CLOSE WINDOW

D3903
བོད་ཡིག

@##/ /rgya gar skad du/ mu ni ma ta a laM kA ra/ bod skad du/ thub pa'i dgongs pa'i rgyan/ sangs rgyas dang byang chub sems dpa' thams cad la phyag 'tshal lo/ /thub dbang la 'dud sgrol ma thugs brtser mdzod/ /kwa ye 'jam dbyangs yang dag dgongs su gsol//ma ma 'od zer can ma yid kyi ni/ /rang bzhin bkra shis gnas rnams rgyas par mdzod/ /shes rab pha rol phyin dang snying rje bdud rtsi'i rang bzhin e ma thub pa rnams kyi sku/ /sems bskyed mchog nas mchog tu yongs su gyur pa rab tu mthon por ci yang son gyur pa//gang zhig bar med khams gsum dag tu sa yi dbang phyug rnams kyis kyang ni rgyun du bsten/ /theg pa gang zhig che ba'i gdeng ldan mchog tu 'od 'bar yon tan phreng ba rnams kyis rol/ /thub chen rnams kyi dgongs pa mchog 'di yi/ /rang bzhin 'phags mchog rnams kyis gsal mdzad pa//'jig rten mun pas dkrugs las mi shes pas/ /de phyir de yi snang ba brgyud pa 'di/ /lam bral rnams dang log pa'i lam can dang / /shes rab ldan dang dad dang ldan rnams kyi/ /sems kyi bdag nyid dag pa'i ched du 'di/ /bya ba bdag blo'i dga' ston rang nyid spro//yon tan rin chen rang bzhin rgyan/ /'di las thub pa'i dgongs pa ni/ /snang ba byas pas yang dag pa'i/ /lta ba ci yang ston par byed/ /dam pa ku sha'i rtse 'dra'i blo/ /yon tan rin chen tshong 'dus te/ /de dang rin chen mi len dang / / the tshom za ba'ang bslus pa yin/ /'dir nges par sems can thams cad sgrib pa gnyis spong ba'i skal ba las ma 'das pa kho nar yod de/ de rnams kyang dge ba'i bshes gnyen la sogs pa dang bral bas rang bzhin med pa'i dngos po rnams la phyin ci log tu mngon par zhen pa las/ma rig pa la sogs pa'i nyon mongs pa dang las dang skye ba'i kun nas nyon mongs pa gsum la yang sngon dang phyi ma dang bar ma'i rim pa ma rtogs pa rnams srid pa'i rtse mo nas mnar med pa'i mthar thug pa'i 'khor ba'i khron pa chen po dma' bar rang gi ngang nyid kyis 'og tu 'gro bar zhugs pa rnams rtsol ba las ji ltar yang ldang bar bya ba sdug bsngal gyi sdug bsngal nyid dang /yongs su 'gyur ba'i sdug bsngal nyid dag gis nyin dang nyin du yongs su skyo bar 'gyur ba rnams so/ /de rnams las dang nyon mongs pa'i gzugs brnyan bzhin nges par 'jug cing rab tu g.yo ba'i chu'i nang gi zla ba'i gzugs brnyan ltar rten gyi yul dang lhan cig skad cig so sor mi rtag pa nyid kyis phongs par nges par ltung ba dang /rang bzhin gyis stong par rtogs pa'i byang chub sems dpa' snying rje'i gzhan gyi dbang nyid kyis/ de rnams kyi mi rtag pa nyid kyi phongs pa'i phongs pa lta bu dam pa'i chos bdud rtsi'i bcud phul du byung ba 'byung ba'i rgyu phyin ci log gi rnam par rtog pa mtha' dag gi gnyen po'i mtshan nyid can 'gro ba ma lus pa'i gnyen gyi rang bzhin sangs rgyas nyid thob par 'dod do//des bskul bar gyur pa bdag nyid la ltos pa med pa de ni mtha' gcig tu pha rol la phan pa don du gnyer ba nyid kyis shin tu dka' ba byed cing dus ring por yang tshogs sogs pa'i yongs su ngal ba la 'jug go//dka' ba rnams la rab tu zhugs pas kyang yun ring po nyid kyis tshogs yongs su rdzogs nas nges par thams cad mkhyen pa'i go 'phang thob par byed do zhes pa de'i phyir sangs rgyas kyi chos rnams kyi rtsa ba snying rje nyid dang /snying rje chen po yongs su 'dzin pa nyid las sangs rgyas bcom ldan 'das rnams thams cad mkhyen pa'i go 'phang brnyes nas 'gro ba ma lus pa'i don mdzad cing bzhugs zhes pas bcom ldan 'das rnams mya ngan las 'das pa la mi gnas pa'i yang rgyu snying rje chen po de kho na'o//de gsungs pa/ brtse nyid sa bon 'phel la chu bzhin dang / /yun ring longs spyod gnas la smin pa bzhin/ /zhes pa dang / rnam 'grel du'ang / gang rnams brtse ba chen po pa//gzhan gyi ngor ni bzhugs pa nyid/ /ces so/ /de yang khams gsum na spyod pa'i sems can ma lus pa rnams la mang du goms par byas pa las 'phel bar 'gyur ro/ /de ltar de snying rje goms pa'i stobs las sems can thams cad 'don par dam bca' bas byang chub tu sems skyed par byed do//gang gi phyir snying rje chen po dang ldan pa yang dag par rdzogs pa'i byang chub kyi rigs can gyi byang chub sems dpa' ni pha rol gyi sdug bsngal gyis sdug bsngal ba nyid kyis kye kun dga' bo su zhig sangs rgyas dang chos dang dge 'dun la skyabs su 'gro ba dang / bslab pa'i gzhi lnga rnams yang dag par bzung nas yongs su skyong bar byed na dge ba'i rtsa ba de'i bsod nams gzhal du med pa dang grangs med par nga smra'o/ /nyan thos dang rang sangs rgyas thams cad kyis mya ngan las 'das pa'i mthar thug pa ji srid par gang gis tshad gzung bar mi nus par smra'o zhes pa la sogs pa'i phan yon thos pas yang dag par dga' ba skyes pa/sangs rgyas chos dang tshogs mchog la/ /byang chub bar du skyabs su mchi/ /zhes pas gzugs kyi sku dang chos kyi sku dang / phyir mi ldog pa'i byang chub sems dpa'i dge 'dun gyi skyabs la brten nas/bdag nyid yang dag par rdzogs pa'i sangs rgyas su gyur te/ 'jig rten 'di thams cad sdug bsngal las bton nas yang dag par rdzogs pa'i sangs rgyas nyid la sbyar bar bya'o zhes dbang po rab kyis rab mdor bsdus pas byang chub kyi sems sdom pa'i rang bzhin skyed par byed do//sdom pa 'di yang bla ma sdom pa la gnas pa yang dag par blang ba'i cho ga shes pa nyid gsar bu dang khyim pa'i cha lugs 'dzin pa las kyang blang bar bya'o/ /de med na sangs rgyas dang byang chub sems dpa' rnams mdun na gnas par yid la byas nas blang bar bya'o//de rgyas par ni de bzhin gshegs pa'i sku gzugs mdun du byas te/ kun dga' bo gang su zhig sems rab tu dang bas de bzhin gshegs pa'i ched du gru bzhi'am zla ba phyed pa'i rnam pa'am zlum po'am shing rta'i rnam par maN+Dal byed pa de grangs ji lta ba bzhin/ byang sgra mi snyan dang /shar lus 'phags po dang / nub ba lang spyod dang / 'dzam bu'i gling gi dbang phyug gi bdag por 'gyur bar smra'o/ /lus zhig nas ni grangs ji lta bar sum cu rtsa gsum dang 'thab bral dang dga' ldan dang 'phrul dga' rnams su skye bar ro zhes pa khang bu brtsegs pa'i mdo la sogs pa'i rjes su 'brangs pas/maN+Dal byugs te mchod pa lngas yang dag par mchod nas/ kun dga' bo gang su zhig thal mo sbyar ba byas te/ bcom ldan 'das de bzhin gshegs pa de la phyag 'tshal lo zhes phyag byed par 'gyur ba'i sems can de rnams ngas yongs su gzung ba'o zhes pa la sogs pa'i phan yon bstan pas/phyogs bcu'i sangs rgyas dang byang chub sems dpa' rnams la rab tu dang ba yang dag par skyed cing phyag 'tshal nas bla ma'i mdun du maN+Dal la sogs pa byas shing pus mo btsugs pa'am tsog pur thal mo sbyar bas dma' bar 'dug nas lan gsum du gsol ba gdab par bya'o//rigs kyi bu khyod kyi mdun du bdag byang chub sems dpa'i sdom pa len par 'dod pas/ de blang bar 'os na bdag la thugs brtse bas bdag la byang chub sems dpa'i tshul khrims kyi sdom pa stsal du gsol zhes so//de la bla mas 'di skad lan gsum brjod par bya ste/ khyod byang chub tu smon pa byas sam zhes pa dang / bdag gi mdun du byang chub sems dpa'i tshul khrims kyi bslab pa'i gzhi rnams lan nam zhes pa'o/ /des 'dzin no zhes dam bca' bar bya'o/ /bla ma yis ni de 'di skad brjod du gzhug par bya ste/phyogs bcu'i 'jig rten gyi khams nas 'dus pa'i sangs rgyas bcom ldan 'das rnams dang byang chub sems dpa' rnams bdag la dgongs su gsol/ slob dpon dgongs su gsol/ bdag ming 'di zhes bgyi bas lus dang ngag dang yid kyis sangs rgyas dang byang chub sems dpa' rnams dang pha dang ma'am de las gzhan pa'i sems can rnams la bsgrubs nas skye ba 'di'am srid pa gzhan rnams su sdig pa gang cung zad bgyis pa dang bgyid du stsal ba dang rjes su yi rang ba de dag thams cad bshags so// shes bzhin dran pa mi 'chab po/ /de ltar lan gsum mo/ /bdag ming 'di zhes bgyi ba nyi ma 'di nas bzung nas snying po byang chub la mchis kyi bar du rkang gnyis rnams kyi mchog sangs rgyas bcom ldan 'das thugs rje chen po can thams cad mkhyen pa thams cad ston pa dgra dang 'jigs pa thams cad las 'das pa skyes bu chen po mi phyed pa'i sku can bla na med pa'i sku can la skyabs su mchi'o//'dod chags dang bral ba rnams kyi mchog zhi ba'i chos la skyabs su mchi'o/ /tshogs rnams kyi mchog phyir mi ldog pa'i byang chub sems dpa'i dge 'dun la skyabs su mchi'o/ / 'di ltar lan gsum mo/ /bdag ming 'di zhes bgyi ba sems can gyi khams mtha' yas pa rnams 'khor ba'i sdug bsngal las bsgral ba'i ched dang / gdon pa'i ched dang yongs su bskyab pa'i ched dang thams cad mkhyen pa'i ye shes bla na med pa la rab tu dgod pa'i ched du ji ltar 'das pa dang da ltar byung ba dang ma byon pa'i byang chub sems dpa' de rnams byang chub tu thugs bskyed de/sangs rgyas nyid du gshegs pa dang gshegs par byed pa dang / gshegs par 'gyur ba dang ji ltar sangs rgyas thams cad kyi sgrib pa med pa'i sangs rgyas kyi ye shes dang sangs rgyas kyi spyan gyis mkhyen zhing gzigs pa dang ji ltar chos rnams kyi chos nyid mkhyen nas rjes su mkhyen bzhin du cho ga des bdag ming 'di zhes bgyi ba slob dpon ming 'di zhes bgyi ba'i mdun dang /sangs rgyas dang byang chub sems dpa' thams cad kyi mdun du bla na med pa yang dag par rdzogs pa'i byang chub tu sems bskyed par bgyi'o//de ltar lan gsum mo/ /bdag gis sdig pa bshags pa dang gsum la skyabs su 'gro ba dang byang chub tu sems bskyed pa las skyes pa'i dge ba'i rtsa ba 'di yang bla na med pa yang dag par rdzogs pa'i byang chub tu yongs su bsngo ste/skyob pa med pa skyabs med pa gnas med pa dpung gnyen med pa gling med pa'i 'jig rten du/ skyob pa dang skyabs dang gnas dang dpung gnyen dang gling du 'gyur bar bgyi'o/ /sems can srid pa'i rgya mtsho las ma rgal ba rnams thams cad bsgral bar bgyi'o/ /sgrib pa med pa'i chos kyi dbyings su mya ngan las 'da' bas yongs su mya ngan las ma 'das pa rnams yongs su mya ngan las 'da' bar bgyi'o//dbugs ma phyin pa rnams dbugs dbyung bar bgyi'o/ /'di ltar lan gsum mo/ /bdag ming 'di zhes bgyi ba de ltar byang chub tu sems bskyed pas mtha' yas pa'i sems can gyi khams la ji ltar ma dang pha dang sring mo dang spun dang bu dang bu mo dang gnyen dang snag gi gnyen mtshams gang yang rung bar gnas pa de ltar so sor 'dzin no//so sor bzung nas kyang nus pa ji lta ba dang / stobs ji lta ba dang / snod ji lta ba'i tshad du dge ba'i rtsa ba bskrun du gzhug go/ /'di nas bzung nas gang cung zad sbyin pa ster bar 'gyur ba dang tshul khrims bsrung bar 'gyur ba dang bzod pa phun sum tshogs par byed par 'gyur ba dang / brtson 'grus rtsom par 'gyur ba dang bsam gtan la snyoms par 'jug par 'gyur ba dang /shes rab kyis rnam par dpyod par 'gyur ba dang / thabs la mkhas pa la'ang slob par 'gyur ba de thams cad sems can thams cad kyi don dang phan pa dang bde ba'i ched du'o/ /bla na med pa yang dag par rdzogs pa'i byang chub las brtsams te/ sa chen po la rab tu bzhugs pa thugs rje chen po dang ldan pa de rnams kyi theg pa chen po dang mthun par rjes su 'jug go//de nyid kyi phyir bdag byang chub sems dpa' slob pa'o/ /'di nas bzung nas bdag byang chub sems dpa' zhes par slob dpon gyis gzung du gsol/ de ltar lan gsum mo/ / de ltar bsod nams yongs su bsngo ba sngon ma can 'gro ba yongs su 'dzin pa dang / de bskyab pa'i ched du tshogs sogs pa dang / theg pa chen po dang mthun par rjes su 'brang bar byed du bcug la/ de bzhin gshegs pa'i sku gzugs de nyid kyi mdun du sangs rgyas dang byang chub sems dpa' thams cad la phyag 'tshal nas mkhyen par gsol bar bya ste/bdag gi mdun du/ 'dis byang chub sems dpa'i tshul khrims kyi sdom pa yang dag par blang ba gzung ngo zhes pa'o/ /bla ma de 'dra ba med par rang gis len na/ slob dpon dgongs su gsol zhes pa dang / slob dpon ming 'di lta bu'i mdun las shes pa bzhag nas ji srid du 'di nas bzung nas bdag byang chub sems dpa' zhes par sangs rgyas bcom ldan 'das rnams dang byang chub sems dpa' rnams kyis gzung du gsol zhes pa'i bar du'o//gsol ba'i de ma thag tu sangs rgyas dang byang chub sems dpa' rnams kyis bsngags shing /dge ba mngon par 'phel ba'i ched du 'di la rtag tu dgongs par 'gyur ro/ /de ltar byang chub sems dpa'i sde snod la sogs par gsungs pa'i cho gas dbang po rnon pos sdom pa blang bar bya'o/ /dbang po 'bring po yang kha cig dge ba'i bshes gnyen la sogs pa dang phrad pa'i dbang las de bzhin du kha cig ji srid 'tsho'i dge bsnyen gyi sdom pa la sogs pa gang yang rung ba sngon ma can byang chub sems dpa'i sdom pa len par byed do//dbang po rtul po ni ji srid 'tsho'i dge bsnyen gyi sdom pa la sogs pa gang yang rung ba sngon ma can kho nas so//'di dag gi yang byang chub sems dpa'i sdom pa ji srid 'tsho'i dge bsnyen gyi sdom pa la sogs pa gang yang rung ba med par yang skye ste/ 'on kyang dbang po'i bye brag las de 'dzin pa'i cho ga'i dbye ba rtogs pa'i phyir ro/ /ji ltar ldog pa'i tshul khrims nyid nyes par spyod pa spong ba yang dag par len pa ni dge bsnyen gyi sdom pa dang /dge tshul gyi sdom pa dang dge slong gi sdom pa dang / bsnyen gnas kyi sdom pa zhes pa rnam pa bzhi gang zag gi bye brag nye bar blangs nas yin pa bzhin no/ /de ltar ni gang zag gang lus dang ngag dang yid kyi nyes par spyod pa rnam pa gsum nyid la dga' ba dang bral ba 'dod pa la lhag par chags pa khyim gyi nang na gnas pas kyang dkon mchog gsum la skyabs su song ba la brten nas dang po re zhig ji srid 'tsho'i bar du spang bya lnga spong ba'i bya ba yang dag par len pa'i nges pa bya ste/byang chub kyi bar du dkon mchog gsum la skyabs su 'gro ba'i dge bsnyen gyi sdom pa dang / byang chub kyi sems las gzhan yang dag par blangs pa ni ji srid 'tsho ba yin pa'i phyir phyis med de rten zhig pa'i phyir dang rten gzhan gyi gzhan du sbyor ba mi rigs pa'i phyir dang dran pa mi srid pa'i yang phyir ro//de ltar 'di goms pa rim gyis 'dod pa las sems dben par 'gyur ba ni spang bya thams cad dang mi tshangs par spyod pa las kyang ldog par spro bas dang por lnga kho na spong ba gzung bar bya'o/ /gang 'dod pa las dben par spyod pa de ni khyim nas byung ste mi tshangs par spyod pa'ang spangs shing rab tu byung ba bya'o//de la rab tu byung ba dang bsnyen par rdzogs par gdags te/ ji skad du bcom ldan 'das kyis gsungs pa/ skra dang kha spu bregs nas gos ngur smrig gon te yang dag pa nyid du dad pas khyim nas khyim med par rab tu 'byung zhes so//'dis dge slong gi phun sum tshogs pa rnam pa bzhi yongs su gzung ngo / /'on te zhes pa'i bar gyis cha lugs phun sum tshogs pa ste/ cha lugs 'di nyon mongs pa dang nye ba'i nyon mongs pa dang mi mthun pa'i phyir khyim pa'i cha lugs las phun sum tshogs pa'o/ / yang dag pa nyid du zhes pa ni las phun sum tshogs pa ste/ gsol ba'i las la sogs pas yang dag par rab tu byung gi bsnyen par ma rdzogs pa'am rang gis rtags gzung ba ma yin no/ /dad pas shes pas bsam pa phun sum tshogs pa ste/ bu lon gyis mnar bas ma yin/ 'jigs pas mnar bas ma yin rgyal po'i chad pa'i ched du ma yin no//khyim nas zhes pa la sogs pa ni gnas phun sum tshogs pa ste khyim pa'i gnas ni khyim mo/ /dog po de las gnas 'di phun sum tshogs pa ste khyim med par shing drung la sogs pa'o/ /rab tu byung ba yang rnam pa gsum ste gsol ba'i las la sogs pas yang dag par blangs pas thob pa dang rtogs pa yod na chos nyid kyis thob pa dang sprul pas nges par bstan pa can rnams so//bsnyen par rdzogs pa ni rnam pa bcu'o zhes 'dul bar bye brag smra ba'i 'dod pa ste 'chad par 'gyur ro/ /gang nyes par spyod pa dang 'dod pa las dben pa dang bral ba de ni nyin zhag tsam du yang nyes par spyod pa dang /'dod pa las dben pa'i ngo bo bsnyen gnas yang dag par len pa la sbyar bar bya'o/ /de bzhin du 'ga' zhig nyin par tsam du 'am mtshan mo tsam du ste/ gzhan gyi bud med la rtse ba dang shan pa rnams mtshan mo dang nyin par spong bar spro ba med pa'i phyir ro//rnam pa 'di lta bu'i gang zag rnams nyid rjes su gzung ba'i ched du zhi ba dang rgyas pa la sogs pa de dang de la bsnyen gnas la gnas par bya'o zhes rtog pa'i cho gar gsungs pa 'ang bdag nyid kyis 'di rnams ma yin te mthong ba'i 'bras bu 'dod pas kyang tshul khrims kyi sdom pa la 'jug go zhes pa'o//de nyid kyi phyir dge bsnyen yang 'dod pa las dben pa goms pa'i don du tshigs mtshams rnams dang cho 'phrul gyi dus su'ang res 'ga' bsnyen gnas kyi sdom pa yang dag par len du gzhug go/ /spro ba dang ldan pas ni zla phyed dang zla ba la sogs pa ste rim gyis goms pas ji srid 'tsho ba'i bar du'ang zhes pa'o//ma ning la sogs pa'i gang zag rnams la ni rang bzhin nyid kyis sdom pa skye ba ma yin la sdom pa ma yin pa yang ma yin te tshwa sgo can gyi zhing rnams la 'bru dang rtswa bzhin no/ /gang mo'i dbang po dang ldan pa de'ang skal ba can nyid do//don dam par pho dang mo 'di dag gi sdom pa la khyad par cung zad med mod gzhan du rtags dang rten dang ming tha dad pa las so/ /spong ba yang dag par len pa 'di'ang bla ma sdom pa len pa'i cho ga la mkhas pa yang dag par len par 'dod pa'i sdom pa can las bya ste so sor thar pa'i sdom pa ni pha rol gyi rnam par rig byed las 'dod pa'i phyir ro//rkyen yod na'ang pha rol la ltos pas mi 'da' ba'i don du'o/ /'di ltar bla mas gsungs pa'i rjes su brjod par bya ste/ bdag ming 'di lta bu dus 'di nas bzung ste ji srid 'tsho'i bar du sangs rgyas la skyabs su mchi'o//bdag ming 'di lta bu dus 'di nas bzung ste ji srid 'tsho'i bar du chos la skyabs su mchi'o/ /bdag ming 'di lta bu dus 'di nas bzung ste ji srid 'tsho'i bar du dge 'dun la skyabs su mchi'o/ /'di ltar lan gsum yang ngo / / skyabs gsum yongs su 'dzin pa'i dge bsnyen du gzung du gsol zhes pa'o/ /de'i rjes su bdag ming 'di lta bu dus 'di nas bzung ste ji srid 'tsho'i bar du srog gcod pa spong ste srog gcod pa las slar ldog go/ /de bzhin du ma byin par len pa dang 'dod pa las log par g.yem pa dang brdzun du smra ba dang 'bru'i chang dang sbyar ba'i chang myos par 'gyur ba bag med pa'i gnas las slar ldog go//'di ltar lan gsum yang ste/ deng nas bzung nas dge bsnyen du gzung du gsol zhes pa'o/ /de ltar 'di yan lag gsum yongs su rdzogs pa dang / yan lag lnga yongs su rdzogs pa'i dge bsnyen du 'gyur te/skyabs gsum yongs su 'dzin pa'i dge bsnyen du bdag slob dpon gyis gzung du gsol zhes pa dang / de bzhin du gsum la skyabs su song ba bslab pa'i gzhi lnga yongs su 'dzin pa'i dge bsnyen du bdag slob dpon gyis gzung du gsol zhes pa rnam pa gnyis 'dul bar gsungs pa'i phyir ro//rgyu bzhis skyabs su 'gro bar rig par bya ste yon tan shes pa dang khyad par shes pa dang khas blangs pa dang ston pa gzhan bstan pa ma yin pas so/ /de rnams kyis snga ma snga ma phyi ma phyi ma'i rgyu ste gang gi phyir yon tan dang khyad par shes pa dag las srog gis kyang dam pa'i chos khas len pa la sangs rgyas la skyabs su 'gro'o//bsnyen gnas kyi sdom pa nyin zhag pa ni rgyun du ba ma yin pa'i rgyan spangs te nyi ma shar ba na sngar bzhin du gzung bar bya'o/ /bdag ming 'di lta bu dus 'di nas bzung nas sang nyi ma ma shar gyi bar du srog gcod pa spong ste/srog gcod pa las slar ldog go/ /de bzhin du ma byin par len pa dang / mi tshangs par spyod pa dang brdzun du smra ba dang 'bru'i chang dang sbyar ba'i chang myos par 'gyur ba bag med pa'i gnas dang khri stan mthon po dang khri stan chen po dang /dri dang / phreng ba dang / byug pa dang kha dog 'chang ba dang / gar dang glu dang rol mo dang rtse 'jo dang dus ma yin pa'i kha zas las slar ldog go/ /dgra bcom pa rnams kyi tshul khrims yon tan brgyad kyis brgyan par bdag bgyid do zhes pa'o/ /'di ltar lan gsum yang ngo //de ltar 'di bsnyen gnas kyi sdom pa yan lag brgyad par 'gyur ro/ /'di yis 'phags pa rnams dang nye bar gnas so zhes pas bsnyen gnas su brjod par bya'o/ /gso sbyong zhes kyang ste/ dge ba'i sa bon gso ba 'dzin par byed ces byas nas so/ /gang gso ba'i don ni mdo las nyin zhag pa'i gso sbyong gi sdom pas 'dod pa na spyod pa'i lha drug gang 'dod pa der skye'o zhes so//nyin par tsam yang dag par len na ni dus 'di nas bzung ste ji srid nyi ma nub kyi bar du zhes dus yongs su bcad par bya'o/ /'di nyid la dgongs nas dus 'di nas bzung nas mtshan mo byung gi bar dang ji srid sang nyi ma shar gyi bar du zhes gsungs so//gso sbyong gi sdom pa kho na ji srid 'tsho ba pa ni go mi'i sdom pa'o zhes pa gdams ngag go/ /'di nyid gang mi bya bar nges pa'i mtshan nyid can de so sor thar pa'i sdom pa'o/ /'di ltar gang 'di yang dag par len pa po g.yengs pa dang sems med pa la'ang 'phangs pa'i dus ji srid par dge ba rjes su 'gro ba'i rgyun yongs su gyur pa'i khyad par skye ste/gang las 'di mi byed par dam bca' ba yang dag par dran nas bkag pa'i las las ngo tshas lus ngag dag yang dag par sdom mo//gang yongs su smin pa thob pa las phyis phun sum tshogs pa rnams skye ba'o/ /rnam par rig byed ma yin pa zhes dngos por gyur pa'i chos gzhan 'ga' yang med de/ rnam par rig byed ma yin pa ni khas blangs nas mi byed pa tsam yin pa nyid kyi phyir ro/ /mi byed pa yang bya ba 'geg pa ste 'di yang cung zad kyang ma yin no//'das pa'i 'byung ba chen po rnams rgyur byas nas 'dogs na'ang de rnams kyang med pa nyid kyi phyir dngos por 'gyur ba med do/ /bye brag tu smra ba rnams ni gzugs gang chos kyi skye mched kyis yang dag par bsdus pa bstan du med la thogs pa med pa yid kyi rnam par shes pa tsam gyis rnam par shes par bya ba sdom pa dang sdom pa ma yin pa dang bar mar gnas pa rnams kyi dge ba dang mi dge ba dang gnyis ka'i rgyun gyis ngo bo de rnam par rig byed ma yin pa'o//de la gzugs 'ga' zhig sems kyi rjes su 'brang ba ste/dper na bsam gtan dang zag pa med pa'i sdom pa'i rang bzhin zag pa dang bcas pa dang zag pa med pa'i bsam gtan gyi sems thob pa las thob la de'i sems gtong bas gtong ba bzhin no/ /'ga' zhig gzhan gyi rig byed la sogs pas yang dag par byung ba ste/ dper na so sor thar pa sdom pa'i gzugs lta bu'o//de la lus kyi rnam par rig byed ni de las dmigs pa'i sems pas bskyed pa'i lus kyi dbyibs kyi khyad par de lta de lta'o/ /ngag gi rnam par rig byed kyang de la dmigs pa'i sems pas bskyed pa tshig gsal por 'don pa'o/ / de dang 'di gnyis ka kun nas slong ba'i sems rnam par shes par byed pa'i phyir rnam par rig byed do/ /rnam par rig byed dang 'dra ba ni chos gang 'phen par byed pa dang mtshams sbyor bar byed pa'i 'byung ba chen po rnams rgyur byas nas rab tu 'jug pa ste/ rnam par rig byed ltar pha rol la rnam par rig par byed pa ma yin pa man ngag tsam las rtogs par bya ba 'ba' zhig ba dge slong la sogs par rnam par gzhag pa'i rgyu 'di ni rnam par rig byed ma yin pa rdzas su yod pa gzugs kyi phung pos yang dag par bsdus pa ste de dang 'dra ba dgag pa byas pa'i phyir bram ze ma yin pa bzhin no zhes zer ro//de mi rigs so zhes gzhan du dpyad zin to/ /lung gi don ni kho bo cag gis rnam pa gzhan du yang nus pa'i phyir spros pas chog go/ /'o na sems can dang yan lag dang yul dang dus nges pa dang bcas pas yang dag par blangs pa sems can 'di las spang ngo //yan lag 'di dang yul 'di dang zla phyed dang zla ba'am yul la sogs pa'i dus las gzhan du'o zhes pa de cir 'gyur zhe na/ legs par spyad pa tsam du 'gyur te rnam pa thams cad du sdig pa spong ba ma yin pa'i phyir ro/ /de bzhin du sdom pa ma yin pa can rnams kyi de'i rigs can rnams bya ba la rab tu sbyor ba dang /gzhan rnams de'i las de khas blangs pa las mi dge ba rjes su 'gro ba'i rgyun yongs su gyur pa'i khyad par bya bar nges pa'i mtshan nyid can sdom pa ma yin pa skye la/ gang zhig 'di rnams la rtag tu 'jug pa ste gang las thob pa yongs su smin pa las phyis phun sum tshogs pa min pa rnams skye ba'o//'di la dus yongs su bcad pa ci yang med de yang dag par blangs pa med pa'i phyir ro/ /sdom pa ma yin pa yang dag par len pa ni 'ga' yang med la bsam pa ngan pa can ni bya ba de dang mngon par 'brel pa las sdom pa ma yin pa so sor thob po//gal te 'ga' zhig yang dag par blangs par gyur pa nyid na de'i tshe sdom pa ltar dus nges pa'o zhes pa'o/ /sdom pa ma yin pa nyes par spyod pa de 'di rnams la yod pas sdom pa ma yin pa can rnams so/ /de rnams kyang shan pa dang bya gag pa dang phag pa dang nya pa dang bya dang ri dgas rngon pa dang /rkun po dang gshed ma dang btson srung ba dang sbrul 'ching ba dang glang po che 'dul ba dang khyi 'chor ba rnams dang rgyas 'chor ba rnams dang rgyal po'i chad pa pa dang shags zan pa rnams ni don gyi sdom pa ma yin pa can no/ /de las gzhan pa rnams sdom pa can ma yin la sdom pa ma yin pa can ma yin te/'di rnams kyi dge ba dang mi dge ba'i las ni sdom pa ma yin la sdom pa ma yin pa'ang ma yin no/ /de yang zhing dang bsam pa dang bya ba nges pa dang dngos po yongs su 'dzin pa dang 'bad pas 'jug pa las skye ste/'di rnams spangs pa las ldog go/ /de la zhing las ni dper na dkon mchog gsum gyi ched du gtsug lag khang bzhengs pa la sogs pa rdzas byung ba'i bsod nams bya ba'i dngos po rnams las bsod nams kyi phung po ji srid du 'di rnams rgyun mi 'chad pa'i bar du nye bar skye la nye bar skyes pa yang mi zad pa lta bu ste/ji skad du khang bu brtsegs pa'i mdor gsungs pa/ kun dga' bo sangs rgyas la bskrun pa'i dge ba'i rtsa ba 'khor bar mi zad de mya ngan las 'das pa'ang thob par byed do/ /de bzhin du chos la bskrun pa dang dge 'dun la bskrun pa yang ngo zhes so//de bzhin du chom rkun pa'i don du skyed tshal la sogs pa rnams byed pa las bsod nams ma yin pa'i phung po ji srid de rnams rgyun mi 'chad kyi bar du ste gang gi phyir chom rkun pa rnams ni de la brten nas grong gi sems can la sogs pa 'phrog par byed pas so//de bzhin du rdzong gi khang pa byed pa la sogs pa rig par bya'o/ /bsam pa las de bzhin gshegs pa la sogs pa'i bsod nams dkon mchog gsum la skyabs su 'gro ba las ji srid du bsod nams rgyun mi 'chad la/ bzlog pas bsod nams ma yin pa lta bu'o/ /bya ba nges pa las ni dper na dam pa'i chos ma bklags par bza' bar mi bya zhes bya ba la sogs pa'i bsod nams te bya ba rnam par chad pa las kyang ldog pa dang srog gcod pa la sogs pa la ni bya ba nges pa las bsod nams ma yin pa ste nges pa btang ba dang bya ba chad pa las kyang ldog pa lta bu'o//dngos po yongs su 'dzin pa las ni dper na 'ga' zhig mchod pa'i ched du mchod rten la sogs pa yongs su 'dzin pa dang / cig shos pha rol la gnod pa'i ched du rgya dang 'khrul 'khor la sogs pa lta bu ste de dag gis bsod nams dang bsod nams ma yin pa dag de yongs su btang ba las ldog go//'bad pas 'jug pa la ni/ dper na 'ga' zhig dad pa'i shugs sam nyon mongs pa'i shugs las dge ba dang mi dge ba'i las 'bad pas byed de de ji srid shugs rjes su 'jug pa de srid du bsod nams dang bsod nams ma yin pa yang ngo zhes pa lta bu'o//de ltar sdom pa can dang sdom pa ma yin pa can dag gis bsod nams dang bsod nams ma yin pa rjes su 'gro bar rig par bya'o/ /de ltar na sdom pa dang sdom pa ma yin pa dag 'phangs pa'i dus las tshu rol du gtong ba med dam zhe na/yod de sdom pa de srid du yang dag par blangs pa dang 'gal ba'i rnam par rig byed skyes na ste/ mtshan nyid ji lta bar bslab pa phul ba dang tshul khrims dang mi mthun pa mi gsod pa dang rdzas yongs su rdzogs pa rku ba dang gzhan gyi bud med la bgrod pa dang / rang gis rtogs pa'i brdzun 'phags pa'i rtogs pa dang ldan par go bar byed pa'i bdag nyid ltung bar 'gyur ba'i chos spyod pa las dang /mtshan gnyis byung ba las te rten rnam par 'khrugs pas dbang po ma yin pa thob pa'o/ /bsnyen gnas kyi sdom pa ni rten chad pas shi ba las gtong bar 'gyur ro//sdom pa ma yin pa ni sdom pa yang dag par blangs pa dang rten rnam par 'khrugs pa las so/ /sdom pa yan lag gsum pa zhes pa la sogs pa gang gsungs pa de la gang gi yan lag 'di rnams yin pa sdom pa gzhan 'ga' zhig ni med do 'o na ci zhe na/ 'di'i yan lag gsum rnams yin pas yan lag gsum tshogs pa sdom pa ste de tshogs pa'i cha shas rnams ni yan lag rnams te dper na dpung gi tshogs yan lag bzhi pa zhes pa lta bu'o/ /de bzhin du sdom pa yan lag lnga pa la sogs pa la yang ngo / /yan lag lnga ni srog gcod pa zhes pa la sogs pa rnams su'ang rig par bya'o//'dir gang dge bsnyen gyi sdom pa yan lag lnga pa yang dag par blangs pa de mi dge ba bcu'i las kyi lam rnams kyang spangs par 'gyur te/ brdzun du smra ba spangs pas ni phra ma dang tshig rtsub pa dang ngag 'khyal pa rnams spang bar bya ba yin te/'di ltar 'di dag gi legs par spyod pa dang ldan par 'gyur ro/ /'o na brdzun du smras pa kho na las ldog par brjod kyi/ lus kyi nyes par spyod pa thams cad so so ba las bzhin du ngag gi nyes par spyod pa thams cad las ma yin pa ci ltar zhe na/ lus kyi nyes par spyod pa gsum ni so sor 'jig rten na mtha' gcig tu smad pa yin la ngag gi nyes par spyod pa rnams ni de lta ma yin no//'di rnams las brdzun du smra ba nyid shin tu smad pa dang ches rags pa yin la de las log pa ngag gi nyes par spyod pa'i las lam las brgal ba ni rang nyid gzhan rnams las ldog par spro la mngon par 'dod pa yang nyes par spyod pa thams cad las ldog go//ji skad du gsungs pa/ 'dir rigs kyi bu'am rigs kyi bu mo srog gcod pa dang ma byin par len pa dang 'dod pas log par spyod pa dang / brdzun du smra ba dang phra ma dang tshig rtsub po dang ngag 'khyal pa dang brnab sems dang gnod sems dang log par lta ba'ang so sor spangs par 'gyur ro zhes so//lus dang ngag gi nyes par spyod pa spong ba 'di yang 'dod chags med pa dang zhe sdang med pa dang gti mug med pa rnams kyis kun nas bslang ba'o/ /de las brnab sems la sogs pa yid kyi nyes par spyod pa las ldog par grub po//brnab sems dang gnod sems dang log par lta ba rnams 'dod chags dang zhe sdang dang gti mug gi rang bzhin yin pa nyid kyi phyir 'dod chags med pa la sogs pa rnams yod na brnab sems med pa la sogs pa rnams grub po zhes pa bcom ldan 'das kyi dgongs pa'o//de ltar na dge ba bcu po 'di yang las lam gyis bsdus par 'gyur te/ de la brnab sems med pa la sogs pa gsum ni las kyi lam yin pa'i phyir las lam ste/ brnab sems med pa la sogs pa rnams las kyi rang bzhin ma yin pa'i phyir ro//de dang mtshungs par ldan pa can gyi sems pa de rnams rgyu bas rgyu la de rnams 'gro bas 'gro ste/ de'i dbang gis de ltar 'du byed pa'i phyir ro/ /srog gcod pa spong ba la sogs pa bdun ni las kyang yin la las kyi lam yang yin pas las lam ste de kun nas slong ba'i sems pa ni de rnams la brten nas 'jug pa'i phyir ro//las kyi lam yin pa dang las dang las kyi lam yang yin pas na las lam rnams te rang bzhin 'dra bas ma yin pa rnams kyang gcig lhag tu bstan pa'i phyir ro/ /gang rnams brnab sems med pa la sogs pa rnams kyang sems pas bskyed pa'i phyir las kyi rang bzhin te lus ngag gi las dang 'dra ba de rnams kyi ni de rnams las kyang yin te lus ngag dang yid kyi las yin pa nyid kyi phyir las kyang yin la lam yang yin pas las lam ste rang bzhin 'dra ba nyid kyi gcig lhag go//'di rnams las gzhan bcu ni mi dge ba'i las kyi lam ste rang bzhin gyi kha na ma tho ba dang bcas pa'o/ /myos par 'gyur ba 'thung ba ni bcas pa'i kha na ma tho ba dang bcas pa ste myos 'gyur 'thungs pa las kun du rmongs pa las dang dran pa nyams pa las gzhan rnams kyang mi srung bar 'gyur bas gzhan srung ba'i don du bcas pa'i kha na ma tho ba chang gcig pu nyid las ldog par gsungs so//myos 'gyur 'thung ba bcas pa'i kha na ma tho ba zhes pa 'di ci las she na/ rang bzhin gyi kha na ma tho ba'i mtshan nyid med pa'i phyir ro/ / rang bzhin gyi kha na ma tho ba de ni sems nyon mongs pa dang ldan pa kho nas lhag par spyad par bya ba yin la gang rang nyid las mi 'dod pa'i rnam par smin par 'gyur gyi der gzhan la ltos pa ci yang med de gsod pa la sogs pa bzhin no/ /chang ni de lta ma yin te bkres skom la sogs pa bsal ba'i bsam pa kho nas 'di bza' btung la sogs pa bzhin nye bar sbyor ba'i phyir ro//de nyid kyi phyir btsun pa legs 'ongs dgra bcom pas kyang rang gis chang 'thungs te 'di nyid las brtsams nas chang 'thung ba spong ba'i bslab pa'i gzhi bcas so/ /chang 'thung ba ni rang nyid las mi 'dod pa'i rnam par smin pa'i ched du rnam par brtag pa yang ma yin gyi ji srid du 'di de las dran pa nyams pas nyes par spyad pa la spyod pa dang nyes par spyod pa la lhag par spyod pa'i rgyu mtshan du 'gyur ro//de nyid kyi phyir thal ches pa yongs su spong ba'i don du ku sha'i rtse mos kyang 'thung ba spang bar bya'o//gzhan yang rang bzhin gyi kha na ma tho ba mi dge ba bcu'i las kyi lam ston pa na lus kyi nyes par spyod pa rnams su chang 'thung ba mi ston pa ci ltar yin zhing dge ba ldog pa'i bslab pa'i gzhi rnams su'ang phyi nas logs su spong ba ston pa ci ltar yin/gang gi phyir 'di lus kyi nyes par spyod pa rags pa'i phyir dang / rang bzhin gyi kha na ma tho ba nyid kyi phyir yang dge ba dang mi dge ba ston pa na lus kyi nyes par spyod pa dang spong ba 'chad pa dag nyid la bstan par rigs shing las lam bcu gcig tu bstan par yang ste de ltar ni med do//de'i phyir chang 'thung ba ni bcas pa'i kha na ma tho ba kho na'o/ /mi dge ba bcu po 'di rnams kyi yang mtshan nyid la sogs pa tshul khrims kyi pha rol tu phyin par 'chad par 'gyur ro/ /'di'i yang nyes par byas pa'i bdag nyid kho na ni ltung ba'i rigs so/ /de yang rnam pa gsum ste ltung bar 'gyur ba ni gang gis 'di sdom pa nyams par 'gyur ba'o//bshags par bya ba ni gang gis pha rol la bshags pas 'di las ldang ba'o/ /bsdam bya ni gang rang nyid kyis bsdams pas ldang ba'o/ /de la ltung bar 'gyur ba las gzhan srog gcod pa la sogs pa chang 'thung ba'i bar dang yan lag ma tshang ba'i ltung bar 'gyur ba'i chos rnams kyang so sor bshags par bya ba ste/rigs kyi bu dgongs su gsol bdag ming 'di lta bu la ji ltar yongs su grags pa'i ltung ba byung bas de bshags par bgyi'o zhes pa mi 'chab po//slan chad kyang sdom par bgyi'o/ /'di ltar gsum zhes so/ /ltung bar 'gyur ba'i chos rnams kyang sdig pa dag pa'i don nyid du bshags par bya ste phung po gsum pa la sogs rab tu gdon par bya'o/ /gzhan gang rnams yan lag ma tshang ba'i srog gcod pa la sogs pa dang phra ma la sogs pa rnams dang /chos gang 'dod pas log par spyod pa rnams la thal ches pa yongs su spang ba'i don du gsungs pa/ de rnams la lhag par spyad pa ni spang ba'i chos te de 'di'i rang nyid kyis bsdam par bya ba kho na ste de slar bdag mi byed do zhes mi byed par sems bskyed pa nyid kyis ldang ba'o//de ltar ltung ba so sor bshags pa dang bsdams nas kyang sngar bzhin du sdom pa yang dag par blang bar bya ste/ slar yang 'di yang dag par len pa la skal ba can yin no/ de ltar dge bsnyen gyi sdom pa yang dag par len pa'i cho ga dang spyod pa brjod zin to//dge tshul dang dge slong gi sdom pa yang dag par len pa'i cho ga dang spyod pa ni kho bos gsal ba'i 'grel bshad dang 'dul ba snang bar gsal bar brjod pa'i phyir 'dir ma bstan to/ /gang zhig dge bsnyen dang dge bsnyen ma dang dge tshul dang dge tshul ma dang /dge slong ma dang / dge slong dang / dge slong ma'i dbye bas ji srid 'tsho ba pa'i so so thar pa'i sdom pa bdun pa rnams las gang yang rung ba'i so so thar pa'i sdom pa la gnas pa nyid kyis byang chub sems dpa'i sdom pa blang bar bya'i gzhan gyis ma yin te/gzhan la byang chub sems dpa'i sdom pa mi skye ba'i phyir ro zhes zer ba de ni theg pa chen po la yongs su ngal ba mang po ma byas pa ste/ gal te so so thar pa'i sdom pa med par byang chub sems dpa'i sdom pa mi skye na ni/ de'i tshe byang chub sems dpa'i sde snod la sogs pa dang de'i rjes su 'brang ba'i gzhung du 'di de'i rtsa bar bshad par 'gyur ro//dgos pa ni gdon mi za bar brjod par bya ba yin te dper na theg pa chen por byang chub kyi bar du gsum la skyabs su 'gro ba lta bu'o/ /'phags pa klu sgrub zhabs kyi dgongs pa'i rjes su 'brang ba'i zla ba grags pas kyang skyabs gsum bdun cu par/dge bsnyen gsum la skyabs 'gro ba/ /de ni sdom brgyad rtsa ba yin/ /rdzogs sangs rgyas chos dge 'dun ni/ /grol bar 'dod pa rnams kyi skyabs/ /thub pa'i dbang po'i sku gnyis dang / / mya ngan 'das dang gang zag brgyad/ /de la gus pas skyabs 'gro gang / /gsum la skyabs su song ba yin/ /shar ri'i lung las dgra bcom gyis/ /byang chub sems dpa' phyag bya ste/ /dkon mchog gsum las phyi rol min/ /sangs rgyas nang du 'dus par dgongs/ / 'bras bu la gnas zhugs pa yi/ /slob pa bdun po rnams kyi sa/ /'phags pa'i lam las rab byung rnams/ /chos mngon pa ru brjod ji bzhin/ /de ltar rgyas pa'i sde snod du'ang / /sa bcu rnams su gsungs pa yis/ /'phags pa'i lam gyi bdag nyid can//de kun 'phags min ji ltar 'gyur/ /re re'i yon tan mthar thug pa/ /nam mkha'i tshad kyi yon tan mchog /byang chub sems dpa' rtag phyag 'os/ /blo ldan rnams kyis skyabs kyang ngo / /zhes so/ /skyabs kyi don dang yongs su skyob pa'i don ci zhe na/ rtag tu nyon mongs tshogs kun dang //nyes par spyod pa thams cad dang / /rga dang 'chi ba dag las kyang / /sangs rgyas nyid ni yongs su skyob/ /'tsho ba rnams ni thams cad dang / /ngan song dang ni thabs min dang / /'jig tshogs theg pa dman las kyang / /de phyir skyabs kyi dam pa'o//'tshe ba thams cad las yongs su skyob pa nyid ni sangs rgyas kyi mthus long ba rnams kyis mig thob po/ /'on pa rnams kyis rna ba'o/ /sems rnam par g.yengs pa rnams kyis rang bzhin du gnas pa'i sems so/ /yams nad rnams zhi'o zhes pa 'di lta bu la sogs pa'o//ngan song las yongs su skyob pa nyid ni sangs rgyas kyi 'od zer gyis der song ba rnams thar bar byed pa'i phyir dang der mi 'gro ba la so sor gnas par byed pa'i phyir ro/ /thabs ma yin pa las ni mu stegs kyi lta ba las slong ba'i phyir ro/ /'jig tshogs las ni theg pa gnyis kyis yongs su mya ngan las bzla ba'i phyir ro//theg pa dman pa las ni theg pa chen po la bgrod pa gcig tu byed pa'i phyir ro/ /sangs rgyas nyid kyang rnam pa thams cad mkhyen pa nyid do/ /de nyid sangs rgyas so de ni byang chub nyid de/ de nyid byang chub kyi lam gyi 'bras bu'o//gzugs kyi sku dag kyang sangs rgyas nyid do/ /lam 'khor lo dang bcas pa chos dkon mchog go/ /de'i rten gzugs kyi sku'i ngo bo phyir mi ldog pa'i byang chub sems dpa'i tshogs ni dge 'dun dkon mchog go/ /gang du chos thams cad las khyad par du 'phags pa nyid kyi phyir bla na med pa'i byang chub ni chos dkon mchog tu rnam par gzhag pa der ni gzugs kyi sku dag kho na sangs rgyas dkon mchog ste de'i tshe lam yang dge 'dun dkon mchog go//sangs rgyas kyi myu gu byang chub sems dpa' ste dngos su na de las gzhan pa med do//'ga' zhig tu byang chub kyi rang bzhin med pa'i cha ni chos dkon mchog go/ /rtogs pa'i cha dang gzugs kyi sku dag ni sangs rgyas dkon mchog go/ /rdo rje lta bu la sogs pa sngon gyi gnas skabs kyi lam ni dge 'dun dkon mchog go zhes rnam par gzhag go//don dam par ni dkon mchog gsum rnams la tha dad ci yang med do/ /phyin ci ma log pa tsam la ltos pa dang bdag med pa nyid kyis kyang zhes pa'o/ /'dir sangs rgyas rnam pa gnyis te/ don dam pa ba ni sku gsum gyis yang dag par bsdus pa'o//tha snyad pa ni sku gdung gi mchod rten dang sku gzugs dang mchod rten dang / byang chub sems dpa'i gzugs te 'di rnams la mchod na sangs rgyas bcom ldan 'das rnams mchod pa'o zhes gsungs pa'i phyir ro/ /mnyam par sems rab tu dang bas rnam par smin pa mnyam par gsungs so//chos kyang rnam pa gnyis te don dam pa ba ni mya ngan las 'das pa'o/ /tha snyad pa ni lam dang sangs rgyas kyi gsung rab dang glegs bam rnams te 'di rnams la mchod na chos la mchod par zhal gyis 'ches pa'i phyir ro/ /dge 'dun yang rnam pa gnyis te/don dam pa pa ni byang chub sems dpa' sa la rab tu zhugs pa rnams dang gang zag brgyad rnams so/ /tha snyad du ni so so'i skye bo rnams kyang ste sde pa bzhi la sogs pa dang dge slong dang dge slong ma rnams so/ /byang chub sems dpa' rnams ni 'di ltar dge 'dun gyis bsdus pa yang ste/de rnams ni sangs rgyas kyi myu gu dang tha snyad pa'i sangs rgyas te rgyu dang 'bras bu'i dngos po rgyun gcig pa'i phyir/ /n+ya gro d+ha'i myu gu dang n+ya gro d+ha'i ljon shing gi rgyun bzhin no/ /nga nyid rgyal po byams pa'i stobs zhes bya ba der gyur to zhes pa la sogs pas skyes rabs rnams su gzhan nyid kyi ming bkag pa'i phyir ro//de nyid kyi phyir bcom ldan 'das byang chub sems dpa' bsnyen par ma rdzogs pa dang khyim pa'i cha lugs 'dzin pa rnams kyang ston par 'du shes pas dge slong dang dgra bcom pa rnams kyis kyang phyag bya'o/ / 'di nyid la dgongs nas 'dul bar gsungs pa/ phyag gi 'os ni gnyis te de bzhin gshegs pa dgra bcom pa yang dag par rdzogs pa'i sangs rgyas dang dge slong rgan po'o zhes so/ /gzhan du na ni de bzhin gshegs pa bzung ba don med par 'gyur te/ dge slong rgan po bzung bas de grub pa'i phyir ro//mdor gsungs pa'ang / rgyu mtshan de la lcags mgar gyi bu tsun da 'gyod par gyur pa mi rung ba kho na'o/ /kun dga' bo de khyod kyis bsal bar bya'o/ /de la 'di skad kyang brjod par bya ste/ bsod snyoms gang yongs su gsol nas de bzhin gshegs pa bla na med pa yang dag par rdzogs pa'i byang chub tu mngon par rdzogs par sangs rgyas pa dang /bsod snyoms gang yongs su gsol nas phung po lhag ma med pa'i mya ngan las 'das pa'i dbyings su yongs su mya ngan las 'das pa'i bsod snyoms de nyid gnyis ka yang 'bras bu mnyam pa med pa'o zhes so//'dis ni byang chub sems dpa' rnams dang sangs rgyas rnams yon gnas mchog tu khyad par med par bstan to/ /bu mo 'od bzang gis theg pa chen po'i mdor yang / 'phags pa mod gal gyi bu chen pos gsol pa/bcom ldan 'das bdag 'di sems dang po bskyed pa'i byang chub sems dpa' nas brtsams te byang chub sems dpa' thams cad la phyag bgyid do zhes gsungs so/ /sde pa'i gzhung du'ang gsungs te/ ji skad du/ dgra bcom pa brgya phrag phyed dang bcu gsum gyis gsol pa/bcom ldan 'das rgyal tshab tu dbang bskur ba dang byang chub sems dpa' thams cad la phyag 'tshal lo zhes dge 'dun phal chen pa'i rig pa 'dzin pa'i sde snod du gsungs so/ /bcom ldan 'das kyis bka' stsal pa/ gang byang chub sems dpa' chos thams cad mnyam pa nyid spros pa med pa'i ting nge 'dzin thob pa de thams cad kun du spyod pa brgyad khri bzhi stong rnams la ji ltar 'dri ba bzhin bdag nyid chos ston to//de nas yang gnas brtan rab 'byor gyis bcom ldan 'das la 'di skad ces gsol to//bcom ldan 'das byang chub sems dpa' rnams kyi rdzu 'phrul ji lta ba de lta yang nyan thos dang rang sangs rgyas rnams kyi yul yang ma lags pas byang chub sems dpa' la phyag 'tshal lo zhes shar gyi ri la gnas pa'i byang chub sems dpa'i sde snod du'o/ /bcom ldan 'das la tshe dang ldan pa kun dga' bos 'di skad ces gsol pa dang /bcom ldan 'das bdag 'phags pa spyan ras gzigs dbang phyug thub pa chen po de la phyag 'tshal lo zhes gangs rir gnas pa rnams kyis skyes pa rabs kyi sde snod du'o/ /gnas brtan pa rnams dang brtags pa pa dang mang du thos pa rnams kyis cho 'phrul chen po'i mdor yang /de nas yang tshe dang ldan pa shA ri'i bus bcom ldan 'das la tshigs su bcad pas mngon par bstod de byang chub kyi sems nye bar blangs nas de ni shin tu chen po yin pas bdag phyag 'tshal lo/ / byang chub kyi sems su gyur pa la phyag 'tshal lo/ bsil bar gyur pa la phyag 'tshal lo zhes gsungs so/ /de nas yang tshe dang ldan pa gang pos bcom ldan 'das la 'di skad ces gsol pa/ byang chub sems dpa' mgon por gyur pa de la phyag 'tshal lo zhes rgyal byed tshal pa rnams kyis cho 'phrul chen [(]pa'i [,]po'i [)]mdor ro//kun gyis bkur ba ku ru kul+la rus sgrogs rigs su gnas pa rnams kyis/ tshe dang ldan pa kun dga' bos gsol pa/ gang 'di dga' ldan nas sku gzi brjid dang ldan pa dang kha dog dang mdzes pas gshegs pa'i byang chub sems dpa' shAkya thub pa de la phyag 'tshal lo zhes gsungs so//tshe dang ldan pa kA lo dA yis kyang gsol pa/ sems can kun la phan don du/ /gang tshe khyod kyi spyi gtsug ni/ /gtsug nor dang ldan sngon byin pa/ /de tshe'ang phyag 'os phyag 'tshal lo/ /zhes rnam par phye ste smra ba rnams kyis sangs rgyas bshad par ro//tshe dang ldan pa kun dga' bos gsol pa/ gang 'di dga' ldan nas yum gyi lhums su nye bar zhugs pa de dang mngal na gnas pa la phyag 'tshal lo zhes thams cad yod par smra ba rnams kyis chos rmad du byung bar gsungs so/ /de ltar du sde pa bzhi rnams la yang so sor dad pa'i phyag gi gzhung yod de mangs pas 'jigs pa'i phyir 'dir ma bris so//'o na ci gang la la byang chub tu sems bskyed pa de rnams la'ang dge slong rnams kyis phyag bya 'am zhe na/ de nges par sangs rgyas su 'gyur ro zhes shes par byed pa med de/gang sa la rab tu zhugs pa lung bstan pa thob pa thos pa de rnams kho na la phyag bya'o/ /byang chub sems dpa' rnams kyis ni sangs rgyas bcom ldan 'das rnams dang byang chub sems dpa'i chos rgan pa rnams la phyag bya'i gzhan su la'ang ma yin no//'jig rten gzhug pa las ni sems can gdul ba'i don du gnas skabs kyi khyad par dang rjes su mthun par bya ste/ ji srid ma dang pha la sogs pa'i bar rnams la'ang phyag bya bar bstan la/ dge slong rnams la'ang btsun pa smra bas brjod do/ /'dir byang chub sems dpa'i srog gcod pa la sogs pa spong ba rnams tha dad par ma brjod pa nyid ji ltar zhe na tshul khrims kyi pha rol tu phyin par ro zhes pa thal ches pas chog go//'o na gang zag gcig pu gang la ji srid 'tsho'i bar gyi yan lag gsum pa dang yan lag lnga pa'i dge bsnyen gyi sdom pa dag dang de'i byang chub kyi bar du skyabs su 'gro ba las gzhan dge bsnyen gyi sdom pa gsum du 'gyur ro zhe na/'di la 'chad par 'gyur ro/ /de ltar byang chub kyi sems spyod pa dang bral ba'ang mtha' yas pa'i 'khor ba'i bde ba bskyed la sgrub pa dang bcas pa ni 'jig rten las 'das pa'i bde ba yang ngo zhes rtogs nas/cung zad tsam bsams nas mi ster ba las yi dags su 'gro la dam bcas nas mi ster ba las kyang dmyal bar 'gro na 'gro ba ma lus pa la bla na med pa'i don dam bcas nas sgrub par mi byed pa ni lta ci smos zhes dam pa'i chos dran pa nye bar gzhag pa'i mdor gsungs pas/'gro ba mtha' dag yongs su bskyab pa'i ched du snying rjes dam bca' ba byas pa'i byang chub sems dpa'i sdom pa can gyis bdag nyid dam gzhan rnams la/ gzhan rnams sam ni bdag la yang //phan pa dang ni bde bar bya/ /sdug bsngal yin yang gang phan nyid/ /bde yang mi phan nyid ma yin/ /phan pa ni phyis rnam par smin pa bde ba ste/ nyon mongs pa can ma yin pa'i phyir dang kha na ma tho ba med pa'i phyir yang ngo / /bde ba ni rjes su 'dzin pa'i tshor ba'o//'dis 'di gnyis bdag dang gzhan rnams la'ang bya ste 'di dag gis rang dang gzhan gyi don thams cad yang dag par bsdus pa'i phyir ro/ /sdug bsngal ni nye bar 'joms pa'i tshor ba ste/ gang 'di'i phan pa phyis bde bar 'gyur ba 'phrod pa'i zas ltar mi phan pa ma yin pa'o//bde yang mi bya ba nyid ni gang mi phan pa phyis rnam par smin pa sdug