CLOSE WINDOW

D3986
བོད་ཡིག

/ //[ @##/ /rgya gar skad du/ Ar+ya shA li sta mA ka ma hA yA na sU tra TI kA / bod skad du/ 'phags pa sA lu ljang pa zhes bya ba theg pa chen po'i mdo'i rgya cher bshad pa/ 'phags pa 'jam dpal gzhon nur gyur pa la phyag 'tshal lo//de la/ yon tan mtha' yas bsam mi khyab/ /ces bya ba la sogs pa la yon tan mtha' yas zhes bya ba ni/ yon tan ni stobs dang / mi 'jigs pa dang / ma 'dres pa la sogs te/ yon tan don du gnyer ba'i lha dang mi rnams kyis 'dris par bya ba dang /bsten par bya ba dang / goms par bya ba dang / bsgom par bya ba dang / mngon du bya ba dang / thob par bya ba'i phyir yon tan rnams so/ /de rnams ni yon tan mang po yin/ mtha' ya pa dang / bsam gyis mi khyab pa yin pas zhes tshig bsdu ste/ yon tan bsam gyis mi khyab pa nyid ni nyan thos dang /rang sangs rgyas dang / so so'i skye bo thams cad dang / rtog ge pa thams cad kyi tshogs dang sems kyi yul las yang dag par 'das pa'i phyir ro/ /de'i phyir yon tan mtha' yas shing bsam gyis mi khyab pa de rnams dang ldan pa'o/ /gang zhig ce na/ smras pa/rdzogs pa'i sangs rgyas thugs rje'i bdag /ces bya ba smos te/ yang dag par phyin ci ma log par sangs rgyas pas rdzogs pa'i sangs rgyas te/ chos thams cad mi rtag pa dang / sdug bsngal ba dang stong pa dang / bdag med pa la sogs par chos dang gang zag la bdag med pa'i ngo bo nyid ji lta ba bzhin du thugs su chud pa'i phyir sangs rgyas so//yang na pad+ma kha phye ba bzhin du blo rgyas pas sangs rgyas sam / sangs rgyas pa'i phyir na sangs rgyas te/ 'gro ba mi shes pa'i gnyid kyis rab tu log pa'i nang na/ skyes bu gnyid sangs pa bzhin du ji lta ba phyin ci ma log par yang dag pa'i ye shes shar ba brnyes pa'i phyir sangs rgyas zhes bya'o//yang na skye bo mi mkhas pa rtogs par mdzad pa'i phyir sangs rgyas te/ ji ltar bdag nyid gzhan la rag ma las par so so rang gis rig pa'i chos kyi de kho na rtogs pa de bzhin du log pa'i lam du 'khyams pa'i sems dang ldan pa/'khor ba 'brog dgon par skye ba dang / rga ba dang / na ba dang / 'chi ba la sogs par gces pa/ lta ba rnam pa sna tshogs kyi nags tshang tshing du nyon mongs pa'i sbrul gdug pa'i 'jigs pas gang bar phan tshun yongs su 'khyams pa gzhan dag kyang yang dag pa'i lam du btsud de/thar pa'i grong khyer chen po bla na med par 'jug par mdzad pa'i phyir sangs rgyas zhes bya'o/ /thugs rje'i bdag ces bya ba ni thugs rje'i rang bzhin te/ nyon mongs pa dang / las dang / sdug bsngal sel ba'i phyir thugs rje'o/ /gang la thugs rje'i bdag nyid de/ /ngo bo nyid yod pa de ni thugs rje'i bdag nyid do//de ni rdzogs pa'i sangs rgyas yin la/ thugs rje'i bdag nyid kyang yin pas rdzogs pa'i sangs rgyas thugs rje'i bdag nyid de / de bas na sangs rgyas thugs rje'i bdag nyid de la'o/ /rab btud sA lu ljang pa yi/ /zhes bya ba smos te/ rab btud ces bya ba ni yang dag par mchod nas te/'dud pa dang / gus pa dang / gzhol bas phyag 'tshal te'o/ /phyag 'tshal te ci zhig bya zhe na/ sA lu ljang pa'i zhes mdo'i bshad sbyar bstan bcos/ tshig le'ur byas pa bshad par bya/ /zhes bya ba smos so/ /de la/ yon tan mtha' yas bsam mi khyab//ces bya ba 'dis ni rang gi don phun sum tshogs pa bstan to/ /thugs rje'i bdag nyid ces bya ba 'dis ni/ gzhan gyi don phun sum tshogs pa brjod do/ /rdzogs sangs rgyas zhes bya ba ni sangs rgyas ni rtogs pa'i don yin pa'i phyir thams cad mkhyen pa nyid do/ /yon tan mtha' yas bsam mi khyab//ces bya ba 'dis ni 'dod chags la sogs pa dang bral ba nyid do/ /nyon mongs pa dang / nye ba'i nyon mongs pa yon tan ma yin pa rnams ni/ yon tan dang mi mthun pa'i phyir ro/ /de bas na thams cad mkhyen pa/ 'dod chags dang bral ba/ rdzogs pa'i sangs rgyas de ltar bu la btud de'o//thugs rje'i bdag nyid ces bya ba ni/ gang zhig thams cad mkhyen cing 'dod chags dang bral ba de ni slob dpon gyis dpe mkhyud dang bral bas gzhan dag la ji ltar rtogs pa'i chos ston te/ 'dis ni gzhan la phan par mdzad pa'i phyir gzhan gyi don phun sum tshogs pa bstan to//de ltar rang gi don dang gzhan gyi don phun sum tshogs pa dang ldan pa rdzogs pa'i sangs rgyas de la btud de'o/ /de ltar na yang 'dod pa dang bcas pa'i tshig yin pa'i phyir 'dod pa dang bcas pas ci zhig 'dod ces dris pa dang / smras pa/ bshad par bya'o/ /gang zhig bshad/smras pa/ sA lu ljang pa'i mdo dang sbyar ba'i bstan bcos tshig le'ur byas pa'o/ /bstan bcos brtsams pa la thog mar/ 'brel pa dang / dgos pa dang / brjod pa dang / brjod par bya ba bzhi nges par brjod par bya ba ma yin nam/ de 'di la med pas 'di'i rtsom pa ni mi rigs pa yin te/'brel pa la sogs pa dang bral ba'i phyir smyon pa'i tshig bzhin no zhe'o/ /brtsam par mi bya'o zhes bya ba ni chos so/ /bstan bcos zhes bya ba chos can no/ /chos dang chos can spyi ni phyogs so/ /brel ba la sogs pa dang bral ba'i phyir zhes bya ba ni gtan tshigs so/ /go bar byed pas na gtan tshigs te/gtan tshigs kyi don ni go bar byed pa yin pa'i phyir ro/ /gang gi phyir 'brel pa la sogs pa dang bral ba'i phyir brtsam par mi bya'o/ /smyon pa'i tshig bzhin no zhes bya ba'i ni dpe'o/ /de skad du brgal ba la smras pa/ 'brel pa la sogs pa dang bral ba'i phyir zhes gang smras pa'i gtan tshigs de ma grub par brjod pa'i phyir bshad pa 'di la 'brel pa la sogs pa bzhi yod pa nyid do//de yang gang zhe na/ smras pa/ sA lu ljang pa'i mdo dang sbyar ba'i bstan bcos tshig le'ur byas pa bshad par bya ba yin pas 'di la 'brel pa yod pa nyid de/sA lu ljang pa'i mdo zhes bya ba ni mu stegs byed pa la sogs pa gzhan gyi gzhung lugs kyi khyad par dag la mi dmigs pa'i phyir bstan bcos 'di ni sangs rgyas dang 'brel pa'o/ /de'i phyir gtan tshigs kyi don ma grub pa nyid do/ /'brel pa yod pa dang dgos pa yang med na med pa yin no//de'i phyir bshad pa/ 'dir ni dgos pa ni/ rgyu dang rkyen gyi don khong du chud pa'i phyir dang / gang zag la bdag med pa dang / chos la bdag med pa dang / gzung ba dang / 'dzin pa med par rtogs pa'i phyir nyon mongs pa dang / shes bya'i sgrib pa dang bral nas bla na med pa yang dag par rdzogs pa'i sangs rgyas thob pas 'di la dgos pa yod pa nyid do//de bas na dgos pa dang bcas pa'i phyir gso ba la sogs pa'i bstan bcos bzhin du brtsam par bya ba nyid do/ /gang dang gang don dang bcas pa de dang de ni brtsam par bya ba ste/ dper na gso ba la sogs pa'i bstan bcos lta bu yin pas dpe ma grub par bshad par 'gyur ro//'di'i brjod pas sA lu ljang pa'i dpes nang dang phyi'i rten cing 'brel par 'byung ba mtshungs pa nye bar sbyar bas 'di brjod pas sA lu ljang pa zhes bya ba yang yod pa nyid de/ de'i phyir yang don ma grub pa nyid do/ / brjod par bya ba zhes bya ba ni/ rten cing 'brel par 'byung ba'i yan lag bcu gnyis rkyen dang bcas pa so sor go rims bzhin mtshan nyid rnam par 'jog par byed pas byed pa po la sogs pa dang / rgyu med pa dang mi mthun pa'i rgyu dang 'bral nas nyon mongs pa dang nye ba'i nyon mongs pa spangs pa'i phyir yang dag pa'i ye shes skyes te/bla na med pa'i chos sku thob pas 'di brjod par bya ba yang yod pa nyid de 'di'i phyir yang gtan tshigs kyi don ma grub pa nyid do/ /de bas na gso ba la sogs pa'i bstan bcos bzhin du bstan bcos 'di 'brel pa la sogs pa dang ldan pa'i phyir brtsam par bya ba nyid do/ /brtsam par bya ba zhes bya ba ni chos so//bstan bcos zhes bya ba ni chos can no/ /chos dang chos can spyi ni phyogs so/ /'di na chos yod pas chos can te gdugs can bzhin no/ /gal te de lta na bstan bcos rtsom pa la phyag 'tshal bar byed pa don med de/ dgos pa med pa'i phyir bya rog gi so brtag pa la sogs pa'i bstan bcos bzhin no zhes bya ba'i gtan tshigs 'di ni don ma grub pa nyid bstan par smras pa/bstan bcos rtsom pa la ston pa la mchod pa byas so/ /gal te ci'i phyir zhe na/ bstan bcos dang / de la gus pa skye ba'i rgyu yin pa'i phyir te/ chos nyan pa gus pa skye ba rnams nyan pa dang sems pa dang /bsgom pa dag la gus par 'gyur gyi/ gus pa ma skyes pa rnams ni ma yin pas gtan tshigs kyi don ma grub pa nyid do/ /yang na dam pa'i spyod pa'i srol bstan pa'i don du bstan bcos rtsom pa las ston pa la mchod pa byed do/ /'di ni skyes bu dam pa mkhas pa rnams kyi spyod pa yin te/nam zhig 'ga' zhig dgos pa rtsom pa la 'jug na dang por yid du 'ong ba'i lha la phyag 'tshal te/ dgos pa khyad par dag la zhugs pa na 'dod pa'i don ring por mi thogs par 'grub pas de'i phyir bstan bcos byed pa 'di yang dam pa'i spyod pa'i srol de nyid kyi rjes su 'brang ba na bstan bcos rtsom pa la rang gi ston pa la yon tan brjod pa sngon du 'gro ba'i phyag 'tshal ba byas nas/bstan bcos bshad par bya ba la zhugs pas 'di la dgos pa yod pa nyid do/ /smras pa/ bstan bcos rtsom pa ston pa la/ /phyag 'tshal byed pa 'bras med min/ / ston pa dang ni bstan bcos la/ /gus bskyed rgyu phyir gzhan du min/ /de nas bstan bcos rtsom pas ston pa la mchod pa bya ba rnam par gnas pa nyid do/ /de'i phyir gzhan gyi bstan bcos kyi thog mar phyag 'tshal bar byed par dgos pa med do zhes gang smras/ gtan tshigs de ma grub pa nyid du bstan par smras pa/bstan bcos rtsom pa la phyag 'tshal bar byed pa ni/ gso ba la sogs pa'i bstan bcos bzhin du dgos pa dang bcas pa nyid do/ /bya rog gi so brtag pa lta bu min no/ /rang gi ston pa la phyag byas te/ sA lu ljang pa'i mdo dang sbyar ba'i bstan bcos tshig le'ur byas pa bshad par bya'o zhes smras na/de yang gang zhig ce na/ thub pa rgyal po'i khab kyi ni/ /zhes bya ba la sogs pa smos so/ /rgyal po'i khab ni rgyal khab ste/ rgyal po'i pho brang zhes bya ba'i tha tshig go/ /bya rgod ces pa'i ri bo la/ /zhes bya ba ni bya rgod phung po'i ri bo la'o//de nyid kyi phyir yang dag par sdud par byed pa'i mdo las/ 'di skad bdag gis thos pa zhes bya ba smos so/ / su las thos shes na/ de'i phyir smras pa/ bcom ldan 'das las so/ /dus gcig na zhes bya ba ni dus gcig na'o/ /bcom ldan 'das zhes bya ba ni bcom pa dang ldan pa'i phyir bcom ldan 'das so//ci zhig bcom pa dang ldan zhe na/ de'i phyir smras pa/ bdud bzhi'o/ /nyon mongs pa dang / phung po dang / lha'i bu dang / 'chi bdag gi bdud ces grags pa'o/ /ji ltar bcom zhe na/ smras pa/ gnyen po ye shes brnyes pa'i phyir te/ mthong ba dang bsgom pa'i lam la 'jug pa'i tshul gyis dran pa nye bar gzhag pa bzhi la sogs pa byang chub kyi phyogs kyi chos sum cu rtsa bdun bsgom pa'i rim gyis /'phags pa'i bden pa bzhi sgom pa rnam par bsgom pa nyid kyis phung po'i de kho na nyid yongs su shes pas mi rtag pa dang / sdug bsngal ba dang /stong pa dang / bdag med pa la sogs par phyin ci ma log pa'i ye shes dang ldan pa'i phyir gang zag dang chos la bdag med pa dang / gzung ba dang 'dzin pa med par rtog pa'i phyir dang / khams gsum pa 'di yang sems tsam kho na'o zhes bya bar rtogs pa'i phyir/ nyon mongs pa dang shes bya'i sgrib pa dang bral ba'i sgo nas nyon mongs pa bcom mo//rtag pa dang / bde ba dang / gtsang ba dang / bdag dang bcas par phyin ci log pa bzhi la sogs pa dang bral ba ste/ chos kyi sku bla na med pa dang ldan nas mi gnas pa'i mya ngan las 'das pa brnyes pa'i phyir phung po dang 'chi bdag gi bdud las rgyal lo//chos thams cad sgyu ma dang / smig rgyu dang / dri za'i grong khyer dang / sprul pa dang / gzugs brnyan dang / brag ca dang / mgal me'i 'khor lo dang / rmi lam lta bur shin tu thugs su chud pa'i phyir kun nas nyon mongs pa'i kun gzhi rnam par shes pa'i bag chags kyi dri ma dang bral bas yang dag pa ma yin pa'i kun tu rtog pa yang dag par chad nas byams pa chen po la sogs pa'i mda' 'phangs pas chu srin gyi rgyal mtshan can sde dang bcas pa la bsnun pa'i phyir lha'i bu'i bdud pham par mdzad de/de ltar bdud bzhi bcom pas na bcom ldan 'das so//yang smras pa/ bdud bzhi'i dgra ni bcom phyir dang / /srid pa gsum las byung ba dang / /byung 'gyur 'byung ba 'byung mkhyen cing / /srid par gnas 'di bcom ldan 'das/ /bcom ldan 'das de lta bu ni rgyal po'i khab/ bya rgod phung po'i ri la bzhugs so/ /ci'i phyir grong khyer de la rgyal po'i khab ces bya zhe na/smras pa/ grong khyer de ni sngon rtswa mchog gi grong khyer zhes grags te/ gang gi tshe grong khyer de la mi ma yin pa 'khrugs pa rnams kyis yang dang yang me btang ba de'i tshe rgyal pos rtogs nas bka' btags pa/ shes ldan grong khyer ba dag /deng phyin chad gang gi khyim du sngar me shor ba des bsil ba'i tshal gyi dur khrod chen por song la khyim brtsigs te 'dug shig ces bsgo ba dang /de nas yang las kyi rkyen gyi dbang gis dang por rgyal po'i pho brang du me shor ro/ /de nas rgyal pos blon po rnams la bos te bsgo ba/ shes ldan blon po dag shes par gyis shig /'di ltar nga nyid kyis de khrims su bcas pa las nga nyid 'da' bar byed pa gang yin pa de ni nga la ma legs shing tshul ma yin pas shes ldan blon po dag deng la bsil ba'i tshal gyi dur khrod chen po'i nang du rgyal po'i pho brang brtsigs shig dang der song nas 'dug par bya'o/ /de nas rgyal po'i tshig tsam gyis thams cad kyis de bzhin du byas so//de la thog mar ni rgyal pos der phyin te gnas btab/ de nas ni gzhan dag gis btab pas rgyal po'i khab ces ming chags so/ /de la rgyal po'i khab grong khyer chen po'i shar lho'i mtshams na/ bya rgod phung po zhes bya ba'i ri yod de/ri gang gi spyi bo bya rgod kyi mgo 'dra ba de la bya rgod phung po'i ri zhes bya'o/ /yang na bdud sdig can gyis bya rgod kyi sha tshugs su mngon par sprul te bcom ldan 'das kyi chos gos dbrog par bya bar brtsams pa las bcom ldan 'das kyis ma nus nas de nyid du bor te chos gos de deng sang du yang rdor gyur nas bzhi rim byas te chos gos lta bur 'dug go//de nye bar mtshon pa'i ri ni bya rgod phung po zhes bya ste/ thub pa bya rgod phung po'i ri de la bzhugs so/ /cig cig pu nyid dam zhe na/ smas pa/ ma yin te/ dge slong mang dang byang chub sems//tshogs dang yang dag thabs cig bzhugs/ /dge slong mang dang zhes bya ba ni dge slong stong nyis brgya lnga bcu'i dge slong gi dge 'dun chen po dang ngo / /byang chub sems tshogs dang yang zhes bya ba ni byang chub sems dpa' sems dpa' chen po rab tu mang po dang thabs cig tu'o/ /bzhugs zhes bya ba ni bzhengs pa dang /'chags pa dang / bzhugs pa dang / gzims pa la sogs pa spyod lam rnam pa bzhis bzhugs pa'o/ /de su zhig ce na thub pa'o/ /thub pa ni/ sku dang / gsung dang / thugs thub pa dang ldan pa'i phyur te/ sku dang gsung dang thugs mi 'jug pas thub pa'o/ ci la mi 'jug ce na/ de'i phyir smras pa/ sku dang / gsung dang / thugs nyes par spyod pa la mi 'jug ces bya ba'i don ston to/ /'di la thub pa yod pas thub pa ste/ ldan pa'i don yin pa'i phyir dbyug pa can bzhin no/ /yang ci'i phyir gnas dang / dus dang / zhabs 'bring pa bstan zhe na/smras pa/ 'khor los sgyur pa'i rgyal po dang / chos mthun par bya ba'i phyir te/ 'khor los sgyur ba'i rgyal po rnams kyi kun tu spyod ni 'di yin par grags te/ gang gi che bram ze dang / khyim bdag rnams rjes su 'dzin pa pa la sogs par byed pa de'i tshe 'jug pa'i gnas grong dang grong khyer la sogs pa dang gang du 'dug nas byed pa'i gnas de nges par rjod par byed do /gnas gang du zhe na / che ge mo zhig na'o/ /dbang nyid rab tu bstan pa'i phyir blon po la sogs pa dang lhan cig go/ /dus zhes bya ba ni snga dro dang phyi dro'i dus so/ /gang dag la zhe na/ bram ze dang khyim bdag la sogs pa la'o//de'i phyir bcom ldan 'das kyang bla na med pa'i chos kyi rgyal po 'khor los sgyur ba'i phyir gnas dang / dus dang zhabs 'bring ba la sogs pa brjod de/ gang du zhe na/ rgyal po'i khab na'o/ /dus gcig na ni snga dro'i dus so / /gang dag dang thabs cig ce na/dge slong stong nyis brgya lnga bcu'i dge slong dang / byang chub sems dpa' rnams dang ngo / /gang dag la zhe na/ dge slong rnams la'o/ /ci zhig gsungs she na/ sA lu ljang pa zhes bya ba'i mdo'o/ /yang smras pa/ gang du gang dag thabs cig dang / /dus gang gang phyir gang la bstan//de dag nyid ni bstan byas nas/ /tha mar kun dga' ba yi sgra/ /sA lu ljang pa la gzigs nas/ /zhes bya ba la sogs pa la/ sA lu ljang pa la gzigs nas ni gzigs te'o/ /rgyu dang rkyen las byung ba ste/ /zhes bya ba ni rgyu rkyen las skyes kyi 'di skyed par byed pa dbang phyug la sogs pa gzhan ni 'ga' yang med do zhes bya bar dgongs pa'o//yang smras pa/ sa bon la sogs ma gtogs par/ /gzhan gyi rgyu zhes mi bya ste/ /dbang phyug sogs dang rgyu med pa/ /mngon sum la sogs 'gal phyir ro/ /sa bon las myu gu la sogs pa skyes kyi/dbang phyug dang / gtso bo dang / rgyu dus la sogs pa ni rgyu ma yin te/ mngon sum dang rjes su dpag pa dag gis mi dmigs pa nyid kyi phyir nam mkha'i ut+pa la bzhin no/ /rgyu dang rkyen skyes de bzhin du/ /yan lag bcu gnyis rim 'byung ba/ /gang gi rten 'brel zhes mthong ba//zhes smos te/ rgyu dang rkyen dag gis bskyed pa'i chos rten cing 'brel bar 'byung ba yan lag bcu gnyis dge slong ngam/ dge slong ma'am/ gzhan yang gang la las byed pa la sogs pa rgyu med pa dang / mi mthun pa'i rgyu dang bral bar mthong ba des/ chos dang sangs rgyas mthong ngo zhes//dge slong rnams la 'di gsungs nas/ /'dren pa cang mi gsung bar bzhugs/ /'phags pa'i chos yan lag brgyad pa dang / 'bras bu'i chos rtogs pa'i ngo bo nyid dang / mya ngan las 'das pa phung po dang bcas pa dang / phung po'i lhag ma med par brjod pa yang ji lta ba bzhin du mthong ngo zhes bka' stsal pa nas/bcom ldan 'das cang mi gsung bar bzhugs so/ /de'i tshe zhes bya ba la sogs pa ni dge slong shA ri'i bu byang chub sems dpa' byams pa'i drung du phyin nas 'di yongs su dris so/ /'di gsungs nas zhes bya ba ni bcom ldan 'das la shA ri'i bus mdo gang thos pa dge slong rnams la gsungs nas te/bka' stsal nas so/ /'dren pa zhes bya ba ni thabs rnam pa sna tshogs kyi tshul gyis sems can rnams 'dren pa'i phyir 'dren pa'o/ /cang mi gsung bar bzhugs zhes bya ba ni ting nge 'dzin la snyoms par zhugs nas bzhugs zhes bya ba'i tha tshig go//dge slong shA ri'i bus thos nas/ /zhes smos te/ dge slong zhes bya ba ni nyon mongs pa bcom pa'i phyir dge slong ngo / /shA ri'i bus thos nas zhes bya ba ni bcom ldan 'das las thos nas so/ /de nyid kyi phyir mdo las/ de'i tshe tshe dang ldan pa shA ri'i bu byang chub sems dpa' sems dpa' chen po byams