CLOSE WINDOW

D3987
བོད་ཡིག

zhu chen gyi lo tsA ba ban+de dpal brtsegs kyis zhus nas gtan la phab pa//[ @##/ /rgya gar skad du/ bud+d+ha a nu smr-i ti TI kA / bod skad du/ sangs rgyas rjes su dran pa'i rgya cher 'grel pa/ 'jam dpal gzhon nur gyur pa la phyag 'tshal lo//sangs rgyas rjes su dran pa bstan pa/ dang po ni de bzhin gshegs pa'i yon tan che ba'i bdag nyid kyi sgo nas rab tu dang ba yang dag par bskyed par bya ba'i ched yin pa'i phyir thun mong ba yin no/ /gnyis pa ni gtan du sems can gyi don bya ba sgrub pa'i thabs nye bar ston pa'i phyir byang chub sems dpa' rnams kho na'i thun mong ma yin pa yin no//re zhig ji ltar na dang pos de bzhin gshegs pa'i yon tan che ba'i bdag nyid kyi sgo nas rab tu dang ba mngon par brjod pa yin zhe na/ go rims bzhin du tshig dgus bgegs bcom pa dang / ston pa nyid phun sum tshogs pa gsung ba nyid dang /sgrub pa nyid kyi mtshan nyid dang / rgyu gang yin pa dang / ji ltar gshegs pa dang / sems can skal ba dang ldan pa dang / mi ldan pa la gzigs pa dang / skal ba dang ldan pa 'dul bar mdzad pa dang / ston pa nyid de gang dag la gnas pa dang / gang dag gi don yin pa mngon par brjod pa'i sgo nas yon tan che ba'i bdag nyid mngon par brjod pa yin te/de la bcom ldan 'das zhes bya ba 'dis ni nges pa'i tshig gi tshul gyis na bcom pa dang ldan pa ni/ bcom ldan 'das zhes bya ba'i phyir bgegs bcom pa ston to/ /'dir ston pa nyid phun sum tshogs pa'i bgegs gang zhe na/lha'i bu'i bdud yin te/ de bcom pas dang po nyid du ston pa phun sum tshogs pa brnyes pa'i phyir ro/ /de bzhin gshegs pa dgra bcom pa yang dag par rdzogs pa'i sangs rgyas zhes bya ba'i tshig 'di dag gis ni ston pa nyid phun sum tshogs pa ston to//ston pa nyid phun sum tshogs pa de yang rnam pa gnyis te/ gsung ba nyid kyi rgyu mtshan nyid dang / sgrub pa nyid kyi mtshan nyid do/ /gsung ba nyid phun sum tshogs pa ni/ gang gis na bcom ldan 'das de bzhin gshegs pa zhes brjod pa chos phyin ci ma log par ston par byed pa nyid de/chos de kho na bzhin du phyin ci ma log par gsungs pa'i phyir ro/ /sgrub pa nyid ni spangs pa phun sum tshogs pa dang / ye shes phun sum tshogs pa ste/ spangs pa phun sum tshogs pa ni dgra bcom pa dang ldan pa'i phyir bcom ldan 'das dgra bcom pa zhes bya ste/ nyon mongs pa rnams ni dge ba'i chos thams cad la gnod par byed pa'i don gyis na dgra dag yin no//ye shes phun sum tshogs pas ni/ chos rnams yang dag par phyin ci ma log par kun nas sangs rgyas pa'i phyir yang dag par rdzogs pa'i sangs rgyas zhes bya ste/ chos phyin ci ma log par ston par byed pa nyid dang /nyon mongs pa thams cad spangs pa dang / chos thams cad mngon par rdzogs par byang chub pa de tsam gyis ni ston pa nyid phun sum tshogs pa yongs su rdzogs pa yin no/ /gsum po de yang bcom ldan 'das kho na la dmigs pas de'i phyir bcom ldan 'das kho nas ston pa nyid phun sum tshogs pa rnam pa thams cad brnyes pa yin no zhes bya bar ston to//rig pa dang zhabs su ldan pa zhes bya ba 'dis ni ston pa nyid phun sum tshogs pa de thob pa'i rgyu ston to/ /rig pa dang zhabs ni 'phags pa'i lam yan lag brgyad de/ mi mthong ba'am rkang pa med par 'gro mi nus pas yang dag pa'i lta ba ni rig pa yin no//yan lag lhag ma rnams ni zhabs yin no/ /yang na rig pa dang zhabs ni bslab pa gsum ste/ lhag pa'i shes rab kyi bslab pa ni rig pa yin no/ /lhag pa'i tshul khrims dang lhag pa'i sems kyi bslab pa dag ni lhag pa'i shes rab kyi sngon rol du sbyang bar bya ba'i phyir zhabs yin te/ sngar spyad pa ni zhabs zhes bya ba'i phyir ro//rig pa sngar smos pa ni de yongs su dag pas tshul khrims dang ting nge 'dzin yongs su dag par 'gyur ba'i phyir te/ shes rab des mig bzhin du mthong zhing tshul khrims dang ting nge 'dzin dag gis rkang pa bzhin du 'gro ba ni bgrod par bya bar phyin par 'gyur bas de'i phyir rig pa dang zhabs zhes bya ba'i sgra ni bslab pa gsum yin par ston to//yang na de la rig pa zhes smos pas ni rig pa gsum bzung la/ zhabs zhes smos pas ni de'i sngon rol du spyad pa yin pa'i phyir tshul khrims phun sum tshogs pa dang / spyod pa phun sum tshogs pa dang / bzlog pa phun sum tshogs pa dang /tshe 'di la bde bar gnas pa