rnam pa dgu la phas kyi rgol ba tshar gcod pa'i nus pa ni gang gi phyir phas kyi rgol ba thams cad kyis phyir mi ldog pa'i phyir brtson 'grus dang ldan pa yin zhes gsungs pa'o//the tshom gcod pa'i nus pa ni gang gi phyir ye shes kyi sa la yang dag par zhugs pa yin zhes gsungs pa'o/ /theg pa las mi g.yo ba'i nus pa ni gang gi phyir nyan thos dang rang sangs rgyas kyi sa rnams las log pa yin zhes gsungs pa'o/ /gsang ba'i gnas la mos pa'i nus pa ni gang gi phyir sangs rgyas kyi ye shes la mngon du phyogs par gcig tu nges pa yin zhes gsungs pa'o//rnam par mi 'dor ba'i nus pa ni gang gi phyir bdud dang nyon mongs pa kun du 'byung ba thams cad kyis mi 'phrogs pa yin zhes gsungs pa'o/ /nyon mongs pa'i sgrib pa rnam par dag pa'i dbang du byas nas gnyen po brtan pa'i nus pa ni gang gi phyir/byang chub sems dpa'i ye shes kyi snang ba la shin tu gnas pa yin zhes gsungs pa'o/ /gnyen po shin tu rgyas pa'i nus pa ni gang gi phyir stong pa nyid dang / mtshan ma med pa dang / smon pa med pa'i chos kun du spyad pa rnams shin tu yongs su bsgom pa yin zhes gsungs pa'o/ /sems can yongs su smin par byed pa'i nus pa ni gang gi phyir thabs dang shes rab kyis rnam par dpyad pa rnams dang ldan pa yin zhes gsungs pa'o/ /shes bya'i sgrib pa rnam par dag pa'i nus pa ni gang gi phyir/byang chub kyi phyogs pa'i chos rnams mngon par bsgrubs pas rnam par rgyas pa yin no zhes gsungs pa'o/ /byang chub sems dpa'i sa mngon du gyur pa 'di la gnas pa de chos de dag la ji lta ba bzhin du mthun par mi byed pas shes rab kyi pha rol tu phyin pa la gnas pa ches shas che zhing /rjes su mthun pa'i bzod pa rnon po gnyis pa skyes pa yin no zhes bya ba de la chos de dag ces bya ba ni nus pa'i khyad par gyis bsdus pa bstan ma thag pa rnams so/ /byang chub sems dpa'i sa mngon du gyur pa 'di la gnas pa de la sangs rgyas mang po snang bar 'gyur zhes bya ba thams cad snga ma bzhin no//de dag las chos bstan pa nyan to/ /thos nas kyang ji lta ba bzhin du snyoms par 'jug pa dang / shes rab dang ye shes kyi snang bas rab tu sbyor ro zhes bya ba ni don gyi gzungs thob par yongs su ston te/ de'i rgyu bstan pa'i phyir ro//gzungs de ni ting nge 'dzin gyi khyad par la brten pa'i lhag mthong dang / zhi gnas kyi snang ba la sbyor bas thob bo/ /nan tan gyis kyang 'dzin te zhes bya ba ni de'i sgrib pa las rnam par grol nas don de la reg pa'o/ /gser gyi sa le sbram baiDUr+yas phyis pa'i dpes ni sa 'di la 'jig rten las 'das pa'i ye shes 'phel bar gyur nas ches 'od gsal ba yongs su ston te/gang gi phyir kye rgyal ba'i sras 'di lta ste dper na gser gyi sa le sbram de nyid baiDUr+yas phyis nas de bas kyang shas cher rab tu byang zhing shin tu 'od gsal bar 'gyur ro/ /kye rgyal ba'i sras dag de bzhin du byang chub sems dpa'i sa mngon du gyur pa 'di la gnas pa'i byang chub sems dpa'i dge ba'i rtsa ba thabs dang shes rab kyis rnam par dpyad pa de dag kyang /de bas shas cher rab tu byang zhing shin tu 'od gsal bar 'gyur ro zhes gsungs pa'o/ /chags pa med pa'i ye shes la mngon par phyogs pa shes rab kyi pha rol tu phyin pa la gnas pa mngon du gyur zhes bya'o//thabs dang shes rab kyis rnam par dpyad pa zhes bya ba ni mi gnas pa'i lam gyis bsdus pa'i shes rab kyis so/ /zla ba'i 'od kyi dpes ni 'od kyi dkyil 'khor gyi dpes bstan pas snga ma'i ye shes pas rgya che ba'i phyir bye brag ston te/'od chung ba ni dkyil 'khor ro/ /che ba ni 'od de/ kye rgyal ba'i sras dag 'di lta ste dper na/ zla ba'i 'od de ni sems can gyi lus rnams kyang sim par byed la/ rlung gi dkyil 'khor bzhis kyang mi 'phrogs pa yin no/ / kye rgyal ba'i sras dag de bzhin du byang chub sems dpa'i sa mngon du gyur pa 'di la gnas pa'i byang chub sems dpa' de'i dge ba'i rtsa ba de dag kyang sems can bye ba khrag khrig 'bum phrag du ma'i nyon mongs pa 'bar ba rnams kyang rab tu zhi bar byed cing / bdud bzhi'i lam gyi spyod pa ngan pa dag gis kyang mi 'phrogs pa yin no zhes bya ba la bdud bzhi'i lam gyi spyod pa ngan pa rnams ni bdud kyis 'jug par byed pa dag yin par shes par bya'o//lhag ma rnams ni snga ma'i tshul gyis ci rigs par khong du chud par bya'o/ /'phags pa sa bcu pa las sa drug pa'i rnam par bshad pa rdzogs so// //bam po bcu pa/ sa bdun pa ni mngon par 'du byed pa med pa la mngon par dga' ba'i gnyen po rnam par gzhag pa dang / de'i rnam par g.yeng ba'i gnyen po rnam par gzhag pa dang / zung du 'brel pa'i lam 'thob pa rnam par gzhag pa dang /sa snga phyi las khyad par rnam par gzhag pa dang / de'i 'bras bu rnam par gzhag pa dang / rnam pa lngas rnam par gzhag par rig par bya'o/ /de la mngon par 'du byed pa med pa la mngon par dga' ba'i gnyen po ni thabs dang shes rab kyis yang dag par skyed pa'i lam gzhan rtsom pa'i khyad par bcu po dag ste/gang gi phyir kye rgyal ba'i sras dag byang chub sems dpa'i sa drug pa la lam shin tu yongs su rdzogs pa'i byang chub sems dpa' de byang chub sems dpa'i sa bdun pa gnon te/ de thabs dang shes rab kyi ye shes kyis mngon par sgrub pa'i lam gzhan rtsom pa'i khyad par bcus gnon to zhes gsungs pa'o//byang chub sems dpa' de ni chags pa med pa'i ye shes la mngon par phyogs pa'i shes rab kyi pha rol tu phyin pa la gnas pa mngon du gyur pas mngon par 'du byed pa med pa nyid la sems dga' ba yin gyi/ mngon par mtho ba'i mngon par 'du byed pa la ni ma yin te/de la mngon par dga' ba'i gnyen por de dag rnam par gzhag go/ /thabs dang shes rab kyi ye shes ni chos la bdag med pa'i ye shes sems can la lta ba dang bcas pa'o/ /lam gzhan rtsom pa'i khyad par ni gnyen pos yongs su zin pa mngon par mtho ba'i lam mo//de ni 'jig rten las 'das pa'i gzhan dang / 'jig rten pa'i mngon par mtho ba'i lam las gzhan du gyur pa'o/ /yon tan rnam pa bzhis khyad par du 'phags pa ste/ ji ltar 'dod pa dang / ji srid 'dod pa'i bar du longs spyod dang / lus kyi khyad par thob pa'i rgyu bsod nams sogs pas longs spyod dang /lus kyi khyad par gyi rgyu nyid ni gang gi phyir stong pa nyid dang / mtshan ma med pa dang / smon pa med pa shin tu bsgom pa'i yid dang ldan la/ bsod nams kyi tshogs chen po bsogs pa yin zhes gsungs pa'o/ /de ltar khyad par thob pa tshad med pa bsgoms pas sems can rnams la log par mi sgrub pa'i phyir/nyes par spyod pa las kun du bsrung ba'i rgyu nyid ni gang gi phyir bdag med pa dang / srog med pa dang gang zag med pa'i chos rnams la yang 'jug la tshad med pa bzhi mngon par sgrub pa yang mi gtong ba yin zhes gsungs pa'o//bsod nams kyi rang bzhin gyi chos kyi tshogs mngon par 'du byed pa pha rol tu phyin pa rnams legs par byed pas/ de'i khyad par 'thob pa'i rgyu 'phel ba'i phyir/ dge ba'i rtsa ba kun du bsrung ba'i rgyu nyid ni gang gi phyir/ bsod nams kyi chos kyi tshogs pha rol tu phyin pa mngon par 'du bya ba yang mngon par 'du byed la/chos gang la yang mngon par zhen pa med pa yin zhes gsungs pa'o/ /sems can la phan 'dogs pa'i rgyu nyid ni sems can la phan 'dogs pa de yang sgo bdun nas rig par bya ste/ gtso bo dang mthun par byed pas gtso bos sems can gzhan 'dul ba'i phyir bsam bzhin du srid par skye ba yongs su 'dzin pa ni/gang gi phyir khams gsum pa thams cad las dben par gyur pa yang thob la/ khams gsum pa'i rgyan rnam par sgrub pa mngon par bsgrub pa yang mngon par sgrub pa yin no zhes gsungs pa'o//kun nas dkris pa dang / bag la nyal 'gags pas shin tu zhi zhing nye bar zhi bas nyon mongs pa rab tu zhi bar bya ba'i phyir gnyen po ston pa ni/ gang gi phyir nyon mongs pa dang 'bar ba thams cad dang bral bas shin tu zhi zhing nye bar zhi ba yang yin la/ sems can thams cad kyi 'dod chags dang /zhe sdang dang gti mug gi nyon mongs pa 'bar ba rab tu zhi bar bya ba mngon par bsgrub pa yang mngon par sgrub pa yin zhes gsungs pa'o/ /sa lnga pa las gnod pa rnam pa bzhi bstan pa gang yin pa'i gnod pa zhi bar byed pa ni gang gi phyir/ sgyu ma dang / rmi lam dang / mig yor dang / sgra brnyan dang / chu zla dang / gzugs brnyan dang sprul pa'i rang bzhin lta bur gnyis su med par yang khong du chud la/ las bya ba rnam par phye ba tshad med pa'i bsam pa mngon par bsgrub pa yang mngon par sgrub pa yin zhes gsungs pa'o/ / chos mnyan pa'i phyir 'khor gyi dkyil 'khor rnams su 'du bar byed pa ni gang gi phyir/ zhing gi tha gru nam mkha' dang mnyam par shin tu bsgom pa'i yid dang yang ldan la/ sangs rgyas kyi zhing gi rgyan rnam par sgrub pa mngon par bsgrub pa yang mngon par sgrub pa yin zhes gsungs pa'o/ / lta ba dang / mnyan pa dang / bsnyen bkur bya ba dang mchod par sbyor ba rnams kyi bsod nams 'phel bar byed pa ni/ gang gi phyir sangs rgyas thams cad chos kyi sku'i rang bzhin du yang 'jug la/ gzugs dang / mtshan dang dpe byad bzang po'i rgyan rnam par bsgrub pa yang mngon par sgrub pa yin zhes gsungs pa'o//chos kyi 'khor lo bskor ba ni gang gi phyir/ de bzhin gshegs pa'i gsung brjod du med cing sgra dbyangs dang bral te/ rang bzhin gyi zhi bar yang mos la dbyangs dang yan lag thams cad rnam par phye bas rnam par dag pa'i rgyan mngon par bsgrub pa yang mngon par sgrub pa yin zhes gsungs pa'o//dris pa lung ston pa ni gang gi phyir sangs rgyas bcom ldan 'das dus gsum mtshan nyid gcig tu thugs su chud pa la yang 'jug la sems can gyi bsam pa brjod pa'i phyir/ bskal pa 'grangs pa'i mtshan nyid tha dad pa shes pa la yang 'jug pa yin te zhes gsungs pa'o//de dag ni lam gzhan rtsom pa'i khyad par bcu po gnyen po yongs su 'dzin pa dang bcas pa yin no/ /de dag gnyen po yongs su 'dzin pa ni stong pa nyid la sogs pa shin tu bsgoms pa dang / bdag med pa'i chos la 'jug pa la sogs pas ci rigs par shes par bya'o//'di dag snang bar gyur pas sa 'di la gnas pa yin te/ gang gi phyir kye rgyal ba'i sras dag thabs dang shes rab kyis mngon par sgrub pa'i lam gzhan rtsom pa'i khyad par bcu po de dag gis byang chub sems dpa' byang chub sems dpa'i sa drug pa las rnam par dbye ba shin tu byas pas byang chub sems dpa'i sa bdun pa gnon to//kye rgyal ba'i sras dag de ltar byang chub sems dpa' sems dpa' chen po lam gyi tshogs thabs dang shes rab kyis mngon par sgrub pa'i lam gzhan rtsom pa'i khyad par bcu po snang bar gyur pa de dag mngon par bsgrubs pas/byang chub sems dpa'i sa bdun pa non zhes bya ste zhes gsungs pa'o/ /de ltar re zhig mngon par 'du byed pa med pa la mngon par dga' ba'i gnyen po rnam par gzhag pas sa bdun pa rnam par gzhag par rig par bya'o/ /de'i 'og tu de'i rnam par g.yeng ba'i gnyen po rnam pa gnyis su rig par bya ste/tshad med pa'i rnam pa bsgom pa dang / mngon par 'du byed pa med pa'i lam la sbyar ba'o/ /de la tshad med pa'i rnam pa bsgom pa ni/ gang gi don du byed pa dang / gnas gang yin pa dang / gang gi dang / ji lta bu dang / gang du dang / de dag tha dad pas rnam pa bcur rig par bya'o/ /de la gang dag gi don du byed pa zhes bya ba ni sems can tshad med pa de dag yongs su smin par byed pa dang / gdul bya'i las tshad med pa byed pa ste/ gang gi phyir byang chub sems dpa'i sa bdun pa la gnas pa'i byang chub sems dpa' de sems can gyi khams tshad med pa la yang 'jug la/sangs rgyas bcom ldan 'das rnams kyis sems can yongs su smin par mdzad pa dang / 'dul ba'i phrin las tshad med pa la 'jug go zhes gsungs pa'o/ /gnas gang yin zhes bya ba ni 'jig rten gyi khams tshad med pa dag na sangs rgyas kyi zhing yongs su dag pa la brten pa ste/gang gi phyir 'jig rten gyi khams mang po tshad med pa la yang 'jug la/ sangs rgyas bcom ldan 'das rnams kyis zhing yongs su dag pa la yang 'jug go zhes gsungs pa'o/ /gang gis zhes bya ba la chos tha dad pa nyid dang /ye shes tshad med pa mngon par rtogs pa ni gang gi phyir chos tha dad pa tshad med pa la yang 'jug la/ sangs rgyas bcom ldan 'das rnams kyi ye shes mngon par rdzogs par thugs su chud pa tshad med pa la yang 'jug go zhes gsungs pa'o/ /bskal pa 'grangs pa dang /dus gsum tshad med par rtogs pas ni gang gi phyir bskal pa 'grangs pa tshad med pa rtogs pa la yang 'jug la/ sangs rgyas bcom ldan 'das rnams kyi dus gsum thugs su chud pa tshad med pa la yang 'jug go zhes gsungs pa'o/ /ji lta bu zhes bya ba ni rnam pa gsum ste/lha tha dad pa la mos pa rnams la lus dang sems 'dra bar 'jug pas/ de dag la mos pa bzlog pa ni gang gi phyir/ sems can gyi mos pa tha dad pa'i khyad par tshad med pa la yang 'jug la/ sangs rgyas bcom ldan 'das rnams kyi ming dang gzugs kyi sku tha dad pa bstan pa tshad med pa la yang 'jug go zhes gsungs pa'o//sngon gyi bsam pa las byung ba'i dbang po rtul po dang / 'bring dang rnon po rnams la ci rigs par chos ston pa ni gang gi phyir sems can rnams kyi bsam pas dbang po tha dad pa tshad med pa la yang 'jug la/ sangs rgyas bcom ldan 'das rnams kyi gsung brjod pas sems can gzhan tshim par mdzad pa tshad med pa la yang 'jug go zhes gsungs pa'o//sems can rnams kyi spyod pa ji lta ba bzhin du gnyen po'i gdams ngag rjes su ston pa ni/ gang gi phyir sems can rnams kyi sems kyi spyod pa tha dad pa tshad med pa la yang 'jug la/sangs rgyas bcom ldan 'das rnams kyi ye shes rab 'byam tshad med pa rjes su rtog pa la yang 'jug go zhes gsungs pa'o/ /gang du zhes bya ba ni theg pa gsum la ste/ de la nyan thos kyi theg pa la ni gang gi phyir nyan thos kyi theg pas nges par 'byung ba la mos pas tshad med pa la yang 'jug la/sangs rgyas bcom ldan 'das rnams kyi lam bstan pa tshad med pa la 'jug pa la yang mos so zhes gsungs pa'o/ /rang sangs rgyas kyi theg pa la ni gang gi phyir rang sangs rgyas kyi theg pa la yang dag par sgrub pa 'grub pa la yang 'jug la/sangs rgyas bcom ldan 'das rnams kyi ye shes zab mo'i sgor 'jug pa bstan pa tshad med pa la yang 'jug go zhes gsungs pa'o/ /theg pa chen po la ni gang gi phyir byang chub sems dpa' rnams kyi byang chub sems dpa'i spyod pa la sbyor ba'i tshad med pa la yang 'jug la/sangs rgyas bcom ldan 'das rnams kyi theg pa chen po yang dag par sgrub pa la 'jug pa bstan pa tshad med pa la yang 'jug go zhes gsungs pa'o/ /de ltar de'i rnam par g.yeng ba'i gnyen po tshad med pa'i rnam pa bsgom pa bcu bstan nas/ mngon par 'du byed pa med pa'i lam la sbyor ba ston te/gang gi phyir 'di snyam du sems te/ de bzhin gshegs pa dgra bcom pa yang dag par rdzogs pa'i sangs rgyas rnams kyi yul de ni de ltar tshad med pa ste/ de ni bskal pa byed ba khrag khrig 'bum phrag ji snyed pa de snyed kyis kyang bgrang bar sla ba ma yin te/ sangs rgyas bcom ldan 'das rnams kyi yul de bdag gis yang dag par bskyed par bya'o/ /lhun gyis grub pa dang / rtog pa med pa dang / rnam par rtog pa med par yongs su rdzogs par bya'o zhes gsungs pa'o/ /de la ngo bo nyid dang bye brag la rnam par rtog pa med pas lhun gyis grub pa nyid de rtog pa med pa dang /rnam par rtog pa med pa zhes bya ba'i tshig 'og ma gnyis kyis ston to/ /de ltar legs par so sor brtag pa'i ye shes dang / mngon par shes pa dang ldan zhing rtag par rgyun du mngon par brtson pa de/ thabs dang shes rab kyis yongs su bsgom pa'i lam gzhan rtsom pa'i khyad par rnams la mi g.yo ba'i tshul gyis shin tu gnas pa yin no zhes bya ba ni de'i rnam par g.yeng ba'i gnyen po yin pa'i phyir ro//de ltar de'i rnam par g.yeng ba'i gnyen po rnam par gzhag pas sa 'di bstan nas zung du 'brel pa'i lam 'thob pa rnam par gzhag pa rnam pa bzhis ston te/gnyis cig car dang / rgyun chags su 'byung ba dang / mos pa rnam par dag pa'i khyad par dang / don chen po byed pa dang / byang chub kyi phyogs rab tu dbye ba'o/ /de skad cig gcig la zhi gnas dang lhag mthong gi lam mngon sum du byed pas gnyis cig car 'byung bar rig par bya'o//spyod pa'i lam thams cad du de dang ldan pas rgyun chags su 'byung ba ste/ gang gi phyir de skad cig gcig la yang lam mngon par sgrub cing mi ldang ste/ de 'gro'am/ 'greng ngam/ 'dug gam/ nyal lam/ rmi lam na yang ye shes de lta bu la mngon par brtson pa yin zhes gsungs pa'o//sgrib pa med pas mos pa rnam par dag pa'i khyad par ni gang gi phyir sgrib pa med pas spyod lam thams cad la gnas shing / 'du shes yid la bya ba rnam pa de lta bu dag dang mi 'bral ba yin no zhes gsungs pa'o/ / de la ye shes tshad med pa de dag la bkra bar byed pa'i phyir 'du shes so/ /mngon du 'dun par byed pa'i phyir yid la byed par rig par bya'o/ /sems can re re la pha rol tu phyin pa bcu yang dag par sgrub pa'i don chen po byed pa ste/ gang gi phyir de'i sems bskyed pa re re la yang byang chub sems dpa'i pha rol tu phyin pa bcu dang /byang chub sems dpa'i sa bcu yang dag par sgrub pa yang dag par 'grub bo/ /de ci'i phyir zhe na/ 'di ltar byang chub sems dpa' ni snying rje chen po sngon du btang ba'i sems bskyed pa 'byung ba re re thams cad kyang sangs rgyas kyi chos yang dag par sgrub pa dang /de bzhin gshegs pa'i ye shes su yongs su bsngo ba'i phyir te/ de la sangs rgyas kyi ye shes yongs su tshol zhing / sems can rnams la dge ba'i rtsa ba gtong ba gang yin pa de ni de'i sbyin pa'i pha rol tu phyin pa'o/ /nyon mongs pa'i yongs su gdung ba thams cad rab tu zhi ba gang yin pa de ni de'i tshul khrims kyi pha rol tu phyin pa'o//snying rje dang byams pa sngon du 'gro bas sems can thams cad la gnod par mi byed pa gang yin pa de ni de'i bzod pa'i pha rol tu phyin pa'o/ /gong nas gong du rtsom pas dge ba'i chos kyis mi ngoms pa gang yin pa de ni de'i brtson 'grus kyi pha rol tu phyin pa'o//thams cad mkhyen pa'i ye shes mngon sum du bya ba'i lam las mi 'phyar ba gang yin pa de ni de'i bsam gtan gyi pha rol tu phyin pa'o/ /rang bzhin gyis skye ba med pa mngon sum du bya bar bzod pa gang yin pa de ni de'i shes rab kyi pha rol tu phyin pa'o//ye shes kyis tshad med par mngon par sgrub pa gang yin pa de ni de'i thabs la mkhas pa'i pha rol tu phyin pa'o/ /ye shes kyis gong nas gong du mngon par sgrub pa gang yin pa de ni de'i smon lam gyi pha rol tu phyin pa'o/ /phas kyi rgol ba dang bdud kyi tshogs thams cad kyis lam gyi rgyun mi chod pa gang yin pa de ni de'i stobs kyi pha rol tu phyin pa'o//chos thams cad ji lta ba bzhin du nges par rtog pa gang yin pa de ni de'i ye shes kyi pha rol tu phyin pa'o zhes gsungs pa'o/ /de la thabs la mkhas pa'i pha rol tu phyin pa ni ye shes kyi tshad med par mngon par sgrub pa ste/yongs su bsngo ba'i khyad par gyi ye shes gang gis sbyin pa la sogs pa tshad med pa mngon par sgrub bo/ /smon lam gyi pha rol tu phyin pa ni ye shes kyis gong nas gong du mngon par sgrub pa ste/ skye ba'i khyad par yongs su 'dzin pas ye shes gang gis sbyin pa la sogs pa gong nas gong du mngon par bsgrub bo//stobs kyi pha rol tu phyin pa ni phas kyi rgol ba dang / bdud kyi tshogs thams cad kyis lam gyi rgyun mi chod pa ste/ lam gang gis sbyin pa la sogs pa'i mi mthun pa'i phyogs pham par byed pa'o/ /ye shes kyi pha rol tu phyin pa ni chos thams cad la ji lta ba bzhin du nges par rtog pa ste/sems can yongs su smin par bya ba'i phyir ye shes gang gis sbyin pa la sogs pa'i rab tu dbye ba rnam pa thams cad shes pa'o/ /byang chub kyi phyogs pa rab tu dbye ba yang rnam pa bzhir rig par bya ste/ theg pa chen por gtogs pa'i phyir pha rol tu phyin pa rnams su dbye ba ni gang gi phyir/kye rgyal ba'i sras dag de ltar na byang chub sems dpa'i sa ring du song ba la gnas pa'i byang chub sems dpa' de'i pha rol tu phyin pa de dag skad cig re re la yongs su rdzogs par 'gyur ro zhes gsungs pa'o/ /sems can yongs su smin par byed par gtogs pa'i phyir bsdu ba'i dngos po rnams su dbye ba ni gang gi phyir/bsdu ba'i dngos po bzhi yang yongs su rdzogs par 'gyur ro zhes gsungs pa'o/ /nyon mongs pa'i sgrib pa rnam par dag par byed par gtogs pa'i phyir gnas dang byang chub kyi phyogs pa dang / rnam par thar ba'i sko rnams su dbye ba ni gang la gnas nas gang zhig bsgoms te/sgo gang gis rnam par dag par 'gyur bya ste/ gang gi phyir gnas bzhi dang byang chub kyi phyogs pa'i chos sum cu rtsa bdun dang / rnam par thar ba'i sgo gsum yang yongs su rdzogs par 'gyur to zhes gsungs pa'o//shes bya'i sgrib ba rnam par dag par byed par gtogs pa'i phyir/ byang chub kyi yan lag gi chos thams cad du dbye ba ni gang gi phyir/ mdor na byang chub kyi yan lag gi chos thams cad skad cig re re la yongs su rdzogs par 'gyur ro zhes gsungs pa'o/ /de ltar zung du 'brel pa'i lam thob pa rnam par gzhag pa bstan nas/sa snga phyi las khyad par rnam par gzhag pa ni sa 'og ma dang / gong ma bas khyad zhugs pa dang / dma' ba gnyis kyis sa bdun pa'i khyad par rnam par gzhag par rig par bya'o/ /khyad zhugs pa ji lta bu zhe na/ sbyor ba las byung ba'i spyod pa yongs su rdzogs pa'i phyir te/de nyid kyi phyir ye shes dang / mngon par shes pa'i spyod pa gnon te/ gang gi phyir de skad ces smras pa dang / byang chub sems dpa' rnam par grol ba'i zla bas byang chub sems dpa' rdo rje'i snying po la 'di skad ces smras so/ / kye rgyal ba'i sras ci byang chub sems dpa'i sa bdun pa 'di nyid la gnas pa'i byang chub sems dpa'i byang chub kyi yan lag thams cad skad cig re re la yongs su rdzogs par 'gyur ram/ 'on te sa bcu po thams cad la yang de bzhin du yongs su rdzogs par 'gyur/ byang chub sems dpa' rdo rje'i snying pos smras pa/kye rgyal ba'i sras byang chub sems dpa'i sa bcu po thams cad la yang byang chub sems dpa'i byang chub kyi yan lag rnams yongs su rdzogs par lta 'gyur te/ byang chub sems dpa'i sa bdun pa 'di la lhag par yongs su rdzogs par 'gyur ro/ /de ci'i phyir zhe na/kye rgyal ba'i sras byang chub sems dpa' rnams kyis 'di ni sbyor ba las byung ba'i spyod pa yongs su rdzogs par byed bas ye shes dang / mngon par shes pa'i spyod pa gnon pa'i phyir ro zhes gsungs pa'o/ /de la mngon par shes pa ni lnga'o/ /ye shes ni ji skad du bstan par rig par bya'o//ji ltar nas 'di la sbyor ba las byung ba'i spyod pa yongs su rdzogs pa yin zhe na/ de ma yin pa'i 'jig rten las 'das pa dang / 'jig rten pa'i lam las khyad par du 'phags pa'i lam mngon par sgrub pa'i phyir ro/ /de nyid kyi phyir 'di la sangs rgyas kyi chos thams cad yang dag par bskyed pas byang chub kyi yan lag rnams yongs su rdzogs par byed de/gang gi phyir kye rgyal pa'i sras byang chub sems dpa'i sa dang po la ni smon lam thams cad la lhag par dmigs pas/ byang chub kyi yan lag rnams yongs su rdzogs par 'gyur ro/ /gnyis pa la ni sems kyi dri ma bsal bas so//gsum pa la ni smon lam rnam par 'phel ba dang / chos kyi snang ba thob pas so/ /bzhi pa la ni lam la zhugs pas so/ /lnga pa la ni 'jig rten gyi bya ba dang mthun par 'jug pas so/ /drug pa la ni chos zab mo'i sgor 'jug pas so/ /byang chub sems dpa'i sa bdun pa 'di la ni sangs rgyas kyi chos thams cad yang dag par bskyed pas byang chub kyi yan lag rnams yongs su rdzogs par 'gyur ro zhes gsungs pa'o//da ltar sa 'og ma las khyad zhugs pas snga phyi las khyad par rnam par gzhag par rig par bya'o/ /sa 'og ma las dma' ba ji lta bu zhe na/ye shes mngon par sgrub pa la sbyor ba'i yan lag rnams 'bad pa dang bcas pas yongs su rdzogs par byed pa ste/ gang gi phyir de ci'i phyir zhe na/ byang chub sems dpa'i sa dang po nas bzung ste/ byang chub sems dpa'i sa bdun pa'i bar du byang chub sems dpas ye shes dang mngon par shes pa mngon par bsgrub pa la sbyor ba'i yan lag gang dag mngon par bsgrub pa de dag ni byang chub sems dpa'i sa brgyad pa yan chad lhun gyis grub par yongs su 'grub po//kye rgyal ba'i sras dag 'di lta ste/ dper na kun nas nyon mongs pa la rnam par dag pa'i 'jig rten gyi khams dang /shin tu yongs su dag pa'i 'jig rten gyi khams gnyis kyis 'jig rten gyi khams kyi bar ni mngon par shes pa'i stobs bskyed pa chen po ma gtogs par gya chom du 'da' bar mi nus so/ /kye rgyal ba'i sras de bzhin du byang chub sems dpa'i spyod pa 'dres pa las yongs su dag pa la yang smon lam dang /thabs dang / shes rab dang mngon par shes pa'i stobs bskyed pa chen po ma gtogs pa gya tshom du 'da' bar mi nus so zhes gsungs pa'o/ /byang chub sems dpa' rnam par grol ba'i zla bas smras pa/kye rgyal ba'i sras ci byang chub sems dpa'i sa bdun pa la byang chub sems dpa'i spyod pa nyon mongs pa'i spyod pas kun nas nyon mongs par shes par bya ba yin nam/ byang chub sems dpa' rdo rje'i snying pos smras pa/ kye rgyal ba'i sras byang chub sems dpa'i sa dang po kho na nas bzung ste/byang chub sems dpa'i spyod pa thams cad ji ltar 'tsham pa'i lam dang mthun pa nyid du byang chub tu yongs su bsngos pa'i dbang gis nyon mongs pa'i skyon dang bral bar shes par bya ste/ de tsam gyis nas bdun po rnams la nyon mongs pa'i spyod pa las shin tu 'das zhes ni mi bya'o zhes bya ba ni de ltar sa 'di ni kun nas nyon mongs pa dang /rnam par byang ba zhes bya ste/ nyon mongs pa spyod pa'i phyir ni ma yin no/ /ji ltar 'tsham pa'i lam dang mthun pa nyid ces bya ba ni sa de dang de ni ji ltar 'tsham pa'i lam la ltos pa'i phyir ro/ /'khor los sgyur ba'i dpes ni tshangs pa'i 'jig rten du skyes pas 'khor los sgyur ba mi'i lus las 'das pa ltar/sa brgyad pa la rnam par smin pa las byung ba'i lam 'thob pa'i phyir kun nas nyon mongs pa'i nyes pa las shin tu 'das pa nyid du yongs su ston te/ gang gi phyir kye rgyal ba'i sras 'di lta ste dper na 'khor los sgyur ba'i rgyal po ni/lha'i glang po rin po che la zhon zhing gling bzhi dag tu yang 'gro'o/ /mi'i sdug bsngal dang / dbul ba dang kun nas nyon mongs pa rnams kyang rab tu shes te/ nyes pa de dag gis gos pa yang ma yin mod kyi/ de tsam gyis mi'i lus las shin tu 'das pa yang ma yin te/gang gi tshe ma'i lus spangs nas tshangs pa'i 'jig rten du skyes par gyur pa de'i tshe/ tshangs pa'i gzhal med khang na gnas te/ stong gi 'jig rten gyi khams kyang mthong zhing rnam par rgyu la tshangs pas snang ba yang ston te/ mi zhes kyang mi brjod do/ /kye rgyal ba'i sras de bzhin du byang chub sems dpa'i sa dang po nas bzung ste/byang chub sems dpa' pha rol tu phyin pa'i theg pa la zhon zhing 'gro ba thams cad du rgyu ba'i tshe/ kun nas nyon mongs pa'i nyes pa rnams kyang rab tu shes te yang dag pa'i lam du zhugs pas kun nas nyon mongs pa de dag gis kyang mi gos kyi/de tsam gyis sa bdun po rnams la nyon mongs pa'i nyes pa rnams las yang dag par 'das zhes ni mi bya ste/ gang gi tshe sbyor ba las byung ba'i spyod pa spangs nas sa bdun pa nas sa brgyad pa non par gyur pa de'i tshe byang chub sems dpa'i theg pa rnam par dag pa la zhon te/'gro ba thams cad du rgyu zhing kun nas nyon mongs pa'i nyes pa rnams kyang rab tu shes te/ shin tu 'das pas de dag gis gos par gyur ces mi bya'o zhes gsungs pa'o/ /sa 'di ni rnam par smin pa la mi gnas pa'i phyir dang / lam mngon par 'du byed pa dang bcas pas bsam pa yongs su ma rdzogs pa'i phyir/nyon mongs pa med pa zhes mi bya'i/ de las bzlog pa'i phyir gong ma rnams la ni mi brjod de/ gang gi phyir kye rgyal ba'i sras byang chub sems dpa'i sa bdun pa 'di la gnas pa'i byang chub sems dpa' ni lhag par 'dod chags la sogs pa nyon mongs pa'i tshogs thams cad las kyang shin tu 'das te/byang chub sems dpa'i sa ring du song ba 'di la spyod pa'i byang chub sems dpa' de ni nyon mongs pa dang bcas pa zhes kyang mi bya/ nyon mongs pa med pa zhes kyang mi bya'o/ /de ci'i phyir zhe na/ nyon mongs pa rnams kun du mi 'byung bas nyon mongs pa dang bcas pa zhes mi bya'o//de bzhin gshegs pa'i ye shes mngon par 'dod pa dang / bsam pa yongs su ma rdzogs pas nyon mongs pa med pa zhes kyang mi bya'o zhes gsungs pa'o/ /de ltar sa snga phyi las khyad par rnam par gzhag pa bstan nas/las rnam par dag pa dang / ting nge 'dzin gyi khyad par 'thob pa dang / sa las yang dag par 'da' ba dang / gnas pa'i khyad par 'thob pa dang / rnam pa bzhis sa 'di'i zung du 'brel pa'i lam gyi 'bras bu rnam par gzhag pa yongs su ston to//de la las rnam par dag pa ni rnam pa bzhis yongs su ston te/ tshul khrims rnam par dag pa'i khyad par ni gang gi phyir/ byang chub sems dpa'i sa bdun pa 'di la gnas pa'i byang chub sems dpa' de ni lhag pa'i bsam pa yongs su dag pa'i lus kyi las dang ldan pa yin/lhag pa'i bsam pa yongs su dag pa'i ngag gi las dang ldan pa yin/ lhag pa'i bsam pa yongs su dag pa'i yid kyi las dang ldan pa yin no/ /de mi dge ba'i las kyi lam gang dag de bzhin gshegs pas smad pa de dag las thams cad kyi thams cad du yang dag par 'das pa yin/dge ba'i las kyi lam gang dag de bzhin gshegs pa dgra bcom pa yang dag par rdzogs pa'i sangs rgyas kyis bka' stsal pa de dag la rtag par rgyun du rjes su 'jug pa yin no zhes gsungs pa'o/ /'jig rten pa'i shes pa rnam par dag pa'i khyad par ni gang gi phyir byang chub sems dpa'i sa lnga pa la 'jig rten pa'i bzo'i gnas dang /las kyi gnas gang dag mngon par bsgrubs pa de dag thams cad kyang 'dir lhun gyis grub pa nyid du 'byung ngo / /de bzhin gshegs pa dgra bcom pa yang dag par rdzogs pa'i sangs rgyas dang / byang chub sems dpa'i sa brgyad pa yan chad la gnas pa'i byang chub sems dpa' rnams ma gtogs par de stong gsum gyi stong chen po'i 'jig rten gyi khams su slob dpon du grags pa yin te zhes gsungs pa'o//bsam pa dang sbyor bas mnyam pa med pa'i lus kyi khyad par 'thob pa ni gang gi phyir/de dang bsam pa'am sbyor ba mnyam pa su yang med do zhes gsungs pa'o/ /bsam gtan la sogs pa mngon sum du byed pa'i khyad par gyis nus pa'i khyad par 'thob pa ni/ gang gi phyir bsam gtan rnams dang / ting nge 'dzin rnams dang / snyoms par 'jug pa rnams dang /mngon par shes pa rnams dang / rnam par thar pa rnams gang yin pa de dag kyang bsgom pa'i sgo'i tshul gyis thams cad kyi thams cad du de la mngon du 'gyur ro/ /'on kyang de tsam gyis byang chub sems dpa'i sa brgyad pa la ji lta ba bzhin du rnam par smin pa yongs su grub pa ni ma yin no//'di ltar byang chub sems dpa'i sa bdun pa 'di la gnas pa'i byang chub sems dpa' de'i sems bskyed pa thams cad la shes rab dang thabs bsgom pa'i stobs yongs su rdzogs par 'gyur te/ de bas kyang shas cher byang chub kyi yan lag thams cad yongs su rdzogs pa 'thob bo zhes gsungs pa'o//de la bsam gtan rnams ni sems can yongs su smin par bya ba'i phyir dang / zhi ba'i bde ba la gnas par bya ba'i phyir/ ting nge 'dzin dang snyoms par 'jug pa rnams kyis mngon par shes pa dang / rnam par thar pa