bsngal bar 'gyur ba mi 'phrod pa lta bu ste/ nyon mongs pa can nyid dang kha na ma tho ba dang bcas pa'i phyir phan pa ma yin pa'o zhes pa 'di re zhig 'di'i bya ba mdor bsdus pa'o/ /yang 'di'i ltung ba ni ci yin/rnam pa du zhe na/ ltung ba ni shin tu 'da' ba'o/ /ltung ba'i sde ni gnyis kho na ste/ phas pham par 'gyur ba'i chos rnam pa bzhi po gang lhag par spyad pa las 'di sdom pa dang 'bral zhing byang chub sems dpa' ma yin par 'gyur ba dang / ltung bas yang dag par bsdus pa'i nyes byas gang gis ltung ba dang bcas par 'gyur ba'o//'dir yang ltung ba 'ga' zhig gzhan las bshags par bya ba ste/ kha cig rang gis bsdam par bya ba'o/ /ltung ba de rnams kyang byang chub sems dpa'i sde snod la sogs par ji ltar 'da' ba bzhin rgyu dang ldan par bcas pa'o//'o na bslab pa kun las btus par rigs kyi bu rgyal po rgyal rigs spyi bo nas dbang bskur ba'i rtsa ba'i ltung ba lnga ste gang gis de sngar byas pa'i dge ba'i rtsa ba thams cad bskams par byed pa phas pham pa'i dngos po lha dang mi'i bde ba thams cad ltung bar byed pa ngan song du nges par 'gro bar byed par 'gyur ba'o zhes pa la sogs pa dang /las dang po pa theg pa chen po la yang dag par gnas pa'i rigs kyi bu dang rigs kyi bu mo rnams kyi rtsa ba'i ltung ba ni brgyad rnams te/ gang gis 'khrul pa rnams sngar bskrun pa'i dge ba'i rtsa ba rnams bskams par byed pa phas pham pa lha dang mi dang theg pa chen po'i bde ba las ltung bar byed pa'i dngos po ngan song du 'gro bar byed par 'gyur ba rnams so zhes pa la sogs pa dang /thabs la mkhas pa'i mdor yang rtsa ba'i ltung ba gsungs pa gang yang rigs kyi bu byang chub sems dpa' zhes bya ba la sogs pa rgyas par gsungs nas bsdus pa ni/dkon mchog gsum gyi dkor 'phrogs pa/ /phas pham pa yi ltung bar 'dod/ /dam chos spong bar byed pa ni/ /gnyis pa yin par thub pas gsungs/ /dge slong tshul khrims 'chal pa'i 'ang //ngur smrig 'phrog dang brdeg pa dang / /btson rar 'jug par byed pa dang / /rab tu byung ba 'bebs pas kyang / /mtshams med lnga po byed pa las/ /log par lta ba 'dzin pas kyang / /grangs la sogs pa 'jig pas kyang / / rtsa ba'i ltung bar rgyal bas gsungs/ /blo ma sbyangs pa'i sems can la/ /stong pa nyid ni brjod pa las/ /sangs rgyas nyid la zhugs pa rnams/ /rdzogs pa'i byang chub las bzlog las/ /so sor thar pa spong bcug ste/ /theg pa che la sbyor ba las/ /slob ma'i theg pa chags la sogs//spang phyir min zhes 'dzin pa dang / /gzhan rnams 'dzin du 'jug las kyang / /bdag gi yon tan brjod pa dang / /gzhan rnams smod par byed las ni/ /bsnyen dang bkur sti grags pa'i rgyus/ /bdag ni zab mo la bzod ces//brdzun nyid du ni smra ba las/ /dge sbyong chad pas gcod 'jug dang / /skyabs gsum po yi ster ba dang / /ster ba len par byed pa las/ /zhi gnas gtong du 'jug pa dang / /yang dag 'jog gi longs spyod rnams/ /kha ton byed la ster las so//byang chub sems ni yongs gtong dang / /chags dang ser sna mi bzad pas/ /slong la ster bar mi byed las/ /'bad pas dga' bar byed pa yi/ /sems can la ni mi bzod par/ /khros pas sems can la brdeg las/ /nyon mongs pas gzhan rjes zhugs te//dam chos 'drar snang ston las so/ /zhes pa dang / byang chub sems dpa'i sde snod du ni rtsa ba'i ltung ba bzhi kho na ste/ de ltar yang de bsdus pa'i byang chub sems dpa'i sdom pa nyi shu par gsungs pas/ nyon mongs drag pos kun bslang ba/ / sdom pa 'jig par byed pa gang / /'di yis ltung ba bzhi po rnams/ /pham pa 'dra bar dgongs pa yin/ /rnyed dang bkur sti chags pa yis/ /bdag bstod gzhan la smod pa dang / /sdug bsngal can mgon med rnams la/ /ser snas chos nor mi ster dang / /gzhan gyis bshags pa mi len par//khros pas gzhan la rdeg pa dang / /theg pa chen po spong byed cing / /dam chos 'drar snang ston pa'o/ /zhes gsungs pa de ci ltar 'gal ba ma yin zhe na/ ma yin te gang zag 'bring dang chung ngu dang chen po'i bye brag gis lnga dang brgyad dang bzhi'o zhes ltung ba'i rab tu dbye ba bstan la/gang zag gcig gi ltung ba gang yin pa de rnams gzhan dag gi yang ngo / /de nyid du ji skad du gsungs pa/ gal te rgyal rigs la sogs pa byang chub sems dpa' yin na de rnams kyi ltung ba des shing gzhan rnams kyi lhag pa ci ltar yin/ ci ste de rnams sdom pa can ma yin na ni 'di rnams kyi ltung ba rnam par gzhag pa ci ltar yin/ ci ltar sdom pa can rnams kyang nyes pa des zin par 'gyur zhe na/ skyon 'di ni med de/ gang rnams gang la mang du 'byung ba de rnams de la bsnan pa ste rang gi ming gis bzung nas bstan pa las 'jigs pa bskyed pa'i don du ste/thams cad kyis phan tshun du ltung ba thams cad yongs su spang bar bya'o/ /rang bzhin gyi kha na ma tho ba chen po gang gis yang dag par ma blangs pa rnams kyang skal ba med par 'gyur ba des sdom pa can rnams ches shin tu'o zhes so/ /gal te de ltar na re re la ltung ba bcu bdun bcu bdun rnams su thal bar 'gyur ro zhe na de lta ma yin te/sde snod du gsungs pa'i bzhi po rnams nyid du gzhan rnams 'dus pa'i phyir ro/ /de ltar ni lnga po rnams kyi gnyis pa ni theg pa chen po spong bas bsdus te/ theg pa chen por ni nyan thos dang rang sangs rgyas kyi theg pa dag kyang ston te de spangs pa las de dag kyang spangs pa'o//gsum pa dang bzhi pa dag brdeg pas so/ /log par lta ba 'dzin pa ni/ /dam chos 'drar snang ston pa ste/ /rgyu med par smra ba ni 'jig rten pha rol spong ba ste mi dge ba bcu yang dag par blangs nas 'jug cing sems can gzhan rnams kyang mi dge ba bcu yang dag par 'dzin du 'jug go zhes gsungs so//grong la sogs pa 'jig pa ni brdeg pas so/ /brgyad po rnams kyi dang po ni theg pa chen po spang bas te/ blo ma sbyangs pa ni stong pa nyid spong bar byed de/ji skad du gsungs pa/ gzhan yang shes pa ngan pa'i phyir/ /rmongs pa mkhas pa'i nga rgyal can/ /'di spong bdag nyid phung byas pa/ /'og tu kha phyogs mnar med 'gro/ /zhes so/ /de spong ba'i rgyu nyid kyis na ston pa pos kyang spong bar byed pa'o/ /gnyis pa ni//dam chos 'drar snang ston pas te/ pha rol tu phyin pa drug po rnams la spyod pa las ni nyan thos dang rang sangs rgyas kyi theg pa dam pa'i chos ltar snang ba'o/ /gsum pa dang bzhi pa dang lnga pa dang drug pa rnams bdag bstod gzhan la smod pas te theg pa chen po ni byang chub sems dpa' rang gi'o//dkon mchog gsum gyi dkor 'phrog pa dang ngur [(]smig [,]smrig [)]'phrog pa dang dge 'dun gyi dbyen dang bdun pa ni ser sna dang chags pa dag gis nor mi ster bas te/ de ltar ni shin tu drag po'i ser sna dang chags pa dag ni gang las pha rol rdzas de la longs spyod pa'i don can yang mi bzod de/tshur 'phrog par byed/ 'byed par byed/ ster du 'jug pa dang / byin pa len pa yang ngo / /zhi gnas gtong du 'jug pa ni rtogs pa'i chos la ser sna drag pos rang yang mi ston la pha rol yang so sor gtong du 'jug go//bsam gtan pa rnams la sbyin par bya ba klog pa pa rnams la ster du 'jug pa ni nor la ser snas te 'ga' zhig ni gang zag 'ga' zhig nyid la ser snar 'gyur ba'i phyir ro/ /byang chub kyi sems gtong ba ni theg pa chen po spong bas te byang chub kyi sems nyid theg pa chen po dang de gtong ba yang spong ba yin pa'i phyir ro//ltung ba bzhi po 'di rnams ni bdag la bstod pa dang gzhan la smod pa zhes pa la sogs pas so sor gnyis nyid dag ste brgyad rnams so/ /rab tu dbye ba 'di ni ji ltar rigs par sngar brjod zin to/ /de'i rab tu dbye ba las mang po yod de rang gis rtogs par bya'o//gzhan rnams ni/ 'o na nam mkha'i snying po'i mdo sder phas pham pa'i ltung ba gzhan mang po gsungs pa ji ltar zhe na/ gsungs pa ni bden mod/ de rnams sdom pa yang dag par blangs pa'i sdom pa 'jig pa'i rgyu ma yin no/ /'o na ci zhe na/ sdom pa yang dag par blangs pa ma yin pa'i sngar bskrun pa'i dge ba'i rtsa ba dang lha dang mi'i bde ba phun sum tshogs pa yang dag par gcod pa'i rgyu yin pas mi 'gal zhes zer ro/ /de la byang chub sems dpa' rnyed pa dang bkur sti rnams la ches lhag par chags pas bdag la bstod pa dang gzhan la smod pa phas pham pa'i ltung ba 'byung ste/mu stegs pa rnams zil gyis mnan par 'dod pa dang / bstan pa gnas par 'dod pa dang thabs des 'dul bar 'dod pa dang / mi dge ba'i gnas las bslang nas dge ba'i gnas la dgod par 'dod pa dang /ma dang pha rnams dang ba'i ched dang dang ba rnams phyir zhing 'byung bar bya ba'i phyir du ltung ba med do/ /de ltar yang ltung ba med pa'i rnam pa 'di gnyis la dgongs nas gsungs pa/ snying brtse ldan dang byams nyid las/ /sems dge ba la ltung ba med/ /ces so/ / sbyin par bya ba'i dngos po rnams dang chos gtan la phab pa yod na'ang don du gnyer ba yang dag par lhags pa rnams la ser sna drag pos zil gyis non te nor ram chos mi ster na phas pham pa'i ltung ba 'byung ste/ longs spyod med nas mi ster ba dang dge 'dun gyi bya ba byed pa la 'jug par 'dod nas mi ster ba dang thabs des 'dul bar 'dod pa dang /mi dge ba'i gnas las bslang nas dge ba'i gnas la gzhag par 'dod pa dang / mi 'phrod pa dang rung ba ma yin pa slong ba dang de rgyal po la gnod par gyur na ltung ba med do/ /mu stegs pa glags lta bar gyur pa'am ma gus pa dang zhe sa med pa dang spyod lam ngan pas chos nod pa dang dbang po rtul por gyur te chos rgya chen por bstan pas 'di skrag cing log par lta ba dang log par mngon par zhen par 'gyur ba dang /bcos ma de la son pa'i chos gzhan snod ma yin pa rnams 'pho bar 'gyur ba srid pa dang /rang mchog tu na bar gyur pa nus pa med pa dang de'ang chos ma yin pas 'jug pa dang thabs des 'dul bar 'dod na ltung ba med do/ /khro ba drag pos zil gyis non pas gzhan la brdeg cing shad kyis sbyangs kyang dang du mi len la bzod par mi byed na/phas pham pa'i ltung ba 'byung ste ltung ba med pa ni thabs des 'dul bar 'dod na zhes pa la sogs pa snga ma bzhin no/ /lta ba chen pos kun nas dkris pas theg pa chen po la smod pa dang spong bar byed de'i gzugs brnyan gyis chos ston par byed na phas pham pa'i ltung ba 'byung ngo zhes pa kun nas dkris pa chen po las byung ba rnams nyid kyis/byang chub sems dpa' sdom pa yang dag par blangs pa kho na phas pham pa can du 'gyur la/ kun nas dkris pa gzhan las byung ba rnams kyis de gtong ba ma yin no/ /yang sdom pa blangs pa ma yin pa dang sdom pa phul ba de byang chub sems dpa' ma yin pas de la rnam pa 'di med do//phul ba ni rang bzhin du gnas pas sdom pa yongs su gtong ba'i bsam pas sems can pha rol po go ba yod pa la bslab pa 'bul lo/ /sangs rgyas dang chos dang dge 'dun dang byang chub sems kyang ngo zhes pa la sogs pa'i tshig rnams kyis so//sems can rnams med na sangs rgyas dang byang chub sems dpa' rnams mngon du byas pa la'o zhes kha cig go/ /gang byang chub kyi sems ma btang ba phas pham pa'i gnas kyi chos lhag par spyad pa med pa dran pa nyams par gyur pa med pa de ni sdom pa yongs su ma btang zhing nyams pa med pas dran pa las skye ba brjes kyang sdom pa de nyid rjes su 'brang bar rig par bya'o//de nyid kyi phyir la ji srid 'tsho'i bar du zhes pa'i dus yongs su bcad par mi bya'o/ / dran pa nyams pa ni sngon gyi 'phen pa'i dbang ngam dge ba'i bshes gnyen dang phrad pa'am byang chub sems dpa'i yon tan thos pa las mngon par 'dod pa yang dag par skye ste/ yang dag par ma blangs pa med par rang bzhin du gnas pa med do/ /gzhan ni yang dag par len pa la mngon du phyogs par 'gyur ba'am min yang rung ngo //gang bslab pa'i rgyu rnams bye brag tu ma rtogs pa'am ma dran pa'am phyin ci log gis sam ma gus pa'am nyon mongs pas zil gyis mnan pas gang yang rung ba'i phas pham pa'i gnas kyi chos la lhag par spyad nas byang chub sems dpa' ma yin par 'gyur ro//de yang gal te gang yang yang dag par len par 'dod na des mthong ba'i chos nyid la slar yang sdom pa yang dag par blang bar bya ste/ 'di dge slong gi sdom pa ltar de yang dag par blang ba'i skal ba med pa ni ma yin no/ /gal te gang rnams kyis 'di sdom pa 'dor bar byed pa'i chos de rnams kun nas dkris pa 'bring las skyes par gyur na de'i tshe zag pa 'bring gi nyes byas kyi ltung ba rnams te gang zag gsum rnams kyi mdun du bshags pas ldang bar 'gyur ro//ji lta ba bzhin du tshe dang ldan pa rnams dgongs su gsol/bdag ming 'di lta bu la ltung ba 'di byung ba de bshags par bgyi'o/ /phyis sdom par 'tshal lo zhes pa gsum du'o/ /kun nas dkris pa chung ngus bslang ba rnams zag pa chung ngu ste gcig gi'ang mdun du bshags par bya ba nyid do/ /nyon mongs pa can dang nyon mongs pa can ma yin pa rnams ni bshags par bya ba rnams kyang rang gi sems kyis bsdams pas kyang ldang bar 'gyur ro//chos dang ldan pa'i gang zag med na nyon mongs pa can dang nyon mongs pa can ma yin pa'i chos byung ba'i bsam pas slar mi byed par sems bskyed par bya zhing phyis kyang bsdam par bya ste slar bdag gis 'di ltar mi bya'o zhes pa'o//de la 'dod chags dang kun nas mnar sems dang phrag dog dang nga rgyal dang ma dad pa dang ma gus pa la sogs pa nyon mongs pa can gyi sems pas kun nas bslang ba'i ltung ba ni nyon mongs pa can no/ /le lo dang snyom las dang bag med pa dang brjed ngas pa la sogs pas bskyed pa ni nyon mongs pa can ma yin pa ste/dkon mchog gsum mchod pa las gzhan du'o/ /'dir snyom las dang le lo la sogs pa'ang nyon mongs pa can du 'dod do/ /'dir kun nas mnar sems ni 'khrug pa ste khong khro dang zhe sdang ngo //le lo ni dge ba la mi spro ba'o/ /snyom las ni lus dang sems gus par byed mi 'dod pa'o/ /ltung ba de rnams dang tshul 'chos dang kha gsag dang gzhogs slong dang thob kyis 'jal ba dang rnyed pas rnyed pa tshol ba dang chang dang mtshon dang dug dang srog chags dang rgya skyegs dang til mar la sogs pa 'tshong ba dang til dang yungs kar ma brtags par 'tshir ba ste smad pas 'tsho ba'i rgyu nyid kyis na log par 'tsho ba'o zhes pa la sogs pa mthar thug pa med pa rnams spangs par bslab bo//de'i mi mthun pa mthar thug pa med pa rnams kyang bslang bar bslab bo//de'i phyir bslab pa mtha' yas pa rnams mdo sde la sogs pa rnams su gsungs te/ byang chub sems dpa' rnams kyi spyod pa tshad med pa nyid kyi phyir ro/ /de gsungs pa/ byang chub sems dpa'i spyod pa ni/ /tshad med par ni gsungs pa ste//sems sbyong ba yi spyod pa ni/ /nges par re zhig spyad par bya/ /zhes so/ /'di tsam 'di yang byang chub sems dpa'i bslab pa ste 'di ltar sems yongs su sbyang ba'o/ /'di ni sems can gyi don thams cad kyi rtsa ba yin pa'i phyir ro/ /de skad du yang / dkon mchog sprin du gsungs pa/ chos thams cad ni sems sngon du 'gro ba ste sems yongs su shes na yongs su shes pa nyid du 'gyur ro/ /'jig rten sems kyis khrid pa ste/ /sems kyis sems ni mi mthong ngo / /dge ba'am 'on te mi dge ba'i//las ni sems kyis sogs pa'o/ /zhes so/ /byang chub sems dpa'i ltung ba med pa ni gang cung zad bya ba gsungs pa ste sgrub pa'i sgo nas sam dgag pa'i sgo nas de las mi 'da' ba'o zhes pa 'di ni drang po ltung ba med pa'i rnam pa'o/ /ltung ba ni 'da' ba'i rang bzhin nyid kyi phyir ro//de lta mod kyi snying rje dang ldan pa 'da' ba ni ltung ba med pa'o zhes pa ste nga rgyas par tshul khrims kyi pha rol tu phyin par bshad par bya'o/ /de ltar byang chub sems dpa'i sdom pa yang dag par len pa'i cho ga spyod pa cung zad dang bcas pa brjod zin to/ /bla na med pa rdo rje sems dpa'i sdom pa yang dag par len pa'i cho ga dang spyod pa ni kho bos man ngag gi snye ma dang 'jigs pa med pa'i gzhung 'grel du gsal bar brjod do//'o na gang gi tshe gang zag gcig 'ga' zhig nyid ji srid 'tsho ba pa'i yan lag gsum dang yan lag lnga pa dang byang chub kyi bar du dkon mchog gsum la skyabs su 'gro ba las yan lag gsum pa ste/dge bsnyen gyi sdom pa gsum dang / dge tshul gyi sdom pa dang / dge slong gi sdom pa dang / byang chub sems dpa'i sdom pa dang / rdo rje sems dpa'i sdom pa rim pas yang dag par len pa de'i tshe/ ci 'di me dang phrad pa na grang ba ltar sdom pa phyi ma dang phrad pa na sdom pa snga ma ldog gam/yang na spong ba 'phel ba dang ldan pa las phyi ma snga ma dang lhan cig gyur nas de'i ming thob ste ji ltar bslab pa'i gzhi lnga dang lhan cig 'dres par 'gyur te gsum kho na brgyad nyid du 'gyur ba dang gnyis po'ang brgyad dang lhan cig bcu yin nam/yang na de rnams gzhan nyid skye zhing tha dad nyid du gnas pa rten gcig la rnam pa sna tshogs pa'i rgyan ltar yin zhe na brjod par bya'o/ /de la phyogs dang po ma yin te/ sdom pa nyams pa'i rgyu mtshan ma yin pa'i phyir dang 'gal ba med pa'i phyir te grang ba'i khyad par gzhan skyes pa na grang ba snga ma mi ldog ste 'gal ba med pa'i phyir ro//bsags pa 'di kho na la tha snyad 'jug pa 'ba' zhig ste snga ma ma yin la gnyis pa ma yin no/ /sdom pa gong ma gong ma mtha' dag nyid so sor yang dag par blangs pa las skye ba dang gnas pa'i phyir ro//gal te de lta na de'i tshe srog gcod pa la sogs pa spong ba mang po rnams la khyad par ram nye bar mkho ba ci yod ce na/ srog gcod pa la sogs pa spong ba nyid kyis na khyad par cung zad kyang med de rigs mtshungs pa'i phyir rigs mthun pa'i gser gyi rgyan du ma bzhin no//'o na ci ltar tha dad ce na/ rang gi mtshan nyid dang dang po'i rgyu tha dad pa las te/ phyi rol gyi lhan cig byed pa'i khyad par dang nang gi lhag pa'i bsam pa phul du byung ba bsags pa dang sems pa'i khyad par las gong ma gong ma'i spong ba rnams skyes pa'i phyir bzo bo mkhas pas byas pa'i rigs mtshungs pa'i rgyan bzhin no//de lta na sdom pa so so gzhan yang dag par len pa na skyabs su 'gro ba rnams so sor bya ste/ 'di rnams sdom pa gzhan yang dag par len pa'i sgor gyur pa'i phyir ro zhe na bya ste dgag pa byed pa su'ang med do/ /gzhan ni skyabs su khas len pa tsam don du gnyer ba yin pa nyid kyi phyir de'ang byang chub kyi bar nyid du khyad par med na len cig khas blangs pas grub pa'i phyir na sdom pa yang dag par len pa rnams la 'jug pa'i dang por gyur pa dang de'i tshe khas blangs pa la khyad par med pa'i phyir 'di tsam nyid kyis sdom pa so so yang dag par len pa'i sgo'i dngos por grub pa'i phyir slar yang skyabs su 'gro ba ni ci yang ma yin no//skyabs su 'gro ba de nyid ni don gyis so so bzhin du tha snyad du bya la/ gang gis sdom pa phyi ma yongs su gtang ba na'ang sdom pa snga ma mi ldog ste skyabs su 'gro ba yod pa'i phyir dang sdom pa rnams tha dad pa'i phyir ro//gzhan du na sdom pa phyi ma gtang ba nyid las sdom pa thams cad gtang bar 'gyur ro zhes pa ste 'di ni spong ba mang po rnams kyi nye bar mkho ba'o/ /de ltar brjod pa'i rim pas byang chub sems dpa' byang chub tu sems bskyed pa ldog pa'i tshul khrims kyi rang bzhin sdom pa'i tshul khrims la brtan por byas nas 'jug pa'i tshul khrims dge ba'i chos sdud kyi tshul khrims dang sems can don byed kyi tshul khrims dang thos pa dang bsam pa la sogs pa dang sbyin pa la sogs pa'i pha rol tu phyin pa rnams yang dag par sgrub pa la'ang tshogs gnyis bsags pa'i ched du stobs ji lta bas tshogs kyi sar mi dmigs par goms par bya'o//de la dge ba ni ngo bo nyid dang 'brel pa dang rjes su 'brel pa dang slong ba dang skye bas thob pa dang nor dam pa dang /sbyor ba dang phan 'dogs pa dang yongs su 'dzin pa dang mdun du byed pa dang gnyen po dang nye bar zhi ba dang rgyu mthun pa las so/ /de la ngo bo nyid las ni dad pa dang / brtson 'grus dang dran pa dang ting nge 'dzin dang shes rab dang ngo tsha dang khrel yod pa dang 'dod chags med pa dang zhe sdang med pa dang dgu ste/gti mug med pa ni shes rab nyid kyi phyir la/ bag yod dang shin tu sbyangs pa dang btang snyoms dang rnam par 'tshe ba ste sems las byung ba'i chos rnams so/ /btang snyoms ni sems lhun gyis grub pa nyid do/ /'brel pa las de dang mtshungs par ldan pa rnams so//rjes su 'brel pa las de rnams nyid kyi bag chags gang yin pa'o/ /slong ba la des kun nas bslang ba'i lus dang ngag gi las so/ /skye bas thob pa las ni dge ba'i chos 'di rnams nyid sngon goms par byas pa la brten nas de'i ngo bo rnam par smin par 'grub ste gang gis de rnams kho na la so sor ma brtags par 'dod pa kun du gnas pa'o//don dam pa las de bzhin nyid do/ /sbyor ba las ni skyes bu dam pa la brten nas dam pa'i chos nyan pa dang tshul bzhin yid la byed pa dang chos dang rjes su mthun pa'i chos sgrub pa'o/ /phan 'dogs pa las ni bsdu ba'i dngos po bzhi rnams kyis sems can rjes su 'dzin pa'i dge ba gang yin pa'o//yongs su 'dzin pa las ni sbyin pa las byung ba'i bsod nams bya ba'i dngos pos sam tshul khrims las byung bas sam/ bsgoms pa las byung ba'i phyug po dang rigs mthon por skye ba yongs su 'dzin pa'am/mtho ris su skye ba yongs su 'dzin pa'am rnam par byang ba'i rjes su mthun pa yongs su 'dzin pa'o/ /mdun du byed pa ni de bzhin gshegs pa'am mchod rten nam sku gzugs mdun du byas pa'am chos sam chos kyi gzhi gang zag gam glegs bam mdun du byas te mchod pa byed pa las so//gnyen po las ni gang rnam par sun 'byin pa gnyen po dang rnam par gnon pa gnyen po dang thag bsring ba gnyen po dang nyon mongs pa'i sgrib pa'i gnyen po dang shes bya'i sgrib pa'i gnyen po'o/ /nye bar zhi ba las ni gang de la brten nas chags pa spong ba'o/ / rgyu mthun pa las ni de'i dbang gis 'jig rten dang 'jig rten las 'das pa'i thun mong dang thun mong ma yin par shes pa la sogs pa'o/ /'dir sbyin pa las byung ba'i bsod nams bya ba'i dngos pos sam zhes pa la sogs pa gsungs pa de la/ rgyu la ma yaT ste/ sbyin pa'i rgyu can sbyin pa las byung ba dang de bzhin du tshul khrims dang bsgom pa'i rgyu can tshul khrims las byung ba dang bsgom pa las byung ba ste/zas las byung ba srog chags rnams rtswa las byung ba ba lang rnams zhes pa lta bu'o/ /yang na rang bzhin la ma yaT ste/ sbyin pa'i rang gi ngo bo'i bsod nams ni sbyin pa'i rang bzhin dang de bzhin du tshul khrims kyi rang bzhin dang bsgom pa'i rang bzhin te/'jim pa'i rang bzhin gyi snod ces pa lta bu'o/ /bsod nams zhes pa'i don ci zhe na/ yang dang yang dge legs kyi ched du 'gyur ba'i phyir bsod nams so/ / yang na skyes bu dag tu 'jug par byed dag par byed pa'i phyir bsod nams so/ /de yang lus la sogs pa dang yang dag par ldan pa'i dge ba'o/ /sbyin pa 'di ci zhe na/ gang gis ster bar byed pa de sbyin pa'o/ /'gran pa dang grags pa 'dod pa dang 'jigs pa dang re ba dang bsten pa'i don du gang ster ba de ni sbyin pa ma yin no//'o na ci zhe na mchod pa dang phan gdags pa'i don du ste yongs su mya ngan las 'das pa la sogs pa rnams la mchod pa'i bsam pas ster ba dang de las gzhan pa rnams la ni dbang po'i 'byung ba chen po la phan gdags par bya 'dod pas te gang gi don du ster bar bshad do//yang cis ster bar byed ce na sems la sogs pa tshogs pas kun nas bslang ba'i lus dang ngag gi las kyi ste 'di ni sbyin pa'i mtshan nyid do/ /de skad du gsungs pa/ gang tshe skyes bu rang nyid rdzas/ / dge ba'i yid kyis sbyin byed pa/ /skad cig de la dge ba yi/ /phung po sbyin pa zhes brjod bya/ /zhes so/ /gtso bo las ni sems nyid sbyin pa ste/ /gang gsungs pa/ rang gi rdzas nyid yongs su btang nas gzhan gyi rdzas su byed pa'i sems ni sbyin pa'o zhes so/ /sbyin pa las byung ba'i bsod nams kyi 'bras bu ci zhe na/sems can thams cad mya ngan las 'da' bar bsngos pas thar pa'i 'bras bu dang 'bras bus longs spyod chen po'o/ /'bras bu longs spyod chen po nyid ni rgya che ba dang gya nom pa rgyun mi 'chad pa'i 'bras bu can nyid kyi phyir ro/ /de nyid kyi phyir don dang mthun pa'i ming ste/ster ba po dang len pa po dag gi dbul ba'i gdung ba sel bar byed pa'i phyir sbyin pa'o/ /khyad par med par sbyin pa'i 'bras bu longs spyod chen po yin la de'i khyad par yang rgyu brgyad rnams kyis te zhing las dang dngos po dang yid la byed pa dang bsam pa dang /de las gzhan yongs su 'dzin pa dang rten dang mang du byed pa dang skye bo mang po las kyang ngo / /de la zhing ni 'gro ba dang sdug bsngal dang phan gdags pa nyid dang yon tan rnams kyi khyad par du 'phags pa'o/ /'gro ba'i khyad par bcom ldan 'das kyis ji skad du gsungs pa/ dud 'gro'i skyes gnas su song ba la sbyin pa byin nas rnam par smin pa brgya 'gyur du re bar bya'o/ /tshul khrims 'chal pa mir gyur pa stong 'gyur du'o zhes so/ /sdug bsngal gyi khyad par ni dper na 'ga' zhig gis dkon mchog gsum gyi ched du'am/ phyogs bzhi'i dge slong gi dge 'dun gyi ched du skyed mos tshal byed pa dang skyed mos tshal der yang gtsug lag khang bzhengs pa dang /gtsug lag khang der mal cha dang stan dbul ba dang / de bzhin du ston mo nges pa 'cha' ba dang / de bzhin du der 'ongs pa dang 'gro ba rnams la ster ba dang / de bzhin du nad pa dang nad g.yog pa rnams la ster ba dang /de bzhin du grang ba dang yul 'khrigs pa dang rlung dang char gyis nyen pa rnams su zan nam skyo ma'am thug pa dang btung ba rnams mngon par bsgrubs nas dge 'dun la phul ba 'dis 'phags pa rnams lus ma brlan pa dang / chos gos ma bangs par yongs su gsol nas bde ba la reg par gyur cig ces pa'o//de rnams kyang gzhi des don nyung ba bya ba nyung bar thos pa la sbyor bar byed bsam pa dang bsgom pa rnams la yang ste/ rdzas las byung ba'i bsod nams bya ba'i dngos po bdun po 'di rnams dang yang dag par ldan pa'i rigs kyi bu'am rigs kyi bu mo ni rgyu yang rung 'dug kyang rung gnyid kyang rung mi gnyid kyang rung rtag par rgyun du bsod nams mngon par 'phel ba kho na'o zhes pa lta bu'o//sbyin pa byin nas zhes pa dang sbyin par bya zhes pas sbyin pa dang sbyin bya rig par bya'o/ /'dir ni rkyen gyi khyad par las sdug bsngal gyi khyad par te len pa po'i sdug bsngal gyi khyad par 'joms pa las ster ba po'i 'bras bu khyad par du 'gyur ro//'di ni rdzas las byung ba las dper brjod pa ste kha cig tu yon tan ldan pa'i zhing las kyang dper brjod la/ de bzhin du sems kyi khyad par las dper brjod de 'dir yang sngon ma'o/ / phan 'dogs pa nyid kyi khyad par las ni ji ltar ma dang pha dag phan 'dogs pa gzhan rnams la yang ngo / /yon tan gyi khyad par las ni tshul khrims dang ldan pa la byin pa ni rnam par smin pa 'bum 'gyur ro zhes pa la sogs pa lta bu ste/ gal te yon tan dang ldan pa'i yon gnas zhing du 'gyur ba de la sbyin pa 'bras bu chen por 'gyur ro//yon tan dang ldan pa'i zhing de'ang sangs rgyas dang chos dang dge 'dun rnams sam/ gang zag khyad par can no/ /zhing mnyam po la gnyis dag gi su'i stobs dang ldan pa'i las su rig par bya zhe na/ dngos po las te gang gi nor bu dang dngul dang gser la sogs pa'i dngos po gya nom pa dang mang bar gyur pa de'i dngos po'i khyad par yongs su 'dzin pa las stobs dang ldan pa'i las byung ste cig shos kyis ma yin no//dngos po'i khyad par las 'bras bu'i khyad par ni ji ltar kha dog phun sum tshogs pa byin na gzugs bzang bar 'gyur ba dang dri phun sum tshogs pa byin na dri ltar grags pa phyogs rnams su rgyas pa'i phyir grags pa dang ldan pa dang /ro phun sum tshogs pa byin na ro zhim po ltar dga' bar 'gyur ba dang reg bya phun sum tshogs pa byin na shin tu gzhon sha can du 'gyur zhing bud med rin po che'i ji lta ba bzhin yan lag rnams su dus su reg na bde bar 'gyur ba lta bu'o//dngos po dang zhing mnyam po la gnyis po dag gis su'i las stobs dang ldan zhe na/ yid la byed pa las te rnyed gang dang ba drag po dang bcas pa'i yid la byed pas ster ba de'i'o//dad pas sbyin pa byin pa las yo byad thams cad phun sum tshogs pa'o/ /gus par byin pa las bkur sti dang rnyed pa phun sum tshogs pa'o/ /rang gi lag gis byin pa las rnyed pa rgya chen po rnams la mos pa phun sum tshogs pa'o/ /dus su byin pa las longs spyod phun sum tshogs pa dus su thob pa'o//gnod pa med par byin pa las longs spyod bar chad med par rnyed pa phun sum tshogs pa'o/ /gnyis dag gi 'di rnams mnyam pa la yang su'i las stobs dang ldan zhe na/ bsam pa las te gang mya ngan las 'da' ba'i bsam pa dang sems can thams cad la yongs su bsngo ba byas nas rab tu ster ba de'i bsam pa yongs su 'dzin pa las stobs dang ldan pa'i las su rig par bya la/cig shos kyis ma yin te/ gang mtho ris kyi rgyu mtshan du'am longs spyod kyi rgyu mtshan du rab tu ster ba ni 'bras bu'i rgyu mtshan du ster bas tshong bzhin du smad pa ste/len pa'i bsam pa'i phyir ro zhes gsungs so/ /'o na 'di yang mya ngan las 'das pa'i bsam pas rab tu ster la/ 'di yang sems can thams cad la yongs su bsngo ba byas nas te/ sngar brjod pa'i rnam pa rnams mnyam pa gnyis dag gis su'i las stobs dang ldan par rig par bya zhe na/de las gzhan yongs su 'dzin pa las de gzhan pa ste/ sbyin pa las gzhan ni tshul khrims yin la/ gang gi sbyin pa de tshul khrims kyis yongs su gzung bar 'gyur ba de'i'o/ /'o na gzhan gyi 'ang sbyin pa tshul khrims kyis yongs su bzung zhing 'di'i yang sbyin pa tshul khrims kyis yongs su bzung ba 'di dag kyang de ma thag tu brjod pa rnam pa rnams mnyam na gnyis dag gi su'i las stobs dang ldan zhe na/rten las te gal te bsod nams rnams byed pa po 'jig rten pa'i lam gyis 'dod chags dang bral bar gyur ba de'i bsgom pa las byung ba'i dge ba yongs su bsgos pa nyid kyi phyir rten las stobs dang ldan pa'i phun sum tshogs pa'o//'o na gnyis ka dag kyang 'dod pa'i khams las 'dod chags dang bral la de ma thag tu brjod pa'i rnam pa rnams kyang mnyam na su'i las stobs dang ldan zhe na/mang du byed pa las te gal te yang dang yang du goms par gyur pa'am yang dang yang du rjes su rnam par brtag pa de'i'o/ /cig shos kyis ma yin te lan cig kun du spyod pa'i phyir ro/ /'o na gnyis dag gi zhing dang dngos po dang yid la byed pa dang bsam pa dang de las gzhan du yongs su 'dzin pa dang rten dang mang du byed pa rnams mnyam na su'i las stobs dang ldan zhe na/skye bo mang po las te gang gis rang gis kyang byas la gzhan rnams kyang byed du bcug pa de'i ste rgyud du ma la bsod nams bskyed pa'i phyir/ /stobs dang ldan pa'i las su rig par bya'o zhes pa ni sbyin pa'i khyad par te/sbyin pa las byung ba'i bsod nams brjod zin to/ /de nas tshul khrims las byung ba brjod par bya ste rang bzhin dang bcas pa'i kha na ma tho ba las ldog pa ni tshul khrims su brjod do/ /de'i 'bras bu mtho ris thob la brgya byin nyid dang tshangs pa nyid la sogs pa bdag gi dngos po phun sum tshogs pa ste 'grub par byed pa'i rgyu nyid kyi phyir ro//sbyin pa'ang mtho ris kyi ched du phun sum tshogs par byed de gtso bo ni tshul khrims so/ /tshul khrims kyang longs spyod chen po'i ched du ste gtso bo ste sbyin pa'o/ /tshul khrims kyang thob byed kyi rgyu nyid las bral ba'i ched du ste gtso bo ni sgom pa'o//ci ltar tshul khrims kyi 'bras bu byang grol yin zhe na/ tshul khrims dang ldan pas smon lam 'grub ste/ de'ang tshul khrims rnam par dag pa nyid las so zhes gsungs pa'i phyir ro/ /yang rnam par dag pa ni thar pa thob par byed pa'i tshogs kyi tshul khrims so//'di lta ste rnam par rtog pas nye bar 'joms pa'i gnyen por dbang po'i sgo bzung ba'o/ /rten las su mi rung bas nye bar 'joms pa'i gnyen por zas kyi tshod shes pa'o/ /tshod 'dzin pa ni dma' ba dang lhag pa'i zas yongs su spong ba'i don to//chung ba'i zas kyis rten nyam chung ba nyid kyis mngon par mi spro ba'o/ /zas ha cang ches na gnyid la sogs pa skyon lnga kun du spyod pa las rten las su mi rung ba nyid do/ /de ltar gnyis kas rten las su mi rung ba nyid de de med na dge ba'i phyogs dang mthun pa'o//mi brtson pas nye bar 'joms pa'i gnyen por nam gyi cha stod dang nam gyi cha smad la mi gnyid par rnal 'byor la rjes su sbyor ba'o/ /'gyod pas nye bar 'joms pa'i gnyen por shes bzhin la gnas pa nyid ces pa'o/ /bsgom pa las byung ba yang mnyam par gzhag pa'i dge ba ste gang mnyam par gzhag pa'i rang bzhin dang de dang lhan cig gyur pa'i bsod nams de bsgom pa zhes brjod do//ci'i phyir zhe na sems la bsgo ba'i phyir te de ltar ni mnyam par gzhag pa'i dge bas me tog rnams kyis til ltar yon tan rnams kyi sems la rtag tu shin tu bsgo bar byed cing de'i rang bzhin du byed pa'i phyir ro//bsgom pa las byung ba yang mdor bsdu na 'jig rten pa dang 'jig rten las 'das pa'i lam mo/ /de la 'jig rten pa'i lam ni bsam gtan rnams dang gzugs med pa rnams so/ /de rnams dang 'di rnams kun nas nyon mongs pa dang rnam par byang ba dang rnam par gzhag pa dang rnam par dag pa rnams kyis rig par bya'o//kun nas nyon mongs pas ji lta bu zhe na lung du ma bstan pa'i rtsa ba bzhi ste/ sred pa dang lta ba dang nga rgyal dang ma rig pa'o/ /sred pas ni bde ba'i ro myang bas kun nas nyon mongs te shin tu sbyong ba'i bde ba la ro myong ba'i phyir ro//lta bas ni lta ba shas che ba'i bsam gtan nyid kyis kun nas nyon mongs te bsam gtan la brten nas sngon gyi mthar rtog pa la sogs pa'i lta ba kun nas slong ba'i phyir ro/ /nga rgyal gyis nga rgyal shas che ba'i bsam gtan pa nyid kyis kun nas nyon mongs te de'i khyad par rtogs pas khengs par 'gyur ba'i phyir ro//ma rig pa ni the tshom shas che ba'i bsam gtan pa nyid kyis kun nas nyon mongs pa ste de kho na nyid ma rtogs pa thar pa 'dod pa khyad par te rtogs pa la thar pa'am thar pa min pa zhes the tshom skye ba'i phyir ro//rnam par byang bas ci lta bu zhe na/ dag pa'i bsam gtan la sogs pa 'jig rten pa rnams kyang dge ba'i phyir kun nas dkris pa'i dri ma dang bral bas rnam par byang ba zhes brjod do/ /rnam par gzhag pa ji lta bu zhe na bsam gtan dang po yan lag lnga pa zhes pa la sogs pa rnam par gzhag pas so//rnam par dag pas ci lta bu zhe na/ rab kyi mtha' yas pa'i bsam gtan dang po nas 'du shes med 'du shes med min skye mched kyi bar rnam par dag pa zhes pa'o/ /'jig rten las 'das pa'i lam ni mthong ba'i lam dang bsgom pa'i lam mo//lam gnyis dang mtshungs par ldan pa'i ting nge 'dzin yang ste bsam gtan dang po nas ci yang med pa'i skye mched kyi bar ro/ /'du shes med 'du shes med min gyi skye mched ni 'jig rten nyid de/ yongs su gsal ba'i 'du shes rab tu rgyu ba med pa nyid kyi phyir ro//de nyid kyi phyir bcom ldan 'das kyis gsungs pa/ ji srid du 'du shes kyi snyoms par 'jug pa de srid du kun shes pa rtogs so zhes so/ /'o na bsod nams bya ba'i dngos po zhes pa'i don ci zhe na gsum po 'di ni ji ltar rigs par bsod nams kyang yin dngos po'ang yin pas bsod nams bya ba'i dngos po ste/re zhig sbyin pa las byung ba'i bsod nams bya ba'i dngos po la lus ngag gi las ni 'di rnam pa gsum char du 'gyur te bsod nams kyang yin bya ba'ang yin bsod nams bya ba'i dngos po'ang yin zhes pa'o/ /de kun nas slong bar byed pa'i sems pa ni bsod nams kyang yin bya ba'ang yin no//de dang lhan cig 'byung ba'i chos rnams ni bsod nams kho na'o/ /lus ngag gi las ni kho na dngos po'o/ /tshul khrims las byung ba ni lus ngag gi las kho na yin pas rnam pa gsum du 'gyur ro/ /bsgom pa las byung ba la byams pa dang snying rje dag ni bsod nams kyang yin la bya ba'i dngos po'ang ste/byams pa dang snying rje'i sgo nas de dang mtshungs par ldan pa'i sems pa mngon par 'du byed pa'i phyir ro/ /yang na bsod nams byed pa ni bsod nams bya ba ste bsod nams la sbyor ba'o//'di rnams ni de'i dngos po ste 'di rnams sgrub pa'i don du bsod nams la rab tu sbyor ba rtsom pa'i phyir ro zhes pa'o/ /de ltar dge ba la sogs pa rnam par gzhag pa 'di ni phal cher gang zag gzhan dang thun mong du bstan pa'o/ /byang chub sems dpa' rnams kyi ni khyad par du'ang rgyas par bya'o//de la sbyin pa ni zang zing dang mi 'jigs pa dang chos kyi dbye ba las rnam pa gsum mo/ /de la zang zing gi sbyin pa ni bdag nyid kyi bar du yongs su gtong ba'o/ /chang dang dug dang mtshon la sogs pa rung ba ma yin pa'i dngos po ster ba ni bkag pa'o//gang drag shul can gyis zhus par gsungs pa/ gal te 'di rnams la chang gi ltung ba ster na/ de rnams dran pa dang shes bzhin yang dag par 'dzin du gzhug go zhes pa ni der chang sbyin pa'ang dgag pa byas na byang chub sems dpa' la khong khro ba shin tu lci ba dang sems can yang dag par bsdu ba nyams pa ste de las gzhan rab tu dang ba'i thabs mi srid na chang sbyin par bya'o zhes pa dgongs pa'o//mi 'jigs pa'i sbyin pa ni tshul khrims dang bzod pa'i pha rol tu phyin pa dag ste/ gnod pa ma skyes pa dang skyes pa la pha rol rnams gdung ba mi byed pa'i phyir ro//chos kyi sbyin pa ni brtson 'grus dang / bsam gtan dang / shes rab kyi pha rol tu phyin pa rnams te/ mi skyo bar bsam gtan rnams bskyed nas pha rol po rnams kyi bsam pa shes te shes rab kyis yang dag pa'i don ji lta ba ston pa'i phyir ro/ /de ltar ni lan cig la chos thams cad rang bzhin med par rtogs pa'i nus pa med pa la dang por bdag la sogs pa bsal bas phyi rol gyi don la bkod nas de'i rjes su khams gsum pa sems tsam du rtogs pa la sbyar ba byas te/de'i rjes su yang dag pa'i don la bya ba rnams rung ba dang mi rung ba yang dag pa dang yang dag pa ma yin pa'i bye brag gis kun rdzob gnyis po ma brtags na gcig tu nyams dga' ba rang gi rgyu snga ma snga ma la rag las par bstan nas yang dag pa'i kun rdzob la gnas te ji ltar mthong ba ltar sgyu ma'i skyes bu lta bus sbyin pa la sogs pa la spyad par bya'o//don dam par skye ba med pa gzhan gyis bstan bya ma yin pa stong pa nyid dang snying rje dbyer med pa don dam pa'i byang chub kyi sems bsgom par bya'o zhes pa 'di lta bu'i rim pas shes rab kyi pha rol tu phyin pa la 'jug par byed do zhes khyad par dang bcas pa 'chad par 'gyur ro//de'i phyir pha rol tu phyin pa drug kyang sbyin pa'o zhes brjod par bya'o//gang 'phags pa thogs med kyis gsungs pa/ phar phyin drug kyang sbyin pa yi/ /zang zing mi 'jigs chos las te/ /gcig dang gnyis dang gsum gyis ni/ /bsgrub bya de la gnas mi bya/ /zhes so/ /tshul khrims rnam pa gsum ni brjod zin zhing 'chad par 'gyur ro//bzod pa ni chos la nges par sems pa dang sdug bsngal dang du len pa dang pha rol gnod pa byed pa la ji snyam pa'i bdag nyid de rnam pa gsum mo/ /brtson 'grus kyang go cha dang dge ba dang sems can gyi don la sbyor ba'i dbye ba las de ltar nyid do//bsam gtan ni yon tan dang sems can gyi don dang nyon mongs pa'i gnyen po dang bde ba mngon par sgrub pa ste snga ma bzhin no/ /yon tan ni mngon par shes pa dang 'phags pa dang lha dang tshangs pa'i gnas la sogs pa rnams so/ /ji skad du gsungs pa/ chos thams cad ni ting nge 'dzin gyi sgo can zhes so//'phags pa'i gnas pa ni nyon mongs pa las rnam par grol ba'i mtshan nyid can te des rang dbang nyid do/ /lha'i gnas pa ni bsam gtan la sogs pa la gnas pa ste des sems dbang du gyur pa nyid do/ /bde ba ni bsam gtan gyi 'bras bu gnod pa med pa dang bde ba nye bar skye ba'i phyir ro//shes rab ni kun rdzob dang don dam pa'i bden pa dang sems can gyi don mtha' dag la dmigs pa'i dbye ba las rnam pa gsum mo/ /byang chub kyi sems la brten pa nyid las rten dam pa nyid do/ /dngos po mtha' dag la kun du spyod pa las dngos po dam pa nyid dang /sems can thams cad la phan pa dang bde ba'i dbang du byas pa nyid las ched du bya ba dam pa nyid dang rnam par mi rtog pa'i ye shes kyis yongs su bzung ba las thabs la mkhas pa dam pa nyid dang bla na med pa yang dag par rdzogs pa'i byang chub tu yongs su bsngos pa nyid las yongs su bsngo ba dam pa nyid dang /nyon mongs pa dang shes bya'i sgrib pas bsgribs pa med pa yang dag par 'grub pa las rnam par dag pa dam pa nyid de sbyin pa la sogs pa pha rol tu phyin pa so so rnams kyi mtshan nyid do zhes 'phags pa thogs med do//de ltar byang chub sems dpa' sbyin pas longs spyod la mngon par dga' ba med de ltos pa med pa'i phyir ro/ /sbyin pa po 'di spyod la lta ba dang bral yang sbyin pas longs spyod mchog tu mang po dang bzang po nye bar gnas par byed cing 'di ni chos nyid yin te sems rgya che ba nyid kyi phyir ro//ji skad du gsungs pa/ bdag gi lus kyang ji ltar 'dod par long / /'di la gzhan gyi blor yang ma byed cig /gang phyir 'di kun mkhyen rnams rang nyid kyi'o/ /bdag la 'dir bdag mngon rlom ci yang med/ /ces pa de ltar byang chub sems dpa' gtong ba chen po la rab tu 'jug go//de phyir thams cad nas ni skyon kun btang byas nas/ /byang chub don gnyer thams cad tshe na kun ster 'gyur/ /'jig rten bskyab la gcig tu pad min sems ga la/ /bya bas skye las spungs med 'di'ang ga la nyid//ces so/ /rgyal po'i rin po che'i phreng bar ji skad du gsungs pa/ gom pa bdun pa'i dus su yang / /bdog pa kun gtong sems 'chang ba'i/ /byang chub sems dpa' mkha' lta bur/ /dpag med bsod nams chu bo bskyed/ /ces so/ /tshul khrims ni yang dag par blangs pas bslab pa rnams la shin du gus pa nyid do//bzod pa dang brtson 'grus kyi rim pa bzhin sems can dang sems can ma yin pas byas pa'i sdug bsngal dang dge ba la sbyor ba gnyis la mi skyo ba'o/ /bsam gtan dang shes rab dag gis rnam par mi rtog pa'i rnal 'byor zhi gnas dang lhag mthong yang dag par bsdus so//'di tsam yang theg pa chen po mtha' dag go/ /de las pha rol tu phyin pa dang po gsum ni lhag pa tshul khrims kyi bslab pa'o/ /bsam gtan lhag pa'i sems so/ /shes rab kyi pha rol tu phyin pa lhag pa'i shes rab bo//brtson 'grus ni bslab pa gsum rnams su yang ste brtson 'grus thams cad kyi grogs yin pa nyid kyi phyir ro/ /rgyu gsum gyis sbyin pa la sogs pa de rnams kyi go rims bstan to/ /snga ma la brten nas phyi ma skye ba'i phyir te gang gi phyir longs spyod la ltos pa med pa ni tshul khrims yang dag par len no//tshul khrims dang ldan pa ni bzod do/ /bzod pa dang ldan pa ni brtson 'grus rtsom mo/ /brtson 'grus brtsams pa ni ting nge 'dzin skyed par byed do/ /sems mnyam par gzhag pa ni yang dag pa ji lta ba bzhin du shes par byed do/ /snga ma dman pa nyid kyi phyir dang phyi ma mchog nyid kyi phyir yang ste sbyin pa dman la tshul khrims mchog nas bsam gtan dman la shes rab mchog gi bar gyi phyir ro//sngon ma rags la phyi ma phra ba nyid kyi phyir yang ste/ sbyin pa ni rags te 'jug sla ba'i phyir dang bya bla ba'i phyir la tshul khrims ni phra ba ste bzlog pa'i phyir ro//de bzhin du shes rab kyi bar du'o/ /'di rnams kyang rim pa bzhin/ chos sbyin tshul khrims rnam dag dang / /mi skye ba la bzod nyid dang / /theg pa che la brtson 'grus rtsom/ /mtha' la snying rje ldan gnas dang / /shes rab pha rol phyin zhes pa//blo ldan rnams kyi gtso bor 'dod/ /mtha' ni bsam gtan bzhi pa'o/ /de ltar yang bcom ldan 'das ma rdo rje gcod par gsungs pa/ rab 'byor gang gA'i klung gi bye ma ji snyed pa de snyed kyi gang gA'i klung rnams su gyur la/ gang gA'i klung de rnams kyi bye ma ji snyed pa de snyed kyi 'jig rten gyi khams rnams skyes pa'am bud med la la zhig kho nas rin po che sna bdun gyis yongs su gang bar byas te de bzhin gshegs pa dgra bcom pa yang dag par rdzogs pa'i sangs rgyas rnams la phul la/gang yang theg pa chen po'i chos kyi rnam grangs 'di las tha na tshig bzhi pa'i tshigs su bcad pa tsam yang bzung nas gzhan rnams la ston par byed na 'di nyid de bas ches bsod nams mang du 'phel la tshad med cing grangs med do//gzhan yang gang du 'di las tshig bzhi pa'i tshigs su bcad pa tsam yang ston pa'i sa phyogs de lha dang mi dang /lha ma yin du bcas pa'i 'jig rten mchod rten du gyur pa yin na gzung ba la sogs pa rnams la lta ci smos so zhes so/ /dper brjod pa gzhan yang mdo ji bzhin no/ /grangs drug ces rnam par gzhag pa ni mi 'phags pa'i rgyu longs spyod dang khyim la zhen pa'i gnyen por go rims bzhin du sbyin pa dang tshul khrims kyi pha rol tu phyin pa dang /ldog pa'i rgyu 'khor ba'i sems can gyi log sgrub las skyes pa'i sdug bsngal dang dus ring por dkar po'i phyogs la rab tu sbyor bas yongs su skyo ba'i gnyen por grangs ji lta bar bzod pa dang brtson 'grus kyi pha rol tu phyin pa dang mnyam pa'i rgyu rnam par g.yeng ba dang shes rab 'chal pa'i gnyen por de bzhin du bsam gtan dang shes rab kyi pha rol tu phyin pa dag go zhes pa de ltar mi mthun pa'i phyogs dang gnyen po'i phyogs rnam par gzhag pa las so// pha rol tu phyin pa gzhan gyi mi mthun pa'i phyogs rtsa ba dang bcas pa spong ba shes rab kyi pha rol tu phyin pa kho na ste/ shes rab ni de bzhin nyid kyi yul can nyid kyis thams cad du gnyen po nyid yin pa'i phyir ro/ /sbyin pa la sogs pa rnams 'khor gsum mi dmigs pa med pa ni ser sna la sogs pa bskyed pa'i rgyu rtog pa sel bar nus pa ma yin no//de nyid kyi phyir shes rab kyi mthu nyid kyis yongs su bsngo ba'i khyad par rnams kyis pha rol tu 'gro ba la sbyar ba gnas su bcug pa nyid kyi phyir sbyin pa la sogs pa rnams pha rol tu phyin par bstan pa thob kyis cig shos ltar na ma yin no//sbyin pa la sogs pa rnams gsum du dmigs pa yod na ni 'jig rten pa'i pha rol tu phyin pa rnams zhes nye bar bstan to/ /de bzhin du rnam par mi g.yeng ba'i rgyu pha rol tu phyin pa bzhi rnams kyis rnam par mi g.yeng ba'i pha rol tu phyin pa gcig 'grub la/rnam par mi g.yeng ba gang la brten nas chos kyi de kho na nyid ji lta ba rtogs pa las sangs rgyas kyi chos rnams yang dag par 'byung ngo zhes de ltar sangs rgyas kyi chos thams cad 'byung ba'i gzhi'i gnas kyi phyir grangs rnam par gzhag go/ /de bzhin du sbyin pa dang tshul khrims kyi pha rol tu phyin pa dag gi pha rol gyi 'bras bu gong du brjod la bzod pa'i pha rol tu phyin pa ni phyogs chen po dang 'khor chen po nyid do//brtson 'grus kyi pha rol tu phyin pa'i longs spyod la sogs pa mi chod pa nyid do/ /bsam gtan gyi pha rol tu phyin pa'i gnod pa med pa'i lus skye ba ste 'bras bu gzhan yang gsungs so//shes rab kyi pha rol tu phyin pa'i dbang po rno ba nyid dang bde ba dang yid bde ba mang po nyid do/ /skye bo'i tshogs chen po dbang du 'gyur ba yang ngo / /mthong ba'i chos kyis ni 'di rnams thams cad kyi gzhi rab tu dang ba dang mthong ba'i chos la mya ngan las 'da' ba'o zhes 'bras bu las rnam par gzhag go//de bzhin du sbyin pa'i pha rol tu phyin pas sems can rjes su 'dzin pa'i phyir dang / tshul khrims kyi pha rol tu phyin pas gnod pa mi byed pa'i phyir dang / bzod pa'i pha rol tu phyin pas gnod pa bzod pa'i phyir dang / brtson 'grus kyi pha rol tu phyin pas bya ba mchog tu 'grub par byed pa'i sems can rnams yongs su smin par rung bar byas nas sems rnam par g.yeng ba rnams mnyam par gzhag pa'i ched du bsam gtan gyi pha rol tu phyin pa dang /sems mnyam par gzhag pa rnams rnam par grol ba'i ched du shes rab kyi pha rol tu phyin pas 'doms pa'i phyir yongs su smin par byed pas de ltar sems can yongs su smin pa dang rjes su mthun pa'i phyir yang grangs rnam par gzhag go//snying rjes gdungs par gyur pas thabs su gyur pa sbyin pa la sogs pa pha rol tu phyin pa drug rnams kyis rjes su bzung nas sbyin pa'i pha rol tu phyin pas de'i tshe nyid bde ba nye bar sdud pa dang /tshul khrims kyi pha rol tu phyin pas phyi mar bde ba nye bar sdud pa dang / sran tshugs pa dang spro ba dang sems rtse gcig pa'i mtha' gcig tu 'bras bu thob pa nye bar blangs nas bzod pa dang / brtson 'grus dang bsam gtan gyi pha rol tu phyin pa