CLOSE WINDOW

D3964
བོད་ཡིག

lo tsA ba byams pa'i dpal gyis bsgyur ba'o//[ ]@##/ /rgya gar skad du/ dzi na mArga a ba tA ra/ bod skad du/ rgyal ba'i lam la 'jug pa/ bla ma dang sangs rgyas dang byang chub sems dpa' thams cad la phyag 'tshal lo//gang zhig bag la nyal ni bag chags bcas dang bdud dgra ma lus thams cad ni/ /gnyen po yang dag gzung ba'i stobs kyis nges bcom byang chub mchog ni rgyas ldan zhing / /kun mkhyen bde gshegs thugs rje bdud rtsi'i rang bzhin skyob pa rab ston mnga' bdag po/ / de dang bla ma mchog dang dge 'dun bcas la gus pas rtag par kun nas 'dud/ /gnyen po yongs su gzung ba yis/ /mi mthun phyogs de kun spang dang / /byang chub mchog ni rtogs pa dang / /'gro ba'i don ni 'dod pa yis/ /rgyal ba'i lam la 'jug pa 'di/ / ji ltar lung bzhin mdor bsdus pas/ /rang gis rtogs par bya ba dang / /dge slong mkhas pa byams dpal bzang / /zhes bya chos kyi don gnyer ba/ /de yis gus par bskul ba dang / /rang nyid mchog tu goms 'phel phyir/ /rang gi shes rab kyis brtags brjod/ /spyod yul min la goms byas nas//don mchog rig pa ldan 'gyur te/ /rdzogs pa'i byang chub 'dod pa yis/ /tshod ma sbyin la'ang 'bad bzhin no/ /mdor na dal 'byor rnyed dka' dang / /mi rtag nyid dang sred sdug bsngal/ /thog med srid pa'i sdug bsngal gyi/ /mtsho las 'gro ba bsgral 'dod dang / / dpal ldan bla ma'i mtshan nyid dang / /byang sems bskyed dang sdom pa dang / /sdig bcu 'bras bu dang bcas dang / /bag med 'dod sred bud med chang / /bag la nyal dang de bzhin du/ /nye ba'i nyon mongs dang bdag med/ /rten cing 'brel 'byung 'khor lo dang / /'phags pa'i bden pa bzhi rnams dang //dam chos mnyan pa la sogs dang / /pha rol phyin bcu rnams gsungs pa/ /'jig rten pa dang don dam dang / /mi sdug rnam pa gsum dang ni/ /gzhan yang dbugs rngub 'byung rjes dran/ /sbyor ba'i lam dang mthong ba'i lam/ /bsgom pa'i lam dang de bzhin du/ /khyad par lam zhes grags pa dang //sa rnams yongs su sbyang ba dang / /yongs smin sku bzhi brjod pa dang / /de bzhin du ni smon lam ste/ /rgyal ba'i lam la 'jug pa 'di/ /mdo ru bsdus te yongs brjod na/ /'di ltar le'u sum cur ni/ /go rims bzhin du gnas pa yin/ /'di ni rgyal ba'i lam la 'jug pa las mdor bsdus kyi le'u zhes bya ba ste dang po'o// //mi yi dngos po rnyed par shin tu dka'/ /rab bsngags skye ba yongs su 'dzin pa dang / /rab bsngags yul dang 'tshe dang skrag pa med/ /nad med pa dang dbang po tshang gyur dang / /lang tsho ldan gyur nas kyang tshe ring dang /'khor ba'i sdug bsngal chu bor g.yengs pas 'jigs/ /dka' tshegs med pa'i gos dang bza' la sogs/ /snying po yod med dpyod shes blo ldan dang / /sangs rgyas byon dang de yis chos gsungs dang / /chos thos 'dod cing mngon par brtson pa dang / / dpal ldan bla ma dam pa'i bsnyen bkur dang / /thos don sems dang bsgom sogs shin tu dkon/ /de ltar ston pas gsungs te 'jig dus kyi/ /rlung gis cher g.yengs gcig gyur rgya mtsho yis/ /gnya' shing bu gar lo brgya nas 'thon pa'i/ /rus sbal mgrin pa chud ltar mi rnyed dka'//sngar bshad las ltos lhag par khyad par du/ /de de rim pa rim pas rnyed par dka'/ /de phyir dal 'byor rin chen legs rnyed pa/ /mi yi lus kyi skyes bu'i don bsgrubs te/ /gal te 'di la phan pa ma bsams na/ /phyis ni gsungs pa'i dal 'byor ga la rnyed/ /bla ma'i bka' lung rang gi rigs pa yis//blo dang ldan pas brtag cing dpyad par bya/ /'di ni rgyal ba'i lam la 'jug pa las dal 'byor rnyed par dka' ba brgyud pa'i rim pa'i le'u ste gnyis pa'o// //skyes pa tsam nas skye 'gro yi/ /mdun na brtse ba med pa yi/ /'chi ba zhes bya'i 'dra chen gnas//shin tu bzlog dka' 'jigs par byed/ /ma dang pha dang bu dang ni/ /spun dang sring mo de bzhin du/ /chung ma gnyen bshes mdza' bo dang / /mi mdza' kun kyang gshin rjes gsod/ /byis pa rgan po gzhon nu dang / /dar ma dang ni mchog gzugs can/ /lang tsho can dang lang tsho med//khrel med 'chi bas za ba'o/ /'khor los sgyur dang mi yi ni/ /dbang po blun po la sogs dang / /tshangs pa la sogs lha rnams dang / /nor rgyas la sogs klu rnams te/ /'di dag kun kyang 'chi bas zos/ /bsam gtan can dang shes pa can/ /zhi dang thub dang snying rje mchog /gtong dang dge ba'i las can dang / /sna tshogs rig pa'i pha rol phyin/ /bde ldan rnyed ldan kha drag dang / /smra mkhas pa dang chos smra rnams/ /'chi ba yis ni 'joms pa ste/ /kun la gtong ba gang yang med/ /gcugs pa dang ni ngo yang med/ /dad pa can dang gus can med//sa mtshams dang ni rtog dpyod med/ /gar yang 'chi bdag 'di ni 'byung / /snod dang sems can 'jig rten grags/ /dus gsum gyi ni khams gsum rnams/ /skyes pa nas bzung brlag gi bar/ /mdor na 'jigs pa'i rjes su phyogs/ /yid brtan mi rung 'chi bdag 'di//byas dang ma byas mi sdod 'dzoms/ /bde dang mi bde yid brtan med/ /gnam lcags chen po glo bur la/ /gsod pa'i gnas su gsod bya ba'i/ /skyes bu stobs kyis khrid pa ltar/ /skye 'gro rnams ni skye tsam gyis/ /de ni skad cig skad cig 'chi/ /dal 'byor rin chen rnyed dka' ste//rnyed kyang skad cig 'jig rang bzhin/ /de mthong yang ni ci nas rang / /'chi ba nyid du mi rtogs te/ /rgas med 'chi med bdag nyid du/ /go zhing lus can gsod pa ste/ /'dod dang gti mug 'jigs khro yis/ /bla ma dang ni phan 'dogs dang / /gang yang rung ste su yang gsod//bla ma dkon mchog gsum dang yang / /yon tan can dang sdug phongs kyi/ /rdzas ni dogs pa med pas 'phrog /longs spyod don du lha bzhin du/ /'dod pas log par spyod pa rnams/ /rung dang mi rung rnam dpyod med/ /gser 'gyur rtsi yi rnyed bzhin du/ /rten cing rab tu tshim par byed//brdzun dang phra ma tshig rtsub dang / /ngag 'khyal ba yi tshig dang ni/ /rol rtsed byed dang sems can ni/ /pha rol sems la zug rngu byed/ /gzhan gyi nor la bdag por ni/ /'dod pa skyed par byed pa dang / /gzhan la gnod par sems par byed/ /chos dang chos min phyin ci log /'di ltar sdig pa byas kyang ni//rgas med 'chi ba med bzhin rol/ /shin tu ltung ste cher rtsub pa'i/ /dmyal ba mi bzad myong bar 'gyur/ /mchog tu tshe ring mi rnams kyang / /tshe lo brgya pa yin par brjod/ /stong phrag sum cu rtsa drug gi/ /zhag la lo ni brgya yin te/ /de rnams nang nas gang rung ba'i//nyin zhag la ni nges par 'chi/ /kha cig mngal du 'chi bar 'gyur/ /kha cig skyes ma thag tu 'chi/ /skad cig 'jig pa'i rang bzhin du/ /chos rnams yang dang yang du bsam/ /bla ma dkon mchog gsum po la/ /blo ldan 'bad pas skyabs su 'gro/ /'di ni rgyal ba'i lam la 'jug pa las mi rtag pa bstan pa'i le'u ste gsum pa'o// //spyir ni 'khor ba sdug bsngal gyi/ /phung por rab tu grags pa yin/ /skye dang rga dang na dang 'chi/ /de bzhin du ni ngan song gsum/ /sdug bsngal rang bzhin nyid du gsungs/ /'khor ba cis kyang 'byung ba yin/ / zhing las g.yo dang tshong dang ni/ /phyugs skyong ba yi sdug bsngal dang / /sdug pa dang bral sdug bsngal dang / /mi sdug dang phrad sdug bsngal dang / /'dod don btsal yang ma rnyed dang / /shin tu bkres skom sdug bsngal dang / /dbul ba'i sdug bsngal shin tu che/ /dgra rnams sna tshogs sdug bsngal dang //bsam pa ma grub nor zad dang / /grogs med sdug bsngal sdug bsngal nyid/ /'gyur ba'i sdug bsngal chen po ni/ /dbang po lnga ni rgyas byed pa'i/ /dbang po'i spyod yul longs spyod kun/ /de bzhin rgyal po dbang phyug sogs/ /khams gsum po ni ma lus kyi/ / mdor na zag bcas bde ba 'di/ /mthar ni 'bral bar 'gyur ba ste/ /'di ni sdug bsngal nyid yin no/ /nges par sdug bsngal 'di rnams kyi/ /nyer len rgyu ni sred pa ste/ /de bzlog pa yi ched du ni/ /chos kyi bdag med bsgom par bya/ /'di ni rgyal ba'i lam la 'jug pa las 'khor ba'i sdug bsngal brjod pa'i le'u ste bzhi pa'o// //thog ma med pa'i 'khor ba ru/ /las rlung shugs kyis gang 'khor ba/ /'di dag dal ba med par 'khor/ /sdug bsngal 'chi ba'i chos can de/ /thog ma med ldan 'khor bar ni/ /skye ba brgyud mar 'khor ba na/ /res 'ga' la lar gang la la//pha dang ma dang bu dang ni/ /snag gnyen sogs su brgya stong du/ /'di la gang zhig ma gyur med/ /bu dang tsha bo sogs 'brel ba/ /nye 'khor gnyen dang rtsa lag rnams/ /srid pa'i sdug bsngal rgya mtsho ru/ /bying ba'i sems can bsgral ba'i phyir/ /nan tan gyis ni legs brtags nas//dpal ldan bla ma dam pa bsten/ /'di ni rgyal ba'i lam la 'jug pa las 'gro ba bsgral bar 'dod pa'i le'u ste lnga pa'o// //lta ba kun gyi gnad shes shing / /snying po yod med rnam dpyod can/ /rtog ge'i bstan bcos kun don dang / /dbu ma'i don la rnam dag blo/ /rgyags min nga rgyal med pa dang //snyoms shing mchog tu snying rje can/ /srid pa'i longs spyod don mi gnyer/ /bla ma dkon mchog gsum la brten/ /gzhan las rnyed pa don mi gnyer/ /chog shes rang gi las la sems/ /pha rol dpal dang rnyed pa dang / /bkur sti yon tan grags pa yis//bde dang ldan na shin tu dga'/ /mdo dang chos mngon 'dul ba yi/ /'gal ba'i don ni gsal byed cing / /bla ma brgyud pa'i rim pa yi/ /theg pa chen po'i don ston pa/ /brtan zhing dul la blo gros ldan/ /bzod ldan gsong por legs smra ba/ /tshul khrims 'chal yang lam la gnas//byas pa'i ltung ba 'chos par byed/ /de la sogs te gsung rab las/ /gsungs pa'i bla ma'i mtshan nyid ldan/ /de 'dra'i dpal ldan bla mar bya/ /de las gzhan pa bdud kyi phyogs/ /'di ni rgyal ba'i lam la 'jug pa las dpal ldan bla ma'i mtshan nyid bstan pa'i le'u ste drug pa'o// //rnam dag tshes dang gza' la sogs/ /rjes su mthun pa kun bzung la/ /gus pas bla ma dkon mchog la/ /cho ga bzhin du mchod byas te/ /tha ma 'bring sogs dbye ba ni/ /rdzogs sangs rgyas sku cho ga yis/ /bla ma dang ni dkon mchog la/ / ci nus pa yi yon dbul bya/ /'khor ba'i sdug bsngal gyis skrag pa'i/ /yid kyis bstod cing phyag kyang bya/ /byang chub snying po ma thob bar/ /dkon mchog gsum la skyabs su 'gro/ /bla ma mchod pa la sogs pa'i/ /thog ma med ldan 'khor ba nas/ /tshe rabs 'di 'am gzhan dag tu//bdag gis ma 'tshal sdig bgyis pa'am/ /bgyid du stsal pa nyid dang ni/ /gti mug 'khrul pas bdag non te/ /rjes su yi rang gang bgyis pa/ /nongs pa de dag mthong bgyis nas/ /bsam pa thag pas mgon la bshags/ /bdag gis dkon mchog gsum dang ni//pha ma'am bla ma gzhan dag la/ /nyon mongs sgo nas lus ngag dang / /yid kyis gnod bgyis gang lags dang / /nyes pa du mas skyon chags pa'i/ /sdig can bdag gis sdig pa gang / /shin tu mi bzad bgyis pa de/ /thams cad 'dren pa rnams la 'chags/ /sdig pa bshags pa'o//'dren pa rnams kyis bdag gi sdig /nongs pa legs par gzung du gsol/ /'di ni bzang po ma lags pas/ /slan chad bdag ni yang mi bgyid/ /mi byed par sdom pa'o/ /phyogs bcu nam mkha'i mthas khyab pa/ /'jig rten khams na bzhugs pa yi/ /sangs rgyas byang sems de dag kun//dus gsum du ni byung rnams dang / /nyan thos bse ru sangs rgyas dang / /'phags min lus can rnams kyi ni/ /dus gsum bsod nams thams cad la/ /dga' bas rjes su yi rang ngo / /bsod nams la rjes su yi rang ba'o/ /rjes su yi rang bgyis pa las//bsod nams dpag med gang skyes pa/ /dge des skye bo thams cad rnams/ /rdzogs pa'i byang chub thob gyur cig /bsod nams yongs su bsngo ba'o/ /'jig rten khams brjod sangs rgyas gang / /dus gsum 'byung ba'i brtse can rnams/ /rnam pa kun du grags par ni/ / chos ni gsung zhing bstan du gsol/ /bskul ba'o/ /yongs su mya ngan 'da' bzhed pa'i/ /skyob pa rtag par bzhugs su gsol/ /dam chos thos te sems can rnams/ /srid pa las ni phyir phyogs shog /gsol ba'o/ /mgon po khyod la thams cad du/ /nges par bdag nyid dbul bar bgyi//deng nas bzung nas bran nyid du/ /'khor ba'i 'jigs pas mchi bar bgyi/ /mgon po bla ma sangs rgyas dang / /byang chub sems kyis bdag bzung mdzod/ /mi 'jigs pa ni bdag la stsol/ /deng nas 'gro ba'i don bgyi'o/ /bdag nyid dbul ba'o/ /de nas rdzogs pa'i byang chub kyi//sems ni bla na med par bskyed/ /lung las gsungs pa'i cho ga yis/ /sems ni rtse gcig dad byas la/ /'di lta ste/ phyogs bcu nam mkha' kun khyab pa'i/ /'jig rten khams na bzhugs pa yi/ /ji snyed sangs rgyas thams cad dang / /de sras byang chub sems rnams dang //'phags pa nyan thos byang chub gang / /'dren pa rang rgyal rnams dang ni/ /rdzu 'phrul chen po'i lha la sogs/ /de dag bdag la dgongs su gsol/ /phyogs bcu nam mkha'i mtha' gtugs pa'i/ /'khor ba'i 'ching ba dam po las/ /sems can khams rnams bsgral phyir dang //rdzogs pa'i byang chub thob bya'i phyir/ /ji ltar dus gsum mgon po rnams/ /byang chub tu ni nges mdzad pa'i/ /byang chub sems ni bla med pa/ /dam pa bdag gis bskyed par bgyi/ /tshul khrims rnam pa gsum bsrungs te/ /sangs rgyas sbyor skyes sdom pa dang //dge ba'i chos ni sdud pa dang / /sems can don byed tshul khrims ni/ /bdag gis brtan por gzung bar bgyi/ /sangs rgyas chos dang dge 'dun te/ /bla na med pa'i dkon mchog gsum/ /deng nas brtsams nas gzung bar bgyi/ /de ltar sems ni bskyed nas kyang / /de nas de la mi mthun phyogs//chom rkun skabs tshol spang ba'i phyir/ /de la zhugs te sems kyis bsrungs/ /sgrib pa'i mun pa kun 'joms shing / /kun mkhyen ye shes byed pa po/ /gang la phan yon dpag med pa/ /thub pa skyes mchog gis gsungs shing / /dpal ldan kun du bzang spyod sogs//smon lam mtha' yas kyis bcings pas/ /rdo rje lta bur brtan pa ste/ /'gro ba'i sdug bsngal sel ba'i mchog /phun sum tshogs pa kun bskyed cing / /bdud ni thams cad 'jigs byed pa/ /sdug bsngal rgya mtsho kun skyob pa'i/ /rin thang med pa'i rin chen mchog /byang chub spyod 'jug la sogs su//bdag nyid chen po rnams kyis ni/ /sems can kun la brtse ba yis/ /mdor bsdus gsungs pa rig par bya/ /ji ltar yid bzhin nor bu dang / /bum pa bzang po mi zad gter/ /dpag bsam shing gi myu gu ni/ /rnyed bzhin 'bad las bsrung bar bya/ /cho ga bzhin du sdom blangs na//byang chub smon pa ldan 'gyur te/ /stong nyid snying rje dbyer med pas/ /byang chub sems su rab tu grags/ /sems bskyed pa ni gzhan don phyir/ /yang dag rdzogs pa'i byang chub 'dod/ /rgyu dang 'bras bu'i dbye ba'am/ /de bzhin lhan cig skye bar brjod/ /nyon mongs la sogs kyis bsgribs phyir//de yi gzugs ni mi gsal ba'i/ /ma rig pa yi gzugs yin phyir/ /rnam par rig byed min zhes brjod/ /sdom par brjod pa de yang ni/ /dkar po'i phyogs kyi rgyun yin no/ /thar pa'i cha mthun gnas pa ni/ /chung ngu la sogs dbye ba gsum/ /'dun pa lhan cig mtshungs ldan sems//dag cing bzang ba'i zhing sa bzhin/ /bsod nams ye shes tshogs mchog yin/ /skye zhing 'byung ba'i rten yin no/ /bsam pa rjes su zhugs pa'i sems/ /dag pa'i gser dang mtshungs pa ste/ /da ltar dang ni phyi nas kyang / /rnam pa kun du 'gyur ba med//lhag pa'i bsam pa mtshungs ldan pa'i/ /dkar phyogs zla ba tshes pa bzhin/ /dge ba'i chos ni thams cad kyang / /gong nas gong du 'phel bar byed/ /las ni dang po par gnas la/ /rim pa bzhin du gsum gsungs pa/ /chung ngu 'bring dang chen po ste/ /thar pa'i cha dang mthun gyur pa'o//sbyor ba'i lam dang mtshungs ldan pa'i/ /sems ni me dang 'dra ba ste/ /mi mthun phyogs kyi bud shing bsreg /rab tu sbyor ba 'phro phyir 'byung / /sbyin pa'i pha rol phyin ldan pa/ /mi zad pa yi gter dang 'dra/ /'dod don kun gyis tshim byas kyang / /'dod don yongs su zad pa med//tshul khrims pha rol phyin ldan pa/ /rin chen 'byung gnas lta bur 'gyur/ /yon tan rin chen de dag kun/ /skye ba'i rten ni de yin no/ /bzod pa'i phar phyin rnal 'byor pa'i/ /sems ni rgya mtsho chen po bzhin/ /mi 'dod pa kun thog bab kyang / /rgyud la bde ba 'khrug mi 'gyur//brtson 'grus pha rol phyin ldan pas/ /rmad du byung ba'i rdo rje bzhin/ /yid ches mngon par brten pa ste/ /bdud kyi ris kyis mi phyed pa'o/ /bsam gtan phar phyin rnal 'byor pa'i/ /sems ni ri rgyal lta bu ste/ /dmigs pa kun gyis g.yengs pa yi/ /bdag nyid che rnams mi bskyod pa'o//shes rab pha rol phyin ldan pa/ /lha rdzas sman chen lta bu ste/ /nyon mongs shes bya'i sgrib pa'i nad/ /des ni kun du 'joms pa yin/ /thabs kun gyis ni phar phyin ldan/ /dge ba'i bshes gnyen lta bu ste/ /kun nas rtag par thams cad du/ /sems can don ni yongs mi gtong / / smon lam dang ni mnyam ldan pa'i/ /sems ni yid bzhin nor bu bzhin/ /smon lam gyi ni nus pa yis/ /'bras bu smon pa 'phel ba nyid/ /stobs kyi pha rol phyin ldan pa'i/ /sems ni nyi ma lta bu ste/ /rang gi gdul bya'i lo tog kun/ /yongs su smin pa nyid du byed/ /ye shes pha rol phyin ldan pa/ / glu dbyangs snyan pa sgrogs pa bzhin/ /chos rnams yang dag bstan pas ni/ /sems can 'dun par byed pa po/ /sems ni bcu po 'di rnams ni/ /rim pas sa ni bcu po ste/ /mthong lam bsgom lam zhes pa las/ /der ni gcig dang go rims bzhin/ /mngon par shes dang mtshungs ldan dang //'khor los sgyur ba'i rgyal po bzhin/ /thogs pa med pa'i mthu yis ni/ /sems