CLOSE WINDOW

D3923
བོད་ཡིག

/ //rgya gar gyi mkhan po pad+ma kA ra warma dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa//[ ]@##/ /rgya gar skad du/ bud+d+ha a nu smr-iti ut+ta ra b+hA ba na nA ma/bod skad du/ sangs rgyas rjes su dran pa bla na med pa bsgom pa zhes bya ba/ sangs rgyas dang byang chub sems dpa' thams cad la phyag 'tshal lo/ /spros pa'i rgyun bcad zhi ba'i gnas rnyed bde 'byung gnas/ /sku gnyis skyed pa'i yon tan mtha' yas gzhir gyur pa/ / chos kun ro gcig brnyes pas stug po'i gnas thim pa/ /rgyal ba'i rgyal ba dmigs mi mnga' la phyag 'tshal lo/ /mun pa gnyis ni gzhom 'dod cing / /yang dag snang ba 'byung 'dod pa'i/ /don grub bya phyir bdag gis ni/ /sangs rgyas rjes dran bla med bshad/ /de la sangs rgyas rjes su dran pa bla na med pa ni 'di ltar blta bar bya ste/rnal 'byor pas tho rangs mal nas langs te gtsang mar gyur pa'am/ mi gtsang ba yang rung bas sngags 'di lan gsum brjod do/ /oM swa b+hA ba shud+d+ha s+sarba d+harmA swa b+hA ba shud+d+hou0f85haM/ de nas 'di ltar blta ste/ lus 'di lta ste/ skra d ang /smin ma dang / rdzi ma dang / kha spu dang / mchan khung gi spu dang / mdoms kyi spu dang / lus gzhan gyi ba spu ste/ spu'i tshogs dang / mig gnyis dang / rna ba gnyis dang / sna dang / so'i phreng ba dang / sen mo dang / pags pa dang / sha dang / tshil dang / khrag dang / rtsa'i dra ba dang / chu ba dang / rgyus pa dang / glad rgyas dang / glad pa dang / lce dang / mid pa dang / ol ko dang / ol mdud dang / glo ba dang / snying dang / mchin pa dang / mkhal ma dag dang / mcher pa dang / lgang pa dang / mtshan dang / rgyu ma dang / gnye ma dang / gzhang dang / pho ba dang / sul mang dang / long ka dang / grod pa dang / bshang ba dang / gci ba dang / snabs dang / ngar snabs dang / lud pa dang / mchil ma dang / mchi ma dang / sna chu dang / rna spabs dang / mig dri dang / rdul dang / bad kan dang / rnag dang / mkhris pa dang / rlung dang / kha chu dang / kha chu dang / rlangs pa dang / sa'i khams dang / chu'i khams dang / me'i khams dang / rlung gi khams dang / nam mkha'i khams dang / rus pa'i phreng ba dang / mgo bo'i rus pa dang / mgrin pa'i rus pa dang / lag pa'i rus pa dang / brang gi rus pa dang / tshigs pa'i rus pa dang / rtsib ma'i rus pa dang / tshang ra'i rus pa dang / dpyi'i rus pa dang / brla'i rus pa dang / byin pa'i rus pa dang / rkang mthil gyi rus pa dang / de dag nyid kyang thod tshal gcig pa dang / gnyis pa dang / gsum pa dang / bzhi pa dang / 'gram pa g.yas pa dang / g.yon pa dang / tshigs pa re re dang / rtsib ma re re dang / sog pa gnyis la sogs pa tha dad pa 'di dag dang / de dag kyang rdul phra rab la thug par 'gyur zhing / de dag kyang phyogs cha tha dad par phye na ma grub ste/ 'di ltar lus 'di ni ma grub cing / de bzhin du mtha' yas pa'i lus thams cad dang /snod kyi 'jig rten thams cad kyang de dang 'dra bar ma grub bo zhes nges par bya'o/ /de ltar lus ma grub pas khog sbubs dang / lce dang / so dang / mchu la sogs pa la brten nas byung ba'i ngag kyang ma grub