CLOSE WINDOW

D3935
བོད་ཡིག

/ //[ ]@##/ /rgya gar skad du/ sU tra sa muts+tsha yA laM ka ra b+hA Sh+yaM rat+nA lo ka nA ma/ bod skad du/ mdo kun las btus pa'i bshad pa rin po che snang ba'i rgyan ces bya ba/ 'phags pa 'jam dpal la phyag 'tshal lo/ /yon tan rin chen ri bo rab brtan zhing //mtshan dang dpe byad bzang po'i 'od 'bar ba/ /nyer rten 'byung po'i dbul ba 'dor mdzad pa/ /mi shes mun bcom thub pa'i dbang po rgyal/ /rgyal bas gsungs pa'i mdo don rab zab cing / /bdag nyid chen po rnams kyi'ang de bzhin pa/ /dmus long nyi bzhin mthong bar mi nus kyang //yid ches lung gi tshad mas bshad par bya/ /gang phyir zab mo'i don la rtog ge yi/ /nus pa mnyam phyir bdag nyid che 'ga' zhig /klu sgrub thogs med tshul las nyams de'i phyir/ /mgon po'i thugs rjes [(]sa [,]su [)]bshad pa klan ka med/ /rtog pa dang ldan pa rnams dgos pa la sogs pa med na 'jug par mi 'gyur bas/bdag nyid chen pos rang gi bstan bcos kyi dgos 'brel gsungs pa ni/ mdo sde sna tshogs las btus pa/ theg pa chen po rin po che'i gtam bshad par bya'o zhes gsungs te/ gal te 'di'i 'brel pa dang brjod par bya ba ma smras na 'brel pa med pa'am/don med pa dag srid pas 'di la gzhan su'ang 'jug par mi 'gyur ba'i phyir/ de bzhin du 'brel pa dang brjod par bya ba yod du zin kyang bya ba'i las rdzogs pa'i khyad par ma brjod pa ni sgrub par byed pa ma yin no zhes bya bas kyang sgrub pa'i tshul las nyams pa kho na'o zhes bya ba 'di 'thad pas so//bstan bcos gzhan la med pa'i 'jug pa'i yan lag thun mong ma yin pa'i dgos pa med na mdo sde bsdu ba 'di la dad pas rjes su 'brang ba yang mnyan pa tsam du yang gus par mi 'gyur bas bya ba'i 'bras bu khyad par can der rtogs pa'i dgos pa brjod par bya'o//gzhan du rtogs pa ma yin te/ 'brel pa med pa'i phyir ro/ /gzhan 'jug par bya ba'i phyir dgos pa yod pa'i tshig dang der rtogs pa kho na brjod par bya'i/ de med pa dang gzhan du rtogs pas ni ma yin te rgyur ma gyur pa'i phyir ro/ /de yang khyad par can gyi don ston pa'i tshig la bya'i brjod par bya ba tsam mam sgra tsam don ston pa'i nus pa ma yin pas brjod par bya ba la sogs pa de kho nar rtogs par brjod par bya'o//bya ba'i ngo bo nyid dgos pa ma yin nam zhe na/ ma yin te ngag thams cad kyang rang gi don brjod par bya ba'i ston par byed pa'i mtshan nyid kyi bya ba ni thun mong ma yin pas thams cad la grags pa'i phyir dgos par gzung bar mi bya ste/de ni bstan bcos las gzhan du 'gyur ba med pa'i phyir ro/ /brjod bya med par dgos pa spangs pa'i phyir bstan pa ma yin te/ brjod par bya ba bstan pa nyes pa de dang bral ba'i phyir ro//de'i khyad par bstan pa'i phyir yang ma yin te/ brjod par bya ba'i khyad par bstan pa nyid kyis de bstan pa'i phyir ro/ /bya ba'i 'bras bu de 'ang 'bras bu'i dgos pa bstan par bya ba yin te/ de med par bya ba'i 'bras bu tsam gyis 'jug par mi 'gyur ro/ /de'ang mngon par thob par bya ba'ang 'dod pa'i 'bras bu'i mchog don du gnyer ba'i shes rab can rnams ni/de'i thabs la 'jug pa na/ rgyu med par 'bras bu grub pa med pas thabs shes pa la bslabs na thabs las 'byung ba'i 'bras bu byung ba'i phyir thabs rtogs par bya ba mdo'i don bsdu ba la 'jug go//de'i phyir 'jug pa'i yan lag gi gtso bo yin pas dgos pa'i yang dgos pa bstan par bya'o/ /de'i yang thabs su gyur pa 'brel pa la sogs pa ston pa'i gzhung gis de bstan par mi nus pas de'i dgos pa'i yang dgos pa'i thabs yang dag pa kho nar bstan pa'i phyir/ 'brel ba la sogs pa bshad do/ /de'i phyir/ 'brel pa rjes su mthun pa'i thabs/ /skyes bu'i don ni rjed byed pa/ /yongs brtags dbang du byas pa'i ngag /de las gzhan pa dbang byas min/ /zhes bya bas 'brel pa dang rjes su mthun pa'i thabs bstan par bya'o/ /de'ang bsgrub par mi nus pa ma yin te/snga rabs dag dmigs pa'i phyir dang / thabs nus par 'thad pa'i phyir/ thug pa med pa'ang ma yin te/ 'di tsam gyis don sgrub pa'i phyir la bya ba'i 'bras bu rdzogs pa yang mthar thug pa yin pa'i phyir ro/ /'dod par bya ba ma yin pa'ang ma yin te/ 'bras bu'i dam pa rnam pa thams cad mkhyen pa nyid la sogs pa ni 'dod par bya ba kho na'o//tshig tsam ni mi bzlogs pa ma yin no/ /zhes kyang brjod par bya ba ma yin te/ gegs ma mthong ba'i phyir dang / don 'grub pa bstan pa'i phyir ci ste na phrad pa srid pa'i sgo nas kyang ngo / /de lta ma yin na ni thams cad kyang bya ba la 'jug par mi 'gyur te/gegs srid pa'i phyir ro/ /rnam grangs gzhan yang 'phags pa klu sgrub ni lung bstan pa thob pa las kyang yid ches pa'i lung nyid pas 'di la 'jug pa yang rigs pa kho na'o/ /'brel pa ni logs shig tu bstan par mi bya ste/ 'bras bu med pas gal te gang brjod pas rtogs pa ma yin te/de ni logs su bstan par bya ba zhig na dgos pa brjod pas 'brel pa ma brjod pa ni med pa'i phyir ro/ /de yang 'di ltar bstan bcos dang dgos pa dag ni thabs dang thabs las byung ba'i ngo bor bstan gyi gzhan du yang ma yin pas 'di ni dgos pa brjod pa las logs shig tu brjod par mi bya ste/'di ltar 'di ni 'di'i dgos pa zhes bstan pa na/ 'di ni 'di'i sgrub pa'o zhes bstan te/ gzhan du gang zhig gang sgrub par mi byed pa de de'i dgos pa yin par 'gyur na shin tu thal ches pa'i phyir ro/ /de la brjod par bya ba ni 'dir tshul khrims dang ldan par gnas pa la sogs pa chos rnam pa bzhi'i ngo bo nyid rnam pa thams cad mkhyen pa nyid thob par byed pa'i lam mdo sde mtha' dag las bcom ldan 'das kyis gsungs pa yin no//dgos pa ni 'dir bcom ldan 'das kyi lung mtha' dag nas dam pa'i chos la brnyas pa spangs pa dang / bla ma la rag lus par bya ba'i phyir thor bur gsungs pa rnams 'phags pa klu sgrub gsung rab kyi don la ma rmongs shing /gzhan rjes su 'dzin pa'i thugs rje dang ldan pas gsal bar bstan pa yin no/ /dgos pa'i yang dgos pa ni 'dir ji skad bshad pa bzhin sgrub pa dang ldan pa las gnas skabs dang mthar thug pa dag tu 'bras bu'i mchog rim gyis 'grub pa yin no//de'i phyir lung snga ma las kyang brjod par bya ba ni don ston pa'o/ /dgos pa ni don shes pa'o/ /dgos pa'i yang dgos pa ni don grub pa'o/ /'brel pa ni thabs dang thabs las byung ba'o zhes gsungs pa yin no/ /de lta bas na kun las btus pa zhes bya bas ni dgos pa bstan te/theg pa chen po zhes bya bas ni dgos pa'i yang dgos pa bstan to/ mdo sde rin po che'i gtam zhes bya bas ni brjod par bya ba bstan to/ /de la mdo sde rnams las gsungs pa'i don bsdus te bstan nas sa dang lam gyi rim pa dang 'bras bu'i don ming gis yul can du shes pa ni dgos pa ni don shes pa'o//'dir smras pa/ bcom ldan 'das nyid kyis gsungs pa'i don 'chad na ni de zlos par 'gyur la/ 'on te ma yin no zhe na ni ji ltar lung 'chad par 'gyur zhe na/ ma yin te gsung gi don shin tu zab cing rtog ge'i yul ma yin la dgos pa dang tshig dang lung sna tshogs shing sna tshogs par bstan pa dang /sngar bshad pa lta bu dang ldan pa rnams shin tu gsal zhing zur phyin la nges pa'i don du gang zag cig gis nyams su blang bar bya bar gtan la 'bebs pas na nyes pa gnyi ga rgyang bsrings pa yin no/ /rnam grangs gzhan yang bsdus pa zhes bstan pa las kyang lus ha cang rgyas pa rnams tshig nyung ngur bstan pa'i phyir dang /rab tu byed pa rnams bstan bcos su byas pa las kyang don 'grel pas bstan bcos bsdus pa'i phyir dang / lung nyid las ma gtogs pa gzhan skabs kyis 'byed pas kyang nyes pa gnyis spangs pa yin no//de bas na mdo sde zhes bya bas ni rang bzo ma yin par bstan te/ phung po la sogs pa'i don mdor ston pa'i phyir mdo sde zhes bya'o/ /yang na ting nge 'dzin gtso bor ston pa'i phyir yang ngo / /sna tshogs zhes bya bas ni nges pa'i don du bstan te/ 'og nas 'chad par 'gyur ro//btus pa zhes bya bas ni zlos pa'i skyon spangs pa yin no/ /theg pa chen po zhes bya ba la/ theg pa'i sgra ni bzhon pa la bya ste/ gzhan du khyer bar byed pa'i phyir ro/ /chen po zhes bya ba ni chos chen po dang ldan pa'o/ /chos chen po gang zhe na/ 'phags pa klu sgrub kyi zhal snga nas sbyin pa dang tshul khrims dang bzod pa dang brtson 'grus dang bsam gtan dang shes rab dang snying rje ni theg pa chen po'o zhes gsungs so//'dir 'phags pa thogs med kyi zhabs kyis ni chos chen po las shin tu rgyas pa'i sde dang / sems bskyed chen po dang / chos chen po la mos pa chen po dang /lhag pa'i bsam pa chen po dang / tshogs chen po dang / dus chen po dang / yang dag sgrub pa po chen po dang / rnam pa bdun ni theg pa chen po'o zhes gsungs pa'i phyir/ don gyi skabs 'dir tshul khrims dang ldan pa la sogs chos rnam pa lngar 'phags pa klu sgrub kyis gsungs te thams cad kyang rig par bya'o//ji ltar zhe na/ 'phags pa klu sgrub dang 'phags pa thogs med kyis gsungs pa dag ni mthun pa nyid kyis chos de dag nyams su blangs pa 'di gzhi tshul khrims phun sum tshogs pa dang ldan pas thos shing bsams te bsgoms pas 'bras bu'i dam pa 'grub pa de bstan te/'phags pa thogs med kyis tshul bzhin du nyan pa dang / sems pa sngon du 'gro ba'i bsgom pa'i rnam pas 'jug par 'gyur la sgom pa dang ldan pas 'bras bu yongs su 'grub pas na nges par 'byin pa'o zhes gsungs pa'i phyir ro/ /nyan thos kyi theg pa dag gi spyod pa'i ming gis brtsad par mi bya ste don gyi khyad par shin tu che ba'i phyir ro//khyad par gang gis she na/ nyan thos dag gis gzhan la gnod pa spong bar zad kyi theg pa chen pos ni phan 'dogs par zhugs pa dag kyang yin no/ /de dag ni phung po la mkhas pa la sogs pa yin gyi/ theg pa chen pos ni rig pa'i gnas mtha' dag la mkhas pa yang yin no//nyan thos pa dag ni mya ngan las 'das pa mgo bcad pa lta bur lta ba la slob pa yin pas theg pa chen po pa ni mi gnas pa'i mya ngan las 'das pa la slob po/ /nyan thos dag ni theg pa sna tshogs su lta ba la theg pa chen po ni theg pa gcig tu slob po//nyan thos dag ni rang gi theg pa la brtson par byed kyi/ theg pa chen po pa ni theg pa mtha' dag la mkhas par byed do/ /nyan thos dag ni bdag med pa 'ba' zhig bsgom gyi theg pa chen po pa ni thabs dang shes rab zung du 'brel par sgom par byed do/ /de'i 'bras bu mthar thug pa'ang mi thob ste/lang kar gshegs pa'i mdo las/ blo gros chen po nyan thos dang rang sangs rgyas la thar pa med do zhes gsungs te/ re zhig pa 'di'i gnas tsam du zad do/ /de ltar lam dang 'bras bu dag ni gnas skabs dang mthar thug par dgos pa'i yang dgos pa bstan te don 'grub pa'i phyir ro//theg pa chen po'i dpe gang zhe na/ rin po che zhes spras te/ rin po che ni chos rnam pa bzhi dang ldan te/ gnod pa nye bar zhi bar byed pa dang / mun pa'i nang du 'od 'byin pa dang / dbul ba 'dor ba dang / dga' ba rgyas par byed pa'o/ /de bzhin du theg pa chen po yang yon tan bzhi dang ldan te/sdom pa'i tshul khrims dang / dge ba'i chos sdud pa dang / sems can gyi don byed pa'i tshul khrims dag ni yid dga' ba rgyas par byed pa'i rgyu yin pa'i phyir dang / ji skad bshad pa'i thos pa'i rnam pa dag ni 'phags pa'i nor bdun bskyed pa'i rgyu yin pas dbul ba 'dor bar byed pa dang /ming dang don gyi yul can gyi bsam pa'i shes rab rnam pa bzhi ni ma rig pa rnam pa gsum sel ba'i rgyu yin pas mun pa'i nang du 'od 'byin pa dang / don gyi yul can bsgom pa'i shes rab rnam pa gsum ni mthong ba dang bsgom pas spang bar bya ba'i sgrib pa 'joms pa'i rgyu yin pas spang bar bya ba'i gnod pa nye bar zhi bar byed pa ste/'di dag ni rgyas par bshad pa ni 'og nas 'chad do/ /gtam zhes bya ba ni thams cad du sbyar bar bya ste/ 'khor 'dus pa la gsungs shing bshad pa'o/ /bshad par bya'o zhes bya ba ni dam bca' ba'o/ /'brel pa ni shugs kyis go bas na thabs dang thabs las byung ba'i mtshan nyid kyis brjod do//da ni mdo'i don bshad par bya ste/ bcom ldan 'das kyis shes rab kyi pha rol tu phyin pa chen mo las ji skad du/ grogs po dag sangs rgyas 'byung ba ni dkon no/ /mir skye ba 'thob pa ni dkon no/ /dal ba phun sum tshogs pa ni dkon no//'khor ba las thar ba ni dkon no zhes gsungs pa ni mdo'i don 'phags pa klu sgrub kyis 'chad par bzhed nas rnyed par dka' ba bcu gcig tu gsungs te/ sangs rgyas 'byung ba shin tu rnyed par dka' ba nas bzung ste/ tha ma che ba rgya chen po la mos pa rnyed par dka' ba'i bar du'o//de la rnyed par dka' ba dang po gsum gyis ni/ sgrub pa'i rten dal 'byor dang ldan pa bstan to/ /dad pa dang byang chub tu sems bskyed pa dang snying rje rnyed par dka' ba gsum gyis ni byang chub tu sems bskyed pa brtan pa bstan to/ /byang chub sems dpa' la rma 'byin pa'i las kyi sgrib pa spang ba la sogs pa ni tshul khrims rnam par dag pa bstan to//dmigs pa la spyod pa la sgrib pa med de zhes bya ba la sogs pas ni thos pa'i rnam pa bstan to/ /mya ngan las 'das pa'i rang bzhin la mkhas par bya ba la sogs pas ni bsam pa'i shes rab bstan to/ /'jam dpal rnam par 'phrul pa'i le'u nas bstan pa la sogs pa ni bsgom pa'i shes rab bstan to//sangs rgyas dang byang chub sems dpa'i che ba rgya chen po bstan pa ste/ rnyed par dka' ba tha mas ni 'bras bu'i don bstan to/ /de ltar na chos 'di bzhi dang ldan na 'bras bu'i mchog 'grub pas mdo'i tshig 'di bzhis skyes bu'i don 'grub pas 'di las gzhan du ma bstan pa yin no//de la rten dal 'byor gyi mtshan nyid bstan pa'i phyir sangs rgyas 'byung ba shin tu rnyed par dka' ste zhes dam bca' ba yin no/ /de la mi khom pa brgyad las log pas na dal ba'o/ /'byor pa ni bcu ste/ rang gi 'byor pa lnga dang /gzhan gyi 'byor pa lnga'o/ /de la gzhan gyi 'byor pa lnga ni 'di lta ste sangs rgyas rnams 'byung ba dang / dam pa'i chos ston pa dang / chos bstan pa rnams gnas pa dang / chos gnas pa rnams rjes su 'jug pa dang / gzhan gyi phyir rjes su snying brtse bar byed pa'o/ /de la sangs rgyas rnams 'byung ba gang zhe na/'di ltar 'di na la la sems can thams cad la dge legs dang / phan pa'i bsam pa bskyed nas/ dka' ba stong phrag mang po dang / bsod nams dang ye shes kyi tshogs chen pos bskal pa grangs med pa gsum gyis tha ma'i lus phyi ma thob nas byang chub kyi snying po la 'dug ste/sgrib pa lnga spangs nas dran pa nye bar gzhag pa bzhi la sems legs par gnas te/ byang chub kyi phyogs kyi chos sum cu rtsa bdun bsgoms nas bla na med pa yang dag par rdzogs pa'i byang chub mngon par rdzogs par 'tshang rgya ba yin te/ de ni sangs rgyas 'byung ba zhes bya'o//'das pa dang / ma 'ongs pa dang / da ltar byung ba'i dus rnams su yang sangs rgyas bcom ldan 'das thams cad de kho na bzhin du 'byung ba yin no/ /dam pa'i chos ston pa gang zhe na/ sangs rgyas bcom ldan 'das de dag nyid dang / de dag nyid kyi nyan thos rnams 'jig rten du byung nas/'jig rten la rjes su thugs brtse ba'i phyir 'phags pa'i bden pa rnams las brtsams nas 'di lta ste gsung rab yan lag bcu gnyis ston par mdzad pa yin te/ de ni dam pa'i chos ston pa zhes bya'o/ /dam pa'i chos de ni dam pa sangs rgyas rnams dang / sangs rgyas kyi nyan thos kyis gdams shing bstan pa 'am bsngags pa yin pas de'i phyir dam pa'i chos te/de bshad pa gang yin pa de ni dam pa'i chos ston pa zhes bya'o/ /chos ston pa rnams gnas pa gang zhe na/ sangs rgyas bcom ldan 'das 'tsho zhing gzhes la chos kyi 'khor lo bskor te/ dam pa'i chos bstan pa nas sangs rgyas bcom ldan 'das yongs su mya ngan las 'das pa'i bar gyi dus ji srid par bsgrub pa mi nyams pa dang / dam pa'i chos mi nub pa yin te/ de ni dam pa'i chos gnas pa zhes bya'o/ /gnas pa de yang don dam pa'i chos mngon sum du bya ba'i tshul gyis yin par rig par bya'o//chos gnas pa rnams rjes su 'jug pa gang zhe na/ dam pa'i chos rtogs pa gang yin pa de nyid kyis skye bo rnams la dam pa'i chos mngon du bya ba'i skal ba dang / mthu yod par rig nas/ ji ltar rtogs pa kho na dang rjes su mthun pa'i gdams shing rjes su bstan pa la rjes su 'jug par byed pa yin te/de ni chos gnas pa rnams rjes su 'jug pa zhes bya'o/ /gzhan gyi phyir rjes su snying brtse bar byed pa gang zhe na/ gzhan zhes bya ba ni sbyin pa po dang sbyin bdag rnams te de dag gi 'tsho ba'i yo byad rkyen du 'bab pa 'di lta ste/ chos gos dang bsod snyoms dang / mal cha dang / stan dang / nad kyi gsos sman dang / yo byad gang yang rung ba de dag gi phyir rjes su snying brtse bar byed pa yin te/ de ni gzhan gyi phyir rjes su snying brtse bar byed pa zhes bya ste/ de ltar gzhan gyi 'byor pa lnga mtshon pa'i don du sangs rgyas 'byung ba smos so//'dir dang po gzhan gyi sbyor ba smos pas/ go rims las 'gal ba'i rgyu mtshan gang zhe na/ sangs rgyas 'jig rten du byung ba la sogs pa ni rang gi 'byor pa thob pa'i rgyu yin pa'i phyir ro/ /sangs rgyas zhes bya ba ni spangs pa dang ye shes kyi don te/ ji skad du/sgrib pa kun gyi dri med pas/ /rnam pa thams cad mkhyen nyid thob/ /rin chen snod ni phye ba ltar/ sangs rgyas nyid ni yang dag ston/ /ce'o/ /'byung ba zhes bya ba ni 'og min gyi gnas su/ chos dang longs spyod rdzogs pa'i skur mngon par sangs rgyas pa'i mdo las/ 'dzam bu'i gling la sogs par shAkya thub pa'i sku mngon par 'byung ste ji skad du/rin chen sna tshogs mdzes pa yi/ /'og min gnas ni nyams dga' bar/ /yang dag sangs rgyas der sangs rgyas/ /sprul pa po ni 'dir 'tshang rgya/ /zhes 'byung ba'i phyir ro/ /shin tu zhes bya ba ni mchog tu zhes bya ba'i don te/mos pas spyod pa'i sa la gnas pa dag spyod yul yin pa'i phyir te/ ji skad du/ de tshe chos kyi rgyun la ni/ /sangs rgyas rnams la zhi gnas dang / /ye shes spangs pa thob bya'i phyir/ /gdams ngag rgya chen thob par 'gyur/ /zhes 'byung bas mos pas spyod pa'i sa la gnas pa ma gtogs pa dag gis sprul pa'i sku ni mi mthong ba'i phyir de'i phyir rnyed par dka' zhes smos pa yin no//'o na mdo las gang dag bde ba can du smon lam 'debs pa de dag ni tshe dpag tu med pa mthong bar 'gyur ro/ /de bzhin du yang dag par rdzogs pa'i sangs rgyas mtshan legs par yongs su bsgrags pa zhes bya ba dang /shin tu yongs rdzogs dpal dang / rnam pa thams cad du cher mchod pa'i dpal zhes bya ba dang / yang bcom ldan 'das shAkya thub pa'i mtshan 'dzin pa de dag kyang phyir mi ldog cing sangs rgyas dang phrad par 'gyur zhes 'byung ba dang / 'gal bas ci mngon zhe na zhes rgol ba la/lan ni 'gal ba med de/ de dag ni sa bon rgyud la bskyed pas dus gzhan la dgongs pa yin la/ 'o na tshogs kyi sa la sangs rgyas dang phrad par 'gyur ba bstan pas de dang 'gal lo zhe na ma yin te/ sangs rgyas dang phrad pa'i dgos pa ni chos thos pa yin la/ de 'ang mos pas spyod pa'i sa chen po la 'byung ba'i phyir dang /chos ma thos par ni spang bya la sogs pa shes par mi 'gyur bas na don med par 'gyur ro/ /de lta ma yin na tha mal pa dag las kyang chos thos pa 'byung bas sangs rgyas dang phrad pa ci dgos she na/ de dag kyang sangs rgyas kyi mthus gdul bya rgyud dang /sa dag la snang bas na sangs rgyas kyi byin gyi rlabs kho nar 'dod de/ dper na/ sangs rgyas 'jig rten phan pa drang srong che/ /bskal pa bye ba brgya lam 'byung bar 'gyur/ /da lta dal ba dam pa rnyed pa las/ /gal te thar 'dod bag med spang bar gyis/ /zhes bstan pa lta bu'o/ /de bas na de dag kyang chos kyi rgyun thob pa la 'dod do//gzhan dag ni sa bon rgyud la bskyed pa'i rgyu yin pas 'gal ba med do zhes bya ba ni lung gi rigs pa'o/ /lung dngos bstan pa ni mdo sde du ma tshad mar gyur pa las shes te zhes bstan te/ rang bzo ma yin pas mdo sde zhes bya'o/ /nges pa'i don du bstan pas na du ma zhes smos te/lung gi don rigs pas brtags pa dang / lung bstan pas na byan byas pa dang / lung gi don lung gis bshad pa dang / lung gi don lung dang mi 'gal bar bstan pa ste/ mtshan nyid 'di bzhis na nges don du shes par bya la de bzhin mtshon pa'i phyir lung gi don lung dang mi 'gal ba dang /lung gi don lung gis bshad pa smos so/ /de nyid kyis mi bslu ba'i phyir tshad ma zhes bya ste/ yang dag par rdzogs pa'i sangs rgyas kyi gsung yin pa'i phyir ji skad du/ dge slong dag sa ni nam mkha' la 'phags kyang srid/nyi ma dang zla ba ni sa la lhung yang srid/ chu klung ni rgyun nas ldog kyang srid/ de bzhin gshegs pa'i bka' ni gzhan du 'gyur mi srid do zhes gsungs pa lta bu'o/ /ji skad du gsungs she na/ dge slong dag ces smos te/ nyon mongs pa bcom pa'i phyir dang / gsol ba dang bzhi'i las kyis bsnyen par rdzogs pa'i phyir dge slong dag ces gsungs so/ /de la phyin ci ma log pa gsungs pas na de bzhin gshegs pa zhes bya'o/ /thob par bya ba'i don thams cad brnyes pa dang / bsod nams kyi zhing bla na med pa yin pa'i phyir mchod par 'os pa yin pas dgra bcom pa zhes bya'o//chos rnams ji lta ba bzhin du don dam par thugs su chud pas yang dag par rdzogs pa'i sangs rgyas zhes bya'o/ /sku tshe dang / mtshan dang / sku dang rigs ma gtogs pa tha dad pa med pas rnams zhes bya'o/ /bskal pa zhes bya ba ni bar gyi bskal pa brgyad cu ste/bskal pa chen po'o/ /de nyid gcig nas gnyis su bgrangs pa ni stong phrag mang po'o/ /de la brgya stong phrag brgya na bye ba'o/ /bye ba rang gi 'gyur nas gnas bzhi pa ni khrag khrig go/ /'jig rten ni stong gsum du'o/ /dpe bsgrub pa ni kun dga' bo zhes smos te/kha dog ces bya ba ni bstan pa'i tshig go/ /gsal ba ni rang bzhin gyi mdog go/ /'od 'byin pas na 'od bzang po'o/ /dpag tshad ces bya ba ni/ lcags chu ri bong lug dang glang / /nyi zer rdul dang sro ma dang / /de las byung ba de bzhin du/ /sor ni nyi shu bzhi la khru/ /khru bzhi la ni gzhu 'dom gang //gzhu 'dom lnga brgya rnams la ni/ /rgyang grags de la dgon par 'dod/ /de brgyad dpag tshad ces bya'o/ /de'i yon tan gzhan bstan pa ni mig gi rab rib sel ba dang / yid kyi dran pa gsal bar byed pa dang / lus kyi nad sel ba dang / sna'i dbang po la phan 'dogs pas me tog de ni rab rib med par byed pa la sogs pa tshig bzhi smos so//gong du 'od bzang po smos pa ni snang bar yang byed ces bya ba ste gzugs mthong ba'i phyir ro/ /de la sna'i dbang po'i mi mthun pa spong bas na sel ba'o/ /mthun pa bskyed pas na 'byin pa'o/ /'o na sna'i dbang por zad dam zhe na/khams bzhi dang bar byed pa ste lus kyi dbang po dang / lce dang / mig dang / rna ba'i dbang po dag ni sa'i khams dang / chu dang / me dang / rlung gi khams yin la/ de dag la phan 'dogs pas dang bar 'gyur ba'o/ /'o na 'khor los sgyur ba'i rgyal po ni mtshan bzang po sum cu dang ldan pas de'i tshe 'byung ngam zhe na 'khor los sgyur ba'i rgyal po thams cad la yang zhes bya ba la sogs pa gsungs te/'khor los sgyur ba zhes bya ba ni/ gser dngul zangs lcags 'khor lo can/ /de dag gling gcig gling gnyis dang / /gsum dang bzhi la mas rim bzhin//phas su rang 'gro g.yul bshams dang / /mtshon brtsams las rgyal gnod pa med/ /ces bya ba'o/ /tshul khrims 'chal ba ni rnam pa gnyis te/ ma thob pa'i nyams pa dang / thob pa'i nyams pa'o/ /yang tshul khrims 'chal ba ni bzhi ste/ rtsa ba'i ltung ba lhag par spyad pa dang /so sor lta ba dang / yongs su ma dag pa'i chos 'chad pa dang / nyan thos dang rang rgyal ba'i bsam pa bskyed pas nyams pa'o/ /dus mnyam pa nyid ni mtshungs pa'o/ /de'i yon tan ni bshad mod kyi/ 'on kyang dbyibs dang / kha dog dang / gnas dang / dus ma brjod pas 'dri ba ni/me tog de ci 'dra gang du nam skyes she na zhes bya'o/ /de la gang du skye ba bstan pa ni mtsho chen po ma dros pa zhes bya ba la sogs pa ste/ 'di nas byang du ri nag po/ /dgu 'das gangs ri'i de nas ni/ /spos ngad ldan pa'i tshu rol na/ /chu zheng lnga bcu yod pa'i mtsho/ /zhes bya ba ste/dmyal ba'i mes kyang dro bar mi nus pas ma dros pa'o/ /yang rgyal po brtsams kyi 'bras khu'i don yin pas na dron po blugs pa grangs par gyur pas ma dros pa zhes bya'o/ /yang na klu'i rgyal po ma dros pa zhes bya ba gnas pas na ma dros pa zhes bya'o/ /nam skye ba bstan pa ni nam sangs rgyas bcom ldan 'das dag ces bya ba la sogs pa ste/sangs rgyas zhes bya ba'i don ni bshad zin to/ /yang na don dang ldan pa'i chos kyi tshogs dang / don dang mi ldan pa'i chos kyi tshogs dang / don dang ldan pa yang ma yin don dang mi ldan pa yang ma yin pa'i chos kyi tshogs mtha' dag rnam pa thams cad du mngon par rdzogs par thugs su chud pas na sangs rgyas zhes bya'o//bdud dpung dang bcas pa thams cad kyi g.yul chen po bcom pas na bcom ldan 'das zhes bya'o/ /yang na/ dbang phyug dang ni gzugs bzang dang / /dpal dang grags dang ye shes dang //brtson 'grus phun sum tshogs pa yi/ /drug po dag la ldan zhes bshad/ /ces pa'i tshul gyis kyang bcom ldan 'das so/ /sprul pa'i sku rnams mtshungs pas na dag ces bya'o/ /dga' ldan zhes bya ba ni 'dod pa'i lha rigs bzhi pa ste/ gzigs pa mtha' dag la gzigs nas 'dzam bu'i gling du byon pa'i tshe/glang chen thal kar mche ba drug ldan pa/ /rkang gnyis mchog dang ldan pas zhal bzhes nas/ /drang srong gnas zhes pa ni ji bzhin du/ /yum gyi lhums su 'jug pa nyid du bstan/ /zhes bya ba'i tshul gyis zhugs pa'o/ /'phags pa byams pa chos kyi rgyal tshab tu dbang bskur bas na babs pa'o//lha'i 'khor du mas bskor nas byon pas na ris zhes bya'o/ /mgo lcogs pa ni kha 'bu ba'o/ /lum pa'i tshal du shing blag sha'i yal ga yum gyis bzung ste/ glo g.yas pa dral ba'i tshe yang tshangs pa dang brgya byin gyis blangs pa'i tshe lha'i bus khrus byas shing ma brten par gom pa bdun bor ba ni bltams pa'o//me tog gyes pa ni kha 'bye'o/ /rdo rje'i gdan du rdo rje'i skyil mo krung gis rdo rje lta bu'i ting nge 'dzin la brten nas rang nyid kyis slob dpon med par chos thams cad rnam pa thams cad du mngon par rdzogs par sangs rgyas pa ni nam bla na med pa zhes bya ba la sogs pa ste/nyan thos dang rang sangs rgyas kyi rtogs pa las khyad zhugs pas na bla na med pa'o/ /phyin ci ma log pa'i don khong du chud pas na yang dag pa'o/ /spangs pa dang ye shes mthar thug pas na rdzogs pa'o/ /zad pa dang mi skye ba shes pa'i ye shes ni byang chub ces bya ste/dri ma zad dang mi skye ba'i/ /ye shes byang chub ces brjod de/ /zad med skye med phyir de dag /go rims bzhin du shes par bya/ /zhes pa'o/ /de nyid mngon sum du mdzad pas mngon par rdzogs par sangs rgyas pa zhes bya'o/ /rab tu rdzogs par smin pas na rgyas pa'o//gdul bya'i gang zag ma gzigs pas gzhan skyo ba bskyed pa'i phyir sprul pa'i sku'i snang ba nub par byed pas na 'dzam bu'i gling du dgung lo brgyad cu rtsa gcig la byon pa ni tshe'i 'du byed gtong bas na bor ba ste/ rnam par nyams pas na tshal rnyings pa'o/ /nam tha ma'i gsol ba ba'i don grub nas gyad kyi nye 'khor ku sha'i grong du glo g.yas pa phab pa'i tshe 'jig rten du cho 'phrul chen po ma byung ba dang /nyid kyi thub pa'i bka'i mes bzhen zhing 'dzam bu'i gling gi rgyan nub pa ni yongs su mya ngan las 'das pa ste/ sa'i steng du lhung bas na me tog la sogs pa lhags pa'o//mdzad pa dag ni bcu gnyis su bstan pa ma yin nam/ ci'i phyir bzhi smos she na/ bden mod kyi/ 'on kyang 'dir mdzad pa bzhi ni sangs rgyas thams cad kyi thun mong ma yin te/ bltams pa dang / mngon par rdzogs par 'tshang rgya ba dang / chos kyi 'khor lo bskor ba dang / mya ngan las 'da' ba med pa gang du yang mi srid la/dka' ba spyod pa la sogs pa ni thams cad du nges pa med de gdul bya rgyud dag pa dag la mdzad pa bzhis don 'grub pa'i phyir dang / kha cig srod la mngon par rdzogs par sangs rgyas nas/ de nyid kyi tho rangs yongs su mya ngan las 'das pa dag la mdzad pa bcu gnyis su rigs pa ma yin no//ci 'dra ba zhes bya ba che khyad ni shing rta'i 'khor lo tsam zhes bya'o/ /kha dog dang ldan zhing gsal te zhes bya ba la ni ji ltar kha dog dang ldan zhing gsal zhe na/ kha dog dkar rab tu 'gyur ro zhes bya ba ni rgyal rigs kyi nang du 'byung ba'i tshe'o/ /dkar por 'gyur ro zhes bya ba ni bram ze'i rigs kyi nang na 'byung ba'i tshe'o//ci'i phyir rigs gnyis kho na smos she na/ 'jig rten na mthun pa dang / dbang che bar grags pa'i rigs ni gnyis te/ mdun na 'don pa dang / rgyal rigs so/ /de la gal te rgyal rigs mchog tu byas na ni rgyal rigs su skye ba bzhes la mdun na 'don mchog tu bya ba ni/bram ze'i rigs su skye bar 'gyur te/ ci'i phyir zhe na/ des gzhan 'dul ba'i phyir ro/ /pad+ma dkar po'i mdo na drang ba'i don yin no zhe na/ gnyis pa nges pa'i don du bstan pa'i lung ni byang chub sems dpa'i sde snod las kyang zhes bya ba'o/ /kye zhes bya ba ni brgyad pa'i sgra'o//rgyal ba'i sras zhes bya ba ni rigs 'tsho ba'i phyir byang chub sems dpa'i ming gi khyad par te/ byang chub sems dpa' sems dpa' che/ /blo dang ldan pas gsal ba'i mchog /rgyal sras rgyal ba'i gzhi dang ni/ /rgyal ba'i myu gu rnam rgyal byed/ /rtsal dang ldan pa 'phags pa'i mchog /ded dpon grags pa chen po ste/ /snying rje can dang bsod nams che/ /dbang phyug de bzhin chos dang ldan/ /zhes bya ba lta bu'o/ /ri mor byas pa la sogs pa mthong ba yang tshogs bsags pa la rag lus pas na rnyed par dka' ste zhes bya'o/ /bskal pa grangs med pa dang po la mthong ba la mchog tu smos so//mos par spyod pa'i sa la sangs rgyas mthong ba ma yin pa tshogs kyi sa la 'dod pa dgag pa ni grogs po dag ces pa la sogs pa ste/ sangs rgyas 'byung ba'i dgos pa'i chos bstan pa yin/ bag yod pa'i chos ston pa zhes bya ba ste/chos thos pa la brten nas nyes pa ma byung gi snga rol la sogs pa'i bag yod pa rnam pa lnga yin pa ni/ bag yod pa ni mya ngan las 'das pa thob par byed pa'i phyir te/ bag yod 'chi med gnas yin te/ /bag med pa ni 'chi ba'i gnas/ bag yod 'chi bar mi 'gyur te//bag med pa ni rtag tu 'chi/ /zhes gsungs pa dang / bag yod pa'i legs pa lnga ste/ longs spyod rgya chen po thob cing de las mi nyams pa dang / phyogs mtshams su grags pa chen po 'byung ba dang / 'khor thams cad du zhum pa med pa dang / 'chi ba'i tshe 'gyod pa med pa dang / shi ba'i 'og tu lha'i 'jig rten du skye'o zhes bya ba la sogs pa bstan pas bag yod pa ni chos thams cad kyi rtsa ba yin pa'i phyir ro//gong du u dum wA ra'i me tog bzhin no zhes 'byung ba ni drang don de dpe mi byed pas so zhe na/ zla ba snying po'i le'u las kyang bstan te zhes bya ste/ dper brjod pa ni mdo gzhan dag las so//'o na sangs rgyas dang phrad pa la yon tan ci yod ce na/ yon tan gyi sgo nas bstan pa ni/ gang dag mthong zhing thos pa dang / /zhes bya ba la sogs pa ste/ don yod pa zhes bya ba ni thams cad la sbyar bar bya'o/ /gang phyir rgyal ba dbang po dag /mthong na ye shes mthong phyir ro//zhes bya ba la sogs pas ni mthong ba don yod pa bstan to/ /rin chen gtsug tor gyi mtshan lan gsum thos pas sum cu rtsa gsum gyi lhar skyes so zhes bya ba la sogs pa de ni thos pa don yod pa'o/ /bsnyen bkur byas pa don yod pa ni khye'u glang po skyong lta bu'o/ / mthar mya ngan las 'das pa thob par byed pas na 'dren pa'o/ /kha cig na re mthong ba dang thos pa dang bsnyen bkur bya ba ji ltar don yod ces 'jig rten 'dren pa'o zhes bya'o zhes 'chad do/ /byed pa ni mtshon pa'i don to/ /gong du de bzhin gshegs pa mthong yang srid mi mthong yang srid ces bya ba de lta bu zhe na/bskal pa bzang po'i mdo las kyang zhes gsungs te/ bskal pa drug cu dang / brgyad khri dang sum brgyar ni mi mthong bar 'gyur ro/ /bskal pa 'di dang / bskal pa skar ma lta bu dang / yon tan bkod pa rnams la ni mthong yang srid pa'o/ /sangs rgyas 'byung ba rnyed dka' ba bshad zin to//mdo sde kun las btus pa'i bshad pa lung gi tshad mar sbyar ba las/ sangs rgyas 'byung ba rnyed dka' ba'i gtam ste dang po'o// //gnyis pa mir 'gyur ba rnyed par dka' ba bstan pa ni/ mir 'gyur ba rnyed par dka' ste zhes bya ba gsungs te/ rang gi 'byor pa lnga mtshon pa'i don du mir 'gyur ba smras so//de la rang gi 'byor pa lnga gang zhe na/ mir gyur pa dang / yul dbus su skyes pa dang / dbang po ma tshang ba med pa dang / gnas la dad par gyur pa dang / las kyi mtha' ma log pa gang yin pa'o/ /de la mir gyur pa gang zhe na/ 'di ltar 'di na la la mi rnams dang skal ba mnyam par skyes pa/skyes pa'i dbang po dang ldan pa 'am/ bud med du skyes pa yin te/ de ni mir gyur pa zhes bya'o/ /yul dbus su skyes pa gang zhe na/ 'di ltar 'di na la la gang du/ 'khor bzhi po rnams dang / dam pa rnams dang / yang dag par song ba rnams dang /skyes bu dam pa rnams 'gro ba'i dbus kyi rkun ma yin pa rnams dang / kla klo ma yin pa rnams su skye zhing / rigs mthon po longs spyod phun sum tshogs pa dag tu skye ba yin te/ de ni yul dbus su skyes pa zhes bya'o/ /dbang po ma tshang ba med pa gang zhe na/ 'di ltar 'di na la la glen pa dang / dig pa dang / lkugs pa dang / lag pas brda byed par gyur cing / legs par gsungs pa dang / nyes par bshad pa'i chos rnams kyi don kun shes par mi nus pa ma yin pa dang / yan lag dang nying lag ma tshang ba med par gyur pa rna ba ma tshang ba med pa la sogs pa yan lag dang nying lag ma tshang ba med pas gang gis dge ba'i phyogs yang dag par bsgrub pa'i skal ba yod pa yin te/de ni dbang po ma tshang ba med pa zhes bya'o/ /gnas la dad par gyur pa gang zhe na/ 'di ltar 'di na la las de bzhin gshegs pas gsungs pa'i chos 'dul ba la dad pa dang /sems dang ba thob par gyur pa yin te/ de ni gnas la dad par gyur pa zhes bya'o/ /de la gnas zhes bya ba ni de bzhin gshegs pas gsungs pa'i chos 'dul ba la bya ste/ 'jig rten dang 'jig rten las 'das pa'i chos dkar po'i chos thams cad skye ba'i gnas su gyur pa yin no/ / des sngon du drangs pa'i dbang gis de la dad pa gang yin pa de ni gnas la dad par gyur pa yin te/ nyon mongs pa'i dri ma dang rnyog pa thams cad bsal bar gyur pa'i phyir ro/ /las kyi mtha' ma log pa gang zhe na/ gang gi tshe 'di nyid la mtshams med pa'i las lnga po dag las gang yang rung ba ma byas shing byed du ma bcug pa yin te/de ni las kyi mtha' ma log pa zhes bya'o/ /tshe 'di nyid la mtshams med pa'i las lnga po de dag byas shing bsags la yongs su ma spangs na yongs su mya ngan las 'das shing 'phags pa'i lam bskyed pa'i skal ba med pas na de'i phyir las kyi mtha' de dag ni las kyi mtha' ma log pa zhes bya'o//des bdag nyid kyi lus de yan lag lnga po de dag gi 'byor par byed pas na de'i phyir bdag gi 'byor pa zhes bya'o/ /de la rnyed par dka' ba'i 'og nas dpe bstan pa'o/ /'o na lung las/ ngas ni gang dag bstan pa yi/ /mi khom brgyad po de dag spong / /zhes bya ba la sogs pa gsungs pas me tog gcig phul ba tsam yang tha ma mya ngan las 'das pa'i rgyur gsungs na ni mi lus thob pa smos kyang ci dgos/de ni bden te/ 'dir ni de ni dud 'gro'i skye gnas su skyes pa nas mi lus thob pa la bya ste/ de ci'i phyir zhe na/ shin tu gti mug par gyur pa'i phyir/ dmyal ba la sogs pa dag ni rtog pa shas che zhing skyo ba bskyed cing thar par yang 'gyur ro//de ci mngon zhe na/ 'phags pa nyid kyi zhal nas/ rgya mtsho che gnas gnya' shing bug pa dang / /rus sbal phrad pa las kyang dud 'gro las/ /mi nyid ches thob dka' bas mi dbang gis/ /dam chos spyad pas de 'bras mchis par mdzod//ces gsungs so/ /rnam grangs gzhan yang dge ba bcu dang ldan pa las mi lus thob pa ni dka' ba ma yin no/ /de lta bas na las rnam pa gsum gyis na dpe ma nges pa ma yin no/ /de la phyogs snga ma ni ci lta zhe na zhes bya ba'o/ /lan ni dge slong dag ces bya ba la sogs pa ste/sa chen po ni dbus kyi gling bzhi ri rab dang bcas pa'o/ /dper na zhes bya ba la sogs pa ni dpe dgod pa'o/ /rus sbal smos pa ni de de'i gnas yin pa'i phyir dang / ha cang yang nyal ba'i phyir ro/ /thub pa ni tshe'i tshad do/ /'tsho ba ni kha zas kyis gnas pa'o/ /nges par bzung ba'i phyir bzlas te brjod pa ni/bcom ldan 'das stes na 'gyur lags so/ /bde bar gshegs bstes na 'gyur lags te zhes bya'o/ /de la bde bar gshegs pa zhes bya ba ni rang gi don phun sum tshogs pa dang / gzhan gyi don phun sum tshogs pa'o/ /de la rang gi don phun sum tshogs pa ni spangs pa dang /ye shes gnyis so/ /de la spangs pa phun sum tshogs pa ni mi ldog par gshegs pa ste rims nad legs par byang ba lta bu'o/ /ye shes phun sum tshogs pa ni ma lus par gshegs pa ste bum pa legs par gang ba lta bu'o/ /gzhan gyi don phun sum tshogs pa ni mdzes par gshegs pa ste gzugs bzang po lta bu'o//de la 'khor ba las thar ba ni zhi ba'o/ /phung po lhag ma dang bcas pa dang lhag ma med pa ste/ nyan thos dang rang rgyal ba'i theg pa ni bstan pa'i chos so/ /theg pa chen po ni rab tu bstan pa'o/ /stes na zhes bya ba ni las rnam pa gsum ci rigs pas so//las rnam pa gsum ni skyes nas myong ba dang / lan grangs gzhan la myong ba dang / ma nges par myong ba'o/ /dpe des smos pa ni gong du sbyar ba dang / 'og tu sbyar ba'i phyir ro/ /mdo sde kun las btus pa'i bshad pa/ lung gi tshad mas sbyar ba las/mi lus thob pa rnyed par dka' ba'i gtam brjod pa ste gnyis pa'o// //da ni dal ba 'byor pa rnyed par dka' ba de bstan pa'i phyir dal ba 'byor pa rnyed par dka' ba ste zhes dam bca' ba mdzad do/ /gong du bshad pa'i lung las 'byung ba de drang ba'i don ma yin nam zhe na/ gnyis pa ni nges don sgrub pa dang dal ba 'byor pa'i mtshan nyid rgyas par bshad pa'i phyir gsungs pa/ dal ba 'byor pa rnyed dka' ste/ /zhes bstan pa yin no/ /de nyid kyang mi lus thob par dka' ba bstan pa ni/ dal ba'i mtshan nyid bstan la/ dal 'byor rnyed dka' bas na 'byor pa lnga bstan te/ ngan song gsum las log pas na mir gyur pa'o/ /mtha' 'khob nas dge bsnyen ma mi 'ong ba'i nang du ma skyes pa'i bar gyis ni yul dbus su skyes pa'o/ /glen pa ma yin pa la sogs pa ni dbang po tshang ba bstan to/ /log par lta ba ma yin pas ni gnas la dad pa dang las kyi mtha' ma log pa/ sangs rgyas 'jig rten du byung bas ni gzhan gyi 'byor pa lnga bstan to/ /gzhan dag ni mi khom pa brgyad las log pa ni dal ba yin la/ mi khom pa gang zhe na/ sems can dmyal ba la sogs pa'o zhes bstan pa'i phyir de 'og nas kyang gang zag tshangs par spyod pa la gnas pa'i dal ba'i dus ni gcig ste/zhes 'byung ba'i phyir ro zhes 'dod do/ /de la bye brag mang po zhes bya ba ni theg pa mtha' dag ston pa las so/ /gcig las 'phros pa zhes bya ba ni gong du 'dzeg pa la bya'o/ /chos sgrub pa'i gnas ma yin pas mi khom pa'o/ /gtso bo bsdus pa ni brgyad ces bya ste/ rnam pa'i rab tu dbye ba ni mtha' yas pa'o//gang zag ces bya ba ni skyes pa dang bud med dag go/ /de la dmyal ba zhes bya ba ni khams bco brgyad do/ /dud 'gro'i skye gnas ni rigs bye ba phrag sum cu rtsa drug go/ /gshin rje'i rigs ni sum cu rtsa drug dag go/ /de la rang bzhin dang lus dang dngos po bstan pas ni dmyal ba'o//dud de 'gro ba'i phyir dang / blun pa'i phyir dud 'gro'o/ /gshin rje zhes bya ba ni 'gro ba'i bdag por gyur pa ste/ de'i rigs ni yi dags kyi 'jig rten no/ /de la dmyal ba'i khams ni bsdu na rnam pa brgyad de/ yang sos dang / thig nag dang / bsdus 'joms dang / ngu 'bod dang /ngu 'bod chen po dang / tsha ba dang / rab tu tsha ba dang / mnar med pa ste chu bur can la sogs pa brgyad ni yang sos la sogs par bsdu'o/ /nyi tshe ba dang nye 'khor ba 'ang tsha ba brgyad kyi 'khor du bsdu'o/ /dud 'gro'i skye gnas ni rdzus te skye ba dang / mngal nas skye ba dang / sgo nga las skye ba dang /drod gsher las skye ba ste skye gnas rnam pa bzhi'o/ /kham gyi zas dang / reg pa'i zas dang / yid la byed pa'i zas dang / rnam par shes pa'i zas can te 'tsho ba'i phyir yang rnam pa bzhi'o/ /rkang pa med pa dang / rkang gnyis pa dang / rkang bzhi pa dang / rkang mangs te gzugs can gyi rnam pa bzhi'o//yi dags ni phyi'i sgrib pa can dang / nang gi sgrib pa can dang / zas dang skom la sgrib pa can te bsdu na rnam pa gsum mo/ /de la dmyal ba dag ni rdzub pa'o/ /yi dags ni mngal nas skye ba dang / rdzub pa gnyis yod de/ mngal nas skyes pa ci mngon zhe na/ ji skad du/ bdag gis mtshan mo bu lnga dang //de bzhin nyin mo bu lnga dag /bskyed cing bskyed cing zos gyur te/ /'on kyang bdag ni 'grangs ma gyur/ /zhes bya ba lta bu'o/ /lha tshe ring po ni gzugs kyi khams kyi gnas rigs bzhi pa ste 'bras bu che'i phyogs gcig na gnas pa'o/ /de ci'i phyir mi khom pa yin zhe na/lus de zhi ba dang / tshe zad pa'i tshe log par lta ba'i phyir ro/ /'khor rnam pa bzhi mi 'ong bas na mtha' 'khob pa'o/ /mtha' 'khob gnyis gang zhe na/ rku 'phrog byed pa la sogs pa ste/ kla klo ni kla klo nyid la bya'o/ /brnab sems ni chags sems can te yid kyis bdag gir byed pa'i phyir ro//gnod sems ni zhe sdang ba can no/ /'khor rnam pa bzhi ni gtso bo smos pa ste/ dge tshul pha ni dge slong gi 'khor du bsdu'o/ /dge tshul ma dang dge slong ma ni dge slong ma'i 'khor du bsdu'o/ /bsnyen gnas ni dge bsnyen gyi 'khor du bsdu'o/ /yid shas chung bas na glen pa'o/ / de nyid kyis na don go ba'i mthu med pa'o/ /sgo lnga'i dbang po shas chung bas na lug ltar lkugs pa'o/ /de nyid kyis na lag brda byed pa'o/ /gang gi don zhe na/ legs par smras pa zhes bya ba la sogs pa ste/ phan pa'i don ston pas na legs par smras pa'o/ /phan pa ma yin pa'i don ston pas na nyes par smras pa'o//yang rna bar snyan pa ni legs par smras pa'o/ /de las bzlog pa ni nyes par smras pa'o/ /log par lta ba rnam pa gsum ste/ rgyu la skur ba dang / 'bras bu la skur ba dang / byed pa la skur ba'o/ /de la rgyu la skur ba ni sbyin pa yang med ces bya ba la sogs pa ste/ma chags pa'i dge ba'i rtsa ba nas sbyin pa ste/ de ni phyug pa'i rgyu yin pa'i phyir ro/ /de nyid snyoms par byed pa dang / dus bzang por sbyin pas na mchod sbyin te de ni rtsa 'jing dang skur bar 'gyur ba'i rgyu yin pa'i phyir ro/ /sbyin pa de nyid kyi khyad par ni sbyin sreg ces bya ste/ de 'byor pa'i rgyu yin pa'i phyir ro//des na/ bzlas la brtson na dga' 'gyur zhing / /bsgom la brtson na grol bar 'gyur/ /mchod la brtson na mchod 'gyur zhing / /me la sbyin sreg byas pas 'byor/ /zhe'o/ /byed pa la skur ba ni legs par byas pa yang med ces bya ba la sogs pa ste/ de la legs par byas pa ni srog gcod pa spong ba la sogs pa ste/de dag ni tshe ring ba la sogs pa'i rgyu yin pa'i phyir ro/ /nyes par byas pa ni srog gcod pa la sogs pa ste/ de dag ni tshe thung ba la sogs pa'i rgyu yin pa'i phyir ro/ /ji skad du/ srog gcod pa yis tshe thung 'gyur/ /ma byin len pas dbul ba nyid//byi 'o byas pas dgra dang bcas/ /brdzun du smras pas skur pa ste/ /phra ma yis ni bshes dang 'byed/ /rtsub po'i tshig gis mi snyan thos/ /ma 'brel smra ba tshig mi btsun/ /brnab sems yid la re ba 'joms/ /gnod sems 'jigs pa sbyin par bshad/ /log par lta bas lta ngan nyid//ces bya ba la sogs pa lta bu'o/ /de la 'bras bu rnam pa bzhi ste/ rnam par smin pa dang / rgyu mthun pa dang / dbang dang / skyes bu byed pa'o/ /'di dag gis bshad pa ni 'og nas zhib tu 'byung ngo / /de la gtso bo yin pa'i phyir rnam par smin pa zhes smras pa ste/ mi 'dra bar smin pas rnam par smin pa'o//ris mthun pa'i snang ba ni 'jig rten 'di'o/ /ris mthun pa dor ba'i ma 'ongs pa'i skye ba las kyi dbang gis 'grub pa'i pha rol lo/ /yod pa'i dngos po 'jig par byed pa ni pha yang med ma yang med ces bya ba la sogs pa ste/ de la dge sbyong zhes bya ba ni chos rnam pa lnga dang ldan pa'i phyir ro//bram ze ni spyod pa gtsang ba'i phyir/ kha na ma tho ba spangs pa'o/ /yang na rab tu byung ba sde lnga ste/ dge slong dang / dge slong ma dang / dge tshul pha dang / dge tshul ma'i sdom pa la brten nas don byed pa ni dge sbyong ngo / /khyim pa'i rtags skra dang kha spu ma bregs shing gos dkar po gyon bzhin du tshangs par spyod pa la sogs pa'i sgo nas don byed pa ni bram ze'o//yang na chos 'di ba'i cha byad can ni dge sbyong ngo / /phyi rol pa'i cha byad can bram ze'o/ /yang na dge sbyong ni rnam pa bzhi ste/ lam rgyal ba dang / ston pa dang / 'tsho ba dang / sun 'byin par byed pa'o//de la dang po'i dbang du byas nas de bzhin gshegs pa ni lam rgyal ba ste yang dag par song ba'o/ /chos smra ba dang legs par zhugs pa ni ston pa dang 'tsho ba ste zhugs pa'o/ /bram ze zhes bya ba ni rigs dang ming dang sgrub pa'i dbang du byas pas rnam pa gsum ste/ don gyi skabs 'dir sgrub pa bram ze la 'dod de bya ba byas shing mi dge ba'i chos thams cad bsal bas na yang dag par song ba'o//yang na slob pa dang mi slob pa dag ni mthong ba dang bsgom pas spang bar bya ba'i nyon mongs pa dag las rnam par rgyal bas na lam rgyal ba'i dge sbyong zhes bya ste/ de'i phyir rgyun du zhugs pa la sogs pa la sbyar bar bya'o//de la rgyun du zhugs pa dang / lan cig phyir 'ong ba dang phyir mi 'ong ba dag ni yang dag par song ba'o/ /de dag ni rgyu la zhugs pa gsum dang / dgra bcom pa'i rgyu la zhugs pa ni yang dag par zhugs pa'o/ /dgra bcom pa'i 'bras bu la gnas pa ni dgra bcom pa'o//dgra bcom pa'i yon tan gang zhe na/ 'jig rten rig pa zhes bya ba la sogs pa ste/ lha'i mig gi mngon par shes pa dang / 'chi 'pho ba dang skye ba shes pa'i mngon par shes pa dang / zag pa zad pa'i mngon par shes pa ni 'jig rten rig pa'o/ /de las bzlog pa ni gang zag tshangs par spyod pa la gnas pa dal ba'i dus ni gcig ste zhes bya ba la sogs pa yin no//de bzhin gshegs pas bstan pa'i chos gang zhe na thog mar dge ba zhes bya ba la sogs pa gsungs te/ chos kyi yon tan gyi rnam grangs ni 'di lta ste/ bshad par bya ba dang / khong du chud par bya ba'o/ /de ci'i phyir zhe na/ ston pa'i dam chos rnam gnyis te/ /lung dang rtogs pa'i bdag nyid do/ /de 'dzin byed dang smra byed dang / /sgrub par byed pa kho na'o/ /zhes 'byung ba'i phyir ro/ /de lta bas na bshad par bya ba'i chos bstan par bya ba ni thog mar dge ba/bar du dge ba/ tha mar dge ba zhes bya ste/ lhag pa'i tshul khrims kyi bslab pa ston pas thog mar dge ba ste/ tshul khrims dang ldan pa yin te/ so sor thar pa'i sdom pas bsdams pa dang / cho ga dang spyod yul phun sum tshogs pa dang / kha na ma tho ba phra rab dag la 'jigs par lta ba'o//bar du dge ba ni lhag pa'i sems kyi bslab pa ste/ 'dod pas dben pa la sogs pa'i bsam gtan bzhi'o/ /tha mar dge ba ni lhag pa'i shes rab kyi bslab pa ste/ 'phags pa'i bden pa bzhi shes par 'dod pa'i zag pa dang / srid pa dang / ma rig pa dang / lta ba'i zag pa las sems rnam par grol ba'i ye shes mthong bar 'gyur ba'o//de lta bu'i dus gsum du dge ba'i chos de yang ci 'dra zhe na/ brjod bya'i don ma log cing mchog tu gyur pa don phun sum tshogs pas don bzang ba'o/ /a la sogs pa rjod byed kyi tshig gsal zhing don myur du go bar byed pas tshig 'bru bzang po'o//de lta bu'i chos des ci zhig sgrub cing ston ce na/ tshangs par spyod pa zhes bya ba ste/ phung po lhag ma dang bcas pa la sogs pa'i mya ngan las 'das pa ni tshangs pa'o/ /de la ci mngon zhe na/ mdo las zhi bar gyur pa tshangs par gyur pa/ bsil bar gyur pa zhes bya ba ni mya ngan las 'das pa'i grangs so zhe'o//de'i rgyu yin pa'i phyir spyod pa ste/ lam gyi 'dus byas kyi gtso bo yin pa'i phyir ro/ /de yang / zag bcas zag pa med chos dang / /lam ma rtogs pa'i 'dus byas rnams/ /zag bcas gang phyir de dag la/ /zag rnams kun tu rgyas par 'gyur/ /zhe'o/ / de'i phyir na tshangs par spyod pa zhes bya bas ni rtogs par bya ba don dam pa'i chos bstan to/ /don dam pa'i chos de ci 'dra ba zhe na/ mu stegs can dang ma 'dres pa'o/ /lam des khams gsum gyi nyon mongs pa spong bas yongs su rdzogs pa'o/ /lam de rang bzhin gyis rnam par grol bas na yongs su dag pa'o//lam de zag pa zad pa rnams kyi rgyud la skyes te rgyud kyi dag pas dag pa'i phyir yongs su byang ba'o/ /la la dag ni thos pa'i tshe dad pa bskyed pas thog mar dge ba'o/ /sems pa'i tshe dga' ba bskyed pas bar du dge ba'o/ /bsgom pa'i tshe blo rgya chen po bskyed pas tha mar dge ba'o//mtho ris dang thar pa'i rgyu yin pa'i phyir mtho ris dang byang grol gyi don 'byung bas don bzang po'o/ /de 'chad pa'i tshig gsal zhing zur phyin pas tshig 'bru bzang po'o zhes zer ro/ /kha cig na re mu stegs kyi chos kyi gnyen po yin pas/ thog ma la sogs par dge ba'o//de ci'i phyir zhe na/ de dag tshig snga phyi 'gal ba 'byung ste/ mi 'tshe ba ni chos kyi mchog ces 'byung la/ phyugs bsad de mchod sbyin byas na mtho ris su 'gro zhes bya ba dang / brdzun gyis slu ba sdig pa'i mchog /ces 'byung la/ rtsed mo dang / mi tshangs par spyod pa dang /bag ma len pa dang / nor 'phrog pa dang / srog gi phyir ni brdzun smra bar bya zhes 'byung ngo / /yang bdag tu smra bas na don bzang po ma yin no/ /ma 'brel pa dang / mi gsal ba dang / cal col du smra bas na tshig 'bru ngan pa'o/ /mi thod can dang / gcer bu pa dang 'dres pas ma 'dres pa yang ma yin no//sa 'og ma'i gnyen po tsam yin pas yongs su rdzogs pa yang ma yin no/ /rang gi sa pa'i nyon mongs pa 'byung bas yongs su dag pa yang ma yin no/ /sa gzhan gyi nyon mongs pa'i yid dang rjes su 'brel pa sa rnam par byang ba yang ma yin no/ /mya ngan las 'das pa'i rgyu ma yin pas tshangs par spyod pa yang ma yin no zhes zer ro//gzhan dag ni thog mar dge ba ni don bzang po'i phyir ro/ /bar du dge ba ni tshig 'bru bzang po'i phyir ro/ /tha mar dge ba ni ma 'dres pa la sogs pa tshig lnga yin no zhes kyang zer ro/ /'o na dal ba 'byor pa rnyed par dka' ba bstan pa drang ba'i don ma yin nam zhe na/nges don gyi lung bstan pa ni grogs po dag ces bya ba la sogs pa yin no/ /kha cig ni lung gzhan bstan pa'i sgo nas don bsdu ba yin no zhes kyang 'dod do/ /la la dag ni dal ba 'byor pa ji ltar rnyed par dka' zhe na/ gtan tshigs gzhan bstan te dper na/a ka ru nag po 'ga' zhig tu dri 'byung gi gtan du ma yin pa ltar dal ba 'byor pa yang tshul khrims dang ldan zhing rgyu ma tshang ba med par tshogs pa las thob kyi gyi na thob par mi 'gyur ro zhes bstan pa'i phyir mdo 'di smos so zhes zer ro/ /kha cig ni mdzes par bya ba'i phyir dang nges don du bya ba dang /tshul gzhan gyis bshad par bshad pa dang / slob dpon rang nyid kyis gzigs pa bstan pa'i phyir bshad pa dang ma bshad pa'i lung gi don mtha' dag bstan par rig par bya'o zhes zer ro/ /kha cig ni mdzes par bya ba'i phyir/ de ltar na mdo sde sangs rgyas snying po las dge slong dag dal 'byor ni rnam pa bcu ste/gzhan gyi 'byor pa lnga dang / rang gi 'byor pa lnga'o zhes bya ba gsungs pa'i don slob dpon gyis mdo du mas bshad pa yin no/ /da ni zla ba'i snying po'i le'u las 'byung ba'i dal 'byor gzhan bstan pa'i phyir/ yang de nyid las 'byung ba zhes smras so//rnam par dag pa zhes bya ba ni yon tan bcu dang ldan pa'o/ /mnyam pa nyid ces bya ba ni ma tshang ba med pa'o/ /de nyid bstan pa ni/ rigs dma' ba spangs pa dang zhes bya ba la sogs pa'o/ /de la rigs mtho bas na rigs dma' ba spangs pa'o/ /ci mi shes pas na glen pa'o/ /bye brag mi phyed pas na blun pa'o//zhar ba dang rlig pa phyung ba la sogs pa ni dbang po nyams pa'o/ /pho'i dbang po dang ldan pa dang / de ma nyams pas phor skyes pa'o/ /'o na bud med kyang ci'i phyir ma smos she na/ rten dman pa'i phyir ma smos so/ /gzugs legs pas na gzugs bzang po'o/ /'byor pa dang ldan pas ni mi dbul ba'o//gzi brjid che bas na mi brnyas pa'o/ /tshig btsun pas na tshig mnyan pa'o/ /mang pos bkur bas na skye bo mang pos lta ba'o/ /de la mnyam pa nyid bcu yongs su rdzogs pa ma yin pas gegs su 'gyur na ni ha cang thal ches par 'gyur la/ ma yin na don med par 'gyur ro zhe na/ma yin te 'on kyang yon tan tshad mar bstan pa'i phyir 'di smos pa nyes pa med do/ /mdo kun las btus pa'i bshad pa lung gi tshad mas sbyar ba las dal ba 'byor pa rnyed par dka' ba'i gtam brjod pa ste gsum pa'o/ /dal 'byor gyi mtshan nyid bshad zin to// //da ni byang chub kyi sems bstan pa bshad par bya'o//de la re zhig mtshams sbyor ba ni de bzhin gshegs pa'i bstan pa la dad pa rnyed par dka' ste zhes bya'o/ /ci'i phyir zhe na/ sangs rgyas bye ba khrag khrig brgya stong la bsnyen bkur byas na gzod dad pa thob po zhes gsungs pa'i phyir ro/ /de la bstan pa ni dam pa'i chos lung dang rtogs pa'i bdag nyid la bya'o//dad pa ni mi phyed pa'i mtshan nyid dang ldan pa'o/ /de ni rnam pa gsum ste/ dang ba'i dad pa dang / yid ches pa dang / 'dod pa'i dad pa'o/ /de dag kyang yul ni dkon mchog la sogs pa rnam pa gsum la ci rigs par skye ba'o/ /'o na lung las kyang dad pa gang zhe na/las dang 'bras bu bden pa dang / dkon mchog gsum la mngon par yid ches pa dang / 'dod pa dang sems dang ba'o zhes pa dang 'gal lo zhes rgol ba'i dad pa ji lta bu zhe na zhes bya ba'o/ /lan ni de dgongs pa'i don te/ bye brag gam sgo nas spyi mtshon pas 'gal ba med pa bstan pa de ni de bzhin gshegs pa'i gsang ba'i mdo las zhes bya ba la sogs pa'o//'di la zhes bya ba ni dad pa bstan par bya ba'i skabs 'di la'o/ /rigs kyi bu'am rigs kyi bu mo zhes bya bas ni dal 'byor thob pa'i gang zag bstan to/ /stong pa nyid dang snying rje mi phyed pa dang ldan pa ni lhag pa'i bsam pa'o//sems bskyed de zhes bya ba ni smon pa'i bdag nyid do/ /spyi'i don la gnas skabs kyi stobs kyis dgos pa bye brag tu bstan pas na dad pa yin zhes bya'o/ /de'i phyir dad pa bstan par bya ba ni dang ba mang zhing zhes bya ba la sogs pa ste/ byed pa dang / yul dang / ngo bo nyid dang / phan yon yang rig par bya'o//de la byed pa ni rnam pa gsum ste/ dang ba'i byed pa dang / 'dod pa'i byed pa dang / yid ches pa'i byed pa'o/ /de la dang ba'i byed pa ni nor bu chu dang byed ltar rgyud kyi rnyog pa med pa ste/ phyir zhing 'phags pa rnams la lta 'dod pa dang / dam pa'i chos nyan par 'dod pa'o/ /de la dang ba ma yin pa ni rtag tu bsgom pa'i phyir ro//'phags pa ni las dang nyon mongs pa las ring du song ba ste/ yang dag par rdzogs pa'i sangs rgyas dang / de'i dge 'dun dag go/ /dam pa ni gang zag de dag ste/ de dag gis spyad pa'i phyir dam pa'i chos so/ /'dod pa'i byed pa ni ser sna med pa la sogs pa ste/thob pa dang spangs pa la dmigs pa'i phyir mya ngan las 'das pa thob pa'i rgyu lam gyi bden pa dang / sdug bsngal gyi rgyu kun 'byung la dmigs pa'o/ /sdug bsngal gyi rgyu kun 'byung spangs pa'i phyir ser sna med ces bya ba ste/ ser sna dang 'chal pa'i tshul khrims la sogs pa dag ni sdug bsngal gyi rgyu yin pa'i phyir ro//mya ngan las 'das pa'i rgyu lam gyi bden pa thob par bya ba'i phyir lhug par gtong ba dang zhes bya ba la sogs pa ste/ ma chags pa'i ngo bo nyid la sogs pa pha rol tu phyin pa drug ni lam du 'dod pa'i phyir ro/ /de la lhug par gtong ba ni sbyin pa dang 'bras bu ma 'brel ba ste mya ngan las 'das pa bsngo ba'i phyir ro//lag pa brkyang ba ni gus pa dang rgya cher rab tu sbyin par bya'o/ /gtong ba la dga' ba ni snga rol dang de'i tshe dang byin zin nas yi rang ba dang / dang ba dang / 'gyod pa med pa'o/ /sbyin pa mi 'chad par byed pa ni gcig tu chos dang bab col ma yin pas longs spyod sgrub ste dus dus su yang dang yang du sbyin par bya ba'i dngos po yongs su gtong ba'o//gtong ba phun sum tshogs pa ni sbyin gnas dag la 'bul ba'o/ /sbyin pa 'gyed par dga' ba ni dus dus su pha dang ma dang bu dang bran pho dang bran mo la sogs pa la kun 'gyed pa'o//yang na sbyin pa rnam pa drug ste/ mi rten pa dang / /dga' ba dang / yang dang yang du sbyin pa dang / snod du gyur pa la sbyin pa dang / yongs su gzung ba sbyin pa dang / 'khor la sbyin pa ste/ de ltar sbyin pa dang / gang la sbyin pa'i dbang du byas nas lhug par gtong ba la sogs pa rnams su rig par bya'o//rnam grangs gzhan yang mi srid pas lhug par gtong ba'o/ /mi 'gyod pas na dga' ba'o/ /gus pa dang ldan pas mchod sbyin no/ /lus dang longs spyod dang dge ba gtong bas gtong ba phun sum tshogs pa'o/ /rjes su dga' bas 'gyed pa la dga' ba'o//gtong ba'i tshe na khong khro ba med pa'o/ /'bras bu 'dod pa'i re ba med pas rnyog pa med pa'o/ /yang na pha rol tu phyin pa drug gis zin pa ste/ de la sbyin pa'i sbyin pa ni lhug par gtong ba'o/ /tshul khrims ni dga' ba dang gus pa'i mchog sbyin no/ /brtson 'grus ni gtong ba phun sum tshogs pa'o//bzod pa ni dga' ba dang khong khro ba med pa'o/ /bsam gtan dang shes rab kyis zin pas na rnyog pa med pa ste/ de ltar na sbyin pa ji lta ba bzhin du tshul khrims kyi sbyin pa la sogs pa rig par bya ste/ 'dir ni mtshon par rig par bya'o/ /yid ches pa'i byed pa bstan pa ni las dang las kyi rnam par smin pa la yid ches pa dang zhes bya ba la sogs pa'o//de la yis ches pa la sogs pa gsum ni som nyi med pa la sogs pa gsum dang sbyar bar bya'o/ /yang na mi phyed pas yid ches par bya'o/ /nges par 'dzin pas mos pa'o/ /bye brag phyed pas rtogs pa'o//thos pa'i tshe som nyi med pa'o/ /bsam pa'i tshe the tshom med pa'o/ /bsgom pa'i tshe yid gnyis med pa'o zhes kha cig 'dod do/ /la la dag ni sbyor ba la sogs pa gsum du som nyi med pa la sogs pa yin no zhes so/ /lus can rnams kyis las dag ni/ / bskal pa brgyar yang chud mi za/ /tshogs shing dus la bab pa na/ /'bras bu nyid du 'gyur ba yin/ /zhes gnyen pos ma bcos par zad par mi 'gyur bas chud mi za'o/ /chud mi za ba ci zhig gnod/ /nyon mongs pa spong na so sor ma brtags pa'i 'gog par 'gyur ro/ /ma yin te chud mi za ba zhes bya ba ni gnyen pos ma bcos na 'bras bu bskyed pa la bya ste/nyon mongs pa zad na de ni 'dod pa kho na ste/ thog ma med pa'i las dag ji ltar zad par 'gyur zhe na/ gnyen pos bsgom zhing rgyu 'gog pas na mi bya ba mi byed pa'o/ /nges don bstan pa'i sgo nas bsdu ba ni/ yang de nyid las 'byung ba zhes bya ba yin no//'dun dang zhe sdang 'jigs pa dang / /rmongs pas gang zhig chos mi 'da'/ /zhes bya ba'i tshul gyis ni bya ba kha na ma tho ba mi byed pa ste/ gzhan du na/ nga yi bstan la ma gus gang / /de yis nga mthong ci zhig bya/ /zhe'o/ /dad pa'i yul bstan pa'i phyir dad pa ni zhes bya ba la sogs pas mtshams sbyor te/dge ba'i chos ni dkar po'i chos mtha' dag bskyed pa'i rgyu byang chub kyi sems so/ /sngon du 'gro ba ni/ rgyal dang rgyal ba'i chos la dad gyur cing / /byang chub bla na med la dad gyur pa/ /sangs rgyas sras kyi spyod la dad byed na//skyes bu dam pa rnams kyi sems skye'o/ /zhes 'byung ba lta bu'o/ /de la dad pa rnam pa gsum gyis yul gang la dad par gyur zhe na/ 'di ltar de bzhin gshegs pa la sogs zhes bya ba la sogs pa gsungs te/ dad pa'i yul ni rnam pa gsum ste/ sangs rgyas dang chos dang dge 'dun dang /sdug bsngal dang kun 'byung ba dang 'gog pa dang / lam dang / las dang / 'bras bu rnams so/ /yul de gsum mtshon pa'i don du de bzhin gshegs pa smos te/ gtso bo yin pa'i phyir ro/ /de bzhin gshegs pa de'i yon tan gang rnams she na/ 'di lta ste/ phung po yongs su dag pa'i yon tan dang /brjod pa yongs su dag pa dang / mdzad pa yongs su dag pa dang / mkhyen pa yongs su dag pa dang / gzigs pa yongs su dag pa dang / mngon par 'phags pa'i yon tan rnams so/ /de la phung po yongs su dag pa ni/ tshul khrims kyi phung po dang /ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba'i ye shes gzigs pa'i phung po'o/ /brjod pa yongs su dag pa ni ji lta ba las brtsams nas chos rnams kyi rang bzhin brjod pa dang / ji snyed yod pa las brtsams nas chos kyi rnam grangs brjod pa'o//mdzad pa ni rnam pa gnyis te/ mi rtog pa dang / dus thams cad pa'i phrin las so/ /mkhyen pa ni rnam pa drug ste/ rdzu 'phrul gyi yul shes pa dang / lha'i rna ba'i mngon par shes pa dang / gzhan gyi sems shes pa dang / 'chi 'pho dang /skye ba shes pa dang / sngon gyi gnas rjes su dran pa dang / zag pa zad pa mngon par mkhyen pa'o/ /gzigs pa ni rnam pa lnga ste/ sha'i spyan dang / lha'i spyan dang / shes rab kyi spyan dang / chos kyi spyan dang / sangs rgyas kyi spyan no/ /mngon par 'phags pa ni rnam pa gsum ste/ sku dang / gsung dang thugs kyis mngon par 'phags pa ste/ de bzhin gshegs pa'i yon tan ni mdor bsdu na 'di dag tu zad de/ ci'i phyir zhe na/ rang dang gzhan gyi don mtha' dag bsdus pa'i phyir te/ lung las yon tan ji snyed brjod pa thams cad kyang 'di gnyis kho nar zad do/ /de la zag pa med pa'i phung po lnga las gtso bo yin pa'i phyir/rnam par grol ba'i ye shes mthong ba'i phung po ni sgrib pa med pa'i ye shes mthong ba zhes smos pa yin no/ /ji lta ba las brtsams nas chos kyi rang bzhin brjod pa ni des bstan pa ni mthong bar dka' ba zhes bya ba la sogs pa gsungs te/ tshu rol mthong ba'i yul ma yin pas shes par dka' ba'o/ /tshad ma'i yul ma yin pas shes par dka' ba'o/ /'phags pa'i spyod yul du gyur pas zab pa'o/ /spros pa dang bral bas rgyu ba chad pa'o/ /gzhi ma grub pas mig kyang med ces bya ba la sogs pa'o/ /chos can med pa la chos mi 'thad pas mi 'gag pa yang med ces bya ba la sogs pa gsungs pa'o//de lta mod kyi 'on kyang kun rdzob tu ji snyed yod pa las brtsams te/ chos rnams kyi rnam grangs brjod pa ni yan lag drug cu dang ldan pa zhes bya ba la sogs pa gsungs te/ gsung yan lag drug cu ni/gsang ba bsam gyis mi khyab pa'i mdo las shes par bya'o/ /de las ci byed ce na/ 'khrul pa mtha' dag gi gnyen po yin pa'i phyir ro/ /ngag gi las yongs su dag pa dang zhes bya ba la sogs pa gsungs pa yin no/ /de ltar rgyas par bshad pa bsdu ba'i phyir mi mkhyen pa'am zhes bya ba gsungs te/ji lta ba'i don mkhyen pas mi mkhyen pa med pa'o/ /ji snyed yod pa mkhyen pas ma gzigs pa med pa'o/ /de gnyis ka'i ngo bos mngon sum du ma mdzad pa med pa dang / mngon par sangs rgyas pa med pa'o/ /mdzad pa yongs su dag pa ni/ spyan yongs su dag pa dang ldan pa zhes gsungs te/nyin mtshan lan drug tu gzigs pas na kun nas spyan dang ldan pa'o/ /yang na gdul bya dus gsum pa rnams yal bar mi 'dor bar dus thams cad pa'i phrin las dang mi rtog pa'i phrin las kyis gzigs pas na kun nas spyan dang ldan pa'o/ / drug mngon par mkhyen pa'i gtso bo yin pa'i phyir zag pa zad pa'i mngon par shes pa bstan pa ni/ 'dod chags dang bral ba zhes bya ba la sogs pa'o/ /gzigs pa yongs su dag pa spyan lnga las dang po yin pa'i phyir/ sha'i spyan smos te/ mthar thug pa med pas dpag tu med pa'o//mngon par 'phags pa'i yon tan las sku mngon par 'phags pa ni/ spyi gtsug bltar mi snang ba'o/ /kun rdzob kyi bden