CLOSE WINDOW

D3940
བོད་ཡིག

mkhan po zhi ba lhas mdzad pa rdzogs so// //[ @##/ /rgya gar skad du/ shik+Sha sa muts+tsha yaH bod skad du/ bslab pa kun las btus pa/ bam po dang po/ sangs rgyas dang byang chub sems dpa' thams cad la phyag 'tshal lo//gang ma thos pas dmyal ba la sogs g.yang sar ni/ /bsreg la sogs pa'i sdug bsngal mi bzad mtha' yas dag /sems ma zhi ba khyed kyis yang yang myong gyur pa/ /de ni mnyan phyir gus pa shin tu rgya cher bsten/ /gang thos nas kyang g.yeng ba med pa'i bdag can gyis//sdig spong sngon byas mang po ma lus zad byed la/ /sngon chad ma thob pa yi bde ba'ang rab 'thob cing / /bde ba las ni nam yang nyams par mi 'gyur dang / /rdzogs pa'i byang chub sems dpa'i bde mchog mi zad dang / /sangs rgyas go 'phang mnyam med phun tshogs thob byed pa//shin tu rnyed dka'i rin chen chos de deng thob na/ /legs par brjod pa 'di la dal thob gus par nyon/ /khams gsum phan mdzad gcig po de gsung mnyan bya'i phyir/ /lha dang klu dang grub pa dri za gnod sbyin dang / /mkha' lding lha min mi'am ci dbang 'dre la sogs/ / dgar bcas nyan par mos shing yid dang 'dir shog shig /bder gshegs chos kyi sku mnga' sras bcas dang / /phyag 'os kun la'ang gus par phyag 'tshal te/ /bde gshegs sras kyi sdom la 'jug pa rnams/ /mdor bsdus don gyi ngag gis brjod par bya/ /sngon chad ma byung ci yang 'dir brjod med//sdeb sbyor mkhas pa'ang bdag la yod min te/ /de phyir gzhan gyi don du bdag mi 'bad/ /rang gi yid la bsgom phyir ngas 'di brtsams / /dge ba bsgom phyir bdag gi dad pa'i shugs/ /'di dag gis kyang re zhig 'phel 'gyur la//bdag dang skal ba mnyam pa gzhan gyis kyang / /ji ste 'di dag mthong na don yod 'gyur/ /dal 'byor shin tu rnyed par dka' ba dang / /skyes bu'i don bsgrub 'di ni rnyed gyur pas/ /gal te 'di la phan pa ma bsams na/ /phyis 'di yang dag 'byor par ga la 'gyur//ji skad du 'phags pa sdong po bkod pa'i mdor 'phags pa rgyal ba'i drod kyi skye mched kyi rnam par thar pa las mi khom pa brgyad las ldog pa yang rnyed par dka'/ mir 'gyur ba yang rnyed par dka'/ dal ba phun sum tshogs pa rnam par dag pa yang rnyed par dka'/sangs rgyas 'byung ba yang rnyed par dka'/ dbang po ma tshang ba med pa yang rnyed par dka'/ sangs rgyas kyi chos mnyan pa yang rnyed par dka'/ /skyes bu dam pa dang 'grogs pa yang rnyed par dka'/ yang dag pa'i dge ba'i bshes gnyen rnams kyang rnyed par dka'/yang dag pa'i tshul rjes su bstan pa nye bar sgrub pa yang rnyed par dka'/ yang dag par 'tsho ba yang rnyed par dka'/ mi'i 'jig rten na chos dang rjes su mthun pa'i chos la nan tan byed pa yang rnyed par dka' na zhes gsungs pa bzhin no/ /de'i phyir rnam pa de lta bu dang phrad pa la brten nas//sems can chen po gang la gang tsho bdag dang gzhan dag kyang / /'jigs dang sdug bsngal mi 'dod pa/ /de tshe de srung gzhan mi gang / /bdag dang bye brag ci zhig yod/ /snyam pa de lta bu'i so sor spyod pa skyes nas des bdag dang sems can gyi khams rnams kyi/sdug bsngal mthar 'byin 'dod pa dang / /bde ba'i mthar yang 'gro 'dod pas/ /dad pa'i rtsa ba brtan byas te/ /byang chub la yang blo brtan bya/ /'di ltar dkon mchog ta la la'i gzungs las/ rgyal dang rgyal ba'i chos la dad gyur cing //sangs rgyas sras kyi spyod la dad byed pas / /byang chub bla na med la dad gyur nas/ /skyes bu chen po rnams kyi sems skye'o/ /dad pa sngon 'gro ma ltar bskyed pa ste/ /yon tan thams cad srung zhing 'phel bar byed/ /dogs pa sel zhing chu bo rnams las sgrol//dad pa bde legs grong khyer mtshon byed cing / /dad pa rnyog pa med cing sems dang byed/ /nga rgyal spong zhing gus pa'i rtsa ba yin/ /dad pa gter dang nor dang rkang pa'i mchog /lag pa bzhin du dge sdud rtsa ba yin/ /dad pa yongs su gtong la dga' bar byed//dad pa rgyal ba'i chos la rab dga' skyed / /dad pa yon tan ye shes khyad par byed/ /sangs rgyas go 'phang ston cing thob byed yin/ /dbang po rno zhing rab tu gsal bar byed/ /dad pa'i stobs la gzhan gyis mi brdzi zhing / /nyon mongs rnam par sel ba'i gzhi rten yin//dad pa rang byung yon tan rnams kyang tshol/ /dad pa chags pa'i sgo la chags pa med/ /mi dal spong zhing dal ba mchog cig yin/ /dad pa bdud kyi lam las 'da' byed cing / /thar pa'i lam mchog ston par byed pa yin/ /sa bon ma rul yon tan rnams kyi rgyu//dad pa byang chub shing ni rnam par skyed / /ye shes khyad par yon tan 'phel bar byed/ /dad pa rgyal ba thams cad ston byed yin/ /gang dag rtag tu sangs rgyas dad gus bcas/ /de dag tshul khrims bslab pa yongs mi 'dor/ /gang dag tshul khrims bslab pa mi 'dor ba//yon tan ldan de yon tan ldan pas bstod / /gang dag rtag tu chos la dad gus bcas/ /de dag rgyal ba'i chos nyan ngoms pa med/ /gang dag rgyal ba'i chos nyan mi ngoms pa/ /de dag chos la mos pa bsam mi khyab/ /gang dag rtag tu dge 'dun dad gus bcas/ / de dag mi ldog dge 'dun dad pa yin/ /gang dag mi ldog dge 'dun rab dad pa/ /de dag dad pa'i stobs kyis mi ldog 'gyur/ /gang dag dad pa'i stobs kyis mi ldog pa/ /de dag dbang po rno zhing rab tu gsal/ /gang dag dbang po rno zhing rab gsal ba/ /de dag sdig pa'i grogs po rnam par spangs//gang dag sdig pa'i grogs po rnam spangs pa/ /de dag chos ldan grogs kyis yongs su bzung / /gang dag chos ldan grogs kyis yongs bzung ba/ /de dag dge ba rgya chen sogs par byed/ /gang dag dge ba rgya chen sogs byed pa/ /bdag nyid chen po de dag rgyu stobs ldan//bdag nyid chen po rgyu stobs gang ldan pa/ /de dag mos pa'i khyad par rgya chen 'gyur/ /gang dag mos pa'i khyad par rgya che ba/ /de dag rgyal ba kun kyis rtag byin brlabs/ /gang dag rgyal ba kun gyis byin brlabs pa/ /de dag byang chub don du sems kyang skye//gang dag byang chub don du sems skye ba/ /de dag drang srong chen po'i yon tan brtson/ /drang srong chen po'i yon tan gang brtson pa/ /de dag rigs mtho sangs rgyas rigs su skye/ /gang dag rigs mtho sangs rgyas rigs skyes pa/ /de dag mnyam zhing sbyor dang mi sbyor spangs//mnyam zhing sbyor dang mi sbyor gang spangs pa/ /de dag dad dang bsam pa rnam par dag /gang dag dad dang bsam pa rnam dag pa/ /de dag lhag pa'i bsam pa dam pa mchog /gang dag lhag bsam dam pa mchog ldan pa/ /de dag rtag tu pha rol phyin pa spyod//gang dag rtag tu pha rol phyin spyod pa/ /de dag theg pa chen po 'di la zhugs/ /gang dag theg pa chen po 'dir zhugs pa/ /de dag sangs rgyas rnams la sgrub pas mchod/ /gang dag sgrub pas sangs rgyas mchod byed pa/ /de dag sangs rgyas rjes dran mi phyed 'gyur//gang dag sangs rgyas rjes dran mi phyed pa/ /de dag rtag tu sangs rgyas bsam yas mthong / /gang dag sangs rgyas bsam yas rtag mthong ba/ /de la nam yang sangs rgyas mi bzhugs min/ /gang la nam yang sangs rgyas mi bzhugs min/ /de dag bar skabs chos las nyams mi 'gyur//zhes bya ba la sogs pa gsungs pa dang / dad pa'i rtsa ba can gyi yon tan rgya chen po mtha' yas pa zhig der gsungs te/ /de rdzogs nas yang mdor bsdus te gsungs pa/ 'di 'dra chos ni gang dag dad gyur pa/ /sems can so so skye bo'i tshogs na dkon//gang dag dge bsags bsod nams byas gyur pa/ /de dag rgyu yi stobs kyis 'di la dang / /gang gA zhing bcu'i rdul snyed sems can la/ /bde ba kun gyis bskal par bsnyen bkur yang / /chos 'dir dad pa'i bsod nams ci 'dra ba/ /bsod nams khyad par de 'dra de la med//ces gsungs pa yin no/ /de skad du chos bcu pa'i mdo las kyang / gang gis 'dren pa nges 'byung ba/ /dad pa theg pa mchog yin te/ /de'i phyir blo dang ldan pa'i mis/ /dad pa'i rjes su 'brang ba bsten/ /ma dad pa yi mi dag la/ / dkar po'i chos rnams mi skye ste/ /sa bon me yis tshig pa las/ /myu gu sngon po ji bzhin no/ /zhes gsungs so/ /de bas ni 'phags pa rgya cher rol pa'i mdo las kyang / kun dga' bo dad pa la sbyor bar bya ste/ 'di ni de bzhin gshegs pa la gsol ba 'debs pa'o zhes bstan to//de skad du/ seng ges zhus pa'i mdo las kyang / dad pas mi khom spang bar 'gyur/ /zhes bka' stsal pa yin no/ /de ltar dad pa'i rtsa ba brtan par byas la/ bsod nams thams cad sdud pa'i phyir na byang chub kyi sems brtan par bya'o/ /ji skad du seng ges zhus pa las/bcom ldan 'das la rgyal bu seng ges zhus pa/ chos rnams thams cad bsdu ba ni/ /chos gang gis ni thob par 'gyur/ /gang dang gang du skyes pa der/ /sems can rnams ni dga' ba 'thob / /bcom ldan 'das kyis bka' stsal pa/ sems can thams cad thar bya'i phyir//byang chub don du sems btud pa/ /des ni chos rnams bsdu ba 'thob/ /des ni dga' ba thob par 'gyur/ /zhes gsungs pa bzhin no/ /de skad du/ 'phags pa sdong po bkod pa'i mdo las kyang / rigs kyi bu byang chub kyi sems ni sangs rgyas kyi chos thams cad kyi sa bon lta bu'o//'gro ba thams cad kyi chos dkar po rnam par 'phel bar byed pas zhing lta bu'o/ /'jig rten thams cad rten pas sa lta bu'o zhes bya ba nas/ byang chub sems dpa' thams cad yongs su srung bas pha lta bu'o zhes bya ba'i bar dang / de bzhin du sbyar te dbul ba thams cad yang dag par gcod pas rnam thos kyi bu lta bu'o/ /don thams cad yang dag par sgrub pas yid bzhin gyi nor bu'i rgyal po lta bu'o/ /bsam pa thams cad yongs su rdzogs par byed pas bum pa bzang po lta bu'o/ /nyon mongs/ pa'i dgra pham par bya ba la mdung thung lta bu'o/ /tshul bzhin ma yin pa yid la byed pa 'gebs pas go cha lta bu'o/ /nyon mongs pa'i mgo lhung bar byed pas ral gri lta bu'o/ /nyon mongs pa'i shing gcod pas sta re lta bu'o/ /'tshe ba thams cad las skyob pas mtshon cha lta bu'o//'khor ba'i chu'i nang na gnas pa steng du 'byin pas mchil pa lta bu'o/ /sgrib pa dang khebs pa'i rtsa ba thams cad rnam par 'thor bas rlung gi dkyil 'khor lta bu'o/ /byang chub sems dpa'i spyod pa dang smon lam thams cad bsdus pa'i phyir mdor bstan pa lta bu'o/ / lha dang mi dang lha ma yin du bcas pa'i 'jig rten la mchod rten lta bu ste/ rigs kyi bu de ltar byang chub kyi sems ni yon tan de dag dang / yon tan gyi bye brag tshad med pa gzhan dang yang ldan no zhes brjod do/ /so so'i skye bo la yang byang chub kyi sems skye ste/ 'di tshig tsam ni ma yin no zhes bya bar ji ltar shes she na/mdo sde du ma mthong ba las te/ re zhig 'phags pa dri ma med par grags pas bstan pa las/ 'jig tshogs la lta ba ri rab dang mnyam pa dran nas byang chub kyi sems skye zhing de las sangs rgyas kyi chos rnams rnam par skye'o zhes ji skad du bstan pa dang /dkon mchog za ma tog gi mdo las kyang / /so so'i skye bo la yang byang chub sems dpa' zhes bya bar shes te/ ji skad du 'jam dpal 'di lta ste dper na ka la bing+ka'i phru gu sgo nga'i sbubs kyi nang na 'dug pa sgo nga ma brtol zhing sbubs nas ma byung yang ka la bing ka'i sgra nyid du 'byin to//'jam dpal de bzhin du byang chub sems dpa' ma rig pa'i sgo nga'i sbubs kyi nang na 'dug pa bdag tu lta ba ma brtol zhing khams gsum las ma byung yang sangs rgyas kyi sgra 'di lta ste/ stong pa nyid dang mtshan ma med pa dang smon pa med pa'i sgra 'byin to zhes gsungs so//chos thams cad 'byung ba med par bstan pa las kyang / byang chub sems dpa' rgyal ba'i blo gros la sas bar mthongs phye nas de 'chi ba'i dus byas pa dang sems can dmyal ba chen por ltung ste/ de ni stong pa nyid la ma dad cing stong pa nyid du smra ba la khong khro ba byas pa yin no zhes gsungs so//nges pa dang ma nges pa la 'jug pa'i phyag rgya'i mdo las kyang / /phyugs kyi shing rta lta bus 'gro ba'i byang chub sems dpa' gang zhe na/ 'di lta ste dper na skyes bu la la zhig sangs rgyas kyi zhing lnga'i rdul phra rab kyi rdul snyed kyi 'jig rten gyi khams 'da' bar 'dod nas/des phyugs kyi shing rta la zhon te lam du zhugs nas/ de yun ring pos lam ring por dpag tshad brgyar phyin pa las/ de der rlung gi dkyil 'khor chen pos bzlog nas dpag tshad khrir ded de phyir phul na skyes bu des phyugs kyi shing rtas 'jig rten gyi khams de dag 'da' ba'am bskal pa las brjod du med pa'i yang brjod du med pa'i bskal par yang 'jig rten kyi khams gcig kyang 'da' bar nus sam gsol pa/bcom ldan 'das de ni ma lags so/ / bcom ldan 'das kyis bka' stsal pa/ de bzhin du gang la la zhig gis byang chub tu sems bskyed la theg pa chen po mi 'dzin mi klog par/ nyan thos kyi theg pa pa rnams la brten cing de dag dang lhan cig tu sten par byed nyan thos kyi theg pa klog cing kha ton byed dpyod cing khong du chud par byed la/gzhan dag kyang klog tu 'jug pa nas/ khong du chud par byed pa'i bar du byed pa ni / de ni des shes rab rtul por 'gyur te/ bla na med pa'i ye shes kyi lam nas slar drangs nas phyir ldog go/ /byang chub sems dpa' 'di'i byang chub kyi sems bsgoms pa las byung ba'i shes rab kyi dbang po dang /shes rab kyi mig gang yin pa de yang rtul por 'gyur zhing nyams par byed de 'di ni phyugs kyi shing rta lta bus 'gro ba'i byang chub sems dpa'o zhes bshad do/ /de bas na de ltar de dag gi stong pa nyid la mos pa dang theg pa chen po la mngon par dga' ba ni/mos pas spyod pa yongs su ma rdzogs pa la yang sbyar bar snang na/ mos pa rab la spyod pa'i byang chub sems dpa' la lta ci zhig smos/ de ni dkon mchog sprin las byis pa'i spyod pa dang log par 'jug pa thams cad las 'das par brjod cing /ting nge 'dzin dang gzungs dang rnam par thar pa dang mngon par shes pa dang rig pa grangs med pas rnam par rol pa/ chos mtha' yas pa la dga' zhing mos pas zang zing med pa phyi ma'i mtha'i bskal pa'i mur thug par rnam par mi rtog cing lhun gyis grub pa'i dga' ba'i shugs kyis snang ba thob pa bskal pa bye ba khrag khrig brgya stong du ma dpag tu med par theg pa chen po la zhugs pa'i bsgom pa sna tshogs yongs su rdzogs pa gzhan gyi don gyi nan tan tshar phyin pa/bsod nams dang ye shes kyi tshogs mngon par bsgrub pa grub pa'i sngon gyi sbyor ba brgya stong phun sum tshogs par brjod do//ci ste 'di drang ba'i don yin na/ ci'i phyir byang chub tu sems bskyed pa gzhan sa 'di la mi 'dod/ 'dir 'dod pa tsam gyis drang ba'i don du byed pa'i bye brag gi rtags kyang mi rnyed do/ /mos pas spyod pa chen po'i chos nyid du gsungs pa las kyang /mos pas spyod pa 'bring dang chung ngu'i rnam pa yang ci nas yod pa nyid du rtogs so/ /yang de bzhin gshegs pa'i gsang ba'i mdo las/ ji skad du bcom ldan 'das byang chub tu sems bskyed pa su'i lags/ rgyal po chen po gang gis lhag pa'i bsam pa ma 'khrugs pa'o//gsol pa bcom ldan 'das su'i lhag pa'i bsam pa ma 'khrugs bka' stsal pa/ rgyal po chen po gang gi snying rje chen po skye ba'o/ /gsol pa bcom ldan 'das su'i snying rje chen po skye/ bcom ldan 'das kyis bka' stsal pa/rgyal po chen po gang gi sems can thams cad la yongs su mi gtong ba'i sems skye ba'o/ /gsol pa bcom ldan 'das ji ltar sems can thams cad yongs su ma btang ba lags/ bka' stsal pa rgyal po chen po nam bdag bde ba btang ba yin no zhes gsungs pa'i dgongs pa ci zhig yin zhe na/byang chub kyi sems tsam gyis chog par 'dzin pa rnams snying rje la dga' ba skyed pa'i phyir 'di gsungs te/ dper na gang la rnal 'byor med pa de dag ni de bzhin gshegs pa'i bstan pa la rab tu byung ba ma yin no zhes gsungs pa lta bu'o//de bzhin du 'dir yang byang chub kyi sems gzhan smad par rig par bya'i/ byang chub kyi sems rnam pa gzhan du mi skye ba ni ma yin no/ /ji skad du chos bcu pa'i mdo las/ rigs kyi bu 'di la byang chub sems dpa' rigs la gnas pa byang chub tu sems ma bskyed na/de bzhin gshegs pa'am de bzhin gshegs pa'i nyan thos kyis bskul zhing skyo bar byas/ yang dag par 'dzin du bcug ste bla na med pa yang dag par rdzogs pa'i byang chub tu sems bskyed pa 'di ni byang chub kyi sems la mos pa'i rgyu dang po'o/ / rdzogs pa'i byang chub bam byang chub kyi sems kyi bsngags pa brjod pa thos nas/ bla na med pa yang dag par rdzogs pa'i byang chub tu sems bskyed pa 'di ni rgyu gnyis pa'o/ /sems can mgon med pa dang skyabs med pa dang dpung gnyen med pa rnams mthong nas snying rje'i sems nye bar gzhag ste bla na med pa yang dag par rdzogs pa'i byang chub tu sems bskyed pa 'di ni rgyu gsum pa'o//des de bzhin gshegs pa'i rnam pa thams cad kyi mchog yongs su rdzogs pa mthong nas dga' ba bskyed de bla na med pa yang dag par rdzogs pa'i byang chub tu sems bskyed pa 'di ni rgyu bzhi pa'o zhes gsungs pa bzhin no//byang chub kyi sems de ni rnam pa gnyis te/ byang chub tu smon pa'i sems dang byang chub tu chas pa'i sems so/ /ji skad du sdong po bkod pa'i mdo las/ rigs kyi bu sems can gang dag bla na med pa yang dag par rdzogs pa'i byang chub tu smon pa de dag ni sems can gyi khams na dkon no//de bas kyang gang dag bla na med pa yang dag par rdzogs pa'i byang chub tu chas pa'i sems can de dag ni shin tu dkon no zhes gsungs pa lta bu'o/ /de la byang chub tu smon pa'i sems ni ngas sangs rgyas su 'gyur bar bya'o zhes sems smon pa las skyes pa yin te/'phags pa dpa' bar 'gro ba'i mdo las/ g.yo byas te byang chub kyi sems bskyed pas kyang sangs rgyas kyi rgyur gsungs na dge ba sna 'ga' byas te sems bskyed pa lta ci smos zhes gsungs so//ji skad du bskal pa bzang po'i mdo las/ de bzhin gshegs pa dbyangs byin zhes bya ba la de bzhin gshegs pa skar ma'i rgyal po zhes bya ba ba lang rdzir gyur pas ba gu la'i me tog phul nas dang po byang chub tu sems bskyed do/ /de bzhin du de bzhin gshegs pa klog gi sgron ma zhes bya ba la de bzhin gshegs pa grags pa thag par gyur pas ras kyi kha tshar phul te/dang po byang chub tu sems bskyed do/ /de bzhin du de bzhin gshegs pa 'od mtha' yas zhes bya ba la de bzhin gshegs pa 'od 'phro can grong khyer kyi sprang por gyur pas rtsa'i sgron ma phul te dang po byang chub tu sems bskyed do//de bzhin gshegs pa rnam par gnon brten zhes bya ba la de bzhin gshegs pa thub dka' shing thun du gyur pas so shing phul te dang po byang chub tu sems bskyed do/ /de bzhin gshegs pa 'jam dpal grags zhes bya ba la de bzhin gshegs pa yon tan rgyal mtshan sman pa'i rgyal por gyur pas skyu rur cig phul nas dang po byang chub tu sems bskyed do zhes bya ba la sogs pa gsungs pa bzhin no//des kyang 'khor ba'i bde ba mtha' yas pa bskyed pa'i phyir byang chub kyi sems spyod pa dang bral ba la yang brnyas par mi bya ste/ji skad du 'phags pa byams pa'i rnam par thar pa las/ rigs kyi bu 'di lta ste dper na rdo rje rin po che ni chag kyang / gser gyi rgyan khyad par du 'phags pa thams cad zil gyis gnon cing rdo rje rin po che'i ming yang mi 'dor la dbul ba thams cad kyang rnam par zlog go//rigs kyi bu de bzhin du thams cad mkhyen par sems bskyed pa'i rdo rje rin po che nan tan dang bral yang nyan thos dang rang sangs rgyas kyi yon tan gyi gser gyi rgyan thams cad zil gyis gnon cing byang chub sems dpa'i ming yang mi 'dor la 'khor ba'i dbul ba thams cad kyang rnam par zlog go zhes gsungs pa lta bu'o//'di las kyang spyod pa dang mi ldan yang byang chub kyi sems ni phan par 'gyur bar shes par bya ste/ gang gi phyir rgyal po la gdams pa'i mdo las/ rgyal po chen po 'di ltar khyod bya ba mang byed pa mang ste/nyin mtshan du thams cad du thams cad rnam pa thams cad du thams cad sbyin pa'i pha rol tu phyin pa la yang bslab pa nas shes rab kyi pha rol tu phyin pa'i bar la bslab par mi nus te/ de bas na rgyal po chen po khyod yang dag par rdzogs pa'i byang chub la 'dun pa dang dad pa dang don du gnyer ba dang smon pa/'gro yang rung 'greng yang rung 'dug kyang rung nyal yang rung sad kyang rung za yang rung 'thung yang rung rtag par rgyun du dran par gyis la yid la zung ste sgoms shig /sangs rgyas dang byang chub sems dpa' dang /'phags pa nyan thos dang rang sangs rgyas dang so so'i skye bo thams cad dang bdag gi 'das pa dang ma 'ongs pa dang da ltar byung ba'i dge ba'i rtsa ba thams cad bsdus shing gzhal te rtsis la rjes su yi rang bar gyis shig /rjes su yi rang ba'i mchog nas/ nam mkha' dang 'dra ba dang /mya ngan las 'das pa dang / mtshungs pa'i bar gyis rjes su yi rang bar gyis shig /rjes su yi rang nas sangs rgyas dang byang chub sems dpa' dang 'phags pa nyan thos dang rang sangs rgyas thams cad la mchod pa bya bar phul cig /phul nas sems can thams cad dang thun mong du gyis shig /de nas sems can thams cad thams cad mkhyen pa'i bar du thob par 'gyur ba dang sangs rgyas kyi chos thams cad yongs su rdzogs par 'gyur bar nyin gcig bzhin du dus gsum du bla na med pa yang dag par rdzogs pa'i byang chub tu sngos shig / rgyal po chen po khyod de ltar zhugs na rgyal srid kyang byed la rgyal po'i bya ba yang nyams par mi 'gyur zhing / byang chub kyi tshogs kyang yongs su rdzogs par 'gyur ro zhes gsungs so/ /mdo sde de nyid las de'i rnam par smin pa yang gsungs pa ni/ rgyal po chen po khyod yang dag par rdzogs pa'i byang chub kyi sems kyi dge ba'i rtsa ba'i las kyi rnam par smin pas/lan du mar lha'i nang du skyes lan du mar mi'i nang du skyes te/ lha dang mir skyes pa na thams cad du yang dbang po byed par gyur kyang / da dung rgyal po chen po khyod kyi yang dag par rdzogs pa'i byang chub kyi sems kyi dge ba'i rtsa ba'i las la bri ba'am/gang bar mi mngon no/ /de bzhin du sbyar te 'on kyang rgyal po chen po bla na med pa yang dag par rdzogs pa'i byang chub kyi sems gcig gis kyang / sems can thams cad bsgral bar dmigs pa dang / sems can thams cad dgrol bar dmigs pa dang /sems can thams cad dbugs dbyung bar dmigs pa dang / sems can thams cad yongs su mya ngan las bzla bar dmigs pa'i phyir/ dge ba'i rtsa ba grangs med dpag tu med pa sogs par 'gyur na/ gang de ltar mang du byed pa lta ci smos zhes bya ba yin no//byang chub kyi sems de yang gzugs kyi sku mthong ba las skyes par de las sngon gyi rtogs pa brjod pa las 'byung ste / de lta na re zhig smon pa byang chub kyi sems su rig par bya'o/ /ca sar ma chud pa la yang byang chub sems dpa'i sdom pa'i dbang du bya ba yod dam med ces bya ba 'di brjod par bya'o zhe na yod par rig par bya ste/nam mkha'i snying po'i mdo las/ rnyed pa dang bkur sti'i rgyu las rtsa ba'i ltung bar gsungs pa'i phyir / sa bcu pa'i mdo las ni sa dang po la/ bdag gis sems can 'di dag la yo byad mang po thams cad nye bar sbyin no snyam pa ma gtogs par su las kyang bkur sti ci yang mi 'dod do zhes bstan to//de bzhin du byang chub sems dpa'i sa rab tu dga' ba la mi g.yo ba'i tshul gyis legs par gnas pa yin no zhes gsungs pa dang / yang de bzhin gshegs pa'i rigs su nges shing rdzogs pa'i byang chub la shin du gzhol ba yin no zhes kyang gsungs so//nam mkha'i snying po'i mdo las kyang / nyan thos kyi theg pa yang de la med na theg pa chen po lta ga la yod ces gsungs la/ de bzhin du/ 'phags pa drag shul can gyis zhus par/ser snas yongs su dkris pa la yang bslab pa'i gnas bcas pa dang rab tu dga' ba'i sa la bdag tu 'du shes pa dang bral bas bdag la chags pa'ang med na/ yo byad thams cad la chags pa lta ga la yod ces gsungs so/ /de bzhin du mgo la sogs pa sbyin pa yang gsungs te/de lta bu la sogs pa mdo sde dag tu sar ma chud pa la bslab pa bcas par snang ngo / /gang du byang chub sems dpa'i dbang du byas nas phyir bstan pa der yang goms par byar mi rung ba'am/ dgag pa'i ngag gis byang chub sems dpa' las dang po pas bslab par mi bya bar 'gyur te/de gnyis med na ni thams cad la bslab par bya'o/ /de la yang bslab pa gcig sgrub pa na bslab pa gzhan bsrung ma nus kyang ltung bar mi 'gyur te/ de skad du 'phags pa blo gros mi zad pas bstan pa'i mdo las/sbyin pa'i dus na tshul khrims la brtul ba btang snyoms la sogs pa rgya cher gsungs pa yin no/ /'di la lhod par yang mi bya ste/ lhag ma gzhan la mi sgrub pa yang ma yin gyi/ ci nus ci 'os su de bzhin nyid du sgrub po zhes sa bcu pa'i mdo las gsungs pa'i phyir ro//sdom pa 'di ni bud med nyon mongs pa chung ngu sems byang chub tu mos pa la'ang 'grub ste/ gang gi phyir byang chub sems dpa'i so sor thar pa las/ shA ri'i bu chos bzhi dang ldan na byang chub sems dpa'i bden par smra ba yin no zhes bya ba nas brtsams te/ shA ri'i bu 'di la rigs kyi bu'am rigs kyi bu mo bla na med pa yang dag par rdzogs pa'i byang chub tu sems bskyed nas/dge ba'i chos yongs su btsal ba'i don du brtson 'grus brtsams te gnas pa dang zhes gsungs pa yin no/ /'di las brtsams te lung nod pa thams cad dang /sdom pa bzung ba yang byang chub sems dpa'i bslab pa'i gnas la goms pa lhur byed pa sdom pa dang ldan pa las bya ste / de ltar byas na de bslab pa las 'das na rab tu ngo mtshar bar 'gyur zhes bla ma la bslus par dogs pa'i 'jigs pa skye ba'am de la nan tan bya mi dgos par dga' ba dang gus pas grub par 'gyur ro//de bas na byang chub sems dpa' rnams de bzhin gshegs pa'i spyan sngar bslab pa 'di'i nang nas/ bslab pa gang yang rung ba grub par 'dod pas yang dag par len par byed do/ /de ltar na 'di ni sdom pa'i spyi'i chos yin no//yang na de lta bu'i dge ba'i bshes gnyen med na phyogs bcu na bzhugs pa'i sangs rgyas dang byang chub sems dpa' rnams mngon du bsgoms nas/ sdom pa dang bdag gi stobs dang yang sbyar nas blang ste/ de ltar ma yin na sangs rgyas dang byang chub sems dpa' thams cad dang lhar bcas pa'i 'jig rten bslus par 'gyur ro//gang gi phyir dam pa'i chos dran pa nye bar gzhag pa'i mdo las/ chung zad cig bsams nas mi sbyin pa ni yi dags su skye la/ dam bcas nas mi sbyin pa ni sems can dmyal bar 'gro'o zhes gsungs na/'gro ba ma lus pa'i bla na med pa'i don dam bcas nas sgrub par mi byed pa lta ci smos/ de bas na chos yang dag par sdud pa'i mdo las kyang / rigs kyi bu byang chub sems dpa' bden pa lhur byed par 'gyur bar bya ste/ rigs kyi bu bden pa yang dag par brjod pa ni chos yang dag par brjod pa'o//rigs kyi bu de la bden pa gang zhe na/ gang byang chub sems dpa' bla na med pa yang dag par rdzogs pa'i byang chub tu sems bskyed nas sems de srog gi phyir yang mi gtong zhing / sems can rnams la yang log par mi byed pa 'di ni byang chub sems dpa'i bden pa'o//gang byang chub sems dpa' bla na med pa yang dag par rdzogs pa'i byang chub tu sems bskyed la sems de phyis yongs su gtong zhing / sems can rnams la'ang log par byed pa 'di ni byang chub sems dpa'i brdzun du smra ba tha ma yin no zhes gsungs so//'phags pa blo gros rgya mtsho'i mdo las kyang / blo gros rgya mtsho 'di lta ste dper na rgyal po'am rgyal po'i blon pos chen pos grong khyer gyi skye bo thams cad sang zan sbyin no zhes mgron du bos nas yal bar dor te/ bza' ba dang btung ba mi sbyar nas des skye ba'i tshogs de dag thams cad bslus pa yin te/de dag kyang bza' ba dang btung ba ma thob pas 'phya zhing slar 'dong ba de bzhin du blo gros rgya mtsho byang chub sems dpa' ma rgal ba bsgral ba dang / ma grol ba dgrol ba dang dbugs ma phyin pa dbugs dbyung ba dang yongs su mya ngan las ma 'das pa yongs su mya ngan las bzla ba'i phyir sems can thams cad la dbugs phyung la/mang du thos pa dang de las gzhan pa dge ba byang chub kyi phyogs kyi chos rnams la yang brtson par mi byed na/ byang chub sems dpa' de ni ji skad smras pa de bzhin du byed pa ma yin te/lha dang bcas pa'i 'jig rten la slu ba yin no/ /de lta bu sngon sangs rgyas mthong ba'i lha rnams kyis mthong na 'phya zhing gzhogs 'phyas byed la rnam par smod de/ gang dag mchod sbyin bya bar dam bcas pa nyams 'og tu chud par byed pa'i mchod sbyin gyi bdag po de dag ni dkon no//blo gros rgya mtsho de lta bas na tshig gang gis lha dang mi dang lha ma yin du bcas pa'i 'jig rten slu bar 'gyur ba'i tshig de lta bu byang chub sems dpas smra bar mi bya'o/ /blo gros rgya mtsho gzhan yang gang la la zhig gis/ byang chub sems dpa' gang la chos kyi don bya bar gsol ba btab pa de la byang chub sems dpa' kho bos khyod kyis chos kyi don 'di yongs su thob par bya'o//zhes tshig smras par gyur na/ byang chub sems dpas de la lus ni yongs su gtang bar bya'i sems can slu bar ni mi bya'o zhes gsungs so //de bas na rang gi mthu dang sbyar te dge ba'i rtsa ba gcig tsam yang yang dag par blangs la bsrung bar bya ste/ 'phags pa sa'i snying po'i mdo las ji skad du/ dge ba'i lam bcu po 'di dag gis sangs rgyas su 'gyur gyi gang gis ji srid 'tsho'i bar du tha na dge ba'i las kyi lam gcig tsam yang mi srung la/'on kyang tshig 'di skad du nga ni theg pa chen po pa ste nga bla na med pa yang dag par rdzogs pa'i byang chub tshol lo zhes zer na/ gang zag de ni shin tu tshul 'chos pa brdzun chen po smra ba/ sangs rgyas bcom ldan 'das thams cad kyi spyan sngar 'jig rten la slu bar byed pa chad par smra ba ste/de rmongs bzhin du 'chi ba'i dus byed cing log par ltung bar 'gro'o zhes gsungs pa bzhin no/ /dus ji srid du nus pa de srid du yang dge ba yang dag par blangs te gnas par bya ste/ 'di ni sman gyi bla bai DUr+ya 'od kyi rgyal po'i mdo las blta bar bya'o//sems can chen po gang de lta bu thos nas kyang / byang chub sems dpa'i spyod pa dka' ba shes rab kyis rtogs par byas nas/ skye bo ma lus pa sdug bsngal las bskyab par khur khyer bar spro ba des ni phyag bya ba dang mchod pa dang / sdig pa bshags pa dang / bsod nams la rjes su yi rang ba dang /sangs rgyas la bskul ba dang / gsol ba gdab pa dang / byang chub tu bsngo ba byas la/ dge ba'i bshes gnyen la gsol ba gdab ste/ de'i tshig gi rjes su brjod pa'am/ yang na bdag nyid kyis brjod pas/ slob dpon dgongs su gsol/ bdag ming 'di zhes bgyi ba zhes smos la/ ji ltar 'jam dpal gyi sangs rgyas kyi zhing gi yon tan bkod pa'i mdo las/ bcom ldan 'das 'phags pa 'jam dpal gyis sngon gyi tshe'i rtogs pa brjod pa las spyod pa dang ldan par byang chub tu sems bskyed pa de bzhin du sems bskyed par bya'o//des 'di skad ces/ /'khor ba thog ma med pa yi/ /sngon gyi tha ma ji srid pa/ /de srid sems can phan don du/ /spyod pa dpag yas spyad par bgyi/ /'jig rten mgon po'i spyan snga 'dir/ /byang chub mchog tu sems bskyed de/ /'gro ba thams cad mgron gnyer nas//de dag dbul zhing phongs las dgrol/ /de ring phan chad gal te yang / /bdag gis 'dod chags sems bskyed nas / /phyogs bcu dag na gang bzhugs pa'i/ /sangs rgyas thams cad bslus par 'gyur/ /byang chub nam zhig thob bar du/ / tha ba'i sems dang gnod sems dang / /phrag dog dang ni ser sna yang / /de ring phan chad mi bya'o/ /tshangs pa'i spyod pa bdag gis spyad/ /sdig pa'i 'dod pa yongs su gtang / /tshul khrims sdom dang nges pa la/ /sangs rgyas rjes su bslab par bya/ /bdag 'dir byang chub rings tshul du//'tshang rgyar mos shing spro ba med/ /phyi mthar thug gi bar du yang / /sems can gcig phyir spyad par bgyi/ /tshad med bsam gyis mi khyab pa'i/ /sangs rgyas zhing ni sbyang bar bgyi/ /phyogs rnams bcu po thams cad du/ /bdag gi ming ni grags par bgyi//lus dang ngag gi las rnams kyang / /rnam pa kun du bdag gis sbyang / /yid kyi las kyang sbyang bar bgyi/ /mi dge'i las ni spyad mi bgyi/ /zhes brjod do/ /'di la dus thams cad du sdom pa bzung ba las tshe rabs gzhan du ltung ba 'byung ba'i dogs par yang mi bya ste/mdo 'di nyid las mi 'khrugs pa'i smon lam snang ba'i phyir ro/ /de las 'di skad du/ ji ltar de bzhin gshegs pa mi 'khrugs pa de sngon byang chub sems dpar gyur pa na tshig 'di skad du/ gal te bdag tshe rabs thams cad du rab tu ma byung na bdag gis sangs rgyas thams cad bslus par 'gyur ro zhes brjod de/shA ri'i bu byang chub sems dpa' mi 'khrugs pa'i rjes su bslab par bya'o/ /shA ri'i bu de ltar bslabs na byang chub sems dpa' sems dpa' chen po tshe rabs thams cad du rab tu 'byung ste/ de bzhin gshegs pa byung yang rung ma byung yang rung /gdon mi za bar khyim gyi gnas nas 'byung ngo / /de ci'i phyir zhe na/ shA ri'i bu 'di ltar khyim gyi gnas nas mngon par 'byung ba 'di ni byang chub sems dpa' rnams kyi rnyed pa'i mchog go/ /de bzhin du sbyar te/ chung ma dang bu dang bu mo la de chags par mi 'gyur ro zhes gsungs so//ji ltar tshe rabs gzhan du nyes pa 'dir mi 'gyur ba de ltar ni 'di nyid du 'chad par 'gyur bas des na re zhig gzhag go/ /de ltar sdom pa yang dag par bzung ba la ltung ba'i mtshan nyid gang gis brjod pa'i dngos po bdag nyid kyis brtags te spong ba dang /ltung ba'i gzugs brnyan dang ltung ba ma yin pa'i gzugs brnyan la rmongs par mi 'gyur bar ltung ba spyi'i mtshan nyid brjod do/ /byang chub sems dpa' sems can thams cad kyi da ltar dang ma 'ongs pa'i sdug bsngal dang yid mi bde ba thams cad zhi bar bya ba dang /da ltar dang ma 'ongs pa'i bde ba dang yid bde ba thams cad bskyed pa'i phyir/ g.yo med par lus dang ngag dang yid brtson pas nan tan mi byed pa dang / de'i rkyen tshogs pa mi tshol ba dang / de'i bar du gcod pa'i gnyen po la mi 'bad pa dang / sdug bsngal ba dang yid mi bde ba chung ngus sdug bsngal dang yid mi bde ba chen po'i gnyen por 'gyur ba mi skyed pa dang /don chen po sgrub pa'i phyir don chung ngu nyams par mi byed pas/ skad cig gcig tsam yang yal bar bor na ltung ba dang bcas pa yin no/ /mdor na rang gi nus pa'i yul ma yin pa'i bya ba rnams la ltung ba med de/don dam pa nyid kyis de la bslab pa bcas pa med pa'i phyir ro/ /gzhan la ni rang bzhin gyis kha na ma tho ba dang bcas pa nyid du gzung ba kho na'o/ /rang gi nus pa'i spyod yul ma yin pa gang zhig la brtson par byed na ltung bar 'gyur te/de ni bsam mi dgos par spyir sdig pa bshags pa'i nang du 'dus pas de las grol bar 'gyur ro/ /de dag ni mdor na/ byang chub sems dpa'i bslab pa'i khog pa yin te/ rgyas par ni bskal pa dpag tu med pa mtha' yas par bshad du yod do/ /yang mdor na byang chub sems dpa'i ltung ba rnam pa gnyis te/ci nus par rigs pa dang ma rigs pa ma brtags par rtsom pa'am rtog pa'am btang snyoms su 'jog pa ni ltung ba dang bcas pa yin no/ /brtags te gar 'os pa las 'da' bar byed na/ tha na gdol pa'i bran gyis dpyas na yang ltung ba dang bcas pa yin no//'di gang las shes she na/ lhag pa'i bsam pa bskul ba'i mdo las gsungs pa las shes te/ byams pa rgyu bzhis sangs rgyas thams cad kyis gsungs pa'i spobs par rig par bya'o/ /bzhi gang zhe na/ byams pa 'di la spobs pa don dang ldan pa yin te don med pa dang ldan pa ma yin pa dang /chos dang ldan pa yin te chos ma yin pa dang ldan pa ma yin pa dang / nyon mongs pa 'bri bar byed pa yin te nyon mongs pa 'phel bar byed pa ma yin pa dang / mya ngan las 'das pa'i yon tan dang phan yon ston pa yin te 'khor ba'i yon tan dang phan yon ston pa ma yin pa ste 'di bzhis so//de bzhin du sbyar te byams pa gang la la rgyu 'di bzhis spobs sam/ spobs par 'gyur ba de la rigs kyi bu'am rigs kyi bu mo dad pa dag gis sangs rgyas su 'du shes bskyed par bya'o/ /ston par 'du shes byas te dam pa'i chos mnyan par bya'o//de ci'i phyir zhe na/ byams pa gang cung zad legs par smras pa de thams cad ni sangs rgyas kyis gsungs pa yin no/ /byams pa de la su spobs pa 'di dag la sangs rgyas kyis bshad pa ma yin no zhes spong ba dang gang zag de la zhe sdang ba'i phyir /de dag la ri mo mi byed na/ des sangs rgyas kyis bshad pa'i spobs pa thams cad spangs par 'gyur ro/ /chos spangs pas chos kyis phongs par 'gyur ba dang mthun pa'i las kyis ngan song du 'gro bar 'gyur ro zhes gsungs so/ /yang gang zhig goms pa'i don du 'di shes par 'dod pa des bslab pa kun las btus pa 'di la spyod pa'i sgo tsam bslab pa'i phyir brtson par byas te/bslab pa la brtson pa 'bras bu shin tu che ba'i phyir ro/ /rab tu zhi ba'i rnam par nges pa'i cho 'phrul gyi mdo las/ 'jam dpal gang gis /gang gA'i klung gi bye ma snyed kyi sangs rgyas rnams las/ sangs rgyas re re la yang gang gA'i klung gi bye ma snyed kyi sangs rgyas kyi zhing nor bu rin po che dbang gi rgyal pos rab tu bkang ste dbul ba phul la de ltar 'bul bas gang gA'i klung gi bye ma snyed kyi bskal par dbul ba phul ba bas/'jam dpal byang chub sems dpa' gzhan gang gis rnam pa 'di lta bu'i chos 'di thos nas phyogs gcig tu song ste 'di ltar sems kyis mngon par rtog cing / 'di lta bu'i chos la bslab par bya'o zhes slob par 'dod na/ des ma bslabs su zin kyang bsod nams ches mang du bskyed de/byang chub sems dpa' nor bu rin po che dbang gi rgyal po sbyin pa'i bsod nams ni de lta bu ma yin no zhes ji skad du gsungs pa bzhin no/ /de bas na de lta bu'i phan yon mthong ba'i byang chub sems dpas ci nas kyang phyir mi ldog par bya ste/ de nyid las 'jam dpal 'di lta ste dper na/stong gsum gyi stong chen po'i 'jig rten gyi khams kyi rdul phra rab kyi rdul snyed kyi sems can de dag las/ sems can re re nas 'dzam bu'i gling la dbang ba'i rgyal por 'gyur te/ de dag thams cad kyis tshig 'di skad ces/ bdag cag gis gang theg pa chen po len pa dang /'dzin pa dang / klog pa dang / kun chub par byed pa de'i sha las nyi ma re re zhing yang srang lnga lnga sen mos gcad par bya ste/ de tshul de lta bus srog dang dbral lo zhes smra ba la/ 'jam dpal gal te byang chub sems dpa' de de skad smra bas mi skrag mi dngang dngang bar mi 'gyur te/tha na skrag pa'i sems gcig kyang mi skyed zhum pa med gang ba med the tshom med la phyir zhing chos yongs su gzung ba la brtson te/ klog pa dang kha ton byed pa la brtson par 'gyur ba'i byang chub sems dpa' de ni/ 'jam dpal byang chub sems dpa' sbyin pa la dpa' ba/tshul khrims la dpa' ba/ bzod pa la dpa' ba/ brtson 'grus la dpa' ba/ bsam gtan la dpa' ba/ shes rab la dpa' ba/ ting nge 'dzin la dpa' ba zhes bya'o/ /'jam dpal gal te byang chub sems dpa' de gsod pa'i mi de dag la mi khro zhing tha ba dang zhe sdang gi sems mi skyed na/'jam dpal byang chub sems dpa' de ni tshangs pa dang mtshungs pa/ dbang po dang mtshungs pa mi g.yo ba yin no zhes ji skad gsungs pa bzhin no/ /'di las kyang da ltar gyi dus na bslab pa la gus par byed pa 'bras bu rnam par smin pa che ba yin te/zla ba sgron ma'i mdo las / /bskal pa bye ba gang gA'i bye snyed du/ /sangs rgyas dag ni bye ba khrag khrig la/ /gdugs dang ba dan mar me'i phreng ba dang / /zas dang skom gyis dad sems mchod byas pas / /gang gis dam pa'i chos 'di 'jig pa'i tshe//bde bar gshegs pa'i bstan pa 'gag pa na/ /nyin zhag dus ni bslab pa gcig bzung ba/ /de bas bsod nams 'di ni khyad par 'phags/ /zhes gsungs te/ de bas na bslab pa la gus par bya'o / /bcom ldan 'das kyis mdo dag las byang chub sems dpa' bslab pa'i gzhi rnams gsungs te/'phags pa dkon mchog sprin las/ rigs kyi bu ji ltar na byang chub sems dpa' rnams byang chub sems dpa'i bslab pa'i sdom pas bsdams pa yin zhe na/ 'di la byang chub sems dpa' 'di ltar dpyod de so sor thar pa'i sdom pa tsam gyis bdag bla na med pa yang dag par rdzogs pa'i byang chub mngon par rdzogs par 'tshang rgya bar mi nus kyang /de bzhin gshegs pas gang 'di mdo sde do dang de dag las byang chub sems dpa'i spyod pa dang byang chub sems dpa'i bslab pa'i gnas bcas pa gang yin pa de dag la bdag gis bslab par bya'o zhes bya ba la sogs pa rgya cher ji skad gsungs pa lta bu'o//de ltar rgya cher gsungs pas/ bdag lta bu blo zhan pas byang chub sems dpa'i sdom pa shes par dka' bas na / de la ji ltar byang chub rigs she na/ /gang gis ltung bar mi 'gyur ba/ /gnad kyi gnas rnams 'dir rig bya/ /gnad kyi gnas de dag kyang gang zhe na/ 'di lta ste/ /bdag gi lus dang longs spyod dang / /dge ba dus gsum skyes pa rnams/ /sems can kun la btang ba dang //de bsrung dag pa spel ba'o/ /'di ni byang chub sems dpa'i sdom pa bsdus pa yin te/ 'di la byang chub sems dpa' rnams bsgom pa glod na yang ltung bar 'gyur ba ni/ byang chub sems dpa'i so sor thar pa'i mdo las gsungs pa bzhin te/ byang chub sems dpa' sems can thams cad kyi phyir/sdug bsngal zad par 'gyur ba'i lam gang bzung ba de/ byang chub sems dpa' 'dzin cing gnas pas bskal pa bye ba 'das nas/ tha na 'dug pa tsam gyis bde ba 'dod pa'i sems cig skyes na yang / de la yang byang chub sems dpas 'di ltar sems bskyed par bya ste/bdag 'di ltar 'dug pa ni sems can thams cad la gnong skur ro zhes so/ /'dul ba yongs su dag pa'i mdo las kyang / 'jam dpal gyis smras pa/ lha'i bu mtshams med pa gang dag dang ldan na / byang chub sems dpa' myur du bla na med pa yang dag par rdzogs pa'i byang chub mngon par rdzogs par 'tshang rgya ba'i mtshams med pa ni 'di lta ste/lnga gang zhe na/ lha'i bu nam byang chub sems dpa' lhag pa'i bsam pas bla na med pa yang dag par rdzogs pa'i byang chub tu sems bskyed nas bar ma dor nyan thos dang rang sangs rgyas kyi sar sems mi bskyed na lha'i bu 'di ni mtshams med pa dang po'o//bdog pa thams cad yongs su gtang bar sems bskyed la bar ma dor ser sna'i sems dang lhan cig mi gnas pa 'di ni lha'i bu mtshams med pa gnyis pa'o//sems can thams cad bdag gis bskyab par bya'o zhes de ltar sems bskyed la bar ma dor zhum par mi byed pa 'di ni lha'i bu mtshams med pa gsum pa'o/ /chos thams cad ma skyes ma 'gags par khong du chud par bya'o zhes de ltar sems bskyed la bar ma dor lta bar gyur pa'i nang du ma ltung ba 'di ni lha'i bu mtshams med pa bzhi pa'o//skad cig ma gcig dang ldan pa'i shes rab kyis chos thams cad mngon par rdzogs par 'tshang rgya bar bya'o zhes de ltar sems bskyed la thams cad mkhyen pa nyid ma thob par bar ma dor mi 'dug cing rgyun mi gcod pa 'di ni lha'i bu mtshams med pa lnga pa'o zhes bya ba'o //de lta bas na lus dang longs spyod dang bsod nams rgyun mi 'chad par gtang ba dang bsrung ba dang dag pa dang spel ba ci rigs par bsgom par bya'o/ /de la re zhig gtang ba'i phyir yongs su 'dzin pa'i nyes pa bsgom pa'i sgo nas 'dod chags dang bral ba bskyed cing gtong ba'i phan yon yang bsgom mo//zla ba sgron ma'i mdo las ji skad du/ /rul par gyur pa'i lus 'di dang / /srog kyang g.yo ba dbang med cing / /rmi lam sgyu ma 'dra ba la/ /byis pa 'di dag chags pas na/ /shin tu ma rungs las byas te//sdig pa'i dbang du song ba dang / /mi mkhas 'chi bdag bzhon pas song / /de dag mi bzad sems dmyal 'gro/ /zhes gsungs pa bzhin no/ /de skad du sgo mtha' yas pa bsgrub pa'i gzungs las kyang / sems can gang dag kha cig rtsod 'gyur ba //de yi gzhi rtsa yongs su 'dzin pa ste/ /de ltas gang la sred par 'gyur ba spongs/ /sred pa spangs ba byas na gzungs su 'gyur/ /zhes gsungs so/ /byang chub sems dpa'i so sor thar pa las kyang / shA ri'i bu gzhan yang byang chub sems dpa' ni chos thams cad la gzhan gyi 'du shes bskyed de dngos po ci yang mi len to//de ci'i phyir zhe na/ len pa ni 'jigs pa yin no zhes gsungs so/ /drag shul can gyis zhus pa las kyang / gang byin pa de ni yang bsrung bar bya ba ma yin pa'o/ /gang khyim na gzhag pa de ni bsrung bar bya ba'o //gang byin pa de ni srid pa zad par 'gyur ba'o/ /gang khyim na gzhag pa de ni srid pa rnam par 'phel ba'o/ /gang byin pa de ni yongs su mi 'dzin pa'o/ /gang khyim na gzhag pa de ni yongs su 'dzin pa dang bcas pa'o/ /gang byin pa de ni 'jigs pa med pa'o//gang khyim na gzhag pa de ni 'jigs pa dang bcas pa'o/ /gang byin pa de ni byang chub kyi lam nye bar ston pa'o/ /gang khyim na gzhag pa de ni bdud kyi phyogs nye bar ston pa'o/ /gang byin pa de ni zad mi shes pa'o/ /gang khyim na gzhag par gyur pa de ni zad par gyur pa'o //gang byin pa de ni bde ba'o/ /gang khyim na gzhag pa de ni kun bsrung dgos pas sdug bsngal ba'o/ /gang byin pa de ni nyon mongs pa spong bar 'gyur ba'o/ /gang khyim na gzhag pa de ni nyon mongs pa 'phel bar byed pa'o/ /gang byin pa de ni longs spyod chen por 'gyur ba'o//gang khyim na gzhag pa de ni longs spyod chen por mi 'gyur ba'o/ /gang byin pa de ni skyes bu dam pa'i las so/ /gang khyim na gzhag pa de ni skyes bu dam pa'i las so/ /gang byin pa de ni sangs rgyas thams cad kyis bsngags pa'o/ /gang khyim na gzhag pa de ni byis pa'i skye bos bsngags pa'o zhes bya ba nas/gal te des bu la lhag par sdug pa bskyed la de bzhin du sems can gzhan la ma yin na des spyo ba gsum gyis rang gi sems la spyo bar bya ste/ gsum gang zhe na/ byang chub ni sems snyoms pa'i byang chub sems dpa' yin gyi sems mi snyoms pa'i ma yin no//byang chub ni yang dag par sbyor ba'i byang chub sems dpa' yin gyi ldog par sbyor ba ni ma yin no/ /byang chub ni tha dad pa med par spyod pa'i byang chub sems dpa' yin gyi tha dad du spyod pa ni ma yin pa ste spyo ba gsum po 'di dag gis rang gi sems la spyos nas/bu de la mi sdug pa'i 'du shes bskyed par bya'o/ /'di ni mi sdug pa ste/ bdag gi snying du sdug pa yin na/ gang bdag gis de'i don du bu de la ni lhag par sdug pa bskyed la sems can gzhan la ni de lta ma yin pas sangs rgyas kyis bka' stsal pa'i bslab pa dang 'gal bar 'gyur ro//bdag gis de'i phyir dge ba'i rtsa ba la yang gnod pa byas srog la yang bag med de gnod par 'gyur bas 'di ni bdag la gnod par byed pa'o/ /bdag de'i phyir byang chub kyi lam dang mi mthun pa'i lam la spyod pas/ 'di ni bdag la phyir rgol ba'o snyam du 'du shes gsum po de dag bskyed par bya'o//des bu de rgyur byas te/ ji lta ji lta bur bu de la sdug par sems pa dang ldan pa bzhin du sems can thams cad la byams pa bskyed pa dang / bdag phangs par sems pa dang ldan pa bzhin du byams pa bskyed pa/ de lta de lta bur de sems bskyed par bya'o//de yang 'di ltar 'di yang gud nas 'ongs la bdag kyang gud nas 'ongs mod kyi sems can thams cad kyang sngon bdag gi bur gyur la bdag kyang sems can thams cad kyi bur gyur te/ 'di la ni bdag gi'am gzhan gyi'am su'i sems can gang yang med do snyam du tshul bzhin du brtag par bya'o//khyim bdag de ltar byang chub sems dpas dngos po gang la yang bdag gi snyam du yongs su gzung bar mi bya chags par mi bya'o/ /g.yo dang sred pa'i bag la nyal mi bya'o/ /khyim bdag gal te byang chub sems dpa' khyim pa'i drung du slob pa 'ongs la/dngos po zhig bslangs pa las/ gal te des dngos po ma btang na/ des 'di ltar dngos po 'di btang yang rung ma btang yang rung ste/ bdag ni dngos po 'di dang gdon mi za bar 'bral bar yang 'gyur te / mi 'dod bzhin du 'chi bar yang 'gyur zhing dngos po 'dis bdag 'dor/bdag gis kyang dngos po 'di 'dor gyis/ dngos po 'di btang la yid dga' ba dang / snying po blangs te 'chi ba'i dus bya'o/ /'di yongs su btang na bdag 'chi ba'i dus kyi tshe sems kun nas zin te gnas par mi 'gyur te/ 'dis ni bdag 'chi ba'i dus kyi tshe dga' ba dang mchog tu dga' ba dang rangs pa dang 'gyod pa med pa skye bar 'gyur snyam du sems nges par bsam par bya'o//gal te de ltar bsams kyang / dngos po de gtong ma nus na des slong ba la kun go bar bya ba gsum gyis go bar bya ste/bdag ni da dung mthu chung zhing dge ba'i rtsa ba yongs su ma smin te/ theg pa chen po la las dang po ba dang bdag ni ma gtong ba la sems kyi dbang du gyur pa dang bdag nyid ni nye bar len pa'i lta ba dang bcas pa dang bdag tu 'dzin pa dang bdag gir 'dzin pa la gnas pa lags kyi /skyes bu dam pa bzod par mdzad cing yongs su gdung bar mi mdzad du gsol/ ji ltar khyod dang sems can thams cad kyi bsam pa yongs su rdzogs par 'gyur ba de ltar bdag gis bgyi'o/ /de ltar bsgrub po/ /de ltar brtson 'grus brtsam mo zhes khyim bdag de ltar byang chub sems dpa' khyim pas slong ba la kun go bar bya ba gsum gyis go bar bya'o zhes gsungs so//slong ba la kun go bar byed pa 'di yang byang chub sems dpa' de la ma dad pa'am byang chub sems dpa' la slong ba ma dad par gyur pa'i nyes pa gzhan spang ba'i phyir gsungs par zad kyi/ser sna'i kha na ma tho ba med pa ni ma yin te/ bcom ldan 'das kyis byang chub sems dpa' rnams la 'di smod do/ /byang chub sems dpa'i so sor thar pa las ji skad du/ shA ri'i bu chos 'di bzhi ni byang chub sems dpa' rnams la med do / /bzhi gang zhe na/ byang chub sems dpa' rnams la g.yo med do//byang chub sems dpa' rnams la ser sna med do/ /byang chub sems dpa' rnams la phrag dog dang phra ma med do/ /byang chub sems dpa' rnams la bdag bla na med pa yang dag par rdzogs pa'i byang chub tu mngon par rdzogs par 'tshang rgya bar mi nus snyam pa'i zhum pa'i sems med do//shA ri'i bu gang la chos bzhi po 'di dag yod pa de la ni mkhas pa rnams kyis/ kye ma'o 'di ni tshul 'chos pa'o / /kye ma'o 'di ni kha gsag can no/ /kye ma'o 'di ni chos las nyams pa'o/ /kye ma'o 'di ni kun nas nyon mongs pa'i chos can no//kye ma'o 'di ni 'jig rten gyi zang zing lhur byed pa'o / /kye ma'o 'di ni zas dang gos ched cher byed pa'o zhes rig par bya'o/ /shA ri'i bu de bzhin du byang chub sems dpa' rnams ni sems dpa' ba yin te/ lag pa'i bar du yongs su gtong ba yin/ rkang pa yongs su gtong ba dang /sna yongs su gtong ba dang / mgo yongs su gtong ba dang / yan lag dang nying lag yongs su gtong ba dang / bu yongs su gtong ba dang / bu mo yongs su gtong ba dang / chung ma yongs su gtong ba dang / dga' ba yongs su gtong ba dang / nor yongs su gtong ba dang /bde ba yongs su gtong ba dang / khyim yongs su gtong ba dang / gnas yongs su gtong ba dang / yul yongs su gtong ba dang / rin po che yongs su gtong ba dang / bdog pa thams cad yongs su gtong ba yin no zhes gsungs pa bzhin no/ /de skad du sred med kyi bus zhus pa las kyang / dngos po gang la de gtong ba'i sems mi skye ba dang gtong ba'i blo mi 'jug pa'i dngos po de bsrel bar mi bya'o/ /yongs su 'dzin pa gang la spang ba'i sems mi skye ba'i/ yongs su 'dzin pa de yongs su gzung bar mi bya'o/ /gang slong ba de dag gis bslangs na yongs su gtong ba'i blo skye bar 'gyur ba'i g.yog de lta bu bcang bar mi bya'o//rgyal srid de gzung bar mi bya'o/ /longs spyod de dag dang rin po che de dag bcang bar mi bya'o/ /dngos po gang la byang chub sems dpa' yongs su mi gtong ba'i blo skye bar 'gyur ba yin na/ nor gyi dngos po gang yang rung ba'i bar du bcang bar mi bya'o//rigs kyi bu byang chub sems dpa' sems dpa' chen pos 'di ltar sems bskyed par bya ste/ bdag gi lus 'di yang sems can thams cad la byin zhing yongs su btang na/ phyi rol gyi dngos po rnams lta ci smos te/ sems can gang dang gang la ci dang ci dgos par 'gyur ba de dang de dag la de dang de sbyin no//yod de yod na lag pa 'dod pa la lag pa sbyin no/ /rkang pa 'dod pa la rkang pa/ mig 'dod pa la mig sbyin no/ /sha 'dod pa la sha/ /khrag 'dod pa la khrag/ /rkang 'dod pa la rkang / yan lag dang nying lag 'dod pa la yan lag dang nying lag /mgo 'dod pa la mgo yongs su btang ste / phyi rol gyi dngos po dag 'di lta ste/ nor dang 'bru dang gser dang dngul dang rin po che dang rgyan dang rta dang glang po che dang shing rta dang bzhon pa dang grong dang grong khyer dang grong rdal dang ljongs dang rgyal srid dang yul 'khor dang rgyal po'i pho brang 'khor dang yul 'khor dang tshong dus dang bran pho smos dang las byed pa dang zho shas 'tsho ba dang bu dang bu mo dang g.yog rnams lta ci smos te/sems can gang dang gang la gang dang gang gis ci dang ci dgos par 'gyur ba/ sems can de dang de dag la de dang de yod pa sbyin no/ /ci nas sems can 'di dag yongs su bsdus pas/ bdag byang chub thob pa'i chos shes par 'gyur ro snyam nas/ sems can la phan gdags pa dang sems can la snying rje ba dang sems can la snying brtse ba'i phyir/ 'gyod pa med cing mya ngan du mi byed pa dang / rnam par smin pa la re ba med par yongs su gtong ngo / /chags pa med par sbyin no/ /de bzhin du sbyar te/ rigs kyi bu dper na/ rtsi'i sdong po ni rtsa ba nas blangs kyang rung / sdong po las blangs kyang rung / yal ga las blangs kyang rung /shun lpags las blangs kyang rung / lo ma las blangs kyang rung / me tog dang 'bras bu dang snying po las blangs kyang rung ste/ de 'di ltar bdag rtsa ba nas blangs so/ /bdag gi rtsa ba nas blangs so/ /bdag gi snying po'i bar du blangs so snyam du rnam par rtog pa mi 'byung mod kyi/rnam par rtog pa med bzhin du sems can rab 'bring tha ma rnams kyi nad med par byed do/ /rigs kyi bu de bzhin du byang chub sems dpa' sems dpa' chen pos kyang 'byung ba chen po bzhi'i lus 'di la rtsi'i sdong po bzhin du 'du shes bskyed cing sems can gang dang gang dag la ci dang ci dgos pa khyer te/lag pa 'dod na lag pa rkang pa 'dod na rkang pa khyer cig ces snga ma bzhin du gsungs so/ /'phags pa blo gros mi zad pa'i mdo las kyang / lus 'di bdag gis sems can thams cad kyi bya ba ci yod pa de la dengs par bya ste/dper na sa'i khams dang chu'i khams dang me'i khams dang rlung gi khams dang 'byung ba chen po bzhi po 'di dag sgo sna tshogs dang rnam grangs sna tshogs dang dmigs pa sna tshogs dang yo byad sna tshogs dang longs spyod sna tshogs kyis sems can rnams nye bar longs spyod par byed pa de bzhin du/ bdag gis kyang 'byung ba chen po bzhi'i khog pa'i lus 'di sgo sna tshogs dang rnam grangs sna tshogs dang dmigs pa sna tshogs dang yo byad sna tshogs dang longs spyod sna tshogs kyis rgya cher sems can thams cad nye bar 'tsho bar bya'o snyam ste/ de don gyi dbang 'di mthong bas/ lus sdug bsngal bar yang so sor rtog la sems can la blta ba'i phyir lus sdug bsngal bas kyang yongs su mi skye'o zhes bstan to// // bam po gnyis pa/ bdag dang longs spyod dang bsod nams btang ba ni/ 'phags pa rdo rje rgyal mtshan gyi mdo las gsungs so//de ltar byang chub sems dpa' bdag nyid sems can thams cad la gtong ba ni / dge ba'i rtsa ba thams cad kyis phan 'dogs pas sems can thams cad la dge ba'i rtsa ba dag gis sems par byed pa dang / bdag nyid mar me dang 'dra bar sems can thams cad la nye bar gzhag pa dang /bdag nyid bde ba dang 'dra bar sems can thams cad la byin gyis brlabs pa dang / bdag nyid chos kyi skye gnas dang 'dra bar 'gro ba thams cad yang dag par 'dzin pa dang / bdag nyid snang ba dang 'dra bar sems can thams cad kyi rjes su 'gro ba dang / bdag nyid 'gro ba thams cad kyi gzhir 'gro ba dang /bdag nyid dge ba'i rtsa ba'i rkyen du gyur par mthong ba dang / bdag nyid 'gro ba thams cad kyi rjes su 'gro ba dang / bdag nyid mdza' bo dang 'dra bar sems can thams cad la nye bar sbyor ba dang / bdag nyid sems can thams cad la lam dang 'dra bar ston pa dang /bdag nyid sems can thams cad kyi bla na med pa'i bde ba'i yo byad du yongs su sbyor ba dang / bdag nyid nyi ma dang 'dra bar 'jig rten kun du mtshungs par byed pa dang sems can thams cad la bdag nyid de lta bu'i chos dang ldan par rab tu sbyin par byed pa dang / 'jig rten thams cad na bdag nyid ci 'dod pa bzhin du bya ba la dbang du gyur par mthong bas 'jig rten kun tu bdag nyid mchod rten gyi mchog tu 'gyur bar bya ste bdag nyid 'gro ba thams cad kyi mchod rten du mthong ba dang / 'jig rten kun du sems mnyam par bsgrub pa dang /bdag nyid 'gro ba kun du yo byad thams cad kyi mu stegs su mthong ba dang / bdag nyid 'jig rten thams cad la bde ba sbyin par so sor rtogs pa dang / bdag nyid 'gro ba kun gyi sbyin bdag tu mos pa dang / bdag nyid 'jig rten kun gyi shes pa dang 'dra bar byas pa dang /bdag nyid byang chub sems dpa'i spyod pa dang ldan par bskyed pa dang / bdag nyid ji skad smras pa de bzhin du byed pa la 'jug pa dang / bdag nyid thams cad mkhyen pa'i go cha bgos par so sor rtogs pa dang sngon mgron du gnyer ba'i sems can rjes su skyong ba dang /bdag nyid nan tan la gnas par byed pa dang / byang chub sems dpa'i gtong ba'i sems yid la byed cing sems can thams cad la bdag nyid skyed mos tshal dang 'dra bar lta ba dang / 'jig rten thams cad la bdag nyid chos kyi dga' ba dang 'dra bar ston pa dang /bdag nyid sems can thams cad la yid bde ba sbyin pa nyid du gnas pa dang / bdag nyid dga' ba mtha' yas pa bskyed par 'gro ba thams cad la gtong zhing 'jig rten kun du bdag nyid dkar po'i chos skye ba'i sgo lta bur yongs su 'dzin pa dang / bdag nyid sems can thams cad la sangs rgyas kyi byang chub sbyin par smon lam 'debs pa dang /skye dgu thams cad la bdag nyid pha dang 'dra bar 'jug pa dang / sems can gyi khams thams cad du yo byad thams cad ma tshang ba med par bya ba'i phyir bdag nyid rab tu gnas pas yin no/ /de ltar byang chub sems dpa' bdag nyid g.yog tu sbyin par byed pa na/slong ba dag la dga' ba yid la byed pa'i sems dang ldan pa / sa la stan 'ding ba'i stan lta bu'i sems dang ldan par bya ste/ sa dang 'dra bar sdug bsngal thams cad bzod pa yid la byed pa bsgrub cing / sems can thams cad kyi rim gro bya ba la ngal ba med pa'i yid dang ldan pa/byis pa'i skye bos sbyar ba'i nyes byas dang du blang ba la brtan zhing sran thub pa'i rang bzhin can legs par gnas pa'i dge ba'i rtsa ba la mngon par brtson zhing sems can gyi khams thams cad kyi rim gro bya ba la rab tu zhugs pas yin no//slong ba 'ongs pa dag la rna ba'am sna yongs su gtong ba na/ byang chub sems dpa'i spyod pas zin cing de bzhin gshegs pa'i rigs kyis rigs mtho ba las byung ba'i sems dang ldan pa dang byang chub sems dpa' thams cad rjes su dran pa'i gnas pa las byung ba dang /'jig rten gsum po thams cad snying po med pa las snying por rtog pa dang / rang gi lus la ma chags pa'i rgyu dang ldan pa dang / gnas med pa'i sangs rgyas kyi chos thams cad kyi rjes su dran pa la gnas pa dang / snying po med pa'i lus las snying po blang ba'i bsam pa dang ldan pas yin no//de ltar byang chub sems dpa' lce blangs ma thag tu tshig 'jam zhing dga' bar 'gyur ba byams par spyod pa'i sems kyis rgyal po la 'os pa'i seng ge'i khri bzang po la bzhag nas/ slong ba de la mngon par smra ste/ sems ma khros par byas/ sems ma smas pa dang / sems ma nyams pa dang / sems bdag nyid chen po'i rigs kyis mtho ba dang / sems sangs rgyas kyi gdung las byung ba dang / sems ma rnyogs pa'i rgyud dang mthu stobs chen po bskyed pa dang / sems lus la ma chags pa dang / sems kha bzhin la mngon par ma zhen cing /pus mo'i lha nga btsugs pa'i lus su byas te/ rang gi kha nas lce phyung la slong ba'i lus la gtad de tshig 'jam zhing mnyen la dga' bar 'gyur ba byams pa nye bar spyod pa 'byin cing / khyod nga'i lce khyer la ji ltar khyod dga' bar 'gyur ba dang / yid dga' ba dang /yid bde ba dang / rab tu dga' zhing rangs pa dang / mos pa skye bar 'a gyur bar ci 'dod pa bzhin gyis shig ces zer ro/ /de mgo yongs su gtong ba na chos thams cad kyi mchog mgo lta bu'i ye shes la 'jug cing / sems can thams cad kyi yongs su bskyab pa'i mgos byang chub khong du chud par byed pa dang /'gro ba thams cad kyi mchog dpe med pa'i ye shes mgo lta bu mngon par 'dod pa dang / kun mkhyen pa'i mgo thob pa / ye shes kyi rgyal po la mos par byed pa dang / chos thams cad kyi dbang phyug gi mgo mtha' yas pa yongs su rdzogs par 'dod cing /slong ba mtha' yas pa dga' bas yongs su khyab pa'i sems kyis yin no/ /de ltar byang chub sems dpa' slong ba dag la lag pa dang rkang pa yongs su gtong ba na dad pa'i lag pa dang ldan pa dang / rjes su phan 'dogs par spyod pa dang / byang chub sems dpa'i rtsal gyis gtong ba'i lag pa brkyang zhing / sbyin pa la mngon par dga' bar lag pa yongs su gtong ba dang / rten chen po la rkang pa 'dor ba dang byang chub sems dpa'i spyod pa la mos pa dang / chor bas ma nyams pa'i sbyin pa'i mthus sems bskyed pa dri ma med par gnas shing /ye shes yongs su dkris pa med pa dang / chos kyi lus rgyun mi 'chad pa mi shigs pa mi chod pa'i lus dang ldan pa/ bdud thams cad kyis mi bskyod pa/ sems dge ba'i bshes gnyen gyis nye bar brtan zhing 'phel ba/ byang chub sems dpa' thams cad dang /spyod pa gcig tu gnas shing gtong ba gcig pus nges par 'byung bas yin no/ /de ltar byang chub sems dpa' rang gi lus dral te slong ba dag la khrag 'byin pa na/ byang chub kyi sems kyis rab tu dga' ba dang / sems byang chub kyi spyod pa 'dod pa dang / sems tshor bas yongs su ma zin pa dang /sems slong ba thams cad 'dod pa dang / sems yongs su len pa thams cad la mi sdang ba dang / sems byang chub sems dpa'i gtong ba'i lam thams cad du zhugs pa dang / sems rang gi lus la mi lta zhing mi ldog la rgyun mi 'chad pas rang gi lus kyi khrag sbyin par byed do //ye shes kyi skye mched kyi sems theg pa chen po la zhugs pa/ yid ches pa dang / yid 'dod pa dang / yid tshim pa dang / yid rangs pa dang / yid mgu ba dang / yid dga' ba dang / yid bde ba dang / yid dang bar gyur te/ rab tu dga' zhing mos pa dang / rangs pa dang / yid bde ba skyes pas yin no/ /slong ba rnams la rang gi lus las sha yongs su gtong ba na dge bar gtong ste/ slong bar 'dod pa'i tshig gis khyed nga'i lus las sha dang rkang cig dgos pa sbyin / khyer cig ces slong ba de dag la smra zhing /dga' ba mtshungs pa med pa rnam par spel ba'i gtong ba'i sems dang / byang chub sems dpa' mkhas pa'i tshogs kyis bsten pa'i dge ba'i chos thams cad kyi grogs su gyur pa dang / 'jig rten gyi dri ma bsal ba'i lhag pa'i bsam pa mchog rab dang / byang chub sems dpa'i mnyam pa nyid kyis brin pa'i sbyin pa rtsom pa chen po yid kyis 'dod par gyur pa dang /slong ba thams cad yi mi chad par sbyin pa btang ba'i dngos po dag gis shin tu so sor brtags pa'i las kyi rnam par smin pa'i rkyen dang / 'jig rten gyi khams thams cad mngon du 'gyur ba'i sangs rgyas kyi zhing gi rgyan bkod pa'i mchod pa dang /'gro ba thams cad la mngon du phyogs pa'i snying rje chen pos yongs su skyob pa dang / sangs rgyas kyi byang chub mngon du gyur pa'i stobs bcu rnam par spyod pa dang / 'das pa dang ma 'ongs pa dang da ltar byung ba'i byang chub sems dpa' thams cad mngon du gyur pa'i dge ba'i rtsa ba gcig gis rim gror bya ba dang /mi 'jigs pa thams cad mngon du gyur pa'i khyu mchog dang seng ge'i sgrar sgrogs pa dang / dus gsum mngon du gyur pa'i dus thams cad mnyam pa nyid du shes pa dang / 'jig rten thams cad mngon du gyur pa phyi ma'i mtha'i mur thug pa'i bskal par brtson pa'i byang chub sems dpa'i smon lam dang /yongs su yi ma chad pa mngon du gyur pa'i mi skyo ba'i sems bskyed pas yin no/ /byang chub sems dpa' slong ba dag la rang gi snying gtong ba na/ sems sbyin pa'i rigs la bslabs pa dang /sems pha rol tu phyin pa la sgrub pa dang / sems byang chub sems dpa'i sbyin pa thams cad la mi rgod par shin tu gnas pa dang / sems rten du gyur bas slong ba thams cad la ri mor byed pa dang / lhag pa'i bsam pa yongs su sbyong ba dang / 'gro ba thams cad yongs su smin par bya ba'i phyir smon lam chen po la zhugs pa dang / byang chub sems dpa'i spyod pa la gnas pa dang / thams cad mkhyen pa nyid la 'jug cing smon lam ma btang bas yin no/ /de slong ba dag la rgyu ma dang / mkhal ma dang /mchin pa dang / glo ba sbyin pa ni / slong ba la rab tu dang ba dang / dga' ba'i rnam pa'i mig dang / byang chub sems dpa' las byung ba'i byams pa dang / mi ngal ba'i yid la byed pa'i gtong ba dang / snying po med pa'i lus las legs par brtags pa'i snying po len pa'i sems dang /mthar dur khrod du 'gro bar lus rjes su dran pa'i yid la byed pa dang / lus gzhan la rag las par yid la bya ba dang / mi rtag pa nyid kyis zin pa'i lus dang / gzhan gyi zas su sems pas lus la sbyang ki dang / ce sbyang dang / wa dang / khyi'i zas su rtog cing /de ltar chos yid la byed pa la zhugs pa'i byang chub sems dpa'/ slong ba de dag la mig mi 'dzums shing sems 'di ltar bskyed de/ gal te bdag gis slong ba 'di la lus las rgyu ma dang / mkhal ma dang / mchin pa dang / glo ba byin kyang rung gal te ma byin kyang rung ste/mthar tshe zad na 'di ni mi rtag ste tha ma dur khrod du 'gro'o zhes de ltar yid la byed par tshim par byed pa'i rgyud dang / de lta bu'i chos shes pa'i bsam pa dang / dge ba'i bshes gnyen gyi 'du shes su gnas pas slong ba la lta ba dang / snying po med pa'i lus las snying po len 'dod pa yin no//chos 'dod pas rang gi sha sen mo dang bcas pa gtong ba na yang / de ltar dge ba'i rtsa ba yongs su sngo bar byed do/ /lus btang ba byas nas/ longs spyod dang bsod nams btang ba ni de nyid las byung ba / de ltar byang chub sems dpa' sbyin gnas dang len pa sna tshogs phyogs gzhan dang gzhan nas 'ongs pa'i gang zag dang /slong ba phongs pa dang bkren pa mang po tshad med pa byang chub sems dpa'i sgra thos te 'ongs pa dang / byang chub sems dpa' la re ba'i skabs kyis 'ongs pa dang / byang chub sems dpa'i sbyin pa dang sngon gyi smon lam thos pa rnams dang /byang chub sems dpa'i sbyin pa dang smon lam gyi sems kyis mgron du gnyer ba rnams dang / thams cad gtong du re ba'i yid can rnams 'ongs pa mthong nas/ slong ba la ri mor bya bas mi ngoms pa'i sems kyis slong ba 'ongs pa rnams la bzod pa gsol ba'i sems dang ldan pas bdag nyid phyogs de dag tu song la khyed 'ongs pa'i nyon mongs par mi 'gyur bar ri mor bya ba zhig na zhes des spyi bos gtugs te bzod pa gsol lo//slong ba thams cad la bzod pa gsol khrus byas lus ngal sos par byas nas/yo byad ci 'os pa sbyin par byed de/ 'di lta ste/ nor bu'i shing rta 'dzam bu'i gling na bzang ba'i na chung rin po ches yongs su gang ba dang / 'di lta ste/ gser gyi shing rta yul gyi na chung rin po che rnam par dag pas yongs su gang ba dang / 'di lta ste bai DUr+ya'i shing rta glu dbyangs dang sil snyan rjes su mthun pa len pas gang ba dang /de bzhin du shel gyi shing rta bu mo rin po che bzhin bzang zhing cha byad sdug gus shin du brgyan pa gzugs blta na sdug cing tshul mkhas pas gang ba dag sbyin par byed do zhes gsungs pa dang / de bzhin du de nyid las/ nor bu'i shing rta glang po che cang shes rin po che thams cad kyi dra bas g.yogs pa dang ldan pa phrugs su mthun pas 'dren pa dag rab tu sbyin par byed/tsan+dan gyi shing rta rin po che'i 'phang lo dang rtsibs sbyar ba/ rin po che'i seng ge'i khri btsugs pa/ rin po che'i gdugs sna tshogs kyis khebs pa/rgyal mtshan dang ba dan gyis phyogs bzhir brgyan pa/ spos sna tshogs kyis shin tu bdugs shing spos kyi snying po'i byug pa thams cad kyis legs par byugs pa me tog gi bkod pa rnam par bkram pa/ bu mo brgya stong rin po che'i tha gus 'dren pa/ mi ldog mi 'gyur bar 'gro zhing drag thal ma khyer bar 'byor ba nas/spos kyi dad yid du 'ong zhing rjes su mthun pa dang / bu dang bu mor bcas pa'i smra ba nye bar sbyor ba dang ldan pa/ spos kyi phye ma sna tshogs gtor bas gtsang sbrar byas pa dag sbyin par byed do zhes gsungs pa dang / de bzhin du gzhan yang de nyid las/bdag nyid sems can thams cad la gtong ngam/ sangs rgyas thams cad la rim gror bya bar 'bul lam/ rgyal srid yongs su gtong ngam/ mkhar ram/ grong khyer ram/ rgyal po'i pho brang rgyan thams cad kyis rnam par spud pa'am/g.yog thams cad kyang slong ba rnams la ci rigs par yongs su gtong ngam/ slong ba dag la bu dang bu mo dang chung ma sbyin par byed dam/ khyim thams cad btang ba nas/ longs spyod dang longs su spyod pa thams cad sbyin par byed do / /de bzhin du skom sbyin pa dang / ro'i sbyin pa yang byang chub sems dpas sbyin par byed pa na/ bzang zhing rnam pa sna tshogs pa rgya che ba gtsang ba rnam pa tha dad pa kha ba dang tsha ba dang bska ba dang / lan tshwa'i ro mchog sna tshogs dang ldan pa shin tu tshim par byed pa'i ro bro ba mang po dang ldan pa dang / khams 'khrugs pa snyoms par byed pa/lus dang sems kyi stobs ston pa/ dga' ba dang mos pa dang mchog tu dga' ba dang / bde ba skyed par byed pa nas/ pha rol gyi gnod par byed pa sel ba/ nad thams cad zhi zhing nad med pa bskyed pa dag sbyin par byed do/ /de bzhin du gos sbyin pa dang / me tog sbyin pa dang / spos sbyin pa dang / byug pa sbyin pa dang / phreng ba sbyin pa dang / mal cha sbyin pa dang / gnas sbyin pa dang / rten sbyin pa dang / mar me sbyin pa dang / na ba'i gsos sman sbyin pa dang / yo byad nas kha zas rnam pa sna tshogs yo lang cher bshams pa dag byang chub sems dpas sbyin par byed do//bzo sna tshogs su byas pa'i sder gyi snod sna tshogs pa tshad med pas spras pa rnam pa du ma dang / dbyig dang gser dang dngul gyi phye ma rnams/ sangs rgyas bcom ldan 'das dag la dbul ba na/ sbyin pa'i gnas bsam gyis mi khyab par mos so/ /'di dag byang chub sems dpa' dkon mchog la dbul na/dge ba'i bshes gnyen shin tu rnyed dka' bas sems bskyed pas dbul la / /'phags pa'i dge 'dun la 'bul na sangs rgyas kyi chos nye bar brten pa'i phyir dbul lo/ /gang zag gam nyan thos sam rang sangs rgyas dag la 'bul na/'phags pa'i yon tan la shin tu dang ba'i sems kyis 'bul lo/ /pha ma la sbyin na bla ma la sri zhu dang rim gro bya ba'i sems kyis sbyin no/ /slob dpon dang bla ma dang sbyin pa'i gnas de dang de dag la 'bul na/ bla ma'i tshogs kyis bstan pa bslab pa la 'jug go/ / dbul po dang phongs pa dang slong ba dag la gos dang zas sbyin pa na/ sems can thams cad la khong khro ba med pa'i mig dang / byams pa yongs su bsgoms pas sbyin par byed do/ /de bzhin du sbyar te/ de ltar byang chub sems dpa' glang po che cang shes yan lag bdun rab tu gnas pa/lo drug lon pa so drug yod pa spu mdog pad+ma 'dra ba/ gdong rnam par dag pa gser gyi rgyan gyis brgyan pa/ lus gser gyi dra bas g.yogs pa/ sna rin po che'i rgyan sna tshogs kyis g.yogs pa/ bkod pas spras pa/ gser gyis g.yogs pa/ blta na sdug pa dpag tshad stong du mi ngal bar 'gro zhing rgyu ba sbyin par byed do //rta cang shes pa zhon na bde zhing lus bde ba dang ldan pa/ bang phun sum tshogs pa/ phyogs bzhir bgrod pa bkur ba'i mgyogs pa dang ldan pa/ zas phun sum tshogs pa/ lha'i mtshungs pa med pa'i rgyan thams cad dang ldan pa dag sbyin par byed do//de dag sbyin zhing gtong ba na gus pas skye bo bla ma dang dge ba'i bshes gnyen dang pha ma dang dbul po dang phongs pa dang slong ba dang len pa'i 'gro ba thams cad la lhug par gtang ba'i sems dang gzung ba med pa'i sems nas/ snying rje chen pos phyogs su khyab pa'i rgyud kyis gtong ba chen po tshad med pa byang chub sems dpa'i yon tan dag la nan tan byed pa dang /rigs btsun pa byang chub sems dpa'i bsam pa yongs su spyod cing sbyin par byed do/ /de ltar sems can dag la stan sbyin zhing gtong na rgyal po'i khri bzang po bai DUr+ya'i rkang pa can / seng ges brten pa gser gyi tha gu dang rin po che'i dra ba'i bla re dang gos 'jam po du ma bting ba nye 'khor spos kyi snying po thams cad kyis shin tu dri zhim par byas pa/ nor bu'i rgyal po sna tshogs kyi rgyal mtshan du ma bsgreng ba/ rin po che bye ba khrag khrig brgya stong du ma'i rgyan bkod pa/ gser gyi dra ba'i bla re bres pa/ gser gyi dril bu g.yer kha'i dra ba 'khrol ba'i sgra yid du 'ong ba'i dbyangs 'byung ba/ rin po che'i 'bru bye ba khrag khrig phrag bcus kun nas bskor te rnam par phye bas shing tu 'phags shing blta na mdzes pa/ srog chags bye ba khrag khrig grangs med pas kun nas blta ba/gdugs kheb gcig gis sa chen po thams cad skyong bar dbang bskur ba rgyal srid kyi dbang phyug thams cad la dbang ba'i stan du bya ba/ de la 'dug cing 'khor lo thogs pa med pas bskyad ba dang chis bya ba la rgyal po'i bka' thams cad nyams pa med par nyan pa de lta bu'i sten gyi rnam pa sbyin par byed do//de ltar byang chub sems dpa' gdugs rnams sbyin pa na/ rin po che chen po'i bkod pas rab tu brgyan pa/ rin po che'i yu ba can dril bu g.yer kha'i dra bas kun nas khebs pa rin po che'i srad bu dang rna rgyan dang mgul rgyan gyi phreng bas khugs can du gyur pa/nor bu dang bai DUr+ya'i phreng ba mngon par dpyangs pa/ nye 'khor na dga' ba'i dbyangs dang yid du 'ong ba'i sgra 'byung ba/ gser gyi dra ba rnam par dag pas nang logs khebs par byas pa/ rin po che'i thur ma'i rgyan brgya stong bres pa nor bu rin po che'i mdzod kun du 'dzin pa/a ka ru dang / tsan+dan dang / spos kyi dam pa bye ba khrag khrig brgya stong du mas nye 'khor dri zhim por bsgos shing bdugs pa/ 'dzam bu'i chu bo'i gser ltar 'od gsal zhing dag pa/ rgyan bye ba khrag khrig mtha' yas pas brgyan pa'i gdugs de 'dra ba rnams dang /de bas kyang ches lhag pa'i gdugs bye ba khrag khrig brgya stong du ma dang / /kha na ma tho ba med pa'i sems kyis sbyin par byed cing / sems can thams cad kyi gtso bo mngon du gyur pa'am/ de bzhin gshegs pa yongs su mya ngan las 'das pa'i mchod rten brgyan pa'i phyir ram/chos btsal ba'i phyir byang chub sems dpa' dang / dge ba'i bshes gnyen nam/ byang chub sems dpa' chos smra ba btsun par bya ba dag gam/ pha dang ma'am dge 'dun dkon mchog gam sangs rgyas thams cad kyis bstan pa nas/ len pa po thams cad kyi bar dag la 'bul ba dang yongs su gtong ba dang ster bar byed pa dang /sbyin par byed pa na/ de dge ba'i rtsa ba de dag 'di ltar yongs su bsngo ba ste zhes gsungs pa dang / re zhig ji ltar yongs su bsngo ba dang por/ dge ba'i rtsa ba thams cad kyi skabs nas ji skad du/ smon lam 'di lta bu yang 'debs te/ ci nas dge ba'i rtsa ba 'di dag rnam par dag par chos kyi mtha' klas par 'gro ba thams cad la nye bar 'tsho ba dang phan par gyur cig /des na dge ba'i rtsa ba 'di dag gis sems can thams cad kyi sems can dmyal ba'i ngan song rgyun chad par gyur cig /dud 'gro'i skye gnas pa dang / gshin rje'i 'jig rten gyi sdug bsngal ba'i phung po rnam par log par gyur cig ces smon lam 'debs so/ /dge ba'i rtsa ba de dag yongs su bsngo ba na / dge ba'i rtsa ba de dag 'di ltar yongs su bsngo ste/ dge ba'i rtsa ba 'dis bdag sdug bsngal gyi phung po bzlog pa'i phyir sems can thams cad kyi gnas su gyur cig /nyon mongs pa thams cad las yongs su dgrol ba'i phyir sems can thams cad kyi skyob par gyur cig /'jigs pa thams cad las bsrung ba'i phyir sems can thams cad kyi skyabs su gyur cig /sa thams cad kyi rjes su 'gro ba'i phyir sems can thams cad kyi rten du gyur cig /shin tu grub pa dang bde ba thob par bya ba'i phyir sems can thams cad kyi dpung gnyen du gyur cig /rab rib med pa'i ye shes kun du bstan pa'i phyir sems can thams cad la snang bar gyur cig /ma rig pa'i mun pa bzlog pa'i phyir sems can thams cad kyi sgron mer gyur cig /shin tu rnam par dag pa la rab tu dgod pa'i phyir sems can thams cad la gsal bar byed par gyur cig /chos nyid bsam gyis mi khyab pa la gzud pa'i phyir sems can thams cad kyi 'dren par gyur cig /sgrib pa med pa'i ye shes kyi phung po nye bar bstan pa'i phyir sems can thams cad kyi yongs su 'dren par gyur cig /de bzhin du sbyar te/ de yang bsam pa thag pa nas yongs su bsngo ba'i tshig tsam gyis ni ma yin no/ /de yang dga' ba'i sems kyis yongs su bsngo'o //mgu ba'i sems kyis yongs su bsngo'o/ /dang ba'i sems dang / rab tu dga' ba'i sems dang / mnyen pa'i sems kyis yongs su bsngo'o/ /byams pa'i sems dang / mdza' ba'i sems dang / phan gdags pa'i sems dang /phan pa'i sems dang / bde ba'i sems kyis yongs su bsngo'o/ /de 'di ltar yongs su bsngo ste/ bdag gi dge ba'i rtsa ba 'dis sems can thams cad kyi 'gro ba rnam par dag par gyur cig /skye ba rnam par dag par gyur cig /bsod nams kyi che ba'i bdag nyid yongs su dag par gyur cig /zil gyis mi non par gyur cig /yongs su zad pa med par gyur cig /thub par dka' ba'i sems dang ldan par gyur cig /brjed pa med par gyur cig /rtogs pa dang blo gros dang / nges pa dang ldan par gyur cig /blo tshad med pa dang ldan par gyur cig /lus kyi las dang ngag gi las dang yid kyi las yon tan gyi rgyan thams cad yongs su rdzogs pa dang ldan par gyur cig /bdag gi dge ba'i rtsa ba 'dis sems can de dag thams cad sangs rgyas thams cad mnyes par byed par gyur cig /mnyes par byas nas kyang mi mnyes par mi byed par gyur cig /sangs rgyas bcom ldan 'das de dag thams cad la dad pa mi phyed pa thob par gyur cig /de bzhin gshegs pa dgra bcom pa yang dag par rdzogs pa'i sangs rgyas de dag las chos bstan pa nyan par gyur cig /mnyan nas kyang the tshom thams cad rnam par ldog par gyur cig /ji ltar thos pa bzhin 'dzin par gyur cig /bzung nas kyang sgrub pa rdzogs par byed par gyur cig /de bzhin gshegs pa de dag thams cad sten par byed par gyur cig /sems las su rung ba yang thob par gyur cig / kha na ma tho ba med pa'i las rnams yang dag par sgrub par byed par gyur cig /bdag nyid dge ba'i rtsa ba chen po rnams la 'jog par gyur cig /shin tu dbul ba thams cad rnam par bzlog par gyur cig /nor bdun rnyed pa yongs su rdzogs par gyur cig /sangs rgyas thams cad kyi rjes su slob par gyur cig /dge ba'i dbang po thob pa rtogs par gyur cig /rgya chen po la mos pa mnyam pa nyid yongs su sgrub par gyur cig /thams cad mkhyen pa'i ye shes kyi go skabs thob par gyur cig /'gro ba thams cad la thogs pa med pa'i mig skyed par gyur cig /mtshan thams cad rgyan gyis brgyan pa'i lus rdzogs par yongs su thob par gyur cig /yon tan thams cad kyi rgyan dang ldan pa'i ngag yongs su dag pa yongs su 'dzin par gyur cig /dbang po bsdams pa dang / stobs bcu dang ldan pa'i sems dge ba yang dag pa bsgrub par gyur cig /mi rten par gnas pa yongs su rdzogs par gyur cig /sangs rgyas thams cad bde ba'i yo byad gang dang ldan pa'i bde ba'i yo byad de sems can thams cad kyis thob par gyur cig ces bstan pa dang / de bzhin du yongs su bsngo ba drug pa las gsungs pa'i tshul gyis yongs su bsngo ba ste/sems can thams cad chags pa med par zhugs pa'i sems dang ldan zhing ye shes kyi zas can du gyur cig /zas la zhen pa med cing zas yongs su shes pa dang ldan pa dang / dga' ba za zhing zang zing med pa'i zas dang ldan pa nas/ 'dod pa la sred pa rab tu ldog pa'i bar du gyur cig /sems can thams cad chos kyi khu shugs dang ldan pa'i sprin las char 'bebs pa dang / chos kyi dga' ba bla na med pas sems kyi rgyun tshim par gyur cig /sems can thams cad ro bro ba thams cad la chags pa med cing ro la mtshan mar mi 'dzin par gyur cig /sangs rgyas kyi chos thams cad la sems 'jug pa dang / theg pa ma nyams pa dang ldan pa dang / theg pa mchog dang ldan pa dang / theg pa dam pa dang ldan pa dang / theg pa myur ba dang ldan pa dang / theg pa stobs chen po dang ldan par gyur cig/sangs rgyas la dga' ba 'thob cing sems can thams cad kyis mthong na ngoms mi shes par gyur cig / sems can thams cad dge ba'i bshes gnyen mthong zhing sems kyi rgyud la gnod pa med par gyur cig /sems can thams cad kyi dug sel ba'i sman gyi rgyal po lta bur snang zhing sems can thams cad nyon mongs pa'i dug bzlog par gyur cig /sems can thams cad kyi mun pa dang rab rib kyi ling tog sel ba'i phyir/ sems can thams cad kyis nyi ma'i dkyil 'khor shar ba lta bur mthong bar gyur cig /ces de ltar bdag nyid nges par brtags nas rang gi bsam pa dang mthun par brjod par bya ste /sems can thams cad mngon par mdzes pa mthong bar yongs su bsngo'o/ /sems can thams cad tshul khrims kyi dri dang ldan pa dang mi chod pa'i tshul khrims dang / byang chub sems dpa'i pha rol tu phyin pa dang ldan pa'i tshul khrims can du gyur cig /sems can thams cad gtang ba thams cad yongs su gtong ba can du gyur te sbyin pas bsgos par gyur cig /sems can thams cad mi 'khrugs pa'i sems rnyed cing bzod pas bsgos par gyur cig /sems can thams cad brtson 'grus chen po'i go bgos shing brtson 'grus kyis bsgos par gyur cig /sems can thams cad da ltar byung ba'i sangs rgyas mngon sum du bzhugs pa'i ting nge 'dzin thob cing bsam gtan gyis bsgos par gyur cig /sems can thams cad byang chub sems dpa' yongs su bsngo bas bsgos par gyur cig /sems can thams cad dkar po'i chos thams cad kyis bsgos par gyur cig /sems can thams cad ye shes chen po thob par bya ba'i phyir mi dge ba'i chos thams cad spangs shing lha'i mal cha thob par gyur cig /sems can thams cad so so'i skye bo ma yin pa'i byang chub kyi sems kyis bsgos pa'i phyir 'phags pa'i mal cha thob par gyur cig /sems can thams cad 'khor bar gtogs pa'i sdug bsngal thams cad yongs su spang ba'i phyir bde ba'i mal cha thob par gyur cig /sems can thams cad chos la reg pa dang ldan zhing nyams bde ba'i mal cha thob par gyur cig /sems can thams cad yon tan gyi gnas dang legs par ldan zhing gnas dang gnas las bskyod de sangs rgyas kyi gnas bla na med pa dang mi 'bral zhing / sangs rgyas kyi zhing yongs su dag pa snang ba la gnas par gyur cig /sems can thams cad sangs rgyas la nye bar brten cing gnas par gyur cig /sems can thams cad sangs rgyas kyi chos thams cad la snang ba mtha' yas pa thob par gyur cig /sems can thams cad chos kyi dbyings thams cad gcig tu rgyas par 'gengs shing thogs pa med pa'i snang ba can du gyur cig /sems can thams cad de bzhin gshegs pa'i sku thob cing lus la nad med par gyur cig /sems can thams cad rnam par mi 'khrugs pa'i chos can du gyur cing sman gyi rgyal po lta bur gyur cig /sems can thams cad 'gro ba gso ba la zhugs shing thogs pa med pa'i sman gyi rgyal po lta bur gyur cig /sems can thams cad mkhyen pa'i nad med pa thob cing nad dang zug rngu 'gags par gyur cig /sems can thams cad bsam pa ji lta ba bzhin du sman sbyor byed par gyur cig /'gro ba thams cad kyi sman la mkhas par gyur cig /sems can thams cad kyi nad thams cad bzlog pa'i phyir yongs su bsngo'o/ /sems can thams cad mthu dang stobs yongs su mi zad pa'i lus dang ldan par yongs su bsngo'o/ /sems can thams cad khor yug gi ri ltar brdzi ba med pa'i lus kyi stobs dang ldan par yongs su bsngo'o//sems can thams cad stobs thams cad kyis brtan pa la chog mi shes par yongs su bsngo'o/ /sems can thams cad snod tshad med par gyur cig /sems can thams cad nam mkha'i khams ltar rgya che ba dang / dran pa'i dbang po dang ldan pa dang /'jig rten pa dang 'jig rten las 'das pa'i tshig thams cad bzung zhing blang ba la dran pa rmongs pa med par gyur cig /sems can thams cad 'das pa dang ma byon pa dang da ltar byung ba'i sangs rgyas thams cad kyi byang chub la dad pa mi phyed pa mchog 'dzin cing dge ba rnam par dag pa'i snod du gyur cig /sems can thams cad sangs rgyas kyis kun du 'gro ba 'thob cing dga' dgur 'gro bar gyur cig /sems can thams cad sems can kun la khong khro ba med pa dang ldan pa'i sems su gyur cig /sems can thams cad lhun gyis grub par sangs rgyas kyi zhing thams cad yongs su khyab par 'gro zhing sems kyi skad cig gcig la chos kyi dbyings thams cad non par gyur cig /sems can thams cad ngal ba med pa'i yid kyi lus thob cing ngal ba dang dub pa med par 'jig rten gyi khams thams cad du 'gro bar gyur cig /sems can thams cad byang chub sems dpa'i spyod pa thams cad rjes su tshol zhing bde bar 'gro ba la 'jug par gyur cig /dge ba'i rtsa ba 'dis sems can thams cad byas pa gzo ba dang byas pa rjes su skyong bas dge ba'i bshes gnyen mi gtong ba'i sems mi 'dor bar gyur cig /sems can thams cad dge ba'i rtsa ba mthun par 'dzin pas dge ba'i bshes gnyen rnams dang don gcig par gyur cig /sems can thams cad dge ba'i bshes gnyen bsten pa phun sum tshogs pa la gnas pa sems su 'jug pa'i dge ba'i bsam pa can du gyur cig /sems can thams cad smon lam gcig tu gyur te dge ba'i bshes gnyen gyi dge ba'i rtsa ba'i las kyi rnam par smin pa rnam par dag par gyur cig /sems can thams cad theg pa chen po la zhon zhing yang dag par zhugs nas thogs pa med par thams cad mkhyen pa'i mthar 'gro bar shog shig /sems can thams cad dge ba'i rtsa bas shin tu khebs shing sangs rgyas thams cad kyis mngon sum du bsrung ba dang yongs su sba ba thob par gyur cig /sems can thams cad yon tan dang ye shes kyis mngon par khebs shing nyon mongs pa dang nye ba'i nyon mongs pa thams cad las ldog par gyur cig /sems can thams cad legs par byas pa rnam par ma 'khrugs shing dkar po'i chos can du gyur la sangs rgyas kyi chos kyi rgyun nyams pa med par gyur cig /sems can thams cad stobs bcu'i bla re dang ldan zhing gdugs lta bur gyur cig /sems can thams cad byang chub kyi khri stan shin du thob par gyur cig /sems can thams cad sangs rgyas rnam par rol pa'i seng ge'i gdan khri thob cing 'gro ba thams cad kyis blta ba'i 'os su gyur cig ces gsungs pa yin no//'phags pa nam mkha' mdzod kyi mdo las kyang / bdag gi dge ba'i rtsa ba'am chos la mkhas pa gang yin pa de sems can thams cad kyi nye bar 'tsho bar mi 'gyur bar ma gyur cig ces gsungs so/ /'das pa dang ma 'ongs pa'i dge ba'i rtsa ba btang ba ni/ 'phags pa blo gros mi zad pa'i mdo las/ dge ba'i sems dang sems las byung ba rnams rjes su dran la rjes su dran nas kyang byang chub tu yongs su bsngo ba la mkhas pa 'di ni 'das pa la mkhas pa'o/ /gang ma 'ongs pa'i dge ba'i rtsa ba nges par sems shing byang chub la mngon du phyogs pa'i las la sems pas bdag la dge ba'i sems bskyed pa 'byung ba gang yin pa de dag bla na med pa yang dag par rdzogs pa'i byang chub tu yongs su bsngo'o zhes gsungs so//de ltar goms pa'i sems las byung bas thams cad btang ba la mos pa yongs su rdzogs nas gtong ba'i sems kyi shugs dang 'brel pas lus yongs su btang bas yongs su 'dzin pa thams cad gtong ba ni/yongs su 'dzin pa'i rtsa ba las byung ba'i sred pa'i sdug bsngal las rnam par grol ba la grol ba zhes bya'o/ /bar du yang bskal pa gzhal du med cing grangs med par 'jig rten pa dang /'jig rten las 'das pa'i bde ba phun sum tshogs pa khyad par du 'phags pa rnam pa sna tshogs mtha' yas pa yang myong bar 'gyur ro/ /rang gi lus la sogs pa mchil pa'i gzan lta bur bdag longs spyod par mi 'dod pa des kyang gzhan dag drangs nas sgrol lo//de'i phyir 'phags pa dkon mchog sprin las kyang sbyin pa ni byang chub sems dpa'i byang chub po zhes gsungs so/ /bslab pa kun las btus pa las sbyin pa'i pha rol tu phyin pa'i le'u ste dang po'o// //de ltar lus la sogs pa btang ba 'di dag kyang bsrung bar bya ste/de ci'i phyir zhe na/ 'di ltar/ /sems can rnams kyis longs spyad phyir/ /lus la sogs pa sbyin par bya/ /ma bsrungs longs spyod ga las 'ongs/ /gang mi spyod pas ci zhig sbyin/ /de bas sems can longs spyod phyir/ / lus la sogs pa bsrung bar bya/ /byang chub sems dpa'i so sor thar pa las/ shA ri'i bu gzhan bsrung ngo snyam na bdag bsrung bar bya'o/ / de bzhin du shA ri'i bu byang chub sems dpa' sems dpa' chen po phan pa 'dod pa dang ldan pas srog gi phyir yang sdig pa'i las mi byed do zhes bya ba'i bar du gsungs so//khyim bdag dpal phyin gyis zhus pa'i mdo las kyang / khur gyi don du shing rta ltar chos kyi blo 'ba' zhig gis gzung bar bya'o zhes gsungs so/ /de bzhin du 'phags pa blo gros mi zad pas bstan pa'i mdo las kyang / sems can la lta bas lus kyi sdug bsngal gyis yongs su mi skye'o zhes gsungs so/ /lus la sogs pa de ltar bskyang zhe na/ dge ba'i bshes gnyen mi gtang zhing / sdong po bkod pa'i mdo las/ 'phags pa dpal 'byung gis ji skad bstan pa lta bu ste/ rigs kyi bu dge ba'i bshes gnyen gyis yang dag par zin pa'i byang chub sems dpa' rnams ni ngan 'gror mi ltung ngo //dge ba'i bshes gnyen gyis bsams pa'i byang chub sems dpa' rnams ni byang chub sems dpa'i bslab pa dang 'gal bar mi byed do/ /dge ba'i bshes gnyen gyis bskyangs pa'i byang chub sems dpa' rnams ni 'jig rten las mngon par 'phags pa yin no//dge ba'i bshes gnyen la bsnyen bkur byas pa'i byang chub sems dpa' rnams ni spyod pa thams cad la mi brjed par spyod pa yin no/ /dge ba'i bshes gnyen gyis yongs su bzung ba'i byang chub sems dpa' rnams ni las dang nyon mongs pa rnams kyis thub par dka' ba yin no//dge ba'i bshes gnyen ni bya ba dang bya ba ma yin pa rnams khong du chud par byed pa'o/ /bag med pa'i gnas las yang dag par bzlog pa'o/ /'khor ba'i grong khyer nas 'don pa'o//rigs kyi bu de lta bas na de ltar yid la bya ba rgyun mi 'chad pas dge ba'i bshes gnyen rnams kyi drung du 'gro bar bya'o/ /khur thams cad bkur bas yongs su mi skyo ba'i phyir sa lta bu'i sems dang / mi phyed pa'i phyir rdo rje lta bu'i sems dang / sdug bsngal thams cad kyis mi bsgul ba'i phyir khor yug lta bu'i sems dang /las thams cad nyams su blang ba la mi smod pas 'jig rten gyi bran lta bu'i sems dang / nga rgyal dang che ba'i nga rgyal rnam par spong bas phyag dar blta bu'i sems dang / khur lci ba bkur bas theg pa lta bu'i sems dang / mi khro bas khyi lta bu'i sems dang /'gro zhing 'ong bas yongs su mi skyo bas gru lta bu'i sems dang / dge ba'i bshes gnyen gyi ngor lta bas bu mdzangs pa lta bu'i sems kyis dge ba'i bshes gnyen la bsnyen bkur bya'o/ /rigs kyi bu khyod kyis rang la ni nad pa'i 'du shes bskyed par bya'o//dge ba'i bshes gnyen la ni sman pa'i 'du shes dang / rjes su bsten pa la ni sman gyi 'du shes dang / nan tan nyams su blangs pa la ni nad 'tsho ba'i 'du shes bskyed par bya'o/ /rigs kyi bu khyod kyis rang la ni 'jigs pa'i 'du shes bskyed par bya'o/ /dge ba'i bshes gnyen la ni dpa' bo'i 'du shes dang /rjes su bstan pa la ni mtshon cha'i 'du shes dang / nan tan la ni dgra sel ba'i 'du shes bskyed par bya'o zhes bya ba'o / /yang de nyid las dge bsnyen ma mi g.yo ma'i rnam par thar pa las kyang / rigs kyi bu dge ba'i bshes gnyen gyis rjes su bstan pa la zhugs pa'i byang chub sems dpa' la sangs rgyas bcom ldan 'das rnams thugs mnyes par 'gyur ro//dge ba'i bshes gnyen gyi tshig dang mi 'gal bar gnas pa'i byang chub sems dpa' la thams cad mkhyen pa nye bar 'gyur ro/ /dge ba'i bshes gnyen gyi tshig la the tshom med pa la dge ba'i bshes gnyen rnams nye bar 'gyur ro//dge ba'i bshes gnyen yid la byed pa dang ma bral ba la don thams cad mngon du 'gyur ro zhes gsungs so/ /de nyid kyi phyir 'phags pa nor bzangs kyis dge slong rgya mtsho'i rgyal mtshan gyi rkang pa gnyis la mgo bos phyag 'tshal te/lan brgya stong du mar bskor ba byas nas dge slong rgya mtsho'i rgyal mtshan la btud de phyag 'tshal nas/ yang dang yang blta zhing yang dang yang mngon par blta ba dang / phyag bya ba dang / rab tu 'dud pa dang / gus par bya ba dang / rim gror bya ba dang / yid la bya ba dang / bsam pa dang / bsgom pa dang / yongs su bsgom pa dang / ched du brjod pa ched du brjod pa dang / ngo mtshar du bya ba dang / yon tan mngon du bya ba dang / rjes su bsngags pa dang / rjes su 'brang bar bya ba dang / rjes su dran par bya ba dang / brtan par bya ba dang /mi gtong ba dang / yid la bsam pa dang / nye bar 'brel par bya ba dang / smon lam gyi rjes su 'jug par bya ba dang / mthong bas dga' ba dang / dbyangs kyi mtshan ma gzung ba dang / gzugs kyi rjes su bsam pa dang / ming yongs su gzung ba'i rjes su song ba'i sems dang ldan par bya ba dang /kha dog dang dbyibs rjes su dran par bya ba dang / ye shes kyi yul rjes su bsam pa dang / ting nge 'dzin gyi yul la rjes su 'jug par bya ba dang / smon lam gyi yul la rjes su 'brang bar bya ba dang / spyod yul gyi yul rnam par dpyad par bya ba dang /ye shes kyi snang ba yongs su gzung bar byed cing dge slong rgya mtsho'i rgyal mtshan gyi drung nas song ngo / /de bzhin du dge ba'i bshes gnyen las 'ongs pa'i thams cad mkhyen pa nyid la yang dag par blta zhing gdang mchi mas gang bar dus te/ dra byi la sprin la lan brgya stong du mar bskor ba byas nas yang dang yang bltas te phyag 'tshal zhing dra byi la sprin gyi drung nas song ngo //byang chub sems dpa'i so sor thar pa las kyang / shA ri'i bu 'di la byang chub sems dpa' ni/ mkhan po dang slob dpon la gus pas gang yongs su mi gtong pa'i rin po che de 'jig rten na med do//gang lus kyis rim gro mi bya ba de med do/ /gang rkang pas gtong ba la mi spro ba de med do/ /gang ngag gi las la mi spro ba de med do/ /de bzhin du sbyar te/ de ci'i phyir zhe na/ chos 'di ni 'ching ba thams cad gcad par 'gyur ba'o/ /chos 'di ni skye ba dang rga ba dang na ba dang 'chi ba dang mya ngan dang smre sngags 'don pa dang sdug bsngal ba dang yid mi bde ba gcod par 'gyur ba'o snyam nas rin po che'i sems bskyed do//chos 'di ni sems can thams cad kyi nad nye bar zhi bar byed par 'gyur bas bdag gis sems can thams cad kyi nad nye bar zhi bar byed pa'i chos 'di lta bu 'dod par bya'o snyam mo zhes gsungs so//khyim bdag drag shul can gyis zhus pa las kyang khyim bdag gal te byang chub sems dpa' lung klog pa dang kha ton bya ba don du gnyer bas sbyin pa dang tshul khrims dang bzod pa dang brtson 'grus dang bsam gtan dang shes rab dang ldan pa'am byang chub sems dpa'i lam gyi tshogs stsogs pa dang ldan pa'i tshig bzhi pa'i tshigs su bcad pa su las mnyan tam lung mnos sam blangs pa'i slob dpon de la des chos kyi gus pa bya'o//ming dang tshig dang yi ge ji snyed kyi tshigs su bcad pa de bstan pa de snyed kyi bskal par gal te slob dpon de la g.yo med par rnyed pa dang bkur sti dang mchod pa thams cad kyis rim gro dang bsnyen bkur byas kyang khyim bdag da dung slob dpon la slob dpon gyi gus pa yongs su rdzogs pa ma yin na chos kyi gus pa lta ci smos zhes gsungs so //shes rab kyi pha rol tu phyin pa brgyad stong pa las kyang / rigs kyi bu khyod kyis dge ba'i bshes gnyen la shin tu gus pa bskyed par bya'o/ /phangs par bya'o/ /de nas byang chub sems dpa' sems dpa' chen po rtag tu ngu de lta bu'i rang bzhin gyi yon tan dag dang bla ma la gus pa yid la byed pa dag dang ldan pas song nas mthar gyis grong khyer gzhan zhig tu phyin pa dang /de'i grong bar gyi tshong 'dus kyi dbus su phyin nas de 'di snyam du sems te/ 'di ltar bdag gi lus btsongs la/ de'i rin gyis byang chub sems dpa' sems dpa' chen po chos 'phags la bkur sti bya'o//yun ring po nas bdag gi lus stong zhig cing zad de btsongs so/ /'khor ba dpag tu med pa nas 'dod pa'i phyir 'dod pa'i rgyus yang dang yang sems can dmyal ba'i sdug bsngal dpag tu med pa dag myong yang 'di lta bu'i chos kyi phyir ram 'di lta bu'i sems can chen po dag la bkur sti bya ba'i phyir ma yin no snyam mo//de nas byang chub sems dpa' sems dpa' chen po rtag tu ngus grong bar gyi tshong 'dus kyi dbus su 'dug ste/ mi su 'dod mi su 'dod ces sgra bsgrags shing skad kyis thos par bos so/ /de bzhin du sbyar te/ de nas bdud sdig can gyis ci nas bram ze dang khyim bdag de dag gis byang chub sems dpa' sems dpa' chen po rtag tu ngus mi su 'dod mi su nga nyo bar 'dod ces zer ba'i sgra mi thos par 'gyur ba de lta bur yongs su bsgribs so/ /de nas byang chub sems dpa' sems dpa' chen po rtag tu ngu gang gi tshe bdag nyo ba ma rnyed pa de'i tshe phyogs gcig tu song nas mchi ma phyung ste 'di ltar bdag gi lus btsongs la byang chub sems dpa' sems dpa' chen po chos 'phags la bkur sti bya snyam na/lus nyo ba yang bdag gis ma rnyed de/ kye ma bdag ni thob pa ngan pa thob bo snyam nas /de nas lha'i dbang po brgya byin 'di snyam du sems te/ de ltar byang chub sems dpa' sems dpa' chen po rtag tu ngu 'di lta ste chos 'dod pa'i phyir bdag gi lus yongs su gtang bar lhag pa'i bsam pa phun sum tshogs pa yin nam ma yin pa/ byang chub sems dpa' sems dpa' chen po rtag tu ngu la bdag gis sad par bya'o snyam ste/ lha'i dbang po brgya byin gyis bram ze'i khye'u'i cha byad du mngon par sprul nas/ byang chub sems dpa' sems dpa' chen po rtag tu ngu ga la ba der song ste 'ongs nas/ byang chub sems dpa' sems dpa' chen po rtag tu ngu la 'di skad ces smras so//rigs kyi bu khyod 'di ltar yid mi dga' zhing yid gdung la mchi ma 'byung ba ci nyes/ des smras pa/ bram ze'i khye'u nga ni chos 'dod pa'i phyir bdag nyid btsongs te/ chos la mchod pa bya bar 'dod na/ lus nyo ba de ngas ma rnyed nas de la nga 'di snyam du sems so//kye ma nga ni bsod nams chung bas 'di ltar lus btsongs te/ shes rab kyi pha rol tu phyin pa la mchod par bya ba dang / 'phags pa byang chub sems dpa' sems dpa' chen po chos 'phags la yang bkur sti bya snyam na bdag gi lus nyo ba ma rnyed do snyam mo//de nas bram ze'i khye'u des byang chub sems dpa' sems dpa' chen po rtag tu ngu la 'di skad ces smras so/ /rigs kyi bu nga la mis ni bya ba med kyi/ nga mchod sbyin zhig byed de der mi'i snying dang khrag dang rus pa dang rkang dag nga la dgos na de rin gyis nyor byin cig ces byas pa dang /byang chub sems dpa' sems dpa' chen po rtag tu ngu 'di snyam du sems te gang bdag gis bram ze'i khye'u des/ snying dang khrag