CLOSE WINDOW

D3934
བོད་ཡིག

@##/ /rgya gar skad du/ sU tra sa muts+tshA ya / bod skad du/ mdo kun las btus pa/ bam po dang po/ sangs rgyas dang byang chub sems dpa' thams cad la phyag 'tshal lo/ /sangs rgyas 'byung ba shin tu rnyed par dka' ste/ sangs rgyas 'byung ba de shin tu rnyed par dka' bar ci mngon zhe na/mdo sde du ma tshad mar gyur pa las shes te/ dam pa'i chos pad+ma dkar po las 'byung ba/ dge slong dag de bzhin gshegs pa dgra bcom pa yang dag par rdzogs pa'i sangs rgyas rnams ni 'byung ba rnyed par dka' ste/ bskal pa bye ba khrag khrig brgya stong phrag mang por yang 'jig rten du de bzhin gshegs pa mthong yang srid mi mthong yang srid de /dper na u dum+WA ra'i me tog bzhin no zhes gsungs so/ /rnam par gtan la dbab pa'i rgyal po'i mdo las 'byung ba/ kun dga' bo 'di lta ste/ u dum+WA ra'i me tog ni sangs rgyas skye ba dang dus gcig tu 'byung ste/kha dog dang ldan zhing gsal te/ 'od gsal la dri ni dpag tshad gcig khor yug tu khyab par byed do/ /me tog des na rab rib med par byed/ dran pa yongs su sbyong bar byed/ nad kyang rab tu zhi bar byed/ mun pa yang sel cing snang bar yang byed/ dri zhim po yang 'byin pas khams bzhi dang bar 'gyur te/ 'khor los sgyur ba'i rgyal po thams cad la yang me tog de mi 'byung na/ sems can tshul khrims 'chal pa rnams la sangs rgyas 'byung ba dang mtshungs pa'i me tog lta 'byung bar ga la 'gyur zhes gsungs so/ /me tog de ci 'dra/ gang du nam skye zhe na/ rtogs pa brjod pa'i mdo las 'byung ba/ mtsho chen po ma dros pa 'das pa'i byang phyogs na ri rtse lnga pa zhes bya ba de'i pha rol na u dum+WA ra'i tshal yod de/ nam sangs rgyas bcom ldan 'das dag dga' ldan gyi lha'i ris nas babs te/ yum gyi lhums su zhugs pa de'i tshe tshal de kha 'bu bar 'gyur ro//nam yum gyi lhums nas bltams pa de'i tshe tshal de kha 'bye bar 'gyur ro/ /nam bla na med pa yang dag par rdzogs pa'i byang chub mngon par rdzogs par sangs rgyas pa de'i tshe tshal de'i me tog kyang rab tu rgyas par 'gyur ro/ /nam tshe'i 'du byed bor ba de'i tshe tshal de rnyings par 'gyur ro//nam yongs su mya ngan las 'das pa de'i tshe tshal de'i lo ma dang / me tog dang / 'dab ma dang / 'bras bu yang lhags par 'gyur ro/ /u dum+WA ra'i me tog de'i tshad la ni shing rta'i 'phang lo tsam mo/ /nam sangs rgyas bcom ldan 'das dag rgyal rigs kyi nang du 'byung ba de'i tshe/me tog de kha dog dkar rab tu 'gyur ro/ /nam bram ze'i rigs kyi nang du 'byung ba de'i tshe me tog de dkar por 'gyur ro zhes gsungs so/ /byang chub sems dpa'i sde snod las kyang / kye rgyal ba'i sras de bzhin gshegs pa ni rnyed par dka' ste/mchog tu rnyed par dka'o zhes gsungs so/ /bcom ldan 'das kyis ye shes shin tu rgyas pa'i mdo las kyang / byang chub sems dpa' rgyal po'i drang srong snyan pa chen pos bstan pa/ grogs po dag de bzhin gshegs pa gang byed pa dang ldan pa'i chos ston pa dag ni brgya la brgya lam na 'jig rten du 'byung ngo zhe'o//zla ba'i snying po'i le'u las kyang bstan te/ sangs rgyas rnams 'jig rten du 'byung ba ni rnyed par dka' ste/ u dum+WA ra'i me tog dper brjod pa dang mtshungs so zhes 'byung ngo / /'phags pa sdong po bkod pa'i mdo las kyang / gang dag mthong zhing thos pa dang //bsnyen bkur byas pa don yod pa/ /'jig rten 'dren pa 'jig rten na/ /bskal pa bye bar rnyed par dka'/ /zhes gsungs so/ /bskal pa bzang po'i mdo las kyang / bskal pa bzang po 'di'i 'og tu sangs rgyas med pa'i bskal pa drug cu 'byung ngo //de'i 'og tu bskal pa snyan pa chen po zhes bya ba 'byung ste/ bskal pa gcig po de las sangs rgyas khri 'byung ngo / /bskal pa snyan pa chen po de'i 'og tu sangs rgyas med pa'i bskal pa brgyad khri 'byung ngo / /de'i 'og tu bskal pa skar ma lta bu zhes bya ba 'byung ste/ bskal pa de gcig la sangs rgyas brgyad khri 'byung ngo //bskal pa skar ma lta bu de'i 'og tu bskal pa sum brgyar sangs rgyas mi 'byung ngo / /de'i 'og tu yon tan bkod pa zhes bya ba'i bskal pa 'byung ste/ bskal pa de gcig la sangs rgyas brgyad khri bzhi stong 'byung ngo zhes gsungs so/ / mir 'gyur ba ni shin tu rnyed par dka' ste/ ji ltar zhe na/ 'di lta ste / yang dag par ldan pa'i lung las 'byung ba/ dge slong dag 'di lta ste/ dper na/ sa chen po 'di chu 'ba' zhig tu gyur la/ de'i nang du mi zhig gis shing bu ga gcig pa zhig bor te/ de shar gyi rlung gis ni nub phyogs su phul/nub kyi rlung gis ni shar phyogs su phul/ byang gi rlung gis ni lho phyogs su phul/ lho'i rlung gis ni byang phyogs su phul la/ de na rus sbal zhar ba tshe lo brgya phrag du ma thub pa/ lo brgya phrag du mar 'tsho ba lo brgyar 'das shing lan cig steng du 'byung ba de bu ga gcig pa'i shing der mgrin pa 'jug na dge slong dag 'di ji snyam du sems/rus sbal zhar ba tshe lo brgya phrag du ma thub pa/ lo brgya phrag du mar 'tsho ba de lo brgya 'das shing lan cig steng du 'byung ba des/ shing bu ga gcig pa'i shing der mgrin pa chud dam/ bcom ldan 'das la dge sbyong dag gis gsol pa/bcom ldan 'das stes na 'gyur lags so/ /bde bar gshegs pa stes na 'gyur lags te / rus sbal zhar ba tshe lo brgya phrag du ma thub pa/ tshe lo brgya phrag du mar 'tsho ba/ de lo brgya 'das shing lan cig steng du 'byung ba des/ shing bu ga gcig pa der mgrin pa chud kyang gda'/mi chud kyang gda'o/ /bcom ldan 'das kyis bka' stsal pa/ dge slong dag de bzhin du de bzhin gshegs pa rnams brgya la brgya lam na 'jig rten du 'byung zhing zhi bar 'gyur ba/ yongs su mya ngan las 'das par 'gyur ba/ rdzogs pa'i byang chub tu 'gro bar byed pa/bde bar gshegs pas rab tu bstan pa'i chos ston to/ /mir gyur pa yang brgya la brgya lam na stes na 'thob ste/ shin tu rnyed par dka'o zhes gsungs so/ /dal ba 'byor pa rnyed par dka' ste/ dal ba 'byor pa rnyed par dka' bar ci mngon zhe na/ mdo sde'i bye brag mang po brjod pa las mthong bas mngon te/gcig la 'phros pa'i lung las 'byung ba/ dge slong dag mi khom pa brgyad po 'di dag ni/ gang zag tshangs par spyod pa la gnas pa'i dus ma yin te / brgyad gang zhe na/ dge slong dag 'di la de bzhin gshegs pa 'jig rten du 'byung ste zhi bar 'gyur ba/yongs su mya ngan las 'das par 'gyur ba/ rdzogs pa'i byang chub tu 'gro bar byed pa/ bde bar gshegs pas rab tu bstan pa'i chos kyang ston na/ gang zag de sems can dmyal bar skyes pa yin te/ da ni gang zag tshangs par spyod pa gnas pa'i dus ma yin pa mi khom pa dang po'o//de bzhin du dud 'gro'i skye gnas dang / gshin rje'i 'jig rten dang / lha tshe ring po dang / mtha' 'khob kyi mi dang / rku 'phrog byed pa dang / kla klo dang / brnab sems can dang / gnod sems can gang du dge slong dang / dge slong ma dang dge bsnyen dang /dge bsnyen ma mi 'ong ba'i nang du skyes pa yin no/ /'jig rten 'dir de bzhin gshegs pa 'byung ste chos kyang ston la/ gang zag de dbus kyi mi'i nang du yang skyes na de glen zhing lug ltar lkugs pa la lag brda byed cing / legs par smras pa dang / nyes par smras pa'i don go ba'i mthu med pa yin no//de bzhin gshegs pa 'jig rten 'dir byung ste/ chos kyang ston la/ gang zag de dbus kyi mi'i nang du yang skyes shing / de glen pa ma yin la/ /lug ltar lkugs pa ma yin pa nas/ don go ba'i mthu yod pa'i bar du yang 'gyur na/ de log par lta zhing phyin ci log tu mthong ste/de 'di ltar byin pa yang med/ mchod sbyin yang med / sbyin sreg byas pa yang med/ legs par byas pa dang / nyes par byas pa'i las kyi 'bras bu rnam par smin pa yang med/ 'jig rten 'di yang med/ 'jig rten pha rol yang med/ pha yang med/ma yang med de / 'jig rten na dge sbyong dang / bram ze yang dag par song ba dang / yang dag par zhugs pa dang / dgra bcom pa 'jig rten rig pa gang rang gi mngon par shes pas 'jig rten 'di dang 'jig rten pha rol mngon sum du bya ste/ khong du chud par byed pa yang med par lta ba yin no//gzhan yang gang zag de dbus kyi mi rnams kyi nang du skye ste/ glen pa ma yin pa nas legs par smras pa dang / nyes par smras pa rnams kyi don go ba'i mthu yod pa'i bar du 'gyur la/ de yang dag par lta zhing phyin ci log tu mthong bar ma gyur te/ de 'di ltar sbyin pa yang yod pa nas mngon sum du byas te khong du chud par byed pa yang yod pa'i bar du lta na/de bzhin gshegs pa 'jig rten du ma byung ste zhi bar 'gyur ba/ yongs su mya ngan las 'das par 'gyur ba/ rdzogs pa'i byang chub tu 'gro bar byed pa/ bde bar gshegs pas rab tu bstan pa'i chos mi ston pa yin no//gang zag tshangs par spyod pa la gnas pa'i dal ba'i dus ni gcig ste/ de bzhin gshegs pa 'jig rten 'dir byung la/ chos kyang ston te/ tshangs par spyod pa/ thog mar dge ba/ bar du dge ba/ tha mar dge ba/ don bzang po/ tshig 'bru bzang po/ma 'dres pa/ yongs su rdzogs pa/ yongs su dag pa/ yongs su byang ba/ yang dag par rab tu ston la/ gang zag de yang dbus kyi mi'i nang du skyes te/ de glen pa ma yin zhing lug ltar lkugs pa ma yin pa nas/ legs par smras pa dang / nyes par smras pa'i don go ba'i mthu yod pa'i bar du gyur la/de yang dag par lta zhing phyin ci ma log par mthong ste/ de 'di ltar sbyin pa yang yod/ mchod sbyin yang yod/ sbyin sreg byas pa yang yod/ legs par byas pa dang / nyes par byas pa'i las kyi 'bras bu rnam par smin pa yang yod/'jig rten 'di yang yod/ 'jig rten pha rol yang yod/ pha yang yod/ ma yang yod/ 'jig rten na dge sbyong dang / bram ze yang dag par song ba dang / yang dag par zhugs pa dang / dgra bcom pa 'jig rten rig pa rang gi mngon par shes pas 'jig rten 'di dang /'jig rten pha rol mngon sum du byas te/ khong du chud par byed pa yang yod par lta'o zhes gsungs so/ /zla ba'i snying po'i le'u las kyang / grogs po dag dal ba 'byor pa rnyed par dka' ste/ spos kyi shing dus kyi rjes su 'brang ba dper brjod pa bzhin no zhes gsungs so//yang de nyid las 'byung ba/ de la rnam par dag pa mnyam pa nyid gang zhe na/ rnam par dag pa zhes bya ba ni mir skye ba thob pa ste/ gang yon tan bcu yongs su rdzogs pa'i mir 'gyur ba 'thob pa'o/ /bcu gang zhe na/ rigs dma' ba spangs pa dang / mi blun pa dang / mi glen pa dang /dbang po ma nyams pa dang / phor skyes pa dang / gzugs bzang ba dang / mi dbul ba dang / mi brnyas pa dang / tshig snyan pa dang / skye bo mang pos lta ba'o zhes gsungs so/ /de bzhin gshegs pa'i bstan pa la dad pa rnyed par dka' ste/ dad pa ji lta bu zhe na/de bzhin gshegs pa'i gsang ba'i mdo las 'byung ba/ grogs po dag 'di la rigs kyi bu'am/ rigs kyi bu mos lhag pa'i bsam pas bla na med pa yang dag par rdzogs pa'i byang chub tu sems bskyed de dad pa yin/ dang ba mang zhing 'phags pa rnams la lta ba 'dod pa dang /dam pa'i chos mnyan par 'dod pa dang / ser sna med cing lhug par gtong ba dang / lag brkyang ste gtong ba la dga' ba dang / mchod sbyin byed pa'i ngang tshul can dang / gtong ba phun sum tshogs pa dang / sbyin pa 'gyed pa la dga' ba dang / khong khro ba med pa'i sems dang ldan pa dang /rnyog pa med pa'i sems dang ldan pa dang / las dang las kyi rnam par smin pa la yid ches pa dang / mos pa dang / rtogs pa dang / som nyi med la the tshom mi za zhing yid gnyis mi za ba yin te/ de dkar po dang / nag po'i las rnams kyi rnam par smin pa chud mi za bar rig nas srog gi phyir yang mi bya ba mi byed do zhes gsungs so//yang de nyid las 'byung ba/ dad pa gang zhe na/ dad pa gang gis 'phags pa'i drung du nye bar 'gro ba dang / bya ba ma yin pa mi byed pa'o zhes gsungs so/ /yid gnyis yang dag par 'joms pa'i mdo las kyang / dad pa ni dge ba'i chos thams cad kyi sngon du 'gro ba ste/de la dad pa gang gis dad par 'gyur ba gang zhe na/ 'di ltar de bzhin gshegs pa sgrib pa med pa'i ye shes mthong ba dang ldan te/ des chos bshad pa ni mthong bar dka' ba/ shes par bya dka' ba/ zab pa rgya che ba bstan pa ste/ de la mig kyang med/mig 'gag pa yang med/ rna ba yang med/ sna yang med/ lce yang med/ lus kyang med/ yid kyang med/ yid 'gag pa yang med/ gnas pa yang med/ mi gnas pa yang med/ grags pa yang med/ ma grags pa yang med/ yan lag drug cu dang ldan pa'i dbyangs kyis zin pa'i tshig dang /yi ge dang / ngag gi las yongs su dag pa dang / sems rnam par dang ba dang / lus yongs su bya ba dang / kha dog sna tshogs ston pas de bzhin gshegs pa la mi mkhyen pa'am mi gzigs pa'am/ ma gsan pa'am/ mngon sum du ma mdzad pa'am/mngon par rdzogs par sangs ma rgyas pa med do/ /de bzhin gshegs pa de ni spyan yongs su dag ste/ kun nas spyan dang ldan pa/ 'dod chags dang bral ba/ zhe sdang spangs pa/ srid pa med par gyur pa/ gti mug legs par bcom pa/ sha'i spyan dpag tu med pa/spyi gtsug bltar mi snang bar mngon par 'phags pa sgra dbyangs zab pa/ don dam pa ston pa/ sangs rgyas kyi chos thams cad kyis bla na med par gyur pa ste/ gang 'di lta bu'i sangs rgyas kyi chos de dag la rtogs pa dang / yid ches pa dang / mi spong ba de ni dad pa'o zhes gsungs so//dad pa'i stobs bskyed pa'i mdo las 'byung ba/ 'jam dpal de la dad pa'i stobs gang zhe na/ dad pa gang gis sangs rgyas kyi chos thams cad la mngon par dad pa dang / mos pa dang / yid ches pa dang / the tshom mi za zhing nem nur med pa ni dad pa'o/ / las dang las kyi rnam par smin pa la mngon par dad pa'o/ /rnyog pa med pa ni sems la dad pa'o/ /chos thams cad stong pa nyid dang / mtshan ma med pa dang / smon pa med pa dang / mngon par 'du mi byed pa la dad pa'o/ /sbyin pa dang / sbyin pa'i 'bras bu dang / tshul khrims dang / tshul khrims kyi 'bras bu dang / bzod pa dang / bzod pa'i 'bras bu dang / brtson 'grus dang / brtson 'grus kyi 'bras bu dang / bsam gtan dang / bsam gtan gyi 'bras bu dang / shes rab dang / shes rab kyi 'bras bu la dad pa'o zhes gsungs so/ /yang de nyid las 'byung ba/dad pa'i mtshan nyid ni dad pa ste / gang theg pa chen po la mos pa 'di ni dad pa'i stobs zhes bya'o/ /gang chags pa med pa dang / khong du chud pa dang / dad pa'i dbang po dang / dad pa'i stobs 'di ni dad pa zhes bya'o/ /gzhan yang dad pa'i stobs ni dad pa gang gis gzhan gyi sgra la dad pa ste/byang chub sems dpa'i gzhan gyi sgra de gang zhe na/ gang gzhan las byang chub kyi sems yang dag par 'dzin du 'jug pa thos pa'o/ /gzhan las byang chub sems dpa'i spyod pa dang / byang chub kyi sems dang / bsam pa dang / sbyor ba dang / pha rol tu phyin pa dang / thabs la mkhas pa dang / bsdu ba'i dngos po dang / sangs rgyas kyi chos dang / byang chub sems dpa'i chos thos pa ste/ gzhan gyi sgra thos nas mngon par dad pa 'di ni dad pa zhes bya'o zhes gsungs so/ /byang chub sems dpa'i sde snod las kyang /shA ri'i bu 'di la byang chub sems dpas lhag pa'i bsam pas byang chub tu sems bskyed pa de ni dad pa yin te/ dad pa mang ba dang / 'phags pa rnams la lta 'dod pa dang / dam pa'i chos nyan par 'dod pa yin no/ /de las dang las kyi rnam par smin pa la mngon par yid ches so//de mi dge ba bcu'i las kyi lam spong zhing dge ba bcu'i las kyi lam yang dag par bzung nas gnas so/ /dad pa can de'i dge sbyong dang bram ze yang dag par song ba dang / yang dag par zhugs pa mang du thos pa dang / thos pa la brtson pa dang / tshul bzhin yid la byed pa la rab tu brtson pa dang /the tshom las rgal ba dang / yang 'byung ba dang zad pa dang rdzogs pa'i sangs rgyas dang byang chub sems dpa' dang sangs rgyas kyi nyan thos de dag dge ba'i bshes gnyen yin par shes nas/ yid ches shing bsten te mnyes par byed do/ /dge ba'i bshes gnyen de dag kyang de la las dang las kyi rnam par smin pa ston to//snod du rig nas zab mo'i gtam 'di lta ste/ stong pa nyid dang mtshan ma med pa dang / smon pa med pa dang / mngon par 'du mi byed pa dang / ma skyes pa dang / ma byung ba'i gtam dang / bdag med pa dang / sems can med pa dang / srog med pa dang / gang zag med pa'i gtam dang / rten cing 'brel par 'byung ba'i gtam brjod de/ thos nas kyang the tshom mi za zhing chos thams cad la chags pa med par 'jug /phung po dang / khams dang / skye mched la yang mi chags/ chos thams cad rang bzhin gyis stong par yang yid ches te/sangs rgyas kyi ye shes tshol zhing bag yod pa la gzhol ba yin no/ /bag yod pa gang zhe na/ gang dbang po sdom pa dang / rang gi sems 'dul ba dang / gzhan gyi sems bsrung ba'o zhes gsungs so/ /zla ba'i snying po'i le'u las/ dkon mchog gsum la sems can rnams dad cing dang ba ni dkon te/dper na yid bzhin gyi nor bu rin po che dper brjod pa bzhin no zhes gsungs so/ /klu'i rgyal po rgya mtshos zhus pa las kyang / klu'i bdag po byang chub sems dpa' chos lnga dang ldan pa dag ni dad pa can yin te/ lnga gang zhe na/ mos pa'i stobs dang / las kyi rnam par smin pa la 'jug pa'i stobs dang /byang chub kyi sems mi 'dor ba'i stobs dang / yi dam la brtan pa'i stobs dang / mi dge ba'i chos thams cad spangs te/ nyes par byas pa thams cad bzod pa'i stobs dang ldan pa'o zhes gsungs so/ /de bzhin gshegs pa'i yon tan dang ye shes bsam gyis mi khyab pa'i yul la 'jug pa bstan pa'i mdo las kyang /'phags pa byang chub sems dpa' sems dpa' chen po sgrib pa thams cad rnam par sel bas smras pa/ 'jam dpal chos lnga po 'di dag la mos na byang chub sems dpa' sems dpa' chen po yon tan gyi bye brag 'di dag dang gzhan grangs med pa yang thob par 'gyur ro//lnga gang zhe na/ chos thams cad gnyen po med pa dang / ma skyes pa dang / ma 'gags pa dang / brjod du med par mos pa dang / lhun gyis grub cing rnam par mi rtog pa de bzhin gshegs pa'i spyod pa dang / spyod lam dang /bya ba dang / 'jug pa dang / gnas 'dzam bu'i gling gi rdul phra rab kyi rdul bas kyang ches lhag pa rnams sems can gyi bsam pa'i dbang gis skad cig gcig la rtag tu 'jug par mos pa dang / seng ge mdangs bzangs kyi rtog pa brjod pa las/ gang sems can yongs su smin par byas pa de bskal pa gang gA'i klung gi bye ma snyed nas bcom ldan 'das shAkya thub pa mngon par rdzogs par sangs rgyas nas bstan par mos pa dang /mar me mdzad kyis lung bstan pa nas bzung ste/ mngon par rdzogs par byang chub pa de'i bar du bcom ldan 'das shAkya thub pa'i byang chub sems dpa'i spyod pa gang yin pa de sangs rgyas kyi yul gyi bskal pa mu med pa nas/mngon par rdzogs par sangs rgyas nas/ bstan par mos pa dang / gang shAkya bsad pa bstan pas sems can yongs su smin par byas pa de yang bcom ldan 'das shAkya thub pas sangs rgyas kyi yul gyi bskal pa mu med pa nas mngon par rdzogs par sangs rgyas nas bstan par mos pa'o zhes gsungs so//de dag pas kyang gang dag byang chub sems bskyed pa'i sems can de dag rnyed par dka' ste/ byang chub tu sems bskyed pa rnyed par dka' bar ci mngon zhe na/mdo mang po las thos te/ sdong po bkod pa'i mdo las 'byung ba/ gang dag 'jig rten na bla na med pa yang dag par rdzogs pa'i byang chub tu sems bskyed pa'i sems can de dag ni shin tu rnyed par dka'o/ /byang chub kyi sems ni sangs rgyas kyi chos thams cad kyi sa bon lta bu'o //'gro ba thams cad kyi chos dkar po rnam par 'phel bar byed pas zhing lta bu'o/ /nyes pa byas pa thams cad bsregs pas bsregs pa'i bskal pa'i me lta bu'o/ /mi dge ba'i chos thams cad zad par byed pa'i phyir sa 'og lta bu'o/ /don thams cad yongs su bsgrub pas yid bzhin gyi nor bu'i rgyal po lta bu'o//bsam pa thams cad yongs su rdzogs par byed pas bum pa bzang po lta bu'o/ /'khor ba'i chu la rgyu ba 'don pas lcags kyu lta bu'o/ /lha dang mi dang lha ma yin dang bcas pa'i 'jig rten la mchod rten lta bu ste/ mdor na sangs rgyas kyi chos thams cad dang /sangs rgyas kyi yon tan thams cad ji skad yod pa byang chub kyi sems kyi yon tan dang phan yon yang de snyed yod do/ /de ci'i phyir zhe na/ byang chub sems dpa'i spyod pa'i dkyil 'khor thams cad kyang 'di las byung ba ste/ 'das pa dang / ma 'ongs pa dang / da ltar byung ba'i de bzhin gshegs pa thams cad kyang 'di las skyes so//rigs kyi bu 'di lta ste dper na dngul chu'i rigs gser du snang ba zhes bya ba yod do / /de ni srang gcig gis kyang lcags srang stong gser du 'gyur ro/ /dngul chu srang gcig po de ni lcags srang stong po des zad par bya ba'am/ lcags su bsgyur bar mi nus so//de bzhin du thams cad mkhyen pa nyid du sems bskyed pa'i dngul chu'i khams dge ba'i rtsa ba yongs su bsngos pa'i ye shes kyis yongs su gzung ba ni/ las dang nyon mongs pa'i sgrib pa'i lcags thams cad zad par byas te/ chos thams cad thams cad mkhyen pa nyid kyi kha dog tu byed kyang /thams cad mkhyen pa nyid du sems bskyed pa'i ro'i khams gcig po de ni las dang nyon mongs pa'i lcags thams cad kyis kyang kun nas nyon mongs par bya ba'am/ zad par mi nus so/ /rigs kyi bu 'di lta ste/ dper na sgron ma gcig khyim mam khang bu ji lta bu 'ang rung ste/der phyung na de phyung ma thag tu lo brgya stong du bsags pa'i mun pa mun nag kyang sel zhing snang bar byed do/ /de bzhin du thams cad mkhyen pa nyid du sems bskyed pa'i sgron ma gcig sems kyi bsam pa'i khyim thibs po ma rig pa'i mun pa mun nag dang ldan pa ji lta bu yang rung ba der phyung na/de phyung ma thag tu bskal pa brjod du med pa brgya stong nas bsags pa'i las dang nyon mongs pa'i sgrib pa'i mun pa mun nag kyang sel zhing ye shes kyi snang ba yang bskyed do/ /rigs kyi bu 'di lta ste/ dper na nor bu rin po che yid bzhin gyi rgyal po'i cod pan thogs pa'i klu'i rgyal po chen po rnams la gzhan gyis gnod pa bya ba'i 'jigs pa med do//de bzhin du byang chub kyi sems snying rje chen po'i nor bu rin po che yid bzhin gyi rgyal po'i cod pan thogs pa'i byang chub sems dpa' rnams la ngan song dang ngan 'gros gnod par bya ba'i 'jigs pa med do//rigs kyi bu 'di lta ste/ dper na zla ba dang nyi ma'i dkyil 'khor gyi 'od kyis ji tsam snang bar byas pa de'i bar gyi gang nor dang / 'bru dang / rin po che dang / gser dang / dngul dang / me tog dang / dri dang / phreng ba dang / byug pa dang / gos dang / longs spyod gang ji snyed pa de dag thams cad kyis nor bu rin po che chen po dbang gi rgyal po'i rin du mi chog go//de bzhin du ji srid du dus gsum la thams cad mkhyen pa'i ye shes chos kyi dbyings kyi yul snang bar mdzad pa de srid du lha dang mi thams cad dang / nyan thos dang / rang sangs rgyas thams cad kyi dge ba'i rtsa ba zag pa dang bcas pa dang zag pa med pa gang ji snyed pa de dag thams cad kyis kyang /byang chub tu sems bskyed pa'i nor bu rin po che chen po'i dbang gi rgyal po'i rin du mi chog go/ /rigs kyi bu 'di lta ste/ dper na rgya mtsho chen po ba dang / ma he dang ra'i 'o mas yongs su gang ba'i nang du seng ge'i 'o ma thigs pa gcig blugs pas 'o ma de dag thams cad 'gyes par 'gyur te/'dur mi btub bo/ /de bzhin du bskal pa brjod du med pa brgya stong du bsags pa'i las dang nyon mongs pa kun gyi 'o ma'i rgya mtshor yang de bzhin gshegs pa skyes bu'i seng ge chen po'i thams cad mkhyen pa nyid du sems bskyed pa'i 'o ma'i thigs pa gcig blugs pas de thams cad ma lus pa zad par 'gyur te/nyan thos dang rang sangs rgyas thams cad kyi rnam par thar pa rnams kyang mi gnas mi 'du'o/ /rigs kyi bu 'di lta ste/ dper na dpa' bo la brten pa'i mi ni dgra thams cad kyis mi 'jigs so//de bzhin du byang chub sems dpa' thams cad mkhyen pa nyid du/ sems bskyed pa dpa' bo la brten pa yang spyod pa ngan pa'i dgra thams cad kyis mi 'jigs so/ /rigs kyi bu 'di lta ste/ dper na rdo rje rin po che chen po ni chag kyang / thams cad las khyad par du 'phags pa'i gser gyi rgyan zil gyis gnon to//de bzhin du thams cad mkhyen pa nyid du sems bskyed pa rdo rje rin po che bsam pa log par zhugs pas chag par gyur kyang / nyan thos dang rang sangs rgyas kyi yon tan gyi gser gyi rgyan zil gyis gnon cing byang chub sems dpa'i ming yang mi 'dor te/'khor ba'i dbul ba thams cad kyang rnam par zlog go zhes ji skad gsungs pa lta bu'o/ /gsal rgyal gyis zhus pa las kyang / rgyal po chen po khyod dam pa'i chos kho na 'tshol ba dang / rgyal po chen po khyod ji lta bur yul ko sa la'i mi rnams kyi don dang / phan pa dang bde ba'i phyir zhugs pa de bzhin du 'jig rten thams cad kyi don dang /phan pa dang / bde ba dang / bsgral ba dang / dgrol ba dang / dbugs dbyung ba dang / yongs su mya ngan las bzla ba'i phyir zhugs shing / khyod thams cad mkhyen pa thob par bya ba dang / sangs rgyas kyi chos thams cad yongs su rdzogs par bya ba'i phyir/bla na med pa yang dag par rdzogs pa'i byang chub tu zhugs pa rgyal po chen po khyod legs so legs so/ /yang rgyal po chen po rgyal bu rgyal byed kyi tshal 'di na lha brgya stong du ma lus mi snang bar byas te gnas nas nga la bsnyen bkur byed pa yod do/ /de dag kyang rgyal po chen po khyod gang yang dag par rdzogs pa'i byang chub tu mos pa dang /dad pa dang / tshol ba dang / smon pa la bsngags pa'o/ /bstod do rjes su yi rang ngo / /rgyal po chen po de dag shin tu dga' ba bskyed de/ mos pa skyes te/ yid dang mthun par gyur to/ /de ci'i phyir zhe na/ 'di ltar rgyal po chen po su byang chub la 'dun pa bskyed pa dang /dad pa dang / 'dod pa dang / smon pa bskyed pa de sangs rgyas brgya phrag du ma dang / chos kyi 'khor lo bskor ba brgya phrag du ma dang / 'phags pa'i dge 'dun gyi rgyun brgya phrag du ma dang / sangs rgyas bye ba khrag khrig brgya stong phrag du ma nas gang gA'i klung gi bye ma bas kyang mang ba'i bar gyi sangs rgyas 'byung ba dang /chos kyi 'khor lo bskor ba dang / 'phags pa'i dge 'dun rgyun mi 'chad par 'byung ba dang / skye bar bya ba'i phyir zhugs pa yin no zhes gsungs so/ /rab tu zhi ba rnam par nges pa'i cho 'phrul gyi mdo las kyang / nam byang chub sems dpa' thams cad mkhyen pa nyid kyi sems dang mi 'bral zhing / nyan thos dang / rang sangs rgyas kyi sems kyi skabs mi 'byed pa dang / sems gzhan yid la mi byed pa thams cad mkhyen pa nyid la dmigs pa'i sems kyi nyon mongs pa thams cad kyi skabs mi 'byed cing /pha rol tu phyin pa drug mi 'dor la/ sems can thams cad la byams pa chen po dang / snying rje chen po dang ldan zhing thams cad mkhyen pa nyid kyi sems yid la byed pas gnas pa 'di ni byang chub sems dpa'i sems kyi rgyan no zhes gsungs so/ /'phags pa ma skyes dgra'i le'u las kyang /'phags pa 'od srungs chen pos smras pa/ 'jam dpal dper na seng ge'i phru gu 'brangs nas ring po ma lon pa stobs dang rtsal ma rdzogs kyang / gang nas gang du seng ge'i phru gu'i dri rdzis khyer ba de dang de logs su ri dgas kyi tshogs de dag gis dri de mi bzod nas 'bros so//glang po che gang dag 'breng pa sra bas dam por bcings pa de dag kyang seng ge'i phru gu de'i dri tshor na sdangs shing 'drogs nas bcings pa'i 'breng pa de dag kyang bcad de/ gang dga' bar 'bros so/ /ri sul na gnas pa ni ri sul du/ khung na gnas pa ni khung du/ chu na gnas pa ni chur 'jug go/ /bya ni nam mkha' la 'phur ro/ /'jam dpal de bzhin du byang chub sems dpa' shes rab kyi stobs bskyed pa ma rdzogs kyang / sems bskyed ma thag tu nyan thos dang rang sangs rgyas thams cad zil gyis gnon te/ bdud thams cad kyang rang gi gnas nas sngangs skrag cing rang gi gnas na mi dga'o zhes gsungs so/ /rin po che'i phung po'i mdo las kyang / kun dga' bo 'di ji snyam du sems/ mi rkang lag bcad na 'tsho'am/ gsol pa bcom ldan 'das 'tsho'o/ /bcom ldan 'das kyis bka' stsal pa/ji ltar snying phyung na 'tsho'am/ gsol pa bcom ldan 'das de ni mi 'tsho'o/ /bcom ldan 'das kyis bka' stsal pa/ kun dga' bo lag pa dang rkang pa lta bur ni nga'i shA ri'i bu dang / maung gal gyi bur lta'o/ /snying lta bu ni byang chub sems dpa' rnams lta'o/ / kun dga' bo gal te byang chub sems dpa' shing rta'i nang du zhugs te/ 'dod pa'i yon tan lngas rtse zhing dga' dgur spyod la/ de'i shing rta 'dren pa gzhan med na/ kun dga' bo byang chub sems dpa' de'i shing rta ni de bzhin gshegs pa'i dbu la yang bskur ro/ /gal te gnas brtan shA ri'i bu dang maung gal gyi bu rnam par thar pa'i sgo gsum la bskal pa'am bskal pa las lhag par gnas kyang /de la de bzhin gshegs pa rim gro dang g.yog bya bar brtson par mi mdzad do zhes gsungs so/ /'od srungs kyi le'u las kyang / 'od srungs 'di lta ste/ dper na zla ba'i dkyil 'khor btang ste/su yang skar ma'i gzugs la nam yang phyag mi 'tshal lo/ /'od srungs de bzhin du mkhas pa rnams kyang nga'i bslab pa la zhugs pa'i byang chub sems dpa' btang ste/ nyan thos la nam yang phyag mi 'tshal lo/ /'od srungs dper na zla ba tshes pa la phyag bya ba de ltar zla ba nya ba la ma yin no//'od srungs de bzhin du gang dag gang nga la rab tu dad pa de dag gis/ byang chub sems dpa' rnams la phyag bya'i/ de bzhin gshegs pa rnams la ni ma yin no/ /de ci'i phyir zhe na/ byang chub sems dpa' las ni de bzhin gshegs pa rnams skye'o/ / de bzhin gshegs pa dag las ni nyan thos dang / rang sangs rgyas thams cad skye'o zhes gsungs so/ /yab dang sras mjal ba'i mdo las kyang / dge slong dag thams cad mkhyen pa nyid dang ldan pa'i sems bskyed pa'i yon tan gyi tshogs ni/ de bzhin gshegs pa gang gA'i klung gi bye ma snyed kyis bskal pa gang gA'i klung gi bye ma snyed du brjod kyang brjod par mi nus so//de ci'i phyir zhe na/ de bzhin gshegs pa sngon byang chub sems dpa'i spyad pa spyod pa na sems can ji snyed tsam sems can du bsdu bar bsdus pa'i sems can de dag thams cad la phan pa dang mi ldan pa'i sems gcig kyang ma skyes so//sems can gyi khams tshad med de/ sems can gyi khams ji snyed pa de bzhin gshegs pa byang chub sems dpa'i spyad pa spyod pa na sems bskyed pa re re las bsod nams kyi phung po de snyed skye'o/ /de ci'i phyir zhe na/ dge slong dag sems can gyi khams ni mi zad pa ste/ji ltar sems can gyi khams mi zad pa de bzhin du de bzhin gshegs pa byang chub sems dpa'i spyad pa spyod pa na/ sems bskyed pa re re las kyang bsod nams kyi phung po mi zad par skye'o zhes gsungs so/ /de bzhin gshegs pa'i gsang ba'i mdo las kyang /byang chub sems dpa' rnams kyi byang chub kyi sems kyi tshogs ni/ dkon mchog gsum gyi rigs mi 'chad par 'gyur ro zhes gsungs so/ /yang de nyid las 'byung ba/ /byang chub sems kyi bsod nams gang / /de la gal te gzugs mchis na/ /nam mkha'i khams ni kun gang ste//de ni de bas lhag par 'gyur/ /sems can kun gyi bsod nams kyi/ /phung po ji snyed yongs bzung ba/ /je snyed byang chub sems dpa' yi/ /byang chub sems las rab tu 'byung / /zhes gsungs so/ /chos yang dag par sdud pa'i mdo las kyang / /byang chub sems dpas byang chub kyi sems las chos thams cad khong du chud par rig par bya'o//chos thams cad ni chos kyi dbyings dang mnyam ste/ shes bya tsam du zad pa dang ye shes stong pa'i phyir/ chos thams cad glo bur du 'byung ba/ gnas pa ma yin pa/ yongs su shes par bya ba ma yin pa ste/sems can dag kyang 'di lta bu'i chos nyid 'di rtogs par bya'o snyam du/ byang chub sems dpa'i sems bskyed pa gang yin pa 'di ni/ byang chub sems dpa'i byang chub kyi sems zhes bya ste/ sems can thams cad la phan pa dang bde ba'i sems so//bla na med pa'i sems so/ /byams pas brlan pa'i sems so/ /snying rjes yongs su mi skyo ba'i sems so/ /dga' ba chen pos 'gyod pa med pa'i sems so/ /btang snyoms kyis dri ma med pa'i sems so/ /stong pa nyid kyis mi 'gyur ba'i sems so/ /mtshan ma med pas dmigs pa med pa'i sems so//smon pa med pas gnas pa med pa'i sems so zhes gsungs so/ /thams cad mkhyen pa nyid du yongs su bsngos pa'i dge ba'i rtsa ba chung ngu yang byang chub kyi snying po la ma 'dug gi bar du/ bar ma dor zad par mi 'gyur te/ 'phags pa blo gros mi zad pas bstan pa'i mdo las 'byung ba/btsun pa sha ra dwa ti'i bu dper na rgya mtsho chen por chu thigs pa gcig lhung ba ni/ bskal pa chen po ma byung gi bar du zad cing skam par mi 'gyur ro/ /de bzhin du byang chub tu yongs su bsngos pa'i dge ba'i rtsa ba yang byang chub kyi snying po la ma 'dug gi bar du/bar ma dor zad cing med par mi 'gyur ro zhes gsungs so/ /thabs la mkhas pa'i mdo las kyang / byang chub sems dpa' thabs la mkhas pa gal te brgya la dbul por gyur na/ de tha na kha zas gzar bu gang zhig sbyin na yang 'di ltar slob ste/ bcom ldan 'das kyis kyang sems ni rgya che'i sbyin pa ni mi che'o zhes gsungs pas na bdag ni sbyin par bya ba'i chos yongs su btang ba chung mod kyi/thams cad mkhyen pa'i sems kyis tshad med par 'gyur ro snyam du sems so zhes gsungs so/ /bskal pa bzang po'i mdo las kyang / de bzhin gshegs pa skar ma'i rgyal po ba lang rdzir gyur pa na/de bzhin gshegs pa sgra 'byin zhes bya ba de la so rtsi'i 'dab ma phul te/ dang po byang chub tu sems bskyed do/ /de bzhin gshegs pa grags pa thag par gyur pa na/ de bzhin gshegs pa glog gi sgron ma zhes bya ba de la ras kyi kha tshar cig phul te/dang po byang chub tu sems bskyed do/ /de bzhin gshegs pa 'od 'phro can grong gi sprang por gyur pa na/ de bzhin gshegs pa 'od mtha' yas de la rtsa'i me sgron phul te/ dang po byang chub tu sems bskyed do/ /de bzhin gshegs pa gdul dka' shing thun du gyur pa na de bzhin gshegs pa rnam par gnon pa brtan pa zhes bya ba de la so shing phul te/dang po byang chub tu sems bskyed do/ /de bzhin gshegs pa yon tan gyi rgyal mtshan chu sbyin pa'i bdag por gyur pa na de bzhin gshegs pa 'jam dpal grags pa zhes bya ba de la chu phor bu gang phul te/ dang po byang chub tu sems bskyed do//de bzhin gshegs pa stobs kyi sde sman pa'i rgyal por gyur pa na/ de bzhin gshegs pa phyag chen zhes bya ba de la skyu ru ra gcig phul te/ dang po byang chub tu sems bskyed do zhes gsungs so/ /yang rin po che'i phung po'i mdo las/ dgra bcom pa'i 'bras bu 'dod pa'i mi gang la la zhig gis/nor bu rin po che dag gis 'jig rten gyi khams mtha' yas pa bkang ste/ sbyin pa byin pa bas/ byang chub sems dpa' gang gis byang chub sems dpa'i theg pa pa'i gang zag mthong nas thams cad mkhyen pa nyid dang ldan pa'i sems kyis rjes su yi rang na rjes su yi rang ba dang ldan pa'i bsod nams 'di la snga ma'i sbyin pa'i bsod nams kyi phung po des/brgya'i char yang nye bar mi 'gro ba nas / rgyu'i bar du yang mi bzod do zhes gsungs so/ /byang chub sems dpa' thams cad mkhyen