can don kun byed pa nyid/ /bsod nams ye shes tshogs ldan pa/ /bang mdzod dang ni mtshungs pa ste/ /bsod nams ye shes tshogs gnyis kyis/ /mdzod ni nges par gnas pa nyid/ /byang chub phyogs kyi chos rnams dang //ldan pas spyod lam dang 'dra ba/ /'phags pa'i gang zag ma lus pa/ /'gro ba dang ni 'ong ba nyid/ /zhi gnas lhag mthong ldan pa ni/ /bzhon pa lta bur dgongs pa yin/ /zung 'jug lam du 'gro bas na/ /srid dang zhi bar mi ltung nyid/ /gzungs dang spobs pa dang ldan pa//bkod ma'i chu dang 'dra ba ste/ /thos dang ma thos chos rnams kun/ /rtag par 'dzin cing ston pa'o/ /rim pa bzhin du brjod pa yi/ /sems ni lnga po 'di dag nyid/ /byang chub sems dpa'i sa la ni/ /khyad par lam gyis bsdus pa'o/ /chos kyi sbyin pa dang ldan pa/ / kun dga'i sgra brnyan lta bu ste/ /thar pa 'dod pa'i gdul bya la/ /kun dga'i tshig ni sgrogs par byed/ /'di ni byang chub sems dpa' yi/ /sa dang 'brel te sangs rgyas sar/ /'jug sbyor ba yi lam gyis bsdus/ /de las gzhan yang gang zhig ni/ /bgrod pa gcig pa'i lam gyis ni//rjes zhugs gang gA'i chu rgyun bzhin/ /snying brtse shes rab dbyer med cing / /gcig tu sbyor bas gzhan don byed/ /chos sku mngon par ldan pa yi/ /sems ni sprin dang 'dra bar 'dod/ /mtha' yas lus kyi sprul sprin gyi/ /sems can don byed rgyu nyid do/ /rdzogs sangs rgyas kyi sas bsdus pa'i//sems 'di gnyis ni rim pa bzhin/ /sngon du gsung ba dngos gzhi'i skabs/ /phyi ma rjes kyi skabs su 'dod/ /'di ni 'jug pa byang chub kyi/ /sems kyi dbye bar gsungs pa yin/ /smon dang 'jug pa'i dbye ba yis/ /byang chub sems ni gnyis su gsal/ / gang nas bzung ste sems can khams/ /mtha' yas rab tu sgrim pa'i phyir/ /mi ldog pa yi sems kyis su/ /sems de yang dag blangs gyur pa/ /deng nas bzung ste gnyid log gam/ /bag med gyur kyang bsod nams shugs/ /rgyun mi 'chad par du ma zhig /nam mkha' mnyam par rab tu 'byung //byang chub smon pa'i sems las ni/ /'khor tshe 'bras bu cher 'byung yang / /ji ltar 'jug pa'i sems bzhin du/ /bsod nams rgyun chags 'byung ba min/ /'di dag gis ni dge ba'i chos/ /zag bcas zag med thams cad kyis/ /lam 'bras dang bcas mtshan nyid rnams//yang dag bsdus te ji bzhin gsungs/ /'di ni rgyal ba'i lam la 'jug pa las byang chub tu sems bskyed pa'i le'u ste bdun pa'o// //mchog tu dge ba bzung ba dang / /mi dge thams cad spangs pa ste/ /de yis sdom pa bzung ba ni/ /ji lta ba bzhin yongs su bsrungs//bstan pa'i sems kyis 'khor ba yi/ /sdug bsngal rjes su dran par bya/ /sdug bsngal rgyu ni spang ba'i phyir/ /gnyen po yongs su gzung bar bya/ /de ni dge bsnyen bsnyen gnas dang / /dge tshul dang ni dge slong rnams/ /lnga dang brgyad dang bcu dang ni/ /thams cad spong zhing bsrung bar gzung //pho dang mo yi dbye ba yis/ /mdor na slar yang brgyad du dbye/ /so sor thar pa'i sdom zhes pa/ /'dul ba nyid du rgyas par spros/ /dge slong lus ni bsdams pa ste/ /dge slong ngag ni bsdams pa yin/ /dge slong yid ni bsdams pa ste/ /dge slong kun du bsdams pa yin//sdig pa thams cad mi bya ste/ /dge ba phun sum tshogs par spyad/ /rang gi sems ni yongs su gdul/ /'di ni sangs rgyas bstan pa yin/ /de dag nyid ni theg chen la/ /zhugs nas khyad par 'phags pa nyid/ /byang chub sems dpa'i bslab pa dang / /ldan zhing de rnams so sor 'brang //byang chub sems kyi bslab pa ni/ /mtha' yas thub pas gsungs pa rnams/ /byang chub spyod 'jug la sogs su/ /bsdus pa de rnams blta bar bya/ /mdor na byang chub sems rnams kyis/ /bslab pa sems can don bsgrub cing / /phung po la sogs chos rnams kyi/ / ngo bo nyid med rnam par bsgom/ /tshangs pa'i spyod pa ma nyams pa/ /rab tu 'bad pas spyad par bya/ /nyan thos byang chub sems dpa' ni/ /kun rdzob pa dang don dam ste/ /sdom pa blangs nas bsrung ba ni/ /kun rdzob pa ru 'dod pa yin/ /tshad med pa ni bzhi rnams la/ /bsnyen cing bsten pa don dam ste//sdug bsngal dang ni sdug bsngal gyi/ /rgyu las 'gro ba bsgral 'dod nyid/ /de ni snying rje chen por gsungs/ /ston ka'i zla 'od bzang bzhin no/ /'gro ba bla med bde ba la/ /sbyor bar 'dod pas byams pa nyid/ /nam mkha' kun ni mthar thug pa'i/ /in+d+ra nI la'i 'od mnyam pa'o//gzhan la phan 'dogs la mkhas shing / /byang chub la phyogs sems can de/ /mthong nas tshim pa dga' mtshan nyid/ /pad+ma rA ga'i 'od dang mtshungs/ /rnyed pa la sogs 'jig rten chos/ /de dag kun la btang snyoms pa'i/ /ting 'dzin de bskyed rnal 'byor pa//btang snyoms pad+ma'i 'dab ma'i 'od/ /rang bzhin dang ni mtshan ma dang / /'bras bu dang mngon 'du byed kyi/ /stong pa nyid kyi snying rje sogs/ /rim bzhin 'khyud par shes par bya/ /tshangs pa'i gnas ni bzhi po rnams/ /dbye ba rnam bzhi rtag bsgom bya/ /rnam par thar pa'i sgo de yis//gal te 'khyud par ma gyur na/ /'di dag zag pa dang bcas so/ /tshangs par spyod pa 'di gnyis ni/ /rgyal ba'i sras po rnams kyi'o/ /tshul gnas thos dang bsam ldan pa/ /bsgom pa la ni rab tu sbyor/ /rang gzhan rgyud kyi nyon mongs pa/ /spong zhing dben par gnas pa yi//bza' ba la sogs pa rnams ni/ /srog bsrung tsam gyis chog shes pa/ /gsungs pa'i mtshan nyid 'di nyid ni/ /ldan pa'i mi de rdzogs pa yi/ /byang chub lam ni dang po la/ /bsgom pa'i snod gyur gzhan du min/ /'khor ba'i bde dang longs spyod ni/ /sred pa nyid du sred par byed/ / de yis rnam g.yengs sems kyis ni/ /lam la goms pa shin tu ring / /thos bsam rab 'phel las byung zhing / /sred dang srid pa rnams spong ba/ /thar pa'i cha mthun dge ba ste/ /de thob thub sras chung ngu'o/ /bsgom pa'i lam ni rnam gnyis te/ /so so'i skye dang 'phags pa yi/ / dbye ba zag bcas zag med do/ /mthong ba zhes bya zag pa med/ /'di ni rgyal ba'i lam la 'jug pa las sdom pa brjod pa'i le'u ste brgyad pa'o// //'di ltar skyes pa'i rin chen sems/ /bsrung ba ru ni 'dod pa yis/ /phan dang mi phan dngos po ni/ /rim bzhin blang dor shes par bya//dor bya'i dbye ba rang bzhin dang / /bcas pa'i kha na ma tho ba'o/ /kha na ma tho mi dge'i las/ /phye nas phye ste bshad par bya/ /rang bzhin kha na ma tho nyid/ /mi dge bcu po 'di dag ste/ /rnam smin mi bzad sdug bsngal nyid/ /de dag rnam par spang bar bya/ /srog gcod pa ni ma 'khrul par//bsams bzhin srog chags gsod pa'o/ /ma byin len pa gzhan gyi nor/ /mthu dang 'jab bus bdag gis byed/ /bgrod min bgrod par 'dod pa yi/ /log par g.yem pa rnam pa bzhi/ /brdzun tshig 'du shes gzhan bsgyur ba'i/ /tshig don mngon par go ba'o/ /mig rna yid kyi rnam shes dang //gsum gyis nyams su myong gang de/ /mthong thos rnam par shes pa dang / /rtogs pa yin te rim bzhin bshad/ /phra ma pha rol dbye ba'i phyir/ /nyon mongs can gyi sems kyi tshig /tshig rtsub po ni mi snyan pa/ /nyon mongs can kun kyal ba yin/ /gzhan yang nyon mongs can sems kyi//kha gsag glu dang rol mor bcas/ /bstan bcos ngan pa'i tshig yin no/ /brnab sems gzhan nor log par chag /gnod sems can la sdang ba'o/ /dge dang mi dge med lta ba/ /log par lta ba yin 'di la/ /gsum mam bdun ni las kyang yin/ /de la rnam smin thams cad du//dmyal bar yongs su brjod pa ste/ /rgyu mthun rgyu 'bras mthun par ni/ /sa steng nyid du myong bar byed/ /bdag pos phyi yul 'dod pa'i don/ /phyin ci log tu 'byung ba'o/ /sdug bsngal phyir dang gsad phyir dang / /gzi byin med phyir 'bras rnams gsum/ /sbyor ba dngos gzhi rjes rnams kyis//gnas skabs go rims bzhin du'o/ /rgyu mthun srog gcod pa yis ni/ /tshe thung lus la nad zug ste/ /ma byin par ni blangs pa yis/ /dbul por 'gyur zhing rgyal po dang / /chom rkun sogs kyis nor zad byed/ /'dod pas log par g.yem rnams kyis/ /chung ma gzhan la 'phyo bar 'gyur//brdzun du smra bas skur pa 'debs/ /phra mas grogs dang dbye bar 'gyur/ /tshig rtsub brjod pas mi snyan thos/ /ngag 'khyal gyis ni legs bshad kyang / /mi len gzhan gyi bzhad gad rgyu/ /brnab sems kyis ni 'dod chags dag / drag cing longs spyod zad par 'gyur/ /gnod sems kyis ni zhe sdang drag /lus kyang ngan pa nyid yin no/ /gti mug drag cing lta ba ngan/ /log par lta ba'i 'bras bur grags/ /'di ni rgyu mthun 'bras bu'o/ /bsad pas phyi rol dngos po rnams/ /'bras bu bcud chung la sogs pa/ /ma byin blangs pas thog 'bab cing //rdul gyis rab tu gang ba nyid/ /'dod pas log par g.yem pa yis/ /phyogs kun rdul gyis khyab pa nyid/ /brdzun du smra bas thams cad du/ /dngos po thams cad dri mi zhim/ /phra ma'i tshig gi 'bras bu ni/ /shin tu mtho dang dma' ba nyid/ /tshig rtsub smras pa las byung ba//sa ni chu med tsha sgo can/ /ngag 'khyal smras pa las byung ba/ /dus tshigs rnams ni log par 'byung / /brnab sems kyis ni 'bras bu phra/ /gnod sems kyis ni 'bras bu rtsub/ /'bras med pa'am 'bras bu chung / /log par lta ba las byung ba'i/ /lhan skyes kha na ma tho ba//'bras bcas gsungs pa de smad pa'o/ /'di ni bdag po'i 'bras bu'o/ /'di ni rgyal ba'i lam la [(]'brug [,]'jug [)]pa las mi dge ba bcu brjod pa'i le'u ste dgu pa'o// //bag med la dga' skye bo gang / /'di ni thar pa'i snod ma yin/ /bag med dug gis brgyal ba ni//mya ngan 'das pa shin tu ring / /dgra bo 'jigs pa cher byed pa/ /bag med dang mnyam 'ga' yang med/ /gang yang bag med dbang song ba/ /dmyal ba ru ni ltung bar 'gyur/ /bag med rab ldan mi dag ni/ /rtse zhing dogs med sdig pa spyod/ /de nas mi bzad dmyal bar ltung //rtag par bag yod mi rnams ni/ /bsod nams ye shes pha rol phyin/ /mchog tu zhi ba 'thob par 'gyur/ /de yi 'jigs pa thams cad zad/ /gang zhig mi bdag thob nas kyang / /bag med pa la mi 'jug cing / /de las gzhan du bzlog pa ni/ /de ni mkhas pa zhes su brjod//sngon du bde ba ltar rtogs nas/ /bag med pa la rjes su 'jug /bag med las byung 'bras bu 'thob/ /phyi nas nges par de gdung 'gyur/ /dgra mang yid du mi 'ong dang / /grags pa ngan zhing shin tu smod/ /tshogs pa'i nang du sma 'bab cing / /bag med ldan pa sdug bsngal snod/ / kun du rtag par las kun la/ /bag med mchog tu nyes pa ste/ /gang yang nyin dang mtshan mo ru/ /de la dge ba rdzogs mi 'gyur/ /'jig rten 'jig rten 'das bde ba/ /cung zad gang yod bag med des/ /rlag par byed par dogs nas ni/ /de nas de ni spang bar bya/ / bag med 'khor ba'i rtsa ba ste/ /bag yod mchog tu 'gro ba'o/ /de bas bag med spangs pa de/ /kun du rtag par bde bar 'gyur/ /bag med brgya yis bcings pa ni/ /yul gyi rgya mtshos g.yengs pa nyid/ /srid pa'i sgrog gis bcings pa yi/ /lha rnams dpag tu med par rtse//skyes pa tsam gyis lha yi ni/ /bde ba skad cig rim pas 'dzad/ /bag med pa yis brgyal ba rnams/ /skad cig zad par mi shes so/ /rtag tu yul la rol pa rnams/ /yid ni bag med kyis g.yengs 'khrul/ /'dod pa'i bde bas chog shes med/ /de yis lha rnams sdug bsngal nyid//'dod pa'i rim gyis 'khrul pa yi/ /lha rnams bag med mun pas gtibs/ /'byor pa g.yo zhing srog kyang ni/ /mthar kyang 'jigs par mi shes so/ /thog mar grogs po gzhan du mthong / /phyi nas dgra bo bzhin du 'gyur/ /lus can rnams kun bag med kyis//nya rnams lcags kyus brlag bzhin no/ /lha dang lha min mi rnams dang / /klu rnams la ni khyad par du/ /kun du don med byed par mthong / /bag med pas ni dgra bo mchog /srid pa'i sdug bsngal gyis skrag cing / /rang dang mdza' bo 'chi bsams te//sems can kun la brtse ba yis/ /bag med yang dag rab tu sel/ /'di ni rgyal ba'i lam la 'jug pa las bag med pa'i nyes dmigs brjod pa'i le'u ste bcu pa'o// //'dod pa rnams la 'dod mi bya/ /'dod pa yis ni kun du bslus/ /'khor ba'i 'ching ba drag po ste//kun kyang dmyal ba'i rgyu rnams so/ /'di la chags dang 'dod pa gang / /de yi sdug bsngal mtha' yas so/ /'dod pa'i sbrul gyis zin pa la/ /zhi ba'i rgyu ni gang yang med/ /chags pas bslus pa'i sems can rnams/ /zhe sdang yongs su 'bar ba ste//gti mug dbang du gyur pa yis/ /tshig rtsub po ni smra ba yin/ /gtum pa las byung gtum pa ste/ /gyur pa dang ni drag gtum nyid/ /'dod pa dug gi me 'dra ste/ /rab tu 'bad pas spang bar bya/ /so so'i skye bo dbang po ni/ /dbang po'i don la zhen byas te/ /'dod pa 'di ni byis pa yi/ / yid 'phrog byed cing dmyal bar ltung / /'dod chags me ni bsreg bya yi/ /yul tsam gyis ni tshim mi 'gyur/ /de bzhin du ni dbang po yang / /yul las zhen pa tshim pa med/ /rtsol bas me ni 'byung ba ste/ /ma 'phrad par ni 'byung mi 'gyur/ /mi rnams kyi ni 'dod pa'i me/ /phrad dam ma phrad kyang ni skye//me ni ring na 'tshig mi byed/ /'dod me ring yang bzod par dka'/ /dug ni zos pas 'chi ba ste/ /'dod chags dran pas yis kyang 'joms/ /kun rtog las byung shing la ni/ /'dod pa'i rlung gis sbar ba ni/ /gol la sogs zhen chags kyi/ /mar blugs me yis shin tu bsregs//'byung po rnams ni sun par byed/ /mes ni mchog tu sreg byed de/ /chags med shin tu rno yang na/ /mi rnams sun par mi byed do/ /da ltar byung ba'i 'dod pa ni/ /skyon dang bcas la khyad par du/ /mi rmongs bde bar gnas pa gang / /de ni brtan pa zhes su brjod//rlung gis bskyod pa'i shugs rlabs kyis/ /shin tu g.yo ba'i chu zla dang / /dbu ba lta bur snying med la/ /mkhas pa su zhig dga' bar 'gyur/ /kun rtog byung nas 'dod chags te/ /de nas zhe sdang rab tu skye/ /zhe sdang khong khros skye bo ni/ /de nas dmyal ba nyid du 'gro/ /de bas ri bo nyams dga' zhing //sna tshogs ljon shing yod pa ru/ /brten cing nges pas bsam gtan bya/ /'dod pa'i kun 'byung mdzad pa yin/ /nges par skyon rnams 'di kun gyi/ /dang po'i byed mkhan ma rig nyid/ /de phyir ma rig gzhom bya ste/ /de yi ngo bo rnams dpyad bya/ /'di ni rgyal ba'i lam la 'jug pa las 'dod pa'i nyes dmigs brjod pa'i le'u ste bcu gcig pa'o// //'khor ba'i sdug bsngal thams cad kyi/ /'phel bar byed pa sred pa nyid/ /de phyir sdug bsngal zhi 'dod pas/ /de bas sred pa mkhas pas gzhom/ /dmyal ba'i me bas sred pa yi//me nyid shin tu bsran par dka'/ /lus ngag yid ni nges sred byed/ /dmyal ba'i me ni de lta min/ /khams gsum pa yi rjes 'jug cing / /thog ma med pa'i las gsum ni/ /'bar med dus gsum du 'byung ba/ /sred med zhes bya gzhan yin no/ /mtho ris 'dod chags me yis bsreg /dud 'gro zhe sdang gis bsreg ste/ /gti mug me yis ngan song bsreg /sred me kun gyis sreg byed do/ /nga rgyal ser sna'i me dud ni/ /kun du rtog pa'i shing las byung / /'dod pa'i me yis 'jig rten bsreg /shing byung me yis de lta min/ /'dod pa'i sbrul gyis zin pa gang //de dag sos par 'gyur ba med/ /'dod pa bsten dang bsgoms pa yis/ /phyir zhing de nyid 'phel bar 'gyur/ /ji ltar me yis bsreg bya thob/ /'phel bar 'gyur ba de bzhin 'di/ /'dod pa'i me ni 'phel ba na/ /bzlog par nus pa ma yin no/ /'khor lo bzhi 'khrul 'jig rten ni//'dod pas yongs su bslus pa nyid/ /thog med zag med 'jig rten la/ /'dod pa lta bu'i dgra med do/ /'dod pas bskul ba'i mi rnams ni/ /rgya mtsho drag shul can du 'jug /mtshon cha sbas pa'i g.yul ngo ni/ /zab mor rab tu 'jug pa'o/ /'dod pa yis ni sa skyong yang //phan tshun nges par gsod pa ste/ /spun dang spun ni lhan cig tu/ /pha dang bu yang phan tshun no/ /dug can mda' yis phog pa yi/ /ri dgas gang du rjes su rgyug /der ni dug de nyid 'gro ste/ /de bzhin sred dug mi la'o/ /sdug bsngal can gyi yi dags rnams//yi dags [(]yongs [,]longs [)]spyod la rgyug ste/ /dmyal ba dmyal ba nyid du ni/ /da ni sred pas cher bskul ba'o/ /yun du lha yi bde ba ni/ /spyad pa'i lha rnams lha yul nas/ /sred pa'i zhags pas drangs nas ni/ /slar yang dmyal bar ltung ba'o/ /bla ma dkon mchog gsum dang ni//yon tan can dang btsun mo'i nor/ /gnyis skyes sogs dang sdug phongs kyi/ /nor ni 'dod can 'phrog par byed/ /skye 'gro kun ni brtse med pas/ /sdig pa thams cad byed pa yin/ /nor de bor nas 'gro ba ste/ /shi nas sdig dang lhan cig 'brang / / de nas dmyal ba la sogs pa'i/ /mi bzad sdug bsngal de 'byung 'gyur/ /drag shul skyob pa med pa de/ /las de yis ni myong bar 'gyur/ /sred pa'i yul ni nges grol zhing / /chags pa'i sol me rnam spangs pa/ /rdo dang rin chen mnyam pa ni/ /mya ngan 'das la bde bar 'gyur/ /blo ldan ye shes chu yis ni//'dod pa'i me ni 'bad de gzhom/ /'dod pa ma bkum pa la ni/ /mya ngan 'das pa shin tu ring / /skad cig dga' ste shes par dka'/ /rnam par smin pa me dang mtshungs/ /mya ngan 'das pa'i bde 'dod pas/ /de phyir sred pa nges gzhom bya/ /sred pa'i zhags pas rnam grol zhing //chags dang zhe sdang spangs pa dang / /sdig pa'i dri ma bral ba yi/ /mkhas pa rnams ni mya ngan bral/ /'di ni rgyal ba'i lam la 'jug pa las sred pa'i nyes dmigs brjod pa'i le'u ste bcu gnyis pa'o// //bud med ngan song rtsa ba ste/ /thams cad du ni nor zad byed/ /bud med ngag nyan mi dag ni//tshogs pa ru ni bzhad gad rgyu/ /bud med rnams ni don med chags/ /g.yo dang ser sna che ba ste/ /'jig rten gnyis su rlag byed pa/ /skyes pa rnams la nye bar gnas/ /chags las skyes pa'i rnam 'gyur tshig /'jam zhing myos byed rnam par lta/ /de yi snying ni gzhan du ste/ / yongs su brjod pa gzhan du'o/ /'jam zhing snum la reg bde yang / /'dzin na rdo rje lta bu ste/ /phan byas bkur byas mi dran zhing / /dri ma can gyi bsam pa'o/ /gos dang zas dang lus rgyan sogs/ /ster ba'i gzhon nu yid 'ong ba/ /rang gi bdag po bor nas ni/ /byes mi la ni 'gro bar byed/ / gang du 'gro ba'i grogs de la/ /bud med dga' bar byed pa ste/ /gnas pa'i skyes pa myur myur ba/ /'di ni spong bar byed pa yin/ /ji lta bung ba me tog gi /bcud zad nas ni song ba ltar/ /de bzhin skyes pa nor zad nas/ /bud med kyis ni spong bar byed/ /ral gri'i snying ste rtsub cing g.yo/ / sdig pa'i mun pas bsgribs pa ste/ /bud med skyes pa brlag bya'i phyir/ /skyes te rgyu gzhan ci yang med/ /lha rnams la yang bud med kyi/ /'ching ba las dam gzhan med de/ /bud med 'ching bas nges bcings pa/ /phyi nas dmyal bar ltung ba'o/ /bud med kyis ni byis pa las/ /sgyu gsog khram ni mngon pa'am//bud med chags pa rmongs pa'i mi/ /rmongs pa'i phyir na mi rig go/ /blo gtad skyes pa slu brid kyi/ /'bad pa yis ni bcings nas kyang / /longs spyod kyi ni bcud 'phrog ste/ /bur shing bzhin du 'jibs nas 'dor/ /skyes pa thabs kun 'chang bas ni/ /rnam pa kun gyis yongs bsrungs kyang //bud med dbang du bya bar ni/ /thams cad du ni mi nus so/ /yid 'ong tshig gis skyes pa rnams/ /ri dgas bzhin du rmongs byed cing / /phyi nas rgud par gyur pa ni/ /mi gtsang thal ba bzhin du spong / /phan byas mi dran bkur byas nas/ /de bzhin dbang phyug byams byas pa//khyod la rgud pa nyer gnas na/ /bud med kyis ni mi dran no/ /me tog rnying pa spangs nas ni/ /bung ba bzhin du rgyug pa ste/ /de bzhin khyo ni rgud pa la/ /mo la brtse dang ngo tsha med/ /snying dga' bar ni mi nges shing / /nges pa med cing snying bzang dang / /g.yo zhing byed pa yid du 'ong / / nga rgyal can ni thams cad du/ /ji ltar dug 'dres sbrang bzhin spang / /bud med phal cher sdig bsam can/ /srid pa'i bang mdzod 'ching ba rnams/ /mi mthun thams cad 'byung ba'i phyir/ /thar pa 'dod pas shin tu spang / /'di ni rgyal ba'i lam la 'jug pa las bud med kyi nyes dmigs brjod pa'i le'u ste bcu gsum pa'o// //gang ni skyon kun byed pa nyid/ /chang ni btung bar mi bya ste/ /de yis bag med kyang 'byung zhing / /khyad par du ni yon tan 'joms/ /'dod chags zhe sdang gti mug rnams/ /cher ni shin tu 'bar byed pa'o/ /'jig rten bzhad gad le lo dang //ngag skyon kun dang nor zad byed/ /blo gtad med cing brdzun tshig dang / /rnam 'khrul bya ba nyams pa nyid/ /blo ni g.yo zhing lus dbang med/ /nad dang blo ni rgud pa dang / /ngo tsha med cing khrel med pa/ /rtsod cing pha rol kun smod dang / /nges pa med pa'i bya ba nyid/ /de bzhin sdig pa spyod pa ste//'jig rten 'di dang pha rol du/ /mi bzad sdug bsngal cher byed pa'o/ /'di dag la sogs nyes 'byung bas/ /de bas chang ni rnam par spang / /gang dang gang gis bslab pa'i gzhi/ /ji ltar thub pas bcas pa gang / /rgya cher bcas pa de nyams na//de ni kha na ma tho ba'o/ /'di ni rgyal ba'i lam la 'jug pa las chang gi nyes dmigs brjod pa'i le'u ste bcu bzhi pa'o// //mang du brjod pas ci zhig bya/ /nyon mongs nye ba'i nyon mongs nyid/ /nyes pa kun gyi rten 'di rnams/ /rab tu 'bad pas gzhom par bya/ /nyon mongs nye ba'i nyon mongs 'byung //'du byed rnams las dge sogs dang / /de las 'khor ba'i phung po 'di/ /mtshan nyid sdug bsngal rab tu skye/ /bag la nyal drug rtsa ba ste/ /'dod chags khong khro nga rgyal lta/ /ma rig the tshom nyon mongs te/ /'di la 'dod chags rnam pa gnyis/ /'dod pa'i khams kyi 'dod chags te//'dod pa'i 'dod chags zhes su brjod/ /gzugs dang gzugs med gyur pa ni/ /srid pa'i chags pa'o lta bu ni/ /bdag dang bdag gi rtag chad dang / /med dang dman la mchog lta dang / /rgyu min lam min de lta ba/ /de rnams lta ba lnga yin no/ / nyon mongs bcu ni khams gsum du/ /dgu bcu rtsa brgyad du phye ba/ /'di dag 'phags pa'i bden bzhi ni/ /mthong dang bsgom lam rnams kyis spong / /'di rnams rgya cher spros nas ni/ /mthong lam skabs su mngon par brjod/ /'di ni mi mthun phyogs kyi ni/ /gnas skabs tsam du brjod pa yin//'di ni rgyal ba'i lam la 'jug pa las bag la nyal ba'i nyes dmigs brjod pa'i le'u ste bco lnga pa'o// //khro dang khon 'dzin g.yo phrag dog /'chab dang 'tshig dang ser sna dang / /sgyu dang rmugs dang nyes rtsom dang / /ngo tsha med dang khrel med dang //thob 'jal dang ni tshul 'chos dang / /kha gsag rnyed pas rnyed 'dod dang / /gzhogs slong zhes bya 'di dag ni/ /log par 'tsho ba lnga rnams so/ /skyon zlos rgyags dang snungs med dang / /zhen dang yongs su zhen nyid dang / /yid la mi byed mi bzod dang / /chags dang mi rigs chags pa dang //snyom pa dang ni chos min chags/ /zhum dang zas mi 'dod pa dang / /thob 'dod dang ni 'dod 'dun dang / /gnod sems dang ni rgod 'gyod dang / /rmugs dang gnyid dang sdig 'dod dang / /le lo dang ni 'dod chen dang / /bka' blo mi bde tshul med dang / /skye bo ngan mtshungs mi dga' dang //rtog pa'i skye ba bzhi dang ni/ /nga rgyal dbye ba bdun du shes/ /the tshom rnams ni nye nyon mongs/ /dri ma 'di rnams spang bya'o/ /nye ba'i nyon mongs pa mdor bstan pa'o/ /khro ba sems rab 'khrugs pa ste/ /'khon 'dzin de dang rab 'brel nyid/ /sems kyi gya gyu g.yo yin te//gzhan skyid mi bzod phrag dog go/ /rang skyon sgrib pa 'chab pa'o/ /'tshig pa sdig pa zhen pa nyid/ /ser sna rab tu mi gtong ba'o/ /sgyu ni pha rol slu ba'o/ /non pa spobs pa nyams gyur pa'o/ /nyes rtsom khros pas non pa'o/ /ngo tsha med dang khrel med pa/ /rang dang gzhan la mi 'dzem pa'o//thob kyis 'jal ba rnyed pa'i phyir/ /mngon sum gzhan la smod byed pa'o/ /tshul 'chos rnyed dang bkur sti'i phyir/ /dbang po sdom par byed pa ste/ /kha gsag rnyed dang bkur sti'i phyir/ /tshig 'jam sngar ni smra ba'o/ /rnyed pas rnyed pa rnams 'dod pa/ /sngar thob pa la bsngags byed pa'o//gzhan gyi rdzas la mngon zhen pas/ /gzhan gyi rdzas la bsngags byed pa/ /gzhogs slong nyid de lnga 'di dag /log pas 'tsho bar 'dod pa'o/ /skyon zlos gzhan khros sems la ni/ /gsos 'debs pa la brjod pa'o/ /rgyags pa dregs pa'o snungs med ni//sems ni rtog par gyur pa'o/ /zhen pa kun nas dkris pa chung / /'dod pa'i 'dod chags las byung ba'o/ /yongs su zhen pa 'dod pa la/ /kun nas dkris pa che ba'o/ /yid la mi byed don rnams la/ /sems kyi sor rtog med pa'o/ /mi bzod gnod pa byed pa dang / /sdug bsngal dag kyang mi bzod pa'o//chags pa rang gi rdzas la ni/ /chags pa'i 'dod chags ldan pa'i yid/ /gzhan gyi rdzas la zhen pa ni/ /ma rigs chags pa zhes bya'o/ /snyom pa rtsom pa med pa'i lus/ /sgyid lug don gyi le lo'o/ /spang bya bud med la chags pa/ /chos la chags pa zhes 'dod do//rang gi yon tan bskyed nas kyang / /sems dman zhum pa yi chad pa'o/ /zas mi 'dod pa bza' drags pas/ /lus mi bde ba yin par brjod/ /thob 'dod bdag nyid ci nas kyang / /yon tan yang dag ldan zhes brjod/ /'dod 'dun yon tan lnga rnams la//'dod pa don du gnyer ba yin/ /gnod sems brlag par smon pa yis/ /gzhan la gnod par sems pa'o/ /lus sems rab tu ma zhi nyid/ /rgod par yang dag rab tu brjod/ /'gyod pa ngan byas phyi nas ni/ /yang dag rab tu gdung 'gyur ba'o/ /rmugs pa lus sems lci ba yis//las la sbyor bar mi nus nyid/ /gnyid ni rnam shes dbang po la/ /'dus pa gnyid ces brjod pa'o/ /sdig 'dod yon tan med bzhin du/ /yon tan ldan par tshul 'chos pa'o/ /le lo las la sun skyo bas/ /lus sems bying ba nyid yin no/ /'dod chen rab tu brkam pa ste//dpal ldan chog shes las 'da' ba'o/ /bka' blo mi bde gang gsungs pa/ /chos la smod pa'i tshig yin no/ /tshul med slob dpon bla ma yi/ /bya ba rnams la mi gus pa'o/ /bla mar gus pa nyams pa nyid/ /'di ni skye na mtshungs pa'o/ /sems ni 'dod sogs la zhen pas//brtan nyams pa ni mi dga' ba'o/ /nye du dang 'brel rtog pa ni/ /nye du la byams 'du shes so/ /de bzhin yul sred de don du/ /de yi yon tan brjod pa'o/ /de bzhin mi 'chir rtog pa gang / /'chi ba'i 'jigs pas mi dogs pa'o/ /rjes rnams rig dang ldan rtog ni//bdag nyid ci nas gzhan dag gis/ /yon tan bdog pa'i rnam pa yis/ /bla mar byed par 'gyur snyam pa'o/ /gzhan rjes chags dang ldan pa yi/ /rnam rtog gang yin gzhan dag la/ /chags dang gnod sems dregs pa yis/ /phan dang mi phan rnams sems pa'o//kun du brtags pa'i khyad par gyis/ /gang gis ci nas yid kyi ni/ /rnam shes 'jug pa nga rgyal lo/ /'di ni thun mong nyid yin no/ /dman pas dman pa nga rgyal te/ /rang las dman las dman snyam pa/ /nga rgyal nyid du nges pa'o/ /dman pa nyid dang bdag nyid ni/ /mnyam snyam pa yang nga rgyal te//dman pa las bdag lhag snyam pa'i/ /blo de yang ni nga rgyal nyid/ /mnyam dang bdag nyid mnyam snyam pa/ /mnyam pa yi ni nga rgyal lo/ /khyad 'phags pa dang bdag mnyam par/ /rlom pa lhag pa'i nga rgyal lo/ /khyad 'phags las bdag khyad 'phags blo//nga rgyal las kyang nga rgyal lo/ /gar yang bdag ni dgos med ces/ /dman pa'i nga rgyal nyid yin no/ /ngo bo nyid stong nyer len gyi/ /phung po lnga la bdag blo gang / /nga'o snyam du rlom pa ni/ /de ni nga'o snyam par bshad/ /bsam gtan dang ni de 'bras bu/ /ma thob pa yang bdag gis ni//thob pa nyid du rtog pa de/ /mngon pa'i nga rgyal zhes su brjod/ /log pa'i lam la sems chags pas/ /mi 'dod 'bras bu gang zhig la/ /bden pa'i las kyi dngos por rtogs/ /de ni log pa'i nga rgyal brjod/ /tha dad 'du shes 'du shes gang / /chags sdang mun gyis bsgribs pa'o//bden dang dkon mchog gsum sogs la/ /blo rnams gnyis ni the tshom mo/ /'di dag nye ba'i nyon mongs te/ /lnga bcu rtsa bdun rab tu brjod/ /phran tshegs gzhir ni drangs pa rnams/ /thar pa 'dod pas spang bar bya/ /'di ni rgyal ba'i lam la 'jug pa las nye ba'i nyon mongs pa'i nyes dmigs brjod pa'i le'u ste bcu drug pa'o// //'di dag chos kyi bdag med pa/ /rtogs pas bag chags bcas pa rnams/ /rab tu spang ngo yang na ni/ /rten cing 'brel par 'byung ba rnams/ /yang dag par ni mthong bas so//yang na 'phags pa'i bden pa bzhi/ /yang dag mthong zhing phung po sogs/ /stong pa nyid du goms pa dang / /'gro ba'i don la bsgom pas spong / /phung po 'di spangs gzhan du ni/ /nying mtshams sbyor bar byed pa gang / /phung po rnams las gzhan pa'i bdag /srid pa'i lam du 'gro ba med/ /byed pa po dang las rnams dang / /de 'bras spyod dang rtag pa la/ /de ni byed po za ba'o/ /bya ba'i nus pa bral ba nyid/ /phung po bdag min bdag la ni/ /phung po mi ldan bdag gi ni/ /phung po ma yin bdag kyang ni/ /phung po la ni gnas ma yin/ / gzhan gyis yongs su brtags pa nyid/ /brtags phyir bdag tu rigs ma yin/ /phung po bdag la 'brel med do/ /de dag rnam par 'gal bas so/ /sngon dang phyi ma gcig pa'i gzugs/ /mi rtag dang 'brel ga la srid/ /'on te 'brel na rtag pa yang / /mi rtag bdag nyid du ni 'gyur//mi rtag pa yang rtag nyid du/ /rtag tu 'brel pa nyid du 'gyur/ /de ltar dpal ldan 'phags pa ni/ /klu sgrub zhabs kyis gsungs pa ste/ /mu stegs can gyis gang brtags pa'i/ /bdag de rigs pas rnam dpyad na/ /phung po kun gyi nang rnams ni/ /gang zhig nas kyang rnyed min te//phung po rnams yod de rtag min/ /de yang bdag gi ngo bo min/ /gang yang rtag dang mi rtag dag /rten dang brten pa'i ngo bor med/ /phung po tsam zhig bdag tu ni/ /'dod pa nyid ni mi 'gegs te/ /de nyid sbom dang dgar la sogs/ /da rung rlom pas 'phel ba nyid/ /de yang sgyu ma ltar brjod de//gang phyir rnam dpyad spyod yul min/ /rnam par spyod pa rgya che'i phyir/ /'dir ni bdag gis ma spros te/ /de yi don ni rtog ge dang / /dbu ma'i bstan bcos dag na yod/ /chos dang gang zag dbye ba yis/ /bdag med rnam pa gnyis su 'dod/ /dbu ma la ni 'jug pa ru//zla grags zhabs kyis gsungs pa ni/ /bdag med 'di ni 'gro ba rnam grol phyir/ /chos dang gang zag dbye bas rnam gnyis gsungs/ /de nyid rnam mang phye ste slar yang ni/ /de ltar gdul bya rnams la ston pas gsungs/ /spros dang bcas nas stong pa nyid/ /bcu drug bshad de mdor bsdus nas//slar yang bzhi ru bshad pa ste/ /de dag theg pa chen por 'dod/ /gang phyir de yi rang bzhin te/ /yin phyir mig ni mig gis stong / /de bzhin rna ba sna dang lce/ /lus dang yid kyang brjod par bya/ /ther zug gnas min 'jig min nyid/ /nye bar bzung ba'i ngo bo nyid//mig sogs drug po gang yin pa/ /nang stong nyid du de 'dod do/ /gang phyir de yi rang bzhin de/ /yin phyir gzugs ni gzugs kyis stong / /de bzhin sgra ro dri dang chos/ /reg bya'i bar du'ang shes par bya/ /gzugs la sogs pa dngos med pa/ /phyi rol stong pa nyid du 'dod/ / gnyi ga'i ngo bo stong pa ni/ /phyi nang stong pa nyid yin no/ /chos rnams rang bzhin stong pa nyid/ /mkhas pas stong pa nyid ces brjod/ /stong nyid de yang stong pa ni/ /stong pa nyid kyi ngo bor 'dod/ /stong nyid stong pa nyid brjod pa/ /stong nyid stong pa nyid 'dod de/ /stong nyid dngos po'i blo can gyi/ /'dzin pa bzlog phyir gsungs pa yin//sems can snod kyi 'jig rten ni/ /ma lus pa la khyab byed phyir/ /tshad med dpe med mu mtha' ni/ /med phyir phyogs rnams chen po nyid/ /phyogs rnams bcu nyid 'di dag kyang / /phyogs kyi stong pa nyid de ni/ /chen po stong pa nyid du gsungs/ /chen por 'dzin pa bzlog phyir ro//de ni dgos pa mchog yin phyir/ /don dam mya ngan 'das pa yin/ /de ni de yis stong nyid gang / /de ni don dam stong nyid de/ /myang 'das dngos blo can rnams kyi/ /dngos por 'dzin pa bzlog pa'i phyir/ /don dam pa yi stong pa nyid/ /don dam mkhyen pas gsungs pa yin//rkyen las byung phyir khams gsum po/ /'dus byas yin par nges par brjod/ /de ni de yis stong nyid gang / /de ni 'dus byas stong nyid gsungs/ /gang la skye gnas mi rtag nyid/ /de dag med pa 'dus ma byas/ /de ni de yis stong nyid gang / /'dus ma byas stong nyid du gsungs/ /gang la mtha' ni yod min pa//de ni mtha' las 'das par brjod/ /de ni de nyid kyis stong nyid/ /mtha' las 'das pa stong nyid brjod/ /thog ma dang po tha ma mtha'/ /de dag med pas 'khor ba ni/ /thog ma tha ma med par brjod/ /'gro 'ong bral phyir rmi lam lta'i/ /srid 'di de yis dben nyid gang //de ni thog ma dang tha ma/ /med pa stong pa nyid do zhes/ /bstan bcos las ni nges par brjod/ /dor ba zhes bya bkram pa de/ /btang ba la ni nges par brjod/ /de spangs dor ba med pa ste/ /'ga' yang btang med gang de ni/ /dor ba med pa de nyid kyis/ /de nyid stong pa nyid gang yin//de phyir de la dor ba med/ /stong pa nyid ces nges par brjod/ /slob ma rang sangs rgyas rnams dang / /byang sems de bzhin gshegs rnams kyis/ /'dus byas sogs kyi ngo bo nyid/ /gang phyir ma byas de phyir ni/ /'dus byas sogs kyi ngo bo nyid/ /rang bzhin du ni brjod pa ste/ / de nyid kyis de stong nyid gang / /de ni rang bzhin stong pa nyid/ /bco brgyad khams dang reg pa drug /de las skyes pa'i tshor ba drug /gzugs can gzugs can min pa'i chos/ /de bzhin 'dus byas 'dus ma byas/ /gang yin de dag des dben phyir/ /chos rnams thams cad stong pa nyid//gzugs la sogs pa dngos med gang / /de ni rang mtshan stong pa nyid/ /gzugs ni gzugs rung mtshan nyid de/ /tshor ba myong ba'i mtshan nyid can/ /'du shes mtshan mar 'dzin pa ste/ /'du byed mngon par 'du byed pa/ /yul rnams so sor rig pa ni/ /rnam shes rang gi mtshan nyid do//phung po'i mtshan nyid sdug bsngal te/ /khams kyi mtshan nyid sbrul gdug 'dod/ /skye ba'i sgor gyur skye mched de/ /sangs rgyas rnams kyis skye mched gsungs/ /rten cing 'brel 'byung gang yin pa/ /rkyen tshogs pa yi mtshan nyid can/ /gtong ba sbyin pa'i pha rol phyin/ / tshul khrims gdung ba med mtshan nyid/ /bzod pa khro med mtshan nyid de/ /brtson 'grus kha na ma tho med/ /bsam gtan sdud pa'i mtshan nyid can/ /shes rab ma chags mtshan nyid can/ /pha rol phyin pa drug rnams kyi/ /mtshan nyid 'di ni bstan pa yin/ /bsam gtan rnams dang tshad med rnams//gzhan yang gang dag gzugs med pa/ /'di dag mi 'khrugs mtshan nyid du/ /yang dag mkhyen pas gsungs pa yin/ /sum cu rtsa bdun byang chub phyogs/ /nges par 'byung byed rang mtshan nyid/ /stong pa nyid gang dben pa'i phyir/ /de yi mtshan nyid dmigs med nyid//zhi phyir mtshan ma med pa ste/ /gsum pa'i nyid mtshan sdug bsngal dang / /rmongs med rnam par thar pa yi/ /mtshan nyid rnam par grol ba'o/ /shin tu rnam par nges pa yi/ /ngo bor stobs rnams kyang brjod do/ /skyob pa mi 'jigs pa rnams ni/ / shin tu brtan pa'i ngo bo'o/ /so so yang dag rig rnams ni/ /spobs sogs tshad med mtshan nyid can/ /'gro la phan pa nyer sgrub pa/ /byams pa chen po nges par brjod/ /sdug bsngal can rnams yongs skyob pa/ /snying rje chen po'o dga' ba ni/ /rab dga'i mtshan