dang rus pa dang rkang nyo ba rnyed pa 'di ni bdag gis rnyed pa'i mchog legs par rnyed do/ /bdag ni shes rab kyi pha rol tu phyin pa dang thabs mkhas pa la yongs su rdzogs par 'gyur ro snyam nas/des sems dga' ba dang sems bde ba dang sems rab tu dga' bar gyur nas/ bram ze'i khye'u la 'di skad ces smras so/ /bram ze'i khye'u nga'i lus 'di las khyod gang 'dod pa sbyin no/ /des de la 'di skad ces smras so/ / rigs kyi bu khyod rin du ci 'dod pa sbyin no zhes byas pa dang / des de la 'di skad ces smras so/ /bram ze'i khye'u khyod kyis gang yongs su gtang ba de nga la byin cig /de nas byang chub sems dpa' sems dpa' chen po rtag tu ngus mtshon rnon po thogs nas/ lag pa g.yas pa phug ste khrag gzags so//brla g.yas pa sha med par btogs nas rus pa gcog tu rtsig pa'i drung du song ngo / /de nas tshong dpon gyi bu mo zhig khang pa'i yang thog na 'dug pa des/ byang chub sems dpa' sems dpa' chen po rtag tu ngu brla'i sha med par btogs nas/ rus pa gcog tu rtsig pa'i drung du song ba mthong nas de 'di snyam du sems te/rigs kyi bu 'di ci'i phyir bdag nyid la bdag nyid 'di lta bu'i na tsha byed pa bdag rigs kyi bu de'i drung du song ste dri'o snyam nas tshong dpon gyi bu mo de byang chub sems dpa' sems dpa' chen po rtag tu ngu ga la ba deng song ste phyin nas byang chub sems dpa' sems dpa' chen po rtag tu ngu la 'di skad ces smras so//rigs kyi bu khyod ci'i phyir khyod bdag nyid la 'di lta bu'i na tsha dag byed/ khrag dang rus pa dang rkang 'dis ci zhig bya/ rtag tu ngus bu mo de la 'di skad ces smras so/ /bram ze'i khye'u 'di la bcongs te/shes rab kyi pha rol tu phyin pa la mchod par bya'o/ /'phags pa byang chub sems dpa' sems dpa' chen po chos 'phags la yang bkur sti bya'o/ /de nas tshong dpon gyi bu mo des byang chub sems dpa' sems dpa' chen po rtag tu ngu la 'di skad ces smras so/ / rigs kyi bu khyod 'di ltar bdag gi snying dang khrag dang rus pa dang rkang yang btsongs te rigs kyi bu de la bkur sti bya bar 'dod pa/ khyod la yon tan gyi rnam pa ci zhig 'grub par 'gyur/ des de la smras pa bu mo rigs kyi bu de gang la ngas bslab par bya ba'i shes rab kyi pha rol tu phyin pa dang thabs la mkhas pa dag ston par 'gyur te/de la ngas bslabs na bla na med pa yang dag par rdzogs pa'i byang chub mngon par rdzogs par sangs rgyas nas sems can thams cad kyi rten du 'gyur ro/ /de bzhin du sbyar te/ de nas tshong dpon gyi bu mo des byang chub sems dpa' sems dpa' chen po rtag tu ngu la 'di skad ces smras so//rigs kyi bu khyod kyis 'di ltar chos rgya chen po 'di dag yongs su brjod pa ni ngo mtshar te/ rigs kyi bu chos 'di lta bu re re'i phyir yang bskal pa gang gA'i klung gi bye ma snyed ngu lus yongs su gtang bar bya ba yin na gcig lta ci smos te/de tsam du khyod kyis chos 'di dag rgya cher yongs su brjod na rigs kyi bu khyod gang gis byang chub sems dpa' sems dpa' chen po chos 'phags la bkur sti bya ba'i gser ram nor bu'am mu tig gam bai DUr+ya'am zhes bya ba nas bdag kyang khyed kyis stsal ba'i g.yog mo lnga brgya 'di dag dang lhan cig tu chos 'phags la mchod pa bgyi ba'i slad du mchi'o zhes bya ba'i bar du rgya cher sbyar ro//de nas byang chub sems dpa' sems dpa' chen po chos 'phags stan las langs te/ bdag gi khyim du zhugs pa dang zhes bya ba nas/ lo bdun gyi bar du ting nge 'dzin gcig la snyoms par zhugs te zhes bya ba'i bar dang /byang chub sems dpa' sems dpa' chen po rtag tu ngu yang lo bdun gyi bar du 'dod pa'i rtog pa ma byung / gnod sems kyi rtog pa ma byung / rnam par 'tshe ba'i rtog pa ma byung / ro la brkam pa ma skyes te/ gzhan du ni byang chub sems dpa' sems dpa' chen po chos 'phags nam ldang bar gyur /bdag cag kyang byang chub sems dpa' sems dpa' chen po chos 'phags kyi chos kyi khri gang la rigs kyi bu de 'dug nas chos ston par 'gyur ba'i chos kyi khri bshams na/ bdag gis sa phyogs 'di chag chag ma btab kyis legs par byugs la me tog sna tshogs gtor te/sa phyogs gang du byang chub sems dpa' sems dpa' chen po chos 'phags shes rab kyi pha rol tu phyin pa dang thabs mkhas pa rab tu ston par 'gyur ba der legs par byug par bya'o snyam mo/ /tshong dpon gyi bu mo la sogs pa bu mo lnga brgya de dag dang byang chub sems dpa' sems dpa' chen po rtag tu ngu'i rjes su slob cing spyod lam gnyis kyis dus 'da' bar byed pa bya ba thams cad kyang de'i rjes su 'jug go/de nas byang chub sems dpa' sems dpa' chen po rtag tu ngus lha'i sgra thos te/ byang chub sems dpa' sems dpa' chen po chos 'phags ni zhag bdun na ting nge 'dzin las langs te /langs nas kyang grong khyer gyi dbus su 'dug ste chos stan par 'gyur ro zhes grag nas/ byang chub sems dpa' sems dpa' chen po rtag tu ngu lha'i sgra de thos pa dang / dga' mgu yid rangs rab tu mgu zhing dga' ba dang yid bde ba skyes te/tshong dpon gyi bu mo la sogs pa bu mo lnga brgya dang / sa phyogs de phyags nas/ chos kyi khri rin po che thams cad kyis spras pa bshams so/ /de nas bu mo de dag gis rang rang gi bla gos phud de stan gang la byang chub sems dpa' sems dpa' chen po chos 'phags 'dug nas chos ston par 'gyur ba der bting ngo //de nas byang chub sems dpa' sems dpa' chen po rtag tu ngus sa phyogs der chag chag gdab par 'dod na/ bdud sdig can gyis chu thams cad mi snang bar byas nas/ ci nas byang chub sems dpa' sems dpa' chen po rtag tu ngus chu ma rnyed nas yid mi dga' zhing sems sdug bsngal te sems gzhan du 'gyur ba dang /dge ba'i rtsa ba nub par 'gyur ba dang / mchod pa de yang mi mdzes par bya ba'i phyir chu de dag mi snang bar byas nas/ kun du chu btsal na ma rnyed do/ /de nas byang chub sems dpa' sems dpa' chen po rtag tu ngu 'di snyam du sems te/bdag gi lus phug la khrag gis sa phyogs 'di chag chag gdab po/ /de ci'i phyir zhe na/ sa phyogs 'di ni rdul che ste/ rdul gyi khams 'di nas byung bas byang chub sems dpa' sems dpa' chen po chos 'phags kyi lus la phog na mi rung na /bdag gi lus gdon mi za bar 'jig pa 'dis ci zhig bya/ bdag gi lus 'di lta bu'i bya ba la zhig pa ni bla'i/ nus pa med pa'i bya ba la 'dod pa'i phyir 'dod pa'i gzhis 'khor ba dag na bdag gi lus brgya stong mang po de lta bu'i gnas su zhig pa ni cir yang mi rung ngo snyam mo//de nas byang chub sems dpa' sems dpa' chen po rtag tu ngus mtshon rnon po blangs te/ bdag gi lus kun du phug nas rang gi khrag gis sa phyogs de khor yug tu chag chag btab bo/ /byang chub sems dpa' sems dpa' chen po rtag tu ngu'i rjes su slob pa tshong dpon gyi bu mo la sogs pa bu mo lnga brgya po de dag thams cad kyis kyang mtshon rnon po blangs te rang rang gi lus phug nas rang rang gi khrag gis sa phyogs de chag chag btab ste/gang de dag la bdud sdig can gyis dge ba'i phyogs kyi bar chad bya bar glags rnyed par mi 'gyur bas byang chub sems dpa' sems dpa' chen po rtag tu ngu dang bu mo de dag sems gzhan du 'gyur ba med do zhes gsungs so//de bas na chos bzhi pa'i mdo las kyang / dge slong dag byang chub sems dpa' sems dpa' chen pos dge ba'i bshes gnyen srog gi phyir yang yongs su gtang bar mi bya ba dang /zhes gsungs so/ /de ltar dge ba'i bshes gnyen mi btang bas bdag la sogs pa bsrung ba la sogs pa bya'o/ /mdo sde dag la blta bas kyang ste/ byang chub sems dpa'i bslab pa'i gzhi rnams ni phal cher mdo sde dag las snang ste/mdo sde de dang de dag las byang chub sems dpa'i kun du sbyang pa dang byang chub sems dpa'i bslab pa'i gzhi rnams bcas so zhes gsungs pa'i phyir ro/ /de lta bas na de ma bltas na ltung ba 'byung ba yang mi shes pas mi spong bar 'gyur bas rtag tu mdo sde blta ba la gus par bya'o//des na 'dis ni dge ba'i bshes gnyen mi gtang ba dang / mdo sde blta bas dam pa'i chos yongs su gzung bar brjod pa yin no/ /'phags pa blo gros rgya mtshos zhus pa'i mdo las/ rigs kyi bu 'on kyang yi ge'i nges pa'i tshig gang dag gis brjod du med pa 'dus ma byas kyi chos de bsnyad pa'i yi ge'i nges pa'i tshig de dag gang len pa dang /'dzin pa dang / ston pa dang / rab tu shes par byed pa dang / 'jog pa dang / rnam par 'grel pa dang / rnam par 'byed pa dang / gsal bar byed pa dang / yang dag par rab tu ston pa 'di ni dam pa'i chos yongs su 'dzin pa zhes bya'o//rigs kyi bu gzhan yang chos smra ba gang dag mdo sde 'di lta bu 'di dag 'dzin pa dang / ston pa dang sgrub pa snying por byed pa'i chos smra ba de dag la gang bsnyen pa dang brten pa dang bsnyen bkur byed pa dang ldan pa dang rim gro byed pa dang / gus par byed pa dang /zhes byed pa dang / bsti stang byed pa dang / kun tu srung ba dang / sbed pa dang / yongs su 'dzin pa dang / gos dang zas dang mal cha dang na ba'i gsos sman dang yo byad sbyin pa dang / legs so zhes bya ba sbyin pa dang / rje bo ltar kun tu bsrung ba dang / dge ba kun tu bsrung ba dang /bsngags pa brjod pa dang / mi snyen pa 'chab pa 'di yang dam pa'i chos yongs su 'dzin pa'o/ /de bzhin du sbyar te/ rigs kyi bu gzhan yang rtsod pa med pa lhur len pa dang / chos ma yin pas rtsod pa rnams chos dang mthun par tshar gcod pa 'di yang dam pa'i chos yongs su 'dzin pa'o//rigs kyi bu gzhan yang zhe sdang med pa'i rgyud dang / sems can thams cad bsdu ba dang rab tu thar bar bya ba'i blo dang zong zing med pa'i sems kyis gzhan dag la chos sbyin pa 'di yang dam pa'i chos yongs su 'dzin pa'o/ /de bzhin du sbyar te/ rigs kyi bu gzhan yang gang chos mnyan pa'i rgyu'am chos bstan pa'i rgyur tha na gom pa gcig 'dor ram tha na dbugs gcig 'byin tam rngub kyang rung ste/'di yang dam pa'i chos yongs su 'dzin pa'o/ /rigs kyi bu gzhan yang gang chos thams cad yongs su mi 'dzin cing mi len pa 'di yang dam pa'i chos yongs su 'dzin pa zhes bya'o//de bzhin du sbyar te/ rigs kyi bu kye ma'o sems 'di ni phyin ci log gi yul la rab tu 'phyar ba ste/ gang de zlog pa dang yongs su bsrung ba dang rtse gcig tu 'gyur ba dang dul ba dang zhi ba dang nye bar zhi ba dang / 'dul ba 'di ni dam pa'i chos yongs su 'dzin pa zhes bya'o//de bzhin du sbyar ro / /rigs kyi bu gzhan yang chos gang gis chos gang 'byung ba'i chos de yongs su mi 'dzin pa dang mi len pa 'di ni dam pa'i chos yongs su 'dzin pa'o zhes bya ba la sogs pa gsungs pa bzhin no/ /de la chos smra ba la brten pa la sogs pas dge ba'i bshes gnyen mi gtang ba dang dge ba'i bshes gnyen gyi mtshan nyid ni bshad zin to//de'i phyir dam pa'i chos yongs su 'dzin pa 'di med na/ srung bar mi 'gyur dag par mi 'gyur/ 'phel bar mi 'gyur la/ de'i phyir de yang byang chub sems dpar mi 'gyur bas/nges par dam pa'i chos yongs su gzung bar bya'o/ /dpal phreng seng ge sgra'i mdo las kyang / /bcom ldan 'das byang chub sems dpa'i smon lam gang gA'i klung gi bye ma snyed gang lags pa de dag ni smon lam chen po gcig gi nang du 'ub cing 'dus te rjes su zhugs pa lags te 'di lta ste dam pa'i chos yongs su 'dzin par ro//bcom ldan 'das de ltar na dam pa'i chos yongs su 'dzin pa ni yul chen po lags so zhes gsungs so/ /yang de nyid las/ lha mo 'di lta ste dper na skyes bu stobs chen po dang ldan pas/ gnad du mi drag par bsnun na yang gnod par 'gyur zhing mi bde bar byed do/ /lha mo de bzhin du dam pa'i chos yongs su 'dzin pa chung ngus kyang bdud sdig can la gnod par 'gyur zhing mya ngan skyed de smre sngags 'don par byed par 'gyur ro/ /lha mo 'di ltar dam pa'i chos yongs su 'dzin pa chung ngus kyang bdud sdig can la gnod par 'gyur zhing sdug bsngal bskyed de/smre sngags 'don par byed pa de lta bu'i chos gzhan ni ngas gcig kyang ma mthong ngo zhes gsungs so/ /yang de las/ lha mo 'di lta ste dper na ri'i rgyal po ri rab kyi gnam 'phang dang zheng rgyas ri nag po thams cad zil gyis mnan nas kun du thal le zhing mngon par thal le 'dug go//lha mo de bzhin du theg pa chen po pa lus dang srog la mi lta ba gzung ba med pa'i sems dang ldan pa'i dam pa'i chos yongs su 'dzin pas kyang / theg pa chen po pa theg pa la gsar du yang dag par zhugs pa lus dang srog la lta ba dang bcas pa rnams kyi dge ba'i chos thams cad zil gyis gnon no zhes bya ba la sogs pa gsungs so//de skad du 'phags pa blo gros rgya mtshos zhus pa'i mdo las kyang / /de bzhin gshegs pa'i dam pa'i chos 'dzin pa/ /rgyal ba rnams kyis yongs su gzung bar 'gyur//lha dang klu dang mi'am ci rnams dang / /bsod nams ye shes kyis ni yongs su gzung / /de bzhin gshegs pa'i dam pa'i chos 'dzin pa/ /dran ldan blo gros ldan zhing blo ldan 'gyur/ /shes rab rgya chen kun nas ye shes ldan/ /mkhas pa bag chags bcas pa'i nyon mongs spong //de bzhin gshegs pa'i dam pa'i chos 'dzin pa/ /de la bdud kyis skyon chags rnyed mi 'gyur/ /de la 'gyod dang de bzhin dogs pa med/ /de la bcings med sgrib pa cung zad med/ /de bzhin gshegs pa'i dam pa'i chos 'dzin pa//zhing stong dag tu nam yang mi skye ste/ /skye ba kun du des ni rgyal ba mthong / /mthong nas de la dad pa rab tu 'thob/ /de bzhin gshegs pa'i dam pa'i chos 'dzin pa/ /chos kyi bdag nyid chen po skye dran 'gyur/ /yang dang yang du rab tu 'byung ba thob / /spyod pa yongs dag sgrub pa snying por byed//de bzhin du sbyar te/ de bzhin gshegs pa'i dam pa'i chos 'dzin pa/ /tshul khrims thob pas 'phags pa'i chos spyod pa/ /mkhas pa mngon shes lnga la myur du reg /ma sman bsam gtan rnam par thar pa thob / /de bzhin gshegs pa'i dam pa'i chos 'dzin pa//de ni zab chos rtogs par khong du chud/ /sangs rgyas spyod yul stong nyid the tshom med/ /sems can bdag med par yang mos par 'gyur/ /de bzhin gshegs pa'i dam pa'i chos 'dzin pa/ /de ni so so yang dag rig pa 'thob/ /'jigs med shes rab rno zhing chags med dag /de ni srog chags kun gyi the tshom gcod/ /de bzhin gshegs pa'i dam pa'i chos 'dzin pa/ /mkhas pa de ni gzungs rnams thob par 'gyur/ /bskal pa brgyar yang gang thos chud mi za/ /spobs dang ldan zhing chags pa med par 'gyur/ / de bzhin gshegs pa'i dam pa'i chos 'dzin pa/ /de la mkhas pa rtag tu dga' bar 'gyur/ /lha dang lha min mi ci'i yid du 'ong / /de la sangs rgyas bu gcig bzhin du bstod / /de bzhin gshegs pa'i dam pa'i chos 'dzin pa/ /brgya byin tshangs pa de bzhin 'jig rten skyong //'khor los sgyur dang mi yi rgyal por 'gyur/ /bde dang yid bdes byang chub de 'tshang rgya/ /de bzhin gshegs pa'i dam pa'i chos 'dzin pa/ /de lus sum cu rtsa gnyis mtshan ldan zhing / /mkhas pa yan lag smad pa med par 'gyur/ /de la lta bas ngoms par yong ma 'gyur//de bzhin gshegs pa'i dam pa'i chos 'dzin pa/ /gang yang chos kyi phyag rgya 'di ston pa'i/ /dge ba'i bshes gnyen de la dkon mi 'gyur/ /chos mdzod zad mi shes pa nyan par byed/ /de bzhin gshegs pa'i dam pa'i chos 'dzin pa/ / lus dang ngag dang yid kyang rnam par dag /tshul khrims ting 'dzin shes rab rnam par dag /rnam grol ye shes shin tu rnam par dag /de bzhin gshegs pa'i dam pa'i chos 'dzin pa/ /de ni byang chub sems brjed 'gyur ba med/ /pha rol phyin pa spyod dang 'gal mi 'gyur/ /dge ba brgya rnams kyis kyang rab tu gzung //zhes 'byung ngo / /tshul khrims kyi pha rol tu phyin pa'i le'u las/ dam pa'i chos yongs su bzung ba'i le'u ste gnyis pa'o// //gsum po rnams kyi bsrung ba la sogs pa'i thabs ni spyir bshad zin te/ bsrung ba la sogs pa brjod par bya'o//de la lus bsrung gang zhe na/ gnod 'gyur spong ba gang yin pa'o/ /de la zhes bya ba ni dam pa'i chos 'dzin par gnas pa ni/ ji ltar gzhan nyams par mi byed pa de ltar de'i lus bsrung ba dpyad par bya ba yin no / /gnod par 'gyur ba spong ba 'di yang 'phags pa nam mkha' mdzod kyi mdo las/byang chub sems dpa' dam pa'i chos 'dzin pa la brtson pa rnams kyis/ /bcom ldan rkang gnyis dam pa ni/ /mya ngan 'das slad bdag cag rnams/ /lus dang srog tu bcas btang ste/ /dam pa'i chos ni gzung bar spro/ /rnyed dang bkur sti spangs nas su//rten pa kun kyang rab spangs te/ /sangs rgyas ye shes ston byed pa'i/ /chos 'di yongs su mi gtong ngo / /dam pa'i chos ni gzung slad du/ /gshe dang mi snyan 'tshe ba dang / /ngan du smra ba'i tshig rnams kyang / /bzod pas de dag dang du blang / / tshul 'di rab tu bzung nas su/ /co 'dri ba dang bsdigs pa dang / /mi bsngags pa dang mi snyan pa / /de dag thams cad bzod par bgyi/ /de bzhin du sbyar te/ dge slong rgyal po rab 'khrug cing / /de ltar rab tu ma rungs pa/ /rnam par 'jig tshe sems can phyir/ /bdag cag dam chos gzung bar bgyi//mdo sde gang dag rab zab cing / /rnam grol 'bras bur ldan pa rnams/ /rab tu 'dzin par mi bgyid de / /de dag sna tshogs gtam rnams bgyid/ /de bzhin du sbyar te/ /tshul 'di rab tu bzung nas su/ /gang dag chos la mi gnas pa'i/ / sems can rnams la byams par bgyi/ /de dag la ni snying rje'ang bgyi/ /sems can rnyed dang 'dod gnas pa/ /tshul khrims 'chal pa mthong nas su/ /de yi 'gro ba cir 'gyur zhes/ /mchi ma'ang rab tu dbyung bar bgyi/ /dam pa'i chos la skur 'debs pa/ /de dag 'phral du mthong na yang //de dag gshe bar mi 'gyur bas / /ring nas byams pa btsal bar bgyi/ /rab tu bsdams nas ngag gi las/ /nyams kyis ci nus bsrung bar bgyi/ /sdig pa la ni rab gnas pa/ /de la glo bur gtam mi bgyi/ /nor sbyin de bzhin bsti stang gis/ /mi rnams yongs su smin bgyis nas//yang dag sdig med spyod yul gyi / /slad kyis de dag bskul bar bgyi/ /khyim dang sten pa kun spangs te/ /don nyung ba dang bgyid nyung ba/ /bas mtha' dgon pa'i spyod yul la/ /ri dgas bzhin du 'gyur ba bgyi/ /de bzhin du sbyar te/ /dul ba dang ni zhi ba dang //grol nas grong du zhugs nas kyang / /sems can gang dag chos tshol ba/ /de la bdag cag chos bstan to/ /chos 'dod par ni rtogs nas su / /shin tu ring du'ang mchi bar bgyi/ /chos la dga' zhing mos rnyed nas/ /lus can rnams kyi don kyang bgyi/ / sems can rnams kyi 'khrul mang po/ /de dag mngon du mthong nas kyang / /chos dang des pa rab gnas nas/ /bdag la rab tu brtag par bgyi/ /bsti stang bgyis dang ma bgyis pa / /ri rab lta bur gyur nas su/ /'jig rten gyis ni mi gos pa/ /'jig rten 'dren par 'gyur bar bgyi//dge slong tshul las nyams rnams kyi/ /mi snyan pa dag rtogs nas kyang / /las ni bdag gir bya bar bgyi/ /de dag las ni smin ma 'gyur / /chos rnams la ni gnas pa la / /deng la de 'dra'i chos rnams ni/ /ji lta bur yang yod med ces/ /gshed ma dag kyang 'gyed par 'gyur//bdag cag ming gi dge sbyong ste/ /dge sbyong yon tan med do zhes/ /yang dag bskul ba thos pa dang / /mdo sde 'di ni spong bar 'gyur/ /sna dang rna chad de dag ni/ /me long dga' bar mi 'gyur ltar/ /yang dag bskul ba thos pa dang / /de dag dam chos spong bar 'gyur//dge slong gang dag dam pa'i chos/ /rab tu 'dzin pa 'byung 'gyur ba / /de dag de bzhin tshul 'chos te/ /gang yang chos 'di mi nyan to/ /rgyal po rnams kyang bslu bar bgyid / /skye bo chen po 'byed 'gyur yang / /sangs rgyas kyis ni byin brlabs kyis/ / sems can de dag chos nyan 'gyur/ /dus ngan de tshe bdag cag rnams/ /sems can dag la phan slad du/ /lus dang srog kyang rab btang ste/ /dam pa'i chos ni gzung bar bgyi/ /zhes brjod pa yin no// //bam po gsum pa/ 'phags pa dam pa'i chos pad ma dkar po las kyang //cho ga spyod yul bsrung bya zhing / /'du 'dzi med la gtsang bar bya/ /rgyal po dang ni rgyal bu dang / /'dres byed rtag tu spang bar bya/ /rgyal po'i zhabs 'bring gang yin dang / /gdol pa zol ba chang 'tshong dang / /mu stegs can ni de dag dang / /rnam pa kun du 'dris mi bya//dge slong 'dul dang lus gnas la / /dgra bcom snyam du sems byed cing / /nga rgyal can rnams brten mi bya/ /tshul khrims 'chal rnams rnam par spang / /dgod cing smra ba'i spyod yul can/ /dge slong ma rnams rtag tu spang / /mi brtan par ni mngon pa yi/ /dge bsnyen rnams kyang spang bar bya//bud med ma ning sems can gang / /de dang 'dris byed rnam par spang / /khyim rnams su ni mna' ma dang / /gzhon nu ma rnams spang bar bya/ /khams dang legs par dri byed pa/ /de dag nam du'ang dga' mi byed/ /phag 'tshong pa dang shan pa dang / /'dris par byed pa rnam par spang //de bzhin du sbyar te/ /gang dag bud med gso byed dang / /gar mkhan gyad dang sil khrol ba/ /gang gzhan de dang 'dra ba spang / /de dag rnams dang 'dris byed spang / /res ma'i gtso mo bsten mi bya/ /ji snyed longs spyod 'tsho ba gzhan/ /shin tu dga' ba de dag kyang //rnam pa kun du yongs su spang / /mkhas pas bud med rnams la yang / /gang gi dus na chos 'chad pa/ /der ni gcig pu mi 'gro ste/ /dgod cing 'dug par mi bya'o/ /zhes gsungs so/ /'di ni gnod pa gzhan yin te/ 'di lta ste bdud kyi las so/ /shes rab kyi pha rol tu phyin pa las/byang chub sems dpa' theg pa la yang dag par zhugs nas ring po ma lon pa de la bdud sdig can shin tu brtson par byed ces gsungs pa dang / de nyid las/ kun dga' bo gzhan yang gang gi tshe byang chub sems dpa' sems dpa' chen po shes rab kyi pha rol tu phyin pa la brtson par byed pa de'i tshe/bdud sdig can rnams ji ltar na byang chub sems dpa' sems dpa' chen po 'di nur ba dang spu zing zhes byed par 'gyur zhig gu/ gang gis na 'di bla na med pa yang dag par rdzogs pa'i byang chub las sems bskyed pa gcig tsam la yang 'bri bar 'gyur zhig gu snyam nas byang chub sems dpa' mtho btsams pa nye bar sgrub po//'jigs pa kun du ston te/ phyogs phyogs su skar mda' gtong ngo / /phyogs sreg pa 'byin zhing kun du ston to zhes bya ba dang / gzhan yang rnam par shes pa la 'du shes pas yi ger 'dri ba nas kun chub par byed pa'i bar du byed cing 'di la bdag cag gis ro myang ba mi rnyed do//zhes stan las langs te 'gro bar 'gyur ro/ /de bzhin du glal ba dang / steg pas kun chub par byed pa'i bar du byed par 'gyur ba ni bdud kyi las so/ /de bzhin du ljongs dang grong la sogs pa la rnam par rtog pa dang /de bzhin du mkhan po dang slob dpon dang pha ma dang blon po dang nye du dang snag gi gnyen mtshams yid la byed pa dang / de bzhin du chom rkun yid la byed pa dang / de bzhin du gos la sogs pa yid la byed pa 'byung ngo / /gzhan yang chos smra ba ni shes rab kyi pha rol tu phyin pa zab mo 'di yi ger bri ba nas/bklag pa'i bar la 'dun par gyur la/ chos nyan pa ni le lo can du gyur pa dang / de las bzlog pa dang / chos smra ba ni yul gzhan du 'gro bar 'dod la chos nyan pa ni de lta ma yin pa yang de bzhin du sbyar ro//chos smra ba ni 'dod pa che la chos nyan pa ni 'dod pa chung ba yang de bzhin du sbyar ro/ /mdor na chos smra ba dang chos nyan pa gnyis kyis mi 'dzom par 'gyur ba de dag thams cad bdud kyi las yin no zhes gsungs so / /'phags pa nam mkha' mdzod kyi mdo las kyang / de ltar mi dge ba'i chos kyi rjes su 'jug pa dang dge ba'i chos spong ba de dag thams cad ni bdud kyi las so zhes gsungs so//'phags pa blo gros rgya mtshos zhus pa'i mdo las kyang / bcom ldan 'das gzhan yang byang chub sems dpa' dgon pa par gyur te/ bas mthar gnas mal bca' bar mngon par dga' zhing 'dod pa chung la chog shes pa ste rab tu dben pa/khyim pa dang rab tu byung ba rnams dang mi 'dre la de don nyung ba dang bgyi ba nyung bas bde bar gnas te g.yo ma mchis kyang / mang du thos pa yongs su btsal ba dang / sems can yongs su smin par bgyi ba dang /chos nyan pa la brtson pa mi gnas pa dang / chos kyi gtam dang don rnam par nges pa'i gtam gyi bar la rgyun dgum par sems te yongs su 'dri ba'i rang bzhin can ma lags/ dge ba ci zhig tshol ba la mi brtson/ de dgon pa la gnas pa dang / gcig pur dga' bas nyon mongs pa rnams kun du mi rgyu ste/de kun nas ldang ba gnon pa tsam gyis dga' ba thob cing bag la nyal yang dag par gzhom pa'i slad du lam bsgom par mi bgyid de/ de ni bdag gi don dang / gzhan gyi don gyi slad du brtson par mi 'gyur ba 'di ni/ bcom ldan 'das byang chub sems dpa'i dgon pa la gnas pa dang rab tu ldan pa'i bdud kyi lcags kyu ste bdun pa'o//de bzhin du sbyar te/ bcom ldan 'das gzhan yang byang chub sems dpa' dge ba'i bshes gnyen ltar bcos pa'i sdig pa'i grogs po gang dag de la bsdu ba'i dngos po rnams las 'dun pa bzlog pa dang / sems can yongs su smin par bgyid pa las 'dun pa bzlog pa dang /dam pa'i chos yongs su bzung ba las 'dun pa bzlog pa dang / bsod nams kyi tshogs las 'dun pa bzlog pa dang / rab tu dben pa la sbyor ba dang / don chung zhing bgyid pa nyung ba la sbyor ba dang / nyan thos dang rang sangs rgyas dang ldan pa'i bka' mchid de la rgyun du mang du ston pa dang /theg pa chen po dang ldan pa'i bka' mchid de la mi ston pa dag la bsnyen cing bsten te/ bsnyen bkur bgyid pa dang / gang gi tshe byang chub sems dpa' dben par gnas pas theg pa chen po las ldang ba'i tshe/ byang chub sems dpa' gdon mi za bar zhal ta byed par bya'o zhes byang chub sems dpa' zhal ta bgyid pa'i dri ma la sbyor ba dang /gang gi tshe byang chub sems dpa' zhal ta bgyid pa'i dri ma la sbyor ba de'i tshe dben pa la sbyor zhing de la 'di skad du byang chub ni byang chub sems dpa' brtson 'grus brtsams pa yin gyi le lo can ni ma yin no//gal te khyod bskal pa brgyad dam bcus bla na med pa yang dag par rdzogs pa'i byang chub mngon par rdzogs par sangs ma rgyas na phyis khyod bla na med pa yang dag par rdzogs pa'i byang chub mngon par rdzogs par 'tshang rgya bar mi nus so zhes mchi la/ bcom ldan 'das de la byang chub sems dpa' gang sgyid lug nas 'bras bu thob par bgyid pa'i gnas mchis nas /bcom ldan 'das 'di ni byang chub sems dpa'i dge ba'i bshes gnyen ltar bcos pa'i bdud kyi lcags kyu ste bcu pa'o/ /de las gzhan pa byang chub sems dpa'i theg pa'i gang zag dag bdud kyi lcags kyus zin pa chos ngan pa la spyod pa de dag la dga' ba rnyed pa dang de dag kyang de bzhin du de'i rjes su 'jug par gyur pa dang /de dman pa la bsten cing khyad par dang bral bas 'di lta ste/ zhan pa'i 'gro ba blun pa 'on pa lkugs pa'i 'gro ba 'gro ba dman pa nyid du mchi bar 'gyur te 'di ni bdud kyi lcags kyu bcu gcig pa'o zhes gsungs te/gang gis de ltar brtson 'grus shin tu brtsams pa skyo bar gyur pas/ rtag tu byang chub sems dpa'i dngos po nyid du mi 'gyur ba'o/ /de bas na dkon mchog sprin las/ 'di la byang chub sems dpa'i spyod lam thams cad du brtson 'grus rtsom pa na/ ci nas lus skyo bar mi 'gyur ba dang sems skyo ba mi 'gyur ba de ltar rtsom ste 'di ni byang chub sems dpa'i rtag pa'i brtson 'grus zhes bya'o zhes gsungs so/ /gang gis skyo bar 'gyur ba'i brtson 'grus te ci 'dra ba zhig yin zhe na/gang 'di stobs chung ba las lci ba'am dus ring por rtsom pa'am mos pa yongs su ma smin pa rnams bya dka' ba'i las rtsom pa ste dper na rang gi sha sbyin pa la sogs pa lta bu'o/ /'dis sems can rnams la lus byin zin mod kyi/ 'on kyang dus ma yin par yongs su spyad pa las bzlog par zad de/gzhan du na sems can de dag la byang chub sems dpa' skyo bar gyur pas / byang chub kyi sems kyi sa bon chud za ba'i phyir 'bras bu'i phung po chen po chud za bar 'gyur ro/ /de'i phyir 'phags pa nam mkha' mdzod kyi mdo las/dus ma yin par 'dod pa ni bdud kyi las so zhes gsungs so/ /dus ma yin zhes te lus gtang ba'i sems mi bskyed pa nyid kyang ma yin te/ goms pa ma brtsams pa'i phyir nam yang sbyin par mi bya bar 'gyur ro/ /de lta bas na de ltar dran pa nye bar gzhag nas byang chub kyi sems yongs su smin pa dang 'gal ba dang gti mug gis rang gi don la gnod pa dang /sha za ba dang las byed pa rnams la lus bsrung bar bya'o/ /dper na sman shing ljon pa blta sdug pa/ /rtsa ba la sogs spyad 'os sa bon ni/ /sbyin yang dus min spyad las bsrung bya ba//rdzogs pa'i sangs rgyas sman shing de bzhin no/ /mdor bsdu na bdud kyi las 'di ni gnod pa yin no/ /'di rnam par spang ba ni dkon mchog sprin gyi mdo las / rigs kyi bu ji ltar na byang chub sems dpa' bdud kyi las yongs su spong ba'i thabs la mkhas pa yin zhe na/ 'di la byang chub sems dpa' mi dge ba'i bshes gnyen thams cad kyi thams cad du yongs su spong ngo / /mi mthun pa'i yul na gnas pa dang 'jig rten rgyang pan pa'i gsang tshig bsten cing sgom pa dang / rnyed pa dang bkur sti dang mchod pa dang rim gro la chags pa thams cad nas thams cad du yongs su spong ngo //nye ba'i nyon mongs pa gang gzhan dag byang chub kyi phyogs kyi lam gyi bar du gcod pa de dag kyang thams cad nas thams cad du yongs su spong ngo / /de dag gi gnyen po yang bsten to zhes gsungs so/ /de nyid las mi dge ba'i bshes gnyen gyi mtshan nyid gsungs pa/tshul khrims nyams pa'i gang zag rnam par spangs pas sdig pa'i grogs po yongs su spangs par rig par bya'o/ /de bzhin du lta ba nyams pa dang cho ga nyams pa dang 'tsho ba nyams pa'i gang zag rnam par spangs pa dang / 'du 'dzi la dga' ba'i gang zag rnam par spangs pa dang /le lo can gyi gang zag rnam par spangs pa dang / 'khor ba la dga' ba'i gang zag rnam par spangs pa dang / byang chub la rgyab kyis phyogs pa'i gang zag rnam par spangs pa dang / khyim pa dang bsten pa rnam par spangs pa dang / sdig pa'i grogs po yongs su spangs par rig par bya ste/rigs kyi bu des de dag yongs su spong ba'i tshe/ gang zag de dag la sdang ba'i sems bskyed par mi bya'o / /khong khro ba'i sems dang brnyas pa'i sems bskyed par mi bya'o des 'di ltar bcom ldan 'das kyis kyang sems can rnams ni/ / khams so so ba bsten te/ bsten par gyur nas chud za bar 'gyur ro zhes bka' stsal to / /de bas na bdag gis bsten pa yongs su spangs par sems nye bar gzhag par bya'o zhes gsungs so/ /byang chub kyi sems brjod pa 'di yang gnod pa yin te/ de'i rgyu ni dkon mchog brtsegs pa las/'od srungs byang chub sems dpa' chos bzhi dang ldan pa'i byang chub kyi sems brjed par 'gyur te/ bzhi gang zhe na/ 'di lta ste/ mkhan po dang slob dpon dang bla ma dang / sbyin gnas la slu ba dang / gzhan 'gyod pa med par dag la 'gyod pa nye bar sgrub pa dang / theg pa chen po la yang dag par zhugs pa'i sems can rnams la bsngags pa ma yin pa dang mi snyan pa dang brjod pa ma yin pa dang /tshigs su bcad pa ma yin pa 'byin pa dang / sgyu dang g.yos gzhan la nye bar spyod kyi lhag pa'i bsam pas ma yin pa zhes gsungs so/ / 'di rnam par spang ba yang de nyid las/ 'od srungs byang chub sems dpa' chos bzhi dang ldan na skye ba thams cad du skyes ma thag tu byang chub kyi sems mngon du 'gyur te/ byang chub kyi snying po la 'dug gi bar du bar ma dor brjed par mi 'gyur ro/ /bzhi gang zhe na 'di lta ste/ srog gi phyir ram tha na bzhad gang gi phyir yang shes bzhin du brdzun gyi tshig mi smra ba dang /sgyu dang g.yo med par sems can thams cad kyi drung na lhag pa'i bsam pas gnas pa dang / byang chub sems dpa' thams cad la ston par 'du shes skyed cing de dag gi yang dag pa'i bsngags pa phyogs bzhir brjod pa dang /sems can gang rnams yongs su smin par byed pa de dag thams cad kyang nyi tshe ba'i theg pa mi 'dod par bla na med pa yang dag par rdzogs pa'i byang chub yang dag par 'dzin du 'jug pa ste/ 'od srungs bzhi po de dag go zhes gsungs so/ /seng ges zhus pa las kyang /gang zhig chos kyi sbyin pa las/ /nam yang bar chad mi byed pa/ /de ni des na rab myur ba dang / /'jig rten mgon dang phrad par 'gyur/ /de bzhin du/ chos kyi sbyin pas skye ba dran/ /gzhon nu de ltar shes par gyis/ /zhes gsungs pa dang / de skad du de nyid las/skye ba kun du byang chub sems/ /rmi lam na yang sems de ni/ /'dor mi 'gyur na ma nyal tshe/ /smos ci 'tshal bar gang gis 'gyur/ /bka' stsal pa/ grong dang grong khyer rnams su yang / /gang du gnas pa'i yul rnams su/ /byang chub la ni yang dag 'dzud/ /des na sems 'dor mi 'gyur ro//zhes gsungs so/ /'phags pa 'jam dpal gyi sangs rgyas kyi zhing gi yon tan bkod pa'i mdo las kyang / byang chub sems dpa' chos bzhi dang ldan na smon lam mi 'dor ro/ /de bzhin du sbyar te/ nga rgyal bcom pa yin/ phrag dog dang ser sna yongs su spangs pa yin/pha rol gyi 'byor pa mthong na yid dga' ba yin no zhes gsungs pa dang / dkon mchog brtsegs pa de nyid las/ spyod lam thams cad du byang chub kyi sems yongs su sbyong ba dang byang chub kyi sems sngon du 'gro ba dang zhes gsungs pa gang yin pa 'di ni 'dir byang chub kyi rgyur shin tu gsal ba nyid do//de skad du zla ba sgron ma'i mdo las kyang / khyed la mos bya khong du chud par bya/ /ji ltar ji ltar mang du mis brtags na/ /de la gnas pa'i rnam par rtog pa des/ /de lta de ltar de la sems gzhol 'gyur/ /zhes gsungs so/ / spro ba med pa yang gnod pa ma yin te/ /de spang ba ni dkon mchog sprin las mthong ste/ 'di la byang chub sems dpa' 'di snyam du mir gyur pas ni byang chub thob par dka' la/ bdag gi brtson 'grus 'di yang chung zhing zhan te/ bdag ni le lo can no/ /byang chub ni mgo dang gos la me 'bar ba bzhin du bskal pa mang po bskal pa brgya phrag mang po bskal pa stong phrag mang po bskal pa brgya stong phrag mang por bsgrub dgos pas bdag ni de lta bu'i khur bkur bar mi spro'o snyam du sems mi bskyed de/'on kyang byang chub sems dpa' ni 'di ltar de bzhin gshegs pa dgra bcom pa yang dag par rdzogs pa'i sangs rgyas gang dag mngon par rdzogs par sangs rgyas pa de dag dang /gang dag mngon par rdzogs par 'tshang rgya ba de dag dang / gang dag mngon par rdzogs par 'tshang rgya bar 'gyur ba de dag kyang / tshul 'di 'dra ba dang lam 'di 'dra ba dang brtson 'grus 'di 'dra bas mngon par rdzogs par sangs rgyas nas/mngon par rdzogs par 'tshang rgya/ mngon par rdzogs par 'tshang rgya bar 'gyur zhes bya ba nas/ de bzhin gshegs pa de dag kyang de bzhin gshegs par gyur pa sha stag las mngon par rdzogs par sangs rgyas pa ma yin gyis/ bdag kyang ci nas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba'i sems can thams cad dang thun mong gi brtson 'grus dang /sems can thams cad la dmigs pa'i brtson 'grus kyis bdag gis kyang de lta de ltar brtsal lo 'bad do zhes gsungs so//gzhan yang gnod pa ni dkon mchog brtsegs pa las mthong ste/ sems can yongs su smin par ma byas pa rnams la yid rton pa byang chub sems dpa'i 'khrul pa dang / sems can snod du ma gyur pa rnams la sangs rgyas kyi chos rgya chen po ston pa byang chub sems dpa'i 'khrul pa dang /rgya chen po la mos pa'i sems can rnams la theg pa dman pa ston pa byang chub sems dpa'i 'khrul pa dang / yang dag par nye bar gnas pa'i sems can tshul khrims dang ldan pa dge ba'i chos can rnams la brnyas shing tshul khrims 'chal pa sdig pa'i chos can sdud pa ni byang chub sems dpa'i 'khrul pa zhes bya'o //mos pa med pa yang gnod pa yin te/ /'phags pa yul 'khor skyong gi mdo las kyang / /sangs rgyas la yang mos pa yod min la/ /chos dang tshogs la de ni mos pa med/ /bslab dang sbyang ba rnams la de mi mos//sdig pa'i blo can ngan song gsum phyogs pa/ /de ni mi nang 'di nas shi 'phos nas/ /las kyi dbang gis mi mkhas rnam par rmongs/ /dmyal ba'am 'on te dud 'gro'i 'gro rnams sam/ /yi dags 'gro ba rnams su sdug bsngal rnyed/ /ces ji skad gsungs pa lta bu'o//de rnam par spangs pa ni dkon mchog brtsegs pa'i mdo las mthong ste/ chos zab mo gang dag de'i blos mi rtogs pa de la sangs rgyas kyi byang chub ni mtha' yas shing / sems can mos pa tha dad pa rnams la de bzhin gshegs pa rnams kyis chos bstan pa 'jug ste/de bzhin gshegs pa nyid kyis mkhyen gyi bdag gis ni mi shes te/ de bzhin gshegs pa nyid dbang du gyur pa yin no zhes byas nas mi spong ngo zhes bya ba'o / /zhal ta byed pa'i tshe don ma yin pa rnam par spang ba la mkhas par bya'o/ /byang chub sems dpa'i so sor thar pa las/chos dang mthun pa dang chos nyan pa dang de bzhin gshegs pa mchod pa la zhal ta bya bar bstan to/ /de la zhal ta bya ba gang yin pa ni rin po che'i phung po'i mdo las gsungs te/ de la dge slong zhal ta byed pas dge slong gi dge 'dun thams cad kyi sems mgu bar bya'o//de la dge slong dgon pa pa bas mtha'i gnas mal bsten pa gang yin pa de dag ni dge slong zhal ta byed pas thams cad du las su bsko bar mi bya'o/ /gal te dge slong dgon pa pa la dge 'dun gyi bya bar gtogs pa slob pa'i las res bab na/ dge slong zhal ta byed pa des las de bdag gis bya'o//yang na dge slong gzhan zhig bskos la las de byed du gzhug ste/ dge slong dgon pa pa la gnod par mi bya'o/ /de la dge slong bsod snyoms spyod pa gang yin pa de la dge slong zhal ta byed pa des kha zas bsod pa bgo bsha' bya'o/ /'od srungs de la dge slong gang rnal 'byor spyod pa gang yin pa de dag la/dge slong zhal ta byed pas mthun pa'i 'tshog chas dang na ba'i gsos sman dang yo byad rnams sbyin par bya'o/ /dge slong rnal 'byor spyod pa des phyogs gang la gnas pa'i sa phyogs der dge slong zhal ta byed pa des sgra chen po dang skad drag po mi dbyung zhing byed du'ang mi gzhug go//dge slong zhal ta byed pas dge slong rnal 'byor spyod pa de bsrung zhing mal cha yang sbyar bar bya'o/ /kha zas bsod pa dang yi gar 'ong pa dang rnal 'byor spyod pa'i sa dang mthun pa'i bza' ba dang bca' ba rnams sbyin par bya'o/ /de bzhin du sbyar te/ dge slong gang dag mang du thos par byed pa la brtson pa de dag spro ba bskyed par bya zhing / de dag la bsrung ba'i bar du bya'o/ /chos smra ba'i dge slong gang yin pa de dag las su mi bsko bar bya'o/ /chos nyan pa la brtson par 'gyur ba'i bar du bya'o/ /'khor gyi dkyil 'khor bsham par bya'o//'bel ba'i gtam gyis dkyil 'khor rnam par sbyang bar bya ba nas de la legs so zhes bya ba mang bar 'gyur ba'i bar du bya'o/ /de bzhin du sbyar te/ dngos po gang la yang dbang bya ba'i 'du shes bskyed par mi bya'o / /bya ba ji tsam du chung ba yang dge 'dun gyi gros bzhin bya zhing rang dgar mi bya'o//dge 'dun gyi phyogs bzhi'i dge 'dun gyi dang mi bsre ba'i bar du bya ste/ bzlog pa yang de bzhin no/ /de bzhin du mchod rten gyi dang phan tshun bsre ba yang bkag go/ /gal te phyogs bzhi'i dge 'dun la brel phongs su gyur la dge 'dun gyi rnyed pa che bar gyur na dge slong zhal ta byed pa des dge slong gi dge 'dun bsdus la gros mthun par bgyis te/dge 'dun gyi rnyed pa las phyogs bzhi'i dge 'dun la bshug par bya'o/ /mchod rten zhig ral du gyur na yang de bzhin du bya'o/ /sbyin pa po dang sbyin bdag la gsol ba thob la mchod rten gso bar bya'o//'od srungs gal te mchod rten gyi rnyed pa ji ltar mang du gyur du zin kyang de dge slong zhal ta byed pas dge 'dun dang phyogs bzhi'i dge 'dun la bshug par mi bya ste / de ci'i phyir zhe na/ dad cing dang ba mang po dag gis mchod rten 'phul ba ni tha na ras kyi kha tshar gcig tsam gang yin pa de yang lha dang bcas pa'i 'jig rten gyi mchod rten yin na/rin po che'am rin po cher smos pa dag lta smos kyang ci dgos/ /mchod rten la gos phul ba gang yin pa de ni de bzhin gshegs pa'i mchod rten de nyid du rlung dang nyi ma dang char bas dengs kyang bla'i mchod rten la phul ba'i gos dang zong gser du bsgyur du mi rung ste/mchod rten la ni mchod rten gyi zong cis kyang brel phongs pa med do/ /'od srungs dge slong gi zhal ta byed pa gang la la zhig tshul khrims dang ldan pa sbyin pa'i gnas rnams la sems khros sam dbang byed cing bsgo blag byed na de mi dge ba'i las des sems can dmyal bar 'gro bar 'gyur ro//gal te mi'i 'jig rten du 'ongs na yang bran dang gzhan gyi las byed par 'gyur ba dang khu tshur dang thal lcag dang lag cha bsnyems pas brdegs pa dang phrad par 'gyur ro/ /de bzhin du sbyar te/ dge slong la chad pas gcod pa dang /'jigs par byed pa dang bsdigs pa dang / dus ma yin par mngag pa dang dus ma yin par bsgo bar byed na/ de mi dge ba des nyi tshe ba'i sems can dmyal ba phur pa mang po zhes bya ba der skye bar 'gyur te/ phur pa stong gi bar dag gis lus la zug cing / 'bar rab tu 'bar la/ kun tu rab tu 'bar bar 'gyur ro/ /de bzhin du sbyar te/ lce'i tshad dpag tshad brgya bar 'gyur zhing de'i lce'i dbang po de la lcags phur brgya stong kun tu 'bar ba dag gis 'bugs par 'gyur ro/ /'od srungs dge slong zhal ta byed pa gang la las dge 'dun gyi rnyed pa 'dus shing 'dus pa gzhag ste dus dus su mi sbyin zhing mtho btsams la gces nas sbyin pa dang kha cig la ma byin na de mi dge ba'i rtsa ba des yi dags kyi skye gnas rgyag 'jim byin pa nub ces bya ba der skye bar 'gyur ro//der yi dags gzhan gyis kha zas blangs te de la bstan na/de bstan pa'i tshe/ mig gnyi ga mi 'dzums par zas de la blta zhing bkres pa dang skom pas nyen pa'i sdug bsngal gyi tshor ba myong gi lo brgya stong du yang zas de ni thob par mi 'gyur ro/ /ji ste brgya la brgya lam na zas de thob kyang ngan skyugs dang rnag khrag tu 'gyur ro zhes gsungs so//dge 'dun bsrungs kyi rtogs pa brjod pa las kyang gnod pa gsungs te/ dge 'dun bsrungs khyod kyis sems can rtsig pa lta bu gang dag mthong ba de rnams ni sngon dge slong yin te/ de dag gis dge 'dun gyi rtsig ngos la ngar snabs kyis ma rungs par byas pas las de'i rnam par smin pas rtsig pa dang 'dra bar gyur to//dge 'dun bsrungs khyod kyis sems can ka ba 'dra ba gang dag mthong ba de rnams kyang sngon dge slong yin te/ de dag gis dge 'dun gyi ka ba ngar snabs kyis ma rungs par byas pas de'i phyir ka ba 'dra bar gyur to/ / dge 'dun bsrungs khyod kyis sems can shing lta bu dang lo ma lta bu dang me tog lta bu dang 'bras bu lta bu gang dag mthong ba de rnams kyang sngon dge slong yin te/ de dag gis dge 'dun gyi shing dang lo ma dang me tog dang 'bras bu rnams gang zag gis yongs su spyad par spyad pas na de'i phyir shing dang lo ma dang me tog dang 'bras bu lta bur gyur to//khyod kyis sems can thag pa lta bu dang phyags ma lta bu gang dag mthong ba de rnams kyang sngon dge slong yin te/ de dag gis dge 'dun gyi thag pa dang phyags ma gang zag gis yongs su spyad par spyad pas na de'i phyir thag pa lta bu dang phyags ma lta bur gyur to//khyod kyis sems can gzhong pa lta bu gang mthong ba de sngon dge tshul ba yin te/ de gzhong pa 'khru zhing 'dug pa dang / dge slong dag cig glo bur du lhags te/ de dag gis de mthong nas dris pa dge tshul pha ci deng dge 'dun la skom lta yod dam/de ser snas non pa'i sems kyis smras pa/ ci gzhong pa bkrus pa'ang ma mthong ngam skom 'thungs zin to/ /de dag gis dus yol zin pa lta snyam du bsams nas re ba chad de dman zhing yi bsad pa'i bzhin gyis dong ngo / /de ni las de'i rnam par smin pas gzhong pa lta bur gyur to//khyod kyis sems can gtun lta bu gang mthong ba de yang sngon dge slong yin te/ de la lhung bzed kyi las shig byung ba de'i tshe/ dge tshul pha dgra bcom pa gcig cig la dam gzhag pa'i las res bab nas de la des smras pa/ dge tshul pha tshigs ma cung zhig rdungs la kho bo la byin/des smras pa gnas brtan bdag brel gyis cung zhig gzhes shig /slad kyis brdungs te gsol lo zhes byas pa dang / de khros nas smras pa/ dge tshul pha gal te kho bo gtun la reg tu rung na ni/ khyod nyid kho bos gtun gyi nang du bcug ste brdungs na tshigs ma nyung zad brdungs pa lta ci smos//dge tshul pha des de kun nas dkris pa drag pos dkris par rig nas/ gal te bdag gis de la lan blan na de bas kyang khros par 'gyur ro snyam nas kha rog ste 'dug go/ /gang gi tshe de kun nas dkris pa dang bral bar gyur pa de'i tshe de'i gan du song nas smras pa/gnas brtan khyod kyis kho bo su lags mkhyen tam/ des smras pa shes te khyod ni yang dag par rdzogs pa'i sangs rgyas 'od srungs kyi bstan pa la rab tu byung ba'i dge tshul lo / /kho bo ni dge slong gnas brtan no/ /dge tshul phas smras pa/de lta yin du zin kyang kho bos ni rab tu byung nas bya ba gang yin pa de byas so/ /ci zhig byas/ nyon mongs pa spangs so/ /'ching ba mtha' dag bcad do/ /bcings pa las rnam par grol lo/ /khyod kyis ni zhe gcod pa'i ngag gi las smras kyi nyes pa la nyes par mthol cig /'on tang las de yongs su byang zhing bsrabs te/ yongs su zad par 'gyur ro/ /des kyang nyes pa la nyes par bshags so/ /las des na gtun lta bur gyur to/ /khyod kyis sems can phru chen lta bu gang dag mthong ba de dag ni sngon dge slong rnams kyi rim gro ba rung ba byed pa yin te/de dag sman 'tshed pa'i tshe dge slong rnams kyis mi snyan pa smras pas de dag sems 'khrugs nas phru chen bcag pas de'i phyir phru chen lta bur gyur to/ /khyod kyis sems can rked par chad la skud pas thogs par gang mthong ba de yang sngon dge slong yin te//rnyed pa 'dzin par byed pa ni / /de ser snas non pas dus bsnor te dbyar gyi gang yin pa de ni dgun gyir byas dgun gyi gang yin pa de ni dbyar gyir byas pas las de'i rnam par smin pas rked par chad la skud pas thogs shing 'gro'o zhes bya ba'o/ /chos smra ba la sogs pa bsrung ba'i le'u ste gsum pa'o// //gzhan yang mdo sde dag las gnod pa chen po dag gsungs te/ re zhig 'phags pa nam mkha'i snying po'i mdo las/ rigs kyi bu rgyal po rgyal rigs spyi bo nas dbang bskur ba'i rtsa ba'i ltung ba lnga ste/ rtsa ba'i ltung ba de dag gis rgyal rigs spyi bo nas dbang bskur ba dge ba'i rtsa ba sngon bskyed pa thams cad thal bar rlog ste/pham par gyur cing lha dang mi'i bde ba'i gnas thams cad las lhung nas ngan song du 'gro bar 'gyur ro/ /lnga gang zhe na/ rigs kyi bu rgyal rigs spyi bo nas dbang bskur bas mchod rten gyi rdzas 'phrog gam dge 'dun gyi dang phyogs bzhi'i dge 'dun la phul ba 'phrog gam 'phrog tu 'jug pa 'di ni rtsa ba'i ltung ba dang po'o//gang yang chos spong zhing 'gog tu 'jug ste/ nyan thos nges par 'byung ba bshad pa'am/ rang sangs rgyas nges par 'byung ba bshad pa'am/ theg pa chen po'i nges par 'byung ba bshad pa spong zhing 'gog tu 'jug pa 'di ni rtsa ba'i ltung ba gnyis pa'o/ /gang yang nga'i phyir rab tu byung ste skra dang kha spu bregs nas gos ngur smrig gyon pa/ bslab pa gzung yang rung ma gzung yang rung / tshul khrims 'chal pa yang rung tshul khrims dang ldan pa yang rung ste/de'i gos ngur smrig 'phrog gam khyim na gnas par byed du 'jug gam lus la lag chas bsnun nam btson rar 'jug gam srog dang bral bar byed du 'jug pa 'di ni rtsa ba'i ltung ba gsum pa'o/ /rgyal rigs gang yang ched du bsams te/ ma'i srog gcod pa dang pha dang bcom ldan 'das kyi nyan thos dgra bcom pa'i srog gcod pa dang /dge 'dun mthun pa 'byed pa dang / ched du bsams te yang dag par rdzogs pa'i sangs rgyas la ngan sems kyis khrag 'byin pa ste/ mtshams med pa'i las lnga po 'di dag las gang yang rung ba'i las byed pa 'di ni rtsa ba'i ltung ba bzhi pa'o//rgyal rigs gang yang rgyu med par smra bar gyur la/ 'jig rten pha rol pa g.yel te/ mi dge ba bcu'i las kyi lam yang dag par bzung nas gnas shing sems can gzhan mang po dag kyang mi dge ba bcu'i las kyi lam yang dag par 'dzin du 'jug ste/'dul zhing 'dzud la 'god pa 'di ni rtsa ba'i ltung ba lnga pa'o/ /de bzhin du sbyar te gang yang grong 'joms pa dang ljongs 'joms pa dang grong khyer 'joms pa dang / yul 'khor 'joms par byed pa 'di yang rtsa ba'i ltung ba'o//de bzhin du sbyar te/ rigs kyi bu'am rigs kyi bu mo theg pa chen po la yang dag par zhugs pa las dang po pa rnams kyi rtsa ba'i ltung ba brgyad de rtsa ba'i ltung ba de dag gis theg pa chen po la yang dag par zhugs pa las dang po pa 'khrul pa rnams dge ba'i rtsa ba sngon bskyed pa thams cad thal bar rlog ste pham par gyur cing /lha dang mi'i theg pa chen po'i bde ba'i gnas las lhung nas ngan song du 'gro bar 'gyur/ yun ring por 'khor ba na 'khor bar 'gyur/ dge ba'i bshes gnyen dang bral bar 'gyur ro/ /brgyad gang zhe na/ sems can gang dag sngon nyes par spyad pa'i rgyus snyigs ma lnga dang ldan pa nyon mongs pa can gyi 'jig rten gyi khams 'dir skyes pa de dag ni dge ba'i rtsa ba chung ba ste/dge ba'i bshes gnyen la brten nas theg pa chen po mchog tu zab pa 'di nyan to/ /rigs kyi bu blo chung ngu de dag kyang bla na med pa yang dag par rdzogs pa'i byang chub tu sems skyed par byed la de dag gi nang nas byang chub sems dpa'i las dang po gang dag stong pa nyid dang ldan pa'i mdo sde mchog tu zab pa 'di nyan pa dang lung nod pa dang klog pa dang kha ton byed pa de dag ji ltar thos pa dang ji ltar chub par byas pa de bzhin du/snga ma'i blo dang 'dra ba gzhan dag gi mdun du/ don bzang po dang tshig 'bru bzang po rgyas par dran par byed cing rab tu ston la/ de dag ni nan tan tu ma sbyangs pa'i byis pa so so'i skye bo dag ste/ mnyan nas skrag cing dngang ste dngang bar 'gyur zhing / de dag dngangs nas bla na med pa yang dag par rdzogs pa'i byang chub kyi sems las phyir log ste nyan thos kyi byang chub la smon na 'di ni byang chub sems dpa' las dang po pa'i rtsa ba'i ltung ba dang po ste/rtsa ba'i ltung ba des rigs kyi bu de dge ba'i rtsa ba sngon skyes pa thams cad thal bar rlog ste pham par gyur cing mtho ris dang thar pa'i bde ba'i gnas las ltung ba dang de'i byang chub kyi sems kyang bslus shing ngan song du 'gro bar 'gyur ro//de lta bas na byang chub sems dpa' sems can gzhan dag dang gang zag gzhan rnams kyi bsam pa dang bag la nyal shes par byas la/ bsam pa ji lta ba bzhin du sems can rnams la bags kyis chos bstan par bya ste/dper na rgya mtsho chen por bags kyis 'jug pa bzhin du bya'o/ /de bzhin du sbyar te/ gzhan yang byang chub sems dpa' las dang po pa kha cig la 'di skad du khyod kyis pha rol tu sbyin pa drug la spyod pa spyad par mi nus/khyod kyis bla na med pa yang dag par rdzogs pa'i byang chub mngon par rdzogs par 'tshang rgya bar mi nus kyi / khyod nyan thos kyi theg pa dang rang sangs rgyas kyi theg par myur du sems skyed cig dang / des na khyod 'khor ba las nges par 'byung ngo zhes smras pa 'di ni byang chub sems dpa' las dang po pa'i rtsa ba'i ltung ba gnyis pa ste/gong du ji ltar smos pa'i bar du'o/ /gzhan yang byang chub sems dpa' las dang po pa kha cig la 'di skad du kye so sor thar pa dang 'dul ba'i tshul khrims la legs par bsrungs pas ci zhig bya/ khyod myur du bla na med pa yang dag par rdzogs pa'i byang chub tu sems bskyed la theg pa chen po lhogs shig dang /des na khyod kyis nyon mongs pa'i rkyen gyis lus dang ngag dang yid rnams kyis mi dge ba'i las gang bsgrubs pa de dag rnam par smin par mi 'gyur bar dag par 'gyur ro zhes smra ba 'di ni byang chub sems dpa'i las dang po pa'i rtsa ba'i ltung ba gsum pa ste gong du ji skad smos pa'i bar du'o//rigs kyi bu gzhan yang byang chub sems dpa' las dang po pas kha cig la 'di skad du rigs kyi bu dag khyed nyan thos kyi theg pa'i gtam ma nyan cig /ma klog cig / gzhan dag la lung ma 'bogs shig /nyan thos kyi theg pa'i gtam chobs shig /des ni khyod kyis 'bras bu chen po rnyed par mi 'gyur zhing gzhi des ni khyed kyis nyon mongs pa mthar 'byin par mi nus kyi / theg pa chen po'i gtam 'di nyid la dad par gyis shig /theg pa chen po nyon cig /theg pa chen po lhogs shig /gzhan dag la yang lung phog shig dang des na khyed kyis ngan 'gro dang ngan song gi lam thams cad zhi bar 'gyur bla na med pa yang dag par rdzogs pa'i byang chub kyang myur du mngon par rdzogs par 'tshang rgya bar 'gyur ro zhes smras la/ gal te de dag gis de'i tshig bzhin du mnyan te 'di 'dra ba'i lta bar gyur pa blangs na gnyis ka la yang rtsa ba'i ltung bar 'gyur te/de ni byang chub sems dpa' las dang po pa'i rtsa ba'i ltung ba bzhi pa'o/ /gzhan yang byang chub sems dpa' las dang po pa dag lce gnyis byed pa yin te/ gzhan du ston cing brjod pa dang sgra dang tshigs su bcad pa dang 'thob pa dang bkur sti'i phyir theg pa chen po 'di tshig tu 'don pa dang / kha ton byed pa dang / klog pa dang ston pa dang / thos pa tsam gzhan la yang ston la/ 'di skad du bdag ni theg pa chen po pa yin gyi gzhan ni ma yin no zhes smra zhing /gzhan dag gis pha rol po gang dag las longs spyod dang yongs su spyod pa rnyed par 'gyur ba de'i rkyen gyis/ 'thob pa dang bkur sti'i phyir de dag gzhan la phrag dog byed de/ de dag 'khrugs par 'gyur zhing / de dag gi bsngags pa ma yin pa brjod do/ /smod do/ / bshung ngo / /rnam par smod do/ /de dag la 'dud pa de rnams la yang phrag dog gi rgyus bdag bstod cing mi'i chos bla ma bdag nyid la sgrogs so/ /de'i phyir de dag dngos po des pham par 'gyur zhing theg pa chen po'i bde ba las lhung ste/ de dag la lci ba chen po'i ltung ba de 'byung zhing / des na ngan song du 'gro bar 'gyur ro/ /dper na mi la la zhig rin po che'i gling du 'gro bar 'dod nas gru las rgya mtshor zhugs la/ de rgya mtsho chen po'i nang du bdag nyid kyis gru bshig nas de nyid du 'chi bar 'gyur ba de bzhin du/ byang chub sems dpa' las dang po pa theg pa chen po'i rgya mtshor 'jug par 'dod pa gang dag phrag dog gi rgyus de dang de smra ste de'i rkyen gyis de dag dad pa'i gru zhig nas shes rab kyi srog dang bral bar 'gyur ro//de ltar na byang chub sems dpa' las dang po pa byis pa de dag la phrag dog gi rgyu dang brdzun gyi rkyen gyis lci ba chen po'i ltung ba 'byung ste/'di ni byang chub sems dpa' las dang po pa'i rtsa ba'i ltung ba lnga pa'o/ /gzhan yang ma 'ongs pa'i dus na khyim na gnas pa dang rab tu byung ba las dang po pa'i byang chub sems dpa' dag byang chub sems dpa' nan tan du sbyangs pa mkhas pa skyes bu chen po gzungs dang bzod pa dang ting nge 'dzin gyi sa la legs par sbyang ba byas pa rnams kyi spyod yul mdo sde zab mo stong pa nyid dang ldan pa gang yin pa theg pa chen po'i mdo sde de dag 'dzin cing tshig tu 'don la kha ton byed cing gzhan dag la yang rgya cher klog cing rab tu ston to //chos 'di dag ni kho bo nyid kyi blos rtogs nas kho bo snying rje bas de bzhin du khyod la bstan gyi khyod kyis kyang ci nas 'di sangs rgyas kyi chos zab mo rnams la mngon sum du 'gyur ba de ltar sgoms shig /de ltar byas nas khyod da ltar kho bo bzhin du ye shes mthong bar 'gyur ro zhes smra'i 'di skad du kho bos mdo sde zab mo zab pa 'di lta bu 'di bklags pa tsam gyis bstan par zad kyi mngon sum du byas nas ni ma yin no zhes ni mi smra ste rnyed pa dang bkur sti'i phyir bdag 'tshong zhing /de'i rkyen gyis dus gsum du gshegs pa'i de bzhin gshegs pa dgra bcom pa yang dag par rdzogs pa'i sangs rgyas dang byang chub sems dpa' dang 'phags pa'i gang zag thams cad kyi spyan sngar nyes pa dang bcas pa yin te lci ba chen po'i ltung bar 'gyur ro//theg pa chen pos lha dang bcas pa'i 'jig rten bslus par 'gyur ro/ /de ni nyan thos kyi theg par yang mi 'gyur na theg pa chen po la 'jug pa'i khyad par 'thob pa lta smos kyang ci dgos/bla na med pa yang dag par rdzogs pa'i byang chub lta smos kyang ci dgos dper na mi la la zhig 'brog dgon pa chen por chas la bkres pa dang skom pas nyen nas de der kha zas kyi phyir 'bras bu chen po'i shing la 'dzegs la/dri phun sum tshogs pa dang ro phun sum tshogs pa ma myangs par 'bras bu chen po'i shing bor te/ dug gi shing la 'dzegs nas dug shing gi 'bras bu zos la zos nas kyang 'chi ba'i dus byas pa ltar gang zag de yang de dang 'dra'o zhes smra'o/ / de dag rnyed par dka' ba'i mi rnyed la rnyed nas kyang dge ba'i bshes gnyen la brten te theg pa chen po la 'jug par 'dod la/ rnyed pa dang bkur sti'i rgyus bdag la bstod cing gzhan la smod pas lci ba chen po'i ltung ba 'di lta bu 'di byung ste/ ltung ba phyi lci ba des mkhas pa thams cad kyis smad par gyur pa ngan song du 'gro ba'i mi gang zag de lta bu ni rgyal rigs dang bram ze dang rje'u rigs dang /dmangs rigs thams cad kyis bsten par bya ba ma yin no/ /gang de la brten pa de ni mkhas pa thams cad kyis spang bar 'gyur te/ 'di ni byang chub sems dpa' las dang po pa'i rtsa ba'i ltung ba drug pa'o//rigs kyi bu gzhan yang ma 'ongs pa'i dus na/ rgyal rigs rnams kyi mdun na 'don gdol pa dang / blon po gdol pa dang shor ba gdol pa dang blon po mkhas pa'i nga rgyal can nor che ba longs spyod che ba dag 'byung ste/ de dag sbyin pa las byung ba'i bsod nams bya ba'i dngos po rnam pa mang po dag la snang ste/gtong bas rgyags shing dregs pa de dag nga rgyal dang rgyags pa dang dregs pa dang / rgyal rigs dang dge sbyong dang rgyal rigs rnams 'byed pa'i dbyen byed cing de dag rgyal rigs la brten nas dge sbyong rnams la chad pas gcod du 'jug chad pas nor 'phrog tu 'jug ste/gnod pa des dge sbyong de dag gang zag gi'am dge 'dun gyi'am phyogs bzhi'i dge 'dun gyi'am mchod rten gyi dag dge sbyong rnams rkur bcug nas de dag la gsug tu 'bul lo/ /gdol pa de dag gis kyang rgyal rigs de dag la 'bul bar 'gyur te de dag gnyi ga la rtsa ba'i ltung bar 'gyur ro//'di ni rtsa ba'i ltung ba bdun pa'o/ /rgyal rigs gdol pa de dag kyang dge sbyong rnams la rab tu sdang bar 'gyur te/ chos 'di lta bu ni chos ma yin par 'dogs shing chos spangs nas chos ma yin pa la 'jog par 'gyur ro/ / mdo sde dang 'dul ba dang bslab pa la mi lta zhing / nag po bstan pa dang chen po bstan pa spangs te/ snying rje chen po'i tshul dang shes rab kyi pha rol tu phyin pa'i bslab pa dang / thabs la mkhas pa'i bslab pa dang mdo sde gzhan dag las bslab pa bstan pa de dag kyang spangs nas chos 'di lta bu dang ldan pa'i dge slong rnams la gtso ba'i phyir bka' khrims gang gis dge slong rnams la gnod par 'gyur ba dang /zhi gnas dang lhag mthong dang mthun pa'i rnal 'byor yid la byed pa 'dor bar byed pa dang / 'phya ba dang gnod pa mang du 'gyur ba'i khrims 'cha' bar byed do/ / rgyu des na dge slong rnams nye bar ma zhi ba'i nyon mongs pa rnams nye bar zhi bar mi 'gyur bslabs par mi 'gyur ro/ /de'i tshe dge slong de dag bsam pa nyams par 'gyur/ tshul khrims nyams par 'gyur/ tshig nyams par 'gyur/ lta ba nyams par 'gyur ro/ /de ci'i phyir zhe na/sgyid lug par 'gyur ba dang / bya ba mang bar 'gyur ba dang / dge sbyong ma yin par dge sbyong du khas 'che ba dang / tshangs par spyod pa ma yin par tshangs par spyod par khas 'che zhing lung bong ltar spyod pas so/ /reg par bya ba'i chos ston pa de dag lhag par rgyal rigs 'khor dang bcas pas bkur sti byas par 'gyur rim gro dang mchod pa byas par 'gyur ro//de dag kyang khyim pa rnams la dge slong spong ba la brtson pa rnams kyi bsngags pa ma yin pa brjod par 'gyur ro/ /rgyal rigs 'khor dang bcas pa de yang dge slong spong ba la brtson pa rnams la rab tu sdang bar 'gyur 'phya bar 'gyur te/des na dge slong spong ba la brtson pa rnams kyi longs spyod dang nye bar spyod pa gang yin pa de dge slong kha ton byed pa la dga' ba rnams la byin par 'gyur te/ de dag gnyi ga la yang rtsa ba'i ltung bar 'gyur ro/ /de ci'i phyir zhe na/ dge slong bsam gtan pa ni zhing dam pa yin gyi/klog pa dang zhal ta byed pa la gnas pa dang klog pa la brtson pa ni ting nge 'dzin dang gzungs dang bzod pa'i sa rnams kyi snod du gyur pa'am shin tu sbyin gnas su gyur pa'am / snod du gyur pa dang / 'jig rten la snang bar byed pa'am lam nye bar ston par byed pa'am las kyi zhing dang nyon mongs pa'i zhing las sems can rnams sgrol ba dang mya ngan las 'das par 'gro ba'i lam la 'jog pa ma yin pa'i phyir te/rigs kyi bu brgyad po 'di dag ni rtsa ba'i ltung ba'o zhes gsungs so/ /'di dag gis nges par 'byung ba yang mdo 'di las gsungs pa ni/gal te byang chub sems dpa' de dag byang chub sems dpa' sems dpa' chen po nam mkha'i snying po'i ming thos nas ngan song du ltung bas 'jigs pa'i phyir mthong bar 'dod cing rtsa ba'i ltung ba 'chags par 'dod la/ gal te de dag byang chub sems dpa' nam mkha'i snying po la phyag 'tshal zhing de'i ming yang brjod na/rigs kyi bu de dag gi mdun du skal pa ji lta ba bzhin du de rang gi gzugs kyis gnas par 'gyur te/ bram ze'i gzugs nas bu mo'i gzugs kyi bar gyis mdun du gnas par 'gyur ro/ /byang chub sems dpa' las dang po pa de la ltung ba ji lta bu byung ba de dag 'chags su 'jug go//de thabs la mkhas pa zab mo dang / theg pa chen po la spyad pa'ang nye bar ston to/ /phyir mi ldog pa'i sa'i bar la yang rab tu 'jog go/ /de bzhin du sbyar te/ gal te de la gsol ba 'debs pa gang yin pa de dag la mngon du ston par mi byed na byang chub sems dpa' las dang po pa nyes pa dang bcas pa des tho rangs langs la shar phyogs su bltas te 'dug la bdug pas bdug par bya/lha'i bu skya rengs la gsol ba gdab par bya ste/ tshig 'di skad du skya rengs skya rengs snying rje chen po skal ba chen po khyod 'dzam bu'i gling du shar ma thag tu snying rjes bdag la khebs par mdzad du gsol//nam mkha'i snying po snying rje chen po dang ldan pa la yang bdag gi tshig gis myur du bskul te thabs gang gis bdag ltung ba 'chags par 'gyur ba dang / theg pa chen po 'phags pa la thabs dang shes rab 'thob par 'gyur ba'i thabs de dag bdag gi rmi lam du bstan du gsol zhes smras pa /de'i tshe de mal du gnyid log par bya ste 'dzam bu gling 'dir skya rengs shar ma thag tu byang chub sems dpa' sems dpa' chen po nam mkha'i snying po dang phrad par 'gyur te/byang chub sems dpa' las dang po pa de'i rmi lam du de'i gzugs mdun du 'dug ste rtsa ba'i ltung ba de dag 'chags su 'jug go/ /de la theg pa chen po'i thabs kyi thabs shes pa 'di lta bu yang bstan te/ thabs shes pa la mkhas pa des byang chub sems dpa' las dang po pa des de nyid du byang chub kyi sems mi brjed pa zhes bya ba'i ting nge 'dzin 'thob po//theg pa chen po la brtan por gnas par yang 'gyur ro zhes bya ba la sogs pa yin no/ /yang na mdo sde de nyid las gsol ba gdab pa'i sngags sngar smos pa gang yin pa des cho ga 'di byas te de las 'di skad du byung ngo //dgon pa'am nags 'dab bam bla gab med par a ka ru'am rgya spos sam dus kyi rjes su 'brang bas bdugs la thal mo sbyar te phyogs dang phyogs mtshams kun du yan lag lngas phyag byas la/ sngags kyi tshig 'di dag brjod par bya'o//'di lta ste/ su smri sha su smri sha/ kA ru Ni ka /tsa ra tsa ra/ bi tsa ra bi tsa ra / sany+tsa ra/ kA ru Ni ka /mu ra mu ra be ga d+hA ri/ mA tsa le/ b+hu dzA sha ta/ kA ru Ni ka / tsin+ta ma Ni pU rA ya/ kA ru Ni ka sarba sha me s+thA pa ya/ A dz+nyA d+hA rI s+phu gung s+phu gung / ru ti bi be ka gu/ dri Sh+Ti bi be kaM gu/ pU ra ya kA ru Ni ka /pU ra yan tu ma ma sarba A sha /sarba pa thaM tsa/ a sho ka ga ti swAhA/ cho ga ni snga ma bzhin no/ /nad dang sdug bsngal thams cad dang 'jigs pa thams cad dang yo byad kyis phongs pa thams cad bsal ba dang 'dod pa thams cad sgrub pa'i phyir bya'o/ /gal te rgyal rigs la sogs pa byang chub sems dpa' yin na ji ltar de dag gi ltung ba nges shing gzhan dag ni ma nges ji ste de dag sdom pa can ma yin na ni/de dag gis ltung bar ji ltar rnam par gzhag cing / sdom pa can dag nyes pa des zin par yang ji ltar 'gyur zhe na/ 'di ni nyes pa med de gang du gang dag la mang du 'byung ba de dag la der rang gi ming nas smos te bstan nas 'jigs pa bskyed pa'i phyir bzlog go//thams cad kyis kyang phan tshun du ltung ba thams cad sprang bar bya'o/ /rang bzhin gyis kha na ma tho ba che bas na gang gi yang dag par ma blangs ba na yang skal ba med pa dang dge ba'i rtsa ba 'chad par 'gyur ba des sdom pa can la shin tu ches 'gyur te de ltar dpyad pas chog go//thabs la mkhas pa'i mdo las kyang rtsa ba'i ltung ba gsungs te/ rigs kyi bu gzhan yang byang chub sems dpa' so sor thar pa'i bslab pa la slob cing bskal pa brgya stod du rtsa ba dang 'bras bu za bar gyur la/sems can rnams kyis legs par smras pa dang nyes par smras pa bzod kyang nyan thos dang rang sangs rgyas dang ldan pa'i yid la byed pas gnas na 'di ni byang chub sems dpa'i ltung ba lci ba'o/ /rigs kyi bu 'di lta ste dper na nyan thos kyi theg pa can la rtsa ba'i ltung ba byung na phung po de nyid kyis yongs su mya ngan las 'da' ba'i skal ba med do//rigs kyi bu de bzhin du ltung ba ma bshags shing nyan thos dang rang sangs rgyas yid la byed pa de ma spangs na sangs rgyas kyis la yongs su mya ngan las 'da' ba'i skal ba med do zhes 'byung ngo //rtsa ba'i ltung ba 'di dag bde blag tu gzung ba dang 'ga' zhig gi lugs gnas par bya ba'i phyir bsdu ba'i tshig le'ur byas pa dag brjod par bya'o/ /dkon mchog gsum gyi dkor 'phrogs pa/ /phas pham pa yi ltung bar 'dod/ /dam pa'i chos ni spong byed pa//gnyis par thub pas gsungs pa yin/ /tshul khrims 'chal pa'i dge slong la'ang / /ngur smrig 'phrog dang brdeg pa dang / /btson rar 'jug par byed pa dang / /rab tu byung las 'bebs pa dang / /mtshams med lnga po byed pa dang / /log par lta ba 'dzin pa dang / / grong la sogs pa 'jig pa yang / /rtsa ba'i ltung bar rgyal bas gsungs/ /blo sbyangs ma byas sems can la/ /stong pa nyid ni brjod pa dang / /sangs rgyas nyid la zhugs pa dag /rdzogs pa'i byang chub zlog pa dang / /so sor thar pa yongs spangs te/ /theg pa chen la sbyor ba dang / / slob pa'i theg pas chags la sogs/ /spong bar 'gyur ba min zhes 'dzin/ /pha rol dag kyang 'dzin 'jug dang / /rang gi yon tan brjod pa dang / /rnyed pa dang ni bkur sti dang / /tshigs bcad rgyu yis gzhan smod dang / /bdag ni zab mo bzod pa'o zhes/ /log pa nyid ni smra ba dang //dge sbyong chad pas gcod 'jug dang / /dkon mchog gsum gyi sbyin byed dang / /sbyin pa len par byed pa dang / /zhi gnas 'dor bar byed pa dang / /yang dag 'jog gi longs spyod rnams/ /kha ton byed la sbyin pa rnams/ /de dag rtsa ba'i ltung ba ste/ /sems can dmyal ba chen po'i rgyu//rmi lam 'phags mkha' snying po yi / /mdun du 'dug ste bshags par bya/ /byang chub sems ni yongs 'dor dang / /chags dang ser sna mi zad pas/ /slong la sbyin par mi byed dang / /bsgrims te dga' bar byed pa na/ /sems can la ni mi bzod par/ /khros pas sems can brdegs pa dang //nyon mongs pa dang gzhan mthun pas/ /chos ltar bcos pa brjod pa'o/ /'phags pa sa'i snying po'i mdo las kyang / tshangs pa chen po gang de'i phyir rab tu byung ba/ tshul khrims 'chal pa sdig pa spyod pa'i/ dge slong mdongs pa shing rul pa lta bur gyur pa/dge sbyong ma yin pa la dge sbyong du khas 'che ba / tshangs par spyod pa ma yin pa la tshangs par spyod par khas 'tshe ba/ nyon mongs pa sna tshogs kyis bshig pa ltung ba pham pa yin yang tshul khrims 'chal pa sdig pa spyod pa'i dge slong de de'i tshe na yang lha thams cad dang mi rnams kyi bar dang bsod nams kyi gter dag gi bar ston pa dang dge ba'i bshes gnyen yin no//de snod du gyur pa ma yin du zin kyang / skra dang kha spu bregs te gos ngur smrig bgos pa dang spyod lam bstan pa'i rgyu des kyang sems can mang po dag gi dge ba'i rtsa ba sna tshogs ston par byed pa dang bde 'gro'i lam ston pa yin no//de lta bas na nga'i phyir rab tu byung ba tshul khrims dang ldan pa'am tshul khrims 'chal pa yang rung ste/ gang nga'i phyir rab tu byung ba la 'khor los sgyur ba'i rgyal po yang chos dang mthun pas kyang lus la chad pas gcod pa dang btson rar 'jug pa dang yan lag dang nying lag gcod pa dang srog gcod du mi gnang na chos ma yin pa lta ci smos/chos 'dul ba la shi ba lta bur brjod du zin na gang zag de gi wang dang gla rtsi dang mtshungs so zhes gsungs so/ /yang de nyid las/nga'i phyir rab tu byung ba snod du gyur tam snod du ma gyur kyang rung ba rnams la gang dag 'tshe ba de dag thams cad ni dus gsum du gshegs pa'i sangs rgyas thams cad la shin tu nyes pa dang bcas pa yin no/ /dge ba'i rtsa ba chad pa dang rgyud tshig pa dang mnar med par gzhol ba yin no zhes gsungs pa dang /yang de nyid las/ 'di lta ste/ sangs rgyas thams cad kyis byin gyis brlabs pa'i gos ngur smrig 'di ni thar pa'i rgyal mtshan yin no zhes gsungs pa dang / yang de nyid las de'i tshe nyan thos khrag khrig brgya stong mang po dang / byang chub sems dpa' khrag khrig brgya stong mang po dag sngon byas pa'i las kyi sgrib pa 'di lta bu bcom ldan 'das la 'chags te/btsun pa bcom ldan 'das bdag cag gis ni sngon gyi de bzhin gshegs pa rnams kyi gsung rab la snod du gyur pa dang snod du ma gyur pa rnams dang / sangs rgyas bcom ldan 'das rnams kyi nyan thos kyi theg pa can gyi gang zag la smad do//bshungs so khros so/ /bsngags pa ma lags pa dang mi snyan pa'i bka' mchid brjod do/ /las kyi sgrib pa des na bdag cag ngan song gsum du sdug bsngal gyi tshor ba drag po mi bzad pa rnam pa mang po myong ngo //de bzhin du sbyar te/ bdag cag las kyi sgrib pa'i lhag ma de da ltar bcom ldan 'das la 'chags so/ /kha cig ni bdag cag gis bcom ldan 'das kyi nyan thos rnams la tshig gis bsdigs so/ /spyos brgyad do zhes 'dzer to/ /kha cig ni bdag cag gis bcom ldan 'das kyi nyan thos snod du gyur pa dang /snod du ma gyur pa rnams la brdegs / bsnun to zhes 'dzer to/ /kha cig ni bdag cag gis bcom ldan 'das kyi nyan thos kyi gos phrogs so zhes 'dzer to/ /kha cig ni bdag cag gis bcom ldan 'das kyis nyan thos rnams kyi longs spyod pa dang yongs su spyod pa rnams phrogs so zhes 'dzer to//kha cig ni bdag cag gis bcom ldan 'das kyi phyir rab tu byung ba rnams khyim par phab ste/ gnas ma lags pa thob par bgyis so zhes 'dzer to/ /kha cig ni bcom ldan 'das bdag cag gis sangs rgyas bcom ldan 'das rnams kyi nyan thos snod du gyur pa dang snod du ma gyur pa dang snod du ma gyur pa nongs pa ma mchis pa rnams khri mon du stsal te bdag cag las kyi sgrib pa des bskal pa mang por ngan song gsum du sdug bsngal drag po mi bzad pa rnam pa mang po myong ngo zhes 'dzer to//de bzhin du sbyar te/ bdag cag da ltar las kyi sgrib pa'i lhag ma de bcom ldan 'das la 'chags so/ /slan chad kyang sdom par bgyid do/ /bdag cag la thugs brtse ba'i slad du bcom ldan 'das kyis gzung du gsol/ /bcom ldan 'das kyis bdag cag ngan song mi bzang pa las gdon du gsol zhes rgya cher gsungs so// //bam po bzhi pa/ rab tu byung ba'i bar du gcod pa'i mdo las kyang gnod pa gsungs te/ ming chen khyim pa chos bzhi dang ldan na skye ba de dang der mi dal ba rnyed par 'gyur/dmus long dang blun pa dang lce med pa dang gdol par 'gyur/ nam du yang bde bar mi 'gyur/ skur pa 'debs pa mang bar 'gyur/ za ma dang ma ning dang / rtag par bran dang bud med du 'gyur/ khyi dang phag dang bong bu dang rnga mo dang / sbrul gdug par 'gyur ro/ / bzhi gang zhe na/ ming chen 'di la khyim pa sngon gyi rgyal ba rnams la lhag par byas pa'i sems can rnams kyi mngon par 'byung ba'i sems dang rab tu 'byung ba'i sems dang 'phags pa'i lam gyi sems kyi bar chad byed pa 'di ni dang po'o/ /gzhan yang nor la chags shing bu la chags nas las kyi rnam par smin pa la yid mi ches te/bu'am bu mo'am chung ma'am nye du'i tshogs dbang phyug gi gnas la 'khod pa rab tu 'byung ba'i bar chad byed pa 'di ni gnyis pa'o zhes gsungs so/ /gzhan gnyis ni dam pa'i chos spong ba dang / dge sbyong dang bram ze rnams la khong khro ba'o//mi dge ba bcu'i las kyi lam gyi gnod pa ni dam pa'i chos dran pa nye bar gzhag pa las/ rnam par smin pa drag po gsungs pa lta bur blta ste/ de las cung zad tsam zhig brjod par bya'o/ /srog gcod pa'i rnam par smin pa nyung zad cig smos pa 'di lta ste/me lce la rgyu ba zhes bya ba'i bya ni gang dag me'i rtse mo la gnas kyang mi 'tshig pa ste/ shin tu dga' zhing sems can dmyal ba pa rnams kyi mgo brtol nas khrag 'thung ngo / /thod pa'i phrag na rgyu ba zhes bya ba'i bya ni gang dag glad pa brtol nas rab tu 'bar zhing glad rgyas 'thung ba'o//lce'i sha za zhes bya ba'i bya ni gang dag lce dral nas mngon du za ba ste/ lce de zos shing zos nas yang skye ste/ pad ma'i 'dab ma bas kyang 'jam mo/ /de ltar don dang mthun pa'i ming can no/ /so 'byin zhes bya ba dang / mgul ba'i ming pa 'dren zhes bya ba dang /glo ba la gnas pa dang / pho ba za ba dang / mchin pa bzlog pa dang / rgyu ma'i nang spri za ba dang / sgal tshigs la dga' ba zhes bya ba dang gshis kyi gsang ba pa zhes bya ba'i bya rnams ni gang dag gshis thams cad phye ste gshis kyi bu ga brtol nas bu gar zhugs te du bzhin pa rnams kyi rkang gi snying khu 'thung ba'o //khab kyi bu ga zhes bya ba'i bya ni gang dag khab lta bu'i mchus khrag 'thung ba'o/ /de bzhin du rus pa'i phrag na gnas pa dang / pags pa dag za ba dang / sder mos 'brad pa dang / tshil za ba dang / rgyus pa 'don pa dang / skra shad 'dzings pa zhes bya ba'i bya rnams ni gang dag skra rtsa nas 'don pa'o//de ltar de mnar med pa'i phyogs gcig na bya 'dab 'jigs zhes bya ba dpag tshad sum 'bum par gyur te bya de dag dang sems can dmyal ba'i bya gzhan dag dang lhan cig tu de la lo brgya stong du mar za yang yang skye'o/ /de brgya la zhig na de las thar kyang de sdug bsngal mang por bskor te/sa phyogs gnyis pa g.yang sa'i ngam grog ces bya ba der 'gro zhing mgon tshol skyabs tshol dpung gnyen tshol lo/ / khor yug tu me'i phung po bcu gcig gis bskor te/ las kyi zhags pas bcings shing grogs med la/ dgra rnams kyis khor yug tu bskor te dgon par phyin te/ de sngar gyi sems can dmyal ba'i tshogs thams cad pas ches lhag pa'i sdug bsngal rnyed cing ngam grog rab lhung zhes bya ba'i g.yang sa'i phyogs su rgyug ste/ ltung nas rkang pa shin tu zhu'o/ /bteg na ni yang shin tu gzhon zhing shin tu 'jam par skye la tshor ba drag po mi bzad pa rnams kyis nyen to//de ltar 'jigs pas dkrugs pa'i bzhin du gyur nas rkang lag dang yan lag dang nying lag thams cad rab tu zhu ba de la sa phyogs der ngam grog ces bya ba'i g.yang sa 'byung ste/ de phyogs dar lhung zhing ngam pa nas dpag tshad sum 'bum du yang g.yang du lhung zhing /yang las kyis byas pa'i rlung gis 'debs so/ /de lhung ba na bya kang ka dang khwa dang / bya rgod dang 'ug pa rnams za'o/ /de ltar de bteg cing lhung ba ni lo brgya stong phrag du ma 'da' bar 'gyur ro/ /brgya la zhig na de nas thar kyang yongs su bskor ba'i 'khor lo'i mtshan ma'i phrag ces bya ba'i phyogs su rgyug ste/sa phyogs der yang 'khor lo rdo rje'i ste ba can me lce rnon po 'bar ba myur du bskor ba'i 'khor lo stong 'byung bar 'gyur te/ de der song ma thag tu lus la 'khor lo de dag bab nas 'khor ro//de bzhin du sbyar te/ yan lag so so thams cad kyang bshig nas bsreg go/ /de'i rkang mthil nas ni gsal shing gis 'bigs so/ /de ltar gnad 'joms pa'i ri la gnad 'joms pa'i srog chags su gyur pa rnams kyis phyi nang rdul phra rab tsam yan chad kyang zos par 'gyur ro//zos shing zos nas kyang yang shin tu gzhon par skye'o/ /shin tu gzhon sha can nyid kyis kyang sdug bsngal drag po 'byung bar 'gyur te/ zos shing zos nas kyang de la sha ches che bar skye bar 'gyur te/ srog gcod pa byas shing bsags pa de'i 'bras bu ni de yin no//ma byin par len pa'i rnam par smin pa gsungs pa/ nyes par byas pa'i las kyi mtha' byed pa de/ mgal me bskor ba dang sprul pa dang dri za'i grong khyer dang smig rgyu lta bu'i nor gyi rnam pa chen por gyur pa rin po che dang gos dang nor dang 'bru mang po mthong ste/ chags pas zil gyis non cing las kyis rmongs par gyur pa de 'di ni bdag gi yin no snyam du sems te/ de ltar rmongs pa sdig pa byed pa de/ me mdag dang lci skam gyi me rab tu 'bar ba 'bogs nas/ nor yod pa der brgyugs pa dang / der gshin rje'i mi las kyis byas pa rnams kyis bzung nas mtshon cha 'bar ba'i nang du khrid de yan lag dang nying lag thams cad gshegs gtubs nas/bsregs te rus pa 'ba' zhig lus par byed de/ de lta bu'i gnas su son kyang de'i chags pa thog ma med pa nas zhugs pa de yongs su 'bri bar mi 'gyur ro zhes bya ba'o//'dod pas log par g.yem ba'i dbang du byas te/ de ltar sdig pa byed pa de mtshon cha'i nyam nga ba de las thar nas me mdag dang lci skam gyi mer 'bogs te/ las kyis bskos pa'i sa phyogs log par mthong ba zhes bya ba gzhan du 'gro'o/ /der yang dran pa nyams par gyur pa des sngon gang dag mthong ba lta bu'i bud med las kyis byas pa dag mthong ste/mthong nas kyang de'i 'dod chags thog ma med pa'i dus nas goms pa'i me 'byung ngo / /de bud med de dag ga la ba der brgyugs pa dang / las kyis byas pa'i lcags kyi rang bzhin gyi mi de dag gis de bzung ste/bzung nas kyang kha'i mchu la sogs pa ci nas lus de la lhag ma yungs 'bru tsam yang mi lus pa de ltar za yang yang skye'o yang za'o/ /de tshor ba drag po mi bzad pa myong yang 'dod chags kyi me de las mi ldog ste bud med de dag ga la ba der yang rgyug go/ / de'i gnod pa de ni 'dod chags kyi me ji lta ba de ltar mi gnod pa ma yin no/ /rdo rje dang lcags kyi bud med de dag kyang lus rab tu 'bar zhing me lce 'khrug pas mi de bzung nas sems can dmyal ba pa de'i lus thams cad bye ma bcangs pa bzhin du bkrum yang slar 'byung ste snga ma bzhin no/ / de bzhin du sbyar te/ /rnam pa kun tu nor 'jig dang / /ngan song rtsa ba bud med yin/ /mi gang dag ni bud med 'dod/ /de dag bde bar ga la 'gyur/ /zhes bya ba nas/ /bud med phung bar byed pa ste / /'jig rten 'di dang pha rol phung / /gal te bdag la phan 'dod na/ /de bas bud med rnam par spang //zhes bya ba'i bar du gsungs so/ /brdzun du smra ba'i dbang du byas te/ de gshin rje'i mi de dag gis bzung ste/ bzung nas kyang de'i kha phye nas de nas lce 'dren te/ las kyi dbang dang brdzun du smra ba de'i 'bras bus lce dpag tshad lnga brgya par 'gyur te / de'i lce 'byung ba'i dus na gshin rje'i mi dag gis lcags kyis rab tu 'bar ba la bldag tu 'jug go//las kyis byas pa'i gshin rje'i thong lcags 'bar ba dang ldan pa stong yang 'byung zhing glang bu stobs dang ldan pa rnams kyis de'i lce la rmo bar 'gyur te/ der rnag dang khrag dang srin bu 'dzag pa'i chu 'bab par 'gyur ro//de bzhin du sbyar te lce de yang lha rnams kyi mig ji lta ba de bzhin du shin tu gzhon pa nas/ de tshor bas nyam thag pa zhes bya ba'i bar du ste/ 'khun cing ngu la ku co 'don kyang de la sdug bsngal [(]sal [,]sel [)]ba su yang med do/ /zhes rgya cher gsungs pa dang / de ltar tshor ba drag po myong ba lce de la lo brgya stong du mar lce rmo bar 'gyur zhing de'i lce de ji ste na dmyal ba pa'i kha'i nang du chud par 'gyur ro/ /de 'jigs pas dkrugs pa'i bzhin du gyur cing gar bab bab tu 'bros so/ /me mdag dang lci skam gyi me'i nang du nub cing tshig la de de ltar sdug bsngal gyis nyam thag pa na/skyabs med dpung gnyen med cing gshin rje'i mi lag na tho ba dang ral gri thogs pa dag 'byung ste/ de dag gis mi de'i glad pa nas rkang pa'i bar du phye mar rlog go zhes bya ba la sogs pa gsungs pa yin no/ /phra ma byed pa'i rnam par smin pa ni brdzun du smra ba dang mthun no//lce dpag tshad sum brgya par 'gyur te zhes bya ba ni bye brag ste/ gshin rje'i mi snying rje med pa de dag gis lce rab tu 'bar ba la bzung nas gshegs par byed do/ /wa dag kyang phyogs gzhan nas za zhing mchog tu drag pa'i sdug bsngal myong la du zhing ku co 'don to / /lce med pas sgra mi gsal lo zhes bya ba la sogs pa'o//ngag rtsub mo'i rnam par smin pa gsungs pa ni/ de dag gis de'i kha phye nas lce bzung ste/ bzung nas kyang mtshon rnon pos bcad de/ de nyid kyi zas su slar yang khar bcug la de yang bkres pas nyam thag cing bkres pa'i rang bzhin gyis rang gi khrag dang kha chu 'dzag pa dang lce de nyid za'o//lce de yang bcad cing bcad nas kyang las kyi dbang gis slar yang skye zhing / de sdug bsngal gyis nyam thag pas sa la 'dre ldog cing ku co 'don to/ /de ltar sdug bsngal gyis nyam thag cing mig gi 'bras bu yongs su 'gyur la sdug bsngal gyis nyam thag pa dman pa grogs med pa gcig pur gyur pas rang gis byas pa la spyod pa de la gshin rje'i mi rnams kyis rjes su bstan pa'i tshigs su bcad pa smras pa/khyod kyis lce yi gzhu yis ni / /rtsub mo zhes ni gang brjod pa//ngag gi mda' rnon 'phangs gyur pas/ /de yi 'bras bu 'di 'ongs so/ /zhes bya ba'o/ /tshig 'khyal ba'i rnam par smin pa gsungs pa ni/ de'i lce de zangs rab tu 'bar bas bsreg go/ /lce bsregs nas mgul pa bsreg go/ /mgul pa bsregs nas snying bsreg go/ / snying bsregs nas rgyu ma bsreg go/ /rgyu ma bsregs nas pho ba bsreg go/ /pho ba bsregs nas kyang thur du 'byung ngo / /gshin rje'i mis tshigs su bcad pa/ snga phyi'i tshig ni ma 'brel cing / /don med pa dang 'chal gyur la/ /ma 'brel khyod kyis gang smras pa/ /de yi 'bras bu 'dir 'ongs so//gang dag bden bar mi smra zhing / /kha ton lhur len mi byed pa/ /de la mkhas pas lcer mthong gi /sha dum nyid du min nam ci/ /zhes bya ba'o/ /brnab sems kyi rnam par smin pa gsungs pa ni/ de la las kyis byas ba'i rdzas gzhan gyis yongs su bzung ba gsob gsog snying po med pa mthong nas las kyis bskul ba rmongs pa de 'di snyam du 'di ni bdag gi yin no snyam du sems te/de nas sems can dmyal ba pa de rdzas ga la bder brgyug go/ /sems can dmyal ba des nor gang mthong ba de ni brnab sems zhes bya ba yid kyis mi dge ba kun tu bsten cing bsgoms la mang du byas pa de'i 'bras bu yin te/de ltar mthong ba na brnab sems mang ba de'i lag nas mtshon cha 'byung ste/ des der brgyugs pa dang sems can dmyal ba pa gzhan de dag gi lag nas kyang mtshon cha rnams 'byung ste/ de dag dang de mtshon chas 'thab pa la ci nas lus la sha yungs 'bru tsam yang mi lus pa de ltar bzhar te keng rus nyi tshe lus par byed do//de bzhin du sbyar te/ /gzhan dag 'byor pa mthong nas ni/ /bdag gir gyur cig snyam bsams pa/ /brnab sems yang dag bskyed gyur pa/ /las de'i 'bras bu 'ongs pa yin/ zhes bya ba'o/ /gnod sems kyi 'bras bu gsungs pa ni/ las kyis bskyed pa'i seng ge dang gzig dang sbrul khro bas zil gyis non pa rnams de'i mdun na 'dug pa de dag gis de 'jigs skrag nas gar bab bab tu bros kyang mi dge ba'i las kyis de 'bros ji ltar nus/ de dag gis de bzung ste bzung nas kyang thog mar glad pa la za ba nas sbrul mche ba gdug pa rnams kyis rtsib logs kyi bar du bzung zhing za la stag rnams ni rgyab nas za bar 'gyur ro//rkang pa ni mes bsregs so/ /gshin rje'i mi rnams kyang rgyang ring po nas mda' 'phen to zhes rgya cher ro/ /log par lta ba'i 'bras bu ni dpag tu med pa gsungs te mdor bsdus nas brjod pa ni mtshon cha'i char dang /mtshon rtse gcig pa dang / rdo rje'i char dang / gnam lcags dang / rdo'i char rnams kyis btab cing me'i phung po bcu rnams dang kha nas bkres pa dang skom pa'i me 'byung bas kyang rgyun tu sreg go zhes bya'o//'dod pa ni gnod pa thams cad kyi rtsa ba ste/ de dag gis shin tu yid 'byung bar bya'o/ /ji ltar 'di nyid las/ me thab ces bya ba'i sems can dmyal ba yod de/ der las gang gis sems can rnams skye zhe na/ gang dge sbyong ma yin pa la dge sbyong du khas 'che zhing bud med kyi glu dang gar dang rgyan rnams kyi sgra thos pa dang dgod pa dang 'jo ba dang rtse ba rnams thos nas/tshul bzhin ma yin pa yid la byed pas 'phangs pa'i blos khu ba 'chor par 'gyur ro/ /de bzhin du sbyar te/ der sems can dmyal ba pa de dag lcags kyi char pas yan lag dang nying lag thams cad phye mar rlog la me ma mur gyi char gyis kyang sreg cing 'tshig go zhes bya ba la sogs pa gsungs pa bzhin no//de ltar sngon 'dod pa nyams su blangs pa dran pas pad ma zhes bya ba'i sems can dmyal ba gsungs te/ myong ba rmi lam du dran pas kyang der sems can dmyal ba pa de dag phru ba rnams su btso zhing gzhong khong du lcags kyi gtun rnams kyis brdung ngo zhes rgya cher ro//de de ltar lha'i bu mo 'dod pa'i phyir tshangs par spyod pa yongs su bsngo bas na/ pad ma chen po zhes bya ba'i sems can dmyal bar gsungs te/ de na tsha sgo can gyi 'bab chu dba' rlabs can zhes bya ba 'bab ste/'bab chu de la nya gang yin pa de dag ni sems can dmyal ba pa de dag go/ /rus pa gang yin pa de dag ni rdo ba'o/ /'jim pa gang yin pa de dag ni skra'o/ /'dam rdzab gang yin pa de dag ni sha'o/ /chu gang yin pa de dag ni ro nye bskol ba'o zhes bya ba la sogs pa'o//de bzhin du skyes pas skyes pa la 'khrig pa log par bcug pa'i chad pa'i bye brag dpag tu med par brjod do/ /de bzhin du byis pa rnams la log par 'jug pa yang tsha sgo can gyi chus khyer ba'i khye'u dag mthong nas de dag gis de la bos pa dang / de byis pa de dag la shin tu sdug par sems pa dang ldan zhing mya ngan dang sdug bsngal gyi shugs kyis chu der 'jug go//ba dang rta rgod ma dang ra mo dang lug mo la sogs pa la yang de bzhin te/ 'dod pa la log par g.yem pa ni rang bzhin gyis kha na ma tho ba dang bcas pa rnam par smin pa shin tu drag par gsungs so//dud 'gro la 'dod pa bsten pa de ni mi dge bas sprul pa'i lcags kyi ba dang rta rgod ma la sogs pa 'bar ba de dag nyid kyi skye gnas kyi lam nas 'jug ste de dag gi ltor me mdag rab tu 'bar ba'i phung pos yongs su gang bar de lo brgya stong mang por 'tshed cing sreg go zhes te rgya cher de nyid du blta'o//de bzhin du gzhan gyis nyal po byas zin pa'i dge slong ma rnams la log par zhugs pa rnams kyi chad pa yang sems can dmyal ba chen por bshad do/ /rang gi chung ma la skye gnas kyi lam ma yin par byas pa yang de bzhin no/ /gzhan gyi chung ma la nan gyis byas pa dang mi dbang ba'i bu mo la byas pa yang de bzhin no//bsnyen gnas la gnas pa rnams la byas pa yang de bzhin no/ /bla ma rnams kyi chung ma la byas pa yang de bzhin no/ /gnyen du 'thams pa rim gro byas pa rnams la log par zhugs pa'i chad pa yang drag cing dpag tu med de/sems can dmyal ba chen po yin par bshad do/ /'khrig pa bdun dang ldan pa'i mdo las kyang / bram ze 'di la kha cig bdag tshangs par spyod par khas 'che zhing de bud med dang gnyis kyis gnyis mi sbyor yang bud med la mig gis gzugs la nges par sems shing blta ste/ des de'i ro myong zhing rtog la zhen te/ lhag par zhen nas gnas pa 'di ni bram ze tshangs par spyod pa 'khrig pa'i chos dang ldan pa yin gyi mi ldan pa ma yin te/ tshangs par spyod pa yongs su ma dag par spyod pa'o/ /de bzhin du bud med dang lhan cig rtse ba dang ca co 'don pa nyams su len pa yang tshangs par spyod pa yongs su ma dag pa'o zhes gsungs pa dang /bud med kyis bsnyen bkur byas pa nyams su len pa yang de bzhin no/ /rtsig pas chod pa'am yol bas chod pa'i bud med kyi rgyan dang glu dang gar la sogs pa'i sgra nyams su len pa'ang de bzhin du 'khrig pa dang ldan pa yin no zhes gsungs so //pha rol po 'dod pa'i yon tan lnga dang ldan pa la bltas nas nyams su len pa yang de bzhin no/ /lha la sogs pa'i gnas su tshangs par spyod pa yongs su bsngo ba yang de bzhin te 'khrig pa'i chos dang ldan pa yin gyi mi ldan pa ma yin no zhes gsungs so//de'i phyir de ltar dran pa dang smon pa'i yul du gyur pa 'dod pa de dag ni gnod pa byed pa nyid do/ /de'i phyir 'dod pa la gdams pa'i mdo las/ dge slong 'dod pa rnams las sems zlog shig /lam 'di ni 'jigs pa dang bcas pa'o/ /rab tu 'jigs pa dang bcas pa'o//tsher ma dang bcas pa'o/ /thibs po dang bcas pa'o lam gol ba'o/ /lam ngan pa'o/ /lam kha brag go/ /skyes bu dam pa ma yin pas bsten pa'o/ /khyod 'di ltar 'dod pa rnams ni ro myong ba chung ba ste / bcom ldan 'das kyis kyang sdug bsngal mang ba gnod pa mang ba 'khrugs pa mang ba ste 'di la ni nyes dmigs mang ngo //dge slong dag 'dod pa rnams ni nad dang 'bras dang zug rngu dang sdig pa dang srid pa'i rtsa ba dang sha dang bcas pa'i mchil pa lta bu yin la/ 'dod pa dag ni 'chi ba mi rtag pa sogs brdzun pa slu ba'i chos can te/ 'dod pa rnams ni rmi lam lta bu yin zhing 'di dag ni byis pa 'drid pa'o zhes gsungs pa snyam du mi sems sam/de bzhin du sbyar te/ dper na ri dgas bshor ba'i khog tshe dang / bya bshor ba'i rgya dang / nya bshor ba'i dol dang / spre'u bshor ba'i rnyong dang / phye ma leb bshor ba'i me'i phung po ji lta bar 'dod pa rnams kyang de bzhin no//de bzhin du sbyar te/ 'dod pa tshol zhing spyod pa na yun ring por seng ge rnams kyi khar chud pa'i mtha' yang mi mngon pa nas ba lang gsod cing ba lang gi sha za ba rnams kyi khar chud pa'i bar gyi mtha' yang mi mngon no/ /sbal pa dag tu gyur nas sbrul rnams kyi khar chud pa'i bar gyi mtha' yang mi mngon no//yun ring por 'dod pa bsten pa na chom rkun yin zhes bzung nas mgo bcad pa'i mtha' yang mi mngon no/ /gzhan gyi chung ma la 'phyo ba dang rkun po dang grong 'joms pa dang ljongs 'joms pa dang mdud pa 'grel ba'i bar yin no zhes bzung nas mgo bcad pa'i mtha' yang mi mngon no//sdug bsngal drag pa rtsub pa mi bzad pa nyams su myong ba'i khrag gzags shing bab pa ni rgya mtsho chen po bzhi'i chu bas kyang mang ngo / /de bzhin du sbyar te/ lus nyes dmigs mang ba 'di ni rus pa 'dus pa/chu rgyus kyis sbrel ba/ shas glan pa/ pags pas dkris shing phyi rol g.yogs pa/ bu ga che chung can/ srin bu'i tshogs gnas pa/ sems can rnams la gnod pa/ nyon mongs pa'i chos rnams kyi gnas yin no/ /lus 'di la nad kyi rnam pa 'byung ba 'di lta ste/mig nad dang rna nad nas gzhang 'brum dang phol mig dang mtshan bar rdol gyi bar dag go/ /de bzhin du sbyar te/ lus kyi kun tu gdung ba rnams dang / lus kyi sdug bsngal dang / lus kyi 'khogs pa dang / sgu ba dang / sgur ba dang / spyi cer dang / skra skya dang / gnyer ma mang ba dang /dbang po rnams yongs su smin pa dang / yongs su 'jig pa dang / 'du byed rnams rnyings par gyur pa dang / shag shig tu gyur pa nas 'dzag pa dang / rab tu 'dzag pa dang / smad pa'i bar gyi lus 'di lta bu 'di ni bsten pa'i 'os ma yin no/ /de bzhin du sbyar te/dge slong khyod kyis 'dod pa dag yod pa gang yin/ khyod gang la rab tu chags/ khyod ji ltar bcings shing brgyal te zhen cing lhag par zhen par gyur/ nam nga yongs su mya ngan las 'das shing dam pa'i chos kyang nub par gyur la/ khyod kyang 'dod pa rnams bsten nas rnam par ltung bar song ba na nam zhig dga' ba dang 'chi ba las bdag thar par gyur /dge slong chog gi 'dod pa rnams las sems zlog shig /'di ni 'dod pa btsal ba'i dus ma yin gyi chos btsal ba'i dus yin no zhes gsungs so/ /khyim bdag drag shul can gyis zhus pa'i mdo las kyang /des 'dod pa la log par g.yem pa spang bar bya ste/ bdag gi chung mas chog par 'dzin pa dang / gzhan gyi chung ma la 'dod pa med pa dang / ma chags pa'i mig gis blta ba dang yid byung ba'i yid dang 'dod pa dag ni shin tu sdug bsngal ba'o snyam du ma chags pa'i yid la byed pa la brtson par bya'o//de gang gi tshe rang gi chung ma la rnam par rtog pa byung ba de'i tshe yang nyon mongs pa'i dbang du gyur pas na/ des rang gi chung ma la mi sdug par rjes su lta ba dang / skrag pa'i yid kyis 'dod pa bsten par bya'i zhen pas zin bzhin du ni ma yin te/rtag tu mi rtag pa dang / bdag med pa dang mi gtsang ba'i 'du shes su bya'o/ /des de ltar dran pa nye bar gzhag nas ci nas yid kyi dgu la yang 'dod pa spyad par mi bya na/ mtshan gnyis sprad pa'am yan lag ma yin par 'jug pa lta ci smos te/ bdag gis de ltar bya'o snyam mo zhes gsungs pa dang / yang de nyid las byang chub sems dpas rang gi chung ma la 'du shes gsum bskyed par bya ste/ gsum gang zhe na/ 'di ni dga' zhing rtse ba'i grogs yin gyi 'di 'jig rten pha rol gyi grogs ni ma yin no/ /'di ni bza' ba dang btung ba'i grogs yin gyi/'di las kyi rnam par smin pa myong ba'i grogs ni ma yin no/ /'di ni bde ba'i grogs yin gyi 'di sdug bsngal gyi grogs ni ma yin no snyam pa'o zhes bya ba nas yang gsum ste/ tshul khrims kyi bar du gcod par 'du shes pa dang / ting nge 'dzin gyi bar du gcod par 'du shes pa dang /shes rab kyi bar du gcod par 'du shes pa'o/ /yang gsum ste/ chom rkun du 'du shes pa dang / btson srung du 'du shes pa dang / sems can dmyal ba'i srung mar 'du shes pa'o zhes gsungs so/ /bu mo zla mchog gis zhus pa las kyang bshad de/de nas bu mo zla mchog gis skye bo phal po che brgyug pa de mthong ma thag tu/ de'i tshe nam mkha' bar snang la shing ta la'i srid du mngon par 'phags te 'dug nas/ skye bo phal po che de la tshigs su bcad de smras pa/ gser gyi kha dog lta bur rab 'bar zhing //yid du 'ong ba'i bdag lus 'di la ltos/ /kye ma rab tu lus mdzes 'di lta bu/ /chags pa'i sems dang ldan la yod re skan/ /gang dag yul rnams la ni chags med cing / /me mdag lta bur 'dod pa rab spong dang / /dbang po drug po sdom pas bsdams pa dang //gang dag tshangs spyod rnam par dag spyod dang / /gang dag gzhan gyi chung ma mthong gyur na/ /ma dang sring mo'i 'du shes skyed byed pa/ /de dag mdzes shing blta na sdug pa dang / /rtag par mchog tu yid du 'ong bar 'gyur/ /grong khyer 'di la kun du gsal bltas dang //bdag spu khung nas spos ngad gang byung ba/ /bdag gis 'dod chags sems kyis de ma bsgrubs / /'di ni sbyin dang dul ba'i 'bras bu yin/ /bdag la 'dod chags sems ni skye ba med/ /'dod chags bral ba la yang chags mi skyed/ /ji ltar bden par shes kyi log min par//bdag gi mdun bzhugs thub dbang 'di dpang yin/ /khyod ni sngon chad bdag gi phar gyur cing / /bdag kyang khyed cag rnams kyi mar gyur la/ /ming sring dag dang phar yang gyur gyur na/ /ma la 'dod chags sems ni su zhig skyed/ / bdag gis sngon chad khyed rnams thams cad bsad/ /bdag kyang khyed kyis sngon chad gshegs shing gtubs / /kun kyang phan tshun dgra dang gsod pa yin/ /khyed cag ji ltar 'dod chags sems kyang skyed / /'dod chags can ni gzugs dang ldan mi 'gyur/ / 'dod chags sems ldan bde 'gror 'gro ma yin/ /'dod chags sems ldan mya ngan 'das mi 'gro/ /de lta bas na 'dod chags yongs su spang / /'dod pa'i rgyus ni sems can dmyal bar ltung / /'dod chags kyis ni yi dags dud 'gror 'gyur / /gang dag 'dod chags sems ni ldan pa rnams//grul bum gnod sbyin lha mi sha zar 'gyur/ /'dod chags kyis ni mi sdug gzugs can dang / /lce med pa dang gyol dang zhar bar 'gyur/ /gang dag smad pa'i spyad pa spyod byed pa/ /de dag rnam pa sna tshogs skyon ldan 'gyur/ /'khor los sgyur ba nyid ni thob pa dang //sum cu rtsa gsum dbang phyug brgya byin dang / /tshangs dang dbang ldan dbang sgyur gang yin pa/ /de ni tshangs spyod rgya chen spyad pas gyur/ /'dod la brkam pa rtag tu dmus long dang / /'on pa glen pa phag dang rnga mo dang / /lung bong spre'u dang glang chen ba lang dang / / stag dang rta dang phye leb sbrang mar 'gyur/ /gang dag tshangs spyod rgya cher spyad pa ni/ /rgyal po dga' dang ldan pa nyid du 'gyur/ /tshong dpon khyim bdag blon po rnams su'ang 'gyur/ /bde dang yid bde ba yang 'phel bar 'gyur/ /'dod pa'i khol po rnams ni gshegs shing gtub/ / du bas bdug cing bcing dang brdeg pa dang / /bsdigs dang mgo dang rna ba lag pa dang / /mig dang sna dang rkang pa'ang bcad phyung 'gyur/ /zhes gsungs so/ /bad sa'i rgyal po 'char byed kyis zhus pa las kyang smad de/ /rma mthong nas ni sbrang ma brgyug pa dang / /mi gtsang mthong nas lung bong brgyug pa dang //phyugs kyi sha phyir khyi yang brgyug pa ltar/ /mi mkhas bud med dga' ba de bzhin brgyug /byis pa rnams ni ma rig bsgribs/ /mun pa'i phung pos kun tu bsgribs/ /bud med chags pa de bzhin rmongs/ /ngan skyugs gnas la bya khwa bzhin//ngan 'gror gang dag zhugs pa dang / /myong ba'i 'du shes chags byed de/ /ngan skyugs gnas su srin bu 'dra/ /de dag bdud kyi spyod yul yin/ /ngan skyugs bum pa ri mo can/ /gang dang gang du snang ba yang / /gcin dang bshang bas gang ba dang / /rkyal pa rlung gis gang ba bzhin//snabs dang mchil ma kha chu dang / /bad kan rnag dang glad rgyas dang / /byis pa rnams kyi lus las ni/ /dring 'dzag ste sbrang rtsi bzhin/ /rus pas rgyas gyur kha sgo can/ /pags dang sha la sogs pas dkris / /lus 'di phol mig 'dra ba ste//smad pa yin zhing dri nga can/ /dper na phol mig rma kha ni/ /srog chags sna tshogs rnams kyis gang / /de bzhin du ni lus 'di yang / /mi gtsang sna tshogs snod yin no/ /lto ni gnye mas gang ba ste/ /mtsher pa dang ni glo ba dang / /mkhal ma khrag dang mkhris pa dang //glad rgyas rus pa rkang gis gang / /gang dag khong na gnas pa ni/ /srin bu'i grong khyim brgyad khri yin/ /gti mug dra bas bsgribs pas na/ /byis pa rnams kyis mi shes so/ /bu ga'i sgo ni dgu dag nas/ /mi gtsang rnag dang dri nga 'dzag /smra ba dang ni mthong bas kyang //byis pa dag ni mtshan mar 'dzin/ /byis pa ngan skyugs spyod yul can/ /mchil ma dang ni snabs za ba/ /chags par 'gyur nas phyogs gang zhing / /kun tu smad pa mi shes so/ /sbrang ma rnams kyis rma mthong ltar/ /smad pa'i gnas la chags par byed/ /mchan khung gnyis nas rdul 'dzag cing //btsog pa'i dri ni 'byung bar 'gyur/ /gang gis ngan 'gror 'gro ba yi/ /nyes par byed pa'i las byed cing / /'dod pa dman pa bsten pa dang / /dman pa'i chos rnams sten byed pa/ /shes rab 'chal pa mnar med song / /sdug bsngal tshor ba myong