rnams kyis mtha' gcig tu bde ba nye bar sdud pa dang /shes rab kyi pha rol tu phyin pas gtan du bde ba nye bar sdud pas bdag nyid pha rol tu phyin pa drug la gnas pa dang ldan pas de la yang dag par len du 'jug pa dang / 'dzud pa dang rab tu dgod pa rnams kyis tshogs gnyis yongs su rdzogs par byed do/ /de la sbyin pa dang tshul khrims dang bzod pa ste pha rol tu phyin pa gsum dang / brtson 'grus dang bsam gtan gyi pha rol tu phyin pa dag gi cha shas ni bsod nams kyi tshogs te gzugs kyi sku'i rgyu'o/ / ye shes kyi tshogs ni shes rab kyi pha rol tu phyin pa dang / brtson 'grus dang bsam gtan gyi pha rol tu phyin pa'i cha shas te chos kyi sku'i rgyu'o/ /mdor bsdu na snying rjes las thams cad sems can gyi don nyid las bsod nams kyi tshogs so/ /shes rab kyis byang chub kyi don nyid kyi phyir ye shes kyi tshogs so//sbyin pa la sogs pa'i pha rol tu phyin pa 'di rnams re re la spyod pas kyang / pha rol tu phyin pa drug nyid sgom pa yongs su rdzogs pa sgrub par byed do zhes pa de ltar khong du chud par bya'o/ /de ltar yang stong phrag nyi shu lnga par gsungs pa/ rab 'byor 'di la byang chub sems dpa' sbyin pa sbyin zhing sems can rnams la byams pa'i lus dang ngag dang yid kyi las nye bar gnas par 'gyur te 'di lta bu ni tshul khrims kyi pha rol tu phyin pa'o//de nyid kyi len pa po rnams gshe ba dang smod pa la sogs pa bzod pas bzod pa'i pha rol tu phyin pa'o/ / de nyid kyi slong ba po khro ba dang mtshang 'bru ba la sogs pa rnams kyis sbyin pa la spro ba yongs su mi 'dor ba las brtson 'grus kyi pha rol tu phyin pa'o/ /de nyid kyi sbyin pa de rnam pa thams cad mkhyen pa nyid du yongs su bsngo bas nyan thos dang rang sangs rgyas kyi sa'i rnam par g.yeng ba'i sems med pas bsam gtan gyi pha rol tu phyin pa'o//de nyid kyi sgyu ma'i blos nye bar gnas pas sbyin pa byin pa las su la yang phan 'dogs pa dang gnod pa mi mthong ba las shes rab kyi pha rol tu phyin pa'o zhes so/ /'phags pa blo gros rgya mtsho'i mdor yang gsungs pa/ blo gros rgya mtsho 'di ltar chos bgrang ba la zhugs pa'i byang chub sems dpa' sems can thams cad kyis gdungs pa bzod do//de bzhin du sbyar te gang lus yongs su 'dor ba dang lus yongs su gtong ba dang lus la ltos pa med pa 'di ni 'di'i sbyin pa'i pha rol tu phyin pa'o/ /gang lus gcod pa na sems can thams cad la byams pas khyab par byed pa dang tshor ba rnams kyis mi 'phrogs pa 'di ni 'di'i tshul khrims kyi pha rol tu phyin pa'o//gang 'di'i lus gcod par byed pa de rnams nyid kyi thar pa'i don du bzod par byed cing sems kyis rma mi 'byin pa 'di ni 'di'i bzod pa'i pha rol tu phyin pa'o/ /brtson 'grus gang gis thams cad mkhyen pa nyid la 'dun pa de mi gtong zhing sems kyis stobs bskyed pa'ang rab tu 'dzin la 'khor ba'i rjes su 'brel par byed dge ba'i rtsa ba brtsams pa nyid kyang rtsom pa 'di ni 'di'i brtson 'grus kyi pha rol tu phyin pa'o//gang lus 'thor ba na thams cad mkhyen pa nyid du sems bskyed pa rin po che mi gtong zhing byang chub nyid la lta bar byed zhi ba rab tu zhi ba nyid du so sor rtog pa 'di ni bsam gtan gyi pha rol tu phyin pa'o//gang lus gcod pa na lus sgyu ma'i chos nyid du 'jug pa 'di ni 'di'i shes rab kyi pha rol tu phyin pa'o zhes so/ /'di bzhin du tshul khrims bsrung ba dang /shes rab bsgom pa ji srid pa so sor pha rol tu phyin pa drug yongs su rdzogs pas yang dag par bsdus par rig par bya'o/ /'di nyid kyang rnam pa thams cad mkhyen pa nyid la go cha'i sgrub pa ste rtse mo'i mngon par rtogs par skad cig gcig pa mthong ba'i lam mo//de la rdzas su pha rol tu phyin pa drug po ming gis bcur 'gyur te shes rab kyi pha rol tu phyin pa kho na khyad par gyi rnam par zhugs pa rnams thabs dang smon lam dang stobs dang ye shes kyi pha rol tu phyin par mngon par brjod par shes par bya'o/ /de ltar ni pha rol tu phyin pa drug gis bsags pa'i dge ba'i rtsa ba bla na med pa yang dag par rdzogs pa'i byang chub tu yang dag par yongs su bsngo ba thabs kyi pha rol tu phyin pa ste thabs des de mi zad par byed pa'i phyir ro//smon lam gyi pha rol tu phyin pa ni smon lam chen po bcu la sogs pa grangs med pa ste/ gang gis skye ba so sor pha rol tu phyin pa drug la spyod pa'o/ /stobs kyi pha rol tu phyin pa ni sgom pa'i stobs dang so sor rtog pa'i stobs te/ gang gis nyi ma so so'am skad cig so sor de rnams la spyod pa'o/ /ye shes kyi pha rol tu phyin pa ni theg pa chen po dgongs pa ji lta ba dang sgra ji lta bar yongs su shes pa'o//seng ge bzang po ye shes kyi pha rol tu phyin pa rnam par mi rtog pa ma yin zhes brjod pa ni shin tu bab chol te/ shes rab kyi pha rol tu phyin pa'i bdag nyid bcu bzhi pa la sogs pa sems bskyed pa bdun gyi ngo bo ni ye shes kyi pha rol tu phyin pa ste/rnam par rtog pa ni byang chub sems dpa' rnams kyi nyon mongs pa kho na yin pas der thams cad du rnam par rtog pa rnams kun du spyod pa cung zad kyang mi srid la/ mthar bag chags kyang ma lus par nub pa nyid kyi phyir ro/ /de'i phyir 'jig rten las 'das pa'i ye shes kyi rjes la thob pa dag pa ni 'jig rten pa'i rnam par rtog pa'i shes pa ga la yin/dag pa nyid kyang ci zhe na gzung ba dang 'dzin par mngon par zhen pa med pa yin la/ rnam par rtog pa ni de lta ma yin te 'di ni rang nyid ma rig pa'i ngo bo nyid du gyur pa dang gang las rang gi rnam pa la phyi rol gyi ngo bor sgro btags nas 'jug pa yin no//sgro 'dogs pa ma yin na'ang ci ltar 'di rnam par rtag pa yin zhes shing rta chen po rnams kyis nges par dpyad do/ /gal te rnam par mi rtog pa la rang bzhin pa'i bya ba dang 'bras bu la rnam par rtog pa med pa'i phyir ro//de tshe bya ba la 'jug pa med de de ni rnam par rtog pa dang 'brel ba nyid kyi phyir ro zhe na/ skyon med de shing gi rang bzhin gyi skyes pa dang bud med kyi 'khrul 'khor bzhin du yod pa tsam las der rab tu 'jug pa'i phyir ro/ /der ni 'khrul 'khor mkhan gyi rnam par rtog pa rgyu yin la 'dir ni de lta ma yin zhes par yang dogs pa mi bya ste/der yang sngon gyi smon lam gyis 'phen pa yod pa nyid kyi phyir ro/ /rnam par rtog pa ni rang yod pa tsam las tha dad pa'i bya ba gzhan med pa kho na yin la de cig shos la yang khyad par med do/ /rnam par rtog pa'i shes pa rgyu nub pa goms pa dang ldan pa rnams rang nyid klog pa la sogs pa'i bya ba la 'jug pa yang mthong ngo zhes so//rnam par rtog pa med pa la spyod pa 'di'i phan yon yang gsungs pa/ gal te 'jig rten gyi khams thams cad na gnas pa'i sems can rnams bdud du gyur la bdud re res kyang ba spu'i bu ga re re nas byung ba'i bdud kyi lus tshad de snyed mngon par sprul mod//de lta na yang rnam par rtog pa med pa spyod pa'i byang chub sems dpa' la bar chad bya bar mi nus so zhes so/ /'phags pa sa bcu par yang khams gsum pa'i bdud thams cad kyi stobs rab tu 'joms par byed pa'i stobs stong pa nyid kyi don gyi rdo rje chen pos 'joms par byed pa rnams 'dul lo zhes pa dang stong pa nyid kyi rdo rjes kyang de rnams rab tu gzhol bar bya'o zhes gsungs so//bdud dang mu stegs byed la sogs pa'i stobs stong pa nyid kyis snang ba med par byed pa ni rab tu 'joms pa'o//rigs pa drug cu par yang / ji srid yid ni rnam g.yo ba/ /de srid bdud kyi spyod yul yin/ /zhes so/ /bdud [(]kying [,]kyang [)]rnam pa bzhi'o/ /de la phung po'i bdud ni rten gyi bdud de gang las de rnams su 'chi ba'o/ /nyon mongs pa'i bdud ni byed pa'i bdud de gang gi phyir de rnams kyis 'chi ba'o//'chi bdag gi bdud ni rang bzhin gyi bdud de dngos po la g+hanya'o/ /lha'i bu'i bdud de bdud rnam pa gsum rab tu spong ba la sbyor ba rnams kyi bar du gcod par byed pa'i phyir ro zhes so/ /de la sbyin pa'i mtshan nyid brjod zin te rnam pa gsum yang ngo / / tshul khrims ni bdag dang gzhan la phan 'dogs par rab tu 'jug pa'i phyir na 'gyod pa med cing rab tu dga' ba'i sbyor bas nyon mongs pa dang du mi las sdig pa mi 'jug pas sam sems la 'gyod pa'i mi nye bar zhi bas sems bsil bar byed pa'o/ /yang na bde ba'i rgyu nyid kyis dam pa rnams kyis bsten par bya ba nyid kyi phyir tshul khrims so//de rnam pa gsum ste sdom pa'i tshul khrims dang / dge ba'i chos sdud pa'i tshul khrims dang / sems can gyi don bya ba'i tshul khrims so zhes so/ /de la sdom pa'i tshul khrims gang yin pa de ni ldog pa'i tshul khrims kyang ngo / / de yang spong ba rnam pa bdun gyi mtshan nyid can de 'dod chags med pa dang / zhe sdang med pa dang / yang dag pa'i lta ba rnams te chos gsum ni de rnams kun nas slong bar byed pa'o zhes pa dang / kun nas slong bar byed pa dang bcas pa'i tshul khrims kyi dbang du byas na dge ba bcu'i las kyi lam rnams su 'gyur ro zhes pa ste de rgyas par brjod zin to//ma brjod pa gang rnams las ldog pa srog gcod pa la sogs pa de rnams kyi mtshan nyid la sogs pa ni brjod par bya'o/ /de la srog chags pha rol po bsad pa ni srog gcod pa'i dngos gzhi'i las kyi lam yin la yan lag lnga ni srog chags dang srog chags su 'du shes pa dang gsod par 'dod pa dang sbyor ba byas pa dang shi ba'o//gal te 'di bsad do snyam du 'du shes pas pha rol gsod na'o/ /gang bsad par 'dod pa de nyid bsad na ste gzhan ma yin no//de yang sbyor ba des de ma thag gam phyis shi na'o/ /'o na gang du dmag gis gdab pa dang ri dgas kyi lings la sogs pa rnams su pha rol po rnams gsod pa'i ched du tshogs pa mang po 'dus pa der gcig gis srog chags gsod par byed na ci de nyid gcig pu kha na ma tho ba de dang ldan par 'gyur ram 'o na te thams cad 'gyur zhe na/thams cad de rnams bya ba gcig pa'i phyir ro/ /'dod pa med pa las gzhan la ste gang zhig nan gyis khrid pa yang srog chags mi bsad do zhes pa de ltar nges par byas te 'gro ba de la bya ba gcig pa nyid med pa'i phyir ro//'di bzhin du ma byin par len pa la yang rig par bya'o/ /'o na gang the tshom gyis gsod par byed pa ci 'di srog chags sam 'on te ma yin de nyid 'di 'am 'on te gzhan zhes pa de'i 'di ci ltar las kyi lam du 'gyur te nges pa med pa'i phyir ro zhe na/ 'gyur te gal te gang su yin yang rung de yin yang rung snyam du byas nas bsnun zhing de yang de las shi na'o//de ma yin pa la der 'du shes pa ni 'gyur te/ de la bsad pa'i bsam pa med pa'i phyir dang sbyor ba ma yin pa'i phyir ro/ /'ga' zhig blo sngon du med kyang bsad pa las byed pa po la chos ma yin pa yod pa ma yin nam dper na me dang reg pa las sreg pa bzhin/de'i phyir 'dir gsod sems ni ci dgos zhes zer ro/ /de ni yang dag pa ma yin te/ gal te gsod pa'i bsam pa dang sdug bsngal bskyed pa'i bsam pa la med pa la'ang bya ba dang 'brel pa tsam las byed pa po la chos ma yin pa skye bar 'dod na/de'i tshe 'dir sus kyang su la yang ci yang mi bya ste/ za ba po gsud de shi ba na zar 'jug pa po srog rjes su gzung bar 'dod pa la yang chos ma yin par thal ba'i phyir dang / sman pa nad pa rnams la rjes su mthun pa'i bya ba rnams nad med pa dang bde ba bskyed par 'dod pas sreg pa dang bcas pa la sogs pa byed pa rnams kyi 'ang chos ma yin par thal ba'i phyir sus kyang bzar gzhug par mi bya la sman dpyad la sogs pa'ang mi bya'o//de'i phyir ci zhig ltar shi bar gyur pa la'ang mes rang gi rten sreg pa bzhin bdag nyid la'ang chos ma yin par thal ba'i phyir ro//de'i bsam pa can byed du bcug pa las mi 'gyur te pha rol po me la reg tu bcug pa las tsha ba nyams su myong ba cung zad kyang med do zhes pas 'di ni gang ci yang ma yin no/ /'o na pha rol po byed du bcug pa la ci ltar las kyi lam du 'gyur te sbyor ba med pa'i phyir ro zhe na/de ni ma yin te bka' bsgos pa'i phyir ro/ /de nyid 'di'i sbyor ba ste gang 'di pha rol po gsod pa la sbyor ba bka' bsgos pa yang sbyor ba'i phyir dang / gang des bka' bsgos pa 'di rab tu sbyor la de nyid sbyor ba po'i sbyor ba ste de'i bka' yis 'di rab tu 'jug pa'i phyir ro//de nyid kyi phyir 'di las kyi lam du grub po/ /brnab sems la sogs pa las gzhan te pha rol pos sbyor ba mi srid pa'i phyir ro/ /'dod pas log par g.yem pa las kyang ste pha rol po byed du bcug pa las 'di la de 'dra ba'i dga' ba yod pa ma yin no/ /de'i phyir 'di la rang nyid rab tu sbyor ro//de bzhin du rjes su yi rang bzhin pa la yang las kyi lam bcu po rnams kyang 'gyur ro/ /dge ba'i lam gyi lam yang byas pa dang byed du bcug pa dang rjes su yi rang ba la 'di bzhin kho nar rnam par gzhag go/ /lung ni chos rnams yid sngon du 'gro ba'i zhes pa'o//bla na med pa'i sa brnyes pa rnams kyi rang gi ngang gis 'byung ba rnam par rtog pa med par dge ba la 'jug pa la'ang sngon gyi yid kyi bag chags smin pa dam pa yod pa'i phyir yid sngon ma can yod pa nyid do/ /ma byin par len pa ni rdzas kyi bdag po'i mngon sum du yod pa de la brnyas pa byas nas stobs kyis sam de'i mngon sum du med pa 'jab bus kyang pha rol gyi rdzas len pa ste pha rol gyi rdzas dang /pha rol gyi rdzas su 'du shes pa dang rku bar 'dod pa dang / sbyor ba byas pa dang brkus pa zhes pa yan lag lnga'o/ /gal te pha rol gyi rdzas 'di rku'o zhes 'du shes pas rku ba dang /gang rku bar 'dod pa de nyid brkus na ste gzhan ni ma yin no/ /gal te nor 'di pha rol po bdag po'am bsrung ba pa de nyid las rjes su 'brel par mi byed na ste/ de'i tshe ji srid 'di btang ba'i bsam pas ldog par byed pa'am/ brkus nas 'di thob par dbugs phyung ste gnas na'o/ /gang gi tshe byang chub sems dpa' sems can thams cad la rdzas thams cad btang ba de'i tshe'ang sems can bdag por gyur pa'i longs spyod rnams kyis sems can rje dpon du gyur pa kho na'i bdag nyid kyi dngos po yang dag par bsrung ba'o zhes pa nyes pa med de/rtag tu rje bo'i las byed pa'i bran la rang gi rdzas yod pa ma yin pas gang gis 'tsho bar byed/ mtha' gcig tu rje bo'i don mchog tu byed pa'i bran la ni rje bo na ba la sogs pas blo rnam par g.yengs pas ma gnang bar longs spyod pa la'ang nyes pa cung zad kyang med do//'dod pas log par spyod pa ni bgrod par bya ba ma yin pa dang / yan lag ma yin pa dang / yul ma yin pa dang / dus ma yin par bgrod pa ste/ yan lag lnga ni gzhan dang gzhan gyir 'du shes pa dang mngon par bgrod par 'dod pa dang / sbyor ba byas pa dang mngon par bgrod pa'o/ /de la bgrod par bya ba ma yin pa la bgrod pa ni bgrod min bgrod pa'o/ /'dir bgrod par bya ba rang gi chung ma kho na ste de'i don du nges par gzung ba'i phyir chun ma'ang rung / bsdus pa'am smad 'tshong ma yang rjes su myos pa pha rol pos bgrod bya ma yin pa'o//gzhan ni bgrod bya min pa ste de dang 'dra ba nyid la dgag sgra ste mi 'dra ba yang dag par rtogs pa'i phyir ro/ /bgrod par bya ba ma yin pa de yang rnam pa gnyis te/ rang bzhin gyis dang yang dag par 'brel pas so/ /de la rang bzhin gyis ni ma dang sring mo dang bu mo dang ma dang pha'i 'brel pa yang rung ste ngo tsha ba'i 'os nyid kyis 'di rnams yongs su spang bar bya ba'i phyir ro//rab tu byung ngam yang ste 'di 'jig rten gyi chos las 'das pa nyid kyi phyir ro/ /'di las gzhan ni yang dag par 'brel pas bgrod par bya ba ma yin pa ste pha rol gyis yongs su bzung bas de dang yang dag par 'brel pa'i phyir ro//'di ni 'dod pas log par spyod pa'i gzhi'o/ /dud 'gro'i 'gro ba rnams dang rigs kyis bsrungs pa rnams kyang rang bzhin gyis dman pa nyid kyi phyir dang spyad par bya ba ma yin pa nyid kyi phyir bgrod par bya ba ma yin pa tsam du thal ches pa yongs su spang ba'i phyir gsungs pa'o//gal te pha rol po'i lam bgrod par bya ba ma yin pa gzhan 'di la bgrod par bya'o zhes/ 'du shes pas mngon par bgrod pa dang rang gir 'du shes pas de nyid la bgrod pa ma yin pa dang / gang rnams gang la bgrod par 'dod pa la ste/ gzhan bgrod par bya ba ma yin pa la yang ma yin pa/de'i tshe 'dod pas log par spyod pa'i las kyi lam du 'gyur ro/ /yan lag ma yin pa bgrod pa ni yan lag min bgrod de yan lag ni mo'i dbang po ste 'di'i 'khrig pa ni dbang po gnyis snyoms par 'jug pa'i rang bzhin yin pa nyid kyi phyir ro/ /yan lag ma yin pa ni yan lag min pa kha dang bshang ba'i lam de dang 'dra ba las 'dod pas log par spyod pa'i gzhi'o//rang gi lag pa la sogs pa rnams ni thal ches pa spang ba'i don nyid du gsungs pa'o/ /rang gi chung ma la yang yul ma yin pa gtsug lag khang ngam mchod rten nam snang ba la bgrod pa ni yul ma yin par bgrod par 'dod pas log par spyod pa'o//dus ma yin pa ni mi rung ba'i gnas skabs mngal lci bas non pa dang yun mi ring ba na btsas pa dang 'khrig pa spong ba ste 'di ni 'dod pas log par spyod pa'i gzhi'o/ /mi 'dod pa dang sdug bsngal ba dang yid mi bde ba'i gnas skabs dang zla mtshan 'dzag pa'i gnas skabs kyang dus ma yin pa tsam ste/rjes su 'jug bya ma yin pa nyid kyi phyir dang smad par bya ba nyid kyi phyir 'di rnams thal ches pa spang ba'i don nyid du gsungs pa'o/ /rang gi chung ma la yang dus ma yin pa mngal dang ldan pa dang nu zho 'thung ba dang nges pa dang bcas pa la bgrod par byed na dus ma yin par bgrod la 'dod pas log par spyod par 'gyur ro zhes pa lus kyi las kyi lam gsum mo//brdzun du smra ba ni gzhan las rnam pa gzhan du 'du shes pas ngag gam lus kyis brjod par 'dod pa'i don rtogs par byed pa ste yan lag lnga ni dngos po dang rnam pa gzhan du 'du shes pa dang gzhan du brjod par 'dod pa dang sbyor ba byas pa dang gsal por brjod pa'o//de la rnam pa gzhan du brjod par 'dod pa ni slu ba'i bsam pa'o/ /sbyor ba ni smra bar 'dod pa'o/ /gal te don gang rjod par byed pa de la slu ba'i bsam par 'gyur ba dang /gang gi dbang du byas nas smras pa nges don de dag de las go na'o/ /'di lta bu 'di ni brdzun du smra ba'o/ /gzhan du na tshig 'khyal pa nyid du 'gyur ro nyon mongs pa can nyid kyi phyir ro/ /kha cig na re brjod pa med par don rnam pa gzhan du rtogs par byed pa de brdzun gyi don rtogs par byed par 'gyur gyi brdzun du smra ba ni ma yin te/brjod pa med pa'i phyir ro zhes zer ro/ /de ni ma yin pa nyid de/ smra ba'i sgras rtogs par byed pa nye bar mtshon pa ste de ni lus kyis kyang ngo / /de lta ma yin na lus kyi rnam par rig byed ci ltar las kyi lam 'di'i nang du bsdu bar bya/so sor thar pa'i mdo 'don pa na'ang ltung ba dang bcas bzhin du cang mi smra bar gyur na brdzun du smra bar gsungs pa de ci ltar drang bar bya/ 'di'i ngag gi don go ba nyid ni ngag gi las dang chos mthun pa'i phyir ro/ /de ltar ni bcom ldan 'das mar rmi lam ni brdzun du smra ba ste zhes pa 'di sangs rgyas ye shes zhabs kyis rnam par bshad pa ni/yang dag pa'i don can ma yin pa nyid kyis de dang 'dra ba'o zhes so/ /phra ma ni pha rol 'grogs pa rnams sam 'khon skyes pa rnams dbye ba'i don nam mi 'dum pa'i don du nyon mongs pa can gyi sems kyis 'di dag dbye ba'am mi 'dum par bya'o zhes mi mthun par byas pa'i tshig ste/yan lag lnga ni dbye ba dang der 'du shes pa dang dbye bar 'dod pa dang sbyor ba byas pa dang 'byed par smras pa'o/ /gal te gang gi dbang du byas nas smras pa des don de go na'o/ /gzhan du na tshig 'khyal pa nyid de nyon mongs pa can nyid kyi phyir ro//phan pa'i bsam pa can gyis grogs ngan pa dang dbye ba'i bsam pas ni phra mar mi 'dod de nyon mongs pa can gyi bsam pa med pa'i phyir ro/ /tshig rtsub po ni nyon mongs pa can gyi sems kyis pha rol po rnams la mi snyan par smra ba dang mtshang 'dru ba'am skyon 'byin pa ste/yan lag lnga ni zher gdab par bya ba dang der 'du shes pa dang sems khros pa nyid dang sbyor ba byas pa dang mi snyan par smras pa'o de gal te go na'o/ /gzhan du na tshig 'khyal pa nyid de nyon mongs pa can nyid kyi phyir ro/ /tshig 'khyal pa ni brdzun du smra ba la sogs pa'i las rnam pa gsum las gzhan pa gang nyon mongs pa can gyi tshig ste/'dod pa dang bcas pa'am chos ma yin pa dang bcas pa'am don ma yin pa dang bcas pa'am byis pa'i gtam dang tshogs kyi dang mya ngan gyi dang grong pa'i nyams dang bcas pa'i glu rnams dang / rjes su chags pa'i dang gar la sogs pa'i brjod pa dang bstan bcos ngan pa rnams kyang ste/ngag gi las 'di thams cad do/ /yan lag lnga ni don med pa la sogs pa dang bcas pa'i don dang der 'du shes pa dang nyon mongs pa can gyi sems nyid dang / sbyor ba byas pa dang 'brel pa med par brjod pa'o/ / las kyi lam gsum po 'di rnams kyang lus kyis kyang byed de brdzun du smra ba bzhin no zhes slob dpon zla ba grags pa'o/ /de ltar ngag gi las kyi lam bzhi rnams so/ /brnab sems ni kye ma ma la pha rol po rnams kyi gang yin pa de dag gir gyur na zhes pha rol gyi rdzas dang longs spyod rnams sam bud med rnams la chags pa 'dzin pa'i nges pa ste/yan lag lnga ni pha rol gyi rdzas dang der 'du shes pa dang der rtog pa dang 'dzin pa rab tu 'jug pa dang 'dzin par nges pa'o/ /gnod sems ni sems can pha rol po rnams la zhe sdang ba sems can 'di rnams la 'tshe bar bya'o zhes gnod pa'i rnam par zhugs pa ste yan lag lnga ni sdang bya dang der 'du shes pa dang sems 'khrugs pa dang zhe sdang rab tu 'dzin pa dang zhe sdang ba'o//log par lta ba na rgyu dang 'bras bu dang bya ba dang yod pa'i dngos po la skur pa 'debs pa'i lta ba ste/ yan lag lnga ni skur pa gdab bya dang der 'du shes pa dang skur pa 'debs par 'dod pa dang skur pa 'debs par yang dag par 'dzin pa dang /skur pa 'debs par byed pa'o/ /lta ba ni 'dir nyon mongs pa can gyi shes rab ste gang gis dge ba'i rtsa ba rnams yang dag par gcod cing mi dge ba la 'jug la dge ba rnams la ma yin pa'o/ / gang de las gzhan pa log par lta ba theg pa gzhan la sogs par lta ba'i mtshan nyid can de thams cad ni log par kun du rtog pa ste/ des dge ba'i rtsa ba gcod par 'gyur ba ni ma yin no zhes pa yid kyi las kyi lam gsum mo/ /kha cig gsum po 'di rnams bsam pa kho na'i khyad par las rig par bya la gnod sems ni dmigs pa'i khyad par las kyang 'dod do zhes zer ro//mi dge bcu po 'di rnams la so sor 'dod chags dang zhe sdang dang gti mug gis rab tu sbyor ro/ /gang gi phyir srog gcod pa gti mug las skyes pa yod de chos kyi blos mchod sbyin byed pa rnams phyugs gsod pa dang rgyal po rnams ma rungs pa gsod pa dang sog po par sig pa rnams ma dang pha gsod pa dang /de bzhin du zas med par 'jog pa dang / dge slong gsod pa dang / 'ga' zhig sbrul la sogs pa dang ri dgas la sogs pa gsod pa ste/ sbrul dang sdig pa dang tam pa ka la sogs pa mi rnams la nye bar 'tshe bar byed pa rnams gsod par bya'o//ri dgas dang phyugs dang bya dang nya la sogs pa rnams longs spyod kyi don du'o zhes log par lta bas 'jug pa thams cad gti mug las skyes pa'i sbyor ba'o/ /de bzhin du ma byin par len pa la ste 'dir gti mug las skyes pa'i sbyor ba ni chos kyi blos rgyal po rnams ma rungs pa tshar gcad pa'i don du dang /bram ze rnams kyang 'di thams cad tshangs pa bram ze rnams la byin pa la dmangs rnams stobs kyis yongs su longs spyod de/ de'i phyir bram ze len pa ni rang gi len pa'o zhes smra ba rnams kyi ste 'di rnams la 'dir pha rol dang rang gi 'du shes su mi 'gyur ba yang med do//de bzhin du 'dod pas log par spyod pa'i sbyor ba gsum las skyes pa ste/ gti mug las skyes pa ni chos kyi blos sog po par sig pa rnams ma la bgrod pa dang bram ze rnams kyi ba lang byin gyi mchod sbyin la gang 'di skad smra ba ste/ bram zes ba lang byin gyi mchod sbyin byas nas lo gcig gis ba lang gi brtul zhugs su 'gyur ro//cho ga can gyis chu btung ngo rtswa rnams gcod do/ /ma dang nye bar 'gro'o/ /sring mo dang nye ba dang rigs gcig pa dang nye bar 'gro ste/ de ltar glang bu 'di 'jig rten las rgyal bar 'gyur ro zhes smra ba dang 'jig rten rgyang 'phen pa rnams kyang ma la bgrod pa ni/gtun dang me tog dang 'bras bu dang zas tshos pa dang 'jug ngogs dang lam dang 'dra'o zhes te/ 'dir chos ma yin pa cung zad kyang med do zhes 'jug pa'o/ /de bzhin du brdzun du smra ba'i sbyor ba ste/ gti mug las skyes pa ni skyon ma mthong ba las te/de bzhin bram ze rnams bud med rnams la dang bag ma len pa'i dus dang srog dang nor srung ba'i don du brdzun du smra ba ni ltung ba med do zhes smra ba lta bu'o/ /de bzhin du dngos gzhi dang mjug kyang 'dod chags dang zhe sdang dang gti mug rnams kyis so/ /de bzhin du gzhan rnams la yang 'dod chags dang zhe sdang dang gti mug sngon du song bas sbyor bar shes par bya'o//phra ma'i sbyor ba gti mug las skyes pa ni phra ma byas pa la nyes pa ci yang med do zhes pa'o/ /de la byed par 'dod pa'i rjes su de la bya ba gang yang rung ba cung zad de ni sbyor ba'i gnas skabs so//sbyor ba des de'i tshe'am dus gzhan du las de yongs su rdzogs pa ni mthar thug par byed pa'i bdag nyid dngos gzhi'i las kyi lam mo/ /de'i rjes su gang rjes su sgrogs pa dang gang yang dag par dga' ba dang gang yang gzhan de dang mthun pa'i bya ba de ni rjes so/ /'o na yid kyi brnab sems la sogs pa rnams la bsam pa ni ci sbyor ba ni ci ste bye brag med pa'i phyir ro zhe na/de'i gzhi la de ltar 'du shes pa dang de ltar 'dod pa ni bsam pa'o/ /de'i bya ba yang dag par 'dzin pa ni sbyor ba'o/ /de lta nyid du nges pa ni mthar thug par byed pa'i las kyi lam mo zhes pa bye brag yod do//mi dge bcu'i las kyi lam 'di rnams kyang byang chub sems dpa'i ltung ba ste ltung ba ni 'da' ba'i ngo bo nyid yin pa'i phyir ro/ /de lta mod kyi dge ba'i bsam pa can gyi dge ba'i rkyen gyi dbang 'ba' zhig las rjes su mthun pa'i rkyen de dang de las/ de dang der ji ltar nye bar bstan pa las 'da' ba dang /snying rje can sems can rnams la byams pa las phan par 'dod pa dang / rnam par drang bar 'dod pa dang 'dul bar 'dod pa nyid kyis 'da' ba ni ltung ba med do/ /las ni rnam pa gnyis te kun nas bslang bar bya ba dang kun nas slong ba po'i bye brag gis so/ / de la lus dang ngag gi las thams cad kun nas bslang bar bya ba ste yid kyi ni kun nas slong ba po'o/ /de yang rnam pa gnyis te 'dod chags med pa la sogs pa'i ngo bo dang de las cig shos so/ /de la 'dod chags la sogs pas kun nas bslang ba'i lus dang ngag gi las thams cad mi dge ba'o//'dod chags med pa la sogs pas kun nas bslang ba thams cad ni dge ba kho na'o/ /ji skad du bzhi brgya par gsungs pa/ byang chub sems dpa' kun rtog las/ /dge ba'am yang na mi dge ba'o/ /gang phyir de'i yid dbang gyur na/ /thams cad dge ba nyid du 'gro/ /zhes so/ / de bzhin du slob dpon tsan+d+ra go mis kyang / sems dge ba dang byams nyid las/ /snying brtse ldan la ltung ba med/ /ces pa dang / snying brtser bcas na mi dge med/ /ces gsungs so/ /byang chub kyi spyod pa la 'jug par yang / /snying rje ldan dang don mthong la/ /bkag pa yang ni rjes su gnang //zhes so/ /gzhan yang / dge slong gis ni rang gi pha/ /rgan por myur bar 'dod do zhes/ /phul bas bub ste shi na yang / /'di la mtshams med 'byung mi 'gyur/ /dgra bcom nang pa rang nyid kyis/ /rang gi mgrin pa nyes mthong ba/ /de ni shi na g.yog byed pa'i/ / dge slong de ni skyon brten min/ /gzhan la gzhan gyi 'du shes kyis/ /bsad par gyur kyang skyon yod min/ /zhes pa 'dul bar gsal bar gsungs so/ /gdug sems med la skyon ma yin/ /gang phyir gso ba'i blo yis ni/ /mtshams med pa la nye byed pa/ /mchod rten rko ba skyon ma yin/ / bsod nams phung po 'ba' zhig 'gyur/ /dge ba'i bsam pas thub dbu la/ /mchil lham zung ni bzhag pa dang / /de bzhin gzhan gyis bsal ba dag /rgyal srid 'bras bu thob par 'gyur/ /de phyir bsam pa'i rtsa bas ni/ /sdig dang bsod nams rnam par gzhag /ces pa lung du gsungs gang phyi//sems dge ba la ltung ba med/ /de phyir brtse ba'i bdag rnams kyis/ /gzhan la phan gang thams cad byed/ /las de thams cad dge ba ru/ /rdzogs sangs rgyas kyis yongs su bsgrags/ /de ltar yul gyi bye brag gis/ /gang tshe las kyi lam la gnas//de tshe gang du'ang mkhas rnams la/ /'gal ba cung zad snang min nyid/ /de ltar ni byang chub sems dpa' chom rkun pa srog chags du ma rnams dang bdag nyid chen po nyan thos dang rang sangs rgyas dang byang chub sems dpa' rnams zang zing cung zad tsam gyi rgyur gsod pa la 'bad pa mtshams med pa mang po'i bya ba la rab tu zhen pa gzigs te/gzigs nas kyang yang 'di ltar sems mngon par 'du byed de/ gal te yang bdag gis 'di 'tsho ba dang bral nas dmyal ba rnams su skye bar 'gyur mod bdag dmyal ba rnams su skye ba ni gdong bla'i/ sems can 'di mi mang po bsad cing mtshams med pa'i las byas nas dmyal bar 'gro bar 'gyur na mi rung ngo zhes pa'i bsam pas snying rje dang ldan pas 'dzem bzhin du 'tsho ba dang phral na ltung bar mi 'gyur la bsod nams mang po yang rab tu skye'o//gang yang chom rkun pa gzhan gyi rdzas 'phrog pa rnams kyis dge 'dun gyi'am mchod rten gyi rdzas 'phrogs te longs spyod par 'dod pa de rnams kyi mdun nas byang chub sems dpas rdzas de ma blangs na nges par 'di rdzas yongs su longs spyod pas de rnams yun ring por don ma yin pa dang mi phan pa dang mi bde bar ma gyur cig ces pas blangs nas dge 'dun gyi dge 'dun la mchod rten gyi mchod rten la phul na/'di ltar ma byin par blangs pa ni ltung bar mi 'gyur la bsod nams mang po yang rab tu skye'o/ /de bzhin du rgyal po'am rgyal po'i blon po ma rungs pa chen po gzhan la 'khu ba la rab tu chags pa dge 'dun dang mchod rten dag la gnod pa byed pa'am kun dga' ra ba pa dge 'dun dang mchod rten gyi dkor 'phrog pa rnams kyi rgyal srid dang dbang phyug gi bdag po nyid nyams par byas pa la rig par bya'o//byang chub sems dpa' la gzhan gyi bud med chags pas bcings pa'i sems kyis 'khrig pa shin tu don du gnyer te/'di skad du bdag ji ltar 'dod pa ltar byed pa nyid na khyod kyis gdul bar 'gyur la gzhan du na nges par bdag srog kyang yongs su gtong ngo zhes pa la/ 'di ltar bdag la 'di nges par brnab sems skyes te bsod nams ma yin pa 'phel bar gyur pa mi rung la 'dod pa thob pa ni ji ltar 'dod par dge ba la yang dag par sbyor ba dang mi dge ba spong du 'jug pa la dbang du 'gyur ro zhes thugs brtse bzhin pas de la log par spyod pa spyad pa'ang ltung bar yang mi 'gyur la bsod nams shin tu mang po yang rab tu skye'o//'di nyid la dgongs nas bcom ldan 'das kyis gsungs pa/gang yang byang chub sems dpas zhe sdang gis kun nas bslang ba'i ltung ba spang bar bya'i 'dod chags kyis kun nas bslang ba ma yin no zhes pa dang / de bzhin du 'dod chags las skyes pa'i ltung ba ni ltung ba ma yin par rig par bya'o zhes so/ /'dod chags kyi sgra ni 'dir byams pa brjod par byed pa ste/de yang byams pa ring du rjes su 'jug pa ste/ gang 'di mtha' gcig tu sems can rnams la phan pa'i ched nyid du 'jug pa'o/ /de bzhin du nye ba 'khor gyis zhus par yang gsungs pa nye ba 'khor/ zhe sdang ni sems can yongs su gtong ba la 'jug go/ / 'dod chags ni sems can yang dag par sdud pa la'o/ /de'i phyir nye ba 'khor 'dod chags dang mtshungs par ldan pa'i ltung ba gang ci yin pa de rnams thams cad ltung ba med pa zhes pa yong ngo zhes so/ /'dir sems can yang dag par sdud pa la zhes pas khyad par du byas pa nyid kyi phyir lhag pa'i bsam pa dang snying rje dang ldan pa la 'di nye bar bstan pa'o zhes pa dgongs pa'o//gang gi phyir de ma thag tu gsungs pa/ nye ba 'khor de la gang thabs la mi mkhas pa'i byang chub sems dpa' de rnams 'dod chags dang mtshungs par ldan pa'i ltung ba rnams las 'jigs so/ /thabs la mkhas pa rnams ni zhe sdang dang mtshungs par ldan pa rnams las 'jigs kyi 'dod chags dang mtshungs par ldan pa rnams las ma yin no zhes so//thabs la mkhas pa rnams kyang su zhe na/ gang shes rab dang snying rje phan tshun mtshungs par ldan pa dag gis sems can gtong ba las zlog par byed pa rnams so//gnyis ka ltar na sems can gtong bar 'gyur ba'i phyir te shes rab 'ba' zhig pas sdug bsngal stong pa nyid du rtogs pa las dang snying rje 'ba' zhig pas kyang nyon mongs pa'i stobs las ring po ma lon par snying rje nyams par 'gyur bas so/ /thabs la mkhas pa'i mdor gsungs pa/byang chub sems dpa' thabs la mkhas pa 'dod pa'i yon tan lnga rnams kyis mngon par dga' bar byed cing de rnams kyis kun du 'dre bar gnas la/ gang gi tshe 'dod par gyur pa de'i tshe shes rab kyi stobs bskyed pa dang thams cad mkhyen pa nyid kyi sems gcig gis 'dod pa'i yon tan thams cad la longs spyad de shi 'phos nas tshangs pa'i 'jig rten du skye'o zhes so//zhe sdang la yang 'di ltar mi 'dod pa ci zhe na/ rang bzhin gyi kha na ma tho ba chen po dang bcas pa'i phyir dang snying rje dang bral ba la thabs nyid mi srid pa'i phyir ro/ /ci ste gang gzhan gyi don grub pa ni rang gi don las chas lhag par mos pa/pha rol la khro ba 'jug pas kyang pha rol la rjes su bstan te rjes su gdung ba sngon du song bas de ma thag par phyis sdom par byed pa/ de'i mi phan pa las zlog par byed pa na khro ba skyon ci yod ce na/ skabs phye bas de'i bag chags kyi nyes pa las snying rje nyams pa'i skyon du 'gyur te/de chad na'ang rtsa ba chad pa'o/ /gal te yang sems can de la phan no zhe na/ de lta mod kyi byang chub sems dpa'i snying rje nyams pas/ sems can gyi phung po chen po'i don rgyun nyams par 'gyur ro/ /'phags pa bden pa gcig pa'i le'ur yang / bu'i dpe ni snying rje la gnas pa nyid yin par rig par bya'o//gang yang der ha cang snying rje bkag pa de 'jig rten gyi don kho na thun mong gi bdag po'i dbang du byas te gsungs so/ /bzlog par bya ba yang gal te na phan par 'dod pa'i byang chub sems dpa' la khong khro bar gyur na/ de yang byang chub sems dpa' ma yin pa dang der gnyis ka'i don ma yin par 'gyur ro//de ltar na 'dod chags la yang skyon mang po gsungs te/ rang gi bde ba la chags pas pha rol gyi sdug bsngal la btang snyoms pa mthong ngo zhe na/ mthong ba bden te gang gis gzhan gyi sdug bsngal nyid du goms pa med pa'o//de lta na rab tu sbas te bdag po dang bcas pa'am bdag po med pa rnams dang rigs dang chos kyi rgyal mtshan gyis bsrung ba rnams la 'dod pas log par spyod par mi 'gyur ram zhe na/ sems can gyi don yod pa dang sems can la nye bar gnod pa med na rjes su 'brel pa nges par brtags te skyon med do//yang dag par tshangs par spyod pa rnams la ni/ don byas pa nyid las ring du spang ba dang mchod par 'os pa yin te ma dang sring mo la sogs pa bzhin no/ /de lta na dge slong gis kyang de bzhin du sgrub po zhe na/ ma yin te de rnam pa gzhan tshangs par spyod pas sems can gyi don sgrub par byed pa'i phyir ro//ci ste de las kyang lhag pa'i sems can gyi don mthong na bslab pa phul bas de la skyon mi srid do/ /gzhan yang 'jig rten na pha mas bu gsal shing la bskyon pa mthong ba dag kyang rang dang rjes su mthun pa'i snying rje'i dbang las rang gi bde ba la mi chags pa mthong na mi nyung ba'i bskal par goms pa de'i bdag nyid du gyur pa'i snying rje chen po dang thabs dang shes rab la sogs pa dge ba'i rtsa ba yongs su rdzogs pa'i byang chub sems dpa' rnams la 'dod chags kyis bar chad byed pa ni lta ci smos te 'di ni mi srid do//'di ltar sems can gyi don la thabs gzhan med na 'dod chags las skyes pa'i ltung ba ni ltung ba med par gsungs so/ /thabs la mkhas par yang / smad 'tshong ma bzhin du don byas pa'i byang chub sems dpa' ltos pa med pa ni sems can de gtong ngo / /sa ma thob pas kyang pha rol tu phyin pa drug legs par spyod pa dang ldan pa 'di bsam par bya ste/cig shos kyi ma yin no zhes pa zhar la 'ongs pa de tsam ste gzhag go/ /de'i phyir zhe sdang gi skabs sbyin par mi bya'o/ /nye ba 'khor gyis zhus par gsungs pa/ shA ri'i bu byang chub sems dpa' rnams kyi kha na ma tho ba chen po dang bcas pa'i ltung ba ni gnyis te/gang dag ce na zhe sdang dang ldan pa dang gti mug dang ldan pa'o zhes so/ /gang yang byang chub sems dpa' rang gi srog gi phyir yang shes bzhin du brdzun du mi smra ba de pha rol po rnams gsod pa dang 'ching ba la sogs pa grol ba'i don du zang zing la mi lta ba thugs brtse ba nyid kyis brdzun du smra ba ni ltung ba med par 'gyur te bsod nams mang po yang rab tu skye'o//sdig pa'i grogs po dang 'brel pa'i sems can rnams de dag dbye ba'i ched du phra mo spyad pa yang ltung ba med de bsod nams mang po yang rab tu skye'o/ /lam log pa la spyod pa rnams de las bzlog pa'i ched du yang yang tshig rtsub po smra ba yang ltung ba med de bsod nams mang po yang rab tu skye'o//gar dang glu dang rol mo dang smad 'tshong ma dang bza' ba dang btung ba dang rgyal po dang chom rkun pa la sogs pa'i gtam la mos pa rnams de rnams kyi gtam gyis drangs nas dge ba la rab tu zhugs pa'i don du rnam pa sna tshogs pa'i 'brel pa med pa'i gtam byas kyang ltung bar mi 'gyur la bsod nams mang po yang rab tu skye'o//de ltar rang bzhin gyi kha na ma tho ba'i las rnams byas kyang byang chub sems dpa' la mi dge ba med cing bsod nams mang po yang rab tu skye na bcas pa'i kha na ma tho ba rnams lta ci smos//de lta mod kyi byang chub sems dpa' rnams kyis byis pa rnams rjes su bsrung ba'i don du 'di lta bu kun du spyad par mi bya ste/ gang gi phyir byis pa rang gis de srid du bag la nyal ma spangs pa rnams pha rol snying rje bas 'jug pa la ltung ba med cing bsod nams mang po yang rab tu skye'o zhes brtag pa phra mo tsam bzung nas de dang de spyod pa rgyun du 'byung ba rnams ngan 'gror 'gro bar 'gyur zhing /bstan pa 'di la yang mi gus par 'gyur ro zhes pa'o/ /de ltar ni mi dge ba bcu'i las kyi lam rnams bdag gi dngos po dang longs spyod dang phyi rol gyi dngos po rgud pa'i rgyu ste/ji skad du gsungs pa/ rigs kyi bu rnams mi dge ba'i las kyi lam bcu rnams chen por snang bas dmyal ba rnams su skye'o/ /'bring gis dud 'gro'i skye gnas rnams su'o/ /chung ngus yi dags rnams su ste/ de ni 'di rnams kyi rnam par smin pa'i 'bras bu'o//de gal te mi rnams dang skal ba mnyam pa nyid du 'ongs na go rims ji lta bar bcu po rnams kyis tshe thung ba dang longs spyod kyis phongs pa dang 'gran zla dang bcas pa'i chung ma dang skur pa mang ba dang 'di'i grogs po dbye bar 'gyur ba dang yid du mi 'ong ba'i sgra thos pa dang ngag gzung bar mi 'os pa dang 'dod chags drag pa dang zhe sdang drag pa dang gti mug drag pa'o zhes pa 'di ni 'di rnams kyi rgyu mthun pa'i 'bras bu'o//phyi rol gyi dngos po rnams mdangs chung bar 'gyur ba dang lo dgra mang ba dang rdul gyis gang ba dang dri nga ba dang mthon dman can dang /tshwa sgo can dang dgon dung can dang tha ba can dang sdig pa can gyi sa dang dus tshigs 'gyur ba mi mnyam pa dang / 'bras bu phra ba dang 'bras bu mi zhim pa dang 'bras bu nyung ba'o zhes pa 'di ni 'di rnams kyi bdag po'i 'bras bu'o/ /de bzhin du dge ba bcu'i las kyi lam rnams bstan pas lha rnams su skye'o zhes pa 'di ni 'di rnams kyi rnam par smin pa'i 'bras bu'o//de gal te mi rnams dang skal ba mnyam par 'ongs na bcu po rnams kyi go rims bzhin tshe thung ba la sogs pa las bzlog pa bcur 'gyur ba 'di ni 'di rnams kyi rgyu mthun pa'i 'bras bu'o//gzi mdangs chung ba la sogs pa las bzlog pa bcur yang 'gyur ba 'di ni 'di rnams kyi bdag po'i 'bras bu'o/ /rnam par grol ba gsum gyi rgyu yang 'di rnams te/ ji skad du gsungs pa/ lag 'gro'i bdag po dge ba bcu'i las kyi lam 'di rnams ni lha dang mir skye ba'i rten no//slob pa dang mi slob pa thob pa dang rang byang chub dang / byang chub sems dpa'i spyod pa thams cad dang ji srid sangs rgyas thams cad kyi chos rnams kyi bar gyi rten no zhes so/ /'o na chos thams cad rang gi mtshan nyid kyis stong pa rmi lam dang sgyu ma la sogs pa lta bu yin na/ de'i phyir las dang de'i 'bras bu yod do zhes rnam par gzhag pa ga la 'thad ce na/de ltar ma yin te sems can rnams kyis chos rnams rang bzhin stong par ma shes la mi shes pa gang zag dang chos su rtog par byed pa rnams legs par spyod pa'am nyes par spyod pa'i las mngon par 'du byed cing / nyes par spyod pas ngan song gsum du ltung la legs par spyod pa rnams kyis lha dang mi rnams su skye'o/ /yang 'ga' zhig gang zag gi bdag med pa nyid du yongs su shes nas bde 'gro dang ngan 'gro spangs te mya ngan las 'das pa thob par byed do/ /byang chub sems dpa' rnams ni pha rol tu phyin pa la sogs pa'i dge ba'i chos rnams yongs su rdzogs par byed pas rim gyis sa bcu bgrod de skad cig gcig dang ldan pa'i shes rab kyis chos thams cad mngon par byang chub nas sangs rgyas bcom ldan 'das su 'gyur ro//de lta mod kyi chos thams cad rmi lam dang 'dra ba nyid yin na mi dge ba bcu la sogs pa rnams med de rmi lam gyi gnas skabs bzhin du sad pa'i gnas skabs na yang 'gyur ro zhe na/ma yin te ji ltar phyi rol gyi don du smra ba'i lugs la skad cig ma nyid kyis rgyu med par 'jig pa yin pa na dang grub pa'i mtha' las kyang / 'jig rten sna tshogs las las skyes//zhes pa'i phyir don dam par sus kyang su yang bsad pa yang med de/ sus kyang su'i nor blangs pa yang med ces pa la sogs pa khas blangs pa la rgyun 'jug pa dang 'gal ba'i dngos po bskyed pa la gsod pa la sogs par rtog pa'i sgo nas/ tshul bzhin ma yin pa yid la byed pa la sogs pa dang ldan pa las mi dge ba la sogs pa bzhin du srog gcod pa la sogs pa rnams sad pa la rnam par gzhag pa de ltar rmi lam na yang dge ba dang mi dge ba bsags pa'i gnas skabs su e ma bsad do zhes bya ba la sogs pa'i rnam par rtog pas sbyor ba'i gnas skabs la sogs par mngon par zhen pa yongs su gsos pas yongs su rgyas pa 'thob pa de'i phyir phyi rol gyi don du smra ba'i lugs kyis kyang rmi lam gyi gnas skabs bzhin zhes pa'i dpe ma grub pa'o//de'i phyir dbu ma pa'i lugs kyis sad pa'i gnas skabs su yang / dngos po rmi lam dang 'du ba de las dang rjes su mthun pa'i don dngos po la sogs pa'i mngon par zhen pas phyin ci log gi 'ching ba mtha' dag ma nyams pa rnams la dge ba la sogs par rnam par gzhag go//'on kyang gnyid mthug po'i 'khrul pa'i rgyu nyid kyis mi gsal ba dang 'khrug par bsgrub pas rmi lam na 'bras bu smin la/sad pa'i skabs na gnyid mthug po 'khrul pa'i rgyu dang bral ba'i phyir gsal ba dang ma 'chol bar snang ba nyid kyi 'bras bu lhag pa'o/ /rmi lam gyi gnas skabs na'ang las dang 'bras bu yod par 'dod pa'i phyir dge slong ma yin pa nyid la sogs pa'i skyon brjod par mi bya ste/bslab pa blangs bzhin du bcom ldan 'das kyis bcas pa'i dbang kho na las sdom pa dang sdom pa ma yin pa gnyis rnam par gzhag par bya ba nyid kyi phyir ro/ /de'i phyir 'jig rten gyi tha snyad du sems can rnams phyin ci log gi las mngon par byed par 'du byed cing /de las kun nas nyon mongs te/ /don dam par ni ma yin no/ /de kho na nyid pa'i phyi rol lam rnam par rig pa'i dngos po cung zad kyang med na gang la gnas nas las byed de/ dper na rmi lam dang sgyu ma la sogs pa rnams kyi bzhin no/ /de nyid kyi phyir de rnams kyi phyin ci log spang ba'i ched du byang chub sems dpa' byang chub tu sems bskyed de tshogs sogs pa nas ji srid du mngon par byang chub na sems can rnams yongs su grol bar byed do//'o na byas shing bsags pa'i las stobs dang ldan pa la ci yongs su sbyong ba yod dam zhe na yod do//las rnam pa gnyis te mi dge ba 'dod pa na spyod pa nyid dang / dge ba zag pa dang bcas pa khams gsum pa'o/ /de'i stobs ni byed pa po mi 'dod kyang de'i 'bras bu yang dag par sbyor ba'o/ /de yongs su sbyong ba ni nus pa med par byed pa ste rgyu dang rkyen rnams kyis gang las kyi nus pa skyed par byed pa de dag dang 'gal ba'i rgyu dang rkyen la sbyor ba las de nus pa med par 'gyur ro//las rnams kyi'ang kun nas slong ba nyon mongs pa rnams dang dmigs pa ni yul rnams so/ /nyon mongs pa rnams kyi'ang rtsa ba tshul bzhin ma yin pa yid la byed pa yang dag pa ma yin pa'i rnam par rtog pa'o//de la dngos por 'dzin pa ni yang dag pa ma yin pa'i kun du rtog pa ste/ dang por de la phyi rol dang nang zhes pa dang brtan pa dang bde ba dang nga'i dang nga'o zhes pa la sogs par sgro 'dogs par bya ba dang las la yon tan mthong ba'o/ /de ltar las byed cing byas pa'i las la yongs su dga' ba dang bsngags pa rjes su sgrogs pa la sogs pa mjug rdzogs pa ste/gang gis te nye bar bsags par yod pa 'bras bu 'byin nus par 'gyur ro/ /de gcod pa ni rnam pa 'di lta bu ste las rnam par sun 'byin pa kun du spyod pas stobs chung bar 'gyur ro//gang gi tshe las de byas na de ma thag kho nar 'gyod pa dang skyon mthong bas sun 'byin par byed pa de'i tshe'i mjug bcom pa nyid kyi phyir stobs chung ba ste kun nas slong mi nus par 'gyur ro/ /sdig pa ni mkhas pa rnams kyis smad pa'i phyir dang 'bras bu 'dod par bya ba ma yin pa nyid kyi phyir spang bar bya'o//de yang rdzogs pa'i sangs rgyas la sogs pa'i mdun du so sor 'chags shing so sor spong ngo de ni bdag gis ma legs pa bgyis pa'o zhes sun 'byin nas slar mi bgyid do zhes dam bcas pas sbyang bar bya ba ste sems kyi chos nyid kyi phyir ro/ / khab kyis tsher ma 'don pa bzhin du bsal bar bya ba ni ma yin no/ /de'i phyir gnyen po'i phyogs kun du spyod pas zil gyis mnan pa ni shin tu stobs chung ba'o/ /gnyen po kun du spyod pa ni mi dge ba'i las dang dge ba zag pa dang bcas pa'i yang zag pa med pa'i dge ba'i las la shin tu mngon par sbyor ba'o//slar ldog pa'i stobs kyis kyang kun nas mnan pas yod kyang cung zad kyang mi byed par 'gyur ro/ /so sor ldog pa'i stobs ni sdom pa yang dag par blangs pa las mi byed pa'i sdom pa thob pa'o/ /sdom pa yang rnam pa lnga ste dge bsnyen nyid la sogs pa so sor thar pa'i sdom pa dang byang chub tu sems bskyed pa tshul khrims rnam pa gsum gyi sdom pa dang de nyid khyad par dang bcas pa dbang bskur gyi sdom pa dang zag pa dang bcas pa'i bsam gtan gyi sdom pa dang /de rnams nyid zag pa dang bral ba zag pa med pa'i sdom pa'o/ /de yang dag par len pa ni cho ga ji lta ba bzhin 'dzin pa dang snyoms par 'jug pa'o//sdom pa dang po gsum rnams kyis dran pa'i stobs las mi byed pa'i sdom pa rang bzhin gyis sdig pa'i las mi byed pa'i nges pa thob pa dang bzhi pa las ni kun nas slong ba rnam par gnon par byed pa dang lnga pa las ni kun nas slong ba dang bral ba'o//rten gyi stobs kyis kyang sdig pa las kyi 'jigs pa las bzhin du byed pa po mi 'dod pa'i 'bras bu 'byin pas zil gyis gnon mi nus so/ /rten gyi stobs ni re zhig dkon mchog gsum la skyabs su 'gro ba 'ba' zhig nyid de/ ji skad du phag mo'i rtogs pa brjod par sum cu rtsa gsum pa'i lha'i bu 'chi ba'i chos can dong gi phag mo'i mngal du skyes nas myong bar 'gyur ba'i las kyi 'bras bu 'byin pa la mngon du phyogs pa mthong nas 'jigs skrag pa nas ji srid brgya byin gyi ngag las dkon mchog gsum la skyabs su song bas las de rtsad nas phyung ste de nas shi 'phos pa dga' ldan du skyes so zhes pa'i bar du'o//byang chub kyi sems mi gtong ba yang rten gyi stobs so/ /byang chub kyi sems rnam pa gnyis te smon pa dang 'jug pa'i sems kyi dbye ba las so/ /'jug pa'i sems kyang kun rdzob pa dang don dam pa'i bye brag las rnam pa gnyis so zhes 'chad par 'gyur ro//de la sman pa'i sems la brtan nas las kyi sgrib pa rtsad nas 'byin pa'i dper brjod pa ni/ mdza' bo'i bu gling gzhan du 'gro bar 'dod pa mas brtse bas rkang pa dag la 'jus nas bzlog pa na ma la khro ba drag pos mgo bo la rkang pa brgyab nas gzings la zhon pa nas ji srid gzings zhig nas