CLOSE WINDOW

D3917
བོད་ཡིག

@##/ /rgya gar skad du/ b+hA ba na kra ma na/ bod skad du/ bsgom pa'i rim pa/ 'jam dpal gzhon nur gyur pa la phyag 'tshal lo/ /theg pa chen po mdo sde'i tshul la zhugs pa rnams kyi phyir bsgom pa'i rim pa mdor brjod par bya'o/ /de la bcom ldan 'das kyis byang chub sems dpa' rnams kyi ting nge 'dzin tha dad pa tshad med dpag tu med pa la sogs pa bstan du zin kyang /zhi gnas dang lhag mthong gnyis kyis ting nge 'dzin thams cad la khyab pas na zhi gnas dang lhag mthong zung du 'brel pa 'jug pa'i lam de nyid brjod par bya'o//bcom ldan 'das kyis bka' stsal pa/ skye ba po yi lhag mthong dang / /zhi gnas goms par byas na ni/ /gnas ngan len 'ching ba dang / /mtshan ma'i 'ching ba rnam grol 'gyur/ /zhes so/ /de lta bas na sgrib pa mtha' dag spong bar 'dod pas zhi gnas dang lhag mthong bsgom par bya'o//zhi gnas kyi stobs kyis ni mar me rlung med pa na gnas pa bzhin du dmigs pa las sems mi g.yo bar 'gyur ro/ /lhag mthong gis mun par nyi ma shar ba bzhin du chos kyi de kho na ji lta ba bzhin du rab tu rtogs pas yang dag pa'i shes rab kyi snang ba 'byung ste/sgrib pa mtha' dag spong bar 'gyur ro/ /de lta bas na bcom ldan 'das kyis rnal 'byor pa rnams kyi dmigs pa'i dngos po bzhi bstan te/ rnam par mi rtog pa'i gzugs brnyan dang / rnam par rtog pa dang bcas pa'i gzugs brnyan dang /dngos po'i mtha' dang / dgos pa yongs su grub pa'o/ /de la zhi gnas kyis ni chos thams cad kyi gzugs brnyan gang yin pa dang / sangs rgyas kyi gzugs la sogs pa la mos nas dmigs pa ste/ de ni rnam par mi rtog pa'i gzugs brnyan zhes bya'o//de la yang dag pa'i don la rnam par rtog pa med pas na de rnam par mi rtog pa zhes bya'o/ /ji ltar thos pa dang ji ltar zin pa'i chos rnams kyi gzugs brnyan la mos te dmigs pas na gzugs brnyan zhes bya'o/ /rnal 'byor pas de kho na'i don rtogs par bya ba'i phyir gang gi tshe lhag mthong gis gzugs brnyan de nyid la spyod pa de'i tshe lhag mthong gi mtshan nyid de kho na la rtogs pa'i rnam par rtog pa de na yod pas na rnam par rtog pa dang bcas pa'i gzugs brnyan zhes bya'o//rnal 'byor pa gzugs brnyan de nyid kyi ngo bo nyid la rtog pas chos thams cad kyi ngo bo nyid ji lta ba bzhin du khong du chud de/bdag gi bzhin gyi gzugs me long gi nang du byung ba la brtags na bdag gi bzhin la mi sdug pa la sogs pa mngon pa bzhin no/ /gang gi tshe dngos po'i mtha'i mtshan nyid kyi de bzhin nyid rtog par gyur pa de'i tshe dngos po'i mtha' khong du chud pas na sa dang po la dngos po'i mtha' la dmigs pa zhes bya'o//des na sman bcud kyis len za ba bzhin du bsgom pa'i lam gyis sa lhag ma rnams su rim gyis shin tu rab tu rnam par dag pa'i skad cig byung bas gnas gyur nas/ gang gi tshe sgrib pa ma lus pa spangs pa'i mtshan nyid dgos pa yongs su rdzogs par gyur pa de'i tshe sangs rgyas kyi sa la ye shes de nyid dgos pa yongs su grub pa la dmigs pa zhes bya'o//de lta bu 'dis ci bstan pa yin zhe na/ zhi gnas dang lhag mthong goms par byas pas dngos po'i mtha' rtogs par 'gyur te/ des sgrib pa mtha' dag spong ba'i mtshan nyid dgos pa yongs su grub pa 'thob bo/ /de nyid sangs rgyas nyid yin te/de bas na sangs rgyas nyid thob par 'dod pas zhi gnas dang lhag mthong la bsgom par bya'o/ /gang de gnyis la mi sgom pa de dag ni dngos po'i mtha' yang mi rtogs / dgos pa yongs su grub par yang mi 'gyur ro zhes bstan par 'gyur ro/ /de la mdor na zhi gnas ni sems rtse gcig pa nyid do//lhag mthong ni yang dag pa la rtog pa'o zhes bcom ldan 'das kyis 'phags pa dkon mchog sprin la sogs pa las zhi gnas dang lhag mthong gi mtshan nyid bka' stsal to/ /de la rnal 'byor pas zhi gnas dang lhag mthong gi tshogs tshul khrims rnam par dag pa la sogs pa la gnas pa des sems can la snying rje chen po bskyed de/byang chub tu sems bskyed nas thos pa dang bsam pa dang sgom pa la sbyar bar bya'o/ /de la rnal 'byor pas sgom pa'i dus na thog mar bya ba ci yod pa thams cad yongs su rdzogs par byas la/ bshang gci byas la sgra'i tsher ma med pa yid du 'ong ba'i phyogs su bdag gis sems can thams cad byang chub kyi snying po la dgod par bya'o snyam du yongs su bsam zhing 'gro ba mtha' dag gdon pa'i bsam pa can gyi snying rje chen po mngon du byas la/phyogs bcu na bzhugs pa'i sangs rgyas dang byang chub sems dpa' thams cad la yan lag lngas phyag byas la/sangs rgyas dang byang chub sems dpa'i sku gzugs ri mo la sogs pa mdun du bzhag gam/ gzhan du yang rung ste de dag la ci nus kyis mchod pa dang bstod pa byas la/ rang gi sdig pa bshags nas 'gro ba mtha' dag gi bsod nams la rjes su yi rang ba byas nas /stan shin tu 'jam pa bde ba la rje btsun rnam par snang mdzad kyi skyil mo krung lta bu'am skyil mo krung phyed du yang rung ste/ mig ha cang mi dbye/ ha cang mi 'dzums par sna'i rtse mor gtad cing / lus ha cang yang mi sgu ha cang yang mi dgye bar drang por bsrangs la dran pa nang du gzhag ste 'dug par bya'o//de nas phrag pa mnyam par gzhag la mgo mi mtho mi dma' zhing phyogs gcig tu mi yo bar bzhag ste sna dang lte ba drang por gzhag go/ /so dang mchu yang tha mal par gzhag go/ /lce yang ya so'i drung du bzhar ro / /dbugs phyi nang du rgyu ba yang sgra can dang /rngam pa dang / dbugs rgod pa can du mi btang gi /ci nas kyang mi tshor bar dal bu dal bus lhun gyis grub pa'i tshul gyis dbugs nang du rngub pa dang phyir 'byung bar 'gyur ba de ltar bya'o/ /de la rnal 'byor pas thog mar de bzhin gshegs pa'i sku gzugs ji ltar mthong ba dang ji ltar thos pa la sems gtad de bzhag nas zhi gnas bsgrub par bya ste/de bzhin gshegs pa'i sku gzugs de yang gser btso ma bzhin du ser la mtshan dang dpe byad bzang pos brgyan pa 'khor gyi dkyil 'khor gyi nang na bzhugs shing thabs sna tshogs kyis sems can gyi don mdzad pa rgyun du yid la byed pas de'i yon tan la 'dod pa bskyed cing bying ba dang rgod pa zhi bar byas la/ji srid du de mdun du bzhugs pa bzhin du gsal bar mthong bar gyur pa de srid du bsam gtan bya'o/ /de nas de bzhin gshegs pa'i sku'i gzugs brnyan byon pa dang bzhud pa la rtog pas lhag mthong bsgom par bya'o//de nas 'di snyam du bsam par bya ste/ ji ltar de bzhin gshegs pa'i sku'i gzugs brnyan 'di gang nas kyang ma gshegs/ gar yang mi bzhud/ bzhugs bzhin du yang ngo bo nyid kyis stong la/ bdag dang bdag gi dang bral ba de bzhin du chos thams cad kyang ngo bo nyid kyis stong zhing 'ong ba dang 'gro ba dang bral ba gzugs brnyan lta bu ste/yod pa la sogs pa'i ngo bo dang bral ba'o zhes dpyad nas rnam