pa ston pas zab pa'o/ /don dam pa'i bden pa ston pas don dam pa ston pa ste/ 'di gnyis ni gsung mngon par 'phags pa'i yon tan no//thugs mngon par 'phags pa ni/ sangs rgyas kyi chos thams cad kyi bla na med par gyur pa ste/ de la mtshan bzang po sum cu rtsa gnyis dang / dpe byad bzang po brgyad cu mtshon pa'i phyir sku mngon par 'phags pa'o/ /gsung yan lag lnga dang ldan pa bstan pa'i phyir gsung 'phags pa bstan te/gsung yan lag lnga gang zhe na/ yongs su shes shing rnam par shes par 'gyur ba dang / mnyan na bde zhing mi mthun pa med pa dang / zab cing dbyangs rjes su 'byung ba dang / gtang mi bra zhing rnar snyan pa dang / ma 'khrugs shing gsal ba'o// byang chub kyi phyogs kyi chos sum cu rtsa bdun dang / tshad med pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / zad par gyi skye mched bcu dang / zil gyis gnon pa'i skye mched brgyad dang / nyon mongs pa med pa dang / smon nas mkhyen pa dang /so so yang dag par rig pa bzhi dang / rnam pa thams cad du yongs su dag pa bzhi dang / dbang bcu dang / stobs bcu dang / mi 'jigs pa bzhi dang / srung ba med pa gsum dang / dgongs pa nye bar gzhag pa gsum dang / bsnyel ba mi mnga' ba'i chos nyid dang / bag chags yang dag par bcom pa dang / thugs rje chen po dang / ma 'dres pa'i chos bco brgyad dag ni sangs rgyas kyi chos thams cad de thugs mngon par 'phags pa'o/ /yon tan rnam pa gsum po 'di dag ni shes rab kyi pha rol tu phyin pa las rig par bya'o/ /de dag gi ngo bo nyid gang zhe na/de la dad pa'i stobs gang zhe na zhes bya ba la sogs pa gsungs te/ dad pa ni rnam pa gsum ste/ yid ches pa dang / dang ba dang / 'dod pa'i dad pa'i ngo bo nyid do/ /de la mi brdzi bas ni stobs zhes bya ste chen po zhes bya ba'i don to/ /de la yid ches pa'i ngo bo nyid ni mngon par dad pa dang zhes bya ba la sogs pa ste/sangs rgyas kyi chos ni des gsungs pa'i las dang 'bras bu phyin ci ma log pa'i mtshan nyid de/ las dang las kyi rnam par smin pa zhes bya'o/ /de la lus la sogs pa'i mngon par 'du byed pa ni las zhes bya ste/ dge ba la sogs pa rnam pa gsum mo//rnyog pa ni bdag tu lta ba yin la/ mos par spyod pa'i sa la chos thams cad bdag med par yid ches pa ni rtog pa med pa'i sems so/ /chos thams cad ces bya ba ni phyi dang nang gi dngos po thams cad de/ gcig dang du ma dang bral ba'i phyir/ ngo bo nyid med pas stong pa nyid dang /rang dang gzhan gnyi ga dang rgyu med pa las mi skye bas rgyu'i mtshan ma med pa dang / yod pa dang med pa dang gnyi ga las mi skye bas 'bras bu smon pa med pa dang / de'i phyir 'du byed thams cad dang bral nas mngon par 'du mi byed pa ni rnam par rtog pa thams cad kyis dben pa ste ma mthong ba'i lam gyi mnyam par gzhag pa'i gnas skabs su dad pa'o//de'i rjes la thob pa nas sa lnga pa'i bar du thabs shes rab zung du 'brel pa'i ngo bo nyid du dad pa ni sbyin pa la sogs pa'o/ /sa drug pa nas bcu pa'i bar du shes rab rnam pa bzhi ni rten cing 'brel par 'byung ba shes pa la sogs pa ste/de ltar na pha rol tu phyin pa bcu ni mthong ba dang bsgom pa'i lam la yid ches pa'i ngo bo nyid do/ /la la dag ni mtho ris kyi rgyu ni las dang las kyi rnam par smin pa'o/ /nyon mongs pa'i sgrib pa spong ba ni rnyog pa med pa'o/ /shes bya'i sgrib pa spong bas na stong pa nyid la sogs pa'o//theg pa mchog 'dod pas na pha rol tu phyin pa drug ste/ mdor na mtho ris dang byang grol gyi sa la yid ches pas yin no zer ro/ /la la dag ni dngos su byung ba dang zhar la byung ba'i don te/ las dang las kyi rnam par smin pa la dad pa ni dngos su yid ches pa'i dad pa ni yin la/rnyog pa med pa'i sems la sogs pa ni zhar las byung ba ste/ de la rnyog pa ni gzung ba dang 'dzin pa'o/ /de dang bral ba'i rang rig pa'i sems 'od gsal ba'i ngo bo nyid ni rnyog pa med pa'i sems so/ /kun tu brtags pa dang /gzhan gyi dbang dang yongs su grub pa'i rang bzhin dag ni mtshan nyid dang / skye ba dang / don dam pa'i ngo bo nyid med pas stong pa nyid la sogs pa nyid yin la/ 'od gsal ba'i sems las ma gtogs pa'i sems gzhan gyi ngo bo nyid tshol bar mi byed pa dang /chos nyid sems las gzhan pa'i sems gzhan no/ /yod pa ma yin rang bzhin brjod do zhes 'byung bas mngon par 'du mi byed pa'o/ /de ltar lta ba rnam par dag pas spyod pa phun sum tshogs pa ni pha rol tu phyin pa rnam pa drug dang bsdu ba'i dngos po bzhi bstan to zhes 'dod do//dang po'i ngo bo nyid ni dang ba'i mtshan nyid ni dad pa ste zhes bya ba ste/ 'dod chags la sogs pa'i rtog pa dang bar byed pas na nor bu chu dang ltar dang bar byed pa'o/ rtog pa med pa nyid gang zhe na/ gang chags pa med pa zhes bya'o/ /yul gang zhe na/ theg pa chen po zhes bya ste/rnam pa bzhi ni theg pa chen po rgyud dang bar byed pa'i gtso bo yin pas theg pa chen po smos so/ /gzhan dag ni dang ba'i dad pa ni mos pa gtso bo yin pas mos par spyod pa'i sa la 'dod de/ re zhig tshogs kyis la sgra'i rjes su 'gro bas byang chub sems dpa' rtag tu ngu dge ba'i bshes gnyen dang shes rab kyi pha rol tu phyin pas shin tu skom nas ngu zhing cho nges 'debs te/nyin mtshan bdun 'das pa lta bu dang / rgyal po la gdams pa las/ yang dag par rdzogs pa'i sangs rgyas kyi gzugs brnyan mthong bas zhag bdun du mig mi 'dzums par lta zhing mchi ma'i rgyun mi 'chad par byung zhing zhes bya ba dang /'phags pa nor bzangs kyis dge ba'i bshes gnyen mthong ma thag tu mig mchi mas gang bar ngus te zhes bya ba lta bu'o/ /de'i phyir tshogs kyi sa la ni theg pa la mos pa mi bzlogs pas na dad pa'i stobs zhes bya'o//drod dang rtse mo'i gnas skabs na dbang byed pa'i phyir dbang po'o/ /bzod pa dang chos kyi mchog tu mi brdzi ba'i phyir stobs zhes bya'o/ /'dir gtso bo yin pas dad pa 'ba' zhig smos te brtson 'grus la sogs pa yang rig par bya'o/ /de la lus la sogs pa la ma zhen pas chags pa med pa khong du chud pa ste/dper na byang chub sems dpa' rtag tu ngu brla'i sha btogs shing rus pa gcog pa dang / lag pa phug ste khrag gzag go zhes pa lta bu'o/ /ma zhen pa ni rang bzhin med par khong du chud pas dngos por lta bas mi brdzi ba'i phyir stobs zhes bya'o zhes 'chad do//de ltar dang ba'i ngo bo nyid bshad nas 'dod pa'i dad pa'i ngo bo nyid bstan pa ni gzhan yang zhes gsungs pa'o/ /bden pa bzhi rtogs par 'dod pas dge ba'i bshes gnyen la brten pa ni gzhan gyi sgra la dad pa'o/ /de la dad pa ni 'dod pa'i dad pa'o//ji ltar zhe na 'og nas gzhan gyi sgra thos nas mngon par dad pa zhes 'byung ba'i phyir ro/ /'dod pa ni 'dun pa ste/ gzhan gyi sgra dang tshul bzhin yid la byed pa las don rnyed pa'i phyir ro/ /de la sdug bsngal dang / kun 'byung dang / 'gog pa dang / lam dag ni shes par bya ba dang / spong bar bya ba dang / mngon du bya ba dang / rgyud la bskyed par 'dod pa'i phyir dang po gzhan gyi sgra la dad pa ste/ chos thos par 'dod pa'o/ /chos gang zhe na/ sbyor ba rim can du bslab par bya bas bden pa bzhin rtogs par bya ba'i phyir ro/ /sbyor ba rim can zhes bya ba ni tshul khrims dang /thos pa dang / bsam pa dang / bsgom pa la bya ste/ 'di na dang por thos la brten nas yid la byed pa 'byung / /tshul bzhin yid la byed las yang dag don yul ye shes 'byung / /de las chos thob de yod de las blo gros rab tu skye/ /gang tshe de ni so so yang rig med na ji ltar nges//zhes bya ba lta bu'o/ /de lta bas na dang po smon pa dang ldan pa'i sems rgyud la bskyed pas na byang chub kyi sems yang dag par 'dzin pa'o/ /'jug pa'i sdom pa len pas na spyod pa'o/ /mthong ba'i lam gyis bsdus pa'i sems rnam pa bcu ni byang chub kyi sems so//lam de la 'jug pa'i rgyud pa'i 'byor pa ni rnam pa gsum ste/ de gsum mtshon pa'i phyir 'gyur ba med pa ni bsam pa'o/ /dngos kyi sbyor ba 'bras bu gsum dang ldan pa ni sbyor ba'o/ /rang gi don bsgrub pa'i thabs ni pha rol tu phyin pa'o//gzhan gyi don bsgrub pa'i thabs ni bsdu ba'i dngos po'o/ /gnyi ga'i bsgrub pa'i rgyu ni thabs la mkhas pa ste/ dge ba'i bshes gnyen no/ /'bras bu'i ngo bo nyid ni sngar bshad pa'i chos rnams te/ sangs rgyas kyi chos so/ /lam rnam pa bzhi ni byang chub sems dpa'i chos de dag ni sbyor ba rim bzhin du bslab pa rnams so//la la na re mos pa gtso bor gyur pa'i dang po'i ngo bo nyid kyi bzod pa dang chos kyi mchog tu dad pa'i stobs gtso bor bshad pa de la ci'i phyir stobs zhes bya/ gang gis brdzi bar mi nus she na/ byang chub kyi sems la sogs pa 'og nas 'chad pa rnams dang ldan pas stobs zhes bya la/de dag gis mi mthun pa zil gyis non pas na mi brdzi ba'o/ /byang chub kyi sems la sogs pa rnams dang ldan pa ni yongs su 'dzin pa la rag lus pas gzhan gyi sgra'o/ /gzhan las zhes bya ba ni yang dag par rdzogs pa'i sangs rgyas la sogs pa ste/de tshe chos kyi rgyun la ni/ /sangs rgyas rnams la zhi gnas dang / /ye shes yangs pa thob bya'i phyir/ /gdams ngag rgya chen rnyed par 'gyur/ /zhes bya ba lta bu'o zhes 'dod do/ /da ni phan yon bshad par bya ste/ shA ri'i bu zhes bya ba la sogs pa skabs 'byed pa yin no//de la mdo gcig gis bshad pa ni byang chub sems dpa'i sde snod las kyang zhes bya'o/ /mdo du ma'i sgo nas bshad pa ni/ zla ba snying po dang / klu'i rgyal po rgya mtshos zhus pa las bstan pa'o/ /de la dang ba'i phan yon ni/dang ba mang ba dang / 'phags pa rnams la lta 'dod pa dang dam pa'i chos nyan par 'dod pa'o/ /yid ches pa'i phan yon ni/ las dang las kyi rnam par smin pa la yid ches pa'o/ /'dod pa'i phan yon ni mi dge ba bcu'i las kyi lam spong zhing zhes bya ba la sogs pa ste/sdug bsngal gyi rgyu yin pa'i phyir ro/ /mi dge ba bcu'i mtshan nyid ni 'og nas ston to/ /bya ba dang bya ba ma yin pa'i ngo bo nyid yin pa las kyang yin la/ bde 'gro dang ngan 'gro'i lam yang yin pas las kyi lam mo/ /phan yon dang ldan pa'i dad pa skye ba'i rim pa gang zhe na/dang ba'i dad pa dang ldan pa dag ni yid ches par 'gyur ro/ /yid ches na 'dod pa'i 'dun pa skye bar 'gyur te/ 'di ni go rims so/ /de'i phyir dad pa brtan par bya ba'i thabs bshad par bya ste/ dang po mtshan nyid dang ldan pa'i dge ba'i bshes gnyen la gsol ba gdab par bya ste/slob dpon khyod las bdag byang chub kyi sems bskyed par bya ba'i phyir dad pa'i rtsa ba brten pa'i thabs nod par 'tshal gyi thugs brtse ba'i slad du bstan du gsol/ des kyang rigs kyi bu dkar po'i chos mtha' dag gi rtsa ba dad pa brtan par 'dod pa ni legs so/ / de'i phyir khyod kyis yang dag par rdzogs pa'i sangs rgyas mtshan sum cu rtsa gnyis dang dpe byad bzang po brgyad cu dang ldan pa yid la gyis shig dang / des khyod lus kyi ba spu ldang ba dang / mchi ma 'khrug pa'i dang ba nyon mongs pa med pa skye bar 'gyur ro/ /yang na ji ltar thos pa'i rnam par yid la gyis shig dang /yang na 'phags pa'i gang zag gi tshogs kyi rnam pa de ltar yid la gyis shig dang de kho na bzhin du 'gyur ro/ /de'ang rtag tu bsgom zhing brtan por bya'o zhes bya ba bstan par bya'o/ /yang rigs kyi bu khyod kyis 'di lta bu'i rgyu yid ches par bya ste/ dkar po'i chos mtha' dag las skyes pa rigs kyi bu de bzhin gshegs pa'i sku ni chos kyi sku ste bsod nams brgya las skyes pa'o zhes bya ba la sogs pa 'og nas 'byung ba lhar yid ches pa'i dad pa bskyed par bya'o/ /de'i phyir khyod kyis sku 'di lta bu la 'dod pa bskyed de thob pa don du gnyer bar bya'o//mi dge ba mtha' dag spang bar bya'o/ /'khor ba'i phung po lnga'i sdug bsngal shes par bya'o/ /'phags pa'i lam yan lag brgyad pa bsgom par bya'o/ /mya ngan las 'das pa thob par bya'o zhes bstan nas/ de dag kyang de kho na bzhin du bsgoms pas mi phyed pa dang ldan pa ni dad pa'i rtsa ba brtan pa zhes bya'o//de'i phyir dang por dge ba'i bshes gnyen sten par byed pa ni dad pa can de dge sbyong dang bram ze zhes bya ba la sogs pa'o/ /de la yang dag par song ba ni 'bras bu thob pa de'i rgyu ni mang du thos pa dang / thos pa la brtson pa ni lung len pa'i dge ba'i bshes gnyen no//tshul bzhin yid la byed pa ni/ bsgrub pa'i dge ba'i bshes gnyen no/ /'di dag gis ni so so'i skye bo'i dge ba'i bshes gnyen bstan to/ /'phags pa'i gang zag ni the tshom las brgal ba dang / yang srid zad pa'o/ / bla na med pa'i dge ba'i bshes gnyen ni rdzogs pa'i sangs rgyas so/ /gang zag de dag gang zhe na/ byang chub sems dpa' dang sangs rgyas kyi nyan thos zhes smos so/ /yid ches pa la sogs pa gsum ni dang po dang bar dang tha mar bstan to/ /'di dag gis ni dang po'i dad pa bsgom pa'i thabs bstan to//las dang rnam par smin pa ston to zhes bya ba ni yid ches pa bsgom pa'i thabs bstan to/ /snod du rig nas zhes bya ba la sogs pas ni 'dod pa'i dad pa bsgom pa'i thabs te mya ngan las 'das pa thob par 'dod pas bden pa gnyis ldan du bsgom par bya ba ni stong pa nyid dang zhes bya ba la sogs pa ste/de la don dam pa'i bden pa bstan pa ni stong pa nyid la sogs pa'o/ /'on kyang rkyen nyid 'di pa tsam du yod pas rten cing 'brel par 'byung ba'i gtam mo/ /stong pa nyid la sogs pa ni bshad zin to/ /chos nyid la rgyu 'bras mi 'thad pas na ma skyes shing ma byung ba'o//kun du brtags pas med pas na bdag la sogs pa med pa ste/ nga rgyal ba'i phyir bdag go/ /zhum pa'i phyir sems can no/ /'tsho ba'i phyir srog go/ /'byung zhing 'jigs pas gang zag go/ /rgyu rkyen tshogs pa las 'bras bu 'byung bas rten cing 'brel par 'byung ba'o//ji ltar thos pa bzhin bsgrub pas chags pa med par 'jug ces bya ba la sogs pa gsungs te/ chags pa ni dngos por zhen pa'o/ /lhag par zhen pa'i gnas yin pas phung po la sogs pa smos te/ spungs pa'i phyir phung po'o/ /rigs kyi don yin pas khams so//skye ba'i sgo yin pas skye mched do/ /de dag kyang chad pa'i gnas spangs pa rang bzhin gyis zhes bya ste/ ngo bo nyid kyis stong pa'i phyir ro/ /'o na thob par bya ba med do zhe na/ sangs rgyas kyi ye shes tshol zhes bya ba ste/ stong pa nyid bsgom pa ni sgom pa rnams kyi dam pa yin pas/des mya ngan las 'das pa 'gog pa thob par 'gyur te/ sgom pa rnam par mi sgom pa'i/ /sgom pa dam pa 'dod pa ste/ /thob par lta ba med rnams kyi/ /thob par yang ni dam par 'dod/ /ces 'chad pa lta bu'o/ /stong pa nyid de yang thabs kyis yongs su zin pas bstan pa ni bag yod pa la gzhol ba yin no zhes bya'o//de nyid bshad pa ni/ dbang po sdom pa zhes bya ba la sogs pa'o/ /de'i phyir 'og nas kyang / thabs dang bral ba'i shes rab ni 'ching bar bshad do/ /da ni mdo du ma'i sgo nas dad pa'i phan yon bstan pa'i phyir/zla ba'i snying po'i le'u las kyang zhes bya ba la sogs pa gsungs te/ dad pa'i phan yon ni/ dper na yid bzhin gyi nor bu rin po che dper brjod pa bzhin no zhes gsungs te/ sngar bshad pa'i yon tan rnams thob par byed pa'i phyir ro/ /yid ches pa dang 'dod pa'i phan yon spyir bstan pa ni/mos pa'i stobs zhes bya ste/ mos pa ni nges par 'dzin pa'o/ /gang la mos pa zhe na/ yid ches pas ni las kyi rnam par smin pa la 'jug pa'o/ /'dod pas ni byang chub kyi sems mi 'dor ba la sogs pa ste/ byang chub kyi sems ni smon pa dang ldan pa'o//yi dam la brten pa ni 'jug pa'i sdom pa'o/ /ji ltar yi dam la brten zhe na/ sdom pa'i tshul khrims kyis ni mi dge ba'i chos thams cad spong ba'o/ /sems can gyi don byed pas ni nyes par byas pa thams cad bzod pa'o/ /ldan pa zhes bya ba ni thams cad la sbyar bar bya ste/thob par 'gyur zhes bya ba tshig gi lhag pa'o/ /kha cig ni sngar bshad pa'i dad pa dang ldan pa ni dkon te/ dkon pa'i dpe rin po che bzhin no/ /dad pa'i mtshan nyid tshul gzhan gyis bshad pa ni mos pa'i stobs la sogs pa'o/ /mos pa ni theg pa chen po'o/ / 'jug pa ni yid ches pa bsgom pa'o/ /mi 'dor ba ni mi gtong ba'o/ /brten pa ni mi g.yo ba'o/ /spangs pa ni 'dor ba'o/ /bzod pa ni len pa'o zhes kyang 'chad do/ /da ni sngar bshad pa'i dad pa'i yul gzhan brtan pa'i phyir chos thams cad ces bya ba la sogs pa gsungs te 'bras bu thob par 'dod pas na sems dpa'o//nyan thos dang rang sangs rgyas kyi theg pa las/ khyad zhugs pas na sems dpa' chen po'o/ /yon tan gyi bye brag ni gnas skabs kyi stobs kyis drangs na byang chub kyi sems brtan par 'gyur ba la bya'o/ / de la 'dod pa'i dad pa'i yul bstan pa ni/ chos thams cad ces bya ba la sogs pa ste/ chos thams cad ni bden pa bzhi'o/ /de la 'gog pa ni/ gnyen po med pa ste/ gdul bar mi nus pa'i phyir ro/ /lam gyi bden pa dag ni/ ma 'gags pa ste gong nas gong du ye shes skye ba'i phyir ro//de dag kyang spang bya yin pa'i phyir 'gog pa kho na'o/ /ma yin te skyes pa'i lam gtsor byed pa'i phyir ro/ /sdug bsngal dang kun 'byung dag ni log pa'i shes pa las byung bas 'khrul pa yin pas bden pa brjod du med pa'o/ /la la na re yon tan gyi bye brag ni mdo nyid gtsor byas pa la'o//chos ni phyi nang gi dngos po thams cad do/ /chos kyi rang bzhin stong pa nyid ni dngos pos sgyur bar mi nus pas gnyen po med pa'o/ /gcig dang du ma dang bral ba la sogs pa ma skyes pa'o/ /chos can med pa la chos kyi mtshan nyid mi 'thad pas ma 'gags pa'o/ / kun rdzob dang don dam pa ni gcig dang tha dad pa mi 'thad pas brjod du med pa'o/ /des na 'gog pa'i ngo bo nyid gtsor bstan to zhes 'grel pa gzhan 'dod do/ /da ni sngar bshad pa'i dang ba'i dad pa'i yul de nyid phrin las kyi yon tan brtsams pa ni/ lhun gyis grub cing zhes bya ba la sogs pa'o//de la mi rtog pa'i phrin las ni lhun gyis grub cing rnam par mi rtog pa zhes gsungs pa ste/ spyod pa ni thugs dang gsung gi phrin las rnams so/ /spyod lam ni rnam pa bzhi ste bzhugs pa dang / bzhengs pa dang / gzims pa dang / 'chag pa ste gnas skabs bzhir don mdzad pas na phrin las so//bya ba ni gzhan don 'ba' zhig pa la bya ste/ rang gi don mdzad zin pa'i phyir ro/ /rang gi don ji ltar mdzad ce na/ bden mod kyi 'on kyang rgyal po lta bu sems bskyed pa'i phyir ro/ /phrin las de dag kyang gdul bya ma lus pa'i bya ba yin pas na khyab pa ste/sangs rgyas mdzad pa rgya che'i phyir/ /khyab pa zhes ni rab tu brjod/ /ce'o/ /phrin las dag kyang gang du mdzad ce na/ gnas zhes smos te/ sprul pa bzhugs pa'i rten yin pa'i phyir ro/ /phrin las kyang gcig tu zad dam zhe na ma yin te/ gdul bya'i bsam pa'i dbang gis sna tshogs pa dang /mi zad pa ste phrin las zad pa med pas na/ rtag pa nyid du mngon par brjod/ /ces bya ba'i tshul gyis na/ 'dzam bu'i gling gi rdul zhes bya ba la sogs pa gsungs so/ /dus thams cad pa'i phrin las ni/ seng ge 'bangs bzangs zhes bya ba la sogs pa gsungs te/gzhan gyi bsam pa'i dbang gis gzhan du sprul pa dang / de yang 'das pa'i dus dpag tu med pa'i snga rol nas shAkya thub pa mngon par sangs rgyas nas bstan pa dang / de'ang dus las bzhengs pas na da ltar bstan pa dang rnam pa gsum du mos na zhes bya ba ni/mdo rnam pa gsum yin no/ /de la seng ge 'bangs bzangs zhes bya ba ni rgyal po seng ge'i bu'i ming ngo / /rtogs pa brjod pa ni sngon gyi tshul lo/ /sems can yongs su smin par bya ba ni/ sha'i phyir 'khor la sogs pa kha btags pa la brtan pas so/ / mar me mdzad ni bskal pa grangs med pa gsum gyi grangs med pa gnyis pa'i tha mar bsnyen bkur ba'i yang dag par rdzogs pa'i sangs rgyas kyi ming ngo / /bzang ste zhes bya ba ni de las lung bstan pa thob nas so/ /sangs rgyas gcig gis mkhyen pas na sangs rgyas kyi yul lo/ / shAkya zhes bya ba ni mas dben gyi chung ma blangs pa las btags pa'i ming ngo / /bsad pa zhes bya ba ni shi ba'i ming gi rnam grangs te 'tsho ba dang bral zhes bya ba'i don te/ bstan pa zhes bya ba ni bden pa mthong ba'i gang zag rnams rgyal po 'phags skyes pos bsad par bstan pa'o/ / smin par byas pa ni skyo ba bskyed pa'i phyir ro/ /mdo kun las btus pa'i bshad pa lung gi tshad mas sbyar ba las/ dad pa rnyed par dka' ba'i gtam brjod pa ste bzhi pa'o/ /dad pa rnyed par dka' ba bstan zin to// //dad pa dang ldan pa la byang chub kyi sems skye bas dad pa brtan par byas nas byang chub kyi sems brtan par bya ba'i phyir re zhig mtshams sbyar ba ni/'di dag kyang zhes bya ba la sogs pa gsungs te/ rnyed par dka' ba ni sangs rgyas thob pa'i rgyu yin pa'i phyir ro/ /dam pa'i chos pad ma dkar po'i mdo tshad mar byas nas 'tshang rgya ba'i rgyu ji ltar yin zhes brgal ba ni/ci mngon zhe na zhes bya ba'o/ /de nyid dgongs pa can yin te dus gzhan la dgongs par bstan pa ni/ mdo mang po zhes gsungs te/ byang chub kyi sems ni rnam pa gnyis te/ smon pa dang 'jug pa'i bdag nyid do//de ci'i phyir zhe na/ 'bras bu dang rgyu la 'dod ces pa'i phyir ro/ /de ltar zhe na/ 'bras bu'i dam pa 'dod pa ni smon pa yin la/ de'i rgyu la 'bad pa ni 'jug pa yin no/ /la la na re don dam pa'i byang chub kyi sems stong pa nyid la dmigs pa ni 'jug pa yin la/kun rdzob kyi byang chub kyi sems snying rje gtso bor gyur pa ni smon pa yin no zhes zer ro/ /la la na re dge ba'i rtsa ba mngon par 'du byed pa ni 'jug pa yin la/ 'du mi byed pa ni smon pa yin no zhes kyang zer ro/ /la la na re bsam pa rnam par dag pa ni smon par 'dod do/ /smon lam yin pa'i phyir ro//sbyor ba phun sum tshogs pa ni 'jug par 'dod de nyams su len pa'i phyir ro zhes zer ro/ /de bas dbye ba bstan pa ni gang dag ces bya ba la sogs pa'o/ /de la gang dag ces bya ba ni dad pa dang ldan pa'o/ /byang chub tu sems bskyed pa zhes bya ba ni smon pa dang ldan pa'o//chas pa zhes bya ba ni 'jug pa'o/ /byang chub kyi sems kyi phan yon bstan pa dang / ngo bo nyid dang sems bskyed pa'i rang bzhin yang rig par bya ste/ de la re zhig phan yon spyir bstan pa ni/ sa bon lta bu'o zhes bya ba la sogs pa ste/ byang chub kyi sems ni smon pa dang 'jug pa'i bdag nyid do//sangs rgyas kyi chos ni stobs la sogs pa'o/ /sa bon zhes bya ba ni bskyed pa'i rgyur gyur pa'i phyir ro/ /'grel pa mkhan po gzhan dag ni sdong po bkod pa'i mdo las 'byung ba 'di dag ni don dam pa'i byang chub kyi sems kyi phan yon yin te zhes 'dod do//de ni 'thad pa ma yin te/ gal te don dam pa zhes bya ba 'dod pa'i bdag nyid mos pas yul du byed pa yin no/ /'di ni 'dod pa kho na'o/ /gal te mthong ba'i lam yin na ni/ de nyid bskyed pa'i rgyu'i gtso bo gang yin/ gal te sems bskyed pa'o zhe na/ 'di dag kyang mos pas spyod pa'i sa la ci'i phyir mi 'dod/sa de la ni med do zhe na/ sa 'di la'ang ci'i phyir yod de/ med pa kho na'o/ /sangs rgyas kyi chos rnams kyi sa bon lta bu zhes bya ba'i don kyang ji ltar drang / 'dod pa'i dbang gis bye brag gi mngon rtags kyang gang zhig yod/ gal te mthong lam bskyed pa'i rgyu sems bskyed pa ma yin no zhe na/bsgom pa'i lam bskyed pa'i rgyu yang ji ltar yin/ des na brgal zhing brtags pa ni mtshungs pa kho na'o/ /spros pas shin tu chog go/ /da ni dkyus ma nyid bstan pa'i phyir re zhig mngon par rtogs pa'i don bstan pa ni/ tshogs kyi sa la dkar po'i chos kyi sa bon lta bu ste/yang dag par blangs pa'i brda las byung ba bskyed pa'i phyir dang / drod kyi gnas skabs su chos nyid mos pas 'du byed pas mthun pa'i cha 'dzin pas na sa bon lta bu'o/ /rtse mo'i gnas skabs su log par lta ba rgyun chad pa'i phyir gang du 'phel bar byed pas zhing lta bu'o//bzod pa dang ldan pa mi dge ba'i las 'bras bu mi 'byin pas sreg pa'i me lta bu'o/ /chos kyi mchog tu gzung ba dang / 'dzin pa dang bral bas lus la sogs pa'i las mi dge ba spong bas sa'i 'og lta bu'o/ /rang dang gzhan gyi don rab tu sgrub pa thob pas sa dang po'i gnas skabs su yid bzhin gyi nor bu lta bu'o//dri ma med pa la sogs pa'i gnas skabs su 'chal ba'i tshul khrims la sogs pa spangs pa ni lus phun sum tshogs pa la sogs pa 'dod pa la rag lus pa'i phyir bum pa bzang po lta bu'o/ /sa bcu'i gnas skabs su mdzad pa mtha' dag byed pas na lcags kyu lta bu'o//sangs rgyas kyi sa la mdzad pa mtha' dag byed pas na mchod rten lta bu'o/ /de la gus pa dang ldan pas 'bras bu chud mi za bas mchod rten lta bu'o/ /'o na yon tan gyi chos der zad dam zhe na/ ma yin te mtshon pa tsam mo zhes don bsdu ba ni/mdor na zhes gsungs te/ rab tu dbye na mtha' yas pa ni/ sangs rgyas kyi chos thams cad ces bya ba la sogs pa'o/ /de las sgrub par byed pa'i lam gyi tshogs ni chos thams cad do/ /stobs la sogs pa yon tan no/ /'o na sangs rgyas kyi yon tan la sogs pa ma lus pa dang ldan pa'i phyir sems bskyed pa nyid na 'bras bu grub pa'i phyir bskal pa mang por ci'i phyir 'bad/ma yin te 'bras bu'i ming rgyu la btags pas na/ gong du sa bon gyi char dper bstan pas na 'gal ba med do zhes log rtog spangs pa'i sgo nas yon tan gyi 'thad pas bstan pa ni/de ci'i phyir zhe na zhes pa la sogs pa'o/ /da ni byang chub kyi sems rnam pa gnyis kyi phan yon dpes bstan pa ni/ dper na zhes bya ba la sogs pa ste/ rnam pa thams cad mkhyen pa nyid rnam par smin pa'i 'bras bu ni gser 'gyur gyi dpes bstan te/bsngo ba ni chud mi za ba'i phyir ro/ /nyon mongs pa'i sgrib pa'i gnyen po yin pas don dam pa'i byang chub kyi sems ni mi mthun pa dang bral ba'i 'bras bu ni/ sgron ma'i dpes bstan te/ sgrib pa chen po ni gnyen po chung ngus sel ba'i phyir ro/ /sangs rgyas thob par 'dod pa'i bsam pa can ma bsgral ba rnams bsgral bar 'dod pa rnams snying rje'i gtsug gi nor bu dang ldan pa'i dbang gis 'bras bu ni ngan song gi sa thag bsrings pas na nor bu'i cod pan thogs pa'i klu'i rgyal po'i dpes bstan te/phyi rol du smin pa ni dbang gi 'bras bu'o/ /byang chub tu sems bskyed pa thob pa ma nyams pa dag ni tshe gzhan nas rang 'khrungs su byang chub kyi sems kyis byang chub kyi sems rnam pa thams cad mkhyen pa la thug gi bar du thugs bskyed pas rang dang gzhan gyi don sgrub par byed pa'i rgyu mthun pa'i 'bras bu ni/nor bu rin po che dbang gi rgyal po'i dpes bstan te/ rin du mi chog pa ni dgos pa ma lus pa de nyid las 'byung ba'i phyir ro//de la mos pa spyod pa'i gnas skabs ni zag pa dang bcas pa'o/ /mthong ba'i lam la sogs pa ni zag pa med pa'o/ /nyan thos dang rang sangs rgyas kyi rigs can dag kyang yongs su 'dzin pa'i khyad par la sogs pas byang chub tu sems bskyed pa'i skyes bu'i byed pas 'phral lam/de ma thag tu theg pa dman pa 'jig pa ni/ seng ge'i 'o ma'i dpes bstan to/ /mtshams med pa la sogs pa'i las dang ldan pa yang byang chub tu sems bskyed pa'i rten gyi stobs thob pa'i skyes bu'i byed pas ngan song la sogs pa thag sring bar byed pa ni dpa' bo'i skyes bu'i dpes bstan to//yang gzhan dag ni tshul gzhan du 'chad de/ spros par mi bya'o/ /da ni phan yon khyad par du brjod pa'i phyir/ rigs kyi bu 'di lta ste/ dper na zhes bya ba la sogs pa gsungs te/ re zhig smos pa'i phan yon bshad pa'i skabs su bab pas dpes 'dren pa'o//'dir khyad par gnyis te smon pa'i khyad par dang / 'jug pa'i khyad par ro/ /de la smon pa'i phan yon gyi khyad par bzhi ste/ byang chub kyi sems brjed pa zil gyis gnon pa'i khyad par dang / 'bri ba dang bral ba'i khyad par mthun pa'i khyad par zil gyis gnon pa'i khyad par dang / rgyud dman pa zil gyis gnon pa'i khyad par dang / tshad med pa dang mi mthun pa zil gyis gnon pa'i khyad par ro/ /de la byang chub kyi sems brjed pa ni rgyu rnam pa bzhi ste/ bla ma dang sbyin gnas la log par slu ba dang / gzhan gnas ma yin pa la 'gyod pa bskyed pa dang / byang chub sems dpa' la zhe sdang bas ngan du brjod pa dang /sems can la g.yo dang sgyus spyod pa'o/ /rgyu de bzhi bstan pa ni/ rdo rje rin po che chag pa lta bu'o/ /de'i gnyen po ni rnam pa bzhi ste/ shes bzhin bzhad gad kyi phyir yang brdzun mi brjod pa dang / gzhan dag rdzogs pa'i byang chub la 'god pa dang byang chub sems dpa' la ston pa ltar sems pa dang /gzhan la bsam pa rnam par dag pa'o/ /chos 'di bzhis zil gyis gnon pas gser gyi rgyan lta bu'i yon tan zil gyis gnon pa'o/ /de la 'khor ba'i dbul ba rnam par bzlog pa ni mngon par mtho ba thob pa ste/ ji skad du rgyal po chen po khyod lan du mar lha'i nang du skyes zhes bya ba la sogs pa lta bu'o//ming mi 'dor ba ni byang chub kyi sems kyi sems mi brjod pa ste/ ji skad du 'od srungs chos bzhi dang ldan na tshe brjes kyang byang chub kyi sems mi 'dor te zhes bya ba la sogs pa lta bu'o/ /kha cig na re nan tan gyi sgra bstan pas sgrub pa dang bral ba tsam la 'dod do//la la ni 'jug pa dang bral ba tsam la 'dod do/ /da ni 'bri ba dang bral ba'i mthun pa'i khyad par zil gyis gnon pa brjod par bya ste/ gong nas gong du mi spel ba ni yon tan 'bri bar 'gyur ba yin pas de'i gnyen po gong nas gong du spel ba'i phyir ro//rgyal po chen po zhes bya ba la sogs pa gsungs te/ chos tshol ba ni chos nyan cing sems pa'o/ /ci'i phyir zhe na/ don dang zhes bya ba la sogs pa ste/ don ni mtho ris dang byang grol la bya'o/ /phan pa ni ma 'ongs pa'i bde ba'o/ /bde ba ni tshe 'di'i 'dod par bya ba'o//ji ltar zhe na/ bsgral ba dang zhes bya ba la sogs pa ste/ nyon mongs pa dag ni chu bo dang 'dra bas/ de spang ba'i phyir bsgal ba'o/ /sdug bsngal rnam pa gsum ni khong bsgril dang 'dra bas/ de gcad pa'i phyir dgol ba'o/ /bdag tu lta ba dag ni ngal ba'i gnas yin pas chos nyid kyi grong khyer gyis dben pas de dag bsti ba'i phyir dbugs dbyung ba'o//rnam par rtog pa dag ni sdug bsngal bskyed pas mya ngan gyi gzhi yin pa'i phyir de yongs su spang ba'i phyir yongs su mya ngan las 'da' ba'o/ /de ltar snying rjes rgyud brlan pa dag ni gzhan gyi don du ye shes thob par 'dod pas/ byang chub tu sems bskyed pa'i phyir thams cad mkhyen pa thob par bya ba'o//sgrib pa kun gyi dri ma med pas/ rnam pa thams cad mkhyen pa nyid thob pa'o zhes bya bas thams cad mkhyen pa nyid thob pa'o/ /ji ltar thob ce na/ chos thams cad yongs su rdzogs par bya'o zhes smos te/ stobs la sogs pa ni chos so//shin tu dgyes pas ngo mtshar ba'i phyir legs so legs so zhes zlos te gsungs pa'o/ /ston pa ji lta ba bzhin du lha rnams rjes su yi rang ba ni yang zhes bya ba ste/ dad pa ni 'dod pa'i dad pa'o/ /tshol ba ni sbyor bar byed pa'o/ /smon pa ni 'bras bu'i 'dod ches pas so/ / rjes su yi rang ba dngos ni phyogs dang phyogs su snyan pa brjod pa bsngags pa'o/ /sngon du bkur bar byed pas bstod pa'o/ /lkog tu yang dga' ba dang ldan pas rjes su yi rang ba'o/ /thog ma dang bar dang tha mar rjes su yi rang bas na dga' ba bskyed pa la sogs pa tshig gsum gsungs so/ /'o na smon pa tsam la ci'i phyir rjes su yi rang bar byed ces de ci'i phyir zhe na zhes rgol ba len du smon pa ni sangs rgyas 'dod pa'i phyir ro//de'i rgyu la 'jug par byed pa'i yon tan gzhan gyi rtsa ba yin pas 'di ltar zhes bya ba la sogs pa gsungs te sangs rgyas thob na de'i 'bras bu chos kyi 'khor lo bskor ba dang 'du bar 'gyur ro zhes phan yon gyi 'thad pa ni zhugs pa yin no zhes bya ba'o//kha cig ni chos kyi 'khor lo ni mthong ba'i lam la bya'o zhes zer ro/ /de ltar snying rjes byang chub kyi sems spel ba ni 'bri ba ste nyams pa'i gnyen po yin pas/ mdo 'di nyid las rgyal po chen po khyod kyis nyin lan gsum mtshan lan gsum du dge ba'i rtsa ba rdzogs pa'i byang chub tu bsngos shing zhes bya ba la sogs pa rgya cher gsungs pa yin no//rgyu dman pa ni bsod nams dang ye shes kyi tshogs cung zad la bya ste/ des rdzogs pa'i byang chub mi thob pas bsod nams dang ye shes kyi tshogs rgya chen pos de zil gyis gnon pa ni/ nam byang chub sems dpa' zhes bya ba la sogs pa gsungs te/bsam pa phun sum tshogs pas ni sems kyi rigs lnga dang bral bas thams cad mkhyen pa nyid kyi sems dang mi 'bral zhing ngo / /sems kyi rigs lnga ni nyan thos kyi sems dang / rang rgyal ba'i sems dang / mi dang lha don du gnyer ba'i sems dang /lung du mi ston pa dang / mi dge ba'i sems so/ /sems gzhan ni mi dang lha 'dod pa'i sems dang / lung du mi ston pa dang / mi dge ba'i sems la bya'o/ /dmigs pa ni thob par 'dod pa'o/ /nyon mongs pa ni ser sna la sogs pa'o/ /pha rol tu phyin pa drug ni sbyin pa la sogs pa'o//de la shes rab ni ye shes kyi tshogs so/ /lhag ma ni bsod nams kyi tshogs so/ /brtson 'grus dang ting nge 'dzin ni tshogs gnyis ka yin no zhes bshad do/ /tshad med pa ni byams pa la sogs pa'o/ /de dang mi mthun pa ni zhe sdang la sogs pa ste de'i gnyen po ni/ byams pa chen po dang zhes bya ba la sogs pa'o//la la ni mi mthun pa'i phyogs nyan thos kyi sems la sogs pa yin te/ rang dul bar byed pa'i phyir ro zhes zer ro/ /gnyen po 'di dag kyang byang chub kyi sems yin pas phan yon zhes bstan to/ /da ni 'jug pa'i phan yon gyi khyad par bstan pa'i phyir 'jam dpal zhes bya ba la sogs pa gsungs te/'dir khyad par ni rnam pa lnga ste/ rten gyi gang zag gi khyad par gyi phan yon bstan pa ni so so'i skye bo la byang chub kyi sems skye zhing byang chub sems dpa'i sdom pa yod de ci'i phyir 'jam dpal ka la ping ka'i phru gu sgo nga'i nang nas sgra sgrogs pa ltar/so so'i skye bo bdag tu lta ba can yang de ma brtol zhing khams gsum nas ma byung yang stong pa nyid kyi sgra 'byin to zhes gsungs pa dang / sngar bstan pa'i rigs pas 'thad pa ni/ seng ge'i phru gu'i dpes bstan te/ shes rab kyi stobs ni stong pa nyid dmigs pa'o/ /ma rdzogs pa ni 'ching ba mtha' dag dang ldan pas dngos por lta ba can no//sems bskyed pa ni brda las byung ba'o/ /bdud ni lha'i bu'i bdud do/ /bsam pa'i khyad par gyi phan yon bstan pa ni/ kun dga' bo zhes bya ba la sogs pa ste/ rnam pa thams cad mkhyen pa nyid kyi gtso bo'i spyod pa ni 'jug pa dang ldan pa'i sems yin pas na/snying lta bu ste byang chub sems dpa' 'tsho ba'i phyir ro/ /stong pa nyid dang snying rje'i khyad par gyis sangs rgyas dang sems can la dmigs pa'i bsam pa mi phyed pa dang ldan pa ni 'dod pa lnga spyod du zin kyang / spyod pa rnam par dag pa'i tshul khrims can yin pas bsngags pa ni dbul yang bkur ro zhes bya ste/ji skad du/ gal te byang chub sems dpa' 'dod yon lnga spyod kyang / /sangs rgyas chos dang 'phags pa'i dge 'dun skyabs song ste/ /sangs rgyas 'grub bya snyam du kun mkhyen yid byed na/ /mkhas pa tshul khrims pha rol phyin gnas rig par bya/ /zhes bstan pa lta bu'o/ /de ltar ma yin na bdag med pa gnyis rtogs pa'i 'phags pa dag kyang snying rje chen po dang bral bas bsngags pa ma yin so so'i skye bo bsam pa dman pa dag lta tshul khrims de bor 'chal ba yin pas na/g.yog bya bar mtshon par mi mdzad pa ste/ gal te bskal pa bye bar dge ba'i sa lam bcu/ /spyod kyang dgra bcom rang rgyal nyid la 'dod bskyed na//de tshe tshul khrims skyon byung tshul khrims nyams pa yin/ /tshul khrims 'chal zhing mi mkhas de bzhin spyod pa nyams/ /zhe'o/ /'dir gang zag gang gi dbang du byas she na/ khyim pa'i byang chub sems dpa' kho na'i dbang du byas te gsungs pa yin par mngon no/ / ji ltar zhe na/ byang chub sems dpa' chos 'phags bud med drug khri brgyad stong dang lhan cig 'dod pa'i yon tan lnga la spyod do zhes bya ba lta bu dang / drag shul can gyis zhus pa las/ khyim pa'i byang chub sems dpa'i dbang du spyad pa yang gsungs pa'i phyir ro/ /rab tu byung ba'i byang chub sems dpa' ni 'dod pa'i yon tan lnga thag ring du yongs su spang bar bya ste/ci'i phyir zhe na/ so sor thar pa dag dang ldan pa ni/ byang chub sems dpa'i sdom pa dang 'gal bar 'gyur la/ de dang 'gal ba ji ltar byang chub sems dpar 'gyur/ bsam pa rnam par dag pa'i sbyor ba de lta ma yin pa la yang ha cang mi srid pa 'gyur ro/ / 'dod pa'i yon tan lnga spyad pa yang gzhan drang ba'i phyir yin gyi yang dag tu ma yin no/ /de ni 'dod pa kho na'o/ /de nyid bstan pas khyim pa'i byang chub sems dpa' yod par bstan te/ gzhan du 'dod pa spangs par drang ba'i phyir te spyod pas drang ba ji ltar 'gyur/ snying las chung ngu'i spyod pa dag dang 'gal ba ni 'dod pa kho na'o//de ni yin te tshul khrims kyi sgra ni sdom pa la 'dod kyi/ gzhan du na rab tu byung ba'i byang chub sems dpa' zhes ji ltar brjod/ tshangs pa'i spyod pa ma yin pa'i tshul khrims dag kyang rab tu byung ba la gnang ba ma yin nam/ de'i gnang ba de yang tshul khrims nyid de sdom pa ni bcas pa'i rjes su 'jug pa yin la/byang chub sems dpa'i sde snod las kyang srog gcod pa don du 'gyur ba la sogs pa gsungs pa'i phyir bcas pa kho na'o/ /de'i phyir bsam pa rnam par dag pa ni gtso bo yin par bstan pa'i phyir mdo smos pa yin no/ /sbyor ba'i khyad par gyi phan yon bstan pa'i phyir 'od srungs zhes bya ba la sogs pa gsungs so//'dir gang du bstan pa'i bsam pa rnam par dag pa/ sbyor ba phun sum tshogs pa/ tshul khrims gnas pa la sogs pa spyod pa bzhi dang ldan pa dag ni bslab pa la zhugs pa zhes bya'o/ /sngar bstan pa'i tshul gyis na/ yon tan dman par bstan pa ni phyag gi 'os ma yin pas phyag mi 'tshal ba ste/ji skad du/ ma skyes dgra yi bu mor gyur pa ni/ /mya ngan med byin yon tan gzi brjid ldan/ /dgra bcom lnga brgya dag ni lhags gyur kyang / /de la phyag bya'i phyir ni de ma langs/ /zhes bstan pa lta bu'o/ /de bzhin gshegs pa bas byang chub sems dpa' la gus par bya ba bstan pa ni byang chub kyi sems yongs su bsngags pa'i phyir te/'bras bu 'dod pas rgyu la nan tan bya bar bstan pa'i phyir ro/ /sbyin pa phun sum tshogs pa de yang gang gis she na/ snying rjes khyad par du 'phags pa bstan pa ni/ yon tan gyi tshogs ni brjod par mi nus pa'o zhes gsungs te/yon tan ni 'bras bu'i khyad par ro/ /sngar bstan pa'i tshul gyis rgol ba ni/ de ci'i phyir zhe na zhes bya ba'o/ /lan ni sems can gyi khams tshad med pas de la dmigs pa'i yon tan bsod nams kyi tshogs kyang tshad med do zhes bstan to/ /'o na sems can ma lus pa la phan pa bsgrubs na ci'i phyir sems can dag grol bar 'gyur/grol ba ma yin pa'i phan pa ni phan pa byas pa yin par mi 'gyur ro/ /sems can dag ma grol na 'tshang rgya bar yang ji ltar 'gyur zhes/ de ci'i phyir zhe na zhes rgol te/ de'i lan ni sems can gyi khams ni mi zad pa ste zhes gsungs te/ grol bas zad pa med do zhes bstan to//'o na sngar bstan pa'i nyes par 'gyur ro zhe na/ ma yin te/ byang chub sems dpa'i bsam pa rnam par dag pa kho na spyod pa'i gtso bo yin pa'i phyir dang / sems can grol bas zad par mi 'gyur ba nyid kyis de dag la brten pa'i bsod nams kyang zad par mi 'gyur bar bstan pa ni/ji ltar zhes bya ba la sogs pa gsungs so/ /shes rab kyis khyad par du 'phags pa bstan pa ni/ byang chub kyi sems kyi tshogs ni zhes bya ba la sogs pa gsungs te/ tshogs zhes bya ba ni shes rab kyis stong pa nyid la dmigs pa'i ye shes kyi tshogs so/ /byang chub kyi sems zhes bya ba ni don dam pa'i sems so//dkon mchog gsum gyi rigs ni stong pa nyid dang snying rje'o/ /mi 'chad pa ni mngon par sangs rgyas pa ste/ mngon par sangs rgyas na chos kyi 'khor lo bskor ro/ /de bskor na 'phags pa'i ye shes 'byung bar 'gyur ro/ /de byung na mngon par rdzogs par 'tshang rgyas par 'gyur ro zhes 'khor lo'i tshul du 'byung bas na mi 'chad pa'o//la la na re rigs ni bden pa la sogs pa brten gzhi la bya'o zhes zer ro/ /la la na re mthong ba'i lam gyi bden pa bzhis bsdus pas sa dang po la 'jug par bya'o zhes zer ro/ /la la na re pha rol tu phyin pa drug la bya'o zhes zer ro//la la na re thabs dang shes rab yin te/ thabs la mkhas pa ni pha yin la/ shes rab ma yin pas de las skyes pa yin no zhes zer ro/ /la la na re sangs rgyas kyis bcas pa'i bslab pa la bya'o zhes zer ro/ /la la na re da ltar gyi sangs rgyas mngon du bzhugs pa'i ting nge 'dzin dang /snying rje chen po yin no zhes 'dod do/ /la la ni smon pa dang 'jug pa'i sems la bya'o zhes zer ro/ /de ltar rgyas par bshad nas phan yon mtha' dag bsdu ba ni/ byang chub kyi sems kyi bsod nams gang zhes bya ba la sogs pa gsungs te/ la la dag ni smon pa dang 'jug pa'i phan yon bsdu ba yin no zhes 'dod do//la la dag ni 'jug pa'i phan yon bsdu bar 'dod do/ /la la dag ni sbyor ba phun sum tshogs pa'i phan yon bsdu bar 'dod do/ /la la dag ni de dag nges don gyi shes byed du 'chad do/ /da ni byang chub kyi sems kyi ngo bo nyid bstan par bya ste/ 'dir ngo bo nyid ni yid kyi rnam par shes pa yul khyad par can du 'phags pa la dmigs pa zad pa med pa 'dren par nus pa ste/yul ni stong pa nyid dang snying rje'o/ /kun gzhi'i rnam par shes pa ni ma bsgribs pa lung du ma bstan pa'i phyir dang / nyon mongs pa can gyi yid ni dri ma can gyi 'khor bzhi dang rtag tu ldan pa'i phyir dang /sgo lnga'i rnam par shes pa dag ni/ brtan pa'i phyir yid kyi rnam par shes pa 'ba' zhig smos te/ spro ba che dang rtsom pa che/ /don che ba dang 'byung ba che/ /byang chub sems dpa' sems dpa' che/ /don gnyis ldan pa'i sems 'byung ba/ /zhes bshad do/ /gang gis khyad par du 'phags/ gang las khyad par 'phags she na/shes rab dang snying rje so so'i skye bo dang nyan thos dang / rang rgyal ba'i sems las khyad par du 'phags pa'o/ /de bstan pa chos yang dag par sdud pa'i mdo las kyang zhes bya ba la sogs pa gsungs te/ chos thams cad ces bya ba ni dkar po'i chos mtha' dag go/ /de las 'byung bas na de skad ces bya'o//de la shes rab kyis chos thams cad stong pa nyid du rtogs pas na/ chos kyi dbyings dang mnyam pa la sogs pa'o/ /kun rdzob gzhi med pa la dmigs pas na/ ye shes stong pa'o/ /'khrul ba'i rgyu las byung bas na glo bur ba'o/ /slu bas na gnas pa ma yin pa'o//rtag tu mi rung bas na yongs su shes par bya ba ma yin pa'o/ /de lta bu'i 'khrul pa spangs pa stong pa nyid gzhan la bstan pa'i sgo nas/ snying rje bstan pa ni sems can dag kyang zhes bya ba la sogs pa'o/ /gzhan dag ni chos thams cad ni stong pa nyid de nam mkha'i dkyil lta bu yin pas mnyam pa'o//'on kyang snang ba tsam mi 'gog cing skur pa mi 'debs pas shes par bya ba tsam mo/ /'khrul ba dang bral bas ye shes stong pa'o/ /'o na ye shes kyi yul ni kun rdzob yin pas ji ltar gnas she na/ glo bur byung ba zhes bya ste/ ma rig pa brtags pa'i phyir ro/ /chos nyid dngos la mi brten pas gnas pa ma yin no//mngon sum dang rjes su dpag pa'i yul ma yin pas yongs su shes par bya ba ma yin pa'o zhes 'dod de/ de la snying rje dang ldan pas sems can la dmigs pa nyan thos la sogs pa las khyad par du 'phags pa ni/ phan pa dang bde ba'i sems so zhes bya ba la sogs pa'o//stong pa nyid kyis dngos por lta ba las khyad par du 'phags pas na stong pa nyid kyis mi 'gyur ba'i sems la sogs pa'o/ /da ni byang chub tu sems bskyed pa'i rang bzhin brjod par bya ba'i phyir/ thams cad mkhyen pa nyid du yongs su bsngos pas zhes bya ba la sogs pa gsungs te/rang bzhin ni rnam pa gnyis te/ byang chub tu sems smon pa dang / de'i rgyu la 'jug pa'o/ /de'i phyir dang po smon pa'i sems bskyed pa'i rang bzhin brjod pa ni thams cad mkhyen pa nyid du zhes bya ba la sogs pa lta bu'o/ /smon pa ni smon lam yin pa'i phyir yongs su bsngos pa zhes bya'o//ji ltar zhe na/ bdag mngon par rdzogs par sangs rgyas nas sems can gyi don byed par gyur cig ces smon lam 'debs pa'i phyir ro/ /byang chub kyi snying po ni rnam pa gnyis te/ gnas byang chub kyi snying po dang / rtogs pa byang chub kyi snying po'o/ /'dir ni gnas byang chub kyi snying po la 'dod do//mi dang lha'i 'bras bu dang / nyan thos dang rang rgyal ba dag ni bar ma do'o/ /'di skad ces kyang brjod par bya ste/ byang chub tu sems bskyed pa'i rgyu ni gang / rkyen ni gang / khas len pa ni gang / mi nyams pa ni gang / nyams pa ni gang / nyams pa rjes su gso ba ni gang zhe na/rgyu ni rnam pa lnga ste/ tshad med pa goms pa sems can gyi sdug bsngal mthong ba dang / skyabs su song bas bdag nyid shes pa dang / tshogs bsags pas rgyud rnam par dag pa dang / rten mngon du gyur pas rgyud dang bar gyur pa dang / snying rje goms pa'o/ /rkyen ni dge ba'i bshes gnyen dbang du gyur pa'o//khas len pa ni sbyor ba phun sum tshogs pas dngos gzhi la smon lam 'debs shing rjes su gdams ngag sbyin pa'o/ /mi nyams pa ni byang chub kyi sems bsgom pa la sogs pa sngar bshad pa rnams te/ nyams pa ni sngar bshad pa'i mi mthun pa'i phyogs su gyur pa'o/ /nyams pa rjes su gso ba ni nyams pa las phyir 'chos pa ste/de ltar na re zhig smon pa'i sems su rig par bya ste/ tshad med pa ni btang snyoms pa dang / byams pa dang / snying rje dang / dga' ba'o/ /de la dang por btang snyoms bsgom par bya ste/ sa gzhi dang 'dra ba'i phyir ro/ /de'i rjes la byams pa ni gser dang 'dra bas so//snying rje ni sa bon dang 'dra bas so/ /dga' ba ni ngo sel ba lta bu'o/ /ji ltar goms par bya zhe na/ rten gyi gang zag dbang po rtul pos rim can du goms pa dang / 'bring gis 'bring du dang / dbang po rnon pos cig car du goms par byas pa'o/ /des rang dang gzhan mnyam par gyur pa dang /gzhan gces par gyur pa ni de'i rgyu yin no/ /sangs rgyas dang chos dang dge 'dun la de nyid thob par 'dod pas skyabs su 'gro zhing skyabs kyi mi nyams pa'i chos rnams rjes su sgrub pa yang rgyu gnyis te ji skad du/ rgyal ba rnams dang bde gshegs chos rnams dang //dge 'dun rnams la dad na sems skye bas/ /byang chub yon tan bsam pa'i sems skye ba/ /rgyu med ma yin gyi na 'byung ba yin/ /zhe'o/ /de nyid thob par 'dod pa sems skye ba cis shes she na/ de yang 'dod pa skyid pa rgyal srid min/ /bdag bde'i don dang grags dang snyan phyir min//zhes 'byung bas skyabs khyad par can du gsal bar bstan pa yin no/ /tshogs bsags pa ni phyag 'tshal ba la sogs pa yongs su bsngo ba la thug pa'i bar rnams te/ bzang po spyod pa las rgyur gsal bar gsungs so/ /rten mngon du gyur pa ni sku mngon du gyur pa ste/rgyal po la gdams pa las gzugs kyi sku mthong ma thag tu zhag bdun du mig mi 'dzums par lta zhing de thob par 'dod pa'i sems skyes par gyur te zhes gsungs pa lta bu'o/ /snying rje goms pa ni sngar tshad med pa bshad pa lta bu ste/ rgyu'i gtso bo yin pas yang smos te/de'i phyir 'gro ba'i sdug bsngal ma lus gzhil ba'i phyir/ /'jig rten phan byed sems ni yongs su skye/ /zhes gsal bar bstan to/ /dge ba'i bshes gnyen ni rnam pa gnyis te/ lung dang sgrub par gyur pa'o/ /yang gnyis te/ yongs su 'dzin pa mngon sum pa dang /khyad par can no/ /'di ni tha ma gnyis su 'dod de/ ci'i phyir zhe na/ khas len pa'i tshul gnyis yin pa'i phyir ro/ /de'i phyir rgyal ba kun dang chos dang dge 'dun dang / de bzhin bla mar gyur pa thams cad la/ /dad dang mos pas dga' ba bskyed bya ste/ /sri zhur mchod byas byang chub sems kyang ste//zhes gsungs pa lta bu'o/ /khas len pa ni bdag rnam pa thams cad mkhyen pa nyid thob nas sems can gyi don yang byed par gyur cig ces smon pa'o/ /lhag ma ni gsal bar zad do/ /da ni 'jug pa'i sdom pa len pa'i rang bzhin bstan pa ni/thabs la mkhas pa'i mdo las zhes bya ba la sogs pa gsungs te/ 'dir rgyu dang rang bzhin brjod pa dang / rkyen dang / rjes kyi bya ba dang / bsrung ba'i tshul gyis rig par bya'o/ /de la rgyu ni goms par bya ba'i snying rjes sems can rjes su 'dzin par dmigs pa'o/ /rkyen ni phyag 'tshal ba dang /sdig pa bshags pa dang / rjes su yi rang ba dang / bsngo ba dang / byang chub tu smon pa'o/ /de la rang bzhin brjod pa ni khas len pa ste/ slon dpon gyi mdun du pus mo'i lha nga sa la btsugs te/ rgyu dang rkyen gyi bya ba rdzogs nas sdom pa gzung bar bya ste/ slob dpon dgongs su gsol/bdag ming 'di zhes bgyi ba zhes brjod nas gsol ba btab la/ slob dpon gyis 'di skad du/ mi 'gyur sems ni brtan gyis la/ /byang chub sems ni bskyed par gyis/ /gal te spyod pa spyad byas na/ /khyod ni yang dag sangs rgyas 'gyur/ /zhes brjod nas/ slob mas da ni bdag gis byang chub sems dpa'i sdom pa rlabs po che thob par gyur cig snyam du sems bskyed nas/slob dpon dgongs su gsol/ bdag ming 'di zhes bgyi bas ni/ /'khor ba tha ma med pa yi/ /sngon gyi tha ma ji srid pa/ /de srid sems can phan don du/ spyod pa dpag yas spyad par bya//'jig rten mgon po'i spyan snga 'dir/ /byang chub dam par sems bskyed do/ /'gro ba thams cad mgron gnyer te/ dbul zhing phongs las dgrol bar bya/ /di ring phan chad gal te yang / bdag gis 'dod chags sems bskyed na/ /phyogs bcu dag na gang bzhugs pa'i/ / sangs rgyas thams cad bslus par 'gyur/ /byang chub nam zhig thob bar du/ /tha ba'i sems dang gnod sems dang / /phrag dog dang ni ser sna yang / /di ring phan chad mi bya'o/ /tshangs pa'i spyad pa bdag gis spyad/ /sdig dang 'dod pa yongs su btang / /tshul khrims sdom pa des pa la//sangs rgyas rjes su bslab par bya/ /bdag ni byang chub rings tshul du/ /'tshang rgyar mos shing spro ba med/ /phyi mthar thug gi bar du yang / /sems can gcig phyir spyad par bya/ /tshad med bsam gyis mi khyab pa'i/ /sangs rgyas zhing ni sbyang bar bya/ /phyogs ni bcu po thams cad du//bdag gi ming ni thos par bya/ /bdag gis bdag la lung bstan te/ /sangs rgyas 'gyur bar dgos pa med/ /bdag gi lhag bsam rnam par dag /bdag dbang 'di na 'dren pa rnams/ /lus dang ngag gi las rnams kyang / /rnam pa kun du bdag gis sbyang //yid kyi las kyang yongs su sbyang / /mi dge'i las ni spyad mi bya/ /zhes brjod par bya'o/ /'dis ji ltar sems bskyed cing sdom pa gzung zhe na/ smras pa/ smon lam btab cing tshul khrims rnam pa gsum khas blangs pa'i phyir ro/ /tshul khrims rnam pa gsum ni/ sdom pa'i tshul khrims dang /sems can gyi don byed pa dang / dge ba'i chos yongs su sdud pa'i tshul khrims so/ /de la dang po'i tshigs su bcad pa gcig gis ni smon pa dang 'jug pa thun mong gi sems bskyed pa bstan to/ /de nas tshigs su bcad pa phyed kyis ni/ smon pa'i sems bskyed pa bstan te/phyed kyis ni 'jug pa'i sems bskyed pa bstan to/ /lhag mas ni 'jug pa nyid kyi tshul khrims rnam pa gsum dang ldan pa ste/ dang po sdom pa'i tshul khrims ngo tsha dang khrel yod pa'i ngo bo ni/ di ring phan chad gal te yang / /zhes bya ba la sogs pa tshigs su bcad pa gcig gis mdor ston te/sems dpa' gtso bo yin pas sems bskyed na zhes smos so/ /rlabs po che'i sems bskyed pa yin pas dam bca'o/ /dge ba sdud pa'i tshul khrims brtson 'grus kyi ngo bo nyid ni/ byang chub nam zhig thob bar du/ /zhes bya ba la sogs pa tshigs su bcad pa gnyis te/khyim pa'i dbang du byas pas ni bzod pa dang / gtong ba dang / tshul khrims so/ /de la bzod pa'i mi mthun pa'i phyogs ni/ tha ba dang gnod sems dang phrag dog go/ /sbyin pa'i mi mthun pa ni/ phrag dog dang ser sna ste/ des na de dag spang bar spro ba ni/ bzod pa dang sbyin pa'o//tshangs par spyod pa bdag gis spyad/ /sdig pa'i 'dod pa yongs su gtang / /zhes bya ba ni tshul khrims te/ dge bsnyen zhes bya ba'i don te sdig pa las dben pa'i phyir ro/ /des na 'phags pa klu sgrub nyid kyis kyang / sbyin pa dang ni tshul khrims dang / /bzod pa'i chos ni khyad par du//khyim pa la bshad snying rje yi/ /snying po can du rtag bsgom mdzod/ /ces gsungs so/ /rab tu byung ba'i dbang du byas nas/ tshul khrims sdom dang des pa la/ /sangs rgyas rjes su bslab par bya/ /zhes gsungs te/ dge ba sdud pa'i gtso bo ni sdom pa dang des pa yin pa'i phyir ro//yang na pha rol tu phyin pa drug ni dge ba sdud pa yin la de mtshon pa'i phyir sdom pa dang des pa bstan to/ /yang sdom pa ni yang dag blangs pa'o/ /des pa ni gzhan la mi 'tshe ba'i phyir lus khyad par can du 'gyur na/ dge ba la sogs pa bstan to/ /sems can don byed pa'i tshul khrims snying rje dang shes rab kyi ngo bo nyid ni/bdag ni byang chub rings tshul du/ /zhes bya ba la sogs pa gsungs te mos shing spro ba med ces bya ba ni/ phyugs rdzi lta bur sems bskyed pa'i phyir ro/ /yang na mos pa ni 'dod pa'o/ /spro ba med ces bya ba ni mngon du mi byed pa'o/ /ci'i rgyus she na/ sems can yongs su smin par bya ba dang / sangs rgyas kyi chos yongs su rdzogs par bya ba'i phyir te/ dang po ni/ sems can gcig phyir spyad par bya/ /zhes bya ba'o/ /gnyis pa ni zhing rnam par sbyong bar bya zhes bya ste/ ming thos pas ni grags pa ste/ 'jig rten gyi khams che ge mo zhig tu zhes 'byung ba lta bu'o//de ltar sdom pa bzung ba'i phan yon ni/ /bdag gis bdag la lung bstan te/ /zhes bya ba la sogs pa'o/ /phan yon gyi 'thad pa ni/ lhag bsam rnam par dag ces bya ba'o/ /lhag pa'i bsam pa dag par gang gis shes she na/ bdag dbang 'di na 'dren pa rnams/ / zhes bya ba'o/ /de ltar tshul khrims rnam pa gsum gyi don bsdu na/ lus dang ngag gi las rnams kyang / /zhes bya ba la sogs pa gsungs so/ /'dir smras pa/ bsam pa dag pa'i sa la ni rung na/ 'ching ba mtha' dag dang ldan pa slob pa 'dod pa go ji ltar 'thad/ ma yin te 'ching ba mtha' dag dang ldan pa kho na spro ba'i rlabs yod pas 'dir slob kyi gzhan du na bsam pa rnam par dag par yang ji ltar 'gyur/yang 'jam dpal gzhon nur gyur pa 'dis byang chub tu sems bskyed phyin chad bskal pa gang gA'i klung grangs med pa brgya stong phrag bdun gyi bye ma snyed 'das par gyur to zhes gsungs pa yang ji ltar drang /spros pas chog go/ /de lta bas na rgyu dang rkyen dang / rang bzhin brjod pa bstan pa'i phyir/ byang chub sems dpa' thabs la mkhas/ /zhes gsungs so/ /thams cad mkhyen pa'i sems kyis tshad med par 'gyur ro zhes bya ba ni/ thabs mkhas pa dang ldan pas yongs su bsngos pa'i phyir ro//dngos po chung ngu thabs mkhas pa'i bsngo bas tshad med par 'gyur ba ni dgongs pa can yin no zhe na/ nges don du bstan pa ni/ bskal pa bzang po'i mdo las kyang / /zhes gsungs so/ /rjes kyi bya ba ni rnam pa gnyis te/ phan yon gyis spro ba skyed pa dang / bslab pa mdor bsdus te lung 'bogs pa'o/ /de la phan yon gyis spro ba bskyed pa bstan pas bslab pa mdor bsdus par go bar 'gyur bas dang por smos te/ yang / rin po che yi phung po las/ /zhes bya ba'o/ /sems bskyed cing sdom pa dang ldan pa dag ni rten khyad par can yin pas sngar bstan pa lta bur bsod nams kyi tshogs shin tu 'phel ba rgyu'i bar du yang mi bzod do zhes gsungs so//phan yon dag kyang tshul khrims rnam pa gsum blangs pa las 'byung bas/ rang bzhin brjod pa ni bslab pa mdor bsdus pa nyid do zhes go bar 'gyur ro//phan yon dang ldan pa'i 'thad pa'i lung ni/ shes rab kyi pha rol tu phyin pa las 'byung zhes gsungs pa yin no/ /la la ni rin po che'i phung po'i mdo'i don ni/ don dam par byang chub kyi sems ngo bo nyid dang phan yon gyis bstan to/ /thams cad mkhyen pa nyid dang ldan pa'i sems zhes bya ba ni/mtshan ma med pa'i sems so/ /don dam pa'i byang chub kyi sems yin par ci mngon zhe na/ 'og nas shes rab kyi pha rol tu phyin pa la bslab par bya'o zhes gsungs pa'i phyir ro zhes kyang zer ro/ /gal te dge ba'i bshes gnyen med na yang cho ga ni 'di nyid do//mdo kun las btus pa'i bshad pa lung gi tshad mar sbyar ba las byang chub tu sems bskyed pa rnyed par dka' ba'i gtam brjod pa ste lnga pa'o/ /byang chub tu sems bskyed pa bshad zin to// //da ni snying rje brtan pa brjod par bya'o/ /de ci'i phyir zhe na/sngar sems skye ba'i rgyu bshad pa'i skabs su snying rje zlos te gsungs pa'i phyir la/ de'i dgos pa gang yin zhe na/ lung las/ smon pa dang ni 'jug pa dang / /de bzhin zab dang rgya che dang / /mi ldog 'bras bu thob pas na/ /theg pa chen po khyad par 'phags/ /de yi sngon du 'gro ba ni//brtan pa rnams kyi snying rje'o/ /zhes 'chad pa dang / slob dpon dpa' bos/ yon tan ma lus byang chub sems la brten/ /byang chub mchog sems snying rje'i rgyu las 'byung / /zhes 'chad do/ /de lta bas na snying rje brtan pas byang chub kyi sems brtan par 'gyur te skye ba na gnas pa dang mthar thug pa'i rgyu yin pa'i phyir/sems can rnams la snying rje che ba ni/ /rnyed par dka' ste zhes dam bca' ba mdzad do/ /'o na rigs las gyur pa dang 'brel pa las gyur pa dang / goms pa las gyur pa dang / glo bur ba'i rang bzhin gyis ji ltar rnyed dka' zhes de la rgol ba ni ci mngon zhe na zhes bya'o//'brel pa dang glo bur dag ni/ nyi tshe ba dang re zhig pa yin pas smon par bya'o/ /lhag ma ni dka' ba kho na'o/ /dka' ba ci mngon zhe na/ mdo sde mang po las thos pa'i phyir te zhes gsungs te/ 'dir snying rje ni rang gi bde ba spong ba'i mtshan nyid yin pas snying rje'i ngo bo nyid kyi mtshan nyid ni zla ba'i snying po'i le'u las gsungs pas te/rang gi bde ba sel bas na dgra dpa' bo lag na rdo rje thogs shing drag shul du 'debs pa las sgrol ba bzhin no zhes bya ba'o/ /dgos pa bstan pa ni/ byang chub tu mngon par mos pa'i sngon du 'gro ba zhes bya ba la sogs pa gsungs te/snying rje ni byang chub tu sems skye ba'i rgyu yin pas dang por dgos pa ni mngon par mos pa'i sngon du 'gro ba zhes bya'o/ /gnas pa'i rgyu yin pas ma nyams par byed pa ni bar du dgos pa ste/ theg pa chen po yang dag par sgrub pa'i sngon du 'gro ba zhes bya ste/yang dag par sgrub pa ni spyod pa mi nyams par byed pa'o/ /mthar thug pa'i rgyu yin pas 'bras bu thob par byed pa ni tha mar dgos pa ste/ sangs rgyas kyi chos ni stobs la sogs pa'o/ /sngon du 'gro ba ni 'dren pa'o/ /snying rje bsgom pa'i gnas skabs ni rnam pa gsum ste/dang po rtsa ba brtan par bya ba'i phyir so so'i skye bo'i gnas skabs su dang / theg pa 'og mar mi lhung bar bya ba'i phyir/ mthong ba'i lam gyi gnas skabs su dang / sems can gyi don mi nyams par bya ba'i phyir sa brgyad pa'i gnas skabs so/ /de bas bsgom pa'i gnas skabs gsum mtshon pa'i phyir dang smos pa ni/bdag gi 'khrul pa la yang so sor rtog cing gzhan gyi 'khrul pa la snying rje ba'o zhes gsungs te/ 'khrul pa ni nyes par spyad pa spyod pa ste/ sdug bsngal gyi rgyu yin pa'i phyir ro/ /da ni phan yon bstan pa'i phyir/ byang chub tu mngon par 'tshang rgya bar 'dod pas zhes bya ba bstan pa la sogs pa gsungs pa ste/sngar smos pa nyid phan yon yin mod kyi 'on kyang de nyid rnam pa gzhan gyis bstan pa ni/ mngon par mtho ba dang / nges par legs pa dag gis so/ /ji ltar zhe na/ mngon par 'tshang rgya bar 'dod pas zhes bstan pa ni nges par legs pa'i phan yon bstan to//mngon par mtho ba'i phan yon ni/ /snying rje chen po'i sems bskyed nas lus dang srog la ma chags pa ni bde 'gror skye ste zhes bya ba'o/ /bdag nyid ma grol bas gzhan dgrol bar mi nus pas na lus dang srog la ma chags par bya'o zhes pa la sogs pa'o//da ni snying rje bsgom pa'i tshul bstan par bya ste/ phan bde la sbyor bar byed pa'i pha dang ma la sogs pa sdug cing yid du 'ong ba dag sdug bsngal gyi rgyu dang dngos la spyod pa dag sdug bsngal bsal bar 'dod pa'i sems ni snying rje zhes bya ste/ sngar bstan pa'i tshul gyis goms par byed pas na snying rje ba'i bdag nyid can no/ /yul gang la zhe na/ sems can gyi rigs rnam pa gnyis te/ sdug bsngal dngos la gnas pa dang / sdug bsngal gyi rgyu la spyod pa'o/ /de la sdug bsngal dngos la gnas pa ni/ sems can sdug bsngal ba dang zhes bya ba la sogs pa'o//des 'phangs pas kye ma bdag lta bu 'ching ba sna tshogs kyis bcings pa dag gis ni rang yang grol bar mi nus na/ gzhan dag kyang lta ci smos kyi ma la bdag rnam pa thams cad mkhyen pa nyid thob nas gdod sdug bsngal dag las dgrol bar bya'o snyam pas na byang chub tu sems bskyed do zhes smos so//sems bskyed nas mthong ba'i lam la gnas pa ni/ rang dang gzhan gyi don sgrub pa thob pas na/ de'i phyir 'bad pa ni chos nyid thob par bya ba'i phyir 'bad ces bya ba la sogs pa'o/ /de thob nas sdug bsngal gyi rgyu la spyod pa dag ni ser sna can zhes bya ba la sogs pa ste/de dag spong du 'jug pa'o/ /rgyu ma spangs na 'bras bu spangs par mi 'gyur bas na rgyu bzlog pa kho na smos so/ /snying rje'i gzhan dbang du gyur pas na nyen cing byang chub las phyir ldog par mi 'gyur te/ gzhan du na rgyal po gser mdog gi rtogs pa brjod pa las snying rje nyams pas/rang sangs rgyas su sems bskyed do zhes bya ba la sogs pa lta bu'o/ /de la 'du byed dang / 'gyur ba dang / sdug bsngal gyi sdug bsngal dag ni sdug bsngal te/ mi dang lha dang ngan song gsum du rim bzhin du sbyar ro/ /phan pa nye bar sgrub pa med pas na skyabs med pa'o/ / nges par 'byung ba mchog gi chos ston pa med pas na mgon med pa'o/ /theg pa gsum la nges par 'god par byed pa med pas na rten med pa'o/ /sdug bsngal sel ba'i grogs po med pas na dpung gnyen med pa'o/ /thos pa dang bsam pa dang bsgom pa'i gnas skabs su 'bad rtsol brtson 'grus rtsom pa'o//thabs sna tshogs pas lus gtong ba la sogs pa ni dka' ba spyod pa'o/ /mi mthun pa las bzlog pas na ser sna can la sogs pa gnyen po la sbyor bas na sbyin pa la sogs pa la dgod pa'o/ /mi bzod pa ni brnag mi nus pa'o/ /rtsub pa ni lus gdung bar byed pa'o//tsha ba ni sems gdung bar byed pa'o/ /chos bcu ni byang chub tu sems bskyed pa dang / chos nyid thob pa la 'bad pa dang / dka' ba spyod pa dang / pha rol tu phyin pa drug la sbyor ba dang / sdug bsngal gyis nyen cing ldog par mi 'gyur ba'o/ /snying rje bsgom pa'i tshul gzhan bstan pa ni/ kye ma zhes bya ba la sogs pa'o/ /de la yul ni sems can sred pa can la sogs pa'o//bsgom pa'i tshul ni rang dbang yod cing zhes bya ba la sogs pa'o/ /de la sngar bstan pa dag ni/ sbyor ba phun sum tshogs pa yin la/ 'dir ni bsam pa rnam par dag pa yin pas bsgom pa'i tshul rnam pa gnyis kyi khyad par ni de yin no/ /de la snying rje bsgom pa'i yul sngar bshad pa de nyid 'chad pa ni/kye ma zhes bya ba la sogs pa ste/ kye ma zhes bya ba la sogs pa ni yid ches pa'i tshig brjod pa'o/ /'dir sdug bsngal la spyod pa'i gang zag ni gnyis te/ khyim pa'i phyogs su gtogs pa dang / /de dag kyang ci rigs par bde ba'i rgyu ma bsags pas sdug bsngal bar gyur pa dang / bsags pa phyin ci log gis sdug bsngal gyi rgyu gyur pa dang / bsags pa rgyu ma gyur par zad pas sdug bsngal ba'o/ /de la khyim pa rnams ni bu dang chung ma la sogs pa la chags pas sdug bsngal ba dang / bu dang chung ma la sogs pa 'grib pas sdug bsngal ba'o/ /de la chags pas sdug bsngal ba ni/ sred pa'i khol po zhes bya ba la sogs pa'o/ /'grib pas sdug bsngal ba ni/ rang dbang med pa zhes bya ste/ /mi 'dod pa'i gzhan dbang du gyur pa'i phyir ro/ /des na mi phongs pa ste mi phan pa'o/ /de la snying rje ji ltar bsgom zhe na/ rang dbang yod cing zhes bya ba la sogs pa ste/ lha dang mi 'thob par gyur pas na gar dga' bar 'gro bar bya'o snyam du smon pas bsam pa yin par mngon no//rab tu byung ba dag