nyid btang snyoms ni//ma 'dres mtshan nyid can zhes bya/ /sangs rgyas chos ni ma 'dres pa/ /bcu dang brgyad du gang 'dod rnams/ /gang phyir ston pa des mi 'phrogs/ /de phyir mi 'phrogs mtshan nyid can/ /rnam kun mkhyen nyid ye shes ni/ /mngon sum mtshan nyid can du 'dod//gzhan ni phyogs gcig pa yin phyir/ /mngon sum zhes byar mi 'dod do/ /'dus byas mtshan nyid gang yin dang / /'dus ma byas kyi mtshan nyid gang / /de de kho nas stong pa nyid/ /de ni rang mtshan stong pa nyid/ /da ltar 'di ni mi gnas shing / /'das dang ma 'ongs yod ma yin//gang du de dag mi dmigs pa/ /de ni mi dmigs pa zhes brjod/ /mi dmigs pa de rang ngo bo/ /de yis dben pa nyid gang de/ /ther zug gnas min 'jig min pas/ /mi dmigs zhes bya'i stong nyid do/ /sbyor ba las byung gzugs rnams med/ /dngos po'i rgyan las byung ba'i phyir//rkyen las byung rnams de nyid kyis/ /stong pa dngos po stong pa nyid/ /dngos po'i sgra yis brjod pa ni/ /mdor bsdus phung po lnga rnams te/ /de rnams de yis stong nyid gang / /de dngos stong pa nyid du bshad/ /mdor bsdus na ni dngos med par/ /'dus ma byas chos rnams la brjod//de ni dngos med de stong nyid/ /dngos po med pa stong pa nyid/ /rang bzhin ngo bo nyid med ni/ /ngo bo nyid brjod stong nyid de/ /'di ltar rang bzhin ma byas pas/ /ngo bo nyid ces bstan pa yin/ /sangs rgyas rnams ni byung yang rung / /ma byung yang ni dngos po nyid//dngos po kun gyis stong pa nyid/ /gzhan gyi dngos por rab tu bsgrags/ /yang dag mtha' dang de bzhin nyid/ /gang de gzhan dngos stong pa nyid/ /shes rab pha rol phyin tshul las/ /de dag dge ni rab tu bsgrags/ /'di ni rgyal ba'i lam la 'jug pa las bdag med pa brjod pa'i le'u ste bcu bdun pa'o// //thog ma med dang nyon mongs kyis/ /'dus byas phung po mtshan nyid de/ /thog ma med pa'i srid 'khor lor/ /rgyun du yongs su 'khor ba ste/ /dpal ldan dbyig gnyen zhabs kyis ni/ / chos mngon mdzod du gsungs pa ni/ /bdag med phung po tsam nyid de/ /nyon mongs las kyis mngon 'dus byas/ /srid pa bar ma'i rgyun gyis ni/ /mar me bzhin du mngal du 'gro/ /ji ltar 'phangs bzhin rim gyis rgyun/ /skyes nas las dang nyon mongs kyis//'jig rten pha rol dag tu 'gro/ /srid pa'i 'khor lo thog ma med/ /de ni rten cing 'brel 'byung ba'i/ /yan lag bcu gnyis cha gsum mo/ /sngon dang phyi mar gnyis gnyis dang / /bar du brgyad yongs rdzogs ldan la/ /sngon skabs nyon mongs ma rig pa/ / 'du byed dag ni sngon las kyi/ /rnam shes mtshams sbyor phung po yin/ /ming dang gzugs ni de phan chad/ /skye mched drug dod tshun chad do/ /de ni gsum dus tshun chad do/ /reg pa bde sdug la sogs kyi/ /rgyu shes nus pa tshun chad do/ /tshor 'khrig tshun chad sred pa ni/ /longs spyod 'khrig pa'i chags can gyi//nye bar len pa longs spyod rnams/ /thob par bya phyir yongs rgyug pa'i/ /de srid 'bras bu 'byung 'gyur ba'i/ /las byed gang yin de srid pa/ /nying mtshams sbyor ba skye ba yin/ /tshor ba'i bar ni rga shi yin/ /'di ni gnas skabs bar 'dod la/ /gtso bo'i phyir ni yan lag bsgrags//sngon dang phyi mtha'i bar dag la/ /rmongs pa rnam par bzlog phyir ro/ /nyon mongs gsum po las gnyis so/ /bzhi bdun de bzhin 'bras bu yin/ /gnyis kyis rgyu 'bras mdor bsdus pa/ /bar ma'i rjes su dpag pa las/ /nyon mongs pa las nyon mongs dang //bya ba nyid do de las bzhi/ /de las bzhi dang nyon mongs skye/ /'di ni srid pa'i yan lag lugs/ /'di ni rgyal ba'i lam la 'jug pa las rten 'brel gyi 'khor lo brjod pa'i le'u ste bco brgyad pa'o// //'phags pa'i bden pa bzhi rnams te//sdug bsngal kun 'byung de bzhin du/ /sdug bsngal 'di yi 'gog pa dang / /sdug bsngal 'gog par 'gro ba'i lam/ /bden pa 'di rnams so sor yang / /rnam pa bzhir ni nges pa ste/ /thar pa 'dod pas 'bad pa yis/ /'chad par 'gyur ba bsgom par bya/ / sdug bsngal gyi ni bden pa yang / /mi rtag sdug bsngal stong bdag med/ /rgyu ni rgyu dang kun 'byung dang / /rab tu skye ba de bzhin rkyen/ /'gog pa'i 'gog dang zhi ba dang / /gya nom pa dang nges 'byung ba'o/ /lam gyi lam dang rigs pa dang / /sgrub dang nges par 'byin pa'o/ / de ltar nyon mongs spang bya'i phyir/ /'phags pa'i bden bzhi bsgom par bya/ /rgyu dang rkyen gyis bskyed pa'i phyir/ /mi rtag skye dang 'jig pa nyid/ /sdug bsngal rjes su mi mthun phyir/ /zag pa dang bcas dngos po ni/ /bdag med deng mi ldan pa'o/ /brtags pa'i chos ni stong pa'o//rnam pa bzhi po 'di dag ni/ /thar pa 'dod pas rtag shes bya/ /sdug bsngal 'khor ba'i phung po rnams/ /dga' ba'i bag chags yang dag 'byung / /dga' la chags dang yang dag ldan/ /sred dang srid pa'i byed pa po/ /rtag tu bden pa'i lam bsgoms pas/ /'di ni 'bad pas gzhom par bya//rgyu de sa bon chos yin phyir/ /nad dang sdug bsngal gzhi nyid do/ /sdug bsngal yang dag skye de'i phyir/ /sdug bsngal kun 'byung nyid shes bya/ /glo bur myong ba'i sdug bsngal la/ /'bras bu zhes ni mngon par brjod/ /rab tu skye ba 'brel sbyor nyid/ /de ni sdug bsngal zug rngu'i rgyur//mngon par brjod bya don gyis ni/ /rkyen ni chu bo 'ching ba nyid/ /'phel ba'i rgyu ni nyon mongs rnams/ /bral ba'i sbyor ba 'gog pa'o/ /sdug bsngal phung po dang bral bas/ /zhi ba zhes su mngon par brjod/ /nyon mongs sdug bsngal bral ba dang / /dge dang bde ba gya nom pa//nges par 'byung ba bdag med de/ /phan dang bde ba rjes su 'phel/ /yang na ma rig 'gog pas na/ /'gog pa yi ni bdag nyid do/ /zhi ba sdug bsngal yang dag zad/ /gya nom bde ba 'ba' zhig go/ /nges par 'byung ba stong nyid sogs/ /rnam thar bde ba'i mtshan nyid do//bdag dang bdag gi bas stong phyir/ /ngo bo nyid kyis stong pa'o/ /'dus byas kun gyi rgyu rnams ni/ /rnam par zhi ba mtshan ma med/ /smon pa med pa khams gsum ni/ /kun du smon pa zad pa'o/ /las rnams mngon par 'dus byas te/ /dngos med mngon par 'dus ma byas/ / yang na 'khor ba'i phung po rnams/ /rgyu ni zad pa 'gog pa ste/ /zhi ba chags sogs nyon mongs pa/ /mi bzad me dpung zhi ba nyid/ /gnod pa kun las nges grol zhing / /bde ba mi zad gya nom pa'o/ /mi mthun phyogs kun nges grol ba/ /nges par 'byung bar rab tu grags/ / 'di yis rgyal ba'i sras rnams ni/ /de nyid don tshol byed phyir lam/ /rigs pa yang ni mi rigs pa'i/ /nyon mongs rnams kyi gnyen po ni/ /thob par byed pa sgrub pa ste/ /lam ni rnam par bsgoms pa yis/ /rtag par phyin ci log zad byed/ /chags thogs med pa'i theg pa gang //nges 'byung yin te der 'byung ba/ /nges par 'byin pa zhes brjod de/ /srid las shin tu 'byung phyir ro/ /yang na 'gro ba'i don gyis lam/ /rigs pa sbyor bas rigs pa'o/ /yang dag par ni thob byed pa'i/ /don gyis sgrub par rab tu brjod/ /'khor ba las ni yang dag par//'byung bas nges par 'byin pa'o/ /'di rnams bshad pa gzhan yang ni/ /rnam par gzhag pa yod mod kyi/ /gzhung bsdus pa yi phyir na 'dir/ /ma sbyar bzod pa nyid du rigs/ /'phags pa'i bden pa bzhi po ni/ /kun du de ltar rtag bsgom bya/ /'di ni nyan thos rang rgyal gyi//byang chub lam gyi rjes 'brang ste/ /gzhan du srid mtsho'i sdug bsngal las/ /sus kyang pha rol bgrod pa med/ /'di ltar 'phags pa'i bden pa bzhi/ /ngo bo nyid med dmigs pa nyid/ /chags pa thams cad rnam spangs pa/ /byang chub sems dpas bsgom par bya//'phags pa'i bden bzhi'i rnam pa ni/ /rang gi rang gzhan bral ba nyid/ /ji lta bar ni gsungs pa rnams/ /rgyal ba'i sras kyis bsgom par bya/ /'di ni rgyal ba'i lam la 'jug pa las 'phags pa'i bden pa bzhi brjod pa'i le'u ste bcu dgu pa'o// //'on kyang mi mthun phyogs dang ni//gnyen po'i chos rnams nges pa ni/ /dam chos mnyan las gzhan du min/ /de bas dam chos mnyan par brjod/ /nyes pa thams cad spang phyir dang / /kun mkhyen go 'phang thob byed pa'i/ /rgyu ni dam chos nyid yin te/ /de bas 'bad pas 'di mnyan bya//dam chos 'bad pas mnyan byas nas/ /yang dag bsam zhing yongs su bsgom/ /sdug bsngal thams cad rnam grol ba/ /kun gyi bdag po rgyal bar 'gyur/ /shin tu gya nom gos dang ni/ /bza' ba dang ni stan dag dang / /bzhon pa'am ni mal cha yis/ /rang gi lus ni bskyed mi bya//byas pa mi gzo sran mi thub/ /sdug bsngal kun gyi 'byung gnas te/ /lus ni dgra ste de don du/ /mkhas pa su zhig sdig pa byed/ /nad kun gyi rten gnod pa can/ /mi gtsang mtha' dag 'dus pa ste/ /shin tu dri nga'i bdag nyid can/ /rang dbang med pas 'jig pa'i rgyu//glog dang mgal me'i 'khor lo bzhin/ /'dod pas tshim med shes byas nas/ /mkhas pas 'di yi bsnyen bkur spang / /de yang 'tsho ba tsam byin nas/ /'di yi yongs su bskyang bar bya/ /rang gzhan bsod nams sogs la sogs/ /bsgrub phyir legs par 'tsho bar bya/ / dam chos 'dzin lus don med du/ /sdug bsngal nyid du mi bya ste/ /lus la brten nas srid pa yi/ /rgya mtsho las ni brgal bar bya'o/ /ji srid 'chi ba ma byung zhing / /blo ni rtogs par ma gyur pa/ /de srid blo ldan 'bad pa yis/ /yid ni chos la dga' bar gyis/ /'tsho ba thams cad brlag phyir dang //bde ba thams cad zad bya dang / /sdug pa kun dang bral bya'i phyir/ /'chi ba mngon par 'ong bar 'gyur/ /mchog tu mi bzad 'chi ba ni/ /thob nas shin tu bzlog dka' ste/ /de tshe chos las gzhan skyabs med/ /de bas chos la dga' bar bya/ /shi nas ngan song las skyob la/ / chos las mchog ni gang yang med/ /sdug pa'i bu dang chung ma sogs/ /'brel pa yang ni shin tu ring / /gang yang bdag dang bdag gis 'brel/ /sngon dang phyi mar gang dang ni/ /gang la yang med par bgyi yang / /tha snyad phyir na mi rigs pa/ /de yang rang gis byas pa'i las/ /dge ba'am yang na mi dge ba//bde dang sdug bsngal nyer spyod phyir/ /'khor dang mdza' dang mi mdza' med/ /de phyir bu dang chung ma sogs/ /shin tu zhen pa spang bar bya/ /sdang la slar yang zhe sdang spang / /dben par chos ni bklag par bya/ /gal te 'khor ba'i sdug bsngal mtshos/ / 'jig pa mi bzad yod na ni/ /chos kyi blo ni bya ba ste/ /'di ltar bde ba thob par 'gyur/ /gang nyid skyes pa'i skye 'gro ni/ /de nyid 'chi bar nges pa ste/ /ji ltar nyin mo'i mtha' ru ni/ /mtshan mo cis kyang 'byung ba bzhin/ /ji srid 'chi ba ma byung ba/ /de srid nyid du rab 'bad nas//bsam pa thams cad yongs spangs te/ /chos bsam pa nyid mchog tu brjod/ /sems ni kun du dam chos la/ /mkhas pas zhen pa nyid du bya/ /gzugs la sogs pa'i yul tshogs las/ /'bad pas rab tu bzlog par bya/ /sems ni kun du rtag par ni/ /rang dag byas te blo can gyis//sems kyi dbang du 'gro mi bya/ /sems kyi dbang gyur dmyal bar ltung / /bzlog par dka' zhing 'khrul pa dang / /g.yo zhing dri ma can nyid gang / /dam chos 'dzin pas g.yo med cing / /dri ma med par byas pa ste/ /bag chags kun dang bdud dang ni/ /mtha' dag dgra ni pham byed cing //mya ngan 'das pa'i grong gi lam/ /skyes bu dam pas sbyong ba nyid/ /sems kyi dbang gis las 'byung ste/ /las kyi dbang gis 'bras bu 'byung / /sems kyi las las yang dag 'byung / /'khor ba zhes ni yongs su brjod/ /sdig dang bsod nams las dang ni//de yi 'bras bu sems kyis byas/ /bde dang sdug bsngal gang cung zad/ /sems las gzhan pa'i byed po med/ /bya ba thams cad sems dbang ste/ /'bras bu'ang sems kyi dbang du shes/ /ji ltar sems ni sna tshogs pa/ /de bzhin 'bras bu yang ni shes/ /ji ltar ri mo mkhan gcig gis//ri mo sna tshogs 'dri byed pa/ /de bzhin sems ni gcig gis kyang / /sna tshogs srid pa'i las byed do/ /sems kyi sprul pa las yin te/ /las kyi sprul pa 'gro ba'o/ /las kyi sprul pa bsdus pas ni/ /sa gnyis po ni bsdus par 'gyur/ /ji ltar sems ni sna tshogs pa//de las 'bras bu sna tshogs shes/ /'gro ba gsum po 'di dag kun/ /sems kyis bris pa nyid du dgongs/ /thog med ma rig pas bcings pa'i/ /sems ni 'khor bar brjod pa ste/ /de nyid 'ba' zhig dag pa ni/ /mya ngan 'das 'chi med zhi ba'o/ / sems dang sems de'i sprul pa yis/ /bskyed pa yi ni khams gsum pa/ /sgyu ma lta bur rnam shes pa'i/ /blo dang ldan pa'i don dam nyid/ /des na de bzhin gshegs pa yi/ /yang dag dam chos mnyan la 'bad/ /kun rtog thams cad bsdus nas ni/ /blo ldan gyis ni chos don bsgoms//'di ltar dam chos kun la ni/ /rtag par brdzun ni mi mthun nyid/ /srid sdug bsngal gyis 'jigs 'di la/ /blo dang ldan pas de dag spang / /bde dang mi ldan mi rnams ni/ /legs pa thams cad rnam par spangs/ /'jig rten 'dir ni rtsa bzhin 'gro//pha rol ngan 'gro sdug bsngal nyid/ /gang zhig chos la mchog rton pa/ /gang du yang ni brdzun mi smra/ /mchod 'os yid ches pa yi gnas/ /de yi ngag ni 'grub par 'gyur/ /brdzun smra ngag ni mi btsun zhing / /shin tu skal ngan chung bar 'gyur/ /kha ni rul ba'i dri ma can//phyis nas 'gyod pas gdungs par 'gyur/ /'di ltar bden pa nyams pa na/ /de yi chos ni shin tu ring / /chos ni nyams par byas pa yis/ /mtha' yas sdug bsngal rim par brgyud/ /ji tsam bsod nams ye shes tshogs/ /rtsa ba bden pa mchog tu 'dod/ /de las bzlog pa skyon du bzhed//bden pa mchog tu 'gyur ba yin/ /gzhan nas bden pa btsal mi bya/ /yul gzhan du ni 'gro mi dgos/ /'jug ngogs rnams las 'jug ngogs mchog /chu yis bkang ba 'jug ngogs yin/ /sgron ma'i nang na sgron mchog tu/ /bden pa sangs rgyas rnams kyis gsungs//sman gyi nang na de mchog ste/ /sdug bsngal thams cad sel bar byed/ /bden pa gnyis don 'di nyid du/ /dam chos sangs rgyas rnams kyis gsungs/ /bden pa smra ba thob gyur pa/ /'khor ba'i 'ching ba las grol ba'o/ /brdzun dang phra ma tshig rtsub dang / /ngag 'khyal pa ni smra ba ste//dmyal ba'i me dang khyad med pa'i/ /ngag skyon de dag spang bar bya/ /bden dang phan dang yid tshim dang / /rgya chen don ni tshig nyung ba/ /skabs dang legs par 'brel ba dang / /brjod bya 'jam por smra bar bya/ /chog shes pa dang rgyags min dang / /sems can kun la phan 'dod cing //chags dang zhe sdang rnam grol ba'i/ /bya ba sgrub par nges par gnas/ /mdza' dang mi mdza' dbye ba med/ /sems snyoms pa yi lus can ni/ /ngan song las ni rnam grol zhing / /bsam pa'i don ni rab sgrub 'gyur/ /sdom la gnas shing zhi ba dang //bla ma mchod la dga' ba dang / /bya dang bya min cho ga shes/ /nan tan don ni rab tu 'grub/ /g.yo med shin tu brtson pa dang / /rtag par ngag ni yid 'ong dang / /bsam gtan kha ton la chags pa'i/ /bya ba 'grub pa ring ba min/ /yul dang dus dang cho ga shes/ /sgrub dang sgrub min bye brag shes//nus pa dang ni thabs dang ldan/ /dngos grub thams cad nye bar gnas/ /gzhan yang mi khros khro ba 'joms/ /bzod pas mi bzod yid 'joms te/ /chos kyis chos min nges par 'joms/ /'od zer gyis ni mun pa 'joms/ /brdzun gyi tshig ni bden pas 'joms//phra ma ting nge 'dzin gyis te/ /tshig rtsub 'jam pa'i sems kyis so/ /ngag 'khyal phan par smra nyid kyis/ /gsod pa byams pa bsgoms pas te/ /rku ba sbyin pas rtag tu rgyal/ /tshul bzhin ma yin yid byed pa/ /de kho na nyid bsgoms pas 'joms/ /ji ltar nyi mas mtshan mo bzhin//ma rig rig pas nges par 'joms/ /dkar po'i phyogs kyis nag po yi/ /phyogs ni 'joms pa de bzhin du/ /'dod log spyod dang 'dod pa rnams/ /blo yis de nyid brtags pas so/ /'phags pa'i bden pa'i lam gyis ni/ /lam ngan pa rnams rtag par 'joms//mi 'jigs bzhi po de dag gis/ /nyam nga ba ni legs par spang / /brjed ngas spong ba dran pa ste/ /de bzhin gshegs pas mi shes spong / /me yis shing la byed bzhin du/ /yang dag gis 'joms yang dag min/ /'jig tshogs la ni lta ba kun/ /stong nyid bsgoms pas 'joms pa'o//rtag par 'dzin pa rab 'joms pa/ /skad cig 'jig par bsgoms pas so/ /le lo'i gti mug 'phel ba kun/ /brtson 'grus kyis ni 'joms pa'o/ /ye shes lhag ldan rtag par dul/ /skyes bu de nyid smra ba yis/ /brdzun smra ma rungs las can gyi/ /mi rnams nges par 'joms pa'o//mu stegs gya gyu'i bsam can kun/ /sangs rgyas kyis ni pham par mdzad/ /lha min lha yis pham pa ste/ /chos nyid kyis ni gnas pa yin/ /'di ni rgyal ba'i lam la 'jug pa las dam pa'i chos mnyan pa la sogs pa brjod pa'i le'u ste nyi shu pa'o// //chags pa thams cad rnam spangs nas/ /sbyin pa btang ste rnam pa bzhi/ /zang zing mi 'jigs chos dang ni/ /byams par brjod de la lar gsum/ /ji srid gang du chags gyur pa/ /de srid 'khor ba'i 'ching ba ste/ /chags pa thams cad spang don du/ /'di ltar sbyin pa sbyin par bya//gang zhig phyug dang dbang phyug dang / /nad med pa dang rgyal po ni/ /stobs kun dang ni ldan pa dang / /skal bzang tshe ring gyur pa ni/ /de ni sbyin pa las byung 'bras/ /lha dang de bzhin mi rnams kyi/ /rab tu sbyin pa stobs kyi mchog /sbyin dang mi ldan ngan 'gror ltung / /skyes bu kun gyi tha ma'o//'dod dang ser snas bcings pa rnams/ /bu dang chung ma'i dbang du 'gro/ /bza' ba 'ba' zhig 'dod pas ni/ /mi dag brlag nas 'gro ba ste/ /'dod pas bcings pa dgrol phyir dang / /nga rgyal shing ni zad bya dang / /sdig pa'i phung po gzhom bya la/ /rab tu sbyin pa stobs kyi mchog / sbyin pa mdun