16b3 /[ ]@#/ /rgya gar skad du/ bo d+hi tsit+ta b+hA ba na/ bod skad du/ byang chub kyi sems bsgom pa/ sangs rgyas la phyag 'tshal lo/ /byang chub kyi sems kyi rnam par 'grel pa bshad par bya ste/ bcom ldan 'das kyis chos thams cad
16b4 sems kyis bsgrubs pa'o/zhes gsungs pa de nyid kyi phyir re zhig sems kyi rang bzhin ci zhes brtag par bya'o/ /dngos po thams cad dang bral ba/ /phung po khams dang skye mched de/ /gzung dang 'dzin pa spangs gyur pa/ /chos bdag med pa mnyam nyid pas/ /rang sems gdod nas ma
16b5 skyes pa//stong pa nyid kyi rang bzhin no/ /zhes gsungs pa'i tshig 'di'i don ci zhe na/ dngos po thams cad ces pa'i dngos po'i sgras bdag la sogs pa brjod do/ /'di skad bshad pa yin te/ bdag dang sems can dang srog dang gso ba dang skyes bu dang gang zag dang shed las skyes dang shed
16b6 bu dang byed pa po dang tshor ba po la sogs pa'o//de ni sems kyi rang bzhin ma yin te/ ci'i phyir na/ de rnams nyid la bdag la sogs pa'i bya ba'i mtshan nyid yod pa ma yin pa'i phyir ro/ /de ltar re zhig bdag la sogs pa dngos por yod pa ma yin na de sems kyi rang bzhin yin pa
16b7 lta ci smos/de'i phyir/ dngos po thams cad dang bral ba/ /phung po khams dang skye mched de/ /sems kyi rang bzhin ma yin par 'gyur ro zhes gsungs pa/ phung po khams dang skye mched de/ /gzung dang 'dzin pa spangs gyur pa'o/ /'di ltar phung po la sogs pa nyid dngos por
17a1 don dam par mi dmigs na de sems kyi rang bzhin yin pa lta ci smos/phung po ni rang bzhin ma yin te/ ci ltar na re zhig gzugs la sogs pa ni phung po rnams kyi rang bzhin ma yin pa'i phyir ro/ /gzugs kyi phung po ni re zhig 'byung ba dang 'byung ba
17a2 las gyur pa'i rang bzhin no//'byung ba rnams ni sa dang chu dang me dang rlung gi khams rnams so/ /'byung ba las gyur pa rnams ni gzugs dang sgra dang dri dang ro dang reg bya rnams so/ /sa la sogs pa'i 'byung ba 'di rnams dang 'byung ba las gyur pa 'di rnams re re'am so
17a3 so'i dngos po mi dmigs so//gang na gcig yod pa de na cig shos kyang ngo zhes pa de'i phyir gzugs tsam mo/ /dge slong dag gzugs kyi phung po ni gzugs kyi phung pos stong ngo zhes bcom ldan 'das kyis gsungs pa'i phyir shing med na grib ma med pa bzhin no/ /de ltar na
17a4 gzugs yongs su ma grub po//de bzhin du tshor ba'i phung po yang yongs su ma grub ste/ ji ltar na tshor ba rnam pa gsum ste/ bde ba dang sdug bsngal dang bde ba yang ma yin sdug bsngal yang ma yin pa'o/ /'di dag phan tshun ltos pa nyid kyi phyir te/ sdug bsngal la ltos nas
17a5 bde bar btags so//gang chos 'ba' zhig gi rang bzhin nyid kyang nye bar mi dmigs te/ mo gsham gyi bu bzhin de ni rdzas su med pa nyid do/ /ring po dang thung ngu bzhin nyams su myong ngo / /yang tshor ba rnam pa gnyis te/ lus kyi dang sems kyi'o/ /lus kyi ni re zhig
17a6 gzugs kyi phung pos bsdus pa'i phyir nye bar mi dmigs so//des na lus med pa'i phyir lus kyi tshor ba mi 'grub po/ /sems kyang yul med pa bstan du med pa gnas med pa brtag tu med pa bltar med pa snang ba med pa rnam par rig pa med pa'o zhes bcom ldan 'das kyis gsungs
17a7 na de la tshor ba ci 'dra ba zhig /des na sems med pa'i phyir sems las byung ba'i tshor ba mi 'grub bo/ /dge slong dag tshor ba'i phung po ni tshor ba'i phung pos stong ngo zhes gsungs pa'i phyir tshor ba'i phung po yang yongs su ma grub bo/ /'du shes kyi phung po ni ming tsam nyid kyi phyir med pa nyid do/ /mtshan
17b1 mar 'dzin pa'i bdag nyid ni 'du shes te/de la de bzhin du dngos po yod pa ma yin na gang la mtshan mar 'dzin par byed/ de'i phyir rgyu mtshan med na rgyu mtshan can yang med do zhes dang / dge slong dag 'du shes kyi phung po ni 'du shes kyi phung pos stong ngo zhes gsungs pa'i phyir