gis ni nyon mongs pa 'phel ba dang / tshul khrims la sogs pa 'grib pas sdug bsngal ba ni/ phan tshun mi 'phrod pa zhes bya ba la sogs pa ste/ nyon mongs pa dag gi gtso bo ni zhe sdang yin te ci'i phyir zhe na/ dge ba'i rtsa ba 'joms par byed pa'i phyir/ 'og nas kyang / khong khro ba zhes bya ba ni bskal pa brgyar bsags pa'i dge ba'i rtsa ba rnams zad par byed pa'i phyir ro zhes gsungs pa'i phyir ro/ /de la mi mthun pa ni mi 'phrod pa ste/ rtsod par byed pa'o/ /khro ba ni sems 'khrugs pa'o/ /zhe sdang ni khong khro ba'o/ /gnod sems ni sems can la sdang ba'o//mang ba ni 'phel bar 'gyur ba'i phyir ro/ /de spang ba'i phyir bzod pa la dgod pa ni/ spang ba'i phyir zhes bya ba ste/ ci'i phyir zhe na/ bzod pa ni tshul khrims kyi 'bras bu'i rgyu'i gtso bo yin pas ji skad du/ bzod pa dka' thub dam pa bzod pa ni/ /mya ngan 'das pa mchog ces sangs rgyas gsungs//rab tu byung ba gzhan la gnod pa dang / /gzhan la 'tshe ba dge sbyong ma yin no/ /zhes gsungs pa lta bu'o/ /yongs su 'dzin pa dang bral bas tshul khrims nyams shing sdug bsngal ba ni sdig pa'i grogs pos yongs su zin pa zhes bya ba la sogs pa gsungs te/ tshul khrims nyams pa dang 'tsho ba nyams pa la sogs pa ni sdig pa'i grogs po ste/dkon mchog sprin las sdig pa'i grogs po bcu bshad pa lta bu'o/ /sdig pa'i las ni kha na ma tho ba ste/ dge ba'i bshes gnyen dang bral bas de la 'jug ste/ dper na u dum wA ra lta bu'i mdo las bshes gnyen ngan pas bslus pa'i dbang gis kha na ma tho ba chen po la zhugs pa lta bu'o//de spang bar bya ba'i phyir yang dag pa'i bshes gnyen dang ldan par bya bas tshul khrims la dgod pa ni dge ba'i bshes gnyen gyis yongs su zin pa dang zhes bya ba la sogs pa ste/ ci'i phyir zhe na/ dge ba'i bshes gnyen ni tshangs par spyod pa yongs su rdzogs pa yin pas/kun dga' bo tshangs pa mtshungs par spyod pa ni tshangs par spyod pa ril gyis yin no zhes gsungs pa lta bu dang / 'phags pa klu sgrub nyid kyis ji skad du/ /dge ba'i bshes gnyen bsten pas tshangs par spyod/ /yongs su rdzogs par thub pa nyid kyis gsungs/ /zhes gsungs so/ /de ltar nyes pa gnyis dang ldan pas bde ba'i rgyu ma bsags pas sdug bsngal bar 'gyur ba ni brkam pa zhes bya ba la sogs pa gsungs te/bde ba'i rgyu ni dge ba'i bshes gnyen dam pa la brten pas chos nyan cing sems pa dang / yang dag par don bsgom pa'o/ /de la bshes gnyen dam pa la brten pa dang / chos nyan cing sems pa med pas sdug bsngal gyi rgyu la gnas pa ni/brkam pa zhes bya ba la sogs pa gsungs pa ste/ 'phags pa'i shes rab ni thos pa las byung ba'i shes rab chos rab tu rnam par 'byed pa'i bdag nyid de/ des mi shes pa la sogs pa sel ba'i phyir ro/ /de med pas bral ba ste spangs pa'i tha tshig go//tshul bzhin yid la byed pa ni/ /'dod chags la sogs pa sun 'byin pa'i phyir gnyen po sems pa'o/ /de med pas brkam pa ste/ dang por zhen pa'i phyir ro/ /chags pa ste bar du mi 'bral ba'i phyir ro/ /chog mi shes pa ste tha mar yang dang yang du 'dod pa'i phyir ro/ /de spangs pa'i phyir thos pa dang bsam pa'i shes rab la 'god pa ni chags pa spang ba dang /'phags pa'i shes rab bskyed pa'i phyir ro/ /yang dag pa'i don bsgom pa ni gnyis te/ 'jig rten dang 'jig rten las 'das pa ste yang dag pa'i lta ba'o/ /de la dang po las dang 'bras bu la skur pa mi 'debs pas chad pa'i mtha' spong ba ste/ de med pas las kyi rnam par smin pa la mi lta ba la sogs pa ste/rtag pa ni mi 'gyur ba'o/ /chad pa ni rgyun chad pa ste/ mdor na 'jig rten pa'i yang dag pa'i lta ba dang bral ba'i don to/ /de spang ba'i phyir 'jig rten las 'das pa ste/ yang dag pa'i lta ba ni/ rten cing 'brel par 'byung ba zab mo dang zhes bya ba la sogs pa gsungs te/ zab pa ni tshu rol pas mi rtogs pa'i phyir ro/ /byas pa chud mi za zhing ma byas pa dang phrad par mi 'gyur bas na skur pa mi 'debs pa de la dgod pa ni gzud pa'o/ /shes rab ni rab tu rnam par 'byed pa'i phyir/ mi shes pa'i gnyen po yin pas de dang bral bas ni ma rig pa dang zhes bya ba la sogs pa gsungs te/ ma rig pa ni yod pa'i ngo bo ma mthong ba ste/ci yod ce na/ 'khrul pa spangs pa'i rang bzhin mi rtog pa'i ngo bor yod pa'i phyir ro/ /gti mug ces bya ba ni med pa mthong ba'i don te/ ci med ce na/ bdag la sogs pa med pa'i phyir ro/ /la la ni dgag bya rnam par bcad pa tsam las ma gtogs pa'i bsgrub par bya ba med pa yin nam/ji ltar mi rtog pa'i ngo bor yod par 'gyur/ bden mod kyi/ 'dir yongs su gcod pa'i ngo bo gang yang khas len pa ma yin te/ chos nyid tsam la yod pa'i ming gis btags par zad do/ /de lta ma yin na 'khrul ba'i rgyu yang ji ltar 'thad/ ma rig pa la sogs pa gtan med pa nyid kyis 'khrul pa'i rgyur gyur pa ni mthong ba'i lam gyis spang bar rigs la/yod pa nyid na go ji ltar spangs par 'gyur mig ser la sogs pas dung ser po la sogs par snang ba yang nang gi ngo bo yongs su sbyangs pa yin gyi/ phyi rol du ji ltar gsal/ khab 'dzag pa nyid snang ba yang med pa kho na las 'khrul gyi yod pa yang zhig las 'khrul/des na gnyis dang bral ba'i ngo bo'i dpe dung lta bu la gzung 'dzin gyi ser po lta bu'o zhes bya ba yang rigs pa ma yin no/ /gal te mig nad byang ba'i tshe der snang na ni rung na/ mig nad byang ba'i tshe khab 'dzag pa de nyid gang du gnas/ 'khrul pa spangs pa'i dus na rjes kyi shes pa mnga' ba zhig na/ma rig pa'ang ji ltar ldog par 'gyur/ de ma log na sangs rgyas zhes gang la ming du gdags zhes zer ro/ /la la na re 'phags pa klu sgrub kyi dgongs pa ma rtogs pa 'ga' zhig de skad du zer mod kyi/ gnyis dang bral ba'i rang rig pa ni nges par yod pa lung dang rigs pa las mngon la/de med par 'dzin pa ni skur pa 'debs pa'i legs par ma zin pa'o zhes 'phags pa thogs med kyis gsal bar gsungs la 'phags pa klu sgrub kyis kyang / med par lta ba ngan 'gror 'gro/ /yod par lta ba bde 'gror 'gro/ /yang dag ji bzhin yongs shes na/ /gnyis la mi brten thar pa yin//zhes bya ba la sogs pa gsungs pa de dag gi rigs pa ni 'og nas 'chad do zhes kyang 'dod do/ /da ni ha cang spros nas/ dkyus ma nyid bstan par bya ste/ dgongs pa ni longs par gyur pa'o/ /med pa nyid gang zhe na/ bdag dang zhes bya ba la sogs pa gsungs te/ bdag tu brjod pa rnam grangs so//de la bdag la sogs pa ni bshad zin to/ /kham gyi zas kyis gnas pas gso ba'o/ /bu ni lus la bya bar 'dod la de la gnas pas na pu ru Sha ste skyes bu'o/ /de lta bu'i ma rig pa spangs pa'i phyir chos bstan pa ni 'phags pa'i shes rab kyi mig ces bya ba ste/ 'di dag gis na bde ba'i rgyu ma bsags pas sdug bsngal bar gyur pa spangs par bstan to//da ni bsags pa phyin ci log gi sdug bsngal gyi rgyur gyur pa spangs pa ni/ 'khor ba la mngon par dga' ba zhes bya ba la sogs pa ste/ bsags pa'i dge ba srid par bsngos pa ni sdug bsngal la bde bar phyin ci log pas na sdug bsngal gyi rgyur gyur pa ste/'khor ba'i phung po lnga'o/ /de nyid sdug bsngal bskyed pas bde ba'i srog 'phrog pa ni gshed ma lta bu'o/ /de spang ba'i phyir mya ngan las 'das pa la dgod pa ni/ khams gsum las dbyung ba zhes smos te/ khams gsum gyi sdug bsngal spang zhes bya ba'i don to/ /bsags pa rgyur ma gyur pa ni bar ma dor zad pa la bya ste/'bras bu ma phyin pa'i phyir ro/ /zad pa'i rgyu ni rnam pa gnyis te/ dge ba'i bshes gnyen dang bral bas bdud kyis gnod par byas pa dang / dngos por lta bas mtshan ma la gnas pa'o/ /dang po ni bdud kyi zhags pas bcings pa zhes bya ba ste/ bdud ni 'dir lha'i bu'i bdud de 'dod pa'i khams kyi gzhan 'phrul dbang byed kyi lha'o//des ji ltar zad par byas she na/ bcings pas bcings zhes bya ste/ dregs par byed pa la sogs pa'i phyir ro/ /dngos por lta bas mtshan ma la gnas pa ni/ g.yo ba dang zhes bya ste/ g.yo ba ni rnam par rtog pa ste/ mi brtan par byed pa'i phyir ro//rlom sems pa ni dngos por lta ba ste zhen pa'i phyir ro/ /de spangs pa'i phyir rdzogs pa'i byang chub la 'god pa ni/ rnam par grol ba zhes bya ba la sogs pa'o/ /da ni dngos por lta bas mtshan ma la gnas pas bsags pas rgyur ma gyur par zad pa nyid bstan pa ni/ mya ngan las 'das pa'i sgo bcad cing zhes bya ba la sogs pa ste/ dngos por lta bas sbyin pa la sogs pa la yongs su ma smin par byas pa ni mya ngan las 'das pa'i sgo gcad par bya'o/ /de la sbyin pa la sogs pa ni sgo lta bu ste 'jug pa'i phyir ro/ /yongs su ma smin pa ni bcad pa lta bu ste/zad par byas pa'i phyir ro/ /ji ltar zad par byas she na/ khyim pas rab tu byung ba la dang / rab tu byung bas rab tu byung ba la dang / khyim pa dang rab tu byung bas byang chub sems dpa' la dang / byang chub sems dpas byang chub sems dpa' la dang / byang chub sems dpa' khyad par gyis khyad par la dang / byang chub sems dpa' khyad par gyis spyi la dang / spyi dang ldan pas spyi la dang / de bzhin du mi spel ba dang / ma thob pa dang / 'gyod pa dang / spyams pa dang / thag bsrings pa dang / sngar bstan pa'i srid par bsngos pa rnams ni zad par byed pa'i rgyu yin no//de spang ba'i phyir byang chub sems dpa' snying rje bsgom pa ni mya ngan las 'das pa'i sgo dbye ba dang zhes bya ba la sogs pa'o/ /mdo kun las btus pa'i bshad pa lung gi tshad mas sbyar ba las snying rje rnyed par dka' ba'i gtam ste drug pa'o/ /snying rje rnyed par dka' ba bshad zin to// //de ltar byang chub tu sems bskyed nas da ni byang chub kyi sems de nyid mi nyams par rjes su bsrung ba'i tshul bshad par bya ste/ 'dir nyams pa'i rgyu ni mi mthun pa'i phyogs so/ /de lta bas na mi mthun pa'i phyogs spang ba brjod par bya ste/ gang zag la zhe sdang ba dang /dam pa'i chos spongs pa dang / bdud kyi las dang / brnyas pa'i sems dang / bar du gcod pa'i chos bzhi ni mi mthun pa'i phyogs byang chub sems dpa'i sdom pa dang 'brel ba'o/ /rtsa ba'i ltung ba bstan pa dag ni phal cher byang chub sems dpa'i sdom pa dang ma 'brel pa'o//sdom pa dang ma 'brel ba dag ci'i phyir bstan ce na/ kha na ma tho ba chen po'i mtshan nyid bstan pas gzhan dgos pa bskyed pa'i phyir ro/ /de'i phyir byang chub sems dpa'i sdom pa dang 'brel pa'i mi mthun pa'i phyogs bar du gcod pa'i chos spang ba bstan pa ni/'di dag pas kyang zhes bya ba la sogs pa'o/ /de nyid rgyas par 'chad pa ni/ /de la zhes bya ba la sogs pa gsungs pa ste/ rma 'byin pa'i nyes pa ni/ byang chub sems dpa'i sdom pa dang ldan pas/ byang chub sems dpa' ji lta bu rung ba la nyes pa 'dir 'gyur zhes bya ba'i don te/sdom pa nyams pa'i gang zag la'ang 'gyur zhes bya ba'o/ /la la dag ni thob pa ma nyams pa la'o zhes 'dod de/ bslab pa thams cad kyi spyi'i mtshan nyid yin pas na gzhan du na ha cang thal bar 'gyur ro zhes zer ro/ /de ltar ma yin te/ 'og nas kyang de la ra'i shing rta lta bus 'gro ba'i byang chub sems dpa' dang /glang po che'i shing rta lta bus 'gro ba dag ni nyams pa'o zhes 'byung ba'i phyir dang / yang ji lta bu yang rung zhes bya ba'i sgra dang / lung las kyang dri ma dang klan ka'i dpes bstan pa'i phyir ro/ /'o na dge bsnyen la sogs pa ci'i phyir bshad ce na/nyes pa 'bring du bstan pas yul byang chub sems dpa' dag ni shin tu nyes pa lci ba dang 'og ma dag kyang spang ba'i phyir nyes pa med do/ /de la sems can rnams kyi dge ba'i rtsa ba ni srog gcod pa spang ba la sogs pa dkar po'i chos rnams so/ /ston pa gzhan la mi brten pa ni/skyabs gsum blangs pa'i phyir ro/ /dge ba'i rtsa ba ni mi dang lha 'grub pa'i rgyu la'o/ /dge slong ni gsol ba dang bzhi'i las kyis bsnyen par rdzogs pa'o/ /dge ba'i rtsa ba ni mya ngan las 'das pa'i rgyur bsngos pa la bya'o/ /dad pas rjes su 'brang ba ni gang zag la yid ches pas 'jug pa'o//chos kyi rjes su 'brang ba ni rang gi shes rab gtsor byed pa'o/ /brgyad pa ni grangs kyi brgyad pa'o/ /rgyun du zhugs pa ni mthong lam thob pa'o/ /lan cig phyir 'ong ba ni 'dod pa'i khams su skye ba gcig lus pa'o/ / phyir mi 'ong ba ni 'dod pa'i khams kyi skye ba zad pa'o/ /dgra bcom pa ni srid pa'i rtse mo'i spang bya rnams kyang spangs pa'o/ /rang sangs rgyas ni rten cing 'brel par 'byung ba nyid kyis rtogs nas 'bras bu thob pa'o/ /ra'i shing rta lta bus 'gro ba dang / glang po che'i shing rta lta bus 'gro ba ni so so'i skye bo mi brtan pa'o//zla ba dang nyi ma lta bus 'gro ba ni/ so so'i skye bo brtan pa'o/ /nyan thos kyi rdzu 'phrul lta bus 'gro ba ni/ sa dang po nas sa bdun pa'i bar du'o/ /de bzhin gshegs pa'i rdzu 'phrul lta bus 'gro ba ni rnam par smin pa'i sas bsdus pa'o//de ltar na so so'i skye bo bstan pa nas bzung ste bskal pa grangs med pa dang po ni myur ba'i dbang du byas pa'o/ /sa dang po nas bdun pa'i bar du brtan pa ni nges shing brtan pa'i dbang du byas pa'o/ /sa brgyad pa nas bcu pa'i bar du ni shin tu bul ba'i dbang du byas pa ste/de ltar bskal pa grangs med pa gsum du rig par bya'o/ /myur ba smos pas shin tu myur ba srid pa yin nam zhe na/ ma yin te/ dper na de bzhin gshegs pa skar rgyal la de bzhin gshegs pa shAkya thub pas bya'i brtul zhugs kyis gnas te/tshigs su bcad pa gcig gis bstod pa lta bus kyang bskal pa mang por 'dums su zad kyang grangs med pa ni/ sus kyang 'dums pa mi srid pa'i phyir ro/ /so so'i skye bo bstan pa ni 'di gang la bya zhe na/ kha cig na re nges par 'byed pa'i cha dang mthun pa la bya'o zhes zer ro//kha cig ni tshogs kyis nas bzung bar 'dod do/ /la la ni bzod pa thob nas 'dod mod kyi 'dir ni dang po brda'i sems bskyed pa nyid nas 'dod de gzhan du na 'phags pa thogs med kyis mos pas spyod pa'i sa pa thams cad kyang mi brtan par gsungs pa'i phyir ro/ / bskal pa ni bskal pa chen po la 'dod do/ /grangs med pa zhes bya ba ni grangs kyi gnas drug cur phyin pa la 'dod do/ /ci'i phyir grangs med pa zhes brjod ce na 'og ma dag tu ni grangs kyi khyad par gyi ming chos mngon pa las gsungs te/ grangs ni/ rkyang pa dang / khug pa'o/ /de la grangs rkyang pa ni gcig dang bcu dang /brgya dang / stong dang / khri dang / 'bum dang / sa ya dang / bye ba dang / dung phyur te gnas dgu'o/ /khug pa'i gnas ni gsum te/ ther 'bum dang / khrag khrig dang / rab bkram dang / gtams dang / dkrigs dang / mi 'khrugs pa dang / khyad sbyin dang / dpang steng dang / ded 'dren zhes bya ba dgu ste/ chen po dgu bsnan pas khug pa dang po'o/ mtha' snang dang / rgyu rig dang / 'od mdzes dang / dbang po dang / legs byin dang / rtogs 'gro dang / 'gying brtul dang / rta rgyags dang / stobs 'khor te dgu ni snga ma ltar chen po dgu bsnan pa ni khug pa gnyis pa'o//brda' shes dang / rnam 'byung dang / stobs mig ces bya ba gsum ni/ snga ma ltar chen po gsum bsnan pas khug pa gsum ste/ de ltar na rkyang pa dgu dang / khug pa'i gnas gsum du grangs bzhi bcu rtsa gnyis te/ bsdu na lnga bcu rtsa gcig ni mngon pa las snang ngo //lhag ma grangs brgyad ni gzhung du mi snang mod kyi 'on kyang khug pa'i gnas su brgyad bsnan na/ lnga bcu rtsa dgu ni grangs kyi ming du btags la/ drug cu pa ni de lta bu'i ming las gsungs pas grangs med pa zhes bya'o zhes slob dpon dbyig gnyen gyis bshad do/ /de la dad pas rjes su 'brang ba la sogs pa rnams kyi dge ba'i rtsa ba ni rang rang gi 'bras bu gang ma thob par 'dod pa'o//dgra bcom pa dag ni gzhan la dmigs pa la bya'o/ /rang sangs rgyas dag ni gnyis la dmigs pa la bya'o/ /byang chub sems dpa' dag ni sangs rgyas dang sems can gyi don 'dod pas khyad par byas pa'i dge ba'i rtsa ba gang yang rung ba'o//'dir dge ba'i rtsa ba dag ni sbyin pa dang tshul khrims dang bsgom pa las byung ba'o/ /khros pa ni zhe sdang ba'o/ /brnyas pa ni khyad du bsad pa'o/ /dpe gzhan gyis bstan pa ni gang la la zhig ces bya ba la sogs pa ste/ sems can ni log sred can la sogs pa'o//byang chub sems dpa' ni las dang po pa theg pa chen po la mos pa tsam yod pa'o/ /spyo ba ni tshig gis gshe ba'o/ /brgyad pa ni tshul khrims nyams pa la sogs pas mtshang 'dru ba'o/ /nyams pa ni dbyug pa dang mtshon dang bong ba la sogs pas brdeg pa'o/ /rkyen de las 'bras bu ci myong zhe na/gang la la zhes smos te/ rkyen gang yang rung ba ni tshul khrims dang / 'tsho ba nyams pa la sogs pa'i rkyen gyis so/ /khyad du bsad pa ni sems can gyi bsgrub pa'i khyad par ro/ /spyo ba ni snga ma ltar ngag gi khyad par ro/ /'bras bu nyid rnam par smin pa'i 'bras bu ni/ sems can dmyal ba ngu 'bod chen po zhes so//ngu 'bod chen po ni grangs kyi gnas gzhan lnga pa'i ming ngo / /sdug bsngal ji lta bu myong ba zhe na/ lus dpag tshad lnga brgya pa zhes bya ba la sogs pa gsungs so/ /sdug bsngal nyid mtshon pa ni lcags kyi thong gshol 'bar ba zhes smos so/ /'dir la la dag ni khyad du bsad de spyos pa'i 'bras bu yin gyi gong ma'i 'bras bu ma yin te/lhag ma rnams kyang de bzhin du rig par bya'o zhes 'dod do/ /stong gsum gyi stong chen po'i zhes bya ba ni/ gling bzhi pa dang nyi zla dang / /ri rab dag ni 'dod lha dang / /tshangs pa'i 'jig rten stong la ni/ /stong ni spyi phud yin par 'dod/ /de stong la ni stong gnyis pa//bar ma'i 'jig rten khams yin no/ /de stong la ni stong gsum ste/ mnyam du 'jig cing 'byung ba yin/ /zhes bya ba'o/ /theg pa chen po nyid las gzhi blangs pa ni/ theg pa chen po ni sangs rgyas kyi bka' ma yin zhes spong ba'o/ /nyes pa skye ba'i rgyu'i mtshan nyid ni/ de ci'i phyir zhes rgol ba la/ lan ni de bzhin gshegs pa thams cad ni zhes bya ba ste/ rgyu spangs pas 'bras bu bcom pa yin pas na/ de bzhin gshegs pa la gnod pa byas pa bas byang chub sems dpa' la gnod pa byas pa nyes pa che bar mi 'thad pas ma yin no zhes bya ba'i don to/ /theg pa chen po dag ni sangs rgyas kyi bka' ma yin te/mdo sde la mi 'jug cing 'dul ba la mi snang ste chos nyid dang 'gal ba'i phyir zhes bya ba la sogs pas na skur pa 'debs pa'o/ /mi 'khor bar byed cing sun 'byin pas na spong ba'o/ /gang zag la skur pa 'debs pa ji ltar spong zhe na/ chos gzhan ma yin zhes bya ba la sogs pa ste/ chos dang gang zag tha mi dad pa'i phyir ro zhes bya ba'i don to//'dzam bu'i gling zhes bya ba ni shing gi bye brag las ming btags pa ste/ dpag tshad drug stong phyed dang bzhi'i nang du chud pa'i gling gi ming ngo / /ci 'dra yang rung ba ni tshul khrims te so sor 'chal pa la yang zhes bya ba'i don to/ /so so'i skye bo zhes bya ba yin no//dpe 'di dag ni bcom ldan 'das kyis 'khor gyi bsam pa la dgongs nas tha dad du bstan gyi rtogs pa'i bye brag gis ni ma yin te/ thams cad las dang po pa kho na la yin no zhes bya'o/ /nyes pa 'di dag byang chub sems dpa'i sdom pa dang 'brel bar ci mngon zhe na/ 'phags pa byams pa seng ge sgra'i mdo las kyang zhes gsungs pa yin no//las dang po pa yin par ci mngon zhe na/ gal te des thams cad mkhyen pa yongs su mi gtong zhe na zhes gsungs pas so/ /nyon mongs pa dag ni sna tshogs pa ma yin nam ci'i phyir zhe sdang khong nas rma 'byung zhing smas par 'gyur zhe na/ byang chub sems dpa' dag ni zhe sdang kho nas lhung bar 'gyur gyi/lhag mas ni ma yin gyi/ des gzhan yongs su gtong bar 'gyur la btang na tshul khrims 'chal zhing dge ba'i rtsa ba 'chad pa'i phyir ro/ /'dod chags dag ni de la ma yin te/ gzhan sdud par 'gyur la/ des na byang chub sems dpa'i bya ba ni gzhan yongs su sdud pas mchog go//lung las kyang byang chub sems dpa'i ltung ba ni zhe sdang las 'byung ngo zhes pa dang / yang byang chub sems dpa'i ltung ba ni gnyis te/ zhe sdang dang / gti mug go zhes 'byung ba yang byang chub sems dpa' thabs la mkhas pa ni/ zhe sdang gis 'jigs la thabs mi mkhas pa ni 'dod chags kyi ltung bas 'jigs so zhes 'byung bas zhe sdang kho na rma 'byin par bstan pa ni/'jam dpal rnam par rol pa'i mdo las kyang zhes bya ba'o/ /'o na de ltar khong khro bas dge ba'i rtsa ba zad pa ji lta bu dpe ston cig ce na/ byang chub sems dpa' chos smra ba rab tu dga' ba'i dbang po la byang chub sems dpa' rgyal ba'i blo gros ma dad cing /khong khro ba bskyed pas sems can dmyal ba chen por ltung bar gyur cing zhes 'byung ba dang / sdong po bkod pa las kyang de dag phan tshun brnyas pa'i sems kyi nyes pas tshe dang 'od dang kha dog las nyams par gyur to zhes 'byung bas/khong khro ba dang brnyas pa dag ni dge ba'i rtsa ba zad pa'i rgyur gsal bas de bstan pa ni zla ba sgron ma las kyang zhes gsungs so/ /de la dge ba'i rtsa ba dag ni rnam pa gsum ste/ sbyin pa las byung ba dang / tshul khrims las byung ba dang / bsgom pa las byung ba'o/ /de la sbyin pa las byung ba ni rnam pa gnyis te/phan 'dogs pa dang / yon tan gyi zhing las byung ba ni sbyin pa dang sangs rgyas mchod pa'o/ /la la dag ni sbyin par byed mi nus pas longs spyod la chags na de'i gnyen po sangs rgyas mchod pa yin pas na sbyin dang sangs rgyas mchod pa zhes smos so zhe'o/ /tshul khrims ni tshul khrims las byung ba'o//thos pa la sogs pa ni bsgom pa las byung ba ste/ thos pa'i don sgom par byed pa ni lus dang sems 'du 'dzi dang rnam par rtog pa las dben par bya bas na/ dgon gnas smos so/ /de ltar rma 'byin pa'i nyes pa bstan nas/ da ni dang ba'i phan yon bstan pa'i phyir de ltar zhes bya ba la sogs pa gsungs te/bsam pa rnam par dag pas na byams pa'o/ /sbyor ba bzang po ni mig bskyed pa'o/ /mos pa ni las dang po pa'o/ /dad pa ni dang ba'i dad pa'o/ /bsngags pa ni yon tan no/ /de nyid kyi nges don gyi lung ni dad pa'i stobs bskyed pa'i mdo las zhes bya ba'o//bslab pa ni khrims lnga la sogs pa'o/ /de la yul dman pas na dge bsnyen no/ /dus thung bas na nyin gcig go/ /dngos po dman pas na zan zhes smos so/ /nyung bas na gcig ces smos so/ /chos grangs med pa ni snga ma yul mang bas 'jig rten gyi khams rdul snyed dang /dus ring la bskal pa gang gA'i bye ma snyed dang / rtag pas na nyin re zhing dang / dngos po bzang bas lha'i zas dang gos byin pa zil gyis gnon ces bya'o/ /de bzhin gshegs pa mthong ba tsam yang bsod nams mang du 'phel ba ci'i phyir zhe na/ bsod nams dang ye shes mthar phyin pas na de'i 'bras bu ni don med pa ma yin te/lung las kyang / sangs rgyas kyi sgra yang don med pa ma yin te/ mya ngan las 'das pa'i rgyur 'gyur ro zhes gsungs na gzugs mthong na ci'i phyir mi 'gyur/ dge 'dun zhes bya ba ni bdud la sogs pas mi phyed pa'i phyir te/sangs rgyas chos dang dge 'dun rnams/ /bdud rnams bye ba brgya yis kyang / /gang phyir dbye bar mi nus pa/ /de phyir dge 'dun zhes bya'o/ /zhe'o/ /nyan thos smos pa ni rtag pa'i phyir ro/ /yang na dang ba'i 'bras bu can yin pas so/ /yang na sdom pa mtshungs pas so/ /yang na mi phyed pas so//yang na yon tan dang ldan pas so/ /yang na spangs pa 'dra bas so/ /yang na grangs mang ba'i phyir ro/ /yang na mi brten pa ma yin pas so/ /bcom ldan 'das 'khor dang bcas pa la bsnyen bkur dus de tsam du dngos po bzang po dang mang pos byas pa bas byang chub sems dpa' la byas pa bsod nams che ba ci'i phyir zhe na/la la na re rgyu gtso bo yin pas rgyu mchog tu bshad de/ byang chub sems dpa' las de bzhin gshegs pa/ de bzhin gshegs pa las ni nyan thos 'byung bar gsungs pa'i phyir ro zhes zer ro/ /la la ni byang chub kyi sems bsngags par bstan pa'i phyir zhes zer ro//ra'i shing rta lta bu'i bsam pa phun sum tshogs pa gang zhe na/ dang ba'i bsam pa la bya'o/ /ci'i phyir zhe na/ rgyun gyi bsam pa ni phun sum tshogs pa ma yin la/ gal te de ltar yin na ra'i shing rta lta bu zhes ji skad brjod/ sangs rgyas la dge ba'i rtsa ba bskyed pa zhes bya ba ni sangs rgyas la dmigs pa'i sbyin pa la sogs pa'o//de ltar dang po'i phan yon bstan nas da ni nges pa dang ma nges pa'i byang chub sems dpa' rnams kyi mtshan nyid bstan pa ni/ byang chub sems dpa' 'di lnga ste/ /zhes bya ba la sogs pa ste/ sangs rgyas kyi zhing ni stong gsum gyi stong chen po'o//phyir phul ba zhes bya ba ni/ dang po'i sa'i cha nas phyir ded pa'o/ /brjod du med pa'i yang brjod du med pa zhes bya ba ni grangs kyi mtha' thug pa ste/ de'i gong na grangs kyi ming gzhan med pas ji skad du/ brjod du med pa'i brjod du med pa ni/ brjod du med pas thams cad tshang bar 'gyur zhes gsungs pa lta bu'o//de ma yin pa de'i 'og mar ni grangs kyi gnas gzhan ming gis brjod pa ste/ ji skad du mdo sde las/ grangs kyi gnas ni gnyis [(]ste[,]te[)]/ khug pa dang / rkyang pa'o/ /rkyang pa ni brgya bcu drug ste/ bye ba dang / khod khod dang / thad dgu dang / khrig khrig dang /thams thams dang / myad myid dang / gang ya dang / ban bun dang / phyar phyur dang / lcag lcig dang / byang bying dang / chem chem dang / phyal phyol dang / khyad khyud dang / zer zer dang / khrib khrib dang / ya gangs dang / cho ma dang / khram khrim dang / nab nub dang / sang sang dang / brgyud yas dang /gtang yas dang / bkra yar dang / gsa' yas dang / mi mtshungs dang / lam lum dang / yam yom dang / khral khrul dang / thad thud dang / bsam phyod dang / brang breng dang / bgrod yas dang / bsngo yas dang / zang yag dang / 'phro bkye dang / rtse 'phyo dang / yong tan dang / 'brug g.yos dang /sang yal dang / mthing yug dang / yid 'phyo dang / nab neb dang / khrig thams dang / yal yal dang / bgrang yas dang / thug yal dang / shang shang dang / yag yag dang / tham thim dang / rlom bsnyal dang / gzhal 'phyos dang / gzhal yal dang / gzhal med dang /gzhal 'khor dang / gzhal thim dang / gar gzhal dang / gzhal sangs dang / gzhal thag dang / gzhal phul dang / gzhal gzhi dang / 'phyo 'gyur dang / nyar nyer dang / phyag phyig dang / zal zul dang / sal sal dang / g.yo ldeg dang / phan phun dang / brnang ya dang /rem 'grol dang / rdzi ngad dang / rdzi rdul dang / phun yol dang / ngad ngad dang / bgrang rtsi dang / zab bgrang dang / dga' brkyang dang / gzhung mda' dang / 'khrul chad dang / 'ol phyod dang / gdab yas dang / gcal yas dang / bgrang yas dang / byim 'phyo dang / ya me dang / bsnyal yas dang / ldab ldeb dang /'ban chad dang / phang phung dang / khye'u chang dang / zhung zung dang / mchog yal dang / mtha' brtul dang / yun 'gyangs dang / bun lob dang / lam lob dang / bsnyad yas dang / lang ling dang / ljab ljib dang / mi brtsal dang / 'byam yas dang / nga 'grang dang / smos yas dang / bkra chal dang / lo rgyas dang /'bum rdib dang / gam gum dang / la lo dang / bgrang 'phyos te de'i steng du rtsa ba'i grangs bdun bsnan na brgya bcu drug ni grangs rkyang ba'i dbang du byas pas so/ /khug pa'i gnas ni bcu ste/ dpag yas dang / yal phyong dang / mu yal dang / bgrang yol dang / mi 'jal dang / bsam phyod dang / mtha' 'byam dang /dpag thag dang / brjod du med pa dang / brjod du med pa'i yang brjod du med pa ste/ de'i steng du bgrong 'phyos la bsgres pa la sogs pa nas brjod du med pa bsgres pa'i bar du bcu bsnan pa ni khug pa'i gnas bcu ste/ nyi shu dang spyir sdom na brgya sum cu rtsa drug tu ni ming gis bstan pas so//dpe de nyid sbyar ba ni/ de bzhin du zhes bya ba la sogs pa ste/ thos pa'i dbang du byas pa ni kha ton byed pa dang / klog pa dang / 'dzin par byed pa'o/ /bsam pa'i dbang du byas pa ni/ /tshul bzhin yid la byed pa'o/ /dpyod pa ni shes rab kyis zhib tu rnam par 'byed pa'o/ /kun chub par byed pa ni ma lus par 'dzin pa'o//de la tshul dman pa la spyod pa dang / 'dre ba la spyod pas na dpe gnyis bstan no/ /rang bzhin gyi rigs dang ldan zhing sems bskyed pas na theg pa chen po pa'o/ /bsam pa rgya che bas na mos pa'o/ /sbyor ba rgya che bas klog pa dang / yongs su 'dzin pa'o/ /de la klog pa ni gzhung gi bdag nyid do//'dzin pa ni don rnam par sems pa'o/ /gus pa ni sems kyi khyad par ro/ /zhe sa ni lus dang ngag gi'o/ /gzhol ba ni mos pa'o/ /'bab pa ni lhan cig spyod pa'o/ /brten pa ni 'grogs pa'o/ /tshol ba ni nyan pa'o/ /'dzin pa ni don mi nyams par byed pa'o//'chang ba ni glegs bam mi gtong ba'o/ /de ltar sgrub pas bsti stang byed pa bstan nas/ zang zing gis bsti stang byed par bstan pa ni/ rab tu gus pas me tog dang zhes bya ba la sogs pa'o/ /byang chub sems dpa'i spyod pa'i gtso bo ni gzhan la gus pa yin pas mi brnyan pa zhes smos so//pha rol tu phyin pa drug ni zab pa dang rgya che ba'o/ /yang kun rdzob kyi bden pa dag ni zab pa yin la/ don dam pa'i bden pa ston pa dag ni rgya che ba yin no zhes kha cig 'dod do/ /bden pa gnyis dang ldan pa'i chos mi spong bas mos pa'o/ /theg pa chen po'i don ni shes rab dang snying rje'o//yang na pha rol tu phyin pa drug go/ /yang na zab pa dang rgya che ba'i don to/ /'phags pa thogs med kyis ni sems bskyed pa la sogs pa rnam pa bdun bshad do/ /'phags pa klu sgrub kyis ni pha rol tu phyin pa drug dang snying rje la bshad do/ /lang kar gshegs pa las ni/chos lnga dang ni rang bzhin dang / /rnam par shes pa brgyad nyid dang / /bdag med pa ni rnam gnyis kyis/ /ma lus theg pa chen po bsdus/ /zhe'o/ /de la chos lnga ni ming dang / rgyu mtshan dang / rnam par rtog pa dang / de bzhin nyid dang / yang dag pa'i ye shes dang / kun brtags pa dang /gzhan gyi dbang dang / yongs su grub pa ni rang bzhin no/ /'phags pa byams pa'i zhal nas ni/ sa bon dang / 'jug pa dang / bsgrub pa dang / go rims dang / 'bras bu dag ni theg pa chen po yin te/ rigs ni sa bon no/ /'jug pa ni sems bskyed pa'o/ / sgrub pa ni rang dang gzhan gyi don to/ /go rims ni pha rol tu phyin pa drug go/ /'bras bu ni byang chub kyi don te/ de'i phyir/ theg pa mchog bstan pa yi rnam pa chos kyis 'gro ba'i sems can la/ /'byor pa'i don tshul bla med gyur pa rnam pa lnga yi bdag nyid ston/ /zhes gsungs so//mkhas pa ni phyin ci ma log par shes pa'o/ /mi g.yo bas na rtag tu'o/ /skyabs ni mtho ris dang byang grol lo/ /byang chub kyi sems ni smon pa dang 'jug pa'o/ /byams pa ni phan par 'dod pa'i sems so/ /snying rje ni sdug bsngal bsal ba'i sems so//pha rol tu phyin pa drug ni sbyin pa la sogs pa'o/ /rton pa bzhi ni thos pa dang / bsam pa dang / sgom pa'i gnas skabs gsum du chos dang / don dang / nges pa'i don dang / ye shes la rton gyi gang zag dang / tshig dang / drang ba'i don dang / rnam par shes pa la mi rton pa'o//bsdu ba'i dngos po ni sbyin pa dang / snyan par smra ba dang / don spyod pa dang / don mthun pa'o/ /rang gi lam la gzhan sbyor ba ni gzhan yang zhes bya ba'o/ /da ni chos spong ba'i nyes pa bstan pa'i phyir dam pa'i chos spong ba ni gsungs te/ gang zag gang gis spong zhe na/ byang chub sems dpa'i theg pa pa zhes smos so/ /dus nam gyi tshe spong zhe na/ sangs rgyas bye ba khrag khrig ces bya ba la sogs pa gsungs te/ bzod pa ma thob cing mos pa yongs su ma rdzogs pa ni/ sangs rgyas mthong yang kha na ma tho ba'i las chen po la 'jug pa srid pas na de smos so//dmigs pa'i tshul zhes bya ba ni 'khor gsum yongs su dag pa dang mi ldan pa'i phyir ro/ /gang spong ba zhe na/ shes rab kyi pha rol tu phyin pa zab mo 'di zhes smos so/ /ri mo byed pa ni sangs rgyas kyi bka' ma yin zhes yongs su spong ba'o/ /ji ltar ri mo byed ce na/ / 'khor du 'ongs na yang lus dang sems kyis mthun par mi spyod ces bya ba ste/ 'khor ni dge slong la sogs pa'o/ /'ongs pa ni chos kyi mkhan po'i gsang drang ba'i phyir lhags pa'o/ /'dud pa la sogs pa med pas lus kyis mthun par mi byed pa'o/ /chos ma yin no zhes spong bas sems kyis mthun par mi byed pa'o//des nyes pa cir 'gyur zhe na/ mthong ba'i chos la sogs pa ni/ 'chal pa'i shes rab tu 'gyur zhes bya ba ste/ shes rab dang bral ba zhes bya ba'i don to/ /'dor ba ni spong ba'o/ /dus gsum gyi sangs rgyas thams cad 'di las skyes shing byung bas na thams cad mkhyen pa nyid bor ba'o//des 'bras bu ci myong zhe na/ skyes nas myong ba'i dbang du byas nas/ lo bye ba khrag khrig ces bya ba la sogs pa gsungs so/ /bar ma chad pa dmyal ba kho na brgyud pas na 'khor ba'o/ /'jig pa ni dus mtha'i me la sogs pa'o/ /chags pa ni dang po rlung nas bzung ste'o//de'i tshe'ang 'jig rten gyi khams gzhan gyi sems can dmyal bar skye bas na dmyal ba chen po nas dmyal ba chen por zhes smos pa yin no/ /de'i las zad nas gong du 'pho ba ni/ dud 'gro dang gshin rje'i 'jig rten du zhes smos pa yin no/ /des na cis te mir skyes na yang lkugs pa dang dmus long la sogs par skye bas na de bzhin no zhes smos pa yin no//'o na kha na ma tho ba chen po ni mtshams med pa ma yin nam zhes rgol ba la/ lan ni de bas kyang dam pa'i chos spong ba kha na ma tho ba che ba yin te/ ci'i phyir zhe na/ dus gsum gyi sangs rgyas kyi ye shes kyi rtsa ba bcad pa'i phyir ro zhes bstan pa ni mtshams med pa lnga dang 'dra zhes mi bya'o zhes gsungs so//'di byang chub sems dpa'i sdom pa dang 'brel par ci mngon zhe na/ byang chub sems dpa'i theg pa pa zhes gsungs pa'i phyir ro/ /da ni bdud kyi las kyi gnod pa bstan pa'i phyir/byang chub sems dpa' rnams kyi bdud kyi las ni zhes gsungs te/ 'dir bdud dag ni du zhig la/ gang zag ni gang gi la/ dus ni nam gyi tshe/ gnod pa ni ji lta bu zhig /bdud kyi las ni du zhig /de spong ba'i thabs ni gang zhig ce na smras pa/ bdud ni rnam pa bzhi ste/ phung po dang / nyon mongs pa dang / 'chi bdag dang / lha'i bu'i bdud do/ /gang zag ni las dang po pa theg pa la gsar du zhugs pa la'o/ /dus ni dad pa dang rnam par rtog pa shas che ba dang / brtson 'grus rtsom pa dang / dge ba'i bshes gnyen dang bral ba'i tshe'o/ /'ching ba las yang dag par 'da' bar bya ba'i phyir rab tu brtson par byed pa la bar chad bya ba'i phyir nye bar 'ong zhing de las mi 'da' bar byed pa'o//bdud kyi las ni bsod nams kyi bar chad byed pa'i bdud kyi las brgyad dang / ye shes kyi bar du gcod pa nyi shu'o/ /brtag pa'i thabs ni bzhi ste/ rgyud kyi yon tan la brtag pa dang / 'od zer la brtag pa dang / chos bshad pa la brtag pa dang /mchod pa la brtag pa'o/ /la la ni stong pa nyid kyis brtag pa dang lnga'o zhes 'dod do/ /spang ba'i thabs ni yang dag pa'i dge ba'i bshes gnyen bsten pa'i sgo nas spong bar bya ba'o/ /de la bdud bzhi ni byang chub sems dpa'i bdud do/ /las rnam pa gnyis mtshon pa ni/bdud kyi las ni shes rab kyi pha rol tu phyin pa las 'byung ba'o zhes bya ba'o/ /las dang po pa theg pa la gsar du zhugs pa la bdud 'byung bas ming la gnas pa zhes smos te/ las dang po pa yin pas na tshig kho na la'o/ /ston pas ming la zhen pas bslus pa zhes bya'o//ming ji lta bu zhe na/ khyod mngon par rdzogs par sangs rgyas pa na zhes bya ba'o/ /las dang po pa yin pas na phyir mi ldog pa'i ltas de dag med par yang zhes bya ste/ phyir mi ldog pa'i ltas ni theg pa dman pa la ngan song dag gis brod pa dang 'jigs pa bskyed pa las kyang mi ldog pa la sogs pa'o//rlom sems pa ni bdud kyi tshig gis nga rgyal ba'o/ /brnyas pa ni khyad du gsod pa'o/ /de'i phyir/ bdag stod gzhan la smod pa'i byang chub sems dpa' ni/ bdud kyis yongs su blang shing blo chung rig par bya/ /zhe'o/ /dus ni rnam pa bzhi ste/ dge ba'i bshes gnyen dang bral ba las 'byung bas na de thabs mi mkhas shing shes rab dang bral ba/dge ba'i bshes gnyen dang bral ba/ dge ba'i bshes gnyen gyis ma zin cing zhes smos te/ mang po smos pa ni mtshon pa'i phyir ro/ /las gang byed ce na/ nyan thos kyi sa'am zhes bya ba la sogs pa gsungs te/ltung ba'i rtsa ba ni srog gcod pa la sogs pa'o/ /ches lci ba ni rnam pa thams cad mkhyen pa'i bar du gcod pa'i phyir te/ dmyal bar 'gro ba byang chub la/ /gtan gyi gegs byed ma yin te/ /nyan thos dang ni rang sangs rgyas/ /theg pa mchog la gegs su 'gyur/ /zhes bya ba lta bu'o/ / rnam par rtog pa dang ldan pa la/ bdud 'byung ba ni/ lha'i bu ji tsam du las 'jug pa zhes bya ba la sogs pa gsungs te/ las ni lus la sogs pa'i las so/ /'jug pa ni rnam par rtog pa'o/ /bdud ni nyon mongs pa ste/ ji skad du/ byang chub sems dpa'i nyon mongs pa ni rnam par rtog pa'o zhes gsungs pa'i phyir ro//smon pa ni 'bras bu 'dod pa'o/ /'dzin pa ni rgyu la 'jug pa'o/ /mchog tu 'dzin pa ni gtsor byed pa'o/ /'dod pa ni 'dun pa'o/ /'du shes pa ni mtshan mar 'dzin pa'o/ /rlom sems pa ni dngos por lta ba'o/ /yongs su rtags pa ni spyod pa'o/ /gang du las 'jug pa zhes smos pa de gang la ji ltar zhe na/byang chub kyi sems la zhes bya ba la sogs pa gsungs te/ zhen pa ni dngos por lta ba'o/ /ci'i phyir bdud kyi las su bshad ce na/ dngos por lta ba ni 'ching ba yin pas thar pa ci thob ces bya ba'i tha tshig go/ /dngos por lta bas kun nas bslang ba'i sbyin pa la sogs pa'i sbyor ba yang 'ching ba kho na yin pas/sbyin pas rlom sems su byed pa dang zhes bya ba la sogs pa gsungs te/ rlom sems pa ni rang dang gzhan dang chos su dngos po lta ba'o/ /mchog tu 'dzin pa ni zhen pa'i gnas su rtog pa'o/ /'dzin pa ni zhe sdang la sogs par brtags pa'o//lan pa ni rtsol ba'o/ /mtshan ma ni g.yeng ba'o/ /rgyu ba ni spyod pa'o/ /mngon du rgyu ba mi 'byung ba tsam la gtsor byed pas na/ dgon pa la dga' zhing mos pa dang / btang snyoms su byed ces smos te/ sems can yal bar 'dor ba na btang snyoms su ltung ba'o/ /chos gos la sogs pa ngan pas chog pas na 'dod pa chung ba'o//mang po mi 'dod pas na chog shes pa'o/ /de la 'dod pa chung bas ni chos bzhi spong ba ste/ tshul 'chos pa dang / kha gsag dang / gzhogs slong dang / thob kyis 'jal ba'o/ /chog shes pas ni rnyed pas rnyed pa spong ngo / /lus la sogs pa las su rung bar byed pas na sbyangs pa'o//yon tan ni bcu gnyis te/ zas las gyur pa gsum dang / gos las gyur pa gsum dang / gnas las gyur pa drug go/ /de la mang du za ba'i gnyen po ni/ stan gcig pa ste/ de yang stan gyi mtha' pa dang / chu'i mtha' pa'o/ /yang yang za ba'i gnyen po ni phyis mi len pa'o/ /bzang po la zhen pa'i gnyen po ni bsod snyoms pa ste/de yang ci thob pa len pa dang mthar gyis rgyu ba'o/ /gos bzang po la chags pa'i gnyen po phyag dar khrod pa ste/ de yang bor ba dang smad pa'i dbang gis so/ /mang po'i gnyen po chos gos gsum pa'o/ /'jam pa'i gnyen po phying pa ba'o/ /'du 'dzi la chags pa'i gnyen po ni dgon pa pa'o//bla gab la chags pa'i gnyen po ni bla gab med pa'o/ /stan la chags pa'i gnyen po ni gzhi ji bzhin pa'o/ /gtsug lag khang la chags pa'i gnyen po ni shing drung ba'o/ /'khrig pa la chags pa'i gnyen po ni dur khrod pa'o//nyal ba la chags pa'i gnyen po ni cog pu pa'o/ /yo byad kyis phongs par byed pas na bsnyungs pa'o/ /bsod nams kyi dngos po sbyin pa la sogs pa la ji lta ba bzhin du ye shes kyi tshogs la zhen pa yang 'ching ba yin pas/ stong pa nyid la gnas pa zhes bya ba la sogs pa gsungs te/stong pa nyid la sogs pa ni lhag mthong ngo / /spros pa med pa ni zhi gnas so/ /rab tu dben pa ni ting nge 'dzin gyi tshogs so/ /tshogs gnyis ni sangs rgyas kyis gnang ba'i phyir bka' sgrub ces bya ba'o/ /de ltar rgyas par bshad pa'i don bsdus pa ni/ ji tsam du rtog pa dang zhes bya ba la sogs pa gsungs te/spyi dang khyad par dang de gnyis kas spyod pa ni rtog pa dang rnam par rtog pa dang yongs su rtog pa'o/ /tha snyad bzhir rtog pas na mthong ba la sogs pa'o/ /'o na las dang po pa dag ji ltar 'dug par 'gyur zhe na/ stong pa nyid rnam pa thams cad kyi mchog dang ldan pa la shes pa yongs su gtad nas/tshogs bsags pa de nyid rtogs par 'gyur zhing nyes pa mtha' dag spong bas las dang po pas kyang sun 'byin pa'i sgo nas spong gi /gzhan du na rtog pa dag ni/ btsan thabs su spangs par 'dod na 'dus byas sun phyung bas gsor mi rung bar 'gyur te/ rnam par dben don mi shes shing //thos pa tsam la 'jug byed pa/ /mi gang bsod nams mi byed pa'i/ /skyes bu tha shal de dag brlab/ /ces 'phags pa nyid kyis gsungs pa dang / yang yod yang dag pa'i dngos po la med do zhes skur pa 'debs pa'i legs par ma zin pa zhes bya ste/ dam pa'i chos 'dul ba 'di las nyams par rig par bya'o zhes/'phags pa thogs med nyid kyis byang chub sems dpa'i sa las kyang gsungs pa'i phyir la/ de'i phyir bcom ldan 'das kyis kyang / 'jig tshogs su lta ba ri rab dang mnyam pa ni bla yi/ mngon pa'i nga rgyal can stong pa nyid du lta ba ni gsor mi rung ngo zhes gsungs so//'og nas yang thabs dang shes rab ya bral ba ni 'ching bar gsungs pa dang / yang thabs dang mi ldan par dge ba spyod pa thams cad kyang bdud kyi las so zhes 'chad do/ /de bas na 'khrul pa la 'khrul par shes nas rim gyis spong ba ni 'khrul pa spangs pa zhes brjod de/sna tshogs 'di dag 'khrul pa na/ /ma 'khrul gang zhig yin zhe na/ /'khrul pa tsam du spongs shes na/ /ma 'khrul yin par shes par bya/ /zhes 'dod do/ /da ni brtson pa dang ldan pa la bdud 'byung bas na/ de'i mtshan nyid brjod pa ni bdud kyi las ni brtson pa las 'byung zhes smos so//brtson pa gang dag ni bdud kyi mi mthun pa'i phyogs ma yin nam/ ji ltar na brtson pa la bdud 'byung zhes ci'i phyir zhe na zhes rgol ba la/ gang zhig rin po che dang bang mdzod dang ldan pa la/ chom rkun pa dag glags tshol zhing dbul zhing phongs la dgras ci zhig byas par 'gyur/ de bzhin du dge ba'i phyogs la brtson pa la bdud 'byung gi le lo la bdud kyis ci zhig bya zhes pa ni/brtson pa la bdud glags tshol gyi zhes gsungs pa yin no/ /brtson pa la sogs pa nyid gang zhe na/ ji tsam du gnyis la sbyor ba zhes gsungs te/ gnyis zhes bya ba ni gzung ba dang / 'dzin pa'i ngo bo nyid do//gzung ba dang 'dzin pa dag ni dngos por grub pa ma yin nam/ lung las kyang nga de'i tshe ri dgas kyi rgyal po seng ge yan lag ma smad pa zhes bya bar gyur to zhes gsungs pa dang / yang dge slong dag mtshan mo nam langs pa na ri dgas ce spyang skad 'byin pa'i sgra thos so zhes gsungs pa ma yin nam/ji ltar gzung ba dang 'dzin pa dgag ce na de ci'i phyir zhe na zhes rgol ba la/ gzung ba dang 'dzin pa dag ni thog ma med pa'i dus nas goms pa'i 'khrul pa yin pas yang dag par mi rung ste/ rigs pa dang lung gis gnod par gyur pa yin la/ bdag med pa ston pa'i tha snyad kyi sgro btags pa ni bdag dang bdag gir gzung ba dang /'dzin pa brjod pa yin pas nyes pa med do/ /'jig rten pa dag ni thog ma med pa'i 'khrul pas goms pa'i dbang gis yang dag par 'dzin pa gnyis la sbyor ba'o zhes bstan to/ /gnyis dang bral bas na sbyor ba yang dag pa ste/ phyin ci ma log pa zhes bya ba'i don to//de kho na nyid du na thob par lta ba med pas thob pa dam pa ni sbyor ba med pa ste/ mi sbyor ba nyid sbyor ba yin pa'i phyir ro/ /spros pa med pa zhes bya ba ni spros pa'i mtha' brgyad dang bral ba ni/ de ltar bshad pa bsdu ba ni gang na mig la mi sbyor ba zhes gsungs so//dad pa dang ldan pa'i bdud kyi las ni shugs kyis go bas na 'dir ma gsungs te/ 'das ma thag pa'i brtson pa dang ldan pa'i skabs su sbyar bar bya'o/ /da ni bdud kyi gnod pa gang byed pa de bstan te mthong ba'i chos la theg pa mchog la nyams par byed pa dang / ma mthong ba'i tshe rten mchog las nyams par byed pa'o//de lta bas na brdar bstan pa'i tshul gyis brtag pa rnam pa lngas brtags nas dge ba'i bshes gnyen la brten pas spang bar bya ba ni/ lha'i bu nyi shu po 'di dag ni zhes smos te/ bdud kyi las brgyad dang / bdud kyi spyod pa bco brgyad dang / bdud kyi las yang dag phul nyi shu zhes smos pa ni de brtag pa la mkhas par bya ba'i phyir ro//de la nyi shu gang zhe na/ rnal 'byor spyod pa zhes gsungs te/ rnal 'byor ni zhi gnas dang lhag mthong gi ting nge 'dzin te/ spyod pa ni rnam pa gnyis te/ sems rnam par sbyong ba'i ting nge 'dzin spyod pa dang / spyod pa nyams su len pa'i spyod pa ste/don gyi skabs 'dir ni sems rnam par spyod pa'i spyod pa la 'dod do/ /bdud ces bya ba ni yon tan skye ba'i bar du gcod pa la bya ste/ 'dir ni theg pa mchog la 'dod do/ /yang dag phul zhes bya ba ni bdud kyi las mchog yin no zhes bya ba'i don to/ /bdud kyi las ni dpag tu med pa yin nam/ji ltar grangs nges zhes rgol ba ni/ gang zhe na zhes bya'o/ /bden mod kyi 'dir mchog bsdus nas bshad pa nyes pa med ces bya ba ni/ 'di lta ste zhes mtshams sbyor ba'o/ /de la rnam pa nyi shu ni 'di lta ste/ yongs su 'dzin pa'i dbang du byas pas bshes gnyen dman pa la brten pa ni/rnam par grol bar 'dod cing zhes bya ba la sogs pa ste/ 'khor bas skrag pa ni nyan thos dang rang rgyal ba'i theg pa'o/ /dang po dang bar ma dang tha mar ni/ gnyen po la sogs pa gsum du sbyar te/ theg pa mchog gi rtsa ba ni dge ba'i bshes gnyen yin pas de dang bral ba ni/de'i bar du gcod pa bdud ces bya'o/ /de ltar yongs su 'dzin pa dang bral na 'bras bu'i mchog sgrub pa dang bral bas shes rab thabs kyis ma zin na ni gnyis te/ gzhan gyi don gyi thabs dang bral ba ni stong pa nyid las so sor rtog cing sems can yal bar 'dor ba ste/ rang nyid kyi nyon mongs pa spong bar 'bad pa'i phyir ro/ /rang don gyi thabs dang bral ba ni 'dus ma byas la so sor rtog cing 'dus byas kyis yongs su skyo ba zhes bya ste/ tshogs yongs su rdzogs par mi 'gyur zhes bya'o/ /de ltar shes rab thabs kyis yongs su ma zin pas zag pa med pa'i shes rab kyi rgyu la log par zhugs pa ni/bsam gtan bskyed cing rnam par ldog pa tshol ba ste/ zag pa med pa'i shes rab kyi rgyu ni ting nge 'dzin yin pa'i phyir bsam gtan bskyed pa ni rang zhi bar 'dod pa'i bsam pa la sogs pa'o/ /ldog pa ni rnam pa thams cad kyi mchog dang ldan pa'i ting nge 'dzin to//yang dag pa'i ting nge 'dzin dang bral ba ni gang zag la ltos te bsam pa dman pa dang / chos la ltos te sbyor ba dman par 'gyur ba'o/ /de la gang zag la ltos te bsam pa dman pa ni gnyis te/ spyi'i dbang du byas nas snying rje dang bral ba ni snying rje chen po bskyed ces bya'o/ / bye brag gi dbang du byas nas byams pa dang bral ba ni khro ba zhes bya'o/ /chos kyi dbang du byas nas sbyor ba dman pa ni gnyis te/ bshad pa'i dbang du byas pa dang / sgrub pa'i dbang du byas pa'o/ /de la bshad pa'i dbang du byas pa ni gnyis te/ shes rab dman pa la sbyor ba ni/ nyan thos dang rang rgyal ba'i gtam ston cing zhes bya ba la sogs pa ste/bdag med pa tsam ston pa'i phyir ro/ /shes rab 'chal pa la sbyor ba ni zab mo'i gtam 'chab cing zhes bya ba la sogs pa ste/ zab mo ni stong pa nyid la sogs pa'o/ /gtam sna tshogs pa ni rgyan po'i gtam la sogs pa'o/ /sgrub pa'i dbang du byas pa ni lnga ste/sbyor ba la mi brtson pa dang / sbyor ba nyams pa la brtson pa dang / sbyong ba mi mthun pa la brtson pa dang / sbyor ba dang bral ba la brtson pa dang / sbyor ba ngan pa la brtson pa'o/ /sbyor ba la mi brtson pa ni gnyis te/ rang gi lam sgrub pa la mi brtson pa ni/ lam shes kyang zhes bya ba la sogs pa ste/lam ni pha rol tu phyin pa drug go/ /gzhan lam du khrid pa la mi brtson pa ni/ rab tu brtson pa'i bsngags pa brjod kyang zhes bya ba la sogs pa ste/ mi sbyor ba ni khrid par mi byed pa'o/ /sbyor ba nyams pa la brtson pa ni gnyis te/rang gi spyod pa mi sgrub pa ni/ dge ba'i rtsa ba sogs kyang zhes bya ba la sogs pa ste/ byang chub kyi sems ni theg pa chen po'i lam du 'gro bar byed pa'i phyir ro/ /rang gi spyod pa la gzhan mi sbyor ba ni/ lhag mthong gi rnal 'byor dang ldan par gnas kyang zhes bya ba la sogs pa ste/ byang chub sems dpa' ni gzhan gces su 'dzin pa'i phyir ro/ /sbyor ba mi mthun pa la brtson pa ni/ nyon mongs pa ma lus pa zad par tshol zhing zhes bya ba la sogs pa ste/ bsam pa dang sbyor ba mi mthun pa'i phyir ro/ /sbyor ba dang bral ba la brtson pa ni gnyis te/ gzhan don sgrub pa'i thabs snying rje dang bral ba ni/shes rab kyis rnam par dpyod cing zhes bya ba la sogs pa'o/ /rang don bsgrub pa'i sbyor ba thabs ma lus pa dang bral ba ni thabs dang mi ldan par zhes bya ba la sogs pa ste/ thabs la mkhas pa dang bral ba zhes bya ba'i don to/ /sbyor ba ngan pa la brtson pa ni gnyis te/ brtson par bya ba ma yin pa la brtson pa ni/ sde snod mi tshol gyi zhes bya ba la sogs pa ste/ byang chub sems dpa'i sde snod ni pha rol tu phyin pa drug dang bsdu ba'i dngos po rnams so/ /'jig rten rgyang pan ni chad par lta ba dag go/ /brtson par byas pa la log par brtson pa ni mang du thos kyang zhes bya ba la sogs pa ste/mang du thos pa ni brtson par bya ba yin yang / chos 'chab pa ni log pa yin pas/ log par brtson pa'o/ /de ltar dman pa la mos pa dag ni/ dngos pos lta bas na 'jig rten pa'i dgos pa'i zhal ta byed pa zhes bya ste/ yang dag par rdzogs pa'i sangs rgyas ni mang du thos pa las skyes kyi/dngos po yongs su 'dzin pa las ma skyes pa'i phyir ro/ /dman pa'i spyod pa la spyod pa dag ni dman pa'i grogs po la brten pas/ byang chub sems dpa' chos smra ba la zhes bya ba la sogs pa ste/ skal ba mnyam pa ni theg pa chen po'i bgo skal la spyod pa'i phyir ro/ / dman pa'i grogs po la brten pa dag ni dman pa la bag med par 'gyur bas/ gang gi tshe brgya byin nam zhes bya ba la sogs pa ste/ 'jig rten skyong ba ni yul 'khor srung la sogs pa'o/ /de ltar na yang dag pa'i lam las zlog par byed pa bdud kyi las kyi go rims 'di ni srid pa kho na'o/ /da ni gzhan la brnyas pa'i nyes pa bshad par bya'o//byang chub sems dpa' gzugs bzang zhing zhes bya ba la sogs pa ni/ gzhan la brnyas pa'i rgyu'o/ /de la lhun legs pa ni gzugs bzang ba'o/ /byad legs pa ni mdzes pa'o/ /phyug pa ni 'byor pa sna tshogs pa'o/ /longs spyod pas nor che ba ni [(]gsar [,]gser [)]la sogs pa mang ba'o//longs spyod ni 'phral gyi dgos pa'o/ /nor mang ba ni gser la sogs pa sna tshogs pa'o/ /mdzod ni sna tshogs pa'i gnas so/ /bang ba ni sna re re'i gnas so/ /rus ni ba ra dwa dza la sogs pa'o/ /rigs ni rgyal rigs la sogs pa'o/ /g.yog ni go re long ngo //'khor ni rjes su 'tsho ba'o/ /bsod nams ni sbyin pa la sogs pa'o/ /ye shes ni thob pa la sogs pa'o/ /brtson pa ni lhur len pa'o/ /dbang phyug ni rgyal po'i sa la gnas pa'o/ /rgyags pa ni dregs pa'o/ /bag med pa ni brtsam pa dang mi ldan pa'o/ /gang la brnyas she na/byang chub sems dpa' gang dag rab tu byung bar gtogs pa zhes gsungs te/ rab tu byung ba dag ni rten mchog yin pas na/ gang dag khyim na gnas par byed bzhin du/ /byang chub dam pa'i mchog 'di thob pa yi/ /sangs rgyas gang yang sngon chad ma byung ste/ /ma 'ongs pa na mi 'byung gnas pa med//ces gsungs pa'i phyir ro/ /khyim gyi gnas nas mngon par 'byung ba zhes bya ba ni/ khyim spangs zhes bya ba'i tha tshig go/ /khyim gyi gnas ni sdug bsngal du ma'i gnas yin pas na/ 'phags pa drag shul can gyis zhus pa las smad pa lta bu'o/ /ye shes kyi tshogs yongs su tshol ba la brtson pa ni/de gtsor byed pa'o/ /'o na tshogs gnyis dag ni lam ma yin nam ci'i phyir 'di mchog ce na/ bden mod kyi 'on kyang 'byor ba mtha' dag spangs pa nyid kyis/ bsod nams kyi tshogs bsags pa'i phyir te/ de lta ma yin na lung las kyang rab tu byung bas zang zing gi sbyin pa ma gnang bas ji ltar tshogs sogs par 'gyur/de'i phyir na tshogs gnyis dang ldan par 'dod do/ /gang gi phyir brnyas she na/ sha dang khrag skams pa zhes bya ste/ dus ma yin pa'i kha zas la sogs pa spang ba'i phyir ro/ /rke ba ni rid pa'o/ /nyam chung ba ni lus kyi mtha' med pa'o//lus rtsas yogs pa ni ha cang yang rke ba'i phyir ro/ /de ltar ci'i phyir lus gdung zhe na/ mgo dang gos la me 'bar ba bzhin du zhes smos te shin tu brtson zhes bya ba'o/ /brtson 'grus brtsams pa ni dge ba'i chos yongs su tshol ba la brtson pa'o/ / theg pa chen po dag ni dngos po gtso bo yin pas rke zhing nyam chung ba mdog ngan cing mi sdug par rig nas brnyas pa zhes gsungs te/ phyi rol la spyad pa yin mod kyi 'on kyang thal ba'i nang du me byung ba lta bur nyes pa dang bcas zhes bya ba'i tha tshig go/ /de la snyam du sems pa zhes bya bas ni bsam pa bstan to//legs par bshad pa nyan mi 'dod ces bya bas sbyor ba bstan to/ /ches dman zhing rmugs pa zhes bya bas ni/ spyir zhing bag med par 'gyur zhes bya ba'i don to/ /da ni bar du gcod pa'i chos bzhi bstan pa'i phyir/ bzhi gang zhe na zhes smos te/ log par brjod pa ni tshigs su bcad pa ngan pa sgrogs pa'o//'di dag byang chub sems dpa'i sdom pa dang 'brel pa ci mngon zhe na/ thams cad la byang chub sems dpa' zhes smos pa'i phyir dang / 'dir yang theg pa chen po'i bar du gcod par bstan pa'i phyir dang / yang yid ches pa'i lung bdag gi bla ma brgyud pa las 'di ltar thos pa'i phyir te/ci'i phyir lung tshad ma yin zhe na/ shin tu lkog tu 'gyur ba'i don dag la ni mngon sum dang rjes su dpag pa mi 'jug pa'i phyir/ tshad ma rnam 'grel las kyang / gnas gsum par ni 'pho ba dang / /bstan bcos len pa rigs ldan yin/ /zhes 'byung ba dang /yang / lung ma rtogs pa'i rtog ge la/ /chos rnams rnam par gnas ma yin/ /drang srong rnams kyi shes pa gang / /de yang lung gi sngon du song / /zhes gsungs pas lung nyid tshad mar bya'o/ /mdo kun las btus pa'i bshad pa/ lung gi tshad mas sbyar ba las bar du gcod pa'i chos spang ba rnyed par dka' ba'i gtam brjod pa ste bdun pa'o// //da ni khyim pa rnams kyi sgrub pa bshad par bya'o/ /de la yang dag pa'i sgrub pa bstan pa ni 'di dag las kyang zhes bya ba la sogs pa gsungs te/ chos ni byang chub sems dpa'i sdom pa'o/ /nan tan gyis bsrung ba ni mi nyams par byed pa'o//lhag pa'i bsam pa rnam par dag pa ma yin pa la khyim ji ltar gnang zhes rgol ba ni ci 'dra zhe na zhes bya ba'o/ /lan ni 'bad pa yod kyang khyim spang bar mi nus pas bstan to/ /'o na gzhan gyi bud med la log par mi sgrub pa yang 'bad pa yod kyang mi nus pa'i phyir ltung bar mi 'gyur ro zhe na/de ni ma yin te gzhan gyi chung ma la bgrod pa ni rang bzhin gyis kha na ma tho ba chen po yin la/ khyim gyi gnas ni bcas pa'i kha na ma tho ba yin par bstan pa ni/ khyim bdag ces bya ba la sogs pa ste/ skyes bu dam pa ni sngon gyi byang chub sems dpa'o//las ni tshul khrims rjes su bsrung ba'o/ /skyes bu ngan pa ni tshe 'di'i bde ba 'dod pa'o/ /las ni kha na ma tho ba'o/ /chos kyis longs spyod tshol ba ni srog gcod pa spong ba la sogs pas gzhan la mi 'tshe ba'o/ /mthun pa ni mchod rten la sogs pa dang ma 'dres pa'o//yang dag pa ni srang la sgyu byed pa la sogs pa ma yin pa'o/ /de dag gis ni longs spyod tshol ba'i dbang du byas pa'o/ /longs spyod pa'i dbang du byas pas ni/ gzhan la 'tshe ba mi byed de/ /zhes bya ba la sogs pa ste/ mi rtag pa'i 'du shes ni myur du 'bral ba'i bsam pa'o//snying po len pa ni/ pha ma la zhes bya ba la sogs pa ste/ gtong ba 'phel ba ni sbyin pa'i 'bras bu yod par byed pa'o/ /log par sgrub pa spang ba ni/ ming chen zhes bya ba la sogs pa gsungs te/ log par bsgrubs pa'i 'bras bu bstan pa ni mi khom par 'gyur zhes smos so/ /dmus long ni mig med par skye ba'o//yid shas chung bas na blun pa'o/ /lce med pas na lkugs pa'o/ /shan pa la sogs pa ni gdol pa'o/ /de dag ni rgyu mthun pa'i 'bras bu'o/ /rnam par smin pa'i 'bras bu ni/ khyi dang zhes bya ba la sogs pa'o/ /'bras bu'i rgyu gang zhe na/ log par sgrub pa dngos bstan pa ni/bzhi gang zhe na zhes gsungs te/ lhag par bya ba byas pa ni dge ba'i rtsa ba bskyed pa'o/ /mngon par 'byung ba ni thar pa 'dod pa'o/ /'phags pa'i lam ni lam bsgom pa'o/ /'dod pa'i nyes pa bstan pa ni/ dper na zhes bya ba la sogs pa ste/'dod pa dag ni thar bar dka' ba'i phyir 'dam lta bu'o/ /nyam nga ba'i phyir g.yang sa lta bu'o/ /rab tu bsregs pas me lta bu'o/ /'jigs pa bskyed pas spu gri lta bu'o/ /'dod pa'i nyes pa de nyid kyi bye brag tu bstan pa ni/ rgyal po chen po zhes bya ba la sogs pa gsungs te/dang po ni chags par gyur pa'o/ /bar du mi 'bral bas na bag med par spyod pa'o/ /tha mar yid mi 'byung bas na phyir zhing lta 'dod pa'o/ /de'i phyir dam pa mi bsten pas na tshul khrims dang ldan pa zhes bya ba la sogs pa gsungs te/ yon tan 'di thos pa la sogs pa'o/ /rgyu des na 'phags pa'i nor dang bral bas/dad pa dang zhes bya ba la sogs pa'o/ /de la yon tan dang bral bas dad pa dang bral ba zhes bya ba la sogs pa'o/ /nyes pa dang du len pas rma la chags pa la sogs pa'o/ /zhi ba ni mya ngan las 'das pa'o/ /'gro bar bya ba ma yin pa ni ngan song ngo / /dman pa la zhen pas mi gtsang ba'i srin bu lta bu'o//snyigs ma len pa ni smad pa 'dod pa'o/ /brkam pa ni ha cang zhen pa'o/ /sbyin pa dang tshul khrims dang bzod pa spangs pas na lha dang mi'i chos las nyams pa'o/ kha na ma tho ba la mi 'dzem pas khrel dang ngo tsha bor ba'o/ /log par 'tsho bas na ngan par smad pa'i 'tsho ba can no//dam pa'i spyod pa ma yin pas mkhas pas smad pa'o/ /bya ba mi shes pas byis pa'o/ /de'i rjes su 'jug pa la brten pa'o/ /kha na ma tho ba la dga' bas sdig pa'i bsam pa can no/ /kha na ma tho ba can dang 'grogs pas brten pa'o/ /kha na ma tho ba byed pas kun du 'jug pa'o//kha na ma tho ba la mos pas gzhol ba'o/ /glags rnyed pas bud med kyis tshugs pa'o/ /rang dbang du byas pas bud med kyis 'khol ba'o/ /'khrig pa'i chos la zhen pas dbang du song ba'o/ /'khrig pa'i chos la mos pas gzhol ba'o/ /mi gtong bas 'grogs pa'o//de nyid ni rma'i sgo'i spyod yul can zhes bya ba la sogs pa'o/ /de'i phyir phan 'dogs pa dang yon tan gyi zhing yongs su spong bas pha ma dang zhes bya ba la sogs pa'o/ /des 'bras bu gang myang zhe na/ sems can dmyal ba dang zhes bya ba la sogs pa'o/ /pha ma dag ni ji ltar phan 'dogs pa'i zhing du 'gyur zhe na/dka' ba byas shing zhes bya ba la sogs pa'o/ /de lta bu de dam pa gang gis smad pas na rgyal po chen po zhes bya ba la sogs pa'o/ /de nyid nges don gyi lung bstan pa'i sgo nas bsdu ba ni/ zla ba sgron ma'i mdo las kyang zhes gsungs so/ /da ni 'dod pa'i nyes pa de nyid spang ba'i phyir/mi sdug pa la yang sbyar bar bya'o zhes gsungs te/ mi sdug pa ni 'dod chags kyi gnyen po yin pa'i phyir de bstan te/ de la mi sdug pa ni rnam pa drug ste/ 'khrig pa'i 'dod chags kyi dbang du byas pa mi gtsang ba'i mi sdug pa dang / mi brtan pas rab tu 'jig pa'i mi sdug pa ste/don gyi skabs 'dir ni 'khrig pa'i gnyen po lus dang sems kyi tshor ba sdug bsngal ba'i dbang du byas pa sdug bsngal gyi mi sdug pa dang / dman pa'i gzhi dang dman pa'i khams gang yin pa 'dod pa'i khams lta bu'i dbang du byas pa ngan pa'i mi sdug pa dang / gzugs med pa la ltos te gzugs kyi khams sam/ mya ngan las 'das pa la ltos te srid pa'i rtse mo man chad lta bu ltos pa'i mi sdug pa dang / khams gsum gyi kun du sbyor ba dang / 'ching ba la sogs pa kun du nyon mongs pa'i mi sdug pa dang / phung po lnga mi rtag cing mi brtan pa rab tu 'jig pa'i mi sdug pa ste/don gyi skabs 'dir ni 'khrig pa'i gnyen po yin pas mi gtsang ba'i mi sdug pa la dgongs so/ /de ni rnam pa gnyis te/ nang la brten pa dang / phyi rol la brten pa'o/ /de la nang la brten pa mi gtsang ba gang zhe na/ rdzas sum cu rtsa drug ste/ skra dang spu dang sen mo so/ /glog pa dri ma pags pa sha /rus pa chu rgyus mkhal ma rtsa/ /snying dang mchin pa glo ba dang / /rgyu ma gnye ma pho ba'o/ /mcher pa phyi sa mchi ma rdul/ /mchil ma snabs dang chu ser zhag /rkang dang tshil dang bad kan mkhris/ /rnag dang khrag dang glad spri dang / /glad rgyas dang ni gcin dag dang //mi gtsang rdzas ni sum cu drug /nang la brten pa yin par 'dod/ /rnam par bsngos shing rnags pa dang / /'bus gzhigs rnam par bam pa dang / /zos shing dmar dang rnam 'thor dang / /rus gong keng rus rnam pa gnyis/ /de bzhin mi gtsang gos pa dang //bsti ba ljan ljin gang ba rnams/ /mi gtsang phyi la brten pa ste/ /bsgom pa'i dmigs pa yin par 'dod/ /ces 'byung ngo / /de la nang la brten pa'i mi gtsang ba'i mi sdug pa la dmigs pa ni nang gi 'dod pa rnams 'dod pa la 'dun pa'i 'dod chags las sems rnam par spyod par byed do//de la phyi rol la brten pa'i mi gtsang ba'i mi sdug pa stong pa nyid la dmigs pa ni/ phyi rol gyi 'dod pa rnams la 'khrig pa la 'dun pa 'khrig pa'i 'dod chags rnam pa bzhi dang ldan pa/ kha dog dang / dbyibs dang / reg pa dang / nye bar spyod pa'i 'dod chags dang ldan pa las sems rnam par spyod par byed de/de la/ rnam par bsngos shing rnags pa dang / /'bus gzhigs rnam par bam pa dang / /zos shing zhes bya ba yid la byed pas ni kha dog la chags pa spong bar byed do/ /dmar dang zhes bya bas ni dbyibs kyi 'dod chags pa spong bar byed do/ /rus gong dang / keng rus dang /rus pa'i keng rus yid la byed pa ni rig pa'i 'dod chags yongs su spong ngo / /rnam 'thor dang zhes bya bas ni nye bar spyod pa'i 'dod chags la sems rnam par sbyong bar byed do/ /de lta bas na lung las kyang bcom ldan 'das kyis shi nas zhag gcig lon pa'am zhes pa gsungs te/ de la shi nas zhag gcig lon pa 'am bdun lon pa'i bar gyis dur khrod bya rog dang chun lag dang /bya rgod dang / khyi dang wa dag gis zos pa mthong nas zhes bya bas ni rnam par bsngos nas zos pa'i bar bstan to/ /pags pa dang sha dang khrag dang chu rgyus kyi zungs med pa zhes bya bas ni rnam par dmar ba bstan to//dur khrod kyi rus pa gang dag mthong na zhes bya bas ni keng rus bstan to/ /lag pa'i rus pa yang logs shig ces bya ba la sogs pa rnams kyis ni rnam par 'thor ba bstan to/ /'di nyid byang chub sems dpas bsgom par bya ba yin pas na/ lung las kyang rnam par bam pa mi dmigs pa'i phyir rnam par bam pa'i 'du shes bsgom par bya'o zhes bya ba la sogs pa gsungs pa yin no//'dir ni smos par zad kyi rgyas par ni 'og nas 'byung ngo / /da ni mi dge ba bcu'i gnod par 'gyur ba bstan pa ni/ 'di lta ste zhes bya ba la sogs pa gsungs te/ mi dge ba bcu ni srog gcod pa nas log par lta ba'i bar du'o//de la srog gcod pa la sogs pa dag gi ni gzhi dang bsam pa dang / nyon mongs pa dang / sbyor ba dang / mthar thug pa'i dbang gis rig par bya'o/ /de la srog gcod pa ni pha rol yin pa dang / srog chags su 'du shes pa dang / bsad pa'i bsam pa dang / brtsal ba byas pa dang / des shi nas gzhi la sogs pa'i khyad par las rig par bya'o/ /rigs dang / chos dang / rgyal mtshan gyis bsrungs pa'am/ rang dbang ba'i yang dus ma yin pa dang / gnas ma yin pa dang / yul ma yin pa dang / yan lag ma yin pa la yang ngo //gzhan gyis yongs su bzung ba dang / der 'du shes pa dang / rgyu ba'i bsam pa dang / gnas nas gnas su spags pa las sdig pa'i khyad par ni rdzas de gang