bo zhes nges par bya'o/ /de ltar lus dang ngag ma grub pas sems kyang ma grub par dpyad de/'di ltar legs par dpyad na sems ni kha dog tu mi dmigs/ dbyibs su yang ma yin/ phyi na yang ma yin/ nang na yang ma yin/ bar na yang ma yin/ nye ba na yang ma yin/ ring ba na yang ma yin/ skad cig snga ma ni 'gags zin/skad cig phyi ma ni ma 'ongs shing ma grub pa'o/ /skad cig da ltar ba ni mi gnas shing ma zin pa'o/ /de'i phyir lus dang ngag dang sems 'di dag ni stong pa/ zhi ba/ yul med pa/ 'jug pa chad pa/ yul na mi gnas pa/ phyogs na mi gnas pa'o zhes bsam mo//de nas yang snga ma bzhin du lus la sogs pa la blta ste yang dang yang du'o/ /de nas yid skyo ba na chos thams cad stong pa nyid do zhes shin tu mos pas yid la byed pa gzhan 'byung ba skyed par mi byed par gsang sngags 'di ci dgar bzlas so/ /oM shU n+ya tA dz+nyA na badzra swa b+hA ba At+ma kou0f85haM/de nas ldang bar 'dod pa dang 'di snyam du e ma'o kyi hud chos 'di dag thams cad ni rab tu zhi ba/ spros pa dang bral ba/ nye bar 'tshe ba med pas bde ba dam pa/ rang bzhin gyis 'od gsal ba/ nam mkha' dang mnyam pa nyid yin na byis pa'i rang bzhin can/ shes rab 'chal pa 'di dag gis de ltar ma shes pas bdag gis sgyu ma dang 'dra bas de dag gi don bgyi'o zhes bsam ste/bcos ma ma yin pa'i snying rjes sems mnyen par byas la skad cig gis rang gi sdug pa'i lha'i skur bltas la langs te/ ji lta ji ltar sems can la phan pa dang bde bar 'gyur ba de lta de ltar spyad par bya'o//sngar bshad pa'i tshul gyis snga dro dang / gung dang / dgongs la sogs par yang dang yang du sangs rgyas rjes su dran par bya ste/ 'di la ni kha zas kyi nges pa dang / dus kyi nges pa dang / spyod lam gyi nges pa dang / gza' dang skar ma'i nges pa yang med do/ / 'on kyang rnal 'byor 'di la gzhol bas ji ltar sangs rgyas rjes su dran pa mi nyams pa de la gnas kyi grogs 'dod par mi bya/ bstod pa dang grags pa dang bde ba dang rnyed pa dag gis yid dga' bar mi bya ste/ gal te dga' ba byung na yang 'bad pas gzhom par bya'o/ /de bzhin du smad pa dang ma grags pa dang sdug bsngal ba dang ma rnyed pa dag gis gdung bar mi bya ste/gal te gdung ba byung na yang nan tan gyis gzhom par bya'o/ /gang zhig de ltar spyod pa de ni bla ma sangs rgyas rjes su dran pa zhes bya ste/ de ltar yang 'phags pa lang kar gshegs pa las gsungs pa/ de ltar skye 'jig spangs pa yi//thub pa zhi ba sus mthong ba/ /de dag 'di dang slad mar yang / /chags med nyer len med par 'gyur/ /zhes so/ /yang gsungs pa/ ji ltar mthong bzhin su lta ba/ /de dag dran pa mi mthong ngo / /rnam par rtog pa mi 'jug cing / / gang tshe sangs rgyas mi mthong la/ /'jug med sangs rgyas yin par ni/ /gal te mthong na de sangs rgyas/ /zhes so/ /yang gsungs pa/ gang gis gang gA'i bye mnyam du/ /'jigs med tshul gyis mthar thug par/ /'dren pa rab tu mthong ba ni/ /de dag 'dren pa mthong ba yin/ / zhes so/ /de bzhin du 'phags pa shes rab kyi pha rol tu phyin pa rdo rje gcod pa las kyang / gang gis nga la sgrar shes shing / /gang gis nga la gzugs su mthong / log par spang