pa ga la ba zhes bya ba la sogs pas bstan to//byams pa'i drung du song nas ni/ /zhes bya ba ni gang la byang chub sems dpa' byams pa nyid par rtag tu gnas pa ste/ der phyin cing song nas so/ /gnyis ka yang rdo leb la 'khod de/ / de nas tshe dang ldan pa shA ri'i bus byang chub sems dpa' byams pa la 'di skad ces smras so/ /byams pa deng 'dir de bzhin gshegs/ /'di gsungs don rnams ma phye bar/ /cang mi gsung bar bzhugs gyur nas / /de'i don ji ltar rtogs par bya/ /zhes bya ba smos so/ /byams pa deng 'dir zhes bya ba brjod nas dge slong rnams la bcom ldan 'das kyis sA lu ljang pa'i dpes bstan pas gang gsungs pa byams pa bde bar gshegs pas bka' stsal pa'i mdo de'i don ci/bcom ldan 'das kyis kyang don rnam par ma phye la/ thams cad mkhyen pa'i yul gyi don rnams kyang nyan thos dang rang sangs rgyas thams cad kyi yul las 'das pa'i phyir rten cing 'brel bar 'byung ba ni gang /chos ni gang / sangs rgyas ni gang zhes bya ba la sogs pa 'dri'o/ /'di nyid mdo byed pas/ mdo dang sbyar ba smras la/ rten cing 'brel dang chos gang yin/ /sangs rgyas kyang ni gang zhig yin//zhes smos te/ ji ltar yang rten cing 'brel par 'byung ba mthong na chos mthong ngo / /chos mthong nas sangs rgyas mthong ngo zhes bya ba ni/ ji ltar rten 'brel mthong na ni/ /chos dang sangs rgyas mthong ba yin/ /bdag gi the tshom 'di smros zhes/ /shA ri'i bu yis ma pham smras/ / gnas brtan shA ri'i bus the tshom de skyes pas de'i phyir ma pham pa la smras so/ /ma pham pa zhes bya ba ni byams pa'o/ /byams pa khyad par ji lta bu can zhig ce na/ byams pa shin tu bsgom pa'i bdag /byams pas gtan la dbab pa smras/ /byams pa'i ting nge 'dzin dang ldan pas shin tu gnas pa'i phyir byams pa shin tu bsgom pa'i bdag nyid do//gtan la dbab pa zhes bya ba ni nges pa'o/ /smras zhes bya ba ni brjod pa'o/ /gang la smras she na/ shA ri'i bu la'o/ /ci zhig smras she na/ 'di la bcom ldan 'das zhes bya ba la sogs pa smos so/ /dge slong dag sus rten cing 'brel par 'byung ba zhes bya ba la sogs pa la rten cing 'brel bar 'byung ba gang zhe na/'di lta ste ma rig pa'i rkyen gyis 'du byed/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug / skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi/ rga shi'i rkyen gyis mya ngan dang / smre sngags 'don pa dang / sdug bsngal ba dang /yid mi bde ba dang / 'khrug pa rnams 'byung ste/ de ltar sdug bsngal gyi phung po chen po 'di 'ba' zhig 'byung bar 'gyur ro zhes bya ba 'di ni bcom ldan 'das kyi rten cing 'brel pa'o zhes gsungs so/ /de la rten cing 'brel par 'byung ba zhes bya ba ni rgyu dang bcas/ rkyen dang bcas pa la bya'i/rgyu med pa dang / rkyen med pa la ma yin pas de'i phyir rten cing 'brel bar 'byung ba zhes bya'o/ /yang ma rig pa la sogs pa srid pa'i yan lag 'di rnams 'byung ba'i go rims ni ji ltar rtogs par bya/ mtshan nyid ni gang / las ni ci/ gang zhig ni yin zhe na/ smras pa/ de la rten cing 'brel bar 'byung ba ni gnyis kyi phyir 'byung bar rtogs par bya ste/ gnyis gang zhe na/ smras pa/ rgyu dang 'brel pa dang / rkyen dang 'brel ba'o/ /rten cing 'brel par 'byung ba de yang phyi nang gi tha dad pa'i phyir rnam pa gnyis su rnam par gzhag go/ /ji lta zhe na/ smras pa/sa bon las myu gu skye ba nas 'bras bu skye ba'i bar te/ sa bon yod na myu gu skye ba dang 'bras bu skye ba'i phyir ro/ /sa bon med na myu gu mi skye ba nas/ 'bras bu mi skye ba'i bar ro/ /sa bon kyang 'di snyam du bdag gis myu gu mngon par bsgrubs so snyam du mi sems so//myu gu yang 'di snyam du bdag ni sa bon gyis mngon par bsgrubs so snyam du mi sems pa nas/ me tog kyang 'di snyam du 'bras bu mngon par bsgrubs so snyam du mngon par mi sems so/ /'bras bu yang 'di snyam du bdag gi myu gu me tog gis mngon par bsgrubs so snyam du mi sems pa'i bar ro//'on kyang sa bon yod na myu gu nas 'bras bu'i bar du skye bar 'gyur te/ de ltar phyi'i rten cing 'brel par 'byung ba rkyen dang 'brel par blta bar bya'o/ / phyi rol gyi rten cing 'brel par 'byung ba rkyen dang 'brel par ji ltar blta zhe na/ smras pa/ khams drug 'dus pa'i phyir te/ khams drug po dag gang zhe na/ 'di lta ste sa la sogs pa dang / dus rnams te/ de ltar phyi rol gyi rten cing 'brel par 'byung ba rkyen dang 'brel par blta bar bya'o/ /sa bon sa la sogs pa la ci zhig phan par byed nas rgyu'i rkyen du 'dod ce na/ sa la sogs pa ni 'dzin pa la sogs pa dang / rlan pa dang / dro ba dang / 'bu ba dang / mi sgrib pa dang / 'gyur ba'i bya ba go rims bzhin du byed do/ /de dag med na mi 'gyur gyi / nam ma tshang ba med pa na/ thams cad 'dus pa de las der 'gyur ro/ /sa la sogs pa yang 'di snyam du bdag cag gis sa bon 'dzin pa la sogs pa bya'o snyam du mi sems so//sa bon yang 'di snyam du bdag la ni rkyen 'di rnams kyis 'dzin pa la sogs pa'i bya bas phan btags so snyam du mi sems so/ /'on kyang sa la sogs pa yod na sa bon la myu gu la sogs pa 'byung bar 'gyur la/ med na mi 'gyur / de nyid kyi phyir mdo mdzad pas gsungs pa/yan lag bcu gnyis ma rig sogs/ /'chi ba la thug go rims bzhin/ /zhes bya ba la/ srid pa'i yan lag gang dag la ma rig pa la sogs pa 'chi la thug pa yod pa de dag ni ma rig pa la sogs pa 'chi ba la thug pa rnams so/ /de lta bas na sdug bsngal gyi phung po 'ba' zhig 'byung bar 'gyur zhes bya ba de lta bas na zhes bya ba ni ma rig pa la sogs pa rim gyis 'byung ba'o//sdug bsngal gyi phung po zhes bya ba ni sdug bsngal gyi tshogs so/ /'ba' zhig ces bya ba ni bdag dang bdag gi dang bral ba'o/ /'byung bar 'gyur zhes bya ba ni skye bar 'gyur ba'o//chos lam yan lag brgyad pa dang / /'bras bu mya ngan 'das pa'o/ /zhes smras te/ chos ni rang gi mtshan nyid 'dzin pa'i phyir chos so/ /lam yan lag brgyad pa zhes bya ba ni log pa'i lta ba dang / log pa'i rtog pa dang / /log pa'i ngag dang / log pa'i las kyi mtha' dang / log pa'i 'tsho ba dang / log pa'i rtsol ba dang / log pa'i dran pa dang / log pa'i ting nge 'dzin to/ /de la log pa'i lta ba zhes bya ba ni log pa'i lta ba ste/ lta ba lnga'o/ /'jig tshogs dang / mtha' dang / lta ba dang / tshul khrims dang log pa zhes bya ba'o//'di thams cad kyang log par thos pa dang bsam pa la sogs pa zhugs pa ste/ de bas na lta ba ngan pa'i phyir log pa'i lam spyad pas mi 'dod pa'i rnam par smin pa mngon par bsgrub pa'i phyir dang / rgyu dang / las dang / 'bras bu la skur pa 'debs pa dang / sgro 'dogs pa'i rnam par bzhugs pa'i phyir log par lta ba dag ces bya ba'o//de dang mi mthun pa'i phyir yang dag pa'i lta ba lam gyi yan lag nyid du rnam par gzhag go/ /tshul bzhin la gnas pa'i yang dag pa'i thos pa dang / bsam pa la sogs pa'i dad pa sngon du 'gro bas rgyu dang / 'bras bu dang /bden pa dang / dkon mchog dang / las dang / 'bras bu la sogs pa yod par lta ba ni yang dag pa'i lta ba ste/ yang dag pa'i lam la nye bar sbyor ba las 'dod pa'i 'bras bu mngon par bsgrub pa'i phyir dang / mi rtag pa dang / sdug bsngal ba dang / stong pa dang / bdag med pa la sogs pa'i rnam par 'jug pa'i phyir yang dag pa'i lta ba zhes bya'o/ /de la log pa'i rtog pa zhes bya ba ni rtog pa log pa'o/ /rtog pa zhes bya ba ni spyod yul dang / yul dang / dmigs pa zhes bya ba ni tha tshig go/ /spyod yul zhes bya ba ni yul drug po gzugs dang sgra la sogs pa'o//log pa zhes bya ba ni phyin ci log ste/ rtag pa dang / bde ba dang / gtsang ba dang / bdag gi rnam pa la sogs par dmigs pas 'dod chags dang / zhe sdang dang / gti mug rgyas par 'gyur ba'i phyir log par rtog pa'o/ /de las bzlog pa ni yang dag pa'i rtog pa'o//yang dag pa zhes bya ba ni phyin ci ma log pa'o/ /rtog pa zhes bya ba ni bya ba dang / sems pa ste/ 'di dang 'di bya'o zhes thog mar sems la bzhag nas lus dang / ngag dang / yid kyi spyod pa dge ba ma chags pa dang / sdang zhe sdang med pa dang / gti mug med pa'i ngo bo mi rtag pa dang / sdug bsngal ba dang / stong pa dang / bdag med pa la sogs par tshul bzhin yid la byed pa'i sbyor ba gang yin pa ni yang dag pa'i lam gyi yan lag ces bya'o/ /log pa'i ngag ces bya ba ni ngag ngan pa ste/ bdag dang gzhan bslu ba'i rnam par zhugs pa'i ngag gang yin pa de ni log pa'i ngag go//'dod chags dang / zhe sdang dang / gti mug dang / nga rgyal la sogs pa dang 'brel ba'i phyir bdag la bstod pa dang / gzhan la smod pa'i ngo bor zhugs pa dang / ngag gi nyes pa rnam pa bzhi dang 'dres pa dang / yang dag pa dang / bden pa dang / de kho na nyid dang / chos thams cad spong bar byed pa dang / rgyal po dang / chom rkun dang / bud med dang / khyim pa dang / skye bo'i gtam gyi ngo bo dang / gsog dang don med pa mang po ni 'phags pa'i skye bo thams cad kyis smad pa'i phyir log pa'i ngag ces bya'o//de dag mi mthun pa'i phyir bdag dang gzhan la mi slu ba'i rnam pa can ma chags pa dang / zhe sdang med pa dang / gti mug med pa la sogs pa'i ngo bo ngag gi nyes pa rnam pa bzhi dang bral ba'i phyir bden pa dang yang dag pa dang de kho na nyid kyi rjes su 'brang ba bden pa bzhi'i rjes su mthun par byed pa dge ba'i chos thams cad sdud pa/phan pa dang yongs su bcad pa'i ngo bo nyid kyi phyir bdag la bstod pa dang / gzhan la smod pa spang ba / mi rtag pa dang / sdug bsngal ba dang / stong pa dang / bdag med pa la sogs pa'i rnam par zhugs pa'i phyir 'phags pa'i skye bo thams cad mi slu bar byed pa ni yang dag pa'i lam gyi rjes su 'jug pa'i phyir yang dag pa'i ngag ces bya'o//log pa'i las kyi mtha' zhes bya ba ni phyin ci log gi las byed pa'o/ /las zhes bya ba ni lus dang / ngag dang yid kyi nyes par spyod pa'i sa bon 'debs pa'i phyir dang /rnam par smin pa mi bzad pa'i 'bras bu mngon par sgrub pa'i rang bzhin mi dge ba'i las kyi mtha' byed pa'i phyir tsha sgo la sogs pa'i skyon dang 'dres pa'i zhing ngan pa la sa bon ngan pa btab pa bzhin/ mi 'dod pa'i rnam par smin pa mngon par bsgrub pa'i phyir smad par bya ba'i las kyi mtha' ni log pa'i las kyi mtha' zhes bya'o//las la dga' ba dang / gnyid la dga' ba dang / smra ba la dga' ba la sogs pa'i rang bzhin ni log pa'i las zhes bya ste/ bdag dang gzhan la reg pa lam yin pa sdug bsngal bar gnas pa'i rten gyi ngo bo'o/ /de dang mi mthun pa'i phyir yang dag pa'i las kyi mtha'o//phyin ci ma log pa'i las byed pa'i phyir lus dan/ ngag dang / yid kyis legs par spyad pa'i sa bon 'debs pa'i phyir dang / zhing gshin pa dang 'dra ba'i legs par byas pa'i las kyi zhing 'dod pa'i rnam par smin pa mngon par sgrub pa'i rnam par zhugs pa'i phyir dang /mi rtag pa dang / sdug bsngal ba dang / stong pa dang / bdag med pa la sogs pa'i ngo bor zhugs pa'i phyir dang / yang dag pa'i las kyi mtha' byed pa'i phyir yang dag pa'i las kyi mtha' ste/ yang dag pa'i lam gyi rjes su 'brang ba'i phyir yang dag pa'i lam zhes bya'o//log pa'i 'tsho ba zhes bya ba ni/ phyin ci log gi 'tsho ba ste/ ngan g.yo dang / kha gsag dang / thob pas 'jal ba dang / gzhogs slong gis 'jug cing mi phongs pa'i lus dang / ngag gi la sogs pa'i nye bar 'tsho bas skyes pa dang bud med la sogs pa'i mtshan ston pa dang /'phong dang / rta dang / snyan ngag dang / gso ba'i dpyad dang / grangs dang / khyim pa'i dpyad dang / gzhon nu'i dpyad dang / rgya mtsho mtshan gyi dpyad dang / ltas shes pa la sogs pa ste/ bdag dang gzhan slu ba'i ngo bor zhugs pa'i phyir tshul des chos gos dang bsod snyoms la sogs pa sgrub pa'i rjes su 'jug pas gnas par byed pa ni log pa'i 'tsho ba zhes bya'o//de dang mi mthun pa'i phyir yang dag pa'i 'tsho ba ni lam gyi yan lag ces bya'o/ /yang dag pa ni rig pa dang ma bral ba'i lus dang / ngag dang yid 'jug pas chos gos la sogs pa bsgrub pa ste/tshul des kun tu 'tsho ba ni yang dag pa'i 'tsho ba'i rjes su 'brang ba'i phyir dang / bdag dang gzhan mi slu ba'i ngo bo'i rnam pa'i phyir 'phags pa'i lam gyi rjes su 'jug pas yang dag pa'i 'tsho ba ni lam gyi yan lag nyid du rnam par gzhag go//log pa'i rtsol ba zhes bya ba ni rtsol ba ni rtsol ba'o/ /log pa'i zhes bya ba ni phyin ci log pa ste/ lus dang / ngag dang / yid kyi rab tu spyod pa mi bden pa rnams kyis bdag dang gzhan la gnod pa byed pa dang / g.yul la sogs pa shom pa dang / pho nya la sogs par 'gro ba dang /spyod pa dang / dbral ba dang / 'jog pa dang / 'degs pa dang / sel ba dang / mi sel ba dang / sbyor ba'i tshul gyis skyed pa dang / zhing dang / rig pa dang / tshong dang / rgyal srid la sogs pa bdag dang pha rol la gnod par byed pa'i lus dang / ngag dang / yid kyis 'jug pa rnam pa sna tshogs la rtsom pa dang bya ba dang /brtson pa ni log pa'i rtsol ba zhes bya'o/ /de dang mi mthun par 'gyur ba'i phyir yang dag par rtsol ba'o/ /yang dag par rtsol ba ni lam gyi yan lag nyid du rnam par gzhag ste/ gang lus dang ngag dang yid kyi spyod pa gcig tu dge ba bdag dang gzhan la phan 'dogs par zhugs pa dag gis 'phags pa'i lam gyi rjes su 'brang ba de ni yang dag par rtsol ba'i phyir yang dag par rtsol ba ste de ni lam gyi yan lag nyid du brjod do//log pa'i dran pa zhes bya ba ni smad par bya ba dran pa ste/ log pa'i dran pa'o/ /dran pa ni dran pa'o/ /'di ni log pa yang yin la/dran pa yang yin pas log pa'i dran pa'o/ /dus gsum gyi yul la sngon dgod pa dang / dga' ba nyams su myong ba'i gzugs dang / sgra dang / dri dang / ro dang / reg pa la sogs pa rjes su dran zhing rjes su brjod pa dang / de la yang lhag par chags pa dang /rjes su chags pa dang / khong khro ba la sogs pa kun tu ldang ba'i phyir bdag dang gzhan gnod par byed pa'i phyir dang / mi 'dod pa'i rnam par smin pa dang 'brel pa'i phyir log pa'i mtshan ma yid la byed pa ni log pa'i dran pa'o/ /de dang mi mthun pa'i phyir yang dag pa'i dran pa ni lam gyi yan lag nyid du brjod do//yon tan rjes su dran pa sngon du btang nas sangs rgyas dang / chos dang / dge 'dun dang / tshul khrims dang / gtong ba dang / lha la sogs pa rjes su dran pa ni yang dag pa'i dran pa ste/ lam gyi yan lag nyid du brjod do/ /ting nge 'dzin gyi bya ba la/ting nge 'dzin ni ting nge 'dzin te/ kun nas mnyam par 'jog cing 'dzin pa'i phyir ting nge 'dzin to/ /'di ni log pa yang yin la/ ting nge 'dzin yang yin pas log pa'i ting nge 'dzin to/ /log pa zhes bya ba ni phyin ci log ste dbang phyug dang rang bzhin dang / dus dang / gtso bo dang /nang gi bdag la sogs pa med pa de dag la dmigs ba sngon du btang ba'i sems 'phro ba gang yin pa'o / /yang na gzugs la sogs pa dang phyi rol gyi dngos po mi rtag pa dang / sdug bsngal ba dang / stong pa dang / bdag med pa la sogs pa'i rnam pa dag la rtag pa dang / bde ba dang / gtsang ba dang / bdag tu lta ba la sogs pa la lhag par chags nas/ de dag la dmigs pa sngon du btang ba'i sems 'phro ba gang yin pa ste/ chags pa dang bcas pa sngon du btang ba'i sems gnas pa gang yin pa de ni log pa'i ting nge 'dzin zhes bya'o/ /de dang 'gal bar sems gnas pa ni yang dag pa'i ting nge 'dzin zhes bya ste/phung po dang / khams dang / skye mched bdag dang bdag gi stong pa rnams la mi rtag pa dang / sdug bsngal ba dang / stong pa dang / bdag med pa'i rnam pa la sogs pa sngon du btang ba'i sems gnas pa ste/ sems rtse gcig pa nyid ni yang dag pa'i ting nge 'dzin zhes bya'o//chos thams cad mnyam pa nyid du bsgrub pa'i phyir ting nge 'dzin to/ /sems rtse gcig pa nyid dang / dmigs pa gcig pa zhes bya ba'i tha tshig ste/ yang dag pa'i ting nge 'dzin de ni lam gyi yan lag nyid du brjod do/ /de ltar gang gis rten cing 'brel par 'byung ba mthong ba des chos mthong ngo //yang smras pa/ lta sogs yan lag brgyad kyi stegs/ /rgyu ni bcu gnyis sngon 'gro ba/ /gang mthong rnam dag bdag nyid des/ /chos kyi de nyid mthong bar 'gyur/ /'bras bu zhes bya ba ni dge sbyong tshul gyi 'bras bu'o//de thob pa ni mngon sum du byed pa ste/ kun nas nyon mongs pa thams cad kyi kun gzhi rnam par shes pa sa bon bag chags kyi dri ma dang bral ba'i phyir gnas gyur pa dang ldan pa/ yid kyi yul yon tan gyi nor bu bsam gyis mi khyab cing gzhal du med pas brgyan pa/ rang gi gzhan la rag ma las pa'i bdag nyid can so so rang gis rig pa sems can thams cad kyi don rgyun mi 'chad par lhun gyis grub par mdzad pa'i bdag nyid spros pa thams cad dang bral ba/zhi gnas dang lhag mthong zung du 'brel par ldan pa'i chos thams cad kyi de kho na nyid thugs su chud pa'i phyir nyon mongs pa dang /shes bya'i sgrib pa'i nags tshang tshing gi rtsa ba rnam par bsregs pa'i ngo bo nyid bla na med pa yang dag par rdzogs pa'i 'bras bu mi slob pa'i ye shes ni 'bras bu'i chos zhes bya'o// // sA lu ljang pa'i rgya cher bshad pa/ bam po gnyis pa/ mya ngan las 'das pa'o zhes bya ba ni phung po'i lhag ma dang bcas pa dang /phung po lhag ma med pa'i ngo bo nyid mi gnas pa'i mya ngan las 'das pa zhes brjod pa/ rga ba med pa/ 'chi ba med pa/ gdung ba med pa / brtan pa/ zhi ba/ rtag pa/ mi 'phrogs pa/ mi zad pa'i bdag nyid thog ma dang / bar dang / tha ma dang bral ba/gnyis med pa'i khams gsum dang bral ba/ lus dang / ngag dang / yid kyi las yang dag par 'das pa/ nor bu rin po che'i rgyal po'i gzugs sna tshogs pa dang 'dra bar yon tan nor bu'i 'od zer rnam pa sna tshogs kyis 'gro ba'i don rgyun mi 'chad par mdzad pa/ zhi ba chos kyi rang bzhin gyi skur gyur pa ni mya ngan las 'das par bzhed do//de ltar thams cad thugs chud phyir/ /chos skyes sangs rgyas zhes bya ste/ /de ltar de bzhin du kun nas nyon mongs pa dang / rnam par byang ba'i bdag nyid chos kun gyi chos de kho na nyid ji ltar gnas pa bzhin du thugs su chud pa'i phyir sangs rgyas zhes bya'o//chos skyes zhes bya ba ni chos dag las skyes pas na chos skyes te/ chos kyis bskyed pa zhes bya ba'i tha tshig go/ /de skad ces bya 'phags mthong bas/ /gang gis mthong ba des mthong ngo / /de skad ces bya ba ni sangs rgyas zhes de skad ces bya ba'i phyir bcom ldan 'das de lta bu'o//'phags mthong bas zhes bya ba ni ye shes kyi mig gis te/ 'phags zhes bya ba ni 'jig rten las 'das pa'o/ /mthong ba zhes bya ba ni mig gis so/ /gang gis mthong ba zhes bya ba ni sus rten cing 'brel par 'byung ba dang / chos la de ltar mthong ba des chos skyes te/chos kyis bskyed pas sangs rgyas mthong ngo zhes bshad pa yin no/ /de la 'dir rten cing 'brel par 'byung ba ji lta bur