par yongs su bsngos pas sbyin pa de ji ltar zil gyis gnon zhe na/shes rab kyi pha rol tu phyin pa las 'byung ba/ shA ri'i bu 'di la byang chub sems dpa' sems dpa' chen po rjes su yi rang ba dang ldan pa'i sems bskyed pa gcig gis/ nyan thos dang rang sangs rgyas kyi sbyin pa dang tshul khrims dang / bzod pa dang / brtson 'grus dang /bsam gtan dang / shes rab rnams zil gyis gnon par 'dod pas/ shes rab kyi pha rol tu phyin pa la bslab par bya'o zhes gsungs so/ /sems can rnams la snying rje che ba ni rnyed par dka' ste/ sems can rnams la snying rje che ba rnyed par dka' bar ci mngon zhe na/mdo sde mang po las thos pa'i phyir te/ zla ba'i snying po'i le'u las 'byung ba/ grogs po dag sems can rnams la snying rje ba dang / snying brtse ba ni rnyed par dka' ste/ dgra dpa' bo lag na rdo rje thogs shing drag tu 'debs pa'i nang nas sgrol ba bzhin no zhes gsungs so/ /byang chub sems dpa'i sde snod kyi mdo las 'byung ba/ 'di la byang chub sems dpa' byang chub tu mngon par mos pa'i sngon du 'gro ba ni snying rje chen po yin no//dper na mi'i srog gi dbang po'i sngon du 'gro ba ni dbugs 'byin pa dang rngub pa'o/ /de bzhin du byang chub sems dpa' theg pa chen po yang dag par bsgrub pa'i sngon du 'gro ba ni snying rje chen po'o/ /dper na 'khor los sgyur ba'i rgyal po'i rin po che thams cad kyi sngon du 'gro ba ni 'khor lo rin po che'o//de bzhin du byang chub sems dpa'i snying rje chen po yang sangs rgyas kyi chos thams cad kyi sngon du 'gro ba'o zhes gsungs so/ /yang de nyid las bdag gi 'khrul pa la so sor rtog cing / gzhan gyi 'khrul pa la snying rje ba'o zhes kyang gsungs so//khyim bdag dpas byin gyis zhus pa las kyang / khyim bdag rnams 'di la byang chub sems dpa' byang chub mngon par rdzogs par 'tshang rgya bar 'dod pas/ sems can thams cad la snying rje chen po'i sems bskyed de lus dang srog la ma chags par bya'o//nor dang / 'bru dang / khyim dang / chung ma dang / bu pho dang / bu mo dang / zas dang / skom dang / gos dang / bzhon pa dang / mal cha dang / bdug pa dang / spos dang / phreng ba dang / byug pa dang / yo byad thams cad la ma chags par bya'o/ / de ci'i phyir zhe na/ khyim bdag rnams sems can dag ni phal cher lus dang srog la sogs pa la chags te/ sdig pa'i las byas pas ngan 'gro rnams su skye la/ sems can rnams la snying rje chen po'i sems bskyed nas/ lus dang srog la ma chags par bde 'gror skye ste/ des sems can thams cad yid la byas la/ sbyin pa la sogs pa dge ba'i chos thams cad la brtson par bya'o zhes gsungs so/ /byang chub sems dpa' rnams ni snying rje'i bdag nyid can yin te/ ji lta zhe na/ 'phags pa dkon mchog sprin gyi mdo las 'byung ba/ rigs kyi bu chos bcu dang ldan na/byang chub sems dpa' snying rje'i bdag nyid can rnams yin no/ /bcu gang zhe na 'di lta ste/ sems can sdug bsngal ba dang / skyabs med pa dang / mgon med pa dang / rten med pa dang / dpung gnyen med pa dag mthong na/ byang chub tu sems bskyed do/ /byang chub tu sems bskyed nas/chos nyid thob par bya ba'i phyir 'bad rtsol brtson 'grus rtsom ste/ dka' ba spyod pa brgya dag kyang byed do/ /de dag chos nyid thob nas sems can rnams la phan par byed do/ /'di lta ste/ sems can ser sna can rnams sbyin pa la gzhol bar byed/ tshul khrims 'chal pa rnams tshul khrims la/gnod sems can rnams bzod pa la/ le lo can rnams brtson 'grus la/ sems 'khrugs pa rnams bsam gtan la/ sems can shes rab 'chal ba rnams mthong na/ shes rab la gzhol bar byed kyang / sems can gyi sdug bsngal mi bzad pa/ rtsub pa tsha ba dag gis nyen cing byang chub las phyir ldog par mi 'gyur ro//rigs kyi bu chos bcu po de dag dang ldan na/ byang chub sems dpa' snying rje'i bdag nyid can yin no zhes gsungs so/ /gzungs kyi dbang phyug gi rgyal pos zhus pa las kyang / kye ma sems can 'di dag ni srid pa'i khol po chen po/chung ma dang / bu pho dang / bu mo la yongs su zhen pas sbags pa rang dbang med pa bdag la mi 'bongs pa dag ste/ rang dbang yod pa'i bdag la 'bongs par bya ba dang / gar dga' bar 'gro bar bya ba'i phyir/ de dag la chos bstan par bya'o snyam du/ sems can rnams la byang chub sems dpa'i snying rje chen po skye ba dang /kye ma sems can 'di dag ni phan tshun du mi 'phrod pa khro ba dang / zhe sdang dang / gnod sems mang ba dag ste/ khro ba dang / zhe sdang dang / gnod sems spang bar bya ba'i phyir/ de dag la chos bstan par bya'o snyam du sems can rnams la byang chub sems dpa'i snying rje chen po skye ba dang /kye ma sems can 'di dag ni sdig pa'i grogs pos yongs su zin pa/ dge ba'i bshes gnyen dang bral ba sdig pa'i las byed pa dag ste/ dge ba'i bshes gnyen gyis yongs su zin pa dang / sdig pa'i grogs po yongs su spang bar bya ba'i phyir/de dag la chos bstan par bya'o snyam du sems can rnams la byang chub sems dpa'i snying rje chen po skye ba dang / kye ma sems can 'di dag ni brkam pa/ chags pas zil gyis gnon pa chog mi shes shing / 'phags pa'i shes rab kyi gnas pa dang bral ba dag ste/chags pa spang ba dang / 'phags pa'i shes rab bskyed pa'i phyir/ de dag la chos bstan par bya'o snyam du sems can rnams la byang chub sems dpa'i snying rje chen po skye ba dang / kye ma sems can 'di dag ni las kyi rnam par smin pa la mi lta zhing rtag pa dang chad pa la gnas pa dag ste/rten cing 'brel bar 'byung ba zab mo dang / las dang bya ba la gzud pa'i phyir/ de dag la chos bstan par bya'o snyam du sems can rnams la byang chub sems dpa'i snying rje chen po skye ba dang / kye ma sems can 'di dag ni ma rig pa dang / gti mug gis ldongs pa dang /bdag dang sems can dang / srog dang / gso ba dang / skyes bu dang / gang zag la mngon par zhen pa dag ste/ 'phags pa'i shes rab kyi mig rnam par dag par bya ba dang / lta bar gyur pa thams cad spang bar bya ba'i phyir/ de dag la chos bstan par bya'o snyam du sems can rnams la byang chub sems dpa'i snying rje chen po skye ba dang /kye ma sems can 'di dag ni 'khor ba la mngon par dga' ba/ phung po lnga'i gshed mas yongs su zin pa dag ste/ khams gsum thams cad las dbugs dbyung ba'i phyir / de dag la chos bstan par bya'o snyam du sems can rnams la byang chub sems dpa'i snying rje chen po skye ba dang /kye ma sems can 'di dag ni bdud kyi zhags pa'i bcing bas bcings pa g.yo ba dang / rlom sems la gnas pa dag ste/ bdud kyi zhags pas bcings pa thams cad las rnam par dgrol ba dang / g.yo ba dang / rlom sems spang ba'i phyir de dag la chos bstan par bya'o snyam du sems can rnams la byang chub sems dpa'i snying rje chen po skye ba dang /kye ma sems can 'di dag ni mya ngan las 'da' ba'i sgo bcad cing ngan 'gro'i sgo phye ba dag ste/ mya ngan las 'das pa'i sgo dbye ba dang / ngan 'gro'i sgo bcad par bya ba'i phyir/ de dag la chos bstan par bya'o snyam du sems can rnams la byang chub sems dpa'i snying rje chen po skye'o zhes gsungs so//'di dag pas kyang gang dag byang chub sems dpa' la rma 'byin pa'i las kyi sgrib pa dang / bdud kyi las dang / brnyas pa'i sems dang / dam pa'i chos spong ba la sogs pa bar du gcod pa'i chos rnams yongs su spong ba'i sems can de dag ni ches rnyed par dka'o//de la byang chub sems dpa' la rma 'byin pa ni dad pa'i stobs bskyed pa la 'jug pa'i phyag rgya'i mdo las 'byung ba/ 'jam dpal gang la la zhig gis 'jig rten gyi khams thams cad kyi rdul phra rab kyi rdul snyed kyi sems can rnams kyi dge ba'i rtsa ba'i bar chad byas pa bas /gang gzhan zhig gis dge bsnyen ston pa gzhan la mi brten par dge ba bcu'i las kyi lam dang ldan pa gcig gi dge ba'i rtsa ba cig gi bar chad byas pa de ni de bas sdig pa ches grangs med par skyed do/ /gang la la zhig gis 'jig rten gyi khams thams cad kyi rdul phra rab kyi rdul snyed kyi dge bsnyen rnams kyi dge ba'i rtsa ba bar chad byas pa bas gang gzhan zhig gis dge slong gcig gi dge ba'i rtsa ba cig gi bar chad byas na de ni de bas sdig pa ches grangs med pa skyed do//de ltar rim bzhin du dad pas rjes su 'brang ba dang /chos kyi rjes su 'brang ba dang / brgyad pa dang / rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa dang / rang sangs rgyas dang / byang chub sems dpa' phyugs kyi shing rta lta bus 'gro ba dang / glang po che'i shing rta lta bus 'gro ba dang / /zla ba dang nyi ma lta bus 'gro ba dang /nyan thos kyi rdzu 'phrul lta bus 'gro ba dang / gang la las 'jig rten gyi khams thams cad kyi rdul phra rab kyi rdul snyed kyi nyan thos kyi rdzu 'phrul lta bus 'gro ba'i byang chub sems dpa' rnams kyi dge ba'i rtsa ba'i bar chad byas pa bas/ gang gzhan zhig gis de bzhin gshegs pa'i rdzu 'phrul lta bus 'gro ba'i byang chub sems dpa' gcig gi dge ba'i rtsa ba'i bar chad byas sam/khros sam/ brnyas pa'i sems bskyed na/ de ni de bas sdig pa ches grangs med pa skyed do/ /gang la la zhig gis phyogs bcu'i 'jig rten thams cad kyi rdul phra rab kyi rdul snyed kyi sems can rnams kyi mig phyung ste bdog pa thams cad phrogs pa bas/gang gzhan zhig gis byang chub sems dpa' la brnyas pa'i sems skyes nas de la spyos shing brgyad de / nyam nga bar byas na/ de ni de bas sdig pa ches mang du skyed do//gang la la zhig gis byang chub sems dpa' la rkyen gang yang rung bas khyad du bsad de spyos na/ de'i sdig pa'i las kyis sems can dmyal ba ngu 'bod chen por skye ste/ lus dpag tshad lnga brgya pa las mgo bo lnga brgya yod de/ mgo bo re re la lce brgya brgya lce re re la yang lcags kyi thong gshol 'bar ba lnga brgya lnga brgyas rmo'o//gang la la zhig gis stong gsum gyi stong chen po'i 'jig rten gyi khams su skyes pa'i sems can thams cad la dbyug pas brdeg pa dang / mtshon gyis gdab pa cher byas te/ bdog pa thams cad phrogs pa bas/ gang gzhan zhig gis byang chub sems dpa' la brnyas pa'i sems bskyed de/khros shing gnod sems dang tha ba dang / khros pa'i sems bskyed na/ de ni de bas sdig pa ches grangs med par bskyed do/ /gtum zhing sems can rnams la gnod par dga' ba gang la las gang gA'i klung gi bye ma snyed kyi 'jig rten gyi khams rnams su/'jig rten gyi khams re re zhing yang gang gA'i klung gi bye ma snyed kyi dgra bcom pa'i srog gcod pa dang / gang gA'i klung gi bye ma snyed kyi rin po che'i mchod rten rin po che'i stegs bus bskor te/ gdugs dang / rgyal mtshan dang / ba dan bsgreng ba bshig pa bas/ gang gzhan zhig gis theg pa chen po la dad pa'i byang chub sems dpa' la theg pa chen po nyid las gzhi blangs te/brnyas pa'i sems bskyed pa dang / rkyen gang yang rung bas khro zhing gshe ba dang / spyos zhing nyam nga bar byas na/ de ni de bas kyang sdig pa ches grangs med pa skyed do/ /de ci'i phyir zhe na/ de bzhin gshegs pa rnams ni byang chub sems dpa' las skyes pa'i phyir ro//gang byang chub sems dpa' la skur pa 'debs pa ni/ sangs rgyas kyi rigs gcod par zhugs pa yin na/ /gang byang chub sems dpa' la skur ba 'debs pa des dam pa'i chos spangs pa yin no/ /chos gzhan ma yin/ chos yongs su 'dzin pa gzhan ma yin te/ chos yongs su 'dzin pa de ni chos so/ /gang la la zhig khros te phyogs bcu'i 'jig rten gyi khams kyi sems can thams cad mun pa mun nag tu bcug pa bas/ gang gzhan zhig khros te/ byang chub sems dpa' la rgyab kyis phyogs shing / ma rungs pa de ma mthong yang bla snyam pa de ni de bas sdig pa ches grangs med par skyed do//gang la la zhig gis 'dzam bu'i gling gi sems can rnams kyi srog bcad de/ bdog pa thams cad phrogs pa bas/ gang gzhan zhig gis byang chub sems dpa' ci 'dra yang rung ba la/ smad pa 'di ni de las sdig pa ches grangs med pa skyed do zhes ji skad gsungs pa lta bu'o//'phags pa byams pa seng ge sgra'i mdo las kyang / byang chub sems dpa' gang la la zhig gis stong gsum gyi stong chen po'i 'jig rten gyi khams su gtogs pa'i sems can thams cad la spyos pa dang / brgyad pa dang / dbyug pa dang / khu tshur gyis brdeg pa de tsam gyis byang chub sems dpa' la rma phyung zhing smas par mi 'gyur gyi byang chub sems dpa' gang gis byang chub sems dpa' gcig la/ tha na gnod sems dang / tha ba dang / zhe sdang gi sems bskyed pa de tsam gyis byang chub sems dpa' la rma phyung zhing smas par 'gyur ro//de ci'i phyir zhe na/ gal te des thams cad mkhyen pa yongs su ma btang na/ byang chub sems dpas byang chub sems dpa'i cig shos la gnod sems dang / tha ba dang / zhe sdang gis sems ji snyed du bskyed pa de snyed kyi bskal par go cha gzod yang bgo dgos so zhes gsungs so//'phags pa 'jam dpal rnam par rol pa'i mdo las kyang / khong khro ba khong khro ba zhes bya ba de ni/ 'jam dpal gang dge ba'i rtsa ba bskal pa brgyar bsags pa 'joms par byed pa ste/ de bas na khong khro ba'o zhes gsungs so/ /'phags pa zla ba sgron ma'i mdo las kyang /phan tshun gnod pa'i sems su gang byed pa/ /de la tshul khrims thos pas skyob mi byed/ /bsam gtan dang ni dgon gnas mi skyob ste/ /sbyin dang sangs rgyas mchod pa'ang skyob mi byed/ /ces gsungs so/ /de ltar byang chub sems dpa' rnams dang /bcom ldan 'das la gnod par byas pa'i sdig pa che ba ni bshad zin te/ de dag la legs par byas pa'i bsod nams shin tu che ba bstan to/ /nges pa dang ma nges pa la 'jug pa'i phyag rgya'i mdo las 'byung ba/ 'jam dpal yongs su brtag pa bzung nas gal te phyogs bcu'i 'jig rten gyi khams thams cad kyi sems can thams cad kyi mig phyung bar gyur la/yongs su brtags pa bzung ste/ rigs kyi bu'am rigs kyi bu mo gang la las sems can de dag thams cad la byams pa'i sems kyis de dag gi mig bskyed pa bas 'jam dpal rigs kyi bu'am/rigs kyi bu mo gang gzhan zhig theg pa chen po la mos pa'i byang chub sems dpa' la/ dad pa'i sems kyis lta na/ 'di ni de bas bsod nams ches grangs med par skyed do/ /'jam dpal rigs kyi bu'am rigs kyi bu mo gang la las phyogs bcu'i 'jig rten gyi khams kyi sems can thams cad btson rar bcug pa btson ra nas bton te/'khor los sgyur ba'i bde ba la bkod pa bas/ 'jam dpal rigs kyi bu'am rigs kyi bu mo gang gzhan zhig theg pa chen po la mos pa'i byang chub sems dpa' la dad pa'i sems kyis lta 'dod cing bsngags pa brjod na 'di ni de bas bsod nams ches grangs med pa skyed do zhes gsungs so// //bam po gnyis pa/ dad pa'i stobs bskyed pa la 'jug pa'i phyag rgya'i mdo las kyang / 'jam dpal rigs kyi bu'am rigs kyi bu mo gang la la zhig gis 'jig rten gyi khams thams cad kyi rdul phra rab kyi rdul snyed kyi sems can rnams la/bskal pa gang gA'i klung gi bye ma snyed du nyin re zhing lha'i zas ro sna brgya dang ldan pa byin pa dang / lha'i gos sbyin pa byin pa bas/ gang gzhan zhig gis ston pa gzhan la mi bsten pa'i dge bsnyen dge ba bcu'i las kyi lam dang ldan pa cig la/ 'di ni sangs rgyas bcom ldan 'das kyi bslab pa la slob pa yin no snyam du bsams nas nyin gcig zan gcig byin la/'di ni de bas bsod nams ches grangs med pa skyed do/ /de bzhin du dge slong dad pas rjes su 'brang ba dang / chos kyi rjes su 'brang ba dang / brgyad pa dang / rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa dang / rang sangs rgyas dag ste/ rigs kyi bu'am rigs kyi bu mo gang la la zhig gis 'jig rten gyi khams thams cad kyi rdul phra rab kyi rdul snyed kyi rang sangs rgyas rnams la/ bskal pa gang gA'i klung gi bye ma snyed du nyin gcig bzhin du zas ro sna brgya pa byin pa dang /de bzhin du lha'i gos sbyin pa byin pa bas/ rigs kyi bu'am rigs kyi bu mo gang la la zhig gis de bzhin gshegs pa'i sku gzugs ri mor bris pa dang / 'jim pa las byas pa mthong ba 'di yang de bas bsod nams ches grangs med par bskyed na/ thal mo sbyar ba dang / me tog dang / bdug pa dang / spos dang / mar me 'bul na/ bsod nams de bas ches grangs med pa bskyed pa lta ci smos/ gang la la zhig gis gang gA'i klung gi bye ma snyed kyi sangs rgyas bcom ldan 'das nyan thos kyi dge 'dun dang bcas pa la bskal pa gang gA'i klung gi bye ma snyed du nyin gcig bzhin du lha'i zas ro sna brgya pa phul ba dang /de bzhin du lha'i na bza' phul ba bas/ gang gzhan zhig gis phyugs kyi shing rta lta bus 'gro ba'i byang chub sems dpa' bsam pa phun sum tshogs pa gcig la sangs rgyas la dge ba'i rtsa ba bskyed pa gang yang rung bas bsdu bar bya ste/tha na nyin gcig zan gcig byin na de ni de bas bsod nams ches grangs med pa skyed do/ /gang la la zhig gis 'jig rten gyi khams thams cad kyi rdul phra rab kyi rdul snyed kyi phyugs kyi shing rta lta bus 'gro ba'i byang chub sems dpa' rnams la de tsam du bsti stang du byas pa bas/gang gzhan zhig gis glang po che'i shing rta lta bus 'gro ba gcig la nyin gcig zan gcig byin na de ni de bas bsod nams ches grangs med pa skyed do/ / gang la la zhig gis glang po che'i shing rta lta bus 'gro ba'i byang chub sems dpa' rnams la de tsam du bsti stang byas pa bas/gang gzhan zhig gis zla ba dang nyi ma lta bus 'gro ba'i byang chub sems dpa' gcig la nyin gcig zan gcig byin na de ni de bas bsod nams ches grangs med par skyed do/ /gang la la zhig gis zla ba dang nyi ma lta bus 'gro ba de rnams la de tsam du bsti stang byas pa bas/gang gzhan zhig nyan thos kyi rdzu 'phrul lta bus 'gro ba'i byang chub sems dpa' gcig la nyin gcig zan gcig byin na/ de ni de bas bsod nams ches grangs med pa skyed do/ /gang gis de tsam du nyan thos kyi rdzu 'phrul lta bus 'gro ba'i byang chub sems dpa' rnams la bsti stang byas pa bas/de bzhin gshegs pa'i rdzu 'phrul lta bus 'gro ba'i byang chub sems dpa' gcig la nyin gcig zan gcig byin na/ de ni de bas bsod nams ches grangs med pa skyed do zhes gsungs so/ /de la phyugs kyi shing rta lta bus 'gro ba'i byang chub sems dpa' nas/de bzhin gshegs pa'i rdzu 'phrul lta bus 'gro ba'i bar du gang zhe na/ nges pa dang ma nges pa la 'jug pa'i phyag rgya'i mdo las 'byung ba/ 'jam dpal byang chub sems dpa' 'di lnga ste/ lnga gang zhe na/ 'di lta ste/ phyugs kyi shing rta lta bus 'gro ba dang /glang po che'i shing rta lta bus 'gro ba dang / zla ba dang nyi ma lta bus 'gro ba dang / nyan thos kyi rdzu 'phrul lta bus 'gro ba dang / de bzhin gshegs pa'i rdzu 'phrul lta bus 'gro ba'o/ /phyugs kyi shing rta lta bus 'gro ba dang glang po che'i shing rta lta bus 'gro ba'i byang chub sems dpa' rnams ni byang chub las phyir ldog go//zla ba dang nyi ma lta bus 'gro ba dang / nyan thos kyi rdzu 'phrul lta bus 'gro ba dang / de bzhin gshegs pa'i rdzu 'phrul lta bus 'gro ba'i byang chub sems dpa' rnams ni byang chub las phyir mi ldog go/ /de la phyugs kyi shing rta lta bus 'gro ba'i byang chub sems dpa' gang zhe na/dper na skyes bu la la zhig sangs rgyas kyi zhing lnga'i rdul phra rab kyi rdul snyed kyi 'jig rten gyi khams 'da' bar 'dod nas de phyugs kyi shing rta la zhon te lam du zhugs nas de yun ring zhig lon nas dpag tshad brgyar phyin pa las/ de rlung gi dkyil 'khor chen pos bzlog nas dpag tshad brgyad cur ded de phyir phul na/skyes bu de phyugs kyi shing rtas 'jig rten gyi khams de dag 'da' ba'am/ bskal pa nas brjod du med pa'i yang brjod du med pa'i bskal par yang 'jig rten gyi khams gcig kyang 'da' bar nus sam/ gsol pa bcom ldan 'das de ni gnas ma lags te/go skabs ma mchis so/ /bcom ldan 'das kyis bka' stsal pa/ de bzhin du gang la la zhig gis byang chub tu sems bskyed la theg pa chen po mi 'dzin mi klog kha ton du mi byed/ tshul bzhin du yid la mi byed par nyan thos kyi theg pa pa rnams la bsnyen cing de dag dang lhan cig tu bsten par byed/nyan thos kyi theg pa klog cing kha ton du byed la / dpyod cing kun chub par byed la/ gzhan yang klog tu 'jug pa nas/ khong du chud pa'i bar du byed na/ de ni des shes rab rtul por 'gyur te/ de ni bla na med pa ye shes kyi lam las slar drangs nas phyir bzlog go//byang chub sems dpa' de'i byang chub kyi sems bsgoms pa las byung ba'i shes rab kyi dbang po dang / shes rab kyi mig gang yin pa de yang rtul por 'gyur zhing nyams par byed de/ 'di ni phyugs kyi shing rta lta bus 'gro ba'i byang chub sems dpa'o//de la glang po che'i shing rta lta bus 'gro ba'i byang chub sems dpa' gang zhe na/ dper na gang la la zhig 'jig rten gyi khams de snyed 'da' bar 'dod de/ yan lag brgyad dang ldan pa'i glang po che'i shing rta la zhon nas lam du zhugs te/ des lo brgyas dpag tshad nyis stong du son pa las/rlung gi dkyil 'khor chen pos lam de nas phyir bdas te bzlog pa nas go skabs ma mchis pa'i bar du ste/ de bzhin du gang byang chub tu sems bskyed nas/ theg pa chen po yang 'chang zhing klog la kha ton byed cing tshul bzhin du yid la byed la nyan thos kyi theg pa pa rnams la yang brten pa nas nyan thos kyi theg pa klog cing shes par byed pa'i bar 'di ni glang po che'i shing rta lta bus 'gro ba'i byang chub sems dpa'o//zla ba dang nyi ma lta bus 'gro ba'i byang chub sems dpa' gang zhe na/ dper na la la zhig de snyed kyi 'jig rten gyi khams 'da' bar 'dod de/de zla ba dang nyi ma lta bus 'gro bas lam du zhugs na des 'jig rten gyi khams de thams cad las 'das par nus sam/ gsol pa/ bcom ldan 'das dus yun ring mo zhig na 'da' bar rngo thogs so / /bcom ldan 'das kyis bka' stsal pa/ de bzhin du gang la la zhig gis byang chub tu sems bskyed de/nyan thos kyi theg pa pa rnams la mi bsten pa nas/ khong du chud par byed pa ma yin pa'i bar du ste/ tha na nyan thos kyi theg pa pa'i tshigs bcad gcig tsam yang mi klog par theg pa chen po nyid klog pa nas theg pa chen po nyid khong du chud par byed pa'i bar 'di ni zla ba dang nyi ma lta bus 'gro ba'i byang chub sems dpa'o//nyan thos kyi rdzu 'phrul lta bus 'gro ba'i byang chub sems dpa' gang zhe na/ dper na la la zhig 'jig rten gyi khams de snyed 'da' bar 'dod na/ nyan thos kyi rdzu 'phrul lta bus de 'jig rten gyi khams de dag las 'da' bar nus sam/gsol pa/ bcom ldan 'das rngo thogs te myur du ni mi 'das so/ /bcom ldan 'das kyis bka' stsal pa/ de bzhin du gang la la zhig byang chub tu sems bskyed de/ theg pa chen po pa/ theg pa chen po la mos pa/ theg pa chen po klog pa/ theg pa chen po yongs su 'dzin pa'i byang chub sems dpa' rnams la gus pa dang bcas/zhe sa dang bcas par de la gzhol zhing de la 'bad de/ de dag dang bsten cing theg pa chen po yongs su tshol ba dang / kun 'dzin cing 'chang ba yin te/ srog gi phyir yang theg pa chen po mi stong zhing rab tu gus pas me tog dang ba dan gyi bar gyis mchod par byed pa dang /byang chub sems dpa' ma lobs pa rnams la mi brnyas pa 'di ni nyan thos kyi rdzu 'phrul lta bus 'gro ba'i byang chub sems dpa'o/ /de la de bzhin gshegs pa'i rdzu 'phrul lta bus 'gro ba'i byang chub sems dpa' gang zhe na/dper na la la zhig 'jig rten gyi khams de snyed 'da' bar 'dod de / des de bzhin gshegs pa'i rdzu 'phrul gyis 'jig rten gyi khams rnams su 'gro na/ de bzhin gshegs pa'i rdzu 'phrul gyis 'jig rten gyi khams de dag 'da' bar nus sam/ gsol pa/ bcom ldan 'das rngo thogs te/sems kyi skad cig tsam gyis 'da'o/ bcom ldan 'das kyis bka' stsal pa/ de bzhin du gang la la byang chub tu sems bskyed de/ rab tu zab cing rgya che ba la mos pa theg pa chen po'i don la mkhas pa rtag tu sems can thams cad kyi skyabs bya ba'i phyir byang chub kyi sems dang /byams pa dang snying rje dang / pha rol tu phyin pa drug dang / rton pa bzhi dang / bsdu ba'i dngos po la brtson pa yin te/ gzhan yang de la rab tu 'god pa de ni/ de bzhin gshegs pa'i rdzu 'phrul lta bus 'gro ba'i byang chub sems dpa'o zhes gsungs so/ /dam pa'i chos spong ba ni kha na ma tho ba dang bcas pa shin tu chen po ste/bar du gcod pa'i chos so/ /shes rab kyi pha rol tu phyin pa las 'byung ba/ byang chub sems dpa'i theg pa pa gang dag sangs rgyas bye ba khrag khrig brgya stong mang po mthong bar gyur te/ dmigs pa'i tshul gyis de dag la sbyin pa byin par gyur pa nas/shes rab kyi pha rol tu phyin pa'i bar du bsgom par yang gyur la de dag shes rab kyi pha rol tu phyin pa zab mo 'di la ri mo mi byed pas/ shes rab kyi pha rol tu phyin pa 'chad pa'i sangs rgyas bcom ldan 'das de dag gi 'khor du 'ongs na yang lus dang sems kyis mthun pa mi byed na/de dag ni 'chal ba'i shes rab tu 'gyur ba'i las rnams stsogs so/ /de dag ni las des shes rab kyi pha rol tu phyin pa zab mo 'di 'dor bar 'gyur ro/ /de dag gis shes rab kyi pha rol tu phyin pa 'di bor bas 'das pa dang / ma 'ongs pa dang / da ltar byung ba'i sangs rgyas bcom ldan 'das rnams kyis thams cad mkhyen pa nyid bor ba yin no//de dag dam pa'i chos kyis phongs par 'gyur ba'i las des lo bye ba khrag khrig brgya stong du ma'i bar du sems can dmyal bar btsos te/ 'jig pa dang chags pa'i bskal pa mang por sems can dmyal ba chen po nas sems can dmyal ba chen por kha 'khor bar 'gyur ro//des dud 'gro'i skye gnas dang / gshin rje'i 'jig rten du yang de bzhin no/ /sha ra dwa ti'i bus gsol pa/ bcom ldan 'das mtshams med pa lnga dang / dam pa'i chos kyis phongs par gyur pa las 'di 'dra bar mi 'gyur lags sam/bcom ldan 'das kyis bka' stsal pa/ sha ra dwa ti'i bu mtshams med pa lnga dang 'dra zhes mi bya'o zhes ji skad gsungs pa lta bu'o/ /byang chub sems dpa' rnams kyi bdud kyi las ni shes rab kyi pha rol tu phyin pa las 'byung ba/ rab 'byor gzhan yang ming la gnas pas bdud kyi las su rig par bya'o/ /de nas byang chub sems dpa' la bdud 'di skad smra ste/ khyod byang chub mngon par rdzogs par sangs rgyas pa na ming 'di'o zhes bya bar 'gyur ro zhes byas pa dang / byang chub sems dpa' de de'i rjes su rtog par 'gyur te/de la phyir mi ldog pa'i ltas gang yin pa de dag med par yang des bdag lung bstan pa snyam du rlom sems su byed de/ de des rlom sems bskyed cing byang chub sems dpa' gzhan la yang brnyas par 'gyur ro/ /de thabs mi mkhas shing shes rab dang bral te/ dge ba'i bshes gnyen gyis ma zin cing sdig pa'i grogs po'i lag tu song bas/nyan thos kyi sa'am/ rang sangs rgyas kyi sar ltung bar 'gyur te/ rlom sems dang ldan pa'i sems bskyed pa 'di ni ltung ba'i rtsa ba bzhi bas kyang ches lci ste/ 'di yang byang chub sems dpas bdud kyi las su rig par bya'o zhes ji skad gsungs pa lta bu'o//'jam dpal rnam par 'phrul pa'i le'u las kyang / 'jam dpal gyis smras pa/ lha'i bu ji tsam du las la 'jug pa de tsam du bdud kyi las so/ /ji tsam du smon pa dang / ji tsam du 'dzin pa dang ji tsam du mchog tu 'dzin pa de tsam du bdud kyi las so//ji tsam du 'dod pa dang / ji tsam du 'du shes pa dang / ji tsam du rlom sems pa dang / ji tsam du yongs su rtog pa de tsam du bdud kyi las so/ /lha'i bu gzhan yang byang chub kyi sems la mngon par zhen pa yang bdud kyi las so/ /sbyin pa'i sems la mngon par zhen pa yang bdud kyi las so//de bzhin du tshul khrims dang / bzod pa dang / brtson 'grus dang / bsam gtan dang / shes rab kyi sems la mngon par zhen pa yang bdud kyi las so/ /sbyin pa rlom sems su byed pa dang / tshul khrims mchog tu 'dzin pa dang /bzod pa 'dzin pa dang / brtson 'grus len pa dang / bsam gtan la mtshan ma dang / shes rab rgyu ba yang bdud kyi las so/ /dgon pa la dga' zhing mos pa'i sems dang btang snyoms su ltung ba yang bdud kyi las so/ /'dod pa nyung ba dang /chog shes pa dang / sbyangs pa'i yon tan dang / yo byad bsnyungs pa rlom sems su byed pa yang bdud kyi las so/ /bdag ni stong pa nyid la gnas pa/ bdag ni mtshan ma med pa la gnas pa/ bdag ni smon pa med pa la gnas pa/ bdag ni spros pa med pa la gnas pa/bdag ni rab tu dben pa la gnas pa/ bdag ni de bzhin gshegs pa'i bka' bsgrub cing gnas pa'o snyam du rlom sems su byed cing rnam par rtog pa yang bdud kyi las so/ /lha'i bu ji tsam du rtog pa dang / rnam par rtog pa dang / yongs su rtog pa dang / mthong ba dang / thos pa dang / bye brag phyed pa dang / rnam par shes pa'i gnas ji tsam pa de tsam du bdud kyi las so/ /lha'i bus smras pa/ 'jam dpal bdud kyi las ga las byung / 'jam dpal gyis smras pa/ lha'i bu bdud kyi las ni brtson pa las byung ba yin no/ /de ci'i phyir zhe na/lha'i bu brtson pa las bdud glags tshol gyi/ mi brtson pa la bdud kyis ci zhig bya bar 'gyur te/ de nyid bdud kyi las yin no/ /smras pa/ byang chub sems dpa' ji ltar na brtson pa yin/ ji ltar na mi brtson pa yin/ smras pa/ lha'i bu ji tsam du gnyis la sbyor ba de tsam du mi brtson pa'o//de ci'i phyir zhe na/ 'jig rten gnas pa ni gnyis la sbyor ba dang ldan pa'o/ /brtson pa zhes bya ba 'di ni sbyor ba yang dag pa'i tshig bla dgas so/ /sbyor ba yang dag pa zhes bya ba 'di ni sbyor ba med pa'i tshig bla dgas so/ /sbyor ba med pa zhes bya ba 'di ni spros pa med pa'i tshig bla dgas so//spros pa med pa zhes bya ba 'di ni sbyor ba yang dag pa'i tshig bla dgas so/ /lha'i bu gang la mig la mi sbyor ba dang / gzugs la mi sbyor ba nas chos kyi bar la mi sbyor ba 'di ni byang chub sems dpa'i sbyor ba yang dag pa zhes bya'o zhes gsungs so//yang de nyid las 'byung ba lha'i bu nyi shu po 'di dag ni byang chub sems dpa' rnams kyi bdud kyi las yang dag phul yin no/ /nyi shu gang zhe na/ 'di lta ste/ rnal 'byor spyod pa rnam par grol ba 'dod cing 'khor bas skrag pa rnams la brten pa dang /bsnyen pa dang bsnyen bkur byed pa ni bdud kyi las so/ /stong pa nyid la so sor rtog cing sems can yal bar 'dor ba yang bdud kyi las so/ /'dus ma byas la so sor rtog cing 'dus byas kyi dge ba'i rtsa ba la yongs su skyo ba yang bdud kyi las so/ /bsam gtan bskyed cing bsam gtan las rnam par ldog par tshol ba yang bdud kyi las so//chos ston kyang chos nyan pa rnams la snying rje chen po mi skyed pa yang bdud kyi las so/ /yon tan dang ldan pa dang / yon tan gyi gnas tshol zhing tshul khrims ngan pa can rnams la khro ba yang bdud kyi las so//nyan thos dang / rang sangs rgyas kyi gtam brjod cing theg pa chen po'i gtam 'chab pa'ang bdud kyi las so/ /zab mo'i gtam 'chab cing gtam sna tshogs ston pa yang bdud kyi las so/ /byang chub sems dpa'i lam shes kyang / pha rol tu phyin pa'i lam yongs su mi tshol ba yang bdud kyi las so//rab tu brtson pa'i bsngags pa brjod kyang sems can mi brtson pa rnams mngon par mi sbyor ba yang bdud kyi las so/ /dge ba'i rtsa ba sogs kyang byang chub kyi sems mngon du mi byed pa yang bdud kyi las so/ /lhag mthong gi rnal 'byor dang ldan par gnas kyang sems can rnams lhag mthong yang dag par 'dzin du mi 'jug pa yang bdud kyi las so//nyon mongs pa ma lus pa zad par tshol zhing 'khor ba'i rgyun gyi nyon mongs pa la smod pa yang bdud kyi las so/ /shes rab kyis rnam par spyod cing snying rje chen po la dmigs pa mi 'dzin pa yang bdud kyi las so//thabs dang mi ldan par dge ba spyod pa thams cad kyang bdud kyi las so/ /byang chub sems dpa'i sde snod mi tshol gyi 'jig rten rgyang phan pa'i gsang tshig 'dzin pa yang bdud kyi las so/ /mang du thos kyang gzhan gyis shes kyis dogs te/ slob dpon chos 'chab pa'ang bdud kyi las so//'jig rten gyi dogs pa'i zhal ta byed cing mang du thos pa mi tshol ba yang bdud kyi las so/ /byang chub sems dpa' chos smra ba theg pa chen po la yang dag par zhugs pa skal ba mnyam pa rnams la mi brten mi bsnyen bsnyen bkur mi byed kyi nyan thos dang rang sangs rgyas kyi theg pa la yang dag par zhugs pa skal ba mi mnyam pa la dga' ba yang bdud kyi las so//gang gi tshe brgya byin nam/ tshangs pa'am/ 'jig rten skyong ba'am/ rgyal po'am/ tshong dpon nam/ khyim bdag gi longs spyod dang / nor dang rin po che dang / dbang phyug gi che ba nyid du gyur pa de'i tshe chos kyi che ba nyid dang ldan pa rnams la mi brten mi bsnyen bsnyen bkur mi byed pa 'di dag ni lha'i bu byang chub sems dpa' rnams kyi bdud kyi las yang dag phul nyi shu'o zhes gsungs so//blo gros rgya mtshos zhus pa'i mdo las kyang / byang chub sems dpa' gzugs bzang zhing mdzes la phyug cing nor che ba dang /longs spyod che zhing nor mang la mdzod dang bang ba mang po phun sum tshogs par gyur te/ gzugs dang longs spyod dang / rus dang / rigs dang / g.yog 'khor dang / bsod nams kyi tshogs kyis ston par gyur pa/ ye shes kyi tshogs yongs su btsal ba la mngon par brtson zhing de gzugs dang /longs spyod dang / g.yog 'khor dang / dbang phyug gi stobs kyis rgyags shing bag ma mchis par gyur te byang chub sems dpa' gang dag rab tu byung bar gtogs pa/ khyim gyi gnas nas mngon par byung ba/ ye shes kyi tshogs kyis yongs su tshol ba la brtson pa gdugs dang bser mas sha dang khrag skams pa/rke ba/ nyam chung ba/ lus rtsas g.yogs pa/ mgo dang gos la zhugs 'bar ba bzhin du gdugs mtshan du brtson 'grus brtsams pa/ dge ba'i chos yongs su btsal ba la rtag tu brtson pa dang ldan pa de dag la rke zhing nyam chung ba/mdog ngan zhing mi sdug par rig nas/ brnyas par bya'o snyam du sems shing de dag las legs par bshad pa nyan mi 'tshal gyi de de bas shas cher dman zhing ches rmugs par 'gyur ba 'di ni/ bcom ldan 'das byang chub sems dpa'i rgyags pa dang bag ma mchis pa dang rab tu ldan pa'i bdud kyi lcags kyu zhes gsungs so//yang de nyid las 'byung ba/ theg pa chen po'i bar du gcod par 'gyur ba'i chos bzhi ste/ bzhi gang zhe na/ bdag gi yon tan brjod pa dang / gzhan gyi yon tan log par brjod pa dang /nga 'o snyam pa'i nga rgyal 'bar ba dang / khro ba bsten pa'o zhes gsungs so/ /'di dag pas kyang gang dag khyim par gyur kyang chos rnams la nan tan gyis sgrub pa'i sems can rnams ni chos rnyed par dka'o/ /de la byang chub sems dpa' khyim pa rnams kyi sgrub pa ci 'dra zhe na/ drag shul can gyis zhus pa'i mdo las 'byung ba/khyim bdag gzhan yang byang chub sems dpa' khyim pa khyim na gnas pa ni skyes bu dam pa'i las rnams byed kyi skyes bu ngan pa'i las rnams mi byed do/ /chos kyis longs spyod tshol gyi chos ma yin pas mi tshol lo/ /mthun pas tshol gyi mi mthun pas ma yin no//yang dag pas 'tsho ba yin gyi log pas 'tsho ba ma yin no/ /de chos kyis longs spyod thob pa de dag gis gzhan la 'tsho bar mi byed do / mi rtag pa'i 'du shes bsgom pa mang zhing snying po len to/ /'di lta ste/ pha ma la bsnyen bkur byed pa dang / bu dang chung ma dang / bran pho dang /bran mo dang / las byed