bar 'gyur//ngan skyugs bzhin du dri nga zhes/ /sangs rgyas rnams kyis bud med smad/ /de lta bas na dman pa ni/ /bud med dman pa rnams dang 'dre/ /byis pa gang zhig ngan skyugs kyi / /rkyal pa thogs nas khyim du 'gro/ /las ni ci 'dra byed pa yi //'bras bu yang ni de 'dra thob / /ces gsungs so/ /yang de nyid las gsungs pa/ sdug bsngal bas btsal ba'i longs spyod bdag rang gso ba'i phyir bsgrubs pa dag dge sbyong dang bram ze rnams dang / bkren pa dang sdug phongs pa dang slong ba rnams la sbyin pa gtong bar mi nus te/bud med kyi dbang du gyur cing / bud med kyi thul 'og tu chud la bud med kyis tshar chod pa bud med kyis 'khol ba rnams ni/ bud med la dga' ba de nyid kyis de gso ba'i phyir sbyin pa gtong bar mi nus tshul khrims yang dag par 'dzin mi nus so/ /de de la chags pas bud med kyis spyo pa'ang bzod bsdigs shing lta ba dang brgyad pa'ang bzod do//bud med kyis bsdigs pa'i mi de zhum zhing sro shi la de'i gdong du blta ste 'dod pa'i rgyu dang 'dod pa'i gzhi'i dbang du song ba yin no/ /rgyal po chen po 'di ni 'dod pa la brkam pa ngan skyugs kyi sgo la gdu ba mi gtsang ba la dga' ba shes bzhin med par spyod pa'i mi'i skyon yin no//de bzhin du sbyar te/ 'di 'dra thos kyang skyo ba dang / /yid 'byung mi 'gyur de dag ni/ /rab tu rmongs nas bud med dang / /phyir zhing sten par byed par 'gyur/ /btsog cing shin tu smad bya ba//'dod pa sdug bsngal sten byed cing / /chos thos nas ni rab rmongs shing / /legs par smras zhes smra bar byed/ /de yi sems ni mo phyir song / /byi ba la ni byi la bzhin/ /rgyal bas bshad pa thos nas ni / /yud tsam zhig ni yid 'byung 'gyur/ / de nas de ni yang 'khrug ste/ /dper na drag po'i dug dang 'dra/ /ji ltar phag ni yud tsam zhig /sdang shing skrag par gyur kyang ni/ /ngan skyugs mthong bar gyur pa dang / /de ni brkam pa skyed pa bzhin/ /de ltar byis pa bde 'dod pa/ /rgyal ba'i bstan pa spangs nas su/ / gang gis ngan 'gror 'gro ba yi/ /'dod pa dman pa sten par byed/ /'dod pa rnams la chags zhen nas/ /shin tu sdig pa'i las byas te/ /tshul khrims ldan la skur ba ni/ /phyi nas ngan 'gror 'gro bar 'gyur/ /skyes bu gang zhig chos tshul 'di 'dra ba/ /rigs nas bud med rnams la bag byed pa//des ni mtho ris lam yang rtag par sbyangs/ /de la byang chub rab mchog dkon ma yin / /dal rnyed shes rab ldan gyur cing / /'di 'dra ba yi chos thos pa/ /'dod pa thams cad 'dir spangs te/ /mkhas pa rab 'byung mngon par 'byung //zhes gsungs so/ /rab tu zhi ba rnam par nges pa'i cho 'phrul gyi mdo las kyang gnod pa gzhan gsungs te/ 'jam dpal rigs kyi bu'am rigs kyi bu mo gang la las 'dzam bu'i gling pa'i sems can thams cad kyi srog bcad dam de dag gi bdog pa thams cad phrogs pa bas/'jam dpal rigs kyi bu'am rigs kyi bu mo gang gzhan zhig gis byang chub sems dpa' dge ba'i rtsa ba gcig gis sems bskyed pa/ tha na dud 'gro'i skye gnas su song ba la zan changs cig sbyin pa dang ldan pa'i dge ba'i rtsa ba'i bar chad byas na/de de bas ches sdig pa grangs med par skyed do/ /de ci'i phyir zhe na/ sangs rgyas 'byung ba skyed pa'i dge ba'i rtsa ba'i bar chad byed par gnas pa'i phyir ro/ /'jam dpal byang chub sems dpa' gang la la gzhan gyi khyim rnams su byang chub sems dpa' la phrag dog dang ser sna byed na/des de'i tshe gzhi de las 'jigs pa chen po gsum shes par bya ste/ gsum gang zhe na sems can dmyal bar skye ba'i 'jigs pa dang / dmus long gis 'jigs pa dang / yul mtha' 'khob tu skye ba'i 'jigs pa zhes bya ba'o/ /yang gsungs pa/ / mi gang de la dga' bar mi byed cing / /yod pa min dang bsngags pa mi smra dang / /mi gang khros nas mi snyan smra ba'am/ /yang na de la 'khrug pa byed pa dag /sems can dmyal bar skye 'gyur te/ /lus ni chen por gyur nas su/ /de yis sdug bsngal myong 'gyur te/ /yid rab mi bde ma rungs 'gyur//dpag tshad lnga brgya'i tshad tsam du/ /de yi lus ni skye bar 'gyur/ /sdig pa'i las kyis rtag tu khyi/ /bye bas bskor nas za bar 'gyur/ /bskal pa dag ni du mar yang / /lus ni dpag tshad lnga brgyar 'gyur/ /de la mgo yang lnga brgya ste/ /de las nyung bar mi 'gyur ro//mgo rnams re re dag la yang / /lnga brgya'i lce las mi nyung ste/ /lce gcig la yang thong gshol ni/ /lnga brgyar tshang ste mi nyung ba/ /'bar bas de la rmo byed de/ /skur 'debs brdegs pa'i las kyis so/ /tshig rtsub dag ni smras pas ni / /shin tu tsha bar sreg par 'gyur//gang dag sdom par mi byed cing / /byang chub sems dpa' gnod byed pa/ /de ni sems can dmyal rnyed de/ /dud 'gro'i skye gnas 'gro bar 'gyur/ /tshul 'di spong bar byed pa ni/ /bskal pa bye ba stong rnams dang / /brgya dang khrag khrig rnams su yang //mnar med par ni sdug bsngal rnyed/ /de nas shi 'phos rab gdug cing / /shin tu mi bzad sbrul du 'gyur/ /bkres shing skom pas mngon gzir kyang / /shin tu mi bzad las rnams byed/ /bza' ba rnyed kyang sdig pa yis/ /nam yang tshim par mi 'gyur ro//gal te de nas shi 'phos nas/ /mi yi nang du skyes na yang / /yid mi gzhungs shing dmus long 'gyur/ /gnod par sems shing sdom pa med/ /nyes pa'i tshig rnams smras nas ni/ /'phags pa mnyes par mi byed pa/ /mi yi nang nas shi 'phos nas//slar yang ngan 'gror 'gro bar 'gyur/ /bskal pa bye ba stong rnams su/ /nam yang sangs rgyas mthong mi 'gyur/ /zhes gsungs so/ /yang de nyid las/ 'jam dpal byang chub sems dpas byang chub sems dpa' la khong khro ba'i sems bskyed pa'am/ brnyas pa'i sems bskyed pa ji tsam pa de snyed kyis bskal par byang chub sems dpa' des sems can dmyal ba pa rnams su gnas par go cha bgo bar bya'o/ /'jam dpal byang chub sems dpa' la skur pa btab pa ma gtogs par byang chub sems dpa' las gzhan gang gis kyang log par ltung bar mi nus so//'jam dpal 'di lta ste/ dper na nor bu rin po che rdo rje ni rdo rje nyid ma gtogs par shing ngam bong ba'am dbyug pa'am rdo ba'am mtshon chas bcag par mi nus so/ /'jam dpal de bzhin du byang chub sems dpa' yang byang chub sems dpa' la skur ba btab pa ma gtogs par las gzhan gyis log par ltung bar byed mi nus so zhes gsungs so//dad pa'i stobs bskyed pa la 'jug pa'i phyag rgya'i mdo las kyang / 'jam dpal rigs kyi bu'am rigs kyi bu mo gang la la zhig gis khros nas phyogs bcu'i 'jig rten gyi khams thams cad kyi sems can thams cad btson ra mun nag dag tu bcug pa bas/rigs kyi bu'am rigs kyi bu mo gang la la khros te byang chub sems dpa' la rgyab kyis phyogs te 'dug nas ma rungs pa 'di mi blta'o/ / zhes zer na 'di ni de bas sdig pa ches grangs med par skyed do/ /'jam dpal rigs kyi bu'am rigs kyi bu mo gang la la zhig gis 'dzam bu'i gling gi sems can thams cad kyi bdog pa thams cad phrogs pa bas/ gzhan gang gis byang chub sems dpa' ji lta bu yang rung ba la smad na 'di ni de bas ches sdig pa grangs med par skyed do zhes gsungs so//yang de nyid las/ 'jam dpal rigs kyi bu'am rigs kyi bu mo gang la la zhig gis mchod rten gang gA'i klung gi bye ma snyed bshig pa dang bsregs pa bas/ rigs kyi bu'am rigs kyi bu mo gzhan gang zhig gis theg pa chen po la mos pa'i byang chub sems dpa' la gnod sems dang tha ba dang khro ba'i sems bskyed de gshe ba dang mi snyan par smra na 'di ni de bas ches sdig pa grangs med par skyed do//de ci'i phyir zhe na/ byang chub sems dpa' las sangs rgyas bcom ldan 'das rnams nges par 'byung la/sangs rgyas las mchod rten rnams dang lha'i rigs thams cad kyi bde ba'i yo byad thams cad 'byung ngo / /byang chub sems dpa' la bsti stang ma byas pa ni sangs rgyas thams cad la bsti stang ma byas pa yin no/ /byang chub sems dpa' la bsti stang byas pa ni sangs rgyas thams cad la bsti stang byas pa yin no//sangs rgyas thams cad la mchod pa bla na med pas mchod pa byed 'dod pas byang chub sems dpa' rnams mchod par bya'o zhes gsungs so/ /de ltar mchod pa'i rnam par smin pa ni rab tu zhi ba rnam par nges pa'i cho 'phrul gyi mdo las kyang /gang zhig chos dang ldan pa ni / /chos smra de dag srung byed pa/ /ngan 'gro rnams ni kun spangs nas/ /brgya byin rdzu 'phrul chen por 'gyur/ /tshangs pa dga' ldan 'thab bral dang / /dbang byed par yang de 'gyur ro/ / gal te mir ni gyur na yang / /rtag tu 'khor los sgyur bar 'gyur/ /tshong dpon dang ni khyim bdag 'gyur/ /rtag tu skyid cing nor chen 'gyur/ /ji ltar gang ga'i bye snyed kyi/ /bskal pa de snyed rtag tu yang / /'jigs med dran pa phun sum tshogs/ /bde dang ldan zhing gnod pa med//ces gsungs so/ /phan pa byed pa dang gnod pa byed pa bsam pa 'di byang chub sems dpa' gang gi dbang du byas she na/ so so'i skye bo nyid kyi dbang du byas pa ste/ dad pa'i stobs skyed pa la 'jug pa'i phyag rgya'i mdo las ji skad du/ 'jam dpal rigs kyi bu'am rigs kyi bu mo gang la la zhig gis sems can 'jig rten gyi khams thams cad kyi rdul snyed dag la bskal pa gang gA'i klung gi bye ma snyed du nyin gcig bzhin lha'i zas ro brgya dang ldan pa byin pa dang de bzhin du lha'i gos rnams sbyin pa byin pa bas rigs kyi bu'am rigs kyi bu mo gzhan gang zhig gis dge bsnyen ston pa gzhan la mi brten pa dge ba bcu'i las kyi lam dang ldan pa zhig la/'di ni sangs rgyas bcom ldan 'das kyi bslab pa la bslabs pa'o snyam du bsams nas nyin gcig zan cig byin na 'di ni de bas ches bsod nams grangs med par skyed do//'jam dpal rigs kyi bu'am rigs kyi bu mo gang la la zhig gis dge bsnyen ston pa gzhan la mi brten pa dge ba bcu'i las kyi lam dang ldan pa 'jig rten gyi khams thams cad kyi rdul snyed dag la/ bskal pa gang gA'i klung gi bye ma snyed du nyin gcig bzhin lha'i zas ro brgya dang ldan pa byin pa dang de bzhin du lha'i gos rnams sbyin pa byin pa bas rigs kyi bu'am rigs kyi bu mo gzhan gang zhig gis dge slong gcig la nyin gcig zan cig byin na/'di ni de bas ches bsod nams grangs med par skyed do zhes gsungs pa bzhin no//nges pa dang ma nges pa la 'jug pa'i phyag rgya'i mdo las kyang / 'jam dpal yongs su brtag pa nye bar bzung ste/ gal te phyogs bcu'i 'jig rten gyi khams thams cad kyi sems can kun gyi mig phyung bar gyur la/ yongs su brtag pa nye bar bzung ste rigs kyi bu'am rigs kyi bu mo gang gis byams pa'i sems kyis sems can de dag thams cad la mig de dag bskyed pa bas/'jam dpal rigs kyi bu'am rigs kyi bu mo gzhan gang gis theg pa chen po la mos pa'i byang chub sems dpa' la dad pa'i sems kyis blta na/'di ni de bas ches bsod nams grangs med par skyed do/ /'jam dpal rigs kyi bu'am rigs kyi bu mo gang la las phyogs bcu'i sems can btson rar bcug pa thams cad btson ra nas bton te/ 'khor los sgyur ba'i bde ba'am tshangs pa nyid kyi bde ba la bkod pa bas/'jam dpal rigs kyi bu'am rigs kyi bu mo gzhan gang gis theg pa chen po la mos pa la dang ba'i sems kyis lta 'dod par gyur cing de'i bsngags pa yang brjod na/ 'di ni de bas ches bsod nams grangs med par skyed do zhes gsungs so//de skad du sa'i snying po'i mdo las kyang / btsun pa bcom ldan 'das rgyal rigs dge ba'am blon po dge ba'am shor ba dge ba'am dge sbyong dge ba'am bram ze dge ba gang zhig gzhan srung ba dang bdag srung ba dang 'jig rten pha rol srung ba dang /bcom ldan 'das kyis bstan pa dang / nyan thos snod du gyur pa dang snod du ma gyur pa yang rung skra bregs nas gos ngur smrig gi tshal bu bgos pa yongs su srung ba dang / nyan pa dang / mchod pa dang / nyan thos kyi gtam dang / rang sangs rgyas kyi gtam dang / theg pa chen po'i gtam nyan pa dang / theg pa chen po la yang dag par zhugs pa'i gang zag tshul khrims dang ldan pa yon tan gyis phyug pa grol ba dang / rigs pa'i spobs pa can dag la mchod pa dang / de dag dang lhan cig tu dga' ba dang rtse ba dang yangs su 'dri ba dang yongs su 'drir 'jug pa dang de dag las mnyan cing bya'o snyam du sems zhes bya ba nas/de bzhin du sbyar te/ de'i sdig pa ji tsam zhig 'byang bar 'gyur/ bcom ldan 'das kyis bka' stsal pa/ rigs kyi bu 'di lta ste dper na mi la la zhig skyes la/ des 'dzam bu'i gling thams cad rin po che sna bdun gyis bkang ste/sangs rgyas bcom ldan 'das bzhugs pa rnams la dbul ba phul la nyi ma gung gi dus su yang de bzhin phye ma red kyi dus su yang de bzhin 'bul zhing / rnam grangs 'dis lo brgya stong du 'di ltar dbul ba phul na/ 'di ji snyam du sems mi de bsod nams mang du bskyed dam/ gsol pa/ btsun pa bcom ldan 'das mi de bsod nams kyi phung po mang po grangs ma mchis dpag tu ma mchis pa skyed do / /de'i bsod nams kyi phung po ni de bzhin gshegs pa ma gtogs par gzhan gang gis kyang tshad gzung bar nus pa ma lags so//bcom ldan 'das kyis bka' stsal pa/ rgyal rigs dge ba'am zhes bya ba nas gong du ji skad smos pa'i bar du de bzhin du sbyar te/ de bsod nams kyi phung po shin tu mang du skyed pa nas/ bsod nams kyi phung po shin tu yangs pa dang shin tu tshad med pa dang shin tu grangs med pa'i bar du skyed do//gang zhig lnga brgya pa tha ma la nga'i dam pa'i chos kyi tshul srung ba de ni bdag srung ba dang gzhan srung ba dang 'jig rten pha rol srung ba dang nga'i bstan pa srung ba dang / nyan thos snod du gyur pa'am snod du ma gyur pa yang rung skra bregs te gos ngur smrig bgos pa rnams yongs su srung ba dang /mi 'tshe ba nas rang gi yul 'khor dang gzhan gyi yul 'khor gyi bar du 'phel bar byed pa dang / ngan song zad par byed pa dang / lha'i gnas 'phel bar byed pa dang / tshe ring du skyong ba dang /rang gi nyon mongs pa dang gzhan gyi nyon mongs pa rnams sel ba dang / rdzogs pa'i byang chub kyi lam pha rol tu phyin pa drug ston pa dang / ngan song thams cad rnam par spong ba dang / 'khor ba ni ring du mi 'khor ba dang / rtag tu dge ba'i bshes gnyen rnams dang sangs rgyas bcom ldan 'das rnams dang /byang chub sems dpa' sems dpa' chen po rnams dang phrad cing / rtag tu dge ba'i bshes gnyen rnams dang mi 'bral bar 'gyur ro/ /ji ltar bsams pa'i sangs rgyas kyi zhing du ring po mi thogs par bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro//de nas lha'i dbang po thams cad 'khor dang bcas pa nas sha za'i dbang po'i bar du 'khor dang bcas pa stan las langs te/ bcom ldan 'das gal ba de logs su thal mo sbyar ba btud nas 'di skad ces gsol to//btsun pa bcom ldan 'das da ltar dang ma 'ongs pa'i dus lnga brgya pa tha ma'i bar du rgyal rigs dge ba rnams dang khyim bdag dge ba'i bar dag dang de bzhin du sbyar te/ de ltar dam pa'i chos srung ba dang de ltar dkon mchog gsum gyi rigs 'bar bar bgyid pa'i rgyal rigs dge ba nas khyim bdag dge ba'i bar de dag la bdag cag 'khor dang bcas pa thams cad kyis kyang rnam pa bcu'i bar gyis bsrung bar bgyi/yongs su bskyang bar bgyi 'phel bar bgyi'o/ /bcu gang zhe na/ de'i tshe 'phel bar bgyi ba dang / tshe'i bar chad kyang chos kyis bzlog par bgyi ba dang / bro nad ma mchis pa dang / 'khor dang bcas pa dang / chos kyi phung po dang / longs spyod pa dang / dbang phyug dang / snyan pa dang / dge ba'i bshes gnyen rnams dang / shes rab phun sum tshogs pa yang 'phel bar bgyi ba ste/bcu po de dag gis bsrung bar bgyi'o/ /zhes rgya cher gsungs so/ /de ltar na sar ma chud pa rnams la yang rnam par smin pa 'di rgya cher blta bar bya'o/ /spyan ras gzigs kyi mdo las kyang / /srog chags kun la phan pa'i phyir//byang chub tu ni sems bskyed nas/ /'jig rten mgon gyi mchod rten la/ /su zhig skor bar byed pa ni/ /skye ba dag ni thams cad du/ /byang chub spyad pa spyod pa'i tshe/ /dran dang ldan zhing blo gros ldan/ /bsod nams ldan zhing 'jigs med 'gyur/ / zhes bya ba la sogs pa gsungs nas bka' stsal pa/ sangs rgyas sras po de dag la/ /mi gang mi dga' byed pa der / /lha dang mi ni spangs nas su/ /de dag sems dmyal spyod yul 'gyur/ /zhes rgya cher gsungs so/ /gong ma bzhin du 'dir yang khyad par gyi rgyu gang yang bstan par mi nus te/de ltar dpyad pas chog go/ /las kyi sgrib pa rnam par dag pa'i mdo las kyang / sgrib pa'i sgra ni gnod par gsungs te/ 'jam dpal sgrib pa zhes bya ba ni/ 'dod chags sgrib pa/ zhe sdang sgrib pa/ gti mug sgrib pa/ sbyin pa sgrib pa/ tshul khrims sgrib pa/ bzod pa sgrib pa/ brtson 'grus sgrib pa/ bsam gtan sgrib pa/ shes rab sgrib pa'o/ /de bzhin du sbyar te/ de ci'i phyir zhe na/ 'jam dpal byis pa so so'i skye bo rnams sbyin pa byin pa'i tshe ser sna can rnams la ma dad par byed de/ de dag ma dad pa des khong khro ba'i sems bskyed pa nas /khong khro ba'i tha ba'i skyon des sems can dmyal ba chen po rnams su skye'o/ /de dag tshul khrims srung ba'i tshe 'chal pa'i tshul khrims can la smod cing gshe la de dag gis mi snyan par smra'o/ /de dag las de dag gi skyon thos nas skye bo mang po ma dad par byed do//de dag ma dad pa des na ngan 'gror 'gro bar 'gyur ro/ /de dag bzod pa sgom pa'i tshe bdag cag ni bzod pa dang ldan pa yin/ de dag gzhan ni gnod sems kyi sems dang ldan pa yin no snyam du bzod pa'i rgyags pas bag med par 'gyur te/bzod pa'i rgyags pas bag med pa de dag bag med pa'i rtsa ba las byung ba'i sdug bsngal rnams myong bar 'gyur ro/ /de dag brtson 'grus rtsom pa'i tshe dge slong 'di dag ni le lo can du gnas pa mngon par mi brtson pa dad pas byin pa yongs su spyod pa ste/'di dag ni chu phor gang gi 'os kyang ma yin no snyam du bdag la bstod de/ de dag brtson 'grus rtsom pa des bdag la bstod cing gzhan la smod pa de dag ni byis pa yin no zhes nga smra'o/ /de dag bsam gtan la mnyam par 'jog pa'i tshe bsam gtan dang snyoms par 'jug pa des 'dod pa skyed cing de dag 'di snyam du sems te/bdag cag ni ting nge 'dzin la gnas pa yin/ dge slong 'di dag gzhan ni sems g.yeng bar gnas pa yin te/ 'di dag ni sangs rgyas su ga la 'gyur zhes rgya cher ro/ /chos thams cad 'byung ba med par bstan pa las kyang /byang chub sems dpa' la ltung bas gleng na byang chub dang ring bar 'gyur ro/ /las kyi sgrib pa yang yongs su 'dzin to/ /phrag dog gis gleng na byang chub dang ring bar 'gyur ro/ /spyod lam gyis gleng na byang chub dang ring bar 'gyur ro//gal te byang chub sems dpas byang chub sems dpa' la dman pa'i 'du shes dang bdag la rgya che ba'i 'du shes bskyed pa bdag smas pa dang las kyi sgrib pa yongs su 'dzin to/ /gal te de byang chub yongs su mi gtong na 'di la byang chub sems dpas byang chub sems dpa' la gdams pa dang rjes su bstan pa'i tshe ston pa'i 'du shes nye bar gzhag ste gdams par bya/rjes su bstan par bya'i byang chub sems dpas byang chub sems dpa' la brnyas pa'i sems bskyed par ni mi bya'o/ /lha'i bu ji ltar byang chub sems dpa' cig shos la brten nas byang chub sems dpa'i dge ba'i rtsa ba 'di chad pa de lta bu ni gang na yang med do zhes gsungs so//byang chub tu sems ma bskyed pa'i sems can byang chub kyi skal ba can la yang brnyas pa bkag na byang chub tu sems bskyed pa lta smos kyang ci dgos/ dpa' bar 'gro ba'i ting nge 'dzin gyi mdo las/blo gros brtan pa/ de la byang chub tu sems ma bskyed par lung bstan pa gang zhe na/ blo gros brtan pa 'di la gang zag la la zhig 'gro ba lnga'i 'khor bar yang na sems can dmyal ba'am/ yang na dud 'gro'i skye gnas sam/ yang na gshin rje'i 'jig rten nam/ yang na lha'am/ yang na mir skyes par gyur la/ gang zag de yang dbang po rno ba rgya chen po la mos pa yin no / de la de bzhin gshegs pas rab tu mkhyen te/ skyes bu gang zag 'di ni bskal pa 'di snyed bskal pa brgya phrag 'di snyed bskal pa stong phrag 'di snyed bskal pa brgya stong phrag 'di snyed bskal pa bye ba khrag khrig brgya stong phrag 'di snyed na byang chub mngon par rdzogs par 'tshang rgya bar 'gyur ro zhes bya ba nas/de bzhin du sbyar te/ blo gros brtan pa de ni byang chub tu sems ma bskyed par lung bstan pa zhes bya'o//de nas bcom ldan 'das la tshe dang ldan pa 'od srungs chen pos 'di skad ces gsol to/ /bcom ldan 'das bdag cag deng slan chad sems can thams cad la ston par 'du shes bskyed par bgyi'o/ /de ci'i phyir zhe na/ sems can gang la byang chub tu yongs su smin pa'i dbang po rnams mchis pa dang gang la ma mchis pa 'tshal bar 'jug pa de bdag cag la ma mchis pa'i slad du ste/bcom ldan 'das bdag cag la 'tshal ba ma mchis pas sems can de lta bu dag la smin pa'i 'du shes bskyed na/ des bdag cag smas par 'gyur ro/ / bcom ldan 'das kyis bka' stsal pa/ 'od srungs legs so legs so/ /tshig 'di ni legs par smras pa'o/ /'od srungs ngas don gyi dbang 'di mthong nas dge slong dag nga'am nga dang 'dra bas gang zag gi drod gzung gi /gang zag gis gang zag la drod mi gzung ngo / /dge slong dag gang zag gis gang zag la drod bzung na smas par 'gyur bar shes par gyis shig ces khyod la de lta bu'i chos bstan te/'od srungs bstan pa des byang chub sems dpa' 'am nyan thos kyis 'di na byang chub sems dpa'i theg pa pa'i gang zag yid du 'ong zhes sems can thams cad la ston par 'du shes bskyed par bya'o//des na der bdag bsrung bar bya'o zhes ji skad gsungs pa bzhin no/ /gang la nges par byang chub 'thob pa'i mtshan ma yod pa de la brnyas pa shin tu bsrung bar bya ste/ dam pa'i chos pad ma dkar po'i mdo las/ sa dang so phag las ni brtsigs pa yi/ /rgyal ba'i mchod rten dga' bzhin byas pa dang / /de phyir sa rdul phung po dag las kyang / /mya ngan dgon pa dag tu byas pa dang / /byis pas rtsed mor de dang de dag tu/ /gang gis rgyal ba de phyir mchod rten dag /bye ma las ni phung por byas pa yang //de rnams kyis kyang byang chub thob par 'gyur/ /zhes bya ba nas/ gang gis rtsig nges gzugs kyi ri mo dag /bsod nams brgya mtshan yongs su rdzogs pa'i sku/ /bdag gis bris sam 'dri ru bcug kyang rung / /de dag thams cad byang chub thob par 'gyur//skyes bu rgan nam 'on te gzhon nu'ang rung / /gang dag la la de ni slob pa'i tshe/ /rtsed mo dga' dang bsang ba byed pa na/ /rtsig ngos sen mo shing bus gzugs bris pa/ /de dag thams cad byang chub thob par 'gyur / /zhes bya ba'i bar du'o/ / de bzhin du sbyar te/ /bde bar gshegs pa rnams la mchod pa'i phyir/ /gang dag lcags kyi sil khrol brdung bcug dang / /chu la brdabs dang thal mos brdabs pa dang / /yid du 'ong zhing snyan pa'i glu dbyangs dang / /ring bsrel de dag rnam mang mchod byas pa/ /de dag thams cad 'jig rten sangs rgyas 'gyur//bde gshegs ring bsrel la ni chung zad dang / /sil snyan gcig brdungs pa yi sgra phyung ngam/ /me tog gcig tsam gyis ni mchod pa dang / /bde gshegs gzugs dang rtsig ngos bris pa la/ /'khrug bzhin pa yi sems kyis mchod na yang //de dag rim gyis sangs rgyas bye ba mthong / /mchod rten de la gang gis thal mo sbyar/ /yongs su tshangs pa'am thal mo ya gcig gam/ /yang na mgo bo skad cig btud pa dang / /de bzhin lan cig lus kyang btud pa dang / /gang gis ring bsrel gnas pa de dag la//g.yeng ba'i sems kyis phyag 'tshal sangs rgyas zhes/ /tshig gcig lan 'ga' brjod par byas pa yang / /de dag kun gyis byang chub mchog 'di thob/ /de tshe bde bar gshegs pa de dag ni/ /mya ngan 'das sam yang na bzhugs kyang rung / /sems can gang gis chos 'di'i ming thos pa//de dag thams cad byang chub thob par 'gyur/ /zhes ji skad gsungs pa bzhin no/ /snying rje chen po'i mdo las kyang / 'di lta ste dper na nya pa mchil pa thogs pas nya bshor ba'i phyir mchil pa gzan ma dang bcas pa mtsho chen por bcug la de bcug pa de nyas mid par gyur na/nya de mtsho chu'i nad na 'phyo yang de srad bu sra ba yu ba skam sa la btags pas brtod pa zhes brjod par bya ste/ nya ba mchil pas 'chor bar 'ongs nas srad bu thangs zhes byed pa las nya zin par shes te des srad bu drangs nas de skam la phyung ste dga' mgur spyod do//de bzhin du sems can gang dag bcom ldan 'das la dad pa'i sems kyis dge ba'i rtsa ba bskyed na/ tha na dad pa'i sems gcig bskyed na yang sems can de dag nyes par byas pa'i las kyi sgrib pas mi dal ba rnams su skyes su zin kyang sangs rgyas bcom ldan 'das rnams kyis sangs rgyas kyi ye shes dang bsdu ba'i dngos po'i srad bus sems can de dag bzung nas 'khor ba'i mtsho chu las bton te mya ngan las 'das pa'i thang la 'jog go zhes gsungs so//de lta bas na de dag la ston pa'i 'du shes bskyed par bya'o//pha rol phyag 'tshal ba'i tshe 'di gsar bu yin yang / byang chub kyi sems kyi stobs bskyed pas phyag bya ba'i 'os yin no snyam du bsams la yid kyis phyag byas te/ dper na dra byi la sprin byang chub sems dpa' chen po yin yang gsar bu 'phags pa nor bzangs la lus thams cad kyis gtugs nas phyag byas pa lta bu dang lhag pa'i bsam pa bskul ba la sogs pa las kyang byang chub sems dpa'i theg pa pa'i gang zag thams cad la phyag bya bar gsungs pa lta bu yin te/'di ni nges pa'i don yin no/ /phyag bya ba dang phyag byed pa gnyis gcig la bsdu ba ji ltar mi 'gal zhe na/phan tshun phyag bya bar dmigs pa'i phyir ro/ /nyams su blangs pa med pas bsod nams ma yin par yang mi 'gyur ro/ /ci sangs rgyas rnams kyang de lta'am zhe na ma yin te/ thug pa med pa dang gcig dma' bar 'gyur ba'i phyir ro//'phags pa rnam par 'thag pa thams cad bsdus pa'i mdo las kyang gnod pa gsungs te/ 'jam dpal dam pa'i chos spong ba'i las kyi sgrib pa ni phra'o/ /'jam dpal gang la la de bzhin gshegs pas gsungs pa'i chos las/ la la ni bzang bar 'du shes la la ngan par 'du shes na dam pa'i chos spong pa'o//dam pa'i chos spangs pas de bzhin gshegs pa la skur pa 'debs pa yin/ dge 'dun la ngan du brjod pa yin no/ /'di ni rigs pa'o 'di ni mi rigs pa'o zhes zer na de dam pa'i chos spong ba yin no ngas 'di na nyan thos kyi theg pa dang ldan pa'am rang sangs rgyas kyi theg pa dang ldan pa'am theg pa chen po dang ldan par chos tha dad par bstan pa gang yang med na/mi blun po de dag nga'i chos 'di la 'di ni nyan thos rnams la bshad pa 'di ni rang sangs rgyas rnams la bshad pa'o zhes tha dad du 'byed de/de tha dad pa'i 'du shes kyis dam pa'i chos spong ba yin no/ /'di ni byang chub sems dpa'i bslab pa'o 'di ni byang chub sems dpa'i bslab pa ma yin no zhes zer na dam pa'i chos spong ba yin no/ /chos smra ba la spobs pa yod do zhe'am/spobs pa med do zhes zer na chos spong ba yin no/ /chos ni chos ma yin par ston to zhes zer na chos spong ba yin no/ /sangs rgyas 'byung ba med par gzungs thob pa med do zhes zer na chos spong ba yin no/ /chos smra ba la gzungs thob pa med do zhes zer na chos spong ba yin no //chos smra ba'i spyod pa la sun 'byin na chos spong ba yin no/ /chos smra ba sgrub pa phun sum tshogs pa ma yin no zhes zer na chos spong ba yin no/ /bag med par gleng na chos spong ba yin no/ /spyod lam gyis gleng na chos spong ba yin no/ /spyod pa dang tshul khrims nyams pas gleng na chos spong ba yin no//spobs pas go bar mi byed do zhes zer na chos spong ba yin no/ /chos rnams kyi snang ba legs par ma bshad do zhes zer na chos spong ba yin no/ /khong du ma chud pas tshig dang tshig tu 'gal bar byas so zhes zer na chos spong ba yin no//yi ge'i ming gis de bzhin gshegs pa'i bka' la 'jug go zhes zer na chos spong ba yin no/ /mdo sde dang mdo sder 'gal bar byas so zhes zer na chos spong ba yin no tshigs su bcad pa dang tshigs su bcad pa 'gal bar bya'o zhes zer na chos spong ba yin no//don la la la mos shing la la la ma mos so zhes zer na chos spong ba yin no/ /chos 'chad pa'i tshe gtam gzhan du bsgyur na chos spong ba yin no/ /dkrugs ma byed na chos spong ba yin no/ /kun du rtog pas smra na chos spong ba yin no/ /'di la spyad 'di la mi spyad ces zer na chos spong ba yin no//'di ni legs par gsungs pa 'di ni legs par gsungs pa ma yin no zhes zer na chos spong ba yin no/ /'dis ni sangs rgyas kyi gsung gi dam tshig smras so 'dis ni sangs rgyas kyi gsung gi dam tshig ma smras so zhes zer na chos spong ba yin no//'jam dpal de ltar na ji tsam du cung zad 'gal bar byed pa de tsam du chos spong ba yin no/ /dge slong ngam dge slong ma'am/ dge bsnyen nam dge bsnyen mas chos smras pa la 'di ni 'di 'dra'o zhes sems sam smra na thams cad dam pa'i chos spong ba yin no zhes bya ba la sogs pa'o//yang de nyid las gsungs pa/ rigs kyi bu de bzhin gshegs pa mya ngan las 'das pa na 'ga' zhig mos pa ji lta ba bzhin du sems can rnams la chos ston par byed pa na 'khor de las sems can kha cig ba spu zing zhes byed dam kha cig mchi ma 'byung ba de dag thams cad kyang de bzhin gshegs pa'i mthus gyur pa yin no//de la skyes bu blun po byang chub sems dpa' ma yin par byang chub sems dpar khas 'che ba dang byang chub sems dpa' sun 'byin pa chos rku ba tshul 'chos pa de dag 'di skad ces ston pa rnams la 'dis ci zhig rtogs zhes zer ba la sogs pa la yang de bzhin du sbyar te/gang dag byang chub sems dpa' rnams la brnyas pa de dag ni sems can dmyal ba na gnas pa'i mthar phyin par nga mi smra'o/ /de ci'i phyir zhe na/ gang byang chub sems dpa' chos sma ba la brnyas pa de ni sangs rgyas la smod pa yin no//de ni chos spong ba yin no/ /de ni dge 'dun la bshung ba yin no/ /gang chos smras pa la smod pa de ni sangs rgyas la mi gus pa yin no/ /gang chos smra ba la mi gus pa de sangs rgyas mthong bar mi 'dod pa yin no/ / gang chos smra ba mthong bar mi 'dod pa de sangs rgyas la mi snyan par brjod pa yin no/ /gang chos smra ba la mi snyan par brjod pa de sangs rgyas yongs su gtong ba yin no/ /gang sems dang po bskyed pa'i byang chub sems dpa' la khong khro ba'i sems su byed pa yang de bzhin du sbyar ro//byams pa byang chub sems dpa' rnams kyis byang chub kyi phyir pha rol tu phyin pa drug yang dag par bsgrub pa gang yin pa de la mi blun po de dag 'di skad du/ shes rab kyi pha rol tu phyin pa nyid byang chub sems dpas bslab par bya ba'i pha rol tu phyin pa lhag ma rnams kyis ci zhig bya zhes zer zhing /de dag pha rol tu phyin pa gzhan la sun 'byin par sems na/ ma pham pa 'di ji snyam du sems/ ka shi'i rgyal por gyur pas phug ron gyi phyir khra la rang gi sha byin pa de 'chal pa'i shes rab can yin nam/ byams pas gsol ba/bcom ldan 'das de ni ma lags so/ /bcom ldan 'das kyis bka' stsal pa/ byams pa ngas byang chub sems kyi spyod pa spyad pa na pha rol tu phyin pa drug dang ldan pa'i dge ba'i rtsa ba gang dag sgrub pa'i dge ba'i rtsa ba de dag gi gnod par gyur tam/ byams pas gsol pa/bcom ldan 'das de ni ma lags so/ /bcom ldan 'das kyis bka' stsal pa/ ma pham pa khyod kyis bskal pa drug cur sbyin pa'i pha rol tu phyin pa yang dag par bsgrubs/ bskal pa drug cur tshul khrims kyi pha rol tu phyin pa dang / bskal pa drug cur bzod pa'i pha rol tu phyin pa dang /bskal pa drug cur brtson 'grus kyi pha rol tu phyin pa dang / bskal pa drug cur bsam gtan gyi pha rol tu phyin pa dang / bskal pa drug cur shes rab kyi pha rol tu phyin pa yang dag par bsgrubs pa de la/ mi gti mug can de dag 'di skad du/'di lta ste/ byang chub ni stong pa nyid kyi tshul du tshul gcig pa yin no zhes zer na de dag spyod pa yongs su ma dag pa yin no zhes bya ba la sogs pa 'byung ngo / /le'u bzhi pa'o// //bam po lnga pa/ gnod pa mdo tsam bshad zin te/ de rnams spang bar bya ba'i thabs ni lhag pa'i bsam pa bskul ba'i mdo las/ las dang po pa'i byang chub sems dpa' rnams kyis gnod pa rnam pa 'di lta bu dag thos nas skrag ste/ yi dam blangs par gsungs pa de bzhin du bya'o/ /de dag gis ni 'di skad ces bcom ldan 'das deng slan chad bdag cag de bzhin gshegs pa'i spyan sngar yi dam 'di lta bur bca' bar bgyi'o//bcom ldan 'das gal te bdag cag gis deng slan chad byang chub sems dpa'i theg pa pa'i gang zag gi ltung ba mad dam mi mad kyang rung ste/ glang na bdag cag gis de bzhin gshegs pa dgra bcom pa yang dag par rdzogs pa'i sangs rgyas la bslus par 'gyur ro//bcom ldan 'das gal te bdag cag gis deng slan chad byang chub sems dpa'i theg pa pa'i gang zag la brnyas sam de la mi snyan par brjod pa na bdag cag gis de bzhin gshegs pa dgra bcom pa yang dag par rdzogs pa'i sangs rgyas la bslus par 'gyur ro//bcom ldan 'das gal te bdag cag gis deng slan chad byang chub sems dpa'i theg pa pa'i gang zag khyim pa'am rab tu byung ba yang rung ste/ 'dod pa'i yon tan lnga la rtse zhing yongs su spyod pa mthong nas ma dad par bgyid dam ma rangs pa'i sems bskyed dam ma gus pa'i sems bskyed dam de la ston par 'du shes ma bskyed na/bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad mdza' bshes kyi khyim mam/slong mo ster ba'i khyim gyi rgyus byang chub sems dpa'i theg pa pa'i gang zag rnams kyi lus la gnod pa'am/ sems la gnod pa bgyis na bdag cag gis de bzhin gshegs pa la bslus par 'gyur ro/ / bcom ldan 'das gal te bdag cag gis deng slan chad byang chub sems dpa'i theg pa pa'i gang zag mthong na yid du mi 'ong ba'i tshig gcig tsam zhig smras na yang bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad nyin lan gsum mtshan lan gsum du byang chub sems dpa'i theg pa pa'i gang zag la phyag ma bgyis na bdag cag gis de bzhin gshegs pa la bslus par 'gyur ro//bcom ldan 'das gal te bdag cag gis deng slan chad brtul zhugs de yang dag par blang ba'i slad du rgyal srid thob pa'am nor thob pa'am lus dang srog kyang yongs su ma btang na bdag cag gis de bzhin gshegs pa la bslus par 'gyur ro//bcom ldan 'das gal te bdag cag gis deng slan chad nyan thos kyi theg pa pa'am rang sangs rgyas kyi theg pa pa'i gang zag la brnyas te bdag cag ni ches drag gi /de dag ni de lta ma yin no snyam na bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad dma' ba'i sems dang gdol ba'i sems dang khyi'i sems lta bur gnas par ma bgyis na bdag cag gis de bzhin gshegs pa la bslus par 'gyur ro//bcom ldan 'das gal te bdag cag gis deng slan chad bdag la bstod cing gzhan la smad na bdag cag gis de bzhin gshegs pa la bslus par 'gyur ro//bcom ldan 'das gal te bdag cag gis deng slan chad gnod sems dang / rtsod pa'i 'jigs pas bskul ma thag tu dpag tshad dam dpag tshad brgyar ma byol na bdag cag gis de bzhin gshegs pa la bslus par 'gyur ro/ /bcom ldan 'das gal te bdag cag gis deng slan chad bdag nyid tshul khrims dang ldan par khas 'che'am/mang du thos pa dang / sbyangs pa'i yon tan dang ldan pa'am yon tan gang yang rung ba zhig gis bdag brjod na bdag cag gis de bzhin gshegs pa la bslus par 'gyur ro/ / bcom ldan 'das gal te bdag cag gis deng slan chad dge ba mi spyoms shing sdig pa mi 'chab par gnas par ma bgyis na bdag cag gis de bzhin gshegs pa dgra bcom pa yang dag par rdzogs pa'i sangs rgyas la bslus par 'gyur ro zhes smras pa dang / de bzhin du sbyar te/de'i tshe bcom ldan 'das kyis byang chub sems dpa' sems dpa' chen po byams pa la bka' stsal pa/ byams pa rigs kyi bu'am rigs kyi bu mo gang las kyi sgrib pa spang bar 'dod pas/ ji ltar rigs kyi bu 'di dag gis byas pa de bzhin du yi dam du bca'o zhes gsungs pa lta bu'o//chos thams cad 'byung ba med pa bstan pa las kyang / nyin dang mtshan mo de bzhin lan gsum du/ /byang chub sems dpa' rnams la mgos phyag 'tshal/ /rtag tu 'dod bzhin spyad pa spyod pa na/ /de dag 'khrul pa tsam yang mi btsal lo//gang tshe 'dod pa'i yon tan lngas rtse mthong / /de las 'khrul pa ci yang mi btsal te/ /byang chub spyod mchog yon tan mtha' yas pa/ /de la de dag re zhig reg snyam bsam/ /rigs pa'i rim dang bya ba'i rim gyis ni/ /rgyal bar 'gyur gyi thang cig gis mi 'gyur//bskal pa bye ba khrag khrig mang zhig na/ /de dag go cha 'jug 'gyur gzhan du min/ /zhes gsungs so/ /de nyid las rigs kyi bu gang dag las kyi sgrib pa 'di lta bu gnod par 'gyur ba de dag gis byang chub sems dpa' cig shos kyi bslab pa thams cad log par mi bsgrub par mi bya'i de'i bya ba thams cad la mos par byas te/'di snyam du sems can gyi spyod pa ni shes par dka' bas bdag gis pha rol gyi sems mi shes so snyam du sems bskyed par bya'o/ /rigs kyi bu de bzhin gshegs pas don gyi dbang 'di gzigs nas gang zag gis gang zag gi drod mi gzung gi /nga'am gang nga dang 'dra bas gang zag gi drod gzung ngo zhes de skad du chos ston to / /rigs kyi bu gang bdag bsrung bar 'dod pa de su'i spyod pa yang rnam par dbye bar mi byed do/ /'di ni 'di 'dra'o 'di ni 'di 'dra'o zhes gzhan la dpyas par mi bya'o//sangs rgyas kyi chos la nyin mtshan du chos kyis yongs su dga' ba'i yid kyis brtson par bya'o zhes gsungs so/ /de skad du sa'i snying po'i mdo las kyang / de nas de'i mod la sems can mkhas pa brgya stong mang po stan las langs te/ bcom ldan 'das ga la ba der logs su thal mo sbyar ba btud nas 'di skad ces gsol to/ /bdag cag btsun pa bcom ldan 'das kyi spyan sngar smon lam 'di skad ces 'tshal te/ btsun pa bcom ldan 'das bdag cag yun ring po ji srid du 'khor ba na 'khor ba de srid du/bzod pa ma thob par rgyal po'i gnas 'thob par ma gyur cig /blon po'i gnas su ma gyur cig /grong khyer gyi gtso bo'i gnas su ma gyur cig /grong gi gtso bo'i gnas su ma gyur cig /grong rdal gyi gtso bo'i gnas su ma gyur cig /mdun na 'don gyi gtso bo'i gnas su ma gyur cig /shor ba'i gtso bo'i gnas su ma gyur cig /ded dpon gyi gtso bo'i gnas su ma gyur cig /mkhas pa'i gtso bo'i gnas su ma gyur cig /dge sbyong gi gtso bo'i gnas su ma gyur cig /khyim bdag gi gtso bo'i gnas su ma gyur cig /khab so pa'i gtso bo'i gnas su ma gyur cig /bdag cag bzod pa ma thob kyi bar du bdag cag gzhi gang las sangs rgyas bcom ldan 'das rnams kyi bstan pa la las shin tu mi bzad pa 'di lta bu 'phel bar gyur pa / sems can rnams kyi bdag po'i bar gyi gnas dag thams cad du thob par ma gyur cig ces rgya cher gsungs so//zla ba sgron ma'i mdo las kyang / gzhon nur gyur pa de dag ni/ /sdig pa mi byed yongs med de/ /phyi ma'i dus na de dag dang / /khyod ni sten par ma byed cig /smra ba dang ni gtam gyis la/ / de dag la ni ri mor gyis/ /byang chub dam pa'i don gyi phyir/ /zhum pa med par bkur sti gyis/ /lo grangs du lon kun dris la/ /de dag rgan par gyur na yang / /de la ri mo legs kyis la/ /rkang pa la yang mgos phyag 'tshol / /byang chub snying po rnams bltas na//de dag 'khrul pa mi blta'o/ /de la khong khro mi bskyed cing / /rtag tu byams pa'i sems su bya/ /gang gi 'khrul pa ci mthong yang / /de dag nyes pa mi bsgrag ste/ /ci 'dra ba yi las byas pa/ /'bras bu de 'dra thob par 'gyur/ /zla ba'i bzhin ni 'dzum bzhin du//rgan rabs dang ni gsar bu la/ /rtag tu gsong por smra ba dang / /des shing nga rgyal bcom par bya/ /gos rnams dang ni zas dag gis/ /de dag la ni phan gdags shing / /'di dag thams cad 'dren 'gyur zhes/ /de ltar khyod kyis sems zhog shig/ ces gsungs so/ /byang chub tu sems bskyed pa la gang zhig dad pa dang gus pa mi bskyed pa des bdag ngan 'gror ltung bas 'jigs pa las bsrung ba dang tshe 'di dang tshe gzhan la mchog tu dga' ba myong bar bya ba dang / rang gi sems kyi rnyog pa gdang ba dang sems dge ba dang las su rung ba thob par bya ba'i phyir sdong po bkod pa'i mdo las /bcom ldan 'das 'phags pa byams pas 'phags pa nor bzangs kyi ched du byang chub tu sems bskyed pa'i yon tan ji skad brjod pa de bzhin du bsgom par bya ste/ 'dis ni rga dang nad kyis mnar ba yi//srog chags sdug bsngal brgya yis gtses pa rnams/ /skye shi mya ngan 'jigs pas gdungs mthong nas/ /de dag don du snying rje'i sems kyis spyod/ /'gro ba rgyud lnga'i 'khor lo'i dkyil 'khor du/ /sdug bsngal 'khrul 'khor btsir ba'i 'gro mthong nas//sdug bsngal 'khrul 'khor 'khor lo 'joms pa yi/ /ye shes rdo rje sra ba 'di tshol lo/ /'dod chags zhe sdang rtsa sdong tsher ma can/ /lta chags rtsa mang yongs su 'dzin pa yi/ /sems can zhing ni yongs su sbyang ba'i phyir/ /shes rab gshol brtan bzang po 'di tshol lo//gti mug ma rig thibs po'i bsam pa can/ /'gro ba shes rab mig stor dmigs med pa/ /de la phyogs bde ston pa'i mthu yod pa'i/ /'gro ba'i ded dpon bzang por 'di 'gyur ro/ /bzod pa'i go bgos rnam thar bzhon pa zhon//shes rab ral gri mya ngan dgra 'joms pas/ /mi 'jigs sbyin pa'i dpa' bor gyur pa 'di/ /'gro ba rnams kyi lam ston 'gyur ba yin/ /'di ni chos kyi gru rab sbyor ba ste/ /ye shes rgya mtsho'i lam la bslabs pa'o/ /zhi ba rin chen mchog gi gling skyel ba//'di ni khams gsum mtsho yi skya ba 'dzin/ /ye shes 'od zer smon lam dkyil 'khor can/ /sems can kun gyi gnas su snang byed pa'i/ /chos dbyings mkha' la 'od chen rab ldan par/ /'di ni sangs rgyas nyi mar 'char bar 'gyur/ /byams pa'i dga' ldan ting 'dzin ngad bsil ba'i//sems can kun la snyoms sems 'od bzang la/ /dkar po'i chos kyi dkyil 'khor yongs rgyas pa'i/ /sangs rgyas zla bar 'di ni 'char bar 'gyur/ /bsam pa'i gzhi rten brtan la rab gnas pa/ /byang chub spyod pa rim gyis 'phags pa bsten//chos kun rin chen 'byung gnas ldan pa yi/ /ye shes rgya mtsho'i mchog tu 'di 'gyur ro/ /byang chub sems kyi klu yi dbang pos phyung / /chos kyi dbyangs kyi mkha' la mngon par 'phags/ /dkar po'i 'bras bu'i lo thog 'phel byed pa'i//'di ni 'gro bar chos sprin char 'bebs 'gyur/ /dag pa'i snying po dri bsung mun sel ba/ /byams pa'i snum yod dran pa'i snod brtan la/ /dri med byang chub sems med 'od bzang ba'i/ /chos kyi mar me 'di ni 'bar byed 'gyur/ /byang chub sems ni med mer snying rje skad //byams pa rdos pa mi g.yo bsam pa mkhregs / /byang chub yan lag mthar gyis byung ba yi/ /sangs rgyas sras su 'di ni yang dag skye/ /bsod nams snying po mngon par 'phel bar byed/ /ye shes snying po yongs su sbyong bar 'gyur/ /'di ni shes pa'i snying po 'char bar byed//smon lam ji bzhin snying po yang dag byung / /snying rje byams pas sprul pa 'di 'dra ba/ /sems can dgrol blos phan pa'i bsam ldan pa/ /rnam dag yid can 'di ni ci 'dra ba/ /de 'dra'i 'gro ba lha dang mi bcas dkon/ /'di 'dra'i bsam pa rab tu rtsa brtan pa//'di 'dra'i sbyor ba brtan pas rnam 'phel zhing / /srid gsum log par byed pa 'di 'dra ba'i/ /ye shes 'bras can shing chen 'byung ba dkon/ /'di ni yon tan kun grub don du gnyer/ /chos rnams thams cad yongs su dris par mos/ /the tshom thams cad rnam par bsal don du//le lo med par bshes gnyen thams cad bsten/ /'di ni bdud kyi dkrugs ma nyon mongs 'joms/ /'di ni lta ba'i dri ma sred pa sel/ /'di ni 'gro ba thams cad dgrol la brtson/ /mkhas pa 'di ni rtag tu khyad par tshol//yon tan lam la nor bzangs 'di gnas pas/ /'di ni ngan song thams cad sbyong bar 'gyur/ /mtho ris lam yang nye bar ston par gyur / /thar pa'i lam du 'gro ba 'dzud par 'gyur/ /'di ni 'gro rgyud kun gyi sdug bsngal sel/ /'di ni 'gro rgyud kun gyis bde ba stobs//'di ni srid pa kun gyi zhags pa 'thub/ /srid pa'i 'gro rgyud thams cad sel bar 'gyur/ /zhes gsungs so/ /de ltar bsgoms pas 'dis gnod pa rnam par spang sla bar 'gyur ro/ /de skad du lhag pa'i bsam pa bskul ba'i mdo las kyang / gnod pa rnam par spang ba gsungs te/byams pa byang chub sems dpa'i theg pa pa'i gang zag chos bzhi dang ldan na/ phyi ma lnga brgya pa tha ma la dam pa'i chos rnam par 'jig pa'i tshe/ ma snad cing ma smas la bde bar yongs su thar bar 'gyur ro/ /bzhi gang zhe na/ bdag gi 'khrul pa la so sor rtog pa dang / byang chub sems dpa'i theg pa pa'i gang zag gzhan gyi nyes pa mi gleng ba dang / mdza' bshes kyi khyim dang slong mo ster ba'i khyim la mi lta ba dang / yid du mi 'ong ba'i tshig spong ba ste/ byams pa chos bzhi po de dag dang ldan na zhes bya ba snga ma bzhin no //yang bzhi ste/ bzhi gang zhe na/ thos pa nyung ngu'i sems can yongs su spang ba dang / 'khor mi bsdu ba dang / bas mtha'i gnas mal bsten pa dang / bdag dul ba dang zhi gnas kyi rnal 'byor la brtson pa ste bzhi po de dag go zhes bya ba dang /yang de nyid las byams pa byang chub sems dpa' las dang po pas shes rab kyi stobs bskyed pa thob pa dang / rnyed pa dang bkur sti yongs su spang ba dang rnyed pa dang bkur sti'i nyes pa mthong bar bya'o/ /de bzhin du sbyar te 'du 'dzi la dga' ba yongs su spang ba dang 'du 'dzi la dga' ba'i nyes pa mthong bar bya'o//smra ba la dga' ba yongs su spang ba dang / smra ba la dga' ba'i nyes pa mthong bar bya'o/ /gnyid la dga' ba yongs su spang ba dang / gnyid la dga' ba'i nyes pa mthong bar bya'o/ /las la dga' ba yongs su spang ba dang las la dga' ba'i nyes pa mthong bar bya'o//spros pa la dga' ba yongs su spang ba dang spros pa la dga' ba'i nyes pa mthong bar bya ste/ de bzhin du sbyar ro / /byams pa 'di la byang chub sems dpa' sems dpa' chen pos rnyed pa dang bkur sti ni 'dod chags bskyed pa yin par brtag par bya'o//rnyed pa dang bkur sti ni dran pa 'joms par byed par brtag par bya'o/ /rnyed pa dang bkur sti ni rnyed pa dang / ma rnyed pas khengs pa dang 'dud par brtag par bya'o/ /rnyed pa dang bkur sti ni gti mug bskyed par brtag par bya'o//rnyed pa dang bkur sti ni bdag gi don sgrub pas khyim la ser sna byed pa dang chags pa byed par brtag par bya'o/ /rnyed pa dang bkur sti ni g.yo skyed par brtag par bya'o/ /rnyed pa dang bkur sti ni 'phags pa'i rigs bzhi yongs su spong pas ngo tsha mi shes pa dang /khrel med pa bskyed par brtag par bya'o/ /rnyed pa dang bkur sti ni sangs rgyas thams cad kyis ma gnang bar brtag par bya'o/ /rnyed pa dang kur sti ni nga rgyal dang rgyags pa dang dregs pa bskyed par brtag par bya'o/ /rnyed pa dang bkur sti ni bla ma rnams la khyad du gsod par brtag par bya'o//rnyed pa dang bkur sti ni bdud kyi phyogs yin pa dang gcig tu bag med pa'i rtsa ba yin pa dang / rnyed pa dang bkur sti ni dge ba'i rtsa ba 'phrog pa dang / rnyed pa dang bkur sti ni glog dang 'khor lo dang lce 'bab pa lta bu dang / rnyed pa dang bkur sti ni spags pa mang pos spags pa dang / mdza' bshes kyi khyim dang slong mo ster ba'i khyim la lta ba dang yid mi bde ba bskyed pa dang / blo rnam par 'khrug par byed pa dang / rnyed pa dang bkur sti ni sdug pa'i dngos po rnam par 'gyur bar byed pa'i phyir mya ngan skyed par byed pa dang /dran pa nye bar gzhag pa bzhi rjod par byed pa dang / dkar po'i chos nyam chung bar byed pa dang / rnyed pa dang bkur sti ni yang dag par spong ba bzhi yongs su nyams par byed pa dang / rdzu 'phrul dang mngon par shes pa yongs su nyams par byed pa dang / sngar bkur sti byed pa la phyis bkur sti mi byed par byed pa dang /rnyed pa dang bkur sti ni mi mdza' ba dang gnas par byed pa dang mdza' bo spong ba dang / rnyed pa dang bkur sti ni pha rol 'drid pas smad 'tshong ma 'dra ba dang / rnyed pa dang bkur sti ni bsam gtan dang tshad med pa yongs su spang ba dang /sems can dmyal ba dang dud 'gro'i skye gnas dang / gshin rje'i 'jig rten du ltung bar byed pa dang / rnyed pa dang bkur sti ni lhas byin dang lhag spyod kyi cho ga dang mthun par brtag par bya'o/ /byams pa byang chub sems dpa' rnyed pa dang bkur sti la nyes dmigs gang dag brtag par bya ba ni 'di lta bu 'di dag go//brtags nas kyang 'dod pa chung bar bya'i yongs su gdung bar ni mi bya'o/ /de ci'i phyir zhe na/ byams pa 'dod pa chung ba la skyon 'di lta bu 'di dag med pa'i phyir te/ de'i phyir sangs rgyas kyi chos rnams la bar chad med pa yin/ khyim pa dang rab tu byung ba dag yid byung bar mi 'gyur ba yin/ lha dang mi rnams bsam pa yongs su dag par bya ba'i phyir gnas pas rjes su bsrung bar 'os pa yin/ ngan 'gro log par ltung ba thams cad kyis skrag pa med pa yin/ bsdigs pa dang bral bas zil gyis mi non pa yin/bdud kyi yul las yongs su grol bas mi 'phrogs pa yin/ sdug bsngal thams cad kyis mi tshugs pa yin/ lha dang mi rnams kyis mngon par 'dod par bya ba yin/ bsam gtan la goms par byed par gnas pas gsal ba yin/ g.yo dang sgyu spangs pa dang 'dod pa'i yon tan lnga la skyon du lta bas bag yod pa yin/'phags pa'i rigs la gnas pas ji skad smras pa de bzhin byed pa yin/ mkhas pa rnams dang tshangs pa mtshungs par spyod pa rnams kyis 'dod pa yin te/ byams pa phan yon 'di lta bu 'di dag shes nas byang chub sems dpa' mkhas pas rnyed pa dang bkur sti thams cad spong ba'i phyir lhag pa'i bsam pas 'dod pa chung ba la gnas par bya zhing 'dod pa chung ba la brten par bya'o zhes bya ba'o //'du 'dzi la dga' ba'i dbang du byas te gsungs pa/ 'dod chags spangs shing zhe sdang rab spangs nas//rnal 'byor can ni 'du 'dzir mi gnas te/ /de ni de la gzhol zhing de la 'bab/ /nyes pa des na dga' bar byed mi 'gyur/ /dgod dang bzhad gad de bzhin rnam rtog pa/ /'di dag thams cad 'du 'dzi rnams las byung / /snying po med pa'i 'du 'dzi su byed pa//de ni yang longs spyod cing ma bsdams yin/ /byis pa dag ni 'jig rten smra la dga'/ /byis pa de dag mchog gi gtam las nyams/ /zhe sdang 'phel zhing rnam rtog shas kyang che/ /nyes pa des ni de la mi chags so/ /rigs pa ma yin smra la dga' bskyed nas//dge slong thos pa rnam par 'phel mi byed/ /de lta bas na mi rigs smra spongs la/ /chos la rtag tu dga' ba thob par gyis/ /byang chub mngon par 'dod phyir nga yis ni/ /rang gi yan lag lan stong snyed du btang / /chos nyan pas ni nga la ngoms med na/ /de dag chos nyan pa la skyo bar 'gyur//rigs min smra dang dam pa ma yin smra/ /rnam pa kun du yongs su spang bar bya/ /bskal pa brgya phrag du mar gang dkon pa/ /chos kyi dam pa de la dga' skyed cig /yon tan 'dod pa nags na gnas pa yis/ /pha rol dag gi skyon la brtag mi bya/ / bdag ni khyad par 'phags shing bdag mchog ces/ /de snyam du ni sems bskyed mi bya'o/ /rgyags 'di bag med kun gyi rtsa ba ste/ /dge slong dman la brnyas par yong mi bya/ /bskal pa gcig gis thar pa thob mi 'gyur/ /'di ni bstan pa 'di la go rims yin/ /zhes gsungs so//de nyid las smra ba la dga' ba'i dbang du byas te gsungs pa/ thos pas rgyags nas gus par mi 'gyur te/ /rnam par 'byed pa'i smra ba rnams la chags/ /brjed par 'gyur zhing shes bzhin med par 'gyur/ /smra la dga' ba'i nyes pa 'di dag go/ / nang gi sems las shin du ring bar 'gyur/ /lus dang sems kyang rab sbyangs ma yin 'gyur/ /khengs pa dang ni 'dud pa mang por 'gyur/ /smra la dga' ba'i nyes pa 'di dag go/ /byis pa dam pa'i chos bsam rab tu nyams/ /sems ni mi mnyen shin tu rtsub par 'gyur/ / zhi gnas lhag mthong dag dang rab tu ring / /smra la dga' ba'i nyes pa 'di dag go/ /rtag tu bla ma dag la gus pa med/ /spags pa'i gtam dag la ni dga' ba skyed/ /snying po med la gnas shing shes rab nyams/ /smra la dga' ba'i nyes pa 'di dag go/ /de ni lha tshogs rnams kyis mi bkur zhing //de tshe de la 'dod pa yang mi skyed/ /de ni so so yang dag rig las nyams/ /smra la dga' ba'i nyes pa 'di dag go/ /gang dag lus ni mngon sum mang yod pa/ /mkhas pa de dag gis ni spyo bar 'gyur/ /de yi srog ni don med 'gyur ba ste/ / smra la dga' ba'i nyes pa 'di dag go/ /bdag ni bsgrubs nyams da ni ci bya zhes/ /'chi ba'i dus tshe byis pa mya ngan byed/ /gting rnyed ma gyur shin tu sdug bsngal 'gyur/ /smra la dga' ba'i nyes pa 'di dag go/ /rtswa bskyod bzhin du 'gul zhing g.yo ba ste/ /de ni de ltar the tshom 'gyur du nges//de ni nam yang blo brtan mi 'gyur te/ /smra la dga' ba'i nyes pa 'di dag go/ /gar mkhan ltad mo'i khrom nang 'dug pa zhig /dpa' bo gzhan gyi yon tan rjod byed la/ /bdag nyid bsgrub las nyams par 'gyur ba bzhin/ /smra la dga' ba'i nyes pa 'di dag go//de ni g.yo ldan yang zhing re bral 'gyur/ /phyi phyir zhing ni rnam par 'gyed pa rtsom/ /'phags pa'i dam pa'i chos las rab tu ring / /smra la dga' ba'i nyes pa 'di dag go/ /mthu chung bsti stang gis ni dgar 'gyur te/ /mi shes ldan pa 'khrug cing rnam par 'gyur/ / spre'u ltar de yi sems ni g.yo bar 'gyur/ /smra la dga' ba'i nyes pa 'di dag go/ /zhes bya ba dang / de bzhin du sbyar te/ yun rings dus nas smra la dga' bas na/ /de ni bdag nyid dga' ba mi 'thob po/ /tshig gang dga' ba mtha' yas 'thob 'gyur ba/ /tshig gcig tsam zhig bsams kyang mchog yin no//bu ram shing shun snying po ci yang med/ /dga' bar bya ba'i ro ni nang na 'dug /shun pa zos nas mis ni bu ram ro/ /zhim po rnyed par nus pa ma yin no/ /ji ltar shun pa de bzhin smra ba ste/ /ro lta bu ni 'di la don sems yin/ / de lta bas na smra la dga' spangs te/ /rtag tu bag yod byos la don soms shig /ces gsungs so/ /gnyid la dga' ba'i nyes pa'i dbang du byas te/ gang zhig rmugs dang gnyid la dga' 'gyur ba/ /de ni gti mug dra ba chen po 'phel/ /de ni lta ba rnyed nas the tshom 'gyur//de la lta gyur gzhan yang mang du 'byung / /gang zhig rmugs dang gnyid la dga' 'gyur ba/ /de ni shes rab shin tu nyam chung 'gyur/ /de yi blo yang yongs su nyams par 'gyur/ /ye shes las ni rtag tu de nyams 'gyur/ /gang zhig rmugs dang gnyid la dga' 'gyur ba//mi shes le lo snyom las shes rab 'chal/ /de la mi ma yin pas glags rnyed de/ /nags na gnas pa'i tshe ni 'tshe bar 'gyur/ /gang zhig rmugs dang gnyid la dga' 'gyur ba/ /de ni dge sems rtag tu mi 'dod de/ /de ni chos la 'dun pa skyed mi byed//phyir zhing chos ma yin la de dga' 'gyur/ /gang zhig rmugs dang gnyid la dga' 'gyur ba/ /de ni rmongs shing chos la 'dun pa nyams/ /byis pa yon tan kun las yongs su nyams/ /dkar po 'joms shing mun par 'gro bar 'gyur/ / gang zhig rmugs dang gnyid la dga' 'gyur ba/ /'jigs par 'gyur zhing sems kyang rab tu zhum/ /de ni rtag par mchog tu dga' mi 'gyur/ /gnyid kyis non pa lus kyang lhod par 'gyur/ /gang zhig rmugs dang gnyid la dga' 'gyur ba/ /bdag nyid mi shes le lo can gyur nas//brtson 'grus stobs dang ldan la phrag dog byed/ /brtson 'grus ldan pa rnams la mi snyan smra/ /zhes bya ba dang / de bzhin du sbyar te/ gang zhig sdug bsngal mun pa kun 'jig cing / /ngan song yongs spongs rtsa bar gyur pa dang / /sangs rgyas kun gyis bsngags par 'gyur ba yi//brtson 'grus 'phags pa de la rtag tu brtan / /zhes gsungs so/ /las la dga' ba'i dbang du byas nas/ bla mas bskul na bka' blo mi bde zhing / /rjes su bstan pa mthun par 'dzin mi byed/ /de ni myur du tshul khrims nyams par 'gyur//nyes pa 'di dag las la dga' ba'i yin/ /khyim na gnas pa'i las rnams rtag sems pas/ /de ni rtag tu gdung bar 'gyur ba ste/ /bsam gtan dang ni spong ba de mi byed/ /nyes pa 'di dag las la dga' ba'i yin/ /de yi 'dod chags shas ni che bar skye//de ni ro bro rnams la chags shing zhen/ /de ni ngan ngon tsam gyis dgar mi 'gyur/ /nyes pa 'di dag las la dga' ba'i yin/ /de ni 'khor mang po la dga' 'gyur te/ /de nyams na ni shin tu sdug bsngal 'gyur/ /de ni bong bu bzhin du 'dre bar 'gyur/ / nyes pa 'di dag las la dga' ba'i yin/ /de bzhin du sbyar te/ nyin dang mtshan mo sems gzhan med par ni/ /zas dang gos la rgyun du sems par byed/ /de ni rtag tu yon tan 'dod ma yin/ /nyes pa 'di dag las la dga' ba'i yin/ /de ni 'jig rten pa yi bya ba 'dre //rigs pa min pa'i smra ba rnams la dga'/ /rigs pa'i smra la de ni dga' mi 'gyur/ /nyes pa 'di dag las la dga' ba'i yin/ /de bzhin du sbyar te/ de nas bcom ldan 'das la byang chub sems dpa' sems dpa' chen po byams pas 'di skad ces gsol to//gang dag mchog gi chos yongs su spangs nas las ngan pa rnams rtsom pa'i byang chub sems dpa' de dag ni shes rab shin tu chung zhing shes rab rnam par nyams par 'gyur ba lags so/ /de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to/byams pa de de bzhin te ji skad smras pa de de bzhin no/ /gang dag mchog gi chos yongs su spangs nas las ngan pa rnams rtsom pa'i byang chub sems dpa' de dag ni shes rab shin tu chung bar 'gyur ro//byams pa khyod la bstan to/ /khyod kyis khong du chud par bya'o/ /gang dag la brtson pa med pa dang / bsam gtan med pa dang / spong ba med pa dang / kha ton bya ba dang mang du thos pa yongs su tshol ba med pa'i byang chub sems dpa' de dag ni de bzhin gshegs pa'i bstan pa la rab tu byung ba ma yin no//byams pa de bzhin gshegs pa'i bstan pa ni bsam gtan dang spong bas rab tu phye ba/ ye shes kyis 'dus byas pa ye shes kyis mnyam par gzhag pa/ mngon par brtson pas rab tu phye ba yin gyi khyim pa'i las kyi mtha' dang zhal ta byed pas rab tu phye ba ni ma yin no//mi rigs pa la brtson pa dang 'khor ba la mngon par dga' ba rnams kyi las ni 'di yin te/ 'di ltar zhal ta byed pa dang 'jig rten pa'i bya bas gzings pa ste/ de la byang chub sems dpa' rnams kyis 'dod pa bskyed par mi bya'o//byams pa zhal ta byed pa la brtson pa'i byang chub sems dpa' gal te rin po che sna bdun gyi mchod rten rnams kyis stong gsum gyi stong chen po'i 'jig rten gyi khams 'di bkang yang des nga mnyes par byas par mi 'gyur rim gro byas par mi 'gyur bsti stang byas par mi 'gyur ro//de bzhin du sbyar ro/ /de la zhal ta byed pa'i byang chub sems dpa' 'dzam bu'i gling yongs su gang ba de dag gis/ lung 'bogs pa dang kha ton la brtson pa'i byang chub sems dpa' gcig la rim gro dang bsnyen bkur bya'o/ /lung dbog pa dang kha ton la brtson pa'i byang chub sems dpa' 'dzam bu'i gling gi tshad rnyed kyis/nang du yang dag 'jog la mngon par brtson pa'i byang chub sems dpa' gcig la rim gro dang bkur sti bya'o/ /de bzhin du sbyar te / de ci'i phyir zhe na/ 'di lta ste shes rab kyi las 'di ni bya dka' ba'i las yin no bla ma'o//bla na med pa'o 'jig rten gsum po thams cad las khyad par du 'phags pa'o/ /mngon par 'phags pa'o/ /byams pa de lta bas na byang chub sems dpa' brtson pa 'dod pa dang / brtson 'grus rtsom par 'dod pas shes rab la brtson par bya'o zhes gsungs so//spros pa la dga' ba'i dbang du byas nas/ /de ni mi khom brgyad dang ring mi 'gyur/ /de ni dal ba phun tshogs mchog mi 'gyur/ /de la gnod pa 'di dag rtag 'byung ste/ /spros spyod de yi nyes pa de dag go/ /de bzhin du sbyar te/ /mkhas pas nyes 'di yang dag rig nas ni//spros pa thams cad yongs su spang bar bya/ /spros spyod dag ni gnod pa rnyed par sla/ /de lta bas na spros la gnas mi bya/ /gang na spros pa'am rtsod pa yod pa las/ /dpag tshad brgya yi pha rol 'gro ba mchog /gang na nyon mongs yod pa de dag tu/ /yud tsam zhig kyang gnas shing 'dug mi bya//rab byung don 'dod yon tan 'dod pa rnams/ /sdang ba'i sems kyis rtsod par ma byed cig /gang gi don du spros pa 'di 'byung ba/ /khyed la zhing med zhing las tshong bya med/ /khyed la chung ma bu dang bu mo med/ /khyim dang gnyen gyi tshogs kyang yod pa min//bran pho dran mo med cing dbang phyug med/ /rab tu byung nas rtsod par ma byed cig /zhi zhing rab tu zhi bas bsten pa yi/ /ngur smrig gos dag dad pas blangs nas ni/ /zhi zhing rab zhi nye bar zhi bar byos/ /spros pa rnam par spongs la bzod pa skyed / / mi bzad sems ni sbrul gdug 'dra bar srungs / /spros la spyod pa sems can dmyal ba dang / /dud 'gro gshin rje'i yul dang ring mi 'gyur/ /de lta bas na bzod dang brtson 'grus skyed / /de bzhin du sbyar te/ theg pa'i stobs 'di yis ni dag 'gyur zhing / /las kyi sgrib pa ma lus byang nas ni//stobs dang bcas shing bzhon bcas bdud thul cig /bstan pa gang yin des ni bzod pa skyed / /ces gsungs so/ /gnod pa rnam par spang ba mdor bstan pas byams pa de lta bas na byang chub sems dpa'i theg pa pa'i rigs kyi bu'am rigs kyi bu mos phyi ma lnga brgya tha ma la dam pa'i chos rnam par 'jig pa'i tshe/ma snad cing ma smas la bde bar yongs su thar bar 'dod pa dang las kyi sgrib pa thams cad byang bar 'dod pas/ 'du 'dzi med pa la dga' ba dang dgon pa dang nags dang / bas mthar gnas pa la brtson par bya zhing /mngon par mi brtson pa'i sems can yongs su spang ba dang / bdag gi 'khrul pa la blta ba dang / gzhan gyi 'khrul pa la mi blta ba dang / cang mi smra ba la dga' ba dang / shes rab kyi pha rol tu phyin pa la gnas pa la brtson par bya'o zhes gsungs so//'phags pa dkon mchog sprin las kyang / gnod pa rnam par spangs pa gsungs pa ni/ nam de'i don grub par gyur gyi bar du bsod snyoms la spyod de gzhan du na gnas gang na khyi za ba'am ba drus ma'am dud 'gro'i skye gnas su gtogs pa rang bzhin gyis ngang tshul ngan pa'i srog chags sam/bud med dang skyes pa dang khye'u dang bu mo kyal ka bya ba'i bsam pa can dag yod pa'am smad pa'i gnas de dag thams cad nas thams cad yongs su spong zhes bya ba ste/ 'dis ni tshe 'di la yang gnod par 'gyur ba rnam pa de lta bu ma spangs na ltung bar 'gyur ro zhes bstan par 'gyur ro//'di lta bu la sogs pas gnod pa rnam par spang ba gang yin pa / /de kun gang gis 'thob ce na/ /'bras bu med pa'i byed spong bas/ /'di la 'bras bu ni gzhan gyi don bya ba ste/ de'i don du gang spyod par mi 'gyur ba de ni 'bras bu med pa yin pas yongs su spang bar bya ba yin te/zla ba sgron ma'i mdo las/ lus kyi sdom pa'i skabs nas ji skad du lag pa mi rgod rkang pa mi rgod cing rkang lag bsdams pa zhes bya ba'i bar du gsungs pa lta bu'o/ /de skad du chos bcu pa'i mdo las kyang /lag pa bskyod pa dang rkang pa bskyod pa dang kun du rgyug pa dang yongs su rgyug pa dang mchong ba dang rkyal ba 'di ni lus kyi gnas ngan len zhes bya'o zhes bstan to/ /'phags pa chos yang dag par sdud pa'i mdo las kyang / ji ltar byang chub sems dpa' rnams gzhan gyi don bya ba las las gzhan mi byed pa de lta bu gsal bar yongs su bstan te/bcom ldan 'das byang chub sems dpa' rnams kyi lus kyi las gang ci yang rung / ngag dang yid kyi las gang ci yang rung / de thams cad ni sems can thams cad la lta bas 'jug go//snying rje chen po'i dbang du 'gyur ba'o/ /sems can la phan pa'i gnas kyi rgyu'o/ /sems can thams cad la phan pa dang bde ba'i lhag pa'i bsam pa las 'byung ngo / /de'i phan pa'i bsam pa 'di lta bus 'du shes 'di lta bur 'gyur te/ gang sems can thams cad la phan pa sgrub pa dang bde ba sgrub pa'i sgrub pa de bdag gis sgrub po snyam mo//de bzhin du sbyar te/ skye mched rnams la grong stong lta bur so sor rtog pa sgrub kyang skye mched yongs su dor bar yang mi 'tshal lo zhes gsungs so/ /'phags pa nam mkha' mdzod kyi mdo las kyang /'di lta ste dper na bu ga nas rlung 'jug pa de bzhin du gang dang gang nas sems la skyon byung ba de dang de nyid nas bdud kyis glags rnyed do/ /de lta bas na byang chub sems dpa' rtag tu sems la skyon med par bya'o/ /de la sems la skyon med pa ni 'di yin te/'di ltar rnam pa thams cad kyi mchog dang ldan pa'i stong pa nyid yongs su rdzogs pa'o zhes gsungs so/ /rnam pa thams cad kyi mchog dang ldan pa'i stong pa nyid de gang zhe na/ gang 'di byang chub sems dpa'i spyod pa yongs su mi gtong bas dngos po thams cad stong pa nyid du goms par byed pa'am goms par byas pa ste/de ni gtsug na rin po che'i mdo las rgya cher bstan to/ /de skad du blo gros mi zad pa'i mdo las kyang / sdig pa mi dge ba'i chos rnams spang ba'i phyir 'dun pa skyed do zhes bya ba'i skabs de nas/ gang ting nge 'dzin gyi phung po la g.yeng bar 'gyur ba sems g.yeng bar byed pa gzhan dang gzhan gang yang rung ste/de ni ting nge 'dzin gyi g.yeng ba zhes bya'o zhes bya ba nas 'di dag ni sdig pa mi dge ba'i chos rnams zhes bya'o zhes bya ba'i bar du gsungs so/ /bslab pa kun las btus pa las tshul khrims kyi pha rol tu phyin pa'i gnod pa rnam par spang ba zhes bya ba ste le'u lnga pa'o// //'bras bu med pa'i spyod pa rnam par spang ba bshad zin to/ /de ji ltar 'grub ce na/ smras pa/ de yang rtag tu dran pas 'grub ces bya'o/ /dran pa bcu gnyis po 'di dag ni 'bras bu med pa'i spyod pa spong bar 'gyur ba ste/'di ltar de bzhin gshegs pa'i bka' las mi 'da' bar srung zhing rnam par smin pa la gus par bya ba'i dran pa dang / lus thams cad mi g.yo ba'i ngo bo nyid du gnas par bya ba'i dran pa dang / sems can gyi don bya ba na yan lag gang mkho ba de la dran pa brtan pas bltas te mi g.yo bar gzhag la mos pa gzhan gyi kha na las par byas pas brtan pa thams cad kyi spyod pa dran pa dang /gsar bu'i 'jigs pa dang dga' ston la sogs pa dang 'brel ba'i gus par bya ba la lus bskyod pa'i dran pa dang /spyod lam bzhi bya ba la spyod pa'i dran pa dang / skabs skabs su spyod lam 'khrugs pa bsrung ba'i phyir spyod lam phun sum tshogs par bya ba la blta ba'i dran pa dang / smra ba'i dus la bab pa na ma dad pa dang / rgod pa dang khros pa dang nye mgon gyi phyogs su lhung ba la sogs pa'i dbang gis rkang lag dang mgo dang gdong gi 'gyur ba shin tu mi mdzes par 'gyur ba bsdams pa'i dran pa dang /nyan ba la brjod par bya ba gang yin pa de sgra ji tsam gyis don rtogs par 'gyur ba'i sgra de las lhag par smra bar mi bya ba'i dran pa dang /gzhan dogs par 'gyur ba'i nyes pa byung zhing ma bslabs pa'i skye bo dang phrad de nyam nga ba na rang gi sems dang bar bya ba de la bsgrim pa'i dran pa dang / sems nang du lhag mthong dang zhi gnas kyi ka ba la rtag tu gdags pa'i dran pa dang / yang nas yang du sems kyi gnas pa la so sor brtags pa'i dran pa dang /skye bo phal po che tshogs pa na gang yang rung phal cher ma shor du zin kyang ji skad bstan pa bzhin du dran pa bsrung ba de la bsgrim pa'i dran pa ste/ de ltar dran pa de dag gis 'bras bu med pa'i spyod pa rnam par spang ba 'grub po/ / dran pa de yang shin tu gus las 'byung / de la gus pa ni bya ba rnams la snying nas mngon du phyogs par te khyad du gsod pa'i gnyen po yin no/ /gus pa de ni zhi ba'i che ba nyid/ /shes par gyur na brtun pa skye/ /zhe ba zhes bya ba de gang zhe na/ 'phags pa blo gros mi zad pas bstan pa'i mdo las/zhi gnas su bstan pa gang yin pa ste/ de de la zhi gnas mi zad pa gang zhe na/ gang sems zhi ba dang / rab tu zhi ba dang / nye bar zhi ba dang / mi g.yeng ba dang / dbang po bsdams pa dang / mi rgod pa dang / mi 'phyar ba dang / mu cor mi smra ba dang /mi brtan pa med pa dang / mi g.yo ba dang / des pa dang / bsrungs pa dang / cang shes pa dang / las su rung ba dang / rtse gcig pa dang / gcig pur dga' ba dang / 'du 'dzi rnam par spong ba dang / dben pa la dga' ba dang / lus dben pa dang / sems bslad pa med pa dang /dgon pa la phyogs shing yid la byed pa dang / sdig pa 'dod pa ma yin pas na spyod lam bsrung ba'i bar dang / dus shes pa dang / tshod shes pa dang / ran pa shes pa dang / rigs pa shes pa dang / mgu sla ba dang / gso sla ba zhes bya ba la sogs pa gsungs so/ / zhi ba de'i che ba nyid ji lta bu zhe na/ yang dag pa ji lta ba bzhin du shes pa bskyed nus pa ste/ 'di ltar/ mnyam gzhag yang dag ji bzhin du/ /shes par 'gyur zhes thub pas gsungs/ /chos yang dag par sdug pa'i mdo las ji skad du/ yid mnyam par bzhag pas yang dag pa ji lta ba bzhin du mthong bar 'gyur ro//yang dag pa ji lta ba bzhin du mthong bas byang chub sems dpa' sems can rnams la snying rje chen po 'jug go snyam mo/ /de yang 'di snyam du sems te/ bdag gis sems can thams cad la ting nge 'dzin gyi sgo 'di dang chos thams cad yang dag pa ji lta ba bzhin du mthong ba 'di grub par bya'o snyam mo//de snying rje chen po des bskul bas lhag pa'i tshul khrims dang / lhag pa'i sems dang / lhag pa'i shes rab la bslab pa yongs su rdzogs par byas nas bla na med pa yang dag par rdzogs pa'i byang chub mngon par rdzogs par 'tshang rgya'o//de lta bas na bdag gis tshul khrims la mi g.yo ba dang / mi lhod par gnas par bya'o zhes gsungs pa lta bu'o/ /zhi ba'i che ba nyid 'di dag dang gzhan ngan song la sogs pa'i sdug bsngal mtha' yas pa las yang dag par 'da' ba dang 'jig rten pa dang 'jig rten las 'das pa'i bde ba phun sum tshogs pa'i pha rol tu phyin pa'i bdag nyid 'di rtogs nas/kun du 'bar ba'i khyim gyi nang du chud pa chu bsil ba 'dod pa bzhin du de 'dod pas brtun pa bsgom par bya ste/ des ni bslab pa rnams la gus par 'gyur zhing de las kyang dran pa nye bar 'jog la dran pa nye bar bzhag pas ni 'bras bu med pa rnam par spong bar byed cing 'bras bu med pa rnam par spangs pa gang yin pa de la gnod pa mi 'byung ngo //de lta bas na lus bsrung bar 'dod pas dran pa'i rtsa ba btsal te rtag tu dran pa nye bar gzhag par bya'o//de bas na drag shul can gyis byin pas zhus pa las/ byang chub sems dpa' khyim pa'i dbang du byas te gsungs pa/ des 'bru'i chang dang sbyar ba'i chang myos par 'gyur ba'i btung ba spang bar bya ste/ de ra ro ba med pa dang myos pa med pa dang 'khrul pa med pa dang /tshig mi 'chal ba dang mi 'phyar ba dang mi rgod pa dang mi g.yeng ba dang dran pa nye bar gnas pa dang shes bzhin dang ldan par bya'o zhes gsungs so/ /de nyid las rab tu byung ba'i byang chub sems dpa'i dbang du byas te dran pa dang shes bzhin ni mi g.yeng ba'o zhes gsungs so//de la dran pa ni 'phags pa gtsug na rin po che'i mdo las/ dran pa gang gis nyon mongs pa thams cad 'byung bar mi 'gyur ba dang / dran pa gang gis bdud kyi las thams cad kyi go skabs mi 'byed pa dang / dran pa gang gis lam gol ba dang lam ngan par mi 'gro ba dang /dran pa sgo ba lta bu gang gis sems dang sems las byung ba'i chos mi dge ba thams cad kyi skabs mi 'byed pa 'di ni yang dag pa'i dran pa zhes bya'o zhes gsungs so/ /shes bzhin ni shes rab kyi pha rol tu phyin pa las gsungs te/ spyod na yang bdag spyod do zhes rab tu shes so/ /'greng na yang bdag 'greng ngo zhes rab tu shes so/ /'dug na yang bdag 'dug go zhes rab tu shes so/ /nyal na yang bdag nyal lo zhes rab tu shes so/ /de'i lus ji lta ji lta bur gnas par gyur ba de lta de lta bur rab tu shes so//de bzhin du sbyar te/ de 'gro ba dang 'ong ba na yang shes bzhin du spyod pa yin no/ /lta ba dang / rnam par lta ba dang bskum pa dang / myang ba dang chos gos snam sbyar dang thang ba dang lhung bzed dang chos gos gyon pa dang za ba dang 'thung ba dang 'cha' ba dang gnyid dang snyom pa bsal ba dang 'ong ba dang 'gro ba dang 'greng ba dang 'dug pa dang gnyid kyis log pa dang /gnyid kyis ma log pa dang smra ba dang cang mi smra ba dang / nang du yang dag 'jog pa shes bzhin du spyod do zhes gsungs so/ /tshul khrims ni ting nge 'dzin 'grub pa yin te/ zla ba sgron ma'i mdo las ji skad du//nyon mongs med pa'i ting 'dzin myur thob ste/ /'di ni tshul khrims rnam dag phan yon no/ /zhes gsungs pa lta bu'o/ /de bas na ting nge 'dzin gyi rgyu'i sbyor ba gang ci yin pa de dag ni tshul khrims kyi nang du 'dus par shes so/ /de lta bas na ting nge 'dzin don du gnyer bas dran pa dang shes bzhin gyi ngang tshul can du bya'o//de bzhin du tshul khrims don du gnyer bas kyang ting nge 'dzin la 'bad par bya ste/ mdo de nyid las ting nge 'dzin gyi phan yon gyi skabs nas/ de ni cho ga med ma yin/ /cho ga dag la rab tu gnas/ /spyod yul la ni rnal 'byor pa/ spyod cing spyod yul ma yin spong / /yongs su gdung ba med par gnas/ /dbang po bsrung zhing bsdams pa yin/ /zhes gsungs so/ /tshul khrims dang ting nge 'dzin gcig gis gcig 'phel bar byed pa 'di gnyis kyis kyang sems yongs su sbyong ba yongs su 'grub po/ / byang chub sems dpa'i bslab pa 'di ni / 'di lta ste/ sems yongs su sbyong ba'o/ /'di ni chos thams cad kyi rtsa ba yin te/ 'phags pa dkon mchog sprin las sems ni chos thams cad kyi sngon du 'gro ba ste sems yongs su shes na chos thams cad yongs su shes par 'gyur ro zhes bya ba dang //yang 'jig rten sems kyis khrid pa ste/ /sems kyis sems ni mi mthong ngo / /dge ba'am 'on te mi dge ba'i/ /las ni sems kyis bsags pa yin/ /sems ni mgal me bzhin du 'khor/ /sems ni rlabs dang 'dra bar g.yo/ / sems ni nags kyi me bzhin sreg /sems ni chu chen bzhin du skyed/ /des de ltar brtags pas sems la dran pa nye bar gzhag par gnas te sems kyi dbang du mi 'gro'i sems de'i dbang du 'gro'o/ /sems de'i dbang du gyur na chos thams cad la dbang du gyur pa yin no zhes gsungs so//chos yang dag par sdud pa'i mdo las kyang / byang chub sems dpa' rnam par gnon pa'i blo gros kyis gsol pa/ chos chos zhes bgyi ba'i chos gang lags pa de ni yul na mi gnas phyogs na mi gnas te gzhan du na chos ni rang gi sems la rag las so//de lta bas na bdag gis rang gi sems shin tu gzung ba dang / shin tu mthar thug pa dang / shin tu thul ba dang / shin tu mnyam par brtsam pa dang / shin tu tshar gcad par bya'o/ /de ci'i phyir zhe na/ sems gang na yod pa de na yon tan dang nyes pa rnams yod kyi /sems med pa la ni yon tan dang nyes pa rnams med do snyam ste/ de la byang chub sems dpa' nyes pa rnams las sems bzlog nas yon tan rnams la 'jug ste/ de lta bas na chos ni sems la rag las byang chub ni chos la rag las zhes bgyi'o//bcom ldan 'das 'di ni chos yang dag par 'dzin pa lags te/ bde bar mngon bar rdzogs par byang chub par 'gyur ro zhes gsungs so/ /'phags pa sdong po bkod pa'i mdo las kyang / byang chub sems dpa'i spyod pa thams cad ni rang gi sems la brten te /sems can thams cad yongs su smin par bya ba dang gdul ba ni rang gi sems la brten to/ /de bzhin du sbyar te/ rigs kyi bu bdag 'di snyam du sems te/ dge ba'i rtsa ba thams cad kyis rang gi sems nye bar brtan par bya'o/ /chos kyi sprin rnams kyis rang gi sems yongs su brlan par bya'o//sgrib par 'gyur ba'i chos rnams las rang gi sems yongs su sbyang bar bya'o/ /brtson 'grus kyis rang gi sems brtan par bya'o zhes bya ba la sogs pa brjod pa yin no/ /de bzhin du de nyid las/ 'phags pa nor bzangs lha mo sgyu ma mthong bas brkam par gyur pa la/grong gi lha mo rin chen mig gis de mthong ba'i don du 'di skad ces rjes su bstan te/ rigs kyi bu khyod kyis 'khor ba'i yul thams cad la dga' bar mi gnas pas sems kyi grong khyer yongs su bsrung ba la brtson par gyis shig /rigs kyi bu khyod kyis de bzhin gshegs pa'i stobs bcu la lhag par dmigs pas sems kyi grong khyer brgyan pa la brtson par gyis shig /rigs kyi bu khyod kyis phrag dog dang ser sna dang g.yo dang bral bas sems kyi grong khyer yongs su sbyang ba la brtson par gyis shig /rigs kyi bu khyod kyis chos thams cad kyi rang bzhin nges par rtogs par bya bas sems kyi grong khyer gyi yongs su gdung ba rab tu zhi bar bya ba la brtson par gyis shig /rigs kyi bu khyod kyis thams cad mkhyen pa nyid kyi tshogs la brtson 'grus chen po'i shugs rnam par spel bas sems kyi grong khyer rnam par spel ba la brtson par gyis shig /rigs kyi bu khyod kyis ting nge 'dzin dang snyoms par 'jug pa dang bsam gtan dang / rnam par thar pa dang chos kyi gzhal med khang yangs pa'i rnam par spyod pa la dbang bsgyur bas sems kyi grong khyer dang gnas kyi mdzod brgyan pa dang bsrung ba la brtson par gyis shig /rigs kyi bu khyod kyis de bzhin gshegs pa thams cad kyi 'khor gyi dkyil 'khor yang dag pa sgrub pa'i sa thams cad kyi shes rab kyi pha rol tu phyin pa rab tu thob par btsal bas sems kyi grong khyer snang bar bya ba la brtson par gyis shig /rigs kyi bu khyod kyis de bzhin gshegs pa thams cad yang dag par 'byung ba'i thabs kyi lam gyis rang gi sems kyi grong khyer nye bar bstan pa la brtson par gyis shig /rigs kyi bu khyod kyis byang chub sems dpa' kun du bzang po spyad pa spyod pa'i smon lam mngon par bsgrub pa'i sems rnam par dag pas sems kyi grong khyer gyi ra ba brtan pa mngon par bsgrub pa la brtson par gyis shig /rigs kyi bu khyod kyis nyon mongs pa dang bdud kyi rigs kyi sdig pa'i grogs po dang bdud kyi 'khor gyis mi choms par bya bas sems kyi grong khyer rgal dka' ba dang mi shigs pa mngon par bsgrub pa la brtson par gyis shig /rigs kyi bu khyod kyis byams pa chen po 'gro ba thams cad la rgyas par dga' bas sems kyi grong khyer rab tu rgyas par bya ba la brtson par gyis shig /rigs kyi bu khyod kyis mi dge ba'i chos thams cad kyi gnyen po chos kyi gdugs yangs pa bsgrub pas sems kyi grong khyer rab tu dga' ba la brtson par gyis shig /rigs kyi bu khyod kyis phyi nang gi dngos po 'gro ba thams cad la bstabs pa'i phyir sems kyi grong khyer gyi sgo dbye ba la brtson par bgyis shig /rigs kyi bu khyod kyis mi dge ba'i chos kyi rgyud thams cad mi srid par bya bas sems kyi grong khyer rab tu mkhrang bar mngon par bsgrub pa la brtson par gyis shig / ces bya ba nas/ rigs kyi bu de ltar sems kyi grong khyer rnam par dag par bya ba la brtson pa'i byang chub sems dpa' dge ba'i rtsa ba thams cad bsgrub pa 'thob par nus so/ /de ci'i phyir zhe na/ 'di ltar sems kyi grong khyer yongs su dag pa'i byang chub sems dpa' de'i mdun na ni sangs rgyas mthong bar bya ba la sgrib pa'am chos mnyan par bya ba la sgrib pa'am sgrib pa thams cad mi gnas so zhes bya ba la sogs pa gsungs so//de lta bas na sems yongs su sbyang bar bya ba de nyid byang chub sems dpa'i bslab pa yin no/ /zhes bya ba 'di rnam par gnas pa yin no//mi g.yo ba'i sems dang ldan pa de ni/ phyi rol g.yo ba bzlog pa yis/ /sems ni zhi gnas mi g.yo 'gyur/ /shes bzhin med pa'i gzhan gyi dbang du gyur cing brjed pa ni 'dod pa'i dmigs pa las gzhan du khrid pa'i phyir sems g.yo bar 'gyur ro//gang gi tshe dran pa dang shes bzhin dang ldan zhing phyi rol du g.yo ba bzlog par gyur pa de'i tshe de'i dbang du gyur pas dmigs pa gcig la btags pas ji srid du 'dod pa de srid du gnas la/ de las kyang sngon bzhin du phan yon rgya cher 'byung ngo //las dang po pa yin du zin kyang sems can gyi don la bzod pa nyid de dad par byed pa'i phyir ro/ /ji lta zhe na/ kun du mi rgod 'jam pa dang / /ran cing mnyen par smra ba yis/ /skal can skye bo 'dun par 'gyur/ /gzung bar 'os pa'ang skye bar 'gyur//'di lta ste/ sems can 'dun par bya ba de nyid byang chub sems dpa'i bya ba yin te/ chos yang dag par sdud pa'i mdo las/ byang chub sems pa 'phags pa mthong dgas gsol ba/ /bcom ldan 'das byang chub sems dpa' ci nas sems can rnams kyis mthong ma thag tu dga' bar 'gyur pa de lta de ltar bsgrub par bgyi'o//de ci'i slad du zhe na/ bcom ldan 'das byang chub sems dpa'i bgyi ba gzhan ma mchis kyi sems can yongs su smin par bgyi bar byas te/ bcom ldan 'das 'di ni byang chub sems dpa'i chos yang dag par brjod pa lags so zhes gsungs pa lta bu'o//de ltar ma byas na nyes she na smras pa/ de ni gzung 'os ma yin na/ /thal bas g.yogs pa'i me bzhin du/ /'jig rten rgyal ba'i myu gu brnyas/ /sems can dmyal la sogs par sreg /sngar ji skad du bstan pa yin no//gang gi phyir de nyid la brnyas pa de nyid gnod pa yin te / /de phyir rgyal bas sdom pa'i mdor/ /gang gis sems can dang 'gyur/ /de ni bsgrims te rnam spang zhes/ /dkon mchog sprin las bka' stsal to/ /ji skad du/ byang chub sems dpa'i yang dag par sbyang pa de gang zhe na/byang chub sems dpa' gang gi phyir de la sems can rnams mdang par 'gyur ba'i gnas ma yin par mi spyod/ yul ma yin par mi spyod/ dus ma yin par mi smra ba yin/ dus mi shes pa ma yin yul mi shes pa ma yin/ chod mi shes pa ma yin te/ de sems can rjes su bsrung ba dang bdag gi byang chub kyi tshogs yongs su rdzogs par bya ba'i phyir/ spyod lam phun sum tshogs shing 'jam par smra ba dang / 'du 'dzi mi mang ba dang / rab tu dben pa la mngon par phyogs pa dang /bzhin gyi mdangs rab tu dang ba yin zhes gsungs pa lta bu'o/ /de bas na chos yang dag par sdud pa'i mdo las kyang / gang sems can srung ba de tshul khrims srung ba yin no zhes bstan to/ /tshul 'dis ni dogs par 'gyur ba'i bud med dang lhan cig tu dben pa'i gnas la sogs par gnas par mi bya'o zhes 'jig rten bsrung ba mdzad par gyur to//de ltar na longs spyod pa'i chu'am thang la gcin dang phyi sa dang mchil ma dang rnag la sogs pa smad pa rnams dben yang rung mi dben yang rung ste lha dang mi'i sems bsrung ba'i phyir mi 'dor ro//dam pa'i chos dran pa nye bar gzhag pa las kyang / lkog tu lhag mar byas te/ lhag ma mi za ba dag la byin na yi dags kyi 'gro bar 'gyur ro zhes gsungs so/ /de bzhin du byang chub sems dpa'i so sor thar pa las kyang / ma dad pa spang ba'i phyir mdun du so shing bza' bar mi bya mchil ma dor bar mi bya'o zhes gsungs so//gus pa dang 'dzem par bya ba'i cho ga 'di ni tshangs pa mtshungs par spyod pa nyi tshe la bya ba ma yin gyi thams cad du bya bar blta'o/ /mdo 'dir ni de dag gi mdun du byas na nyes pa shin tu lci ba'i 'jigs pa bstan pa'i phyir tshangs pa mtshungs par spyod pa'i ched du bstan pa yin te/ ji ltar 'di nyid las sgra drag po mi bya'o zhes gsungs pa'i cho ga 'di nyi tshe ba ma yin pa bzhin no/ /de skad du tshangs pas zhus pa'i mdo las kyang / bag sar bzhin du bya'o zhes gsungs so/ /de bzhin du so sor thar pa las/ 'jig rten ma dad par byed par bstan pa brtags te bsal bar bya'o/ /de la re zhig /kha bkang ba dang sgrar bcas dang / /kha gdangs nas ni bza' mi bya/ /rkang pa brkyang ste mi 'dug cing / /lag pa mnyam du mi mnye'o/ /de bzhin du rang gis kyang brtags pa dang / mthong ba dang thos pas 'jig rten ma dad par 'gyur ba bsrung bar bya'o// //bam po drug pa/ma dad par byed pa'i tshig spang ba ni bla ste dran pa bskul ba tsam gyi phyir bstan par bya'o/ /'phags pa blo gros rgya mtshos zhus pa'i mdo las/ tshig zhum pa med pa yin/ tshig sub sub po med pa yin/ tshig nog nog po med pa yin/ 'bar bar byed pa'i tshig med pa yin/ co 'dri ba'i tshig med pa yin/'dod chags kyi rjes su chags pa'i tshig med pa yin/ phal pa'i tshig med pa yin/ kun du ma bsrungs ba'i tshig med pa yin/ gnod sems 'bar ba'i tshig med pa yin/ 'thab pa dang rtsod pa dang 'gyed pa'i tshig med pa yin/ thob kyis 'jal ba'i tshig med pa yin/ tshig 'gyur ba med pa yin/ tshig mi brtan pa med pa yin/ mu cor smra ba'i tshig med pa yin/ gar gyi ltad mo lta ba'i tshig med pa yin/ ngor skur pa 'debs pa'i tshig med pa yin no zhes gsungs so/ /'phags pa de bzhin gshegs pa'i gsang ba'i mdo las kyang / zhi ba'i blo gros byang chub sems dpa'i ngag ni chags pa'am sdang pa'am/rmongs pa'am/ nyon mongs pa'am/ thogs pa'am/ nye bar thogs pa'am/ rang gi phyogs bstod pa'i tshig gam/ gzhan gyi phyogs tshar gcod pa'i tshig gam/ bdag bstod pa la rjes su chags pa'i tshig gam/ gzhan gyi bstod pa la bar du gcod pa'i tshig gam/ kha 'og tu lus 'khrus par mi byed pa'i tshig gam/ mngon pa'i nga rgyal gyis brda sprod pa'i tshig mi 'byin zhes bya ba la sogs pa gsungs so/ /'phags pa sa bcu pa'i mdo las kyang / ngag gang dag yid du mi 'ong bas snying na bar byed cing / gdung bar byed pa dang / bdag gi rgyud dang gzhan gyi rgyud ma rung bar byed pa'i tshig gi rnam pa de lta bu spangs te/ ngag 'di 'jam pa dang mnyen pa dang / yid du 'ong ba dang / brdzun ma yin pa dang / rnar snyan pa dang / snying du sdug pa dang / grong khyer ba dang / skye bo mang po'i yid du 'ong ba dang / yid dga' bar byed pa dang /yid tshim par byed pas bdag gi rgyud dang gzhan gyi rgyud dang bar byed pa dang / lan legs par ldon pa'i tshig dang / dus su smra ba dang / yang dag par smra ba dang / chos smra ba dang / rigs pa smra ba dang / 'dul ba smra ba de lta bu'i tshig brjod de / de tha na bzhad gad du bya ba'i tshig yongs su spang bar bya ba yang yongs su spong na/tshig gis gzhan rnam par g.yeng ba lta ci smos zhes bya ba'i bar du gsungs so/ /'phags pa nam mkha' mdzod kyi mdo las kyang / bla ma'i ngag mi gcog pa dang pha rol gyi tshig mi zlog pas tshig gzung bar 'os par 'gyur ro zhes gsungs so//chos yang dag par sdud pa'i mdo las/ byang chub sems dpa' nam mkha' mdzod kyis gsol ba las kyang / byang chub sems dpa'i gang gis sems can rnams la gnod par 'gyur ba'i tshig de smra bar mi bgyi'o/ /gang gis gzhan la gdung bar 'gyur ba'i tshig de smra bar mi bgyi'o//byang chub sems dpa' gang gzhan gyis 'tshal bar mi 'gyur ba'i tshig de smra bar mi bgyi'o/ /gang gzhan gyi don ma lags pa dang / don ma mchis pa'i tshig de smra bar mi bgyi'o/ /gang sems can rnams kyi snying la mi 'bab pa dang / 'khor go ba ma lags pa dang rnar mi snyan pa'i tshig de smra bar mi bgyi'o zhes gsungs so/ /mdor na gzhan dad par mi 'gyur ba bsrung bar bya bar 'phags pa blo gros rgya mtshos zhus pa'i mdo las bstan te/ gzhan yang theg pa chen po sdud par 'gyur ba'i chos gcig ste/ bdag gis 'khrul pa la rtog pas sems can thams cad rjes su srung ba'o zhes bya'o//gang gis sems can thams cad srung bar byed pa 'di ni bdag lus bsrung ba ste/ ci nas gzhan dag gis ma rung bar mi 'gyur ba dang ci nas gzhan dag rung bar mi 'gyur ba'o/ /gzhung rgyas pa 'di'i don bsdus pa 'di ni byang chub sems dpas yid kyis rtag tu gzung bar bya ste//shin tu nges shing rab dad dang / /brtan zhing gus bcas zhe sar bcas/ /ngo tshar bcas shing 'jigs bcas dang / /zhi zhing gzhan dga' byed la brtson/ /phan tshun mi mthun byis pa yi/ /'dod pa rnams kyis mi skyo zhing //nyon mongs skyes pas 'di dag gi/ /sems 'di yin snyam brtser ldan dang / /kha na ma tho med dngos la / /bdag dang sems can dbang byas nas/ /sprul pa bzhin du nga med par/ /yid ni rtag tu gzung bar bya/ /zhes bya ba'o / /ci bdag bsrung ba 'di de tsam du zad dam zhe na ma yin no//'o na ci zhe na/ /sman dang gos la sogs bcas pas/ /de la sman ni rnam pa gnyis te/ gtan du ba'i sman dang na ba'i rkyen sman no/ /de la gtan du ba'i sman gyi dbang du byas te/ 'phags pa dkon mchog sprin las/ bsod snyoms de las cha gcig ni tshangs pa mtshungs par spyod pa rnams kyi spyir gzhag go//gnyis pa ni sdug bsngal ba rnams kyi spyir gzhag go/ /gsum pa ni sems can log par ltung ba rnams kyi spyir gzhag go/ /cha bzhi pa ni bdag za'o/ /de za ba na 'dod chags med par za ste chags par ma yin brkam par ma yin zhen par ma yin gyi gzhan du na ji tsam du lus gnas par 'gyur ba dang 'tsho bar bya ba'i phyir za ste ji ltar ha cang yang nyams dma' ba dang ha cang yang lus lci bar mi 'gyur ba de ltar za'o//de ci'i phyir zhe na/ ha cang yang nyams dmas na ni dge ba'i phyogs la rgyab kyis bltas par 'gyur ro//lus ha cang yan lcis na ni gnyid kyis non par 'gyur ro/ /de bas na bsod snyoms de zos nas dge ba'i phyogs la mngon du phyogs par bya'o zhes bya ba la sogs pa gsungs so/ /'phags pa rin po che'i phung po'i mdo las/ des grong ngam grong khyer ram grong rdal du bsod snyoms spyod pa na chos kyi go cha bgos la bsod snyoms spyad par bya'o//de la chos kyi go cha gang zhe na/ mig gis yid du 'ong ba'i gzugs rnams mthong na rjes su chags par mi bya'o/ /yid du mi 'ong ba'i gzugs rnams mthong na khong khro bar mi bya'o/ /de bzhin du sgra dang dri dang ro dang reg pa yid du mi 'ong ba dang /yid du 'ong ba rnams la rjes su chags pa dang khong khro bar mi bya'o/ /dbang po shin tu bsdams pa dang mig mi g.yeng ba dang gnya' shing gang tsam du blta ba dang dul ba dang cang shes kyi sems dang sngon yid la byed pa'i chos mi 'dor ba dang zang zing gis ma 'bags pa'i rgyud kyis bsod snyoms spyad par bya'o//mthar chags su bsod snyoms blang bar bya'o/ /gang nas bsod snyoms rnyed pa der rjes su chags par mi bya'o/ /gang nas ma rnyed pa der yang khong khro bar mi bya'o/ /khyim bcur bslangs pa las khyim bcu gcig pa las bsod snyoms ma rnyed na yang yongs su yi chad par mi bya'i/de 'di snyam du bram ze dang khyim bdag 'di dag ni bya ba mang ba dag yin pas de dag gis bdag la sbyin par nges pa med de de dag bdag la sems pa yang ngo mtshar che na bsod snyoms sbyin pa lta smos kyang ci dgos snyam pa'i 'du shes bskyed par bya ste/des de ltar yongs su yi chad pa med par bsod snyoms spyad par bya'o/ /sems can gang dag de'i mig lam du snang bar gyur pa skyes pa dang bud med dang khye'u dang bu mo dang tha na dud 'gro'i skye gnas su song ba de dag la yang byams pa dang snying rje'i sems bskyed par bya'o//ji nas kyang sems can gang dag bdag gi mig lam du snang bar gyur pa'am bsod snyoms sbyin pa de dag mtho ris su 'gro bar 'gyur ba de ltar bya'o/ /de ltar brtson par bya'o/ /des bsod snyoms ngan nam bzang yang rung blangs te/ grong ngam grong khyer ram grong rdal 'di na bdag gi bsod snyoms 'di la bgo bsha' bya dgos pa'i sems can dbul po su yod snyam du phyogs bzhi kun du blta bar bya'o//gal te sems can dbul po zhig mthong na des bsod snyoms de la bgo bsha' bya'o/ /gal te sems can dbul po ma mthong na des 'di ltar gang dag bdag gi mig lam du snang bar ma gyur te/mi snang ba'i sems can de dag la bsod snyoms kyi thog ma'i cha skal sbyin gyi byin nas len pa dag yongs su spyod cig snyam du sems bskyed la/ des bsod snyoms de khyer te dgon pa'i gnas der song la lhung bzed dang lag pa bkrus te/dge sbyong gi spyod pa dang cho ga dang ldan pa'i spyod pa bzang pos byin gyis brlabs la des skyil mo krung bcas te bsod snyoms de bza' bar bya'o/ /de bzhin du sbyar te/ zas zos nas 'di snyam du lus 'di la srin bu'i rigs brgyad khri yod pa dag 'di'i mthus bde bar gnas par gyur cig /da lta ni 'di dag zang zing gis bsdu bar bya'o/ /byang chub thob nas ni chos kyis bsdu bar bya'o snyam du sems bskyed par bya'o/ /gal te de'i nyung bar gyur na des 'di snyam du kha zas nyung bas ni bdag gi lus yang bar 'gyur/spong ba bzod par 'gyur/ bdag gi bshang gci 'byung ba nyung bar 'gyur/ bdag la dad pas byin pa chung bar 'gyur/ bdag gi lus yang ba dang sems yang bar 'gyur/ bdag rmugs pa dang gnyid chung bar 'gyur ro snyam du sems bskyed par bya'o/ /de bzhin du sbyar te/gal te des bsod snyoms mang zhig rnyed na de la yang ran par bza' bar bya'o/ /dor ba'i chos nyid du yang bya ste/ bsod snyoms de las rdo leb gang yang rung ba'i steng du gtor la 'di snyam du gcan gzan dang bya'i tshogs gang la la zang zing gi zas 'dod pa byin nas len pa de dag byin pa'i sbyin pa byin pa 'di la zo zhig snyam du sems bskyad par bya'o zhes gsungs so//yang bka' stsal pa/ des kha zas bzang po rnams la ro bro ba'i 'du shes thams cad kyi thams cad du bskyed par mi bya'o/ /des 'di ltar bdag gis gdol bu lta bu dang lus dang sems gtsang mar bya'i kha zas kyis lus gtsang mar ni mi bya'o//de ci'i phyir zhe na/ zas bzang po ji snyed cig zos kyang de thams cad ni tha mar rnag tu zag go/ /tha mar mi mthun no/ /tha mar dri nga ba'o/ /de lta bas na bdag gis zas bzang po 'dod par mi bya'o snyam du bslab par bya'o//de bzhin du sbyar ro/ /des 'di ltar sems bskyed par bya ste/ bdag la skyes pa bsod snyoms ster gyi bud med ni ma yin no zhe'am/ bdag la bud med bsod snyoms ster gyi skyes pa ni ma yin no zhe'am/ bdag la khye'u bsod snyoms ster gyi bu mo ni ma yin no zhe'am/bdag la bu mo bsod snyoms ster gyi khye'u ni ma yin no zhe'am/ bdag gis bzang po rnyed kyi ngan pa ni ma yin no zhe'am/ bdag gis bsti stang du byas nas rnyed kyi bsti stang ma byas par ni ma yin no zhe'am/ bdag gis bde blag tu rnyed kyi sha thang par ni ma yin no zhe'am/ bdag la skyes pa dang bud med dang / khye'u dang bu mo rtsi bar 'gyur ro zhe'am/ phyin ma thag tu bdag la sems par 'gyur ro / /bdag sdod dgos par 'gyur ram/ shin tu bsdogs pa rnyed par 'gyur ram/ bdag gis bzang po ro sna tshogs dang ldan pa rnyed par 'gyur gyi dbul po'i zas lta bu ngan pa ni rnyed pa ma yin no snyam du des mi dga' ba yid la byed pa thams cad bskyed par mi bya'o//de bzhin du sbyar te/ sems can phal cher ni ro la brkam ste/ zas kyi phyir sdig pa'i las rnams byas nas sems can dmyal bar skye'o/ /gang dag chos shes pa mi brkam pa ma zhen pa ro la mi gdu ba lce'i dbang po chog shes pa zas ngan ngon ji tsam gyis kyang 'tsho ba de dag ni shi 'phos te shi ba'i dus byas nas mtho ris su skye bar 'gyur/lha dang mi rnams kyi nang du bde 'gror 'gro bar 'gyur/ lhar skyes nas bdud rtsi za bar 'gyur ro/ /'od srungs de ltar na bsod snyoms spyod pa'i dge slong gis ro la sred pa zlog ste/sems nges par sems pas lhad zan zhag bdun lon pa za yang yi 'chad par mi bya'o/ /de ci'i phyir zhe na/ lus gso ba dang 'phags pa'i lam gyi tshogs bsags pa'i don du bdag gis zas bza'o snyam pa'i phyir ro//de bzhin du sbyar te/ 'od srungs gal te sprin 'dus shing char 'bab ste/ bsod snyoms spyod pa'i dge slong bsod snyoms la 'jug mi nus pa'i dus kyi tshe/ byams pa'i zas kyi go bgo ste /chos sems pa yid la byed pa la gnas nas zhag gnyis sam zhag gsum zhig zan chad na/'di ltar yi dags gshin rje'i 'jig rten pa nyes par byed pa'i las byas pa gang dag lo brgyar yang mchil ma'i thal ba 'ga' bza' mi rnyed pa dag kyang yod de/ de lta bas na bdag tshul bzhin du chos sems pa la gnas pas/ lus nyam chung ba'am sems nyam chung ba bskyed par mi bya ste/bkres pa dang skom pas ji mi snyam par bya'o/ /'phags pa'i lam bsgom pa la brtson 'grus rgyun mi 'chad par bya'o snyam du 'du shes bskyed par bya'o/ /de bzhin du sbyar te/ khyim gang na bsod snyoms gtsang ma byed pa'i khyim der stan la 'dug ste bsod snyoms gtsang ma byed ma zin gyi bar du chos kyi gtam brjod par bya'o//de nas bsod snyoms de blangs la stan las langs te 'gro bar bya'o/ /'od srungs bsod snyoms spyod pa'i dge slong gis 'khong bar mi bya/ kha gsag mi bya/ tshul 'chos par mi bya'o/ / de la 'khong ba gang zhe na/ gang gzhan dag la tshig 'di skad du smra ba ste/ bdag gi bsod snyoms ni ngan pa'o bdag gi bsod snyoms ni rtsub pa'o/ /bdag gis sngon 'di lta bu dang ma 'grangs par ma zos so/ /bdag gi bsod snyoms ni skye bo mang po dang thun mong du byas so/ /bdag gis nyung zhig zos te bdag ma 'grangs pas bdag gi lus nyam chung ngo zhes bya ba ste 'di ltar 'khong ba'i mtshan ma gang ci yang rung ba 'di lta bu 'di ni sems kyi tshul 'chos pa zhes bya ste/dge slong bsod snyoms spyod pas de dag thams cad mi bya'o/ /gang lhung bzed du 'ongs pa ngan kyang rung bzang yang rung nyung yang rung mang yang rung gtsang yang rung mi gtsang yang rung ste de bza' bar bya'o//yongs su gdung ba med pa dang / bsam pa yongs su dag pa dang / chos nges par sems pa mang ba dang / lus gso ba dang 'phags pa'i lam nye bar bstan pa'i phyir des bsod snyoms bza' bar bya'o zhes bya ba'o//de skad du drag shul can gyis byin pas zhus pa'i mdo las kyang / gang la la bsod snyoms blangs te/ bdag dang gzhan gyi don rdzogs par byed nus na ngas byang chub sems dpa' de mgron du 'gro bar gnang ngo zhes gsungs so/ /de ltar re zhig rtag tu ba'i sman gyis lus bsrung bar bya ba yin no//de la yang nya dang shas ni ma yin te/ lang kar gshegs pa'i mdo las bkag pa'i phyir te / 'di ltar byang chub sems dpa' snying brtse ba'i bdag nyid can gyis sha thams cad mi bza'o zhes bshad do/ /de bzhin du sbyar te/ /'khrul pa dang ni gnyen bshes dang //khu chu khrag las byung ba'i phyir/ /'byung po rnams ni dngang 'gyur bas/ /rnal 'byor can gyis sha mi bza'/ /sha rnams dang ni sgog btsong dang / /chang dag rnam pa sna tshogs dang / /ke'u dang sgog skya de bzhin du/ /rnal 'byor can gyis rtag tu spang / / 'bru mar gyis kyang byugs pa spang / /khri la brten pa'i sems can rnams/ /bu ga bu gar 'jig 'gyur phyir/ /khri la nyal bar mi bya'o/ /de bzhin du sbyar te/ /khe yi phyir ni sems can gsod/ /sha yi phyir ni nor sbyin byed/ /de dag gnyi ga sdig pa can/ /ngu 'bod byed la sogs par btso//gang gis thub pa'i tshig 'das te/ /bsam pa ngan pas sha za na/ /'jig rten gnyis ni gzhig pa'i phyir/ /shAkya'i bstan las brtul zhugs blangs/ /shin tu mi bzad dmyal bar yang / /sdig pa'i las can de dag 'dod/ /ma rungs du 'bod la sogs su//sha za de dag btso bar 'gyur/ /rnam gsum dag pa'i sha rnams ni/ /ma brtags pa dang ma blangs dang / /ma bskul ba yang spong med pas/ /de bas sha ni mi bza'o/ /rnal 'byor can gyis sha mi bza'/ /nga dang sangs rgyas dag gis bshad/ /sems can gcig la gcig za ba//sha za dag gi rigs su skye/ /dri mi zhim zhing smad pa dang / /smyon pa rnams su skye bar 'gyur/ /gdol pa sme sha can rigs dang / /btso blag mkhan du yang yang skye/ /mkha' 'gro'i rigs kyi skye gnas dang / /sha za'i rigs su skye bar 'gyur/ /mi yi tha ma de dag ni//srin po byi la'i mngal du skye/ /glang po rtsal dang sprin chen dang / /mya ngan 'das dang sor phreng dang / /lang kar gshegs pa'i mdo las kyang / /ngas ni sha yang rnam par spangs/ /sangs rgyas byang chub sems dpa' dang / /nyan thos rnams kyis smad pa la/ /ngo mi tsha bar za ba ni//rtag tu smyon par skye bar 'gyur/ /sha la sogs pa spang ba'i phyir/ /bram ze'i rigs dang rnal 'byor can/ /shes rab can dang nor ldan par/ /de dag rnams ni skye bar 'gyur/ /mthong dang thos dang dogs pa yis/ /sha rnams thams cad rnam par smad/ /sha zan rigs su skyes pa yi //rtog ge ba rnams mi shes so/ /ji ltar 'dod chags thar pa la/ /bar chad byed par 'gyur ba bzhin/ /de ltar sha dang chang la sogs/ /bar chad byed par 'gyur ba'o/ /ma 'ongs pa yi dus na ni/ /sha za gti mug smra ba dag /sha ni sdig med rung ba'o zhes//sangs rgyas rnams kyis bshad ces zer/ /zas la sman dang 'dra ba dang / /bu yi sha dang mtshungs par yang / /ran pa dang ni mi 'phrod par/ /rnal 'byor can gyis zas la spyod/ /seng ge dag dang stag rnams dang / /wa la sogs dang 'grogs 'gyur bas/ /ngas ni byams pas gnas pa la//rtag par rnam pa kun du smad/ /thar pa'i chos dang 'gal ba'i phyir/ /mi rnams dang bar 'gyur ba'i sha/ /de phyir bza' bar mi bya ste/ /'di ni 'phags pa'i rgyal mtshan no/ /zhes gsungs so/ /ye shes ldan gyi le'u las/ sha za ba gang 'byung ba de ni don chen por bsgrub pa'i phyir nyes pa med de/de las 'di skad du/ dge slong 'di ni 'chi ba'i dus bgyis na/ /'dzam bu'i gling du ting 'dzin sgra yang ni/ /sems can rnams la rtag tu nub par 'gyur/ /'dis gsos pas ni ting 'dzin rnams kyang thob/ /ces gsungs so/ /de ni snying rje chen po la mngon par brtson pa ste/de la byams pa med du mi dogs pas nyes pa med do/ /'phags pa dkon mchog sprin las/ dur khrod pas sha dang 'phags pa med par bya'o zhes gsungs pa gang yin pa de ni de las gzhan pa'i rang bzhin can gyi sems can gyi don du bstan pa'i phyir ro //'dul ba las de la rnam pa gsum yongs su dag pa zos na spang ba'i bar chad du mi 'gyur ro zhes gang gnang ba de ni yongs su spangs pas dag par lta ba rnams kyis mngon pa'i nga rgyal bsal ba dang / skal ba yod kyang de la chags pas bstan pa la 'jug mi nus pa spang ba'i phyir ro//de skad du lang kar gshegs pa'i mdo las kyang / bstan pa brjod pa de dang de las bslab pa'i gzhi rim par bca' ba skas kyi gdang bu bre ba'i tshul du rnam pa gsum bcas nas de'i ched du byas pa rnams kyang bkag ste/ de nas tha na rang shi ba bcu'i sha yang bkag go zhes gsungs so//rtag tu ba'i sman bshad zin to/ /na ba'i gsos sman yang brjod par bya ba nyid do/ /bdag gi don dang tshangs par spyod pa gnas par bya ba'i phyir nyan thos kyi 'dul ba las kyang / lhung bzed dang chos gos kyang btsongs la lus bsrung bar gsungs na/ skye bo dpag tu med pa yongs su bskyab pa'i rgyu byang chub sems dpa'i lus lta ci smos te/dal ba'i dga' ba phun sum tshogs pa 'di lta bu ni rnyed par dka'o/ /de rab tu bstan pa'i phyir/ bcom ldan 'das kyis de dang der bdag nyid sman la nye bar sbyor bar bstan to/ /'phags pa dkon mchog sprin gyi mdo las kyang /de nam chod bzung bar gyur pa de'i tshe/ nyi tshod yod dam med kyang rung ste/ de dag gi lus gso ba'i yo byad 'di lta ste/ mar ram/ 'bru mar ram/ sbrang rtsi'am/ bu ram mam/ rtsi'i khu ba'am/ sdong po'i khu ba'am/ 'bras bu'i khu ba de lta bu dag bzar mi rung ste/gzhan za ba mthong na yang khong khro ba'i sems dang 'jungs pa'i sems kyang mi bskyed do/ /yang gal te zas phyis mi len pa'i byang chub sems dpa' de ji lta bu'i nad kyis srog gi bar chad du 'gyur ba'am/ dge ba'i phyogs kyi bar chad du 'gyur te/ nad tshabs che na des 'gyod pa med cing the tshom med par byas la des sman yin par sems nye bar bzhag ste spyad par bya'o zhes gsungs so//gos kyi longs spyod kyi sbyor ba ni drag shul can gyis zhus pa'i mdo las bstan te/ ngo tsha zhing 'dzem pas khrel yod pas dkri ba dang / sha sbrang dang sbrang bu dang rlung dang nyi ma dang sdig sbrul gyis reg par 'gyur ba g.yogs pa dang /dge sbyong gi rtags brtan pa dang / ngur smrig de dag ni lha dang mi dang lha ma yin du bcas pa'i 'jig rten gyi mchod rten no snyam nas mchod rten gyi phyir yang dag par gzung bar bya ba dang / de dag ni yid byung ba dang 'dod chags dang bral bas kha dog bsgyur ba yin gyi/'dod chags kyis kha dog bsgyur ba ma yin pa dang / 'di dag ni nye bar zhi ba dang mthun pa yin gyi nyon mongs pa 'bar ba dang mthun pa ma yin pa dang / ngur smig 'di dag gis dkris shing g.yogs nas sdig pa las ldog par bya ba dang /legs par bya ba'i las bya ba dang / chos gos kyis cha sbyor ba la brtson pa ma yin pa dang / ngur smrig 'di dag 'phags pa'i lam gyi tshogs dang mthun pa yin par shes nas skad cig gcig la yang rnyog pa dang 'grogs par mi bya bar ngur smrig rnams bcang bar bya ba ste zhes gsungs so//'di la chad pa ni rin po che'i phung po'i mdo las/ 'od srungs gang dag lhod cing yang dag par mi sdom pa dang dge sbyong gi yon tan gyi chos 'di dag las nyams pa lus la ngur smrig dag 'chang ba rnams ni de la gus pa mi skyed do/ /'od srungs de la dge sbyong gi kha dog dang gzugs can la gnod pa byed pa zhes bya ba'i nyi tshe ba'i sems can dmyal ba yod do //'od srungs nyi tshe ba'i sems can dmyal ba der dge sbyong gi gzugs su gyur bzhin du gos 'bar ba dag dang mgo 'bar ba dag dang lhung bzed 'bar ba dag dang stan 'bar ba dag dang mal cha 'bar ba dag gnod pa byed de/de dag gi longs spyod dang yongs su spyad pa gang ci yod pa de thams cad 'bar rab tu 'bar te kun tu rab tu mched cing 'bar la de me lce gcig tu gyur te/ dge sbyong gi kha dog dang gzugs kyis gnod pa de dag myong bar 'gyur ro zhes gsungs so/ /'phags pa dkon mchog sprin gyi mdo las kyang /byang chub sems dpa' bla gab med pa la lus na'am lus kyis mi nus par gyur na des gtsug lag khang du gnas te/ 'di snyam du nyon mongs pa'i gnyen po'i phyir de bzhin gshegs pa'i sbyangs pa'i yon tan bcas te ci nas kyang bdag gtsug lag khang na gnas bzhin du nyon mongs pa rnams spong bar 'dod pa ste de ltar bya ste/gtsug lag khang de la yang chags pa mi skyed de zhen par mi bya'o snyam du sems bskyed do/ /de 'di ltar sems te sbyin pa'i bdag po rnams la phan gdags par bya'i bdag cag gis bdag nyid gso bar ni mi bya'o snyam mo zhes gsungs so//yang de nyid las/ de dag nyal ba na glo g.yas pas nyal bar byed de rkang pa'i steng du rkang pa bzhag nas/ lus chos gos dag gis shin tu g.yogs shing / dran pa dang shes bzhin dang ldan bzhin du snang ba'i 'du shes dang ldang ba'i 'du shes su nyal bar byed de gnyid kyi bde ba la chags par mi byed do//snyes pa'i bde ba la yang ma chags te/ gzhan du na de dag ji tsam du 'byung ba chen po rnams gnas shing 'tsho ba'i phyir nyal bar byed la rtag tu rgyun mi 'chad pa yang dge ba'i phyogs la mngon du phyogs pa yin no zhes gsungs so//phyogs 'dis yongs su spyad pa thams cad sems can gyi don du byin gyis brlab par bya ste/ des na/ bdag la sred pas longs spyad na/ /nyon mongs bcas pa'i ltung bar 'gyur/ /zla ba sgron ma'i mdo las ji skad du/ /de dag kha zas ro zhim bsod pa dag /rnyed nas rnal 'byor mi brtson za zhing 'thung //de dag la ni zas de gdug par 'gyur/ /ba lang phru gus pad rtsa ma bkrus bzhin/ /zhes gsungs pa lta bu'o/ /'phags pa rin po che'i phung po'i mdo las kyang / /bcom ldan 'das kyis dad pas byin pa yongs su spyod pa yongs su bstan pa dang /de nas 'khor de nyid nas rnal 'byor spyod pa'i dge slong nyis brgyas chos kyi rnam grangs 'di thos nas rab tu dus te mchi ma zag cing tshig 'di skad ces bcom ldan 'das bdag cag ni gum yang rung ste 'bras bu ma thob kyi bar du dad pas stsal ba'i bsod snyoms cig tsam yang yongs su spyad par mi bgyi'o zhes smras so//bcom ldan 'das kyis bka' stsal pa/ skyes bu dam pa dag legs so legs so/ /ngo tsha shes pa dang 'gyod pa dang ldan pa dang 'jig rten pha rol du kha na ma tho bas 'jigs par lta ba rnam pa 'di lta bu dag gis gsang rab 'di mdzes so//'od srungs ngas dge slong gnyis la dad pas byin pa gnang ste/ gnyis gang zhe na/ ldan pa dang grol ba'o/ /dge slong dag dge slong ldan pa rnal 'byor spyod pa nga'i bstan pa la zhugs pa 'du byed thams cad mi rtag par mthong / 'du byed thams cad sdug bsngal bar rig /chos thams cad la bdag med par mos/ mya ngan las 'das pa zhi bar rtogs bas ni ri rab tsam gyi khams dag gis dad pas byin pa yongs su spyad kyang de'i yon tan shin tu yongs su dag par 'gyur ro/ /sbyin pa po dang sbyin bdag gang dag las dad pas byin pa yongs su spyad pa de las de dag gi bsod nams kyi rnam par smin pa 'byor pa chen po dang phan yon chen por 'gyur ro//de ci'i phyir zhe na/ dge slong dag rdzas las byung ba'i bsod nams bya ba'i dngos po rnams las gang byams pa'i sems la snyoms par 'jug pa de mchog yin pa'i phyir ro/ /'od srungs dge slong gang zhig sbyin pa po dang sbyin bdag gi chos gos dang bsod snyoms dang mal cha dang yo byad rnams yongs su spyad nas sems rnam par grol ba tshad med pa la snyoms par 'jug na sbyin pa po dang sbyin bdag de'i rnam par smin pa yang tshad med par shes par bya'o//'od srungs stong gsum gyi stong chen po'i 'jig rten gyi khams na yod pa'i rgya mtsho chen po rnams ni yongs su zad par 'gyur yang srid kyi de'i bsod nams kyi rgyu mthun pa ni yongs su zad par gang yang mi 'gyur ro zhes gsungs so//de ltar bsod snyoms la 'gro bar rtsom mam/ zas za bar rtsom pa dang /sbyin pa po la phan gdags pa dang / lus kyi srin bu bsdu ba dang / sems can thams cad kyi don grub pa ste gnas gsum la dran pa nye bar gzhag nas/ dam pa'i chos yongs su gzung ba dang / de bzhin gshegs pa'i bka' bsgrub pa dang / bya ba thams cad la dran pa dang ldan par bya'o//stsogs pa zhes bya ba ni gsang sngags rnams kyis kyang yongs su bsrung bar bya'o/ /de la thog mar re zhig dkyil 'khor dang dam tshig gi phyir/ dam tshig gsum gyi rgyal po las 'byung ba'i rig sngags 'di brjod par bya'o/ /na ma sarba bud d+ha bo d+hi sa twA nAM/ oM bi ra dzi bi ra dzi /ma hA badzri/ sa ta sa ta/ sA ra te sA ra te/ tra yi tra yi/ bi d+ha ma ni/ saM b+hany+dza ni/ ha ra ma ti/ sid d+ha a gre traM swA hA/ 'dis dkyil 'khor thams cad du zhugs par 'gyur ro/ /yang na de bzhin gshegs pa'i snying po brgya stong bzlas na 'jig rten pa dang 'jig rten las 'das pa'i dkyil 'khor thams cad du zhugs par 'gyur ro//de gang zhe na/ na ma stai ya d+h+wi kA nAM ta thA ga tA nAM/ sarba tra a pra ti ha tA bA p+ti d+harma tA ba li nAM/ aM aH sa ma sa ma/ sa man+ta tou0f85 nan+ta tA bAb+ti shA sa ni/ ha ra ha ra/ sma ra sma ra Na/ bi ga te/ rA ga bud d+ha d+ha rma te/ sa ra sa ra/ sa ma ba lA / ha sa ha sa/ tra ya tra ya/ ga ga na ma hA ba ra lak+Sha Ne/ dz+wa la dz+wa la na sA ga re swA hA/ 'di ni de bzhin gshegs pa thams cad kyi sku yin te 'di la gus pa bla na med par bya'o/ /'dis las dang po pa dag kyang sems can rnams la sangs rgyas kyi mdzad pa mtha' yas pa byed par 'gyur ro/ / 'di nyid bdud la sogs pa dang ma rungs pa thams cad las srung bar byed pa'i mchog yin no/ /thal mo brdabs pa'am/ thal ba'am/ yungs kar ram/ chu'am/ lta ba'am/ yid kyis kyang mtshams gcod par byed do/ /nad kyis btab na sman nam chu la sngags kyis btab ste btung ngo //yang na mchod rten nam sku gzugs sam dam pa'i chos kyi glegs bam la nags kyi me tog sems mnyam par gzhag ste 'bul zhing zla ba phyed sbyor ba byas na nad chen po dag las thar bar 'gyur ro/ /sangs rgyas dang byang chub sems dpa' la dmigs pa dang sems can thams cad la dmigs pa dang sems can thams cad kyi don bya bar 'dod pa'i sems kyis bzang po'i spyod pa mngon du bya bas bzlas brjod bya'o//cho ga 'di ni cho ga 'di'i mjug nas 'byung ngo / /dam tshig gsum gyi bzlas brjod byed pas ni khrus ma byas kyang nyes pa med do/ /lhag ma dang mi gtsang bas kyang nyes pa med do//phyag rgya 'dra ba dag mi bza'o mi bgom mo khri la nyal bar mi bya'o/ /chang mi btung ngo / /mos pas spyod pa'i bslab pa'i gzhi dag las mi g.yo ba dang the tshom med na sngon dang tshul ngan par gyur kyang 'grub bo/ /mkhas sam mi mkhas kyang rung ste nges par 'grub bo//de skad du de nyid las/ /gang zhig byang chub sems brtan zhing / /blo gros chags pa med pa dang / /the tshom dag kyang mi byed pa/ /des 'di nges par 'grub par 'gyur/ /zhes gsungs so/ /byang chub kyi sems brten pa ni 'dir so so'i skye bo'i sems stobs dang ldan par nges par bya ba'i phyir gsungs kyi sar chud pa'i dbang du byas pa ni ma yin te/'di ltar de nyid las/ slar dbyung bar bya ba dang / snang bar bya ba thob par 'dod pa dang / mun pa chen po'i khrod nas snang bar 'jug par 'dod pa dang / log par ltung bas lhag par bsgrub par bya'o zhes gsungs so//de bzhin du bdag lta bu bsod nams chung ngu la 'grub par ga la 'gyur zhes sems zhum pa bkag go/ /sa la gnas pa ngan 'gro las shin tu 'das pa spro ba'i rlabs mang ba bsod nams kyi phung po dpag tu med pa bstsags pa la ni gong du smos pa'i nyes pa nyid mi srid do//'di la ma shes nas sngags rnams yi ge lhag par brjod kyang nyes pa med do/ /nyungs kyang nyes par mi 'gyur ro/ /cho ga nyams kyang nyes par mi 'gyur ro/ /'on kyang dad pa'i shugs dang byang chub kyi sems kyi shugs dang / rang gi don dor ba'i shugs brtsan par bya ste / rnam par mi rtog par brjod na gdon mi za bar tshe 'di nyid la byang chub sems dpa' mthong ba dang ci 'dod pa yang 'grub par 'gyur ro/ /yang na rdo rje 'dzin thams cad kyi sngags 'dis bsrung bar bya'o/ /na ma s+t+rai ya d+h+wi kA nAM/ ta thA ga tA nAM/ sarba badzra d+ha rA nAM/ oM tsa Na ra la tsa Na ra la/ ba la ba la/ badzra badzra shAn+ta ne shAn+ta ne / pha la na pha la na/ ba ra ba ra/ mA ra mA ra/ badzra d+ha la/ spu Ta s+phu Ta/ la laM ta shi kha ra/ sa man+ta badzrI Ni/ dz+wa la ne dz+wa la ne/ na mo stu ste/ a grou0f85 gra shA sA kA nAM/ ra Na ra Na/ hUM hUM s+pho Ta s+pho Ta badzro t+ta me swA hA/ 'di bton pa tsam gyis bgegs dang / rnam par log 'dren thams cad mi 'ong ngo //lha dang klu la sogs pa thams cad kyis mi bzod do/ /bza' ba dang btung ba dang mal cha dang mchod pa'i yo byad rnams kyang sngags chu'am/ blta ba'am yid kyis bsrung ngo / /yang na mi g.yo ba'i snying pos de thams cad bya'o/ /de ni 'di yin te/na maHsa man+ta badzra NAM tra Ta / a mo g+ha tsaN+Da/ ma hA ro Sha Na s+pho Ta ya / hUM b+h+ra ma ya b+h+ra ma ya/ hUM traT/ hAM mAM oM ba lan+da de te dzo ma li ni swA hA/ 'dis kham dang po la lan brgyad bsngags la sangs rgyas dang byang chub sems dpa' rnams kyi sman gyi rgyal po nyid du bsams te bza'o/ /dug gzhil ba ni 'di lta ste/i li mit+te/ ti li mi mit+te / i li mi li mit+te/ ti li mi li mit+te / dum be dum be/ du bA lI / du ma he/ dus+se/ tak+ke/ tak+ka ra Ne/ ma ma meM ma ma ma ra Ne/ kaSh+mI ra/ muk+te/ i li ti li me/ a g+ha ne/ A g+ha nA g+ha ne/ i li i li ye/ mi li mi lI ye/ a ga i ya/ a a i yi/shwe te/ shwe te tuN+De/ a nA nu rak+te / a ru ruk+ke trAM oM/ bi sha ni ke ta ni swA hA/ gang zhig rig sngags 'di lan cig thos pas kyang de la sbrul gyis mi za'o/ /de'i lus la dug gis mi tshugs so/ /sprul gang de la za ba de'i mgo a rdza ka'i dog pa bzhin du tshal pa bdun du 'gas so//su rig sngags 'di 'chang ba de la ji srid 'tsho'i bar du sbrul gyis mi za'o/ /de'i lus la dug gis mi tshugs so/ /gsang sngags kyi tshig 'di dag sprul gyi mdun du gdon par mi bya'o/ /de ci'i phyir zhe na/ sprul 'chi bar 'gyur pa'i phyir ro/ /'di lta ste/ i la la/ tsi la la/ tsak+ko bAk+ko / ko DA/ ko DI ti/ ku ra DA/ ku ra DI ti/ po DA/ po DI ti/ pu ru dA / pu ru DA+e ti / mo TA/ mo DI te / ni ku ru DA/ ni ku ru DA ti/ mu ru DA / mu ru DI ti / ni ma mu ru DA/ ni ma mu ru DI ti/ phu ru De/ phuT+Ta ra he/ phuT+Ta ra he/ phuT+Ta d+dan+ta ra he/ phuT+Ta d+dan+ta ra he/ na ga ra he/ na ga TaT+Tan+da ha re/ sarba ha re/ sarba ta TaT+Tan+da ha re/ a ts+tshe/ ats+tshe/ ats+tsha le / tsha la bi Shi/ shI te shI ta/ bat+tA le/ mA tA le/ ha le ha le/ ha la ha la/ ha la le/ i la le/ ke pa tsa le/ mi la le/ dan+ti dan+ti / ta Ta ta Ta/ s+phu Ta s+phu Ta/ phaT phaT swA hA/ dge slong dag de ltar na dug sel gyis 'byung po 'dus pa thams cad la rig sngags brjod pa de dag thams cad ni de bzhin no//gzhan ma yin pa de bzhin no/ /yang dag pa'o/ /bden pa'o/ /ma nor ba'o/ /phyin ci ma log pa'o/ /dug 'di mi 'dug par gyur cig /sbyin par byed pa'i gan du song shig /'dzin pa'i gan du song shig /me'i nang du song shig /chu'i nang du song shig /thang la song shig /ka ba'i nang du song shig /rtsig pa'i nang du song shig /nam mkha' la song shig /sa'i nang du song shig /zhi bar gyur cig swA hA/ rkun po la sogs pa bzlog pa'i phyir 'od zer can bzlas par bya'o/ /pad+mA kra ma si/ pa rA kra ma si/ a pa rA kra ma si / u da ma si/ na da ma si/ ni re ma si/ arka ma si/ o rma si/ ba na ma si/ gul+ma ma si/ tsai ba ra ma si/ An+ta ra d+ha na ma si swA hA/ lha mo 'od zer can bdag lam du skyobs shig /lam log pa las skyobs shig /bdag skye bo'i 'jigs pa las skyobs shig /bdag rgyal po'i 'jigs pa las skyobs shig /bdag rkun po'i 'jigs pa las skyobs shig /bdag klu'i 'jigs pa las skyobs shig /bdag glang po'i 'jigs pa las skyobs shig /bdag seng ge'i 'jigs pa las skyobs shig /bdag stag gi 'jigs pa las skyobs shig /bdag sbrul gyi 'jigs pa las skyobs shig /bdag me'i 'jigs pa las skyobs shig /bdag phyir rgol ba dang grogs po ngan pa thams cad las skyobs shig /'khrugs pa dang ma 'khrugs pa dang / nyams pa dang ma nyams pa dag tu yang bdag la srungs shig /bdag la srungs shig srungs shig /'di lta ste/ A lo/ /ta lo/ /ka lo/ /ko li/ ats+tshin+te/ tats+tshi t+te / bdag la 'tshe ba dang 'jigs pa dang / nad thams cad las srungs shig srungs shig sA hA/ dkon mchog gsum la phyag 'tshal lo/ /lha mo 'od zer can la phyag 'tshal lo/ /lha mo 'od zer can gyi snying po brjod par bya'o/ /'di lta ste/ oM bat+tA li/ ba rA li/ ba rA ha mu khi/ sarba duSh+TA na/ ni bA rA ya/ ban d+ha ban d+ha/ ban d+ha mu khi/ dzam+b+ha ya/ staM b+ha ya/ mo ha ya swA hA/ oM mA rI ts+yai swA hA/ oM ba ra le/ ba da le/ ba rA ha mu khi/ sarba duSh+TA na/ ban d+ha ban d+ha swA hA/ 'jigs pa thams cad las bsrung ba'i phyir rig sngags 'chang ba'i ste snod las 'byung ba'i rig sngags tshe rabs mtha' yas pa dran par 'gyur ba'i rgyu mthu che ba yi ge lnga bcu rtsa bdun po 'di la yang sbyar bar bya'o//'di lta ste/ aT+Te/ baT+Te/ naT+Te ku naT+Te / Ta ke Tha ke/ Tha ra ke Tha ke/ u ru ma ti/ ru ru ma ti/ tu ru hi li mi li/ sarba nya tsa bi pa dag+ga/ na mo saM / pa saM ma saM bud d+hA NAM/ sid d+han+tu me man+t+ra pa daiH swA hA/ 'di ni bdag lus bsrung ba ste/ sman dang gos la sogs bcas pas kyang / sems can gyi don byed pa'i dran pa sngar byas la bya'o/ /bdag la srid pas longs spyod na/ /nyon mongs bcas pa'i ltung bar 'gyur/ /zhes bya ba la/ byang chub sems dpa' thams cad sems can thams cad la gtang ba de la/ gal te brjed nas gzhan gyi rdzas bdag gso ba'i sred pas spyad na nyon mongs pa can gyi ltung bar 'gyur ro/ /ji ste sred pa ni med la gzhan la chags sam sems can gyi bya ba brjed nas spyod na nyon mongs pa can ma yin pa'i ltung bar 'gyur ro//gzhan gyi rdzas su 'du shes la bdag gi phyir spyod na brkus pa'i ltung bar 'gyur ro/ /rin thang tshang na so sor thar pa las pham par 'gyur ro/ /bdag po dang bcas pa'i longs spyod rnams kyis bdag po dang bcas pa'i lus bsrung ngo snyam pas spyad na nyes pa med de/bran rtag tu rje bo'i las byed pa gang gis 'tsho ba bdag gi rdzas yod pa ni ma yin no/ /chos yang dag par sdud pa'i mdo las kyang / sems can thams cad kyi ci bya ba thob par bya ba'i phyir byang chub sems dpa' bran lta bu bya'o zhes gsungs so/ /shin tu rje bo'i don la brtson pa'i bran gyis rje bo na ba la sogs pas rmya ba'i blo can gyis gnang ba med par spyad kyang nyes pa med do//de ltar spyod pa'i byang chub sems dpa'i thad du 'ga' zhig gis de kha na mi rigs par ma dad par bya ba ni mi rigs te/ gtong ba'i sems ngo mtshar chen po can yongs su mi shes pa'i phyir ro//tshul 'di la ni 'ga' zhig gis the tshom bya bar mi rigs so/ /thams cad gtang ba ni bcom ldan 'das kyi zhal nas gsungs pas gong du bshad pa yin no/ /de ltar na lus bsrung ba ni sems can gyi don nyid du bstan pa de/ gsal bar rtogs par bya ba'i phyir rigs pa 'di gsal bar byas su zad kyi rang dgar byas pa ni ma yin no//bslab pa kun las btus pa las lus bsrung ba'i le'u ste drug pa'o// //de ltar re zhig lus bsrung bar rig par bya'o/ /longs spyod bsrung ba brjod par bya'o/ /zhes bya ba ste/ legs spyad dag la brtsam par bya//thams cad la yang tshod rig bya/ /de ltar bslab pa'i gzhi 'di las/ /de yi longs spyod bsrung mi dka'/ /drag shul can gyis zhus pa las kyang / shin tu brtags te las byed pa dang legs par bya ba'i las byed pa zhes bslab pa'i gzhi gsungs pas longs spyod rnams bzhag nyes pa dang ma brtags pa dang g.yel ba bkag pa grub pa yin no//zhi gnas kyi skabs nas kyang tshod shes pa dang rigs pa shes par gsungs te/ des na gang 'di longs spyod chung ngu dang ngan pas kyang dgos pa 'grub pa lta na bdag gam gzhan dag gis kyang rung ste/ longs spyod mang po dang bzang po chud gson pa la yal bar mi dor ba de grub pa yin no//de bas na drag shul can gyis zhus pa'i mdo las kyang / bu dang chung ma dang bran pho dang bran mo dang las byed pa dang zho shas 'tsho ba rnams yang dag par yongs su spyad pa zhes gsungs te/ ci nas kyang bdag dang gzhan gyi byang chub kyi phyogs dang thos pa la sogs pa'i bar chad du 'gyur ba'i gtong ba'am mi gtong ba gnyi ga mi bya'o//sems can gyi don la nus pa che ba'am nus pa mtshungs pa'i byang chub sems dpa'i lhag pa'am/ mtshungs pa'i dge ba'i bar chad byed pa'i gtong ba dang / mi gtong ba mi bya bar grub pa yin no//'di la dgongs nas/ byang chub sems dpa'i so sor thar pa las kyang bstan te/ shA ri'i bu byang chub sems dpa'i khyim gyi gnas nas mngon par byung ba byang chub kyi yan lag la mngon par brtson pa gang yin pa des ji ltar sbyin pa sbyin par bya/ sbyin pa ji tsam zhig sbyin par bya/sbyin pa'i rang bzhin ci 'dra ba zhig sbyin par bya/ de bzhin du sbyar te/ chos sbyin pa dang chos kyi sbyin bdag tu bya'o/ /shA ri'i bu byang chub sems dpa' khyim pa gang gis sangs rgyas kyi zhing gang gA'i klung gi bye ma snyed dag rin po che sna bdun gyis rab tu bkang ste/ de bzhin gshegs pa dgra bcom pa yang dag par rdzogs pa'i sangs rgyas rnams la dbul ba phul ba bas/shA ri'i bu rab tu byung bar gyur pa'i byang chub sems dpa' gang zhig tshig bzhi pa'i tshigs su bcad pa gcig bstan na 'di ni de bas ches bsod nams mang du bskyed de/ shA ri'i bu de bzhin gshegs pas ni rab tu byung bas zang zing gi sbyin pa byin par ma gnang ngo //de bzhin du sbyar te/ shA ri'i bu/ gang gis lhung bzed du 'ongs pa lhung bzed du chud pa'i rnyed pa chos dang mthun pa chos kyis rnyed par gyur na/ des tshangs pa mtshungs par spyad pa rnams dang thun mong du bza' bar bya'o//gal te la la zhig 'ongs nas lhung bzed dang chos gos slong la gal te sangs rgyas kyis gnang ba'i chos gos gsum las lhag par gyur na ji ltar btang ba bzhin du sbyin par bya'o/ /gal te de la chos gos nyung bar gyur na gang la brten te/ tshangs par spyod pa la gnas pa de ni yongs su gtong bar mi bya'o//de ci'i phyir zhe na/ de bzhin gshegs pas chos gos gsum gtang bar mi bya'o zhes gsungs pa'i phyir ro/ /shA ri'i bu gal te byang chub sems dpas chos gos gsum yongs su gtang ste/ slong ba po gtso bor byed par gyur na des 'dod pa chung ba bstan pa ma yin no//shA ri'i bu byang chub sems dpas gang khyim gyi gnas nas mngon par byung ba des chos la brten par bya ste/ des de la mngon par brtson par bya'o zhes gsungs so / /gzhan du na sems can gcig bsdu ba'i phyir sems can gyi tshogs chen po dang / sems can des kyang byang chub sems dpa'i bsam pa yongs su sbyar bar bya ba'i bar chad byas pas/don chen po dmas par byas par 'gyur ro/ /de bas na dge ba'i phyogs rgya chen po rnam par spangs pas ma bsrungs pa zhes bya'o / /de ltar re zhig gtong ba bkag go/ /mi gtong ba dgag pa ni/ 'phags pa blo gros rgya mtshos zhus pa'i mdo las kyang /theg pa chen po'i bar du gcod pa'i rnyed pa mang po ji skad gsungs pa lta bu'o/ /bdag gi cho gar bstan pa gang yin pa de byang chub sems dpa' gzhan la yang bsgrub par bya'o zhes bya bar ci mngon zhe na/ 'phags pa drag shul can gyis zhus pa'i mdo las bstan pa'i phyir te/gzhan gyi bya ba byas shing rang gi bya ba yongs su gtang bar bya'o zhes gsungs pa lta bu'o/ /de skad du dri ma med par grags pas bstan pa'i mdo las kyang / 'khor ba'i 'jigs pas skrag pas ci la brten par bya/ smras pa/ 'jam dpal 'khor ba'i 'jigs pas skrag pa'i byang chub sems dpas sangs rgyas kyi che ba nyid la brten par bya'o//smras pa/ sangs rgyas kyi che ba nyid la gnas par 'dod pas ji ltar gnas par bya/ smras pa/ sangs rgyas kyi che ba nyid la gnas par 'dod pas sems can thams cad mnyam pa nyid la gnas par bya'o//smras pa/ sems can thams cad mnyam pa nyid la gnas par 'dod pas gang du gnas par bya/ /smras pa/ sems can thams cad rab tu thar bar bya ba la gnas par bya'o zhes gsungs so/ /de skad du chos yang dag par sdud pa las/ byang chub sems dpa' ded dpon gyis gsol pa/bcom ldan 'das byang chub sems dpa' ni thog ma kho nar sems can thams cad byang chub par 'tshal bar bgyi ste bdag nyid ni ma lags so zhes bya ba nas/ bcom ldan 'das 'di ni chos yang dag par brjod pa lags so zhes bya ba'i bar du gsungs so/ /gtang bas de'i rang gi don bya ba med par grub mod kyi/'on kyang sems can gyi don nyams pas 'jigs pa'i phyir skal ba med pa'i sems can la rang gi khur khas 'chi bar mi byed do/ /gang du sems can gyi don nyams par ma mthong ba der rang gis byas sam gzhan gyis 'gro ba la phan par spyad par bye brag ci yod na/ de byang chub sems dpa' gzhan gyi dge ba sgrub pa'i phyir/ rang gi dge ba mi 'dor/ ci ste bdag ngan 'gro'i sdug bsngal gyis 'jigs na cig shos kyang sdug bsngal de nyid kyis 'jigs so/ /ji ste de sdug bsngal bas bdag la gnod pa med do snyam du yal bar 'dor na gong du smos pa'i mdo rnams las 'byung ba bzhin du nyes pa dang bcas par 'gyur ro//yang dkon mchog brtsegs pa'i mdo las/ 'od srungs bzhi po 'di dag ni byang chub sems dpa' ltar bcos pa'o zhes bya ba las brtsams te/ bdag gis bde ba don du gnyer ba yin te sems can gyi sdug bsngal bsal ba don du gnyer ba ma yin pa'o zhes gsungs so//de lta bas na drag shul can gyis zhus pa'i tshul ltar snga ma yin bzhin du bdag la smad par bya'o/ /byang chub sems dpa'i bslab pa 'di ni chos yang dag par sdud pa'i mdo las/ 'phags pa rtsom pa med kyis ji skad bstan pa lta bu ste/rigs kyi bu sgrub pa la gnas par ji ltar rig par bya/ smras pa/ gang sems can rnams la log par mi sgrub pa'o/ /smras pa/ sems can rnams la log par mi sgrub pa ji lta bu/ smras pa/ gang sems can rnams la byams pa chen po dang snying rje chen po mi 'don ba'o/ / rab 'byor gyis smras pa/ byang chub sems dpa' rnams kyi byams pa chen po gang yin/ smras pa/ gang lus dang srog dang dge ba'i rtsa ba thams cad sems can thams cad la sbyin zhing lan du phan 'dogs par re ba yang med do / /smras pa/ byang chub sems dpa' rnams kyi snying rje chen po gang yin/smras pa/ gang thog ma kho nar sems can thams cad byang chub par 'dod kyi bdag ni ma yin pa'o zhes bya'o / /yang de nyid las/ snying rje chen po ni byang chub sems dpa'i bslab pa thams cad kyi rtsa ba'o zhes gsungs so/ /byang chub sems dpa' don du gnyer ba gang yang rung bas don du gnyer bar bya ba yin pa'i phyir na/gang gis sbyin pa po yon gnas chen pos don chen po sbyin pa las bsod nams kyi rgya mtsho'i phung po chen po snang bar 'gyur ba 'di ni gdon mi za bar bcom ldan 'das kyis bzlog par bya ba ma yin pa dang / gdon mi za bar bstan to zhes bya bar yong nges pa yin te/ de lta ma yin na ni phongs pas 'chi bar 'gyur ba 'ba' zhig tu zad do//rab tu zhi ba rnam par nges pa'i cho 'phrul gyi mdo las/ rgyal po chen po khyod kyis lo stong gi 'god pa gang yin pa de dag thams cad bsdoms te/ dge slong gcig la byin par gyur cing / de bzhin du thams cad dge slong thams cad la so sor byin par gyur la/ gang yang lung 'bogs pa dang kha ton la brtson pa'i byang chub sems dpa' gus pa dang bcas pa chos 'dod pa zhig gis dad pas byin pa chen po la 'os pa blangs te/ 'di ltar sbyin pa 'dis bdag gis chos yongs su btsal ba brtsam mo snyam du sems bskyed na/ dge ba'i rtsa ba 'di la gtang bar bya ba'i chos yongs su gtang ba des brgya'i char yang nye bar mi 'gro'o zhes gang bstan pa de ni khyim gyi bde ba la chags pa'i dbang du byas nas gsungs pa ste/sngar bstan pa'i tshul gyis nyes pa ci yang med do/ longs spyod bsrung ba mdo tsam bstan zin to/ /bsod nams bsrung ba brjod par bya ste/de la/ rang don rnam smin sred spangs pas/ /dge ba kun tu bsrung bar 'gyur/ /sred med kyi bus zhus pa las ji skad du/ de rgyal srid kyi phyir tshul khrims mi srung / mtho ris kyi phyir ma yin/ brgya byin gyi phyir ma yin/ tshangs pa'i phyir ma yin/ longs spyod kyi phyir ma yin/ dbang phyug gi phyir ma yin/gzugs kyi phyir ma yin/ kha dog gi phyir ma yin/ snyan pa'i phyir ma yin no/ /de bzhin sbyar ro/ /dmyal ba'i 'jigs pas 'jigs nas tshul khrims bsrung ba ma yin/ de bzhin du dud 'gro'i skye gnas dang gshin rje'i 'jig rten gyis 'jigs skrag pas tshul khrims bsrung ba ma yin te/gzhan du na sangs rgyas kyi tshul la dgod pa'i phyir tshul khrims bsrung ba nas/ sems can thams cad la phan pa dang bde ba grub pa dang bde ba don du gnyer bas tshul khrims srung ngo / /de bzhin du sbyar te / tshul khrims kyi phung po de lta bu dang ldan pa'i byang chub sems dpa' de chos bcu las yongs su nyams par mi 'gyur ro//bcu gang zhe na/ 'di lta ste/ 'khor los sgyur ba'i rgyal srid las yongs su mi nyams te de la yang bag yod cing byang chub 'dod pa yin/ brgya byin las yongs su mi nyams te de la yang bag yod cing byang chub 'dod pa dang / sangs rgyas mthong bar 'dod pa yin/de bzhin du tshangs pa dang / sangs rgyas mthong ba mi phyed pa thob pa dang / chos nyan pa las yongs su mi nyams pa nas ji ltar thob pa'i chos bsgrub pa la nan tan byed pa dang / byang chub sems dpa'i yi dam gyi bar las yongs su mi nyams pa dang / spobs pa rgyun mi 'chad pa dang / dge ba'i chos thams cad don du gnyer ba dang /bsam gtan las yongs su mi nyams pa'o/ /de bzhin du sbyar te/ de ltar tshul khrims kyi phung po la gnas pa'i byang chub sems dpa' sems dpa' chen po ni lha rnams kyis rtag tu phyag byas pa yin/ klu rnams kyis rtag tu bsngags pa yin/ gnod sbyin rnams kyis rtag tu phyag byas pa yin/ dri za rnams kyis rtag tu mchod pa yin/ klu'i dbang po dang lha ma yin gyi dbang po rnams kyis rtag tu rjed pa yin/ bram ze dang rgyal rigs dang tshong dpon dang khyim bdag rnams kyis rtag tu gsol ba yin/ mkhas pa rnams kyis rtag tu 'gro bar bya ba yin/sangs rgyas rnams kyis rtag tu dgongs pa yin/ lha dang bcas pa'i 'jig rten gyis ston pa dang mtshungs par bkur ba yin/ sems can thams cad la snying brtse ba yin no/ /de bzhin du sbyar ro/ /'gro ba bzhir mi 'gro ste/ bzhi gang zhe na 'di lta ste/ sems can yongs su smin par bya ba ma gtogs par mi khom pa'i 'gro bar mi 'gro ba dang /sangs rgyas med pa'i zhing gi 'gro bar mi 'gro ba dang / log par lta ba can gyi rigs su skye ba'i 'gro bar mi 'gro ba dang / ngan 'gro'i 'gro ba thams cad du mi 'gro ba'o zhes gsungs pa lta bu'o/ /de ltar sngar btang ba'i bsod nams nyon mongs pa'i dbang gis yang len pa bsrung bar bya'o//bsod nams byin pa'i bsod nams gang yin pa de las gzhan gyi don las ma gtogs pa rnam par smin pa mi 'dod par bya'o/ /gzhan yang bsod nams bsrung bar 'dod pas/ 'gyod par yang ni mi bya ste/ /drag shul can gyis zhus pa las ji skad du/ byin nas 'gyod pa'i sems bskyed par ni mi bya'o zhes gsungs pa lta bu ste/mjug mthu chung bar byas pas mthu chung bar 'gyur te/ 'gyod pas sdig pa zad pa bzhin du bsod nams kyang zad par 'gyur bar dgongs pa'o/ /byas par gyur kyang bsgrags mi bya/ /bcom ldan 'das kyis rnam grangs du mar dge ba mi spyoms pa dang /sdig pa bshags pa gsungs so/ /de la yid mi bde ba'i phyir sdig pa ni/ bshags pas zad par 'gyur ro/ /bsod nams ni de ltar zad par mi 'gyur te/ yid bde ba'i phyir yang mi zad de/ sems can gyi don gyi phyir zang zing med pa'i sems kyis bsgrags pa ni nyes pa med do //dkon mchog sprin las ji skad du/ sman pa'i dpes bdag bstod pa nyes pa med par bstan pa lta bu'o/ /yang bsod nams bsrung bar 'dod pas/ /rnyed dang bkur stis 'jigs bya zhing / /khengs pa rtag tu spang bar bya/ /byang chub sems dpa' dang bya zhing / /chos la yid gnyis spang bar bya//'di ni dkon mchog brtsegs pa las rab tu bstan te / 'od srungs byang chub sems dpa' chos bzhi dang ldan pa'i dge ba'i chos skyes shing byung ba rnams yongs su zad par 'gyur te dge ba'i chos de dag gis rgyas par mi 'gyur ro/ /bzhi gang zhe na/ 'di lta ste/ mngon pa'i nga rgyal gyis 'jig rten rgyang 'phen pa'i gsang tshig tshol ba dang /rnyed pa dang bkur sti la lhag par zhen pas khyim la lta ba dang / byang chub sems dpa' la rnam par sdang zhing skur ba 'debs pa dang / ma thos pa dang ma zin pa'i mdo sde rnams spong ba'o zhes bstan to/ /'phags pa thams cad yod par smra ba rnams kyi gzhung las kyang /dge slong dag dge slong gis 'di ltar skra dang sen mo'i mchod rten la yan lag thams cad kyis phyag 'tshal te sems dang bar byed pa la ltos/ /btsun pa de lta lags so/ /dge slong dag dge slong 'dis sa ji tsam zhig non pa'i 'og dpag tshad brgyad khri bzhi stong na yod pa'i gser gyi 'khor lo la thug pa'i bar na bye ma ji snyed yod pa de snyed du dge slong 'dis 'khor los sgyur ba'i rgyal srid stong 'gyur du longs spyod par 'gyur ro zhes bya ba nas de nas tshe dang ldan pa nye bar 'khor gyis/bcom ldan 'das ga la ba de logs su thal mo sbyar ba btud de/ bcom ldan 'das la 'di skad ces gsol to//bcom ldan 'das kyis dge slong gi dge ba'i rtsa ba de lta bur che bar gsungs na bcom ldan 'das dge ba'i rtsa ba de dag gang du bsrabs pa dang yongs su byang ba dang yongs su zad par 'gyur/ nye ba 'khor ji ltar tshangs pa mtshungs par spyod pas tshangs pa mtshungs par spyod pa la rma byung ba dang rmas par byas pa de lta bu ni ngas ma mthong ste/nye ba 'khor des dge ba'i rtsa ba chen po 'di dag bsrabs pa dang yongs su byang ba dang yongs su zad par 'gyur ro/ /nye ba 'khor de lta bas na ci nas 'gal ba la yang sems kyis gnod par mi bya na rnam par shes pa dang bcas pa'i lus lta smos kyang ci dgos zhes 'don to//'phags pa 'jam dpal rnam par rol pa'i mdo las / khong khro ba khong khro ba zhes bya ba ni bskal pa brgyar bsags pa'i dge ba'i rtsa ba 'joms pas de'i phyir khong khro ba zhes bya'o zhes gsungs so/ /'phags pa sdong po bkod pa'i mdo las/ mtshan mo'i lha mo sems can kun skyob pa'i dpal gyis sngon gyi rtogs pa brjod pa bsnyad pa las kyang /de dag phan tshun brnyas pa'i mi dge ba 'dus pas tshe'i tshad kyang nyams par 'gyur/ kha dog dang stobs dang bde ba las kyang yongs su nyams par 'gyur zhes gsungs so/ /'dir ni brgya lam na yang khengs par mi bya'o zhes rab tu bstan pa'i phyir rtag tu zhes brjod do//rnyed pa dang bkur sti ni ji ste na khas blang bar bya ste/ dkon mchog sprin las ji skad du/ 'di la byang chub sems dpa'i rin po che'i phung po ri rab tsam thob na yang len to/ /dngos po ngan pa zhig thob na yang len to/ /de ci'i phyir zhe na/ de 'di ltar sems te sems can 'di dag ni ser sna can brkam pa 'dod pas bkol ba 'jungs pa yin te/rgyu de dang rkyen de dang gzhi des chu'i phung po chen pos non pa bzhin du 'khor ba'i rgya mtshor 'byung nub byed pa de dag la yun ring por don dang phan pa dang bde ba chen por 'gyur ro snyam ste/ de blangs nas bdag gir mi byed chags pa'i sems mi bskyed do//gzhan du na sems can thams cad dang thun mong du sangs rgyas dang chos dang dge 'dun dag la yang bya ba byed do/ /sems can sdug bsngal ba rnams la yang phan par byed do/ /sbyin pa'i bdag po de yang gzengs bstod pa dang shin tu dga' bar byed do zhes gsungs pa lta bu'o//de bzhin du de nyid las/ sbyin pa des khengs par yang mi 'gyur zhes gsungs so/ /yang de nyid las/ gal te yang rgyu de dang rkyen de dang gzhi des grags pa dang sgra dang tshigs su bcad pa zhig byung yang des khengs par mi 'gyur nga rgyal mi skye rgyags pa mi skye ste de 'di snyam du sems so//ring por mi thogs par grags pa dang sgra dang tshigs su bcad pa 'di su la nye bar gnas pa dang / su dag gis nye bar gnas par byas pa dang / grags pa dang sgra dang tshigs su bcad pa gang zhig nye bar gnas pa 'di gsum gang yang thams cad du thams cad med par 'gyur na de la mkhas pa'i rang bzhin can su zhig mi rtag cing mi gnas pa'i chos mi brtan pa yid brtan du mi rung ba dag la dga' ba'i sems bskyed pa'am/khengs par 'gyur ba'am/ nga rgyal dang rgyags pas dregs par 'gyur snyam ste/ de ltar na byang chub sems dpa' rnyed pa dang bkur sti dang grags pa dang sgra dang tshigs su bcad pa rnams la dran pa shin tu nye bar gzhag cing gnas so zhes gsungs so//gzhan yang dman pa'i yid kyis gdol bu lta bur 'jig rten na spyod pa yin/ rtag tu rgyun mi 'chad par bsod snyoms slong ba'i 'du shes nye bar gzhag pas dman zhing dman pa'i yid kyis nga rgyal dang rgyags pa dang dregs pa dang bral ba rnams yin no zhes gsungs so//yang gsungs pa/ rigs kyi bu 'di la byang chub sems dpa' khyim gyi gnas nas mngon par byung ste rab tu byung nas bdag gi grogs po dang blon po dang gnyen bshes dang snag gi gnyen mtshams la shi ba dang 'dra'o zhes nga rgyal bcom pa yin/bdag gi gzugs mi sdug par khas blangs shing bdag gis gos kha dog mi sdug pa bgos te tshul gzhan du bsgyur ro zhes nga rgyal bcom pa yin/ sprang ba'i rgyu sprang ba'i phyir mgo bregs shing lag na lhung bzed thogs nas grong nas grong du 'gro'o zhes nga rgyal bcom pa yin/gdol bu dang 'dra bar dman pa dman pa'i sems kyis bsod snyoms kyi phyir 'gro'o zhes nga rgyal bcom pa yin/ bdag ni bsod snyoms pa ste bdag gi 'tsho ba gzhan la rag lus so zhes nga rgyal bcom pa yin/ brnyas pa'i bsod snyoms ngan ngon len to zhes nga rgyal bcom pa yin/bdag gis slob dpon dang bla ma dang sbyin pa'i gnas rnams mnyes par bya dgos so zhes nga rgyal bcom pa yin/ bdag gis tshangs pa mtshungs par spyod pa rnams la 'di lta ste/ cho ga dang spyod yul dang kun spyod pa de dang des mgu bar bya'o zhes nga rgyal bcom pa yin/ sangs rgyas kyi chos ma thob pa rnams thob par bya'o zhes nga rgyal bcom pa yin/sems can khros pa dang gnod sems rnams kyi nang na bzod pa mang bar bya'o zhes nga rgyal bcom pa yin no zhes gsungs so// //bam po bdun pa/ 'phags pa blo gros rgya mtshos zhus pa'i mdo las kyang / de lus yongs su dag pa yin te/ lus mtshan gyis legs par brgyan pa dang / lag pa dang rkang pa 'jam zhing mnyen pa dang / bsod nams kyi rgyu mthun pa'i lus shin tu rnam par phye ba dang / dbang po ma tshang ba med pa dang / yan lag dang nying lag thams cad yongs su rdzogs pa yin yang / gzugs kyis rgyags shing dregs pa med pa yin te/[. ]lus che ba'i tshul dang ldan pa ma yin no/ /de chos gzung bar bya ba'i phyir sems can ci tsam du dman pa gzugs ma tshang ba rnams la yang 'dud do rab tu 'dud do zhes gsungs so/ /yang de nyid las bcom ldan 'das 'di lta ste/ dper na gang gi tshe rgya mtsho chen po mchis par 'gyur ba de'i tshe gzhol ba'i phyogs na mchis par 'gyur ro//de gzhol ba'i slad du chu klung thams cad dang chab mig dang 'bab chu thams cad tshegs chung ngus der 'bab bo/ /bcom ldan 'das de bzhin du byang chub sems dpa' nga rgyal ma mchis pa bla ma dang sbyin gnas la gus pa la yang tshogs chung dus chos zab mo'i sgo rnams rna ba'i dbang po la grag par 'gyur zhing dran pa la yang gnas par 'gyur ro//bcom ldan 'das de lta bas na byang chub sems dpa' nga rgyal gyis khengs nga rgyal gyis rengs par gyur te/ bla ma dang sbyin gnas rnams la kun du mi 'dud cing 'dud par mi bgyid la rab tu mi 'dud na/bcom ldan 'das kyi ma'o byang chub sems dpa' 'di ni nga rgyal gyi lcags kyus zin par rig par bgyi'o zhes gsungs so/ /'phags pa 'jig rten las 'das pa'i le'u las kyang / kye rgyal ba'i sras bcu po 'di dag ni byang chub sems dpa' rnams kyi nga rgyal gyi las so//bcu gang zhe na/ 'di lta ste/ bla ma dang sbyin gnas dang slob dpon dang pha ma dang dge sbyong dang bram ze dang yang dag par song ba dang yang dag par zhugs pa rnams la mi gus pa ni nga rgyal gyi las so/ /chos smra ba dang / khyad par can gyi chos khong du chud pa dang / chos rgya chen po ston pa dang theg pa chen po la zhugs pa dang 'byung ba'i lam gyi tshul shes pa dang /gzungs dang mdo sde la shin tu byang ba rnams la mi 'dud de/ khengs shing 'gying la chos dang chos smra ba la gus pa mi skyed cing sri zhu dang zhes mi byed pa ni/ nga rgyal gyi las so/ /chos mnyan pa dang yang dag pa'i gtam bya bar 'dug pa na/chos kyi shugs rgya chen po skyes kyang la la zhig 'di la dad pa skyes par 'gyur du 'ong snyam ste chos smra ba la legs so zhes bya ba sbyin par mi byed pa ni nga rgyal gyi las so/ /mngon pa'i nga rgyal bskyed nas bdag gi gzengs bstod cing pha rol khyad du gsod pa dang bdag shes pa la mi 'jug cing sems kyi nges par sems pa mi skyed pa ni nga rgyal gyi las so//lhag pa'i nga rgyal bskyed nas shes shing rtogs bzhin du bsngags par 'os pa'i gang zag rnams kyi bsngags pa 'chab pa dang mi snyan par brjod cing gzhan gyi yon tan bsngags pas yid mi dga' bar 'gyur ba ni nga rgyal gyi las so//'di ni chos so/ /'di ni 'dul ba'o/ /'di ni yang dag par rdzogs pa'i sangs rgyas kyi bka' yin no zhes bya bar yang dag par shes la/ gang zag la zhe sdang zhing chos la zhe sdang ba dang dam pa'i chos spong ba dang gzhan dag kyang rtsod du 'jug cing ldog par byed pa ni nga rgyal gyi las so//stan mthon po 'dod pa dang gces te las su mi bsko ba'i chos tshol ba dang gzhan gyi rim gro bya bar sdod cing mngon par dga' ba dang gnas brtan rgan po tshangs par spyod pa yun ring du spyad pa rnams la mi ldang zhing mi su ba dang bsnyen bkur mi byed pa ni nga rgyal gyi las so//bzhin khro gnyer can du byas shing mi 'dzum pa dang / tshig 'jam zhing mnyen pa med la rtag tu khengs pa'i sems kyis glags lta skabs tshol ba ni nga rgyal gyi las so/ /mngon pa'i nga rgyal can du lhung zhing mkhas pa'i gan du mi 'gro mi bsnyen mi bsten bsnyen bkur mi byed yongs su mi 'dri zhing dge ba ni ci mi dge ba ni ci/ci byas na yun ring por don dang phan pa dang bde bar 'gyur/ ci byas na yun ring por gnod pa dang mi phan pa dang mi bde bar 'gyur zhes mi 'dri ste/ de rmongs pa las ches rmongs par gyur nas/ gti mug gis blong zhing nga rgyal gyis brgyal te 'byung ba mi mthong ba ni nga rgyal gyi las so//mngon pa'i nga rgyal gyis zil gyis non pas sangs rgyas 'byung ba mnyes par mi byed pa dang sngon gyi dge ba'i rtsa ba zad par byed pa dang gsar mi skyed pa dang / bshad par mi bya ba 'chad pa dang 'thab mo byed cing rtsod pa mang bar gyur te/ 'di lta bu'i chos la gnas pas 'dod rgyal chen por lhung ba'i gnas su gyur kyang /byang chub kyi sems kyi stobs skyed pas dbang phyug thob par 'gyur yang / des bskal pa brgya stong du sangs rgyas 'byung ba yang mi mthong na chos nyan par lta ga la 'gyur te 'di ni nga rgyal gyi las bcu pa'o/ /kye rgyal ba'i sras byang chub sems dpa' dag gis nga rgyal gyi las bcu po de lta bu de dag yongs su spangs nas/ye shes kyi las bcu thob par 'gyur ro zhes gsungs so / /de nyid las sems can thams cad la nga rgyal med pa zhes ye shes kyi las legs par bshad do/ /'phags pa yul 'khor skyong gis zhus pa'i mdo las kyang / rmongs pa de dag nga rgyal dbang gis na //ngan song pa dang mi khom skye ba dang / /dbul dang dman pa'i rigs su skye ba dang / /dmus long mdog ngan mthu chung nyid 'dzin byed/ /ces gsungs so/ /chos yang dag par sdud pa las kyang / sems can gyi zhing ni byang chub sems dpa'i sangs rgyas kyi zhing ste/sangs rgyas kyi zhing gang las sangs rgyas kyi chos rnams 'thob par 'gyur ba de la log par bsgrub pa mi rigs so snyam mo/ /de yang 'di snyam du legs par spyad pa dang nyes par spyad pa thams cad ni sems can la brten nas 'byung ngo / /nyes par spyad pa la brten nas ni ngan song rnams 'byung ngo //legs par spyad pa la brten nas ni lha dang mir 'gyur ro snyom mo zhes gsungs so/ /de bas na dkon mchog ta la la'i gzungs las kyang / kye rgyal ba'i sras dag 'di la byang chub sems dpa' las dang po pa'i byang chub sems dpa' ni sems can rnams la thog ma nyid du sems rnam pa bcu bskyed de/rnam pa bcu gang zhe na 'di lta ste/ phan pa'i sems dang / bde ba'i sems dang / snying brtse ba'i sems dang / mnyen pa'i sems dang / sdug pa'i sems dang / phan gdags pa'i sems dang / kun du srung ba'i sems dang / snyoms pa'i sems dang / slob dpon gyi sems dang / ston pa'i sems te/ sems rnam pa bcu po 'di dag bskyed do zhes gsungs so/ /dad pa'i stobs bskyed pa la 'jug pa'i phyag rgya'i mdo las/ bdag nyid ni sems can thams cad kyi slob mar khas len pa la gnas shing sems can gzhan dag kyang slob mar khas len pa la gzhag go snyam du dbugs dbyung ba rnyed do//de bzhin du sbyar te/ rnam par 'dud pa dang rab tu 'dud pa la gzhag go snyam du dbugs dbyung ba rnyed do/ /zhes gsungs so/ /de la rnam par 'dud pa dang rab tu 'dud pa ni sems can thams cad la nga rgyal med pa nyid do/ /de bzhin du 'phags pa dri ma med par grags pas bstan pa las kyang /sangs rgyas kyi zhing yongs su dag par skye bar bya ba'i phyir sems can thams cad la ston pa ltar gces par byed ces gsungs so/ /stan 'ding ba dang rkang pa 'khru ba la sogs pa'i las byed pa na yang 'jig rten ma dad par 'gyur ba bsrung ba'i phyir/sems kyis gces pa dang gus par bsam pa goms par bya'o/ /'phags pa sdong po bkod pa'i mdo las kyang gsungs te/ des seng ge'i khri chen po de la 'dug ma thag tu skye bo mang po de dag mngon du phyogs par 'gyur te thal mo sbyar nas rgyal po de la phyag 'tshal lo/ /de bzhin du sbyar te/rgyal po chos thams cad kyi nga ro'i gdugs kyi dkyil 'khor rab tu sgrogs pa des slong mo pa de dag mthong ba'i mdo de la de'i rgyus ches dga' bar gyur gyi/ bskal pa tshad med pa'i mthas klas par zhes bya ba nas/ gnas gtsang ma'i lha'i rnam par thar pa zhi ba'i bde ba la gnas pa thob pas ni ma yin no zhes bya ba'i bar du'o//rigs kyi bu 'di lta ste/ dper na/ skyes bu sred pa la spyod pa pha ma dang phu nu dang bu sring dang mdza' bo dang blon po dang gnyen bshes dang bu dang bu mo dang chung ma dang yun ring mo zhig tu bral ba la 'brog dgon par 'khyams te/ de dag mthong bar 'dod pa las de dag dang phrad na de dag mthong bas mi ngoms shing dga' ba dang chags pa chen po skye bar 'gyur ro//rigs kyi bu de bzhin du rgyal po chos thams cad kyi nga ro'i gdugs kyi dkyil 'khor rab tu sgrogs pas slong mo pa de dag mthong bar gyur pa'i mod la dga' ba'i shugs chen po skyes so/ /sems kyi dga' ba'i ro bde ba dang ldan par gyur to//sems spro ba'i shugs rab tu byung ngo zhes bya ba nas/ slong mo pa de dag la bu gcig pa'i 'du shes skyed pa'i phyir ro/ /pha ma'i 'du shes dang sbyin pa'i gnas kyi 'du shes dang dge ba'i bshes gnyen gyi 'du shes dang / dkon pa'i 'du shes dang / dka' ba byed pa'i 'du shes dang /gces spras byed pa'i 'du shes dang / phan 'dogs pa dam pa'i 'du shes dang / byang chub kyi lam nye bar ston pa'i 'du shes dang / mkhan po'i 'du shes dang / ston pa'i 'du shes skyed pa'i phyir te zhes bya ba'i bar du gsungs so/ /de lta bu'i thabs gzhan med na sems can gyi gan du 'gro ba dang rim gro byed pa'i tshe thams cad du gtang ba dran par bya ste/bdag gi lus 'di ni 'di dag gi yin gyi/ bdag bde ba'i don du sa byi dor byed pa dang bsku ba la sogs pa byed pa bzhin du 'di la ci dgar spyod cig snyam du bsam mo / /yang na rje bo mi dga' bas 'jigs pa de dga' bar 'dod pas des bsgo ba bsgrubs pa ltar yid la bya'o//rten gzhan med pa'i phyir bcom ldan 'das kyis rim gro mdzad pa yang dge slong nad pas nyams su blangs so/ /dge slong gi bya ba rgyas pa las ji skad du/ bcom ldan 'das kyis bka' stsal pa/ dge slong ma 'jigs shig / dge slong ngas khyod kyi rim gro bya'o/ /dge slong khyod kyi gos rnams tshur byin cig ngas bkru'o/ /de skad ces bka' stsal pa dang / bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das kyis dge slong nad pa 'di'i gos mi gtsang bas 'bags pa rnams mi bkru bar gsol lo //bcom ldan 'das de bdag gis bkru bar 'tshal lo/ /bcom ldan 'das kyis bka' stsal pa/ kun dga' bo de'i phyir khyod kyis dge slong 'di'i gos rnams khrus shig /de bzhin gshegs pas ni chu blugs so/ / de nas tshe dang ldan pa kun dga' bos dge slong nad pa de'i gos bkrus so//bcom ldan 'das kyis ni chu blugs so/ /de bzhin du sbyar te/ de nas tshe dang ldan pa kun dga' bos dge slong nad pa de shin tu legs par blangs te phyi rol du phyung nas bkrus so/ /bcom ldan 'das kyis ni chu blugs so zhes gsungs pa bzhin no/ /yang smras pa/ gang dag mgu bas che nyid dang / /ma mgus mi bzang rgud 'gyur ba/ /de dag srog kyang yongs btang nas/ /mgu bar bya bar rigs pa yin/ /gang dag mgu byas mang po rnams/ /grub de sems can 'di dag nyid/ /'jig rten na ni sems can las/ /grub pa'i zhing gzhan yod ma yin/ /'di dag yid bzhin nor bu dang //bum bzang 'dod 'jo'i ba dang ni/ /bla ma dang ni lha 'dra ba/ /des na 'di dag mgu bar bya/ /gzhan yang g.yo med gnyen gyur cing / /phan pa dpag med mdzad rnams la/ /sems can mgu bya ma gtogs par/ /gzhan 'ga' zhig gis lan lon 'gyur / / ral pa'i nang gnas sems can rnams/ /'bad pas g.yo ba med par ni/ /ji ltar bzhen bzhin mgon pos sngon/ /dbu yis bzung bar gyur pa yin/ /gang phyir sku gtong mnar med 'jug pa la/ /de la byas pas lan lon nyid 'gyur ba/ /des ni gnod chen byed kyang de dag la//legs pas thams cad rab tu spyad par bya/ /re zhig bdag gi rjer gyur nyid kyang ni/ /gang phyir rang gi sku la'ang mi gzigs pa/ /rje bo de dang de la ji ltar bdag /nga rgyal byed cing bran gyi dngos mi byed/ /gang dag bde bas thub rnams dgyes 'gyur zhing / /gang la gnod na mi dgyes 'byung 'gyur ba//de dag dga' bas thub dbang kun dgyes shing / /de la gnod byas thub la gnod pa byas/ /ji ltar lus la kun nas me 'bar ba/ /'dod pa kun gyis yid bder mi 'gyur ba/ /de bzhin sems can gnod pa byas na yang / /thugs rje che rnams dgyes pa'i thabs med do//de bas bdag gis 'gro la gnod byas pas/ /thugs rje che kun mi dges gyur pa gang / /sdig de di ring so sor bshags bgyi yis/ /mi dges gang lags de thub bzod par gsol/ /de bzhin gshegs rnams mnyes par bgyid slad deng / /bdag nyid kun gyis 'jig rten bran du mchi//'gro mang bdag 'di'i mgo la rdog bsnun nam/ /yang na gnod par byed bzod 'jig rten mgon/ /'gro ba 'di kun thugs rje'i bdag can des/ /bdag tu mdzad pa 'di la the tshom med/ /sems can ngo bor mthong ba 'di dag ni/ /mgon de bdag nyid ci phyir gus mi byed//'di nyid de bzhin gshegs pa mnyes byed yin/ /rang don yang dag sgrub byed 'di nyid yin/ /'jig rten sdug bsngal sel ba'ang 'di nyid de/ /des na bdag nyid rtag tu de nyid bya/ /dper na rgyal po'i mi 'ga' zhig /skye bo mang la gnod byed kyang / /skye bo mig rgyang ring po dag / nus kyang slar gnod mi byed de/ /'di ltar de gcig ma yin gyi/ /rgyal po'i mthu stobs de yi mthu/ /de bzhin gnod byed nyam chung ba/ /'ga' yang khyad du gsad mi bya/ /'di ltar dmyal ba'i srung ma dang / /thugs rje ldan rnams de yi dpung / /des na dmangs kyis rgyal gtum bzhin/ / sems can rnams ni mgu bar bya/ /rgyal po lta zhig khros na yang / /sems can mi mgu byas pa yis/ /myong bar 'gyur ba gang yin pa/ /dmyal ba'i gnod pa des byed dam/ /rgyal po lta zhig mgu na yang / /sems can mgu bar byas pa yi/ /thob par 'gyur ba gang yin pa/ /sangs rgyas nyid sbyin mi srid do//sems can mgu las byung ba yi/ /ma 'ongs sangs rgyas 'grub lta zhog /tshe 'di nyid la dpal chen dang / /grags dang skyid gyur cis ma mthong / /mdzes pa nyid dang nad med dang / /rab dga' yun ring 'tsho ba dang / /'khor los sgyur ba'i bde rgyas ni/ /'khor tshe bzod pas thob par byed//byams sems ldan la mchod byas gang / /de ni sems can che ba nyid/ /sangs rgyas dang ba'i bsod nams gang / /de ni sangs rgyas che ba nyid/ /de lta bas na zlo ba sgron ma'i mdo las kyang / byams pa bsgoms pa'i 'bras bu brjod de/ /mchod pa tshad med rnam mang ji snyed pa//zhing ni bye ba khrag khrig gtams snyed du/ /skyes bu mchog la mchod pa de byas pas/ /byams pa'i sems la grangs dang char mi phod/ /ces bya ba'o / /de lta bas na sbyin pa'i gnas chen po de lta bu dag la khengs pa rtag tu spang bar bya/ khengs pa 'di ni tshul bzhin ma yin pa yid la byed pa las byung ba'i phyir de la mi 'jug par sgrim par bya ste/dkon mchog sprin las ji skad du/ rigs kyi bu ji ltar na byang chub sems dpa' tshul bzhin ma yin pa'i yid la byed pa dang bral ba yin zhe na/ 'di la byang chub sems dpa' gcig pu klog tu song ste/ rab tu dben par gnas shing /'di ltar bdag ni ma 'dres par gnas pa ste/ bdag ni rab tu dben pa na gnas pa'o/ /bdag ni de bzhin gshegs pa'i chos 'dul ba la zhugs pa'o/ /dge sbyong ngam bram ze gzhan gang yin pa dag ni kun kyang 'dres pas gnas pa/ 'du 'dzi mang ba de bzhin gshegs pa'i chos 'dul ba las nyams pa'o snyam du sems mi skyed de/de ltar na byang chub sems dpa' tshul bzhin ma yin pa'i yid la byed pa dang bral ba yin no zhes gsungs pa lta bu'o/ /yang de nyid las 'di la byang chub sems dpa' brtson 'grus rtsom pa ni brtson 'grus de'i ro myong bar mi byed de/ brtson 'grus des gzhan la mi smod bdag la mi stod do//de 'di snyam du shes rab dang ldan pa'i rang bzhin can su zhig bdag gi las la brtson pas gzhan la smod snyam du sems te/ rigs kyi bu de ltar na byang chub sems dpa' bsnyems pa med pa'i brtson 'grus can yin no zhes gsungs so//bsod nams bsrung ba mdor bsdus pa ni 'di yin te/ byang chub tu yongs su bsngo ba gang yin pa'o/ /ji skad du 'phags pa blo gros mi zad pas bstan pa'i mdo las/ dge ba'i rtsa ba byang chub tu yongs su bsngos pa ni byang chub kyi snying po la 'dug gi bar du bar mdor 'ga' yang zad par mi 'gyur ro//btsun pa sha ra dwa ti'i bu 'di lta ste/ dper na chu'i thigs pa rgya mtsho chen por lhung ba ni bskal pa'i mthar thug gi bar du bar mdor zad pa med do zhes gsungs so/ /bslab pa kun las btus pa las longs spyod dang bsod nams bsrung ba'i le'u ste bdun pa'o// //lus la sogs pa gsum bsrung ba bshad zin te/ da ni dag pa brjod par bya'o/ /ci'i don du zhe na/ lus ni rnam par sbyang byas na/ /phan pa'i longs spyod 'gyur ba ste/ /'bras chan legs par tshos pa dang / /gzeg med lus can phan pa 'dra/ /'phags pa de bzhin gshegs pa'i gsang ba'i mdo las ji skad du gang yang grong khyer chen po dag gi dur khrod chen po srog chags brgya stong du mas gang bar gyur pa der yang byang chub sems dpa' sems dpa' chen po des bdag gi lus chen po shi zhing dus las 'das par ston to//der sems can dud 'gro'i skye gnas su gyur pa de dag gis ji tsam 'dod par sha la zos nas tshe'i mthar phyin te 'chi ba'i dus su gyur cing shi nas bde 'gro mtho ris kyi 'jig rten du lha'i nang du skye ba dang /de dag gi yongs su mya ngan las 'da' ba'i bar gyi rgyur 'gyur ba gang yin pa de yang byang chub sems dpa' de nyid kyi sngon gyi smon lam yongs su dag pa'i phyir te/sems can gang dag gis bdag 'chi ba'i dus su gyur pa'i sha zos pa de dag la de nyid mtho ris su skye ba nas yongs su mya ngan las 'da' ba'i bar gyi rgyur gyur cig ces gang gis yun ring po nas smon lam btab ste tshul khrims dang ldan pa de'i bsam pa grub pa dang don du gnyer ba grub pa dang smon lam grub pa yin no zhes gsungs pa lta bu'o//yang de nyid las de chos kyi skus rab tu phye bas na mthong bas kyang sems can rnams kyi don byed do/ /thos pa dang reg pas kyang sems can rnams kyi don byed do/ /zhi ba'i blo gros 'di lta ste dper na/ sman pa'i rgyal po 'tsho byed kyis rtsi thams cad bsdus te rtsi shing mang po las bu mo'i gzugs bzang zhing mdzes pa blta na sdug pa legs par byas te legs par zin cing legs par byi dor byas pa de 'ong ngam 'gro'am 'greng ngam 'dug gam nyal yang rtog pa med cing rnam par rtog pa med do//der nad pa gang dag btsun pa btsun pa rgyal po'am rgyal po'i blon po chen po'am rgyal po'i bu'am tshong dpon nam khyim bdag gam blon po'am rgyal phran gang dag 'ong ba de dag sman pa'i rgyal po 'tsho byed kyis sman gyi bu mo de dang de dag phrad ma thag tu nad thams cad byang ste nad med cing bde ba las nyams pa med par 'gyur ro//zhi ba'i blo gros sman pa gzhan la med pa sman pa'i rgyal po 'tsho byed kyis 'jig rten gyi nad gso ba'i shes pa la ltos / zhi ba'i blo gros de bzhin du byang chub sems dpa' chos kyi skus rab tu phye ba yang sems can bud med dang skyes pa dang khye'u dang bu mo 'dod chags dang zhe sdang dang gti mug gis yongs su gdungs pa ji snyed pa de dag gi lus la reg na/reg ma thag tu de dag gi nyon mongs pa thams cad sel bar 'gyur ro/ /lus yongs su gdung ba dang bral bar yang shes so/ /'di ni 'di ltar byang chub sems dpa' de nyid kyi sngon gyi smon lam shin tu yongs su dag pa'i phyir ro zhes gsungs te /de'i don du lus sbyang bar bya'o/ /gzhan yang / ji ltar lo thog rtsas khebs na/ /nad kyis zhum zhing rgyas mi 'gyur/ /de ltar sangs rgyas myu gu yang / /nyon mongs khebs na rgyas mi 'gyur/ /gnyen pos bsal na 'phel bar 'gyur/ / zhes bya bar dgongs pa'o/ /lus kyi dag pa gang zhe na/ sdig dang nyon mongs rnams sbyang yin/ /rdzogs sangs rgyas kyis gsungs tshul du/ /'bad pa med na nga song 'gro/ /de la sdig pa sbyang ba ni chos bzhi bstan pa'i mdo las bsten te/ byams pa byang chub sems dpa' sems dpa' chen po chos bzhi dang ldan na sdig pa byas shing bsags pa zil gyis non par 'gyur ro //bzhi gang zhe na 'di lta ste/ rnam par sun 'byin pa kun tu spyod pa dang / gnyen po kun tu spyod pa dang / nyes pa las zlog pa'i stobs dang / rten gyi stobs so/ /de la rnam par sun 'byin pa kun tu spyod pa ni mi dge ba'i las spyod pa de la 'gyod pa mang ba yin no//de la gnyen po kun tu spyod pa ni mi dge ba'i las byas nas kyang dge ba'i las la shin tu brtson pa'o/ /de la nyes pa las zlog pa'i stobs ni sdom pa yang dag par blangs pas mi byed pa'i sdom pa thob pa'o//de la rten gyi stobs ni sangs rgyas dang chos dang dge 'dun la skyabs su 'gro ba dang byang chub kyi sems mi gtong ba ste/ de stobs dang ldan pa la brten pas sdig pas zil gyis gnon par mi nus so/ /byams pa byang chub sems dpa' sems dpa' chen po chos bzhi po de dag dang ldan na sdig pa byas shing bsags pa zil gyis non par 'gyur ro zhes bya ba'o//de la rnam par smod pa kun tu spyod pa ji ltar bsgom par bya zhe na/ gser 'od dam pa'i mdo las ji skad bstan pa lta bu ste/ sangs rgyas rkang gnyis dam pa dag /thugs brtse thugs rje ldan pa'i thugs/ / gang dag phyogs bcu'i 'jig rten na/ /bzhugs pa bdag la dgongs su gsol/ /bdag gis sngon chad sdig pa'i las/ /shin tu mi bzad gang bgyis pa/ /stobs bcu'i spyan sngar mchis nas ni/ /de dag thams cad bshags par bgyi/ /pha ma dag tu mi 'dzin dang / /sangs rgyas rnams su mi 'dzin dang //dge ba dag tu mi 'dzin pas/ /sdig pa bdag gis gan bgyis dang / /phyug pa'i rgyags pas dregs pa dang / /rigs dang longs spyod rgyags pa dang / /gzhon pa'i rgyags pas dregs pa yis/ /bdag gis sdig pa gang bgyis dang / /nyes pa'i dmigs su ma mthong bas//nyes pa bgyis pa'i las dang ni/ /nyes par bsags shing nyes smras pa'i/ /sdig las bdag gis gang bgyis dang / /byis pa'i blo yis 'jug pa dang / /mi shes mun pa'i sems dang ni/ /sdig pa'i grogs po'i dbang gyur dang / /nyon mongs rnam par 'khrug sems dang //rtsed mo dga' ba'i dbang nyid dang / /mya ngan dang ni nad dbang dang / /nor gyis ma chog nyes pa yis/ /bdag gis sdig pa gang bgyis dang / /'phags min skye bo 'dre ba dang / /phrag dog ser sna sgyu dang ni/ /g.yo dang dbul ba'i nyes pa yis/ /bdag gis sdig pa gang bgyis dang //phongs dang rgud pa'i dus kyi tshe/ /'dod pa rnams kyi 'jigs rgyu dang / /phyug po ma yin gyur pa yis/ /bdag gis sdig pa gang bgyis dang / /g.yo ba'i sems kyi dbang nyid dang / /'dod dang khro ba'i dbang dag dang / /bkres dang skom gyis nyen pa yis/ /bdag gis sdig pa gang bgyis dang //bza' ba dag dang btung ba dang / /bud med rgyu dang gos kyi phyir/ /nyon mongs gdung ba sna tshogs kyis/ bdag gis sdig pa gang bgyis dang / /lus dang ngag dang yid kyi sdig /nyes spyad rnam par gsum bsags ni/ /'di 'dra'i tshul gyis gang bgyis pa/ /de dag thams cad bdag 'chags so//sangs rgyas rnams dang chos rnams dang / /de bzhin nyon thos rnams la yang / /gus pa ma lags gang bgyis pa/ /de dag thams cad bdag 'chags so/ /gang yang rang sangs rgyas rnams dang / /byang chub sems dpa' rnams la yang / /gus pa ma lags bgyis pa rnams//de dag thams cad bdag 'chags so/ /dam chos smra ba rnams la yang / /gus pa ma lags bgyis pa dang / /chos la'ang gus par ma bgyis pa/ /de dag thams cad bdag 'chags so/ /bdag gis rtag tu mi shes pas/ /dam pa'i chos ni spangs pa dang / /pha ma rnams la ma gus dang //de dag thams cad bdag 'chags so/ /blun pa dang ni byis pa dang / /'dod chags zhe sdang gti mug dang / /nga rgyal dregs pas bsgribs bgyis pa/ /de dag thams cad bdag 'chags so/ /bdag gis phyogs bcu'i 'jig rten du/ /stobs bcu rnams la mchod par bgyi//bdag gis phyogs bcu'i sems can rnams/ /sdug bsngal kun las gdon par bgyi/ /sems can bsam gyis mi khyab kun/ /sa bcu la ni dgod par bgyi/ /sa bcu la ni gnas nas kyang / /thams cad de bzhin gshegs gyur cig /ji srid sdug bsngal rgya mtsho las//de kun mthar bgyi nus srid du/ /sems can re re'i phyir yang ni/ /bskal pa bye bar spyad par bgyi/ /gser 'od dam pa zhes bgyi ba/ /las rnams thams cad byang bgyid pa/ /zab mo dag ni ston pa 'di/ /sems can de dag bstan par bgyi/ /gang gis bskal pa stong rnams su//sdig pa shin tu mi bzad bgyis/ /lan cig rab tu bshags pa yis/ /de dag thams cad byang bar 'gyur/ /gang gis las kyi sgrib pa rnams/ /myur du yang dag zad 'gyur ba/ /gser 'od dam pa dge ba yis / /bshags pa 'di dag bshags nas ni//rin chen 'byung gnas mchog bcu po/ /sa bcu la ni gnas par bgyi/ /sangs rgyas yon tan snang bar bgyi/ /srid pa'i mtsho las bsgral bar bgyi/ /sangs rgyas rgya mtsho chu bo dang / /yon tan rgya mtsho zab mo de/ /sangs rgyas yon tan bsam yas kyis/ /thams cad mkhyen du rdzogs par bgyi//ting 'dzin brgya phrag stong rnams dang / /gzungs rnams bsam gyis mi khyab dang / /dbang stobs byang chub yan lag gis/ /stobs bcu dam par 'gyur bar bgyi/ /dgongs pa'i thugs kyis sangs rgyas rnams/ /bdag la rnam par gzigs su gsol/ / thugs rje ldan pa'i thugs kyis ni/ /nongs par rab tu gzung du gsol/ /bdag gis bskal pa brgya rnams su/ /sngon chad sdig pa gang bgyis pa/ /de phyir bdag ni mya ngan sems/ /phongs dang mya ngan 'jigs pas gzir/ /sdig pa'i las la 'jigs par bgyi/ /yid ni rtag tu dman par gyur//gang dang gang du spyod bgyid pa/ /bdag ni gang du'ang dga' ma mchis/ /sangs rgyas thams cad thugs rje ldan/ /'gro ba kun gyi 'jigs sel bas/ /nongs par rab tu gzung du gsol/ /'jigs pa dag las bdag thar mdzod/ /bdag gi nyon mongs las rnams kyi/ /dri ma de bzhin gshegs pas sol //sangs rgyas rnams kyis bdag la ni/ /snying rje'i chu yis bkru bar gsol/ /sdig pa thams cad bshags par bgyi / /sngon chad bdag gis gang bgyis dang / /de ltar bdag gi sdig pa gang / /de dag thams cad bdag 'chags so/ /nongs par bgyis pa'i las rnams kun//slan chad mi bgyid bsdams par bgyi/ /bdag gis nongs par bgyis pa gang / /sdig de bcab par mi bgyi'o/ /lus kyi las ni rnam gsum dang / /ngag gi rnam pa bzhi dag dang / /yid kyi rnam pa gsum po rnams/ /de dag thams cad bdag 'chags so//lus kyis bgyis dang ngag gi las/ /yid kyis rnam par bsams pa dang / /las rnams bcu po bgyis pa dag /de dag thams cad bdag 'chags so/ /mi dge'i las bcu spangs nas su/ /dge ba bcu po bsten bgyis te/ /sa bcu la ni bdag gnas bgyi/ / stobs bcu mchog tu 'gyur bar bgyi/ /bdag gi sdig pa'i las gang dag /mi 'dod 'bras bu thob bgyid pa/ /sangs rgyas spyan sngar mchis nas ni/ /de dag thams cad bshags par bgyi/ /'dzam bu'i gling 'dir gang dag gang / /'jig rten khams ni gzhan dag tu/ /gang rnams dge ba'i las bgyid pa//de dag kun la yi rang ngo / /lus dang ngag dang yid kyis kyang / /bdag gis bsod nams gang bsgrubs pa/ /bdag ni dge ba'i rtsa ba des/ /byang chub mchog la reg par bgyi/ /srid mtsho nyam ngar byis pas blo yis ni/ /shin tu mi bzad sdig pa gang bgyis pa//stobs bcu mnga' ba'i spyan sngar mchis nas ni/ /sdig pa de kun so sor bshags par bgyi/ /skye ba nyam nga srid pa nyam nga dang / /'jig rten nyam nga g.yo sems nyam nga bar/ /lus kyi spyod pa nyam nga sna tshogs kyis/ /bdag gis sdig pa gang bsags de 'chags so/ / byis pa blun byas nyon mongs nyam nga dang / /sdig pa'i grogs dang phrad pa nyam nga dang / /srid pa nyam nga 'dod chags nyam nga dang / /zhe sdang gti mug mun pa nyam nga dang / /dal ba'i nyam nga dus kyi nyam nga dang / /bsod nams bsgrub pa nyam nga dag gis kyang / /rgyal ba yang dag mngon sum mchis nas ni//sdig pa de kun so sor bshags par bgyi/ /zhes gsungs so/ /khyad par du na byang chub sems dpa'i ltung ba lci ba dang yang ba rnams bshags pa ni 'phags pa nye ba 'khor gyis zhus pa las gsungs pa gang yin pa'o/ /ltung ba lci ba yang gang yin zhe na/ spyir de las gsungs pa ni/nye ba 'khor gal te theg pa chen po la yang dag par zhugs pa'i byang chub sems dpa' la 'dod chags dang ldan pa'i ltung ba gang gA'i klung gi bye ma snyed byung la/ gang zhe sdang dang ldan pa'i ltung ba gang yin pa ni gcig byung na byang chub sems dpa'i theg pa brtsan par bya na/de gnyis las gang zhe sdang dang ldan na ltung ba de ni shin tu lci'o/ /de ci'i phyir zhe na/ nye ba 'khor zhe sdang gis ni sems can yongs su gtong bar byed la/ 'dod chags ni sems can sdud par byed pa'i phyir ro/ /nye ba 'khor de la nyon mongs pa gang sems can sdud par 'gyur ba de la ni byang chub sems dpa' 'dzem pa'ang med 'jigs pa yang med do//de bzhin du sbyar te/ nye ba 'khor de lta bas na khyod la 'dod chags dang ldan pa'i ltung ba thams cad ni ltung ba ma yin par bshad do zhes bya'o/ /'di la dgongs pa gang zhe na/ sems can sdud pa nyid de sngar bye brag tu byas pa'i phyir ro//bstan pa 'di ni lhag pa'i bsam pa dang snying brtse ba dang ldan pa las yin te/ de nyid las de ma thag tu nye ba 'khor/ de la gang thabs la mi mkhas pa'i byang chub sems dpa' de dag ni 'dod chags dang ldan pas 'jigs kyi zhe sdang dang ldan pas ni ma yin no//nye ba 'khor byang chub sems dpa' gang dag thabs la mkhas pa de dag ni zhe sdang dang ldan pa'i ltung bas 'jigs kyi 'dod chags dang ldan pas ni ma yin no zhes gsungs so/ /thabs mkhas pa yang gang zhe na/ gang dag shes rab dang snying rje gnyis kyis sems can gtong ba las zlog pa'o//gnyi ga ltar yang sems can gtong bar 'gyur te/ shes rab gcig pus ni sdug bsngal stong pa nyid du khong du chud pa'i phyir dang / snying rje gcig pus ni nyon mongs pa'i dbang gis ring por mi thogs par snying rje nyams par 'gyur ba'i phyir ro/ /thabs la mkhas pa'i mdo las kyang /rigs kyi bu dper na/ gsang sngags dang rig sngags 'dzin pa'i mi'i rgyal pos bzung ste/ thag pa lnga'i bcing bas bcings su zin kyang de gang gi tshe 'gro ba 'dod pa de'i tshe gsang sngags dang rig sngags kyi stobs bskyed pa gcig gis bcings pa thams cad gtubs te 'gro'o//rigs kyi bu de bzhin du/ byang chub sems dpa' thabs la mkhas pa yang gang gi tshe 'dod pa'i yon tan lnga las dga' bar myong zhing de dag dang lang long du gyur pas gnas kyang gang gi tshe 'dod par gyur pa de'i tshe shes rab kyi stobs bskyed pa dang thams cad mkhyen pa nyid kyi sems gcig gis 'dod pa'i yon tan thams cad bcom nas tshangs pa'i 'jig rten du skye'o zhes gsungs so//zhe sdang la yang de ltar ci'i phyir 'dod par mi byed ce na/ rang bzhin gyis kha na ma tho ba dang bcas pa'i phyir dang snying rje dang bral bas na thabs nyid mi srid pa'i phyir ro/ /yang na gzhan gyi don grub pa rang gi don las shin tu lci bar lhag par mos pa na/khro ba la gnas pas kyang gzhan la rjes su bstan nas gdung ba sngon du 'gro bas de ma thag tu phyin chad mi byed pa'i sdom pa 'thob bo/ /gnod pa las bzlog pa'i phyir khros pa la nyes pa ci yod ce na / skabs phye na de'i bag chags gsos par 'gyur bas snying rje nyams pa'i nyes par 'gyur ro//de bcad na rtsa ba 'chad par 'gyur ro zhes 'og nas bstan par bya'o/ /gal te sems can de la phan du zin kyang byang chub sems dpa' snying rje nyams pas sems can gyi don chen po'i rgyun nyams par 'gyur ro//'phags pa bden pa po'i le'u'i dpes ni snying rje la gnas pa yin par rig par bya'o/ /der ha cang snying rje bkag pa gang yin pa de ni 'jig rten gyi don la mkhas pas 'jig rten pa 'dun par bya ba'i phyir ro/ /zlog pa na yang gal te phan par 'dod pa'i byang chub sems dpa' la khong khro bar gyur na/de yang byang chub sems dpa' ma yin par 'gyur zhing gnyi ga la gnod par 'gyur ro/ /'dod chags kyang nyes pa yin te/ 'dod pa dag la brten pa'i mi/ /ldongs 'gyur pha ma gsod par 'gyur/ /'dod bsten tshul khrims ldan pa'ang gsod/ /des na rtag tu spang bar bya//zhes bstan te/ bdag bde ba la chags pas ni gzhan gyi sdug bsngal yal bar 'dor bar mthong ngo zhe na/ gang gzhan gyi sdug bsngal bdag gi sdug bsngal du ma goms pa de la ni mthong ba bden te/ gang shin tu goms pa de la ni nyes pa gnyi ga mi 'byung ngo / /zla ba sgron ma'i mdo las ji skad du/kun dga' bo 'di lta ste/ dper na 'di la skyes bu la la zhig rkang pa nas spyi bo'i bar du 'bar bar gyur te rab tu 'bar zhing me lce gcig tu gyur pa de la/ skyes bu la la zhig der nye bar 'ongs te/ 'di skad du kye skyes bu tshur shog/ / lus la me 'bar ba ma zhi bar 'dod pa'i yon tan lnga dang phrad cing ldan par rtses shig dga' bar gyis shig dga' mgur spyod cig ces zer na kun dga' bo 'di ji snyam du sems/ skyes bu de lus la me 'bar ba ma zhi bar 'dod pa'i yon tan lnga dang phrad cing ldan par 'gyur te rtse ba dang dga' ba dang dga' mgur spyod par byed dam/kun dga' bos gsol pa/ bcom ldan 'das de ni ma lags so/ /bcom ldan 'das kyis bka' stsal pa/ kun dga' bo yongs su brtag pa bzung ste skyes bu de lus la me 'bar ba ma zhi bar 'dod pa'i yon tan lnga dang phrad cing ldan par 'gyur te/ rtse ba dang dga' ba dang dga' mgur spyod du zin kyang de bzhin gshegs pa sngon byang chub sems dpa'i spyad pa spyod pa na sems can rnams ngan song gsum gyis sdug bsngal bar gyur cing dbul ba dag mthong nas yid bde ba'am sems bde ba ma byung ngo zhes rgyas par gsungs pa lta bu'o//'jig rten na yang bu gsal shing la bskyon pa mthong ba na pha ma la rang gi tshul dang mthun par snying rje ba'i dbang gis rang gi bde ba la mi chags par snang ngo //dben pa zhig tu byas na khyo yod pa'am/ mgo gtsang ma rigs dang chos dang rgyal mtshan gyis bsrungs pa la yang rung ste 'dod pa la log par g.yem par mi 'gyur ro//sems can gyi don du 'gyur la sems can la yang mi gnod pa bsgrubs na nyes pa med do/ /yang dag par tshangs par spyod pa rnams ni don byas pa'i phyir de dag lam srid la sogs pa bzhin du ring du spang zhing mchod do/ /de lta na ni dge slong gis kyang bya bar 'gyur ro/ /de lta ma yin te/de bzhin du tshangs par spyod pa'i rnam pas sems can gyi don bsgrub pa'i phyir ro/ /de skad du 'phags pa blo gros mi zad pa'i mdo las/ des dus dang dus ma yin pa btang snyoms su bya'o zhes gsungs so/ /ci ste de las sems can gyi don du 'gyur ba lhag pa mthong na bslab pa dbul lo//bskal pa mang por goms pas bdag nyid du gyur pa'i snying rje chen po dang thabs la mkhas pa la sogs pa yongs su rdzogs pa'i dge ba'i rtsa ba can gyi byang chub sems dpa' rnams la 'dod chags kyis bar du gcod par byed par 'gyur ram ci 'di ni mi srid pa nyid do/ / thabs la mkhas pa'i mdo las kyang bstan te/ bram ze'i khye'u skar ma lo bzhi khri nyis stong gi bar du tshangs par spyod pa'i dbang du byas nas des gom pa bdun pa la gnas te snying rje skyes nas bdag gi brtul zhugs 'di bshig ste/ sems can dmyal bar song bar gyur kyang sems can dmyal ba'i sdug bsngal de myong bar bzod kyi/bud med 'di shir 'ong gis bde bar gyur cig ces rigs kyi bu bram ze'i khye'u skar ma de slar log ste bud med de la lag pa g.yas pa nas bzung nas sru mo khyod ci 'dod pa bya'i longs shig ces de skad ces smras so/ /de bzhin du sbyar te/ rigs kyi bu nga 'dod pa ngan pa dang ldan pa'i snying rje chen po'i sems bskyed pas kyang bskal pa khrir 'khor ba phyir bsnyil te spangs par gyur to//rigs kyi bu sems can gzhan gang dag sems can dmyal bar skye bar 'gyur ba des byang chub sems dpa' thabs la mkhas pa tshangs pa'i 'jig rten du skyes pa la ltos zhes gsungs so//yang de nyid las/ gal te byang chub sems dpa' sems can gcig gi dge ba'i rtsa ba skye bar 'gyur ba lta na/ ltung ba ji lta bu byung ba bskal pa brgya stong du sems can dmyal bar 'tsho bar 'gyur ba de 'dra ba'i ltung ba byung yang bcom ldan 'das byang chub sems dpa' ltung ba byung ba dang sems can dmyal ba'i sdug bsngal de la spro ba nyid du bgyi ste /sems can gcig po de'i dge ba'i rtsa ba yongs su btang ba dang yongs su bri bar ni mi bgyi'o zhes gsungs so/ /yang de nyid las/ rigs kyi bu 'di la byang chub sems dpa' thabs mkhas pa brgya la la la zhig tu sdig pa'i grogs po'i dbang gis nyes pa byung na de 'di ltar slob ste/gal te bdag gis phung po 'di dag gis yongs su mya ngan las 'da' bar bya na ni bdag gi sems yongs su gdung ba dang ldan par yang 'gyur gyis 'di ltar bdag gis sems can yongs su smin par bya ba'i phyir phyi ma'i mtha'i mur thug par gnas pa de lta bu'i go cha bgos la/bdag gi sems la gdung bar ni mi bya'i/ ji lta ji ltar 'khor bar 'khor bar 'gyur ba de lta de ltar sems can yongs su smin par bgyi'o/ /ltung ba 'di yang chos bzhin du gso bar bya'o//phyis nyes par mi bya'o snyam du sems so/ /rigs kyi bu yongs su brtag pa bzung na gal te rab tu byung ba'i byang chub sems dpa' rtsa ba'i ltung ba bzhi po thams cad zhig par gyur kyang / thabs la mkhas pa 'dis sel bar byed pa lta na/ byang chub sems dpa' la ltung bar mi 'gyur bar nga smra'o zhes gsungs so//'di ni dkon mchog sprin las kyang gsal ba nyid de/ mtshams med pa byed par 'dod pa'i mi gsad par gnang ba'i phyir ro/ /nyan thos kyi 'dul ba las kyang / rtsa ba'i ltung ba'i gnas nyid la snying rje bas ri dgas la sogs pa btang bas nyes pa med par gsungs so//gang byang chub sems dpa' la 'dod chags skyes nas bde 'gro 'thob pa 'di ni 'dod chags yon tan can yin te khro ba ni de lta ma yin no/ /'phags pa thabs la mkhas pa'i mdo las ji skad du/ byang chub sems dpa' dga' byed la bu mo dpal yon can gyi mchog chags par gyur ba'i dbang du byas nas//dga' byed smon lam phyi phyir 'debs pa ni/ /bud med gang dag chags sems kyis blta ba/ /de ni bud med lus kyang yongs spangs te/ /skyes bu spangs pa'i sems can 'gyur bar shog /gang gis sems can gzhan dag dmyal 'gro ba//des ni dpa' bo dag la chags bskyed na/ /mtho ris 'gro zhing skyes pa nyid 'gyur ba/ /de yi yon tan 'di 'dra kun dga' ltos/ /de bzhin du sbyar te/ /su zhig rtsi rgyal grags pa chen po yi/ /byang chub sems dpa' rnams la zhe sdang skyed/ /de dag nyon mongs las kyang bde sbyin na/ / de la bkur sti byed pa smos ci dgos/ /zhes gsungs so/ /de ltar sems can gyi don gyi thabs gzhan med na/ 'dod chags las byung ba'i nyes pa yang nyes pa ma yin par bshad do/ /thabs la mkhas pa'i mdo las kyang / smad 'tshong ma ltar don byed nas byang chub sems dpa' btang snyoms rjes su byed de sems can de 'dor ro zhes rgyas par gsungs so//sa thob pa pha rol tu phyin pa drug spyad pa la 'di bsam par bya'i gzhan la ni ma yin no/ /de ltar zhar la 'ongs pa yin te re zhig gzhag go/ /de'i phyir zhe sdang skabs dbye bar mi bya'o/ /nye ba 'khor gyis zhus pa las kyang bka' stsal te/shA ri'i bu byang chub sems dpa' rnams kyi kha na ma tho ba chen po dang bcas pa'i ltung ba gnyis te/ gnyis gang zhe na/ 'di lta ste/ zhe sdang dang ldan pa dang / gti mug dang ldan pa'o/ /de bzhin du sbyar te/ shA ri'i bu de la byang chub sems dpa' dang pos thog ma'i ltung ba sde bcu las lci ba rnams bshags par bya'o//ltung ba yod pa sde lnga las lci ba rnams bshags par bya'o/ /shA ri'i bu bud med kyi lag nas 'dzin pa dang / mig gis blta ba dang / gnod sems kyang ltung ba ste gang zag gcig gam gnyis la yang bshags par bya'o/ /byang chub sems dpa' mtshams med pa lnga dang ldan pa'i ltung ba dang / bud med las ltung ba byung ba dang lag pa las ltung ba byung ba dang khye'u las ltung ba byung ba dang / mchod rten las ltung ba byung ba dang / dge 'dun las ltung ba byung ba dang / de las gzhan pa'i ltung ba lci ba rnams ni sangs rgyas bcom ldan 'das sum cu rtsa lnga la gcig pos nyin mtshan du ltung ba lci ba rnams bshags par bya'o//de la ltung ba bshags pa ni 'di lta ste/ bdag ming 'di zhes bgyi ba sangs rgyas la skyabs su mchi'o/ /chos la skyabs su mchi'o/ /dge 'dun la skyabs su mchi'o / /de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phyag 'tshal lo//rdo rje snying pos rab tu 'joms pa la phyag 'tshal lo/ /rin chen 'od 'phro la phyag 'tshal lo/ /klu dbang gi rgyal po la phyag 'tshal lo/ /dpa' bo'i sde la phyag 'tshal lo/ /dpal dgyes la phyag 'tshal lo/ /rin chen me la phyag 'tshal lo/ /rin chen zla 'od la phyag 'tshal lo//mthong ba don yod la phyag 'tshal lo/ /rin chen zla ba la phyag 'tshal lo/ /dri ma med pa la phyag 'tshal lo/ /dpas byin la phyag 'tshal lo/ /tshangs pa la phyag 'tshal lo/ /tshangs pas byin la phyag 'tshal lo/ /chu lha la phyag 'tshal lo/ /chu lha'i lha la phyag 'tshal lo/ / dpal bzang la phyag 'tshal lo/ /tsan+dan dpal la phyag 'tshal lo/ /gzi brjid mtha' yas la phyag 'tshal lo/ /'od dpal la phyag 'tshal lo/ /mya ngan med pa'i dpal la phyag 'tshal lo/ /sred med kyi bu la phyag 'tshal lo/ /me tog dpal la phyag 'tshal lo//de bzhin gshegs pa tshangs pa'i 'od zer rnam par rol pas mngon par mkhyen pa la phyag 'tshal lo/ /de bzhin gshegs pa pad+ma'i 'od zer rnam par rol pas mngon par mkhyen pa la phyag 'tshal lo/ /nor dpal la phyag 'tshal lo/ /dran pa'i dpal la phyag 'tshal lo//mtshan dpal shin tu yongs bsgrags la phyag 'tshal lo/ /dbang po tog gi rgyal mtshan gyi rgyal po la phyag 'tshal lo/ /shin tu rnam par gnon pa'i dpal la phyag 'tshal lo/ /g.yul las shin tu rnam par rgyal ba la phyag 'tshal lo/ /rnam par gnon pas gshegs pa la phyag 'tshal lo//kun nas snang ba bkod pa'i dpal la phyag 'tshal lo/ /rin chen pad mos rnam par gnon pa la phyag 'tshal lo/ /de bzhin gshegs pa dgra bcom pa yang dag par rdzogs pa'i sangs rgyas rin po che pad+ma la rab tu bzhugs te ri dbang gi rgyal po la phyag 'tshal lo/ / de dag la sogs pa 'jig rten gyi khams thams cad na de bzhin gshegs pa dgra bcom pa yang dag par rdzogs pa'i sangs rgyas ji snyed bzhugs te 'tsho zhing gzhes pa'i sangs rgyas bcom ldan 'das de dag bdag la dgongs su gsol/ /gang bdag gis skye ba 'di dang skye ba gzhan dag thog ma ma mchis pa'i skye ba nas 'khor bar 'khor ba na/sdig pa'i las bgyis pa dang / bgyid du stsal ba dang / bgyid pa la rjes su yi rang ba dang / mchod rten gyi dang dge 'dun gyi dang / phyogs bzhi'i dge 'dun gyi nor phrogs pa dang / 'phrog tu stsal ba dang 'phrog pa la rjes su yi rang bar gyur ba dang /mtshams ma mchis pa'i las bgyis pa dang bgyid du stsal ba dang bgyid pa la rjes su yi rang bar gyur pa dang / mi dge ba bcu'i las kyi lam bzung ste spyod pa dang spyod du stsal ba dang rjes su yi rang bar gyur pa dang / las kyi sgrib pa gang gis bsgribs nas sems can dmyal bar mchi ba'am/dud 'gro'i skye gnas dang gshin rje'i yul du mchi ba'am/ yul mtha' 'khor gyi kla klo rnams su skye bar 'gyur ba'am/ lha tshe ring por skye bar 'gyur ba'am/ dbang po ma tshang bar 'gyur ba dang / log par lta ba yongs su 'dzin pa dang / sangs rgyas 'byung ba la mnyes par mi bgyid pa'i las kyi sgrib pa de dag thams cad ye shes su gyur pa/spyan du gyur pa dpang du gyur pa tshad mar gyur pa'i sangs rgyas bcom ldan 'das mkhyen cing gzigs pa de dag gi spyan sngar so sor bshags so/ /mthol lo/ /mi 'chab bo/ /slan chad kyang sdom par bgyi'o/ /sangs rgyas bcom ldan 'das de dag bdag la dgongs su gsol//gang bdag gis skye ba 'di dang skye ba gzhan dang thog ma ma mchis pa'i skye ba nas 'khor bar 'khor ba'i tshe / tha na dud 'gro'i skye gnas su gyur pa la zan chang cig tsam sbyin pa stsal ba dang / tshul khrims bsrungs par gyur pa dang /gang bdag gis tshangs par spyad par gnas pa'i dge ba'i rtsa ba dang / gang bdag gis sems can yongs su smin par bgyis pa'i dge ba'i rtsa ba dang gang bdag gis byang chub kyi sems kyi dge ba'i rtsa ba dang / gang bdag gis bla na med pa'i ye shes kyi dge ba'i rtsa ba de dag thams cad gcig tu bsdus/gcig tu spungs bcal te/ mngon par bsdus nas/ bla ma'i yang bla ma bla na med pa yang dag par rdzogs pa'i byang chub tu yongs su bsngo bas yongs su bsngo bar bgyi'o/ /ji ltar 'das pa'i sangs rgyas bcom ldan 'das rnams kyis yongs su bsngos pa dang / ji ltar ma byon pa'i sangs rgyas bcom ldan 'das rnams yongs su bsngo bar 'gyur ba dang / ji ltar da ltar byung ba'i sangs rgyas bcom ldan 'das rnams yongs su bsngo ba de bzhin du bdag gis kyang yongs su bsngo'o/ /sdig pa thams cad so sor bshags so/ /bsod nams thams cad kyi rjes su yi rang ngo //sangs rgyas thams cad la gsol ba gdab bo/ /bdag bla na med pa'i ye shes su gyur cig /mi mchog rgyal ba gang dag da ltar bzhugs pa dang / /gang dag 'das pa dag dang de bzhin gang ma byon/ /yon tan bsngags pa mtha' yas rgya mtsho 'dra kun la/ / thal mo sbyar ba bgyis te skyabs su nye bar mchi/ /byang chub sems dpa'i gang dag snying rje'i stobs ldan zhing / /dpa' bo sems can rnams la phan phyir spyod byed pa/ /de dag rnams kyis skyabs med sdig byed bdag la skyobs/ /byang chub sems dpa' de dag rnams la bdag skyabs mchi /shA ri'i bu 'di ltar byang chub sems dpa' / sangs rgyas sum cu so lnga 'di dag la sogs pa de bzhin gshegs pa thams cad kyi rjes su song ba'i yid la byed pas sdig pa thams cad rnam par dag par bya'o/ /de de ltar sdig pa thams cad rnam par dag pas/ sems can rnam par thar bar bya ba'i phyir de la sangs rgyas bcom ldan 'das rnams zhal nye bar ston to/ /de bzhin du byis pa so so'i skye bo 'khrul pa rnams yongs su smin par bya ba'i phyir tshig 'bru sna tshogs rnam par nye bar ston kyang chos kyi dbyings las mi g.yo'o/ /de bzhin du sbyar ro/ / byang chub sems dpa' nyin mtshan du sangs rgyas bcom ldan 'das de dag gi mtshan 'dzin pa dang yongs su brjod pa dang phung po gsum pa'i chos kyi rnam grangs klog pas ltung ba 'gyod pa las byung ba dang / ting nge 'dzin kyang thob pa gang yin pa de ni nyan thos dang rang sangs rgyas kyi theg pa thams cad kyis ltung ba 'gyod pa'i gnas rnam par sbyang bar mi nus so zhes gsungs so//rnam par sun 'byin pa kun du spyod pa bshad zin to/ /gnyen po kun du spyod pa bshad par bya ste/ de la mdo sde zab mo la brten pas kyang sdig pa zad par 'gyur te/ rdo rje gcod pa las ji skad du rab 'byor rigs kyi bu'am rigs kyi bu mo gang dag 'di lta bu'i mdo sde tshig 'di dag len pa dang /'dzin pa dang klog pa dang / kun chub par byed pa de dag ni mnar bar 'gyur shin tu mnar bar 'gyur ro/ /de ci'i phyir zhe na/ rab 'byor 'di ltar sems can de dag gi tshe rabs snga ma'i mi dge ba'i las ngan song du skye bar 'gyur ba dang mthun pa byas pa gang dag yin pa'i tshe rabs snga ma'i mi dge ba'i las de dag tshe 'di la mnar bas 'byang bar 'gyur te/sangs rgyas kyi byang chub kyang thob par 'gyur ro zhes gsungs so/ /stong pa nyid la mos pas kyang sdig pa dag par 'gyur te/ de bzhin gshegs pa'i mdzod kyi mdo las gsungs pa /'od srungs gang gis pha yang yin la/ rang sangs rgyas kyang yin pa de srog bcad na de'i srog gcod pa'i nang nas ma rungs pa'o/ /'di lta ste/ dkon mchog gsum gyi dkor rku ba 'di ni ma byin par len pa'i nang na ma rungs pa'o/ / 'di lta ste ma yang yin la dgra bcom ma yang yin pa de la log par spyad pa 'di ni 'dod pa la log par spyod pa rnams kyi nang na ma rungs pa'o/ /'di lta ste/ de bzhin gshegs pa la skur pa 'debs pa 'di ni brdzun du smra ba'i nang na ma rungs pa'o/ /'di lta ste/ 'phags pa'i dge 'dun la mi snyan pa brjod pa 'di ni phra ma'i nang na ma rungs pa'o//'di lta ste 'phags pa rnams la gnod pa 'di ni tshig rtsub po'i nang na ma rungs pa'o/ /'di lta ste chos 'dod pa rnams rnam par g.yeng bar byed pa 'di ni tshig kyal pa'i nang na ma rungs pa'o/ /'di lta ste mtshams med pa byed par shom pa 'di ni gnod sems kyi nang na ma rungs pa'o//'di lta ste/ yang dag par song ba rnams kyi rnyed pa 'phrog pa'i sems 'di ni brnab sems kyi nang na ma rungs pa'o/ /'di lta ste lta bas gzings pa 'di ni log par lta ba'i nang na ma rungs pa ste/ 'od srungs 'di ni mi dge ba bcu'i las kyi lam 'di ni kha na ma tho ba chen po dang bcas pa'o//'od srungs gal te sems can gcig cig mi dge ba bcu'i las kyi lam kha na ma tho ba chen po dang bcas pa 'di dag dang ldan par gyur la/ de yang de bzhin gshegs pas rgyu dang rkyen dang ldan pa'i chos ston pa la 'jug ste/ 'di la bdag gam/sems can nam/ srog gam/ gang zag gam/ gang byed pa'am/ gang myong ba ni gang yang med do snyam nas/ chos thams cad ni byas pa med pa dang / mngon par 'dus byas pa med pa dang / sgyu ma lta bu'i chos nyid dang / kun nas nyon mongs pa med pa'i chos nyid dang / rang bzhin gyis 'od gsal ba'i chos nyid la 'jug cing / chos thams cad gdod ma nas dag par yid ches te mos na/ sems can de dag ngan song du 'gro bar nga mi smra'o zhes gsungs so/ /las kyi sgrib pa rnam par dag pa'i mdo las kyang / 'jam dpal gzhan yang byang chub sems dpa' gang gis ltung ba la ltung ba ma yin par mthong ba dang 'dul ba ma yin pa la 'dul bar mthong ba dang /kun nas nyon mongs pa la rnam par byang bar mthong ba dang / 'khor ba'i khams la mya ngan las 'das pa'i dbyings su mthong ba des las kyi sgrib pa rnam par dag pa thob po zhes gsungs so//dam tshig gsum gyi rgyal po las kyang / sdig pa'i gnyen po kun du spyad par gsungs te/ mig btsums la sangs rgyas dang byang chub sems dpa' la dmigs pa'i sems kyis yi ge brgya pa lan stong phrag brgyad bzlas brjod byas na / mig btsums bzhin du sangs rgyas dang byang chub sems dpa' mthong bar 'gyur/sdig pa dang bral bar 'gyur ro/ /yang na mchod rten la skor ba byed cing stong phrag brgyad bzlas par bya'o/ /sku gzugs dang dam pa'i chos kyi glegs bam gang yang rung ba zhig mdun du bzhag nas kyang bskor zhing lan stong bzlas par bya ste cho ga ni 'di nyid do zhes gsungs so//skul byed ma'i gzungs las kyang / ji srid du sdig pa byad pa'i mtshan ma mthong ba de srid du bzlas brjod bya ste/ rmi lam na zas ngan pa skyug pa dang / zho dang 'o ma la sogs pa 'thungs pa dang / skyugs pa dang / nyi ma dang zla ba mthong ba dang / nam mkha' la 'gro ba dang /me 'bar ba dang ma he dang mi nag po thub pa dang / dge slong dang dge slong ma'i dge 'dun mthong ba dang / 'o ma 'byung ba'i shing dang glang po dang khyu mchog dang / ri dang seng ge'i khri dang khang bzangs kyi steng du 'dzeg pa dang / chos nyan pa rmis na sdig pa dang bral bar 'gyur te/ sdig pa byang bar shes par bya'o zhes gsungs so//de bzhin gshegs pa'i gzungs kyi le'u las kyang gnyen po kun du spyod par gsungs te/ dper na mi zhig ngan skyugs kyis reg pa las legs par bkrus te khrus byas nas spos kyis byugs na/ de'i dri nga ba med cing bral bar 'gyur ro/ /de bzhin du mtshams med pa lnga byed pa'i sdig pa de byang bar 'gyur ro//gang yang mi dge ba bcu'i las kyi lam dang ldan par gyur la/ de bzhin gshegs pa la dad pa rnyed nas de bzhin gshegs pa de'i sku gzugs byed na de'i sdig pa yang mi mngon par 'gyur / bye brag tu ni byang chub kyi sems dang ldan pa dang /bye brag tu ni khyim gyi gnas nas 'byung ba tshul khrims dang ldan pa'i sdig pa byang bar 'gyur ro zhes gsungs so/ /me tog brtsegs pa'i gzungs las kyang gsungs te/ seng ge rnam par rtse ba gang gis de bzhin gshegs pa dgra bcom pa yang dag par rdzogs pa'i sangs rgyas pa lo gcig gam lo brgya'am lo stong yang rung ste/bde ba'i yo byad thams cad kyis bsnyen bkur byas pa dang / byang chub kyi sems kyis yang dag par zin pa gang gis de bzhin gshegs pa la mchod pa'i phyir/ de bzhin gshegs pa yongs su mya ngan las 'das pa'i mchod rten la me tog 'ga' 'bul lam chu snyim pa gang tsam 'thor ram/byug pa'i thig le 'dri 'am/ me tog gi nyal nyil 'phyag gam/ byug pa 'bul lam/ me tog 'bul lam/ bdug spos 'bul lam/ mar me 'bul te phul nas dga' ba'i sems kyis gom pa'i gar stabs 'ga' bor te/ sangs rgyas bcom ldan 'das de la phyag 'tshal lo zhes smra ba de dag ni/seng ge rnam par rtse ba bskal par ram bskal pa brgya'am bskal pa stong du'am/ bskal pa brgya phrag stong du yang ngan 'gro log par ltung bar 'gyur ba de'i gnas med do zhes gsungs so/ /sman gyi bla bai DUr+ya'i 'od kyi rgyal po'i mdo las kyang /gang dag yang bslab pa'i gzhi lnga po dag 'dzin pa dang / gang dag bslab pa'i gzhi bcu po dag 'dzin pa dang / gang dag byang chub sems dpa'i sdom pa bslab pa'i gzhi bzhi brgya po dag 'dzin pa dang / khyim gyi gnas nas byung ba'i dge slong gang dag bslab pa'i gzhi nyis brgya lnga bcu po dag 'dzin pa dang /dge slong ma gang dag bslab pa'i gzhi lnga brgya po dag 'dzin pa ste/ gang dag ji ltar yongs su bzung ba'i bslab pa'i sdom pa de dag gi nang nas/ bslab pa'i gzhi gang yang rung ba zhig las nyams par gyur te/ ngan 'gro ngan song gis 'jigs skrag pa de dag bcom ldan 'das de bzhin gshegs pa sman gyi bla baiDUr+ya'i 'od de la mchod pa rnam pa sna tshogs byed na/de dag la ngan song gsum gyi sdug bsngal med par shes par bya'o/ /bud med gang la la bu btsa' ba'i dus na sdug bsngal ma rungs pa drag po byung ba des/ bcom ldan 'das de bzhin gshegs pa sman gyi bla bai DUr+ya'i 'od de la mchod na de myur du yongs su thar bar 'gyur/bu yang yan lag yongs su tshang bar btsa' zhing gzugs bzang ba dang mdzes pa dang / blta na sdug pa dang / dbang po rno ba dang / blo dang ldan pa dang / nad med cing gnod pa nyung bar 'gyur ro/ / de la mi ma yin pas mdangs 'phrogs par mi nus so/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo gang gi phyir nga bcom ldan 'das de bzhin gshegs pa sman gyi bla bai DUr+ya'i 'od de'i mchod pa rnam pa sna tshogs byed na/ de dag la ngan song gsum gyi sdug bsngal med par shes par bya'o// yon tan brjod par khyod dad dam yid ches sam/ yang na khyod sangs rgyas kyi spyod yul zab mo 'di la yid gnyis sam som nyi'am/ the tshom za ba med dam de nas bcom ldan 'das la tshe dang ldan pa kun dga' bos 'di skad ces gsol to//btsun pa bcom ldan 'das bdag de bzhin gshegs pas gsungs pa'i chos rnams la yid gnyis sam som nyi'am the tshom 'tshal ba ma lags so/ /de ci'i slad du zhe na/ de bzhin gshegs pa rnams la sku dang gsung dang thugs kyi kun du spyod pa yongs su ma dag pa mi mnga' ba'i slad du'o//bcom ldan 'das gdugs dang dgung zla 'di ltar rdzu 'phrul che ba 'di gnyis ni dog sa la ltung yang gda'/ ri'i rgyal po ri rab ni gnas nas 'pho yang gda'i sangs rgyas rnams kyi bka' ni gzhan du mi 'gyur lags so/ /btsun pa bcom ldan 'das de ltar lags kyis kyang / sems can dad pa'i dbang po dang bral ba dag mchis te/sangs rgyas rnams kyi sangs rgyas kyi spyod yul 'di thos na de dag 'di snyam du sems par 'gyur te/ de bzhin gshegs pa'i mtshan 'di dran pa tsam gyis ji ltar shin tu yon tan dang phan yon du 'gyur snyam nas de dag mi dad cing yid mi ches te spong bas yun ring por gnod pa dang mi sman pa dang yid mi bde ba dang rnam par ltung bar 'gyur ro//bcom ldan 'das kyis bka' stsal pa/ kun dga' bo de bzhin gshegs pa de'i mtshan su'i rna lam du grag par gyur pa de/ ngan 'gro ngan song du 'gro bar 'gyur ba ni gnas med de go skabs ma yin no//kun dga' bo sangs rgyas rnams kyi sangs rgyas kyi spyod yul ni yid ches par dka'o/ /kun dga' bo khyod dad cing yid ches par gyur pa de ni/ de bzhin gshegs pa'i mthu yin par blta'o/ /byang chub sems dpa' sems dpa' chen po skye ba gcig gis thogs pa rnams ma gtogs par 'di nyan thos dang rang sangs rgyas thams cad kyis ma yin no zhes gsungs so//yang de nyid las dad pa'i rigs kyi bu'am rigs kyi bu mo gang dag yan lag brgyad dang ldan pa'i bsnyen gnas la nye bar gnas te/ lo gcig gam zla ba gsum du bslab pa'i gzhi rnams 'dzin cing /gad dag gi bsam pa 'di lta bus/ bdag gi dge ba'i rtsa ba 'dis nub phyogs gang na de bzhin gshegs pa tshe dpag med bzhugs pa'i 'jig rten gyi khams bde ba can du skye bar shog shig ces smon lam de lta bu btab pa dag las/ gang dag gis bcom ldan 'das de bzhin gshegs pa sman gyi bla bai DUr+ya'i 'od de'i mtshan thos par gyur pa de dag 'chi ba'i dus kyi tshe byang chub sems dpa' brgyad rdzu 'phrul gyis lhags nas lam ston par 'gyur te/de dag der pad+ma tshon kha dog sna tshogs rnams las rdzus te skye bar 'gyur ro/ /gang la la dag lha'i 'jig rten du skye bar 'gyur ba de dag ni/der skyes nas sngon gyi dge ba'i rtsa ba de zad par mi 'gyur zhing ngan 'gror 'gro bar mi 'gyur ro/ /de nas shi 'phos nas kyang mi'i 'jig rten 'dir gling bzhi pa'i dbang phyug 'khor los sgyur ba'i rgyal por 'gyur te/ sems can bye ba khrag khrig brgya stong du ma dag dge ba bcu'i las kyi lam la 'god par 'gyur ro//yang gzhan dag ni rgyal rigs shing sA la chen po lta bu'i khyim dag tu skye bar 'gyur/ bram ze shing sA la chen po lta bu'i khyim dag dang / khyim bdag shing sA la chen po lta bu'i khyim dag dang / nor dang 'bru dang mdzod dang bang ba mang po 'byor pa'i khyim dag tu skye bar 'gyur te/gzugs phun sum tshogs pa dang / dbang phyug phun sum tshogs pa dang / g.yog phun sum tshogs pa dang dpa' ba dang rtul phod pa dang tshan po che chen po'i stobs kyi shugs dang ldan par 'gyur ro/ /bud med gang gis de bzhin gshegs pa de'i mtshan thos shing bzung ba de'i bud med kyi dngos po de tha ma yin par shes par bya'o zhes gsungs so// //bam po brgyad pa/ 'jam dpal gyi sangs rgyas kyi zhing gi yon tan bkod pa'i rgyan las kyang / ye shes bla ma 'od kyi tog /de bzhin smon lam blo gros dang //dbang po zhi dang 'jam dbyangs la/ /bdag ni gus pas phyag 'tshal lo/ /su zhig byang chub sems dpa' 'di dag gi ming 'dzin pa de bud med kyi dngos por mi 'gyur ro zhes gsungs so/ /gnyen po kun tu spyad pa mngon par bstan zin to/ /da ni nyes pa las bzlog pa'i stobs brjod par bya ste/'phags pa sa'i snying po'i mdo las ji skad du gsungs pa lta bu ste/ srog gcod pa spong ba'i byang chub sems dpa' ni sems can thams cad la mi 'jigs pa sbyin pa yin te/ skrag par mi byed 'khrug par mi byed spu zing zhes 'gyur bar mi byed do/ /de dge ba'i las kyi rnam par smin pa de dang srog gcod pa spong ba'i 'khor lo des sngon gyi mtha'i mu nas 'gro ba lnga'i 'khor lor zhugs shing 'khor ba'i chu ngos khyer nas/srog gcod pa'i rgyus lus dang ngag dang / yid kyi las kyi sgrib pa dang nyon mongs pa'i sgrib pa dang chos kyi sgrib pa byas pa dang byed du bcug pa dang rjes su yi rang ba gang yin pa thams cad 'joms te/ma lus par rnam par smin par mi 'gyur ba'i bar du byed do/ /de la rigs mthun pa'i lha dang mi rnams dga' bar 'gyur ro/ /nad med pa dang tshe ring bar 'gyur ro/ /rigs kyi bu gzhan yang byang chub sems dpa' sems dpa' chen po gang ji srid 'tsho'i bar du ma byin par len pa spangs par gyur cing sems can thams cad la mi 'jigs pa sbyin la gzhan la 'gran pa med pa dang 'khrug pa med par rang gi rnyed pas chog shes shing /chos ma yin pa'i longs spyod mi 'dod de/ dge ba'i rtsa ba des ma byin par len pa'i rgyu las byung ba'i bar gyi las kyi sgrib pa 'joms so//rab tu 'joms so/ /ma lus par rnam par smin par mi 'gyur ba'i bar du byed do/ /de bzhin du sbyar te/ dge ba bcu'i las kyi lam rnams kyis rang gi mi mthun pa'i phyogs mi dge ba rnams 'joms par gsungs so/ /de skad du zla ba sgron ma'i mdo las kyang / gnod sems spangs pas sdig pa zad par 'gyur ba 'byung ste/ji skad du/ /'dir ni yang dag ma lags par/ /byis pa rnams kyis mtshang brus dang / /spyod pa dag ni bzod bgyi ste/ /smod pa'ang 'dren pa dang du blang / /byang chub sems dpas gzhan dag la/ /bdag gis gnod sems bskyed pa dang //sngon chad bdag gis sdig pa'i las/ /bgyis pa rnams ni sbyang bar bgyi/ /zhes gsungs pa lta bu'o/ /nyes pa las zlog pa'i stobs bshad zin to/ /rten gyi stobs brjod par bya ste/ 'dir phag gi rtogs pa brjod pa dper bya'o/ /gang dag sangs rgyas skyabs dong ba/ /de dag ngan 'gror 'gro mi 'gyur//mi yi lus ni spangs nas su/ /de dag lha yi lus thob po/ /zhes gsungs te/ de bzhin du chos dang dge 'dun gyi dbang du byas te gdon to/ /'phags pa byams pa'i rnam par thar pa las kyang / byang chub kyi sems kyis sdig pa rnam par dag par gsungs te/nyes pa byas pa thams cad bsregs pas sreg pa'i bskal pa'i me lta bu'o/ /mi dge ba'i chos thams cad zad par byed pas sa'i 'og lta bu'o/ /de bzhin du sbyar te/ rigs kyi bu 'di lta ste/ dper na dngul chu'i rigs gser du snang ba zhes bya ba yod de/ de ni srang gcig gis kyang lcags srang stong gser du 'gyur ro//dngul chu srang gcig pa da ni lcags srang stong po des zad par byas pa'am lcags su bsgyur bar mi nus so/ /de bzhin du thams cad mkhyen pa nyid du sems bskyed pa'i dngul chu'i khams dge ba'i rtsa ba yongs su bsngo ba dang ye shes kyis bzung ba gcig gis las dang nyon mongs pa'i sgrib pa'i lcags thams cad zad par byas te/chos thams cad thams cad mkhyen pa nyid kyi kha dog tu byed kyang / thams cad mkhyen pa nyid du sems bskyed pa'i dngul chu'i khams gcig po de ni las dang nyon mongs pa'i lcags thams cad kyis kyang kun nas nyon mongs par bya ba'am zad par mi nus so//rigs kyi bu 'di lta ste dper na mar me gcig gis khyim mam khang bu ji lta bur bcug kyang rung ste bcug ma thag tu lo stong du bsags pa'i mun pa yang rnam par sel cing snang bar byed do/ /de bzhin du thams cad mkhyen pa'i sems bskyed pa'i mar me gcig gis kyang sems can gyi bsam pa'i thibs po ma rig pa'i mun pa dang ldan pa ji lta bu yang rung bar zhugs na zhugs ma thag tu bskal pa brgya stong brjod du med par bsags pa'i las dang nyon mongs pa'i sgrib pa dang mun pa thams cad rnam par sel zhing ye shes kyi snang ba skyed do//rigs kyi bu 'di lta ste dper na nor bu rin po che yid bzhin gyi rgyal po'i cod pan thogs pa'i klu'i rgyal po chen po rnams la gzhan gyis gnod par bya ba'i 'jigs pa med do/ /de bzhin du byang chub kyi sems dang snying rje chen po'i nor bu rin po che'i yid bzhin gyi rgyal po'i cod pan thogs pa'i byang chub sems dpa' rnams la yang /ngan song dang ngan 'gros gnod par bya ba'i 'jigs pa med do zhes bya ba'o/ /'phags pa nye ba 'khor gyis zhus pa las kyang gsungs te / nye ba 'khor 'di la theg pa chen po la yang dag par zhugs pa'i byang chub sems dpa' gal te snga dro'i dus na ltung ba byung ba yang /phyi dro'i dus na thams cad mkhyen pa'i sems dang mi 'bral bar gnas te/ de ltar na theg pa chen po la yang dag par zhugs pa'i byang chub sems dpa'i tshul khrims kyi phung po mtha' med do/ /gal te phyi dro'i dus na ltung ba byung ba yang /phye ma red kyi dus na thams cad mkhyen pa'i sems dang mi 'bral bar gnas te/ de ltar na theg pa chen po la yang dag par zhugs pa'i byang chub sems dpa'i tshul khrims kyi phung po'i mtha' med do/ /gal te phye ma red kyi dus na ltung ba byung ba yang srod la thams cad mkhyen pa'i sems dang mi 'bral bar gnas te/de ltar na tshul khrims kyi phung po mtha' med do/ /gal te srod la ltung ba byung ba yang nam phyed na thams cad mkhyen pa'i sems dang mi 'bral bar gnas te/ de ltar na tshul khrims kyi phung po mtha' med do/ /gal te nam phyed na ltung ba byung na yang tho rangs thams cad mkhyen pa'i sems dang mi 'bral bar gnas te/de lta na theg pa chen po la yang dag par zhugs pa'i byang chub sems dpa'i tshul khrims kyi phung po'i mtha' med do/ /nye ba 'khor de lta na theg pa chen po la yang dag par zhugs pa'i byang chub sems dpa' rnams kyi bslab pa ni bcos su rung ba yin no//de la byang chub sems dpa' 'gyod pas kun nas ldang ba de skyes na ha cang yang mi dga' bar mi bya'o/ /nye ba 'khor de la gal te nyan thos kyi theg pa pa'i gang zag la/ ltung ba yang dang yang byung na/ /nyan thos kyi theg pa pa'i gang zag gi tshul khrims kyi phung po nyams par rig par bya'o zhes gsungs so//bslab pa kun las btus pa las sdig pa sbyang ba'i le'u ste brgyad pa'o// //tshul khrims kyi pha rol tu phyin pa rdzogs s+ho // //des na de ltar rgyun mi 'chad par sdug bsngal mang po dang ldan pa'i 'chal pa'i tshul khrims skye ba bsrung zhing de ltar las kyi sgrib pa'i gegs sel ba des nyon mongs pa rnam par sbyong ba la 'bad par bya'o//de la thog mar re zhig bzod par bya'o / /mi bzod pa ni skyo ba ni sron mi nus pa'i phyir thos pa la sogs pa la brtson pa nyams par 'gyur zhing / thos pa dang mi ldan pas ni bsam gtan gyi thabs dang nyon mongs pa rnam par sbyong ba'i thabs kyang mi shes te/de bas na skyo ba med par thos pa btsal bar bya/ shes su zin kyang 'dren mar spyod pas mnyam par gzhag dka' bar 'gyur te/ de'i phyir/ de nas nags su gnas par bya/ /der yang rnam par g.yeng ba zhi bar bya ba la mi brtson pas sems mnyam par 'jog par mi 'gyur bas//mnyam par gzhag la brtson bya zhing / /mnyam par bzhag pa'i 'bras bu ni nyon mongs pa sbyangs pa ma gtogs pa ci yang med pas de'i phyir/ mi sdug la sogs bsgom par bya/ /de ltar 'di dag ni re zhig sdig pa sbyong ba bstan pa'i tshig go//da ni bshad pa brjod do/ /de la bzod pa ni/ chos yang dag par sdud pa'i mdo las/ sdug bsngal dang du len pa'i bzod pa dang chos la nges par sems pa'i bzod pa dang gzhan gyis gnod pa byas pa la ji mi snyam pa'i bzod pa'o zhes rnam pa gsum gsungs so//de la sdug bsngal nyams su len pa'i bzod pa'i mi mthun pa'i phyogs ni/ sdug bsngal gyis 'jigs pa nyid mi 'dod pa byung ba dang phrad pa dang / rang gi bde ba la mngon par chags pa nyid 'dod pa'i gegs byed pa dang phrad pa ste/ de dag las yid mi bde zhing / de las ni sdang ba'am zhum pa nyid do//de bas na zla ba sgron ma'i mdo las kyang / bde ba la mi chags pa dang / /sdug bsngal la mi skyo ba'o/ /zhes gsungs so/ /dkon mchog sprin gyi mdo las kyang / gang nang gi mya ngan dang smre sngags 'don pa dang sdug bsngal ba dang yid mi bde ba dang 'khrug pa de dag bzod cing dang du len to zhes gsungs so//'phags pa drag shul can gyis zhus pa las kyang / khyim bdag gzhan yang byang chub sems dpa' khyim pas rjes su chags pa dang khong khro ba med pas 'jig rten gyi chos brgyad la mnyam pa nyid thob par bya'o/ /des longs spyod rnyed dam chung ma dang bu rnyed dam nor dang 'bru dang rdzas rnyed kyang khengs par yang mi bya'o//thams cad ma 'byor yang de zhum par yang mi bya yi mug par yang mi bya'o/ /des 'di ltar brtag par bya ste/ 'dus byas thams cad ni sgyu ma'i rnam pa lta bu rnam par bsgrub pas so sor nye bar gnas pa'i mtshan nyid do//'di lta ste/ pha ma dang chung ma dang bran dang las byed pa dang zho shas 'tsho ba dang mdza' bshes dang blon po dang nye du dang snag gi gnyen mtshams de dag ni las kyi rnam par smin pas grub pa yin te/ bdag dbang ba ma yin la nga yang 'di dag gi ni ma yin no zhes gsungs so/gzhan yang / gal te bcos su yod na ni/ /de la mi dga' ba ci dgos/ /de ste bcos su med na ni/ /de la mi dga' byas ci phan/ /bcos kyang yid mi bde na ni/ /khro bas rgyal bas 'thad pa'am/ /zhum pa'i phyir na spro nyams pas/ /rgud pa chen pos zin par 'gyur/ /de la yang dang yang sems pas//tshe yang thung bar 'gyur ba yin/ /de lta bas na goms pa las/ /gnod pa bzhin du don med spang / /yid mi bde ba spang ba yang ji ltar goms par bya zhe na/ yang ba dang snyi ba'i sems spangs pa las te/ drag shul can gyis zhus pa las ji skad du/ shing bal gyi 'da' ba lta bu'i sems dang bral bar bya'o zhes gsungs pa lta bu'o//'phags pa sdong po bkod pa las kyang / bu mo khyod kyis nyon mongs pa thams cad gzhom pa'i phyir thub par dka' ba'i sems bskyed par bya'o/ /mngon par zhen pa thams cad gzhom pa'i phyir gzhan gyis mi thub pa'i sems bskyed par bya'o//mi mthun pa'i bsam pa can gyi sems can rgya mtsho'i glong 'khyil ba lta bu bab pa rnams la mi 'khrugs pa'i sems bskyed par bya'o zhes gsungs so/ /goms par gyur na dka' ba cung zad kyang med de / 'di ltar re zhig shin tu blun pa khur rtsa ba dang nya pa dang zhing pa la sogs pa dag kyang sdug bsngal la goms pa las 'bras bu shin tu chung ngu dang ldan pa'i dngos po la yang yun ring po nas rmad du gyur pa'i mtshan ma can gyi sems mkhrang ba dang /sgyid lug pas zil gyis mi non na/ 'khor ba'i bde ba thams cad dang byang chub sems dpa'i bde ba thams cad dang bla na med pa'i go 'phang thob pa'i 'bras bu can gyi las la smos su yod dam ci/'di ltar phal pa dag kyang cung zad gnod pa byed pa bdag gi nyes par byas pas bcom zhing rang nyid 'chi ba rnams la brdeg pa'i ched du/ drag tu brdegs pa myong yang g.yul du 'jug na/ dus shin tu ring por gnod pa byed pa dka' bas bsgrubs pa'i dge ba'i nor bag tsam pa'i rkun po dmyal ba nyid kyi gsod sar gsad bya'i gshed mar gyur pa srid pa'i btson ra'i srung mar nges par 'byung ba'i lam gyi phyir phyogs ma rung bar byed pa rjes su mthun pa 'dra yang gnod pa drag po byed pa gnod pa ma byas par dgrar gyur pa/thog ma med pa'i bskal pa las dam du 'brel ba'i sha 'khon can / nyon mongs pa'i dgra rnams la gzhom par spro ba'am sdug bsngal bzod par go ji ltar mi 'gyur te/ sa gsum las rnam par rgyal bar bya ba'i phyir chas shing bdud kyi ri khrod pa'i bdag pos zin pa'i 'gro ba gnang btson thar bar bya ba'i phyir g.yul ngor zhugs pa ni khyad par du yang 'gyur ba kho na'o//de la sdug bsngal chung ngu la goms par bya ba sngon du btang na/ dka' ba dang shin tu dka' ba la yang goms pa 'grub ste/ dper na goms pa'i dbang gis sems can thams cad sdug bsngal la bde bar 'du shes pa de bzhin du sdug bsngal 'byung ba thams cad la bde bar 'du shes nye bar gzhag pa goms pas bde ba'i 'du shes nyid du nye bar gnas par 'gyur ro//'di'i rgyu mthun pa'i 'bras bu ni chos thams cad bde bas non pa zhes bya ba'i ting nge 'dzin thob pa yin no/ / yab dang sras mjal ba'i mdo las/ bcom ldan 'das chos thams cad la bde bas non pa zhes bgyi ba'i ting nge 'dzin mchis te/ ting nge 'dzin de thob pas byang chub sems dpa' sems dpa' chen po dmigs pa'i dngos po thams cad la bde ba'i tshor ba sha stag myong bar 'gyur zhing sdug bsngal gyi tshor ba mi myong la sdug bsngal yang ma lags/bde ba yang ma lags pa yang mi myong ste/ sems can dmyal ba'i gnod pas gnod par bgyis kyang bde ba'i 'du shes nye bar gnas pa dang / mi'i gnod pas gnod par bgyis kyang bde ba'i 'du shes nye bar gnas pa dang /lag pa bcad dam rkang pa bcad dam/ rkang lag bcad dam/ rna ba'am/ sna'am/ rna ba dang sna gtubs kyang bde ba'i 'du shes nye bar gnas par 'gyur ba dang / sba lcag gis gzhus sam/ sba lcag phyed tshal lam/ lcag gis gzhus kyang bde ba'i 'du shes nye bar gnas par 'gyur ba dang /btson rar bcug gam/ lcags sgrog dang shing sgrog tu bcug gam/ btson cha dam po la rgyas btab bam/ byis pa'i gtsug phud ltar bcings sam/ dugs kyi snod ltar bdugs sam/ bu ram shing brdungs pa ltar brdungs sam / 'dam bu gzhom pa ltar bcom mam/ 'bru mar gyi mar me ltar 'bar bar byas sam/ mar gyi mar me dang / zho bskol ba ltar 'bar bar byas kyang bde ba'i 'du shes nye bar gnas par 'gyur ba dang / me'i nang du bor ram/ seng ge'i khar bstabs sam/ stag gi khar bstabs sam / de bzhin du sbyar te/ skam dril bya ba ltar dril tam/ byi bo'i chad pa lta bus bcad dam/ nyes pa byung ba bsgrags pa ltar bsgrags sam/ kAR+Sha pa Na tsam du gtubs sam/ 'bras phye btso ba ltar btsos sam/ glang po che rnams kyis bcom yang bde ba'i 'du shes nye bar gnas par 'gyur ba dang / mig phyung ngam/ gsal shing gi rtse mo la gzhag gam/gsad pa'i gnas su khrid de rnam pa thams cad du mgo bcad kyang bde ba'i 'du shes nye bar gnas par 'gyur te bde ba yang ma lags mi bde ba yang ma lags pa'i 'du shes rnam pa thams cad du mi 'byung ngo / /de ci'i slad du zhe na/ 'di ltar byang chub sems dpa' sems dpa' chen po des/yun ring po nas spyad pa spyod pa'i tshe/ smon lam 'di ltar btab ste gang gis bdag la kha zas byin pa de dag nye bar zhi ba'i bde ba thob par gyur cig /gang gis bdag la skom blud pa de dag dang / gang gis bdag la rim gror byas pa dang bkur sti byas pa dang bsti stang byas pa dang mchod pa byas pa de dag thams cad kyang nye bar zhi ba'i bde ba thob par gyur cig /gang yang bdag la gshe bar byed pa dang mi bde ba byed pa dang rdeg pa dang mtshon gyis 'debs pa dang rnam pa thams cad du srog gcod pa'i bar du byed pa de dag thams cad kyang byang chub kyi bde ba thob cing bla na med pa yang dag par rdzogs pa'i byang chub mngon par rdzogs par 'tshang rgya bar gyur cig ces smon lam btab ste/de yid la bya ba de dag dang ldan zhing / de lta bu'i las dang de lta bu'i smon lam dang ldan pas sems can thams cad kyi rjes su song ba'i bde ba'i 'du shes la brten zhing bsnyen la bsgom zhing mang du byed de/de las de'i rnam par smin pas chos thams cad la bde bas non pa zhes bya ba'i ting nge 'dzin rab tu thob po/ /gang gi tshe byang chub sems dpa' chos thams cad la bde bas non pa'i ting nge 'dzin thob par gyur pa de'i tshe bdud kyi las thams cad kyis mi 'phrogs shing mi 'khrugs par 'gyur ro zhes rgyas par gsungs so//sbyor ba 'di ni gtong ba thams cad yongs su rdzogs par byed pa dang / bya bar dka' ba'i spyod pa thams cad bsgrubs pa dang / bzod pa thams cad brtan par byed pa dang / brtson 'grus thams cad la nur ba med par byed pa dang /bsam gtan dang shes rab kyi yan lag gi tshogs thams cad la sbyor ba yin no zhes gsungs pa / de lta bas na rtag tu dga' bar bya ste/ zla ba sgron ma'i mdo las/ gus dang bcas shing yid ni rtag tu dga' bar bya / /zhi ba'i lta ba la ni rtag tu gnas par 'gyur/ /zhes ji skad gsungs pa lta bu'o//'phags pa blo gros mi zad pas bstan pa'i mdo las kyang gsungs so / /de la dga' ba chen po gang zhe na/ gang sangs rgyas kyi chos rnams dran pa dang rjes su dran pa dang dga' ba dang / dad pa dang mchog tu dga' ba dang sems ma gong zhing mi brdzi ba dang srid pa med pa dang /'dod pa'i dga' ba thams cad gtong ba dang / chos kyi dga' ba thams cad kyi rten dang sems rab tu dga' ba dang / lus rab tu sim pa dang / sangs rgyas la dga' zhing yid 'phar ba dang / de bzhin gshegs pa'i sku la dga' zhing mos pas mtshan dang dpe byad bzang po'i rkyen tshol ba la mkhas pa dang /dge ba'i chos mnyan pas mi skyo ba dang / de kho na'i chos la brten pa'i nan tan dang / dga' ba dang mgu ba dang rangs pa dang rab tu dga' bas chos la mos pa dang / rtag tu rgyun mi 'chad par sems can rnams la khong khro ba med pa'i blo dang /sangs rgyas kyi chos tshol ba la 'dun pa dang / chos la 'dun pa de yang mi 'dor ba dang / sangs rgyas kyi chos rgya chen po la mos shing rnam par grol ba dang / nyi tshe ba'i theg pa dang ma 'dres pa'i sems bskyed pa dang / ser sna med pas ma zhum par sems bskyed pa dang / nor gang sems kyis sbyin 'dod pa de sbyin zhing byin nas kyang 'khor gsum dag par yongs su sbyangs pa dang /sbyin pa la dga' ba dang / tshul khrims dang ldan pa rnams la rtag tu dang ba dang / tshul khrims 'chal pa rjes su 'dzin cing byams pa dang / bdag gi tshul khrims yongs su dag pa dang / ngan 'gro'i 'jigs pa thams cad las shin tu 'das par dbugs 'byin pa dang /de bzhin gshegs pa'i tshul khrims kyi bsngo ba dang / brtan zhing mi phyed pa dang / pha rol gyis ngan par brjod pa dang ngan par smras pa'i tshig gi lam la khong khro ba med pa'i sems nyid dang / bzod cing nges pa dang / nga rgyal med pa dang / bla ma la 'dud cing rim gro byed pa dang / rtag tu bzhin 'dzum pa dang / khro gnyer med pa dang / sngon du gsong por smra ba dang / tshul 'chos pa med pa dang / kha gsag med pa dang / thob kyis 'jal ba med pa dang / bsam pa dag pa dang / sems la brlang ba med pa dang / gya gyu med pa dang /thams cad la legs par lta ba dang / skyon med par lta ba dang / ltung ba mi gleng ba dang / yang dag par dga' bar 'gyur ba'i chos kyi rjes su 'jug pa dang / byang chub sems dpa' rnams la ston pa ltar phangs par 'dzin pa dang / chos rnams la bdag bzhin phangs par 'dzin pa dang /de bzhin gshegs pa rnams la srog bzhin du phangs par 'dzin pa dang / bla ma la pha ma bzhin du phangs par 'dzin pa dang / sems can rnams la bu bzhin du phangs par 'dzin pa dang / mkhan po dang slob dpon la sangs rgyas bzhin du phangs par 'dzin pa dang / nan tan la yan lag gi dam pa mgo bzhin du phangs par 'dzin pa dang /pha rol tu phyin pa rnams la rkang lag bzhin du phangs par 'dzin pa dang / chos smra ba rnams la rin po che thams cad bzhin du phangs par 'dzin pa dang / sangs rgyas kyi chos thams cad la yid bzhin gyi nor bu bzhin du phangs par 'dzin pa dang /rjes su bstan pa la dga' ba'i rtsed mo bzhin du phangs par 'dzin pa dang / chog shes pa la nad med pa bzhin du phangs par 'dzin pa dang / chos tshol ba la sman bzhin du phangs par 'dzin pa dang / skul zhing dran par byed pa la sman pa bzhin du phangs par 'dzin pa ste/ de ltar gang dbang po thams cad la dbang po ma gong ba 'di ni dga' ba zhes bya'o zhes bya ba la sogs pa gsungs so//'di la bslabs pa'i byang chub sems dpa' rnams ni/ 'phags pa sprin chen po'i mdo las/ sems can dmyal ba'i 'gro ba la dga' bar yang 'gyur ba dang / sems can dmyal ba'i 'gro ba la sems shing rtag tu bsam pa gtong ba'i ngang tshul can du'ang 'gyur ba dang /sems can dmyal ba'i tshong rdal gyi tshong par yang 'gyur ba dang / sems can dmyal ba'i 'thob pa mi gtong bar yang 'gyur ba dang / sems can dmyal ba'i me la sems rgyas par 'gyur zhes gsungs pa'i tshig 'dis brgyan par byed do//sdug bsngal dang du len pa'i bzod pa bshad zin to/ /'phags pa blo gros rgya mtshos zhus pa'i mdo las kyang bzod pa rnam pa gsum bstan te/ blo gros rgya mtsho 'di la byang chub sems dpa' sems dpa' chen po thams cad mkhyen par sems bskyed pa rin po che de ltar bskyed nas/'phags pa ma yin pa tshul khrims 'chal pa'i sems can rnams sam/ bdud rnams sam/ bdud kyi ris kyi lha rnams sam/ bdud kyis byin gyis brlabs pa rnams sam/ bdud kyi pho nya rnams kyis gtses sam rnam par gtses sam bskyod dam kun tu bskyod dam/dkrugs sam kun tu dkrugs sam/ spyos sam bsdigs sam brdegs kyang / byang chub tu bsam pa'i sems bskyed pa de las mi phyed pa dang / sems can thams cad rab tu thar bar byed pa'i snying rje chen pos/ /brtson 'grus brtsams pa las mi phyed pa dang /dkon mchog gsum gyi rigs mi 'chad par bya ba la brtson pa las mi phyed pa dang / sangs rgyas kyi chos thams cad yang dag par bsgrub pa'i dge ba'i rtsa ba la sbyor ba las mi phyed pa dang / mtshan dang dpe byad bzang po yongs su bsgrub par 'gyur ba'i bsod nams kyi tshogs bsags pa las mi phyed pa dang /sangs rgyas kyi zhing yongs su sbyang ba mngon par bsgrub par brtson pa las mi phyed pa dang / lus dang srog 'dor zhing dam pa'i chos yongs su 'dzin par mngon par brtson pa las mi phyed pa dang / sems can thams cad yongs su smin par bya ba la mngon par brtson zhing bdag bde ba la mi chags pa las mi phyed pa ste/de de ltar lhag pa'i bsam pa phun sum tshogs par gyur pas/ sems can thams cad kyis co dris kyang bzod/ thing slad byas pa dang / smad pa dang / bshung ba byas kyang bzod/ /sems can thams cad kyis mtshang brus sam spyos sam/bsdigs sam/ ngan du brjod dam/ ngan du smras pa'i tshig gi lam kyang bzod/ sems can thams cad kyi gnod pa yang bzod/ sems can thams cad kyi khur yang bzod/ sgrol bas kyang skyo ba med/ zhum pa med/ kun du zhum pa med/ sgyid lug pa med/ yi chad pa med/stobs nye bar ston par byed/ mthu skyed par byed cing brtson 'grus rtsom par byed la/ brtul bas brtul bar byed de de spro ba skyed cing rmongs pa'i sems mi 'dzin to/ /mtshang brus kyang slar mtshang mi 'bru ba dang / brdegs kyang slar mi rdeg /khros kyang slar mi khro/ /gshe ba la slar mi gshe ba ste/de ltar sems 'grang ba'i go cha gyon no/ /'di lta ste theg pa chen po'i mdo 'di ni 'jig rten thams cad dang mi mthun pa'i theg pa'o/ /de ci'i phyir zhe na/ sems can de dag ni rgyun gyi rjes su 'gro ba dag go/ /bdag ni rgyun las ldog par rtsol bar 'dod pa'o/ /sems can de dag ni phan tshun mi mthun pa dag go//bdag ni sems can thams cad kyi mi mthun pa spang pa'i phyir go cha ba gos pa'o/ /sems can de dag ni gnod sems la dpa' bdag go/ /bdag ni bzod pa dang des pa yongs su tshol ba'o/ /sems can de dag ni gcig la gcig 'drid cing yongs su 'drid par gnas pa dag go//bdag ni shes rab kyis ngoms pa yongs su tshol ba'o/ /de bzhin du sbyar te/ gal te phyogs bcu'i rab tu dbye bas rab tu phye ba'i sems can ji snyed pa de dag thams cad/ ral gri dang shag ti dang mdung thung dang mtshon rtse gnyis pa la sogs pa lag na thogs te bdag gi phyi bzhin 'brang yang sa phyogs gang du 'greng ngam 'dug gam 'chag gam nyal yang rung ste byang chub kyi sems skye bar 'gyur ba dang /sbyin pa'i sems sam/ tshul khrims kyi sems sam/ bzod pa'i sems sam/ brtson 'grus kyi sems sam/ bsam gtan gyi sems sam/ shes rab kyi sems sam/ thos pa'i dge ba'i rtsa ba'i sems skye bar 'gyur ba'i sa phyogs der bdag lus rgya shug gi lo ma'i brgya cha tsam du gtubs sam rnam par gtor ram/ rnam par bcom mam/ sems can de dag thams cad las gzhan mi byed par rgyun du gshe'am/ bsdigs sam/smod dam/ bshung ngam/ tshig ngan pa dang / ngag rtsub po smra bar gyur kyang bdag gis sems can 'ga' la yang 'khrug pa'i sems bskyed par mi bya'o/ /de ci'i phyir zhe na/ sngon gyi mtha' nas 'khor ba tshad med par byas te/ gang du bdag gi lus 'di sems can dmyal bar song ngam/ dud 'gro'i skye gnas su song ngam/gshin rje'i 'jig rten du song ngam/ mir gyur kyang rung ste/ 'dod pa'i zas kyi dri mas dri ma can du gyur nas chos thos pa dang mi ldan zhing / yang ba'i 'tsho ba'i spyod yul don med pas 'tsho ba can du 'gyur te/ yan lag dang nying lag rnam pa brgyar gshegs shing gtubs te phye zhing phral la bya ba rnam pa mang po byas kyang bdag gis gzhi de las bdag gi don byas kyi/gzhan gyi don ma byas kyi gal te sems can de dag thams cad kyis phyi ma'i mthar bdag gi lus gshegs gtubs rnam par gtor rnam par bcom pa de lta bur gyur kyang bdag gis thams cad mkhyen pa yongs su mi gtong ngo //sems can thams cad yongs su mi gtong ngo / /dge ba'i chos 'dod pa yongs su mi gtong ngo / /de ci'i phyir zhe na/ lus gtubs pa'i lus kyi gnod pa 'di thams cad kyis ni sems can dmyal ba pa'i sdug bsngal gyi brgya'i char yang nye bar mi 'gro ba nas rgyu'i bar du yang mi bzod do//bdag ni sems can dmyal bar gnas par spro'i bdag gis sangs rgyas kyi chos gtang bar ni mi bya'o/ /de bzhin du sbyar te/ gang gi gzhi las gnod sems byung ba'i chos de bdag gis spang bar bya'o snyam mo/ /chos de gang zhe na/'di lta ste/ lus la dga' ba dang lus la gnas pa dang lus la chags pa ste/ lus gtang na gnod sems kyang gtong ngo / /blo gros rgya mtsho de ltar chos 'grang ba la zhugs pa'i byang chub sems dpa' sems dpa' chen po ni sems can thams cad kyi gnod pa bzod de mi skyo mi khro'o/ / de bzhin du sbyar te/ blo gros rgya mtsho de la thabs mkhas pa'i byang chub sems dpa'i lus gcod pa ni/ pha rol tu phyin pa drug bsgom pa yongs su rdzogs par 'gyur ro/ /blo gros rgya mtsho ji ltar na thabs la mkhas pa'i byang chub sems dpa'i lus gcod pa na/ pha rol tu phyin pa drug bsgom pa yongs su rdzogs par 'gyur zhe na/gang lus 'dor ba dang lus yongs su gtong ba dang lus la mi lta ba 'di ni/ de'i sbyin pa'i pha rol tu phyin pa'o/ /gang lus gcod pa na sems can thams cad la byams pas khyab par byed pa dang / tshor ba rnams kyis mi 'phrogs pa 'di ni de'i tshul khrims kyi pha rol tu phyin pa'o//gang lus yongs su gcod pa na gang dag de'i lus gcod pa de dag nyid rab tu thar bar bya ba'i phyir bzod cing sems kyis rma mi 'byin te/ bzod pa'i stobs nye bar ston pa 'di ni de'i bzod pa'i pha rol tu phyin pa'o/ /brtson 'grus gang gis thams cad mkhyen pa de la 'dod pa mi 'dor zhing sems kyi stobs bskyed pa yang rab tu 'dzin la/'khor ba'i rjes su yang 'brang zhing dge ba'i rtsa ba brtsam pa yang rtsom pa 'di ni/ de'i brtson 'grus kyi pha rol tu phyin pa'o/ /gang lus rnam par 'dor ba na thams cad mkhyen par sems bskyed pa rin po che de mi brjed cing byang chub nyid la lta ba dang /zhi ba dang rab tu zhi ba la so sor rtog pa 'di ni de'i bsam gtan gyi pha rol tu phyin pa'o/ /gang lus gcod pa na lus la rtswa dang rtsig pa dang shing dang rdo dang mig yor lta bur so sor rtog cing / lus la sgyu ma'i chos nyid du 'jug pa dang yang dag par na mi rtag pa nyid dang yang dag par na sdug bsngal ba nyid dang yang dag par na bdag med pa nyid dang /yang dag par na zhi ba nyid du lus la rtog pa 'di ni/ de'i shes rab kyi pha rol tu phyin pa'o/ /de bzhin du sbyar te/ gzhan yang de 'di snyam du sems te/ sems can 'di ni le lo can dge ba'i chos dang bral ba ste/ de ni bdag la mtshang 'bru zhing gshe ba'o//bdag ni brtson 'grus brtsam par bya/ dge ba'i rtsa ba yongs su btsal bar brtson pa la mi ngoms par bya ste/ sems can 'di byang chub kyi snying por sngar je 'dug par byas la/ phyis bdag bla na med pa yang dag par rdzogs pa'i byang chub mngon par rdzogs par 'tshang rgya bar bya'o/ / snyam du de ltar go cha gyon pa 'di ni/ de'i brtson 'grus kyi pha rol tu phyin pa'o/ /de bzhin du sbyar te/ sems can ma dul ba/ ma zhi ba/ ma sbas pa/ nye bar ma zhi ba/ 'di lta bu 'di dag gi don du bdag gis go cha chen po bgos te/ 'di ltar sems nges par sems su gzhug go snyam pa 'di ni/ de'i bsam gtan gyi pha rol tu phyin pa'o//de bzhin du sbyar te/ bdag ni chos nyid la brten par bya'o snyam nas/ de la gshe ba dang khro ba su yin zhes des yongs su tshol ba na gang gshe ba dang khro ba'i chos de mi dmigs so/ /de bdag dang gzhan mi dmigs pas dmigs par lta ba dang bral bar bzod pa 'di ni/de'i shes rab kyi pha rol tu phyin pa'o zhes gsungs so/ /bcom ldan 'das ma las kyang gsungs te/ 'di ltar bdag gis sems can thams cad kyi rtsod pa dor bar bya ba yin no / /bdag nyid rtsod par byed dam/ bdag gang smra ba la slar smra na ni/ bdag gis ma rnyed pa dang nyes pa rnyed par 'gyur ro//ji ltar bdag gis ni sems can thams cad kyi zam pa lta bur bya na/ bdag gzhan la khyod ces bya ba'i tshig gam tshig rtsub po smra bar bya ba'am/ 'di ni bdag gis smra bar mi bya ste/ 'thab pa dang / rtsod pa'i nang du bdag gis bem po lta bu dang / lug ltar lkugs pa lta bur bya'o/ / gzhan gyis ngan du smras pa dang ngan du brjod pa'i tshig gi lan thos na sems kyi kun du gnod sems su mi bya'o/ /bdag gis gzhan dag la gang gzhan gyis nyes pa gzhan skyes na de ni bdag la legs pa ma yin pa dag gi cha ma yin no/ /gang bdag gis gzhan dag gi nyes pa gzhan mnyam par bsams pa de ni bdag gi cha ma yin no//de ci'i phyir zhe na/ bdag gis bsam pa rnam par 'khrugs par mi bya'o/ /'di ltar bdag gis ni sems can thams cad bde bar sbyar ba thams cad kyis bde bar bya zhing bla na med pa yang dag par rdzogs pa'i byang chub tu mngon par rdzogs par 'tshang rgya bar bya ste/mya ngan las 'das par bya ba yin na/ de la bdag gnod sems su byed dam/ shin tu nyes pa byas kyang gzhan dag la gnod sems mi bya ba yin na de la bdag gti mug tu 'gyur ram/ 'di ni bdag gis bya ba'i cha yin te/ brtul ba brtan par brtul bar bya'o/ /srog gi bar chad byed kyang bdag gis 'khrugs par mi bya'o//bdag gis khro gnyer can gyi bzhin dbyung bar mi bya'o zhes de ltar sems bskyed do zhes gsungs so/ /byang chub sems dpa'i so sor thar pa las kyang / sems can gang dag khros pa de dag la dbugs 'byin to yid phebs par byed do bzod pa gsol lo rjes su mthun par byed do//chos kyis tshim par byed do zhes gsungs so/ /bslab pa kun las btus pa las/ bzod pa'i le'u ste dgu pa'o// //de ltar bzod pa la gnas nas thos pa la brtson 'grus rtsom ste/ gzhan du na de'i thos pa chud za ba nyid du 'gyur te/ zla ba sgron ma'i mdo las ji skad du/ji snyed chos rnams mang po chub byas kyang / /thos pas rgyags nas tshul khrims mi srung ba/ /tshul khrims 'chal pa ngan 'gror gang 'gro ba/ /de la mang du thos pas skyob mi nus/ /zhes gsungs pa lta bu'o/ /mang du thos pa'i bsngags pa ni sred med kyi bus zhus pa'i mdo las gsungs te/'di ltar rigs kyi bu thos pa dang ldan na shes rab 'byung bar 'gyur ro/ /shes rab dang ldan na nyon mongs pa rab tu zhi bar 'gyur ro/ /nyon mongs pa med pa la bdud kyis glags mi rnyed do zhes bya ba'o / /de las yang drang srong chen po bla ma'i skyes pa'i rabs rgya cher mdzad nas gsungs te/byang chub sems dpa' sems dpa' chen po chos 'dod pa bsam pa phun sum tshogs pa gus pa dang bcas pa rnams la 'jig rten gyi khams gzhan na bzhugs pa'i sangs rgyas bcom ldan 'das dag zhal nye bar ston to/ /chos kyang thos par mdzad do/ /dri ma med pa'i gzi brjid byang chub sems dpa' sems dpa' chen po chos 'dod pa dag la ni chos kyi gter ri sul dang shing gi nang du bcug pa dang chos kyi glegs bam du gyur pa mtha' yas pa dag kyang lag mthil du gnas par 'gyur ro//dri ma med pa'i gzi brjid byang chub sems dpa' sems dpa' chen po chos 'dod pa rnams la sngon sangs rgyas mthong ba'i lha rnams spobs pa nye bar sgrub bo//de bzhin du sbyar te/ tshe yongs su zad na yang sangs rgyas bcom ldan 'das rnams dang lha rnams tshe dang stobs nye bar sgrub po/ /de dag sangs rgyas kyi byin gyi rlabs dang lha'i byin gyi rlabs kyis 'dod na lo stong du yang gnas so//de bzhin du sbyar te/ bskal pa'am bskal pa'i lhag ma nas ji tsam du 'dod pa de tsam du gnas so/ /byang chub sems dpa' sems dpa' chen po chos la gus pa bskyed pa rnams la sangs rgyas bcom ldan 'das rnams rga ba yang sel bar mdzad do/ /nad kyang sel bar mdzad do//dran pa nye bar sgrub bo/ /rtogs pa dang dang blo gros dang spobs pa yang nye bar sgrub bo/ /de bzhin du sbyar te/ lta bar gyur pa yang sel to/ /yang dag par lta ba yang nye bar sgrub bo/ /dri ma med pa'i gzi brjid byang chub sems dpa' sems dpa' chen po chos la gus pa rnams la pha rol gyi gnod pa'i 'jigs pa thams cad mi 'byung ngo //dri ma med pa'i gzi brjid de lta bas na byang chub sems dpa' sems dpa' chen pos thos pa'i tshogs mkhas pa la mngon par brtson par bya'o zhes gsungs so/ /thos pa'i rnam pa ji lta bu byang chub sems dpa'i 'dul ba la bsngags she na/ 'phags pa blo gros mi zad pas zhus pa'i mdo las/thos pa'i rnam pa ni brgyad cu ste/ 'di lta ste/ 'dun pa'i rnam pa dang / bsam pa'i rnam pa dang / lhag pa'i bsam pa'i rnam pa dang / sbyor ba'i rnam pa dang / dge ba'i bshes gnyen gyi rnam pa dang / nga rgyal med pa'i rnam pa dang / bag yod pa'i rnam pa dang / ri mor byed pa'i rnam pa dang /mthun pa'i rnam pa dang / bka' blo bde ba'i rnam pa dang / bsnyen bkur byed pa'i rnam pa dang / rna blags te nyan pa'i rnam pa dang / yid la byed pa'i rnam pa dang / mi g.yeng ba'i rnam pa dang / gnas kyi rnam pa dang / rin po cher 'du shes pa'i rnam pa dang / sman du 'du shes pa'i rnam pa dang / nyon mongs pa'i nad thams cad zhi bar byed pa'i rnam pa dang / dran pa'i snod kyi rnam pa dang / shes pa rtogs pa'i rnam pa dang / blo gros rtogs pa'i rnam pa dang / blo la 'jug pa'i rnam pa dang / sangs rgyas kyi chos la mi ngoms par nyan pa'i rnam pa dang / gtong ba spel pa'i rnam pa dang /dul zhing cang shes pa'i rnam pa dang / mang du thos pa la brten pa'i rnam pa dang / gus par dga' ba myong bar byed pa'i rnam pa dang / lus bde ba'i rnam pa dang / sems rab tu dga' ba'i rnam pa dang / mi skyo bar nyan pa'i rnam pa dang / don nyan pa'i rnam pa dang / chos nyan pa'i rnam pa dang / nan tan nyan pa'i rnam pa dang / gzhan gyis bstan pa nyan pa'i rnam pa dang / chos ma thos pa nyan pa'i rnam pa dang / mngon par shes pa nyan pa'i rnam pa dang / theg pa gzhan la 'dod pa med pa'i rnam pa dang / pha rol tu phyin pa nyan pa'i rnam pa dang / rin po che nyan pa'i rnam pa dang / byang chub sems dpa'i sde snod nyan pa'i rnam pa dang /bsdu ba'i dngos po nyan pa'i rnam pa dang / thabs la mkhas pa nyan pa'i rnam pa dang / tshangs pa'i gnas pa nyan pa'i rnam pa dang / dran pa dang shes bzhin nyan pa'i rnam pa dang / skye ba la mkhas pa nyan pa'i rnam pa dang / mi skye ba la mkhas pa nyan pa'i rnam pa dang / mi sdug pa'i rnam pa dang /byams pa'i rnam pa dang / rten cing 'brel bar 'byung ba'i rnam pa dang / mi rtag pa'i rnam pa dang / sdug bsngal ba'i rnam pa dang / bdag med pa'i rnam pa dang / zhi ba'i rnam pa dang / stong pa nyid kyi rnam pa dang / mtshan ma med pa'i rnam pa dang / smon pa med pa'i rnam pa dang / mngon par 'du mi byed pa'i rnam pa dang /dge ba'i mngon par 'du byed pa'i rnam pa dang / bden par byin gyis brlabs pa'i rnam pa dang / chung mi gzan pa'i rnam pa dang / rang dbang gi rnam pa dang / bdag gi sems srung ba'i rnam pa dang / brtson 'grus mi gtong ba'i rnam pa dang / chos la nges par rtog pa'i rnam pa dang / nyon mongs pa'i gnyen po'i rnam pa dang /bdag gi phyogs srung ba'i rnam pa dang / pha rol gyi phyogs dang nyon mongs pa tshar gcod pa'i rnam pa dang / nor bdun la brten pa'i rnam pa dang / dbul ba thams cad tshar gcod pa'i rnam pa dang / mkhas pas bsngags pa'i rnam pa dang / mkhas pa mngon par dga' ba'i rnam pa dang /'phags pas kun shes pa'i rnam pa dang / 'phags pa ma yin pa rnams mos par byed pa'i rnam pa dang / bden pa mthong ba'i rnam pa dang / phung po'i nyes pa spang ba'i rnam pa dang / 'dus byas kyi nyes pa yongs su 'jal ba'i rnam pa dang / don la brten pa'i rnam pa dang /chos la brten pa'i rnam pa dang / ye shes la brten pa'i rnam pa dang / nges pa'i don gyi mdo sde la brten pa'i rnam pa dang / sdig pa thams cad mi bya ba'i rnam pa dang / bdag dang gzhan la phan pa'i rnam pa dang / legs par byas pa'i las kyi rnam pa dang / mi 'gyod pa'i rnam pa dang / bye brag tu 'gro ba'i rnam pa dang /sangs rgyas kyi chos thams cad 'thob pa'i rnam pa ste/ 'di dag ni byang chub sems dpa' rnams kyi thos pa'i rnam pa brgyad cu zhes gsungs so/ /yang de nyid las gsungs pa/ gang chos kyi tshogs la sbyor ba de ni de'i ye shes kyi tshogs yin no/ /de la chos kyi tshogs su sbyor ba gang zhe na/gang 'di ni don nyung ba dang smra ba nyung ba dang yo byad nyung ba dang srod dang tho rangs la mi nyal zhing rnal 'byor la brtson pas/ thos pa'i don la rtogs pa dang / yang dang yang tshol ba dang / sems la rnyog pa med pa dang / sgrib pa rnams gnon pa dang / ltung ba rnams las 'byung ba shes shing 'gyod pa med pa dang kun nas ldang ba med pa dang /nan tan snying por byed pa dang / chos la gzhol pa dang / chos la 'bab pa dang / chos la bab pa dang / mthu dang ldan pa dang / ye shes tshol ba la mgo dang gos la me 'bar ba lta bu dang / de la ma chags par gnas pa dang / tshul khrims mi lhod pa dang /brtson pa mi gtong ba dang / bye brag tu 'gro ba dang / 'du 'dzi la mi dga' ba dang / gcig pur dga' ba dang / dgon pa la mngon par phyogs shing yid la byed pa dang / 'phags pa'i rigs kyis chog shes pa dang / sbyangs pa'i yon tan las mi g.yo ba dang / chos kyi dga' ba la dga' zhing mos pa dang /'jig rten pa'i sngags dran par mi byed pa dang / 'jig rten las 'das pa'i chos tshol ba dang / dran pa nyams pa med pa dang / don rtogs pa'i rjes su 'gro ba dang / blo gros kyi lam dang mthun pa dang / bstan pas sdom pa dang / rkyen gyis ye shes kyi rjes su 'gro ba dang /khrel yod pa dang ngo tsha shes pas brgyan pa dang / ye shes kyi rjes su 'gro ba lhur byed pa dang / mi shes pa sel ba dang / ma rig pa dang / gti mug gi mun pa dang rab rib kyi mun pas chod pa bsal ba dang / shes rab kyi mig rnam par dag pa dang / blo shin tu rnam par dag pa dang /blo rgya che ba dang / blo ma zhum pa dang / blo ma gyes pa dang / mngon sum du shes pa dang / yon tan gzhan la rag ma lus pa dang / bdag gi yon tan mi bsnyems pa dang / gzhan gyi yon tan kun la brjod pa dang / legs par bya ba'i las byed pa dang / las kyi rnam par smin pa dang 'gal bar mi byed pa dang /las yongs su dag pa'i ye shes 'di ni/ btsun pa sha ra dwa ti'i bu byang chub sems dpa' rnams kyi ye shes kyi tshogs mi zad pa zhes 'byung ngo / /ci mnyan par bya zhe na/ bcom ldan 'das kyis ye shes shin tu rgyas pa'i mdo las/ don dang bcas pa'i gzhon nu rtse ba'i bstan bcos rnams bslab par bya'o//don med pa rnams yongs su spang bar bya'o/ /'di lta ste/ 'jig rten rgyang 'phen pa'i bstan bcos rnams dang / chad pa'i tshul gyi bstan bcos rnams dang / byad stems kyi bstan bcos rnams dang / smra ba'i rig pa'i bstan bcos rnams dang / gzhon nu rtse ba'i bstan bcos rnams dang / rmugs byed kyi rig pa'i bstan bcos rnams so/ /de bzhin du sbyar te/ de las gzhan pa gang ci yang rung ste/ rnam par thar pa dang mi mthun pa'i bstan bcos shes pa rmongs par 'gyur ba de dag thams cad byang chub sems dpa'i theg pa la yang dag par zhugs pas spang bar bya'o zhes gsungs so//de ltar thos pa dang ldan pa sems sbyang ba'i phyir dgon par gnas par bya'o/ /drag shul can gyis zhus pa las/ bsam pa phun sum tshogs pa ma yin pa la yang khyim gnang ba ji ltar yin zhe na/ 'bad pa dang ldan mi nus pa'i phyir ro/ /'o na gzhan gyi chung ma la yang ltung ba med par 'gyur ro//de ni ma yin te/ de dag la mi nus su zin kyang rang bzhin gyis skyon du 'gyur ba'i phyir ro/ /khyim du gnas pa ni bcas pa'i kha na ma tho ba dang bcas pa'i phyir ro/ /bslab pa kun las btus pa las/ brtson 'grus kyi le'u ste bcu pa'o// // de ltar na drag shul can gyis zhus pa'i tshul gyis khyim gyi skyon rnams bsgoms te dgon pa la gnas par bya'o zhes bya bar gnas so/ /ji skad du zla ba sgron ma'i mdo las/ /'dod pa dag ni rab tu sten byed cing / /bu dang chung ma dag la sred byed na / /smad par bya ba'i khyim la brten pa de/ /nam yang bla med byang chub mchog mi 'thob//gang dag 'dod pa lci skam me bzhin spong / /bu dang chung ma dag la sred spangs nas/ /khyim gyis skrag ste khyim nas mngon byung ba/ /de dag byang chub mchog 'di rnyed mi dka'/ /gang dag khyim na gnas par byed bzhin du/ /byang chub dam pa mchog 'di 'thob pa yi/ / sangs rgyas gang dag sngon chad ma byung ste/ /ma 'ongs pa na'ang mi 'byung gnas pa med/ /rgyal srid mchil ma'i thal ba bzhin spangs nas/ /dben pa 'dod des dgon par gnas byed pa/ /nyon mongs spangs nas bdud ni bcom nas su/ /byang chub rdul med 'dus ma byas 'tshang rgya/ /de bzhin du sbyar te/rab tu byung nas chos spyod ci 'dra ba/ /zas dang skom dang de bzhin gos rnams dang / /me tog spos dang phreng ba rnams kyis ni/ /khyu mchog rnams la bsnyen bkur byas mi 'gyur/ /gang zhig byang chub rab tu 'dod byed cing / /'dus byas ngan las yid byung sems can gyi/ /don du dgon par phyogs te gom bdun bor//'di ni de bas bsod nams khyad par 'phags/ /zhes gsungs so/ /gal te skal ba mi 'dra ba'i sems can la rjes su chags pa dang 'khor 'dod pa dang rnyed pa la sogs pa 'dod pas dben pa'i phyogs na sdod na/ de'i phyir 'di las gsungs pa/ 'di dag bdag la gnod sems ldan pa zhes//mkhas pas byis pa rnams dang rtsod mi byed/ /bsti stang byas te byis pa yongs su spong / /byis pa'i chos la 'dris par yongs mi byed/ /byis pa ji srid yun rings legs bsten kyang / /de dag phyir zhing mi mdza' 'gras 'gyur zhes/ /byis pa'i ngo bo nyid kyi rgyus shes nas//mkhas pa byis pa dag dang sten mi byed/ /byis pa rang bzhin ngo bo tha dad de/ /so so'i skye bo rnams la mdza' med ces/ /byis pa rnams kyi ngo bo nyid shes nas/ /mkhas pa 'dir byis pa rnams la yid mi rton/ /chos dang mthun pa'i tshig gis smras gyur kyang //khro dang zhe sdang yid mi ches ba dag /rab tu smra ste 'di ni byis pa'i chos/ /don de rnam par shes nas yid mi rton/ /byis pa rnams ni byis pa dag dang mtshungs/ /dper na ngan skyugs dang ni ngan skyugs bzhin/ /mkhas pa rnams ni mkhas pa dang lhan cig ste/ /mar dang mar gyi nyid khur mtshungs pa bzhin//zhes bya'o/ /de skad du yang de nyid las/ /gang dag dga' dang mi dga' cung zad med/ /de dag mi yi 'jig rten rtag rab bde/ /gang dag nags dang ri sul la dga' ba/ / dge sbyong nyid kyi rab bde myong bar 'gyur/ /gang dag bdag gir byed pa ci yang med/ /gang dag yongs 'dzin rnam pa kun tu med//bse ru lta bur 'jig rten 'dir gnas pa/ /de dag nam mkha' la ni rlung ltar 'gro/ /gang dag 'jig rten la ni yid mi chags/ /de dag mi yi 'jig rten rab tu bde/ /dga' dang mi dga' la ni chags med pa/ /de dag 'di na rtag tu sems rlung 'dra/ /gang dag mi sdug de phrad sdug bsngal te//gang dag sdug de dang bral sdug bsngal yin/ /mtha' de gnyi ga rab tu spangs nas su/ /mi gang chos la dga' ba de dag bde/ /zhes gsungs so/ /yang de nyid las/ nyes pa'i tshogs mang thams cad spangs nas su/ /rnal 'byor can ni rtag tu byed pa nyung / /rnal 'byor can brtson nam yang rtsod pa med//dgon par gnas pa de yi yon tan 'di/ /de ni rtag tu 'dus byas yid 'byung 'gyur/ /de ni 'jig rten ci la'ang 'dod pa med/ /zag pa dag ni rnam par 'phel mi 'gyur/ /nags na gnas pa 'di yi yon tan 'di/ /de ni nam yang rtsod par mi 'gyur te/ / rtag tu zhi zhing dga' la dben par rgyu/ /lus dang ngag dang yid kyang rab bsdam 'gyur/ /dgon par gnas pa 'di la yon tan mang / /de ni thar pa'i rjes su mthun pa yin/ /de ni rnam grol zhi ba myur rtogs byed/ /nags na gnas shing rnam grol sten byed na/ /dgon gnas de la yon tan 'di kun 'byung //zhes gsungs so/ /yang de nyid las/ grong dang grong khyer dag la dga' spangs la/ /rtag tu dben zhing nags khrod bsten par gyis/ /bse ru lta bur rtag tu gnyis med byos/ /ring por mi thogs ting 'dzin mchog thob 'gyur/ /zhes gsungs so/ /'phags pa yul 'khor skyong gis zhus pa'i mdo las kyang //skyon gyis gzings pa mtha' yas ldan pa'i khyim spangs rtag tu nor mi lta/ /des shing yon tan ldan pa de dag dgon par dga' zhing dbang po dul/ /de dag gang du'ang bud med rnams dang skyes pa dag dang 'dris mi byed/ /bse ltar gcig pur gnas shing bsam pa dri med dag la dri ma bral//de dag thob pa rnams kyis dga' bar mi 'gyur ma thob yid zhum med/ /'dod pa chung ste ngan ngon tsam la dga' zhing sgyu dang tshul 'chos spongs/ /sems can don phyir brtson 'grus yid ldan sbyin dang dul ba la yang gnas/ /sangs rgyas ye shes don gnyer bsam gtan brtson 'grus yon tan pha rol phyin//lus dang de bzhin srog la mi lta sdug pa'i rtsa lag rnam spangs te/ /bsam pa rdo rje lta bur rab brtan rtag tu byang chub lam la sbyor/ /lus ni dum bu dum bur bcad kyang de dag sems la g.yo ba med/ /thams cad mkhyen nyid re ba phyir zhing brtson 'grus shin tu brtan 'dir rtsom//zhes gsungs so/ /drag shul can gyis zhus pa las kyang / bdag ni sems can dang 'dre bar mi bya'o/ /bdag gis sems can gcig gi dge ba'i rtsa ba bskyed par mi bya'o zhes bya ba la sogs pa gsungs so/ /gal te thos pa dang ldan pa dal ba phun sum tshogs pa 'di rnyed nas rnyed pa la sogs pa la chags pa'i sems mi sbyong na de ni lha dang bcas pa'i 'jig rten la slu ba gcig pur 'gyur ro//'phags pa dkon mchog brtsegs pa las kyang / /'od srungs 'di lta ste dper na mi la la zhig rgya mtsho'i chu chen pos khyer la chus skom bzhin du 'chi ba'i dus byed pa de bzhin du 'od srungs 'di ni dge sbyong dang bram ze kha cig chos mang po blangs te kun chub par byas kyang /'dod chags la sred pa mi sel zhe sdang la srid pa mi sel gti mug la srid pa mi sel ba de dag ni chos kyi rgya mtsho chen pos khyer la/ nyon mongs pa'i skom pas 'chi ba'i dus byed par 'gyur te/ ngan 'gror 'gro bar 'gyur ro zhes gsungs so//de lta bas na gdon mi za bar dgon pa la gnas par bya'o/ /gnas de lta bu dag ni 'phags pa dkon mchog sprin las kyang / gnas gang dag na bsod snyoms blang ba'i spyod yul dang ha cang yang mi ring ha cang yang mi nye ba dang / gnas gang dag na chu dang zhing rnyog pa med pa gtsang zhing dri ma med pa tshogs chung ba yod pa dang /gnas gang na shing phun sum tshogs pa me tog phun sum tshogs pa 'bras bu phun sum tshogs pa lo ma phun sum tshogs pa/ gcan gzan khro bo med pa phug dang ldan pa sman gshong dang ldan pa thag thug med pa 'gron bde ba zhi ba gnyis su med pa'i gnas de 'dra ba dag na gnas so//de gnas de dag na gnas shing / gang des sngon blangs pa dang sngon thos pa de nyin lan gsum mtshan lan gsum du ha cang yang mi che ha cang yang mi chung ba dang / dbang po mi rgod cing phyi rol du ma song ba'i sems dang dad pas nye bar 'tsho zhing tshig nye bar bzung ste/mtshan mar 'dzin cing gnyid kyis ma log par kha ton byed do/ /gal te dge slong dgon pa'i drung du rgyal po'am blon po'am de ma yin pa gzhan bram ze'am rgyal rigs sam grong pa'am yul gyi mi dag 'ongs na/ des de dag la gus par legs par 'ongs so zhes brjod par bya ste/des rgyal po chen po ji ltar stan bting ba la bzhugs shig ces de skad byas nas gal te 'dug na gnyi ga yang 'dug par bya'o/ /de ste mi 'dug na yang gnyi ga mi 'dug par bya'o/ /gal te dbang po rgod par gyur na rgyal po chen po gang khyod kyis sa phyogs na dge slong dang bram ze rnams tshul khrims dang ldan pa yon tan dang ldan pa mang du thos pa dag mi rgod dang spre'u rnams kyis ma gtses par gnas pa de ni rnyed pa legs par rnyed do zhes bstan par bya'o//de ste brtan zhing dul ba dbang po rab tu zhi ba zhig yin te chos bstan par rung na de la chos sna tshogs bstan par bya'o/ / de ste chos sna tshogs bstan pa la mi dga' na de la skyo ba dang mthun pa'i chos bstan par bya'o/ /de ste skyo ba dang mthun pa'i chos bstan pa la yang mi dga' na de la de bzhin gshegs pa'i che ba rgya che ba dag bstan par bya'o/ /bram ze dang rgyal rigs dang grong pa dang yul gyi mi dag 'ongs na yang ci rigs par bya ba dag bya'o//de de ltar mang du thos pas chos nyan pa rnams kyi sems mgu bar byed nus pa yin te/ sems can de dag kyang de la dga' ba dang dad pa dang rangs pa 'thob par 'gyur ro zhes gsungs so// //bam po dgu pa/ khyim bdag drag shul can gyis zhus pa'i mdo las kyang /khyim bdag gzhan yang byang chub sems dpa' rab tu byung ba dgon pa la gnas pas 'di ltar bdag ci'i phyir dgon pa la gnas/ dgon pa na gnas pa 'ba' zhig ni dge sbyong ma yin te/ 'di na ma byang ba ma sbas pa ma zhi ba ma dul ba mi 'grus pa rab tu mi brtson pa/'di lta ste ri dgas dang spre'u dang bya mang po dang chom rkun dang / gdol pa dag kyang mang du gnas te/ de dag kyang dge sbyong gi yon tan dang ldan pa ma yin pas/ gang gi phyir bdag dgon pa la gnas pa 'di lta ste/ dge sbyong gi don de yongs su rdzogs par bya'o snyam du brtag par bya'o/ /de bzhin du sbyar te/khyim bdag gzhan yang byang chub sems dpa' rab tu byung ba dgon pa na gnas pas bdag ci'i phyir dgon par 'ongs snyam du brtag par bya ste de yang 'di ltar bdag ni 'jigs shing skrag pa'i phyir dgon par 'ongs so/ /ci zhig gis 'jigs shing skrag ce na/ 'du 'dzis 'jigs shing skrag go//'grogs pas 'jigs shing skrag go/ /'dod chags dang zhe sdang dang gti mug gis 'jigs shing skrag go/ /nga rgyal dang rgyags pa dang / 'chab pas 'jigs shing skrag go/ /chags pa dang phrag dog dang ser snas 'jigs shing skrag go/ /gzugs dang sgra dang dri dang ro dang reg byas 'jigs shing skrag go//phung po'i bdud kyis 'jigs shing skrag go/ /nyon mongs pa'i bdud kyis 'jigs shing skrag go/ /'chi bdag gi bdud kyis 'jigs shing skrag go/ /lha'i bu'i bdud kyis 'jigs shing skrag go/ /mi rtag pa la rtag par phyin ci log pas 'jigs shing skrag go/ /sdug bsngal la bde bar phyin ci log pas 'jigs shing skrag go//bdag med pa la bdag tu phyin ci log pas 'jigs shing skrag go/ /mi gtsang ba la gtsang bar phyin ci log pas 'jigs shing skrag go/ /sems dang yid dang rnam par shes pas 'jigs shing skrag go/ /sred pas 'jigs shing skrag go / 'khor bas 'jigs shing skrag go/ /sgrib pa dang chod pa dang kun nas ldang bas 'jigs shing skrag go/ /'jig tshogs la lta bas 'jigs shing skrag go/ /bdag tu 'dzin pa dang / bdag gir 'dzin pas 'jigs shing skrag go/ /rgod pas 'jigs shing skrag go/ /'gyod pa dang the tshom gyis 'jigs shing skrag go//sdig pa'i grogs pos 'jigs shing skrag go/ /rnyed pa dang bkur stis 'jigs shing skrag go/ /mi dge ba'i bshes gnyen gyis 'jigs shing skrag go/ /ma mthong bar mthong ngo snyam du 'dzin pas 'jigs shing skrag go/ /ma thos par thos so snyam du 'dzin pas 'jigs shing skrag go//ma dran par dran no snyam du 'dzin pas 'jigs shing skrag go/ /bye brag ma phyed par bye brag phyed do snyam du 'dzin pas 'jigs shing skrag go/ /mi shes par shes so snyam du 'dzin pas 'jigs shing skrag go/ /dge sbyong gi dri mas 'jigs shing skrag go/ / gcig la gcig gnod par sems pas 'jigs shing skrag go/ /'dod pa'i khams dang gzugs kyi khams dang gzugs med pa'i khams kyis 'jigs shing skrag go/ /srid pa'i 'gro ba thams cad du 'chi 'pho dang skye bas 'jigs shing skrag go/ /sems can dmyal ba dang dud 'gro'i skye gnas dang yi dags kyi yul du 'gro bas 'jigs shing skrag go//mi khom pas 'jigs shing skrag go/ /mdor na mi dge ba'i chos thams cad yid la byed pas 'jigs shing skrag ste/ bdag de lta bu'i 'jigs shing skrag pas 'jigs nas dgon par 'ongs so/ /de bzhin du sbyar te/ khyim bdag gzhan yang byang chub sems dpa' rab tu byung ba 'jigs shing skrag nas/dgon pa la gnas pas 'di la gang cung zad 'jigs pa skye ba de dag thams cad ni bdag tu 'dzin pa las skyes so/ /de bzhin du sbyar te/ bdag tu mngon par chags pa dang / bdag tu yongs su 'dzin pa dang / bdag gi gzhi dang bdag la sred pa dang / bdag tu 'du shes pa dang / bdag tu smra ba nye bar len pa dang / bdag tu lta ba dang / bdag gi gnas dang / bdag tu yongs su rtog pa dang / bdag bsrung ba las skyes te/ gal te bdag dgon pa la gnas la bdag tu 'dzin pa yongs su ma spangs/ bdag tu mngon par chags pa dang / bdag tu yongs su 'dzin pa dang / bdag gi gzhi dang / bdag la sred pa dang / bdag tu 'du shes pa dang / bdag tu smra ba nye bar len pa dang / bdag tu lta ba dang / bdag gi gnas dang / bdag tu yongs su rtog pa dang / bdag srung ba yongs su ma spangs na ni/bdag dgon pa la gnas pa don med par 'gyur ro snyam du sems par bya ste/ bdag tu 'du shes pa la ni dgon pa la gnas pa don med do/ /gzhan du 'du shes pa la yang med do/ /de bzhin du sbyar te/ khyim bdag dgon pa la gnas pa zhes bya ba ni chos thams cad la mi brten par gnas pa'o//chos thams cad la mi 'dzin par gnas pa'o/ /mtshan ma thams cad la mi chags par gnas pa'o/ /de bzhin du sbyar te/ gzugs thams cad la mi brten par gnas pa'o/ /sgra dang dri dang ro dang reg pa thams cad la mi brten par gnas pa'o/ /chos thams cad mnyam pa nyid dang mi 'gal bar gnas pa'o//sems shin tu zhi bas shin tu sbyangs par gnas pa'o/ /'jigs pa thams cad spangs pas mi 'jigs par gnas pa'o/ /nyon mongs pa thams cad las rnam par grol bas chu bo las rgal bar gnas pa'o/ /brten par gnas pa'o/ /ngan ngon gyis chog shes par 'dzin cing 'dod pa chung bas 'phags pa'i rigs rnams la rab tu dga' bar gnas pa'o//dgang sla zhing gso sla bas chog par 'dzin par gnas pa'o/ /shes rab kyi phyir tshul bzhin la sbyor bas thos pa la gnas pa'o/ /rnam par thar pa'i sgo stong pa nyid dang mtshan ma med pa dang smon pa med pa la so sor rtog pas thar par gnas pa'o//bcings pa bcad pas rnam par grol bar gnas pa'o/ /rten cing 'brel bar 'byung ba dang mthun pas ma dul ba rnams nye bar zhi bar gnas pa'o/ /shin tu rnam par dag pas bya ba byas par gnas pa'o/ /khyim bdag 'di lta ste dper na/dgon pa la rtswa dang shing gel ba dang nags tshal gnas kyang 'jigs pa med cing mi skrag skrag par mi 'gyur ro/ /khyim bdag de bzhin du byang chub sems dpa' rab tu byung ba dgon pa la gnas pas kyang lus la rtswa dang shing gel pa dang sman dang rtswig pa dang shing dang mig yor lta bu dang sgyu ma dang mtshungs pa'i 'du shes bskyed par bya ste/'di la su zhig 'jigs par 'gyur 'di la su zhig skrag par 'gyur snyam du sems bskyed par bya'o/ /des 'jigs shing skrag par lta na/ 'di ltar lus 'di la ni bdag gam sems can nam srog gam skye ba'am gso ba'am skyes bu'am gang zag gam shed las skyes pa'am shed bu med de/'di ltar 'jigs pa zhes bya ba 'di ni/ yang dag pa ma yin pa kun brtags pa yin gyi bdag gis ni yang dag pa ma yin pa kun brtags pa de la brtag par mi bya'o snyam du lus la tshul bzhin du brtag par bya'o/ /des ji ltar dgon pa la rtswa dang shing gel ba dang sman dang nags tshal gnas pa rnams nga'i ba med pas yongs su 'dzin pa med pa de bzhin du byang chub sems dpa' yang nga'i pa med pa yongs su 'dzin pa med pas chos thams cad dgon pa nyid do snyam du shes nas nye bar bsgrubs te gnas par bya'o//de ci'i phyir zhe na/dgon pa la gnas pa de ni nyon mongs pa gcod pa ste nga'i ba med pas yongs su 'dzin pa med pa'o/ /de bzhin du sbyar te/ khyim bdag gzhan yang byang chub sems dpa' rab tu byung bas sangs rgyas kyis dgon pa la gnas par bka' stsal par shes nas dgon pa la gnas par bya ste/der dge ba'i chos thams cad yongs su rdzogs par 'gyur ro/ /dge ba'i rtsa ba nye bar brtan nas/ phyis grong dang grong khyer dang grong rdal dang ljongs dang yul dang pho brang 'khor dag tu zhugs te chos bstan par bya'o/ /de bzhin du sbyar te/ khyim bdag gal te byang chub sems dpa' rab tu byung ba lung dang kha ton mnod pa'i phyir tshogs kyi nang du 'jug na des der gus pa dang bcas par bya ste/slob dpon dang mkhan po rnams dang / gnas brtan dang bar ma dang dge sbyong gsar bu rnams la zhe sa dang bcas par bya'o/ /tshul mkhas par bya'o/ /snyom las med par rang gis bya ba dang gzhan la gdung ba med par bya'o//des bsnyen bkur la gdu bar mi bya'o/ /des 'di ltar de bzhin gshegs pa dgra bcom pa yang dag par rdzogs pa'i sangs rgyas lha dang bcas pa'i 'jig rten dang / bdud dang bcas pa dang / tshangs pa dang bcas pa dang / dge sbyong dang bram ze'i skye dgu dang bcas pa dang /lha dang mi dang lha ma yin du bcas pas mchod pas / sbyin gnas su gyur pa de yang sems can thams cad la gang las kyang rim gror bya ba bdag gir mi mdzad na/ bdag cag ma bslabs pa slob dpon 'dod pa rnams lta ci smos te/ bdag gis sems can thams cad la bsnyen bkur bya'i/ gang las kyang bsnyen bkur bya ba bdag gir mi bya'o snyam du brtag par bya'o/ /de ci'i phyir zhe na/ khyim bdag dge sbyong bsnyen bkur la gdu ba ni yon tan gyi chos rjes su gzung ba chud gzon pa yin te/ des gang dag sdud pa de dag kyang 'di snyam du sems te/ bdag cag ni bsnyen bkur gyi phyir sdud kyi chos kyi phyir ni ma yin no snyam mo zhes gsungs so//yang de nyid las/ khyim bdag gal te byang chub sems dpa' dgon pa pa chos nyan par 'dod dam/ mkhan po dang slob dpon la lta bar 'dod nas/ nad 'dri ba'i phyir grong gi gnas su 'ongs nas/ des dgongs su slar ldog par bya ba'i phyir 'gro ba'i sems bskyed par bya'o//de gal te lung mnod pa dang kha ton bya ba gzhan la rag las te gtsug lag khang na gnas na yang / des dgon pa la gzhol ba'i sems kyis/ gang dngos po thams cad la dgon par 'du shes pa dang chos tshol bas mi ngoms pa de nyid dgon pa la gnas pa yin no snyam du bsam par bya'o zhes gsungs so//'phags pa rin po che'i phung po'i mdo las kyang / gal te dge slong dgon pa pa 'bras bu ma thob pa so so'i skye bo'i drung du sdig sbrul dang gcan gzan gtum po dag 'ongs na des de la 'jigs pa dang skrag par mi bya'i / des 'di snyam du bdag thog ma nyid nas lus dang srog bor te dgon pa'i gnas su 'ongs kyang 'di la bdag gis 'jigs par mi bya skrag par mi bya'i/byams pa'i sems bskyed par bya zhe sdang rnam par spang par bya 'jigs pa spang bar bya'o snyam du sems bskyed par bya'o/ /gal te de ltar byas nas sbrul dang gcan gzan de dag gis srog gcod cing za na yang des 'di snyam du gcan gzan 'di dag la bdag gis zang zing tsam gyis tshim par byed mi nus kyi/de dag gis bdag gi sha zos nas bde ba la reg par gnas par 'gyur la/ bdag gis kyang snying po med pa'i lus las snying po blangs par 'gyur ba ni bdag gis rnyed pa legs par rnyed do//de bzhin du sbyar te/ gal te dgon pa'i gnas de na gnas pa na mi ma yin pa 'ongs na mdog sdug kyang rung mi sdug kyang rung / de la chags par mi bya khong khro bar mi bya'o/ /gal te sngon sangs rgyas mthong ba'i lha dag dge slong dgon pa pa'i gan du 'ongs te dri ba yongs su 'dri na/de la dge slong dgon pa pa des ji ltar thos pa bzhin du lha de dag la chos bshad par bya'o/ /ci ste lha de dag zab mo'i dri ba yongs su dris te dge slong dgon pa des lan mi thebs pa lta na/ des nga rgyal med par byas la 'di skad ces ma bslabs pa la brnyas par mi bya ste sangs rgyas kyi bstan pa la lung mnos nas 'bad de khong du ma chud pa'i chos rnams khong du chud par gyur pa de'i tshe de'i dus na dris pa thams cad kyi lan gdab par bya'o//bdag ni chos nyan pa yin gyi khyed spobs par gyis shig ces brjod par bya ste/ 'od srungs dge slong dgon pa pa de ltar lha de dag la go bar bya'o//de bzhin du sbyar te/ dgon pa'i gnas de na gnas pa des rtswa dang shing gel ba dang sman dang nags tshal de dag ji ltar 'byung ba dad ji ltar 'jigs par 'gyur ba dang / ji ltar phyi rol gyi dngos po 'di dag bdag po med pa/ g.yo ba med pa/ byed pa med pa/ rgyu dang rkyen tshogs pa las 'byung gi /rgyu dang rkyen ma tshang na mi 'byung ba ste/ 'di la don dam par skye ba dang 'gag pa'i chos gang yang med do snyam du mtshan mar gzung bar bya'o zhes gsungs so / /yang gsungs pa/ dgon pa'i gnas de na gnas pa na 'di ltar sems bskyed par bya ste/ 'di ltar bdag ni lam ring po nas 'dir 'ongs la gcig pu gnyis su med pa ste/legs par byas pa'am nyes par byas pa bskul ba'i grogs ni gang yang med kyi/ lha dang klu dang gnod sbyin dang dri za dang sangs rgyas bcom ldan 'das gang bdag gi sems kyi bsam pa shes pa dag yod de/ bdag dgon pa'i gnas na gnas la mi dge ba'i sems kyi dbang du song na de dag dbang du 'gyur ro//bdag lam ring po nas 'ongs shing gcig pu gnyis su med de/ rten pa med bdag gi med yongs su 'dzin pa med la/ gal te 'dod pa la rnam par rtog pas rnam par rtog /gnod sems kyi rnam par rtog pas rnam par rtog / 'tshe ba'i rnam par rtog pas rnam par rtog gam/ mi dge ba gzhan la rnam par rtog pas rnam par rtog par gyur na/ gang 'du 'dzi dang 'du ba la mngon par dga' ba'i sems can rnams dang bye brag med par 'gyur te/ bdag gis lha dang klu dang gnod sbyin dang dri za rnams la bslus par 'gyur zhing / sangs rgyas bcom ldan 'das rnams kyang mi mnyes par byas par 'gyur gyis/ ci nas kyang bdag la lha rnams 'phya bar mi 'gyur ba dang / sangs rgyas bcom ldan 'das rnams kyang dgyes par 'gyur ba de ltar bya'o snyam du sems bskyed par bya'o zhes gsungs so/ /bslab pa kun las btus pa las/ dgon par gnas par brjod pa zhes bya ba'i le'u ste bcu gcig pa'o// //de ltar dgon pa la gnas nas mnyam par gzhag pa la sbyar bar bya ste/ bcom ldan 'das ma las/ des sems can de dag gi don du bsam gtan gyi pha rol tu phyin pa la spyod pas sems g.yeng bar mi 'gyur ro/ /de ci'i phyir zhe na/ 'di ltar de 'di snyam du sems g.yeng ba la ni 'jig rten pa'i bsam gtan bskyed pa'ang dkon na/bla na med pa yang dag par rdzogs pa'i byang chub lta ci smos/ de lta bas na bdag bla na med pa yang dag par rdzogs pa'i byang chub mngon par rdzogs par sangs ma rgyas kyi bar du sems mi g.yeng bar bya'o snyam du sems so zhes gsungs so//yang de nyid las/ rab 'byor gzhan yang / byang chub sems dpa' sems dpa' chen po sems dang po bskyed pa nas nye bar bzung ste/ bsam gtan gyi pha rol tu phyin pa la spyod cing rnam pa thams cad mkhyen pa nyid dang ldan pa'i yid la byed pas bsam gtan la snyoms par 'jug ste/de mig gis gzugs rnams mthong yang mtshan mar mi 'dzin cing mngon rtags su mi 'dzin pa yin no/ /gang gi phyir mig gi dbang po sdom pas ma bsdams par gnas te/ brnab sems dang yid mi bde ba dang sdig pa mi dge ba'i chos gzhan la yang sems rjes su 'jug pa de dag sdom par byed mig gi dbang po srung bar byed do//de bzhin du rna bas sgra thos pa dang / snas dri tshor ba dang / lces ro myang ba dang / lus kyis reg bya la reg pa dang / yid kyis chos rnam par rig pa na mtshan mar mi 'dzin cing mngon rtags su mi 'dzin pa yin no/ /gang gi phyir yid kyi dbang po sdom pas ma bsdams te sdig pa mi dge ba'i chos rnams la rjes su 'jug pa de dag sdom par byed yid kyi dbang po srung bar byed do//de 'gro'am 'greng ngam 'dug gam nyal lam smra'am mi smra yang rung ste/ mnyam par gzhag par gnas pa dang zhi bar gnas pa mi 'dor ro//de lag pa mi rgod pa dang / rkang pa mi rgod pa dang / mu cor mi smra ba dang / tshig 'chal ba med pa dang / dbang po mi g.yeng ba dang / mi rgod pa dang / yab yab po ma yin pa dang / gzu sems can ma yin pa dang / lus 'khrul pa med pa dang / sems 'khrul pa med pa dang / lus zhi ba dang / ngag zhi ba dang / sems zhi ba dang / dben yang rung mi dben yang rung ste spyod lam bcos pa med pa yin no/ /de bzhin du sbyar te/ chog shes pa dang / gso sla ba dang / dgang sla ba dang / 'grogs na bde ba dang / cho ga dang spyod yul bde ba dang / 'du 'dzi'i nang na yang spyod yul dben pa dang /rnyed pa dang ma rnyed pa la yang mnyam zhing 'gyur ba med pa yin/ khengs pa med cing 'dud pa dang / de bzhin du bde ba dang sdug bsngal ba dang / bstod pa dang smad pa dang / snyan pa dang mi snyan pa dang / 'tsho ba dang 'chi ba yang mnyam zhing 'gyur ba med pa yin/ khengs pa med cing 'dud pa dang /de bzhin du dgra dang mdza' bo dang / yid du 'ong ba dang yid du mi 'ong ba dang / 'phags pa dang 'phags pa ma yin pa dang / sgra dang gzugs sdug pa dang mi sdug pa rnams la yang mnyam zhing 'gyur ba med pa yin/ khengs pa med cing 'dud pa yin/ rjes su chags pa dang mi mthun pa dang bral ba yin no//de ci'i phyir zhe na/ 'di ltar chos thams cad rang gi mtshan nyid kyis stong zhing byung ba med pa dang rdzogs pa med pa dang / mngon du grub pa med par mthong ba'i phyir ro zhes rgya cher gsungs so/ /de la yid zhum na dga' ba bsgom pas gzengs bstod par bya'o/ /rgod par gyur na mi rtag pa yid la bya bas rab tu zhi bar bya'o//gnyi ga'i gnyen po'i don du ni/ 'phags pa yul 'khor skyong gis brjod pa'i tshigs su bcad pa dran par bya ste/ sangs rgyas 'jig rten phan pa drang srong che/ /bskal pa bye mang brgya lam 'byung bar 'gyur/ /da lta dal ba dam pa rnyed pa la/ /gal te thar 'dod bag med spong bar gyis//zhes gsungs so/ /de bzhin du/ 'di ni sgyu ma lta bur bden pa min/ /'dus byas rmi lam mtshungs par brtags nas ni/ /'di ni rtag tu sdug pa thams cad dang / /myur du 'bral bar mi 'gyur gang yang med/ /pha rol phyin dang sa dang stobs rnams la/ /rtag tu brtson par gyis la 'bad par gyis//rdul med byang chub sangs rgyas ma gyur par/ /brtson 'grus nams kyang nyams par gyur ta re/ /zhes gsungs so/ /'phags pa rgya cher rol pa'i mdo las kyang / srid gsum rga dang nad kyi sdug bsngal 'bar/ /'di ni 'chi med rab 'bar mgon med pa//srid las 'byung la 'gro ba rtag tu rmongs/ /bum par chud pa'i bung ba 'khor ba bzhin/ /srid gsum mi brtan ston ka'i sprin dang 'dra/ /'gro ba'i skye 'chi gar la lta dang mtshungs/ /'gro ba'i tshe 'gro nam mkha'i glog 'dra ste/ /ri gzar 'bab chu lta bur myur mgyogs 'gro/ /srid sred ma rig dbang gis skye bo rnams//mi dang lha gnas ngan song lam gsum po/ /'gro ba lnga po dag tu mi mkhas 'khor/ /dper na rdza mkhan 'phang lo 'khor ba bzhin/ /rtag tu gzugs sdug mchog dang sgra snyan dang / /dri zhim ro mchog reg pa bde byed pa/ /dus ngan rnyi la 'gro ba 'di dag thogs/ / dper na rngon pa'i rnyi la spre'u thogs bzhin/ /'dod pa'i yon tan mya ngan gnod pa mang / /'jigs bcas rtag tu dgra byed nyon mongs bcas/ /ral gri'i sa 'dra dug sdong lo ma mtshungs/ /ngan skyugs snod ltar 'phags pa'i skye bos spangs/ /'dod pa'i yon tan 'jigs bcas nyon mongs bcas/ /rtag tu dran pa brjed byed mun pa byed//rtag tu 'jigs pa'i rgyu byed sdug bsngal rtsa/ /srid pa'i sred pa'i 'khri shing 'phel bar byed/ /ji ltar me 'bar 'obs nas 'jigs bcas pa/ /de ltar 'dod 'di 'phags pa'i skye bos rig /'dam rdzab che 'dra ral gri gshegs gnas 'dra/ /ral gri'i so la sbrang rtsis bskus dang mtshungs//ji ltar sbrul gyi mgo dang ngan skyugs snod/ /de ltar 'dod 'di mkhas pa rnams kyis rig /bya sha kham bu 'dra zhing gsal shing 'dra/ /ro la khyi ltar dgra dang bcas pa yis / /'dod pa'i yon tan 'di dag chu zla 'dra/ /gzugs brnyan mtshungs shing brag ca 'dra ba dang / / mig yor 'dra zhing gar la lta 'dra dang / /rmi lam mnyam par 'phags pa'i skyo bos rig /'dod pa'i yon tan skad cig ya ma brla/ /sgyu ma smig rgyu 'dra zhing brdzun pa can/ /chu bur dbu ba lta bur yang dag min/ /yongs su brtags las byung bar mkhas pas rtogs / /na tshod thog mar gzugs mchog 'dzin pa'i tshe//phangs shing sdug 'dod 'di ni byis pa'i spyod/ /rga na sdug bsngal gzi brjid lus bcom nas/ /rnam par spangs te ri dgas klung skam bzhin/ /nor 'bru dam pa rdzas mang stobs ldan tshe/ /phangs shing sdug 'dod 'di ni byis pa'i spyod/ /nor nyams sdug bsngal bar ni gyur pa'i tshe//rnam par spangs te mi yis 'phrog stong bzhin/ /ji ltar me tog shing dang 'bras bcas shing / /de ltar sbyin 'dod mi la dga' bar byed/ /nor nyams rga bas nyen cing spong byed pa/ /de dag dga' bar mi 'gyur bya rgod bzhin/ /rdzas ldan gzugs mchog ldan tshe dpon po bzhin//phrad na sdug cing dbang po dga' bar byed/ /rga na sdug bsngal nyen cing nor zad pa/ /de tshe 'dod par mi 'gyur 'chi bdag bzhin/ /rga bas rga byas na tshod yal gyur na/ /sdong po gnam lcags kyi ni bcom pa bzhin/ /rga bas 'khogs na 'jigs bcas khang rul 'dra/ /rga las 'byung ba thub pa myur du smros//bud med skyes pa'i tshogs rnams rga bas skyems / /'khri shing sA la'i nags la rlung dmar bzhin/ /rga bas brtson 'grus rtsal dang shugs 'phrog ste/ /dper na skyes bu 'dam du bying ba bzhin/ /rga bas gzugs sdug gzugs ni mi sdug byed/ /rga bas gzi brjid 'phrog cing mthu stobs 'phrog /rga bas bde ba 'phrog cing brnyas par byed/ /rga bas 'chi byed rga bas mdangs kyang 'phrog /nad brgya mang dang nad 'thibs sdug bsngal gyis/ /'gro ba gces te mi yis ri dgas bzhin/ /rga dang na bas bcom pa'i 'gro ltos la/ /sdug bsngal gyis ni 'byung ba myur shod cig /dper na dgun smad rlung dang kha ba che//rtsi shing gel pa nags sman mdangs kyang 'phrog /de ltar nad 'di 'gro ba'i mdangs 'phrog cing / /dbang po gzugs dang stobs ni nyams par byed/ /nor 'bru nor chen tha mar zad par byed/ /nad ni rtag tu 'gro ba brnyas par byed/ /gnod pa byed cing sdug la sdang bar byed//yongs su gdung byed mkha' las nyi ma bzhin/ /'chi dang 'pho dang 'chi 'pho dus byed pa/ /phangs shing sdug pa'i skye bo rtag tu 'bral / /phyir mi 'ong zhing phrad par 'gyur ma yin/ /shing las lo 'brul 'dra zhing rlung rgyun mtshungs / /'chi ba dbang yod pa dag dbang med byed/ /'chi bas 'phrog byed chu bos shing ded bzhin//mi ni gnyis min grogs med gcig pur 'gro/ /rang las 'bras bu ldan pas dbang yang med/ /'chi bas srog chags brgya phrag mang 'dzin te / /'byung po'i tshogs la rgya mtsho'i chu srin bzhin/ /klu la mkha' lding glang chen seng ge 'dra/ /rtsa rtsi 'byung po'i tshogs la me dang mtshungs//zhes gsungs so/ /rgyal po la gdams pa'i mdo las kyang / /rgyal po chen po 'di lta ste dper na phyogs bzhi nas ri chen po sra ba/ /brtan pa/ snying po dang ldan pa/ ma zhig pa/ ma gas pa/ 'phan med pa/ shin tu mkhregs pa gcig tu stug po bzhi/ gnam la reg cing sa zlog ste/rtswa dang shing gel pa dang yal ga dang lo ma thams cad dang / sems can srog chags 'byung po thams cad phye mar 'thag cing 'ong ba de dag las ni/ mgyogs par 'bros pa'am/ stobs kyis bzlog pa'am/ nor gyis bzlog pa'am/ rdzas dang sngags dang sman rnams kyis bzlog par sla ba ni ma yin no//rgyal po chen po de bzhin du/ 'jigs pa chen po bzhi po 'di dag 'ong ste/ de dag las mgyogs pas 'bros pa'am/ stobs kyis bzlog pa'am/ nor gyis bzlog pa'am/ rdzas dang sngags dang sman rnams kyis bzlog par sla ba ma yin no/ /bzhi gang zhe na/ rga ba dang / nad dang / 'chi ba dang / rgud pa'o/ /rgyal po chen po de rga ba ni dar la bab pa 'joms shing 'ong / nad ni nad med pa 'joms shing 'ong / rgud pa ni phun sum tshogs pa thams cad 'joms shing 'ong / 'chi ba ni srog 'joms shing 'ong ste/ de dag las ni mgyogs pas 'bros pa'am/ stobs kyis bzlog pa'am/ nor gyis bzlog pa'am/rdzas dang sngags dang sman rnams kyis zhi bar sla ba ma yin no/ /rgyal po chen po 'di lta ste/ dper na ri dgas kyi rgyal po seng ge ri dgas kyi tshogs kyi nang na bzhugs nas ri dgas bzung ste ji ltar 'dod pa bzhin du bya ba byed do/ /ri dgas de ni stobs po che'i kha mi bzad pas bzung bas dbang med par 'gyur ro//rgyal po chen po de bzhin du 'chi bdag gi gsal shing gis zug ste/ rgyags pa dang ni bral/ mgon ni med skyabs ni med/ dpung gnyen ni med/ gshis ni 'jigs / tshigs ni 'bye 'bral/ sha dang khrag ni skam / lus ni nad kyis gdungs skom ni skom/bzhin ni 'gyur/ rkang lag ni g.yo ba/ las ni mi nus/ mthu ni med/ kha chu dang snabs dang gcin dang ngan skyugs kyis ni lus la gos/ mig dang rna ba dang sna dang lce dang lus dang yid kyi dbang po dag ni 'gag /skyigs bu ni 'byung / sgra ngar ngar po ni 'thon/ sman pas ni bor/ / sman dang kha zas dang bza' ba dang thug pa thams cad kyis ni kles la bor te/ 'gro ba gzhan dag tu 'gro bar mal gyi tha ma la ni nyal/ thog ma med pa'i skye ba dang rga ba dang na ba dang 'chi ba'i 'khor ba'i rgyud du ni nub/ srog ni cung zad cig las/ gshin rje'i mis ni 'jigs skrag /byur gyi dbang du ni song //dbugs rgyu ba ni chad / kha dang sna ni gdangs/ so ni gtsegs/ sbyin pa sbyin no zhes de skad gsol ba ni 'debs/ las kyi srid pa nas yang srid pa la ni 'jug /gcig pu gnyis su med cing grogs ni med de/ 'jig rten 'di ni 'dor/ 'jig rten pha rol du ni 'gro/ /skyas chen po ni 'debs/mun pa chen por ni zhugs/ g.yang sa chen por ni ltung / khrod stug por ni 'jug /dgon pa chen por ni 'gro/ /rgya mtsho chen pos ni khyer/ las kyi rlung gis ni bdas/ sa tshugs med pa'i phyogs su ni 'gro/ /g.yul ngo chen por ni 'jug /gdon chen pos ni zin/ nam mkha' la ni 'chel/pha ma dang phu nu dang / sring mo dang bu dang bu mos ni bskor/ dbugs ni 'chad/ nor la bgo bsha' bya zhes ni zer/ kyi hud ma kyi hud pha kyi hud bu zhes ni zer/ skra ni zhig ste/ sbyin pa dang dka' thub dang chos 'ba' zhig grogs su gyur pa na chos ma gtogs par skyabs gzhan med/ mgon gzhan med gnas gzhan med dpung gnyen gzhan med do/ /rgyal po chen po de'i tshe de'i dus na/ chos ni gling dang gnas dang mgon dang skyabs dang dpung gnyen dang ston par 'gyur ro/ /rgyal po chen po 'di lta ste dper na/ grang bas nyen pa la me dang / mes rab tu gdungs bar gyur pa la me gsod pa dang /tsha bas nyen pa la bsil ba dang / 'gron po ngal ba la grib ma dang rlung bsil ba dang / lam du zhugs pa la bzhon pa dang / nyal ba la mal 'jam po dang / skom pa la chu grang mo dang / shin tu bkres pa la zas bzang po dang / mya ngan gyis non pa la dbugs 'byin pa dang /gdungs pa la sim par byed pa dang / dgon par lam stor ba la lam mtshon par byed pa dang / nad kyis btab pa la sman pa dang sman dang nad g.yog byed pa dang / chus khyer ba la gzings dang / 'dam du bying ba la 'ju sa dang / rgal dka' ba la zam pa dang / nyam nga ba la 'bab stegs dang /mun khung na sgron me dang / rgya mtsho chen po la gru dang / lhags pas nyen pa la rlung med pa'i gnas dang / yul gzhan du 'gro ba'i lam rgyags dang / dbul po la nor dang / byed par 'dod pa la grogs dang / gcad par 'dod pa la lag ca dang / gzhig par 'dod pa la rdo rje dang /g.yul ngor zhugs pa la go cha dang / 'jigs pa la stobs dang ldan pa'i grogs dang / 'thab pa la dpung gnyen dang / dog pa la go 'byed pa dang / mu ge la nor dang ldan pa dag mgon dang skyabs dang gnas dang rten du 'gyur ba de bzhin du/ rgyal po chen po 'chi bdag gi gsal shing gis zug ste/rgyags pa dang ni bral/ mgon ni med/ skyabs ni med/ dpung gnyen ni med/ gshis ni 'jig /tshigs ni 'bye 'bral/ sha dang khrag ni skam / lus ni nad kyis gdung / skom ni skom/ bzhin ni 'gyur/ rkang lag ni g.yob/ las ni mi nus/ mthu ni med/ kha chu dang / snabs dang gcin dang ngan skyugs kyis ni lus la gos/ mig dang / rna ba dang / sna dang / lce dang lus dang yid kyi dbang po dag ni 'gag /skyigs bu ni 'byung / sgra ngar ngar po ni 'thon/ sman pas ni bor/ sman dang kha zas dang bza' ba dang / thug pa thams cad kyis ni kles la bor te/ 'gro ba gzhan dag tu 'gro bar mal gyi tha ma la ni nyal/thog ma med pa'i skye ba dang rga ba dang 'chi ba'i 'khor ba'i rgyud du ni nub/ srog ni cung zad cig las / gshin rje'i mis ni 'jigs skrag /byur gyi dbang du ni song / dbugs rgyu ba ni 'chad/ kha dang sna ni gdangs/ so ni gtsegs/ sbyin pa ni sbyin no zhes de skad gsol ba ni 'debs/las kyi srid pa nas yang srid pa la ni 'jug /gcig pu gnyis su med cing grogs ni med de/ 'jig rten 'di ni 'dor/ 'jig rten pha rol du ni 'gro/ /skyas chen po ni 'debs/ mun pa chen por ni zhugs/ g.yang sa chen por ni ltung /khrod stug por ni 'jug /dgon pa chen por ni 'gro/ /rgya mtsho chen pos ni khyer/ las kyi rlung gis ni bdas/ sa tshugs med pa'i phyogs su ni 'gro ba na chos ma gtogs par mgon gzhan med/ skyabs gzhan med/ dpung gnyen gzhan med do/ /rgyal po chen po chos ni de'i tshe de'i dus na/gling chen po dang gnas dang mgon dang skyabs dang dpung gnyen dang ston par 'gyur ro/ /rgyal po chen po de'i tshe/ 'di snyam du sems te/ kyi hud gang du 'gro bar 'gyur/ phyogs gar 'gro bar 'gyur/ gang du yongs su 'dzin par byed par 'gyur/ bdag gi mar ni su zhig 'gyur snyam pa las/des sems can dmyal bar skye bar mthong bar 'gyur na 'di lta ste/ mnar med pa dang / tsha ba dang / rab tu tsha ba la sogs pa'i sems can dmyal ba rnams su lo mang po lo brgya phrag mang po lo brgya stong phrag mang por sdug bsngal chen po sdug bsngal mi bzad pa drag pa rtsub pa yid du mi 'ong ba'i tshor ba myong ste/ji srid du sems can dmyal ba myong bar 'gyur ba'i sdig pa mi dge ba'i las thams cad kyi thams cad du zad cing byang bar ma gyur pa de srid du 'chi ba'i dus byed par mi 'gyur ro/ /de dud 'gro'i skye gnas su skye ba mthong bar gyur na/ 'di lta ste/ rgya mtsho chen po'i nang du nya rlon dang nya rlon mid la sogs pa srog chags gcig gis gcig gsod pa dang 'tshe ba dang dbang med par skye'o//bdag yi dwags kyi nang du skye bar mi 'gyur ram snyam na/ 'di lta ste/ lo mang po dang lo brgya phrag mang po dang lo brgya stong phrag mang por chu'i sgra yang mi thos na mthong ba lta ci smos par 'gyur ro//rgyal po chen po de lta bas na khyod kyis mi rtag par blta zhing zad pa dang dengs par blta bar bya ste/ 'chi bas 'jigs skrag par bya'o/ /chos kyis rgyal srid kyis shig /chos ma yin pas ni mi bya'o/ /khyod chos dang mthun par gyis shig /chos ma yin pa dang mthun par ni mi bya'o//de ci'i phyir zhe na/ rgyal po chen po khyod kyi lus 'di/ 'di ltar legs par yongs su bsrungs legs par yongs su btsas pa yang 'chi ba'i dus byed par 'gyur ro/ /yon tan thams cad dang ldan zhing shin tu yun ring por bza' ba dang / bca' ba dang myang ba dang ngoms par 'gyur ba bsod pa dang gtsang ma mang pos tshim par byas te bskyed bskyed pa yang tha ma'i mal na 'dug pa'i tshe/sman pas bor zhing sman dang kha zas dang bza' ba dang thug pas kyang kles la bor nas bkres pa dang skom pas nyen cing yid mi bde bar 'chi ba'i dus byed par 'gyur ro/ /rgyal po chen po 'di ltar khyod kyis lus bkrus shing bskus te bdug pas bsgos me tog dri zhim pos bsgos kyang /gdon mi za bar 'chi ba'i dus su rang bzhin gyis lhan cig skyes pa'i dri nga ba 'byung bar 'gyur ro/ /rgyal po chen po 'di ltar gos yul ka shi pa'i ras dang / srin bal dang / du gu la dang / dar dang / 'dab ma dang / bal dang / gso ras la sogs pa'i gos kyi bye brag gis g.yogs kyang tha ma'i mal na 'dug pa'i tshe/ snum rnam pa mang po dang chus reg cing gos dri ma can gon zhing 'chi ba'i dus byed par 'gyur ro/ /rgyal po chen po khyod de ltar bud med kyi nang na 'dug btsun mo'i 'khor gyi nang na 'dug ste/bud med kyi tshogs kyis bskor zhing gar dang glu dang rol mo dang sil snyan byed/ pheg rdob pi bang dang gling bu len/ rnga rdung zhing yid bde bar rtse dga' zhing dga' mgur spyod pa yang 'chi bas 'jigs skrag nas shin tu yid mi bde zhing 'chi ba'i dus byed par 'gyur ro/ / rgyal po chen po 'di ltar khyod kyi khyim gyi nang na spos dri zhim po'i [(]bskubs [,]bsku bas [)]ni bskus/ gtan pa ni bcug /skar khung ni legs par bcad/ byug pa mang pos ni byugs / 'bru mar dri zhim po dang ldan pa'i mar me ni 'bar/ dar gyi lnga ldi mang po ni bres/ me tog dri zhim po'i sil ma mang pos ni chal bar bkram /pog phor nas ni bdugs/ khri'i rtsa ba gser dang dngul dang bai DUr+ya las ni byas/ pa ti ka dang / dre'u rdog gi stan dang / stan nang tshangs can dang / za 'og gi stan dang / yul ka ling ka'i stan dang / steng du gding ba dang / de'i steng du gding bas ni bkab/ g.yas g.yon du dar mang po'i sngas ni bzhag pa'i khri la nyal ba yang bya rog dang bya rgod dang / wa dang / ro dang / sha dang / rus pa dang / skra dang / khrag dang / zhag dang / chu ser dang rnag gi gnas mchog tu 'jigs su rung ba'i dur khrod chen por bor nas lus g.yo ba med cing sa la nyal du gdon mi za'o//rgyal po chen po 'di ltar yang khyod glang po che'i bya la kha'am rta'i rgyab bam shing rta la zhon te/ dung dang rnga dang rdza rnga dang / 'khar rnga dang / rol mo'i sil snyan gyi bye brag len pa dang / gdugs dang rgyal mtshan dang ba dan dang rnam par rgyal ba'i ba dan ni bsgreng /bsil yab nor bu'i yu ba can dang / rnga yab dang shing tA la las byas pa ni g.yob cing / glang po che dang rta pa dang dpung bu chung du ma ni phyi bzhin 'brang / rgyal bu dang bram zes bslab pa phog pa'i blon po dang mdun na 'don pa dang skye bo thal mo sbyar ba brgya stong du mas ni phyag bya zhing rgyal bar spyon cig rgyal bar spyon cig ces snyan pa brjod de phyir 'byung myong ba yang ring por mi thogs par g.yo ba med cing mal du shi nas mi bzhis bteg ste/pha dang ma dang phu nu dang sring mo dang chung ma dang bu pho dang bu mo dang / bran pho dang bran mo dang / las byed pa dang / zho shas 'tsho ba dang / chal za ba dang /blon po dang / grong khyer ba'i skye bo dag mya ngan gyi dbang du song ste/ lag pa bteg nas brang rdung zhing mchog tu snying rje bar/ kyi hud bu kyi hud mgon po kyi hud phu bo kyi hud jo bo zhes ngu zhing / zham 'bring ba dang grong khyer pa'i skye bo dag gis 'jigs pa dang bcas par mthong ste/ grong khyer gyi lho phyogs kyi sgor phyung nas/sa'i 'og tu bcug gam/ 'brog dgon par sa'i nang du bcug kyang / bya rog dang bya rgod dang wa la sogs pas zos shing / rus pa de dag mes bsregs sam chur bskyur ram sa'i 'og tu bcug kyang rlung dang nyi ma dang char pas phye mar byas te/ phyogs phyogs su gtor zhing de nyid du rul par 'gyur ro//rgyal po chen po de ltar sems can thams cad kyi lus kyang 'di bzhin du 'gyur ro/ /rgyal po chen po 'du byed thams cad ni de ltar mi rtag pa de ltar mi brtan pa zhes rgya cher gsungs so/ /de la nyon mongs pa ni gtsor 'dod chags dang zhe sdang dang gti mug rnams te/de dag gi nang nas gang la mchog tu gnod par byed pa'i gnyen po gang yin pa de thog mar bsgom zhing de'i gzhi yang yongs su spang bar bya'o/ /de la re zhig 'phags pa dkon mchog sprin las/ de 'dod chags kyi gnyen po la brten cing 'dod chags skye ba'i rkyen rnams yongs su spong ngo //'dod chags kyi gnyen po de ni gang / 'dod chags skye ba'i rkyen de dag ni gang zhe na/ mi sdug pa bsgom pa ni 'dod chags kyi gnyen po'o/ /yul gyi bzang mo ni 'dod chags skye ba'i rkyen no/ /mi sdug pa bsgom pa de yang gang zhe na/ 'di lta ste/ lus 'di la skra dang spu dang sen mo dang so dang rdul dang /dri ma dang / pags pa dang sha dang rus pa dang rgyus pa dang rtsa dang mkhal ma dang snying dang mchin pa dang glo ba dang rgyu ma dang gnye ma dang pho ba dang sul mangs dang long ka dang mcher pa dang phyi sa dang mchil ma dang rdul dang snabs dang ngar snabs dang zhag dang chu ser dang rkang dang tshil dang mkhris pa dang bad kan dang rnag dang khrag dang klad pa dang klad rgyas dang gcin dag yod de/dngos po de dag la byang chub sems dpa' yongs su rtog pa'i rang bzhin can yin te/ yongs su rtog pa'i rang bzhin can de 'di snyam du byis pa blun po mi gsal ba mi mkhas pa de yang dngos po 'di dag shes nas 'dod chags kyi sems mi skye na shes rab dang ldan pa'i rang bzhin can lta smos kyang ci dgos snyam ste/de ltar na byang chub sems dpa' mi sdug pa mang du bsgom pa yin no zhes gsungs so/ /bcom ldan 'das ma las kyang / gzhan yang byang chub sems dpa' sems dpa' chen po shes rab kyi pha rol tu phyin pa la spyod pa na/lus 'di yang dag pa ji lta ba bzhin du rab tu shes so/ /rab 'byor 'di lta ste dper na ba lang gi shan pa'am ba lang gi shan pa'i slob mas ba lang bsad de gri rnon pos bag bzhir gshegs nas 'greng ngam 'dug ste so sor rtog go/ /rab 'byor de bzhin du byang chub sems dpa' sems dpa' chen po shes rab kyi pha rol tu phyin pa la spyod pa na yang /lus 'di la yod pa ni sa'i khams dang chu'i khams dang me'i khams dang rlung gi khams so zhes lus 'di la khams kyis yang dag pa ji lta ba bzhin du so sor rtog go zhes bya ba nas/ de bzhin du sbyar te/ rab 'byor 'di lta ste dper na/ chun pa'i rdzas / 'bras sA lu dang / 'bru dang / til dang / 'bras dang / mon sran sde'u dang / mon sran gre'u dang / nas dang / gro dang / sran chung dang / yungs kar dang / 'bru sna tshogs kyis gang ba de dag la/ skyes bu mig dang ldan pas brtags na/'di ltar 'di dag ni 'bras sA lu'o/ /'di dag ni 'bru'o/ /'di dag ni til lo/ /'di dag ni 'bras so/ /'di dag ni mon sran sde'u'o/ /'di dag ni mon sran sde'u'o/ /'di dag ni nas so/ /'di dag ni gro'o/ /'di dag ni sran chung ngo / /'di dag ni yungs kar ro zhes bya bar shes so/ /rab 'byor de bzhin du byang chub sems dpa' sems dpa' chen po yang /shes rab kyi pha rol tu phyin pa la spyod pa na/ lus 'di la rkang mthil yan chad klad rgyas man chad sen mo dang spu dang pags pa la thug pa mi gtsang ba rnam pa sna tshogs kyis gang ba ste/ lus 'di la yod pa ni skra dang / spu dang klad pa dang klad rgyas dang mig gi rngu ma dang rna spabs kyi bar dag go zhes snga ma ltar yang dag pa ji lta ba bzhin du so sor rtog go/ /de bzhin du sbyar te/ rab 'byor gzhan yang byang chub sems dpa' dur khrod du song ste / dur khrod du bor ba ro'i gnas su bskyal ba shi nas zhag gcig lon pa'am/ shi nas zhag gnyis lon pa'am/ shi nas zhag gsum lon pa'am/ shi nas zhag bzhi lon pa'am/ shi nas zhag lnga lon pa'am/ rnam par bam pa'am/ rnam par bsngos pa'am/ rnam par rnags pa'am/ rnam par 'bus gzhigs pa'i ro sna tshogs mthong na/ de lus 'di yang de lta bu'i rang bzhin can no//de lta bu'i chos can no/ /chos nyid 'di las ma 'das pa'o zhes lus 'di la yang de dang sbyor ro/ /rab 'byor de ltar na byang chub sems dpa' sems dpa' chen po shes rab kyi pha rol tu phyin pa la spyod pa na/ de lus la lus kyi rjes su lta zhing gnas so/ /de bzhin du sbyar te/gzhan yang gang gi tshe shi ba'i ro dur khrod du bor ba/ shi nas zhag drug lon pa'am/ shi nas zhag bdun lon pa'am/ bya rog gis btogs pa'am / ne'u le'am/ bya rgod dam/ khyi'am/ ce sbyang ngam/ de las gzhan pa srog chags rnam pa sna tshogs kyis za ba mthong na de lus 'di yang de lta bu'i rang bzhin can/de lta bu'i chos can no/ /chos nyid 'di las ma 'das pa'o zhes lus 'di yang de dang sbyar ro/ /de bzhin du sbyar te/ gzhan yang gang gi tshe shi ba'i ro dur khrod du bor na/ rnam par zos pa/ mi gtsang ba/ dri nga ba mthong na/ de lus 'di yang de dang sbyar ro zhes bya ba snga ma bzhin no//gzhan yang gang gi tshe/ dur khrod na keng rus dang / sha dang khrag ra ri chags pa chu rgyus brang breng thogs pa mthong na/ de lus 'di yang de dang sbyar ro zhes bya ba snga ma bzhin no/ /gzhan yang gang gi tshe/ dur khrod na keng rus su gyur pa sha dang khrag dang chu rgyus med pa mthong na/de lus 'di yang zhes bya ba snga ma bzhin no/ /gzhan yang gang gi tshe dur khrod na rus pa phyogs dang phyogs mtshams su 'thor ba 'di lta ste/ rje ngar gyi rus pa yang gzhan na/ brla'i rus pa yang gzhan na/ 'dong mo yang gzhan na/ sgal tshigs kyang gzhan na/ rtsib ma yang gzhan na/mjing tshigs kyang gzhan na/ dpung pa'i rus pa yang gzhan na 'dug pa mthong na/ de lus 'di yang de lta bu'i rang bzhin can no/ /de lta bu'i chos can no/ /chos nyid 'di las ma 'das pa'o zhes lus 'di yang de dang sbyar ro/ /de bzhin du sbyar te/ rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa na/dur khrod na rus pa lo du ma lon pa rlung dang nyi mas gdugs pa dkar ba dung lta bu mthong na/ de lus 'di yang de lta bu'i rang bzhin no/ /de lta bu'i chos can no/ /chos nyid 'di las ma 'das pa'o zhes lus 'di yang de dang sbyar ro//rab 'byor gzhan yang byang chub sems dpa' sems dpa' chen po shes rab kyi pha rol tu phyin pa spyod pa na/ dur khrod rus pa lo du ma lon pa thi ba'i mdog ltar sngo ba sob sob por gyur pa zegs pa sa la rdul dang mtshungs shing mnyam par gyur pa mthong na/ de lus 'di yang de lta bu'i rang bzhin no/ /de lta bu'i chos can no/ /chos nyid 'di las ma 'das pa'o zhes lus 'di yang de dang sbyar ro zhes gsungs so/ /'di ni re zhig 'dod chags la kun du spyod pa'i gnyen po mdor bsdus pa'o/ /zhe sdang gi gnyen po ni byams pa dang mi sdug pa'i sems can mi mthong ba'am de dang lhan cig tu zas la sogs pa don gcig pas dga' ba skye'o//de la gzhan la bde ba 'dod pa dang don du gnyer ba dang mos pa dang mngon par dga' ba ni byams pa ste/ 'dod pa la 'dod chags dang lan du phan 'dogs pa'i rgyu dag las nyon mongs pa can ma yin pa'i chags pa zhes bya ba'i tha tshig go//de ni rnam pa gsum ste/ 'phags pa blo gros mi zad pa'i mdo las/ sems can la dmigs pa'i byams pa ni sems dang po bskyed pa'i byang chub sems dpa' rnams kyi'o/ /chos la dmigs pa'i byams pa ni spyod pa la zhugs pa'i byang chub sems dpa' rnams kyi'o//dmigs pa med pa'i byams pa ni mi skye ba'i chos la bzod pa thob pa'i byang chub sems dpa' rnams kyi'o zhes gsungs so/ /yang sangs rgyas la dmigs pa dang / byang chub sems dpa' la dmigs pa dang / nyan thos dang rang sangs rgyas la dmigs pa dang /sems can la dmigs pa'o/ /de la sems can la dmigs pa ni gang thog mar snying du sdug pa'i sems can la phan pa dang bde ba nye bar bsgrub par bsam par goms par byed cing de dang mthun pa'i byams pa nye bar bsgrub po / /de'i 'og tu 'dres pa rnams la'o//de'i 'og tu tha mal pa rnams la'o/ /de'i 'og tu nye 'khor ba rnams la'o/ /de'i 'og tu rang gi grong na gnas pa rnams la'o/ /de bzhin du gzhan gyi grong pa nas phyogs gcig gi bar du mos par byas te khyab par byas nas rdzogs par byas te gnas so/ /phyogs bcur yang de bzhin no//sangs rgyas la sogs pa la dmigs pa la ni sbyor ba 'di med de/ de ni rdo rje rgyal mtshan gyi yongs su bsngo ba las/ de byang chub sems dpa'i spyad pa spyod pa na/ gzugs yid du 'ong ba'am yid du mi 'ong ba gang ji snyed cig mthong ba dang / de bzhin du sgra dang dri dang ro dang reg bya dang chos yid du 'ong ba'am/yid du mi 'ong ba'am kha na ma tho ba med pa dag la bde ba rgya che ba 'od gsal ba'am/ gang gis yid bde ba skye ba dang / bde ba bsgrub pa dang / dad pa skye pa dang / dga' ba 'byung ba dang / mchog tu dga' ba la gnas pa dang / mgu ba 'byung ba dang / yid mi bde ba ldog pa dang / sems dge ba 'byung ba dang / sems las su rung bar 'gyur ba dang / bsam pa mnyen par 'gyur ba dang / dbang po rab tu tshim par 'gyur ba'i bde ba de myong ba na/ sangs rgyas thams cad la 'di ltar yongs su bsngo ste/ yongs su bsngo ba 'dis sangs rgyas bcom ldan 'das de dag de bas kyang sangs rgyas kyi gnas pa'i bde ba bsam gyis mi khyab pa dang ldan par gyur cig /sangs rgyas kyi ting nge 'dzin gyi bde ba mtshungs pa med pas legs par zin par gyur cig /sangs rgyas kyi bde ba mtha' yas pas rgya cher brtan par gyur cig / sangs rgyas kyi rnam par thar pa'i bde ba tshad med pa dang ldan par gyur cig /sangs rgyas kyi cho 'phrul gyi bde ba dpag tu med pas legs par zin par gyur cig /sangs rgyas kyi gnas pa chags pa med pa'i bde ba bsam gyis mi khyab pas legs par yongs su zin par gyur cig /sangs rgyas kyi khyu mchog tu gyur pa'i bde ba bsnyen par dka' ba rgyun mi 'chad par gyur cig /sangs rgyas kyi stobs kyi bde ba dpag tu med pas shin tu bde bar gyur cig /tshor ba thams cad zhi bar mi skye ba'i bde bas 'gyur ba med par bde bar gyur cig /de bzhin gshegs pa'i bde ba'i chags pa med par gnas par rtag tu mnyam par gzhag pa gnyis su kun du mi spyod pas rnam par mi 'khrugs par bde bar gyur cig /byang chub sems dpas de ltar dge ba'i rtsa ba de de bzhin gshegs pa rnams la yongs su bsngos nas byang chub sems dpa' rnams la yongs su bsngo ste/ gang 'di bsam pa yongs su ma rdzogs pa rnams kyi bsam pa yongs su rdzogs par bya ba dang /thams cad mkhyen pa'i lhag pa'i bsam pa yongs su ma dag pa rnams yongs su dag par bya ba dang / pha rol tu phyin pa thams cad yongs su rdzogs pa yongs su rdzogs par bya ba dang / byang chub kyi sems bskyed pa rdo rje lta bu'i gnas su bya ba dang thams cad mkhyen pa las phyir mi ldog pa'i go cha rgyun mi gcad pa dang /byang chub kyi sgo'i dge ba'i rtsa ba rnams bskyed pa dang / 'gro ba thams cad la mnyam pa nyid du gnas pa'i smon lam chen po yongs su rdzogs par bya ba dang / byang chub sems dpa'i gnas pa thams cad rtogs par bya ba dang /byang chub sems dpa'i dbang po thams cad mngon par shes pa rno bar bya ba dang / byang chub sems dpa'i dge ba'i rtsa ba thams cad thams cad mkhyen pa nyid du reg par bya ba'i phyir yongs su bsngo'o/ /de de ltar byang chub sems dpa' rnams kyi don du dge ba'i rtsa ba yongs su bsngos nas/sangs rgyas kyi bstan pa la spyod pa dang nyan thos dang rang sangs rgyas thams cad la dge ba'i rtsa ba de 'di ltar yongs su bsngo ste/ sems can gang la la dag se gol cig gtogs pa srid du sangs rgyas kyi sgra nyan pa'am/chos kyi sgra nyan pa'am/ 'phags pa'i dge 'dun la bsnyen bkur byed pa de dag gi dge ba'i rtsa ba de/ bla na med pa yang dag par rdzogs pa'i byang chub tu yongs su bsngo'o/ /sangs rgyas rjes su dran pa yongs su rdzogs par bya ba'i phyir yongs su bsngo'o/ /chos rjes su dran pa la sbyor bar bya ba'i phyir yongs su bsngo'o//'phags pa'i dge 'dun la gus par bya ba'i phyir yongs su bsngo'o/ /sangs rgyas mthong ba dang mi 'bral bar bya ba'i phyir yongs su bsngo'o/ /sems yongs su dag par bya ba'i phyir yongs su bsngo'o/ /sangs rgyas kyi chos rab tu rtogs par bya ba'i phyir yongs su bsngo'o//yon tan dpag tu med pa bsgrub par bya ba'i phyir yongs su bsngo'o/ /mngon par shes pa thams cad kyi dge ba yongs su dag par bya ba'i phyir yongs su bsngo'o/ /chos la yid gnyis zlog pa'i phyir yongs su bsngo'o/ /ji ltar sangs rgyas kyi bsten pa la zhugs pa rnams dang nyan thos dang rang sangs rgyas rnams la yongs su bsngo ba de bzhin du/byang chub sems dpa' de sems can thams cad la dge ba'i rtsa ba de yongs su bsngo ste/ gang 'di sems can dmyal ba pa'i lam las bzlog pa'i phyir yongs su bsngo'o/ /dud 'gro'i skye gnas rnam par gcad pa'i phyir yongs su bsngo'o//gshin rje'i 'jig rten nye bar gcad pa'i bde ba'i phyir yongs su bsngo'o/ /ngan song ma lus pa thams cad kyi 'gro bar skye ba rnam par gcad pa'i phyir yongs su bsngo'o/ /de bzhin du sbyar te/ sems can de dag bla na med pa'i byang chub la mos pa rnam par spel ba'i phyir yongs su bsngo'o//thams cad mkhyen pa nyid kyi sems kyi lhag pa'i bsam pa thob par bya ba'i phyir yongs su bsngo'o/ /sangs rgyas kyi chos thams cad mi spong ba'i phyir yongs su bsngo'o/ /thams cad mkhyen pa nyid kyi shin tu bde ba bsgrub par bya ba'i phyir yongs su bsngo'o//sems can thams cad shin tu rnam par dag par bya ba'i phyir yongs su bsngo'o/ /sems can thams cad ye shes mtha' yas pa rtogs par bya ba'i phyir yongs su bsngo'o/ /de bzhin du sbyar te/ byang chub sems dpa' thams cad mkhyen pa nyid la dmigs pa dang ldan pa/ sems can thams cad la phan pa dang bde ba'i sems dang ldan pa dang / de bzhin du sbyar te/ 'gro ba thams cad yongs su bskyab pa'i yid dang ldan pa dang / dge ba'i rtsa ba la rtag tu brtson pa/ rgyags pa dang bag med pa bzlog pa dang / de bzhin du sbyar te/ nyon mongs pa thams cad la rgyab kyis phyogs pa/byang chub sems dpa' thams cad kyi rjes su slob pa'i sems dang ldan pa/ thams cad mkhyen pa nyid kyi lam dang zhe ma 'gras pa/ ye shes kyi sa la brten pa/ mkhas pa dang 'grogs par dga' ba dang / de bzhin du sbyar te/ bung ba ltar dge ba'i rtsa ba sogs pa 'gro ba thams cad la skyob pa'i rgyu dang ldan pa/'dus byas thams cad la mngon par zhen pa med pa de'i/ gos dang zas dang na ba'i gsos sman dang yo byad dang 'ong ba dang 'gro ba dang / lus kyi bsnyen bkur dang / 'dug pa la sogs pa rten pa'i gnas la 'jug pa'i las dang / spyod lam gyi gnas dang /spyod lam rnam par mi 'khrugs pa dang / lus kyi las dang / ngag gi las dang / yid kyi las legs par spyad pa dang / dbang po drug sdom pa dang / rang gi lus g.yogs pa dang / mnye ba dang bkru ba'i las dang / zos pa dang / 'chos pa dang / myangs pa dang / bskum pa dang /brkyang ba dang / lta ba dang / rnam par lta ba dang / gnyid kyis log pa dang / gnyid kyis log pa dang / rang gi lus su gtogs pa'i bsnyen bkur ci gang yang rung ste/ de thams cad thams cad mkhyen pa nyid du yongs su ma bsngos pa cung zad kyang med do zhes bya ba nas/ rang gi ba rnams dang de las gzhan dud 'gro'i skye gnas su song ba rnams la/ 'bras chan pho tshum gang ngam zan chang cig tsam yongs su gtong pa yang skye ba de dang de dag tu de dag nyid la phan pa dang de dag nyid yongs su dgrol ba'i phyir de thams cad yongs su bsngo'o/ / sems can de dag dud 'gro'i skye gnas de dang sdug bsngal gyi rgya mtsho dang sdug bsngal nye bar len pa de dang sdug bsngal gyi phung po de dang sdug bsngal gyi tshor ba de dang / sdug bsngal nye bar bsags pa de dang / sdug bsngal mngon par 'du byed pa dang / sdug bsngal gyi gzhi dang / sdug bsngal gyi rtsa ba de dang /sdug bsngal gyi gnas de las rnam par bzlog pa'i phyir yongs su bsngo'o/ /de la dmigs pas sems can thams cad la dmigs par byed do/ /sems can rnams la mngon du byed do/ /yid la byed do/ /'di lta ste thams cad mkhyen pa nyid du yongs su sngo bar byed pas dge ba'i rtsa ba de la mngon du 'gro bar byed do//byang chub sems bskyed pas rab tu 'dzin to/ /dge ba'i rtsa ba de la sbyor ro/ /'khor ba'i dgon pa las rnam par zlog go/ /sangs rgyas kyi bde ba sgrib pa med pa mngon du byed do/ /'khor ba'i rgya mtsho las 'byin to/ /sangs rgyas kyi chos dang ldan pa'i byams pas khyab par byed do zhes bya ba la sogs pa gsungs so//gser 'od dam pa las gsungs pa'i byams pa dang snying rje'i snying po can gyi tshigs su bcad pa 'di dag gus pa thams cad kyis bsams te/ tha na tshig gis kyang bsgom par bya'o/ /gser 'od dam pa'i rnga chen sgra