mngon par bsgrub pa'i gnas yin te/'gog pa dang / snyoms par 'jug pa dang go rims bzhin no/ /de ltar zung du 'brel ba'i lam gyi 'bras bu rnam pa bzhi las yang dag par 'das pa yongs su bstan nas ting nge 'dzin gyi khyad par 'thob pa ting nge 'dzin rnam pa bcus yongs su ston te/ de yang rnam par mi rtog pa dang /rnam par mi rtog pa'i don las brtsam pa ni gang gi phyir de byang chub sems dpa'i sa bdun pa 'di la gnas pa'i tshe/ byang chub sems dpa'i ting nge 'dzin rnam par dbye ba shin tu rnam par phye ba zhes bya ba la snyoms par 'jug pa ste/ don shin tu bsam pa zhes bya ba zhes gsungs pa'o//tshig gcig la don gyi khyad par du mar 'byed pa ni gang gi phyir/ khyad par ni blo gros zhes bya ba gsungs pa'o/ /don gcig la rnam grangs du mar ston pa ni gang gi phyir/ rab tu dbye ba'i don gyis mdzod ces bya ba gsungs pa'o/ /rig pa thams cad kyi gnas shes pa ni gang gi phyir/don ji lta ba bzhin du rnam par 'byed pa zhes bya ba zhes gsungs pa'o/ /de bzhin nyid la dmigs te/ rtsa ba bstan pas nyon mongs pa'i sgrib pa rnam par dag pa ni gang gi phyir/ rtsa ba shin tu gnas pas brtan pa zhes bya ba zhes gsungs pa'o/ /sgrib pa rnam pa bzhi rnam par sbyong ba'i phyir shes bya'i sgrib pa rnam par dag pa las brtsams par rig par bya ste/sgrib pa rnam pa bzhi la yon tan khyad par can la sgrib pa de'i gnyen por ye shes dang mngon par shes pa'i sgo zhes bya ba zhes gsungs pa'o/ /chags pa med pa'i ye shes la sgrib pa de'i gnyen por chos kyi dbyings yongs su sbyong bar byed pa zhes bya ba zhes gsungs pa'o//sangs rgyas kyi chos zab cing rgya che ba la zhum pa'i sgrib pa de'i gnyen por de bzhin gshegs pa'i phan yon zhes bya ba zhes gsungs pa'o/ /mi gnas pa'i lam la sgrib pa ni gang gi phyir/ byang chub sems dpa'i ting nge 'dzin don sna tshogs kyi mdzod 'khor ba dang mya ngan las 'das pa'i sgo zhes bya ba la snyoms par 'jug ste zhes gsungs pa'o//don sna tshogs kyi mdzod ces bya ba ni dge ba'i rtsa ba sna tshogs su rig par bya'o/ /de dag la sogs pa ye shes dang mngon par shes pa chen po'i sgo'i ting nge 'dzin sa yongs su sbyong bar byed pa 'bum phrag bcu tshang ba la snyoms par 'jug go//de thabs dang shes rab kyis yongs su sbyong ba'i ting nge 'dzin de dag thob nas snying brtse ba dang / snying rje'i stobs kyis nyan thos dang rang sangs rgyas kyis las yang dag par 'das pa yin no//shes rab dang ye shes kyis rnam par dpyad pa'i sa yang mngon du gyur pa yin no zhes bya ba de la nyan thos dang / rang sangs rgyas kyis las yang dag par 'das pa ni thabs dang shes rab bsgom pa'i stobs dang / snying rje'i stobs dang rnam pa gnyis kyis yongs su ston to/ /shes rab dang ye shes kyis rnam par dpyad pa'i sa zhes bya ba ni brgyad pa'o//mngon du gyur pa yin no zhes bya ba ni nye bar gyur pa'o/ /der ni zhi gnas dang lhag mthong gi lam grub pa yin te/ rnam par dpyad pa 'ba' zhig tu zad do/ /yang dag par 'das pa de yang las kyi khyad par gyis rab tu ston te/ gang gi phyir byang chub sems dpa'i sa bdun pa 'di la gnas pa'i byang chub sems dpa' de'i lus kyi las tshad med pa mtshan ma dang bral ba 'byung / ngag gi las tshad med pa mtshan ma dang bral ba 'byung / yid kyi las tshad med pa mtshan ma dang bral ba shin tu yongs su sbyangs pa mi skye ba'i chos la bzod pas snang bar gyur pa 'byung ngo zhes gsungs pa'o//de la mnyam par gzhag pa nyid kyi mtshan ma dang bral ba'o/ /nyan thos dang rang sangs rgyas rnams kyi las mtshan ma dang bral bar 'byung du zin kyang sems can thams cad kyi don bya ba'i bya ba med pas tshad med pa ma yin no/ / de'i 'og tu tshad med pa de byang chub sems dpa'i sa gzhan las khyad par du 'phags par bstan pa'i phyir sbyor ba'i spyod pa yongs su rdzogs pas shin tu yongs su sbyangs pa nyid dang / mi skye ba'i chos la bzod pas snang bar gyur pa nyid gsungs so/ /rgyal po'i bu'i dpes ni sa 'di yang dag par 'das pa'i khyad par ston te/sbyor ba'i spyod pa yongs su rdzogs pas sbyor ba'i mthar thug ba'i yid la byed pa la gnas pa'i phyir rang gi yul shes pa la gnas pa yin te/ gang gi phyir byang chub sems dpa' rnam par grol ba'i zla bas smras pa/ kye rgyal ba'i sras byang chub sems dpa'i sa dang po la gnas pa'i byang chub sems dpa' lus dang ngag dang yid kyi lus tshad med pa yang nyan thos dang rang sangs rgyas kyi spyod pa las yang dag par 'das pa ma yin nam/byang chub sems dpa' rdo rje'i snying pos smras pa/ kye rgyal ba'i sras de lta yang yin te/ de ni sangs rgyas kyi chos la lhag par dmigs pa'i che ba nyid kyis gyur du zad kyi/rang gi blos rnam par dpyad pas ni ma yin no/ /byang chub sems dpa'i sa bdun pa 'di la ni rang gi blo'i spyod yul rnam par dpyod pa thob pas nyan thos dang / rang sangs rgyas thams cad kyis mi 'phrogs pa yin no//kye rgyal ba'i sras 'di lta ste/ dper na rgyal po'i rigs su skyes pa'i rgyal po'i bu'i rgyal po'i mtshan dang ldan pa ni rgyal po'i byin gyis blon po'i tshogs thams cad zil gyis gnon gyi/ rang gi blos rnam par dpyad pas ni ma yin no/ /nam de nar son par gyur pa de'i tshe/ rang gi blo'i stobs bskyed pas blon po'i bya ba thams cad las shin tu 'das pa yin no/ /kye rgyal ba'i sras de bzhin du byang chub sems dpa' yang sems bskyed ma thag tu lhag pa'i bsam pa'i che ba nyid kyis nyan thos dang rang sangs rgyas thams cad zil gyis gnon gyi/ rang gi blos rnam par dpyad pas ni ma yin no//byang chub sems dpa'i sa bdun pa 'di la gnas pa'i byang chub sems dpa' ni rang gi yul shes pa la gnas pas nyan thos dang rang sangs rgyas thams cad kyi bya ba las shin tu 'das pa yin no zhes gsungs pa'o/ /lus kyi las la sogs pa tshad med pa smos pa des na mang ba nyid kyis tshad med par ma zad kyi mthus kyang tshad med par rig par bya'o zhes bye brag tu phye ba'i phyir/kye rgyal ba'i sras de ltar byang chub sems dpa' byang chub sems dpa'i sa bdun pa 'di la gnas pa'i tshe/ lus dang ngag dang yid kyi las zab cing dben pa rgyu ba med pa yang thob pa yin te/gong du yongs su tshol ba'i brtson pa yang mi gtong ngo zhes gsungs pa'o/ /de la ring du song ba'i phyir zab pa'o/ /de'i mi mthun pa'i phyogs kyi sgrib pa spangs pa'i phyir dben pa'o/ /de ma yin pa'i 'jig rten las 'das pa dang /'jig rten pa'i sa la mi rgyu ba'i phyir rgyu ba med pa'o/ /nyan thos dang rang sangs rgyas rnams kyi las de'i mtshan ma dang bral yang de lta bu yang ma yin la/ gong du yongs su mi tshol bas/ de tsam la gnas par yang zad do/ /de ltar sa las yang dag par 'das pas zung du 'brel ba'i lam gyi 'bras bu bstan nas/yang dag pa'i mtha' la gnas pa'i phyir dang / 'gog pa mngon sum du mi byed pa'i phyir srid pa mi gtong bas gnas pa'i khyad par ston te/ gang gi phyir byang chub sems dpa' rnam par grol ba'i zla bas smras pa/ kye rgyal ba'i sras byang chub sems dpa'i sa gang yan chad byang chub sems dpa' 'gog pa la snyoms par 'jug /byang chub sems dpa' rdo rje'i snying pos smras pa/ kye rgyal ba'i sras byang chub sems dpa'i sa drug pa yan chad byang chub sems dpa'i 'gog pa la snyoms par 'jug ste/ byang chub sems dpa'i sa bdun pa 'di la gnas pa'i byang chub sems dpa' ni sems kyi skad cig sems kyi skad cig la yang 'gog pa la snyoms par 'jug ste/'gog pa mngon sum du byas zhes ni mi bya'o/ /des na de ni bsam gyis mi khyab pa'i lus dang ngag dang yid kyi las dang ldan pa zhes bya'o/ / kye rgyal ba'i sras de ltar byang chub sems dpa' yang dag pa'i mtha' la gnas pas kyang gnas la 'gog pa yang mngon sum du mi bya'o/ /kye rgyal ba'i sras 'di lta ste dper na mi zhig rgya mtsho chen po'i gru chen por zhugs te/ rgal ba'i thabs la mkhas pas rlung la mkhas pa dang / chu la mkhas pa ni rgya mtsho chen po'i chu'i nyes pas mi gos so/ /kye rgyal ba'i sras de bzhin du byang chub sems dpa' byang chub sems dpa'i sa bdun pa 'di la gnas shing pha rol tu phyin pa'i theg pa'i grur zhugs pa yang / yang dag pa'i mtha' la gnas pas kyang gnas la 'gog pa yang mngon sum du mi byed do zhes gsungs pa'o//de ltar snyoms par 'jug pa thob pa'i gnas pa'i khyad par bstan nas/ sbyor ba gnyen po yongs su 'dzin pa dang bcas pa rnam par brgyad kyis rgyu ba thob pa'i gnas pa'i khyad par ston to / /sbyor ba rnam pa brgyad la de 'khor ba'i sgo yin pas bsod nams mngon par 'du byed pa'i sbyor ba ni gang gi phyir/de ltar ye shes thob pa de ting nge 'dzin dang ye shes kyi stobs bsgom pa mngon par bsgrub pa'i phyir blo dang thabs dang shes rab kyi stobs skyed pa chen pos 'khor ba'i sgo yang ston la/ bsam pa mya ngan las 'das pa la gnas pa yang yin zhes gsungs pa'o//phung po yongs su 'dzin pa'i sbyor ba ni gang gi phyir/'khor mang pos kun nas bskor bar yang snang la/ rtag par rgyun du shin tu dben pa'i sems thob pa yang yin zhes gsungs pa'o/ /bsams bzhin du srid pa yongs su 'dzin pa'i sbyor ba ni gang gi phyir/ smon lam gyi dbang gis khams gsum du skye ba yang mngon par sgrub la/'jig rten gyi nyes pas kyang mi gos pa yin zhes gsungs pa'o/ /'dod pa la 'dod chags kyis kun nas dkris pa dang / bag la nyal yang spangs la 'khrig pa bsten pa yang ston pas rigs kyi rgyud la sbyor ba ni gang gi phyir/zhi zhing rab tu zhi ba yang yin la/ thabs kyis kyang rab tu 'bar te/ de ltar 'bar yang tshig par mi 'gyur ba yin zhes gsungs pa'o/ /'jug par byed pa'i sbyor ba ni gang gi phyir/ sangs rgyas kyi ye shes la yang yongs su 'jug la/ nyan thos dang rang sangs rgyas kyi sa dag kyang 'grub pa yin zhes gsungs pa'o//zas dang nyal ba ni bdud kyi yul yin pa'i phyir/ ston pa la sbyor ba ni gang gi phyir sangs rgyas kyi yul gyi thil du yang son la/ bdud kyi yul na 'dug par snang ba yang yin zhes gsungs pa'o/ /bdud kyi yul na ba dang /rga ba dang 'chi ba 'di gsum ston pas 'chi 'pho'i sbyor ba ni gang gi phyir/ bdud bzhi'i lam las kyang yang dag par 'das la/ bdud kyi spyod yul gyi thil du yang ston pa yin no zhes gsungs pa'o/ /rnam par bzlog pa'i sbyor ba ni rnam pa gsum ste/ lta ba ngan pa la chags pa las rnam par bzlog pa ni gang gi phyir/mu stegs can gyi gnas thams cad na 'dug pa yang snang la/ sangs rgyas kyi mu'i gnas mi 'dor ba'i bsam pa dang ldan pa yang yin zhes gsungs pa'o/ /gnod pa las rnam par bzlog pa ni gang gi phyir/ 'jig rten gyi bya ba thams cad dang ldan par yang snang la/'jig rten las 'das pa'i chos kyi tshul la yang dag par gzhol ba yin zhes gsungs pa'o/ /lha la sogs pa dag pas kyang lhag pa'i lus yongs su 'dzin pas de dag gi chags pa rnam par bzlog pas chags pa rnam par bzlog pa ni gang gi phyir/ lha dang /klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / mi dang / mi ma yin pa dang / brgya byin dang / tshangs pa dang / 'jig rten skyong ba thams cad las lhag pa'i bkod pa rnam par sgrub pa yang thob la/ chos la dga' ba yid la bya ba yang mi spong ba yin zhes gsungs pa'o//bstan pa 'dzin par yang 'gyur ro zhes bya ba ni sbyor ba'i spyod pa yongs su rdzogs pa'i phyir/ slob dpon du grags pas de 'dzin pa'i mchog yin pa'i phyir ro/ /sa 'di ni sems can la phan 'dogs pa dang / chos kyi bzod pas rab tu phye bar rig par bya ste/gang gi phyir de de bas kyang ches sems can la phan 'dogs pa dang / chos kyi bzod pa rnam par dag par 'gyur ro zhes gsungs pa'o/ /sa 'di ni sbyor ba'i mthar phyin par 'gro bas ring du song ba zhes bya'o/ /gser gyi sa le sbram rin po che thams cad kyis spras pa'i dpes ni byang chub kyi phyogs pa la sogs pa sbyor ba'i lam thams cad yongs su rdzogs pas/sa 'di'i dge ba'i rtsa ba rnams shin tu 'od gsal bar yongs su ston te/ gang gi phyir kye rgyal ba'i sras dag 'di lta ste/ dper na gser gyi sa le sbram de nyid rin po che thams cad kyis spras na de bas shin tu bzang zhing 'od gsal bar 'gyur te/de ma yin pa'i rgyan gyi rnam pa gzhan dag gis mi 'phrogs par 'gyur ro/ /kye rgyal ba'i sras dag de bzhin du byang chub sems dpa'i sa bdun pa ring du song ba 'di la gnas pa de'i byang chub sems dpa'i dge ba'i rtsa ba thabs dang shes rab kyis mngon par sgrub pa de dag kyang de bas ches shin tu rab tu byang ba dang /shin tu 'od gsal bar 'gyur te/ nyan thos dang rang sangs rgyas thams cad kyis mi 'phrogs par 'gyur ro zhes gsungs pa'o/ /nyi ma'i 'od kyi dpes ni snga ma bzhin du khyad par yongs su ston te/ gang gi phyir kye rgyal ba'i sras dag 'di lta ste/ dper na nyi ma'i 'od ni skar ma'i tshogs thams cad dang / zla ba'i 'od rnams kyis mi 'phrogs shing / 'dzam bu'i gling na rlan gyi bag yod pa thams cad kyang shin tu skem par byed do/ /kye rgyal ba'i sras dag de bzhin du byang chub sems dpa' sa ring du song ba 'di la gnas pa'i byang chub sems dpa' de'i dge ba'i rtsa ba de dag kyang /nyan thos dang rang sangs rgyas thams cad kyis mi 'phrogs shing / sems can thams cad kyi nyon mongs pa'i rnyog pa yang yongs su skems so zhes gsungs pa'o/ /lhag ma snga ma'i tshul bzhin du sbyar bar bya'o//'phags pa sa bcu pa las sa bdun pa'i rnam par bshad pa rdzogs so// //bam po bcu gcig pa/ sa brgyad pa ni yongs su sbyang ba byas pa'i sa bsdu ba dang / rnam par dag pa'i bzod pa thob pa dang / gnas pa'i khyad par thob pa dang /sangs rgyas kyi zhing yongs su dag par byed pa dang / dbang thob pa dang che ba nyid kyi khyad par dang / nges pa'i tshig rab tu dbye ba dang / rnam pa bdun gyis rnam par gzhag par rig par bya'o/ /de la yongs su sbyang ba bya ba'i sa bsdu ba ni spyi dang so so nas sa bdun bsdus pa'o//spyir bsdu ba ji lta bu zhe na/ bdag med pa rnam pa gnyis gong nas gong du rab tu rtogs pa dang / de'i thabs kyis zin pa'i shes rab kyis mi gnas pa'i lam yongs su sbyong ba dang / sbyor bas bsdus pa'i tshogs yongs su rdzogs par byed pa ste/ gang gi phyir kye rgyal ba'i sras dag byang chub sems dpa' byang chub sems dpa'i sa bdun po dag la rnam par dbye ba legs par byas pa/shes rab dang thabs kyi lam shin tu yongs su sbyongs pa/ tshogs shin tu bsags pa zhes gsungs pa'o/ /so so nas bsdu ba ji lta bu zhe na/sa dang po la sogs pa la smon lam shin tu btab pa la sogs pa ni gang gi phyir/ smon lam chen po shin tu btab pa zhes gsungs pa'o/ /de la sa gnyis pa la ni de lta bas na bdag gis sa rnam pa thams cad yongs su sbyang zhing / mngon par sgrub pa nyid la brtson par bya'o zhes bya ba skabs 'dir de bzhin gshegs pa'i byin gyi rlabs su rig par bya ste/gang gi phyir de bzhin gshegs pa'i byin gyis shin tu brlabs pa zhes gsungs pa'o/ /sa gsum pa la ni 'dod chags dang bral ba las mi nyams pa'i bsam gtan la sogs pa thob pa'i phyir/rang gi dge ba'i rtsa ba stobs bskyed pa rjes su thob pa ste/ gang gi phyir rang gi dge ba'i rtsa ba'i stobs bskyed pa rjes su thob pa zhes gsungs pa'o/ /sa bzhi pa ni rnam par gzhag pa'i chos ston pas shes bya'i sgrib pa rnam par dag pa'i khyad par gyis sangs rgyas kyi chos yid la byed pa dang ldan pa nyid de/gang gi phyir de bzhin gshegs pa'i stobs dang / mi 'jigs pa dang sangs rgyas kyi chos ma 'dres pa yid la byed pa dang ldan pa zhes 'dir gsungs pa'o/ /lnga pa la ni rnam par dag pa la sems kyi bsam pa mnyam pa nyid dag gi bsam pa la sogs pa shin tu yongs su sbyangs par rig par bya ste/gang gi phyir lhag pa'i bsam pa'i brnag pa shin tu yongs su sbyangs pa zhes 'dir gsungs pa'o/ /sa drug pa la ni snying rje chen po sngon du 'gro ba dang / dbang byed pa dang rten cing 'brel par 'byung ba la rnam par spyod pas bsod nams dang ye shes kyi stobs kyis mngon par 'phags pa de nyid gang gi phyir/bsod nams dang ye shes kyi stobs kyis mngon par 'phags pa zhes 'dir gsungs pa'o/ /sa bdun pa la ni lam gzhan rtsom pa'i khyad par rnams kyis sems can rnams la sbyor ba mi gtong ba nyid de/ gang gi phyir snying rje dang byams pa chen pos sems can thams cad la sbyor ba mi gtong ba zhes gsungs pa'o//sems can gyi khams tshad med pa la sogs pa la 'jug pa rnams kyis ye shes kyi lam tshad med pa dang ldan pa nyid du rig par bya ste/ gang gi phyir ye shes kyi lam tshad med pa dang ldan pa de zhes gsungs pa'o//de ltar sa brgyad pa'i yongs su sbyang ba byas pa'i sa bsdus pa rnam par gzhag pa byas nas/ rnam par dag pa'i bzod pa thob pa rnam par gzhag pa yongs su ston te / mi skye ba'i chos la bzod pa thob pas rnam par dag pa'i bzod pa 'thob bo/ /de rnam par dag pa nyid lhun gyis grub par rig par bya ste/bzod pa de yang mi skye ba rnam pa bzhi la rig par bya'o/ /mi skye ba rnam pa bzhi ni yod pa mi skye ba dang / rang bzhin gyis mi skye ba dang / grangs kyi bye brag mi skye ba dang / las kyi bye brag mi skye ba'o/ /de la yod pa mi skye ba ni rnam pa bdun mi skye ba ste/ yod pa rnam pa bdun la rnam par byang ba'i phyogs la chos rnam pa snga nas yod pa de'i gnyen por chos thams cad gzod ma nas ma byung ba nyid la 'jug go zhes gsungs so/ /gsar du skye ba de'i gnyen por ma skyes pa nyid ces gsungs pa'o / /mtshan nyid yod pa de'i gnyen por mtshan med pa nyid ces gsungs so//phyi ma'i mtha' yod pa de'i gnyen por byung ba med pa nyid ces gsungs pa'o / /kun nas nyon mongs pa'i phyogs la sngon gyi mtha' na yod pa de'i gnyen por 'jig pa med pa nyid ces gsungs so/ /sems can rnams rdzogs pa yod pa de'i gnyen por thug pa med pa nyid ces gsungs so//rnam par byang ba'i phyogs la kun nas nyon mongs pa can nyid yod pa de'i gnyen por 'jug pa med pa nyid ces gsungs pa'o/ /rang bzhin gyis skye ba med pa ni chos la bdag med pa'o/ /de na bdag med pa'i rang bzhin te/ gang gi phyir dngos po med pa'i ngo bo nyid ces gsungs pa'o//bzod pa 'di ni de la dmigs pa'i phyir dngos po med pa la dmigs pa'i phyir yang ma yin te/ bdag med pa ni gnyis med pa'i mtshan nyid yin pa'i phyir ro/ /grangs kyi bye brag mi skye ba ni kun nas nyon mongs pa dang / rnam par byang ba'i chos rnams dus gsum du 'bri ba'am 'phel ba med pa'i phyir te/gang gi phyir thog ma dang / dbus dang / tha ma mnyam pa nyid ces gsungs pa'o/ /las kyi bye brag mi skye ba ni de bzhin nyid rnam par dag pa ltar sangs rgyas kyi ye shes tha dad du bya ba med pa ste/ gang gi phyir de bzhin nyid ltar thams cad mkhyen pa'i ye shes rnam par mi rtog pa rtogs par bya ba nyid las brtsams nas 'jug go zhes gsungs pa'o//de ltar mi skye ba'i chos la bzod pa'i dmigs pa bstan nas/ rnam par smin pa dang / rlom sems dang / yul rnam par rig pas bsdus pa'i rnam par rtog pa'i rang bzhin gyi 'du shes dang bral bas 'jug pa ston te/gang gi phyir de thams cad du sems dang / yid dang / rnam par shes pa'i rnam par rtog pa'i 'du shes dang bral zhing zhes gsungs pa'o/ /'du shes smos pa ni mi mthun pa'i phyogs kyi 'du shes dgag pa'i phyir te/ gnyen po'i 'du shes de la yod pa'o//de ni rnam pa gsum gyis sa 'og ma las khyad par du 'phags pa ste/ lhun gyis grub pas khyad par du 'phags pa ni gang gi phyir thogs pa med ces gsungs pa'o/ /khyab pas khyad par du 'phags pa ni gang gi phyir nam mkha' 'dra zhes gsungs pa'o/ /rang gi ngang gis de bzhin nyid du zhugs pa'i phyir mi g.yo bas khyad par du 'phags pa ni gang gi phyir/bla gab med pa'i rang bzhin du zhugs pas mi skye ba'i chos la bzod pa thob pa zhes bya'o zhes gsungs pa'o/ /de ltar sa brgyad pa'i rnam par dag pa'i bzod pa 'thob pa rnam par gzhag pa bstan nas/gnas pa'i khyad par 'thob pa ston to/ /de la gnas pa'i khyad par 'thob pa ni gnas pa zab mo thob pa'o/ /de ni zab pa nyid rnam pa bdun du rig par bya ste/ /ring ba'i sa la 'jug pas zab pa nyid ni gang gi phyir/ kye rgyal ba'i sras dag de la bzod pa de lta bu dang ldan pa'i byang chub sems dpa' ni byang chub sems dpa'i sa mi g.yo ba thob ma thag tu byang chub sems dpa'i gnas pa zab mo ring ba'i ye shes zhes gsungs pa'o//byang chub sems dpa' sa dag pa pa rnams dang / thun mong ba'i zab pa nyid ni gang gi phyir tha mi dad pa zhes gsungs pa'o/ / gzung ba dang 'dzin par snang ba med par gyur pas yul zab pa nyid ni gang gi phyir/ mtshan ma thams cad dang bral ba 'du shes kyi 'dzin pa ngan pa thams cad las phyir log pa zhes gsungs pa ste/ mi mthun pa'i phyogs kyi 'du shes dgag pa'i phyir 'dzin pa ngan pa smos so/ /bdag dang gzhan gyi don la zhugs pas sgrub pa zab pa nyid ni gang gi phyir tshad med pa zhes gsungs pa'o//zil gyis mi gnon pa zab pa nyid ni gang gi phyir/ nyan thos dang rang sangs rgyas thams cad kyis mi 'phrogs pa zhes gsungs pa'o/ /mi mthun pa'i phyogs srab pa zab pa nyid ni gang gi phyir dben pa zhes gsungs pa'o//gnyen po la mngon du phyogs pa zab pa nyid ni gang gi phyir/ thams cad las dben pa mngon du gyur pa rjes su thob pa yin no zhes gsungs pa ste/ de bzhin nyid ni thams cad las dben pa'o/ /'gog pa'i snyoms par 'jug pa'i dpes ni gnas pa de'i zhi ba nyid yongs su ston te/gang gi phyir kye rgyal ba'i sras dag 'di lta ste dper na dge slong rdzu 'phrul dang ldan pa/ sems kyi dbang mchog thob pa mthar gyi sa dgu pa 'gog pa la snyoms par zhugs pa ni g.yo ba dang / rlom sems thams cad dang bral ba yin no//kye rgyal ba'i sras dag de bzhin du byang chub sems dpa' yang byang chub sems dpa'i sa brgyad pa mi g.yo ba 'di thob ma thag tu 'bad pa thams cad dang bral te/ lhun gyis grub pa'i chos nyid thob cing lus dang / ngag dang / sems kyi rtsol ba dang bral nas rnam par smin pa la gnas pa yin no zhes gsungs pa'o//de la g.yo ba dang rlom sems thams cad dang bral ba ni de dag gi gnas sems med pa'i phyir ro/ /'bad pa thams cad dang bral ba ni 'bad pa dang bcas pa'i sa las yang dag par 'das pa'i phyir ro/ /lhun gyis grub pa'i chos nyid thob pa ni de'i gnyen po rnyed pa'i phyir ro//da ni lhun gyis grub cing rtsol ba med pa nyid dang / rnam par smin pa las gnas pa nyid kyi lhun gyis grub pa'i chos 'thob pa de yang dag par ston te/ rtsol ba dang mi mthun pa'i gnas thob pa'i phyir ro/ / rnam par smin pa la gnas pa nyid ni kun gzhi rnam par shes pa'i de bzhin nyid la shin tu gnas pa nyid yin par rig par bya'o/ /gnyid kyis log pa la sad pa'i dbas ni gnas pa 'di la 'du shes 'gog pa'i nyes pa sel to/ /'du shes yod du zin kyang bzod pa de ni de kho na shes pa dang ldan par ston to//gang gi phyir kye rgyal ba'i sras dag 'di lta ste/ dper na mi zhig gnyid kyis log pa'i rmi lam na bdag chu bo chen pos khyer ba snyam byed la/ de de nas ci phyin du 'bad cing rtsol ba chen po rtsol rtsol ba las/ de 'bad cing rtsol ba chen po de nyid kyis sad na sad ma thag tu 'bad cing rtsol ba thams cad dang bral bar 'gyur ro//kye rgyal ba'i sras dag de bzhin du byang chub sems dpa' yang sems can gyi tshogs chu bo chen po bzhis khyer bar shes nas 'bad cing rtsol ba chen po rtsom mo/ /de brtson 'grus chen po brtsams pas byang chub sems dpa'i sa mi g.yo ba thob ma thag tu 'bad pa thams cad dang bral bar 'gyur te/de'i gnyis su kun du spyod pa dang / mtshan ma kun du spyod pa thams cad kyi thams cad du mi snang bar 'gyur ro zhes gsungs pa'o/ /de la rnam par dag pa'i dbang du byas nas/ 'khor ba dang mya ngan las 'das pa gnyis su kun du spyod pa dang /yul la yongs su spyod pa'i dbang du byas nas mtshan ma kun du spyod pa snang bar mi 'gyur ro/ /tshangs pa'i 'jig rten du skyes pa'i dpes ni sa 'og ma'i de dag kun du mi 'byung bas rnam par smin pa thob ste/ rgyang ring bas khyad par yongs su ston te/ gang gi phyir kye rgyal ba'i sras dag 'di lta ste/ dper na tshangs pa'i 'jig rten du skyes shing gnas pa la ni 'dod pa na spyod pa'i nyon mongs pa rnams kun du mi 'byung ngo / /kye rgyal ba'i sras dag de bzhin du byang chub sems dpa'i sa mi g.yo ba la gnas pa'i byang chub sems dpa'i sa la yang sems dang /yid dang / rnam par shes pa kun du 'byung ba yang kun du mi 'byung ste/ de sangs rgyas la kun du 'byung ba'am/ byang chub la kun du 'byung ba'am/ byang chub sems dpa' la kun du 'byung ba'am/ byang chub kyi spyod pa la kun du 'byung ba'am/ rang sangs rgyas la kun du 'byung ba'am/ nyan thos la kun du 'byung ba'am/ mya ngan las 'das pa la kun du 'byung ba'am/ dgra bcom pa la kun du 'byung ba'am/ phyir mi 'ong ba la kun du 'byung ba'am/ lan cig phyir 'ong ba la kun du 'byung ba'am/ rgyun tu zhugs pa la kun du 'byung ba thams cad kyang kun du mi 'byung na/'jig rten pa la kun du 'byung ba rnams lta smos kyang ci dgos zhes gsungs pa'o/ /de la 'jug pa dang / log pa'i phyogs la sems la sogs pa dang / sangs rgyas la sogs pa la kun du 'byung ba med pa'i phyir ro/ / sangs rgyas la sogs pa la kun du 'byung ba ni theg pa chen po dang / nyan thos kyi theg pa'i bye brag dang / theg pa chen po la yang gang zag dang / chos kyi bye brag dang / nyan thos kyi theg pa la yang chos dang / slob pa dang / mi slob pa'i bye brag gis bstan par rig par bya'o/ /de la 'jug pa dang ldog pa'i phyogs la sems la sogs pa dang /sangs rgyas la sogs pa la kun du 'byung ba med ces bya ba de la 'jug pa'i phyogs la sems la sogs pa kun du 'byung ba med pa ni gang gi phyir sems dang / yid dang / rnam par shes pa'i kun du 'byung ba kun du mi 'byung ste zhes gsungs pa'o//log pa'i phyogs la sangs rgyas la sogs pa la kun du 'byung ba med pa ni sangs rgyas la kun du 'byung ba'am zhes bya ba nas brtsams te/ rgyun du zhugs pa la kun du 'byung ba yang kun du mi 'byung na zhes bya ba'i bar du gsungs pa'o/ /theg pa chen po dang nyan thos kyi theg pa'i bye brag de la theg pa chen po'i bye brag ni sangs rgyas dang /byang chub dang byang chub sems dpa' dang / byang chub sems dpa'i spyod ba la kun du 'byung ba rnams so/ /nyan thos kyi theg pa'i bye brag ni nyan thos dang / mya ngan las 'das pa dang / dgra bcom pa la sogs pa la kun du 'byung ba'o//theg pa chen po la gang zag gi bye brag ni rang sangs rgyas dang byang chub sems dpa' la kun du 'byung ba'o/ /chos kyi bye brag ni byang chub dang / byang chub sems dpa'i spyod pa la kun du 'byung ba'o/ /nyan thos kyi theg pa'i chos dang /slob pa dang mi slob pa'i gang zag gi bye brag la chos kyi bye brag ni mya ngan las 'das pa la kun du 'byung ba'o/ /mi slob pa'i bye brag ni dgra bcom pa la kun du 'byung ba'o/ /slob pa'i bye brag ni phyir mi 'ong ba la sogs pa kun du 'byung ba'o/ /kye rgyal ba'i sras dag de ltar byang chub sems dpa'i sa mi g.yo ba 'di la gnas pa'i byang chub sems dpa' sngon gyi smon lam gyi stobs bskyed pa dang /chos kyi sgo'i rgyun de la gnas pa de la/ sangs rgyas bcom ldan 'das rnams de bzhin gshegs pa'i ye shes nye bar sgrub pa mdzad de/ de la 'di skad ces kyang bka' stsal te/rigs kyi bu legs so legs so sangs rgyas kyi chos rjes su thob par bya ba la/ 'di ni don dam pa'i bzod pa yang yin na 'on kyang gang nged kyi stobs bcu dang / mi 'jigs pa bzhi la sogs pa sangs rgyas kyi chos phun sum tshogs pa de khyod la med kyis sangs rgyas kyi chos phun sum tshogs pa de yongs su btsal ba'i phyir brtson 'grus rtsom shig /bzod pa'i sgo 'di nyid kyang ma dor cig ces bya ba de la de bzhin gshegs pa'i ye shes nye bar sgrub pa 'dis ni de la gnas pas mngon par dga' ba tsam gyis chog par 'dzin pa zlog par mdzad de/byas pa bsngags pa dang / mi byed pa bskul ba dang / de la gnas pa mi 'dor bas sangs rgyas kyi chos phun sum tshogs pa ma thob pa thob par byed nus pa'i dbang du mdzad nas zlog par mdzad do/ /yang khyim pa dang / rab tu byung ba'i phyogs dang / kun nas dkris pa dang / bag la nyal gyis kun nas nyon mongs par gyur pa'i sems can rnams la sems can gyi don bya ba don che ba nyid kyi dbang du mdzad nas zlog par mdzad de/ gang gi phyir rigs kyi bu khyod kyis de ltar zhi ba'i rnam par thar pa thob kyang / byis pa so so'i skye bo ma zhi ba rab tu ma zhi ba nyon mongs pa sna tshogs kun du 'byung bar gyur pa rnam par rtog pa rnam pa sna tshogs kyis g.yen spyo ba 'di dag la soms shig ces gsungs pa'o//de la ma zhi ba ni nyon mongs pa'i kun nas dkris pa'o/ /rab tu ma zhi ba ni de'i bag la nyal ma spangs pa'o/ /nyon mongs pa sna tshogs kun du 'byung bar 'gyur ba ni khyim pa'i phyogs so//rnam par rtog pa rnam pa sna tshogs kyis g.yen spyo ba ni rab tu byung ba'i phyogs so/ /yang smon lam dang sems can yongs su smin par bya ba dang ye shes kyi tshogs 'bras bu med par 'gyur ba'i dbang du mdzad nas kyang zlog par mdzad de/ gang gi phyir yang rigs kyi bu khyod sngon gyi smon lam dang /sems can gyi don thob par bya ba dang / ye shes kyi sgo bsam gyis mi khyab pa dran par gyis shig ces gsungs pa'o/ /yang thun mong ma yin pa'i don du dub pa 'bras bu med pa'i dbang du mdzad nas kyang zlog par mdzad de/ gang gi phyir yang rigs kyi bu 'di ni chos rnams kyi chos nyid de/de bzhin gshegs pa rnams byung yang rung ma byung yang rung chos kyi dbyings 'di ni gnas pa nyid de/ 'dis ni de bzhin gshegs pa rnams nyi tshe rab tu dbye bar bya ba ma yin gyi/ nyan thos dang rang sangs rgyas thams cad kyang rnam par mi rtog pa'i chos nyid 'di 'thob bo zhes gsungs pa'o//de'i 'og tu sems can gyi don mdzad pa las brtsams nas lus tshad med pa la sogs pas sangs rgyas kyi chos phun sum tshogs pa de'i nus pa yongs su ston te/ sems can gyi don mdzad pa de yang gnas gang gis mdzad pa ni gang gi phyir yang rigs kyi bu khyod nged kyi lus tshad med pa nyid ces gsungs pa'o//kun rdzob dang don dam pa'i ye shes gang gis mdzad pa ni gang gi phyir ye shes tshad med pa nyid ces gsungs pa'o/ /zhing yongs su dag pa gang gis mdzad pa ni gang gi phyir sangs rgyas kyi zhing tshad med pa nyid ces gsungs pa'o//gdul bya'i spyod pa mkhyen pa gang gis mdzad pa ni gang gi phyir/ ye shes mngon par sgrub pa tshad med pa nyid ces gsungs pa'o/ /gang gis bsdus te mdzad pa ni gang gi phyir 'od kyi dkyil 'khor tshad med pa nyid ces gsungs pa'o/ /bshad pa gang gis mdzad pa ni gang gi phyir/sgra skad kyi yan lag tshad med pa nyid la ltos te zhes gsungs pa'o/ /khyod kyis kyang de bzhin du mngon par sgrub pa skyed cig ces bya ba ni de bzhin gshegs pa rnams sems can gyi don mdzad pa de ston to/ /yang de bzhin gshegs pa rnams kyi bde bar gnas pa'i khyad par yang ston te/gang gi phyir rigs kyi bu gang khyod kyis chos thams cad la rnam par mi rtog pa'i snang ba 'di ni khyod kyi snang ba gcig pur zad do/ /rigs kyi bu de bzhin gshegs pa rnams la ni chos snang ba'i sgo 'di 'dra ba yongs su mtha' yas par song ba mdzad pa mtha' yas shing /'brel pa mtha' yas pa yin gyis de dag thob par bya ba'i phyir mngon par sgrub pa skyed cig ces gsungs pa'o/ /de la mtha' yas par gyur pa dag ni sgo tha dad pa'i phyir ro/ /mdzad pa mtha' yas pa dag ni mdzad pa tha dad pa'i phyir ro//'brel pa mtha' yas pa dag ni gong nas gong du rten pa tha dad pa'i phyir ro/ /yang 'jig rten gyi khams dang / sems can dang chos rab tu dbye ba ji ltar mthong ba rnams la lta ba tsam zhig bya ba'i phyir tshegs chung ba'i dbang du mdzad nas zlog par mdzad de/ gang gi phyir yang rigs kyi bu khyod kyis phyogs bcu'i zhing tshad med pa nyid dang /sems can tshad med pa nyid dang / chos rnam par dbye ba tshad med pa nyid la ltos te/ de dag thams cad ji lta ba bzhin du khong du chud par gyis shig ces bka' stsal to/ /kyi rgyal ba'i sras de ltar sa de lta bu dang ldan pa'i byang chub sems dpa' la sangs rgyas bcom ldan 'das de dag ye shes mngon par sgrub pa'i sgo tshad med pa de dag la sogs pa gang dag gis byang chub sems dpa' ye shes rnam par dbye ba tshad med pas mngon par sgrub pa'i las mngon par sgrub par mdzad do//kye rgyal ba'i sras khyod mos par bya'o//khyod kyis khong du chud par bya'o/ /gal te sangs rgyas bcom ldan 'das de dag gis byang chub sems dpa' de la mngon par sgrub pa'i sgo rnams su gzhug pa ma mdzad du zin na/ de'i de nyid yongs su mya ngan las 'das par 'gyur te/ sems can thams cad kyi bya ba yang rgyun gcad par 'gyur ro zhes gsungs pa'o//de la de nyid yongs su mya ngan las 'das par 'gyur te zhes bya ba ni ye shes nye bar sgrub pa'i dgos pa ston to / /yang sangs rgyas bcom ldan 'das de dag ni byang chub sems dpa' de la skad cig gcig la ye shes kyi las gang mngon par sgrub pa la dang po'i sems bskyed pa nas bzung ste/sa bdun pa la gnas pa dang ldan pa'i bar gyi rtsom pa snga ma des brgya'i char yang nye bar mi 'gro/ stong gi cha dang / 'bum gyi cha dang / bye ba'i cha dang / bye ba brgya'i cha dang / bye ba stong gi cha dang /bye ba 'bum gyi cha dang / bye ba khrag khrig 'bum gyi char yang nye bar mi 'gro'o/ /grangs dang / cha dang / bgrang ba dang / bskrun pa dang / rgyur yang nye bar mi 'gro ba nas dpe'i bar du yang mi bzod ba de snyed du tshad med pa'i ye shes mngon par sgrub pa'i las nye bar sgrub pa mdzad do//de ci'i phyir zhe na/ kye rgyal ba'i sras 'di ltar sngan chad ni lus gcig gis mngon par bsgrub pas spyod pa mngon par bsgrub par gyur gyi/ 'di la gnas pa'i byang chub sems dpa' ni lus rnam par g.yo ba tshad med pa dang / sgra skad mngon par sgrub pa tshad med pa dang /ye shes mngon par sgrub pa tshad med pa dang / skye ba mngon par sgrub pa tshad med pa dang / zhing yongs su dag par bya ba tshad med pa dang / sems can yongs su smin par bya ba tshad med pa dang / sangs rgyas la mchod pa dang rim gro bya ba tshad med pa dang / chos kyi tshul khong du chud pa tshad med pa dang /mngon par shes pa mngon par sgrub pa'i stobs skyed pa tshad med pa dang / 'khor gyi dkyil 'khor rnam par phye ba tshad med pas byang chub sems dpa'i spyod pa'i stobs yang dag par 'grub ste/ tshad med pa dang ldan pa'i lus dang / ngag dang yid kyi las kyis byang chub sems dpa'i spyod pa thams cad kyi stobs mi g.yo ba'i tshul gyis yang dag par 'grub bo zhes bya ba de la/de snyed du tshad med pa'i ye shes mngon par 'grub pa'i las nye bar sgrub pa mdzad do zhes bya ba ni gnas pa de'i yon tan yongs su 'dzin pa'i rgyu nyid kyi khyad par te/ rgyu dang bcas par brjod pa yongs su ston to//grangs dang cha la sogs pa'i bshad pa ni mtshams sbyar bar rig par bya'o/ /rgyu ni gcig dang gcig ni gnyis kyi rgyu'o/ /gnyis dang gcig ni gsum gyi rgyu'o/ /gnyis dang gnyis ni bzhi'i rgyu'o zhes bya ba la sogs pa'o/ / dper yang mi bzod ces bya ba ni cha gang gis dpag pa'o/ /lus rnam par phye ba tshad med pa zhes bya ba ni byang chub sems dpa' thams cad kyi lus rnams bdag gi lus nyid du mos pa'o/ /sgra skad mngon par sgrub pa la sogs pa yang / de bzhin du tshad med pa nyid du rig par bya'o/ /bcu pa 'di ni sems can yongs su smin par bya ba dang /tshogs bsags pa dang sgrib pa rnam par dag pa'i dbang du byas par rig par bya ste/ lus dang ngag la gnas bshad pa gang gis/ ye shes la brten pa gang gis/ skye ba yongs su 'dzin pa gang gis/ zhing gang du/ sems can gang yongs su smin par byed pa dang / sangs rgyas la mchod pa dang / rim gro bya ba dang / chos kyi tshul khong du chud pa gnyis kyis ji ltar bsod nams dang ye shes kyi tshogs bsags pa dang / ji ltar mngon par shes pa la sgrib pa dang / mngon par rdzogs par byang chub pa la sgrib pa rnam par sbyong ba ste/'di thams cad du yang tshad med pa dang ldan pa'i lus dang / ngag dang yid kyi las su rig par bya'o/ /mi g.yo ba'i tshul gyis zhes bya ba ni rgyun mi 'chad par sogs pa'o/ /kye rgyal ba'i sras dag 'di lta ste dper na rgya mtsho chen por 'gro ba'i gru bo che ni rgya mtsho chen po la ma thug gi bar du ched du bskyod cing 'gro bar bya ba yin te/rgya mtsho chen po la zhen ma thag tu rlung gi dkyil 'khor gyis bskyod nas ched du bskyod mi dgos par 'gro ste des na rgya mtsho chen po la nyin gcig gis ci chod pa de ni sngon ched du bskyod cing 'gro bas/ lo brgyar yang de srid du tshad med par phyin par mi nus so//kye rgyal ba'i sras de bzhin du byang chub sems dpa'i dge ba'i rtsa ba'i tshogs shin tu bsags pa/ theg pa chen po la yang dag par sgrub pa yang byang chub sems dpa'i spyod pa'i rgya mtsho chen por phyin nas/ lhun gyis grub pa'i ye shes kyis yud tsam cig la thams cad mkhyen pa'i ye shes ji tsam gnon pa de ni sngon gyi ched du bya ba'i las kyi bskal ba 'bum du yang de snyed du dpag tu med pa gnod par mi nus so zhes bya ba'i gru bo che'i dpes ni gnas pa de'i mngon par shes pa myur ba'i rgyu nyid kyi khyad par yongs su ston to//dge pa'i rtsa ba'i tshogs shin tu bsags pa zhes bya ba ni sa bdun po rnams kyis theg pa chen po yang dag par bsgrubs pa'o//byang chub sems dpa'i spyod pa'i rgya mtshor phyin nas zhes bya ba ni sa brgyad pa'o// // de ltar gnas pa'i khyad par thob pas sa brgyad ba rnam par gzhag nas/ sangs rgyas kyi zhing yongs su dag par byed pas rnam par 'jog ste/de la sangs rgyas kyi zhing yongs su dag bar byed pa ni snod kyi 'jig rten la dbang ba'i sbyor ba dang / sems can gyi 'jig rten la dbang ba'i sbyor ba dang / ye shes mngon par rdzogs par byang chub pa la dbang ba'i sbyor ba dang / dbang ba'i sbyor ba rnam la gsum gyis rig par bya'o//de la snod kyi 'jig rten la dbang ba ni rnam pa lnga ste/ gang 'dod pa de kun du ston pa'am/ mi snang bar byed pa'am/ ci 'dra bar 'dod pa de 'dra ba ston pa dang / dus ji srid du 'dod pa dus de srid du ston pa dang / bsdus pa dang rgyas pa ji ltar 'dod pa bzhin du byed pa dang /ji snyed 'dod pa de srid ston pa ste/ kye rgyal ba'i sras byang chub sems dpa'i sa brgyad pa thob pa'i byang chub sems dpa' de ni/ thabs mkhas pa'i ye shes kyis mngon par sgrub pa lhun gyis grub pa la zhugs pa'i byang chub sems dpa'i blo gros chen pos thams cad mkhyen pa'i ye shes la rnam par dpyod cing 'jig rten gyi khams 'byung ba la yang rnam par dpyod do //'jig rten gyi khams 'jig pa la yang rnam par dpyod do/ /de 'jig rten ji ltar 'jig pa de yang rab tu shes so/ /'jig rten ji ltar 'chags pa de yang rab tu shes so zhes bya ba la 'jig rten gyi khams 'byung ba la sogs pa shes pa de ni snod kyi 'jig rten la dbang ba'i rnam pa dang po'i sbyor ba ste gang 'dod pa de ston pa'am/mi snang bar byed ces bya ba de'i'o/ /las sogs pa gang gis 'jig rten 'jig pa de yang rab tu shes so/ /las zad pa gang gis 'jig rten 'chags pa de yang rab tu shes so zhes bya ba la sogs pa dang /zad pa shes pa ni gnyis pa ste/ ci 'dra bar 'dod pa de 'dra bar ston to zhes bya ba de'i'o/ /dus ji srid du 'jig rten 'jig pa de yang rab tu shes so/ /dus ji srid du 'jig rten 'chags pa de yang rab tu shes so//'jig rten zhig nas dus ji srid du gnas pa de yang rab tu shes so/ /'jig rten 'chags nas dus ji srid cig tu gnas pa de yang rab tu shes so zhes bya ba la dus ji srid du 'jig pa la sogs pa shes pa ni gsum pa'i ste/ dus ji srid du 'dod pa de srid du ston to zhes bya ba de'i'o//de sa'i khams chung bar yang rab tu shes so/ /rgya chen por gyur pa dang / tshad med pa dang / rnam par che ba yang rab tu shes so/ /de chu'i khams chung ba yang rab tu shes so/ /rgya chen por gyur pa dang / tshad med pa dang / rnam par phye ba yang rab tu shes so/ /de me'i khams chung ba yang rab tu shes so//rgya chen por gyur pa dang / tshad med pa dang / rnam par phye ba yang rab tu shes so/ /de rlung gi khams chung ba yang rab tu shes so/ /rgya chen por gyur pa dang / tshad med pa dang / rnam par phye ba yang rab tu shes so/ /de rdul phra rab kyi rdul phra ba yang rab tu shes so//rnam par phye ba yang rab tu shes so/ /rdul phra rab kyi rdul tshad med pa / rnam par phye ba la mkhas pa yang rab tu shes so/ /'jig rten gyi khams gang na sa'i khams kyi rdul phra rab kyi rdul ji snyed yod pa de dag kyang rab tu shes so/ /chu'i khams kyi rdul phra rab kyi rdul ji snyed yod pa de dag kyang rab tu shes so//me'i khams kyi rdul phra rab kyi rdul ji snyed yod pa de dag kyang rab tu shes so/ /rlung gi khams kyi rdul phra rab kyi rdul ji snyed yod pa de dag kyang rab tu shes so/ /sems can gyi lus la rdul phra rab kyi rdul ji snyed yod pa de dag kyang rab tu shes so//zhing gi tshogs la rdul phra rab kyi rdul ji snyed yod pa de dag kyang rab tu shes so/ /de sems can gyi lus rags pa dang / lus phra ba dang / lus rnam par phye ba yang rab tu shes so/ /sems can dmyal ba pa'i lus kyi gnas kyi rdul phra rab kyi rdul ji snyed yod pa de dag kyang rab tu shes so//dud 'gro'i skye gnas pa'i lus kyi gnas kyi rdul phra rab kyi rdul ji snyed yod pa de dag kyang rab tu shes so/ /gshin rje'i 'jig rten pa'i lus kyi gnas kyi rdul phra rab kyi rdul ji snyed yod pa de dag kyang rab tu shes so/ /lha ma yin gyi 'jig rten gyi lus kyi gnas kyi rdul phra rab kyi rdul ji snyed yod pa de dag kyang rab tu shes so//lha'i lus kyi gnas kyi rdul phra rab kyi rdul ji snyed yod pa de dag kyang rab tu shes so/ /mi'i lus kyi gnas kyi rdul phra rab kyi rdul ji snyed yod pa de dag kyang rab tu shes so zhes bya'o/ /sa'i khams chung ba la sogs pa shes pa nas mi'i lus kyi rdul phra rab kyi rdul gyi bar du shes pa ni bzhi pa ste/bsdus pa dang rgyas pa ji ltar 'dod pa bzhin du byed ces bya ba de'i'o/ /de ltar rdul phra rab kyi rdul rab tu dbye ba shes pa la zhugs pa des 'dod pa'i khams 'jig pa yang rab tu shes so/ /gzugs kyi khams 'jig pa dang /gzugs med pa'i khams 'jig pa yang rab tu shes so/ /'dod pa'i khams 'chags pa dang / gzugs kyi khams 'chags pa dang / gzugs med pa'i khams 'chags pa yang rab tu shes so/ /'dod pa'i khams chung ba yang rab tu shes so/ /rgya chen por gyur pa dang /tshad med pa dang rnam par phye ba yang rab tu shes so/ /gzugs kyi khams dang gzugs med pa'i khams chung ba yang rab tu shes so/ /rgya chen por gyur pa dang / tshad med pa dang rnam par phye ba yang rab tu shes so/ /khams gsum pa rnam par dpyad pa zhes pa khong du chud par bya ba'i phyir legs par mngon par bsgrub pa'i ye shes kyi snang ba dang ldan zhing sems can rnams kyi lus rab tu dbye ba shes pa la mkhas la/lus rnam par dbye ba shes pa la mkhas pas skye ba mngon par sgrub pa rnams la blo gtong ste/ de sems can yongs su smin par bya ba'i phyir/sems can rnams kyi skye ba dang / lus yang dag par 'grub pa ci 'dra ba de lta bur rang gi lus byin gyis rlob bo/ /de stong gsum gyi stong chen po'i 'jig rten gyi khams gcig rgyas par bkang nas/ ji ltar sems can rnams bla na med pa yang dag par rdzogs pa'i byang chub tu yongs su smin par 'gyur bas/sems can lus tha dad pa la mos pa rnams la snang ba dang shes pa'i rjes su 'gro bas rang gi lus de kho na bzhin du skye bar mngon par sgrub bo/ /stong gsum gyi stong chen po'i 'jig rten gyi khams gnyis sam/ gsum mam/ bzhi'am/ lnga'am/ bcu'am/ nyi shu'am/ sum cu'am/ bzhi bcu'am/ lnga bcu nas brjod du med pa'i yang brjod du med pa'i bar dag rgyas par bkang ste/ sems can lus tha dad pa la mos pa rnams la snang ba dang / shes pa'i rjes su 'gro bas rang gi lus de kho na bzhin du skye bar mngon par sgrub bo//de ye shes de lta bu dang ldan pas sangs rgyas kyi zhing gcig nas kyang mi g.yo la/ sangs rgyas kyi zhing brjod du med pa rnams dang / 'khor gyi dkyil 'khor rnams na yang snang bar gyur pa yin no zhes bya ba 'dod pa'i khams 'jig pa la sogs pa shes nas sangs rgyas kyi zhing gcig nas kyang mi g.yo ba la zhes bya ba'i bar lnga pa'i ste/ji snyed pa 'dod pa de snyed ston zhes bya ba'i de'i'o/ /de la sa'i khams la sogs pa ni yul dang mtshan nyid kyis shes par rig par bya ste/ ji ltar yul gyis she na/ chung ba ni mnyam par ma bzhag pa'i sa pa'i rnam par smin pa'i rnam par shes pa'i yul lo//rgya chen por gyur pa ni mnyam par bzhag pa'i sa pa'i rnam par smin pa'i rnam par shes pa'i yul lo/ /tshad med pa ni de bzhin gshegs pa'i yul lo/ /ji ltar na mtshan nyid kyis she na/ rang dang spyi'i mtshan nyid rnam par dbye ba'i sgo nas te/lus rags pa dang / phra ba ni gzugs can dang gzugs can ma yin pa'i sems can rnams kyi lus su rig par bya ste go rims bzhin no/ /'dod pa'i khams la sogs pa yang / yul dang mtshan nyid kyis shes par bya ste/ 'dod pa'i khams kyi mi rnams kyi yul ji snyed pa ni chung ba'o//lha rnams kyi yul ni rgya chen por gyur pa'o/ /gzugs kyi khams kyi rtog pa dang / dpyod pa dang bcas pa'i yul ni chung ba'o/ /rtog pa med pa dpyod pa med pa'i yul ni rgya chen por gyur pa'o/ /gzugs med pa'i khams kyi sngar chos 'di par gyur pa'i so so'i skye po rnams kyi yul ni chung ba'o//nyan thos dang rang sangs rgyas rnams kyi yul ni rgya che ba'o/ /de bzhin gshegs pa thams cad kyi yul ni tshad med pa'o/ /sems can rnams kyi lus rab tu dbye ba shes pa la mkhas pa dang / lus rnam par dbye ba shes pa la mkhas pa lus ma 'dra ba dang 'dra ba shes pa la mkhas pa ste/rigs gzhan dang rang gi rigs kyi bye brag gis rig par bya'o/ /'khor gyi dkyil 'khor rnams su snang bar gyur pa yin zhes bya ba ni de 'dra ba'i lus ston to// // de ltar snod kyi 'jig rten la dbang ba'i sbyor bas sangs rgyas kyi zhing yongs su dag pa bya ba bstan nas/ sems can gyi 'jig rten la dbang ba'i sbyor ba ston te / de la sems can gyi 'jig rten la dbang ba ni de 'gugs pa la dbang ba'o/ /de'i sbyor ba ni gdul bya'i lus dang sems dang mthun pa'i lus dang sems ston pa ste/ gang gi phyir de sems can rnams kyi lus rnam par dbye ba dang / mos pa dang / lhag pa'i bsam pa ci 'dra bar sangs rgyas kyi zhing de dang de dag dang / 'khor gyi dkyil 'khor de dang de dag tu de lta de ltar rang gi lus kun du ston te/ de dge sbyong gi 'khor gyi dkyil 'khor rnams su dge sbyong gi kha dog dang gzugs ston to/ /bram ze'i 'khor gyi dkyil 'khor rnams su bram ze'i kha dog dang gzugs ston to//rgyal rigs kyi 'khor gyi dkyil 'khor rnams su rgyal rigs kyi kha dog dang gzugs ston to/ /rje'u rigs kyi 'khor gyi dkyil 'khor rnams su rje'u rigs kyi kha dog dang gzugs ston to/ /khyim bdag gi 'khor gyi dkyil 'khor rnams su khyim bdag gi kha dog dang gzugs ston to//rgyal chen bzhi'i lha'i ris kyi 'khor gyi dkyil 'khor rnams su rgyal chen bzhi'i ris kyi kha dog dang gzugs ston to/ /sum cu rtsa gsum gyi 'khor gyi dkyil 'khor rnams su sum cu rtsa gsum gyi kha dog dang gzugs ston to/ /de bzhin 'thab bral gyi 'khor gyi dkyil 'khor rnams dang /dga' ldan gyi 'khor gyi dkyil 'khor rnams dang / 'phrul dga' ba'i 'khor gyi dkyil 'khor rnams dang / gzhan 'phrul dbang byed kyi 'khor gyi dkyil 'khor rnams dang / tshangs pa'i 'khor gyi dkyil 'khor rnams su tshangs pa'i kha dog dang gzugs ston to/ /de nyan thos kyi gdul bya'i sems can rnams la nyan thos kyi lus dang kha dog dang gzugs ston to//rang sangs rgyas kyi gdul bya'i sems can rnams la rang sangs rgyas kyi lus dang kha dog dang gzugs ston to/ /byang chub sems dpa'i gdul bya'i sems can rnams la byang chub sems dpa'i lus dang kha dog dang gzugs ston to//de bzhin gshegs pa'i gdul bya'i sems can rnams la de bzhin gshegs pa'i sku dang kha dog dang gzugs ston to/ /kye rgyal ba'i sras de ltar sangs rgyas kyi zhing brjod du med pa'i sems can de dag gi mos pa rab 'byam de dang / de dag tu de kho na bzhin du rang gi lus rnam par phye ba ston to zhes gsungs pa'o//de ltar sems can la dbang ba'i sbyor ba bstan nas/ don dam pa dang kun rdzob kyi ye shes gnyis kyis ye shes mngon par rdzogs par byang chub pa la dbang ba'i sbyor ba ston to/ /de la don dam pa'i ye shes ni rang dang gzhan gyi rgyud yongs su mi gcod pas/lus su rnam par rtog pa thams cad med pa dang / lus mnyam pa nyid thob pas ston to/ /gang gi phyir de lus su rnam par rtog pa thams cad dang bral zhing / lus mnyam pa nyid thob pas zhes gsungs pa'o/ /'dis ni nyan thos dang rang sangs rgyas dang thun mong ma yin pa'i don dam pa'i ye shes yongs su bstan pa yin no//kun rdzob kyi ye shes ni kun nas nyon mongs pa dang / rnam par byang ba dang / gnyis ka ma yin pa'i phyogs shes pa'i phyir sems can gyi lus la sogs pa zhes pas ston te/ gang gi phyir des sems can gyi lus kyang rab tu shes so//zhing gi lus dang / las rnam par smin pa'i lus dang / nyan thos kyi lus dang / rang sangs rgyas kyi lus dang / byang chub sems dpa'i lus dang / de bzhin gshegs pa'i sku dang / shes pa'i lus dang / chos kyi lus dang / nam mkha'i lus kyang rab tu shes so zhes gsungs pa'o//de la sems can dang snod kyi 'jig rten dang / de skye ba'i rgyu las kyis ni kun nas nyon mongs pa'i phyogs su rig par bya'o/ /theg pa gsum ni rnam par byang ba'i phyogs te/ de yang shes pa gang dang / chos gang gis rab tu phye ba'o/ /nam mkha'i lus ni gnyis ka ma yin pa'i phyogs so//des sems can rnams kyi sems dang / bsam pa mngon par sgrub pa kun du shes nas 'dod na sems can gyi lus rang gi lus su byin gyis rlob bo/ /de bzhin du zhing gi lus dang / las rnam par smin pa'i lus dang / nyan thos kyi lus dang / rang sangs rgyas kyi lus dang / byang chub sems dpa'i lus dang /de bzhin gshegs pa'i sku dang / shes pa'i lus dang / chos kyi lus dang / nam mkha'i lus kyang rang gi lus su byin gyis rlob bo/ /de sems can gyi sems dang bsam pa mngon par sgrub pa kun du shes nas/ de 'dod na sems can gyi lus rang gi lus su byin gyis rlob bo//de bzhin du zhing gi lus dang / las rnam par smin pa'i lus dang / nyan thos kyi lus dang / rang sangs rgyas kyi lus dang / byang chub sems dpa'i lus dang / de bzhin gshegs pa'i sku dang / shes pa'i lus dang / chos kyi lus dang / nam mkha'i lus rang gi lus su byin gyis rlob bo zhes bya ba de la/sems can gyi lus rang gi lus su byin gyis rlob ces bya ba ni/ dbang de dang de la bya ba sgrub pa'i sbyor ba mtshungs pa nyid yongs su ston to/ /de la sems can gyi lus rnams ni las dang / skye ba dang nyon mongs pa'i kun nas nyon mongs pa'i bye brag dang / gzugs can dang / gzugs can ma yin pa'i khams kyi bye brag gis rab tu shes pa ste/ gang gi phyir de sems can rnams kyi las kyi lus kyang rab tu shes so/ /rnam par smin pa'i lus nyid dang / nyon mongs pa'i lus nyid dang / gzugs kyi lus nyid dang / gzugs med pa'i lus nyid kyang rab tu shes so zhes gsungs pa'o//zhing gi lus rnams ni stong la sogs pa'i 'jig rten gyi khams kyi bye brag dang / 'jig rten gyi khams kun nas nyon mongs pa can dang / nyon mongs pa can ma yin pa'i bye brag dang / chol ba la sogs pa'i bye brag gis shes te/ gang gi phyir zhing gi lus rnams kyi chung ngu nyid rab tu shes so//rgya chen por gyur pa nyid dang / tshad med pa nyid dang / kun nas nyon mongs pa can nyid dang / rnam par dag pa nyid dang / chol ba nyid dang / steng g.yogs med pa nyid dang / ngos phyal ba nyid dang / 'jug pa'i khyim can nyid dang / phyogs kyi dra ba rnam par dbye ba nyid kyang rab tu shes so zhes gsungs pa'o//chol ba la sogs pa'i tshig gi don ni sa dang por bshad pa bzhin no/ /las kyi rnam par smin pa nyid dang / nyan thos dang / rang sangs rgyas dang / byang chub sems dpa'i lus rnams ni rang dang spyi'i mtshan nyid kyi bye brag dang /gang zag med pas brda tsam du zad pa nyid kyis shes te/ gang gi phyir las rnam par smin pa'i lus rnams kyi rnam par phye ba dang / brda yang rab tu shes so/ /nyan thos kyi lus rnams dang / rang sangs rgyas kyi lus rnams dang / byang chub sems dpa'i lus rnams kyi rnam par phye ba dang /brda yang rab tu shes so zhes gsungs pa'o/ /de bzhin gshegs pa'i sku rnams ni ji ltar mngon par rdzogs par byang chub pas ston te / byang chub tu smon lam btab nas dga' ldan du skyes pa gang yin pa dang / sangs rgyas sprul pa gang yin pa dang / rang gi sku gdung gi ring bsrel byin gyis brlabs pa gang dag yin pa dang / rnam par smin pa'i sku gang yin pa dang / 'od zer gang gis sems can rnams 'gugs pa dang / 'jig rten pa dang 'jig rten las 'das pa'i sems rnam par grol ba thun mong ba gang yin pa dang / mngon par mtho ba'i rgyu thun mong ma yin pa gang yin pa dang /de bzhin gshegs pa rnams kyi zag pa med pa'i dbyings gang yin pa dang / ma chags pa'i ye shes gang yin pa ste/ gang gi de dag thams cad mdzad pa de dag gi bye brag gis rab tu shes pa ste/ gang gi phyir de bzhin gshegs pa'i sku rnams kyis mngon par rdzogs par byang chub pa'i sku nyid kyang rab tu shes so//smon lam gyi sku nyid dang / sprul pa'i sku nyid dang / byin gyi rlabs kyi sku nyid dang / gzugs dang / mtshan ma dang / dpe byad bzang po'i rgyan gyi sku nyid dang / 'od kyi sku nyid dang / yid kyi sku nyid dang / bsod nams kyi sku nyid dang / chos kyi sku nyid dang / ye shes kyi sku nyid kyang rab tu shes so zhes gsungs pa'o/ /shes pa'i lus rnams ni thos pa dang / bsams pa las byung ba'i shes pa'i bye brag dang / bsgoms pa las byung ba'i shes pa'i bye brag dang / 'bras bu dang / zhugs pa'i shes pa'i bye brag dang /'jig rten pa la sogs pa'i bye brag gis rab tu shes te/ gang gi phyir shes pa'i lus rnams kyi shin tu dpyad pa nyid kyang rab tu shes so/ /ji lta ba bzhin du nges par rtogs pa nyid dang / 'bras bu dang / sbyor bas bsdus pa nyid dang / 'jig rten pa dang / 'jig rten las 'das pa rnam par dbye ba nyid dang /theg pa gsum rnam par dgod pa nyid dang / thun mong dang thun mong ma yin pa nyid dang / nges par 'byin pa nyid dang / nges par 'byin pa ma yin pa dang / slob pa dang / mi slob pa nyid kyang rab tu shes so zhes gsungs pa'o/ /chos kyi lus rnams ni chos nyid gcig brjod pa dang /ji skad thos pa bzhin du 'dzin pa dang / gdul bya rnams kyi dbang po la sogs pa'i gnas skabs dang mthun pa'i 'du shes dang / 'chad pa rnam par gzhag pa dang / dbang po dang bcas pa dang / dbang po med pa'i mtshan nyid rnam par gzhag pa dang / mchog gi mtshan nyid rnam par gzhag pas rab tu shes pa ste/gang gi phyir chos kyi lus rnams kyi mnyam pa nyid kyang rab tu shes so/ /mi 'khrugs pa nyid dang / gnas skabs dang / brda kun rdzob tu rnam par gzhag pa dang / sems can dang / sems can ma yin pa'i chos rnam par gzhag pa nyid dang /sangs rgyas dang / chos dang / 'phags pa'i dge 'dun rnam par gzhag pa nyid kyang rab tu shes so zhes gsungs pa'o/ /nam mkha'i lus rnams ni mtha' yas pa'i mtshan nyid dang / khyab pa'i mtshan nyid dang / bstan du med cing thogs pa med pa'i mtshan nyid dang / 'dus ma byas pa'i mtshan nyid dang /gzugs kyi sgo 'byed pa'i mtshan nyid yin pas/ gzugs kyi de mngon pa'i phyir dang / rang gi mtshan nyid du rab tu shes pa ste/ gang gi phyir nam mkha'i lus rnams kyi tshad med pa nyid kyang rab tu shes so/ /thams cad du song ba nyid dang / lus med pa nyid dang / nor ba med pa nyid dang /gzugs kyi lus kyis mngon par gsal bar byed pa nyid kyang rab tu shes so zhes gsungs pa'o/ /de ltar sangs rgyas kyi zhing yongs su dag par byed pas/ sa brgyad pa'i rnam par gzhag pa bstan nas dbang thob pas ston to/ /de la dbang thob pas ni de lta de ltar snod kyi 'jig rten dang /sems can gyi 'jig rten dang / ye shes mngon par rdzogs par byang chub pa dbang ba rnam pa gsum gyi sbyor bas dbang bcu rab tu 'thob ste/ gang gi phyir des lus dang shes pa mngon par sgrub pa de lta bu thob pas bskal pa brjod du med pa'i yang brjod du med par tshe byin gyis rlob pas tshe la dbang ba 'thob bo//ting nge 'dzin nges par sems dpag tu med pa grangs med pa'i ye shes kyis 'jug pas sems la dbang ba 'thob bo/ /'jig rten gyi khams thams cad rgyan bkod pa du mas rab tu brgyan pa'i byin gyi rlabs kun du ston pas yo byad la dbang ba 'thob bo/ /las kyi rnam par smin pas byin gyi rlabs kyis dus ji lta ba bzhin du ston pas las la dbang ba 'thob bo//'jig rten gyi khams thams cad du skye ba kun du ston pas skye ba la dbang ba 'thob bo/ /sangs rgyas kyi zhing dang / dus gang du ci dga' bar mngon par rdzogs par byang chub pa kun du ston pas smon lam la dbang ba 'thob bo//'jig rten gyi khams thams cad sangs rgyas kyis gang ba rab tu ston pas mos pa la dbang ba 'thob bo/ /sangs rgyas kyi zhing thams cad du rdzu 'phrul gyi rnam par 'phrul pa kun du ston pas rdzu 'phrul la dbang ba 'thob bo/ /de bzhin gshegs pa'i stobs dang mi 'jigs pa dang /sangs rgyas kyi chos ma 'dres pa dang / mtshan dang dpe byad bzang po dang / mngon par rdzogs par byang chub pa kun du ston pas ye shes la dbang ba 'thob bo/ /mtha' dang dpung med pa'i chos kyi sgo snang ba kun du ston pas chos la dbang ba 'thob bo zhes gsungs pa'o/ / dbang 'di bcu ni gnod pa bcu'i gnyen por go rims bzhin du rig par bya ste/ gnod pa bcu ni/ 'chi ba'i gnod pa dang / kun nas nyon mongs pa'i gnod pa dang / dbul ba'i gnod pa dang / nyes par spyad pa'i gnod pa dang / ngan 'gro'i gnod pa dang / 'dod pa mi 'grub pa'i gnod pa dang /chos kyis phongs par 'gyur ba'i las kyi sgrib pa'i gnod pa dang / kun du tshol ba la 'bad pa'i gnod pa dang / the tshom gyi gnod pa dang / bag tsha ba'i gnod pa'o/ /de ltar dbang thob pas sa rnam par gzhag pa bstan nas/ che ba nyid kyi khyad par gyis ston to/ /de la che ba nyid kyi khyad par ni che ba nyid rnam pa gsum ste/ye shes kyis che ba nyid dang / las kyis che ba nyid dang / de gnyi ga'i gnas yon tan gyis che ba nyid do/ /de la ye shes kyis che ba nyid ni 'khor ba dang mya ngan las 'das pa la/ mi gnas pas ye shes bsam gyis mi khyab pa nyid de/ gang gi phyir de byang chub sems dpa'i dbang bcu po de dag thob ma thag nas/ye shes bsam gyis mi khyab pa dang ldan pa yin zhes gsungs pa'o/ /bsam gyis mi khyab pa de nyid de yang bsgom pa khyad zhugs pa bsam gyis mi khyab pa nyid dang / shes bya rtogs pa bsam gyis mi khyab pa nyid dang / mi mthun pa'i phyogs bsal ba bsam gyis mi khyab pa nyid dang rnam pa gsum du rig par bya ste/ gang gi phyir ye shes dpag tu med pa dang / ye shes shin tu rgyas pa dang / ye shes mi 'phrogs pa dang ldan pa yin no zhes gsungs pa'o/ /de de lta bu'i rjes su song zhing ye shes de lta bu dang ldan pas/lus kyi las kha na ma tho ba shin tu med pa kun du 'byung ba rab tu 'byung / ngag gi las kha na ma tho ba shin tu med pa kun du 'byung ba rab tu 'byung / yid kyi las kha na ma tho ba shin tu med pa zhes gsungs pa'o/ /de de lta bu'i rjes su song zhing zhes bya ba ni sngar ji skad bstan pa'o//ye shes de lta bu dang ldan pas zhes bya ba ni ji skad bstan pa de'o/ /lus la sogs pa'i las kha na ma tho ba shin tu med pa kun du 'byung ba rab tu 'byung zhes bya ba ni las kyis che ba nyid do/ /kha na ma tho ba shin tu med pa de yang rnam pa bzhis yongs su ston te / kun du 'byung ba ni kun du 'byung bar byed pa dang /kun du 'byung ba'i dus na ste/ gang gi phyir ye shes sngon du 'gro zhing ye shes kyi rjes su 'brang ba zhes gsungs pa'o/ /kun nas nyon mongs pa med pa dang / sems can gyi don byed pa'i las gnyis kyis lam yongs su 'dzin pa ni gang gi phyir/ shes rab kyi pha rol tu phyin pas dbang byed pa/snying rje chen po sngon du 'gro ba'i thabs mkhas pas shin tu rnam par phye ba zhes gsungs pa'o/ /bdag dang gzhan gyi sbyor ba'i rgyu gnyis kyis rgyu yongs su 'dzin pa ni gang gi phyir/ smon lam gyis shin tu mngon par bsgrubs pa/ de bzhin gshegs pa'i byin gyi rlabs kyis shin tu byin gyis brlabs pa zhes gsungs pa'o//sems can gyi don dang / zhing yongs su dag par bya ba dang / sangs rgyas kyi chos yang dag par sgrub pa'i bya ba ste/ bya ba sgrub pa ni gang gi phyir/ sems can gyi don la sbyor ba rgyun ma bcad pa/ 'jig rten gyi khams mtha' yas pa rnam par phye bar gyur pa/kun du 'byung ba rab tu 'byung ngo / /kye rgyal ba'i sras mdor na byang chub sems dpa'i sa mi g.yo ba 'di thob pa'i byang chub sems dpa'i lus dang / ngag dang yid kyi las ni sangs rgyas kyi chos thams cad yang dag par thob par bya ba'i phyir/kun du 'byung ba rab tu 'byung ngo zhes gsungs pa'o/ /de la yon tan gyis che ba nyid ni bsam pa'i stobs la shin tu gnas pa la sogs pas yongs su ston to/ /de ni yon tan rnam pa bdun gyis dbang du byas pa ste/ mi gnas pa'i lam gyi yon tan ni gang gi phyir/ de de ltar byang chub sems dpa'i sa mi g.yo ba 'di thob pas nyon mongs pa kun du 'byung ba thams cad dang bral ba'i phyir/bsam pa'i stobs la shin tu gnas pa yin/ las dang mi bral ba'i phyir lhag pa'i bsam pa'i stobs la shin tu gnas pa yin/ sems can gyi don mi gtong ba'i phyir / snying rje chen po'i stobs la shin tu gnas pa yin/ 'gro ba thams cad yongs su skyob pa'i phyir/ byams pa chen po'i stobs la shin tu gnas pa yin zhes gsungs pa'o/ /de la mi gnas pa'i lam nyid ni mi mthun pa'i phyogs rnam par nyams shing gnyen po bsten pa dang sems can la lta ba rnam pa gnyis kyis rig par bya'o//brjod pa med pa nyid kyi yon tan ni gang gi phyir/ brjed pa med pa'i chos dang ldan pa'i phyir/ gzugs kyi stobs la shin tu gnas pa yin zhes gsungs pa'o/ /ngag phun sum tshogs pa'i yon tan ni gang gi phyir/ sangs rgyas kyi chos thams cad rab tu rnam par 'byed pa'i bye brag la mkhas pa'i phyir/spobs pa'i stobs la shin tu gnas pa yin zhes gsungs pa'o/ /sems phun sum tshogs pa'i yon tan ni gang gi phyir/ 'jig rten gyi khams mtha' yas pa'i spyod pa rnam par dbye ba la mkhas pa'i phyir mngon par shes pa'i stobs la shin tu gnas pa yin zhes gsungs pa'o//rgyu'i yon tan ni gang gi phyir/ byang chub sems dpa'i bya ba thams cad mi gtong ba'i phyir smon lam gyi stobs la shin tu gnas pa yin zhes gsungs pa'o/ /sbyor