pa'i mi dang / zho shas 'tsho ba rnams yang dag pa'i longs spyod dang / mdza' bo dang / bron po dang / nye du dang / snag gi gnyen mtshams rnams la bkur sti dang / gong du yang chos la 'dzud pas gtong ba 'phel bar byed do zhes gsungs so/ /khyim pa rnams kyi log par bsgrub pa gang zhe na/rab tu 'byung ba'i bar du gcod pa'i mdo las 'byung ba/ ming chen chos bzhi dang ldan na khyim pa mi khom par gyur pa yin te/ skye ba de dang der dmus long dang / blun pa dang / lkugs pa dang / gdol pa dang / nam du yang bde ba mi myong bar 'gyur/ skur pa 'debs pa mang ba dang /ma ning dang / za ma dang / rtag tu bran dang / bud med du 'gyur/ khyi dang phag dang / bong bu dang / rnga mo dang / sbrul gdug par 'gyur te/ sangs rgyas kyi bstan pa la nan tan du mi byed do/ /bzhi gang zhe na/ ming chen 'di la khyim pas sngon gyi rgyal ba la lhag par bya ba byas pa'i sems can rnams kyi mngon par byung ba'i sems dang rab tu byung ba'i sems dang /'phags pa'i lam gyi sems kyi bar chad byed pa 'di ni dang po'o/ /gzhan yang khyim pa dbang phyug gi gnas na 'dug cing nor la chags pa dang bu la chags pas las kyi rnam par smin pa la yid mi ches shing /bu pho dang / bu mo'am/ chung ma'am/ gnyen gyi tshogs rab tu byung ba'i bar chad byed pa 'di ni gnyis pa'o/ /gzhan yang khyim pa dam pa'i chos spong ba yin te/ des ma thos pa'i chos rnams thos na/ ma dad cing spong bar byed pa 'di ni gsum pa'o/ /gzhan yang khyim pa tshul khrims dang ldan pa'i dge sbyong dang bram ze la kun nas mnar sems dang /tha ba'i sems mang ba yin te/ 'di ni bzhi pa'o/ /bzhi po 'di dag las chos gang yang rung ba zhig dang ldan na/ khyim pa mi khom par gyur pa yin te/ skye ba de dang der zhes bya ba nas sangs rgyas kyi bstan pa la nan tan mi byed do zhes bya ba'i bar du 'gyur ro//dper na mi la la zhig mi gtsang ba'i dong du lhung nas mi gzhan la yang 'di skad du a la la/ 'di ltar chu 'di shin tu dang ba ngo mtshar to zhes zer ba ni/ chu ma yin pa la chur 'du shes skyed de/ dang ba'i chur 'du shes pa de bzhin du/ sems can gang la la bdag nyid 'dod pa'i 'dam du bying ba dag gzhan yang 'dod pa'i 'dam du 'jug par byed do//bdag nyid 'dod chags kyi g.yang sar lhung bar byas/ zhe sdang gi g.yang sa dang / gti mug gi g.yang sar lhung bar byas la gzhan yang de dag tu ltung bar byed do/ /dper na mi la la zhig gis dgra bo bzung ste/me mdag me lce med pa du ba med pa 'dom bdun pa'i nang du bcug pa de bzhin du/ gang la la me dang mtshungs pa'i 'dod pa dang / me dang mtshungs pa'i bud med dang bsten cing 'dod pa bsngags te/ gzhan yang 'dod pa dag la 'jug par byed pa na de dag ni gzhan yang me'i rlubs su lhung bar byed do//de dag nad dang mya ngan de dag la nye bar sbyar ro/ /dper na mi la la zhig gis mi gzhan la yang bde ba yongs su longs spyod pa'i phyir/ spu gri'i so lta bu'i ri la 'dzeg tu bcug pa 'di lta ste/ spu gri'i so lta bu'i ri mnyam zhing mi mnyam pa med pa 'di ni bde ba'i longs spyod do zhes zer ba de bzhin du phal cher pha ma bu la byams pa dang ldan pas de'i chung ma len te/de dag gis 'dod pa bsngags nas/ 'dod pa la bcug pa de lta bu ni mdza' bo'i gzugs kyi sbrul gdug pa drag cing che ba ston to/ /g.yang sa bgrod dka' ba 'jigs 'jigs ltar 'dug pa yang ston to//sems can dmyal ba dang / dud 'gro dang / yi dags kyi 'jig rten du 'gro ba'i lam yang mtshon te zhes gsungs so/ /bad sa'i rgyal po shar pas zhus pa'i mdo las kyang gsungs te/ rgyal po chen po 'di la skyes bu 'dod pa la chags shing bud med la lta 'dod pa ni tshul khrims dang ldan pa'i dge slong dang /bram ze la brten pa mi srid pas de tshul khrims dang ldan pa de dag gis yongs su spangs pas dad pa dang tshul khrims dang / gtong ba dang / thos pa dang / shes rab las yongs su nyams te rma la chags pa/ btsog pa'i spyod yul can/bshul bar mnam pa la dga' ba bud med la dad che ba/ chags pa'i spyod yul can/ 'gro bar bya ba ma yin par song ba/ smad par 'os pa / mi gtsang ba'i srin bu dang 'dra ba/ snyigs ma len pa/ khrel dang ngo tsha bor ba/ lha dang mi'i chos stor ba/ ngan par smad pa'i 'tsho bas 'tsho ba/mkhas pas smad pa/ bud med kyis tshugs pa/ bud med kyis khol ba/ ngar snabs dang / kha chu dang / snabs dang / chu ser dang / rnag dang / she rul zag pa myong bar byed pa/ mi gtsang ba'i spyod yul can/ ba lang dang / lug dang / bya gag dang / khyi dang / phag dang / wa dang / bong bu'i chos spyod pa/ gnod pas 'tsho ba/ pha ma la phangs par mi 'dzin pa/ dge sbyong dang / bram ze dang / sbyin gnas la phangs par 'dzin pa med pa/ sangs rgyas dang chos dang dge 'dun la dad pa nyams pa/ sems can dmyal ba dang / dud 'gro'i skye gnas dang /gshin rje'i 'jig rten la zhugs shing gzhol ba/ seng ge dang nam mkha' lding gi lus la yang dag par zhugs pa/ lcags kyi shing shal ma li mthon po dang / me ma mur la gzhol ba/ sems can dmyal ba yang sos dang thig nag dang / bsdus 'joms dang / ngu 'bod dang /ngu 'bod chen po dang tsha ba dang / rab tu tsha ba dang / mnar med pa'i sems can dmyal ba chen por zhugs pa ni/ bud med dang mdza' zhing bud med dang 'grogs te dgod pa dang / dga' ba dang / rtse ba dang glu gar rol mo la sogs pa rjes su dran zhing skyo ba mi skye ba de/ pha mas dka' ba byas shing bskyed de/gcin dang phyi sa yang bzod par byas shing blangs nas/ zla ba dgu'am bcur rum du btsas te/ shin tu sdug bsngal myong bas gsos shing pang du blangs nas nu zho blud cing rab tu nyon mongs par gsos bskyed de/ 'dzam bu'i gling rnam par bkra ba ston pa/ don dang / phan pa dang / bde ba dang / grub pa dang / legs su dga' ba'i sbyin pa'i gnas de dag gis bu la phan pa dang / bde bar 'dod pas/ bdag gi nor gyi tshogs kyis gzhan gyi bu mo de blangs nas de de la chags shing 'khril te/ pha rol gyi khyim nas blangs pa'i bud med de la zhen cing brgyal nas/ pha ma rgas gtugs te/ nyam chung / mig gis mi mthong ba de nor dang longs spyod med par byas nas/ rang gi khyim nas phyung ste skrod do/ /rgyal po chen po gang pha ma dka' ba byed byed pa sbyin pa'i gnas la rtag tu rgyun mi 'chad par dag pa'i bde bas bsti stang du byas zhing yang dag pa'i bde bas bla mar bya ba'i rigs na/des de'i tshe rang gi khyim nas phyi rol du phyung ste bskrad nas/ gzhan gyi khyim nas blangs pa'i bud med la bza' ba dang / btung ba dang / gos kyis bstabs nas dogs su byas te/ des gang bde 'gror 'gro ba'i chos ni spangs gang ngan 'gror 'gro ba'i chos ni blangs nas snying rje'i bag med cing bsam pa med pa'i ngan pa'i sems dang ldan pa la ltos zhes gsungs so//zla ba sgron ma'i mdo las kyang / 'dod pa'i phyir ni byis pa rnams/ /bud med rul la sten byed de / /'gro ba rul bar 'gro 'gyur zhing / /ngan 'gro rnams su lhung bar 'gyur/ /'jigs pa chen po'i zhags pa ni/ / bud med zhags pa mi bzad pas/ /sangs rgyas rnams kyis 'dod pa dang / /bud med bsten pa'ang ma bsngags so/ /lam 'dis byang chub mi 'gyur bas/ /bud med rnams la ma bsten par/ /sbrul gdug shin tu khro ba ltar/ /mkhas pas de ni rnam par spongs/ /sangs rgyas kun gyis bsten pa yi//byang chub lam la sgom par byed/ /lam de goms par bsgoms byas nas / /bla med sangs rgyas 'grub par 'gyur/ /zhes gsungs so/ /mi sdug pa la yang sbyar bar bya'o/ /'di lta ste/ srog gcod pa dang / ma byin par len pa dang / 'dod pa la log par g.yem pa la sogs pa mi 'dod pa'i 'bras bu rnam par smin par 'gyur ba ni/byang chub sems dpa' nyi tshe la log par bsgrubs par bstan pa ma yin gyi/ sems can thams cad dang thun mong du yin te/ 'di lta ste/ dam pa'i chos dran pa nye bar gzhag pa'i mdo las gsungs pa/sems can dmyal ba pa de dag sems can dmyal ba'i srung ma de dag gis tho 'tshams shing bdag gis las byas pa rgya'i 'bur ltar bstan nas khas len du bcug ste/ rnam pa du mar nyes pa sna tshogs byas pa de bzhin du sdug bsngal du mar yang tshor bar byed do/ /rgyu dang 'dra ba'i 'bras bu dang /sa bon dang 'dra ba'i 'bras bur 'gyur te/ ji ltar mi dge ba'i las rdzogs par byas pa bzhin du/ rab tu tsha ba'i sems can dmyal ba chen por mi dge ba'i las rdzogs pa'i 'bras bu rdzogs par myong ngo / /de bzhin du lo brgya stong du ma'i bar du sdig pa'i las dgrar gyur pa phan pa mi 'dod cing mi phan par 'dod pa des sems can dmyal ba pa de sems can dmyal bar sreg go//de brgya la ci ste de las thar na yang skyabs tshol dpung gnyen tshol zhing brgyugs pa dang / des mthong ba rgyang ring po nas khyi rlugs nas kha gdangs te stobs che zhing shin tu mgyogs pa rdo rje'i kha shin tu 'jigs par zugs pa/khyi khro bos bdag bskor bar mthong nas/ sems can dmyal ba pa de bros par brtsal ba dang / khyi thams cad kyis bsnyags te de dag gis bzung ngo / /bzung nas kyang kham bu re re dang chu rgyus nas chu rgyus dang / gshes kyi dmigs nas gshes kyi dmigs dang /rus pa'i tshigs nas tshigs dang yan lag dang nying lag thams cad bcad kyang de bzhin du 'chos te/ yungs 'bru tsam gyi sha yang ma lus par byas nas/ de nas yang phyir skyes te/ de bzhin du yun ring por khyi de dag 'cha'o/ /de las gang gi 'bras bu zhe na/ de ni srog gcod pa'i 'bras bu ste/de sha za ba'i phyir sems can gyi srog gcod pas de ni de'i 'bras bu yin no/ /ma byin par len pa'i 'bras bur 'gyur ba ni/ ji ltar sems can dmyal ba pa des las kyis bsgyur ba'i nor mang po dag mthong nas las kyi rgyus rmongs te/ bdag gi nor de dag gzhan gyis khyer ba snyam zhig nas des de dag bsnyags pa dang /de gshin rje'i mi dag gis bzung nas brgyangs te/ mtshon gyis bcad cing / tshigs su gtubs kyang phyir yang 'byor to/ /sems can dmyal ba pa de sems can dmyal ba pa gzhan dag gis kyang mthong nas rgyugs pa dang / de dag kyang gshin rje'i mi de dag gis bzung ste/ral gri dang / mdung thung dang / mtshon rtse gnyis pa dang / gtun 'bar ba rnams kyis dmyal nas/ de dag ma byin par blangs pa'i 'bras bus lo brgya stong du mar ma byin par blangs pa'i 'bras bu ma zad ma byang med par ma gyur gyi bar du myong nas de phyis de las thar par 'gyur ro//'dod pa la log par g.yem pa ni thal tshan gyi chu klung gis bud med khyer nas/ khyo ga la 'bod cing chu'i dbas g.yengs te/ phyed ni byung phyed ni bying nas sems can dmyal ba pa la 'bod de nga ni thal tshan gyi chu klung gis khyer te/ mgon med cing nyams nyes pa la skyabs kyis zhes zer zhing bud med de ngu ba'i sgra de las kyi rgyus rmongs pas thos nas/thal tshan gyi chu klung der zhugs pa dang / zhugs ma thag tu de'i lus kyang thal tshan gyi rno bas rus pa la sha yungs 'bru tsam gyi lhag ma yang ma lus par de ltar zhigs pa dang / yang phyir skyes so/ /de nas yang bud med de rgyang ring po nas thal tshan gyi chu klung gis khyer te/bdag la skyabs med kyi skyobs shig ces byi bo la smras pa mthong nas sems can dmyal ba pa de 'dod chags kyi zil gyis non te yang bud med de la bzung ba dang / des lcags kyi mtshon cha'i sen mo rnon pos khyo ga de la bzung ste brad nas de'i lus la sha yungs 'bru tsam yang ma lus par gyur nas lus kun ni khrag gis yogs te/lus la ni rgyus pa'i dra ba 'ba' zhig lus so/ /de bud med la chags pas zil gyis non nas yang rgyugs te/ de sdig pa'i las de ma zad ma byang med par ma gyur gyi bar du lo brgya stong du mar thal tshan gyi chu klung gis g.yengs nas de phyis sems can dmyal ba de las thar te thar nas kyang yang slar skyes so zhes rgya cher gsungs so//longs spyod dang srog la chags pa yang khyim pa rnams kyis log par bsgrub pa yin te/ gsal rgyal gyis zhus pa'i mdo las kyang 'byung ba/rgyal po chen po dper na/ skyes pa'am bud med cig gnyid kyis log pa'i rmi lam na/ kun dga' ra ba nyams dga' ba'am/ ri dang rdzing bu dang / 'bab chu dang nags tshal dang / ljongs dang / mtshe'u dang / chu mig nyams dga' ba mthong ba las/de sad ma thag tu ci yang ma mthong ngo / /rgyal po chen po dper na shing las me tog byung nas 'bras bu 'byung ngo / /'bras bu byung nas 'bras bu yang med par 'gyur ro/ /'dab ma sngon po byung nas skya bor 'gyur ro/ /skya bo las ni yang med par 'gyur ro/ /rgyal po chen po de bzhin du gang rgyal srid kyi bde ba dang /rgyal srid kyi dbang phyug gi bde ba dang / 'dod pa'i bde ba dang / 'dod pa'i longs spyod la dbang ba'i bde ba 'di lta ste/ glang po che dang / rta dang / shing rta dang / dpung bu chung dang / sras dang / btsun mo dang / gzhon nu dang / blon po dang / rtsis pa dang / sna chen po la gtogs pa dang /sgo ba dang / 'khor dang / pha ma dang / spun dang / sring mo dang / chung ma dang / bu pho dang / bu mo dang / rten grogs dang / bran pho dang / bran mo dang / las byed pa dang / go re long dang / zho shas 'tsho ba dang / yul gyi mi dang / dngul dang / gser dang / nor bu dang / rin po che dang /gos dang / nor dang / 'bru dang / mdzod dang / bang ba la sogs pa de dag thams cad bor te 'gro dgos so/ /de dag thams cad ni mi rtag pa/ mi brtan pa/ yid brtan du mi rung ba/ rnam par 'gyur ba'i chos can/ yun thung ba/ mi gnas pa/ g.yo ba 'gul ba/ mthar 'jig pa/skad cig pa/ mthar sdig pa/ zad cing 'jig pa'i sgo/ mthar 'gyes pa'i chos can/ 'jigs pa dang bcas pa/ 'tshe ba dang bcas pa/ mya ngan dang 'khrug pa mang ba/ 'brul ba / 'jig pa/ 'chad pa/ 'gyes pa/ 'thor ba/ rnam par 'jig pa'i chos can te/ de lta bas na/ rgyal po chen po khyod mi rtag par lta ba dang / zad pa dang 'jig par lta zhing chos kyi rgyal po gyis la/ chos ma yin pas ma byed cig/ chos kyi rjes su 'jug par gyis la chos ma yin pa'i rjes su 'jug par ma byed cig/ rgyal po chen po 'di lta ste dper na phyogs bzhi nas ri chen po sra ba/ snying po dang ldan pa/ma zhig pa/ ma gas pa/ khong stong ma yin pa/ shin tu mkhregs pa/ gcig tu 'dus pa bzhi gnam la reg cing sa bzlog ste/ rtswa dang / shing dang / shing gel ba dang / yal ga dang / lo ma thams cad dang sems can srog chags 'byung po thams cad phye mar 'thag cing 'ong na de dag las ni mgyogs pas 'bros pa dang /stobs kyis bzlog pa'am/ nor gyis bzlog pa'am/ rdzas dang / sngags dang / sman rnams kyis bzlog par sla ba ma yin no/ /rgyal po chen po de bzhin du 'jigs po chen po bzhi po 'di dag 'ongs te/ de dag las mgyogs pas 'bros pa'am/stobs kyis bzlog pa'am/ nor gyis bzlog pa'am/ rdzas dang / sngags dang / sman rnams kyis bzlog par sla ba ma yin no/ /rgyal po chen po bzhi gang zhe na/ 'di lta ste/ rga ba dang / nad dang / 'chi ba dang / rgud pa'o/ /rgyal po chen po rga ba ni dar la bab pa 'joms shing 'ong //nad ni nad med pa 'joms shing 'ong / 'chi ba ni srog 'joms shing 'ong / rgud pa ni phun sum tshogs pa thams cad 'joms shing 'ong ngo / /rgyal po chen po 'di lta ste/ dper na ri dwags kyi rgyal po seng ge ri dwags kyi tshogs kyi nang du zhugs nas ri dwags bzung ste/ ji ltar 'dod pa bzhin du bya ba byed do//ri dwags de ni stobs po che'i kha mi bzad pas bzung bas dbang med par 'gyur ro/ /rgyal po chen po de bzhin du 'chi bdag gi gsal shing gis zug ste/ rgyags pa dang ni bral/ mgon ni med/ skyabs ni med/ dpung gnyen ni med/ bshes ni med/ gshis ni 'jig /tshigs ni 'bye 'bral/ sha dang khrag ni skam lus ni nad kyis gdungs / skom ni skom/ bzhin ni gyur / rkang lag ni g.yo ba/ las ni mi nus/ mthu ni med/ kha chu dang / snabs dang / gcin dang / ngan skyugs kyis ni lus la gos/ mig dang / rna ba dang / sna dang /lce dang / lus dang / yid kyi dbang po dag ni 'gag/ skyigs bu ni 'byung / sgra ngar ngar po ni 'don/ sman pas ni bor/ sman dang / kha zas dang / bza' ba dang / bca' ba dang / thug pa thams cad kyis ni gles la bor te / 'gro ba gzhan dag tu 'gro bas mal gyi tha ma la ni nyal/thog ma med pa'i skye ba dang / rga ba dang / na ba dang / 'chi ba'i 'khor ba'i rgyud du ni nub/ srog ni cung zad cig las/ gshin rje'i mis ni 'jigs skrag/ byur gyi dbang du ni song / dbugs rgyu ba ni chad/ kha dang sna ni gdangs/ so ni gtsigs / sbyin pa sbyin no zhes de skad gsol ba ni 'debs/las kyi srid pa na yang srid pa la ni 'jug/ gcig pu gnyis su med cing grogs ni med / 'jig rten 'di ni 'dor 'jig rten pha rol tu ni 'gro/ skyas chen pos ni 'degs/ mun pa chen por ni zhugs/ g.yang sa chen por ni lhung / khrod stug por ni 'jug/dgon pa chen por ni 'gro/ /rgya mtsho chen pos ni khyer/ las kyi rlung gis ni brdas / sa tshugs med pa'i phyogs su ni 'gro/ /g.yul ngo chen por ni 'jug /gdon chen pos ni zin/ nam mkha' la ni 'chel/ pha ma dang / phu nu dang / sring mo dang / bus ni bskor/ dbugs ni chad/nor bgo bsha' bya zhes ni zer/ kyi hud ma / kyi hud pha / kyi hud bu zhes ni zer/ skra ni zhigs te/ sbyin pa dang / dka' thub dang / chos 'ba' zhig grogs su gyur pa na / chos ma gtogs par skyabs gzhan med/ mgon gzhan med gnas gzhan med/ dpung gnyen gzhan med do//rgyal po chen po de'i tshe de'i dus na/ chos ni gling dang gnas dang / mgon dang ston par 'gyur ro/ /rgyal po chen po de lta bas na/ khyod kyis mi rtag par lta zhing zad pa dang / dengs par blta bar bya ste/ 'chi bas 'jigs skrag par bya'o/ /chos kyis rgyal srid kyis shig/ chos ma yin pas ni mi bya'o/ /khyod chos dang mthun par gyis shig /chos ma yin pa dang mthun par ni mi bya'o/ /de ci'i phyir zhe na/ rgyal po chen po khyod kyis lus 'di 'di ltar legs par yongs su bsrungs pa/ legs par yongs su btsas pa'ang 'chi ba'i dus byed par 'gyur ro/ /yon tan thams cad dang ldan zhing shin tu yun ring por bza' ba dang /bca' ba dang / myang ba dang / ngoms par 'gyur ba bsod pa/ gtsang ma mang pos tshim par bya ste / bskyed bskyed pa yang tha ma'i mal na 'dug pa'i tshe/ sman pas bor zhing sman dang / kha zas dang / bza' ba dang / thug pas gles la bor nas bkres pa dang /skom pas nyen cing yid mi bde bar 'chi ba'i dus byed par 'gyur ro/ /rgyal po chen po 'di ltar khyod kyis lus bkrus shing bskus te/ bdug pas bsgos/ me tog dri zhim pos bsgos kyang gdon mi za bar dus su rang bzhin gyis lhan cig skyes pa'i dri nga ba 'byung bar 'gyur ro/ / rgyal po chen po 'di ltar yul ka shi'i ras dang / mon dar dang / du gu la'i ras dang / dar dang / kha che dar dang / bal dang / zar ma'i ras la sogs pa'i gos kyi bye brag gis g.yogs kyang tha ma'i mal na 'dug pa'i tshe/ snum rnam pa mang po dang / chus reg cing gos dri ma can gyon cing 'chi ba'i dus byed par 'gyur ro//rgyal po chen po de ltar khyod khyim na bud med kyi nang na 'dug btsun mo'i 'khor gyi nang na 'dug ste/ bud med kyi tshogs kyis bskor zhing / gar dang glu dang rol mo sil snyan byed/ pheg rdob dang / pi wang byed/ gling bu len/ rnga brdung zhing yid bde bar rtse dga' zhing dga' mgur spyod pa yang 'chi bas 'jigs skrag nas shin tu yid mi bde zhing 'chi ba'i dus byed par 'gyur ro//rgyal po chen po de ltar khyod khyim gyi nang na spos dri zhim pos bsku bas ni bskus / gtan pa ni bcug /skar khung ni legs par bcad/ byug pa mang pos ni byugs/ 'bru mar dri zhim po dang ldan pa'i mar me ni 'bar/dar gyi lda ldi mang pos ni bres/ me tog dri zhim po'i sil ma mang pos ni chal bar bkram / pog phor nas ni bdug / khri'i rtsa ba gser dang / dngul dang / bai DUr+ya las ni byas/ pa ti ka dang dre'u rdog gi stan dang / stan nang tshangs can dang / za 'og gi stan dang / yul ka ling ka'i stan dang /steng du bting ba dang / de'i steng du gding bas ni bkab/ g.yas g.yon du dar dmar po'i sngas ni gzhag pa'i khri la nyal ba yang bya rog dang bya rgod dang / wa dang / ro dang / sha dang / rus pa dang / skra dang / khrag dang / zhag dang / chu ser dang / rnag gi gnas mchog tu 'jigs su rung ba'i dur sa chen por bor na/lus g.yo ba med cing sa la nyal du gdon mi za'o/ /rgyal po chen po 'di ltar yang khyod glang po che'i bya la kha'am/ rta'i rgyab bam/ shing rta la zhon te/ dung dang / rnga dang / rdza rnga dang / khar rnga dang /rol mo sil snyan gyi bye brag len pa dang / gdugs dang / rgyal mtshan dang / ba dan dang / rnam par rgyal ba'i ba dan ni bsgreng / bsil yab nor bu'i yu ba can dang / rnga yab dang / shing ta la las byas pa ni g.yob cing / glang po che dang / rta pa dang / dpung bu chung ngu ma ni phyi bzhin 'brang /rgyal bu dang / bram ze bslab pa phog pa'i blon po dang / mdun na 'don dang / skye bo thal mo sbyar ba brgya stong du mas ni phyag bya zhing rgyal bar spyon cig /rgyal bar spyon cig ces snyan pa brjod de phyir 'byung ba myong ba yang ring po mi thogs par g.yo ba med cing mal du shi nas mi bzhis bteg ste/pha dang ma dang phu nu dang / sring mo dang / chung ma dang / bu pho dang / bu mo dang / rten grogs dang / bran pho dang / bran mo dang / las byed pa dang / zho shas 'tsho ba dang / blon po dang / grong khyer ba'i skye bo dag mya ngan gyi dbang du song ste/ lag pa bteg nas brang brdung zhing mchog tu snying rje bar kyi hud bu/kyi hud mgon po/ /kyi hud phu bo kyi hud jo bo zhes ngu zhing zham ring ba dang / grong khyer ba'i skye bo dag gi 'jigs pa dang bcas par mthong ste/ grong khyer gyi lho phyogs kyi sgor phyung nas sa'i 'og tu bcug gam/ 'brog dgon par sa'i 'og tu bcug kyang bya rog dang /bya rgod dang wa la sogs pas zos shing rus pa de dag mes bsregs sam/ chur bskur ram sa'i 'og tu bcug kyang rlung dang nyi ma dang / char pas phye mar byas te / phyogs phyogs su 'thor zhing de nyid du rul bar 'gyur ro/ /rgyal po chen po de ltar thams cad kyi lus kyi rang bzhin ni 'di yin te/'di ltar mi rtag pa/ 'di ltar mi brtan pa/ 'di ltar yid brtan du mi rung ba/ 'di ltar rnam par 'jig pa'i chos can/ yun thung ba/ mi gnas pa/ g.yo ba/ 'gul ba/ mthar 'jig pa/ skad cig pa/ mthar sdig pa/ zad cing 'jig pa'i sgo/ /mthar 'gyes pa'i chos can 'jigs pa dang bcas pa/'tshe ba dang bcas pa/ mya ngan dang / 'khrug pa mang ba/ 'brul ba / 'jig pa/ 'chad pa/ 'gyes pa / 'thor ba/ rnam par 'jig pa'i chos can te/ de lta bas na rgyal po chen po khyod mi rtag par lta ba dang / zad pa dang / 'jig par lta ba dang / 'dod chags kyis chags pa med par lta ba dang / zhe sdang gis sdang ba med pa dang / gti mug gis rmongs pa med pa dang / rgyal srid kyi dbang phyug dang / 'dod pa'i longs spyod kyi bde ba rnams la yang mi chags par bya'o/ /srog dang nad med pa'i rgyags pas rgyags par mi bya'o/ /de ci'i phyir zhe na/rgyal po chen po 'dod pa rnams rnyed pa'am/ so sor rnyed pa'am/ bsags pa'am/ rab tu bsags pa'am/ bsten pas ni 'dod pa rnams kyis ngoms par 'gyur ro zhes nga mi smra'o/ /gang dag ngoms pa de dag ni 'phags pa'i shes rab kyis ngoms so zhes gsungs so//rtag tu lus la mi sdug par bsgom pa dang ldan par bya ste/ dkon mchog sprin gyi mdo las 'byung ba/ lus 'di la skra dang / spu dang / sen mo dang so dang / rdul dang / dri ma dang / pags pa dang / sha dang / rus pa dang / rgyus pa dang / rtsa dang / mkhal ma dang / snying dang / mchin pa dang / glo ba dang / rgyu ma dang / gnye ma dang / lgang pa dang / pho ba dang / sul mangs dang / long ka dang / mcher pa dang / phyis dang / mchi ma dang / rngul dang / snabs dang / ngar snabs dang / zhag dang / chu ser dang / rkang dang / tshil dang / mkhris pa dang / bad kan dang /rnag dang / khrag dang / glad pa dang / glad rgyas dang / gcin dag yod de dngos po de dag la byang chub sems dpa' yongs su rtog pa'i rang bzhin can yin te/ yongs su rtog pa'i rang bzhin can de 'di snyam du gang yang byis pa blun po mi gsal ba mi mkhas pa/ de yang dngos po 'di dag shes nas 'dod chags kyi sems mi bskyed na/shes rab dang ldan pa'i rang bzhin can la lta smos kyang ci dgos snyam du sems so zhes ji skad gsungs pa lta bu'o/ /don rnam par nges pa'i mdo las kyang 'byung ste / dge slong dag 'di la dge slong dgon pa na 'dug kyang rung / shing drung na 'dug kyang rung /khang stong na 'dug kyang rung ste/ lus 'di nyid la 'og gi rkang mthil yan chad/ skra dang klad pa la thug gi bar du mi gtsang ba rnam pa sna tshogs kyis gang bar yang dag pa ji lta ba bzhin du so sor rtog ste/ lus 'di la yod pa ni skra dang / spu dang sen mo dang / so dang / rngul dang / dri ma dang / pags pa dang / sha dang / rus pa dang / rgyus pa dang / rtsa dang / mkhal ma dang / snying dang / glo ba dang / mchin pa dang / pho ba dang / long ka dang / rgyu ma dang / gnye ma dang / lgang pa dang / sul mangs dang / mcher pa dang / phyi sa dang / mchi ma dang / rdul dang / ngar snabs dang / mchil ma dang / zhag dang / chu ser dang / rkang dang / tshil dang / rnag dang / bad kan dang / mkhris pa dang / khrag dang / klad pa dang / klad rgyas dang / gcin dang / mig rdu dang / rna spabs dang / so'i dri ma dang / lce'i dri ma dag yod de/ mi gtsang ba rnam pa sna tshogs kyis gang bar yang dag pa ji lta ba bzhin du so sor rtog go//dge slong dag 'di lta ste/ dper na 'bras sA lu dang / 'bru dang / nas dang / gro dang / mon sran gre'u dang / mon sran sde'u dang / rgya sran dang / 'bras so ba dang / sran chung dang / mon sran na gu dang / yungs kar dang / 'bru rnam pa sna tshogs kyis gang ba'i sbyang zhig kha gnyi ga phye ba de la mig dang ldan pa'i mi zhig gis blugs nas so sor rtog go / /so sor brtags nas 'di dag ni 'bras sA lu'o/ /'di dag ni 'bru'o/ /'di dag ni nas so/ /'di dag ni gro'o/ /'di dag ni mon sran gre'u'o/ /'di dag ni mon sran sde'u'o//'di dag ni rgya sran no/ /'di dag ni 'bras so ba'o/ /'di dag ni sran chung ngo / /'di dag ni mon sran na gu'o/ /'di dag ni 'bras drus pa'o/ /'di dag ni til lo/ /'di dag ni yungs kar ro zhes bya bar shes so/ /dge slong dag de bzhin du dgon pa na 'dug kyang rung /shing drung na 'dug kyang rung / khang stong na 'dug kyang rung ste/ lus 'di nyid la 'og gi rkang mthil yan chad/ skra dang glad pa la thug gi bar du mi gtsang ba rnam pa sna tshogs kyis gang bar yang dag pa ji lta ba bzhin du so sor rtog shig ces gsungs so/ /dpas byin gyis zhus pa'i mdo las kyang /'di la byang chub sems dpas lus 'di'i thog ma dang tha ma'i rgyu la so sor brtag par bya'o/ /pha ma'i khu chu dang khrag 'dres pa las 'byung ste/ lus 'di la khu chu dang khrag ni lus kyi thog ma'i rgyu yin no/ /tha ma'i rgyu ni zas 'ju ba la sogs pa ste/ kham gyi bza' ba'i zas zos ma thag tu bad kan gyi gnas su 'gro'o//bad kan gyi gnas su phyin nas/ bad kan gyis rkyang rkyang por byas te/ shin tu mi gtsang bar 'gyur ro/ /de'i 'og tu mkhris pa'i gnas su 'gro ste/ mkhris pa'i gnas su phyin nas zhu zhing skyur por gyur te/ rlung gi gnas su 'gro'o/ /zhu ste rlung gi gnas su phyin nas rlung gis tshigs ma logs shig dngas ma logs shig tu rnam par 'byed de /tshigs ma las ni gcin dang ngan skyugs la sogs te dri ma rnams 'byung / dngas ma las ni khrag tu 'gyur te/ khrag las sha'o/ /sha las tshil lo/ /tshil las rus pa'o/ /rus pa las rkang ngo //rkang las khu chu'o/ /khu chu las lus 'di ste/ de ltar thog ma dang / tha ma'i rgyu mi gtsang ba'i phyir lus mi gtsang bar byang chub sems dpas bsam par bya'o zhes gsungs so/ /yang de nyid las 'byung ba/ 'di ltar mi gtsang phung po'i lus la ni/ /gzugs mngon nga rgyal can gang gus byed pa//byis pa'i blo can de ni mngon bzhin du/ /mi shes ngan skyugs bum pa thogs shing 'gro/ /de yi sna nas rnag ni rnam par 'dzag /kha nas dri mi zhim pa rtag tu 'byung / /mig rngu chags zhing skye bo'i srin bu can/ /de la su zhig chags zhing gus par byed/ /dper na byis pa sol ba thogs nas su//'di ni dkar por bya zhes bdar kyang ni/ /dkar po'i dngos por mi 'gyur zad par 'gyur/ /phyis blo phyin ci log gi nga rgyal can/ /de ltar mi gang gtsang sbra'i blo gros can/ /nga yi lus 'di gtsang mar bya zhes te/ /bskus phyis 'bab stegs brgyar ni khrus byas kyang / / 'chi bdag dbang gis zad 'gyur gtsang mi 'gyur/ /zhes gsungs so/ /'phags pa dri ma med par grags pas bstan pa las kyang / /de nas li ts+tsha bI dri ma med par grags pas tshad med pa'i thabs la mkhas pa'i ye shes dang ldan te/ yangs pa'i grong khyer chen po na gnas zhing 'dug go/ /de thabs la mkhas pas bdag nyid na ba lta bur bstan nas/de la nad dri ba'i phyir yangs pa'i grong khyer chen po nas rgyal po dang / blon po chen po dang / blon po dang / gzhon nu dang / 'khor dang / bram ze dang / khyim bdag dang / tshong dpon dang / khyim pa dang / yul gyi mi dang /de ma yin pa srog chags stong phrag mang po nad 'drir 'ongs te/ der lhags pa de dag la/ lits+tsha bI dri ma med par grags pas 'byung ba chen po bzhi'i lus 'di nyid la brtsams nas chos ston te/ grogs po rnams lus 'di ni 'di ltar mi rtag pa 'di ltar mi brtan pa/ 'di ltar yid brtan du mi rung ba/'di ltar nyam chung ba/ 'di ltar snying po med pa/ 'di ltar zhigs pa/ 'di ltar yun thung ba/ 'di ltar sdug bsngal ba/ 'di ltar nad mang ba/ 'di ltar 'gyur ba'i chos can no/ /grogs po dag 'di ltar lus 'di ni nad mang po'i snod de/ mkhas pas de la gnas par mi bya'o//grogs po dag lus 'di ni cang mi bzod pa ste/ dbu ba rdos pa lta bu'o/ /lus 'di ni ring du mi gnas pa ste/ chu'i chu bur lta bu'o/ /lus 'di ni nyon mongs pa'i srid pa las 'byung ba ste/ smig rgyu lta bu'o/ /lus 'di ni snying po med pa ste/ chu shing gi phung po lta bu'o/ /kye ma lus 'di ni rus pa la rgyus pas sbrel ba ste/'khrul 'khor lta bu'o/ /lus 'di ni sems phyin ci log las byung ba ste/ sgyu ma lta bu'o/ /lus 'di ni yang dag pa ma yin pa mthong ba ste rmi lam lta bu'o/ /lus 'di ni sngon gyi las kyi gzugs brnyan snang ba ste/ gzugs brnyan lta bu'o/ /lus 'di ni rkyen la rag las pa'i phyir brag ca lta bu'o//lus 'di ni sems 'khrug cing 'gyes pa'i mtshan ma ste/ sprin lta bu'o/ /lus 'di ni skad cig tu 'jig pa dang ldan zhing mi gnas pa ste/ glog dang mtshungs so/ /lus 'di ni rkyen sna tshogs las byung ba ste/ bdag po med pa'o/ /lus 'di ni sa dang 'dra ste byed pa med pa'o//lus 'di ni chu dang 'dra ste bdag med pa'o/ /lus 'di ni me dang 'dra ste srog med pa'o/ /lus 'di ni rlung dang 'dra ste/ gang zag med pa'o/ /lus 'di ni nam mkha' dang 'dra ste rang bzhin med pa'o/ /lus 'di ni 'byung ba chen po rnams kyi gnas te/ yang dag pa ma yin no//lus 'di ni bdag dang bdag gi ba med pa ste stong pa'o/ /lus 'di ni rtswa dang / shing dang / rtsig pa dang / bong ba dang / mig yor lta bu ste bems po'o/ /lus 'di ni rlung gi 'khrul 'khor dang ldan par 'byung ste tshor ba med pa'o/ /lus 'di ni rnag dang / mi gtsang ba bsags pa ste/gsog go/ /lus 'di ni rtag tu byug pa dang mnye ba dang / 'jig pa dang 'gyes pa'i chos can te gsob bo/ /lus 'di ni nad bzhi brgya rtsa bzhis gtses pa'o/ /lus 'di ni rtag tu rga bas zil gyis non pa ste khron pa rnying pa dang 'dra'o/ /lus 'di ni 'chi ba'i mthar thug pa ste/ mthar mi gnas pa'o//lus 'di ni phung po dang / khams dang / skye mched kyis yongs su zin pa ste/ gshed ma dang dug drag po dang grong stong pa lta bu'o/ /khyed kyis de lta bu'i lus de la sun pa dang / skyo ba skyed cing de bzhin gshegs pa'i sku la mos pa bskyed par bya'o/ /grogs po rnams de bzhin gshegs pa'i sku ni chos kyi sku ste/bsod nams las skyes pa'o/ /de bzhin gshegs pa'i sku ni sbyin pa las skyes pa/ tshul khrims las skyes pa/ ting nge 'dzin las skyes pa/ shes rab las skyes pa/ rnam par grol ba las skyes pa/ rnam par grol ba'i ye shes mthong ba las skyes pa/byams pa dang snying rje dang dga' ba dang btang snyoms las skyes pa/ sbyin pa dang / dul ba dang / yang dag pa'i sdom pa las skyes pa/ dge ba bcu'i las kyi lam las skyes pa/ bzod pa dang des pa las skyes pa/ brtson 'grus dang brtan pa'i dge ba'i rtsa ba las skyes pa/ bsam gtan dang / rnam par thar pa dang / ting nge 'dzin dang snyoms par 'jug pa las skyes pa/ thos pa dang / shes rab dang / thabs las skyes pa/ byang chub kyi phyogs kyi chos sum cu rtsa bdun las skyes pa/ zhi gnas dang lhag mthong las skyes pa/ stobs bcu las skyes pa/ mi 'jigs pa bzhi las skyes pa/ sangs rgyas kyi chos ma 'dres pa bco brgyad las skyes pa/ pha rol tu phyin pa thams cad las skyes pa/ mngon par shes pa dang rig pa las skyes pa/ mi dge ba'i chos thams cad spong ba las skyes pa/ dge ba'i chos thams cad yang dag par sdud pa las skyes pa/bden pa las skyes pa/ yang dag pa nyid las skyes pa/ bag yod pa las skyes pa'o/ /grogs po dag de bzhin gshegs pa'i sku ni dge ba'i las tshad med pa las skyes pa ste/ khyed kyis de lta bu'i sku de la mos pa bskyed par bya'o zhes gsungs so// // bam po gsum pa/ dbang phyug gi gnas rnyed na yang sus kyang / log par bsgrub par mi bya ste/ yang dag par sgrub pa la nan tan du bya'o/ /de la yang dag pa'i sgrub pa ni/ bden pa po'i le'u las 'byung ba/ skye dgu bskyang ba la brtson pa'i chos kyi rgyal pos 'du shes la gnas pa brgyad kyis mang du gnas par bya'o//brgyad gang zhe na/ skye dgu'i rigs su gtogs pa'i sems can rnams la bu'i 'du shes dang / mi srun pa khro ba rnams la nad pa'i 'du shes dang / sdug bsngal ba rnams la snying rje ba'i 'du shes dang / bde ba rnams la dga' ba'i 'du shes dang / mi mdza' ba rnams la de'i gzhi las nyes par lta ba'i 'du shes dang /mdza' ba rnams la rjes su bsrung ba'i 'du shes dang / longs spyod rnams la sman gyi 'du shes dang / bdag la bdag med pa'i 'du shes so/ /rgyal po chen po de la skye dgu'i ris su gtogs pa'i sems can rnams la bu'i 'du shes kyis gnas pa ni rgyal po chen po de phas bu bcos pa ltar mi srun pa tshar bcad pa la 'jug kyang /snying rje ba'i bsam pa mi gtong ba'o/ /mi srun pa rnams la nad pa'i 'du shes kyis gnas pa ni sman pa ltar gnod pa byed pa la ni mi khro zhing skyon rab tu bsal ba'i phyir sbyor ba'o/ /sdug bsngal ba rnams la snying rje ba'i 'du shes kyis gnas pa ni/gnod pa thams cad yongs su spong zhing phan pa sgrub pa'i phyir 'jug pa'o/ /bde ba rnams la dga' ba'i 'du shes kyis gnas pa ni gzhan gyi nor dang yo byad la brnab sems dang phrag dog gi sems mi bskyed pa'o/ /mi mdza' ba rnams la de'i gzhi la nyes par lta ba'i 'du shes kyis gnas pa ni de'i gzhi yongs su spong ba ste/des skye bo gzhan la lta ci smos kyi dgra rnams dang yang mdza' bar byed pa'o/ /mdza' ba rnams la rjes su bsrung ba'i 'du shes kyis gnas pa ni mdza' ba