ba zhugs pa ste/ /skye bo des ni nga mi mthong / /sangs rgyas rnams ni chos nyid lta/ /'dren pa rnams ni chos kyi sku/chos nyid shes par bya min pas/ /de ni rnam par shes mi nus/ /zhes gsungs so/ /de bzhin du 'phags pa sangs rgyas thams cad kyi yul la 'jug pa ye shes snang ba'i rgyan zhes bya ba'i mdo las kyang gsungs pa/ rtag tu skye med chos ni de bzhin gshegs/ /chos rnams thams cad bde bar gshegs dang 'dra//byis pa'i blo can mtshan mar 'dzin pa rnams/ /'jig rten dag na med pa'i chos la spyod/ /ces so/ /gzhan yang 'phags pa shes rab kyi pha rol tu phyin pa brgyad stong pa las kyang gsungs pa/ sangs rgyas bcom ldan 'das rnams ni chos kyi sku yin gyi/dge slong dag 'jig tshogs la skur ma 'dzin par dge slong dag nga ni chos kyi sku yongs su rdzogs par ltos shig ces gsungs pas/ de bzhin gshegs pa'i sku ni yang dag pa'i mtha' rtag pa 'di lta ste/ shes rab kyi pha rol tu phyin par blta'o zhes so/ /yang de nyid las gsungs pa/ de bzhin gshegs pa ni gzugs kyi skur mi blta ste/ de bzhin gshegs pa ni chos kyi sku'o/ /rigs kyi bu chos nyid ni 'ong ba'am 'gro ba med de/ rigs kyi bu de bzhin du de bzhin gshegs pa rnams la byon pa'am bzhud pa med do zhes so/ /gang yang 'phags pa lang kar gshegs pa las kyang gsungs pa/gang zag med cing phung po med/ /sangs rgyas ye shes zag med pa/ /rtag tu zhi ba rnam bsgom ste/ /de la bdag ni skyabs su mchi/ /zhes so/ /de ltar lus rang bzhin med pa dang / ngag rang bzhin med pa dang / yid rang bzhin med par bsgom pa ni chos kyi sku rjes su dran pa'o//gzhan yang phan par dga' bar 'dod pa'i lha'i sku'i nga rgyal 'chang ba ni gzugs kyi sku rjes su dran pa'o/ /'di lta bu'i rjes su dran pa bsgoms pas lus kyi spyod pa ni tshul mi 'chos par bya'o/ /gcig pu rgyu bar bya'o/ /gnod pa skyob pa tsam las lus brgyan par mi bya'o//slong mos 'tsho bar bya'o/ /mi rigs pa'i bsnyen bkur mi bya'o/ /ngag gi spyod pa ni don med par mi smra'o/ /'brel pa dang bcas bzhin du yid du 'ong bar smra'o/ /gzhan la gdung ba skyed pa mi smra'o/ /rtog pa sngon la song bas smra'o/ /gsal zhing dpes khrid de smra'o/ / pha rol gyi lan thebs par smra'o/ /yid kyi spyod pa ni brtan pa dang / dul ba dang / ma khengs pa dang / ma zhum par bya'o/ /phyogs las rgyal ba dang / pha rol gyi ngor mi lta ba dang / ma yengs par bya'o/ /dran pa dang / shes bzhin dang lhan cig par bya'o/ /mi'i mchog gang zhig 'di lta bus rjes su dran pa dang /spyod pa la gzhol ba de dag ni ring por mi thogs par 'byor pa dam pa thob par 'gyur ro/ /chu nang pad+ma nyi ma'i zer phye rab rgyas dga' skyed ltar/ /bla med rjes dran pad+ma gzhung gi zer phye dga' skyed la/ /pad+ma'i phreng ltar legs sbyar 'dis ni skye bo ma lus pa/ / bla med sangs rgyas rjes dran nam yang mi 'bral der 'bad shog /sangs rgyas rjes su dran pa bla na med pa mdo'i rjes su 'gro ba zhes bya ba dkyil 'khor chen po'i slob dpon ma hA ma ti'i zhal snga nas mdzad pa rdzogs so// //A tsAr+ya bi na ya tsan+d+ra dang / lo tsA ba dge slong chos kyi shes rab kyis bsgyur cing zhus te gtan la phab pa'o/