nas 'gro ba ste/ /sbyin pa po ni de rjes 'gro/ /lam ston pa ni sbyin pa'o/ /'jig rten pha rol rab 'gro ba'i/ /sbyin pa'i chu yis ma bkrus nas/ /tshul khrims rlabs kyis yongs bsgos te/ /ye shes kyis brgal dri ma med/ /sdug bsngal pha rol rab tu 'gro/ /skyes bu phan par 'dod pa yis//sgron ma gsum ni rab bsten bya/ /sbyin dang tshul khrims ye shes te/ /'di dag skyon rnams sel byed pa'o/ /sbyin pa ma byas ngo tsha yis/ /nyon mongs skyon gyis bslus pa rnams/ /lhar skyes nas kyang dman 'gyur te/ /de phyir sbyin pa mchog tu 'gyur/ /sbyin pa'i rim gyis 'phel ldan pas//ser sna'i stobs ni spangs pa rnams/ /lha yi rtsed mo la gzhol zhing / /sems ni tshim pa nyid du 'gyur/ /yi dags yang dag rab gzir ba'i/ /bkres skom rang bzhin me gang yin/ /ser sna dgra yi 'bras bur ni/ /thams cad sangs rgyas nyid kyis gsungs/ / snying rje'i mchog ldan gang zhig ni/ /sdug bsngal can la bde sbyin pa/ /sbyin pas de la bde bar 'gyur/ /de phyir sbyin pa rab tu bsngags/ /sbyin pa 'jig rten sgron ma byed/ /gang du 'gro ba'i rjes su 'gro/ /nyes pa zad pa'i tshig gi gnas/ /de bzhin gshegs pa rnams kyis gsungs//ser sna'i sgra ni nges bcom par/ /byas nas sems ni legs bsgoms te/ /gang zhig sbyin pa rab gtong ba/ /de ni srid pa'i mtsho las brgal/ /dang po rtag tu sbyin pa sbyin/ /'bad pas tshul khrims bsrung bar bya/ /sred pa ye shes kyis gzhom bya/ / lam 'di bde bar 'jug pa'i lam/ /ser sna dang ni ldan pa'i sems/ /rtog par kun du de gzhom bya/ /bdag med bsgoms pa goms pa yis/ /chags pa thams cad gzhom par bya/ /sbyin pa ma btang bkres skom gyis/ /yi dags gnas su gdung bar 'gyur/ /sbyin pas chos dang ldan pa yi/ /'khor los sgyur ba'i rgyal por 'gyur//sbyin pa'i sa la brten nas ni/ /tshul khrims srung rnams mkhas pa yin/ /tshul khrims ldan pa dus kyis ni/ /ye shes kyis ni yongs su grol/ /sdug bsngal nges 'byung lam du ni/ /'di ni thob pa rnams kyis bsngags/ /de ltar rig nas mkhas pas ni/ / rtag tu sbyin pa dga' bar bya/ /sngon du bag med spyad pa gang / /sbyin pa la sogs ma spel ba/ /phyi nas 'chi ba'i dus kyi tshe/ /de ni rang sems gdung bar 'gyur/ /sbyin pa byed mi nor de ni/ /rtag par longs ni mi spyod pa/ /'bad pas yongs su bsrungs pa yis/ /nor de rnams ni chud zos 'gyur/ / bla ma'i tshogs la sbyin pa'i phyir/ /rtag tu nor ni spyod byed pa'i/ /nor de mdzes par lta ba yin/ /de las bzlog pa rtswa dang mtshungs/ /stobs chung ba dang dul rnams la/ /sdig dang ma 'dres sbyin byin na/ /sems can rnams kyi mig ji bzhin/ /'jig rten 'di dang pha rol du/ /sbyin pa mi yi 'jig rten du//byin pas dge bar 'gro ba'o/ /lha rnams sbyin pa mi gtong ste/ /'di ni 'bras bu'i sa ru 'dod/ /mi rnams las kyis yin te/ /lha rnams 'bras bu'i sa yin no/ /las kyi dbang gis 'bras bu ste/ /rgyu med pa las 'bras bu yin/ /bsam gtan dang ni nyan pa spangs/ / sbyin dang tshul khrims rnams spang zhing / /rtsod dang rtsub dang rmongs pa yin/ /gson yang shi dang mtshungs pa'o/ /gang zhig chos kyi rjes 'brang na/ /'jig rten 'dir ni srog dang bcas/ /rang gis thams cad rab byin pas/ /rtag par sems can don bya ste/ /sems can la gnod sbyin pa ni//rgyal sras rnams kyis mi bya'o/ /'jigs dang skrag dang ngo tshas min/ /lan la re bas sbyin mi bya/ /lhag bsam ma yin g.yo dang sgyu/ /rgyags dang bcas pas mi sbyin no/ /de yi 'bras bu spyod 'dod dang / /brdzun dang rgod pa'i sems kyis min/ /bdag bstod pa dang gzhan smod dang //khro dang zhe sdang gti mug dang / /yid la gcags dang 'gyod pa dang / /grags dang bde ba'i 'dun pas min/ /de ni sbyin pa byas nas kyang / /sangs rgyas nyid du yongs su bsngo/ /khams gsum kun du khyab pa yi/ /bdag med pa ni yongs su bsgom/ /rgyu mthun 'bras bu rnam grol te/ / bdud kyi 'jigs pa kun bzlog pa'o/ /gcig tu ma nges kun khyab pa/ /sems can thams cad nyer 'gro ba'i/ /rnam thar bzhi ni yang dag pa'i/ /tshangs gnas bzhi po bsgom par bya/ /nyon mongs kun dang bral byed cing / /khyad par 'gro ba'i gzhung lam ste/ /mtha' med chad pa med pa yi/ /kun mkhyen ye shes byed pas so//ji ltar gsungs pa'i skyon bral zhing / /ji ltar gsungs pa'i yon tan ldan/ /sbyin pa de ni mi zad de/ /mi mthun phyogs kyis mi shigs so/ /rgya mtsho chen por chu 'khyor gang / /blugs pa mi zad ji bzhin no/ /'di ni sbyin pa'i gtam mo/ /bde ba thams cad thob bya dang //sdug bsngal thams cad zhi bya'i phyir/ /mtho ris tshogs kyi byed pa po/ /tshul khrims rtag par bsrung bar bya/ /sdom dang sems can don kun byed/ /dge ba'i chos ni sdud pa dang / /tshul khrims rnam pa gsum du grags/ /nyi ma'i gnyen gyis gsal bar gsungs/ /nor gyi nang na tshul khrims mchog /'od nang nyi ma ji bzhin no/ /nor de spangs nas 'gro ba ste/ /tshul khrims nyid ni mdun nas 'gro/ /ji ltar nyi mas mun 'joms pa/ /de bzhin tshul khrims sdug bsngal 'joms/ /mtho ris tshogs kyi lam bzang po/ /skyong zhing 'jigs pa sel bar byed/ /srid pa'i longs spyod phyir phyogs phyir//tshul khrims de ni mchog tu bsrung / /de nyid 'jig rten phyi mar yang / /tshul khrims nyid ni nges rten 'byung / /tshul khrims kyis ni 'dir yang skyob/ /pha rol du yang ngan song sbyong / /tshul khrims bde 'gro'i skas yin no/ /de bas tshul khrims lhag par spyod//tshul khrims mi zad mdzod du 'gyur/ /tshul khrims mi zad bde ba'o/ /rgyal po chom rkun chu sogs kyis/ /tshul khrims nor ni 'phrog mi nus/ /khrims kyis lus sogs dge las rnams/ /nyon mongs med pa'i 'bras bur 'gyur/ /snyan dang skal bzang mchog tu bde/ /bag yod shin tu 'od bzang dang / /dri med srid la chags bral sogs//tshul khrims sangs rgyas kyis rab bsngags/ /'khor ba kun gyi spyod pa las/ /zhi dben thob par bya phyir ro/ /tshul khrims dam pa'i gos gyon pa/ /ngo tsha dang bcas skyes bu mchog /gzhan du gcer bur tha ma ste/ /dud 'gro dang mtshungs ngo tsha bral//yan lag lnga yi sgo nas ni/ /dkon mchog gsum la phyag bya ste/ /bla mar gus shing nyan par 'dod/ /dad pa shin tu bskyed par bya/ /kha na ma tho rdul tsam gyi/ /'jigs pas ma sbags tshul khrims so/ /theg pa gzhan la ma brten pas/ /ma nyams pa yi tshul khrims nyid/ /ma rungs mi bzad mi skye ba//skyon med pa yi tshul khrims nyid/ /nyon mongs skye bos ma bcings pa/ /de bzhin ma 'dres tshul khrims nyid/ /dben zhing lhad ma zhugs pa'i phyir/ /dkar po'i chos ni rnam 'phel nyid/ /ji ltar 'dod bzhin 'gro ba'i phyir/ /smin pa yi ni tshul khrims nyid/ /mkhas pas rab tu bsngags pa ni//kun la yang dag bsngags pa'o/ /kun nas kha na ma thob/ /med phyir ma smad par brjod do/ /rdzogs pa'i sangs rgyas kun gyis de/ /rnam gar gzigs nas rab tu bsgrags/ /de dag la sogs rnam pa ni/ /drug cu rtsa lnga dag pa ni/ /tshul khrims phung po rnam par dag /'gyur zhing yongs su mi zad brjod/ /gzhung bsdus phyir na bdag gis ni/ /de dag thams cad ma bsdus so/ /tshul khrims 'chal ba'i rab rib kyis/ /bag med pa ni rnam par spyod/ /sdig pa byed cing ngan 'gro cher/ /rab tu lhung zhing 'jigs chen myong / /de bas kun du rab 'bad pas//rgyal sras rnams kyis tshul khrims bsrung / /chos kun bdag med rnam bsgoms pas/ /theg pa chen po'i rjes su 'gro/ /srid pa'i longs spyod ma lus pa'i/ /gzung yul lus la sogs pa sdom/ /tshul khrims phung po rnam dag pas/ /rang bzhin med pa gsal bar ldan/ / de nyid rdzogs pa'i byang chub rgyu/ /don ni thams cad sgrub pa po/ /de ni dpag med rnam pa ste/ /de ltar mdo ru bsdus te brjod/ /de bas kun du rtog pa kun/ /rab tu bsdus la goms bya ste/ /gang phyir tshul khrims kun gyi ni/ /spros rnams 'dir ni 'dus 'gyur ba'o/ /de ni tshul khrims kyi gtam mo/ / khro ba'i me ni bzod dka' bas/ /bsod nams ljon shing kun rlag byed/ /rang bzhin lus sogs spong gdung ba/ /skal ba ngan pa'i rgyu gcig po/ /zhe sdang las skyes khro ba dang / /'khon du 'dzin pa dgra chen po/ /gang zhig khong khro la sogs kyis/ /dbang phyug gzhan la gnod byed de/ /gzhan gnod las skyes sdug bsngal ni//mi bzad shin tu bzod par dka'/ /de ni sna tshogs tshul gyis ni/ /'bad pas bzod pa bsgom par bya/ /dpal ldan zhi ba lhas gsungs pa/ /zhe sdang lta bu'i sdig pa med/ /bzod pa lta bu'i dka' thub med/ /de bas bzod la nan tan du/ /sna tshogs tshul gyis bsgom par bya//bde gshegs sras kyis gshe ba la/ /slar yang gshe bar mi bya ste/ /sgra rnams sgra brnyan lta bur ni/ /yang dang yang du bsam par bya/ /rdeg pa la ni slar yang ni/ /'dis ni brdeg par mi bya ste/ /lus ni gzugs brnyan dang mtshungs par/ /mkhas pas yun ring yang dag bsam//khros la khro bar mi bya ste/ /sems ni sgyu ma dang mtshungs zhes/ /lhag pa'i bsam pa nyid kyis ni/ /don dam pa la dmigs pas kyang / /shin tu bzod pa 'byung ba yin/ /de yang chos rnams kun gyi ni/ /rang bzhin rnam par rigs pa yis/ /ngo bo nyid med la bzod pa//mchog gi bzod pa skye bar 'gyur/ /bzod pa khro ba'i sbrul gyi ni/ /nam mkha' lding gi gsang sngags mchog /khong khro'i rab rib mun pa ni/ /sel ba'i sman mchog bzod pa'o/ /dam chos nor ni nyams pa yis/ /'khor ba'i 'gro ba lnga po la/ /gang dag bzod nor rang bzhin can//sems can de rnams phyug por shes/ /skyes bu rnams la thar pa ston/ /'khor ba'i 'jigs pa sel ba po/ /mtho ris skyabs su gyur pa de/ /dmyal ba'i me ni rlag byed pa'o/ /bdud dgra kun gyi dpung stobs ni/ /rab tu 'joms byed rgyu yi mchog /zhe sdang sogs kyi gnyen por ni/ /mkhas pas rtag tu bzod bsgom bya/ /sdug bsngal lhag bzod chos la ni/ /nges par sems pa'i mtshan nyid can/ /gzhan gyi gnod pa ji mi snyam/ /zhes bya bzod pa gsum du brjod/ /de bas 'khor ba'i sdug bsngal las/ /'gro ba bsgral bar 'dod pa nyid//gzings dang 'dra ba'i bzod pa ni/ /bdag nyid chen po rnams kyis bsgom/ /'di ni bzod pa'i gtam mo/ /skyes bu kun gyis yang dag don/ /'grub pa'i rgyu yi brtson 'grus brtsam/ /kun du brtson 'grus nyid med na/ /'dod pa cung zad mi 'grub ste/ /le lo dang ni gnod spro dang //yi chad dang ni cung zad chog /mi mthun phyogs te gzhom pa'i phyir/ /'di ltar brtson 'grus rnam bsgom bya/ /brtson 'grus brgyad ni yang dag par/ /blang bar de bzhin gshegs pas gsungs/ /de las cung zhig yang dag drangs/ /mdor bsdus nas ni mngon par brjod/ /byang chub sems dpa'i go cha dang //gzhan don sogs la mchog 'gro dang / /yang dag rnyed dang 'gro ba smin/ /bsod nams ye shes tshogs mchog dang / /shes rab ces bya nyid kyi tshogs/ /yang dag rdzogs pa'i sangs rgyas chos/ /yang dag blangs pa'i bsod nams tshogs/ /mi zad par ni yongs su brjod/ / de la go cha mi zad pa/ /de ni bskal pa la sogs pa/ /grangs med 'khor bar mi skyo nyid/ /sems can kun gyi rgyu yin phyir/ /bsod nams ye shes tshogs gang yin/ /pha rol phyin pa mngon rdzogs byed/ /yang dag sangs rgyas thams cad kyi/ /dam chos nyan dang 'dzin la sogs/ / dkon mchog gsum dang bla ma la/ /mchod dang nye bar gnas pa sogs/ /'di dag mi zad go cha ste/ /bskal pa la sogs grangs med pa'o/ /'di lta'i bya ba rnams la ni/ /rab tu spro te nam mkha' bzhin/ /bskal pa'i sa mtshams yangs pa 'di/ /byang chub sems dpa'i brjod pa'o//go cha'i brtson 'grus kyi tshogs so/ /sangs rgyas rnams ni blta phyir dang / /dam pa'i chos ni mnyan phyir dang / /sems can yongs smin bya phyir dang / /thams cad mkhyen pa thob bya'i phyir/ /khor yug chen po'i bar du ni/ /sa mtshams med par me mdag khengs/ / 'jig rten khams su 'jug 'gro yang / /yang dag spro ba brtan pa ste/ /rtag par brtson pa gzhan don phyir/ /'gro de mchog tu 'gro ba'o/ /dkon mchog gsum la byang chub sems/ /bsgom bya gsungs pa'i rim pas so/ /mchog tu 'gro ba'i brtson 'grus kyi tshogs so/ /gang dag cung zad blangs pa yi//bsod nams tshogs de bsngo bar bya/ /rgya mtshor 'bab pa'i chu bzhin du/ /byang chub bsngos de mi zad gsungs/ /sems can rnams ni byang chub la/ /dgod pa'i phyir ni yongs su bsngo/ /mi zad yang dag thob pa ni/ /byang chub sems dpas shes par bya//yang dag rnyed pa'i brtson 'grus kyi tshogs so/ /nyi ma re rer stong gsum gyi/ /stong chen du ni gtogs pa yi/ /'jig rten khams ni ji snyed pa/ /sems can gnas pa de yang ni/ /sna tshogs thabs kyis sangs rgyas ni/ /nyid du thub sras yongs smin byed/ /'di ltar rim pas bskal pa ni//grangs med bye ba brgyar yang ngo / /de lta mod kyi sems can khams/ /mtha' yas grangs med sa yi ni/ /stong gi cha yi cha gcig kyang / /de ni yongs su smin ma gyur/ /rjes bstan 'di ltar thos nas kyang / /de las mchog tu spro ba thob/ /mi zad yongs su smin pa ni/ /byang chub sems dpa' yin par brjod/'gro ba smin pa'i brtson 'grus kyi tshogs so/ /ji snyed nam mkha'i mthar thug pa'i/ /'jig rten gsum na gnas pa yi/ /sems can de dag kun dang yang / /slob pa rnams dang byang sems dang / /bse ru nyan thos byang chub ni/ /dus gsum bzhugs pa de kun gyi/ / bsod nams tshad ni ji tsam pa/ /de tsam bsod nams bcu 'gyur du/ /bsags pa yi ni thub pa yi/ /ba spu'i bu ga gcig skye'o/ /de ltar ba spu'i bu ga rnams/ /thams cad skye ba'i dge ba yis/ /bsod nams brgya 'gyur dag las ni/ /dpe byad gcig ni 'grub par 'gyur/ /dpe byad thams cad bsdus pa yi//bsod nams phung pos mtshan yin te/ /stong phrag gcig tu bsdoms pas ni/ /mtshan rnams kun gyi rgyu yin no/ /stong phrag bcu ni bsdoms pa yis/ /thub pa'i mdzod spu gcig yin no/ /mdzod spu'i dge ba'i phung po ni/ /'bum gyis gtsug tor 'byung ba'o//bsod nams 'bum de bye bas ni/ /chos kyi dung ni rab tu skye/ /mi bzad pa yi bsod nams tshogs/ /brtson chen thub pas gsungs pa nyid/ /de snyed pa ni cher spro ba/ /byang chub sems dpa' la skye'o/ /bsod nams kyi brtson 'grus kyi tshogs so/ /stong gsum 'jig rten khams kyi ni/ / sems can dang rjes 'brang gyur par/ /yongs su brtag pa nyer bzung ste/ /thams cad 'di ltar gyur kyang ni/ /chos kyi rjes 'brang rtogs pa yi/ /cha dang dpe yis bstan mi bzod/ /de bzhin du ni ji srid du/ /sa bcu'i ye shes thob pa yis/ /de bzhin gshegs pa'i gnas dang ni/ /gnas min mkhyen pa'i stobs kyi ni//de dag kun gyis cha dang ni/ /dpe bstan par yang nye mi 'gyur/ /de ltar me bzhin sangs rgyas chos/ /ma 'dres pa ni thams cad la/ /'jug cing de rnams la yang ni/ /cher spro ba yang mi zad pa'o/ /de yang ye shes tshogs kyi ni/ /brtson 'grus brtson pa brjod pa nyid/ / 'di dag byang sems ma gtogs pa/ /gzhan gyi sems kyi spyod yul min/ /ye shes kyi brtson 'grus kyi tshogs so/ /rgya chen nam mkha' kun gnas pa'i/ /dus gsum gnas pa'i sems can rnams/ /kun gyi sems kyi spyod pa ni/ /gang gis kun du shes 'gyur ba/ /de ltar shes rab kyi ni tshogs//blo ldan byang chub sems dpa' yis/ /thob par bya ba de ni yang / /spro ba chen po skye bar 'gyur/ /shes rab kyi brtson 'grus kyi tshogs so/ /dge ba'i rtsa ba'i tshogs gang ni/ /byang chub sems la sogs bsdus pa/ /sems ni dang po nas brtsams nas/ /byang chub snying po yi ni bar//bsags te yang dag gzung rnams dang / /de bzhin sangs rgyas chos rnams kun/ /yang dag blangs pa'i tshogs de ni/ /mi zad yang dag blangs par brjod/ /yang dag blangs pa'i tshig gis so/ /brtson 'grus 'di kun mtha' dag la/ /chos kyi bdag med bsgoms pa nyid//nam mkha' bzhin du rnam dag 'gyur/ /gzhan du lta ba ldan pas min/ /'gro kun ngo bo nyid med pas/ /dbang po drug ni rab bsdus nas/ /zhen pa med pa'i sems kyis ni/ /'di de rtag par bsgoms pa'o/ /'di ni brtson 'grus kyi gtam mo/ / skyon rnams sel ba'i bsam gtan dang / /de bzhin gnas pa'i bsam gtan mchog /dbang sbyor dang gsum shes par bya/ /tshangs pa'i bde ba rab bsgrub pa'o/ /rtog dang dpyod dang dga' ba dang / /bde dang rtse gcig sems dang ni/ /yan lag lnga po 'di dag ldan/ / bsam gtan dang po rab tu skye/ /nad ni yongs su dang ba dang / /dga' dang bde ba rtse gcig sems/ /rnam pa bzhi po 'di dag ldan/ /bsam gtan gnyis pa la gnas gsungs/ /btang snyoms dang ni dran pa dang / /shes bzhin bde ba rtse gcig sems/ /yan lag lnga po 'di dag ldan//bsam gtan gsum pa nyid du 'gyur/ /btang snyoms dran ldan sdug bsngal min/ /bde min pa ni myong ba ste/ /rtse gcig sems ldan yan lag ni/ /bzhi ldan bsam gtan tha ma'o/ /yang na gzugs sogs spyod yul gyis/ /g.yeng byed 'dod pa'i sdig chos ni//bzod dka' de rnams spangs pa yis/ /dben pa'i bsam gtan dang po ste/ /rtog dang dpyod pa gnyis po yis/ /shin tu dben pa las skyes pa'i/ /dga' dang bde ba mtshungs ldan pa/ /bsam gtan dang po mnyam par gzhag /bsam gtan dang po'i rjes mthun gang / /rtog pa nye bar brtags pa dang / /shes dang mthong dang dpyod pa nyid//don gcig pa yi tshig rnams so/ /brtags pa de nyid la dpyod dang / /yongs su sbyor dang rjes su 'gro/ /'jug dang rnam dpyod kyang don gcig /gnas pa nye bar rdzogs pa ste/ /yang dag myong ba legs skyong ba'o/ /de la gnas nas mthong ba'i lam/ / thob par 'dod pa'i 'dun pa 'thob/ /mthong