yis ni//stong gsum 'jig rten 'jig rten gsum 'di na/ /ngan song sdug bsngal gshin rje'i sdug bsngal dang / /dbul ba'i sdug bsngal sdug bsngal zhi bar shog /rnga bo che yi sgra skad 'di yis ni/ /'jig rten phongs pa thams cad zhi gyur cig /ji ltar thub dbang 'jigs med 'jigs zhi ltar//sems can 'jigs med 'jigs dang bral bar shog /ji ltar 'khor bar kun mkhyen thub dbang po/ /'phags pa'i yon tan kun dang ldan pa ltar/ /skye dgu ting 'dzin byang chub yan lag gi /yon tan ldan zhing yon tan rgya mtshor gyur//rnga bo che yi sgra skad 'di yis ni/ /sems can thams cad tshangs pa'i dbyangs ldan gyur / /sangs rgyas byang chub dam pa mchog reg shog /chos kyi 'khor lo dge ba skor gyur cig /bskal pa bsam gyis mi khyab bzhugs par shog /'gro la phan phyir chos ni ston gyur cig /nyon mongs 'joms 'gyur sdug bsngal sel bar shog /'dod chags zhe sdang gti mug zhi gyur cig /sems can gang dag ngan song sar gnas te/ /rus pa dang ni lus gdungs rab 'bar ba/ /de dag rnga chen bsgrags pa thos gyur nas/ /sangs rgyas phyag 'tshal lo zhes tshig smra shog /sems can kun gyi skye ba brgya dag dang / /skye ba stong phrag bye ba skye dran shog /thub pa'i dbang po rtag tu dran gyur cig /de dag gis ni rgya chen gsung thos shog /rnga bo che yi sgra skad 'di yis ni/ /sangs rgyas rnams dang rtag tu 'grogs rnyed gyur/ /sdig pa'i las rnams rnam par spong bar shog /bya ba dge ba rnams ni spyod gyur cig /de bzhin du sbyar te/ zhing rnams kun na srog chags thams cad kyang / /'jig rten dag na sdug bsngal kun zhi gyur/ /sems can dbang po ma tshang yan lag nyams/ /de kun da ltar dbang po tshang bar shog / gang dag nad btab nyam chung lus nyams dang / /phyogs bcu dag na skyabs med gyur pa rnams/ /de kun myur du nad las thar gyur cig /nad med stobs dang dbang po rnyed par shog /gang dag rgyal po chom rkun shor bas bsdigs bsad 'os/ /sdug bsngal rnam pa sna tshogs brgya yis phongs gyur pa//sems can nyam thag gyur cing sdug bsngal de dag kun/ /'jigs mchog mi bzad brgyad po de las thar gyur cig /gang dag brdegs shing bcings dang bcings pas gzir/ /phongs pa sna tshogs dag na gnas gyur cing / /nyon mongs stong phrag du mas dkrugs nas kyang //'jigs pa mi bzang mya ngan sna tshogs rnyed/ /de dag thams cad bcings las grol gyur cig /mnar ba dag ni brdegs las thar bar shog /gsad bya rnams kyang srog dang ldan gyur shog /phongs gyur thams cad 'jigs pa med par shog /sems can gang dag bkres sred skom gyis gzir//de dag zas skom sna tshogs rnyed par shog /long bas gzugs rnams sna tshogs mthong gyur cig /'on pas yid 'ong sgra rnams thos par shog /gcer bu rnams kyis sna tshogs gos rnyed gyur/ /sems can dbul pos gter rnams rnyed par shog /nor 'bru rin chen sna tshogs mang po yis/ /sems can thams cad bde dang ldan par shog /gang yang sdug bsngal tshor bas gnod ma gyur/ /sems can thams cad blta na sdug pa dang / /gzugs bzang mdzes shing tshul du shis par shog / rtag tu bde ba du ma stsogs gyur cig /yid kyis zas skom rab 'byor bsod nams dag /bsams ma thag tu de dag grub gyur cig /rdza rnga pheg rnga pi bang sgra snyan dang / /chu mig mtshe'u dang rdzing bu lteng ka dag /gser gyi pad+ma ut+pal pad+ma can/ /zas skom gos nor mu tig nor bu dbyig / rgyan gser rin chen sna tshogs bai DUr+ya/ /de dag bsams ma thag tu grub gyur cig /de bzhin du sbyar te/ 'jig rten gang na'ang sdug bsngal sgra mi 'byung / /sems can gcig kyang mi 'phrod mthong ma 'gyur / /de dag thams cad kha dog rgya chen dang / /phan tshun du ni 'od byed gyur par shog / mi yi 'jig rten phun sum tshogs gang yod/ /de dag bsams pas skye bar de dag gyur/ /bsam pa thams cad bsams ma thag tu yang / /bsod nams 'bras bu yongs su rdzogs par shog /spos dang phreng ba dag dang byug pa dang / /gos dang phye ma me tog sna tshogs dag /ljon shing dag las dus gsum 'bab par shog /sems can mtha' dag len cing dgar gyur cig /de bzhin gshegs pa bsam yas thams cad dang / /rdzogs pa'i byang chub sems dpa' nyan thos dang / /rdul bral dri med brtan pa'i chos la yang / /phyogs bcu rnams su mchod pa byed par shog /'gro ba dman pa thams cad spong gyur cig /mi khom brgyad po dag las 'das par shog /dal ba'i rgyal po dam pa thob gyur cig /rtag tu sangs rgyas 'grogs pa thob par shog /de bzhin du sbyar te/ rtag tu mthon po'i gnas su skye bar shog /nor dang 'bru yi mdzod rnams 'byor gyur cig /snyan dang grags dang gzugs dang kha dog gis/ /bskal pa du mar legs par brgyan par shog /bud med thams cad rtag tu por gyur te/ /dpa' zhing rtul phod mkhas shing gsal bar shog /de kun rtag tu byang chub phyir spyod gyur/ / pha rol phyin pa drug la spyod par shog /phyogs bcu dag na rin chen shing dbang drung / /sangs rgyas bder bzhugs rin chen bai DUr+ya'i/ /khri la bzhugs pa dag ni mthong gyur cig /chos bstan pa yang bdag gis de thob shog /ces bya ba'o // //bam po bcu pa/ gti mug gi phra rgyas kyi gnyen po ni rten cing 'brel par 'byung ba la lta ba'o//de la rten cing 'brel bar 'byung ba ni/ /sA lu ljang pa'i mdo las bstan pa ste/ de la nang gi rten cing 'brel bar 'byung ba rgyu dang 'brel pa gang zhe na/ gang 'di ma rig pa'i rkyen gyis 'du byed rnams zhes bya ba nas skye ba'i rkyen gyis rga shi zhes bya ba'i bar du'o //gal te ma rig pa ma byung na 'di snyam du bdag gis 'du byed kyang ma mthong zhing / de bzhin du skye ba ma byung du zin na rga shi'i bar du yang mi mthong ba zhig na / 'on kyang ma rig pa yod pa las 'du byed rnams mngon par 'grub par 'gyur ba nas skye ba yod pa las rga shi'i bar du mngon par 'grub par 'gyur ro//de la ma rig pa yang 'di snyam du bdag gis 'du byed rnams mngon par bsgrub po snyam du mi sems so/ /'du byed rnams kyang 'di snyam du bdag cag ni ma rig pas mngon par bsgrub po snyam du mi sems pa nas/ de bzhin du skye ba yang 'di snyam du bdag gis rga shi mngon par bsgrub po snyam du mi sems shing / rga shi yang 'di snyam du bdag ni skye bas mngon par bsgrub po snyam du mi sems pa'i bar du ste/ 'on kyang ma rig pa yod pa las 'du byed rnams mngon par 'grub cing / 'byung bar 'gyur ba nas/de bzhin du skye ba yod pa las rga shi'i bar du mngon par 'grub cing 'byung bar 'gyur te/ de ltar na nang gi rten cing 'brel bar 'byung ba'i rgyu dang 'brel par blta'o/ /nang gi rten cing 'brel par 'byung ba rkyen dang 'brel ba ji ltar lta zhe na khams drug 'dus pa'i phyir te/khams drug po gang dag 'dus pa'i phyir zhe na/ 'di lta ste/ sa dang chu dang me dang rlung dang nam mkha' dang rnam par shes pa'i khams 'dus pa las nang gi rten cing 'brel bar 'byung ba rkyen dang 'brel par blta'o/ /de la nang gi rten cing 'brel par 'byung ba'i sa'i khams gang zhe na/gang 'di 'dus nas lus kyi sra ba'i dngos po mngon par 'grub par byed pa 'di ni sa'i khams zhes bya'o/ /gang lus sdud pa'i bya ba byed pa 'di ni chu'i khams zhes bya'o/ /gang lus kyi bros pa dang 'thungs pa dang 'chos pa dang myangs pa rnams 'ju bar byed pa 'di ni me'i khams zhes bya'o//gang lus kyi dbugs phyi nang du rgyu ba'i bya ba byed pa de ni rlung gi khams zhes bya'o/ /gang lus kyi nang sbubs yod par byed pa 'di ni nam mkha'i khams zhes bya'o/ /gang mdung khyim gyi tshul du lus kyi ming dang gzugs kyi myu gu mngon par 'grub par byed pa rnam par shes pa lnga'i tshogs su gtogs pa dang zag pa dang bcas pa'i yid kyi rnam par shes pa 'di ni rnam par shes pa'i khams zhes bya'o//rkyen 'di dag med par lus skye bar mi 'gyur gyi nam nang gi sa'i khams tshang zhing de bzhin du chu dang me dang rlung dang nam mkha' dang rnam par shes pa'i khams rnams kyang tshang bar gyur la/thams cad 'dus pa de las lus mngon par 'grub par 'gyur ro/ /de la sa'i khams kyang 'di snyam du bdag gis lus kyi sra ba'i dngos po mngon par bsgrub po snyam du mi sems so/ /chu'i khams kyang 'di snyam du bdag gis lus sdud pa'i bya ba 'di bya'o snyam du mi sems so//me'i khams kyang 'di snyam du bdag gis lus kyis zos pa dang 'thungs pa dang 'chos pa dang myangs pa rnams 'ju bar bya'o snyam du mi sems so/ /rlung gi khams kyang 'di snyam du bdag gis lus kyi dbugs phyi nang du rgyu ba'i bya ba bya'o snyam du mi sems so//nam mkha'i khams kyang 'di snyam du bdag gis lus kyi nang skabs yod par bya'o snyam du mi sems so/ /rnam par shes pa'i khams kyang 'di snyam du bdag gis lus kyi ming dang gzugs mngon par bsgrub po snyam du mi sems so/ /lus kyang 'di snyam du bdag ni rkyen 'di dag gis bskyed do snyam du mi sems mod kyi/'on kyang rkyen 'di dag yod na lus skye bar 'gyur ro/ /de la sa'i khams ni bdag ma yin/ sems can ma yin/ srog ma yin/ skye ba po ma yin/ shed las skyes pa ma yin/ shed bu ma yin/ bud med ma yin/ skyes pa ma yin/ ma ning ma yin/ nga ma yin/ bdag gi ma yin/ gzhan su'i yang ma yin no/ /de bzhin du sa'i khams dang / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams kyang bdag ma yin/sems can ma yin/ srog ma yin/ skye ba po ma yin/ shed las skyes pa ma yin/ shed bu ma yin/ bud med ma yin/ skyes pa ma yin/ ma ning ma yin/ nga ma yin/ bdag gi ma yin/ gzhan su'i yang ma yin no/ /de la ma rig pa gang zhe na/ khams drug po 'di dag nyid la gang gcig pur 'du shes pa dang /ril por 'du shes pa dang / rtag par 'du shes pa dang / brtan par 'du shes pa dang / ther zug tu 'du shes pa dang / bde bar 'du shes pa dang / bdag tu 'du shes pa dang / sems can dang / srog dang / skye ba po dang / gso ba dang /skyes bu dang / gang zag tu 'du shes pa dang shed las skyes pa dang / shed bur 'du shes pa dang / nga zhes bya ba dang bdag gi zhes bya bar 'du shes pa ste/ 'di lta bu la sogs pa mi shes pa rnam pa sna tshogs pa 'di ni ma rig pa zhes bya'o/ /de ltar ma rig pa yod pas yul rnams la 'dod chags dang zhe sdang dang gti mug 'jug ste/de la yul rnams la 'dod chags dang zhe sdang dang gti mug gang yin pa 'di ni ma rig pa'i rkyen gyis 'du byed rnams zhes bya'o/ /dngos po so sor rnam par rig pa ni rnam par shes pa'o/ /rnam par shes pa dang lhan cig byung ba nye bar len pa'i phung po bzhi po 'di dag ni ming dang gzugs so//ming dang gzugs la brten pa'i dbang po rnams ni skye mched drug go/ /chos gsum 'dus pa ni reg pa'o/ /reg pa myong ba ni tshor ba'o/ /tshor ba la zhen pa ni sred pa'o/ /sred pa 'phel ba ni len pa'o/ /len pa las skye ba yang srid pa skye ba'i las ni srid pa'o//rgyu de las phung po 'byung ba ni skye ba'o/ /skyes nas phung po smin pa ni rga ba'o/ /rgas nas phung po 'jig pa ni 'chi ba'o/ /'chi ba na rmongs pa mngon par chags pa dang bcas pa'i nang gi yongs su gdung ba ni mya ngan to/ /mya ngan las byung ba'i tshig tu smre ba ni smre sngags 'don pa'o//rnam par shes pa lnga'i tshogs dang ldan pa'i mi bde ba myong ba ni sdug bsngal lo/ /yid la byed pa dang ldan pa yid kyi sdug bsngal ni yid mi bde ba'o/ /gzhan yang 'di lta bu la sogs pa nye ba'i nyon mongs pa gang yin pa de dag ni 'khrug pa zhes bya'o// de bzhin du sbyar te/ de la mun pa chen po'i phyir ma rig pa'o/ /mngon par 'du byed pa'i phyir 'du byed rnams so/ /rnam par rig pa'i phyir rnam par shes pa'o/ rten pa'i phyir ming dang gzugs so/ /skye ba'i sgo'i phyir skye mched drug go/ /reg pa'i phyir reg pa'o//myong ba'i phyir tshor ba'o/ /skom pa'i phyir sred pa'o/ /nye bar len pa'i phyir len pa'o/ /yang srid pa skyed pa'i phyir srid pa'o/ /phung po 'byung ba'i phyir skye ba'o/ /phung po smin pa'i phyir rga ba'o/ /'jig pa'i phyir 'chi ba'o/ /mya ngan byed pa'i phyir mya ngan to/ /tshig gis smra ba'i phyir smre sngags 'don pa'o//lus la gnod pa'i phyir sdug bsngal lo/ /sems la gnod pa'i phyir yid mi bde ba'o/ /nyon mongs pa'i phyir 'khrug pa'o/ /gzhan yang de kho na mi rtogs shing log par rtogs pa'i mi shes pa ni ma rig pa'o/ /de ltar ma rig pa yod pa na 'du byed rnam pa gsum mngon par 'grub ste/bsod nams su nye bar 'gro ba dang / bsod nams ma yin par nye bar 'gro ba dang / mi g.yo bar nye bar 'gro ba ste 'di ni ma rig pa'i rkyen gyis 'du byed rnams zhes bya'o/ /bsod nams su nye bar 'gro ba'i 'du byed rnams las bsod nams su nye bar 'gro ba'i rnam par shes pa nyid du 'gyur//bsod nams ma yin par nye bar 'gro ba'i 'du byed rnams la bsod nams ma yin par nye bar 'gro ba'i rnam par shes pa nyid du 'gyur/ mi g.yo bar nye bar 'gro ba'i 'du byed rnams las mi g.yo bar nye bar 'gro ba'i rnam par shes pa nyid du 'gyur te 'di ni 'du byed kyi rkyen gyis rnam par shes pa zhes bya'o//ming dang gzugs kyang de bzhin no/ /ming dang gzugs rnam par 'phel bar skye mched drug gi sgo nas bya ba byed pa rnams 'byung ste/ de ni ming dang gzugs kyi rkyen gyis skye mched drug ces bya'o/ /skye mched drug pa dag las reg pa'i tshogs drug 'byung ste/de ni skye mched drug gi rkyen gyis reg pa zhes bya'o/ /ji lta bur reg pa 'byung ba de lta bur tshor ba 'byung ste/ de ni reg pa'i rkyen gyis tshor ba zhes bya'o/ /tshor ba'i bye brag de dag myong ba dang / mngon par dga' ba dang lhag par zhen pa dang / lhag par zhen nas 'dug pa de ni tshor ba'i rkyen gyis srid pa zhes bya'o//myong ba dang mngon par dga' ba dang lhag par zhen pa dang lhag par zhen nas 'dug pa las bdag sdug pa'i ngo bo dang bde ba'i ngo bo dang 'bral bar ma gyur cig snyam du mi gtong ba dang phyir zhing don du gnyer ba 'di ni srid pa'i rkyen gyis len pa zhes bya'o/ / de ltar don du gnyer ba nas yang srid pa skyed pa'i las lus dang ngag dang yid kyis kun nas slong ba de ni len pa'i rkyen gyis srid pa zhes bya'o/ /las de las skyes pa'i phung po rnams grub pa gang yin pa de ni srid pa'i rkyen gyis skye ba zhes bya'o/ /skyes nas mngon du grub pa'i phung po rnams kyi 'phel ba dang yongs su smin pa las 'jigs par 'gyur ba de ni skye ba'i rkyen gyis rga shi zhes bya'o//de bzhin du sbyar te/ de ltar rten cing 'brel bar 'byung ba'i yan lag bcu gnyis po 'di dag ni gcig gi rgyu gcig gcig gi rkyen gcig / rtag pa ma yin mi rtag pa yang ma yin/ 'dus byas ma yin 'dus ma byas ma yin/rgyu med pa ma yin rkyen med pa ma yin/ myong ba yod pa ma yin/ zad pa'i chos ma yin/ 'jig pa'i chos ma yin/ 'gog pa'i chos ma yin te/ thog ma med pa'i dus nas zhugs pa rgyun ma chad par rlung gi rgyun bzhin du rjes su zhugs mod kyi/ 'on kyang yan lag bzhi po 'di dag ni rten cing 'brel bar 'byung ba'i yan lag bcu gnyis po de bsdu bar bya ba'i rgyur 'gyur ro//bzhi gang zhe na/ 'di lta ste/ ma rig pa dang sred pa dang las dang rnam par shes pa'o/ /de la rnam par shes pa ni sa bon gyi rang bzhin gyis rgyu byed do/ /las ni zhing gi rang bzhin gyis rgyu byed do//ma rig pa dang sred pa ni nyon mongs pa'i rang bzhin gyis rgyu byed do/ /de la las dang nyon mongs pa dag ni sa bon rnam par shes pa bskyed do/ /de la las ni sa bon rnam par shes pa'i zhing gi bya ba byed do/ /srid pa ni sa bon rnam par shes pa brlan par byed do//ma rig pa ni sa bon rnam par shes pa 'debs te rkyen de dag med na sa bon rnam par shes pa mngon par 'grub par mi 'gyur ro/ /de la las kyang 'di snyam du bdag gis sa bon rnam par shes pa'i zhing gi bya ba bya'o snyam du mi sems so/ /sred pa yang 'di snyam du bdag gis sa bon rnam par shes pa brlan par bya'o snyam du mi sems so//ma rig pa yang 'di snyam du bdag gis sa bon rnam par shes pa gdab po snyam du mi sems so/ /sa bon rnam par shes pa yang 'di snyam du bdag ni rkyen 'di dag gis bskyed do snyam du mi sems te 'on kyang sa bon rnam par shes pa las kyi zhing la brten pa sred pa'i rlan gyis brlan pa ma rig pas btab pa skye ba na/skye ba'i gnas nying mtshams sbyor ba ma'i mngal de dang der ming dang gzugs kyi myu gu mngon par 'grub ste/ ming dang gzugs kyi myu gu de yang bdag gis ma byas gzhan gyis ma byas gnyi gas ma byas/dbang phyug gis ma byas dus kyis ma bsgyur rang bzhin las ma byung byed pa la rag las pa ma yin rgyu med pa las kyang ma skyes te / 'on kyang pha dang ma phrad pa dang dus dang ldan pa dang rkyen gzhan tshogs na bdag po med pa'i chos bdag gi med pa 'dzin pa med pa nam mkha' dang mtshungs pa/sgyu ma'i mtshan nyid kyi rang bzhin dag la rgyu dang rkyen ma tshang ba med pa'i phyir skye gnas su nying mtshams sbyor ba ma'i mngal de dang der myong ba dang ldan pa'i sa bon rnam par shes pa ming dang gzugs kyi myu gu mngon par sgrub po/ /'di lta ste/ mig gi rnam par shes pa ni rgyu lnga las 'byung ste/lnga gang zhe na/ mig la brten pa dang gzugs dang snang ba dang nam mkha' dang de bskyed pa'i yid la byed pa brten nas mig gi rnam par shes pa 'byung ngo / /de la mig ni mig gi rnam par shes pa'i rten gyi bya ba byed do/ /gzugs ni mig gi rnam par shes pa dmigs pa'i bya ba byed do//snang ba ni mngon pa'i bya ba byed do/ /nam mkha' ni mi sgrib pa'i bya ba byed do/ /de bskyed pa'i yid la byed pa ni sems pa'i bya ba byed do/ /rkyen de dag med na mig gi rnam par shes pa 'byung bar mi 'gyur gyi/ nam nang gi skye mched mig ma tshang bar ma gyur la/ de bzhin du gzugs dang snang ba dang /nam mkha' dang de skyed pa'i yid la byed pa dag kyang ma tshang bar ma gyur te/ thams cad 'dus pa de las mig gi rnam par shes pa 'byung bar 'gyur ro/ /de la mig ni 'di snyam du bdag gis mig gi rnam par shes pa'i rten gyi bya ba bya'o snyam du mi sems so/ /gzugs kyang 'di snyam du bdag gis mig gi rnam par shes pa'i dmigs pa'i bya ba bya'o snyam du mi sems so//snang ba yang 'di snyam du bdag gis mig gi rnam par shes pa'i mngon pa'i bya ba bya'o snyam du mi sems so/ /nam mkha' yang 'di snyam du bdag gis mig gi rnam par shes pa'i mi sgrib pa'i bya ba bya'o snyam du mi sems so//de bskyed pa'i yid la byed pa yang 'di snyam du bdag gis mig gi rnam par shes pa'i sems pa'i bya ba bya'o snyam du mi sems so/ /mig gi rnam par shes pa yang 'di snyam du bdag ni rkyen 'di dag gis bskyed do snyam du mi sems te 'on kyang rkyen 'di dag yod pa las mig gi rnam par shes pa skye bar 'gyur ro//de bzhin du dbang po lhag ma rnams la yang ci rigs su bya'o/ /de la chos gang yang 'jig rten 'di nas 'jig rten pha rol tu mi 'pho mod kyi/ rgyu dang rkyen ma tshang ba med pa'i phyir las kyi 'bras bur mngon par yang yod do//de bzhin du sbyar te/ 'di lta ste dper na rab tu phyis pa'i me long gi dkyil 'khor la bzhin gyi gzugs brnyan snang ba yang bzhin me long gi dkyil 'khor du ma 'phos mod kyi/ rgyu dang rkyen ma tshang ba med pa'i phyir bzhin du mngon pa yang yod do/ /de bzhin du 'di nas kyang su yang shi 'phos pa med la gzhan du yang ma skyes te/rgyu dang rkyen rnams ma tshang ba med pa'i phyir las kyi 'bras bur mngon pa yang yod do/ /'di lta ste dper na/ zla ba'i dkyil 'khor ni dpag tshad bzhi khri nyis stong nas 'gro ste/ 'on kyang snod chung ngu chus gang bar zla ba'i dkyil 'khor gyi gzugs brnyan snang ba yang zla ba'i dkyil 'khor ni gnas de nas ma 'phos te/snod chung ngu chus gang ba'i nang du song ba yang med mod kyi rgyu dang rkyen ma tshang ba med pa'i phyir zla ba'i dkyil 'khor du snang ba yang yod do/ /de bzhin du 'di nas kyang su yang shi 'phos pa med la/gzhan du yang ma skyes mod kyi rgyu dang rkyen rnams ma tshang ba med pa'i phyir las kyi 'bras bur mngon pa yang yod do / /'di lta ste dper na/ me ni rgyu dang rkyen ma tshang na mi 'bar gyi rgyu dang rkyen tshogs pa las 'bar ro/ /de bzhin du bdag po med pa'i chos bdag gi med pa 'dzin pa med pa nam mkha' dang mtshungs pa sgyu ma'i mtshan nyid kyi rang bzhin dag la rgyu dang rkyen rnams ma tshang ba med pa'i phyir skye ba'i gnas nying mtshams sbyor ba ma'i mngal de dang der sa bon rnam par shes pa las dang nyon mongs pa rnams kyis bskyed pa ming dang gzugs kyi myu gu mngon par sgrub po//de la nang gi rten cing 'brel bar 'byung ba rnam pa lnga ste/ lnga gang zhe na/ rtag par ma yin pa dang / chad par ma yin pa dang / 'pho bar ma yin pa dang / rgyu chung ngu las 'bras bu chen por 'byung ba dang / de dang 'dra ba'i rgyud du'o/ /ji ltar rtag par ma yin no zhe na/ gang gi phyir tha ma 'chi ba'i phung po rnams kyang gzhan la skye ba'i char gtogs pa rnams kyang gzhan te/tha ma 'chi ba'i phung po gang yin pa de nyid skye ba'i char gtogs pa rnams ma yin gyi / tha ma 'chi ba'i phung po rnams kyang 'gags la skye ba'i char gtogs pa'i phung po rnams kyang 'byung bas de'i phyir rtag par ma yin no//ji ltar chad par ma yin zhe na/ tha ma 'chi ba'i phung po rnams 'gags pa las skye ba'i char gtogs pa'i phung po rnams 'byung ba ma yin 'gags pa las kyang ma yin gyi tha ma 'chi ba'i phung po rnams kyang 'gags la de nyid kyi tshe skye ba'i char gtogs pa'i phung po rnams srang mda'i mthon dman bzhin du 'byung bar 'gyur te de'i phyir chad par ma yin no//ji ltar 'pho bar ma yin zhe na/ sems can gyi ris mi 'dra ba nas skal ba mnyam pa'i skye bar skye ba mngon par 'grub pas de'i phyir 'pho bar ma yin no/ /ji ltar rgyu chung ngu las 'bras bu chen po 'byung zhe na/ las chung ngu byas pa las 'bras bu chen po'i rnam par smin pa myong ste de'i phyir rgyu chung ngu las 'bras bu chen po mngon par 'grub po/ /ji ltar myong bar 'gyur ba'i las byas pa de lta bur myong bar 'gyur ba'i rnam par smin pa myong bas de'i phyir de dang 'dra ba'i rgyud du'o/ /btsun pa shA ri'i bu rten cing 'brel bar 'byung ba bcom ldan 'das kyis yang dag par gsungs pa 'di gang la la zhig gis yang dag pa'i shes rab kyis 'di ltar yang dag pa ji lta ba bzhin du rtag par rgyun du srog med pa dang srog dang bral ba dang /ji lta ba nyid dang / ma nor ba dang / ma skyes pa dang / ma byung ba dang / ma byas pa dang /'dus ma byas pa dang / thogs pa med pa dang / dmigs pa med pa dang / zhi ba dang / 'jigs pa med pa dang / mi 'phrogs pa dang / mi zad pa dang / rnam par ma zhi ba'i rang bzhin du mthong ba dang / med pa dang / gsog dang / gsob dang / snying po med pa dang / nad dang 'bras dang /zug rngu dang / sdig pa dang / mi rtag pa dang / sdug bsngal ba dang / stong pa dang bdag med par yang dag par rjes su mthong ba de ni/ ci bdag sngon gyi dus na byung ba zhig gam 'on te ma byung ba zhig snyam du sngon gyi mtha' la mi rtog go/ /ma 'ongs pa'i dus na cir 'gyur ci lta bur 'gyur zhes ma 'ongs pa'i mtha' la mi rtog go//'di ci zhig 'di ci lta bu zhig ci zhig yod cir 'gyur sems can 'di dag gang nas 'ongs 'di nas shi 'phos nas gang du 'gro bar 'gyur zhes da ltar byung ba la yang mi rtog go zhes bya ba'o/ /'phags pa sa bcu'i mdo las kyang gsungs te/ de la ma rig pa dang sred pa dang len pa ni nyon mongs pa'i lam gyi rgyun mi 'chad pa'o/ /'du byed dang srid pa ni las kyi lam gyi rgyun mi 'chad pa'o/ /lhag ma rnams ni sdug bsngal gyi lam gyi rgyun mi 'chad par rab tu rnam par phye'o/ /de bzhin du sbyar te/ ma rig pa'i rkyen gyis 'du byed rnams zhes bya ba gang yin pa de ni sngon gyi mtha' la ltos pa'o//rnam par shes pa nas tshor ba'i bar de ni da ltar byung ba la ltos pa'o/ /sred pa nas srid pa zhes bya ba'i bar de ni phyi ma'i mtha' la ltos pa ste/ de phan chad yang de dag rab tu 'byung ngo / /de bzhin du sbyar te/ de 'di snyam du sems te/ldan pa las ni 'dus byas 'byung ngo / /bral ba las ni 'dus byas mi 'byung ngo / /tshogs pa las ni 'dus byas 'byung ngo / /ma tshogs pa las ni 'dus byas mi 'byung ngo / /ma la de ltar bdag gis 'dus byas nyes pa mang po'i skyon chags pa 'di lta bu 'di shes par byas la/'du ba 'di dang tshogs pa 'di'i rgyun gcad par yang bya'o/ /sems can yongs su smin par bya ba'i phyir 'du byed rnams shin tu zhi bar bya ba thob par yang mi bya'o snyam mo zhes gsungs te / /'di ni gti mug sbyang ba mdor bsdus pa'o/ /bslab pa kun las btus pa las/sems yongs su sbyang ba'i le'u ste bcu gnyis pa'o// //de ltar sems las su rung nas dran pa nye bar gzhag pa la 'jug ste/ de la mi sdug pa'i skabs nas lus dran pa nye bar gzhag pa bshad zin to/ /de nyid dbye ba'i bag tsam zhig chos yang dag par sdud pa'i mdo las gsungs te/rigs kyi bu gzhan yang byang chub sems dpa' ni 'di ltar lus 'di ni rkang pa dang / rkang sor dang / byin pa dang / brla dang / dku do dang / lto ba dang / lte ba dang / sgal tshigs dang / snying dang / rtsib logs dang / sog pa dang / lag pa dang / lag ngar dang / dpung pa dang /thal gong dang / mjing pa dang / 'gram pa dang / dpral ba dang / mgo dang / mgo'i thod pa 'dus pa tsam ste/ las 'byung ba'i byed pa pos bsags pa/ nyon mongs pa dang nye ba'i nyon mongs pa dang kun du rtog pa dang / rnam par rtog pa tha dad pa brgya stong gi gnas su gyur pa'o/ / 'dir khams kyi rdzas mang po 'dus pa ni 'di lta ste/ skra dang kha spu dang sen mo dang so dang rus pa dang pags pa dang sha dang sha'i spri dang rgyus pa dang tshil dang zhag dang chu ser dang mcher pa dang gcin dang phyi sa dang / pho ba dang long ka dang khrag dang snabs dang mkhris pa dang / rnag dang mchil ma dang klad pa dang klad rgyas rnams te/de ltar rdzas mang po 'dus pa yin no / /'di la lus zhes ji skad du bya snyam du lus dran pa nye bar 'jog go/ /de la so sor rtog pa na 'di snyam du sems te/ lus 'di ni nam mkha' dang mtshungs so snyam nas de lus la nam mkha' ltar dran pa nye bar 'jog go//de thams cad nam mkha' ltar mthong ngo / /de lus yongs su shes pa'i phyir gang du yang dran pa nye bar mi 'jog go/ /rnam par mi 'jog go/ /rnam par mi 'phro'o zhes bya ba'o/ /yang gsungs pa/ lus 'di ni sngon gyi mtha' nas kyang ma 'ongs/ phyi ma'i mthar yang mi 'gro /sngon gyi mtha' dang phyi ma'i mtha' la yang mi gnas te/ gzhan du na yang dag pa ma yin pa phyin ci log las byung ba/ byed pa po dang tshor ba po med pa/ thog ma dang tha ma dang dbus med pa/ rtsa ba gnas pa med pa/ bdag po med pa nga'i ba med pa yongs su 'dzin pa med pa ste/tshogs zhes bya ba dang lus zhes bya ba dang longs spyod ces bya ba dang gnas zhes bya ba dang rten zhes bya ba dang tshang zhes bya ba dang / skye mched ces bya ba ni glo bur gyi tha snyad rnams kyis tha snyad btags pa'o/ /lus 'di ni snying po med pa ste/ pha dang ma'i khu ba dang khrag las byung ba mi gtsang ba rul ba rang bzhin gyis dri mi zhim pa/'dod chags dang zhe sdang dang gti mug dang 'jigs pa dang sgyid lug pa'i rkun pos dkrugs pa/ rtag tu 'jig pa 'bral ba 'brul ba rnam par 'thor ba rnam par 'joms pa'i chos can/ nad tha dad pa brgya stong gi tshang ngo snyam du lus la dran pa nye bar 'jog go zhes bya ba'o//'phags pa gtsug na rin po che'i mdo las kyang / kye ma'o lus 'di ni mi rtag pa'i rnam pa ste ring por mi gnas pa tha mar 'chi ba yin par shes nas lus kyi phyir mi mthun pa'i 'tsho ba mi spyod cing snying po len to/ /de snying po gsum len te/ gsum gang zhe na/ lus kyi snying po dang / longs spyod kyi snying po dang / 'tsho ba'i snying po'o/ /de lus mi rtag go snyam nas sems can thams cad kyi bran dang slob mar khas blangs te ci bya'o cog la 'bad pa yin / lus mi rtag go snyam nas lus kyi nyes pa yon po dang g.yo dang tshul 'chos pa thams cad mi byed do//lus mi rtag go snyam nas srog la bag mi ston par 'gyur te srog gi phyir yang sdig pa'i las mi byed do/ /lus mi rtag go snyam nas longs spyod la spyod pa sred cing chags par mi byed de de bdog pa thams cad yongs su gtong ba yin no/ /rigs kyi bu gzhan yang byang chub sems dpa' lus la lus kyi rjes su lta ba'i dran pa nye bar gzhag pa bsgom pa/bdag gi lus de las sems can thams cad kyi lus nye bar 'dogs shing bdag gis sems can thams cad kyi lus sangs rgyas kyi sku'i gnas la gnas par bya'o snyam ste/ji ltar de bzhin gshegs pa'i sku zag pa med pa ltar rang gi lus kyi chos nyid la yang de bzhin du rtog go/ /de zag pa med pa'i chos la mkhas pas sems can thams cad kyi lus kyang de'i mtshan nyid du rab tu shes so zhes bya ba la sogs pa gsungs so/ /khyim bdag dpas byin gyis zhus pa las kyang /'di lta ste lus 'di mthar gyis 'grub pa dang mthar gyis 'jig pa dang rdul phra rab bstsags pa dang khong stong dang dgye gu can dang bu ga dgu dang spu'i khung bu nas zag pa dang / grog mkhar lngar sbrul gdug pa'i gnas su gyur pa dang / ma skyes dgra'i spre'u ltar grogs la 'khu ba dang /bshes gnyen ngan pa ltar 'drid pa'i bdag nyid can dang / dbu ba rdos pa ltar rang bzhin gyis nyam chung ba dang / chu'i chu bur ltar byung nas 'jig cing 'ju ba dang / smig rgyu ltar slu ba'i bdag nyid can dang / chu shing ltar bshig na snying po med pa dang / sgyu ma ltar slu ba'i bdag nyid can dang /rgyal po ltar bsgo blag mang ba dang / dgra ltar glags lta ba dang / rkun po ltar yid brtan du mi rung ba dang gshed ma ltar rjes su chags pa med pa dang / mi mdza' ba ltar mi phan par 'dod pa dang / gsod pa ltar shes rab kyi srog gi bar chad byed pa dang / grong stong ltar bdag dang bral ba dang / rdza mkhan gyi snod ltar mthar 'jig pa dang / rdzing ltar mi gtsang ba sna tshogs kyis yongs su gang ba dang / sbang ma'i snod ltar mi gtsang ba zag pa dang / de bzhin du sbyar te/ rma ltar bskyod mi bzod pa dang / zug rngu ltar gnod pa'i bdag nyid can dang /khang rnying ltar bcos legs bya zhing brten pa dang / gru rnying ltar bcos legs bya zhing spyad pa dang / bum pa so ma btang ba ltar nan tan gyis bag bya dgos pa dang / de bzhin du sbyar te/ chu 'gram gyi shing ltar g.yo zhing 'gul ba dang / chu klung chen po'i rgyun ltar mthar 'chi ba'i rgya mtsho la thug pa dang /glo bur ba'i khyim ltar sdug bsngal thams cad kyi gnas su gyur pa dang / mgon med pa'i gnas khang ltar yongs su gzung ba med pa dang / btson srung ltar gsug gis bsgrub par bya ba dang / de bzhin du sbyar te/ byis pa chung ngu ltar rtag tu yongs su bskyang dgos pa'o zhes gsungs so//yang gsungs pa/ 'di ltar mi gtsang phung po'i lus la ni/ /gzugs kyi nga rgyal can gang gces 'dzin pa/ /byis pa'i blo can de ni mngon bzhin du/ /mi shes ngan skyugs bum pa thogs shing 'gro/ /de yi sna nas rnag gi rnam pa 'dzag /kha nas dri mi zhim pa rtag tu 'byung //skye bo'i kha 'gram mig ni srin bu bzhin/ /de la su zhig chags shing gces par byed/ /dper na byis pa sol ba thogs nas su/ /'di ni dkar por bya zhes bdar byed kyang / /dkar po'i dngos por mi 'gyur zad par 'gyur/ /byis blo phyin ci log tu mngon par rlom//de ltar mi gang gtsang sbra'i blo gros ldan/ /nga yi lus 'di gtsang mar bya zhes te / /bskus phyis 'bab stegs brgyar ni khrus byas kyang / /'chi bdag dbang gis zad 'gyur gtsang mi 'gyur/ /byang chub sems dpa' de ltar lus la 'jig pa dang / bu ga dgu'i sgo nas 'dzag par brtag par bya ba nas byang chub sems dpa'i lus la srin bu'i rigs brgyad khri bzhi stong gi gnas su brtag par bya ba'i bar du'o//de bzhin du sbyar te/ byang chub sems dpa' lus la spyang ki dang ce spyang dang khyi dang rjen sha za ba gzhan gyi zas su brtag par bya/ byang chub sems dpa' lus la rus pa dang rgyus pa'i bog res sbrel bas 'khrul 'khor lta bur brtag par bya/byang chub sems dpa' lus la zas dang skom las byung ba ste rang gi kha na las pa ma yin par brtag par bya'o zhes te rgya cher ni de nyid las shes par bya'o/ /tshor ba dran pa nye bar gzhag pa ni/re zhig 'phags pa gtsug na rin po che'i mdo las ji skad du/ rigs kyi bu 'di la byang chub sems dpa' tshor ba rnams la tshor ba'i rjes su lta ba'i dran pa nye bar gzhag pa bsdom pa ni tshor ba bde bar gnas pa'i sems can rnams la snying rje chen po thob par 'gyur ro/ / de 'di ltar gang la tshor ba med pa de ni bde ba yin no zhes slob ste/ des sems can thams cad kyi tshor ba spang ba'i phyir tshor ba rnams la tshor ba'i rjes su lta ba'i dran pa nye bar gzhag pa bsgom mo/ /de sems can rnams kyi tshor ba 'gog pa'i phyir go cha bgos kyang bdag gi tshor ba 'gog par yang mi byed do//des tshor ba gang ci myong yang tshor ba de dag thams cad snying rje chen pos yongs su bzung zhing myong bar byed do/ /de nam bde ba'i tshor ba myong ba'i tshe na 'dod chags la spyod pa'i sems can rnams la snying rje chen po rnyed de bdag gi 'dod chags kyi cha bag la nyal ba yang yongs su spong ngo //nam sdug bsngal gyi tshor ba myong ba'i tshe na zhe sdang la spyod pa'i sems can rnams la snying rje chen po rnyed de bdag gi zhe sdang gi bdag la nyal yang yongs su spong ngo / /nam bde ba yang ma yin sdug bsngal yang ma yin pa'i tshor ba myong ba'i tshe na gti mug la spyod pa'i sems can rnams la snying rje chen po rnyed de bdag gi gti mug gi bag la nyal yang rab tu spong ngo //bde ba'i tshor ba la rjes su chags par mi 'gyur te rjes su chags pa legs par 'joms par yang byed do/ /sdug bsngal gyi tshor ba la khong khro bar yang mi 'gyur te/khong khro ba legs par 'joms par yang byed do/ /sdug bsngal ba yang ma yin bde ba yang ma yin pa'i tshor ba la ma rig pa dang ldan par mi 'gyur te ma rig pa legs par 'joms par yang byed do/ /des tshor ba gang ci myong ba de dag thams cad kyang mi rtag par shes shing myong bar byed do//sdug bsngal du shes shing myong bar byed do/ /bdag med par shes shing myong bar byed do/ /de bde ba'i tshor ba la ni mi rtag par shes par 'gyur ro/ /sdug bsngal gyi tshor ba la ni zug rngur shes par 'gyur ro/ /sdug bsngal yang ma yin bde ba yang ma yin pa'i tshor ba la ni zhi bar shes par 'gyur ro//de ltar na gang bde ba de ni mi rtag pa'o/ /gang sdug bsngal ba de ni sdug bsngal ba nyid do/ /gang bde ba yang ma yin sdug bsngal ba yang ma yin pa de ni bdag med pa'o zhes bya ba la sogs pa gsungs pa bzhin no/ /'phags pa blo gros mi zad pa'i mdo las kyang /sdug bsngal gyi tshor bas reg na ngan song dang mi khom par skyes pa'i sems can thams cad la snying rje chen po bskyed do/ /de bzhin du sbyar te/ tshor ba ni mngon par zhen pa'o/ /tshor ba ni yongs su 'dzin pa'o/ /tshor ba ni nye bar len pa'o/ /tshor ba ni dmigs pa'o//tshor ba ni phyin ci log go/ /tshor ba ni rnam par rtog pa'o zhes bya ba la sogs pa gsungs so/ /chos yang dag par sdud pa'i mdo las kyang / tshor ba myong bar rab bstan pa/ /tshor ba las gzhan tshor ba po/ /gud na yod pa ma yin na/ /gang gis de ni tshor bar 'gyur//byang chub ci 'dra de bzhin du/ /zhi zhing dag la 'od gsal bar/ /tshor ba 'di la mkhas pa rnams/ /dran pa de ltar nye bar gzhag /ces gsungs so/ /de ni tshor ba dran pa nye bar gzhag pa mdor bsdus pa'o/ /sems dran pa nye bar gzhag pa ni dkon mchog brtsegs pa las ji skad du/de 'di ltar sems yongs su tshor te/ 'dod chags par 'gyur ba'am zhe sdang bar 'gyur ba'am gti mug par 'gyur ba'i sems de dag gang yin/ ci 'das pa'am ma 'ongs pa'am da ltar byung ba zhig yin/ de la sems 'das pa gang yin pa de ni zad pa'o//ma 'ongs pa gang yin pa de ni ma phyin pa'o/ /da ltar byung ba ni gnas pa med do snyam mo/ /'od srungs sems ni nang na yang med phyi rol na yang med gnyi ga na yang med cing mi dmigs so / /'od srungs sems ni gzugs med pa/ bstan du med pa/ thogs pa med pa/ rten med pa/ snang ba med pa/ rnam par rig pa med pa/ gnas med pa'o/ /'od srungs sems ni sangs rgyas thams cad kyis kyang ma gzigs mi gzigs gzigs par mi 'gyur ro/ /log par zhugs pa'i 'du shes las chos rnams 'byung ba ma gtogs par/ /sangs rgyas thams cad kyis kyang ma gzigs mi gzigs gzigs par mi 'gyur ba gang yin pa de'i rgyu ba ci 'dra bar rig par bya zhe na/'od srungs sems ni sgyu ma dang mtshungs te yang dag pa ma yin pa kun du rtog pas skye ba rnam pa mang po yongs su 'dzin to/ /de bzhin du sbyar te/ 'od srungs sems ni 'bab chu'i rgyun dang mtshungs te mi gnas pa skyes nas 'jig cing dengs pa'o//'od srungs sems ni rlung dang mtshungs te ring du 'gro zhing gzung du med par rgyu ba'o / /'od srungs sems ni mar me'i 'od 'phro ba dang mtshungs te rgyu dang rkyen las byung ba'o//'od srungs sems ni nam mkha' dang mtshungs te nyon mongs pa dang nye ba'i nyon mongs pa glo bur ba rnams kyis nye bar nyon mongs pa'o/ /'od srungs sems ni glog dang mtshungs te skad cig gcig tu 'jig cing mi gnas pa'o/ /de bzhin du sbyar te/ 'od srungs sems ni sdug bsngal thams cad bskyed pa'i phyir mi mdza' ba dang mtshungs so//'od srungs sems ni dge ba'i rtsa ba thams cad 'jig par byed pa'i phyir bye ma'i khang pa dang mtshungs so/ /'od srungs sems ni sdug bsngal ba la bde bar 'du shes pa'i phyir nya'i mchil pa dang mtshungs so/ / 'od srungs sems na bdag med pa la bdag tu 'du shes pa'i phyir rmi lam dang mtshungs so/ /'od srungs sems ni mi gtsang ba la gtsang bar 'du shes pa'i phyir sbrang ma sngon po dang mtshungs so/ /'od srungs sems ni gnod pa rnam pa mang po byed pas phyir rgol ba dang mtshungs so/ /'od srungs sems ni rtag tu klan ka tshol ba'i phyir gnod sbyin mdangs 'phrog pa dang mtshungs so//'od srungs sems ni rtag tu glags lta bas dgra dang mtshungs so/ /'od srungs sems ni rjes su chags pa dang khong khro ba dang ldan pas rtag tu mtho dman can no/ /'od srungs sems ni dge ba'i rtsa ba thams cad rku bas chom rkun dang mtshungs so //'od srungs sems ni gzugs la dga' bas phyi byi zhi la'i mig dang mtshungs so/ 'od srungs sems ni sgra la dga' bas g.yul gyi rnga dang mtshungs so/ /'od srungs sems ni phag mi gtsang ba'i dri la dga' ba bzhin du dri la dga'o//'od srungs sems ni ro la dga' zhing zas kyi lhag ma za ba'i bran mo dang mtshungs so/ /'od srungs sems ni reg pa la dga' bas sbrang ma 'bru mar gyi snod la chags pa dang mtshungs so/ /'od srungs sems ni kun du btsal yang mi rnyed do/ /gang mi rnyed pa de ni mi dmigs pa'o//gang mi dmigs pa de ni 'das pa yang ma yin ma 'ongs pa yang ma yin da ltar byung ba yang ma yin no/ /gang 'das pa yang ma yin ma 'ongs pa yang ma yin da ltar byung ba yang ma yin pa de ni dus gsum las yang dag par 'das pa'o/ /gang dus gsum las yang dag par 'das pa de ni yod pa yang ma yin med pa yang ma yin no zhes bya ba la sogs pa gsungs pa bzhin no //'phags pa gtsug na rin po che'i mdo las kyang / de sems kun du tshol bas na sems nang na yang yang dag par rjes su mi mthong / sems phyi rol na yang yang dag par rjes su mi mthong / sems phyi nang na yang yang dag par rjes su mi mthong / phung po rnams la yang sems yang dag par rjes su mi mthong / khams rnams la yang sems yang dag par rjes su mi mthong / skye mched rnams la yang sems yang dag par rjes su mi mthong / des sems yang dag par rjes su mi mthong bas/sems gang las byung zhes sems kyi rgyun kun du tshol zhing de 'di snyam du sems te/ dmigs pa yod pa las sems 'byung bar 'gyur ro snyam mo/ /de yang 'di snyam du sems te/ ci dmigs pa de yang gzhan la sems de yang gzhan nam/ 'on te dmigs pa gang yin pa de nyid sems yin gal te dmigs pa yang gzhan la sems de yang gzhan na ni/sems de gnyis su 'gyur ro/ /'on te dmigs pa gang yin pa de nyid sems yin na ni sems kyis sems de nyid ji ltar mthong bar 'gyur te/ sems kyis sems mthong bar mi rung ngo / /'di lta ste dper na ral gri'i so de nyid kyis ral gri'i so de nyid gcad par mi nus pa dang sor mo'i rtse mo de nyid kyis sor mo'i rtse mo de nyid la reg par mi nus pa de bzhin du sems de nyid kyis kyang sems de nyid mthong bar mi nus so snyam mo//de bzhin du sbyar te/ rigs kyi bu gzhan yang gang mgyogs pa rab tu mgyogs pa mi gnas par rgyu ba spre'u dang rlung dang 'dra ba 'bab chu'i rgyun dang 'bru mar gyi mar me dang 'dra ba rgyang ring por 'gro ba/lus med pa/ yul la brkam pa/ skye mched drug la spyod pa/ gzhan dang gzhan gyi shes pa dang ldan pa'i sems/ gnas pa/ rtse gcig pa/ mi 'phro ba/ rnam par mi 'phro ba/ zhi gnas la rtse gcig pa/ g.yeng ba med pa 'di ni sems gnas pa zhes bya'o zhes gsungs so/ /'phags pa blo gros mi zad pa'i mdo las kyang / bdag gis rnam par bsgrub par bya ba la brtson par bya ste sems kyi chos nyid 'di yang mi 'dor ro snyam mo//de la sems kyi chos nyid ni gang rnam par bsgrub pa ni gang zhe na/ sems ni sgyu ma lta bu ste 'di la gang yang sbyin pa de ni sems kyi chos nyid ces bya'o/ /gang yang bdog pa thams cad yongs su btang ste sangs rgyas kyi zhing thams cad yongs su dag par bya ba'i phyir yongs su bsngo ba 'di ni rnam par bsgrub pa zhes bya'o zhes bya ba la sogs pa gsungs so//chos rjes su dran pa ni re zhig de nyid las ji skad du/ byang chub sems dpa' chos la chos kyi rjes su lta zhing gnas pa ni gang las sangs rgyas kyi chos med pa dang / gang las byang chub med pa dang /gang las lam med pa dang / gang las thar pa med pa dang / gang las nges par 'byung ba med pa'i chos de gang yang mi mthong ngo / /des chos thams cad 'byung bar shes nas sems can rnams la sgrib pa med par shes par bya ba'i phyir snying rje chen po'i ting nge 'dzin gyi sgo thob par 'gyur ro//de chos thams cad dang nyon mongs pa thams cad la yang sgyu mar 'du shes pa thob ste/ chos 'di dag ni nyon mongs pa med pa ste 'di dag ni nyon mongs pa dang bcas pa ma yin pa'o/ /de ci'i phyir zhe na/ 'di ltar de dag ni nges pa'i don la rtog pa ste/ nyon mongs pa rnams la ni tshogs med/phung por gyur pa med/ 'dod chags kyi dngos po med/ zhe sdang gi dngos po med/ gti mug gi dngos po med pa ste/ nyon mongs pa 'di dag nyid rtogs pa'i phyir byang chub po/ / nyon mongs pa'i ngo bo nyid gang yin pa byang chub kyi ngo bo nyid kyang de yin no zhes de ltar dran pa nye bar 'jog go zhes gsungs so//'phags pa gtsug na rin po che las kyang / rigs kyi bu 'di la byang chub sems dpa' chos rnams la chos kyi rjes su lta ba'i dran pa nye bar gzhag pa la gnas pa 'di snyam du sems te/ skye ba na chas rnams kho na skye/ 'gag pa na chos rnams kho na 'gag ste/'di la bdag gam sems can nam srog gam skye ba po'am gso ba'am skyes bu'am gang zag gam shed las skyes pa'am shed bu'am gang skye ba'am rga ba'am 'chi ba'am/ 'pho ba'am skye bar 'gyur ba gang yang med do/ /'di ni chos rnams kyi chos nyid do //gal te bsgrubs na ni grub po / /gal te ma bsgrubs na ni mi 'grub ste/ dge ba yang rung mi dge ba yang rung mi g.yo ba yang rung ste ji ltar bsgrubs pa de lta bur 'grub mod kyi/ chos rnams la sgrub par byed pa yang med la/ chos rnams rgyu med par yang gang yang mi skye'o snyam mo zhes bya ba la sogs pa gsungs so//yang de nyid las/ de gang cung zad chos zab mo la so sor rtog kyang thams cad mkhyen pa nyid kyi byang chub kyi sems rjes su dran pa de yang mi 'dor zhes gsungs so/ /'phags pa rgya cher rol pa las kyang / /'du byed mi rtag brtan pa ma yin te//rdza so ma btang lta bur 'jig pa'i bdag /gzhan gyi rdzas ni brnyan po byas dang mtshungs/ /bye ma'i grong khyer lta bur ring mi thogs/ /'du byed 'di dag 'jig pa'i chos can te/ /dbyar gyi zhal zhal ji ltar 'gogs pa bzhin/ /chu ngogs bye ma yod pa 'dra ba ste/ /rkyen la rag las rang bzhin nyam chung ba //'du byed mar me'i 'od 'gro 'dra ba ste/ /myur du 'byung zhing 'gag pa'i chos can yin/ /rlung dang mtshungs par ring du mi gnas la/ /sbu ba lta bur nyam chung snying po med/ /'du byed g.yo ba med cing stong pa ste/ /brtags na chu shing dag gi phung po 'dra/ sgyu ma lta bur sems ni rmongs par byed/ /lag bcangs stong pas byis pa 'drid dang mtshungs/ /'dus byas gyur pa thams cad rgyu dag dang / /rkyen rnams kyis ni rab tu 'byung ba ste/ /gcig gis gcig rgyu byas te brten nas byung / /byis pa'i skye bos 'di 'dra 'di ma rtogs/ /dper na gres ma mun dza brten byas la//brtsal ba'i stobs kyis thag par 'gyur ba dang / /zo chun rgyud mo 'khor 'byung bcas pa yang / /de dag re res 'grub par 'gyur ba med/ /de ltar srid pa'i yan lag kun 'grub pa/ /gzhan dang gzhan tshogs pa la brten nas ni/ /de dag so so re re 'grub ba ni//sngon gyi mtha' dang phyi ma'i mtha' mi dmigs/ /sa bon yod na myu gu ji bzhin te/ /sa bon gang yin de nyid myu gu min/ /de las gzhan min de yang ma yin te/ /de ltar rtag min chad min chos nyid de / /ma rig pa ni 'du byed rkyen yin te/ /'du byed de yang yang dag nyid du med//ma rig pa dang 'du byed de dag kyang / /rang bzhin stong ste g.yo ba med pa yin/ /rgya las rgya yi 'bur ni snang mod kyi/ /rgyu de 'phos par dmigs pa'ang yod ma yin/ /de la de med gzhan las ma yin te/ /de ltar 'dus byas rtag med chad pa med/ / mig dang gzugs la brten pa byas nas su/ /mig gi rnam par shes pa 'dir byung yang / /mig ni gzugs la brten pa ma yin la/ /gzugs kyang mig las 'pho ba yod ma yin/ /'di dag bdag med mi sdug chos can yin / /de dag bdag dang sdug par brtags pa ste/ / nor pa yang dag ma yin brtags yin yang / /de las mig gi rnam par shes pa 'byung / /rnam par shes pa 'gags nas 'byung gyur te/ /mkhas pas skye dang 'jig pa rnam par mthong / /gang du ma song gang nas 'ong ba min/ /rnal 'byor pas ni stong pa sgyu ltar mthong / /dper na gtsub shing dang ni gtsub stan dang //lag pas brtsal ba byas pa gsum tshogs pa/ /de la brten nas me ni 'byung 'gyur te/ /byung nas ring por mi thogs 'gag par 'gyur/ /de nas mkhas pa la las brtags byas te/ /'di ni gang nas 'ongs la gar song zhes/ /phyogs dang phyogs mtshams kun du brtags byas na//de ni 'ong ba'am 'gro ba mi dmigs so/ /phung po dag dang skye mched khams rnams kyi/ /rkyen ni ma rig pa dang sred dang las/ /de dag tshogs pa sems can zhes brjod kyang / /de ni dam pa'i don du dmigs su med/ /ces bya ba la sogs pa gsungs so//bslab pa kun las btus pa las dran pa nye bar gzhag pa'i le'u ste bcu gsum pa'o/ / dran pa nye bar gzhag pa bshad zin to// // de ltar sems 'os su gyur nas yang stong pa nyid la 'jug par bya ste/ gang zag stong pa nyid ni de ltar shin tu grub pa yin no//de'i phyir rtsa ba chad pas nyon mongs pa thams cad kun du mi 'byung ngo / /'phags pa de bzhin gshegs pa gsang ba'i mdo las ji skad du/ zhi ba'i blo gros 'di lta ste/ dper na shing rtsa ba nas bcad na yal ga dang lo ma dang yal ga phra mo thams cad skam par 'gyur ro//zhi ba'i blo gros de bzhin du 'jig tshogs la lta ba nye bar zhi na nyon mongs pa dang nye ba'i nyon mongs pa thams cad zhi bar 'gyur ro zhes gsungs pa lta bu'o/ /stong pa nyid bsgom pa'i phan yon ni mu med do / /re zhig zla ba sgron ma'i mdo las ji skad du/ de ni nam yang bde gshegs rnams kyi bslab mi 'dor//dpa' bo de ni nam yang bud med dbang mi 'gro/ /de ni bde gshegs rnams kyi bstan la dga' ba rnyed/ /'di ni chos kyi rang bzhin rab tu zhi ba shes/ /de 'dir ring po mi thogs rkang gnyis dbang por 'gyur/ /de ni bde ba sbyin par byed pa'i sman par 'gyur//de ni sdug bsngal rnams kyi zug rngu kun du 'byin/ /de ni chos kyi rang bzhin rab tu zhi ba shes/ /mi yi zla ba de ni bzod pa'i stobs kyis 'phags/ /de ni rdo dbyug dag gis bsnun kyang 'khrugs mi 'gyur/ /de yi yan lag nying lag bcad kyang 'khrugs pa med //de ni chos kyi rang bzhin rab tu zhi ba shes/ /de ni nam yang ngan 'gror skye bar 'gyur ma yin/ /rtag tu gzugs mdzes shing ni mtshan dang ldan par 'gyur/ /des ni rtag tu mngon shes lnga po 'di dag bsgom/ /dpa' de 'dir rtag bde gshegs rnams kyi mdun na gnas/ / zhes bya ba la sogs pa gsungs pa bzhin no / /bcom ldan 'das ma las kyang / shA ri'i bu gzhan yang byang chub sems dpa' sems dpa' chen po sangs rgyas kyi sku yongs su bsgrub par 'dod pa dang / skyes bu chen po'i mtshan sum cu rtsa gnyis dang dpe byad bzang po brgyad cu thob par 'dod pa dang /skye ba thams cad du skye ba dran pa dang byang chub kyi sems chud mi za ba dang byang chub sems dpa'i spyod pa ming rjed pa thob par 'dod pa dang / sdig pa'i bshes gnyen dang sdig pa'i grogs po thams cad yongs su spong bar 'dod pa dang / sangs rgyas dang byang chub sems dpa' dang dge ba'i bshes gnyen thams cad mnyes par bya bar 'dod pa dang /bdud kyi ris kyi lha thams cad gdul bar 'dod pa dang / sgrib pa thams cad rnam par sbyang bar 'dod pa dang / chos thams cad la bsgrib pa med pa thob par 'dod pas shes rab kyi pha rol tu phyin pa la bslab par bya'o//shA ri'i bu gzhan yang byang chub sems dpa' sems dpa' chen po phyogs bcu dag na sangs rgyas bcom ldan 'das gang dag bzhugs pa de dag bdag gis bsngags pa brjod do snyam na shes rab kyi pha rol tu phyin pa la bslab par bya'o//shA ri'i bu gzhan yang byang chub sems dpa' sems dpa' chen po sems bskyed pa gcig gis shar phyogs su 'jig rten gyi khams gang gA'i klung gi bye ma snyed 'da' bar 'dod pa dang / de bzhin du sbyar te/ phyogs bcu thams cad 'da' bar 'dod pas shes rab kyi pha rol tu phyin pa la bslab par bya'o zhes bya ba la sogs pa rgya cher gsungs so//de la ji ltar chos thams cad bdag med kyang las dang 'bras bur 'brel pa mi 'gal ba dang / rang bzhin med kyang ji ltar mthong bzhin pa'i chos thams cad mi 'gal ba de ltar ni/ yab dang sras mjal ba'i mdo las bstan te/rgyal po chen po skyes bu 'di ni khams drug pa/ reg pa'i skye mched drug pa/ yid kyi nye bar spyod pa bco brgyad pa'o/ /rgyal po chen po skyes bu 'di ni khams drug pa zhes gang smras pa de ci la brten te smras she na/ rgyal po chen po khams drug ni 'di dag go//drug gang zhe na/ 'di lta ste/ sa'i khams dang / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams dang / rgyal po chen po de dag ni khams drug ste/ skyes bu 'di dag ni khams drug pa'o zhes gang ngas smras pa de ni de la brten te smras so//skyes bu 'di ni reg pa'i skye mched drug pa'o zhes gang smras pa de ci la brten te smras she na/ rgyal po chen po reg pa'i skye mched drug ni 'di dag ste/ drug gang zhe na/ gzugs rnams la lta ba'i phyir mig reg pa'i skye mched dang / sgra rnams la nyan pa'i phyir rna ba reg pa'i skye mched da/dri rnams la snom pa'i phyir sna reg pa'i skye mched dang / ro rnams la myang ba'i phyir lce reg pa'i skye mched dang / reg bya rnams la reg pa'i phyir lus reg pa'i skye mched dang / chos rnams rnam par shes pa'i phyir yid reg pa'i skye mched do/ /rgyal po chen po de dag ni reg pa'i skye mched drug ste/skyes bu 'di dag ni reg pa'i skye mched drug pa'o zhes gang ngas smras pa de ni de la brten te smras so/ /rgyal po chen po skyes bu 'di ni yid kyi nye bar spyod pa bco brgyad pa'o zhes gang smras pa de ci la brtan te smras she na/ rgyal po chen po yid kyi nye bar spyod pa bco brgyad ni 'di dag ste/bco brgyad gang zhe na/ 'di la mig gis gzugs mthong na yid bde ba dang yid mi bde ba dang btang snyoms su 'gyur bar gzugs la nye bar spyod do/ /de bzhin du rna ba la sogs pa la yang brjod par bya'o/ /rgyal po chen po de la gang dag yid bde bar nye bar spyod pa drug dang /gang dag yid mi bde bar nye bar spyod pa drug dang / gang dag btang snyoms su nye bar spyod pa drug po de dag gcig tu bsdus na yid kyi nye bar spyod pa bco brgyad du 'gyur ro/ /de bzhin du sbyar te/ rgyal po chen po nang gi sa'i khams gang zhe na/gang ci yang rung ste/ lus 'di la nang gi khong na sra ba dang mkhrang ba'i rnam pa dang nye bar gyur pa dang zin pa'o/ /de yang gang zhe na/ 'di lta ste/ skra dang spu dang / sen mo dang zhes bya ba la sogs pa'o/ /rgyal po chen po phyi rol gyi sa'i khams gang zhe na/ gang ci yang rung ste/ phyi rol gyi sra ba dang mkhrang ba'i rnam pa dang / nye bar ma gyur pa dang ma zin pa 'di ni phyi rol gyi sa'i khams zhes bya'o/ /rgyal po chen po de la nang gi sa'i khams 'byung ba'i tshe gang nas kyang mi 'ong / 'gag pa'i tshe gang du yang stsogs par mi 'gyur ro/ /rgyal po chen po bud med nang du bdag ni bud med do zhes rtog pa'i dus de yod do //de nang du bud med ces brtags nas phyi rol du skyes pa la skyes pa zhes rtog go/ /de phyi rol du skyes pa la skyes pa zhes brtags nas chags par gyur te phyi rol gyi skyes pa dang phrad par 'dod do/ /skyes pa yang nang du bdag ni skyes pa'o zhes rtog ste de nang du bdag ni skyes pa zhes brtags nas phyi rol du bud med la bud med ces rtog go// phyi rol du bud med la bud med ces brtags nas chags par 'gyur te/ phyi rol gyi bud med dang phrad par 'dod do/ /phrad par 'dod pas phrad par 'gyur ro//phrad pa'i rkyen gyis mer mer po skye bar 'gyur ba'i dus de yod do/ /rgyal po chen po de la kun du rtog pa gang yin pa dang / gang kun du rtog pa po gang yin pa de gnyis ka yang med do/ /bud med la ni bud med med do/ /skyes pa la ni skyes pa med do/ /de ltar med cing yang dag pa ma yin par kun du rtog pa skye ste/kun du rtog pa de yang ngo bo nyid kyis med do/ /kun du rtog pa ji lta ba bzhin du phrad pa dang mer mer po yang ngo bo nyid kyis med do/ /gang ngo bo nyid kyis med pa de ji ltar sra ba skyed par 'gyur/ rgyal po chen po de ltar kun du rtog pa shes par byas nas sra ba nyid rtog par bya ste/ci nas sra ba ni skye ba'i tshe gang nas kyang mi 'ong bar shes par bya'o/ /rgyal po chen po 'di ltar gang lus 'di dur khrod kyi mthar 'gyur ba'i dus de yod do / /de'i sra ba de 'jig cing 'gag par 'gyur ba'i tshe/ shar phyogs su mi 'gro/ lho phyogs dang / nub phyogs dang / byang phyogs dang / steng dang 'og dang / phyogs mtshams rnams su yang mi 'gro ste/ rgyal po chen po nang gi sa'i khams ni de ltar blta'o/ /rgyal po chen po 'jig rten gnas pa 'di nam mkhar gyur pa la/ tshangs pa'i gzhal med khang rin po che sna bdun gyi rgyu las grub pa la gnas pa'i dus de yod do //rgyal po chen po de'i sra ba de 'byung ba'i tshe gang nas kyang mi 'ong ngo / /gzhan 'phrul dbang byed kyi lha rnams kyi gzhal med khang rin po che sna bdun gyi rgyu las grub pa byung yang rgyal po chen po de'i sra ba de 'byung ba'i tshe gang nas kyang mi 'ong ngo //khor yug dang khor yug chen po'i ri rdo rje'i rgyu las grub pa sra zhing brtan la lhun stug pa rnams gnas par gyur kyang de dag gi sra ba de 'byung ba'i tshe gang nas kyang mi 'ong ngo / /ri'i rgyal po ri rab dag dang / gnya' shing 'dzin dag dang / mu khyud 'dzin dag dang gshol mda' 'dzin dag dang /rdo rje 'dzin dag dang / seng ldeng can dag dang / rnam par 'dud dag dang / ri rta rna dag dang / blta na sdug dag dang / blta na sdug chen po dag dang / ther sgre dag dang / spos kyi dad ldang dag dang / gangs kyi ri dag dang / de ma yin pa'i ri nag po'i bar dag gnas pa dag dang /thams cad dang ldan pa'i stong gsum gyi stong chen po'i 'jig rten gyi khams gnas pa dag dang / rngams su dpag tshad brgyad khri bzhi stong yod la rgyar dpag tshad drug khri yod pa'i sa chen po gnas par gyur kyang rgyal po chen po sra bde 'byung ba'i tshe gang nas kyang mi 'ong ngo //rgyal po chen po 'jig rten 'di 'jig par 'gyur ba'i tshe sa chen po 'di mes tshig pa'am/ chus bshig pa'am/ rlung gis gtor bar 'gyur ba'i dus de yod do/ /de mes tshig na ni du ba yang mi mngon thal ba'i lhag ma yang mi mngon par 'gyur ro//'di lta ste dper na/ mar ram 'bru mar mes bsregs na du ba yang mi mngon zhing thal ba'i lhag ma yang mi mngon par 'gyur ro/ /de bzhin du stong gsum gyi stong chen po 'jig rten gyi khams 'di mes tshig pa'i tshe du ba yang mi mngon zhing thal ba'i lhag ma yang mi mngon par 'gyur ro//chus bshig pa'i tshe/ yang lhag ma ci yang mi mngon par 'gyur te/ 'di lta ste dper na lan tshwa chu'i nang du zhu ba ni lhag ma cung zad mi mngon par 'gyur ro/ /de bzhin du stong gsum gyi stong chen po'i 'jig rten gyi khams 'di yang chus bshig pa'i tshe lhag ma cung zad kyang mi mngon par 'gyur ro//rlung gis gtor ba'i tshe yang lhag ma cung zad kyang mi mngon par 'gyur te/ 'di lta ste dper na rnam par 'thor rlung gis bdas pa'i bye'u ni lhag ma cung zad kyang mi mngon par 'gyur ro/ /de bzhin du stong gsum gyi stong chen po'i 'jig rten gyi khams 'di yang rlung gis gtor ba'i tshe lhag ma cung zad kyang mi mngon par 'gyur ro//rgyal po chen po de ltar sa'i khams de 'byung ba yang stong / sa'i khams 'jig pa dang 'byung ba yang ngo bo nyid kyis stong ngo / /rgyal po chen po'i sa'i khams ni tha snyad tsam ma gtogs par sa'i khams nyid du mi dmigs te/tha snyad de yang bud med ma yin/ skyes pa ma yin gyi / rgyal po chen po de ltar yang dag pa ji lta ba bzhin gyi shes rab kyis rtogs shig /rgyal po chen po de la chu'i khams ni rnam pa gnyis te/ nang dang / phyi rol gyi'o/ / nang gi chu'i khams gang zhe na/ gang ci yang rung ste lus 'di la nang gi khong na chu dang chu'i rnam pa dang chu nyid dang / rlan pa dang / rlan pa'i rnam pa dang rlan pa nyid dang gsher ba nyid dang / nye bar gyur pa dang zin pa'o/ /de yang gang zhe na/ 'di lta ste/ mchi ma dang / rdul dang / mchil ma dang /snabs dang / chu ser dang / tshil dang / mkhris pa dang / ngar snabs dang / rnag dang / khrag dang / 'o ma dang / gcin dang / gzhan yang gang lus 'di'i nang gi khong na/ chu dang chu'i rnam pa dang chu nyid dang rlan pa dang rlan pa'i rnam pa dang rlan pa nyid dang gsher ba nyid dang / nye bar gyur pa dang zin pa 'di ni nang gi chu'i khams zhes bya'o//de bzhin du sbyar te/ rgyal po chen po'i sdug pa mthong na mchi ma 'byung ba dang / sdug bsngal gyis nyen pa dang chos kyi shugs kyis mchi ma 'byung ba dang rlung gis btab bam/ rnam pa gzhan dag gis kyang mchi ma 'byung ste/dpyad byas pas kyang nang gi chu'i khams 'phel bar 'gyur ba'i dus de yod de/ rgyal po chen po chu'i khams de 'byung ba'i tshe gang nas kyang mi 'ong ngo / /rgyal po chen po gang nang gi chu'i khams de yongs su skam par 'gyur ba'i dus de yod de / de yongs su skam zhing 'gag pa'i tshe gang du yang mi 'gro'o//rgyal po chen po gang nang gi me'i khams shas che bar gyur na/ des nang gi chu'i khams yongs su gdung bar 'gyur ba'i dus de yod de/ gdungs pa'i tshe gang du yang mi 'gro'o/ /rgyal po chen po de bzhin du nang gi chu'i khams 'byung ba'i tshe gang nas kyang mi 'ong ngo //'gag pa'i tshe gang du yang mi 'gro'o/ /rgyal po chen po gang 'jig rten 'di chags par 'gyur ba'i dus de yod de/ 'jig rten gyi khams 'di chags par 'gyur ba'i tshe/ nam mkha' 'di la kun du sprin shin tu stug po'i tshogs sum cu rtsa gnyis 'khrigs par 'gyur te /de dag 'khrigs pas thams cad dang ldan pa'i stong gsum gyi stong chen po'i 'jig rten gyi khams 'di thams cad g.yogs par 'gyur te/ de las bskal pa bar ma lnga'i bar du gshol mda' tsam gyi char gyi rgyun 'bab po/ /bskal pa bar ma lnga'i bar du glang po che'i pho mtshan tsam gyi char 'bab po//bskal pa bar ma lnga'i bar du rgyun mi 'chad pa'i char 'bab po/ /bskal pa bar ma lnga'i bar du thigs pa chen po'i char 'bab po/ /des sa chen po 'di nas tshangs pa'i 'jig rten gyi bar du chus khyab par gang bar 'gyur te/rgyal po chen po chu'i phung po chen po de 'byung ba'i tshe'ang gang nas mi 'ong ngo / /rgyal po chen po gang 'jig rten 'di 'jig par 'gyur ba'i dus de yod de / 'jig rten gyi khams 'jig par 'gyur ba'i tshe/ nyi ma gnyis 'jig rten du 'byung bar 'gyur te/ nyi ma gnyis 'jig rten du byung bas chu mig dang chu bran rnams skam par 'gyur ro//de nas nyi ma gsum 'jig rten du 'byung ste/ nyi ma gsum 'jig rten du byung ba na chu mig chen po dang chu klung chen po rnams skam par 'gyur ro/ /de nas nyi ma bzhi 'jig rten du 'byung ste/ nyi ma bzhi 'jig rten du byung bas gang nas chu klung chen po bzhi po de dag 'bab pa'i mtsho chen po ma dros pa de de yang thams cad kyi thams cad du skam par 'gyur thim par 'gyur te med par 'gyur ro//de nas nyi ma lnga 'jig rten du 'byung ste/ nyi ma lnga 'jig rten du byung bas rgya mtsho chen po yang dpag tshad gcig tsam gyi chu yongs su zad cing yongs su 'grib par 'gyur ro//dpag tshad gnyis dang / dpag tshad gsum dang / bzhi dang / lnga dang / bcu dang / nyi shu dang / sum cu dang / bzhi bcu dang / dpag tshad lnga bcu tsam gyi chu yongs su zad cing yongs su 'grib par 'gyur ba nas/dpag tshad bzhi khri'i bar gyi chu las par 'gyur ba dang / shing ta la gnyis tsam nas mchan khung nub tsam dang / ba lang gi rjes kyi chu tsam gyi bar du las par 'gyur ba'i dus de yod do/ /rgyal po chen po gang rgya mtsho chen po de las zil pa phram phrum tsam las par 'gyur ba'i dus de yod do//rgyal po chen po gang rgya mtsho chen po de la mdzub mo snubs pa tsam gyi chu'ang ma las par 'gyur ba'i dus de yod do/ /rgyal po chen po de tsam du yang chu'i khams de 'gag pa'i tshe yang gang du yang mi 'gro ste/ shar phyogs dang /lho phyogs dang nub phyogs dang byang phyogs dang steng dang 'og dang / phyogs mtshams rnams su mi 'gro'o/ /rgyal po chen po chu'i khams de ni skye ba yang stong / 'jig pa yang stong / gnas pa'i tshe yang chu'i khams de rang bzhin gyis stong ste/ rgyal po chen po chu'i khams de ni tha snyad tsam ma gtogs par chu'i khams kyis stong zhing mi dmigs pa ste/tha snyad de yang bud med ma yin/ skyes pa ma yin no zhes bya ba snga ma bzhin no/ /me'i khams ni rnam pa gnyis te/ nang gi dang / phyi rol gyi'o/ /nang gi me'i khams gang zhe na/ gang ci yang rung ste/ lus 'di la me dang me'i rnam pa dang / dro ba dang dro ba'i rnam pa dang / nye bar gyur pa dang zin pa'o/ /de yang gang zhe na/ gang gis lus 'di gdung ba dang / kun du gdung ba dang yongs su gdung ba dang / gang gis zos pa dang 'thungs pa dang / 'chos pa dang myangs pa rnams bde zhing legs par zhu bar 'gyur ba dang /gang gi shas che na/ rim mo rim mo zhes bya ba'i grangs su 'gro ba dang zhes bya ba la sogs pa'o/ /phyi rol gyi me'i khams gang zhe na/ gang phyi rol gyi me dang me'i rnam pa dang / dro ba dang dro ba'i rnam pa dang / nye bar ma gyur pa dang ma zin pa ste/de dag ni mi dag gtsub shing dang ldan pa dang rtswa dang ldan pa'am/ ba lang gi lci ba'i sbur ma'am shing bal gyi 'da' ba dang ldan par byas shing me 'byin te/ de byung nas grong yang tshig grong gi phyogs kyang tshig /grong khyer ram grong khyer gyi phyogs sam yul lam yul gyi phyogs sam/gling ngam/ rtswa'i gtos sam/ nags sam/ shing ngam/ rtswa'am/ ba lang gi lci ba dag sreg cing 'gro ba dang zhes bya ba la sogs pa'o/ /rgyal po chen po de la phyi rol gyi me'i khams ni 'byung ba'i tshe'ang gang nas kyang mi 'ong / 'gag pa'i tshe yang gang du yang mi 'gro ste/de ni rang bzhin dang bral ba'i phyir med pa/ las yod par 'gyur zhing yod par gyur nas kyang med par 'gyur ro zhes bya ba la sogs pa'o/ /de la nang gi rlung gi khams gang zhe na/ gang lus 'di la rlung dang rlung gi rnam pa dang / yang ba nyid dang g.yo ba nyid dang / nye bar gyur pa dang zin pa'o/ /de yang gang zhe na / 'di lta ste/ gyen du 'gro ba'i rlung dang / thur du 'gro ba dang / thad kar 'gro ba dang / rgyab tu 'gro ba dang / rgyab na gnas pa dang / lto na gnas pa dang / 'chad par byed pa dang / 'gas par byed pa dang / gzer ba dang / 'dar bu dang /sna skad dang / rlung skran dang / dbugs 'byung ba dang / rngub pa dang ldan pa dang / yan lag dang yan lag la gnas pa'i rlung dag dang zhes bya ba la sogs pa'o/ /phyi rol gyi rlung de yang shar phyogs kyi rlung yod do/ /lho phyogs dang / nub phyogs dang / byang phyogs kyi rlung yod do//rdul dang bcas pa dang / rdul med pa dang chung ba dang che ba'i rlung yod do/ /kun du khyab pa'i rlung dang / rnam par 'thor ba'i rlung dang / tshub ma'i rlung dag kyang yod do/ /rgyal po chen po rlung gi phung po chen po langs na shing dag kyang gcog /rtsig pa'i kha dag dang ri'i rtse mo dag kyang bsnyil zhing bsnyil nas rmeg med par 'gyur ba dag dang /yang sems can dag gos kyi mtha' ma'am sbud pa'am rlung g.yab dag gis rlung g.yob pa'i dus de yod do / /gzhan yang gang tshul 'di dang 'dra ba de ni phyi rol gyi rlung gi khams zhes bya ba la sogs pa snga ma bzhin no// // bam po bcu gcig pa/ nang gi nam mkha'i khams gang zhe na/ gang ci yang rung ste/ lus 'di la nang gi khong na nye bar gyur pa dang / zin pa dang / nam mkha' dang nam mkha'i rnam pa nang zhes bya ba'i grangs su 'gro ba/ ma gang ba dang pags pa dang sha dang khrag gis gang bar bya ba ma yin pa'o//de yang gang zhe na/ lus 'di la mig gi nang zhe'am/ rna ba dang / sna'i nang zhe'am/ kha'am kha'i nang zhe'am/ kha'i sgo zhe'am/ lkog ma zhe'am/ mid pa zhe'am/ gang nas kyang mid pa dang / gang du gnas pa dang / gang gis zos pa dang 'thungs pa dang 'chos pa dang myangs pa rnams thur du rgyu bar byed pa dang /gzhan yang gang lus 'di la nang gi khong na nye bar gyur pa dang / zin pa dang / phung por gyur pa'am khams su gyur pa'am skye mched du gyur pa dag ni nam mkha'i dang / nam mkha'i rnam pa dang / ma gang ba dang pags pa dang sha dang khrag gis gang bar bya ba ma yin pa nang gi grangs su 'gro ba khong stong dang bu ga zhes bya ba dag ste/de dag ni nang gi nam mkha'i khams zhes bya'o/ /phyi rol gyi nam mkha'i khams gang zhe na/ gang ci yang rung ste/ phyi rol gyi nam mkha' dang nam mkha'i rnam pa dang /ma gang ba dang / gzugs su gyur pas gang bar bya ba ma yin pa / ma 'dres pa khong stong dang bu gar gyur pa 'di ni phyi rol gyi nam mkha'i khams zhes bya'o/ /rgyal po chen po gang las kyi rkyen gyis skye mched rnams 'byung ba'i dus de yod do / /de dag nam mkha'i khams la kun nas skor bar byed do//de nang gi nam mkha'i khams zhes bya ba'i grangs su 'gro yang de ni gang las kyang ma 'ongs so/ /rgyal po chen po gzugs zhig na thams cad nam mkha' 'gyur ba'i dus de yod do/ /de ci'i phyir zhe na/ nam mkha'i khams ni zad mi shes pa'i phyir ro/ / de lta na nang gi nam mkha'i khams ni gnas shing mi g.yo ba'o/ /rgyal po chen po 'di lta ste dper na/ 'dus ma byas de ni mya ngan las 'das pa'i dbyings te/ de bzhin du nam mkha'i khams kyang thams cad du song bar blta bar bya'o/ /rgyal po chen po 'di lta ste dper na/ mi zhig gis thang la khron pa'am rdzing bu'am khron rings sam rdzing zhig brkos na/rgyal po chen po 'di ji snyam du sems/ de'i nam mkha' de ga las 'ongs/ gsol pa/ bcom ldan 'das de ni gang las kyang ma mchis so/ /rgyal po chen po 'di lta ste dper na/ me des khron pa nas rdzing gi bar de dag phyir bkang na rgyal po chen po de ji snyam du sems/de'i nam mkha' de gang du song / gsol pa/ bcom ldan 'das de ni gang du yang ma mchis te/ de'i slad du zhe na/ nam mkha'i khams ni 'gro ba'am 'ong bar nye bar gnas pa ma lags/ bud med kyi dngos po dang skyes pa'i dngos por nye bar gnas pa ma lags pa'i slad du'o/ /bka' stsal pa/ rgyal po chen po de ltar na phyi rol gyi nam mkha'i khams ni mi g.yo mi 'gyur pa'o/ /de ci'i phyir zhe na/ nam mkha'i khams ni nam mkha'i khams kyis stong zhing nam mkha'i khams dang bral ba ste/nam mkha'i khams ni bud med kyi dngos por nye bar mi gnas/ skyes pa'i dngos por nye bar mi gnas kyis/ de ltar yang dag pa ji lta ba bzhin du yang dag pa'i shes rab kyis rtogs shig /rgyal po chen po de la rnam par shes pa'i khams gang zhe na/ mig gi dbang ba ni bdag po//gzugs ni dmigs pa/ gzugs so sor rnam par rig pa ste/ sngon po rnam par rig pa'am/ ser po dang dmar po dang khra bo rnam par rig pa'am/ ring po dang thung ngu dang / sbom po dang phra mo rnam par rig pa ste/ rgyal po chen po de ltar gang ci yang rung / kha dog dang dbyibs rnam par rig pa 'di ni mig gi rnam par shes pa'i khams zhes bya'o/ /de bzhin du gang ci yang rung / rna ba'i dbang po ni bdag po nas/ yid kyi dbang po ni bdag po/ /chos ni dmigs pa ste/ sgra rnam par rig pa'am/ dri rnam par rig pa'am/ ro rnam par rig pa'am/rig pa rnam par rig pa'am/ chos rnam par rig pa 'di ni/ rna ba'i rnam par shes pa'i khams nas yid kyi rnam par shes pa'i khams kyi bar te/ de ltar dbang po drug ni bdag po/ /yul drug ni dmigs pa yin la/ yul rnam par rig pa 'di ni rnam par shes pa'i khams zhes bya'o//rgyal po chen po rnam par shes pa'i khams de ni dbang po la mi brten/ yul rnams las ma 'ongs/ bar gyi dbus na mi gnas te/ de ni nang na yang ma yin/ phyi rol na yang ma yin/ gnyi ga med par yang ma yin no/ /rnam par shes pa'i khams de ni dngos po so sor rnam par rig nas 'gag ste/de 'byung ba'i tshe gang nas kyang ma 'ongs/ 'gag pa'i tshe gang du yang mi 'gro'o/ /rnam par shes pa'i khams de 'byung ba yang stong / 'jig pa yang stong ste/ rnam par shes pa'i khams de 'byung ba yang rang bzhin gyis stong ngo //rgyal po chen po de ltar na/ tha snyad ma gtogs par rnam par shes pa'i khams de ni rnam par shes pa'i khams nyid kyis stong ste/ tha snyad de yang skyes pa ma yin/ bud med ma yin gyi/ de ni de ltar yang dag pa ji lta ba bzhin du yang dag pa'i shes rab kyi sa rtogs shig /rgyal po chen po de la mig gi skye mched gang zhe na/ de ni 'byung ba chen po bzhi dang ba ste/ 'di ltar sa'i khams dang / chu'i khams dang / me'i khams dang / rlung gi khams so/ /de la sa'i khams dang ba ni skye mched ma yin no/ /chu'i khams dang ba yang ma yin no//me'i khams dang ba yang ma yin no/ /rlung gi khams dang ba yang mig gi skye mched ma yin no/ /de ci'i phyir zhe na/ sa'i khams dang ba ni chos gang la yang skye mched dam skye mched thob par bya bar nye bar mi gnas so/ /de bzhin du rlung gi khams kyi bar dang ba ni tshes gang la yang skye mched dam skye mched thob par bya bar nye bar mi gnas so//de ci'i phyir zhe na/ chos de dag ni sems pa med cing byed pa med la ci la yang mi nus pa ste/ rgyal po chen po chos rnams ni re re nas btsal na tha snyad tsam ma gtogs par mig gi skye mched mi dmigs so//de ci'i phyir zhe na/ sa'i khams dang ba ni sa'i khams dang bas stong / rlung gi khams dang ba'i bar ni rlung gi khams dang bas stong ste/ chos gang dag rang bzhin gyis stong pa de dag la dang ba'am 'khrugs par 'gyur ba'ang ga la yod de/ gang la yang dang ba'am 'khrugs pa mi dmigs pa de dag ji ltar gzugs la lta bar 'gyur/de ltar mig gi skye mched ni mig gi skye mched kyi rang bzhin gyis shin tu stong ste/ de ni 'ong ba dang 'gro ba med pa'i phyir sngon gyi mtha' yang mi dmigs phyi ma'i mtha' yang mi dmigs so/ /rang bzhin med pa'i phyir de la gnas pa yang mi dmigs so//gang rang bzhin gyis med pa de ni bud med kyang ma yin skyes pa yang ma yin no/ /gang bud med kyang ma yin skyes pa yang ma yin pa de ni des rlom sems su lta ga la 'gyur te/ rgyal po chen po rlom sems ni bdud kyi spyod yul lo/ /rlom sems med pa ni sangs rgyas kyi spyod yul lo//de ci'i phyir zhe na/ chos thams cad ni rlom sems dang bral ba'o/ /de bzhin du sbyar te/ rgyal po chen po de la rna ba'i skye mched nas lus kyi skye mched kyi bar gang zhe na/ gang 'byung ba chen po bzhi dang ba'o/ /rgyal po chen po de ltar na chos thams cad kyi bar ni/rnam par thar pa la mngon par phyogs pa chos kyi dbyings su nges pa/ nam mkha'i khams kyi mthas klas pa/ gdags su med pa/ tha snyad med pa/ brjod du med pa/ brjod par bya ba ma yin pa'o/ /rgyal po chen po gang la dbang po rnams thogs par 'gyur ba de ni yul rnams zhes bya ste/mig gis gzugs rnams la thogs par 'gyur ba de'i phyir gzugs rnams ni mig gi yul zhes bya'o/ /de bzhin du rna ba'i sgra rnams zhes bya ba la sogs pa'o/ /de la mig gzugs rnams la thogs so zhes bya ba 'di ni 'bab pa'i thogs par 'gyur bar bstan te/'di ltar mig ni gzugs rnams la rnam pa gsum du 'bab ste/ mthun pa rnams la sdug pa'i 'du shes kyis 'bab pa dang / mi mthun pa rnams la khong khro ba'i 'du shes kyis 'bab pa dang / mthun pa yang ma yin mi mthun pa yang ma yin pa rnams la btang snyoms kyi 'du shes kyis 'bab pa //de bzhin du yid ni chos rnams la zhes bya ba la sogs pa ste/ yul de dag ni yid kyi spyod yul zhes bya ba ste/ de la yid spyod cing rnam par spyod pas de'i phyir yid kyi spyod yul zhes bya'o/ /rgyal po chen po yid de mthun pa'i gzugs rnams la rjes su chags par spyod pa des ni de'i 'dod chags skye bar 'gyur/mi mthun pa'i gzugs rnams la khong khro bar spyod pa des ni de'i zhe sdang skye bar 'gyur/ mthun pa yang ma yin mi mthun pa yang ma yin pa rnams la rmongs par spyod pa des ni de'i gti mug skye bar 'gyur te/de bzhin du sgra dang dri dang ro dang reg bya rnams la yang chos rnam pa gsum gsum la dmigs pa myong bar 'gyur te snga ma bzhin no/ /rgyal po chen po de la dbang po rnams ni sgyu ma lta bu yul rnams ni rmi lam lta bur shes par bya'o/ / rgyal po chen po 'di lta ste dper na mi zhig nyal ba'i rmi lam na yul gyi bzang mo dang lhan cig tu yongs su spyod par rmis la/ de nyal ba las sad nas bud med yul gyi bzang mo de rjes su dran par gyur na/ rgyal po chen po 'di ji snyam du sems/ rmi lam na mthong ba'i yul gyi bzang mo de yod dam gsol pa/bcom ldan 'das de ni ma mchis so/ /bka' stsal pa rgyal po chen po 'di ji snyam du sems skyes bu gang rmi lam na yul gyi bzang mo mthong ba'i bud med de dang lhan cig tu rtse ba dang dga' ba dang / mngon par zhen par 'gyur ba de mkhas pa'i rang bzhin can yin nam gsol pa/bcom ldan 'das de ni ma lags te/ de ci'i slad du zhe na/ bcom ldan 'das rmi lam ni mthong ba'i yul gyi bzang mo de ni shin tu ma mchis shing mi dmigs na/ de dang lhan cig tu yongs su spyod pa lta ga la mchis te gzhan du na gang de la zhen pa'i mi de ni shin tu phongs shing dub pa'i skal ba can du 'gyur ro//bcom ldan 'das kyis bka' stsal pa/ rgyal po chen po de bzhin du byis pa so so'i skye bo thos pa dang mi ldan pa yang mig gis gzugs mthong na yid bde bar 'gyur ba rnams la mngon par zhen par 'gyur te/de mngon par zhen nas rjes su chags par 'gyur ro/ /rjes su chags par gyur nas yongs su chags par 'gyur ro/ /yongs su chags par gyur nas 'dod chags las byung ba'i lus kyis ni rnam pa gsum ngag gis ni rnam pa bzhi yid kyis ni rnam pa gsum mngon par 'du byed de /las mngon par 'du byas pa de yang thog ma nyid nas zad cing 'gags la bral zhing rnam par 'gyur ba ste/ shar phyogs su brten te gnas pa ma yin/ lho phyogs dang nub phyogs dang byang phyogs dang / steng dang / 'og dang / phyogs mtshams rnams su brten te gnas pa ma yin/'di na ma yin pha bi na ma yin par bar ma dor ma yin te/ dus gzhan na 'chi ba'i dus dang tshod nye bar gnas pa'i tshe/ srog gi dbang po 'gags te tshe yongs su zad cing de dang skal ba 'dra ba'i las rnams kyang zad nas rnam par shes pa tha ma 'gags pa'i tshe/'di lta ste dper na nyal nyal ba las sad pa'i yul gyi bzang mo dang 'dra bar yid kyis dmigs par 'gyur ro/ /rgyal po chen po de la rnam par shes pa tha ma'i dbang dang las dmigs pa de dang rkyen gnyis kyis skye ba'i char gtogs pa'i rnam par shes pa dang po 'byung ste/yang na ni sems can dmyal bar/ yang na ni dud 'gro'i skye gnas su/ yang na ni gshin rje'i 'jig rten du/ yang na ni lha ma yin gyi ris su/ yang na ni mi'i nang du/ yang na ni lha'i nang du skye bar 'gyur te/ rnam par shes pa dang po skye ba'i char gtogs pa de/ de 'gags ma thag tu bar ma chad par/ gang la rnam par smin pa myong bar 'gyur ba mngon pa'i sems kyi rgyud skal ba 'dra bar 'byung ngo / /de la gang rnam par shes pa tha ma 'gag pa de ni 'chi 'pho zhes bya ba'i grangs su 'gyur ro/ /gang rnam par shes pa dang po 'byung ba de la ni skye ba zhes bya'o //rgyal po chen po de lta na chos gang yang 'jig rten 'di nas 'jig rten pha rol du 'pho ba'ang med la 'chi 'pho dang skye bar mngon pa'ang yod de/ rgyal po chen po rnam par shes pa tha ma de skye ba'i tshe yang gang nas kyang mi 'ong / /'gag pa'i tsho gang du yang mi 'gro'o//las kyang skye ba'i tshe gang nas kyang mi 'ong 'gag pa'i tshe gang du yang mi 'gro'o/ /rnam par shes pa dang po skye ba'i tshe yang gang nas kyang mi 'ong 'gag pa'i tshe yang gang du yang mi 'gro'o/ /de ci'i phyir zhe na/ ngo bo nyid med pa'i phyir te / rnam par shes pa tha ma ni rnam par shes pa tha mas stong /las ni las kyis stong / rnam par shes pa dang po ni rnam par shes pa dang pos stong / 'chi 'pho ni 'chi 'phos stong / skye ba ni skye bas stong la / las rnams 'bras bu med par mi 'gyur zhing rnam par smin pa myong bar mngon pa yang yod de/ de la ming gi brda tsam ma gtogs par byed pa po'am za ba po gang yang med do/ /rgyal po chen po 'di lta ste dper na/ mi zhig nyal ba'i rmi lam na dgra dang 'thab pa zhig rmis la/ nyal ba las sad nas de nyid dran par gyur na/ rgyal po chen po 'di ji snyam du sems rmi lam du rmis pa'i dgra de'am dgra de dang 'thab pa yod dam/gsol pa bcom ldan 'das de ni ma mchis so/ /bka' stsal pa/ rgyal po chen po 'di ji snyam du sems 'o na skyes bu gang rmi lam gyi dgra la mngon par zhen pa'am/ dgra dang 'thab par 'gyur ba de mkhas pa'i rang bzhin can yin nam/gsol pa bcom ldan 'das de ni ma lags te/ de ci'i slad du zhe na/ bcom ldan 'das rmi lam na mthong ba'i dgra de nyid kyang shin tu ma mchis shing mi dmigs na de dang 'thab pa lta ga la mchis te gzhan du na gang de la mngon par zhen pa'i mi de ni phongs shing dub pa'i skal ba can du 'gyur ro//bcom ldan 'das kyis bka' stsal pa/ rgyal po chen po de bzhin du byis pa so so'i skye bo thos pa dang mi ldan pa yang mig gis gzugs mthong na yid mi bde bar 'gyur ba rnams la yang mngon par zhen par 'gyur te mngon par zhen nas khong khro bar 'gyur ro//khong khro bar gyur nas zhe sdang bar 'gyur/ zhe sdang bar gyur nas zhe sdang las byung ba'i las lus kyis ni rnam pa gsum ngag gis ni rnam pa bzhi yid kyis ni rnam pa gsum mngon par 'du byed de snga ma bzhin no/ /rgyal po chen po 'di lta ste/dper na/ mi zhig gnyid kyis log pa'i rmi lam na 'dres non par rmis te 'jigs pas shin tu rmongs par 'gyur la/ nyal ba las sad nas 'dre dang shin tu rmongs par gyur pa de dran par gyur na/ rgyal po chen po de ji snyam du sems rmi lam na mthong ba'i 'dre de dang shin tu rmongs par gyur pa de yod dam/gsol pa bcom ldan 'das de ni ma mchis so/ /bka' stsal pa/ rgyal po chen po 'di ji snyam du sems 'o na de ltar rmi lam na mthong ba'i 'dre de la mngon par zhen cing shin tu rmongs par 'gyur ba'i mi de mkhas pa'i rang bzhin can yin nam/ gsol pa bcom ldan 'das de ni ma lags te/de ci'i slad du zhe na/ bcom ldan 'das rmi lam gyi 'dra de ni shin tu ma mchis shing mi dmigs na shin tu rmongs pa lta ga la mchis te/ gzhan du na gang de la mngon par zhen pa'i mi de ni phongs shing dub pa'i skal ba can du 'gyur ro/ / bcom ldan 'das kyis bka' stsal pa/ rgyal po chen po de bzhin du byis pa so so'i skye bo thos pa dang mi ldan pa yang mig gis gzugs mthong na btang snyoms su 'gyur ba rnams la yang mngon par zhen par 'gyur te/ mngon par zhen nas shin tu rmongs par 'gyur ro/ /shin tu rmongs nas kun nas nyon mongs par 'gyur ro//kun nas nyon mongs nas gti mug las byung ba'i las lus kyis ni rnam pa gsum ngag gis ni rnam pa bzhi yid kyis ni rnam pa gsum mngon par 'du byed de zhes bya ba la sogs pa snga ma bzhin no/ /rgyal po chen po 'di lta ste dper na mi zhig nyal ba'i rmi lam na yul gyi bud med bzang mo glu len pa'i glu snyan pa dang pi bang len pa'i sgra snyan pa nyan cing de glu dang rol mo'i sgra des yongs su spyod pa rmis la/nyal ba las sad nas glu dang rol mo'i sgra de nyid dran par gyur na/ rgyal po chen po 'di ji snyam du sems rmi lam na mthong ba'i yul gyi bud med bzang mo dang /glu dang rol mo'i sgra de yod dam/ gsol pa bcom ldan 'das de ni ma mchis so/ /bcom ldan 'das kyis bka' stsal pa/ rgyal po chen po 'o na rmi lam na mthong ba'i yul gyi bud med bzang mo de glu dang rol mo'i sgra la mngon par zhen pa'i mi de mkhas pa'i rang bzhin can yin nam/gsol pa bcom ldan 'das de ni ma lags te/ de ci'i slad du zhe na/ rmi lam na mthong ba'i yul gyi bud med bzang mo de ni shin tu ma mchis shing mi dmigs na/ de'i glu dang rol mo'i sgra lta ga la mchis te/ gzhan du na gang de la zhen pa'i mi de ni phongs shing dub pa'i skal ba can du 'gyur ro//bcom ldan 'das kyis bka' stsal pa/ rgyal po chen po de bzhin du byis pa so so'i skye bo thos pa dang mi ldan pa yang rna bas sgra thos na yid du 'ong ba rnams la mngon par zhen par 'gyur te zhes bya ba la sogs pa snga ma bzhin no//de bzhin du dri la sogs pa la yang rnam pa gsum gsum du rig par bya'o/ /de bzhin du sbyar te/ rgyal po chen po khyod kyis ji ltar na bdag lha dang bcas pa'i 'jig rten gyi mig dang / sgron ma dang / mar me dang / snang ba dang / gru dang / dogs dang /'bab stegs dang / 'dren pa dang / yongs su 'dren pa dang / ston pa dang / ded dpon dang / sngon du 'gro bar 'gyur snyam pa dang / bdag grol nas dgrol bar bya'o/ /rgal nas bsgral bar bya'o/ /dbugs phyin nas dbugs dbyung bar bya'o/ / yongs su mya ngan las 'das nas yongs su mya ngan las 'da' bar bya'o snyam du yid la gzhag par bya'o / /rgyal po chen po dbang phyug lta zhig ni sngon myong bar gyur pa'i mtha' yang mi mngon te/ rgyal po chen po de ltar dbang po rnams ni sgyu ma lta bu ste chog mi shes so/ /tshim par mi 'gyur ba'o//yul rnams ni rmi lam lta bu ste tshim par mi nus pa ngoms par mi nus pa'o zhe'o/ /de la 'khor los sgyur ba'i rgyal po grags pa mtha' yas kyi gtam rgyud las mtho ris nas lhung ste/ de'i tshe rgyal po chen po dang grong khyer pas bskor ba las 'di skad 'byung ste/ 'di lta ste/ dper na/ mar gyi gong bu'am/ mar gsar gyi gong bu bye ma tsha ba la gzhag pa ni 'ju zhing mi gnas so/ /de bzhin du rgyal po chen po grags pa mtha' yas kyang bying zhing mi gnas par gyur to/ /de nas rgyal po chen po dga' byed kyis/ rgyal po chen po grags pa mtha' yas de ltar bying ba de la 'di skad ces smras so//rgyal po chen po grags pa mtha' yas kyis legs par brjod pa ji skad cig gsungs zhes mchi na bdag gis 'jig rten pa rnams la ji skad cig lung bstan par bgyi/ des smras pa/ rgyal po chen po grags pa mtha' yas ni gling chen po bzhir rgyal srid kyi dbang phyug la dbang byas shing bsam pa yid bzhin du grub la don med par ma gyur pa'ang myong /shing thams cad na dus ma yin par yid bzhin du 'bras bu chags pa dang / gnod pa thams cad rgyun chad pa dang / sems can thams cad kyi yid la bsams pa don yod pa dang /spos chu'i char dbab pa dang / lha'i yid bzhin gyi gos kyi char dbab pa dang / dbyig gi char dbab pa dang / gser gyi char dbab pa dang / rin po che sna tshogs kyi char dbab pa dang / yo byad thams cad kyi char dbab pa yang myong bar gyur nas/ gling chen po bzhi dag tu gnas te gling chen po bzhi'i rgyal srid kyi dbang phyug la dbang byas nas/brgya byin gyi stan phyed mnan pa la 'dod pa chen pos ma btang ste / 'dod pas ma ngoms bzhin du 'chi ba'i dus byas so zhes rgyal po chen po khyod kyis lung ston cig /de bas na rgyal po chen po khyod kyi dbang po rnams ni sgyu ma lta bu/yul rnams ni rmi lam lta bu'o zhes de ltar rig par byas nas sems nges par gzhag par bya ste/ gzhan dring mi 'jog par bya'o/ /rgyal po chen po 'di lta ste dper na/ smig rgyu'i rang bzhin ni ma byung mi 'byung da ltar yang med do/ /de bzhin du gzugs dang tshor ba dang 'du shes dang 'du byed dang rnam par shes pa'i rang bzhin yang ma byung mi 'byung da ltar yang med do zhes bya ba la sogs pa'o//yang de nyid las gsungs pa/ 'di ltar de bzhin gshegs pas kun rdzob dang don dam pa gnyis thugs su chud de shes par bya ba yang kun rdzob dang don dam pa'i bden pa 'dir zad do//de yang bcom ldan 'das kyis stong pa nyid du rab tu gzigs rab tu mkhyen legs par mngon du mdzad pas de'i phyir thams cad mkhyen pa zhes bya'o/ /de la kun rdzob ni 'jig rten gyi spyod par de bzhin gshegs pas gzigs so/ / don dam pa gang yin pa de ni brjod du med pa ste/ shes par bya ba ma yin pa/ rnam par shes par bya ba ma yin pa/ yongs su shes par bya ba ma yin pa/ ma bstan pa/ rab tu ma bstan pa/ ma thos pa/ thos par ma byas pa/ ma shes pa/ rnam par ma shes pa/ ma bstan pa/ma mthong ba/ ma btags pa/ 'dzin du ma bcug pa/ rtogs par ma byas pa/ thob par ma byas pa/ ma thob pa/ nye bar ma bsnyen pa/ ma bor ba / ma bzhag pa/ ma spangs pa/ bya ba med pa/ byed pa med pa/ rab tu zhi ba med pa/ ma smad pa/ ma bstod pa/ thogs pa ma yin pa/ma thogs pa ma yin pa/ bde ba ma yin pa/ sdug bsngal ba ma yin pa/ snyan pa ma yin pa/ mi snyan pa ma yin pa/ gzugs ma yin pa/ gzugs med pa ma yin pa zhes bya ba la sogs pa dang / gang gi bde bar gshegs la 'gro ba rnams/ / bde ba'i don du dad pa skye 'gyur ba/ /rgyal bas 'gro ba rnams kyi don slad du/ /'jig rten phan phyir kun rdzob de bstan to/ /sems can tshogs kyi 'gro drug gang bstan pa/ /sems can dmyal dang dud 'gro yi dags dang / /lha min ris dang mi dang lha yi rnams//mi yi seng ges kun rdzob btags pa mdzad/ /rigs dmar de bzhin mtho ba'i rigs rnams dang / /phyug po'i khyim dang dbul ba'i rigs rnams dang / /zhes bya ba la sogs pa'o/ /yang gsungs pa/ gang bcom ldan 'das kyis bla na med pa yang dag par rdzogs pa'i byang chub tu lung bstan pa'i chos de gang zhig /ci gzugs sam/ 'on te tshor ba'am/ 'on te 'du shes sam/ 'on te 'du byed dam/ 'on te rnam par shes pa zhig bcom ldan 'das kyis bla na med pa yang dag par rdzogs pa'i byang chub tu lung bstan snyam nas/ de dag 'di snyam du sems te/ gzugs ni bcom ldan 'das kyis bla na med pa yang dag par rdzogs pa'i byang chub tu lung ma bstan pa nas/ rnam par shes pa'i bar du ma yin no/ /de ci'i phyir zhe na/ gzugs kyang ma skyes pa/ byang chub kyang ma skyes pa ste/ ji ltar ma skyes pas ma skyes par mngon par rdzogs par 'tshang rgya bar bya/de bzhin du rnam par shes pa'i bar du shes par bya'o/ /de bzhin du sbyar te/ de ltar chos thams cad mi dmigs na/ 'di la sangs rgyas ni gang / byang chub sems dpa' ni gang / byang chub ni gang / lung bstan pa ni gang /gzugs ni gzugs kyis stong pa nas rnam par shes pa'i bar du'o/ /de bzhin du sbyar te/ de dag ni tha snyad tsam ming tsam brda tsam kun rdzob tsam brjod pa tsam gdags pa tsam ste/ de la mkhas pa rnams kyis mngon par zhen par bya ba'i mi cha'o zhe'o/ /yang de nyid las 'di skad ces gsungs te/'phrul dga'i lha rnams kyis gsol pa/ bcom ldan 'das kyis gsungs pa'i don bdag cag gis 'tshal ba ltar na / chos thams cad ni yang dag pa'i mtha' dang / sgrib pa ma mchis pa'i mtha' dang / mtha' yas pa'i mtha' dang / mi gnas pa'i mtha' zhes bya ba la sogs pa dang /bcom ldan 'das chos thams cad rang bzhin ma yin pa ni byang chub legs par rig par bgyi'o/ /tha na mtshams med pa rnams kyang byang chub po/ /de ci'i slad du zhe na/ bcom ldan 'das byang chub ni rang bzhin ma mchis pa ste/ mtshams med pa rnams kyang rang bzhin ma mchis pa lags pas de'i slad du mtshams med pa rnams kyang byang chub ces bgyi'o/ /bcom ldan 'das gang su dag yongs su mya ngan las 'das par 'tshal ba de dag ni gnod par 'gyur ba'i chos can te/ de ci'i slad du zhe na/ gal te 'khor bar zhugs pa zhig mchis na ni mya ngan las 'das pa yang 'tshal bar 'gyur na zhes bya ba'o//gzhan 'phrul dbang byed kyi lha rnams kyis gsol pa/ bcom ldan 'das 'phrul dga'i lha rnams kyis yang dag pa'i mtha' zhes gang smras pa de la bdag cag gis ni yang dag pa yang ma dmigs na de'i mtha' lta smos kyang ci 'tshal/de ci'i slad du zhe na/ bcom ldan 'das gang la la zhig gis yang dag par dmigs na ni/ mtha' yang des dmigs par 'gyur te/ de ni gnyis kyis spyod pa'o zhes so/ /de nyid las 'di skad du/ mi mjed kyi bdag pos ston pa la bstod pa//ji ltar mi zhig rmi lam bkres gyur pas/ /kha zas ro brgya zos pas 'grangs 'gyur ba/ /de la bkres med zas med sems can med/ /rmi lam de 'drar chos rnams thams cad gzigs/ /mi zhig yid du 'ong ba'i tshig smras na/ / dga' bar 'gyur yang tshig la 'pho ba med/ /tshig nyid med cing dgar 'gyur dngos kyang med/ /de mkhyen de la the tshom yang mi mnga'/ /pi wang sgra snyan mnyan na rnar snyan te/ /sgra de rang bzhin gang yang yod ma yin/ /de ltar mkhas pas phung po 'di gzigs na/ /phung po'i rang bzhin gang yang dmigs mi mnga'//ji ltar mi yis dung gi sgra thos te/ /sgra 'di gang las byung zhes brtags byas kyang / /rang bzhin stong pa'i dngos de mi dmigs pa/ /mi dbang khyod kyis de bzhin chos kun gzigs/ /ji ltar mi zhig bsod pa'i kha zas la/ /yan lag srog phan ji ltar 'gyur brtags na//dngos med yan lag srog kyang de bzhin te/ /drang srong chen pos de bzhin chos kun gzigs/ /ji ltar mi zhig nam mkha'i 'ja' mthong na/ /yan lag gzhigs brtags rang bzhin med phyir stong / /'ja' 'drar yan lag de dag stong pa nyid//drang srong che khyod de bzhin chos kun gzigs/ /grong khyer mchog kyang yan lag rnams gzigs na/ /grong khyer rang bzhin de bzhin ming mi dmigs/ /grong khyer ji bzhin de ltar yan lag stong / /mi dbang khyod kyis de bzhin chos kun gzigs//skyes bu dga' bar rnga zhig brdungs bgyis na/ /dga' ba skyes kyang sgra yi rang bzhin stong / /ji ltar sgra bzhin de yi yan lag stong / /mi dbang khyed kyis de bzhin chos kun gzigs/ /skyes bus ji skad rnga de brdungs pa'i tshe/ /sgra ni phyogs su mi 'gro 'byung ba med//phyogs su de bzhin 'gag par mi 'gyur te/ /mi dbang khyed kyis de bzhin chos kun gzigs/ /skyes bus ji ltar rnga de brdungs pa'i tshe/ /thogs pa med cing snyan pa'i rang bzhin te/ /sgra 'drar de yi yan lag de rang bzhin/ /mi dbang khyod kyis chos kun de ltar gzigs/ / skyes bus ji ltar rnga de brdungs pa'i tshe/ /sgra de 'jig rten dga' byar rtog pa med/ /sgra 'drar de yi yan lag de rang bzhin/ /mi dbang khyod kyis chos kun de ltar gzigs/ /skyes bus ji ltar rnga de brdungs pa'i tshe/ /g.yo ba med cing zhi ba'i dngos kyang med/ /sgra 'drar de yi yan lag de rang bzhin//mi dbang khyod kyis chos kun de ltar gzigs/ /skyes bus ji ltar rnga de brdungs pa'i tshe/ / sgra de rang dbang ma byung yan lag min/ /ji ltar sgra bzhin khyod kyi yan lag stong / /mi dbang khyod kyis chos kun de ltar gzigs/ /zhe'o/ /yang gsungs pa/byams pa dge bsgoms sems can dmigs pa yin zhes 'dren pas bka' stsal pa / /sems can rnam par bshig cing 'gro ba thams cad sems can med par mkhyen/ /de ltar rkang gnyis dam pa rnyog pa mi mnga' the tshom bral thugs ldan/ /des na bde gshegs rnams brtags blo mnga' mchod 'os khyod la mchod par 'tshal//bde bar gshegs pas sdug bsngal phyogs bcur gnas pa kun du mi dmigs kyang / /lha yi lhar gyur khyod kyis sems can rnams la snying rje bgyi bar gsungs/ /de ltar rgyal mchog bdag cag rgyal ba'i dgongs pa ji bzhin 'tshal//des na rkang gnyis gtso bo mi mchog 'os khyod la mchod par 'tshal/ /thub pa khyod kyis sems can dang ni bsal bgyi sdug bsngal ma gzigs la/ /dgyes pa skyes nas rab tu dgyes pa'i thugs kyis mi dgyes rnam par bsal/ / de ltar sangs rgyas tshul ni bsam gyis mi khyab tshul 'di ji bzhin 'tshal/ /des na mi mchog khyod la mchod nas mnyes pa'i 'bras bu thob par bgyi/ /thub pas sku ni rnam par spangs pas sku btsal mdzad na ma bsnyengs kyang / /de ltar 'dren pa dran pa ma gsung ma lags bsnyel ba yong mi mnga'//bde bar gshegs pas lus la song ba'i bsgom pa bsgom par gyis zhes gsungs/ /sangs rgyas tshul 'di rig nas bde bar gshegs pa skyob la mchod par bgyis/ /sdug bsngal zhi bya phyir ni zhi gnas lhag mthong lam yang bsgoms zhes gsungs//bcom ldan gang gis 'gro ba nyon mongs bag chags dri ma de dag zhi/ /thub pa zhi gnas lhag mthong dri ma thams cad stong pa ste/ /'di la lha tshogs gang du'ang the tshom ma mchis skyon bral khyod la mchod/ /yang gsungs pa/ mig ni mig gi rang bzhin dang bral ba/khams ni khams kyi rang bzhin dang bral ba'i slad du ste/ chos gang la rang bzhin ma mchis pa de ni dngos po ma mchis pa'o/ /gang la dngos po ma mchis pa de ni yongs su ma grub pa'o/ /gang yongs su ma grub pa de la ni skye ba ma mchis so/ /gang skye ba ma mchis pa de la ni 'gag pa ma mchis so//de bzhin du sbyar te/ gang dus gsum du mi dmigs pa de ni mig ma lags dbang po ma lags so/ /gang mig ma lags shing dbang po ma lags pa de'i tha snyad ji ltar 'tshal bar bgyi/ 'di lta ste dper na/ chad pa stong pa ni brdzun pa yang dag pa ma lags pa ma mchis pa ste/'di ltar ming du gdags par bas kyi don dam par ni stong par yang mi dmigs chad par yang mi dmigs so/ /de bzhin du mig dang dbang po yang chad pa stong pa ltar brdzun zhing ma mchis la yang dag pa ma lags pa ste/gsob gsog log pa slu pa'i chos can byis pa 'drid pa glen pa rmongs par bgyis pa ste/ 'di ltar ming du gdags par bas kyi don dam par ni mig kyang mi dmigs zhes bya ba'o/ /yang de nyid las gsungs pa/ rmi lam char chen 'bab pa ltar/ /de bzhin zag pa rnams 'byung bar//zag pa 'byung ba mkhas pa po/ /dpa' bo chen po khyod kyis bstan/ /rmi lam dag na mgo bcad bzhin/ /khyod kyis zag pa zad pa gzigs/ /de ni mkhas pa rnams la bstan/ /thams cad gzigs la phyag kyang 'tshal/ /zhes so/ /'di nyid las mi'am ci'i rgyal po ljon pas zhus nas/bcom ldan 'das kyis bka' stsal pa/ stong pa nyid dang lung bstan pa/ /bdag gis ma 'tshal zhes smras pa / /gal te 'ga' zhig mi stong na/ /rgyal bas de lung bstan mi gsungs / /ci phyir zhe na 'di lta bur/ /rang gi rang bzhin gnas gyur nas //'gyur ba med cing ther zug ste/ /de la 'phel med 'grib pa med/ /dper na rang bzhin stong pa yi/ /me long dkyil 'khor yongs dag la/ /gzugs brnyan snang ba de bzhin du/ /ljon pa chos rnams shes par gyis/ /chos kyi dbyings ni 'gyur med na//mchod pa'i yan lag 'gyur gang zhes/ /yan lag rnams la rtag byos la/ /ljon pa mchod pa 'di la spyod/ /g.yo ba ma mchis bgyi ba rnams/ /bstan pa ma 'tshal zhes smras pa/ /shing rta'i yan lag 'dus pa dang / /shing rta'i bya ba bzhin du rtogs / /ngas ni las kyi rnam pa bstan//byed po phyogs bcu rnams na med/ /shing rnams rlung gis bsgul ba las/ /me 'byung 'gyur ba ji bzhin no/ /bdag cag me 'di bskyed bya zhes/ /rlung dang shing la sems pa med/ /'on kyang me ni 'byung ba ltar/ /las kyi byed pa de bzhin no/ / gang yang bsod nams tshogs dang ni/ /byang chub yang dag bsgrub pa dang / /legs spyod yod min zhes zer ba/ /de tshul yang dag mnyan par byos/ /mi yi tshe tshad lo brgya ni/ /'tsho ba yin zhes ji skad brjod/ /lo la phung po spungs pa med/ /sgrub pa de yang de dang mtshungs / / zhes so/ /bcom ldan 'das ma las kyang / tshe dang ldan pa rab 'byor ci chos ma skyes pa skye'am 'on te skyes pa skye / rab 'byor gyis smras pa/ tshe dang ldan pa shA ri'i bu kho bo ni chos ma skyes pa skye bar yang mi 'dod skyes pa skye bar yang mi 'dod do zhes gsungs so/ /'phags pa chos yang dag par sdud pa las kyang /rigs kyi bu de bzhin nyid ces bya ba de ni stong pa nyid kyi tshig bla dgas te stong pa nyid ni mi skye mi 'gag go /smras pa/ bcom ldan 'das kyis kyang 'di skad du chos thams cad ni stong pa'o zhes gsungs te/ de bas na chos thams cad ni mi skye mi 'gag go//byang chub sems dpa' rtsom pa med kyis smras pa/ rigs kyi bu de de bzhin no/ /ji ltar khong du chud pa bzhin te/ chos thams cad ni mi skye mi 'gag go smras pa/ gang 'di bcom ldan 'das kyis 'dus byas kyi chos thams cad ni skye'o 'gag go zhes gsungs na de bzhin gshegs pas 'di ci las dgongs te gsungs//smras pa rigs kyi bu 'jig rten gnas pa skye ba dang 'gag pa la mngon par chags pas de la de bzhin gshegs pas thugs rje chen pos 'jig rten dang nga pa'i gnas bsal ba'i phyir tha snyad kyi dbang gis skye'o 'gag go zhes gsungs te/ 'di la chos gang yang skye ba dang 'gag pa med do zhes gsungs so/ /yang de nyid las/ bcom ldan 'das de la mig gis gzugs rnams la sgra mi 'byin/ rna bas sgra rnams dang / snas dri rnams dang / lces ro rnams dang / lus kyis reg bya rnams dang / yid kyis chos rnams la sgra mi 'byin pa de ni chos so//de la ji ltar na mig gis gzugs rnams la sgra mi 'byin zhe na/ phrad pa ma mchis pa'i slad du'o/ /mig ni gzugs la phrad par mi bgyid pa nas/ rna bas sgra la ma lags/ snas dri la ma lags/ lces ro la ma lags/ lus kyis reg bya la ma lags/yid kyis chos kyi bar la phrad par mi bgyid do/ /gang phrad par mi bgyid pa de ni sgra mi 'byin pa'o/ /bcom ldan 'das gnyis su ma mchis na chos la sgra 'byin pa ma mchis pa'o / /bcom ldan 'das chos thams cad ni gnyis su ma mchis pa ste gcig gis gcig ma 'tshal rnam par ma 'tshal/mi rtog rnam par mi rtog /'byung bar mi bgyid 'jig par mi bgyid/ 'bri bar mi bgyid/ 'phel bar mi bgyid/ chags par mi bgyid mi chags par mi bgyid/ 'khor bar mi bgyid/ yongs su mya ngan las 'da' bar mi bgyid de/'di dag ni su'i yang ma lags/ 'di dag gi su yang ma lags so/ /bcom ldan 'das chos 'di dag ni skyo bar