par rtog pa med cing brjod pa med par ngang gcig tu gyur pa'i yid kyis de kho na bsgom zhing ji srid 'dod par 'dug par bya'o//ting nge 'dzin 'di ni da ltar gyi sangs rgyas mngon sum du bzhugs pa zhes bya ba'i ting nge 'dzin las bstan te/ ting nge 'dzin 'di'i phan yon zhib tu ni mdo sde de nyid las rig par bya'o/ /rnam pa gcig tu na rnam pa ji snyed kyis chos thams cad bsdus par gyur pa de la sems bzhag ste bying ba dang rgod pa la sogs pa rab tu zhi bar zhi gnas bsgrub par bya'o//mdor na chos thams cad ni gzugs can dang gzugs can ma yin pa'i bye brag gis bsdus te/ de la gzugs can rnams ni gzugs kyi phung por 'dus so/ / tshor ba la sogs pa'i phung po ni gzugs can ma yin pa'i ngo bo nyid do/ /'di la byis pa dag yod pa la sogs par 'dzin pa la zhen pa'i phyir blo phyin ci log tu gyur nas 'khor ba na yongs su 'khyams te/ de dag gi phyin ci log bsal ba'i phyir de dag la snying rje chen po mngon du byas la/rnal 'byor pa'i zhi gnas grub nas de kho na rtogs par bya ba'i phyir/ de nas lhag mthong bsgom par bya ste/ yang dag par so sor rtog pa ni lhag mthong zhes bya'o/ /yang dag pa ni gang zag dang / chos la bdag med pa'o/ /de la gang zag la bdag med pa ni gang phung po rnams bdag dang bdag gi med pa nyid do//chos la bdag med pa ni gang de dag sgyu ma lta bu nyid do/ /de la rnal 'byor pas 'di ltar brtag par bya ste/ gang zag ni gzugs la sogs pa las gud na med de/ de mi snang ba'i phyir dang / gzugs la sogs pa nyid la nga'o snyam pa'i shes pa 'byung ba'i phyir ro//gang zag ni gzugs la sogs pa'i phung po'i ngo bo nyid kyang ma yin te/ gzugs la sogs pa de dag mi rtag la du ma'i ngo bo nyid yin pa'i phyir dang / gang zag ni rtag pa dang gcig pu'i ngo bo nyid yin par gzhan dag gis brtags pa'i phyir ro//de nyid dam gzhan nyid du brjod du mi rung ba'i gang zag gi dngos po yod par ni mi rung ste/ dngos po la yod pa'i rnam pa gzhan med pa'i phyir ro snyam du brtag par bya'o/ /de lta bas na 'di lta ste/ 'jig rten gyi nga dang nga'i zhes bya ba ni brdzun te 'khrul pa kho na yin par nges par rig nas/de nas chos la bdag med pa rtog par bya ba'i phyir chos gzugs can rnams la yang ci 'di dag sems las gud na don dam par yod de 'dug pa zhig gam/ 'on te sems nyid gzugs la sogs par snang ste/ rmi lam gyi gnas skabs na snang ba dang 'dra ba zhig yin zhes dpyad par bya'o//des de dag la rdul phra rab tu rtog cing rdul phra rab rnams kyang cha shas kyis so sor brtags na mi dmigs te/ de ltar ma dmigs na de yod pa'am med pa nyid du rnam par rtog pa zlog par byed do/ /khams gsum pa yang sems tsam du rtogs kyi gzhan du ma yin no//de skad lang kar gshegs pa las kyang bka' stsal te/ rdzas ni rdul du rnam bshig cing / /gzugs la rnam par ma rtog shig /sems tsam rnam par gzhag pa ni/ /lta ba ngan pas mi rtogs so/ /zhes 'byung ngo //de 'di snyam du sems te/ sems nyid thog ma med pa'i dus na gzugs la sogs pa yang dag pa ma yin pa la mngon par zhen pa'i dbang gis rmi lam na dmigs pa'i gzugs la sogs pa snang ba bzhin du byis pa rnams la gzugs la sogs pa phyi rol du chad pa bzhin du snang ste/de lta bas na khams gsum pa ni sems tsam kho na yin no/ /des de ltar chos su gdags pa mtha' dag ni sems kho na yin par rtogs nas/ de la so sor brtags na chos thams cad kyi ngo bo nyid la so sor brtags pa yin no snyam nas sems kyi ngo bo nyid la so sor rtog go//de 'di ltar dpyod do / /don dam par na sems kyang sgyu ma bzhin du ma skyes pa ste/ gang gi tshe brdzun pa'i ngo bo nyid gzugs la sogs pa'i rnam pa 'dzin par sems nyid sna tshogs kyi rnam par snang ba de'i tshe de las gud na med pa'i phyir de nyid kyang gzugs la sogs pa bzhin du bde ba nyid du ga la 'gyur/ji ltar gzugs la sogs pa sna tshogs kyi rnam pa yin pas gcig dang du ma'i ngo bo nyid ma yin pa de bzhin du sems kyang de las gud na med pa'i phyir gcig dang du ma'i ngo bo nyid ma yin no/ /sems skye ba'i tshe yang gang nas kyang mi 'ong / 'gag pa'i tshe yang gang du yang mi 'gro ste/don dam par na bdag dang gzhan dang gnyis ka las skye bar mi rigs so/ /de lta bas na sems kyang sgyu ma bzhin te/ sems ji lta ba de bzhin du chos thams cad kyang sgyu ma lta bu ste/ don dam par na ma skyes pa'o snyam du brtag par bya'o/ /rnal 'byor pa des sems gang gis so sor rtog pa la brtags na de'i ngo bo nyid kyang mi dmigs te/de ltar rnal 'byor pas dmigs pa gang dang gang la sems 'phro ba de dang de'i ngo bo nyid la yongs su brtags na de'i ngo bo nyid kyang mi dmigs te/ des gang gi tshe mi dmigs pa de'i tshe dngos po thams cad brtags shing chu shing gi sdong po bzhin du snying po med par rtogs na de las sems zlog par byed do//de nas yod pa la sogs par rnam par rtog pa med par gyur nas spros pa thams cad dang bral ba mtshan ma med pa'i rnal 'byor 'thob bo/ /de skad 'phags pa dkon mchog sprin las kyang bka' stsal te/de ltar skyon la mkhas pa des spros pa thams cad dang bral ba'i phyir stong pa nyid bsgom pa la rnal 'byor du byed do/ /de ltar stong pa nyid bsgom pa mang bas gnas gang dang gang du sems 'phro zhing sems mngon par dga' ba'i gnas de dag gi ngo bo nyid yongs su btsal na stong par rtogs so//sems gang yin pa de yang brtags na stong par rtogs so/ /sems gang gis rtog pa de'i ngo bo nyid kun tu btsal na stong par rtogs te/ de de ltar rtogs pas mtshan ma med pa'i rnal 'byor la 'jug go zhes 'byung ngo / /'di ni 'di skad du gang nye bar mi rtog pa de ni mtshan ma med pa la 'jug par mi 'gyur zhes bstan pa yin no//de ltar chos rnams kyi ngo bo nyid la nye bar rtog pa na gang gi tshe mi dmigs pa de'i tshe yod par mi rtog go/ /med par yang mi rtog ste gang med par brtags pa de yang de'i blo la dus thams cad du mi snang ba'i phyir ro//gal te dngos po zhig mthong bar gyur na ni de'i tshe de 'gag pa'i phyir med do zhes brtag par bya na/ gang gi tshe rnal 'byor pa'i shes rab kyis brtags na dus gsum du yang dngos po mi dmigs pa de'i tshe gang 'gag pa'i phyir med ces rnam par brtag par bya/ dngos po dang dngos po med par rtog pa gnyis kyis rtog pa thams cad la khyab pa'i phyir de'i tshe de ltar de la rtog pa gzhan dag kyang mi 'byung ste/khyab par byed pa med na khyab par bya ba yang med pa'i phyir ro/ /de ltar gyur na spros pa med pa rnam par mi rtog pa nyid la zhugs pa yin no//gzugs la sogs pa la yang mi gnas pa yin no/ /shes rab kyis brtags na dngos po mtha' dag gi ngo bo nyid ma dmigs pa'i phyir shes rab mchog gi bsam gtan pa yang yin no/ /de de ltar gang zag dang chos la