lhag pa'i sems bzhi bzung ngo / /rig pa gsum ni sngon gyi gnas rjes su dran pa mkhyen pa mngon sum du mdzad pa'i mngon par shes pa dang / 'chi 'pho dang skye ba mkhyen pa mngon sum du mdzad pa'i mngon par shes pa dang / zag pa zad pa mkhyen pa mngon sum du mdzad pa'i mngon par shes pa ste/'di ltar bcom ldan 'das byang chub kyi shing drung du bzhugs te/ nam gyi thun dang po dang / dang 'og la sngon gyi gnas rjes su dran pa dang / 'chi 'pho dang skye ba mkhyen pas sems can sngon gyi mthar gtogs pa rnams dang / phyi ma'i mthar gtogs pa rnams kyi sngon gyi gnas dang /'chi 'pho dang skye ba gzigs nas thun gsum pa la zag pa zad pa mkhyen pas spang bar bya ba gang yin pa dang / thob par bya ba dang / mngon par rdzogs par byang chub par bya ba gang yin pa de thams cad spangs pa mngon sum du byas mngon par rdzogs par byang chub nas thams cad mkhyen pa nyid brnyes so//rig pa de dag gi sngon rol du spyad par bya ba ni tshul khrims phun sum tshogs pa yin no/ /de la tshul khrims phun sum tshogs pa ni rnam pa drug ste/ tshul khrims dang ldan pa dang / so sor thar pa'i sdom pa la gnas pa dang / cho ga phun sum tshogs pa dang / spyod yul phun sum tshogs pa dang / kha na ma tho ba phra rab tsam dag la yang 'jigs pa dang / bslab pa'i gzhi yang dag par blangs nas slob pa ste/ de dag gis ni tshul khrims yongs su dag pa yin no/ /de ltar tshul khrims yongs su dag nas ting nge 'dzin yongs su dag par bya ba'i phyir spyod pa phun sum tshogs pa la spyod de/de la spyod pa phun sum tshogs pa ni/ spyod lam thams cad du shes bzhin du gnas pa'o/ /bzlog pa phun sum tshogs pa ni mig la sogs pas shes par bya ba la mtshan ma dang mngon rtags su mi 'dzin pa'i phyir dbang po'i sgo bsdam pa yin no/ / de ltar tshul khrims yongs su dag pa shes bzhin du gnas pa dang / dbang po rnams kyi sgo bsdams par gyur nas ting nge 'dzin sgrub par byed de/ ting nge 'dzin ni tshe 'di la bde bar gnas pa lhag pa'i sems bzhi yin no/ /de dag las kyang bsam gtan bzhi pa ste/ bsam gtan bzhi pa las su rung bar bya ba'i phyir ting nge 'dzin yongs su sgrub bo//de ltar ting nge 'dzin yongs su dag pa ni mngon par shes pa mngon par sgrub par byed de/ rdzu 'phrul gyi mngon par shes pa dang / lha'i rna ba'i mngon par shes pa dang / pha rol gyi sems shes pa'i mngon par shes pa dang / sngar bshad pa'i rig pa gsum sgrub par byed de/de lta bas na rig pa de dag dang zhabs de dag dang ldan pas bcom ldan 'das kyis ston pa nyid phun sum tshogs pa brnyes pa'i phyir rig pa dang zhabs su ldan pa ni ston pa nyid phun sum tshogs pa 'thob pa'i rgyur bstan pa yin no/ /bde bar gshegs pa zhes bya ba 'dis ni ji ltar gshegs par bya ba bzhin du gshegs pa de ston par byed do//legs par gshegs pa ni bde bar gshegs pa ste/ yang phyir mi ldog pa'i don gyis rims nad legs par byang ba bzhin no/ /ma lus par rdzogs pa ni bde bar gshegs pa ste/ shes bya ma lus par rtogs pa'i don gyis na bum pa legs par gang ba bzhin no//don 'di gnyis ni phyi rol pa dang nyan thos dag las khyad par du bya ba'i don te/ phyi rol pa rnams ni yang phyir ldog pa'i phyir legs par gshegs pa ma yin no/ /nyan thos la sogs pa ni yang so so'i skye bor 'gyur ba'i skal ba can ma yin pa'i phyir legs par gshegs pa ni yin mod kyi/shes bya thams cad la ye shes thogs pa'i phyir ma lus par rtogs pa ni ma yin no/ /bcom ldan 'das ni legs par gshegs pa'i phyir dang / rtogs par bya ba ma lus par rtogs pa'i phyir bde bar gshegs pa zhes bya'o/ /de ltar rig pa dang zhabs su ldan pas ston pa phun sum tshogs pa de ma lus par brnyes pa'i bcom ldan 'das kyi ston pa nyid kyi phrin las de ni 'jig rten mkhyen pa/skyes bu 'dul ba'i kha lo sgyur ba/ bla na med pa zhes bya ba'i tshig 'di gnyis kyis ston to/ /ston pa nyid kyi phrin las de yang rnam pa gnyis te/ 'jig rten skal ba dang ldan pa dang / skal ba dang mi ldan pa la gzigs pa dang / skal ba dang ldan pa 'dul bar mdzad pa'o/ /de la 'jig rten mkhyen pa zhes bya ba 'dis ni 'jig rten skal ba dang ldan pa dang mi ldan pa la gzigs te/ 'jig rten rig pa na 'jig rten mkhyen pa yin no/ /'di ni 'jig rten skal ba dang ldan pa dang mi ldan pa mkhyen pa'i phyir 'jig rten