gsungs she na/ sus rten cing 'brel par 'byung ba 'di zhes bya ba la sogs pa'o/ /gang zhig srog la sogs bral ba/ /zhes bya ba ni gang gis rten cing 'brel par 'byung ba 'di rtag tu srog la sogs pa dang bral ba ste/srog dang bral bar ro mthong ba ni rig pa dang / rjes su dpag pa dag gis spyod pa dang / 'jal ba dang / rtog pa dang / nye bar rtog pa'o/ /rtag tu srog med pa zhes bya ba ni srog med pa'o/ /kun tu 'tsho ba gcer bu pa dag 'di ltar rtog ste/nang dang phyi rol gyi dngos po 'di thams cad ni srog dang bcas shing dbang po dang ldan no/ /dbang po dang ldan pa de bas na sa gsum po 'di thams cad srog chags phra mo rnams kyis gang ngo zhe'o/ /de nyid kyi phyir srog chags thams cad ni srog chags za ste/ srog chags gang dag srog chags mi za ba'i srog chags de dag ni thar pa thob bo zhes zer ro//de bas na de dgag pa'i phyir srog med pa dang / srog dang bral ba zhes bya ba la sogs pa gsungs so/ /srog med pa zhes bya ba ni srog med pa ste/ srog dang bral ba zhes bya ba'i tha tshig go/ /rgyu dang rkyen las skye ba'i chos can gyi phyir te/rgyu ni sa bon la sogs pa'o/ /rkyen ni sa la sogs pa ste/ de dag kyang phan tshun gcig la gcig rtog pa dang / yongs su rtog pa dang / rnam par rtog pa dang bral ba'i phyir rtswa dang shing dang rtsig pa dang chos 'dra ba g.yo ba med pa bya ba med pa'o/ /de bas na srog la sogs pa dang bral ba'i phyir srog med pa'o//phan tshun rgyu rkyen 'brel pa las skye zhing gcig la gcig kyang sems pa med la/ bya ba dang las kyang snang ste/ rgyu dang rkyen gyis rgyun 'di ni thog ma med pa nas zhugs pa yin no/ /ji ltar kun tu 'tsho ba gcer bu pa dag shing rnams ni sems dang bcas pa yin te/g.yo ba'i phyir dang / nyal ba'i phyir dang / bcad na skye ba'i phyir ro zhes tha snyad 'dogs pa lta bu ni ma yin te/ phyi rol gyi dngos po rnams ni nyi ma dang zla ba'i reg pa'i dbang gis zhum pa dang / rgyas par rjes su dpag gi /de dag la nyal ba dang ldang ba lta ga la yod/rlung gis bskyod pa'i dbang gis shing gi yal ga la sogs pa 'gul bar rjes su dpag pas de dag la 'gro ba dang 'ong ba ga la dmigs te/ don ma grub pa nyid do/ /bcad na skye'o zhes bya ba 'di ni don ma grub pa nyid du bstan pa'i phyir smras pa/ gal te de dag yang sems dang bcas pa zhig yin na/ci'i phyir gcod pa'i gnas skabs na gang gis na srog gcod pa la sogs pa'i sdug bsngal myong bar mi 'gyur la/ mi dga' ba la sogs pa'i spyod pa'am/ gsol ba 'debs pa la sogs pa'am/ de nas gzhan du 'gro ba cung zad mi byed/ bcad na skye ba'i phyir sems dang bcas par khas len na gang dag bcad na mi skye bas de dag bzlog pa'i phyir sems med pa nyid du 'gyur ro/ /sems dang bcas pa rnams kyi yan lag dang nying lag la sogs pa bcad na mi skye ba'i chos can yin pa'i phyir sems med pa nyid du thal bar 'gyur du 'ong bas de'i phyir de'i gtan tshigs kyi don ma grub pa nyid do//de lta bas na srog med pa dang / srog dang bral ba zhes bya ba 'di rnam par gnas so/ /ji lta bu nyid dang / ma nor ba zhes bya ba ni rgyu med pa dang mi mthun pa'i rgyu dang bral ba'i phyir ma nor ba'o/ /ma skyes pa zhes bya ba ni bskyed par bya ba dang /skyed pa dang bral ba'i phyir ro/ /ma byung ba zhes bya ba ni rtag pa dang chad pa dang bral ba'i phyir ro/ /ma byas pa zhes bya ba ni byed pa po dang bral ba'i phyir te/ nang gi byed pa'i skyes bu dang dbang phyug la sogs pa 'jug pa'i 'du byed dang bral ba'i phyir ro/ / thogs pa med pa zhes bya ba ni sgrib pa med pa'i rang bzhin yin pa'i phyir ro/ /dmigs pa med pa zhes bya ba ni dmigs par bya ba dang dmigs pa dang bral ba'i phyir ro/ /rnam par zhi ba'i rang bzhin zhes bya ba ni las dang nyon mongs pa dang bral ba'i phyir ro/ /gcig tu zhi ba'i rang bzhin spros pa thams cad dang bral ba/rtog pa'i dra ba thams cad dral ba/ rtag tu gnas pa/ mi 'jigs pa/ skye ba dang 'jig pa dang bral ba'o/ /gang gis tshul 'di 'dra bar chos la yang mthong ba ste/ nyer zhi la thug bcas par ni/ /zhes smos te/ nyer zhi la thug ces bya ba ni nye bar zhi ba tha mar bstan pa'i phyir nye bar zhi ba la thug pa'o//gang gis chos la yang tshul 'di 'dra bar brtag pa dang / srog med pa la sogs pa'i rang bzhin du mthong ba ni/ rten 'brel chos dang sangs rgyas dag /dri ma med pa'i blos mthong ba ste/ des ni bla na med pa'i chos kyi skur sangs rgyas mthong ngo zhes bcom ldan 'das kyis gsungs so//des zhes bya ba ni gang gis mthong ba'o/ /'phags pa'i chos mngon par rtogs te zhes bya ba ni gang dag sdig pa'i chos rnams la pha rol du ring ba de dag ni 'phags pa'o/ /de dag gi chos ni 'phags pa'i chos te/ yang dag pa'i lta ba la sogs pa'o//mngon par rtogs te zhes bya ba ni mngon du phyogs par rtse gcig tu byas pa'i phyir dang / mngon sum du byas pa'i phyir te/ ting nge 'dzin thob pa'i phyir zhes bya ba'i tha tshig go/ /yang dag pa'i ye shes dang ldan pas zhes bya ba ni yang dag pa'i phyin ci ma log par chos thams cad bdag med pa'i de kho na nyid rtogs pa'i phyir ro//bla na med pa'i zhes bya ba ni 'di'i gong na chos khyad par can cung zad tsam yang med de/ de bas na de ni bla na med pa zhes bya'o/ /chos kyi sku zhes bya ba ni chos sku nyid chos kyi sku ste/ mchig bu bzhin no/ /sangs rgyas zhes bya ba ni chos thugs su chud pa'i phyir ro//de ltar na sus rten cing 'brel par 'byung ba mthong ba des chos bla na med pa'i byang chub byed pa mi slob pa'i ngo bo nyid mthong ngo / /sus 'phags pa'i ye shes kyi spyod yul gyi chos de/ de lta bu rang gi ji lta ba bzhin mngon par rtogs pas chos las skyes pa/ chos kyi sprul pa/ chos gzigs pa/ sangs rgyas mthong ngo zhes bcom ldan 'das kyis gsungs so/ /rten cing 'brel par 'byung ba'i mtshan nyid kyi dbye ba rnam par gzhag par bya ba'i phyir/ rten 'brel zhes pa'i mtshan nyid ni/ /zhes bya ba smos so/ /ci'i phyir rten cing 'brel par 'byung ba zhes bya zhe na/de'i phyir smras pa/ rgyu bcas la sogs tshigs dang ldan/ /rgyu dang bcas rkyen dang bcas pa la bya'i/ rgyu med rkyen med pa la ma yin te/ bcom ldan 'das kyis rten cing 'brel par 'byung ba'i mtshan nyid mdor bka' stsal pa/ rkyen 'di nyid kyi 'bras bu'o//de nyid kyi phyir smras pa/ sangs rgyas byung rung ma byung rung / /chos nyid 'di ni gnas pa yin/ /gang gi phyir rgyu dang rkyen dag gis rgyun mi 'chad cing / rgyu dang 'bras bu rgyun ma chad par gcig nas gcig tu 'jug gi/ 'di la rgyu med pa'am/ mi mthun pa'i rgyu'am/'jug par byed pa'am/ ldog par byed pa 'ga' yang med pa de nyid kyi phyir de bzhin gshegs pa rnams byung yang rung / ma byung yang rung / chos nyid dang / chos gnas pa nyid dang / chos nges par 'gyur ba 'di ni ye 'dug pa'o zhes gsungs so/ /gal te rkyen dang bral ba'i rgyu gcig pu nyid kyis dngos po rnams skye zhing gnas pa'o//gal te rkyen kyang rgyu la mi ltos par 'ga' zhig skyed nus par gyur na ni gnas pa dang mi gnas pa zhes bya ba'i de brjod pa'i rigs na 'di dag skye ba 'bras bu 'byung ba yang rgyu med par ma yin/ rkyen med par ma yin pas de bzhin gshegs pa rnams byung yang rung ma byung yang rung /chos nyid dang chos gnas pa nyid 'di ni ye nas 'jug pa ste/ 'di lta ste rten cing 'brel par 'byung ba'i chos rkyen 'di nyid kyi 'bras bu'o zhes bcom ldan 'das kyis rten cing 'brel par 'byung ba mdor bka' stsal to/ /chos nyid ni 'dir rgyu dang rkyen gyi chos nyid gang yin pa'o//chos gnas pa zhes bya ba ni chud mi za ba'i chos nyid do/ /chos nges par gyur pa nyid ces bya ba ni rkyen nyid 'di pa'i go rims nges pa ste/ rgyu dang rkyen rim pa bzhin pa'o/ /rten cing 'brel par 'byung ba mthun pa zhes bya ba ni rgyu med par rkyen rnams mi 'jug la/ rkyen rnams med par yang rgyu 'jug pa med pa nyid kyi phan tshun tshogs na 'jug par 'gyur ro/ /gzhan ma yin pa de bzhin nyid ces bya ba ni gzhan nyid dang bral ba'i phyir ro/ /yang dag pa nyid ces bya ba ni slu bar mi byed pa'i phyir ro/ /bden pa kho na zhes bya ba ni bden pa dang mthun pa'i phyir ro/ / de kho na nyid ces bya ba ni don dang ldan pa'i phyir ro/ /ma nor ba nyid ces bya ba ni phyin ci log rnam pa bzhi dang bral ba'i phyir ro/ /phyin ci ma log pa nyid ces bya ba ni rjes su mthun pa'i phyir ro/ /'di ltar yang rten cing 'brel par 'byung ba 'di zhes bya ba la sogs pa ni rgyu dang rkyen rnam pa gnyis yin pas rgyu rkyen gnyis kyi phyir rten cing 'brel par 'byung ba'i go rims khas blang bar bya'o//gnyis gang zhe na/ gsungs pa/ rgyu dang 'brel pa dang / rkyen dang 'brel pa'i phyir de yang phyi dang nang gi bye brag gis rnam pa bzhir khas blang dgos pas/ phyi dang de bzhin nang gi ni/ /rgyu dang rkyen ni rnam gnyis te//zhes bya ba smos so/ /de ltar nang dang phyi rol gyi bye brag gis tha dad pa'i rgyu dang rkyen rnams kyi mtshan nyid kyi dbye ba ji lta bu zhe na/ phyi rol rgyu ni sa bon sogs/ /zhes bya ba smos so/ /de la phyi rol gyi rten cing 'brel par 'byung ba rgyu dang bcas pa gang zhe na/ zhes brjod nas 'di lta ste/sa bon las myu gu/ myu gu las 'dab ma/ 'dab ma las sdong bu/ sdong bu las sbu gu/ sbu gu las snying po/ /snying po las me tog /me tog las 'bras bu zhes bya ba gsungs so/ /rkyen ni rnam pa drug tu bstan/ /zhes bya ba ni skabs yin pa'i phyir phyi rol gyi rten cing 'brel par 'byung ba'i zhes bya bar sbyar te/rnam pa drug ces bya ba ni sa la sogs pa rnam pa drug go/ /de nyid kyi phyir smras pa/ sa bon myu gu sdong bu sogs/ /ji ltar 'bras bu 'jug par brjod/ /sa bon yod na myu gu dang sdong bu la sogs pa 'bras bu la thug pa rnams 'byung gi sa bon med na myu gu dang sdong bu la sogs pa 'bras bu la thug pa rnams 'byung ba med do//de las sa bon yang 'di snyam du bdag gis myu gu la sogs pa mngon par bsgrubs so snyam du mi sems so/ /myu gu la sogs pa yang 'di snyam du bdag ni sa bon la sogs pas mngon par bsgrubs so snyam du mi sems so//me tog kyang 'di snyam du bdag gis 'bras bu mngon par bsgrubs so snyam du mi sems pa'i bar du ste/ 'bras bu yang 'di snyam du bdag ni me tog gis mngon par bsgrubs so snyam du mi sems mod/ 'on kyang sa bon yod na myu gu la sogs pa nas 'bras bu la sogs par 'byung bar 'gyur gyi/med na mi 'gyur te/ de ltar phyi rol gyi rten cing 'brel par 'byung ba rgyu dang 'brel par blta bar bya'o/ /rkyen ni sa la sogs pa ste/ / dus la thug pa go rims bzhin/ /de nyid kyi phyi rol gyi rten cing 'brel par 'byung ba rkyen dang 'brel pa ji ltar blta zhe na zhes bya ba gsungs so//phyi rol gyi rten cing 'brel par 'byung ba rkyen dang 'brel pa rnam pa dur blta bar bya zhe na gsungs pa/ khams drug 'dus pa'i phyir ro/ /drug po gang dag ce na/ sa dang / chu dang / me dang / rlung dang / nam mkha' dang / dus rnams go rims bzhin 'dus pa las phyi rol gyi rten cing 'brel par 'byung ba zhes bya ba'i rkyen nyid du go rims bzhin te/go rims ji lta ba bzhin du shes par bya'o/ /rgyu dang rkyen 'di rnams las gang gi las gang yin zhe na/ de'i phyir smras pa/ rten dang rlan dang smin pa dang / /'bru 'phel dang ni go 'byed dang / / 'gyur ba dag ni de rnams kyis/ /bya ba ji bzhin 'jug pa'o/ /de la sa'i khams ni sa bon rten pa'i bya ba byed do zhes bya ba ni sa bon myu gu bskyed par mngon du phyogs par rten pas sra ba nyid ces bya'o/ /chu'i khams ni rlan par byed do zhes bya ba ni mnyan par byed do zhes bshad pa yin no/ /me'i khams ni smin par byed do zhes bya ba ni yongs su rgyas pa'i gnas skabs nye bar bskyed pa na/phan tshun reg pas dro ba nyid ni yongs su smin pa zhes bya'o/ /rlung gi khams ni 'bu bar byed do zhes bya ba ni 'phel bar byed pa'i phyir te/ rang gi gnas skabs nas byung ste/ phyi rol du khyer pa'i phyir/ rlung gi khams ni sa bon 'bu bar byed 'phel bar byed ces bya'o//nam mkha'i khams ni sa bon dang / myu gu la sogs pa la mi sgrib pa'i bya ba byed ces bya ba ni/ nam mkha'i khams ni gegs mi byed pa nyid kyis mthun par 'jug pa'i phyir sa bon dang myu gu la sogs pa la mi sgrib pa'i bya ba byed ces bya'o//dus ni sa bon 'gyur ba'i bya ba byed do zhes bya ba ni dus kyang rnam pa thams cad yongs su bsgrubs pas dus ji lta ba bzhin du 'gyur bar byed pa na sa bon 'gyur ba'i bya ba byed do zhes bya'o/ /thams cad kyang ma tshang ba med na 'byung gi / ma tshang na 'byung ba med do/ /de nyid kyi phyir smras pa/rkyen rnams tshogs pa med na ni/ /sa bon yod kyang myug sogs med/ /sa bon med pa nyid yin na/ /rkyen rnams yod kyang de dang 'dra/ /de nyid kyi phyir gsungs pa/ thams cad 'dus la sa bon 'gags pa na de las mngon par 'grub par 'gyur ro/ /rgyu dang de bzhin rkyen rnams ni//ngar 'dzin la sogs bral ba ste/ /rgyu dang rkyen ni tshogs pa las/ /las kyi 'bras bu chud za med/ /de la sa'i khams kyang 'di snyam du bdag gis sdug pa'i bya ba bya'o snyam du mi sems so/ /de bzhin du chu dang / me dang / rlung dang / nam mkha' dang / dus rnams kyang 'di snyam du mi sems te/ngar 'dzin pa dang / nga yir 'dzin pa med pa'i phyir ro/ /las kyi 'bras bur gdags pa chud za ba yang med de/ thams cad du rgyu dang rkyen rnams ma tshang ba med pa las zhes bya ba khong du chud par bya'o/ /myu gu de yang zhes bya ba ni sa bon gyi rgyu can gyi myu gu la sogs pa de skyes pa na /bdag las ma yin gzhan las min/ /gnyis dang byed po dus las min/ /de bzhin dbang phyug sogs byas min/ /rang bzhin las min rgyu med min/ /zhes smos so/ /bdag las zhes bya ba ni dngos po rnams rgyu dang rkyen dag med par bdag nyid las skye ba'o//ngo bo nyid du smra ba rnams 'di ltar rtog ces grag ste/ dngos po rnams kyi ngo bo nyid/ /'di ni dus rtag gnas pa ste/ /'di la 'ga' yang skye ba med/ /'ga' yang 'gag par mi 'gyur ro/ /rma bya'i 'dab ma bkra ba dang / /pad+ma la sogs rab dmar dang / /tsher ma rno la sogs pa gang //su zhig gis ni sngon byas smros/ /de bas na de'i gzhung lugs dgag pa'i phyir smras pa/ dngos po rnams rang las skye bar rung ba ma yin te/ snga nyid nas gnas pa'i phyir ro/ /skye ba dang ldan par khas len na ni rgyu dang rkyen nyid khas blangs par 'gyur ro/ /de bas na dngos po rnams rang gi ngo bo las skye bar rung ba ma yin te/skye ba dang ldan pa'i phyir bum pa la sogs pa bzhin no/ /gang gi ltar na dngos po rnams rtag tu gnas pa de'i ltar na skye ba dang / bya ba dang / las dang / gnas pa dang / 'jig pa yang mi rung ba zhig na/ skye ba dang /bya ba dang / las dang / gnas pa dang / 'jig pa yang mngon sum du snang ngo / /de bas na nyes pa 'dir thal bar 'gyur du 'ong bas bdag las min zhes smos te/ dngos po rnams rang las skye na rtag tu skye bar thal bar 'gyur ba'i phyir ro/ /nam mkha' lta bur cung zad kyang gang du yang nam yang skye ba'am 'gag par mi 'gyur ro zhe na/smras pa/ mngon sum dang 'gal ba'i phyir te/ 'di ltar dngos po rnams rgyu dang rkyen las skye bar ni snang ngo / /de ltar na re zhig dngos po rnams rang gi ngo bo las ma skye'o/ /gzhan las zhes bya ba ni bdag las so/ /gzhan skyed par byed pa dang /'jig par byed pa'i bdag yod do zhes grag ste / phyi dang nang gi dngos po thams cad ni bdag gi yon tan yin la / bdag ni nang gi byed pa'i skyes bur yod de/ de yod na 'gro ba dang / 'ong pa dang / g.yo ba dang / rtog pa dang / sel ba dang / rlom sems dang / bya ba dang /las dang / de nyid dang gzhan nyid du yang 'jug go/ /mig la sogs pa ni bdag gi yon tan yin te/ gzhan gyi don yin pa'i phyir/ mal cha la sogs pa'i yan lag bzhin no zhes bya ba la/ gzhan zhes bya ba'i sgras ni bdag gi yin par brjod do/ /mig la sogs pa ni de'i yon tan yin pas de'i don ni gzhan gyi don te/dper na mal cha la sogs pa gzhan du nye bar sbyor ba la gzhan gyi don zhes bya ba lta bu'o/ /gzhan gyi don yin pa'i phyir zhes bya ba'i gtan tshigs 'di ni mal cha'i dpe dang mi sbyor te/ 'dus pa yin pa'i phyir ro/ /bdag ni 'dus pa ma yin pa'i rang gi ngo bo yin na/ji ltar na bdag 'dus pa ma yin zhing bdag lus med pa la mal cha la sogs pa'i yan lag 'dus pa'i rang gi ngo bos phan 'dogs par rung / de bas na gtan tshigs kyi don ma grub pa de/ 'dus pa ma yin pa gzhan gyi don sgrub par byed pas mal cha'i dbye bas mal cha'i dpe 'dus pa gzhan gyi don kho na bsgrubs pa yin no//bdag 'dus pa yin pas rgyu dang rkyen las skye ba thob pa la nga dang nga'i zhes rlom pa'i rnam pa 'jug pa'i phyir sems kho na la bdag ces bya'i/'di la nang gi byed pa'i skyes bu rus sbal gyi spu'i rang bzhin dang 'dra ba rigs pa dang rjes su dpag pa dang bral ba ni 'ga' yang [(]mad [,]med [)]do zhes bstan pa'i phyir bcom ldan 'das kyis phyi dang nang gi dngos po ni gzhan las skye ba rung ba ma yin pa gsungs so//gal te de ltar dngos po rnams bdag las kyang skye bar mi 'gyur/ gzhan las kyang ma yin/ 'o na dngos po rnam pa gnyis las skye bar 'gyur ro snyam na de'i phyir de'i gzhung lugs dgag pa'i phyir smras pa/gnyis dang byed po dus las min/ /zhes bya ba smos te/ bdag dang gzhan las ma yin no/ / gzhan dag ni bdag dang gzhan 'brel pa las/ dngos po rnams skye bar rtogs te/ de'i phyir gnyis nyid du brjod pa de lta na'ang / bdag las ma dmigs pa'i phyir dang / gzhan las min pa'i phyir gnyis las min zhes smos te/ rgyu dang rkyen ma gtogs pa bdag dang gzhan med do zhes bcom ldan 'das kyis gsungs so/ /gal te gnyis phrad kyang skye ba dang 'jig par mi 'dod na 'o na byed po gzhan dbang gis skye ba dang 'jig par 'gyur ro zhes kha cig zer te mu stegs byed gzhan dag byed pa po zhes bya ba thog ma'i byed pa po rtag pa rgyun mi chad pa khyab pa'i bdag 'ga' zhig yod de/des phyi dang nang 'di thams cad skyed cing 'jig par byed do zhes rtogs so/ /de bas na de'i gzhung lugs dgag pa'i phyir smras pa/ dngos po rnams skye ba dang / gnas pa dang / 'jig pa nyid ni byed pa po la rig las pa ma yin no/ /'o na ci zhe na/ rgyu dang rkyen 'brel pa las dngos po rnams 'jug par snang ngo / /byed pa po ni nam mkha' bzhin 'gyur ba med pa'i phyir de la rag ma las te/ skye ba dang / gnas pa dang / 'jig pa nyid du rung ba ma yin no/ /gal te ci'i phyir zhe na/ byed pa po 'gyur ba med pa/ byed pa med pa nam mkha'i bdag nyid la ni bya ba dang / las cung zad kyang med do/ /dngos po skye ba dang ldan pa rnams la rgyu dang rkyen la rag las te/ 'jug pa nyid kyi rim par 'byung bar snang ngo / / gang gi ltar na byed pa po la rag las te 'jug pa de'i ltar na dngos po rnams kyi skye ba dang / gnas pa dang / 'jig