brtan pa dang / thams cad dang mdza' ba'o/ /longs spyod rnams la sman gyi 'du shes kyis gnas pa ni 'dod pa la log par g.yem pa la yongs su mi spyod cing longs spyod rnams la ma chags par yongs su spyod pa'o//bdag la bdag med pa'i 'du shes kyis gnas pa ni chos don du gnyer zhing dge sbyong dang / bram ze rnams kyi drung du song ste rjes su mthun pa'i chos sgrub pa la 'jug pa ste/rgyal po chen po 'du shes la gnas pa brgyad po de dag gis gnas pa'i chos dang ldan pa'i rgyal po ni skyes phul ba tsam gyis kyang longs spyod rnams shin tu mang bar 'phel bar 'gyur gyi/ chos dang mi mthun pas ni g.yo'i sbyor ba dang / 'dun pa rnam pa thams cad kyis bsgrubs kyang de ltar 'phel bar mi 'gyur ro zhes gsungs so//yid gnyis legs par 'joms pa'i mdo las kyang / chos bzhi dang ldan na rgyal po rgyal rigs spyi bo nas dbang bskur ba log par mi ltung ba'i chos can du 'gyur te/ de bzhin gshegs pa dgra bcom pa yang dag par rdzogs pa'i sangs rgyas myur du mnyes par byed cing longs spyod chen po phun sum tshogs pa yang yongs su 'dzin to//bzhi gang zhe na/ 'di lta ste/ de bzhin gshegs pa'i bstan pa srung ba'i phyir gnas pa yin/ sdig pa mi dge ba'i chos la smod pa dang / stong pa nyid dang / mtshan ma med pa dang / smon pa med pa'i chos yongs su 'dzin pa dang / bla na med pa yang dag par rdzogs pa'i byang chub tu sems bskyed pa'o zhes gsungs so/ /mi dge ba yongs su spang bar bya ba gang zhe na/ nyi ma'i snying po'i le'u las 'byung ba/ ma 'ongs pa'i dus na rgyal rigs dang / bram ze'i rigs dang /rje'u rigs dang / dmangs rigs dag chos kyis gnas pa'i dge slong rnams la byin pa'i khyim gyi gzhi dang / zhing gi gzhi dang / kun dga' ra ba'i gzhi dang / skyed mos tshal dang / bran pho dang / bran mo dang / las byed pa dang / mal cha dang / stan dang / na ba'i gsos sman dang / yo byad nas rkang 'gros kyi bar du yang de bzhin du byin pa la brku ba dang /ril gyis 'phrog pa dag 'byung bar 'gyur te/ rgyal rigs nas/ dmangs rigs kyi bar du de dag tshe 'di nyid la mi 'dod pa'i chos nyi shu dang myur du ldan par 'gyur ro/ /nyi shu gang zhe na/ lha 'bang bar 'gyur ba dang / phyogs dang / phyogs mtshams su de'i mi snyan pa grags par 'gyur ba dang /de mdza' bo dang / nye du dang / snag gi gnyen mtshams kyis bor bar 'gyur ba dang / de la dgra mang bar 'gyur ba dang / nor dang / 'bru dang / yo byad 'grib par 'gyur ba dang / g.yeng ba mang bar 'gyur ba dang / yan lag ma tshang bar 'gyur ba dang /de gnyid med par 'gyur ba dang / de dag rtag du skom pas nyen par 'gyur ba dang / de la btung ba yang dug tu 'gyur ba dang / mdza' ba yid du 'thad pa dag dang yang myur du 'bral bar 'gyur ba dang / rtag tu gzhan dang 'thab par 'gyur ba dang / pha ma dang / chung ma dang /bu pho dang / bu mo dang / bran pho dang / bran mo dag bsgo ba'i rjes su mthun par mi byed par 'gyur ba dang / de'i tshig gsang ba dang / nor gsang ba dang / btsun mo'i 'khor gsang ba dang / de'i gsang ba'i dngos po thams cad snang zhing mngon par 'gyur ba dang / bgo skal la spyod pa mi sdug pa dag gis longs spyod rnams chud gson par 'gyur ba dang /myur du nad drag pos btab par 'gyur ba dang / sman dang nad g.yog med cing sha dang khrag skams la/ sdug bsngal myong bar 'gyur ba dang / bdag gi gcin rkyags kyis reg ste/ 'chi ba'i dus byed par 'gyur ba ste/ rgyal po chen po mi 'dod pa'i chos nyi shu po 'di dag dang myur du 'phrad par 'gyur ro/ /gang chos kyis gnas pa'i dge slong rnams la byin pa'i longs spyod dang / yongs su spyod pa dang / nor dang / yo byad phrogs sam bdag spyod dam / gzhan spyod du bcug na de 'chi ba'i dus byas nas/ mnar med pa'i sems can dmyal ba chen por skye ste/de na tshe bskal pa'i bar du zangs bzhu ba'i khu ba 'thung zhing lcags kyi thu lum za la me'i gos gyon cing shin tu mi bzad pa'i sdug bsngal sna tshogs myong bar 'gyur ro/ /bskal par 'dug pa'i tshe zad nas mya ngam dgon pa chu med pa na lam gol ba'i yi dwags dang skal ba mnyam par skyes na yang rkang pa dang /lag pa dang / mig med par skye'o/ /de nas phyogs bzhi'i rlung tsha bas sreg cing spu gri 'dra ba'i sa la 'gro ste/ de lo brgya stong du ma'i bar du de na 'di 'dra ba'i sdug bsngal myong bar 'gyur ro/ /de brgya la ji ste na shi 'phos na yang / rgya mtsho chen por sha sna gu'i lus dpag tshad brgya par skyes te/de ni sngon gyi las kyi rgyus dpag tshad brgya kho ra khor yug tu chu zangs bzhu ba'i khu ba 'dra ba byung nas/ de chu de'i nang na lo brgya stong du ma'i bar du sems can dmyal bar gnod pa myong bar 'gyur ro/ /de nas shi 'phos nas kyang mya ngam gyi dgon par rdzus te skyes nas/sha sna gu chen po ri rab tsam du gyur te de phyogs bzhi kun nas rlung shin tu tsha bas sreg cing der phyogs bzhi nas gcan gzan dang / bya kun lhags te za'o/ /de brgya la ji ste yun ring po zhig na de nas shi 'phos nas kyang / yang sems can dmyal ba chen por skye'o/ /de nas shi 'phos nas kyang yang rnam pa 'di lta bu'i sdug bsngal chen po myong bar 'gyur ro//yongs su brtag pa bzung ste/ de ji ste brgya la mi rnams dang skal ba mnyam par skyes na yang / sangs rgyas med pa'i sangs rgyas kyi zhing snyigs ma lnga can du skye zhing mig med pa dang mi sdug par 'gyur te/ rgyal po chen po chos kyis gnas pa'i dge slong rnams kyi longs spyod dang /yongs su spyod pa dang / nor dang yo byad phrogs na/ de 'di lta bur sdug bsngal bar 'gyur ro zhes gsungs so/ /nam mkha'i snying po'i le'u las kyang / rigs kyi bu rgyal po rgyal rigs spyi bo nas dbang bskur ba'i ltung ba'i rtsa ba lnga ste/ ltung ba'i rtsa ba de dag gis/ rgyal rigs spyi bo nas dbang bskur ba'i dge ba'i rtsa ba sngon bskyed pa thams cad chud gzan te/ pha sa pham zhing lha dang mi'i bde ba'i gnas thams cad nas lhung nas ngan song du 'gro bar 'gyur ro/ /lnga gang zhe na rigs kyi bu rgyal rigs spyi bo nas dbang bskur bas mchod rten gyi rdzas 'phrog gam/dge 'dun gyi dang / phyogs bzhi'i dge 'dun la phul ba 'phrog gam/ 'phrog tu 'jug pa 'di ni ltung ba'i rtsa ba dang po'o/ / gang yang chos spong zhing 'gog tu 'jug ste/ nyan thos nges par 'byung ba bshad pa'am/ rang sangs rgyas nges par 'byung ba bshad pa'am/theg pa chen po nges par 'byung ba bshad pa spong zhing 'gog tu 'jug pa 'di ni ltung ba'i rtsa ba gnyis pa'o/ / gang yang nga'i phyir rab tu byung ste/ skra dang kha spu bregs nas gos ngur smrig gyon pa bslab pa bzung yang rung / bslab pa ma bzung yang rung ste/ tshul khrims 'chal ba yang rung /tshul khrims dang ldan pa yang rung / de'i gos ngur smrig 'phrog gam/ khyim na gnas par byed du bcug gam/ lus kyi chad pa gzhu brdeg byed dam/ chad pa nor 'bul du 'jug gam/ btson rar 'jug gam/ srog dang bral bar byed du 'jug pa 'di ni ltung ba'i rtsa ba gsum pa'o//rgyal rigs gang yang ched du bsams te/ ma'i srog gcod pa dang / pha dang bcom ldan 'das kyi nyan thos dgra bcom pa'i srog gcod pa dang / dge 'dun 'dum pa 'byed pa dang / ched du bsams te yang dag par rdzogs pa'i sangs rgyas la ngan sems kyis khrag 'byin pa ste/mtshams med pa'i las lnga po 'di dag las gang yang rung ba'i las byed pa 'di ni ltung ba'i rtsa ba bzhi pa'o/ / rgyal rigs gang yang rgyu med pa smra bar gyur la/ 'jig rten pha rol la g.yel te/ mi dge ba bcu'i las kyi lam yang dag par bzung nas gnas shing / sems can gzhan mang po dag kyang /mi dge ba bcu'i las kyi lam yang dag par 'dzin du 'jug ste/ 'dul zhing 'jug pa 'di ni ltung ba'i rtsa ba lnga pa'o/ / yang blon po'i ltung ba'i rtsa ba lnga ste/ lnga gang zhe na/ blon po gang mchod rten gyi rdzas sam/ dge 'dun gyi dang / phyogs bzhi dge 'dun gyi rdzas 'phrog pa 'di ni ltung ba'i rtsa ba dang po'o//gang yang grong 'joms pa dang / ljongs 'joms pa dang / grong khyer 'joms pa dang / yul 'khor 'joms par byed pa 'di ni ltung ba'i rtsa ba gnyis pa'o/ / yang blon po gang chos spong ba ste/ nyan thos nges par 'byung ba bshad pa'am/ rang sangs rgyas nges par 'byung ba bshad pa'am/ thams cad mkhyen pa'i ye shes nges par 'byung ba bshad pa spong zhing 'gog la/ subs par byed pa 'di ni ltung ba'i rtsa ba gsum pa'o/ / yang blon po gang bcom ldan 'das kyi phyir rab tu byung ba/ tshul khrims dang ldan yang rung / tshul khrims dang mi ldan yang rung ba la 'tshe ste/gos ngur smrig 'phrog gam/ khyim na gnas par byed du 'jug gam/ btson rar bcug gam/ chad pas nor 'phrog gam/ srog dang bral bar byed du 'jug pa 'di ni ltung ba'i rtsa ba bzhi pa'o/ / yang blon po gang mtshams med pa lnga las gang yang rung bas sdig pa la sogs pa 'di ni ltung ba'i rtsa ba lnga pa'o// yang blon po gang gis ltung ba'i rtsa ba lnga po 'di dag las gang yang rung ba zhig byas na/ blon po de dge ba'i rtsa ba sngon bskyed pa thams cad chud gzon pa yin no zhes gsungs so/ /zla ba'i snying po'i le'u las kyang / grogs po dag su nga'i phyir rab tu byung ste/ kha na ma tho ba dang bcas pa chen po srog gcod par byed dam/ma byin par len pa dang / mi tshangs par spyod pa dang / brdzun du smra ba dang / mi rigs pa'i mi dge ba gzhan byed pa de/ rgyal po rgyal rigs nas grong khyer dang grong gi gtso bos grong khyer dang / yul dang gtsug lag khang nas bskrad de longs spyod dang bral la /rjes su mthun pa'i ngag gis chad pas gcad par bya'i/ lus la ni chad pas mi gcad do/ /su zhig lus kyi chad pa gzhu brdeg byed na de ni dge ba thams cad las nyams par 'gyur ro/ /lha dang mi'i nang du skye ba dang bral te/ mnar med par skye bar 'gyur ro/ /de nas lha thams cad nas lus srul bo'i bar du ji snyed 'dus pa thams cad dang ldan pa'i 'khor de dkon mchog gsum la sems shin tu dad cing rab tu cher gus te ngo mtshar du 'dzin cing /'di skad ces gsol to/ /deng slan chad bdag cag thams cad kyis bcom ldan 'das kyis bstan pa bsrung bar bgyi'o/ /dge slong dang /dge slong ma dang / dge bsnyen dang / dge bsnyen ma dang / tha na gang bcom ldan 'das kyi bslab pa 'bral ba dang / tha na su zhig bcom ldan 'das kyi slad du skra dang / kha spu bregs te/ ngur smrig gi tshal bu 'tshal zhing bslab pa bzhin mi bgyid la de yongs su 'dzin pa ma mchis na yang bdag cag gis de la ston pa'i 'du shes kyis srung zhing yongs su bskyang bar bgyi'o//yo byad thams cad sbyar bar bgyi'o/ /gal te rgyal pos ngur smrig gi tshal du 'tshal ba de lta bu la/ rkyen gang yang rung bas lus kyi chad pa gzhu brdeg bgyis na/ bdag cag gis rgyal po de la mi srung ngo / / mi bskyang ngo / /de'i yul 'khor du bgyi ba thams cad kyang yal bar 'dor ro/ /de'i yul 'khor du g.yo thams cad dang / 'thab mo dang / rtsod pa dang / mi ngas dang / nad dang / mu ge dang / 'khrug pa dang / dus ma lags par rlung ldang ba dang / dus ma lags par char 'bab pa dang / char mi 'bab cing lo ma rung bar 'gyur ba'i rkyen gnod pa zhig byung na yang / bdag cag gis bzlog par mi bgyi'o / /de'i yul nas de bzhin gshegs pa'i nyan thos kyang yul gzhan du 'chi bar bgyi'o/ /yul de nas sbyin gnas kyang ma mchis par bgyi'o/ /bdag cag kyang de nas mchi bar bgyi'o zhes 'byung ngo //'phags pa sa'i snying po'i mdo las kyang / sa'i snying po sngon byung ba/ yul lnga len gyi rgyal po sde rnam par rgyal ba zhes bya ba'i 'bangs gsad pa la thug pa zhig yod pa de srog gi phyir skra dang kha spu bregs te ngur smrig gi tshal bu mgul du btags so//de nas gsad pa la thug pa'i mi de gshed mas bcing ba lngas dam por bcings nas dur khrod chen po bi ti kha lam ba ka zhes bya bar bor ro/ /de nas de'i mtshan mo dur khrod chen po der srin mo chen mo mig mi bzang ma zhes bya ba de g.yog lnga stong dang 'ongs nas/ des bcings pa lngas bcings pa'i mi zhig mgo bregs te/gos ngur smrig gyon pa mthong nas des de la bskor te/ phyag 'tshal nas slar song ngo / /de bzhin du gnyis pa seng ldeng so can zhes bya ba 'khor lnga stong dang / de bzhin du gsum pa khro gnyer skra can zhes bya ba dang / bzhi pa ral gri kha zhes bya ba de dag gis mgo bregs te/ngur smrig gi tshal bu gyon pa de mthong nas/ bkres bzhin du ma zos par phyir dong ngo / /sa'i snying po sngon byung ba rgyal po rab tu bsod nams can zhes bya ba de'i blon pos mi gsad pa la thug pa zhig /glang po che rgyags pas gsod du bcug pa dang / glang po che des mi de'i rkang pa gnyis nas bzung ste/mthu thams cad kyis sa la brdabs par byas pa dang / mi de gos dmar po gyon pa zhig nas/ glang po che gtum pas kyang gos dmar po gyon pa mthong ba dang / sems dad nas mi de dal gyis sa la gzhag ste du bzhin du mdun na 'dug cing snas de'i rkang pa gnyis la nyug go/ /dud 'gro'i skye gnas su song ba'i mi khom par gyur pa log par ltung ba de lta bu yang gos dmar po gyon pa mthong nas/bzod cing sdig pa ma byas par gyur pa la ltos/ yang ma 'ongs pa'i dus na/ rgyal po gdol pa dang / blon po dang / bkrabs pa dang / dge sbyong dang bram ze dang / khyim bdag gdol ba blun yang mkhas so zhes nga rgyal byed cing tshul 'chos pa dang /g.yo dang sgyu'i tshig gis 'jig rten bslu ste/ de ni bla na med pa'i theg pa chen po tshol lo zhes zer la blun zhing gtum ste/ 'jig rten pha rol gyi 'jigs pa la mi lta ba dag 'byung ste/ de dag ni nga'i phyir rab tu byung ba snod du gyur pa dang / snod du ma gyur pa'ang rung ba la rkyen sna tshogs las snyad btags te/'tshe zhing lus kyi chad pa'am/ btson rar zhugs pa'i chad pa'am/ longs spyod dang / yongs su spyod pa dang dbral ba'i chad pa'am/ khyim pa'i las sna tshogs byed du gzhug pa'i chad pa'am/ sma dbab pa'i chad pa'am/ bsnyen bkur byed du gzhug pa'i chad pa'am/ chad pas bsdigs pa nas / srog dang bral ba'i bar du byed par 'gyur te/ de dag thams cad ni dus gsum du gshegs pa'i sangs rgyas bcom ldan 'das thams cad la rab tu mnyes par byas par gyur pa/ mnar med par gzhol zhing dge ba'i rtsa ba chad pa/sems kyi rgyud bsregs pa/ mkhas pa kun gyis yongs su spangs pa'o/ /gzhan yang rgyal rigs gdol pa nas khyim bdag gdol pa'i bar du gang dag phyogs bzhi'i dge 'dun la phul ba gtsug lag khang gi gzhi'am/ kun dga' ra ba'i gzhi'am/ khyim gyi gzhi'am/ zhing gi gzhi'am/ mi'am dud 'gro'i skye gnas su song ba'i gos sam/ bza' ba'am/ btung ba'am/ mal cha'am/ na ba'i gsos sman nam / yo byad dam/ longs spyod dam/ kun spyod pa sna tshogs sam/ me tog dang 'bras bu'i shing ngam/ shing bcud can nam/ spos kyi shing ngam/mtshon gyi shing ngam grib shing yang rung ste/ dge slong rnams la longs spyod dang / yongs su spyod pa'i phyir byin pa 'phrog pa dang / 'phrog tu 'jug pa dang / bdag nyid spyod pa dang / gzhan spyod du 'jug pa dang / nga'i phyir rab tu byung ba la gshe ba dang / spyo ba dang / skrod pa dang /brnyas pa dang / chos kyi bar du byed pa dang / chos smra ba'i dge slong rnams la gnod par byed pa dag 'byung bar 'gyur te/ de dag thams cad ni dus gsum du gshegs pa'i de bzhin gshegs pa thams cad nas mkhas pa thams cad kyis spangs pa'i bar du'o zhes gsungs so/ / de nyid las bcom ldan 'das kyis gsungs pa/ bzod pa thob pa'i sems can rgyal po rgyal rigs spyi bo nas dbang bskur ba rnams la ni gnas dang longs spyod dang / yongs su spyod pa dang / dbang phyug gi gnas ngas gnang ngo / /byang chub sems dpa' sa'i snying pos gsol pa/bcom ldan 'das rgyal po rgyal rigs spyi bo nas dbang bskur ba/ gang bzod pa ma thob pa de ji ltar ngan song du mi mchi bar 'gyur/ bcom ldan 'das kyis bka' stsal pa/ gang bzod pa ma thob kyang de dge ba bcu'i las kyi lam yang dag par bzung ste/ gnas na de la yul 'khor gyi longs spyod dang / yongs su spyod pa dang / dbang phyug gi gnas gnang ngo / /byang chub sems dpa' sa'i snying pos gsol pa/ bcom ldan 'das gang dag bzod pa ma thob la/ dge ba bcu'i las kyi lam dang yang mi ldan pa de dag ni rgyal rigs gdol ba dag ste/bcom ldan 'das kyis bstan pa zab mo 'di 'jig par bgyid par 'gyur zhing de dag ni mnar ma mchis par mchi bar 'gyur ba lags na/ de dag ji ltar thar bar 'gyur/ bcom ldan 'das kyis bka' stsal pa/ rigs kyi bu rgyal po rgyal rigs spyi bo nas dbang bskur ba gang dad pa'i stobs kyis go cha bgos te/dkon mchog gsum la dad pa mang zhing / theg pa gsum gyis nges par 'byung ba'i chos mi spong la/ tha na tshigs su bcad pa gcig kyang ma rung bar mi bgyid de/ tshul khrims dang ldan pa dang / tshul khrims 'chal ba yang rnam par mi 'tshe/ tha na mgo bregs te gos ngur smrig gyon pa la yang gnod pa mi byed pa dang /dge 'dun dang / mchod rten gyi rdzas mi 'phrogs pa dang / dge slong la 'tshe zhing longs spyod pa las bzlog pa dang / theg pa gsum gyis nges par 'byung ba'i chos kyi gtam nyan cing ji ltar thos pa nyams kyis ci nus su bsgrub pa dang /theg pa gsum la nan tan byed pa'i dge slong rnams dang bsten pa dang bsnyen bkur byed pa dang / yi dam la brten pa dang / mi slu ba'i sems dang ldan pa dang / sems can rnams theg pa chen po la yang dag par 'dzin du 'jug pa dang / 'dzud pa dang / rab tu 'god par byed pa de lta bu'i rgyal rigs dge ba de la/sngon gyi de bzhin gshegs pa thams cad kyis kyang yul 'khor gyi zas kyi longs spyod dang / yongs su spyod pa dang / dbang phyug gi gnas rgya chen po ni log par ltung bar mi 'gyur bar snang ste/ ngas kyang de dag la de snang ngo zhes gsungs so/ /yang de nyid las 'byung ba/rgyal rigs nas khyim bdag gi bar du dge ba gang la la zhig da ltar dang ma 'ongs pa'i dus lnga brgya tha ma'i bar du bdag dang gzhan dang / 'jig rten pha rol srung ba dang / bcom ldan 'das kyi bstan pa srung ba dang / nyan thos kyi theg pa dang / rang sangs rgyas kyi theg pa dang /theg pa chen po la yang dag par zhugs pa'i gang zag tshul khrims dang ldan pa yon tan gyis phyug pa/ snod du gyur pa dang / snod du ma gyur pa nas mgo bregs te/ ngur smrig gi tshal bu gyon pa'i bar la srung bar byed / mchod par byed pa dang / mchod rten dang dge 'dun la phul ba la bdag kyang mi spyod/gzhan yang spyod du mi 'jug pa dang / 'phrog na'ang 'dor bar byed pa de ni bsod nams kyi phung po tshad med grangs med dpag tu med pa skyed do/ /de nas lha'i dbang po thams cad nas/ sha za'i rgyal po'i bar gyis 'di skad ces gsol to/ / bcom ldan 'das rgyal rigs dge ba nas/ khyim bdag dge ba'i bar du gang zhig yon tan 'di lta bu dang ldan pa de bdag cag gis rnam pa bcus bsrung bar bgyi'o/ /bcu gang zhe na 'di lta ste/ de'i tshe bsring bar bgyi ba dang / tshe'i bar chad du 'gyur ba/ chos kyis bzlog par bgyi ba dang /bro nad ma mchis par bgyi ba dang / g.yog dang longs spyod dang / kun spyod pa dang / dbang phyug dang / snyan pa dang / grags pa dang / dge ba'i bshes gnyen dang / shes rab phun sum tshogs pa yang bskyed par bgyi'o/ /rgyal rigs dge ba de 'khor dang bcas pa dang / yul 'khor mtha' dag bdag cag gis rnam pa bcus bsrung bar bgyi'o / /bcu gang zhe na/ 'di lta ste/ gzhan gyi dmag tshogs dang / nang gi dmag tshogs dang / sdig pa dang / 'chi ba dang / char mi 'bab pa dang / char ches pa dang / dus ma lags par rlung ldang ba dang / tsha ba dang /gza' dang / rgyu skar gyi gnod pa dang / mu ge 'byung ba dang / glo bur gyi bro nad kyis 'gum pa dang / log par lta ba rnams las bzlog par bgyi'o zhes 'byung ngo / /'phags pa zla 'od kyi le'u las kyang / gtong ba po dang / sbyin bdag dang / lha dang klu dang /gnod sbyin gang dag nga'i bstan pa 'dzin pa dang / gang dag nga'i chos kyi tshul yun ring du gnas par bya ba dang / dkon mchog gsum gyi rigs rgyun mi 'chad par bya ba'i phyir brtson pa dang gang dag nga'i bu dag las skyes pa dang / chos las skyes pa dang / chos kyi sprul pa'i dge slong dang dge slong ma dang /dge bsnyen dang / dge bsnyen ma dang / gzhan dad pa'i rigs kyi bu dang / rigs kyi bu mo dang / gang dag don dam pa'i bden pas yang dag par rdzogs pa'i byang chub kyi bar du yongs su tshol ba/ yongs su skyong ba'i gtong ba po dang / sbyin bdag dang / lha dang klu dang / gnod sbyin de dag ngas byams pa la bskal pa bzang po'i byang chub sems dpa' sems dpa' chen po rnams kyi lag tu gtad do zhes gsungs so/ /chos sgrub pa la gnas par 'dod pas sems la mkhas par bya'o/ /ji ltar na sems la mkhas pa yin zhe na/'phags pa dkon mchog sprin gyi mdo las 'byung ba/ byang chub sems dpa' sems la mkhas par bya'o/ /ji ltar na byang chub sems dpa' sems la mkhas pa yin zhe na/ de lus dang sems rab tu dben pas sems la mkhas pa yin te/ de sems la 'di snyam du bdag gi sems 'di ci dge ba la spyod dam/de ste mi dge ba'am/ 'on te lung du ma bstan pa'am/ chos gang la spyod ces rnam par spyod de/ gal te dge ba la spyod na/ de la sems dga' ba dang / rangs pa dang / mos pa spyod do/ /dge ba'i chos de dag gang zhe na/ 'di lta ste/byang chub kyi phyogs kyi chos sum cu rtsa bdun no/ /'on te mi dge ba la spyod na de la skyo ba mang ba dang / rtog pa mang ba yin te/ mi dge ba'i chos de dag spong ba la brtson pa yin no zhes gsungs so/ /ma skyes dgra'i mdo las kyang / byang chub sems dpa' sems bskyed pa gang la bdud sdig can gyis glags rnyed pa dang /de bzhin gshegs pa mi mnyes par 'gyur ba dang / lha rnams mi dga' bar 'gyur ba dang / bdag gi dge ba'i rtsa ba'i phyogs 'bri bar 'gyur ba'i sems bskyed par mi bya'i/ sems bskyed pa gang la/ bdud sdig can gyis glags mi rnyed pa dang /de bzhin gshegs pa mnyes par 'gyur ba dang / lha rnams dga' ba dang / bdag gi dge ba'i rtsa ba'i phyogs 'bri bar mi 'gyur ba'i sems bskyed par bya ste/ de ltar zhugs pa de'i sems bskyed pa thams cad chos kyi 'khor lo bskor ba yin no zhes gsungs so/ /smra ba la dga' bar mi bya ste/lhag pa'i bsam pa bskul ba'i mdo las 'byung ba/ byams pa 'di la dge slong smra ba la dga' ba ni mi btsun te/ mang du thos pas rgyags shing dregs nas brjed ngas pa yin/ nang du tshul bzhin yid la byed pa dang bral zhing sems kyi rgyud dmu rgod du 'gyur ba yin/ zhi gnas dang lhag mthong yongs su spangs la/lha dang klu dang gnod sbyin gyis kyang dam par mi bkur zhing 'gyod pa dang ldan pa yin / sgrub pa la mi gnas pa yin no zhes gsungs so/ /dmigs par spyod pa la grub pa med de/ sgrub pa shes par 'dod pas mang du thos pa dang / nang du yang dag 'jog la brtson par bya ste/de nyid las 'byung ba/ gal te zhal ta byed pa la brtson pa'i byang chub sems dpas / rin po che sna bdun gyi mchod rten gyis stong gsum gyi stong chen [(]pa'i [,]po'i [)]'jig rten gyi khams bkang na / des nga mi mnyes kyi / gal te pha rol tu phyin pa dang ldan pa'i tshig bzhi pa'i tshigs su bcad pa gcig bzung na/des nga la bsti stang du byas par 'gyur ro/ /de ci'i phyir zhe na/ byams pa de bzhin gshegs pa dgra bcom pa yang dag par rdzogs pa'i sangs rgyas rnams kyi byang chub ni mang du thos pa las skyes kyi/ dngos po yongs su 'dzin pa las ni ma skyes so//gal te zhal ta byed pa la brtson pa'i byang chub sems dpas lung 'bogs pa dang / kha ton la brtson pa'i byang chub sems dpa' la/ de bsod nams 'dod pa'i phyir zhal ta'i kun tu sbags pas sbags na/ bsod nams ma yin pa'i phung po cher 'phel te/ las kyi sgrib pa yang gzung bar 'gyur ro//gal te zhal ta byed pa la brtson pas byang chub sems dpas 'dzam bu'i gling yongs su gang bar gyur kyang / de dag thams cad kyis lung 'bogs pa dang / kha ton la brtson pa'i byang chub sems dpa' gcig la bsnyen bkur dang g.yog bya'o//'dzam bu'i gling gi tshad tsam gyi lung 'bogs pa dang / kha ton la brtson pa'i byang chub sems dpa' de dag thams cad kyis nang du yang dag 'jog la brtson pa'i byang chub sems dpa' gcig la bsnyen bkur dang g.yog bya'o/ /de ltar na de bzhin gshegs pas rjes su yi rang zhing gnang ba yin no//de ci'i phyir zhe na/ 'di lta ste/ shes rab kyi las 'di ni dka' ba'i las te/ bla na med pa khams gsum thams cad las khyad par can du gyur pa mngon par 'phags pa'o zhes gsungs so/ /yang chos sgrub pa ni/ rin po che'i phung po'i mdo las 'byung ba/'od srungs 'di lta ste dper na/ rgya mtsho chen por 'jug par 'dod pa'i tshong pa ni rin po che'i gling nas/ bdag gi yul du bde bar phyin gyi bar du de gru la shin tu rtog par byed do/ /'od srungs de bzhin du byang chub sems dpa' thams cad mkhyen pa'i rgya mtsho la 'jug par 'dod pas kyang ji tsam byis pa so so'i skye bo dang /nyan thos dang rang sangs rgyas thams cad kyi sa las 'das te/ bdag gi pha'i spyod yul 'jug pa'i bar du'o/ /pha rol tu phyin pa drug gi gru shin tu rtogs par bya'o zhes gsungs so/ /ma skyes dgra'i mdo las kyang / thams cad mkhyen pa nyid kyi sems kyi rtsa ba mi gcod pa de ni rtsa ba de yang dag par 'dzin du 'jug pa ste/brtson 'grus so/ /thams cad mkhyen pa'i ye shes su bsngo ba'i phyir sbyin pas chog mi shes pa dang / sems can thams cad la skyabs bya ba'i phyir tshul khrims kyis chog mi shes pa dang / sangs rgyas kyi sku tshol ba'i phyir bzod pas chog mi shes pa dang / dge ba'i rtsa ba thams cad bsgrub pa'i phyir brtson 'grus kyis chog mi shes pa dang / mi dmigs pa'i rnal 'byor gyi phyir bsam gtan la chog mi shes pa dang / thams cad la rnam par spyod pa'i phyir shes rab kyis chog mi shes pa'o//chos kyi phyir longs spyod dang / 'tsho ba de dag thams cad ni kha na ma tho ba med pa'o zhes gsungs so/ /bsgrub pa don du gnyer bas sems can thams cad la sems snyoms par bya ste/ 'phags pa zla ba sgron ma'i mdo las 'byung ba/ kye gzhon nu byang chub sems dpa' chos gcig dang ldan na/yon tan 'di dag rnyed de/ myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /chos gcig po gang zhe na/ gzhon nu 'di la byang chub sems dpa' sems can thams cad la sems snyoms pa dang / phan pa'i sems dang / khong khro ba med pa'i sems dang / mi mnyam pa med pa'i sems yin te/ chos gcig po 'di'o zhes gsungs so/ /bsam gtan dang kha ton gyi bar du gcod pa'i chos rnams kyang yongs su spang bar bya ste/ dam pa'i chos dran pa nye bar gzhag pa'i mdo las 'byung ba/ rigs kyi bu bcu po 'di dag ni byang chub sems dpa' rnams kyi bsam gtan dang /kha ton gyi bar du gcod par byed pa'o/ /bcu gang zhe na/ 'di lta ste/ 'du 'dzi'i gtam mnyan pa dang / ri mo 'bri ba dang / snyan ngags sbyor ba dang / gza'i tshogs dang / rgyu skar sems pa dang / zas rnyed pa bdag gir byed pa dang /sha za mo ltar nor bsgyur ba sems pa dang / rgyal po la brten pa dang mkhas pa rnams la mi 'dri ba dang / bde ba la mgron du 'bod pa dang / 'dre zhing gnas pa ste bcu po 'di dag go zhes gsungs so/ /'phags pa tshangs pas zhus pa'i mdo las kyang / lha'i bu chos sgrub pa chos sgrub pa zhes bya ba ni/ gang chos thams cad la mi sgrub pa 'di chos sgrub pa'o/ /de ci'i phyir zhe na/ gang chos mi sgrub pa de ni chos mi byed do/ /gang mi byed cing rnam par mi byed pa de ni chos sgrub pa'o zhes gsungs so/ /chos rnams bsgrub par 'dod pas rnyed pa dang bkur sti yongs su spang bar bya ste/lhag pa'i bsam pa bskul ba'i mdo las 'byung ba/ rnyed pa dang bkur sti ni gti mug bskyed pas dran pa 'joms par byed pa dang / bdag gi don bsgrub pa'i phyir g.yo bskyed pa dang / rgyags pa dang / nga rgyal dang / dregs pa bskyed pa dang / sangs rgyas thams cad kyi gnang ba ma yin par brtag par bya'o/ /rnyed pa dang / bkur sti ni gdon mi za bar ltung ba'i rtsa ba ste/ dge ba'i rtsa ba stor bar byed par brtag par bya'o/ /rnyed pa dang bkur sti ni sngar bkur sti byed la/ phyis bkur sti mi byed pa bsam gtan dang /tshad med pa yongs su spangs pas sems can dmyal ba dang / dud 'gro'i skye gnas dang / gshin rje'i 'jig rten du rab tu ltung bar byed pa/ lhag spyod kyi spyod pa dang mtshungs par gnas pa yin par so sor brtag par bya'o/ /rnyed pa dang bkur sti ni myur du zug par byed pa'i phyir tsher ma dang 'dra bar brtag par bya'o//rnyed pa dang bkur sti ni thar bar dka' ba'i phyir 'dam dang 'dra bar brtag par bya'o zhes gsungs so/ /so sor brtags nas 'dod pa chung ba la sems gzhol bar bya ste/ yang dag par ldan pa'i lung las 'byung ba/ shing n+ya gro d+ha zhig gi drung na/lug khyu chen po zhig 'khod de/ lug khyu de'i nang nas phyi sa za ba'i lug gcig phyi sa khung du phyi sa zar song ste/ phyi sa la ci 'dod pa zos nas mdun du phyi sa'i phung po bzhag ste 'dug nas mgo bsgyur zhing de des de tsam gyis lug gzhan dag la brnyas pa byed do/ /de bzhin du dge slong la la zhig rnyed pa dang /bkur sti dang / grags pas non nas sems zin pa de/ grong dang grong khyer dang grong rdal zhig tu bsod snyoms kyi phyir zhugs te/ de der zas gtsang ma zhim po ci 'dod pa zos nas phyi de nyin kyang zas la 'os pa'i zas khyer te 'ongs nas dge slong dag la smras pa tshe dang ldan pa dag kho bos zas gtsang ma zhim po 'di ci 'dod pa zos nas/zas 'di mi dgos te lhag par gtor ba'i rigs na/ khyed 'dod na 'di zo shig ces de des de tsam gyis dge slong rung ba des pa gzhan dag la brnyas par byed do/ /dge slong dag de bzhin du rnyed pa dang / bkur sti dang grags pa ni mi bzad pa'o zhes rgya cher gsungs so//g.yo dang sgyu yang yongs su spang bar bya ste/ ma dros pa'i mdo las 'byung ba/ thams cad mkhyen pa nyid kyi sems bskyed pa de'i bar du gcod pa gnyis te/ gnyis gang zhe na/ 'di lta ste/ g.yo dang sgyu'o/ /gzhi'ang gnyis te drang po dang /g.yo med pa'o zhes gsungs so/ /nan tan bsgrub par 'dod pas dge ba'i bshes gnyen dag la brten par bya ste/ sgrub pa ni dge ba'i bshes gnyen gyi kha na las so/ /ji ltar shes she na/ mdo las 'byung ba'i phyir te/ dpal 'byung ba dang / dpal gyi blo gros kyi rnam par thar pa las 'byung ba/byang chub sems dpa' rnams kyi byang chub sems dpa'i spyod pa thams cad thos pa ni dge ba'i bshes gnyen la rag las pa'o/ /byang chub sems dpa'i yon tan yongs su rdzogs par bya ba thams cad ni dge ba'i bshes gnyen las 'byung ba'o//byang chub sems dpa'i dge ba'i rtsa ba thams cad ni dge ba'i bshes gnyen gyis bskyed pa'o/ /byang chub sems dpa'i bslab pa la nan tan du bya ba thams cad ni dge ba'i bshes gnyen la rag las pa'o/ /byang chub sems dpa'i lhag pa'i bsam pa yongs su dag pa thams cad la ni dge ba'i bshes gnyen rtsa bar 'gyur ro//byang chub sems dpa'i bsod nams bsags pa thams cad ni dge ba'i gshes gnyen gyis bsrungs pa'o/ /dge ba'i bshes gnyen mgu bar byas nas sangs rgyas thams cad kyi byang chub thob pa'o/ /dge ba'i bshes gnyen gyis yang dag par zin pa'i byang chub sems dpa' rnams ni ngan song du mi ltung ngo //dge ba'i bshes gnyen gyis yongs su bzung ba'i byang chub sems dpa' rnams ni theg pa chen po las mi ldog go/ /dge ba'i bshes gnyen gyis yongs su bsams pa'i byang chub sems dpa' rnams ni/byang chub sems dpa'i bslab pa dang 'gal bar mi byed do/ /dge ba'i bshes gnyen gyis yang dag par zin pa'i byang chub sems dpa' rnams ni so so skye bo'i sa las yongs su 'da'o/ /dge ba'i bshes gnyen gyis yongs su bsrung ba'i byang chub sems dpa' rnams ni nyan thos dang /rang sangs rgyas kyi nges par gyur ba la mi 'jug go/ /dge ba'i bshes gnyen ni lam gol ba las yongs su bsrung ba'o/ /chos thos par 'gyur ba'i sprin gyi char rab tu 'bebs pa'o/ /sangs rgyas kyi chos thams cad la gnas par byed pa'o//'di ltar yang rigs kyi bu dge ba'i bshes gnyen ni sangs rgyas kyi rigs su bskyed pas ma lta bu'o/ /dge ba'i bshes gnyen ni phan pa rgya chen po bsgrubs pas pha lta bu'o/ /dge ba'i bshes gnyen ni sdig pa thams cad las bsrung bas ma lta bu'o//dge ba'i bshes gnyen ni 'khor ba'i chu bo chen po las sgrol ba'i mnyen pa lta bu'o/ /dge ba'i bshes gnyen ni thams cad mkhyen pa'i ye shes rin po che'i gling du phyin par byed pas gdos pa 'dzin pa lta bu'o/ /rigs kyi bu de lta bas na de ltar yid la bya ba rgyun mi chad pas khyod kyis dge ba'i bshes gnyen bsten par gyis shig/khur thams cad bskur bas yongs su mi skyo ba'i phyir sa lta bu'i sems dang mi phyed pa'i phyir rdo rje lta bu'i sems dang / sdug bsngal thams cad kyis mi sgul ba'i phyir khor yug lta bu'i sems dang / ci dga' bar bka' nyan pas bran lta bu'i sems dang /mi khro bas khyi lta bu'i sems kyis dge ba'i bshes gnyen la brten par bya'o/ /rigs kyi bu khyed kyis bdag la ni nad pa'i 'du shes bskyed par bya'o/ /dge ba'i bshes gnyen la ni sman pa'i 'du shes dang / gdams ngag la ni sman gyi 'du shes dang /nan tan nyams su blang ba la ni nad 'tsho ba'i 'du shes bskyed par bya'o/ / ci'i phyir zhe na/ rigs kyi bu de ltar dge ba'i bshes gnyen la lhag pa'i bsam pa yongs su dag pa'i byang chub sems dpa' rnams ni/ dge ba'i bshes gnyen gyi ngag thams cad nyams su len pa'i tshe/gangs kyi ri la brten pa'i rtswa dang / shing gel pa dang / sman dang / nags tshal lta bur dge ba'i rtsa ba thams cad kyis rnam par 'phel lo/ /rgya mtsho chen po chu'i snod du gyur pa ltar sangs rgyas kyi chos thams cad kyi snod du 'gyur ro zhes 'byung ngo / /mdor na sangs rgyas dang /byang chub sems dpa'i spyod pa thams cad dang / sangs rgyas kyi chos thams cad rab tu 'thob cing / yongs su 'grub pa ni dge ba'i bshes gnyen gyi kha na las so/ /dge ba'i bshes gnyen las 'byung ngo / /rin po che'i phung po'i mdo las kyang / 'od srungs 'di lta ste/dper na rgya mtsho'i nang du gru zhig na/ gang dag shing leb bam/ gzhan ci yang rung ba zhig la brten pa de dag ni bde bar 'gram du phyin par 'gyur ro/ /'od srungs de bzhin du byang chub sems dpa'i theg pa pa thams cad mkhyen pa'i sems kyi gru zhig ste/ byang chub las rab tu nyams kyang /gang dge ba'i bshes gnyen gyi shing leb la brten pa de dag ni/ yang thams cad mkhyen pa'i sems rab tu thob ste/ chos thams cad kyi pha rol tu song nas chos kyi dbyings kyi gling du phyin to/ /de bas na 'od srungs bla na med pa yang dag par rdzogs pa'i byang chub ni dge ba'i bshes gnyen la brten to zhes gsungs so//bla na med pa'i dge ba'i bshes gnyen de bzhin gshegs pa bzhugs pa'am/ yongs su mya ngan las 'das pa rnams la mchod pa dang / rim gro bya ste de las bsod nams kyi tshogs dpag tu med pa yongs su rdzogs shing / rnam par smin pa'ang mi zad par 'grub bo/ /ji ltar me tog brtsegs pa'i mdo las/ seng ge rnam par rtse ba gang zhig gis de bzhin gshegs pa mthong ste/ sems dang nas mchod pa dang / gang zhig gis de bzhin gshegs pa yongs su