rgya mtsho'i [(]'grom [,]'gram [)]na nyi tshe ba'i dmyal ba yod par/'dis ma la ma gus pa byas pa'i las zad pas sdod cig 'khor lo 'di khyod kyi spyi bor bskor bar 'gyur ro zhes pa'i sgra bar snang las thos nas/ gang su'ang rung ba 'gro ba 'di na ma la mi gus par byas pa rnams dang byed pa rnams dang byed par 'gyur ba de rnams kyi las de bdag kho na la rnam par smin par gyur cig /su yang rnam pa 'di lta bu'i sdug bsngal gyi skal ba can du ma gyur cig ces shugs drag pos smon pa la gnas pa/ 'di 'dra ba'i las mthong ba'i chos la nyams su myong bar 'gyur ba de yang yongs su zad de 'khor lo yang de'i sting du de lta nyid du gnas shing slar 'di skad kyang thos te longs la song shig khyod kyi las 'di ni smon pa'i stobs kho na las ma lus par zad do zhes pa lta bu'o//'jug pa'i sems brdar btags pa ni lhag par mos pa ste/gang sangs rgyas dang byang chub sems dpa'i yon tan rnams la dang sems can rnams gdod nas dag pa nyid chos rnams rang bzhin gyis bdag med pa nyid du lhag par mos nas byang chub dang sems can la dmigs te sems skyed par byed do/ /de ltar sems 'di ni dngos por 'dzin pa'i gnyen po yin la de'i rtsa ba can gyis chos thams cad kyi gnyen por 'gyur te yang dag pa'i don ji lta ba bzhin rtogs pa'i phyir ro//de'i phyir sems bskyed pa 'di ni las kyi sgrib pa thams cad rnam par sbyong bar byed de/ ji skad du gsungs pa/ byang chub sems dpa' de gal te snga dro ltung ba byung na nyi ma phyed na byang chub kyi sems mngon du byed pa de'i tshul khrims kyi phung po mtha' med pa nyid du rig par bya'o//de bzhin du rigs kyi bu bskal pa'i me dang mnyam pa'i byang chub kyi sems ni nyes par spyod pa thams cad sreg par byed do zhes rgya cher ro/ /de bzhin du 'phags pa byams pa'i rnam par thar par rigs kyi bu 'di lta ste sgron me gcig khyim mam gnas khang ci 'dra ba cig tu rab tu bcug na/de rab tu bcug ma thag tu lo stong du bsags pa'i mun pa mun nag kyang sel zhing snang bar byed do/ /de bzhin du thams cad mkhyen par sems bskyed pa'i sgron me gcig sems can gyi bsam pa'i thibs po ma rig pa'i mun pa dang ldan pa ci 'dra cig tu rab tu zhugs na de rab tu zhugs ma thag tu brjod du med pa'i bskal pa brgya stong phrag tu bsags pa'i las dang nyon mongs pa'i sgrib pa'i mun pa mun nag kyang sel zhing ye shes kyi snang ba yang dag par bskyed do//zhes so/ /'phags pa dkon mchog [(]brtsebs [,]brtsegs [)]par yang / 'od srungs 'di lta ste phug la sogs par lo brgya stong phrag 'das pa dang skyes bu 'ga' zhig gis til mar sgron me byas na de ci mun pa mun nag de ni lo brgya stong du bsags pa ste 'di nas mi 'gro zhes par 'gyur ram/bcom ldan 'das ma lags te gang gi phyir til mar sgron me bgyis na de la mi 'gro ba'i nus pa ma mchis te des gdon mi 'tshal ba nyid du 'gro bar bgyi'o/ /bcom ldan 'das kyis bka' stsal pa/ 'od srungs de bzhin kho nar las dang nyon mongs pa brgya stong phrag du mar bsags pa yang tshul bzhin yid la byed pa'i so sor rtog pa gcig gis 'gro'o//zhes so/ /byang chub kyi sems la zhugs na ni kha na ma tho ba thams cad 'dag pa la the tshom med do/ /ji skad du de bzhin gshegs pa gsang ba'i mdor gsungs pa 'od srungs de gal te sems can gcig kha na ma tho ba chen po mi dge ba bcu po 'di rnams yang dag par ldan par gyur la de yang de bzhin gshegs pa'i chos bstan pa rgyu dang rkyen ldan pa la zhugs te 'dir bdag gam sems can nam srog gam gang byed pa po'am gang tshor ba po ci yang med do zhes ma byas mngon par 'du ma byas pa sgyu ma'i chos nyid la 'jug nas sems can de ngan 'gror 'gro bar nga mi smra'o zhes pa'i bar dang /ji srid du gang 'di ltar lhag par mos par 'gyur ba de la ni ltung ba dang ltung ba'i gnas ci yang med do/ /de ci'i slad du zhe na/ gnas med cing go skabs med pa ste gang sgrib pa med pa la ltung ba gnas pa 'di ni gnas yod pa ma yin no zhes pa'i bar du'o//lhag pa'i bsam pa bskul ba'i mdor yang / mdor bsdus nas don med pa spang bar gsungs te/ byams pa de'i phyir byang chub sems dpa'i theg pa pas lnga brgya'i tha ma la dam pa'i chos nub par 'jug bzhin pa na bde blag tu yongs su grol bar 'dod pas 'dod pa dang las kyi sgrib pa thams cad zad par byed 'dod pas tshogs la mngon par dga' ba med par 'byung bar bya zhing dgon pa dang nags dang bas mthar gnas pas brtson pa dang mi brtson pa'i sems can yongs su spangs pa bdag nyid kyi 'khrul pa rtog pa gzhan gyi 'khrul pa mi tshol ba cang mi smra bar sgom pa la dga' bas shes rab kyi pha rol tu phyin pa'i gnas pa la mngon par dga' bas bsgom par bya'o//zhes so/ /las kyi sgrib pa thams cad rnam par dag pa'i mdor yang gsungs pa/ 'jam dpal chos thams cad sgyu ma dang sprul pa lta bur yongs su shes pa dang ldan pa la sgyu ma lta bu'i sems ni chos rnams la gang du yang sgrib pa med do//'jam dpal de lta na yang byis pa so so'i skye bo rnams rang gi kun du rtog pas dmyal ba dang dud 'gro'i skye gnas dang gshin rje'i 'jig rten du ltung ngo / /med pa'i chos yongs su brtags nas sdug bsngal stong phrag mang po rnams nyams su myong ngo zhes so//gang yang mdo dang rgyud dang gsang sngags la sogs pa zab mo de rnams don 'di mngon par rjod par byed de/ /de rnams len pa dang 'dzin pa la sogs pas kyang las kyi sgrib pa rnams zad par byed do/ /de ltar 'di'i nyes par spyod pa de 'bras bu 'byin mi nus par 'gyur na skyes bu dam pa la brten nas chos zab mo nyan pa dang chos thams cad bdag med pa nyid du so sor rtog pa las mi skye ba'i chos la bzod pa thob pa'i yan lag bsgoms pa 'byung ba ni shin tu'o//'dir dper brjod pa ni dge slong dpa' byin tshul khrims dang ldan pa bsod snyoms spyod pa bud med mchog gis mthong ste de yang chags pa drag pos brgyab des dbugs phyung bas rang bzhin du gnas pa gzugs mdzes pa dang lhan cig kun nas sbyar zhing mang du gnas la/de'i bdag po la yang dug dang bcas pa'i kha zas byin no/ /de yang shi zhes thos nas 'di ltar gyur te/kye ma bdag gis mi bzad pa'i las byas te gang gi phyir bdag gis 'dod pa yang spyad mi yang bsad do zhes pa dang / kye ma kyi hud bdag dmyal bar 'jug par 'gyur ro zhes de lus dang sems gdung ba drag por yongs su gyur te/ su yis bdag phongs pa 'di las grol bar byed ces rnam par rmongs bzhin du 'khor zhing gtsug lag khang gi sgor sa la 'gyel lo//de nas byang chub sems dpa' ngo mtshar bla mas dge slong de nags su khyer te bar snang la gnas nas lus las de bzhin gshegs pa mang po spros pa rnams kyis chos bstan pas/lha'i bu stong phrag bzhi bcu mi skye ba'i chos la bzod pa thob pa'i de ma thag tu dge slong gi lus la ba spu'i bu ga thams cad nas dmyal ba'i me byung ba byin rlabs kyis zhi'o/ /dge slong de yang yongs su gdung ba dang bral te sems byang chub kyi rnam pa dang ldan pas skye ba med pa'i chos kyi tshul la rab tu dpyad nas mi skye ba'i chos la bzod pa thob po zhes so//yangs pa can du dge slong dri ma med pa'i 'od zer bsod snyoms la rgyu ba na smad 'tshong ma yang dag par chags pas sngags kyis btab pa'i bsod snyoms lhung bzed du blugs pa'i de ma thag tu yang dag par chags te de dang lhan cig tu rtse dga' nyams su myong ste gtsug lag khang du 'ongs nas 'gyod pa chen po skyes pas yongs su gdungs pa la bcom ldan 'das kyis stong pa nyid la lhag par mos pa bstan pa las dga' ba mchog dang ldan pa bla na med pa yang dag par rdzogs pa'i byang chub tu lung bstan to zhes so//gang yang de lta bur gyur kyang zhing brngas pas na sog rtsa ltar 'ga' zhig tu lus kyi lhag ma cung zad lus pa dang / gang yang nyams su myong bar nges pa med pa'i las de'i rnam par smin par mi nus pa nyid ni/ de la dbang ba'i stobs kyis rnam par smin pa phyis bsal nas tshogs kyi yan lag nyid du bskyed pas rnam par sbyong ngo //dge ba'i las zag pa dang bcas pa ni byang chub kyi sems yongs su gzung ba dang rdzogs pa'i byang chub tu yongs su bsngo ba dang / yang dag pa'i don so sor rtog pas zag pa med pa nyid du bskyed nas tshogs la mngon du phyogs par byed pas rnam par sbyong ngo //don dam pa'i byang chub kyi sems kyang chos thams cad skye ba med pa'i shes rab zag pa med pa ste/ des ni las dmigs pa med pa dang bya ba med pa dang byed pa po med de gang zhig gang gis rnam par sbyang ba'o/ / don dam pa la gnas pas ni gang du yang 'jug pa'am ldog pa med do zhes chos thams cad ni mi dmigs pa kho nas las rnam par sbyong ngo / /rmi lam du yang sdig pa zad pa'i mtshan ma rnams mthong ste 'di lta ste zas ngan pa la sogs pa skyugs pa dang zho dang 'o ma la sogs pa za ba'am skyugs pa dang nyi ma dang /zla ba mthong ba dang / nam mkha' la 'gro ba dang / me 'bar ba dang skyes bu gdug pa dang bcas pa nag po pham par byas pa dang dge slong dang dge slong ma mthong ba dang 'o ma can gyi shing dang glang po dang / khyu mchog dang ri dang seng ge'i khri dang khang bzangs dang gru la 'dzegs pa dang chos nyan pa las sdig pa zad par yang dag par mtshon par bya'o//de ltar re zhig pa'i las rnam par sbyong ba brjod zin to/ /gal te de ltar rnam par dag pa yod na/ bskal pa bye ba brgya yis kyang / /lus can las rnams chud mi za/ /tshogs shing dus la bab pa dang //'bras bur nges par smin par 'gyur/ /zhes pa la sogs pa'i gsung rab ci ltar zhe na de ni gnyen po bsgoms pa la sogs pa med na zhes shes par bya'o/ /ma 'ongs pa'i las ni rkyen rnams ma tshang ba bskyed pas mi skye ba nyid sbyong ba ste/ ma skyes pa ni ci'i yang gegs su 'gyur ba med do//de la kun nas slong ba'i rkyen ni 'dod chags la sogs pa'i nyon mongs pa rnams te gang kun nas gnas pa las mi 'dod cing mi shes kyang blo ma sbyangs pa rnams bya ba ma yin pa byed pa'o blo sbyangs pa rnams ni dpa' bo ste de rnams zil gyis mi gnon zhing slar la de rnams kyis zil gyis gnon no//zil gyis gnon pa yang dag pa'i so sor rtog pas brdzun pa nyid du rtogs pa ste 'di rnams kyi skye gnas ni kun du rtog pa nyid yin pa'i phyir ro/ /dmigs pa'i rkyen ni yul rnams te gang gis 'di rnams 'bros pa rnams bzlog pa pos skra nas 'dzin pa bzhin du stobs kyis bkug cing bkug nas btson khang bzhin du bdud kyi yul la 'jog la/don dam pa pa'i rtsa ba nyid thob pa'i brtan pa rnams ni gzhan 'phrul dbang byed kyi sa'i mthar thug pa'i 'dod pa rnams kyis kyang mi khugs shing zil gyis mi non te snga ma bzhin zhes pas las rnams skye ba med do zhes pa sdom pa'i tshul khrims khyad par bcas pa rgyas pa dang bcas pa brjod zin to//de yang byang chub sems dpa'i sems gnas pa'i ched du 'gyur ro/ /'jug pa'i tshul khrims ni gnyis te dge ba'i chos sdud kyi tshul khrims ni bdag nyid kyi sangs rgyas kyi chos yongs su smin pa'i ched du'o sems can don byed kyi tshul khrims kyang sems can yongs su smin pa'i ched du'o//'di tsam yang byang chub sems dpa'i bya ba thams cad do/ /'di lta ste mthong ba'i chos la bde bar gnas pa'i ched du sems gnas pa dang / lus dang sems ngal ba med pa'i yongs su smin pa gnyis so zhes pa'o//'jug pa'i tshul khrims 'di'i rten du ldog pa'i tshul khrims te yid dang rjes su mthun pa phul du byung ba'i lha dang mir skye ba rnams dang de rnams nyid bdag gi dngos po dang / longs spyod dang phyi rol gyi dngos po phun sum tshogs pa'i mtshan nyid can gyi 'bras bu skyed par byed pa rnam par grol ba'i mtshan nyid rnams kyang ngo //dge ba'i las kyi lam 'di rnams thos pa la sogs pa dang sbyin pa la sogs pa rnams ji lta ji ltar nye bar byed pa de lta de ltar mchog tu bla na med pa dang mchog tu yongs su rgyas par 'gyur te gang gis rnam pa de lta bu'i 'bras bu thob par byed do//gzhan gang du byang chub sems dpa' rnams kyi tshul khrims rnam pa dgu gsungs pa de ni tshul khrims rnam pa gsum po 'di nyid kyi nang du 'dus pa'i phyir 'di ni byang chub sems dpa' rnams kyi tshul khrims te de skyon med pa ni ji ltar blangs pa'i bslab pa gcig las kyang ma 'das pa'i phyir ro//ma nyams shing ma ral ba ni bslab pa mang po las ma 'das pa'i phyir ro/ /'dres pa ma yin pa ni mi dge ba dang ma 'dres pa'i phyir ro/ /nog nog por ma gyur pa ni srid pa'i longs spyod kyi don du yongs su ma bsngos pa'i phyir ro//'di nyid thun tshags ma yin pa'i tshul khrims zhes brjod de ltung ba med pa'i rnam pa gzhan gyis nog nog por ma gyur pa'i rnam pa gzhan bstan pa'i phyir ro/ /gang skyon med pa la sogs pa'i yon tan dang ldan pa'i tshul khrims de rang dbang can de srid pa'i 'bangs las grol ba'i phyir ro//de nyid kyi phyir 'phags pa rnams kyis tshul khrims 'di bsngags pa'o/ /ting nge 'dzin yang 'grub par byed pa ste tshul khrims dang ldan pa las sems mnyam par 'jog pa'i phyir ro/ /de'i phyir 'di 'dra ba'i tshul khrims ni bsten par bya'o/ /de 'phags pa dpa' bos gsungs pa/gang zhig lus dang ngag dang yid sdom pa/ /'di ni mdor bsdus tshul khrims yin gsungs te/ /'di la gnas rnams 'gro la phan pa'i don/ /sems pa khyad par 'bras bu dang bcas 'gyur/ /zhes so/ /bzod pa ni bzod par byed pa ste/ don dam par ni rnam par rtog zhi ba//bzod pa'i de nyid rig pas bzod par gsungs/ /de phyir 'jig rten rmi lam ltar rtog pa/ /rnam rtog nye bar zhi la 'bad par bya/ /brtson 'grus ni dge ba'i las la spro ba ste/ sa gzhi mtha' dag me mdag tu bya ba'am/ /mtshon gyis bkang ba rkang pas mnan byas nas//gang zhig thub dbang lta ba'am zhi ba'i chos/ /bcud len btung phyir mchog tu spro ba'o/ /bsam gtan ni gzung bar bya ba la sems rtse gcig pa nyid yin la/ de yang lus dang sems dben pa dag kho na las 'gyur te/ ji skad du 'phags pa zla ba sgron mar gsungs pa//gang rnams 'dod pa spangs shing me lta bu'i/ /bu dang chung ma rnams la sred spangs nas/ /shin tu skrag pas khyim nas nges thon pa/ /de rnams byang chub mchog 'di rnyed mi dka'/ /gang rnams khyim gyi nang na gnas bzhin du/ /byang chub dam pa mchog 'di thob pa yi//sangs rgyas gang yang sngon chad byung ba dang / /ma 'ongs 'byung 'gyur gang zhig bzhugs pa med/ /rgyal srid mchil ma'i thal ba bzhin spangs nas/ /dben pa 'dod pas nags kyi nang gnas na/ /nyon mongs rab tu spangs shing bdud bcom nas/ /rdul bral 'dus ma byas pa'i byang chub rtogs//zhes so/ /slar yang / grong dang grong khyer la dga' rnams spangs nas/ /bse ru rtag tu gnyis pa med 'byung ltar/ /nags khrod dben pa rtag tu bsten byas nas/ /ring por mi thogs ting 'dzin mchog thob 'gyur/ /zhes pa dang / slar yang / 'jig rten dga' ba rtag tu bde min pas//gang la 'dir mdza' mi mdza' dga' med par/ /gang zhig nags dang ri sul mngon dga' des/ /shin tu bde ba dri med rjes myong 'gyur/ /gang 'dir bdag gi 'dzin pa ci yang med/ /gang la yongs 'dzin kun du yod min par/ /'jig rten 'dir ni bse ru bzhin spyod pa//de ni mkha' la rlung bzhin 'gro bar 'gyur/ /gang rnams slar yang log par rab zhugs te/ /byis pa rtag tu 'dod yon la dga' rnams/ /ji ltar bya rgod ro la lhag mos ltar/ /rtag tu dbang 'gyur grol bar mi 'gyur ro/ /zhes so/ /'phags pa yul 'khor skyong gi mdor yang /mtha' yas skyon gyis thibs po khyim ni spangs nas sems ltos med pa de rnams ni/ /nges pa rtag tu gnas su dga' ba thob cing yon tan ldan rnams dbang po zhi/ /de rnams bud med skyes pa rnams dang 'dris pa gang du'ang yod min zhing / / bsam pa dag pa dri ma med rnams bse ru lta bur gcig pur gnas/ /de rnams rnyed pas dga' bar mi 'gyur ma rnyed pas kyang yid mi zhum/ /'dod pa chung zhing ngan ngon rnams kyis mngon dga' rgyu dang tshul 'chos spangs/ /zhes so/ /slar yang rigs pa ma yin pa'i spyod pas de rnams dbul po'i rigs su skye bar 'gyur ro//de rnams rab tu byung zhing bstan pa 'di la rnyed pa tsam gyis tshim pa skye bar 'gyur ro/ /de rnams sdig pa 'chags par yang mi 'gyur na ye shes kyi mngon par rtogs pa lta ci smos/ de rnams sangs rgyas kyi yon tan spangs nas bdag ni dge sbyong ngo zhes bdag nyid dam 'cha' bar 'gyur ro//ji srid du lus dang srog la ltos pa dang bcas pa ni chos yongs su tshol bar nga mi smra'o/ /skyes bu rmongs pa de rnams la ji lta ba de ltar ston pa drug la mi smod do/ /de rnams ni gzhan du smra ba gzhan du byed pa slu bar byed pa ste/de rnams la lha dang bcas pa'i 'jig rten gyi bde 'gro yang ring na byang chub lta ci smos zhes so/ /'phags pa dkon mchog brtsegs par 'od srungs 'di lta ste nor bu rin po che mi gtsang bar ltung na don med par 'gyur ba dang smad par bya bar 'gyur ro/ /'od srungs de bzhin du mang du thos pa rnyed pa dang bkur sti'i mi gtsang bar ltung ba blta bar bya'o//cung zhig kyang med pa la ni lha dang mi dga' bar 'gyur ro/ /gzhan yang / rang don tsam la 'gro ba yi/ /phyugs kyang 'di ltar nyon mongs te/ /'gro ba'i don sgrub bsod nams can/ / de rnams skye bo chen po'o/ /grang dang rlung sogs sdug bsngal rnams/ /rang don sems pas kyang bzod na/ /'gro ba'i don du zhugs pa rnams/ /de rnams ci ltar bzod mi byed/ /dmyal ba'i sdug bsngal rnams kyang ni/ /snying rje can gyis bzod bya na/ /grang dang rlung sogs sdug bsngal rnams//de rnams da lta ci phyir sems/ /zhes pas 'jig rten phan lta dang / /sangs rgyas nyid du 'gyur 'dod pas/ /rtag tu sbyor bas bsam gtan ni/ /rtsom la yang dag 'bad pa byed/ /ngal bsos ngal bsos bsrubs pa yis/ /me ni 'byung bar mi 'gyur ba//de nyid sbyor dang sbyor ba la'ang / /khyad par rtogs pa med na'o/ /de bzhin du'ang / shes rab mi brtson blo can gang phyir lta ba ni/ /dag par mi 'gyur de med na yang tshul khrims med/ /de med na ni yang dag ting 'dzin thob med cing / /de dang bral bas sdug bsngal zad pa de bzhin nyid//ji skad du 'phags pa ting nge 'dzin rgyal por gsungs pa/ gzhan yang ting 'dzin 'di na sgom mod kyang / /ting nge 'dzin gyi 'du shes mi 'jig na/ /de yi nyon mongs slar yang 'khrug 'gyur te/ /lhag spyod 'dir ni ting 'dzin sgom pa bzhin/ /zhes so/ /mi 'jig pa ni rnam par mi dpyod pa'o//de ltar ni skyil krung dam po bcas nas dus ring por zhi gnas de'i bdag nyid du gyur pa'i drang srong lhag spyod kyi ral pa'i bug par gnas mi g.yo ba'o zhes te byi ba bu skyes pa'i bu dang tsha bo rnams kyis dus ring por ral pa dam dum du byas te sa la ltung la/ drang srong de yang dus ring po na ting nge 'dzin de las langs nas ral pa de lta bu mthong ste/ mnyam par gzhag pas yongs su shes nas zhe sdang zhing gtum par gyur nas der smras pa bdag gang na byi ba gsod cing za ba der skye bar gyur cig ces log pa'i smon lam gyi dbang gis byi la'i mngal du skyes nas de ltar byed pa 'phags pa rnams kyis gzigs te gsungs pa/kye ma ting nge 'dzin shin tu de'i bdag nyid du gyur kyang lhag mthong med na mi g.yo ba'i ting nge 'dzin bzhin du nyon mongs pa rtsa ba nas 'don mi nus te/ de ltar ni yun ring por yang ting nge 'dzin gyis bsal ba'i nyon mongs pa slar 'khrugs pa rnams kyis lhag spyod byi lar byas so//zhes so/ /de yang stong pa nyid dang snying rje dbyer med pa rab tu mi gnas pa'i sems nyid byang chub kyi sems shes rab kyi pha rol tu phyin pa'o/ /phul du byung thob pa ni shes rab ste/ de ni 'jig rten pa'ang yod pas de'i phyir chos kyi de kho na nyid yongs su shes pa las shes bya dag pa'i pha rol tu phyin zhing song bas na pha rol tu phyin pa'o//yang na pha rol tu phyin pa ste rtogs pa ni pha rol tu phyin pa'o/ /shes rab kyang 'jig rten pa'i shes rab ni shes bya'i de kho na nyid yongs su shes pa med pa la sogs pas de las bzlog pa'i phyir pha rol tu phyin pa ma yin par brjod do//de kho na nyid de yang gang zag dang chos kyi stong pa nyid do/ /yang thos pa dang bsams pa dang bsgoms pa las byung ba'i ye shes skye ba'i rim gyis rnam pa thams cad mkhyen pa thob pa ni pha rol tu phul du byung ba'i mthar phyin pas na pha rol tu phyin pa'o//pha rol tu phyin pa'i ngo bo ni pha rol tu phyin pa nyid la shes rab kho na pha rol tu phyin pa nyid yin pas shes rab kyi pha rol tu phyin pa nyid do/ /lung du yang ngo bo'i rkyen gyi mtha' yis chos kyang brjod kyi chos nyid kho na ni ma yin no/ /dper na gsher ba chu'i khams so gsher ba nyid chu'i khams zhes pa bzhin no//yang na pa ra ma ni don dam pa ste/ pa ra ma las byung ba ni pA ra mi yin pas don dam pa chos thams cad mnyam pa nyid kyi rang bzhin la dmigs nas skyes pa'i shes rab ni shes rab kyi pha rol tu phyin pa'o/ /yang na pha rol gyi sgras de bzhin nyid brjod de thams cad kyi pha rol du gyur pa'i phyir ro//pha rol de bzhin nyid rtogs pa'i shes rab ni shes rab kyi pha rol tu phyin pa'o/ /rnam par bshad pa'i rnam pa 'di thams cad kyang bcom ldan 'das ma bar mar btsal bar bya'o/ /ci ltar na chos kyi sku'i mdzad pa shes rab kyi pha rol tu phyin pa yin zhe na/de'i 'bras bu nyid yin pa'i phyir ro/ /bcom ldan 'das ma shes rab kyi pha rol tu phyin pa kho na khams gsum du 'khor ba pa sel bar 'byung ba'o/ /gang gi phyir 'di ni rig pa ste ma rig pa'i gnyen por gyur pa yin la ma rig pa'i rtsa ba can ni 'khor ba'o/ /de skad du yang gsungs pa/las dang nyon mongs pas 'phangs pa'i skye ba'i rgyu ni 'khor ba'o/ /zhes so/ /de ltar ni bden pa gnyis mi shes pa ni ma rig pa'o/ /ma rig pa'i rkyen gyis mi dge ba 'dod pa na spyod pa kho na dang dge ba zag pa dang bcas pa khams gsum pa'i las ni 'du byed do/ / las de'i sa bon gang yin pa des yongs su bsgos pa'i sems ni 'du byed kyi rkyen gyis rnam par shes pa'o zhes zla ba grags pa'o/ /mdzod du ni 'du byed kyi rkyen gyis ma'i mngal du nying mtshams sbyor ba'i skad cig gi phung po lnga rnam par shes pa zhes bshad do/ /rnam par shes pa'i rkyen gyis ming dang gzugs te/de yang nying mtshams sbyor ba'i gnas skabs su ma'i mngal du tshor ba la sogs pa gzugs can ma yin pa'i phung po bzhi rnams dang / 'byung ba dang rgyur byas pa'i gzugs ji ltar srid pa ste de nyid nur nur po zhes brjod cing rim gyis mer mer po dang gor gor po dang nar nar po dang yan lag 'gyus pa la sogs pa'i gnas skabs rnams so//de la phung po bzhi po rnams ni yang srid par gzhol bar byed pa'i phyir ram yul la gzhol bar byed pa'i phyir nyid ming nyid do/ /'byung ba dang rgyur byas pa'i gzugs ni grang ba la sogs pa rnams kyis rnam par 'gyur ba skye ba'i phyir gzugs nyid do//ming dang gzugs de nyid rim gyis 'phel bar son pa ni mig la sogs pa'i gnas skabs su skye mched drug gi rkyen du 'gyur zhing gnas skabs der skye mched drug rdzogs par 'gyur la/ skye mched nyid ni sems dang sems las byung ba skye bo'i sgo'i don gyis na'o//skye mched drug po de rnams yongs su smin pa las dang yul la mngon du phyogs par gyur pa las dbang po dang yul dang rnam par shes pa gsum 'dus pa'i bdag nyid reg pa skye'o/ /'di ni rten gyi bye brag gis rnam pa drug go/ /reg pa bde ba nyams su myong bya la sogs pa'i ngo bo gang 'dra ba de 'dra ba'i tshor ba skye'o//de bzhin du 'du byed kyis 'phangs pa'i yan lag sred pa dang len pas gsos pas 'chi ba'i dus su srid par 'gyur ro/ /de las ji ltar 'phangs pa'i rim gyis skye'o rgas so 'chi'o/ /de la sred pa gang zhe na/ gang bde ba'i tshor ba la mi 'bral bar mngon par 'dod pa dang /sdug bsngal la 'bral bar mngon par 'dod pa dang sdug bsngal yang ma yin bde ba yang ma yin pa la gnyis kar mngon par 'dod pa med pa'o/ /len pa ni gang 'dod pa la sogs pa rnams la 'dun zhing chags pa'o/ /de dmigs pa'i bye brag gis rnam pa bzhi ste 'dod pa'i len pa dang lta ba'i len pa dang tshul khrims dang brtul zhugs kyi len pa dang bdag gi dngos po'i nye bar len pa'o//'dod chags des 'dod pa la sogs pa nye bar len par 'gyur bas so/ /sred pa dang len pa dag la khyad par ci yod ce na/ khyad par med par yang srid la/ mngon par dga' ba ni sred pa'o/ /khyad par gyis ni len pa'o/ /yang na ring ba'i rgyu sred pa dang nye ba'i rgyu len pa'o/ /de'i phyir de ltar 'du byed kyi sa bon sred pa dang len pas gsos pas 'bras bu bskyed la mngon du phyogs pa ni srid pa zhes brjod do/ /mdo las ni 'dod pa'i srid pa dang gzugs kyi srid pa dang gzugs med pa'i srid pa zhes gsungs te/'on kyang las kyi srid pa kho na la dgongs pa'o/ /srid pa'i de ma thag tu'ang 'dir rnam par shes pa gang yin pa de skye bar 'gyur te ming dang gzugs la sogs pa rim gyis tshor ba ji srid pa'o//skyes pa'i dga' ba dang 'chi ba la sogs par 'gyur ro/ /de ltar brjod pa'i rim pas bdag med pa can gyi sdug bsngal gyi tshogs 'di kun du 'byung bar 'gyur ro/ /de ltar 'dir rten cing 'brel par 'byung ba'i yan lag bcu gnyis ni mdor bsdus nas yan lag bzhi rnams su rnam par gzhag par byas so zhes rig par bya'o//'di lta ste 'phen byed kyi yan lag dang 'phangs pa'i yan lag dang mngon par 'grub byed kyi yan lag dang mngon par grub pa'i yan lag go zhes pa ste/ gsum dang bzhi dang gsum dang gnyis so zhes pa rim pa ji lta ba bzhin te/yan lag bcu gnyis po bsdus pa las yan lag bzhi rnams su bsgrags pa'o/ /gang 'di rnams gnas skabs kyi bar la reg pa la ste gang bar skabs kho nar shi ba la ma yin la gzugs dang gzugs med pa la spyod pa la'ang ma yin no/ /de ltar re zhig skye ba gnyis kyis rnam par gzhag pa'i dbang du byas nas de bzhin du brjod la skye ba gsum du yang rnam par gzhag ste/de la ma rig pa dang 'du byed 'das pa'i skye ba'o/ /rnam par shes pa nas srid pa'i bar ni da ltar gyi skye ba'o/ /skye ba dang rga shi ni ma 'ongs pa'i skye ba'o/ /de la ma rig pa'i rkyen can gyi 'du byed 'das pa'i skye bar byas pa rnams kyis skye ba 'dir nying mtshams sbyor ba'i rnam par shes pa dang por byas nas tshor ba ji srid par rnam par smin pa mngon par 'grub par byed do//da ltar ba'i srid pa dang len pa dang srid pa rnams kyis kyang ma 'ongs pa'i skye ba la sogs pa bskyed do//skye ba gsum gyi rnam par gzhag pa 'di'i dgos pa dang sngon dang phyi ma'i mtha' dang bar ma rnams la kun du rmongs pa bzlog pa'o/ /de ltar gsungs mod kyi 'on kyang ma rig pa'i rkyen can gyis 'du byed rnams kyi skye ba bskyed pa'i dus na/ sred pa dang len pa dang srid pa rnams kyang yod la de rnams kyis gang ma 'ongs pa'i skye ba skyed par byed pa de bzhin du ma rig pa'i rkyen can gyi 'du byed rnams kyis kyang bya ba ste/ming dang gzugs las gzhan pa'i skye ba la sogs pa rnams med pa'i phyir de rnams nyid rnam pa gzhan gyis bshad par 'gyur ro//de'i phyir skye ba'i rnam par gzhag pa gnyis 'gal ba med do rten cing 'brel par 'byung ba 'di de yang kun nas nyon mongs pa gsum gyi bdag nyid dang lam gsum du rig par bya'o/ /de la nyon mongs pa ni kun nas nyon mongs pa ste gang gi phyir nyon mongs pa'i dbang gis las dang skye ba 'phen par byed la bden pa mthong ba la las yod kyang yang srid 'phen pa med pa'i phyir dang /nyon mongs pa kun du spyod pas yang srid pa'i sa bon srid par byed pa'i phyir ro/ /nyon mongs pa can gyi sems kyang yang srid par nying mtshams sbyar bas 'ching bar byed pa'i phyir skye ba'i kun nas nyon mongs pa'i yang rgyu mtshan no//de nyid kyi phyir dgra bcom pa la nying mtshams sbyor ba med do nyon mongs pa can gyi sems med pa'i phyir ro/ /las dge ba dang mi dge ba yang kun nas nyon mongs pa ste/ de'i tshe nyid na lus dang sems dag ngal ba'i rgyu mtshan yin pa nyid kyi phyir dang phyis kyang rnam par smin pa sbyin par byed pa'i phyir ro//skye ba yang nye bar 'tshe ba thams cad kyi gzhi rten yin pa'i phyir kun nas nyon mongs pa'o/ /rnam pa gnyis kyang ste/ dang po gnyis ni rgyu'i kun nas nyon mongs pa'o/ /phyi ma 'bras bu'i kun nas nyon mongs pa'o//ma rig pa dang sred pa dang len pa rnams nyon mongs pa'i lam mo/ /'du byed dang srid pa las kyi lam mo/ /yan lag lhag ma rnams rnam par smin pa'i lam mo zhes pa'o/ /de 'phags pa klu sgrub zhabs kyis gsungs pa/ 'khor ba'i 'khor lo rnam gsum pa/ / thog ma mtha' dang dbus med 'di/ /mgal me'i 'khor lo bzhin du ni/ /phan tshun rgyu mtshan 'khor bar byed/ /ces so/ /de nyid kyi phyir 'khor ba la thog ma med de sngar med pa'i sems can skye ba med pa'i phyir ro/ /thog ma dang ldan pa nyid na rgyu med pa nyid du thal ba'i phyir ro//skye ba rgyu la rag las pa'i phyir rgyu zad pa las tha ma ni rigs te sa bon zad pa las myu gu bzhin no/ /sangs rgyas byung ba so sor sems can grangs med pa yongs su mya ngan las bzla ba'i phyir ro/ /gang gnyen po dang phrad pa na 'bri ba'i chos can de rnams gnyen po'i phyogs shin tu 'phel ba na shin tu 'dzad pa'i chos srid pa yin te gser gyi dri ma la sogs pa bzhin/'khor ba pa yang bdag med pa nyid la sogs pa'i mtshan nyid kyi gnyen po'i phyogs la mngon du phyogs pa yod na 'bri ba'i chos can yin no zhes pa'i tshad ma las 'khor ba'i rgyun chad pa yod do//'gro ba 'di dag thams cad sangs rgyas 'gyur/ /zhes pa la sogs pa'i lung las kyang ngo / /ji skad du rigs pa drug cu par gsungs pa/ ma rig rkyen gyis 'jig rten zhes/ /gang phyir rdzogs pa'i sangs rgyas gsungs/ / de phyir 'jig rten 'di dag ni/ /rnam par rtog par cis mi 'thad/ /ma rig 'gags par gyur pa na/ /gang gi 'gog pa skye 'gyur ba/ /de phyir mi shes kun brtags par/ /ci yi phyir ni gsal mi 'gyur/ /gnas med dmigs pa yod ma yin/ /rtsa ba med cing gnas pa med/ / ma rig sa bon las byung ba/ /thog ma dbus mtha' rnam par spangs/ /chu shing dbus bzhin snying po med/ /dri za'i grong khyer lta bu ste/ /kun rmongs grong khyer 'jigs rung ba/ /'gro ba sgyu ma bzhin du snang / /tshangs la sogs pas 'jig rten 'di/ /gang zhig bden par rab brjod pa//de yang 'phags rnams brdzun zhes gsungs/ /de las lhag ma gzhan ci zhig /ces so/ /de bzhin du/ dngos por khas len yod na ni/ /chags sdang drag po 'byung 'gyur ba'i/ /lta ba ma rungs yongs su 'dzin/ /de yis bslangs pa'i rtsod pa byed/ / de ni lta ba kun gyi rgyu/ /de med nyon mongs 'byung mi 'gyur/ /de phyir de ni yongs shes na/ /lta dang nyon mongs yongs su zad/ /cis de yongs shes 'gyur zhe na/ /rten cing 'brel par mthong ba las/ /brten nas skyes pa ma skyes par/ /de nyid rig pa'i mchog gis gsungs/ / log pa'i shes pas zil mnan pa/ /bden min bden par 'du shes rnams/ /yongs su 'dzin dang rtsod sogs kyi/ /rim pa chags las rab tu 'jug /nyon mongs lag 'gro g.yo can gyis/ /'ga' zhig kho na'i gnas rnyed pas/ /'dzin par 'gyur ro gang gi sems//gnas med de rnams 'dzin mi 'gyur/ /sems ni gnas dang bcas rnams la/ /dug can skyon du cis mi 'gyur/ /gang tshe tha mal gnas pa yang / /nyon mongs lag 'gros za bar 'gyur/ /ji ltar byis pas gzugs brnyan la/ /bden pa'i 'du shes kyis zhen pa//de bzhin yul gyi dra ba ru/ /gti mug las ni 'jig rten 'ching / /dngos po gzugs brnyan lta bur ni/ /bzung nas ye shes spyan rnams kyis/ /yul gyi ming can 'dam la ni/ /bdag nyid chen po thogs pa med/ /byis pa rnams ni gzugs la zhen//bar ma rnams ni chags bral 'gyur/ /blo mchog rnams kyis gzugs kyi ni/ /rang bzhin shes pas rnam par grol/ /gnas med bdag nyid chen po rnams/ /chags pa med cing chags bral min/ /gnas yod na ni chags pa dang / /chags dang bral ba skye bar 'gyur//sdug ces pa las chags 'gyur la/ /de las bzlog las chags bral te/ /sgyu ma'i skyes bu bzhin dben par/ /mthong nas mya ngan 'das par 'gro/ /zhes so/ /'khor ba de yang skyon lnga dang ldan par rig par bya ste sdug bsngal nyid dang longs spyod zad pa dang mdza' ba dang bral ba dang 'ching ba dang sgrib pas so//de ni phongs pa 'di rnams te/ nad med pas phongs pa ni rnam pa mang po'i nad dang sdug bsngal dang yid mi bde ba dang ngal bas so/ /longs spyod kyis phongs pa ni dga' ba phun sum tshogs pa la mi dga' ba'i rgud pa nges par 'brel pa nyid kyis so//nye du nyams pa ni de rgud pa dang bral ba las rjes su mya ngan byed pa'o/ /tshul khrims nyams pa ni gzugs dang gzugs med pa'i khams su skyes pa na 'chal pa'i tshul khrims spangs kyang sdom pa'i tshul khrims dang 'gal ba 'dod pa'i sred pa'i bag la nyal gyi rjes su 'ching ba'o//lta ba nyams pa ni 'jig rten pa'i ye shes thob pa rnams de dang 'gal ba ma rig pa'i bag la nyal gyi sgrib pa las so/ /skye ba'i rgyun 'di yang nye bar len pa'i phung po lnga'i bdag nyid kyi srid par brjod do/ /de yang rnam pa bzhi ste/ bar ma do'i srid pa dang / skye ba'i srid pa 'gro ba rnams su nying mtshams sbyor ba'i skad cig ma dang / de'i pha rol sngon dus kyi srid pa dang / skad cig ma tha ma la 'chi ba'i srid pa'o/ /gang la pha rol 'chi ba dang skye ba'i srid pa'i 'gro ba dag gi bar du 'byung ba'i phyir bar ma do'i srid pa ste khams gnyis su 'gyur ro//gzugs med pa'i khams na gnas gzhan yongs su bcad pa med de/ gang thob pa'i don du bar ma do'i srid pa 'grub pa'o/ /bar ma do'i srid pa de yang 'gro ba 'phen par byed pa'i las nyid kyis 'gro ba thob pa'i ched du 'phen pa'i phyir 'gro ba gang du 'gro bar 'gyur ba der gang 'ong bar 'gyur ba'i sngon dus kyi srid pa de dang 'dra ba'i rnam pa ste/dbang po kun tshang ba lo lnga drug lon pa'i byis pa'i tshad tsam pa dbang po gsal ba/ thogs pa med pa yid kyi rang bzhin lus shin tu dang ba 'dod pa na spyod pa nyid na dri za bas dri za rigs mthun pa dang lha'i mig dag pas mthong ba las kyi rdzu 'phrul gyi shugs dang ldan pa mi ldog pa ste/nyi ma bdun nam nyi ma bdun pa bdun nam ji srid skye ba'i tshogs pa ma thob pa'i dus kyi bar du sdod pa ni bzhed pa tha dad las bsdad nas pha ma dag sbyor ba mthong ste/ ji ltar rigs par 'dod chags sam zhe sdang skyes pas phyin ci log tu gyur nas rtse bar 'dod pas yul der phyin nas/gnas skabs de la bdag nyid yang dag par mos shing mngal gyi gnas yang dag par thob pa la dga' ba skyes nas gnas so/ /de nas 'di pha ma'i mi gtsang ba nur nur po gyur pas phung po gor gor por 'gyur ro//pho ni ma'i lto ba g.yas pa la brten nas rgyab tu kha phyogs shing tsog tsog por 'gyur la/ 'on te mor gyur na ni g.yon pa la brten te lto ba la kha bltas pa'o/ /mo yir gyur pa'am pho yir gyur pa'i 'dod chags kyis zhugs te/ gnas ji lta bas phyis ma ning du 'gyur ro//de ltar sgo nga las skyes pa dang mngal skyes dag skye gnas su 'gro'o/ /drod gsher las skye ba ni las ji lta bar gtsang dang mi gtsang ba'i dri ma mngon par 'dod pa las te/ rdzus skyes ni gnas mngon par 'dod pa las so/ /dmyal ba pa rnams su mngon par 'dod pa ni blo phyin ci log nyid kyi phyir ro//dmyal ba'i bar do'i srid pa ni spyi'u tshugs so/ /mngal du 'jug pa bzhi rnams te rmongs pa rnams ni mngal du 'jug pa dang gnas pa dang 'byung ba shes bzhin ma yin pa nyid de gcig go/ /'khor los sgyur ba bsod nams rgya chen po dang ldan pa rnams 'jug pa kho na shes bzhin du'o//rang sangs rgyas rnams 'jug pa dang gnas pa dag go/ /sangs rgyas rnams ni 'jug pa dang gnas pa dang 'byung ba yang ste bzhi pa'o/ /de la sgo nga las skyes pa'i gnas pa ni sems can gang sgo nga las skye ba rnams te/ ngang pa dang rma bya la sogs pa rnams lta bu'o//mi 'ga' zhig rnams kyang ste dper na khrung khrung mo las skyes pa'i brag dang nye brag dang ri dgas 'dzin gyi ma'i bu sum cu rtsa gnyis dang rgyal po lnga len gyi bu lnga brgya rnams lta bu'o/ /mngal skyes ni sems can gang mngal nas skyes pa rnams te/ mi dang glang po che dang rta la sogs pa lta bu dang yi dags kha cig kyang ngo //drod gsher las skye ba ni gang 'byung ba'i drod gsher las skyes pa rnams te sbrang bu la sogs pa lta bu'o/ /mi 'ga' zhig kyang ste nga las nu dang mdzes pa dang nye mdzes dang thi ba'i phreng ba can ma dang a mra skyong ma la sogs pa lta bu'o//rdzus skyes ni sems can rkang lag dang nying lag thams cad ldan pa la lan cig la skye ba rnams te/ lha rnams dang dmyal ba rnams dang srid pa bar ma rnams dang yi dags 'ga' zhig dang / klu dang nam mkha' lding la sogs pa'i dud 'gro 'ga' zhig dang bskal pa dang po pa'i mi rnams lta bu'o//skye gnas thams cad las rdzus skyes mchog go/ /byang chub sems dpa' mngal skyes kyi skye gnas la brten pa ni/ nye du'i 'brel pas shAkya'i rigs chen po chos la gzhug pa'i don dang 'di ni 'khor los sgyur ba'i rigs so zhes gzhan rnams rim gro cher bskyed pa'i don dang mir gyur pa rnams kyis kyang grub pa 'di thob po zhes gdul bya rnams spro ba'i don du'o//gzhan du na rigs dang gdung yongs su mi shes pa ci 'di sgyu ma'i skyes bu'am lha'am sha za zhes pa 'di ltar yongs su rtog par 'gyur ro/ /kha cig na re rdzus skyes kyi sems can shi ba rnams kyi lus mi gnas te mar me bzhin mi snang bar 'gyur bas sku gdung rnams gzhag pa'i don du'o zhes so//de ma yin te rdzu 'phrul gyi byin rlabs las sku gdung rnams gnas pa'i phyir ro/ /dngos po las ni sku gdung rnams mi 'dod pa kho na ste sgyu ma lta bu'i ye shes la sogs pa'i rang bzhin yin pa'i phyir dang thub pa dri ma med pa'i blo can rnams 'khor ba ji srid par bzhugs pa'i phyir ro//skye gnas bzhi can gyi 'gro ba 'di yang zas bzhis gnas pa'o/ /de la kham gyi zas ni 'dod pa'i khams na'o/ /gsum 'dus pa las skyes pa reg pa dang yid la sems pa dang /rnam par shes pa zhes pa zas gsum ni khams gsum rnams na'o/ /de la reg pa ni rgya mtsho'i 'gram du srog chags rnams kyis bye mar bzhag pa'i sgo nga rnams ma'i reg pa dran pa rnams 'drul bar mi 'gyur la gang ma dran pa de rnams 'drul ba lta bu'o/ /yid la sems pa ni dper na mu ge yod na thal ba'i thum bu la phyir brtags pa'i bu dag yun ring por gnas pa bshig pa ni yi chad nas shi ba dang /rgya mtsho chen por gru zhig pa'i skyes bu rnams sgrub pa'i phung po chen po la thad do zhes te drung du song ste kun du mnams nas re ba chad nas shi ba lta bu'o/ / gal te gang zag pa dang bcas pa'i chos thams cad srid pa rnams gso bar byed pas zas yin no/ /de lta na yang gtso bo yin te lus rgyas pa'i don du kham du byas pa'i zas dang sems dang sems las byung ba rnams rgyas pa'i ched du reg pa dang yid la sems pas yang srid 'phen pa dang 'phangs zin pa ni las kyis bsgos pa'i rnam par shes pa'i sa bon las mngon par 'grub po//'gro ba gang na zas su yod ce na thams cad na thams cad do/ /de bzhin du skye gnas rnams na'o/ /dmyal ba na kham du byas pa'i zas ci ltar zhe na/ lcags kyi tho lum 'bar ba dang zangs bskol ba'o/ / nyams par byed pa'i zas ni dmyal ba pa rnams na ste des kyang bkres pa dang skom pa 'joms par nus pa'o/ /nyi tshe ba'i dmyal ba rnams na kham du byas pa'i zas mi bzhin no/ /de ltar sems can rnams kyi rten cing 'brel par 'byung ba dang gnas pa dang 'chi 'pho ba rnams bshad zin to/ /de la dge ba'i rtsa ba chad pa dang mtshams sbyor ba dang khams dang sa las 'dod chags dang bral ba dang yongs su nyams pa dang 'chi 'pho dang skye ba zhes pa chos drug ni yid kyi rnam par shes pa kho na la 'dod kyi gzhan la ma yin no//'dir bar ma do'i srid pa nying mtshams sbyor ba yang skye ba'o/ /'chi 'pho dang skye ba dag ni tshor ba btang snyoms la'o//'on kyang mnyam par gzhag pa'i sems dang sems med pa la de dag med do/ /gang gi tshe 'di'i rten rnam par 'gyur bar rtsom pa de'i tshe nges par 'di'i rten de dang 'brel pa ste/ rgyu dang 'bras bu'i dngos po ni rjes su 'gro ba dang ldog pa'i rjes su byed pa tsam nyid yin pa'i phyir dang de ma thag pa la sogs pa'i khyad par don med pa'i phyir 'gog pa dang 'du shes med pa'i snyoms par 'jug pa dag bzhin du sngar gyi sems yun ring po 'gags pa las kyang skyes par gyur pa'i sems mngon du gyur nas phyis 'chi 'pho'i gzhan du ni ma yin no//skye ba las ni sems chad pa'i rgyu med pa'i phyir dang nyon mongs pa med par mi skye ba'i phyir/'du shes med pa'i sems can gyi sems med par rigs pa nyid ma yin no/ /gzhan yang gang snang ba med pa'i 'gro ba pa'i sems can rnams phyi rol pa'i mngon par shes pa lnga can dang nyan thos dang rang sangs rgyas dang byang chub sems dpa' rnams kyi mig lam du mi 'ong ba de rnams de bzhin gshegs pa la shing rta'i 'khor lo'i tshad tsam gyi phyogs la snang bar 'gyur ba de rnams kyang shin tu mang ste/stong gsum gyi stong chen po'i 'jig rten gyi khams na lha dang mi de tsam med do/ /de ltar sems can tshad med pa snang ba de rnams de bzhin gshegs pa rnams kyis ji ltar rigs par 'dul bar byed do//de rnams sems can gzhan rnams kyis shes pa yang med do zhes pa'o/ /'dul ba yang skye ba med pa la sogs pa bstan pas so/ /de 'phags pa klu sgrub zhabs kyis gsungs pa/yan lag bcu gnyis 'khor lo 'di/ /srid pa'i lam du 'khor bar 'gyur/ /'di las gzhan pa'i sems can gang / /lam 'bras spyod pa med par 'dod/ /me long la brten gang 'dra bar/ /bzhin gyi dkyil 'khor snang ba na/ /de ni der 'phos ma yin la//de med na ni de mi 'byung / /de bzhin phung po skye 'gyur zhing / /srid pa bar dor mtshams sbyor ba/ /mkhas pas de 'phos ma yin par/ /thams cad tshe na nges par bya/ /mdor na stong pa'i chos rnams kyis/ /stong pa'i chos rnams skyed par byed/ /las 'bras byed po za ba po//kun rdzob tu ni rgyal bas bstan/ /chos rnams rgyu las skye ba la/ /'gal ba nam yang yod ma yin/ /gang phyir rgyu ni rgyus stong bas/ /skye ba med par rtogs par bya/ /zhes te sems can gyi 'jig rten brjod zin to/ /snod kyi 'jig rten brjod par bya ste/ 'dir sems can rnams kyi las kyi dbang gis grub pa nam mkha' la gnas pa 'og tu rlung gi dkyil 'khor rngams su dpag tshad 'bum phrag bcu drug pa rgyar grangs med pa'o/ /der sprin gyi char pa las chu'i dkyil 'khor dpangs su 'bum phrag brgyad pa'o/ /chu lhag ma yongs su gyur pa gser gyi sa gzhi'i dkyil 'khor dpangs su stong phrag nyi shu lhag pa'i sum 'bum pa'o//'di dag gi rgya'i tshad ni stong phrag gsum dang phyed dang lnga brgya lhag pa'i 'bum phrag bcu gnyis so/ /'khor yug tu ni sum 'gyur ro/ /der ri rab la bskor te gnya' shing 'dzin dang gshol mda' 'dzin dang seng ldeng can dang blta na sdug dang rta rna dang rnam 'dud dang mu khyud 'dzin te gser gyi ri bdun rnams so//de las phyi rol na gling bzhi rnams dang / de rnams kyi phyi rol na khor yug gi lcags ri ste brgyad pa'o/ /lhun po ni gser dang dngul dang bai DUr+ya dang shel gyi rang bzhin no//'dzam bu'i gling 'di'i logs bai DUr+ya'i rang bzhin du snang ste/ de'i 'od 'dir phog pas nam mkha' bai DUr+ya'i kha dog tu snang ngo zhes so/ /ri 'di rnams kyang chu la stong phrag brgyad cur nub la/ lhun po ni chu las steng du yang stong phrag brgyad cu'o/ /brgyad po ni phyed phyed phri ba ste de rnams dpangs dang zhing mnyam pa'o//'di rnams kyi bar rnams ni rol mtsho bdun te/ dri bzang ba dang ro zhim pa dang yang ba dang / dang ba dang / 'jam pa dang / bsil ba dang / mgrin pa dang lto ba la mi gnod pa nyid kyi phyir yan lag brgyad dang ldan pa'i chus gang ba'o//de la ri rab dang gnya' shing 'dzin gyi bar ni nang gi rgya mtsho dang po ste dpag tshad stong phrag brgyad cu'o/ /logs kyi rgyar ni gnya' shing 'dzin gyi 'gram nas bgrod par bya ba las sum 'gyur ro/ /rol mtsho gzhan rnams phyed phyed do mu khyud 'dzin dang khor yug dag gi bar ni phyi'i rgya mtsho chen po ste ba tsha can gyi chus gang ba zheng du stong phrag nyi shu rtsa gnyis lhag pa'i 'bum phrag gsum pa'i tshad can no//de la gling bzhi ste ri rab kyi ngos bzhi rnams na'o/ /de la 'dzam bu'i gling ngos gsum la stong phrag gnyis dang gcig la ni dpag tshad phyed dang bcas pa'i dpag tshad gsum ste shing rta'i dbyibs lta bu'o//de'i dbus su gser gyi rang bzhin gyi sa gzhi la rdo rje'i gdan mngon par 'grub ste gang du byang chub sems dpa' rnams thams cad bzhugs nas rdo rje lta bu'i ting nge 'dzin skyed par byed pa'o/ /'di'i shar na shar gyi lus 'phags zla phyed lta bu ngos gsum 'di dang 'dra ba gcig la dpag tshad phyed dang bzhi brgya pa'o//'di nas nub na nub kyi ba lang spyod stong phrag phyed dang brgyad pa zlum pa zla ba gang ba lta bu ste 'di'i dbus la phyed dang gsum mo/ /'di'i byang na byang sgra mi snyan gru bzhi pa ngos so sor stong phrag gnyis pa'o/ /gang gling rnams kyi dbyibs 'dra ba de'i dbyibs lta bu kho nar der mi rnams kyi gdong pa'o//kha cig na re mo'i dbang po'i yang ngo zhes so/ /lus dang lus 'phags sgra mi snyan/ /sgra mi snyan zla rnga yab gzhan/ /g.yo ldan dang ni lam mchog 'gro/ /brgyad rnams de yi bar gyi gling thams cad na mi rnams gnas so//gzhan rnams na re gcig na srin po rnams so/ /zhe'o/ /'dzam bu'i gling 'di nyid na/ byang du ri nag po dgu'i pha rol na gangs dang ldan pa'i ri'o/ /de las pha rol spos ngad ldang ba las tshu rol na mtsho ma dros pa zhes pa yan lag brgyad dang ldan pa'i chus gang ba chu zheng du dpag tshad lnga bcu pa gang las chu bo chen po gang gA dang sin d+hu dang si tA dang pak+Shu rnams 'bab pa'o//de'i drung na 'dzam bu mngon par grub ste gang gi dbang gis 'di 'dzam bu'i gling zhes brjod pa'o/ /'dzam bu'i gling 'di nyid kyi 'og dpag tshad stong phrag nyi shu'i 'og na mnar med pa'i dmyal ba chen po ste dpangs dang rgya'i tshad stong phrag nyi shu pa'o//mnar med pa'i steng du steng nas steng du rab tu tsha dang tsha ba dang ngu 'bod chen po dang ngu 'bod dang bsdus 'joms dang thig nag dang yang sos te dmyal ba bdun rnams so/ / gzhan rnams na re mnar med pa'i logs rnams na'o zhes so/ /brgyad po de rnams ni so sor bcu drug nye 'khor te dmyal bar ltung ba rnams 'di rnams su slar ltung ba'o/ /ci dmyal ba'i srung ma de rnams sems can nam 'on te ma yin zhe na/ ma yin no bya ba byed pa ci ltar zhe na sems can rnams kyi las kyis de ltar snang ba'o//gang gshin rje'i srin por skye bar 'gyur zhes gsungs pa ni/ der gang gshin rjes bka' bsgos pa rnams kyis sems can rnams dmyal bar khrid par byed pa de rnams gshin rje'i srin po zhes brjod kyi gang las byed pa rnams ma yin no//zhes so/ /gzhan rnams na re sems can no zhe'o/ /de'i las rnams gang du rnam par smin zhe na/ dmyal ba de rnams nyid du'o/ /ci ltar mer gnas pa rnams mi 'tshig ce na/ las rnams kyi me las mtshams byas pa'i phyir ram yang na 'byung ba'i khyad par grub pa'i phyir ro//tsha ba'i dmyal ba brgyad po 'di rnams las gzhan rnams ni grang ba'i dmyal ba rnams te chu bur can dang chu bur rdol ba dang so thams thams pa dang a chu zer ba dang kyi hud zer ba dang ut+pal ltar gas pa dang / pad+ma ltar gas pa dang / pad+ma ltar cher gas pa zhes pa brgyad po rnams 'dzam bu'i gling 'di'i 'og na dmyal ba chen po rnams kyi logs la'o//'dzam bu'i gling 'di'i 'og na mnar med pa la sogs pa rnams kyi go skabs yang yod de gling rnams 'bru'i phung po bzhin 'og rgya che ba'i phyir ro/ /de nyid kyi phyir rgya mtsho chen po rim gyis gzhol ba'o zhes pa dmyal ba bcu drug po 'di rnams ni sems can thams cad kyi las kyi dbang gis grub pa'o//nyi tshe ba'i dmyal ba rnams ni rang rang gi las kyang mang po'am gnyis sam gcig kyang rung ste/ de rnams kyis rnam pa'i bye brag du ma'o/ /gnas kyang nges pa med de chu bo dang ri dang mya ngam gyi phyogs rnams dang 'og na'ang yod pa'i phyir ro//dud 'gro rnams kyang thang dang chu dang nam mkha'i spyod yul pa'o/ /yi dags rnams kyi rgyal po ni gshin rje zhes bya ste/ de'i rgyal po'i pho brang ni 'dzam bu'i gling gi 'og dpag tshad lnga brgyas par yongs su bcad nas te/de rnams kyi rtsa ba'i gnas yin la de las gzhan du 'phos pa rnams so/ /'di'i steng gi bar snang la 'phrul byed kyi rlung rnams 'khor ba dang 'dra bar zla ba dang nyi ma dang skar ma rnams ri rab la yongs su bskor bar byed do/ /de la zla ba dang