pa nyid rtag tu nye bar 'gyur ro/ /byed pa po rtag pa'i phyir cig car dngos po rnams skye ba dang / gnas pa dang / 'jig par 'gyur ba'am/ yang na 'ga' yang skye ba dang /gnas pa dang / 'jig par mi 'gyur ro/ /rtag pa'i phyir gang la'ang cung zad kyang skye ba'am / 'jig par mi byed do/ /dngos po rgyu dang rkyen la rag las te 'jug pa rnams kho na la byed pa po dang / bya ba dang / rgyu dang 'bras bu skye ba 'dra ba'i rim pa 'byung ba dmigs kyi/skye ba med pa nam mkha'i ut+pa la la sogs pa ni skye ba dang gnas pa dang 'jig pa rung ba ma yin no/ /rgyu 'gyur ba med pa las phan tshun rag las te/ 'jug par bya ba dang ldan pa rnams kyi skye ba nges pa ni rung ba ma yin te/ rtag pa'i dngos po las skyes pa/ /mi rtag rung ba ma yin nyid//rgyu las 'gyur ba med pa'i phyir/ /yang na 'dra ba kho nar byed/ /rgyu dang 'bras bu tha dad na/ /mi 'gyur bar ni ji ltar 'gyur/ /rgyu la 'gyur ba yang yod pa'i phyir de mi 'dra ba'i phyogs nyams so/ /bya ba dang mi ldan pa mo gsham gyi bu'i bdag nyid rnams la ni 'ga' yang bya ba dang las nges par rung ba ma yin pas bcom ldan 'das chos rnams la mi bslu bas dngos po rnams la skye ba'i bya ba byed pa po la rag las pa ma yin gyi/'on kyang rgyu dang rkyen 'dus pa yod na dngos po rnams skye ba dang / 'jig pa dag rung ngo zhes gsungs so/ /gal te de ltar na 'di la dngos po rnams skye ba dang /gnas pa dang / gzhan du 'gyur ba la sogs pa khas blang bar bya ste/ dngos rnams skye dang gnas pa yi / /rgyu ni dbang phyug yin rig bya/ /gzhan dag de ltar log rtogs shing / /ji ltar ma yin de ltar brjod/ /gzhan dag ni sems can dang / snod kyi 'jig rten skye ba dang /gnas pa dang / 'jig pa dag ni dbang phyug gis byas shing 'jig par rtogs te/ dbang phyug de'i sems kyi dbang gis lus dang / sa gsum dang / byed pa la sogs pa 'byung bar 'gyur ro zhes grag go/ /gzhan dag ni de nyid kyi sems bskyed pa tsam gyis sems can dmyal ba dang / yi dgas dang /dud 'gro dang / lha dang mi la sogs pa dang / rims dang / dug dang / nad dang / bud med dang / skyes pa dang / ma ning dang / gzugs bzang ba dang / gzugs mi sdug pa dang / chom rkun pa dang / g.yon can dang / rkun ma dang / byi po byed pa dang / srog gcod pa dang /brdzun du smra ba dang / chang 'thung ba dang / rgyal po la 'jug pa dang / mtha' 'khob dang / ri khrod pa dang / g.yung po dang / snying rje med pa dang / gtum po dang / tshig rtsub po smra ba dang / bram ze gsod pa dang / pha ma gsod pa dang / ba lang gsod pa dang / gshed ma la sogs pa dang /gnod sbyin dang / srin po dang / mkha' 'gro ma la sogs pa dang / gzhan gsod par byed pa thams cad dang / bde ba dang sdug bsngal la sogs pa dang / mtho ris dang / byang grol de thams cad sems bskyed pa tsam gyis phyung ngo zhes zer ro/ /dbang phyug byed pa por smra ba shes rab shin tu gzhon pa nyid dang /song ba'i rjes su 'gro ba nyid kyis rigs pa'i khyad par dang bral ba de la gus shing gzhol bas snga phyi 'gal ba byis pa gzhon nu gdol ba bzhin du don ji lta ba nyid ma yin pa/ mngon sum la sogs pa dang 'gal ba/ sbyin pa dang / dul ba dang / yang dag par sdom pa dang /'dod pa dang mi 'dod pa'i 'bras bu dang / legs par byas pa dang / nyes par byas pa'i las dang / bgrod par bya ba dang / bgrod par bya ba ma yin pa dang / bza' ba dang / mi bza' ba dang / mtho ris dang / byang grol la sogs pa'i 'bras bu dang 'gal ba/ rigs pa dang /lung la sogs pa dang 'gal ba/ tshig tsam phyogs su byas nas rang gi mi shes pa'i ling tog gis mig bsgribs pas nus pa med pa'i phyir phyugs su gyur ba rnams ni phyugs pas kyang ches phyugs te/ mi mngon pa mo gsham gyi bu'i rang bzhin phyugs bdag la brten te/ 'gro ba skye zhing gnas pa dang //'jig pa'i rgyu ni dbang phyug na/ /de yi skye zhing gnas pa dang / /'jig pa'i rgyu yang brjod dgos so/ /skye ba dang / gnas pa rgyu dang bcas pa nyid du khas len na ni rtag par smra ba nyams par 'gyur bas smra ba btang ste/ phyin ci log tu bsgrub pa'i phyir dbang phyug rgyu ma yin pa nyid kho nar grub par 'gyur ro//'dod pa tsam gyis skyes na ni/ 'gro ba thams cad cig car skye ba dang / gnas pa dang / 'jig par 'gyur ro/ /de'i phyir yang ma grub pa'i don nyid yin te/ thams cad rtag tu skye bar thal bar 'gyur ba'i phyir ro/ /sdug bsngal ba dang / ngan pa dang / zhe 'gras pa dang / mi gtsang ba dang / byas pa mi gzo ba la sogs pa 'byin pa ni dgos pa khyad par med pa'i phyir yang ma grub pa'i don nyid yin te/ de'i 'byin pa'i ngal ba 'bras bu med do/ /dgos pa med pa la ni rtog pa sngon du gtong ba rnams 'jug pa med de/ dgos pas ma khyab pa'i phyir ro/ /de dag dgos pa dang ldan pa la log na rtog pa sngon du gtong ba rnams kyi 'jug pa de yang ldog pas ma grub pa'i don nyid yin no//rgyu dang rkyen ni tshang ba na / /rim gyis skye dang 'jig pa dang / /mngon sum du ni snang ba ste/ /ma tshang na yang skye ba med/ /sems can dang snod kyi 'jig rten gyi bde ba dang sdug bsngal la sogs pa skye zhing gnas pa dang /'jig pa ni rim pa kho nas dmigs te/ de'i phyir dbang phyug rgyu ma yin no/ /dngos po 'ga' yang skye ba dang / gnas pa dang / 'jig par mi rung ste/ mngon sum dang 'gal ba de'i phyir yang ma grub pa'i don nyid yin no/ /mngon sum las brling ba'i tshad ma gzhan yang yod pa ma yin no zhes smra ba thams cad la grags so//gcig pu don byed yod min zhing / /brtse dang rab gdung med pa la/ /yon tan zab mo nyid dang ni/ /lta spyod sems pa sogs mi rigs/ /gcig pu bya ba dang ldan pa dang mi ldan pa la yon tan zab mo nyid dam gzugs la sogs pa dmigs pa'i sems pa nyid mi rung bas de ni mi mthun no//rgyu ni kun na yod min na/ /ji lta bur na rkyen nyid yin/ /rgyu min nyid ni byed med phyir/ /ji ltar dbang phyug che dbang byed/ /dngos rnams byed po dbang phyug che/ /de yang byed por mi 'dod na/ /pha med par ni bu 'byung ba//de ni 'dod dang mthong ba med/ /rigs pa smra rnams rgyu dang ni/ /rgyu mthun 'dra ba nyid du 'dod/ /rtag las 'bras bu rtag rigs te/ /mi rtag las kyang mi rtag nyid/ /sA lu'i sa bon las 'bras bu/ /las kyi myu gu skye ba mthong / /de bzhin dbang phyug che rtag ni/ /dngos po rnams ni rtag tu 'byung //ji ltar me yis thams cad sreg /de bzhin gal te dbang phyug 'dod/ /me yi rgyu ni me gzhan la/ /dbang phyug la ni rgyu yod min/ /rim gyis 'jug pas me rgyun las / /thams cad sreg pa yang 'dod na/ /dbang phyug la ni 'gyur med pas/ /me dang 'dra bar rung ma yin//de ltar na dbang phyug byed pa po nyid du khas len pa la nyes pa mang du yod pas/ bcom ldan 'das kyis dngos po rnams skye ba dbang phyug gis byas par mi rung ngo zhes gsungs so/ /gzhan dag ni thams cad dus kyis bsgyur bar 'dod do/ /de dag ni 'di skad smras te/ dngos rnams skye zhing gnas pa ni//dus kyis sgyur bar byed pa ste/ /dngos rnams skye dang gnas pa yang / /dus kyis sgyur bar byed pa nyid/ /de la 'di skad brjod de/ 'di la dus zhes bya ba ci yin/ rtag pa'am/ mi rtag pa'am/ pho'am/ mo'am/ ma ning gi rang bzhin nam/ lha'am/ sha za'am/ lus can nam/ lus can ma yin pa'am/ bya ba dang bcas pa'am/ bya ba med pa dang ldan pa zhig /gal te de rtag bya ba las/ /de la rag las rung ma yin/ /cig car skye bar 'gyur de yang / /'gal ba'i phyir ni mi 'dod do/ /mi rtag nyid na dus min gyi/ /rgyu dang rkyen ni 'brel phyir ro/ / gal te skyes pa bud med dang / /ma ning sogs yin ci smra 'gal/ /lus can lus med bya ba sogs/ /yin na phan tshun 'gal ba nyid / /rtag pa nyid na mi 'gyur phyir/ /bya dang las ni 'gal bar 'gyur/ /de ltar na dus su smra ba rnams dus kyi dbang gis dngos po rnams skye ba dang / gnas pa dang /'jig par khas len pa yang rung ba ma yin pas de yang bzang po ma yin pa nyid do/ /nyi ma dang / zla ba dang / skar ma dang / dus tshigs dang / lo la sogs pa dang / phyi nang gi dngos po rnams song ba dang / 'gro bar 'gyur ba'i ngo bo'i phyir dus zhes bya bas de'i phyir dngos po rnams skye ba dang /gnas pa dang / 'jig pa ni/ dus kyis bsgyur bar mi rung ngo / /gzhan yang rang bzhin du smra ba dag ni nang dang phyi rol gyi dngos po thams cad rang bzhin las 'byung bar 'dod de/ dngos po rnams kyi rang bzhin kho nar zad kyi / dngos po 'ga'i skyed par byed pa'am/ 'jig byed pa'i rgyu ni 'ga' yang med de /sra ba dang / gsher ba dang / dro ba dang / yang ba nyid dang / 'jam pa dang / rno ba'i rang bzhin nyid dang / mngar ba dang / skyur ba dang / lan tshwa dang / kha ba dang / sems can ma yin pa'i dbye ba nyid de/ lha mi dud 'gro la sogs dang //rgyal po bram ze rigs ngan sogs/ /legs par byas dang nyes byas dang / /bde sdug rtag tu gnas pa nyid/ /de ltar rang bzhin yid gnyis kyis/ sems 'khrul pa de la 'di skad ces brjod par bya ste/ rang bzhin la ni 'gyur mthong bas/ /mngon sum la sogs 'gal phyir ro//gang la 'gyur ba yod pa de/ /'gyur ba med pa ji ltar 'gyur/ /gsal ba du ma tha dad la/ /skye ba dang ni 'jig pa snang / /skye dang 'jig dang 'brel na ni/ /mi 'gyur bar ni ji ltar 'gyur/ /rang bzhin 'gyur ba med pa'i phyir/ /skyes bu la sogs don med na//rigs dang rgyal po zhing sogs la/ /de dag gi yang 'bras bu snang / /rang bzhin 'gyur na ni/ rtag par smras pa nyams par 'gyur/ /de lta bas na rgyu rkyen du/ /smra ba rnams kyi lam 'di rigs/ /de ltar na rang bzhin du smra ba yang phan tshun 'gal ba nyid pas dngos po rnams kyi skye ba dang /gnas pa dang / 'jig pa ni rang bzhin las 'byung bar mi rung ngo zhes gsungs so/ /'o na dngos po rnams kyi skye ba dang / gnas pa dang / 'jig pa rgyu med pa can du 'gyur te/ gzhan rgyu med pa can du smra ba rnams rgyu med pa kho nar dngos po rnams skye ba dang 'gag par rtog go/ /rgyu med par smra bar khas len na rgyu nges pa med pa'i phyir byas pa chud za ba dang /ma byas pa dang phrad pa dang thug pa med par yang 'gyur la/ legs par byas pa dang / nyes par byas pa la sogs pa dang / pha dang / bu dang / bram ze dang / rgyal rigs dang / rje'u rigs dang / dmangs rigs dang /khyi sha can la sogs pa dang / gtsang ba dang mi gtsang ba dang / bgrod par bya ba dang / bgrod par bya ba ma yin pa dang / bza' ba dang / mi bza' ba dang / lha dang / sha za la sogs pa dang / sbyin pa dang / dul ba dang / yang dag par sdom pa dang / bzlas brjod dang / dka' thub dang / smyung ba dang / nges pa dang / mchod sbyin shes pa dang / mi shes pa la sogs pa'i rgyu nges pa med pa'i phyir phan tshun bye brag nges par rnam par gzhag par yang mi 'gyur ro/ /de bas na nyes pa der thal bar 'gyur du 'ong bas rgyu med par smra ba yang 'jig rten la sogs pa dang 'gal ba'i phyir ma grub pa nyid do//gang gzhan gtso bo dang / rdul phra rab la sogs pa dang / rgyu med pa dang mi mthun pa'i rgyur smra bas smra ba la sogs pa de dag kyang 'di nyid kyis dgag par bya'o/ /de'i phyir/ bdag las ma yin gzhan las min/ /gnyis dang byed po dus kyis min//de bzhin dbang phyug sogs byas min/ /rang bzhin las min rgyu med min/ /zhes gsungs so/ /rgyu dang rkyen gyis 'jug pa yang / /thog ma med pa'i dus can snang / /zhes bya ba ni thog ma med pa'i dus nas spros pa'i bag chags kyi sa bon rgyun mi 'chad par chu bo'i rgyun 'bab pa bzhin rjes su 'jug pas/rgyu dang rkyen gyis 'jug pa yang / /thog ma med pa'i dus can snang / /zhes bya ba smos so/ /de nyid kyi phyir mdo las/ 'on kyang / sa dang / chu dang / me dang / rlung dang / nam mkha' dang / dus kyi khams rnams 'dus nas sa bon 'gags pa na myu gu mngon par 'gyur ro zhes gsungs te/'on kyang zhes bya ba ni med pa las byung ba dang / bdag dang / gzhan dang / gnyis ka dang / dbang phyug la sogs pa dang bral ba'i sa bon dang sa la sogs pa'i tshogs pa nyid las myu gu la sogs pa skye bar 'gyur ro zhes bya'o/ /rgyu lnga dag gis phyi rol gyi//rten cing 'brel par 'byung ba bzhed / /ces bya ba la/ rgyu lnga dag gis zhes bya ba ni rgyu lnga po dag gis so/ /phyi rol gyi zhes bya ba ni sa bon la sogs pa'o / /rten cing 'brel par 'byung ba zhes bya ba ni rten cing 'brel par ro/ /rtag par ma yin chad par min/ /'pho bar ma yin rgyu chung las//'bras bu chen po 'grub pa dang / /'dra ba'i rjes su 'gro phyir yang / /zhes bya ba smos te/ rtag par ma yin zhes bya ba ni/ gang gi phyir sa bon yang gzhan nyid la myu gu yang gzhan nyid de/ myu gu gang yin pa de nyid kyang sa bon ma yin la/ sa bon nyid kyang myu gu ma yin la/sa bon ma 'gags na yang myu gu mi 'byung la/ 'gags na yang ma yin gyi/ 'on kyang sa bon yang 'gags la/ myu gu yang skye ste/ de'i phyir rtag par ma yin no/ /chad par min zhes bya ba ni sa bon sngar 'gags pa las kyang myu gu mi skye la/ ma 'gags pa las kyang ma yin gyi/ 'on kyang sa bon yang 'gags la/ de nyid kyi tshe myu gu yang 'byung bar 'gyur te/ de bas na chad par ma yin no/ /'pho bar ma yin zhes bya ba ni sa bon dang myu gu mi 'dra ba kho na ste/ de'i 'pho bar ma yin no/ /rgyu chung ngu las zhes bya ba ni sa bon chung ngu btab pa las so//'bras bu chen po 'grub pa zhes bya ba ni rgyu chung ngu de las 'bras bu mang po mngon par 'grub pa ste/ chung ngu las 'bras bu chen po mngon par 'grub pas de'i phyir rgyu chung ngu las 'bras bu chen po 'byung ngo / /'dra bar rjes su 'gro phyir yang / /zhes bya ba ni sa bon ji lta bu btab pa de lta bu kho na'i 'bras bu mngon par 'grub pas de'i phyir de dang 'dra ba'i rgyud du ste/'dra bar 'bras bu mngon par 'grub pa'i phyir ro/ /sa bon myu gu tha dad phyir/ /sa bon rtag pa nyid ma yin/ /chad par mi 'gyur gang gi phyir/ /sa bon yod na myu gu ste/ /sa bon 'dra ba 'grub pa'i phyir//de dang mi 'dra yang mi 'dod/ /myu gu 'bras bu la sogs pa/ /myu gu 'pho yang yod ma yin/ /sa bon chung rab cig yod na/ /sa bon nyid las 'byung 'gyur te/ /de bas rgyu ni chung ngu las/ /'bras bu chen po skye phyir ro/ /sa bon sA lu sogs btab la //'bras bu khre rgod la sogs min/ /de nyid kyi phyir/ myu gu sa bon ltar mi 'dod/ /rgyu med myu gu skye ba'ang med/ /'gag dang skye ba mgo mnyam ste/ /srang mda'i mgo mjug mtho dman bzhin/ /zhes bya ba smos te/ de ltar na phyi rol gyi rten cing 'brel par 'byung ba kun brtags pa'i bdag nyid kyis ma bsags par blta bar bya'o//de bzhin nang gi 'ang rgyu dang ni/ /rkyen gyi rnam pa gnyis su bzhed/ /de bzhin nang gi zhes bya ba ni/ phyi rol gyi rten cing 'brel par 'byung ba bzhin du rgyu dang rkyen rnam pa gnyis dang 'brel pa'i phyir tha dad pa rnam pa gnyis su rtogs par bya'o//rgyu dang rkyen gyi rnam pa gnyis su zhes bya ba ni nang gi rten cing 'brel par 'byung ba rgyu dang 'brel pa dang / rkyen dang 'brel pas rnam pa gnyis su khong du chud par bya'o/ /bzhed ces bya ba ni mngon par bzhed pa dang dgongs pa dang / mngon du bzhed pa zhes bya ba'i tha tshig go/ /de la nang gi rten cing 'brel par 'byung ba rgyu dang 'brel pa ji ltar rtogs par bya zhe na/smras pa/ 'di'i rgyu dang po ma rig pa/ /tha ma 'chi yin go rims bzhin/ /de la thog mar ma rig pa bstan pa'i phyir dang por ma rig pa'o/ /tha mar 'chi ba'i yan lag bstan pa'i phyir tha ma 'chi ba'o/ /de dag gi bar gang yin pa de dag ni dbus su 'dod de/de nyid kyi phyir mdo las/ ma rig pa'i rkyen gyis 'du byed rnams/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung ste/ de ltar na sdug bsngal gyi phung po chen po 'ba' zhig po 'di 'byung bar 'gyur ro zhes gsungs so//yan lag bcu gnyis nyon mongs las/ /skye bcas bdag nyid cha gsum ni/ /rgyu dang rkyen las byung ba ste/ /byed pa la sogs rnam par spangs/ /nyon mongs pa dang / las dang skye ba gzhan dbang gi bdag nyid 'di yang cha gsum gyis rnam par gzhag ste/nyon mongs pa'i gzhan gyi dbang gi ngo bo nyid dang las kyi gzhan gyi dbang gi ngo bo nyid dang / skye ba'i gzhan gyi dbang gi ngo bo nyid kyis so/ /de la nyon mongs pa'i gzhan gyi dbang gi ngo bo nyid ni yan lag gsum ste/ ma rig pa dang / sred pa dang / len pa rnams so/ /las kyi gzhan gyi dbang gi ngo bo nyid ni yan lag gnyis te /'du byed dang srid pa dag go/ /skye ba gzhan gyi dbang gi mtshan nyid ni yan lag lhag ma bdun te/ rnam par shes pa dang / ming dang gzugs dang / skye mched drug dang / reg pa dang / tshor ba dang / skye ba dang / rga shi rnams so/ /yang zhes bya ba'i sgras ni bsdu bar bya bar blta ste/mya ngan dang / smre sngags 'don pa dang / yid mi bde ba dang / 'khrug pa la sogs pa dang / sdug pa dang bral ba dang / mi sdug pa dang phrad pa dang / 'dod pas phongs pa la sogs pa bsdu'o/ /de ltar rten cing 'brel par 'byung ba yan lag bcu gnyis pa 'di ni ngo bo nyid gsum du rig par bya'o//de yang byed pa po la sogs pa dang ngo bo nyid kyis bral bar shes par bya'o// // sA lu ljang pa'i mdo'i rgya cher bshad pa/ bam po gsum pa/ gal te dang po ma rig med/ /tha ma 'chi ba 'byung mi 'gyur/ /zhes bya ba la/gal te dang po ma rig pa med ces bya ba ni/ gal te ma rig pa med par gyur na/ 'du byed rnams mi 'byung ba nyid do/ /de bzhin du gal te rga ba dang 'chi ba'i bar du med par gyur na mya ngan la sogs par 'jug par mi 'gyur ro/ /de dag las gzhan bdag dang ni/ /bdag gi zhes pa gang na'ang med//ces bya ba ni/ de la ma rig pa yang 'di snyam du bdag gis 'du byed la sogs pa mngon par bsgrubs so snyam du mi sems pa nas rga shi'i bar du yang 'di snyam du bdag gis mya ngan la sogs pa mngon par bsgrubs so snyam du mi sems so/ /'du byed la sogs pa yang 'di snyam du bdag cag ni ma rig pa la sogs pas mngon par bsgrubs so snyam du mi sems pa nas rga shi yang 'di snyam du bdag cag ni skye ba la sogs pas mngon par bsgrubs so snyam du mi sems pa'i bar du'o//dang po ma rig byung nas ni/ /tha ma shi ba'ang snang bar 'gyur/ /zhes bya ba ni ma rig pa yod pa las 'du byed la sogs pa mngon par 'grub cing 'byung bar 'gyur bas na rga shi yod pa las mya ngan dang smre sngags 'don pa la sogs pa'i bar mngon par 'grub cing 'byung bar 'gyur ro//de ltar 'di ni nang gi rgyu/ /zhes bya ba ni de ltar na nang gi rten cing 'brel par 'byung ba'i rgyu dang 'brel par blta'o/ /nang gi rten cing 'brel par 'byung ba rkyen dang 'brel par ji ltar blta zhe na/smras pa/ 'di yi rkyen ni rnam pa drug /'di'i zhes bya ba ni nang gi'o/ /rkyen zhes bya ba ni tshogs pa'o/ /rnam pa drug ces bya ba ni rnam pa drug go/ /tha ma rnam shes thog ma sa/ /nang gi rkyen du 'dod pa yin/ /rnam par shes pa tha mar yongs su bstan pa'i