lam 'dun pa thob nas ni/ /sngar gyi bsam gtan la mi chags/ /dngos po las ni khyad 'phags pa'i/ /bsam gtan gnyis pa tshol bar byed/ /rtog pa dang ni dpyod pa yi/ /sgrib pa rab tu 'joms pa yis/ /bsam gtan gnyis pa thob pa ni//nang yang dang zhing sems kyi rgyun/ /gcig tu gyur pa'i blo de ni/ /dga' zhing bde ba'i bdag nyid do/ /rtog dpyod nye bar zhi ba dang / /nang ni yongs su dang bar 'gyur/ /rgyun ni gcig tu 'gyur zhes pa/ /'di yang ro mnyam gyur pa yi/ /rgya mtsho chen po'i chu bzhin du/ / ting nge 'dzin gyi ro gcig 'gyur/ /dga' ba dkon mchog gsum la ste/ /de phyir de ni dben skyes bde/ /bsam gtan gnyis pa thob nas ni/ /de la gnas na slar yang ni/ /mi skye'i chos la bzod pa ni/ /thob par bya phyir thams cad du/ /'dun pa skye bo de nas ni/ /bsam gtan gnyis pa yis skyo nas//bsam gtan de bas bla med pa'i/ /bsam gtan gsum pa de tshol byed/ /bsam gtan gnyis pa'i sgrib pa ni/ /dga' ba yin te de spangs nas/ /bsam gtan gsum pa thob pa ni/ /de bzhin dga' med bde ba'o/ /de bas bsam du med 'di dag /dga' ba med pa'i bde ba brjod/ / 'di dag mchog gyur ma yin te/ /zad pa'i chos phyir de las yang / /mi skye'i chos la bzod pa ni/ /thob par bya phyir de bzhin du/ /'dun pa drag mchog mi zad pa/ /blo ldan rnams la skye ba nyid/ /de ni bde yang ma chags pas/ /bsam gtan bzhi pa thob 'gyur te/ /btang snyoms dran pa yongs su dag /sdug min bde min zhi ba'o/ /bsam gtan 'di dag snyoms 'jug pas/ /de yi sems ni 'jam par 'gyur/ /dga' zhing shin tu dul ba ste/ /brtan zhing drang la 'od gsal ba/ /lus can rnams kyi phan bde ba/ /skyed la rab tu zhugs pa yi//skye ba med pa'i chos la ni/ /bzod pa'i snang ba skye bar 'gyur/ /de nas mchog tu lhun grub cing / /shin tu sbyangs pa'i lam la 'jug /nyan thos la sogs lam dang ni/ /bsam gtan thun mong pa ru brjod/ /zag med rnam pa bcu drug rnams/ /byang chub sems dpa'i ma 'dres pa'o//bsam gtan pha rol phyin gsungs pa/ /nyan thos sogs kyi spyod yul min/ /gzhung ni yang dag bsdus pa'i phyir/ /'dir ni lung las ma sdebs so/ /'di ni bsam gtan gyi gtam mo/ /thos bsam bsgom las 'khrungs pa yi/ /shes rab gsal ba thar pa'i blo//gzung dang 'dzin pa rnam bcom pas/ /gnyis med ye shes snang ba ste/ /gcig dang du ma las nges grol/ /dngos dang dngos min rnam par spangs/ /rgyu dang 'bras bu las 'das pa/ /mtshan gzhi mtshan nyid las grol ba/ /dus gsum khams gsum shin tu 'das//kun rtog rten ni nges par spangs/ /spros pa nyer zhi zhi ba ste/ /dag cing shin tu dri ma med/ /gnod pa med cing yang dag gnod/ /don dam pa yi ngo bo nyid/ /ma lus chos kyi bdag med kyi/ /ye shes shes rab 'bras bu'i bdag /'di ni shes rab kyi gtam mo/ /rang gi skyon ni gzhom pa dang //sems can thams cad lam gzhug dang / /myur du bde ba mngon rtogs byed/ /thabs ni rnam pa gsum du 'dod/ /'di ni thabs kyi gtam mo/ /smon lam dbye ba gsum zhes pa/ /rang gi tshogs rgyun mi 'chad dang / /'gro ba'i don gyi rgyu dang ni//sangs rgyas zhing ni rnam sbyong ba'o/ /zhes pa ni smon lam gyi gtam mo/ /las kyis zlog par byed pa dang / /nyon mongs pa ni sel ba dang / /rgol ba dang ni bdud dgra kun/ /bzlog pa'i stobs dang gsum zhes gsungs/ /zhes pa ni stobs kyi gtam mo/ /rtog dang rtog med mnyam nyid du//snang dang rnam par mi rtog dang / /sems can don thabs nges snang [(]te [,]ste[)]/ /ye shes gsum du dbye ba'o/ /zhes pa ni ye shes kyi gtam mo/ /sbyin pa la sogs 'di dag rnams/ /byang chub sems ni sngon 'gro bas/ /byams pa'i bsam pa mngon bsgoms rnams/ /slar yang phar phyin 'jig rten pa//'di ni 'jig rten pa rnams so/ /dmigs pa'i yul ni gsum po rnams/ /chos kyi bdag med bsgoms pa yis/ /de rnams 'jig rten 'das par shes/ /de nyid rtogs pa'i mtshan nyid can/ /'di ni 'jig rten las 'das pa rnams so/ /byams pa'i bsam pa khyad med kyang //chos kyi bdag med dang ldan pa'i/ /sbyin pa'i pha rol phyin sogs rnams/ /yongs su dag pa'i khyad par ro/ /'di ni sa rnams kyi khyad par gyi rgyu'o/ /sbyin pas rab dga'i rnal 'byor te/ /tshul khrims ldan pas dri med 'gyur/ /bzod pas 'od byed brtson 'grus kyis//'od 'phro 'di ni bsod nams ldan/ /bsod nams las ni sbyang dka' ba/ /shes rab kyis ni mngon 'gyur mthong / /ring du song ba thabs chen pos/ /stobs dang ldan las mi g.yor 'gyur/ /smon lam gyis ni legs blo can/ /ye shes ldan pas chos kyi sprin/ / pha rol phyin pa bcu pa ni/ /dag pa'i rim pas sa bcu'o/ /gzhan yang 'dir/ las kyi rdzu 'phrul sems dang tshe/ /bsod nams ye shes yo byad dang / /chos dang ye shes dbang phyug nyid/ /stobs kyang bcu ste nan tan dang / /spobs dang dad dang thos dang bsgom/ /yang dag so sor brtags pa dang //bsod nams ye shes bzod pa'o/ /'di ni dbang bcu dang stobs bcu dang byang chub sems dpa' rnams kyi pha rol tu phyin pa 'bras bu dang bcas pa'o/ /sa 'di rnams kyi dmigs pa ni/ /khyad par med de stong nyid do/ /chos dang gang zag bdag med kyi/ /mtshan nyid de bzhin gnyis med pa'o//de dang de yi rtog pa ni/ /gzhom phyir de yi ngo bo dgongs/ /dngos su rtog pa'i dbye ba yis/ /rnam pa mtha' yas rnam par smin/ /'di ni rgyal ba'i lam la 'jug pa las pha rol du phyin pa bcu 'bras bu dang bcas pa'i le'u ste nyi shu rtsa gcig pa'o// // blang bya dang ni dor bya'i tshig /'di ni mngon du shes dang ni/ /da dung ye shes sar 'jug phyir/ /cho ga yang dag rab bstan bya/ /de la 'jug pa mi sdug dang / /dbugs rngub 'byung ba dran pa ste/ /de la chags can mi sdug pas/ /chags pa yongs su zad par byed/ /chags pa kha dog dbyibs dang ni//reg bya dri sogs yul yin no/ /mi sdug goms pas de zad de/ /zhi gnas yang dag 'byung ba'o/ /rang lus sha dang rul dang zags/ /rus pa'i dra ba tsam du bsam/ /de ni rim pas 'phel nas ni/ /sa ni gang ba nyid du lta/ /dad mos 'phel phyir 'di gsungs te/ /slar yang de bzhin bsdus nas ni//rang nyid la ni bsgom bya ste/ /rus pa yi ni lug brgyud du'o/ /bsgoms pa'i dngos po gsal ba na/ /las dang po ni rdzogs pa'o/ /keng rus dang ni thod phyed par/ /btang bas sbyang ba byas par bshad/ /shin tu 'das nas yid byed pa/ /smin mtshams dkyil du sems bzung bya//rnam par spel dang bsdu ba yi/ /rim pa nyid ni rnam par bsgom/ /mi sdug rnam gsum gsungs pa ni/ /dman dang 'bring sogs dbye ba nyid/ /mi 'dod bdag nyid rang bzhin ni/ /de ni chags pa'i gnyen po ste/ /mi sdug bsgoms pa gsum pa'o/ / 'di ltar lus la yang dag brtag /so dang skra dang sen mo skye/ /khrag dang pags pa sha dang ni/ /rdul dang tshil dang zhag chu ser/ /rgyus pa rkang dang mcher ba dang / /snying rus mkhris glo mchin pa dang / /pho ba rgyu ma zhag dang ni/ /glad pa dang ni mig rnag dang / /phyi sa dang ni bad kan dang / / snabs dang mchi ma gcin dang ni/ /mchil ma dang ni khu ba dang / /srin bu rnag sogs de dag gi/ /phung po la ni lus zhes brjod/ /dri ma ngan dang mi sdug dang / /rang dbang med pa'i rang bzhin nyid/ /mngon sum mi gtsang bsdus pa ni/ /don med kun gyi snod yin no/ /'di la chags te bzlog dka' ba//ma rig pas bsgribs ya mtshan che/ /ga bur la sogs dri bzangs dang / /gang dang 'grogs pas brlag par 'gyur/ /'di ltar dur khrod sa dbus su/ /song nas shi ba'i ro la ni/ /lta zhing rang gi gnyen gyis spong / /gzhan yang 'jig par byed pas so/ /rlung gis shin tu g.yengs pa ste//rnam par bsngos shing rnam par gzigs/ /phyed zos pa dang 'bu yis ni/ /rab tu mngon par gzhig pa nyid/ /sha med rnam par gtsigs pa dang / /rus pa keng rus rang bzhin nyid/ /rnam par 'thor ba mthong nas ni/ /mkhas pas rang gi lus dang mnyam/ /de ltar mi sdug yang dag par//bsgoms pa yis ni mi chags 'gyur/ /de yis zhi gnas rdzogs pa ste/ /de ni bsgom pa'i snod yin no/ /'di ni rgyal ba'i lam la 'jug pa las mi sdug pa bsgom pa'i le'u ste nyi shu rtsa gnyis pa'o// //rtog dpyod mang na dbugs rngub dang / /dbugs 'byung dran pas brtan par bya//thams cad du ni sems bsdus te/ /de bas srog la dmigs pa mchog /'jug pa'am ni 'byung ba yi/ /srog gi rlung ni bgrang bar bya/ /dran pa tsam du gcig la sogs/ /gcig bcu'i mthar bgrang slar de bzhin/ /gal te bar du g.yengs na ni/ /slar yang de ni bgrang bar bya//sems ni 'dus dang g.yengs pa dang / /chad dang lhag pas ma yin no/ /yang na dbugs 'byung la sogs rung / /'gro ba rtag tu rjes 'gro bya/ /ji tsam ring bar 'jug pa dang / /'byung ba yang ni sems kyis brtag /gzhag pa zhes bya sna rtse ni/ /rkang sor mthar ni yang dag gnas//nor bu'i thag pa bzhin du ni/ /rtse gcig sems kyis bsam par bya/ /ci 'di rjes su mthun pa'am/ /nye bar 'joms pa'i rlung rnams zhes/ /dbugs rngub 'byung ba dran pa bsgom/ /zhi gnas dang ni nad med rgyu/ /bgrang dang rjes 'gro 'jog pa dang / /rtog pa dang ni bsgyur ba dang //yongs su dag dang drug 'di ni/ /dbugs rngub dbugs dbyung dran par 'dod/ /'dir ni gzhung bsdus 'dod pas ni/ /rnam pa gsum ni rnam par phye/ /drug po rnams las gang rung bas/ /yang dag 'dod don 'grub pa yin/ /'di ni rgyal ba'i lam la 'jug pa las dbugs 'jug pa dang 'byung ba dang bgrang ba'i le'u ste nyi shu rtsa gsum pa'o// //zhi gnas rdzogs par byas pa las/ /dran pa nyer gzhag bsgom pa ni/ /lus dang tshor ba sems dang chos/ /mtshan nyid bral ba yongs su bsgom/ /lus 'di yang ni btags pa tsam/ /don de bzhin du brten pa med/ /yul gcig na med thams cad kyi/ / cha la yang ni mi gnas so/ /lag pa la sogs gcig la yang / /lus kyi blo ni skye mi 'gyur/ /cha shas las gzhan lus kyi blo/ /gang la nges pa skye mi 'gyur/ /cha shas rnams ni lus nyid na/ /'di dag ma lus lus su 'gyur/ /phyogs kyi cha yis rnam phye bas/ /phra rab rdul yang cha dang ldan/ /cha ji snyed ni gcig min te//de bas du ma nyid kyis min/ /gcig dang du ma rnam bral gang / /dngos med nam mkha'i me tog bzhin/ /drug gis cig car sbyar ba na/ /phra rab rdul yang drug car 'gyur/ /drug po dag ni go gcig na/ /gong bu rdul phran tsam du 'gyur/ /de bas na ni ngo bo nyid/ /med kyang lus kyi blo skye dang //thog med ma rig pa las 'byung / /'jig tshogs lta bar rab tu skye/ /lus mi srid na mig la sogs/ /srid pa yang ni shin tu ring / /de phyir mig sogs 'dus reg las/ /'byung ba'i tshor ba ga la yod/ /gzung bya'i dngos med sems de med/ /de phyir 'dzin pa po mi srid//gzung dang 'dzin pa nges grol na/ /slar yang 'dzin pa ga la zhig /rgyu dang rkyen las byung ba yi/ /phung po skye mched khams rnams ni/ /rten cing 'brel pa'i spyod yul rnams/ /thams cad skye med ngo bo nyid/ /dngos po rang las ma skyes te/ /don med phyir te de mi srid/ /rdzogs par skye bar 'gyur ba ni//slar yang rgyu nyid du ni 'gyur/ /gang tshe rgyu nyid 'bras bu na/ /de yi rgyu ni so so ru/ /kha dog dbyibs dang ro nus pa/ /rnam par smin par mi 'gyur ro/ /snga ma'i gzugs ni yongs spangs nas/ /phyi ma'i gzugs ni yongs 'dzin pa/ /de yi de nyid ji ltar yin/ /de phyir rang nyid las mi skye//rgyu dang 'bras bu gnyis gcig par/ /'jig rten pa yang mi rtog go/ /gang phyir rgyu de nyams nas kyang / /'bras bur gsal ba ma mthong ste/ /de bas 'jig rten du mi rigs/ /de kho na nyid du yang min/ /rang las skyes pa'i phyogs 'di ni/ /dpag tu med pa'i skyon du 'gyur/ / gzhan las kyang ni mi skye ste/ /gzhan nyid la ni khyad med na/ /dngos po kun las dngos po kun/ /skye ba ru ni 'gyur ba'o/ /gang las gang ni skye bar 'gyur/ /rjes su 'gro las ldog pa dang / /pha rol nyid las khyad med kyang / /gang las gang ni skye 'gyur ba/ /de nyid de yi rgyu yin na//gang las de nyid skye 'gyur ba/ /de dag nyid ni gang na ste/ /gang ste mthong phyir zhe na min/ /gang phyir sgyu mas ma nges nyid/ /shA lu ka sogs las kyang ni/ /shA lu ka skye ci las kyang / /skye mthong rwa las mda' mthong ste/ /sa dag pa las pad ma'o/ /rang nyid grub nas gzhan 'byung ste//gzhan grub nas ni rang nyid 'dod/ /de gnyis ltos nas grub pa ste/ /pha rol tshu rol bzhin du gsungs/ /gnyis ka las kyang skye min te/ /skyon ni gnyis ka 'byung bar 'gyur/ /rgyu med las kyang rigs min te/ /kun du rab tu thal 'gyur te/ /rgyu gzhan la ni mi ltos phyir/ / rtag tu yang dang med par 'gyur/ /ltos pa yi ni dngos po rnams/ /res 'ga' ba nyid du ni 'gyur/ /dngos rnams yod pa skye min te/ /rang nyid thob phyir don med nyid/ /skyes pa yang ni skye ba na/ /de ni thug pa med par 'gyur/ /dngos rnams med pa skye min te/ /ri bong rwa sogs ji bzhin no/ / thams cad nyid las 'di dag kun/ /rtag par skye bar rab tu thal/ /yod dang med las mi skye ste/ /'gal ba'i phyir na mi srid do/ /gnyis ka min las mi skye ste/ /de lta'i don ni mi srid phyir ro/ /lus la sogs rnams ji tsam bzhin/ /dbu ma rtsa ba la sogs su/ / gsungs pa gang de yongs shes bya/ /bsdus pa'i phyir ni 'dir ma brjod/ /gang gang cung zad gang gi tshe/ /gang du de ltar nyid snang ba/ /de kun de tshe de ru ni/ /de lta nyid du rab tu med/ /de phyir gang la gang gzugs kyis/ /ji srid cung zad rab rtogs pa/ /de yi gzugs kyis de stong ste/ /sgyu ma'i grong khyer sprul bzhin no//'di ltar lus la sogs pa ni/ /ngo bo nyid med rnam bsgoms pas/ /de la ngo bo nyid med pa'i/ /rang bzhin nyid du dran pa skye/ /thos bsam sogs kyis shes rab ni/ /dran pa'o de la nye bar 'jog /nye bar gzhag pa'o lus la sogs/ /'di dag dbye ba rnam pa bzhi//phyin ci log ni bzhi po yi/ /gnyen po nyid ni ngo bo nyid/ /gtsang sogs 'khrul pa gzhom pa nyid/ /bzhi po 'di dag dbye ba'o/ /ji ltar gsungs pa'i dran nyer gzhag /bsgoms pa byas te legs par gnas/ /mdor na lus la sogs pa ni/ /mi rtag sogs su blta bar bya/ /de nas drod du 'gyur zhes pa'i//dge ba'i rtsa ba skye bar 'gyur/ /sdug bsngal la sogs bden bzhi ni/ /rnam pa bcu drug spyod yul lo/ /gtsub shing gtsubs pa la sogs pas/ /ji ltar phyi rol me 'byung bzhin/ /yang dag shes pa'i me las ni/ /'byung ba'i rtags ni dang por brjod/ / mngon shes la sogs bcos pa yi/ /rnam pa nye bar mtshon pa ste/ /lus sogs las su rung dang zhi/ /mngon par shes sogs yon tan yang / /chung dang 'bring dang chen po ste/ /de ni rim pas skye bar 'gyur/ /rnal 'byor shin tu dad pa yis/ /bden pa nyid du shin tu bsgom/ /de las de yi mi mthun phyogs//skyes pa rnams ni spong bar byed/ /slar yang de dag mi skyed cing / /kun du skyes pa 'joms par byed/ /gnyen po'i phyogs rnams ma skyes pa/ /bskyed phyir yang dag 'bad par byed/ /skyes pa rnams ni nan tan gyis/ /bsrung zhing yongs su 'phel bar byed/ /'dun pa bskyed cing brtson 'grus ni//rtsom ste thub pa'i sras kyis so/ /brtan pas yang dag spong ba ni/ /bzhi po 'di dag bsgom par bya/ /de nas rtse mor gyur zhes pa'i/ /dge ba'i rtsa ba skye bar 'gyur/ /de 'phel ba las skyes de ni/ /spong ba'i brtson 'grus ldan pa zhes/ /gsungs pa'i brtson 'grus can la ni//rdzu 'phrul rkang pa 'di dag 'byung / /'dun dang brtson 'grus sems dang ni/ /dpyod pa'i ting 'dzin 'di dag go/ /'dun pa drag po'i stobs ldan pas/ /dge ba'i chos ni rnams bsgoms pas/ /de la rtse gcig sems kyis ni/ /ting 'dzin nye bar skye bar 'gyur/ / yang dag spong ba'i brtson 'grus de/ /yang dag ldan pa'i rnal 'byor pa/ /de yi bdag rkyen brtson 'grus kyi/ /ting 'dzin nya bar skye bar 'gyur/ /sems sbyong ldan pa yi ni sems/ /de kho na nyid gcig pu'i sems/ /sems ni bdag pos ma bskyed par/ /de la ting 'dzin skye bar 'gyur/ / da lta bdag la sdig pa'i chos/ /yod pa nyid dam 'on te med/ /dpyod pa zhes pa'i ting 'dzin gyi/ /rgyal por sems ni rtse gcig 'gyur/ /'jig rten 'das pa'i rdzu 'phrul gyi/ /rkang pa'i rgyu dang rkyen rnams so/ /rdzu 'phrul rkang pa bzhi po dag /gsungs pa 'di dag ting 'dzin te/ / 'di las bzod par 'gyur zhes pa'i/ /dge ba'i rtsa ba skye bar 'gyur/ /de bzhin gshegs pas yang dag bstan/ /chos kun mngon par 'dod par 'gyur/ /bzod thob ngan song mi 'gro zhing / /rgyal bas byang chub lung ston 'gyur/ /rgyal ba'i sras ni sems bskyed nas/ /grangs med bskal pas nges 'byung 'gyur//dad dang brtson 'grus dran pa dang / /de bzhin ting 'dzin shes rab bcas/ /dbang po lnga ste mthong lam gyi/ /bskyed pa yi ni bdag po nyid/ /bden dang dkon mchog dge sogs la/ /dad dang ye shes bdag nyid de/ /de yang rnam pa gsum du 'dod//dad dang yod nyid gsungs pa nyid/ /le lo don med brtson pa dang / /yi chad pa dang zhum bdag nyid/ /de dag gnyen po brtson 'grus te/ /dge la spro ba'i mtshan nyid do/ /dran pa dus gsum sa la ni/ /sems ni nyams pa med pa'o/ /sems rtse gcig pa'i chos la ni//ting nge 'dzin du yongs su brjod/ /shes rab thos bsam las byung zhing / /chos rab 'byed pa'i bdag nyid do/ /'di dag sngon du skyes kyang ni/ /rim pa 'dis ni rgyas pa'o/ /de nas chos mchog de bzhin nyid/ /ces pa'i dge ba'i rtsa ba 'byung / /'jig rten pa yi chos kun gyi//mchog nyid phyir ni de bzhin brjod/ /dbang po rnams dang stobs rnams su/ /rim pas 'phel