yin pa'i khyad par dang / sbyor ba la sogs pa'i khyad par gyi ma byin par len pa'i kha na ma tho ba rig par bya'o/ / bslu ba'i bsam pa dang / lta ba yid la bzhag nas don go ba la tshig gam lus kyi reg byed kyis go bar byas pa dang / the tshom za ba la nges par smras nas yang brdzun du smra ba'i kha na ma tho ba bslu bar bya ba'i khyad par dang / bsam pa'i khyad par la sogs pas rig par bya'o/ /mi dga' bar 'dod pa'am dbye ba'i bsam pas 'ga' zhig la mi dga' ba thos nas de la bsnyad pa dang /de la thos nas 'di la yang rung ste/ yang dag pa'am yang dag pa ma yin yang phra ma'i kha na ma tho bar rig par bya'o/ /yang dag pa ma yin na/ brdzun yin no zhe na/ la la dag na re/ brdzun no zhes zer ro//la la dag ni ma yin te/ dbye ba'i bsam pas na 'di ni phra ma yin la/ slu ba'i bsam pa med pas/ brdzun ma yin te/ des na yang dag pa ma yin par tshig rtsub mo smra na yang / brdzun du mi 'gyur te/ bsam pa gnyis cig car mi srid pa'i phyir ro zhes zer ro/ / khros pa'i sems dang ldan pa dang / pha rol po sdug bsngal bar 'dod pas don go bar smra na tshig rtsub mo'i kha na ma tho bar rig par bya'o/ /don mi go bar smas pa ni ngag 'khyal ba'o/ /de gsum ma gtogs pa tshig gzhan gang zhig nyon mongs pa can gyi sems kyis brjod na ngag 'chal pa'i kha na ma tho bar rig par bya'o//las kyi lam 'di gsum yang brdzun bzhin du lus kyis kyang byed la/ sdig pa'i khyad par yang brdzun dang 'dra'o/ /gzhan gyi nor la 'dod pa bskyed pa las ni brnab sems kyi kha na ma tho bar rig par bya'o/ /sems can la zhe sdang ba las ni gnod sems kyi kha na ma tho bar rig par bya'o//log par lta ba ni sngar bshad pa bzhin du lta'o/ /las kyi lam 'di gsum gyi sdig pa'i khyad par ni/ bsam pa'i khyad par kho na las rig par byas la/ brnab sems kyi ni dmigs pa'i dbang gis kyang rig par bya'o/ /de ltar mi dge ba bcu gzhi la sogs pa'i yan lag yongs su rdzogs par spyad pa las ni/gnod par 'gyur bas na mi 'dod pa'i 'bras bu zhes smos pa yin no/ /stsogs pa zhes bya ba ni brdzun du smra ba la sogs par bsdu'o/ /'bras bu ni rnam pa bzhi ste/ rnam par smin pa'i 'bras bu dang / rgyu mthun pa'i 'bras bu dang / dbang gi 'bras bu dang / skyes bu byed pa'i 'bras bu'o/ /de la skyes bu byed pa'i 'bras bu ni/ 'phral la 'am de ma thag tu myong bar 'gyur ro/ /dbang gi 'bras bu ni phyi rol du smin par 'gyur ro/ /rgyu mthun pa'i 'bras bu ni byed pa dang / myong ba'i dbang gis rnam pa gnyis so/ /rnam par smin pa'i 'bras bu ni ngan song gsum du'o//de lta bas na 'bras bu bzhi mtshon pa'i don du rnam par smin pa zhes smos so/ /'o na sdom pa can kho na la nyes par 'gyur ram zhe na/ ma yin te/ thams cad dang thun mong yin par bstan pa ni/ byang chub sems dpa' nyi tshe la log par bsgrub pa bstan pa ma yin gyi zhes smos so//'dir ni mtshon par zad kyi zhib tu mdo nyid las shes par bya'o zhes phyogs mtshon pa ni rgya cher gsungs so zhes bya'o/ /de la srog gcod pa'i rgyu mthun pa ni mir gyur pa'i tshe rnam pa gnyis te/ byed pa rgyu mthun pa dang / myong ba rgyu mthun pa'o/ /de la byed pa rgyu mthun pa ni thams cad du byed par dga' ba ste/thams cad du rig par bya'o/ /myong ba rgyu mthun pa ni 'di lta ste tshe thung ba dang nad mang ba'o/ /dbang gi 'bras bu ni lo thog la sogs pa kha ba dang / shin pa dang / rul bar 'gyur zhing des dus ma yin par 'chi ba'i rkyen du 'gyur ba'o/ /'dod pa la log par g.yem pa'i myong ba rgyu mthun pa'i 'bras bu ni/g.yog 'khor mi srun pa dang / lhod pa dang bcas pa'i chung mar 'gyur ba'o/ /dbang gi 'bras bu ni lud khung dang ljan ljin can du skye bar 'gyur ro/ /ma byin par len pa'i myong ba rgyu mthun pa'i 'bras bu ni/ longs spyod med pa dang gzhan dang thun mong ba'o//dbang gi 'bras bu ni sad dang mu ge la sogs par 'gyur ba'o/ /brdzun du smra ba'i myong ba rgyu mthun pas ni slu ba dang skur pa mang ba'o/ /dbang gi 'bras bu ni ha cang char che ba la sogs pa'o/ /phra ba'i myong ba rgyu mthun pas ni g.yog 'khor mi 'dum pa dang / ngan par 'du ba'o/ / dbang gi 'bras bu ni/ sa gzhi gye gu dang mtho dman can du skye ba'o/ /ngag rtsub po'i myong ba rgyu mthun pa ni/ zher 'debs pa dang / yid du mi 'ong ba'i tshig thos pa'o/ /dbang gi 'bras bu ni sa gzhi rtsub pa dang tsher ma can la sogs pa'o/ /tshig 'khyal pa'i myong ba rgyu mthun pas ni tshig mi btsun pa dang /ma brtags par spobs pa can no/ /dbang gi 'bras bu ni ljon shing yal ga dang lo ma dang 'bras bu med par 'gyur ba'o/ /brnab sems kyi myong ba rgyu mthun ni/ 'dod pa che ba dang chog mi shes pa'o/ /dbang gi 'bras bu ni longs spyod dang 'bru la sogs pa je chung du 'gyur ba'o/ /gnod sems kyi myong ba rgyu mthun pas gzhan gyis 'tshe ba dang glags lta bar 'gyur ba'o//dbang gi 'bras bu ni gcan gzan gdug pa dang srin dang me la sogs pa mang bar 'gyur ba'o/ /log par lta ba'i myong ba rgyu mthun pas ni lta ba ngan pa dang / g.yo sgyu can no/ /dbang gi 'bras bus ni mgon med cing skyabs med par 'gyur ba la sogs pa'o//de lta bas na rnam par smin pa dang myong ba rgyu mthun pa'i dbang du mdzad nas/ 'phags pa sa bcu'i mdo las srog gcod pa ni sems can dmyal bar khrid do/ /dud 'gro'i skye gnas su khrid do/ /gshin rje'i 'jig rten du khrid do/ /ci de brgya la mir skyes na yang 'bras bu gnyis myong bar 'gyur te/'di lta ste tshe thung ba dang nad mang ba'o zhes bya ba la sogs pa rgyas par gsungs pa yin no/ /de la gtso bo yin pas sems can dmyal ba 'ba' zhig smos te/ zhib tu ni dam pa'i chos dran pa nye bar gzhag pa nyid las rig par bya'o/ / da ni longs spyod dang srog la chags pa'i log par sgrub pa spang ba'i phyir/ longs spyod dang srog la chags pa zhes bya ba la sogs pa gsungs te/ log par sgrub pa ni bar du gcod pa'i rgyu'o/ /de la re zhig spyir bstan pa ni/ rgyal po chen po zhes bya ba la sogs pa ste/ longs spyod dang lus la sogs pa ni mi rtag pa nyid yin la/mi rtag pa'i don ni med pa'i don yin pas rmi lam gyi dpes bstan to/ /mi rtag pa nyid ni/ shing las zhes gsungs te/ longs spyod dang lus la sogs pa 'phel ba mi rtag par bstan pa ni/ me tog byung nas 'bras bu 'byung ngo zhes bya bas dpe bstan to/ /gnas pa mi rtag pa ni 'bras bu byung nas yang med pa'i dpes bstan to//'grib pa mi rtag pa ni 'dab ma'i dpes bstan to/ /de ltar dpe don du sbyar ba ni/ de bzhin du zhes gsungs te/ rgyal srid ni rin po che dang nye ba'i rin po che'o/ /dbang phyug ni longs spyod mtha' dag la dbang ba'o/ /'dod pa ni gzugs la sogs pa'o//dbang ba ni dbang med pa'o/ /de dag gang zhe na glang po che dang zhes bya ba la sogs pa gsungs te/ glang po che dang / rta dang / shing rta ni theg pa'i longs spyod do/ /de'i steng du dpung bu chung bsnan pa ni dpung rnam pa bzhi ste/ bde ba skyong ba'i dbang du byas pa'o//sras dang btsun mo dang gzhon nu zhes bya ba ni nang gi 'khor te/ bde ba spyod pa'i dbang du byas te/ de la nang gi slas ni slas te btsun mo dam pa'o/ /blon po dang rtsis pa dang sna chen po la gtogs pa zhes bya ba ni nye ba'i 'khor te/ longs spyod kyi bde ba gong du spel ba'i dbang du byas pa ste/de la 'khor lo'i 'thab pa'i blon po chen po sna chen po la gtogs pa'o/ /sgo ba dang 'khor zhes bya ba ni de dang nye ba'i 'khor te/ bde ba dang mi mthun pa las bsrung ba'i dbang du byas pa'o/ /pha ma nas rten grogs zhes bya ba'i bar ni/ 'khor gyi gtso bo ste/ bde ba thob pa'i dbang du byas pa'o//bran po nas zho shas 'tsho ba'i bar ni/ phyi'i 'khor te/ bde ba'i rgyu chud mi gson pa'i dbang du byas pa'o/ /yul gyi mi zhes bya ba ni ris su gtogs pa'i 'khor te bde ba la sbyar ba'i dbang du byas pa'o/ /gser dang dngul la sogs pa ni nor bu dang bya ba dag go/ /gos dang nor zhes bya ba ni spyad pa'i dbang du byas pa'o//'bru dang bang mdzod ces bya ba ni bsag par bya ba'o/ /sogs pa zhes bya ba ni rkang 'gros nas zhing gi bar du bsdu ba ste/ 'di dag kyang 'phel ba dang gnas pa dang 'jig pa mi rtag par bstan to/ /longs spyod ji lta ba bzhin du srog mi rtag par bstan pa ni/bor te 'gro dgos so zhes bya ba ste/ dus kyis gnyer te rgyal po 'gro dgos na/ /longs spyod mdza' dang gnyen gshes rjes mi 'gro/ /zhes gsungs so/ /da ni ji ltar mi rtag pa bstan pa de'i phyir mi rtag pa zhes bya ba la sogs pa gsungs te/ re zhig spyir bstan pa ni skad cig ma'i mi rtag pas na mi rtag pa ste skyes nas 'jig pa'i phyir ro//rgyun mi rtag pas na mi brtan pa ste blo rtsing gis kyang rtogs pa'i phyir ro/ /glo bur gyis mi rtag pas na yid mi brtan pa ste/ dus la mi sdod par 'jig pa'i phyir ro/ /dus kyis mi rtag pas na rnam par 'gyur ba ste dus kyis 'gyur ba'i phyir ro//de ltar mi rtag pas na yun thung ste ring du mi gnas pa zhes snga ma phyi mas bshad par bya'o/ /da ni khyad par du bshad par bya ste/ re zhig la tshe mi rtag pa ni mthar sdig pa zhes bya ste/ rgas pa ni yid du mi 'ong ba'i phyir sdig pa'o/ /longs spyod mi rtag pa ni zad cing 'jig pa ste/zad pa ni rang gi nyams pa'o/ /'jig pa ni glo bur gyi rkyen gyis so/ /thams cad kyi rang bzhin de yin pas na sgo zhes bya ste/ der 'gro ba'i phyir ro/ /longs spyod dang lus dag ni shing rta'i yan lag 'dus pa lta bu yin pas na rgud pa dang dga' ba dag ni so sor 'gyes pa lta bu'o/ / nad med pa mi rtag pa ni 'jigs pa dang 'tshe ba dang bcas pa zhes bya ba la sogs pa ste/ lhan cig skyes pa'i nad ni sdar ma lta bu'i ngo bo nyid pas na/ ngag gi skrag pa ste/ 'jigs pa dang bcas pa'o/ /glo bur ba'i nad ni mtshon gyi zug rngu lta bu ste/ 'phral du 'byung bas 'tshe ba dang bcas pa'o/ / srog mi rtag pas 'chi ba ni/ sems kyi gdung ba'i rgyu yin pas mya ngan mang ba'o/ /lus gdung ba'i rgyu yin pas 'khrug pa mang ba ste/ lus las kyang 'chi ba'i rkyen gyi mya ngan dang 'khrug pa rnams 'byung ngo zhes gsungs so/ /'chi ba nyid gang zhe na/ tshe dang drod dang rnam shes kyis//de yi lus ni bor ba nas/ /dran pa med de shing lta bur/ /sa la 'gyel nas nyal bar 'gyur/ /zhes bya ba ni 'chi ba yin la/ yan lag dang nying lag dag ni sa la 'brul/ 'byung ba chen po bzhi'i lus 'di 'jig /dbugs rgyu ba dang srog dag ni 'chad/ rus pa dang sha dang khrag dang rgyus pa la sogs pa dag ni so sor 'gyes/skra dang rus pa dag ni phyogs dang phyogs mtshams su 'thor zhes bya ba'i tshul gyis 'brul ba la sogs pa'i tshig rnams bshad par bya'o/ /rnam par 'jig pa zhes bya ba ni nges par zhes bya ba'i don to/ /de dag kyang dus nges pa med/mdo sde las mthar sgo gcig tu 'du bas ni dri ba mgo gcig tu lan gdab pa'i phyir chos can zhes bya ba smos pa yin no/ /de ni log par sgrub pa spang ba'i phyir mi rtag pa nyid la gdams pa ni/ de bas na zhes bya ba la sogs pa gsungs te/ 'dir mi rtag pa ni rnam pa gnyis te/ nang gi mi rtag par lta ba dang /phyi'i mi rtag par lta ba'o/ /de la nang gi mi rtag pa ni skad cig pa dang / rgyun mi rtag pa dang / glo bur gyis mi rtag pa'o/ /phyi'i mi rtag pa ni dus kyis mi rtag pa ste/ rnam par bam pa la sogs pa'o/ /de dag kyang yang dang yang du goms par bya ba dang / gnas skabs rnam pa dgur rang gi lus dang mgo bsgre bas log par sgrub pa spang bar 'gyur te/ji skad du/ dran pa nye bar gzhag pa'i skabs nas zhib tu 'byung bzhin du lta ba ni mi rtag pas lta ba dang zhes bya'o/ /zad pa dang 'jig pa dag ni nang dang phyi rol lus la ltos pa'o/ /longs spyod la chags pa'i gnyen po ji ltar sgom zhe na/la la na re 'dod pa'i nyes dmigs sgom pa nyid yin no zhes zer ro/ /la la na re lus mi rtag pa sgom pa nyid kyis longs spyod la chags pa spong bar 'gyur ro zhes zer ro/ /chos kyi rgyal po ni chos dang mthun par bya'i bab col du ma yin zhes bya ba'o/ /ji ltar zhe na/rjes su 'jug par gyis la zhes bya ste/ bcom ldan 'das kyis ji ltar gsungs pa bzhin du 'jug par bya'o zhes bya ba'i don to/ /chos ma yin pa ni lugs ma yin te/ dper na kun du rgyu byang chub kyi sems skyes pa'i rabs las bstan pa lta bu'o/ /da ni gang gis mi rtag pa de nyid bstan pa ni/dper na zhes bya ba la sogs pa ste/ re zhig dper dgod pa ni ri chen po zhes bya ba ste/ thog tu bab pas na ri dper dgod pa'o/ /rga ba la sogs pa bstan par phyogs bzhi smos so/ /mi zlogs shing mi shigs par bstan pas na sra ba la sogs pa smos te/ dbug par mi nus pas na sra ba'o//mkhregs pas na snying po dang ldan pa'o/ /'phan med pas na ma zhig pa'o/ /ser ka med pas na ma gas pa'o/ /gseng med pas na khong stong ma yin pa'o/ /gzhig par mi nus pas na mkhregs pa'o/ /bar med pas na gcig tu 'dus pa'o/ /'phangs dang rngams che bas na byin che zhing mtho ba'o//de ltar bshad pa'i dpe nyid sbyar ba ni/ de bzhin du smos te/ bzlog par sla ba ma yin no zhes bya ba ni/ shugs kyis nyon mongs pa spangs nas 'ching ba las grol bar 'gyur ro zhes bya ba ni 'phangs pa yin no/ /de la lus dang srog dang longs spyod kyi dbang du byas nas 'dir bzhi bstan te/lus kyi dbang du byas nas rga ba dang na ba'o/ /srog gi dbang du byas nas 'chi ba'o/ /longs spyod kyi dbang du byas nas rgud par rnam par bzhag ste/ 'joms pa ni 'phrog pa'i phyir te ji skad du dge slong dag lang tsho ni 'jig rten pa thams cad la sdug pa/ na ba/ phangs pa/ yid du 'ong ba/ mngon par dga' bar bya'o/ /lang tsho'i mtha' ni rga ba ste/ dge slong dag 'jig rten pa thams cad mi sdug pa dang / mi na ba/ mi phangs pa/ yid du mi 'ong ba/ mngon par dga' ba bya ba ma yin pa'o zhes bya ba la sogs pa gsungs pa lta bu'o/ /de ltar log par sgrub pa spyir bstan nas/da ni de dag thams cad kyi rtsa ba yin pas lus la chags pa spang ba khyad par du brjod par bya'o/ /de la re zhig lus mi rtag pa bstan pa ni/ 'chi ba yin la/ de yang mi 'dod pa gzhan gyi dbang yin pas rang dbang med par bstan pa ni/ ri dgas kyi rgyal po seng ge zhes dpes bstan to//dpe gnyis sbyar ba ni de bzhin du zhes gsungs te/ 'chi bdag ni gshin rje la bya'o/ /gsal zhing zhes bya ba ni/ mi bde ba'i ming gi rnam grangs so/ /ji ltar zhe na/ rgyags pa dang ni bral zhes bya ba la sogs pa'o/ /ji ltar mi bde bar 'gyur zhe na/srid pa bzhir brgyud pa'i tshe sdug bsngal rnam pa bzhi myong ste/ 'chi ba'i srid pa dang / bar ma do'i srid pa dang / sngon dus kyi srid pa dang / skye ba'i srid pa ste rnam pa bzhir rgyags pa dang bral ba la sogs pa'i sdug bsngal rnam pa bzhi myong ste/ de la rgyags pa dang bral zhes bya ba la sogs pa ni 'chi ba'i sdug bsngal mang po bstan to//las kyi srid pa nas yang srid pa la ni 'jug ces bya ba la sogs pas ni/ bar ma do'i srid pa'i sdug bsngal bstan te/ 'ju zhes bya bas 'bras bu'i rgyu lta bur chad par mi 'gyur bar 'byung ba la bya'o/ /'dir sdug bsngal ni lus bye brag med pa la srid par 'gyur ba'o//la la na re bar ma do'i srid pa ni med de/ lung las bar ma do'i bshad pa yang gnas gzhan du 'gro ba'i bar la bya'o zhes zer ro/ /sngon dus kyi srid pa'i sdug bsngal bstan pa ni gang du skye ba de'i byad gzugs 'dzin pa ste/ mdo 'di nyid las sems can dmyal bar 'gro bar 'gyur na/de sems can dmyal ba yang sos dang zhes bya ba la sogs pa gsungs te de'i phyir mun pa chen por ni zhugs zhes bya ste/ sdig pa byed pa'i snang ba yin pa'i phyir ro/ /des ma 'ongs pa'i skye ba sems can dmyal ba la sogs par skye ba ni srid pa'i sdug bsngal te/de dag tu nying mtshams sbyor ba ni phyir mdo 'di nyid las skye bar 'gyur ro zhes gsungs pa'i phyir ro/ /'o na sdug bsngal de las skyob par byed pa gang yin zhe na/ sbyin pa dang zhes bya ba la sogs pa gsungs te/ dka' thub ni tshul khrims so/ /chos ni thos pa la sogs pa'o//la la na re sbyin pa ni gtong ba'o/ /dka' thub ni yan lag brgyad dang ldan pa'i gso sbyong ngo / /chos ni bzod pa ste/ de gsum gyis ni ngan song gis spong bar 'gyur bas/ lung las/ slong ba chung yang sbyin par bya/ /bden par smra bya khro mi bya/ /rnam pa 'di gsum gnas bgyis na/ / lha yi nang du skye bar 'gyur/ /zhes zer ro/ /la la na re chos ni skyabs su 'gro ba'o/ /dka' thub ni sdig pa bshags pa'o/ /sbyin pa ni dngos po dang / zhing dang / bsam pa'i khyad par can la bya'o zhes 'dod do/ /la la dag ni chos ni bzod pa la sogs pa bzhi la 'dod do/ /'jig rten na chos ma yin pa la chos kyi sgrar bshad pa phyugs bsad pa'i mchod sbyin la sogs pa dag ni bde ba'i rgyu ma yin pas skyabs gzhan med ces bya ba la sogs pa'o//la la na re bu dang bu mo la sogs pa dag ni/ tshe 'di 'ba' zhig gi grogs yin pas/ 'phags pa drag shul can gyis zhus pa las kyang de skad brjod pas na chos ma gtogs pa skyabs gzhan med ces bya ba la sogs pa gsungs so zhes zer ro//da ni mi rtag pa bsgom par gdams pa ni/ de lta bas na zhes gsungs te/ dngos po ni 'jig pa'o/ /skyo ba skye ba'i rgyu yin pas na 'chi bas 'jigs skrag par bya'o/ /des ni ci zhig bya zhe na/ 'chi ba la las rjes su 'breng bas na las mi dge ba spangs pa ni/ chos kyi rgyal srid gyis shig ces bya ba la sogs pa'o/ /mthun pa ni rjes su 'jug pa'o/ /'o na lus 'di ni gus shing gces par bya ba yin te/ yon tan thams cad dang ldan pa'i phyir zhes rgol ba ni/ de ci'i phyir zhe na zhes bya ba'o//las ni gus par byas shing gces su byas pa yang 'chi ba'i tshe yon tan thams cad dang bral bar 'gyur bas de don med par 'gyur zhes bstan pa ni/ legs par yongs su bsrungs legs par yang yongs su btsas pas yang zhes bya ba ste/ phyi'i mi mthun pa las ni bsrungs zhes bya ba'o/ / nang gi mi mthun pa las ni btsas zhes bya ba ste/ yon tan ni gzugs dang / sgra dang / dri dang / ro dang / reg pa'o/ /ldan pa zhes bya ba ni 'byor pa'o/ /yun ring por zhes bya ba ni nam 'tsho'i bar du/ de la ro phun sum tshogs pa'i mi rtag pa bstan pa ni/ bza' ba dang zhes bya ba la sogs pa ste/bza' ba ni 'bras chan la sogs pa'o/ /bca' ba ni bu ram shing la sogs pa'o/ /myang ba ni sbrang rtsi la sogs pa'o/ /ngoms par 'gyur ba ni btung ba'i bye brag go/ /bsod pa ni yid du 'ong ba'o/ /gtsang ba ni g.yos legs pa'o/ /tshim pa ni 'bru la sogs pa'o/ /de nyid kyang mi rtag pas na tha ma'i mal na 'dug pa'i tshe zhes bya ba la sogs pa'o//dri phun sum tshogs pa mi rtag par bstan pa ni/ bkrus shing bskus te bdug pas bsgos zhes bya ba la sogs pa ste/ dri nga ba ni dri mi zhim pa'o/ /reg pa mi rtag par bstan pa ni/ yul ka shi'i ras dang zhes bya ba la sogs pa'o//sgra snyan pa mi rtag pa ni/ bud med kyi nang na 'dug ces bya ba la sogs pa'o/ /gzugs mi rtag par bstan pa ni/ khyod kyi khyim gyi nang na zhes bya ba la sogs pa gsungs te/ gdon mi za ba ni nges pa'o/ /da ni longs spyod pa'i khyad par mi rtag par bstan pa'i phyir glang po che'i bya ba la kha 'am zhes bya ba la sogs pa gsungs te/glang po che dang / rta dang / shing rta ni zhon pa'i longs spyod do/ /dung la sogs pa ni sgra snyan pa'i longs spyod do/ /gdugs ni dga' ba'i longs spyod do/ /rgyal mtshan la sogs pa ni mtshon pa'i longs spyod do/ /gzugs kyi khyad par ro/ /nor bu'i yu ba can la sogs pa ni bsil ba'i bya ba'o//glang po che dang rta dang dpung bu chung ni bde ba skyob pa'i dbang du byas pa'o/ /blon po la sogs pa ni shis pa rjod par byed pa'o/ /de dag mi rtag par bstan pa ni/ g.yo ba med cing zhes bya ba la sogs pa ste/ zhon pa'i longs spyod la mi rtag par bstan pa la sogs pa dang rim pa bzhin du sbyar bar bya'o//'o na rgyal po 'ba' zhig gi lus mi rtag gam zhe na/ thams cad kyi lus kyi rang bzhin ni 'di yin te zhes smos pas skyes pa thams cad ni 'chi bar 'gyur zhes mgo gcig tu lan gdab par bya'o/ /'o na 'chi ba'i sdug bsngal la sogs pa de dag las thabs gang gis grol bar 'gyur zhe na spang ba'i thabs gsungs pa ni/mi rtag par lta ba dang zhes bya ba la sogs pa ste/ sdug bsngal mtha' dag gi rgyu tshe 'di la chags pa yin pas 'chi ba rjes su dran pa la gdams pa ni mi rtag par lta ba dang / zad pa dang / 'jig par lta ba'o/ /'chi ba'i 'og tu ngan song gi sdug bsngal gyi rgyu mi dge ba yin pas/las dang 'bras bu yid ches pa'i dad pa sgom par gdams pa ni/ 'dod chags kyi chags pa med par zhes bya ba la sogs pa ste/ mi dge ba bcu'i las kyi lam dag gi rgyu ni 'dod chags la sogs pa yin pas spang bar bya'o zhes bya ba yin no/ /'khor ba las thar ba ma yin par 'chi ba'i sdug bsngal mi ldog pas/'khor ba'i nyes dmigs sgom par gdams pa ni/ rgyal srid kyi dbang phyug dang zhes bya ba la sogs pa ste/ spang zhes bya ba'i sgras slar yang phyir 'khor bar 'gyur bas spang bar bya zhes bya ba'i don te/ slob dpon nyid kyis 'khor ba mthon dman gyi nyes pa bshad pa bzhin no//srog ces bya ba ni tshe'i don to/ /nad med pa ni lus kyi srog dang lus kyi bde bas khengs par mi bya'o zhes bya ba'i don to/ /'dod pa dag ni longs spyad par bya ba yin no zhes de ci'i phyir zhe na zhes rgol ba la gang zhig tshim par 'gyur ba de ni brten par rig nas/'dod pa dag ni lan tshwa'i chu lta bu yin pas phyir zhing gdung bar 'gyur bas don med pa'i phyir brten par mi rigs so zhes bya ba ni/ 'dod pa rnams rnyed pa'am zhes bya ba la sogs pa gsungs te/ tshol ba'i dbang du byas nas rnyed pa'am so sor rnyed pa'o/ /srung ba'i dbang du byas nas bsags pa 'am rab tu bsags pa'o//longs spyod pa'i dbang du byas nas brten pa'o/ /nga mi smra'o zhes bya ba ni 'dod pas tshim par mi gsung ba ste/ zhal gyis mi bzhes so zhes bya ba'i tha tshig go/ /'o na 'bras bu yod pa gang yin zhe na mya ngan las 'das pa ni bsgrub par bya'o zhes phan yon bstan pa ni/ngoms pa'i 'phags pa shes rab po/ /zhes gsungs te/ mthong ba'i lam thob pa la 'bad par bya'o zhes bya ba'i don te/ shes rab ni bden pa ma nor ba'i shes rab po/ /de ltar bcom ldan 'das kyis ji ltar gsungs pa bzhin du 'jug par bya ba ni rgyal ba'i tshul te/ slob dpon 'phags pa klu sgrub nyid kyis rin po che'i phreng ba'i mdo las gsungs pa yin no//de ltar rtag pa dang bde ba mngon par zhen pa'i log par bslabs pa spangs pa bshad nas/ da ni gtsang bar phyin ci log pa'i log par sgrub pa spang ba'i phyir/ rtag tu lus la mi sdug par bsgom pa dang ldan par bya ste zhes gsungs pa'o//ji ltar bsgom par bya zhe na/ lus 'di la skra dang zhes bya ba la sogs pa gsungs te/ re zhig nang gi dbang du byas pa'o/ /rnam par bam pa la sogs pa ni/ phyi'i dbang du byas pa'o/ /nang dang phyi'i 'dod chags kyi gnyen po yin pa'i phyir ro/ /kun rdzob tu mi gtsang ba'i rdzas sum cu rtsa drug la sogs pa bsgoms nas chos nyid kyi dbang du byas te/rang bzhin med pa'i 'og nas 'byung ba lta bu sgom pa ni mi sdug pa bsgom pa'i thabs theg pa chen po'i dbang du byas pa'o/ /nyan thos kyi theg pa'i dbang du byas pa ni/ nyan thos kyis las 'byung ba bzhin du rig par bya'o//bsgom pa'i thabs su gnas bstan pa ni/ dgon pa na 'dug kyang rung zhes bya ba la sogs pa gsungs te/ lus 'du 'dzi las dben par bya ba'i phyir ro/ /de la rgyang grags kyi mtha' ni dgon pa ste/ skye bo'i rgyun lugs dang sgra'i tsher ma las dben pa'i phyir ro//lo ma dang ldan pa shing gi shing drung ste/ ha cang rtag par bya ba zhen pas bsten par bya ba yin no/ /khong stong gi 'du 'dzi la chags pas bstan par bya ba yin no/ /yongs su rtog pa ni dpyod par byed pa'o/ /phan pa dang bde ba'i don la rmongs pas na byis pa'o/ /spyi mi shes pas na blun pa'o//bye brag mi phyed pas na mi gsal ba'o/ /phan bde'i thabs la 'jug pa mi shes pas na mi mkhas pa'o/ /dngos po 'di dag shes nas zhes bya ba ni mi gtsang brtags na'o/ /de nyid nges pa'i don du bstan pa ni/ don rnam par gdon mi za ba'i chos kyi rnam grangs las zhes smos so//'dis ni ril por 'dzin pa'i log par bsgrub pa spang ba yang bstan pa yin no/ /da ni bdag tu lta ba byed pa po'i bdag tu zhen pa'i log par sgrub pa spang ba'i phyir/ lus 'di thog ma dang tha ma'i rgyu la so sor brtag par bya'o zhes gsungs te/ dbang phyug dang dus la sogs pas ma byas pas na byed pa po med pa'o//'o na ji ltar 'grub ce na/ pha dang ma phrad pa dang / dri za nye bar 'khor ba dang / las ji ltar bsags pa ste/ rgyu rkyen de gnyis dang ldan pa las skyes pas na/ tshogs pa tsam gyis 'bras bu 'byin/ /zhes bya ba'o/ /de'i phyir/ pha ma'i khu chu dang khrag 'dus pa las 'byung ste zhes smos te/pha'i sa bon la gnod pa med pa dang / ma'i zla mtshan dus dang ldan pa dang / dri za nye bar 'khor bas na 'dus pa zhes bya ste/ skye ba'i dang po khu khrag gnas/ /dug can srin bu'i dug dang mtshungs/ /zhes bya ba'o/ /tha ma zhes bya ba ni lus gnas pa'o/ /kham gyi zas zhes bya ba ni/dri dang ro dang reg pa'i skye mched gsum ste/ kham gyi zas ni 'dod pa na/ /skye mched gsum gyi bdag nyid de/ /zhe'o/ /de las kyang rags pa yin pa'i phyir ro/ /skye mched smos pa ni bza' ba'i zas zhes smos so/ /de la spyi bo nas lhe'u sna'i bar ni bad kan gyi gnas pa'o/ /lhe'u sna nas lte ba'i bar ni mkhris pa'i gnas so//lte ba nas rkang mthil gyi bar du ni rlung gi gnas so/ /de la rkyang rkyang po ni sla bar byed pa ste/ chu'i khams yin pa'i phyir ro/ /zhu bar byed pa ni me'i khams yin pa'i phyir ro/ /rnam par 'byed pa ni g.yo bar byed pa'i phyir ro/ /de ltar rgyas par bshad pa bsdu ba'i phyir yang zhes smos te/mngon pa'i nga rgyal ni gtsang bar zhen pa'i phyir ro/ /ji ltar mngon zhe na/ sna nas rnag gi rnam pa 'dzag /ces pa la sogs pa'o/ /de ltar bdag tu mngon par zhen pa'i log par sgrub pa spang bar bshad nas/ da ni yon tan du lta ba'i log par sgrub pa spang ba'i phyir sgom pa ni/grogs po rnams zhes bya ba la sogs pa gsungs te/ nyes dmigs kyi mtshan nyid dang / nyes dmigs rtogs nas spang bar bya ba dang / spangs pa'i phan yon rig par bya'o/ /de la nyes dmigs kyi mtshan nyid bstan pa ni/ lus 'di ni 'di ltar mi rtag par zhes bya ba la sogs pa ste/ mi rtag pa'i mtshan nyid ni mi rtag pa la sogs pa tshig gsum smos te/ skad cig pa dang / rgyun gyis dang / glo bur gyis mi rtag pa'i phyir ro/ /stong pa'i mtshan nyid ni nyam chung ba ste/ dngos por lta ba ni brtag mi bzod pa'i phyir ro/ /bdag med pa'i mtshan nyid ni snying po med pa ste/ bdag tu lta ba dag ni btsal na mi rnyed pa'i phyir gzhan du mi dmigs pa phung po dag ni du ma'i ngo bor snang ba la/bdag gi rang bzhin ni gcig tu brtag pa'i phyir de med pas na zhig pa'o/ /sdug bsngal ba'i mtshan nyid ni/ 'di ltar yun thung ba zhes bya ba la sogs pa ste/ 'du byed dang / 'gyur ba dang / sdug bsngal gyi sdug bsngal rnam pa gsum ni/ bde ba dang sdug bsngal ba dang / btang snyoms kyi tshor ba gsum gyi dbang du byas pa ste/ de la tshor ba dang btang snyoms kyi dbang du byas nas/ 'du byed kyi sdug bsngal ni yun thung ba zhes bya ste/ bde ba dang sdug bsngal gyi 'du byed pas na ring du mi gnas pa yin la/bde ba dang sdug bsngal dag ni sdug bsngal yin pa'i phyir ro/ /tshor ba sdug bsngal gyi dbang du byas nas/ sdug bsngal ba zhes gsungs te/ tshor ba sdug bsngal ba dag ni sdug bsngal gyi sdug bsngal yin pa'i phyir ro/ /tshor ba bde ba'i dbang du byas nas/nad mang ba zhes bya ba la sogs pa gsungs te/ lus kyi bde ba nad med pa'i 'gyur ba ni nad mang ba'o/ /longs spyod la sogs pa nyams pa la sogs pas tshor ba sdug bsngal bskyed pas na 'gyur ba'i chos can yin no/ /nad mang ba ci'i phyir zhe na/ nad kyi gnas yin pa'i phyir zhes bstan pa ni/ nad mang ba'i snod do zhes gsungs so/ /gnas nyid bstan pa ni/ rus pa la rgyus pa 'brel pa zhes gsungs te/ rus pa dum bu nyis brgya bzhi bcu ni chu rgyus brgya drug cus sprel zhing chu ba chen po bcu drug gis brtan pa/ sha spar thabs brgyad cus zhal zhal byas pa zhes bya ba la sogs pa lta bu yin la/gtso bo yin pas rus pa dang rgyus pa smos te/ de'i dpe ni 'khrul 'khor lta bu ste/ 'gro ba dang nyal ba'i bya ba byed pa'i phyir/ 'di ni 'gyur ba'i sdug bsngal gyi dbang du byas pa'o/ /mkhas pas de la gnas par mi bya'o zhes bya ba ni/ shes rab kyis brtags nas zhen par mi bya'o zhes gdams pa'o//de ltar nyes dmigs kyi mtshan nyid mdor bstan nas/ da ni rgyas par bshad pa'i phyir/ lus 'di ni cang mi bzod pa zhes bya ba la sogs pa gsungs te/ khyab pa dang bstsags pa dang rten byed pa'i phyir lus zhes bya ste re zhig spyir btang ba yin no/ /de la gzugs kyi phung po 'di dag ni ha cang mi bzod pa zhes bya ste/nyam chung ba'i phyir ro/ /de'i dpe ni dbu ba rdos pa lta bu'o/ /lus zhes bya ba ni tshor ba'i phung po ste/ ring du mi gnas pa ni byung nas 'gags pa'i phyir ro/ /chu'i chu bur lta bu zhes bya ba ni yang skye zhing 'gag pa'i phyir dang / sdug bsngal gyi ngo bo nyid yin pa ste/ lung las kyang tshor ba ni chu'i chu bur lta bu yin la/ tshor ba gang ci yang rung / de ni 'dir sdug bsngal du rig par bya'o zhes gsungs pa'i phyir ro/ /lus zhes bya ba ni 'du shes kyi phung po ste/ nyon mongs pa'i srid pa'i 'dod chags la sogs pa yongs su gdung bas phyin ci log tu brtags pa'i phyir mtshan mar 'dzin pa'o//smig rgyu lta bu zhes bya ba ni chu med kyang der snang ba'i phyir ro/ /la la na re 'dir nyon mongs pa'i dgra ni/ 'dod chags dang rnam par rtog pa kho na la bya ste/ 'khor bar 'ching ba'i rgyu yin pa'i phyir ro zhes zer ro/ /lus zhes bya ba ni 'du byed kyi phung po ste/ snying po med pa ni sems pa'i tshogs drug 'dus pa'i phyir ro//chu shing lta bu zhes bya ba ni/ so sor phye na snying po med pa'i phyir te/ lung las kyang 'du byed kyi phung po gang zhe na/ sems pa'i tshogs drug ste zhes gsungs pa'i phyir ro/ /lus zhes bya ba ni/ rnam par shes pa'i phung po ste/ /phyin ci log ni med pa la//rnam par phye na yod ma yin/ /rnam shes sgyu ma 'dra bas na/ /rgyu rkyen tshogs las yang dag 'byung / /de phyir dngos po med ces bya/ /zhe'o/ /med pa la 'khrul pa yod par 'dzin pa ji ltar rung / 'khrul pa ni gzhi dang bcas pa yin no/ /ma yin te/ 'khrul pa ni med pa la rung gi/gzhan du ji ltar 'khrul/ mtho yor med pa la mir 'khrul pa bzhin no/ /de'i phyir gzhi med pa kho na'o/ /de lta bas na yang dag pa ma yin pa'i kun du rtog pa'i mtshan nyid yod do zhes bstan pa ni/ yang dag pa ma yin pa mthong zhes bya ste/ yid kyi skye mched la sogs pa'o/ /rmi lam lta bu zhes bya ba ni/gzhi med pa la 'khrul pas snang ba'i phyir ro/ /mig gi khams la sogs pa thams cad kyang de bzhin rig par bya ste/ thog ma med pa can gyi bag chags de lta bu goms pa'i phyir ro/ /de dag rgyu rkyen tshogs pa las skyes pas na rgyu'i dbang du byas nas las kyi gzugs brnyan snang ba zhes smos te/sngon zhes bya ba ni tshe snga ma la sogs pa'o/ /las ni dge ba la sogs pa'o/ /gzugs brnyan ni de dag rjes su mthun pa'i ngo bo nyid de/ slob dpon nyid kyi zhal nas/ kha ton mar me me long brgya/ /me shel sa bon sgyur dang sgras/ /phung po nying mtshams sbyor ba yang //mi 'pho bar yang mkhas rtogs bya/ /zhe'o/ /snang ba zhes bya ba ni lus blangs pa la sogs pa'o/ /sngar bshad pa'i rkyen ma tshogs na/ rgyu'i ngo bo yang 'bras bu mi skyed pas rkyen la rag las pa zhes bya ste/ brag ca lta bu rkyen las 'byung ba'i phyir ro/ /rgyu rkyen gang tshogs pa las phung po gang 'grub ce na/'dod pa'i khams kyi dge ba'i las zag pa dang bcas pas ni mtho ris kyi lha la sogs par skye ba ste/ re zhig tshul khrims kyi 'bras bu ni mi'i lus thob bo/ /tshul khrims dang / sbyin pa dang / bzod pa rlabs po che ni 'dod pa'i khams kyi lha'i rigs su ji ltar rigs par skye'o//srog gcod pa'i las mang du byas shing zhe sdang gi shas che ba ni/ dmyal bar 'phen no/ /gti mug gi shas che zhing nyes pa ltung ba phra mo khyad du bsad pas ni dud 'gro'i skye gnas su skye'o/ /'dod chags kyi shas che zhing ser sna'i las mang du byas pas ni yi dags su skye ste/de'i phyir 'dod pa'i khams ni mnyam par ma bzhag pas na sems 'khrugs pa'o/ /mtshan ma ni rtags so/ /gzugs dang / gzugs med pa'i khams ni zhi ba'i rnam pa ste/ yid mi bde ba dang / bde ba dag bsam gtan dang po nas bzhi pa'i bar du snyoms par 'jug pa'i tshe spangs pa dang /gzugs kyi 'du shes las rnam pa thams cad du yang dag par 'das pa la sogs pa gzugs med pa'i skye mched rnam pa bzhi ni/ ting nge 'dzin dang ldan pas na dgyes pa zhes bya ste/ yid mi bde ba la sogs pa nub pa'i phyir ro/ /sprin lta bu zhes bya ba ni 'byung ba dang nub pa'i phyir ro//mtshan ma zhes bya ba ni rtags te mtshon pa'i phyir ro/ /de dag kyang ji ltar rigs par skad cig pa dang rgyun gyi ngo bos 'jig pas skad cig tu zhes bya ba la sogs pa ste/ rgyu la mi ltos pa'i phyir ro/ /glog ces bya ba ni ha cang myur ba'i phyir ro/ /la la na re da ltar dang ma 'ongs pa'i phung po ni glog dang sprin lta bu yin la 'das pa'i dngos po dag ni rmi lam la sogs pa lta bu ste/thams cad kyang mi rtag par bstan pa yin no zhes kyang zer ro/ /la la na re skye ba mi rtag par bstan pa'i phyir gzugs brnyan dang / brag ca lta bur bshad la/ gnas pa mi rtag pa ni sprin lta bu'o/ /'chi ba mi rtag pa ni glog lta bu ste/ de ltar sprin thams cad kyang mi rtag pa zhes zer ro/ /de ltar phung po la sogs pa'i nyes dmigs spang bar bshad nas/ da ni gang zag tu lta ba spang ba'i phyir ro/ /der gtogs pa'i nyes dmigs kyi mtshan nyid bstan pa ni/rkyen sna tshogs las 'byung ba zhes bya ba la sogs pa ste/ rkyen sna tshogs pa ni mi shes pa dang / las dang sred pa'i rang bzhin no/ /bdag po zhes bya ba ni byed pa po ste/ dbang phyug la sogs pa'o/ /de dag btsal na mi rnyed pas na med pa'o/ /de'i phyir/ phung po 'dod rgyal dus dang rang bzhin dang / /ngo bo nyid las ma yin rgyu med yin/ /dbang phyug de yi rgyu min de lta bas/ /mi shes las dang srid las byung rig mdzod/ /ces slob dpon nyid kyis gsungs so/ /sa dang 'dra ba ni/ sra ba'i mtshan nyid do/ /byed pa ni las te dbang phyug la sogs pas ma byas pa ste snga ma bzhin no//chu dang 'dra ba ni gsher ba'i mtshan nyid do/ /bdag med ces bya ba ni rtag pa la sogs pa med pa'o/ /me dang 'dra ba ni tsha zhing sreg pa'i mtshan nyid do/ /srog med pa ni drod de me yin pa'i phyir ro/ /rlung dang 'dra ba ni yang ba dang g.yo ba'i mtshan nyid do//gang zag med pa ni skye zhing 'jig pa'i mtshan nyid ni las dang nyon mongs pa'i dbang yin pa'i phyir ro/ /nam mkha' dang 'dra ba ni rang bzhin med pa'i phyir te/ rig pas btsal na mi rnyed pas so/ /de lta bas na 'byung ba chen po rnams kyi gnas zhes bya ste/ yang dag pa ma yin pa dag ni de kho na nyid du brdzun pa'i phyir ro//ji ltar zhe na/ lus ni sa la sogs pa rgyu rkyen tshogs pa las skyes pa yin pas gnas zhes bya la/ de dag kyang rgyu gcig gis 'bras bu du ma mi byed la/ rgyu gcig gis 'bras bu gcig kyang mi byed pa'i phyir dang / rgyu du mas 'bras bu du ma mi byed la/ rgyu du mas 'bras bu gcig kyang mi byed pa'i phyir la/'on kyang ma brtags pa'i mtshan nyid du rgyu dang 'bras bu yang dmigs pas yang dag pa ma yin pa'o/ /phung po lnga ni bdag dang bdag gir 'dzin pa'i gzhi ste/ de yang rnam par shes pa la ni bdag tu 'dzin pa la phung po lhag ma la ni bdag gir 'dzin pas na bdag dang bdag gi'o//de dag kyang gcig dang du ma'i rang bzhin dang bral ba med pas te stong pa'o/ /cis stong zhe na/ la la dag ni bdag ces bya ba dngos por grub par 'dod de/ de dag kyang ci bdag ces bya ba phung po'i ngo bo nyid dam de las ma gtogs pa zhig tu yod grangs na/ phyogs dang po ltar na phung po dag ni mi rtag la du ma'i ngor snang ba'i phyir dang /bdag ces bya ba ni rtag pa dang gcig pur brtags pa'i phyir ro/ /phyogs gnyis pa ltar na/ phung po las ma gtogs pa'i bdag ni snang du rung ba las mi dmigs pa'i phyir dang / bdag gi ngo bor 'dod pa'i phyir mi rung ba nyid do//la la dag ni rdul phra rab 'byung ba la sogs pa'i ngo bor gnas so zhes 'dod do/ /de dag kyang cha shas dang bcas pa la sogs pa'i skyon du 'gyur ba'i phyir/ gang yang mi rung ba'o/ /ha cang spros pas chog nas da ni dkyus ma nyid brjod par bya ste/ bems po zhes bya ba ni rtogs pa dang bral ba'o//da ni dpe ni rtswa la sogs pa'o/ /'o na ci'i phyir gzugs kyi phung po 'grub ce na/ rnam par shes pa la brten pa'i rlung gi byed pas na 'khrul 'khor dang ldan par 'byung ba'o/ /'o na bems po ma yin no zhe na/ tshor ba med pas te nyams su ma myong ba'i phyir ro/ /'byung ba zhes bya ba ni skye gnas nas rlung gis 'phen zhes bya ba'i don to//de'i dngos po gang zhe na/ rnag dang mi gtsang ba bsags pa zhes bya ba ste/ khu ba dang khrag las mchi gu'i rnam pa lta bur 'gyur ro/ /snying po med pas na gsog go/ /gnas pa'i 'du byed kyis kyang dgod pas na rtag tu byug pa la sogs pa'o/ /gang las she na/nad ces smos te/ rlung dang mkhris pa dang bad kan dang / 'dus pa las gyur pa'i nad brgya rtsa gcig pa bzhi ni bzhi brgya rtsa bzhi'o/ /gtse ba ni gnyen po'o/ /rga ba ni 'byung ba yongs su smin pa'o/ /zil gyis non pa ni rtag tu nyen pa'o/ /'chi ba ni rnam par shes pas lus yongs su btang ba'o//de la rtswa'i rkyal pa lta bu yin pas na gsob bo/ /khron pa rnying pa'o/ /de ltar na skye ba dang gnas pa dang / na ba dang 'chi ba'i ngo bo nyid pas nyes dmigs sna tshogs pa bshad nas da ni mdor bsdus te bshad pa ni/ phung po dang zhes bya ba la sogs pa ste/ phung po lnga ni gshed ma lta bu ste/'dir zag pa med pa'i phung po lnga las logs shig tu bstan pa'i phyir gshed ma lta bu zhes smos pa yin no/ /khams rnams ni dug drag po zhes smos te/ sbrul gdug pa lta bu'o/ /skye mched rnams ni grong stong pa lta bu zhes smos te/ 'di dag gis ni nyes dmigs mtshon pa yin no/ / phung po la sogs pa la yon tan du blta ba ni log par sgrub pa yin pas mi rtag pa la sogs pa'i mtshan nyid du bshad nas/ da ni nyes dmigs rtogs nas de spang bar bya ba'i phyir gdams pa ni/ khyed kyis de lta bu'i lus de la sun pa dang zhes bya ba la sogs pa gsungs te/ sun pa ni dmus byung bar bya'o//skyo ba bskyed pa ni spang bar bya'o/ /ji ltar zhe na/ sngar bshad pa ltar goms par byas la nyes dmigs rtogs par 'gyur ro/ /rtogs na spong bar 'gyur ro/ /'o na thob par bya ba gang yin zhe na/ de bzhin gshegs pa'i sku la mos pa bskyed par bya'o zhes gsungs te/ 'bras bu thob par bya ba yin pa'i phyir ro//sku ni rnam pa gnyis te/ gzugs kyi sku dang / chos kyi sku'o/ /de la gtso bo yin pa'i phyir chos kyi sku smos te/ lung las kyang / /gang zhig nga la gzugs su mthong / /gang zhig nga la sgrar shes pa/ /log par spong bas zhugs pa ste/ /skye bo des ni nga mi mthong / /sangs rgyas rnams ni chos kyi sku//'dren pa rnams ni chos nyid lta/ /chos nyid shes par bya min par/ /des ni yang dag shes mi nus/ /zhes gsungs pa dang / yang dge slong dag de bzhin gshegs pa ni chos kyi skur yongs su rdzogs par ltos la 'jig tshogs la skur ma 'dzin cig ces gsungs pa'i phyir ro/ / de ci'i phyir zhe na/ chos kyi sku ni sngar bshad pa ltar khyab pa dang rtag pa'i phyir la/ gzugs kyi sku ni kun rdzob yin pas de med pa'i phyir ro/ /rkyen las skyes pa rang gi dngos ma skyes/ /rgyal ba rnams kyi sku ni chos kyi sku/ /chos nyid nam mkha' lta bur rtag gnas zhes/ /bstan pas chos skyong 'od zer 'grub par 'gyur//zhes gsungs la/ dge slong dag mtshan bzang po dang dpe byad kyi ngo bor de bzhin gshegs pa lta ba ni/ 'khor los sgyur ba'i rgyal po yang de bzhin gshegs par 'gyur ro zhes gsungs pa'i phyir dang / yang bdag ni ring bsrel pas shes rab kyi pha rol tu phyin pa nyid len to zhes gsungs pa'i phyir ro//de bzhin du de bzhin gshegs pa dgra bcom pa yang dag par rdzogs pa'i sangs rgyas mtshan sum cu rtsa gnyis su yid la mi byed/ dpe byad bzang po brgyad cur yid la mi byed de/ dran pa med cing yid la byed pa med pa ni/ sangs rgyas rjes su dran pa bla na med pa zhes bya'o zhes gsungs pas na chos kyi sku ni thob par bya ba yin pa'i phyir ro//de thob pa'i thabs lam gyi bden pa gang zhe na/ bsod nams las skyes pa zhes bya ba la sogs pa gsungs te/ tshogs gnyis kyi 'bras bu yin pa'i phyir la bar gyi tshig mi mngon par byas pas bsod nams las skyes pa'o zhes sbrel te/de lta ma yin na/ bsod nams ye shes las byung ba'i/ /dam pa gnyis ni thob par shog /ces slob dpon nyid kyi lung yang ji ltar grang / la la na re yon tan gyi mtshan nyid tsam la chos kyi skur bshad pas bsod nams las skyes zhes bya'o zhes kyang zer ro/ /la la ni de lta na ni rgyu ni ma tshang ba'i phyir te/yon tan gyi sku la chos kyi skur bshad na/ ye shes kyi cha la bsod nams su ci'i phyir mi 'dogs/ 'dogs na ni 'dod pa kho na yin la ma yin na ni rgyu ma tshang bar 'gyur ro zhes kyang zer ro/ /bsod nams nyid gang zhe na/ sbyin pa las skyes pa zhes bya ba la sogs pa gsungs te/sbyin pa ni gtong ba dang / gtong ba chen po dang / shin tu gtong ba'i ngo bo nyid de/ sngar bshad pa'i phung po yongs su dag pa gang yin pa ni/ tshul khrims la sogs pa ste/ tshul khrims ni sdom pa'i tshul khrims la sogs pa'o/ /ting nge 'dzin ni sgyu ma lta bu la sogs pa'o/ /shes rab ni mkhyen pa ste/gsum char yang zag pa med pa la bya'o/ /rnam par grol ba ni mthong bas spang bar bya ba la sogs pa'i sgrib pa thams cad spangs pa'o/ /rnam par grol ba'i ye shes mthong ba ni khyad par can gyi ye shes mngon sum du byas pa'o/ /byams pa la sogs pa bzhi ni tshad med pa'o/ /sbyin pa la sogs pa ni pha rol tu phyin pa bcu ste/dul ba ni nyon mongs pa 'dul ba'o/ /yang dag par sdom pa ni zag pa sdom par byed pa'o/ /dge ba bcu ni srog gcod pa spong ba la sogs pa ste tshul khrims kyi rab tu dbye ba'o/ /sdug bsngal las ji mi snyam pa la sogs pa rnam pa gsum ni bzod pa'o/ /gzhan la mi 'tshe ba ni nges pa ste/'di gnyis ni bzod pa'i rab tu dbye ba'o/ /rgyun mi gcod pas na brtson 'grus so/ /brtson pa mi 'dor bas na brtan pa'o/ /sems rab tu 'dzin pa'i phyir yang brtan pa ste/ 'di gsum ni spro ba'i khyad par ro/ /bsam gtan ni bsam gtan dang po la sogs pa'o/ /rnam par thar pa ni gzugs can gzugs rnams la lta ba la sogs pa brgyad do//ting nge 'dzin ni dpa' bar 'gro ba la sogs pa rnams so/ /snyoms par 'jug pa ni bsam gtan bzhi dang / gzugs med pa'i snyoms par 'jug pa bzhi dang / 'gog pa'i snyoms par 'jug pa'o/ /'di bzhi ni ting nge 'dzin gyi rab tu dbye ba yin no//thos pa ni yid kyi rnam par shes pa la don snang ba'i mig gi yul can no/ /shes rab ni chos rab tu rnam par 'byed pa'o/ /thabs ni thabs la mkhas pa'i yongs su 'dzin pa'o/ /'dis ni smon lam dang / stobs dang / ye shes kyang bsdus par rig par bya ste/ 'di gsum ni shes rab kyi rab tu dbye ba ste/pha rol tu phyin pa drug po de dag kyang lam gang du sgom zhe na/ byang chub kyi phyogs kyi chos sum cu rtsa bdun zhes smos te/ dran pa nye bar gzhag pa bzhi la sogs pa lam bzhi'i ngo bo nyid du sgom mo/ /dran pa nye bar gzhag pa la sogs pa de dag ji ltar bsgom zhe na/ zhi gnas dang lhag mthong zhes gsungs te/zhi gnas ni sems rtse gcig pa'o/ /lhag mthong ni so sor rtog pa'o/ /lam lnga pa mi slob pa'i lam la ni stobs bcu zhes smos te/ gnas dang gnas ma yin pa mkhyen pa la sogs pa bcu'o/ /mi 'jigs pa ni nyon mongs pa spangs pa zhal gyis bzhes pa la sogs pa bzhi la klan ka'i rgol ba chos dang mthun pa med pa bzhi'o//ma 'dres pa bco brgyad ni/ spyod pa ma 'dres pa dang / rtog pa ma 'dres pa dang / phrin las dang ye shes kyi ma 'dres pa ste/ 'khrul pa mi mnga' ba la sogs pa bco brgyad do/ /pha rol tu phyin pa thams cad ni dad pa'i stobs su bshad pa'i yon tan thams cad kyi mthar phyin pa'o//mngon par shes pa ni rdzu 'phrul la sogs pa rnam pa drug shes pa'o/ /rig pa ni rnam pa gsum shes pa'o/ /mi dge ba ni sdug bsngal rnam pa gsum mo/ /spong ba ni kun 'byung ngo / /dge ba ni 'gog pa'i ngo bo'o/ /sdud pa ni lam mo/ /bden pa ni bsod nams kyi tshogs so//yang dag pa ni ye shes kyi tshogs so/ /bag yod pa ni yon tan de dag 'grub pa'i rgyu'i dbang du byas pa'o/ /de ltar rgyas par bshad nas mdor bsdu na/ dge ba'i las tshad med pa zhes bya ste/ dngos po dang dus so/ /de la dngos po ni/ bsod nams dang ye shes kyi tshogs mtha' dag go/ / dus ni bskal pa grangs med pa gsum mo/ /de ltar na dngos po dang dus tshad med pas tshad med pa'o/ /rnam grangs gzhan yang sngar bshad pa'i lam rnam pa bzhi'i ngo bor phyogs kyi chos rnams sgom par byed pa na/ lam gang dang gang la gtsor byed ce na tshogs kyis la mi dge ba'i chos thams cad spong ba zhes bya ste/ldog pa'i tshul khrims gtsor bsgom mo/ /sbyor ba'i lam la dge ba sdud pa zhes bya ste/ 'jug pa'i tshul khrims so/ /mthong ba'i lam la bden pa las skyes pa zhes bya ste/ ye shes bcu drug la dmigs pa'i phyir ro/ /bsgom pa'i lam la yang dag pa nyid las skyes pa zhes bya ba ste/ yang dag pa ni phyin ci ma log pa'i chos nyid do/ /nyid ces bya ba ni ji ltar mthong ba'i don de nyid goms par byed pa'i phyir ro/ /bag yod pa zhes bya ba ni chos de dag thams cad kyi rtsa ba yin pa'i phyir mtha' dag par sbyar bar bya'o/ /dge ba'i las tshad med pa zhes bya ba ni/ bsod nams brgya las skyes pa'o zhes bya'o/ / de ltar na sku rnam pa gnyis ni/ tshogs rnam pa gnyis las skyes so zhes 'dod do/ /'o na lam gyi chos ni 'phags pa'i lam yan lag brgyad pa'o zhes 'byung ba ma yin nam/ bden mod kyi 'gal ba ni med de der ni gtso bo smos te/ 'dir ni lam mtha' dag gtsor gzung ba yin no/ /de ltar bden pa bzhi shes par bya ba ni log par sgrub pa spangs par 'gyur ro//de ltar khyim pa rnams kyi sgrub pa spyir bshad nas/ da ni dbang phyug gi gnas rnyed pa rnams kyi sgrub pa bye brag tu bshad par bya'o/ /de la yang dag pa'i sgrub pa bstan pa'i phyir/ /dbang phyug gi gnas rnyed na yang zhes gsungs te/ log par sgrub pa ni mi dge ba la sogs pa 'og nas 'byung ba rnams so//yang dag pa'i sgrub pa ni tshul rnam pa brgyad la sogs pa'o/ /de nyid bstan pa ni skye dgu bskyang ba la brtson pa'i chos kyi rgyal po zhes bya ba la sogs pa gsungs te/ skye dgu ni ris su gtogs pa'o/ /bskyang ba ni chos kyis bskyang bar bya ba'o/ /chos kyi rgyal po zhes bya ba ni chos dang mthun par byed pa mtha' dag go//la la ni chos kyi rgyal po zhes bod pa ste/ gang phyir bzod dang mi bzod pa/ /shes par dga' bas rgyal po ni/ /chos min rigs pas min spyod kyang / /rjes su 'tsho bas phal cher bstod/ /ces bya bas rab snang gtum po la ngor bstod pa bzhin no zhes zer ro//de ni ma yin te/ gcer bu bden smra ba ni ngor bstod pa'i kha gsag can yang ma yin te/ mdo 'di nyid las rgyal po chen po khyod ni gtum po'o khyod ni khro bo'o zhes ngor ldog pa'i phyir dang / bde ba'i tshig ni gong gi 'brel pa'i sgras drangs kyang mi 'thad pa'i phyir ro/ /brgyad ces smos pa ni bye ba'i ngo bo bsdus pa'i phyir te/zhib tu ni rnam pa'i rab tu dbye ba mtha' yas pa'i phyir ro/ /de yang gang zhe na/ gzhan la ltos pa'i dbang du byas pa dang / rang la ltos pa'i dbang du byas pa'o/ /gzhan la ltos pa ni rnam pa gsum ste/ sems can sdug bsngal la spyod pa dang / bde ba la gnas pa dang / rjes su 'brel pa'i dbang du byas pa'o//sdug bsngal la spyod pa ni rnam pa gnyis te/ rgyu la zhugs pa dang / sdug bsngal dngos la spyod pa'i dbang du byas pa'o/ /sdug bsngal gyi rgyu la zhugs pa ni rnam pa gnyis te/ bag med pa dang log par sgrub pa'o/ /de la bag med pa'i dbang du byas nas/ ris su gtogs pa la bu'i 'du shes so zhes bya'o//log par sgrub pa'i dbang du byas nas nad pa'i 'du shes zhes bya'o/ /sdug bsngal dngos la spyod pa'i dbang du byas nas snying rje'i 'du shes zhes bya'o/ /bde ba la gnas pa'i dbang du byas nas dga' ba'i 'du shes zhes bya'o/ /rjes su 'brel pa rnam pa gnyis te/'khon pas rjes su 'brel pa dang / mdza' bas rjes su 'brel pa'o/ /de la 'khon pas rjes su 'brel pa'i dbang du byas nas/ de'i gzhi la nyes par lta ba'i 'du shes zhes bya'o/ /mdza' bas rjes su 'brel pa'i dbang du byas nas/ rjes su srung ba'i 'du shes zhes bya'o/ /rang la ltos pa'i rnam pa gnyis te/longs spyod kyi dbang du byas pa dang / bdag gi dbang du byas pa'o/ /de la longs spyod kyi dbang du byas pa ni/ sman gyi 'du shes zhes bya'o/ /bdag gi dbang du byas pa ni bdag med pa'i 'du shes zhes byas so/ /de ltar dbye ba bstan nas/ gsal ba'i dbye ba bstan pa ni/ rgyal po chen po zhes bya ba la sogs pa ste/rgyal po chen po zhes bya ba ni bde ba'i mnyes pa'i tshig go/ /ris ni 'khor du gyur pa'o/ /mi srun pa ni 'khor du gyur pa bag med pa'o/ /bag med pa ni rnam pa gnyis te/ sdig pa spyod pa dang / so tshis mi shes pa'o/ /tshar gcad pa ni rnam pa bzhi ste/ bzhams te bsgo ba dang / 'khyig cing sdod pa dang /tshogs su sma dbab pa dang / bskrad pa'i las bya ba'o/ /bskrad pa ni rnam pa gnyis te/ re zhig pa dag gtan du ba'o/ /snying rje'i bsam pa mi gtong ba ni/ thams cad du rang gi nyon mongs pa las srung ba'o/ /nad pa'i 'du shes ni ji skad du/ rtag tu nyes pas rang dbang med par byas sems kyis/ /skye bo rnams la blo ldan nyes par mi 'dzin te//mi 'dod bzhin du log par sgrub par 'gyur ro zhes/ /skye bo dag la snying rje rnam par 'phel phyir ro/ /zhes gsungs pa lta bu'o/ /mi khro ba ni byams pa bsgom pa'o/ /'gyod pa spong ba ni nyes pa spong bar byed pa'o/ /sdug bsngal ni rnam pa brgyad cu dag la ci rigs par sdug bsngal ba'o//snying rje ni bsal bar 'dod pa'o/ /gnod pa spong ba ni de nyid de'i snying rje'o/ /phan pa sgrub pa ni byams pa'o/ /bde ba la gnas pa ni rnam pa gsum ste/ dman pa dang / mnyam pa dang / mchog tu gyur pa'o/ /de la dman pa dang / mnyam pa'i gang zag gi dbang du byas nas brnab sems mi bskyed pa'o//mchog gi dbang du byas nas phrag dog med pa'o/ /mi mdza' ba ni 'khon pa rjes su 'brel pa'o/ /gzhi ni sems la bya'o/ /mdza' ba ni mthun pa nyid do/ /brtan pa ni mi g.yo ba'o/ /de lta bas na zhe sdang ba dang chags pa'i sems spong ba ste/ 'di gnyis ni btang snyoms su bshad pa yin no//de ltar na snying rje dang / byams pa dang / dga' ba dang / btang snyoms te tshad med pa bzhi ni gzhan don sgrub pa'i thabs su bstan pa yin te/ ci'i phyir zhe na/ gnod sems la sogs pa dang ldan na/ sems can yongs su spong bar byed pa'i phyir ro/ /longs spyod ni rnam pa gnyis te/ lus la brten pa dang /longs spyod la brten pa'o/ /de la lus la brten pa'i dbang du byas nas 'dod pa log par mi spyod pa zhes bya ste/ rang gi chung mas chog shes pa'o/ /longs spyod la brten pa'i dbang du byas nas/ ma chags par yongs su spyod pa zhes gsungs te/ chags pa ni zhen pa'o/ /des na 'phags pa nyid kyis kyang /kha zas sman dang 'dra bar rig pa yis/ /chags dang zhe sdang med par brten bgyis te/ /rgyags pa'i phyir dang snyems pa'i phyir ma lags/ /'tshag phyir ma lags lus gnas 'ba' zhig phyir/ /zhes gsungs so/ /bdag gi dbang du byas pa ni skyes bu dam pa bsten pa dang /dam pa'i chos nyan pa dang / tshul bzhin yid la byed pa'o/ /de la skyes bu dam pa la brten pa'i dbang du byas nas drung du 'gro ba smos so/ /dam pa'i chos nyan pa'i dbang du byas nas chos don du gnyer ba smos so/ /tshul bzhin yid la byed pa'i dbang du byas nas/ rjes su mthun pa'i chos sgrub pa smos te/chos ni mya ngan las 'das pa'o/ /rjes su mthun pa'i chos ni thar pa dang rjes su mthun pa'o/ /la la na re chos ni mthong ba'i lam ste/ de dang rjes su mthun pa ni sbyor ba'i lam mo zhes zer ro/ /de la 'dod pas log par g.yem pa spong ba ni/ lus phun sum tshogs pa'i rgyu yin no/ / longs spyod la ma chags par spyod pa ni/ longs spyod phun sum tshogs pa'i rgyu ste/ 'di gnyis ni mtho ris thob par byed pa'i thabs so/ /skyes bu dam pa la brten pa la sogs pa ni thar pa'i rgyu ste/ de ltar na mtho ris dang byang grol dag ni rang gi phan pa yin te/ de ltar na rang don dang gzhan don gnyis las bsgrub par bya ba gzhan med la/'di dag gi thabs kyang 'di dag gis bstan pas na brgyad ces bstan to/ /'o na bde ba gang yin pa bstan dgos so zhe na/ phan pa'i spyod pa la zhugs pa dag ni bde ba zhar la 'ong bas logs shig tu bstan mi dgos pa ni/ 'du shes brgyad po de dag la gnas pa la ni zhes smos so//ldog pa'i sgo nas bstan pa ni/ chos dang mi ldan pas zhes bya ba la sogs pa ste/ g.yo ni bslu ba'i sems so/ /'dun pa ni yo byad 'dod pa'o/ /la la na re rgyal po'i ngor byas pas na brgyad du bstan te/ ci'i phyir zhe na/ rab snang gtum po la sogs pa ni rnam par 'tshe ba la sogs pa'i skyon brgyad ha cang shas che ba'i phyir ro//de'i gnyen po glang po che'i lta stangs kyis bstan to zhes kyang zer ro/ /la la ni bya ba'i mchog bsdus pa yin zhes kyang zer ro/ /la la ni 'khor der tshogs kyi bsam pas bstan to zhes kyang 'dod do/ /de ltar bden pa po'i le'u las kyang yang dag pa'i sgrub pa bstan nas/da ni yid gnyis yang dag par sems pa'i sgrub pa bstan pa'i phyir chos bzhi dang ldan na zhes smos te/ rang dang gzhan gyi don 'grub pa'i sbyor ba spyir bstan nas/ rang ma dul bas gzhan 'dul bar mi 'gyur ba'i phyir/ rang gi don 'thob pa'i thabs bye brag tu bstan pa'i phyir/ chos bzhi zhes smos so//rang gi don ni rnam pa gnyis te/ phan pa dang / bde ba'o/ /phan pa ni rnam pa gnyis te/ gtan du ba dang / gtan du ba ma yin pa'o/ /de ltar na bstan pa phan pa gtan du ba ma yin pa ni/ re zhig pa ste lha dang mi thob pa'o/ /de'i dbang du byas nas log par mi ltung ba zhes gsungs te/log pa ni sems can dmyal ba la sogs pa'o/ /mi ltung ba ni de dag yongs su spong ba'o/ /de lta bu'i lus la brten nas phan pa gtan du ba grub pas de bstan pa ni/ myur du mnyes par byed pa gsungs te/ mnyes par byed pa ni sangs rgyas mthong ba'o/ /sangs rgyas mthong ba tsam gyis phan pa gtan du bar ji ltar 'gyur/rgyal po ma skyes dgras rtse mo thob pa yin yang mtshams med pa la zhugs pa lta bu'o zhe na/ chos can zhes smos te bzod pa myur du thob bo zhes bya ba'i tshig gi lhag ma'o/ /de'i phyir phan pa gtan du ba nyid du 'gyur te/ bzod pa thob nas ngan song du mi ltung ba'i phyir ro//bde ba'i dbang du byas nas/ longs spyod chen po yang yongs su 'dzin to zhes gsungs te/ phun sum tshogs pa ni/ ma lus pa mtha' dag pa'o/ /ma 'ongs pa'i phan par 'gyur ba tshe 'di'i bde ba ji ltar gzhag /gal te tshe 'di nyid du 'dod do zhe na/ mnyes par byed cing zhes bya ba'i sgra'i 'brel pa ji ltar grang zhe na/rtsa ba'i 'brel pas sdebs pa'i phyir mnyes par byed cing zhes 'og ma nyid du bstan kyang hwa zhes bya ba bde ba'i brda can du byas nas tshe 'di'i bde bar 'gyur bar mngon no/ /'ang zhes bya ba bsdu ba'i tshig ni he'i byed par snang gi / bsdu ba'i tshig tu mi 'gyur ba'i yang phyir ro//de lta ma yin na rgyu 'bras bu dag gi zlog pa ji ltar 'thad/ mngon pa'i mdzod las/ rgyu sngar yod par bstan pa'ang bsam pa dman pa la dgongs pa'i phyir ro/ /theg pa chen po la rgyu 'bras nges pa med par bstan pas nyes pa med do/ /mngon par zhen pa bzlog par zad kyi 'dir ni nges pa can kho nar 'dod do//de lta ma yin na 'bras bu dag ji ltar thob par 'gyur/ 'bras bu 'dod pa rgyu la nan tan byas na thob kyi 'bras bu la ji ltar gzhan du 'bad/ ha cang spros pas chog go/ /'bras bu thob pa'i rgyu nyid gang zhe na/ de bstan pa'i phyir/ bstan pa bsrung ba'i slad du gnas pa yin zhes bya ba la sogs pa gsungs te/bstan pa ni dam pa'i chos la bya'o/ /srung ba ni yongs su 'dzin pa'o/ /'dzin pa'i tshul ni rnam pa bzhi ste/ sgrub pa dang ldan pas 'dzin pa dang / rigs pa dang ldan pas 'dzin pa dang / dbang phyug dang ldan pas 'dzin pa dang / rnal 'byor dang ldan pas 'dzin pa'o/ /sgrub pa dang ldan pas 'dzin pa ni/thos pa dang / bsam pa dang / sgom pa la rab tu sbyor ba'o/ /rigs pa ni rnam pa mang ste/ mngon sum dang rjes su dpag pas de dag gis ji ltar 'dzin ce na/ mngon sum dang rjes su dpag pa la brten nas chos mi mthun par smra ba'i phyi rol gyi mu stegs kun du rgyu la sogs pa dag gis/rtag par 'dzin pa la sogs pa'i grub pa'i mtha' ngan pa rnam par 'joms shing / yang dag pa'i lta ba la 'god pa dang / yid ches pa'i lung la brten nas/ nang gi mu stegs kha cig brjed du med pa'i gang zag tu lta ba la sogs pa log pa'i grub pa'i mtha' la zhen pa rnams de las bzlog cing /yang dag pa'i lta ba la 'god pa dag ni/ reg pa dang ldan pas chos yongs su 'dzin pa yin no/ /dbang phyug dang ldan pas ji ltar 'dzin ce na/ kha cig rgyal po dbang phyug gi che ba nyid thob par 'gyur ba'i tshe/ de'i 'khor du dge sbyong dang bram ze gang yang rung / yang la la zhig chen po yongs su spangs shing bor/de btang nas nag po bstan pa'i chos ston cing 'dul ba la 'god pas dam pa'i chos nub par byed pa mthong na/ kye ma sems can 'di dag ni log pa'i lam du zhugs shing / gzhan yang de'i rjes su 'khrid par byed pa la phan pa dang bde ba 'byung ba'i rgyu yang nub par byed pas/ ma la bdag ni ngan song du lhung yang bla'i/'di dag ni de lta ma yin no snyam nas snying rje'i bsam pas de dag srog dang bral ba'i bar du byed cing / des chos yun ring du gnas pa ni dbang phyug dang ldan pas yongs su 'dzin pa'o/ /rnal 'byor dang ldan pas 'dzin pa gang zhe na/ 'ga' zhig bsam gtan gyi mthu phul du byung zhing ting nge 'dzin la dbang thob par 'gyur bas/sngar bshad pa lta bu'i gang zag la rdzu 'phrul ston cing / skrag pa'am 'dun par byed pas dam pa'i chos yun ring du gnas par byed pa ni rnal 'byor dang ldan pas dam pa'i chos yongs su 'dzin pa'o/ /don gyi skabs 'dir ni sgrub pas 'dzin pa'i phyogs gcig bstan to//gnyis pa ni sdig pa mi dge ba'i chos la smod pa zhes bya ste/ kun rdzob la skur pa mi 'debs pa'i phyir ro/ /gsum pa ni stong pa nyid dang zhes bya ba la sogs pa ste/ bzhi pa ni bla na med pa yang dag par rdzogs pa'i byang chub tu sems bskyed pa zhes gsungs te/byang chub kyi sems ni kun rdzob dang don dam pa'o/ /des na chos yongs su 'dzin pa ni phan pa dang bde ba'i rgyu yin no zhes bshad par bya'o/ /don 'grub pa'i thabs thams cad kyang phan tshun du 'dra ba ma yin no zhe na/ bden mod kyi 'dir sngar brjod pa'i rjes su mthun pa'i chos sgrub par bshad pa de nyid ni rgyas par byas pa yin pas don thob pa gtso bo zhes bshad par bya'o//de ltar yang dag par sgrub par bshad nas da ni log par sgrub pa bstan pa'i phyir re zhig mtshams sbyar ba ni mi dge ba yongs su spang bar bya ba gang zhe na zhes smos te/ sngar bshad pa de'i mi mthun pa'i phyogs nyid mi dge ba yin pa ma yin nam/de las lhag pa ci zhig yod ces rgol ba ni gang zhe na zhes bya'o/ /lan ni der ma zad kyi rtsa ba'i ltung ba dag kyang yin no zhes bstan pa ni nyi ma'i snying po'i le'u las 'byung ba zhes pa la sogs pa gsungs so/ /de la rtsa ba'i ltung ba ni 'dir rnam pa bzhi ste/ rgyal po'i rtsa ba'i ltung ba dang / blon po'i rtsa ba'i ltung ba dang / nyan thos kyi rtsa ba'i ltung ba dang / byang chub sems dpa' las dang po pa'i rtsa ba'i ltung ba'o/ /de la nyan thos kyi rtsa ba'i ltung ba ni rnam pa lnga ste/ srog gcod pa dang / ma byin par len pa nas mtshams med pa'i las kyi bar du'o/ /byang chub sems dpa'i rtsa ba'i ltung ba ni rnam pa brgyad de/yongs su ma smin pa'i gang zag la stong pa nyid brjod pa la sogs pa'o/ /de la nyan thos kyi rtsa ba'i ltung ba dag ni gong ma dang 'brel pa'o/ /byang chub sems dpa'i rtsa ba'i ltung ba dag ni 'og ma dang 'brel pa'o/ /de la nyan thos kyi sa dang 'brel pa dag ni nyan thos kyi sa rnams su rig par bya'o//byang chub sems dpa'i rtsa ba'i ltung ba brjod par bya ste/ 'phags pa klu sgrub nyid kyis ni byang chub dpa' las dang po pa'i rtsa ba'i ltung ba ni bcu gnyis su bzhed de gang zhe na/ 'phags pa nam mkha'i snying po'i mdo las rtsa ba'i ltung ba rnam pa brgyad dang / thun mong bar gyur pa bzhi'o/ /de la las kyi sbyor ba dang /dngos gzhi dang / mjug yongs su rdzogs pa las pham pa'i ltung ba rnam par gzhag go/ /la la na re 'phags pa klu sgrub nyid kyis ni sngar bstan pa brgyad dang / de'i steng du ser snas slong ba la sbyin par mi byed pa dang / chos ma yin pa chos su brjod pa dang / byang chub kyi sems yongs su spong ba ste/bco lnga po ni byang chub sems dpa'i rtsa ba'i ltung ba rnam par gzhag go zhe'o/ /la la na re 'phags pa thogs med dang rjes su mthun par gzhag go zhes zer ro/ /'phags pa thogs med zhabs kyis ni byang chub sems dpa'i sa la rtsa ba'i ltung ba rnam pa brgyad du gsal bar gzhag pa na'o/ /'dir rgyal po la sogs pa'i rtsa ba'i ltung ba ci'i phyir bstan/gal te sdom pa dang 'brel pas so zhe na/ de dag las ji ltar nges kyi gzhan la ma yin/ ma yin na ni rtsa ba'i ltung bar ji ltar gzhag /nyes pa ming de 'dir ni dge ba'i rtsa ba chad pa la dgongs pa dang / 'byung ba nye bas rtsa ba'i ltung ba dang / rgyal po la sogs pa las gzhag go//de lta bas na dge ba'i rtsa ba sngon bskyed pa thams cad chud gsan par 'gyur zhes 'byung ba dang / yang log par lta ba dang grong 'joms pa dag so sor bstan pas 'byung ba nye bar gsal ba nyid do/ /gang ltar yang zad mod sdom pa'i rtsa bar ltung bar gzhag go/ /ma yin te/rtsa ba'i ltung ba dag ni sdom pa gcod par byed pa'i phyir la/ 'di dag sdom pa can las na kha na ma tho ba chen por 'gyur du zin kyang / sdom pa gcod par byed par mi 'gyur bas rtsa ba'i ltung bar gzhag par mi bya'o/ /ma byin par len pa dang srog gcod pa dag gis kyang ma yin nam zhe na/ ma yin te/ de ni 'dod pa nyid yin yang tshul khrims 'chal pa la zhe sdang ba dang / chos spong ba dang / log par lta ba dag ji ltar gzhag par bya/ bar du gcod pa'i chos dang / mi dge ba bcu'i gnod pa zhes ming du bstan pa las na rtsa ba'i ltung ba ma yin par mngon no/ /de lta bas na rgyal po dang blon po'i ltung ba bstan pas na/sdom pa dang rjes su 'brel pa'i rtsa ba'i ltung ba mtshon pa yin no/ /de dag dngos su ci'i phyir mi bstan zhe na/ so sor thar pa dang / nam mkha'i snying po'i mdo las gsal ba'i phyir ro/ /rgyal po la sogs pa dag kyang 'dra ba ma yin nam zhe na/ de ni the tshom za ba srid pas mdo mang po nges don du byas pa'i phyir dang /khyim pa sgrub pa yin pas de dag phyogs gcig tu bstan pa'i yang phyir ro/ /sdom pa dang rjes su 'brel pa'i yang de dang 'dra ba kho na yin pas bstan par rigs so zhe na/ de ni gong du sems bskyed pa bstan pas de'i mi mthun pa'i chos spang bar go ba'i phyir dang /sdom pa 'jig pa'i rgyur gsungs pa la the tshom za ba mi srid pa'i phyir ro/ /de lta bas na dang po nyi ma'i snying po'i mdo las 'byung