17b2 'du shes kyi phung po yang yongs su ma grub bo//'du byed kyi phung po yang de bzhin du snying po med pa'i phyir te/ ci ltar snying po med ce na/ tshogs pa tsam nyid kyi phyir te/ tshor ba dang 'du shes dang sems pa dang 'dun pa dang reg pa dang / blo gros dran pa dang yid la byed pa dang mos pa zhes
17b3 bya ba sems las byung ba 'di rnams dang /skye ba la sogs pa mi ldan pa rnams kyang 'du byed kyi phung po nyid du bstan to/ /sems las byung ba'i chos de rnams re re ba'am so sor skye ba yod pa ma yin te/ 'du byed kyi las kyi mtshan nyid kyi phyir med pa nyid do/ /byed pa po med na bya ba
17b4 yang med de/dge slong dag 'du byed kyi phung po ni 'du byed kyi phung po nyid kyis stong ngo zhes gsungs pa'i phyir 'du byed kyi phung po yang yongs su ma grub bo/ /mig dang rna ba dang sna dang lce dang lus dang yid ni rnam par shes pa'i phung po ste/ mig gi rnam par shes pa la sogs pa de rnams
17b5 re re'am so so ba rang bzhin mi dmigs so//de ltar mig la brten nas gzugs rnams la mig gi rnam par shes pa skye ba gzugs kyi phung po nyid yod na mig dang gzugs las skye na/ mig dang gzugs med na ci ltar rnam par shes pa skye/ de ltar re zhig mig gi rnam par shes
17b6 pa skye ba'o//rna ba dang sna dang lce dang lus dang yid kyi rnam par shes pa rnams kyang rigs pa 'di nyid kyis shes par bya'o/ /yid kyi rnam par shes pa ni yid la brten nas chos rnams la yid kyi rnam par shes pa skye ba de yang 'das par gyur pa ni rgyu med pa la ci ltar rnam par shes pa skye/ de
17b7 ltar re zhig 'das pa'i rnam par shes pa ni 'gags pa'o//ma 'ongs pa ni ma thob pa dang / /da ltar byung ba ni gnas pa med do/ /de'i phyir chos gang dus gsum du yang rang bzhin mi dmigs pa de'i yod pa ni ci lta bu zhig yin/ dge slong dag rnam par shes pa'i phung po ni rnam par shes
18a1 pa'i phung po nyid kyis stong ngo zhes gsungs pa'i phyir rnam par shes pa'i phung po yang yongs su ma grub bo//de nyid kyis phung po dang khams dang skye mched nges par bstan pa so so ba bsal zin to/ /phung po med pa nyid kyis de rnams kyi rang bzhin med pa nyid grub bo/ /
18a2 des na phung po dang khams dang skye mched rang bzhin dang bral ba'i phyir sems de gzung ba dang 'dzin pa las rnam par grol ba ste/ sems de'i gzung ba med na 'dzin pa yang med pa'i phyir ro/ /re zhig gzung ba med pa ji ltar zhe na/ ji skad du/ bcom ldan 'das kyis gsang ba pa'i
18a3 bdag po sems ni de bzhin gshegs pa dgra bcom pa yang dag par rdzogs pa'i sangs rgyas rnams kyis ma gzigs mi gzigs gzigs par mi 'gyur ro//gsang ba pa'i bdag po sems ni sngon po ma yin ser po ma yin dkar po ma yin dmar po ma yin btsod ka ma yin shel gyi kha
18a4 dog ma yin ring po ma yin thung du ma yin zlum po ma yin gru bzhi ma yin snang ba ma yin mun pa ma yin bud med ma yin skyes pa ma yin ma ning ma yin/gsang ba pa'i bdag po sems ni 'dod pa'i khams kyi rang bzhin ma yin/ gzugs kyi khams kyi rang bzhin ma yin/ gzugs med pa'i khams kyi rang bzhin ma yin/
18a5 lha dang klu dang gnod sbyin dang dri za dang lha ma yin dang nam mkha' lding dang mi'am ci dang lto 'phye chen po'i rang bzhin ma yin/ mi dang mi ma yin pa'i 'gro ba'i rang bzhin ma yin pa nas ji srid rnam pa thams cad du btsal na mi dmigs so zhes gsungs so/ /de ltar na re zhig gzung ba'i sems de
18a6 med pa yin no//ci ltar 'dzin pa med pa yin zhe na/ de ltar yang bcom ldan 'das kyis gsungs te/ gsang ba pa'i bdag po sems ni nang na ma yin phyi rol na ma yin gnyis ka'i bar na yang mi dmigs na/ de ci ltar 'dzin par 'gyur/ de ltar na gzung ba dang 'dzin pa dang bral ba'o/ /