bdag med pa'i de kho na la zhugs pas blta bar bya ba dang /brtag par bya ba gzhan med pa'i phyir dpyod pa med cing brjod pa med par ngang gcig tu gyur pa'i yid rang gi ngang gis 'jug pas mngon par 'du byed pa med pa'i phyir rnal 'byor pas de kho na de shin tu gsal bar nges par gzung zhing 'dug par bya'o/ /der gnas kyang sems kyi rgyud rnam par mi g.yeng bar bya'o//gang gi tshe bar skabs su sems phyi rol du rnam par g.yengs par mthong ba de'i tshe de'i ngo bo nyid la brtags nas rnam par g.yengs pa zhi bar byas la yang de nyid du sems gzhag par bya'o/ /gang gi tshe de la sems mngon par mi dga' bar mthong ba de'i tshe ting nge 'dzin gyi yon tan mthong ba'i phyir de la dga' ba bsgom par bya'o//rnam par g.yeng ba la nyes par mthong ba'i phyir mi dga' ba rab tu zhi bar bya'o/ /ci ste rmugs pa dang gnyid kyis non pas rgyu ba mi gsal ba'i phyir sems bying ba'am bying du dogs par gyur pa de'i tshe mchog tu dga' ba'i dngos po sangs rgyas kyi gzugs la sogs pa'am/snang ba'i 'du shes yid la byas nas bying ba zhi bar byas nas de kho na nyid shin tu bstan par gzung bar bya'o/ /gang gi tshe rnal 'byor pa dmus long dang 'dra ba'am/ mun par zhugs pa'i mi dang 'dra ba'am/ mig btsums pa dang 'dra bar de kho na shin tu gsal bar mi 'dzin pa de'i tshe bying ba dang lhag mthong med par rig par bya'o//ji ste gang gi tshe sngon myong ba'i yul la 'dod pas bar skabs su sems rgod pa'am/ rgod du dogs par mthong ba de'i tshe mi rtag pa la sogs pas skyo ba'i dngos po yid la byas la rgod pa zhi bar bya'o//de nas yang de kho na nyid la sems mngon par 'du byed pa med par 'jug pa la 'bad par bya'o/ /gang gi tshe rnam par g.yeng ba'i mi lta bu'am/ spre'u bzhin du sems mi gnas par gyur pa na rgod pa dang zhi gnas med pa yin par rig par bya'o/ / ci ste gang gi tshe bying ba dang rgod pa las dben pa'i phyir mnyam par zhugs shing rang gi ngang gis 'jug pas de kho na la sems shin tu gsal bar gyur pa de'i tshe rtsol ba glod pas btang snyoms su byas te /de'i tshe zhi gnas dang lhag mthong zung du 'brel pa'i lam grub pa yin par rig par bya'o/ / yang gang gi tshe lhag mthong bsgoms pas shes rab shin tu shas che bar gyur pa de'i tshe zhi gnas mtshungs pa'i phyir mar me rlung la bzhag pa bzhin du sems g.yo bas de kho na shin tu gsal bar mi mthong bar 'gyur te/de'i phyir de'i tshe zhi gnas bsgom par bya'o/ /zhi gnas kyi shas che na yang gnyid kyis log pa'i mi bzhin du de kho na shin tu gsal bar mthong bar mi 'gyur te/de lta bas na de'i tshe yang shes rab bsgom par bya'o/ /gang gi tshe glang gnyis zung du 'brel te mnyam du zhugs pa bzhin du gnyis ka mnyam du zhugs par gyur pa de'i tshe ji srid du lus dang sems la gnod par ma gyur pa de srid du mngon par 'du bya ba med par gnas par bya'o//mdor na ting nge 'dzin thams cad la nyes pa drug yod de/ le lo dang / dmigs pa brjed pa dang / bying ba dang / rgod pa dang / mi rtsol ba dang / rtsol ba'o/ /de dag gi gnyen por spong ba'i 'du byed brgyad bsgom par bya ste/ 'di lta ste/dad pa dang / 'dun pa dang / rtsol ba dang / shin tu sbyangs pa dang / dran pa dang / shes bzhin dang / sems pa dang / btang snyoms so/ /de la dang po bzhi ni le lo'i gnyen po ste/ 'di ltar ting nge 'dzin gyi yon tan rnams la mngon par yid ches pa'i mtshan nyid kyis dad pas rnal 'byor pa 'dod pa skye bar 'gyur ro//de nas 'dod par gyur pas brtson 'grus rtsom mo/ /de nas brtson 'grus la brten pas lus dang sems las su rung ba nyid du byed do/ /de nas lus dang sems shin tu sbyangs pas le lo ldog par 'gyur ro/ /de bas na dad pa la sogs pas le lo spong bar 'gyur te/de'i phyir de dag bsgom par bya'o/ /dran pa ni dmigs pa brjed pa'i gnyen po'o/ /shes bzhin ni bying ba dang rgod pa gnyis kyi gnyen po ste/ des de gnyis rtogs nas spong ba'i phyir ro/ /bying ba dang rgod pa ma zhi ba'i dus na mi rtsol ba nyes pa ste/de'i phyir de'i gnyen por sems pa bsgom par bya'o/ /gang gi tshe bying ba dang / rgod pa rab tu zhi ste sems rnal du 'jug pa de'i tshe rtsol ba nyes pa ste/ de'i tshe de'i gnyen por btang snyoms bsgom par bya'o/ /sems mnyam par zhugs pa'i tshe gal te rtsol ba byas na de'i tshe sems rnam par g.yeng bar 'gyur ro//sems bying bar gyur pa la gal te rtsol ba ma byas na de'i tshe lhag mthong med pa'i phyir mi long ba bzhin du sems bying bar 'gyur ro/ /de lta bas na sems zhum pa bsal zhing rgod pa zhi bar byas la mnyam par gyur pas btang snyoms su bya'o//de nas rnal 'byor pa ji srid du dga' ba de srid du mngon par 'du byed pa med pa kho nar de kho na bsgom zhing 'dug par bya'o/ /lus dang sems la gnod par gyur na skabs skabs su 'jig rten mtha' dag la bltas la sgyu ma dang / rmi lam dang / chu zla lta bu dang / mig yor lta bur rtogs par bya'o/ /de skad du rnam par mi rtog par 'jug pa las kyang bka' stsal te/ 'jig rten las 'das pa'i ye shes kyis chos thams cad nam mkha'i dkyil dang 'dra bar mnyam par mthong ngo / /de'i rjes la thob pa ni sgyu ma dang / smig rgyu dang / chu zla bzhin du mthong ngo zhes 'byung ngo //de ltar 'gro ba sgyu ma lta bur rtogs nas sems can thams cad la snying rje chen po mngon du byas la 'di snyam du bsam par bya ste/ byis pa'i blo can de dag gis chos zab mo 'di lta bu ma rtogs nas gzod ma nas zhi ba'i chos rnams la yang yod pa la sogs par sgro btags te/phyin ci log tu gyur nas las dang nyon mongs pa rnam pa sna tshogs bstsogs te/ de'i phyir 'khor bar yongs su 'khyams pas na bdag gis ci nas kyang / 'di dag chos zab mo 'di lta bu khong du chud par bya'o snyam du bsam par bya'o/ /de nas ngal bsos te /yang de bzhin du chos thams cad mi snang ba'i ting nge 'dzin la 'jug par bya'o/ /yang sems skyo bar gyur na yang ngal bsos te de bzhin du par bya'o/ /de lta bu'i rim pa 'dis chu tshod gcig gam/ mel tshe thun phyed dam/ thun gcig gam ji srid nus pa de srid du 'dug par bya'o//de nas ting nge 'dzin las ldang bar 'dod na skyil mo krung ma bshig par 'di snyam du bsam par bya ste/ chos 'di dag thams cad don dam par na ma skyes pa yin yang sgyu ma bzhin du rgyu dang rkyen so sor nges pa sna tshogs 'dus pa'i dbang gis ma brtags na nyams dga' ba sna tshogs kho na dag 'byung ste/des na chad par lta bar yang mi 'gyur ro/ /sgro 'dogs pa'i mthar yang mi 'gyur te/ 'di ltar shes rab kyis rnam par dpyad na mi dmigs te/ des na rtag pa nyid dang sgro 'dogs pa'i mthar yang mi 'gyur ro/ /de la gang dag shes rab kyi mig dang bral bas phyin ci log gi blo can du gyur cing bdag tu mngon par zhen nas