yang mi bgyid chags par yang mi bgyid do/ /bcom ldan 'das chos 'di dag ni kun nas nyon mongs par yang mi 'gyur rnam par byang bar yang mi 'gyur ro/ / bcom ldan 'das bdag gis de ltar 'tshal to/ /bdag gis de ltar rtogs so/ /bcom ldan 'das gang bdag 'di ltar 'tshal 'di ltar rtogs so zhes de ltar mchi ba de ni skye mched rnams kyis 'gyur ba'o/ /bcom ldan 'das skye mched rnams ni 'di snyam du 'di dag ni bdag gi 'gyur ba'o snyam du mi sems so//gang de ltar 'tshal ba de ni su dang yang mi rtsod do/ /gang mi rtsod pa de dag ni dge sbyong gi chos kyi rjes su 'jug pa'o/ /gang dge sbyong gi chos kyi rjes su 'jug pa de ni gang nas kyang 'jug par mi bgyid mi 'jug par yang mi bgyid/ sbyor bar yang mi bgyid mi sbyor ba yang mi bgyid/'gro bar yang mi bgyid sdod par yang mi bgyid 'bri bar yang mi bgyid 'phel bar yang mi bgyid de/ thams cad chos kyi tshul du mthong ngo / /thams cad rnam par grol ba'i tshul du mthong ngo / /chos kyi dbyings nyid du mthong ngo / /de ltar thams cad 'byung bar mthong ste/gang 'byung ba de yang yang dag par rjes su mi mthong ngo / /gzhan du na ming tsam dang btags pa tsam dang tha snyad tsam du mthong ba ni ma mchis pa ma lags so/ /ming de yang ming ma mchis pa'o/ /btags pa yang btags pa ma mchis pa'o/ /tha snyad kyang tha snyad ma mchis pa'o//chos mthong bas sangs rgyas mthong ngo / /sangs rgyas mthong bas sems can thams cad mthong ngo / /sems can thams cad mthong bas rgyu dang rkyen mthong ngo / /rgyu dang rkyen mthong bas stong pa nyid mthong ngo / /stong pa nyid mthong ba ni mthong ba ma mchis pa'o//bcom ldan 'das chos thams cad ma mthong ba ni yang dag pa mthong ba'o zhes gsungs so/ /gnas med pa kun rdzob tu ji ltar rung zhe na/ ji ltar mi rung ste/ ji ltar sdong po med na skyes bur 'khrul pa bzhin no/ /gang la brten nas skyes bur 'khrul par 'gyur ba stong pa nyid du smra ba la sdong po de don dam par ji ltar grub /chos thams cad ni rtsa ba med pa ste/ yang dag par na rtsa ba mi 'thad pa'i phyir ro/ /de skad du 'phags pa dri ma med par grags pas bstan pa las kyang / yang dag pa ma yin pa'i kun du rtog pa'i rtsa ba gang yin/ smras pa yang dag pa ma yin par kun du rtog pa'i rtsa ba ni phyin ci log gi 'du shes so//smras pa phyin ci log gi 'du shes kyi rtsa ba gang yin/ smras pa phyin ci log gi 'du shes kyi rtsa ba ni rten med pa'o/ /smras pa rten med pa'i rtsa ba gang yin/ smras pa 'jam dpal gang rten med pa de'i rtsa bar 'gyur ba ci zhig yod/de ltar chos thams cad ni rten med pa'i rtsa ba la gnas pa'o zhes gsungs so/ /'di ni sems sbyang bar 'dod pas shes rab kyi pha rol tu phyin pa bsgom par bya ba mdor bsdus pa ste/ bsgoms nas kyang nyon mongs pa'i dgra dang 'thab pa la mkhas par bya'i rang gi khyim na dpa' bar ni mi bya'o//'phags pa chos yang dag par sdud pa'i mdo las ji skad gsungs pa lta bu ste/ stong pa nyid smra ba ni mi gnas pa'i phyir 'jig rten gyi chos rnams kyis mi 'phrogs te/ rnyed pas dga' ba yang med ma rnyed pas mi dga' ba yang med/ grags pas yi sos pa yang med ma grags pas sro shi ba yang med/smad pas zhum pa yang med bstod pas dga' bar sems pa yang med/ bde bas chags par 'gyur ba yang med sdug bsngal bas yid 'byung bar 'gyur ba'ang med/ gang de ltar 'jig rten gyi chos rnams kyis mi 'phrogs pa de ni stong pa nyid shes pa ste/de ltar mi 'phrogs pas stong pa nyid khong du chud par bya'o zhes bya ba dang / de bzhin du stong pa nyid smra ba ni gang du yang chags pa'am mi chags pa med do / /gang la chags pa dang gang la mi chags pa de stong pa nyid du shes pa stong pa nyid du mthong ngo //gang gi chos gang la chags pa dang chags pa med pa des ni stong pa nyid du shes so/ /de bzhin du gang la la 'thab cing rtsod par byed pa de ni stong pa nyid mi shes te/ de gang dang 'thab cing rtsod par byed pa de stong pa nyid du shes de stong pa nyid du mthong ngo zhes bya ba la sogs pa'o//'di ni sems sbyang ba mdor bsdus pa'o/ /gang la 'bad pa byas na myur du sems dag par 'gyur zhe na/ bdag bstod pa dang gzhan la brnyas pa spang bas so/ /'di nyid kyi rtsa ba ni bdag dang sems can du lta ba ste/ de yang 'di goms par byas na yang sla bar 'gyur te/gzhan la gus par bya ba dang bdag khyad du bsad pa de ltar bsgom par bya'o/ /gal te sems can phung po rnams/ /rnam pa kun du mnyam gnas na/ /gcig la bdag dang gzhan nyid du/ /'gal bar 'byung ba ji ltar 'gyur/ /de ni dmigs pa med par yang / / thog med rtogs pa goms pa yis/ /lus can dag ni kun du spyod/ /goms na dga' ba ci zhig yod/ /de ltar goms pa'i bdag nyid du/ /mtshungs na ci phyir bde ba'i rgyu/ /gzhan la gus byas btang nas ni/ /rang sdug 'gyur ba gzhan 'dod byed/ /yid bzhin nor bu'i gtam brjod las//gus par bya ba'i rgyu yod do / /bdag la gus byed skal ngan gyi/ /skye bo las 'dir bde ba'ang med/ /de ltar bdag la chags ldan pa/ /brlang zhing nga rgyal ser sna can/ /kun las 'phags pa'i tshul lta bu/ /de las zlog ste bsgom par bya/ /bdag la gus par byed pa 'di//bstod smad la sogs chus bcus pas/ /'phel te dmyal ba'i tshil zhag gis/ /btab pas dmyal ba'i me bzhin no/ /re zhig dgra la sems med phyir/ /bdag la bstod do snyam mi srid/ /bdag la gzhan dga' grags snyam pa/ /'di ni bdag gi blo gros 'khrul//de mgu ba la bdag dga' ba/ /de ni rtag tu spyir 'gyur mod/ /de bdes bya ba med ce na/ /dga' des bdag la ci zhig bya/ /gzhan nam yang na bdag la'ang rung / /gzhan dgas bdag la ci zhig bya/ /'di ni gzhan gyi dga' bas bdag /lus kyis bde ba 'dod ma yin//de ltar shes nas gzhi med kyi/ /rnam par rtog pa spang bar bya/ /ma grags smad dang ma bkur ba/ /de lta don med shes par bya/ /phyag 'tshal sogs pas chos mi 'gyur/ /tshe dang nad med stobs mi 'gyur/ /co 'dri byed pa'i tshe na ni/ /gzhan gyis lus sgyur byed dang mtshungs//dga'am 'on te mi dga' yang / /rnyed dang ma rnyed mtshungs par 'gyur/ /de ltar don med rnam spang ste / /ri dang mtshungs pa'i yid du bya/ /'dris pa spangs pas sems myur du dag par 'gyur ro/ /'dir yang bsam par bya ste/ /mtshan mar 'dzin pa las byung ba'i//ngo shes pas ni yang dang yang / /rjes su chags pa skye bar byed/ /de la khong khro 'byung bar 'gyur/ /gang la rjes chags khong khro yod/ /des ni sdig pa bzlog ma yin/ /phrag dog ser sna lhan cig tu/ /skur pa 'debs pa sna tshogs 'byung / /rnyed la sogs pa 'dod pa dag / nga rgyal la sogs mang po 'byung / /des na 'bad pa thams cad kyis/ /thub pas 'dris pa yongs su spang / /'dra phyir 'di ni gzhan yin ya/ /'khrul pas de ni 'di'o zhes/ /rgyun rgyud bzhin du rtog de'i phyir/ /stobs kyis de nyid la gnas bya/ /'dra ba 'di ni dngos med de/ /khyed la sdug bsngal bskyed par 'gyur//nga dang de dag thams cad kyang / /ring por mi thogs med par 'gyur/ /bslab pa kun las btus pa las lus yongs su dag pa'i le'u ste bcu bzhi pa'o// //yang dag 'tsho ba sbyangs pa yis/ /longs spyod dag par shes par bya//khyim bdag drag shul can gyis zhus pa las ji skad du/ khyim bdag 'di la byang chub sems dpa' khyim pa chos kyis longs spyod tshol gyi chos ma yin pas ni mi tshol lo/ /mthun pas tshol gyi mi mthun pas ma yin no/ /yang dag pas 'tsho ba yin gyi log pas 'tsho ba ma yin no zhes gsungs pa lta bu'o//'phags pa dkon mchog sprin las kyang / byang chub sems dpa' ni sbyin par byed pa dang sbyin pa'i bdag po mthong na spyod lam mi 'chos so/ /ji ltar na spyod lam mi 'chos she na/ gnya' shing gang tsam du blta ba dang /skyo bar blta ba dang / sgrim pa med par blta bas gom pas bags kyis dal nas dal nas 'dor zhing 'debs pa ma yin te/ de ltar na lus kyis tshul 'chos pa mi byed do/ /ngag gis tshul 'chos par mi byed do/ /ji ltar ngag gis tshul 'chos par mi byed ce na/ byang chub sems dpa' ni rnyed pa'i rgyu rnyed pa'i phyir gcom bskyungs shing smra ba ma yin 'jam por smra ba ma yin dga' bar smra ba ma yin/rjes su 'brang ba'i tshig brjod pa ma yin te/ de ltar na ngag gis tshul 'chos pa mi byed do/ /ji ltar na sems kyis tshul 'chos par mi byed ce na/ byang chub sems dpa' ni sbyin pa byed pa'am sbyin pa'i bdag pos rnyed pa bstan na/tshig gis 'dod pa chung bar ston cing sems kyis 'dod pa bskyed pa ma yin no/ /rigs kyi bu 'di lta ste/ tshig gis 'dod pa chung la sems kyis rnyed pa 'dod pa 'di ni nang gi gdung ba yin te/ de ltar na sems kyis tshul 'chos pa mi byed do//de ltar na byang chub sems dpa' tshul 'chos pa dang kha gsag gi rnyed pa dang bral ba yin no/ /ji ltar na gzhogs slong gi rnyed pa dang bral ba yin zhe na/ byang chub sems dpa' ni sbyin pa byed pa'am sbyin bdag mthong na bdag gos kyis phongs so bdag lhung bzed kyi phongs so//bdag na ba'i gsos sman gyis phongs so zhes gzhogs slong mi byed cing / sbyin pa byed pa'am sbyin pa'i bdag po la mi slong zhing tshig tu mi brjod de / de ltar na byang chub sems dpa' gzhogs slong gi rnyed pa dang bral ba yin no/ /ji ltar na thob kyis 'jal ba'i rnyed pa dang bral ba yin zhe na/byang chub sems dpa' ni sbyin pa byed pa dang sbyin pa dag mthong na bdag la sbyin pa'i bdag po che ge mo zhig gis dngos po che ge mo zhig byin te/ de la bdag gis kyang phan pa che ge mo zhig byas so/ /'dis kyang bdag la 'di ni tshul khrims dang ldan par rig ste mang du thos pa'o 'dod pa chung ba'o zhes 'di dang 'di byin no//bdag gis kyang de la snying rje ba'i sems nye bar gzhag ste blangs so zhes de skad kyi tshig mi brjod do/ /de ltar na byang chub sems dpa' thob kyis 'jal ba'i rnyed pa dang bral ba yin no/ /ji ltar na byang chub sems dpa' mi rigs par btsal ba'i rnyed pa dang bral ba yin zhe na/rigs kyi bu byang chub sems dpa' ni lus la rma byung ba dang sems la rma byung bar rnyed pa tshol ba ma yin no/ /de la lus kyi rma ni 'di lta ste/ rnyed pa'i rgyu rnyed pa'i phyir brgyug pa dang kun du brgyug pa dang / tshul khrims 'chal pa la spyod pa'o//sems kyi rma ni 'di lta ste/ rnyed pa la smon pa dang tshangs pa mtshungs par spyod pa gzhan gyi rnyed pa dag la gnod sems mang ba ste/ de ltar na byang chub sems dpa' mi rigs par btsal ba'i rnyed pa dang bral ba yin no/ /ji ltar na byang chub sems dpa' chos ma yin pa'i rnyed pa dang bral ba yin zhe na/rigs kyi bu 'di ltar byang chub sems dpa' srang la sgyu med pa dang btsal ba la sgyu med pa dang yid brtan pa la gnod par byed pa med pa dang g.yos rnyed pa mi sgrub pa ste/ de ltar na byang chub sems dpa' chos ma yin pa'i rnyed pa dang bral ba yin no//ji ltar na byang chub sems dpa' yongs su ma dag pa'i rnyed pa dang bral ba yin zhe na/ 'di la byang chub sems dpa' gang mchod rten gyi dang 'dres pa'am chos kyi dang 'dres pa'am/ dge 'dun gyi dang 'dres pa'am ma byin pa ma gnang ba de dag mi len cing bdag gir mi byed/ chags pa'i sems mi skyed de/ de ltar na byang chub sems dpa' yongs su ma dag pa'i rnyed pa dang bral ba yin no/ /ji ltar na byang chub sems dpa' rnyed pa la zhen pa med pa yin zhe na/ rigs kyi bu 'di la byang chub sems dpa' rnyed pa rnyed kyang bdag gir mi byed/ nor du mi rtsi tshogs su mi byed cing /dus dus su dge sbyong dang bram ze dang pha ma dang mdza' bo dang blon po dang gnyen bshes dang snag gi gnyen mtshams dag la gtong zhing dus dus su bdag kyang yongs su spyod la yongs su spyod pa'i tshe chags pa med pa dang zhen pa med par yongs su spyod do/ / rnyed pa ma rnyed na yang skyo ba'i sems mi skyed cing yongs su yi mi 'chad de/ sbyin pa byed pa dang sbyin bdag rnams ma dad par mi 'dzin pa yin te zhes bya ba la sogs pa gsungs so/ /stong pa snying rje'i snying po can/ /spyod pas bsod nams dag par 'gyur/ 'phags pa nam mkha'i mdzod kyi mdo las gsungs pa/ 'di lta ste/ ngar 'dzin pa rnam par dag par sbyin pa de sbyin no/ /nga yir 'dzin pa rnam par dag par sbyin pa de sbyin/ rgyu rnam par dag par sbyin pa de sbyin/ lta ba rnam par dag par sbyin pa de sbyin/ mtshan ma rnam par dag par sbyin pa de sbyin/tha dad pa rnam par dag par sbyin pa de sbyin/ rnam par smin pa la mi re ba rnam par dag par sbyin pa de sbyin/ nam mkha' dang mtshungs pa'i sems rnam par dag par sbyin pa de sbyin no / /rnam par dag pa brgyad po 'di dag gi sgo nas sbyin pa de sbyin no/ /ji ltar nam mkha' mtha' med pa bzhin du sems can mtha' med par byas te sbyin pa de sbyin/ji ltar nam mkha' rgya che zhing sgrib pa med pa de bzhin du byang chub tu bsngos te sbyin pa de sbyin/ ji ltar nam mkha' la gzugs med pa de bzhin du gzugs thams cad la mi gnas par sbyin pa de sbyin/ ji ltar nam mkha' la tshor ba med pa de bzhin du tshor ba thams cad dang bral bar sbyin pa de sbyin/ ji ltar nam mkha' la 'du shes med pa de bzhin du 'du shes thams cad kyi mdud pa med par sbyin pa de sbyin/ ji ltar nam mkha' 'dus ma byas pa de bzhin du 'dus byas thams cad med par sbyin pa de sbyin/ji ltar nam mkha' mtshan nyid rnam par rig pa med pa de bzhin du rnam par shes pa la mi gnas par sbyin pa de sbyin/ ji ltar nam mkha' sangs rgyas kyi zhing thams cad la khyab pa de bzhin du sems can thams cad la byams pas khyab par sbyin pa de sbyin/ ji ltar nam mkha' sems can thams cad kyi go skabs 'byed pa de bzhin du sems can thams cad nye bar 'tsho bar sbyin pa de sbyin/ji ltar nam mkha' la nga'i ba med pa de bzhin du sems can thams cad yid la byed pa thams cad dang bral bar sbyin pa de sbyin/ ji ltar sprul pas sprul pa la sbyin pa sbyin pa lta bur rnam par mi rtog cing lhun gyis grub ste sems dang yid dang rnam par shes pa dang bral zhing chos thams cad la re ba med pa de ltar rnam par shes pa dang bral ba'i phyir sgyu ma'i mtshan nyid kyi ngo bo nyid rnam par dag par byang chub sems dpas sbyin pa de sbyin te/rigs kyi bu gang de lta bur sbyin pa yongs su gtong ba de ni/ shes rab kyi ye shes kyis ni sems can thams cad kyi nyon mongs pa yongs su 'dor zhing thabs kyi ye shes kyis ni sems can thams cad mi gtong ba ste/ rigs kyi bu de lta bur gtong ba'i sems ni byang chub sems dpas sbyin pa nam mkha' dang mtshungs pa yin no zhes gsungs so//'phags pa blo gros mi zad pa'i mdo las kyang / sems can thams cad la gnod pa'i sbyin pa med pa nas/ ji skad smos pa las bri ba'i sbyin pa med pa'i bar dang / sems can thams cad la sbyin gnas ma yin no zhes brnyas pa'i sbyin pa med pa'i bar dang /de bzhin du sbyar te/ smre ba'i sbyin pa med do/ /slong ba rnams la gnod pa'i bar gyi sbyin pa med do/ /bsting ba dang brid pa'i sbyin pa med do/ /rgyab kyis phyogs pa'i sbyin pa med do/ /bor ba'i sbyin pa med do/ /brnyas pa'i sbyin pa med do//rang gis lag ma dar ba'i sbyin pa med do/ /de bzhin du sbyar te/ mi rung ba'i sbyin pa med do / /dus ma yin pa'i sbyin pa med do/ /dug dang mtshon cha sbyin pa med do/ /sems can rnams la rnam par 'tshe ba'i sbyin pa med do zhes gsungs so/ /drag shul can gyis zhus pa'i mdo las/des gzhan dag la chang yang sbyin te/ des 'di snyam du 'di ni sbyin pa'i pha rol tu phyin pa'i dus yin te/ gang ci 'dod pa de la de sbyin pa'i dus la bab kyi bdag gis 'di ltar bya ste/ gang dang gang la 'di ltar chang yang byin nas gang 'di 'khrul pa med pa'i spyod pa la de dang de dag dran pa dang shes bzhin yang dag par 'dzin du gzhug go snyam pa'i 'du shes bskyed par bya'o zhes gang gsungs pa ni/chang gi sgo nas kyang byang chub sems dpa' la re thag chad de khong khro ba lci bar 'gyur bas/ 'dis sems can bsdu ba nyams par 'gyur te/ gzhan dad par bya ba'i thabs su 'gyur bas chang sbyin no zhes bya bar dgongs pa'o/ /mtshon cha la sogs pa yang gal te gnod par mi 'gyur ba lta na lci yang brtags te/ byin na ltung ba med par 'di nyid kyis mngon no/ /mdo sde las ni spyir bkag pa gsungs so/ / sbyin pa rnam par dag pa'i phyogs tsam zhig bshad zin to/ /tshul khrims rnam par dag pa ni/ 'phags pa nam mkha' mdzod kyi mdo las gsungs te/ sems can rnam par dag pa'i phyir byang chub kyi sems dang mi 'bral ba dang / tshad mar gyur pa rnam par dag pa'i phyir nyan thos dang rang sangs rgyas kyi sems med pa zhes bya ba la sogs pa'o//gzhan yang tshul khrims rnam par dag pa ni nam mkha' dag pa ste/ tshul khrims de yang dag pa'o/ /nam mkha' dri ma med pa ste tshul khrims de yang dri ma med pa'o/ /nam mkha' zhi ba ste tshul khrims de yang zhi ba'o/ / nam mkha' mi mthong ba ste tshul khrims de yang mi mthong ba'o/ /nam mkha' mi dma' ba ste tshul khrims de yang mi dma' ba nas/ nam mkha' mi chod mi phyed pa ste tshul khrims de yang mi chod mi phyed pa la sogs pa'i bar du'o/ /nam mkha' la zhe 'gras pa med de/ sems can thams cad la zhe 'gras pa med pa'i bzod pa yongs su dag pa dang /nam mkha' ni mnyam par sbyor ba ste sems can thams cad la sems mnyam pa'i bzod pa yongs su dag pa zhes bya ba la sogs pa'o/ /'di lta ste dper na shing sA la chen po'i tshal yod par la la zhig 'ongs te shing sA la bcad na/de la shing sA la bcad pa'i lhag ma rnams 'di snyam du 'di dag ni bcad do/ /bdag gis bcad do snyam du mi sems te/ de dag la rjes su chags pa yang med do/ / khong khro ba yang med do / /mi rtog rnam par mi rtog yongs su mi rtog go / /de bzhin du gang bzod pa ni byang chub sems dpa'i bzod pa nam mkha' dang mtshungs pa yongs su dag pa'i mchog go zhes so//'phags pa gtsug na rin po che'i mdo las/ rgya cher smos te gsungs pa 'di ni brtson 'grus kyi pha rol tu phyin pa zhes bya'o/ /de'i yongs su dag pa gang zhe na/ gang lus la mi g.yor dang gzugs brnyan du shes pa/tshig brjod du med par shes pa/ sems can la shin tu nye bar zhi bar shes pa'o/ /de bzhin du byams pa chen po'i go cha bgos/ snying rje chen po'i gnas la gnas te/ rnam pa thams cad kyi mchog dang ldan pa'i stong pa nyid kyi rnam pas mngon par bsgrubs pas bsam gtan du byed do//de la rnam pa thams cad kyi mchog dang ldan pa'i stong pa nyid gang zhe na/ sbyin pa ma tshang ba med pa nas thabs ma tshang ba med pa'i bar dang / byams pa chen po dang snying rje dang dga' ba dang btang snyoms ma tshang ba med pa dang / bden pa shes pa la 'jug pa ma tshang ba med pa dang / byang chub kyi sems sems can la lta ba ma tshang ba med pa dang / bsam pa dang lhag pa'i bsam pa'i sbyor ba ma tshang ba med pa dang / sbyin pa dang snyan par smra ba dang don spyod pa dang don mthun pa ma tshang ba med pa dang / dran pa dang shes bzhin ma tshang ba med pa dang /dran pa nye bar gzhag pa dang yang dag par spong ba dang / rdzu 'phrul gyi rkang pa dang / dbang po dang stobs dang byang chub kyi yan lag dang 'phags pa'i lam yan lag brgyad pa ma tshang ba med pa dang / zhi gnas dang lhag mthong ma tshang ba med pa dang / de bzhin du sbyar te/rang bzhin gyis nye bar zhi ba la las dang nyon mongs pa rnams kyis nye bar ma zhi ba dang / chos nyid kyis btang snyoms pa/ sangs rgyas kyi chos thams cad la lta ba/ rang gi mtshan nyid kyis bems po dang / byin gyi rlabs bya ba'i phyir rnam par 'gro ba med pa dang / rang gi ngang gis mi ldog pa dang /sangs rgyas kyi bya ba la rtag tu brtson pa dang / nye bar zhi bas bsil bar gyur pa dang / sems can yongs su smin par bya ba la rtag tu 'bad pa ste/ 'di ni rnam pa thams cad kyi mchog dang ldan pa'i stong pa nyid ces bya ba nas/ rigs kyi bu 'di ni byang chub sems dpa'i bsam gtan gyi pha rol tu phyin pa'i spyod pa yongs su dag pa'o zhes bya ba'i bar du'o//'dis shes rab yongs su dag pa yang rig par bya ste/ bsod nams thams cad la yang de bzhin no/ /bslab pa kun las btus pa las/ longs spyod dang bsod nams dag pa'i le'u ste bco lnga pa'o// //da ni gsum char gyis 'phel ba yang brjod par bya ste/ ci'i don du zhe na/ gzung bar bya ba rab mang la/ /'di ni nyung na 'dis ci bya/ /shin tu ngoms pa bskyed ma yin/ /de phyir 'di ni 'phel bar bya//shin tu ngoms pa ni sangs rgyas nyid de/ de ni nyan thos dang thun mong ba'i dag pa tsam gyis sems can rnams la mi bskyed do zhes bya ba'i tha tshig go/ /lus 'phel bya ba gang zhe na/ le lo med dang stobs bskyed yin/ /de la 'phags pa dkon mchog sprin las stobs gsungs te/gang byang chub sems dpa'i stobs la stobs kyis brdzi ba'i sems can de ni sems can gyi ris na med do zhes bya ba la sogs pa'o/ /de bskyed pa ji lta bu zhe na/ gang 'phags pa de bzhin gshegs pa'i gsang ba'i mdo las kyang ma skyes dgras / 'phags pa lag na rdo rje'i stobs mthong nas ngo mtshar du gyur ces zhus nas/bcom ldan 'das kyis gsungs pa/ rgyal po chen po byang chub sems dpa' chos bcu dang ldan na stobs 'di lta bu thob ste/ bcu gang zhe na/ rgyal po chen po 'di la byang chub sems dpa' lus dang srog ni yongs su gtong gi dam pa'i chos ni yongs su mi gtong ba dang sems can thams cad la 'dud cing nga rgyal 'phel bar mi byed pa dang /sems can mthu chung ba rnams la bzod cing khong khro bar mi byed pa dang / sems can bkres pa rnams la kha zas bzang po mchog sbyin pa dang / sems can 'jigs pa rnams la mi 'jigs pa sbyin pa dang /sems can nad pa rnams la yang dag pa'i gso bar bya bar spro ba dang / sems can dbul po rnams la longs spyod dag gis tshim par byed pa dang / de bzhin gshegs pa'i mchod rten la rdo thal gyis skud pa dang / sems can rnams la kun tu dga' bar 'gyur ba'i tshig sgrogs pa dang /sems can dbul po sdug bsngal ba ngal ba chad pa rnams kyi khur khyer ba ste/ rgyal po chen po byang chub sems dpa' chos bcu po de dag dang ldan na stobs 'di lta bu 'thob po zhes bya ba'o/ /le lo med pa bskyed pa gang zhe na/ gang brtson 'grus bskyed pa ste/ 'phags pa blo gros rgya mtshos zhus pa'i mdo las ji skad gsungs pa lta bu ste/ blo gros rgya mtsho byang chub sems dpa' rtag tu brtul ba brtan par brtson 'grus brtsam par bya'o/ /byang chub sems dpa' gces pa mi 'dor bar mos pa drag po bya'o/ / blo gros rgya mtsho brtson 'grus brtsams pa rnams la ni bla na med pa yang dag par rdzogs pa'i byang chub dka' ba ma yin no/ /de ci'i phyir zhe na/ blo gros rgya mtsho gang na brtson 'grus yod pa de na byang chub yod do/ /le lo can la ni byang chub shin tu ring zhing rnam par ring ngo / /le lo can rnams la ni sbyin pa med pa nas shes rab kyi bar du med do//le lo can rnams la ni gzhan gyi don med do zhes bya'o / /zla ba sgron ma'i mdo las kyang / /ut+pal chu nang ji bzhin du/ /de nas mthar gyis rnam par 'phel/ /zhes bya ba la sogs pa gsungs so/ /'di ni lus 'phel ba mdor bsdus pa'o//stong dang snying rje'i snying po can/ /sbyin pas longs spyod 'phel bar 'gyur/ /rdo rje gcod pa las/ byang chub sems dpa' gang mi gnas par sbyin pa sbyin pa de'i bsod nams kyi phung po tshad gzung bar sla ba ma yin no zhes ji skad du gsungs pa bzhin no//shes rab kyi pha rol tu phyin pa chen po las kyang / shA ri'i bu gzhan yang byang chub sems dpa' sems dpa' chen po/ sems can thams cad la sbyin pa chung ngu zhig byin la/ thabs mkhas pas rnam pa thams cad mkhyen par yongs su bsngos pas grangs med dpag tu med par bya bar 'dod pas shes rab kyi pha rol tu phyin pa la bslab par bya'o//gser dang dngul dang skyed mos tshal dang rgyal srid la sogs pa'i yo byad kyi bar gyis sems can thams cad kyi bsam pa yid bzhin du yongs su rdzogs par byed par 'dod pas shes rab kyi pha rol tu phyin pa la bslab par bya'o zhes gsungs so//byang chub sems dpa' rnams ni snying rje med par ci yang mi spyod do zhes brjod par bya'o/ /'di ni longs spyod 'phel ba mdor bsdus pa'o // //bam po bcu gnyis pa / bsod nams 'phel ba ni spel ba rnams kyi rtsa ba yin pa des na de'i don du grabs bsham pa brjod par bya'o//brtson dang bsam pa brtan pa yang / /dang por nan tan byas nas ni/ /snying rje mdun du gzhag nas su/ /dge ba spel la nan tan bya/ /sems sbyang ba'i phyir brtson 'grus dang por dus su bsgom pa sbyor ba rtsom pa'i tshe yang sngon du byed pas brtan par bya ba'i phyir tshigs su bcad pa'o//'thob pa'i dus nye bar 'gyur ba'i tshe mtshon cha la mkhas pa la gus pa bzhin du sbyor ba dang dus mnyam du brtan par bya'o zhes lhod par bzlog pa'i phyir dang po zhes bya ba smos so/ /de la brtson pa brtan par byed pa ji lta bu zhe na/ji ltar 'phags pa nor bzangs byang chub sems dpa'i spyod pa rjes su bstan pa de ni rjes su rnam par sems/ sngon gyi mtha'i mur thug pa'i lus mang po yang dag pa'i spyod pa nyams su ma blangs par chud zos pa la bsam pas ni lus kyi stobs rab tu brtan par byed/sngon gyi mtha'i mur thug pa'i lus dang sems yongs su dag kyang don med par 'khor ba'i sems kyi rgyud du gyur pa la bsam pas ni sems dang yid la bya ba shin tu tshar gcod / sngon gyi mtha'i mur thug pa'i las yang dag pa ma yin pas 'jig rten gyi don du g.yen spyo ste don med par sha thang ba la bsam pas ni da ltar byung ba'i don shin tu gces pa la legs par bsgrub par rnam par sems/sngon gyi mtha'i mur thug pa'i yang dag pa ma yin pa'i kun du rtog pas kun nas bslang ba'i phyin ci log gi kun du rtog pas yang dag par brtan pa'i yid la byed pa'i bsam pas ni byang chub sems dpa'i spyod pa thams cad yang dag pa'i rtog pas mngon par 'du byas pa'i stobs yang dag par bskyed/'das pa'i lus kyis bdag gi don gyi sbyor ba la rtsom pa'i yul la yongs su bsam pas ni sems can thams cad kyi sbyor ba las khyad par du 'phags par lhag pa'i bsam pa'i stobs rab tu brtan par byed/'das pa'i 'dod pa yongs su tshol ba'i spyod pa ro med pa la yongs su bsam pas ni sangs rgyas kyi chos thams cad thob pa'i sbyor bas dbugs phyin pa chen po 'thob pa'i dbang po'i shugs drag po rnam par 'phel bar byed/'das pa'i dus kyi bsam pa phyin ci log dang ldan pa'i sbyor ba la yongs su bsam pas ni da ltar byung ba'i dus su phyin ci log med pa dang ldan pa'i yang dag pa'i lta ba dang byang chub sems dpa'i smon lam la yi dam bca' bas sems kyi rgyud yongs su rgyas par byed/sngon gyi mtha'i brtson 'grus brtsams pa mi cha la don ma yin pa dang / yongs su ma grub pa'i brtson 'grus nyams su blangs pa la yongs su bsam pas ni da ltar byung ba'i dus su sangs rgyas kyi chos yongs su bsdu ba la sta gon du gnas pa'i brtson 'grus chen po rtsom pa'i rnam par gnon pas lus dang sems kyi gzengs mtho ba yang dag par bskyed/sngon gyi mtha'i mur thug pa'i 'gro ba lnga'i rgyud kyi ngan song du bdag dang gzhan bor ba la brtags pas lus 'tsho ba med pa yongs su bzung ba la yang dag par bsam pas ni sangs rgyas kyi chos thams cad yongs su bsgrub pa dang 'gro ba thams cad nye bar 'tsho ba dang dge ba'i bshes gnyen thams cad bsnyen bkur bar nus pa'i lus yongs su bzung bas dga' ba dang mchog tu dga' ba'i shugs drag po rgya chen po rnam par 'phel bar byed/da ltar byung ba'i skye ba mngon par 'grub pa'i rga ba dang na ba dang 'chi ba dang mya ngan gyi 'byung gnas su 'gyur te 'du ba dang 'bral ba'i gter du gyur pa'i lus kyang /phyi ma'i mtha'i bskal pa'i mur thug pa'i byang chub sems dpa'i spyod pa spyad pa la brtson pa dang sems can yongs su smin par bya ba dang sangs rgyas kyi chos yongs su bsdu bas brtson pa dang de bzhin gshegs pa'i zhal blta zhing zhing thams cad du rgyu ba dang /chos smra ba thams cad la rim gro bya ba dang de bzhin gshegs pa thams cad kyi bstan pa yongs su bzung ba la brtson pa dang chos thams cad yongs su btsal ba'i grogs su gyur pa dang dge ba'i bshes gnyen thams cad mthong bar bya ba dang sangs rgyas kyi chos thams cad yang dag par bsdu ba la brtson pa'i byang chub sems dpa'i smon lam dang ye shes kyi rgyu dang rkyen du gyur pa la bltas shing dge ba'i rtsa ba'i dbang po dang shugs bsam gyis mi khyab pa rnam par 'phel bar byed cing 'phags pa byams pa'i drung du song ba bzhin no//'phags pa blo gros mi zad pa'i mdo las kyang / byang chub sems dpa' ni gcig pu gnyis su med cing grogs med pa bla na med pa yang dag par rdzogs pa'i byang tu go cha gyon te/ de brtson 'grus kyi stobs kyis yongs su zin pa'i lhag pa'i bsam pas/pha rol gyi skabs mi 'byed par bdag nyid byed do/ /rang gi stobs kyis 'phags so/ /de de ltar go cha sra ba bgos pas sems can thams cad kyis yongs su thob par bya ba gang ci yin pa de bdag gis thob par bya'o/ /gang 'phags pa thams cad dang theg pa la gsar du yang dag par zhugs pa'i byang chub sems dpa' rnams kyis thob par mi 'gyur ba de bdag gis yongs su thob par bya'o//sbyin pa ni bdag gi grogs ma yin gyi bdag ni sbyin pa'i grogs so/ /tshul khrims dang bzod pa dang brtson 'grus dang bsam gtan dang shes rab ni bdag gi grogs ma yin gyi/bdag ni tshul khrims dang bzod pa dang brtson 'grus dang bsam gtan dang shes rab rnams kyi grogs yin no/ /pha rol tu phyin pa rnams kyis bdag la bsnyen bkur mi bya'i/ bdag gis pha rol tu phyin pa rnams la bsnyen bkur bya'o/ / de bzhin du bsdu ba'i dngos po rnams dang dge ba'i rtsa ba thams cad la yang sbyar ro/ /ji tsam du bdag gcig pu gnyis su med cing grogs med par rdo rje'i rang bzhin gyi sa'i dkyil 'khor la gnas te/ bdud stobs dang bcas pa btul nas sems kyi skad cig gcig dang ldan pa'i shes rab kyis bla na med pa yang dag par rdzogs pa'i byang chub mngon par rdzogs par 'tshang rgya bar bya'o zhes gsungs so//'phags pa rdo rje rgyal mtshan gyi mdo las kyang / 'di lta ste/ dper na lha'i bu nyi ma 'char ba na dmus long gi nyes pas mi 'dug go/ /dri za'i grong khyer gyi nyes pas mi 'dug go//gling bzhi pa'i 'jig rten gyi khams kyi sa'i rdul gyi nyes pas mi 'dug go/ /lha ma yin gyi dbang po sgra gcan gyi nyes pas mi 'dug go/ /du ba'i dkyil 'khor gyi nyes pas mi 'dug go/ /'dzam bu'i gling gi nye ba'i nyon mongs pa'i nyes pas mi 'dug go/ / grib ma tha dad pa'i nyes pas mi 'dug go/ /ri mi mnyam pa'i nyes pas mi 'dug go/ /de bzhin du byang chub sems dpa' sems dpa' chen po dran pa dang shes bzhin can sems zab cing rgya che ba rnam par ma zhum pa yon tan gyi spyod pa dang ye shes kyi spyod pa mthas gtugs pa ni sems na 'khu ba'i ngang tshul can gyi nyes pas mi ldog go//sems can dmu rgod kyi nyes pas mi ldog go/ /dge ba'i rtsa ba yongs su bsngo ba med par mi gnas so/ /sems can dang lta ba'i snyigs ma'i nyes pas mi ldog go/ /sems can sems 'khrugs pa rnams dang ring bar mi 'gyur ro/ / sems can sems ma rung bar gyur pas byang chub kyi go cha rgyun gcod par mi byed do/ /sems can gyi 'thab pa'i rnyog pa rnams kyis 'gro ba thams cad yongs su bskyab pa'i smon lam rgyun gcod par mi byed do/ /ji tsam du byis pa'i skye bo dang 'grogs pa dang sems can gzhan gyi nyes pa rnams kyis skyo bar mi byed do//de ci'i phyir zhe na/ 'di ni 'di lta ste/ 'gro ba thams cad rnam par dag par gdul ba'i phyir sgrib pa med pa'i dkyil 'khor du 'char ro/ /de bzhin du sbyar te/ gang sems can de dag thams cad kyi sdug bsngal gyi phung po dang / sgrib pa sna tshogs dang las nye bar gnas pa'i sgrib pa gang dag gis de dag sangs rgyas mthong bar mi 'gyur ba dang /chos nyan par mi 'gyur ba dang dge 'dun shes par mi 'gyur ba de dag gis de dag gi sgrib par 'gyur ba de dag gi las rnam pa gsum bsags pa'i sdug bsngal gyi phung po rang gi lus 'dis blang bar bya'o//sems can dmyal bar skye ba de dag dang ngan song gi sa la gnas pa'i sems can de dag thams cad de nas shi 'phos par gyur cig /bdag gis sdug bsngal gyi phung po chen po 'di blang bar bya'o/ /brtson par bya'o/ /spro bar bya'o/ /mi ldog par bya'o/ /mi 'bros par bya'o//mi skrag par bya'o/ /mi 'jigs par bya'o/ /phyir mi ldog par bya'o/ /sgyid mi lug par bya'o/ /de ci'i phyir zhe na/ bdag gis ni sems can thams cad kyi khur bskur bar bya'o/ /bdag ni 'dod dgar byed pa ma yin te/ bdag ni sems can thams cad bsgral ba'i smon lam can yin gyi bdag gis sems can yongs su smin par bya'o//bdag gis 'gro ba thams cad bsgral bar byas te/ skye ba'i dgon pa dang / rga ba'i dgon pa dang / nad kyi dgon pa dang / 'chi 'pho dang skye ba'i dgon pa dang / ngan song thams cad kyi dgon pa dang / mi khom pa'i dgon pa dang / 'du byed thams cad kyi dgon pa dang / lta ba thibs po thams cad kyi dgon pa dang / dge ba'i las chud za ba'i dgon pa dang mi shes pa kun nas langs pa'i dgon pa de dag thams cad las/ bdag gis sems can thams cad yongs su thar bar bya'o//srid pa'i dra bar chud pa/ ma rig pa'i sgrib pas bsgribs pa/ srid pa'i sred pa dang ldan pa/ mthar rab tu 'jig par 'gyur ba/ sdug bsngal gyi gzeb tu bcug pa/ 'khor ba'i btson ra na gnas pa/ mi mkhas pa/ dam bcas pa dang 'gal ba/the tshom za bar gyur pa/ rtag tu yid gnyis za ba/ mi bde ba mthong ba/ 'byung ba mi mkhas pa/ srid pa'i rgya mtsho klong 'khyil ba'i dkyil 'khor na gcig pu rgyu ba'i sems can thams cad bla na med pa'i ye shes kyi rgyal srid la dgod pa'i phyir bdag gis spyod pa spyad par bya'o//bdag ni bdag 'ba' zhig yongs su thar bar bya ba la brtson pa ma yin gyi /bdag gis sems can 'di dag thams cad thams cad mkhyen pa nyid kyi sems kyi gzings kyis 'khor ba bgrod dka' ba las bsgral bar bya'o/ /g.yang sa chen po las dbyung bar bya'o//gnod pa thams cad las yongs su thar bar bya'o/ /'khor ba'i rgyun las bsgral bar bya'o/ /bdag nyid kyis sems can thams cad kyi sdug bsngal gyi phung po khas blangs so/ /ji tsam gyis 'jig rten gyi khams thams cad du gtogs pa'i ngan song thams cad kyi sdug bsngal gyi gnas myong bar spro bar bya'o//bdag gis dge ba'i rtsa ba rnams kyis sems can thams cad mi dor bar bya'o/ /bdag ngan song gcig tu yang phyi ma'i mtha'i mu'i bskal par gnas par brtson par bya'o/ /ngan song gcig la ji lta ba bzhin du 'jig rten gyi khams thams cad du gtogs pa'i ngan song ma lus pa thams cad du gnas pa'i sems can thams cad yongs su thar bar bya ba'i phyir yang de bzhin no//de ci'i phyir zhe na/ bdag gcig pu sdug bsngal bar gyur pa ni bla'i/ bdag gi sems can thams cad ngan song gi sar rab tu ltung ba ni de lta bu ma yin te/bdag gis 'dir bdag nyid gtar bcug la sems can dmyal ba dang dud 'gro'i skye gnas dang gshin rje'i 'jig rten gyi dgon pa las 'gro ba thams cad blu bar bya'o/ /bdag ni sems can thams cad kyi don du sdug bsngal gyi tshor ba'i phung po thams cad bdag nyid kyi lus 'dis myong bar bya'o//sems can thams cad kyi ched du bdag nyid sems can thams cad kyi gnya'o/ /bden par smra ba yid ches su rung ba mi slu ba bya bar spro ste bdag gis sems can thams cad yongs su mi gtong ngo / /de ci'i phyir zhe na/ bdag ni sems can thams cad la dmigs nas thams cad mkhyen pa nyid kyi sems bskyed pa ste/'di ltar 'gro ba thams cad yongs su thar bar bya ba'i phyir bdag dga' ba 'dod pa ma yin par bla na med pa yang dag par rdzogs pa'i byang chub tu yang dag par zhugs so/ /bdag ni 'dod pa'i yon tan lnga'i dga' ba myong bar bya ba ma yin/'dod pa'i yul bsten pa'i phyir ma yin/ bdag ni 'dod pa'i khams su gtogs pa'i dga' ba bkod pa gzhan dang gzhan sgrub pa'i phyir ma yin par byang chub sems dpa'i spyod pa spyad par bya'o/ /de ci'i phyir zhe na/ 'jig rten thams cad kyi dga' ba 'di ni dga' ba ma yin pa'i phyir ro//'di lta ste 'dod pa bsten pa 'di ni bdud kyi spyod yul lo/ /'di lta ste 'dod pa bsten pa'i lam 'di ni blo ngan pas bsten pa'o/ /nye bar bsten pa 'di ni sangs rgyas thams cad kyis ma bsngags pa'o/ /de'i phyir nye bar bsten pa 'di ni sdug bsngal gyi phung po thams cad 'byung ba nyid yin te/de nyid las sems can dmyal ba dang dud 'gro'i skye gnas dang gshin rje'i 'jig rten rnams 'byung ngo / /sems can rnams 'thab pa dang rtsod pa dang mtshang 'bru ba dang 'gyed pa dang / 'khrugs pa dang / kun du 'khrugs pa rnams 'byung ngo //sems can de dag gis 'dod pa bsten na sangs rgyas bcom ldan 'das rnams las thag ring du 'gyur ro/ /'dod pa 'di dag ni mtho ris su skye ba'i bar chad du yang 'gyur na bla na med pa'i ye shes kyi rgyal srid/ sems can thams cad kyi grub pa dang bde ba la lta smos kyang ci dgos te/de ltar bdag gis 'dod pa skyon tshad med pa dang ldan la rab tu 'bar zhing kun du rab tu 'bar bar mthong gis / de lta bas na bdag gzhi de la mi spyod par nan tan bya'o/ /de bzhin du sbyar te/ ji lta ji ltar sems can thams cad shin tu bde ba dang / myong ba med pa'i bde ba nas thams cad mkhyen pa nyid kyi bde ba'i bar du thob par 'gyur ba de lta de ltar/bdag kha lo sgyur ba/ yongs su 'dren pa bdag sgron ma 'dzin pa/ bdag zhi ba'i 'gro ba ston pa/ bdag dal ba'i 'gro ba thob pa/ bdag thabs shes pa/ bdag don la mkhas pa/ bdag 'khor ba'i rgya mtsho nas thams cad mkhyen pa'i ye shes kyi grus yul chen po la gnas pa/ bdag yongs su bsngo ba la mkhas pa/ pha rol ston pa bdag gis de lta de ltar dge ba'i rtsa ba thams cad yongs su bsngo bar bya'o/ /de bzhin du sbyar te/ gling bzhi pa'i 'jig rten gyi khams snang bar bya ba'i phyir gling bzhi pa'i 'jig rten gyi khams na sems can ji snyed pa de snyed kyi nyi ma 'char ba ma yin gyi gling bzhi pa snang bar bya ba'i phyir nyi ma gcig po 'di kho na 'char ro//gang gis de dag nyin mo'i grangs su shes par 'gyur ba dang rang gi bya ba yongs su thob par 'gyur ba dang /lo tog yongs su smin par byed par 'gyur ba dang / nyin gcig bzhin du skyed mos tshal dang grong khyer rnams su dga' zhing rtse la dga' dgur spyod pa myong bar 'gyur ba dang / phyogs mthong bar 'gyur ba dang / grong dang grong khyer dang grong rdal dang / yul 'khor dang rgyal po'i pho brang 'khor rnams su 'ong ba dang 'gro bar 'gyur ba'i snang ba gling bzhi par skyes pa'i sems can re re'i lus las 'byung ba ma yin no//de bzhin du sbyar te/ lha'i bu nyi ma 'char ba na nyi ma'i dkyil 'khor gcig pu gnyis su med par gling bzhi pa'i khams kyi sems can rnams la snang bar 'byung ngo //de bzhin du byang chub sems dpa' dge ba'i rtsa ba bsgrub cing dge ba'i rtsa ba yongs su bsngo ba yang 'di ltar sems bskyed de/ sems can 'di dag la ni gang gis 'di dag bdag yongs su skyob par 'gyur ba'i dge ba'i rtsa ba de med na/ gzhan skyob par lta smos kyang ci dgos/bdag ni sems can thams cad kyi ched du dge ba'i rtsa ba rnams yang dag par bsgrub par bya'o/ /dge ba'i rtsa ba yongs su bsngo bar bya'o/ /'di lta ste/ sems can thams cad thar bar bya ba dang / sems can thams cad la snang bar bya ba dang / sems can thams cad shes par bya ba dang / sems can thams cad bsgral bar bya ba dang / sems can thams cad yongs su bzung ba dang / sems can thams cad yongs su bsgrub pa dang / sems can thams cad rab tu tshim par bya ba dang / sems can thams cad kyi the tshom bcad pa'i phyir/bdag nyi ma'i dkyil 'khor lta bur byas te/ gzhan la mi ltos par bya/ gzhan la skabs phye zhing sems can la go cha dor bar mi bya/ sems can thams cad kyi thad du sems can bskyab pa'i brtson pa las ldog par mi bya/ sdug bsngal thams cad bsal ba'i yongs su bsngo ba las ldog par mi bya/dge ba'i rtsa ba chung ngu yongs su bzung bar mi bya/ yongs su bsngo ba chung ngus chog par mi bsam mo zhes bya ba la sogs pa gsungs so/ /'phags pa blo gros mi zad pas zhus pa'i mdo las kyang / de bskal pa 'di snyed cig tu go cha bgo'o/ / bskal pa 'di snyed cig tu go cha mi bgo'o / /zhes bskal pa bgrangs pas byang chub mi tshol gyi bsam gyis mi khyab pa'i go cha gyon par byed do/ /gal te 'khor ba'i sngon gyi mtha' ji tsam pa de tsam la nyin zhag gcig tu gyur la/ nyin zhag gi tshul de lta bu'i nyi ma bco lngas zla ba phyed du gyur la/nyi ma sum cus zla ba gcig tu gyur te/ zla ba bcu gnyis kyis lo gcig tu gyur la/ lo bgrang ba 'dis lo 'bum la byang chub kyi sems gcig bskyed cing / de bzhin gshegs pa dgra bcom pa yang dag par rdzogs pa'i sangs rgyas gcig mthong la/ 'jug pa 'di dang bgrang ba 'dis gang gA'i klung gi bye ma snyed kyi sems bskyed pa dang de bzhin gshegs pa mthong bas sems can gcig gi sems dang spyod pa shes par gyur la/'jug pa 'di dang bgrangs pa 'dis de snyed kyi sems bskyed pa dang / de bzhin gshegs pa mthong bas sems can thams cad kyi sems dang spyod pa rnams shes par gyur kyang /mi zhum pa'i go cha 'di ni byang chub sems dpa'i go cha mi zad pa zhes gsungs so/ /de bzhin du sbyin pa la sogs pa dang byang chub kyi phyogs dang skyes bu chen po'i mtshan rnams la yang sbyar ro/ / 'phags pa dkon mchog sprin las kyang / 'di la byang chub sems dpa' sems can dmu rgod sems can gdul dka' bar rig ste/ de rnams kyis yi chad nas 'di lta bu'i dmu rgod 'di lta bu'i gdul dka' ba'i sems can 'di dag gis chog go zhes te / gzhi de las yongs su skyo zhing rgyab kyis phyogs par 'gyur te/gang na sems can 'di lta bu dag gi ming yang mi thos pa'i 'jig rten gyi khams yongs su dag par smon lam ni 'debs so/ /sems can gyi don la ma phyogs pa'i byang chub sems dpa' ni yongs su dag pa'i 'jig rten gyi khams su yang skye bar mi 'gyur te/de la byang chub sems dpa' shes rab can ni 'di ltar sems can gyi khams thams cad na sems can gang rnams ngan pa brtson 'grus chung ba blun po glen pa lug ltar lkugs pa'i rang bzhin can yongs su mya ngan las mi 'da' ba'i chos can/ sems can gyi khams ma lus pa 'di las bsnyigs pa sangs rgyas thams cad dang byang chub sems dpa' thams cad kyis spang bar gyur pa yod pa de dag bdag gi sangs rgyas kyi zhing du 'dus par gyur la/bdag gis de dag byang chub kyi snying po la 'dug tu bcug ste/ bla na med pa yang dag par rdzogs pa'i byang chub mngon par rdzogs par 'tshang rgya bar bya'o snyam du sems bskyed de/byang chub sems dpa' de ltar sems pa'i sems bskyed pa re re la yang bdud kyi gnas thams cad rab tu g.yo'o/ /sangs rgyas thams cad kyang de'i bsngags pa gsung par 'gyur ro zhes gsungs so/ /de ltar re zhig bsod nams mngon par spel bar 'dod pas brtson pa brtan par bya'o//da ni bsam pa brtan par bya ba brjod par bya ste/ brtan par bya ba 'dis ci bya snyam du rtog pa bsal ba'i phyir/ 'phags pa chos yang dag par sdud pa'i mdo las gsungs pa/ bcom ldan 'das bsam pa phun sum tshogs pa ni chos rnams kyi rtsa ba ste/gang la bsam pa ma mchis pa de la sangs rgyas kyi chos thams cad ring ba lags so/ /bcom ldan 'das bsam pa phun sum tshogs pa la ni/ gal te sangs rgyas mi bzhugs na yang nam mkha'i dkyil dang rtsig pa dang shing rnams las chos 'byung ngo //byang chub sems dpa' bsam pa dag pa la ni rang gi yid kyi spyod pa nyid las gdams ngag dang rjes su bstan pa 'byung ngo / /bcom ldan 'das de bas na byang chub sems dpa' bsam pa phun sum tshogs par bgyi'o/ /bcom ldan 'das 'di lta ste/ dper na gang la rkang pa mchis pa de la 'gro ba mchis so//bcom ldan 'das de bzhin du gang la bsam pa mchis pa de la sangs rgyas kyi chos rnams mchis so/ /bcom ldan 'das 'di lta ste dper na/ yan lag gi dam pa mgo gang la mchis pa de la 'tsho ba mchis so/ /bcom ldan 'das de bzhin du bsam pa gang la mchis pa de la sangs rgyas kyi byang chub mchis so//bcom ldan 'das 'di lta ste/ dper na gang la 'tsho ba mchis pa de la rnyed pa mchis so/ /bcom ldan 'das de bzhin du gang la bsam pa mchis pa de la sangs rgyas kyi rnyed pa mchis so/ /bcom ldan 'das 'di lta ste/dper na zhugs shing mchis na zhugs 'bar gyi zhugs shing ma mchis na zhugs mi 'bar ro/ /bcom ldan 'das de bzhin du bsam pa mchis pa'i byang chub sems dpa' de la sangs rgyas kyi chos rnams 'bar gyi bsam pa ma mchis pa la mi 'bar ro/ /bcom ldan 'das 'di lta ste/dper na sprin chags na char 'bab kyi sprin ma chags na char mi 'bab po/ /bcom ldan 'das de bzhin du bsam pa ma mchis na sangs rgyas kyi chos rnams 'byung gi bsam pa mchis na mi 'byung ngo / /bcom ldan 'das 'di lta ste/ dper na zhugs shing gang rtsa ba nyams pa de las me tog dang 'bras bu rnams mi 'byung ngo //bcom ldan 'das de bzhin du gang bsam pa log par zhugs pa de las dge ba'i chos thams cad mi 'byung ngo / /bcom ldan 'das de bas na byang chub sems dpa' sangs rgyas kyi byang chub tshol bas rang gi bsam pa shin tu bzung ba dang shin tu bsrung ba dang shin tu sbyang bar bgyi'o zhes bya ba'o//bsam pa zhes bya ba 'di ji lta bu zhe / 'phags pa blo gros mi zad pa'i mdo las/ bsam pa de yang ma byas pas na bcos ma ma yin no/ /g.yo med pas na ma byas pa'o / /rab tu rtogs pas na g.yo med pa'o//sgyu med pas na rab tu rtogs pa'o/ /dag pas na sgyu med pa'o/ /drang bas na dag pa'o/ /gya gyu med pas na drang ba'o/ /gsal bas na gya gyu med pa'o/ /mi mnyam pa med pas na gsal ba'o/ /sra bas na mnyam pa med pa'o/ /mi phyed pas na sra ba'o//mkhrang bas na mi phyed pa'o/ /mi g.yo bas na mkhrang ba'o/ /mi gnas pas na mi g.yo ba'o zhes bya ba la sogs pa'o/ /'di nyid yon tan lhag pa thob par bya ba'i phyir zhugs pa ni lhag pa'i bsam pa zhes bya'o/ /de nyid las ji skad du/ bye brag tu 'gro ba'i phyir rgyal ba'i lhag pa'i bsam pa zhes bya ba la sogs pa gsungs pa dang /yang lhag pa'i bsam pa zhes bya ba ni 'byung po rnams lus nges pa'o/ /sems can thams cad la byams pa'o/ /'phags pa rnams la phan par sems pa'o/ /'phags pa ma yin pa la snying rje ba'o/ /bla ma la rim gro byed pa'o//dpung gnyen med pa rnams la dpung gnyen no/ /skyabs med pa rnams la skyabs so/ /gling med pa rnams la gling ngo / mgon med pa rnams la mgon no/ /grogs med pa rnams la grogs so/ /gya gyu can rnams la drang ba'o/ /dmu rgod rnams la gsal ba'o//g.yo can rnams la g.yo med pa'o/ /sgyu can rnams la sgyu med pa'o/ /byas pa mi gzo ba rnams la byas pa gzo ba'o/ /'khu ba rnams la byas pa tshor ba'o/ /mi phan pa rnams la phan 'dogs pa'o/ /log par zhugs pa la bden pa'o/ /pho thegs can la nga rgyal med pa'o//legs par byas pa rnams la mi smod pa'o/ /gzhan gyi 'khrul pa la mi rtsod pa'o/ /log par zhugs pa rnams la kun du srung ba'o/ /thabs kyi dge ba spyod pa thams cad la nyes par mi lta ba'o/ /sbyin pa'i gnas rnams la rim gro byed pa'o/ / bstan pa la mthun par 'dzin pa'o zhes bya ba la sogs pa gsungs pa lta bu'o/ /de ltar brtson pa dang bsam pa la brtan par byas nas/ snying rje mdun du bzhag nas su/ /dge ba spel la nan tan bya/ /chos yang dag par sdud pa'i mdo las ji skad gsungs pa lta bu ste/ de nas bcom ldan 'das la byang chub sems dpa' spyan ras gzigs dbang phyug gis 'di skad ces gsol to//bcom ldan 'das byang chub sems dpas chos shin tu mang po la bslab par mi bgyi'o/ /bcom ldan 'das byang chub sems dpas chos gcig rab tu gzung zhing rab tu rtogs par bgyis na/bcom ldan 'das sangs rgyas kyi chos thams cad de'i lag mthil du mchis pa lags so/ /chos gcig pu gang zhe na/ 'di lta ste/ snying rje chen po'o/ /bcom ldan 'das snying rje chen pos ni sangs rgyas kyi chos thams cad byang chub sems dpa' rnams kyi lag mthil du mchis pa lags so//bcom ldan 'das 'di lta ste/ dper na 'khor los sgyur ba'i rgyal po'i 'khor lo rin po che gang du mchi ba der dpung gi tshogs thams cad mchi'o/ /bcom ldan 'das de bzhin du byang chub sems dpa'i snying rje chen po gang du mchi ba der sangs rgyas kyi chos thams cad mchi'o//bcom ldan 'das 'di lta ste/ dper na gdugs shar na sems can rnams kyi bya ba thams cad shin tu mang bar 'gyur ro/ /bcom ldan 'das de bzhin du snying rje chen po gang du shar bar gyur pa der byang chub byed pa'i chos kyi bya ba gzhan rnams kyang shin tu mang bar 'gyur ro//bcom ldan 'das 'di lta ste/ dper na yid kyis byin gyis brlabs pa'i dbang po thams cad ni rang rang gi yul 'dzin pa la 'jebs par 'gyur ro/ /bcom ldan 'das de bzhin du snying rje chen pos byin gyis brlabs pa'i byang chub par byed pa'i chos rnams rang rang gi bya ba la rab tu 'jebs par 'gyur ro//bcom ldan 'das 'di lta ste/ dper na srog gi dbang po mchis na dbang po gzhan rnams 'byung bar 'gyur ro/ /bcom ldan 'das de bzhin du snying rje chen po mchis na byang chub par byed pa'i chos gzhan rnams kyang 'byung bar 'gyur zhes bya ba'o//'phags pa blo gros mi zad pa'i mdo las kyang / btsun pa sha ra dwa ti'i bu 'di lta ste/ dper na dbugs 'byung ba dang rngub pa ni/ skyes bu'i srog gi dbang po'i sngon du 'gro ba'o/ /de bzhin du byang chub sems dpa' theg pa chen po bsgrub pa'i snying rje chen po yang sngon du 'gro ba'o//de bzhin du sbyar te/ 'di lta ste/ dper na tshong dpon nam khyim bdag bu gcig pa la snying thag pa nas sdug par 'dzin pa de bzhin du/ byang chub sems dpa' snying rje chen po la gnas pa yang sems can thams cad la snying thag pa nas sdug par 'dzin pa yin no zhes gsungs so//'di ji ltar bsgom par bya zhe na/ rang gis sngon myong ba dang myong bar 'gyur ba'i sdug bsngal dang 'jigs pa rnam pa du ma rang gis shin tu mi 'dod pa bsgoms te/ byams pa dang ldan pas sdug pa la sogs pa la byams pa bzhin du bsgom par bya ba'am da ltar byung ba'i sdug bsngal gyis nyen pa rnams dang sdug bsngal chen po'i rgya mtsho 'khor ba yun ring po dus tshigs med pa na sdug bsngal dang ldan pa rnams la bsgom par bya'o//'phags pa sa bcu pa las ji skad gsungs pa lta bu ste/ de 'di snyam du sems te/ kye ma'o byis pa so so'i skye bo 'di dag ni mi shes pa rmongs pa dag ste/de dag gi lus grangs med pa 'gags la 'gag par 'gyur zhing 'gag bzhin te/ de ltar mchi yang lus la yid 'byung ba mi skyed cing / sdug bsngal gyi 'khrul 'khor je bas je 'phel du byed/ 'khor ba'i rgyud las mi ldog phung po'i gnas mi 'dor//khams kyi sbrul dag gis skyo bar mi 'gyur/ dga' ba'i 'dod chags kyis rmongs pa rtogs par mi byed/ skye mched kyi grong stong pa la mi lta/ ngar 'dzin pa dang nga yir 'dzin pa'i phra rgyas mi spong / nga rgyal dang lta ba'i zug rngu mi 'byin/ 'dod chags dang zhe sdang dang gti mug gi me lce 'bar ba zhi bar mi byed/ma rig pa'i mun pa mi sel/ sred pa'i rgya mtsho mi skems/ stobs bcu'i ded dpon yongs su mi tshol zhing bdud kyi bsam pa thibs po'i rjes su song ba ste/ 'khor ba'i rgya mtsho rnam par rtog pa rnam pa sna tshogs kyi chu srin 'dzin khris dkrugs pas yongs su g.yengs pa ngo mtshar che ste/ma la bdag gis sems can de ltar sdug bsngal gyis nyam thag pa/ mgon med pa/ dpung gnyen med pa/ skyabs med pa/ gnas med pa/ gzhi med pa/ rten med pa/ long bar gyur pa/ ma rig pa'i sgo nga'i sbubs dang spris g.yogs pa/mun pas zil gyis non pa de dag gi don du gcig pu gnyis su med par gyur nas/ bsod nams dang ye shes kyi tshogs bsag par bya ba rnam pa ji lta bus sems can de dag shin tu rnam par dag pa 'thob par 'gyur ba nas/ stobs bcu'i stobs kyis ye shes chags pa med pa'i bar gyi mthar thug pa 'thob par 'gyur ba'i rnam pa de lta bu'i bsod nams dang ye shes kyi tshogs bsag par bya'o snyam mo zhes bya'o//yang de nyid las gsungs pa/ kye ma'o sems can 'di dag ni 'khor ba'i mya ngan gyi lam du zhugs pa/ sems can dmyal ba dang dud 'gro'i gnas dang gshin rje'i 'jig rten gyi g.yang sa la mngon du phyogs pa/lta ba ngan pa'i dra ba nyam nga bar zhugs pa gti mug gi thibs pos kun nas yog pa/ log pa'i lam du zhugs pa/ ldongs par gyur pa/ yongs su 'dren pa med pa zhes bya ba nas/ de bzhin du sbyar te/ 'khor ba rgyun gyis bdas pa/ srid pa'i klung du zhugs pa/ shugs drag pos bdas te blta ba'i mthu med pa 'dod pa dang gnod sems dang rnam par 'tshe ba'i rnam par rtog pa mang po'i rjes su zhugs pa/ 'jig tshogs la lta ba chu srin chen pos zin pa/ 'dod pa thibs po'i klong du zhugs pa/dga' ba can dang 'dod chags kyi dkyil du kun du thogs pa/ nga'o snyam pa'i nga rgyal gyi thang la 'khyams pa/ dpung gnyen med pa/ skye mched kyi grong nas ma 'phags pa/ sgrol ba la mkhas pa dang bral bar gyur pa yin gyi / de dag bdag gis snying rje chen po dang dge ba'i rtsa ba'i stobs kyis bton te/thams cad mkhyen pa'i gling 'tshe ba med pa rdul med pa 'jigs pa dang skrag pa thams cad med pa la rab tu dgod par bya'o/ /kye ma'o sems can 'di dag ni sdug bsngal ba dang yid mi bde ba dang 'khrug pa mang po mang ba / sdug pa dang mi sdug pa dang 'brel pa/ mya ngan dang smre sngags 'don pa dang bcas pa'i rjes su rgyu ba/ sred pa'i sgrog tu bcug/ khams gsum pa'i ma rig pa'i thibs pos kun nas khebs pa yin gyi / de dag bdag gis khams gsum pa'i gnas thams cad la dben pa/ mya ngan las 'das pa la rab tu dgod par bya'o zhes bya ba la sogs pa'o//de ltar brtson pa dang bsam pa dang snying rje gcig gis gcig brtan par byas pa de dag gi bsod nams mngon par spel ba rtsom mo/ /de la re zhig bzang po spyod pa'i cho ga bzhin/ /phyag 'tshal la sogs gus par bya//drag shul can gyis zhus pa las/ nyin lan gsum mtshan lan gsum du/ gtsang ba dang gos gtsang ma bgos te phung po gsum pa bklag par bya'o zhes gsungs so/ /de la phung po gsum ni sdig pa bshags pa dang / bsod nams kyi rjes su yi rang ba dang / sangs rgyas la bskul ba zhes bya ba ste bsod nams kyi phung po yin pa'i phyir ro//de la phyag 'tshal ba ni sdig pa bshags pa'i nang du 'dus te sangs rgyas la phyag 'tshal nas sdig pa bshags so zhes nye ba 'khor gyis zhus pa las bstan pa'i phyir ro/ /gsol ba gdab pa ni bskul ba dang don gcig pa'i phyir ro//mchod pa ni 'byor pa med pa'i phyir mi rtag pas ma smos so/ /yid dang ngag ni mdo sde gzhan las grags pa'i phyir ma bshad de / /tshig gsum ni gtso bo yin par shes par bya'o/ /de la phyag 'tshal ba ni sangs rgyas thams cad la phyag 'tshal lo zhes bya ba lta bu ste/tshigs su bcad pa bzhi pa dang / ji ltar ston pa'i bstod pa dang / bzang po spyod pa la sogs pa'i tshigs su bcad pa rnams kyis so/ /mchod pa ni 'phags pa dkon mchog sprin gyi mdo las ji skad gsungs pa lta bu ste/ rigs kyi bu 'di la byang chub sems dpa' me tog gi rnam pa'am 'bras bu'i rnam pa nga yir bya ba med pa yongs su gzung ba med pa gang yin pa de rnams nyin lan gsum mtshan lan gsum sangs rgyas dang byang chub sems dpa' rnams la 'bul lo//dge ba'i rtsa ba de yang bla na med pa yang dag par rdzogs pa'i byang chub tu yongs su bsngo'o//de bdug pa'i shing ngam spos kyi shing ngam rin po che'i shing ngam dpag bsam gyi shing ngam me tog gi shing ngam 'bras bu'i shing nga yir bya ba med pa yongs su gzung ba med pa gang yin pa de lta bu de dag kyang nyin lan gsum mtshan lan gsum sangs rgyas dang byang chub sems dpa' rnams la 'bul lo zhes bya ba'o //dam tshig gsum bkod pa'i rgyal po las kyang thang las skyes pa'i rin po che'i rnams dang chu las skyes pa'i rin po che'i ri rnams dang thang las skyes pa'i rin po che la sogs pa phyogs bcu na rnam par gnas pa nga yir bya ba med pa yongs su gzung ba med pa rnams 'bul lo zhes gsungs so//phyogs 'dis sman thams cad dang bcud kyis len thams cad dang chu thams cad dang kha na ma tho ba med pa'i chu'i dkyil 'khor dang gser gyi dkyil 'khor thams cad dang / 'jig rten gyi khams chags pa rnams na ro dang reg pa mchog tu phun sum tshogs pa'i sa zhag dang bdud rtsi'i sbu gu dang ma rmos ma btab pa'i 'bras bu sA lu dang byang gi sgra mi snyan gyi gling dang 'jig rten gyi khams yongs su dag pa rnams na yod pa mchog tu nyams dga' ba'i longs spyod rnams 'bul lo//'phags pa dkon mchog sprin las 'di skad du/de mdo sde rnams las mchod pa dang rim gro bya ba rgya chen po gang yin pa de lta bu dag nyan cing / de dag snying thag pa nas lhag pa'i bsam pa mchog gis sangs rgyas dang byang chub sems dpa' rnams la yongs su bsngo'o zhes bya ba dang / de bzhin du mchod pa dang rim gro sna tshogs bya ba rjes su sems so zhes gsungs so//bshags pa ni sngar brjod pa nyid do/ /'phags pa blo gros mi zad pa'i mdo las ni/ bdag dang gzhan gyi sdig pa bshags pa ni bsod nams kyi tshogs su brjod do/ /rjes su yi rang ba ni bzang po spyod pa'i tshigs su bcad pa'am/zla ba sgron ma'i rjes su yi rang ba'i le'u las so/ /gsol ba gdab pa ni bzang po spyod pa nyid kyis so/ /yongs su bsngo ba ni mtha' dag bzang po spyod pa nyid du rdzogs pa'am/ rdo rje rgyal mtshan gyi yongs su bsngo ba yang yin par blta'o/ / yang na sa bcu pa las gsungs pa'i smon lam chen po rnams te/ 'di lta ste/ sangs rgyas ma lus pa la mchod pa dang / rim gro lhag ma med pa mtha' dag bya ba'i phyir rnam pa thams cad kyi mchog dang ldan pa/ mos pa rgya chen po rnam par dag pa chos kyi dbyings kyis klas par rgya che ba nam mkha'i khams kyi mthas gtugs pa/phyi ma'i mtha'i mur thug pa/ bskal pa bgrang bar sangs rgyas 'byung ba bgrangs pa thams cad la mchod pa dang rim gro chen po bya ba rgyun mi 'chad pa'i smon lam chen po dang po mngon par bsgrub po/ /'di lta ste/ de bzhin gshegs pa thams cad kyis gsungs pa'i chos kyi tshul yang dag par bzung ba dang /sangs rgyas thams cad kyi byang chub yang dag par yongs su bzung ba dang / yang dag par rdzogs pa'i sangs rgyas thams cad kyi bstan pa yongs su bsrung ba'i phyir/ chos kyi dbyings kyis klas par rgya che ba/ nam mkha'i khams kyi mthas gtugs pa/phyi ma'i mtha'i mur thug pa/ bskal pa bgrang bar sangs rgyas 'byung ba bgrangs pa thams cad kyis dam pa'i chos yongs su bzung ba rgyun mi 'chad pa'i smon lam chen po gnyis pa mngon par bsgrub po/ /'di lta ste/ 'jig rten gyi khams rab 'byam ma lus pa thams cad du sangs rgyas 'byung ba thams cad kyi dga' ldan gyi pho brang na bzhugs pa thog mar mdzad de/'pho ba dang gshegs pa dang / lhums na bzhugs pa dang / bltam pa dang / gzhon nu rol pa dang / btsun mo'i 'khor gyi nang na bzhugs pa dang / mngon par 'byung ba dang / dka' ba spyad pa dang / byang chub kyi snying por gshegs pa dang / bdud 'dul ba dang / mngon par rdzogs par byang chub pa dang / chos kyi 'khor lo bskor bar bskul ba dang / yongs su mya ngan las 'das pa chen po ston pa'i drung du 'gro zhing mchod pa dang chos kyis yang dag par bsdu ba'i sbyor ba sngon du 'gro bas thams cad dus gcig tu bsgrub pa'i phyir/chos kyi dbyings kyi mthas klas par rgya che ba/ nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrang bar sangs rgyas 'byung ba bgrangs pa thams cad kyi gan du 'gro ba rgyun mi 'chad pa'i smon lam chen po gsum pa mngon par bsgrub po//'di lta ste/ byang chub sems dpa'i spyod pa thams cad shin tu rgyas pa/ che ba/ tshad med pa/ tha mi dad pa/ pha rol tu phyin pa thams cad kyis bsdus pa/ sa yongs su sbyong ba/ yan lag dang /nye ba'i yan lag tu bcas pa bsgrub pa dang / mtshan nyid 'dra ba dang / mi 'dra ba dang / 'du ba dang / rgyas pa dang bcas pa'i byang chub sems dpa'i spyod par gyur pa'i sa'i lam thams cad ji lta ba bzhin du ston pas pha rol tu phyin pa yongs su sbyang bar bya ba'i gdams ngag dang rjes su bstan pa rab tu sbyin pas brtan pa'i sems bskyed pa mngon par bsgrub pa'i phyir/chos kyi dbyings kyis klas par rgya che ba/ nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrang bar spyod pa/ bgrangs pa thams cad du rgyun mi 'chad par mngon par bsgrub pa'i smon lam chen po bzhi pa mngon par bsgrub po//'di lta ste/ sems can gyi khams ma lus pa thams cad gzugs can dang / gzugs med pa dang / 'du shes can dang / 'du shes can ma yin pa dang / 'du shes med 'du shes med min dang /sgo nga las skyes pa dang / mngal nas skyes pa dang / drod gsher las skyes pa dang / rdzus te skyes pa dang / khams gsum du gtogs pa/ 'gro ba drug tu 'dus pa/ skye ba thams cad du gtogs pa/ ming dang gzugs kyis bsdus pa'i sems can ma lus pa thams cad yongs su smin par bya bar sangs rgyas kyi chos la gzud pa dang 'gro ba bgrangs pa thams cad gcad pa dang thams cad mkhyen pa'i ye shes la rab tu dgod pa'i phyir/chos kyi dbyings kyis klas par rgya che ba/ nam mkha'i khams kyi mthas gtugs pa/ phyi ma'i mtha'i mur thug pa bskal pa bgrang bar sems can gyi khams bgrangs pa thams cad yongs su smin par bya ba rgyun mi 'chad pa'i smon lam chen po lnga pa mngon par bsgrub po//'di lta ste/ 'jig rten gyi khams shin tu rgyas pa dang / tha gru che ba dang / tshad med pa dang / phra ba dang / rags pa dang / snrel zhi dang / spyi'u tshugs dang / ngos phyal ba dang / 'jug pa'i khyim can dang / mig 'phrul ltar rnam par phye ba dang / phyogs bcu rnam pa tha dad pa rnam par 'byed pa la 'jug pa la ma lus pa/ ye shes kyi khong du chud par bya zhing mngon du 'gyur bar bya ba'i phyir/chos kyi dbyings kyis klas par rgya che ba/ nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrang bar 'jig rten gyi khams bgrangs pa thams cad du 'jug pa rgyun mi 'chad pa'i smon lam chen po drug pa mngon par bsgrub po/ /'di lta ste/ zhing thams cad zhing gcig dang / zhing gcig zhing thams cad du yang dag par gzhol bar bya ba yongs su sbyong ba dang / sangs rgyas kyi zhing tshad med pa dag 'od dang rnam par bkod pa'i rgyan gyis rab tu brgyan pa dang / yongs su dag pa'i lam dang ldan pas nyon mongs pa thams cad bsal ba dang /sems can ye shes kyi 'byung gnas tshad med pas rab tu gang ba dang / sangs rgyas kyi yul rgya chen po la yang dag par gzhol ba dang / sems can gyi bsam pa ji lta ba bzhin du yang dag par bstan cing shin tu tshim par bya ba'i phyir/ chos kyi dbyings kyis klas par rgya che ba/nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrang bar sangs rgyas kyi zhing bgrangs pa thams cad yongs su skyong ba rgyun mi 'chad pa'i smon lam chen po bdun pa mngon par bsgrub po/ /'di lta ste/ byang chub sems dpa' thams cad dang bsam pa dang sbyor ba gcig par bya ba dang /'gran zla med pa'i dge ba'i rtsa ba bsag par bya ba dang / byang chub sems dpa' thams cad dang dmigs pa gcig pas mnyam pa nyid du bya ba dang / rtag tu rgyun mi 'chad par byang chub sems dpa' dang 'grogs shing mi 'bral bar bya ba dang /sangs rgyas 'byung ba ci dgar bstan par bya ba dang / rang gi sems bskyed par de bzhin gshegs pa'i mthu ye shes kyi mthu khong du chud par bya ba dang / ma nyams shing rjes su 'gro ba'i mngon par shes pa rab tu thob par bya ba dang / 'jig rten gyi khams thams cad rnam par rgyu bar bya ba dang /'khor gyi dkyil 'khor thams cad du snang ba thob par bya ba dang / skye ba thams cad du rang gi lus rjes su 'gro bar bya ba dang / theg pa chen po bsam gyis mi khyab pa dang ldan par bya ba dang / byang chub sems dpa'i spyod pa spyad par bya ba'i phyir/ chos kyi dbyings kyis klas par rgya che ba/nam mkha'i khams kyi mthas gtugs pa/ phyi ma'i mtha'i mur thug pa/ bskal pa bgrang bar spyod pa bgrangs pa thams cad du theg pa chen po la 'dzud pa rgyun mi 'chad pa'i smon lam chen po brgyad pa mngon par bsgrub po/ /'di lta ste/ phyir mi ldog pa'i 'khor lo la yang dag par gnas pa'i byang chub sems dpa'i spyod pa spyad par bya ba dang /lus dang ngag dang yid kyi las don yod par bya ba dang / mthong ma thag tu sangs rgyas kyi chos nges par thob par bya ba dang / dbyangs brjod ma thag tu ye shes khong du chud par bya ba dang / dad par gyur ma thag tu nyon mongs pa ldog par bya ba dang /sman gyi rgyal po lta bu'i lus thob par bya ba dang / yid bzhin gyi nor bu lta bu'i lus thob par bya ba dang / byang chub sems dpa' sems dpa' chen po'i spyod pa spyad pa'i phyir/ chos kyi dbyings kyis klas par rgya che ba/ nam mkha'i khams kyi mthas gtugs pa/phyi ma'i mtha'i mur thug pa/ bskal pa bgrang bar spyod pa bgrangs pa thams cad don yod par rgyun mi 'chad pa'i smon lam chen po dgu pa mngon par bsgrub po/ /'di lta ste/ 'jig rten gyi khams thams cad du bla na med pa yang dag par rdzogs pa'i byang chub mngon par rdzogs par sangs rgyas par bya ba dang /byis pa'i lam gcig dang tha mi dad par byis pa'i lam thams cad du skye ba dang / byang chub kyi snying por gshegs pa dang chos kyi 'khor lo bskor ba dang / yongs su mya ngan las 'das pa chen po bstan par bya ba dang / sangs rgyas kyi yul chen po mthu dang ye shes kyi rjes su 'gro bas sems can gyi khams thams cad kyi bsam pa ji lta ba bzhin du/ sangs rgyas 'byung bar dal ba/ dal ba la rtogs par byed/ zhi bar byed/ thob par byed cing bstan par bya ba dang / gcig mngon du yang dag par rtogs pas chos kyi dbyings thams cad mya ngan las 'das pas rgyas par bya ba dang /dbyangs gcig brjod pas sems can gyi khams thams cad kyi sems tshim par bya ba dang / yongs su mya ngan las 'das pa chen po bstan kyang spyod pa'i stobs rgyun mi gcad pa dang /ye shes chen pos chos thams cad 'byung bar byed pa bstan par bya ba dang / chos shes par bya ba dang / rdzu 'phrul dang sgyu ma'i mngon par shes pas 'jig rten gyi khams thams cad rgyas par bya ba'i phyir/ chos kyi dbyings kyis klas par rgya che ba/ nam mkha'i khams kyi mthas gtugs pa/phyi ma'i mtha'i mur thug pa/ bskal pa bgrang bar mngon par rdzogs par byang chub pa bgrangs pa thams cad du theg pa chen po mngon par bsgrub pa rgyun mi 'chad pa'i smon lam chen po bcu po mngon par bsgrub ste/ smon lam bcu po 'di dag mngon par bsgrub po/ /zhes bya ba'o//'di bsgom pa'i tshe thams cad la yang yongs su bsngo'o zhes bya bar sbyar ro/ /'phags pa spyan ras gzigs dbang phyug gi rnam par thar pa las gang gsungs pa de yang 'di ltar bya ste/ dge ba'i rtsa ba 'di sems can thams cad g.yang sa'i 'jigs pa dang bral bar bya ba'i phyir yongs su bsngo'o//sems can thams cad kyi rgyun las byung ba'i 'jigs pa rab tu zhi bar bya ba dang / sems can thams cad kyi rmongs pa'i 'jigs pa bzlog pa'i phyir yongs su bsngo'o/ /sems can thams cad kyi bcing ba'i 'jigs pa bcad pa dang / sems can thams cad kyi srog 'chad par byed pa'i 'jigs pa rnam par bzlog pa dang /sems can thams cad kyi yo byad dang bral ba'i 'jigs pa bsal ba dang / sems can thams cad kyi 'tsho ba med pa'i 'jigs pa nye bar zhi bar bya ba dang / sems can thams cad kyi tshigs su bcad pa med pa'i 'jigs pa las shin tu bzla ba'i phyir yongs su bsngo'o//sems can thams cad kyi 'khor ba'i 'jigs pa nye bar zhi bar bya ba dang / sems can thams cad 'khor gyi nang du bag tsha ba'i 'jigs pa dang bral bar bya ba dang / sems can thams cad 'chi ba'i 'jigs pa las shin tu bzlog pa dang /sems can thams cad ngan 'gro'i 'jigs pa las rnam par bzlog par bya ba dang / sems can thams cad yang ba'i 'gro ba mun pa mun nag can bzlog pa la snang bar bya ba'i phyir yongs su bsngo'o/ /sems can thams cad ris mi mthun pa dang phrad pa'i 'jigs pa dang shin tu bral bar bya ba dang /sems can thams cad kyi sdug pa dang bral ba'i 'jigs pa 'gag pa dang / sems can thams cad kyi mi sdug pa dang 'grogs pa'i 'jigs pa bsal ba dang / sems can thams cad lus la yongs su gnod pa'i 'jigs pa dang shin tu bral bar bya ba dang /sems can thams cad sems la yongs su gnod pa'i 'jigs pa las thar bar bya ba dang / sems can thams cad sdug bsngal dang yid mi bde ba dang 'khrugs pa las yang dag par bzla ba'i phyir yongs su bsngo'o zhes bya ba'o/ / mdor na bzang po spyod pa las tshigs su bcad pa gnyis 'byung ba 'di ni yongs su bsngo ba bla na med pa ste/ 'jam dpal dpa' bos ji ltar mkhyen pa dang / /kun du bzang po de yang de bzhin te/ /de dag gi ni rjes su bdag slob cing / /dge ba 'di dag thams cad yongs su bsngo / / dus gsum gshegs pa rgyal ba thams cad kyis/ /bsngo ba gang la mchog tu bsngags pa des/ /bdag gis dge ba 'di dag thams cad kyang / /bzang po spyod pa mchog phyir bsngo bar bgyi/ /zhes bya ba'o/ /bslab pa kun las btus pa las le'u bcu drug pa'o// // bam po bcu gsum pa / phyag 'tshal ba la sogs pa bshags pa des bsod nams 'phel bar 'gyur bar ci mngon zhe na/ 'phags pa spyan ras gzigs kyi mdo las shes te/ de las 'di skad du/ ngas ni gang dag bstan pa yi/ /mi khom brgyad po de dag spong / /sangs rgyas 'byung ba rab mdzes pa//mnyes par byed 'di dal ba gcig /mdog ldan gzugs ni phun sum tshogs/ /mtshan gyis legs par brgyan pa dang / /mthu dang stobs dang ldan par 'gyur/ /le lo can du de mi 'gyur/ /de ni phyug cing nor cher 'gyur/ / bsod nams ldan zhing brdzi ba med/ /'jig rten sgron ma mnyes byas nas/ /yang dang yang du bsti stang byed/ /tshong dpon khyim ni rgyas pa dang / /phyug po rnams su skye bar 'gyur / /dpa' zhing sbyin pa'i bdag por 'gyur/ /lhug par gtong zhing ser sna med/ /ris bskor rgya mtsho tshun chad kyi //sa kun la ni de brten zhing / /de ni mnga' bdag gling bzhi yi/ /dbang phyug rgyas pa chos ldan 'gyur/ /'khor los sgyur ba rdzu 'phrul che/ /rin chen bdun dang ldan par 'gyur/ /rgyal srid gnas nas sangs rgyas la/ /yang dang yang du bsti stang byed/ /'di nas shi 'phos mtho ris su//song nas sangs rgyas bstan la dang / /lhun po'i steng gi dbang phyug po/ /lha yi dbang po brgya byin 'gyur/ /'jig rten mgon gyi mchod rten la/ /mi gang skor ba byed pa yi/ /bsngags pa bskal pa bye bar yang / /brjod pas zad par bya mi nus/ /su zhig byang chub sems bskyed nas//ston pa'i mchod rten phyag 'tshal ba/ /de ni bskal pa bye bar yang / /nam yang long zhing 'theng mi 'gyur/ /mchod rten bskor ba byas nas ni/ /brtson 'grus brtan zhing mthu brten la/ /brten zhing rnam par gnon brtan dang / /de ni myur du mkhas par 'gyur/ /gang zhig sangs rgyas bye ba khrag khrig brgya stong la//bskal pa bye ba gzhal byas bsti stang byas pa bas/ /gang zhig phyi ma mi bzang bskal pa 'di la ni/ /mchod rten phyag 'tshal de yi bsod nams shin tu che/ /sangs rgyas dam pa sbyin gnas mtshungs pa med gyur pa/ /spyod pa dam pa spyad nas khyad par brnyes gyur pa//mi yi khyu mchog de la 'dir ni mchod byas na/ /rnam par smin pa dam pa mtshungs med rang bzhin 'gyur/ /mi yi nang nas shi 'phos nas/ /sum cu gsum du 'gro bar 'gyur/ /der ni rin chen sna tshogs kyi / /gzhal med khang pa thob par 'gyur/ / chod rten phreng ba 'dir phul na/ /khang bzang dag dang khang brtsegs pa/ /lha yi bu mos bsnyen pa rnams/ /sum cu rtsa gsum spyod par 'gyur/ /yan lag brgyad ldan chus gang zhing / /gser gyi bye ma bdal gyur pa/ /bai DUr+ya dang shel dag gi/ /lha yi rdzing bu thob par 'gyur/ / der ni lha yi dga' spyad nas/ /mkhas pas tshe tshad rdzogs par 'gyur/ /lha yi 'jig rten shi 'phos nas/ /mi nang longs spyod ldan par 'gyur/ /mchod rten phreng ba 'bul byed pa/ /tshe rabs bye ba stong rnams dang / /khrag khrig dag ni brgya bgrangs pa / /kun du bkur sti byas par 'gyur//mchod rten bye ba 'bul byed pa/ /de ni 'khor los sgyur rgyal 'gyur/ /brgya byin lha yi dbang phyug 'gyur/ /tshangs pa'i 'jig rten tshangs par 'gyur/ /'jig rten mgon po skyob pa la/ /dar gyi dbul ba phul byas na/ /lha yi dag dang mi rnams kyi/ /don rnams thams cad 'grub par 'gyur//'jig rten mgon po skyob pa la/ /phreng ba'i khang pa byas nas ni/ /de yi g.yog 'khor mi byed cing / /rgyal po 'byor ba chen por 'gyur/ /'phags pa rnams kyis gang spangs pa/ /sdig pa'i las ni spong bar byed/ /rdzogs sangs rgyas kyis bshad pa yi//dge ba'i las la rten par byed/ /lha'am 'on te klu rnams sam/ /'jig rten dag ni gang mkhas pa/ /de dag dga' zhing mgu ba dang / /bsti stang byas shing bsngags par 'gyur/ /brtan pa de ni gar skyes par/ /bsod nams gzi yis shin tu brjid/ /yul 'khor dag dang grong khyer dang //rigs der bsti stang byas par 'gyur/ /gang gis spos chu yungs 'bru tsam blangs te/ /bcom ldan mchod rten la ni bdug byed pa/ /de yi phan yon brjod kyis sems dang zhing / /rdul dang dri ma spangs la mnyan par gyis/ /de ni bsod nams ldan zhing phyogs kun rgyu//nad med gyur cing blo brtan bag yod ldan/ /spyad pa rnam par spyod tshe mya ngan 'dul/ /skye bo mang po dga' zhing yid du 'ong / /rgyal srid thob nas rgyal ba mchog bkur 'gyur/ /mthu chen rab mkhas 'khor los sgyur 'gyur te/ /gser gyi mdog ldan mtshan gyi go cha can//'jig rten kun na yid 'ong dri ldan thob/ /bcom ldan mchod rten gos kyis dkris byas na/ /de ni btsas ma thag tu gos mchog thob/ /lha yi khyad 'phags dar gos rab bzang rnyed/ /btsas ma thag tu de lus shin tu bde/ /gang zhig gos kyis bcom ldan mchod rten dang //'dren pa mtshungs med rnams la mchod byed pa/ /de 'dir mtshungs pa med pa'i lus 'thob ste/ /sum cu rtsa gnyis mtshan gyi me tog rgyas/ /bcom ldan mchod rten gos kyis dkris byas na/ /lag mthil nas ni mu tig phreng mdzes pa/ /sna tshogs dag dang seng ge'i phreng ba dang //gser skud rab mdzes bskal pa mtha' yas 'byung / /'jig rten sangs rgyas 'gyur zhes mos bskyed de/ /bcom ldan mchod rten ba dan phul byas na/ /de ni skye bo mang po'i mchod 'os 'gyur/ /byang chub spyod mchog dam pa zhi ba spyod/ /rdul bsal sems can mchog la rgyal mtshan phul//ring por mi thogs nor mang rnyed par 'gyur/ /shes rab mtha' yas mdzod ni mang ldan yang / /sems chung mi 'gyur dman pa'i sems mi 'gyur/ /de ni gzhan la gnod pa'i sems mi skyed/ /sems ni rab dang rtag tu bag yod ldan/ / de la me dang dug dang mtshon mi tshugs/ /skye bo tshogs chen gyis ni blta bar 'gyur/ /sangs rgyas mchod rten mar me gcig phul na/ /'di nas bzung ste srid pa'i rtse mo'i bar/ /sangs rgyas zhing ni 'dzam gling gser gyis gang / /de 'dra'i dpal de zad par bya mi nus/ /bcom ldan mchod rten mar me phul byas na//de yi lus ni mdog ngan yong mi 'gyur/ /gzugs mchog sra zhing lag pa gzu ba 'dra/ /snang ba thob nas 'jig rten kun du rgyu/ /gal te khrag khrig brgya stong sangs rgyas zhing / /yungs 'bru dag gis byur bur gang gyur pa/ /bgrang ba dang ni gzhal zhing brjod par nus//bde gshegs mar me gcig phul de lta min/ /rgyan gyis brgyan pa'i gzugs mdzes blta sdug pa/ /su zhig bcom ldan mchod rten 'bul byed pa/ /de 'dir lus ni mtshungs pa med 'gyur te/ /gang gis rgyal ba'i sku ni rab 'bar ba/ /sum cu rtsa gnyis mtshan gyi go bgos 'gyur//khyad par 'phags pa'i gzugs dang gser 'dra dang / /'dzam gling gser ltar rab mdzes blta na sdug /mtshan gyi me tog rgyas pas mngon du gang / /mngon par shes pa 'thob cing dbang cher grags/ /byang chub spyod mchog dam pa zhi ba spyod //de ni nams kyang longs spyod 'grib mi 'gyur/ /lhas kyang bsti stang bya zhing mchod par 'os/ /brtan pa 'dod pa'i longs spyod gzhar mi dga'/ /tshul khrims rnam dag rab mkhas tshangs par spyod/ /yi dam bcas nas nags dang nags 'dab song / /mngon shes 'thob cing khyad par 'thob par 'gyur//bcom ldan mchod rten rnams la gdugs 'bul ba/ /ji lta bur yang byang chub sems mi 'dor/ /byams la gnas shing mi dman sems su 'gyur/ /de yi shes pa rnams kyang nyams pa med/ /rol mo sgra yis mi mchog mchod byas na/ / mya ngan med cing dbang ldan rgyal por 'gyur / /mi yi 'jig rten yid 'ong sgra ldan 'gyur/ /de sgra yan lag tshang zhing dag par 'ong / /bcom ldan mchod rten rol mo'i sgra byas na/ /shes bzhin ldan zhing mig ni rnam dag 'gyur/ /rna ba rnam par dag cing sems kyang dag /sna yi dbang po mchog dang ldan par 'gyur//de yi lce ni rab mdzes blta na sdug /thog mar rab mnyen mdzes shing sgra yid 'ong / /dper na lha yi rin chen byi ru 'dra/ /sgra skad yan lag bye ba dpag med 'byin/ /bcom ldan mchod rten rol mo'i sgra byas na/ /nams kyang sbrul du mi 'gyur lce med min/ / zhar ba sgur po ya yo can mi 'gyur/ /lus ni khyad par 'phags shing shin tu mdzes/ /bcom ldan mchod rten rol mo'i sgra byas na/ /lha'am klu'am mi'am lto 'phye che/ /su yang de la ma dad skyed mi 'gyur/ /dbugs phyin thob nas 'jig rten kun du rgyu/ /bcom ldan mya ngan 'das pa'i mchod rten phyags//bskal pa bye ba khrag khrig brgya stong du/ /yan lag ma smad khyad 'phags lus thob cing / /mdzes la mtshan gyis go char byas par 'gyur/ /bcom ldan mya ngan 'das pa'i mchod rten phyags/ /lha yi tsan+dan khyad 'phags rab mdzes pa'i/ /gzhal med khang mchog yid 'ong dri ldan 'thob//de ni de la nam yang sred mi skyed/ /rgyal ba'i mchod rten spos byug phul byas na/ /bcom ldan 'das kyi bstan pa 'jig 'gyur tshe/ /'dzam bu'i gling du skye bar mi 'gyur zhing / /de ni de tshe mtho ris bdag por 'gyur/ /rgyal ba'i mchod rten spos byug phul byas na//dri mi zhim dang mi gtsang smad pa rnams/ /rtag tu spong zhing tshul khrims phung por gnas/ /de ni rtag tu tshangs spyod mchog 'di spyod/ /rgyal ba'i mchod rten spos byug phul byas na/ /'di nas shi 'phos mtho ris lha dbang 'gyur/ /ring por mi thogs don stong rnams la rtog /lha rnams la ni rgya chen don kyang byed/ /rgyal ba'i mchod rten spos byug phul byas na/ /khyad 'phags tshig ldan sgra dbyangs yid 'ong 'gyur/ /skye bo mang po'i yid 'ong dga' zhing bkur/ /de yi kha bzhin rtag tu gsal bar 'gyur/ /rgyal ba'i mchod rten spos byug phul byas na//de ni ngan song sa rnams ma lus spong / /de bzhin gshegs dang nye ba 'thob par 'gyur/ /dad pa thob cing rtag tu bde ba dga'/ /bcom ldan mchod rten ba rgya bsal byas na/ /de ni mi khom brgyad po kun spong zhing / /de ni dal 'gyur de ni khyad par 'phags/ /de ni sangs rgyas mtshungs med mchod par byed//bcom ldan mchod rten ba rgya bsal byas na/ /bag yod blo gros brtan la dpa' bor 'gyur/ /'dod pa'i yon tan dag la dga' mi bskyed/ /mi dman sems kyis mngon par 'byung bar 'gyur/ /bcom ldan mchod rten ba rgya bsal byas na/ /de ni nams kyang byang chub sems mi 'dor//tshul khrims skyon med shin tu bsdams par 'gyur/ /rnam dag 'dod chags bral ba'i chos kyang 'thob/ /bcom ldan mchod rten ba rgya bsal byas na/ /de ni mdog ngan dus rnams rtag tu spong / /'chal ba'i shes rab ma lus rnam par spong / /shes rab rgya chen gyur nas spyod la gnas//bcom ldan mchod rten ba rgya bsal byas na/ /kha zas gtsang ma dag kyang rnyed 'gyur zhing / /khyad 'phags kha dog ldan zhing blta sdug pa/ /reg dang ldan zhing rab mdzes gos rnams 'thob/ /dad pa'i shugs bskyed bcom ldan mchod rten la/ /me tog skam po nyal nyil phyags byas na//'dod pa smad pa sdug bsngal bye ba spong / /stobs bcu mnga' ba'i ded dpon mnyes par byed/ /mchod rten me tog rnying pa su 'phyag pa/ /de ni mdzes shing rnam dag lus su 'gyur/ /skye bo mang pos mchod 'os blta 'os 'gyur/ /de la rgyal po gnod par sems mi 'gyur//bcom ldan mchod rten dag la snga rabs mis/ /me tog phul ba skam po phyags byas na/ /ngan song sa yi lam ngan thams cad gcod/ /byang chub sems dpa' tshul khrims phung por gnas/ /mchod rten me tog rnying pa su 'phyag pa/ /bag yod mya ngan rnams dang skyon rnams spong //nad rnams du ma ma lus rnam par spong / /bskal pa mtha' yas rnams su dbugs 'byin 'thob/ /mchod rten me tog rnying pa su 'phyag pa/ /sbyin gnas mtshungs med sems rgyas 'thob par 'ong / /mtshungs med thob cing lha mis mchod 'os 'gyur/ / rnam dag lus ldan rgyan gyis brgyan par 'gyur/ /lha yi me tog rab mdzes man+da ra/ /mtshungs med pa ta la yang su 'bul dang / /mchod rten me tog nyal nyil su 'phyag pa/ /de dag rnam smin 'dra ste mchog tu 'gyur/ /'jig rten sangs rgyas 'gyur byar mos bskyed de/ /ston pa'i mchod rten thal sbyar phyag 'tshal ba//'jig rten dag na bla mar bkur sti bya/ /de ni mdzes shing blta na sdug par 'gyur/ /de 'dir rgyal srid thob nas lha klu mi/ /lto 'phye che dang 'jig rten thams cad 'dud/ /stong gi 'jig rten khams kun rgyas par 'gyur/ /dbang phyug nyid du dbang thob rgyal srid bsten//de yi yul la sems can gang gnas pa/ /de kun sangs rgyas ye shes rdzogs par 'god/ /des ni ngan song sa yang rnam par spong / /de dag rnams kyis don mchog dam pa byed/ /bsod nams blo gros dran ldan mchod 'os 'gyur/ /dbugs phyin thob nas 'jig rten kun du rgyu//de yi g.yog 'khor yid 'ong sgra skad ldan/ /bsam pa ji bzhin de dag dga' ba bskyed / /gsal snyan ngag gis sems can go bar byed/ /de srog dbang phyug sus kyang phan mi byed/ /skye bo tshogs chen dag gis blta 'os 'gyur/ /de yi g.yog kyang dbyangs ldan yan lag dag /sangs rgyas mchod rten thal sbyar phyag 'tshal ba/ /sbyin dang snyan par smra dang don spyod dang / /don mthun pa dag skye bo mang la byed/ /spyos shing brgyad kyang khro ba'i dngos mi bskyed / /sangs rgyas mchod rten thal sbyar phyag 'tshal ba/ /mtho ris 'jig rten gnas shing lha dbang 'gyur//mir gyur na yang mi yi rgyal po 'os/ /de ni nam yang yongs su nyams mi 'gyur/ /sangs rgyas mchod rten thal sbyar phyag 'tshal ba/ /de ni nam yang ngan song phyis mi ltung / /'jig rten 'dir de rtag tu 'dod pa spong / /nor can nang na phyug cing nor mang 'gyur//yon tan ldan la tshig gcig su smra ba/ /de ni nam yang mi rigs bsngags mi spyod / /mi yi 'jig rten gnas min spyod mi 'gyur/ /de la sems can mi ngoms dga' bar 'gyur/ /zhes gsungs so/ /snying rje chen po pad ma dkar po'i mdo las kyang / kun dga' bo nga 'dug pa la mngon sum du bsti stong byed pa dang bla mar byed pa nas mchod par byed pa'i bar lta zhog /gang nga yongs su mya ngan las 'das nas ring bsrel yungs 'bru tsam la bsti stong byed pa lta yang zhog /nga'i phyir mchod rten byas pa la gang bsti stong byed pa lta yang zhog ste/kun dga' bo gang dag kha cig sangs rgyas la dmigs nas tha na sangs rgyas la dmigs pa'i sems kyis me tog gcig nam mkha' la 'dor na/ bsod nams kyi phung po de'i rnam par smin pa dge ba'i rtsa ba de dag thams cad kyi 'bras bu mya ngan las 'das pa yin te/ tha ma mya ngan las 'das par nga smra'o//kun dga' bo gang dag kha cig sangs rgyas la dmigs nas tha na sangs rgyas la dmigs pa'i sems kyis me tog gcig nam mkha' la 'dor na/ de'i rnam par smin pa gang yin pa de ni/ kun dga' bo gal te sems can 'ga' zhig bskal pa gcig tu 'khor ba la 'di ji srid par kun du brgyug cing 'khor yang /'khor ba'i sngon gyi mtha' mi shes pa bzhin du bsod nams mngon par 'du bya ba'i dge ba'i rtsa ba mngon par 'du byas pa de'i mtha' de ni brgya byin nyid rnams kyis rnyed par sla ba ma yin no/ /de ci'i phyir zhe na/ kun dga' bo 'di ltar sangs rgyas la phul ba'i yon tan ni 'khor ba na spyod pa'i bde ba thams cad kyi mthas gtugs par sla ba ma yin te/ gzhan du na dge ba'i rtsa ba de'i 'bras bu mya ngan las 'das pa nyid 'bras bu yin pas tha ma mya ngan las 'da' bar nga smra'o/ /kun dga' bo gang dag kha cig mngon du bsti stang byed pa lta yang zhog /gang nga'i sku gdung dang ring bsrel yungs 'bru tsam la sku gdung gi mchod pa byed pa lta yang zhog /gang nga'i phyir mchod rten byas pa rnams la bsti stang byed pa lta yang zhog /gang sangs rgyas la dmigs nas tha na me tog gcig nam mkha' la 'dor ba yang lta yang zhog ste/kun dga' bo gal te sems can mya ngan las 'das pa'i skal pa med pa zhig gis sangs rgyas la dmigs nas tha na me tog gcig nam mkha' la 'dor na yang kun dga' bo dge ba'i rtsa ba de'i 'bras bu de yang mya ngan las 'das pa'i 'bras bu yin te/mya ngan las 'das pas klas pa dang mya ngan las 'das pa'i mthas gtugs par nga smra'o zhes gsungs so/ /klu'i rgyal po rgya mtshos zhus pa chen po las kyang / klu'i bdag po byang chub sems dpa' chos brgyad dang ldan na/ rtag tu rgyun mi 'chad par sangs rgyas dang phrad pa 'thob po//brgyad gang zhe na/ sems can sangs rgyas kyi gzugs la lta ba yang dag par 'dzin du 'jug pa dang / de bzhin gshegs pa la rim gro byed pa dang / rgyun mi 'chad par de bzhin gshegs pa'i bsngags pa brjod pa dang / de bzhin gshegs pa'i sku gzugs byed pa dang /sems can thams cad de bzhin gshegs pa la blta ba yang dag par 'dzin du 'jug pa dang / sangs rgyas kyi zhing gang na de bzhin gshegs pa'i sgra grag pa'i sangs rgyas kyi zhing der smon lam 'debs pa dang / rgyun zhum pa med pa dang / rgyun rgya chen por gyur nas sangs rgyas kyi ye shes tshol ba'o zhes gsungs so//bsod nams 'phel bar 'dod pa la sangs rgyas dang 'phrad pa ci dgos she na/ de'i mtha' ni thams cad mkhyen pa ma yin pas mi shes te/ 'phags pa sdong po bkod pa las ji skad bsngags pa lta bu'o/ / bskal pa bye ba phrag brgyar yang / /sangs rgyas sgra ni rab bkod na/ /the tshom thams cad gcod pa'i mchog /mthong bar 'gyur ba smos ci dgos/ /chos kun rtogs par thugs chud cing / /'jig rten gsum gyi bsod nams stegs/ /sems can thams cad rnam sbyong ba//'jig rten sgron ma mthong ba legs/ /bsod nams che las grub pa'i zhing / /ye shes dkyil 'khor rab shar ba/ /'jig rten dpag med snang bar mdzad/ /bsod nams phung po rnam par 'phel/ /sdug bsngal dra ba gcod mdzad cing / /ye shes phung po sbyong ba yi//rgyal ba gang gis mnyes byas pa/ /de dag ngan 'gro'i 'jigs pa med/ /rkang gnyis dam pa mthong na ni/ /sems rgya chen po skye 'gyur zhing / /shes rab stobs ni 'od gsal ba/ /grangs med pa yang skye bar 'gyur/ /zhes gsungs so/ /yang de nyid las/ sems can kun gyi don gyi phyir/ /brtan zhing thugs rje che ldan la / /chos kyi 'khor lo rab bskor ba/ /de bzhin gshegs pa rnams kyang 'byung / don kun brtson pa'i sangs rgyas la/ /bskal pa bye ba phrag brgyar yang / /lus can dag ni thams cad kyis/ /lan du phan gdags ji ltar nus//ngan song gsum po mi bzad du/ /bskal pa bye bar bsreg bla yi/ /chags pa thams cad rnam bzlog pa/ /ston pa mi mthong de lta min/ /'jig rten ji snyed thams cad kyi / /ngan song 'gro ba so so der/ /shin tu yun ring gnas bla yi/ /sangs rgyas mi thos de lta min//ci yi phyir na ngan song du/ /yun ring gnas par 'dod ce na/ /gang phyir rgyal ba'i dbang po dag /mthong na ye shes 'phel phyir ro/ /'jig rten dbang phyug rgyal mthong na/ /sdug bsngal thams cad rgyun chad 'gyur/ /rdzogs pa'i sangs rgyas spyod yul gyis / /ye shes la yang 'jug par 'gyur//mi mchog sangs rgyas mthong na ni/ /sgrib pa thams cad zad par 'gyur/ /gang gis byang chub thob 'gyur ba'i/ /bsod nams dpag tu med pa 'phel/ /zhes gsungs so/ /bsod nams rab tu 'phel bar bya ba la sangs rgyas dang phrad pa ni de ltar dgos pa yod do//de bzhin gshegs pa rnams kyi sku gzugs tsam mthong ba yang de tsam du 'bras bu dpag tu med na/ rang gi ngo bo mthong ba lta smos kyang ci dgos/ dad pa'i stobs bskyed pa la 'jug pa'i phyag rgya'i mdo las/ 'jam dpal rigs kyi bu'am rigs kyi bu mo gang la la zhig gis /bskal pa gang gA'i klung gi bye ma snyed du 'jig rten gyi khams thams cad kyi rdul snyed kyi rang sangs rgyas dag la nyin gcig bzhin du lha'i zas ro brgya dang ldan pa byin pa dang de bzhin du lha'i gos rnams sbyin pa byin pa bas/ 'jam dpal rigs kyi bu'am rigs kyi bu mo gzhan gang zhig gis sangs rgyas ri mor bris pa'am gzugs su byas pa mthong na/'di ni de bas ches bsod nams grangs med pa bskyed na/ thal mo sbyar ba'am me tog gam bdug pa'am spos sam mar me 'bul ba lta ci smos te/ 'di ni de bas ches bsod nams grangs med pa bskyed do zhes gsungs so//byang chub sems dpa'i sde snod las kyang / bsod nams spel ba'i thabs gsungs te/ gang de bzhin gshegs pa'i mchod rten 'phyag pa de smon lam rnam par dag pa mchog bzhi 'thob ste/ bzhi gang zhe na/ gzugs la smon lam rnam par dag pa mchog dang /mnyam par gzhag pa brtan pa la smon lam rnam par dag pa mchog dang / de bzhin gshegs pa mthong ba la smon lam rnam par dag pa mchog dang / mtshan phun sum tshogs pa la smon lam rnam par dag pa mchog ces bya ba'o/ /yang de nyid las/ de bzhin gshegs pa'i mchod rten rnams la me tog 'bul ba'am spos ris 'dri na ma tshang ba med pa brgyad 'thob ste/brgyad gang zhe na/ gzugs ma tshang ba med par 'gyur ba dang / longs spyod ma tshang ba med pa dang / g.yog 'khor ma tshang ba med pa dang / tshul khrims ma tshang ba med pa dang / ting nge 'dzin ma tshang ba med pa dang / thos pa ma tshang ba med pa dang / shes rab ma tshang ba med pa dang / smon lam ma tshang ba med pa zhes gsungs so/ /rin po che'i phung po'i mdo las kyang / gang dag srid pa gsum du gtogs pa'i sems can de dag thams cad so so nas de bzhin gshegs pa'i mchod rten 'phang du 'di lta ste/ri'i rgyal po ri rab lta bu byed la de dag la yang so so nas gang gA'i klung gi bye ma snyed kyi bskal par bsti stang bya ba thams cad kyis bsti stang byed pa bas byang chub sems dpa' gang thams cad mkhyen pa nyid kyi sems dang ma bral bas me tog gcig 'dor na/de ni bsod nams kyi phung po snga ma bas bsod nams ches mang du bskyed do zhes gsungs so/ /yang de nyid las/ stong gsum gyi stong chen po'i 'jig rten gyi khams na sems can gang dag yod pa de dag thams cad theg pa chen po la yang dag par zhugs par gyur la/thams cad 'khor los sgyur ba'i rgyal srid dang ldan par gyur te/ 'khor los sgyur ba'i rgyal po re res kyang mar me'i snod rgya mtsho chen po tsam byas te/ ri rab tsam gyi mar me'i snying pos mar me bus la/ so so nas de lta bu'i mar me'i mchod pas de bzhin gshegs pa'i mchod rten rnams la mchod pa bas/byang chub sems dpa' khyim gyi gnas nas 'byung ba gang gis mar me'i snying po 'bru mar gyis bskus te de bzhin gshegs pa'i mchod rten gyi drung du 'dzin na/ ras 'bru mar gyis bskus pa'i mar me 'di la snga ma'i mar me phul ba des brgya'i char yang mi phod pa nas rgyu'i bar du yang mi bzod do//'khor los sgyur ba'i rgyal po de dag gis sangs rgyas la sogs pa'i dge slong gi dge 'dun la bde bar sbyar ba thams cad kyis phu dud byed pa bas/ byang chub sems dpa' khyim gyi gnas nas mngon par byung ba gang gis bsod snyoms blangs te/ lhung bzed du chud pa de bzhin dag dang bgo bsha' byas te zan de ni de bas ches mang zhing ches rin che'o/ /gang yang rgyal po chen po dag gis ri rab tsam gyi gos kyi phung po sangs rgyas la sogs pa dge slong gi dge 'dun la phul ba bas/ byang chub sems dpa' khyim gyi gnas nas mngon par byung ba gang gis phyi rol du byung ste/sangs rgyas la sogs pa theg pa chen po la yang dag par zhugs pa'i dge slong gi dge 'dun dang / de bzhin gshegs pa'i mchod rten la chos gos gsum phul na/ dge slong gi chos gos byin pa 'dis gos sbyin pa snga ma de zil gyis non par 'gyur ro//yang rgyal po de dag re res 'dzam bu'i gling thams cad me tog gis mdzes par byas te/ de bzhin gshegs pa'i mchod rten la phul ba bas/ byang chub sems dpa' khyim gyi gnas nas byung ba gang gis tha na de bzhin gshegs pa'i mchod rten la me tog gcig phul na sbyin pa 'di la sbyin pa snga ma bas des brgya'i char yang mi phod pa nas rgyu'i bar du yang mi phod do zhes gsungs so//mthar gyis yang dag par 'phags pa'i le'u las kyang bstan te/ phan yon bzang po bzhi po 'di dag mthong nas byang chub sems dpa' de bzhin gshegs pa mchod pa la spro bar 'gyur te/bzhi gang zhe na/ bdag gis sbyin gnas kyi mchog la mchod pa byas par 'gyur ba dang / bdag mthong nas gzhan dag kyang de bzhin du slob par 'gyur ba dang / de bzhin gshegs pa la mchod pas byang chub kyi sems brtan par 'gyur ba dang / mngon sum du mthong bas skyes bu chen po'i mtshan sum cu rtsa gnyis kyi dge ba'i rtsa ba sogs par 'gyur ba ste/bzhi po 'di dag go zhes so/ /'di ni de bzhin gshegs pa la mchod pa dang rim gro byed pa bla na med pa ste/ blo gros rgya mtshos zhus pa'i mdo las ji skad du/ blo gros rgya mtsho gsum po 'di dag ni de bzhin gshegs pa la mchod pa dang rim gro byed pa bla na med pa'o//gsum gang zhe na/ gang byang chub tu sems bskyed pa dang / gang dam pa'i chos yongs su 'dzin pa dang / gang sems can rnams la snying rje chen po bskyed pa'o zhes gsungs pa lta bu'o/ /'phags pa dkon mchog sprin las kyang bstan te/rigs kyi bu byang chub sems dpa' chos bcu dang ldan na mngal gyi dri mas mi gos par skye'o/ /bcu gang zhe na/ 'di lta ste/ de bzhin gshegs pa'i gzugs byed pa dang / mchod rten zhig pa 'chos pa dang / de bzhin gshegs pa'i mchod rten dag la spos kyi byug pa 'bul ba dang /de bzhin gshegs pa'i sku gzugs dag la khrus kyi spos chu 'bul ba dang / de bzhin gshegs pa'i mchod rten dag la phyag dar dang skyang nul bya ba 'bul ba dang / pha ma la lus kyi rim gro byed pa dang / mkhan po dang slob dpon dag la lus kyi rim gro byed pa dang / tshangs pa mtshungs par spyod pa rnams la lus kyi rim gro byed pa dang / de yang zang zing med pa'i sems kyis te zang zing dang bcas pas ma yin pa dang / dge ba'i rtsa ba de yang 'di ltar/ dge ba'i rtsa ba 'dis sems can thams cad mngal gyi dri mas ma gos par skye bar gyur cig ces yongs su bsngo zhing de yang bsam pa thag pa nas sems pa ste/rigs kyi bu chos bcu po de dag go zhes bya ba'o / /rjes su yi rang ba'i phan yon ni shes rab kyi pha rol tu phyin pa las gsungs te/ gang theg pa la dang po yang dag par zhugs pa'i byang chub sems dpa' sems dpa' chen po rnams kyi sems bskyed pa de la rjes su yi rang bar bgyid/byang chub sems dpa'i spyad pa spyod pa rnams kyi sems bskyed pa de la rjes su yi rang bar bgyid/ byang chub sems dpa' sems dpa' chen po phyir mi ldog pa rnams kyi phyir mi ldog pa'i chos de nyid la rjes su yi rang bar bgyis na/bcom ldan 'das rigs kyi bu'am rigs kyi bu mo de'i bsod nams kyi phung po ji snyed cig bskyed par 'gyur/ de skad ces gsol pa dang / bcom ldan 'das kyis lha'i dbang po brgya byin la 'di skad ces bka' stsal to/ /kau shi ka stong gsum gyi stong chen po'i 'jig rten gyi khams ni srang tshad kyis gzhal bas tshad gzung bar nus kyi/kau shi ka byang chub sems dpa' sems dpa' chen po'i rjes su yi rang ba'i mdo las skyes pa'i sems bskyed pa de dag gi bsod nams ni tshad gzung bar mi nus so/ /de skad ces bka' stsal pa dang / bcom ldan 'das la lha'i dbang po brgya byin gyis 'di skad ces gsol to//bcom ldan 'das sems can gang dag byang chub sems dpa' sems dpa' chen po sems dang po bskyed pa nas nye bar bzung ste/ bla na med pa yang dag par rdzogs pa'i byang chub mngon par rdzogs par sangs rgyas pa'i bar la rjes su yi rang ba las skyes pa'i bsod nams 'di ltar dpag tu med do zhes bya ba mi nyan pa dang ma 'tshal ba dang rjes su yi rang bar mi bgyid pa dang mi sems pa de dag ni bdud kyis byin gyis brlabs pa lags so//sems can de dag ni bdud kyi phyogs su 'gyur ba lags so/ / bcom ldan 'das kyis bka' stsal pa/ kau shi ka byang chub sems dpa'i theg pa pa'am rang sangs rgyas kyi theg pa pa'am nyan thos kyi theg pa pa'i rigs kyi bu'am rigs kyi bu mo gang dag gis sems bskyed pa la rjes su yi rang ba de dag gis myur du de bzhin gshegs pa dgra bcom pa yang dag par rdzogs pa'i sangs rgyas rnams mnyes par byed par 'gyur gyi mi mnyes par byed par mi 'gyur ro//de ltar rjes su yi rang ba'i mdo las skyes pa'i sems bskyed pa'i dge ba'i rtsa ba de dag gis gang dang gang du skye ba de dang der phu dud du bya bar 'gyur bla mar bya bar 'gyur ri mor bya bar 'gyur mchod par bya bar 'gyur rjed par 'gyur gsol bar 'gyur ro//de dag ni yid du mi 'ong ba'i gzugs rnams mthong bar mi 'gyur ro / /de dag ni yid du mi 'ong ba'i sgra rnams thos par mi 'gyur ro/ /de bzhin du dri dang ro rnams ma yin zhing reg bya rnams reg par mi 'gyur ro/ /de dag ni ngan song du skye bar mi 'gyur bar shes par bya'o//de dag ni mtho ris su skye bar shes par bya'o/ /de ci'i phyir zhe na/ 'di ltar sems can de dag gis sems can grangs med pa'i dge ba'i rtsa ba sems can de dag thams cad la bde ba skyed pa dag la rjes su yi rang ba'i phyir te/ de dag bla na med pa yang dag par rdzogs pa'i byang chub mngon par rdzogs par sangs rgyas nas sems can grangs med pa dpag tu med pa dag yongs su mya ngan las 'da' ba'i bar du byed par 'gyur ro zhes bya ba'o//yang de nyid las/ rab 'byor stong gsum gyi stong chen po'i 'jig rten gyi khams gang gA'i klung gi bye ma snyed na sems can gang dag yod pa de dag thams cad bla na med pa yang dag par rdzogs pa'i byang chub la gnas par gyur la/bla na med pa yang dag par rdzogs pa'i byang chub la gnas nas kyang bskal pa gang gA'i klung gi bye ma snyed du dmigs pa'i 'du shes kyis/bsam gtan bzhi pa la snyoms par 'jug pa bas/ byang chub sems dpa' sems dpa' chen po shes rab kyi pha rol tu phyin pa 'di dang thabs mkhas pas zin pa gang gis/ 'das pa dang ma byon pa dang / da ltar byung ba'i sangs rgyas bcom ldan 'das rnams kyi tshul khrims dang ting nge 'dzin dang /shes rab dang rnam par grol ba dang / rnam par grol ba'i ye shes mthong ba'i phung po dang / rang sangs rgyas kyi tshul khrims dang ting nge 'dzin dang / shes rab dang / rnam par grol ba dang / rnam par grol ba'i ye shes mthong ba'i phung po dang /nyan thos kyi tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba'i phung po thams cad gcig tu bsdus te/ bzlums shing gzhal la/ ma lus pa la rjes su yi rang ba'i mchog gis rjes su yi rang ba dang / gtso bo dang dam pa dang rab dang phul dang gya nom pa dang bla ma dang bla na med pa dang bla ma'i bla ma dang mnyam pa med pa dang /mi mnyam pa dang mnyam pa dang dpe zla med pas rjes su yi rang la rjes su yi rang ba'i mod las skyes pa'i bsod nams bya ba'i dngos po yang bla na med pa yang dag par rdzogs pa'i byang chub tu yongs su bsngo na/rab 'byor rjes su yi rang ba'i mod las skyes pa'i bsod nams bya ba'i