nyi ma dag ri rab kyi phyed gnya' shing 'dzin gyi ri'i steng nas mnyam par rgyu'o//tshad ni zla ba'i dkyil 'khor dpag tshad lnga bcu pa'o/ /nyi ma'i lnga bcu rtsa gcig pa'o/ /skar ma'i gzhal yas khang rnams kyi gang chung ba de'i tshad rgyang grags so/ /nyi ma'i gzhal med khang gi 'og phyi rol ni me shel gyi dkyil 'khor tsha zhing snang bar byed pa'o//zla ba'i gzhal med khang gi 'og ni chu shel bsil ba dang snang bar byed pa'o/ /gling bzhir nyi ma gcig dang zla ba gcig gis bya ba byed do/ /gang gi tshe byang gi sgra mi snyan du nam phyed pa de'i tshe shar lus 'phags su nyi ma nub pa'o/ /'dzam bu'i gling du nyi ma phyed do//ba lang spyod du 'char ro/ /de bzhin du gzhan rnams su yong ngo / /'di nyi ma'i 'gros kyi bye brag gis mtshan mo dang nyin mo rnams 'phel ba dang thung ba dag go/ /dkar po'i phyogs kyi dang por zla ba'i dkyil 'khor nyams par mthong ba'i rgyu ci zhe na/ nyi ma'i 'od kyis te zla ba'i gzhal yas khang gi logs gzhan la grib ma lhung ste zla ba'i dkyil 'khor ma rangs par mthong ngo //sngon gyi slob dpon rnams na re/ gang re 'ga' gzhal med khang gi phyed snang ba de 'dra ba de rgyu ba'i tshul lo/ /zhes so/ /nyi ma la sogs pa'i gzhal yas khang 'di rnams la gnas pa'i lha rnams ni rgyal chen bzhi'i ris pa gzhal med khang la gnas pa rnams so//sa la gnas pa ni ri rab kyi bang rim la sogs pa rnams la gnas pa'o/ /ri rab kyi bang rim bzhi rnams te/ de la gcig ni dpag tshad stong phrag bcu gyen du son pa nas te bzhi pa'i bar du yang de bzhin du'o//stong phrag bcu drug dang brgyad dang bzhi dang gnyis thon pa'o/ /de rnams la lag na gzhong thogs rnams dang phreng thogs rnams dang rtag myos rnams dang rgyal chen ris bzhi pa'i lha rnams te/ gnya' shing 'dzin la sogs pa ri bdun po rnams la yang ngo / / bang rim bzhi pa la rnam thos sras dang yul 'khor srung dang 'phags skyes po dang mig mi bzang ste rgyal po chen po bzhi rnams byang la sogs pa'i phyogs rnams la gnas so/ /lag na gzhong thogs la sogs pa 'di rnams thams cad rgyal chen bzhi'i ris kyi lha'o/ /lhun po'i steng na legs par spyad pa lhan cig byas pa sum cu rtsa gsum der skyes pas sum cu rtsa gsum pa'o//lhun po'i steng gi ngos so sor stong phrag brgyad cu ste thur du ji lta ba bzhin no/ /gzhan rnams na re ngos so sor stong phrag nyi shu'o zhes zer ro/ /grwa bzhi na dpag tshad lnga brgya'i tshad kyis brtsegs pa bzhi rnams te/gang rnams su lag na rdo rje zhes pa'i gnod sbyin rnams so sor gnas pa'o/ /ri rab kyi steng de'i dbus na grong khyer blta na sdug ces pa ngos re re la dpag tshad phyed dang sum stong du ring ba dpangs su dpag tshad phyed dang gnyis pa/ sa'i mthil gser gyi rang bzhin la rin po che sna tshogs kyis bkra ba shing bal ltar reg na 'jam pa brgya byin gyi rgyal po'i pho brang ngo //de'i dbus na rnam par rgyal ba zhes pa'i khang bo zangs ngos so sor dpag tshad brgya phrag phyed dang gsum du ring ba dpangs su ji ltar mdzes pa'o/ /grong khyer gyi logs bzhi rnams na shing rta sna tshogs dang rtsub 'gyur dang 'dres tshal dang dga' ba'i tshal zhes pa skyed mos tshal rnams so//grong khyer gyi phyi rol gyi logs gnyis kyi byang shar na shing yongs 'dus brtol te/ de'i rtsa ba dpag tshad lnga zug go/ /dpangs su dpag tshad brgya pa'o/ /yal ga dang 'dab ma dang lo ma dpag tshad lnga bcu khyab ste gnas so//de thams cad me tog rgyas pa'i dri rdzi phyogs su dpag tshad brgyar 'gro la rdzi phyogs ma yin par dpag tshad lnga bcu'o/ /ci rang gi 'byung ba la brten pa kho nas me tog gi dri'i rgyun de 'jug gam/ 'on te rlung la bsgos nas skye zhe na/ 'di la nges pa med la slob dpon gyi 'dod pa gnyis ka ltar yang ngo / /lho nub na chos bzangs te lha'i 'dun sa gang du lha rnams 'khod nas bya ba dang bya ba ma yin pa bgro bar byed pa'o/ /de lta bu ni sum cu rtsa gsum pa rnams kyi snod gnas pa'o/ /skabs gsum pa rnams las steng du lha rnams gzhal med khang la gnas pa'o//de rnams kyang 'thab bral dang dga' ldan dang 'phrul dga' dang gzhan 'phrul dbang byed de 'dod khams pa rnams dang bsam gtan bzhi pa'i sa pas so/ /de la tsha ba'i dmyal ba brgyad dang gling bzhi dang rgyal chen bzhi'i ris pa la sogs pa lha drug dang /dud 'gro dang / yi dags kyi dbye bas 'dod khams gnas ris nyi shu'o/ /de la 'dod pa skye ba gsum rnams te/ 'dod pa ji ltar bskyed pa longs spyod pa las mi rnams dang lha'i ris bzhi rnams dang / 'phrul dga' ba rnams rang gis sprul zhing sprul nas 'dod pa rnams longs spyod pa dang gzhan 'phrul dbang byed pa rnams gzhan gyi sprul pa'i 'dod pa rnams la dbang phyug gi dbang byed pa'o//'dir sa dang 'brel par gnas pa rgyal chen bzhi'i ris dang sum cu rtsa gsum pa rnams mi bzhin du gnyis kyis gnyis 'khrig la/ 'thab bral la sogs pa rnams grangs ji lta bar 'khyud pa dang lag pa bcangs pa dang dgod pa dang lta bas so//'on kyang lha rnams la khu ba med pa'i phyir rlung btang bas yongs su gdung ba dang bral lo/ /bye brag tu smra ba rnams na re thams cad kyang gnyis kyis gnyis snyoms par 'jug pa ste dus yongs su bcad pas 'khyud pa la sogs par gdags par gsungs so zhes so//ji tsam ji tsam du yul shas che ba de tsam du 'dod chags kyang shas che ba'o/ /lha'am lha mo gang gis phang par gzhon nu ma byung ba de ni de dag gi bu brgyud de lta'i ris rnams su lo lnga dang drug dang bdun dang brgyad dang dgu pa dang bcu pa lta bur ro//gzugs khams su ni lha rnams lus yongs su rdzogs pa skyes pa dang bud med kyi dbang po dang bral ba gos dang bcas par skye'o/ /lha de rnams thams cad kyang 'phags pa'i skad du smra'o/ /de la bsam gtan dang po ni tshangs ris dang / tshangs pa'i mdun na 'don dang tshangs chen po//gnyis pa ni 'od chung dang tshad med 'od dang 'od gsal lo/ /gsum pa ni dge chung dang tshad med dge dang dge rgyas te 'di rnams kyang bde ba nyams su myong ba'o/ /bzhi pa ni rab kyi mtha' pa ni btang snyoms nyams su myong ba ste/ sprin med dang bsod nams skyes dang 'bras bu che dang mi che ba dang mi gdung ba dang gya nom snang dang shin tu mthong ba 'og min no//bsam gtan bzhi ni chung ngu dang 'bring dang chen po'i dbye bas so sor sa gsum pa'o/ /bzhi pa ni chen po nyid la chung ngu'i chung ngu dang / chung ngu dang 'bring dang chen po dang shin tu chen po dang mchog tu chen po'i bye brag gis gnas drug ste 'di rnams gnas bcu bdun no//de na gnas pa'i sems can rnams dang bcas pa ni gzugs kyi khams so/ /'bras bu che ba'i phyogs gcig na 'du shes med pa pa'i sems can rnams so/ /kha cig 'di rnams kyi gnas la sogs pa kho nar 'bras bu che ba'i steng na'o zhes so//mi che ba zhes pa 'dir a bI ha zhes pa dang mi 'dod pa zhes pa'ang ming du sems so/ /mi che ba la sogs pa 'og min gyi bar lnga rnams gtsang ma'i gnas te/ gtsang ba ni 'phags pa rnams kho na 'di rnams su skyes nas gnas pa'i phyir ro/ / gzugs med pa'i khams na gnas med cing btang snyoms nyams su myong ba tshor ba la sogs pa'i phung po bzhi pa/ skye ba'i bye brag gi rnam pa bzhi ste/ nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched ces pa'o//'di rnams yul gyis byas pa'i steng dang 'og ni med/ yul gang du snyoms par 'jug pa de thob pa rnams shi 'phos pa de nyid du skye ba'i phyir ro/ /slar yang de nas shi 'phos pa rnams de nyid du srid pa bar ma 'grub pa'o/ /'dir 'di la gzugs yod pa ma yin pas gzugs med de de'i dngos po ni gzugs med pa nyid do//gzugs med pa kho na dang gzugs med pa nyid ces pa ni dman pa la dgag pa ste/ de'i phyir de nas shi 'phos pa rnams kyi gzugs ni gzugs kho na las skye'o/ /gzhan rnams na re sems kho na las skye ste lus de'i rnam par smin pa rgyus yongs su bsgos pa thob pa 'jug pa las so zhes so//chos mngon pa pa kha cig na re dman pa'i don la dgag sgrar brjod de/ gzugs med pa'i khams na gzugs kyang yod/ gnas kyang yod/ de nas steng nas steng du gnas pa'i gzhal med khang rnams kyang yod ces zer ba nas sa la sogs pa rnams kyi yang tshad dang dbyibs kyi dbye ba'i bar du rgyas par ston no//de'i 'dod pa 'dir ma spros te mang po'i 'dod pa ma yin pa'i phyir ro/ /bsam gtan la sogs pa dang phyogs gcig pa'i phyir des yang dag par bsdus pa'i nyer bsdogs brgyad rnams te/bsam gtan dang gzugs med pa brgyad rnams kyi re re re re'i ste gang gis de la 'jug pa'o/ /bsam gtan dang po'i nyer bsdogs mi lcogs pa med pa yan lag bzhi pa'o/ /bsam gtan dang po nyid rtog pa dang mtshungs par mi ldan pa 'dod pa rnams la btang snyoms kyi tshor ba dang mtshungs par ldan pa rtog pa med la dpyod pa dang bcas pa ni bsam gtan khyad par du 'phags pa nyid kyi phyir de'i 'bras bu tshangs pa chen po'o zhes pa 'dod pa dang /gzugs dang gzugs med pa'i khams rnams so/ /de la gtso bor tshul khrims kyi rnam par smin pa dang ldan pa ni 'dod pa na spyod pa'i lha rnams so//ting nge 'dzin gyi rnam par smin pa dang ldan pa ni tshangs ris la sogs pa rnams so/ /shes rab kyi rnam par smin pa dang ldan pa rnams ni gtsang ma'i gnas rnams te 'phags pa rnams kho na der skye ba'i phyir ro/ /'di rnams kyang bag med pa'i sa la gnas pa rdzogs pa'i byang chub dang rjes su mthun pa'i gdams ngag gi snod do//bag med pa'i sa ni rnam pa gsum ste/ 'dod pa'i bde ba'i ro myang ba ste de phal cher 'dod khams kyi lha rnams so/ /bsam gtan gyi bde ba'i ro myang ba bsam gtan du skyes pa rnams so//mya ngan las 'das pa'i rgyu mtshan gyi ro myang ba ni gtsang ma'i gnas pa rnams so/ /gzugs med pa rnams ni bgrod pa la sogs pa mi rung ba'i phyir ro/ /gdul byar ni byams pa yongs su bsgoms shing rdzogs pa'i sangs rgyas la sogs pa yid la byed pa las te rdzogs pa'i byang chub kyi snod du 'gyur ba'o zhes pa'o//ci khams gsum pa gcig kho na'am zhe na khams gsum pa rnams kyi mtha' yod pa ma yin te nam mkha' ji srid du 'jig rten gyi khams rnams so/ /'jig rten gyi khams rnams ji ltar gnas she na/shar dang / lho dang / nub dang / byang gi phyogs rnams dang / steng dang 'og na yang 'jig rten gyi khams 'jig pa dang 'chags pa rnams kyi bar dang mtshams med de/ 'og min gyi gong na yang 'dod pa'i khams so/ /'dod pa'i khams kyi 'og na yang 'og min no//gang khams gcig las 'dod chags dang bral ba de thams cad las so/ /de bzhin du gzugs dang gzugs med pa las kyang ngo / /gang bsam gtan dang po la brten nas rdzu 'phrul skyed par byed pa de ni 'jig rten gyi khams gang du skye ba der skyed par byed la/ tshangs pa'i 'jig rten de nyid du nges 'gro'i gzhan du ma yin no//gang lha rnams kyi gnas nyi shu rtsa gsum pa brjod pa de rnams kyi 'og nas steng du ci tsam ring zhe na/ gnas dang gnas nas 'og tu ji srid pa de srid de dang de las steng du ste thams cad 'dzam bu'i gling mtshams so/ /'o na 'thab bral la sogs pa rnams kyi gzhal med khang gi tshad ci zhe na/kha cig na re bzhi po rnams ri rab kyi steng ci tsam pa'o zhes so/ /gzhan rnams na re gong ma nyis 'gyur ro zhes so/ /kha cig na re bsam gtan dang po ni gling bzhi pa ji srid pa'o/ /gnyis pa ni stong spyi phud kyi 'jig rten gyi khams ji tsam pa'o//gsum pa ni stong gnyis pa ji tsam pa'o/ /bzhi pa ni stong gsum pa ji tsam pa'o/ /gzhan rnams na re dang po la sogs pa rnams ni stong la sogs pa'i tshad yin la bzhi pa tshad med pa'o zhes so/ /de la gling bzhi dang zla ba dang nyi ma dang 'dod pa na spyod pa drug dang bsam gtan dang po rnams so sor stong ni/stong rnams kyi tshogs pa ste stong spyi phud kyi 'jig rten gyi khams so/ /spyi phud de rnams stong ni stong gnyis pa bar ma'i 'jig rten gyi khams so/ /stong gnyis pa de rnams stong ni stong gsum gyi stong chen po'i 'jig rten gyi khams te gling bzhi pa bye ba phrag brgya rnams so//'di thams cad mnyam du 'jig cing mnyam du 'chags so/ /'chags pa ni 'byung ba'o/ /'dir dpag tshad dang ming dang lo rnams nye bar mkho ba'i phyir dang po'i rim gyis brtsam par bya'o/ /gzugs kyi nges par dbye ba'i mtha' ni rdul phra rab po/ /ming gi mtha' ni yi ge ste dper na 'og zhes pa lta bu'o//dus kyi mtha' skad cig ma ste skad cig gi tshad ni chos 'gro ba ste ji srid du rdul phra rab nas rdul phra rab gzhan du 'gro ba'o/ /chos mngon pa pa rnams na re skyes bu stobs dang ldan pas se gol gtogs pa tsam gyi skad cig ma drug cu rtsa lnga 'da'o zhes so//de la rdul phra rab dang rdul phran dang lcags dang chu dang ri bong dang lug dang glang dang nyi zer gyi rdul dang / sro ma dang shig dang nas dang sor mo'i tshigs zhes pa bcu gnyis ni phyi ma bdun 'gyur te tshigs gsum sor mo'o/ /log la byas pa'i sor mo nyi shu rtsa bzhi khru'o/ /khru bzhi gzhu'o//gzhu lnga brgya rnams rgyang grags so/ /rgyang grags brgyad rnams dpag tshad do/ /skad cig brgya nyi shu rnams de'i skad cig go/ /de'i skad cig de drug cu thang cig go/ /thang cig sum cu yud tsam mo/ /yud tsam sum cu la nyin zhag gcig go/ /rgyal dang dbo dang sa ga dang chu stod dang khrums dang smin drug rnams kyi nag po'i phyogs la tshes re re chad pa'i phyir nyin zhag nyi shu rtsa dgu dang nyin zhag sum cu ni zla ba'o//zla ba bcu gnyis rnams lo'o/ /de la 'dzam bu'i gling gi mi rnams phal cher khru phyed dang bzhi pa'o/ /'ga' zhig khru bzhi pa'o/ /shar dang ba lang spyod dang byang zhes pa rnams ni khru brgyad dang bcu drug dang sum cu rtsa gnyis pa rim pa ji lta bar lus kyi tshad do//rgyang grags kyi rkang pa gcig dang gnyis dang gsum dang bzhi dang lnga dang drug rnams rgyal chen bzhi'i rigs la sogs lha drug rnams kyi'o/ /tshangs ris la sogs pa bcu bdun po rnams kyi lus ni dpag tshad phyed dang gcig dang phyed dang gnyis dang gnyis dang bzhi dang brgyad dang bcu drug dang sum cu rtsa gnyis dang drug cu rtsa bzhi dang nyi shu rtsa lnga lhag pa'i brgya dang phyed dang sum brgya dang lnga brgya dang stong dang /stong phrag gnyis dang bzhi dang brgyad dang bcu drug rnams so//byang sgra mi snyan dang ba lang spyod dang shar lus 'phags po rnams su tshe ni lo stong dang de'i phyed do/ /'dzam bu'i gling du bskal pa dang po'i mi rnams kyi tshad med pa dang bar du ma nges pa dang tha mar lo bcu'o/ /mi rnams kyi lo lnga bcu rgyal chen bzhi'i ris pa rnams kyi nyin zhag go//de'i lo lnga brgya rnams tshe'o/ /steng ma rnams kyi nyin zhag dang tshe phyi ma nyis 'gyur ro/ /gzugs can rnams kyi yang dpag tshad phyed la sogs pa bzhin bskal pa phyed la sogs pa tshe'i tshad do/ /gzugs med na bskal pa stong phrag nyi shu dang bzhi bcu dang drug cu brgyad cu rnams tshe'o//'dir bskal pa chen po'i phyed de bar gyi bskal pa bzhi bcu bskal par byas nas/ bskal pa de'i phyed la sogs pa gzugs can gsum po rnams kyi tshe'o/ /'od chung nas brtsams nas ni bskal pa chen pos tshe'o/ /ngan 'gro ni gang rgyal chen bzhi'i ris pa rnams kyi tshe tshad de ni dmyal ba chen po yang sos su nyin zhag gcig ste de'i lo lnga brgya rnams tshe'o//sum cu rtsa gsum pa la sogs pa rnams kyi tshe ni thig nag dang bsdus 'joms dang ngu 'bod dang / ngu 'bod chen po dang tsha bar nyin zhag gcig ste de yis lo stong la sogs pa rnams tshe'o//rab tu tsha ba ni bar gyi bskal pa phyed tshe'o/ /mnar med pa'i bar gyi bskal pa'o/ /dud 'gro rnams kyi ni nges pa med cing mchog tu tshe ring ba'i dud 'gro rnams kyi bar gyi bskal pa ste/ dga' bo dang nyer dga' la sogs pa klu rnams kyi'o/ /mi'i zla ba yi dags rnams kyi nyin zhag ste des lo lnga brgya rnams so//grang ba'i dmyal ba rnams kyi chu bur can gyi tshe ni gang ma ga d+hA'i til khA ri'i nyi shu pa'i sbyang ste sbyang de las lo brgya nas til re phyung bas zad pa'o/ /gzhan rnams so sor nyi shu 'gyur du 'phel ba'i tshe'o/ /bar du 'chi ba ni sgra mi snyan ma gtogs pa thams cad na yod do//mnyam du 'jig go zhes gang brjod pa de la 'jig pa gnyis te 'gro ba 'jig pa dang khams 'jig pa'o/ /yang gnyis te sems can 'jig pa dang snod 'jig pa'o/ /gang dmyal ba rnams su sems can 'chi 'pho zhing mi skye ba'i dus der 'gyur te de 'jig pa'i bskal pa rtsom pa'o//rim gyis dmyal ba rnams su sems can gcig kyang ma lus par 'gyur te/ gang de'i tshe dmyal ba myong bar nges pa'i las 'dzin pa de 'jig rten gyi khams gzhan gyi dmyal bar 'phan par byed do/ /de bzhin du dud 'gro rnams dang yi dwags rnams dang 'dzam bu'i gling dang shar lus 'phags dang ba lang spyod dang sgra mi snyan pa'i mi rnams dang 'dod pa na spyod pa drug dang bsam gtan dang po rnams rim gyis 'jig go//gang gi tshe tshangs pa'i 'jig rten du sems can gcig kyang ma lus par 'gyur ba 'di tsam 'di lta ste sems can 'jig pas 'jig rten 'jig pa'o//de nas snod stong pa 'di nyid nas kun nas sems can rnams kyi de 'phen pa'i las yongs su zad nas lhas char ma phab pa dang nyi ma dang po shar bas sa bon gyi grong dang 'byung ba'i grong dang chu mig dang chu phran rnams skam mo/ /nyi ma gnyis shar bas chu bo thams cad skam mo//gsum pa chu bo chen po bzhi dang ma dros pa la sogs pa'i mtsho phran chen po rnams skam mo/ /bzhi pas rgya mtsho chen po dpag tshad brgya'i bar du skam mo/ /lnga pas dpag tshad nyis brgya la sogs pa'o/ /drug pas chu'i thigs pa shin tu che chung ba yang mi lus te sa chen po dang ri rab kyang du bar 'thul lo//nyi ma bdun pa shar bas stong gsum gyi stong chen po'i 'jig rten gyi khams bsregs te ji ltar thal bar yang mi shes par bsregs nas rang nyid kyang zhi'o zhes pa nyi ma bdun gyi mes 'jig pas bsam gtan dang po'i bar bsreg go/ /de bzhin du char pa'i chu ba tshwa can gyis bsam gtan gnyis pa myags par byed do//rnam par bskyod pa'i rlung chen po'i rlung gis 'jig pas bsam gtan gsum pa rnam par 'thor ro/ /bsam gtan bzhi pa na 'jig pa med do/ /'o na de rtag gam zhe na ma yin te gang gi phyir bsam gtan bzhi pa ni sa gzhi gcig tu 'brel pa med kyi 'o na ci zhe na/gnas gzhan rnam par chad pa ste skar ma bzhin no/ /de na sems can gang dang gang skye ba'am 'chi 'pho ba ni gzhal med khang dang bcas par yin pa'i phyir 'di rtag pa nyid med do/ /'dir bar ma chad par me yis 'jig pa lan bdun no//de nas chus gcig go/ /de ltar chu yis bdun song ba na yang mes bdun no/ /phyis rlung gis 'jig pa gcig tu 'gyur la/ de rnams ni mes 'jig pa lnga bcu rtsa drug dang chus bdun dang rlung gis gcig ste 'di rnams su 'gyur ro/ /de ltar dmyal bar sems can rnams 'chi 'pho ba nas bzung ste ji srid snod kyi 'jig rten rnams zad pa'i bar gyi dus 'di 'jig pa'i bskal pa ste bar gyi bskal pa nyi shu rnams so//de'i rjes su 'jig rten gyi khams zhig pa 'di stong pa nam mkha' tsam du bar gyi bskal pa nyi shu gnas so/ /de nas slar yang sems can rnams kyi las kyi dbang gis nam mkha' las rlung dal bu rnams g.yo'o//de nas ji skad brjod pa rlung gi dkyil 'khor la sogs pa thams cad skye'o/ /'di tsam 'di ni snod 'chags pas 'jig rten du 'gyur ro/ /de nas sems can gzhan zhig 'od gsal ba'i lha rnams las shi 'phos nas tshangs pa'i gzhal med khang stong par skye'o//sems can gzhan rnams kyang de nas shi 'phos te tshangs pa mdun na 'don du'o/ /de nas tshangs ris dang gzhan 'phrul dbang byed rnams su ste rim gyis byang sgra mi snyan dang ba lang spyod dang shar lus 'phags dang 'dzam bu'i gling dang yi dags dang dud 'gro dang dmyal ba rnams kyi bar du skye'o//'di ni chos nyid yin te gang phyis zhig pa de la mngon la 'chags pa'o/ /gang gi tshe dmyal ba rnams sems can gcig skyes par 'gyur ba de'i tshe/ gang 'jig rten 'di bar gyi bskal pa nyi shur 'chags pa yin no//chags nas bar gyi bskal pa nyi shur gnas par 'gyur ba de ni nye bar 'ong bar 'gyur ro/ /'dir yang bskal pa dang po'i mi rnams ni gzugs na spyod pa bzhin du yid kyi rang bzhin dang ba rang 'od can nam mkha' la 'gro ba dga' ba'i zas can rnams te/ de rnams sa'i dri bsnams nas ro myong shing zos pas/de rnams kyi lus la rtsub pa nyid dang lci ba nyid zhugs shing 'od ni nub par gyur te/ de nas mun pa byung ba na nyi ma dang zla ba dag byung ngo / /sa'i ro dang sa'i zhag dang myu gu'i tshal rim gyis skyes pa rnams chags pa las nub par gyur to/ /ma rmos ma btab pa'i 'bras bu skyes pa de zos pa na gci ba dang bshang ba'i lam pho dang mo'i dbang po dang bcas pa byung shing dbyibs kyang tha dad pa byung ste/sngon goms pa'i dbang las tshul bzhin ma yin pa yid la byed pas 'dod pa'i 'dod chags rgya chen po gang las log par zhugs par gyur pa'o//le lo las sog 'jog byas shing bdag tu 'dzin pa skyes pa na 'bras sA lu brngas pa slar mi skye bar gyur to/ /de nas zhing rnams bgos nas rang gi rnams la kun nas 'dzin pa byas te pha rol gyi la brkus so/ /de nas bsrung ba'i don du skyes bu khyad par can cig byung ba la drug cha bstabs te/zhing rnams kyi bdag po nyid kyi phyir rgyal rigs zhes don dang mthun pa'i ming ngo / /mang pos bkur ba nyid kyi phyir dang skye dgu rnams dga' bar byed pa nyid kyi phyir mang pos bkur ba dang rgyal po zhes so/ /khyim rnams las yid phyir phyogs pa rnams ni bram ze zhes bya ba'i ming byung ngo //rgyal po gang yang rung ba zhig gis chad pas bcad pa'i chom rkun pa rnams na re bdag gis 'di lta bu ma bgyis so zhes brdzun du smra bar gyur to/ /de ltar 'jig rten chags bzhin pa rnams mi rnams kyi tshe dpag tu med pa ste/ las kyi lam rnams 'phel bar gyur pa na rim gyis thung ba nyid de/mthar tshe lo bcu pa chos ma yin pa la chags pa/ chags pa mi bzad pas zil gyis gnon pa log pa'i chos kyis dkris pa rnams la/ gnod sems mthar thug ste shing la sogs pa rnams mtshon char 'gyur ro/ /de rnams sems can gzhan gsod par byed pa'i phyir mtshon gyis te srog gcod pa nyi ma bdun 'byung ngo //slar yang skyon de rnams nyid kyis mi ma yin pa rnams yams nad spro bar byed pa gang las mi de rnams nad kyis 'chi bar 'gyur ro zhes pa nad zla ba bdun dang nyi ma bdun 'byung ngo / /slar yang skyon de rnams nyid kyis char mi 'bab cing mu ge 'byung ste/mi rnams bkres pa dang nyam chung bas gab nas 'chi la/ gzhan rnams kyang rus gong dkar po rnams bskol nas 'thung zhing / thur ma'i rtse mos khyim rnams su zang zing 'god par byed de/ de ring khyim bdag gsol ba'o sang khyim bdag mo'o zhes pa 'di lta bu la sogs pa dang /'bru'i gnas kyi bug pa rnams nas thur mas 'bru ba dang 'bras bu rnams chung ba chu mang po la bskol nas 'thung ngo zhes pa mu ge lo dang zla ba dang zhag bdun rnams 'byung ngo / /de'i tshe yang gling gnyis dag tu gnod sems lhag par thob par 'gyur zhing kha dog ngan pa dang nyam chung ba dag dang /bkres pa dang skom pa dag kyang ngo zhes pa 'di ni chags pa rnams gnas pa'i bar gyi bskal pa dang po'o/ /tshe lo bcu pa de rnams las rim gyis 'phel bar gyur pas tshe lo brgyad khrir 'gyur zhing slar yang 'gribs pas tshe lo bcu par gyur pa 'di ni bar gyi bskal pa gnyis pa'o//de bzhin du bco brgyad kyi bar du'o/ /nyi shu pa ni yar skye ba kho na ste mar 'bri ba med la tshe lo bcu pa las lo brgyad khri ji srid par ro/ /bar gyi bskal pa gzhan rnams kyi 'phel ba dang 'grib pa'i dus ji srid pa de srid bar gyi bskal pa dang po'i 'grib pa'i dus dang tha ma'i 'phel ba'i dus kyang ngo zhes pas thams cad dus mnyam pa'o//de la bar gyi bskal pa gcig gis snod rnams 'chags so/ /bar gyi bskal pa bcu dgus sdod pa po byed do/ /'jig rten chags pa bar gyi bskal pa nyi shur gnas so/ /gcig gis snod rnams 'jig go//bcu dgus stong par 'gyur ro/ /'jig rten zhig pa ni bar gyi bskal pa nyi shu gnas so zhes pa brgyad cu ni bskal pa chen po ste/ bskal pa bzang po la sogs pa phung po lnga'i rang bzhin no/ /bskal pa 'ga' zhig ni de lta bu ma yin te/ smon lam dang dge ba'i rtsa ba'i dbang gis shin tu ring pa nyid kyi phyir ro//dper na bskal pa skar ma lta bu ste de'i 'grib pa'i dus nyid las ji skad brjod pa'i bar gyi bskal pa'i tshad kyi bar gyi bskal pa stong phrag nyi shu yod pa'i phyir ro/ /de ltar bzang po la sogs pa bskal pa chen po grangs kyi gnas gzhan drug cur son par thob pa ni grangs med pa zhes brjod do//de nas bzlas nas slar yang bgrang bar bya ste de lta bu grangs med pa gsum zhes brjod do/ /de lta bu'i bskal pa grangs med pa gsum la sangs rgyas nyid 'byung ngo / /de ltar bskal pa grangs med pa dang pos tshogs kyis nas brtsams nas sa dang po'i bar rdzogs par byed do//gnyis pas ni dri ma med pa la sogs pa sa drug go/ /gsum pas ni mi g.yo ba'i sa nas brtsams nas sangs rgyas kyi sa'i bar ro zhes mdo las so/ /gzhan rnams na re gsum du chos mthun pa'i phyir bskal pa grangs med pa gsum zhes brjod kyi don dam par ni ma yin no//de ltar ni tshogs kyis rdzogs par byed pa la bskal pa grangs med pa gcig 'da'o/ /de'i de ma thag par mos par byed pa'i sa rdzogs par byed pa la bskal pa grangs med pa gnyis so/ /de'i rjes su rab tu dga' ba'i sa nas bzung ste chos kyi sprin gyi bar so sor bskal pa grangs med pa gsum gsum rnams kyis byang chub sems dpa'i sa rdzogs nas/sangs rgyas kyis kun du 'od thob par byed do zhes pa de ltar bskal pa grangs med pa sum cu rtsa gsum gyis sangs rgyas nyid thob po zhe'o/ /sangs rgyas nam 'byung zhe na/ skye dgu'i tshe lo brgyad khri pa 'grib pa nas brtsams nas mi rnams tshe lo brgya par 'gyur ba'i bar 'dir sangs rgyas rnams 'dir 'byung ngo / /sngar ni ma yin te sems can yid 'byung ba dka' ba nyid kyi phyir ro/ /'phyi bar yang ma yin te de'i tshe dang bskal pa dang nyon mongs pa dang lta ba dang sems can gyi snyigs ma lnga shin tu lhag par gyur pa'i phyir ro//gnyis kyis srog dang yo byad rgud par byed la gnyis kyis dge ba'i phyogs rgud par byed cing gcig gis bdag gi dngos po rgud pa ste gzugs tshad dang nad med pa dang stobs dang blo dang dran pa dang brtson 'grus dang brtan pa rnams nyams pa'i phyir ro//rang sangs rgyas rnams ni 'phel ba dang 'grib pa la'ang 'byung ngo / /'khor los sgyur ba rnams ni mi rnams kyi tshe lo dpag tu med pa nas brgyad khri pa'i bar la ste/ 'og tu ma yin la skye gnas su 'am yang na chu skyes kyi snying por rdzus te skye ba'o/ /de rnams kyang bar snang la 'ongs pa'i gser dang dngul dang zangs dang lcags kyi 'khor lo can gling bzhi dang gsum dang gnyis dang gcig gi bdag po/'khor lo dang glang po dang rta dang nor bu dang bud med dang khyim bdag dang blon po'i rang bzhin gyi rin po che bdun dang ldan pa/ phas bsu rang 'gro g.yul bshams dang //mtshon brtsams pas rgyal gnod pa med pa ste/ mtshon gyis kyang rgyal bar byed cing gnod pa med la/ rgyal nas sems can dge ba bcu'i las kyi lam rnams la 'god par byed do/ /gling bzhi pa'i 'jig rten gyi khams gcig tu dus gcig la 'khor los sgyur ba gnyis 'byung ba med de/'gran zla med pa'i las byas pa'i phyir sangs rgyas bzhin no/ /'o na gcig tu de bzhin gshegs pa gnyis dag lhan cig tu mi 'byung ba ci'i phyir zhe na/ sku de lta bu tshogs pas gdul bar bya ba'i skye bo mi srid pa'i phyir ro/ /gus pa dang rings pa'i don du yang ste sangs rgyas gcig la shin tu gus par 'gyur te 'di 'dra ba rnyed par dka'o zhes sems shing /'di gshegs pa'am yongs su mya ngan las 'das na mgon med par 'gyur du 'ong zhes bstan pa sgrub pa la shin tu rings par byed do/ /'jig rten gyi khams gzhan rnams na ni sangs rgyas rnams yod pa nyid de/mang po rnams mnyam du tshogs la 'jug pa mthong ba'i phyir dang gcig tu mang po rnams cig car 'byung ba mi rung ba de 'byung ba la gegs ci yang med pas 'jig rten gyi khams gzhan rnams su nges par 'byung ngo / /sangs rgyas kyi sku mang pos gdul bar bya ba dang / sems can gyi don srid na ni 'jig rten gyi khams gcig tu de bzhin gshegs pa mang po rnams cig car 'byung ba 'gal ba med de ye shes kyi nus pa thogs pa med pa nyid na'ang cig car yang sems can gyi don la 'jug pa'i phyir te/ de bzhin gshegs pa rnams ser sna dang phrag dog la sogs pa'i dri ma dang bral ba dang rgyu mnyam por 'jug pa nyid kyi phyir ro//kha cig na re dus gcig tu de bzhin gshegs pa du ma med de gcig kho nas sems can gyi don bya ba thams cad nus pa'i phyir zhe'o/ /rtag tu sangs rgyas gcig nyid de de kho nas sku tshe mtha' yas par byin gyis rlob par nus pa'i phyir ro zhes cis mi 'dod/rgyu'i stobs las gzhan rnams kyang 'byung ngo zhe na/ de ltar na rgyu'i stobs nyid las 'jig rten gyi khams mtha' yas pa rnams su de bzhin gshegs pa mtha' yas pa cig car 'gyur bas 'gal ba ci yod rim gyis ni 'jig rten gyi khams gcig tu yang de rnams 'byung ba gnas pa kho na'o//byung ba de rnams ni yongs su mya ngan las 'da' ba med pa'i phyir ro/ /chos dang longs spyod rdzogs pa'i sku dag gis yod pa kho na'o/ /bsod nams dang mi ldan pa rnams la snang bar mi 'gyur ba 'ba' zhig yin gyi bsod nams chung ba'am che ba ji lta bar yang dag par dmigs so//'o na 'dir de bzhin gshegs pa dag 'jig rten gyi khams ci tsam du 'dod ce na stong gsum mo/ /gzhan rnams na re gling bzhi pa'o zhes so/ /bcom ldan 'das 'og min gyi khang pa nyid du mngon par rdzogs par sangs rgyas pa ni sprul pa'i skus stong gsum gyi nang du gtogs pa'i gling bzhi pa rnams thams cad du dga' ldan du skye ba dang 'chi 'pho ba dang mi rnams su skye ba yongs su 'dzin pa la sogs pa kun du ston to snyam du sems so/bud med kyis ni 'khor los sgyur ba nyid dang brgya byin nyid la sogs pa thob pa med de bdag po gzhan gyi dbang nyid kyi phyir ro/ / bud med la bud med rin po che la sogs pa longs spyod pa'i nus pa med pa'i phyir ro/ /rang byang chub dang bla na med pa'i byang chub kyang rtogs par mi 'gyur te/ go rims bzhin du de bse ru lta bur 'dre ba med pa dang / sa gsum gyi ston pa nyid mi srid pa'i phyir ro/ /de ni skye bo g.yon can thams cad kyis bgrod par bya ba dang /shes rab chung ba nyid las slob dpon med par mngon par byang chub par mi rung bar kun du spyod pa gzhan gyi dbang nyid kyi phyir ro/ /sngags kyi tshul du ni thabs kyi khyad par gyis bud med kyis kyang bla na med pa'i byang chub rtogs so zhes gsungs so zhes zhar la 'ongs pa gzhag go//khams gsum pa 'di yang sems can dang snod kyi 'jig rten gyi bye brag gis rnam pa gnyis kyang ste phung po dang skye mched dang khams kyi rang bzhin no/ /de la phung po rnam lnga ste gzugs dang tshor ba dang 'du shes dang 'du byed rnams dang rnam par shes pa'o//de la mig dang rna ba dang sna dang lce dang lus te dbang po rnams dang gzugs dang sgra dang dri dang ro dang reg bya ste/ yul rnams dang bcu gzugs kyi phung po'o/ /gzhan na re rnam par rig byed ma yin pa'ang ngo zhes so/ /de yang rnam pa gnyis te 'byung ba rnams dang 'byung ba las gyur pa rnams so//de la 'byung ba chen po bzhi rnams ni sa dang chu dang me dang rlung gi khams te reg bya'i nang du 'dus so/ /lhag ma'i reg bya ni 'jam pa nyid la sogs pa'o/ /mig la sogs pa bcu rnams 'byung ba las gyur pa kho na ste 'byung ba rnams la yod pa'i phyir ro/ /dper na rtswa dang shing la sogs pa rgyur byas nas yod pa khyim dang bud shing rgyur byas nas me bzhin te/de bzhin du 'byung ba rnams la brten nas mig la sogs pa nye bar skye ba ni rgyur byas pa'i gzugs zhes brjod do/ /de nyid kyi phyir gang gi tshe 'byung ba chen po rnams gzugs brnyan bzhin rang bzhin med pa de'i tshe de'i rgyu can 'byung ba las gyur pa mig dang gzugs la sogs pa rang bzhin med pa nyid du bde blag tu rtogs so//gzhan yang 'dod pa'i khams su dbang po las phyi rol pa ni rdul phra rab kyi rdzas brgyad par skye'o/ /de la rdzas brgyad rnams ni 'di lta ste 'byung ba chen po bzhi dang gzugs dang dri dang ro dang reg bya rnams so//nang gi bdag nyid lus kyi dbang po can ni rdzas dgu pa'o/ /mig la sogs pa'i dbang po can ni dbang po gzhan ldan te rdzas bcu pa'o/ /sgra dang bcas pa ni slar yang 'di rnams rdul phra rab kyi rdzas dgu dang bcu pa dang bcu gcig par skye'o/ / de la rdzas brgyad pa'i rdul phra rab la rdzas brgyad po de rnams se 'bru'i sa bon ltar rang bzhin so sor rnam par gnas pa ni med do/ /'o na ci zhe na btung ba la sogs pa la ko la dang ku lad tha dang bu ram dang bse yab la sogs pa'i khu ba bzhin 'dres par gyur nas rnam par gnas so/ /de la rdul phra rab la re re'ang rdzas bdun bdun las tha dad par ma grub pa nyid kyi phyir rang bzhin grub pa med de/phan tshun ltos pa nyid kyis skye ba'i phyir ro/ /rnam pa thams cad du med pa yang ma yin te re re'ang rdzas bdun bdun rnams rgyur byas nas nye bar dmigs pa'i phyir ro/ /rigs pa 'di rdzas bcu dang bcu gcig gi rdul phra rab rnams la yang shes par bya'o//de ltar dbang po dang yul rnams gzugs brnyan lta bu'o/ /de las skyes pa'i sems dang sems las byung ba yang ste gzugs brnyan dang 'dra ba'i rten dang dmigs pa las skyes pa nyid kyi phyir ro/ /gzhan yang ji ltar 'byung ba chen po rnams phan tshun ltos nas skye ba nyid kyi phyir rang bzhin grub pa med pa de bzhin du sems dang sems las byung ba yang ste phan tshun gyi stobs las bskyed pas grub pa nyid kyi phyir ro//rang bzhin pa rnams ni gzugs brnyan lta bu nyid la shin tu mi 'jug go/ /de bzhin du mtshon cha dang mtshan nyid la yang sbyar bar bya'o//de la sa ni mkhrang ba nyid dang mkhregs pa nyid dang sra ba nyid de 'dzin pa'i las can no/ /chu'i khams ni gsher ba nyid dang snum pa nyid de sdud pa'i las can no/ /me ni dro ba nyid de smin pa nyid dang skems pa'i las can no/ /rlung ni yang zhing g.yo ba nyid de 'phel ba dang 'gro bar byed pa'i las can no//'di ltar 'phel ba ni cha shas lhag po bskyed pa'o/ /'byung ba chen po 'di rnams kyi yang gcig gang na yod pa de na lhag ma rnams te/ gang gi phyir rdo la sogs pa sa'i rdzas la sdud pa la sogs pa'i las mthong ba las chu dang me dang rlung rnams yod pa nyid du rjes su dpag go//chu la gru 'dzin pa dang dro ba dang 'bab pa mthong ba'i phyir sa dang me dang rlung rnams so/ /me 'bar ba la bstan pa dang gong bur 'dril ba dang g.yo ba mthong ba'i phyir sa dang chu dang rlung rnams so/ /rlung la 'dzin pa dang grang ba dang dro ba'i reg pa mthong ba'i las sa dang chu dang me rnams so//nam mkha' ni chen po nyid du yod mod 'byung ba nyid ni ma yin te 'dus ma byas pa nyid kyis na thun mong dang thun mong ma yin pa'i las kyi khyad par bskyed pa nyid med pa'i phyir ro zhes pas nam mkha' 'byung ba chen po ma yin no/ /mig gi dbang po ni mig gi zlum skor na mig 'bras kyi nang na gnas pa mi mthong ba rgun 'brum gyi 'bras bu'i tshad tsam pa zi ra'i me tog dang 'dra bar gnas pa shin tu dang ba'i pags pas g.yogs pa'o//rna ba'i dbang po ni gro ga gcus pa lta bu rna ba'i nang na gnas pa'o/ /sna'i dbang po ni dril bu'i nang gi lce lta bu'o//lce'i dbang po ni zla ba phyed pa lta bu'o/ /lus kyi dbang po ni lus lta bur gnas so/ /lnga po 'di rnams rang gi don dmigs pa la dbang byed pa nyid kyi phyir dbang po rnams so/ /gzugs kyi skye mched ni kha dog dang dbyibs shes pa rnam pa gnyis so/ /kha dog ni sngon po dang ser po dang dmar po dang dkar po dang sprin dang du ba dang rdul dang khug rna dang grib ma dang nyi 'od dang snang ba dang mun pa'o//dbyibs ni ring po dang thung ngu dang lham pa dang zlum po dang mthon po dang dma' ba dang / dbyibs mnyam pa dang dbyibs mi mnyam pa'o/ /nyi 'od ni nyi ma'i 'od do//snang ba ni zla ba dang skar ma dang me dang sman dang nor bu rnams kyi 'od do/ /sgra ni zin pa dang ma zin pa dang gnyis ka'i 'byung ba chen po'i rgyu can no/ /zin pa ni sems dang bcas pa'o/ /ma zin pa ni sen mo dang skra la sogs pa gang gcad pa la nad med pa'o/ /dri ni gsal lo//ro ni rnam pa drug ste mngar ba dang skyur ba dang lan tshwa dang tsha ba dang kha ba dang bska ba'i bye brag gis so/ /reg bya ni bcu gcig gi bdag nyid de 'byung ba chen po bzhi rnams dang / 'jam pa nyid dang / rtsub pa nyid dang / lci ba nyid dang / yang ba nyid dang / grang ba dang / bkres pa dang skom pa'o//lto ba'i nang gi gang lus kyi dbang pos reg par bya ba de bkres pa ste bza' ba mngon par 'dod par byed pa dang / skom pa ni btung ba mngon par 'dod pa ste rgyu las 'bras bu btags pa'i phyir ro/ /chu dang me'i khams shas che ba'i 'byung ba 'dus na 'jam pa nyid do/ / sa dang rlung shas che na rtsub pa nyid do/ /sa dang chu shas che na lci ba nyid do/ /me dang rlung shas che na yang ba nyid do/ /chu dang rlung shas che na grang ba'o/ /rlung shas che na bkres so/ /me dang rlung shas che na skom pa'o zhes pa dbang po lnga'i yul rnams so/ /de la mig la sogs pa lnga rnams ni rang gi 'bras bu rnam par shes pa las rjes su dpag par bya ba nyid kyi phyir yid kyi rnam par shes pas rnam par shes par bya ba kho na'o//gzugs la sogs pa lnga rnams ni mig la sogs pa lnga'i rnam par shes pa rnams kyis rnam par shes par bya ba'o/ /rnam par rig byed ma yin pa ni dngos por yod pa ma yin no zhes sngar bsgrubs zin to//de'i phyir bcu po nyid gzugs su rung / gang rnams gang du gnod par bya ba dang thogs par bya ba'o zhes pas thogs pa dang bcas pa'i gzugs rnams so/ /de rnams kyi phung po ni gzugs kyi phung por bshad do/ /tshim par bya ba dang yongs su gdung bar byed pa dang de gnyis las rnam par grol ba'i yul gyi rang gi ngo bo mngon sum du bya bas yul nyams su myong ba rnam par shes pa'i nyams su myong ba rig pa ni tshor ba zhes brjod do//de la bye brag smra ba rnams na re sems ni gtso bo yin la sems las byung ba rnams ma yin no//de rnams ni sems kyi 'di rnams sam sems la yod pa rnams yin pas sems kyi bya ba'i rang bzhin te tha dad du grub bo/ /chos rab tu rnam par 'byed pa'i dus su ni shes rab sems las byung ba cha shas kyang gsal la/ la la la lar chos gtso bo ste/ dper na mngon par yid ches pa'i dus na dad pa la sogs pa zag pa med pa'i phung po lnga'i tshogs pa lta bu'o zhes so//rnal 'byor spyod pa pa rnams na re sems kyi bya ba'i rang bzhin sems kyi gnas skabs kyi khyad par sems las byung ba ste sems las tha dad pa ma yin no zhes so/ /dbu ma pa rnams na re kun rdzob tu ma brtags na nyams dga' ba nyid kyi phyir ji lta ba de lta ste kha cig tu de nyid dang 'ga' zhig tu gzhan nyid lta bu tha snyad byed la don dam par ni de nyid dang gzhan nyid du yang mi rigs so//tshor ba de yang lus kyi dang sems kyi'o/ /slar yang rnam pa gsum ste bdag dang sdug bsngal dang sdug bsngal yang ma yin bde ba yang ma yin pa'o//slar yang rnam pa lnga ste bde ba dang sdug bsngal dang yid mi bde ba dang btang snyoms kyi dbang po rnams so/ /de la gzugs can gyi dbang po la brten pa'i rnam par shes pa dang mtshungs par ldan pa dang / bsam gtan gsum pa na yid kyi yang ste sim pa'i tshor ba ni bde ba'i dbang po'o/ /gzugs can gyi dbang po'i rnam par shes pa dang mtshungs par ldan pa sim pa ma yin pa'i tshor ba ni sdug bsngal gyi phung po'o/ /yid kyi rnam par shes pa dang mtshungs par ldan pa tshim pa'i tshor ba ni bde ba'i dbang po'o//yid nyid tshim pa ma yin pa ni yid mi bde ba'i dbang po'o/ /thams cad kyi nyid sim pa yang ma yin sim pa ma yin pa yang ma yin pa'i tshor ba ni btang snyoms kyi dbang po'o/ /gang gi phyir sems kyi bde ba dang sdug bsngal phal cher rnam par rtog pa las skyes shing lus kyi ni ma yin te/yul gyi dbang las dgra bcom pa rnams la yang skye ba'i phyir ro/ /slar yang rnam pa drug ste mig gi 'dus te reg pa las byung ba nas yid kyi 'dus te reg pa las byung ba ji srid pa'i bar ro zhes pa tshor ba'i phung po brjod zin to/ /'dir bum pa dang snam bu dang gzugs la sogs pa 'dus byas rnams la 'dus byas su thun mong ba nyid na'ang so so rang gi rgyu dang rkyen rnams la khyad par yod do//de'i khyad par las kyang lto ldir ba la sogs pa'i phan tshun khyad par yod do/ /khyad par de nyid mtshan ma zhes brjod de des don rnams khyad par du rjes su dpag par bya ba nyid kyi phyir ro//bum pa nyid la sogs pa'i mtshan ma de sems las byung ba'i chos gang gis 'dzin pa dang 'du shes pa dang yongs su gcod par byed pa de ni mtshan mar 'dzin pa'i bdag nyid 'du shes zhes brjod do/ /'di la bye brag tu smra ba rnams na re mtshungs par mi ldan pa'i ming dang lhan cig don gcig la 'jug pa'i 'du shes ni ming gi don gsal bar byed cing 'du shes kyis shes par byed do//de ni ming dang mtshan ma dang don gyi brdas shes pa rnams kyi gsal ba ste/ de rnams ngag las ming nges par byed cing ming las kyang don no/ /de nyid kyi phyir ngag ming la 'jug cing ming gis don gsal bar byed do//brda la ma byang ba ni mi gsal ba'i 'du shes kyis ming gis don rtogs par mi byed la/ ming gis don rtogs su 'jug par yang mi byed do zhes zer ro/ /de yang gzhan du rnam par dpyad zin to/ /rigs pa ni/ /phyi rol du'am yid la'ang rung ste gang du'ang sgra dang 'dres med la//slar yang yi ge'i rnam pa dang 'dres don gyi rnam pa cung zad spro/ /mi bden bdag nyid du gnas gang yang blo nyid kyis zhen pa/ /de dag phyi rol dang ni ngag la nges par 'dzin te de phyir rnam par rtog par gzhag /ces so/ /'du shes de yang rnam pa drug ste/mig gi rnam par shes pa dang mtshungs par ldan pa nas yid kyi rnam par shes pa dang mtshungs par ldan pa'i bar ro zhes pa 'du shes kyi phung po'o/ /'du byed kyi phung po ni sems byung ste/ de las tshor ba dang 'du shes dag byung ste rtsod pa'i rtsa ba nyid dang 'khor ba'i rgyu nyid kyi phyir phung po logs su byas so//rtsod pa'i rtsa ba ni gnyis te 'dod pa la lhag par chags pa dang lta ba la lhag par chags pa'o/ /de dag gi gtso bo'i rgyu ni go rims bzhin du tshor ba dang 'du shes dag go/ /'khor ba'i rgyur gyur pa yang de dag ste tshor ba la chags pa dang 'du shes phyin ci log par 'khor ba'i phyir ro//de las gzhan pa'i sems las byung ba rnams ni sems pa dang reg pa dang yid la byed pa dang 'dun pa dang mos pa dang dad pa dang brtson 'grus dang dran pa dang ting nge 'dzin dang shes rab dang rtog pa dang dpyod pa dang bag yod pa dang bag med pa dang / yid 'byung ba dang / dga' ba dang / shin tu sbyangs pa dang shin tu sbyangs pa ma yin pa dang / rnam par 'tshe ba dang rnam par mi 'tshe ba dang / ngo tsha dang khrel yod pa dang btang snyoms dang rnam par grol ba dang dge ba'i rtsa ba rnams dang mi dge ba'i rtsa ba rnams dang lung du ma bstan pa'i rtsa ba rnams dang /kun du sbyor ba rnams dang 'ching ba rnams dang / phra rgyas rnams dang nye ba'i nyon mongs pa rnams dang kun nas dkris pa rnams dang / zag pa rnams dang chu bo rnams dang sbyor ba rnams dang nye bar len pa rnams dang mdud pa rnams dang sgrib pa rnams dang shes pa rnams dang bzod pa rnams te 'du byed rnams so//de la sems pa ni sems mngon par 'du byed pa yid kyi las te/ sems bya ba dang bcas pa'i rang bzhin thob pas de dang de la 'jug par byed pa'i las can gyi rang bzhin no/ /de yang rnam pa gsum ste dge ba dang mi dge ba dang lung du ma bstan pa'o//yang mig gi rnam par shes pa la sogs pa dang mtshungs par ldan pas drug go/ /reg pa ni pha dang ma dang bur gzhag pa bya ba dbang po dang yul dang rnam par shes pa rnams 'dus pa ste/ dbang po dang yul dang rnam par shes pa rnams 'dus pa yod pa na bde ba la sogs pa'i tshor ba bskyed pa dang rjes su mthun pa'i dbang po'i 'gyur ba yongs su gcod pa gang yin pa 'dra ba tsam gyis bde ba la sogs pa'i tshor ba skyed par byed pa de ni sems las byung ba reg pa zhes brjod do//dbang po'i rnam par 'gyur ba la de dang 'dra ba las reg go zhes byas nas so//de'i phyir dbang po'i bye brag gis mig gi 'dus te reg pa nas yid kyi 'dus te reg pa'i bar ro/ /chos mngon par yang gsungs pa/ gsum 'dus pa na dbang po'i 'gyur ba yongs su gcod pa ni reg pa ste tshor ba skyed pa'i brten byed pa'i las can no zhes so/ /'dus pa zhes bya ba ni 'bras bu dang rgyu'i dngos por gnas pa gsum po rnams gang phan tshun du reg pa'o//yid la byed pa ni sems yul la phyogs par byed pa ste/ yul la bstod pa dang bcas pa zhes pa'i don to/ /ting nge 'dzin ni rnam par g.yeng ba'i gnyen po'i chos te rgyun mi dmigs pa gcig pa'i rgyu yin la yid la byed pa ni yul las de'i skad cig sems 'phro bar mi byed pa'o//'dun pa ni rnam par shes pa'i byed par 'dod pa nyid do/ /sred pa las 'dun pa tha dad de/ ji ltar la cha ni shing tshan mo dag mi 'bral bar byed pa'i rgyu yin pa de bzhin du sred pa ni sems yul la mngon par chags pa las mi 'bral ba'i rgyu yin la 'dun pa ni bya ba'i bsam pa nyid tsam yin pas so//mos pa ni sems rang gi yul la gang rang gi ngo bor mos pas te phye ma leb me la bzhin du lhag par mos pa dang bcas pa'o/ /yid la byed pa ni yul yid la byed pa ste der ni yid kyi dbang du byas la 'dir ni yul gyi'o//dad pa ni bden pa dang dkon mchog dang las kyi 'bras bu rnams la yod pa nyid dang yon tan can nyid dang nus pa nyid du mngon par yid ches pa'o/ /de dbye na ni de yod pa nyid la mngon par yid ches pa'i rnam pa'i dad pa dang yon tan can nyid la rab tu dang ba'i rnam pa dang /nus pa nyid la bdag gi sa thob pa'ang 'grub par nus so zhes mngon par 'dod pa'i rnam pa'o/ /bden pa ni sdug bsngal la sogs pa bzhi po rnams so/ /rnam pa gnyis kyang ste kun rdzob dang don dam pa'i bden pa dag go/ /brtson 'grus ni dge ba la spro ba'o//dran pa ni gang byas pa dang byed bzhin pa dang bya ba'i las rnams la sems kyi brjed pa med pa dang sems mngon par brjod pa de'o/ /ting nge 'dzin ni sems rtse gcig pa nyid de/ rtse gcig tu dmigs pa'o/ /shes rab ni chos rnams rab tu rnam par 'byed pa ste the tshom bzlog pa'i las can no//gang dngos po la gang zag dang chos kyi bdag rang gi blos yan lag rnam par phye nas gang rang gi ngo bo tshol ba ste/ gang zag dang chos rnams la rang gi ngo bo brtags pa na rang bzhin med pa nyid kyis cung zad kyang mi dmigs so/ /rtog pa ni gang dang ldan pa las rnam par shes pa bum pa'i ring ba dang mdzes pa tsam bzhin du rags pa'i dmigs pa yongs su gcod pa de kun du rtog pa'i ming can no//dpyod pa ni bum pa rnying pa dang brtan pa zhes phra mo lta bar zhugs pa'i sems las byung ba'i chos so/ /bag med pa ni dge ba'i chos rnams mi sgom pa ste mi sgrub pa'o//bag yod ni de las bzlog pa'o/ /yid 'byung ba ni chos gang dang ldan pa las sems 'khor ba'i skyon mthong ba nyid las 'khor ba las yid 'byung ba ste de ni nyon mongs pa spong ba dang rjes su mthun pa'i yang dag pa'i shugs so/ /mchog tu dga' ba ni sems rab tu dga' ba dang chags pa ste yid bde ba las tha dad du gyur pa'o//shin tu sbyangs pa ni lus dang sems dag las su rung ba'o/ /shin tu sbyangs pa ma yin pa ni lus dang sems dag gi lci ba nyid dang rmugs pa dang gnyid kyi bdag nyid do/ /rnam par 'tshe ba ni chos gang dang ldan pa las khro ba'i rkyen gyis thal lcag la sogs pas gzhan la tho 'tshams pa de'o//de dang 'gal ba'i chos ni rnam par mi 'tshe ba'o/ /ngo tsha na gang gi dbang gis bdag nyid dang chos kyi dbang du byas pas sdig pa las bzlog pa ste/ de ni sdig pa la mi 'jug pa'i rgyu'i chos ngo tsha zhes bya ba'o//khrel yod ni gzhan la ltos nas skyon rnams kyis ngo tsha bar byed pa'o/ /btang snyoms ni chos gang gis dmigs pa la sems mnyam du 'jug pa ste de ni sems mnyam pa nyid do/ /des ni sems rjes su chags par mi byed khong khro bar mi byed do/ /de yang dgra bcom pa rnams kyi ye shes kyang ldan pa so sor brtags pa'i btang snyoms te/so so skye bo rnams kyi