18a7 de ci'i phyir zhe na/ gsang ba pa'i bdag po sems de ni rang bzhin gyis yongs su dag pa'i phyir ro/ /de'i phyir chos gang rnam pa thams cad du yongs su btsal na rang bzhin mi dmigs pa de ci ltar 'dzin par 'gyur/ de ltar sems ni gzung ba dang 'dzin pa las rnam par grol ba'o/ /chos bdag
18b1 med pa mnyam pa nyid pas zhes pa la/ji ltar chos thams cad bdag med pa de ltar sems kyang ste/ de ltar yang bcom ldan 'das kyis gsungs pa/ chos thams cad ni stong pa'o/ /sems de ni stong pa nyid kyi mtshan nyid do/ /chos thams cad ni dben pa'o/ /sems de
18b2 yang dben pa'i mtshan nyid do//zhes so/ /de'i phyir/ chos bdag med pa mnyam nyid pas/ /rang sems gdod nas ma skyes pa'o/ /gang yang gdod ma nyid nas ma skyes pa skye ba med pa de'i rang bzhin ci 'dra ba zhig ce na/ stong pa nyid kyi rang bzhin no/ /zhes gsungs so/ /stong pa nyid
18b3 kyi rang bzhin ci zhe na/'di lta ste nam mkha'i rang bzhin no/ /de ltar yang bcom ldan 'das kyis gsungs te/ stong pa ni nam mkha'o/ /sems de yang nam mkha' dang mnyam pa'o/ /de'i rang bzhin ni byang chub bo/ /ji ltar nam mkha' rang bzhin med pa ming tsam du skyes pa de ltar sems de
18b4 yang rang bzhin med pa ming tsam du skyes pa'o//de ltar sems ni skye ba dang 'gag pa med par rtogs par bya'o/ /de yang bla na med pa yang dag par rdzogs pa'i byang chub ces bya'o/ /de ltar yang bcom ldan 'das kyis gsungs te/ byang chub gang zhe na/ sems yang dag pa ji lta ba bzhin
18b5 yongs su shes pa ste/de yang bla na med pa yang dag par rdzogs pa'i byang chub bo/ /de la gsang ba pa'i bdag po chos thams cad med cing mi dmigs pa des na bla na med pa yang dag par rdzogs pa'i byang chub ces brjod do/ /de ci'i phyir zhe na/ nam mkha'i mtshan nyid de ni byang chub bo/ /de la
18b6 ni rtogs pa dang rtogs par bya ba 'ga' yang med do//de ci'i phyir zhe na/ byang chub ni nam mkha'i mtshan nyid kyi phyir ro/ /des na rang gi sems yang dag pa ji lta ba bzhin mthong ba'i rjes su thabs kyis sems can thams cad kyi sems la dmigs pa 'byung ste/ kye ma ma la sems can 'di
18b7 dag ni sdug bsngal bar gyur te/gang 'di dag rang gi sems kyi rang bzhin ma rtogs pa/ yang dag pa ma yin pa'i rnam par rtog pa'i gdon gyis zin pa/ 'khor bar sdug bsngal rnam pa sna tshogs so sor nyams su myong bar 'gyur ba ste/ sems can 'di rnams kyis rang gi sems
19a1 kyi chos nyid kyi rang bzhin rtogs par bya ba'i phyir 'bad cing brtsal bar bya'o snyam mo/'di ni snying rje chen pos yongs su zin pa'i rang gi sems sems can thams cad la lhag par gnas pa skye ba ste/ 'di byang chub kyi sems su brjod par bya'o/ /ji skad du/ gang tshe
19a2 nam mkha' mnyam ye shes//byang chub 'byung ba skyes gyur pa/ /de tshe sems ni gzhan don la/ /gcig tu phyogs pa skye bar 'gyur/ /gang de ltar bsgom pa de byang chub kyi sems bsgom pa ste/ de ltar yang bcom ldan 'das kyis/ byang chub sems kyi bsod nams gang / /gal
19a3 te de la gzugs mchis na//nam mkha'i khams 'di kun gang ste/ /de ni de bas lhag par 'gyur/ /zhes gsungs so/ /de ltar byang chub mchog gi spyod pa 'di yang rtsa ba ste/ /gzungs dang so so yang dag par rig pa dang / mtshan dang dpe byad dang sangs rgyas kyi yon tan thams
19a4 cad kyi 'byung gnas yin no//de ltar yang bcom ldan 'das kyis dge slong dag ngas byang chub sems kyi yon tan rjes su bsngags pa las brtsams te bstan na bskal par yang mthas gtugs par mi 'gyur ro zhes gsungs so/ /de'i phyir thams cad mkhyen pa nyid du sems bskyed pa 'di
19a5 ni byang chub sems dpa'i spyod pa'i gzhir gyur pa yin no//de lta bas na 'di la rnal 'byor du bya'o/ /zhes pa slob dpon ka ma la shI la'i zhabs kyis mdzad pa byang chub kyi sems bsgom pa rdzogs so// //zha lu lo tsA ba dge slong d+har+m+ma pA la b+ha dra zhes bgyi bas grwa thang du bsgyur ba'o// //