phyir tha ma rnam shes so//thog ma ni sa zhes bya'o/ /de nyid kyi phyir mdo las/ khams drug 'dus pa ste/ sa dang / chu dang / me dang / rlung dang / nam mkha' dang / rnam par shes pa la sogs pa ni nang gi rten cing 'brel par 'byung ba rkyen dang 'brel par blta'o zhes gsungs so/ /sra dang rjes su sdud pa dang //smin dang dbugs 'phel go 'byed nyid/ /ces bya ba ni de la nang gi sa'i khams gang zhe na/ gang lus dang 'brel pa sra ba dang / rtsub pa dang / hrud hrud po dang / mkhrang par gyur pa dang / skra dang / spu dang / sen mo dang / so dang / rdul dang / dri ma dang / pags pa dang /sha dang / chu rgyus dang / rus pa dang / de lta bu la sogs pa gzhan yang lus 'di la gang cung zad ci yod pa de thams cad gcig tu bsdus te sa'i khams zhes bya'o/ /rjes su sdud pa zhes bya ba ni sdud pa dang 'brel pa dang / mnyen pa dang / 'khyud pa dang / gong bur byed pa dang / gsher ba nyid dang /'di lta ste/ mchi ma dang / rngul dang / mchil ma dang / snabs dang / zhag dang / rkang dang / khu chu dang / gcin dang / phyi sa dang / khrag dang / chu ser dang / klad pa dang / pho ba dang / long ka la sogs pa dang / gzhan yang lus 'di la de lta bu'i gsher ba'i rang bzhin yod pa ni chu'i khams zhes bya'o//smin pa zhes bya ba ni smin par byed pa ste / smin pa dang / tshos pa dang / smin 'gyur dang / dro ba dang / me dang / gdung ba dang / tsha ba dang / lham pa dang / gang lus 'di'i nang na zos pa dang / 'thungs pa dang / 'chos pa rnams legs par bde bar 'jug par byed pa gzhan yang gang cung zad ci yang rung ste/de lta bu de thams cad ni me'i khams zhes bya'o/ /dbugs zhes bya ba ni rlung gi khams te/ dbugs ni dbugs 'byung ba dang / dbugs rngub pa dang / tshig dang / smra ba dang / 'gro ba dang / 'ong ba dang / zhum pa dang 'phel ba zhes bya ba ni/ lus ni rgyas pa dang /skyed pa dang / g.yo ba dang / 'gul ba dang / ldeg pa dang / rgyas par gyur pa dang / 'phel ba dang / cham pa dang / lud pa dang / skyigs bu dang / sbrid pa dang / stod kyi rlung dang / smad kyi rlung dang gzhan yang lus 'di'i nang na gang cung zad de lta bu yod pa de thams cad gcig tu bsdus te rlung gi khams zhes bya'o//go 'byed ces bya ba ni sgrib pa med pas go 'byed pa'o/ /sgrib pa ni thogs pa dang bcas pa dang / sgrib pa dang bcas pa'o/ /sbu gu dang / sbubs dang / gseng dang / bu ga ste/ kha'i bu ga dang / rna ba'i bu ga dang / sna'i bu ga dang / mig gi bu ga la sogs pa lus kyi nang gi sbubs 'di ni nam mkha'i khams zhes bya'o//shes dang gzugs kyi rjes 'jug pa/ /rnam shes lnga dang ldan pa dang / /de na nyon mongs can yid kyang / /'di rnams nang gi rkyen yin no/ /de la ming gi rjes su 'jug pa dang / gzugs kyi rjes su 'jug pa ni nang gi rnam par shes ba'i khams zhes bya'o//rnam shes lnga dang ldan pa dang / /zhes bya ba ni rnam par shes pa lnga'i tshogs gang yin pa'o/ /de la nyon mongs can yid kyang / /zhes bya ba ni nyon mongs can gyi yid de/ de dag dang 'byung ba chen po bzhi gcig tu bsdus nas mdung khyim gyi tshul du med dang gzugs zhes bya'o/ /de la ming zhes bya ba gzugs can ma yin pa'i phung po bzhi po tshor ba dang /'du shes dang / 'du byed dang / rnam par shes pa zhes bya ba dang / gzugs zhes bya ba pha ma'i khu chu dang / khrag las byung ba srid pa bar ma'i phung po la brten nas dang por ming dang gzugs mngon par 'grub pa gang yin pa de dang / yid kyi rnam par shes pa zag pa dang bcas pa bsgribs la lung du ma bstan pa'i ngo bo bdag tu rmongs pa la sogs pa nyon mongs pa bzhi'i bdag nyid de/ bdag tu rmongs pa dang / bdag tu nga rgyal ba dang / bdag la lta ba dang / bdag la chags pa zhes bya ba nyon mongs pa bzhi po 'di rnams dang ldan pa nyon mongs pa can gyi yid ces bya ba gcig tu bsdus pa la ming dang gzugs zhes bya'o//khams rnams 'dus par gyur pa las/ /lus ni skye bar 'dod pa yin/ /zhes bya ba ni/ bshad ma thag pa'i khams drug go/ /'dus par gyur pa las zhes bya ba ni ma tshang ba med pa las so/ /lus zhes bya ba ni 'byung bo dang 'byung ba las gyur pa 'dus pa'i gong bu'o//skye ba zhes bya ba na 'byung bar ro/ /'dod ces bya ba ni rjes su dpag pa ste/ 'di la byed pa po la sogs pa ni med do snyam du bsams pa'o/ /de dag bdag dang bdag gi zhes/ /rnam rtog skye ba med par 'dod/ /ces bya ba ni bdag cag gis 'di dag bskyed do snyam pa dang /de rnams kyis bdag cag bskyed do snyam du de rnams gcig la gcig rtog pa mi skye'o/ /de dag yod na skye 'gyur te/ /de dag med na 'byung ba med/ /rkyen rnams med na lus skye bar mi rung gi/ gang gi tshe nang gi rkyen sa la sogs pa/ ma tshang ba med pa de'i tshe 'dus pa las lus skye bar 'gyur la/ma tshang na lus skye bar mi 'gyur ro/ /de rnams bdag sogs mi ldan pa/ /gzhan yang su'i yang ma yin no/ /de la sa'i khams ni bdag ma yin te/ nga dang nga'i snyam ba'i rlom sems pa dang bral ba'i phyir ro/ /sems can ma yin pa ni sems dang / yid dang / rnam par shes pa dang bral ba'i phyir ro//srog ma yin pa ni g.yo ba med pa'i phyir ro/ /skye ba po ma yin pa ni bskyed par bya ba dang / skyed pa po dang bral ba'i phyir ro/ /shed las skyes pa ma yin pa ni/ shed dang bral ba'i phyir ro/ /shed bu ma yin pa ni nang na 'dug pa'i shed bu lta bu med pa'i phyir ro/ /bud med ma yin/ skyes pa ma yin/ ma ning ma yin pa ni nang gi bud med dang / skyes pa dang / ma ning gi bdag nyid med pa'i phyir ro/ /nga dang bdag ma yin zhes bya ba ni/ bdag dang bdag gir rlom pa dang bral ba'i phyir ro/ /gzhan yang su'i yang ma yin no zhes bya ba ni dbang phyug la sogs pa'i byed pa po dang / bya ba dang las dang bral ba'i phyir ro//de bzhin du chu dang / me dang / rlung dang / nam mkha' dang / rnam par shes pa'i khams kyang bdag ma yin/ sems can ma yin/ srog ma yin/ skye ba po ma yin/ shed las skyes pa ma yin/ bud med ma yin/ skyes pa ma yin/ ma ning ma yin/ nga ma yin/ bdag ma yin te/ dbang phyug la sogs pa gzhan yang su'i yang ma yin no zhes shes par bya'o/ /gang gcig ril sogs 'du shes pa/ /de ni ma rig srid gsum sgrib / /de la ma rig pa gang zhe na/ smras pa/ srid gsum sgrib pa zhes bya'o/ /srid pa gsum ni srid gsum ste/ /'dod pa'i srid pa dang /gzugs kyi srid pa dang / gzugs med pa'i srid pa'o/ /de dag kyang sems can dang / snod kyi 'jig rten gyi tha snyad kyis rnam pa gnyis su gzhag go/ /yang khams dang / 'gro ba dang / skye gnas kyi bye brag gis ni rig pa gsum du gzhag go/ /ji ltar zhe na/ smras pa/ de la 'dod pa'i khams gnas ris sum cu rtsa drug gi rnam par rig pa snang ba thun mong dang thun mong ma yin pa'i ngo bo nyid la ril po gcig par rtog cing 'du shes pas 'dzin pa'i phyir ma rig pa zhes brjod do//de la gnas sum cu rtsa drug ni tsha ba'i rang bzhin gyi dmyal ba chen po brgyad dang / grang ba'i rang bzhin gyi dmyal ba chen po brgyad de/yang sos dang / thig nag dang / bsdus 'jom dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa zhes bya ba tsha ba'i dmyal ba brgyad dang / a chu zer ba dang / kyi hud zer ba dang / so tham tham pa dang /chu bur can dang / chu bur rdol ba dang / pad+ma ltar gas pa dang / pad+ma chen po ltar gas pa dang / ut+pal ltar gyes pa zhes bya ba'i grang ba'i rang bzhin yin pa'i phyir grang ba'i dmyal ba brgyad dang / nyi tshe ba dang / nye 'khor ba dang / yi dags rnams kyi gnas dang / dud 'gro rnams kyi gnas dang /lha ma yin rnams kyi gnas dang / gling bzhi dang / bar gyi gling brgyad do/ /de la yi dags rnams kyi gnas ni mya ngam dang / 'brog dgon pa na'o/ /de las gzhan du gyes pa ni grong dang / grong khyer dang / grong rdal dang / dur grod dang / ri dang / 'brog dang / ri 'or dang /gling dang / chu klung dang / rlung dang / mtsho dang / lteng ka dang / rdzing dang / khron pa dang / skyed mos tshal dang / gnas dang / lha khang dang / ma mo'i khyim dang / klu'i gnas dang / mya ngam dang / mtshe'u dang / shing dang / khang stong dang / lam po che dang / klung gi drung dang / dgon pa'i gnas dang /g.yang sa dang / zam pa dang / gzings kyi gnas dang / srang dang / lam po che dang / tshong khang dang / bzhi mdo dang / sum mdo dang / mu stegs bsod nams byed pa'i gnas dang / chu 'dus la sogs par gnas bcas te/ rang gi las kyi dbang gis rnam par rig pa snang ba rnam par rtog pa las byung ba rnams gang mi shes pa 'di ni ma rig pa zhes bya'o//dud 'gro'i gnas ni rgya mtsho chen po'i nang na'o/ /skye ba'i gnas ni bzhi ste/ sgo nga las skye ba dang / mngal nas skye ba dang / drod gsher las skye ba dang / rdzus te skye ba'i skye gnas kyi bye brag gis dud 'gro'i 'gro ba sna tshogs kyi rnam par rig pa'i rnam par snang ba rnam par rtog pa'i bag chags kyis bsgos pa'i rgyud can te/de las gzhan du gyes pa ni bong bu dang / phag pa dang / spre'u dang / glang po che dang / rnga mo dang / rta dang / ri dgas dang / ma he dang / ba lang dang / ba men dang / 'bri dang / khyi dang /wa dang / ne'u le dang / byi ba dang / seng ge dang / stag dang / dred dang / dom dang / sbyang ki dang / byi la dang / nya dang / rus sbal dang / chu srin dang / chu srin byis pa gsod dang / sbrul dang / grog sbur dang / sdom dang / bye ma leb dang / sreg pa dang / grog ma dang / srin bu dang / grog mkhar dang / skyin gor dang / shig dang / 'bu dang / chu na gnas pa dang / ne tso dang / ri skegs dang / khu byug dang / rma bya dang / ngang pa dang / khrung khrung dang / chu skyar dang / khwa dang / bya rgod dang / 'ug pa dang / shang shang te'u dang / 'dab bzangs la sogs pa gnas ma nges pa'i 'gro bas rang gi las kyi bag chags gzhan gyi dbang gis rnam par snang ba'i rnam pa la gnas bcas pa gang mi shes pa 'di yang ma rig pa zhes bya'o//lha ma yin rnams kyi gnas bzhi ni ri rab kyi bang rim bzhi'i nang na'o/ /de nas gzhan du gyes pas gnas bcas pa/ ri dang / 'brog dang / tshal dang / skyed mos tshal dang / klung dang / grong la sogs pa rang gi las kyi dbang las rnam par rig pa snang ba rnam par rtag pa las byung ba'i gnas gzhan dag gang mi shes pa 'di yang ma rig pa zhes bya'o/ /sems can dmyal ba rang gi las kyi dbang dang mthun pa'i rnam par rtog pa las byung ba rnams kyi ni /mtsho chen po ma dros pa nas dpag tshad nyi khri'i 'og na snod kyi rnam par rig pa'i rang bzhin rtsa bar gyur pa'i gnas gzhan mngon par grub bo/ /de las gzhan du nyi tshe ba'i sems can dmyal ba la sogs pa'i snod kyi rnam par rtog pa las byung ba'i ri dang 'brog dang / mya ngam dang /ri sul dang / g.yang sa dang / chu 'gram la sogs pa'i gnas mngon par grub pa gang mi shes pa 'di yang ma rig pa zhes bya'o/ /gling bzhi ni shar gyi lus 'phags dang / lho'i 'dzam bu'i gling dang / nub kyi ba lang spyod dang / byang gi sgra mi snyan no/ /bar gyi gling brgyad ces bya ba ni/shar gyi lus 'phags kyi 'khor lus dang / lus 'phags dang / lho'i 'dzam bu'i gling gi 'khor g.yo ldan dang / lam mchog 'gro dang / nub kyi ba glang spyod kyi 'khor rnga yab dang / rnga yab gzhan dang / byang gi sgra mi snyan gyi 'khor sgra mi snyan dang / sgra mi snyan gyi zla'o//gling dang nye ba'i gling de dag rab tu dbye bas ni rnam pa mang por tha dad de/ rang gi rnam par shes pa'i snang ba rnam par rtog pa'i dbang gis byung ba spros pa sna tshogs pa'i bag chags kyis bsgos pa de lta du mi shes pa gang yin pa 'di yang ma rig pa zhes bya'o/ /lha drug gi sems can gyi snod kyi rnam pa'i rnam par rig pa snang ba'i bye brag thun mong dang thun mong ma yin pa'i ngo bo ma lus pa la gong bur 'dzin pa'i rtog pa'i dbang gis byung ba rnams gang mi shes pa 'di yang ma rig pa zhes bya'o//de la lha'i ris drug ces bya ba ni rgyal chen ris bzhi dang / sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed do/ /gzhan yang gang rig sngags 'chang grub pa dang / drang srong dang / nam mkha' lding dang / dri za dang / mi'am ci dang / lto 'phye chen po dang / klu dang / gnod sbyin la sogs pa dang / rgyu skar dang / gza' dang / skar ma dang / /zla ba dang / nyi ma 'khor dang bcas pa la gzhal med khang dang bcas te/ skye ba dang 'jig pa dang rang gi las kyi dbang gis rnam par rig pa'i rnam par snang ba rnam par rtog pa'i bag chags kyi rjes su song ba rnams dang / sgo nga las skyes pa dang / mngal nas skyes pa dang / drod gsher las skyes pa dang /rdzus te skye ba'i skye gnas kyi bye brag gis dud 'gro'i 'gro ba sna tshogs kyi rnam par rig pa'i rnam par snang ba rnam par rtog pa'i bag chags kyis bsgos pa'i rgyud can bong bu dang / phag dang / spre'u dang / glang po che dang / rnga mo dang / rta dang / ri [(]dgas [,]dwags [)]dang / ma he dang / ba lang dang /ba men dang / 'bri dang / khyi dang / wa dang / ne'u le dang / byi ba dang / seng ge dang / stag dang / dred dang / dom dang / spyang ki dang / byi la dang / nya dang / rus sbal dang / chu srin dang / chu srin byis pa gsod dang / sbrul dang / grog sbur dang / sdom dang / phye ma leb dang /sdig pa dang / grog mo dang / srin bu dang / grog mkhar dang / skyin gor dang / shig dang / 'bu dang / chu na gnas pa dang / ne tso dang / ri skegs dang / khu byug dang / rma bya dang / ngang pa dang / khrung khrung dang / chu skyar dang / khwa dang / bya rgod dang / 'ug pa dang / shang shang te'u dang /'dab bzangs la sogs pa gnas ma nges pa'i 'gro bas rang gi las kyi bag chags gzhan gyi dbang gis rnam par rig pa snang ba'i rnam pa la gnas bcas te/ de ltar na 'gro ba skye gnas tha dad pa du ma'i bye brag gis tha dad pa'i sems can dang snod kyi 'jig rten zhes grags pa thun mong dang /thun mong ma yin pa'i bye brag la sogs pa ril por 'dzin pa las byung ba gcig tu bsdus nas 'dod pa'i khams zhes bya'o/ /yang smras ba/ khams 'gro skye gnas bye brag gis/ /'dod srid rnam pa sum cu drug /lha drug mi ni bcu gnyis dang / /dmyal ba bcu drug dud 'gro dang / / yi dags lha ma yin du bcas/ /de lta bu'i rnam pa rtog pa sna tshogs kyi bag chags las byung ba gang mi shes pa/ yongs su mi chod pa/bsgribs pa mi gsal ba/ khong du ma chud pa/ yongs su mi shes pa mun pa mun nag dang / sngon gyi mtha' dang / phyi ma'i mtha' dang / dbus dang / rgyu dang / las dang / 'bras bu dang / bden pa dang / dkon mchog dang / sdug bsngal dang / kun 'byung dang / 'gog pa dang / lam mi shes pa gang yin pa de ma rig pa ste/ khams gsum gyi sgrib pa zhes bya'o/ /de nyid kyi phyir mdo las/ khams drug po 'di dag nyid la gang gcig pur 'du shes pa dang /ril por 'du shes pa dang / rtag par 'du shes pa dang / ther zug tu 'du shes pa dang / bde bar 'du shes pa dang / bdag tu 'du shes pa dang / sems can du 'du shes pa dang / srog tu 'du shes pa dang / skyes bur 'du shes pa dang / gang zag tu 'du shes pa dang / shed las skyes su 'du shes pa dang /shed bur 'du shes pa dang / nga zhes bya ba dang / bdag gi zhes bya bar 'du shes pa ste/ 'di lta bu la sogs pa mi shes pa sna tshogs pa 'di ni ma rig pa zhes bya'o zhes bstan to/ /de la sa'i khams ni rdzas brgyad yin pa'i phyir gcig pur 'du shes pa mi rung ngo / /rdul phra mo rnams ni phan tshun bsags pa'i bdag nyid ma yin pa'i phyir ril por 'dzin par mi rung ngo //rgyu rkyen 'brel par 'jug pa'i phyir rtag par 'du shes par mi rung ngo / /yun ring du mi gnas pa'i phyir ther zug tu 'du shes pa med do/ /skyes ma thag tu 'jig pa'i phyir brtan par 'du shes pa med do//'du byed dang 'gyur ba'i sdug bsngal dang ldan pa'i phyir bde bar 'du shes pa med do/ /mi gtsang ba'i rdzas rnam pa sum cu rtsa drug 'dus pa'i phyir gtsang bar 'du shes pa med do/ /'byung ba dang / 'byung ba las gyur pa'i rdzas du ma yin pa'i phyir bdag tu 'du shes pa med do/ /sems dang sems las byung ba'i byin gyis brlabs pa'i phyir sems can du 'du shes pa med do//bya ba med pa'i phyir srog tu 'du shes pa med do/ /yang 'gro ba dang 'ong ba dang bral ba'i phyir gang zag tu 'du shes pa med do/ /nga dang nga yir rlom sems dang bral ba'i phyir shed las skyes dang / shed bur 'du shes pa med do//nga zhes bya ba dang / bdag gi zhes bya ba la sogs pa dang bral ba'i phyir shed las skyes la sogs par 'du shes pa mi rigs so/ /de ltar na khams drug po mi rtag pa la sogs pa'i rang gi ngo bo de dag mi shes pa gang yin pa 'di ni ma rig pa zhes bya'o/ /de la ma rig pa zhes bya ba ni rig pa ma yin pas ma rig pa'o//rig pa med pa ni ma yin te/ med pa ni ci yang ma yin no/ /ma rig pa rig pa las gzhan du rig pa gzhan nyid yin no/ /de bas na med pa dgag pa yang ma yin/ gzhan nyid kyang ma yin no/ /'o na ci zhe na/ 'gal ba yin te/ ma rig pa ni ma rig pa ma yin pa/ rig pa'i chos dang 'gal ba la ma rig pa zhes bya'o//gzhan 'phrul dbang byed kyi lha de'i gong yan chad gnas bcu bdun gyi rnam pa'i rnam par rig pa snang ba ni gzugs kyi khams so/ /de 'byung ba ni sems can dang / snod kyi 'jig rten gyi ngo bo thun mong dang thun mong ma yin pa'i bye brag rnam par rtog pa'i dbang gis byung ngo //gnas dag ni bsam gtan bzhi bsgom pa rnam pa gsum dang ldan pas tshangs ris la sogs pa bcu gnyis dang / bsam gtan bzhi pa spel mar bsgom pa dang ldan pas/ gnas gtsang ma'i gnas lnga'o/ /de la dang po ni tshangs ris dang / tshangs pa'i mdun na 'don dang / tshangs pa chen po'o/ / gnyis pa ni 'od chung dang / tshad med 'od dang / 'od gsal lo/ /gsum pa ni dge chung dang / tshad med dge dang / dge rgyas so/ /bzhi pa ni sprin med dang / bsod nams skyes dang / 'bras bu che'o/ /gnas gtsang ma'i ni mi che ba dang / mi gdung ba dang / shin tu mthong dang / gya nom snang dang /'og min no/ /bsam gtan bzhi'i sa rtog pa dang bcas pa dang / rtog pa med pa dang / bde ba dang / btang snyoms dang / mtshungs par ldan pa dang / bsam gtan khyad par can dang / mi lcogs pa med pa'i sa 'di dag gang mi shes pa dang / ma mthong ba dang / mngon par ma rtogs pa 'di yang ma rig pa zhes bya'o//gang yang ming tsam gyi 'du shes snang ba'i rnam pa'i rnam par rig pa'i rnam par rtog pa las byung ba gzugs med pa'i snyoms par 'jug pa bzhi po nam mkha' dang / rnam shes dang ci yang med pa dang / 'du shes med 'du shes med min skye mched rnams gang mi shes pa dang /mngon par ma rtogs pa dang / ma mthong ba 'di yang ma rig pa zhes bya'o/ /de nyid kyi phyir/ bcom ldan 'das kyis/ bsam gtan bzhi dang mi lcogs med/ /khyad par can gyis rnams dang / /gzugs med