ni ye shes dang ldan pa ma yin pa so sor ma brtags pa'i btang snyoms so/ /rnam par grol ba ni sems dri ma med pa nyid de nyon mongs pa la sogs pa spangs pa yod na rnam par grol ba mya ngan las 'das pa zhes bya ba sems las byung ba'i chos skye bo de la dge legs kyi don ni dge ba'i don te rnam par grol ba yang nye bar 'tshe ba mtha' dag las log pa'i ngo bo nyid yin pa nyid kyi phyir phyin ci log med pa'i dge ba ste nad med pa nyid bzhin no//lam gyi bden pa ni de thob pa'i rgyu nyid kyi phyir dge ba'o//de las gzhan pa'i bden pa gnyis ni zag pa dang bcas pa ste rnam par smin pa 'dod pa nyid kyis rjes su mthun pa'i gzugs brnyan mngon par 'grub par byed pa'i phyir ro/ /dge ba'i rtsa ba rnams ni gsum ste 'dod chags med pa dang / zhe sdang med pa dang /gti mug med pa'o/ /de la 'dod chags med pa ni sred pa dang 'gal ba'i chos te dngos po rnams la mngon par zhen pa med pa'i mtshan nyid do/ /zhe sdang med pa ni khong khro dang 'gal ba'i chos te sems can rnams la mnar sems med pa nyid mtshan nyid can no/ /gti mug med pa ni ma rig pa dang 'gal ba'i chos te shes rab kyi rang bzhin no//'di rnams ni rang nyid dge ba dge ba gzhan rnams kyi rtsa bar gyur pa shing gi rtsa ba bzhin bskyed pa dang gnas pa dang 'phel ba'i rgyu'o/ /'di las bzlog pas na gsum ni mi dge ba'i rtsa ba rnams te 'dod chags dang / zhe sdang dang / gti mug go/ /de la 'dod par gtogs pa'i 'dod chags thams cad ni chags pa mi dge ba'i rtsa ba'o/ /zhe sdang thams cad kyang ngo / /'jig tshogs dang mthar 'dzin par lta ba dang de dang mtshungs par ldan pa'i gti mug ma gtogs pa 'dod pa na spyod pa'i ma rig pa thams cad ni gti mug mi dge ba'i rtsa ba'o//lung du ma bstan pa'i rtsa ba rnam gsum ste srid pa dang ma rig pa dang blo'o/ /de la 'dod pa na spyod pa'i 'jig tshogs dang mthar 'dzin par lta ba dang de dang mtshungs par ldan pa'i gti mug ma gtogs par nyon mongs pa dang nye ba'i nyon mongs pa thams cad mi dge ba ste mi 'dod pa'i rnam par smin pa can nyid kyi phyir ro//gzugs dang gzugs med pa na spyod pa'i nyon mongs pa dang nye ba'i nyon mongs pa thams cad dang 'dod pa'i khams su'ang 'jig tshogs la lta ba la sogs pa gsum ste 'di thams cad lung du ma bstan pa'o/ /de la gang dang gang zhig sred pa dang ma rig pa dang shes rab lung du ma bstan pa de thams cad ni lung du ma bstan pa'i rtsa ba ste/rang nyid lung du ma bstan pa nyid kyi phyir dang / lung du ma bstan pa gzhan gyi rtsa ba nyid yin pa'i phyir ro/ /lung du ma bstan pa gzhan ni rtsa ba ma yin te mi brtan pa nyid dang steng du 'jug pa nyid las rtsa ba dang chos mi mthun pa'i phyir ro//yang chos mngon par gsungs pa/ dge ba'i rtsa ba gsum rnams dang / ngo tsha dang khrel yod pa rang bzhin gyis dge ba ste phan pa'i sman bzhin no/ /de dag dang mtshungs par ldan pas ni chos gzhan dge ba rnams te sman dang bsres pa'i chu bzhin no//de rnams kyis kun nas bslang bas ni sems dang ngag gi las dag dang bye brag tu smra ba'i 'dod pas sems dang ldan pa ma yin pa thob pa la sogs pa dge ba rnams kyang ste sman dang 'dres pa'i chu las yang dag par byung ba'i 'o ma bzhin no/ /kun du sbyor ba rnams ni dgu ste 'dod chags dang /khong khro dang / nga rgyal dang / ma rig pa dang / the tshom dang ldan pa dang mchog tu 'dzin pa dang phrag dog dang ser sna'o/ /srid pa'i sdug bsngal la kun du sbyor ba'i phyir kun du sbyor ba'o/ /de la 'dod chags ni rjes su chags pa dang sred pa dang / lhag par zhen pa dang zhen pa'o//khong khro ni gnod sems dang zhe sdang ste sems can gyi yul la kun nas mnar sems pa'o/ /nga rgyal ni rnam pa bdun te de la yang dag pa'am yang dag pa ma yin pas gzhan las bdag khyad par 'phags par rtog cing sems pa gang zhig sems kyi rang bzhin gyi rnam par 'gyur ba ltung ba'i rgyu sems las byung ba'i chos nyon mongs pa can 'di ni nga rgyal gyi spyi'o//de ni 'jug pa'i bye brag gis tha dad pa ste de la thos pa dang tshul khrims dang rigs dang gzugs dang dbang phyug la sogs pa rnams kyis dman pa las bdag nyid dman pa dang 'dra ba dang lhag pa'am mtshungs pa dang mtshungs par nye bar dmigs nas yongs su rtog pa'i khyad par ni nga rgyal lo//khyad par du 'phags pa rnams dang bdag dman pa mnyam pa nyid du mngon par nga rgyal ba ni lhag pa'i nga rgyal lo/ /khyad par du 'phags pa las kyang bdag khyad par du 'phags par sems pa ni nga rgyal las kyang nga rgyal lo//nye bar len pa'i phung po lnga po stong pa rnams la nga'o zhes yongs su rtog pa ni nga'o snyam pa'i nga rgyal te bdag tu nga rgyal ba yang ngo / /zag pa dang bcas pa'i phung po rnams nye bar len pa ste bdag tu 'dogs pa'i rgyu nyid kyi phyir ram/yang na nyon mongs pa rnams ni de rnams las skyes pa nyid kyi phyir nye bar len pa rnams bzung bya'i phyir nye bar len pa rnams te/ de rnams las yang dag par byung bas nye bar len pa'i phung po rnams so/ /de rnams kyang stong pa brten nas gdags par bya ba rnams te bdag gi dngos po dang bral ba'i phyir dang rang bzhin dang bral ba'i phyir ro//de rnams la rmongs pa las nga'o zhes 'dzin pa ni nga'o snyam pa'i nga rgyal lo/ /bsam gtan dang ting nge 'dzin dang lam dang 'bras bu la sogs pa'i rtogs pa mchog tu khyad par du 'phags pa thob pa med par bdag gis thob po zhes mngon du phyogs pas sems pa ni mngon pa'i nga rgyal lo//log pa'i las gsod pa dang rku ba la sogs pa sdig pa'i bya ba la bsngags pa dang mtho bar gyur pa ni log pa'i nga rgyal lo/ /bdag nyid la bya ba thams cad sgrub pa'i nus pa med par yongs su rtog pa dang bdag nyid la dman par yongs su rtog pa ni cung zad kyi nga rgyal lo//ma rig pa ni chos gang dang ldan pa las bden pa'i don mi mthong ba dang dngos po rnams la yod pa ma yin pa'i rang bzhin gang zag gam chos su sgro 'dogs pa de ste/ rig pa'i mi mthun pa'i phyogs dkon mchog gsum dang bden pa mi shes pa tsam mo/ / rig pa ni chos kyi rang bzhin gyi yul zag pa med pa'i ye shes so/ /the tshom dang bden pa dang dkon mchog gsum la sogs pa rnams la yod med gnyis ka'i rnam par zhugs pa nyon mongs pa can gyi shes rab dogs pa'i bdag nyid do/ /lta ba ni rnam pa gsum ste/ de la Shad+l-i 'jig pa la'o zhes pa 'jig go//nyams par bya ba'o zhes pa 'jig pa'o/ /tsi nyi sogs pa la'o zhes pa bsags pa ni tshogs so/ /'jig pa yang yin tshogs kyang yin pa ste rnam par 'jig pa'i bdag nyid kyi tshogs pa ni 'jig tshogs so/ /de la nyon mongs pa can gyi shes rab kyis ngar byed pa dang / nga yir byed par zhugs pa ni 'jig tshogs la lta ba'o/ /de yang nye bar len pa'i phung po rang bzhin med pa la phyin ci log tu rtag pa'i ngo bo nyid du gzung ba rnams la gang zag tu lhag par sgro 'dogs pas rnam pa nyi shur rab tu 'jug go/ /'di lta ste gzugs dang gzugs dang ldan pa dang gzugs la bdag dang bdag la gzugs so zhes pa gzugs kyi phung po la mchog tu 'dzin pas 'jig tshogs la lta ba'i cha shas bzhi rnams so//de bzhin du tshor ba dang / 'du shes dang / 'du byed dang / rnam par shes pa'i phung po la mchog tu 'dzin las so sor bzhi rnams so/ /nye bar len pa'i phung po lnga po rnams la kye ma bdag dang 'jig rten 'di rtag pa'am/chad pa dang de bzhin du yod pa dang med pa zhes pa 'di lta bu la sogs pa mtha' gnyis gnyis su rtog pa'i 'jug pa shes rab nyon mongs pa can mtha' gnyis su 'dzin zhing mngon par zhen pa nyid kyi lta ba ni mthar 'dzin par lta ba'o//rgyu dang 'bras bu dang bden pa dang dkon mchog gsum dang rten cing 'brel par 'byung ba la sogs pa la skur pa 'debs pa med pa'i rnam par zhugs pa'i shes rab nyon mongs pa can ni log par lta ba'o/ /mchog tu 'dzin pa ni rnam pa gnyis te/ de la dngos po dman pa zag pa dang bcas pa la mchog tu 'dzin te 'di ni bden te gzhan gti mug go zhes pa 'di lta bur mngon par zhen pa ni lta ba la sogs pa mchog tu 'dzin pa lta ba mchog tu 'dzin pa ste sogs pa phyis pa las so//rgyu ma yin pa la rgyur lta ba dang lam ma yin pa la lam du lta ba ni tshul khrims dang brtul zhugs mchog tu 'dzin pa ste 'dir yang sogs kyi sgra phyis pa'o//'di ni zag pa dang bcas pa'i dngos po ma dag pa rnam par grol ba'i lam gyi bdag nyid ma yin pa thams cad nyid la dag pa dang grol ba'i lam nyid du 'dzin pa'i phyir ro/ /phrag dog ni gzhan gyi yon tan gyis gdung ba'o/ / ser sna ni chos la sogs pa sbyin pa la mkhas pa dang 'gal ba'i sems 'dzin pa'o/ /'ching ba rnams ni gsum ste/ 'dod chags dang zhe sdang gti mug go/ /'di rnams kyis bcings pa rnams khams gsum las mi 'da' ba'i phyir ro/ /phra rgyas rnams ni drug ste 'dod chags dang / khong khro dang nga rgyal dang ma rig pa dang the tshom dang lta ba'o/ /'dir 'dod chags rnam pa gnyis te 'dod pa'i 'dod chags dang / gzugs dang gzugs med pa'i 'dod chags so/ /lta ba 'jig tshogs la lta ba la sogs pa rnam pa lngar phye bas phra rgyas bcu rnams te rang gi ngo bo yis rnam pa tha dad pa dang /khams kyi rnam pa'i dbye ba bcu gnyis kyis lhag pa'i brgya dang dgu bcu rtsa brgyad du yang 'gyur te ji ltar 'chad par 'gyur ba de ji lta bu'o/ /gnas pa dang skye ba'i rjes su mthun pa'i dngos po rnams la/ ji ltar srid pa'i dmigs pa dang mtshungs par ldan pa dag la rgyas par 'gyur bas phra rgyas so//yang na 'jug pa mtshon par dka' ba nyid kyis sam phra bas bdag nyid kyi rgyud rjes su 'brel pa'i phyir bag la nyal lo/ /'di rnams kyi skye ba'i rim pa yang ji ltar gnas pa'i dngos po ji lta ba bzhin ma rtogs pa las yod pa ma yin pa'i rang bzhin sgro 'dogs pas na sngon la ma rig pa'o//de nas yang dag pa dang log pa'i phyogs gnyis thos nas 'di bden nam mi bden zhes the tshom mo/ /de nas log pa'i phyogs goms pa las dngos po la yang dag par goms pas phyin ci log tu lta ba log par lta ba'o/ /'dir log par lta ba ni ldog par nges pa ste/'di lta ste bdag nyid gzung bar bya'i rgyu dang 'bras bu la skur pa 'debs pa'i bdag nyid ni ma yin no/ /de nas 'jig tshogs la lta ba'o/ /de nas mthar 'dzin par lta ba'o/ /de nas tshul khrims dang brtul zhugs mchog tu 'dzin pa ste gang la mthar 'dzin pa des dag par brtsi ba'i phyir ro//de nas lta ba mchog tu 'dzin pa ste gang gis dag par rtogs pa de mchog tu 'dzin pa'i phyir ro/ /de nas rang gi lta ba la chags pa'o/ /lta ba des khengs pa ni gzhan la zhe sdang ngo zhes pa'i rim pa'o/ /rgyu rnam pa gsum rnams kyis re re yang skyed par byed de gal te phra rgyas spangs pa ma yin par gyur pa dang tshul bzhin ma yin pa yid la byed pa dang yul nye bar gnas par gyur na'o//de 'di rnams rgyu dang yul dang sbyor ba'i stobs rnams su 'gyur ro/ /phra rgyas drug po 'di rnams kyang lus dang ngag dang sems kyi rgyud nyon mongs par byed pa'i phyir nyon mongs pa rnams su yang brjod do//gang nyon mongs pa de rnams nye ba'i nyon mongs pa yang ngo / /gang gzhan sems las byung ba'i chos nyon mongs pa can sgyu la sogs pa de rnams ni nye ba'i nyon mongs pa kho na ste sems nyon mongs par byed pa'i phyir ro/ /de la sgyu ni gzhan slu ba ste/ gang gis rnam par rmongs par byed pa'am gang las gzhan rnams kyi bsam pa mi shes par 'gyur la/sgyu ma bzhin du rang gi ngo bo sbas nas sems ji bzhin ma yin pa'i bdag nyid du 'jug ste/ chos gang dang ldan pa las pha rol rnams slu bar byed pa de sgyu'o/ /rgyags shing dregs pa ni rgyags pa ste gang gi dbang las gzhan rnams la lus dang sems kyi rgyun mi gus pa dang bcas par 'gyur ba'o//rnam par 'tshe ba ni khro ba'i rkyen gyis thal lcag la sogs pa rdeg pa'i rgyu'i chos so/ /'tshig pa ni sdig pa dang 'grogs pa ste so rnams kyis zas 'dzin pa bzhin du sdig pas btsir nas gnas pa'o//'khon du 'dzin pa ni mi mdza' ba dang rjes su 'brel pa ste sems la khro bar bya ba'i dngos po lan mang du byed pa'o/ /g.yo ni chos gang dang ldan pa las ji ltar gnas pa'i rigs pa dang mi rigs pa 'khyog po mi gsal bar 'jug pa de ste sems kyi rgyun gya gyu'o/ /de la 'di rnams kyi rgyu dang rgyags pa dag 'dod chags kyi dri ma'i rgyu mthun pa'o//'khon du 'dzin pa dang rnam par 'tshe ba ni khong khro'i'o/ /'tshig pa ni lta ba mchog tu 'dzin pa'o/ /g.yo ni log par lta ba'i'o/ /kun nas dkris pa rnam pa bcu ste rmugs pa dang gnyid dang rgod pa dang 'gyod pa dang phrag dog dang ser sna dang ngo tsha med pa dang khrel med pa khro ba dang 'chab pa'o//rmugs pa ni 'di 'dar ba nyid dang lus dang ngag dag lci ba nyid du gyur pas sems dmigs pa rtogs pa la las su mi rung ba'o/ /gnyid ni gnyid de rnam par shes pa lnga 'jug pa dang 'gal ba'i chos yid kyi rnam par shes pa'ang blun par 'gyur ba'i rgyu'o//gnyid mthug po'i gnas skabs na ni rig pa med la gnyid dang bral ba na sngar gyi shes pas 'dus byas pa las blo de lta bu'i rnam pa rnams 'byung ste de'i phyir lus ni sgyu ma yin no zhes kyang zer ro/ /ngo tsha med pa ni chos gang dang ldan pa las bdag nyid la ltos nas 'dzem pa dang bral zhing sdig pa la 'jug pa ste de rang bzhin gyis ngan pa'i chos so//khrel med pa ni de nyid gzhan la ltos pas so/ /khro ba ni sems can dang sems can ma yin pa'i yul la sems rab tu khro ba tsam ste da ltar 'byung 'gyur gyis sems de nyid drag po nyid du byed pa ste gtum pa'o//'chab pa ni sdig pa sbed pa'o/ /kun nas sbrel te kun nas bcings nas gnas pas kun nas dkris pa rnams te dge ba'i phyogs la 'jug pa dang shin tu 'gal ba nyid kyi phyir ro/ /'di rnams la yang rmugs pa dang gnyid dang khrel med pa rnams ni ma rig pa'i rgyu mthun pa'o//'gyod pa ni the tshom gyi rgyu mthun pa'o/ /ngo tsha med pa dang rgod pa dang ser sna rnams dang 'dod chags kyi rgyu mthun pa'o/ /khro ba dang phrag dog dang khong khros kun bslang ba'o/ /'chab pa ni sred pa'am ma rig pa'i rgyu mthun te/ 'di rnams dri ma bcu rnams dang nye ba'i nyon mongs pa rnams so//zag pa rnam gsum ste 'dod pa dang srid pa dang ma rig pa'i zag pa'o/ /de la ma rig pa ma gtogs pa gzhan 'dod pa na spyod pa'i nyon mongs pa kun nas dkris pa bcu dang bcas pa rnams ni 'dod pa'i zag pa'o/ /ma rig pa bor ba'i phra rgyas nyid gzugs dang gzugs med pa na spyod pa lung du ma bstan pa kha nang du bltas nas 'jug pa mnyam par gzhag pa'i sa rnams ni srid pa'i zag pa'o//khams gsum pa'i ma rig pa ni ma rig pa'i zag pa'o/ /'di ni nyon mongs pa thams cad kyi rtsa bar gyur pa ste de'i phyir logs su rnam par gzhag go /srid pa'i rtse mo nas mnar med pa'i bar du skye mched drug gi rma nas 'dzag pa'i phyir ram 'di rnams kyis zag par byed pa'am rgyud yul la gnas par byed pa'i phyir zag pa'o//chu bo rnams ni bzhi ste de la lta ba rnams las gzhan pa 'dod pa dang srid pa dang ma rig pa'i zag pa rnams kho na 'dod pa dang srid pa dang ma rig pa'i chu bo gsum mo//khams gsum pa'i lta ba rnams lta ba'i chu bo ste bzhi pa'o/ /khyer bas na chu bo ste de rnams kyis de dang ldan pa khyer bas te de'i rjes su sgrub pa'i phyir ro/ /sbyor ba rnams ni chu bo bzhi po kho na ste sdug bsngal sna tshogs la kun du sbyor bas ldan par byed pa'am yang yang du rjes su 'brel pa yul rnams la sbyor bar byed pas sbyor ba'o//nye bar len pa rnams bzhi ste 'dod pa'i sbyor ba nyid ma rig pa dang bcas pa 'dod pa'i nye bar len pa dang lta ba'i sbyor ba nyid tshul khrims dang brtul zhugs ma gtogs pa'i lta ba nye bar len pa dang tshul khrims dang brtul zhugs kyi nye bar len pa dang srid pa'i sbyor ba nyid ma rig pa bsnan pa rmugs pa dang rgod pa dang bcas pa ni bdag tu smra ba'i nye bar len pa'o//tshul khrims dang brtul zhugs kyi nye bar len pa lta ba rnams las ci'i phyir phyung zhe na/ lam gyi dgra zlar gyur pa nyid kyi phyir dang phyogs gnyi ga slu bar byed pa nyid kyi phyir te gang gi phyir khyim pa rnams 'dis bslus te mi bza' ba la sogs pa rnams la lam du 'du shes pas so//rab tu byung ba rnams kyang ste 'dod pa'i yul yongs su spangs pas dag par rtogs pas 'gro ba'i phyir ro/ /'dod pa la sogs pa nye bar len pas na nye bar len pa rnams so/ /mdud pa rnams ni bzhi yin zhing 'dod pa'i khams kho na ste/ma rig pa dang gnod sems dang tshul khrims dang brtul zhugs mchog tu 'dzin pa dang 'di bden par mngon par zhen pa'o/ /ma rig pa nyid lus kyi mdud pa ste rnam pa sna tshogs pa'i 'dod pa thob pa rnams la mi 'chad par 'jug pa'i phyir ro/ / de bzhin du lhag ma la sbyar bar bya'o/ /sgrib pa rnams ni lnga ste 'dod pa la 'dun pa dang gnod sems dang rmugs pa dang gnyid dang rgod 'gyod dang the tshom mo/ /'dod pa'i khams kho na sgrib pa rnams te shin tu mi dge ba nyid kyi phyir ro/ /dge ba'i phyogs la sgrib par byed pa nyid kyi phyir sgrib pa rnams so//gnyid dang rmugs pa dag sgrib pa gcig tu brjod pa dang rgod pa dang 'gyod pa gnyis dag kyang gcig pa rgyu ci yin zhe na/ zas dang zas ma yin pa dang bya ba gcig pa'i phyir/ gnyid dang rmugs pa dag zas gcig pa ni chos lnga ste/ rmyo ba dang mi dga' ba dang g.yal ba dang kha zas kyi drod ma shes pa dang sems zhum pa nyid do//zas ma yin pa ni snang ba'i 'du shes so/ /bya ba yang gcig ste gnyis kas kyang sems zhum par byed pa'i phyir ro/ /rgod pa dang 'gyod pa dag gi zas bzhi ste nye du'i rnam par rtog pa ljongs kyi rnam par rtog pa dang mi 'chi ba'i rnam par rtog pa dang sngon dgod pa dang rtses pa dang yongs su spyad pa rnams rjes su dran par gyur pa'o zhes pa'o//zas ma yin pa zhi gnas so/ /bya ba yang gcig ste gnyi ga yang sems nye bar ma zhi ba 'jug par byed pa'i phyir ro/ /gang gi tshe nyon mongs pa thams cad sgrib pa yin na ci'i phyir lnga kho na bshad ce na phung po la gnod pa dang the tshom za bar byed pa'i phyir te/gang gi phyir 'dod pa la 'dun pa dang gnod sems dag gi tshul khrims kyi phung po gnod par byed do/ /gnyid dang rmugs pas shes rab kyi phung po la'o/ /rgod pa dang 'gyod pas ting nge 'dzin gyi phung po la'o//ting nge 'dzin dang shes rab dag med na bden pa rnams la the tshom za bar 'gyur ro zhes pa de'i phyir lnga'o/ /shes pa rnams ni bcu gnyis te sdug bsngal dang kun 'byung dang 'gog pa dang lam dang zad pa dang mi skye ba dang chos dang rjes su dang gzhan gyi sems dang kun rdzob dang yongs su 'dris pa dang sgra ji bzhin shes pa'o//bzod pa rnams ni brgyad de sdug bsngal la chos byas pa'i bzod pa la sogs pa'o zhes pa sems dang mtshungs par ldan pa'i 'du byed rnams brjod zin to/ /sems dang ldan pa ma yin pa'i 'du byed rnams kyang 'ga' zhig khas len par byed pa 'di lta ste/thob pa dang ma thob pa dang 'du shes med pa'i snyoms par 'jug pa dang / 'gog pa'i snyoms par 'jug pa dang 'du shes med pa dang srog gi dbang po dang / /rigs mthun pa nyid dang yul la dmigs pa dang phung po so sor thob pa dang skye mched la dmigs pa dang skye ba dang rga ba dang gnas pa dang mi rtag pa nyid dang ming gi tshogs dang tshig gi tshogs dang yi ge'i tshogs dang tshogs pa dang ma tshogs pa'o//de la thob pa ni rnyed pa dang yang dag par ldan pa'o/ /de yang rnam pa gnyis ni ma thob pa dang nyams pa rnyed pa dang thob pa yang dag par ldan pa'o/ / bzlog pa las ma thob pa'o/ /thob pa dang ma thob pa 'di dag kyang rang gi rgyud du gtogs pa rnams kyi lung du ma bstan pa dang dge ba'i las dad pa dang thos pa dang bsam pa las byung ba la sogs pa rnams kyi ste/ so sor brtags pa'i 'gog pa dang so sor brtags pa ma yin pa'i 'gog pa dag gi yang ngo //'du shes med pa'i snyoms par 'jug pa ni dge rgyas kyi 'dod chags dang bral la gong ma'i 'dod chags dang ma bral ba'i nges par 'byung ba'i 'du shes sngon du btang ba'i yid la byed pas sems dang sems las byung ba'i chos rnams 'gog pa gang yin pa'o/ /'gog pa'i snyoms par 'jug pa ni ci yang med pa'i skye mched la 'dod chags dang bral ba'i zhi bar gnas pa'i 'du shes sngon du btang ba'i yid la byed pas gang sems dang sems las byung ba'i chos rnams 'gog pa'o//'du shes med pa pa ni 'du shes med pa'i snyoms par 'jug pa'i 'bras bu ste/'du shes med pa'i sems can gyi lhar skyes pa'i gang sems dang sems las byung ba'i chos rnams 'gog pa'o/ /srog gi dbang po ni khams gsum pa'i tshe'o/ /rigs mthun pa nyid ni sems can mtshungs pa dang sems can 'dra ba nyid de sems can rnams don gcig par mngon par 'dod pa'i rgyu'o//skye ba ni phung po mngon par grub pa'o/ /rga ba ni phung po yongs su smin pa'o/ /gnas pa ni skyes pa'i chos rnams ma zhig pa'o/ /mi rtag pa nyid ni skyes pa'i chos rnams 'jig pa'o/ /ming gi tshogs ni ming gi tshig bla dwags 'di'o/ /tshig gi tshogs ni yi ge yongs su rdzogs pa 'di'o//yi ge'i tshogs ni yi ge rnams so/ /ma tshogs pa ni rgyu dang rkyen rnams ma tshang ba'o/ /tshogs pa ni rgyu dang rkyen rnams ma tshang ba med pa'o/ /theg pa chen po'i chos mngon pa kun las btus par gsungs pa ni so so'i skye bo gang zhe na/ 'phags pa'i chos rnams ma thob pa'o zhes pa de ma thob pa'i nang du 'dus so//de bzhin du mgyogs pa gang zhe na/ rgyu dang 'bras bu myur du 'byung ba'o/ /go rims gang zhe na/ rgyu dang 'bras bu cig car ma yin par 'byung ba'o/ /dus gang zhe na/ rgyu dang 'bras bu rgyun du 'byung ba ste/'di yod na de la gang rgyu dang 'bras bu byung zin la 'gags zin pa de 'das pa'i dus zhes gdags so/ /gang ma byung ba de ma 'ongs par ro/ /gang byung la ma 'gags pa de da ltar ba zhes par ro/ /yul gang zhe na/ phyogs bcu rnams na rgyu dang 'bras bu yod pa ste/ rgyu dang 'bras bu phyogs bcu khyab pa la yul du btags pa'o//grangs gang zhe na/ 'du byed rnams kyi so so tha dad pa ste bdag nyid gcig pa tha dad pa med pa nyid la gnyis dang gsum la sogs pa'i grangs mi 'byung ba'i phyir ro zhes pa'o/ /thob pa la sogs pas 'di rnams kyang khyad par gzhan spong ba las ldog pa tha dad bzhin du rnam par gzhag gi de kho na nyid du ni ma yin no zhes theg pa chen po dang tshad ma rnam 'grel la sogs par legs par dpyad do//de'i phyir ldan pa ma yin pa'i 'du byed rnams rdzas su med pa kho na'o/ /mtshungs par ldan pa'i 'du byed rnams ni mdor na rnam pa gnyis te spang bar bya ba dang blang bar bya ba'o//de la spang bar bya ba ni nyon mongs pa bcu rnams so/ /de rnams kyi nang du shin tu sbyangs pa ma yin pa dang mi dge ba dang mi dge ba'i rtsa ba dang lung du ma bstan pa dang lung du ma bstan pa'i rtsa ba dang kun du sbyor ba dang 'ching ba dang nye ba'i nyon mongs pa dang kun nas dkris pa dang zag pa dang chu bo dang sbyor ba dang nye bar len pa dang mdud pa dang sgrib pa rnams te ji lta ba de ltar brjod zin to//nyon mongs pa'i rgyu can kun nas nyon mongs pa rnams dang mi dge ba dang lung du ma bstan pa'i sems pa la sogs pa rnams kyang ji ltar srid par spang bar bya ba'o/ /sdug bsngal gyi bden pa dang kun 'byung gi bden pa dang /zag pa dang bcas pa'i kun rdzob kyi shes pa'ang spang bar bya'o/ /de nyid kyi phyir 'di thams cad nyon mongs pa spangs na spong bar byed do zhes pas nyon mongs pa spong bar byed pa kho na so sor rtog par byed par 'gyur ro/ /sems las byung ba lhag ma rnams ni blang bar bya'o zhes pa 'du byed kyi phung po brjod zin to//rnam par shes pa gang zhe na/ gang don 'dzin pa dang yongs su gcod pa rnam par rig cing rtogs pa'o/ /dper na nor bu rnams ni nye bar gyur par gzhag pa'i tshon gyi rjes su byed par 'gyur te de bzhin du rnam par shes pa yul gyi rnam pa can du nye bar skye bzhin pa ni yul yongs su gcod par byed do//yul gyi rnam pa tsam yang rnam par shes pa ma yin te/ yul kho na'i rnam par shes pa nyid du thal ba'i phyir ro/ /don gyi rnam pa las rnam par shes pa phyi rol yang ma yin te de la don gyi rnam pa med par thal ba'i phyir ro/ /rnam par shes pa la gnas pa'i rnam pas phyi rol gyi don du btags la phyi rol gyi don gyis kyang rnam par shes pa btags so zhes pa 'di ltar phan tshun ltos nas rnam par shes pa dang rnam par shes par bya ba grub po//rnam par shes pa de rnam pa drug ste/ mig dang / rna ba dang / sna dang / lce dang / lus dang / yid kyi rnam par shes pa'o//gal te yang dbang po dang yul dang yid la byed pa tshogs pa dang snang ba la'ang ji ltar srid pa bzhin brten nas rnam par shes pa skye ba de lta na'ang mig gi rnam par shes pa zhes pa la sogs pas thun mong ma yin pa'i rgyu kho nas tha snyad gdags te rnga'i sgra dang nas kyi myu gu zhes pa ji lta ba bzhin no//mar gzhag par bya ba'i dbang po phan pa dang gnod pa dag gis rnam par 'gyur bar gyur na gsal ba dang / zhen pa nyid du rjes su byed pa'i phyir ro zhes brjod do/ dus dang rgyud dang rnam pa dang 'gro ba dang yul tha dad pa rnams kyi gzugs la sogs pa bsdus shing sdom pa nye bar bzung nas phung po lnga ste/gzugs rung mtshan nyid can ni gzugs/ /tshor ba nyams myong bdag nyid do/ /'du shes mtshan mar 'dzin pa ste/ /'du byed mngon par 'du byed pa'o/ /yul na so sor rnam rig pa/ /rnam par shes pa'i mtshan nyid do/ /zhes pa rang gi mtshan nyid rnams gsungs so//skye mched rnams ni bcu gnyis te/ mig dang / rna ba dang / sna dang / lce dang / lus dang / gzugs dang / sgra dang / dri dang / ro dang / reg bya'i skye mched ste bcu rnams brjod zin la yid dang chos kyi skye mched dag bshad par bya'o/ /de la yid kyi skye mched ni dngos po bdun po ste yul drug gi rnam par shes pa rnams dang yid kyi dbang po'o//de yang rnam par shes pa drug po rnams kyi nang na gang rnam par shes pa 'gags ma thag pa de ni/ de dang 'dra ba'i 'bras bu mngon par grub par byed pas de las phyi ma'i rnam par shes pa'i sa bon gyi dngos po'i gnas skabs kyis drug pa'i rten rab tu sgrub pa'i don du rnam par gzhag pa ste mig la sogs pa'i dbang po ltar tha dad du gyur pa ni yod pa ma yin no//tshor ba dang 'du shes dang 'du byed dang phung po rnams ni chos kyi skye mched do/ /rnam par rig byed ma yin pa dang nam mkha' dang so sor brtags pa'i 'gog pa dang so sor brtags min gyi 'gog pa rnams kyang ste chos bdun rnams chos kyi skye mched do bye brag tu smra ba'o//de la rnam par rig byed ma yin pa ni dpyad zin to/ /chos gang chos gzhan rnams mi sgrib pa'am gzhan rnams kyi bsgrib bya ma yin pa de ni mi sgrib la go skabs 'byed pa'o//'di'i bar du dngos po rnams shin tu gsal ba'i phyir/ bar gsal te nam mkha' yin la gzugs su gyur pas mi gsal la spror med pa'o/ /so sor brtags pa 'phags pa'i shes rab kyis thob par bya ba ni so sor brtags pas 'gog pa ste/ 'di ltar phung po lhag ma dang bcas pa'i mya ngan las 'das pa'i dbyings te gang du nyon mongs pa'i 'ching ba las rnam par grol ba'i phung po tsam mo//gzhan so sor brtags min gyi 'gog pa ni gang rgyu dang rkyen ma tshang ba ste/ 'di ltar phung po lhag ma med pa'i mya ngan las 'das pa'i dbyings phung po'i 'ching ba shin tu chad pa'i mtshan nyid can no//'di gsum yang rdzas su yod pa 'dus ma byas pa'o zhes zer ro/ /gzugs can gyi rdzas med pa tsam ni nam mkha'o/ /nyon mongs pa med pa tsam so sor brtags pas 'gog pa'o/ /phung po med pa tsam so sor brtags min gyi 'gog pa ste/ mar me shi ba ltar yin gyi rdzas su med do zhes mdo sde pa rnams chos ma yin par rtog pa rnams so//'dir ni 'dus ma byas chos ma yin la chos ma yin pa yang ma yin te 'dus byas bzhin kho na'o/ /de bzhin nyid kyang 'dir 'dus ma byas su brjod de chos thams cad gdod ma nas ma skyes pa nyid kyi phyir ro/ /de bzhin nyid de ni chos kyi dbyings dang so sor rig bya dang rnam par dag pa ste so sor brtags pa'i 'gog pa dang so sor brtags min gyi 'gog pa zhes par yang brjod do//rnam par shes pa skye ba'i sgo'i don gyi skye mched bcu gnyis rnams so/ /yid kyi skye mched la rnam pa bdun du phye nas khams rnam pa bco brgyad du brjod do/ / mig gi khams dang gzugs kyi khams dang mig gi rnam par shes pa'i khams nas yid kyi khams dang chos kyi khams dang yid kyi rnam par shes pa'i khams ji srid pa'o zhes pa rten drug dang dmigs pa drug pa dang rnam par shes pa drug gi bye brag gis bco brgyad bshad pa rnams rang gi mtshan nyid 'dzin pa'i don gyis na khams rnams so//khams bco brgyad po 'di rnams las 'dod pa dang yang dag par ldan pa rnams du zhe na thams cad do/ /gzugs dang yang dag par ldan pa du zhe na/ bcu bzhi ste dri dang ro dang sna'i rnam par shes pa dang / lce'i rnam par shes pa rnams ma gtogs pa'o/ / gzugs med pa dang yang dag par ldan pa rnams du zhe na/ phyi ma gsum po gang zag dang bcas pa'o/ /yang dag par mi ldan pa rnams du zhe na/ de rnams nyid gang zag pa med pa rnams so/ /dge ba rnams du/ mi dge ba rnams du/ lung du ma bstan pa rnams du zhe na/ bcu ni rnam pa gsum car te/ sems kyi khams bdun dang gzugs dang / sgra dang / chos kyi khams rnams so/ /lhag ma brgyad rnams lung du ma bstan pa'o/ /de rnams kyang rnam pa gnyis te/ bsgribs la lung du ma bstan pa rnams ni rnam par rig byed ma yin pa'i gzugs la sogs pa'o/ /ma bsgribs la lung du ma bstan pa ni sprul pa'i sems la sogs pa rnams so//bsgribs pa ni nyon mongs pa dang yang dag par ldan pa'o/ /nang gi bdag nyid du zhe na/ bcu gnyis te/ gzugs dang / sgra dang / dri dang / ro dang / reg bya dang / chos kyi khams kha cig ma gtogs pa'o/ /phyi'i du zhe na/ drug ste gang ma gtogs pa rnams so//dmigs pa dang bcas pa du zhe na/ sems kyi khams bdun rnams dang chos kyi khams kyang ngo / /lhag ma bcu rnams dmigs pa med pa'o/ /de ltar khams bco brgyad po 'di rnams kho na/ la lar bsdus nas skye mched bcu gnyis su rnam par gzhag la la lar shin tu bsdus nas phung po lngar ro//de rnams nyid bden pa bzhi ste/ sdug bsngal dang kun 'byung dang 'gog pa dang lam rnams so/ /rang bzhin gsum yang ste kun brtags dang gzhan dbang yongs grub po/ /gnyis kyang ste kun rdzob dang don dam pa'i bden pa'o/ /gcig kho na yang ste don dam pa'i bden pa gnyis su med pa'o//de yang spros pa las 'das pa'o/ /de nyid theg pa chen po shes rab kyi pha rol tu phyin pa don dam pa'i byang chub kyi sems so/ /de la spang bya'i phyogs ni kun nas nyon mongs pa ste de'i 'bras bu sdug bsngal gyi bden pa dang de thob pa'i thabs kun 'byung gi bden pa'o/ /blang bya'i phyogs ni rnam par byang ba ste de'i 'bras bu 'gog pa'i bden pa dang de thob pa'i thabs lam gyi bden pa'o//de la kun rdzob kyi bden pa'i nang du 'dus pa ni sdug bsngal dang kun 'byung dang lam gyi bden pa rnams so/ /don dam pa'i bden pa'i rang gi ngo bo ni 'gog pa'i bden pa'o/ /de'i phyir bden pa gnyis kho na ste/yab dang sras mjal ba'i mdor ji skad du gsungs pa/ 'jig rten mkhas pas bden pa 'di gnyis dag /gzhan las ma thos rang nyid kyis gzigs te/ /gang yang kun rdzob de bzhin don dam mo/ /bden pa gsum pa ci yang yod ma yin/ /zhes gsungs so/ /de bzhin du 'phags pa tshangs pas zhus par/sdug bsngal med do/ /sdug bsngal kun 'byung ba med do/ /'gog pa med do/ /lam 'phags pa rnams kyi bden pa med do/ /'on kyang tshangs pa gang sdug bsngal skye ba med pa 'di ni 'phags pa'i bden pa'o/ /gang kun 'byung ba kun du rgyu ba med pa 'di ni 'phags pa rnams kyi bden pa'o//gang shin tu 'gags pa rnams la skye ba med cing 'gag pa med pa 'di ni 'phags pa rnams kyi bden pa'o/ /gang mnyam pa nyid kyi chos rnams thams cad la brtse bas lam bsgom pa 'di ni 'phags pa rnams kyi bden pa'o zhes so/ /de'i phyir don dam par sdug bsngal la sogs pa'i bden pa yod pa ma yin te/'khor ba las yid 'byung ba'i don dang nyan thos rnams kyi dbang du mdzad nas gang zag gi bdag med pa'i de kho na nyid tsam la 'jug pa'i ched du mi rtag pa la sogs pa'i ngo bos de bstan pa 'ba' zhig ste/ bdag med pa gnyis ka bstan pa'i dbang du byas pa las ni ma yin no zhes rtogs par bya'o//gang rnams kun rdzob pa'i rang bzhin la yang skur pa 'debs par byed pa dang / gang dam pa yin pa'i bstan bcos nyan pa la sogs pa la mngon par zhen pas blo gros phyin ci log can rnams/ kun rdzob yod pa ma yin pa brdzun pa kho na la rtag pa la sogs pa'i dngos por sgro 'dogs shing gzugs la sogs pa ji ltar snang ba yang ji lta ba de ltar yongs su 'dzin par byed pa de rnams sgro 'dogs pa dang skur pa 'debs pa'i mthar lhung ba'i blos mtha' gnyis dang bral ba'o zhes ji lta ba bzhin du don dam pa'i tshul gyi rgya mtsho shin tu zab mo la mi 'jug pas de'i don du bcom ldan 'das kyis dgongs pa nges par 'grel pa'i mdor skye ba med pa la sogs pa bstan pa don dam pa'i dbang du byas pa nyid kho nar gsal bar mdzad cing ngo bo nyid med par rnam pa gsum gyi dgongs pa bstan pas dbu ma'i lam mtha' gnyis dang bral ba nges pa'i don kho nar gzhung 'dzugs par mdzad do//de la gang ma brtags na yid ches pa mthong ba ji lta ba sgyu ma bzhin du rten cing 'brel par 'byung ba'i dngos po de gzhan gyi dbang gi ngo bo nyid do/ /de yang kun rdzob tu sgyu ma ltar pha rol rkyen gyi stobs kyis skye'i rang bzhin kho na ni ma yin pas skye ba ngo bo nyid med pa nyid du rnam par gzhag ste/ gang yang rten cing 'brel par 'byung ba de rang bzhin stong pa kho na'o//gzhan gyi dbang gi ngo bo nyid de kho na la gang rtag pa dang mi rtag pa la sogs pa'i rang bzhin don dam pa par sgro 'dogs pa de kun brtags pa'i ngo bo nyid do/ /de'i 'di ji ltar kun brtags pa'i mtshan nyid ma grub pa'i phyir/ mtshan nyid ngo bo nyid med pa nyid du rnam par gzhag go//ngo bo nyid med pa 'di yang dngos por na gzhan gyi dbang gi ngo bo nyid kho na la rnam par gzhag ste de kho na la de'i mtshan nyid du brtags pa'i phyir ro/ /gang yang chos thams cad don dam par rtag tu rang bzhin gyis ngo bo nyid med par gnas pa de yongs su grub pa'i ngo bo nyid de/ de ni rtag tu sgro btags pa med pa nyid du grub pa'i phyir ro//gang dgongs pa nges par 'grel pa'i mdor gsungs pa gang gzhan dbang gi mtshan nyid dang yongs su grub pa'i mtshan nyid la rnam pa thams cad du kun nas nyon mongs pa pa dang rnam par byang ba pa gtan nas bral ba nyid de de la mi dmigs pa 'di ni stong pa nyid kyi mtshan nyid mtha' dag ces brjod do zhes bya'o//de la yang 'dod chags la sogs pa gzhan gyi dbang gi mtshan nyid kun rdzob pa rnams la kun nas nyon mongs par byed pa nyid dang 'khor bar kun du sbyor ba nyid dang gnyen po'i phyogs kyi gegs byed pa nyid la sogs pa dngos po bar sgro btags pa gang yin pa de ni de rnams la kun brtags pa'i mtshan nyid do//rnal 'byor pa'i kun rdzob tu phyin ci ma log par yongs su grub pas yongs su grub pa'i phyir yongs su grub pa'i mtshan nyid byang chub kyi phyogs la sogs pa rnam par byang ba rnams la gang mi mthun pa'i phyogs nges par 'joms par byed pa nyid dang mya ngan las 'das pa la yang dag par sbyor ba nyid la sogs pa'i ngo bor dngos po'i chos nyid du sgro btags pa de ni de rnams la kun brtags pa'i mtshan nyid do//kun brtags pa'i mtshan nyid kyi ngo bo'i chos 'di de gnyis ka'ang rang bzhin gyis 'od gsal ba'i chos kyi dbyings la mi srid de/ don dam par kun nas nyon mongs pa la sogs pa med pa'i phyir ro//kun nas nyon mongs pa dang rnam par byang ba'i chos 'di rnams thams cad kyang don dam par skye ba med par ro gcig pa nyid kyis na rnam par dbye ba mi rigs pa nyid kyi phyir ro/ /de'i phyir gnyis kyi gnyis ka yang stong la yang dag pa'i kun rdzob tu gnyis ka'ang gnas pa'i phyir kun nas nyon mongs pa dang rnam par byang ba'i phyogs med pa'i nyes pa yang med de/de skad du'ang 'phags pa shes rab kyi pha rol tu phyin pa stong phrag phyed dang gsum par gsungs par/ rab kyi rtsal gyis rnam par gnon pa gzugs ni 'dod chags kyi chos can nam 'dod chags dang bral ba'i chos can ma yin no//de bzhin du tshor ba dang / 'du shes dang / 'du byed rnams dang / rnam par shes pa'o/ /gang 'di rnams kyi 'dod chags ma yin pa'i chos nyid dang 'dod chags dang bral ba ma yin pa'i chos nyid 'di yang shes rab kyi pha rol tu phyin pa'o/ /de bzhin du gzugs ni zhe sdang gi chos can nam zhe sdang med pa'i chos can nam gti mug gi chos can nam gti mug med pa'i chos can ma yin no//de bzhin du gang rnam par shes pa ji srid pa'i gti mug ma yin pa'i chos nyid dang gti mug dang bral ba yang ma yin pa nyid kyi chos nyid 'di ni shes rab kyi pha rol tu phyin pa'o//gzugs ni kun nas nyon mongs pa'am rnam par byang bar 'gyur ba med do/ /de bzhin du rnam par shes pa'i bar du'o/ /gang 'di rnams kyi kun nas nyon mongs pa ma yin rnam par byang ba ma yin pa 'di ni shes rab kyi pha rol tu phyin pa'o zhes so/ /'o na kun rdzob tu skye'o zhes gsungs pa ma yin nam//de la kun rdzob ces pa 'di ci zhe na/ rang bzhin med pa'i dngos po rnams la yang gang dngos por phyin ci log gi rnam par sgro 'dogs pa 'khrul pa'i blo de ni kun rdzob tu brjod de/ 'di la bsgrib par bya ba'am 'dis de kho na nyid 'gebs pa ltar byed pa'i phyir ro/ /de bzhin du yang mdor gsungs pa/kun rdzob tu ni dngos rnams skye/ /don dam par ni rang bzhin med/ /rang bzhin med pa gang 'khrul pa/ /de ni yang dag kun rdzob 'dod/ /ces so/ /de las byung ba'i phyir des nye bar bstan pa'i dngos po brdzun pa thams cad ni kun rdzob par brjod do/ /de yang thog ma med pa'i 'khrul pa'i bag chags yongs su smin pa'i dbang gis dngos po med pa las dngos po yang dag par yod pa lta bur nye bar ston cing srog chags thams cad la skye ste gang las de'i bsam pa'i dbang gis dngos po brdzun pa'i ngo bo thams cad kun rdzob tu yod par brjod do//'di rnams yang dag par dngos po'i ngo bo nyid kyang ma yin te ji ltar snang ba de kho na nyid ma yin pa'i phyir ro//ri bong gi rwa bzhin du gtan med pa'i ngo bo nyid kyang ma yin te ma brtags na dga' ba'i rnam par so sor snang ba'i phyir ro/ /de ltar ni sgyu ma'i skyes bu la sogs pa la 'khrul pa'i shes pa dang ldan pa'i mi rnams kyis gang gzhag pa'i ngo bo de bzhin du dngos po thams cad la brdzun pa'i rnam pa can gyi shes pas gang sgro btags pa de ni kun rdzob kyi bden pa zhes tha snyad du byas so//sgyu ma'i skyes bu la sogs pa de kho na la yang rnam par shes pa ma bslad pa rnams kyis ji ltar gzhag pa'i ngo bo de bzhin du dngos po thams cad la gang yang dag pa'i tshad mas nges pa'i ngo bo de ni don dam pa'i bden pa'o//ji ltar yang 'khrul pa dang ma 'khrul pa'i shes pas rnam par gzhag pa'i ngo bo kun rdzob dang don dam pa'i bden pa gnyis la brten nas rab rib can la sogs pas nye bar dmigs pa skra shad la sogs pa rnams dang / rnam par rig par smra ba rnams kyi gzung ba dang 'dzin pa'i rnam pa gnyis la kun rdzob tu yod pa nyid dang don dam par med pa nyid do zhes pa la sogs par rnam par gzhag pa la ltos pa'i bye brag gis 'gal ba med pa de bzhin du dngos po thams cad la'o//des na ji skad bshad pa'i kun rdzob 'khrul pa'i ngo bo dngos por na skye ba med kyang gang las dngos rnams skye ba ltar nye bar ston te/des na de la brten pa'i dbang gis kun rdzob tu dngos po skye'o zhes brjod la/ don dam par ni skye ba med do/ /phyin ci ma log pa'i don gyi yul can nyid kyi phyir yang dag pa'i thos pa dang bsams pa dang bsgoms pa las byung ba'i shes pa thams cad kho na ni don dam par brjod de dam pa 'di'i don yin zhes byas nas so//dngos dang brgyud pas byas pa ni khyad par te/ de'i dbang las dngos po 'di rnams thams cad skye ba med pa kho nar rtogs so/ /yang dag pa'i shes pas 'di rnams skye ba grub pa ma yin no zhes brjod par 'gyur ro/ /yang na rnam par ma dpyad pa ni kun rdzob ste/de ltar ni bsams pa las byung ba'i shes rab de kho na nyid phyin ci ma log pa nges par sems pa la zhugs pa'i tshad ma yang dag pa'i stobs las byung ba dang / de bzhin du bsgoms pa las byung ba yang ste/ de kho na nyid kyi don dngos su rnam par dpyod pa nyid kyis sam de'i rgyu mthun pa nyid kyis rnam par dpyad par brjod do//de kho na'i don la rgyab kyis phyogs pa brdzun pa'i rnam par dpyad par brjod do/ /de kho na'i don la rgyab kyis phyogs pa brdzun pa'i rnam pa nye bar 'dzin pa'i shes pa thams cad ni de las bzlog pa'i phyir ma dpyad pa ste/ rnam par mi rtog pa'i ye shes ni ma yin la dpyod pa med pa tsam yang ma yin no//de'i phyir de rab tu grags pa'i ngo bo yin pa'i phyir dngos po brdzun pa'i ngo bo thams cad ni kun rdzob pa kho na'o/ /yang na kun rdzob ni 'jig rten gyi grags pa ste/ 'jig rten thams cad la grags pa'i don thams cad ni kun rdzob nyid du 'dod pa'i phyir ro/ /don thams cad dbang po thams cad kyi spyod yul yang ma yin pa kho na ste kha cig gis 'ga' zhig kho na mthong ba'i phyir ro//de'i phyir shin tu lkog tu gyur pa las dang 'bras bu la sogs pa rnam par gzhag pa rnam pa so sor nges pa thams cad ni thams cad mkhyen pa'i ye shes kho na ste/ gzhan ni cig shos kyi shes pa las kyang ngo //bstan bcos byed pa kha cig gis grags pa las rgal te gang dngos po rnams brtags pa la sogs pa'i ngo bor nye bar brtags pa de ni log pa'i kun rdzob tu yod par brjod de de grags pa las kyang med pa nyid kyi phyir ro/ /gang yang grags pa'i rjes su 'brang nas rab tu brtags pa/dper na/ 'di ni bdag gam sems can med/ /chos 'di rnams ni rgyu dang bcas/ /zhes pa de lta bu ni yang dag pa'i kun rdzob tu yod par brjod do/ /des na dngos po gcig la bstan bcos byed pa rnams kyis ngo bo du mar sgro btags pa yod na'ang dngos po phan tshun 'gal ba'i rang bzhin du ma nyid du thal ba med do//yang na sgyu ma'i don ni kun rdzob kyi don te mi bden pa'i don ni sgyu ma'i don no/ /sgyu ma'i don 'khrul pa'i shes pa'i ngo bo yin yang shes pa dngos po nyid du thal ba yang ma yin te/ de ni brdzun pa'i rnam pa nye bar 'dzin par snang ba'i phyir la bden pa dang brdzun pa'i ngo bo dag kyang phan tshun 'gal ba'i phyir ro//des na brdzun pa'i ngo bo yang bden pa nyid du 'gyur ba'i phyir shes pa 'khrul pa nyid du mi 'gyur la sna tshogs kyi ngo bo nyid du'ang mi 'gyur te/ gcig la ngo bo nyid du mi 'gal ba'i phyir ro/ /mi bden pa'i ngo bo yang brdzun pa'i phyir 'khrul pa nyid na'ang shes pa bden pa nyid du mi 'gyur te/ de dag ni bdag nyid thams cad kyi phan tshun sna tshogs med pa'i phyir dang gcig la cha shas dang cha shas can gyi dngos po mi srid pa'i phyir ro//de'i phyir shes pa'ang brdzun gyi phyir shes bya nang gi tshul las 'di khyad par che'o/ /kun rdzob sgra tsam zhes pa ni mngon par shes pa ste/ bde bar gshegs pa pa ni su'ang kun rdzob sgra tsam zhes par 'dod pa med do//gang yang mdo las/ 'di rnams thams cad ming tsam ste/ /'du shes tsam la rab tu gnas/ /rjod par byed las tha dad pa'i/ /brjod par bya ba yod ma yin/ /zhes gsungs pa de la'ang / gang rnams rjod par byed pa dngos por gyur pa kho na dang / brjod par bya ba yang de las gzhan du gyur par rtog par byed de de'i 'dod pa dgag pa'i ched du rjod byed dang brjod par bya ba dag rtog pa la gnas pa nyid kho nar nye bar bstan pa'o//'dir 'du shes ni rtog pa ste rtog pa'i ngo bo kho na rjod byed du ming gi sgras mngon par dgongs so/ /rna ba'i shes pa la snang ba'i don ni ma yin te rjod par byed pa nyid ma yin pa'i phyir ro//de tsam nyid du zad na yang thams cad gzugs la sogs pa sna tshogs su snang bar mi 'gyur la phung po la sogs pa rnam par gzhag par yang mi 'gyur ro/ /ji ltar sgyu ma'i skyes bu mang po rnams la skyes bu dang skyes bu zhes sgra'i don spyi'i rnam pa can gyi ngo bo brtags pa rnam par 'jog pa de bzhin du dngos po don dam par ngo bo nyid med pa rnams la'o//don dam par sgro btags pa'i ngo bor brjod par bya bzhin pa ni kun rdzob kho nar 'gyur te/ de ni spros pa thams cad las 'das pa'i phyir ro/ /de skad du mdor gsungs pa/ lha'i bu gal te don dam par don dam pa'i bden pa lus dang ngag dang yid rnams kyi yul gyi ngo bor 'gyur na ni bden pa'i grangs su mi 'gro'i kun rdzob kyi bden pa kho nar de 'gyur ro//'on kyang don dam par na don dam pa'i bden pa ni tha snyad thams cad las 'das pa'o zhes so/ /yang na dngos po rnams kyi skad cig pa nyid ni kun rdzob po//dngos po g.yo ba'i bdag nyid de thams cad kyi gang sgyu ma bzhin du rang bzhin gyis ngo bo nyid med pa'i mtshan nyid kyi stong pa nyid de don dam pa ste/ de yang de bzhin gshegs pa rnams byung ba dang ma byung ba dag tu'ang dus thams cad du gnas pa nyid kyi phyir rtag pa'o/ /gal te kun rdzob tshad ma yin na ci ltar 'di kun rdzob yin/'on te tshad ma ma yin na ci ltar 'di las bdag med par 'grub ce na/ 'di mi rigs te de ltar ni ji ltar rjes su dpag pa'i shes pa spyi brdzun pa nye bar 'dzin par zhugs pas kun rdzob pa'i ngo bo yin yang mngon par 'dod pa'i don bya ba thob par byed pa nyid kyis tshad mar 'dod pa de bzhin du kun rdzob 'ga' zhig kyang rang gi ngo bo brdzun pa yin yang tshul bzhin du thos pa dang bsam pa la sogs pa'i rgyu brgyud pas 'ongs pa nyid kyi phyir 'jig rten pa dang 'jig rten las 'das pa'i don la mi slu ba nyid kyis tshad ma'o zhes brjod la de las bzlog pa ni tshad ma ma yin no// tshad ma la sogs pa rnam par gzhag pa 'di thams cad tha snyad kho na las so zhes tshad ma rnam 'grel la sogs par bsgrubs pas 'di ni gyi na'o/ /kun rdzob thams cad kyang dngos po'i ngo bo ma yin pa kho na'o zhes bsgrubs zin to/ /de'i phyir shing la sogs pa kun rdzob 'di'i nye bar len pa ni rang dang rjes su mthun pa thog ma med pa dngos por ma gyur pa kho nar rigs so//rnam par shes pa la sogs pa dngos por gyur pa ni med de de ni de dang 'gal ba nyid kyi phyir ro/ /de'i phyir ma brtags na grags pa rnams la gang skye ba dang gnas pa dang 'jig pa la sogs par sgro btags pa sgyu ma dang rmi lam dang /dri za'i grong khyer dang / sprul pa la sogs pa lta bu de kun rdzob kyi bden pa'o zhes rnam par gzhag go/ /gang sgro ma btags par yang dag pa'i tshad mas yongs su nges pa skye ba med pa la sogs pa de ni don dam pa'i bden pa'i bden pa'o/ /de skad du yang chos yang dag par sdud par gsungs pa/skye ba med pa ni bden no/ /skye ba la sogs pa chos rnams mi bden te brdzun pa slu ba'i chos can no zhes so/ /skye ba med pa 'di yang don dam pa dang mthun pa'i phyir don dam pa zhes brjod kyi dngos ni ma yin te/ dngos su na don dam pa ni spros pa thams cad las 'das pa nyid kyi phyir ro//skye ba med pa kho na de kho na nyid de de yang rnam pa thams cad du bstan par bya ba ma yin yang tha snyad kyi dbang gis 'dus byas ma lus pa'i chos nyid kyis na 'dus ma byas pa'o zhes bstan pa'o/ /skye ba dang skye ba med pa dag dus thams cad du gnas pa nyid kyi phyir 'dus ma byas pa'o zhes kyang bstan gyi/de gnyis ka'i ngo bo ni ma yin te/ de ni ngo bo thams cad las 'das pa'i mtshan nyid can gyi phyir ro/ /ji skad du rab tu dang ba chen po bskyed pa'i mdor gsungs pa/ gzhan las rtogs min zhi ba ste/ /spros pa rnams kyis ma spros pa/ /rnam par mi rtog sna tshogs min/ /'di ni de bzhin nyid mtshan nyid/ / ces so/ /de nyid kyi phyir sems bskyed pa nyi shu rtsa gnyis ni kun rdzob kho nar bye brag dang bcas pa ste de ltar yang bye brag dang khyad par dang yon tan dang chos shes pa don gzhan ma yin la bye brag can dang khyad par can dang yon tan dang chos can zhes pa don gzhan ma yin no/ /gang gi tshe rang gi mtshan nyid 'dzin pa'i phyir chos kyi sgras chos can la brjod pa de'i tshe ni chos de chos nyid ces tha snyad bya ste sgra'i don rnam par gzhag pa ni brda las byung ba nyid kyi phyir ro//sgra'i don ni sgrub pa dang dgag pa'o/ /de dag kyang sgrub pa brjod pa'i sgra las cig car rtogs te pad dkar gyi sgra las 'dab ma brgya pa dkar po ma