ba'i yon tan ni gang gi phyir/ sangs rgyas kyi chos thams cad yang dag par sgrub pa'i phyir pha rol tu phyin pa'i stobs la shin tu gnas pa yin zhes gsungs pa'o//nye bar sgrub pa'i yon tan ni gang gi phyir/ rnam pa thams cad kun mkhyen pa'i ye shes mngon du gyur pa'i phyir/ de bzhin gshegs pa'i byin gyis rlabs kyi stobs la shin tu gnas pa yin zhes gsungs pa'o//de de lta bu'i stobs bskyed pa thob pas bya ba thams cad kyang kun du ston la zhes bya ba ni rjes su chags pa dang / khong khro ba la sogs pa dang ldan pa nyon mongs pa dang bcas pa rnams kyis kun du spyad pa rnams so/ /bya ba thams cad la yang kha na ma tho ba med pa yin no zhes bya ba ni yon tan de dag gis so//de ltar che ba nyid kyi khyad par gyis sa 'di'i rnam par gzhag pa bstan nas/ nges pa'i tshig rab tu dbye bas ston to/ /de la nges pa'i tshig rab tu dbye ba ni rnam pa gnyis te/ sa'i nges pa'i tshig rab tu dbye ba dang / gang zag gi nges pa'i tshig rab tu dbye ba'o//de la sa'i nges pa'i tshig rab tu dbye ba ni rnam pa drug tu rig par bya ste / nye ba'i nyon mongs pa'i gnyen po ni nye ba'i nyon mongs pa de yang rnam pa gnyis te/ sa 'og ma pa'i mngon par 'du byed pa dang / theg pa dman par smon lam 'debs pa dang / bdud kyi las dang /nyon mongs pa kun du 'byung ba ste/ de'i gnyen por kye rgyal ba'i sras dag byang chub sems dpa'i ye shes kyis 'di ni mi 'phrogs pa'i phyir mi g.yo ba zhes bya'o/ /ye shes mi bzlog pa'i phyir mi bzlog pa'i sa zhes gsungs pa'o/ /zab pa nyid gang gi phyir 'gro ba thams cad kyis shes par dka' ba'i phyir rnyed par dka' ba'i sa zhes bya'o zhes gsungs pa'o//spyod pa dang gnas pa rnam par dag pa ni gang gi phyir kha na ma tho ba med pa'i phyir gzhon nu'i sa zhes bya'o/ /bsam pa ji lta ba bzhin du dbang byed pa'i phyir skye ba'i sa zhes bya'o zhes gsungs pa'o/ / de la spyod pa rnam par dag pa ni bya ba thams cad la nyes pa med pas gzhon nu'i dang 'dra'o/ /gnas pa rnam par dag pa ni bsam pa 'byor pas skye skye ba'i sa la gnas pa dang 'dra ba'o / /'jig rten pa dang 'jig rten las 'das pa'i 'dus byas rnam par dag pa'i khyad par ni gang gi phyir yang bya ba med pa'i phyir yongs su grub pa'i sa zhes bya'o//ye shes kyis rnam par dbye ba shin tu byas pa'i phyir/ yongs kyi mthar thug pa'i sa zhes bya'o zhes gsungs pa'o/ /de la 'jig rten las 'das pa'i 'dus byas rnam par dag pa'i khyad par ni ye shes kyis rnam par dbye ba shin tu byas pas shes bya'i sgrib pa rnam par sbyong ba'i phyir ro//de gnyi ga'i 'dus ma byas rnam par dag pa'i khyad par ni gang gi phyir/ smon lam shin tu mngon par bsgrubs pa'i phyir mya ngan las 'das pa'i sa zhes bya'o zhes gsungs pa'o/ /sngon gyi smon lam gyi dbang gis sems can gyi don yongs su mi gtong ba dang /byang chub sems dpa'i sa'i khyad par gyi 'dus ma byas rnam par dag pa'i khyad par ni gang gi phyir/ gzhan gyis rnam par mi 'khrugs pas byin gyi rlabs kyi sa zhes bya'o/ /sngon gyi mthar mngon par bsgrubs pas lhun gyis grub pa'i sa zhes bya'o zhes gsungs pa'o//de la byang chub sems dpa'i sa'i khyad par ni sa drug pa dang / bdun pa la khyad zhugs pa ste/ sa drug pa la ni lam gzhan rtsom pa'i khyad par gyi gzhan gyis rnam par 'khrugs so/ /bdun pa ni 'bad pa dang bcas pa'o/ / 'di ni thams cad mngon par bsgrubs pas lhun gyis grub par 'jug pa'o/ /de la gang zag gi nges pa'i tshig rab tu dbye ba ni/ byang chub sems dpa' don gang gis na byang chub sems dpa'i sa mi g.yo ba thob ces bya ba de ston pa las rig par bya'o/ /de ni don rnam pa gnyis kyis brjod de/gcig tu mi g.yo ba dang / gcig pa nyid las mi g.yo ba ni sangs rgyas kyi rigs kyi rjes su song ba'i rgyu ste/ gang gi phyir kye rgyal ba'i sras de ltar byang chub sems dpa' ye shes de lta bu mngon par bsgrubs pa dang ldan zhing / sangs rgyas kyi rigs kyi rjes su song ba zhes gsungs pa'o//de la sangs rgyas kyi rigs ni khams brtas pa'i khyad par ro/ /de'i rjes su song ba ni yon tan yongs su 'dzin pa dang / sgrub pa dang / nye ba dang / rnam pa gsum gyis rab tu phye ba ste/ gang gi phyir sangs rgyas kyi yon tan shin tu snang bar gyur ba/ de bzhin gshegs pa'i spyod lam dang /spyod pa spyad pa'i rjes su song ba/ sangs rgyas kyi zhing mngon du gyur pa zhes gsungs pa'o/ /de la shin tu snang bar gyur pa'i don ni shin tu sbyang ba'i don du rig par bya'o/ /gnas pa dang spyod pa'i spyad pa ni spyod lam dang spyod pa'i spyad pa'o/ /de la gcig tu mi g.yo ba ni rtag par rgyun du de bzhin gshegs pa'i byin gyi rlabs kyis shin tu byin gyis brlabs pas yongs su ston te/gang gi phyir rtag par rgyun du de bzhin gshegs pa'i byin gyi rlabs kyis shin tu byin gyis brlabs pa yin zhes gsungs pa'o/ /de la yon tan rnam pa lnga'i dbang du byas par rig par bya ste/mchod pa'i yon tan ni gang gi phyir/ brgya byin dang / tshangs pa dang / 'jig rten skyong bas bsu ba yin zhes gsungs pa'o/ /kun du bsrungs pa'i yon tan ni gang gi phyir/ lag na rdo rje rtag par phyi bzhin 'brang ba yin zhes gsungs pa'o/ / rten gyi yon tan ni gang gi phyir ting nge 'dzin gyi stobs kyis yongs su ma btang ba yin zhes gsungs pa'o/ /zhing yongs su dag pa'i yon tan ni gang gi phyir lus rnam par phye ba tshad med pa mngon par bsgrub pa yin zhes gsungs pa'o/ /sems can yongs su smin par byed pa'i yon tan ni sems can yongs su smin par byed pa'i yon tan de rnam pa lngas yongs su bstan te/bsams bzhin du skye ba yongs su 'dzin pa ni gang gi phyir lus thams cad kyi spyod pa'i stobs dang ldan pa yin zhes gsungs pa'o/ /dbang po dang / bsam pa dang / bag la nyal shes par nus pa ni gang gi phyir mngon par shes pa chen po'i rnam par smin pa yongs su grub pa yin zhes gsungs pa'o//chos kyi tshul la gzud pa'i phyir/ chos mtha' yas pa 'dzin par nus pa ni gang gi phyir ting nge 'dzin mtha' yas pa la dbang byed pa yin zhes gsungs pa'o/ /len par nus pa ni gang gi phyir lung bstan pa tshad med pa yang dag par nod pa yin zhes gsungs pa'o//bshad par nus pa ni gang gi phyir 'gro ba ji ltar yongs su smin pa bzhin du mngon par rdzogs par byang chub pa ston par byed pa yin zhes gsungs pa'o/ /de lta bu dang ldan zhing zhes bya ba ni gcig tu mi g.yo ba'o//de la gcig pa nyid las mi g.yo ba ni/ theg pa chen po'i dkyil 'khor du zhugs pas yongs su bstan te/ gang gi phyir de lta bu dang ldan zhing theg pa chen po'i dkyil 'khor du zhugs pa zhes gsungs pa'o/ /dkyil 'khor gyi don ni mi phyed pa'i don to//de yang rnam pa dgur rig par bya ste/ ye shes mi phyed pa ni gang gi phyir shin tu rnam par dpyad pa'i ye shes kyi mngon par shes pa chen po dang ldan pa zhes gsungs pa'o/ /bshad pa mi phyed pa ni gang gi phyir rtag par rgyun du shes rab kyi snang ba'i 'od zer rab tu gtong ba zhes gsungs pa'o//rnam par grol ba mi phyed pa ni gang gi phyir chos kyi dbyings chags pa med pa'i lam du zhugs pa zhes gsungs pa'o/ /zhing yongs su dag pa mi phyed pa ni gang gi phyir 'jig rten gyi khams kyi lam rnam par dbye ba la mkhas pa zhes gsungs pa'o/ /theg pa chen po la 'jug pa mi phyed pa ni gang gi phyir yon tan gyi rnam pa thams cad yang dag par ston pa zhes gsungs pa'o//mngon par shes pa mi phyed pa ni gang gi phyir rang gis sems bskyed pa la dbang byed pa zhes gsungs pa'o/ /dri ba lan 'debs par nus pa mi phyed pa ni gang gi phyir sngon gyi mtha' dang phyi ma'i mtha' shin tu rtogs pa'i ye shes can zhes gsungs pa'o//byang chub kyi snying po la 'dug pa mi phyed pa ni gang gi phyir/ bdud kyi lam thams cad kyi 'jug pa dang / ldog pa shes pa dang ldan pa zhes gsungs pa'o/ /mngon par rdzogs par byang chub pa mi phyed pa ni gang gi phyir/de bzhin gshegs pa'i yul dang spyod yul thams cad kyi rjes su zhugs pa zhes gsungs pa'o/ /'jig rten gyi khams rab 'byam mu med pa dag na byang chub sems dpa'i spyod pa phyir mi ldog pa'i tshul gyis spyod pas zhes bya ba ni sbyor ba don yod pa'o/ /de bzhin gshegs pa de dag la bsnyen bkur byed cing /'jig rten gyi khams rnam par dbye ba sngon du 'gro ba chos snang bar sgrub pa yang dag par len to zhes bya ba ni de'i phyir ro/ /gser gyi sa le sbram 'dzam bu'i gling gi bdag po la btags pa'i dpes ni/ rnam par dag pa'i sa thob pas gnas khyad par can du byas pa'i dge ba'i rtsa ba 'od gsal bar yongs su ston te/gang gi phyir kye rgyal ba'i sras 'di lta ste/ dper na gser gyi sa le sbram de nyid mgar ba mkhas pas zin par byas te/ 'dzam bu'i gling gi bdag po'i mgul lam/ mgo la btags na 'dzam bu'i gling pa'i sems can thams cad kyi rgyan gyi rnam pa rnams kyis mi 'phrogs pa yin no//kye rgyal ba'i sras de bzhin du byang chub sems dpa'i sa mi g.yo ba 'di la gnas pa'i byang chub sems dpa'i dge ba'i rtsa ba de dag kyang nyan thos dang / rang sangs rgyas thams cad nas byang chub sems dpa'i sa bdun pa la gnas pa'i bar dag gis mi 'phrogs pa yin no zhes gsungs pa'o//lhag ma ni snga ma bzhin no/ /'phags pa sa bcu pa las sa brgyad pa'i rnam par bshad pa rdzogs so// //sa dgu pa ni/ smra ba po'i rtsol ba phun sum tshogs pa dang / ye shes phun sum tshogs pa dang /spyod pa la 'jug pa phun sum tshogs pa dang / bshad pa phun sum tshogs pa dang / rnam pa bzhis rnam par gzhag par rig par bya'o/ /sa brgyad pa'i ye shes kyi las mngon par bsgrubs pa rnams kyis zhing yongs su dag par bya ba bsgrubs nas/'di la sems can yongs su smin par bya ba sgrub ste/ 'di ni de'i khyad par ro/ /de la smra ba po'i rtsol ba phun sum tshogs pa ni gzhan gyi don dang / bdag gi don gyi dbang du byas nas/ tshig gcig dang / gcig dang lnga dang gsum gyis bstan te/ gzhan gyi don ni gzugs med pa rnams su thar pa thob par 'gyur bar 'du shes pa'i gdul bya rnams kyi dbang du byas pa ste/gang gi phyir kye rgyal ba'i sras byang chub sems dpa' de de ltar ye shes tshad med pas rnam par dpyad pa'i blos yang rnam par thar pa zhi ba gong ma rnams shes par byed ces gsungs pa'o//bdag gi don ni sangs rgyas kyi ye shes ma thob pa'i dbang du byas pa ste/ gang gi phyir yang de bzhin gshegs pa'i ye shes gong ma ma rdzogs pa la rnam par dpyod ces gsungs pa'o/ /yang byang chub sems dpa' yongs su smin pa dag gi dbang du byas pa dang /tshul bzhin ma yin pa sems pa la sbyor ba'i gdul bya rnams dang / mi shes pa dag chos kyi tshul bstan par shes par bya ba dang / skyabs ngan par zhugs pa rnams dang / mtho ris la mos pa rnams kyi dbang du byas nas tshig lngas go rims bzhin du gzhan gyi don ston te /gang gi phyir de bzhin gshegs pa'i gsang ba'i rjes su 'jug par bya ba la 'jug /ye shes bsam gyis mi khyab pa'i che ba nyid rab tu rnam par 'byed/ gzungs dang ting nge 'dzin rab tu rnam par 'byed pa yongs su sbyong / mngon par shes pa rgya chen po mngon par sgrub/'jig rten gyi khams rnam par dbye ba shes par byed ces gsungs pa ste/ zhing yongs su dag pa kun du ston pas mtho ris la mos pa zlog par byed do/ /mngon par rdzogs par byang chub pa dang / chos kyi 'khor lo bskor ba dang / yongs su mya ngan las 'das pa kun du bstan pa'i dbang du byas nas tshig gsum gyis go rims bzhin du bdag gi don ston te/gang gi phyir de bzhin gshegs pa'i stobs dang / mi 'jigs pa dang / sangs rgyas kyi chos ma 'dres pa mi 'phrogs pa yongs su sbyong bar byed/ de bzhin gshegs pa'i chos kyi 'khor lo bskor ba khyu mchog tu gyur pa'i rjes su 'jug /snying rje chen po'i byin gyi rlabs thob pa mi 'dor zhing / byang chub sems dpa'i sa dgu pa gnon te zhes gsungs pa ste/ sems can gyi don la lta ba dang bcas pa'i yongs su mya ngan las 'das pa yin pas snying rje chen po'i byin gyi rlabs thob pa mi 'dor bar rig par bya'o//de ltar chos smra ba po'i rtsol ba phun sum tshogs pas sa dgu pa rnam par gzhag pa bstan nas/ ye shes phun sum tshogs pa ston to/ /de la ye shes phun sum tshogs pa ni chos gang dag bshad par bya ba de dag gi dbang du byas par rig par bya'o/ /de dag ni rnam par byang ba dang /kun nas nyon mongs pa dang / gnyi ga ma yin pa'i chos rnams te/ gang gi phyir de byang chub sems dpa'i sa 'di la gnas pa de dge ba dang / mi dge ba dang lung du mi ston pa'i chos mngon par 'du bya ba yang yang dag pa ji lta ba bzhin du rab tu shes te zhes gsungs pa'o//rnam par byang ba'i chos rnams kyang zag pa dang bcas pa dang / zag pa med pa dag ste/ gang gi phyir zag pa dang bcas pa dang / zag pa med pa'i chos mngon par 'du bya ba zhes gsungs pa'o/ /zag pa med pa rnams kyang 'jig rten pa dang / 'jig rten las 'das pa dag ste/ gang gi phyir 'jig rten pa dang 'jig rten las 'das pa'i chos mngon par 'du bya ba zhes gsungs pa'o/ /de rnams kyang bsam du yod pa dang / bsam gyis mi lang ba dag ste/ gang gi phyir bsam gyis khyab pa dang / bsam gyis mi khyab pa'i chos mngon par 'du bya ba zhes gsungs pa'o//bsam du yod pa rnams kyang nges pa dang ma nges pa dag ste/ gang gi phyir nges pa dang ma nges pa'i chos mngon par 'du bya ba zhes gsungs pa'o/ /de rnams kyang theg pa gsum po dag ste/ gang gi phyir nyan thos dang rang sangs rgyas kyi chos mngon par 'du bya ba dang / byang chub sems dpa'i spyod pa'i chos mngon par 'du bya ba dang /de bzhin gshegs pa'i sa'i chos mngon par 'du bya ba zhes gsungs pa'o/ /theg pa gsum po'i chos de dag kyang / lam dang gnas gyur pas rab tu phye ba'i phyir/ 'dus byas dang 'dus ma byas kyis rab tu phye ba dag ste/ gang gi phyir 'dus byas kyi chos mngon par 'du bya ba dang /'dus ma byas kyi chos mngon par 'du bya ba yang yang dag pa ji lta ba bzhin du rab tu shes so zhes gsungs pa'o/ /de ltar ye shes phun sum tshogs pas/ sa rnam par gzhag pa bstan nas spyod pa la 'jug pa phun sum tshogs pa ston to/ / de la spyod pa la 'jug pa phun sum tshogs pa ni nyon mongs pa dang / las kyi kun nas nyon mongs pa rten dang bcas pa las brtsams pa dang / skye ba'i kun nas nyon mongs pa la brten pa kun nas nyon mongs pa dang / rnam par byang ba gnyis su nges pa dang ma nges pa'i gnas skabs las brtsams par rig par bya ste/gang gi phyir de ye shes de lta bu dang ldan pa'i blo sems can gyi sems kyi rgyu ba thibs po yang dag pa ji lta ba bzhin du rab tu shes te/ nyon mongs pa'i rgyu ba thibs po dang las kyi rgyu ba thibs po zhes gsungs pa'o/ /mos pa la sogs pa ni dbang po la sogs dang mthun pa'i phyir nges pa dang ma nges pa'i gnas skabs de ni dbang po la sogs pa'i rim gyis rig par bya ste/gang gi phyir dbang po'i rgyu ba thibs po dang / mos pa'i rgyu ba thibs po dang / khams kyi rgyu ba thibs po dang / bsam pa dang bag la nyal gyi rgyu ba thibs po dang /skye ba'i rgyu ba thibs po dang / bag chags kyi mtshams sbyor ba'i rgyu ba thibs po dang / phung po gsum gyi gnas pa'i rgyu ba thibs po yang yang dag pa ji lta ba bzhin du rab tu shes so zhes gsungs pa'o/ /thibs po ni mang ba'i don dang / spyod pa shes par mi nus pa'i don du rig par bya'o//sems can gyi rgyu ba thibs po ni sems rnam pa tha dad pas ston te/ gang gi phyir de sems can rnams kyi sems rnam pa tha dad pa yang yang dag pa ji lta ba bzhin du rab tu shes te zhes gsungs pa'o/ /sems rnam pa tha dad pa de yang mtshan nyid rnam pa brgyad kyis rab tu ston te/sems dang yid dang rnam par shes pa rnam pa drug rab tu dbye bas rab tu dbye ba'i mtshan nyid kyis ston pa ni gang gi phyir sems rnam pa sna tshogs nyid ces gsungs pa'o/ /gnas pa gzhan du 'gyur ba dang / 'jig pa dang skye bar 'gyur bas 'gyur ba'i mtshan nyid ston pa ni gang gi phyir/ sems skad cig tu myur du 'gyur ba dang /'jig pa dang / mi 'jig pa nyid ces gsungs pa'o/ /dmigs pa de las sems kyi lus gud na med pas don dam pa'i mtshan nyid kyis ston pa ni gang gi phyir/ sems lus med pa nyid ces gsungs pa'o/ /yul mtha' yas pa la 'jug pas rang gi mtshan nyid kyis ston pa ni gang gi phyir/sems mtha' yas shing thams cad du mang ba nyid ces gsungs pa'o/ /rang bzhin gyis kun nas nyon mongs pa ma yin pa'i mtshan nyid kyis ston pa ni gang gi phyir/ sems 'od gsal ba nyid ces gsungs pa'o/ /kun nas dkris pa dang bcas pa dang / kun nas dkris pa med pa'i mtshan nyid kyis ston pa ni gang gi phyir/ sems nyon mongs pa dang bcas pa dang / nyon mongs pa med pa nyid ces gsungs pa'o/ /bag la nyal dang bcas pa dang / bag la nyal med pa'i mtshan nyid kyis ston pa ni gang gi phyir/ sems bcings pa dang rnam par thar pa nyid ces gsungs pa'o//ji ltar byang chub sems dpa' rnams bsams bzhin du skye ba dang / de ma yin pa sems can rnams rang gi las dag gi skye bas rgyu'i mtshan nyid kyis ston pa ni gang gi phyir/ sems sgyu ma lta bur rnam par sgrub pa nyid dang / sems 'gro ba ji lta ba bzhin du nye bar gnas pa nyid nas/sems tha dad pa 'bum phrag du ma'i bar dag kyang yang dag pa ji lta bzhin du rab tu shes so zhes gsungs pa'o/ /rang bzhin gyis 'od gsal ba yin du zin kyang / sems nyon mongs pa dang bcas pa dang / nyon mongs pa med pa dang / sems bcings pa dang /rnam par thar pa ste/ mtshan nyid drug pa dang bdun pas ni nyon mongs pa'i kun nas nyon mongs pa ston to/ /sems 'gro ba ji lta ba bzhin du nye bar gnas pa ste brgyad pas skye ba'i kun nas nyon mongs pa ston to/ /nyon mongs pa'i rgyu ba thibs po rab tu dbye ba ni rnam pa gsum gyis bstan te/srid pa'i rtse mo'i bar du ring du song ba ni gang gi phyir/ de nyon mongs pa rnams ring du song ba nyid kyang yang dag pa ji lta ba bzhin du rab tu shes te zhes gsungs pa'o/ /dge ba la sogs pa la sbyor ba mtha' yas pa kun du 'byung bas shes par dka' ba ni gang gi phyir sbyor ba mtha' yas pa nyid ces gsungs pa'o//nyon mongs pa dang / skye ba dang las kyi kun nas nyon mongs pa rnams kyis nyon mongs par byed pa ni de la ji ltar 'ching ba gang gis gang bcings pa de bstan pa'i phyir nyon mongs pa'i kun nas nyon mongs pas kun nas nyon mongs pa nyid du yongs su ston to //gang gi phyir lhan cig skyes shing mi 'bral ba nyid dang / bag la nyal dang / kun nas dkris pa don gcig pa nyid dang / sems dang mtshungs par ldan pa dang / mtshungs par ldan pa ma yin pa nyid ces gsungs pa'o/ /de la ji ltar zhes bya ba ni/ gcig gi grogs su gcig gyur pas gcig gis gcig bskyed pa ste/lhan cig skyes shing tha mi dad pa'i phyir ro / /'ching ba gang gis zhes bya ba ni bag la nyal gyis te/ de yod na de las mi 'grol ba'i phyir te/ bag la nyal dang kun nas dkris pa don gcig pa'i phyir ro/ /gang bcings pa zhes bya ba ni sems te/sems dang mtshungs par ldan pa dang / mtshungs par ldan pa ma yin pa'i phyir ro/ /mtshungs par ldan pa ma yin pa smos pa ni thar pa'i skabs yod par bstan pa'i phyir / lus kyi 'gro ba dang / khams dang rgyus skye ba'i kun nas nyon mongs pas kun nas nyon mongs pa nyid du yongs su ston te/gang gi phyir skye ba'i mtshams sbyor ba'i 'gro ba ji lta ba bzhin du nye bar gnas pa nyid dang / khams gsum pa rnam par phye ba nyid dang / sred pa dang / ma rig pa dang / lta ba'i zug rngu dang / nga rgyal dang gti mug gi kha na ma tho ba chen po nyid ces gsungs pa'o/ /phyogs gsum po dag la thar pa'i bar du gcod pa'i las kyi rgyu yin pa'i phyir dang /lus la sogs pa'i las 'khor ba dang mthun par 'byung bar byed pa tshad med pa'i rgyu yin pa'i phyir/ las kyi kun nas nyon mongs pas nyon mongs par byed pa nyid du yongs su ston te/ gang gi phyir las rnam pa gsum gyi gzhi rgyun mi 'chad pa nas mdor bsdu na nyon mongs pa'i spyod pa tha dad pa brgyad khri bzhi stong gi rjes su 'jug pa nyid kyi bar du yang dag pa ji lta ba bzhin du rab tu shes so zhes gsungs pa'o//phyogs gsum ni 'dod pa la longs spyod pa'i phyogs dang / sdom pa med pa'i phyogs dang / mu stegs can gyi phyogs so//las kyi rgyu ba thibs po rab tu dbye ba ni/ 'gro ba'i rgyu nyid rab tu dbye bas ston te/ gang gi phyir de las dge ba dang / mi dge ba dang lung du mi ston pa nyid dag kyang yang dag pa ji lta ba bzhin du rab tu shes te zhes gsungs pa'o/ /rang bzhin rab tu dbye bas ston pa ni gang gi phyir rnam par rig byed dang rnam par rig byed ma yin pa nyid ces gsungs pa'o//thabs rab tu dbye bas ston pa ni gang gi phyir sems dang lhan cig skyes shing tha mi dad pa nyid ces gsungs pa'o/ /'bras bu sogs pa dang mi sogs pa'i rab tu dbye bas ston pa ni gang gi phyir/ rgyu rang gi ngang gis skad cig tu 'jig cing /'phel ba dang 'bras bu chud mi za zhing mtshams sbyor ba nyid ces gsungs pa'o/ /'bras bu ma smin pa dang / smin zin pa rab tu dbye bas ston pa ni gang gi phyir/ rnam par smin pa dang bcas pa dang / rnam par smin pa med pa nyid ces gsungs pa'o/ / mi mthun pa'i phyogs dang / gnyen po rab tu dbye bas ston pa ni gang gi phyir/ nag po dang / dkar po dang / tha dad pa dang / sna tshogs kyi las phyogs du ma yang dag par len pa nyid ces gsungs pa'o/ /rkyen rab tu dbye bas ston pa ni gang gi phyir las kyi zhing tshad med pa nyid ces gsungs pa'o//khor zug ma yin pa dang / khor zug rab tu dbye bas ston pa ni gang gi phyir/ 'phags pa dang 'jig rten rab tu rnam par phye ba nyid ces gsungs pa'o/ /nges pa dang ma nges pa rab tu dbye bas ston pa ni gang gi phyir/ tshe 'di dang skyes pa dang / lan grangs gzhan la myong bar 'gyur ba nyid dang /theg pa dang theg pa ma yin pa la nges pa dang / ma nges pa nas las tha dad pa stong phrag du ma'i bar dag kyang yang dag pa ji lta ba bzhin du rab tu shes so zhes gsungs pa'o/ /de la rang bzhin rab tu dbye ba ni las rnam pa gnyis te/ bsam pa dang sems pa'o/ / thabs rab tu dbye ba ni sems dang lhan cig tu skyes nas bag chags kyi sems dang / tha mi dad pa'i 'bras bu mngon par 'grub par byed pa'o/ /'bras bu sogs pa dang mi sogs pa rab tu dbye ba ni thog ma med pa'i dus kyi las rang gi ngang gis skad cig la 'jig cing 'phel ba dang / rgyus mngon par 'dus byas pa'i las 'jig pa dang 'phel ba'o//lan grangs gzhan dang skyes nas myong bar 'gyur ba yang rig par bya'o/ /mi mthun pa'i phyogs dang gnyen po rab tu dbye ba ni/ nag po dang / dkar po dang / gnyi ga ma yin pa dang / gnyi ga'i cha'i las yang dag par len pa rab tu dbye bar rig par bya'o//nges pa dang ma nges pa rab tu dbye ba ni gnas skabs gsum la nges pa dang / ma nges pa nyid dang / theg pa rnam pa gsum la nges pa dang / ma nges pa nyid dang / theg pa ma yin par 'khor bar nges pa dang / ma nges pa nyid du rig par bya'o/ /dbang po rnams kyi rgyu ba thibs po bshad pa'i snod rab tu dbye bas ston pa ni gang gi phyir/de la dbang po tha ma dang / 'bring dang / rab nyid kyang yang dag pa ji lta ba bzhin du rab tu shes te zhes gsungs pa'o/ /dbang po 'pho ba ni gang gi phyir/ sngon gyi mtha' dang / phyi ma'i mtha' dang / tha dad pa dang / tha dad pa ma yin pa nyid ces gsungs pa'o/ /rigs rab tu dbye bas ston pa ni gang gi phyir/ rgya chen po dang / 'bring dang / tha ma nyid ces gsungs pa'o/ /kun nas nyon mongs pa rab tu dbye bas ston pa ni gang gi phyir/ nyon mongs pa dang lhan cig skyes shing tha mi dad pa nyid ces gsungs pa'o//nges pa dang ma nges pa rab tu dbye bas ston pa ni gang gi phyir/ theg pa dang theg pa ma yin pa la nges pa dang ma nges pa nyid dang / yongs su smin par nges pa dang ma nges pa nyid ces gsungs pa'o/ /'byung ba rab tu dbye bas ston pa ni gang gi phyir/ dbang po'i dra ba'i rjes su 'brang ba dang myur du 'jig pa dang mtshan mar 'dzin pa nyid ces gsungs pa'o//nyan thos kyi rnam par dag pa rab tu dbye bas ston pa ni gang gi phyir/ dbang po'i dbang gis mi brdzi ba nyid ces gsungs pa'o/ /byang chub sems dpa'i rnam par dag pa rab tu dbye bas ston pa ni gang gi phyir/ dbang po bzlog tu rung ba dang /bzlog tu mi rung ba rab tu rnam par dbye ba nyid ces gsungs pa'o/ /dbang po thams cad bsdu bar rab tu dbye bas ston te gang gi phyir/ ring du song ba dang lhan cig skyes pa rnam pa sna tshogs tha dad pa nyid nas mdor bsdu na dbang po tha dad pa nyid stong phrag du ma'i bar dag kyang yang dag pa ji lta ba bzhin du rab tu shes so zhes gsungs pa'o//de la dbang po 'pho ba rab tu dbye ba ni snga ma 'bogs pa dang / snga ma rnams las phyi ma rnams dma' ba dang / khyad par du 'phags pa nyid dang mtshungs pa nyid kyis rig par bya'o/ /rigs rab tu dbye ba ni theg pa gsum gyi rigs rab tu dbye ba'o/ / kun nas nyon mongs pa rab tu dbye ba ni/ yid dang bde ba la sogs pa'i dbang po rnams kyi nyon mongs pa kun nas dkris pa dang bag la nyal nyid do/ /nges pa dang ma nges pa rab tu dbye ba ni theg pa gsum po dag dang / 'khor bar nges pa dang ma nges pa nyid dang / yongs su smin par nges pa nyid do/ / de la sems can theg pa dman par ma nges pa rnams kyi dbang po dag ni byang chub sems dpas zlog par byed do/ /theg pa chen por ma nges pa rnams ni nges par byed pa'o/ /gcig tu shin tu nges pa rnams ni rnam par grol bar byed do/ /yongs su smin par nges pa rnams la ni btang snyoms su byed do//'byung ba rab tu dbye ba ni 'byung ba rnam pa gsum du rig par bya ste/ rten 'byung ba ni skye mched drug po dag phan tshun 'brel par rjes su 'brang ba'o/ /skye ba dang 'jig pa 'byung ba ni myur du 'jig pa'o/ /dmigs pa las byung ba ni mtshan mar 'dzin pa'o/ /nyan thos kyi rnam par dag pa rab tu dbye ba ni lam gyi dbang gis mi mthun pa'i phyogs las rgyal ba'i don to//byang chub sems dpa'i rnam par dag pa rab tu dbye ba ni phyir ldog pa dang / phyir mi ldog pa'i sa rab tu dbye ba'o/ /dbang po thams cad bsdus pa rab tu dbye ba ni sbyor ba las byung ba dang / rnam par smin pa'i dbang bo rab tu dbye bar rig par bya'o//mos pa dang / khams dang / bsam pa rnams kyi chung ngu dang / 'bring dang chen po la sogs rab tu dbye ba mtha' yas pas kyang rab tu dbye bar rig par bya ste/ gang gi phyir de mos pa rnams kyi chung ngu dang / 'bring dang / rab nyid rnams kyang yang dag pa ji lta ba bzhin du rab tu shes pa nas mos pa tha dad pa stong phrag du ma'i bar dag kyang yang dag pa ji lta ba bzhin du rab tu shes so zhes gsungs pa'o//khams rnams dang bsam pa rnams kyang de bzhin du brjod par bya'o/ /de la bag la nyal ni rjes su 'brang ba'i don du rig par bya'o / / de dag gi rgyu ba thibs po'i dbye ba ni gang du rjes su 'brang ba dang / ji ltar rjes su 'brang ba de'i rab tu dbye bas ston to/ /gang du rjes su 'brang zhe na/ rnam par smin pa dang / rnam par smin pa ma yin pa'i sems la ste/ gang gi phyir de la bag la nyal rnams kyi bsam pa dang / lhan cig skyes pa dang /sems dang lhan cig skyes pa nyid kyang yang dag pa ji lta ba bzhin du rab tu shes te zhes gsungs pa'o/ /ji ltar rjes su 'brang zhe na/ rjes su 'brang ba rnam pa drug ste/ rjes su 'brang ba rnam pa drug la bar med par rnam pa sna tshogs yun ring bo nas rjes su 'brang ba ni gang gi phyir/sems dang mtshungs par ldan pa dang / mtshungs par ldan pa ma yin pa rnam par dbye ba dang / ring nas rjes su zhugs pa nyid ces gsungs pa'o/ /dang po nyid du rjes su 'brang ba ni tshig gnyis kyis ston te/ gang gi phyir thog ma med pa'i dus nas ma bsal ba nyid dang /bsam gtan dang / rnam par thar pa dang / ting nge 'dzin dang / snyoms par 'jug pa dang / mngon par shes pa thams cad kyis mi mjed pa nyid ces gsungs pa'o/ /khams dang sems dang yul thams cad du song bas rjes su 'brang ba ni tshig gsum gyis ston te/gang gi phyir khams gsum pa'i mtshams sbyar bar mtshams sbyor bas shin tu 'brel pa nyid dang / thog ma med pa'i dus nas sems bcings par kun du 'byung ba nyid dang / skye mched kyi sgo nas rnam par rig pa 'byung ba nyid ces gsungs pa'o/ /gnyen po yod pa'i don yin pas med pa'i don gyi rjes su 'brang ba ni gang gi phyir/gnyen po thob pa rjes su gyur pa nyid ces gsungs pa'o/ /nyon mongs pa'i bdag nyid dang / kun nas dkris pa'i mtshan nyid du phrad pa dang / ma phrad pas sa dgu po rnams dang / skye mched drug la phra ba rjes su 'brang ba ni gang gi phyir/sa dang skye mched dang phrad pa dang / ma phrad pa nyid ces gsungs pa'o/ /'jig rten las 'das pa ma yin pa'i lam gyis spang bar bya ba ma yin pas spang ba bsgrub dka' bar rjes su 'brang ba ni gang gi phyir/ gzhan ma yin pa 'phags pa'i lam gyis bsal ba yang yang dag pa ji lta ba bzhin du rab tu shes so zhes gsungs pa'o//skye ba'i rgyu ba thibs po rab tu dbye ba las lus rnam pa sna tshogs kyis ston pa ni gang gi phyir/ de skyes pa tha dad pa rnams kyang yang dag pa ji lta ba bzhin du rab tu shes te zhes gsungs pa'o/ /las rnam pa sna tshogs kyis ston pa ni gang gi phyir/las ji lta ba bzhin du rab tu skye ba zhes gsungs pa'o/ /gnas rnam pa sna tshogs kyis ston pa ni gang gi phyir/ sems can dmyal ba dang / dud 'gro dang / yi dags dang / lha ma yin dang / mi dang lha'i gnas zhes gsungs pa'o/ /gzugs dang 'du shes yar skye ba dang /mar 'grib pa sna tshogs kyis ston pa ni gang gi phyir/ gzugs dang gzugs med par skye ba dang / 'du shes yod pa dang 'du shes med par skye ba zhes gsungs pa'o/ /phyi rol dang 'dra ba'i rgyu rnam pa sna tshogs kyis ston pa ni gang gi phyir/ las kyi zhing dang /sred pa'i rlan dang / ma rig pas mun par gyur pa'i rnam par shes pa'i sa bon gyis yang srid pa rab tu 'byung ba zhes gsungs pa'o/ /rang gi mtshan nyid rnam pa sna tshogs kyis ston pa ni gang gi phyir/ ming dang gzugs lhan cig skyes shing tha mi dad pa zhes gsungs pa'o/ / 'phel ba dang mngon par 'grub pa'i rgyu rnam pa sna tshogs kyis ston pa ni gang gi phyir/ srid pa la mgo rmongs pa dang / srid pas mngon par 'dod pas mtshams sbyor ba zhes gsungs pa'o/ /kun 'byung ba dang sdug bsngal gyi bden pa rnam par gzhag pa rnam pa sna tshogs kyis ston pa ni gang gi phyir/spyod pa 'dod pa dang / skye bar 'dod pa dang / sems can la dga' ba dang / thog ma dang tha ma med par khams gsum pa 'dzin pa dang / 'du shes 'dren pa nyid kyang yang dag pa ji lta ba bzhin du rab tu shes so zhes gsungs pa'o/ /de la spyod par 'dod pa nyid kyis ni dga' ba can dang /'dod chags dang ldan pa dang / de dang der mngon par dga' ba ston to/ /skye ba 'dod pa nyid kyis ni yang srid pa pa ston to/ /sems can la dga' bas ni bdag dang gzhan gyi rgyud la chags pa'i mtshan nyid kyi srid pa ston to/ /'gro ba dang / 'ongs pa khams gong ma dang /'og ma 'dzin pa dang / chung ba dang / rgya chen por gyur pa dang / tshad med pa dang / ci yang med pa'i 'du shes 'dren pas srid pa'i 'khor lo yongs su 'khor bas sdug bsngal gyi bden pa rnam par gzhag pa ston to/ /bag chags rnams kyi rgyu ba thibs po rab tu dbye ba las 'bras bu 'byin par nye bar gnas pa dang /nye bar mi gnas pa'i bye brag gis ston pa ni gang