snyoms par 'jug pa yi/ /'du shes tha dad bzhi rnams dang / / rnam dag rnams kyi sa bzhi dang / /sa bcu bstan pa'i bdag nyid rnams/ /dbang phyug chen po thob pa'i gnas/ /de ni khams gsum ma gtogs pa/ /rang sems rnal 'byor rnal 'byor dbang / /rnam par dag pa 'byung ba'i sa/ /ye shes ting nge 'dzin dang gzugs/ /dbang dang so sor rig pa can//zhes gsungs te/ de la yang gang nyon mongs pa can ma yin pa'i mi shes pa dang / ma mthong ba dang / mngon par ma rtogs pa dang / khong du ma chud pa bsgom pa'i lam gyi ye shes skye ba la gegs byed pa de yang ma rig pa zhes bya'o/ /de lta bas na ma rig pa'i mun pa'i rab rib kyi ling thog gis mig bsgribs pa'i phyir/yul rnams la gzugs dang / sgra dang / dri dang / ro dang / reg bya dang / chos kyi rnam pa'i rnam par rig pa/ phyin ci log gi rnam par rtog pa'i bag chags snang ba nyid kyis rtag pa dang / bdag dang / bde ba dang / gtsang ba la sogs par phyin ci log pas 'dod chags dang /zhe sdang dang gti mug rgyas pa'i phyir 'dod chags skyes pa'i las kyang mngon par 'du byed do/ /'dod pa la gegs byed pa dang ldan pa'i phyir/ zhe sdang las skyes pa'i las kyang mngon par 'du byed do/ /lam ma yin pa la lam du 'du shes pa dang ma dag pa la dag par 'du shes pa dang /grol ba ma yin pa la grol bar 'du shes pa'i phyir gti mug las skyes pa yang mngon par 'du byed do/ /de gnyis las bzlog pa nyid kyis mi g.yo ba'i las kyang mngon par 'du byed do/ /rkyen de dang / gzhi des ma rig par chags pa dang / zhe sdang dang / gti mug dang /nga rgyal dang / lta ba dang / the tshom dang / phrag dog dang / ser sna'i rjes su song ba'i phyir lus kyi las mi dge ba bdag dang shes pa yongs su bskyab pa'i ched du srog gcod pa dang / ma byin par len pa dang / 'dod pas log par g.yem pa dang / myos pa'i rgyu chang 'thung pa gzhan du mi 'dod pa'i rnam par smin pa mngon par 'grub pa yang mngon par 'du byed do//ngag gi brdzun dang / phra ma dang / tshig rtsub po dang / don med par smras pa mi 'dod pa'i rnam par smin pa mngon par 'grub pa yang mngon par 'du byed do/ /yid kyi las brnab sems dang / gnod sems dang /log par lta ba dang mtshungs par ldan pa yang mngon par 'du byed do/ / lus dang / ngag dang / yid kyi nyes par spyod pa'i chos yang dag par blangs pa'i rgyus sems can dmyal ba dang / yi dags dang / dud 'gro dang / lha dang / mi dang / lha ma yin rnams su skye bar 'gyur ro/ / de nyid kyi phyir mi shes pa'i yul 'dod chags dang / zhe sdang gti mug mngon du byed/ /ces bya ba smos te/ de la mi shes pas zhes bya ba ni ma rig pa'i rkyen gyis 'du byed kyi dngos po mngon par 'du byed pas lhag par bsgom pa'i 'du byed kyi dngos po so sor rnam par rig pa'i ngo bo'i rnam par shes pa mngon par 'grub bo//de nyid kyi phyir/ de las 'du byed dngos po ni/ /rnam par rig pa'i rnam shes 'byung / /zhes bya ba smos te/ de las zhes bya ba ni/ 'du byed la brten nas so/ /dngos po ni rnam par rig pa'i zhes bya ba ni rnam par rig par byed pas rnam par rig pa ste/ rnam par shes pa la las kyi bag chags 'jog pa zhes bya ba'i tha tshig go//rnam shes lhan cig 'byung ba ni/ /gzugs can ma yin phung po bzhi/ /zhes bya ba la/ rnam shes lhan cig 'byung ba zhes bya ba ni rnam par shes pa'i rgyu las byung ba'o/ /gzugs can ma yin phung po bzhi/ /zhes bya ba ni rnam par shes pa'i phung po bzhi ste/tshor ba dang / 'du shes dang / 'du byed dang / rnam par shes pa zhes bya ba rnams so/ /gzugs can ma yin zhes bya ba ni 'byung ba dang 'byung ba las gyur pa bsags pa'i rnam pa dang bral ba'i phyir yin gyi/ rtag pa ni ma yin no/ /'o na ci zhe na / sems dang sems las byung ba'i ngo bo dag yin no//phung po nyid ni rdzas du ma'i bdag nyid yin pa'i phyir ro/ /gzugs ni khams bzhi po pha ma'i khu chu dang / khrag las byung ba sa dang / chu dang / me dang / rlung gi khams te/ de dag bsdus nas rnam par shes pa'i rkyen gyis ming dang gzugs zhes bya'o//ming dang gzugs la brten nas ni/ /dbang po skye mched 'byung bar 'gyur/ /zhes bya ba ni/ gang sngon dbang po la sred pa dang bcas pa'i bag chags ming dang gzugs la bzhag pa'i ming dang gzugs des rkyen byas nas mig la sogs pa'i dbang po drug mngon par 'grub pas dbang po skye mched drug 'byung bar 'gyur zhes bya'o//dbang po skye mched sgo drug ni rnam par shes pa drug gi rten du gyur pa ste/ gzugs la sogs pa'i yul dmigs pa'i rnam par rig pa snang ba 'dzin pa'i rang gi ngo bo rnams mngon par bsgrubs pas bcom ldan 'das kyis ming dang gzugs la brten pa'i dbang po rnams ni skye mched drug go zhes gsungs so//yul dang dbang po rnam par shes / /'dus pa las ni reg pa 'byung / /zhes bya ba ni dbang po skye mched drug po rkyen du byas nas yul la dbang po dang / rnam par shes pa 'dus pa'i phyir reg pa ste/ dbang po dang rnam par shes pa dag gzugs la sogs pa'i yul rnams la reg pa lta bur bar ma chod nyid du 'jug ste/'di la reg pa ni 'ga' yang med do/ /bsags pa ma yin pa rnam par shes pa lnga ni tshogs bsags pa yul dang / dbang po rnams dang lhan cig gcig tu 'gyur du 'ong bas reg pa lta bu yin gyi reg pa ni ma yin no zhes bya'o//de nyid kyi phyir bcom ldan 'das kyis kyang / chos gsum 'dus pa ni reg pa'o zhes gsungs te/ dmigs pa snang ba'i rnam par rig pa skye ba'o/ /de bzhin du reg pa'i ro myang ba la 'chums pa la/ reg pa'i tshogs drug la brten te tshor ba'i tshogs drug skye'o/ / de nyid kyi phyir/ reg byung tshor bar shes bya ste/ /zhes bya ba smos so/ /tshor ba ni reg pas bskyed pa ste/ reg pa'i rgyu las 'byung zhes bya ba'i tha tshig go/ /de la tshor ba zhes bya ba ni des tshor bar byed pas na tshor ba ste/ tshor ba ni myong ba'o/ /bde ba dang sdug bsngal ba dang / bde ba yang ma yin/sdug bsngal ba yang ma yin pa dang / yid bde ba dang / yid mi bde ba'i bye brag la tshor bar snang ba'i rnam pa'i rnam par rig pa rnam par rtog pa'i dbang gis byung ba yul dang / dbang po dang rnam par shes pa gsum tshan drug gi bye brag gis tshor ba'i tshogs drug skye bas bcom ldan 'das kyis reg pa dang lhan cig skyes pa ni tshor ba'o zhes gsungs so//de bzhin du tshor ba'i ro myang ba cung zad la chags shing mngon par zhen pa'i bdag nyid ni tshor ba'i rgyu can gyi sred pa zhes bya ba sred pa skye ste/ de nyid kyi phyir / de bzhin tshor las sred pa 'byung / /zhes bya ba smos so/ /sred pa zhes bya ba ni khams gsum pa'i 'dod chags te/chags pa dang / lhag par zhen pa dang / mngon par 'dod pa dang / zhen pa dang / mi 'bral bar 'dod pa dang / dga' ba dang / sdug pa zhes bya ba'i tha tshig go/ /de yang dbang po dang / yul dang / rnam par shes pa'i bye brag gis sred pa'i tshogs drug tu rnam par gzhag ste/sred par snang ba'i rnam pa can gyi rnam par rig pa'i dbang gis byung ba'i sred pa'i tshogs drug skye bas bde bar gshegs pas tshor ba la zhen pa ni srid pa'o zhes gsungs so/ /de ltar lhag par zhen pa'i sred pa 'phel pa ni len pa'o/ /de nyid kyi phyir/ sred 'phel nye bar len pa ste//zhes bya ba smos so/ /sred pa ni chags pas kun nas 'khyud pa 'bral bar mi 'dod pa'i rgyu'o/ /dge ba dang mi dge ba dang lung du ma bstan pa la sogs pa ni len pa ste/ nye bar len pa'i phyir nye bar len pa'o/ /nye bar lnga pa'i len pa ni nye bar len pa'o/ /rang gi las ji ltar blangs pa'i lam brgyags kyi gzhan gyi dbang gis len pa las skyes pa yang srid pa zhes bya'o//de nyid kyi phyir/ len pa las ni srid pa 'byung / /zhes bya ba smos so/ /rang gi las kyi bag chags ji lta ba snang ba'i rnam pa can gyi rnam par rig pa rnam par rtog pa'i dbang gis byung ba yang srid pa mngon par bsgrub pa'i phyir srid pa zhes bya ste yang 'byung ba'i phyir ro//rang gi las ni bag chags ji lta ba'i dbang gis zhes bya ba ni dge ba dang mi dge ba dang / mi g.yo ba'i las kyi bag chags kyi dbang gis zhes bya ba'i tha tshig go/ /de ltar na las kyi srid pa ni rgyu yin no/ /srid las phung 'byung skye ba ste / /las kyi srid pa'i rgyu de las phung po 'byung ba ni skye ba zhes bya'o//de la phung po 'byung ba zhes bya ba ni phung po skye ba ste/ khams dang skye mched thob pa yang bsdus te skye ba zhes brjod do/ /de la phung po zhes bya ba ni rdzas du ma bsags pa'i phyir spungs pa'i don ni phung po'i don to/ /yang na mi rtag pa nyid kyis 'joms pa'i phyir te/skyes ma thag tu mi rtag pa nyid kyi srin pos za bar byed/ 'joms par byed/ 'jig par byed ces bya ba'i tha tshig go/ /de ltar mngon par grub na skye ba'i rgyus skye ba'i rkyen gyis rga ba nyid 'grub bo/ /de nyid kyi phyir/ de bzhin skye las rga ba'o/ /zhes bya ba smos te/ skye ba'i rkyen gyis mngon par bsgrub pa'i phung po rnams rga ba ni rnyings pa nyid de/nyam chung bar byed pa dang / spyi cer ba dang / mgo skya ba dang / gnyer mas gang ba dang / sgur ba dang / sgu ba dang / kyor kyor po dang / sgra ngar ngar po nyid dang / 'khar ba la brten pa dang / spyod pa mi gsal ba dang / dbang po nyams pa dang /dran pa nyams pa zhes bya ba de lta bu ni skye ba'i rkyen gyis mngon par bsgrub pa'i phung po rnams rang gi las kyi rnam pa can gyi rnam par rig pa snang ba rnam par rtog pa'i bag chags kyi dbang gis bskyed pa'i rnyings pa ni rga ba zhes bya'o/ /de ltar rga bas rgas par gyur pa'i phung po gzhan du 'gyur ba ni 'chi ba zhes bya'o//de nyid kyi phyir smras pa/ de bzhin rga ba'i phung med pa/ /de ni 'chi ba zhes brjod do/ /de la rga ba zhes bya ba ni shig shig por gyur pa rga ba'i rkyen gyis 'chi ba 'byung ngo / /de la 'chi ba zhes bya ba ni phung po gzhan du gyur pa ste/ 'chi ba dang / shi ba dang / dus byed pa dang / 'jig rten pha rol du 'gro ba dang /'pho ba dang / 'gro ba dang / phung po gyes pa dang / phung po 'jig pa dang / tshe zad pa dang / srog gi dbang po 'gags pa zhes bya ba de lta bu la sogs pa bsdus pa ni rga shi'o/ /'chi bar snang ba'i rnam pa can gyi rnam par rig pa'i rnam par rtog pa'i dbang gis byung ba/phung po 'jig pa 'chi ba ste/ gnas skabs tha ma nyal ba'i tha ma rnam par shes pa 'pho ba/ drod yal ba/ tshe dang bral ba/ ris mthun pa 'dor ba/ srid par 'pho ba'o/ /gang yang rnam par shes pa tha ma'i gnas skabs na gnad 'chad pa la sogs pas bskyed pa rnams rnam pa du mar bla ba dang /blang ba dang / nyam chung ba dang / yongs su rnyings pa dang / zhen pa dang / 'gag 'gag po dang / gdong mdog ngan pa dang / mgon med pa dang / rang gi las kyi rnam par rtog pa las byung ba'i gshin rje'i mi de dag gis phan tshun khrid pa'i rnam par snang ba'i rnam par rig pa dang /srog gi lhag ma cung zad tsam lus pa las dbugs brtsegs pa 'byung ba dang / mi dga' ba dang / 'gul ba dang / rkan yongs su bskams pa dang / sna zhom pa dang / rdul dang / brlan dang / dri ma dang / rang gi gcin dang / phyi sa dang / kha chu lus la chags shing gos pa dang /grogs med par mun nag chen po dang / g.yang sa dang / ri dang / bog ri dang / nags tshal thibs po dang / khang stong dang / khyim dang / /zhal med khang dang / steng khyams dang / khang pa brtsegs pa dang / me 'obs dang / mtsho chen po dang / sog ma'i phung por 'gro ba lta bu'i sems phyin ci log tu gyur pa'i phung po gzhan len pa ni 'chi ba zhes bya'o //rmongs pa 'chi las mya ngan te/ /zhes bya ba ni srid pa dang bcas pa'i nang gi gdung ba ni mya ngan to/ /nang gi gdung ba zhes bya ba ni sems yongs su gdung ba'o/ /mya ngan byed pa'i phyir mya ngan te/ da ni bdag dga' ba'i dngos po dang /sdug pa'i dngos po dang bral bar 'gyur ro snyam du mi dga' zhing gdungs pas na mya ngan zhes bya'o/ /las ji ltar 'phags pa'i rnam par snang ba'i rnam par rig pa mngon du gyur pa ni dga' ba dang / 'jigs pa dang / mi dga' ba'i rnam pas bskyed pa gnad 'chad pa'i sdug bsngal dang /sems blong bar gyur pa'i mya ngan las gzhan du bslangs pa kye ma kyi hud ci gang gis/ ji ltar/ gang du skyabs su gshegs shing gzigs/ /'dir 'gro'o/ /bdag ni song ngo / /blangs so/ /brgyab bo/ /shi'o/ /zos so/ zhig go/ /rab tu zhig go//kyi hud ma gcig /kyi hud pha gcig /phu nu po/ che zhe/ bu/ bu mo/ chung ma zhes rnam pa mang por bla ba phyin kyi log gi tshig sgrogs pas bskyed pa'i rdol pa'i gdung ba ni smre sngags 'don pa'o/ /de nyid kyi phyir/ mya ngan las ni brjod pa gang / /de ni smre sngags 'don zhes bya/ /zhes bya ba smos so//smre sngags 'don pa las byung ba/ /rnam par shes pa'i tshogs lnga yi/ /sim pa ma yin sdug bsngal brjod/ /lus kyi bde ba'i bgegs pa'o/ /smre sngags 'don pa las byung ba/ /zhes bya ba ni/ smre sngags 'don pa las so/ /rnam par shes pa lnga'i tshogs dang ldan pa zhes bya ba ni yid du 'ong ba'i gzugs dang /sgra dang / dri dang / ro dang / reg bya'i rjes su dran pas nye bar bskyed pa/ rnam par shes pa'i tshogs lnga'i sdug bsngal nye bar gnod par byed pa/ sim pa ma yin pa nyams su myong ba/ lus kyi bde ba'i gegs byed pa'i bdag nyid sdug bsngal gyi rnam pa snang ba'i rnam par rig pa'i dbang gis byung ba ni sdug bsngal zhes brjod do//yid la byed pa'i sdug bsngal ni/ /yid la nye bar gnod byed pa/ /de yid mi bder zhes bya ste/ /gang gzhan nye ba'i nyon mongs rgyu/ /yid kyis bde ba dang / sdug bsngal rjes su dran nas sngon rgod pa dang /dga' ba dang / rtses pa dang / chas pa dang / 'phyar g.yeng byas pa la sogs pa tshul bzhin ma yin pa yid la byed pa dang mtshungs par ldan pa yid kyi sdug bsngal yid mi bde ba la sogs pa nye bar nyon mongs pa skye bas/ /gang gzhan nye ba'i nyon mongs rgyu/ /zhes bya ba smos te/gang gzhan yang 'di lta bu la sogs pa nye ba'i nyon mongs pa de dag ni nyon mongs zhes kyang bya/ 'khrug pa zhes kyang bya la/ de la srid pa'i yan lag bcu gnyis 'di dag nyid kyi ming don dang mthun par bstan pa'i phyir/ /mun mngon ming dang gzugs dang ni/ /skye mched reg pa skom pa'i phyir//zhes bya ba smos so/ /de la mun pa'i phyir ma rig pa'o/ /mngon zhes bya ba ni mngon par 'du byed pa'i phyir 'du byed rnams so/ /gzhol ba'i phyir ming ngo / /gzugs kyi phyir gzugs so/ /skye mched reg myong skom pa'i phyir zhes bya ba ni skom pa'i phyir skye mched do//reg pa'i phyir reg pa'o/ /myong ba'i phyir tshor ba'o/ /skom pa'i phyir sred pa'o/ /sred las nye dang yang 'byung dang / /smin dang 'jig dang mya ngan phyir/ /nye bar len pa'i phyir len pa'o/ /yang srid pa skyed pa'i phyir srid pa'o/ /'byung ba'i phyir skye ba'o/ /smin pa'i phyir rga ba'o//'jig pa'i phyir 'chi ba'o/ /mya ngan byed pa'i phyir mya ngan to/ /tshig sogs lus la gnod pa dang / /sems yid mi bde phyir dang ni/ /nyon mongs phyir na ming don mthun/ /go rims bzhin du bstan pa yin/ /tshig gis smre ba'i phyir smre sngags 'don pa'o/ /lus la gnod pa'i phyir sdug bsngal lo//sems la gnod pa'i phyir yid mi bde ba'o/ /nyon mongs pa'i phyir nyon mongs pa'o/ /yang de kho na ma shes pa/ /zhes bya ba la sogs pa ni yang brtags pa'i don rab tu bstan pa'i phyir smras pa ste/ yang de kho na yongs ma shes/ /ma rig la sogs go rims bzhin//snga ma snga ma las phyi ma/ /skye ba dag tu yang dag brjod/ /de kho na yongs mi shes zhes bya ba ni ma rtogs pa dang log par rtogs pa ste/ tshul bzhin ma yin pa yid la byed pa'i rgyus mi shes pa ni ma rig pa'o/ /ma rig pa yod na 'du byed sna tshogs mngon par bsgrub ste/ bsod nams su nye bar 'gro ba dang /bsod nams ma yin par nye bar 'gro ba dang / mi g.yo bar nye bar 'gro ba'o/ /de la bsod nams su nye bar 'gro ba'i 'du byed rnams las bsod nams su nye bar 'gro ba'i rnam par shes pa nyid du 'gyur ro/ /bsod nams ma yin par nye bar 'gro ba'i 'du byed rnams las bsod nams ma yin par nye bar 'gro ba'i rnam par shes pa nyid du 'gyur ro//mi g.yo bar nye bar 'gro ba'i 'du byed rnams las mi g.yo bar nye bar 'gro ba'i rnam par shes pa nyid du 'gyur te/ 'di ni rnam par shes pa'i rkyen gyis ming dang gzugs zhes bya'o/ /ming dang gzugs rnam par 'phel bas skye mched drug gi sgo nas bya ba byed pa rnams 'byung ste/de ni ming dang gzugs kyi rkyen gyis skye mched drug ces bya'o/ /skye mched drug po las reg pa'i tshogs drug 'byung ste/ de ni skye mched drug gi rkyen gyis reg pa zhes bya'o/ /ji lta bur reg pa 'byung ba de lta bur tshor ba 'byung ste/de ni reg pa'i rkyen gyis tshor ba zhes bya'o/ /tshor ba'i bye brag de dag myong ba dang / mngon par dga' ba dang / lhag par zhen nas 'dug pa de ni tshor ba'i rkyen gyis sred pa zhes bya'o/ /myong ba dang lhag par zhen pa las bdag sdug pa'i ngo bo dang / bde ba'i ngo bo dang bral bar ma gyur cig snyam du gang gi phyir zhing smon pa 'di ni sred pa'i rkyen gyis len pa zhes bya'o//de ltar smon cing yang srid pa bskyed pa'i las lus dang / ngag dang / yid kyis kun nas slong ba de ni len pa'i rkyen gyis srid pa zhes bya'o/ /las de las skyes pa'i phung po rnams mngon par 'grub pa gang yin pa de ni srid pa'i rkyen gyis skye ba zhes bya'o//skyes nas mngon du grub pa'i phyir phung po rnams kyi 'phel ba yongs su smin pa dang / 'jig par 'gyur ba de ni skye ba'i rkyen gyis rga shi zhes bya'o/ /yan lag snga ma snga ma rnams ni phyi ma phyi ma skye ba rnams kyi rgyu nyid yin pas de dag ni phyi ma 'byung ba'i phyir rkyen kho na ste/de ltar rten cing 'brel par 'byung ba'i yan lag bcu gnyis po 'di ni rgyu gzhan dang gzhan las byung ba'o/ /yan lag bcu gnyis gsum 'jug pa/ /'di ni rtag chad thogs med skye/ /chu bo'i rgyun bzhin 'jug pa yis/ /thog ma med pa'i dus can 'jug / mi rtag pa ma yin pa de ni rgyun du gnas pa'i phyir ro/ /'dus byas ma yin pa de ni 'du byed dang bral ba'i phyir ro/ /sems pa po yod pa ma yin pa de ni sems dang bral ba'i phyir ro/ /rkyen las byung ba ma yin pa ni rkyen dang bral ba'i phyir ro/ /zad pa'i chos ma yin pa ni bsags pa dang bral ba'i phyir ro//'gog pa'i chos ma yin pa ni skye ba dang / gnas pa dang / 'jig pa dang bral ba'i phyir ro/ /thog ma med pa'i dus nas zhugs pa ni dus kyi mtshams yongs su chad pa dang bral ba'i phyir ro/ /klung gi rgyun bzhin du rgyun 'byung bas rgyun ma chad par 'jug pa'o// //'phags pa sA lu ljang pa'i mdo/rgya cher bshad pa/ bam po bzhi pa ste tha ma'o/ /rten cing 'brel par 'byung ba 'di chu bo'i rgyun bzhin du rgyun mi 'chad par rjes su 'jug mod kyi/ 'on kyang bzhi po 'di dag ni rgyu ni sdud par byed pa ste/ yan lag bzhi ni yan lag bcu gnyis pa'i rten cing 'brel pa zhes bya ba sdud par byed pa'i rgyur 'gyur ro//de'i