mya ngan las 'das pa'i ring bsrel yungs 'bru tsam rnams la mchod pa byed pa ni/rnam par smin pa mnyam par shes par bya ste/ bye brag gam tha dad du bya ba med do zhes ji skad gsungs pa lta bu'o/ /snying rje chen po'i mdo las kyang / kun dga' bo gang la mngon du bsti stang byed pa lta yang zhog nga'i sku gdung la sku gdung gi mchod pa dang /ring bsrel yungs 'bru tsam la mchod pa lta yang zhog /nga'i phyir mchod rten byas pa rnams la bsti stang byed pa lta yang zhog ste/ kun dga' bo gang la la sangs rgyas la dmigs nas/ tha na me tog gcig nam mkha' la gtor na/ bsod nams kyi phung po de'i rnam par smin pa gang yin pa ni/kun dga' bo ci tsam du thog ma med pa'i 'khor ba na/ de'i sngon gyi mtha' mi mthong ba de tsam gyi bskal par 'khor ba'i tshe/ brgya byin nyid dang / tshangs pa nyid dang / 'khor los sgyur ba'i rgyal srid rnams kyi mtha' rnyed par mi nus so/ /sangs rgyas la dmigs nas/ tha na nam mkha' la me tog gcig 'dor ba lta yang zhog ste/ gal te sems can dag tha na rmi lam na sangs rgyas la dmigs nas nam mkha' la me tog gcig 'dor na/ dge ba'i rtsa ba de yang tha mar mya ngan las 'da' bar 'gyur bar nga smra'o/ /gal te tha na dud 'gro'i skye gnas su song ba'i sems can rnams kyis sangs rgyas la dmigs pa'i dran pa rnyed na/de dag gi dge ba'i rtsa ba yang tha ma mya ngan las 'da' ba'i bar du 'gyur bar nga smra'o/ /kun dga' bo sangs rgyas bcom ldan 'das rnams la yon phul ba ci tsam du mthu che ba dang / sems dang ba ji tsam du mthu che ba la ltos/ kun dga' bo 'di ltar sangs rgyas la phyag 'tshal lo zhes zer na/ kun dga' bo tshig de'i don ni 'di'o/ /'di lta ste/ sangs rgyas bcom ldan 'das rnams kyi sgra ni don med pa ma yin te/ gang 'di sangs rgyas la phyag 'tshal lo zhes zer na/de don med par mi 'gyur ro/ /de bzhin gshegs pa rnams la dge ba'i rtsa ba ji tsam du chung ngu bskyed pa yang chud za bar mi 'gyur te/ tha na sems dang ba gcig bskyed pa de thams cad kyang tha ma mya ngan las 'da' ba'i bar du 'gyur ro/ /'di lta ste dper na/ nya ba mchil ba thogs pas nya bshor ba'i phyir mchil ba gzan ma dang bcas pa/mtsho chu chen por bcug la/ bcug ma thag tu nyas mid par 'gyur na/ nya de mtsho chu'i nang na 'phyo yang / de srad bu sra ba yu ba skam sa la btags pas brtod pa zhes bya ste/ nya ba mchil bas bshor ba 'ongs nas/srad bu thangs shes byed pa las nya zin par shes te/ de srad bu drangs nas skam sa la phyung ste/ dga' dgur spyod pa de bzhin du/ byang chub sems dpa' gang dag sangs rgyas bcom ldan 'das la dad pa'i sems kyis dge ba'i rtsa ba bskyed na/ tha na dad pa'i sems gcig bskyed na yang sems can de dag nyes pa byas pa'i las kyi sgrib pas/mi dal ba rnams su skyes su zin yang / sangs rgyas bcom ldan 'das rnams kyis sangs rgyas kyi ye shes dang / bsdu ba'i dngos po'i srad bus sems can de dag bzung nas 'khor ba'i mtsho chu nas bton te/ mya ngan las 'das pa'i thang la 'jog go zhes gsungs so//klu'i rgyal po rgya mtshos zhus pa las/ klu'i bdag po byang chub sems dpa' chos brgyad dang ldan na rtag tu rgyun mi 'chad par sangs rgyas dang 'phrad pa thob bo/ /brgyad gang zhe na/ sangs rgyas kyi sku gzugs la lta ba yang dag par 'dzin tu 'jug pa dang /de bzhin gshegs pa la rim gro byed pa dang / rgyun mi 'chad par de bzhin gshegs pa'i bsngags pa brjod pa dang / de bzhin gshegs pa'i sku gzugs byed pa dang / sems can thams cad de bzhin gshegs pa la lta ba yang dag par 'dzin du 'jug pa dang /sangs rgyas kyi zhing gang na de bzhin gshegs pa'i sgra grags pa'i sangs rgyas kyi zhing der smon lam 'debs pa dang / rgyun zhum pa med pa dang / rgyun rgya chen por gyur nas sangs rgyas kyi ye shes tshol ba'o zhes gsungs so/ /byang chub sems dpa'i sde snod las kyang / gang de bzhin gshegs pa'i mchod rten byi dor byed pa de smon lam rnam par dag pa mchog bzhi rab tu 'thob bo//bzhi gang zhe na/ mtshan phun sum tshogs pa'i gzugs smon lam rnam par dag pa mchog dang / yi dam la brtan pa smon lam rnam par dag pa mchog dang / de bzhin gshegs pa mthong ba smon lam rnam par dag pa mchog dang /'khor chen po phun sum tshogs pa smon lam rnam par dag pa mchog go zhes gsungs so/ /yang de nyid las de bzhin gshegs pa'i mchod rten rnams la me tog 'bul lam/ spos ris 'dri na ma tshang ba med pa brgyad thob ste/ brgyad gang zhe na/ gzugs ma tshang ba med pa dang / longs spyod ma tshang ba med pa dang / g.yog 'khor ma tshang ba med pa dang / tshul khrims ma tshang ba med pa dang / ting nge 'dzin ma tshang ba med pa dang / thos pa ma tshang ba med pa dang / shes rab ma tshang ba med pa dang / smon lam ma tshang ba med pa'o zhes gsungs so//de bzhin gshegs pa'i gzugs kyi le'u las kyang / sa'am/ rdo thal lam/ shing ngam/ rdo'am/ ru gar ram/ lcags sam/ gser ram/ dngul lam/ bai DUr+ya'am/ shel lam/ mu tig dmar po'am/ rdo'i snying po 'am/sbug gam/ dung ngam/ man shel lam/ spos sam/ ras sam/ shing leb bam/ rtsig ngos la de bzhin gshegs pa'i sku gzugs bri bar bya/ ral ba gso bar bya/ 'drum pa bcos par bya ste/ de bzhin gshegs pa'i sku gzugs byas na/rigs dma' ba rnams dang sdig pa byed pa'i rigs rnams dang / log par lta ba'i rigs rnams su mi skye ste/ yan lag gang yang rung ba ma tshang ba med par 'gyur ro/ /gal te mtshams med pa lnga byas su zin kyang / de bzhin gshegs pa la dad pa rnyed de/ de bzhin gshegs pa'i sku'i gzugs byas nas /las des sems can dmyal ba myong na yang chung [(]du [,]ngu [)]myong ste/ theg pa gsum las theg pa gang yang rung bas nges par 'byung bar 'gyur ro/ /dper na mi zhig mi gtsang bas reg pa las rab tu dag par bkrus te/ spos kyis byugs na de'i dri mi zhim pa med par 'gyur ro//de bzhin du mtshams med pa byas pa de'i sdig kyang med par 'gyur ro/ /gang mi dge ba bcu'i las kyi lam dang ldan yang / de bzhin gshegs pa la dad pa rnyed de de bzhin gshegs pa'i sku gzugs byas na/ de'i sdig pa ji ltar me'i phung pos mar tshig ste/du ba yang mi mngon pa bzhin du/ de'i sdig pa de yang mi snang bar 'gyur ro zhes gsungs na/ byang chub kyi sems dang ldan pa khyim gyi nang nas byung na/ tshul khrims dang ldan pa khyad par 'phags pa lta ci smos te/ rin po che'i phung po'i mdo las/ sems can gang dag srid pa gsum du gtogs pa de dag thams cad kyis/so so nas de bzhin gshegs pa'i mchod rten 'phang du ri'i rgyal po ri rab tsam byas te / de dag la bskal pa gang gA'i klung gi bye ma snyed du so so nas bsti stang du bya ba thams cad kyis bsti stang byas pa bas/ byang chub sems dpa' thams cad mkhyen pa nyid kyi sems dang ma bral ba gang gis me tog gcig phul na/de ni bsod nams kyi phung po snga ma bas ches mang du skyed do zhes ji skad gsungs pa lta bu'o/ /yang rin po che'i phung po'i mdo nyid las/ gang stong gsum gyi stong chen po'i 'jig rten gyi khams kyi sems can de dag thams cad theg pa chen po la yang dag par zhugs te/thams cad 'khor los sgyur ba'i rgyal srid dang ldan par gyur la/ 'khor los sgyur ba'i rgyal po re res kyang / rgya mtsho chen po tsam gyi mar me'i snod byas te/ ri rab tsam gyi snying po bsregs la so so nas 'di 'dra ba'i mar mes de bzhin gshegs pa'i mchod rten la mchod pa byas pa bas/gad khyim gyi gnas nas mngon par byung ba'i byang chub sems dpa' mar me'i snying po yungs mar gyis bskus te/ de bzhin gshegs pa'i mchod rten gyi drung du bzung na/ mar me phul ba snga mas snying po yungs mar gyis bskus pa de'i brgya'i char yang mi chog pa nas/rgyu'i bar du yang mi chog go/ /gang yang 'khor los sgyur ba'i rgyal po de dag gis/ sangs rgyas la sogs pa dge slong gi dge 'dun la/ bde ba'i yo byad thams cad kyis bsti stang du byas pa bas/gang yang khyim gyi gnas nas mngon par byung ba'i byang chub sems dpas bsod snyoms blangs te/ lhung bzed du 'ongs pa/ gzhan dang bgos te zos na/ de ni de bas ches cher 'phags so/ /gang yang 'khor los sgyur ba'i rgyal po de dag gis/ ri rab tsam gyi chos gos kyi phung po sangs rgyas la sogs pa/dge slong gi dge 'dun la phul ba bas/ gang yang khyim gyi gnas nas mngon par byung ba'i byang chub sems dpa' chos gos gsum po ma gtogs par gzhan theg pa chen po la yang dag par zhugs pa dang / sangs rgyas la sogs pa dge slong gi dge 'dun dang /de bzhin gshegs pa'i mchod rten la phul na snga ma'i chos gos kyi phung po de/ dge slong la chos gos byin pa 'dis zil du brlag go/ /gang yang 'khor los sgyur ba'i rgyal po de dag re res 'dzam bu'i gling thams cad me tog gis bkang ste/ de bzhin gshegs pa'i mchod rten la phul ba bas/ gang yang khyim gyi gnas nas mngon par byung ba'i byang chub sems dpas de bzhin gshegs pa'i mchod rten la tha na me tog gcig phul na/ sbyin pa snga mas sbyin pa 'di'i brgya'i char yang mi chog pa nas rgyu'i bar du yang mi chog go zhes gsungs so//mthar gyis yang dag par 'phags pa'i mdo las kyang / bzang po phan yon bzhi po 'di yang dag par rjes su mthong na/ byang chub sems dpa' de bzhin gshegs pa mchod pa la spro ba yin no/ /bzhi gang zhe na/ sbyin gnas mchog la bdag mchod par 'gyur ba dang /bdag las zla bltas te/ sems can gzhan yang de bzhin du mchod pa byed par 'gyur ba dang / de bzhin gshegs pa mchod nas byang chub kyi sems brtan par 'gyur ba dang / skyes bu chen po'i mtshan sum cu rtsa gnyis mngon du mthong nas/dge ba'i rtsa ba bsags par 'gyur pa ste/ bzhi po 'di dag go zhes gsungs so/ /'di yang de bzhin gshegs pa la mchod pa dang rim gro bya ba bla na med pa ste/ blo gros rgya mtshos zhus pa'i mdo las 'byung ba/ blo gros rgya mtsho gsum po 'di dag ni/ de bzhin gshegs pa la mchod pa dang /rim gro bya ba bla na med pa'o/ /gsum gang zhe na/ gang byang chub tu sems bskyed pa dang / gang de bzhin gshegs pa rnams kyi dam pa'i chos yongs su 'dzin pa dang / gang sems can rnams la snying rje chen po bskyed pa'o zhes ji skad gsungs pa lta bu'o/ / don dam pa'i mchod pa la yang rtag tu brtson par bya ste/ byams pa seng ge'i sgra'i mdo las 'byung ba/ sangs rgyas su 'du shes pa las sangs rgyas mthong ba yang med na/ sangs rgyas la mchod par 'gyur ba lta ci smos te/ de ni gnas pa ma yin no/ /de la sangs rgyas la mchod pa gang zhe na/gang 'du shes kyi mtshan ma mi bskyed pa'o/ /gang la sems med pa dang / sems las byung ba yid la mi byed pa dang / sangs rgyas su 'du shes pa med pa dang / chos su 'du shes pa med pa dang / dge 'dun dang / gang zag dang / bdag dang pha rol tu 'du shes pa med pa 'di ni/de bzhin gshegs pa la mchod pa'o zhes gsungs so/ /shes rab kyi pha rol tu phyin pa las kyang / gal te 'jig rten gyi khams gang gA'i klung gi bye ma snyed de bzhin gshegs pa'i ring bsrel gyis/ kha bcing du rung ba tsam du gang bar gyur pa dang / gang shes rab kyi pha rol tu phyin pa glegs bam du bris pa cha de gnyis las gcig stsal na/ bcom ldan 'das bdag gis shes rab kyi pha rol tu phyin pa 'di nyid blang ngo / /de ci'i slad du zhe na/ de bzhin gshegs pa'i ring bsrel dag ni de las byung bas na mchod pa ste/ de bzhin gshegs pa'i ring bsrel rnams ni/shes rab kyi pha rol tu phyin pas yongs su bsgos pa'o zhes gsungs so/ /gang dag de bzhin gshegs pa rnams kyi yongs su mya ngan las 'das pa la yang dag pa ji lta ba bzhin du mos pa'i sems can de dag ni shin tu rnyed par dka'o/ /de bzhin gshegs pa rnams kyis yongs su mya ngan las 'das pa yang dag pa ci lta ba bzhin ci 'dra zhe na/mdo sde du ma las thos te/ de bzhin gshegs pa skye ba srid pa'i mdo las 'byung ba/ kye rgyal ba'i sras 'di la byang chub sems dpa' sems dpa' chen po de bzhin gshegs pa dgra bcom pa yang dag par rdzogs pa'i sangs rgyas rnams kyis yongs su mya ngan las 'das pa chen po khong du chud par 'dod pas rang bzhin gyi ngo bo nyid la blo yongs su btang ste/des de bzhin nyid kyi yongs su mya ngan las 'das pa ji lta ba de bzhin du/ de bzhin gshegs pa'i yongs su mya ngan las 'das pa khong du chud par bya'o//yang dag pa'i mtha'i yongs su mya ngan las 'das pa ji lta ba dang / chos kyi dbyings kyi yongs su mya ngan las 'das pa ji lta ba dang / nam mkha'i dbyings kyi yongs su mya ngan las 'das pa ji lta ba dang / rang bzhin gyi yongs su mya ngan las 'das pa ji lta ba dang /'dod chags dang bral ba'i mtha'i yongs su mya ngan las 'das pa ji lta ba dang / rmi lam gyi mtha'i yongs su mya ngan las 'das pa ji lta ba dang / mtshan nyid med pa'i mtha'i yongs su mya ngan las 'das pa ji lta ba dang / chags pa med pa'i mtha'i yongs su mya ngan las 'das pa ji lta ba dang /bdag gi rang bzhin gyi mtha'i yongs su mya ngan las 'das pa ji lta ba dang / chos thams cad kyi rang bzhin gyi mtha'i yongs su mya ngan las 'das pa ji lta ba de bzhin du/ de bzhin gshegs pa'i yongs su mya ngan las 'das pa khong du chud par bya'o//de ci'i phyir zhe na/ de ni de dag thog ma nas ma skyes ma byung ba'i phyir te/ chos gang ma skyes ma byung ba de la 'bral bar 'gyur ba gang yang med do/ /kye rgyal ba'i sras gzhan yang de bzhin gshegs pa rnams ni/ byang chub sems dpa' rnams la yongs su mya ngan las 'das pa shin tu mthar thug pa mi brjod mi ston te/de ci'i phyir zhe na/ de dag gis ni de bzhin gshegs pa thams cad da ltar byung ba ji lta ba de bzhin du 'das pa dang / ma byon pa rnams kyang skad cig gcig la mngon du byas shing / skad cig kyang ye shes kyi skad cig gi rjes su 'brang bar bya/skad cig de la yang de bzhin gshegs pa thams cad mngon du blta bar bya/ de bzhin gshegs pa'i mngon par sgrub pa thams cad kyang des mngon par bsgrub par bya ste/ des ni gnyis kyi 'du shes kyang bskyed par mi bya/ mi gnyis pa'i 'du shes kyang ma yin/sems can gyi 'du shes kyang ma yin/ bdag gi 'du shes kyang ma yin par bya ba'i phyir ro/ /kye rgyal ba'i sras de ci'i phyir zhe na/ byang chub sems dpa' ni mngon par zhen pa'i lam thams cad dang bral zhing 'du shes thams cad yongs su spang bar bya ba'i phyir ro//kye rgyal ba'i sras gzhan yang de bzhin gshegs pa 'byung ba zhes bya ba 'di ni sems can pha rol yongs su tshim par 'gyur ba'i tshig go/ /de bzhin gshegs pa yongs su mya ngan las 'da' ba zhes bya ba 'di ni sems can pha rol gyi skyo ba skyed pa'i tshig ste/kye rgyal ba'i sras/ de bzhin gshegs pa rnams ni skye ba med de/ yongs su mya ngan las mi 'da'o/ /de ci'i phyir zhe na/ de bzhin gshegs pa rnams ni chos kyi dbyings la bzhugs pa'i phyir te/ sems can pha rol gyi sems dang / bsam pa yongs su bskang bar bya ba'i phyir/de bzhin gshegs pa yongs su mya ngan las 'da' bar snang ngo / /kye rgyal ba'i sras 'di lta ste/ dper na nyi ma'i dkyil 'khor chos kyi dbyings kyi tshad dang mnyam pa zhig shar la/ de shar nas kyang 'jig rten gyi khams thams cad kyi chu yongs su dang ba'i snod thams cad du gzugs brnyan phyin par snang zhing mngon la nyi ma'i dkyil 'khor 'phos pa med cing /nyi ma'i dkyil 'khor kun du phyin pa snang bar gyur kyang de'i nang na chu'i snod gcig cig chag gam/ de nas logs shig tu phyung ngam/ stong par gzhag par gyur kyang / nyi ma'i gzugs brnyan yang snang bar mi 'gyur na/kye rgyal ba'i sras de la ji snyam du sems/ nyi ma'i dkyil 'khor ram gcig gis nyes te snod der nyi ma'i gzugs brnyan mi snang bar ma gyur grang ngo / /byang chub sems dpa' de bzhin gshegs pa'i rigs su byung ba'i dpal gyis smras pa/ kye rgyal ba'i sras de lta ma yin te/snod dang mi ldan pa'i phyir nyi ma'i gzugs brnyan mi snang gi /nyi ma'i dkyil 'khor gyis nyes pa ni ma yin no/ /byang chub sems dpa' kun tu bzang pos smras pa/ kye rgyal ba'i sras de bzhin du/ de bzhin gshegs pa nyi ma'i dkyil 'khor 'char bar 'gyur ba'i tshe yang 'jig rten gyi khams rab 'byam thams cad kyi chos dbyings kun du snga phyi med par 'char te/de ni 'jig rten gyi khams rab 'byam kun gyi sems can rnyog pa med pa dang ldan pa'i chu'i snod thams cad la gzugs brnyan snang bar 'gyur ro / /sems kyi rgyud rnyog pa med pa'i phyir/ rtag tu rgyun mi 'chad par de bzhin gshegs pa'i sku nyi ma'i dkyil 'khor snang yang sems can sems rnyog pa dang ldan zhing snod chag par gyur pa rnams kyis ni/de bzhin gshegs pa'i nyi ma'i dkyil 'khor mthong bar mi 'gyur te/ de bzhin gshegs pa la 'pho ba mi mnga' yang thams cad du skye bar snang ste/'jig rten gyi khams rab 'byam la la zhig gi sems can snod chag pa lta bur gyur pa'am/ sems rnyog pa med pa dang ldan zhing las dang nyon mongs pas bsgribs pa zhig yod par gyur na yang / der ni de bzhin gshegs pa rnams mya ngan las 'das par snang na/ kye rgyal ba'i sras de la ji snyam du sems/ de bzhin gshegs pas nyes te/ de bzhin gshegs pa rnams mya ngan las 'da' ba'am/ gcig tu ma gyur grang ngo / /smras pa/ kye rgyal ba'i sras de lta ma yin te/ de bzhin gshegs pa rnams ni sems can gyi rgyud dge ba'i rtsa ba dang mi ldan pas yongs su mya ngan las 'da'i/de bzhin gshegs pa rnams kyis nyes pa'i phyir zhes ni mi brjod do/ /smras pa/ kye rgyal ba'i sras 'o na/ byang chub sems dpa' sems dpa' chen pos/ de bzhin gshegs pa rnams mya ngan las 'da' ba yang de lta bur shes par bya'o//kye rgyal ba'i sras gzhan yang yongs su mya ngan las 'da' ba'i 'dul ba'i sems can rnams la/ de bzhin gshegs pa rnams yongs su mya ngan las 'da' ba ston te/ de bzhin gshegs pa rnams ni 'byung ba yang med/ yongs su mya ngan las 'da' ba yang med do//kye rgyal ba'i sras de yang 'di lta ste dper na me ni 'jig rten thams cad na yang me'i dgos pa sgrub bo/ /de las grong ngam/ grong khyer ram/ grong rdal lam/ yul lam/ pho brang 'khor tam/ rgyal po'i gnas shig tu me shi bar gyur na/ kye rgyal ba'i sras de la ji snyam du sems / des 'jig rten thams cad du me thams cad lhag ma med pa'am/ gcig tu shi ste zhi bar ma gyur grang ngo / /byang chub sems dpa' de bzhin gshegs pa'i rigs su byung ba'i dpal gyis smras pa/ kye rgyal ba'i sras de lta ma yin no//smras pa/ kye rgyal ba'i sras de bzhin du/ de bzhin gshegs pa dgra bcom pa yang dag par rdzogs pa'i sangs rgyas kyang 'jig rten gyi khams rab 'byam ma lus pa thams cad na de bzhin gshegs pa'i phrin las mdzad pa las dus gzhan zhig na de bzhin gshegs pa'i phrin las yongs su rdzogs par grub nas/zhing gi grangs su bya ba la la zhig nas yongs su mya ngan las 'da' bar bstan par gyur pa na/ kye rgyal ba'i sras de la ji snyam du sems/ 'jig rten thams cad nas kyang / de bzhin gshegs pa'am/ gcig yongs su mya ngan las 'das par ma gyur grang ngo //smras pa/ kye rgyal ba'i sras de lta ma yin no/ /smras pa/ kye rgyal ba'i sras de lta na/ byang chub sems dpa' sems dpa' chen pos/ de bzhin gshegs pa dgra bcom pa yang dag par rdzogs pa'i sangs rgyas rnams kyis yongs su mya ngan las 'das pa chen po yang de lta bur khong du chud par bya'o//kye rgyal ba'i sras gzhan yang 'di lta ste dper na/ sgyu ma'i mkhan po mkhas pa las lobs pa shin tu byang ba zhig gis sngags dang rig sngags kyi stobs dang / shugs la brten te/ stong gsum gyi stong chen po'i 'jig rten gyi khams thams cad du sgyu ma'i rnam pa mang po bstan te/grong dang / grong khyer dang / ljongs dang / pho brang 'khor dang / rgyal po'i gnas thams cad du/ rang gi lus bstan te sgyu ma de dag kyang bskal par gnas par byin gyis brlabs pa/ las grong ngam/ grong khyer ram/ ljongs sam/ yul lam/ pho brang 'khor tam/ rgyal po'i gnas gcig tu dgos pa rdzogs par zin nas/ sgyu ma'i mkhan po des rang gi lus mi snang bar byas na/ kye rgyal ba'i sras de la ji snyam du sems/ 'jig rten thams cad nas kyang /sgyu ma'i rnam pa mang po yongs su nub pa'am/ gcig tu ma gyur grang ngo / /byang chub sems dpa' de bzhin gshegs pa'i rigs su byung ba'i dpal gyis smras pa/ kye rgyal ba'i sras de lta ma yin no/ /smras pa/ kye rgyal ba'i sras de bzhin du/ de bzhin gshegs pa dgra bcom pa yang dag par rdzogs pa'i sangs rgyas ye shes kyi sgyu ma tshad med pa la shin tu byang ba/thabs dang shes rab dang ye shes kyi rig sngags kyis shin tu byung ba yang / chos kyi dbyings thams cad du de bzhin gshegs pa'i sku sgyu ma'i rnam pa lta bu chos kyi dbyings kyis klas pas gnas pa/nam mkha'i khams kyi mthar thug pa mi 'jigs par bstan pa/ sems can gyi mos pa bzhin du phrin las rdzogs par zin nas/ zhing rab 'byam la la zhig nas yongs su mya ngan las 'das pa ston kyang zhing gcig nas yongs su mya ngan las 'das pas 'jig rten gyi khams thams cad nas yongs su mya ngan las 'da' ba ma yin te/kye rgyal ba'i sras byang chub sems dpa' sems dpa' chen pos/ de bzhin gshegs pa rnams yongs su mya ngan las 'da' ba ni de lta bur khong du chud par bya'o/ /kye rgyal ba'i sras de ltar byang chub sems dpa' sems dpa' chen pos/de bzhin gshegs pa dgra bcom pa yang dag par rdzogs pa'i sangs rgyas rnams kyi yongs su mya ngan las 'da' ba tshad med pa'i rjes su song ba/ chags pa med pa'i mthar thug pa/ chos kyi dbyings ltar mtha' dang dbus med pa/nam mkha'i dbyings kyi rang bzhin can de bzhin nyid kyis mi skye mi 'gag pa yang dag pa'i mtha' la gnas pa dus bzhin du rab tu ston pa/ 'gro ba thams cad du rgyun mi 'chad par sngon gyi byin gyi rlabs kyis shin tu byin gyis brlabs pa/ 'gro ba'i zhing thams cad dang /chos kyi dbyings rab 'byam thams cad las mi 'da' bar khong du chud par bya'o zhes gsungs so/ /shes rab kyi pha rol tu phyin pa las kyang / rab 'byor mya ngan las 'das pa 'di ni 'di lta ste/ rang bzhin gyis stong pa nyid do zhes gsungs so// // bam po bzhi pa/ dam pa'i chos pad+ma dkar po'i mdo las kyang / 'od srungs chos thams cad mnyam pa nyid du khong du chud pa ni mya ngan las 'das pa'o zhes gsungs so/ /yang de nyid las rigs kyi bu gang yang de bzhin gshegs pas mdzad pa de/ de bzhin gshegs pas mdzad cing yun ring po de srid nas mngon par rdzogs par sangs rgyas nas/tshe'i tshad dpag tu med par de bzhin gshegs pa rtag tu bzhugs shing yongs su mya ngan las mi 'da' ste/ 'dul ba'i dbang gis yongs su mya ngan las 'da' ba ston to/ / ci'i phyir zhe na/ ngas rnam grangs des sems can rnams yongs su smin par byed pa'i phyir ro zhes gsungs so/ /snying rje chen po'i mdo las kyang / tshangs pa 'di ltar 'jig rten 'di las zad pa dang / nyon mongs pa zad pa dang / sdug bsngal zad pa dang / sdug bsngal nye bar zhi bas zhi zhing byang ste/rnam par zhi ba ni yongs su mya ngan las 'das pa'o zhes bya'o/ /tshangs pa de la las gang yin pa de zad pa dang / nyon mongs pa gang yin pa de dang bral zhing nub pa ma gtogs par mya ngan las 'da' ba gang yang med do zhes gsungs so/ /'jig rten las 'das pa'i le'u las kyang /sangs rgyas rnams kyi mya ngan las 'das pa kun du bstan pa la 'jug pa ni mtha' yas so zhes gsungs so/ /'phags pa tshangs pas zhus pa las kyang / bcom ldan 'das yongs su mya ngan las 'das pa zhes bya ba ni/ gang mtshan ma thams cad rab tu zhi ba dang /g.yo ba thams cad dang bral ba'o zhes gsungs so/ /yang gsungs pa/ tshangs pa yongs su mya ngan las 'das pa zhes bya ba ni/ phan tshun du rkyen gyis sgro btags pa med pa'o zhes 'byung ngo / /yang dag par ldan pa'i lung las kyang / dge slong dag khyed la mya ngan las 'das pa dang /mya ngan las 'da' bar 'gro ba'i lam bshad par bya'o/ /de la mya ngan las 'das pa gang zhe na/ 'di lta ste/ 'dod chags zad pa dang / zhe sdang zad pa dang / gti mug zad pa'o/ /de la mya ngan las 'das par 'gro ba'i lam gang zhe na/ 'phags pa'i lam yan lag brgyad pa 'di nyid do zhes gsungs so//bcom ldan 'das kyi ye shes shin tu rgyas pa'i mdo las kyang / maud gal gyi bu sngon byung ba/ de bzhin gshegs pa snyan pa brjod pa zhes bya ba byung ste/ de'i nyan thos 'dus pa yang byung ngo / /de'i tshe na sangs rgyas kyi zhing de na dge slong dmigs pa kun la mtshungs par lta ba zhes bya ba theg pa chen po la yang dag par zhugs pa gcig cig yod de/sangs rgyas bye ba khrag khrig brgya stong dpag tu med pa rnams la/ dge ba'i rtsa ba bskyed kyang / de de srid kyi bar du bla na med pa yang dag par rdzogs pa'i byang chub kyi sems la ma zhugs kyi/theg pa chen po bla na med pa la yang dag par zhugs te/ sangs rgyas kyi zhing brjod du med pa'i yang brjod du med pa yongs su sbyong bar 'dod do/ /yang de'i tshe na sangs rgyas kyi zhing de na dge slong gcig po de ma gtogs par sems can gzhan gang gis kyang / byang chub kyi phyir byang chub tu sems ma bskyed de/ de chos zab mo thams cad la dbang zos pas/ lha tshe ring po rnams kyi nang du skyes so/ /de nas de bzhin gshegs pa snyan pa brjod pas/ sangs rgyas kyi mdzad pa mdzad nas/ sems can chen po gang la sangs rgyas kyi mdzad pa ma mdzad ces sangs rgyas kyi zhing thams cad du gzigs pa dang /des theg pa chen po la yang dag par zhugs pa'i sems can gcig po de la byang chub kyi snod du gyur na/ de yang mi dal ba rnyed nas de lus de nyid kyis byang chub tu dge ba'i rtsa ba bskyed pa'i skal pa med de/de nas shi 'phos nas mnar med pa'i sems can dmyal ba chen por lhung ste/ de de nas yang byang chub tu dge ba'i rtsa ba bskyed pa'i skal ba med la/ de mnar med pa nas shi 'phos te mi rnams kyi nang du skyes kyang blun po lug ltar lkugs pa lag brda byed pa chos go ba'i mthu med par gzigs nas/der de bzhin gshegs pa de sprul te/ sems can de yongs su smin par mdzad do/ /sprul pas de yongs su smin par mdzad pa na/ skye ba bye ba khrag khrig phrag drug cur de bzhin gshegs pa de mi bde ba myong ngo / /maud gal gyi bu de bzhin gshegs pa'i thugs rje chen po la ltos/sems can gcig gi phyir yang bskal pa grangs med par mi bde ba myong zhing gang zag de yongs su smin par mdzad nas phyir mi ldog pa'i lam la gzhag go/ /maud gal gyi bu de ji snyam du sems/ de'i tshe de'i dus na de bzhin gshegs pa snyan pa brjod pa zhes bya bar gyur pa de gzhan zhig yin snyam na de ltar mi lta'o//de ci'i phyir zhe na/ de bzhin gshegs pa don thams cad gzigs pa de/ de'i tshe snyan pa brjod par gyur to/ /maud gal gyi bu de ji snyam du sems/ de'i tshe dge slong dmigs pa kun la mtshungs par lta ba zhes bya bar gyur pa de gzhan zhig yin pa snyam na yang de ltar mi lta'o//de ci'i phyir zhe na/ de bzhin gshegs pa 'od dpag med de'i tshe/ dge slong dmigs pa kun la mtshungs par lta ba zhes bya bar gyur to zhes gsungs so/ /yang yab dang sras mjal ba'i mdo las kyang / dge slong dag sngon byung ba 'das pa'i dus bskal pa dpag tu med pa/ bgrang du med pa/ bsam gyis mi khyab pa/ mtshungs pa med pa/ gzhal du med pa brjod du med pa/ 'das pa de'i tshe de'i dus na/ de bzhin gshegs pa dgra bcom pa yang dag par rdzogs pa'i sangs rgyas dbang po'i tog ces bya ba 'jig rten du byung ste/de bzhin gshegs pa dbang po'i tog gi sangs rgyas kyi zhing yang 'jig rten gyi khams gang gA'i klung gi bye ma snyed las/ sangs rgyas kyi zhing gcig tu gyur to/ /sangs rgyas kyi zhing de na 'khod pa'i sems can rnams kyang bde ba lnga thob par gyur te/'di ltar la la ni 'dod pa'i bde ba dang ldan par gyur to/ /la la ni khyim nas 'byung ba'i bde ba dang ldan par gyur to/ /la la ni bsam gtan gyi bde ba dang ldan par gyur to/ /la la ni snyoms par 'jug pa'i bde ba dang ldan par gyur to/ /la la ni bla na med pa yang dag par rdzogs pa'i byang chub kyi bde ba dang ldan par gyur te/de dag bde ba de la yang spyod la/ de dag de la yang mngon par zhen pa med par gyur to/ /'di lta ste dper na/ bung ba me tog gi khu bas nye bar 'tsho yang de la mngon par zhen pa med do/ /de bzhin du sems can de dag kyang bde ba de la yongs su spyod kyang de la mngon par zhen pa med do//'di lta ste dper na/ bar snang la rgyu ba'i bya ni bar snang la rgyu yang de la mngon par chags pa yang med do/ /de bzhin du sems can de dag kyang bde ba de la yongs su spyod kyang de la mngon par zhen pa med do/ / 'jam dpal gyis gsol pa/ de'i tshe de'i dus na de bzhin gshegs pa dbang po'i tog ces bgyi bar gyur pa de ni/ bcom ldan 'das nyid de'i tshe dus na/ de bzhin gshegs pa dbang po'i tog ces bgyi bar gyur par 'tshal to zhes gsungs so/ /lang kar gshegs pa'i mdo las kyang /bya ba dang ni mtshan nyid dang / /dngos por mya ngan nga mi 'da'/ /rnam rtog rnam par shes pa las/ /bzlog pas mya ngan nga 'das so/ /zhes gsungs so/ /theg pa gcig la mos pa'i sems can de dag ni shin tu rnyed par dka' ste/ theg pa gcig tu zad par ni mdo sde du ma las gsungs pa'i phyir ro/'phags pa dam pa'i chos pad+ma dkar po'i mdo las 'byung ba/ nga yang theg pa gcig las brtsams te sems can rnams la chos 'chad pa 'di lta ste/ sangs rgyas kyi theg pa thams cad mkhyen pa nyid kyi mthar thug pa ste/ theg pa gnyis sam gsum zhes bya ba dag kyang med do//phyogs bcu'i 'jig rten thams cad na yang chos nyid ni 'di'o/ /de ci'i phyir zhe na phyogs bcu'i 'jig rten gyi khams thams cad du gang 'das pa'i dus na byung ba'i de bzhin gshegs pa de dag thams cad kyang theg pa chen po gcig las brtsams nas/sems can rnams la chos bstan te/ gang 'di sangs rgyas kyi theg pa'o/ /gang ma 'ongs pa'i dus na 'byung ba'i de bzhin gshegs pa de dag kyang / sangs rgyas kyi theg pa gcig pu la brtsams nas sems can rnams la chos ston par 'gyur ro/ / gang da ltar byung ba'i dus na phyogs bcu'i 'jig rten gyi khams thams cad kyi de bzhin gshegs pa de dag thams cad kyang sangs rgyas kyi thog pa gcig pu la brtsams nas/ sems can rnams la chos ston to/ /de rnam grangs 'dis de ltar rig par bya ste/ phyogs bcu'i 'jig rten gyi khams gang na yang theg pa gnyis su btags pa yang med na/gsum du lta ci smos zhes gsungs so/ /'phags pa bden pa'i le'u las kyang / 'jam dpal theg pa gcig gis nges par 'byung ba'i phyir/ sangs rgyas kyi zhing de ni theg pa chen po'i snying po dang ldan pa yin no//nga la nyan thos dang / rang sangs rgyas kyi theg pa rnam par dgod pa med do/ /de ci'i phyir zhe na de bzhin gshegs pa la 'du shes sna tshogs med pa'i phyir te/ 'jam dpal gal te de bzhin gshegs pa la la dag ni theg pa chen po'o/ /la la dag ni rang sangs rgyas kyi theg pa/la la dag ni nyan thos kyi theg pa bshad par gyur na de ni de bzhin gshegs pa'i sems yongs su ma dag par 'gyur te/ mngon par zhen pa'i skyon du yang 'gyur/ snying rje chen po nyi tshe bar yang 'gyur/ 'du shes tha dad pa'i skyon du yang 'gyur / nga chos la slob dpon dpe mkhyud byas par yang 'gyur ro//'jam dpal ngas sems can rnams la chos gang dang gang bstan pa de dag thams cad ni 'di lta ste/ thams cad mkhyen pa'i ye shes thob par bya ba'i phyir byang chub la gzhol ba/ theg pa chen po la 'bab pa'i thams cad mkhyen pa nyid bsgrub pa / yul gcig tu yang dag par phyin par byed pa ste/de bas na nga la theg pa rnam par dgod pa med do/ /'jam dpal theg pa rnam par dgod pa zhes bya ba de ni/ de bzhin gshegs pas sa rnam par dgod par mdzad pa'o/ /de ni gang zag rnam par dgod par mdzad pa'o/ /tshogs chung ngu dang /tshogs tshad med pa rnam par dgod par mdzad pa ste/ chos kyi dbyings kyi tha dad pa med pa'i phyir 'di la theg pa tha dad pa med de/ 'di ni kun rdzob tu 'jug pa bstan pa/ 'jug pa'i sgo tsam du brjod pa'o/ /gang don dam par theg pa gcig pa ni gnyis pa ma yin zhes gsungs so//shes rab kyi pha rol tu phyin pa las kyang / lha'i bu gang dag bla na med pa yang dag par rdzogs pa'i byang chub tu sems ma bskyed pa de dag gis/ bla na med pa yang dag par rdzogs pa'i byang chub tu sems bskyed par bya'o/ /gang dag yang dag pa nyid du nges par zhugs pa de dag ni byang chub tu sems bskyed pa'i mthu med do//de ci'i phyir zhe na/ de dag 'khor ba'i rgyun gyi mtshams bcad pa'i phyir ro/ /de dag gal te bla na med pa yang dag par rdzogs pa'i byang chub tu sems bskyed na ni/ nga yang rjes su yi rang zhing / nga de dag gi dge ba'i rtsa ba la bar chad mi byed de/khyad par du 'phags pa bas kyang shin tu khyad par du 'phags pa'i chos rnams la lhag par dmigs par bya'o zhes gsungs so/ /'dus pa chen po'i le'u las kyang / theg pa gcig tu yang dag par 'du ba ni/ theg pa thams cad theg pa gcig tu mnyam pa nyid du yang dag par 'du ste/chos kyi dbyings dbyer med pa la 'jug par tshul gcig go zhes gsungs so/ /'phags pa gzungs kyi dbang phyug rgyal pos zhus pa'i mdo las kyang / sangs rgyas bcom ldan 'das rnams ni gtam sna tshogs kyi ched du 'byung ba ma yin te/chos kyi dbyings ro gcig pa sgrib pa med pa/ sems can thams cad la go skabs 'byed pa/ mngon par rdzogs par sangs rgyas nas/ sems can rnams khong du chud par bya ba'i phyir/ 'di lta ste/ phyir mi ldog pa'i 'khor lo rab tu bskor ro/ /rigs kyi bu 'di lta ste dper na/nor bu mkhan gyis nor bu'i rigs las sbyang ba ma byas pa'i nor bu rin po che blangs nas/ bul tog gi chu rnon pos bkrus te/ skra nag po'i la bas byi dor byas kyang de tsam gyis brtson 'grus rgyun mi gcod kyi/ de'i 'og tu de rngul chu rnon po dang bcas pas bkrus te/shing dang snam bus byi dor bya bas byi dor byed do/ /de tsam gyis kyang brtson 'grus rgyun mi gcod do/ /de'i 'og tu yang sman chen po'i khu bas bkrus te/ ras phra mos byi dor byas pas byi dor byed do/ /byi dor byas te nor bu mching bu'i rigs dang bral nas bai DUr+ya zhes bya'o//de bzhin du de bzhin gshegs pas yongs su ma dag pa'i sems can gyi khams rig nas mi rtag pa dang / sdug bsngal ba dang / bdag med pa dang / mi sdug pa yid 'byung bar 'gyur ba'i gtam gyis 'khor ba la mngon par dga' ba'i sems can rnams yid 'byung bar byed do //'phags pa'i chos 'dul ba la 'jug par byed do/ /de tsam gyis de bzhin gshegs pa brtson 'grus rgyun mi gcod kyi/ de'i 'og tu stong pa nyid dang / mtshan ma med pa dang / smon pa med pa'i gtam gyis de bzhin gshegs pa'i gtam gyi tshul khong du chud par byed do//de tsam gyis kyang de bzhin gshegs pa brtson 'grus rgyun mi gcod kyi/ de'i 'og tu phyir mi ldog pa'i 'khor lo'i gtam dang / 'khor gsum yongs su dag pa'i gtam gyis/ sems can de dag de bzhin gshegs pa'i yul la 'dzud do/ /sems can rgyud dang rang bzhin sna tshogs pa de dag mnyam du zhugs nas/de bzhin gshegs pa'i chos nyid khong du chud pas/ sbyin gnas bla na med pa rnams zhes bya'o zhes gsungs so/ /phyir mi ldog pa'i 'khor lo'i mdo las kyang / 'jam dpal gzhon nur gyur pas gsol pa/sangs