gi phyir/ des bag chags rnams kyi nye bar btags pa dang / nye bar btags pa ma yin pa nyid kyang yang dag pa ji lta ba bzhin du rab tu shes te zhes gsungs pa'o/ /'gro ba'i bag chags kyi bye brag gis ston pa ni gang gi phyir/'gro ba bzhin du bag chags bsgos pa nyid ces gsungs pa'o/ /sems can dang bsten pa'i bag chags kyi bye brag gis ston pa ni gang gi phyir/ sems can ji lta bu dang / spyod pa spyad pas bsgos pa nyid ces gsungs pa'o//bzo'i las kyi nyon mongs pa'i bag chags kyi bye brag gis ston pa ni gang gi phyir/ las ji lta ba bzhin du nyon mongs pa goms par byas pas bsgos pa nyid ces gsungs pa'o/ /dge ba la sogs pa'i las kyi bag chags kyi bye brag gis ston pa ni gang gi phyir/ dge ba dang mi dge ba dang lung du mi ston pa'i phyir goms par byas pas bsgos pa nyid ces gsungs pa'o//bar ma do'i srid pa'i bag chags kyi bye brag gis ston pa ni gang gi phyir/ yang srid par 'gro bas lhag par bsgos pa nyid ces gsungs pa'o/ /'bras bu 'byin pa'i rim gyis bye brag gis ston pa ni gang gi phyir/mthar gyis lhag par bsgos pa nyid ces gsungs pa'o/ /ring du song ba'i bag chags kyi nyon mongs pa'i rgyun mi 'chad pas nyon mongs pa 'grib par byed pa'i phyir/ 'jig rten pa'i nges par 'byung ba'i bag chags kyi bye brag gis ston pa ni gang gi phyir/ ring du song bas rgyun mi 'chad la nyon mongs pa 'grib par byed pas bsgos pa nyid ces gsungs pa'o//chos 'di pa dang gzhan mu stegs can gyi thar pa'i tshogs kyi bag chags kyi bye brag gis ston pa ni gang gi phyir/ rdzas su gyur pa dang rdzas su ma gyur pas bsgos pa nyid ces gsungs pa'o/ /theg pa'i bag chags kyi bye brag gis ston pa ni gang gi phyir/nyan thos dang / rang sangs rgyas dang / byang chub sems dpa' dang / de bzhin gshegs pa mthong ba dang / thos pa dang 'grogs pas bsgos pa nyid kyang yang dag pa ji lta ba bzhin du rab tu shes so zhes gsungs pa'o/ /sems can gyi tshogs gsum gyi rgyu ba thibs po rab tu dbye ba las yongs su mya ngan las 'da' ba'i chos can dang /yongs su mya ngan las mi 'da' ba'i chos can theg pa gsum la gcig tu nges pa dang / gcig tu ma nges pa'i bye brag gis ston pa ni gang gi phyir/ de sems can gyi tshogs yang dag pa nyid du nges pa nyid dang /log pa nyid du nges pa nyid dang / de gnyi ga dang bral bas nges pa med pa nyid kyang yang dag pa ji lta ba bzhin du rab tu shes te zhes gsungs pa'o/ /legs par spyad pa dang / nyes par spyad pa'i rgyu'i bye brag gis ston pa ni gang gi phyir/ yang dag pa'i lta bas yang dag pa la nges pa nyid dang /log pa'i lta bas log par nges pa nyid dang / de gnyi ga dang bral bas nges pa med kyang yang dag pa ji lta ba bzhin du rab tu shes so zhes gsungs pa'o/ /ngan 'gro dang bde 'gro'i rgyu'i bye brag gis ston pa ni gang gi phyir/ mtshams med pa lnga gang yang rung ba zhig tu log par nges pa nyid dang /dbang po lnga la yang dag par nges pa nyid dang / de gnyi ga dang bral bas nges pa nyid ces gsungs pa'o/ /mu stegs can dang / 'phags pa nyan thos kyi rgyu'i bye brag gis ston pa ni gang gi phyir/ log pa brgyad du log par nges pa nyid dang / yang dag pa la yang dag par nges pa nyid dang / yang byar med pa nyid dang / de gnyi ga dang bral bar nges pa med pa nyid ces gsungs pa'o/ /byang chub sems dpa'i bye brag gis kyang ston pa ni gang gi phyir/ ser sna dang / phrag dog dang / ngan pa spyod pa ma bzlog pas log par nges pa nyid dang /'phags pa bla na med pa'i lam bsgom pa nye bar sgrub pas yang dag par nges pa nyid dang / de gnyi ga dang bral bas nges pa med pa'i phung po la lung 'bogs pa yang yang dag pa ji lta ba bzhin du rab tu shes so zhes gsungs pa'o/ /de la ser snas don du gnyer ba'i sems can yal bar 'dor ba dang /phrag dog gi nyes pas sems can gzhan sbyor bar mi 'dod pa dang / ngan pa nye bar spyod pa ma bzlog pas gzhan la sdug bsngal nye bar sgrub pa'i phyir pha rol tu phyin pa dang mi mthun pas byang chub sems dpa'i log pa nyid du nges pa yin no/ /de ltar smra ba po'i rtsol ba phun sum tshogs pa dang /ye shes phun sum tshogs pa dang / spyod pa la 'jug pa phun sum tshogs pa dang / rgyu rnam pa gsum gyis sa 'di la rab tu gnas par 'gyur ro/ /rab tu gnas nas thar pa nye bar sgrub pa'i sgo nas bshad pa phun sum tshogs par 'gyur te/ gang gi phyir kye rgyal ba'i sras de ltar byang chub sems dpa'i ye shes de lta bu dang ldan pa ni byang chub sems dpa'i sa legs pa'i blo gros can la rab tu gnas pa zhes bya ste/byang chub sems dpa'i sa legs pa'i blo gros can 'di la gnas pa'i byang chub sems dpa' de ni sems can rnams kyi spyod pa rnam pa tha dad pa de lta bu dag shes nas de bzhin du thar pa nye bar sgrub pa nye bar sgrub bo zhes gsungs pa'o//bshad pa phun sum tshogs pa de yang shes pa phun sum tshogs pa dang / ngag phun sum tshogs pa dang / smra ba po phun sum tshogs pa dang rnam pa gsum gyis yongs su bstan to//shes pa phun sum tshogs pa de yang gang zhig shes pa dang / gang gi dbang du byas nas de bstan pas ston par rig par bya'o/ /ci zhig shes nas ston zhe na/ yongs su smin par gyur pas rnam par grol ba'i snod nyid dang / 'dul bas rnam par grol ba'i rang bzhin dang theg pa gsum tha dad pas rnam par grol ba rab tu dbye ba ste/gang gi phyir sems can yongs su smin pa yang yang dag pa ji lta ba bzhin du rab tu shes te/ sems can gdul ba dang / nyan thos kyi theg pa bstan pa dang / rang sangs rgyas kyi theg pa bstan pa dang / byang chub sems dpa'i theg pa bstan pa dang /de bzhin gshegs pa'i sa bstan pa yang yang dag pa ji lta ba bzhin du rab tu shes so zhes gsungs pa'o/ /gang gi dbang du byas nas ston zhe na/ gnyen po bstan pa'i snod nyid de/ gdul bya'i snod la brtags nas gnyen po ston zhes bya ba'i tha tshig ste/tshig gnyis dang / dbang po dang / mos pa dang mthun par chos ston pas chos ston pa'i snod ni tshig gnyis kyis ston te/ gang gi phyir de de ltar shes nas sems can rnams la de kho na bzhin du chos ston te/ bsam pa ji lta ba rnam par dbye ba dang / bag la nyal ji lta ba rnam par dbye ba dang /dbang po ji lta ba rnam par dbye ba dang / mos pa ji lta ba rnam par dbye ba zhes gsungs pa'o/ /dpe ji lta bu zhe na/ nye bar sgrub pa'i snod nyid ni gang gi phyir/ spyod yul ji lta ba bzhin dbye ba shes pa nye bar sgrub pa zhes gsungs pa'o/ /rnam grangs ji lta bu'i snod nyid ni gang gi phyir/spyod yul thams cad shes pa khong du chud par bya ba zhes gsungs pa'o/ /ji snyed thob pa'i snod nyid ni gang gi phyir/ khams kyi thibs po ji lta ba bzhin du nye bar spyod pa dang ldan pa zhes gsungs pa'o/ /skye ba der nyon mongs pa dang / las kyi bag chags 'dra bas tshig gzung bar 'os pa nyid ni gang gi phyir/skye bar nyon mongs pa dang las kyi bag chags ji lta ba bzhin du rjes su 'jug pa zhes gsungs pa'o/ /nges pa dang ma nges pa'i dbang po rnam par bzlog pa ni gang gi phyir/ tshogs ji lta bu la gnas pa khong du chud par bya ba zhes gsungs pa'o//theg pa ji lta bus nges par 'byin pa'i snod nyid ni gang gi phyir/ theg pa ji lta bu la mos pa'i rnam par grol ba thob par bya ba chos ston to zhes gsungs pa'o/ /byang chub sems dpa'i sa legs pa'i blo gros can 'di la gnas pa'i byang chub sems dpa' de ni chos smra ba chen po byed cing /de bzhin gshegs pa'i chos kyi mdzod bsrung ngo zhes bya bas ni 'chad pa po nyid dang / 'dzin pa po nyid du yongs su ston to/ /de chos smra ba'i tshul dang ldan pa zhes bya ba ni rnam pa nyi shus gtam brjod pa'o/ /ji lta bu zhe na/ dus dang / gus par byed pa dang / go rims dang /mtshams sbyar ba dang / mthun par ldan pa dang / dga' bar byed pa dang / mos par byed pa dang / tshim par byed pa dang / brtun ngas par mi byed pa dang / g.yel bar mi byed pa dang / rigs pa dang mthun pa dang / ma 'dres pa dang / chos dang ldan pa dang / 'khor ji lta ba dang / byams pa'i sems dang ldan pa dang / phan pa'i sems dang ldan pa dang / snying rje'i sems dang ldan pa dang / rnyed pa dang / bkur sti dang / tshigs su bcad pa rnams la mi gnas pa dang / bdag la mi stod cing gzhan la mi smod pa'o/ /de la dus ni mi khom pa brgyad dang ma 'brel zhes bya ba'i tha tshig ste/dper na/ mya ngan gyis gdungs rims btab 'khrugs pa yul la mngon phyogs rnam par nyam ngar gnas/ /sgo ba med cing srung ma med dang phra ma zhugs dang sgrub pa med pa yi/ /rgyal po la ni yul dus shes pa ji ltar rang don brjod pa mi 'dod ltar//sems kyi rgyal po mi khom brgyad dang 'brel pa la yang tshul ni de nyid do/ /zhes bshad pa lta bu'o/ /gus par byed ces bya ba ni mthun pa'i spyod lam gyis gnas pa la yin gyi/ mi mthun pas ma yin te/ ji lta bu zhe na/ min par 'dug pa 'greng ste chos mi bshad par bslab par bya'o zhes bya ba la sogs pa so sor thar pa'i mdo las bslab pa'i chos rnams kyi nang nas ji ltar rgya cher 'byung ba de ltar shes par bya'o//de ci'i phyir zhe na/ sangs rgyas dang byang chub sems dpa' rnams ni chos gtso bor mdzad pa'i phyir te/ chos la gus par byas na gzhan dag kyang chos la shin tu gus pa skye ba'o //nyan pa dag kyang gus pa skye bar 'gyur gyi/ brnyas pa skye bar mi 'gyur ro/ /de ltar gus par byas nas ston pa de chos la ser sna byed pa'i dri ma med pas thams cad la thams cad ston to/ /slob dpon gyis dpe mkhyud mi byed pas rgyun chags su ston to//go rims zhes bya ba ni tshig dang yi ge go rims ji lta ba bzhin du ston pa'o/ /mtshams sbyar ba zhes bya ba ni ji ltar tshig dang yi ge go rims bzhin du bstan pa'i go rims bzhin du don rnam par 'byed pa'o/ /mthun pa dang ldan pa zhes bya ba ni don dang ldan par chos ston gyi/don dang mi ldan par ma yin te/ de la don nyid ston gyi don dang mi ldan pa ma yin no/ /dga' bar byed ces bya ba ni yang dag par bstan par bya ba rnams la yang dag par ston to/ /mos par byed ces bya ba ni yang dag par 'dzin du gzhug par bya ba rnams yang dag par 'dzin du 'jug pa'o//tshim par byed ces bya ba ni yang dag par gzengs bstod par bya ba rnams yang dag par gzengs bstod pa'o/ /brtun ngas par mi byed pa dang g.yel bar mi byed ces bya ba rnam pa 'di gnyis kyis ni dga' bar bya ba rnams dga' bar byed pa'o/ /rigs pa zhes bya ba ni mngon sum dang / rjes su dpag pa dang /yid ches pa'i lung gi tshad ma dang ldan pa'i gtam zer ba'o/ /mthun pa zhes bya ba ni bde 'gror 'gro ba dang rjes su mthun pa'o/ /ma 'dres pa zhes bya ba ni ma 'khrugs pa go sla ba gzing gzing ba ma yin pa'o/ /chos dang ldan pa zhes bya ba ni 'phags pa'i bden pa bzhi dang ldan pa'o//'khor ji lta ba zhes bya ba ni bzhi'am brgyad de/ gang la ji ltar gang 'ongs pa de la de ltar de brjod pa'o/ /rnam pa bco lnga po de dag gis ni byang chub sems dpa'i gzhan gyi don thams cad dang mthun pa'i gtam du shes par bya'o/ /de'i 'og tu byams pa'i sems dang ldan pa zhes bya ba ni gnod pa byed pa'i sems can rnams la byams pa'i sems nyid nye bar gzhag nas gtam brjod pa'o//phan pa'i sems dang ldan pa zhes bya ba ni/ nye bar spyad pa spyod pa'i sems can rnams phan par bya ba'i sems nyid nye bar gzhag nas so/ /snying brtse ba'i sems dang ldan pa zhes bya ba ni bde ba dang sdug bsngal bas rgyags pa dang /sro shi ba'i sems can rnams la phan pa dang / bde ba dang snying brtse ba'i sems nyid nye bar gzhag nas so/ /rnyed pa dang / bkur sti dang / tshigs su bcad pa rnams la mi gnas pa zhes bya ba ni zang zing med pa'i sems kyis rnyed pa dang / bkur sti dang /tshigs su bcad pa thams cad la re ba med pa'o/ /bdag la mi stod cing gzhan la mi smod ces bya ba ni nga rgyal dang / phrag dog gis kun nas dkris pa dang bral bar sems can rnams la chos ston pa ste/ rnam pa lnga po de dag gis ni byang chub sems dpa'i rang gi sems yongs su dag pa'i gtam du shes par bya'o//de ltar na rnam pa nyi shus gtam brjod pas chos smra ba'i tshul dang ldan pa yin no/ /de la ngag phun sum tshogs pa ni byang chub sems dpa'i so so yang dag par rig pas mngon par bsgrubs pa'i tshig gis chos ston par 'gyur te/ gang gi phyir shes pas sa la mkhas pa tshad med pa dang ldan pas/byang chub sems dpa'i tshig so so yang dag par rig pa bzhis mngon par bsgrubs pas chos ston to/ /de la byang chub sems dpa'i so so yang dag par rig pa bzhi ma 'dres pa dag 'di lta ste/ chos so so yang dag par rig pa dang /don so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa rtag par rgyun du 'byung ngo zhes gsungs pa'o/ /ma 'dres pa de dag ces bya ba ni thun mong ma yin pa rnams so/ /de la so so yang dag par rig pa rnams kyi yul ni chos nyid dang /chos nyid spyod yul kho na dang / go bar byed pa dang / go bar byed pa sgo du ma kho na'o/ /de la chos nyid ni gang mtha' gnyis rnam par spangs pa'i rigs kyis bsdus pa ste/ 'di lta ste dper na gzugs kyi mtshan nyid ni gzugs su rung ba'o zhes bya ba la sogs pa'o//chos nyid spyod yul kho na rigs kyis bsdus pa de nyid ji ltar shes pa'i yul du 'gyur ba ste/ rigs kyis bsdus pa de ji ltar shes pa'i yul du 'gyur ba'o/ /'di lta ste dper na gzugs gang zhe na/ ming dang gzugs rnams zhes bya ba la sogs pa'o//go bar byed pa ni ji ltar shes pa'i yul de nyid brjod pas gzhan khong du chud par byed pa ste/ gzhan dag brjod pas khong du chud par bya'o/ /go bar byed pa sgo du ma nyid ni brjod pas gzhan khong du chud pa de nyid kyi rnam grangs tshad med pa shes pa nyid do/ /de dag ni rnam pa bcur rnam par gnas te/rang gi mtshan nyid kyi dbang du byas pa dang / spyi'i mtshan nyid dang / tshul gyi mtshan nyid dang / bstan pa'i mtshan nyid dang / shes pa'i mtshan nyid dang / rnam par byang ba'i mtshan nyid rnam pa lnga ste/ 'di lta ste mngon pa'i nga rgyal med pa'i mtshan nyid dang / theg pa dman pa dang / gya nom pa'i mtshan nyid dang / byang chub sems dpa'i sa'i mtshan nyid dang / de bzhin gshegs pa'i sa'i mtshan nyid dang / de'i mdzad pa sgrub pa'i mtshan nyid do/ /de la rang gi mtshan nyid ni rnam pa bzhi ste/ rigs kyi rang gi mtshan nyid dang / so so'i rang gi mtshan nyid dang /sgra ji bzhin du ming du bgrangs pa'i mtshan nyid dang / ming de'i rab tu dbye ba'i rang gi mtshan nyid de gang gi phyir/ de chos so so yang dag par rig pas chos rnams kyi rang gi mtshan nyid rab tu shes so/ /don so so yang dag par rig pas chos rnams kyi rnam par dbye ba rab tu shes so//nges pa'i tshig so so yang dag par rig pas chos rnams ma 'dres par bstan pa rab tu shes so/ /spobs pa so so yang dag par rig pas chos rnams kyi mthun pa'i rgyun rgyun mi 'chad pa rab tu shes so zhes gsungs pa'o/ /de la ma 'dres par bstan pa ni su ming go bar 'gyur ba de la de nyid kyis ston gyi gzhan gyis ma yin pa'o//mthun pa'i rgyun rgyun mi 'chad pa zhes bya ba ni rnam grangs dag gi rgyun zad mi shes pa ste/ rnam grangs mang pos don de nyid bstan par bya ba'i phyir ro/ /de la spyi'i mtshan nyid kyang rnam pa bzhi ste/ chos thams cad kyi spyi'i mtshan nyid dang /'dus byas thams cad kyi spyi'i mtshan nyid dang / chos thams cad kyi btags pa'i spyi'i mtshan nyid dang / btags pa'i btags pa spyi'i mtshan nyid de gang gi phyir/ gzhan yang chos so so yang dag par rig pas chos rnams kyi dngos po med pa'i lus rab tu shes so//don so so yang dag par rig pas chos rnams kyi 'byung ba dang 'jig pa rab tu shes so/ /nges pa'i tshig so so yang dag par rig pas chos thams cad kyi btags pa rgyun 'chad pa med par chos ston to/ /spobs pa so so yang dag par rig pas ji ltar btags pa bzhin du 'khrugs pa med par mtha' yas pas chos ston to zhes gsungs pa ste/mi rtag pa nyid kyi sgo nas chos la bdag med pa la 'jug pas spyi'i mtshan nyid gnyis pas ni snga ma shes pa'i yul du 'gyur ro/ /de la chos thams cad kyi btags pa rgyun 'chad pa med pa zhes bya ba ni chos gzhan gyi btags pa'i chos gzhan la mi ston pa'o//ji ltar btags pa bzhin du 'khrugs pa med pa zhes bya ba ni rnam grangs gzhan dag gis sngar btags pa dang mi 'gal ba'o/ /tshul gyi mtshan nyid kyang rnam pa bzhi ste/ byung ba'i tshul gyi mtshan nyid dang / byung ba dang ma byung ba'i tshul gyi mtshan nyid dang /btags pa dang rdzas kyi tshul gyi mtshan nyid dang / brjod pa'i dngos po'i tshul gyi mtshan nyid de/ gang gi phyir gzhan yang chos so so yang dag par rig pas da ltar byung ba'i chos rnams kyi rnam par dbye ba rab tu shes so/ /don so so yang dag par rig pas 'das pa dang /ma 'ongs pa'i chos rnams kyi rnam par dbye ba rab tu shes so/ /nges pa'i tshig so so yang dag par rig pas 'das pa dang / ma 'ongs pa dang da ltar byung ba ma 'dres bar chos ston to/ /spobs pa so so yang dag par rig pas dus re re zhing chos snang ba mu med par chos ston to zhes gsungs pa ste/'das pa dang ma 'ongs pa ni da ltar byung ba'i rigs su gtogs pa'i phyir/ rigs des bsdus par rig par bya'o/ /'das pa dang ma 'ongs pa la ltos nas/ da ltar byung ba la da ltar byung ba nyid du shes te/ de ltar de ni shes pa'i yul yin no/ / brjod pa'i dngos po'i tshul gyi mtshan nyid ni dus gsum las lhag pa med par rig par bya'o/ /chos kyi snang ba mu med pa zhes bya ba la snang ba ni rnam grangs su rig par bya'o/ /bstan pa'i mtshan nyid kyang rnam pa bzhi ste/ mdo la sogs pa bstan pa'i mtshan nyid dang / de'i rnam par bshad pa bstan pa'i mtshan nyid dang /rjes su mthun par bstan pa'i mtshan nyid dang / /'tsham par bstan pa'i mtshan nyid de/ gang gi phyir gzhan yang chos so so yang dag par rig pas chos rab tu dbye ba rab tu shes so/ /don so so yang dag par rig pas don rab tu dbye ba rab tu shes so//nges pa'i tshig so so yang dag par rig pas sgra bzhin du bstan pas chos ston to/ /spobs pa so so yang dag par rig pas bsam pa ji lta ba bzhin du shes pas chos ston to zhes gsungs pa'o/ /de la sgra bzhin du bstan pa ni skad ji lta ba bzhin du bstan pa'o/ / bsam pa ji lta ba bzhin du shes pa ni gang gi bsam pa ji lta ba dang / su dpe'i rnam grangs ji snyed kyis khong du chud par 'gyur ba'o/ /shes pa'i mtshan nyid kyang rnam pa bzhi ste/ mngon sum du shes pa dang / lkog tu gyur pa shes pa dang / 'thob pa'i thabs shes pa dang / 'thob pa shes pa ste/gang gi phyir gzhan yang chos so so yang dag par rig pas chos shes pas rnam par dbye ba ma 'dres pa la mkhas pa rab tu shes so/ /don so so yang dag par rig pas rjes su rtog pa'i shes pas de bzhin du rnam par gzhag pa rab tu shes so/ /nges pa'i tshig so so yang dag par rig pas kun rdzob shes pas ston pas ston te /spobs pa so so yang dag par rig pas don rnam par shes pa la mkhas pas chos ston to zhes gsungs pa'o/ /de la chos shes pas rnam par dbye ba ma 'dres pa la mkhas pa ni chos shes pas bden pa rnam par dbye ba phyin ci ma log pa la mkhas pa'o//rjes su rtog pa'i shes pas de bzhin du rnam par gzhag pa ni rjes su rtog pa'i shes pas 'di ji lta ba de bzhin du gzhan yang de bzhin du rnam par 'jog pa'o/ /spobs pa so so yang dag par rig pas don dam pa shes pa la mkhas pa ni rnam grangs ma nor ba la spobs pa yin par rig par bya'o//mngon pa'i nga rgyal med pa'i mtshan nyid kyang rnam pa bzhi ste/ don dam pa'i bden pa la mngon pa'i nga rgyal med pa dang / kun rdzob kyi bden pa la mngon pa'i nga rgyal med pa dang / bstan pa snyan pa la mngon pa'i nga rgyal med pa dang / bstan pa bla na med pa la mngon pa'i nga rgyal med pa ste/gang gi phyir gzhan yang chos so so yang dag par rig pas chos tshul gcig pa mi 'khrugs pa rab tu shes so/ /don so so yang dag par rig pas phung po dang / khams dang / skye mched dang / bden pa dang rten cing 'brel bar 'byung ba la mkhas pa khong du chud par bya ba 'jug go//nges pa'i tshig so so yang dag par rig pas 'gro ba thams cad smon pa'i sgra dbyangs shin tu snyan pa'i yi ge rnams kyis ston to/ /spobs pa so so yang dag par rig pas phyi phyir zhing snang ba mu med pas ston to zhes gsungs pa'o/ /de la tshul gcig pa mi 'khrugs pa ni bdag ni bdag med par shes par byed do//bdag gi bdag med pa rtogs pa'o snyam pa la sogs pas chos la bdag med pa la mi 'khrugs pa'o/ /phung po la sogs pa la mkhas pa ni bdag med par rab tu rtogs par 'gyur te/ des na de ni shes pa'i yul nyid yin no//phung po la sogs pa la mkhas pas ni/ ril po gcig pu'i bdag tu 'dzin pa dang / mi 'dra ba la rgyur 'dzin pa dang / za ba por 'dzin pa dang / byed pa por 'dzin pa'i gnyen por go rims bzhin du rig par bya'o/ /theg pa dman pa dang / gya nom pa'i mtshan nyid kyang rnam pa bzhi ste/dmigs pa'i mtshan nyid dang / rigs kyi mtshan nyid dang / rnam par grol ba'i mtshan nyid dang / yid la byed pa'i mtshan nyid de gang gi phyir/ gzhan yang chos so so yang dag par rig pas theg pa gcig la yang dag par gzhol ba tha dad pa med par rab tu shes so/ / don so so yang dag par rig pas theg pa rab tu rnam par phye ba rnam pa tha dad par rab tu shes so/ /nges pa'i tshig so so yang dag par rig pas theg pa thams cad tha mi dad par ston to/ /spobs pa so so yang dag par rig pas theg pa re re la yang chos kyi snang ba mu med par ston to zhes gsungs pa'o//de la yang dag par gzhol ba tha dad pa med pa ni dmigs pa tha dad pa med pa nyid du rig par bya'o/ /theg pa thams cad tha mi dad par ston zhes bya ba ni rnam par grol ba thun mong bas ci nas skrag par mi byed pa'o/ /chos kyi snang ba mu med pa zhes bya ba la snang ba ni rnam grangs su rig par bya ste/ji lta bus gdul bya rnams la theg pa so so rnam par grol ba thob par byed pa'i tshul bzhin yid la byed pa rnam pa du ma rab tu 'byung ngo / /byang chub sems dpa'i sa'i mtshan nyid kyang rnam pa bzhi ste/ mngon par rdzogs par rtogs pa'i mtshan nyid dang /bstan pa'i mtshan nyid dang / thabs nye bar sgrub pa'i mtshan nyid dang / sgo du ma la 'dzud pa'i mtshan nyid de/ gang gi phyir gzhan yang chos so so yang dag par rig pas byang chub sems dpa'i spyod pa dang / ye shes kyi spyod pa dang / chos kyi spyod pa thams cad ye shes kyis khong du chud par bya ba thams cad la 'jug go//don so so yang dag par rig pas sa bcu rnam par dgod pa dang / bstan pa rab tu rnam par dbye ba la 'jug go/ /nges pa'i tshig so so yang dag par rig pas sa ji lta ba bzhin du lam nye bar sgrub pa ma 'dres par ston to/ / spobs pa so so yang dag par rig pas re re la yang rnam pa mu med par ston to zhes gsungs pa'o/ /de la byang chub sems dpa'i spyod pa ni ye shes dang / chos kyi spyod pa gnyis kyis ston te / de ni ye shes dmigs pa dang bcas pa smos pa'i phyir ro/ /sa bcu rnam par dgod pa ni sems kyis so//bstan pa ni tshig gis yin par rig par bya'o/ /sa ji lta ba bzhin du lam nye bar sgrub pa ma 'dres par ston to zhes bya ba ni gdams ngag phyin ci ma log pa'o/ /de bzhin gshegs pa'i sa'i mtshan nyid kyang rnam pa bzhi ste/ chos kyi sku'i mtshan nyid dang / gzugs kyi sku'i mtshan nyid dang /mngon par rdzogs par thugs su chud pa'i mtshan nyid dang / bstan pa'i mtshan nyid de gang gi phyir/ gzhan yang chos so so yang dag par rig pas de bzhin gshegs pa thams cad mtshan nyid gcig tu khong du chud par bya ba la 'jug go/ /don so so yang dag par rig pas dus dang /dngos po dang mtshan rnam par dbye ba tha dad pa khong du chud par bya ba rab tu shes so/ /nges pa'i tshig so so yang dag par rig pas ji ltar mngon par rdzogs par thugs su chud pa bzhin du rnam par dbye ba bstan pas ston to/ /spobs pa so so yang dag par rig pas chos kyi tshig re re la yang bskal pa mtha' yas par rgyun mi 'chad par ston to zhes gsungs pa'o//de la dus ni bskal pa gang la sangs rgyas gang 'byung ba'o/ /dngos po ni sangs rgyas kyi zhing gang na sku ci 'dra bas so/ /mtshan ni ming gang gis gang rtogs pa'o/ /ji ltar mngon par rdzogs par thugs su chud pa bzhin zhes bya ba ni sangs rgyas bcu'i dbang du byas nas gang gis mngon par rdzogs par thugs su chud pa ji lta ba bzhin du bstan par bya'o//mdzad pa'i sgrub pa'i mtshan nyid kyang rnam pa bzhi ste/ mngon par rdzogs par rtogs pa'i mtshan nyid dang / rnam par gzhag pa'i mtshan nyid dang /bstan pa'i mtshan nyid dang / de mi zad pa'i mtshan nyid de gang gi phyir/ gzhan yang chos so so yang dag par rig pas de bzhin gshegs pa thams cad kyi gsung dang / stobs dang / mi 'jigs pa dang / sangs rgyas kyi chos dang / thugs rje chen po dang /so so yang dag par rig pas sbyor ba dang / chos kyi 'khor lo bskor bas thams cad mkhyen pa'i ye shes khong du chud par bya ba rab tu shes so/ /don so so yang dag par rig pas sems can gyi spyod pa brgyad khri bzhi stong dang / bsam pa ji lta ba dang / dbang po ji lta ba dang / mos pa ji lta ba bzhin gyi de bzhin gshegs pa'i gsung rab tu shes so/ /nges pa'i tshig so so yang dag par rig pas sems can thams cad kyi spyod pa dang / ma 'dres pa'i de bzhin gshegs pa'i gsungs rjes su bsgrags pas ston to/ /spobs pa so so yang dag par rig pas de bzhin gshegs pa'i ye shes kyi snang ba spyod pa'i dkyil 'khor la mos pas chos ston to zhes gsungs pa'o//de la gsung ni tshig gang gis ston pa'o/ /stobs ni gang thob pas so/ /mi 'jigs pa ni gang gis mu stegs can rnams zil gyis gnon pa'o/ /sangs rgyas kyi chos ni sangs rgyas kyi chos ma 'dres pa gang dag gis nyan thos dang /rang sangs rgyas rnams zil gyis non pa'o/ /thugs rje chen po ni gang gis shin tu ston pa'o/ /so so yang dag par rig pas sbyor ba ni gang la brten nas ston pa'o/ /chos kyi 'khor lo bskor ba ni 'chad pa'o//de dag thams cad kyis thams cad mkhyen pa'i ye shes khong du chud par bya ba rab tu shes so/ /bsam pa ji lta ba zhes bya ba ni 'dir khams 'di lta bur yin par rig par bya'o/ /de bzhin gshegs pa'i ye shes kyi snang ba spyod pa'i dkyil 'khor ni de bzhin gshegs pa'i chos kyi sku ste/de ni sems can gyi don spyod pas spyod pa'o/ /tha mi dad pas dkyil 'khor ro/ /de la mos pas byang chub sems dpa'i spobs pa zad mi shes pa'o/ /de la smra ba po phun sum tshogs pa ni rnam pa bzhis yongs su bstan te/ gzungs phun sum tshogs pa dang / rab tu ston pa phun sum tshogs pa dang /dris pa lan 'debs pa phun sum tshogs pa dang / 'dzin pa phun sum tshogs pa'o/ /de la gzungs phun sum tshogs pa ni gzungs rnam pa bcu ste/ don gyi gzungs ni gang gi phyir/ kye rgyal ba'i sras byang chub sems dpa' so so yang dag par rig pa'i ye shes de lta bu la mkhas pa byang chub sems dpa'i sa dgu pa thob pa/de bzhin gshegs pa'i chos kyi mdzod thob pa/ chos smra ba chen po byed pa ni don dang ldan pa'i gzungs thob pa yin te zhes gsungs pa'o/ /tshig gi gzungs ni gang gi phyir/ chos dang ldan pa'i gzungs zhes gsungs pa'o//mngon par shes pa'i gzungs ni gang gi phyir/ ye shes mngon par bsgrub pa dang ldan pa'i gzungs zhes gsungs pa'o/ /'od zer rab tu gtong ba'i gzungs ni gang gi phyir/ snang ba dang ldan pa'i gzungs zhes gsungs pa'o/ /phas kyi rgol ba tshar gcod pa'i gzungs ni gang gi phyir/blo gros bzang po dang ldan pa'i gzungs zhes gsungs pa'o/ /de bzhin gshegs pa la mchod pa bya ba mi 'dogs pa'i sems can la phan gdags pa nye bar sgrub pa'i gzungs ni gang gi phyir/ nor dang ldan pa'i gzungs zhes gsungs pa'o/ /theg pa chen po la zhum pa'i sems can yang dag par gzengs bstod pa'i gzungs ni gang gi phyir/gzi brjid dang ldan pa'i gzungs zhes gsungs pa'o/ /thogs pa med pa spobs pa'i gzungs ni gang gi phyir/ chags pa med pa'i sgo'i gzungs zhes gsungs pa'o/ /spobs pa mi zad pa'i gzungs ni gang gi phyir/mtha' yas pa dang ldan pa'i gzungs zhes gsungs pa'o/ /don sna tshogs la spobs pa'i gzungs ni gang gi phyir/ don sna tshogs la spobs pa'i gzungs thob pa yin no zhes gsungs pa'o/ /de la gzungs kyi sgo de dag la sogs pa gzungs kyi sgo grangs med pa 'bum phrag bcu tshang pa thob ste/gzungs kyi sgo grangs med pa 'bum phrag bcu dang ldan pa'i sgra skad kyi yan lag la mkhas pas de snyed du tshad med pa dang ldan pa'i spobs pa rnam par phye ba'i sgos chos ston to/ /de de ltar gzungs kyi sgo grangs med pa 'bum phrag tshad med pa dag gis /sangs rgyas bcom ldan 'das dpag tu med pa dag las chos nyan cing / thos nas kyang brjed par mi byed de/ ji skad thos pa yang tshad med par rnam par phye nas ston to/ /de de bzhin gshegs pa gcig las gzungs kyi sgo grangs med pa 'bum phrag bcus chos kun chub par byed de/de bzhin gshegs pa gcig las ji lta ba bzhin du de bzhin gshegs pa mtha' yas pa dag las kyang de bzhin no/ /de smon pa tsam gyis yang dag par rdzogs pa'i sangs rgyas las chos kyi sgo snang ba ches mang du yang dag par 'dzin gyi/ nyan thos shin tu mang du thos pa dang ldan pa/thos pa 'dzin pa'i gzungs thob pas ni bskal pa 'bum du gzung ba'i byin gyi rlabs kyis de ltar mi zin to zhes bya ba ni smra ba po phun sum tshogs pa'o/ /rab tu ston pa phun sum tshogs pa ni gang gi phyir/ de de lta bu'i gzungs thob cing spobs pa thob pas chos kyi gtam bya ba'i phyir/'dug 'dod na stong gsum gyi stong chen po'i 'jig rten gyi khams thams cad rgyas par bkang ste/ chos kyi stan la 'dug cing bsam pa ji lta ba bzhin du rnam par phye ste sems can rnams la chos ston to / /de'i chos kyi stan ni de bzhin gshegs pa dag dang /byang chub sems dpa' dbang bskur ba'i sa thob pa rnams ma gtogs par thams cad las 'phags pa snang ba tshad med pa dang ldan pa yin no/ /de chos kyi stan la 'dug nas/ 'dod na sgra skad gcig gis 'khor thams cad go bar byed do/ /'dod na sgra tha dad pa dang / sgra skad kyi yan lag tha dad pa rnam par phye ba rnams kyis go bar byed do/ /'dod na 'od zer gyi sgo nye bar sgrub pa las chos kyi sgo rnams 'byung bar byed do/ /'dod na spu'i khung bu rnam par dbye ba thams cad nas sgra skad thams cad 'byung bar byed do/ /'dod na stong gsum gyi stong chen po'i 'jig rten gyi khams na gzugs su snang ba ji snyed yod pa'i gzugs su snang ba de dag thams cad las chos kyi sgra 'byung bar byed do//'dod na sgra skad gcig gis chos kyi dbyings thams cad go bar byed do/ /'dod na sgra skad thams cad kyi sgrar byin gyis brlab po/ /'dod na 'jig rten gyi khams thams cad na yod pa'i glu dang /rol mo'i sgra dang / sil snyan gyi sgra thams cad las chos kyi sgra 'byung bar byed do/ /'dod na yi ge gcig gi sgra las tshig thams cad rab tu phye ba'i sgra 'byung bar byed do/ /'dod na 'jig rten gyi khams brjod du med pa'i sa dang / chu dang / me dang / rlung gi phung po tshad med pa'i rdul phra rab kyi rdul phra rab tu phye ba'i rdul re re las chos kyi sgo brjod du med pa 'byung bar byed do zhes gsungs pa'o/ /dris pa'i lan 'debs pa phun sum tshogs pa ni gang gi phyir/ gal te stong gi 'jig rten gyi khams su gtogs pa'i sems can