phyir bzhi gang zhe na zhes gsungs so/ /ma rig sred las rnam par shes/ /de dag go rims bzhin du bshad/ /ma rig pa dang / sred pa dang / las dang / rnam par shes pa zhes bya ba go rims bzhin no/ / rgyu las rnam shes sa bon te/ /rnam par shes pa ni sa bon gyi rang bzhin gyi rgyu byed do/ /las ni zhing du gsungs pa yin/ /las ni zhing gi rang bzhin gyi rgyu byed do zhes gsungs so/ /ma rig pa dang / sred pa ni nyon mongs pa'i rang bzhin gyi rgyu byed do/ /las dang nyon mongs rnam par shes//sa bon nyid du nyer gnas la/ /las dang nyon mongs pa dag ni sa bon rnam par shes pa skyed par byed do/ /de la/ las ni sa bon rnam shes kyi/ /zhing gi bya ba yang byed do/ /sred pas rnam shes zhes bya ba'i/ /sa bon de ma thag rlan byed/ /ma rig sa bon rnam par shes/ / brlan pas bsten pa 'debs par byed/ /las dang sred dang ma rig pa/ /zhing dang brlan dang 'debs byed rnams/ /rnam par shes la 'di bya dang / /rnam shes bdag 'dis snyam pa med/ /de la las kyang 'di snyam du/ /mi sems so zhes bya ba la sogs pa ni las kyang 'di snyam du/ /bdag gis sa bon rnam par shes pa'i zhing gi bya ba yang bya'o snyam du mi sems pa nyid do//sred pa yang zhes bya ba la sogs pa ni 'di ltar sred pa yang 'di snyam du bdag gis sa bon rnam par shes pa brlan pa'i bya ba bya'o snyam du mi sems so/ /ma rig pa yang zhes bya ba la sogs pa ni ma rig pa yang 'di snyam du bdag gis sa bon rnam par shes pa gdab bo snyam du mi sems so//rnam par shes pa yang zhes bya ba la sogs pa ni 'di snyam du bdag ni rkyen 'di dag gis bskyed do snyam du mi sems te/ 'on kyang sa bon rnam par shes/ /las dang nyon mongs gnas pa ni/ /sa bon rnam shes zhes brjod pa/ /ma rig lud kyis bran pa dang //sred pa'i chu yis bsten na ni/ /ma rig lud ces bya ba ni lud dang 'dra bas lud de thams cad kyi rjes su 'gro ba'i phyir ro/ /lud kyis bran pa zhes bya ba ni lud kyis bkab pa'o/ /sred pa'i chu yis bsten na ni/ /zhes bya ba ni sred pa nyid chu'o/ /bsten na zhes bya ba ni brlan na'o//rgyu las ming dang gzugs kyi ni/ /myu gu skye ba'ang snang bar 'gyur/ /zhes bya ba ni rgyu dang rkyen tshogs pa skye ba ni ming dang gzugs kyi myu gu mngon par 'grub par 'gyur ro/ /ming dang gzugs kyi myu gu dang yang zhes bya ba la sogs pa ni/ rang gzhan gnyis ka la sogs pas/ ming gzugs 'di dag 'byung min gyi //ming dang gzugs kyi myu gu 'di dag ni rang dang gzhan gnyis ka la sogs pas bskyed pa ma yin no/ /'o na ji lta bu yin zhe na/ smras pa/ pha dang ma ni phrad pa dang / /dus rnams mi 'gal nyid las so/ /pha dang ma ni phrad pa dang / /zhes bya ba la sogs pa ni pha dang ma kun tu chags par gyur pa dang /'dus pa dang / ma rungs par gyur pa ste/ bu 'chags par nus pa dang / dus dang ldan pa'o/ /nyi ma gsum 'das te khrag ngan pa dang bral ba de ni/ bud med rnams kyi dus su brjod de/ de'i tshe skyes pa dang yang phrad/ khu ba dang khrag dang yang ldan/dri za bdag nyid kyang sems kyang sems phyin ci log tu gyur te/ pha dang ma'i bya ba la mos na mngal du skye ba'i rim gyis nur nur po dang / mer mer po dang / nar nar po dang / gor gor bo dang / rkang lag 'gyur ba'i gnas skabs las 'das te skye ba na/ byis pa dang / gzhon nu dang / bar ma dang /dar la bab pa dang / rgan po la sogs pa'i gnas skabs bcur 'gyur ro/ /de nyid kyi phyir yang smras pa/ myong ba cung zad 'brel pa ni/ /sa bon rnam par shes par brjod/ /ma yi mngal du rim bzhin 'phel/ /ming gzugs myu gu skyed par byed/ /'on kyang pha de dang ma phrad pa dang / zla mtshan dang ldan pa dang / rkyen gzhan yang chogs pa na ma'i mngal du myong ba dang ldan pa'i sa bon rnam par shes pa ming dang gzugs kyi myu gu mngon par 'grub bo/ /rkyen rnams ma tshang med pa dang / /rgyu rnams 'gal ba ma yin las/ /sgyu ma bdag med 'dzin med par/ /skye ba yang ni yod pa yin/ / de nyid kyi phyir bdag po med pa'i chos bdag gi med pa dang / 'dzin pa med pa dang / sgyu ma'i mtshan nyid kyi rang bzhin dag la rgyu dang rkyen ma tshang pa med pa'i phyir zhes gsungs so/ /bdag po med pa zhes bya ba ni nang gi byed pa'i skyes bu la sogs pa mi dmigs pa'i ngo bo yin mod kyi/de la mngon par zhen phas bskyed pa gang kun tu 'dzin pa'o/ /chos zhes bya ba ni phung po dang / khams dang / skye mched kyi ngo bo nyid do/ /bdag gi zhes bya ba ni bdag dang bdag gi dang bral ba'o/ /'dzin pa med pa zhes bya ba ni dbang phyug la sogs pa yongs su 'dzin pa mi dmigs pa'i phyir ro//sgyu ma'i mtshan nyid kyi rang bzhin dag la zhes bya ba ni ji ltar sgyu ma ni med pa yin yang tha snyad rnam pa sna tshogs sgrub par byed pa de bzhin du sgyu ma'i rang bzhin gyi chos thams cad la bya ba la sogs pa rnam pa sna tshogs dmigs par 'gyur ro/ /rgyu dang rkyen 'dus pa ma gtogs par rgyu dang rkyen la sogs pa'i chos cung zad kyang skye ba'am 'jig par mi 'gyur te/ji ltar yang rgyu dang rkyen ma tshang ba'i phyir dngos po rnams skye ba med pa de khong du chud par bya ba'i phyir dper/ mig gi rnam par shes pa yang / /rgyu lnga po yis 'byung ba ste/ /zhes bya ba smos te/ 'di lta ste/ mig gi rnam par shes pa ni rgyu lngas 'byung ste/lnga gang zhe na zhes bya ba la sogs pa ni/ mig dang gzugs dang de bzhin snang / /nam mkha' de bskyed yid la byed/ /ces bya ba de nyid kyi phyir mig la brten pa dang / gzugs dang / snang ba dang / nam mkha' dang / de bskyed pa yid la byed pa la yang zhes bya ba gsungs so//de la mig ces bya ba ni gzugs blta bar bya ba la mig gi dbang po ma tshang ba med par 'gyur ba'o/ /de nyid kyi phyir mig ni rnam par shes pa'i rten gyi bya ba byed do zhes gsungs so/ /snang ba zhes bya ba ni zla ba dang / skar ma dang / me dang / sman dang / nor bu'i 'od rnams te mngon par bya ba la snang ba yang nye bar gnas par 'gyur ba'o//nam mkha' yang mi sgrib pa nyid kyis ma tshang bar ma gyur pa'o/ /de bskyed pa la yid la byed pa yang bsam pa'i bya ba la mtshang bar ma gyur pa'o/ /lnga po ma tshang med pa las/ /mig gi rnam par shes pa 'byung / /mig gi rnam par shes pa'i rkyen de dag las gang yang rung ba zhig med na yang mig gi rnam par shes pa 'byung bar mi 'gyur gyi yod na 'byung bar 'gyur ro//de dag bdag gis de skyed ces / /rnam rtog skye med ji lta bar/ /zhes bya ba ni de la mig gi dbang po ni 'di snyam du mig gi rnam par shes pa'i rten gyi bya ba bya'o snyam du mi sems so//gzugs kyang 'di snyam du bdag gis mig gi rnam par shes pa'i dmigs pa'i bya ba bya'o snyam du mi sems so/ /snang ba yang 'di snyam du bdag gis mig gi rnam par shes pa'i mngon pa'i bya ba bya'o snyam du mi sems so/ /nam mkha' yang 'di snyam du bdag gis mig gi rnam par shes pa'i mi bsgrib pa'i bya ba bya'o snyam du mi sems so//de skyed pa'i yid la byed pa yang 'di snyam du bdag gis mig gi rnam par shes pa'i bsam pa'i bya ba bya'o snyam du mi sems so/ /mig gi rnam par shes pa yang 'di snyam du bdag ni rkyen 'di dag gis bskyed do snyam du mi sems te/ 'on kyang rkyen 'di dag yod pa las mig gi rnam par shes pa skye bar 'gyur gyi med na mi 'gyur ba ltar/rna ba'i dbang po la sogs kun/ /skye ba'i rim pa 'di nyid yin/ /de bzhin du rna ba'i dbang po la sogs pa yang rgyu lngas skye ba'i rim pa khong du chud par bya'o/ /rgyu dang rkyen ni tshogs pa las/ /byed po la sogs bral ba dang //nga 'dzin pa dang bral ba las/ /skye ba yang ni snga ma bzhin/ /de ltar rten cing 'brel 'byung ba'i/ /rgyu can kun tu shes par bya/ /de ltar te / rgyu dang rkyen gyi rim pa bshad ma thag pa'i rim pa de ltar chos thams cad kyi skye ba dang / gnas pa dang / 'jig pa rtogs par bya'o/ /'jig rten 'di nas pha rol du//'gro ba'i chos 'ga' gang na'ang med/ /'on kyang rgyu dang rkyen dag las/ /las kyi 'bras bur mngon pa yin/ /de la chos zhes bya ba ni mig dang / rna ba dang / sna dang / lce dang / lus dang / yid la sogs pa'i chos dang / gzugs dang / sgra dang / dri dang / ro dang / reg bya dang / chos la sogs pa dang / phung po dang / khams dang / skye mched dang / rten cing 'brel par 'byung ba la sogs pa'i chos so/ /'di nas zhes bya ba ni/ 'jig rten 'di nas 'jig rten pha rol lam/ 'jig rten pha rol nas 'jig rten 'dir chos 'ga' yang mi 'pho ba'o/ /gal te de ltar na rtag par smra ba'am/rgyu med pa dang mi mthun pa'i rgyur smra bar 'gyur du 'ong ngo zhe na/ bka' stsal pa/ rgyu dang rkyen ma tshad pa med pa'i phyir las kyi 'bras bur mngon pa yang yod do/ /de la 'pho ba yang med la las kyi 'bras bu yang chud mi za bar mngon sum dang / rjes su dpag pa dang / yid ches pa'i lung las rab tu grags pa'i dpe 'di dag gis shes par bya ste/ ji ltar me long rab phyis la/ /bzhin gyi gzugs brnyan dmigs pa bzhin/ /me long nang du gzugs brnyan yang / /'phos pa yod pa ma yin nyid/ /de nyid kyi phyir gsungs pa/'di lta ste/ rab tu phyis pa'i me long gi dkyil 'khor la bzhin gyi gzugs brnyan snang ba yang bzhin me long gi dkyil 'khor nang du ma 'phos mod kyi/ rgyu dang rkyen ma tshang ba med pa'i phyir bzhin du mngon pa yang yod do/ /de bzhin du 'ga' yang 'di nas shi 'phos pa yang med la/ pha rol tu skyes pa yang med mod kyi/rgyu dang rkyen ma tshang ba med pa'i phyir las kyi 'bras bur mngon pa yang yod do/ /de dag phan tshun rtog med cing / /byed pa po dang lam rnams spangs/ /de bzhin skye ba snang ba ni/ /sngon 'phel bya ba'i rim pa las/ /de dag ces bya ba ni/ bzhin dang me long ngo //phan tshun zhes bya ba ni gcig la gcig go/ /rtog med ces bya ba ni rnam par rtog pa med pa'o/ /byed pa po dang las rnams spangs/ /zhes bya ba ni/ de la byed pa po dang las med do/ /chad par mi 'gyur ram zhe na/ /de bzhin skye ba snang ba ni/ /zhes smos so/ /ji ltar byed pa med pa'i bya ba dang las su 'gyur zhe na/smras pa/ sngon 'phel bya ba'i rim las so/ /ji ltar zla ba ring gnas pa/ /chu snod chung ngu'i nang du ni/ /snang ste 'phos pa'ang ma yin la / /bya ba dang ni las kyang yod/ /de nyid kyi phyir bka' stsal pa/ dper na zla ba'i dkyil 'khor ni dpag tshad bzhi khri nyis stong na gnas te/'on kyang snod chung ngu chus gang bar zla ba'i dkyil 'khor gyi gzugs brnyan snang yang zla ba'i dkyil 'khor ni gnas de na ma 'phos te/ 'on kyang snod chung ngu chus gang ba'i nang du snang ste/ rgyu dang rkyen ma tshang ba med pa'i phyir zla ba'i gzugs brnyan mngon pa yang yod do//de bzhin du 'di nas su yang shi 'phos pa dang / ma skyes mod kyi rgyu dang rkyen rnams ma tshang ba med pa'i phyir las kyi 'bras bur mngon pa yang yod do/ /yang dper na me ni rgyu ma tshang na mi 'bar gyi rgyu dang rkyen tshogs pa las 'bar ro/ /de bzhin du bdag po med pa'i chos 'dzin pa med pa phan tshun gyi rkyen can sgyu ma'i mtshan nyid kyi rang bzhin dag la rgyu dang rkyen ma tshang ba med pa'i phyir skye ba'i gnas nyid mtshams sbyor ba ma'i mngal de dang der sa bon rnam par shes pa las dang nyon mongs pa rnams kyis bskyed pa'i ming dang gzugs kyi myu gu mngon par 'grub po//phyi yi las dang bya ba rgyu//de ni brtags pa'i bdag nyid do/ /de la phyi'i rten cing 'brel par 'byung ba'i bya ba dang / las su rnam par gzhag pa ni brtags pa'i bdag nyid du shes par bya'o/ /de bzhin gzhan dbang nang gi ste/ /rnam shes lnga po 'byung ba'o/ /de la gzhan gyi dbang gi rten cing 'brel par 'byung ba'i mtshan nyid ni nang gi ste/dbang po lnga dang / yul gyi rnam par rig pa snang ba'i rnam pa can du rig par bya'o/ /brtag bya min phyir don dam ni/ /yongs su grub par 'dod pa yin/ /gang brtag pa dang gzhan gyi dbang gi bdag nyid kyi rnam pa'i rnam par rig pa snang ba'i rnam pa dang bral ba la rnam par rtog pa med pa shin tu yongs su dag pa/chu'i khams dang / gser dang / nam mkha' lta bur yongs su dag pa/ nyon mongs pa dang shes bya'i sgrib pa'i ngo bo yongs su dag pa/ zla ba shar ba lta bur yon tan bsam gyis mi khyab pa/ gzhal du med pa'i 'od zer snang ba'i bdag nyid can 'phos pa med pa/sems can thams cad kyi don lhun gyis grub par rgyun mi 'chad par mdzad pa/ thog ma dang dbus dang tha ma dang bral ba/ khams gsum las yang dag par 'das pa/ dri ma dang bral ba/ dri ma med pa/ dri ma spangs pa'i ngo bo/ /so so rang gis rtog pa'i spyod yul gyi bdag nyid lus dang /ngag dang / yid kyi sa las yang dag par 'das pa/ so so rang gis rig pa/ gzhan la rag ma las pa/ gzugs sna tshogs kyi nor bu rin po che'i rgyal po lta bu ste/ bla na med pa'i chos kyi sku zhes bya'o/ /rgyu dang rkyen dang ldan skye ba/ /nam yang rnam gnyis shes par bya/ / byed pa po la sogs pas dben/ /gsog gsob stong sogs snying po med/ /de nyid kyi phyir de la nang gi rten cing 'brel par 'byung ba rgyu lngar blta ste zhes bya ba gsungs so/ /gang zhe na/ gsungs pa/ rtag par ma yin te/ gang gi phyir tha ma 'chi ba'i phung po rnams kyang gzhan la/ skye ba'i char gtogs pa rnams kyang gzhan te/ tha ma 'chi ba'i phung po gang yin pa de nyid skye ba'i char gtogs pa rnams ma yin no/ /skyed par byed pa'i rgyu gang yin pa de nyid 'jig par byed pa yin la/ 'jig par byed pa'i rgyu gang yin pa de nyid kyang skyed par byed pa yin par 'gyur du 'ong bas tha ma 'chi ba'i phung po rnams kyang 'gags la/skye ba'i char gtogs pa'i phung po rnams kyang 'byung bas de'i phyir rtag par ma yin no/ /tha ma 'chi ba'i phung po rnams sngon 'gags pa las ma yin zhes bya ba ni 'gags nas yun ring du lon pa las ma yin pa / skye ba'i char gtogs pa zhes bya ba ni skye ba'i cha la brten pas na skye ba'i cha la gtogs pa ste/phung po rnams 'byung bar 'gyur ba'o/ /tha ma 'chi ba ma 'gags pa kho nar skye ba'i char gtogs pa'i phung po dag 'byung bar 'gyur na mi rung bas bka' stsal pa/ tha ma 'chi ba'i phung po rnams kyang 'gags la/ de nyid kyi tshe skye ba'i char gtogs pa'i phung po rnams srang mda'i mthon dman bzhin du 'byung bar 'gyur te/de'i phyir chad par ma yin no/ /sems can gyi ris mi 'dra ba nas skal ba mnyam pa'i skye bar skye ba gzhan mngon par 'grub pas de'i phyir 'pho bar ma yin no/ /las chung ngu byas pas 'bras bu chen po'i rnam par smin pa myong ste/de'i phyir rgyu chung ngu las 'bras bu chen po mngon par 'grub bo/ /ji ltar myong bar 'gyur ba'i las bsags pa de lta bu myong bar 'gyur ba'i rnam par smin pa myong bas de'i phyir de dang 'dra ba'i rgyud du'o/ /gang gis rten cing 'brel bar 'byung ba 'di la yang dag pa'i shes rab kyis de ltar yang dag pa ji lta ba bzhin du/rtag par rgyun du srog med pa dang / ji lta bu nyid dang / ma nor ba nyid dang / ma skyes pa dang / ma byung ba dang / ma byas pa dang / 'dus ma byas ba dang / thogs pa med pa dang / dmigs pa med pa dang / zhi ba dang / mi 'phrogs pa dang / rnam par zhi ba ma yin pa'i rang bzhin dang /med pa dang / gsog dang / gsob dang / snying po med pa dang / nad dang / 'bras dang / sdig pa dang / mi rtag pa dang / sdug bsngal ba dang / stong pa dang / bdag med par mthong ba zhes bya ba la/ gang gis rten cing 'brel bar 'byung ba 'di la zhes bya ba ni nang gi rten cing 'brel bar 'byung ba gang yin pa 'di la'o//yang dag pa'i zhes bya ba ni phyin ci ma log pa'i'o / /shes rab kyis zhes bya ba ni 'jig rten las 'das pa'i shes rab kyis so/ /yang dag pa ji lta ba bzhin du zhes bya ba ni de kho na nyid ji lta bar ro/ /rtag par rgyun du zhes bya ba ni dus thams cad du rgyun mi 'chad par ro//srog med pa zhes bya ba ni srog dang byed pa la sogs pa dang bral ba'i phyir srog med pa'o/ /ma skyes pa zhes bya ba ni skye ba dang bral ba'i phyir ro/ /ma byung ba zhes bya ba ni gnas pa dang bral ba'i phyir ro/ /ma byas pa zhes bya ba ni byed pa po med pa'i phyir ro/ /'dus ma byas pa zhes bya ba ni 'dus byas kyi mtshan nyid dang bral ba'i phyir ro//thogs pa med pa zhes bya ba ni sgrib pa dang bral ba'i phyir ro/ /dmigs pa med pa zhes bya ba ni dmigs par bya ba dang dmigs par byed pa dang bral ba'i phyir ro/ /zhi ba zhes bya ba ni zhi ba nyid kyi phyir ro/ /'jigs pa med pa zhes bya ba ni skye ba la sogs pa'i 'jigs pa dang bral ba'i phyir ro//mi 'phrogs pa zhes bya ba ni nyon mongs pa'i gzhan dbang dang bral ba'i phyir ro/ /mi zad pa zhes bya ba ni rtag tu rnam par gnas pa'i phyir ro/ /rnam par zhi ba ma yin zhes bya ba ni gcig tu zhi ba'i bgrod pa dang bral ba'i phyir ro/ /med pa zhes bya ba ni phung po las gud na gzhan med pa'i phyir ro//gsog ces bya ba ni grol ba'i bdag lcags thur lta bu gcig pur med pa'i phyir ro/ /gsob ces bya ba ni nang na 'dus pa'i ngo bo bdag gi rdzas med pa'i phyir ro/ /snying po med pa zhes bya ba ni 'phro ba'i bdag nyed med pa'i phyir ro/ /nad ces bya ba ni nad kyi bdag nyid phung po las gud na med pa'i phyir ro//'bras zhes bya ba ni phung po las ma gtogs pa gnod bar byed pa gzhan med pa'i phyir ro/ /sdig pa zhes bya ba ni las dang nyon mongs pa las gud na gnod pa'i ngo bo gzhan med pa'i phyir ro/ /mi rtag pa zhes bya ba ni skyes ma thag tu 'jig pa ste/ phung po las gud na gzhan med pa'i phyir ro//sdug bsngal zhes bya ba ni 'du byed dang 'gyur ba'i sdug bsngal las gung na med pa'i phyir ro/ /stong pa zhes bya ba ni brtags pa'i ngo bo nyid yang dag pa ma yin pa'i kun tu rtog pa las gud na med pa'i phyir ro/ /bdag med pa zhes bya ba ni phung po las ma gtogs pa bdag gi rdzas med pa'i phyir ro//byed pa po la sogs pas dben/ /gsob gsog stong sogs snying po med/ /de ltar shes rab kyis mthong gang / /ci cir ci ltar gang du cis/ /snyam pa'i rtog smra sogs spangs pa/ /yon tan mtha' yas bsam mi khyab/ /zhi ba chos kyi rang bzhin sku//de bzhin nyid kyi phyir de ni/ /sngon gyi mtha' la mi rtog go/ /zhes gsungs te/ ci bdag 'das pa'i dus na byung bar 'gyur ram snyam pa'i rmongs pa 'di la mi skye'o/ /ma rmongs pa la ye shes skye ba'i phyir bdag 'das pa'i dus na mi 'di lta bur 'gyur ram snyam pa la sogs pa dang /bdag lha'am/ sha za'am/ bde bar gnas pa'am/ sdug bsngal bar gnas pa cir 'gyur ram snyam pa'i rmongs pa med pa nyid do/ /bdag bde 'gro'am/ ngan 'gro'am/ yun ring ba'am/ yun thung ba ji ltar 'gyur snyam pa'i rmongs pa yang med pa nyid ngo //ma 'ongs pa'i mtha' la mi rtog ste/ ci ma 'ongs pa'i dus na 'byung bar 'gyur ram snyam pa dang / 'on te 'byung bar mi 'gyur snyam pa'i rmongs pa yang 'di la med pa nyid do/ /ma 'ongs pa'i dus na cir 'gyur snyam pa ma 'ongs pa'i dus na lha'am/ sha za'am/ mi cir 'gyur snyam pa'i