mkhyen pa zhes bya ste/'di ltar bcom ldan 'das ni sangs rgyas kyi spyan gyis nyin lan gsum mtshan lan gsum du su ni nyams/ su ni 'phel/ su ni nyam nga bar gyur/ su ni ngan song la gzhol/ su ni ngan song la 'bab/bdag gis gang ni ngan song las drangs nas mtho ris dang thar pa la dgod par bya/ gang gi dge ba'i rtsa ba ma skyed pa rnams ni yongs su smin par bya/ gang gi yongs su smin pa rnams ni thar bar bya zhes 'jig rten la rnam par gzigs par mdzad do/ /skyes bu 'dul ba'i kha lo sgyur ba zhes bya ba 'dis ni skal ba dang ldan pa 'dul bar mdzad pa ston te/bcom ldan 'das kyis 'jig rten skal ba dang ldan pa dang / skal ba dang mi ldan pa la gzigs nas skyes bu gang dag 'dul bar 'os pa 'dul bar spyod pa de dag ni skal ba dang ldan pa ste/ de dag 'dul bar mdzad do/ / kha lo sgyur ba'i ngo bor gyur pa'i phyir 'dul ba'i kha lo ni sgyur ba'i ngo bo yin no/ /bla na med pa zhes smos pa ni kha lo sgyur ba'i ngo bo khyad par du bya ba'i phyir te dga' bo dang / sor mo'i phreng ba dang / lteng rgyas 'od srungs la sogs pa 'dul bar mdzad pa'i skyes bu kha cig 'dod chags dang zhe sdang dang gti mug shas che ba gdul dka' ba rnams kyang 'dul ba'i phyir dang /thabs sla ba mchog tu kha na ma tho ba med pas 'dod pa bsod nams dang dub pa dang ldan pa'i mtha' spangs nas dbu ma'i lam gyis 'dul ba'i phyir dang / don gyi mchog mya ngan las 'das pa la 'dul ba'i phyir dang / gtan du mi ldog par 'dul ba'i phyir skyes bu 'dul ba'i kha lo sgyur ba bla na med pa zhes bya ba ste/skal ba dang ldan pa rnams 'dul ba'i phyir bcom ldan 'das ni skyes bu 'dul ba'i kha lo sgyur ba zhes bya'o/ /'o na skal ba med pa de dag ji ltar sgrub par mdzad ce na/ de dag la yang dbul ba dang /ngan 'gro'i sdug bsngal las yongs su skyob pas longs spyod dang / bde 'gro la sogs pa la 'god par mdzad do/ /skal ba dang mi ldan pa ni rigs med pa la bya'o/ /skal ba dang ldan pa ni nyan thos la sogs pa'i byang chub la rigs ji lta ba bzhin du 'god par mdzad do//ma nges pa'i rigs can ni rkyen gyi stobs kyis rab tu grol ba las nyams pa las bzlog ste gya nom pa la 'god par mdzad pas skyes bu 'dul ba'i kha lo sgyur ba bla na med pa zhes bya'o/ /lha dang mi rnams kyi ston pa zhes bya ba 'dis ni ston pa nyid kyi phrin las de gang dag la gnas pa de ston te/bcom ldan 'das sems can rnams la mtho ris dang / byang grol ston pa'i phyir bye brag med par ston pa yin mod kyi/'dis ni gang la bden par mthong ba dang / dge sbyong gi tshul gyi 'bras bu thob pa dmigs pa de dag gi skabs yin no/ /don ji lta ba bzhin rjes su ston pa ni 'dir ston pa nyid kyi phrin las yin par dgongs la/de'i snod ni lha dang mi dag yin pas de'i phyir lha dang mi dag gi ston pa zhes bya'o/ /ji skad du bshad pa'i tshig dgus brjod par 'dod pa yon tan che ba'i bdag nyid mtha' dag mngon par brjod zin nas sangs rgyas bcom ldan 'das zhes bya ba 'di gnyis yang ci'i phyir smos she na/gang la yon tan che ba'i bdag nyid 'di yod pa de ni sangs rgyas bcom ldan 'das yin no zhes bya bar bstan pa'i phyir ro/ /yang na bcom ldan 'das zhes bya ba'i sgra ni grags pa'i rnam grangs su brjod par bya ba yin no/ /bcom ldan 'das zhes bya ba ni grags pa dang ldan pa ste/ rnam par grags pa zhes bya ba'i sgra'i don yin no//de lta bas na 'di ltar bcom ldan 'das de ni sangs rgyas zhes bya bar rnam par grags so zhes bya ba'i tha tshig go/ /'di ltar de ni de bzhin gshegs pa zhes bya ba dang / 'di ltar de ni dgra bcom pa zhes bya ba dang / 'di ltar yang dag par rdzogs pa'i sangs rgyas zhes bya ba re re la'ang sbyar bar bya'o//'di la dngos po mtha' dag rtogs pa'i blo yod pas na sangs rgyas zhes bya'o/ /de bzhin gshegs pa de ni bsod nams dag gi rgyu mthun pa/ dge ba'i rtsa ba rnams chud mi za ba zhes bya ba la sogs pa sangs rgyas rjes su dran pa bstan pa 'di la ni bcom ldan 'das de sems can gyi don rgyu gang gis gtan du dang /sku gang yin pa dang / gang la brten pa dang / bya ba gang yin pa dang / thabs gang yin pa dang / gang na gnas shing de la ma chags par don mdzad pa dang / dngos po gang la chags pa dang / spang ba gang yin pa dang / ye shes gang yin pa dang / sku gang dag la bzhugs nas gtan du sems can