dngos po 'di la/ byang chub sems dpa' dmigs pa can gyi bsam gtan bzhi'i bsod nams mngon par 'du byed pa snga ma des brgya'i char yang nye bar mi 'gro ba nas rgyu'i bar du yang mi bzod do zhes gsungs so//tshul 'di nyid ni yongs su bsngo ba la yang gsungs so/ /gsol ba gdab pa'i phan yon ni drag shul can gyis zhus pa las/ chos yongs su gzung bar bya ba'i phyir sangs rgyas kyi zhing gzhal du med grangs med pa rnams su tshe yongs su bsgyur ro zhes gsungs so/ /bslab pa kun las btus pa las phyag 'tshal ba la sogs pa'i phan yon gyi le'u ste bcu bdun pa'o// bzang po spyod pa la sogs pa'i tshul khrims kyis bsod nams 'phel bar bshad zin to// // 'di yang 'di'i rgyu gzhan yin te/ dad pa la sogs pa rtag tu bsgom pa gang yin pa'o//de bzhin gshegs pa'i gsang ba'i mdo las ji skad gsungs pa lta bu ste/ rgyal po chen po chos bzhi po 'di dag ni theg pa chen po la yang dag par zhugs pa rnams yongs su mi nyams shing khyad par du 'gro bar 'gyur ba'o / /bzhi gang zhe na/ rgyal po chen po dad pa ni yongs su mi nyams shing khyad par du 'gro bar 'gyur ba'o //dad pa gang zhe na/ dad pa gang gis 'phags pa'i drung du nye bar 'gro ba dang mi bya ba mi byed pa'o/ /rgyal po chen po gus pa ni khyad par du 'gro bar 'gyur ba ste/ gus pa gang gis 'phags pa rnams kyis legs par bshad pa rnams gus par nyan pa dang rna blags te chos nyan pa'o//rgyal po chen po nga rgyal med pa ni khyad par du 'gro bar 'gyur ba ste/ nga rgyal med pa gang gis 'phags pa rnams la mngon par 'dud pa dang rab tu 'dud pa la phyag 'tshal ba'o/ /rgyal po chen po brtson 'grus ni khyad par du 'gro bar 'gyur ba ste/brtson 'grus gang gis lus yang ba dang sems yang ba 'thob pa dang bya ba thams cad kyang nyams 'og tu chud par byed pa ste/ rgyal po chen po chos bzhi po 'di dag ni theg pa chen po la yang dag par zhugs pa rnams yongs su mi nyams shing khyad par du 'gro bar 'gyur ba'o zhes bya ba ste/dad pa la sogs pa 'di dag la rtag tu goms par bya'o/ /yang na dad pa la sogs pa gzhan dag la ste/ 'phags pa blo gros mi zad pa'i mdo las ji skad du/ btsun pa sha ra dwa ti'i bu gzhan yang byang chub sems dpa' rnams kyi dbang po lnga rnams mi zad pa ste/de la dbang po lnga gang zhe na/ gang 'di dad pa'i dbang po dang / btson 'grus kyi dbang po dang / dran pa'i dbang po dang / ting nge 'dzin gyi dbang po dang / shes rab kyi dbang po'o/ /de la dad pa'i dbang po gang zhe na/ dad pa gang gis chos bzhi la dad pa ste/ bzhi gang zhe na/ 'di lta ste/'khor ba na spyod pa'i 'jig rten pa'i yang dag pa'i lta ba la dad pa ste/ de las kyi rnam par smin pa la ston pa yin/ dge ba'am sdig pa'i las gang dang gang byas pa de dang de'i rnam par smin pa myong bar 'gyur ro snyam ste srog gi phyir yang sdig pa'i las mi byed pa dang / byang chub sems dpa'i spyod pa la dad pa ste/spyod pa de la zhugs nas kyang theg pa gzhan la 'dod pa mi bskyed pa dang / chos thams cad la don dam pa nges pa'i don zab mo/ rten cing 'brel bar 'byung ba bdag med pa sems can med pa srog med pa gso ba med pa gang zag med par rnam par dpyod pa dang /stong pa nyid dang mtshan ma med pa dang smon pa med pa'i mtshan nyid du dad pa ste/ lta bar gyur pa thams cad bag la nyal bar mi byed pa dang / stobs dang mi 'jigs pa la sogs pa sangs rgyas kyi chos thams cad la dad pa ste/ dad pa'i phyir the tshom dang nem nur dang bral bas sangs rgyas kyi chos de dag yang dag par sgrub pa ste 'di ni dad pa'i dbang po zhes bya'o//de la brtson 'grus kyi dbang po gang zhe na/ chos gang la dad pa'i dbang pos dad par 'gyur ba'i chos de dag brtson 'grus kyi dbang pos yang dag par sgrub pa ste/ 'di ni brtson 'grus kyi dbang po zhes bya'o//de la dran pa'i dbang po gang zhe na/ chos gang brtson 'grus kyi dbang pos yang dag par bsgrub pa'i chos de dag dran pa'i dbang pos chud mi gson te/ 'di ni dran pa'i dbang po zhes bya'o/ /de la ting nge 'dzin gyi dbang po gang zhe na/ dran pa'i dbang pos chos gang chud mi gson pa'i chos de dag ting nge 'dzin gyi dbang pos rtse gcig tu byed de/'di ni ting nge 'dzin gyi dbang po zhes bya'o/ /de la shes rab kyi dbang po gang zhe na/ chos gang ting nge 'dzin gyi dbang pos rtse gcig tu byas pa'i chos de dag shes rab kyi dbang pos rab tu rtog cing shin tu rtog par byed de/gang chos de dang de dag la gzhan gyi dring mi 'jog par shes shing so sor rang gis shes pa 'di ni shes rab kyi dbang po zhes bya'o/ /de ltar na dbang po lnga po 'di dag ni lhan cig tu 'grogs shing rjes su 'brel ba ste/ sangs rgyas kyi chos thams cad yongs su rdzogs par byed do//lung bstan pa'i sar yang gzhog go zhes gsungs pa bzhin no/ /dad pa la sogs pa'i stobs rnams la yang rtag tu goms par bya ste/ 'phags pa gtsug na rin po che'i mdo las ji skad du/ rigs kyi bu de la byang chub sems dpa'i stobs kyi spyod pa yongs su dag pa gang zhe na/gang dbang po de dag gis nye bar bstan nas bdud thams cad kyis mi brdzi bar 'gyur ba dang / nyan thos dang rang sangs rgyas kyi theg pa gnyis kyis mi 'phrogs par 'gyur ba dang / theg pa chen po 'di las phyir mi ldog par 'gyur ba dang / nyon mongs pa thams cad kyis mi thul bar 'gyur ba dang /sngon gyi dam bcas pa la brtan par 'gyur ba dang / sems kyi stobs shin tu brtan par 'gyur ba dang / lus kyi stobs dang ldan par 'gyur ba dang / dbang po rnams sbed par 'gyur ba dang / dgra rnams kyis mi tshugs par 'gyur ba dang / phyir rgol ba thams cad kyis mi bskyod par 'gyur ba'o zhes bya ba la sogs pa gsungs pa bzhin no//de ltar/ /re zhig bsod nams spel ba'i phyir/ /dad pa la sogs rtag tu bsgom / /gzhan yang byams dang zhes bya ba ni/ zla ba'i sgron ma'i mdo las ji skad du/ /bye ba khrag khrig dkrigs pa'i zhing dag na//mchod pa rnam mang dpag med ji snyed pa/ /skyes mchog rnams la de yis rtag mchod pas/ /byams pa'i sems kyi grangs dang char mi phod/ /ces gsungs pa lta bu'o/ /gzhan yang sangs rgyas stsogs dran bya/ /sangs rgyas la sogs pa rjes su dran pa de yang gang zhe na/'phags pa yul 'khor skyong gis zhus pa'i mdo las bsngags pa ste/ mtshan mchog ldan pa dri med zla ba'i zhal/ /gser mdog 'dra ba khyod la phyag 'tshal lo/ /rdul bral khyod 'dra srid pa gsum ma mchis/ /mnyam med mkhyen can khyod la phyag 'tshal lo/ / rgyal ba'i dbu skra 'jam mdzes snum zhing bzang / /khyod kyi gtsug tor 'di na ri rgyal bzhin/ /gtsug tor mi mthong khyod dang mtshungs ma mchis/ /thub pa khyod kyi smin mtshams mdzod spus mdzes/ /kun da zla ba kha ba dung ltar dkar/ /thugs rje gang gis 'gro ba 'di gzigs pa//spyan mchog bzang po ut+pal sngon po 'dra/ /rgyal ba dri med spyan la phyag 'tshal lo/ /ljags yangs srab la zangs kyi mdog 'dra ba/ /de yis rang gi zhal gyi gdong yang khebs/ /chos gsungs pas ni 'gro ba 'dul bar bgyi/ /'jam [(]sdum [,]snum [)]gsung ldan khyod la phyag 'tshal lo//tshems bzangs shin tu brtan pa rdo rje 'dra/ /bcu dang sum cu snyoms shing thags bzang ba/ /'dzum pa mdzad nas 'gro ba 'dul bar bgyid/ /bden gtam snyan pa khyod la phyag 'tshal lo/ /rgyal ba khyod kyi gzugs dang mtshungs ma mchis/ /'od kyis zhing brgya dag kyang snang bar bgyid//'jig rten na ni tshangs dbang skyong de dag /bcom ldan khyod kyi 'od kyis zil du brlag /e na'i byin pa mnyam med bcom ldan 'das/ /glang po'i rgyal po rma bya seng ge'i stabs/ /bcom ldan gnya' shing gang du gzigs shing gshegs//sa dang ri dang ngam pa g.yo bar mdzad/ /bcom ldan 'das sku mtshan gyis brgyan pa ste/ /khyod kyi pags pa 'jam zhing gser mdog 'dra/ /'gro ba gzugs 'di lta bas ngoms mi 'gyur/ /khyod ni mtshungs pa ma mchis gzugs dang ldan/ /khyod sngon bskal pa brgyar ni dka' thub spyad//khyod gtong dul dang sbyin pa kun la dgyes/ /sems can kun la thugs rje byams thugs ldan/ /mchog tu thugs rje can la phyag 'tshal lo/ /khyod ni sbyin dang tshul khrims rtag tu dgyes/ /khyod ni bzod dang brtson 'grus dges rab brtan/ /khyod ni bsam gtan shes rab 'od gzigs mnga'//mtshungs med ye shes mnga' la phyag 'tshal lo/ /khyod ni smra ba ngan pa'i tshogs can 'joms/ /khyod ni seng ge lta bur 'khor du sgrogs/ /khyod ni sman pa'i rgyal po dri gsum sel/ /mchog tu dga' mdzad khyod la phyag 'tshal lo/ /thub pa sku gsung thugs ni rnam par dag /pad ma chu ltar srid pa gsum mi gos/ /khyod ni tshangs dbyangs ka la ping ka'i skad/ /srid gsum pha rol gshegs la phyag 'tshal lo/ /khyod kyis 'gro 'di sgyu ma lta bu dang / /gar la lta dang rmi lam 'dra ba dang / /bdag med sems can med cing srog 'gro med//chos rnams smig rgyu chu zla 'dra bar mkhyen/ /stong pa zhi ba skye ba med pa'i tshul/ /ma shes pas na 'gro ba 'khyams 'gyur te/ /thugs rje thabs tshul rig pa brgya dag gis / /de dag rnams ni 'dzud par mdzad pa lags/ /'dod chags la sogs nad mang brgya dag gis/ /skrag par 'gyur ba'i 'gro la rtag gzigs te//bde gshegs sems can brgya dag yongs 'grel cing / /zla med dman pa lta bu rnam par rgyu/ /skye dang rga dang 'chi dang mya ngan non/ /sdug dang bral dang smre sngags 'don pa brgyas/ /rtag tu na ba'i 'gro ba gzigs nas ni/ /thub pa thugs rjes yongs su 'grel zhing rgyu//dud 'gro yi dags dmyal ba'i 'gro rnams su/ /'gro kun shing rta'i 'phang lo bzhin du 'khor/ /glen pa dmigs bu ma mchis mgon ma mchis/ /de la lam gyi dam pa ston mdzad pa/ gtso bo mtshungs pa med pas gang bstan la/ /'phags lam de nyid gang dag sngon chad kyi//chos kyi dbang phyug 'gro ba'i don mdzad pa/ /rgyal ba de dag rnams kyis rab tu gsungs/ /'jam zhing mnyen la yid du 'ong ba'i mchog /tshangs las lhag par mchog tu dga' bgyid pa/ /dri za mi ci lha yi bu mo mchog /sgra de zil gyis mnan nas gsung pa mdzad //bden dang drang ba mi zad thabs tshul gyis/ /yongs sbyangs yon tan mtha' yas ldan pa'i gsung / /de thos sems can khrag khrig phrag brgya dag /theg pa gsum gyis zhi bar mchi bar bgyid/ /khyod la mchod pas lha yi bde ba ni/ /rnam pa mang dang de bzhin mi yis 'thob//mi yi bdag po 'gro la phan bgyid pa/ /phyug cing nor che 'byor ba chen por 'gyur/ /mtshungs med khyod la dad pa bskyed pa ni/ /gling bzhi bdag po 'khor los sgyur ba mchog /'gro la dge ba bcu po kun 'byed pa/ /rin chen rab bzangs bdun ldan thob par 'gyur//rgyal ba khyod la mchod pa bgyis pas ni/ /tshangs pa brgya byin 'jig rten bdag po dang / /yongs su dga' ldan lha yi bdag po dang / /gzhan 'phrul ba dang 'thab bral rab dgar 'gyur/ /'gro ba'i sdug bsngal rnam mang sel mdzad pa/ /mnyam med khyod la mchod dang mthong ba dang //thos pa'ang de ltar 'bras bu mchis lags te/ /gnas mchog rga shi med pa 'thob par 'gyur/ /bcom ldan lam la mkhas shing lam mkhyen pa/ /'jig rten 'di ni ngan pa'i lam las zlog /bcom ldan 'gro ba dag ni 'phags pa'i lam/ / bde ba zhi ba rdul dang bral la 'god/ /bsod nams gter khyod bsod nams don gnyer ba'i/ /bsod nams bgyi ba rtag tu mi bas te/ /byang chub dam pa ma thob bar du ni/ /bskal pa bye ba mang por bas mi 'gyur/ /gzhan 'phrul 'dra ba rtag tu dga' bgyid pa/ /yongs su dag cing mdzes pa thob par 'gyur//dam pa'i zhing du lus dang ngag yid kyis/ /sems can dag ni rnam par dag par 'gyur/ /rgyal ba mchod pa'i mi yis 'di la sogs/ /yon tan rnam pa du ma thob par 'gyur/ /mtho ris thar pa mi yi bde ba dang / / 'gro ba kun gyi bsod nams gter thob 'gyur/ /khyod kyi brjod dang grags pa rgya chen po/ /phyogs rnams kun gyi zhing mang brgyar yang mchis/ /rgyal ba khyod kyi bsngags pa'i phreng ba ni/ /bde bar gshegs rnams 'khor du rtag par sgrogs/ /rims nad bral zhing 'gro ba thar mdzad pa/ / mthong na dga' ba thugs rje mchog ldan pa/ /bcom ldan dbang po zhi ba zhi dges pa/ /mi mchog dam pa khyod la phyag 'tshal lo/ /bdag gis rgyal ba khyod kyi gsung thos nas/ /mngon par shes pa lnga thob mkha' la gnas/ /dpa' bo bde gshegs mtshungs par bdag gyur te/ / dri med chos ni 'gro la rnam par dbye/ /lha dang mi dang klus mchod bde bar gshegs/ /yon tan kun gyi mthar phyin deng bstod pas/ /bsod nams rgya chen gang bsgrubs gyur pa 'dis/ /'gro ba sangs rgyas go 'phang thob par shog/ /ces bya'o/ /yang na chos yang dag par sdud pa'i mdo las gsungs pa ste/gzhan yang sangs rgyas bcom ldan 'das rnams ni bsod nams dang ye shes kyi tshogs chen po mnga' ba/ byams pa chen po dang snying rje chen po'i spyod yul can/ /sems can gyi phung po chen po'i skyabs su gyur pa/ mgon du gyur pa/ sman pa chen po zug rngu 'byin pa/sems can thams cad la sems snyoms pa/ rtag tu ting nge 'dzin gyi spyod yul pa/ 'khor ba dang mya ngan las 'das pa las rnam par grol ba nas/ sems can thams cad kyi pha ma lta bur gyur pa dgra zin la sems snyoms pa'i bar du'o/ /de bzhin du sbyar te/ 'jig rten thams cad zil gyis gnon pa/'jig rten thams cad kyi snang bar gyur pa/ rnal 'byor chen po la rnal 'byor pa/ bsam gtan chen po'i spyod yul ba/ rnam par grol ba phun sum tshogs pa/ bdag nyid chen po / /skye bo chen po'i zham 'bring ba dang ldan pa/ skye bo khyad par can gyi zham 'bring ba dang ldan pa/lta ba dang nyan pa dang brten pa dang bsnyen bkur byed pa mi zlogs pa/ bdag bde ba la mi lta ba/ gzhan gyi sdug bsngal zhi bar byed pa la dgyes pa/ chos la gzhol ba/ chos kyi nor can/ chos kyi zas can/ chos kyi sman can/ chos kyi gter chen /chos kyi dbang phyug /chos kyi bdag po/ chos kyi sbyin bdag /rtag tu gtong ba la mngon par dgyes pa/ rtag tu bag yod pa/ rtag tu dben pa la mngon par dgyes pa/ thams cad du stegs dang zam par gyur pa/ rgyal po'i lam chen po dang 'dra ba/ nyi ma chen po dang 'dra ba/tshangs pa chen po dang 'dra ba/ ye shes chen po'i rdo rje 'chang ba/ chos chen pos dbugs 'byin pa/ gzugs lta bas mi ngoms pa mthong bas mi ngoms pa ste/ sangs rgyas bcom ldan 'das de dag de ltar rjes su dran no/ /de dag de ltar rjes su dran pas de dag gi yon tan yongs su sgrub pa'i phyir sbyor ro//dran pa nye bar 'jog go/ /brtson 'grus rtsom mo/ /de'i phyir sangs rgyas rjes su dran pa zhes bya ste/ 'di ni byang chub sems dpa'i sangs rgyas rjes su dran pa dran pa nye bar gzhag pa zhes bya'o/ /'di nyid las chos rjes su dran pa gsungs pa/'di la byang chub sems dpa' 'di snyam du sems te/ gang sangs rgyas bcom ldan 'das de dag ni yon tan mtha' yas mu med pa ste/ de dag ni chos las skyes pa/ chos kyi bgo skal la spyod pa/ chos kyis sprul pa/ chos bdag por gyur pa/ chos las byung ba/ chos kyi spyod yul/chos la brten pa/ chos kyis grub pa ste/ gang sangs rgyas bcom ldan 'das rnams kyi mtshan dang dpe byad bzang po de dag kyang / chos las skyes pa/ chos las rnyed pa chos kyis grub pa'o/ /gang de bzhin gshegs pa rnams kyi/ de bzhin gshegs pa'i stobs bcu dang mi 'jigs pa bzhi po de dag kyang chos las skyes pa chos las rnyed pa chos kyis grub pa'o//gang de bzhin gshegs pa rnams kyi sangs rgyas kyi chos ma 'dres pa bco brgyad po de dag kyang chos las skyes pa chos las rnyed pa chos kyis grub pa'o/ /gang 'jig rten pa dang 'jig rten las 'das pa'i bde ba'i yo byad de dag kyang chos las skyes pa chos las rnyed pa chos kyis grub pa'o//de bas na bdag sangs rgyas kyi byang chub tshol bas chos gtso bor bya'o/ /chos spyod yul ba dang / chos la brten pa dang / chos la gzhol ba dang / chos snying por byed pa dang / chos rjes su mthun pa'i chos bsgrub par bya'o snyam pa 'di ni byang chub sems dpa'i chos rjes su dran pa dran pa nye bar gzhag pa zhes bya'o/ /gzhan yang byang chub sems dpa' 'di snyam du sems te/ chos ni sems can thams cad la mnyam par 'jug pas chos ni tha ma dang 'bring dang rab mthong nas 'jug pa ma yin te/de ltar bdag gis kyang chos dang 'dra ba'i sems su bya'o/ /chos ni phyogs su ma lhung bas chos ni ngor lta zhing 'jug pa ma yin te/ de ltar bdag gis kyang chos dang 'dra ba'i sems su bya'o/ /chos ni dus chad pa med pa/'di mthong ba la don yod pa rang gi rig pas chos ni dus la lta zhing 'jug pa ma yin te/ de ltar bdag gis kyang chos dang 'dra ba'i sems su bya'o/ /chos ni mthon dman med pas chos ni rgya che ba la 'jug pa ma yin dman pa la 'jug pa ma yin te/ /de ltar bdag gis kyang chos dang mthun pa'i sems su bya'o//chos ni mchog dang tha ma dang bral bas chos ni rnam par dag pa la yang 'jug pa ma yin nyams pa la 'jug pa yang ma yin te/ de ltar bdag gis kyang chos dang 'dra ba'i sems su bya'o/ /chos ni zhing dang zhing ma yin pa'i lta ba dang bral bas chos ni 'phags pa la 'jug pa yang ma yin so so'i skye bo la 'jug pa yang ma yin te/de ltar bdag gis kyang chos dang 'dra ba'i sems su bya'o/ /chos ni rtag tu rgyun mi 'chad par 'jug pas chos ni nyin mo 'jug pa ma yin mtshan mo 'jug pa ma yin/ mtshan mo 'jug la nyin mo mi 'jug pa ma yin te/de ltar bdag gis kyang chos dang 'dra ba'i sems su bya'o/ /chos ni gang la yang nam yang sdod pa ma yin pas chos ni 'dul ba'i dus las kyang mi 'da' ste/ de ltar bdag gis kyang chos dang 'dra ba'i sems su bya'o/ /chos ni thams cad du 'dod pa med pas chos ni sdang ba rnams la zhe 'gras pa yang med dad pa rnams la rjes su chags pa yang med de/de ltar bdag gis kyang chos dang 'dra ba'i sems su bya'o/ /chos ni bri ba yang ma yin gang ba yang ma yin te dpag tu med grangs med pas nam mkha' ltar 'bri ba yang ma yin 'phel ba yang ma yin te/de ltar bdag gis kyang chos dang 'dra ba'i sems su bya'o/ /chos ni sems can rnams kyis srung ba ma yin gyi chos kyis sems can rnams srung ba ste/ de ltar bdag gis kyang chos dang 'dra ba'i sems su bya'o/ /chos ni skyabs yongs su tshol ba ma yin pas chos ni 'jig rten thams cad kyi skyabs yin te/de ltar bdag gis kyang chos dang 'dra ba'i sems su bya'o/ /chos ni thogs pa med pa'i mtshan nyid pas chos ni gang la yang thogs pa med de/ de ltar bdag gis kyang chos dang 'dra ba'i sems su bya'o/ / chos ni bag la nyal med pas bag la nyal mi 'jug ste/ de ltar bdag gis kyang chos dang 'dra ba'i sems su bya'o/ /chos ni rtag tu rnam par mi rtog pas chos ni 'khor bas 'jigs skrag pa yang ma yin mya ngan las 'das pa la rjes su chags pa yang ma yin te/ de ltar bdag gis kyang chos dang 'dra ba'i sems su bya'o snyam mo//de ltar na byang chub sems dpa' chos ltar dran pa nye bar 'jog pas de'i phyir chos rjes su dran pa zhes bya ste/ rigs kyi bu 'di ni byang chub sems dpa' chos rjes su dran pa dran pa nye bar gzhag pa zhes bya'o zhes so/ / yang de nyid las gsungs pa/ dge 'dun ni chos smra ba/ chos spyod pa/ chos sems pa/ chos kyi zhing / chos 'dzin pa/ chos la ston pa/ chos la mchod pa/ chos kyi bya ba byed pa/ chos kyi spyod yul ba/ chos spyod pa phun sum tshogs pa/ rang bzhin gyis drang ba/rang bzhin gyis dag pa/ snying rje'i chos can/ snying rje dang ldan pa/ rtag tu dben pa'i spyod yul ba/ rtag tu chos la gzhol ba/ rtag tu dkar po spyod pa'o snyam mo zhes bya ba la sogs pa'o/ /de la byang chub sems dpa'i dge 'dun rjes su dran pa ni 'di lta bu yin te/ dge 'dun gyi yon tan yang dag pa gang yin pa de dag bdag gis / bdag dang sems can thams cad la bsgrub par bya'o snyam pa ste/ 'phags pa dri ma med par grags pas bstan pa las/ byang chub sems dpa'i yon tan ji skad du 'byung ba de lta bur dge 'dun rjes su dran pa bsgom par bya'o//sems can kun gyi gzugs dang ni/ /skad dang dbyangs su gang brjod pa/ /byang chub sems dpa' mkhas rnams kyis/ /skad cig gcig la ston par byed/ /sgyu ma'i chos kyis rnam rtsen pa/ /de dag sems can smin bya'i phyir//rga ba dang ni na bar 'gyur/ /bdag nyid shi bar rab tu ston/ /sa rnams kun du tshig par ni/ /bskal pas bsreg par kun ston te/ /sems can rtag par 'du shes pa/ /mi rtag par ni rab bstan to/ /sems can bye ba stong rnams kyang / /yul gcig tu ni mgron du gnyer//thams cad khyim du zan byin te/ /thams cad byang chub phyir bsngo'o/ /sngags dang rig pa ci yod dang / /bzo gnas rnam pa mang po dag /thams cad kyi yang pha rol phyin/ /sems can thams cad bde thob byed/ /'jig rten ya mtshan ji snyed pa/ /de dag kun du rab byung nas//lta ba tha dad gyur pa yi/ /sems can rnams ni yongs su 'grol / /zla ba'am nyi mar de gyur te / /brgya byin tshangs pa skye dgu'i bdag /chu dang me yang rab 'gyur te/ /sa dang rlung du'ang de bzhin no/ /nad kyi bskal pa bar ma la/ /de ni rtsi mchog dam par 'gyur//des ni sems can rnam grol zhing / /nad rnams med cing bde bar 'gyur/ /mu ge'i bskal pa bar ma la/ /zas dang skom du bsgyur nas su/ /bkres shing skom pa med byas te/ /srog chags rnams la chos ston to/ /mtshon gyi bskal pa bar ma la/ /de dag byams pa bsgom 'gyur te//sems can bye ba brgya mang po/ /gnod sems med la 'dzud par byed/ /g.yul chen 'dres pa'i nang du ni/ /de dag phyogs la mnyam par 'gyur/ /byang chub sems dpa' stobs chen rnams/ /'dum zhing 'du bar dga' bar byed/ /sangs rgyas zhing ni ji snyed pa//bsam gyis mi khyab dmyal bar yang / /sems can rnams la phan bya'i phyir/ /bsams bzhin du ni der 'gro'o/ /ji snyed dud 'gro'i skye gnas kyi/ /'gro ba'i bar du bstan pa ni/ /thams cad du yang chos ston te/ /de'i phyir rnam par 'dren ces bya/ / 'dod pa'i longs spyod rnams kyang ston/ /bsam gtan pa la bsam gtan ston/ /bdud rnams rab tu 'joms byed cing / /de dag glags su 'gyur mi byed/ /me dbus na ni pad ma ltar/ /byung ma myong ba de ston te/ /de bzhin 'dod dang bsam gtan yang / /byung ma myong ba de ston to//bsams bzhin smad 'tshong rnams su sgyur/ /skyes pa rnams ni bsdu ba'i phyir/ /'dod chags lcags kyus drongs nas su/ /de dag sangs rgyas ye shes 'god/ /sems can rnams la phan pa'i phyir/ /grong mi dang ni ded dpon dang / /mdun na 'don dang blon po dang //blon po chen por rtag tu 'gyur/ /sems can dbul po rnams la ni/ /zad mi shes pa'i gter du gyur/ /gang la sbyin pa byin pa yang / /de dag byang chub sems bskyed btsud / /nga rgyal khengs pa'i sems can la/ /de dag tshan chen mchog gyur te/ /nga rgyal kun kyang bcom nas su//bla med byang chub tshol du btsud/ /'jigs skrag sems can rnams la ni/ /rtag tu de yi mdun na 'dug /de dag mi 'jigs byin nas kyang / /byang chub tu ni smin par byed/ /de dag lnga mngon shes pa yi/ /drang srong tshangs par spyod gyur te/ / bzod dang des dang tshul khrims dang / /sdom pa la ni sems can 'god/ /rim gro lhur byed sems can rnams/ /'jigs pa med pas 'dir mthong nas/ /bran dang g.yog tu shin tu 'gyur/ /slob mar yang ni nye bar 'gro/ /yan lag gang dang gang rnams kyis/ /sems can chos la dgar gyur pa//thabs chen shin tu bslabs pa dag /bya ba dag ni thams cad ston/ /de dag slob ma mtha' yas shing / /spyod yul rnams kyang mtha' yas te/ /ye shes mtha' yas rdzogs pas na/ /srog chags mtha' yas grol bar byed/ / bskal pa bye ba phrag brgyar ni//bcom ldan sangs rgyas rnams kyis kyang / /de yi yon tan mtha' brjod dka'/ /zhes bya ba'o // //bam po bcu bzhi pa ste tha ma / byang chub sems dpa'i yon tan rnams ni/ dkon mchog ta la la'i gzungs las ji skad gsungs pa de ltar bsgom par bya ste /me tog phal cher me tog bla re dang / /me tog bkod pa'i 'od zer rab bkye ste/ /me tog sna tshogs kun du bkram byas shing / /bdag nyid chen po de dag rgyal ba mchod/ /bdug pa phal cher bdug pa'i bla re dang / /bdug pa bkod pa'i 'od zer rab bkye ste//bdug pa sna tshogs kun du bkram byas shing / /bdag nyid chen po de dag rgyal ba mchod/ /phal cher spos dang spos kyi bla re dang / /spos kyi bkod pa'i 'od zer rab bkye ste/ /sna tshogs spos rnams kun du bkram byas shing / /bdag nyid chen po de dag rgyal ba mchod/ / phreng ba phal cher phreng ba'i bla re dang / /phreng ba bkod pa'i 'od zer rab bkye ste/ /phreng ba sna tshogs kun du bkram byas shing / /bdag nyid chen po de dag rgyal ba mchod/ /phye ma phal cher phye ma'i bla re dang / /phye ma bkod pa'i 'od zer rab bkye ste/ /phye ma sna tshogs kun du bkram byas shing //bdag nyid chen po de dag rgyal ba mchod/ /na bza' phal cher na bza'i bla re dang / /na bza' bkod pa'i 'od zer rab bkye ste/ /na bza' sna tshogs kun du bkram byas shing / /bdag nyid chen po de dag rgyal ba mchod/ /phal cher gdugs dang gdugs kyi bla re dang / /gdugs kyi bkod pa'i 'od zer rab bkye ste//sna tshogs gdugs rnams kun du bkram byas shing / /bdag nyid chen po de dag rgyal ba mchod/ /rin chen phal cher rin chen bla re dang / /rin chen bkod pa'i 'od zer rab bkye ste/ /rin chen sna tshogs kun du bkram byas shing / /bdag nyid chen po de dag rgyal ba mchod//pad ma phal cher pad+ma'i bla re dang / /pad ma bkod pa'i 'od zer rab bkye ste/ /pad ma sna tshogs kun du bkram byas shing / /bdag nyid chen po de dag rgyal ba mchod/ /rgyan phreng phal cher rgyan phreng bla re dang / /rgyan phreng bkod pa'i 'od zer rab bkye ste//rgyan phreng sna tshogs kun du bkram byas shing / /bdag nyid chen po de dag rgyal ba mchod/ /rgyal mtshan mchog bkod 'od zer rab bkye zhing / /de dag rgyal mtshan dkar dmar ser po dang / /sngo dang rgyal mtshan bkod pa sna tshogs pa/ /du mas rgyal ba'i zhing rnams brgyan par byed/ / nor bu'i dra ba sna tshogs bkod pa'i gdugs/ /dar gyi lda ldi ba dan rab dpyangs shing / /dril g.yer dra ba rgyal ba'i gsung sgrogs pa/ /de bzhin gshegs kyi dbu la de dag 'dzin/ /lag pa'i mthil nas mchod pa bsam byas rnams/ /rgyal ba gcig la mchod pa byed pa ltar/ / rgyal ba ma lus kun la'ang de bzhin te/ /drang srong ting 'dzin rnam 'phrul 'di 'dra'o/ /de dag 'gro ba sdud pa'i ye shes kyis/ /rnam par 'phrul dang ting 'dzin mchog bsgrubs shing / /bya ba dag dang bsnyen bkur kun gyi sgo / /thabs stong dag gis sems can 'dul bar byed/ /kha cig de bzhin gshegs pa mchod sgo dang //sbyin pa bsam gyis mi khyab gtong sgo dang / /sbyangs pa'i yon tan tshul khrims srung sgo dang / /bzod pa mi zad mi 'khrugs sgo dag dang / /kha cig brtul zhugs dka' thub brtson sgo dang / /bsam gtan rab tu zhi bar gnas sgo dang / /don la rnam nges shes rab sgo rnams dang //spyod pa kun ldan thabs kyi sgo dag dang / /tshangs pa'i gnas pa dag dang mngon shes sgo/ /bsdu ba'i dngos pos phan par 'dod sgo dang / /bsod nams bsags dang ye shes sgo dag dang / /bden dang rten dang rnam thar sgo dag dang / /kha cig stobs dang dbang po lam sgo dang //nyan thos theg pas rnam par grol sgo dang / /rkyen gyi theg pas rnam par dag sgo dang / /theg pa mchog gi rnam par 'phrul sgo dang / /kha cig mi rtag nyid dang sdug bsngal sgo/ /kha cig bdag med srog med sgo dag dang / /mi sdug 'du shes 'dod chags bral sgo dang //zhi 'gog ting nge 'dzin gyi sgo yis 'dul/ /'gro ba spyod pa'i sgo rnams ji snyed pa/ /de snyed chos kyi sgo la rab zhugs te/ /de dag kun du rnam thar sgo dag nas/ /bsam pa ji bzhin 'jig rten sems can 'dul/ /gang dag kun du rnam thar sgo dag nas/ /bsams bzhin 'jig rten sems can 'dul byed pa//de dag sus kyang mtshan mar gzung mi nus/ /ting 'dzin rnam par 'phrul pa de 'dra'o/ /de dag dga' ba bkod pa ting 'dzin mchog /'gro ba thams cad yongs smin mthun byed pa/ /dga' bde spro ba rab dga' kun ldan rnams//bsams shing bstan zhing sems can 'dul bar byed/ /gang du lo nyes 'jig rten yo byad gang / /bde byed thams cad rab tu dkon gyur pa/ /der ni kun gyi bsams bzhin bya ba yis/ /sbyin pa sbyin zhing 'gro ba'i don rnams byed/ /de dag zas skom mchog dang ro mchog dang //gos dang bgo ba rin chen sna tshogs dang / /rgyal srid nor dang bdag phangs yongs gtong bas/ /sbyin la mos pa'i 'gro ba 'dul bar byed/ /brten pa de dag mtshan mchog lus spras shing / /gos dang rgyan mchog bgos shing brgyan byas te/ / phreng bas brgyan cing spos kyis bskus pa yis / /gzugs rnams bstan pas sems can 'dul bar byed/ /mthong na dga' tshim rab tu dga' rnams la/ /blo mchog de dag mchog tu gzugs bzang ba/ /gzugs kyi dam pa yongs su ston byed cing / /gzugs la mos pa'i sems can 'dul bar byed//de dag ka la ping ka'i sgra snyan dang / /khu byug kun la ngang pa'i sgra skad dang / /rnga dang tshangs dang mi'am ci yi sgras/ /mos pa kun la de bzhin chos kyang ston/ /stong phrag brgyad cu rtsa bzhi gang yin pas/ /rgyal ba gang dag 'gro ba'i don mdzad pa'i/ / chos kyi bye brag sgo mo de dag gis/ /bsam pa ji bzhin 'jig rten sems can 'dul/ /de dag bde dang sdug bsngal grogs kyang byed/ /don dang gnod pa'i grogs kyang de bzhin byed/ /bya ba kun la grogs su 'gyur byas shing / /grogs kyi sgo nas sems can 'dul bar byed/ / sdug bsngal gnod pa 'dus byas skyon rnams la/ /grogs kyi don du de dag bzod byed cing / /'gro ba kun la phan don bde don du/ /de dag grogs don gnod pa dang du len/ /gang na sngon byung med cing chos med de/ /dgon par 'gro dang thar pa mi dmigs pa/ /der ni rgyal srid 'byor pa rab spangs te//zhi ba'i yid kyis gnas med mngon par 'byung / /de dag khyim dang 'ching dang bsreg pa'i gnas/ /'gro ba thams cad yongs su dgrol ba'i rgyur/ /'dod pa'i dga' ba kun la mi gnas par/ /mngon par byung zhing thar pa rab tu brjod/ /de dag spyod pa bcu rnams rjod byed cing //skyes chen rnams kyi chos spyod gang yin dang / /drang srong rnams kyi spyod yul ma lus par/ /yongs su brjod cing 'gro ba'i don rnams byed/ /gang na sems can dpag med tshe ldan zhing / /bde dang ldan la nyon mongs chung yod pa/ /der ni rga bas nyen cing nad bu can/ / bdag la dbang med 'chi ba'i dbang gyur ston/ /'dod chags 'bar zhing zhe sdang rab 'bar la/ /'jig rten gti mug me chen rab 'bar zhing / /rga dang na dang 'chi ba rab 'bar ba'i/ /'jig rten bstan gnas sems can 'dul bar byed/ /de dag sangs rgyas stobs bcu brtson bzhi dang //chos kyi khyad par bco brgyad rnams kyis kyang / /sangs rgyas che ba'i bdag nyid rjod byed cing / /sangs rgyas yon tan rnams kyis 'gro don byed/ /de dag kun brjod rdzu 'phrul rjes bstan pas/ /gzugs kyi byin rlabs stobs kyis thams cad du/ /de bzhin gshegs pa'i rdzu 'phrul ston byed cing //rdzu 'phrul rnam par 'phrul pas sems can 'dul/ /de dag thabs tshul rnam pa sna tshogs kyis/ /'jig rten rgyu zhing 'gro ba'i don rnams byed/ /'jig rten mi chags chu la pad ma bzhin/ /dga' zhing dad par byed la rnam par rgyu/ /de dag snyan dngags mkhan rgyal snyan dngags sbyor//gar mkhan rnga mkhan gyad dang rol mo mkhan/ /bzhugs mdzes rgyan phreng thogs shing gar byed dang / /sgyu ma mkhan po gzugs mang kun du ston/ /grong pa grong dpon kha lo sgyur bar 'gyur/ /de bzhin ded dpon tshong dpon khyim bdag 'gyur/ / rgyal po blon po mdun 'don pho nya dang / /sman pa 'jigs med bstan bcos cho ga mkhan/ /de dag dgon par ljon shing chen por 'gyur/ /sman dang rin chen mi zad gter rnams dang / /yid bzhin nor bu 'dod sbyin sdong po dang / /lam gol dong ba rnams la lam ston 'gyur/ / 'jig rten byung nas mi ring shes gyur cig /sems can lam gyi tshul rnams mi shes pa/ /de dag kun la rmongs chos tshong thabs dang / /sna tshogs bzo rnams 'jig rten rjod par byed/ /'tshe med gnod sems med pa'i sbyor ba gang / /sems can bde byed mkhas pas rab bsngags pa//rig stobs sman dang bstan bcos sna tshogs kun/ /drang srong de dag rnams kyis rab tu brjod/ /gang la lhar bcas 'jig rten rmongs 'gyur ba/ /drang srong spyod mchog dam pa gang yin dang / /brtul zhugs dka' spyad dka' thub spyod kun kyang / / mkhas pas de dag rnams kyis rab tu brjod/ /de dag spyod can kun rgyu mu stegs can/ /gdung ba gau ta ma dang mi smrar spyod/ /gcer bu gos med lhur len dge sbyong la/ /mu stegs can gyi slob dpon mkhas par ston/ /de dag kun du 'tsho ba'i chos 'dzin dang / /bla na yod dang bla na med rnams dang //ral pa ring dang gzhon nu'i brtul zhugs can/ /de dag tu yang slob dpon 'gyur ba yin/ /nyi ma'i rjes lta dka' thub lnga ldan dang / /khyi dang ba lang brtul zhugs ri dgas spyod/ /gle'u can dang mu stegs sum cu pa/ /de dag tu yang de dag slob dpon 'gyur/ / lhag pa'i shes la 'jug par dga' rnams dang / /mu stegs nye reg yul du rgyu rnams su/ /rtsa ba 'bras bu chu spyod gyur nas kyang / /bsam yas chos la de dag dam pa mchog /tsog pur 'dug dang gcig pur rgyu ba dang / /tsher ma rtswa dang thal bar nyal ba dang / /gang dag gtun shing mal can gnas pa dang //de dag tu yang de dag slob dpon 'gyur/ /phyi rol mu stegs can rnams ji snyed pa/ /de dag bsam pa mos pa rtogs byas shing / /bsnyen dka' mi bzad drag shul dka' thub kyis/ /mu stegs can gyi sdug bsngal spang bar 'dul/ /'jig rten lta bas 'khrug pa shes byas nas//lta ba ngan la gnas pa'i mu stegs can/ /kun la phra ba'i gzhi dang thabs tshul gyis / /de dag rnams la bden pa ston par byed/ /la lar 'gro lding ba yi sngags kyi gzhi/ /shin tu gsang ba'i gzhi yis bden pa ston/ /la la dag la gsal zhing drang tshig gis//la la dag la lha yi gsang tshig gis/ /la la dag la yi ge dbye tshig dang / /don la rnam nges rdo rje'i tshig rnams dang / /rgol ba 'dul bar shes pa'i tshig rnams dang / /bstan bcos thub med thar pa'i tshig rnams kyis/ /la la dag la mi skad tshig rnams dang //kun la 'jug pa nges tshig rnams kyis su / /la la dag la lha yi nges tshig dang / /klu yi nges tshig gnod sbyin nges tshig gis/ /la lar srin po 'byung po sha za dang / /dri za grul bum lto 'phye che tshig dang / /mi ci lha min mkha' lding tshig rnams kyis/ /bden pa bstan cing thar par 'dren par byed//de dag bden dang nges tshig tshul shes te/ /de ltar rgyal ba'i chos rnams ma lus pa'i/ /chos nyid bsam byas tshig lam shes par ston/ /de dag ting 'dzin rnam 'phrul de 'dra'o/ /de dag 'gro bde mchog gi ting nge 'dzin/ /'gro ba kun la mngon par sgrub byed cing //'od zer bsam gyis mi khyab rab bkye ste/ /'od zer bkye nas sems can 'dul bar byed/ /mthong na legs pa'i 'od zer rab gtong zhing / /sems can ji snyed 'od zer de shes pa/ /de dag mthong legs don med ma yin te/ /bla na med pa'i ye shes mchog gi rgyu//mi rnams kun la sangs rgyas yongs bstan dang / /chos kyang yongs su bstan de lam bstan cing / /rgyal ba'i sku gzugs mchod rten bstan byas pas/ /des na mthong legs 'od zer grub par 'gyur/ /lha yi 'od zer zil gyis gnon pa yi / /'od zer 'od byed ces bya rab gtong zhing //rdul dang mun pa thams cad bsal byas te/ /'jig rten phan pa'i 'od de rab tu snang / /sems can gang dag 'od des bskul byas pa/ /de dag rgyal ba mchod phyir sgron ma 'dzin/ /de dag rgyal ba mchod phyir sgron bzung bas/ /'jig rten sgron ma mdzad pa'i rgyal bar gyur //'bru mar mar me mar gyi mar me dang / /rtswa shing 'dam bu 'od ma'i sgron ma dang / /spos dang bcud len rin chen sgron ma dag /rgyal ba rnams la phul nas 'od byed thob/ /sgrol zhes bya ba'i 'od zer rab gtong zhing / /sems can gang dag 'od des bskul byas la//de dag sred spangs sred pa'i rgya mtsho las/ /sems can sgrol ba'i don du go cha gyon/ /gang dag sred spangs sred pa'i rgya mtsho las/ /sems can sgrol ba'i don du go gyon pa/ /de dag chu bo bzhi las rab tu sgrol/ /mya ngan med pa'i bde ba'i grong khyer ston//stegs dang zam pa du ma byas pa dang / /chu klung lam la sgrol ba'i gru byin te/ /'dus byas sun phyung zhi ba bsngags byas pas/ /des na sgrol ba'i 'od zer grub par 'gyur / /skom pa sel ba'i 'od zer rab gtong zhing / /sems can gang dag 'od des bskul byas pa//'dod pa'i yon tan skom pa rab spangs shing / /chos la mos pa'i ro ni don du gnyer/ /'dod pa'i yon tan skom pa rab spangs te/ /chos mos ro la don du gnyer gyur pas/ /bdud rtsi char pa 'bebs pa'i sangs rgyas 'gyur/ /'jig rten skom pa'i sred pa rnam par sel //rdzing dang khron pa chu klung chu rdo dang / /mtsho rnams byang chub don du byed btsud de/ /'dod pa smad cing bsam gtan bsngags byas pas/ /des na skom pa sel ba grub par 'gyur/ /dga' bar byed pa'i 'od zer rab gtong zhing / /sems can gang dag 'od des bskul byas pa//dga' bas rgyas shing byang chub mchog don du/ /rab 'byung 'gyur bar bya zhes sems bskyed do/ /thugs rje ldan pa'i sku gzugs mtshan brgyan pa/ /pad+ma'i gdan la bzhugs pa rnams byas shing / /rtag tu sangs rgyas yon tan rnams brjod pa/ /des na dga' byed 'od zer grub par 'gyur//mgu bar byed pa'i 'od zer rab gtong zhing / /sems can gang dag 'od des bskul byas pa/ /rtag tu sangs rgyas la ni dga' mgu zhing / /chos la dga' mgu dge 'dun dga' mgu'o/ /de dag rtag tu sangs rgyas dga' mgu zhing / / chos la dga' mgu dge 'dun dga' mgu nas/ /sangs rgyas chos dang 'phags pa'i tshogs rnams dang / /rtag tu 'grogs thob bzod pa bla med 'thob/ /sangs rgyas rjes dran chos dang tshogs mchog la/ /sems can mang po bskul zhing dran byas te/ /byang chub sems kyi yon tan rab brjod pas//des na mgu byed 'od zer grub par 'gyur/ /bsod nams bsags pa'i 'od zer rab gtong zhing / /sems can gang dag 'od des bskul byas pa/ /bla na med pa'i byang chub don gnyer zhing / /sbyin pa sna tshogs du ma sbyin par byed/ /gtan pa med pa'i mchod pa de byed tshe//slong ba rnams kyi bsam pa rdzogs byed de/ /bsam pa thams cad sbyin pa byin byas pas/ /bsod nams bsags pa'i 'od zer grub par gyur/ /ye shes ldan pa'i 'od zer rab gtong zhing / /sems can gang dag 'od des bskul byas pa/ / chos gcig sgo mo nas ni du ma yi/ /chos kyi sgo rnams yud kyis khong du chud/ /chos kyi dbye ba sems can 'dzin btsud de/ /don la nges pa'i ye shes rnams phye zhing / /chos kyi tshig don brjod pa byas pas na/ /des na ye shes ldan pa'i 'od zer 'grub/ /shes rab sgron ma'i 'od zer rab gtong zhing //sems can gang dag 'od des bskul byas pa/ /stong pa bdag med ma skyes ma byung zhing / /rang bzhin med pa'i chos la rab tu 'jug /bdag po med chos stong pa byed med pa/ /sgyu ma smig rgyu chu zla mtshungs 'dra zhing / /rmi lam mtshungs la gzugs brnyan 'dra ba dag /ston pas shes rab sgron ma de grub po/ /chos kyi rnam 'phrul 'od zer rab gtong zhing / /sems can gang dag 'od des bskul byas pa/ /mi zad mdzod kyi gzungs ni thob gyur nas/ /de bzhin gshegs pa kun gyi mdzod kyang 'dzin/ /chos 'dzin rnams la yongs su phan btags te//drang srong rnams la chos kyis bsrung byas shing / /'gro ba chos kyi rjes su gzung byas pas/ /chos kyi rnam 'phrul 'od zer grub par 'gyur / /gtong dang ldan pa'i 'od zer rab gtong zhing / /sems can 'jungs pa gang dag des bskul ba / / longs spyod mi rtag mi brtan shes gyur nas/ /de dag rtag tu gtong la dga' mos 'gyur/ /ma dul gdul dka'i sems can ser sna can/ /nor rnams rmi lam sprin dang 'drar shes nas/ /dga' ba'i yid kyis sbyin pa spel byas pas/ /des na gtong dang ldan pa'i 'od grub po//yongs su gdung med 'od zer rab gtong zhing / /khrims 'chal sems can gang dag des bskul ba/ /tshul khrims rnam par dag la gnas gyur nas/ /rang 'byung 'gyur bar bya zhes sems bskyed do/ /dge ba'i las lam yongs su dag pa dang //tshul khrims la yang sems can mang 'dzud cing / /byang chub sems kyang yang dag 'dzin bcug pas/ /yongs gdung med pa'i 'od zer de grub po/ /bzod pa bkod pa'i 'od zer rab gtong zhing / /mi bzod sems can gang dag des bskul ba/ /khro dang tha ba nga rgyal yongs spongs shing //de ni rtag tu bzod mos dga' bar 'gyur/ /sdig ldan rnams kyis nyes byas bzod byas te/ /byang chub don du 'khrug pa ma byas shing / /bzod pa'i yon tan rtag tu bsngags brjod pas/ /des na bzod pa bkod pa de grub po/ /brtun dang ldan pa'i 'od zer rab gtong zhing //le lo'i sems can gang dag des bskul ba/ /rigs par brtson pa dkon mchog gsum rnams la/ /sbyor ba skyo med mchod pa byed par 'gyur/ /rigs par brtson pa dkon mchog gsum rnams la/ /sbyor ba skyo ba med pas mchod byas nas//de dag bdud bzhi'i lam las rab 'das te/ /byang chub bla med myur du reg par 'gyur/ /sems can mang po brtson 'grus 'dzin bcug ste/ /dkon mchog gsum la mchod pa rab byas nas/ /zad pa'i dus na dam chos yongs bzung bas/ /des na brtun par ldan pa'i 'od thob po//zhi bar byed pa'i 'od zer rab gtong zhing / /rnam 'khrug sems can ji snyed des bskul ba/ /de dag chags dang sdang dang rmong med cing / /rtogs par gyur nas mnyam gzhag sems su 'gyur/ /sdig pa'i grogs po skyon ldan spyod can dang / / 'dre ba yongs su rnam par spangs byas te/ /dgon par rab zhi bsam gtan rab brjod pas/ /des na zhi bar byed pa'i 'od grub bo/ /shes rab bkod pa'i 'od zer rab gtong zhing / /shes 'chal sems can ji snyed des bskul ba/ /bden dang rten dang rnam thar tshul rnams dang / / dbang po shes pa rtogs par khong chud cing / /nyi ma'i sgron ma'i ting 'dzin thob gyur nas/ /shes rab snang bar mdzad pa'i rgyal bar 'gyur/ /rgyal srid nor dang bdag phangs yongs btang ste/ /byang chub don du chos gang btsal byas pa/ /chos de gus par byas nas rab bshad pas//shes rab bkod pa'i 'od zer de grub po/ /sangs rgyas ldan pa'i 'od zer rab gtong zhing / /sems can gang dag 'od des bskul byas pa/ /sangs rgyas stong phrag du ma bsam yas rnams/ /pad+ma dam pa rnams la bzhugs par mthong / /sangs rgyas che dang sangs rgyas rnam thar dang //sangs rgyas rnam 'phrul mtha' yas brjod byas shing / /sangs rgyas stobs dang rdzu 'phrul rab brjod pas/ /des na sangs rgyas ldan pa'i 'od grub po/ /mi 'jigs sbyin pa'i 'od zer rab gtong zhing / /'jigs nyen sems can gang la des reg pa//'byung po gza' dang gsad brdeg bcing ba dang / /nad 'go 'jigs pa kun las thar bar 'gyur/ /mi 'jigs sbyin pas sems can bskyab pa dang / /srog chags gsod las bzlog par byas pa dang / /'jigs pa skyabs tshol rnams la skyabs byas pas//mi 'jigs sbyin pa'i 'od zer de grub po/ /bde ba kun byed 'od zer rab gtong zhing / /nad pa na ba gang dag des reg pa/ /rnam pa kun du nad kyi sdug bsngal thar/ /bsam gtan ting 'dzin bde ba rnams kyang 'thob/ /nad gsos 'bras bu sman dang rtsa ba dang //rin chen bcud len spos dang byug pa dang / /bu ram sbrang rtsi 'o ma mar dag dang / /'bru mar zas skom byin pas de thob po/ /sangs rgyas ston pa'i 'od zer rab gtong zhing / /tshe zad tha mar gang dag des bskul ba/ /sangs rgyas rjes dran sangs rgyas mthong bar 'gyur/ / de dag shi 'phos sangs rgyas bzhugs shing 'gro/ /'chi ba'i dus su sangs rgyas dran byas te/ /dga' byed rgyal ba'i sku gzugs bstan byas shing / /'chi kar sangs rgyas skyabs su gtang brjod pas/ /sangs rgyas ston pa'i 'od zer de thob po/ /chos rab brjod pa'i 'od zer rab gtong zhing //sems can gang dag 'od des bskul byas pa/ /chos nyan klog cing yi ger 'dri bar byed/ /de dag rtag tu chos la dga' mos 'gyur/ /chos kyi mu ge byung tshe chos brjod de/ /chos tshol rnams kyi bsam pa rdzogs byas shing / /'dun pa bskyed de chos la brtson gyis zhes//brjod pas chos rab brjod pa de thob po/ /sangs rgyas sras rnams yongs su bskul ba'i phyir/ /dbyangs dang ldan pa'i 'od zer rab gtong zhing / /'jig rten gsum na sgra rgyun ji snyed pa/ /kun kyang de bzhin gshegs pa'i gsung du thos/ /gsang bstod sgra yis drang srong che bstod de//rgyal ba'i gsung sgra don du sil snyan dang / /sgra chen dril bu sbyin rnams 'gro kun la/ /rab tu bsngags pas dbyangs ldan 'od grub po/ /'chi med sbyin pa'i 'od zer rab gtong zhing / /sems can gang dag 'od des bskul byas pa/ / bag med spyod pa thams cad rab spangs te/ /yon tan kun la brtson pa nyams su len/ /'dus byas rtag tu bde ba med pa ste/ /sdug bsngal 'tshe ba du mas yongs su gang / /'gog pa rtag tu bde zhing zhi spyod ces/ /brjod pas 'chi med sbyin pa de thob po/ /khyad par ldan pa'i 'od zer rab gtong zhing //sems can gang dag 'od des bskul byas pa/ /rgyal ba rnams kyi tshul khrims khyad par dang / /ting 'dzin khyad par shes rab khyad par thob/ /thub chen rgyal po khrims kyi mchog gyur cing / /ting 'dzin mchog dang shes rab mchog gyur ces//byang chub don du bstod cing bsngags brjod pas/ /des na khyad par ldan pa'i 'od grub po/ /rin chen bkod pa'i 'od zer rab gtong zhing / /sems can gang dag 'od des bskul byas pa/ /rin chen mi zad gter rnams thob gyur nas/ /drang srong che la rin chen dam pas mchod//rgyal dang rgyal ba'i mchod rten rin chen phul/ /skye bo nyon mongs rin chen rnams kyis bsdus/ /rgyal ba rnams la rin chen rab phul bas/ /rin chen bkod pa'i 'od zer grub par gyur / /spos rab snang ba'i 'od zer rab gtong zhing / /sems can gang dag 'od des bskul byas pas//mi la med spos yid 'ong tshor gyur nas/ /sangs rgyas yon tan rnams la nges par 'gyur/ /mi dang lha yi spos dang byug pa yis/ /mi yi gtso la mchod pa rab byas te/ /spos las rgyal ba'i gzugs dang mchod rten dag /byas pas spos rab snang ba de grub po//sna tshogs bkod pa'i 'od zer rab gtong zhing / /rgyal mtshan ba dan gdugs mchog sna tshogs dang / /sil snyan bsgrags shing spos kyi bdug pa yis/ /pho brang dam pa mdzes byas me tog bkram/ /sil snyan dag gis rgyal ba rnams bsu zhing / /me tog bdug pa bdug spos phye ma dang //rgyal mtshan ba dan gdugs mchog rnams kyis mchod/ /des na sna tshogs bkod pa grub par gyur/ /shin tu dang byed 'od zer rab gtong zhing / /sa rnams lag mthil bzhin du gnas par byed/ /mchod rten drang srong gnas rnams sbyang byas pas//des na shin tu dang byed 'od grub po/ /sprin dang ldan pa'i 'od zer rab gtong zhing / /spos kyi char 'bebs sprin rnams kun du gnas/ /mchod rten 'khor sar spos kyi chus btang pas/ /sprin dang ldan pa'i 'od de rab tu 'thob/ /lhab lhub bkod pa'i 'od zer rab gtong zhing //gcer bu gos gyon rgyan dang ldan par 'gyur/ /gos dang bgo ba rgyan phreng sna tshogs dag /sbyin pa byas pas lhab lhub bkod pa grub/ /ro mchog ldan pa'i 'od zer rab gtong zhing / /bkres pa kha zas ro mchog thob par 'gyur/ /zas dang skom dang ro mchog sna tshogs rnams//byin pas ro mchog ldan pa'i 'od grub po/ /nor rnams ston pa'i 'od zer rab gtong zhing / /dbul po dag gis rin chen gter rnams 'thob/ /dkon mchog gsum la gter gzhi mi zad pa/ /dbul ba byas pas nor ston 'od thob po/ / mig rnams sbyong ba'i 'od zer rab gtong zhing / /de tshe long bas sna tshogs gzugs rnams mthong / /rgyal ba dag dang rgyal ba'i mchod rten la/ /mar me phul bas mig sbyong 'od zer grub/ /rna ba rnam sbyong 'od zer rab gtong zhing / /rna ba nyams pas sgra mang thos par 'gyur/ / rgyal ba rnams dang rgyal ba'i mchod rten la/ /sil snyan phul bas rna sbyong 'od grub po/ /sna rnams sbyong ba'i 'od zer rab gtong zhing / /sngon chad ma tshor dri zhim tshor bar 'gyur/ /rgyal ba rnams dang rgyal ba'i mchod rten la/ /spos rab phul bas sna sbyong 'od zer grub//lce rnam sbyong ba'i 'od zer rab gtong zhing / /sgra snyan yid 'ong rnams kyis sangs rgyas bstod/ /mi snyan bslang bar smra ba rnams spongs te/ /'jam par smras pas lce sbyong 'od zer grub/ /lus rnams sbyong ba'i 'od zer rab gtong zhing / /dbang po nyams pa dbang po ldan par 'gyur//rgyal ba rnams dang rgyal ba'i mchod rten la/ /lus btud byas pas lus rnams sbyong ba thob/ /sems rnams sbyong ba'i 'od zer rab gtong zhing / /smyos pa thams cad sems dang ldan par 'gyur/ /ting 'dzin dbang rjes sems 'gro byas pas na//sems rnams sbyong ba'i 'od zer de grub po/ /gzugs rnams sbyong ba'i 'od zer rab gtong zhing / /mi dbang rnams kyi bsam yas sku mthong ste/ /sku gzugs ri mo sna tshogs mang po dang / /mchod rten brgyan byas gzugs sbyong 'od grub po/ /sgra rnams sbyong ba'i 'od zer rab gtong zhing //sgra ni sgra min stong par rab tu shes/ /rkyen las byung bas brag ca 'dra'o zhes/ /sgra rnams bstan pas 'od zer de grub po/ /dri rnams sbyong ba'i 'od zer rab gtong zhing / /dri nga thams cad dri zhim mchog tu 'gyur/ /spos rab mchog chus rgyal ba'i mchod rten dag /khrus byas byang chub zhing gi 'od de yin/ /ro bro sbyong ba'i 'od zer rab gtong zhing / /dug can dug med ro'i mchog tu 'gyur/ /sangs rgyas nyan thos bcas dang pha ma la/ /ro mchog thams cad phul ba'i 'od de yin/ /reg rnam sbyong ba'i 'od zer rab gtong zhing //reg na rtsub pa 'jam zhing bde bar 'gyur/ /mdung thung rtse gsum ral gri mda' chen char/ /phreng ba 'jam pa pad+ma ut+pal 'gyur/ /bcos bu'i ras mang 'jam zhing reg bde rnams/ /rgyal ba rnams kyi gshegs shul bting bkram ste/ /me tog byug pa na bza' 'jam rnams dang //phreng ba bla re phul ba'i 'od de yis/ /chos rnam sbyong ba'i 'od zer rab gtong zhing / /'jig rten phan mdzad rgyal ba thams cad kyi/ /spu rnams kun nas chos rnams bsam mi khyab/ /byung ba thos nas mos pa thams cad tshim/ /rkyen las byung bas ma skyes ngo bo nyid//rgyal ba rnams kyi sku ni chos sku ste/ /chos nyid nam mkha' bzhin du gnas so zhes/ /brjod pas chos rnam sbyong ba thob par 'gyur/ /'od zer sgo mo de dag la sogs pa/ /drang srong rnams kyi spu yi sgo gcig nas/ /'od zer gang ga'i bye ma snyed 'byung ste/ / kun la sbyor ba tha dad tshul can no/ /ji ltar sku yi spu yi sgo gcig nas/ /'od zer gang gA'i bye ma snyed 'byung ba/ /ma lus spu rnams kun nas de bzhin te/ /drang srong ting 'dzin rnam 'phrul 'di 'dra'o/ /yon tan gang gis 'od zer gang 'grub pa'i/ /yon tan de grogs sngon chad gang gyur pa//de dag nyid las 'od zer rab 'byung ste/ /drang srong ye shes rnam 'phrul 'di 'dra'o/ /de dag bsod nams sngon grogs gang yin la/ /rjes su yi rang gsol ba sus btab dang / /gang gis mthong ste dge ba bsags gyur pa/ /de dag kun gyis 'od zer de dag shes//gang dag bsod nams byas shing dge bsags dang / /gang dag yang yang sangs rgyas rnams mchod cing / /sangs rgyas yon tan 'dun te don gnyer ba/ /de dag kun la 'od zer de dag bskul/ /dper na dmus long nyi ma mi mthong yang / /de med ma yin 'jig rten kun du 'char//mig dang ldan pas shar bar shes gyur nas/ /kun kyang rang rang so so'i las la 'jug /de bzhin skyes chen 'od zer de dag kun/ /rab tu byung yang log pas nyen gyur cing / /mos nyams phal pa rnams kyis mi mthong ste/ /blo gros yangs pa rnams la de dag mod //dper rgyan nor bu bzhon pa gzhal med khang / /bcud kyis len dang rin chen byug pa spos/ /de dag skye bo che la yod mod kyi/ /phongs par gyur pa rnams la de dag med/ /de bzhin skyes chen 'od zer de dag kun/ /de dag yod kyang log pas nyen gyur cing / /mos pa nyams pa rnams kyis mi mthong ste//blo gros yangs pa rnams la de dag mod/ /gang dag 'od zer dbye ba 'di thos nas/ /dad cing mos la dang ba skyes gyur nas/ /bdag ni yon tan che rgyur mi 'gyur zhes/ /de dag dogs dang som nyi mi bskyed do/ /de dag g.yog 'khor bkod pa rnam 'phrul pa//ting 'dzin dam pa mngon par grub byed cing / /phyogs bcu kun du do zla med rnams kyi/ /zham ring sangs rgyas sras rnams ston par byed/ /'od bkod de dag pad+ma sna tshogs pa/ /stong gsum tshad tsam byin gyis brlab byas nas/ /skyil krung bcas pa'i lus kyis kun khyab ste//ting 'dzin rnam par 'phrul pa 'di 'dra'o/ /de dag zhing bcu'i rdul snyed pad+ma gzhan/ /'khor dang bcas pas byin gyis brlab byas shing / /sangs rgyas sras kyis thams cad yongs su bskor/ /de dag ting 'dzin ting 'dzin med par gnas/ /drang srong de yis sems can gang dag rnams//yongs su smin byas sangs rgyas legs bsgrubs pas/ /de dag pad+ma chen po de bskor zhing / /kun kyang thal mo sbyar nas lta zhing 'khod/ /gang dag ting 'dzin gnas par rab zhugs pa/ /skyes chen rnams kyi chos nyid 'di yin te/ /rang gi slob mas kun kyang yongs bskor nas//skar ma'i tshogs kyis zla ba bskor ba bzhin/ /de dag ji ltar phyogs gcig rab 'jug cing / /zham 'bring sangs rgyas sras rnams ston byed pa/ /de bzhin gshegs rnams ma lus kun du ston/ /ting 'dzin rnam par 'phrul pa 'di 'dra'o/ / de dag phyogs kyi dra ba khyab gnas pa'i/ /ting 'dzin dam pa mngon par sgrub byed cing / /kha cig mnyam gzhag kha cig ldan par yang / /phyogs rnams kun du rang gi lus ston to/ /de dag shar gyi phyogs su mnyam gzhag cing / /nub kyi phyogs su dpa' bo rnam par ldang / /nub kyi phyogs su mnyam par bzhag gyur cing //bdag nyid chen po shar gyi phyogs nas ldang / /de bzhin phyogs bcu rnams su rab tu 'jug /gzhan gyi phyogs su mnyam par bzhag gyur la/ /ye shes yon tan phyug po gzhan nas ldang / /drang srong ting 'dzin rnam 'phrul 'di 'dra'o/ / shar phyogs sangs rgyas zhing rnams gang yin pa/ /grangs med ma lus dag na rang byung ba/ /de dag spyan sngar zhabs drung de dag rnams/ /zhi ba'i ting nge 'dzin la rnam par snang / /phyogs der mnyam par gzhag pa brtan byas nas/ /dpa' bo nub kyi zhing khams ma lus par/ /rnam par ldang zhing mngon sum rgyal kun la//mchod pa du ma rab tu byed par snang / /nub phyogs sangs rgyas zhing rnams gang yin pa/ /grangs med ma lus dag na bzhugs sangs rgyas/ /de dag spyan sngar zhabs drung de dag rnams/ /zhi ba'i ting nge 'dzin la gnas par snang / /phyogs der mnyam par gzhag pa brtan byas nas//dpa' bo shar gyi zhing rnams ma lus par/ /rnam par ldang zhing mngon sum rgyal kun la/ /mchod pa du ma rab tu byed par snang / /de bzhin phyogs bcu dag gi zhing rnams su/ /phyogs rnams ma lus kun du brtan la 'jug /kha cig mnyam gzhag kha cig langs gyur cing //'jig rten sgron ma rnams mchod byed par snang / /de dag mig gi lam la mnyam gzhag cing / /gzugs kyi lam nas bdag nyid chen po ldang / /gzugs rnams bsam gyis mi khyab ston pa na/ /de la lhar bcas 'jig rten rmongs par 'gyur/ / gzugs kyi lam la mnyam par bzhag gyur la/ /mi ni ma skyes ma byung rang bzhin te/ /stong pa byed pa med par rab ston cing / /mig gi lam nas dran ldan rnam par ldang / /de dag rna ba'i lam la mnyam gzhag cing / /sgra yi lam nas bdag nyid chen po ldang / /gang la lhar bcas 'jig rten rmongs gyur pa//sgra dang skad rnams lan la rab tu zhugs/ /sgra yi lam la mnyam par bzhag gyur cing / /rna ba ma skyes ma byung rang bzhin te/ /stong pa byed pa med par rab ston cing / /rna ba'i lam nas dran ldan rnam par ldang / /de dag sna yi lam la mnyam gzhag cing / / dri yi lam nas bdag nyid chen po ldang / /gang du lhar bcas 'jig rten rmongs gyur pa / /dri mchog dam pa 'jug par rab tu zhugs/ /dri yi lam la mnyam par bzhag gyur cing / /sna ni ma skyes ma byung rang bzhin te/ /stong pa byed pa med par rab ston cing / /sna yi lam nas dran ldan rnam par ldang //de dag lce yi lam la mnyam gzhag cing / /ro mchog kun gyi lam nas rnam par ldang / /gang du lhar bcas 'jig rten rmongs gyur pa/ /bdag nyid chen po ro mchog rnam par ldang / /ro mchog rnams la mnyam par bzhag gyur cing / /lce ni ma skyes ma byung rang bzhin te//stong pa byed pa med par rab ston cing / /lce yi lam nas dran ldan rnam par ldang / /de dag lus kyi lam la mnyam gzhag cing / /reg pa'i lam nas bdag nyid chen po ldang / /gang du lhar bcas 'jig rten rmongs gyur pa/ /'jig rten bde ba bskyed pa'i reg la bzhugs//reg pa'i lam la mnyam par bzhag gyur cing / /lus ni ma skyes ma byung rang bzhin te/ /stong pa byed pa med par rab ston cing / /lus kyi lam nas dran ldan rnam par ldang / /de dag sems kyi lam la mnyam gzhag cing / /chos kyi lam nas bdag nyid chen po ldang //gang du lhar bcas 'jig rten rmongs gyur pa/ /chos la gnas pa'i 'jug par rab tu zhugs/ /chos kyi lam la mnyam par bzhag gyur cing / /sems ni ma skyes ma byung rang bzhin te/ /ston pa byed pa med par rab ston cing / /sems kyi lam nas dran ldan rnam par ldang //de dag byis pa'i lus la mnyam gzhag cing / /lang tsho shugs la gnas pa rnams las ldang / /lang tsho shugs gnas rnams la mnyam gzhag cing / /rgas shing 'khogs pa'i lus las rnam par ldang / /rgas shing 'khogs pa'i lus la mnyam gzhag cing //dad pa'i dge bsnyen ma yi lus las ldang / /dge bsnyen dad pa'i lus la mnyam gzhag cing / /dad pa'i dge bsnyen lus las rnam par ldang / /dad pa'i dge bsnyen lus la mnyam gzhag cing / /dge slong ma yi lus las rnam par ldang / /dge slong ma yi lus la mnyam gzhag cing //dge slong mang du thos pa'i lus las ldang / /dge slong mang thos lus la mnyam gzhag cing / /slob dang mi slob lus las rnam par ldang / /slob dang mi slob lus la mnyam gzhag cing / /rkyen gyis sangs rgyas lus las rnam par ldang / /rkyen gyis sangs rgyas lus la mnyam gzhag cing //sangs rgyas sku mchog rab las rnam par ldang / /sangs rgyas sku mchog rab la mnyam gzhag cing / /lha yi lus gzugs las ni rnam par ldang / /lha yi lus gzugs la ni mnyam gzhag cing / /rdzu 'phrul chen po klu yi lus las ldang / / rdzu 'phrul klu yi lus la mnyam gzhag cing / /rdzu 'phrul gnod sbyin lus las rnam par ldang / /'phrul chen gnod sbyin lus la mnyam gzhag cing / /'byung po kun gyi lus las rnam par ldang / /'byung po kun gyi lus la mnyam gzhag cing / /spu yi sgo gcig nas ni rnam par ldang //spu sgo gcig la mnyam par bzhag gyur cing / /spu sgo thams cad las ni rnam par ldang / /spu sgo kun la mnyam par bzhag gyur cing / /skra rtse gcig gi khyon las rnam par ldang / /skra rtse gcig gi khyon la mnyam gzhag cing / /skra rtse kun gyi khyon las rnam par ldang //skra rtse kun gyi khyon las mnyam gzhag cing / /phra rab rdul gyi rdul las de dag ldang / /rdul gcig la ni mnyam par bzhag gyur cing / /ma lus rdul rnams kun las rnam par ldang / /rdul rnams ma lus kun la mnyam gzhag cing / /rgya mtsho rdo rje'i gzhi las rnam par ldang //rgya mtsho rdo rje'i gzhi la mnyam gzhag cing / /nor bu'i shing thog dag las rnam par ldang / /shing thog dag la mnyam par bzhag gyur cing / /rgyal ba rnams kyi 'od zer sgo nas ldang / /rgyal ba'i 'od zer sgo la mnyam gzhag cing / /rgya mtsho'i chu yi chu klung rnams las ldang / / rgya mtsho'i chu klung rnams la mnyam gzhag cing / /bdag nyid chen po me yi lam las ldang / /me yi lam la mnyam par bzhag gyur cing / /rlung gi lam las dran ldan rnam par ldang / /rlung gi lam la mnyam par bzhag gyur cing / /bdag nyid chen po sa yi gzhi las ldang / /sa yi gzhi la mnyam par bzhag gyur cing //lha kun gzhal med khang las rnam par ldang / /lha kun gzhal med khang la mnyam gzhag cing / /dran ldan de ni mkha' las rnam par ldang / /yon tan mtha' yas bsags pa de dag gi /ting 'dzin rnam thar de dag bsam mi khyab/ /rgyal ba kun gyis bskal pa bsam yas su//bshad pa mdzad kyang zad par mdzad mi spyod/ /'gro las rnam smin bsam gyis mi khyab ste/ /rgyal ba kun gyis de dag gsungs pa ni/ /lha klu'i rnam 'phrul sangs rgyas rnam 'phrul dang / /bsam byed bsam gtan rnam 'phrul bsam mi khyab//de dag la yang dpes ston brjod par bya/ /de dag 'dra ba'i dpe lta cang med de/ /mkhas shing rig pa'i skye bo dpe rnams kyis/ /bstan na myur du don rnams shes par 'gyur/ /rnam thar brgyad kyi dbang la gnas pa yi/ /nyan thos gcig tu gyur nas mang por 'gyur//mang por gyur nas phyir yang gcig 'gyur te/ /mkha' la bsam gtan 'cha' zhing 'bar bar byed/ /smad nas me 'bar stod nas chu yi rgyun/ /stod nas me 'bar smad nas chu yi rgyun/ /'gro dang 'greng dang nyal dang 'dug pa dang / /lus 'phrul skad cig gcig la bsam mi khyab//de ni snying rje che dang mi ldan zhing / /byang chub mi tshol 'jig rten yal 'dor yang / /lus kyi rnam 'phrul bsam yas ston byed na/ /'jig rten phan 'dod ci phyir ston mi byed/ /nyi zla mkha' las rnam par rgyu 'dod cing / /phyogs rnams kun gyi chu yi ngogs dag dang / / mtsho mtshe'u mtsho bran snod dang rin chen dang / /rgya mtsho chu klung rnams dang gzugs brnyan ston/ /de bzhin gzugs rnams bsam gyis mi khyab pa/ /skyes bu dpa' bo phyogs bcu kun du ston/ /ting 'dzin rnam thar kun gyi tshul la mkhas/ /de la de bzhin gshegs pa rang byung dpang / /dang ba'i mtsho la yan lag bzhi pa'i dmag /de dag so so'i rang gi gzugs brnyan mthong / /ral gri mda' chen gzhu dang mda' rnams dang / /go gyon bzhon dang theg par bcas su mthong / /gang gi gzugs gang gnas gang cha byad gang / /de dang de dag de ltar chu las mthong / /'on kyang chu la byams sdang rnam rtog med//drang srong ting 'dzin rnam 'phrul 'di 'dra yi / /rgya mtsho'i lha mo sgra ldan zhes bya ba/ /sems can rgya mtshor ji snyed skyes rnams kyi/ /skra yi yan lag dbyangs kyi tshul mkhas te/ /rang gi skad kyis 'gro kun tshim par byed/ /sgra ldan chags sdang gti mug ldan de yang //skad rnams kun gyi sgra yi tshul mkhas na/ /gzungs dang chos kyi stobs la dbang thob rnams/ /lhar bcas 'jig rten ci phyir mgu mi byed/ /tam bu ra yi chung ma dbyangs ldan nam/ /tshangs pa'i bu mo yid la byung ba de/ /bden dang dam bcas mi tshe dga' rnams kyi//sems dang yid dang kha yi sgor 'jug ste/ /dbyangs ldan chags bcas zhe sdang can de yang / /brtul zhugs grub mthun dbyangs kyi yan lag gis/ /yid 'ong skad kyis 'jig rten mgu byed na/ /ye shes yon tan phyug rnams cis mi byed/ /rig sngags tshul mkhas sgyu ma'i mkhan po ni//sna tshogs gzugs mang mtha' yas ston pa byed/ /nyin mtshan yud dang zla ba lo brgya dang / /khyim bzang rgyas pa shin tu mdzes pa ston/ /'dod chags sdang ldan sgyu ma'i mkhan po yang / /sgyu ma'i 'phrul gyis 'jig rten mgu byed na/ / bsam gtan mngon shes rnam thar rab bslabs pa/ /spyod tshul mkhas rnams ci phyir mgu mi byed/ /lha dang lha min dbang po 'thab pa'i tshe/ /rgyal ldan lha yis lha min pham byas na/ /de dag 'jigs pas gdugs bcas bzhon bcas shing / /theg bcas dmag bcas go gyon bzhin du 'byer //'dod chags sdang ldan lha dbang de dag kyang / /lus kyi rnam 'phrul bsam yas ston byed na/ /dbang phyug rdzu 'phrul dbang gnas dpa' ba rnams/ /lus kyi rnam 'phrul ci phyir ston mi byed/ /rdo rje 'chang ba'i glang pos srung bu/ /dbang po'i 'khor gyur rdzu 'phrul chen po de//mgo bo sum cu rtsa gsum mngon sprul zhing / /mgo rnams kun la'ang mche ba drug drug ste/ /mche ba de dag so so re re la'ang / /rdzing bu chus gang bdun bdun sprul pa byed/ /rdzing bu re re'ang pad+ma sna tshogs pa/ /rnam par bkod pa bdun bdun sprul pa byed/ /pad+ma re la'ang lha yi bu mo dag /sgyu rtsal kun shes bdun bdun sprul pa byed/ /de dag rtsed mo glu gar tshul la mkhas/ /sum cu rtsa gsum dbang po de dang rtse/ /glang po de yang lus ni bsgyur byas te/ /lha rnams kun dang 'grogs shing bde bar byed/ /spyod pa'i tshul dang longs spyod kun kyang mthun/ /glang po mchog gi rnam 'phrul de ltar snang //glang po chags sdang gti mug ldan de yang / /'di 'dra'i rdzu 'phrul rab tu ston byed na/ /shes rab thabs kyis stobs la sbyangs pa rnams/ /ting 'dzin brgya yi rnam 'phrul cis mi byed/ /sgra gcan ji ltar 'dod bzhin lus sprul te//rdo rje'i gzhi la rkang pa 'jog byed cing / /rgya mtsho lte bar phyin pa tsam du ston/ /ri rab rtse dang nyid kyi mgo yang snyoms/ /sgra gcan chags sdang gti mug ldan de yang / /'di 'dra'i rdzu 'phrul kun du ston byed na/ /'jig rten sgron ma bdud rnams rab 'byam pa/ /rdzu 'phrul mtha' yas ci ste ston mi byed//brgya byin rnam 'phrul bsam yas pa la ltos/ /lha dang lha min dbang po g.yul 'gyed tshe/ /lha min bye ba 'byer ba ji snyed pa/ /de snyed brgya byin rang gi lus las sprul/ /lha min dbang dang lha min phal kun gyis/ /brgya byin rang rang mdun du 'dug par shes//de ni rdo rje 'chang bas gzung ngo zhes/ /lha min dbang po kun kyang mgo myos gyur/ /'jigs par byed pa'i mig stong rab bstan te/ /rdo rje me lce 'bar ba thogs byed cing / /lus la go bgos gzi brjid bsnyen dka' ba'i/ /brgya byin mthong nas lha min dbang po 'byer/ / de yang bsod nams phal pa'i mthu stobs kyis / /lha rgyal don du rnam par 'phrul byed na/ /'gro ba ma lus kun gyi skyabs gyur pa/ /bsod nams mi zad rnams lta cis mi 'phrul/ /lha la skul ma 'debs pa'i lha yi rnga/ /lha las rnam par smin pas grub gyur pa / /lha rnams bag med gnas par shes gyur nas//rnga de nam mkha' las ni sgra sgrogs te/ /'dod pa thams cad mi rtag ther zug min/ /tha shal mi brtan dbu ba'i ngo bo nyid/ /sgyu ma smig rgyu chu zla mtshungs 'dra zhing / /srid pa thams cad rmi lam sprin dang mtshungs/ /bag med thams cad dgra bcas mya ngan can//'chi ba'i lam yin mi 'chi'i lam ma yin/ /ji snyed su dag bag med gnas gyur pa/ /de dag 'chi bdag chu srin chen pos zin/ /sdug bsngal rtsa ba yongs 'dzin thams cad yin/ /skye ba thams cad 'phags pa rnams kyis smad/ /'dod pa'i yon tan rnams kyi yul la rmongs//chos kyi stobs la rtag dga' gyis zhes bskul/ /rnga des bskul nas brgya byin lha rnams dang / /lha yi 'dun sa chos bzangs 'dug nas su/ /gtam gang zhi zhing 'dod chags bral mthun pa/ /chos kyi gtam de lha rnams kun la brjod/ /rnga de gzugs med bstan du mi rung yang //de ltar rnga sgras don chen rab byed na/ /bsam pa ji bzhin gzugs ni yongs ston rnams/ /'gro ba kun gyi don chen cis mi byed/ /lha dang lha min dbang po g.yul 'gyed tshe/ /lha yi bsod nams khyad par mthu stobs kyis/ /lha la skul ma 'debs pa'i lha yi rnga//lha rnams ma 'jigs shig ces sgra 'byin te/ /rnga yis bskul nas lha rnams rab dga' zhing / /skrag pa med de stobs kyang skyes par gyur / /lha min dbang po skrag pas nyen pa rnams/ /'jigs nas dmag bcas de yi mod la 'byer/ / de ltar rnga skad 'byin pa'i rnga 'dra ba/ /'gro ba kun gyi skyabs dang dpung gnyen po/ /nyon mongs bdud bcom snying rje che ldan rnams/ /zhi ba'i sgra bsgrags nyon mongs sel bar byed/ /dbang po lha yi bu mo dgu bcu gnyis/ /dbang po'i sprul pas kun kyang dga' bar 'gyur//gcig kyang bdag dang brgya byin rtse bar shes/ /gcig ltar lha mo kun kyang de bzhin no/ /lha mo kun dang dga' bar gnas snang zhing / /chos bzangs 'dun sa na yang de bzhin 'dug /lha rnams kun la chos rab ston snang zhing / /brgya byin skad cig gcig la rnam par 'phrul//brgya byin chags sdang gti mug ldan pa yang / /sprul pas rang gi 'khor rnams dga' byed na/ /'gro don mi skyo sbyor rnams ci yi phyir/ /rdzu 'phrul stobs kyis 'jig rten mgu mi byed/ /bdud kyis dkrugs ma 'gro ba'i dbang sgyur ba/ /de yi dbang du sems can 'di kun 'dong //las dang nyon mongs kun du zhugs pa yis/ /so so'i skye bo thams cad bdud des bcings / /chags sdang gti mug ldan pa'i bdud de yang / /'gro ba thams cad dbang du 'gyur byed na/ /dbang bcu dbang thob rnams la ci rob ste/ /'gro ba thams cad rang gi phyogs ma bzhag /stong gsum gnas kyi bdag po tshangs pa yang / /stong gsum tshangs gnas ji snyed yod pa na/ /de dag kun na 'dug par rab snang zhing / /tshangs pa'i sgra dbyangs shin tu yid 'ong sgrogs/ /tshangs de 'jig rten pa yi tshangs lam gyi/ /bsam gtan mngon shes rnam par 'phrul byed na//'jig rten rab 'das bla na med pa yi / /bsam gtan rnam thar gnas pa cis mi 'phrul/ /dbang phyug chen po'i shes pa'i rnam 'phrul ltos/ /rgya mtsho'i sprin gyis char thigs rab bkye ba/ /skad cig gcig la thams cad bgrang bar byed/ / thigs 'ga'i zer kyang ma shes de med na/ /bslabs pa bskal pa bsam yas rab bslabs te/ /byang chub bla med ye shes thob pa rnams/ /ci phyir skad cig gcig la sems kyis ni/ /'gro ba ma lus kun gyi sems mi shes/ /sems can las smin bsam gyis mi khyab pas/ / 'jig rten 'di kun rlung las yongs su byung / /rgya mtsho ri dang lha yi gzhal med khang / /rin chen rnam phyes sa bon bkram pa'ang byung / /rlung las byung gyur sprin gyis char 'bebs shing / /slar yang rlung nyid kyis ni sprin zhi byed/ /'jig rten gyi ni lo tog rlung gis bskyed/ /'gro ba kun gyi bde mang rlung gis byas//rlung des pha rol phyin lam bslabs shing / /sangs rgyas yon tan rnams la ma bslabs par/ /'jig rten rnam smin bsam mi khyab ston na/ /mchog thob pa dag ci ste ston mi byed/ /ces bya ba'o/ /bslab pa kun las btus pa las dkon mchog gsum rjes su dran pa'i le'u ste bco brgyad pa'o// //bsod nams 'phel ba'i don du rgyu gzhan yang bya ste/ gang zhig dus rnams kun du sems can don bya ba 'di yin no/ /'di ni dkon mchog sprin las/ de de bzhin gshegs pa'i mchod rten nam de bzhin gshegs pa'i sku gzugs la me tog gam bdug pa'am spos gsol na/sems can thams cad kyi ngang tshul ngan pa'i dri nga ba bsal ba dang / de bzhin gshegs pa'i tshul khrims kyi dri bro bar yongs su bsngo'o/ /de phyag dar dang zhal zhal byed na sems can thams cad kyi spyod lam mi sdug pa med par 'gyur ba dang spyod lam mdzes pa phun sum tshogs par yongs su bsngo'o//de me tog gi gdugs gsol na sems can thams cad kyi nyon mongs pa dang nye ba'i nyon mongs pa'i gdung ba med par bya ba'i phyir yongs su bsngo'o/ /de gtsug lag khang gi nang du 'gro na 'di ltar sems can thams cad mya ngan las 'das pa'i grong khyer du gzud do snyam du sems bskyed do//de phyir 'byung na 'di ltar sems can thams cad 'khor ba'i btson ra nas gdon to snyam du sems bskyed do/ /de gnas khang gi sgo 'byed na 'di ltar 'jig rten las 'das pa'i ye shes kyi bde 'gro thams cad kyi sgo dbye'o snyam du sems bskyed do//de sgo gcod na 'di ltar ngan 'gro thams cad kyi sgo rnams bcad do snyam du sems bskyed do/ /de 'dug na 'di ltar sems can thams cad byang chub kyi snying po la 'god do snyam du sems bskyed do/ /de glo g.yas pas nyal na 'di ltar sems can thams cad sangs rgyas kyi mya ngan las 'da' bas yongs su mya ngan las 'da'o snyam du sems bskyed do//de de nas ldang na 'di ltar sems can thams cad nyon mongs pa kun nas ldang ba rnams las bslang ngo snyam du sems bskyed do/ /de lus kyi ched la 'gro na 'di ltar sems can thams cad skyes bu chen po'i 'gros su 'gro bar gyur cig snyam du sems bskyed do//de de ltar 'dug na 'di ltar sems can thams cad kyi 'dod chags dang zhe sdang dang gti mug gi zug rngu 'byung ngo snyam du sems bskyed do/ /de bkru bshal byed na 'di ltar sems can thams cad kyi nyon mongs pa'i dri ma'i skyon rnams bkru'o snyam du sems bskyed do//de lag pa bsnyal na 'di ltar sems can thams cad kyi nyon mongs pa'i dri nga ba rnams bsal lo snyam du sems bskyed do/ /de rkang pa 'khru na 'di ltar sems can thams cad kyi nyon mongs pa'i rdul rnam pa sna tshogs bsal lo snyam du sems bskyed do//de gdong 'khru na 'di ltar sems can thams cad kyi chos thams cad kyi sgo yongs su sbyang ngo snyam du sems bskyed do/ /de so shing za na 'di ltar sems can thams cad kyi dri ma rnam pa sna tshogs bsal lo snyam du sems bskyed do/ /de lus kyi g.yo ba thams cad sems can thams cad la phan pa dang bde bar yongs su bsngo'o//de de bzhin gshegs pa'i mchod rten la phyag 'tshal na 'di ltar sems can thams cad lha dang bcas pa'i 'jig rten gyis phyag bya bar shog cig snyam du sems bskyed do zhes ji skad gsungs pa lta bu'o//yang na shes rab kyi pha rol tu phyin pa las ji skad gsungs pa lta bu ste/ shA ri'i bu gzhan yang gcan gzan khro bo'i dgon par song na/ byang chub sems dpa' sems dpa' chen pos 'jigs par mi bya skrag par mi bya dngang bar mi bya'o/ / de ci'i phyir zhe na/ 'di ltar des sems can thams cad kyi don du thams cad yongs su gzung ba'i phyir te/ des 'di snyam du gal te gcan gzan dag gis bdag zos na 'di ltar sbyin pa de byin par gyur cig /bdag gi sbyin pa'i pha rol tu phyin pa yongs su rdzogs par 'gyur/ bla na med pa yang dag par rdzogs pa'i byang chub la yang shin tu nye bar 'gyur ro/ /ji ltar bdag bla na med pa yang dag par rdzogs pa'i byang chub mngon par rdzogs par sangs rgyas pa'i tshe/ sangs rgyas kyi zhing de na dud 'gro'i skye gnas su song ba'i sems can yong ye med par 'gyur ba de ltar bya'o snyam du sems bskyed do//shA ri'i bu rkun po'i dgon par song na byang chub sems dpa' sems dpa' chen pos 'jigs par mi bya skrag par mi bya dngang bar mi bya'o/ /de ci'i phyir zhe na/ byang chub sems dpa' sems dpa' chen po de dag ni bdog pa thams cad yongs su gtong ba la mkhas pa yin te/byang chub sems dpa' sems dpa' chen pos lus kyang yongs su btang ba yin/ yo byad dang 'tshog chas kyang yongs su btang ba yin/ des 'di snyam du gal te sems can de dag gis bdag gi yo byad dang 'tshog chas rnams phrogs na de dag la sbyin pa de byin par gyur cig /gal te de dag gis bdag gi srog bcad par gyur kyang de la bdag gis zhe sdang dang khong khro bskyed par mi bya/ bdag gis de dag la lus dang ngag dang yid kyis kyang nyes par mi bya'o/ /de ltar na de'i tshe sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa yongs su rdzogs par 'gyur zhing / bdag bla na med pa yang dag par rdzogs pa'i byang chub la shin tu nye bar 'gyur te/ ji ltar bdag bla na med pa yang dag par rdzogs pa'i byang chub mngon par rdzogs par sangs rgyas pa'i tshe/ sangs rgyas kyi zhing de na nyes pa 'di dang gzhan yang yong ye rnam pa thams cad du mi 'byung zhing med par 'gyur ba de ltar bya'o//de ltar bsgrub po snyam du sems bskyed par bya'o/ /shA ri'i bu chu'i dgon par phyin na/ byang chub sems dpa' sems dpa' chen pos 'jigs par mi bya skrag par mi bya dang bar mi bya'o/ /de ci'i phyir zhe na/byang chub sems dpa' sems dpa' chen po rnams ni mi 'jigs pa'i chos can yin te/ des 'di snyam du bdag gis sems can thams cad kyi sred pa thams cad gcod par bslab par bya'o/ /byang chub sems dpa' sems dpa' chen pos skrag par mi bya'o/ /gal te bdag skom pas 'chi ba'i dus byas par gyur na sems can thams cad la snying rje chen po'i sems bskyed par bya ste/kye ma 'di ltar 'jig rten na chu'i dgon pa 'di lta bu snang bas sems can 'di dag ni bsod nams chung ba dag ste/ ji ltar bdag bla na med pa yang dag par rdzogs pa'i byang chub mngon par rdzogs par sangs rgyas pa'i tshe/sangs rgyas kyi zhing de na chu'i dgon pa yong ye rnam pa thams cad du mi 'byung ba dang mi snang bar 'gyur ba de ltar bya'o de ltar bsgrub po/ /ji ltar yan lag brgyad dang ldan pa'i chu rnyed par 'gyur ba de ltar bsod nams kyi las la sems can rnams sbyar bar bya'o//ji ltar de'i tshe brtson 'grus kyi pha rol tu phyin pa yongs su rdzogs par 'gyur ba de ltar sems can thams cad kyi don du brtson 'grus brtan pa brtsam par bya'o snyam du sems bskyed par bya'o/ /shA ri'i bu gzhan yang bkres pa'i dgon par song na/ byang chub sems dpa' sems dpa' chen pos 'jigs par mi bya skrag par mi bya dngang bar mi bya'o//des 'di ltar 'dis go cha bgo ste/ ji ltar bdag bla na med pa yang dag par rdzogs pa'i byang chub mngon par rdzogs par sangs rgyas pa'i tshe/ sangs rgyas kyi zhing de na bkres pa'i dgon pa 'di lta bu yong ye rnam pa thams cad du mi 'byung ba dang /mi snang bar 'gyur ba dang sems can de dag thams cad bde bar 'gyur zhing bde ba la dbang ba dang / bde ba dang ldan par 'gyur ba de ltar brtson 'grus brtan po brtsam par bya ste/ de ltar rang gi sangs rgyas kyi zhing yongs su sbyang bar bya'o//ji ltar na sems can de dag gang ci sems par 'gyur ba dang yid kyis gang dang gang 'dod pa de dang de 'byung bar 'gyur ba / 'di lta ste dper na sum cu rtsa gsum pa'i lha rnams kyi yid la bsam pa thams cad 'grub pa dang / yid la bsam pa thams cad 'byung ba bzhin du de ltar bya'o//ji ltar sems can de dag chos dang ldan pa'i bsam pa yongs su rdzogs par 'gyur ba dang / sems can thams cad thams cad du thams cad las 'tsho ba'i yo byad dang bral bar mi 'gyur ba de ltar brtson 'grus brtan po brtsam par bya'o snyam du sems bskyed par bya'o zhes bya'o //de ltar dus rnams rtag tu sems can gyi don bya ba 'di ni bsod nams 'phel ba'i rgyu ste/ zhib tu ni spyod yul yongs su dag pa'i mdo las blta bar bya'o/ /gzhan yang / chos kyi sbyin pa zang zing med/ /bsod nams 'phel ba'i rgyur 'gyur te//lhag pa'i bsam pa bskul ba'i mdo las ji skad gsungs pa lta bu ste/ byams pa gang zhig thob pa dang bkur sti mi 'dod par chos kyi sbyin pa byin na/ chos kyi sbyin pa zang zing med pa'i phan yon nyi shu ste/ nyi shu gang zhe na/ 'di lta ste/ dran pa dang ldan pa yin/ blo dang ldan pa yin/ blo gros dang ldan pa yin/ mos pa dang ldan pa yin/ shes rab dang ldan pa yin/ 'jig rten las 'das pa'i shes rab rjes su rtogs par 'gyur pa yin/ 'dod chags chung ba yin/ zhe sdang chung ba yin/ gti mug chung ba yin/ bdud kyis de la glags mi rnyed pa yin/sangs rgyas bcom ldan 'das rnams kyis dgongs pa yin/ mi ma yin pa rnams kyis de srung ba yin/ lha rnams de'i lus la mdangs 'jug pa yin/ mi mdza' ba rnams kyis de la glags mi rnyed pa yin/ de mdza' bo rnams dang mi phyed pa yin/ tshig gzung bar 'os pa yin/mi 'jigs pa thob pa yin/ yid bde ba mang ba yin/ mkhas pas bsngags pa yin/ de chos kyi sbyin pa de rjes su dran par 'gyur ba yin te/ byams pa phan yon nyi shu po de dag go zhes bya ba'o/ /shes rab kyi pha rol tu phyin pa las kyang gsungs te/ gal te kun dga' bo khyod kyis nyan thos kyi theg pa'i gang zag rnams la nyan thos kyi sa'i chos bstan la/chos bstan pa des kyang gang dag stong gsum gyi stong chen po'i 'jig rten gyi khams kyi sems can de dag thams cad dgra bcom pa nyid mngon du byas par gyur kyang / da dung nyan thos khyod kyis nga la nyan thos kyi bya ba byas par mi 'gyur ro//kun dga' bo gal te khyod kyis byang chub sems dpa' sems dpa' chen po la/ shes rab kyi pha rol tu phyin pa dang ldan pa'i tshig gcig cig bstan nam bshad na/ de ltar na nyan thos kyis nga mnyes par byas par 'gyur ro/ / chos bstan pa snga mas gang dag stong gsum gyi stong chen po'i 'jig rten gyi khams kyi sems can de dag thams cad dgra bcom pa nyid thob par gyur la/ dgra bcom pa de dag gi sbyin pa las byung ba'i bsod nams bya ba'i dngos po dang / tshul khrims las byung ba'i bsod nams bya ba'i dngos po dang /bsgoms pa las byung ba'i bsod nams bya ba'i dngos po gang yin pa de la kun dga' bo ji snyam du sems/ bsod nams kyi phung po mang ba yin nam/ gsol ba/ bcom ldan 'das mang lags so/ /bde bar gshegs pa mang lags so/ /bcom ldan 'das kyis bka' stsal pa/kun dga' bo de lta bas kyang su zhig byang chub sems dpa' sems dpa' chen po rnams la shes rab kyi pha rol tu phyin pa dang ldan pa'i chos ston na/ nyan thos kyi theg pa'i gang zag de bsod nams kyi phung po ches mang du bskyed de/ /kun dga' bo de bas kyang gang su zhig byang chub sems dpa' sems dpa' chen po rnams la shes rab kyi pha rol tu phyin pa dang ldan pa'i chos tha na nyi ma gcig ston na de bsod nams kyi phung po ches mang du bskyed do//kun dga' bo nyi ma gcig lta zhog la tha na snga dro'am/ kun dga' bo snga dro lta zhog la tha na chu tshod gcig nas skad cig gcig ces bya'o //de bzhin du sbyar te/ kun dga' bo 'di ni byang chub sems dpa' sems dpa' chen po de'i chos sbyin pa ste/ nyan thos kyi theg pa thams cad dang rang sangs rgyas kyi theg pa'i gang zag thams cad kyi dge ba'i rtsa ba zil gyis mnan pa'o//kun dga' bo byang chub sems dpa' sems dpa' chen po dge ba'i rtsa ba 'di lta bu dang ldan pa/ dge ba'i rtsa ba 'di lta bu sems pa la ni gnas ma yin zhing go skabs med de/ gang byang chub sems dpa' sems dpa' chen po de bla na med pa yang dag par rdzogs pa'i byang chub las phyir ldog pa de ni gnas med do zhes bya ba'o //chos kyi sbyin pa ji ltar sbyin par bya zhe na/ 'phags pa dam pa'i chos pad+ma dkar po'i mdo las gsungs pa/ mkhas pa dus su sems par byed pa na/ /khang bur zhugs te de bzhin sgo bcad nas/ /chos 'di thams cad la ni tshul bzhin blta//langs nas zhum pa med pa'i sems kyis shod/ /mkhas pa bde la rtag tu gnas par 'gyur/ /bde la 'dug nas de bzhin chos kyang ston/ /gtsang zhing yid du 'ong ba'i sa phyogs su/ /yangs pa'i stan ni rab tu bshams bting ste/ /bzang po'i tshon gyis legs par kha bsgyur ba//chos gos gtsang ma de ni rab bgos nas/ /rdul gzan nag po de bzhin bshams byas la/ /sham thabs che tshad legs par rab bgos nas/ /bcos bu'i ras rnams sna tshogs legs bting ba/ /rkang rten bcas pa'i khri la rab 'dug cing / / rkang pa legs par bkrus te steng 'dzegs nas/ /gdong dang bzhin gyi mdangs ni rab snum zhing / /chos kyi stan de la ni rab 'dug nas/ /sems can lhags pa rtse gcig gyur rnams la/ /gtam mang sna tshogs mang po smra ba dang / /dge slong dag dang dge slong ma rnams dang / /dge bsnyen rnams dang dge bsnyen ma dag dang //rgyal po dag dang rgyal bu rnams la yang / /mkhas de rtag tu phrag dog med par ni/ /sna tshogs don ldan snyan pa'i gtam yang ston/ /le lo dag kyang rnam par rab spangs nas/ /skyo ba yi ni 'du shes bskyed mi bya/ /mkhas pas mi dga' thams cad rnam par spang //byams pa'i stobs ni 'khor la bsgom par bya/ /nyin mtshan du yang chos mchog rab tu bsgom / /mkhas pa de ni bye ba khrag khrig dpes/ /'khor rnams mgu zhing de bzhin dga' bar byed/ /de la nam yang 'dod pa chung zad med/ /zas dang skom dang bza' dang bca' ba dang //gos dang mal cha chos gos rnams dang ni/ /na ba'i gsos sman dag kyang mi bsam ste/ /'khor rnams la ni ci yang mi bslang ngo / /gzhan du mkhas pa rtag tu bdag nyid dang / /sems can 'di dag sangs rgyas 'grub par shog /phan phyir 'jig rten chos gang bstan pa de/ / bdag gi bde ba'i yo byad kun snyam sems/ /zhes bya'o/ /yang de nyid las/ chos kyi rnam grangs 'di rab tu ston pa na/ chos kyi dga' ba snyoms pa byed de tha na 'ga' tsam la yang chos kyi dga' bas lhag par phan 'dogs par mi byed do zhes gsungs so/ /zla ba sgron ma'i mdo las kyang / chos kyi sbyin pa'i ched kyi phyir/ /gal te khyod la gsol 'debs na/ /rab rgyas dag gis ma brlabs zhes/ /thog mar tshig de brjod par bya/ /khyod ni shes shing mkhas yin na/ /bdag nyid chen po'i mdun du ni/ /bdag gis ji ltar bshad nus zhes/ /khyod kyis de skad brjod par bya/ / 'phral du brjod par mi bya yi/ /snod la brtag pa byas nas bya/ /gal te snod ni shes gyur na/ /gsol ma btab kyang bshad par bya/ /'khor ni mang po 'khor nang du/ /gal te ngang tshul ngan mthong na/ /khyod kyi yo byad bsnyungs mi bshad/ /sbyin pa'i bsngags pa brjod par bya/ /gal te 'dod pa chung gyur te//tshul khrims dag par gnas yin na/ /khyod kyis byams pa'i sems bskyed la/ /yo byad bsnyungs pa'i gtam gyis shig /gal te sdig 'dod nyung gyur cing / /tshul khrims ldan pa mang gyur la/ /gnyen po rnyed pa de yi tshe/ /tshul khrims bsngags pa brjod par bya//zhes gsungs so/ /'phags pa blo gros rgya mtshos zhus pa'i mdo las kyang / 'di lta ste/ sha me sha ma ba ti / sha mi ta sha tru aM ku re/ maM ku re/ mA ra dzi te/ ka ro ti/ ke yU re/ U ko hA ya ti/ bi sha tha ni rma le/ ma lA pa na ya/ u kha re/ kha ro gra se/ gra sa ne / he mU khI/ pa rA mu khI/A mA khI/ sha mi tA ni / sarba gra ha ban+d+ha nA ni/ ni gr-i hI twa / sarba pa ra pra bA di na pi mu k+tA mA ra pra shA s+thA pi tA/ bud+d+ha mu drA / sa mu d+g+ha ti tA sarba mA ra / a tsa li ta pa da pa ri shud+d+he / bi ga ts+tshan+tu / sarba mA karma Ni/ blo gros rgya mtsho sngags kyi tshig 'di dag ni bdud tshar gcad pa'i tshig nyon mongs pa bsal ba'i tshig ste/de dag chos smra ba des legs par kha ton du byas la chos kyi khri la 'dug ste/ byang chub kyi rnam pas mngon par sgrub pa'i byams pas 'khor thams cad la khyab par byas la/ bdag la sman pa'i 'du shes bskyed de/ chos la sman gyi 'du shes dang / chos nyan pa la nad pa'i 'du shes dang / de bzhin gshegs pa la skyes bu dam pa'i 'du shes dang / chos kyi tshul la yun ring du gnas pa'i 'du shes bskyed la/ sngags kyi tshig 'di dag mngon du byas te/ de chos kyi gtam byed na/ de'i khor yug dpag tshad brgya tshun chad du bdud kyi ris kyi lha rnams mtho btsam par bya ba'i phyir 'ong bar mi 'gyur ro//gang dag 'ong ba de dag gis kyang bar chad byed par mi nus so zhes gsungs so/ /yang de nyid las gsungs pa / chos smra bas gtsang sbra dang / kun du spyod pa gzob pa dang /legs par bkrus pa dang / legs par gos bgo bar bya'o zhes so/ /de ltar chos kyi sbyin pa dang / /byang chub sems ni mdor bsdu na/ /bsod nams 'phel ba'i rgyu yin no/ /dkon mchog za ma tog gi mdo las ji skad du 'jam dpal 'di lta ste/ dper na spos kyi shing ljon pa sna tshogs ni khams bzhis bzung nas rnam par 'phel lo//'jam dpal de bzhin du tshogs sna tshogs bsags pa'i byang chub sems dpa'i dge ba'i rtsa ba yang byang chub kyi sems kyis bzung zhing thams cad mkhyen pa nyid du yongs su bsngos na rnam par 'phel lo zhes gsungs pa bzhin no//phyogs 'di ni las dang po pa rnams 'phral du byang chub sems dpa'i bslab pa dran par bya ba'i phyir bstan te/ rgya cher ni sangs rgyas kyi yul nyid yin no/ /'dir/ bslab pa ji ltar brjod pa 'di'i/ /'grub pa yang dag spong rnams te/ /bag yod pa dang ma bral zhing / / dran pa dang ni shes bzhin dang / /tshul bzhin du ni sems pas so/ /de la sdig pa mi dge ba'i chos ma skyes pa rnams mi bskyed pa'i phyir 'dun pa skyed do 'bad do brtson 'grus rtsom mo sems rab tu 'dzin to yang dag par rab tu 'jog go zhes bya ba 'dis ni bsrung ba'o/ /sdig pa mi dge ba'i chos skyes pa rnams spang ba'i phyir 'dun pa skyed ces bya ba 'dis ni dag pa'o//dge ba'i chos ma skyes pa rnams bskyed pa'i phyir 'dun pa skyed pa dang / skyes pa rnams gnas pa dang 'phel bar bya ba'i phyir zhes bya ba 'dis ni 'phel ba bstan to/ /de dag kyang rtag tu bag yod pa dang ma bral bar bya ste/de ni dge ba thams cad kyi rtsa ba yin pa'i phyir ro/ /zla ba sgron ma'i mdo las ji skad du/ tshul khrims thos dang gtong dang de bzhin bzod/ /dge ba'i chos su brjod pa ji snyed pa/ /kun gyi rtsa ba bag yod 'di yin te/ /gter 'thob byed ces bde bar gshegs pas bstan//zhes gsungs pa bzhin no/ /bag yod pa zhes bya ba 'di ji lta bu zhe na/ 'dod pa las nyams pa dang mi 'dod pa byung bar dogs pa sngon du 'gro bas gzob pa lhur len pa ste/ 'di lta ste/ dper na rgyal po drag po khro zhing mgu dka' ba'i bran sman gyi 'bru mar gyis gang ba'i snod thogs te/stegs 'drod pa la 'gro bas bya ba bzhin no/ /de bzhin gshegs pa'i gsang ba'i mdo las gsungs te/ de la bag yod pa gang zhe na/ gang 'di dbang po sdom pa'o/ /de mig gis gzugs rnams mthong na mtshan mar mi 'dzin cing mngon rtags su mi 'dzin pa nas/yid kyis chos rnams rnam par shes na mtshan mar mi 'dzin cing mngon rtags su mi 'dzin pa yin te/ chos rnams kyi ro myang ba dang nyes dmigs dang 'byung ba yang yang dag pa ji lta ba bzhin du rab tu shes pa ste/ 'di ni bag yod pa zhes bya'o/ /gzhan yang bag yod pa ni gang rang gi sems 'dul ba dang /gzhan gyi sems rjes su srung ba dang / nyon mongs pa la dga' ba sel ba dang / chos la dga' ba'i rjes su 'jug pa la sogs pa 'di ni bag yod pa zhes bya'o/ /gsang ba pa'i bdag po su dad pa dang ldan zhing bag yod pa dang ldan pa des ni brtson 'grus gang gis bag yod par byed pa dang dad par byed pa'i chos de dag yang dag par sgrub par 'gyur ba'i brtson 'grus dang ldan par bya'o//gsang ba pa'i bdag po su dad pa dang bag yod pa dang brtson 'grus dang ldan pa des ni/ dran pa dang shes bzhin gang gis byang chub kyi phyogs kyi chos rnams chud za bar mi 'gyur ba'i dran pa dang shes bzhin dang ldan par bya'o//gsang ba pa'i bdag po su dad pa dang bag yod pa dang / brtson 'grus dang dran pa dang shes bzhin dang ldan pa des tshul bzhin du sbyor ba la brtson par bya'o/ / gsang ba pa'i bdag po tshul bzhin la brtson pa'i byang chub sems dpa' ni gang yod pa de yang yod par rab tu shes so/ /gang med pa de yang med par rab tu shes zhes bya ba nas/ kun rdzob tu mig la sogs pa yod do zhes bya ba'i bar du'o/ /de bzhin du de nyid las/ sems can don brtson byang chub sems dpa' ni//tshul bzhin nyid kyis dben sems gang yin dang / /rtag tu bag yod 'chi med rgyu yin te/ /yongs su 'dzin med bde ba kun gyi rgyu/ /zhes gsungs so/ /yang smras pa/ bdag gzhan mnyam nyid goms byas pas/ / byang chub sems ni brtan par 'gyur/ /bdag dang gzhan nyid ltos pa ste/ /pha rol tshu rol ji bzhin brdzun/ /dogs de rang gis pha rol min/ /gang la ltos te tshu rol 'gyur/ /bdag nyid rang gis mi grub na/ /gang la ltos te gzhan du 'gyur/ /gal te de la sdug bsngal bas//bdag la mi gnod phyir mi srung / /ma 'ongs sdug bsngal khyod la ni/ /gnod mi byed pas ci ste srung / /de tshe'ang bdag nyid yin snyam pa'i/ /rnam rtog de ni log pa ste/ /gang phyir 'chi ba gzhan nyid la/ /der skye ba yang gzhan nyid yin/ /gal te gzhan zhig der skyes na//bsod nams kyis ni ci zhig dgos/ /ci phyir gzhon tshe lus rgas pa/ /bde bar bya phyir nor stsogs byed/ /mngal na gnas pa zhig pa las/ /byis par gyur pa gzhan yin la/ /byis pa zhig nas gzhon nu nyid/ /de zhig nas ni dar la bab/ /de zhig nas ni rgas gyur te//lus ni ji ltar gcig par 'dod/ /de ltar skad cig so so bas/ /lus gzhan sen mo skra tshogs bzhin/ /ci ste byis pa'i tshang bor nas/ /byis pa gzhon nu nyid gyur na/ /gang zhig gnas skabs bral gnas pa/ /lus kyi rang bzhin brjod par gyis/ / lus ni sku gzugs 'dra zhe na/ /mar me thal ba la de med/ /gal te rags spangs phra dngos su/ /de la rnam par gnas she na/ /rang nyid bstan pa tsam 'gyur bas/ /de ni lus zhes brjod mi bya/ /de la bdag ni bsam pa med/ /snang ba'i lus ni 'jig dang ldan/ / gnas skabs rnams dang 'brel gyur pa/ /kun rdzob nyid du snang ba yin/ /lung gis kyang ni de yod na/ /rigs pa dang ni lung gis bzlog /'di ltar yon tan ma gtogs par/ /gtso bo yod pa ma yin la/ /gtso bo gsum yang yod ma yin/ /de bzhin yon tan yod na yang //de ni so so rnam gsum bdag /'gro ba lhag ma rnam pa dgur / /sems pa med pa gos la sogs/ /de bde'i bdag nyid ji lta bu/ /snam stsogs las skyes bde sogs min/ /snam stsogs las ni bde sogs yin/ /snam bu la sogs rgyu med phyir/ /med na de bde ga la yod//de ltar lung dang rigs pa yis/ /'dus byas thams cad mi rtag pa/ /de yi rgyu 'bras 'brel ba ni/ /mngon sum yin pas mi gnod do/ /de ni rang gi rgyud las mthong / /rtag pa la ni ji lta bur/ /phra rab rdul yang gcig min te/ /phyogs kyi dbye ba mi 'thad phyir//mar me'i 'bru mar zad 'gyur ba/ /zad 'gyur tshe na mngon pa med/ /de ltar dngos po zad par yang / /skad cig re re mi mngon no/ /rgyud dang tshogs zhes bya ba yang / /phreng ba dmag la sogs bzhin brdzun/ /de la goms pas ngar 'dzin na/ /gzhan la ci phyir skye mi 'gyur//de phyir skye mched tshogs bzhin du/ /'gro ba gcig tu shes par bya/ /ma byung nyid nas sdug bsngal de/ /gzhan gyi bdag las phyir bzlog bya/ /de yang mi rigs 'gyur zhe na/ /gzhan la'ang rang gi bdag nyid med/ /bdag gzhan mi rigs gang yin de//ci rigs par ni bzlog bya yin/ /snying rjes sdug bsngal mang gyur pas/ /ci phyir nan gyis skyed ce na/ /'gro ba'i sdug bsngal brtag byas na/ /ji ltar snying rje sdug bsngal mang / /de ltar rgyud ni goms gyur pa/ /gzhan gyi sdug bsngal zhi dga' bas//pad+ma'i nags su ngang pa ltar/ /mnar med par yang 'jug par 'gyur/ /sems can rnam par grol ba na/ /dga' ba'i rgya mtsho gang yin pa/ /de nyid kyis ni chog min nam/ /ro med thar pas ci zhig bya/ /de ltar gzhan gyi don byas pas//rlom sems dang ni ngo mtshar med/ /gcig tu gzhan don la dga' bas/ /rnam smin 'bras bu re ba med/ /phyogs bcu'i sems can phun tshogs de'i/ /bdag gi yin par gdon mi za/ /gzhan bde bdag gir 'du shes pas/ /bdag la phrag dog go skabs med//sdig pa bshags par bya ba dang / /bsod nams rjes su yi rang dang / /sangs rgyas bskul dang gsol gdab pa/ /gzhan dang bdag gi phyir byed do/ /yongs su bsngo ba de bzhin te/ /bye brag med par rab tu 'jug /de ltar sems can khams bzhin du/ / bsod nams mtha' yas rab tu 'byung / /lam 'di dam pa mchog yin te/ /bde ba mtha' yas dus ston bzang / /byang chub sems dpa'i ded dpon ches/ /gang zhig dga' ba 'phel ba yin/ /lag na rdo rje bsel mchog rnams/ /bdud kyi gcan pa skrag byed cing / / sangs rgyas phyag brnyan rnams kyis kyang / /rtag tu yongs su bsrung ba yin/ /rdzogs pa'i sangs rgyas rgyal ba'i sras/ /byang chub sems kyi shing rtar zhugs/ /lha la sogs pas stod byed cing / /lam de nas ni 'gro bar byed/ /de ltar sems can rnams la bdag / goms byas tshul gyis sgro btags te/ /bdag gzhan sdug bsngal zhi bya'i phyir/ /bdag la sogs pa rnam kun gtang / /gang zhig sred pas yongs zin pa/ /de yi sdug bsngal zhir mi 'gyur/ /'gyur bas rnam par chud zos nas/ /de ni 'di ltar sdug bsngal skyed / / 'jig rten sdug bsngal mes gdungs na/ /rang gi bde la dgar ci yod/ /kun nas tshig par gyur pa yi/ /lus la'ang bde ba ci zhig yod/ /bdag la chags par byed pa ni/ /sdug bsngal kun gyi rtsa ba mchog /de ltar sems can thams cad la/ /bdag nor gtang zhing de gzhom mo//rten cing 'brel 'byung bsam pa yis/ /bdag la ma chags dran byas te/ /'bad pa kun gyis de'i pho nya/ /dam pa shes khe 'dod pham bya/ /gang gis 'jigs pas de mi gtong / /de ma byin na 'jigs pa yin/ /'di ltar bdag gi lus dang sems/ / skad cig re res 'gro ba nyid/ /gal te mi rtag dri 'bab pa'i/ /lus kyis rtag cing dri med pa'i / /byang chub thob par 'gyur na ni/ /de ni rin med rnyed min nas / /rtsi sman gzugs dang 'dra bar ni/ /'jig rten chos la mi sems pas/ /da ltar bdag kyang gtang byos la//sems can kun gyi don du spyod/ /sems can kun phyir blon por ni/ /rang gi shes rab bkol bar bya/ /rigs pas nor de bsrung byas te/ /sems can rnams la mkho bar spyad/ /bdag gi lus dang gzhan lus la/ /sdug bsngal mang sel sdug bsngal gang / / de bya bde ba'ang de bzhin te/ /bde ba mang byed bskyed par bya/ /sems can longs spyod gegs byed phyir/ /bsgribs te nyon mongs sbyangs byas te/ /'jig rten 'tsho ba'i 'bab stegs nas/ /sprul gyi ro bsal bzhin du bya/ /bsod nams zhing 'di dag gyur na/ /phun sum lo tog 'bras bu che//bde ba'i mu ges gdungs pa yi / /'gro ba dag ni tshim par 'gyur/ /'thob dang bkur sti lus la sogs/ /skyo la bdag gis btang min nam/ /ci phyir da dung 'khrug par byed/ /bdag gis brdzun du de smras sam/ /rang don gnod byed la sdang na/ / 'o na snying rje gang du 'byung / /gal te gzhan don 'jig pa la/ /snying rje med pa'ang su zhig 'khrug /gla rtsi bu ram shing la sogs/ /bdag pos mi shes bzhag nyes te/ /longs spyod du ni mi rung bas/ /spyod brgyad la sogs 'os yin bden/ /bdag po la ni phan 'dod nas//rim gro bya bar sems pa med/ /de la bskul ba'ang mi byed de / /longs spyod phyir yang 'gro mi byed/ /ma rmos ma btab rgyal sras rnams/ /de dag rjes 'brangs nyer song ste/ /sna tshogs mi bzad khams rnams dang / /dbang po kun gyi sman chen 'gyur//de dag shes byas dran byas te/ /khro ba dang ni gnod byed kyang / /sdug bsngal rnams la zhim pa yi / /rang bzhin mi 'dor bde bar byed/ /sa dang chu dang me dang rlung / /nam mkha' zhes bya khams lnga po/ /sems can ji srid gnas srid du/ /kun gyi don ni byed pa ste//nyes spyod kun gyis de dag ni/ /sems can don las mi ldog go/ /de bzhin bdag gis khams drug po/ /'di dag don med mi bya'o/ /nam mkha'i mtha' ni ji tsam par/ /'jig rten mtha' ni srid gyur pa/ /de srid 'jig rten don byed pas//ye shes sngon btang gnas par bgyi/ /bya ba bsrungs na bdag la ni/ /bdag gis mi dri nan gyis su/ /slob dpon bdag gis rtag par bdag /slob ma mchog bzhin bslab par bya/ /bdag gi bla ma bdag 'dra bar / /bdag gi bag nyal skyon sus shes//bdag sdug bsngal dang bdag 'jigs pas/ /su zhig de ltar sdug cing 'jigs/ /skyo bar mi 'gyur 'gros mi 'gyur/ /snying rje yi yang yul gyur cig /rtag tu nye bar gnas gyur pa/ /slob ma bdag 'dra ga la yod/ /nyon mongs kyis smyo gti mug ldongs//g.yang sa mang po'i lam du ni/ /gom pa re re rdeg 'cha' ba/ /bdag dang gzhan rtag mya ngan gzhi/ /'gro ba rnams ni sdug bsngal mtshungs/ /de bas 'khrul pa btsal mi rigs/ /'di la yon tan mthong na ni/ /ngo mtshar chen po bya ba'i rigs//nyes pa rgya mtsho bdag gcig pu / /blang bar nus pa ma yin pas/ /'di na bdag la gzhan yang dgos/ /nyes las thar byed gzhan gang yin/ /pha rol bskul la mkhas pa po/ /gsol ba ma btab phan byed kyi/ /tshig ni spyi bos blang bar bya/ /bdag ni kun gyi slob par bya//nyon mongs dgra ni mang po dang / /gcig pu bdag ni g.yul 'gyed tshe/ /de na gcig dang 'thab pa na/ /gzhan ni bdag gi bde ba 'joms/ /sdang ngam mi sdang gyur kyang rung / /de na la la rgyab nas sam / /gzhan nas 'jigs pa sgrogs byed pa//de ni bdag la srog phangs sbyin/ /sdug bsngal kun gyi sman pa mchog /bde ba'i dga' ston rab tshogs zhing / /rnam pa kun du nyer 'tsho ba/ /'jam dbyangs khyod la phyag 'tshal lo/ /de ltar bde bar gshegs kyi sras/ /rnam kun rmad du byung rnams kyi//spyod pa nye bar bkod pa yi/ /dge ba bdag gis gang bsags pa / /bde gshegs go 'phang mtha' yas ni/ /nam mkha'i mtshams par dbang mdzad pa/ /de yi bde ba mtha' yas rnams/ /lus can dag gis thob par shog /bsod nams spel ba rdzogs so// //bslab pa kun las btus pa zhes bya ba byang chub sems dpa'i 'dul ba mdo sde du ma las btus pa/ slob dpon zhi ba'i lhas mdzad pa rdzogs so// /rgya gar gyi mkhan po dzi na mi tra dang / dA na shI la dang / zhu chen gyi lo tsA ba ban de ye shes sdes bsgyur cing zhus te gtan la phab pa/