las rnam pa sna tshogs byed pa de dag ni 'khor ba na yongs su 'khyam mo//gang dag 'khor ba la gcig tu mi phyogs shing snying rje chen po dang bral ba dang / sems can gyi don du sbyin pa la sogs pa pha rol tu phyin pa rdzogs par mi byed kyi/bdag 'dul ba 'ba' zhig byed pa'i sems can de dag ni thabs med pa'i phyir nyan thos sam rang sangs rgyas kyi byang chub tu ltung ngo / /gang dag 'gro ba ngo bo nyid med par khong du chud nas kyang snying rje chen po'i stobs kyis 'gro ba mtha' dag gdon par dam bcas nas/sgyu ma mkhan bzhin du blo phyin ci log tu ma gyur pas bsod nams dang ye shes kyi tshogs rgya chen po yongs su sgrub pa de dag ni de bzhin gshegs pa'i go 'phang brnyes nas 'khor ba na 'gro ba ma lus pa la phan pa dang bde ba'i rnam pa thams cad yang dag par sgrub cing bzhugs so//de dag kyang ye shes kyi tshogs kyi stobs kyis nyon mongs pa mtha' dag spangs pas 'khor bar yang mi ltung la/ sems can thams cad la lta bas bsod nams kyi tshogs rgya che zhing tshad med pa bsags pa'i dbang gis na mya ngan las 'das par yang mi ltung ngo / / sems can thams cad kyi nye bar 'tsho bar yang 'gyur ro/ /de lta bas na sems can mtha' dag la phan pa dang bde ba bskyed par 'dod pa mi gnas pa'i mya ngan las 'das pa thob par 'dod pa dag gis bsod nams dang ye shes kyi tshogs rgya chen po sgrub pa la dus thams cad du mngon par brtson par bya'o snyam du bsam mo/de skad de bzhin gshegs pa'i gsang ba'i mdo las kyang bka' stsal te/ ye shes kyi tshogs ni nyon mongs pa mtha' dag spong bar 'gyur ba lags so/ /bsod nams kyi tshogs ni sems can thams cad nye bar 'tsho bar 'gyur ba lags so//bcom ldan 'das de lta lags pas byang chub sems dpa' sems dpa' chen pos bsod nams dang ye shes kyi tshogs la brtson par bgyi'o zhes 'byung ngo / /'phags pa de bzhin gshegs pa skye ba 'byung ba'i mdo las kyang bka' stsal te/ gang de bzhin gshegs pa rnams 'byung ba de ni rgyu gcig pu ma yin no//de ci'i phyir zhe na/ kye rgyal ba'i sras de bzhin gshegs pa rnams ni yang dag par 'grub pa'i rgyu tshad med pa 'bum phrag bcus yang dag par 'grub ste/ bcu gang zhe na/ 'di lta ste/ bsod nams dang ye shes kyi tshogs tshad med pas mi ngoms pa yang dag par 'grub pa'i rgyu dang zhes bya ba la sogs pa rgyas par 'byung ngo //'phags pa dri ma med par grags pas bstan pa las kyang bka' stsal te/ kye grogs po dag de bzhin gshegs pa'i sku ni bsod nams brgya las nges par skyes pa'o//dge ba'i chos thams cad la nges par skyes pa'o/ /dge ba'i las tshad med pa las nges par skyes so zhes bya ba la sogs pa rgya cher 'byung ngo / /de ltar byas na dal gyis skyil mo krung bshig ste/ phyogs bcu na bzhugs pa'i sangs rgyas dang byang chub sems dpa' thams cad la phyag btsal nas de dag la mchod pa dang bstod pa byas la/'phags pa bzang po spyod pa la sogs pa'i smon lam chen po gdab po/ /de nas stong pa nyid dang snying rje'i snying po can bla na med pa'i byang chub tu yongs su bsngos pa'i sbyin pa la sogs pa'i bsod nams kyi tshogs sgrub pa la mngon par brtson par bya'o//gang zhig sems kyi rnam par rtog pas bskyed pa'i dge ba dang mi dge ba'i las kyi dbang gis sems can rnams mtho ris la sogs pa'i 'bras bu myong zhing 'khor ba na 'khor ro/ /gang dag ci yang mi sems ci yang mi byed pa de dag ni 'khor ba las yongs su thar bar 'gyur ro//de lta bas na ci yang mi bsam mo/ sbyin pa la sogs pa dge ba spyad par yang mi bya'o/ /sbyin pa la sogs pa spyod pa ni skye bo blun po'i dbang du mdzad nas bstan pa kho na yin no snyam du sems shing de skad kyang smra ba des ni theg pa chen po mtha' dag spangs pa yin no//theg pa chen po thams cad kyi rtsa ba ni theg pa chen po yin pas de spangs na theg pa thams cad spangs par 'gyur ro/ /'di ltar ci yang mi bsam mo zhes smra ba ni yang dag par so sor rtog pa'i mtshan nyid kyi shes rab spangs par 'gyur ro/ /yang dag pa'i ye shes kyi rtsa ba ni yang dag par so sor rtog pa yin pas na de spangs na rtsa ba bcad pa'i phyir 'jig rten las 'das pa'i shes rab spangs par 'gyur ro//sbyin pa la sogs pa dge ba spyad par mi bya'o zhes smras pas kyang sbyin pa la sogs pa thabs shin tu zur phyin par spangs pa yin no/ /mdor na 'di lta ste/ thabs dang shes rab ni theg pa chen po'o//de skad 'phags pa ga ya mgo'i ri las kyang gsungs te/byang chub sems dpa' rnams kyi lam ni mdor bsdu na gnyis te/ gnyis gang zhe na/ 'di lta ste/ thabs dang / shes rab bo zhe'o/ /'phags pa de bzhin gshegs pa'i gsang ba las kyang bka' stsal te/thabs dang shes rab 'di gnyis kyis byang chub sems dpa'i lam thams cad bsdus par 'gyur ro zhes 'byung ste/ de'i phyir theg pa chen po spong ba ni las kyi sgrib pa chen po byas par 'gyur ro/ /de lta bas na theg pa chen po spong ba/ thos pa nyung ba/ bdag gi lta ba mchog tu 'dzin pa/skye bo mkhas pa la bsnyen bkur ma byas pa/ de bzhin gshegs pa'i gsung rab kyi tshul ma rtogs pa/ bdag phung bar byas nas gzhan yang phung bar byed pa rigs pa dang lung dang 'gal ba'i dug gis btab pa'i tshig ni mkhas pa bdag la legs su 'dod pas zas dug can bzhin du rgyang ring du yongs su spang bar bya'o//de ltar des yang dag par so sor rtog pa spangs na chos shin tu rnam par 'byed pa zhes bya ba yang dag pa byang chub kyi yan lag dam pa kho na yang spangs par 'gyur ro/ /yang dag par so sor rtog pa med par rnal 'byor pas thabs gang gis thog ma med pa'i dus nas gzugs la sogs pa'i dngos po la mngon par zhen cing goms pa'i sems rnam par mi rtog pa nyid la rnam par gzhag par bya /gal te chos thams cad la dran pa med pa dang / yid la byed pa med pas 'jug go zhe na/de yang rigs pa ma yin te/ yang dag par so sor rtog pa med par ni nyams su myong ba'i chos thams cad mi dran par bya ba dang / yid la mi bya bar byed mi nus so/ /gal te bdag gis chos 'di dag dran par mi bya'o/ /yid la mi bya'o snyam du de ltar bsgom zhing de dag la dran pa med pa dang /yid la byed pa med pa bsgom pa ni de'i tshe des de dag shin tu dran pa dang / shin tu yid la byas par 'gyur ro/ /ci ste dran pa dang / yid la byed pa med pa tsam la dran pa med pa dang / yid la byed pa med pa skad du bya na/ de'i tshe de gnyis rnam pa gang gis med par 'gyur ba de nyid dpyad dgos te/med pa ni rgyur rung bar yang mi 'gyur te/ gang gis mtshan ma med pa dang / yid la byed pa med pa las rnam par mi rtog pa nyid du 'gyur/ de tsam gyi phyir rnam par mi rtog par 'gyur du zin na ni brgyal ba yang dran pa dang / yid la byed pa med pas rnam par mi rtog pa nyid du 'jug par 'gyur ro//yang dag par