gyi don mdzad pa'i don de dag gi go rims bzhin du tshig gnyis dang /drug dang / gsum dang / bzhi dang / yang drug dang / gsum dang / gsum dang / bzhi dang / bzhis bstan to/ /de la de bzhin gshegs pa de ni bsod nams dag gi rgyu mthun pa/ dge ba'i rtsa ba rnams chud mi za ba zhes bya ba 'di gnyis kyis ni rgyu gang gis rtag tu sems can gyi don mdzad pa ston te/ rgyu gnyis las gzhan dag gis gtan du sems can gyi don byed mi nus so/ /so so'i skye bo dag gis bsod nams dag gi rnam par smin pa phyung nas yongs su zad par 'gyur ba'i phyir ro//nyan thos dang rang sangs rgyas rnams kyi dge ba'i rtsa ba dag ni phung po lhag ma med pa'i mya ngan las 'das pa'i dbyings su zad par 'gyur ba'i phyir ro/ /de bzhin gshegs pa'i bsod nams dag ni rnam par smin pa phyung nas yongs su zad pa med de/ gang gi phyir de bzhin gshegs pa de bsod nams dag gi rgyu mthun pa'i phyir ro //'di ltar bcom ldan 'das byang chub sems dpa'i spyod pa la gnas pa na sems can thams cad la gzigs la rnam par smin pa la mi gzigs shing sbyin pa la sogs pa bsod nams thams cad rgyu mthun pa'i 'bras bu 'byung bar bya ba'i ched du sbyin pa yang khyad par du 'gyur zhing sbyin pa mi zad par gyur cig ces sbyin pa yongs su bsngo ba mdzad kyi longs spyod phun sum tshogs pa'i ched du ni bsngo bar mi mdzad la/de bzhin du tshul khrims la sogs pa khyad par du 'gyur zhing tshul khrims la sogs pa mi zad par gyur cig ces bsngo ba mdzad kyi/ bde 'gro lus phun sum tshogs pa la sogs pa'i ched du ni bsngo bar mi mdzad do//de ltar sbyin pa la sogs pa'i bsod nams yongs su bsngos pa rnams rgyu mthun par gyur pas de bzhin gshegs pa de bsod nams mi zad pa yin te/ des ni gtan du sems can gyi don mdzad par spyod do/ /de bzhin gshegs pa'i dge ba'i rtsa ba thams cad ni phung po lhag ma med pa'i mya ngan las 'das pa'i dbyings su yang zad pa med pas de'i phyir dge ba'i rtsa ba rnams chud mi za ba yin no//de nyid kyi phyir de bzhin gshegs pa rnams kyi sku ni rtag pa zhes bya ste/ nye bar 'dus byas pa'i sku sngon 'phags pa'i shugs kyis rtsol ba med par yid bzhin gyi nor bu bzhin du 'khor ba ji srid par 'jug pa'i phyir ro//de ltar na de bzhin gshegs pa de ni sems can gyi don gyi 'bras bu can gyi dge ba'i rtsa ba rnams chud mi za ba zhes bya'o/ /bzod pas brgyan pa/ bsod nams kyi gter rnams kyi gzhi/ dpe byad bzang po rnams kyis spras pa/mtshan gyi me tog rgyas pa/ spyod yul ran par mthun pa/ mthong na mi mthun pa med pa zhes bya ba'i tshig 'di drug gis ni bcom ldan 'das de sku gang gis sems can gyi don gang mdzad pa'i sku de ston te/ sku de ni gzugs kyi sku yin no/ /gzugs kyi sku de'i phun sum tshogs pa la yang rnam pa lngas ston te/rtsa ba'i rgyu phun sum tshogs pa dang / rab tu dbye ba'i rgyu phun sum tshogs pa dang / ngo bo nyid phun sum tshogs pa dang / gnas skabs phun sum tshogs pa dang / mdzad pa phun sum tshogs pa'o/ /de la bzod pas brgyan pa zhes bya ba 'dis ni rtsa ba'i rgyu phun sum tshogs pa ston to//bzod pa ni mdzes pa'i rgyu yin te/ 'di ltar bzod pas ni mdzes par 'gyur ro zhes gsungs so/ /yang 'di ni mdog ngan par 'gyur ba'i lam yin te/ 'di lta ste khro ba yin/ khon du 'dzin pa yin zhes gsungs te/ bzod pa ni rang gi ngo bo bsten pa dang / de'i mi mthun pa'i phyogs yongs su spangs pas mdzes pa'i rgyur bshad do//bsod nams kyi gter rnams kyi gzhi zhes bya ba 'dis ni rab tu dbye ba'i rgyu phun sum tshogs pa ston te/ sku'i yan lag so so'i rgyu ni rab tu dbye ba'i rgyu yin no/ /de yang 'phags pa blo gros mi zad pas bstan pa las brtson 'grus mi zad pa bstan pa'i nang nas bsod nams kyi tshogs mi zad par bstan pa las khong du chud par bya ste/de las ni sems can thams cad kyi bsod nams kyi phung po bcu 'gyur gyis de bzhin gshegs pa'i ba spu'i khung gcig mngon par 'grub pa gsungs la/ ba spu'i khung thams cad mngon par 'grub par rtogs pa'i bsod nams kyi phung po brgyad 'gyur gyis ni dpe byad bzang po gcig mngon par 'grub bo//dpe byad bzang po thams cad mngon par 'grub par gtogs pa'i bsod nams kyi phung po stong 'gyur gyis ni mdzod spu dang / gtsug tor dang / chos kyi dung ma gtogs pa mtshan re re yongs su 'grub par gsungs la/mtshan nyi shu rtsa dgu 