gos pa bzhin no//sgra las byung ba'i shes pa ni sgro btags pa'i rang bzhin rnam par dben pa'i rang gi ngo bo'i yul can te/ de nyid kyi phyir rigs la sogs pa'i don med pa'i yul can mngon par 'dod pa'i don gyi dngos po med pa kho na'ang gzhan sel ba'o/ /gal te yang dngos po yul du mi 'gyur ro zhes dngos po med pa'i yul ni sel ba'i yul te/de la ni dngos por ni yul can kyang mngon pa'i nga rgyal las 'di'i yul du don nyid do/ /don gyi yul can nyid na'ang bdag nyid thams cad kyis ma yin gyi 'on kyang ldog pa gcig gi mtshams kyi ngo bo'o/ /gang yang rigs mi mthun dang bral ba'i bdag nyid dngos po'i cha de rnam par rtog pa'i spyod yul te de sgra'i don no//de gsungs pa/ nges pas ma nges ngo bo gang / /de ni ci ltar de yi yul/ /zhes so/ /de'i phyir sgra gzhan rab tu 'jug pa'i phyir rigs mi mthun re re rnam par gcod pa'i bdag nyid ni dngos po'i cha ste sgra'i don no/ / de yod pa'i phyir dang des dben pa gzhan med pa'i phyir dgag pa dang sgrub pa'i tha snyad thams cad ni de'i rgyu can kho na'o/ /gang gi phyir ma yin par dgag pa ni rnam par gcod pa'i bdag nyid yin pa nyid kyi phyir de med par med pa'i phyir na dgag pa rtogs la sgras kyang de rjod par byed pa nyid na ldog pa rjod par byed pa kho na'o//ji ltar yang dgag pa byed pa'i sgras sgro 'dogs pa'i rnam pa rnam par gcod cing bsgrub par bya ba nyid kyis kyang brjod la/ med dgag ni bdag nyid ngo bo ci yang med pa dngos po med pa'i ngo bo mi gtong ba de bzhin du sgrub pas kyang sgrub pa'i ngo bo nyid du brjod kyang gzhan las ldog pas ldog pa'i ngo bo nyid las mi 'da'o//de nyid kyi phyir yang nyan pa po'i 'dod pa'i ngor khyad par gzhan mi spong ba'i phyir sems rang bzhin med pa dang stong pa zhes pa la sogs pa khyad par med pa'i tha snyad dang / khyad par gzhan spong ba'i phyir rnam par shes pa'i rang bzhin med pa nyid dang stong pa nyid ces pa la sogs pa khyad par gyi tha snyad do//don dam par ni chos rnam par shes pa dang / chos nyid stong pa nyid la sogs pa ni rang bzhin med pa nyid kyi phyir khyad par dang khyad par med pa dag med do/ /de gsungs pa/ don dam rnam par dpyad rnams la/ /de ltar gyur pa mi 'grub pas/ /kun rdzob pa yi tshig don la/ /de nyid dang ni gzhan nyid 'gog /ces dang / ldog pa ngo bo nyid med phyir/ /tha dad tha dad brtag pa min/ /zhes so/ /des na zla ba la sogs pa rnams kyi dkar po nyid la sogs pa ltar 'dus byas kyi mtshan nyid kun rdzob dang lhan cig gcig nyid dang gzhan nyid dag gi brjod par byar med pa kho na ni don dam pa'i mtshan nyid do/ / dngos po kho na la de nyid dang gzhan nyid du rnam par rtog pa srid pa'i phyir la/ don dam pa'i spyi'i mtshan nyid ni dngos po'i ngo bo med pa nyid kyi phyir de nyid dang gzhan nyid du brjod bya ma yin pa nyid kho na'o/ /dngos po yod na yang de nyid dang gzhan nyid kyi rnam par rtog pa 'byung gi dngos po rnams rang bzhin med pa la de de ltar mi srid do zhes 'gal ba med pa kho na'o//don dam pa ye shes kyi bdag nyid kyang kun rdzob dang lhan cig de bzhin nyid kyi mtshan nyid don dam pa'i rnam par gcig pa nyid du 'dod pa kho na ste/ ji skad du shes rab kyi pha rol tu phyin par gsungs pa/ rab 'byor 'jig rten gyi kun rdzob kyang gzhan la/ don dam pa yang gzhan pa ma yin gang 'jig rten gyi de bzhin de kho na don dam pa'i de bzhin nyid do zhes so//ye shes kyi bdag nyid kyi don dam pa ni sgyu ma la sogs pa dang khyad par med pa nyid kyi phyir yang dag pa'i kun rdzob kyi ngo bo nyid kyang yin la/ de kho na nyid rtogs pa dang mthun pa nyid kyi phyir don dam pa'i ngo bo nyid kyang ngo zhes pa ltos pa'i bye brag gis gcig la gnyis ka'i ngo bo nyid kyang mi 'gal lo//de'i phyir chos dang chos can tha dad pa la sogs pa'i rnam par gzhag pa tha snyad kho nar ro zhes pas don dam par sems bskyed pa la sogs pa rnams khyad par dang bcas pas ma yin la khyad par med pa yang ma yin no/ /gang 'phags pa sa bcu pa'i mdor gsungs pa/kye rgyal ba'i sras rnams 'di lta ste/ khams gsum pa 'di ni sems tsam mo zhes pa de ni mdo gzhan rnams su rgyas pa dang bcas par rang bzhin med pa nyid bstan pa'i phyir don dam pa pa nyid du mi gzung gi sems tsam nyid du bstan pa de ni rim gyis don dam pa'i tshul gyis rgya mtsho la zhugs pa'i ched 'ba' zhig tu zad do zhes zung shig /de ltar ni gang lan gcig la chos ma lus par rang bzhin med par rtogs par mi nus pa de re zhig sems tsam nyid la brten nas rim gyis phyi'i don rang bzhin med pa nyid la 'jug go/ /de nyid kyi phyir gsungs pa/ 'di ltar rnam par lta rnams kyi//gzung dang 'dzin pa 'gag par 'gyur/ /zhes so/ /de'i 'og tu rim gyis sems tsam gyi rang bzhin la so sor rtog pa na de yang bdag nyid pa nyid du khong du chud nas zab mo'i tshul la 'jug par 'gyur ro/ /kun rdzob tu rnam par shes pa bzhin du phyi'i don yang gnas te/gzhan du na 'phags pa sa bcu par/ sa brgyad pa la byang chub sems dpas 'jig rten gyi khams su gtogs pa'i rdul phra rab kyi grangs la sogs pa yongs su shes par gsungs pa de dang 'gal te/ ji skad du gsungs pa/ de rdul phra mo nyid kyang rab tu shes la chen por gyur pa dang tshad med pa nyid dang rnam par phye ba nyid kyang rab tu shes so//'jig rten gyi khams gang na sa'i rdul phra rab ji snyed yod pa de rnams kyang rab tu shes so/ /de bzhin du chu'i khams dang / me'i khams dang / rlung gi khams kyang rab tu shes so zhes rgya cher ro/ /grags pa dang yang 'gal te rnam par shes pa bzhin du phyi rol gyi don yang grags pa'i phyir ro//rigs pas dpyad na ni gnyis ka yang brtag mi bzod pa nyid kyis dngos por med do/ /tha snyad kyi bden pa la dngos po gnyis ka'ang ba lang rdzi bo'i bar la grags pa nyid do/ /sems tsam du gsungs pa'i 'bras bu ni gzhan gyis kun brtags pa'i byed pa po dang za ba po dgag pa ste tha snyad du yang sems ma gtogs pa gzhan byed pa po la sogs pa ma grub pa'i phyir ro//yang na sems ni chos thams cad kyi sngon du 'gro ba nyid kyi phyir chos thams cad la ltos nas sems gtso bor sgrub pa'i don du'o/ /gang gsungs pa/ don yod ma yin sems nyid de/ /zhes pa dang / de bzhin du/ bag chags kyis ni dkrugs pa'i sems//don du snang ba rab tu 'byung / /zhes pa la sogs pa der yang rnam pa med pa'i sems kyis ji ltar yang yul 'dzin pa mi rung ba'i phyir gdon mi za bar de rnam pa dang bcas pa kho nar khas blang bar bya'o/ /de'i phyir sems kyi rnam pa ma gtogs pa don gyi rnam pa mi snang ba'i phyir de bkag pas sems rnam pa dang bcas pa kho na sgrub pa 'ba' zhig ste/de las phyi rol gyi don med par rtogs pa ni ma yin no/ /de yang na gang bdag yod pa nyid la sogs pa bstan pa bzhin du de lta bus 'dul ba'i skye bo la ltos nas bcom ldan 'das kyis bstan pa'o/ /de skad du yang / lang kar gshegs par gsungs pa/ nad pa dang ni nad pa la//sman pas rdzas byin ji lta bar/ /de bzhin sangs rgyas sems can la/ /sems tsam nyid du gsungs pa yin/ /zhes so/ /gzhan rnams slu bar gsungs pa yang ma yin te de lta bus gdul ba'i skye bo la phan pa dang bde ba thob par byed pas bstan pa 'bras bu yod pa nyid kyi phyir ro/ / pha rol la gcig tu phan pa kho na bden pa nyid kyi phyir bcom ldan 'das rnams brdzun gsung ba yang mi mnga' ste/ ji skad du 'phags pa klu sgrub zhabs kyis gsungs pa/ gzhan la gcig tu phan pa bden/ /mi phan nyid phyir cig shos brdzun/ /zhes so/ /gzhan rnams na re sems tsam kho na rang gis rab tu grub pa'i ngo bo can nyid kyi phyir kun rdzob tu gnas la/phyi rol gyi don ni kun rdzob tu yang mi gnas te/ sems kyi rnam pa ma gtogs pa de ma grub pa'i phyir ro/ /de'i phyir de rab tu bstan pa'i ched du bcom ldan 'das kyis dngos po rnams sems tsam nyid du bstan to zhes gsung ngo / /de ltar kun rdzob tu phyi rol gyi don nam/rnam par rig pa tsam nyid yin yang bla ste the tshom med par dngos po'i ngo bo nyid yang dag pa sgrub pa gang yid ches pa de lta bu'i bka' rnam pa thams cad du med do/ /de ltar bcom ldan 'das kyi gsung rab kyi tshul yang dag pa ma gtogs pa brdzun pa'i mngon pa'i nga rgyal can dngos po'i rang bzhin nye bar rtogs pa rnams ni bcom ldan 'das la skur par byed smod par byed pa ste bdag nyid phung la gzhan yang phung du 'jug pa'o//dngos por smra ba de rnams thams cad ni chos kyi de kho na nyid phyin ci log tu ston pa'i phyir shes rab kyi pha rol tu phyin pa ltar bcos pa kho na nye bar ston pa'o/ /chos thams cad ngo bo nyid med par smra ba rnams ni phyin ci log pa kho na'o//de'i phyir blo gros dang ldan pas/ dad pas chos zab mo rnams spang ba'i lta ba bor te/ de la yang bcom ldan 'das kho na tshad mar byas na bdag nyid mi shes pa'i skyon gyis de ma rtogs par bsams shing mdo sde zab mo rnams la lhag par mos pa bskyed de/mnyan pa dang gzung ba dang bsgom pa la sogs pa rnams la mngon par brtson par bya'o/ /gzhan rnams kyang yang dag par len du gzhug go/ /bdag nyid de la mos pa'i ched du smon lam yang gdab par bya'o/ /de ltar ni de bzhin gshegs pa kho na mngon sum tshad ma 'ba' zhig go//de rnams kyis dngos po yang dag par cung zad kyang ma dmigs te/ ji skad du/ byang chub sems dpa'i sde snod du gsungs pa/ yang chos thams cad ji lta ba bzhin mthong ba gang zhe na gang 'di mthong ba med pa'o zhes so/ /'phags pa chos yang dag par sdud par yang gsungs pa/ chos thams cad mthong ba med pa ni mthong ba dam pa'o zhes so/ /'o na chos thams cad bdag med pa nyid rnal 'byor pa rnams kyi mngon sum ji ltar yin te de ni dngos por med la dngos po med par yang ji ltar yang rnam par shes pa mi bskyed pa'i phyir ro zhe na/ 'di ni mi rigs te kho bo cag gis ri bong gi rwa la sogs pa dang 'dra ba'i dngos po med pa 'ba' zhig mngon sum gyis shes pa so sor skyed par byed par ni khas mi len gyi/'on kyang rnal 'byor pa chen po chos thams cad smig rgyu dang mig yor ltar ji lta ba bzhin sgom par byed pa rnams kyis yang dag pa'i don bsgom pa rab kyi mtha' las byung ba'i ting nge 'dzin thob la mthu phul du byung ba bsam gyis mi khyab pa dang ldan pa'i phyir rnal 'byor pa de rnams la chos ma lus pa bdag med pa'i de kho na nyid mngon du byed pa shin tu gsal ba'i ye shes rnam pa de lta bu nye bar skye ste/de nyid mthong ba med par brjod kyi med par dgag pa'i ngo bo ma yin no/ /de skad du yang bcom ldan 'das kyis gsungs pa/blo gros chen po byang chub sems dpa' chos thams cad sgyu ma dang rmi lam lta bur nye bar bstan par bya ste mthong bya dang mthong bya min pa'i mtshan nyid can nyid kyi phyir ro zhes so/ /de ltar mthong bya'i mtshan nyid can ni tha snyad du'o/ /mthong bya min pa'i mtshan nyid ni don dam pa kho nar ro zhes pa mdo'i don no//'di kho na la dgongs nas 'phags pa klu sgrub zhabs kyis gsungs pa/ srid pa dang ni myang 'das nyid/ /gnyis 'di yod pa ma yin te/ /srid pa yongs su shes kho na/ /mya ngan 'das pa zhes par brjod/ /ces so/ /gal te yang chos thams cad don dam par skye ba med pa ro gcig pa nyid kyis mngon sum yang don dam par rang bzhin med mod/de lta mod kyi kun rdzob kyi bden pa la brten pa mngon sum la sogs pa rnam par gzhag pa thams cad mi 'khrug go/ /tha snyad du rnal 'byor pa'i shes pa'am gzhan so so'i skye bo'i shes pa ni 'phags pa'i gang zag la sogs pa rnam par gzhag pa'i rgyur mi 'dod pa ma yin gyi/'on kyang gang thams cad kyi tshe kun rdzob tu yang rgyu med pa de kho na tha snyad du yang mi skye ba kho na ste ri bong gi rwa la sogs pa'o/ /gang yod pa de ni skye ste sgyu ma dang gzugs brnyan la sogs pa'o/ /de la ji ltar sngags dang sman la sogs pa tshogs pa'i dbang gis glang po la sogs pa sna tshogs pa'i sgyu ma rab tu 'jug pa de bzhin du/sems can rnams kyi nyon mongs pa dang las kyi dbang gis skye ba la sogs pa'i sgyu ma dang / rnal 'byor pa rnams kyi yang rang gi bsod nams dang ye shes kyi tshogs kyi dbang gis rnal 'byor pa'i ye shes la sogs pa'i sgyu ma rab tu 'jug pa kho na'o//de rnams kyang sgyu ma mkhan bzhin du sgyu ma de rnams yang dag pa ji lta bar yongs su shes pa'i phyir de kho na nyid du mngon par zhen pa med cing gzhan gyi don du go cha yang gyon te ji skad du chos yang dag par sdud par gsungs pa/ rdzogs pa'i byang chub mkhas rnams kyis/ /'gro ba de ltar snga nas shes//srid gsum sprul pa ltar shes te/ /'gro ba'i don du go cha gyon/ /zhes so/ /gang skye ba la sogs pa'i sgyu ma de la byis pa'i skye bo rtog pa can lta bur ji ltar mthong ba bzhin bden par mngon par zhen pa de rnams phyin ci log tu mngon par zhen pa'i phyir byis pa rnams su brjod do/ /'di rnal 'byor pa'i mngon sum gyis yang dag par rtogs par bya'o zhes pa de yang rigs pa med pa ma yin te de ltar ni mkhas pa rnams kyis/mngon sum rtog bral ma 'khrul pa/ /zhes mngon sum gyi mtshan nyid bshad la/ goms pa'i stobs las yang dag pa ma yin pa'i don la yang shes pa shin tu gsal ba kho nar skye ste/dper na 'dod pa dang mya ngan dang 'jigs pa dang smyos pa la sogs pa rnams kyis nye bar bslad pa rnams la shin tu goms pa mang du byas pa las bud med la sogs pa so sor snang ba'i shes pa shin tu gsal ba skye ste/ gang gi phyir de rnams kyis de rnams mdun na yod pa ltar mthong nas lus la sogs pa'i bya ba bab chol rnam pa du ma rtsom pa lta bu'o//de'i phyir ji skad bshad pa de kho na nyid sgom par byed pa kha cig kyang de la shes pa shin tu gsal ba skye ba nyid do zhes pa srid do/ /gang gsal bar snang ba'i shes pa de yang rtog pa med pa kho na ste/ rtog pas 'khrugs pa la gsal ba'i rnam pa nyid du skye ba med pa'i phyir ro zhes tshad ma rnam 'grel la sogs par rgyas par byas so//mngon sum rnam pa gnyis su yang slob dpon rnams kyis rnam par phye ste/ rnal 'byor pa rnams kyi dang / cig shos rnams kyi'o/ /de la gang cig shos rnams kyi mngon sum de ni don dam pa'i dbang du byas nas ma 'khrul par mi brjod de//gzhan du na ni thams cad rnal 'byor pa kho nar 'gyur gyi tshu rol mthong bar mi 'gyur ro/ /tha snyad du rmi lam la sogs pa bzhin ji ltar grags pa'i don la mi slu ba tsam la de ma 'khrul par brjod pa 'ba' zhig go/ /gang yang nyan thos la sogs pa'i rnal 'byor pa'i mngon sum de ni gang zag la bdag med pa nyid tsam mngon du byed par zhugs pa nyid kyi phyir/de la mi slu ba nyid kyis mngon sum tshad ma ste/ rnam pa thams cad kyi de kho na nyid kyi spyod yul can ni ma yin no/ /gang bcom ldan 'das rnams kho na'i mngon sum de rnam pa thams cad kyi de kho na nyid kyi spyod yul can yin pa'i phyir/dngos su na de kho na mi slu ba nyid kyis rnam pa thams cad kyi de kho na nyid la so sor ma 'khrul ba ste/ des na sangs rgyas bcom ldan 'das kyis chos thams cad mtshan nyid med par rab tu mkhyen to/ /rnam pa thams cad mkhyen pa nyid kyi ye shes dngos po nyid du thal ba yang ma yin te/de yang chos thams cad kyi nang du 'dus pas de rnams kyis mtshan nyid med pa nyid du mngon par rdzogs par sangs rgyas pa'i phyir ro/ /de skad du 'phags pa shes rab kyi pha rol tu phyin pa 'bum par gsungs pa rnam pa thams cad mkhyen pa nyid kyi ye shes ni mngon sum gyi mtshan nyid can te/de yang de bzhin gshegs pas mtshan nyid med pa zhes par mngon par rdzogs par sangs rgyas so zhes so/ /de la tha snyad pa'i mngon sum gyi spyod yul gyi don rmi lam la sogs pa bzhin du brdzun par snang ba la yang gang byis pa rnams kyis dngos po pa don dam pa pa'i ngo bo la sogs par sgro btags pa de la rjes su dpag pas gnod la/de la gnod na chos thams cad don dam par rang bzhin med pa nyid du 'grub bo/ /de la gnod pas grub pa'i don yang rjes su dpag pa'i tshad mar bcom ldan 'das nyid kyis gsungs pa kho na ste/ klu'i rgyal po ma dros pas zhus par/ gang zhig rkyen las skyes pa de ma skye//de yi skye ba rang bzhin las yod min/ /gang zhig rkyen gyi dbang de stong par brjod/ /gang zhig stong par shes de bag yod pa'o/ /zhes so/ /blo gros rgya mtsho la bstan par yang / gang rnams rten cing 'brel par 'byung / /de rnams rang bzhin cung zad med/ /gang rnams rang bzhin las med pa//de rnams gang du'ang mi 'byung ngo / /zhes so/ /de bzhin du/ dper na me long nyid la ni/ /gcig dang gzhan nyid spangs pa'i gzugs/ /snang yang de ni yod ma yin/ /de bzhin dngos la rang bzhin nyid/ /ces so/ /'phags pas kyang dbu ma'i bstan bcos su gsungs pa/ gang zhig rten cing 'brel 'byung ba//de rnams stong pa nyid du smra/ /de ni rten nas btags pa'o/ /de nyid dbu ma'i lam yin no/ /zhes so/ /slob dpon gyis kyang gsungs pa/ gang gis dngos rnams rnam dpyad na/ /de nyid du ni de dngos med/ /gang gi phyir na de rnams la/ gcig dang du ma'i rang bzhin med//ces so/ /rten cing 'brel par 'byung ba gcig dang du ma'i ngo bo dang bral ba nyid kyi gtan tshigs 'di dag gi/ gang rten cing 'brel par 'byung ba de ni don dam par rang bzhin stong pa ste sgyu ma bzhin chos thams cad kyang rten cing 'brel par 'byung ba'o/ /gang don dam par gcig dang du ma'i rang bzhin dang bral ba de rang bzhin med de gzugs brnyan bzhin/chos thams cad kyang don dam par gcig dang du ma'i rang bzhin dang bral ba'o zhes so/ /sbyor ba gnyis kyi gzhung ni rtog ge'i bya ba mi shes pa rnams kyis mi rtogs pa'i phyir mi nyan par dogs pas 'dir rgyas par ma byas so//mdor bsdus pa ni kho bos dbu ma'i snye mar phul du byung bar rnam par bshad do/ /de las mkhas pa rnams kyis rtogs par bya'o/ /gal te yang rjes dpag 'di tha snyad du mngon sum kho na las 'brel pa thob nas gnas thob par gyur mod shing gnyis drud pa las skyes pa'i me bzhin du mngon sum de nyid la gnod pa byed de/ngo bo nyid la gnod mod/ kho bo cag la mi 'dod pa ci yang med do/ /rab tu rnam par 'byed pa'i ye shes kyi mes brdzun pa'i chos kyi bud shing 'di thams cad bsregs nas rnam par 'byed pa'i me rab tu zhi bas ni mya ngan las 'das pa'i mchog rtog pa nye bar zhi ba'i mtshan nyid can rtogs par 'gyur te/de skad du yang rgyal po'i rin chen phreng bar/ 'gro ba'i chos kun rnam shes kyi/ /me yi bud shing nyid du 'dod/ /de rnams ji bzhin rnam dpyod pa'i/ /me yis bsregs na nyer zhir 'gyur/ /zhes so/ /de'i phyir de kho na nyid kyi ye shes skyes na/gal te yang rjes su dpag pa'i mtshan nyid kyi rtog pa ldog ste rten med mod/ de lta mod kyi mi 'dod pa med do de'i phyir bcom ldan 'das kyis 'phags pa dkon mchog brtsegs par/ yang dag par so sor rtog pa rnam par rtog pa dang bcas pa nyid yin na yang 'bras bu rnam par mi rtog pa'i ye shes bskyed pa nyid kyis 'bras bu chen po nyid du shing gnyis drud pa las skyes pa'i me'i dpes bstan to//gang zhig gal te rnam par shes pa yang chos gzhan bzhin du don dam par ngo bo nyid med pa yin na/ de'i tshe de ni brdzun pa'i phyir rnal 'byor pa rnams de las gzhan pa'i chos ltar spong bar byed par 'gyur ro//de byed na yang rnal 'byor pa yang med/ rnal 'byor pa'i shes pa yang med/ des de kho na nyid so sor rig pa yang med sangs rgyas bcom ldan 'das rnams kyi mi gnas pa'i mya ngan las 'das pa yang med rnam pa thams cad mkhyen pa nyid kyi ye shes kyang med de/ de'i phyir rnam par gzhag pa thams cad bshig par 'gyur ro zhes rgol ba de ni mi rigs te/gal te de bden par mngon par zhen pa spong bar thal lo zhe na/ de ni thal ba ma yin te de ltar 'dod pa'i phyir ro/ /'on te rnam pa thams cad du yongs su spong bar thal bar byed na ni de'i tshe gtan tshigs ma nges pa nyid de bsgrub bya las bzlog na gnod pa can gyi tshad ma med pa'i phyir ro//brdzun zhes te de rnams thams cad du spang bar bya'o zhes pa 'di la rgyu ci yang med de brdzun pa gang nam yang rang dang gzhan gyi don du sbyor ba mi 'gyur ba de rnams rnal 'byor pa rnams kyis thams cad yongs su dor ba'i mtshan nyid du spang bar bya'o/ / gang yang dngos dang brgyud pas rang dang gzhan la nye bar mkho ba'i yon tan de rnams brtse ba chen po rnams kyis ci ltar dus thams cad du spang / de'i phyir zhing yongs su dag pa dang gzugs kyi sku sprul pa la sogs pa gang cung zad de thams cad bcom ldan 'das rnams kyis phyin ci log spangs pa'i sgo nas spangs kyang 'khor ba ji srid par mi ldog pa kho na ste de rnams sgyu ma mkhan bzhin du thams cad brdzun pa nyid du thugs su chud kyang gzhan la phan pa'i thabs nyid yin pa'i phyir mi ldog /'di rnams la phyin ci log tu chags pa yang med de yang dag pa ji lta ba bzhin du rtogs pa'i phyir ro//dngos po kho na ni blang ba'i rgyu yang ma yin la dngos po med pa nyid yongs su dor ba'i rgyu yang ma yin te/ de ltar ni nyan thos dngos po 'du shes can rnams kyang bden pa dang po gnyis spong la bden pa gsum pa dngos por med kyang len to/ /rnal 'byor pa rnams kyang brtse bas non pa'i yid kyis gzhan gyi don gyi ched du glang po che la sogs pa'i brdzun pa'i 'ang sprul pa rnam pa sna tshogs sgrub po//de bzhin du brtse ba chen po'i gzhan gyi dbang nyid kyis bcom ldan 'das gzhan la phan pa dang bde ba sgrub pa'i thabs ma lus pa mkhyen pa shes rab kyi snang ba phul du phyin pas kun du rmongs pa'i mun pa ma lus pa rab tu bsal ba gzhan la phan par bzhed pa rnams ni/phyin ci log ma lus pa spangs na yang sngon gyi smon lam gyi dbang gis sems can gyi las dang nyon mongs pa dang nam mkha'i mthar thug pa'i bar du bzhugs par 'dod pa kho na'o/ /'dzam bu'i gling du yang shAkya thub pa'i gzugs kyis gdul bya mi srid na yang 'khor lo sdom pa la sogs pa'i gzugs kyis da lta yang bzhugs pa nyid de/bcom ldan 'das bskal pa mi nyung bar dge ba'i tshogs bsags pa dang ldan pa zab mo'i tshul la gdul ba'i skal ba can byang chub sems dpa' rnams kyi yul du snang zhing chos ston to//mtha' med pa'i phyir sems can thams cad 'don pa mi srid do zhe na/ de nyid kyi phyir de'i bsam pa brtse ba'i rang bzhin mtha' med pa kho nar bzhugs pa'o/ /gzhan du na dam bcas pa dang mthun par gnas par mi 'gyur te/ de rnams kyis dang po sems bskyed pa kho na nas sems can thams cad shin tu sdug bsngal ba las nges par grol bar dam bcas so//de la rnal 'byor pa'i ye shes la sogs pa'i sgyu ma'i rgyu ni bsod nams dang ye shes kyi tshogs rang nyid ji lta ba'i rjes su mthun pa'o/ /bcom ldan 'das rnams kyi gnas pa'i mya ngan las 'das pa'i rgyu ni mdor na thugs rje dang shes rab dag ste/de rnams ni thugs rjes mya ngan las 'das pa mtha' gcig tu zhi bar mkhyen yang nyan thos la sogs pa bzhin mngon du mi mdzad la shes rab kyis kyang kun nas nyon mongs pa ma lus pa'i rgyu kun du rmongs pa'i go skabs thag bsrings par byas pa'i phyir srid par gtogs pa'i skyon gyi dri mas ma gos par 'khor bar mi ltung ngo zhes pa 'di rnams gnyis kas mi gnas par grub po//de nyid kyi phyir thabs dang shes rab zung du 'brel par 'byung ba ni byang chub sems dpa' rnams kyi lam du brjod do/ /ji lta ba bzhin du 'jig rten yang snang ba dang bcas pa la sogs pa'i ye shes kyis gzigs pa de yang kun rdzob dang don dam pa'i rnam pas ji ltar snang ba de bzhin du bcom ldan 'das kyis kyang mngon sum kho nar dngos po skyes pa ma lus pa rnam pa thams cad du lag mthil gyi skyu ru ra'i 'bras bu bzhin du gsal bar mkhyen te rnal 'byor pa'i ting nge 'dzin gyi nus pa bsam gyis mi khyab pa can dang ldan pa'i phyir ro//de'i phyir bcom ldan 'das rnam pa thams cad mkhyen pa'i ye shes su rnam par gzhag go/ /gang yang spros pa thams cad dang bral ba chos ma lus pa snang ba med pa yang dag pa'i don sgom pa rab kyi mtha' las skyes pa mchog tu 'jig rten las 'das pa'i ye shes te des rnal 'byor pa chen po rnams de kho na nyid rtogs par byed do zhes pa'o//tshogs yongs su rdzogs pa ni lta ba 'di kho na la rigs te/ sbyin par bya ba la sogs pa'i dngos po 'ga' yang don dam par med pa nyid kyi phyir der dmigs pa ni phyin ci log kho na ste smig rgyu la chur dmigs pa bzhin no/ / de'i phyir des kun nas bslang ba'i pha rol tu phyin pa sgrub pa thams cad kyang bdag dang bdag gir phyin ci log gis kun nas bslang ba'i sbyin pa la sogs pa bzhin du sgyu ma dag pas kun nas bslang ba nyid kyi phyir shin tu stobs chung ngo / /sbyin par bya ba la sogs pa dmigs pa'i mtshan nyid du gyur pa yang mi dmigs pa ni yang dag pa'i don gyi yul can nyid kyi phyir smig rgyu la chur mi dmigs pa bzhin phyin ci ma log pa'o//de'i phyir des kun nas bslang ba'i sbyin pa la sogs pa yang 'bras bu chen por 'gyur ro/ /sbyin bya la sogs pa mtha' gcig tu med pa yang ma yin te gang gis sbyin bya la sogs pa mi 'jug pas bsod nams mi 'byung la kun rdzob tu thams cad yod pa'i phyir ro//thams cad kyi tshe mi dmigs pa yang ma yin te ting nge 'dzin gyi gnas skabs ma yin pa na sgyu ma bzhin du dmigs pa'i phyir ro/ /de'i tshe ni mos pa las byung ba'i mi dmigs par rnam par gzhag go/ /mnyam par gzhag pa'i gnas skabs na ni sbyin pa la sogs pa rnams mi dmigs pa kho na ste/de'i tshe de rnams 'jug pa la brten pa yang ma yin te sbyin pa la sogs pa btang snyoms su byas pa'i phyir ro/ /'on kyang sbyor ba dang mjug gi gnas skabs su de rnams la 'jug go/ /de nyid kyi phyir stong pa nyid la lhag par mos pa'i sbyin pa la sogs pa la dmigs pa la brten pa rnams 'bras bu chen po nyid dang yongs su dag par 'phags pa shes rab kyi pha rol tu phyin pa la sogs pa rnams su gsungs pa/rab 'byor byang chub sems dpa' gang rab tu mi gnas par sbyin pa sbyin pa de'i bsod nams kyi phung po tshad gzung bar sla ba ma yin no zhes pa la sogs pas so//'dir sbyin pa ni pha rol tu phyin pa drug char yin te/ sbyin pa ni pha rol tu phyin pa drug rnams so zhes gsungs pa'i phyir ro/ /dkon mchog 'byung gnas kyi mdor yang gsungs pa/ zhi ba'i blo gros byang chub sems dpa' byang chub kyi ched du spyad pas chos thams cad ngo bo med par khong du chud par bya ste sbyin pa dang len pa po dang yon gnas dang yongs su bsngo ba dang sbyin pa'i 'bras bu gang du yongs su bsngor 'jug pa dang /gang du yongs su bsngo ba yang dag par rdzogs pa'i byang chub ces pa 'di thams cad rang bzhin med par rtogs par bya'o/ /de ltar stong pa nyid la mos pa de ni bsam pa tshad med pa las sbyin pa'i pha rol tu phyin pa yongs su dag cing sbyin pa des kyang pha rol tu phyin pa'i ming thob ste/rdzab rdzub ma yin par 'gyur ro zhes rgyas par ro/ /de'i phyir shes rab kyi pha rol tu phyin pa'i dbang du gyur pa ni de las gzhan pa'i pha rol tu phyin pa la sogs pa yon tan gyi tshogs rnams te/des de rnams long ba bzhin du khrid nas bde bar gshegs pa'i sa kun du 'od du gnas par byed pa'i phyir ro/ /shes rab kyi pha rol tu phyin pa kho na bcom ldan 'das ma theg pa chen po'i bdag nyid theg pa gcig nyid do/ /gang yang theg pa tha dad pa rnam par gzhag pa de ni byis pa rnams gzhug pa'i don du bcom ldan 'das kyis bstan pa ste/nges pa'i don ni ma yin no/ ji skad du lang kar gshegs par gsungs pa/ theg pa'i rnam gzhag yod min nyid/ /theg pa gcig tu nga smra'o/ /byis pa rnams ni drang don du/ /theg pa tha dad nga smra'o/ /zhes so/ /tshogs chung ba nyid dang tshogs tshad med pa nyid rnam par gzhag gi/theg pa tha dad pa ni ma yin te/ chos kyi dbyings dbyer med pa'i phyir la/ 'di ni gzhug pa'i sgor bstan pa'o/ /gang 'phags pas gsungs pa/ chos kyi dbyings la dbyer med phyir/ /gtso bo theg pa dbyer ma mchis/ /khyod kyis sems can gzhug ched du//theg pa gsum du gsungs pa'o/ /zhes so/ /de'i phyir gang theg pa gcig tu bstan pa ni dgongs pa can nyid de/ chos kyi dbyings la sogs pa'i mtshan nyid kyi theg pa mtshungs pa nyid kyis gcig nyid du gsungs par brjod pa de la/ shA ri'i bu khyod ma 'ongs pa'i dus na yang dag par rdzogs pa'i sangs rgyas pad+mo'i 'od ces bya bar 'gyur ro zhes pa la sogs pa 'phags pa dam pa'i chos pad+ma dkar po la sogs par mtha' gcig tu gsungs par rjes su mthun pa ma yin no//theg pa gsum bstan pa thabs kyi ngo bo nyid bstan par bya ba'i ched 'ba' zhig la gdul bya'i skye bo la bcom ldan 'das kyis theg pa gcig bstan pa dgongs pas bstan pa'o zhes 'phags pa chos bcu pa la sogs par gsungs te/theg pa gsum du bstan pa 'di bcom ldan 'das kyis thabs te bden pa ni ma yin no zhes shes pa'i gdul bya rnams ni gzhug par mi nus pas so/ /'di'i rjes su 'brangs pa las 'phags pa byams pas mdo sde rgyan du yang theg pa gcig tu bstan pa dgongs pa can no zhes bstan to//nyan thos rnams bag la nyal chad na skye ba yang shin tu yang dag par chad pas 'di rnams skye ba du ma brgyud pas bsgrub par bya ba'i sangs rgyas nyid du ga la 'gyur zhes pa mi rigs te/ de rnams kyi skye ba shin tu yang dag par chad pa ma grub pa'i phyir ro//ji skad du dpal phreng seng ge'i nga ro'i mdor gsungs pa/ dgra bcom pa rnams la yang 'jigs pa mchis te/ gang gis 'jigs pa'i dgra bcom pa dang rang sangs rgyas de rnams kyang bcom ldan 'das nyid la skyabs su mchi'o/ /de rnams kyi skye ba zad pa ma mchis shing /de rnams la spang bar bya ba'i chos mang po rnams mchis la/ gang rnams ma spangs na mya ngan las 'das pa'i dbyings dang ring du 'gyur ba'o zhes so/ /rnam 'grel du yang / dgra bcom sems yin pa de yang / /ci phyir mtshams sbyor med par 'dod/ /ces so/ /gang du zad pa dang mi skye ba shes pa gsungs pa de yang drang ba'i don du mdo de nyid las gsungs te/bcom ldan 'das gang yang dgra bcom pa dang rang sangs rgyas rnams kyi rnam par grol ba la so sor rtog pa'i ye shes mthar thug pa de rnams dgongs pa can te drang ba'i don to/ /'chi 'pho ni gnyis po 'di dag ste/ bcom ldan 'das rnam par chad pa'i 'chi 'pho ni nying mtshams sbyor ba dang bcas pa'i sems can rnams kyi'o/ /bcom [(]ldanA [,]ldan [)]'das bsam gyis mi khyab par yongs su bsgyur ba'i 'chi 'pho ni dgra bcom pa dang rang sangs rgyas dang dbang thob pa'i byang chub sems dpa' yid kyi rang bzhin gyi lus can rnams kyi byang chub kyi snying la thug pa'i bar du lags so//rnam par chad pa'i 'chi 'pho ba'i dbang du byas te dgra bcom pa dang rang sangs rgyas rnams kyis bdag gi skye ba zad do snyam pa'i shes pa 'byung ba lags so zhes so/ /de'i phyir dgra bcom pa dang rang sangs rgyas rnams kyis nyon mongs pa thams cad spangs kyang ma rig pa'i bag chags ma spangs la de ma spangs pa'i phyir nyon mongs pa thams cad kyi bag chags mi spong la/de rnams kyang yang srid pa gzhan gzung bas byang chub sems dpa'i spyad pa spyod do/ /ci ltar yang srid pa 'dzin zhe na/ rgyu'i stobs dang rkyen gyi stobs las so/ /de la gang 'di nyon mongs pa'i bag chags ma spangs pa de rkyen no//rgyu ni zag pa dang bcas pa'i dge ba'i rtsa ba'i rgyu can yang srid pa len par byed pa zag pa med pa'i dge ba'i rtsa ba rnams te gang gsungs pa/ blo gros rgya mtsho de rnams 'khor bar 'ching bar byed pa dge ba'i rtsa ba dang mtshungs par ldan pa'i nyon mongs pa ci zhe na/'di lta ste bsod nams kyi tshogs yongs su tshol bas mi ngoms pa nyid dang bsams bzhin du srid par skye ba yongs su 'dzin pa dang / sangs rgyas phrad pa don du gnyer ba dang sems can yongs su smin pa'i ched du yongs su mi skyo ba dang dam pa'i chos 'dzin par 'dod pa dang / sems can gyi bya ba ci yod pa la 'grus pa nyid dang / chos la chags pa'i bag la nyal dang ma bral ba dang pha rol tu phyin pa kun du sbyor ba rnams yongs su mi gtong ba ste/ gang gis byang chub sems dpa' rnams nyon mongs par byed pa ni 'di rnams so/ /gsol pa bcom ldan 'das gal te dge ba'i rtsa ba lags na de ci'i slad du nyon mongs pa zhes brjod par bgyi/bka' stsal pa blo gros rgya mtsho de ltar ni/ 'di lta bu'i rang bzhin 'di rnams kyis byang chub sems dpa' rnams khams gsum ni nyon mongs pa las yang dag par byung ba'o/ /de la byang chub sems dpa' thabs la mkhas pa dang dge ba'i rtsa ba'i stobs bskyed pas bsams bzhin du khams gsum du sbyor te des na dge ba'i rtsa ba dang mtshungs par ldan pa'i nyon mongs pa zhes brjod do zhes pa dang /ji srid du khams gsum du sbyor ba ste sems nye bar nyon mongs par byed pas ni ma yin zhes pa la sogs pa'o//theg pa chen po rgyud bla mar yang / ma rig pa'i bag chags kyi sa dang / ma rig pa'i bag chags kyi sa'i rkyen can mtshan ma'i spros pa phra mo kun du spyod pas kun nas bslang ba'i zag pa med pa'i las la brten nas yid kyi rang bzhin gyi phung po yang dag par skye'o/ /de la ma rig pa'i bag chags kyi sa ni nyon mongs pa'i kun nas nyon mongs pa bzhin no//zag pa med pa'i las mngon par 'du byed pa ni las kyi kun nas nyon mongs pa bzhin no/ /yid kyi rang bzhin gyi lus rnam pa gsum mngon par grub pa ni skye ba'i kun nas nyon mongs pa bzhin no/ /de'i rkyen can bsam gyis mi khyab par yongs su bsgyur ba'i 'chi 'pho ni skye ba'i rkyen gyis rga shi bzhin no zhes so//ma rig pa'i bag chags kyi sa dang zag pa med pa'i las kyi rgyu can dang slar skye ba 'di rnams la yong ngo zhes dpal phreng seng ge'i nga ror gsungs so/ /bcom ldan 'das 'di lta ste nye bar len pa'i rkyen can zag pa dang bcas pa'i las kyi rgyu can srid pa gsum 'byung ngo //de bzhin kho nar bcom ldan 'das ma rig pa'i bag chags kyi sa'i rkyen can zag pa med pa'i las kyi rgyu can/ dgra bcom pa rnams dang rang sangs rgyas rnams dang dbang thob pa'i byang chub sems dpa' rnams kyi yid kyi rang bzhin gyi lus gsum 'byung ngo zhes rgyas par ro//sa brgyad pa la byang chub sems dpas chos thams cad la dbang thob par 'gyur ro/ /da ni 'di brjod par bya ste ci de'i bdag gi dngos po 'jig rten 'dir ram 'on te 'jig rten pha rol du/ ci 'dod pa'i khams sam gzugs sam/ gzugs med pa'am zhe na/ 'gro ba'am skye gnas sam srid pa'am 'jig rten gang du yang bgrang bar bya ba ma yin no//'o na bdag gi dngos po mngon par 'grub pa ci 'dra zhe na/ yid kyi rang bzhin te/ yid kyi rang bzhin ni sprul pa dang 'dra bar lta'i sprul pa ni ma yin no/ /yang srid pa zhes pa yang 'chi 'pho dang skye ba'i dbang las btags nas brjod de gang gi phyir dbang thob pa las sems can gyi don yod na 'gro ba dang skye gnas de dang der yang snang la de med na mi snang ngo //lus de yang zag pa med pa'i dge ba'i rtsa ba'i rnam par smin pas 'dus byas pa'i phyir 'dus byas dang / 'khor ba zhes par brjod la/ zag pa dang bcas pa'i las dang /nyon mongs pas 'dus ma byas pa'i phyir 'dus ma byas zhes pa dang mya ngan las 'das zhes par brjod do/ de bzhin du yang gsungs pa/ de'i phyir bcom ldan 'das 'dus byas pa'i 'khor ba yang mchis la/ 'dus byas kyang yin 'dus ma byas kyang yin pa'i mya ngan las 'das pa mchis so zhes so//bcom ldan 'das mar yang gsungs pa/ byams pa de'i skye ba las dang nyon mongs pa nye bar 'gro bar mi 'dogs kyi 'on kyang dgra bcom pa'i yang skye ba ni bsam gyis mi khyab pa'i sprul pa yongs su bsgyur bar gdags so/ /zhes so/ /bdag la chags pa dang ldan pa ni mngon par dga' ba sngon du 'gro ba kho nar sdug bsngal dang bde ba dor ba dang thob par 'dod pas mngal gyi gnas yongs su 'dzin no zhes pas nyon mongs pa rnams kyi nus pa ni khams gsum du skye bar brjod la de rnams la sogs pas 'bras bu khams gsum pa'i skye ba ldog ste zag pa med pa'i dbyings su skye ba ni ma yin no//lang kar gshegs par yang nyan thos dang rang sangs rgyas rnams 'khor ba'i rgya mtshor bying zhing chos kyi mtshan nyid la mngon par zhen pa'i dbang gis mtha' gcig tu mya ngan las mi 'da' ste/ ma rig pa'i bag chags kyi sa'i 'ching ba las ma grol gyi/ nyon mongs pa tsam las grol ba 'ba' zhig go//mya ngan las 'das pa med na'ang mar me shi ba'i ming can zag pa med pa'i ting nge 'dzin dang ldan pa las bskal pa ji srid par yang yongs su dag pa'i sangs rgyas kyi zhing du pad+ma'i sbubs su zag pa med pa'i khams la gnas so/ /de nas snang ba mtha' yas la sogs pa'i de bzhin gshegs pa rnams kyis byin gyis brlabs pa'i 'od zer rnams kyis sad par byas pa las/ting nge 'dzin de las langs pas sangs rgyas dang byang chub sems dpa' rnams kyi 'jig rten las 'das pa'i 'byor pa mthong ste/ de byang chub tu sems bskyed nas skye ba la dbang ba'i stobs las mi g.yo la sogs pa'i sa pa'i byang chub sems dpa' bzhin du sprul pa'i skye bas grol ba'i gnas skabs na dmyal ba la sogs pa spyod pa ltar 'gro zhing tshogs yongs su rdzogs te byang chub mchog thob par byed do zhes gsal bar rig par byas so//shes rab kyi pha rol tu phyin par yang gsungs pa/de gal te bla na med pa yang dag par rdzogs pa'i byang chub kyi ched du sems skyed par byed na bdag ni de rnams kyi dge ba'i rtsa ba'i bar chad mi byed do zhes so/ /de bzhin du ting nge 'dzin rgyal po'i mdor yang / 'gro ba 'di rnams thams cad sangs rgyas 'gyur/ /'di na snod kyi min sems can 'ga' yang med//ces so/ /gang gi phyir 'di dri ma rnams glo bur ba nyid kyi phyir dang sems rang bzhin gyis 'od gsal ba nyid kyis 'gro ba ma lus pa la sangs rgyas nyid rung ba yod pa kho na'o zhes mngon par dgongs pa bshad par rigs so/ /de bzhin du bcom ldan 'das kyis mdo rnams su/sems can thams cad de bzhin gshegs pa'i snying po can no zhes pa 'dis thams cad bla na med pa'i byang chub kyi go 'phang rtogs par rung ba nyid du yongs su bstan to/ /'phags pa byams pas kyang theg pa chen po rgyud bla mar/ thams cad la ni khyad med kyang / /de bzhin nyid ni dag gyur pa//de bzhin gshegs nyid de yi phyir/ /'gro kun de yi snying po can/ /zhes pa la sogs pa'o/ /de bzhin gshegs pa'i sgras kyang chos kyi dbyings gang zag dang chos kyi bdag med pa'i mtshan nyid can rang bzhin gyis 'od gsal ba brjod par bzhed pa nyid kyi phyir ro/ /gzhan yang theg pa zhes bya ba ni mya ngan las 'das pa'i grong khyer du 'gro ba'i lam de kho na nyid shes pa'i bdag nyid dang mya ngan las 'das pa la yang brjod de/'dis 'gro ba zhes pa dang der 'gro ba zhes byas nas so/ /de kho na nyid shes pa kho nas thar pa thob kyi gzhan las ma yin pa'i phyir ro/ /de kho na nyid de yang gcig kho na ste/ lta ba tha dad na yang dngos po de kho na nyid sna tshogs su dmigs pa med de ha cang thal bar 'gyur ba'i phyir ro/ /de'i phyir de kho na nyid ngo bo gcig gi yul can gyi ye shes kyang ngo bo gcig pa kho na'o/ /de yang dngos su na sangs rgyas dang byang chub sems dpa' de kho na nyid yang dag par mkhyen pa rnams kyi ye shes gang de nyid de kho na nyid kyi yul can te rnam pa thams cad kun du rmongs pa'i gnyen po yin pa'i phyir ro//nyi tshe ba'i shes pa rnams kyis de kho na nyid rtogs par 'gyur ba med de ha cang thal ba'i phyir te de lta na ni thams cad kho na nyid mthong bar 'gyur ro/ /de'i phyir gang zag dang chos la bdag med pa'i de kho na nyid mngon sum du byed pa'i ye shes de nyid mya ngan las 'das pa thob par byed pa'i lam yang dag pa ste gzhan ma yin no zhes pa de'i phyir theg pa gcig kho na'o//de mdor bsdus pa'i rab tu dbye ba ni/ 'phags pa lang kar gshegs pa'i mdor gsungs pa/ chos lnga rnams dang rang bzhin dang //rnam par shes pa brgyad nyid dang / /bdag med pa nyid gnyis dag ste/ /theg chen mtha' dag yongs su bsdus/ /zhes so/ /de la chos lnga ni ming dang rgyu mtshan dang rnam par rtog pa dang de bzhin nyid dang yang dag pa'i ye shes so/ /de la kun rdzob kyi bden pa rgyas par bstan pa las ming dang rgyu mtshan dang rnam par rtog pa rnams gsungs so//don dam pa'i bden pa bstan pa las dngos dang btags pas de bzhin nyid dang yang dag pa'i ye shes dag bshad do/ /rang bzhin rnam pa gsum ni kun brtags dang gzhan dbang dang yongs su grub bo/ /rnam par shes pa brgyad rnams ni kun gzhi'i rnam par shes pa dang nyon mongs pa can gyi yid dang mig la sogs pa'i rnam pa drug go//bdag med pa nyid gnyis ni gang zag gi bdag med pa dang chos kyi bdag med do/ /de la kun brtags dang gzhan dbang dag dang rnam par shes pa brgyad gsungs pa rnams kun rdzob kyi bden pa bstan pa las so//yongs su grub pa'i rang bzhin dang bdag med pa gnyis gsungs pa ni don dam pa'i bden par brjod pa las so/ /bden pa gnyis la 'jug pa'i mdor yang nyon mongs pa thams cad kyi rtsa ba dngos por mngon par zhen pa yin pa'i phyir chos thams cad kyang dngos nyid med par sgom pa kho nas nyon mongs pa rnams spong gi lam gzhan gyis ma yin no zhes bstan te/gang gsungs pa 'jam dpal ci ltar nyon mongs pa rnams 'dul bar 'gyur ci ltar yongs su shes par 'gyur/ 'jam dpal gyis smras pa/ don dam par shin tu ma skyes shing ma byung la dngos po med pa'i chos thams cad la gang kun rdzob tu yod pa ma yin pa'i phyin ci log ste de las kun rdzob tu rtog pa dang rnam par rtog pa'o//de las tshul bzhin ma yin par yid la byed pa'o/ /de las bdag tu sgro 'dogs pa'o/ /de las lta ba'i kun nas dkris pa'o/ /de las nyon mongs pa rnams 'byung ngo / /lha'i bu gang yang chos thams cad don dam par shin tu ma skyes shing ma byung bar shes pa med pa'i tshul gyis shes pa de don dam par phyin ci ma log pa'o//de ni kun du mi rtog par rnam par mi rtog go/ /de ni tshul bzhin du sbyor ro/ /de ni don dam par yod pa ma yin pa sgro 'dogs par mi 'gyur ro/ /de la lta ba'i kun nas ldang bar mi 'gyur ro//de ltar skye ba med pa la gnas pa de nyid kyi nyon mongs pa rnams mthong ba med pa'i tshul gyis shin tu 'dul bar blta bar bya'o/ /gang gi tshe nyon mongs pa rnams snang ba med pa'i shes rab kyi ye shes kyis don dam par shin tu stong pa dang shin tu mtshan ma med pa dang / don dam par dngos po rnams shin tu ma skyes shing ma byung bar rab tu shes pa med pa'i tshul gyis rab tu shes pa de'i tshe lha'i bu nyon mongs pa rnams rab tu shes pa med pa'i tshul gyis yongs su shes par 'gyur ro//'di lta ste gang sbrul dug can gyi rigs klog pa des de'i dug zhig par byed do/ /de bzhin du gang nyon mongs pa rnams kyi rigs shes pa de'i nyon mongs pa rnams shin tu mi dmigs pa'i tshul gyis rab tu zhi bar 'gyur ro//lha'i bu don dam par shin tu ma skyes shing ma byung dngos po med pa'i chos thams cad la gang kun du rtog pa 'di ni nyon mongs pa rnams kyi rigs so zhes so/ /de'i phyir dngos por mngon par zhen pa ni nyon mongs pa dang las dang skye ba'i kun nas nyon mongs pa'i dra ba mtha' dag rab tu skye ba'i rtsa ba nyid yin pa'i phyir/de'i gnyen por gyur pa nges par legs pa'i grong khyer du 'jug par 'gyur ba shes rab kyi pha rol tu phyin pa'i ming can dngos po ma lus pa stong pa nyid du bsgom pa 'di gcig tu kho nar zad pas de'i phyir de don du gnyer ba rnams kyis lam ngan pa'i rnam par rtog pa mtha' dag bsrings te spangs nas bdag nyid chen po rnams kyis shin tu gsal ba'i rigs pa dang lung gi sgron ma'i tshogs kyis rab tu snang ba mdzad pa'i phyir dang skye bo mkhas pa'i ded dpon ma lus pa rnams kyis bgrod cing rjes su bgrod pa'i phyir de kho na rtag tu gus pas bdag 'dod pa rnams kyis nges par bsten par bya'o//de ltar theg pa chen po'i bdag nyid theg pa gcig kho na dang chos thams cad don dam par ngo bo nyid med pa nyid du grub po/ /de kho na bcom ldan 'das ma shes rab kyi pha rol tu phyin pa'o//de kho na stong pa dang snying rje dbyer med pa don dam pa byang chub kyi sems zhes bya'o/ /thub pa'i dgongs pa'i rgyan las byang chub kyi sems kyi snang ba'i le'u ste dang po'o// //de ltar 'gro ba thams cad sgrib gnyis spong ba'i skal ba dang ldan pa'o zhes nyon mongs pa dang shes bya'i sgrib pa spang ba'i ched du rtog pa dang ldan pas bsgom pa la 'bad par bya'o//de yang thun mong dang de las cig shos so thabs dang shes rab de'i bdag nyid du sgom pa ni nyan thos dang rang sangs rgyas dang byang chub sems dpa' thams cad kyi thun mong ste gang gi phyir sgom pa ni 'bras bu mngon par 'grub pa'i ched du yin la 'bras bu yang gtso bor gzhan la phan pa thun mong ba'o//de yang sems can gyi phung po mtha' dag sgrib pa gnyis spangs pas kun du bzang po nyid yang dag par 'grub pa'o/ /de yang yang dag par rdzogs pa'i sangs rgyas nyid med na med ces de yang de'i don nyid kyi phyir 'bras bu'o//de yang bsod nams dang ye shes kyi tshogs kyis bsdus pa pha rol tu phyin pa'i mtshan nyid can rgyu'i gnas skabs nges par byed pa'i cha dang mthun pa dang thar pa'i cha dang mthun pa'i gnas skabs med na med ces pas 'di thams cad ni thabs dang shes rab gnyis su med pa sgom pa kho na las bsgrub par bya ba ste/ji skad du 'phags pa shes rab kyi pha rol tu phyin par gsungs pa/ nyan thos kyi sa la slob par 'dod pas kyang shes rab kyi pha rol tu phyin pa 'di kho na mnyan par bya'o/ /ji srid shes rab kyi pha rol tu phyin pa 'di kho na la rnal 'byor du bya'o/ /de bzhin du rang sangs rgyas kyi sa dang ji srid sangs rgyas kyi sa la yang zhes pa la sogs pa rgya cher ro//shes rab dang thabs gnyis su med pa'i rnal 'byor de yang byang chub kyi sems kyi bdag nyid yin pa'i phyir bsod nams thams cad kyi rang bzhin no/ /de'i phyir de goms pas 'bras bu thams cad mngon par 'grub po//de nyid kyi phyir theg pa gcig tu bstan pa yang shin tu nges pa ste shes rab dang thabs gnyis su med pa'i ye shes kyi rang bzhin chos kyi dbyings las ma gtogs pa'i gzhan pa'i theg pa 'di na yod pa ma yin pas so zhes bsgrubs zin to/ /de'i phyir bcom ldan 'das kyis bden pa la sogs pa'i dbye bas bsgom pa bstan pa ni gdul bya'i skye bo'i mos pa tha dad pa las ming tsam tha dad pa ste 'di ni de rnams su 'jug pa'i don no//de'i phyir ming de dang des mdo dang chos mngon pa la sogs par de dang de la sems can rnams kyi sems kyi 'jug pa rjes su 'jug pa'i ched du de kho na nyid de nyid tha dad med kyang tha dad bzhin du mdzad nas sangs rgyas bcom ldan 'das rnams kyis nye bar bstan to//de la dbang po rtul po rnams la de kho na nyid de nyid sgro btags pa cung zad bzlog pas mi rtag pa la sogs pa'i sgra rnams kyis gsungs so/ /dbang po 'bring po rnams la ni gzung ba dang 'dzin par sgro btags pa bzlog pas rang rig pa tsam du bstan to//dbang po rnon po rnams la sgro btags pa ma lus pa bzlog pas stong pa nyid dang spros pa med pa la sogs pa'i sgra rnams kyis nye bar bstan to/ /de tshad ma rnam 'grel du gsungs pa/ stong nyid lta bas grol 'gyur te/ /bsgom pa lhag ma de'i don yin//zhes so/ /shes rab dang thabs gnyis su med pa sgom pa'i gzhan byang chub kyi sems kho na las/ thams cad kyi mngon par mtho ba dang nges par legs pa'i mtshan nyid kyi 'bras bu mtha' dag 'grub po zhes pa 'di ni gnas pa'o/ /sdug bsngal la sogs pa'i bden pa sgom pa ni de la gzhug pa'i don kho na'o//de la rtag pa dang bde ba dang bdag gir sgro 'dogs pa bzlog pas mi rtag pa dang sdug bsngal ba dang stong pa dang bdag med pa'i rnam pa rnams kyi bsgom par bya ba'i de kho na nyid la sdug bsngal gyi bden pa zhes brjod do/ /de bzhin du las dang dbang phyug la sogs pa rgyu nyid med pa'i phyir chos thams cad rgyu med pa dang dus la sogs pa sems med pa dang rtag pa'i dngos po'i rgyu can nyid kyi phyir rgyu gcig pa dang gtso bo dang sgra'i tshangs pa la sogs pa'i rgyu can nyid kyi phyir yongs su 'gyur ba'i dngos po'i rgyu can dang dbang phyug la sogs pa'i rgyu can nyid kyi phyir blo dang ldan pa'i rgyu can no zhes pa de'i gnyen por rgyu dang kun 'byung ba dang rab tu skye ba dang rkyen zhes pa'i ldog pa bzhi ste de rnams kyi bsgom par bya ba ni kun 'byung gi bden pa zhes tha snyad du bya'o//thar pa med pa dang thar pa sdug bsngal ba dang bsam gtan gyi bde ba kho na gya nom pa dang grol ba yang slar 'khor bar ltung ngo zhes pa'i gnyen por 'gog pa dang