ba nyid du 'gyur/ /bzod pa chos mchog la gnas te/ /dad pa la sogs stobs ldan pas/ /gang tshe lha dang bdud dang ni/ /nyon mongs kun gyis thub dka' zhing / / ting 'dzin grangs las 'das pa ni/ /blo ldan la ni skye bar 'gyur/ /'di ni nges par 'byed pa yi/ /cha bzhi ru ni brjod pa yin/ /chung dang 'bring sogs dbye ba yis/ /tha dad so so'i dge ba gsum/ /'di dag sbyor ba'i lam du 'gyur/ /tshogs kyi sa ni zhes kyang ngo / /de bzhin so so'i skye bo'i sa//mngon par dga' ba rin chen 'od/ /'di ni rgyal ba'i lam la 'jug pa las sbyor lam brjod pa'i le'u ste nyi shu rtsa bzhi pa'o// //da ni byang chub sems dpa' yi/ /mthong ba'i lam ni brjod par bya/ /yang dag de nyid yang dag mthong / /mi mthun phyogs ni spong bar 'gyur//mthong lam de yi dri ma ni/ /rtsa ba'i bag la nyal drug ste/ /chags dang khong khro nga rgyal lta/ /ma rig the tshom zhes nyon mongs/ /'dod chags la yang rnam gnyis te/ /'dod pa'i khams kyi 'dod chags gang / /de ni 'dod pa'i 'dod chags mchog /gzugs dang gzugs med gyur pa ni/ / srid pa'i chags pa'o lta ba ni/ /bdag dang bdag gir rtag chad dang / /med dang dman la chad lta dang / /rgyu min lam min der lta ba/ /de rnams lta ba lnga yin no/ /nyon mongs bcu ni khams gsum du/ /brgyad cu rtsa brgyad du dbye ste/ /'phags pa'i bden pa bzhi rnams kyis/ /lta ba 'di dag slar yang spong //gang 'di 'dod par spyod pa yi/ /sdug bsngal bden pa yid byed na/ /mi rtag sdug bsngal stong pa dang / /bdag med rnam par skye bar 'gyur/ /sdug la chos shes bzod pa dang / /sdug bsngal la chos shes 'di gnyis/ /'dod pa'i chu bo'i nyon mongs gang / / sngar bstan de rnams kun spang byed/ /de bzhin gzugs dang gzugs med pa'i/ /srid pa'i sdug bsngal bden bsgoms pas/ /sdug bsngal rjes su shes bzod dang / /de shes pa ni yang dag skye/ /gzugs dang gzugs med nyon mongs ni/ /de nyid khong khro ma gtogs pa/ /rab tu 'joms te so so ru//rnam pa dgu gnyis bco brgyad do/ /'di ltar khams gsum nyon mongs ni/ /sdug bsngal bden pa mthong ba yi/ /skad cig bzhi po 'di nyid kyis/ /nyi shu rtsa brgyad rab tu spong / /'dod pa'i kun 'byung bden pa ni/ /rgyu dang kun 'byung dang yang ni/ /rab tu skye dang de bzhin rkyen/ /rnam pa bzhir ni yid la bya//kun 'byung la chos shes bzod dang / /de shes pa ni yang dag skye/ /tshul khrims brtul zhugs 'jig tshogs lta/ /mthar 'dzin lta rnams ma gtogs pa/ /'dod chags khong khro nga rgyal dang / /ma rig the tshom 'di dag dang / /log lta lta ba mchog 'dzin te/ /'dod pa'i 'dun rnams zad par 'gyur//gzugs dang gzugs med gyur pa yi/ /kun 'byung bden pa bsgoms pa las/ /kun 'byung la rjes shes bzod dang / /de shes pa ni rab tu skye/ /gzugs dang gzugs med nyon mongs ni/ /khong khro ma gtogs rab 'joms te/ /so sor drug drug bcu gnyis so/ / de ltar khams gsum nyon mongs rnams/ /kun 'byung bden pa mthong ba las/ /skad cig bzhi po 'di dag ni/ /nyid kyis bcu dgu zad par byed/ /'gog dang zhi dang de bzhin du/ /gya nom pa dang nges 'byung ste/ /'gog pa'i bden pa 'dod pa de/ /rnam pa bzhi 'di yid la bya/ /'gog la chos shes bzod pa dang //de shes yang dag skyes pa las/ /gang de kun 'byung du gsungs rnams/ /nyon mongs bdun ni rab tu spong / /blo ldan byang chub sems dpa' gang / /gzugs dang gzugs med khams phyin nas/ /slar yang 'gog pa'i bden pa ni/ /yid la byas pa de la ni//'gog la rjes shes bzod pa dang / /de shes yang dag skyes pa las/ /gzugs dang gzugs med srid nyon mongs/ /rnams ni so sor drug rim bzhin/ /gnyis por de ltar bcu gnyis te/ /khams gsum por ni skad cig bzhin/ /'gog bden de ni mthong ba las//bcu dgu rab tu spang ba'o/ /lam gyi bden pa bsgoms pa ni/ /'dod pa'i khams su rnam pa bzhi/ /lam dang nges par 'byin pa dang / /rigs pa sgrub pa'i rang bzhin las/ /lam la'ang chos shes bzod pa dang / /de shes yang dag skyes pa las/ / tshul khrims brtul zhugs mchog 'dzin dang / /bcas pa brgyad ni 'dod pa'i'o/ /gzugs dang gzugs med gyur pa ni/ /de bzhin lam bden bsgoms pa las/ /gzhan yang lam la rjes shes pa'i/ /bzod dang de shes skyes pa las/ /gzugs dang gzugs med gyur pa na/ /bdun bdun de ni bcu bzhi'o//da ltar khams gsum nyon mongs rnams/ /lam gyi bden pa mthong ba las/ /skad cig bzhi po 'di yis ni/ /nyi shu rtsa gnyis rab tu spong / /'di dag gis ni byang sems kyi/ /mthong ba'i lam ni rab tu skye/ /'phags pa'i bden pa bzhi po rnams/ /de ltar mthong ba'i lam de nyid//nyon mongs pa ni brgyad cu brgyad/ /bden pa yis ni rab 'joms so/ /'gro kun ngo bo med pa ste/ /gzugs brnyan dang mtshungs gsal ba'o/ /dag cing gnyis med nam mkha' mnyam/ /de nyid de nas mthong bar 'gyur/ /mthong lam du ni bden mthong ba'i/ /bden pa'i rgya mtsho skye ba'o//mthu dang sems can don dang ni/ /ting 'dzin yon tan mtha' yas ldan/ /dran dang chos rab 'byed pa yi/ /shes rab brtson 'grus gong du brjod/ /dga' ba sems las byung bar gsungs/ /shin tu sbyangs pa lus bde ste/ /snyoms par gnas pa'i btang snyoms so/ /ting 'dzin sems ni rtse gcig pa'o//byang chub yan lag bdun ldan pa'i/ /chos 'di dag ni zag pa med/ /de nas kun bden mi 'gyur ba'i/ /ting 'dzin de nas de la skye/ /dbu ni bcad nas sbyin byed kyang / /sdug bsngal bar ni mi 'gyur ro/ /de ltar dga' ba'i sa de la/ /sbyin pa'i pha rol phyin rjes 'brang / / byang chub sems dpas dang po yi/ /mchog tu dga' ba thob pa nyid/ /'di ni rgyal ba'i lam la 'jug pa las mthong lam brjod pa'i le'u ste nyi shu rtsa lnga pa'o// //de nas yang ni bsgom pa'i lam/ /theg pa gsum la rjes gnas pa'i/ /phra zhing phra ba'i dri ma ni/ /zad byed 'bad pas bsgom par bya//mthong ba'i don gyi de nyid la/ /sems kyis yang yang bskyed cing bsgom/ /goms nas thar pas 'gro ba'i lam/ /chung dang 'bring dang chen po ste/ /slar yang gsum du dbye ba ni/ /chung ngu'i chung ngu chung ngu'i 'bring / /chung ngu yi ni chen po dang / /de bzhin 'bring dang chen po yang //'dod pa'i sar ni dgu ru dbye/ /bsam gtan gzugs med snyoms 'jug gi /sa brgyad pa la de bzhin no/ /so so so so'i sa la ni/ /dgu dgu yi ni rnam par 'gyur/ /'di ltar bsgom la khams gsum du/ /brgyad cu rtsa gcig dbye ba ni/ /mi mthun spang bya las phye ba/ / chags dang khong khro nga rgyal dang / /ma rig bag la nyal 'di bzhi/ /'dod pa'i khams kyi mi mthun phyogs/ /bsgom pas spang bar bya rnams so/ /de bzhin gzugs kyi khams su ni/ /khong khro ma gtogs gsum de nyid/ /gsum ni gzugs med khams su ste/ /bcu po 'di ni khams gsum du'o//chung ngu'i 'bring dang chen po ni/ /slar yang gsum du dbye ba ste/ /chung ngu'i chung sogs dbye ba ni/ /dgu ru 'dod pa'i sa rnams su'o/ /bsam gtan gzugs med sa brgyad la/ /mi mthun phyogs ni dgu dgu'o/ /'dod pa la sogs sa dgu la/ /rnam pa brgyad cu rtsa gcig 'gyur//lam la bzlog pa'i rim pa nyid/ /chung ngu'i chung ngu la sogs kyis/ /chen po'i che sogs dri ma spong / /gsungs pa'i mthong dang bsgom pa'i lam/ /mthong ba zhes ni gsungs pa dang / /bsgom lam zhes pa la brten nas/ /nyan thos sogs kyi tshul gyis ni//sa brgyad po ni thob par 'gyur/ /de yang rigs kyi sa dang po/ /gnyis pa de bzhin brgyad pa ste/ /mthong ba zhes bya gsum pa'o/ /bzhi pa de bzhin bsrabs pa'i sa/ /lnga pa 'dod chags bral zhes pa/ /drug pa byas pa bsrung ba ste/ /bdun pa nyan thos zhes pa'o/ /brgyad pa de bzhin rang rgyal sa//nyan thos rang rgyal byang chub kyi/ /lam zhugs pa la gsungs pa'o/ /byang chub sems dpa' shes bya ni/ /dri ma med sogs sa dgu ste/ /'phags lam yan lag brgyad po dang / /mtshungs par ldan pa bsgom pa'i lam/ /lta ba rtog pa ngag dang las/ / 'tsho ba dang ni rtsol ba dang / /dran pa ting 'dzin yang dag ldan/ /lam gyi yan lag brgyad por shes/ /gnyis pa dri ma med pa'i sa/ /nyes dang dri ma kun zad phyir/ /tshul khrims pha rol phyin dag pa/ /ston ka'i zla 'od dang mtshungs so/ /bzod pa'i pha rol phyin dag pa//gsum pa 'od byed pa yang ni/ /ye shes me lce rab 'bar bas/ /'dzin pa gnyis ni legs par bsregs/ /bzhi pa 'od 'phro ba yang ni/ /yang dag ye shes 'od 'phro'i phyir/ /brtson 'grus pha rol phyin lhag cing / /byang chub phyogs kyis rgyun du byas/ / lnga pa rgyal bar dka' ba yang / /bdud kun gyis thub shin tu dka'/ /bsam gtan phar phyin gyis bcings pa/ /bsod nams tshogs kyi bsgrubs pa nyid/ /drug pa mngon du 'gyur zhes pa/ /sangs rgyas chos la mngon phyogs nyid/ /shes rab pha rol phyin dag pa/ / 'gog pa'i bden pa thob ste rgyas/ /bdun pa ring song thabs chen po/ /rjes su ring du song ba'i phyir/ /blo [(]ltan [,]ldan [)]skad cig skad cig der/ /'gog pa yang ni thob par 'gyur/ /de bzhin brgyad pa mi g.yo'i phyir/ /gzhon nu'i sa ste mi g.yo ba/ /smon lam rnam par dag pa'i sa/ / 'gog las rgyal ba skul byed pa'o/ /dgu pa legs pa'i blo gros zhes/ /bgyi ba'i sa ste stobs la brten/ /'di ni blo ldan legs pa yi/ /blo gros so sor rig pa thob/ /bcu pa chos kyi sprin yang ni/ /dam chos char ni mngon par 'bebs/ /'di ni byang sems dbang bskur te//sangs rgyas rnams kyis dag par byed/ /'di ni rgyal ba'i lam la 'jug pa las bsgom lam brjod pa'i le'u ste nyi shu rtsa drug pa'o// //lam gzhan kun la khyad 'phags shing / /rtse mo nyid du phyin pa las/ /khyad par lam du grags pa yang / /sa ni bcu pa'i nang du'o//sangs rgyas zhing dang mngon shes dang / /dam pa'i bsod nams ye shes tshogs/ /rdzogs pa'i byang chub phyogs kyi chos/ /rnams dang zhi gnas lhag mthong bcas/ /gzungs dang spobs pa rnams dang ni/ /sha la sogs pa'i spyan lnga dang / /'di dag la sogs chos rnams kun//thams cad du ni yongs su sbyong / /'di ni rgyal ba'i lam la 'jug pa las khyad par gyi lam bshad pa'i le'u ste nyi shu rtsa bdun pa'o// //sa 'di rnams kyi sbyong ba'i lam/ /'phags pa mi pham zhabs kyis ni/ /mngon par rtogs pa'i rgyan du gsungs/ / yongs su sbyong ba rnam bcu yis/ /sa ni dang po 'thob 'gyur te/ /bsam dang phan pa'i dngos nyid dang / /sems can rnams la sems mnyam nyid/ /gtang dang bshes gnyen bsten pa dang / /dam chos dmigs pa tshol ba dang / /rtag tu nges 'byung sems nyid dang / /sangs rgyas skur 'dod dga' ba dang //chos ston pa dang bden pa yi/ /tshig ni bcu pa yin par 'dod/ /'di dag rang bzhin mi dmigs pas/ /yongs su sbyong bar shes par bya/ /tshul khrims byas pa gzo dang bzod/ /rab tu dga' dang snying rje che/ /bkur sti bla ma la gus nyan//brgyad pa sbyin pa sogs la brtson/ /thos pa mi ngoms nyid dang ni/ /zang zing med par chos sbyin dang / /sangs rgyas zhing kun sbyong ba dang / /'khor bas yongs su mi skyo dang / /ngo tsha khrel yod ces bya ba/ /rlom med bdag nyid de rnams lnga/ /nags gnas 'dod chung chog shes dang //sbyangs pa yang dag sdom bsten dang / /bslab pa yongs su mi gtong dang / /'dod pa rnams la smod pa dang / /mya ngan 'das dang bdog kun gtong / /mi zhum pa dang lta ba med/ /'dris dang khyim dang 'khren pa dang / /'du 'dzir gyur pa'i gnas dang ni/ /bdag bstod gzhan la brnyas pa dang //mi dge las kyi lam bcu dang / /rlom pas khengs dang phyin ci log /blo ngan dang ni nyon mongs bzod/ /bcu po 'di ni rnam spangs na/ /sa lnga pa ni yang dag 'thob/ /sbyin dang tshul khrims bzod brtson 'grus/ /bsam gtan shes rab rab rdzogs pas/ / slob ma dang ni bse ru la/ /dga' dang skrag pa'i sems spangs dang / /slong na mi zhum bdog pa kun/ /btang yang mi dga' med pa dang / /dbul yang slong ba mi spong bas/ /sa ni drug pa yang dag 'thob/ /bdag dang sems can 'dzin pa dang / /srog dang gang zag chad rtag dang / /mtshan ma rgyu dang phung po dang //khams dang skye mched dag dang ni/ /khams gsum pa la gnas dang chags/ /sems ni kun du zhum pa dang / /dkon mchog gsum dang tshul khrims la/ /de lta ba yi mngon zhen dang / /stong pa nyid la rtsod pa dang / /de dang 'gal ba'i nyes pa ni/ / nyi shu gang la rnam chad pa/ /de yis sa ni bdun pa thob/ /rnam thar sgo gsum shes pa dang / /'khor gsum rnam par dag nyid dang / /snying rje dang ni rlom med dang / /chos mnyam nyid dang tshul gcig shes/ /mi skye ba dang bzod shes dang / /chos rnams rnam pa gcig tu ston/ /rtog pa kun du 'joms pa dang //'du shes lta dang nyon mongs spong / /zhi gnas nges par sems pa dang / /lhag mthong la ni mkhas pa dang / /sems dul ba dang thams cad la/ /thogs pa med pa'i ye shes dang / /chags pa'i sa min gar 'dod pa'i/ /zhing gzhan du ni mnyam 'gro dang / /kun du bdag gi ngo bo ni/ / ston pa nyid dang nyi shu'o/ /sems can kun yid shes pa dang / /mngon par shes pas rtse ba dang / /sangs rgyas zhing bzang bsgrub pa dang / /yongs su brtag phyir sangs rgyas ston/ /dbang po shes dang rgyal ba yi/ /zhing skyong sgyu ma ltar gnas dang / /bsams bzhin srid pa len pa dang / /las ni rnam pa 'di brgyad bshad//smon lam dag ni mtha' yas dang / /lha la sogs pa'i skad shes dang / /spobs pa chu bo lta bu dang / /mjal du 'jug pa mchog dang ni/ /rigs dang rus dang cho 'brang dang / /'khor dang skye ba dag dang ni/ /nges 'byung byang chub shing rnams dang / /yon tan phun sum tshogs pa yin//sa dgu 'das nas ye shes ni/ /gang gis sangs rgyas sar gnas pa/ /de ni byang chub sems dpa'i sa/ /bcu pa yin par shes par bya/ /'di ni rgyal ba'i lam la 'jug pa las sa bcu yongs su sbyong ba'i lam brjod pa'i le'u ste nyi shu rtsa brgyad pa'o// //tshogs ni thams cad ma lus pas//lam ni yongs su dag pa'i rgyun/ /sangs rgyas rnams kyi sku bzhi ni/ /blo chen rnams kyis rdzogs par 'gyur/ /khams gsum spyod pa las grol ba/ /dag cing zhi la mkha' mnyam pa/ /brtag dka' rtogs par dka' ba yi/ /bden bzhi dpe med mthug po ste//mchog gi bde bas khyab pa'o/ /mchog tu mi 'gyur bde dam pa/ /rnam par rtog med cha las 'das/ /yang dag mtha' ste 'od gsal ba/ /rnam par shes pa'i chos nyid 'das/ /phra rab rdul ni rnam par spangs/ /skyid cing 'jigs med snying brtse yi/ /mthar phyin chos rnams rang bzhin bdag /lhan skyes ngo bo nyid ces pa'i/ /sku de sangs rgyas spyod yul lo/ /mngon par rtogs pa'i rgyan du ni/ /'phags pa mi pham pas gsungs te/ /thub pa'i ngo bo nyid sku ni/ /zag pa med pa'i chos gang dag /thob gyur rnam kun rnam dag pa/ /de dag rang bzhin mtshan nyid can//ngo bo nyid kyi sku'o/ /byang chub phyogs sogs chos rnams ni/ /rdzogs sangs rgyas rnams spyod yul lo/ /sgrib pa kun las nges grol ba/ /stong pa nyid dang ro gcig mchog /chos rnams de dag kun gyi ni/ /rten du yang dag rab tu brjod/ /rnam pa kun gyi mchog ldan pa//khyab bdag stong nyid ro gcig ste/ /rnam dag stong nyid gcig pa'i bdag /sna tshogs gzugs 'dzin dam pa ste/ /stong nyid snying rje dbyer med pas/ /dngos dang dngos min gcig mtshan nyid/ /bden pa gnyis kyi bdag nyid du/ /dpal ldan chos sku ston pa'o/ /gtso bo ye shes tshogs gnyis ni//yongs su smin pa mkha' dang mtshungs/ /gtso bo sems gang gsal dag pa/ /thub pa zung 'jug bdag nyid do/ /rdzogs sangs rgyas dang de sras kyis/ /chos kyi sku de gsungs pa ste/ /mngon rtogs rgyan du gsungs pa ni/ /byang chub phyogs mthun tshad med dang //rnam par thar dang mthar gyis ni/ /snyoms 'jug dgu yi bdag nyid dang / /zad par bcu yi bdag nyid dang / /zil gyis gnon pa'i skye mched ni/ /rab tu dbye bas rnam brgyad dang / /nyon mongs med dang smon mkhyen dang / /mngon shes so so yang dag rig /rnam pa thams cad dag bzhi dang //dbang bcu dang ni stobs bcu dang / /mi 'jigs pa ni bzhi dag dang / /bsrung ba med pa rnam gsum dang / /dran pa nyer gzhag rnam gsum dang / /bsnyel ba mi mnga'i chos nyid dang / /bag chags yang dag bcom pa dang / /skye la thugs rje chen po dang //thub pa kho na'i ma 'dres chos/ /bco brgyad bshad pa gang yin dang / /rnam pa thams cad mkhyen nyid dang / /chos kyi sku zhes brjod pa yin/ /chos kyi sku'o/ /theg chen kun gyi rnam pa ni/ /sdud pa'i chos ni yang dag gsungs/ /sa bcu dbang phyug rnams dang ni//de ni bde ba longs spyod nyid/ /thogs med zag med khyab pa ste/ /gsal zhing 'byung ba'i rdul phran spangs/ /dbang po'i gzhu dang nam mkha' yi/ /skar tshogs dri ma med pa bzhin/ /me long rnams su phan tshun du/ /de ni gzugs brnyan gzugs brnyan bzhin/ / sum cu gnyis mtshan brgyad cu yi/ /dpe byad rgyan du byas te 'bar/ /bsod nams tshogs ni gtso bo ru/ /rnam par smin pa gsungs bdag nyid/ /ma lus nam mkha' yongs gang zhing / /mtha' yas 'od gsal mtha' yas pa/ /de ltar mngon rtogs rgyan las gsungs/ /mtshan 'di sum cu rtsa gnyis dang //dpe byad brgyad cu'i bdag nyid 'di/ /theg chen nye bar longs spyod phyir/ /thub pa'i longs spyod rdzogs skur bzhed/ /longs spyod rdzogs pa'i sku'o/ /ji lta ji lta'i gzugs kyis ni/ /sems can 'dul bar 'gyur ba ste/ /sems can bsam pa'i rjes brtags nas/ /shAkya thub pa la sogs pa'i//thub pas 'khor ba ma stongs bar/ /kun du skye dang byang chub sogs/ /bstan nas 'gro don byed pa ste/ /lus gtsor sprul pa'i mtshan nyid de/ /'phags pa rgyal ba byams pas gsungs/ /gang gis srid pa ji srid par/ /'gro la phan pa sna tshogs dag /mnyam du mdzad pa'i sku de ni//thub pa'i sprul sku rgyun mi 'chad/ /sprul sku'o/ /gzhan yang rgyal bas lung bstan pa/ /'phags pa klu sgrub kyis gsungs pa/ /khams gsum spyod pa las grol mkha' dang mnyam gyur dngos kun ngo bo nyid/ /dag cing zhi la rnam bsten mchog zhi'i rang bzhin rnal 'byor pa nyid sprul//rtogs dka' brtag par dka' la bdag gzhan rab phan khyab cing mtshan ma med/ /rgyal ba'i bden pa mnyam med mnyam sku mi rtog sku gcig la phyag 'tshal/ /lhan cig skyes pa'i sku'o/ /gang zhig gcig min du ma ma yin bdag dang gzhan phan phun tshogs chen po'i gzhir gyur pa//dngos dang dngos med ma yin nam mkha' bzhin du ro mnyam rtogs par dka' ba'i rang bzhin can/ /'gyur med gos pa med cing zhi la mi mnyam mnyam pa khyab pa po ste spros med pa/ /so sor rang rig dpe med rgyal ba rnams kyi chos sku de la bdag ni phyag 'tshal lo//chos sku'o/ /gang zhig 'jig rten las 'das bsam gyis mi khyab legs byas dam pa'i 'bras bu'i bdag nyid du/ /'byor pas 'khor gyi nang du sna tshogs gsal mdzad blo ldan chen po rnams ni dga' ba'i rgyu/ /sangs rgyas rnams ni 'jig rten kun las rab byung rgyun mi 'chad par rgya chen dam chos sgrogs//chos kyi rgyal srid che la rab zhugs longs spyod rdzogs sku de la 'dir ni bdag phyag 'tshal/ /longs spyod rdzogs pa'i sku'o/ /gang zhig sems can smin pa'i ched du la lar me bzhin du ni gsal bar snang gyur cing / /yang ni la lar rdzogs par byang chub chos 'khor bskor nas slar yang mya ngan 'das gang mthong //rnam pa du mar zhugs nas srid gsum 'jigs pa sel ba'i thabs su sna tshogs gzugs kyis ni/ /phyogs bcur rjes song don chen thub pa rnams kyi sprul pa'i sku la 'dir ni phyag 'tshal lo/ /sprul pa'i sku'o//longs spyod rdzogs pa'i sku la gnas/ /mtshan dang dpe byad rnams kyi yang / /spros pa rgya che ba yi phyir/ /so so ru ni mngon par brjod/ /bla ma'i rjes 'gro la sogs pas/ /phyag zhabs 'khor los mtshan pa'o/ /mi phyed sdom pa blangs pa yis/ /zhabs ni rab tu legs par gnas//bsdu ba'i dngos po bzhi po ni/ /yun ring du ni bsten pa yis/ /phyag dang zhabs kyi sor mo ni/ /ngang pa bzhin du dra bas 'brel/ /gya nom pa yi bza' bca' sogs/ /rab tu byin pas phyag zhabs ni/ /gzhon zhing 'jam ste byis pa ni/ /skyes ma thag pa ji bzhin no//lhag pa la sogs byin pa yis/ /phyag zhabs gnyis kyi rgyab dang ni/ /ltag khung phrag pa gnyis te bdun/ /mtho ba yi ni sku can nyid/ /gsod pa'i skye bo thar byas pas/ /lag pa'i sor mo ring ba nyid/ /skye 'gro'i mtsho la phan btags pas/ /rtag tu rting pa yangs pa nyid//srog gcod pa ni spangs pa yis/ /sku che shin tu drang ba nyid/ /dge chos blangs pa'i gtso bo yis/ /zhabs kyi long bu mi mngon nyid/ /dge ba blangs te spel ba yis/ /spu ni gyen du phyogs pa nyid/ /rig dang bzo sogs gus byas te//byin pa e n+ya'i byin pa nyid/ /slong ba bdog pa'i nor byin pas/ /phyag ni ring zhing mdzes pa nyid/ /gsang ba'i tshig ni bsrungs pa dang / /'gro ba tshangs spyod la bkod pas/ /mdoms kyi sba ba sbubs su ni/ /nub pa nyid du grags pa'o/ /gding ba gya nom pa byin pas/ /mdog ni gser 'dra ba nyid dang //khang bzangs dam pa byin pa yis/ /pags pa 'jam zhing gser mdog nyid/ /'du 'dzi la sogs spangs pa yis/ /spu ni re re nas g.yas 'khyil/ /dge ba'i bshes gnyen thams cad ni/ /gnas ji lta bzhin bkod pa yis/ /zhal mdzod spus mtshan drag tshig ni//med pa seng ge'i ro stod 'dra/ /snyan dang rim pas legs smras pas/ /dpung mgo shin tu zlum pa nyid/ /smin la sogs pa rab byin pas/ /thal gong yang dag rgyas pa dang / /de bzhin nad pa'i g.yog byas pas/ /ro ni bro ba'i mchog nyid do/ /nags tshal kun dga' ra ba sogs//mi rnams yang dag byed bcug pas/ /sku yi dkyil 'khor mnyam nyid de/ /n+ya gro d+ha yi dkyil 'khor bzhin/ /gtsug lag khang sogs byin pa yis/ /dbu ni gtsug tor ldan pa nyid/ /'jam zhing snyan pa'i tshig smras pas/ /ljags ni ring zhing srab pa nyid/ /dam chos legs par go byas pas//de bzhin tshangs pa'i gsung nyid do/ /sems can kun la tshig kyal pa/ /spangs pas seng ge'i 'gram pa nyid/ /sems can kun la legs bkur ba'i/ /sbyin pa sogs kyis tshems dkar nyid/ /'tsho ba dag pa don gnyer bas/ /tshems ni mnyam pa nyid du brjod/ / bden tshig kun du spyad pa yis/ /tshems ni thags ni bzang ba nyid/ /phra ma'i tshig ni spangs pa yis/ /tshems ni bzhi bcu tshang ba nyid/ /sems can kun la mnyam nyid du/ /bltas pas spyan ni mthon mthing nyid/ /khong khro sogs dang bral bltas pas/ /rdzi ma pa yi lta bu nyid/ /gsungs pa 'di dag thub chen gyi//mtshan ni sum cu rtsa gnyis so/ /'du byed kun la ma chags pas/ /thub pa'i sen mo zangs mdog nyid/ /sems can kun la phan bsams pas/ /sen mo'i mdog ni snum pa nyid/ /rigs kyi mchog las 'khrungs pa'i phyir/ /sen mo mtho ba nyid yin no/ /tshul ni kha na ma tho ba//med pas sor mo zlum pa nyid/ /legs par dge ba bsags pa yis/ /sor mo rnams ni rgyas pa nyid/ /mthar gyis zhugs pa nyid kyis ni/ /sor mo byin gyis phra ba nyid/ /lus sogs las dang 'tsho ba ni/ /rab bsrungs rtsa mi mngon pa nyid/ /nyon mongs mdud pa rnam dgrol bas/ / rtsa yi mdud pa med pa nyid/ /sems la chos ni sbas pa yis/ /long bu mi mngon pa nyid do/ /skye bo kun bgrod dka' bsgral bas/ /zhabs mi mnyam pa med pa nyid/ /mi zil gnon mkhas bsod nams kyis/ /seng ge'i stabs su gshegs pa nyid/ /klu zil gnon mkhas bsod nams kyis/ / glang po'i stabs su gshegs pa nyid/ /mkha' la gshegs mkhas bsod nams kyis/ /ngang pa'i stabs su gshegs pa nyid/ /skyes bu khyu mchog bsod nams kyis/ /khyu mchog stabs su gshegs pa nyid/ /bskor phyogs lam mthun gshegs pa yis/ /g.yas su ldog cing gshegs pa nyid//mdzes pa'i dge mkhas nyid kyis ni/ /yang dag mdzes par gshegs pa nyid/ /rtag tu gya gyu'i sems med pas/ /mi g.yo bar ni gshegs pa yin/ /rnam dag yon tan thob pa'i phyir/ /sku ni 'khril bag chags pa nyid/ /sdig pa'i chos dang ma bsags pas/ /sku ni byi dor byas 'dra nyid//gdul bya kun gyi sems brtags nas/ /dam pa'i chos ni ston pa dang / /lus sogs gtsang sbra'i tshul gyis ni/ /sku ni rim par 'tsham pa dang / /sku sogs kun spyod gtsang sbra'i phyir/ /sku ni shin tu gtsang ba nyid/ /thugs ni brtse chen gyis brlan phyir/ /sku ni shin tu 'jam pa nyid//thugs ni shin tu yongs dag phyir/ /sku ni rnam par dag pa nyid/ /chos 'dul ba ni rdzogs pa yis/ /thub pa'i mtshan ni rdzogs pa nyid/ /yangs mdzes yon tan brjod pa yis/ /sku yi kho lag yangs pa nyid/ /kun la thugs ni snyoms pa'i phyir/ /gom pa shin tu snyoms pa nyid//rnam dag chos ni yang dag ston/ /spyan ni shin tu yongs dag nyid/ /go sla'i chos ni ston pa'i phyir/ /shin tu gzhon sha can nyid dang / /thugs ni rtag tu ma zhum phyir/ /dku ni zhum pa med pa nyid/ /dge ba yang dag 'phags pa yis/ / shin tu rgyas shing mtho ba'i sku/ /yang srid pa ni zad pa'i phyir/ /sku ni shin tu grims pa nyid/ /rten cing 'brel 'byung gsal ston pas/ /yan lag rnam par phyed pa nyid/ /tshig don shin tu rnam dag par/ /ston pas gzigs pa dag pa nyid/ /brtul zhugs phun tshogs slob ma ni/ /bsdus pas dku ni zlum pa nyid//bdud stobs 'joms pas dku ma zhom/ /de bzhin dam pa'i sku nyid do/ /chos zad pa ni bzlog pa'i phyir/ /phyal ni phyang nge ba nyid do/ /shin tu zab pa'i chos ston pas/ /lte ba zab pa nyid yin no/ /slob pa mthun par 'dzin pa yis/ /lte ba g.yas phyogs 'khyil pa nyid/ /thams cad du ni rab mdzes pa'i//'khor 'byung ba yi chos nyid kyis/ /de'i phyir kun du rtag pa ni/ /kun nas mdzes pa nyid yin no/ /thugs ni kun du yang dag phyir/ /kun du spyod pa gtsang ba nyid/ /dus min chos dang bral ba'i phyir/ /sku la sme ba gnag bag med/ /lus sogs zo mdog bde ba yi/ /rgyu yi chos ni bstan pa'i phyir//phyag gnyis shing bal lta bur ni/ /shin tu legs par 'jam pa nyid/ /dge sbyong chen po brnyes pa yis/ /phyag gi ri mo mdangs yod nyid/ /chos zab mo la gnas pa'i phyir/ /phyag gi ri mo zab pa nyid/ /phyi rjes su ni yang dag par/ /yang dag chos ni ston mdzad dang //sems can kun la brtse ba yis/ /phyag gi ri mo ring ba nyid/ /bslab pa rab mang kun ston pas/ /zhal ni ha cang mi ring nyid/ /khams gsum po ni thams cad kyi/ /shin tu rab tu gsal bar ni/ /gzugs brnyan lta bur shes pa'i phyir/ /mchu ni bim pa ltar dmar nyid/ /'jam por smras pas ljags mnyan nyid//yon tan mchog mnga' ljags srab nyid/ /chags pa'i byis pa gting dpag dka'i/ /chos kyis 'dul bas ljags dmar nyid/ /bsnyengs pa thams cad mi mnga' bas/ /'brug gi sgra dang ldan pa nyid/ /shin tu snyan la sogs gsungs pas/ /gsung snyan mnyen la 'jam pa nyid//srid pa'i kun sbyor bsdams pa'i phyir/ /mche ba zlum pa nyid yin no/ /gdul dka'i sems can 'dul ba'i phyir/ /mche ba rno ba nyid yin no/ /shin tu dkar ba'i chos kyis ni/ /gtul phyir mche ba dkar ba nyid/ /mnyam pa'i sa la rab gnas phyir/ /mche ba rab tu mnyam pa nyid//rim pas chos ni nges rtogs shing / /gsal bas mche ba byin gyis phra/ /shes rab mchog la gnas pa'i phyir/ /shangs ni mtho zhing yid du 'ong / /skye 'gro gtsang ma phun tshogs pas/ /shangs ni yang dag gtsang ba nyid/ /chos ni shin tu rgya che'i phyir//spyan ni yangs pa nyid yin no/ /don gyi tshogs ni bsdus pa yis/ /mchog tu rdzi ma stug pa nyid/ /gzhon nu ma kun mngon mgu bas/ /spyan ni pad 'dab rgyas 'dra nyid/ /rtag tu phyi rjes gzigs pa'i phyir/ /de bzhin smin tshugs ring ba nyid/ /chos 'dul 'jam po la mkhas pas//smin ma shin tu 'jam pa nyid/ /thugs rgyud dge bas brlan pa'i phyir/ /smin ma shin tu snum pa nyid/ /thams cad du ni skyon gzigs phyir/ /smin ma'i spu ni mnyam pa nyid/ /mchog tu gnod pa bzlog mdzad pas/ /phyag ni ring zhing rgyas pa nyid/ /chags sogs g.yul las nges rgyal bas//snyan gnyis mnyam pa nyid yin no/ /sems can kun gyi rgyud la ni/ /rab tu gnod pa spangs pa yis/ /sgra gsan snyan gyi dbang po ni/ /nyams pa rnam par spongs pa nyid/ /lta bas byas pa thams cad kyis/ /gzhan du mi 'gyur ba nyid kyis//dpral ba legs 'byes rtsod pa kun/ /zhi byas dbyes ni che ba nyid/ /smon lam yongs su rdzogs pa yis/ /dbu ni yongs su rgyas pa nyid/ /'dod la zhen pa bzlog pa yis/ /dbu skra bung ba ltar gnag nyid/ /mthong dang bsgom pa'i spang bya ni/ /bcom pas dbu skra stug pa nyid//bstan pa blo ni 'jam po yis/ /yongs su shes pas dbu skra 'jam/ /dri mas thun ni ma 'khrugs pas/ /skra ni ma 'dzings pa nyid do/ /rtag par tshig rtsub ma brjod pas/ /skra ni mi bshor ba nyid do/ /byang chub yan lag me tog ni/ /bkram phyir dbu skra dri zhim nyid//rtag par kun du mdzes par ni/ /'gyur ba'i bsod nams nyid kyis ni/ /dpal be'u dang ni bkra shis mtshan/ /dpal gyis mdzes pa'i phyag zhabs nyid/ /'di dag ni mtshan sum cu rtsa gnyis dang / dpe byad bzang po brgyad cu ste/ longs spyod rdzogs pa'i sku la gnas pa'o//'di ni rgyal ba'i lam la 'jug pa las sku bzhi brjod pa'i le'u ste nyi shu rtsa dgu pa'o// //rgyal ba'i lam 'jug yang dag par/ /sbyar las bsod nams tshad med gang / /de yis 'gro kun rgyal ba yi/ /lam la legs par 'jug par shog / bdag gi bsod nams 'di yis ni/ /nam mkha'i kun khyab skye bo rnams/ /ngan 'gro kun las nges grol zhing / /mi khom thams cad rnam par spangs/ /skye bar lha dang mi yi ni/ /skye ba yongs su thob par shog /srid pa'i sdug bsngal gyis skrag pas/ /dkon mchog gsum la skyabs 'gro zhing //dam chos nyan sems don bsgom dang / /sems ni bden par gnas par shog /theg pa chen po la gnas te/ /tshangs pa'i spyod dang ldan par shog /lam kun rnam par bsgoms pa yis/ /sa la sogs pa kun thob nas/ /zhing kun yang dag sbyangs nas su/ /myur du rgyal ba thob par shog /ji srid 'khor ba'i gnas skabs su/ /bsam pa'i don kun thams cad ni/ /nam mkha'i mdzod bzhin mkha' nyid nas/ /sems can kun la 'byung bar shog /phyogs bcu nam mkha'i mthar gnas pa'i/ /'jig rten khams ni de dag rnams/ /don grub 'jig rten khams bzhin du//de dag thams cad rnam dag shog /bdag kyang byang chub snying po'i bar/ /zang zing mi 'jigs dam chos dang / /byams pas sems can thams cad kyi/ /bsam kun yongs su rdzogs byed cing / /rtag pa nyid du tshangs spyod dang / /sdom pa kun gyis bsdam par shog /sems can don kun byed pa dang / /chos kun don ni ston par shog /'jig rten khams kyi sems can kun/ /bdag la gnod pa byed kyang ni/ /bdag ni de dag thams cad la/ /phan 'dogs byed pa nyid du shog /'khor ba'i sdug bsngal bsran nas bdag /rtag par sems can don la brtson//sems ni dam chos bsam gtan la/ /ro gcig bstan pa nyid du shog /ji ltar brtson ldan brtson 'grus bzhin/ /bdag kyang go cha sbyor ba dang / /de bzhin mi ldog pa zhes pa'i/ /brtson 'grus dang ni ldan par shog /ting 'dzin phun sum tshogs pa yi/ /tshogs kyi byang chub bsgrubs pa yis//bsam gtan kun la gcig tu gnas/ /bdag sems rdo rje lta bur shog /shes rab nam mkha'i mtha' khyab pa/ /rdo rje yi ni mtshan nyid dang / /rab mthug kun dga'i tshogs dang ni/ /snying rje'i ro yis nges gang zhing / /thabs dang smon lam de bzhin du/ /stobs ni rab tu 'byor pa dang //ye shes bdag nyid 'di dag ni/ /bdag la rnam par dag par shog /mngon shes kun gyi mthar phyin te/ /khyad par lam ni thob par shog /sangs rgyas zhing ni rnam sbyangs te/ /bdag ni sangs rgyas nyid gyur cig /'di nyid kyi ni rim pa yis/ /bdag gi bsod nams mthu yis ni//'khor ba pa yi sems can kun/ /myur du rgyal ba nyid du shog /bsod nams yongs su bsngo ba 'di/ /bdag nyid kyi ni blo yis byas/ /kun nas kun du ma lus pa/ /sangs rgyas nyid kyis mkhyen pas na/ /kun du bzang po zhes bgyi ba'i/ /smon lam rgya mtsho ji lta ba/ / de bzhin du ni bdag la yang / /dge ba rgya mtsho de myur du/ /'bras bu dang ni bcas par shog /phyogs bcu nam mkhas kun khyab pa'i/ /sangs rgyas zhing gi rgyal rnams gang / /de dag ji ltar smon lam ni/ /mngon du byas pa'i rim pa rnams/ /de tsam nyid du bdag gis kyang //bsam pa brtan pa de bzhin gyi/ /bsod nams mthu yis 'di dag ni/ /de bzhin du ni 'grub par shog /ji ltar dpal ldan 'jam dbyangs kyi/ /smon lam de ltar bdag gi yang / /dus ni yun mi ring ba yis/ /smon lam 'di ni yongs rdzogs shog /sangs rgyas kun rnams rang rang gi /zhing bzhugs mya ngan mi 'da' zhing / /mkha' mnyam chos kyi char gyis ni/ /rtag tu sems can phan byed shog /sems can rnams kyang sangs rgyas chos/ /dge 'dun bcas pa thams cad la/ /lha rdzas mchod sprin mtha' yas pas/ /yang dag par ni mchod byed shog /de bzhin gshegs pa'i yon tan gyis/ /'jig rten khams kun gang bar shog /mchog gi chos rnams sems 'gyur zhing / /srid pa sbyong bar byed par shog /lung don gang dang 'gal ba dang / /don med pa'am yang na ni/ /gang 'og 'chol dang sgra ngan ldan/ /gzhung gi skyon ni cung zad gang //brtse ba can gyis dag byed pa'am/ /'on te sgro skur spangs te byas/ /chos kyi blo tsam gyis byas phyir/ /mkhas pas bdag la bzod par rigs/ /blo ni zhan par gyur pa dang / /so so skye bo yin pa'i phyir/ /'dir ni bdag gis skyon bsdus gang / /spang zhing chos dang mthun bzung ste/ /blo can brtse bas bzod par mdzod//'di ni rgyal ba'i lam la 'jug pa las smon lam gyi le'u ste sum cu pa'o// //ji skad bshad pa'i spang bya dor/ /gzung bya thams cad blang bar bya/ /rtog pa thams cad bsdus bya zhing / /chos kyi bdag med goms par bya/ /rang gzhan phyir ni slob dpon ni/ /sangs rgyas ye shes dpal gyis byas//rgyal ba'i lam la 'jug pa yi/ /chos bsdus pa ni rdzogs pa'o/ /rgyal ba'i lam la 'jug pa zhes bya ba kha che'i rigs kyi paN+Di ta chen po rig pa'i gnas lnga la sbyangs shing byang chub kyi sems kyis brgyan pa bud+d+ha shrI dz+nyA na zhes bya bas mdzad pa rdzogs so// //e ma rtsom pa'i tshad ldan paN chen gyis mdzad rgyal ba'i lam 'jug 'di//nyung la gsal rdzogs lung rigs dang 'brel don chen ldan mthong ste/ /legs sbyar skad kyis dben pa'i mi rnams la ni phan 'dod nas/ /rtsod dus skyes kyang rig gnas lnga sbyangs sdom gsum la gnas pa'i/ /bod yul dbus kyi dge slong dgra bcom legs par mnyan te bsgyur//phrag dog 'gran khengs dregs sems spangs te blangs na don chen 'gyur/ /gang dag srid zhen blo zhan 'tsho med long med bsgom 'dod sogs/ /thos bral rnams kyang 'di tsam cig nyan nus na thos mang 'gyur/ /gzhung 'di'i tshad ni tshigs bcad stong dang tshig brgyas lhag pa ste//sgra don dpyad nas bsgyur kyang nongs na mkhas rnams bzod par bzhes/ /brtsam zhus bsgyur ba'i mkhan po gsum gyis 'bad 'bras 'di dar nas/ /dge des bdag sogs 'gro kun rgyal ba'i lam zhugs kun mkhyen shog /bsgyur ba'i dgos 'brel dang gzhan la gdams pa dang / /bzod par gsol ba dang bsngo ba la sh+loka gsum lo tsA bas bgyis so/