ba'i rtsa ba'i ltung ba bstan pa ni/ ma 'ongs pa'i dus na zhes gsungs te/ re zhig gang dang 'brel zhe na/ rgyal rigs dang zhes bya ba la sogs pa'o/ /gang gi dang 'brel zhe na/chos kyi gnas pa'i zhes bya ba la sogs pa'o/ /dngos po gang zhe na/ khyim gyi gzhi dang zhes bya ba la sogs pa'o/ /ji lta bur byas pas she na/ rku ba pa dang zhes bya ba la sogs pa ste/ 'di dag rgyun ma chad par kun du spyod pa dang / dga' zhing mgu la yon tan du lta ba dang / ngo tsha dang khrel med par 'gyur ba dang /gzhan gyi gsol ba'i rjes su ma btang ba las kha na ma tho bar rig par bya ste/ 'og ma dag la yang de bzhin du rig par bya'o/ /de la rgyun ma chad pa ni thun tshod las 'das pa'o/ /kun du spyod pa ni/ yul dang dus ma nges pa'o/ /lhag ma ni go bar zad do/ /des 'bras bu gang myong zhe na/gzhi dang bsam pa'i khyad par las/ /mthong chos 'bras bu can gyi las/ /zhes bya ba'i tshul gyis mthong ba'i chos la myong bar 'gyur ba ni/ tshe 'di la zhes gsungs te/ skyes bu byed pa'i 'bras bu yin pa'i phyir ro/ /rnam par smin pa'i 'bras bu ni/ mnar med pa zhes bya ba la sogs pa'o//de la yi dags kyi dbang du byas nas/ bskal par 'dug pa'i tshe zad nas mya ngan dgon pa'i zhes bya ba la sogs pa'o/ /dud 'gro'i dbang du byas nas/ rgya mtsho chen por sha snag gu'i lus zhes bya ba la sogs pa smos te/ de la lam gyi dbus na 'dug pas lam gol ba'o/ /mnar med pa ni bsti ba'i gnas med pa'o//bskal pa zhes bya ba ni bskal pa chen po'o/ /bar du zhes bya ba ni tshe'i mthar thug par 'gyur ro/ /'o na mnar med ni bar gyi bskal pa'o zhes 'byung ba dang 'gal lo zhe na/ de ni theg pa chung ngu'i dbang du mdzad pas 'gal ba med do/ /lus dpag tshad brgya pa zhes bya ba ni nya'i rigs so//dbang gi 'bras bu ni/ sangs rgyas med pa'i zhing snyigs ma lnga can du skye zhes gsungs te/ snyigs ma lnga ni sems can gyi snyigs ma la sogs pa'o/ /rgyu mthun pa'i 'bras bu ni mig med la mi sdug pa zhes bya'o/ /don bsdu ba ni rgyal po chen po zhes bya ba la sogs pa'o/ /de ltar rtsa ba'i ltung ba spyir bstan nas/da ni khyad par du brjod par bya'o/ /de'i phyir dang po rten gyi khyad par du byas nas thun mong ma yin pa'i lung bstan pa ni/ rigs kyi bu zhes bya ba la sogs pa gsungs te/ rigs kyi gtso bo yin pas rgyal po zhes smos so/ /rigs mnyam pa las 'chos pa'i bu yin pas rgyal rigs so/ /lha chen po la sogs pa'i dkyil 'khor du zhugs pas na spyi bo nas dbang bskur ba'o//ngan song du 'gro bar byed pas na ltung ba'o/ /gtso bo yin pas na rtsa ba'o/ /ji ltar zhe na/ lha dang mi'i bde ba gnas nas ltung ste zhes smos te/ ci'i phyir zhe na phas pham zhing zhes smos te/ de'i gnyen por gyur pas zhes bya ba'i tha tshig go//ngan song gi rgyu dag ni mtha' yas pa ma yin nam des rgol ba ni lnga gang zhe na/ bden mod kyi 'dir gtso bo smos pas nyes pa med ces bstan pa ni/ rigs kyi bu zhes bya ba la sogs pa'o/ /gang la brten nas bsod nams rgya chen po skye ba ni mchod rten zhes bya ba'i don to zhes pa kha cig zer ro//la la ni lha yul nas babs pa la sogs pa la bya'o zhes 'dod do/ /rdzas ni yo byad do/ /chos ni theg pa gsum gyi chos so/ /spong ba ni mi mkho bar byed pa ste/ glegs bam 'jig pa la sogs pa'o/ /'gog pa ni don thob pa'i bar du gcod pa'o/ /nyan thos nges par 'byung ba ni/bden pa gtsor ston pa'o/ /rang sangs rgyas nges par 'byung ba ni/ rten cing 'brel par 'byung ba gtsor ston pa'o/ /theg pa chen pos nges par 'byung ba ni/ shes rab dang snying rje chen po gtsor ston pa'o/ /yang na gsung rab yan lag bcu gnyis las/ shin tu rgyas pa'i mdo sde ma gtogs pa mdo sde la sogs pa ni nyan thos dang rang sangs rgyas nges par 'byung ba'o//shin tu rgyas pa de ni theg pa chen po la nges par 'byung ba'o zhes kyang kha cig 'dod do/ /dge 'dun 'dum pa 'byed pa ni 'khor lo phye ba'o/ /grong ni khyim gcig la sogs pa'o/ /ljongs ni khyim bcu la sogs pa'o//grong khyer ni rig pa'i gnas bco brgyad dang ldan pa'o/ /yul 'khor ni ris su bcad pa'o/ /spong ba la sogs pa ni snga ma bzhin no/ /yang na spong ba ni 'dor bar byed pa'o/ /'gog pa ni snga ma bzhin no/ /subs par byed pa ni glegs bam 'jig pa'o//rten gyis khyad par du byas pa bshad zin to/ /da ni yul gyi khyad par las gyur pa'i rtsa ba'i ltung ba thun mong ba bstan par bya ste/ dang po zla ba snying po'i le'u las dge sbyong rten gyi khyad par brjod pa ni/ grogs po dag ces gsungs te/ nyams pa las rjes su sgrub pa'i tshul bstan pa ni/grong khyer dang zhes bya ba la sogs pa gsungs te/ gal te tshul khrims 'chal pa la spyod pa zhig na/ rgyal po la sogs pas dge 'dun bsdus nas gsol bar bya ste/ dge 'dun gyis kyang gaN+DI brdungs nas dge 'dun bsdus te/ las brjod pa'i sgo nas dbyung bar bya ba ni/ nyams pa la sgrub pa'i tshul lo/ /de la grong khyer ni spyod yul gyi grong ngo / /yul ni mtshams ji ltar bcad pa'i nang du chud pa'o/ /gtsug lag khang ni chos dang ldan pa 'du ba'i sa'i khyad par ro/ /longs spyod ni lhan cig gnas pa dang gtam 'dre ba la sogs pa'o/ /rjes su mthun pa ni bshad pa ltar byas pa'o//gang gi chad pa ni song shig pa'i khyad par brjod pa'o/ /tshul las nyams pa'i khyad par dngos bstan pa ni/ su zhig ces gsungs te/ khyim pa 'am rab tu byung ba'o/ /bde ba thams cad ni bde ba'i rgyu spangs pa ste/ mthong ba dang ma mthong ba'i khyad par ro/ /'bras bu nyams pa ni lha dang mir skye ba dang bral ba la sogs pa'o//ltung ba skyed pa'i khyad par 'thad pa ni de nas zhes gsungs te/ yid du 'ong ba'i phyir lha'o/ /thams cad ni 'dod pa'i khams la sogs pa'o/ /nas zhes bya ba ni dang po smos pa'o/ /lus srul po ni gang gis lus srul bar byed pa ste/ gdon gyi khyad par ro//bar du zhes bya ba ni tha mar gzung ba ste/ 'khor du gtogs pa de brgyad do/ /bslab pa 'dral ba ni bslab pa zhig pa ste pham par gyur pa'o/ /bslab pa bzhin mi bgyid pa ni rjes su mi sgrub pa'o/ /yongs su 'dzin pa med pa ni/ tshul khrims ral bar gyur pas so/ /ston pa ni bcom ldan 'das so//phyi'i gnod pa las ni bsrung bar bya'o/ /nang gi gnod pa las ni bskyang bar bgyi ba'o/ /de ltar mi mthun pa'i rkyen spang ba ltar mthun pa'i rkyen sgrub pa ni yo byad thams cad sbyar bar bya'o/ /de'i phyir de la yang dag pa'i sgrub pa'i tshul las nyams na nyes dmigs bstan pa ni/ gal te zhes bya bya ba la sogs pa'o//la la ni sngar bshad pa'i tshul las nyams pa'i 'bras bu gnyis pa mthong ba'i chos kyi 'bras bu mtshon pa'i phyir te/ lhag ma ni zhar las byung zhes kyang zer ro/ /da ni sa'i snying po'i mdo las yul gyi khyad par las byung ba'i rtsa ba'i ltung ba brjod par bya ste/ re zhig ltung ba bskyed pa'i 'thad pa ni/sngon 'byung ba zhes bya ba la sogs pa gsungs te/ srin po sha za dang dud 'gro'i gti mug pas kyang gus par bkur ba'i phyir yul khyad par can du gyur pa mngon no zhes bya ba'i don to/ /bcom ldan 'das ci'i phyir rjes su dpag pa 'dzin ce na 'khor nges par bskyed pa'i phyir ro/ /de lta yin yang rmongs pa 'ga' zhig ni de lta mi shes so zhes smad pa ni/yang ma 'ongs pa'i dus na zhes bya ba la sogs pa'o/ /ltung bar byed pa'i mtshan nyid ni/ rkyen sna tshogs la tha snyad btags zhes bya ba ste/ ltung ba'i 'bras bu ni rab tu nyes par gyur pa zhes bya ba la sogs pa gsungs pa yin no//dge ba'i rtsa ba chad pa zhes bya ba ni sbyin pa la sogs pa dge ba'i rtsa ba zhig pa'o/ /sems kyi rgyud sreg pa zhes pa ni/ dkar po'i chos rgyud la mi skye ba'o/ /mkhas pa spangs pa ni dam pas yongs su bor ba'o/ /lus la chad pas bcad pa 'ba' zhig gis ltung bar 'gyur bar ma zad kyi longs spyod dang phral bas kyang 'gyur ro zhes bstan pa ni gzhan yang zhes bya'o//de ltar rtsa ba'i ltung ba'i mtshan nyid bstan nas/ 'o na dbang phyug gi gnas gang la gnang zhe na/ bzod pa thob pa'i gang zag ces gsungs so/ /de la mos pas spyod pa la gnas pa na bzod pa thob pa'o/ / 'o na mos pa spyod pa ma yin pa'i gang zag de dag ni ltung bar 'gyur ro zhes thal ba brjod pa ni/ gsol ba zhes gsungs te/ ji ltar ngan song du mi 'gro bar 'gyur zhes bya ba ni/ 'gro bar thal ba kho na'o zhes skyon brjod pa'o/ /ma yin te gal te bzod pa ma thob pa'i sdig pa la spyod pa dag ni/ de ltar 'dod pa kho na'o//lhag ma ni gtan tshigs ma grub pa nyid de/ gal te bzod pa ma thob kyang chos kyi rjes su 'jug pa dag ni ngan song du 'gro bar mi 'gyur ro zhes bstan pa ni gang bzod pa ma thob kyang zhes bya ba'o/ /de lta bas na bzod pa ma thob kyang chos bzhin du'ang mi byed pa la ni/dbang phyug gi gnas gnang ba ma yin la/ de la spyod pas na kha na ma tho ba'i las rtsa ba'i ltung ba 'byung bas na bstan pa zab mo 'di 'jig pa ste/ bcas pa las dral bar 'gyur zhes bya ba'o/ /gzhan dag ni gal te/ rgyal po gdol par gyur na de'i rjes su gzhan 'jug pas/ tshul khrims btang ste/sa'i snying po 'khor lo bcu pa'i mdo nub par byed cing de'i rjes su 'jug pas ngan song du 'gro'o zhes mdo nyid tshad mar bya'o zhes kyang 'dod do/ /ji ltar thar bar 'gyur zhes bya ba ni thar bar mi 'gyur ba kho na'o zhes bya ba'i don to/ /de ltar gnang ba dang ma gnang ba'i gang zag gi rab tu dbye ba bstan nas/da ni gnang ba'i gang zag gis rjes su sgrub pa'i thabs bstan pa ni/ gang dad pa'i stobs kyi go cha bgos te zhes bya ba la sogs pa gsungs te/ sngar rtsa ba'i ltung ba'i nyes pa bstan pa de nyid las bzlog pa'i chos dang ldan pa ni/ de'i gnyen pos te/ log par sgrub pa spong ba yin pas na/rjes su sgrub pa'i tshul lo/ /de la dad pa ni yid ches pa la sogs pa'o/ /de nyid mi mthun pa'i phyogs kyis mi brdzi bas na stobs zhes bya'o/ /go cha ni brtson 'grus so/ /ji ltar zhe na/ rgyal po'i ltung ba'i rtsa ba dang po'i gnyen po ni/ dkon mchog gsum la dad pa mang zhing zhes bya ba ste 'dir dad pa mang zhing gsum bsgom mo//rtsa ba'i ltung ba gnyis pa dam pa'i chos spong ba'i gnyen po ni/ theg pa gsum gyis nges par 'byung ba'i chos mi spong la zhes bya ba la sogs pa'o/ /gsum pa dge sbyong la brten pa'i rtsa ba'i ltung ba'i gnyen po ni tshul khrims dang ldan pa dang tshul khrims 'chal pa la yang rnam par mi 'tshe zhes bya ba la sogs pa'o//mtshams med pa la ste/ rtsa ba'i ltung ba'i gnyen po ni/ dge 'dun dang mchod rten gyi rdzas mi 'phrogs pa zhes bya ba la sogs pa ste/ longs spyod 'phrog pa ni mtshams med pa dang nye ba yin la/ de spong bas mtshams med pa ga la zhig byed ces gnyen por bstan pa yin no//bzlog pa ni gzhan yang de ltar na rjes su 'dzin pas na rang nyid ga la zhig ces bya ba'i don to/ /log par lta ba'i gnyen po ni/ yang dag pa'i lta ba yin te/ de'i phyir dang po yang dag pa'i lta ba skye ba'i rgyu skyes bu dam pa la brten pa ni/ theg pa gsum la nan tan byed pa'i dge slong rnams la brten pa dang /bsnyen bkur byed pa'o/ /gnyis pa dam pa'i chos nyan pa ni/ theg pa gsum gyi nges par 'byung ba'i chos kyi gtam nyan ces bya ba'o/ /gsum pa tshul bzhin du yid la byed pa ni/ ji ltar thos pa nyams kyis ci nus su sgrub pa dang / yi dam la brtan pa dang /sems can rnams theg pa chen po la yang dag par 'dzin du 'jug pa dang / de la yi dam ni rang gi dam bcas pa sngar bstan pa rnams so/ /gzhan de dag 'god pa ni 'khor mang po kha na ma tho ba dag la sbyor ba'i gnyen po bstan pa yin te/ sngar ji skad du/ sems can mang po dag kyang dge ba bcu'i las kyi lam yang dag par 'dzin du 'jug cing zhes bstan pa'i phyir ro//de lta bas na/ skyes bu dam pa brten pa la sogs pa dag ni/ yang dag pa'i lta ba skye ba'i rgyu yin la/ de skyes na log par lta ba spong bas na/ 'di ni rtsa ba'i ltung ba lnga po'i gnyen por bzhag pa yin no//grong 'joms pa la sogs pa'i gnyen po ni mi slu ba'i sems dang ldan pa zhes gsungs te/ grong la sogs pa 'joms pa ni g.yo'i sbyor ba yin pa'i phyir ro/ /de'i phan yon bstan pa ni/ log par ltung bar mi 'gyur bar zhes bya ba'o/ /de bzhin du rjes su sgrub pa'i phan yon bstan pa ni/yang dag nyid las 'byung ba zhes smos te/ dge ba ni sngar bshad pa'i chos rnams dang ldan pa'o/ /lnga brgya tham zhes bya ba ni/ phrag bcu'i tha ma rtags tsam 'dzin pa'i dus so/ /bdag bsrung ba ni sngar bshad pa'i nyams pa las rjes su sgrub pa'i tshul du byed pa'o/ /gzhan bsrung ba ni de ltar rjes su sgrub pas yul 'khor du bya ba thams cad byed pa ste/nyes pa las bzlog pa'i phan yon 'byung ba'o/ /'jig rten pha rol bsrung ba ni/ lha dang mi'i skye ba la sogs pa'o/ /bstan pa bsrung ba ni dbang phyug gi stobs la sogs pa'o/ /yon tan ni thos pa la sogs pa'o/ /snod ni tshul khrims rnam par dag pa'o//srung bar byed pa ni 'tshe ba la sogs pa las bzlog pa'o/ /mi spyod pa ni 'phrog pa dang spyod pa las bzlog pa'o/ /spyod du mi 'jug pa ni 'phrog tu 'jug pa dang / spyod du 'jug pa las bzlog pa'o/ /de'i phan yon bstan pa ni/ bsod nams kyi phung po zhes smos te/ma mthong ba'i phan yon gyi dbang du byas nas bsod nams kyi phung po tshad med ces bya ba la sogs pa ste/ tshad med pa ni tshad med pa'i phyir ro/ /grangs med pa ni bgrang bar mi nus pa'i phyir ro/ /dpag tu med pa ni shes pas mi dpogs pa'o/ /mthong ba'i phan yon ni/ tshe bsring ba la sogs pa ste/bcu tshan dang pos ni bde ba'i rkyen sgrub pa'o/ /gnyis pas ni mi bde ba'i rkyen spong ba'o/ /longs spyod dang bral bar byed pa'i ltung ba las bzlog pas na yongs su skyong ba zhes gsungs so/ /la la ni thams cad kyi don bsdus pa yin no zhes kyang zer ro/ /gtong ba po ni rkyen sgrub pa'i ming ngo //sbyin bdag ni rgyu sbyor ba'o/ /der ma zad pas na lha dang zhes bya ba la sogs pa gsungs so/ /bstan pa 'dzin pa ni snga ma bzhin no/ /des ni chos kyi bar chad byed pa'i gnyen po'o/ /chos kyi tshul yun ring du gnas par byed pa ni/ chos smra ba la brten pa la sogs pas chos 'grel cing bshad par byed pa'o//des ni chos smra ba la gnod par byed pa'i gnyen po yang yin no/ /rigs rgyun mi gcod pa ni/ byang chub tu sems bskyed pa la sbyor ba'o/ /ngag las skyes pa ni nyan thos kyi theg pa'i 'bras bu thob pa ste/ bden pa bzhi'i chos bshad pas 'bras bu rnyed pa'i phyir ro/ /chos las skyes pa ni/ rang rgyal ba'i theg pas 'bras bu thob pa ste/ rten cing 'brel par 'byung ba rtogs pa las 'bras bu rnyed pa'i phyir ro/ /chos kyi sprul pa ni theg pa chen pos 'bras bu thob pa'i byang chub sems dpa' ste/ 'bras bu thob kyang mngon du mi byed pa'i phyir ro/ /gzhan dad pa ni skyabs su 'gro ba dang ldan pa'o/ /don dam pa'i bden pa ni/stong pa nyid bsgom pa'o/ /'o na nyan thos la sogs pa dag kyang yin no zhe na/ yang dag par rdzogs pa'i zhes gsungs te/ theg pa mchog 'dod pa zhes bya ba'o/ /de'i phan yon ni/ lag tu gtad do zhes gsungs te/ mi ldog par 'gyur ro zhes bya ba yin no/ /de ltar na yul gyi khyad par las gyur pa ltung ba thun mong ba'i gnyen po bstan pa yin no//thun mong ba dang thun mong ma yin pa nyid gang zhe na/ rgyal po dang blon po'i rtsa ba'i ltung ba dag ni/ khyim par gyur pa gzhan dang thun mong ma yin la/ yul gyi khyad par dge sbyong la brten pa dag ni/ rgyal po la sogs pa'i yang yin pas thun mong bar gzhag go//de ltar na mi mthun pa dang gnyen po ji skad bstan pa dag ni phal cher sdom pa dang ma 'brel par lta'o/ /mdo kun las btus pa'i bshad pa lung gi tshad mas sbyar ba las dbang phyug gi gnas rnyed pa rnams kyi bsgrub pa bstan zin to// //de ltar mi mthun pa'i phyogs bar du gcod pa spang ba'i thabs bstan par bya ste/de'i phyir chos sgrub pa la gnas par 'dod pas sems la mkhas par bya'o zhes gsungs pa ste/ chos ni ji ltar bshad pa'i tshul khrims so/ /bsgrub pa ni mi nyams par bya bar 'dod pa'o/ /sems ni dran pa dang shes bzhin dang / bag yod pa'o//mkhas pa ni 'og nas ci zhes dpyod par byed pa'o/ /de dag 'das pa'i dus su kha na ma tho bas nyams par byas pa ni stobs bzhis dag par bya ba dang / da ltar gyi nyes pa ni thun tshod las ma 'das pas/ ji ltar rigs par bshad par bya ba dang / ma 'ongs pa'i nyes pas gos par dogs pas ni dran pa la sogs pa goms par bya ba yin no//tshul khrims ni lus la sogs pa gsum gyis bsrung bar bya ba ma yin nam/ ji ltar na sems kho na la mkhas par byed pa zhes rgol ba ni/ ji ltar ni zhes bya ba'o/ /byang chub sems dpa' zhes smos pas ni/ sems bskyed pa mi nyams par bsrung bar bstan to//de'i phyir lus dang sems rab tu dben pas zhes smos te/ sems nyid gtso bo yin par bstan te/ gzhan du na dran pa la sogs pa med na/ lus la sogs pa nyes pa la 'jug par 'gyur ba'i phyir ro/ /lus la sogs pa la dben par ma gyur na yang dran pa 'jug par mi 'gyur te/de'i phyir lus dang zhes smos so/ /de la lus dben pa ni/ 'du 'dzi la sogs pa spangs pa'o/ /'du 'dzi nyid gang zhe na/ la la ni skye bo'i tshogs la bya'o zhes zer ro/ /la la na re tshe 'di'i rtogs pa dang ldan pa ni gcig kho na yang 'du 'dzi'i gnas yin no zhes zer ro/ /sems rab tu dben pa ni/'dod pa'i rnam par rtog pa la sogs pa spangs pa'o/ /de la dran pa yongs su srung ba ni/ ci bdag gis sems 'di dge ba la spyod dam zhes bya ba la sogs pa'o/ /shes bzhin gyi srung ba ni/ dga' ba dang rangs pa dang / mos pa bskyed do zhes gsungs te/dga' ba ni thog mar sems bde ba'o/ /rangs pa ni bar du mgu ba'o/ /mos pa ni tha mar 'gyod pa med pa'o/ /bag yod pa ni skyo ba dang rtog pa mang ba ste/ skyo ba mang ba ni mi mthun pa spong ba'o/ /rtog pa ni gnyen po bsgom pa'o/ /de lta bas na dang po dran pas rang gi sems gang la spyod ces mi brjed par byed do//shes bzhin gyis dge ba la spyod cing rjes su mi 'gyod pa la sogs pa byed do/ /bag yod pas dge ba goms shing sdig pa spong bar byed do/ /de lta bu'i tshul khrims de gang gi don du zhe na/ rnam pa thams cad mkhyen pa nyid kyi don du yin pas/ ma skyes dgra'i mdo las kyang zhes gsungs pa/'dun pas 'gro ba dang / zhe sdang gis 'gro ba dang / 'jigs pas 'gro ba dang / gti mug gis 'gro ba dag ni bdud kyi spyod yul yin pas glags rnyed pa'o/ /snying rje dang byang chub kyi sems dang mi ldan pa ni/ de bzhin gshegs pa mi mnyes pa ste/ snying rje med na sems can yongs su gtong bar 'gyur bas na de'i phyir/gang gis sems can dag la yid kyis gnod byed kyang / /nga la ji ltar brten te de ni ltos dang bral/ /zhes bya ba lta bu'o/ /byang chub kyi sems med pa'ang ji ltar rig par bya'o/ /dngos por lta ba yang de bzhin te/ 'og nas kyang zhal ta bas rin po che'i mchod rten gyis stong gsum gang bar byas na'ang nga mnyes par mi 'gyur ro zhe'o//mi brtson pa'ang de bzhin te/ 'dir brtson 'grus kyi sgra ni theg pa mchog la spro ba'i phyir theg pa dman pa'i chos yongs su bzung bas kyang / nga la bya ba byas par mi 'gyur zhe'o/ /tshul khrims dang sbyin pa dang bzod pa gtsor gyur pa'i pha rol tu phyin pa drug dang bral ba ni lha rnams mi dga' ba ste/rang gi phyogs 'grib pa'i phyir ro/ /rnam grangs gzhan yang pha rol tu phyin pa drug ni/ lha rnams dga' ba'i rgyu yin pas te/ myur du mngon par 'tshang rgya ba'i phyir/ rgyal chen bzhi po ni lhung bzed yongs su 'bul ba dang zhes bya ba nas tshangs pa ni gsol ba gdab par spro'o zhes gsungs pa lta bu'o//dmigs pa ni dge ba mi zad par byed pa'i rgyu yin pa'i phyir dang / yongs su bsngo ba'ang de bzhin te/ thams cad mkhyen par dmigs pa ni/ mya ngan las 'das pa'i mthar thug par 'gyur ro zhes 'byung ba dang /ldog pa dang rjes su 'gro ba'i sgo nas sbyor ba dang / dngos gzhi dang / rjes kyis te phun sum tshogs par bya bar bstan to/ /da ni tshul khrims 'chal pa'i rgyu spang bar bstan pa ni/ smra ba la dga' bar mi bya ste zhes gsungs te/ mdo 'di nyid las ji skad du/ bu ram shing shun snying po ci yang med/ dga' bar bya ba'i ro ni nang na 'dug /shun pa zos pa'i mis ni bu ram ro/ /zhim po myong bar 'gyur ba ma yin te/ /ji ltar shun pa de bzhin smra ba ste/ /ro lta bu ni 'di la don sems yin/ /zhes bya ba la sogs pa gsungs te/ brjed ngas pa ni dran pa dang bral zhes bya ba'i don to//tshul bzhin yid la byed pa dang bral ba ni shes bzhin med ces bya ba'o/ /sems kyi rgyud dmu rgod du gyur pa ni/ bag yod pa dang bral zhes bya ba'o/ /de ltar tshul khrims 'chal pa la ting nge 'dzin dang shes rab med pas na zhi gnas dang lhag mthong yongs su spangs pa'o/ / bslab pa gsum dang bral bas na dam par mi 'gyur ba'o/ /nang gi gdung ba dang ldan pas na 'gyod pa dang ldan pa ste/ tshul khrims med pa'i phyir ro/ /chos 'chad pa ni tshul khrims 'chal pa'i rgyu ji ltar yin zhe na/ bden mod kyi/ 'on kyang smra ba ni rgyud 'khrug par byed pa yin la/ des na dran pa nyams pa la sogs pa'i rkyen gyis so zhes bya ba ni/sgrub pa la mi gnas pa yin no zhes gsungs te/ yon tan len par mi byed pa'i phyir ji skad du/ yang dag sangs rgyas bstan pa ni/ /thos pa tsam gyis mi 'grub ste/ /la la stobs med chu klung gis/ /nan gyis khyer bar gyur pa dag / skom gyis 'chi bar gyur pa bzhin/ /ma bsgoms chos kyang de bzhin no/ /zhes bya ba la sogs pa gsungs pa dang / sngar bshad pa lta bu yin pa'i phyir ro/ /'dis ni las la dga' ba dang / spros pa la dga' ba dang / gnyid la dga' ba dang / 'du 'dzi la dga' ba dang / rnyed pa dang bkur sti la dga' ba ste/'jig rten gyi chos drug spang bar bstan pa yin no/ /mdo kun las btus pa'i bshad pa lung gi tshad mas sbyar ba las tshul khrims kyi pha rol tu phyin pa bshad zin to// //de ltar byang chub tu sems bskyed cing byang chub sems dpa'i sdom pa mi nyams par bsrung ba dang ldan pa ni/khyad par du 'gro ba'i rgyu bsgrub pa la 'jug pa ste/ 'phags pa zla ba sgron ma'i mdo las/ sgrub pa med na tshul khrims kyi 'bras bu zad nas ltung bar 'gyur ba gsungs pa'i phyir ro/ /de'i phyir dang po sgrub pa'i phan yon bstan pa ni/ dmigs par spyod pa la sgrub pa med de zhes gsungs te/dmigs par spyod pa ni/ dngos por lta bas kun nas bslang ba'i dge ba spyod pa'o/ /sgrub pa med pa dngos por zhen nas grol ba'i thabs yang dag pa la rmongs pa'o/ /de'i phyir mang du thos pa dang zhes gsungs te/ zag pa med pa'i rgyu yin pa'i phyir ro/ / nang du yang dag 'jog pa ni tshul bzhin du yid la byed pa'o/ /de dag gang zhe na/ mang du thos pa ni rig pa'i gnas lnga la mkhas par byed pa'o/ /tshul bzhin yid la byed pa ni bsam pa'i shes rab bo/ /des 'phags pa ni bsgom pa ste/ thabs bsgom pa dang / shes rab bsgom pa dang / thabs dang shes rab zung du 'brel par bsgom pa'i mtshan nyid do/ /de lta bas na/ gal te zhes bya ba la sogs pa gsungs so/ /'o na gang gi zhe na/ gal te pha rol tu phyin pa dang ldan pa zhes bya ba ste/ bsti stang ni bsnyen bkur ba'o/ /mchod rten ni bsod nams che ba'i rgyur grags pas na/ ci'i phyir zhe na zhes brgal ba las/ rigs pa ni/ mang du thos pa las skyes kyi/ /zhes gsungs te/ bsod nams chen po thob pa yin yang / ma rig pa dang 'gal ba'i rgyu ma yin pas de dang 'gal ba ni thos pa la yin no zhes bstan to/ /de'i phyir gal te zhes bya bas dman pa bstan te/ bsod nams ma yin pa skye ba ni/ dman pa la sbyar ba'i phyir ro/ /de la thos pa'i phan yon bstan pa ni/ gal te zhes bya ba'o/ /bsgom pa'i phan yon bstan pa ni/ nang du yang dag 'jog la brtson pa zhes gsungs te/ gnang ba ni bka' stsal pa'o/ /de ltar mngon par 'phags pa'i rgyu gang zhes dri ba ni/de ci'i phyir zhe na zhes rtog pa la dka' ba'i las te zhes gsungs te/ dka' ba ni 'khor ba las bzlog par chas pa'i phyir ro/ /'o na theg pa 'og ma dag kyang yin no zhe na bla na med pa zhes gsungs te/ 'khor ba'i 'dren pa dag kyang ded dpon dam par 'dod pa'i phyir ro//de'i phyir khams gsum pa'i thams cad las khyad par can du gyur pa ste/ thams cad kyi ded dpon yin pa'i phyir ro/ /mngon par 'phags pa ni gtso bor gyur pa'o/ /phan yon de lta bu dang ldan pa'i sgrub pa gang zhe na/ sgrub pa ni rnam pa gsum ste/ thos pa las byung ba'i shes rab dang /bsams pa las byung ba dang / bsgoms pa las byung ba'i shes rab po/ /de lta bas na dang po thos pa las byung ba'i shes rab bskyed pa'i phyir/ yang chos sgrub pa ni zhes bya ba la sogs pa gsungs te/ chos ni 'dir thos pa'i shes rab la bya'o/ /sgrub pa ni de nyid nyams su len pa'o//de la thos pa ji ltar bya zhe na/ chos thams cad dngos po med pa'i ston ka'i nyi ma phyed kyi nam mkha'i dkyil lta bu spros pa'i mtha' dang bral ba de lta bur rtogs pa'i thabs su bya bar bstan to/ /thabs gang gis she na/ bsam pa rnam par dag pa dang / sbyor ba phun sum tshogs pa'i thabs kyis so//de la bsam pa ni rnam pa bzhi ste/ bdag bsgrags pa'i bsam pa ma yin pa dang / rtsod pa las rgyal bar 'dod pa'i bsam pas ma yin pa dang / mtshang 'dru ba'i bsam pas ma yin pa dang / de'i phyir sems can yongs su bsgral bar dmigs pa dang /nyon mongs pa'i dgra las rgyal ba'i bsam pa dang / rnam pa thams cad mkhyen pa nyid thob par 'dod pa'i bsam pa dang / chos dang chos smra ba la gus par bya ba'i bsam pas mnyan par bya ba'o/ /sbyor ba ni rnam pa gsum ste/ sbyor ba stong pa nyid snying rje chen po can byang chub kyis zin cing /go cha'i brtson 'grus dang ldan pa dang / dngos gzhi 'khor gsum rnam par dag pa pha rol tu phyin pa drug dang ldan pa dang / rjes la mi dmigs pas dge ba rdzogs pa'i byang chub tu yongs su bsngo ba ste/ thabs de lta bus mnyan par bya'o zhes bstan to/ /'di dag gi mtshan nyid du ni mdo sde rgyan las slob dpon rta dbyangs kyis bshad par blta bar bya'o//'dir ni mdo tsam du brjod pa'i phyir dang po sbyor ba stong pa nyid la sogs pa ni/ 'od srungs zhes gsungs te/ byang chub kyis zin pa ni thams cad mkhyen pa'i rgya mtsho las 'jug par 'dod pa'o//stong pa nyid dang ldan pas byis pa so so'i skye bo'i sa las 'das pa'o/ /snying rje dang ldan pas nyan thos dang rang sangs rgyas kyi sa las 'da'o/ /go cha dang ldan pa'i bdag gi zhes smos te/ pha'i spyod yul ni rnam pa thams cad mkhyen pa nyid do/ /mdo sde las pha rol tu phyin pa drug ni pha'i spyod yul du bshad pa'o//dngos po 'khor gsum rnam par dag pa la sogs pa ni/ rtsa ba mi gcod pa zhes bya ste/ brtson 'grus kyis bya ba rnams byed pa'i phyir ro/ /rjes kyi yongs su bsngo ba ni/ thams cad mkhyen pa nyid du bsngo ba'i phyir zhes bya ba la sogs pa gsungs te/ chog mi shes pa ni rgya mtsho lta bus mi ngoms pa'o//zag pa med pa'i las yongs su spyod pa la bslab pa bag yongs su gnas pas kha na ma tho ba med pa'o zhes gsungs te/ ji skad du/ shes rab rnam pa gsum la 'jug pa ni/ nyes pa dang ltung ba phra mo dag las grol bar 'gyur ro zhes gsungs pa lta bu'o/ /bsam pa ni rnam pa bzhi ste/bdag bsgrags pa'i bsam pas ma yin pa ni/ sgrub pa don du gnyer bas zhes gsungs te/ sems snyoms pa ni byams pa la sogs pa'o/ /de bas na rtsod pa las rgyal ba'i bsam pas ma yin pa la sogs pa rnams kyang rig par bya ste/ 'dir ni mtshon par zad do/ / rang bzhin ji lta bu zhig mnyan ce na/ rig pa'i gnas lnga la mkhas par bya bar gsungs so/ /'o na lung las tshul gcig gis 'tshang rgya bar gsungs pa dang 'gal lo zhe na/ de ni dgongs pa'i don du gsungs pa yin par rig par bya ste/ ji ltar zhe na gang zag dbang po rtul po la dgongs pa dang /'jig rten pa'i lam bskyed pa la dgongs pa dang / gzhan drang ba la dgongs pa'i phyir ro/ /yang / rig pa'i gnas lnga dag la brtson par ma byas na/ /'phags mchog gis kyang thams cad mkhyen nyid mi 'gyur te/ /zhes gsungs pa dang yang 'gal bar 'gyur ro/ /de ni drang ba'i don yin no zhe na/gal te sangs rgyas kyi gsung ni dgongs pa sna tshogs su 'jug pas rung ba zhig na/ bka'i don gtan la 'bebs par byed pas ci ltar gzhan du bshad/ de lta na ni don gtan la phab par yang mi 'gyur la/ ha cang thug pa med pa'i thal bar yang 'gyur ba'i phyir ro/ /de lta bas na/ldog pa'i sgo nas spang bar bya ba bstan pa ni/ 'du 'dzi'i gtam nyan pa dang zhes bya ba la sogs pa ste/ 'du 'dzi'i gtam ni brtag pa'i bstan bcos rnams so/ /mnyan nas ni rang bzo ba'i gtam mo/ /lhag ma ni go sla ba rnams te/ 'di dag las don du 'gyur ba cung zad bshad mod kyi don chen po nyams pas na bar du gcod pa'o//da ni tshul khrims ci lta bus mnyan pa de bshad par bya ste/ dang po nyon mongs pa'i gnyen por 'gyur bar bya dgos pas rtsod pa'i bsam pas ma yin pa ni/ lha'i bu zhes gsungs te/ chos thams cad la mi sgrub pa ni dngos por lta ba 'dor ba ste/dngos po ni 'ching ba'i gnas yin pa'i phyir ro/ /ji ltar 'ching zhe na/ dngos por zhen pa yod na bdag tu rtog par 'gyur la/ bdag yod na gzhan du shes pas de las nyon mongs pa mtha' dag 'byung bar 'gyur te/ bdag yod na ni gzhan du shes/ /bdag gzhan cha las 'dzin dang sdang //'di dag dang ni kun 'brel las/ /skye bo kun nas nyes tshogs bsten/ /zhes bya ba lta bu'o/ /'o na dngos por lta ba nyid thabs gang gis 'dor zhes de ci'i phyir zhe na zhes rgol ba la 'bad cing rtsol ba ni rnam par rtog pa yin pas/ byang chub sems dpa'i nyon mongs par 'gyur la/'bad pa med cing rtsol ba dang bral ba ni nyon mongs pa mi skyed pas na chos mi byed pa'o/ /'o na 'bad pa med na grol bar 'gyur ram zhe na/ bya ba rang bzhin nyid du khas blangs la/ /de ni ma yin te/ 'dir/ 'bad pa med cing rtsol ba med/ /ces bya ba ni dngos por grub pa'i nyon mongs pa spang bar rtsol bar mi bya ste/de ni log pa yin pa'i phyir ro/ /ci ltar zhe na/ gal te dngos po nyid grub pa zhig yod na de thabs gang gis sel bar 'gyur/ grub ces bya ba rang bzhin nyid du khas blangs la/ rang bzhin gzhan du 'gyur ba mi rigs te/ ma byas pa'i phyir ro/ / de ltar na spangs pa'i grol ba thag bsrings pa yin te/ gnyen po med pa'i phyir ro/ /'o na ji lta bu zhe na/ med pa la yod par rtog pa ni phyin ci log yin pas nyon mongs pa'i nyes pa bshad pa/ yod pa'i rtog pa dang bral ba ni ma 'khrul pa'i shes pa zhes bya'o/ / 'o na med par rtog pas sam zhe na/ yod pa'i dngos po ma grub na gang zhig med par 'gyur/ des na med par rtog pa'ang mi 'byung ste/ mtha' yongs su spangs pa'i phyir ro/ /de lta bas na/ nyon mongs pa dag ni brdzun la dngos por ma grub pa yin pa/ mi rtog pa ni bde ba'i ngo bo nyid du gnas pa de skyes na snang bas mun pa ltar sel gyi/yul gzhan du 'phos pa'am dngos po bzhag pa lta bu ma yin pas na nang gi mu stegs pa 'ga' zhig de lta bur 'dod pa dgag pa'i phyir ro/ /'bad pa dang rtsol ba med ces bstan to/ /rnam grangs gzhan yang mnyam par gzhag pa'i dus na mi rtog pa'i ngo bo nyid du gnas pa ni/ye shes skye ba'i rgyur 'thad kyi/ /gzhan du na/ byams pa la sogs pa ni rmongs pa dang 'gal ba rgyu ma yin kyang de skad ces brjod do/ /mi byed pa ni nyon mongs pa spong bar mi rtsol ba'o/ /rnam par mi byed pa ni gnyen po bskyed pa la mi 'bad pa ste/ de'i phyir/ 'di la bsal bya ci yang med/ /gzhag par bya ba cung zad med/ /yang dag nyid la yang dag lta/ /yang dag mthong na rnam par grol/ /zhes gsungs so/ /'o na mi rtag pa nyid la thabs gang gis skyed ce na/ rtog pa la brten pas so/ /rtog pa nyid gang gis spong ba zhe na/ mi rtog pa nyid kyis te/de'i phyir/ dmigs pa la ni brten nas su/ /mi dmigs pa ni rab tu skye/ /zhes gsungs pa lta bu'o/ /gnyis pa rnam pa thams cad mkhyen pa'i ye shes thob par bya dgos pas/ rnyed pa dang bkur sti'i bsam pa yin pa ni/ chos rnams bsgrub par bya 'dod pa'o zhes gsungs te/ chos ni rnam pa thams cad mkhyen pa'i ye shes so//sgrub pa ni de thob par bya ba'o/ /rnyed pa ni yo byad do/ /bkur sti ni stan 'dings pa la sogs pa'o/ /yongs su spang bar bya ba ci'i phyir zhe na/ mthong ba dang mthong ba'i yon tan thams cad 'joms shing nyes pa thams cad 'phel bar byed pa'i phyir ro//de la yon tan ni tshul khrims la sogs pa'o/ /nyes pa ni 'chal pa'i tshul khrims la sogs pa'o/ /de'i phyir gti mug bskyed pa zhes bya ba la sogs pa gsungs te/ gti mug ni 'dir shes bzhin ma yin pa la dgongs so/ /dran pa 'joms pa ni sdom pa'i tshul khrims nyams par byed pa'o//bdag gi don ni tshe 'di'i bde ba'o/ /g.yo ba skyed pa ni sems can gyi don byed pa las nyams pa ste/ gzhan slu ba nyid do/ /rgyags pa la sogs pa ni nga rgyal te/ des yon tan sbyin pa la sogs pa mi skyed cing nyams par byed pas na dge ba'i chos yongs su sdud par mi 'gyur ba'o//so sor thar pa'i sdom pa las nyams par byed pas na gnang ba ma yin pa ste/ mi dge ba bcu spyod pa'i phyir ro/ /byang chub sems dpa'i sdom pa las nyams par byed pas na/ ltung ba'i rtsa ba de pham pa lta bu'i chos yin pa'i phyir ro/ /ser sna bskyed pas na/ sngar bkur sti byed pa zhes smos te/ phyis mi byed pa ni yongs su 'dzin pa'i skyon gyis so/ /sems rnam par g.yeng bas na bsam gtan dang tshad med pa yongs su spangs pa ste/ tshad med pa ni tshangs par skye ba'i rgyu yin pa'i phyir ro/ /le lo dang ldan pas na/ lhag spyod kyi spyod pa dang mtshungs pa ste/le lo ni thob pa'i yon tan nyams par byed pa'i rgyu yin pa'i phyir ro/ /khong khro bskyed pas na rab tu 'jug pa zhe sdang ni sems la gnod pas na tsher ma lta bu yin pa'i phyir ro/ /'chal ba'i shes rab ni 'dam lta bu ste/ mi shes pa ni 'byung ba'i lam la rmongs pa'i phyir ro/ /rnam par smin pa'i 'bras bu ni sems can dmyal ba la sogs pa'o//la la ni nyon mongs pa dang nye ba'i nyon mongs pa bskyed pas na/ dran pa 'joms pa dang / rgyags pa la sogs pa bskyed pa'o/ /bka' las 'das pas na ma gnang ba la spyod pa'o/ /tshul khrims nyams par byed pas na dge ba'i rtsa ba stor bar byed pa'o//mthong ba'i nyes dmigs ni phyis mi byed pa'o/ /ma thob pa'i nyams pa ni bsam gtan dang tshad med pa yongs su spangs pa'o/ /thob pa'i nyams pa ni lhag spyod kyi cho ga lta bu'o/ /phrag dog bskyed pas tsher ma lta bu'o/ /dbral bar dka' bas 'dam lta bu'o zhes kyang zer ro//sems can thams cad bsgral bar dmigs pa'i phyir bdag bsgrags pa'i bsam pa ma yin pa ni/ so sor brtags zhes bya ba ste/ so sor brtags nas zhes bya ba ni/ sems can yongs su thar bar bya ba ni dmigs par spyad nas so/ /'dod pa ni bdag gi yon tan ni//chung ba de bsgrags pa'i bsam pa btang nas so/ /bzlog pa'i sgo nas dpe drang ba ni/ shing n+ya gro d+ha'i drung na zhes smos so/ /grong rdal ni tshong 'dus kyi khyim mo/ /drung ba ni 'dod pa chung ba'o/ /des pa ni ngang 'jam pa'o/ /de ltar nyes dmigs kyi sgo nas spang bar bya dgos pas na mi zad pa zhes bya ste/ma rungs pa'o/ /brnyas pa ni khyad du gsod pa'o/ /grags pa ni snyan pa brjod pa'o/ /chos dang chos smra ba la gus par bya dgos pas/ chos kyi mkhan po'i mtshang 'dru ba'i bsam pas ma yin pa ni/ g.yo dang sgyu yang yongs su spang bar bya/ /zhes bya ba ste/ yon tan la sogs pa thob par 'dod pa'i re ba'i yid kyis tshul gzhan du sgyur ba ni slu bas na g.yo'o//drang por mi byed pas na sgyu'o/ /de nyid ldog pa'i sgo nas bstan pa ni bar du gcod pa na'o zhes bya ba'o/ /yongs su spang bar ni chos dang chos smra ba la gus pa bskyed par bya ba'i phyir ro/ /de'i phyir lung las kyang /chos la ni sman gyi 'du shes zhes bya ba la sogs pa gsungs so/ /rjes su 'gro ba'i sgo nas bstan pa ni/ gzhi'ang gnyis te zhes bya ba ste/ drang po dang g.yo med pa ni gsang mtshang 'dru ba'i bsam pas ma yin pa'o/ /de ltar chos nyan pa'i tshul de lta bus yul nas gang la mnyan zhe na/yongs su 'dzin pa'i khyad par bstan pa la ni nan tan sgrub par 'dod pas zhes gsungs pas te/ nan tan du bya ba ni bsgrub pa'i don la'o/ /yongs su 'dzin pa las ci'i phyir zhe na/ shin tu lkog tu gyur pa la ni lung gtso bo yin te/ mngon sum dang rjes su dpag pa mi 'jug pa'i phyir ro//'o na byang chub sems dpa' thos pa dri ma med pa'i gzi brjid dang ldan pa la ni chos ri sul dang / ka ba dang / rtsig pa'i nang dag tu 'ang 'byung bar 'gyur ro zhes bstan pas yongs su 'dzin pa ji ltar bsngags de ni lhag pa'i bsam pa rnam par dag pa'i phan yon du bstan mod kyi/ 'dir las dang po pa dag dkar po yongs su 'dzin pa la ma brten pa na thabs gang gis 'jug par 'gyur/rang gi spyod pas so zhe na/ gal te lhag pa'i bsam pa rnam par dag pa la 'dod pa kho na ste/ rtog pa rang skye bar sngar bstan to/ /de lta yin pa la ni ci ltar rung / lung cung zad la brten pa la sogs pa yang ma yin te/ci ltar/ rtog ge brten cing ma nges la/ /ma khyab kun rdzob skyo ba can/ /byis pa la ni brten pas na/ /de phyir de ni yul min 'dod/ /ces bya ba lta bu'o/ /lung ci zhig dgongs she na/ de yang ma yin te/ lung med pa'i rtog ges ni/ snang ba'i don kyang rtogs par mi nus na/shin tu lkog tu gyur pa'i don la lta ci smos/ 'phags pa thogs med kyang / lung ma rtogs par rtog ge la/ /chos rnams rnam par gnas ma yin/ /zhes gsungs so/ /gal te rtogs shing khong du chud pa nyid na de nyid kyis so zhe na/ de yang ma yin te/ 'jig rten pa yi tshul du yang //rig pa glegs bam la bslabs shing / /bla ma'i kha nas ma yin pa/ /mang po'i nang du mi mdzes te/ /'phyon ma'i bud med sbrum ma bzhin/ /zhes 'byung na/ shin tu lkog tu gyur pa'i don la dge ba'i bshes gnyen med par ni/ lung las/ gru yi skya ba 'dzin med pas/ /rgya mtsho'i ngogs su phyin mi 'gyur//de bzhin bla ma med pa yi/ /sgrub pos srid pa'i mthar mi phyin/ /ces bya ba gsungs pa lta bu dang / yang 'phags pa nor bzangs kyis dge ba'i bshes gnyen stong gi brgya las gdams pa btsal ba yin pa'i phyir dang / yang dge ba'i bshes gnyen ni/ srog gi phyir yang gtang bar mi bya zhes gsungs pa ni/ yongs su 'dzin pa nges par brten par bya dgos so/ /dgos pa chen po dang ldan pa'i yongs su 'dzin pa du zhe na/ de ni rnam pa gnyis te/ bla na yod pa'i dge ba'i bshes gnyen dang / bla na med pa'i dge ba'i bshes gnyen no/ /dang po ni rnam pa gnyis te/lung dang ldan pa dang / sgrub pa dang ldan pa'o/ /de la lung dang ldan pa ni gdams pa phyin ci ma log pa dang ldan pa'o/ /sgrub pa dang ldan pa ni phun sum tshogs pa'i dge ba'i bshes gnyen no/ /de gang zhe na/ chos rnam pa bzhi dang ldan pa la bya ste/ 'dod pa chung zhing chog shes pa dang /snying rjes rjes su 'dzin pa dang / so sor thar pa dang / byang chub sems pa'i sdom pa dang ldan pa dang / shes rab phun sum tshogs pa nyid do/ /la la na re dul ba la sogs pa chos rnam pa bcu bshad pa la bya'o zhes zer ro/ /la la na re mang du thos pa la sogs pa chos rnam pa lnga dang ldan pa'o zhes zer ro//la la na re sdom pa la gnas pa la sogs pa chos rnam pa lnga dang ldan pa'o zhes zer ro/ /la la na re tshul khrims dang ldan par gnas pa la sogs pa chos rnam pa bdun dang ldan pa la bya'o zhes zer ro/ /la la na re tshul khrims 'chal pa la sogs pa skyon rnam pa gsum dang mi ldan pa ni/phun sum tshogs pa'i dge ba'i bshes gnyen du 'dod do/ /de la lung dang ldan pa pa ni lung len pa'i dge ba'i bshes gnyen dang / sgrub pa dang ldan pa'i dge ba'i bshes gnyen no/ /de la lung las ni lung len pa 'ba' zhig go/ /sgrub pa dang ldan pa ni lung dang sgrub pa gnyis so//lung dang ldan pa dang / sgrub pa dang ldan pa re res kyang gnyis ka 'grub bo/ /gnyis kyis ni re res 'grub pa ma yin no/ /de'i phyir 'dir tshigs su bcad pa/ lag gnyis dang po gnyis pa dang / /de yi gnyen po'i dbye ba ni/ /dus dang mda' ni rnam pa gnyis//mda' gnyis re re drang srong dang / /yon tan dag ste dus gzhan gyis/ /'dod pa ma spangs go bya'i phyir/ /bstan gyi lag pa gnyis kyi las/ /bsdus te rnam pa re re gnyis/ /bsdu ba'i tshigs su bcad pa'o/ /de la gtso bo yin pas sgrub pa zhes smos so/ /de la dge ba'i bshes gnyen bsten pa'i mtshan nyid bstan pa ni/dpal 'byung ba dang zhes bya ba la sogs pa gsungs te/ dang po bsten pa'i dngos por bstan pa ni/ rag las pa'o zhes bya ba la sogs pa ste/ spyod pa ni tshul khrims la sogs pa ni rna ba'i dbang po yul ma grags pa'o/ / sgrub pa'i dbang du byas nas/ yon tan yongs su rdzogs par bya ba zhes gsungs te/ yon tan ni thos pa la sogs pa'o/ /yongs su rdzogs pa ni ma tshang ba med pa'o/ /de ltar sgrub pa dang ldan pa ni 'jig rten dang 'jig rten las 'das pa'o/ /gnas skabs rnams su yon tan gyi tshogs skye ba nas gnas skabs thams cad du yongs su 'dzin pa'i khyad par gyis dang por 'jig rten pa'i lam du bskyed pa zhes bya ba ste/dge ba'i rtsa ba ni sbyin pa las byung ba la sogs pa shes rab kyis yongs su zin pa'i khyad par ro/ /bslab pa nan tan du bya ba ni spro ba'i khyad par te/ brtson 'grus kyis sdig pa mi dge ba'i chos ma skyes pa mi bskyed pa la sogs pa'o//lhag pa'i bsam pa yongs su dag pa ni/ sems pa'i ting nge 'dzin la sogs pa'o/ /zhi gnas dang lhag mthong gi khyad par ro/ /bsod nams bsags pa ni dad pa la sogs pa'i dbang pos khyad par du byas pa'o//byang chub ni ji lta ba la sogs pa shes pa'i ye shes te/ de dang rjes su mthun pas na mgu bar byed pa dad pa la sogs pa'i khyad par byas pa'o/ /ngan song du mi ltung ba ni bzod pa'i gnas skabs su song ba'i mya ngan las 'das pa ste/ zin pa ni rang bzhin med pa rtogs pa'i khyad par ro//theg pa chen po ni stong pa nyid la bya bar dgongs te/ de'i khyad par chos thams cad la bdag med par yid ches pa ni mi ldog pa'o/ /'jig rten las 'das pa'i gnas skabs dang po chos kyi dbyings kun du 'gro ba rtogs pas na/ so so'i skye bo'i sa ste/ kun du sbyor ba gsum la sogs pa zad pas na/yongs su 'da' ba'o/ /bslab pa ni sdom pa'i tshul khrims la sogs pa'o/ /'gal ba ni srog gcod pa la sogs pa ste/ de'i nyes pa mi spyod pas na mi byed pa'o/ /nyan thos dang rang sangs rgyas kyis nges pa ni bdag med rtogs pa'i shes rab ste/ lhag pa'i ting nge 'dzin gyi stobs kyis mi 'jug pa'o//lam ni sdug bsngal shes pa'i mtshan nyid la sogs pa ste/ de'i mi mthun pa'i phyogs lus kyi gtsang bar 'dzin pa la sogs pa ni gol ba'o/ /yongs su bsrung ba ni rang gi shes rab skyed par byed pas so/ /chos ni rten cing 'brel bar 'byung ba'o/ / char rab tu 'bebs pa ni shes rab kyi stobs bskyed pas so/ /de'i phyir 'phags pa nyid kyis kyang / /rten cing 'brel par 'byung 'di rgyal ba yi/ /gsung gi mdzod kyi gces pa zab mos te/ /zhes gsungs so/ /sangs rgyas kyi chos ni dran pa nye bar gzhag pa la sogs pa rnams so/ / gnas par byed pa na snga ma ltar rang gi shes rab bskyed pas so/ /phan pa ni mtshan ma med cing rtsol ba dang bcas pa'o/ /rgya chen po ni mtshan ma med pa ste/ mtshan ma ni rgya chung ba'i phyir ro/ /sangs rgyas kyi rigs ni sngar bshad pa rnams so/ /yang sangs rgyas kyi rigs ni mtshan ma med par rtogs pa'o//bskyed pa ni lhun gyis grub pa ste/ ngang gis 'byung bas ma lta bu'o/ /sdig pa ni mi shes pa'i rnam grangs te/ don la rmongs pa la sogs pa ni sdig pa'o/ /so so yang dag par rig pa rnam grangs dang mtshan nyid la rmongs pa sel bas na bsrung ba ste/so so yang dag par rig pa'i gong du bskyed pas ma ma lta bu'o/ /'khor ba ni phung po lnga'i rang bzhin te/ sdug bsngal brgyud pa'i phyir ro/ /chu bo ni khyer bar byed pa ste rgyu dang 'bras bu'i chos rnams so/ /sgrol ba ni phrin las yang dag par rdzogs pa'i sangs rgyas dang 'dra ba'i phyir ro/ / de'i phyir sa bcu pa la ni sangs rgyas nyid du brjod do zhe'o/ /rnam pa thams cad kyi mchog mkhyen pas na thams cad mkhyen pa'o/ /kun rdzob mkhyen pas na ye shes so/ /gling ni 'khor ba'i sdug bsngal yongs su chad pa'o/ /rin po che ni sngar bshad pa'i 'dra ba'i phyir dper brjod pa ni phrin las la bya'o kha cig zer ro//la la ni yon tan mtha' dag gi dpe yin par 'dod do/ /de ltar tshogs kyi sa nas mthar phyin pa'i bar du yon tan mtha' dag skye ba ni yongs su 'dzin pa'i dbang las 'byung bar rig par bya ste/ 'dir ni mdor bsdus te bstan gyi zhib tu 'phags pa sdong po bkod pa'i mdo las shes par bya'o//yongs su 'dzin pa'i phan yon gyi don bshad pa ni slob dpon rta dbyangs kyis mdo sde'i rgyan du bshad par rig par bya'o/ /mos pas spyod pa nas mthar phyin pa'i sa'i bar du yon tan gyi chos rnams yongs su sbyar ba ni/ 'phags pa thogs med kyi byang chub sems dpa'i sa las shes par bya'o//sa dang po nas mthar phyin pa'i sa'i bar de nyid kyi rgyas pa ni sa bcu pa las rig par bya'o/ /'dir smras pa/ mdo sde rnams su sangs rgyas 'byung ba rnyed par dka' ba la sogs pa mang du gsungs shing / mdo gcig tu yang dpes mtshon na sems bskyed pa'i phan yon la sogs pa mang du 'byung ba las/mdo grangs 'ga' zhig tu 'chad pa dang / sems bskyed pa'i phan yon la sogs pa grangs su chad pa bsdus pa'i dgongs pa gang yin pa brjod dgos so zhe na/ la la na re phyogs mtshon pa yin no zhes zer na/ la la na re mdo du ma dang gcig tu bshad pa bsdus pas ni mtha' dag pa yin la/sems bskyed pa'i yon tan la sogs pa ni phyogs mtshon pa yin no zhes bshad do/ /la la na re dgos pa'i dbang gis don du ma dang gcig tu bshad pa yin la phyogs mtshon pa rnams ni sogs pa'i sgra dang ldan pa gang 'byung ba la ji ltar rig par sbyar ro//mdo sde las mang du gsungs pa nyung du bgrangs pa rnams ni skyes bu'i don 'grub pa'i rgyur 'gyur ba rnams yin no/ /de'i phyir phyogs tshod kyi 'dod pa rnams la rigs pa dang lung gang yang med de/ 'dir ni gzhung mangs kyis 'jigs pas ma spros te/ bzlog pa gnod pa med pa yang de bzhin no//de bzhin du mtshon pa yang ji ltar rigs par shes par bya'o zhes bla ma brgyud pa las bdag gis thos so zhes zer ro/ /de ltar phan yon dang ldan pa'i yongs su 'dzin pa'i bsnyen bkur bar gdams pa ni/ de ltar yid la bya ba rgyun mi chad pas bsten par gyis shig ces gsungs te/ yid la bya ba ni yon tan gyi sgo nas so/ /ci ltar bsten zhe na/ rnam par dag pa'i sgo nas ni/ /sa lta bu'i sems dang zhes bya ba la sogs pa ste/ khur ni dam bcas pa'i don to/ /bskur ba ni rjes su bsgrub pa'o/ /mi skyo ba ni sun par mi bya ba'o/ /mi phyed pa ni bdud dang bdud kyi ris kyis byin gyis brlabs pa'i gang zag gi rjes su mi 'jug pa'o//sdug bsngal ni tha mal pa'i las kyis dub pa'o/ /mi 'gul ba ni g.yo bar mi nus pa'o/ /ci dga' ba ni ci ltar dgyes par bya'o/ /mi khro ba ni gus pa'i phyir rang bsten pa'o/ /ci lta bus she na/ sngar bstan pa ltar gus pa'i sems ni bdag ni dad par 'du shes bskyed par bya'o zhes bya ba la sogs pa gsungs pa'o//dge ba'i bshes gnyen kho na la gus pa ci'i phyir zhes te/ ci'i phyir zhe na zhes rtog pa la/ yon tan thams cad kyi rtsa ba yin pas zhes phan yon bstan pa ni/ rigs kyi bu zhes bya ba la sogs pa ste/ ri gangs can ni sman sna tshogs kyi gnas yin pas/de dag yongs su 'phel ba ltar dge ba'i bshes gnyen yang yon tan thams cad skye ba'i gnas yin pas gong du 'phel ba ni rnam par 'phel lo zhes gsungs so/ /rgya mtsho chen po chu yongs su 'dzin pa ltar dge ba'i bshes gnyen yang yon tan gyi snod yin par bstan pa ni snod du 'gyur ro zhes gsungs so//de ltar ma thob pa'i yon tan thob pa dang / thob pa mi nyams shing 'phel ba'i khyad par bstan nas de nyid mdor na bsdu ba ni mdor na zhes gsungs te/ thob pa ni rnyed pa'o/ /chos ni stobs la sogs pa ste/ yongs su 'grub pa ni mi nyams pa'o//kha na las pa ni lung las so/ /byung ba ni sgrub pa dang ldan pa las so/ /de ni yon tan nyams pa sor chud par byed pa'i phan yon bstan pa ni/ 'od srungs zhes gsungs te/ shing leb ni gru'i tshal pa ci yang rung ba 'am mi ro la sogs pa'o/ /'gram ni ngogs so/ /dpe de nyid sbyar ba ni de bzhin du zhes pa ste/thams cad mkhyen pa'i sems ni rdzogs pa'i byang chub 'dod pa'i smon pa'i sems so/ /zhig pa'i sems ni nyams par byed pa'i chos bzhi thun tshod las 'das pa dang / sems can yal bar dor ba dang / byang chub tu smon pa gtang ba'o/ /byang chub ni 'bras bu ste thob par bya ba'o//nyams pa ni rgyu spang ba'i phyir ro/ /'on kyang yongs su 'dzin pa la brten nas/ sor chud par 'gyur ba ni gang zhes gsungs pa yin no/ /thams cad mkhyen pa'i sems rab tu thob pa ni/ mos pas spyod pa'i las so/ /chos thams cad kyi pha rol tu son pa ni pha rol tu phyin pa bcu sa bcu la 'das nas so//chos kyi dbyings ni chos thams cad kyi stong pa nyid do/ /phyin pa ni mngon du mdzad pa ste mngon par sangs rgyas pa'o/ /de nyid mdor bsdus pa ni/ de bas na zhes gtan tshigs su bstan pas don bsdus pa yin no/ /de ltar bla na yod pa'i dge ba'i bshes gnyen bsten pa phan yon dang bcas pa bstan pa'o//bla na med pa'i dge ba'i bshes gnyen bsten pa'i tshul bstan pa ni/ bla na med pa zhes gsungs te/ 'dir yongs su 'dzin pa'i khyad par gnyis smos pa ci'i phyir zhe na/ gong du sems bskyed pa'i yul gnyis bstan pa'i phyir te/ yul yod pa las blang ba ni bsgrub pa'i dge ba'i bshes gnyen gyis bya bar bstan to/ /yul med pa las blangs par bstan pa ni bla na med pa'i dge ba'i bshes gnyen gyis so/ /yod pa dang med pa nyid ji lta bu zhe na/ gal te don chen po nyams par 'gyur ba nges pa las ni rgyang grags kyi mthar yang med pa nyid do//ma nges pa las ni dpag tshad brgya'i pha rol tu yang yod pa nyid do/ /phun sum tshogs pa zhes bya ba ci dngos po'i stobs kyis sam 'on te bsam pa'i dbang gis 'dod ce na/ dngos po'i stobs kyis te/ theg pa chen po ni dngos po'i dbang gis gzhag par 'dod kyi bsam pa'i dbang gis ni ma yin no//de ci ltar shes she na/ lung brgyud pa las te/ gal te bsam pa'i dbang gis 'grub na gang la 'du shes nye bar bzhag pa dang ma bzhag pa las yon tan dang nye ba dngos po'i dbang gis ji ltar gzhag /'du shes gtso cher byed pa po yin pa la ni dngos po'i stobs kyis 'jigs par mi rigs te/dper na nang yongs su smin pa las phyi ma smin pa'i dbang gis log par sgrub pa las 'bras bu ma rung bar bshad pa'i phyir la/ de bzhin mthong ba la sogs pa'i gzhi ni theg pa chen po la med do/ /dngos po la nyes pa dang ldan pas na der ma nyes kyang bar chad ji lta ba bzhin du byed par 'gyur ro zhes theg pa bsdus pa las 'byung ba'i phyir ro//yang byang chub sems dpa'i sdom pa ni dngos po'i dbang kho na las rig par bya'o/ /nyan thos kyi ni bsam pa'i dbang gis so zhes bsdu ba las gsungs so/ /yang / byang chub sems dpa'i dge ba'i bshes gnyen ni//phun sum tshogs pa min la der 'du shes/ /yid la med par 'du shes gang gis na/ /dngos po'i dbang gis tha ma nyid der bshad/ /ces lung bsdus pa las gsungs so/ /ha cang spros pas da ni dkyus ma nyid la 'jug par bya'o/ /bla na med pa zhes bya ba ni yon tan mthar thug pa'i phyir ro/ / dge ba'i don dam las dge ba mya ngan las 'das pa'o/ /de'i rgyu ston pas na bshes gnyen no/ /de gang zhe na/ de bzhin gshegs pa zhes bya ba'o/ /bzhugs pa ni sku mngon sum pa'o/ /yongs su mya ngan las 'das pa ni rten mngon sum pa'o/ /mchod pa ni zang zing dang sgrub pa'o/ /rim gro ni sku mngon sum du gyur pa la stan 'ding ba la sogs pa'o//bla na yod pa dang med pa zhes bya ba ci dngos po'i dbang gis sam/ bsam pa'i dbang las gzhag ce na/ dngos po'i dbang gis te/ de bzhin gshegs pa ni mi'i gtso bo zhes bshad cing / gzhan rnams ni de'i rjes su bslab pa gsungs pa'i phyir la/bsam pa'i dbang gis na thams cad kyang bla na med pa nyid de/ ji skad du bla ma la yang dag par rdzogs pa'i sangs rgyas kyi sku dang zhes bya ba la sogs pa gsungs pa'i phyir ro/ /med pa la yod pa nyid du lta ba ni log pa'i 'du shes ma yin nam zhe na ma yin te/ sku dang / gsung dang / thugs kyi mdzad pa tha mi dad pa'i phyir te/ yang dag par rdzogs pa'i sangs rgyas kyi sku yis 'dul ba rnams la skal ba mnyam pa'i gzugs su ston pas mtshan dang dpe byad ma nges pa'i phyir dang / gsung gis 'dul ba rnams la chos 'chad pa'i bya ba snang ba'i phyir dang / thugs kyi phrin las bsam pa'i dbang gis rjes su ston pa rnams yin la/ so so'i skye bo'i yongs su 'dzin pa yang de dang tha dad pa gang zhig yin/ de'i phyir bya ba la ltos te tha mi dad pa nyid de/ sems can dang sangs rgyas dag ni khams tha mi dad pa'i phyir ro/ /spros pas chog nas/ da ni bla na med pa'i dge ba'i bshes gnyen bsten pa'i phan yon bstan pa'i phyir/bsod nams kyi tshogs dpag tu med pa yongs su rdzogs shing zhes bya ba la sogs pa gsungs te/ tshogs ni 'bras bu la 'jug pa'o/ /dpag tu med pa zhes bya ba ni bsam pas mi dpogs pa'o/ /mi zad pa ni yul khyad par can la brten pa'i phyir ro//dngos kyi stobs kyis so/ /de la yul gyi dbang du byas nas mchod pa'i phan yon bstan pa ni/ gang gis de bzhin gshegs pa mthong ste zhes bya ba la sogs pa'o/ /de la rab tu rgyas pa'i dbang du byas nas ring bsrel yungs 'bru tsam zhes smos so/ /bsam pa'i dbang gi phan yon ni//snying rje chen po'i mdo las kyang / /zhes bya ba la sogs pa gsungs pa'o/ /rten gyi dbang gi phan yon ni/ gal te tha na dbang gi zhes bya ba la sogs pa gsungs pa'o/ /ngo bo nyid kyi dbang gi phan yon ni kun dga' bo zhes bya ba la sogs pa'o/ /de ltar phan yon spyi'i tshul du mdor bshad pa ni/klu'i rgyal po zhes bya ba la sogs pa gsungs so/ /'bras bu'i khyad par 'grub pa'i phan yon bstan pa ni/ sangs rgyas dang phrad par 'grub po zhes bya ba la sogs pa gang gsungs pa'o/ /yul gyi khyad par gyi phan yon bstan pa ni/ byang chub sems dpa'i sde snod las kyang zhes bya ba la sogs pa gsungs te/yul ni rten gyi ngo bo nyid de'i phyir dang po rten mchod pa'i dbang du byas nas/ mchod rten gyi byi dor byed pa zhes bya ba la sogs pa gsungs pa'o/ /rten byed pa'i dbang du byas nas sa'am rdo thal lam zhes bya ba la sogs pa gsungs so//gang zag gi khyad par las dman pa'i dbang du byas pa ni/ gal te mtshams med pa lnga byas su zin kyang zhes bya ba la sogs pa gsungs pa'o/ /gang zag mchog gi dbang du byas pa ni/ byang chub sems dang ldan pa zhes bya ba la sogs pa ste/ rten dman pa'i dbang du byas nas/khyim pa zhes khyad par gyi gzhir bzhag pas rten mchog tu gyur pas na/ dman pa dang khyad par gyi phan yon yang rig par bya'o/ /la la na re mi dge ba bcu byed pa zhes smos pa ni rten dman pa'i dbang du byas pa yin la/ khyim pa zhes bya ba ni gzhi gcig tu gzhag pas na/gong ma khyad par du 'phags par bstan pa'i thabs yin pas rten dman pa dang khyad par ni de yin no zhes zer ro/ /de ltar na mtshams med pa yang rten dman par ji ltar mi gzhag des na 'di mi rigs zhes kyang kha cig zer ro/ /da ni spro ba'i khyad par de brtson 'grus kyi dbang du byas pa'i phan yon bstan pa ni/sbyin gnas mchog la mchod pa dang / /zhes bya ba la sogs pa gang gsungs so/ /mchod pa'i ngo bo nyid kyi khyad par gyi phan yon bstan pa ni/ blo gros rgya mtsho zhes gsungs te/ kun rdzob tu bsod nams kyi sgrub pa bstan pas rdzas kyi ngo bo nyid las khyad par 'phags pa ni/gang byang chub tu sems bskyed pa dang zhes bya ba la sogs pa'o/ /don dam par ye shes kyi sgrub pa bstan pas rdzas dang kun rdzob pa las khyad par du gyur pa bstan pa ni/ sangs rgyas su 'du shes pa la sangs rgyas mthong ba yang med na zhes bya ba la sogs pa gang gsungs pa'o//de la sangs rgyas su 'du shes pa zhes bya ba ni dngos por lta ba can gyi phyin ci log gi 'du shes gzung ba dang 'dzin par blta ba'o/ /mthong ba yang med pa ni gzugs la sogs par zhen pa'i phyir/ log par zhugs pas bsgribs pa'i phyir/ /gang zhig nga la gzugs su mthong //de bzhin nga la sgrar shes pa/ /log par spong bar zhugs pa na/ /skye bo des ni nga mi mthong / /zhes gsungs pa lta bu'o/ /ci smos zhes pa ni des mnyes par mi 'gyur ro zhes bya ba'i tha tshig go/ /'o na ci lta bu zhe na 'du shes kyi mtshan ma mi skyed pa zhes gsungs te/chos kyi skus dmigs pa'o/ /ci ltar dmigs she na/ rgyu dang 'bras bu dang / rang gi ngo bo nyid rnams la/ rang dang gzhan dang gnyi ga dang / rgyu med pa la skye ba mi 'thad pa dang / yod pa dang med pa gnyi ga mi skye ba dang / gcig dang du ma'i ngo bo nyid dang bral ba'i mtshan nyid dran pa med pa dang /yid la byed pa med par sgom pa ni chos kyi skur dmigs pa ste dmigs pa med pa zhes bya ba'i tha tshig go/ /de'i phyir dran pa med cing yid la byed pa med pa ni sangs rgyas rjes su dran pa bla na med pa zhes bshad do/ /mnyam par gzhag pa'i gnas skabs su 'bad pa dang rtsol ba med par rang gi chos nyid la 'jug pa na/sems dang sems las byung ba yid la mi byed pa ste/ gzugs kyi sku'i ngo bo sangs rgyas nyid kyang mi dmigs na des mtshan dang dpe byad kyi khyad par ga la zhig dmigs pa dang / ngo bo dang rgyu dang 'bras bu ma skyes pas skye ba med pa nyid spros la mtha' dag zad pa ni yang dag par rdzogs pa'i sangs rgyas zhes bya ste/skye med chos ni rtag tu de bzhin gshegs/ /chos rnams thams cad de bzhin gshegs dang 'dra/ /byis pa blo can mtshan mar 'dzin pa ni/ /'jig rten dag na med pa'i chos la spyod/ /ces gsungs pas dngos por smra ba rnams ni med pa la yod par 'khrul pa sgro 'dogs par zad kyi rigs pas brtags shing dpyad na ci ltar yang bden pa ma yin no//'du shes med pa zhes bya ba ni sgro 'dogs pa dang bral ba'o/ /de lta bas na kho bo cag ni yod par sgro 'dogs pa'i 'khrul pa dang med par skur pa 'debs pa'i 'khrul pa ste/ de dag bsal ba'i phyir bshad pa yin no//dkon mchog za ma tog gi mdo las/ bdag cag sangs rgyas lta ba dang / chos mnyan pa dang / dge 'dun bsnyen bkur ba don du mi gnyer te zhes gsungs pa yang chos nyid don dam par 'bad pa dang rtsol ba dang bral ba'i ngo bo nyid la dgongs pas na 'du shes med pa 'di ni mchod pa'o zhes gsungs so//don dam pa'i mchod pa zang zing dang kun rdzob las khyad par du 'phags par bstan pa nges pa'i don bsgrub pa ni/ shes rab kyi pha rol tu phyin pa las kyang zhes gsungs pa yin no/ /ring bsrel ni bsod nams chen po thob par byed pa'i rgyu yin na/ ci'i phyir gzhan las gus zhes rgol ba ni/de ci'i phyir zhe na zhes bya ba'o/ /la la ni stong pa nyid thams cad kyi mchog dang ldan pa bsgom pa ni nyid kyis de la gus par yang 'gyur la/ rnam grangs gzhan yang stong pa nyid goms pa med na dngos por blta bas grol bar yang mi 'gyur bar bstan pa ni de las 'byung bas na zhes bya ba'o//mdo kun las btus pa'i bshad pa lung gi tshad mas rab tu sbyar ba las/ sgrub pa rnyed par dka' ba'i gtam brjod pa ste brgyad pa'o/ /mdo kun las btus pa las brtson 'grus kyi pha rol tu phyin pa rdzogs so// //thos pa la brtson 'grus brtsams pa mi zad par bya ba'i phyir bsam pa'i shes rab kyis bsrung dgos pas na de brjod par bya ste/'dir rgyal ba byams pa'i zhal snga nas/ sbyin pa la sogs re re ni/ /de dag so sor bsdus pa yis/ /go cha'i sgrub pa gang yin te/ /drug tshan drug gis ji bzhin bshad/ /ces yongs su sbyar ba ltar 'dir yang bsam pa'i rang bzhin go cha sum cu rtsa drug tu brjod par bya ste/lung las kyang sbyin pa nas shes rab kyi bar du gsal bar gsungs pa'i phyir/ de'i phyir bsam pa'i rang bzhin go cha'i tshogs kyi sa nas 'jug pa brgyud pa sbyor ba'i lam las bsgom par bya ba yin te/ de'i gang zag gi mtshan nyid ni/gang dag ces gsungs pa yin te/ thar pa'i cha dang mthun pa'i dge ba'i rtsa ba dang ldan pa'i gang zag gang dag ces bya ba'o/ /yongs su mya ngan las 'das pa ni mi gnas pa'i mtshan nyid dang ldan pa'o/ /yang dag pa ji lta ba bzhin ni de'i mtshan nyid phyin ci ma log pa 'og nas 'chad pa lta bu'o//dman pa la mos pa 'ga' zhig de bzhin gshegs pa'i mya ngan las 'das pa'i rang bzhin mi shes pas 'dus byas kyis thob pa dang bral ba 'dus ma byas pa'i rjes yin no zhes zer la/ la la na re nam mkha'i sprin dengs pa lta bur gyur to zhes dngos por lta bas bcings par ji lta bar mi shes pas rgol ba ni/ci 'dra zhe na zhes bya ba'o/ /lan ni dbyings dang ye shes gnyis su med pa'i ngo bo nyid la dus rtag tu bzhugs pas 'dul ba'i ngo bor mya ngan las 'da' bar snang yang / chos nyid la de med pa'i ngo bo nyid de dngos por lta ba rnams skrag pa'i gnas su 'gyur ba yang slob dpon nyid kyis kyang /nges par legs pa'i chos dag ni/ /phra zhing zab par snang ba yang / /byis pa thos dang mi ldan rnams/ /skrag par byed par rgyal bas gsungs/ /zhes chos rnams kyi ngo bo nyid spros pa thams cad dang bral ba/ rtog ge pa rnams kyis shes par bya ba ma yin pa bsam gyis mi khyab pa'i dbyings de lta bu ni mya ngan las 'das pa yin/de thob pa gang la yod pa de ni de bzhin gshegs pa zhes bya'o/ /de yang cis shes she na/ rang gi rtog ge ma yin pas mdo sde las shes zhes bya ba'o/ /mdo nyid nges pa'i don du bstan pas/ du ma zhes smos so//de dag gis mya ngan las 'das pa'i rang bzhin bstan pa'i phyir/ kye rgyal ba'i sras zhes gsungs te/ dang po rang bzhin gyi sgo nas bstan pa ni/ rang bzhin gyi ngo bo nyid la blo yongs su btang ste zhes gsungs te/ rang bzhin gyi ni chos kyi dbyings so/ /ngo bo nyid ni de'i rang bzhin bstan te de bzhin nyid ces bya ba'o//blo yongs su btang ba ni shes rab kyis rnam par dpyad nas so/ /ci ltar dpyad ce na/ yod par lta ba ni dngos po'i mtha' yin la/ med par lta ba ni chad pa'i mtha' yin pas/ dngos po dang chad pa'i mtha' dang bral ba dbu ma'i lam la shes rab kyis yongs su zin pa'o/ / 'dzin pa ni nges par 'byed pa'o/ /de la yod par lta ba ni phyi dang nang gis mu stegs pa 'ga' zhig rtag pa dang / kha cig mi rtag pa la sogs par lta ba dang / rdul phra rab rdzas kyi ngo bo nyid du lta ba ste/ bye brag tu smra ba dang / btsun pa dge 'dun srung dang / mdo sde pa dag na re/ rdul phra rab sbyar ba dang bskor ba dang bar mtshams med par 'dod pa dag go//chad par lta ba ni yang dag pa'i dngos po gzung ba dang / 'dzin pa dang bral ba gnyis su med pa'i shes pa rang bzhin gcig pa'i ngo bo yang med par lta ba dag ste/ 'di gnyis ni dngos po dang chad par lta ba'i mtha' ste mtha' de gnyis dang bral ba ni dbu ma'i lam yang dag pa'i don gyi de kho na nyid chos kyi dbyings zhes bya'o//de nyid ma bcos shing rang bzhin gyis 'gyur ba med pas de bzhin nyid ces bya'o/ /dngos por lta ba ni yang dag pa ma yin pas/ dngos po dang bral ba ni phyin ci ma log pa'i don gyis yang dag pa'i mtha'o/ / spros pa rnams ni blo yis byas pa'i phyir tha dad pa yin pas blo'i yul du ma gyur pas dbyer med pa'i don gyis spros pa med pa ni chos kyi dbyings te/ yon tan bskyed pa'i phyir d+hA tu ste khams kyi don to/ /rgyu dang rkyen gyis 'dus ma byas shing rang bzhin gyis stong pas nam mkha'o/ /chos rnams kyi ngo bo nyid gzung ba dang 'dzin pa dang bral ba ni snga ma ltar byas pa ma yin pas rang bzhin dang ngo //spang bar bya ba dang gnyen po ni btags pas gzhag pas de kho na nyid du 'phags pa klu sgrub kyi zhal snga nas dang / 'phags pa byams pa'i zhal snga nas kyis/ 'di la bsal bya ci yang med/ /bsnan par bya ba cung zad med//yang dag nyid la yang dag lta/ /yang dag