rmongs pa yang 'di la mi 'byung ba nyid do //bde ba'am/ sdug bsngal ba'am/ gzugs bzang ba'am/ gzugs ngan pa ji ltar 'gyur snyam pa'i rmongs pa yang 'di la med do/ /nang la yang mi rtog go zhes bya ba ni nang la rmongs par mi 'gyur ba ste/ 'di ci zhig ces bya ba ni bdag gam bdag med snyam pa'o//'di ji lta bu zhig ces bya ba ci gzugs can nam/ 'on te gzugs can ma yin pa zhig snyam pa'i rmongs pa yang 'di la mi 'byung ngo / /ci zhig yod ces bya ba ni legs par byas pa'i las byas pa'am/ nyes par byas pa'i las byas pa snyam pa'i rmongs pa yang 'di la mi skye'o/ / sems can 'di lha'i 'gro ba'am/ mi'i 'gro ba gang nas 'ongs te 'di nas shi 'phos nas lha rnams sam mi rnams sam/ dmyal ba'am / yi dags dang / dud 'gro gang du 'gro bar 'gyur snyam pa'i rmongs pa yang 'di la mi 'byung ngo / /'jig rten na dge sbyong ngam/ bram ze dag gi lta bar gyur pa tha dad pa gang dag yod par 'gyur ba zhes bya ba la lta bar gyur pa zhes bya ba ni lta ba'i gnas so//tha dad pa zhes bya ba ni so so ba'o/ /'di lta ste zhes pa ni bstan pa'i phyir ro/ /bdag tu smra ba dang ldan pa zhes bya ba ni phung po las ma gtogs par bdag med de/ ma dpyad par bdag dang bdag gi zhes bya ba'i ngo bor bdag tu 'dzin pa dang ldan pa'i phyir bdag tu smra ba dang ldan pa zhes gsungs te/phyin ci log tu 'dzin pas kun nas bslang ba'i phyir ro/ /gang zag tu smra ba dang ldan pa zhes bya ba la sogs pa ni yang 'gro ba'i phyir gang zag ces bya ba phung po las ma gtogs pa gang 'jig rten 'di spangs nas 'jig rten pha rol du 'gro ba'am/'jig rten pha rol spangs nas 'jig rten 'dir 'ongs pa yod pa ma yin pas 'dzin pa dang / ngan pa phyin ci log gi 'dzin pa zhes gsungs so/ /dge mtshan dang bkra shis su ldan pa zhes bya ba la/ dge mtshan ni 'jig rten bzo'i gnas dang / rig pa'i gnas rnam pa sna tshogs gang dag yin pa dga' ston dang / bag ma gtong ba dang / bag ma len pa dang / 'thab mo dang / g.yul dang / skyed mos tshal dang / chu klung dang / rgya mtsho dang / ri dang / tshal dang / 'phags pa'i gzhan de dang de dag tu 'gro ba dang / lta ba dang / 'pho ba dang /'jug pa dang / gnas pa'i rjes su dga' ba rtse ba'i bde ba myong ba'i gar dang / glu dang / tshig tu smra ba dang / rgyug pa dang / mchong ba dang / tshar dang / skyes pa dang / bud med dang / khye'u dang / bu mor 'gyed pa'i gtam dang / rtsod pa dang / lde'u brjod pa dang / glang po che dang /rta la sogs pa 'thab pa dang / rtswa dUr ba dang / zho dang / gi'u wang dang / zhing gshol dang / tho ba dang / me tog dang / 'bras bu dang / bum pa dang / dung dang / nya la sogs pa dang / bram ze dang / khyu mchog dang / zla ba dang / nyi ma dang / gza' dang / skar ma dang /rgyu skar dang / /yud tsam dang / sbyor ba dang / byed pa la sogs pa ste ltas mkhan la sogs pa bdag nyid dang dag pa tshol ba dang / phyin ci log rnam pa du ma'i 'phyang thag la 'ju zhing lam ma yin pa la lam du 'du shes pa dang / ma dag pa la dag par 'du shes pa dang / ma grol ba la grol bar 'du shes pas 'gro ba drug gi 'khor lor zhugs pa'i blo gros can 'gro ba dang 'gro bar gyur pa rnams ni 'khor ba kho na'i rjes su 'brang gi/mya ngan las 'das pa'i ni ma yin no zhes de dag yang dag pa'i shes rab kyis mthong ba na phyin ci log rnam pa bzhi dang bral ba'i phyir rtsa ba nas bcad de/ de mi snang bar gyur cing spangs pa yin pas yongs su shes nas rtsa ba nas bcad de/shing ta la'i mgo bzhin mi snang ba'i rang bzhin du phyis mi skye mi 'gag pa'i chos su 'gyur ro zhes bya'o/ /de nyid kyi phyir smras pa/ de bzhin 'di nas 'chi 'pho pa/ /'ga' med 'gro bar skyes pa'ang snang / /de nyid kyi phyir dpe brjod pa//ji ltar bud shing dang 'brel ba/ /me yi rgyun ni 'jug 'gyur gyi/ /rgyu ni ma tshang gyur pa las/ /me yi rjes su 'jug pa min/ /de bzhin zhes bya ba ni ji ltar zla ba'i gzugs thag ring po na gnas nas kyang chu'i snod chung ngu 'am/ chu dang til mar gyi snod chen po dang / du ma dag tu yang snang ba zla ba'i gzugs 'phos pa'am/du ma nyid kyang med mod kyi/ 'on kyang chu'i snod du ma dag tu snang ngo / /de bzhin du 'di nas 'ga' yang shi 'phos pa yang med/ song ba yang med/ 'ong ba yang med/ rgyu dang rkyen ma tshang ba med pa'i shi 'phos pa dang / song ba dang / 'ong ba dang snang ba de bzhin du chu snod dang 'dra ba sems can gyi rgyud 'gro ba'i gnas gzhan rnam pa du ma tha dad pas sems zla ba'i gzugs brnyan skye bar 'gyur ro//rgyu dang rkyen rnams ma tshang ba med pa'i phyir zhes bya ba ni dge ba dang / mi dge ba dang / mi g.yo ba la sogs pa'i rgyu ji ltar 'phangs pa der snang ba'i rnam pa can gyi rnam par rig pa 'byung ste/bdag dang bdag gi dang bral ba'i dngos po thams cad la rten cing 'brel par 'byung ba'i rim pa rtogs par bya'o/ /rgyun mi 'chad pa'i dpe brjod / ji ltar bud shing dang 'brel na/ /me yi rgyun ni 'jug 'gyur gyi/ /las dang nyon mongs pas bsgos pa'i sems kyi rgyud me'i rgyun dang 'dra ba'i bud shing ni las dang nyon mongs pa kho na yin par brtag ste/ji ltar me bud shing rgyur byas nas 'bar ba rgyun mi 'chad la/ bud shing med na rgyun 'chad par 'gyur ba de bzhin du 'dir yang las dang nyon mongs pa'i bud shing bcad de/ kun nas nyon mongs pa'i kun gzhi rnam par shes pa'i sa bon gyi rgyun ye shes kyi me dang phrad pas bsregs na rgyu 'gag pa'i phyir 'bras bu mi 'byung ngo //de nyid kyi phyir bka' stsal pa/ dge slong ngam bram ze gang dag yod pa 'di lta ste zhes bya ba ni 'di las phyi rol pa rnams so/ /'jig rten na zhes bya ba ni 'jig rten 'jig cing 'jig cing 'gro ba'i don te/ 'jig pa'i phyir 'jig rten pas zhig par 'gyur ba zhes bya ba'i tha tshig go/ /lta bar gyur pa zhes bya ba ni lta ba dang mthong ba ste phyin ci log gi bstan bcos nyan pa dang / sems pa la sogs pa'i log pa'i shes pa byung ba'i phyir log pa'i shes pa ni lta ba zhes bya'o/ /tha dad pa ni so so ba'o/ /'di lta ste/bdag tu smra ba dang ldan pa zhes bya ba la sogs pa ni nye bar len pa'i phung po lnga po gzugs dang / tshor ba dang / 'du shes dang / 'du byed dang / rnam par shes pa zhes bya ba bdag dang bdag gi dang bral ba dag la bdag nyid du yang dag lta ba'i shes rab nyon mongs pa can gang yin pa de ni lta ba zhes bya'o//'jig tshogs dang / mtha' dang / lta ba dang / tshul khrims dang / brtul zhugs dang / log par lta ba sngon du 'gro ba'i shes rab ngan pa ma rig pa dang mtshungs par ldan pa'i phyir lta ba zhes bya ba de dang / ma rig pa sngon du 'gro ba'i 'dod chags dang / khong khro ba dang / nga rgyal dang /ma rig pa dang / lta ba dang / the tshom dang / nye ba'i nyon mongs pa mtshungs par ldan pa dang / lta ba ma yin pa'i mtshan nyid khams kyi rnam pa dang bye brag gi tha dad pa ma gtogs nas/ kun nas nyon mongs pa'i kun gzhi rnam par shes pa la bag chags su gnas pa de'i rnam pa can gyi rnam par shes pa snang ba gsos pa rnams thog ma nyid du 'jig rten las 'das pa'i lam la bstan te/'phags pa'i bden pa bzhi bsgom pa goms pa'i rim gyis sdug bsngal dang / kun 'byung dang / 'gog pa dang / lam mthong pa dang / bsgom pa dang / rnam par grol ba dang /khyad par dang / bar chad med pas spangs pa mngon du byas pa dang / gang yang byang chub kyi phyogs kyi chos sum cu rtsa bdun dang / dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang /lam dang / rten cing 'brel par 'byung ba dang / bsam gtan dang / gzugs med pa dang / tshad med pa dang / rjes su dran ba drug la sogs pa dang / chos dang / gang zag la bdag med pa dang / byang chub kyi sems bsgom pa dang / ting nge 'dzin dang / gzungs dang / dad pa dang / brtson 'grus dang / ting nge 'dzin dang / shes rab dang / sa dang / dbang dang / mngon par shes pa dang / ye shes dang / pha rol tu phyin pa dang / rnam par grol ba'i sgo dang / bzod pa bsgom pa la sogs pa'i rim gyis 'jig rten las 'das pa'i lam gyi rjes su 'gro bas/ mos pas spyod pa la rab tu gnas shing nges par 'byung ba rab tu sbyor ba mngon sum du byas pa las dbang po dang /stobs dang / mi 'jigs pa dang / ma 'dres pa dang / so sor rig pa dang / dpe byad dang / skyes bu chen po'i mtshan dang / rdzu 'phrul gyi rkang pa la sogs pa bsgom pa yongs su rdzogs nas bla na med pa yang dag par rdzogs pa'i rjes su rtogs pa las zhi gnas dang /lhag mthong gi rjes su mthun pa mnyam pa nyid du gyur pa/ yon tan mtha' yas bsam mi khyab/ /zhi ba chos kyi rang bzhin sku/ / thog ma dbus dang mtha' bral ba/ /rtogs nas sangs rgyas go 'phang thob/ /ces bya'o/ / de la gzugs kyi phung po zhes bya ba ni/ gzugs su snang ba'i rnam pa can gyi rnam par rig pa snang ba'i rnam par rtog pa las byung ba rdzas du ma'i bdag nyid 'byung ba dang / 'byung ba las gyur pa'i gzugs kyi mtshan nyid spyi bcu gcig bdag nyid bdag gi rdzas rnam pa lngar sgro 'dogs pas kun nas bslang ba mig dang /rna ba la sogs pa dang / gzugs dang / sgra la sogs pa dang / 'dod pa dang / gzugs dang / gzugs med pa dang mtshungs par ldan pa'i yang dag pa ma yin pa'i kun tu rtog pa'i mtshan nyid phung po dang / khams dang / skye mched dang / dbang po dang / rnam par shes pa'i yul gyi bdag nyid dang /gzhan yang de lta bu'i gzugs kyi mtshan nyid kyi chos ni gzugs kyi phung po zhes bya'o/ /de la tshor ba'i phung po zhes bya ba ni bde ba dang / sdug bsngal dang / gnyis ka'i rnam par myong ba'i rnam pa can gyi rnam par rig pa snang ba ste/ yul dang / dbang po dang /rnam par shes pa dbye bas tshor ba'i tshogs drug go/ /khams kyi rnam pa dang bye brag gi dbye bas ni nyon mongs pa dang / nye ba'i nyon mongs pa dang mtshungs par ldan pa'i phyir rab tu dbye ba mtha' yas te/ bde ba dang / sdug bsngal dang / yid bde ba dang / yid mi bde ba btang snyoms dang ldan pa'i phyir bdag gi rdzas rnam pa drug nyid yang dag pa ma yin pa'i kun tu rtog pa rnam par rtog pa'i kun gzhi rnam par shes pa'i bag chags dang 'brel bas 'dod chags dang /zhe sdang dang / gti mug la sogs pa khams gsum pa'i rnam par rtog pa'i dbang gis byung ba rdzas su ma bsdus pa'i phyir tshor pa'i phung po zhes bya'o//'du shes ni phra ba dang / rags pa dang / chen por gyur pa la sogs pa mtshan mar 'dzin pa snang ba'i rnam pa can gyi rnam par rig pa rnam par rtog pa'i dbang gis byung ba sngon dgod pa dang / dga' ba dang / rtses pa la sogs pa rjes su dran zhing skyes pa dang bud med la sogs pa'i mtshan ma'i khyad par 'dzin pa'i bdag nyid de /yul dang / dbang po dang / rnam par shes pa'i dbye bas 'du shes kyi tshogs drug go/ /'dod chags dang / zhe sdang dang / gti mug dang 'brel pa'i phyir khams kyi rnam pa dang / bye brag gi dbye bas ni rab 'byam mtha' yas te/kun nas nyon mongs pa'i kun gzhi'i rnam par shes pa'i bag chags dang 'brel pa'i phyir bdag tu rmongs pa la sogs pa dang ldan pa'i bdag nyid ni 'du shes zhes bya'o/ /'du byed ni mtshungs par ldan pa dang / ldan pa ma yin pa dang / gdags pa dang / 'dus byas dang /'dus ma byas su snang ba'i rnam pa can gyi rnam par rig pa rnam par rtog pa'i dbang gis byung ba rnams so/ /sngon 'phangs pa'i kun gzhi rnam par shes pa las yod pa'i bag chags kyi dbye bas ni khams kyi rnam pa dang / bye brag gi rab 'byam mtha' yas dang ldan pa'i 'du byed kyi rdzas du ma bsdus pa'i phyir 'du byed kyi phung po zhes bya'o//de la rnam par shes pa'i phung po ni rnam pa brgyad de/ yul dang / dbang po dang / rnam par shes pa'i bye brag tu snang ba'i rnam pa can gyi rnam par rig pa rnam par rtog pa'i dbang gis byung ba kun gzhi rnam par shes pa'i bag chags dang 'brel pa'i phyir khams kyi rnam pa dang /bye brag gi dbye bas rab 'byam mtha' yas ni rnam par shes pa'i phung po zhes bya'o/ /de dag nyid kyang khams dang / skye mched dang / zag pa dang bcas pa dang / 'dus byas dang / kun nas nyon mongs pa la sogs pa'i rnam grangs kyi dbye bas rang gi mtshan nyid dang 'brel pas bsdus te/phung po dang / khams dang / skye mched rnams zhes bya'o/ /de ltar na kun nas nyon mongs pa'i kun gzhi rnam par shes pa'i sa bon dang 'brel pa yang dag pa ma yin pa'i kun du rtog pas kun nas bslangs pa khams gsum par slong ba'i sems dang / sems las byung ba de dag ni 'khor ba zhes bya'o/ / 'on kyang de la thog ma nyid du byed pa po la sogs pa dang bral ba gsog gsob snying po med pa zhes bya bar rig nas bden pa bzhi bsgom pa lugs dang mthun par 'dug pas gtan la phab ste/ 'jig rten las 'das pa'i ye shes kyi me byung nas ma rig pa'i mun pa la sogs pa dang bral te rgyu dang rkyen gyi don gyi de kho na nyid yongs su shes pa las zhi ba chos kyi skur rtogs so//de'i phyir sdug bsngal dang / kun 'byung ba dang / 'gog pa dang / lam mthong ba dang / bsgom pa'i lam gyi go rims zhes bya ste/ de la sdug bsngal gyi bden pa la mi rtag pa dang / sdug bsngal ba dang / stong pa dang / bdag med par yang dag par rjes su mthong ba'i shes pa dang /bzod pa dang / grol ba dang / spong ba dang / khyad par dang / bar chad med pa'i shes pas sdug bsngal de mngon par rtogs nas nyon mongs pa'i kun gzhi rnam par shes ba'i bag chags yang dag par bcom ste/ gang zag dang chos la bdag med par rtogs nas khams gsum par snang ba yang dag pa ma yin pa'i kun tu rtog pa las byung ba'i sems tsam pa 'di la sgyu ma dang /smig rgyu dang / dri za'i grong khyer dang / mgal me'i 'khor lo dang / brag ca dang / chu zla dang / gzugs brnyan bzhin du rnam par bsgoms na / phung po la sogs pa dang /khams dang / skye mched du gzung ba dang / 'dzin pa dang bral nas chos la bdag med pa mnyam pa nyid la zhugs te/ rang gi sems nyid gzod ma nas ma skyes pa'o zhes stong pa'i ye shes la zhugs nas chos thams cad ngo bo nyid med pa'i ye shes kyi snying rje'i rtsa ba can byang chub kyi sems kyi rgyur gyur pa thabs sna tshogs dang /bsod nams dang / ye shes kyi tshogs bsags nas pha rol tu phyin pa bcu'i rgyu dag gis sa bcu'i rten can ye shes bcu'i dmigs pa dbang bcu'i 'bras bu can yon tan bsam gyis mi khyab cing mtha' yas pa'i 'byung gnas zhi ba chos kyi sku rtogs so/ /de bzhin du kun 'byung gi bden pa la kun 'byung dang /rgyu dang / rab tu skye ba dang / rkyen du bar chad med pa dang / rnam par grol ba dang / spong ba dang / khyad par dang / mthong ba dang / bsgom pa lugs dang mthun pa dang / lugs dang mi mthun pa'i rnam pas kun nas nyon mongs pa'i kun gzhi rnam par shes pa'i bag chags kyi dri ma dang bral nas zhi ba chos kyi sku la 'jug go//'gog pa'i bden nga la yang 'gog pa dang / zhi ba dang / gya nom pa dang / nges par 'byung ba bar chad med pa dang / rnam par grol ba dang / spong ba dang / khyad par dang / mthong ba dang / bsgom pa'i lam gyi rim gyis kun nas nyon mongs pa'i kun gzhi rnam par shes pa'i bag chags yang dag par bcom pas bar chad med pa dang /spong ba dang / rnam par grol ba dang / khyad par bsgoms pa las gang zag dang chos la bdag med par rtogs te zhi ba'i chos kyi sku 'thob bo/ /rgyu dang rkyen dang bral ba las lam gyi bden pa la yang lam dang /rig pa dang / sgrub pa dang / nges par 'byin par yang dag par mthong na 'di ltar mthong ba dang / bsgom pa dang / bar chad med pa dang / spong ba dang / rnam par grol ba dang / khyad par gyi lam dang mthun par kun gzhi rnam par shes pa la yod pa'i bag chags yang dag par bcom nas/gang zag dang chos la bdag med pa'i mnyam pa nyid rtogs pa las sku gsum gyi rten zhi ba chos kyi sku yon tan bsam gyis mi khyab cing gzhal du med pa'i tshogs can thog ma dang / bar dang / tha ma dang bral ba don thams cad rgyun mi 'chad par lhun gyis grub par mdzad pa'i bdag nyid bla na med pa dang /thams cad mkhyen pa nyid thob bo/ /yang smras pa/ gang gis de ltar de nyid bzod/ /de ni lung bstan the tshom med/ /gang gis de ltar bshad ma thag pa'i rten cing 'brel par 'byung ba gang zag dang chos la bdag med pa'i de nyid bzod cing 'dod pa de ni gang zag dang chos la bdag med par bzod pa dang ldan pa'i phyir bla na med pa yang dag par rdzogs pa'i byang chub tu lung bstan pa dang 'dra bar blta bar bya zhing shes par bya ba'i tha tshig go//de nyid kyi phyir mdo las/ btsun pa shA ri'i bu rigs kyi bu'am rigs kyi bu mo gang la la chos la bzod pa 'di lta bu dang ldan na/de bzhin gshegs pa dgra bcom pa yang dag par rdzogs pa'i sangs rgyas kyis bla na med pa yang dag par rdzogs pa'i byang chub tu lung ston to zhes gsungs so/ /de skad byams bdag bdag nyid kyis/ /shA ri'i bu la smras pa dang / / de skad du shA ri'i bus byang chub sems dpa' byams pa la dris pa dang /byang chub sems dpa' byams pas kyang / sA lu ljang pa dper mdzad pa'i mdo 'di rgya cher rnam par phye nas bshad pa dang / byang chub sems dpa' byams pas bshad pa/ sA lu ljang pa dper mdzad pa/ /de ni shA ri'i bus thos nas/ /zhes bya ba ni sA lu ljang pa dpar mdzad pa'o//snying po blangs te lha tshogs kyis/ / zhes bya ba la/ snying po blangs te zhes bya ba ni/ chos kyi don de kho na nyid rtogs pa'i phyir snying po bzung ba'o/ /lha tshogs kyis zhes bya ba ni/ lha dang / klu dang / gnod sbyin dang / dri za la sogs pa dang bcas pa'o/ /rjes su yi rangs zhes bya ba ni rjes su yi rangs te'o //mngon bstod nas zhes bya ba ni/ khyod kyis ji skad bshad pa de kho na ltar yin gyi/ gzhan du ma yin no zhes nges par bzung zhing nges par bskyed nas so/ /langs te song nas dga' sems kyis/ /dge slong rnams la bshad pa yin/ /de nyid kyi phyir mdo las/de nas tshe dang ldan pa shA ri'i bu byang chub sems dpa' byams pas bshad pa la mngon par dga' nas/ stan las langs te song ngo zhes gsungs so/ /byang chub sems dpa' sems dpa' chen po byams pas de skad ces smras pa ni/ byang chub sems dpa' byams pa de skad ces shA ri'i bu la smras pa'o//yi rangs pa ni shA ri'i bus de thos nas yid dga' ste/ sems mgu zhes bya ba'i tha tshig go/ /song nas dge slong rnams la mdo sde zab cing rgya che ba rmad du byung ba ji ltar thos pa bzhin sems can thams cad la phan pa'i phyir bshad pa yin no/ /sA lu ljang pa'i mdo sde yi/ /rgya cher bshad pa rab bzang po//dman blos rab tu rtogs bya'i phyir/ /brgya phrag bcu gnyis kho nar byas/ /sA lu ljang pa'i rgya cher bshad pa/ slob dpon chen po klu sgrub kyis mdzad pa rdzogs so// //rgya gar gyi mkhan po d+harma shrI pra b+hA dang / lo tsA ba ban+de legs pa'i blo gros dang / dz+nyA na ku mA ras bsgyur/