so sor rtog pa med par rnam pa gzhan gyis dran pa med cing yid la byed pa med par bya ba'i thabs gzhan med do/ /dran pa med pa dang / yid la byed pa med par gyur du zin kyang yang dag par so sor rtog pa med na chos rnams kyi ngo bo nyid med pa la 'jug par ji ltar 'gyur/chos rnams ngo bo nyid kyis stong par gnas pa kho na yin du zin kyang so sor rtog pa de med na de dag gis stong pa nyid rtogs par mi 'gyur ro/ /stong pa nyid rtogs pa med pas ni sgrib pa spong bar mi 'gyur ro/ /de ltar gyur du zin na thams cad kyang dus thams cad du rang thar bar 'gyur ro//yang rnal 'byor pa de gal te chos thams cad la dran pa nyams pa'am/ rmongs pas dran pa dang / yid la byed pa mi 'jug na ni de'i tshe shin tu rmongs pa yin pas de rnal 'byor par ji ltar 'gyur/ yang dag par so sor rtog pa med par de la dran pa med pa dang /yid la byed pa med pa goms par byas pas glen pa nyid goms par byas pa yin no/ /de'i phyir yang dag pa'i ye shes kyi snang ba rgyang ring du bsrings par 'gyur ro/ /ci ste de dran pa nyams pa yang ma yin/ glen pa yang ma yin na ni de'i tshe yang dag par so sor rtog pa med par ji ltar dran pa med pa dang /yid la byed pa med par byed nus par 'gyur/ dran bzhin du yang mi dran/ mthong bzhin du yang mi mthong ngo zhes byar mi rung ngo / /dran pa med pa dang / yid la byed pa med pa goms par byas na ji ltar sngon gyi gnas rjes su dran pa la sogs pa dang /sangs rgyas kyi chos la sogs par 'gyur te/ 'gal ba'i phyir dro ba dang 'gal ba drang ba bsten pa'i tshe dro ba reg pa'i tshor ba mi 'byung ba bzhin no/ /yang rnal 'byor pa ting nge 'dzin la snyoms par zhugs pa la gal te yid kyi rnam par shes pa yod na de'i tshe des gdon mi za bar ci zhig la dmigs dgos te/so so'i skye bo rnams kyi shes pa ni glo bur du dmigs pa med par mi 'gyur ro/ /ci ste med na ni de'i tshe ji ltar chos rnams kyi ngo bo nyid med par rtogs par 'gyur/ gnyen po gang gis ni nyon mongs pa spong bar 'gyur/ bsam gtan bzhi pa ma thob pa'i so so'i skye ba'i sems ni 'gog par 'gyur mi srid do//de lta bas na dam pa'i chos la dran pa med pa dang / yid la byed pa med pa 'byung ba de yang yang dag par so sor rtog pa sngon du 'gro ba yin par blta bar bya ste/ gang gi phyir yang dag par so sor rtog pa nyid kyis dran pa med pa dang /yid la byed pa med par byed nus kyi gzhan du ma yin te/ 'di ltar rnal 'byor pa gang gi tshe yang dag pa'i shes rab kyis brtags na don dam par na dus gsum du chos skyes pa gang yang ma mthong ba de'i tshe ji ltar na dran pa dang / yid la byed par bya/ don dam par na dus gsum med pa'i phyir myong ba med pa gang yin pa de ji ltar dran par bya/yid la byed par bya/ de'i phyir de spros pa thams cad nye bar zhi bas rnam par mi rtog pa'i ye shes la zhugs pa yin no/ /de la zhugs pas stong pa nyid rtogs par 'gyur ro/ / de rtogs pas lta ba ngan pa'i dra ba mtha' dag spangs par 'gyur ro / /thabs dang ldan pa'i shes rab bsten pas kun rdzob dang don dam pa'i bden pa la yang dag par mkhas pa yin no/ /de bas na sgrib pa med pa'i ye shes thob pa'i phyir sangs rgyas kyi chos thams cad thob par 'gyur ro/ / de lta bas na yang dag par so sor rtog pa med na yang dag pa'i ye shes 'byung bar yang mi 'gyur/ nyon mongs pa'i sgrib pa spong bar yang mi 'gyur ro/ /'phags pa 'jam dpal rnam par rol pa'i mdo las kyang bka' stsal te / bu mo ji ltar na byang chub sems dpa' g.yul las rnam par rgyal ba yin/gsol pa/ 'jam dpal rnam par brtags na chos thams cad mi dmigs pa gang lags pa'o zhes 'byung ngo / /de lta bas na rnal 'byor pas ye shes kyi mig phye la shes rab kyi mtshon gyis nyon mongs pa'i dgra rnams pham par bya ste/ 'jigs pa med par gnas pa'i phyir mi sngar ma bzhin du mig 'dzums par mi bya'o//'phags pa ting nge 'dzin gyi rgyal po'i mdo las kyang bka' stsal te/ gal te chos la bdag med so sor rtog /so sor de brtags gal te bsgom pa ni/ /de nyid mya ngan 'das thob 'bras bu'i rgyu/ /rgyu gzhan gang yin des ni zhi mi 'gyur//zhes 'byung ngo / /mdo kun las btus pa las kyang 'byung ste/ bdag lhag mthong gi sbyor ba la zhugs par gnas kyang gzhan dag lhag mthong gi sbyor ba la mi 'jug na bdud kyi las so zhes 'byung ngo / /lhag mthong ni yang dag par so sor rtog pa'i ngo bo nyid yin par 'phags pa dkon mchog sprin dang /dgongs pa nges par 'grel pa las kyang bka' stsal to/ /'phags pa dkon mchog sprin las kyang bka' stsal pa/ lhag mthong gis brtags nas ngo bo nyid med par rtogs pa ni mtshan ma med pa la 'jug pa'o zhes 'byung ngo / /'phags pa lang kar gshegs pa las kyang /blo gros chen po gang gi phyir blos brtags na rang dang spyi'i mtshan mi rtogs te/ des na chos thams cad ngo bo nyid med pa zhes bya'o zhes bka' stsal to/ /gal te yang dag par so sor rtog pa la mi bya na/ de ltar bcom ldan 'das kyis mdo sde de dang de dag la yang dag par so sor rtog pa rnam pa du ma bka' stsal pa de dang yang 'gal bar 'gyur ro//de lta bas na bdag ni shes rab chung ngu / brtson 'grus chung ngu ste/ mang du thos pa yongs su tshol mi nus so zhes de skad bya ba'i rigs kyi/ bcom ldan 'das kyis mang du thos pa bsngags pa'i phyir dus thams cad du yang de spang bar ni mi rigs so//tshangs pas zhus pa las kyang bka' stsal te/ gang dag bsam gyis mi khyab pa'i chos rnams la sems zhugs pa de dag ni tshul bzhin ma yin pa'o zhes 'byung ngo / /de la gang dag don dam par ma skyes pa'i chos rnams la skye bar yongs su brtags te/nyan thos la sogs pa bzhin du de dag la mi rtag pa dang sdug bsngal gyi tshul du sems par byed pa de dag ni sgro 'dogs pa dang skur ba 'debs pa'i mtha' de dag la sems pa 'jug pas tshul bzhin ma yin par 'gyur te/ de dgag pa'i phyir de skad bka' stsal gyi/yang dag par so sor rtog pa de dgag par ni ma yin te/ de ni mdo sde kun las kyang bka' stsal pa'i phyir ro/ /de skad tshangs pas zhus pa de nyid las kyang bka' stsal te/ byang chub sems dpa' rnams kyis gsol pa/ gang chos thams cad la sems kyis sems kyang der ma smras ma nyams na de'i slad du de byang chub sems dpa' zhes bgyi zhes 'byung ngo //yang de nyid las ji ltar na brtson 'grus dang ldan pa lags/ bka' stsal pa/ gang gi tshe thams cad mkhyen pa'i ye shes la brtags nas ma dmigs pa'o zhes gsungs so/ /yang de nyid las tshul bzhin du chos la so sor rtog pa de dag ni blo gros dang ldan pa yin no//zhes gsungs so/ /yang de nyid las de dag ni chos rnams la sgyu ma dang smig rgyu ji lta ba bzhin du rab tu rnam par 'byed do zhes gsungs so/ /de ltar gang dang gang du bsam gyis mi khyab pa la