'grub par gtogs pa'i bsod nams kyi phung po khri 'gyur gyis ni mdzod spu 'grub bo/ /mdzod spu 'grub par gtogs pa'i bsod nams kyi phung po 'bum 'gyur gyis ni gtsug tor 'grub bo/ /gtsug tor 'grub par gtogs pa'i bsod nams kyi phung po bye ba phrag 'bum 'gyur gyis ni de bzhin gshegs pa'i chos kyi dung mngon par 'grub bo zhes gsungs te/de ltar na de bzhin gshegs pa'i gzugs kyi sku de ni bsod nams kyi gter rnams kyi gzhi yin no/ /dpe byad bzang po rnams kyis spras pa/ mtshan gyi me tog rgyas pa zhes bya ba 'di gnyis kyis ni/gzugs kyi sku'i ngo bo nyid phun sum tshogs pa ston te/ de bzhin gshegs pa'i sku mdzes pa'i rang gi ngo bo ni mtshan dang dpe byad kyis brgyan pa yin no/ /de la dpe byad bzang po rnams kyis spras pa ni de dag mtshan gyi 'khor yin pa'i phyir ro//mtshan gyi me tog rgyas pa ni de dag rgyan du gyur pa'i phyir ro/ /spyod yul ran par mthun pa zhes bya ba 'dis ni gnas skabs phun sum tshogs pa ston par byed de/ mngon du gshegs pa thams cad du mdzes pa'i phyir spyod lam thams cad du mdzes pa ni gnas skabs phun sum tshogs pa yin no//mthong na mi mthun pa med pa zhes bya ba 'dis ni mdzad pa phun sum tshogs pa ston te/ de bzhin gshegs pa'i sku'i mdzad pa ni rang gi ngo bos kyang rab tu dang ba bskyed la/ gnas skabs kyis kyang rab tu dang ba bskyed pas sems can rnams dang mi mthun pa med pa yin te/ mthong ba tsam gyis 'di ni skyes bu chen po yin no zhes bya bar rtogs shing rab tu dang ba skyed par byed pa gang yin pa 'di nyid 'di'i mthong na mi mthun pa med pa yin no/ /dad pas mos pa rnams la mngon par dga' ba/ shes rab zil gyis mi non pa/ stobs rnams la brdzi ba med pa zhes bya ba'i tshig gsum po 'dis ni bcom ldan 'das de sems can gang dag la brten nas sems can gyi don mdzad pa de ston par byed de/sems can de dag kyang dad pa'i bsam pa'am/ zil gyis mnan pa'i bsam pa ste/ bsam pa gnyis kyis de bzhin gshegs pa'i drung du 'ong ngo / / dad pa'i bsam pa yang rnam pa gnyis te/ ci 'dra ba snyam pa'i bsam pa'am/ rab tu dga' ba'i bsam pa'o/ /de gnyi ga yang mngon par 'dod pa'i ngo bo yin pa'i phyir dad pa zhes bya'o/ /'di ltar kha cig ni ci 'dra ba zhig snyam pa'i bsams pa skyes pa dang / sngon gyi dge ba'i rtsa bas yang dag par bskul nas de bzhin gshegs pa'i drung du 'gro'o//kha cig ni yon tan che ba'i bdag nyid thos nas rab tu dang ba yang dag par bskyed pa dang / dge ba'i rtsa bas bskul nas 'gro ste/ de bas na 'dis ni bar mar gnas pa dang / dad pa dag bstan pa yin no/ /de dag gis mthong na dga' ba dang /rab tu dang ba skyed pa mdzad pa'i phyir bcom ldan 'das de ni dad pas mos pa rnam pa de gnyi ga'i yang mngon par dga' ba'i rgyu yin no/ /zil gyis mnan pa'i bsam pa yang rnam pa gnyis te/ shes rab zil gyis mnan pa'i bsam pa ni dper na rtsod pa don du gnyer bar byed pa bden po la sogs pa lta bu'o//lus kyi stobs kyis zil gyis gnon pa'i bsam pa de ni dper na 'brog gnas la sogs pa stobs kyis mngon pa'i nga rgyal byed pa rnams lta bu'o/ /de bas na 'dis ni bsam pa rnam pa gnyis kyis zhe 'gras pa rnams yang dag par bstan pa yin no/ /bcom ldan 'das de ni shes rab phul du phyin pa dang ldan pa'i phyir dang /zil gyis gnon par mdzad pa'i phrin las phul du phyin pa dang ldan pa'i phyir zil gyis gnon par 'dod pa de gnyi ga'i shes rab kyi zil gyis mi non cing stobs rnams kyis brdzi ba med pa yin no/ /sems can thams cad kyi ston pa/ byang chub sems dpa' rnams kyi yab/'phags pa'i gang zag rnams kyi rgyal po/ /mya ngan las 'das pa'i grong khyer du 'gro ba rnams kyi ded dpon zhes bya ba'i tshig 'di bzhis ni bcom ldan 'das de sems can thams cad kyi bya ba gang yin pa mdzad pa de ston te/ de la sems can thams cad kyi ston pa zhes bya ba ni bcom ldan 'das de khyad par med par sems can thams cad kyi bya ba ston pa nyid kyis mdzad pa yin te/'di ltar ngan song du skyes pa kha cig kyang 'od dang de bzhin gshegs pa'i sku yang dag par bstan pas rab tu dang ba bskyed nas bde 'gro la 'god par mdzad la/ bde 'gror skyes pa rnams kyang kha cig skal ba dang mi ldan pa sngar bshad pa'i tshul du zil gyis mnan pa'i bsam pas lhag pa rnams ni 'khor ba'i bde ba'i lam sbyin pa la sogs pa la 'god par mdzad