rgyas bcom ldan 'das rnams kyis chos bstan pa ji tsam zhig mthun/ bka' stsal pa/ sangs rgyas bcom ldan 'das rnams kyis chos bstan pa ni phyir mi ldog pa'i chos kyi 'khor lor mthun no/ /gsol pa/ bcom ldan 'das ji ltar bcom ldan 'das de theg pa gsum la brtsams te/de ltar chos ston/ bka' stsal pa/ rigs kyi bu sems can de dag ni dman pa la mos pa dag ste/ de dag theg pa gcig la mi 'jug pas na/ thabs mkhas pas de dag de ltar nye bar khrid de rigs kyi bu sangs rgyas bcom ldan 'das rnams ni thabs mkhas pa chen po dang ldan pa'o//bcom ldan 'das de ni snyigs ma lnga'i dus na byung ste/ de dag ni theg pa gcig la ma mos pa dag go zhes gsungs so/ /'phags pa dpal gyi phreng ba seng ge'i sgra'i mdo las kyang / yongs su mya ngan las 'das pa zhes bya ba ni/de bzhin gshegs pa rnams kyi thabs so/ /theg pa gsum po thams cad kyang theg pa gcig po'i grangs su 'gro ste/ theg pa gcig khong du chud pas bla na med pa yang dag par rdzogs pa'i byang chub khong du chud do zhes gsungs so/ /'phags pa lang kar gshegs pa'i mdo las kyang /nyan thos dang / rang sangs rgyas rnams bag chags kyi nyes pa dang / ting nge 'dzin gyis myos pa med par gyur nas/ zag pa med pa'i dbyings nas slar sad de/ yang 'jig rten gyi dang / 'jig rten las 'das pa zag pa med pa'i dbyings su gtogs pa'i tshogs rnams yongs su rdzogs par bkang nas/chos kyi sku bsam gyis mi khyab pa la dbang med par rab tu thob par 'gyur ro zhes gsungs so/ /de lta mod kyi sems can gyi dge ba'i tshogs spyod pa tha dad pa dang / 'dul ba'i dbang dang theg pa sna tshogs kyi sgo ston pas kyang 'jig rten gyi khams tha dad pa rnams su de bzhin gshegs pa rnams kyi chos bstan pa la 'jug go//theg pa gsum du yang ma zad de/ sdong po bkod pa'i rnam par thar pa las rnam par snang byed dpal gyi 'jig rten gyi khams na de bzhin gshegs pa kun nas ye shes rin chen 'od 'phro dpal yon tan gyi tog gi rgyal po mngon par rdzogs par sangs rgyas ma thag tu sems can dpag tu med pa dag ni nyan thos kyi sa la bkod/sems can dpag tu med pa dag ni rang byang chub la bkod/ sems can dpag tu med pa dag ni shugs dang ldan pa'i spobs pas nges par 'byung ba'i byang chub la bkod/sems can dpag tu med pa dag ni pha rol gnon pa dri ma med pa'i rgyal mtshan gyi byang chub la bkod/ sems can dpag tu med pa dag ni chos la spobs pas nges par 'byung ba'i byang chub la bkod/ sems can dpag tu med pa dag ni dbang po yongs su dag pa'i spobs pas nges par 'byung ba'i byang chub la bkod/ sems can dpag tu med pa dag ni stobs mnyam pa nyid yang dag par spyod pa'i rjes su 'gro bas nges par 'byung ba'i byang chub la yongs su smin par byas/ sems can dpag tu med pa dag ni chos kyi grong khyer la mngon par phyogs pa'i yul gyi theg pa srid pa nges par 'byung ba'i byang chub la bkod/sems can dpag tu med pa dag ni thams cad du song ba'i rdzu 'phrul mi phyed pa'i tshul gyis theg pa nges par 'byung ba'i byang chub la bkod/ sems can dpag tu med pa dag ni spyod pa'i sbyor ba tshad med pa yang dag par 'du bas nges par 'byung ba'i byang chub la bkod/sems can dpag tu med pa dag ni ting nge 'dzin la gnas pa'i tshul gyis nges par 'byung ba'i byang chub la bkod/ sems can dpag tu med pa dag ni dmigs pa thams cad kyi yul yongs su dag pa'i dkyil 'khor gyi tshul gyis nges par 'byung ba'i byang chub la bkod/sems can dpag tu med pa dag ni byang chub sems dpa'i byang chub la sems bskyed / sems can dpag tu med pa dag ni byang chub sems dpa'i lam la bkod/ sems can dpag tu med pa dag ni pha rol tu phyin pa'i lam rnam par dag pa la bkod/sems can dpag tu med pa dag ni byang chub sems dpa'i sa dang po la bkod pa nas/ byang chub sems dpa'i sa bcu pa'i bar la bkod/ sems can dpag tu med pa dag ni byang chub sems dpa'i spyod pa smon lam gyi khyad par du gyur pa la btsud/ sems can dpag tu med pa dag ni byang chub sems dpa'i kun tu bzang po'i spyod pa'i smon lam rnam par dag pa la bkod do zhes gsungs so//byang chub sems dpa' dam pa'i chos rtag tu yongs su gzung bar bya'o/ /dam pa'i chos yongs su gzung ba gang zhe na/ dad pa'i stobs bskyed pa'i mdo las 'byung ba 'jam dpal de la dam pa'i chos yongs su bzung na/dam pa'i chos yongs su bzung ba yin no/ /dam pa'i chos yongs su bzung na/ sems can thams cad yongs su bzung ba yin no/ /sems can thams cad yongs su bzung na sangs rgyas kyi rigs mi 'chad par byas pa yin no/ /sangs rgyas kyi rigs mi 'chad par 'dod pa dang /sems can thams cad kyi nyon mongs pa 'joms par 'dod pa dang / ngan 'gro kun gyi sgo gcod par 'dod pa dang / 'khor los sgyur ba'i rgyal po'i bde ba dang / brgya byin dang / tshangs pa dang / 'jig rten skyong ba'i bde ba grangs med dpag tu med pa myong bar 'dod pa dang /bdud kyi zhags pa thams cad gcod par 'dod pa nas bla na med pa yang dag par rdzogs pa'i byang chub mngon par rdzogs par sangs rgyas par 'dod pa'i bar gyis/ tha na sems dang po bskyed pa'i byang chub sems dpa' la yang yongs su bzung ba ji tsam chung ngu yang bya'o zhes gsungs so//'phags pa blo gros rgya mtshos zhus pa'i mdo las kyang / blo gros rgya mtsho byang chub sems dpa' rnams kyi theg pa chen po sdud par 'gyur ba'i chos ni gcig ste/ 'di ltar byang chub kyi sems mi brjed cing bag yod pa'o/ /gzhan yang chos gcig ste/ 'di ltar bdag bde ba la mi chags pa'i snying rje chen po'o//gzhan yang chos gcig ste/ 'di ltar chos smra ba rnams la ston pa dang / bla ma ltar phangs par rim gro byed pa'o/ /gzhan yang chos gcig ste/ 'di ltar de bzhin gshegs pa bzhugs pa rnams sam/ yongs su mya ngan las 'das pa rnams la mchod pa dang /rim gro byed pas chog mi shes pa'o/ /gzhan yang chos gcig ste/ 'di ltar chos thams cad rang bzhin gyis ma skyes pa dang / ma byung bar rig nas mi skye ba'i chos la bzod pa rab tu thob pa zhes gsungs so/ /byang chub sems dpa'i sde snod las kyang /byang chub sems dpa' chos bzhi dang ldan na/ byang chub las mi nyams te/ tshe brjes nas kyang 'khor los sgyur ba'i rgyal po byed de/ ji ltar smon pa bzhin du dge ba'i rtsa ba thams cad kyang rjes su mthun par 'gyur la/ stobs che zhing mthu bo che ltar lus mi shigs par 'gyur te/'khor los sgyur ba'i rgyal po'i sras kyang rab tu thob/ tshangs pa'i gnas pa bzhi yang 'thob ste/ tshangs pa'i 'jig rten du skyes nas/ tshangs pa'i dbang yang rab tu 'thob bo/ /bzhi gang zhe na/ 'di la byang chub sems dpa' de bzhin gshegs pa'i mchod rten zhig par mthong na/slar gso bar mos te/ de la 'jim pa'i ril bu 'gas glon pa yin/ lam gyi bzhi mdo chen por skye bo mang po 'du ba'i gnas su de bzhin gshegs pa'i mchod rten brtsigs sam/ mchod rten nam/ khang pa brtsegs pa'am/rdo rings sam/ de bzhin gshegs pa'i sku gzugs sam/ de bzhin gshegs pa'i yon tan gzhan dang / gzhan rjes su dran par bya ba 'di lta ste/ chos kyi 'khor lo rab tu bskor ba'am/ mngon par 'byung ba'am/ byang chub kyi shing ngam/ bdud 'dul ba'am/ cho 'phrul chen po'am/ yongs su mya ngan las 'das pa chen po ston pa'am/ lha yul nas babs pa'am/ de bzhin gshegs pa'i nyan thos kyi dge 'dun mi 'dum pa mthong na/ sdum byed pa la brtson pa yin/ de bzhin gshegs pa'i bstan pa dam pa'i chos rab tu rnam par 'jig pa na/tshigs su bcad pa gcig srung ba la mi brjed par brtson pa yin/ chos sam chos smra ba yongs su 'dzin cing lus dang srog 'dor bar chos mi gtong ba ste/ bzhi po de dag go zhes gsungs so/ /'phags pa dkon mchog sprin gyi mdo las kyang /rigs kyi bu chos bcu dang ldan na/ byang chub sems dpa' dam pa'i chos yongs su 'dzin pa rnams yin no/ /bcu gang zhe na/ 'di lta ste/ phyi ma'i dus phyi ma'i tshe/ lnga brgya tha ma la dam pa'i chos rnam par 'jig cing bstan pa 'khrug par gyur pa dang / sems can rnams lam ngan par zhugs pa dang /ye shes kyi sgron ma mya ngan las 'das te ston pa med pa'i tshe/ mdo sde rgya chen po don che zhing mthu che ba dam pa'i chos thams cad kyi ma mo dang 'dra ba dag 'dzin cing / klog la kha ton byed cing / kun chub par byed pa dang / gzhan la yang brjod cing ston la/yang dag par ston cing gsal bar byed pa dang / de la zhugs pa'i gang zag rnams la/ dga' ba dang dad pa dang / rangs par byed cing de dag la phan 'dogs pa dang / zang zing med pa'i sems kyis dam pa'i chos nyan pa dang / chos smra ba'i gang zag rnams la ston par 'du shes bskyed pa dang /dam pa'i chos la bdud rtsir 'du shes bskyed pa dang / bcud gsos su 'du shes bskyed pa dang / rtsi'i 'du shes bskyed pa dang / lus dang srog la mi lta bar dam pa'i chos yongs su tshol ba dang / tshol nas kyang nan tan gyis sgrub po zhes gsungs so/ / rab tu zhi ba rnam par nges pa'i cho 'phrul gyi mdo las kyang / bzang skyong byang chub sems dpa' chos bzhi dang ldan na/ dam pa'i chos yongs su 'dzin te/ bzhi gang zhe na/ bdag bde ba la mi chags pa dang / gzhan la bde ba stobs pa dang / snying rje chen po rab tu thob pa dang / chos yongs su tshol bas mi ngoms pa ste/ bzhi po de dag go zhes gsungs so/ /yang mdo de nyid kyi sngon gyi tshul gyi le'u las kyang / rgyal bu dri ma med pa'i gzi brjid kyis/ bcom ldan 'das de bzhin gshegs pa ri rab chen po dge slong brgyad khri bzhi stong dang bcas pa la/lo stong gi bar du rnam pa thams cad kyi mchog dang ldan pa'i yo byad thams cad kyis bsnyen bkur byas par gyur to/ /de nas lo stong lon pa dang / bcom ldan 'das ri rab chen po de bzhin gshegs pa des rgyal po dri ma med pa'i gzi brjid la bka' stsal pa/ rgyal po chen po khyod kyis gang lo stong du sbyin pa'i chos yongs su btang ste/de bzhin gshegs pa la phul ba'i sbyin pa'i chos yongs su btang ba de dag thams cad yongs su bsdus kyang / chos yongs su tshol ba la brtson pa'i byang chub sems dpa'i dbugs lan gcig rgyu ba'i dge ba'i rtsa ba'i brgya'i char yang nye bar mi chog pa nas/rgyu'i bar du yang mi chog na/ gang lung 'bogs pa dang / kha ton la brtson pa dang / tshig bzhi pa'i tshigs su bcad pa pha rol tu phyin pa dang rab tu ldan pa gcig tsam du rab tu ston pa lta ci smos te/ de'i bsod nams kyi phung po'i mtha' nga mi 'chad do//sbyin pa'i chos yongs su gtong ba lta zhog ste/ rgyal po chen po khyod kyis gang lo stong gi bar du rgyu god pa thams cad bsdus nas/ dge slong gcig la byin par gyur la/ de bzhin du so sor dge slong thams cad la byin pa bas/ byang chub sems dpa' gang lung 'bogs pa dang /kha ton la brtson pa dang / gus pa dang bcas pa dang / chos ston 'dod pas dad pas byin pa'i zas blangs nas/ 'di snyam du bdag gis kha zas 'dis chos yongs su btsal bar bya'o snyam du sems bskyed na/ /sbyin pa'i chos yongs su gtong ba des/dge ba'i rtsa ba de'i brgya'i char yang nye bar mi chog pa nas/ rgyu'i bar du yang mi chog go zhes gsungs so/ /'phags pa de bzhin gshegs pa'i gsang ba'i mdo las kyang / byang chub sems dpa' bsod nams kyi phung po ji snyed brjod pa bas/ dam pa'i chos ni yongs 'dzin na/ de bas bsod nams ches mang ngo / /dam chos 'dzin pa'i bsod nams ni/ /sangs rgyas kyis ni nan tan du/ /bskal pa bye bar brjod mdzad kyang / /mtha' mar phyin par 'gyur ma lags/ /zhes 'byung ngo / /dam pa'i chos gang zhe na/ dpal gyi phreng ba seng ge'i sgra'i mdo las gsungs pa/dam pa'i chos zhes bya ba de ni theg pa chen po'i tshig bla dgas so/ /de ci'i phyir zhe na/ nyan thos dang / rang sangs rgyas kyi theg pa dang / 'jig rten dang 'jig rten las 'das pa'i dge ba'i chos thams cad kyang theg pa chen pos rab tu phye ba'i phyir ro zhe'o/ /chos yang dag par sdud pa'i mdo las kyang /dam pa'i chos yongs su 'dzin pa ni/ 'di lta ste/ de bzhin gshegs pas gsungs pa'i mdo sde zab mo rnams lung nod pa dang / 'dzin pa dang / kha ton byed pa dang / sems pa'o zhes gsungs so/ /byang chub sems dpa' gang dmigs pa'i spyod pa la gnas te/dus dpag tu med par de bzhin gshegs pa la mchod pa byas kyang / de dag lung bstan pa yang thob par mi 'gyur na/ byang chub lta thob par ga la 'gyur te/ tshangs pas zhus pa'i mdo las 'byung ba/ tshangs pa dras bskal pa'am/ bskal pa las lhag par de bzhin gshegs pa de dag gi mtshan nas brjod cing /gang dag ngas chos de gang la ngas tshangs par spyod pa spyad cing / pha rol tu phyin pa drug spyad kyang de bzhin gshegs pa de dag gis de la lung ma bstan no/ /de ci'i phyir zhe na / 'di ltar tshangs pa nga spyod pa la gnas par gyur pa'i phyir ro/ /nam ngas de bzhin gshegs pa mar me mdzad mthong ma thag tu mi skye ba'i chos la bzod pa rab tu thob nas/de nas gdod nga lung bstan te/ de nas nga spyod pa thams cad las yang dag par 'das so/ /de nas nga pha rol tu phyin pa drug yongs su rdzogs so zhes ji skad gsungs pa lta bu'o/ /byang chub sems dpa' chos zab mo la mos pa dang mi ldan pa rnams/bdag dang gzhan gyi don bya ba yongs su rdzogs par mi 'gyur te/ zla ba snying po'i le'u las 'byung ba/ don dam pa'i bden pa ni bla na med pa yang dag par rdzogs pa'i byang chub ste/ nyan thos dang / rang sangs rgyas thams cad dang thun mong ma yin no//de bas na kun rdzob kyi bden pa gang gis kyang / bla na med pa yang dag par rdzogs pa'i byang chub tu dge ba'i rtsa ba'i tshogs kyi mchog sgrub mi nus so/ /zla ba'i snying po 'di lta ste dper na/ me stag gang gis kyang rgya mtsho chen po zab mo skems mi nus so/ /zla ba'i snying po de bzhin du kun rdzob kyi bden pa gang gis kyang rang gi nyon mongs pa'i rgya mtsho skems par yang mi nus na/sems can gzhan rnams kyi lta smos kyang ci dgos zhes gsungs so/ /chos zab mo ni gang / chos zab mo la mos pa ni ji lta bu yin zhe na / byang chub sems dpa'i sde snod las 'byung ba/'phags pa'i yang dag pa'i lta ba 'byung ba ni/ rgyu gnyis dang rkyen gnyis te/ gnyis gang zhe na/ gzhan gyi sgra dang / bdag nyid kyi tshul bzhin yid la byed pa'o/ /de 'di snyam du sems te/ gzhan gyi sgra de gang / bdag nyid tshul bzhin yid la byed pa gang zhe na/de de ltar tshul bzhin yid la byed pa na/ 'di snyam du sems par 'gyur te/ rnal 'byor spyod pa gang dag byang chub sems dpa'i sde snod kyi rnam grangs 'di ma thos/ 'phags pa'i chos 'dul ba ma thos par ting nge 'dzin tsam gyis kyang dga' ba rnyed nas/ nga rgyal gyi dbang gis che ba'i nga rgyal du lhung ba de dag ni/skye ba dang / rga ba dang / na ba dang / 'chi ba dang / mya ngan dang smre sngags 'don pa dang / sdug bsngal ba dang / yid mi bde ba dang / 'khrug pa las yongs su mi thar sdug bsngal gyi phung po las yongs su mi thar te/ de bzhin gshegs pas de la dgongs nas 'di skad gsungs so/ /pha rol las rjes su mthun par thos pa ni/ rga ba dang 'chi ba las rnam par grol ba'o/ /de 'di ltar slob ste/ byang chub sems dpa'i tshul bzhin sbyor ba ni gang / ji ltar na byang chub sems dpa'i tshul bzhin sbyor ba yin snyam nas/de 'di ltar slob ste/ byang chub sems dpa' sems dpa' chen po ni chos gang la yang sbyor bar mi byed/ rab tu sbyor bar mi byed do/ /tshul bzhin du sbyor ba zhes bya ba 'di ni mi sbyor ba'i tshig bla dgas so/ /gzhan yang byang chub sems dpa' tshul bzhin du sbyor ba ni sgra 'byin par mi byed/zlos pa 'byin par mi byed/ gang nas sgra 'byung ba de yang mi dmigs te/ sgra de nyid gang nas byung / gang du 'gag ces sngon gyi mtha' dang / phyi ma'i mtha' la rtog par byed do/ /gang smra ba dang / gang smra bar 'gyur ba dang / gang gis smras pa dang / gang gis smra bar 'gyur ba dang /gang spong ba'i phyir smras pa dang / gang spong ba'i phyir smra ba dang / gang spong ba'i phyir smra bar 'gyur ba dang / gang khong du chud par bya ba'i phyir smras pa dang / gang khong du chud par bya ba'i phyir smra ba dang / gang khong du chud par bya ba'i phyir smra bar 'gyur ba de thams cad yongs su btsal na/'das pa'i rnam pa dang / ma 'ongs pa'i rnam pa dang / da ltar byung ba'i rnam par mi dmigs pa de ni/ de'i tshul bzhin sbyor ba'o zhes de ltar slob bo/ /byang chub sems dpa' de ltar tshul bzhin du sbyor bas/ ji ltar na tshul bzhin du mthong zhe na/ de 'di ltar slob ste/ gang gi tshe na byang chub sems dpa' chos thams cad rang bzhin gyis 'gags par mthong ba de'i tshe tshul bzhin mthong ngo / /gang gi tshe chos thams cad rang bzhin gyis nye bar zhi bar mthong ba de'i tshe tshul bzhin mthong ngo / /gang gi tshe chos thams cad rnam par zhi bar mthong ba de'i tshe/tshul bzhin mthong ngo / /gang gi tshe chos thams cad rang bzhin gyis snyoms par zhugs par mthong ba de'i tshe/ tshul bzhin mthong ngo / /gang gi tshe chos thams cad ma skyes par mthong ba de'i tshe/ tshul bzhin mthong ngo / /gang gi tshe chos thams cad ma byung bar mthong ba de'i tshe tshul bzhin mthong ngo //gang gi tshe chos thams cad shin tu yang dag par ma byung bar mthong ba de'i tshe/ tshul bzhin mthong ngo / /gang gi tshe chos thams cad mya ngan las 'das par mthong ba de'i tshe/ tshul bzhin mthong ngo / /de gang gis mthong ba de la yang rtog ste/ ci nas kyang mi mthong ba dang /mi rtog pa de ltar mthong ste/ de ltar mthong na tshul bzhin mthong ba zhes bya'o/ /yang 'di ltar slob ste/ byang chub sems dpa' tshul bzhin du sbyor ba ni/ chos gang la yang the tshom dang rmongs pa med pa'o/ /tshul bzhin du sbyor ba ni chos gang la yang sgrib pa med do//tshul bzhin du sbyor ba ni chos gang la yang thar pa'i sgor mi 'gyur ba med do/ /tshul bzhin du sbyor ba ni chos gang la yang spong bar bya ba'i phyir 'chad pa med do/ /tshul bzhin du sbyor ba ni/ chos gang yang rtogs par bya ba'i phyir 'bad pa med de/ gang chos thams cad yang dag par mthong ba dang /ji lta ba bzhin du mthong ba de ni/ yang dag par lta ba'o/ /chos thams cad ji lta ba bzhin du mthong ba gang zhe na/ 'di lta ste/ ma mthong ba'o/ /ma mthong ba zhes bya ba de ni ma skyes pa'i tshig bla dgas so/ /ma skyes pa zhes bya ba 'di ni yang dag par ma byung ba'i tshig bla dgas so//yang dag par ma byung ba zhes bya ba gang zhe na/ de ni mi snang ba'i tshig bla dgas so/ /de bzhin gshegs pas de la dgongs nas/ 'dus byas thams cad mi skye bar mthong na/ yang dag pa nyid du nges pa la 'jug ste/ 'di lta ste yang dag pa nyid du nges pa la 'jug pa de ni/ yang dag par lta'o zhes de skad gsungs so/ /de 'di snyam du sems te/ ci'i phyir na yang dag pa nyid du nges pa la 'jug pa zhes bya zhes de 'di ltar slob ste/ chos thams cad gang dang mnyam pa sangs rgyas kyi chos de dang mnyam ste/ de bas na yang dag pa nyid du nges pa la 'jug pa'o zhes gsungs so//yab dang sras mjal ba'i mdo las kyang / rgyal po chen po 'jig rten gnas pa 'di nam mkhar gyur pa la/ tshangs pa'i gzhal med khang rin po che sna bdun gyi rgyu las grub pa gnas pa'i dus de yod de/ rgyal po chen po de'i sra ba de 'byung ba'i tshe/ gang nas kyang mi 'ong ngo / /gzhan 'phrul dbang byed kyi lha rnams kyi gzhal med khang rin po che sna bdun gyi rgyu las grub pa byung yang / rgyal po chen po de'i sra ba de 'byung ba'i tshe/ gang nas kyang mi 'ong / khor yug dang / khor yug chen po'i ri rdo rje'i rgyu las grub pa/ sra zhing brtan pa lhun stug pa rnams gnas par gyur kyang de dag gi sra ba de 'byung ba'i tshe/gang nas kyang mi 'ong ngo / /ri'i rgyal po ri rab dag dang / gnya' shing 'dzin dag dang / mu khyud 'dzin dag dang / gshol mda' 'dzin dag dang / rdo rje 'dzin dag dang / seng ldeng can dag dang / rnam par 'dud dag dang / ri rta rna dag dang / blta na sdug pa dag dang / blta na sdug chen po dag dang / ther sgre dag dang / spos kyi ngad ldang dag dang / gangs ri dag dang / de ma yin pa'i ri nag po dag na gnas pa dang / thams cad dang ldan pa'i stong gsum gyi stong chen po'i 'jig rten gyi khams gnas pa dang / rngams su dpag tshad brgyad khri bzhi stong yod la / rgyar dpag tshad drug khri yod pa'i sa chen po gnas par gyur kyang / rgyal po chen po sra ba de 'byung ba'i tshe gang nas kyang mi 'ong ngo / /rgyal po chen po 'jig rten 'di 'jig par 'gyur ba'i tshe/ sa chen po 'di mes tshig pa'am/ chus bshig pa 'am/rlung gis gtor bar 'gyur ba'i dus yod do/ /de mes tshig na ni du ba yang mi mngon/ thal ba'i lhag ma yang mi mngon par 'gyur ro/ / 'di lta ste dper na/ nam mkha' la mar ram 'bru mar gyi mes bsregs na/ du ba yang mi mngon zhing / thal ba'i lhag ma yang mi mngon par 'gyur ro//de bzhin du stong gsum gyi stong chen po'i 'jig rten gyi khams 'di mes tshig pa'i tshe/ du ba yang mi mngon zhing thal ba'i lhag ma yang mi mngon par 'gyur ro/ /chus bshig pa'i tshe yang lhag ma ci yang mi mngon par 'gyur te/ 'di lta ste dper na/ lan tshwa chu'i nang du zhu ba ni/ lhag ma cung zad kyang mi mngon par 'gyur ro//de bzhin du stong gsum gyi stong chen po'i 'jig rten khams 'di yang chus bshig pa'i tshe/ lhag ma cung zad kyang mi mngon par 'gyur ro/ /rlung gis gtor ba'i tshe yang lhag ma cung zad kyang mi mngon par 'gyur te/ 'di lta ste dper na/ rnam par 'thor ba'i rlung gis bdas pa'i bye'u ni lhag ma cung zad kyang mi mngon par 'gyur ro//de bzhin du stong gsum gyi stong chen po'i 'jig rten gyi khams 'di yang rlung gis gtor ba'i tshe/ lhag ma cung zad kyang mi mngon par 'gyur te/ rgyal po chen po de ltar sa'i khams de 'byung ba yang stong / sa'i khams 'jig pa dang 'byung ba yang ngo bo nyid kyis stong ngo //de bzhin du nang gi sa'i khams dang / phyi nang gi khams lhag ma rnams dang / chos thams cad skye ba na yang gang nas kyang mi 'ong la/ 'gag pa na yang gang du 'ang mi 'gro ste/ de dag gi skye ba yang stong la/ skyes pa yang rang bzhin gyis stong ngo zhes gsungs so//ma skyes dgra'i le'u las kyang / de nas rgyal po ma skyes dgra rang gi khyim na byang chub sems dpa' de dag dang / nyan thos chen po de dag lhung bzed dang / lag pa bkrus par rig nas/ chos nyan pa'i phyir 'jam dpal gzhon nur gyur pa'i mdun du 'dug ste/'jam dpal bdag gi 'gyod pa de bsal du gsol/ 'jam dpal gyis smras pa/ rgyal po chen po khyod kyi 'gyod pa ni/ sangs rgyas bcom ldan 'das gang gA'i klung gi bye ma snyed kyis kyang bsal bar mi spyod do/ /de nas rgyal po ma skyes dgra skyabs ma rnyed pas/ shing bcad pa ltar sa chen po la 'gyel to/ /de nas gnas brtan 'od srungs chen pos rgyal po ma skyes dgra la 'di skad ces smras so/ /rgyal po chen po 'jam dpal gzhon nur gyur pa ni ldem po ngag tu ston pa la mkhas kyis/ ma 'jigs ma skrag par don 'di ci las dgongs te gsungs zhes dris shig /de nas rgyal po ma skyes dgra slar langs te/ 'jam dpal gzhon nur gyur pa la 'di skad ces smras so/ /'jam dpal ci la dgongs te de skad gsung / 'jam dpal gyis smras pa/ rgyal po chen po 'di ji snyam du sems sangs rgyas bcom ldan 'das rnams sems kyi dmigs pas rab tu phye ba yin nam/smras pa/ 'jam dpal de lta ma lags so/ /'jam dpal gyis smras pa/ 'o na de sems bskyed pas rab tu phye ba yin nam/ smras pa de ma lags so/ /smras pa 'on te sems 'gags pas rab tu phye ba yin nam/ smras pa de ma lags so/ /smras pa 'on te 'dus byas kyis rab tu phye ba yin nam/ smras pa de ma lags so/ /smras pa sangs rgyas bcom ldan 'das rnams 'dus byas rnam par rig pas rab tu phye ba yin nam/ smras pa de ma lags so/ /'jam dpal gyis smras pa/ rgyal po chen po 'di ji snyam du sems/chos gang chos gang gis kyang rab tu phye bar mi 'gyur ba des chos gang yang bsal bar nus sam/ smras pa mi nus so/ /'jam dpal gyis smras pa/ rgyal po chen po 'di la bsams nas khyod kyi 'gyod pa de/ sangs rgyas bcom ldan 'das gang gA'i klung gi bye ma snyed kyis kyang bka' stsal par mi spyod do zhes de skad smras so//gzhan yang rgyal po chen po gang la la zhig nam mkha' bar snang 'di rdul lam du ba'am/ mun pas kun nas nyon mongs par byed 'dod na/ rgyal po chen po 'di ji snyam du sems/ nam mkha' bar snang kun nas nyon mongs par byed nus sam/smras pa / 'jam dpal de ni mi nus so/ /'jam dpal gyis smras pa/ rgyal po chen po gang 'di skad ces ngas nam mkha' bar snang 'di rnam par sbyang ngo zhes zer na/ nam mkha' bar snang sbyang bar nus sam/ smras pa 'jam dpal mi nus so/ /'jam dpal gyis smras pa/rgyal po chen po de bzhin du de bzhin gshegs pa rnams kyis chos thams cad kun nas nyon mongs pa med cing / nam mkha' dang 'dra bar thugs su chud de/ de dag gis gang bsal bar bya ba'i chos kun nas nyon mongs pa'am/ rnam par byang ba gang yang mi dmigs so/ /rgyal po chen po ngas don gyi dbang 'di mthong nas khyod kyi 'gyod pa sangs rgyas bcom ldan 'das gang gA'i klung gi bye ma snyed kyis kyang bsal bar mi spyod do zhes de skad ces smras so//gzhan yang rgyal po chen po sangs rgyas bcom ldan 'das de dag gis gang kun nas ldang ba'i sems nang nas kyang mi dmigs/ gang kun nas ldang ba'i chos rnams phyi rol nas kyang mi dmigs so/ /de ci'i phyir zhe na/ rgyal po chen po chos thams cad rang bzhin gyis kun nas ldang ba med pa'i phyir ro/ /rang bzhin gang yin pa de ni kun nas ldang ba med pa ste/ gang kun nas ldang ba ni gnas med cing go skabs med pa'o//de ci'i phyir zhe na/ rgyal po chen po chos thams cad ni ngo bo nyid kyis dben pa'o/ /rgyal po chen po chos thams cad yongs su grub pa med pas ngo bo nyid med pa'o/ /rgyal po chen po chos thams cad 'dre ba med pas yongs su grub pa med pa'o/ /rgyal po chen po chos thams cad 'byung ba med pas 'dre ba med pa'o//rgyal po chen po chos thams cad dngos po dang bral bas 'byung ba med pa'o/ /rgyal po chen po chos thams cad bya ba'i mthu med pas dngos po med pa'o/ /rgyal po chen po chos thams cad bems po yin pas bya ba'i mthu med pa'o/ /rgyal po chen po chos thams cad rnam par rig pa'i mtshan nyid ma yin pas bems po'o//rgyal po chen po chos thams cad rang bzhin gyis mi 'pho bas rnam par rig pa ma yin pa'o/ /rgyal po chen po chos thams cad 'gro ba las log pas 'pho ba med pa'o/ /rgyal po chen po chos thams cad mi 'gyur ba'i chos can yin pas 'gro ba med pa'o//rgyal po chen po chos thams cad skye ba med pas mi 'gyur ba'i chos can no/ /rgyal po chen po chos thams cad 'phel ba med pas skye ba med pa'o/ /rgyal po chen po chos thams cad rang bzhin gyis 'od gsal bas 'brel pa med pa'o/ /rgyal po chen po chos thams cad dag pas rang bzhin gyis 'od gsal ba'o//rgyal po chen po chos thams cad bla gab med pa dang 'dra bas dag pa'o/ /rgyal po chen po chos thams cad gnyen po med pas bla gab med pa dang 'dra ba'o/ /rgyal po chen po chos thams cad gnyis dang bral bas gnyen po med pa'o/ /rgyal po chen po chos thams cad mtha' rnam par spangs pas gnyis dang bral ba'o//rgyal po chen po chos thams cad mtha' med pas mtha' rnam par spangs pa'o/ /rgyal po chen po chos thams cad mu med pas mtha' yas pa'o/ /rgyal po chen po chos thams cad mthar thug pa med pas mu med pa'o/ / rgyal po chen po chos thams cad dmigs pa med pas mthar thug pa med pa'o/ /rgyal po chen po chos thams cad phyin ci log med par so sor nye bar gnas pas nye bar gnas pa'i phyir dmigs pa med pa'o/ /rgyal po chen po chos thams cad rtag pa dang / sdug pa dang / bde ba dang / bdag mi dmigs pas phyin ci log med pa'o/ /rgyal po chen po chos thams cad 'bral ba med pa'i tshul gyis rtag pa'o/ /rgyal po chen po chos thams cad rang bzhin gyis 'od gsal ba'i phyir sdug pa'o/ /rgyal po chen po chos thams cad ni rnam rtog med pa'i phyir bde ba'o/ /rgyal po chen po chos thams cad bdag med par yongs su ston pa'i tshul gyis bdag gi ngo bo nyid med pa'o //rgyal po chen po chos thams cad nang nye bar zhi bas 'gyod pa med pa'o/ /rgyal po chen po chos thams cad don dam pa'i bden par rnam par gzhag pa med pas brdzun pa'o/ /rgyal po chen po chos thams cad rab tu dang ba'i mtshan nyid pas zhi ba'o//rgyal po chen po chos thams cad bdag gir 'dzin pa dang bral bas nga yi ba med pa'o/ /rgyal po chen po chos thams cad rnam par grol ba'i mtshan nyid pas ro myang ba med pa'o/ /rgyal po chen po chos thams cad ming du btags pa med pas ming med pa'o//rgyal po chen po chos thams cad tha dad pa ma yin pas dbyer med pa'o/ /rgyal po chen po chos thams cad rnam par grol bar yang dag par 'du bas ro gcig pa'o/ /rgyal po chen po chos thams cad mtshan ma med pa'i mtha' ste dben pa'i mtshan nyid do/ /rgyal po chen po chos thams cad 'jug pa med pas/dmigs pa rnam par dag pa'i phyir mtshan ma med pa'o/ /rgyal po chen po chos thams cad lta bar gyur pa thams cad dang bral bas dag pa'o/ /rgyal po chen po chos thams cad dus gsum las shin tu 'das pas smon pa med pa'o/ /rgyal po chen po chos thams cad 'das pa dang /ma 'ongs pa dang / da ltar byung ba med pas/ dus gsum du yongs su chad pa'o/ /rgyal po chen po chos thams cad shin tu ma skyes pas mya ngan las 'das par yang dag par 'du ba'o / /rgyal po chen po 'di ji snyam du sems/ chos gang ma skyes ma byung ba de kun nas nyon mongs par bya nus sam/smras pa 'jam dpal de ni mi nus so/ /'jam dpal gyis smras pa/ de bsal bar nus sam/ smras pa 'jam dpal de ni mi nus so/ /'jam dpal gyis smras pa/ rgyal po chen po de ltar de bzhin gshegs pa rnams kyis chos thams cad mya ngan las 'das pa dang mtshungs par mkhyen to//de bas na de dag gis the tshom bsal bar mi spyod do/ /de lta bas na rgyal po chen po khyod tshul bzhin la brtson par bya'o/ /khyod phyin ci log med pa'i sems kyis yang dag par so sor brtag par bya'o/ / ji ltar so sor brtags na chos gang yang mi len mi 'dor la/chos gang dang yang lhan cig mi gnas pa de ltar khyod kyis so sor brtag par bya'o/ /gang chos thams cad dang mi gnas pa de ni shin tu sbyangs pa zhes bya'o/ /gang shin tu sbyangs pa de rab tu zhi ba'o/ /gang rab tu zhi ba de rang bzhin no/ / rang bzhin gang yin pa de rang bzhin med pa'o//rgyal po chen po chos thams cad ni bdag med pas ma byas pa yin gyis de la khyod kyis bzod pa gyis shig /khyod kyis chos gang yang mi bya'o/ /de ci'i phyir zhe na/ rgyal po chen po mya ngan las 'das pa ni bya ba med pas te/ de la bya ba dang 'gyur bar bya ba'i chos gang yang med do//gang yang bya ba med cing 'gyur ba med pa de mya ngan las 'das pa zhes bya'o/ /de nas rgyal po ma skyes dgras brgya stong ri ba'i ras bcos bu zung gtsag blangs te/ stan las langs nas/ 'jam dpal gzhon nur gyur pa la phul ba dang / des ma blangs so/ /de nas ma skyes dgras ras bcos bu zung de 'jam dpal gzhon nur gyur pa'i lus la bor ro//ras bcos bu zung de 'jam dpal gzhon nur gyur pa'i lus la bor ma thag tu de nas de'i mod kho na la 'jam dpal gyis rang gi lus mi snang bar byas so/ /de nas rgyal pos 'jam dpal ni ma mthong gi / steng gi bar snang las rgyal po chen po 'jam dpal gzhon nur gyur pa'i lus ji ltar ma mthong ba de bzhin du 'gyod pa de la ltos shig /'gyod pa de ji lta ba bzhin du chos thams cad la ltos shig/ /chos thams cad ji ltar mthong ba de bzhin du gos la ltos shig /gang gis mthong ba de la yang de bzhin du ltos shig /rgyal po chen po su'i lus mthong ba de la ras bcos bu zung de phul shig ces sgra zhig thos pa dang / byang chub sems dpa' dang / nyan thos dang / slas dang / bud med kyi 'khor ji snyed pa de dag thams cad kyi lus la ras bcos bu zung de dbul bar byas pa dang /de dag kyang ma mthong nas ting nge 'dzin 'di lta bu de la mngon sum du gyur te/ rang gi lus la 'du shes 'byung ba ma gtogs par gzugs ci yang mig gis mthong ba la snang bar ma gyur to/ /yang su'i lus mthong ba de la ras bcos bu zung de byin cig ces de skad kyi sgra zhig kyang thos nas/de ras bcos bu zung de bgo'o snyam pa dang / rang gi lus kyang ma mthong nas/ gzugs kyi 'du shes thams cad dang bral lo/ /yang rgyal po chen po ji ltar gzugs rags pa'am/ phra ba ci yang ma mthong ba de bzhin du 'gyod pa de ltar ltos shig /'gyod pa ji ltar mthong ba de bzhin du chos thams cad la blta bar bya ste/gang gis mthong ba de yang de bzhin du lta'o/ /ji ltar gang mthong ba dang / gang gis mthong ba de yang mi mthong rnam par mi mthong ba de ltar ltos shig /rgyal po chen po gang chos thams cad mi mthong ba de ni yang dag pa'i mthong ba ste/ rgyal po chen po yang dag pa'i mthong ba ni mthong ba med pa'o zhes de skad kyi sgra zhig kyang thos so//de nas rgyal po ma skyes dgra rlom sems dang / rnam par rtog pa thams cad dang bral nas/ ting nge 'dzin de nyid las langs pa dang / 'khor de thams cad kyang mthong ngo zhes gsungs so/ /sgyu ma mkhan bzang po'i mdo las kyang /bzang po bzhi po 'di dag ni byang chub sems dpa' rnams kyi don sems pa'o/ /bzhi gang zhe na/ chos rnams rten nas 'byung ste/ rgyu med pa ma yin pa dang / gang zag med pa'i phyir chos gang yang skye ba med pa dang / chos gang rten cing 'brel bar 'byung ba de ma skyes pa dang /gang ma skyes pa de dngos po med pa dang / gang dngos po med pa de byang chub yin pas rnam par mi 'jig pa'o zhes gsungs so/ /rnam grangs gzhan gyi sgo nas kyang chos nyid zab mo 'di bstan te/ sangs rgyas phal po che'i mdo las de bzhin gshegs pas bka' stsal pa/ 'jam dpal dbugs 'byin pa lnga po 'di dag rnyed na/byang chub sems dpa' rnams kyis sa dang po yongs su sbyong bar 'gyur ro/ /lnga gang zhe na 'di lta ste/ bdag ni dmigs pa med pa'i rnam par thar pa'i ye shes la gnas pa ste/ gzhan dag kyang dmigs pa med pa'i rnam par thar pa la dgod do snyam nas/dbugs 'byin pa rab tu rnyed do / /de la dmigs pa med pa'i rnam par thar pa'i ye shes ni gang gnyis pa dang / mi gnyis pa rnam par dag pa'o/ /bdag ni chos rnams brten te mi 'byung bar mos pa la gnas pa ste/ gzhan dag kyang chos rnams brten te mi 'byung bar mos pa la dgod par bya'o snyam nas dbugs 'byin pa rab tu rnyed de//de la rkyen rnams skye ba med pa'i rang bzhin pas/ chos rnams brten te mi 'byung zhes bya'o/ /bdag ni chos thams cad kyi gnas med par mos pa la gnas pa ste/ gzhan dag kyang chos thams cad kyi gnas med par mos pa la dgod do snyam nas dbugs 'byin pa rab tu rnyed de/de la phyogs cha tha dad pa'i rang bzhin med pas chos thams cad kyi gnas med pa zhes bya'o/ /bdag ni sangs rgyas nam mkha' dang 'dra bar mos pa la gnas pa ste/ gzhan yang sangs rgyas nam mkha' dang 'dra bar mos pa la dgod do snyam nas dbugs 'byin pa rab tu rnyed de//de la tha dad pa la mi gnas pas sangs rgyas nam mkha' dang 'dra