sogs pa'i tshig thos na de dang der thos pa dang bsam pa tsam kho nas de kho na rtogs par gang dag sems pa de dag gi mngon pa'i nga rgyal dgag pa'i phyir chos rnams so so rang gis rig par bya ba nyid du bstan par byed do//tshul bzhin ma yin pa'i sems pa yang dgag par byed par khong du chud par bya'i/yang dag par so sor rtog pa de dgag par ni ma yin no/ /de lta ma yin na rigs pa dang lung shin tu mang po dang 'gal bar 'gyur ro zhes sngar bshad pa bzhin no/ /yang thos pa dang bsam pa las byung ba'i shes rab kyis rtogs pa gang yin pa de nyid bsgom pa las byung ba'i shes rab kyi bsgom par bya'i/gzhan du ni ma yin te/ rta dkyus kyi sa bstan nas rgyug pa bzhin no/ /de lta bas na yang dag par so sor brtag par bya'o/ /de ltar rnam par rtog pa'i ngo bo nyid yin du zin kyang tshul bzhin du yid la byed pa'i ngo bo nyid yin pa'i phyir de las rnam par mi rtog pa'i ye shes 'byung bar 'gyur pas na ye shes de 'dod pas de la brten par bya'o//rnam par mi rtog pa'i yang dag pa'i ye shes kyi me byung na shing gnyis drud pa las me byung bas shing de gnyis bsregs pa bzhin du de yang phyis de gnyis kyis bsreg par 'gyur ro zhes 'phags pa dkon mchog brtsegs pa las kyang bka' stsal to//yang dge ba la sogs pa'i las ci yang mi bya'o zhes zer ba de ni de skad smra bas las zad nas grol bar 'gyur ro zhes mu stegs can kun tu tshol ba'i smra ba khas blangs par 'gyur ro/ /bcom ldan 'das kyi gsung rab la nyon mongs pa zad nas grol bar 'gyur gyi/las zad nas grol bar 'gyur ba med do/ /thog ma med pa nas bsags pa'i las zad par bya mi nus te/ de ni mtha' yas pa'i phyir ro/ /ngan song la sogs pa yang de'i 'bras bu la spyod pa'i tshe las gzhan dag kyang 'byung ste/ nyon mongs pa med par ma gyur te de rgyur gnas na las dgag par mi nus pa'i phyir mar me ma 'gags na de'i 'od mi 'gag pa bzhin no//lhag mthong la skur ba 'debs pa de'i nyon mongs pa zad par 'gyur mi srid do zhes sngar bshad pa yin no/ /ci ste nyon mongs pa zad par bya ba'i phyir lhag mthong la brten par bya'o snyam du sems na ni de'i tshe nyon mongs pa zad pa nyid kyis grol bar 'grub ste/las zad par bya ba'i tshig don med par 'gyur ro/ /mi dge ba'i las mi bya'o zhes zer ba de ni rigs na/ dge ba ci ste dgag /gal te 'khor bar byed pas dgag pa skad du byas na yang de ni mi rung ste/ bdag la sogs par phyin ci log gi kun nas bslang ba'i dge ba'i las gang yin pa de nyid 'khor bar byed pa yin gyi/byang chub sems dpa' rnams kyi las snying rje chen pos kun nas bslang ba bla na med pa yang dag par rdzogs pa'i byang chub tu yongs su bsngos pa yang 'khor bar byed pa ma yin no/ /de skad 'phags pa sa bcu pa las kyang bka' stsal te/dge ba bcu'i las kyi lam de dag nyid bsngo ba la sogs pa yongs su sbyang ba byas pa'i bye brag gis ni nyan thos dang / rang sangs rgyas dang / byang chub sems dpa' dang / sangs rgyas nyid sgrub par byed do zhes 'byung ngo / /'phags pa dkon mchog brtsegs pa las kyang /chu klung chen po thams cad rgya mtsho chen por zhugs pa'i chu'i phung po bzhin du byang chub sems dpa' rnams sgo sna tshogs nas dge ba bsags pa yang thams cad mkhyen pa nyid du ro gcig pa nyid du 'gyur ro zhes gsungs so/ /sangs rgyas dang byang chub sems dpa' rnams kyi gzugs kyi sku dang /zhing yongs su dag pa dang / 'od dang / 'khor dang / longs spyod chen po la sogs pa phun sum tshogs pa gang yin pa de ni sbyin pa la sogs pa bsod nams kyi tshogs kyi 'bras bu nyid yin par mdo sde dang de dang de dag tu bcom ldan 'das kyis bka' stsal pa de dang yang 'gal bar 'gyur ro//dge ba spyod pa bkag pas ni so sor thar pa'i sdom pa la sogs pa yang bkag par 'gyur te/ de'i phyir de'i mgo bo dang kha spu bregs pa dang chos gos ngur smrig bcang ba la sogs pa yang don med par 'gyur ro/ / dge ba'i las mngon par 'du bya ba la mi phyogs par gyur na 'khor ba la mi phyogs pa dang / sems can gyi don bya ba la mi phyogs pa kun tu bsten par 'gyur te/ de'i phyir de'i byang chub kyang rgyang bsrings par 'gyur ro/ /'phags pa dgongs pa nges par 'grel pa las kyang bka' stsal te/sems can gyi don bya ba la shin tu mi phyogs pa dang / 'du byed pa mngon par 'du bya ba la shin tu mi phyogs pa ni bla na med pa yang dag par rdzogs pa'i byang chub tu ngas lung ma bstan to zhes bka' stsal to/ /'phags pa nye ba 'khor gyis zhus pa las kyang /'khor ba la mi phyogs pa ni byang chub sems dpa' rnams kyi 'chal pa'i tshul khrims mchog yin no zhes bstan to/ /'khor ba yongs su 'dzin pa ni tshul khrims kyi mchog yin no zhes gsungs so/ /'phags pa dri ma med par grags pas bstan pa las kyang thabs kyis zin pa'i 'khor bar 'gro ba ni byang chub sems dpa' rnams kyi thar pa'o//thabs dang bral ba'i shes rab ni 'ching ba'o/ /shes rab dang bral ba'i thabs kyang 'ching ba'o/ /shes rab dang bcas pa'i thabs ni thar pa'o/ /thabs dang bcas pa'i shes rab kyang thar pa'o zhes bka' stsal to//'phags pa nam mkha' mdzod las kyang / 'khor bar yongs su skyo ba ni byang chub sems dpa' rnams kyi bdud kyi las so zhes gsungs so/ /mdo kun las btus pa las kyang 'dus ma byas pa la yang so sor rtog la/ 'dus byas kyi dge bas kyang yongs su skyo ba ni bdud kyi las so//byang chub kyi lam yang rab tu shes la pha rol tu phyin pa'i lam yang yongs su mi tshol ba ni bdud kyi las so zhes bstan to/ /yang de nyid las/ sbyin pa la sems mngon par zhen pa nas shes rab kyi bar la sems mngon par zhen pa ni bdud kyi las so zhes bshad pa de la sbyin pa la sogs pa bsten dgag pa ni ma yin gyi /ngar 'dzin pa dang / nga yir 'dzin pa la sems mngon par zhen pa/ gzung ba dang 'dzin pa la sems mngon par zhen pa/ dmigs pa can gyi sbyin pa la sogs pa phyin ci log tu mngon par zhen pa gang yin pa de dgag pa ste/phyin ci log tu mngon par zhen pas kun nas bslang ba'i sbyin pa la sogs pa yongs su dag par mi 'gyur te bdud kyi las so zhes bshad do/ /de lta ma yin na bsam gtan yang bsten par bya ba ma yin par 'gyur ro/ /de ltar gyur na thar par yang ji ltar 'gyur/de'i phyir na dmigs pa can sna tshogs su 'du shes pas sbyin pa byin pa la sogs pa gang yin pa de ni yongs su dag pa ma yin par bstan pa'i phyir 'phags pa nam mkha' mdzod las kyang / sems can phyin ci log gi las sna tshogs la sogs pa'i 'du shes can gyi sbyin pa la sogs pa ni bdud kyi las so zhes bshad do//phung po gsum pa'i yongs su bsngo ba las kyang bka' stsal pa/ gang bdag gis sbyin pa dang / tshul khrims dang / bzod pa dang / brtson 'grus dang / bsam gtan dang / shes rab mnyam pa nyid du ma 'tshal nas