rnams lhags te/ de la skad cig thang cig yud tsam cig la dri ba yongs su 'dri zhing / de dag re res kyang sgra rnam pa tha dad pa tshad med pas yongs su dris la/ gcig gis gang dris pa de gnyis pas ma yin na 'ang / byang chub sems dpa' des skad cig thang cig yud tsam cig nyid la thams cad bzung ste/ tshig gcig brjod pas thams cad go bar byed do//gal te stong gnyis su gtogs pa dang / stong gsum du gtogs pa nas/ stong gsum gyi stong chen po'i 'jig rten gyi khams brjod du med par gtogs pa'i sems can rnams lhags te skad cig thang cig yud tsam cig la dri ba yongs su 'dri zhing /de dag re res kyang sgra rnam pa tha dad pa tshad med pas yongs su dris la/ gcig gis gang dris pa de gnyis pas ma yin na'ang / byang chub sems dpa' des skad cig thang cig yud tsam cig nyid la thams cad bzung ste/ tshig gcig brjod pas thams cad go bar byed do/ / chos kyi gtam gyi phyir 'dug nas kyang de bzhin gshegs pa'i byin gyi rlabs len cing sangs rgyas kyi mdzad pa mtha' dag gis sems can thams cad la nye bar gnas pa yin no zhes gsungs pa'o/ /'dzin pa phun sum tshogs pa ni gang gi phyir/ de de bas kyang shas cher ye shes kyi snang ba 'di lta bu rab tu 'dzin par rtsom ste/gal te skra'i rtse mo'i go gcig la 'jig rten gyi khams brjod du med pa'i rdul phra rab kyi rdul ji snyed pa de snyed kyi de bzhin gshegs pa bzhugs la/ de snyed du tshad med pa'i 'khor gyi dkyil 'khor na chos ston cing / de bzhin gshegs pa de dag re res kyang de snyed du tshad med pa'i sems can rnams la chos tha dad pa ston la/sems can gyi bsam pa'i rgyu re re la yang de snyed du tshad med pa'i chos nye bar sgrub pa nye bar sgrub ste/ de bzhin gshegs pa gcig gis ji lta ba bzhin du de bzhin gshegs pa thams cad kyang de bzhin la/ skra'i rtse mo'i go gcig la ji lta ba de bzhin du chos kyi dbyings thams cad na yang de bzhin la/der bdag gis ci nas kyang skad cig thang cig yud tsam gcig la de bzhin gshegs pa thams cad kyi thad nas skad cig las tha mi dad pa'i chos kyi snang ba nod pa de lta bu'i dran pa rgya chen po bsgrub par bya zhing /ji skad brjod pa'i 'khor gyi dkyil 'khor chos nyan pa ris tha dad pa rnams kyis yongs su gang ba/ ji snyed pa de dag tu yang skad cig thang cig yud tsam cig la/ sems can thams cad yongs su tshim par byed na/ 'jig rten gyi khams de tsam dag gi sems can rnams lta smos kyang ci dgos pa de lta bu'i shes rab kyi snang ba rnam par nges pa'i spobs pa bdag gis yongs su sbyang bar bya'o snyam mo zhes gsungs pa'o //'di rnams ni brda phrad par sla bas rnam par dbye ba ma byas so/ /lhag ma rnams ni snga ma bzhin no/ /'phags pa sa bcu pa las sa dgu pa'i rnam par bshad pa rdzogs so// //sa dgu pa la zhing yongs su dag par bya ba dang / sems can yongs su smin par bya ba nas/ sa bcu pa la shes bya mngon par rdzogs par byang chub par bya ba sgom pa yongs su rdzogs par byed de/ 'di ni khyad par ro/ / de yang yongs su sbyang ba bya ba'i sa yongs su rdzogs pa dang / ting nge 'dzin yongs su rdzogs pa thob pa dang / dbang bskur ba thob pa dang / che ba nyid mthar phyin par song ba dang / sa'i nges pa'i tshig dang / mthu bla na med pa dang / bla na yod pa dang / sa'i dpe dang / sa'i phan yon dang / rnam pa brgyad kyis rnam par gzhag par rig par bya'o/ /de la yongs su sbyang ba byas pa'i sa yongs su rdzogs pa ni shin tu rnam par phye ba rnam par 'byed pa nyid kyis sa dgu po rnams yongs su rdzogs par rig par bya ste/ gang gi phyir kye rgyal ba'i sras byang chub sems dpa' de/ de ltar sa dgu pa'i bar du shes bya tshad med pa la rnam par brtags pa'i blos zhes gsungs pa'o//shin tu rnam par phye ba rnam par 'byed pa zhes bya ba la shin tu rnam par phye ba rnam par 'byed pa nyid de yang rnam pa bdun gyis rab tu phye ba ste/ shin tu bsgoms pa ni tshig gsum gyis rab tu phye ba ste/ gang gi phyir chos dkar po shin tu yongs su rdzogs pa/ tshogs bsags par bya ba mtha' yas pa shin tu bsags pa/ bsod nams dang ye shes kyi tshogs chen po shin tu yongs su bzung ba zhes gsungs pa ste/ tshig 'di dag ni bshad pa'i mtshams sbyar ba yin par rig par bya'o/ /bdag dang gzhan gyi don la zhugs pa'i phyir khyab pas rab tu phye ba ni gang gi phyir/snying rje chen pos shin tu rgyas pa thob pa zhes gsungs pa'o/ /sangs rgyas kyi zhing yongs su dag par byed pas rab tu phye ba ni gang gi phyir/ 'jig rten gyi khams rnam par dbye ba rnam pa tha dad pa la mkhas pa zhes gsungs pa'o//sems can yongs su smin par byed pas rab tu phye ba ni gang gi phyir/ sems can gyi khams kyi rgyu ba thibs po la zhugs pa zhes gsungs pa'o/ /shin tu rig pa ni gang gi phyir/ de bzhin gshegs pa'i spyod yul la 'jug pas mthun par gyur pa'i 'du shes yid la byed pa zhes gsungs te/de bzhin gshegs pa'i spyod yul ni de bzhin nyid do/ /chog par mi 'dzin pas rab tu phye ba ni gang gi phyir/ stobs dang / mi 'jigs pa dang / sangs rgyas kyi chos ma 'dres pa la lhag par dmigs pa dang ldan pa zhes gsungs pa'o/ /sa'i mthar thug par song bas rab tu phye ba ni gang gi phyir/rnam pa thams cad dang ldan pa'i thams cad mkhyen pa'i ye shes kyi sa la dbang bskur ba thob pa zhes bya'o zhes gsungs pa'o/ /de ltar yongs su sbyang ba bya ba'i sa yongs su rdzogs pas sa bcu pa rnam par gzhag pa bstan nas/ ting nge 'dzin yongs su rdzogs pa thob pas ston to//de la ting nge 'dzin yongs su rdzogs pa thob pa ni ting nge 'dzin dri ma med pa 'khor dang bcas pa mngon du gyur pa yin par rig par bya ste/ gang gi phyir kye rgyal ba'i sras byang chub sems dpa'i ye shes de lta bu dang ldan zhing / dbang bskur ba'i sa thob pa de la/byang chub sems dpa'i ting nge 'dzin dri ma med pa zhes bya ba mngon du 'gyur ro zhes gsungs pa ste/ nyon mongs pa rgyang sring bar byed pa'i don gyi dri ma med pa'o/ /bsgrib mi dgos par mngon du gyur pas mngon du 'gyur ba zhes bya'o/ /de yang ting nge 'dzin rnam pa dgus dri ma med pa nyid rnam pa brgyad du rig par bya ste/ldem po ngag la 'jug pa dri ma med pa nyid ni gang gi phyir/ chos kyi dbyings rnam par dbye ba la 'jug pa zhes bya ba zhes gsungs pa'o/ /nye ba dri ma med pa nyid ni gang gi phyir/ byang chub kyi snying po'i rgyan gyi tshogs can zhes bya ba zhes gsungs pa'o/ /'od zer rab tu gtong ba dri ma med pa nyid ni gang gi phyir/'od zer rnam pa thams cad kyi me tog ces bya ba zhes gsungs pa'o/ /gzung med pa nyid ni gang gi phyir/ rgya mtsho'i snying po lta bu can zhes bya ba zhes gsungs pa'o/ /mngon par shes pa mngon par bsgrub pa dri ma med pa ni gang gi phyir/ rgya mtsho lta bur 'byor pa zhes bya ba zhes gsungs pa'o//zhing yongs su dag par byed pa dri ma med pa nyid ni mtha' yas pa dang / de kho na la dmigs pa'i tshig gnyis kyis ston te/ gang gi phyir na ma mkha'i khams ltar rgyas pa zhes bya ba dang / chos thams cad kyi ngo bo nyid rnam par 'byed pa zhes bya ba zhes gsungs pa'o//sems can yongs su smin par byed pas dri ma med pa nyid ni gang gi phyir/ sems can thams cad kyi sems kyi spyod pa rjes su rtogs pa zhes bya ba zhes gsungs pa'o/ /da ltar gyi sangs rgyas thams cad gzhan dang / gzhan mngon par rdzogs par byang chub pa mngon du gyur pa shes pas mngon par rdzogs par rtogs pa dri ma med pa ni gang gi phyir/byang chub sems dpa'i ting nge 'dzin da ltar byung ba'i sangs rgyas thams cad mngon sum du bzhugs pa mngon du 'gyur te zhes gsungs pa'o/ /de dag la sogs pa ting nge 'dzin grangs med pa 'bum phrag bcu de la mngon du 'gyur ro//de ting nge 'dzin de dag thams cad la snyoms par 'jug cing ldang ngo / /ting nge 'dzin la mkhas pa dang ldan pa yang yin te/ ting nge 'dzin gyi bya ba ji snyed pa de dag thams cad kyang nyams su myong ngo / /de la ting nge 'dzin grangs med pa 'bum phrag bcu ni snyed pa'i tha ma la byang chub sems dpa'i ting nge 'dzin thams cad mkhyen pa'i ye shes dang khyad par dbang bskur ba dang ldan pa zhes bya ba mngon du 'gyur te zhes bya ba thams cad mkhyen pa'i ye shes dang khyad par med par dbang bskur ba dang ldan pa zhes bya ba ni thams cad mkhyen pa'i ye shes dang mnyam pa nyid du dbang bskur ba dang ldan pa ste/ting nge 'dzin gyi bya ba ji snyed pa nyams su myong bas ting nge 'dzin yongs su rdzogs par ston to/ /de ltar ting nge 'dzin yongs su rdzogs pa thob pas sa rnam par gzhag pa bstan nas dbang bskur ba thob pas ston to/ /de la dbang bskur ba thob pa ni stan gang dang /lus kyi tshad ni ji tsam pa dang / 'khor gang dang / mtshan ma gang byung bar gyur pa dang / gang gis ji ltar dbang bskur ba de ston par rig par bya'o/ /de la stan gyi mtshan nyid ni rnam pa bcu ste/ tshad kyi mtshan nyid ni gang gi phyir/ de mngon du gyur ma thag tu stong gsum 'bum phrag bcu'i gtos dang mnyam pa'i zhes gsungs pa'o//mchog gi rang bzhin gyi bdag po dang 'brel pa'i mtshan nyid ni gang gi phyir/ rin po che chen po'i rgyal po'i pad+ma 'byung bar 'gyur te zhes gsungs pa'o/ /mchog gi rang bzhin gyi khyad par gyi mtshan nyid ni gang gi phyir/rin po che'i rnam pa thams cad kyis spras pa zhes gsungs pa'o/ /sa'i mtshan nyid ni gang gi phyir/ 'jig rten gyi yul thams cad las yang dag par 'das pa zhes gsungs pa'o/ /rgyu'i mtshan nyid ni gang gi phyir/ 'jig rten las 'das pa'i dge ba'i rtsa ba las byung ba zhes gsungs pa'o//grub pa'i mtshan nyid ni gang gi phyir/ sgyu ma'i rang bzhin gyi spyod yul du yongs su grub pa zhes gsungs pa'o/ /don dam pa'i mtshan nyid ni gang gi phyir/ chos kyi dbyings la shin tu gnas par snang ba zhes gsungs pa ste/ shin tu gnas pa ni legs par gnas pa'o//lha'i dri bsung las yang dag par 'das pas yon tan gyi mtshan nyid ni gang gi phyir/ lha'i yul las yang dag par 'das pa zhes gsungs pa'o/ /chu ba dang snying po la sogs pa rang bzhin gyi mtshan nyid ni gang gi phyir/ nor bu rin po che bai DUr+ya chen po'i chu ba can/ tsan+dan gyi rgyal po mtshungs pa med pa'i snying po can/rdo rje'i snying po chen po'i ze ba can/ 'dzam bu'i chu'i gser ltar snang ba'i lo ma can/ 'od zer dpag tu med pas rgyas pa'i lus can zhes gsungs pa'o/ /rgyan gyi mtshan nyid ni gang gi phyir/ rin po che thams cad kyis nang rab tu spras pa/ rin po che'i dra ba mu med pas kun nas yog pa/stong gsum 'bum phrag bcu tshang ba'i rdul phra rab kyi rdul ji snyad kyi pad+ma'i 'khor dang ldan pa zhes gsungs pa'o/ /lus kyi tshad ci tsam la zhe na/ sten gyi rkyen du bab pa'i lus kyi dbyibs la ste/ gang gi phyir byang chub sems dpa' de'i lus kyang de dang 'tsham zhing /de'i rkyen du bab par gnas so/ /thams cad mkhyen pa'i ye shes dang khyad par med par dbang bskur ba dang ldan pa'i ting nge 'dzin de thob ma thag du rin po che chen po'i rgyal po'i pad+ma'i stan de la 'dug par kun du snang ngo zhes gsungs pa'o/ /'khor gang gi nang du zhe na/ rin po che chen po'i rgyal po'i pad+ma'i stan de'i 'khor gyi pad+ma la 'dug pa'i byang chub sems dpa'i 'khor gyi nang du ste/gang gi phyir byang chub sems dpa' de rin po che chen po'i rgyal po'i pad+ma de la 'dug ma thag tu de nas rin po che chen po'i rgyal po'i pad+ma'i 'khor rin po che chen po'i pad+ma ji snyed byung ba de snyed kyi byang chub sems dpa' dag gis byang chub sems dpa' de bskor nas rin po che chen po'i pad+ma de dag kyang phan 'dogs pa'i las can pad+ma de dag la 'khod par snang ste/byang chub sems dpa' de nyid la lta zhing / de dag re re yang ting nge 'dzin 'bum phrag bcu bcu la snyoms par 'jug go zhes gsungs pa'o//mtshan ma gang byung bar gyur na zhes bya ba ni 'od zer byung ba ste/ de dag kyang phan 'dogs pa'i las can dang / sbron pa'i las can dang / 'gugs pa'i las can te/ las gsum dang ldan par rig par bya ste/ gang gi phyir byang chub sems dpa' de dang byang chub sems dpa' de dag gis mnyam par gzhag ma thag tu 'jig rten gyi khams thams cad ma lus par g.yo bar 'gyur ro//ngan song thams cad rgyun chad par 'gyur ro/ /chos kyi dbyings thams cad snang bas rgyas par 'gyur ro/ /'jig rten gyi khams thams cad yongs su dag par 'gyur ro//sangs rgyas kyi zhing thams cad du ming gi sgra grag par 'gyur ro/ /spyod pa mthun pa'i byang chub sems dpa' thams cad 'du bar 'gyur ro/ /'jig rten gyi khams thams cad kyi lha dang / mi'i rol mo glu dang / rol mo'i sgra dang / sil snyan gyi sgra 'byung bar 'gyur ro//sems can thams cad la bde ba skye bar 'gyur ro/ /yang dag par rdzogs pa'i sangs rgyas thams cad la mchod pa dang / rim gro bya ba bsam gyis mi khyab pa byed pa 'byung bar 'gyur ro/ /de bzhin gshegs pa thams cad kyi 'khor gyi dkyil 'khor gyis kyang rnam par rig par 'gyur ro//de ci'i phyir zhe na/ kye rgyal ba'i sras 'di ltar byang chub sems dpa' de rin po che chen po'i rgyal po'i pad+ma'i gdan de la 'dug ma thag tu rkang pa'i 'og gi mthil gnyis nas 'od zer grangs med pa 'bum phrag bcu 'byung ste/ byung nas kyang phyogs bcu'i sems can dmyal ba chen po mnar med pa yan chad snang bar byed do//sems can dmyal ba pa'i sems can rnams kyi sdug bsngal thams cad kyang rgyun chad par byed do/ /pus mo gnyis nas 'od zer grangs med pa 'bum phrag bcu 'byung ste/ byung nas kyang phyogs bcu'i dud 'gro'i skye gnas pa'i gnas thams cad snang bar byed do//dud 'gro'i skye gnas kyi sdug bsngal kyang rab tu zhi bar byed do/ /lte ba khung nas 'od zer grangs med pa 'bum phrag bcu 'byung ste/ byung nas kyang phyogs bcu'i gshin rje'i 'jig rten gyi gnas thams cad snang bar byed do/ /gshin rje'i 'jig rten pa'i sems can rnams kyi sdug bsngal thams cad kyang rab tu zhi bar byed do//rtsib logs g.yas g.yon nas 'od zer grangs med pa 'bum phrag bcu 'byung ste/ byung nas kyang phyogs bcu'i mi'i gnas rnams snang bar byed do/ /mi'i sdug bsngal rnams kyang rab tu zhi bar byed do/ /lag pa'i mthil gnyis nas 'od zer grangs med pa 'bum phrag bcu 'byung ste/byung nas kyang phyogs bcu'i lha dang lha ma yin gyi gnas rnams snang bar byed do/ /lha dang lha ma yin gyi sdug bsngal rnams kyang rab tu zhi bar byed do/ /phrag pa gnyis nas 'od zer grangs med pa 'bum phrag bcu 'byung ste/byung nas kyang phyogs bcu'i nyan thos kyi theg pa pa rnams kyi gnas snang bar byed do/ /chos snang ba'i sgo yang nye bar sgrub bo/ /rgyab dang mgul nas 'od zer grangs med pa 'bum phrag bcu 'byung ste/ byung nas kyang phyogs bcu'i rang sangs rgyas kyi gnas rnams snang bar byed do/ /zhi ba'i ting nge 'dzin gyi sgo'i tshul yang nye bar sgrub bo//kha'i sgo nas 'od zer grangs med pa 'bum phrag bcu 'byung ste/ byung nas kyang phyogs bcu'i byang chub sems dpa' sems dang po bskyed pa yan chad sa dgu pa thob pa'i bar dag snang bar byed do/ /shes rab dang thabs la mkhas pa'i tshul yang nye bar sgrub bo//smin mtshams kyi mdzod spu nas 'od zer grangs med pa 'bum phrag bcu 'byung ste/ byung nas kyang phyogs bcu'i bdud kyi gnas thams cad mog mog por byas nas dbang bskur ba thob pa'i byang chub sems dpa' rnams snang bar byas te/ de dag gi lus rnams su nub par byed do//steng gi yan lag gi dam pa mgo las stong gsum grangs med pa 'bum phrag bcur tshang ba'i rdul phra rab kyi rdul ji snyed kyi 'od zer 'byung ste/ byung nas kyang phyogs bcu'i de bzhin gshegs pa'i 'khor gyi dkyil 'khor thams cad snang bar byas te/ 'jig rten la lan bcu bskor ba byas nas steng gi bar snang la 'dug ste/ 'od zer gyi dra ba'i dkyil 'khor chen por byas nas de bzhin gshegs pa la mchod pa dang rim gro bya ba 'od shin tu gsal ba zhes bya ba rab tu byed de/ mchod pa dang rim gro bya ba de la sems dang po bskyed pa yan chad sa dgu pa thob pa'i bar dag gis de bzhin gshegs pa la mchod pa dang rim gro byas pas brgya'i char yang nye bar mi 'gro/stong gi cha dang / 'bum gyi cha dang / bye ba'i cha dang / bye ba brgya'i cha dang / bye ba stong gi cha dang / bye ba 'bum gyi cha dang / bye ba khrag khrig 'bum gyi char yang nye bar mi 'gro ste/grangs dang / cha dang / bgrang ba dang / rgyur yang nye bar mi 'gro ba nas/ dpe'i bar du yang mi bzod do/ /'od zer gyi dra ba'i dkyil 'khor chen po de las phyogs bcu nas me tog tu gdags pa dang / spos dang / bdug pa dang / phreng ba dang / byug pa dang / phye ma dang /gos dang / gdugs dang / rgyal mtshan dang / ba dan dang / rin po che'i rgyan dang / nor bu rin po cher gdags pa ji snyed yod pa de dag thams cad pas lhag cing 'jig rten gyi yul thams cad las shin tu 'das pa/ 'jig rten las 'das pa'i dge ba'i rtsa ba'i tshogs kyi dbang gis grub pa/yon tan gyi rnam pa thams cad phun sum tshogs pa/ sprul pa'i byin gyi rlabs bsam gyis mi khyab pas byin gyis brlabs pa/ bkod pa sna tshogs kyi nor bu rin po che chen po dag kyang de bzhin gshegs pa re re'i 'khor gyi dkyil 'khor du sprin chen po'i char ltar mngon par 'bab bo//mchod pa de dag sems can gang dag gis shes pa de dag thams cad bla na med pa yang dag par rdzogs pa'i byang chub tu nges par 'gyur ro zhes gsungs pa ni 'od zer de dag phan 'dogs pa'i las can du shes par bya'o/ /mchod pa de dag sems can gang dag gis shes pa de dag thams cad kyang bla na med pa yang dag par rdzogs pa'i byang chub tu nges par 'gyur ro zhes bya ba ni de dag nges pa'i sa la nges par 'gyur ro zhes bya ba'i tha tshig go//rnam grangs gzhan du na nges par 'gyur ba ni/ bya ba la bag yod par legs par sdom pa can du 'gyur ro zhes bya ba'i tha tshig go / mchod pa dang rim gro bya ba de lta bu byas nas kyang 'od zer de dag gis de bzhin gshegs pa'i 'khor gyi dkyil 'khor thams cad snang bar byas te/ 'jig rten la lan bcu bskor ba byas nas/ de bzhin gshegs pa dgra bcom pa yang dag par rdzogs pa'i sangs rgyas de dag gi zhabs kyi 'og gi mthil rnams su nub par 'gyur te/des na de bzhin gshegs pa de dag dang / byang chub sems dpa' de dag gis/ 'jig rten gyi khams rab 'byam che ge mo zhig na/ byang chub sems dpa' spyod pa de lta bu dang ldan pa/ dbang bskur ba'i dus la bab par thugs su chud par 'gyur ro zhes gsungs pa ni sbron pa'i las can ni//kye rgyal ba'i sras de la byang chub sems dpa'i sa dgu pa la gnas pa'i byang chub sems dpa' dpag tu med grangs med pa dag 'jig rten gyi khams rab 'byam mtha' yas pa dag nas der lhags nas/ byang chub sems dpa' de la kun nas bskor te/mchod pa chen po byas nas byang chub sems dpa' de nyid lta zhing / ting nge 'dzin 'bum phrag bcu la snyoms par 'jug go/ /byang chub sems dpa' dbang bskur ba'i sa thob pa rnams kyi dpal be'u dang / rdo rje dang bkra shis las bdud kyi dgra las rnam par rgyal ba zhes bya ba'i 'od zer chen po cig 'od zer gyi 'khor grangs med pa 'bum phrag bcu bcu 'byung ste/byung nas kyang phyogs bcu snang bar byas nas cho 'phrul mu med pa yang dag par bstan to / byang chub sems dpa' de'i dpal be'u dang / rdo rje dang bkra shis la nub par 'gyur ro/ /'od zer de dag der nub ma thag tu byang chub sems dpa' de'i stobs dang /mthu yang 'bum gyur pas kyang lhag par mngon par 'phel bar snang ngo zhes gsungs pa ni 'gugs pa'i las can te/ de lta bu ni mtshan ma gang byung nas dbang bskur ba'o // // dpal be'u dang / rdo rje dang bkra shis zhes bya ba'i mtshan ni byang chub sems dpa' rnams kyi snying ga na yod par rig par bya'o//gang gis dbang bskur zhe na/ byang chub sems dpa' de dang phan tshun ye shes mnyam pa nyid du yang dag par yongs su 'dzin pa dang / de bzhin gshegs pa rnams kyi 'od zer gyis dbang bskur te/ gang gi phyir kye rgyal ba'i sras de nas de bzhin gshegs pa dgra bcom pa yang dag par rdzogs pa'i sangs rgyas de dag mdzod spu dag nas/ thams cad mkhyen pa nyid ni mngon par shes pa dang ldan pa zhes bya ba'i 'od zer 'khor gyi 'od zer grangs med pa 'bum phrag bcu bcu 'byung ste/ de dag gis phyogs bcu thams cad kyi 'jig rten gyi khams thams cad ma lus par snang bar byas nas/ 'jig rten la lan bcu bskor ba byas te/ de bzhin gshegs pa'i rnam par 'phrul pa chen po rnams bstan/ byang chub sems dpa' bye ba khrag khrig 'bum phrag mang po bskul/ sangs rgyas zhing rab 'byam thams cad rnam pa drug tu bskyod de/ ngan song thams cad 'chi 'pho ba dang / 'gro bar skye ba rab tu zhi bar byas/ bdud kyi gnas thams cad mog mog por byas/ de bzhin gshegs pa thams cad mngon par rdzogs par byang chub pas rnam par sangs rgyas pa'i sangs rgyas kyi gdan kun du bstan nas/sangs rgyas thams cad kyi 'khor gyi dkyil 'khor bkod pa'i mthu rab tu bstan te/ 'jig rten gyi khams chos kyi dbyings kyi sa klas pa/ nam mkha'i khams kyi mthas gtugs pa thams cad snang bar byas nas phyir log ste/ byang sems dpa'i 'khor gyi dkyil 'khor thams cad kyi steng nas bskor ba byas nas bkod pa chen po bstan te/'od zer de dag kyang byang chub sems dpa' de'i yan lag gi dam pa mgor nub par 'gyur ro/ /de'i 'khor gyi 'od zer rnams ni de ltar byang chub sems dpa' rnams kyi mgor nub par 'gyur te/'od zer de dag gis phog ma thag tu byang chub sems dpa' de dag gis sngon ma thob pa'i ting nge 'dzin stong phrag bcu thob bo/ /'od zer de dag kyang dus gcig tu byang chub sems dpa' de'i yan lag gi mgo la 'bab par 'gyur te/ byang chub sems dpa' de yang dag par rdzogs pa'i sangs rgyas kyi yul la mngon par dbang bskur ba zhes bya'o//stobs bcu yongs su rdzogs nas ni yang dag par rdzogs pa'i sangs rgyas kyi grangs su 'gro'o zhes gsungs pa'o/ /de ji ltar dbang bskur zhe na/ 'khor los sgyur ba'i rgyal po'i bu thu bo lta bur te /gang gi phyir kye rgyal ba'i sras 'di lta ste/ dper na 'khor los sgyur ba'i rgyal po'i bu thu bo che gzhon nu btsun mo dam pa la btsas pa/ rgyal po'i mtshan dang ldan par gyur pa de la 'khor los sgyur ba'i rgyal pos lha'i glang po rin po che la gser gyi khri bzang po'i steng du bzhag ste/steng nas bla re bres shing gdugs dang rgyal mtshan dang rol mo'i bkod pa rgya chen po byas te/ rgya mtsho chen po bzhi las chu blangs pa de gser gyi bum pas bcus te/ chu des gzhon nu'i spyi bo nas dbang bskur na de dbang bskur ma thag tu rgyal po rgyal rigs spyi bo nas dbang bskur ba zhes bya ba'i grangs su 'gro ste/dge bcu'i las kyi lam yongs su rdzogs nas ni 'khor los sgyur ba zhes bya ba'i ming 'thob bo/ /kye rgyal ba'i sras de bzhin du byang chub sems dpa' yang sangs rgyas bcom ldan 'das de dag gis dbang bskur ma thag tu ye shes kyi dbang bskur bas dbang bskur ba zhes bya ste/stobs bcu yongs su rdzogs nas ni yang dag par rdzogs pa'i sangs rgyas kyi grangs su 'gro'o/ /kye rgyal ba'i sras 'di ni gang gi don du byang chub sems dpa' bye ba 'bum phrag du ma rtsom pa'i byang chub sems dpa'i ye shes chen por dbang bskur ba zhes gsungs pa'o//dbang bskur ba dang dus mnyam du sa 'di la rab tu gnas pa yin te/ gang gi phyir de ltar dbang bskur zhing yon tan dang / ye shes tshad med pa rnam par 'phel ba de ni byang chub sems dpa'i sa chos kyi sprin la gnas pa zhes bya'o zhes gsungs pa'o// // de ltar dbang bskur ba thob pas sa rnam par gzhag pa bstan nas/ che ba nyid kyi bye brag rnam pa lngas che ba nyid mthar phyin pa dang ldan pa ston te/ che ba nyid rnam pa lnga ni shes pa'i che ba nyid dang / rnam par thar pa'i che ba nyid dang / ting nge 'dzin gyi che ba nyid dang / gzungs kyi che ba nyid dang / mngon par shes pa'i che ba nyid do//de dag ni don rnam pa lnga dang 'brel bar rig par bya ste/ shes bya'i de kho na mngon par rdzogs par byang chub pa'i don dang 'brel ba dang / sems la dbang ba'i don dang 'brel pa dang / don thams cad 'grub pa sems bskyed pa tsam la rag las pa'i don dang 'brel pa dang /'khor ba ji srid par sems can gyi don bya ba'i rjes 'jug pa dang 'brel pa dang / sems can yongs su smin par byed pa'i nus pa dang 'brel pa'o/ /shes pa'i che ba nyid kyang rnam pa bdun du rig par bya ste/ yang dag par 'grub pa shes pa'i che ba nyid dang /sprul pa shes pa'i che ba nyid dang / byin gyis brlabs pa shes pa'i che ba nyid dang / cha phra ba 'jug pa shes pa'i che ba nyid dang / gsang ba'i gnas shes pa'i che ba nyid dang / skal ba la 'jug pa shes pa'i che ba nyid dang / lam la 'jug pa shes pa'i che ba nyid do / / de la dang po ni thams cad mkhyen pa nyid la the tshom za ba gcod nus pa'i dbang du byas pa'o/ /gnyis pa ni de la gnas pas mngon par sgrub nus pa'i dbang du byas pa'o/ /gsum pa ni de nyid de lta de ltar byed nus pa'i dbang du byas pa'o/ /bzhi pa ni sprul pa dang byin gyi rlabs de gnyi ga la gnyis su med pa'i ye shes kun du 'byung ba'i dbang du byas pa'o//lnga pa ni sems can yongs su ma smin par skrag pa bsal ba'i dbang du byas pa'o/ /drug pa ni tshe'i 'du byed byin gyis brlabs pa dang / gtang ba la dbang ba'i dbang du byas pa'o/ /bdun pa ni gnyen po bstan pa'i dbang du byas pa'o//de la yang dag par 'grub pa shes pa ni rten cing 'brel par 'byung ba'i shes pa yin par rig par bya ste/ de yang srid pa'i yan lag gang dag byung bas kun nas nyon mongs par 'gyur zhing / 'gag pas rnam par byang bar 'gyur ba dang / khams gsum gang du ba dang / sems can gang dag dang / sems gang kun nas nyon mongs shing rnam par byang ba dang / 'dus byas dang / 'dus ma byas kyi chos gang dag mi shes pa dang / shes pas dang / nam mkha' dang 'dra ba'i yul ji tsam pa dang / dam pa dang dam pa ma yin pa'i chos bstan pa gang gis dang /mya ngan las 'das pa gang ma thob pa dang / thob pa dang lta ba'i nyes pa gang gis mu stegs can rnams kyis de mi thob pa dang / snod kyi 'jig rten gyi 'byung ba dang / ldog pa gang dag dang / theg pa gsum yang dag par 'grub pa gang yin pa de'i rab tu dbye bas rig par bya ste/gang gi phyir kye rgyal ba'i sras byang chub sems dpa'i sa chos kyi sprin 'di la gnas pa'i byang chub sems de ni chos kyi khams yang dag pa ji lta ba bzhin du rab tu shes te/ 'dod pa'i khams yang dag par 'grub pa dang / gzugs kyi khams yang dag par 'grub pa dang / gzugs med pa'i khams yang dag par 'grub pa dang / sems can gyi khams yang dag par 'grub pa dang / rnam par shes pa'i khams yang dag par 'grub pa dang / 'dus byas dang 'dus ma byas kyi khams yang dag par 'grub pa dang / nam mkha'i khams yang dag par 'grub pa dang /yang dag pa dang yang dag pa ma yin pa bstan pa'i khams yang dag par 'grub pa dang / mya ngan las 'das pa'i khams yang dag par 'grub pa dang / lta bar gyur pa'i nyon mongs pa yang dag par 'grub pa yang yang dag pa ji lta ba bzhin du rab tu shes so/ /'jig rten gyi khams 'jig pa dang /'chags pa yang dag par 'grub pa dang / nyan thos kyi spyod pa yang dag par 'grub pa dang / rang sangs rgyas kyi spyod pa yang dag par 'grub pa dang / byang chub sems dpa'i spyod pa yang dag par 'grub pa dang / de bzhin gshegs pa'i stobs dang / mi 'jigs pa dang / rang sangs rgyas kyi chos dang / gzugs kyi sku dang / chos kyi sku yang dag par 'grub pa dang / rnam pa thams cad dang ldan pa'i thams cad mkhyen pa'i ye shes yang dag par 'grub pa dang / mngon par rdzogs par 'tshang rgya ba dang / chos kyi 'khor lo bskor ba dang / mya ngan las 'das pa kun du bstan pa yang dag par 'grub pa dang / mdor na chos thams cad la 'jug cing / rnam par dbye bas brtag pa yang dag par 'grub pa yang yang dag pa ji lta ba bzhin du rab tu shes so zhes gsungs pa'o/ /de la sprul pa shes pa ni sems can du sprul pa la sogs pa'i bye brag gis rig par bya ste/gang gi phyir de ye shes de lta bu dang ldan pa'i blos gong du sems can sprul pa'i las yang dag pa ji lta ba bzhin du rab tu shes te/ nyon mongs pas byas pa'i sprul pa dang / lta bar gyur pa'i sprul pa dang / 'jig rten gyi khams su sprul pa dang /chos kyi dbyings su sprul pa dang / nyan thos su sprul pa dang / rang sangs rgyas su sprul pa dang / byang chub sems dpa' sprul pa dang / de bzhin gshegs par sprul pa dang / sprul pa thams cad la rtog pa yang rtog pa med pa nyid du yang dag pa ji lta ba bzhin du rab tu shes so zhes gsungs pa'o//de la nyon mongs pa dang / lta bar gyur pa'i sprul pa ni nyon mongs pa dang / lta bar gyur pa'i sprul pa ston pa gang yin pa'o/ /chos kyi dbyings su sprul pa ni rnam par gzhag pa'i chos la 'jug pa'o/ /sprul pa de dag thams cad la yongs su rtog pa rnams rtog pa med pa nyid du yang dag pa ji lta ba bzhin du rab tu shes so//de la byin gyi rlabs zhes pa ni gang gi phyir/ de sangs rgyas su byin gyis brlab pa yang yang dag pa ji lta ba bzhin du rab tu shes te/ chos su byin gyis brlab pa dang / dge 'dun du byin gyis brlab pa dang / las su byin gyis brlab pa dang /nyon mongs par byin gyis brlab pa dang / dus byin gyis brlab pa dang / smon lam byin gyis brlab pa dang / mchod pa byin gyis brlab pa dang / spyod pa byin gyis brlab pa dang / bskal pa byin gyis brlab pa dang / ye shes su byin gyis brlab pa yang yang dag pa ji lta ba bzhin du rab tu shes so zhes gsungs pa ste/mdo las ji skad 'byung ba bzhin du rig par bya'o/ /de la ye shes su byin gyis brlab pa ni thams cad mkhyen pa'i ye shes su rig par bya'o/ /cha phra ba 'jug pa shes pa ni de bzhin gshegs pa dgra bcom pa yang dag par rdzogs pa'i sangs rgyas rnams kyi cha phra rab 'jug pa'i mkhyen pa gang dag yin pa 'di lta ste/spyod pa la cha phra ba 'jug pa'i mkhyen pa dang / 'chi 'pho ba dang / skye ba la cha phra ba 'jug pa'i mkhyen pa dang / bltams pa la cha phra ba 'jug pa'i mkhyen pa dang / rnam par 'phrul pa la cha phra ba 'jug pa'i mkhyen pa dang /mngon par 'byung ba la cha phra ba 'jug pa'i mkhyen pa dang / mngon par rdzogs par byang chub pa la cha phra ba 'jug pa'i mkhyen pa dang / chos kyi 'khor lo bskor ba la cha phra ba 'jug pa'i mkhyen pa dang / tshe'i tshang byin gyis brlab pa la cha phra ba 'jug pa'i mkhyen pa dang /yongs su mya ngan las 'da' ba la cha phra ba 'jug pa'i mkhyen pa dang / bstan pa gnas pa la cha phra ba 'jug pa'i mkhyen pa de dag thams cad yang dag pa ji lta ba bzhin du rab tu shes so zhes gsungs pa ste/ mdo las ji skad 'byung ba bzhin du rig par bya'o/ /de la rnam par 'phrul pa ni gom pa bdun por ba la sogs pa yin par rig par bya'o//gsang ba'i gnas shes pa ni de de bzhin gshegs pa dgra bcom pa yang dag par rdzogs pa'i sangs rgyas rnams kyi gsang ba'i gnas gang dag yin pa 'di lta ste/ sku'i gsang ba dang / gsung gi gsang ba dang /thugs kyi gsang ba dang / dus dang dus ma yin pa rnam par dpyad pa gsang ba dang / byang chub sems dpa' lung bstan pa gsang ba dang / sems can bsdu ba dang / tshar gcad pa gsang ba dang / theg pa tha dad pa gsang ba dang / sems can gyi spyod pa dang / dbang po rnam par dbye ba gsang ba dang /las su bya ba