mthong na rnam par grol/ /zhes don dam pa la spang ba dang spong byed med pas 'dod chags dang bral ba'i mtha'o/ /snang ba rnams ni sems nyid las ma gtogs pa'i phyi rol gyi don med de de'i phyir na/ 'phags pa nyid kyis/'byung ba che la sogs bshad pa/ /rnam par shes su yang dag 'du/ /de shes pas ni 'bras 'gyur la/ /log par rnam brtags ma yin nam/ /zhes gsungs pa dang / 'phags pa byams pa'i zhal snga nas kyang / bdag dang chos su gter 'dod pas/ /sna tshogs dag ni gang byung ba//de ni rnam par shes par 'gyur/ /gyur pa de yang rnam gsum ste/ /rnam par smin dang ngar sems dang / /yul la rnam par rig pa'o/ /zhes rab tu byed pa sum cu pa las gsungs pa lta bu'i don gyi rmi lam gyi mtha'o/ /chos nyid la rang dang spyi'i mtshan nyid mi 'thad de yongs su grub pa ni gzung 'dzin dang bral bas mtshan nyid med pa'o//yang dag pa ma yin pa'i kun du rtog pa las byung ba khams gsum gyi sems dang sems las byung ba'i mtshan nyid gzhan gyi dbang du gyur pa ni chags pa ste dngos por zhen ces bya ba'i don te/ de nyid phyin ci ma log pa'i ye shes kyi ma skyes par khong du chud pas chags pa med pa'i mtha'o/ /phung po dang de las gzhan par yod par mi 'thad pas/ gang zag tu lta ba rnams ni med pa'i don gyis bdag gi rang bzhin gyi mtha'o/ /gzung ba dang 'dzin pa'i ngo bo nyid chos su lta ba rnams ni gzugs la sogs pa gcig dang du ma'i rang bzhin dang bral bas na/chos thams cad kyi rang bzhin te ngo bo nyid med pas na mtha' ste stong pa nyid do/ /ci lta ba bzhin zhes pa ni de dag thams cad rang bzhin gyis stong gi yod pas bshigs pa lta bu ma yin pas so/ /dam bca' ba tsam ni ldog pa ma yin te/ gnod pa byed pa'i tshad ma gzhan yod do/ /de gang zhe na/ dngos po dang / dngos po med pa dag ni phan tshun 'gal bar smra ba ma yin nam/ 'di las lhag pa gang gis dngos po mi brdzun la/ de med pa ni yang dag pa yin/ tshad ma thams cad kyi nang nas mngon sum gyi tshad ma ni gtso bo yin la/ mngon sum gyi tshad ma yang dbang po nyid gtso bo yin pas thams cad la gsal bar snang ba go ci ltar bzlog ces/de ci'i phyir zhe na zhes rgol ba la/ lan ni de lta ma yin te/ dngos por lta ba ni rigs pas brtags kyang brdzun pa yin la/ chos rnams kyi dngos po med pa ni bden pa nyid de/ de ci'i phyir zhe na/ rigs pas grub cing des gnod pa med pa'i phyir ro/ /dngos por lta ba ci ltar rigs pas brtag ce na/ thog ma nas ma skyes shing ma byung ba'i phyir te/ zhes gsungs te/ thog ma zhes bya ba ni dang po nyid nas so/ /dang po zhes bya ba ni byis pa yod pa'i dngos po bshig pa ma yin te/de ni skur ba yin te sngar bshad pa bzhin no/ /lung las kyang / de bzhin gshegs pa rnams 'jig rten du byung yang rung / ma byung yang rung ste/ chos rnams kyi chos nyid ni rtag tu gnas pa'o zhes gsungs so/ /ma skyes pa ni skye ba med pas brjod du med pa'i ngo bo nyid de/'phags pa klu sgrub nyid kyis kyang dbu ma shes rab las/ rang las ma yin gzhan las min/ /gnyis las ma yin rgyu med min/ /dngos po gang dag gang na yang / /skye ba nam yang yod ma yin/ /zhes bya ba la sogs pa gsungs la/ yang / rten cing 'brel par gang 'byung ba//rang bzhin gyis ni de ma skyes/ /rang bzhin gyis ni ma skyes gang / /de la skye zhes ci skad brjod/ /shin tu phra ba'i dngos rnams la/ gang gi skye ba rnams brtags la/ /rnam par mi mkhas de yis ni/ /rkyen las byung ba'i don ma mthong / /zhes gsungs pa dang / yang 'phags pa byams pa dang 'phags pa thogs med kyi zhal snga nas kyang / sgro 'dogs pa'i legs par ma zin pa dam pa'i chos 'dul ba las nyams pa gang zhe na/ gal te chos gang dag dang / dngos po gang la yang ji ltar brjod pa 'jug pa ltar chos de dag dang dngos po de'i bdag nyid du 'gyur na ni de ltar na chos gcig pu dang /dngos po gcig pu'i ngo bo nyid rnam pa sna tshogs mang bar thal bar 'gyur ro/ /de ci'i phyir zhe na/ 'di ltar chos gcig pu dang dngos po gcig pu la mang por dgag gi rnam pa sna tshogs mang por brjod cing btags te 'dogs la/btags pa'i tshig rnam pa sna tshogs mang po dag las brtags pa'i tshig gang rung gcig cig chos de dang dngos po de la de'i bdag nyid dang / de'i rang bzhin gyi ngo bo nyid du gyur la/ brtags pa'i tshig gzhan dag ni ma yin no zhes bya ba'i nges pa ci yang mi dmigs te/ de'i phyir btags pa'i tshig thams cad ni ma lus pa'am gcig kyang rung ste/ chos thams cad dang dngos po thams cad kyi de'i bdag nyid du 'gyur ba'ang med la/ de'i rang bzhin gyis ngo bo nyid du 'gyur ba yang med do/ /gzhan gal te gzugs la sogs pa'i chos rnams 'dogs pa'i tshig gi ngo bo nyid med pa yin no zhe na/de ltar na dang po sngar byung ba phyis dga' mgur 'dogs pa'i tshig nye bar 'dogs na ni 'dogs pa'i tshig gis nye bar 'dogs pa'i snga rol des nye bar ma btags pa'i tshe/ chos de dang dngos po de ngo bo nyid med par 'gyur ro/ /ngo bo nyid med na yang dngos po med pa la ni 'dogs pa'i tshig gis nye bar ji ltar gdags/'dogs pa'i tshig gis nye bar 'dogs pa de mang na yang / chos dang dngos por 'dogs pa'i tshig gi ngo bo nyid yod par mi rung ngo / /gal te 'dogs pa'i tshig gis nye bar 'dogs pa'i snga rol nas gzugs de gzugs kyi bdag nyid yin te/phyis kyang de la gdags pa'i tshig gis bsdus pa'i dus su gzugs su nye bar 'dogs par byed na yang / de ltar na ni gzugs zhes 'dogs pa'i tshig nye bar 'dogs pa de med bzhin du yang / gzugs zhes bya bar 'gyur ba'i chos dang der 'gyur ba'i dngos po la/de'i blo 'jug par 'gyur bar rigs na/ de mi 'jug pas na rigs pa dang gtan tshigs 'dis chos gzugs nas mya ngan las 'das pa'i bar du brjod pa'i ngo bo nyid du rig par bya'o zhes gsungs pa skye ba med cing brjod du med pa nyid du rig par bya'o/ /ma byung ba yang zhes bya ba ni 'bras bu la btags pa ste/rgyu skye ba med pa la 'bras bu yang sngar bstan pa ltar 'byung ba med pa'i phyir ro/ /la la na re ma skyes pa dang ma byung ba ni ngo bo gcig la tha snyad gnyis su btags pa'o zhes zer ro/ /la la na re ma skyes pa ni da ltar ro/ /ma byung ba ni 'das pa'o/ /'bral ba med pa ni ma 'ongs pa na yang skye ba med pa'o zhes kyang zer ro//gzhan dag ni spang bya'i nyon mongs pa la sogs pa ni skye ba med la/ de'i gnyen po ni ma byung ba ste ci'i phyir zhe na/ gnyen po ni spang bar bya ba la sogs pa'i phyir ro/ /da ltar spang bya dang spong byed med na gang gis gang zhig ci ltar spong ste/des na spangs pa'i 'bral ba yang med do zhes zer ro/ /de ltar rgyu dang 'bras bu ma skyes shing ma byung ba de la/ gnyen pos byar med pas na spang bar bya ba'i 'bral ba yang med do/ /'o na yod pa sun phyung na med par 'gyur ro zhe na ma yin te/ kho bo cag dbu ma pa ni med par yang khas mi len te/med pa ni skur pa yin pas sngar bshad pa bzhin no/ /gtan tshigs gzhan yang yod de/ 'phags pa klu sgrub kyi zhal snga nas kyang / gang la med pa 'dod pa la/ /byang chub brten phyir sems med cing / /khas len med cing spyod pa med/ /de la ci ltar med pas shes/ /zhes gsungs pa dang /yang / rnam par dben don mi shes shing / /thos pa tsam la 'jug byed pa/ /mi gang bsod nams mi byed pa'i/ /skyes bu tha shal de dag brlag /ces gsungs pa dang / yang lung las/ stong nyid don ni mi shes shing / /stong pa nyid du khas 'che la/ /chad par lta bar gyur pa ni//stong min stong par lta zhes la/ /'phags pa byams pa dang 'phags pa thogs med kyis kyang / sngar bstan pa'i rjes thogs nyid du skur pa 'debs pa'i legs par ma zin pa dam pa'i chos 'dul ba las nyams pa gang zhe na/ gzugs la sogs pa'i chos rnams kyi dngos po tsam la skur pa 'debs pa ni de kho na yang med la 'dogs pa yang med de/de gnyi ga yang mi rigs so/ /'di lta ste/ dper na gzugs la sogs pa'i phung po rnams yod na gang zag tu gdags su rung gi / med du zin na dngos po med pa la gang zag gdags su med do/ / de bzhin du gzugs la sogs pa'i chos rnams kyi dngos po tsam yod na/ gzugs la sogs pa'i chos rnams 'dogs pa'i tshig nye bar gdags su rung gi /med na dngos po med pa la gdags pa'i tshig nye bar 'dogs pa med do/ /de la 'dogs pa'i gzhi med du zin na ni gzhi med par 'gyur bas/'dogs pa yang med par 'gyur ro/ /de lta bas na gang zag kha cig shes par dka' ba'i mdo sde theg pa chen po dang ldan pa/ zab mo stong pa nyid dang ldan pa/ dgongs pa'i don bstan pa dag thos nas/ bshad pa'i don yang dag pa ji lta ba bzhin du ma shes nas tshul bzhin ma yin par rnam par brtags te rigs pa ma yin pas bskyed pa'i rtog pa tsam gyis 'di thams cad ni brtags pa tsam du zad de 'di ni de kho na yin no//su 'di ltar blta ba de ni yang dag par blta ba yin no zhes de ltar lta zhing de skad smra'o/ /de dag gi ltar na 'dogs pa'i gzhi'i dngos po tsam yang med pas 'dogs pa nyid kyang thams cad kyi thams cad du med par 'gyur na/brtags pa tsam gyis de kho na lta yod par ga la 'gyur/ de bas na de dag gis ni de kho na nyid dang / brtags pa dang / de gnyis ka la skur pa btab par 'gyur te/ de'i phyir med par lta ba'i gtso bo yin par rig par bya'o//de ltar med pa de ni tshangs pa mtshungs par spyod pa la mdzangs pa rnams kyis smos pa'i 'os ma yin zhing 'grogs par mi bya ba ste/ des rang gang lta ba 'dzin yang phung bar byed pa'i phyir ro/ /'di la dgongs nas bcom ldan 'das kyis kyang 'di na la la gang zag tu lta ba ni bla'i/la la stong pa nyid la log par zin pa ni gsor mi rung ngo zhes gsungs te/ ci'i phyir zhe na/ gang zag tu lta ba ni shes bya la rmongs su zin kyang shes bya la skur pa mi 'debs pas na ngan song du yang skye bar mi 'gyur la/ gzhan dag kyang mi slu zhing chos dang bden pa la 'god par byed do//bslab pa'i gzhi yang nyams su len par 'gyur la/ stong pa nyid la log par zin pas ni de las bzlog par 'gyur ro/ /ci ltar log par zin ce na/ gang la gang gis stong pa de la yang mi 'dod la/ gang gis gang stong pa de yang mi 'dod pa 'di lta bu ni log par zin pa zhes bya ste/ci'i phyir zhe na gang gis stong pa med pa dang / gang stong ste yod pa'i stong pa nyid ni rigs pa'i phyir ro/ /thams cad med na ni gang du ci zhig gang gis stong par 'gyur te/ des de nyid stong pa nyid du 'gyur du mi rung ngo / /de'i phyir de lta bu ni stong pa nyid la log par zin pa yin no zhes gsungs so//'o na chos rnams kyi ngo bo nyid gang yin zhe na/ brjod du med pa nyid de/ brjod pa ni mtha' yin pa'i phyir ro/ /de'i phyir 'phags pa 'jam dpal gyis lits+tsha bI dri ma med par grags pa la [(]sobs [,]spobs [)]pa dris nas/ de ci'i phyir zhe na zhes rgol ba la/lan ni cang mi smra bar gyur pa dang / 'phags pa 'jam dpal gyis rjes su bstod pa lta bu dang / 'phags pa byams pa dang 'phags pa thogs med kyis kyang / yang dag ma yin kun rtog yod/ /de la gnyis po yod ma yin/ /stong pa nyid ni 'di la yod/ / de la yang ni de yod do/ /stong pa ma yin mi stong min/ /de lta bas na thams cad bshad/ /yod pa med pas yod pas na/ /de ni dbu ma'i lam yin no/ /zhes gsungs pas/ yang dag pa ma yin pa'i kun du rtog pa yod pa dang gzung ba dang 'dzin pa med pa dang / gzung ba dang 'dzin pa dang bral ba dang /rang rig pa yod pas na/ kho bo cag dbu ma pa ni mtha' gnyis dang bral ba'i lam la legs par 'jug pas log par zin pa'i gang zag phyi dang nang gi mu stegs byed kyi rtog ge ba ngan pa'i gzhung lta zhig ga la 'dzin/ de'i phyir tshu rol mthong ba'i mngon sum la sogs pa ni snang ba'i don la yang 'khrul par 'gyur na/shin tu lkog tu gyur pa'i don las kyang rmongs par 'gyur/ de'i phyir 'phags pa klu sgrub dang thogs med kyi lung gi rjes su 'brangs pas lung nyid tshad ma yin te/ sngar bshad pa lta bu'o/ /ci'i phyir zhe na/ 'phags pa klu sgrub ni sa dang po la gnas pa yin la 'phags pa thogs med ni sa gsum pa la gnas pa yin pas grub pa'i mtha' yang mtshungs pa nyid de/ci ltar kho bos bsgrub pa bzhin no/ /kho bo cag shes bya nang gi yin par 'dod pa la sun 'byin pa'i gang zag zhe sdang bas smra ba rnams kyis log par zin pa'i rnam grangs mang du yod mod kyi/'dir ha cang spros pas chog nas da ni dkyus la 'jug par bya ste/ gal te mya ngan las 'das pa'i rang bzhin de lta bu rtogs par bya na/ 'o na byang chub sems dpa' rnams yang dag pa'i mthar ltung bar 'gyur ro zhe na ma yin te/ mya ngan las 'das pa'i rang bzhin de dag gi phyogs 'ga' zhig rtogs par zad kyi mtha' dag pa ni sa bcu'i dbang phyug gis rtogs par 'gyur bas/shin tu mthar thug pa mi brjod mi ston te zhes bya ba'o/ /brjod na ni der 'gyur ro zhes bya ba'i tha tshig go/ /phyogs 'ga' zhig ma rtogs na ni dngos por lta bar 'gyur la/thams cad du rtogs na ni yang dag pa'i mtha' mngon du byas par 'gyur bas/ de ci'i phyir zhe na zhes rgol ba la/ lan ni 'og nas bshad pa ltar thabs dang shes rab zung du 'brel par sgom pa'i dbang gis srid pa dang zhi ba'i mtha' bsrings pa yin no zhes bstan pa ni de dag gis ni zhes bya ba'o//phyogs 'ga' zhig ces bya ba ni mos pas spyod pa'i sa la mos pas yul du byed pa na khong du chud par 'dod pa ste 'dun pa'o/ /mos pas spyod pa'i sa chen po la bden pa rtogs pa dang / rjes su mthun pa'i chos mos pas yul du byed pa rang bzhin gyis ngo bo nyid la blo yongs su gtang ba'o//sa dang po la chos kyi dbyings kun du 'gro ba'i de bzhin nyid rtogs pa na sangs rgyas kyi sa la chos thams cad rnam pa thams cad du mngon par rdzogs par sangs rgyas pas na/ chos thams cad kyi rang bzhin gcig pa dang /du ma dang bral ba'i ngo bo nyid rtogs pa'i bar du yon tan thams cad gyen du ldan pa yin par sbyar bar bya ste/ kho bos ni gzhung mangs pa'i dogs pas sbyar ba ma byas so/ /de la mngon du bya ba ni gzugs kyi sku'i rnam pa gnyis te/ ji skad du sa dang po la sangs rgyas brgya'i zhal mthong zhing zhes bya ba la sogs pa gsungs so//skad cig gcig la zhes bya ba ni ting nge 'dzin gyi stobs kyis so/ /de dag kyang dngos por ma zhen par kun rdzob kyi sgo nas ye shes kyi skad cig gis rjes su 'brang bar bya zhes bya ba ste/ ye shes kyi yul ni kun rdzob yin pa'i phyir la/ting nge 'dzin gyi rdzu 'phrul gyi stobs kyis na skad cig kyang zhes bya'o/ /rjes su 'brel pa ni rjes su 'gro ba'o/ /skad cig de la yang zhes bya ba ni de'i skad cig ma gcig la yang ngo / /thams cad ces bya ba ni dus gsum pa rnams so/ /mngon par bsgrub pa ni/sems can yongs su smin par bya ba dang / zhing yongs su sbyang bar bya ba'o/ /'o na dngos por lta bar 'gyur zhe na/ gnyis kyi 'du shes kyang bskyed par mi bya zhes bya ba ste/ gnyis ni bdag gzhan no/ /'du shes ni rnam par rtog pa ste/ de bskyed par mi bya ba ni/byang chub sems dpa'i nyon mongs pa yin pa'i phyir ro/ /'o na 'dus ma byas pa 'ba' zhig bsgom pa 'am zhe na de ni ma yin te/ 'gog pa'i mtha' spang dgos pa'i mi gnyis pa'i 'du shes kyang ma yin zhes bya ste/ sgyu ma tsam du dmigs par bya dgos pa'i phyir ro/ /sgyu ma tsam zhes smos pas/gang zag dang chos su blta ba'i 'du shes spang bar bya ba ni/ sems can zhes bya ba la sogs pa'o/ /gnyis dang gnyis ma yin pa'i lta ba spangs na ci ltar 'bras bu thob ces de ci'i phyir zhe na zhes rtog pa la/ sngar bshad pa ltar mtha' gnyis ni spangs pa yin pas yod pa dang med par zhen pa'i lam rnams dang bral zhing bdag dang chos su lta ba'i 'du shes spang dgos pa ni lam gyi gegs yin pa'i phyir ro//de la zhen pa'i 'dod chags pa'o/ /de ltar mya ngan las 'das pa'i rang bzhin gyi sgo nas bstan nas da ni phrin las kyi sgo nas mya ngan las 'das pa'i rang bzhin bstan pa ni/kye rgyal ba'i sras zhes gsungs te/ phrin las ni rnam pa gnyis te/ mi rtog pa dang / dus thams cad pa'o/ /de dag bstan pa ni/ gzhan yang zhes bya ste/ 'byung ba'i phrin las ni de bzhin gshegs pa 'byung ba zhes gsungs te/chos kyi sku'i phrin las sprul pa'i ngo bo nyid bstan pas 'dul ba rnams la yang dag par rdzogs pa'i sangs rgyas 'pho ba dang lhums su 'jug pa la sogs pa snang ba ni 'byung ba'o/ /'jig pa'i phrin las ni sprul pa'i snang ba brtul bar byed pa ste/ rtag par 'dzin pa'i lta ba bzlog par mdzad pas/ku sha'i grong la sogs par rdo rje lta bu'i sku bshigs par mdzad pa/ yongs su smin par byed pa ni yongs su mya ngan las 'das pa zhes bya ba ste/ skyo ba bskyed pa ni rtag par lta ba can rnams so/ /'o na de bzhin gshegs pa ni 'dus byas pa'o snyam du sems na mi rtog pa'i phrin las yin pas skye ba 'ang med ces bya ba la sogs pa ste/dus rnams kun du de bzhin gshegs pa ni/ /dbyings dang ye shes gnyis med rang bzhin gyis/ /chos kyi sku ste de la de zhugs nas/ /mya ngan 'da' min gzhan las 'das pa min/ / zhes bya ba'o/ /de'i dpe gang zhe na/ 'di lta ste dper na zhes bya ba la sogs pa gsungs te/ de bzhin gshegs pa'i phrin las ni yul la khyab pas na/ sangs rgyas gcig gis kyang mdzad pa thams cad du mdzad pa mya ngan las 'da' ba'ang thams cad du ston pa ni nyi ma'i dkyil 'khor chos kyi dbyings dang mnyam pa zhes de gsungs pa yin no//mya ngan las 'da' bar snang ba yang thugs rje nyi tshe ba ma yin mod kyi/ 'on kyang gdul bya rnams kyi nyes pas yin na/ snod chag gam zhes bya ba la sogs pa'i dpes gsungs pa yin te/ de la tshogs ma bsags pa dang /dman par bsags pa dang / bsags pa thag bsrings pa gsum gyi dbang du mdzad nas chag pa dang logs shig phyung ba dang / stong par gyur pa zhig smos te/ snod chag pa lta bu ni rnam par smin pa'i sgrib pa dang ldan pa ste/ des thag bsrings pa'i phyir ro//logs shig tu phyung ba lta bu ni sems rnyog pa dang ldan pa ste/ des tshogs dman par bsags pa'i phyir ro/ /stong pa lta bu ni las dang nyon mongs pa'i sgrib pas khebs pa ste/ de'i dbang gis tshogs ma bsags pa'i phyir ro/ /de lta bu'i sgrib pa dang ldan pas na de de bzhin gshegs pa mi mthong bas//ci ltar chu yi snod chag na/ /zla ba'i gzugs brnyan mi snang ltar/ /de bzhin sems can ngan pa la/ /sangs rgyas sku ni mi snang ngo / /zhes gsungs pa lta bu'o/ /'o na de bzhin gshegs pa gcig gis phrin las mdzad pa zin na/ thams cad kyang ma yin nam/lung las kyang sangs rgyas thams cad ni mdzad pa gcig go zhes 'byung ngo snyam du sems na/ mdzad pa'i phrin las ni me'i dpe gsungs te/ me ni gcig tu 'bar ba dang / shi bas thams cad ma yin pa ltar de bzhin gshegs pa'i phrin las kyang gcig tu rdzogs pas thams cad du ma yin te/gdul bya shing lta bu yod pa dang med pa las phrin las me lta bu 'bar ba dang / mi 'bar bar shes par bya ba dang / ci ltar me ni gzhan du 'bar/ /gzhan du shi bar gyur pa ltar/ /sangs rgyas phrin las sems can la/ /snang dang mi snang shes par bya/ / zhes gsungs pa lta bu'o/ /'o na dang po sems bskyed pa'i tshe/ sems can thams cad gdon par dam bcas nas tha ma mya ngan las 'das kyang / sems can gyi khams 'bri ba'am gang ba mi mngon pas mdzad pa ci ltar mthar phyin ce na/ la la ni rigs pa dang ldan pa'i gang zag rnams la yin pas rigs med pa rnams ci ltar dag par 'gyur rigs zhes bya ba ni thog ma med pa'i dus can rgyu dang rkyen gyis 'dus ma byas pa/chos nyid kyis thob pa/ skye mched kyis khyad par yin pa'i phyir ro/ /de lta bas na rigs dang ldan pa rnams ni grol ba nyid pas nyes pa med do zhes bya ba dang /yang bsam pa la rnam par gzhag pa byed pa pos dngos po'i stobs kyis ma yin pas nyes pa med pa yin la/ 'o na brdzun du smra bar ji ltar mi 'gyur zhe na mi 'gyur te/ nang gi bsam pa'i dbang gis 'du shes bsgyur ba med pa'i phyir la/ rigs kyi khyad par gyis grol ba dang / ma grol ba srid pa'i phyir ro zhes zer la/gzhan dag la ni/ ma zhum pa yi lus kyis ni/ /tshor ba lhag par bzod byed cing / /mar me shi bar gyur pa bzhin/ /de yi sems ni rnam par grol/ /zhes gsungs pa'i mya ngan las 'das pa spangs nas/ sangs rgyas mya ngan yong mi 'da'/ / chos kyang nub par mi 'gyur te/ /sems can rnams la phan gdags phyir/ /thabs kyis mya ngan 'das pa ston/ /ces gsungs pa'i lung tshad mar byas nas/ bde gshegs snying po 'gro kun yongs la khyab/ /sems ni rgya che mchog tu rab bskyed de/ /'gro ba 'di dag thams cad sangs rgyas 'gyur//de'i phyir snod min sems can gang yang med/ /ces bya ba thams cad kyang de bzhin gshegs par 'gyur bas/ phrin las nyid kyi khyad par de dag 'dul ba'i thabs su ston pas/ gzhan yang yongs su mya ngan las 'da' bas gdul ba rnams la zhes gsungs pa yin no//thams cad de bzhin gshegs pa'i snying po can du sgrub pa ni/ bshad zin 'chad par 'gyur bas gzhan/ /zhes bya ba'i tshul gyis re zhig gzhag go/ /bri ba dang gang ba med pa ni sems can gyi khams mi zad pa'i phyir la/ mi zad pa'ang spyi'i dbang du byas pa'i phyir te/ so so'i dbang du byas nas grol ba'i phyir zad pa kho na'o//spyi ni so so ba 'dus pa ma yin la/ so sor grol ba nyid kyis spyi ci ltar mi grol/ gang zhig snon pa med la bri ba yod pa de ni zad pa'i chos can te/ dper na 'bru'i phung po lta bu'o zhe na ma yin te/ rigs su chad pa'i phyir dpe 'dra ba ma yin no//gang zhig pha mtha' yod pa de ni zad par rigs pa las sems can gyi khams ni nam mkha'i khams dang mnyam pas pha mtha' med pas zad par ci ltar rigs/ de ma grub bo zhe na/ lung dang 'gal ba'i phyir la/ nyes pa zad pa'i lung ni chos dang mthun par zlog par mi rigs so//drang ba'i don du yang bkri bar mi nus te/ snga ma ltar nges pa'i don gyi mtshan nyid dag dang ldan pa'i phyir ro zhes zer ro/ /yul khyab pa ci lta ba bzhin du dus la khyab pa de nyid kyi dpe gang zhe na/ sgyu ma'i mkhan po zhes gsungs te/ mkhas pa ni bzo'i khyad par legs pa'o//lobs pa ni rnam pa mtha' dag shes pa'o/ /shin tu byang ba ni mang du byas pas myur ba nyid do/ /sngags ni lha pho dang 'brel pa ste gsang ba'i phyir ro/ /rig pa ni lha mo dang 'brel ba ste/ rig ma yin pa'i phyir ro/ /dpe dang sbyar ba ni de bzhin du zhes bya ba la sogs pa ste/ye shes kyi rgyu tshad med pa ni/ bskal pa grangs med pa gsum du bsags pa'i tshogs so/ /la la na re bskal pa grangs med pa sum cu rtsa gsum gyis nges par 'byung ngo zhes zer ro/ /thabs ni thabs su gyur pa ste thabs nyid do/ /de gang zhe na/ bsod nams kyi tshogs te gsang sngags lta bu'o//shes rab ni don dam pa zhes pa'o/ /ye shes ni kun rdzob shes pa ste/ shes rab dang ye shes ni rig ma lta bu'o/ /mi 'jigs pa ni 'og nas 'byung ba ltar dus gsum la khyab pa'o/ /de ltar na mya ngan las 'das pa ni phrin las kyi sgo nas kyang rig par bya'o//de ltar na mya ngan las 'das pa rang bzhin dang phrin las kyi sgo nas rgyas par bshad nas/ de dag gi don bsdu ba ni kye rgyal ba'i sras de ltar zhes bya ba la sogs pa gsungs te/ rang bzhin gyi sgo nas bsdu ba ni/ tshad med pa'i rjes su song ba zhes bya ba la sogs pa'o/ /de la sngar bstan pa'i rang bzhin dang 'dod chags dang bral ba dang /rmi lam dang / mtshan nyid med pa dang / bdag dang chos thams cad kyi rang bzhin gyi mtha' rnams ni tshad med pa'i rjes su song ba zhes bya la/ lhag ma rnams ni grangs ji lta ba bzhin du sbyar bar bya'o/ /phrin las kyi sgo nas bsdu ba ni/dus bzhin rab tu ston pa zhes bya ba la sogs pa gsungs te/ 'byung ba dang 'jig pa'i phrin las yul la khyab pa nyid nyi ma'i dkyil 'khor ltar snang ba ni/ dus ci bzhin du rab tu ston pa'o/ /de nyid me ltar rgyu yod pa dang med pas 'bar ba dang / mi 'bar ba ni 'gro ba thams cad du rgyun mi chad pa ste/gdul bya'i sems can yod na phrin las rgyun mi 'chad pa yin no/ /dus la khyab pa'i phrin las sgyu ma bskal par gnas pa ltar phrin las bskal par gnas pa ltar byin gyis brlabs pas/ sngon gyi byin gyi rlabs kyis shin tu byin gyis brlabs pa ste/sngon gyis zhes bya ba ni bskal pa grangs med pa rnams so/ /byin gyis brlab pa ni byin gyis rlabs kyi mthu nyid do/ /'gro ba'i zhing ni gdul bya'i gnas so/ /chos kyi dbyings ni khams kyi don te/ sems can gyi rjes su zhugs pa zhes bya ba'i don to//de ltar mya ngan 'das pa'i rang bzhin bstan nas/ da ni mya ngan las 'das pa sgo sna tshogs nas 'jug par bstan pa ni/ rab 'byor zhes bya ba la sogs pa gsungs te/ chos kyi dag pa'i sgo nas 'jug pa ni rang bzhin gyis stong pa nyid do zhes bya ba ste/ rang bzhin gyis stong pa nyid de ni ngo bo nyid kyis dag pa'o//rtogs pa thob pa'i sgo nas 'jug pa ni/ chos thams cad mnyam pa nyid du rtogs pa zhes gsungs te/ mnyam pa nyid ni de bzhin nyid tha mi dad pa'i phyir ro/ /rtogs pa ni khong du chud pa'o/ /byed pa'i sgo nas 'jug pa ni/ rigs kyi bu zhes gsungs te/byed pa ni phrin las nyid do/ /spangs pa'i sgo nas 'jug pa ni las zad pa dang zhes bya ba la sogs pa ste/ las dang nyon mongs pa ni rgyu yin la/ sdug bsngal ni 'bras bur gyur pa'o/ /zhi ba ni mngon du rgyu spangs pa'o/ /bya ba ni bag la nyal bcom pa'o/ / rnam par zhi ba ni tshor ba rgyun chad pa ste/ de ni btang snyoms kyi ngo bo nyid yin pa'i phyir ro/ /de ltar dag pa dang phrin las kyi sgo nas 'jug pa mya ngan las 'das par bstan pa dang / 'og nas mtshan ma rab tu zhi ba la sogs pa mya ngan las 'das par bstan pa rnams/ rab tu rmongs pas gong 'og gi//'brel pa go bar bya phyir bstan/ /zhes bya ba'i tshul gyis mya ngan las 'das pa kun du bstan pa la 'jug pa ni mtha' yas so zhes gsungs te/ kun du bstan pa ni mdo sna tshogs su'o/ /'jug pa mtha' yas pa ni dag pa la sogs pa la 'jug pa'i phyir ro/ /de la mtshan ma ni gzung bar bya ste/gzugs la sogs pa'i mtshan ma la'o/ /g.yo ba ni khams gsum gyi sems dang sems las byung ba rnams te/ gzung ba dang 'dzin pa 'gag pas na bral ba ste/ de'i phyir rnam rtog zad pas na de'i tshe mya ngan las 'das zhes gsungs pa lta bu'o//'dus ma byas pa'i sgo nas 'jug pa ni rkyen gyis sgro btags pa med ces bya ba ste/ so sor brtags pa'i 'gog pa yin pa'i phyir ro/ /de las 'dus ma byas pa ni rgyu dang rkyen gyis ma byas pa ste/ sgro btags pa ni med pa la byas pa yin pa'i phyir te de med pa'o//'dus byas pa'i sgo nas 'jug pa ni 'dod chags zad pa dang zhes bya ba la sogs pa gsungs te/ lam gyi bden pas 'dus byas pa'i sgo nas nyon mongs pa spangs pa'i phyir ro/ /phrin las kyi sgo nas 'jug pa ni/ maud gal gyi bu zhes bya ba la sogs pa gsungs te/dus thams cad pa yin pa'i phyir/ de'i tshe de'i dus na zhes smos pa yin no/ /de la mthong ba'i lam ma skyes pas na byang chub kyi sems la ma zhugs pa'o/ /byang chub tu sems bskyed pa nas theg pa chen po la zhugs pa'o/ /rang bzos zhugs pas na dbang zos pa'o//des tha ma'i rnam par shes pa dang / bar ma dor log par shes pa skyes pas na ltung bar 'gyur ba'o/ /de dag skal ba mnyam par skye bar mdzad pas na sprul pa ste/ thabs sna tshogs la dgod pas na mi bde ba myong zhes bya'o/ /thugs rje chen po ni dus thams cad pa'i mdzad pa'o//phyir mi ldog pa ni sa brgyad pa la gzhag pa'o/ /de lta bu'i thams cad pa'i phrin las bstan pa ni/ drang ba'i don yin pas khongs su mi rung zhe na/ nges don du sgrub pa ni dge slong dag ces bya ba la sogs pa'o/ /de la gzugs la sogs pa 'dod pa'i yon tan lnga ni 'dod pa'i bde ba'o//tshangs par spyod pa'i phyogs gcig pa'i mya ngan las 'das pa yin pa'i phyir/ khyim nas 'byung ba'i bde ba'o/ /sngar bstan pa'i don rnams kyis na bsam gtan bzhi dang / mthar gyis gnas pa'i snyoms par 'jug pa bde ba'o//mthong ba'i lam thob pas na rdzogs pa'i byang chub kyi bde ba'o/ /de dag kyang mngon par ma zhen pas byung ba dang bya ba'i dpes bstan te/ dus thams cad pa ni yin pas de'i tshe zhes gsungs pa yin no/ /de ltar na mtshan ma rab tu zhi ba la sogs pa'i mdo 'di rnams kyis snga ma'i mdo rnams bshad pa yin te/mtshan ma rab tu zhi ba dang / g.yo ba dang zhi ba dang bral bas ni rtogs pa'i dag pa bshad par rig par bya'o/ /rkyen gyis sgro btags pa med pas ni chos nyid kyis bshad par rig par bya'o/ /'dod chags zad pa la sogs pas ni spangs pa'i sgo nas 'jug par bshad par rig par bya'o//ye shes shin tu rgyas pa'i mdo las byung ba rnams kyis ni byed pa'i sgo nas 'jug pa bshad par rig par bya ste/ de lta bas na bcom ldan 'das kyis mdo sde ni mdo sde gzhan gyis bshad par bya'o zhes gsungs pa yin no//de lta bas na 'di dag gis ni rang dang gzhan gyi don mthar phyin pa mya ngan las 'das par rig par bya'o zhes bshad nas/ da ni de dag gi don bsdu ba mdo gzhan gyis bstan pas/ lang kar gshegs pa las zhes gsungs te/ phrin las rgyun mi 'chad pas na bya ba la sogs pa mya ngan las mi 'da' ba ste dus thams cad dang yul la khyab pa'i phyir ro//sngar bstan pa'i rang bzhin de bzhin nyid la sogs pa rnams ni/ rang bzhin gyis chad pa med pa'i mtshan nyid mya ngan las mi 'da' ba'o/ /de bzhin gshegs pa'i mdzad pa rgyun chad pa mar me shi ba lta bur gyur pa ma yin pas dngos po chad pa ma yin dngos por mya ngan las mi 'da' ba'o//'o na ci lta bur zhe na rtog pa zad pa ste/ lung las/ byang chub sems dpa'i nyon mongs pa ni rnam par rtog pa'o zhes gsungs la/ rnam rtog thams cad zad pas na/ /de tshe nga yi mya ngan 'da'//zhes gsungs pas rnam par rtog pa zad pa'o/ /rnam par shes pa ni mtshan mar 'dzin pa ste/ mtshan mar 'dzin pa spangs pas na rnam par shes pa zad pa'o/ /de la rtogs pa ni spyir rtogs pa'o/ /rnam par shes pa ni bye brag tu rtog pas de'i khyad par ni de yin no//mdo kun las btus pa'i bshad pa lung gi tshad mas sbyar ba las mya ngan las 'das pa la mos pa rnyed par dka' ba'i gtam brjod pa ste dgu pa'o/ /mdo kun las btus pa las chos zab mo la bzod pa'i le'u ste dang po rdzogs so// // de ltar thob bya 'bras bu mya ngan las 'das pa'i rang bzhin gyi mtshan nyid gtan la phab nas/ da ni thob par byed pa'i lam gyi khyad par brjod par bya ste/ 'dir 'phags pa klu sgrub dang / 'phags pa thogs med kyis grub pa'i mtha' mi shes pa'i mngon pa'i nga rgyal can 'ga' zhig 'di skad ces/bcom ldan 'das kyis theg pa gsum du gsungs pa ni nges pa'i don yin te/ nyan thos rang rgyal bla med kyi/ /theg pa che dag ngas bshad do/ /zhes gsungs pa'i mdo tshad mar byas nas/ 'phags pa thogs med kyis ldem por dgongs te/ theg pa gsum du bshad pa yang nges pa'i don yin no zhes bcom ldan 'das kyis lung dang 'phags pa thogs med kyi dgongs pa'i don mi rtogs pa de lta bu'i gang zag 'byung bar dgongs nas/de dag la phan gdags shing nges pa'i don du gtan la dbab par mdzad pas/ theg pa gcig tu bstan pa'i phyir theg pa gcig la zhes smos te mos pa ni nges par 'dzin pa'o//shin tu rnyed par dka' ba ni tshogs bsags pa rung ba'i phyir/ de dag 'di skad ces sems can rnams ni rigs rnam pa lnga'i bdag nyid pas de'i 'bras bu theg pa yang gsum ste/ rigs gcig tu gsungs pa yang / de bzhin nyid ni thams cad la/ /khyad par med phyir dag gyur pas/ /de bzhin gshegs nyid de yi phyir/ /'gro kun de yi snying po can/ /zhes bya ba yin pas/ de'i phyir theg pa gcig tu gsungs pa yang / rigs ma nges pa dang /theg pa chen po pa'i rigs can la dgongs pa ste/ 'phags pa byams pas/ kha cig dag ni drang phyir dang / /gzhan dag nges par gzung ba'i phyir/ /rdzogs pa'i sangs rgyas rnams kyis ni/ /ma nges rnams la theg gcig bstan/ /zhes zer te/ de dag gis 'phags pa byams pa la sogs pa'i dgongs pa ma rtogs shing mi shes par rig par bya'o//ci'i phyir zhe na/ gal te de bzhin nyid thams cad la yod na bye brag med pa'i phyir/ gang zhig grol ba chen por mi 'gyur/ bye brag yod na de bzhin nyid du ci ltar 'gyur/ gal te rkyen gyi stobs kyis so zhe na/de ni 'dod pa kho na ste/ rigs lnga gsungs pa ni rkyen gyis byas pa'i phyir ro/ /de bzhin nyid ni 'dod pa ma yin te/ skye mched kyi khyad par ro zhe na ma yin te/ de bzhin nyid med na/ skye mched kyi khyad par gang las 'grub/ rgyu dang rkyen gyis 'dus ma byas pa zhes 'dod pa las kyang de bzhin du mngon no//'o na khyed cag kyang theg pa gsum du ji ltar mi 'dod/ /de'i phyir de bzhin nyid la dbye ba med na/ rigs gcig pa'i phyir de ci ltar rung / ma yin te de bzhin nyid gcig pa nyid las kyang sgrub pa'i khyad par gyis te/ brten pa chos kyi bye brag gis/ /rigs kyi dbye ba yongs su brjod//ces 'dod do/ /de ni mtshungs so zhe na/ gang du gnas skabs su'o zhe na de ni mi 'dod pa ma yin no/ /mthar thug par ro zhe na ci ltar mtshungs te sngar bstan pa'i rigs pa nyid kyis so/ /zab mo'i don la rigs pa ma yin te lung yod do zhe na/ rigs pas bstan par ma gyur pa'i//lung ni bkrir btub pa'i phyir nges par mi 'gyur la/ bzlog pa ni nges pa can yin pas chos kyi dbyings ni rigs kyi don yin pas dbyer med pa'i phyir/ thams cad kyang de bzhin gshegs pa'i snying po can yin pas/ de'i 'bras bu theg pa gcig pa nyid de/rtogs pa'i thabs rim can du theg pa sna tshogs su bstan cing / rigs de nyon mongs pa la sogs pas snang bar ma gyur pas/ re zhig rigs lngar gsungs pa yin te/ ci ltar rdo rje'i phye ma'i gser/ /mig lam snang bar ma gyur pa/ /sbyangs pas snang bar gyur pa bzhin/ /'jig rten bde bar gshegs pa brjod//ces gsungs pa'i phyir dang / 'phags pa klu sgrub kyis kyang / sbrum ma'i lto na 'dug pa'i bu/ /mig lam snang bar mi 'gyur ltar/ /nyon mongs thibs pos bkag pa yis/ /chos dbyings mig lam snang ma yin/ /zhes gsungs so/ /de bzhin du 'phags pa byams pas kyang /chos dbyings snang byed 'od 'byung zhing / /de bzhin nyid la tha dad med/ /rigs kyi don ni snang ba'i phyir/ /thams cad bde gshegs snying po can/ /zhes gsungs pas de bzhin gshegs pa'i snying po'i mdo ji lta ba bzhin du nyon mongs pas bkris su zin kyang /sad pa'i rkyen gyis 'dus byas na thams cad theg pa gcig tu zad do/ /de rtogs pa'i thabs su theg pa sna tshogs su bstan pa la 'gal ba med de/ skas kyi gdang bu bre ba'i tshul gyis ji skad du/ lha yi theg dang tshangs pa'i theg /de bzhin nyan thos rang rgyal dang //bla na med pa'i theg pa zhes/ /rnam pa du mar ngas bshad do/ /zhes gsungs la/ 'og nas kyang theg pa gsum du yang ma zad kyi zhes 'byung ba dang / de yang sngar bstan pa ltar 'og ma med na gong ma mi skye ba'i phyir bstan la/ de'i dgos pa gang zhig ce na/ dbang po rtul po drang ba'i thabs dgon pa chen por grong khyer sprul pa dang 'dra'o zhes bshad par bya'o//de'i phyir theg pa gcig tu sgrub pa'i 'thad pa gsungs pa ni/ theg pa gcig tu zad pa la/ /zhes dam bca' bar mdzad do/ /gtan tshigs gang zhe na/ rigs pa ci lta ba bzhin du lung gis gtan tshigs bkod pa ni/nga yang theg pa gcig las brtsams te zhes gsungs te theg pa gcig gang zhe na/ sangs rgyas kyi theg pa zhes gsungs so/ /rang sangs rgyas su thal bar 'gyur zhes dgongs nas thams cad mkhyen pa'i mthar thug pa zhes smos so/ /rigs pa nyid gang zhe na/ gnyis sam gsum zhes bya ba med do zhes gsungs te/ sngar bstan pa'i rigs pas mi 'thad pa'i phyir ro/ /de la gnyis zhes bya ba ni theg pa dman pa dang mchog tu gyur pa'o/ /gsum zhes bya ba ni theg pa gsum mo/ /ci ltar med ce na/ chos kyi dbyings la tha dad med pa'i phyir ro//'khor gyis log par rtog pa 'ga' zhig sngar bstan pa ltar rgol ba ni/ ci'i phyir zhe na zhes bya'o/ /lan ni rigs pa ltar lung gi rang bzhin tshad ma'i skyes bur bsgrub pa ni/ phyogs bcu'i zhes bya ba ste bcom ldan 'das shAkya thub pa ni snyigs ma lnga dang ldan pa'i khams su byon pas dman pa'o snyam pa'i log rtog bsal ba'i phyir/sangs rgyas thams cad mnyam pa ste/ /sku tshe mtshan dang rigs kyis min/ /zhes bya ba'i tshul gyis gang 'das pa'i dus na byung ba'i zhes bya ba la sogs pa gsungs pa yin no/ /rim can du gsungs pa thams cad ma yin te/ dbang po rnon po'i gang zag la ni cig car du'o zhes bstan pa ni/ theg pa gnyis su brtags pa'ang med na zhes gsungs pa yin te/ dbang po rnon pos ni dang po nyid nas theg pa gcig tu slob pa yin pa'i phyir la/ de dag tu'ang dbang po rnon po 'dus pas zhes bya ba'i don to/ /ji smos zhes bya ba ni gang la zhig ces bya ba'i don to//de'i phyir 'jam dpal zhes gsungs te/ snying po ni gtso bo'i don yin pa'i phyir ro/ /'o na mi mjed kyi 'jig rten 'dir dbang po rtul po sha stag 'dus sam zhe na de ni ma yin te/ gang zag dbang po rnon po'i dbang dang nges pa'i don du na/ nga la nyan thos dang rang sangs rgyas kyi theg pa rnam par dgod pa med ces gsungs te/ theg pa gsum ni bsam pa dman pa la dgongs te bshad ces bya ba'i don to/ 'o na/ theg pa gsum du ngas bshad do/ /zhes gsungs pa dang 'gal bas ci'i phyir zhe na zhes bya ba la/ de ni spyi'i sgo nas bye brag mtshon pas nyes pa med do zhes bya ba ni lan yin no//rnam grangs gzhan yang ngas yi ge gcig kyang brjod pa med do zhes gsungs pa las ni 'dul ba'i bsam pa'i dbang gis rtog pa sna tshogs su byung du zad kyi/ de bzhin gshegs pa ni rtog pa spangs pas 'du shes sna tshogs pa tha dad kyi 'du shes mi mnga' bas med pa'i phyir te/gal te 'du shes tha dad pa dang ldan na/ de bzhin gshegs pa ma yin par 'gyur zhes bya ba ni/ gal te zhes bya ba la sogs pa gsungs pa yin no/ /de la rtog pa ma 'gags pas sems yongs su ma dag pa'o/ /de nyid gang zhe na/ mngon par zhen pa zhes bya ba ste zhen pa ni 'khor 'dun pa dang ldan pa la chags pa'o//nyi tshe ba ni phyogs gcig pa'o/ /'du shes tha dad pa ni chags pa dang zhe sdang ba'o/ /dpe mkhyud ni gsang ba ste mdor na theg pa sna tshogs su bstan na nyes pa dang bcas par 'gyur zhes bya ba'o/ /de la theg pa gcig tu blo sbyangs pa la legs pa rnam pa bzhi yod de rang gi lam la the tshom mi za ba dang /lam gzhan la brnyas pa mi skye ba dang / bdud kyis bslu bar mi btub ste/ phan yon rnam pa bzhi mtshon pa'i don du legs pa dang po rang gi lam la the tshom mi za ba bstan pa ni/'jam dpal zhes bya ba gsungs pa yin no/ /chos gang dang gang bstan pa zhes bya ba ni/ tshul gzhan dang gzhan gyis so/ /theg pa gcig tu yang dag 'du ba ni byang chub la gzhol ba'o/ /'bab pa ni thogs par byed pa'o/ /sgrub pa ni de'i rgyur gyur pa'o/ / yul gcig ni rdzogs pa'i byang chub bo/ /de lta bas na theg pa gcig tu blos sbyangs pas rang gi lam theg pa chen por shes par 'gyur ro/ /de ltar theg pa gcig tu las kyang gsum du gsungs pa'i dgongs pa gang zhe na/ snga ma ltar gang zag gi dbang po la sogs pa ma yin pas na/'jam dpal zhes gsungs te/ rang bzhin gyi rigs de lta bu rtogs pa'i khyad par la dgongs pas/ theg pa rnam par dgod pa gsungs te/ rnam par dgod pa ni rim pa zhes pa sa'i dbang du byas pa ni sa rnam par dgod pa zhes gsungs te/ chos kyi rigs la bdag med pa tsam du rtogs pa las/nyan thos dang rang sangs rgyas kyi sar gzhag pa lta bu'o/ /gang zag ni dbang po'i rim pa ste dad pa'i rjes su 'brang ba la sogs pa gang zag gi rnam par gzhag pa byed pa lta bu'o/ /tshogs ni rgyu'i don te/ tshogs bsags pa'i bye brag las rtogs pa tha dad pa dper na chos nyid tha dad pa med pa'i mdo las bstan pa lta bu'o//thabs kyi dbang du byas pa ni 'jug pa'o/ /de dag dgongs pa can du bstan pas don dam par zhes gsungs pa yin no/ /shes rab kyi pha rol tu phyin pa las kyang theg pa gsum du gsungs pa dgongs pa can du bstan pa ni/lha'i bu zhes bya ba la sogs pa ste sems skyed par byed pa'o zhes pa ni thams cad kyang theg pa chen po'i snod du bya ba'i phyir ro/ /sems bskyed pa'i mthu med do zhes bya ba ni/ 'dod pa dang sred pa'i zag pa spangs pa'i phyir dgra bcom par gyur pa'o/ /sems bskyed na ni zhes bya ba ni theg pa gsum du gsungs pa ni dgongs pa can yin pa'i phyir la/bar chad mi byed pa ni rigs lnga dang theg pa gsum du mi smra ba'o/ /khyad par du 'phags pa ni dgra bcom pa thob pa ste/ khams gsum gyi spang bya spang ba'i phyir ro/ /shin tu khyad par du 'phags pa ni/bsam gyis mi khyab pa sgrub pa'i skye ba la brten nas sems skyed par byed pa'o/ /de bzhin du 'dus pa chen po'i mdo las kyang gsungs pa ni/ theg pa gcig tu yang dag par 'du ba ni zhes gsungs te/ rtogs pa tha dad pa thams cad kyang theg pa chen por phyin par byed pas na/yang dag par 'du ba'o/ /de ci'i phyir zhe na/ sangs rgyas bcom ldan 'das rnams ni zhes gsungs te/ gtam sna tshogs ni theg pa tha dad pa'o/ /mi 'byung ba ci'i phyir zhe na/ stong pa nyid tha dad pa med pa'i phyir ro/ /de'i phyir chos kyi dbyings ro gcig pa zhes gsungs te/sgrib pa med pa zhes bya ba ni sgrib pa mtha' dag spangs pa'o/ /ro gcig pa ni gzugs kyi de bzhin nyid kyis rnam pa thams cad mkhyen pa nyid kyi de bzhin nyid rjes su song ba zhes gsungs pa lta bu'o/ /nyid kyis gzigs pa'i lam ston pas na khong du chud par bya ba'i phyir ro//phyir mi ldog pa'i 'khor lo ni de lta mod kyi/ gang zag gi dbang po rim pas rtogs par bya ba'i thabs ston pa ni/ re zhig dpes go bar bya ba'i phyir/ dper na zhes gsungs pa yin no/ /de la bsgom par bya ba'i rim pa ni nor bu mkhan gyis zhes bya ba la sogs pa gsungs te/nor bu mkhan lta bu ni thams cad mkhyen pa'i sangs rgyas nyid de/ des/ sa 'am rdo ni nang du gser/ /bag la zha ba lta bu ni/ /'di yi khams ni rnam dag pa/ /bag la nyal ni phra bar gzigs/ /dge slong dag sems can gyi khams rnam par dag pa ni de bzhin gshegs pas gzigs so zhes gsungs pa lta bu'o//nor bu sbyangs pa ma byas pa lta bu ni/ 'dod chags kyi bag la nyal pa la sogs pas dkris pa'i khams rnam par dag pa'o/ /bul tog gi chu lta bu ni mi rtag pas yid 'byung ba la sogs pa ste/ mi rtag pa la sogs pa ni bsgom pa yin pa'i phyir ro//tshad ma'i rgyan las/ 'khor ba las yid ma byung bar/ /sems ni thar par 'dod ma yin/ /sdug bsngal me yis ma gdungs par/ /skye bo skyo ba skye mi 'gyur/ /zhes gsungs pa lta bu'o/ /'phags pa chos 'dul ba'i chos thams cad bdag med par yid ches pa'o//skra'i la ba dper bya ba ni/ rtsub pas myur du reg par byed pa ltar 'khor ba la yid byung bar byed pa'i phyir/ mi rtag pa la sogs pa ni mi 'dod pa'i ngo bo nyid yin pa'i phyir la/ des na myur du spong ngo zhes bya bar dgongs pa ste/ rtag par 'dzin pa la sogs pa phyin ci log bzhi'i gnyen po yin pa'i phyir ro//brtson 'grus mi 'dor ba ni de tsam gyis chog par mi 'dzin pa'i phyir ro/ /dngul chu rnon po lta bu ni/ stong pa nyid la sogs pa ste/ ngo bo rgyu dang 'bras bus stong pa'i rang bzhin bsgoms na nyon mongs pa spong bar 'gyur bas/chos kyi grags pas/ byams sogs rmongs dang mi 'gal phyir/ /nyes pa shin tu tshar gcod min/ /stong nyid lta dang de 'gal phyir/ /nyes pa shin tu tshar gcod byed/ /ces gsungs pa lta bur stong pa nyid shes pa'i shes rab kyis mthong ba'i lam rtogs par 'gyur ro zhes bya ba ste/de bzhin gshegs pa'i gtam gyi tshul ni rnam par rtog pa thams cad kyis dben pa'o/ /bcas pa'i sgra ni bul tog dang dngul chu 'dre bar byed pa ltar shes rab thabs kyis zin pa bsgom pa'i phyir ro/ /shing dang snam bu'i byi dor ni sngar gyi sbrum ma'i reg bya 'dor bar byed pa ste de bas 'jam pa'i reg pa'i byi dor byed pa ltar/'di na bdag gam sems can med/ /ces bya ba'i tshul gyis mtshan mar 'dzin pa spong ba'i phyir ro/ /sman chen po dper bya ba ni phyir mi ldog pa'i 'khor lo'i gtam thabs dang shes rab zung du 'brel par sgom pa yin pas 'og nas kyang thabs dang shes rab ya bral ba ni 'ching bar gsungs pa'i phyir la/'khor gsum yongs su dag pa zhes bya ba ni/ bdag la sogs pa'i 'du shes dang bral ba ste/ de bzhin gshegs pa'i yul ni 'khor ba dang zhi bar mi rtogs pa'o/ /ras srab mo dper bya ba ni/ sa rnam pa dgu la shes bya'i sgrib pa srab mo sbyang dgos pa'i phyir ro//de ltar rim gyis bsgoms nas mthar phyin par 'gyur ba ni/ rgyud dang zhes bya ba la sogs pa ste rang bzhin ni khams so/ /sna tshogs pa ni ba ru ra'i mdo las ji skad du/ ba ru ra'i phung po 'phang du ri rab dang mnyam pa zhig la/skyes bu 'ga' zhig gis sems can 'di'i khams ni 'di lta bu'o zhes brjod cing / ba ru ra'i phung po las re re nas dor yang / ba ru ra'i phung po ni zad par mi 'gyur ro zhes gsungs pa lta bu'o/ /'o na rigs gcig nyid nyams so zhe na/ mnyam du zhugs nas zhes gsungs te/thams cad kyang mthar rim gyis song ba nas 'tshang rgya bar 'gyur te/ dam pa'i chos pad+ma dkar po'i mdo las/ dgra bcom pa rnams sangs rgyas su lung bstan pa lta bu dang / yang byang chub sems dpa' lag na rdo rje ni/ de'i tshe tshe dang ldan pa kun dga' bor gyur to zhes bya ba la sogs pa gsungs pa lta bu ni/chos nyid khong du chud pa nas/ /zhes gsungs te/ chos nyid khong du chud pa ni thams cad rnam pa thams cad du mngon par rdzogs par sangs rgyas pa'o/ /sbyin gnas bla na med pa zhes bya ba ni ci skad du/ sangs rgyas sbyin gnas dam pa mtshungs med 'gyur/ / zhes bya ba lta bu ste sangs rgyas nyid do/ /de'i phyir nges pa'i shes byed bkod pa na/ phyir mi ldog pa 'khor lo'i mdo las kyang zhes gsungs pa yin no/ /gzhan gyi log par rtogs pa bsal ba'i phyir 'jam dpal gyis zhus pa yin/ 'o na theg pa gcig tu zad nas gsum du gsungs pa'i dgongs pa gang zhe na/dgongs pa bstan pa ni/ gsol pa zhes gsungs pa yin no/ /dgongs pa gang gi slad du ci ltar theg pa gsum ston ce na/ bsam pa dman pa drang ba'i phyir te/ gal te theg pa chen por bskal pa grangs med pa mang por ram/ bsod nams dang ye shes kyi tshogs chen pos sam/de bzhin du 'phags pa byams pas gsungs pa ltar/ chen po rnam pa du ma bstan na bsam pa dman pa rnams da dang bar 'gyur bas/ slob dpon nyid kyis kyang / spong bas ma rung bdag nyid can/ /mnar med pa ni spyi'u tshugs 'gro/ /zhes nyes pa de lta bu la sogs pa spang ba'i phyir rgyal po 'char byed la/btsun mo sngo bsangs ma shi ba brda sprod pa ltar/ thabs mkhas pas de dag rim gyis sangs rgyas kyi sar nye bar khrid de/ sngar ltar cig car bstan na mi 'jug pa spong ba'i phyir ro/ /de'i thabs mkhas pa ste mi skrag pa mdzad ces bya ba'o//de ltar mi 'jug cing bsam pa dman pa yang gang gis nyes she na/ snyigs ma lnga yi dus na byung / /zhes bya ba ste/ lta ba'i snyigs ma la sogs pas gos pa'i phyir dang / yang / dman par mos shing khams kyang shin tu dman/ /grogs po dman pa dag gis yongs bskor ba//zhes gsungs pas/ mos pa ste spong ba dag go zhes bya ba'o/ /de ltar rtsa ba'i lung bkod nas/ da ni de nyid kyis shes par byed pa'i lung bkod pa ni/ 'phags pa dpal phreng gi mdo las kyang zhes gsungs te/ yongs su mya ngan las 'das pa ni nyan thos la sogs pa'i mya ngan las 'da' ba'o//thabs so zhes bya ba ni dgon par sprul pa lta bu'o/ /grangs su 'gro ba ni nang du chud pa'o/ /de'i legs pa ni khong du chud do zhes bya'o/ /de bzhin du lang kar gshegs pa'i mdo las kyang gsungs te/ bag chags ni nyon mongs pa dang rjes su mthun pa'i spyod pa ste/dgra bcom pa mchongs pa can dper brjod pa'o/ /ting nge 'dzin ni zhes gnas so/ /zag pa med pa ni 'dod pa dang srid pa dang / ma rig pa dang / lta ba ste de spangs pas na med pa'o/ /'jig rten gyi zhes pa ni/ spyir yang khams 'og mar bsam gyis mi khyab par bsgyur ba'i 'chi 'pho ba la brten nas skye ba'i phyir ro//'jig rten las 'das pa'i zhes bya ba ni rnam pa thams cad kyi mchog dang ldan pa'i stong pa nyid kyi ye shes kyi tshogs rnams so/ /bskangs pa ni rdzogs par byas pa'o/ /yang na yang zhes bya ba ni rgyal po'i bu blo rtul po ltar sngon du bya ba gang yin pa ni phyis yang gang byed par 'gyur zhes bya ba'o//sngar bstan pa ltar kha cig na re theg pa gsum kho na nges pa'i don yin no snyam du sems na/ nges pa'i don ni sngar bstan pa ltar/ theg pa gcig tu zad la/ drang ba'i don du ni theg pa sna tshogs pas gsum du yang ma zad kyi zhes bya ba ni de lta mod kyi zhes gsungs pa'o//de lta mod kyi zhes bya ba ni nges pa'i don du na theg pa gcig tu zad pa las kyang ngo / /gdul bya la ltos nas ni theg pa sna tshogs su zhes bya bar dge ba'i tshogs spyod pa tha dad pa dang zhes bya ba la sogs pa gsungs te/dge ba ni don dam pa mya ngan las 'das pa'o/ /tshogs ni rgyu'i don to/ /de nyid ni spyod pa zhes pa ste/ nyams su len pa la ltos pa'o/ /'dul ba'i dbang ni slob ma'i rgyud kyis so/ /theg pa sna tshogs pa ni 'jig rten las 'das pa'i lam du'o/ /sgo ni 'jug pa'i tshul lo//tha dad pa ni mched la sogs pa'o/ /chos bstan pa ni 'og nas 'byung ba rnams so/ /de dag gang zhe na/ nyan thos kyi sa la bkod ces bya ba la sogs pa ste/ 'di dag gis kyang theg pa gsum du 'jog pa spong bar byed pa ste de la bden pa'i lam dang / rten cing 'brel par 'byung ba'i lam dang /ting nge 'dzin gyi lam dang / brtson 'grus kyi lam dang / shes rab kyi lam dang / dbang po'i lam dang / stobs kyi lam dang / rnam par thar pa'i lam dang / mngon par shes pa'i lam dang / tshad med pa'i lam dang / ting nge 'dzin gyi lam dang / dmigs pa yongs su dag pa'i lam dang /bsam pa rnam par dag pa'i lam dang / sbyor ba tshad med pa'i lam dang / sbyor ba'i khyad par gyi lam dang / khyad par 'bras bu'i lam dang / 'bras bu rnam par dbye ba'i lam gyi dbang du byas nas nyan thos kyi sa la bkod ces bya ba la sogs pa gsungs te/sdug bsngal la sogs pa'i bden pa las skyes pas na/ nyan thos te chos kyi 'khor lo lan gsum gyi rnam pa bcu gnyis su bskor bas 'bras bu thob pa'i phyir ro/ /dbang po rnam pa gsum gyis tshogs kyi sa la sogs pa nas/ rang gi ma rig pa'i rkyen gyis 'du byed la sogs pa lugs su 'byung ba dang /bzlog pa bsgom pa rang gi byang chub mngon par 'du byed pas na rten cing 'brel par 'byung ba'i lam mo/ /theg pa chen po la sogs kyi lam du dran pa nye bar gzhag pa dang / yang dag par spong ba dang / rdzu 'phrul gyi rkang pa rnams bsgoms pas na/shes rab dang brtson 'grus dang ting nge 'dzin te/ de la rdzu 'phrul gyi rkang pa ni/ shugs dang ldan pa'i spobs pa ste/ sems pa la sogs pas 'phangs pa'i stobs kyis shes rab la spobs pas sgrib pa sel bas nges par 'byung ba'o/ /yang dag par spong ba ni pha rol gnon pa ste/sdig pa mi dge ba'i chos ma skyes pa mi skyed cing / skyes pa spong bas na mi mthun pa'i phyogs pha rol gnon pa'o/ /dge ba'i chos ma skyes pa bskyed cing skyes pa gong du spel bas na/ dri ma med pa'i rgyal mtshan 'dzin to/ /dran pa nye bar gzhag pa ni bden pa bzhi rtogs pas na chos la spobs pa ste/nges par 'byung ba ni phyin ci log spong ba'i phyir ro/ /dbang byed pa ni drod kyi dad pa la sogs pa ni dbang po yongs su dag pa ste/ drod dang rtse mo'i gnas skabs su rtogs pa ni spobs pa'o/ /mi mthun pa'i phyogs spangs pas ni nges par 'byung ba ste thams cad du sbyar bar bya'o//mi brdzi ba'i phyir ni stobs te dad pa la sogs pa chen po bzod pa dang chos kyi mchog tu mnyam pa ste/ tha mi dad par spyod pa ste/ mthong ba'i lam gyi cha dang mthun pas na rjes su 'gro'o/ /stong pa nyid la sogs pa ni sbyor ba'i lam gyi gtso bor byed pa'i chos yin pas ngo bo nyid ma grub pa la sogs pas chos te/mya ngan las 'das pa'i grong khyer la mngon par phyogs pa ste/ rjes su 'gro bas de nyid gtso bo yin pas yul gyi theg pa ste/ zhon pa lta bu khams la smon pa med pas srid pa nges par 'byung ba'o/ /mngon par shes pa drug ni gzhan gyi don byed 'grub pa'i gtso bo yin pas thams cad du song ba'i rdzu 'phrul mi phyed pa zhes bya ba smos te/thams cad ces bya ba ni khams gsum ma lus pa'o/ /dang po yin pas rdzu 'phrul zhes smos so/ /mi phyed pa ni mi 'phrogs pa'o/ /dro ba la sogs pa de dag kyang byams pa la sogs pa'i stobs kyis theg pa chen por 'gyur bas/chos nyid kyi sgo nas ma yin te/ kha cig gang zag med par rtogs pas nyan thos su gyur to zhes lung las/ gzung ba'i rtog pa spang phyir dang / /zhes 'byung ba'i phyir rang sangs rgyas kyis gzung ba rang bzhin med par rtogs pa'i phyir 'phags pa byams pa'i dgongs pa drang ba'i don du 'jug pa nges par sbyar bar rig par bya ste/ci'i phyir zhe na/ chos su lta ba ma spangs na gang zag tu lta ba ldog par mi 'gyur te/ 'phags pa nyid kyis kyang / ci srid phung por 'dzin yod pa/ /de srid bdag tu lta bar 'gyur/ /zhes gsungs pas na tshad med pa la yang rag lus so zhes bya ba na/spyod pa'i sbyor ba tshad med pa yang dag par 'du ba zhes gsungs te/ spyod pa ni rang yongs su smin pa dang sems can yongs su smin pa'i spyod pa'o/ /de'i sbyor ba ni byams pa la sogs pa'o/ /tshad med pa ni yul gyi dbang du byas pa ste/ yang dag par 'du ba sems can ji snyed yod pa la brten pa rnams kyi bsod nams 'du ba'o//de dag kyang chos kyi mchog chen po 'grub pa'i ting nge 'dzin la gnas pa'o/ /de bzhin du spyan lngas kyang yin pas/ dmigs pa thams cad kyi yul yongs su dag pa'i dkyil 'khor zhes gsungs te/dmigs pa'i yul ni spyan lnga'i yul te/ gzugs so sor nges pa la sogs pa'o/ /yongs su dag pa ni sgrib pa med pa'o/ /de dag kyang mtha' dag pas dkyil 'khor zhes bya'o/ /de la bsam pa rnam par dag pa ni smon pa dang ldan pa ste/ 'bras bu thob pa'i bsam pa yin pa'i phyir ro//sbyor ba tshad med pa ni tshul khrims rnam pa gsum dang ldan pa ste/ des rgyu la 'jug pa'i phyir ro/ /sbyor ba'i khyad par ni go rims la bya ste 'dir pha rol tu phyin pa rnams so/ /rnam par dag pa ni sgo gsum dag pa'o/ /khyad par gyi 'bras bu ni sa bcu ste/ pha rol tu phyin pa bcus nges par 'byung ba'i phyir ro//'bras bu rnam par dbye ba ni rnam pa gnyis te/ rgyal po lta bur sems bskyed pa ni spyod pa'i smon lam gyis khyad par du gyur pa zhes smos te/ spyod pa ni sngar bstan pa gnyis so/ /smon lam gyis khyad par du gyur pa ni/ ci lta ci ltar gdul bya yin/ / don rnams yongs su rdzogs 'gyur ba/ /de lta de lta'i snang ba'ang / /bdag la brten te 'byung gyur cig /ces dang po smon pa'i stobs kyis 'tshang rgya ba la sogs pas don byed pa'o/ /phyugs rdzi lta bu ni rtag tu gzhon nu'i sa la gnas pa ni/ ci srid sems can 'ga' zhig kyang / /gang du ma grol de srid du//de phyir bla na med pa yis/ /byang chub thob kyang gnas gyur cig /ces sems smon pas na kun du bzang po'i spyod pa'i smon lam mo/ /de lta bas na theg pa bcu bdun du gsungs pa/ las kyang gdul bya la phan pa dpag tu med pa mdzad pa'i thabs mnga' bas theg pa gsum du ci ltar nges/nges pa'i don ni theg pa gcig tu sngar gtan la phab pa bzhin no/ /mdo kun las btus pa'i bshad pa/ lung gi tshad mas rab tu sbyar ba las theg pa gcig tu sgrub pa ste/ chos zab mo la bzod pa'i le'u gnyis pa rdzogs so// // de ltar theg pa gcig dang ldan par dam pa'i chos yongs su 'dzin par bstan pa ni/ dam pa'i chos yongs su gzung bar bya'o zhes gsungs te/ rtag tu zhes bya ba ni rgyun mi 'chad par zhes bya ba'i don to/ /de dag kyang shes rab kyis stong pa nyid la dmigs pa dang / snying rjes sems can la dmigs pas na yongs su gzung bar bya'o//sngar bstan pa'i thos pa'i brtson 'grus las lhag pa ci zhig yod ces rgol ba ni/ gang zhe na zhes gsungs so/ /spyi dang khyad par gyi dbang gis nyes pa med pa ni 'jam dpal zhes gsungs pa ste/ gong du ni thos pa 'ga' zhig tu bstan la/'dir ni des 'phangs pa'i don bsgrub pas spyir bshad pa yin no zhes bya ba ni lan yin te/ de'i phyir dang po chos 'dzin pa'i dgos pa bstan pa ni/ dam pa'i chos yongs su gzung na zhes bya ba la sogs pa ste/ chos dang chos yongs su 'dzin pa tha mi dad pa'i don gyis na/ byang chub sems dpa' zhes bya ba la sogs pa gsungs pa yin no//rgyu tshogs pa las 'bras bu skye bas na sems can yongs su gzung ba yin no zhes gsungs pa yin no/ /chu bo tsha sgo can gyi mdo las/ sems can la gus pa sangs rgyas kyi rgyur gsungs pas na sangs rgyas kyi rigs mi 'chad par bya ba yin no zhes gsungs so//de ltar spyir bstan nas da ni bye brag tu bshad par bya'o/ /sangs rgyas kyi rigs zhes bya ba la sogs pa gsungs te/ sangs rgyas kyi rigs ni sngar bstan pa rnams las bcas pa'i bslab pa mi dor bar bya bar dgongs te/ tshul khrims rnam par dag pa bya bar 'dod pas chos yongs su bzung ngo zhes bya ba'o//gzhan la phan pa sgrub par 'dod pas kyang zhes bya ba ni sems can gyi nyon mongs pa zhes gsungs te/ byang chub sems dpa'i bya ba ni gzhan la phan pa gtso bo yin pa'i phyir ro/ /rang yongs su smin par bya ba'i dbang du byas nas re zhig mtho ris kyi dbang du byas nas/ngan 'gro kun gyi sgo gcod pa/ /zhes smos te ngan 'gro ni sems can dmyal ba la sogs pa'o/ /sgo ni srog gcod pa la sogs pa ste/ gcod pa ni chos 'dzin pa'i phyir ro/ /mtho ris nyid gang zhe na/ 'khor los sgyur ba zhes smos te/mi'i phun sum tshogs pa'i dbang du byas pa'i phyir ro/ /lha'i phun sum tshogs pa'i dbang du byas nas brgya byin dang zhes bya ba la sogs pa gsungs so/ /byang grol gyi dbang du byas nas/ bdud kyi zhags pa gcod par 'dod pa zhes bya ba la sogs pa gsungs te/bdud ni nyon mongs pa la sogs pa'o/ /zhags pa ni 'dod chags 'phel ba la sogs pa'o/ /gcod pa ni ting nge 'dzin bsgom pa la sogs pa'o/ /byang grol nyid gang zhe na/ bla na med pa zhes smos te gtso bo yin pa'i phyir 'dir smos te/ chung ngu bya ba ni tha na dang ba'i sems kyis lta ba la sogs pa'o//chos 'dzin pa'i las gang zhe na/ mdo blo gros rgya mtsho'i dbang du byas nas/ blo gros rgya mtsho zhes gsungs te/ tshul khrims rnam par dag pa dam pa'i chos 'dzin pa yin pa ni/ byang chub kyi sems mi brjed cing bag yod pa'o zhes gsungs te/mi brjed pa ni byang chub sems dpa'i tshul khrims mi nyams par bsrung ba'o/ /bag yod pa ni so sor thar pa'i 'dul ba mi nyams par bsrung ba'o/ /tshul khrims kyi ngo bo nyid pas gcig pa'i sgrar bstan pa'o/ /de nyid kyi khyad par bdag dang gzhan gyi don sgrub pa'i dbang du byas nas/bdag bde ba la mi chags pa'i snying rje zhes bya ba la sogs pa gsungs te/ gegs sel ba'i dus su byas pas na/ gzhan gyi don la mi phyogs pa ni rnam par 'tshe ba ste de'i gegs sel ba ni snying rje'o/ /rang gi don la mi phyogs pa ni/ lus dang longs spyod la chags pa ste/lus la chags pa spang ba'i phyir chos smra ba rnams la gus pa'o/ /longs spyod la chags pa spang ba'i phyir de bzhin gshegs pa rnams la mchod pa'o/ /rgya mtsho chus mi ngoms pa ltar chog mi shes pa ste phyir zhing 'dod pa'o//ngo bo nyid tha dad pas gcig pa'i sgrar so sor bstan to/ /de nyid rnam par dag pa'i rgyu'i dbang du byas nas/ ye shes kyi khyad par ni snga ma ltar chos thams cad ma skyes pa la sogs pa bsgom pa dang dngos por blta ba ni rnam par ma dag pa'i phyir ro/ /bzod pa ni bzod pa nyid do//byang chub sems dpa'i sde snod kyi dbang du byas nas re zhig chos 'dzin pa'i phan yon ni/ byang chub las mi nyams te zhes bya ba la sogs pa ste/ nyams pa ni 'bras bu ma myong bar zad do/ /rjes su mthun pa ni bsam pa ltar 'grub pa'o/ /stobs che ba ni lus kyi dbang du byas pa'o//mthu che ba ni gyad stobs po che ste sred med kyi bu'o/ /gsang ba bsam gyis mi khyab pa las kyang byang chub sems dpa'i lus kyi stobs 'grub pa'i rgyu gsungs pas na/ dgos pa med ces brtsad par mi bya'o/ /de la mi shigs pa ni brdzi bar mi nus pa ste/ stobs mi 'phrogs pa zhes bya'o//srid pa ni dbang phyug nyid do/ /chos 'dzin pa nyid kyi dbang du byas nas bzhi gang zhe na zhes gsungs te/ bsod nams kyi tshogs sog pa'i dbang du byas nas/ mchod rten zhig pa mthong na zhes gsungs pa yin no/ /ye shes kyi tshogs sgrub pa'i dbang du byas nas/chos 'jig pa'i tshe bsrung ba gsungs pa yin no/ /dkon mchog sprin gyi mdo'i dbang du byas nas chos 'dzin pa bstan pa ni rigs kyi bu zhes bya ba gsungs te/ dus nam gyi tshe gzung ba bstan pa ni/ phyi ma'i dus phyi ma'i tshe zhes smos te dus kyi dbang du byas pa ni lnga brgya'o//chos kyi dbang du byas pa ni rnam par 'jig pa la sogs pa ste 'jig pa ni nub par gyur pa'o/ /'khrug pa ni glag pa'o/ /gang zag gi dbang du byas pa ni lam ngan par zhugs pa'o/ /'dren pa med pas mya ngan las 'das pa'o/ /dngos po gang 'dzin pa bstan pa ni mdo sde zhes gsungs te/lhag pa'i sems kyi bslab pa ston pas na mdo sde ste ma mo la sogs pa yang gzung ngo / /sangs rgyas kyi chos stobs la sogs pa bstan pas na rgya che ba'o/ /sa dang pha rol tu phyin pa ston pas na rgya chen po zhes bya'o/ /phan pa 'byung bas na don chen po'o//bde ba 'byung bas na mthu che ba'o/ /gzhir gyur pas nam mo lta bu'o/ /thabs ji lta bus 'dzin pa ni rtogs pa'i chos bsgrub pa'i dbang du byas pa ni 'dzin cing klog pa dang kha ton byed cing kun chub par byed pa ste/ 'dzin pa ni don bsgrub pa'o/ /lung gi chos smra ba'i dbang du byas pa ni brjod cing ston la yang dag par ston cing gsal bar byed pa ste mi shes pa'i gang zag la brjod pa'o//log shes dang ldan pa la ston pa ni the tshom dang ldan pa la yang dag par ston pa dang gsal bar byed pa ste ma zhugs pa dang log par zhugs pa dang the tshom gyis zhugs pa'i dbang du byas pa'o//yang dag par zhugs pa'i gang zag gi dbang du byas nas dga' ba dang dad pa dang rangs pa byed pa ste/ dang po dang bar dang tha mar bsam pas rjes su 'dzin pa'o/ /sbyor bas rjes su 'dzin pa ni phan 'dogs pa ste/ mthun pa'i rkyen sgrub pa dang /mi mthun pa'i rkyen sel ba'o/ /lung dang rtogs pa'i chos 'grub pa'i rkyen gang zhe na/ rgyu'i dbang du byas nas sngar bstan pa'i bsam pa bzhi dang ldan pas na zang zing med pa'i sems dang ldan pa'o/ /rkyen gyi dbang du byas nas yongs su 'dzin pa'i khyad par la gus pas na ston pa ste/yang dag par rdzogs pa'i sangs rgyas ltar sems pas chos smra ba la gus pa'o/ /chos la gus pa ni bdud rtsir 'du shes pa dang zhes bya ba la sogs pa ste/ nges par legs pa'i dbang du byas nas bdud rtsir 'du shes te/ mya ngan las 'das pa ni 'chi ba med pa'i phyir ro//bcud bsod ni bcud phan pa ste/ ma 'ongs pa'i mngon par mtho ba 'grub pa'i bsam pa'i dbang du byas pa'o/ /rtsi ni yan lag gcig pa ste/ tshe 'di'i bde ba mi nyams pa'i phan yon gyis dper byas pa yin no/ /la la ni ma thob pa'i don thob par byed pa dang /thob pa mi nyams shing 'phel bar byed pa dang / nyams pa sor chud par byed pa dang / don 'byung bas na de gsum du bstan to zhes kyang zer ro/ /bsam pa rnam par dag pa'i sbyor ba gang zhe na/ lus dang srog la mi lta bar zhes bya ste/ stong gsum gyi stong chen po me mur gyis gang ba'i 'obs su bskal pa gcig gis kyang tshigs su bcad pa gcig kyang yongs su tshol lo zhes gsungs pa lta bu'o//rnyed pa chud mi gzon pas bsgrub pa zhes smos te/ de ltar na skyes bu dam pa bsten pa dang / dam pa'i chos nyan pa dang / tshul bzhin yid la byed pa dag gis chos yongs su 'dzin pas na/ston pa'i dam chos rnam gnyis te/ /lung dang rtogs pa'i bdag nyid do/ /de 'dzin byed pa smra byed dang / /sgrub par byed pa kho na yin/ /zhes bshad pa yin no/ /rab tu zhi ba rnam par nges pa cho 'phrul gyi dbang du byas nas/chos 'dzin pa'i ngo bo nyid bstan pa ni/ bdag