zhes bya'o/ /bdag ni sangs rgyas sems dang yid dang rnam par shes pa dang bral bar mos pa la gnas pa ste/ gzhan dag kyang sangs rgyas sems dang yid dang / rnam par shes pa dang bral bar mos pa la dgod do snyam nas dbugs 'byin pa rab tu rnyed de/de la ye shes lhun gyis grub pa rab tu rnyed pas/ sangs rgyas sems dang yid dang / rnam par shes pa dang bral ba'o zhes bya ste/ lnga po de dag go zhes gsungs so/ /tshangs pa khyad par sems kyis zhus pa'i mdo las/ dra ba can gyi 'od kyis smras pa/ tshangs pa chos thams cad ni tshul bzhin no/ /chos thams cad ni tshul bzhin ma yin pa'o/ /smras pa/ tshangs pa chos thams cad ni tshul bzhin/ chos thams cad ni tshul bzhin ma yin pa zhes bya ba de ji lta bu/ smras pa/ bsam du med pas ni chos thams cad tshul bzhin no//gang bsam du med pa'i chos rnams la sems pa dang ldan pa de dag ni tshul bzhin ma yin pa'o/ /chos thams cad dben pa'i mtshan nyid 'di ni tshul bzhin no/ /gang dben pa la mngon par mi brtson pa de dag ni/ lhag par byed pa la brtson pa'o/ /gang lhag par byed pa la brtson pa de dag ji srid du lhag par byed pa de srid du tshul bzhin ma yin no//smras pa/ tshangs pa chos rnams kyi rgyu gang yin/ smras pa/ rigs kyi bu rang gi yul dben pa 'dod chags dang bral ba'i mtha' ni chos rnams kyi rgyu yin no zhes 'byung ngo / /bdun brgya pa las kyang / 'jam dpal khyod gang gi tshe shes rab kyi pha rol tu phyin pa la bsgom pa na/ gang la gnas nas shes rab kyi pha rol tu phyin pa la bsgom / 'jam dpal gyis gsol pa/ btsun pa bcom ldan 'das bdag gang gi tshe/ shes rab kyi pha rol tu phyin pa la bsgom pa na/ gnas pa ma mchis par shes rab kyi pha rol tu phyin pa la bsgom mo//bcom ldan 'das kyis bka' stsal pa/ 'jam dpal mi gnas par shes rab kyi pha rol tu phyin pa la bsgom pa gang / 'jam dpal gyis gsol pa/ btsun pa bcom ldan 'das gang ci la yang mi gnas pa de shes rab kyi rol tu phyin pa la bsgom pa lags so//bcom ldan 'das kyis bka' stsal pa/ 'jam dpal khyod gang gi tshe/ shes rab kyi pha rol tu phyin pa bsgom pa de'i tshe/ khyod kyi dge ba'i rtsa ba gang 'phel bar 'gyur/ gang 'bri bar 'gyur/ 'jam dpal gyis gsol pa/ btsun pa bcom ldan 'das de'i tshe bdag gi dge ba'i rtsa ba 'phel bar 'gyur ba'am/'bri bar 'gyur ba gang yang ma mchis so/ /btsun pa bcom ldan 'das gang gi chos gang la 'phel ba'am 'bri bar 'gyur ba de ni/ shes rab kyi pha rol tu phyin pa la bsgom pa ma lags so zhes gsungs so/ /'jam dpal rnam par 'phrul pa'i le'u las/lha'i bus smras pa/ 'jam dpal khyod ji ltar 'dis shes par rung bar 'gyur ba de lta bur ston tam/ 'jam dpal gyis smras pa/ lha'i bu sangs rgyas kyi ye shes ni sus kyang kun shes pa'am/ rnam par shes par mi nus so/ /de ci'i phyir zhe na/ lha'i bu sangs rgyas kyi ye shes ni chags pa med pa/rnam par rtog pa med pa/ brjod du med pa/ bsnyad du med pa/ sbyor ba med pa/ tshig med pa/ sems dang yid dang rnam par shes pa dang bral ba ste/ de sus kyang kun shes par ram/ rnam par shes par mi nus so/ /lha'i bus smras pa/ 'jam dpal gal te sangs rgyas kyi ye shes kun shes par bya ba ma yin na/nyan thos 'di dag gis kun shes par ga la 'gyur/ byang chub sems dpa' rnams kyang phyir mi ldog pa la gnas par ga la 'gyur/ 'jam dpal gyis smras pa/ lha'i bu gang yi ge rnams kyis ye shes de bstan pa 'di ni/de bzhin gshegs pa rnams kyi thabs te/ ye shes de ni yi ge med pa'o/ /lha'i bu 'di lta ste dper na/ me gtsubs pa las me mi 'byung gi /gtsub shing gtsubs pa las mi 'byung ba de bzhin du/ lha'i bu de bzhin gshegs pas gal te thog ma kho nar sangs rgyas kyi ye shes rgya cher yang dag par rab tu bstan na/sems can gang gis kyang de bzhin gshegs pa'i ye shes de kun shes par mi 'gyur bas / de bzhin gshegs pas gtsub shing gi gtam gyis ye shes de bstan te/ ye shes de ni yi ge med pa'o/ /lha'i bus smras pa/ 'jam dpal gtsub shing gi gtam de gang /'jam dpal gyis smras pa/ lha'i bu gang ci yang rung / sdom pa dang / yo byad bsnyungs pa'i gtam dang / pha rol tu phyin pa la sbyor ba'i gtam dang / byang chub kyi phyogs kyi chos la 'jug pa'i gtam 'di ni gtsub shing gi gtam zhes bya'o/ /lha'i bus smras pa/'jam dpal gtsub shing gi gtam ma yin pa'i gtam gang / 'jam dpal gyis smras pa/ lha'i bu gtam gang skye ba dang / 'jig pa dang / gnas pa'i gtam ma yin pa dang / 'dren pa dang / sel ba'i gtam ma yin pa dang / gtam gang kun nas nyon mongs pa yongs su brjod pa'i gtam ma yin pa dang /rnam par byang ba'i phan yon gyi gtam ma yin pa dang / gtam gang 'khor ba la yid 'byung bar bya ba'i gtam ma yin pa dang / mya ngan las 'das pa la mngon par dga' bar bya ba ma yin pa'i gtam dang / gtam gang yongs su shes par bya ba'i phyir ma yin/ spang bar bya ba'i phyir ma yin/bsgom par bya ba'i phyir ma yin/ mngon sum du bya ba'i phyir ma yin pa dang / gtam gang thob par bya ba'i phyir ma yin/ mngon par rtogs par bya ba'i phyir ma yin pa 'di ni lha'i bu dag snying po yod pa'i gtam mo zhes gsungs so/ /chos thams cad dmigs su med cing sems pa med pa/rin po che bsags pa bstan pa'i mdo las kyang / de bzhin gshegs pas 'jam dpal la bka' stsal pa/ 'jam dpal bsam gyis mi khyab pa'i dbyings/ bsam gyis mi khyab pa'i dbyings zhes bya ba la bsam gyis mi khyab pa'i dbyings zhes bya ba de gang yin/'jam dpal gyis gsol pa/ bcom ldan 'das bsam gyis mi khyab pa'i dbyings zhes bgyi ba ni/ dbyings gang sems ma mchis pa sems grol bar bgyi ba ma lags pa/ sems kyis dpag par bgyi ba ma lags pa/ bsam pas rab tu dbye bar bgyi ba ma lags pa lags mod kyi/'on kyang bcom ldan 'das sems nyid bsam gyis mi khyab pa'i dbyings lags so/ /de ci'i slad du zhe na/ sems la sems ma mchis pa ma lags kyi/ sems nyid sems ma lags pas/ sems ni ngo bo nyid kyis ma mchis pa'o/ / sems ji lta ba bzhin pas/ sems ma mchis pa nyid sems ma lags te/ bcom ldan 'das 'di ni bsam gyis mi khyab pa'i dbyings lags so zhes 'byung ngo / /yang mdo de nyid las/ de bzhin gshegs pas bka' stsal pa/ 'jam dpal khyod kyis 'di ltar bdag gis sems can gdul lo snyam pa'i go cha ma bgos sam/'jam dpal gyis gsol pa/ bcom ldan 'das sems can gyi khams ni bri ba'am/ gang bar mi gda' na/ de ji ltar sems can rnams 'dul bar 'gyur/ yongs su mya ngan las bzla bar 'gyur/ bcom ldan 'das gang dag sems can gyi khams 'dul ba'i slad du/yang dag par zhugs pa de dag ni/ nam mkha' 'dul bar yang dag par zhugs pa lags so/ /gang dag sems can 'dul bar sbyor ba/ de dag ni byang chub gdul bar 'tshal ba'o/ /bcom ldan 'das chos thams cad ni byang chub lags te/ bcom ldan 'das byang chub ni kun nas nyon mongs pa'am/rnam par byang ba ma lags so/ /de'i slad du/ bcom ldan 'das kyis 'jam dpal khyod sems can 'dul ba'i phyir yang dag par ma zhugs sam/ zhes de skad bka' stsal te/ bcom ldan 'das bdag ni sems can 'dul pa'i slad du'am/sems can kun nas nyon mongs par bgyi ba'i slad du yang dag par ma zhugs so/ /de ci'i slad du zhe na/ bcom ldan 'das sems can zhig mchis na ni/ sems can kun nas nyon mongs pa dang / sems can rnam par byang bas rab tu phye bar yang 'gyur na/ bcom ldan 'das sems can ma mchis pas sems can kun nas nyon mongs pa dang /rnam par byang bas rab tu phye ba ma lags so/ /bcom ldan 'das de ltar na rten cing 'brel par 'byung ba dang mi 'gal ba lags so/ /bcom ldan 'das ma mchis na ni kun nas nyon mongs pa ma lags/ rnam par byang ba ma lags te/bcom ldan 'das chos thams cad rten cing 'brel bar 'byung bas ngo bo nyid ma mchis pa'o/ bcom ldan 'das gang kun nas nyon mongs pa'am/ rnam par byang ba de ni rten nas 'byung ba'i don te/ ma mchis pa'i don to/ /bcom ldan 'das ma mchis pa'i don ni rten te 'byung ba'i don du mkhas pa rnams kyis rtogs te/mkhas pa rnams ni ma mchis brten de 'byung ba'i don to snyam du de ltar rnam par mi rtog go/ /gang la rnam par mi rtog pa'i don de la kun nas nyon mongs pa'am/ rnam par byang ba ma mchis so/ /bcom ldan 'das 'di lta ste/ dper na sgyu ma bgyid pa'am/sgyu ma bgyid pa'i slob mas khang pa brtsegs pa'am/ khang pa brtsegs pa rgyud mo 'bar rab tu 'bar kun tu 'bar te/ me lce mched par gyur pa mngon par sprul pa de la mi la la zhig 'di ltar bdag gi khang pa brtsegs pa'am/ khang pa brtsegs pa rgyud mo 'bar rab tu 'bar kun tu rab tu 'bar te/me lce mched par gyur pa dgum par bgyi'o snyam nas/ go cha 'tshal na/ bcom ldan 'das mi de 'di ltar bgegs dang / nyon mongs pa'i skal pa can du mi 'gyur lags sam/ bcom ldan 'das kyis bka' stsal pa/ 'jam dpal de de bzhin no/ /'jam dpal gyis gsol pa/bcom ldan 'das de de lta lags te/ gang sems can gdul ba'i slad du/ go cha 'tshal ba de ni bgegs dang / nyon mongs pa'i skal ba can du 'gyur ba lags so zhes 'byung ngo / /yang mdo de nyid las/ bcom ldan 'das kyis bka' stsal pa/'jam dpal yang dag par so sor rtog pa zhes bya ba de / chos gang gi tshig bla dgas yin/ 'jam dpal gyis gsol pa/ bcom ldan 'das yang dag par so sor rtog pa zhes bgyi ba ni/ so sor rtog pa dang / chos gang la yang tha dad par yang mi bgyid/ gcig tu yang mi bgyid de/bcom ldan 'das 'gyur ba ma mchis pas rnam par mi rtog pa'o/ /bcom ldan 'das yang dag par so sor rtog pa zhes bgyi ba 'di ni/ yang dag par so sor rtog pa ma mchis pa'i tshig bla dgas so/ /bcom ldan 'das yang dag par so sor rtog pa la brten te/ bdag ni so so'i skye bo'am/'phags pa nyan thos snyam du de ltar mi sems so/ /de ci'i slad du zhe na/ 'di ltar chos gang so so'i skye bo'am/ 'phags par 'gyur ba'i chos de yang dag par rjes su mi mthong ba'i slad du'o/ /bcom ldan 'das yang dag par so sor rtog pa la brten nas/ rigs kyi bu'am/ rigs kyi bu mo chos kyi dbyings kyi tshul gyis de ltar gnas pa lags te/chos gang la yang mnyam pa nyid du yang mi bgyid/ mi mnyam par yang mi bgyid/ so so'i skye bo'i chos ni mi mnyam pa'o zhes rnam par rtog par mi bgyid/ 'phags pa'i chos ni mnyam pa'o zhes rnam par rtog par mi bgyid do/ / de ci'i slad du zhe na/ 'di ltar dmigs pa gang mnyam pa'am/ mi mnyam par bgyid pa de mi dmigs pa'i slad du'o/ /gang gis mnyam pa'am/ mi mnyam par bgyid pa de yang dge slong de la ma mchis so/ /de ltar rnam par mi rtog pa'i dge slong ni/ bdag rnam par mi rtog go snyam du de ltar 'dzin pa yang ma mchis so zhes 'byung ngo //'phags pa dri ma med par grags pas bstan pa las kyang / nad kyi gzhi de gang zhe na/ 'di lta ste/ lhag par dmigs pa ni gzhi'o/ /lhag par dmigs pa'i gzhi la/ ji tsam du dmigs pa de tsam du nad kyi gzhi'o/ /ci la lhag par dmigs she na/khams gsum la lhag par dmigs so/ /lhag par dmigs pa'i gzhi yongs su shes pa gang zhe na/ dmigs pa med cing mi dmigs pa'o/ /gang mi dmigs pa de ni lhag par mi dmigs pa'o/ /ci mi dmigs she na/ 'di lta ste/ bdag tu lta ba dang / pha rol tu lta ba dang / lta ba gnyis su mi dmigs te/de bas na mi dmigs pa zhes bya'o zhes gsungs so/ /yang de nyid las byang chub sems dpa' mthong dgas smras pa/ gzugs nyid stong pa ste/ gzugs bshig pas stong pa ma yin gyi/ gzugs kyi rang bzhin stong pa ste/ de bzhin du tshor ba dang / 'du shes dang / 'du byed dang / rnam par shes pa stong pa nyid ces bya ba de ni gnyis te/ rnam par shes pa nyid ni stong pa nyid de/ rnam par shes pa bshig pas stong pa nyid kyi rnam par shes pa'i rang bzhin stong pa nyid do/ /'di la gang gis len pa'i phung po lnga la de bzhin du shes shing / de lta bur ye shes kyis rig pa de ni gnyis su med par 'jug pa'o zhes gsungs so//shes rab kyi pha rol tu phyin pa las/ 'phags pa shA ri'i bus dris pa/ btsun pa rab 'byor byang chub sems dpa' shes rab kyi pha rol tu phyin pa la spyod pa ji ltar thabs la mkhas par rig par bya/ rab 'byor gyis smras pa/ tshe dang ldan pa sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la spyod pa ni/gzugs la mi spyod/ tshor ba la ma yin/ 'du shes la ma yin/ 'du byed rnams la ma yin/ rnam par shes pa la ma yin/ gzugs kyi mtshan ma la ma yin pa nas/ rnam par shes pa'i bar gyi mtshan ma la ma yin/gzugs rtag par ma yin/ mi rtag par ma yin/ bde bar ma yin/ sdug bsngal bar ma yin/ bdag tu ma yin/ bdag med par ma yin/ zhi bar ma yin/ ma zhi bar ma yin/ stong par ma yin/ mi stong par ma yin/ mtshan mar ma yin/ mtshan ma med par ma yin/smon par ma yin/ smon pa med par ma yin/ dben par ma yin/ mi dben par yang mi spyod do/ /rnam par shes pa'i bar la rtag par ma yin/ mi rtag par ma yin pa nas/ dben par ma yin zhing / mi dben par yang mi spyod pa'i bar du'o/ /de bzhin du khams dang / skye mched dang /rten cing 'brel par 'byung ba dang / byang chub kyi phyogs dang / mngon par shes pa dang / pha rol tu phyin pa dang / stobs dang / mi 'jigs pa dang / so so yang dag par rig pa dang / sangs rgyas kyi chos ma 'dres pa rnams la yang mi spyod pa nas/ dben pa'am/mi dben pa zhes bya ba'i bar du yang mi spyod do/ /de ci'i phyir zhe na/ 'di ltar tshe dang ldan pa shar dwa ti'i bu gang gzugs kyi stong pa nyid de/ gzugs ma yin la/ stong pa nyid las gzugs gzhan ma yin te/ gzugs nyid stong pa nyid la/ stong pa nyid gzugs yin pa nas/ rnam par shes pa nyid stong pa nyid la/stong pa nyid rnam par shes pa'i bar du'o/ /de bzhin du sangs rgyas kyi chos ma 'dres pa rnams kyi bar gyi stong pa nyid gang yin pa de dag sangs rgyas rnams ma yin/ stong pa nyid las sangs rgyas kyi chos rnams gzhan pa yang ma yin te/ sangs rgyas kyi chos rnams nyid stong pa nyid la/stong pa nyid sangs rgyas kyi chos rnams so/ /de ltar byang chub sems dpa' shes rab kyi pha rol tu phyin pa la spyod pa ni/ thabs la mkhas par rig par bya ste/ shes rab kyi pha rol tu phyin pa la spyod do zhes kyang khas mi len/ mi spyod do zhes kyang khas mi len/ spyod kyang spyod la mi spyod kyang mi spyod do zhes kyang khas mi len/spyod pa yang ma yin mi spyod pa yang ma yin no zhes kyang khas mi len to/ /de ci'i phyir zhe na/ 'di ltar shes rab kyi pha rol tu phyin pa dngos po med pa'i ngo bo nyid kyi phyir ro/ /zhes 'byung ngo / /yang shes rab kyi pha rol tu phyin pa de nyid las/ bcom ldan 'das kyis bka' stsal pa/kau shi ka 'di la rigs kyi bu'am/ rigs kyi bu mo/ shes rab kyi pha rol tu phyin pa ltar bcos pa ston pa yod de/ de la shes rab kyi pha rol tu phyin pa ltar bcos pa ni 'di yin te/ de dag gzugs mi rtag par ston to/ /de bzhin du sdug bsngal ba dang / bdag med pa dang / mi sdug par ston to//de bzhin du tshor ba dang / 'du shes dang / 'du byed rnams dang / rnam par shes pa dang / de bzhin du khams dang / skye mched dang / bsam gtan dang / tshad med pa dang / gzugs med pa dang / dran pa nye bar gzhag pa dang / yang dag par spong ba dang / rdzu 'phrul gyi rkang pa dang /dbang po dang / stobs dang / byang chub kyi yan lag dang / lam dang / stobs dang / mi 'jigs pa dang / so so yang dag par rig pa dang / sangs rgyas kyi chos ma 'dres pa dang / rnam pa thams cad mkhyen pa nyid mi rtag pa dang / sdug bsngal ba dang / bdag med par ston to //gang de ltar spyod pa de shes rab kyi pha rol tu phyin pa la spyod pa'o zhes de skad ston pa de ni/ kau shi ka shes rab kyi pha rol tu phyin pa ltar bcos pa'o/ /de la shes rab kyi pha rol tu phyin pa ltar bcos pa ma yin pa gang zhe na/ de dag 'di ltar ston te/ rigs kyi bu khyod tshur shog /shes rab kyi pha rol tu phyin pa bsgoms la /gzugs nas rnam pa thams cad mkhyen pa nyid kyi bar la mi rtag pa nyid dang / sdug bsngal ba dang / bdag med pa dang / mi sdug par yang dag par rjes su mi lta'o/ /de ci'i phyir zhe na/ gzugs ni gzugs kyi ngo bo nyid kyis stong ste/ gzugs kyi ngo bo nyid gang yin pa de dngos po med pa'o//gang dngos po med pa de/ shes rab kyi pha rol tu phyin pa'o/ /gang shes rab kyi pha rol tu phyin pa de la ni/ gzugs rtag pa zhe'am/ mi rtag pa zhes bya ba mi dmigs te/ de la gzugs nyid kyang mi dmigs na rtag pa'am mi rtag pa lta ga la yod de/ rnam pa thams cad mkhyen pa nyid kyi bar du de bzhin no/ /gang de ltar ston pa ni shes rab kyi pha rol tu phyin pa ltar bcos pa ma yin pa ston pa'o/ /yang 'di skad ston te/ rigs kyi bu tshur shog/ /shes rab kyi pha rol tu phyin pa bsgoms la/ chos gang las kyang shin tu ma 'da'/ chos gang la yang ma gnas shig /de ci'i phyir zhe na/ 'di ltar shes rab kyi pha rol tu phyin pa'i chos gang las shin tu 'da' bar bya ba'am/ gang la gnas par bya ba'i chos de med pa'i phyir ro/ /'di ltar chos thams cad ni ngo bo nyid kyis stong pa ste/ gang ngo bo nyid kyis stong pa de dngos po med pa'o/ /gang dngos po med pa de shes rab kyi pha rol tu phyin pa'o//gang shes rab kyi pha rol tu phyin pa de la ni blang bar bya ba'am/ dor bar bya ba'am/ bskyed par bya ba'am/ dgag par bya ba'i chos gang yang med do zhes de ltar nye bar ston pa ni/ shes rab kyi pha rol tu phyin pa ltar bcos pa ma yin par ston pa'o/ /rab 'byor gyis gsol pa/bcom ldan 'das ji tsam gyis na/ shes rab kyi pha rol tu phyin pa la dmigs pa lags/ ji tsam gyis na mi dmigs pa lags/ bcom ldan 'das kyis bka' stsal pa/ ji tsam du na gnyis po de tsam du dmigs pa'o/ /mi gnyis pa ni mi dmigs pa'o//rab 'byor gyis gsol pa/ bcom ldan 'das gnyis zhes bgyi ba gang lags/ bcom ldan 'das kyis bka' stsal pa/ ming dang gzugs nas yid dang chos kyi bar dang / byang chub dang / sangs rgyas kyi bar ji tsam pa de tsam du gnyis so/ /rab 'byor gyis gsol pa/bcom ldan 'das ci dmigs par bgyi ba mi dmigs sam/ 'on te mi dmigs par bgyi ba de mi dmigs lags sam / bcom ldan 'das kyis bka' stsal pa/ rab 'byor dmigs par bya ba mi dmigs pa yang ma yin la/ mi dmigs par bya ba mi dmigs pa yang ma yin te/rab 'byor dmigs pa dang mi dmigs pa mnyam pa nyid ni mi dmigs pa'o zhes 'byung ngo / /yang der 'phags pa rab 'byor gyis gsol pa/ bcom ldan 'das kyis don dam pa la brten nas/ bla na med pa yang dag par rdzogs pa'i byang chub mngon par rdzogs par sangs rgyas pa ma lags sam/bcom ldan 'das kyis bka' stsal pa/ ma yin no/ /rab 'byor gyis gsol pa/ de las bzlog pa gnas pas sam/ bcom ldan 'das kyis bka' stsal pa/ de ni ma yin no/ /rab 'byor gyis gsol pa/ gal te don dam pa la gnas pas kyang ma lags/ bzlog pa la gnas pas kyang mngon par rdzogs par sangs rgyas pa ma lags na/'o na de bzhin gshegs pas byang chub mngon par rdzogs par sangs ma rgyas pa'am/ gcig tu ma gyur lags sam/ bcom ldan 'das kyis bka' stsal pa/ rab 'byor mngon par rdzogs par sangs rgyas te/ de yang 'dus byas kyi khams sam 'dus ma byas kyi khams gang la yang mi gnas pa'o zhes gsungs so/ /yang de nyid las bcom ldan 'das kyis bka' stsal pa/ rab 'byor dngos po med pas dngos po med pa mngon par rdzogs par sangs rgyas par mi nus so/ /rab 'byor gyis gsol pa/ bcom ldan 'das ci dngos pos dngos po ma mchis pa mngon par rdzogs par sangs rgyas par nus lags sam/ bcom ldan 'das kyis bka' stsal pa/ rab 'byor de ni mi nus so/ /rab 'byer gyis gsol pa/ dngos po ma mchis pas dngos po ma mchis pa/ mngon par rdzogs par sangs rgyas par nus lags sam/bcom ldan 'das kyis bka' stsal pa/ rab 'byor de ni mi nus so/ /rab 'byor gyis gsol pa/ 'o na dngos pos dngos po mngon par rdzogs par sangs rgyas par nus lags sam/ bka' stsal pa/ rab 'byor de ni mi nus so/ /gsol pa bcom ldan 'das 'o na thob pa ma mchis pa dang /mngon par rtogs pa ma mchis par mi 'gyur lags sam / bka' stsal pa/ mngon par rtogs pa yod de/ mngon par sgrub pa bzhi po 'dis ni ma yin no/ /gsol pa bcom ldan 'das 'o na mngon par rtogs pa ci 'dra ba zhig lags / bka' stsal pa/ gang la spros pa 'di dag med pa ste/ mngon par rtogs pa ni ma spros shing / spros pa med pa'o/ /gsol pa/ bcom ldan 'das spros pa gang lags/ bka' stsal pa gzugs rtag ces bya ba'am/ mi rtag ces bya ba ni spros pa'o/ /gzugs bde zhes bya ba'am/ gzugs sdug bsngal zhes bya ba dang /bdag ces bya ba dang bdag med ces bya ba dang / zhi zhes bya ba dang / ma zhi zhes bya ba ni spros pa ste/ de bzhin du chos thams cad kyi bar du gsungs so/ /yang de nyid las 'byung ba/ rab 'byor 'di lta ste/ dper na bya 'dab chags bar snang la rgyu ba sa la mi ltung ste/ nam mkha' bar snang la gnas kyang der mi 'dug cing gnas 'cha' bar mi byed do/ /rab 'byor de bzhin du byang chub sems dpa' sems dpa' chen po stong pa nyid dang mtshan ma med pa dang / smon pa med pa la gnas kyang mngon sum du byed pa gang gis nyan thos dang rang sangs rgyas kyi sar ltung bar 'gyur bas/stong pa nyid dang mtshan ma med pa dang smon pa med pa mngon sum du mi byed do zhes gsungs so// //bam po lnga pa ste tha ma/ sum brgya pa las kyang de bzhin gshegs pas gsungs te/ rab 'byor 'di ji snyam du sems/ de bzhin gshegs pas/ bla na med pa yang dag par rdzogs pa'i byang chub gang yang mngon par rdzogs par sangs rgyas sam /de bzhin gshegs pas chos gang yang bstan tam/ rab 'byor gyis gsol ba/ ji ltar bcom ldan 'das kyis gsungs pa'i don bdag gis 'tshal ba ltar na/ de bzhin gshegs pas gang bla na med pa yang dag par rdzogs pa'i byang chub tu mngon par rdzogs par sangs rgyas pa'i chos de gang yang ma mchis so//de bzhin gshegs pas gang bstan pa'i chos de gang yang ma mchis so/ /de ci'i slad du zhe na/ gang de bzhin gshegs pas chos bstan pa de ni gzung du ma mchis brjod du ma mchis te de ni chos ma lags chos ma mchis pa yang ma lags so//de ci'i slad du zhe na/ 'phags pa'i gang zag rnams ni/ 'dus ma byas kyis rab tu phye ba'o zhes gsungs so/ /de bzhin gshegs pas 'dul ba'i dbang gis theg pa chen po'i sgo sna tshogs nye bar ston pas/ chos nyid zab mo 'di ston te/ ji ltar lang kar gshegs pa las/ blo gros chen pos zhus pa / bcom ldan 'das kyis mdo gzhan brjod pa las/ de bzhin gshegs pa'i snying po gsungs pa de/ bcom ldan 'das kyis rang bzhin gyis 'od gsal bar rnam par dag pas thog ma nas rnam par dag pa nyid mtshan sum cu rtsa gnyis dang ldan pa sems can thams cad lus kyi nang na mchis par brjod do//bcom ldan 'das rin po che rin thang chen po gos dri ma can gyis yongs su dkris pa ltar phung po dang / khams dang / skye mched kyi gos kyis yongs su dkris pa 'dod chags dang zhe sdang dang gti mug gis zil gyis non pa yongs su rtog pa'i dri mas dri ma can du gyur pa/rtag pa brtan pa ther zug par ni brjod na/ bcom ldan 'das de bzhin gshegs pa'i snying po smra ba 'di mu stegs byed kyi bdag tu smra ba dang / ji ltar mi 'dra ba lags/ bcom ldan 'das mu stegs byed rnams kyang rtag pa byed pa yon tan med pa khyab pa mi 'jigs pa'o zhes bdag tu smra ba ston par bgyid do//bcom ldan 'das kyis bka' stsal pa/ blo gros chen po nga'i de bzhin gshegs pa'i snying po bstan pa ni mu stegs byed kyi bdag tu smra ba dang mtshungs pa ma yin te/ blo gros chen po de bzhin gshegs pa dgra bcom pa yang dag par rdzogs pa'i sangs rgyas rnams ni stong pa nyid dang yang dag pa'i mtha' dang mya ngan las 'das pa dang /ma skyes pa dang / mtshan ma med pa dang / smon pa med pa la sogs pa'i tshig gi don rnams la de bzhin gshegs pa'i snying por bstan par byas nas/ byis pa rnams bdag med pas 'jig par 'gyur ba'i gnas rnam par spang ba'i don du de bzhin gshegs pa'i snying po'i sgo bstan pas rnam par mi rtog pa'i gnas snang ba med pa'i spyod yul ston te/'di la blo gros chen po ma 'ongs pa dang da ltar byung ba'i byang chub sems dpa' sems dpa' chen po rnams kyis bdag tu mngon par zhen par mi bya'o//blo gros chen po dper na/ rdza mkhan ni 'jim pa'i rdul gyi phung po gcig las lag pa dang bzo dang lag zungs dang / chu dang srad bu dang nan tan dang ldan pa las/ snod rnam pa sna tshogs byed do/ /blo gros chen po de bzhin du de bzhin gshegs pa rnams kyang chos la bdag med pa rnam par rtog pa'i mtshan nyid thams cad rnam par log pa'i de bzhin nyid shes rab dang /thabs la mkhas pa dang ldan pa sna tshogs kyis de bzhin gshegs pa'i snying por bstan pa'am/ bdag med par bstan pas kyang rung ste rdza mkhan bzhin du tshig dang yi ge'i rnam grangs rnam pa sna tshogs kyis ston te des na de'i phyir blo gros chen po de bzhin gshegs pa'i snying po bstan pa mu stegs byed kyi bdag tu smra ba bstan pa dang mi 'dra'o//blo gros chen po de ltar de bzhin gshegs pa rnams mu stegs byed bdag tu smra ba la mngon par zhen pa rnams drang ba'i phyir de bzhin gshegs pa'i snying po bstan pas de bzhin gshegs pa'i snying po ston te/yang dag pa ma yin pa'i bdag tu rnam par rtog pa'i lta bar ltung ba'i bsam pa can dag rnam par thar pa gsum gyi spyod yul la gnas pa'i bsam pa dang ldan pas myur du bla na med pa yang dag par rdzogs pa'i byang chub mngon par rdzogs par 'tshang rgya bar ji ltar 'gyur zhes te/ blo gros chen po de'i don du de bzhin gshegs pa dgra bcom pa yang dag par rdzogs pa'i sangs rgyas rnams de bzhin gshegs pa'i snying po ston par mdzad do//de lta bas na 'di ni mu stegs byed bdag tu smra ba dang mtshungs pa ma yin no/ /blo gros chen po de bas na mu stegs byed kyi lta ba rnam par bzlog pa'i phyir/ de bzhin gshegs pa'i snying po bdag med pa'i rjes su 'jug par bya'o//'di lta ste/ chos stong pa nyid dang skye ba med pa dang / gnyis ma yin pa dang rang bzhin med par bstan pa 'di ni byang chub sems dpa' rnams kyi grub pa'i mtha' bla na med pa'o/ /chos zab mo bstan pa 'di yongs su bzung bas theg pa chen po'i mdo sde thams cad yongs su bzung ba yin te/'di ltar chos zab mo bstan pa 'di ni mdo sde thams cad kyi nang du 'dus so zhes gsungs so/ /yang bcom ldan 'das kyis lang kar gshegs pa de nyid las bka' stsal pa/ blo gros chen po stong pa nyid dang skye ba med pa dang gnyis ma yin pa dang rang bzhin med pa'i mtshan nyid ni sangs rgyas thams cad kyi mdo sde'i nang du 'dus so zhes gsungs so//zla ba sgron ma'i mdo'i tshigs su bcad pa las kyang / 'jig rten khams ni stong dag tu/ /ngas ni mdo sde gang bshad pa/ /tshig 'bru tha dad don gcig ste/ /thams cad brjod par nus ma yin//tshig gcig rnam par bsgoms na ni/ /de dag thams cad bsgom par 'gyur/ /sangs rgyas ji snyed thams cad kyis/ /chos rnams mang po rab bshad pa/ /chos rnams thams cad stong pa nyid/ /mi gang don la mkhas pa dag /tshig 'di bslabs par gyur pa la/ / sangs rgyas chos rnams dkon ma yin/ /zhes gsungs so/ /chos zab mo la mos pas/ bsod nams thams cad bsdus pa yin te/ sangs rgyas su ma grub kyi bar du 'jig rten pa dang / 'jig rten las 'das pa'i phun sum tshogs pa thams cad 'grub par 'gyur te/ khye'u rin po ches byin pa'i mdo las 'byung ba/'jam dpal byang chub sems dpa' thabs la mkhas pa dang bral bas bskal pa brgya stong du pha rol tu phyin pa drug la spyad pa bas gang gis chos kyi rnam grangs 'di the tshom dang bcas pas nyan pa'i bsod nams de bas ches bsod nams mang du bskyed na/ gang the tshom med par nyan pa lta ci smos/yang yi ge bris nas lung 'bogs pa dang / 'chang ba dang gzhan dag la yang rgya cher rab tu ston pa lta ci smos zhes gsungs so/ /rdo rje gcod pa las kyang / bcom ldan 'das kyis bka' stsal pa/ rab 'byor 'di ji snyam du sems/ gang gA'i klung gi bye ma ji snyed pa gang gA'i klung yang de snyed du gyur na/gang de dag gi bye mar gyur pa de mang ba yin nam/ rab 'byor gyis gsol pa/ bcom ldan 'das gang gA'i klung du gyur pa de dag nyid kyang mang ba lags na de dag gi bye ma lta smos kyang ci dgos/ bcom ldan 'das kyis bka' stsal pa/ rab 'byor khyod la bsgo'o//khyod kyis khong du chud par bya'o/ /gang gA'i klung de dag gi bye ma ji snyed pa de snyed kyi 'jig rten gyi khams skyes pa'am/ bud med la las rin po che sna bdun gyis rab tu bkang ste/ de bzhin gshegs pa la sbyin pa byin na skyes pa'am bud med de gzhi de las bsod nams mang du bskyed dam/ rab 'byor gyis gsol pa/ bcom ldan 'das mang lags so/ /bde bar gshegs pa mang lags so/ /bcom ldan 'das kyis bka' stsal pa/ gang zhig chos kyi rnam grangs 'di las tha na tshig bzhi pa'i tshigs su bcad pa tsam bzung ste/ gzhan dag la yang bstan na/ de bas bsod nams ches mang du bskyed do zhes gsungs so//tshangs pas zhus pa las kyang / de bzhin gshegs pas gsungs te/ grogs po dag rigs kyi bu'am rigs kyi bu mo bsod nams 'dod pas de bzhin du rnyed pa dang gzugs dang longs spyod dang g.yog 'khor dang chos kyi dbang phyug dang lha dang mi'i phun sum tshogs pa'i bar thams cad 'dod pas chos kyi rnam grangs 'di mnyan par bya mos par bya gzung bar bya'o zhes gsungs so//shes rab kyi pha rol tu phyin pa las shA ri'i bus gsol ba/ bcom ldan 'das gang shes rab kyi pha rol tu phyin pa bstan pa 'di thos nas mos pa'i sems can de dag byang chub tu nges par 'gyur ba lags so//byams pas gsol pa/ bcom ldan 'das gang shes rab kyi pha rol tu phyin pa bstan pa 'di thos nas mos pa'i byang chub sems dpa' de dag ni byang chub la nye bar gyur pa lags so/ / 'jam dpal gyis gsol pa/ bcom ldan 'das gang shes rab kyi pha rol tu phyin pa bstan pa 'di thos nas mos pa'i byang chub sems dpa' de dag ni/sangs rgyas nyid du lta bar bgyid do zhes 'byung ngo / /chos zab mo la mos pa 'di ltung ba dang 'gyod pa thams cad sel ba dang / las kyi sgrib pa thams cad rnam par sbyong bar 'gyur te/ de bzhin gshegs pa'i mdzod kyi mdo las 'byung ba/'od srungs 'di lta ste/ pha yang yin la rang sangs rgyas kyang yin pa de'i srog bcad na de ni srog bcad pa'i nang na chen po'o / /'di lta ste/ dkon mchog gsum gyi dkor rku ba 'di ni ma byin par len pa'i nang na chen po'o / / 'di lta ste/ ma yang yin la dgra bcom ma yang yin pa de la log par spyad pa de ni 'dod pa la log par g.yem pa rnams kyi nang na chen po'o / /'di lta ste/ de bzhin gshegs pa la skur ba 'debs pa 'di ni brdzun du smra ba'i nang na chen po'o / /'di lta ste/ 'phags pa'i dge 'dun la mi snyan pa brjod pa 'di ni phra ma'i nang na chen po'o//'di lta ste/ 'phags pa rnams la co 'dri ba 'di ni tshig rtsub po'i nang na chen po'o / /'di lta ste/ chos 'dod pa rnams la rnam par g.yeng bar byed pa 'di ni tshig kyal ba rnams kyi nang na chen po'o/ /'di lta ste/ mtshams med pa byed par shom pa 'di ni gnod sems kyi nang na chen po'o//'di lta ste/ yang dag par song ba dang yang dag par zhugs pa rnams kyi rnyed pa 'phrog pa'i sems 'di ni brnab sems kyi nang na chen po'o/ /'di lta ste/ lta bas gzings pa 'di ni log pa'i lta ba'i nang na chen po'o/ /'od srungs mi dge ba bcu'i las kyi lam 'di dag thams cad ni kha na ma tho ba chen po dang bcas pa'o//'od srungs gal te sems can gcig cig mi dge ba bcu'i las kyi lam kha na ma tho ba chen po dang bcas pa 'di dag dang ldan par gyur la de yang de bzhin gshegs pas rgyu dang rkyen du ldan pa'i chos bstan pa la 'jug ste 'di la gang byed pa'am gang tshor bar byed pa'i bdag gam/sems can nam srog gam gang zag gang yang med do/ /zhes de ltar ma byas par mngon par 'dus ma byas pa med pa sgyu ma'i chos nyid kun nas nyon mongs pa med pa rang bzhin gyis 'od gsal ba'i chos thams cad la 'jug cing / chos thams cad thog ma nas dag par mngon par dad pa dang /mos pa'i sems can de ngan song du 'gro zhes nga mi smra'o/ /de ci'i phyir zhe na/ nyon mongs pa rnams kyi phung po dngos po med de nyon mongs pa thams cad skyes nas 'jig cing 'ju'o / /rgyu dang rkyen tshogs pa'i 'du 'phrod las skye ste skyes ma thag tu 'gag go//gang sems skye ba'i 'jig pa de nyid nyon mongs pa thams cad kyi 'jig pa ste/ gang de ltar mos pa de la ltung ba gang yang med cing ltung ba'i gnas med de gnas ma yin zhing skabs med do/ /gang gi sgrib pa med pa la ltung ba gnas pa de ni gnas ma yin no zhes gsungs so//bdud btul ba'i le'u las kyang / 'dul ba 'dzin pa nye ba 'khor gyis dris pa/ sdig can ji ltar na dge slong 'dul ba 'dzin pa yin/ bdud kyis smras pa/ btsun pa nye ba 'khor dge slong gis nam chos thams cad shin tu dul bar shes te/ nyes pa rnams kyi thog ma'i sngon gyi mtha' yang dben pa'i mthar shes/nyes pa byung ba rnams kyi 'gyod pa yang sel cing brtan por mi byed de/ de dag la gang gis mtshams med pa rnams kyang rnam par gnon na/ cho ga dang tshul khrims la log par zhugs pa/ phran tshegs lta smos kyang ci dgos pa de lta bu'i chos kyi tshul gyi rnam pa yang nye bar bsgrub nyon mongs pa 'dul ba la yang mkhas glo bur du nyon mongs pa rnams la yang kun nas nyon mongs par gyur pa ma yin pa dang /'byung bar 'du shes pa nyon mongs pa nang du yang ma bton phyi rol du yang ma yin gnyi ga med par yang ma yin te/ nyon mongs pa khong du chud pa nyid nyon mongs pa med par shes shing nyon mongs pa yang mi sel nyon mongs pa med pa yang mi sgrub nyon mongs pa thams cad kyang sprin dang char sprin 'dra bar shes te/ye shes dang lhag mthong gi rlung gis gtor nas phyogs dang yul du 'gro ba yang med gnas pa yang med pa dang nyon mongs pa rnams ni chu zla dang 'dra ste/yongs su rtog pa'i gzugs brnyan gyi bzhin nye bar ston pa dang / nyon mongs pa rnams ni mun pa'i spyod yul te/ shes rab kyi sgron mas mi snang bar byed pa dang / nyon mongs pa rnams ni rkun po dang mkha' 'gro ma dang gnod sbyin dang / srin po dang 'dra ste/ tshul bzhin yid la byed pas brtags na/gnas pa ma yin pa dang nyon mongs pa rnams ni glags tshol ba ste tshul bzhin ma yin pa yid la byed pas 'phel ba dang stong pa nyid dang mtshan ma med pa dang / smon pa med pa'i shes pas yid la 'jug par mi byed par sus nyon mongs pa rnams 'di 'dra bar shes te/ sems can nyon mongs pas kun nas nyon mongs par gyur pa rnams la snying rje zhing bdag med pa dang /sems can med pa mngon sum du gyur pa ni 'dul ba 'dzin pa yang dag pa zhes bya'o zhes 'byung ngo / /'phags pa ma skyes dgra'i mdo las kyang / bcom ldan 'das kyis bka' stsal pa/ kun dga' bo khyod la bsgo'o / /khyod kyis khong du chud par bya'o/ /gal te mtshams med pa byed pas dam pa'i chos kyi rnam grangs 'di thos nas 'jug cing mos na de'i las de las kyi sgrib pa yin no zhes nga mi smra'o zhes gsungs so/ /'di ni chos zab mo la mos pa'i phan yon mdor brjod pa yin te/ rgyas par ni theg pa chen po'i mdo sde de dang de dag las mnyan par bya'o/ /byang chub sems dpa' thabs la mkhas pa dang bral bar chos nyid zab mo la sbyor bar mi bya ste/ 'di ltar thabs dang shes