la 'jug pa gsang ba dang / spyod pa dang / mngon par rdzogs par byang chub pa dang / rang bzhin thugs su chud pa gsang ba de dag thams cad yang dag pa ji lta ba bzhin du rab tu shes so zhes gsungs pa ste/ mdo las ji skad 'byung ba bzhin du rig par bya'o//bskal pa la 'jug pa shes pa ni de bskal pa la 'jug pa gang dag yin pa 'di lta ste/ bskal pa gcig la bskal pa grangs med par yang dag par gzhol ba nyid dang / bskal pa grangs med pa la bskal pa grangs med par yang dag par gzhol ba nyid dang / skad cig la bskal pa dang /bskal pa la skad cig tu yang dag par gzhol ba nyid dang / bskal pa la bskal pa ma yin pa dang / bskal pa ma yin pa la bskal par yang dag par gzhol ba nyid dang / sangs rgyas dang bcas pa'i bskal pa la sangs rgyas med pa'i bskal par yang dag par gzhol ba nyid dang /sangs rgyas med pa'i bskal pa la sangs rgyas dang bcas pa'i bskal par yang dag par gzhol ba nyid dang / 'das pa dang ma 'ongs pa la da ltar byung ba dang / 'das pa la ma 'ongs pa dang / 'das pa la da ltar byung ba'i bskal par yang dag par gzhol ba nyid dang /bskal pa ring po la bskal pa thung ngur yang dag par gzhol ba nyid dang / bskal pa thung ngu la bskal pa ring por yang dag par gzhol ba nyid dang / bskal pa thams cad la ming du btags par yang dag par gzhol ba nyid de de dag thams cad yang dag pa ji lta ba bzhin du rab tu shes so zhes gsungs pa ste/mdo las ji skad 'byung ba bzhin du rig par bya'o/ /de la yang dag par gzhol ba ni mnyam pa nyid du mos pa yin par rig par bya ste/ bskal pa thams cad la phan tshun ming yang dag par gzhol ba nyid du rab tu shes so/ /de la 'jug pa shes pa ni so so'i skye bo'i sa'i dbang du byas pa dang /nga rgyal spyod pa dang / mtho ris la mos pa dang / rnam par rtog pa dpyod pa'i dbang du byas pa ste/ de bzhin gshegs pa dgra bcom pa yang dag par rdzogs pa'i sangs rgyas rnams kyi 'jug pa mkhyen pa gang dag yin pa 'di lta ste/ byis pa'i lam gyi 'jug pa mkhyen pa dang /rdul phra rab kyi rdul la 'jug pa mkhyen pa dang / zhing gi tshogs mngon par rdzogs par rtogs pa la 'jug pa mkhyen pa dang / sems can gyi lus dang / sems mngon par rdzogs par rtogs pa la 'jug pa mkhyen pa dang / thams cad kyi rjes su mngon par rdzogs par rtogs pa la 'jug pa mkhyen pa dang /snrel zhir spyod pa kun du bstan pa la 'jug pa mkhyen pa dang / mthun pa'i spyod pa kun du bstan pa la 'jug pa mkhyen pa dang / mi mthun pa'i spyod pa kun du bstan pa la 'jug pa mkhyen pa dang / bsam du rung ba dang / bsam du mi rung ba dang /'jig rten gyis rnam par shes par rung ba dang / rnam par shes par mi rung ba'i spyod pa kun du bstan pa la 'jug pa mkhyen pa dang / nyan thos kyis rnam par shes par bya ba dang / rang sangs rgyas kyis rnam par shes par bya ba dang / byang chub sems dpas rnam par shes par bya ba dang /de bzhin gshegs pas rnam par mkhyen par bya ba'i spyod pa kun du bstan pa la 'jug pa mkhyen pa de dag thams cad yang dag pa ji lta ba bzhin du rab tu shes so/ /kye rgyal ba'i sras de ltar na sangs rgyas bcom ldan 'das rnams kyis mkhyen pa yangs shing tshad med pas sa 'di la gnas pa'i byang chub sems dpa' 'jug pa shes pa yang tshad med do zhes gsungs pa ste/mdo las ji skad du 'byung ba bzhin du rig par bya'o/ /de ltar shes pa'i che ba nyid rnam pa bdun bstan nas rnam par thar pa'i che ba nyid ston to/ /de la rnam par thar pa'i che ba nyid rdzu 'phrul gyi yul gyi dbang du byas pa ni gang gi phyir/kye rgyal ba'i sras de ltar byang chub sems dpa'i sa 'di dang ldan pa'i byang chub sems dpa' de/ byang chub sems dpa'i rnam par thar pa bsam gyis mi khyab pa zhes bya ba 'thob bo zhes gsungs pa'o/ /'jig rten gyi khams dang / 'gro ba mtha' yas par smon nas shes pa thogs pa med pa nyid ni gang gi phyir/sgrib pa med pa zhes bya ba zhes gsungs pa'o/ /'jig rten pa dang 'jig rten las 'das pa slob pa dang / mi slob pa'i nyan thos la sogs pa'i rnam par grol ba shes pa ni gang gi phyir/ rnam par dag pa rnam par 'byed pa zhes bya ba zhes gsungs pa'o//dngos po ci 'dod dgur bsgyur ba ni gang gi phyir/ sgo kun du snang ba zhes bya ba zhes gsungs pa'o/ /chos kyi gzungs ni gang gi phyir/ de bzhin gshegs pa'i mdzod ces bya ba zhes gsungs pa'o/ /phas kyi rgol ba tshar gcad pa'i gzungs ni gang gi phyir/'khor lo thogs pa med pa dang ldan pa zhes bya ba zhes gsungs pa'o/ /dus gsum gyi bskal pa ji ltar 'dod pa bzhin du byin gyis rlob pa ni gang gi phyir/ dus gsum gyi rjes su song ba zhes gsungs pa'o/ /chos thams cad kyi rten cing 'brel par 'byung ba'i rnam pa thams cad shes pa ni gang gi phyir/chos kyi dbyings kyi snying po can zhes bya ba zhes gsungs pa'o/ /lus med cing snang ba tsam gyis rgyas par 'gengs pa ni gang gi phyir/ rnam par grol ba'i dkyil 'khor snang ba zhes gsungs pa'o/ /'jig rten gyi khams du ma'i sems can gyi sems cig car shes pa'i dbang du byas par yang rig par bya ste/gang gi phyir byang chub sems dpa'i rnam par thar pa yul ma lus pa zhes bya ba thob ste/ kye rgyal ba'i sras de ltar byang chub sems dpa'i sa bcu pa 'di la gnas pa'i byang chub sems dpa' byang chub sems dpa'i rnam par thar pa'i sgo bcu po de dag la sogs pa rnam par thar pa'i sgo 'bum phrag grangs med pa dpag tu med pa dag 'thob bo zhes gsungs pa'o//ting nge 'dzin gyi che ba nyid ni gang gi phyir/ de bzhin du ting nge 'dzin 'bum zhes gsungs pa'o/ /gzungs che ba nyid ni gang gi phyir/ gzungs 'bum zhes gsungs pa'o/ /mngon par shes pa'i che ba nyid ni gang gi phyir/ mngon par shes pa mngon par sgrub pa 'bum dag gi bar du 'thob bo zhes gsungs pa'o/ /de ltar che ba nyid kyi mthar phyin par song bas sa bcu pa rnam par gzhag pa bstan nas/ sa'i nges pa'i tshig gis ston to//de la sa'i nges pa'i tshig ni sprin dang 'dra ba'i chos rnam pa gsum du rig par bya'o/ /thob pa'i chos kyis sa 'di pa'i lus nam mkha' lta bu la khyab par byed pas khyab pa dang / chos des sems can rnams kyi nyon mongs pa'i rdul rab tu zhi bar byed pa dang / dga' ldan gyi gnas la sogs pa'i rim gyis sems can sgrol ba ste/sprin gyi char gyis lo tog sgrol ba bzhin no/ /de la dran pa la mkhas pa zhes bya ba ni 'og nas ston pa 'dzin pa'i rgyu yongs su bstan pa'i phyir te/ gang gi phyir de ye shes de lta bu dang ldan pa'i blo dang / tshad med pa'i rjes su song ba'i dran pa la mkhas pa dang ldan pa yin te zhes gsungs pa'o//'dzin pa'i nus pa de mang po dang / cha phra ba dang myur du 'dzin par yongs su ston te/ gang gi phyir de phyogs bcu'i sangs rgyas bcom ldan 'das dpag tu med pa rnams kyi chos kyi snang ba chen po dang / chos kyi gsal ba chen po dang / chos kyi sprin chen po tshad med pa dag skad cig thang cig yud tsam cig la bzod do//yang dag par len to/ /bdag gir byed do/ /yang dag par 'dzin to/ /kye rgyal ba'i sras 'di lta ste/ dper na klu'i rgyal po rgya mtshos sprin las chu'i tshogs chen po phab pa ni rgya mtsho chen po ma gtogs par sa'i phyogs gzhan gyis bzod pa'am/yang dag par blang ba'am/ bdag gir bya ba'am/ yang dag par gzung bar sla ba ma yin no/ /kye rgyal ba'i sras de bzhin du de bzhin gshegs pa rnams kyi de bzhin gshegs pa'i gsang ba la 'jug pa gang dag yin pa 'di lta ste/ chos kyi snang ba chen po dang /chos kyi gsal ba chen po dang / chos kyi sprin chen po de dag ni sems can thams cad dang / nyan thos dang / rang sangs rgyas thams cad dang / sa dang po nas bzung ste/ sa dgu pa'i bar la gnas pa'i byang chub sems dpa' rnams kyis kyang bzod pa'am/ yang dag par blang ba'am/bdag gir bya ba'am/ yang dag par gzung bar sla ba ma yin te/ byang chub sems dpa'i sa chos kyi sprin 'di la gnas pa'i byang chub sems dpa' ni de dag thams cad bzod do/ /yang dag par len to/ /bdag gir byed do/ /yang dag par 'dzin to zhes gsungs pa'o//de la sangs rgyas bcom ldan 'das dpag tu med pa rnams kyi chos kyi snang ba chen po tshad med pa dag ces bya ba ni mang po 'dzin pa'o/ /de bzhin gshegs pa'i gsang ba la 'jug pa ni phra ba 'dzin pa'o/ /skad cig thang cig yud tsam cig la zhes bya ba ni myur du 'dzin pa'o//chos thos pa de yang rang bzhin dang / las kyis yongs su bstan te/ ji ltar rang bzhin gyis she na/ snang bar gyur pa nyid kyis thos pa dang / bsams pa las byung ba'i shes pa smos par 'gyur ba'i phyir ro/ /gsal bar gyur pa nyid kyis ni bsgoms pa las byung ba smos par 'gyur ba'i phyir ro//ji ltar na las kyis she na/ sprin bzhin du gzhan dag la dam pa'i chos kyi char 'bebs pa'i phyir ro/ /mos pa'i sgo nas bzod/ tshig 'bru 'dzin pa'i sgo nas yang dag par len/ don 'dzin pa'i sgo nas bdag gir byed/ de gnyis ka 'dzin pa'i sgo nas yang dag par 'dzin par rig par bya'o//rgya mtsho ni dang bar 'gyur ba'i dngos po'i sgo nas bzod/ go skabs 'byed pa'i sgo nas yang dag par len/ de nas gzhan pa'i chu'i grangs 'grib par byed pa'i sgo nas bdag gir byed/ spyad pa'i 'os ma yin pa'i sgo nas yang dag par 'dzin par rig par bya'o//kye rgyal ba'i sras 'di lta ste/ dper na rgya mtsho chen po ni klu'i dbang po chen po gcig gi sprin chen po yang bzod do/ /yang dag par len to/ /bdag gir byed do/ /yang dag par 'dzin to/ /klu'i dbang po chen po gnyis dang gsum nas dpag tu med pa'i bar dag gi sprin chen po dag kyang skad cig thang cig yud tsam cig la bzod do//yang dag par len to/ /bdag gir byed do/ /yang dag par 'dzin to/ /de ci'i phyir zhe na/ rgya mtsho chen po tshad med par yangs shing rgya che ba'i phyir ro/ /kye rgyal ba'i sras de bzhin du byang chub sems dpa'i sa chos kyi sprin 'di la gnas pa'i byang chub sems dpa' yang skad cig thang cig yud tsam cig la de bzhin gshegs pa gcig gi chos kyi snang ba chen po dang /chos kyi gsal ba chen po dang / chos kyi sprin chen po rnams kyang bzod de/ yang dag par len to/ /bdag gir byed do//yang dag par 'dzin to/ /skad cig thang cig yud tsam cig la de bzhin gshegs pa gnyis dang gsum nas dpag tu med pa de dag dang / bsam gyis mi khyab pa dag dang / mtshungs pa med pa dag dang / mtha' yas pa dag dang / mu med pa dag dang / mtshams med pa dag dang /gzhal du med pa dag dang / brjod du med pa dag dang / grangs med pa dag dang / bgrang ba las 'das pa'i bar dag gi chos kyi snang ba chen po dang / chos kyi gsal ba chen po dang / chos kyi sprin chen po rnams bzod/ yang dag par len/ bdag gir byed/ yang dag par 'dzin te/de'i phyir sa 'di chos kyi sprin zhes bya'o/ /byang chub sems dpa' rnam par grol ba'i zla bas smras pa/ kye rgyal ba'i sras byang chub sems dpas skad cig thang cig yud tsam cig la de bzhin gshegs pa ji snyed cig las chos kyi snang ba chen po dang / chos kyi gsal ba chen po dang / chos kyi sprin chen po bzod par byed pa dang / yang dag par len pa dang / bdag gir byed pa dang / yang dag par 'dzin pa dag bgrang par nus sam/ byang chub sems dpa' rdo rje'i snying pos smras pa/ kye rgyal ba'i sras byang chub sems dpas skad cig thang cig yud tsam cig la de bzhin gshegs pa 'di snyed cig las chos kyi snang ba chen po dang /chos kyi gsal ba chen po dang / chos kyi sprin chen po bzod/ yang dag par len / bdag gir byed/ yang dag par 'dzin to zhes grangs kyis bstan pa'i tshul gyis bgrang par sla ba ma yin te/ 'on kyang dpe bstan par bya'o / /kye rgyal ba'i sras 'di lta ste/dper na phyogs bcu'i 'jig rten gyi khams sangs rgyas kyi zhing brjod du med pa bye ba khrag khrig 'bum phrag bcu'i rdul phra rab snyed kyi rdul snyed na sems can gyi khams ma lus pa'i tshul du ji snyed cig yod pa de dag las sems can gcig cig thos pa 'dzin pa'i gzungs thob par gyur pa 'di lta ste/dper na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rdo rje pad+ma'i bla ma'i dge slong rnam par rgyal ba chen po zhes bya ba bzhin du/ de bzhin gshegs pa rnams kyi rim gro ba dang / nyan thos chen po thos pa 'dzin pa rnams kyi mchog tu phyin par gyur te/sems can gcig po de thos pa la mkhas pa'i stobs bskyed pa de lta bu dang ldan par gyur cing / sems can gcig po de ci 'dra bar 'jig rten gyi khams ma lus pa thams cad kyi sems can de dag thams cad kyang de bzhin du ldan par gyur la/ gcig gis gang bzung ba de gnyis pas bzung na/ kye rgyal ba'i sras de la ji snyam du sems/ sems can de dag gi thos pa la mkhas par gyur pa de dag tshad med pa mang ba yin nam/ byang chub sems dpa' rnam par grol ba'i zla bas smras pa/ kye rgyal ba'i sras sems can de dag gis thos pa la mkhas pa de dag ni mang ste tshad med do//byang chub sems dpa' rdo rje'i snying pos smras pa/ kye rgyal ba'i sras khyod mos par bya'o/ /khong du chud par bya'o/ /byang chub sems dpa'i sa chos kyi sprin 'di la gnas pa'i byang chub sems dpa' ni skad cig thang cig yud tsam cig la/ de bzhin gshegs pa gcig las chos kyi snang ba dang / gsal ba dang / sprin chen po chos kyi dbyings dus gsum gyi mdzod ces bya ba bzod/ yang dag par len/ bdag gir byed/ yang dag par 'dzin te/ chos kyi snang ba dang / gsal ba dang / sprin chen po yang dag par 'dzin pa la mkhas pa de la/thos pa la mkhas pa snga ma des brgya'i char yang nye bar mi 'gro'o/ /stong gi cha dang / 'bum gyi cha dang / bye ba'i cha dang / bye ba brgya'i cha dang / bye ba stong gi cha dang / bye ba 'bum gyi cha dang / bye ba khrag khrig 'bum gyi cha dang / grangs dang / cha dang / bgrang ba dang / dpe dang rgyur yang nye bar mi 'gro ba nas/ bskrun pa tsam gyi bar du yang mi bzod do/ /de bzhin gshegs pa gcig las ji lta ba bzhin du/ phyogs bcu'i 'jig rten gyi khams snga ma dag na rdul phra rab kyi rdul de dag ji snyed yod pa de snyed kyi yang dag par rdzogs pa'i sangs rgyas rnams dang /de dag pas kyang ches mang zhing / tshad med pa'i de bzhin gshegs pa rnams las byang chub sems dpa' skad cig thang cig yud tsam cig la chos kyi snang ba dang / gsal ba dang sprin chen po chos kyi dbyings dus gsum gyi mdzod ces bya ba bzod/yang dag par len/ bdag gir byed/ yang dag par 'dzin te/ de'i phyir na sa 'di ni chos kyi sprin zhes bya'o/ /de la chos kyi dbyings dus gsum gyi mdzod ces bya ba la chos kyi dbyings ni brjod pa'i gzhi gsum gyi mdzod do/ /sprin dang / 'brug sgra dang / glog la sogs pa dang 'dra bas khong du chud par bya ste/gang gi phyir kye rgyal ba'i sras gzhan yang byang chub sems dpa'i sa chos kyi sprin 'di la gnas pa'i byang chub sems dpa' de ni rang gi smon lam gyi stobs bskyed pas snying brtse ba dang / snying rje chen ba dang / chos kyi snang ba chen po bsgrags ba'i 'brug sgra sgrogs pa mngon par shes pa dang /rig pa dang mi 'jigs pa'i glog 'gyu ba 'od zer chen po'i drung gis shin tu bskyod pa bsod nams dang / ye shes kyi sprin gyi dra ba stugs po chen pos kun du khebs pa/ lus rnam pa sna tshogs kyi sprin 'khyil pa kun du ston pa/ chos kyi sgra chen po sgrogs pa/stong pa nyid dang / mtshan ma med pa dang / smon pa med pa'i chos kyi sgra chen po sgrogs pa/ bdud kyi phyogs shin tu tshar gcod pa kun nas bsdus te/ skad cig thang cig yud tsam cig phyogs bcu'i 'jig rten gyi khams snga ma de dag na rdul phra rab kyi rdul ji snyed yod pa de snyed kyi 'jig rten gyi khams bye ba khrag khrig phrag 'bum de dag rgyas par bkang la/de dag pas kyang ches mang zhing tshad med pa'i 'jig rten gyi khams bye ba khrag khrig 'bum rgyas par bkang ste/ dge ba'i bdud rtsi'i rgyun gyi char chen pos bsam pa ji lta ba bzhin du/ sems can rnams kyi thog ma med pa'i dus nas mi shes pa las byung ba'i nyon mongs pa'i rdul dang /me lce thams cad rab tu zhi bar byed de/ de'i phyir na sa 'di ni chos kyi sprin zhes bya'o zhes bya ba 'di la 'od zer chen po rab tu 'byung ba ni rlung lta bu'o/ /'khor ba na lus rnam pa sna tshogs kyi klong 'khyil ba kun du ston pa ni klong 'khyil ba lta bu'o//chos kyi sgra chen po sgrogs pa zhes bya ba ni char 'bab pa'i sgra lta bu'o/ /de lta bu sa'i nges pa'i tshig gis 'di'i rnam par gzhag pa bstan nas mthu bla na med pa dang / bla na yod pas ston te/ de la mthu bla na med pa dang / bla na yod pa nyid ni gnas dang /gzhi dang / rang gi mtshan nyid dang / bya ba sgrub pa dang / yongs su tshim par byed pa dang / rgya che ba nyid dang / rnam pa drug tu rig par bya'o/ /de la mthu de ni sems can gzhan gyi mthu las bltas te bla na med pa'o/ /de bzhin gshegs pa'i mthu las bltas te bla na yod pa'o//de la gnas ni rnam pa bzhi ste/ rnam par thar pa bsam gyis mi khyab pa dang / rgya mtsho ltar 'byor pa'i ting nge 'dzin dang / ye shes mngon par sgrub pa dang ldan pa'i gzungs dang / rdzu 'phrul bya ba'i mngon par shes pa ste sngar bstan pa'o/ /gzhi ni phyi rol gyi dngos po sa la sogs pa dang /nang gi rang gi lus kyi dngos po ste gang gi phyir/ kye rgyal ba'i sras gzhan yang byang chub sems dpa'i sa chos kyi sprin 'di la gnas pa'i byang chub sems dpa' ni 'jig rten gyi khams gcig na yang dga' ldan gyi pho brang na bzhugs pa nas bzung ste/ 'pho ba dang / gshegs pa dang / lhums na bzhugs pa dang / bltams pa dang / mngon par 'byung ba dang / mngon par rdzogs par byang chub pa dang / bskul ba dang / chos kyi 'khor lo chen po bskor ba dang / yongs su mya ngan las 'das pa chen po'i sa zhes bya ba'i bar du de bzhin gshegs pa'i mdzad pa thams cad sems can rnams kyi bsam pa ji lta ba dang /gdul bya ji lta ba bzhin du byin gyis rlob bo/ /de bzhin du gnyis nas 'jig rten gyi khams de dag na rdul phra rab kyi rdul de dag ji snyed yod pa de dag pas kyang ches mang ba'i 'jig rten gyi khams bye ba khrag khrig 'bum phrag dpag tu med pa'i bar dag na yang dga' ldan gyi pho brang na bzhugs pa nas yongs su mya ngan las 'das pa chen po'i sa zhes bya ba'i bar du de bzhin gshegs pa'i mdzad pa thams cad sems can rnams kyi bsam pa ji lta ba dang /gdul bya ji lta ba bzhin du byin gyis rlob po zhes gsungs pa'o//de la rang gi mtshan nyid ni rnam pa gnyis te/ lus la sogs pa yongs su bsgyur ba dang sprul pa'o/ /yongs su bsgyur ba ni rnam pa gsum du rig par bya ste/ dog pa dang yangs par yongs su bsgyur ba dang / gzhan du 'gyur bar yongs su bsgyur ba dang /sems can thams cad brgyan pa la sogs pa'i byin gyi rlabs kyi dbang gis yongs su bsgyur ba ste/ gang gi phyir ye shes kyi dbang de lta bu thob cing shin tu rnam par brtags pa'i ye shes dang / mngon par shes pa dang ldan pa de 'dod na 'jig rten gyi khams kun nas nyon mongs pa can ni yongs su dag pa nyid du byin gyis rlob bo//'jig rten gyi khams yongs su dag pa ni kun nas nyon mongs pa can nyid du byin gyis rlob bo/ /'dod na dog pa ni yangs pa nyid du byin gyis rlob bo/ /yangs pa ni dog pa nyid du byin gyis rlob bo/ / de bzhin tha gru che ba dang /rgya chen por gyur pa dang / tshad med pa dang / phra ba dang / rags pa dang / tshol ba dang steng g.yogs med pa dang / gzhi phyal ba la sogs pa'i 'jig rten gyi khams thams cad kyang khyu mchog tu gyur pas mngon par sgrub pa de dang der byin gyis rlob bo/ /'dod na rdul phra rab kyi rdul gcig la/'jig rten gyi khams khor yug dang / mtsho dang bcas pa thams cad dang ldan pa gcig byin gyis rlob ste/ rdul phra rab kyi rdul de yang mi skye la/ bya ba de dag kyang kun du ston to/ /rdul phra rab kyi rdul gcig la 'jig rten gyi khams gnyis dang / gsum dang / bzhi dang / lnga nas brjod du med pa'i bar du thams cad kyang khor yug dang / mtsho dang bcas par byin gyis rlob ste rdul phra rab kyi rdul de yang mi skye la/ bya ba de dag kyang kun du ston to/ /'dod na 'jig rten gyi khams gcig tu 'jig rten gyi khams gnyis kyi bkod pa kun du ston to/ /'dod na 'jig rten gyi khams brjod du med pa'i bar gyi bkod pa kun du ston to//'dod na 'jig rten gyi khams gcig gi bkod pa 'jig rten gyi khams gnyis su kun du ston to/ /'dod na 'jig rten gyi khams brjod du med pa'i bar dag tu yang kun du ston to/ /'dod na 'jig rten gyi khams brjod du med pa dag na sems can gyi khams ji snyed yod pa de dag 'jig rten gyi khams gcig tu bkod de/sems can rnams la gnod pa yang med do/ /'dod na 'jig rten gyi khams gcig na sems can gyi khams ji snyed yod pa de dag 'jig rten gyi khams brjod du med pa dag tu 'god de/ sems can rnams la gnod pa yang med do//'dod na 'jig rten gyi khams brjod du med pa dag na 'khod pa'i sems can rnams skra tsam gyi khyon gcig la 'god de/ sems can rnams la gnod pa yang med do/ /'dod na skra tsam gyi khyon gcig la sangs rgyas thams cad kyi yul bkod pa gcig kun du ston to// 'dod na sangs rgyas thams cad yul bkod pa brjod du med pa'i bar dag kun du ston to zhes bya ba dang / 'og nas 'dod na sems can thams cad la bsam pa bzhin du gzugs kyi lus kyi gnas brgyan par byin gyis rlob bo/ /rang gi lus de bzhin gshegs pa'i skur byin gyis rlob bo zhes bya ba la sogs pa mdo las 'byung ba bzhin no//bya ba sgrub pa ni mchod pa'i sgo nas byang chub kyi tshogs bsags pa ste/ gang gi phyir 'dod na 'jig rten gyi khams brjod du med pa dag na rdul phra rab kyi rdul ji snyed yod pa de snyed kyi lus skad cig thang cig yud tsam cig la sprul par byed do/ / lus re re la yang de snyed kyi lag pa kun du ston to/ /lag pa de dag gis kyang phyogs bcu'i sangs rgyas rnams la mchod pa byed do/ /lag pa re res kyang me tog gi phur ma gang gA'i klung gi bye ma snyed dag sangs rgyas bcom ldan 'das de dag la 'thor ro/ /me tog la ji lta ba bzhin du spos dang / phreng ba dang / byug pa dang / na bza' dang / gdugs dang / rgyal mtshan dang / ba dan rnams dang / bkod pa thams cad kyang de bzhin no/ /lus re re la yang de snyed kyi mgo byin gyis rlob cing / mgo re re la yang de snyed kyi lce byin gyis rlob ste/ lce de dag gis sangs rgyas bcom ldan 'das de dag gi bsngags pa brjod do//sems bskyed pa re re la yang phyogs bcu khyab par 'gro ste/ sems bskyed pa tsam gyis kyang mngon par rdzogs par byang chub pa tshad med pa nas/ yongs su mya ngan las 'das pa chen po'i bkod pa'i bar du byin gyis rlob bo/ /dus gsum gyi lus tshad med pa yang byin gyis rlob ste/rang gi lus la sangs rgyas bcom ldan 'das tshad med pa rnams kyi sangs rgyas kyi zhing gi yon tan bkod pa tshad med par byin gyis rlob bo/ /'jig rten gyi khams 'jig pa dang / 'chags pa thams cad kyang rang gi lus la byin gyis rlob bo/ / rlung gi dkyil 'khor thams cad kyang spu'i khung bu gcig nas 'byin te sems can rnams la yang gnod pa mi byed do/ /'dod na rgya mtsho'i mthar thug pa'i 'jig rten gyi khams chu'i phung po gcig tu byin gyis rlob ste/ der yang pad+ma chen por byin gyis rlob bo/ /pad+ma chen po de'i 'od kyi bkod pas kyang 'jig rten gyi khams mu med pa rgyas par gang bar byed de/de la yang byang chub kyi shing chen po kun du ston pas na/ rnam pa thams cad kyi mchog dang ldan pa'i thams cad mkhyen pa nyid kyi bar du yang kun du ston to/ /rang gi lus la phyogs bcu'i nor bu dang / glog dang / zla ba dang / nyi ma'i 'od byin gyis rlob pa nas/'od dang snang ba thams cad kyi bar du byin gyis rlob bo/ /kha'i dbugs kyis kyang phyogs re re'i 'jig rten gyi khams mtha' yas pa g.yo bar byed de/ sems can rnams 'jigs par yang mi byed do/ /phyogs bcu'i rlung gis 'jig pa dang / mes 'jig pa dang / chus 'jig par yang byin gyis rlob bo/ /'dod na sems can thams cad la bsam pa bzhin du gzugs kyi lus kyi gnas brgyan par byin gyis rlob bo/ /rang gi lus de bzhin gshegs pa'i skur byin gyis rlob bo/ /de bzhin gshegs pa'i sku rang gi lus su byin gyis rlob bo/ /de bzhin gshegs pa'i sku rang gi sangs rgyas kyi zhing du byin gyis rlob bo//rang gi sangs rgyas kyi zhing de bzhin gshegs pa'i skur byin gyis rlob bo/ /kye rgyal ba'i sras de ltar byang chub sems dpa'i sa chos kyi sprin la gnas pa'i byang chub sems dpa' ni rdzu 'phrul gyi rnam par 'phrul pa de dag dang /gzhan yang bye ba khrag khrig 'bum phrag dpag tu med pa dag kun du ston to zhes gsungs pa'o/ /yongs su tshim par byed pa ni the tshom du gyur pa rnams la rang gi mthu kun du bstan pa dang / chos thams cad bshad pa ste gang gi phyir/ de nas 'khor de'i byang chub sems dpa' kha cig dang /lha dang / klu dang / gnod sbyin dang / dri za dang / lha ma yin dang / brgya byin dang / tshangs pa dang / 'jig rten skyong ba dang / dbang phyug chen po dang / gnas gtsang ma pa kha cig 'di snyam du sems te/ 'di ltar byang chub sems dpa'i rdzu 'phrul mngon par 'du bya ba'i spyod yul yang de ltar tshad med na/de bzhin gshegs pa rnams kyi rdzu 'phrul ci 'dra ba zhig yod snyam pa dang / de nas yang byang chub sems dpa' rnam par grol ba'i zla bas 'khor de'i sems kyi bsam pa'i rnam par rtog pa shes nas/ byang chub sems dpa' rdo rje'i snying po la 'di skad ces smras so//kye rgyal ba'i sras kye ma 'khor 'di the tshom du gyur na/ de dag gi the tshom gcad pa'i phyir/ byang chub sems dpa'i rdzu 'phrul gyi bkod pa cung zad cig legs par bstan pa mdzod cig /de nas byang chub sems dpa' rdo rje'i snying po de'i tshe byang chub sems dpa'i ting nge 'dzin sangs rgyas kyi zhing thams cad kyi tshogs kyi rang bzhin kun du ston pa zhes bya ba la snyoms par zhugs so//byang chub sems dpa' rdo rje'i snying pos byang chub sems dpa'i ting nge 'dzin sangs rgyas kyi zhing thams cad kyi tshogs rang bzhin kun du ston pa la snyoms par zhugs ma thag tu/de nas de nyid kyi tshe byang chub sems dpa'i 'khor de dag thams cad dang / lha dang / klu dang / gnod sbyin dang / dri za dang / lha ma yin dang / brgya byin dang / tshangs pa dang / 'jig rten skyong ba dang / dbang phyug chen po dang / gnas gtsang ma pa'i 'khor thams cad byang chub sems dpa' rdo rje'i snying po'i lus kyi khong na 'khod par rang rang gis shes par gyur te/der sangs rgyas kyi zhing mngon du grub par shes so/ /sangs rgyas kyi zhing de na rnam pa dang / bkod pa gang dag yod pa de dag kyang bskal pa bye ba tshang bas kyang brjod par sla ba ma yin no//der byang chub kyi shing stong gsum 'bum phrag bcur khyab pa'i sdong po can/ stong gsum bye ba yongs su tshang ba tsam du shin tu rgyas pa tshad med pa'i yal ga can/ rtse mo shin tu mtho ba byung ste/ de dang rkyen du 'bab par byang chub kyi snying po de la seng ge'i khri rgya chen po byung nas/de la de bzhin gshegs pa mngon par shes pa'i blo gros thams cad kyi rgyal po zhes bya ba byang chub kyi snying po dam par gshegs te bzhugs par mthong ngo / /de ltar de na bkod pa ji snyed par gyur pa de dag ni bskal pa bye ba tshang bas kyang brjod par sla ba ma yin no/ / de la cho 'phrul chen po de bstan nas thams cad dang ldan pa'i byang chub sems dpa'i 'khor de dang / lha dang / klu dang / gnod sbyin dang / dri za dang / lha ma yin dang / brgya byin dang / tshangs pa dang / 'jig rten skyong ba dang / dbang phyug chen po dang / gnas gtsang ma'i 'khor thams cad na gnas pa ji lta ba bzhin du 'khod pa dang /de nas thams cad dang ldan pa'i 'khor de ngo mtshar dang rmad du gyur nas/ byang chub sems dpa' rdo rje'i snying po de nyid la nges par sems shing 'khod par gyur to zhes gsungs pa ste/ de ltar the tshom du gyur pa rnams la/rang gi mthu kun du bstan pas yongs su tshim par byed pa bstan to/ /chos thams cad bstan pa ji lta bu zhe na/ gang gi phyir 'og nas de ni de bas kyang shas cher bskal pa du ma dang / bskal pa stong phrag du ma dang / bskal pa 'bum phrag du ma dang / bskal pa khrag khrig 'bum phrag du ma dang /bskal pa bye ba phrag du ma dang / bskal pa byed pa brgya phrag du ma dang / bskal pa bye ba stong phrag du ma dang / bskal pa bye ba 'bum phrag du ma dang / bskal ba bye ba khrag khrig 'bum phrag du mar chos kyi dbyings yongs su dris pa bstan pa rnams la mi 'phrogs pa yin no zhes gsungs pa'o//rgya chen po ni rnam pa gnyis te/ mthu rgya che ba dang / grangs rgya che ba'o/ /de yang sa 'og ma thams cad las khyad par 'phags pa'o/ /de la mthu rgya che ba ni gang gi phyir/ de nas byang chub sems dpa' rnam par grol ba'i zla bas/ byang chub sems dpa' rdo rje'i snying po la 'di skad ces smras so//kye rgyal ba'i sras 'di ltar ting nge 'dzin 'di'i yul bkod pa'i mthu de ni bsam gyis mi khyab ste/ ngo mtshar rmad du byung ba yin na/ kye rgyal ba'i sras ting nge 'dzin 'di'i ming ci zhes bya/ byang chub sems dpa' rdo rje'i snying pos smras pa/kye rgyal ba'i sras ting nge 'dzin 'di ni sangs rgyas kyi zhing thams cad kyi tshogs kyi rang bzhin kun du ston pa zhes bya'o/ /byang chub sems dpa' rnam par grol ba'i zla bas smras pa/ kye rgyal ba'i sras ting nge 'dzin 'di'i spyod yul dang / yul gyi bkod pa ji lta bu/ byang chub sems dpa' rdo rje'i snying pos smras pa/ kye rgyal ba'i sras byang chub sems dpa'i ting nge 'dzin 'di la shin tu bsgom pa ni 'dod na sangs rgyas kyi zhing 'di 'dra ba 'jig rten gyi khams gang gA'i klung gi bye ma snyed kyi rdul phra rab kyi rdul snyed dam/ de bas kyang mang du rang gi lus las kun du ston to//kye rgyal ba'i sras byang chub sems dpa'i sa chos kyi sprin la gnas pa'i byang chub sems dpa'i ting nge 'dzin 'di 'dra ba 'bum phrag mang po 'thob ste/ des na byang chub sems dpa' de'i lus sam/ lus kyi las ni byang chub sems dpa' rgyal tsha ba thob pa/ byang chub sems dpa'i sa legs pa'i blo gros can la gnas pa dag gis kyang shes par sla ba ma yin no//ngag gam ngag gi las kyang shes par sla ba ma yin no/ /yid dam yid kyi las kyang shes par sla ba ma yin no/ /rdzu 'phrul yang shes par sla ba ma yin no/ /dus gsum la rnam par lta ba yang shes par sla ba ma yin no//ting nge 'dzin gyi spyod yul la 'jug pa yang shes par sla ba ma yin no/ /ye shes kyi yul yang shes par sla ba ma yin no/ /rnam par thar pas rnam par rtse ba yang shes par sla ba ma yin no/ /sprul pa'i las sam/ byin gyi rlabs kyi las sam/ mthu'i las kyang shes par sla ba ma yin pa nas mdor bsdu na gom pa 'jog cing 'degs pa'i las kyi bar du yang byang chub sems dpa' rgyal tshab thob pa/byang chub sems dpa'i sa legs pa'i blo gros can la gnas pa dag gis kyang shes par sla ba ma yin te zhes gsungs pa'o/ / grangs rgya che ba ni gang gi phyir/ kye rgyal ba'i sras byang chub sems dpa'i sa chos kyi sprin 'di ni mdor bsdus te bstan na yang de ltar tshad med pa ste/ rgya cher ni bskal pa grangs med pa 'bum phrag du mas bstan kyang mthar thug par mi 'gyur bar shes par bya'o zhes gsungs pa'o/ /da ni grangs rgya che ba de nyid yang dag par bstan pa'i phyir dang /de bzhin gshegs pa'i sa mtha' dag bstan par mi nus pa ston te/ gang gi phyir byang chub sems dpa' rnam par grol ba'i zla bas smras pa/ kye