CLOSE WINDOW

D3925
བོད་ཡིག

@##/ /rgya gar skad du/ sa mA d+hi sam+b+ha ra pa ri brta nA ma/ bod skad du/ ting nge 'dzin gyi tshogs kyi le'u zhes bya ba/ sangs rgyas dang byang chub sems dpa' thams cad la phyag 'tshal lo/ /dang por mi lus rin po che chud mi gsan cing mi'i lus thob pa don yod par 'dod pa'i gang zag gis thog mar sngon du 'gro ba yan lag bdun dang ldan par bya ste/gzhi dad pa dang ldan pa dang / rkyen dge ba'i bshes gnyen bsten cing de'i yon tan len pa dang / gus pa dang ldan pa dang / yid ches shing the tshom mi za ba dang / brtson 'grus dang ldan pa dang / thams cad la yid skyo ba med pa dang /thams cad du nga rgyal spangs te/ de dag ni sngon du 'gro ba'i yan lag rnam pa bdun no/ /dus dang rnam pa thams cad du gzhan gyi skyon la mi brtag cing nyes pa mi brjod pa dang / rang gi yon tan la rlom sems mi bskyed pa dang / ngo tsha shes pa dang khrel yod pa sngon du 'gro bas rang srung ba dang /sdom pa rnam pa gsum la nan tan du spyad pa dang / ngo dga' dang gsar 'grogs dang mtho ltag spangs te rtag tu zungs thub par gnas pa dang / yul dang dus dang gnas skabs kyis gzhan gyi rgyud tshod shes pa'i sgo nas spyad par bya ba dang / gzhan la brnyas pa spang zhing khyad kyis mi gsad par bya ste/de dag ni 'jig rten gyi kha na ma tho bas mi gos shing ya rabs kyi tshul mi nyams pa'i yan lag rnam pa bdun no/ /rtag tu 'dod pa chung zhing chog shes pa dang / zhen pa dang chags pa che zhing 'dzin pa che ba spang ba dang / le lo dang snyom las spang ba dang /ha cang yang thal bar 'gyur ba yang shes par bya ba dang / don chen por mi 'gyur ba'i gtam dang / bya ba la sogs pa spang zhing mi 'jug pa dang / tshul bzhin ma yin pa yid la byed pa spang ba dang / gang gi gnyen por 'gro ba bsten shes par bya ba ste/ de dag ni bar chad spang ba'i yan lag rnam pa bdun no//mi'i lus thob pa dang sangs rgyas kyi chos spyod cing sgrub pa ni dkon no snyam pa dang / de lta bu'i sgrub pa ni don chen po dang ldan pa yin no snyam pa dang / 'jig rten gyi bya ba byed pa rnams ni nges par don med par shes par bya ba dang / gzhan gyi sdug bsngal rang gi gnyen por bsten par shes par bya ba dang /nga ni rtag tu bdud kyi spar ba na 'dug ste myur du 'chi'o zhes rgyun du bsam pa dang / bsags pa thams cad ni nges par bsdus par shes par bya ba dang / rang gi gnyer ma dang skra dkar la sogs pa la rtag tu brtag cing skyo bar bya ba ste/ de dag ni rang la rang gis gzhan bskul btab pa'i yan lag rnam pa bdun no//sangs rgyas kyi ye shes ni zab cing rgya che/ bka' dang mdo sde ni grangs mang / bdag ni blo ngan zhing rmongs la le lo che bas thams cad brjod cing shes par mi nus te/ bdag nyid tshe zad par 'gyur du 'ong snyam pa dang /sgra dang yi ge'i rjes su 'brang ba'i bshad pa'i shes pa 'di dag gis gzhan thul ba'am phan thogs pa ma yin te/ mi rnams ni shin tu mgu dka' bar bsam pa dang / rang dang gzhan gyi grub pa'i mtha' la chags sdang rnam pa gnyis spangs te skur pa mi gdab pa dang /spun zla dang nye du dang mdza' bshes la sogs pa rnams ni nges par 'gron po lam gyis bsdus pa dang 'dra bar bsam pa dang / 'jig rten gyi rnyed pa dang bkur sti dang / bstod pa dang / smad pa la sogs pa 'di dag ni nges par slu ba nyid yin par shes par bya ba dang /'jig rten gyi rnyed pa dang 'dod pa dang / sred pa dang khe dang grags pa dang nga rgyal dang rlom sems la sogs pa 'di dag ni nges par me dang dug dang mtshon chen po dang 'dra bar shes par bya ba dang / phyi dang nang gi dngos po 'di dag la sgyu ma'am rmi lam lta bur rgyun du dpyad par bya ba ste/de dag ni gdung ba bcad pa'i yan lag rnam pa bdun no/ /'du 'dzi la dga' ba spang zhing dben par gnas par bya ba dang / der yang rang gzhung ji lta ba bzhin du lha mnyes par bya ba dang / lha mngon du bya ba rnam pa gsum la brtson zhing 'bad rtsol drag tu bya ba dang / der yang re ba dang dogs pa dang 'dod pa dang /'jigs pa spangs te gnas par bya ba dang / snying rje chen po dang ldan pa dang / sems dpa' zhing rtul phod pa'i sgo nas blang dor med par ngas sgrub pa 'di'i sgo nas 'dod pa'i don ma grub pa'i bar du lus dang srog gi phyir yang mi gtong ngo zhes dam bcas pa sgrub pa dang /der yang rmi lam la sogs pa rtags dang mtshan ma ci byung yang dga' ba dang / mi dga' ba mi bya zhing gzhan la mi smra ba dang / der yang lha'i rmi lam dang rtags la sogs pa ni gdams ngag las shes par bya zhing khyad kyis mi gsod pa ste/ de dag ni skyes bu'i don myur du 'grub cing mngon du 'gyur ba'i yan lag rnam pa bdun no//de lta bu'i gang zag gi lus ni shin tu dkon zhing gces pas na lus bsrung bar bya ste/ gos dang zas dang sman la sogs pa ji ltar mthun par spyad pa dang / mi dang mi ma yin pa'i gnod pa bsrung ba dang / gnas mthun zhing bde zhing gnod pa med pa la gnas pa dang /lus sems ngal zhing dub pa'i las dang bya ba mi bya ba dang / nam phyed dang nyi ma phyed dang zas 'ju ba'i dus dang lus la nad khams skyed pa'i dus su dmigs pa la 'bad rtsol mi bya ba dang / lus dang sems ngal zhing dub pa'i dus su skyo ba bsang zhing dmigs pa gsor ba ni man ngag las shes par bya ba dang /rtag tu spyod lam gyi rnal 'byor gyis lus mnyam par gzhag pa ste/ de dag ni lus bsrung zhing gnod pa bsal ba'i yan lag rnam pa bdun no/ /de ltar gnas pas skyo zhing dge ba la g.yel ba dang /bya ba dang byed pa'i rnam rtog byung na rang gis rang la lcag brdab cing gnyen po bskyed par bya'o/ /lus la gnod pa glo bur ba byung ba dang / shes pa'i bye brag mi 'dra ba byung na rang gi nyams dang man ngag gis bcos par bya zhing / yang na mkhas pa gzhan la yang dri bar bya'o/ / rgyal po'i bka' dang rang la nus pa yod pa dang / gzhan gyi don mthong na phrin las rnam pa bzhi ni rdo rje gtsug tor gyi rgyud dang man ngag las shes par bya'o/ /nyon mongs pa mi 'dra ba dang / sems can gyi rnam par rtog pa mi 'dra ba rnams la gnyen po mi 'dra ba rnams ni mdo sde rgya bo che rnams las shes par bya ste/de dag kha 'phangs pa'am kha skong gi yan lag rnam pa bzhi'o/ /ting nge 'dzin gyi tshogs kyi le'u slob dpon nag po zhabs kyis mdzad pa rdzogs so// //rgya gar gyi mkhan po kr-iSh+Na pa de nyid dang / zhu chen gyi lo tsA ba dge slong chos kyi shes rab kyis bsgyur cing zhus te gtan la phab pa'o/