dmigs par ltung bas sbyin pa la brtsal ba dang /tshul khrims mchog tu 'dzin pas tshul khrims srung ba dang / bdag dang gzhan du 'du shes pas bzod pa bsgoms pa la sogs pa gang lags pa de dag thams cad so sor bshags par bgyi'o zhes 'byung ba gang yin pa de la yang dmigs pa can sna tshogs su 'du shes pa phyin ci log tu mngon par zhen pas kun nas bslang ba'i phyir sbyin pa la sogs pa yongs su dag pa ma yin pa tsam gyi phyir bshad kyi /dus thams cad du sbyin pa la sogs pa la bsten pa dgag pa ni ma yin no/ /de lta ma yin na dmigs pa can phyin ci log tu gyur pa 'ba' zhig gi ma yin na sbyin pa la sogs pa thams cad bye brag med par dgag par 'gyur ro//tshangs pas zhus pa las kyang / spyod pa ji snyed pa de dag thams cad ni yongs su rtogs pa'o/ /yongs su mi rtog pa ni byang chub bo zhes bya ba la sogs pa gsungs pa gang yin pa de la yang skye ba la sogs par rnam par rtog pa'i skabs yin pas de ni yongs su rtogs pa nyid du bshad kyi /mtshan ma med par gnas shing mngon par 'du bya ba med par 'jug pa la gnas pa'i byang chub sems dpa' ni lung bstan pa yin te/ gzhan du ma yin no zhes de tsam du bstan te/sbyin pa la sogs pa thams cad la don dam par na ma skyes par yongs su bstan gyi/ spyod par mi bya ba ni bka' ma stsal to/ /de lta ma yin na mar me mdzad kyi snga logs su sangs rgyas gang dag la bcom ldan 'das kyis bsnyen bkur mdzad pa de dag gi mtshan bcom ldan 'das kyis bskal par yang brjod par mi spyod pa de dag gis kyang bcom ldan 'das byang chub sems dpa'i gnas skabs na bzhugs pa'i spyod pa ci'i phyir dgag pa ma mdzad/mar me mdzad kyis kyang de'i tshe bcom ldan 'das kyi spyod pa dgag par ma mdzad pa kho na ste/gang gi tshe sa brgyad pa la gnas shing zhi ba mtshan ma med pa la gnas pa de gzigs nas de'i tshe bcom ldan 'das lung bstan gyi/ de na de'i spyod pa bkag pa ni ma yin no/ /sa brgyad pa la byang chub sems dpa' rnams kyi mtshan ma med par gnas pa mchog de ni de dag de nyid du yongs su mya ngan las 'das par 'gyur du 'ong ngo zhes sa bcu las sangs rgyas rnams kyis dgag pa mdzad do//gal te rnam pa thams cad du spyod pa de mi bya bar gyur na ni sngar brjod pa thams cad dang yang 'gal bar 'gyur ro/ /yang tshangs pas zhus pa de nyid las gsungs pa/ sbyin pa yang sbyin la de'i rnam par smin pa la yang mi re la/ tshul khrims kyang bsrung ba de yang sgro 'dogs pas ma yin zhes bya ba la sogs pa 'byung ngo / /tshangs pa byang chub sems dpa' chos bzhi dang ldan pa rnams sangs rgyas kyi chos rnams las phyir mi ldog pa yin no/ /bzhi po de dag gang zhe na/'khor ba dpag tu med pa yongs su 'dzin pa dang / sangs rgyas dpag tu med pa la rim gro dang mchod pa dpag tu med pa byed pa zhes bya ba la sogs pa 'byung ba thams cad dang 'gal lo/ dbang po rtul po kho nas spyod par bya'i/ dbang po rnon pos mi bya'o zhes brjod par mi rung ste/'di ltar sa dang po nas bzung ste sa bcu pa'i bar la gnas pa'i byang chub sems dpa' rnams kyi sbyin pa la sogs pa'i spyod pa rnams 'byung zhing lhag ma rnams kyang kun tu mi spyod pa ni ma yin no zhes gsungs pa'i phyir ro/ /sar chud pa rnams dbang po rtul po zhes bya bar yang mi rung ste/'phags pa nye ba 'khor gyis zhus pa las kyang / mi skye ba'i chos la bzod pa la gnas pa nyid kyis gtong ba dang / gtong ba chen po dang / rab tu gtong ba dag bya'o zhes bka' stsal to / /mdo kun las btus pa las kyang / pha rol tu phyin pa drug la sogs pa sgrub pa dang ldan pa'i byang chub sems dpa' rnams ni de bzhin gshegs pa'i rdzu 'phrul gyis 'gro ba yin no zhes bsngags te/de bzhin gshegs pa'i rdzu 'phrul gyis 'gro ba las mgyogs pa ni gzhan med do/ /pha rol tu phyin pa drug dang / sa bcu ma gtogs par byang chub sems dpa' rnams kyi shin tu myur bar 'jug pa'i lam gzhan ni med do//des sems kyi rgyud 'dag pa bzhin du rim gyis 'dag par 'gyur ro zhes mdo sde las kyang bka' stsal to/ /'phags pa lang kar gshegs pa dang / sa bcu la sogs pa las kyang / byang chub sems dpa' gang gi tshe de bzhin nyid la gnas par gyur pa de'i tshe sa dang por chud pa yin te/de nas rim gyis sa gong ma rnams yongs su sbyangs nas de bzhin gshegs pa'i sa la 'jug go zhes bka' stsal pa ste / de'i phyir sa dang pha rol tu phyin pa las ma gtogs par sangs rgyas nyid kyi grong khyer du cig car 'jug pa'i sgo gzhan ni med de /bcom ldan 'das kyis kyang mdo sde la sogs pa gang las kyang bka' ma stsal to/ /gal te bsam gtan nyid du pha rol tu phyin pa drug 'dus pas na de bsten pas pha rol tu phyin pa thams cad bsten par 'gyur te/ de'i phyir sbyin pa la sogs pa pha rol tu phyin pa gzhan so sor bsten mi dgos pa skad du bya na yang /de mi rung ste de ltar gyur du zin na sangs rgyas la ba lang gi lci ba'i dkyil 'khor byas pa'i nang du yang pha rol tu phyin pa drug 'dus pas na dkyil 'khor 'ba' zhig bya'i/ bsam gtan la sogs pa mi bya bar 'gyur ro//nyan thos 'gog pa'i snyoms par 'jug pa la snyoms par zhugs pa la yang mtshan ma la sogs pa kun tu mi 'byung ba'i phyir de ltar pha rol tu phyin pa drug yongs su rdzogs par 'gyur te/ de'i phyir nyan thos rnams dang / byang chub sems dpa' rnams bye brag med par bstan par 'gyur ro//byang chub sems dpa' rnams gnas skabs thams cad du pha rol tu phyin pa drug yongs su rdzogs par bya bar bstan pa'i phyir bcom ldan 'das kyis pha rol tu phyin pa re rer yang pha rol tu phyin pa thams cad 'dus par bka' stsal gyi/ pha rol tu phyin pa gcig kho na zhig bsten par ni ma gsungs so//de skad 'phags pa chos thams cad shin tu rgyas pa las kyang bka' stsal te/ byams pa byang chub sems dpa' rnams kyi pha rol tu phyin pa drug yang dag par bsgrubs pa 'di ni rdzogs pa'i byang chub kyi phyir yin na/ de la yang mi blun po dag 'di skad du byang chub sems dpas shes rab kyi pha rol tu phyin pa kho na la bslab par bya'i/ pha rol tu phyin pa lhag ma rnams kyis ci zhig bya zhes zer zhing / de dag pha rol tu phyin pa gzhan dag la sun 'byin par sems so/ /ma pham pa 'di ji snyam du sems/ ka shi'i rgyal por gyur pa gang yin pa des/phug ron gyi phyir rang gi sha khra la byin pa de shes rab 'chal pa yin nam/ byams pas gsol pa/ bcom ldan 'das de ni ma lags so/ /bcom ldan 'das kyis bka' stsal pa/ byams pa nga byang chub sems dpa'i spyad pa spyod pa na pha rol tu phyin pa drug dang ldan pa'i dge ba'i rtsa ba gang dag bsags pa'i dge ba'i rtsa ba de dag gis gnod par gyur tam/byams pas gsol pa/ bcom ldan 'das de ni ma lags so/ /bcom ldan 'das kyis bka' stsal pa/ ma pham pa khyod kyis kyang bskal pa drug cur sbyin pa'i pha