bde ba la chags pa dang zhes bya ba la sogs pa ste/ de ltar na rten mchog las mi nyams pa'i rgyu tshul khrims rnam par dag pa dang / theg pa mchog las mi nyams pa'i rgyu snying rje dang spyod pa chen po'i rgyu sbyin pa dang / dge ba rnam par byed pa'i ye shes kyi tshogs dang /dge ba la nus pa'i phyir lus dang sems kyi stobs phun sum tshogs pa dang / rnam par dag pa mthar phyin pa'i rgyu chos bshad pa dang / sgrub pa dang / rnam par dag pa myur ba'i rgyu tshad med pa bsgom pa ste/ chos rnam pa 'di bdun gyis dgos pa 'grub par 'gyur bas bsgom par bya ba yin no//ci ltar zhe na/ sbyor ba snying rje dang ldan pa dang / dngos gzhi pha rol tu phyin pa drug gis zin pa dang / rjes bsngo ba yongs su bsngo ba mi dmigs pa'i rgyas btab par bsgom pa spro ba chen po dang ldan pa brtson 'grus kyi ngo bo nyid du gzhag par bya'o//ngo bo nyid kyi phan yon bstan pa ni/ yang mdo sde de nyid kyi sngon gyi le'u las zhes bya ba la sogs pa gsungs te/ sngon gyi tshul ni 'das pa'i gtam brjod pa'o/ /cung zad tsam gyis chog par 'dzin pa'i phyir ye shes kyi tshogs la dgod pa ni shing gi bar du zhes gsungs so//chos yongs su tshol ba ni ye shes kyi tshogs sgrub pa'o/ /de la lung 'bogs pa ni tshig dang don ston pa'o/ /kha ton la brtson pa ni de nyid bstan pa'o/ /gus pa ni chos smra ba la gus pa'o/ /sems bskyed pa na zhes bya ba ni zang zing gi sbyin pa dang ldan pa'i dngos po ni ye shes kyi tshogs bskyed pa'i bsam pas zil gyis gnon ces bya ba'i don to//nas zhes bya ba ni grangs dang / mthu dang / rigs dang / rgyu dang / dper mi bzod ces bya ba bsdus pa'o/ /ye shes kyi tshogs sgrub pa'i bsod nams de ni rgyal po'i nga rgyal bcag pa'i don du dgongs pa yin no zhe na/nges pa'i don du sgrub pa ni/ /byang chub sems dpa'i bsod nams kyis/ /zhes gsungs te/ bsod nams ni sbyin pa las byung ba'o/ /lhag ma ni go sla'o/ /phan yon chen po de dag gang la zhe na theg pa chen po nyid la'o zhes bya ba chos kyi rang bzhin brjod pa ni/dam pa'i chos gang zhe na zhes bya ste/ thams cad la'ang sgrar 'jug pa'i phyir zhes rgol ba'o/ /lan ni ma yin te/ bsam pa dang ni bstan pa dang / /sbyor ba dang ni ston pa dang / /dus 'gal phyir na dman pa dang / /de ni dman pa kho na yin/ /zhes bstan pas nyan thos kyi theg pa la ma yin pas na theg pa chen po'i tshig bla dgas so zhes bya ba gsungs te/theg pa chen po ni sngar bstan pa nyid do/ /'o na nyan thos kyi theg pa med na theg pa chen po zhes ci ltar bya/ de'i phyir thun mong ba nyid do zhes rgol ba ni/ de ci'i phyir zhe na zhes bya ba'o/ / lan ni de lta ma yin te/ theg pa chen po ni rgyu yin pas/ yod dang med dang yod med dang / /zhes bya ba'i tshul gyis theg pa chen po yod na nyan thos kyi theg pa yod la de med na'ang med pas rab tu phye ba'i phyir ro zhes gsungs so/ /rnam grangs gzhan yang 'dir rang gi sde pa dag na re/dam pa'i chos ni theg pa chen po zhes brjod par mi rigs te/ theg pa chen po ni sangs rgyas kyi bka' ma yin te/ mdo sde la mi 'jug cing 'dul ba la mi snang la chos nyid dang yang 'gal ba'i phyir zhes rgol ba ni de ci'i phyir zhe na zhes bya ba'o/ /lan ni de lta ma yin te/ sngar lung ma bstan lhan cig byung //spyod yul ma yin grub pa dang / /yod dang med na yod med dang / /gnyen po dang ni sgra gzhan phyir/ /sangs rgyas rnams ni mngon sum spyan/ /bstan pa dag kyang srung bar mdzad/ /dus la ye shes ma bsgribs pas//de phyir btang snyoms mi rung ngo / /ma tshang ba dang 'gal ba dang / /thabs min de ltar ma bstan phyir/ /nyan thos kyi ni theg pa ni/ /theg chen chos zhes bya ba min/ /bsam pa dang ni bstan pa dang / /sbyor ba dang ni ston pa dang / /dus 'gal phyir na dman pa gang / /de ni dman pa kho na yin//rang gi nyid la 'jug phyir dang / /rang gi 'dul la snang phyir dang / /zab pa'i phyir dang rgya che'i phyir/ /chos nyid dang ni 'gal ba med/ /ces bya ba'i tshul gyis nyan thos dang zhes bya ba la sogs pa gsungs te/ bcom ldan 'das ni dus mkhyen pa'i phyir ma 'ongs pa'i 'jigs pa bzhin du ci'i phyir sngar lung ma bstan ces bya ba la sogs pa 'phags pa thogs med kyis bstan cing bshad pa bzhin du lan gdab par bya ste go sla bas 'dir ni ma bshad do//de dag kyang dus mkhyen pa ni mdo las phyis 'byung ba'i phyir gsungs pa ni/ci'i phyir ston pa la rgol bar byed ces brtsad par yang mi byed do/ /de nyid nges pa'i don du bsgrub pa ni/ chos yang dag par sdud pa'i mdo las kyang gsungs pa yin te/ zab mo ni stong pa nyid la sogs pa ste/ ci skad du/ zab mo stong pa nyid sgro 'dogs/ /skur pa dang bral zag pa yin//zhe'o/ /mdo kun las btus pa'i bshad pa lung gi tshad mas sbyar ba las/ dam pa'i chos bzung ba bzod pa'i le'u ste gsum pa rdzogs so// //de ltar brtson 'grus kyi ngo bo nyid rnam pa gsum du spyir bshad pa las/ da ni pha rol tu phyin pa drug sems kyis yongs su rdzogs pas na/chos zab mo bsgom par brjod pa ni/ byang chub sems dpa' gang zhes gsungs te/ byang chub sems dpa' ni rten gyi gang zag go/ /dmigs pa'i spyod pa ni dngos por lta ba'o/ /dus dpag tu med pa ni bskal pa mang por yang ngo / /de bzhin gshegs pa la mchod pa ni zang zing dang sgrub pa'o//la la zang zing gi'o zhes zer te/ de ni 'og nas tshangs par spyod pa spyad cing zhes 'byung bas rigs pa med pa kho na'o/ /lung bstan pa ni mang ste 'phags pa dpa' bar 'gro ba'i mdo tshad mar byas nas/ gsang ste lung bstan pa la sogs pa lung bstan pa gang zhe na/la la na re lung ston pa lung bstan pa la bya ste/ ci'i phyir na yang zhes smos pa'i phyir ro zhes zer ro/ /la la na re mngon du lung bstan pa la bya'o zhes zer te/ de'i phyir sa brgyad pa la mi skye ba'i chos la bzod pa rab tu thob pas/ spyod pa thams cad las yang dag par 'das so zhes gsungs te yongs su rdzogs pa'i khyad par can dang /khyad par med pa'i dbang du byas pa las dang po ma yin pa'i phyir te/ gzhan du na 'phags pa sa bcu'i mdo las 'byung ba dang 'gal ba'i phyir ro/ /mar me mdzad ni la la na re/ bskal pa grangs med pa gnyis la sangs rgyas bdun khri drug stong bsnyen bkur ba'i mtha' ma'i mtshan no/ /la la na re de lta na sa brgyad pa'i gnas skabs su mi 'gyur te/ bskal pa grangs med pa lngar bshad pa'i dang po ni/ tshogs kyi lam nas sa dang po'i bar du rdzogs par 'gyur ba'i tshe/sangs rgyas bdun khri lnga stong gi tha ma ni sangs rgyas rin chen gtsug tor can yin la/ gnyis pa nas sa bdun pa'i bar du bskal pa grangs med pa gnyis pa la sangs rgyas bdun khri drug stong gi tha ma ni sangs rgyas mar me mdzad yin no/ /sa brgyad pa nas sangs rgyas kyi sa'i bar du bskal pa grangs med pa gsum pa la sangs rgyas bdun khri bdun stong gi tha ma sangs rgyas rnam par gzigs yin pas na/rnam gzigs mar me rin chen gtsug /grangs med gsum gyi tha mar byung / /zhes 'byung ba dang 'gal lo zhes zer ro/ /la la na re nyan thos bsam pa dman pa la ltos nas de skad bshad kyi/gzhan du na sa dang po nas bzung ste rnam par thar pa tshad med pa thob pa'i phyir sangs rgyas kyi grangs ji ltar nges/ de ltar na ni sa bcu zhes kyang ci ltar rigs te/ de'i dgongs pa'i don ltar bya'o zhes zer ro/ /la la na re grangs med pa gnyis pa'i tha mar brjod pa ni gzhan gyi bsam pa dang mthun par bya ba'i phyir bstan gyi theg pa chen po la nges par ga la zhig bsam pa tha dad pas lung nyid las nges par ma gsungs te/kha cig tu ni bdun khri lnga stong gi tha ma ni yul 'khor skyong yin pa nas/ gnyis pa la ni mar me mdzad nas dbang po'i rgyal mtshan yin la/gsum pa la ni legs mdzad nas 'od srungs kyi bar du'o zhes gsungs pa'ang dmigs pa ma nges pa nyid la/ de bzhin du rtsa ba'i lung tha dad par gsungs pa tha dad par snang bas nges pa'i ther zug pa'ang mi snang na de theg pa chen po la sngar bshad pa lta bu ni gang la nges/rnam grangs gzhan yang gal te de ltar yin yang sngar bstan pa'i tshul gyis brtag pa'i phyir dang / mtshan ma mthun par mnga' ba'i phyir yang gzhan du dang gzhan las kyang nyes pa med do zhes zer ro/ /la la na re bskal pa grangs med pa sum cu rtsa gnyis sangs kyi sa thob pa las tshogs kyi lam ni bskal pa gcig gis so//sbyor ba'i lam ni gnyis so/ /sa dang po nas sa bcu pa'i bar ni bskal pa grangs med pa gsum gsum gyis 'da' bas na grangs med pa ni sum cu rtsa gsum po de'i phyir yang nges par mi gzhag go zhes zer ro/ /mthong ma thag ces bya bas ni/pad+ma can gyi tshong 'dus kyi dbus su spos 'tshong gi khye'ur gyur pas ut+pal lnga gtor ba'i tshe/ lung bstan pa ni mngon du lung bstan pa ste/ ma 'ongs pa'i dus su de bzhin gshegs pa shAkya thub pa zhes bya bar gyur to zhes bstan pa'o/ /lung bstan pa'i rgyu mtshan ni/ spyod pa thams cad las 'das so zhes bya ba la sogs pa'o/ /la la na re lung bstan ma thag tu zhes phan yon du 'dren no/ /'o na sgrub pa'ang de nyid du'am zhe na ma yin te/ de ni yongs su rdzogs pa'i dbang du byas pa yin la/ 'dir ni dang po bsgom pa'i mtshan nyid du bzhag pas nyes pa med de/sbyin pa nas shes rab kyi bar spyod pa dang / dngos gzhi dang rjes la mi dmigs pas yongs su zin pa brtson 'grus kyi ngo bo nyid ni go cha'i sgrub pa'o zhes mkhas pa dag gis bshad pa'i rjes su 'brangs pas yid gnyis mi bya'o/ /mdo kun las btus pa'i bshad pa lung gi tshad mas sbyar ba las/pha rol tu phyin pa drug gi le'u ste chos zab mo bzod pa bzhi pa rdzogs so// //ci skad bshad pa chos zab mo la mos par bya ba ni/ byang chub sems dpa' chos zab mo la zhes gsungs te/ re zhig chos zab mo la mos pa bstan pa ni/ ldog pa'i sgo nas bdag dang gzhan gyi don bya ba yongs su rdzogs par mi 'gyur zhes gsungs te/dngos por zhen pas 'bras bu mi 'byung bas na rdzogs par mi 'gyur ba'o/ /ldog pa'i sgo nas rjes su 'brang ba'i sgo nas bstan pa ni don dam pa'i bden pa ni zhes gsungs te/ don dam pa'i bden pa ni spros pa'i mtha' rnam pa brgyad dang bral ba'o//byang chub ste zhes bya ba ni sangs rgyas kyis de rtogs pa'i phyir ro/ /chos nyid 'ba' zhig la bzhugs pa'o/ /de'i phyir/ byang chub nam mkha'i mtshan nyid de/ /rtogs pa thams cad spangs pa yin/ /zhes gsungs pa lta bu'o//'o na chos nyid la tha dad pa med pas na/ stong pa nyid la ni tha dad pa med pa'o zhes bya bas nyan thos dang / rang sangs rgyas tha dad pa med do zhes kyang zer ro/ /de ni bden te 'on kyang snying rjes khyab par byas pas na thun mong ma yin no zhes gsungs te/ stong pa nyid ni rtogs par 'dra yang snying rjes yongs su bzung ba'i phyir ro zhes bya bar dgongs te/la la na re gang zag bdag med pa dang gzung ba med par rtogs pa dang / nyan thos dang rang sangs rgyas kyis rtogs pa yin pas so zhes kyang zer ro/ /de ltar rnam pa thams cad kyi mchog dang ldan pa'i stong pa nyid bsgom pa mchog yin pas na de bas na zhes gsungs te/kun rdzob kyi bden pa ni slu ba'i phyir ro/ /ci ltar zhe na/ spang bar bya ba yin pa'i phyir ro/ /mchog ces bya ba ni dam par gyur pa ste nyon mongs pa spangs pa'i phyir tshogs yongs su rdzogs par 'gyur ro/ /dge ba ni don dam pa mya ngan las 'das pa'o//rtsa ba ni de'i rgyur gyur pa'o/ /de'i dpe ni dper na zhes bya ba ste dpe bkod pa'o/ /theg pa dman pa mi 'grub pas na rang gi zhes gsungs pa yin te/ de lta bas na chos zab mo la mos par bya'o zhes bya ba'i tshig gi lhag ma'o/ /de ltar chos zab mo la mos pa'i dgos pa bstan nas/da ni chos zab mo la mos pa'i rang bzhin bstan pa ni/ chos zab mo ni gang zhes bya ba la sogs pa gsungs te/ kun rdzob nyid las ma gtogs pa/ /don dam yod pa ma yin pas/ /kun rdzob gang yin de nyid ni/ /dam pa'i don du 'dod pa yin//zhes gsungs pa ji lta bu zhes rgol ba la/ de ni bden mod kyi thob pa'i thabs la 'jug pa la de skad ces bya'o zhes bstan pa ni yang dag pa'i lta ba 'byung ba'i rgyu gnyis dang rkyen gnyis te zhes gsungs te/ 'phags pa'i zhes gsungs pa las na/ 'jig rten las 'das pa'i yang dag pa'i lta ba zhes bshad par bya'o//gzhan gyi sgra ni pha rol las thos pa'o/ /tshul bzhin yid la byed pa ni thos pa rjes su bsrung ba'o/ /mdor bstan pa de nyid rgyas par bshad pa ni/ dri bas mtshams sbyor bar de zhes gsungs pa yin no/ /de la dang po sbyor ba ni dbang du byas nas 'di snyam du sems par gyur te zhes gsungs te/rnal 'byor yid la byed pa gang gis gzhan las rjes su mthun par ma thob par zhi gnas tsam gyis ni nyon mongs pa mi spong ngo zhes bya ba ni/ rnal 'byor spyod pa zhes bya ba la sogs pa gsungs pa yin no/ /dngos gzhi yid la byed pa'i dbang du byas nas/chos gang la yang sbyor bar mi byed ces bya ba la sogs pa gsungs pa yin no/ /sgom pa rnam par mi bsgom pa'i/ /sgom pa dam par 'dod pa ste/ /thob par bya ba med rnams kyis/ /thob pa yang ni dam par 'dod/ /ces bya ba'i tshul gyis mngon par shes pa'i mtshan ma yid la mi byed pa ni sgra 'byin par mi byed pa'o//zlos pa'i rtag tu brjod pa'o/ /rgyu mi dmigs pas gang nas zhes bya ba'o/ /ci ltar zhe na/ 'byung ba dang 'gags pa'i sngon dang phyi ma'i mtha' la spyod pas de kho na nyid du na byed pa po med pa la bya ba mi 'thad pas/de bzhin gshegs pa la sogs pas chos bshad pa la sogs pa ni byung ma thag tu rgyu med pas 'jig pas na chos kyi dbang du byas pa dang / gang zag gi dbang du byas pa dang / nyon mongs pa'i dbang du byas pa dang / de spang ba'i gnyen po'i dbang du byas nas 'gags pa dang mi gnas pa dang ma byung ba'i dbang du byas pas/gang zhes bya ba la sogs pa yin no/ /mnyam par gzhag pa'i rjes kyi dus su tshul bzhin du sbyor bas/ byang chub sems dpa' de ltar tshul bzhin du sbyor bas/ ji ltar na tshul bzhin du mthong zhes rgol te/ thob pa dang spangs pa med par 'gyur ro zhes bsams pa'o/ /ma yin te mdo las/ gcig kyang mthong ba med pa ni/ /de kho na mthong ba nyid do/ /zhes bstan pa ni gang gi tshe na zhes bya ba la sogs pa'o/ /de la mthong ba'i lam gyi mnyam par gzhag pa'i gnas skabs rnam par rtog pa thams cad kyis dben pas na rang bzhin gyis 'gags pa'o//mthong bas spang bar bya ba brgya rtsa spangs pa na nye bar zhi ba ste log pa'i 'du shes spangs pa tsam du zad pas/ thams cad la rang bzhin gyis zhes bya ste/ yod pa bshig pa ma yin zhes bya ba'o/ /de dag gi bag la nyal bcom pas na rnam par zhi ba'o//chos kun 'gro bar rtogs pas na snyoms par zhugs pa'o/ /sngar bshad pa ltar ma skyes pa dang ma byung ba'i 'jig rten pa'i dag pa las khyad par du gyur pas na shin tu zhes bya ba'o/ /'jig rten las 'das pa las khyad par du gyur pas na mya ngan las 'das pa'o//snga rabs dag na re/ ngo bo nyid kyis ma skyes pas na rang bzhin gyis 'gags pa'o/ /gdod nas dag pas nye bar zhi ba'o/ /tshor ba rgyun chad pas nye bar zhi ba'o/ /gnyen po med pas snyoms par zhugs pa'o/ /rgyu med pas ma skyes pa'o/ /'bras bu ma grub pas ma byung ba'o//ngo bo nyid dang bral bas shin tu ma byung ba'o/ /sdug bsngal spangs pas mya ngan las 'das pa'o zhes kyang zer ro/ /rnam grangs gzhan yang tshogs kyis la chos thams cad la bdag tu lta ba spangs pas bdag med par yid ches pas rang bzhin gyis 'gags pas te/ gang zag tu lta ba ni rang gi ngang gis med pa'i phyir ro/ /drod kyi gnas skabs su chos kyi bdag nyid med pa'i phyogs gcig kyang rtogs pas rnam par mi rtog pa'i snang ba thob pas nye bar zhi ba ste ma rig pa'i bye brag spangs pa'i phyir ro/ /rtse mo'i gnas skabs su bdag med pa'i khyad par de dag gong du 'phel bas na/mi mthun pa rnam par zhi ba'o/ /bzod pa'i gnas skabs su bdag med pa'i khyad par gyis phyogs gcig rtogs pas na snyoms par zhugs pa'o/ /chos kyi mchog gi gnas skabs su de ma thag tu mthong ba'i lam rtogs pa'i ting nge 'dzin thob pas na ma skyes pa ste sgro skur dang bral ba'o//mthong ba'i lam du chos kyi dbyings kun du 'gro ba rtogs pas na 'bras bu la zhen pa med pas ma byung bar mthong ba'o/ /bsgom pa'i lam la ni ji ltar mthong ba'i don goms par byed pas shin tu ma byung ba ste/ gser lta bur yongs su sbyong ba'i phyir ro//mi slob pa'i lam du mthar phyin pas na mya ngan las 'das pa mthong ste/ de ltar na 'jig rten las 'das pa'i yang dag par lta ba rtogs pa'o zhes bya'o/ /rnam grangs gzhan yang bar chad med pa dang / rnam par grol ba'i lam gyis bsdus pa'i mthong ba'i lam la skad cig ma brgyad dang /brgyad de/ bden pa bzhis bsdus pas na bzhi dang / bzhi dang / bzhi dang / bzhi ste/ de dag kyang gnyis kyis bsdus pa'i gnyis dang / gnyis dang / gnyis dang / gnyis dang / gnyis dang / gnyis dang / gnyis dang / gnyis la rim bzhin du rang bzhin gyis 'gags par mthong ba la sogs pa dang sbyar bar bya ste/shes rab kyi pha rol tu phyin pa las de skad gsungs pa'i phyir ro/ /rnam grangs gzhan yang / mnyam par gzhag pa'i dus su chos gzugs la sogs pa ngo bo nyid kyis 'gags par rtogs pa ni/ dngos po'i gnas lugs tshul bzhin du shes rab kyis mthong ngo //'gags pa gang zhe na nye bar zhi ba ste bsgoms pas bral ba'i phyir ro/ /bsgoms pas bral ba nyid gang zhe na rnam par zhi ba ste/ bag la nyal spangs pa'i phyir ro/ /bag la nyal spangs pa nyid gang zhe na snyoms par zhugs pa ste/mtshan ma rgyun chad pa'o/ /mtshan ma rgyun chad pa nyid gang zhe na/ sngar bshad pa ltar ma skyes shing ma byung ba'o/ /ma skyes shing ma byung ba nyid gang zhe na/ shin tu ma byung ba ste rab tu bral ba'o/ /rab tu bral ba gang zhe na mya ngan 'das pa ste tshor ba rgyun chad pa'i phyir ro zhes bshad par bya'o//de ltar spyod pa'i shes rab nyid la rtogs pas ni/ gang gis mthong ba de la'ang rtog ge zhes gsungs te/ gang gis zhes bya ba ni shes rab de nyid kyis so/ /mthong ba ni mthong ba med pa'i tshul du'o/ /rtogs pa ni dpyod par byed pa'o/ /mtshan ma'i 'du shes dang bral bas na ci nas kyang zhes bya ba ste/chos rnams mi 'dzin gang yin dang / /de dag mtshan mar mi mthong phyir/ /thams cad dmigs su med par ni/ /shes rab la ni yongs su rtog /ces bya ba'i tshul gyis mi mthong ba dang / mi rtogs pa'o/ /de ltar tshul bzhin du mthong ba'i phan yon gang zhe na/chos gang la yang the tshom dang rmongs pa med do zhes bya ba la sogs pa ste/ 'di ltar slob ste zhes bya ba ni phan yon du lta bar byed pa'o/ /chos ni mtshan nyid 'dzin pa ste gzugs la sogs pa'o/ /the tshom ni yid gnyis za ba'o/ /rmongs pa ni mi shes pa'o//bsgribs pa ni khebs pa ste/ gzung ba dang 'dzin pa dang bral ba'i stong pa nyid mi mthong ba'o/ /thams cad sems su shes pas na/ /sgor mi 'gyur ba med pa ste/ /'khor ba'i rgyur gyur gang yin pa/ /de nyid sbyangs pa byas pa las/ /dag pa de ni mya ngan 'das/ / chos kyi sku yang de nyid do/ /zhes slob dpon nyid kyis gsungs pa dang / yang / 'khor ba yongs su shes pas na/ /mya ngan 'da' zhes de la brjod/ /ces gsungs la/ slob dpon nyid kyis rim pa lnga pa las/ ci ltar chu la chu bzhag dang / /ci ltar mar la mar bzhag dang / / rang gi rang gis ye shes ni/ /legs rtogs de ni 'dir phyag yin/ /zhes gsungs pa lta bus na spangs pa'i phyir 'bad pa med pa ni spang bar bya ba mi dmigs pa'i phyir ro/ /rtogs par bya ba 'bad pa med pa ni thob bya la dmigs pa'i phyir te/ nyon mongs pa dag gnyen po ni brtags pa tsam du zad pa'o//gang phyir de ltar yin pa de'i phyir/ yang dag par mthong ba zhes bya ba la sogs pa te phyin ci ma log pas na yang dag pa ste/ dngos por lta ba na log par yin pa'i phyir ro/ /ci lta ba bzhin ni gnas lugs de rang bzhin pa'i phyir ro/ /'o na med pa las rgyu 'bras ci ltar 'thad ces gang zhe na zhes rgol ba la/lan ni yod pa ni 'khrul pa yin pas 'khrul pa zad pa ni yang dag pa'o zhes bya bar ma mthong ba'o zhes bya ba dngos por ma dmigs pa ni/ yang dag pa ste rigs pas brtags na yod pa mi 'thad pa'i phyir ro zhes bya'o/ /'o na ci dngos po bshig pas sam zhe na/ma skyes pas zhes smos te/ yod pa la sogs par zhen pas spong gi de ni ma yin no zhes bya ba'i tshig go/ /rgyu med pa las 'bras bu mi 'thad pa'o/ /rgyu ma skyes pas na 'bras bu ma byung ba'o zhes bya ba ni/ ma skyes pa zhes bya ba de ni/ de ltar rgyu dang 'bras bu med pa gang yin pa ni ngo bo nyid med pas na de ni mi snang ba'i tshig bla dgas te/de kho na nyid du na rgyu med ces bya bas 'bras bu med par bstan te/ 'bras bu ni rgyu la ltos pa'i phyir ro/ /rgyu dang 'bras bu med ces bya bas rang gi ngo bo nyid bsal te/ med pa la rgyu dang 'bras bu mi 'thad pa'i phyir zhes bya ba'o//de'i phyir mdo sde ni mdo sde gzhan gyis bshad pa yin pas/ lung gzhan bstan pa ni mi skye ba ste/ sgro skur dang bral bas shes rab kyis rtogs na/ phyin ci ma log pa yang dag pa'i chos nyid rtogs pas na/ de la 'phags pa'i yang dag pa'i lta ba zhes bya ba'o zhes bstan pa ni/'du byed thams cad ces bya ba la sogs pa'o/ /rnal 'byor pa'i the tshom ni nang nas rtogs pa yin pas na 'di snyam du sems te zhes gsungs te/ thob pa dang yangs pa med do snyam nas sngar bstan pa lta bur chos thams cad nam mkha' lta bu yin pas stobs la sogs pa yang de lta bu rtogs na/yang dag pa'i don rtogs par 'gyur ro snyam nas the tshom ldog pa ni/ 'di ltar slob ste zhes bya ba la sogs pa'o/ /de ltar chos zab mo la mos pa'i tshul bstan nas/ da ni zab mo'i don bstan pa'i phyir dang po yab dang sras mjal ba'i mdo las kyang zhes gsungs te/khams drug med par bstan pa ni/ /rgyal po chen po zhes bya ba la sogs pa ste/ 'jig rten gyi sems can dang snod kyi bye brag gis rnam pa gnyis te/ dmyal ba yi dags dud 'gro dang / /mi rnams dang ni lha drug dag /'dod pa'i khams yin dmyal ba dag / gling dbye ba las te nyi shu'o/ /gong ma'i gnas dag bcu bdun ni/ /gzugs khams yin der so so yi/ /bsam gtan sa ni gsum pa yin/ /bzhi pa sa ni brgyad pa yin/ /gzugs med khams ni gnas med do/ /skye ba las ni rnam pa bzhi/ /der ni ris dang srog la yang / / sems kyi rgyud ni brten pa yin/ /zhes bya ba lta bu ni sems can gyi 'jig rten bstan pa'o/ /snod kyi 'jig rten gyi dbang du byas nas/ tshangs pa'i gzhal med khang zhes bya ba la sogs pa gsungs te/ tshangs pa ni gzugs kyi khams kyi bsam gtan dang po'i gnas ni gzhal med khang zhes bya ba'o//gnas pa ni dang po chags pa ste/ chags pa dang po rlung nas ni/ /dmyal ba srid pa'i bar du'o/ /bar gyi bskal pa nyi shur ni/ /chags par gyur pa dus yin no/ /zhes bya ba lta bu'o/ /gzhan 'phrul dbang byed ni 'dod pa'i lha'i ris drug pa'o/ / khor yug tu ni lcags ri'i ming ngo / /khor yug chen po ni stong gsum gyi stong chen po'i mtha' bskor ba'o/ /de'i rgyu ni lcags yin te/ la la na re gser kha dog lcags su snang ba yin no zhes kyang zer ro/ /gzhig par mi nus pas na sra ba'o/ /mi g.yo bas na brtan pa'o/ /rngam che bas na lhun stug pa'o//ri rab ni dpag tshad 'bum drug khri yod pa rin po che sna bzhi las grub pa ste/ lhun po rin chen bzhi'i rang bzhin/ /chu yi nang du brgyad khri dag /nub bo chu yi steng du yang / /dpag tshad dag ni brgyad khri'o/ /zhes bya ba'o/ /gnya' shing 'dzin la sogs pa ni ri bdun te/de la lhun po gnya' shing 'dzin/ /gshol mda' 'dzin dang seng ldeng can/ /de bzhin lta na sdug ri dang / /rta rna dang ni rnam 'dud dang / /mu khyud 'dzin ri de bdun gser/ /phyed phyed bri ba brgyad char la/ /de dag zheng yang 'phang dang mnyam/ /de rnams bar ni rol mtsho bdun/ / zhes bya ste/ de la rdo rje 'dzin ni rdo rje las grub pa'o/ /the sgre la sogs pa ni 'dzam bu'i gling gi ri ste/ de la spos kyi ngad ldan ni spos ngad dang ldan pa'i ri'o/ /gangs ri ni ri gangs can no/ /ri nag po ni 'bigs byed la sogs pa'o/ /'jig pa'i dbang du byas nas sa chen po 'di mes tshig pa 'am zhes bya ba la sogs pa ste/me dang chu dang rlung dag gis/ /'jig pa rnam pa gsum du 'gyur/ /bsam gtan gnyis sogs gsum po ni/ /gsum po dag gis rim bzhin 'jig /nang gi skyon dang chos mthun phyir/ /bzhi pa na med mi g.yo'i phyir//mi rtag de bzhin gzhal med khang / /sems can bcas te 'byung 'jig phyir/ /me yis bdun no chu yis gcig /de ltar me bdun thal nas kyang / /chu yis bdun te de nas ni/ /tha mar rlung gis 'jig pa yin/ /zhes bya ba'o/ /de dag gis ni mtshon pa yin pas na de bzhin du zhes bya ba la sogs pa gsungs te sngar bshad pa'i sems can gyi khams kyis zin pa'i 'byung ba'i dbang du byas pa skye ba la sogs pa dang /gnyi ga 'byung ba chen po rnams dang / de bzhin du skye mched la sogs pa dag kyang yin no zhes bstan pa ni/ de bzhin du nang gi zhes bya ba la sogs pa'o//de ni chos zab mo'i don ma skyes dgra'i mdo las gsungs pa de bshad par bya ste/ ci'i phyir zhe na/ sngar gang zag la bdag med par bshad pas chos kyi bdag med pa'i snod du byas pa'i phyir da ni chos kyi bdag med pa ston pas/ de nas zhes mtshams sbyor ba'o//shes rab thabs kyis yongs zin pa/ /'jig rten bla na med par gzhag /ces bya ba'i tshul gyis shes rab bsgom pa ni/ bsod nams kyi tshogs sngon du 'gro ba can yin pas de bstan pa'i phyir/ rang gi khyim du bsod snyoms la spyan drang ba yin no/ /dam pa'i chos ni rin che bas//bcom ldan 'das la tshangs pas gsol ba btab pa ltar/ 'dir yang chos rin che bar bstan pa ni gsol ba btab pa yin no/ /mtshams med pa la sogs pa'i kha na ma tho ba rnams sel ba ni/ stobs bzhi yis yin la/ de yang stong pa nyid kyi gnyen po'i stobs kyis bag chags dang bcas pa 'joms pas na/dper na me stag gang gis kyang / /rgya mtsho zab mo skem mi nus/ /de bzhin kun rdzob bden pas kyang / /nyon mongs rgya mtsho skem mi nus/ /zhes bya bas nyon mongs pa dang / shes bya'i sgrib pa'i gnyen por stong pa nyid bstan pa yin no//stong pa nyid ni shes rab kyi spyod yul yin pa dang / des 'dul ba'i phyir shes rab la mnga' brnyes pa 'jam dpal gyis bstan pa yin no/ /nyes pa dag ni 'chab pas 'phel ba na/ thams cad du bsgrags pas dag par bstan pa ni 'khor mang po'i nang du bstan pa yin no//byang chub sems dpa'i ltung ba dag ni yul thams cad du 'chags par rung bar bstan pa ni/ nyan thos la sogs pa'i mdun du bstan pa yin no/ /de ltar gsol ba btab pa la stong pa nyid mdor bstan pa ni/ rgyal po chen po khyed kyis 'gyod pa ni bsal bar mi spyod do zhes gsungs te/chos thams cad stong pa nyid yin pas bsal bar bya ba med do zhes bya ba'o/ /ngo bo nyid kyis med pa la/ /yod med gang gis sgro skur byed/ /nam mkha' la ni gang zhig gis/ /tshon gyis ri mo bri bar nus/ /zhes bya ba'i tshul gyis na bsal bar mi spyod do zhes bya ba'o//dngos por lta ba 'ga' zhig stong pa nyid la log par 'dzin pas/ chos thams cad stong pa nyid ni dkar po'i chos yongs su spong ngo zhes skrag pas stong pa nyid la log par rtog pa ni/ skyabs ma rnyed nas shing bcad pa ltar sa la 'gyel to zhes gsungs te/ skyabs ni sdug bsngal spang ba'i thabs so//ma rnyed pa ni dngos por zhen pa'i dbang gis ma rtogs pa'o/ /dran pa med pas na shing lta bur gyur pa'o/ /stong pa nyid ni tshu rol mthong ba'i shes pas mi rtogs pas sngar bshad pa ltar lung tshad ma yin par bstan pas yongs su 'dzin pa la rag lus pa nyid kyis na/'phags pa 'od srungs kyis dbugs dbyung ba'i phyir bskul ba ni/ rgyal po chen po ma skyes dgra la smras pa bzhin no/ /yang dag par rdzogs pa'i sangs rgyas kyi gsung gi bsgyur ba la sogs pa la ldem por dgongs pa yin pas/ pha dang ma ni gsad bya zhing //bram ze gtsang sbra can nyid dang / /rgyal po yul 'khor bcas bcom la/ /mi de yongs su dag par 'gyur/ /zhes bya ba dang / yid mi ches dang bya mi bzod/ /mi ni gang gis khyim 'bigs byed/ /go skabs bcom dang skyugs pa za/ /skyes bu de ni dam pa yin//zhes bya ba lta bur ldem por dgongs pa'i sgo nas/ gting dpag par bya dka' bas spang bar mi rigs te/ zab mo'i don tshu rol pas mi rtogs pas/ 'phags pa'i spyod yul yin zhes bstan pa ni dris shig ces bya ba'o/ /de lta bu'i stong pa nyid ni shin tu lkog tu gyur pa lung tshad ma yin pas rjes su 'brang ba ni slar langs te don zhus pas bstan pa yin no//de lta bu'i gang zag la stong pa nyid rgyas par 'chad kyi gzhan du na chud za bar 'gyur ba'i phyir ro/ /de lta bas na snod du gyur pa la bstan pa ni rgyal po chen po zhes gsungs te/re zhig gnyen po ma skyes par bstan pa ni/ sangs rgyas bcom ldan 'das sems kyis dmigs pas rab tu phye bas yin nam zhes bya ba la sogs pa gsungs pa ste/ sems can kun gzhi rnam par shes pa ma bsgribs la lung du ma bstan pa'i ngo bo nyid ni bag chags thams cad kyi gzhir gyur pas gnyen po'i ngo bor mi 'thad pa dang /yid kyi mngon par shes pa la sogs pa mngon par 'dus byas pa rnams ni mi rtag pa'i phyir yang ma yin par bstan pa ni/ sems kyi zhes bya ba la sogs pa'o/ /de la sems kyi dmigs pa rnams ni phyin ci log yin pas med pa la yod par 'dzin pa'i ngo bo nyid kyis na/'og nas kyang sangs rgyas ni sems dang yid dang rnam par shes pa dang bral ba ste/ ye shes lhun gyis grub pa rab tu brnyes pa'i phyir ro zhes gsungs pas de las byung ba ma yin pa'o/ / lhun gyis grub pa'i ye shes kyang / sems mngon par 'du byed pa las byung ba yin pas 'o na zhes rgol ba la/ 'du byed pa la rgyu dang rkyen gyi ngo bo nyid las byung ba yin la ye shes ni rgyu dang rkyen dang bral bas na phan tshun 'gal bas de ma lags so zhes bya'o/ /'o na mngon par 'du byas pa las 'byung bar mi 'thad na/ldog pa las sam zhes rgol ba ni 'on te zhes bya'o/ /ma yin te/ 'dus ma byas la 'dus ma byas pa 'byung bar rgyu dang 'bras bu'i ngo bo nyid gang zhig snga ma dang phyi ma'i 'o zhe na/ snga ma ni phyi ma la ltos pa yin na phyi ma gang gis snga ma'o zhes bzhag /de bzhin du phyi ma'ang snga ma la ltos pa yin na/ snga ma gang gis phyi ma'o zhes bzhag /snga ma'i snga ma ni de'i yang snga ma la ltos na med pa ma yin la bzlog pa tshul de nyid pas ci ltar rung / ma byas pas rgyu dang 'bras bu gang du'ang mi rung bas bsal bas na de ma lags so zhes bya ba'o//de ni ma yin te/ lam bsgoms pas 'bras bu thob po zhes bya ba ni/ 'o na zhes rgol ba'o/ /lan ni bsgom pa ni sems la goms par byed pa yin no/ /gang gis gang zhig la 'dus byas thams cad rgyu med par 'jig pas skad cig tu mi gnas pas mi rung la/ 'das pa'i sems ni zhig cing ma 'ongs pa ni ma skyes pa dang / da ltar byung ba ni mi gnas pas gang zhig la snga ma'i nus pa phyi ma la'o zhe na/ 'phos pa la ni 'pho ba med la/ ma 'phos pa la 'pho ba mi 'thad pas/ de gnyis las ma gtogs pa'i nus pa yod pa ma yin pas mi rung ngo //rnam pa de dag las ma gtogs pa'i 'pho ba ni yod par mi rung ngo / /'o na lam goms pa nyid do/ /chos nyid la ni 'dod pa kho na ste/ spang bya ni gang zhig spong bar byed pa'i gnyen po ni ci lta bu/ nyon mongs pa nyid ni nyon mongs pa nyid ma yin te/ 'dus byas pa'i phyir nyon mongs pa gzhan lta bu'o//de'i snga rol ni med pa nyid la phyi ma ni ma byung ba nyid do/ /de gnyis ma byung ba ni yod pa ma yin te skabs med pa'i phyir ro/ /gnyen po ni spang bya la ltos pas na med pa la gang gis byed par 'gyur/ byed pa po yod na ni bya ba rung ba las de gang zhig yin/re zhig byas pa las ni bya ba med la/ ma byas pa la yang byas pa med do/ /de gnyis ma yin pa'i byed pa ni/ gang na yang med pa ste skabs med pa'i phyir ro/ /de lta yin yang 'khrul pa spangs pa'i rim pa las gzhag go zhe na/ de gang zhig gang gis spong / 'khrul pa ni brdzun pa nyid pas de spong bar byed pa de dang tha mi dad na ci ltar spong ste/gcig pa'i phyir 'khrul pa nyid lta bu yin no/ /tha dad pa ni ci ltar spong ste/ de mi 'dra ba'i phyir spang bar bya ba'i nus pa ji ltar 'jug /tha dad pas tha mi dad pa'i bya ba byed pa ni/ tha dad pa dang tha mi dad pa'i bya ba tha dad dam tha mi dad/bya ba tha dad na tha mi dad pa nyid nyams pa yin la/ tha mi dad na tha dad pa gang la brjod par bya'o/ /tha dad pas tha dad pa'i bya ba byed na ni/ bya ba dang byed po nyid kyang mi 'dra ba las ci ltar 'jug par 'gyur/ de'i phyir mi 'thad pas na ma lags so zhes bya'o//de ltar yin yang shes bya thams cad shes pa la 'dod do zhes rgol ba ni smras pa zhes bya'o/ /lan ni ma yin te shes bya ni brdzun pa nyid pas de dang gcig na go ci ltar ye shes bden par 'gyur/ tha dad na gang gis de shes par 'gyur te sngar bshad pa bzhin no/ /ye shes ltar shes bya rnams bden par gyur pa las kyang gcig par mi rung ngo zhes bya ba ni ma lags so zhes bya ba'o//de ltar bshad pa bsdus pa'i phyir chos gang zhes gsungs te/ gnyen pa'i ye shes gang kun gzhi la sogs pa'i dmigs pa las byung bar mi 'thad pas/ de'i phyir nyes pa gang yang bsal bar mi nus pas/chos thams cad stong pa nyid du bshad pa ni bsal bar nus sam zhes smras pa yin no/ /de ltar ye shes stong pa nyid ni chos nyid la bshad kyi/ 'on kyang kun rdzob tu ye shes bskyed par bya'i/ skur bar mi bya ste/ 'khrul pa las snang zhes bya ba ni 'di la bsams nas zhes bya ba yin no//gnyen po ni spang bya la gzhag pas na spang bya nyid kyang med par bstan pa ni/ gzhan yang zhes gsungs te sngar bshad pa nyid la gzhan pa'i tshul gyis zhes bya'o/ /de gang zhe na/ sems ni rang bzhin 'od gsal bas/ /nyon mongs rnams ni mtshan nyid med/ /ces bya ba'i tshul gyis sngar bshad pa lta bus na/chos nyid rnam par dag pa ni dngos por bsgyur bas na/ chos nyid 'ba' zhig la dmigs par bya ba ni brdzun pa las zhen par ni mi bya'o zhes stong pa nyid bstan pa ni/ nam mkha'i zhes dpe gsungs pa yin no/ /gang zhig yod pa ni bsal ba srid na/med pa ji ltar sbyang zhes stong pa nyid bstan pa ni/ nges par snang ba 'di ni rnam par sbyang ngo zhes zer na zhes bya ba la sogs pa'o/ /de lta bu ni stong pa nyid gang gis rtogs she na/ de bzhin gshegs pa rnams kyis zhes gsungs pa yin no/ /de nyid tshad ma'i skyes bu yin pas de'i gsung gi rjes su 'brang bar bya'o zhes bstan pa ni de dag gis zhes bya ba'o//chos nyid de lta bu las kyang kun rdzob tu nyes pa spang bar bya'o zhes bstan pa ni ngas don gyi dbang gis mthong nas zhes gsungs pa yin no/ /de ltar gnyen po dang spang bya med pas spong ba'i thabs kyang med par bstan pa ni gzhan yang zhes bya ba gsungs te/nyes pa ni nang du'ang mi dmigs/ phyi rol du'ang mi dmigs te/ de ci'i phyir zhe na/ ngo bo nyid kyis med pa nyid pas med pa ni gang du'ang gnas pa mi rigs so zhes bya ba ni/ gang na'ang zhes bya ba la sogs pa gsungs pa yin no//de ltar shes na nyes pa de spong ba yin no zhes bya ba ni rang bzhin te/ ngo bo nyid shes na sbrul gyi rigs 'don shes pa la/ sbrul gyi gnod pa med pa ltar nyon mongs pa'i rigs shes na de spong bar 'gyur te des mi gos so zhes bya ba ni gnas med kyang zhes bya ba la sogs pa'o//ngo bo nyid kyis med pa mi 'thad de dmigs pa'i phyir ro zhes de ci'i phyir zhe na zhes rgol ba la lan ni/ med pa nyid kyis snang ba rung ste/ rab rib can la skra shad 'dzings pa lta bu'o zhes bstan pa ni lan yin no/ /ci ltar med ce na ngo bo nyid kyis dben pa'o zhes bya ba la sogs pa gsungs pa ste spang bar bya ba'i ngo bo nyid pas na/gcig dang du ma dang bral bas dben pa ste stong pa dang / snang ba'ang 'khrul pa yin pas rigs pa la ma grub pa ni tshig gnyis kyis bstan to/ /spong bar byed pa'i gnyen po'i dbang du byas nas chos nyid la skye ba med pa dang /ma skyes pa dang / ma byung ba ste dngos po med la phrad pas stong pa med par bstan pa ni/ 'dre ba med pa la sogs pa'o/ /mi mthun pa dang gnyen po med pa la bya ba mi 'thad pa la rtsol ba'i nus pa med cing / de'ang bems po ste ngo bo nyid kyis lung du ma bstan la/ de'ang rnam par rigs pa'i mtshan nyid ma yin pas ni/bya ba'i mthu med pa la sogs pa'o/ /de lta bu la spang ba mi 'thad pa ni/ ngo bo nyid mi 'gyur bas byed pa mi 'thad pa dang / gzhan du mi 'phro bas spangs pa med pa dang / rtag pa med pa'i tshul gyis rtag pa mi 'gyur ba dang / thul ba med pas gnyen po mi skye ba dang /mi mthun pa dang gnyen po phrad pa med pas spang ba med pa ni rang bzhin gyis mi 'pho ba la sogs pa'o/ /'o na 'bad pa med par ci ltar thar bar mi 'gyur zhe na ma yin te/ glo bur ba'i dri ma bsal ba la rag las pa ni/ yod pa dang med par lta ba'i log par zhen pa spangs na yin pa dang /spang ba'ang 'bad pa med pa na mi 'gyur ba dang / 'bad pa 'ang log par 'bad pa spang ba'i phyir/ bla ma ring dang mtshan ma dang / /bdag gi brtson 'grus lhag lta ba'i/ /byang chub sems dpa' nga rgyal can/ /byang chub las ni ring zhes bya/ / zhes bya ba yi tshul spangs nas/ /ci skad bshad pa'i skad du na/ /rtog pa tsam du lta ba yi/ /byang chub sems dpa' rtog med rnams/ /byang chub thob ces nges par brjod/ /ces bya ba'i tshul gyis 'di dag rtog pa tsam du blta la/ rtog pa tsam de yang yongs su spong ba na/ mtha' gnyis dang bral ba la sogs pa'o//de la med par lta ba spang ba'i dbang du byas pa ni mu med pa la sogs pa ste/ 'khrul pa'i snang ba rgya che bas na mu med mtha' thug pa med pa'o/ /mtha' ni mtha' ste zad par dmigs pa ni mthar thug pa yin la/ de med pas na dmigs pa med pa'o//yod par lta ba spang bar bya ba'i dbang du byas nas/ phyin ci log med par zhes bya ba bstan pa yin no/ /de nyid bshad pa ni rtag pa dang zhes bya ba la sogs pa'o/ /bshad pa de nyid gsal bar bya ba ni 'bral ba med pa la sogs pa ste/ de ltar na stong pa nyid kyi don gcig gis gcig bshad de/dngos por lta ba yongs su spang bar bstan to/ /'o na 'thob pa'i 'bras bu med par thal lo zhe na ma yin te/ stong pa nyid la tha dad ni/ /cung zad yod pa ma yin yang / /rtog med tshul gyis rtogs pa na/ /stong nyid mthong zhes tha snyad gdags/ / zhes bya bas mi rtog pa nyid kyis rtogs pa yod do zhes bstan pa ni rgyal po chen po zhes gsungs pa yin te/ shes rab kyi pha rol tu phyin pa las ji skad du/ nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang /don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong pa nyid dang / chos thams cad stong pa nyid dang /rang gi mtshan nyid stong pa nyid dang / mi dmigs pa stong pa nyid dang / dngos po med pa'i ngo bo nyid stong pa nyid de/ stong pa nyid bcu drug tu gsungs pa nyid bstan pa ni chos thams cad ni nye bar zhi ba zhes bya ba la sogs pa ste/ nang ni mig la sogs pa'i dbang po rnams so/ / zhi ba ni stong pa nyid de/ de'i phyir 'gyod pa ste yid la gcags pa med pa'o zhes thams cad du sbyar bar bya'o/ /chos thams cad ni gzugs la sogs pa yul rnams te rnam par shes pa nyid der snang bas na/ 'byung ba che la sogs bshad pa/ /rnam par shes su yang dag 'du/ /de shes pas ni 'bral 'gyur na//log par rnam rtog ma yin nam/ /zhes bya ba'i tshul gyis brdzun pa'o/ /chos ni nang dang phyi'i skye mched rnams te bzhi pa ni stong pa nyid do/ /mtshan nyid ni de'i rang bzhin te de'i gsum ni stong pa nyid dang po gsum yin te/ tshogs kyi sa la rtogs par 'gyur ro//chos ni nang gi ngo bo nyid la sogs pa'i stong pa nyid la dmigs pa'i shes pa nyid de bdag gir 'dzin pa ni de dag la dmigs pa'i shes pa'i ngo bo nyid kyang stong pas na bral ba ste/ stong pa nyid du 'dzin pa'i rnam par rtogs pa spang bas na sbyor ba'i lam du rtogs pa yin no/ /chos ni shar la sogs pa'i phyogs bcu po ste thams cad stong pa nyid du rtogs pas na mthong bas spang ba las rnam par grol ba'i mtshan nyid las rnam par rtog pa thams cad kyis dben pas sa dang po la ro myang ba med do//chos ni mya ngan las 'das pa ste/ don dam par tha snyad kyis ming du gdags pa med pa ming med pa ste stong pa nyid ni bral ba tsam yin pas mchog gi don gyis sa gnyis pa la'o//chos ni 'dus byas rnams te rkyen gyis 'dus byas par gcig pa nyid kyis spyi'i mtshan nyid tha dad pa khams gsum 'dus byas stong pa nyid do/ / dngos por ma grub pa'i ngo bo nyid kyis na gnyen po nus pa'i phyir rgyu mthun pa'i don gyi mchog sa gsum par ro/ /chos ni 'dus ma byas pa ste/ skye ba dang 'gag pa dang gnas pa las gzhan du 'gyur ba med pas/ rgyu dang rkyen las rnam par grol bar ro gcig pas 'dus byas kyi gnyen po sbyor bas btags pa'i mtshan ma med pas 'di ni yongs su 'dzin pa med pa'i don gyis sa bzhi pa'o//chos ni 'dus byas te rtag pa dang chad pa'i mtha' ni mtshan ma'o/ /mtha' de las 'das pas na mtshan ma med pa'i mtha' ste dben pa ni stong pa nyid do/ /'di ni rgyud tha dad pa med pas sa lnga pa la'o//thog ma dang dbus dang tha mar gyur pa'i bye brag med pas na 'jug pa ste tshar gcad du med pas tha dad pa'i dmigs pa med pa'i dag pa ste kun nas nyon mongs pa dang rnam par byang ba med pas sa drug pa'o/ /lta bar gyur pa drug cu rtsa gnyis ni dor bar bya ba yin pa las chos nyid kyi dbang du byas na med pa ste bral ba'i stong pa nyid do//sna tshogs pa ma yin pas sa bdun pa la'o/ /'phags pa rnams kyis ma mdzad pas rang bzhin ni 'gyur ba med pa'i phyir dang / 'dus byas la sogs pa'i chos thams cad ni phan tshun ltos pas gzhag pas na rang bzhin 'grub pa med pas na stong pa 'di gnyis ni dus gsum las 'das pas 'grib pa dang 'phel ba med pa dang /rnam par mi rtog pa zhing yongs su dag pa la dbang bas 'dus byas pa la smod pa med pas sa brgyad pa la'o/ /chos rnams kyi rang bzhin mtshan nyid btags pa tsam du zad pa dang /'das pa la sogs pa'i chos rnams ni 'du ba la sogs pa'i dus rnams gcig go/ /bzlog na mi dmigs pas dus gsum yongs su chad pa ste ye shes la dbang bas sa dgu pa'o/ /shin tu ma skyes pa ni rten cing 'brel par 'byung ba yin pa'i phyir ro/ / tshogs pa dang ldan pa'i chos rnams ni ngo bo nyid kyis yod pa ma yin pas mya ngan las 'das pa ste/ stong pa nyid yang dag par 'du ba ste/ gcig pas na las la dbang bas na sa bcu pa'o zhes stong pa nyid rtogs pa'i 'bras bu 'byung bas de med pa ma yin no zhes bstan pa yin no zhes 'das pa pa kha cig zer ro//la la ni stong pa nyid bcu drug tu gzhag pa ni shin tu rigs pas lung dang yang mi 'gal ba las sa dang lam gyi rim par sbyar ba ni ha cang rigs pa med ces zer ro/ /da lta ba kha cig ni tshogs kyi sa la 'jug pa 'byed pa'i stong pa nyid gcig dang / tshogs kyi sa la gsum dang /sbyor ba'i lam du gcig dang / sa bcu la dgu rtogs so zhes kyang zer ro/ /de ltar thams cad stong pa nyid yin pa de'i phyir don bsdu ba'i sgo nas nges pa'i shes pa skyed pa ni 'di ji snyam du sems zhes gsungs te/ stong pa nyid ni sgro skur dang bral bas de la 'bras bu mi skye ba'i ngo bo nyid pas chos thams cad la nyes pas gos pa med pa ni/chos gang ma skyes pa zhes bya ba la sogs pa'o/ /med pa la [(]spar [,]spang [)]bar bya ba mi 'jug pas de bsal bar nus sam zhes gsungs so/ /de lta bu gang gis rtogs she na/ yang dag pa'i don bsgoms pa ni/ rnal 'byor pas rtogs so zhes bstan pa ni de ltar zhes gsungs so//phan yon de lta bu dang ldan pa'i stong pa nyid la sbyar bar gdams pa ni/ de lta bas na zhes bya ba la sogs pa gsungs te/ tshul bzhin ni gnas lugs te stong pa nyid do/ /phyin ci log ni dngos por lta ba'o/ /bsal ba dang gzhag pa med pa'i sems kyis stong pa nyid bsgom par bya ba ni/ci ltar zhes bya ba la sogs pa'o/ /de la len pa ni 'bras bu'o/ /dor ba ni nyes pa'o/ /de'i 'du shes dang yang mi 'grogs pas lhan cig mi gnas pa'o/ /shin tu dag pa ni las su rung ba'o/ /zhi ba ni thar pa'o//rang bzhin ni ngo bo nyid do/ /rang bzhin med pa ni ma grub pa'o/ /rgyu rkyen dang bral bas bdag po ste byed pa po med pa'o/ /de lta bu'i stong pa nyid la bsgom par bya bas na bzod par bya'o/ /mi bya ba ni dngos por zhen pa'o/ /'o na 'bad pa med na ci ltar grol zhes de ci'i phyir zhe na zhes rgol ba la/'bad pa ni kun rdzob tu yin la don dam pa'i bden pa ni de dang bral bas na bya ba med pa ste zhes bya ba la sogs pa gsungs pa ste/ de la bya ba ni rgyur 'bad pa'o/ /'gyur ba ni 'bras bu'i ming ngo / /de dag dang bral bas na stong pa nyid ni gdung ba med pas mya ngan las 'das pa zhes bya'o//chos bshad pa la yi rang nas 'chad pa po la bsnyen bkur byas pa ni chos dang chos smra ba gus par bya ba'i phyir yin no/ /de lta bu'i stong pa nyid snang ba thams cad dang bral ba'i ngo bo nyid de bstan pa'i phyir ro/ /des ras kAR+ShA pa Na brgya stong ri ba de ma blangs pa yin no//la la na re chos smra ba ni zang zing gi phyir ma yin gyi/ snying rje 'ba' zhig gis bstan par bya ba yin pas de ma blangs pa yin no zhes zer ro/ /la la na re rang nyid 'dod pa chung bar bstan pas so zhes kyang zer ro/ /la la na re stong pa nyid dngos por lta ba mi len pa'i phyir/rang gi stong pa nyid rtogs par bstan pa'i phyir zhes kyang zer ro/ /thams cad du nang gi sems kyis tshogs yongs su rdzogs pa yin par bstan pa ni de'i lus la bor ba yin no/ /rnam grangs gzhan yang 'phags pa 'jam dpal gyis byin gyis brlabs nas 'dor du bcug pa yin no//stong pa nyid ni rnam pa thams cad dang bral ba yin pas rang gi lus mi snang bar byas pa yin no/ /stong pa nyid ni sgra'i rjes su zhugs nas de bstan pa'i don goms par byas pas rtogs pa yin par bstan pa ni sgra grags pas bstan pa yin no/ /shing gnyis drud pa las me byung nas shing nyid kyang tshig pa ltar stong pa nyid shes rab kyis rtogs nas shes rab nyid kyang sngar bshad pa ltar rang bzhin med pa yin par rtogs pa ni gang gis mthong ba de las yang zhes gsungs pa yin no//srid pa thams cad ye nas stong pa ste/ /nyi tshe stong nyid mu stegs can rnams yin//zhes 'byung bas thams cad stong par bstan pa ni su'i lus mthong ba de la zhes gsungs pa yin no/ /rgyal po ma skyes dgra ni rtse mo thob pa yin pas bzod pa la bkod pa ni rang gi lus la 'du shes 'byung ba ma gtogs par gzugs kyi 'du shes dang bral ba ste gzung ba med par rtogs pa mtshan pa yin no//'jig rten chos kyi mchog la bkod pa ni rang gi lus kyang mi mthong bar bya ste/ gzugs kyi 'du shes thams cad dang bral ba ni gzung ba dang bral ba'i ye shes rtogs par bstan pa yin no/ /mthong ba'i lam la bkod pa ni/ /zhes gsungs pa yin te/rags pa ni 'dod pa'i khams dang gzugs kyi khams so/ /phra ba ni gzugs med pa ste/ dman par dgag pa yin pa'i phyir med pa ma yin pas phra ba'o/ /ma mthong ba ni bzod pa brgyad kyis bar chad med pa'i lam du'o/ /rnam par mi mthong ba ni shes pa brgyad kyis rnam par grol ba'i lam du'o//dngos por mi mthong ba ni de med pas mi mthong bas mi rtog pa'i ye shes kyis phyin ci ma log par chos kyi dbyings su mthong bas chos thams cad mi mthong ba ni zhes bya ba la sogs pa'o/ /rlom sems ni dngos por lta ba ste/ 'jig rten pa'i lam gyi chos thams cad bdag med par yid ches pas bral ba'o//rnam par rtog pa ni 'jig rten pa'i lam gyi ngo bo ste/ mthong ba'i lam thob pa rnam par rtog pa thams cad kyis dben pa'o/ /ting nge 'dzin ni chos thams cad stong pa nyid kyang kun rdzob tu las dang 'bras bu mi slu bar bstan pa ni 'khor thams cad mthong ngo zhes gsungs pa yin no//rnam grangs gzhan yang mnyam par gzhag pa'i rjes la thob pa la snang ba mi 'gag par bstan pa yin no zhes kyang bshad par bya'o/ /da ni de ltar chos nyid zab mo'i don gang zag dang chos la bdag med pa'i mtshan nyid rgyas par bshad pa de nyid mdo gzhan gyi sgo nas bsdu ba'i phyir bshad pa ni/sgyu ma mkhan bzang po'i mdo las kyang zhes gsungs te/ phyi dang nang gi mu stegs byed pa 'ga' zhig rgyu med pa las skye bar 'dod par dgag pa ni/ chos rnams bsten nas 'byung ste rgyu med pa ma yin pa dang zhes gsungs te/rtag tu yod pa la sogs par thal bar 'gyur ba'i phyir ro/ /gang zag rgyur yod pa dgag pa'i phyir gang zag med pa'i phyir zhes gsungs te/ sngar bshad pa'i tshul gyis ni ma yin no/ /nang gi mu stegs pa dngos por smra ba'i 'dod pa dgag pa ni chos gang rten cing 'brel par 'byung ba de ma skyes pa zhes bya ba ste/rang dang gzhan dang gnyi ga rgyu med pa las skye bar mi 'thad pas ma skyes pa'o/ /gcig dang du ma dang bral ba ste dngos po med pa'o/ /dngos po med pa ni nam mkha' dang 'dra bas rnam par mi 'jig pa ste rtag pa'i phyir ro zhes bya ba'o/ /de ltar chos zab mo'i mtshan nyid spyir bshad nas/da ni khyad par bstan pa'i phyir/ rnam grangs gzhan gyis kyang zhes gsungs te/ rnam grangs ni bye brag go/ /chos nyid ni stong pa nyid do/ /so so'i skye bos ma yin pas zab mo zhes bstan to/ /dbugs 'byin pa ni phan yon gyi ming gi rnam grangs so//yongs su sbyong ba ni thob pa mi nyams par byed pa'o/ /la la ni thob par byed pa'i phyir yongs su sbyong ba'o zhes kyang zer ro/ /yongs su sbyong ba'i khyad par mang du bshad pa gang zhe na zhes rgol ba la/ gtso bo bsdus pas nyes pa med/ /ces bya ba ni/ 'di lta ste zhes bya ba'o//de nyid bstan pa ni mi dmigs pa'i zhes bya ba ste/ stong pa nyid kun du 'gro ba rtogs pas mnyam par gzhag pa la snang ba nub pa'o/ /rnam par thar pa'i yon tan gyi che ba'o/ /kun rdzob la rjes su dpag par bya bas na ye shes gnas pa'o/ /rang gi rtogs pa la gzhan 'god pas na gzhan dag kyang zhes bya ba'o//bstan pa de nyid bshad pa ni gang gnyis pa dang zhes bya ba la sogs pa ste/ gzung ba dang 'dzin pa dang bral ba ni/ gnyis pa dang rnam par dag pa ste spangs pa'o/ /mthong ba'i lam mthong ba nyid kyis rang rig pa'i ye shes gnyis su med par 'dzin pa'ang spangs pas na gnyis ma yin pa rnam par dag pa'o//rten cing 'brel par 'byung ba yin pas/ rang bzhin med ces bya ba'i tshul gyis chos rnams bsten te mi 'byung bar mos pa zhes bya ste/ chos nyid bsten par byas nas sngar bshad pa ltar skye ba mi 'thad pa'i phyir ro//gang zhig rkyen las skyes pa de ma skyes/ /de la skyes pa'i rang bzhin yod ma yin/ /rkyen la rag las gang de stong pa ste/ /gang zhig stong nyid shes pa de bag yod/ /ces bya ba'i tshul gyis bsten te mi 'byung ba'o/ /gnas ni gzhi ste/ dngos po zhes bya ba'i don to/ / dngos po ni rdul phra rab 'dus par 'dod pas na ci skad bshad pa'i rigs pas de med par bstan pa ni/ phyogs tha dad pa'i rang bzhin yin la de'ang btsal na de mi rnyed pas med pa'o/ /ci skad bshad pa'i don goms pa'i 'bras bu nyid ni sangs rgyas nam mkha' dang 'dra bar mos zhes bya ba ste/lus med pas tha dad pa med pa'i phyir te/ mkha' ltar lus med pa yi phyir/ /sangs rgyas du ma nyid mi 'dod/ /ces bya bas tha dad pa la mi gnas pa'o/ /dbyibs rnam par dag pa ci lta bar/ ye shes rnam par dag pa'i dbang du byas nas/ sems dang zhes bya ba la sogs pa gsungs te/sems ni kun gzhi rnam par shes pa'o/ /yid ni nyon mongs pa can no/ /rnam par shes pa ni 'jug pa'i tshogs drug go/ /ye shes lhun gyis grub pa ni kun gzhi la sogs pa gnas yongs su gyur pa'i ngo bo nyid me long lta bu la sogs pa'i ye shes so/ / mdo kun las btus pa'i bshad pa lung gi tshad mas rab tu sbyar ba las chos zab mo la bzod pa lnga pa ste bzod pa'i pha rol tu phyin pa bshad zin to// //de ltar thos pa la sogs pa yongs su shes par byas pa rnams thob par bya ba'i phyir/ bsgoms pa las byung ba'i shes rab bskyed par bya ste/gang gi don du dris pa rnams/ /sangs rgyas sras po nga la nyon/ /yang dag sangs rgyas bstan pa 'di/ /thos pa tsam gyis mi 'grub ste/ /la la stobs med chu klung gis/ /mi 'dod bzhin du khyer ba dag /skom bzhin 'chi bar gyur pa dag /ma bsgoms chos kyang de bzhin no/ /zhes bya ba la sogs pa mang du gsungs pas na nges par bsgom par bya dgos par mngon no//de'i phyir dang po thob par bya ba'i yul bstan pa ni/ sngar bshad pa'i dbyings rnam par dag pa dang ye shes rnam par dag pa'i ngo bo ste/ 'phags pa byams pa'i zhal snga nas/ thub pa'i ngo bo nyid kyi sku/ / zag med chos ni rnam kun du/ /rnam par dag 'gyur gang yin pa/ /de yi rang bzhin mtshan nyid can/ /zhes bya ba la sogs pa gsungs pa lta bu'o/ /de la dbyings rnam par dag pa ni chos nyid kyi sku/ ye shes rnam par dag pa ni me long lta bu la sogs pa'i ye shes te/ thob par bya ba ni ye shes lnga kho nar zad pas/de'i phyir dbyings rnam par dag pa'i dbang du byas nas bsam du med pa zhes gsungs te/ bsam pa las 'das pas na bsam du med pa ste spros pa'i mtha' brgyad dang bral ba'i phyir ro/ /chos ni kun nas nyon mongs pa la sogs pa'o/ /ro gcig pas na tshul bzhin te gnas lugs zhes bya'o//sems dang ldan pa ni dngos por smra ba rnams rdzas la sogs par 'dod pa'o/ /ye shes rnam par dag pa'i dbang du byas nas/ dben pa'i mtshan nyid ces gsungs te/ dben pa ni rnam par rtog pa rnams kyis stong pa ste gnas yongs su gyur pa'i phyir ro//mi brtson pa ni ye shes tshol bar mi 'bad pa'o/ /lhag par byed pa ni log par 'bad pa ste mtshan mar bstan pa'o/ /nyams su len pa'i mtshan nyid bstan pa ni/ smras pa zhes bya ba la sogs pa gsungs pa ste/ chos sngar bshad pa'i dbyings dang ye shes rnam par dag pa thob par byed pa ni/lhag par byed pa la brtson pas ma yin no/ /gang gis she na/ smras pa zhes gsungs te/ rigs dang chos dang chos kyi sku ni gcig pa'i phyir/ sems can gyi dus na rigs zhes bya ba dang / bsgrub pa na chos zhes bya ba dang / grub pa na chos sku zhes brjod pa'i phyir ro//de'i phyir rang gis rang gi ye shes rtogs na zhes gsungs pa yin pas/ chos rnams zhes bya ba chos kyi sku yon tan dang bcas pa rnams 'grub pa'i rgyu yin no/ /de'i phyir gang la gnas nas shes rab stong pa nyid la bsgom pa zhes slar dris na/ gnas pa med par bsgom pa yin//zhes bstan pa yin la ci la gnas pa med ce na/ 'khor ba dang mya ngan las 'das pa ro gcig par rtogs pas/ srid pa dang zhi ba la mi gnas par bsgom mo zhes bshad pa yin no/ /de'i phyir lung las kyang / bcom ldan 'das shes rab ni tshu rol na yang mi gnas/pha rol na yang mi gnas/ dbus na yang mi gnas te/ dus gsum mnyam pa nyid du rtogs pa'i phyir zhes gsungs pa yin no/ /de la mi gnas pa ni rtog pa spangs pas mi rtog pa nyid do/ /'o na thob pa dang spangs pa med do zhe na/ chos nyid la ni 'dod pa kho na ste/ thob pa spangs pa ni rtog pa yin pa'i phyir la/rtog pa ni nyon mongs pa yin pa'i phyir spang bar bya ba kho na'o/ /kun rdzob tu ni mi 'gog pa ste zhing yongs su dag pa la sogs pa'i sbyor ba gsungs pa'i phyir ro/ /de lta bu chos nyid zab mo de gang gi yul yin zhe na/ 'phags pa'i ye shes kyi yul yin pas tshu rol pa'i shes pa'i yul ma yin par bstan pa ni/khyod 'di ltar shes par rung bar 'gyur ba de lta bur ston tam zhes dris pa ste/ mngon sum la sogs pa'i mtshan ma'i yul yin na ci ltar zab pa yin zhes rgol ba'o/ /lan ni don dam pa'i mngon sum dang rjes su dpag pa'i yul ma yin te/shin tu zab pas lung mi slu ba dang ldan pa kho nas rtogs par bya ba ni/ sangs rgyas kyi ye shes kyis kyang kun shes pa'am rnam par shes par mi nus so zhes bya ba ste/ kun shes par mi nus pa ni rtog pa dang bral ba'i shes pa ste mngon sum gyis kun du shes par mi nus pa'o/ /rnam par shes par mi nus pa ni/rtog pa dang bcas pa'i shes pa dngos po'i stobs kyis zhugs pa'i mtshan mas mi rtogs pa'o/ /tshad mas mi rtogs pa ci'i phyir zhes rgol ba la/ de'i yul ma yin pas zhes bstan pa ni chags pa med pa zhes bya ba la sogs pa ste/ dngos po ma yin pas chags pa ste thogs pa med ces bya ba'o//dngos po dang bral ba la sems mi 'jug pas rnam par rtog pa med pas te/ rtog pa ni spyod par byed pa'o/ /sems kyis bsam du med pa tha snyad mi 'jug pas brjod du med pa la sogs pa ste/ brjod pa ni gcig dang du ma la sogs pas brjod pa'o/ / bsnyad pa ni 'di dang gzhan pa la sogs pa'i tha snyad do/ /sbyor ba ni ming gis sgro 'dogs pa la sogs pa'o/ /tshig ni rjod par byed pa'i ngag go/ /bsam pa las 'das pas sems dang yid dang rnam par shes pa dang bral ba'o/ /rnam grangs gzhan yang me long lta bu la sogs pa'i ye shes de ni 'das pa la sogs pa'i dus gsum du ma chags shing thogs pa med pa nyid dang /de'ang nyes pa thams cad spangs pa rnam par rtog pa med cing / mi rtog pa mi rtog pa ste/ sngar bshad pa'i nyi ma ltar gzhan gyi don byed pa'o/ /de lta bu'i sangs rgyas de ni rten gyi dbang du byas nas nam mkha' ltar lus med la/sngon gyi rjes su 'brangs nas de ma yin pas/ gcig dang du mar brjod par mi bya bas brjod du med pa'o/ /byed pa'i dbang du byas nas gnas dang dbyibs dang kha dog dang 'khor dang chos ma nges pas bsnyad du med pa'o/ /dngos po ma yin pas sbyor ba med pa ste/ sbyor ba ni dngos po'i mtshan nyid yin pa'o/ /brjod pa las 'das pas brjod du med pa ni tshig med pa'o/ /rnam par shes pa las 'das pas ye shes kyi ngo bo nyid ni sems la sogs pa dang bral ba'o/ /rnam grangs gzhan yang ye shes ni ci lta ba la sogs pa mkhyen pa'o//de nyid ni nyon mongs pa spangs pas chags pa med pa rnam par rtog pa med pa ste/ de la chags pa ni 'dod chags so/ /rnam par rtog pa ni gti mug ste sgyu 'phrul dra ba las kyang / rnam par rtog pa ma rig pa/ /chen pos 'khor ba'i mtsho chen du/ /khyer bas mi rtog rnam bsgoms na//rtog med 'gyur te nam mkha' bzhin/ /zhes gsungs pa lta bu'o/ /nyon mongs pa spangs pa ni 'dus ma byas pa yin pas rgyu rkyen dang bral yang / nyan thos pa dag 'dod pa lta bur mi shi ba ltar gyur pa bzhin ma yin pas/ bya ba 'jug par yang snang bas brjod du med pa'o//byed pa ni 'gal ba phrugs su ston pas/ me'i dbus su pad+ma dang / /rgya mtshor me chen 'bar ba ston/ /lus gcig dag gis kun du khyab/ /ri rab rdul phran nang du 'dzud/ /ces bya ba lta bur ston pas na/ nges pa'i tshig gis gzhan la bsnyad du med pa'o/ /de lta bu de lus kyi 'du byed pas rtogs pa ma yin pas sbyor ba med pa'o//tshig gi brjod du med pas tshig med pa'o/ /sems mi 'jug pas sems la sogs pa dang bral ba'o/ /rnam grangs gzhan yang chags pa med pa ni/ rnam par rtog pa med pa'i phyir ro zhes bya ba nas tshig med pa sems dang yid dang rnam par shes pa dang bral ba'i phyir zhes kyang bshad par bya'o//rnam grangs gzhan yang dbyings rnam par dag pa ni/ chags pa med pas na tshig med pa'i bar te/ chags pa ni dngos por zhen pa'o/ /rnam par rtog pa ni spyi dang khyad par du sems pa'o/ /sems pa'i mngon rtags ni brjod pa la sogs pa ste/spyir brjod du med pa ni brjod du med pa'o/ /bye brag tu brjod du med pas na bsnyad du med pa'o/ /sbyor ba ni byed pa ste sgro 'dogs pa'o/ /de dag dang bral bas med pa'o/ /mya ngan las 'das pas tshig tu brjod du med pa ni tshig med pa'o/ /ye shes rnam par dag pa ni sems la sogs pa dang bral ba ste me long lta bu la sogs pa'i ye shes ni kun gzhi la sogs pa dang bral ba ste gnas yongs su gyur pa'o//rnam grangs gzhan yang ngo bo nyid kyi dbang du byas nas chags pa med pa'o/ /rnam par rtog pa med pa'o/ /mtshan nyid kyi dbang du byas nas brjod du med pa'o//byed pa'i dbang du byas nas sbyor ba med pa'i tshig med pa'o/ /rnam grangs kyi dbang du byas nas sems dang yid dang rnam par shes pa dang bral ba'o/ /de la ngo bo nyid ni nyon mongs pa dang shes bya'i sgrib pa dang bral ba ste/ nyon mongs pa dang bral bas chags pa med pa'o//shes bya'i sgrib pa dang bral bas rtogs pa med pa'o/ /mtshan nyid med pa mtshan nyid yin pas brjod pa dang bsnyad pa med pa'o/ /mi rtog pa dang dus thams cad pa nyid kyis na sbyor ba med pa ste/ dgongs pa nye bar gzhag pa gsum dang ldan pas rjes su chags pa dang khong khro bsal ba'o//ngas yi ge gcig kyang ma brjod ces gsungs kyang gdul bya la chos snang bas tshig med pa'o/ /me long lta bu dang mnyam pa nyid dang so sor rtog pa dang bya ba grub pa'i ye shes rnams ni/ sems te kun gzhi la sogs pa gnas su dag pa'i rnam grangs yin no/ / 'o na rnal 'byor gyi mngon sum nyid thabs gang gis sgrub ce na/ gal te zhes rgol ba la/ yongs su 'dzin pa'i thabs kyis ston zhes pas so zhes bya ba ni yi ge rnams kyis zhes bya ba'o/ /de ltar sgro btags nas ston pa ma yin no/ /thabs gzhan med pas thabs te zhes bya ba ste sgro btags nas zhes bya'o//de lta bu'i zab mo'i ye shes de thabs kyis bsgrub par bya ba'i rnam pa gang gis sgrub ce na/ rnam pa ji ltar yid la bya ba bstan pa ni/ lha'i bu zhes gsungs te/ bsgom pa'i zhes pas so zhes bya bar dgongs so/ /rgyu tshogs pa la 'bras bu skye bas ting nge 'dzin 'grub pa'i rgyu ting nge 'dzin gyi tshogs la gnas pa bstan pa ni gtsub shing gi dpes bstan te/dper na shing skam pa dang / gus pa dang / yun ring ba dang / bar ma chad par gtsubs pa las me 'byung gi /yan lag gang yang rung ba zhig ma tshang ba la ma yin pa ltar ting nge 'dzin 'grub pa'ang de dang 'dra'o zhes bstan pa'i phyir sdom pa dang yo byad bsnyungs pa'i gtam zhes gsungs te/lus dang longs spyod la chags pa ni shing rlan dang bcas pa lta bu ni yin pas lus la chags pa spang ngo zhes bstan pa ni sdom pa'i gtam zhes gsungs te/ tshul khrims la gnas ting nge 'dzin thob ste//ting nge 'dzin thob nas shes rab sgom par byed ces gsungs pa'i phyir ro/ /longs spyod la chags pa spang bar bstan pa ni/ yo byad bsnyungs pa'i gtam zhes gsungs te/ zang zing ngan pa la zhen pa'i/ /g.yeng bas ting 'dzin 'grub pa yin/ /'grub pa'ang nyams par 'gyur bas na//yo byad bsnyungs par ngas bshad do/ /zhes bya ba'i tshul gyis longs spyod la ma chags pa bsgom par bya ste/ mdor na lus dang longs spyod la ma chags pas zhi gnas dang lhag mthong 'grub par 'gyur ro zhes bya bar dgongs so/ /de la le lo med pas gus pa'o/ / 'bras bu mthar mi stong pas na yun ring ba'o/ /go skabs mi 'byin pas bar ma chad pa'o/ /de la ma chags pa ni ting nge 'dzin 'grub pa'i tshogs so/ /gus pa la sogs pa ni gnas pa'i tshogs so/ /bar ma chad pa ni 'phel ba'i tshogs te mdor na ting nge 'dzin gyi tshogs ji snyed bshad pa de dag thams cad kyang 'dir 'dus par shes par bya'o//mdo kun las btus pa'i bshad pa lung gi tshad mas rab tu sbyar ba las ting nge 'dzin gyi tshogs kyi le'u ste lnga pa rdzogs so// //de ltar ting nge 'dzin gyi tshogs la gnas pas dmigs pa la sems gtad par bya ste/ 'phags pa thogs med kyi dmigs pa la sems gtad par bya ba'i thabs rgya cher ni/ rnal 'byor spyod pa'i sa la sogs par zhib tu gsungs pa yin pas 'dir ha cang spros par mi bya'o/ /'phags pa klu sgrub kyis ji ltar gsungs pa de bzhin du rig par bya'o/ /'dir ni 'phags pa de dag gis gsungs pa mdor brjod par bya'o//re zhig dmigs pa'i yul ni gang zag dang chos zhes bya ba'o/ /de la gang zag ni ril por 'dzin pa dang rtag pa dang bde ba dang bdag dang gtsang mar 'dzin pa'o/ /chos ni phung po dang khams dang skye mched la sogs pa'o/ /de dag la ji ltar ril por 'dzin pa nas/chos kyi bdag gi bar du med par bsgom pas gsal ba dang / nges pa dang / mi rtog pa dang / las su rung ba dang / rtse gcig pa ni thob pa'i rnam pa ste zhi gnas kyi lam