do//skal ba dang ldan pa bsam pa rnam pa gnyis kyis lhag pa rnams kyang dge ba'i rtsa ba ma bskyed pa rnams ni dge ba'i rtsa ba skyed par mdzad do//dge ba'i rtsa ba bskyed pa rnams ni dge ba'i rtsa ba yongs su smin par mdzad do/ /yongs su smin pa rnams ni rigs ji lta ba bzhin du nyan thos la sogs pa la 'god cing yongs su grol bar mdzad de/ de ltar na bcom ldan 'das de ni ngan 'gro dang bde 'gror skyes pa rnams dang /skal ba dang ldan pa dang / skal ba dang mi ldan pa rnams kyi bya ba bsgrub pa'i phyir na sems can thams cad kyi ston pa zhes bya'o/ /bya ba de'i gnas skabs kyi bye brag ni rnam pa gnyis te/ zhugs pa'i gnas skabs kyi bye brag dang / 'jug pa'i gnas skabs kyi bye brag go//zhugs pa'i gnas skabs kyi bye brag kyang sangs rgyas 'byung ba dang nye bar bsgrub par bya ba'i phyir sangs rgyas dang nyan thos kyi rigs kyi bye brag ni rnam pa gnyis so/ /de la sangs rgyas kyi rigs can gyi dbang du mdzad nas byang chub sems dpa' rnams kyi yab ces bya ba smos te/ bcom ldan 'das de ni rang gi yon tan phun sum tshogs pa la dbang thob pa'i byang chub sems dpa' rnams la yang dag par gtod pa'i phyir 'khor los sgyur bas 'khor los sgyur ba'i bu mtshan dang ldan pa la 'khor lo yang dag par gtod pa shes pa rnams kyi phar gyur pa dang 'dra ba de dag gi yab tu gyur zhes bya'o// nyan thos kyi rigs can gyi dbang du mdzad nas 'phags pa'i gang zag rnams kyi rgyal po zhes bya ba smos te/ bcom ldan 'das de ni 'khor los sgyur ba'i bu phal pa rnams kyi rgyal por gyur pa bzhin du nyan thos gcig tu dka' bzhin du byed pas rtog pa thob pa rnams kyi rgyal po lta bur gyur pa yin no//'jug pa'i gnas skabs kyi bye brag ni rigs gsum car la yang srid pas de'i phyir de'i dbang du mdzad nas mya ngan las 'das pa'i grong khyer du 'gro ba rnams kyi ded dpon zhes bya ba smos te/ bcom ldan 'das de ni mya ngan las 'das pa'i grong khyer du 'jug pa thar pa'i sa bon ma skyes pa de dag gi rigs ji lta ba bzhin du lam nas lam gzhan du khrid par mdzad pa'i phyir ded dpon zhes bya'o//ye shes dpag tu med pa/ spobs pa bsam gyis mi khyab pa/ gsung rnam par dag pa/ dbyangs snyan pa/ sku byad blta bas chog mi shes pa/ sku mtshungs pa med pa zhes bya ba'i tshig 'di drug gis ni bcom ldan 'das de thabs gang gis sems can gyi don mdzad pa'i thabs de ston te/ thabs de yang de las gsum yin no/ /de la go rims bzhin du tshig dang pos ni yid kyi phrin las ston to/ /gsum gyis ni gsung gi phrin las ston to//gnyis kyis ni sku'i phrin las ston te/ gsung dang sku'i phrin las dag ni chos 'chad pa la sogs pa ston pa'i ngo bo yin pa'i phyir lhur sems can gyi don mdzad pa'i thabs yin par ston to/ /thugs kyi phrin las kyang de dag kun nas slong bar byed pa nyid kyis sems can gyi don mdzad pa'i thabs yin par yongs su bzung ste/ye shes ni de dang lhan cig spyod pa'i phyir 'dir thugs kyi phrin las zhes bshad do/ /yul dpag tu med pas ye shes dpag tu med pa yin la/ de dang ldan pas bcom ldan 'das ye shes dpag tu med pa zhes bya ste/ sku dang gsung gi phrin las kyi mtshan nyid ni sems can gyi don mdzad pa'i thabs yin par bzung la/de dag kyang dpag tu med la bcom ldan 'das kyi ye shes de la thogs pa med par 'jug go/ /gsung gi phrin las ni spobs pa dang dbyangs rnam par dag pa'i yon tan phun sum tshogs pa'i khyad par bstan te/ de la spobs pa'i khyad par yang rnam pa gnyis te/yi ge la brten pa dang / don la brten pa'o/ /yi ge la brten pa ni tshig re re la brten nas yi ge'i bye brag gzhan dang gzhan dag gis bskal pa dpag tu med par ston kyang de bzhin gshegs pa'i spobs pa yongs su gtugs pa med pa las rig par bya'o/ /don la brten pa ni bskal pa dpag tu med par sems can dpag tu med pa rnams so so nas zhu ba dpag tu med pa yongs su zhus pa'i zhu ba thams cad la lan cig gsung gcig brjod pa kho nas lan thebs pa las rig par bya ste/de ltar na yi ge dang don la brten pa'i spobs pa'i khyad par gyis bsam gyis mi khyab pa ngo mtshar rmad du byung ba'i chos ston par mdzad pa'i phyir bcom ldan 'das de spobs pa bsam gyis mi khyab pa zhes bya'o//ngag gi skyon brdzun du smra ba la sogs pa dang / smra bar bcol ba'i skyon spu zing zhes byed pa la sogs pa dang / nga ro'i