rab zung du 'brel pa ni/ byang chub sems dpa' rnams kyi sbyor ba yang dag pa'o/ /'di skad du dri ma med par grags pas bstan pa las kyang 'byung ste/thabs med pas zin pa'i shes rab bcings pa gang zhe na/ 'di lta ste/ stong pa nyid dang mtshan ma med pa dang / smon pa med pa la yang nges par rtog cing / mtshan dang dpe byad bzang po dang sangs rgyas kyi zhing gi rgyan dang / sems can yongs su smin par bya ba la nges par mi rtog pa 'di ni thabs med pas zin pa'i shes rab ste bcings pa'o//thabs kyis zin pa'i shes rab grol ba gang zhe na/ 'di lta ste/ mtshan dang dpe byad bzang po dang sangs rgyas kyi zhing gi rgyan dang / sems can yongs su smin par bya ba la/ sems nges par rtog cing stong pa nyid dang mtshan ma med pa dang smon pa med pa yang 'dris par byed la/yongs su mi skyo ba 'di ni thabs kyis zin pa'i shes rab ste grol ba'o/ /shes rab kyis ma zin pa'i thabs bcings pa gang zhe na/ 'di lta ste/ lta ba thams cad dang nyon mongs pa kun nas ldang ba dang bag la nyal ba dang rjes su chags pa dang khong khro ba la gnas te/dge ba'i rtsa ba brtsams pa thams cad byang chub tu mi bsngo ba 'di ni shes rab kyis ma zin pa'i thabs te/ bcings pa'o/ /shes rab kyis zin pa'i thabs grol ba gang zhe na/ 'di lta ste/ lta ba thams cad dang nyon mongs pa kun nas ldang ba dang bag la nyal dang rjes su chags pa dang khong khro ba spangs pas/dge ba'i rtsa ba brtsams pa thams cad byang chub tu yongs su bsngos la des kyang mi snyems pa de ni shes rab kyis zin pa'i thabs te grol ba'o/ /zhes gsungs so thabs dang shes rab tu ldan pa 'di dag thams cad ni byang chub sems dpa'i spyod yul lo byang chub sems dpa'i spyod yul gang zhe na/de nyid las 'byung ba/ gang so so'i skye bo'i spyod yul yang ma yin/ 'phags pa'i spyod yul yang ma yin pa 'di ni byang chub sems dpa'i spyod yul lo/ /gang 'khor ba yang spyod yul la nyon mongs pa yang spyod yul ma yin pa dang / gang mya ngan las 'das par rtog pa yang spyod yul la shin tu mya ngan las 'das pa yang spyod yul ma yin pa dang /gang bden pa bzhi'i ye shes kyang spyod yul la dus ma yin par bden pa'i rtog par byed pa yang spyod yul ma yin pa dang / gang nang du so sor rtog pa yang spyod yul la bsams bzhin du srid par skye ba yongs su 'dzin pa yang spyod yul ba dang /gang mi skye bar rab tu rtog pa yang spyod yul la nges par 'gyur ba la 'jug pa yang spyod yul ma yin pa dang / gang sems can thams cad kyi 'du 'dzi yang spyod yul la nyon mongs pa'i bag la nyal yang spyod yul ma yin pa dang / gang stong pa nyid kyang spyod yul la rnam pa thams cad du yon tan yongs su tshol ba la yang spyod yul ba dang /gang mngon par 'du mi byed pa yang spyod yul la dge ba'i rtsa ba thams cad mngon par 'du byed pa rgyun mi gcod pa yang spyod yul ba dang / gang zhi gnas dang lhag mthong gi chos thams cad yongs su tshol ba yang spyod yul la shin tu zhi bar mi ltung ba yang spyod yul ba dang /gang chos kyi 'khor lo rab tu bskor ba dang / gang yongs su mya ngan las 'das pa chen po ston pa yang spyod yul la byang chub sems dpa'i spyod pa mi gtong ba yang spyod yul la 'di ni byang chub sems dpa'i spyod yul lo zhes gsungs so/ /bdud 'dul ba'i mdo las kyang /lha'i bu gzhan yang byang chub sems dpa' rnams kyi sbyor ba yang dag pa yang dag phul ni gang / shes rab kyi shes pas brtson pa yang med la thabs kyi shes pas dge ba'i chos thams cad sdud pa la yang sbyor ba dang / shes rab kyi shes pas bdag med pa dang / sems can med pa dang / srog med pa dang / gso ba po med pa dang / gang zag med par yang sbyor la thabs kyi shes pas sems can thams cad yongs su smin par byed par yang sbyor ba dang / shes rab kyi shes pas chos thams cad blang ba med pa dang dor ba med pa yang sbyor la/ thabs kyi shes pas chos thams cad yongs su 'dzin par yang sbyor ba dang /shes rab kyi shes pas sangs rgyas thams cad dang chos kyi dbyings dbyer med par yang sbyor la thabs kyi shes pas sangs rgyas thams cad la bla mar bya ba dang / gus par bya ba dang / mchod par bya ba dang / rim gro byed par yang sbyor ba dang / shes rab kyi shes pas sangs rgyas kyi zhing thams cad nam mkha'i zhing du yang sbyor la thabs kyi shes pas sangs rgyas kyi zhing gi yon tan bkod pa yongs su sbyong ba'i rgyan la yang sbyor ba dang /shes rab kyi shes pas 'phags pa thams cad 'dus ma byas kyis rab tu phye bar yang sbyor la/ thabs kyi shes pas 'phags pa thams cad la bla ma dang gus pa dang rim gro byed par yang sbyor ba dang /shes rab kyi shes pas/ sangs rgyas kyi sku zag pa med par so sor rtog par yang sbyor la/ thabs kyi shes pas mtshan dang dpe byad bzang po dang rgyan la yang sbyor ba dang / shes rab kyi shes pas 'du byed thams cad ma skyes pa dang ma byung bar yang so sor rtog par yang sbyor la/thabs kyi shes pas bsams bzhin du srid par skye ba yongs su 'dzin pa la yang sbyor ba'o zhes gsungs so/ /'phags pa blo gros mi zad pas bstan pa las kyang / de la byang chub sems dpa'i thabs ni gang / shes rab mngon par sgrub pa ni gang zhe na/gang snyoms par 'jug pa na sems can la lta bas snying rje chen po'i dmigs pa la sems 'dogs pa 'di ni de'i thabs so/ /gang zhi zhing rab tu zhi ba la snyoms par 'jug pa 'di ni de'i shes rab bo/ /gang snyoms par 'jug pa na snying rje chen po dang sangs rgyas kyi ye shes la ston pa 'di ni de'i thabs so//gang ci la yang mi gnas par bsam gtan byed pa 'di ni de'i shes rab bo/ /gang snyoms par 'jug pa na chos thams cad yongs su 'dzin pa la lta ba 'di ni de'i thabs so/ /gang chos kyi dbyings dbyer med par bsam gtan byed pa 'di ni de'i shes rab bo/ / gang snyoms par 'jug pa na sangs rgyas kyi sku'i rgyan mngon du byed pa 'di ni de'i thabs so//gang chos kyi sku gnas pas bsam gtan byed pa 'di ni de'i shes rab bo zhes gsungs so/ /'phags pa dri ma med par grags pas bstan pa las kyang / byams pa byang chub sems dpa' rnams kyi phyag rgya ni 'di gnyis te/ 'di gnyis gang zhe na tshig dang 'bru sna tshogs la dad pa'i phyag rgya dang /chos kyi tshul zab mos mi skrag cing yang dag pa ji lta ba bzhin du 'bab pa dang / 'jug pa'i phyag rgya ste/ phyag rgya de gnyis ni byang chub sems dpa' rnams kyi phyag rgya'o/ /de la byang chub sems dpa' gang sems tshig dang 'bru sna tshogs la dad cing lhur byed pa de dag ni las dang po pa'o //gang dag mdo sde zab mo ma gos pa phrugs dang snrel zhi'i rgyud kyi tshig dang rim pa rab tu dbye ba 'di 'don pa dang / nyan pa dang mos pa dang ston par 'gyur ba'i byang chub sems dpa' de dag ni yun ring po nas tshangs par spyod pa spyad par rig par bya'o/ /las dang po ba'i byang chub sems dpa' ni rgyu gnyis kyis bdag la rma 'byin te/chos zab mo la nges par sems par mi 'gyur ro/ /gnyis gang zhe na sngon ma thos pa'i mdo sde zab mo thos na skrag cing the tshom du gyur nas rjes su yi rang bar mi byed kyi steng du/ 'di lta bu bdag cag gis sngon ma thos na de dag gang nas 'ong zhes spong bar byed pa dang /rigs kyi bu gang dag mdo sde zab mo 'di 'dzin pa dang / chos zab mo'i snod du gyur pa dang chos zab mo ston pa de dag la mi bsten mi 'grogs bsnyen bkur mi byed cing de dag la bsti stang mi byed par 'gyur te/ bar bar du de dag la mi snyan pa yang brjod pa'o/ /rgyu gnyis kyis chos zab mo la mos pa'i byang chub sems dpa' bdag nyid la rma 'byin te/mi skye ba'i chos la yang bzod pa myur du thob par mi 'gyur ro/ /gnyis gang zhe na/ las dang po pa spyad nas ring por ma lon pa'i byang chub sems dpa' rnams la brnyas shing khyad du gsod de/ 'dzin du mi 'jug mi byed mi ston pa dang /gang zab mo la mos pa'i bslab pa la ri mo mi byed cing / 'jig rten gyi zang zing gi sbyin pas ni sems can la phan 'dogs shing chos kyi sbyin pas ma yin te rgyu gnyis po dag go zhes gsungs so/ /gang sangs rgyas dang byang chub sems dpa'i che ba nyid rgya chen po la 'jug pa'i sems can de dag ni shin tu rnyed par dka'o//sangs rgyas dang byang chub sems dpa'i che ba nyid rgya chen po gang zhe na/ 'phags pa dri ma med par grags pas bstan pa las 'byung ba/ btsun pa 'od srungs chen po phyogs bcu'i 'jig rten gyi khams dpag tu med pa na byang chub sems dpa' la slong ba gang gis lag pa'am/rkang pa'am/ rna ba'am/ sna'am/ khrag gam/ rgyus pa'am/ rus pa'am/ rkang ngam/ mig gam/ ro stod dam/ mgo'am/ yan lag dang nying lag gam/ rgyal po'i srid dam/ yul 'khor dang / ljongs sam/ chung ma dang / bu pho dang /bu mo dang / bran pho dang / bran mo dang / rta dang ba lang dang / shing rta dang / bzhon pa 'am/ gser dang / dngul dang / nor bu dang / mu tig dang / man shel dang / bye ru dang / bai DUr+ya dang / nor bu rin po che rnams kyang rung / bza' ba dang / btung ba dang / bro ba rnams sam/ gos rnams nyam nga bar byas te / slong ba de dag thams cad kyang phal cher bsam gyis mi khyab pa'i rnam par thar pa la gnas pa'i byang chub sems dpa' rnams te/ thabs la mkhas pas lhag pa'i bsam pa brtan pa 'di dag ston to/ /de ci'i phyir zhe na/ btsun pa 'od srungs chen po byang / chub sems dpa' rnams ni dka' thub drag pas na de lta bur ston te/ go skabs ma phye bar byang chub sems dpa' la nyam nga ba byed pa'i mthu skye bo phal po che la med do/ /go skabs ma phye bar sad pa'am/ slong bar yang mi nus so/ /btsun pa 'od srungs chen po 'di lta ste dper na/ ba lang glang po che de la brdeg pa ni bong bus bzod par mi nus te/de bzhin du btsun pa 'od srungs chen po byang chub sems dpa' ma yin pas byang chub sems dpa' la nyam nga bar byed mi nus kyis byang chub sems dpa' nyid byang chub sems dpa' la nyam nga bar byed de/ byang chub sems dpa' nyam nga bar byas pa byang chub sems dpas bzod do zhes gsungs so//de skad du 'phags pa sdong po bkod pa'i mdo las kyang byang chub sems dpa' chos kyi dbyings kyi smon lam gyi gzhi rab tu rtog pa zhes bya ba/ de bzhin gshegs pa ye shes kyi dkyil 'khor du snang ba'i dbyings kyi sangs rgyas kyi zhing / sangs rgyas kyi rigs mi zad pa ston pa nas 'ongs te/bcom ldan 'das shAkya thub pa'i spyan sngar byang chub sems dpa'i mthu rab tu bstan pa 'di lta ste/ mtshan dang dpe byad bzang po thams cad dang / spu'i rtse mo thams cad dang / lus thams cad dang / yan lag dang / nying lag thams cad dang / tshig gi lam thams cad dang / gos dang smad g.yogs thams cad nas/byang chub sems dpa'i 'khor thams cad dang / bdag dang bcom ldan 'das rnam par snang mdzad dang sngon gyi mtha'i mur thug pa'i de bzhin gshegs pa 'das pa thams cad dang / phyi ma'i mtha'i mur thug pa'i de bzhin gshegs pa lung bstan pa dang / lung ma bstan pa ma byon pa thams cad dang /da ltar byung ba'i phyogs bcu'i sangs rgyas kyi zhing rab 'byam thams cad na bzhugs pa rnams kyi sngon gyi sbyin pa'i pha rol tu phyin pa dang ldan pa'i sngon gyi sbyor ba rgya mtsho dang / len pa dang / sbyin pa'i dngos po thams cad kyi gzugs brnyan dang mtshan dang dpe byad bzang po dang /spu'i rtse mo dang / lus thams cad dang / yan lag dang nying lag dang / tshig gi lam dang / gos dang smad g.yogs thams cad la rab tu snang bar gyur par rnam par bstan pa dang / tshul khrims kyi pha rol tu phyin pa thams cad dang ldan pa'i sngon gyi sbyor ba rgya mtsho dag kyang rab tu snang bar yongs su bstan pa dang bzod pa'i pha rol tu phyin pa dang ldan pa'i yan lag dang nying lag thams cad mthun par rab tu bstan pa dang ldan pa'i sngon gyi sbyor ba rgya mtsho rab tu snang bar gyur pa yongs su bstan pa dang /byang chub sems dpa' thams cad kyi brtson 'grus dang / drag shul dang / rnam par gnon pa dang ldan pa'i sngon gyi sbyor ba rgya mtsho rab tu snang bar gyur pa yongs su bstan pa dang /de bzhin gshegs pa thams cad kyi bsam gtan gyi rgya mtsho yongs su tshol zhing rab tu sgrub pa dang ldan pa'i sngon gyi sbyor ba'i rgya mtsho rab tu snang bar gyur pa yongs su bstan pa dang / de bzhin gshegs pa thams cad kyi chos kyi 'khor lo bskor ba'i tshul yongs su sgrub cing chos yongs su tshol ba dang ldan pa dang /bdog pa thams cad yongs su gtong zhing rtsol ba chen po'i lus dang ngo bo gzugs brnyan rnam par rig par bya bas sngon gyi sbyor ba rgya mtsho rab tu snang bar gyur pa yongs su bstan pa dang / de bzhin gshegs pa thams cad mthong zhing dga' ba dang / byang chub sems dpa' thams cad kyi lam la 'gro ba thams cad mngon par mos par byed pa dang ldan pa'i sngon gyi sbyor ba rgya mtsho rab tu snang bar gyur pa yongs su bstan pa dang / byang chub sems dpa' thams cad kyi sngon gyi smon lam rgya mtsho mngon par sgrub pa'i sgo yongs su dag pa dang ldan pa'i sngon gyi sbyor ba rgya mtsho rab tu snang bar gyur pa yongs su bstan pa dang /byang chub sems dpa' thams cad kyi stobs kyi pha rol tu phyin pa rab tu grub pa dang / rnam par mnan pa dang rnam par dag par byas pa dang ldan pa'i sngon gyi sbyor ba rgya mtsho rab tu snang bar gyur pa yongs su bstan pa dang /chos kyi dbyings rgya chen po rnam par 'phrul pa thams cad kyi sprin gyis rgyas par bkang ste/ byang chub sems dpa' thams cad kyi ye shes kyi dkyil 'khor dang ldan pa'i sngon gyi sbyor ba rgya mtsho rab tu snang bar gyur pa yongs su bstan par byed cing /mi mjed kyi 'jig rten gyi khams gang na ba der lhags nas/ bcom ldan 'das ga la ba der dong ste 'khor dang bcas pas/ bcom ldan 'das la phyag 'tshal nas/ steng gi phyogs su bsten te/ rdo rje'i dbang po sna tshogs thams cad kyi rgyan gyi snying po can gyi khang pa brtsegs pa dang /seng ge'i khri rdo rje dang / an+da rnyil gyi pad mo'i snying po can dag mngon par sprul nas nor bu'i rgyal po rin po che thams cad rab tu 'bar ba'i dra bas kun nas brgyan pa dang / rin po che'i rgyal po dus gsum gyi de bzhin gshegs pa'i mtshan dang dbyangs su sgrogs pa'i phreng ba rab tu 'phyang ba dang /mgo la rin po che'i cod pan thogs pa'i byang chub sems dpa' lus su byin gyis brlabs nas skyil mo krung bcas te 'khod do/ /byang chub sems dpa' de dag thams cad kyang 'khor dang bcas par byang chub sems dpa' kun du bzang po'i spyod pa dang / smon lam gyis byung ba/de bzhin gshegs pa thams cad kyi zhabs kyi drung nas zhal du lta ba/ ye shes yongs su dag pa'i mig dang ldan pa/ de bzhin gshegs pa thams cad kyi chos kyi 'khor lo dang mdo sde'i tshul gyi gsung rgya mtsho la rna ba yongs su gzhol ba/ byang chub sems dpa' thams cad kyi dbang rab tu thob par bya ba la pha rol tu phyin pa'i mchog thob pa/de bzhin gshegs pa thams cad kyi drung du 'dong ba skad cig gcig tu yongs su bstan pa dang / rnam par 'phrul pa las byung ba/ 'jig rten gyi khams thams cad du lus gcig gis rgyas par gang ba'i yul dang ldan pa/ de bzhin gshegs pa thams cad kyi 'khor gyi dkyil 'khor du lus mngon par 'byung zhing rnam par snang ba rdul shin tu phra ba gcig la 'jig rten gyi khams gcig tu snang zhing khongs su chud par yang dag par ston pa'i yul dang ldan pa/'gro ba thams cad yongs su smin par bya ba dang gdul bya'i dus la sdod par gzhol ba/de bzhin gshegs pa thams cad kyi chos kyi 'khor lo'i sprin gyi 'brug sgra spu'i rtse mo thams cad nas rab tu sgrogs pa'i yul dang ldan pa/ 'jig rten gyi khams rab 'byam thams cad sprul pa lta bur khong du chud pa/ sems can thams cad kyi lus mnyam pa kun tu ston pa/sems kyi skad cig la phyogs bcu rgya mtsho thams cad du rnam par sprul pas rgyas par 'gengs pa'o zhes gsungs so/ /yang sdong po bkod pa'i mdo de nyid las/ byang chub sems dpa'i che ba nyid bstan te/ de nas tshong dpon gyi bu nor bzangs kyis byang chub sems dpa' kun tu bzang po'i lus mthong ba dang /byang chub sems dpa' kun tu bzang po'i yan lag re re dang / yan lag rnam par phye ba re re dang / lus kyi cha re re dang / lus kyi rnam par phye ba re re dang / yan lag gi cha re re dang / yan lag gi phyogs rnam par phye ba re re dang / lus re re dang / lus rnam par phye ba re re dang / spu'i khung bu re re dang / spu'i khung bu rnam par phye ba re re dang / stong gsum gyi stong chen po'i 'jig rten gyi khams 'di rlang gi phung po dang bcas/ chu'i phung po dang bcas/ sa'i phung po dang bcas/ me'i phung po dang bcas/ rgya mtsho dang bcas/ gling dang bcas/ chu klung dang bcas/ rin po che'i ri dang bcas/ ri rab dang bcas/ khor yug dang bcas/ grong dang / grong khyer dang / grong rdal dang / yul 'khor dang pho brang 'khor dang bcas/ nags tshal dang bcas/ khang khyim dang bcas/ skye bo'i tshogs dang bcas/ sems can dmyal ba'i 'jig rten dang bcas/dud 'gro'i skye gnas dang bcas / gshin rje'i 'jig rten dang bcas/ lha ma yin gyi 'jig rten dang bcas/ klu'i 'jig rten dang bcas/ nam mkha' lding gi 'jig rten dang bcas/ mi'i 'jig rten dang bcas lha'i 'jig rten dang bcas/tshangs pa'i 'jig rten dang bcas/ 'dod pa'i khams kyi yul dang bcas/ gzugs kyi khams kyi yul dang bcas/ gzugs med pa'i khams kyi yul dang bcas/ gzhi dang bcas/ rten dang bcas/ dbyibs dang bcas/ sprin dang bcas/ glog dang bcas/ skar ma dang bcas/ nyin zhag dang bcas/ zla ba phyed dang bcas/ zla ba gcig dang bcas/ dus dang bcas/ lo dang bcas/ bskal pa bar ma dang bcas/ bskal pa dang bcas par gzugs brnyan gyi tshul du mthong ngo / /'jig rten gyi khams 'di la ji lta ba de bzhin du shar phyogs kyi 'jig rten gyi khams thams cad kyang mthong bar gyur to//shar phyogs la ji lta ba de bzhin du/ lho phyogs dang / nub phyogs dang / byang phyogs dang / byang shar gyi phyogs mtshams dang / shar lho'i phyogs mtshams dang / lho nub kyi phyogs mtshams dang / nub byang gi phyogs mtshams dang /'og dang / steng gi phyogs dang / phyogs mtshams thams cad kyi 'jig rten gyi khams thams cad kyang sangs rgyas 'byung ba dang bcas/ byang chub sems dpa'i 'khor gyi dkyil 'khor dang bcas par gzugs brnyan gyi tshul du mthong bar gyur to/ /gang mi mjed kyi 'jig rten gyi khams 'dir sngon gyi mtha'i mur thug pa'i 'jig rten gyi khams gcig nas gcig tu brgyud pa ji snyed pa de dag thams cad kyang /byang chub sems dpa' kun tu bzang po'i skyes bu chen po'i mtshan re re las sangs rgyas 'byung ba dang bcas/ byang chub sems dpa'i 'khor gyi dkyil 'khor dang bcas/sems can dang bcas/ khang khyim dang bcas/ bskal pa dang bcas par mthong bar gyur to/ /de bzhin du phyi ma'i mtha'i mur thug pa'i sangs rgyas kyi zhing rab 'byam thams cad kyang mthong bar gyur to/ /ji ltar 'jig rten gyi khams 'dir sngon gyi mtha' dang phyi ma'i mthar thug pa'i 'jig rten gyi khams gcig nas gcig tu brgyud pa thams cad mthong bar gyur pa de bzhin du phyogs bcu'i 'jig rten gyi khams thams cad du yang sngon gyi mtha' dang phyi ma'i mtha'i mur thug pa'i 'jig rten gyi khams gcig nas gcig tu brgyud pa thams cad kyang byang chub sems dpa' kun tu bzang po'i lus kyi skyes bu chen po'i mtshan re re dang /spu'i khung bu re re nas shin tu rnam par phye ba dang / phan tshun ma 'dres par mthong bar gyur to/ /byang chub sems dpa' kun tu bzang po yang / ji ltar bcom ldan 'das de bzhin gshegs pa rnam par snang mdzad kyi spyan snga na seng ge'i khri rin po che chen po'i pad ma'i snying po can la 'dug cing /rnam par rtse ba 'di lta bur yongs su bstan pa mthong ba de bzhin du/ shar phyogs na yang bcom ldan 'das de bzhin gshegs pa bzang po'i dpal 'jig rten gyi khams pad+ma'i dpal na rnam par rtse ba 'di nyid yongs su ston cing 'dug par mthong ngo //shar phyogs na ji lta ba de bzhin du phyogs dang / phyogs mtshams kun gyi 'jig rten gyi khams thams cad na de bzhin gshegs pa thams cad kyi zhabs drung na/ byang chub sems dpa' sems dpa' chen po kun tu bzang po seng ge'i khri rin po che chen po'i pad+ma'i snying po can la 'dug cing rnam par rtse ba 'di nyid yongs su ston par mthong ngo //ji ltar phyogs bcu'i 'jig rten gyi khams thams cad na de bzhin gshegs pa thams cad kyi zhabs drung na/ byang chub sems dpa' sems dpa' chen po kun tu bzang po seng ge'i khri rin po che chen po'i pad+ma'i snying po can la 'dug cing rnam par rtse ba 'di nyid yongs su ston pa mthong ba de bzhin du phyogs bcu kun gyi sangs rgyas kyi zhing thams cad kyi rdul phra rab kyi rdul dag dang /rdul phra rab kyi rdul re re'i sangs rgyas kyi 'khor gyi dkyil 'khor chos kyi dbyings ltar rgya che ba dag na/ byang chub sems dpa' kun tu bzang po de bzhin gshegs pa thams cad kyi zhabs drung na seng ge'i khri rin po che chen po'i pad+ma'i snying po can la 'dug cing rnam par rtse ba 'di nyid yongs su ston par mthong ngo //de'i lus re re las / dus gsum du byung ba'i dmigs pa thams cad gzugs brnyan gyi tshul du rnam par dmigs par mngon par bstan par mthong ngo //zhing thams cad dang / sems can thams cad dang / sangs rgyas 'byung ba thams cad dang / byang chub sems dpa'i 'khor gyi dkyil 'khor thams cad kyang gzugs brnyan gyi tshul du rnam par dmigs pa mngon du bstan par mthong ngo //sems can thams cad kyi sgra dang / sangs rgyas thams cad kyi dbyangs dang / de bzhin gshegs pa thams cad kyi chos kyi 'khor lo bskor ba dang / rjes su bstan pa dang / kun brjod pa'i cho 'phrul thams cad dang / byang chub sems dpa'i yang dag par bsdu ba thams cad pa dang /sangs rgyas kyi rnam par rol pa thams cad kyang thos par gyur to zhes gsungs so/ /'di ni byang chub sems dpa'i che ba nyid rgya chen po mdo tsam smos pa yin te/ rgyas par ni phyi ma'i mtha'i bskal par yang bstan par mi nus so/ /de la de bzhin gshegs pa'i che ba nyid kyi mthu gang zhe na/sa bcu'i mdo sde las/ byang chub sems dpa' rnam par grol ba'i zla bas/ byang chub sems dpa' rdo rje'i snying po la dris pa/ kye rgyal ba'i sras byang chub sems dpa' rnams kyi spyod pa dang yul dang byin gyi rlabs kyang de ltar tshad med na/ de bzhin gshegs pa rnams kyi spyod yul dang yul la 'jug pa ci 'dra/byang chub sems dpa' rdo rje snying pos smras pa/ kye rgyal ba'i sras 'di lta ste dper na/ mi la la zhig gis gling bzhi pa'i 'jig rten gyi khams nas rde'u rgya shug gi tshig gu tsam gnyis sam gsum zhig blangs te/ 'di skad du 'jig rten gyi khams mtha' yas pa dag na/sa'i khams ji snyed cig yod de/ rde'u 'di las ji tsam zhig gis lhag par 'phags shing / lhag par tshad med ces zer ba cig yod na / kye rgyal ba'i sras de ltar khyod de bzhin gshegs pa dgra bcom pa yang dag par rdzogs pa'i sangs rgyas ye shes tshad med pa mnga' ba rnams kyi chos nyid la/byang chub sems dpa'i chos nyid kyis 'jal ba ni khyod kyi tshig 'di yang de dang 'dra bar bdag gis dpags so/ /kye rgyal ba'i sras 'di ltar gling bzhi pa'i 'jig rten gyi khams nas gang blangs pa'i sa'i khams ni chung la lhag ma las pa ni tshad med do/ /kye rgyal ba'i sras de bzhin du byang chub sems dpa'i sa chos kyi sprin 'di kho na yang bskal pa grangs med par shin tu bstan kyang /phyogs tsam zhig bstan du zad na/ de bzhin gsheg pa'i sa lta smos kyang ci dgos/ kye rgyal ba'i sras khyod la bsgo'o/ /khyod kyis khong du chud par bya'o/ /de bzhin gshegs pa 'di bdag gi mdun na dpang du bzhugs te/kye rgyal ba'i sras gal te phyogs bcu'i phyogs re re'i sangs rgyas kyi zhing 'jig rten gyi khams mu med pa'i rdul phra rab kyi rdul snyed cig sa 'di lta bu thob pa'i byang chub sems dpa' rnams kyis bu ram shing gi tshal lam/ 'dam bu'i tshal lam 'od ma'i tshal lam/til gyi tshal ltar yongs su gang bar gyur kyang de dag gi byang chub sems dpa'i spyod pa mngon par sgrub pa bskal pa mu med par bsgrubs pa dag ni/ de bzhin gshegs pa'i ye shes skad cig yud tsam thang cig tu byung ba'i de bzhin gshegs pa'i yul gyi brgya'i char yang mi chog pa nas/de bzhin du bye ba khrag khrig brgya stong gi cha'i bar dang rgyur yang mi chog go zhes gsungs so/ /de bzhin gshegs pa'i yon tan dang ye shes bsam gyis mi khyab pa'i yul la 'jug pa bstan pa'i mdo las kyang / 'jam dpal de bzhin gshegs pa 'di sems can la la dag gis ni 'khor ba 'di nyid du rab tu 'byung ba la phyogs pa dang /khyim nas mngon par 'byung bar shes so/ /la la dag gis ni rab tu byung ba dang / la la dag gis ni dka' ba spyod pa la gnas pa dang / la la dag gis ni byang chub kyi snying por 'gro ba dang / la la dag gis ni byang chub kyi snying po la 'dug pa dang /la la dag gis ni bdud bcom pa dang / la la dag gis ni mngon par rdzogs par sangs rgyas pa dang / la la dag gis ni brgya byin dang / tshangs pa dang / 'jig rten skyong ba rnams kyis gsol ba btab pa dang / la la dag gis ni chos kyi 'khor lo rab tu bskor bar shes so/ / la la dag gis ni nyan thos kyi theg pa'i gtam dang / la la dag gis ni rang sangs rgyas kyi theg pa'i gtam dang / la la dag gis ni theg pa chen po'i gtam thos so/ /la la dag gis ni de bzhin gshegs pa'i sku'i srid 'dom gang bar mthong ngo / /la la dag gis ni rgyang grags gcig tsam pa nas/la la dag gis ni de bzhin gshegs pa'i sku'i srid dpag tshad bye ba khrag khrig brgya stong bgrang ba las shin tu 'das pa'i bar du mthong ngo / /la la dag gis ni de bzhin gshegs pa'i sku gser gyi kha dog lta bu nas/ la la dag gis ni yid bzhin gyi nor bu rin po che'i kha dog lta bu'i bar du mthong ngo //la la dag gis ni yongs su mya ngan las 'da' bar mdzad pa dang / la la dag gis ni yongs su mya ngan las 'das pa dang / la la dag gis ni zhugs la bzhen pa dang / la la dag gis ni sku gcig tu sra ba dang / la la dag gis ni de bzhin gshegs pa'i ring bsrel 'god par shes so//la la dag gis ni mngon par rdzogs par sangs rgyas nas lo bcu lon pa dang / la la dag gis ni yongs su mya ngan las 'das nas lo bcu lon pa dang / la la dag gis ni byang chub kyi snying por byon pa dang / la la dag gis ni bcom ldan 'das shAkya thub pa'i bstan pa nub par shes so//la la dag gis ni yongs su mya ngan las 'das nas/ bskal pa bcu dang / nyi shu dang / sum cu dang / bzhi bcu dang / bye ba khrag khrig brgya stong lon pa dang / la la dag gis bcom ldan 'das shAkya thub pa mngon par rdzogs par sangs rgyas nas bskal pa brjod du med pa'i yang brjod du med pa zhig lon par shes kyang /'jam dpal de bzhin gshegs pa ni mi rtog rnam par mi rtog ste/ 'on kyang lhun gyis grub pas mi rtog bzhin du sems can gyi bsam pa'i dbang gis bya ba 'di lta bu rtag tu 'byung ngo zhes gsungs so//'phags pa sangs rgyas phal po che'i mdo las kyang / 'jam dpal 'di lta ste dper na/ mtsho khyon du dpag tshad lnga stong yod pa/ bya rog gis btung du rung ba tsam du mu dang kha da chad du 'dug pa pad+ma'i lo mas khebs pa zhig yod par gyur la/ de la mi la la zhig lcags kyi shing rta 'phang lo rtsibs stong yod pa/nam mkha' lding gi shugs pas drag pa'i rta mgyogs pas shing rta de drangs te/ srog shing chu la yang mi reg rta'i rmig pas pad+ma'i 'dab ma yang mi snang ba de lta de ltar de'i shing rta des drangs pa na mtsho de las sbrul gdug pa zhig byung ste/ skad cig gang gis shing rta phyir 'khor ba'i skad cig de la/des shing rta de lan bdun du bskor bar gyur/ skad cig gang gis sbrul gdug pas shing rta de lan cig 'khor ba'i skad cig de la/ dge slong kun dga' bos chos rnam pa bcu bshad de don kyang go bar byed/ skad cig gang gis kun dga' bos chos rnam pa gcig bshad pa'i skad cig de la/dge slong sha ra dwa ti'i bus chos rnam pa stong bshad de/ don kyang go bar byed/ skad cig gang gis sha ra dwa ti'i bus chos rnam pa gcig bshad pa'i skad cig de la/ dge slong maung gal gyi bus 'jig rten gyi khams stong phrag brgyad khri shin tu 'das/skad cig gang gis maung gal gyi bu 'jig rten gyi khams gcig shin tu 'da' ba'i skad cig de la/ de bzhin gshegs pas phyogs bcu'i 'jig rten gyi khams chos kyi dbyings kyis klas pa/ nam mkha'i khams kyi mthas gtugs pa dang / rab 'byam rgya mtsho thams cad du 'jig rten gyi khams re re dang /gling re re dang / skra'i khyon tsam re re yang dga' ldan gyi gnas nas 'chi 'pho ba dang / lhums su 'jug pa dang / bzhugs pa dang / bltams pa dang / brgya byin dang / tshangs pas blangs pa dang / gnas bkod pa dang / gom pa bdun 'dor ba dang /phyogs bcur rnam par gzigs pa dang / seng ge'i sgra chen po sgrogs pa dang / las dang / bzo dang / sgyu [(]tsal [,]rtsal [) dang / rig pa'i gnas thams cad slob pa dang / gzhon nu'i sa kun tu ston pa dang / btsun mo'i 'khor gyi nang na rnam par rol pa dang / skyed mos tshal gyi sar 'byung ba dang /thams cad mkhyen pa nyid la phyogs pa dang / mngon par 'byung ba dang / rab tu 'byung ba dang / dka' ba spyad pa spyod pa dang / zhal zas gsol ba dang / byang chub kyi snying por bzhud pa dang / bzhugs pa dang / bdud btul ba dang / byang chub mngon par sangs rgyas pa dang / byang chub kyi shing la spyan mi 'dzums par gzigs pa dang / tshangs pa chen pos gsol ba btab pa dang / chos kyi 'khor lo rab tu bskor ba dang / lha'i gnas su gshegs pa dang / mngon par rdzogs par byang chub pa dang / chos kyi 'khor lo'i tshul rab tu bskor ba'i yul rnam pa tha dad pa dang /bskal pa'i ming brjod pa dang / tshe'i tshad dang / 'khor gyi dkyil 'khor bkod pa dang / sangs rgyas kyi zhing rnam par dag pa bkod pa'i tshul dang / byang chub kyi sems dang / spyod pa dang / smon lam dang / pha rol tu phyin pa dang / sa dang mngon par shes pa dang /bzod pa dang / gzungs dang / ting nge 'dzin dang / rnam par thar pa dang / de la mchod pa dang / byang chub sems dpa' dang de bzhin gshegs pa'i chos kyi yul tshad med pa dang / chos kyi sprin tshad med pa la 'jug pa rnam pa tha dad pa dang / sems can yongs su smin par bya ba dang /thabs rnam par gzhag pa rnam pa tha dad pa dang / cho 'phrul chen po dang / rnam par rol pa dang / yongs su mya ngan las 'das pa chen po ston pa dang / sku gcig tu sra ba'i ring bsrel rnam par 'byed pa dang / bstan pa gnas pa dang / kun tu dbye ba dang / 'bri ba dang / dam pa'i chos nub pa yang kun du ston la/mu stegs can gyi gnas la spyod pa thams cad dang / skyes pa'i rabs thams cad du yang lhun gyis grub pa rnam par mi rtog bzhin du cig car kun snang ngo / /phyi ma'i mtha'i bskal pa'i mur thug pa'i byin gyi rlabs rgyun mi gcod par ston pas/ skad cig gi yun de nyid la phyogs bcu nas skra'i khyon tsam re re dang / spu'i khung bu'i phyogs re re'i bar la dus gsum du gshegs pa'i de bzhin gshegs pa byang chub sems dpa'i 'khor gyi dkyil 'khor rgya mtsho dang bcas pa thams cad dang / sangs rgyas kyi zhing gi yon tan gyi bkod pa rgya chen po thams cad dang /sems can gyi rigs kyi gnas bkod pa rgya chen po thams cad dang / sems can gyi rigs kyi skye mched drug tu btags pa rgya chen po thams cad dang / byang chub sems dpa'i spyod pa yang dag par 'grub pa bkod pa rgya chen po thams cad dang / de bzhin gshegs pa'i yul bkod pa rgya chen po thams cad lhun gyis grub pas rnam par mi rtog bzhin du cig car ston to//phyi ma'i mtha'i mur thug pa'i byin gyi rlabs rgyun mi gcod par kun tu ston pas skad cig de nyid la phyogs bcu kun nas skra'i khyon tsam gyi bar la/ sems can gyi khams ma lus pa lus pa med pa'i sems can re re la yang sems can thams cad snyed kyi lus dang /dbyibs dang / kha dog dang / dbyangs dang / smra ba dang / chos bstan pa rnam pa tha dad pa la sogs pa'i bye brag gzhan dang / gzhan dag lhun gyis grub pas rnam par mi rtog bzhin du cig car ston te/ sems can gzhan dang gzhan dag gi bsam pa'i dbang gis/phyi ma'i mtha'i bskal pa'i mur thug pa'i byin gyi rlabs rgyun mi gcod par kun du ston to/ /'jam dpal 'di lta ste dper na/ zla ba yar gyi ngo'i tshes bco lnga'i nam phyed kyi dus na/ zla ba'i dkyil 'khor 'dzam bu'i gling gi skyes pa dang / bud med dang /khye'u dang / bu mo rnams kyi mdun na gnas par mthong yang zla ba'i dkyil 'khor mi rtog rnam par mi rtog ste/ 'on kyang de lhun gyis grub pas/ rnam par mi rtog bzhin du ma 'dres pa'i chos dang ldan pas bya ba 'di lta bu 'byung ngo / /de bzhin du bsam pa ji lta ba dang / 'dul ba ji lta ba bzhin du sems can de dag gis de bzhin gshegs pa mdun na bzhugs par mthong yang /de bzhin gshegs pa rnams mi rtog rnam par mi rtog ste/ 'on kyang lhun gyis grub pas rnam par mi rtog bzhin du/ sangs rgyas kyi chos ma 'dres pa dang ldan pas mdzad pa 'di lta bu 'byung ngo / / zhes rnam pa mang du gsungs so/ /mdo sde zab mo rgya chen po gang dag las/ sangs rgyas dang / byang chub sems dpa'i che ba nyid bstan pa de dag la mos pa dang / yi ger 'dri ba dang / klog pa dang / mchod pa dang / bsti stang byed pa yang bsod nams shin tu rgyas par 'phel bar 'gyur te mdo 'di nyid las/'jam dpal 'di lta ste dper na/ ri'i rgyal po ri rab ni 'di lta ste/ 'phang dang / rngams dang / che ba nyid kyis ri thams cad zil gyis mnan nas/ lhag ge/ thal le/ lam me'o/ /'jam dpal de bzhin du byang chub sems dpa'i chos kyi rnam grangs 'di la mos pas kyang /'di lta ste mthong ba dang / yangs pa dang / che ba nyid kyis mdo sde 'di la mos pa/ pha rol tu phyin pa lnga las byung ba'i dge ba'i rtsa ba bskal pa grangs med par bsags pa'i byang chub sems dpas phyogs bcu'i 'jig rten gyi khams kyi rdul snyed zil gyis mnan nas/ lham me dang /lhan ne dang / lhang nge'o/ /'jam dpal rigs kyi bu'am/ rigs kyi bu mo gang la las phyogs bcu'i 'jig rten gyi khams kun gyi sems can thams cad byang chub kyi sems la rab tu bkod pa bas/ 'jam dpal rigs kyi bu'am/ rigs kyi bu mo gang gzhan zhig phung po med pa'i gnas la mos par gyur na/'di ni de bas bsod nams ches grangs med pa skyed do/ /'jam dpal gal te sems can thams cad phung po med pa'i gnas la mos par gyur pa bas/ 'jam dpal rigs kyi bu'am/ rigs kyi bu mo gzhan gang zhig gis/chos kyi rnam grangs 'di la mos nas yi ger 'dri ba'am tha na glegs bam la bris te/ mos pas 'chang ngam/ mar me dang / bdug pa dang / me tog dang / spos dang / phreng ba dang / byug pas mchod na 'di ni de bas bsod nams ches grangs med pa skyed do zhes gsungs so//mdo sde sna tshogs las btus pa/ theg pa chen po rin po che'i gtam/ A tsAr+ya Ar+yanA gArdzu nas mdzad pa rdzogs so// //rgya gar gyi mkhan po dzi na mi tra dang / shI len+d+ra bo d+hi dang / zhu chen gyi lo tsA ba ban de ye shes sdes bsgyur cing zhus te gtan la phab pa'o/