rol tu phyin pa yang dag par bsgrubs/de bzhin du bskal pa drug cur shes rab kyi pha rol tu phyin pa'i bar du yang dag par bsgrubs na/ de la mi blun po dag 'di skad ces tshul gcig kho nas byang chub ste/ 'di lta ste/ stong pa nyid kyi tshul gyis so zhes zer te/ de dag ni spyod pa yongs su ma dag par 'gyur ro zhes bya ba la sogs pa 'byung ngo //stong pa nyid 'ba' zhig bsten na nyan thos bzhin du mya ngan las 'das pa'i mthar ltung bar 'gyur ro/ /de'i phyir na thabs dang bcas pa'i shes rab bsten par bya'o/ /de lta bas na slob dpon klu sgrub kyi zhal snga nas kyi mdo kun las btus pa las bshad pa/thabs mkhas pa dang bral ba'i byang chub sems dpa' chos zab mo nyid la mngon par brtson par mi bya'o zhes 'byung ngo / /'dir yang 'phags pa dri ma med par grags pas bstan pa la sogs pa khungs bstan cing bshad kyi / de yang slob dpon klu sgrub kyi zhal snga nas kyi bka' ni ma yin no//rigs pa dang lung du ldan pa dang / bcom ldan 'das kyi gsung rab btang la/ mkhas pa rtog pa dang ldan pas 'gro ba blun po gzhan gyi tshig bzung ba mi rigs so/ /'phags pa gtsug na rin po che las kyang / sbyin pa la sogs pa dge ba mtha' dag dang ldan pas rnam pa thams cad kyi mchog dang ldan pa'i stong pa nyid la bsgom par bya'o zhes gsungs te/stong pa nyid 'ba' zhig ni ma yin no/ /'phags pa dkon mchog brtsegs pa las kyang bka' stsal te/ 'od srungs 'di lta ste dper na/ blon pos zin pa'i rgyal po rnams dgos pa thams cad byed pa de bzhin du byang chub sems dpa'i shes rab thabs mkhas pas zin pa yang sangs rgyas kyi mdzad pa thams cad byed do zhes 'byung ngo //de bas na stong pa nyid 'ba' zhig bsten na mya ngan las 'das pa la 'jug par 'gyur du 'ong ngo zhes bcom ldan 'das kyis 'phags pa de bzhin gshegs pa'i gsang ba'i mdo las/gcig tu sems dmigs pa med par mi bya'i/ thabs la mkhas pa la yang brten par bya'o zhes gsungs so / /de bstan pa'i phyir rigs kyi bu 'di lta ste dper na me ni rgyu las 'bar te/ rgyu med na zhi bar 'gyur ro / /de bzhin du dmigs pa la sems 'bar gyi/dmigs pa med na sems zhi bar 'gyur ro/ /de la thabs la mkhas pa'i byang chub sems dpa' shes rab kyi pha rol tu phyin pa yongs su dag pas dmigs pa nye bar zhi bar yang shes la dge ba'i rtsa ba la dmigs pa yang zhi bar mi byed/ nyon mongs pa la dmigs pa yang 'byung bar mi byed la/pha rol tu phyin pa'i dmigs pa la yang 'jog par byed/ stong pa nyid du dmigs pa la yang so sor rtog la sems can thams cad la snying rje chen pos dmigs pa yang blta'o / /rigs kyi bu de ltar na byang chub sems dpa' thabs la mkhas pa shes rab kyi pha rol tu phyin pa dag pas dmigs pa la dbang thob po zhes rgya cher gsungs nas/yang bka' stsal pa/ de ltar na byang chub sems dpa'i dmigs pa gang ci yang rung / de thams cad ni thams cad mkhyen pa'i ye shes mngon par bsgrub pa'i phyir mi gnas pa med do//byang chub sems dpa' gang dmigs pa thams cad byang chub tu yongs su bsngos pa de ni byang chub sems dpa'i thabs la mkhas pa ste/ chos thams cad byang chub kyi rjes su song bar mthong ngo / /rigs kyi bu 'di lta ste dper na stong gsum gyi stong chen po'i 'jig rten gyi khams na gang sems can rnams kyi longs spyod du mi 'gyur ba de med do//rigs kyi bu de bzhin du byang chub sems dpa' thabs la mkhas pa yang dmigs pa gang ci yang rung / byang chub la phan 'dogs par gyur pa ma yin par mthong ba med do zhes rgya cher 'byung ngo //de bzhin du mdo sde mtha' yas pa las byang chub sems dpa' rnams kyi thabs dang shes rab kyi tshul sgrub pa bstan to/ /de la bdag nyid sbyin pa la sogs pa bsod nams kyi tshogs la brtson 'grus rtsom mi nus su zin kyang / gzhan dag la de skad du bstan pa ni mi rigs so//de ltar byas na bdag dang gzhan la 'khu ba byas par 'gyur ro/ /de ltar byang chub sems dpa' ci nas kyang yang dag par so sor brtag par bya zhing sbyin pa la sogs pa bsod nams kyi tshogs mtha' dag bsgrub par bya zhes rigs pa dang lung gis bstan pa yin no/ /de'i phyir rtog pa dang ldan pas thos pa nyung ba mngon pa'i nga rgyal can rnams kyi tshig dug bzhin du spangs la/slob dpon klu sgrub la sogs pa skye bo mkhas pa'i tshig bdud rtsi'i rjes su 'jug pas sems can mtha' dag la snying rje chen po bskyed nas / sgyu ma mkhan bzhin du phyin ci log tu ma gyur pas bla na med pa yang dag par rdzogs pa'i byang chub tu yongs su bsngos pa'i sbyin pa la sogs pa'i dge ba'i spyod pa mtha' dag dang /'gro ba ma lus pa gdon pa la mngon par brtson par bya ste/ ji skad du 'phags pa chos yang dag par sdud pa las/ dper na sgyu ma'i mkhan po zhig /sprul pa thar bar bya phyir brtson //des ni snga nas de shes pas/ /sprul pa de la chags pa med/ /srid gsum sprul pa 'dra bar ni/ /rdzogs pa'i byang chub mkhas pas shes/ /'gro ba'i ched du go bgos te/ /'gro ba de ltar snga nas shes/ /zhes 'byung ba lta bu'o/ /de ltar thabs dang shes rab rtag tu gus par bya ste/goms par byas pa de'i sems kyi rgyud rim gyis yongs su smin pa na gong nas gong du shin tu rnam par dag pa'i skad cig 'byung bas yang dag pa'i don la bsgom pa rab kyi mthar phyin par gyur na 'jig rten las 'das pa'i ye shes rtog pa'i dra ba mtha' dag dang bral ba/chos kyi dbyings shin tu gsal bar rtogs pa/ dri ma med cing mi g.yo ba rlung med pa'i mar me dang 'dra ba 'byung ste/ de'i tshe dngos po'i mtha' la dmigs pa thob par 'gyur ro/ /sa dang po yang thob pa yin no/ /mthong ba'i lam la yang zhugs pa yin no/ /de de'i gong ma'i sa rnams yongs su sbyangs nas rim gyis gser bzhin du sgrib pa bsags pa ma lus pa med par 'gyur la/chags pa med pa dang / thogs pa med pa'i ye shes thob nas yon tan ma lus pa'i gzhi sangs rgyas kyi sa thob par 'gyur te/ dgos pa yongs su grub pa la dmigs pa yang thob pa yin no//de lta bas na sangs rgyas thob par 'dod pas dbu ma'i lam la mngon par brtson par bya'o/ /de ltar dbu ma'i lam bshad pas/ /bdag gis bsod nams gang thob pa/ /de yis skye bo ma lus pa/ /dbu ma'i lam ni thob par shog /dam pa phrag dog la sogs dri ma thag bsrings pa/ /yon tan rnams kyis mi ngoms chu yi mtsho 'dra dag /rnam par phye nas legs par bshad rnams 'dzin byed de/ /ngang pa rab dga' chu la 'o ma len pa bzhin/ /de lta bas na mkhas rnams kyis/ /phyogs ltung dkrugs yid ring spongs la//byis pa las kyang legs bshad pa/ /thams cad blang ba kho nar bya/ /bsgom pa'i rim pa slob dpon A tsaR+ya ka ma la shI las tha mar mdzad pa rdzogs so// //rgya gar gyi mkhan po pradz+nyA warma dang / zhu chen gyi lo tsA ba ban+de ye shes sde la sogs pas bsgyur cing zhus te gtan la phab pa'o/