skyon gdangs mi snyan pa la sogs pa ji snyed pa de dag med pa'i phyir bcom ldan 'das de ni gsung rnam par dag pa zhes bya'o//gsung gi yon tan gyi sgo nas yid du 'ong ba'i phyir bcom ldan 'das de ni dbyangs snyan pa zhes bya'o/ /gsung gi yon tan ni gsung dbyangs kyi yan lag lnga dang ldan pa dang drug cu dang ldan pa las rig par bya'o//sku byad blta bas chog mi shes pa dang / sku mtshungs pa med pa zhes bya ba'i tshig 'di gnyis ni sku'i phrin las kyi rten gyi khyad par dang / rang gi ngo bo'i khyad par bstan te/ de la rten gyi khyad par ni sku byad blta bas chog mi shes pa las rig par bya ste/ bcom ldan 'das de'i yan lag dang nying lag dag la yun ring mo zhig nas mthong yang sngon ma mthong ba bzhin du blta ba'i dga' bas ngoms mi shes pa'i sku byad blta bas chog mi shes pa zhes bya'o//rang gi ngo bo'i khyad par ni sku mtshungs pa med pa las rig par bya ste/ bcom ldan 'das de ni khams dang / 'gro ba dang /skye gnas dag tu gdul bya de dang de dag la kha dog dang spyod pa mthun par bstan pa dang / chos bstan pas 'dul bar mdzad pa'i phyir sku mtshungs pa med pa zhes bya'o/ /'dod pa dag gis ma gos pa/ gzugs dag gis nye bar ma gos pa/ gzugs med pa dag dang ma 'dres pa zhes bya ba'i tshig 'di gsum gyis ni bcom ldan 'das de gang na gnas pa dang /de la ji ltar ma chags par sems can gyi don mdzad pa ston te/ de la gang na gnas shing sems can gyi don mdzad ce na/ 'dod pa'i khams dang / gzugs kyi khams na gnas te/de na lus dang / ngag dang 'brel pa yod pa'i phyir ro/ /gzugs med pa'i khams na ni ma yin te/ de nyid kyi phyir gzugs med pa dag dang ma 'dres pa zhes bya ba gsungs so/ /de la bcom ldan 'das de 'dod pa'i khams na sems can gyi don mdzad pa na 'dod par gtogs pa'i 'dod pa'i 'dod chags la sogs pa'am/der gtogs pa'i sems can log par sgrub pa dag gis mi 'phrogs pa'i phyir 'dod pa dag gis ma gos pa zhes bya'o/ /gzugs kyi khams na yang snyoms par 'jug pa'i tshe snyoms par 'jug pa'i bde ba dag dang / der gtogs pa'i sems can dang 'brel pa der skye ba'i yon tan yang dag par bstan pas sems ma 'phangs pa'i phyir gzugs dag gis nye bar ma gos pa zhes bya'o/ /nye bar gos pa ni nye bar gos pa ste/ de yang snyoms par 'jug pa'i ro myang ba dang skye ba'i yon tan yang dag par mthong bas ro myang ba'o//de dag med pas na nye bar ma gos pa zhes bya'o/ /phung po dag las rab tu rnam par grol ba/ khams rnams dang mi ldan pa/ skye mched rnams bsdams pa zhes bya ba'i tshig 'di gsum gyis ni bcom ldan 'das de dngos po gang la yang ma chags par sems can gyi don mdzad pa de ston te dngos po de yang phung po dang /khams dang skye mched dag yin te/ phyi nang gi dngos po ni de'i bdag nyid yin pa'i phyir ro/ /de dag kyang chags pa'i gnas yin pa'i phyir te/ de la phung po rnams ni/ yang skye ba'i mtshan nyid yin pa'i phyir de dag la rab tu thar bas/ bcom ldan 'das de phung po dag las rab tu rnam par grol ba zhes bya'o/ /khams rnams ni dbang po rnams kyis rnam par shes pa'i sgo nas yul rnams dang ldan pa'i ngo bo yin pa'i phyir de la brten pa'i kun nas nyon mongs pa dang bral bas/ bcom ldan 'das de khams rnams dang mi ldan pa zhes bya'o//skye mched rnams ni mthong ba la sogs pa skye ba'i sgor gyur pa'i phyir/ de la brten pa'i kun nas nyon mongs pa bsdams pa'i phyir/ bcom ldan 'das de skye mched rnams bsdams pa zhes bya'o/ /mdud pa rnams yongs su bcad pa/ yongs su gdung ba dag las rnam par grol ba/sred pa las yongs su grol ba/ chu bo las brgal ba zhes bya ba'i tshig 'di bzhis ni/ bcom ldan 'das de spangs pa phun sum tshogs pa ji lta bu zhig yin na/ sems can gyi don mdzad pa de ston te/ nyon mongs pa rnams ni mdor bsdu na/ yul dang ma phrad pa dang /phrad pa'i bye brag gis rnam pa gnyis te/ mdud pa'i mtshan nyid rnams dang / yongs su gdung ba'i mtshan nyid rnams so/ /de dag gi sgo yang rnam pa gnyis te/ sred pa'i sgo rnams dang / chu bo'i sogs rnams so/ /yul dang ma phrad pa rnams la ni/ don du gnyer ba'i rnam pa'i sred pa'i sgo nas mdud par gyur pa dag yin no//phrad pa rnams la ni shas cher kun tu spyod pa'i sgo nas chu bo bzhin du 'phrogs pa'i phyir yongs su gdung bar 'gyur ba dag yin no/ /mdud pa de dang