rgyal ba'i sras byang chub sems dpa' rnams kyi spyod pa'i yul gyi byin gyis brlabs pa 'di yang de ltar tshad med na de bzhin gshegs pa'i spyod yul dang /yul la 'jug pa ci 'dra/ byang chub sems dpa' rdo rje'i snying pos smras pa/ kye rgyal ba'i sras 'di lta ste/ dper na mi la la zhig gis gling bzhi pa'i 'jig rten gyi khams nas rde'u rgya shug gi tshi gu tsam gnyis sam gsum zhig blangs te/'di skad du 'jig rten gyi khams mtha' yas pa dag na sa'i khams ji snyed cig yod/ rde'u 'di las ji tsam zhig gi lhag par 'phags shing lhag par tshad med ces zer ba zhig yod na/ kye rgyal ba'i sras de ltar khyod de bzhin gshegs pa dgra bcom pa yang dag par rdzogs pa'i sangs rgyas ye shes tshad med pa mnga' ba rnams kyi chos nyid la/byang chub sems dpa'i chos nyid kyis 'jal ba ni khyod kyi tshig 'di de dang 'dra bar bdag gis dbags so/ /kye rgyal ba'i sras ji ltar gling bzhi pa'i 'jig rten gyi khams nas gang blangs pa'i sa'i khams ni chung la/lhag ma las pa ni tshad med pa de bzhin du/ kye rgyal ba'i sras dag byang chub sems dpa'i sa chos kyi sprin 'di kho na yang bskal pa dpag tu med par bstan kyang phyogs tsam zhig bstan du zad na/ de bzhin gshegs pa'i sa lta smos kyang ci dgos/kye rgyal ba'i sras khyod mos par bya'o/ /khong du chud par bya'o/ /de bzhin gshegs pa 'di bdag gi mdun na dpang du bzhugs te/ kye rgyal ba'i sras gal te phyogs bcu'i phyogs re re'i sangs rgyas kyi zhing 'jig rten gyi khams mu med pa'i rdul phra rab kyi rdul snyed cig / sa 'di lta bu thob pa'i byang chub sems dpa' rnams kyis 'di lta ste/ dper na bu ram shing gi tshal lam/ 'od ma'i tshal lam/ 'dam bu'i tshal lam/ til gyi tshal bzhin du yongs su gang bar gyur kyang / de dag gis kyang byang chub sems dpa'i spyod pa mngon par bsgrub par bskal pa dpag tu med pa mngon par bsgrubs pa ni de bzhin gshegs pa'i ye shes skad cig gcig la byung ba'i de bzhin gshegs pa'i yul gyi brgya'i char yang nye bar mi 'gro'o//stong gi cha dang / 'bum gyi cha dang / bye ba'i cha dang / bye ba brgya'i cha dang / bye ba stong gi cha dang / bye ba 'bum gyi cha dang / bye ba khrag khrig 'bum gyi cha dang /grangs dang / cha dang / bgrang ba dang / dpe dang rgyur yang nye bar mi 'gro ba nas/ bskrun pa tsam gyi bar du nye bar mi 'gro'o/ /kye rgyal ba'i sras dag de ltar byang chub sems dpa' ye shes de lta bu dang ldan pa ni de bzhin gshegs pa'i sku dang / gsung dang thugs gnyis su med pa'i byang chub sems dpa'i ting nge 'dzin gyi stobs kyang mi gtong la/sangs rgyas la lta ba dang / mchod pa dang / rim gro yang rab tu byed de/ bskal pa re re la yang de bzhin gshegs pa mtha' yas pa dag la rnam pa thams cad mngon par sgrub pa'i mchod pa rgya chen po dang ldan pa'i mchod pa dag gis mchod par byed do//sangs rgyas bcom ldan 'das de dag byin gyi rlabs dang / snang ba yang yang dag par len to zhes bya ba dang / kye rgyal ba'i sras 'di lta ste/ dper na lha'i rgyan chen po'i rnam pa mkhan bzos ma byas pa/ rin po che chen pos spras pa/ lha'i rgyal po dbang sgyur gyi yan lag gi dam pa mgo'am mgul du btags na de ma yin pa'i lha dang mi'i rgyan lhab lhub kyi rnam pa dag gis mi 'phrogs pa yin no//kye rgyal ba'i sras de bzhin du byang chub sems dpa'i sa chos kyi sprin 'di thob pa'i byang chub sems dpa'i ye shes kyi rgyu ba de dag kyang / sems can thams cad dang /nyan thos dang rang sangs rgyas thams cad dang / byang chub sems dpa'i sa dang po yan chad byang chub sems dpa'i sa dgu pa thob pa'i bar gyi byang chub sems dpa' rnams kyis kyang mi 'phrogs pa yin te/ byang chub sems dpa'i sa 'di la gnas pa'i byang chub sems dpa'i ye shes snang ba ni sems can rnams thams cad mkhyen pa'i ye shes kyi bar la 'dzud par 'gyur bas de ma yin pa'i ye shes kyi snang ba dag gis mi 'phrogs so//kye rgyal ba'i sras 'di lta ste/ dper na lha'i rgyal po dbang phyug chen po'i 'od ni skye ba'i gnas thams cad las shin tu 'das pa yin te/sems can rnams kyi lus kyang tshim par byed do/ /kye rgyal ba'i sras de bzhin du byang chub sems dpa'i sa bcu pa chos kyi sprin 'di la gnas pa'i byang chub sems dpa'i ye shes kyi snang ba yang nyan thos dang / rang sangs rgyas thams cad dang byang chub sems dpa'i sa dang po yan chad byang chub sems dpa'i sa dgu pa thob pa'i bar gyi byang chub sems dpa' rnams kyis kyang mi 'phrogs pa yin te/thams cad mkhyen pa nyid kyi bar la yang sems can rnams rab tu 'jog go zhes gsungs pa'o/ /bgrod pa gsum shes pa la sogs pa yang dag par sgrogs pas ni lam gsum yang dag par sgrogs te/lam gsum la the tshom bcad pa'i lam ni gang gi phyir/ kye rgyal ba'i sras byang chub sems dpa' ye shes de lta bu dang ldan pa de la sangs rgyas bcom ldan 'das rnams bgrod pa gsum shes pa yang dag par ston to //chos kyi dbyings rab tu dbye ba shes pa zhes gsungs pa'o / /bgrod pa gsum zhes bya ba ni lam gsum zhes bya ba'i tha tshig go/ /de bzhin gshegs pa'i gsang ba sgrogs pas mngon par shes pa myur ba nyid kyi lam ni gang gi phyir/ 'jig rten gyi khams thams cad rgyas par 'gengs pa zhes gsungs pa'o//byin gyi rlabs mtshungs pa nyid kyi las ni byin gyi rlabs mtshungs pa nyid rnam pa gsum du reg par bya ste/ zhing yongs su dag pa'i mtshungs pa nyid kyi byin gyi rlabs dang / sems can rnams yongs su smin par bya ba'i phyir/ chos ston par snang ba'i mtshungs pa nyid kyi byin gyis rlabs dang /mngon par rdzogs par byang chub pa'i mtshungs pa nyid kyi byin gyi rlabs te/ gang gi phyir 'jig rten gyi khams thams cad snang bar byin gyis brlabs pa dang / sems can dang / zhing dang / chos thams cad yongs su shes pa'i shes pa dang /sems can thams cad kyi sems kyi spyod pa la 'jug pa shes pa dang / sems can thams cad kyi yongs su smin pa'i dus ji lta ba bzhin du shes pa dang / 'dul ba las mi g.yo ba dang / chos thams cad rab tu rnam par 'byed pa'i rnam par dbye ba shes pa la mkhas pa dang /mdor na thams cad mkhyen pa'i ye shes thob par byed pa'i bar dag yang dag par ston to zhes gsungs pa'o/ /de ltar mthu bla na yod pas sa 'di'i rnam par gzhag pa bstan nas sa'i dpe ston to/ /de la sa'i dpe ni mtsho dang / ri dang / rgya mtsho dang / nor bu bai DUR+Yas yon tan rnam pa bzhir rig par bya'o/ /yon tan rnam pa bzhi ni sgrub pa'i yon tan dang / mchog gi yon tan dang / nges par 'byung dka' ba'i nges par 'byung ba 'bras bu che ba nyid kyi yon tan dang / mthar thug par yongs su bsngo ba'i yon tan no//de la sgrub pa'i yon tan ni smon lam la brten nas bsdu ba'i dngos po bzhis gzhan gyi don sgrub pa dang / rang gi dge ba'i rtsa ba 'phel te byang chub thob par byed pas/ rang gi don sgrub par rig par bya ste/ gang gi phyir kye rgyal ba'i sras byang chub sems dpa'i sa bcu po de dag ni/rim gyis mngon du phyogs pa rnam pa thams cad dang ldan pa'i thams cad mkhyen pa'i ye shes kyi song ba rjes su song bar blta'o/ /kye rgyal ba'i sras 'di lta ste/ dper na mtsho chen po ma dros pa las byung ba'i 'bab chu ni/ klung gi rgyun gyi sgo bzhis 'dzam bu'i gling kun du ngoms par byas kyang mi zad la rnam par 'phel te/sems can dpag tu med pa dag la phan par gyur cing / rgya mtsho chen po'i bar du zhen par 'gyur te/ chu de ni thog ma nyid nas rgya mtsho chen po la mngon du phyogs pa yin no/ / kye rgyal ba'i sras de de bzhin du byang chub kyi sems kyi mtsho chen po las byung ba'i dge ba'i rtsa ba'i 'bab chu yang / smon lam chen po'i rgyun gyi sgo bsdu ba'i dngos po bzhis sems can gyi khams kun du ngoms par byas kyang mi zad la rnam par 'phel te/ sems can dpag tu med pa dag la phan par gyur cing / rnam pa thams cad dang ldan pa'i thams cad mkhyen pa'i ye shes kyi bar gyi rgya mtsho chen po la zhen par byed de/ dge ba'i rtsa ba'i chu de ni thog ma nas kyang / thams cad mkhyen pa nyid kyi rgya mtsho chen po la mngon du phyogs pa yin no zhes gsungs pa'o//thams cad mkhyen pa'i skabs yin pas mchog nyid kyi yon tan ni gang gi phyir/ kye rgyal ba'i sras byang chub sems dpa'i sa bcu po de dag ni/ sangs rgyas kyi ye shes la brten nas yod par 'gyur te/ kye rgyal ba'i sras 'di lta ste/dper na sa chen po la brten nas/ ri'i rgyal po chen po bcu yod par gyur pa 'di lta ste/ ri'i rgyal po chen po gangs ri dang / spos ngad ldang dang / rnam par 'dal dang / drang srong ri dang / gnya' shing 'dzin dang / rta rna ri dang / mu khyud 'dzin dang /khor yug dang / tog can dang / ri'i rgyal po chen po ri rab bo/ /kye rgyal ba'i sras 'di lta ste/ dper na ri'i rgyal po chen po gangs ri ni/ sman gyi rnam pa thams cad kyi 'byung gnas yin te/ sman gyi rnam pa thams cad blang bas thug par 'gyur ba med do//kye rgyal ba'i sras de bzhin du byang chub sems dpa'i sa rab tu dga' ba la gnas pa'i byang chub sems dpa' yang / 'jig rten pa'i snyan dngags dang / bstan bcos dang / gsang sngags dang / rig pa thams cad kyi 'byung gnas yin te/ 'jig rten pa'i snyan dngags dang /bstan bcos dang / gsang sngags dang / rig pa thams cad 'don pas thug par 'gyur ba med do/ /kye rgyal ba'i sras 'di lta ste/ dper na ri'i rgyal po chen po spos kyi ngad ldang ni/ spos kyi rnam pa thams cad kyi 'byung gnas yin te/ spos kyi rnam pa thams cad blang bas thug par 'gyur ba med do //kye rgyal ba'i sras de bzhin du byang chub sems dpa'i sa dri ma med pa la gnas pa'i byang chub sems dpa' yang / byang chub sems dpa'i tshul khrims dang / sdom pa dang / spyod pa thams cad kyi spos kyi 'byung gnas yin te/byang chub sems dpa'i tshul khrims dang / sdom pa dang / spyod pa thams cad kyi spos kyis thug par 'gyur ba med do/ /kye rgyal ba'i sras 'di lta ste dper na/ ri'i rgyal po chen po rnam par 'dal ni dngos rin po che 'ba' zhig yin zhing / rin po che'i rnam pa thams cad kyi 'byung gnas yin te/rin po che'i rnam pa thams cad blang bas thug par 'gyur ba med do/ /kye rgyal ba'i sras de bzhin du byang chub sems dpa'i sa 'od byed pa la gnas pa'i byang chub sems dpa' yang / 'jig rten pa'i bsam gtan dang / mngon par shes pa dang /rnam par thar pa dang / ting nge 'dzin dang / snyoms par 'jug pa thams cad kyi 'byung gnas yin te/ 'jig rten pa'i bsam gtan dang / mngon par shes pa dang / rnam par thar pa dang / ting nge 'dzin dang / snyoms par 'jug pa thams cad yongs su dris pa bstan pa rnams kyis thug par 'gyur ba med do//kye rgyal ba'i sras 'di lta ste dper na/ ri'i rgyal po chen po drang srong ni/ dngos rin po che 'ba' zhig yin zhing / drang srong mngon par shes pa lnga dang ldan pa rnams kyi 'byung gnas yin te/ drang srong mngon par shes pa lnga dang ldan pa rnams bgrang bas thug par 'gyur ba med do//kye rgyal ba'i sras de bzhin du byang chub sems dpa'i sa 'od 'phro can la gnas pa'i byang chub sems dpa' yang / lam dang lam ma yin pa gzhan gyi khyad par thams cad shes pa'i 'byung gnas yin te/ lam dang lam ma yin pa gzhan gyi khyad par thams cad shes pa yongs su dris pa bstan pa rnams kyis thug par 'gyur ba med do/ /kye rgyal ba'i sras 'di lta ste dper na/ ri'i rgyal po chen po gnya' shing 'dzin ni dngos rin po che 'ba' zhig yin zhing / gnod sbyin rdzu 'phrul chen po dang ldan pa rnams kyi 'byung gnas yin te/gnod sbyin rdzu 'phrul chen po dang ldan pa bgrang bas thug par 'gyur ba med do/ /kye rgyal ba'i sras de bzhin du byang chub sems dpa'i sa shin tu sbyang dka' ba la gnas pa'i byang chub sems dpa' yang mngon par shes pa'i rdzu 'phrul gyi rnam par 'phrul pa dang /cho 'phrul thams cad kyi 'byung gnas yin te/ mngon par shes pa'i rdzu 'phrul gyi rnam par 'phrul pa dang / cho 'phrul thams cad yongs su dris pa bstan pa rnams kyis thug par 'gyur ba med do/ /kye rgyal ba'i sras 'di lta ste dper na ri'i rgyal po chen po rta rna ri ni dngos rin po che 'ba' zhig yin zhing /'bras bu'i rnam pa thams cad blang bas thug par 'gyur ba med do/ /kye rgyal ba'i sras de bzhin du byang chub sems dpa'i sa mngon du gyur pa la gnas pa'i byang chub sems dpa' yang rten cing 'brel par 'byung ba la 'jug pa bstan pa'i 'byung gnas yin te/nyan thos kyi 'bras bu dang / mngon par rtogs pa yongs su dris pa bstan pa rnams kyis thug par 'gyur ba med do/ /kye rgyal ba'i sras 'di lta ste dper na/ ri'i rgyal po chen po mu khyud 'dzin ni dngos rin po che 'ba' zhig yin zhing / klu rdzu 'phrul chen po dang ldan pa thams cad kyi 'byung gnas yin te/klu rdzu 'phrul chen po dang ldan pa thams cad bgrang bas thug par 'gyur ba med do/ /kye rgyal ba'i sras de bzhin du byang chub sems dpa'i sa ring du song ba la gnas pa'i byang chub sems dpa' yang thabs dang shes rab bstan pa'i 'byung gnas yin te/ rang sangs rgyas kyi 'bras bu dang / mngon par rtogs pa yongs su dris pa bstan pa rnams kyis thug par 'gyur ba med do/ /kye rgyal ba'i sras 'di lta ste dper na/ ri'i rgyal po chen po khor yug ni dngos rin po che 'ba' zhig yin zhing / dbang du gyur pa rnams kyi 'byung gnas yin te/ dbang du gyur pa rnams bgrang bas thug par 'gyur ba med do//kye rgyal ba'i sras de bzhin du byang chub sems dpa'i sa mi g.yo ba la gnas pa'i byang chub sems dpa' yang byang chub sems dpa'i dbang mngon par bsgrub pa yongs su dris pa bstan pa rnams kyi 'byung gnas yin te/ 'jig rten gyi khams rnam par dbye ba yongs su dris pa bstan pa rnams kyis thug par 'gyur ba med do//kye rgyal ba'i sras 'di lta ste dper na/ ri'i rgyal po chen po tog dang ldan pa ni dngos rin po che 'ba' zhig yin zhing / lha ma yin rdzu 'phrul chen po dang ldan pa rnams kyi 'byung gnas yin te/ lha ma yin rdzu 'phrul chen po dang ldan pa bgrang bas thug par 'gyur ba med do//kye rgyal ba'i sras de bzhin du byang chub sems dpa'i sa legs pa'i blo gros can la gnas pa'i byang chub sems dpa' yang sems can gyi 'jug pa dang / ldog pa thams cad shes pa'i spyod pa'i 'byung gnas yin te/ 'gro ba thams cad kyi 'byung ba dang 'jig pa yongs su dris pa bstan pa rnams kyis thug par 'gyur ba med do//kye rgyal ba'i sras 'di lta ste dper na/ ri'i rgyal po chen po ri rab ni dngos rin po che 'ba' zhig yin zhing / lha klu rdzu 'phrul chen po dang ldan pa rnams kyi 'byung gnas yin te/ lha klu rdzu 'phrul chen po dang ldan pa bgrang pas thug par 'gyur ba med do//kye rgyal ba'i sras de bzhin du byang chub sems dpa'i sa chos kyi sprin la gnas pa'i byang chub sems dpa' yang de bzhin gshegs pa'i stobs dang / mi 'jigs pa dang sangs rgyas kyi chos ma 'dres pa rnams kyi 'byung gnas yin te/ sangs rgyas kyi phrin las yang dag par bstan pa yongs su dris pa bstan pa rnams kyis thug par 'gyur ba med do zhes gsungs pa'o//rin po che 'ba' zhig gi ri'i dpe smos pa ni sa brgyad pa dag 'dod chags dang bral ba dag pa'i sa yin pa'i phyir ro/ /ri de dag ni sems can ma yin par brjod pa'i dngos po dang / sems can du brjod pa'i 'byung gnas yin no//sems can ma yin par brjod pa'i dngos po yang rnam pa gnyis te/ yongs su spyad pa'i dngos po dang / rin po che zhes brjod pa yongs su 'dzin pa'i dngos po'o/ /yongs su spyad pa'i dngos po yang rnam pa gnyis te/ 'byung ba mi mnyam pa'i gnyen po'i dngos po dang / 'byung ba mnyam pa ston pa'i dngos po ste/ dris rab tu phye ba dang / ri drug pa'i 'bras bu'i rnam pa'i ros rab tu phye ba'o/ /sems can du brjod pa ni gnod pa rnam pa drug gi gnyen por rig par bya ste/ gnod pa rnam pa drug ni dbul ba'i gnod pa dang / 'chi ba la sogs pa yams kyi nad kyi gnod pa dang /mu ge'i gnod pa dang / 'dul ba ma yin pa'i gnod pa dang / dbyig dug la sogs pa'i gnod pa dang / phyir rgol ba'i gnod pa'o/ /de la mngon par shes pa lnga dang ldan pa ni sbyin pa'i gnas yin pas dbul ba'i gnyen po'o/ /lha ma yin rnams ni de 'jil ba'i gsang sngags ston pas dbyig dug gi gnyen po'o//dbang du gyur pa ni 'jig rten skyong rnams yin par rig par bya'o/ /ri de dag ni ji ltar smos pa'i dngos po 'byung ba'i don gyi 'byung gnas yin zhing / rgyun mi 'chad pa'i don gyis thug par 'gyur ba med par rig par bya'o/ /de dag gis kyang rgya mtsho chen po smos la /rgya mtsho chen pos kyang de dag rab tu phye ba'o/ /de bzhin du thams cad mkhyen pa'i rgyu dang 'bras bu yin pas/ byang chub sems dpa'i sa bcu po de dag gis kyang thams cad mkhyen pa nyid smos la/ thams cad mkhyen pa nyid kyis kyang rab tu phye ba yin par rig par bya ste/ gang gi phyir kye rgyal ba'i sras 'di lta ste dper na rin po che'i ri de dag gis kyang rgya mtsho chen po smos la/rgya mtsho chen pos kyang rab tu phye ba'o/ /kye rgyal ba'i sras de bzhin du byang chub sems dpa'i sa bcu po 'di dag gis kyang thams cad mkhyen pa nyid smos la de thams cad mkhyen pa nyid kyis kyang rab tu phye ba'o zhes gsungs pa'o//sa rnams kyi nges par 'byung dka' ba'i nges par 'byung ba'i 'bras bu chen po/ yon tan ni rgyu dang 'bras bur 'brel pa ste/ rgya mtsho las nges par 'byung dka' ba lta bu'i phyir dang / nges par 'byung ba rnams kyi byang chub kyi 'bras bu che ba'i phyir ro/ /rgya mtsho chen po'i yon tan ni brgyad du rig par bya ste/'jug bde ba'i yon tan ni gang gi phyir/ kye rgyal ba'i sras 'di lta ste dper na/ rgya mtsho chen po ni rnam pa bcus mi 'phrogs pa'i grangs su 'gro ste/ bcu gang zhe na/ 'di lta ste bags kyis gzhol ba zhes gsungs pa'o/ /gtsang ma nyid kyi yon tan ni gang gi phyir/ shi ba'i ro dang mi gnas pa zhes gsungs pa'o/ /mi 'dra ba med pa'i yon tan ni gang gi phyir/ chu gzhan gyi grangs spangs pa zhes gsungs pa'o/ /kun du bsrungs pa'i yon tan ni gang gi phyir/ ro gcig pa zhes gsungs pa'o/ /phan 'dogs pa'i yon tan ni gang gi phyir/ rin po che mang ba zhes gsungs pa'o//zab pa dang rgya che ba gnyis kyis mi skam pa nyid kyi yon tan ni gang gi phyir/ zab cing gting dpag dka' ba dang yangs shing tshad med pa zhes gsungs pa'o/ /chen po dag gi gnas bcas pa'i phyir gnas kyi yon tan ni gang gi phyir/ 'byung ba chen po gnas su gyur pa zhes gsungs pa'o//rlabs 'byung ba'i dus las mi yol ba dang / chus ngoms mi shes pa gnyis kyis 'jig rten bsrungs pa'i yon tan ni gang gi phyir/ dus chad pa las mi yol ba dang / sprin chen po'i char thams cad kun du 'dzin pas mi ngoms pa'o zhes gsungs pa ste/ rgya mtsho chen po dang 'dra ba'i chos nyid kyis sa bcu rnams su byang chub sems dpa'i spyod pa yang rnam pa bcur rig par bya ste/gang gi phyir kye rgyal ba'i sras de bzhin du byang chub sems dpa'i spyod pa yang rnam pa bcus mi 'phrogs pa'i grangs su 'gro ste/ bcu gang zhe na 'di lta ste/ byang chub sems dpa'i spyod pa sa rab tu dga' ba la smon lam chen po rim gyis mngon par bsgrubs pas gzhol ba dang /byang chub sems dpa'i sa dri ma med pa la 'chal pa'i tshul khrims kyis shi ba'i ro dang mi gnas pa dang / byang chub sems dpa'i sa 'od byed pa la 'jig rten pa'i gdags pa'i grangs spangs pa dang / byang chub sems dpa'i sa 'od 'phro ba can la/sangs rgyas la dad pa mi phyed pa'i ro gcig pa dang / byang chub sems dpa'i sa shin tu sbyang dka' la/ thabs dang mngon par shes pa tshad med pas 'jig rten pa'i bya ba mngon par sgrub pa'i rin po che mang ba dang / byang chub sems dpa'i sa mngon du gyur la rten cing 'brel par 'byung ba la rab tu rtog pas zab pa dang /byang chub sems dpa'i sa ring du song la blos rab tu rnam par 'byed pa la mkhas pas yangs shing tshad med pa dang / byang chub sems dpa'i sa mi g.yo ba la bkod pa chen po mngon par sgrub pa kun du bstan pas 'byung ba chen po'i gnas su gyur pa dang / byang chub sems dpa'i sa legs pa'i blo gros can la rnam par thar pa zab mos 'gro ba'i spyod pa ji lta ba bzhin du khong du chud pas dus chad pa las mi yol ba dang /byang chub sems dpa'i sa chos kyi sprin la de bzhin gshegs pa'i chos kyi snang ba'i sprin gyi char chen po thams cad kun du 'dzin pas mi ngoms pa'o zhes gsungs pa'o//mthar thug par yongs su bsngo ba'i yon tan ni/ /nor bu rin po che chen po'i dpes ston te gang gi phyir/ kye rgyal ba'i sras 'di lta ste dper na/ nor bu rin po che chen po ni gang gi tshe/ rin po che rigs bcu las shin tu 'das nas mngon par sbags par gyur/mgar ba mkhas pas legs par bsregs/ legs par bcos/ legs par yongs su sbyangs/ legs par byi dor byas te/ legs par phug cing rin po che'i skud pas legs par btags la/ nor bu rin po che dang bai DUr+ya'i yu ba mthon po can gyi rgyal mtshan gyi rtse mo la btags te/thams cad 'od rab tu 'byung zhing / rgyal pos bsngags par gyur pa de'i tshe/ sems can thams cad kyis rin po che thams cad bsdu bar bya bar nye bar gnas pa yin no/ /kye rgyal ba'i sras de bzhin du gang gi tshe/ byang chub sems dpa' rnams kyi thams cad mkhyen pa nyid kyi sems rin po che bskyed pa 'phags pa'i rigs bcu las shin tu 'das pa bskyed par 'gyur/sbyangs pa'i yon tan dang / yo byad bsnyungs pa dang / tshul khrims dang / brtul zhugs dang / dka' thub kyis legs par bsregs/ bsam gtan dang / ting nge 'dzin dang snyoms par 'jug pas legs par bcos/ lam gyi yan lag gi rnam pas legs par sbyangs/thabs dang mngon par shes pas legs par byi dor byas te/ rten cing 'brel par 'byung bas legs par phug cing / thabs dang shes rab rin po che sna tshogs kyi skud pas legs par btags la/ dbang gi nor bu rin po che chen po dang / bai DUr+ya'i yu ba can gyi rgyal mtshan gyi rtse mo la btags te/sems can gyi spyod pa thams cad rab tu btags pa dang / thos pa'i shes pa'i 'od rab tu 'byung bar gyur la/ de bzhin gshegs pa chos kyi rgyal pos yang dag par rdzogs pa'i sangs rgyas kyi ye shes dbang bskur bas dbang bskur bar gyur pa de'i tshe/ sems can thams cad kyis sangs rgyas kyi mdzad pa rin po che thams cad bsdu bar bya bar nye bar gnas pa yin te/de'i tshe thams cad mkhyen pa zhes kyang bya'o zhes gsungs pa'o/ /de la rin po che'i rigs bcu las shin tu 'das zhes bya ba ni nor bu dang / mu tig dang bai DUr+ya la sogs pa'i nang nas/ nor bu dang bai DUr+ya ma gtogs pa'o/ / mngon par sbags zhes bya ba nas thams cad du 'od rab tu 'byung bar gyur ces bya ba'i bar gyis yon tan rnam pa brgyad kyis yongs su zin par ston te/ yon tan rnam pa brgyad ni rtag par mngon par sbags pas shin tu yongs su brtags pa'i phyir rigs kyi yongs su btags pa'i yon tan dang /mgar ba mkhas pas legs par bsregs pas kha dog gi yon tan dang / legs par bcos pas dbyibs kyi yon tan dang / legs par yongs su sbyangs pas dri ma med pa'i yon tan dang / legs par byi dor byas pas gsal ba'i yon tan dang / legs par phug pa dang / rin po che'i skud pas legs par btags pa dang /nor bu rin po che dang be+e DUr+ya'i yu ba mthon po can gyi rgyal mtshan gyi rtse mo la btags pa'i tshig gsum gyis mngon par 'du byed pa'i yon tan dang / thams cad du 'od zer rab tu 'byung bas/ thams cad du 'od rab tu 'byung ba'i phyir/ mthu'i yon tan dang rgyal pos bsngags pa zhes bya bas ni/yongs su ma bzung ba nyid kyi yon tan nyid ston to/ /yang dag par rdzogs pa'i sangs rgyas kyi ye shes dbang bskur ba nyid ni sems can thams cad dang thun mong ba'i dge ba'i rtsa ba'i gter nyid du'o/ /'phags pa'i rigs bcu las shin tu 'das zhes bya ba ni/ / nyan thos kyi rigs brgyad de/ zhugs pa dang 'bras bu la gnas pa'i bye brag gis so/ /rang sangs rgyas kyi rigs gnyis te/ zhugs pa dang 'bras bu la gnas pa'o/ /de ltar sa'i dpes sa bcu pa'i rnam par gzhag pa bstan nas/ sa'i phan yon gyis ston te/ de la sa'i phan yon ni rnam pa gnyis te/bsod nams 'phel ba dang mchod pa byed pa'o/ /de yang mos pa la gzud pa'i phyir / chos kyi rnam grangs 'di che ba nyid du yang dag par bstan pa'i phyir yongs su bstan te gang gi phyir/ kye rgyal ba'i sras byang chub sems dpa'i spyod pa yang dag par sgrub pa rnam pa thams cad dang ldan pa'i thams cad mkhyen pa'i ye shes kyi yon tan sogs pa'i chos kyi sgo'i le'u 'di ni sems can dge ba'i rtsa ba ma bskyed pa rnams kyi rna lam du grag par mi 'gyur ro//byang chub sems dpa'i rnam par grol ba'i zla bas smras pa/ kye rgyal ba'i sras rnam pa thams cad dang ldan pa'i thams cad mkhyen pa'i ye shes kyi yon tan sogs pa'i chos kyi sgo'i le'u 'di/gang dag gi rna lam du grag par gyur pa de dag bsod nams kyi tshogs ji tsam zhig dang ldan par 'gyur/ byang chub sems dpa' rdo rje'i snying pos smras pa/ kye rgyal ba'i sras thams cad mkhyen pa'i ye shes kyi mthu ji tsam par thams cad mkhyen pa nyid sems bskyed pas bsdus te/dmigs pa'i bsod nams sogs pa yang de tsam ste/ thams cad mkhyen pa nyid kyi sems bskyed pas bsdus te/ dmigs pa'i bsod nams sogs pa ji tsam par/ chos kyi sgo'i le'u 'di la mngon par phyogs pa'i bsod nams sogs pa yang de tsam du shes par bya'o//de ci'i phyir zhe na/ kye rgyal ba'i sras byang chub sems dpa' ma yin pas rnam pa thams cad dang ldan pa'i thams cad mkhyen pa'i ye shes kyi yon tan sogs pa'i chos kyi sgo'i le'u 'di mnyan pa'am/ mos pa'am/ yid ches pa'am/ len pa'am/ 'dzin pa'am/ kun du 'dzin par mi nus na/sgom pa'i rnam pa'i sbyor bas sgrub pa lta smos kyang ci dgos/ kye rgyal ba'i sras de lta bas na/ gang dag chos kyi sgo'i le'u 'di nyan cing thos nas kyang mos pa dang / mos nas kyang 'dzin pa dang sgom pa'i rnam pas sbyor ba'i byang chub sems dpa' de dag ni/ thams cad mkhyen pa'i ye shes kyi sgo dang ldan par shes par bya'o zhes gsungs pa'o//bsod nams 'phel ba la yid ches par bya ba'i phyir 'gyur ba ltas bco brgyad can drug snang ba kun du ston te gang gi phyir/ de nas de'i tshe sangs rgyas kyi mthu dang chos nyid thob pas phyogs bcu'i 'jig rten na sangs rgyas kyi zhing bye ba phrag bcu'i rdul phra rab kyi rdul snyed kyi 'jig rten gyi 'gyur ba ltas chen po bco brgyad can drug /g.yos rab tu g.yos/ kun du rab tu g.yos so/ /'gul rab tu 'gul/ kun du rab tu 'gul to / /ldeg rab tu ldeg/ /kun du rab tu ldeg go/ /'khrugs rab tu 'khrugs/ kun du rab tu 'khrugs so/ /'ur 'ur rab tu 'ur 'ur/ kun du rab tu 'ur 'ur ro/ /chem chem rab tu chem chem/ kun du rab tu chem chem mo zhes gsungs pa'o/ /de la 'gyur ba drug ni/ g.yo ba dang / mtho ba dang / dma' ba dang / steng du 'gro ba dang 'og tu 'gro ba dang sgra sgrogs pa'o/ /ltas bco brgyad ni g.yos pa la sogs pa rnam pa drug po de dag gis dal ba dang / 'bring dang drag pa rim du rig par bya'o//don gzhan du na snod kyi 'jig rten mngon par 'dus byas pa dang / mngon par 'dus ma byas pa'i sa'i dbang du byas pa dang / sems can gyi 'jig rten na sems can gyi ris bzhi ste/ mi mkhas pa dang / tha dad pa la mos pa dang / nga rgyal can dang / rig sngags dang ldan pa rnams kyi dbang du byas nas/dal ba dang / 'bring dang drag pa'i bye brag gis g.yos pa nas/ kun du rab tu chem chem gyi bar gyi ltas bco brgyad du rig par bya'o/ /de ltar bsod nams 'phel ba la yid ches par bya ba bstan nas mchod pa byed pa ston te/ gang gi phyir sangs rgyas kyi mthu dang chos nyid thob pas/lha'i me tog dang / spos dang phreng ba'i sprin gyi char mngon par bab bo/ /lha'i gos kyi sprin dang / lha'i rin po che'i sprin dang / lha'i rgyan gyi sprin dang / lha'i gdugs kyi sprin dang / lha'i rgyal mtshan gyi sprin dang / lha'i ba dan gyi sprin gyi char mngon par bab bo/ /lha'i rol mo sil snyan dang / pheg rdob pa dang glu dbyangs kyi sprin gyi sgra grag go/ /lha'i las shin tu 'das pa thams cad mkhyen pa nyid kyi sa la mngon par bstod pa'i glu dbyangs kyi sprin gyi sgra grag go zhes gsungs pa'o/ /'jig rten gyi khams thams cad du bstan pa de yongs su brjod pas ni chos kyi rnam grangs 'di sgo mtha' yas pa nas sems can gyi don du nye bar gnas par yongs su bstan te gang gi phyir/gling bzhi pa'i 'jig rten gyi khams 'di nas gzhan 'phrul dbang byed kyi gnas su lha'i dbang po dbang bsgyur gyi gzhal med khang / nor bu rin po che'i snying po can gyi khang pa na ji lta ba de bzhin du 'jig rten gyi khams thams cad du yang chos bstan pa 'di phyogs bcu thams cad du rgyas par byung bar gyur to//sangs rgyas kyi mthus phyogs bcu nas byang chub sems dpa' sangs rgyas kyi zhing bye ba phrag bcu'i rdul phra rab kyi rdul snyed dag phyogs bcu rgyas par 'gengs shing lhags te/ de dag lhags nas kyang 'di skad ces/kye rgyal ba'i sras de ltar khyod kyis byang chub sems dpa'i chos nyid 'di brjod pa legs so legs so/ /kye rgyal ba'i sras bdag cag kyang rdo rje'i snying po zhes bya bar ming mthun pa sha stag ste/ 'jig rten gyi khams rdo rje'i dpal zhes bya ba nas de bzhin gshegs pa'i mtshan rdo rje'i rgyal mtshan zhes bya ba dag gi thad nas 'dir lhags te/'jig rten gyi khams de dag thams cad na yang / sangs rgyas kyi mthus 'khor rnam pa 'dra ba dag la/ tshig 'di dag nyid dang / yi ge 'di dag nyid dang / rim pa 'di dag nyid dang / don 'di dag brjod pa dag gis chos bstan pa 'di nyid lhag chad med pa byung bar gyur to//kye rgyal ba'i sras bdag cag kyang dpang du gyur pa sha stag sangs rgyas kyi mthus 'khor 'dir phyin te/ kye rgyal ba'i sras 'jig rten gyi khams 'dir bdag cag ji ltar phyin pa de bzhin du/ phyogs bcu'i 'jig rten gyi khams kyi gling bzhi pa'i 'jig rten gyi khams re re'i gzhan 'phrul dbang byed kyi gnas su lha'i rgyal po'i dbang bsgyur gyi gzhal med khang nor bu rin po che'i snying po can gyi khang par yang sangs rgyas kyi zhing bye ba phrag bcu'i rdul phra rab kyi rdul snyed kyi/byang chub sems dpa' rnams phyin par gyur to zhes zer ro zhes gsungs pa ste/ rim pa 'di dag ces bya ba ni go rims 'di dag go//lhag ma ni go sla bas rnam par dbye ba ma byas te/ mdo sde las ji skad 'byung ba bzhin du khong du chud par bya'o/ /sa 'di la gnas pa'i byang chub sems dpa' ni/ phal cher lha'i rgyal po dbang phyug chen por 'gyur te/ sems can rnams la nyan thos dang /rang sangs rgyas dang / byang chub sems dpa'i pha rol tu phyin pa bstan pa la mkhas shing mthu yod pa yin no/ /de 'dod na skad cig thang cig yud tsam cig la ting nge 'dzin sangs rgyas kyi zhing brjod du med pa bye ba khrag khrig brgya stong phrag bcu'i rdul shin tu phra ba snyed rab tu thob cing / de dag la snyoms par 'jug pa dang /sangs rgyas de snyed kyi zhal mthong ba dang / de dag gi byin gyi rlabs yang dag par shes pa dang / 'jig rten gyi khams de snyed cig bskyod pa dang / de snyed dag tu 'gro ba la sogs pa'i brtson 'grus rtsom mo/ /'phags pas bcu pa las sa bcu pa chos kyi sprin zhes bya ba'i rnam par bshad pa rdzogs te sa bcu rnam par bshad pa rdzogs so// //rgya gar gyi mkhan po many+dzu shrI gar+b+ha dang / pradz+nyA warma dang / zhu chen gyi lo tsA ba ban+de ye shes sde dang / ban+de dpal brtsegs kyis bsgyur te zhus nas gtan la phab pa // //