mo/ /rgya cher ni 'phags pa byams pa dang / 'phags pa thogs med kyis gsal bar gsungs pa kho na'o//zhi gnas kyi nyes pa la sogs pa kho na'ang de bzhin du rig par bya'o/ /spong ba'i 'du byed kyang de kho na ltar shes par bya'o/ /de ltar sems yongs su gzung ba dang yul gang la zhe na de bsgom pa ni/ pha rol tu phyin pa la sbyor ba'i gtam zhes bya ba la sogs pa gsungs te/spyod pa la pha rol tu phyin pa drug dang / zhi gnas dang lhag mthong gis bsdus pa'i dran pa nye bar gzhag pa la sogs pa ni tshul bzhin yin pas so/ /de dag kyang lam gyi gnas skabs su yul thams cad du thams cad pa yin pas pha rol tu phyin pa dang / byang chub kyi phyogs zhes gnyis su smos pa yin no//mdo kun las btus pa'i bshad pa lung gi tshad mas sbyar ba las bsam gtan gyi pha rol tu phyin pa bshad zin to// //de ltar byang chub kyi sems la sogs pa bsod nams kyi tshogs bskyed nas/ de dag kyang ye shes kyi tshogs su 'gyur bar bya ba'i phyir shes rab kyi pha rol tu phyin pa'i rang bzhin dgos pa de dag med pa'i ngo bo nyid des mdor bstan pa ni/lha'i bu zhes gsungs te shes rab ni don dam pa shes pa'o zhes 'phags pa thogs med kyis gsungs pa dang / 'phags pa klu sgrub kyis kyang / zab pa shes pas shes rab bo//zhes gsungs pa de bshad pa ni 'dus byas ma yin pas skye ba dang zhes bya ba la sogs pa ste/ 'dus byas chos ni skye ba dang / /rga dang gnas dang mi rtag nyid/ /ces gsungs pa'i phyir ro/ /gnyen po dang mi mthun pa'i chos dang bral bas 'dren pa dang sel ba zhes gsungs so//spang ba dang blang ba'i mtshan nyid dang bral bas nyon mongs pa dang rnam par byang ba zhes gsungs pa yin no/ /nyes dmigs dang phan yon gyi dbang du byas nas/ yid 'byung ba mngon par dga' ba ma yin pa zhes gsungs pa yin no/ /sdug bsngal dang kun 'byung gi dbang du byas nas shes pa dang spang bar bya ba zhes gsungs pa yin no//'gog pa dang lam gyi dbang du byas nas mngon sum du bya ba dang bsgom par bya ba zhes gsungs pa yin no/ /mngon par rtogs pa'i dbang du byas nas thob pa dang mngon par rtogs pa zhes gsungs te/ thob pa ni rnyed pa dang ldan pa'o//mngon par rtogs pa ni khong du chud pa'o/ /de la thob pa ni 'dis sa dang po la'o/ /mngon par rtogs pa ni lhag ma dgu la ste mnyam par gzhag pa'i dus su chos nyid la dmigs pa ma yin zhes bya'o/ /de la chos nyid la dmigs pas na dag pa'o/ /'bras bu chos kyi sku thob par byed pas snying po yod pa'o//de nyid rgyas par bshad pa'i phyir/ chos thams cad sems med cing zhes bya ba la sogs pa gsungs te/ thob pa don dam pa mya ngan las 'das pa'i rang bzhin bstan pa ni/ sngar bstan pa de nyid tha snyad gzhan gyis dmigs su med cing zhes bya ba la sogs pa gsungs te/chos ni gzhal bar bya ba'i mtshan nyid gzugs la sogs pa'o/ /ngo bo nyid kyis stong pas na dmigs su med pa'o/ /sems la sogs pa dang bral bas na sems med pa'o/ /de gang zhe na/ dri ba sngon du btang nas dbyings gang sems ma mchis pa zhes bya ba la sogs pa gsungs te/dbyings ni khams te rgyu'i don to/ /gang bskyed ce na/ mya ngan las 'das pa'i rang bzhin ni sems ma mchis pa'o/ /tshad med pas na sems 'gro ba ma lags pa ste dmigs pa ni rgyu chung ba'i phyir tshad yod pa'o/ /dpag pa ni gzhal ba ste tshad ma'i yul du bya ba'o/ /bsam pa ni tha snyad 'dogs pa ste de dag dang bral bas ma lags pa'o//'o na dbyings gang zhes dris pa'i mtshan nyid bstan gyi/ bskyed bya ma bstan na ci'i phyir 'bras bu'i ming gis gdags she na/ sems nyid ces gsungs te/ 'khor ba'i rgyu ni gang yin pa/ /de nyid sbyang bar byas pa las/ / dag pa de ni mya ngan 'das/ /chos kyi sku yang de nyid do/ /zhes sngar bshad pa ltar rgyu yang de nyid las 'bras bu yang de nyid do zhes bstan to/ /de ni 'thad pa ma yin te/ sems can dang sangs rgyas dag tha mi dad par 'gyur ro zhes de ci'i phyir zhe na/ rgol ba la lan ni chos nyid du ni 'dod pa kho na yin la/kun rdzob tu ni dbul mo'i khyim gyi rin po che ltar ma bsgrubs pas/ ma rtogs par zad pa zhes bya ba ni sems la zhes bya ba la sogs pa'o/ /de la sems ni 'khor ba pa'i sems so/ /sems med pa ma yin pa ni rnam par byang ba'i sems te kun gzhi la sogs pa yongs su gyur pa rnams so//'o na tha mi dad pa nyid kyis thams cad grol ba 'am ma grol ba nyid du ji ltar mi 'gyur zhe na/ sems nyid sems ma lags pa zhes gsungs te/ mi rtag pa nyid dang cig car mi skye ba nyid kyis da ltar gyi sems ni ma 'ongs pa'i sems nyid ma yin zhes bya ste/ kun nas nyon mongs pa dang rnam par byang ba ni mtshan nyid mi 'dra ba'i phyir ro//'o na de nyid ci ltar 'thad ce na ma yin te/ 'khrul pa dang ma 'khrul pa dbye ba tha dad kyis sems kyi chos nyid tha dad pa med do zhes sems ni ngo bo nyid kyis ma mchis pa'o zhes gsungs te/ kun nas nyon mongs pa ni 'khrul pa yin pas ngo bo nyid kyis te rigs pas ma grub pa'o//'o na rnam par byang ba ci ltar 'grub ce na/ sems ci lta ba bzhin pas zhes gsungs te/ gzung ba dang 'dzin pa'i mtshan nyid kyis nyon mongs pa dang / shes bya'i sgrib pa dang bral ba nyid rang rig pa'i sems 'od gsal ba ni ji lta ba bzhin no/ / sems ma mchis pa ni gzung ba dang 'dzin pa nyid do/ /sems lags pa ni de dang bral ba'i rang rig pa'o/ /de nyid tshu rol mthong ba pas mi shes pas na bsam gyis mi khyab pa'i dbyings te/ mdor na mya ngan las 'das pa zhes bya ba ni/ rang rig pa 'od gsal ba nyid rtogs pa yin par shes rab kyis dpyod pa'o//de thob par zhes pa gang zhe na/ thob byed lam gyi mtshan nyid bstan pa ni yang mdo de nyid las zhes mtshams sbyor te/ sngar bstan pa'i mya ngan las 'das pa de ni dmigs pa med pa nyid bsgoms pas 'thob bo zhes bya ba'o/ /de'i phyir spong ba'i tshul gyis slar dri ba ni/khyed kyis zhes gsungs te/ sems can la sogs par dmigs pa ni 'ching ba yin na ci ltar de'i don du zhugs zhes rgol ba'o/ /lan ni don dam pa'i klan ka la kun rdzob kyis lan gdab pa ni dmigs pa la brten nas zhes bya ba shugs kyis 'phangs nas/ 'dir khas len pa'i tshul gyis gsol ba zhes gsungs pa yin te/mi dmigs pa dang 'gal zhes bya ba ni/ shugs kyis phyogs snga ma yin te/ sems can gyi don du zhugs te sngar bshad pa ltar sems bskyed nas/ de mi dmigs na ci ltar don byed ces sems pa'o/ /lan ni don dam pa'i sgo nas bri ba 'am zhes pa la sogs pas gsungs te/bcom ldan 'das nyid kyis dang po sems bskyed nas tha ma mdzad pa rdzogs kyi bar du sems can bsgral yang 'khor ba la bri ba'am mya ngan las 'das pa la gang ba ma gzigs pa ltar zhes bya ba'o/ /rnam grangs gzhan yang chos nyid la zad pa med pas zhes kyang bshad par bya'o//kun rdzob tu so so'i rgyud ni der 'gyur gyi spyi ni ma yin no zhes kyang bshad par bya'o/ /de'i phyir mi zad pa'i dpe ni/ nam mkha' zhes gsungs te gnyen po med pa'i phyir ro/ /dpe sngar bshad pa ltar stong pa nyid du thams cad 'dus pas chos thams cad ni byang chub pa'o zhes gsungs te/chu khams gser dang nam mkha' rnams/ /dag pa bzhin du dag par 'dod/ /zhugs pa dang sbyar ba ni rnam grangs su rig par bya'o/ /de ltar khas len pas mjug sdud pa ni de'i slad du zhes gsungs pa'o/ /'o na sems can gyi don du zhugs pa nyid nyams so zhe na lan ni sems can zhig mchis na ni zhes gsungs te/chos nyid du na med pa'i phyir zhes bya ba'o/ /de nyid ldog pa'i sgo nas 'gyur na zhes bya ba'o/ /rjes su 'gro ba'i sgo nas ma mchis pas so zhes gsungs so/ /rig pa gang gis she na/ de ltar na rten cing 'brel par 'byung ba dang mi 'gal zhes gsungs te ma skyes pa'i phyir zhes bya ba'o//chos can med pa la chos nyid mi 'thad pas ma mchis pas ni zhes bya ba ste med pa la thar pa dang bcings pa mi 'thad ces bya'o/ /sngar bshad pa'i rten cing 'brel par 'byung ba dang ci ltar mi 'gal zhe na/ngo bo nyid ma mchis pa'o zhes bya ba la sogs pa la 'jug go zhes gzhan dag zer ro/ /la la ni gang yod pa de la khyad par gyi chos 'thad de/ med pa la khyad par med pas mi 'thad pa ni rigs la sems can yang med pas zhes bya ba ni/ sngar bshad pa'i rten cing 'brel par 'byung ba ste/ rgyu rkyen gyi 'thad pa dang mi 'gal ba ni/ 'o na skye ba la sogs pa dmigs pas so zhe na/ don dam par zhes pa kha bskang ba ni ma mchis pa'o zhes bya ba la sogs pa'o/ /don dam par skye ba la sogs pa med kyang / kun rdzob ni ji ltar gnas so zhes bstan pa ni rten nas 'byung ba'i don to zhes bya ba'o//de lta bas na shes rab dang ldan pa ni med pa la sgro 'dogs pa dang yod pa la skur pa gang yang mi byed do zhes bya ba ni bcom ldan 'das zhes gsungs te/ shes bya rnams ni 'gal ba'i don du snang bas na rigs pas brtags na med pa nyid 'khrul pa'i shes pa la snang bas na med pa la snang ba ni ma mchis pa'i don ni zhes bya ba'o//med pa la snang bas 'khrul pa yin pas na/ yang dag par mi 'dzin pa ni mkhas pa rnams ni zhes bya ba ste sgyu ma byed pa de'i mtshan nyid shes pa lta bu'o/ /de'i phyir/ brten nas skyes pa rang gi dngos ma skyes/ /zhes 'thad par 'gyur ro//de ltar rtogs pa la phan yon ci yod ce na/ phan yon ni gang la rnam par mi rtog pa de la zhes gsungs so/ /'das pa de rnams kyi dpe gang zhe na dper na zhes gsungs te/ med pa la yod par lta ba ni log par lta ba yin no zhes bya ba'o/ /'dis ji ltar bstan ce na mya ngan las 'das pa thob par byed pa ni thabs kyis zin pa'i stong pa nyid bsgom pa yin la/der 'phags pa rnams gshegs pas na lam zhes bya ba'o zhes bshad do/ /de lta bu'i lam de gang gis rtogs she na spyod pa'i bdag nyid kyis so zhes shes rab kyi rang bzhin bstan pa ni/ yang mdo de nyid las zhes gsungs te ngo bo nyid dang byed pa dang phan yon yang rig par bya'o//de la shes rab kyi ngo bo nyid ni rab tu rnam par byed pa ste/ ci ltar 'byed ce na gsal bar byed pa ste ma mthong ba rtogs par byed pa'o/ /de'i phyir dri ba sngon du song ba'i lam ni/ so sor rtog pa gang chos la yang tha dad pa zer ram/mi bgyid pa gcig tu yang mi bgyid de zhes gsungs te don dam par chos rnams ro gcig par rtogs pas tha dad pa mi byed pa'o/ /kun rdzob sna tshogs pas gcig tu mi byed pa ste de la tha dad pa ni dngos por sgro 'dogs pa'o/ /gcig pa ni med par skur pa nyid de gang la de gnyis med par shes pa ni yongs su grub pa'i ngo bo nyid mi 'gyur ba dang phyin ci ma log par rtogs pa'o//'o na shes rab nyid ni ci 'dra zhe na/ yang dag par so sor rtog pa ma mchis pa'i tshig bla dgas zhes gsungs te/ shing gnyis drud pa'i mes shing nyid tshig pa ltar spyod pa nyid kyis dpyad na de nyid kyang mi dmigs so zhes bya ste/'di ni chos rnam par 'byed pa'i ngo bo nyid do/ /de'i byed pa bstan pa ni so sor rtog pa la brten te zhes gsungs te/ ci ltar 'dzin pa de ltar kun nas nyon mongs bstan/ /bdag dang bdag gir mi dmigs rnam par byang bas gsungs//de la gang yang nyon mongs rnam dag 'gyur med par/ /byang chub sems dpa' shes rab pha rol phyin 'di rtogs/ /zhes tha dad du 'dzin pa spong ngo zhes bstan pa'o/ /'o na kun nas nyon mongs pa dang rnam par byang bar gzhag pa dang 'gal zhes de ci'i phyir zhe na zhes rtog pa la/ lan ni rnam par gzhag pa'i shes pa la mi dmigs pa ni chos nyid do zhes don dam pas lan gdab pa ni rjes su mi mthong zhes gsungs so/ /chos ni kun nas nyon mongs pa la sogs pa'o/ /'gyur ba ni byed pa nyid de bcings pa dang grol ba zhes sbyar ro/ /shes rab kyis 'jal ba'i phan yon ni so sor rtog pa la brten nas rigs kyi bu 'am zhes bya ba la sogs pa gsungs te/'khor ba dang mya ngan las 'das pa mnyam par rtogs par 'gyur ro zhes bya ba ste/ rnam par rtog pa thams cad zad pa'i grol ba thob bo zhes bshad pa yin no/ /gzung ba'i dbang du byas nas chos gang la yang zhes gsungs so//'dzin pa'i dbang du byas nas gang gis zhes gsungs so/ /de yang mnyam par gzhag pa'i dbang du byas nas 'dzin pa yang zhes gsungs so/ /de lta bu'i shes rab des yul gang la 'jal zhe na de'i dmigs pa bstan pa ni/ nad gzhi'i de gang zhe na zhes gsungs te/nad ni nyon mongs pa'i ming gi rnam grangs so/ /gzhi ni de bskyed pa'i yul lo/ /lhag par dmigs pa zhes bya ba ni med pa la yod par zhen pa'i ming ste lhag pa ni sgro 'dogs pa'i tha tshig go/ /yul nyid gang zhe na khams gsum zhes bya ste/ 'dod pa la sogs pa la zhen ces bya'o//de ltar kun du 'jug pa'i dmigs pa bstan nas ldog pa'i dmigs pa ni/ gzhi yongs su shes pa zhes bya ste/ gang zag dang chos su lta ba spong ba ni nyon mongs pa spangs pas 'khor ba las ldog pa'o/ /lhag par dmigs pa ni sgro mi 'dogs pa'o/ /ldog pa'i yul bstan pa ni 'di lta ste bdag tu lta ba dang zhes bya ba la sogs te/bdag yod na ni gzhan du shes/ /bdag gzhan cha la 'dzin dang sdang / /'di dag dang ni kun 'brel las/ /nyes pa thams cad 'byung ba yin/ /zhes bya ba'i tshul gyis so/ /de ltar gang zag tu lta ba ldog pa'i yul du bstan nas chos su lta ba yang spang dgos pas gzugs nyid ces gsungs te/phung po lnga la sogs pa'i chos nyid mi dmigs par sgro mi 'dogs pa ni rang bzhin stong pa'o/ /snang ba tsam du mi 'gog pas skur pa mi 'debs pa ni bshig pas stong pa ma yin pa ste/ yod pa 'jig pa ni log par lta ba yin pa'i phyir ro//chos can la chos nyid tha dad pa ma yin pas nyid ces gsungs so/ /de ltar rtogs pa'i phan yon ni gnyis su med par 'jug go zhes bya ba ste gnyis su med pa'i ye shes thob bo zhes bya ba'o/ /de la shes pa ni thos pa dang bsam pa'i shes rab kyis so/ /rig pa ni bsgoms pa las byung ba'i shes rab kyis so//de ltar chos thams cad gtan la phab nas de bsgom pa'i thabs bstan pa ni shes rab kyi pha rol tu phyin pa las zhes gsungs te dri ba sngon du btang bas lan bstan pa ni/ gzugs las mi spyod ces bya ba la sogs pa gsungs te/ mnyam par bzhag pa la mi rtog pa'i phyir chos can mi dmigs pa'o//chos kyi khyad par ni mtshan ma ste sngon po dang ring po la sogs pa'o/ /bye brag ni rtag pa la sogs pa ste/ mtha' gnyis dang bral bar bstan pa ni theg pa chen po gang du'ang mi gnas pa'i phyir dang / byang chub sems dpa'i mthong ba'i lam ni mnyam par gzhag la skad cig ma gcig tu bstan pa'i phyir ro//de la rtag pa ma yin pa la sogs pa ni/ bden pa bzhi'i rnam pa rnams te skad cig tu 'jig pa dang ldan par rtag par ma yin no/ /'dra bar 'byung bas mi rtag pa ma yin no/ /yang na kun du brtags pa dang gzhan gyi dbang ni med pa dang 'gyur bas rtag pa ma yin no//chos nyid kyis gzugs ni snga ma po med pas mi rtag pa ma yin pa'o/ /yang na kun nas nyon mongs pa'i gzugs ni rtag pa ma yin la mya ngan las 'das pa ni mi rtag par ma yin pa'o/ /lhag ma rnams kyang ji ltar rigs par de kho na bzhin brjod par bya'o// de ltar mi spyod na ji ltar spyod ces de ci'i phyir zhe na zhes rgol ba la/ byang chub sems dpa' rnams ni mtha' gnyis dang bral bar bsgom dgos la des na mi gnas zhes bstan pa ni/ gzugs kyi stong pa nyid spros pa dang bral ba de ni dngos por lta ba sgro 'dogs pa'i ngo bo ma yin la/ yod pa'i gzugs snang ba la med par skur pa mi 'debs pas mtha' gnyis dang bral ba ni/gzugs kyis zhes bya ba la sogs pa'o/ /de nyid bsdu ba ni gzugs nyid ces bya ba la sogs pa ste/ mtha' gnyis spong ba'i dgos par bstan to/ /de ltar mnyam par gzhag pa la mi rtog pa bsgom pa ni langs pa'i tshe sgyu ma dang smig rgyu la sogs pa bsgom pa ste/rnam par mi rtog pa la 'jug pa las 'jig rten las 'das pa'i ye shes kyis chos thams cad nam mkha'i dkyil lta bur mthong la/ rjes las thob pa ni sgyu ma la sogs kyi ming lta bur yongs su shes so zhes gsungs pas de'i phyir snang ba yang ngo bo med pa dang /dngos po med kyang snang ba'i phyir de spyod do zhes kyang khas mi len ces bya ba la sogs pa ste dngos por snang ba tsam gyis mi spyod pa khas mi len la snang ba rang bzhin dang bral bas spyod par khas mi len pa'o/ /de'i phyir chos nyid la ltos te 'og mar bshad pa 'khrul pa la ltos te gong mar bshad pa'o//sgrub pa dang dgag pa'i phung po gsum po yang de kho na ltar yin te/ spyod pa dang mi spyod pa'i sgrub pa'i phung po dang po ni gong ma dang 'og mar rim pa ston la/ dgag pa gnyis par ni rim pa las bzlog par bstan te/ de'i rgyu mtshan ni dngos po med pa ste chos nyid la gzhag go zhes bya'o//des na sgyu ma dang chos mthun te med kyang snang ba zhes bya'o/ /de ltar zab mo bsgom pa'i thabs bstan nas/ de nyid kyi thabs la mkhas pa bstan pa ni yang zhes gsungs te/ bcos ma dang bcos ma ma yin pa la mkhas par bya ba'i dmigs pa bstan pa ni/ gol ba'i lam las bzlog pa'i phyir ro/ /de la spang bya la mkhas par bya ba'i phyir 'di la zhes gsungs te/ nang gi mu stegs pa 'ga' zhig med pa'i dngos po rdul phra rab 'byar ba la sogs pa 'dod cing / de dag skad cig la sogs pas mi rtag par lta ba zhes bya ba'o/ /blang bya la mkhas pa ni de la zhes bya ba la sogs pa ste/gtan tshigs bkod pa ni gzugs ni zhes bya ba la sogs pa'o/ /de'i don ni kun brtags la sogs pa mtshan nyid la sogs pa ngo bo nyid med par bsgom pa ni bsgom pa dam pa'o zhes bshad par bya'o/ /des kyang bden pa zung du 'jug par bya dgos pas na yang zhes gsungs te/shin tu ma 'da' zhes dang rig tsam yang med par lta ba ni skur pa yin pas so zhes bya ba'o/ /ma gnas shig ces bya ba ni gzung ba dang 'dzin par ma zhe na cig ces bya ba'o/ /de'i rgyu mtshan ni 'di ltar gsungs te chos thams cad ni brtags pa dang / gzhan gyi dbang dang yongs su grub pa'o//ngo bo nyid kyis stong pa nyid ni mtshan nyid dang skye ba dang don dam par ngo bo nyid med pa ste rgyal ba byams pa'i zhal snga nas/ ngo bo nyid ni rnam gsum gyi/ /ngo bo nyid ni rnam gsum la/ /dgongs nas chos rnams thams cad ni/ /rang bzhin med pa nyid du bstan/ /ces gsungs so//dngos po med pa ni/ chos nyid de kun brtags la sogs dben pas na/ rgyal ba byams pa'i zhal snga nas 'byung la rab tu byed pa sum cu pa las kyang / grub ni de dang snga ma'o/ /rtag tu med par 'gyur de nyid/ /ces gsungs la de bzhin du gnyis po med pa'i phyir bshad do zhes kyang gsungs so//shes rab ni gnyis su med pa'i ye shes te ye shes ni mnyam par gzhag pa'i dus su chos nyid la dmigs pas na bor ba dang zhi ba'i dbang du byas nas dor ba dang blang ba med pa'o/ /kun nas nyon mongs pa dang rnam par byang ba'i dbang du byas nas dgag pa dang bskyed par bya ba med pa ste/'phags pa byams pas shes rab ni don dam pa la dmigs pa'o zhes gsungs so/ /de ltar thabs la mkhas pa bstan nas/ da ni zab mo'i don de nyid la 'ga' zhig rtsod par rtsom pa ni/ ji tsam gyis na zhes bya ba la sogs pa ste/ dmigs pa dang / lam dang / 'bras bu dang / thabs dang /'bras bu'i bye brag la sogs par rtogs pa yin te/ de la dmigs pa ni gnyis te spang bar bya ba'i dmigs pa dang / blang bar bya ba'i dmigs pa la log par rtogs pa spang ba ste/ dang po'i dbang du byas nas sngar bcos ma nyid du bstan pas gzugs nyid kyang med na rtag pa lta ga yod ces bstan pas med pa yin na 'khrul pa'i gzhi med pa'i phyir/de mi 'thad par brtsad pa ni/ ci tsam gyis na dmigs pa lags/ /zhes bya ba ste/ tho yor med na gang la 'khrul pa'i yul med pa dang 'dra zhes bsams pa'o/ /de bzhin du med pa nyid la ci ltar dmigs zhes bya ba'o//dmigs pa'i mngon du song ba las bkag pa ni mi dmigs pa yin na med pa la chad pa nyid ji ltar gzhag pa dang 'dra bar chos can nyid med pa'i khyad par gyi chos sems pa ni ngal ba kho na yin la gzhan du na snga ma don med pa kho na'o zhe na/ lan ni ji tsam du zhes gsungs te/ tho yor med na skyes bur 'khrul pa'am skra shad 'dzings pa rtogs pa lta bur med pa la yod par zhen pas dmigs pa yin la/de bsal ba ni mi dmigs pa yin pas gzhan du na bden pa nyid la log par byas par 'gyur ba'i phyir ro/ /de ni ji srid 'khrul pa ma spangs kyi bar du gnyis su dmigs pas/ de lag pa yin la de spangs pa'i tshe gnyis su snang ba'i 'khrul pa ldog pas gnyis pa zhes bya ba la sogs pa gsungs so/ /de nyid bshad pa ni mig dang zhes bya ba la sogs pa'o/ /de'i phyir mi dmigs pa ni rnam par byang ba'i ngo bo nyid yin no zhes bshad par bya'o/ /'o na dmigs pa mtha' dag bkag pas na gal te rnam par byang ba mi dmigs pas ni ngal ba tsam du zad do//kun nas nyon mongs pa mi dmigs na ni 'bad pa med par grol ba'i phyir la/ gal te spangs pa'i phyir nyon mongs pa mi dmigs so zhe na ni/ spang bya ma dmigs pa'i phyir ci ltar gnyen po'ang mi dmigs/ gnyen po mi dmigs na/spang bya ci ltar dmigs/ de'i phyir spang bya dngos por gyur pa'am/ gnyen po med par thal ba ni ci zhes rgol ba'o/ /de ni ma yin te/ 'khrul pa la 'khrul par shes nas sun phyung ba goms pa las rab kyi mthar thug pa'i 'bras bu'i dus na bsam gyis mi khyab pa'i rnam par thar pa thob cing /de'ang dmigs pa la sogs par rtogs pa goms pa las yin no zhes bstan pa ni/ rab 'byor zhes gsungs te/ dmigs pa dang ni mi dmigs pa mnyam pa zhes bya ba ni/ dmigs pa med pa la bya ste/ dmigs pa ni thar pa'i rgyu ma yin no/ /lam la brtsad pa ni yang der zhes gsungs te/bden pa gnyis ni lam du 'dod pas/ gal te don dam par 'bras bu thob na ni med pa rgyur 'gyur ba'am/ kun rdzob don dam par 'gyur bas don dam pa la brten nas sam zhes gsungs so/ /'on te kun rdzob las so zhe na ni 'khrul pa rgyur gyur pas/ 'khrul pa dang ma 'khrul pa'i bye brag med pa'am chos nyid la rag ma las par gyur pas/de las bzlog pas sam zhes gsungs so/ /lan ni ma yin no zhes gsungs te mtha' rnam par spangs pas so zhes bya ba'o/ /'o na ji ltar 'tshang rgya bar 'gyur te/ thabs med par rgol ba ni 'o na zhes bya ba'o/ /lan ni 'khor ba dang zhi ba ro gcig par rtogs pa yin gyi tha dad pa ni ma yin no zhes bstan pa ni/de yang zhes gsungs te/ 'dus byas ni kun rdzob ste 'khor ba'o/ /'dus ma byas pa ni don dam pa ste mya ngan las 'das pa'o/ /mi gnas pa ni rnam par rtog pa zad pa'i phyir ram ro gcig par rtogs pas sam shes rab dang snying rje dbang bskur ba'i phyir ro//de'i rgyu mtshan bstan pa ni dngos po med pas zhes bya ba la sogs pa gsungs te/ rgyu med pas 'bras bu med par 'grub na ni med par rgyu 'bras bur 'gyur ba'i phyir ro/ /dngos pos dngos po med par 'grub na ni 'gal ba gnas par 'gyur te/yod pa dang med pa gnyis phan tshun spangs pa'i phyir ro/ /dngos po med pas dngos por 'grub na ni med pa rgyur 'gyur ba'i phyir ro/ /dngos po dngos por 'grub na ni dus mnyam pa zhig gam tha dad pa zhig /dus mnyam pa ni rgyu 'bras bu 'thad pa ma yin la/ tha dad pa ni brad pa med pa'i phyir ro//'o na thob pa dang rtogs pa gang zhig ce na zhes 'bras bu la brtsad pa ni 'o na zhes bya ba'o/ /lan ni spros pa'i mtha' dang bral ba rtag pa 'bras bu yin pas spros pa la der mi 'jog pa ni gang la zhes gsungs te/ spros pa med pa ni spros pa zad pa'o/ /ma spros pa ni zad pa'i khyad par te chos nyid 'ba' zhig pa'o//spros pa zad pa ni khyad par gnyis pa rtogs pa'i dag pa'o/ /'o na mtha' gnyis gang zhe na/ gzugs rtag ces bya ba'am zhes bya ba la sogs pa'o/ /da ni 'thad pa ma yin no zhes thabs kyis ngo bo nyid la brtsad pa ni stong pa nyid 'ba' zhig la gnas na/theg pa 'og mar lhung ngo zhes lan ni/ 'di lta ste dper na zhes bya ba la sogs pa ste goms shing mngon du mi byed do zhes bya ba'i don to/ /'o na mngon du mi byed pa las ni 'bras bu'i bye brag med do zhe na/ lan ni ci ltar rigs zhes gsungs so/ /de ni 'thad pa ni gzung du ma mchis zhes bya ba la sogs pa ste/chos nyid la ni 'dod pa nyid yin la/ kun rdzob tu ni rtogs pa yod par bstan pa ni 'phags pa'i zhes gsungs te/ 'dus ma byas 'gog pa'i mya ngan las 'das pa ni gcig pa'i phyir ro/ /de ltar zab mo'i bsgom pa'i thabs zhar la byung ba dang bcas pa bstan nas/da ni chos nyid zab mo'i rnam grangs bstan pa'i phyir/ de bzhin gshegs pas gsungs te/ 'dul ba ni slob ma'i ming gi rnam grangs so/ /de'i dbang ni stong pa nyid du rtogs na skrag pa rnams la mi spong ba'i thabs la mkhas pa ston te/ theg pa'i sgo ni 'jug pa'i tshul lo/ / sna tshogs pa ni bsam pa'i dbang gis thabs la rmongs pa'o/ /'di zhes bya ba ni log par rtog pa spang ba'i phyir te stong pa nyid 'di zhes bya ba'o/ /de ltar dgos pas mtshams sbyar nas de nyid bstan pa ni ci ltar zhes gsungs te/ de la dang po chos nyid kyi ngo bo nyid ni de bzhin gshegs pa'i snying po zhes gsungs te/khams ni rang bzhin gyi rnam par dag pa dri ma dang bcas pa'i de bzhin nyid de/ mdo gzhan ni de bzhin gshegs pa'i snying po la sogs pa'o/ /brjod pa ni dpe rnam pa dgu gsungs te/ pad+ma ngan la rgyal ba'i sku dang ni/ sbrang ma'i sbrang rtsi shun pa'i nang na gnas/ /mi gtsang dong du rin chen gser dang ni//sa yi gter dang myu gu la sogs 'bras/ /rul ba'i gos dang rgyal ba'i gzugs brnyan dang / /'bangs mo'i lto na rgyal po'i sras bzhin dang / /sa la rin chen ci bzhin dri ma yis/ /sgrib pa'i khams ni 'gro ba kun la gnas/ /zhes gsungs pa'o/ /de'i mtshan nyid ni/rang bzhin gyis 'od gsal zhes bya ba la sogs pa ste/ dri ma thog ma nyid nas bral ba'i mtshan nyid de rnam par dag pa zhes bya ba ni gzung 'dzin dang bral ba'o/ /cha 'dzin pas na mtshan sum cu rtsa gnyis dang ldan pa ste sa bon gyi don to/ /lus kyi nang zhes bya ba ni sems la gnas pa'i tshig bla dgas so//'o na ji ltar 'khor zhe na/ phung po zhes bya ba la sogs pa gsungs te g.yogs par byed pas gos dang 'dra ba ste/ kun du zhen pas dkris pa'i phyir ro/ /'dod chags la sogs pa ni stobs dang ldan pas gnon pa'i phyir ro/ /rtog pa'i 'khrul pas bag chags kyis bsgos pa'i phyir ro//sgrib pa rnams kyi mtshan nyid 'dod chags kyi bag la nyal ba la sogs pa rnams ni 'phags pa byams pas rgyud bla ma las bsdus par rig par bya'o/ /sgrib pas g.yogs pa de'i chos nyid ni rtag pa zhes bya ba la sogs pa ste/ skad cig pa ma yin pas rtag pa'o//rgyun gyis gnas pas brtan pa'o/ /mi 'gyur bas ther zug pa'o/ /rtag pa la sogs par gsungs pa gzhan dag log par rtogs pa ni bcom ldan 'das zhes gsungs te/ ci ltar mi 'dra zhes bya ba ni 'dra bar bstan pa'o/ /ci ltar 'dra bas gcig ce na/ mu stegs byed rnams kyang zhes gsungs te/bdag gi rang bzhin yang de lta bur smra ste/ des na bdag sun phyung na snying po nyid sun phyung la/ snying po grub na bdag grub par 'gyur bas zhes ci ltar spong zhes spong ba'o/ /lan ni bdag tu smra ba dang mtshungs pa ma yin te zhes gsungs te/ 'dir chos nyid la ming gzhan du brjod pa'o zhes bstan pa ni stong pa nyid dang zhes bya ba la sogs pa'o//sogs pa'i sgra ni de bzhin nyid dang / don dam pa dang / chos nyid dang / chos nyid kyi dbyings dang chos skyon med pa nyid dang chos gnas pa rnams bsdu'o/ /de ltar ming gzhan gyis btags pa'i dgos pa ni/ byis pa rnams zhes gsungs te/don mi shes pas na byis pa'o/ /'jigs pa ni skrag pa'o/ /spangs pa ni skrag pa spangs pa'i phyir ro/ /dgos pa'i 'bras bu ni rnam par mi rtog pa'i gnas zhes gsungs te/ sgo ni 'jug pa'i thabs kyi khyad par ro/ /gnas ni yul lo/ /snang ba ni 'khrul pa'o/ / med pa ni spangs pa ste/ 'khrul pa dang bral ba'i thabs zhes bya'o/ /spyod yul ni spyod yul te spyod yul nyid do/ /de'i phyir gdams pa ni blo gros chen po zhes gsungs so/ /'jam dpal ni shes rab dang ldan pas na 'di'i shes rab po nas rtogs so zhes 'phags pa 'jam dpal la gdams so//de'ang gang gi ched du zhe na byang chub sems dpa' sems dpa' chen po zhes gsungs te/ nyan thos kyi theg pa dag la bstan zhes bya ba'o/ /'o na chos nyid brjod du med pa nyid ma yin nam/ ci ltar tshig gis bstan zhe na/ bden mod kyi thabs kyis bstan to zhes dpe bshad pa ni/dper na zhes gsungs te/ gzhan du na sus kyang rtogs par mi 'gyur ro zhes bya ba'o/ /dpe de nyid don dang sbyar ba ni de bzhin du zhes gsungs te/ rnam par rtog pa las log par mi rtogs pa'o/ /sa nyid brjod du med pa nyid ma yin nam ci ltar tshig gis bstan zhe na/ de nyid ji ltar bstan du rung zhe na/shes rab thabs kyis zhes bya ste/ brdar btags nas ston pa ltar zhes bya ba'o/ /de nyid bshad pa ni snying por bshad pa 'am zhes bya ba'o/ /de nyid bsdu ba ni de'i phyir zhes bya ba la sogs pa'o/ /de ltar sngar bstan pa'i dgos pa'i de nyid khyad par du bshad pa ni de ltar zhes gsungs so//drang ba ni khrid pa'i ming ngo / /gang zhe na mu stegs byed ces bya ste/ ci'i phyir brjod ce na/ bdag tu smra ba la zhen pa'o/ /gang gi phyir zhe na/ bdag tu rtogs pas zhes gsungs te/ log par zhugs pa de'i phyir zhes sbyar ro/ /ci ltar zhugs she na yang dag pa ma yin par zhes bya ste bdag ni log pa'i phyir brdzun par brjod de/med pas bcings pa'i phyir zhes sbyar ro/ /dka' thub drag po can yang log pa'i bsam pas khrid pas ngal ba can du bstan pa ni/ der lhung ba'i bsam pa can dag thar par ji ltar 'gyur zhes sbyar ro/ /thar pa nyid gang zhe na rnam par thar pa gsum zhes gsungs te/dngos por lta bas stong nyid rtogs pa min/ /mtshan med smon pa dang bral yul min te/ /dmus long nyi ma'i dkyil 'khor ji bzhin pas/ /de phyir theg chen mya ngan 'das mi reg /ce'o/ /ci ltar 'gyur te mi 'gyur zhes bya ba'o/ /de lta bas na de dag de la reg par bya ba'i phyir thabs bstan pa ni de'i don du zhes bya ba'o//don gyi thabs nyid gang zhe na/ lta ba rnam par ldog pa'i phyir/ /zhes gsungs te de'i don du 'bad par bya'o zhes bstan pa yin no/ /de ci'i phyir bdag med pa kho na la 'jug par bya zhe na/ 'di lta ste zhes gsungs te/ yang dag pa'i lta ba yin pa ni chos stong pa nyid dang zhes bya ba la sogs pa ste/stong pa nyid ni dngos por lta ba 'joms pa'i phyir grub pa'i mtha' ste grub pa'i mtha' ni mi shigs pa'o/ /de'i mtha' ni mur thug pa'o/ /gong na med pas na bla na med pa'o/ /yang dag pa'i spyod pa yin pa ni chos zab mo bstan pa ni gzung bas zhes bya ste/chos 'dzin pa ni spyod pa rnams kyi dam pa yin te yang dag pa'i lta ba 'grub pa'i rgyu yin no/ /spyod pa phun sum tshogs par bstan pa ni 'di ltar zhes gsungs te/ ji ltar mtha' dag gzung zhe na lan du bstan pa ste/ 'dus pa'i phyir zhes bya bas shes rab kyi dbang du byas pa'i sbyin pa la sogs pa rnams ni spyod pa phun sum tshogs pa zhes bshad la/yang dag pa'i lta ba ni de'i rgyu yin pa'i phyir ro/ /de nyid nges pa'i don du bya ba ni yang zhes gsungs so/ /spyod pa phun sum tshogs par ji ltar 'gyur zhe na/ de'i 'thad pa ni zla ba sgron ma'i mdo las zhes gsungs te stong ni stong chung ngu'o//dag ces bya ba ni mang pos ston par byed pa ste/ stong gnyis pa nas stong gsum du zhes bya ba'o/ /ngas ni zhes bya ba ni shAkya thub pa nyid kyis te de'i zhing stong gsum yin pa'i phyir ro/ /la la ni stong nyid la sogs pa ni mtshon pa ste/ sngar bshad pa ltar sangs rgyas rnams ni mnyam pa nyid kyis 'jig rten thams cad du sangs rgyas thams cad kyis zhes zer ro//la la ni mtshan 'dra ba mang po gzigs pas so zhes zer ro/ /tshig 'bru tha dad pa ni sgra sna tshogs pas bshad pas so/ /tshig gcig po gang zhe na thams cad stong pa nyid ces bya ba'o/ / don la mkhas pa ni sngar bshad pa lta bu ste gzhan du na sngar bshad pa ltar chud za ba yin no/ /dkon pa ma yin pa ni mi dkon pa ste mod pa'o/ /gang zhe na/ sangs rgyas chos rnams te stobs la sogs pa'o/ /de ltar zab mo la mos pa'i dgos pa bstan nas/ de nyid khyad par zab mo la mos pa'i phan yon bstan pa ni/chos zab mo la mos pa'i zhes gsungs te/ bsod nams ji ltar sdud ce na/ 'jig rten dang zhes bya ba la sogs pa'o/ /de nyid lung dang sbyar ba ni/ dang po khye'u rin chen gyi mdo las bstan pa ni/ 'jam dpal zhes gsungs te/ khyad par gyi gzhi ni rten gyi khyad par ni byang chub sems dpa' thabs la mkhas pa dang bral ba'o//dus ni bskal pa brgya stong ngo / /spyod pa ni drug ste khyad par gyi gzhi'o/ /khyad par gyi mtshan nyid ni gang gis zhes pa la sogs pa ste/ the tshom ni yid gnyis so/ /lung 'bogs pa ni ston pa'o/ / mdo gnyis pa ni dpe dgod par gang+gA'i klung gi zhes bya ba'o/ /don gyi khyad par ni de snyed kyi zhes gsungs te/ khyad par gyi gzhi rten ni de snyed kyi skyes pa'am bud med ces smos te rten mchog yin pas so/ /dngos po ni rin po che ste dkon pa la sogs pa'i phyir bzang ba'o/ /mtha' dag pas sna bdun no//mang po ni bkang ba'o/ /yul bzang po ni de bzhin gshegs pa ste byas pa mi zad pa'i phyir ro/ /khyad par gyi mtshan nyid ni/ gang zhig ces gsungs pa'o/ /phan yon gyi 'bras bu nyid gang zhe na mngon par mtho ba'i dbang du byas nas/ bsod nams 'dod pa dang zhes bya ba la sogs pa gsungs te/bar zhes bya ba ni mtha' bzung ba'o/ /nges par legs pa'i dbang du byas nas/ shA ri'i bus gsol pa zhes gsungs te/ sa brgyad pa'i dbang du byas nas nges pa'o/ /sa dgu pa la nye ba'o/ /sa bcu pa la 'thob pas na sangs rgyas nyid du blta bar bgyi'o/ /la la ni mos pa la gsum du rang gi rtogs pa'i dbang gis nges pa la sogs par bshad do zhes zer ro//gzhan dag ni yul 'grol bas las dang po pa mos pa dang ldan pa rnams ni nges pa ste mi ldog par 'gyur ba'o/ /sems bskyed pa rnams ni nye ba ste nye bar gyur pa ste/ spyod pa la zhugs pa de bzhin du blta bar bya'o/ /phyir mi ldog pa yang de bzhin no//skye ba gcig gis thogs pa ni sangs rgyas nyid du blta bar bgyi'o/ /la la ni thams cad kyang snying po dang ldan pas nges par bzhag ste/ thams cad kyang de thob tu rung bas de'i rkyen yul yin pas nges pa'o/ /rigs dang ldan pas sems bskyed pas ni snga ma ltar nye ba'o/ /spyod pa bsgrub pa yang snga ma ltar sangs rgyas nyid du blta'o zhes kyang zer ro//la la ni lung bstan pa'i phan yon gsum ste/ gsang ste lung bstan pa dang sems bskyed par lung bstan pa ni nges pa'o/ /lung ston par lung ston pa ni nye ba'o/ /dngos su lung bstan pa ni sangs rgyas nyid du blta bar bya'o zhe'o/ /phan yon gnyis pa ni nyes pa thams cad sel bas na ltung ba dang zhes gsungs te/bcas pas rjes su 'gal ba ni ltung ba ste ltung bar byed pa dang sgrib par byed pa'i phyir te/ sgrib pa ni las dang lam gyi gegs byed pa'i phyir ro/ /lhag ma ni 'gyod pa ste yid la gcags pa'o/ /yang na rgyu ni ltung ba'o/ / 'bras bu ni 'gyod pa'o/ /gzhan ltung bas na ltung ba'o/ /sgrib pas na 'gyod pa'o/ /las kyi sgrib pa ni las kyi sgrib pa'i ngo bo nyid de las kyi sgrib pa gang gis las la sgrib pa'o/ /yang na byed par nye bar gzung ba nyid ni las kyi sgrib pa'o/ /de nyid gang zhe na/ 'od srungs zhes gsungs te sdig pa'i rnam grangs brtag pa'i phyir te/srog gcod pa la sogs pa 'di dag gi bsam pa la sogs pa'i yan lag ni sngar bshad pa nyid de/ kha na ma tho ba chen po rnams bsdu ba'i phyir dang stong pa nyid kyi phan yon bstan pa'i phyir ro/ /de la mtshams med pa'i las gnyis gzhi gcig la bsdu ba ni pha dang rang sangs rgyas te/pha bsad pa dang dgra bcom pa bsad pa'i phyir ro/ /dkor ni dbyig la sogs pa ste yul gsum la brkus pa'i phyir ro/ /nye ba ni ma dgra bcom ma ste ma ni ma bskyed ma la bya ste mtshams med pa dang cha 'dra ba'i phyir ro/ /lhag ma ni go sla ba'o/ /de dag gang la zhe na gcig la bsdu ba ni gal te zhes gsungs te/gcig gi rgyud kyis bsdus pas nyes pa shin tu che ba'i phyir zhes bshad do/ /de'ang 'joms par 'gyur bas na/ de yang zhes gsungs so/ /ci lta na de spang zhe na/ rgyu dang zhes gsungs te ldan pa ni 'joms pa ste 'phrod pa nyid do/ /ci ltar 'phrod ce na la la ni rten dang sun 'byin pa dang sor chud pa dang gnyen po ste stobs bzhi ldan pa la bya'o zhes zer ro//la la ni rgyu ni nang gi nye bar len pa dang / phyi rol gyi rkyen yongs su 'dzin par ldan pas kun rdzob tu 'gyod cing gnyen po stong pa nyid bsgom pa'o zhes zer ro/ /la la rang bzhin med pa nyid la bya ste gang zhig rkyen las skyes pa de ma skyes pa ltar bas na 'og nas kyang skyes ma thag tu 'gag go zhes bya ba ni mi gnas par bstan pa'i phyir ro zhes zer ro//la la ni byas pa chud mi za bar shes nas yongs su spang ba'i phyir rtsol ba la bya'o/ /la la ni me lnga bsten pa la sogs pa ni rgyu ma yin pas na de'i rgyu ni de dag dang 'gal ba yin pas dngos por lta ba dang /stong pa nyid dang 'gal te des na gang byed pa'am zhes bya ba la sogs pa la 'jug go zhes zer ro/ /de lta bas na ma byas pa ni byed pa po med pa'i phyir ro/ /'dus ma byas pa ni rgyu rkyen tshogs pa med pa ste skyes nas 'jig pa'i phyir snga ma dang phyi ma phrad par mi 'gyur ba la bya'o//'o na mngon sum dang 'gal zhe na sgyu ma'i chos nyid ces bya ste/ ma brtags na snang ba'i phyir ro/ /stong pa la stong pas glags mi rnyed pas na nyon mongs pa med pa'o/ /ci'i phyir glags mi rnyed ce na rang bzhin gyis 'od gsal ba ste bsgyur du mi nus pas so//de la rgyu rkyen med pas thog ma nas dag pa'o/ /'o na thams cad ci'i phyir ma grol lo zhe na/ mngon par dad cing mos pa zhes bya'o/ /rang 'byung rnams kyi dam pa'i don/ /dad pa med na rtogs min te/ /nyi ma'i dkyil 'khor 'od ldan pa/ /long ba rnams kyis ji bzhin no/ /zhe'o/ / chos rnams stong pa nyid yin yang ci'i phyir nyes pa dang ldan pa rnams mi grol zhe na/ rigs pas sngar bstan pa bzhin pas dngos po med pa'o/ /ci ltar med ce na/ skyes nas 'jig cing 'ju'o/ /ci ltar skye zhe na rgyu dang zhes bya ba'o/ /ci ltar 'jig ce na/ rgyu la ma ltos pas skyes ma thag tu'o/ / sems ci lta bar nyon mongs pa yang de bzhin pas gang zhes gsungs so/ /nyon mongs pa zad kyang las kyi 'bras bu 'byin no zhe na/ gang sgrib pa med pa de la zhes gsungs te nyon mongs pa zad na grol bar 'gyur ro zhes bstan to/ /'o na nyon mongs pa zad na las sogs par mi bde la las kyi sgrib pa ni nyon mongs pa las grol bar rigs pa ma yin pas ci ltar 'thad ce na/mdo gnyis pa bstan te/ nyes pa chen po byas kyang de'i rjes su rten la sogs pa'i stobs nyid sngon du btang ste/ gnyen po bsgoms na grol ba ni sngar ma skyes dgra'i mdo las gsungs pa bzhin du/ 'dir yang nam chos thams cad shin tu dul bar shes te zhes bya ba la sogs pa gsungs te/chos ni chos kyi sgrar bstan pa 'am mtshan nyid 'dzin pa'i phyir ro/ /yang na chos mthun par bshad pas nyes pa rnams kyi zhes bya ste ltung ba rnams kyi rgyu nyon mongs pa dang / de'i rgyu stong pa ste dngos pos dben pa ste/ 'das pa ni zhig la ma 'ongs pa ni ma byung ba dang da ltar ni mi gnas pas dben pa ste stong pa nyid do//'gyod pa sel ba ni ltung ba'i chos bzhin du'ang phyir bcos pa ste chad pa'i la sogs pa'o/ /brtan por mi byed pa ni 'gyod pa mi gnas par byed pa ste/ 'gyod pa nyid sgrib pa yin pa'i phyir ro/ /ldang ba'i thabs bsam pa'am/ldang ba'i thabs sbyor ba phyir bcos pa nyid gang zhe na/ de dag la zhes gsungs te/ stobs bzhis ni kha na ma tho ba chen po'ang sel na zhes bya ba'o/ /de la cho ga ni bcas pa'i nyes pa phra mo la bya'o/ /tshul khrims ni srog gcod pa spong ba la sogs pa'o/ / tshul khrims kyi rnam pa ni stobs bzhi dag par byed pa'o/ /'das pa'i nyes pa bshags kyang yang nyes pas gos na ci ltar bya zhe na de'i rgyu spangs pa'i phyir ro/ /nyon mongs pa 'dul ba la mkhas zhes gsungs te/ mi sdug pa dang byams pa dang rten cing 'brel par 'byung ba bsgom zhes bya ba'o/ / ci ltar 'dul zhe na/ glo bur gyi zhes bya ste brdzun zhes bya ba'i don to/ /brdzun par byas nas de'i dbang du mi 'gro bas na kun nas nyon mongs par gyur pa ma yin par ro/ /bag med pa la sogs pas ltung ba byung na skyen par phyir 'chos pas na 'byung bar 'du shes pa'o/ /sngar bstan pa'i ci ltar brtan por mi byed ce na yul dang mtshan nyid dang spong ba la mkhas pas 'gyod pa mi gnas par byed pa ste/yul ni nang la sogs pa ste nang la sogs pa'i skye mched rnams su'o/ /gnyis ga med pas ni bar te dbang po'am nam mkha'o/ /ma yin na ni dgag pa ste ci skad sngar bshad pa nyid yin no/ /mtshan nyid ni gnyis te spong bar byed pa'i mtshan nyid khong du chud pa nyid ces bya ste/gnyen po'i ngo bo gang gis rang bzhin med par rtogs na zhes bya ba ste nyon mongs pa shes na de spong ba ste dper na klu'i rigs 'don shes na gnod pa mi byed pa lta bu'o/ /'o na ji ltar khong du chud ce na rtsa ba med par rtogs pa'o/ /de'i phyir mi sel zhes bya ste/bsal bya ma dmigs pa'i phyir ro/ /mi bsgrub ces bya ste rtog pa spangs pa'i phyir ro/ /ci ltar rtsa ba med par brtag ce na/ spang bar bya ba'i mtshan nyid ni sprin dang zhes bya ba la sogs pa ste lhag mthong ni shes rab bo/ /ye shes ni ye shes so/ /shes rab ye shes kyi don dam pa dang kun rdzob tu dpyad nas gtor ba ni bshig pa'o//de dag kyang rtog pa las byung bas sgrib pa'i phyir sprin dang 'dra'o/ /rnam par shes pa gyur pa yin pas nang gi sems der snang bas chu zla lta bu ste/ bzhin ni nang gi mthus so/ /mi shes pa las byung bas mun pa'i spyod yul lo/ /log pa'i shes pa las byung bas na rkun po la sogs pa lta bu ste/las ni glags tshol ba ste bde ba 'phrog par byed pa'o/ /de la ma rig pa'i rgyu kun du brtags pa'i ma rig pa ni gnyis pa ste 'dzin par kun du brtags pa'i dpe ni sprin lta bu ste 'dra bar gzhan 'byung ba'i yang phyir ro/ /gzung bar kun du brtags par ni char sprin lta bu ste/yul dang 'dra ba yang gzhan 'byung ba'i yang phyir ro/ /de'i gnyen po ni ye shes la sogs pa ste bden pa gnyis la mkhas pas spong ba'i phyir ro/ /ci ltar spong zhe na/ phyogs na 'gro ba dang yul na gnas pa med pa ste dngos po med pa'i phyir ro/ /lhan cig skyes pa'i ma rig pa'i dpe ni chu zla lta bu ste thog ma med pa'i bag chags goms pa'i phyir der snang ngo //de ni gsum ste lhan cig skyes pa'i 'dod chags ni chu zla lta bu ste/ nang gi sems kyi sdug pa la sogs par brtags pas yongs su rtog pa'o/ /gti mug ni mun pa lta bu ste mi shes pas rmongs pa'o//zhe sdang ni rkun po la sogs pa lta bu'o/ /de la bskal pa stong la sogs par bsags pa'i dge ba rku bar byed pas na rkun po lta bu ste mi shes pas rkyen byas pa'i phyir ro/ /khong khro gnas med pas na mkha' 'gro ma lta bu ste yul rnams la rgyug pa'i phyir ro/ /'bras bu mi 'dod par byed pas gnod sbyin lta bu ste yid du mi 'ong ba'i phyir ro//thar pa'i gzi brjid 'phrog pas na srin po dang gnod sbyin lta bu ste mdangs 'phrog pa'i phyir ro/ /tshul bzhin yid la byed pa ni stong pa nyid do/ /la la ni byams pa la sogs pa la smra'o/ /ci ltar yid la bya zhe na stong pa nyid dang zhes bya ba la sogs pa'o//de lta bas na de spong ba'i thabs la mkhas pa ni rnam pa thams cad kyi mchog dang ldan pa ni stong pa nyid yin pas sems can la sogs pa gsungs te/ thabs dang shes rab zung du 'brel pas zhes sbyar ro/ /de dag nges pa'i don du bya ba ni/ mdo gsum pa ste chos kyi rnam grangs ni stong pa nyid do/ /dang po dang /bar pa dang / tha mar ni thos pa dang mos pa dang 'jug pa'o/ /de lta bas na rnam grangs su bshad pa ni mdor bstan pa'i ltung ba ni ci ltar sbyong zhe na bdud 'dul ba'i le'u las 'byung ba lta bu'o/ /de'i 'gyod pa ci ltar sel zhe na ma skyes dgra'i mdo las bstan pa lta bu'o/ /las kyi sgrib pa ji ltar sbyong zhe na/mdzod kyi mdo las bstan pa lta bu ste de 'gyod pa dang las kyi sgrib pa ni khyad par dang / spyi'i dbang du byas pa'o zhes kyang bshad do/ /lta bu zhes bya ba ni sgra drangs nas phan yon gnyis phyogs yongs su mtshon pa ni 'di ni zhes gsungs pa ste/ 'dir mdor bsdus so zhes bshad pa'o/ / bsod nams dang ye shes dag ni sku gnyis 'grub bo zhes bya bar bstan pas bsod nams dang ye shes kyi bye brag bstan pa shes rab de'ang thabs dang ldan par bstan pa ni/ thabs mkhas pa dang bral bar gsungs te byang chub sems dpa' ni shes rab goms par byed pa'o/ /de ltar bas na sbyor ba yang dag pa'o zhes bya ste yang dag pa'i thar pa'i thabs so//sbyor ba ni lam de'o/ /de yang ci ltar shes she na/ de skad ces lung dang sbyar ba ni thabs kyis ma zin pa'i zhes bya ba la sogs pa gsungs te/ zhing gi rgyan ni zhing dang 'brel par rgyan ces bya ste/ snod rnam par dag pa'o/ /lta ba ni drug cu rtsa gnyis te tshangs pa'i dra ba las gsungs pa lta bu'o//des na mdo sde rgyan las/ shes rab thabs kyis yongs su zin pa dang / /sbyin sogs shes rab kyis zin mi bzad gzhag /ce'o/ /de ltar rjes su 'gro ba dang ldog pa'i sgo nas dgos pa bstan nas/ /de'i ngo bo nyid bshad pa ni/ thabs dang zhes bya ba la sogs pa gsungs pa ste/shes rab dang snying rjes 'brel pa de'i ngo bo nyid ni gang so so'i skye bo'i zhes bya ba la sogs pa'o/ /de nyid bshad pa ni gang 'khor ba yang zhes bya ba la sogs pa ste/ de la dus ma yin pa ni tshogs rdzogs pa'o/ /nang du so sor rtog pa ni mya ngan las 'das pa la goms pa'o//mi skye ba ni stong pa nyid do/ /nges par gyur pa ni zhi ba phyogs gcig pa'o/ /de la mos pas spyod pa'i sa rnams su spyir btang ba ni shes rab dang snying rje 'brel pa ste/ sa 'di la gnas pa'i byang chub sems dpa' ni so so'i skye bo yin yang byis pa'i rgyud las 'das pas zhes bya ba la sogs pa gsungs pa'i phyir ro//dro ba dang rtse mo'i gnas skabs su ni bye brag tu gang zag la bdag med par rtogs pas mya ngan las 'das pa spyod yul la de rtogs kyang chos kyi de ma rtogs pas 'khor ba la spyod yul ba dang gzung ba med par rtogs pa dang 'dzin pa med par ma rtogs pas kyang ngo //bzod pa'i sa la chos zab mo la bzod pas kyang mya ngan las 'da' bar rtogs pa gtsor bshad la/ chos kyi mchog tu mthong ba'i lam ma thob pas spyod yul ma yin pa'o/ /sa dang po la ni bden pa spyod yul lo/ /gnyis pa la ni nang du so sor rtog pa ste 'chal pa'i dri ma spong ba'o/ /gsum pa la ni bzod pa dang ldan pas mi skye ba gtsor bsgom la/bzhi pa la spros pa dang ldan pas 'og ma'i nges pa la mi 'jug ste gong du yon tan tshol ba'o/ /lnga pa la bden pa gnyis goms par byed pas 'du 'dzi'i spyod yul la sogs pa'o/ /drug pa la rten 'brel goms pas de rang bzhin med pa'i stong pa nyid spyod yul gtsor bsgom la/bdun pa la mtshan ma med cing rtsol ba dang bcas pas yon tan tshol ba zhes bshad do/ /sa brgyad pa la mtshan ma med pa lhun gyis grub pas mngon par 'du 'dzi byed la/ der chos nyid kyis sgrub pa'i sgo la bskul bas rgyun mi gcod pa'o/ /sa dgu pa la so so yang dag par rig pas shin tu zhi bar mi ltung ba ste des chos bshad pa'i sgo nas don med pa la sbyor ba spang ba'i phyir ro//sa bcu pa la gang chos kyi 'khor lo bskor ba dang zhes bya ba la sogs pa ste mdzad pa byed pa'i phyir la rang don gyi dbang du byas nas shes bya phra ba la thogs pas spyod pa mi gtong ngo / /de lta bas de nyid nges pa'i don du bstan pa ni lha'i bu zhes gsungs te/re zhig phyir bstan pa ni brtson pa med pa ni shes rab kyis stong pa nyid du rtogs pa yin la/ chos rnams sdud pa ni snying rje la sogs pa thabs kyi stobs kyis so/ /bye brag tu 'chad pa ni dang po tshogs kyis nas bzung ste rtse mo'i bar du bdag med pa la sogs pa ste theg pa tha mar mi ltung ba'i phyir thabs sems can yongs su smin pa la sogs pa rig par bya'o//bzod pa dang chos kyi mchog tu blang ba med pa la sogs par sbyor ba dang / chos yongs su 'dzin par sbyor ba ste de la chos yongs su 'dzin par sbyor ba ni chos kyi mchog chen po la rig par bya'o//sa dang po la ni chos kyi dbyings dbyer med pa ste kun du 'gro ba'i don gyis so/ /sa gnyis pa la sogs pa gsum la ni thams cad nam mkha'i zhing du sbyor ba'o/ /lnga pa la sogs pa gsum la ni 'dus ma byas kyi rab tu 'phel bar sbyor ba'o/ /brgyad pa la sogs pa gsum la ni/ gzigs pa med pa'i skur rtogs par sbyor ba'o//sa thams cad kyi dbang du byas nas ni ma skyes pa la sogs par sbyor ba'o/ /'di gnyis kyi khyad par gzhan ni rang dang gzhan gyi don gyi dbang du byas pa'o/ /de lta bu'i thabs dang shes rab zung du 'brel pa ste lam de rnams su ci ltar bsgom zhe na/ gang snyoms par 'jug pa na zhes bya ba la sogs pa ste/de la mos pas spyod pa nas bzung ste sa bdun pa'i bar du ni sems can la lta ba la sogs pa ste/ de la sems can ni spyir yul du bya'o/ /snying rje chen po ni mos pas spyod pa'i sa la rig par bya'o/ /snying rje chen po ni mthong ba'i lam nas bzung ste'o/ /yang zhi ba dang rab tu zhi ba ni 'jig rten dang 'jig rten las 'das pa'i gnas skabs su rig par bya'o//sa brgyad pa ni snying rje chen po dang ye shes la rton pa ste/ 'dir yang snying rje khyad par du bsgom par bya dgos pa'i phyir ro/ /sa dgu pa la ni chos yongs su 'dzin pa la lta ba ste so so yang dag par rig pa'i chos 'chad pa'i phyir ro/ /sa bcu pa la ni sangs kyi sku'i rgyan la sogs pa mngon du byed pa ste/sku'i rgyan ni sku nyid kyi rgyan la bya ste gzugs kyi sku ni zhing gi rgyan yin pa'i phyir ro/ /'jug pa ni sbyor ba la bsnyegs pa ma yin te ha cang thal bar 'gyur ba'i phyir ro/ /'o na dal 'byor thob pa nas ma yin no zhe na/ ci'i phyir gal te mtshan nyid tshang na ni 'dod pa kho na yin la/dang po sgom pa'i sa nas ni ma yin no zhes bstan pa'i phyir ro/ /bsgom pa'i thabs la 'jug pa'i rim pa bstan pa ni phyag rgya gnyis te zhes bya ba la sogs pa ste/ 'debs pa'i phyir phyag rgya'o/ /de nyid ni kun rdzob tu tshig 'bru zhes bya ba la don dam par zab mo la 'jug pa ste/'dis ni sngar bstan pa'i tshul thabs dang shes rab la mi 'da' bas rgyas btab pa ste/ rnams zhes gsungs pas mtha' dag par mngon no/ /de ltar thabs la 'jug pa'i yul bstan nas/ de nyid gang zag dang sbyar ba ni de la zhes gsungs pa ste/ las dang po pa ni mos pa'i sa pa'o/ /ma gos pa ni rtogs pa spang ba'o/ /bshad pa dang sbyar bas na phyugs so/ /bsgyur ba la sogs par gsungs pa'i ldem po ngag gi snrel zhi ste gzhan du 'khyogs pas na ldem po'o/ /rgyud ni ma 'dres pa'i phyir ro/ /yun ring du tshangs par spyad pa ni bskal pa grangs med par ro//'di ni dal 'byor thob pa nas goms par bslab par mngon gyi thams cad du thabs dang shes rab zung du 'brel par ma yin no zhes log par rtog par mi bya'o/ /gnyis su gsungs pa ni gtsor goms par bya bar bstan gyi ma yin pa ni ma yin te ha cang thal ba'i phyir ro/ /de lta bu'i gang zag gi 'jug pa'i tshul ni ldog pa'i sgo nas rma 'byin pa'i nyes pa bstan to//nyes dmigs 'di la bstan pa ni nges par sems par mi 'gyur ba ste/ zab mo la mi gus zhes bstan pa'o/ /de'i rgyu nyid ni chos spong ba dang gang zag la zhe sdang ba ste sngar ji skad bshad pa nyid do/ /nyes pa gnyis te yun ring du spyad pa'i gang zag la ni mi skye ba'i chos la bzod pa zhes gsungs so//'jig rten pa'i lam du goms pa mthong ba'i lam la bzod pa dang sa bdun pa man chad du goms pa sa brgyad pa la bzod pa ste/ 'dir ni dang po'i rgyu'i gegs su gzung ngo / /de'i rgyu na dman pa la khyad du gsod pa dang gus pa la ser sna byed pa ste/'dir bslab pa ni chos zab mo la mos pa nyid do/ /ri mo ni de ston pa nyid yin la/ de mi byed pas ri mo mi byed pa'o/ /rnam grangs su bslabs pa khyad du gsod pa ste/ de'i phyir dper na rab tu byung ba la ngas ni zang zing sbyin par mi gnang ngo zhes gsungs pa lta bu'o/ /mdo kun las btus pa'i bshad pa lung gi tshad mas rab tu sbyar ba las shes rab kyi pha rol tu phyin pa bshad zin to//mdo kun las btus pa las spyod pa'i khyad par rnyed dka' ba'i gtam brjod pa ste bcu pa'o// //de ltar pha rol tu phyin pa drug la slob pa de'ang thob bya gang zhig la dmigs nas slob ce na/thob bya sku gnyis la ste chos kyi sku ni bshad zin to/ /gzugs kyi sku ni che ba nyid rgya chen po zhes gsungs te/ nyid ces bya ba ni nyan thos la sogs pa dgar ba'o/ /'jug pa ni gnyis te mos pas 'jug pa dang thob pas 'jug pa'o/ /de'ang ji ltar zhe na lan ni lung gis shes te/ 'phags pa dri ma med par grags pas bstan pa las zhes bya ba la sogs pa'o/ /de'i phyir dang po sa dang po'i yon tan bstan pa las/ thabs la mkhas pa'i spyod pa bstan pa ni/ btsun pa 'od srungs chen po zhes gsungs te/ sa rnams su phan yon gyi khyad par rmad du byung ba rnams yod kyang sa dang po dang bcu pa ni mtshon pa yin la/sa re re la rmad du byung ba drug la sogs pa yang / dang po sbyin pa la sogs pa brtsams pa'i rmad du byung ba ston te/ tshogs yongs su rdzogs par bya ba'i phyir dang / mthong ba la phan gdags par bya ba dang / bsam pa rdzogs par bya ba dang /gzhan rjes su drang ba dang / rang gi 'khrul pa dgod pa'i phyir ni bsam gyis mi khyab pa'i rnam par thar pa thob po zhes gsungs so/ /nyam nga ba zhes bya ba ni gnyi ga la brtags pa'o/ /phal cher zhes smos pas dman pa'i don dam pa spangs pa ste/ de la de'i phyir zhes kyang sbyar te gzhan du na bya ba nyams pa'i phyir ram brdzun du smra ba'i phyir ro//de ltar na dbang med par 'gyur ro zhe na/ dang po go skabs ma phye bar/ /zhes smos so/ /sbyin par khas 'ches par slong ba ni mi srid de de ci'i phyir zhe na/ mthu med ces bya ste mi nus pa'i phyir ro/ /ci'i phyir rang nyid kyis byed ce na/dka' thub dag pa ste myur bar 'gro ba'i phyir ro/ /'o na gang gi zhe na phal la med ces bya ste/ byang chub sems dpa' nyid kyis te sngar bstan pa'i phyir ro/ /de nyid dpe sgrub pa ni dper na zhes gsungs te/ bzod pa ni 'dod pa'o/ /sa bcu pa'i yon tan bstan pa ni gnyis te/ chos snang ba'i yon tan rnam par 'phrul pa dang /khams snang ba'i yon tan rnams kyi rnam par 'phrul pa'o/ /de la dang po'i dbang du byas nas gtso bo'i yon tan rnam par 'phrul pa ni/ gang gis 'phrul zhe na byang chub sems dpa' de'o/ /gang gi thad du zhe na bcom ldan 'das shAkya thub pa'i spyan sngar ro/ / gang gi don du zhe na mthu rab tu bstan pa'i phyir ro/ /rten gang nas she na/ mtshan dang zhes bya ba la sogs pa nas so/ /gang gi yon tan 'phrul zhe na/ byang chub sems dpa'i 'khor la sogs pa'o/ /yon tan gyi chos gang 'phrul zhe na chos snang ba'i rnam par 'phrul pa ni sngon gyi sbyin pa la sogs pa'o//gnas bkod pa'i rnam par 'phrul pa ni mi mjed kyi zhes bya ba la sogs pa'o/ /gdan bkod pa'i rnam par 'phrul pa ni rdo rje'i dbang po zhes bya ba la sogs pa'o/ /lus bkod pa'i rnam par 'phrul pa ni nor bu'i rgyal po zhes bya ba la sogs pa'o/ /'khor gyi yon tan ni byang chub sems dpa' de dag thams cad kyang zhes gsungs so//de la smon lam gyis byung ba nyid ni zhal du lta ba la sogs pa'o/ /khams snang ba'i yon tan gyi rnam par 'phrul pa ni yang sdong po bkod pa de nyid las zhes gsungs so/ /dang po lus la dmigs pa sprul pa'i yon tan gyi dbang du byas nas/yon tan gyi dbang du chos gang la ldan zhe na/ tshong dpon gyi bu nor bu bzang po zhes bya ste/ ci'i phyir zhe na/ sgyu ma lta bu'i ting nge 'dzin gyis mthong ba'i phyir ro/ /gang nas 'phrul zhe na byang chub sems dpa' kun du bzang po yang zhes gsungs te/ dngos po gang zhe na stong gsum la sogs pa'o//de nyid las snod ni rlung gi phung po la sogs pa'o/ /sems can ni dmyal ba la sogs pa'o/ /dus ni nyin zhag la sogs pa'o/ /phyogs ni shar phyogs la sogs pa'o/ /rten rnam par 'phrul pa ni/ byang chub sems dpa' kun du bzang po yang zhes gsungs te/rten gang na gnas pa rnam par 'phrul pa ni/ rnam par snang mdzad kyi spyan snga na'o/ /dmigs pa rnam par 'phrul pa ni/ de'i lus re re las kyang zhes gsungs pa'o/ /brjod pa rnam par 'phrul pa ni/ sems can gyi sgra la sogs pa'o/ /mdzad pa rnam par 'phrul pa na/chos kyi 'khor lo bskor ba la sogs pa'o/ /mthar thug pa'i 'bras bu ni de la zhes gsungs te/ de la tshad med pa ni sa bcu'i rnam par ro/ /ye shes tshad med pa ni rnam pa thams cad dang mchog mkhyen pa'o/ /de la dpe ni dper na zhes bya ba'o/ /de bzhin du zhes bya ba ni don dang sbyar ba'o//de'i 'thad pa ni dbang du bzhugs te zhes bya ste de la 'di lta bu zhes bya ba ni sa chos kyi sgron ma'o/ /de dag gi yon tan grangs kyi dpe ni bu ram shing zhes bya ba la sogs pa ste/ snying rje'i gzhan dbang du gyur pas 'khor bar gnas kyang yon tan gyi ro yis mi 'dor bas bu ram shing lta bu'o/ / nyon mongs pa dang mthun pa'i spyod pa ltar snang yang nyon mongs pas stong pas 'dam bu lta bu'o/ /shes rab phun sum tshogs pa'i phyir des stong pa yin pa ni 'od ma lta bu ste yon tan rnams kyi snod du gyur pas til lta bu'o/ /de dag mang bas na tshal smos te 'dra ba rnams bsdus pa'i phyir ro/ /de ltar yon tan gyi che ba bstan nas/phrin las kyi che ba bstan pa ni/ 'jam dpal zhes gsungs te/ rmad du byung ba'i phrin las dngos ni de la gcig tu sra ba ni sku gdung ring bsrel la bya'o/ /de ltar mi rtog pa dang dus thams cad pa'i phrin las de nyid nges pa'i don du bya ba ni 'phags pa sangs rgyas phal po che'i mdo las zhes gsungs te/dpe ni 'di lta ste dper na zhes bya ba ste rmad du byung ba'i gzhi bstan pa ni/ dge slong kun dga' bo zhes bya ba la sogs pa'o/ /rmad du byung ba'i phrin las dngos ni de bzhin gshegs pa zhes bya ba la sogs pa ste go bar bzod do/ /de ltar 'bras bu'i phan yon bshad nas/da ni che ba la mos pa'i phan yon bshad par mdo sde zab mo zhes bya ba la sogs pa ste/ de nyid lung dang sbyar ba ni/ mdo de nyid las zhes bya ba'o/ /phan yon gyi dpe nyid ni dper na zhes gsungs pa'o/ /de la gnam 'phang dang zhang rgyang che ba nyid ni lhag ge la sogs pa ste/ de la theg pa dma' ba las mtho ba'o//de nyid ni yangs pa la sogs pa ste/ yangs pa dang che ba'i bden pa gnyis kyi dbang du bus pa'o/ /de'i gzhi ni dngos po dang dus dang gang zag gi pha rol tu phyin pa lnga la sogs pa'o/ /de nyid kyi bsod nams kyi khyad par bstan pa ni/ 'jam dpal zhes gsungs te/byang chub ni rang dul bar 'dod pa'o/ /phung po med pa ni mya ngan las 'das pa'o/ /ci'i phyir zhe na/ 'gro ba la dmigs pa med pas rgya chung ba'i phyir dang / 'di la mos pa la sogs pa ni rdzogs pa'i byang chub kyi rgyu yin pa'i phyir/ sngar bshad pa lta bu gang yang yin no/ /mdo kun las btus pa'i bshad pa lung gi tshad mas rab tu sbyar ba las rgya chen po la mos pa rnyed par dka' ba'i gtam brjod pa ste rnyed par dka' ba bcu gcig pa bshad zin to//mdo kun las btus pa las yon tan gyi le'u ste drug pa rdzogs so// //da ni de dag nges par bya ba'i phyir/lung gi tshigs su bcad pa 'di brjod par bya ste/ dang po bsod nams min spangs nas/ /bar du bdag lta log pa ste/ /tha ma kun las ldog shes pa/ /rigs par ldan phyir grol ba'o/ /thar pa don du gnyer 'dod rnams/ /glang chen lam du song 'gro yang / / grags phyir blo gros sbyang 'ga' zhig /de ma mthong phyir grags la brten/ /de nyid mthong ba yin zhe na/ /tshad ma min phyir 'di mthong bzhin/ /de ma nges par grags she na/ /de la tshad mas gnod phyir ro/ /tshad ma de nyid min na ni/ /des gzhal ci phyir brdzun mi 'gyur/ /dam pa'i don la grags 'ga' zhig /lung mi 'gyur te de nyid bzhin/ /snang grangs spyod pas mthong zhe na/ /de nyid ma mthong ci yi phyir/ /yul min zhe na de 'dod pas/ /de la mkhas pa ci zhig rtsod/ /lung yang de la rag lus zhes/ /smra na ci phyir de la min/ /rgyu med mi rung gang zhig rgyu/ /de med nus pas ma mthong phyir//gzhan du ha cang thal bar 'gyur/ /des na zab mor gyur pa la/ /sngon gyi lung rnying yongs btang ste/ /rang ltar gzung min lung las gsungs/ /bsregs bcad bdar bas gser lta bur/ /brtags nas blang bar gsungs she na/ /de yod min te ma yin ltar/ /ma rtogs grub pa'i lam med par//chos kyi mig can gyis mthong ste/ /de yang de la brten zhe na/ /bshad bzhin rgyu min 'bras bu ltar/ /tshad ma de yis gnod pa yin/ /grub lam snang ba rtags yin te/ /rang nyid bya byed mi rtogs par/ /lkog gyur ji ltar 'dzin par 'gyur/ /de la'ang sgrub byed yod pa min/ / 'gal phyir mngon sum gang gis 'dzin/ /tshad mas gnod phyir gsum pa'ang min/ /gcig dang tha dad mi snang na/ /bdag sogs gang rung gnas pa smos/ /mi dmigs phyir dang 'gal phyir na/ /de ma rtogs dang de las min/ /mtshan nyid 'dzin pa 'ang ma grub pas/ /rang gi 'dod pa gang la zhig /gcig min des na du ma'ang min/ /rang gzhan gnyis dang rgyu med dang / /yod sogs skye bar mi rung bas/ /ngo bo la sogs gang zhig yod/ /brtags dang gzhan dbang grub pa min/ /mtshan nyid la sogs dngos med par/ /klu sgrub thogs pa med pas gsungs/ /ma rtogs 'ga' zhig mi mthun smra//mi mthun des zab nga lung ni/ /brdzun pa nyid du smras pas na/ /de las skur pa gang zhig yod/ /don gnyis phyir na gang zhig brdzun/ /de spangs bzlog pa'i rgyu 'ga' zhig /drang phyir zhe na de brdzun min/ /don med phyir na gnyis pa brdzun/ /'gal phyir gzhung gi don la reg / 'dod rgyal smra ba mi mthun pas/ /glang chen lam du brten te dong / /dam pa nye bar brten pa yi/ /dam pa gang yin de gnyis mthun/ /dka' ba mdangs dang 'joms rnyed nas/ /sdug bsngal du ma 'byung ba'i gnas/ /sbrul gyi tshang 'dra med sogs ltar/ /bcas pa dang po yongs su bsrungs/ / dran dang shes bzhin bag yod pas/ /grub pa'i mtha' la brten pa ni/ /nyes pa'i rgyu ni bdag lta nyid/ /shes nas yongs su spong ba yin/ /shes pa goms pas 'bras bu thob/ /de rgyu nges don zab chos rtogs/ /dam pa'i don du cis mi gzung / /goms na ci zhig dka' phyir 'ga'/ /sdug bsngal bde bar rtogs bzhin pas//zad med brten 'ga' ci zhig min/ /bsam gyis mi khyab dpe las 'das/ /brjod du med pa'i chos nyid ni/ /lag tu thob par dgos pa med/ /btang snyoms la sogs tshad med pas/ /tshangs pa'i gnas su skye nyid dang / /gtong bas longs spyod bzod pas gzugs//khrims kyis mtho ris sogs don dang / /grags dang rnyed sogs rgya mtsho ni/ /'di dang gzhan du the tshom med/ /sngar bshad rgyas par bshad de nyid/ /rang bzhin lag pa rang bzhin gsum/ /mda' dang mig dang yon tan dang / /dus dang yon tan yon tan dang //dgu ni dang po gnyis pas 'grub/ /gsum pa bsgrub par bya bas te/ /bzhi pas dngos po gsum pa'o/ /de 'grub lnga sogs la rag lus/ /de don bdun pas rig bya ste/ /thob par byed pa brgyad par gsungs/ /yon tan tha ma de rnams grangs/ /sbyin sogs spyod pa rnam drug tu//gzhung don chos bzhi de ltar bsgrags/ /rgyal ba'i sras kyi lam po che/ /rgyal sras rnams la bstan pa ni/ /bsdus pa bshad pa las byung ba'i/ /bsod nams 'grub pas 'gro kun rgyal/ /go 'phang dam pa thob gyur nas/ /mi nub chos kyi rgyal mtshan ni/ /snod du gyur pa'i 'gro ba la/ / zhi ba'i tshul du ston par shog /yi ge pa yi don ched du/ /brtsis nas sh+loka sum stong dang / /de las lnga bcu lhag cig ni/ /'di yi tshad du byas pa yin/ /bam po bcu dang sh+loka lnga bcu yod do/ /mdo kun las btus pa'i bshad pa rin po che snang ba'i rgyan ces bya ba lung gi tshad mas rab tu sbyar ba las bsdus pa'i tshigs su bcad pa'o//mdo kun las btus pa'i bshad pa slob dpon rin chen 'byung gnas zhi bas mdzad pa rdzogs so// //rgya gar gyi mkhan po paN+Di ta nag po'i zhabs dang / bod kyi lo tsA ba dge slong tshul khrims rgyal bas bsgyur cing zhus te gtan la phab pa'o// //