de dag gi sgor gyur pa sred pa rnams dang / yongs su gdung ba de dang de dag gi sgor gyur pa chu bo rnams spangs pa'i phyir/bcom ldan 'das de mdud pa rnams shin tu bcad pa/ yongs su gdung ba dag las rnam par grol ba/ sred pa las yongs su grol ba/ chu bo las brgal ba zhes bya'o/ /ye shes yongs su rdzogs pa/ 'das pa dang ma byon pa dang da ltar byung ba'i sangs rgyas bcom ldan 'das rnams kyi ye shes la gnas pa/mya ngan 'das pa la mi gnas pa/ yang dag pa nyid kyi mtha' la gnas pa zhes bya ba'i tshig 'di bzhis ni/ bcom ldan 'das de ye shes phun sum tshogs pa ji lta bu zhig yin na/ sems can gyi don mdzad pa de ston te/ ye shes de ni rnam pa gsum ste/rnam pa thams cad mkhyen pa dang / tha dad med par mkhyen pa dang /mi gnas pa'i mkhyen pa'o/ /de la rnam pa thams cad mkhyen pa ni ye shes kyis shes bya'i tshogs thams cad dang / rnam pa thams cad la khyab pa'i phyir ye shes yongs su rdzogs pa zhes bya ba yin no/ /tha dad pa med par mkhyen pa ni/ dus gsum du gtogs pa'i sangs rgyas kyi sku tshe dang / sku'i ngo bo dang / zhing la sogs pa'i khyad par gyis tha dad pa rnams kyang / chos kyi skus mnyam pa nyid brnyes pa'i phyir/ 'das pa dang / ma byon pa dang / da ltar byung ba'i sangs rgyas bcom ldan 'das rnams kyi ye shes la gnas pa zhes bya ba yin no/ /mi gnas pa'i mkhyen pa ni/'khor ba dang mya ngan las 'das pa dag la mi gnas pa'i phyir/ mya ngan las 'das pa la mi gnas pa yin te/ yang dag pa'i mtha' la gnas pa gang yin pa de nyid/ 'di'i nyan thos la sogs pa'i mya ngan las 'das pa la mi gnas pa yin no/ /yang dag pa'i mtha' ni de bzhin nyid rnam par dag pa ste/de nyid chos kyi sku yin no/ /de la gnas pa ni yang dag pa'i mtha' la gnas pa zhes bya'o/ /sems can thams cad la gzigs pa'i sa la bzhugs pa'o zhes bya ba ni 'dir bsdus pa'i don ni 'di yin te/ sems can thams cad la gzigs pa'i sa ni/ de bzhin gshegs pa'i sku gsum yin te/ 'di lta ste de bzhin gshegs pa des de kho na la gnas te/ sems can thams cad kyi rgyud la gzigs nas/ bsam pa ji lta ba bzhin du theg pa gsum gyi sgo nas chos ston par mdzad pas sku gsum po de kho na la bzhugs zhes bya ba'i tha tshig go/ /'di ltar lung las/bcom ldan 'das de longs spyod rdzogs pa'i skus sa bcu la gnas pa 'phags pa spyan ras gzigs dbang phyug dang / de las gzhan pa'i bdag nyid chen po rnams la/ theg pa chen po'i chos ston cing / 'og min gyi gnas na bzhugs so zhes 'byung ste/ de ltar re zhig longs spyod rdzogs pa'i skus sems can gyi don mdzad par sbyor bar bshad pa yin no//sprul pa'i sku la yang sems can gyi don mdzad par sbyor bar yod pa nyid de/ 'di ltar gzhung lugs las/ bcom ldan 'das de sprul pa'i sku'i 'dod pa na spyod pa 'phags pa shA ri'i bu la sogs pa dang / de las gzhan pa skal ba dang ldan pa rnams kyi sems can gyi rgyud la gzigs nas cho 'phrul gsum bstan pas bsam pa ji lta ba dang /skal ba ji lta ba bzhin du nyan thos kyi theg pa'i chos nyid ston cing 'khor ba ji srid par bzhugs so zhes 'byung ste/ de ltar sprul pa'i sku de yang de dang ldan par bstan pa yin no//chos kyi sku de ni gnyi ga'i gzhir gyur pa'i phyir de dag gi rgyur 'gyur bas de nyid gtso bo'i rgyu yin no/ /de med na de gnyi ga yang med pas sems can gyi don mdzad pa yang med par 'gyur te/ de lta bas na sems can thams cad la gzigs pa'i sa ni de bzhin gshegs pa'i sku gsum yin no zhes bya bar gnas so//'di dag ni de bzhin gshegs pa'i yang dag pa'i yon tan yin no/ /'dir bsdus pa'i tshigs su bcad pa ni/ rgyun mi 'chad gzugs sems can dang / /de yi bya ba rigs pa dang / /khams dang dngos la ma chags dang / /spangs dang ye shes phun sum tshogs//gzhan gyi don du spyad pa 'di/ /gnyis dang drug dang gsum dang bzhi/ /drug dang gsum gnyis bzhi tshan gnyis/ /tshig 'di dag gis rab tu bstan/ /rnam pa drug gis sku bstan pa/ /rtsa ba'i rab dbye rgyu dang rang / /gnas skabs mdzad pa phun tshogs pa'i/ /tshig rnams kyis ni 'dir bshad do//ston pa phun tshogs de rgyu dang / /de bzhin byon pa kho na dang / /de yi phrin las de gnas te/ /dran pa nyung ngu'i bsdus pa yin/ /zhes bya ba yin no/ /'phags pa sangs rgyas rjes su dran pa'i rgya cher 'grel pa/ slob dpon dbyig gnyen gyis mdzad pa rdzogs so/