zhi ba dang gya nom pa dang nges par 'byung ba zhes pa ldog pa bzhi ste de rnams kyi bsgom par bya ba ni 'gog pa'i bden pa zhes par tha snyad du bya ste sngon po la sogs pa las gzhan pa'i 'gog pa ma mthong ba'i phyir ro//de bzhin du bdag yod pa'i phyir bdag med pa'i mtshan nyid can gyi lam med pa dang 'di lam ngan pa dang lam gzhan yang yod pa dang slar ldog par yang lam mo zhes pa de'i gnyen por lam dang rigs pa dang bsgrub pa dang nges par 'byin pa zhes pa'i ldog pa bzhi ste de rnams kyi bsgom par bya ba ni lam gyi bden pa zhes bstan te/sngon po la sogs pa las gzhan pa'i bdag med pa nyid med pa'i phyir ro//de ltar de kho na nyid la dbye ba med kyang ldog pa tsam gyis byas pa'i dbye ba las sdug bsngal la sogs pa'i bden pa tha dad par bstan la slar yang phye bas mi rtag pa la sogs pa'i rnam pa rnams kyis rnam pa bcu drug tu yang ngo / / de la mdo las/ skye ba sdug bsngal lo rga ba ni sdug bsngal lo zhes pa la sogs pas 'du byed kyi sdug bsngal dang sdug bsngal gyi sdug bsngal dang rnam par 'gyur ba'i sdug bsngal rnams kyi sdug bsngal gyi bden pa ste 'bras bur gyur pa'i nye bar len pa'i phung po lnga rnams so/ /de rnams kho na rgyur gyur pa ni kun 'byung gi bden pa'o//sred pa dang las yongs su zad pa las gang sdug bsngal shin tu skye ba med pa'i mya ngan las 'das pa ni 'gog pa'i bden pa'o/ /de thob pa'i thabs ni lam gyi bden pa'o/ /'di rnams kyi rim pa yang ji ltar mngon par rtogs pa ste/ de ltar ni dang po rnam par dpyod pa'i gnas skabs na sdug bsngal la rtog go//phyi nas 'di'i rgyu ci zhes kun 'byung la'o/ /'di'i 'gog pa ci zhes 'gog pa la'o/ /'di'i lam ci zhes lam la ste/ nad mthong na de'i gzhi dang zad pa dang sman tshol ba bzhin no/ /de la yon tan gyi lo tog mtha' dag tshul khrims sa dang 'dra ba la nges par brten no zhes rtogs nas so sor thar pa'i sdom pa yang dag par blangs pas tshul khrims la gnas par gyur pa sgom pa la sbyor ba'i dus na dam pa ma yin pa dang 'dres pa'i rnam par rtog pa rnams yongs su spong ngo //de la 'dod chags la spyod pas dang por ting nge 'dzin gyi don du mi sdug pa sgom par byed do//'dod chags kyang rnam pa dgur bcom ldan 'das ma chen mor bstan te/ 'di lta ste dbyibs la chags pa dang 'khrig pa'i dngos po la chags pa dang / tsan+dan la sogs pa'i dris bskyed pa'i lus la chags pa dang / rgyan gyis bskyed pa'i lus mdzes pa la chags pa dang /lus kyi kha dog la chags pa dang / sha rgyas pa la chags pa dang / yan lag dang nying lag gi sgeg pa la chags pa dang / so'i mdzes pa phun sum tshogs pa la chags pa dang / kha dog dang dbyibs la chags pa'o zhes so/ /de'i gnyen por grangs ji lta bar mi sdug pa rnam pa dgu sgom pa ste/dper na sbos pa bzhin du rnam par bam pa'i 'du shes dang / yan lag so sor gyur pa nyid kyis 'bus gzhigs pa'i 'du shes dang / dri nga zhing rnag gi rang bzhin nyid kyis na rnam par rnags pa'i 'du shes dang / pags pa bshus pa ltar rnam par dmar ba'i 'du shes dang /rnam par sngos pa'i 'du shes dang / mi gtsang ba'i phung po'i 'du shes dang so sor ring du gyur pa nyid kyis rnam par 'thor ba'i 'du shes dang / rus pa'i 'du shes dang / rnam par tshig pa'i 'du shes so zhes pa'o/ /rnam par rtog pa la dpyod pas ni dbugs rngub pa dang / 'byung ba rjes su dran pa goms par byed do//dbugs rngub pa ni dbugs sdud pa ste 'jug pa'i rlung ngo / /dbugs 'byung ba ni dbugs spro ba ste phyir 'gro ba'i rlung ngo / /de la dmigs pa'i shes rab ni dbugs rngub pa dang 'byung ba rjes su dran pa ste dran pa'i rgyu nyid kyi phyir dran par brjod do/ /de la lus dang sems dag brlan nas dbugs rngub pa dang 'byung ba tsam la sems gtad de dbugs 'byung ba dang dbugs rngub pa dag so sor gcig dang gnyis dang /ji srid bcu'i bar du rnam par g.yeng ba med par bgrang bar byed de/ de bzhin du ting nge 'dzin thob kyi bar du'o/ /'di ni rlung 'ba' zhig kho na ma yin gyi de rnams ni 'byung ba chen po bzhi dang de la brten pa'i phung po las gyur pa dang sems dang sems las byung ba rnams kyang ngo zhes phung po lngar nye bar rtog par byed do//rlung la dmigs pa'i blo bsgyur nas gong nas gong du dge ba'i rtsa ba rnams la kun du sbyor ro/ /de nas zhi gnas rdzogs pa ni lus dang tshor ba dang sems dang chos dran pa nye bar gzhag pa rnams gzugs ni gzugs su rung ba'i mtshan nyid can no zhes pa la sogs pa rang gi mtshan nyid kyis dang /stong pa dang bdag med pa nyid dag spyi'i mtshan nyid de des bsgom par bya'o/ /de la dang po rang gi mtshan nyid kyi rigs can lus dran pa nye bar gzhag pa la 'jug ste de yang mi gtsang bar 'du shes phyin ci log gi gnyen por ro//de nas tshor ba dran pa nye bar gzhag pa la ste de yang sdug bsngal la bde bar phyin ci log gi gnyen po'o/ /de nas kyang sems dran pa nye bar gzhag pa la ste de yang mi rtag pa la rtag par phyin ci log gi gnyen po'o/ /de'i de ma thag tu chos dran pa nye bar gzhag pa la ste de yang dad pa la sogs pa chos tsam la dmigs pa nyid kyi phyir bdag med pa la bdag tu 'du shes pa'i gnyen po'o//de nyid kyi phyir mdzod du gsungs pa/ phyin ci log gi gnyen por bzhi/ /zhes so/ /gang gi tshe rang gi mtshan nyid 'dzin pas chos zhes byas nas phung po lnga la dmigs pa kho na chos dran pa nye bar gzhag pa yin pa de'i tshe mi rtag pa dang sdug bsngal ba dang stong pa dang bdag med pa'i rnam pa rnams kyis chos thams cad sgom par byed do//mi rtag pa la sogs pa'i rnam pa bzhi nang du 'dus pa skad cig ma nyid dang gang zag gi bdag med pa'i rnam pa dag tu 'am/gang zag gi bdag med pa nang du 'dus pa'i skad cig ma nyid kyi rnam par chos thams cad sgom par byed do/ /dran pa kho na nye bar 'jog pa yin pas dran pa nye bar gzhag pa'o/ /gang rnams 'di dran pa nye bar 'jog pas na zhes smra ba de rnams ni shes rab dran pa nye bar gzhag par 'dod do//de'i rjes su mi dge ba dang dge ba skyes pa dang ma skyes pa dag go rims bzhin du spong ba dang mi skye ba dang 'phel ba dang bskyed pa'i rgyur brtson 'grus yang dag par spong ba rnams te 'di rnams kyis sems yang dag par 'jog pa'i phyir yang dag 'jog bzhi rnams kyang ngo / /de nas brtson 'grus dang ldan pa'i sems las su rung bar 'gyur zhes pas 'dun pa'i ting nge 'dzin dang /brtson 'grus kyi ting nge 'dzin dang / sems kyi ting nge 'dzin dang / dpyod pa'i ting nge 'dzin zhes pa 'jig rten las 'das pa'i rdzu 'phrul gyi rkang pa gnas nyid kyi phyir rdzu 'phrul gyi rkang pa bzhi rnams so//de ltar ni 'dun pa drag po kho na legs par sbyor ba la sems rtse gcig pa'i mtshan nyid kyi ting nge 'dzin skyed par byed pa dang yang dag par spong ba'i brtson 'grus rnams kyis mi dge ba spong zhing dge ba bskyed pa la legs par sbyor ba dang zhi gnas dang rab tu 'dzin pa dang btang snyoms kyi rgyu mtshan sems rnams kyis yongs su sbyong ba las dang /ci bdag mi dge ba phra mo rnams kun du spyod dam bdag yongs su brtag par bya'o zhes yang dag par nye bar 'jog pa las te de 'di rnams ni 'dun pa la sogs pa'i ting nge 'dzin rnams so/ /'di rnams skyes pa kun nas dkris pa rnams ring du gyur pa na/ bag la nyal rnams spong ba'i ched du slar yang yang dag par spong ba rnams kyis brtson 'grus rtsom pa la spong ba 'du byed brgyad rnams 'byung bar 'gyur te/'dun pa dang brtson 'grus dang dad pa dang shin tu sbyangs pa dang dran pa dang shes bzhin dang sems pa dang btang snyoms so/ /de la nam zhig 'jig rten pa dang 'jig rten las 'das pa'i snyoms 'jug rnams thob par 'gyur snyam pa ni 'dun pa'o//mi dge ba thams cad 'joms pa'i ched du brtson 'grus so/ /gong ma dang khong du chud pa'i chos la dad pa dang de sngon du 'gro ba'i shin tu sbyangs pa dang de la shes bzhin gyi phyogs kyi dran pa dang lhag mthong gi phyogs shes bzhin dang de la yang sems mngon par 'du byed pa'i sems pa dang kun nas nyon mongs pa med pa'i btang snyoms so//de ltar 'dun pa la sogs pa'i ting nge 'dzin dang spong ba'i 'du byed rnams dang ldan pa'i rdzu 'phrul gyi rkang pa nyon mongs pas dben pa/ srid pa las 'dod chags dang bral ba/ sdug bsngal 'gog pa la brten pa/phung po thams cad nye bar spong bas yongs su gyur pa sgom mo/ /de nas yongs su sbyang ba byas pa las nges par 'byed pa'i cha dang mthun pa bden pa bzhi'i yul can rnam pa bcu drug pa bsgoms pa las byung ba'i dge ba'i rtsa ba rnam pa bzhi'o/ /'dir drod dang rtse mo'i rang bzhin dad pa dang brtson 'grus dang dran pa dang ting nge 'dzin dang shes rab ste lnga ni 'jig rten las 'das pa'i chos bskyed pa la dbang byed pa thob pa yod na dbang po rnams su 'gyur te/rdzu 'phrul gyi rkang pa rnams la rab tu sbyor ba ni rtags mthong ba las gong ma'i khyad par skyes pa na nges pa skyes te ston pa dang nyan thos la sogs pa rnams kyi rtog pa la mngon par yid ches pa skye ste de ni 'di'i dad pa'i dbang po'o//dad pa lhag par las brtson 'grus la sogs pa rnams lhag pa'o/ /de nas dbang po lnga rnams sgom bzhin pa kho na de bzhin du 'phel te ji lta bar bdud la sogs pa mi mthun pa'i phyogs rnams kyis mi brdzi ba nyid kyi phyir dang zil gyis mi non pa nyid kyi phyir stobs kyi ming thob ste stobs rnams ni bzod pa dang chos mchog gi rang bzhin no//de nas chos mchog gi de ma thag tu 'phags pa'i bden pa bzhi'i yul can bden pa bzhi'i bden pa mngon par rtogs pa zag pa med pa skad cig bcu drug yang dag par skye ste/'di lta ste sdug bsngal la chos shes pa'i bzod pa dang chos shes pa dang rjes su shes pa'i bzod pa dang / rjes su shes pa ste/ de bzhin du kun 'byung dang 'gog pa dang lam la'o zhes pa bden pa bzhi la dmigs pa'i skad cig bcu drug rnams so/ /de la chos shes pa'i bzod pa dang chos shes pa'i skad cig brgyad rnams ni 'dod pa na spyod pa'i nyon mongs pa'i gnyen po'o//rjes su shes pa'i bzod pa dang rjes su shes pa'i skad cig rnams ni gzugs dang gzugs med pa na spyod pa'i nyon mongs pa'i gnyen po'o/ /de la bzod pa'i skad cig thams cad rnams rkun po 'byin pa bzhin du nyon mongs pa spong ba'i phyir/bar chad med pa'i lam gyi rang bzhin shes rab kyi bdag nyid kyis sdug bsngal la sogs pa mthong ba'i rang bzhin nyon mongs pa'i thob pa rnams gcod pa'o/ /shes pa'i skad cig ma rnams kyang nyon mongs pa spangs pa na sgo 'phar gcod pa'i tshul gyis bya ba dang ldan pa rnam par grol ba'i lam gyi rang bzhin sdug bsngal la sogs pa mthong ba nges pa'i bdag nyid nyon mongs pa dang bral ba'i thob pa rnams dang lhan cig skyes zhes kha cig go//gzhan rnams ni rjes su shes pa rnams kho na nges pa'i bdag nyid de bcu gnyis rnams ni mngon du byed pa'o zhes zer ro//de dang 'di yang dpyod par 'gyur ro/ /'dir skad cig bco lnga rnams ni mthong ba'i lam ste/ de la rnal 'byor pa rgyun du zhugs pa'i 'bras bu la zhugs par brjod do/ /lam la rjes su shes pa ni bsgom pa'i lam ste/ skad cig ma de la rgyun du zhugs pa kho na'o/ /rgyun ni mya ngan las 'das pa'i mtshor 'bab pa'i lam ste de la zhugs pa'o//gal te thogs na mi'i srid pa bdun kho na dang / bar ma do'i srid pa bdun dang / de bzhin du lha rnams su'o zhes pa srid pa nyi shu rtsa brgyad du so sor mtshams sbyor ro zhes kha cig go/ /bdun kho nar ro zhes gzhan dag go/ /de'i phyir de ltar thogs na srid pa lan bdun pa zhes brjod do//de la snga na med pa shes par bya 'dod pa yod la blta bar bya ba ni med do/ /'dir yang mthong ba'i lam la yang dag pa ji lta ba bzhin rtogs pa ni byang chub dang rdzogs pa'i byang chub ste de'i yan lag byang chub kyi yan lag bdun rnams so sor thob ste dran pa dang chos rnam par 'byed pa dang brtson 'grus dang dga' ba dang shin tu sbyangs pa dang ting nge 'dzin dang btang snyoms so//de rnams ni rdzogs pa'i byang chub kyi yan lag kyang ngo / /de la chos rnam par 'byed pa dang brtson 'grus dang dga' ba zhes pa gsum rnams lhag mthong gi phyogs so//shin tu sbyangs pa dang ting nge 'dzin dang btang snyoms rnams zhi gnas kyi phyogs so/ /dran pa ni gnyis ka'i phyogs so/ /dga' ba ni gang dmigs pa de kho na la yid bde ba'o/ /btang snyoms ni lhun gyis grub pa 'byung ba'o/ /dbus dang mtha' rnam par 'byed par yang gsungs pa/rang bzhin yan lag gnas yan lag /gsum pa nges 'byung yan lag ste/ /bzhi pa phan yon yan lag go/ /rnam gsum nyon mongs med yan lag /'di la gzhi dang gnas dang ni/ /rang bzhin gyis ni bstan par 'dod/ /ces so/ /byang chub kyi gnas dran pa'o/ / rang bzhin chos rnam par 'byed pa'o/ /nges par 'byung ba brtson 'grus so/ /phan yon dga' ba'o/ /kun nas nyon mongs pa'i rgyu gnas ngan len gyi gnyen po shin tu sbyangs pa ste/ de'i phyir kun nas nyon mongs pa med pa'i gzhi'o/ /gnas ni ting nge 'dzin no/ /rang bzhin ni btang snyoms so//de la sdug bsngal mthong bas spang bar bya ba bcu ste/ 'dod chags dang / khong khro dang / nga rgyal dang / ma rig pa dang the tshom ste lnga rnams dang / 'jig tshogs dang / mthar 'dzin pa dang / log par lta ba dang / lta ba mchog tu 'dzin pa dang / tshul khrims dang / brtul zhugs mchog tu 'dzin pa'i lta ba rnams te lnga'o//de rnams kho na las bdun ni kun 'byung dang 'gog pa mthong bas spang bar bya ba ste/ 'jig tshogs dang / mthar 'dzin pa dang / tshul khrims dang / brtul zhugs mchog tu 'dzin pa'i lta ba ma gtogs pa'o/ /lam mthong bas spang bar bya ba brgyad de de rnams tshul khrims dang brtul zhugs mchog tu 'dzin pa dang bcas pa'o//bsgom pas spang bar bya ba bzhi ste/ 'dod pa'i khams kyi 'dod chags dang / khong khro dang / nga rgyal dang / ma rig pa'o/ /gzugs dang gzugs med pa'i khams dag na yang thams cad du de rnams kho na khong khro bor ba'o/ /de nyid kyi phyir dgu bcu rtsa brgyad du 'gyur ro//de ltar sdug bsngal la sogs pa'i bden pa mthong ba rnams la slar 'bad pas sgom pa de nyid lam ste/ phung po gsum pa 'phags pa'i lam yan lag brgyad pa de sgom ste/ yang dag pa'i lta ba dang rtog pa dang ngag dang las kyi mtha' dang 'tsho ba dang rtsol ba dang / dran pa dang ting nge 'dzin gyi yan lag rnams so//de la yang dag pa'i lta ba dang rtog pa dang rtsol ba rnams shes rab kyi phung po'o/ /yang dag pa'i ngag dang las kyi mtha' dang 'tsho ba rnams tshul khrims kyi phung po'o/ /yang dag pa'i dran pa dang ting nge 'dzin dag ting nge 'dzin gyi phung po'o/ /de la yang dag pa'i lta ba ni zag pa med pa'i shes rab bo/ / yang dag pa'i rtog pa ni dge ba'i kun du rtog pa'o/ /yang dag pa'i ngag ni ngag gi dge ba'i las kyi lam bzhi rnams so/ /yang dag pa'i las kyi mtha' ni lus kyi dge ba gsum rnams te spong ba'i rang bzhin no/ /yang dag pa'i 'tsho ba ni tshul 'chos dang kha gsag dang log pa'i 'tsho ba spong ba'o/ / yang dag pa'i rtsol ba ni brtson 'grus so/ /yang dag pa'i dran pa ni dmigs pa mi brjed pa'o/ /yang dag pa'i ting nge 'dzin ni bsam gtan bzhi'o/ /dbus dang mtha' rnam par 'byed par yang gsungs pa/ yongs su gcod dang go byed dang / /rnam gsum gzhan yid ches par byed/ /mi mthun phyogs kyi gnyen por yang //lam gyi yan lag de rnams brgyad/ /lta dang tshul khrims yo byad bsnyungs/ /gzhan la rnam par rig byed 'dod/ /nyon mongs nye ba'i nyon mongs dbang / /mi mthun phyogs kyi gnyen po nyid/ /ces so/ /de la mthong ba'i lam yongs su gcod pa ni yang dag pa'i lta ba'o/ /gzhan go bar byed pa ni yang dag pa'i rtog pa dang /yang dag pa'i ngag ste yang dag pas kun nas bslang ba'i tshig gis de go bar byed pa'i phyir ro/ /gzhan yid ches par byed pa'i yan lag rnam pa gsum ni yang dag pa'i ngag dang las kyi mtha' dang 'tsho ba rnams so/ /de rnams kyis rim pa ji lta bar gsum rnams la yid ches par 'gyur te/ brjod pa dang 'brel pa'i gtam rnam par nges pas shes rab la'o//bya ba ma yin pa mi byed pa las tshul khrims la'o/ /chos tsam gyi tshod zin par chos gos la sogs pa la tshol ba las kyang yo byad bsnyungs pa la'o/ /mi mthun phyogs kyi gnyen po'i yan lag gsum rnams ni yang dag pa'i rtsol ba dang dran pa dang ting nge 'dzin te/de rnams ni rim pa bzhin du nyon mongs pa bsgom pas spang bar bya ba dang / nye ba'i nyon mongs pa bying rgod dang / dbang gi mi mthun pa'i phyogs yon tan khyad par can mngon par sgrub pa'i gegs kyi gnyen po'o/ /'phags pa ni slob pa rnams te de rnams kyi nyon mongs pa las grol ba mngon du bya ba'i ched du lam 'di bskyed de/de'i phyir 'di 'phags pa rnams kyi yan lag brgyad pa zhes pas 'phags pa'i lam yan lag brgyad do/ /yan lag 'di rnams langs pa'i yang ste/ lam la mnyam par gzhag pa la ni yang dag pa'i rtog pa dang / ngag dang / las kyi mtha' dang / 'tsho ba dang dran pa rnams mi srid do//'o na lam la snyoms par zhugs pa de'i tshe yan lag brgyad sgrub pa'i chos su ci ltar 'gyur zhe na/ 'jig rten las 'das pa'i chos thob pas de'i rang bzhin zag pa med pa'i rnam par rig byed ma yin pa thob ste/ gang thob pas langs kyang slar yang log pa'i ngag la sogs la mi 'jug cing yang dag pa'i ngag la sogs pa rnams la yang 'jug go//de'i phyir rgyu mtshan la rgyu mtshan can nye bar btags pa las yan lag brgyad nyid de/ gzhan du na lam la mnyam par gzhag pa 'gal lo/ /lam 'di yang tshangs pa mya ngan las 'das pa la phan par spyod pas tshangs par spyod pa ste/ mdor tshangs par spyod pa gang zhe na/ 'phags pa'i lam yan lag brgyad do zhes gsungs pa'i phyir ro/ /dran pa nye bar gzhag pa la sogs pa sde bdun po sum cu rtsa bdun po 'di rnams byang chub sems dpa' rnams kyis kyang bsgom par bya ste khyad par ni 'chad par 'gyur ro/ /byang chub ni zad pa dang mi skye ba shes pa dag ste de'i phyogs rjes su mthun pa rnams so zhes pa byang chub kyi phyogs rnams so//'dir bsgom pa'i lam la 'dod khams su 'dod chags dang / khong khro dang / nga rgyal dang / ma rig pa rnams dang / gzugs dang gzugs med pa dag tu 'dod chags dang / nga rgyal dang / ma rig pa rnams so zhes pa bcu'o//slar yang so sor rnam pa dgu ste/ chung ngu dang / 'bring dang / chen po rnams la slar yang so sor chung ngu dang / 'bring dang / chen po nyid kyis so/ /'dod pa'i khams dang bsam gtan bzhi dang gzugs med bzhi'i sa dgu rnams su ste/ so sor rnam pa brgyad cu rtsa gcig tu 'gyur ro//khong khro ni dgu kho na'o/ /de bzhin du bsgom pa'i lam yang chung ngu dang / 'bring dang / chen po ste slar yang so sor chung ngu dang / 'bring dang / chen po nyid kyis rnam pa brgyad cu rtsa gcig go/ /rnam pa 'di rnams kyang nyon mongs pa'i rnam pa re re spang bar bya ba la/ so sor bar chad med pa dang rnam grol gyi lam gyi rang bzhin no//de la 'dod par gtogs pa'i rnam pa lnga'i bar spangs pa ji srid pa ni lan cig phyir 'ong ba la zhugs pa'o/ /drug pa spangs na ni lan cig phyir 'ong ba'o/ /bdun pa dang brgyad pa'i rnam pa spangs pa ni phyir mi 'ong ba la zhugs pa'o/ /'dod pas bsdus pa'i rnam pa dgu spangs pa ni phyir mi 'ong ba'o//srid pa'i rtse mo'i bar gyi cha brgyad pa zad par byed pa ni dgra bcom pa nyid la zhugs pa'o/ /dgu pa spong ba'i bar chad med pa'i lam ni rdo rje lta bu zhes tha snyad du bya'o/ /rnam par grol ba'i lam ni zad pa shes pa'o/ /zad pa shes pa skyes nas ni chung ngu dang / 'bring dang /chen po'i bye brag tha dad pa thams cad khams gsum pa'i 'dod chags dang bral ba rnams su 'gyur ro/ /'di rnams kyis yang sa bcu rnams te/ dkar po rnam par mthong ba'i sa lhag mthong 'ba' zhig gi gnas skabs ngos 'byed cha mthun la dang rigs kyis chos mchog gi gnas skabs dang / brgyad pa'i sa rgyun du zhugs pa'i 'bras bu la zhugs pa dang /mthong ba'i sa skyes pa bdun lus pa'i rgyun du zhugs pa dang / de las gong du 'khor ba dang 'gal ba bde ba'i ye shes thob pa'i phyir lan cig phyir 'ong ba la zhugs pa'i sa dang / bsrabs pa'i sa lan cig phyir 'ong ba dang / phyir mi 'ong ba'i 'bras bu la zhugs pa'i sa dang /'dod chags dang bral ba'i sa ni phyir mi 'ong ba dang / dgra bcom pa nyid kyi 'bras bu la zhugs pa'i sa dang byas pa rtogs pa'i sa ni dgra bcom pa'i ste bya ba byas so zhes shes pa'i phyir bya ba byas pa dgra bcom pa de'i sa zhes byas nas so/ /nyan thos kyi sa ni nyan thos kyi rnam pa bcu po de kho na'o//rang sangs rgyas kyi sa ni rang sangs rgyas kyi sa'o/ /'ga' zhig tu rigs dang brgyad pa dang mthong ba dang bsrabs pa dang 'dod chags dang bral bar byas pa rtogs pa'i sa rnams nyan thos kyi ste gzhan gyi ma yin no zhes theg pa gsum rnam par gzhag pa la dgongs pas/ drug po rnams kyang nyan thos kyis zhes grub pa'i don du drug po rnams su ma 'dus pa zhugs pa gsum gyis zhes rnam par gzhag ste de'i tshe nyan thos kyi sa rnam pa bdun no//khams gsum gyi 'dod chags dang bral ba yang 'di rnams kyi mya ngan las 'das par brjod pa de 'dir nyon mongs pa rnams nges par song zhes byas nas so/ /mya ngan 'das dbyings kyang ste/mya ngan las 'das pa'i dbyings ni mya ngan 'das dbyings te/ zag pa thams cad zad pa'i ye shes bden pa yongs su shes pa'o/ /gang gi phyir de skyes na nyon mongs pa zad pa'i phyir sdug bsngal gyi me slar skye ba med pas so/ /de yang rnam pa gnyis te phung po lhag ma dang bcas pa dang phung po lhag ma med pa'o//de la phung po ni phung po lnga po nyid de nyon mongs pa med pa rnams lhag mar lus pa'o/ /gang du de rnams kyang lus pa med pa de ni lhag ma med pa'o/ /gang gi phyir nyan thos rnams tshe zad pa las blangs pa'i phung po rnams nub pa na/ khams gsum gyi 'dod chags dang bral ba'i phyir/ phyi ma rnams ma blangs na/ gang zag gi bdag med pa rtogs pa las phung po lhag ma med pa'i mya ngan las 'das pa'i dbyings so/ /slar yang de'i rnam par gzhag pa theg pa gsum la ci rigs pa rnam pa bcu gsum gyis rig par bya ste/ mtshan nyid las dang zag pa nyid dang kun nas nyon mongs pa dang don dam pa dang yongs su ma rdzogs pa dang yongs su rdzogs pa dang rgyan med pa dang rgyan dang bcas pa dang /khyad par du 'phags pa ma yin pa dang / khyad par du 'phags pa dang / lhag ma dang bcas pa dang / lhag ma med pa las dang / rnam grangs las so/ /de la mtshan nyid ni/ gang gis 'gog na lam gyis so/ /'gog pa gang yin na sgrib pa thams cad kyi gnas ngan len spangs pa na gzhan skye ba med pa'o//gang du 'gog na zag pa med pa'i dbyings su'o zhes so/ /zab pa nyid las ni 'du byed de rnams nye bar zhi ba las 'gog pa de bzhin du brjod par bya ba ma yin/ /gzhan ma yin par ma yin pa ste/ gzhan nyid na de dang 'brel pa med pa don gzhan du gyur pa kho nar 'gyur ro//gzhan ma yin pa nyid ni kun nas nyon mongs pa'i bdag nyid du'o/ /gnyis ka nas gnyis kar ro gnyis ka ma yin par sgrub par mi nus te/ de ni ngag gi lam thams cad las 'das pa spros pa med pa'o/ /kun nas nyon mongs pa las ni de'i yan lag gis mya ngan las 'das pa ste/de'i yan lag nyon mongs pa'i rnam pa kun du spyod pa'i gnas skabs spangs pa'i phyir ro/ /'jig rten pa'i lam gyis sa bon nyams smad pa'i 'gog pa gang yin pa'o zhes pa'i don te/ ji skad du gsungs pa 'dod pa rnams kyis dben pa zhes rgya cher ro/ /don dam pa las ni shes rab 'dis sa bon bcom pa'i phyir ro//yongs su ma rdzogs pa las ni rgyun du zhugs pa'i 'bras bus bsdus pa nas dgra bcom pa nyid la zhugs pas bsdus pa'i bar te kun du sbyor ba lhag ma dang bcas pa nyid kyi phyir ro/ /yongs su rdzogs pa las ni dgra bcom pa'i 'bras bus bsdus pa ste kun du sbyor ba lhag ma med pa nyid kyi phyir ro//rgyan med pa las ni shes rab kyis rnam par grol ba rnams kyi'o/ /rgyan dang bcas pa las ni gnyis ka'i cha las rnam par grol ba rnams kyi ste yon tan khyad par du 'phags pa'i rgyan dang ldan pa'i phyir ro/ /gnyis ka'i cha ni nyon mongs pa'i sgrib pa dang snyoms 'jug gi sgrib pa'o//khyad par du 'phags pa ma yin pa las ni nyon mongs pa'i sgrib pa dang shes bya'i sgrib pa phyogs gcig las grol bas nyan thos dang rang sangs rgyas kyi'o/ /khyad du 'phags pa las ni sangs rgyas kyi ste shes bya'i sgrib pa las rnam par grol bas so/ /lhag ma dang bcas pa ni phung po lhag ma dang bcas pa'i mya ngan las 'das pa'i dbyings so//lhag ma med pa ni lhag ma med pa'i mya ngan las 'das pa'i dbyings so/ /rnam grangs las ni bcom ldan 'das kyis ji skad gsungs pa/ ma lus par spangs pa dang nges par spangs pa dang byang bar gyur pa dang zad pa dang 'dod chags dang bral ba dang 'gog pa dang rnam par zhi ba dang nub pa dang 'dus ma byas pa dang blta dka' ba dang g.yo ba med pa dang mi 'dud pa dang 'chi ba med pa dang zag pa med pa dang gnas dang /gling dang skyob pa dang skyabs dang dpung gnyen dang 'chi 'pho med pa dang rims nad med pa dang bde ba dang zhi ba dang dge bar 'gyur ba dang / nad med pa dang mi g.yo ba dang mya ngan las 'das pa'o zhes so/ /de la ma lus par spangs pa zhes pa ni mdor bstan pa'o/ /lhag ma rgyas par bshad pa'o/ /nges par spangs pa ni kun nas dkris pa byung ba spangs pa'o/ /byang bar gyur pa ni bag la nyal mthar byed pa'i phyir te bag chags spangs pa'i dbang du byas nas gsungs la/rtsa ba med na gtan mi skye ba'i phyir ro zhes pa'i don to/ /de slar yang gnyen po mthong ba dang bsgom pa'i lam gyi bye brag gis rnam pa gnyis su rnam par gzhag ste zad pa dang 'dod chags dang bral ba zhes pa'o/ /de la mthong ba'i lam gyi bral ba'i dbang du byas nas zad pa ste/ nyon mongs pa'i phung po chung ngu tsam lus pa nyid kyi phyir ro/ /bsgom pa'i lam gyis ni 'dod chags dang bral ba ste/ de ni sa las 'dod chags dang bral ba'i rtogs pa rab tu sgom pa nyid kyi phyir ro/ /de gnyis kyis bral bar gyur na mi skye ba'i chos nyid du byas pa'i phyi ma la sdug bsngal 'gog pa dang mthong ba'i chos la yid kyi phyir ro//mi bde ba rnam par zhi ba ste de kun du mi spyod pa'i phyir ro/ /de'i phyir de'i 'bras bur gyur pa sdug bsngal rnam pa gnyis spangs pa'i dbang du byas nas gsungs pa 'gog pa dang rnam par zhi ba'o zhes so/ /nye bar 'tshe ba lhag ma mthar gyur pa bzung nas nub pa zhes pa ste/ de ltar byas nas ma lus par spangs pa rgyas par bshad par rig par bya'o//'dus ma byas ni mtshan nyid gsum dang bral ba nyid kyi phyir te/ 'dus byas las bzlog pas so/ /blta dka' ba ni sha'i mig dang lha'i mig gi spyod yul las shin tu 'das pa nyid kyi phyir ro/ /g.yo ba med pa ni 'gro bar 'pho ba dang bral ba nyid kyi phyir ro//mi 'dud pa ni 'dod pa dang gzugs med pa'i srid pa gsum med pa na srid pa rnams su mi 'dud pa'i phyir ro/ /'chi ba med pa ni phung po'i bdud dang bral ba'i phyir te 'chi ba'i don rten phung po med pa'i phyir ro zhes pa'i don to/ /zag pa med pa ni nyon mongs pa'i bdud dang bral ba'i phyir ro/ /gnas ni rnam par grol ba'i dga' ba de'i gzhi nyid kyi phyir ro//gling ni khams gsum las yongs su chad pa'i phyir te/ 'khor ba'i rgya mtsho chen po la thang du gyur pa nyid kyi phyir ro zhes pa'i don to/ /skyob pa ni nye bar 'tshe ba thams cad bzlog pa'i phyir te/ de thob na skye ba la sogs pa'i nye bar 'tshe ba thams cad dang bral ba'i phyir ro zhes pa'i don to//skyabs ni der bsam pa dang sbyor ba 'bras bu yod pa'i gzhi'i gnas yin pa'i phyir te/ der byas pa'i bsam pa dang sbyor ba dag 'bras bu yod pa'i gzhi'i gnas nyid kyis brten par bya ba nyid kyi phyir ro zhes pa'i don to/ /dpung gnyen ni mchog 'phags pa nyid du 'gro ba'i gzhi'i gnas yin pa'i phyir te dgra bcom pa thob pa'i thabs kyi dmigs pa nyid kyi phyir ro zhes pa'i don to//'chi 'pho med pa ni ma skyes pa nyid kyis nyams pa mi srid pa'i phyir ro/ /rims nad med pa ni 'dod pas 'joms pa'i gdung ba thams cad med pa'i phyir ro/ /yongs su gdung ba med pa ni mya ngan dang smre sngags 'don pa dang sdug bsngal ba dang yid mi bde ba dang 'khrugs pa'i yongs su gdung ba thams cad med pas na bsil bar gyur pa nyid kyi phyir ro//bde ba ni na ba dang rga ba dang 'chi ba'i 'jigs pa dang bral ba 'phags pa'i gnas pa'i rten nyid kyi phyir ro/ /zhi ba ni dge ba'i chos thams cad kyi rten nyid kyi phyir ro/ /bde gzhi nyid ni 'jig rten las 'das pa'i bde ba'i gzhi nyid kyi phyir ro//dge bar gyur pa ni sbyor ba bde bas de thob pa'i dmigs pa'i dngos po'i phyir ro/ /nad med pa ni nyon mongs pa la sogs pa'i sgrib pa'i nad dang bral ba'i phyir ro/ /dper na rgyu gsum gyis nad 'byung ste nyes pa bsags pas dang mi 'phrod pa brten pas dang btang snyoms kyis so//de bzhin kho nar nyon mongs pa'i nad de 'di'i nyes pa rnams ni 'dod pa'i rtog pa la sogs pa'o/ /stong pa nyid la sogs pa rnams las gzhan thams cad mi 'phrod pa'o/ /de'i phyir gus pa dang bcas pas phyin ci ma log pa'i de kho na nyid goms pa las med par 'gyur ro//mi g.yo ba ni yul gyi spros pa'i rnam par g.yeng ba thams cad dang bral ba'i phyir ro/ /mya ngan las 'das pa ni gzugs la sogs pa'i 'du shes thams cad bral ba zhi la bde bar gnas pa'i dmigs pa nyid kyi phyir ro/ /byang chub sems dpa' rnams ni bdag med pa gnyis ka rtogs pa'i phyir chos kyi rnam par rtog pa rnams la yang bskal pa'i me bzhin du sems shing phung po lhag ma dang bcas pa'i mya ngan las 'das pa'i dbyings la mngon par dga' ba med do//don dam par ni sangs rgyas nyid kho na phung po lhag ma med pa'i mya ngan las 'das pa'i dbyings de kho nar rnam par mi rtog pa mtha' dag rnam pa thams cad du bral ba'i phyir ro//gang yang bcom ldan 'das yongs su mya ngan las 'das pa de ni gdul bya rnams kyi de lta bu'i bsam pa'i dbang las so/ /'o na gang dgra bcom pa'i 'bras bu las yongs su nyams pa 'di ci slar skye'am zhe na/ 'di ni med de gang gi phyir 'bras bu las nyams pa mi mchi bas so//'bras bu las yongs su nyams pa ni su yang dus byed pa med pa kho na ste/ dge slong rnams 'phags pa nyan thos thos pa dang ldan pa dran pa nyams pa 'byung ngo / /'on kyang yang myur ba kho nar nub pa dang yongs su zad pa dang yongs su gtugs pa kho nar 'gyur ro zhes mdor gsungs pa'i phyir ro//gzhan du na tshangs par spyad pa yid brtan du mi rung bar 'gyur ro/ /de yang 'bras bu de las yongs su nyams kyang 'bras bu da dang 'gal ba'i bya ba mi byed de dpa' bo bred kyang mi 'gyel ba bzhin no/ /de la gang la dbang po rtul po rnams ni sdug bsngal la sogs pa'i bden pa bsgom pa la mngon par brtson pa dang po kho nar bdag nyid dul ba dang zhi ba gcig pu mngon par sems pa rnams te de ltar 'dod chags dang bral ba mngon du byed cing de rnams mya ngan las 'das pa thob pa'i 'du shes kyis zag pa med pa'i dbyings kho na la gnas so//gang dbang po 'bring po rnams ni bden pa sgom pa la mngon par dga' ba kho na gzhan gyi don la cung zad sred pa rnams te 'dod chags dang bral ba bskyed kyang 'dod chags dang bral ba mngon du mi byed par dus byed cing /de rnams lus kyi chos ston pa mngon par 'dod pa'i dbang gis las dang lam gyi rnam par smin pa las dam pa'i chos nub par 'gyur ba na gzhan gyi gdams ngag la mi ltos par shes bya'i sgrib pa gzung ba dang 'dzin pa'i don gyi rnam par rtog pa dag rim pa bzhin spangs pa dang spangs pa dag rkyen nyid 'di pa tsam gyi byang chub kyi rang byang chub mngon du byas shing rdzu 'phrul la sogs pa bstan pas snod du rung bar byas pa'i gdul bya'i rnam par shes pa la sgra med kyang don de snang ngo zhes pas/lus kyi chos bstan pa byas nas zag pa med pa'i dbyings kho na la gnas so/ /dbang po rtul po dang 'bring po 'di dag kyang phyis thams cad mkhyen pa'i ye shes kyi 'od zer gyis bskul ba nyid kyis shes rab kyi pha rol tu phyin pa la 'jug cing rim gyis yang dag par rdzogs pa'i sangs rgyas nyid mngon par 'grub par byed do//dbang po rnon po rnams ni yang sdug bsngal la sogs pa'i bden pa bsgom pa la mngon par dga' ba gzhan gyi don gcig pu la sred pa/ khams gsum gyi nyon mongs pa spangs kyang / snying rje chen po'i bdag nyid kyis sems can mtha' dag gdon pa'i bsam pa can te bcom ldan 'das kyi dbang kho nas dus de'i phyis bcom ldan 'das ma shes rab kyi pha rol tu phyin pa la goms par byas nas bsod nams dang ye shes kyi tshogs yang dag par rdzogs te bla na med pa yang dag par rdzogs pa'i sangs rgyas bcom ldan 'das su 'gyur ro//gnyis po de dag kyang bskal pa grangs med bzhi mngon par rdzogs nas yang dag par rdzogs par sangs rgyas pa nyid 'ba' zhig go//de'i phyir shes rab kyi pha rol tu phyin pa'i thabs kyi rnal 'byor dang bral ba las mngon par mtho ba'i 'bras bu med la yang dag par rdzogs pa'i byang chub thob pa yang med do/ /gang yang bskal pa'i tshogs mi nyung bar bsgoms pa blo yongs su dag pa de rnams la kho na nyid la sgro 'dogs pa ma lus pa bzlog pas stong pa nyid dang spros pa med pa la sogs pa'i sgra rnams kyis nye bar bstan no//de rnams de la mngon du phyogs par byas nas de'i rang bzhin sbyin pa la sogs pa bya ba'i rang bzhin gyi thabs goms pa las sangs rgyas nyid mngon par 'grub par byed do//de yang snying rje chen po skyes pas byang chub tu sems bskyed de de nyid gong nas gong du rnam par rtog pa spang ba yongs su dag pa nyid sgrub pa'i don du sgom mo/ /ji skad du bcom ldan 'das ma bdun brgya par gsungs pa 'jam dpal mi gnas pa la de rnams shes rab kyi pha rol tu phyin pa sgom pa ci yod/bcom ldan 'das gang ci la yang mi gnas pa de nyid shes rab kyi pha rol tu phyin pa sgom pa'o/ /gang chos gang gi yang gnas pa'am mi gnas pa mi dmigs pa gnas pa ste/ gang chos gang yang mi sems la rnam par mi rig pa'o/ /bka' stsal pa 'jam dpal sangs rgyas kyi chos rnams la mi sems sam/gsol pa/ bcom ldan 'das mi sems lags so/ /gang bsam gyis mi khyab pa nyid de kho na ni mya ngan las 'das pa dang skye ba ma mchis pa dang shes rab kyi pha rol tu phyin pa dang chos kyi dbyings dang rgyu ba med pa'i dbyings shes pa ni gnyis su ma mchis gnyis su bgyir ma mchis pa'o/ /gang de lta bu'i ye shes de dmigs su ma mchis pa'i tshul gyis sangs rgyas kyi ye shes so//bcom ldan 'das 'di ltar shes rab kyi pha rol tu phyin pa sgom pa ni chos gang yang mi dmigs pa na gnas pa ma mchis te/ chos gang len pa'am 'dor ba'o/ /chos gang yang 'grib pa'am 'phel ba mi dmigs so/ /bcom ldan 'das skye ba ma mchis pa la ni 'phel ba'am 'grib pa nyid ma mchis so//zhes so/ /de'i yang mtshan nyid la sogs pa 'phags pa klu sgrub zhabs kyis gsungs pa/ byang chub sems kyi mtshan nyid ni/ /bdag dang phung sogs rnam rig gi/ /rtog pas mngon par ma bsgribs shing / /stong par sangs rgyas rtag tu bzhed/ /bdag tu 'dzin pa bzlog don du//phung po khams sogs bstan pa ste/ /de yang sems tsam rnam gzhag pas/ /skal ba chen po rnams kyis bshig /'di dag thams cad sems tsam du/ /rnam rig smra ba rnams la grub/ /rnam rig rang bzhin ci yin la/ /da ni de 'dir brjod par bya/ /'di rnams thams cad sems tsam zhes//thub pa yis ni gang bstan pa/ /byis rnams skrag pa spang don te/ /de ni de bzhin nyid ma yin/ /stong nyid bdag nyid tshul gcig gi/ /sems 'di nyid la kun brtags dang / /gzhan gyi dbang dang yongs grub pa/ /nyid du yang ni brtags pa yin/ /theg chen la dga'i bdag nyid rnams/ / chos la bdag med dang mtshungs pa'o/ /stong nyid mkha' mnyam ye shes ni/ /byang chub snying por son gyur pa/ /dus gsum byas pa la brten pa'i/ /sangs rgyas bdag nyid kun gyis mkhyen/ /dmigs med sgyu ma lta bu yi/ /stong nyid srid pa 'jig byed do/ /zhi ba chos rnams kun gyi gnas/ / 'di ni rtag tu bsgom par bgyi/ /skye ba med ces stong pa zhes/ /dmigs pa med ces stong pa nyid/ /dman pa'i bdag nyid gang sgom pa/ /'di ni 'dir de sgom pa min/ /dge dang mi dge'i rnam rtog rnams/ /rgyun gcod pa yi mtshan nyid ni/ /sangs rgyas rnams kyis stong par gsungs//gzhan ni stong nyid min par bzhed/ /dmigs pa med pa'i sems kyis ni/ /nam mkha'i mtshan nyid la gnas pas/ /nam mkha' sgom pa 'di kho na/ /stong pa nyid ni stong par dgongs/ /gang phyir chos rnams skye med min/ /stong pa nyid ces rab tu bsgrags/ /mdor na phung po lnga po rnams//chos rnams thams cad yin zhes bshad/ /ji lta'i de nyid brjod pa na/ /kun rdzob chad pa nyid ma yin/ /kun rdzob las ni logs par ru/ /de bzhin nyid ni dmigs pa med/ /gang phyir kun rdzob stong nyid brjod/ /stong nyid kho na kun rdzob ste/ /med na ma 'byung nges pa'i phyir//byas dang mi rtag pa dag bzhin/ /kun rdzob nyon mongs las las byung / /las ni sems las yang dag byung / /sems kyang bag chags kyis yid la/ /bag chags bral las bde ba'o/ /bde ba'i sems ni zhi ba nyid/ /zhi ba'i sems ni rmongs med la/ /rmongs med pas ni de nyid rig /de nyid rig pas grol ba thob/ /byang chub sems mchog de nyid dang / /stong pa nyid ces bshad pa ste/ /de bzhin nyid dang yang dag mtha'/ /sdug bsngal bdag med sogs de bzhin/ /gzhan don ro gcig byang chub ni/ /byang sems myu gu las byung ba/ /snying rje'i rtsa ba brtan pa ni/ / rgyal ba'i sras kyis sgom par byed/ /gang sgom pa yis brtan pa rnams/ /bsam gtan gyi yang bde spangs nas/ /pha rol sdug bsngal gyis gdungs te/ /mnar med par yang 'jug 'gyur ba/ /'di ni ngo mtshar 'di bsngags 'os/ /'di ni khrims mchog dam pa ste/ /de lta mod kyi de rnams kyi//rang gi lus dang don gtong mtshar/ /chos 'di rnams ni stong shes nas/ /las dang 'bras bu bsten gang de/ /ngo mtshar las kyang ngo mtshar zhing / /rmad byung las kyang rmad byung ngo / /sems can bskyab pa'i bsam pa yis/ /srid pa'i 'dam du skyes kyang 'di/ /de byung skyon gyis mi gos te//pad+ma'i 'dab ma chu yis bzhin/ /'di rnams stong nyid ye shes mes/ /nyon mongs bud shing rnams bsregs shing / /'on kyang snying rjes brlan pa yis/ /bzang po la sogs rgyal sras rnams/ /tshangs dbang nye dbang drag sogs kyis/ /gzugs brnyan du ni rab bzhugs rnams/ / 'gro ba 'dul ba'i sbyor ba yis/ /snying rje bsam pas zlos gar mdzad/ /ces so/ /de nyid kyi phyir byang chub kyi sems de sgrub pa dang bral ba yang 'khor bar 'bras bu chen por bcom ldan 'das kyis gsungs te/ ji skad du 'phags pa rgyal po la gdams pa'i mdor gsungs pa/ de'i phyir rgyal po khyod kyis yang dag par rdzogs pa'i byang chub 'di nyid la 'dun pa dang dad pa dang don du gnyer ba dang smon lam 'di kho na 'gro yang rung 'greng yang rung bgrod kyang rung /'dug kyang rung nyal kyang rung / gnyid ma log kyang rung za yang rung 'thung yang rung rtag par rgyun du rjes su dran par yid la gyis shig /bsgoms shing sangs rgyas dang byang chub sems dpa' dang /'phags pa nyan thos dang rang sangs rgyas dang so so skye bo thams cad dang bdag gi yang 'das pa dang ma 'ongs pa dang / da ltar gyi dge ba'i rtsa ba rnams bsdams nas rjes su yi rang bar gyis shig /de nas sems can thams cad thams cad mkhyen pa nyid kyi bar du thob par bya ba dang sangs rgyas kyi chos thams cad yongs su rdzogs pa'i ched du/nyi ma nyi mar dus gsum du bla na med pa yang dag par rdzogs pa'i byang chub tu yongs su bsngos shig ces pa la sogs pa gsungs nas de slar yang gsungs pa/ rgyal po chen po khyod yang dag par rdzogs pa'i byang chub kyi sems dge ba'i rtsa ba'i rnam par smin pas lan du mar lha'i nang du skyes/lan du mar mi'i nang du skyes la/ slar yang lha dang mi rnams su skye ba thams cad du yang rgyal srid la dbang byed pa nyid du 'gyur ro/ /zhes so/ /gang yang sgrub pa snying por byed pa'i byang chub kyi sems de shin du yang 'bras bu yangs pa kho na'o zhes grub po//de nyid kyi phyir 'phags pa dpas byin gyis zhus par gsungs pa/ byang chub sems kyi bsod nams gang / de la gal te gzugs mchis na/ /nam mkha'i khams ni kun bkang ste/ /de ni slar yang lhag par 'gyur/ /gang gA'i bye ma'i grangs snyed kyi/ /sangs rgyas zhing rnams mi gang gis//rin chen dam pas kun bkang ba/ /'jig rten mgon la phul ba bas/ /gang zhig thal mo sbyar gyur te/ byang chub ched du sems bskyed na/ /mchod pa 'di ni khyad par 'phags/ /gang gis mtha' yang ma mchis so/ /zhes so/ /'phags pa sdong po bkod par yang //rigs kyi bu byang chub kyi sems ni sangs rgyas kyi chos thams cad kyi sa bon du gyur pa'o zhes rgyas par ro/ /'phags pa klu sgrub zhabs kyis kyang gsungs pa/ mi gang skad cig gcig tsam yang / /byang chub sems ni rab sgom pa/ /de yi bsod nams phung po ni/ /'di tsam zhes pa bgrang mi nus//nyon mongs med gyur rin chen sems/ /'di ni gcig tu grol ba ste/ /nyon mongs bdud sogs chom rkun gyis/ /gzhom bya ma yin dbrog bya min/ /'di ni theg chen gtso bo ste/ /'di ni byang chub sems mchog yin/ /mnyam par gzhag rnams byang chub sems//'bad pa yis ni bskyed par gyis/ /'khor bar bdag gzhan don sgrub la/ /byang chub sems las ma gtogs pa/ /gzhan gang sangs rgyas rnams kyis ni/ /sngon chad nam yang gzigs pa med/ /ces so/ /byang chub tu sems bskyed pa 'di yang dper na long bas mar me gzung ba gzhan la phan par 'gyur ba de bzhin du don mi shes par thos pa 'dzin pa'o zhes thos pa'i don rtogs par byas nas byang chub sems dpa'i sdom pa gzung ba sngon ma can te/de ji ltar gzung ba ni sngar brjod pa de bzhin no/ /de nas byang chub tu sems bskyed pa'i byang chub sems dpa' ni/ dper na so sor rtog pa med pa'i mel tshe ba sgra 'don gyin gnyid ma log kyang chom rkun pa rnams kyis rku ba de bzhin du sgra tsam la brtson pa thos pa mang yang so sor rtog pa med pa ni nyon mongs pa'i chom rkun pa rnams kyis 'joms pas na sgrub pa la sbyar ro//de ting nge 'dzin rgyal po'i mdor gsungs pa/ gzhon nu sgrub pa snying por byed pa la bla na med pa yang dag par rdzogs pa'i byang chub rnyed par dka' bar 'gyur ba med do zhes so/ /sgrub pa yang mdor bsdu na byang chub kyi sems sgom pa dang sbyin pa la sogs pa'i thabs sgrub pa'o/ /de bzhin du 'di lta bu'i sgrub pa yang rnyed par dka' ba nyid du 'phags pa sdong po bkod par gsungs pa/rigs kyi bu sems can gyi ris na bla na med pa yang dag par rdzogs pa'i byang chub tu sems smon pa'i sems can de rnams rnyed par dka'o/ /de bas kyang sems can gang bla na med pa yang dag par byang chub pa la yang dag par zhugs pa de rnams shin tu rnyed par dka'o zhes so/ /byang chub kyi sems de yang shes rab dang thabs kyi rang bzhin kho na bskyed par bya'o//de la chos thams cad spros pa med pa nyid du rtogs pa ni shes rab bo/ /spros pa med pa nyid 'di ci zhe na/ mdor bsdu na ji srid dngos po dang dngos po med pa la sogs pa'i rnam par rtog pa de thams cad phyin ci log dang spros pa ste spros pa med pa ni chos kyi dbyings stong pa nyid do//de ltar na stong pa nyid kho na spros pa'o zhe na/ stong pa nyid kyi sgras cung zad kyang sgrub pa med de gang gi phyir/ sgrub pa'i sgra'i don ma yin gyi 'on kyang sgro 'dogs pa las ldog pa tsam mo/ /de'i phyir stong pa nyid kyi tshig gsal ba ni sgro 'dogs pa mtha' dag las ldog pa rtogs par byed pas gdul bya'i skye bo'i rgyud la de kho na nyid kyi rang bzhin gsal bar byed kyi gang gis de kho na spros pa yin pa stong pa nyid kho nar sgrub pa ma yin no//spros pa med pa nyid spros pa'o zhes kyang brjod par mi bya ste/ gang gi phyir spros pa med pa zhes bya ba'i spros pa yod pa ma yin na de ci ltar spros pa yin/de'i tshe med pa kho na de kho na nyid do zhes mi rigs pas so/ /de ltar na sgro 'dogs pa mtha' dag las ldog pa de kho na nyid do zhe na/ de ltar ma yin te gang gi phyir ldog pa ni dngos po med pa yin la dngos po med pa yang ci ltar de kho na nyid yin te skur pa 'debs pa'i mtha' nyid kyi phyir ro/ /de'i phyir sgro 'dogs pa mtha' dag las ldog pas de kho na nyid stan pa na/dngos po dang dngos po med pa la sogs pa'i tshul du de kho na nyid ma thob nas mngon par zhen par 'gyur ro/ /des na stong pa nyid la sogs pa'i sgra rnams kyis mngon par zhen pa de bsal bar byas pa na de kho na nyid kyi rang gi ngo bo gsal bar byed pas de brjed byar btags nas brjod de stong pa nyid la sogs pa'i sgra rnams las sgro 'dogs pa mtha' dang bral ba'i ngo bo de kho na nyid du lhag par zhen pa'i phyir ro//de'i phyir stong pa nyid kyi rang bzhin kho na chos thams cad spros pa med pa nyid kyi yin la spros pa med pa rtogs pa yang shes rab bo/ /thabs ni bcom ldan 'das ma snying rje chen po'o//de yang rnam pa gsum ste de la sems can la dmigs pa ni sdug bsngal nyid kyi sdug bsngal nyid dang yongs su 'gyur ba'i sdug bsngal nyid dag gis nyin dang nyin du yongs su skyo ba'i sems can rnams la dmigs nas skye ba gang yin pa'o/ /chos la dmigs pa ni gang skad cig so sor mi rtag pa nyid kyis phongs par ltung ba'i chos thams cad la dmigs nas skye ba'o//dmigs pa med pa ni chos thams cad rang bzhin med pa la dmigs nas bskyed pa'o/ /de la dmigs pa med pa'i snying rje sgom pa'i gnas skabs na/ thabs dang shes rab dag 'di bdag nyid du sgom la snying rje'i cig shos sgom pa'i gnas skabs na ni ma yin te/de ni dngos po'i rang bzhin du dmigs pa nyid kyis spros pa med pa nyid med pa'i phyir shes rab kyi rang bzhin du skye ba med pa'i phyir ro/ /de'i phyir bdag nyid du sgom pas na lhan cig sgom pa kho na ste shes rab dang thabs kyi tha snyad tha dad pa ni ldog pa byas pa'o/ /ji skad du bcom ldan 'das mar gsungs pa/ rab 'byor dngos po med pa'i rang bzhin gyi chos rnams la dngos por 'du shes pa la ni shes rab kyi pha rol tu phyin pa sgom pa med de phyin ci log pa'i phyir ro/ /'on kyang chos kyi 'du shes thams cad sgom pa rnam par mi sgom pa ni shes rab kyi pha rol tu phyin pa sgom pa'o/ /de bzhin du dngos po'i 'du shes can la sbyin pa'i pha rol tu phyin pa sgom pa med pa de 'di ni bdag dang 'di la dang 'di sbyin no zhes de ltar 'du shes pa'i phyir ro//de bzhin du ji srid byang chub kyi phyogs la sogs pa rnams la ste/ ji srid du gang kun rdzob de kho na don dam pa ste gang gi phyir de dag de bzhin nyid du gcig pa kho na'o/ /'on kyang phung po rnams la dngos por 'du shes pa rnams la don dam pa de ni dngos po med pa'o zhes kun rdzob tu bstan la/dngos po med par 'du shes pa rnams la dngos po'o zhes te/ don dam par ni dngos po dmigs su med de dngos po med pa yang med do zhes so/ /'phags pa klu sgrub zhabs kyis kyang gsungs pa/ so so'i skye bo dngos bdag can//rang gi sems kyis bslus gyur te/ /dngos dang dngos med phyin ci log /nyes pa nyon mongs dbang du gyur/ /dngos po la mkhas rnams kyis ni/ /dngos po mi rtag slu ba'i chos/ /gsog dang stong pa bdag med dang / /rnam par dben pa zhes par mthong / /zhes so/ /de la dang por re zhig rnal 'byor pa tshul khrims dang bzod pa dang brtson 'grus te zhi gnas kyi tshogs rnams la gnas pas yid dang rjes su mthun pa'i sa phyogs su lus drang por gzhag nas stan bde ba la 'dug ste/sems rtse gcig pa'i mtshan nyid can ting nge 'dzin bskyed par bya'o/ /'o na sems rtse gcig gzhag pa'i ched du rnam par g.yeng ba spang ba'i don du goms par byed pa yin na/dbu ma rnams ni g.yo ba'i chu'i nang gi zla ba ltar 'gro ba g.yo zhing rang bzhin stong pa zhes pa dang kun rdzob pa skad cig mar smra ba rnams kyi sems rnam par g.yeng ba yod pa ma yin te/ don so sor nges pa nyid kyis thams cad rtse gcig pa nyid kyi phyir ro zhe na/'di ni 'brel pa med de/ nyams su myong bas grub par sems 'ga' zhig de kho na nyid la yang dag par phyogs pa dang / 'ga' zhig phyin ci log dang gzhan ni bya ba la sogs pa tsam la mchog tu 'dzin pa'i phyir ro/ /de la chos thams cad bdag med pa'i de kho na nyid las gzhan du phyogs pa'i sems thams cad rnam par g.yeng ba kho nar brjod la de kho na nyid la gcig tu gnas pa ni mnyam par gzhag pa zhes pa 'di tsam cis mi thob gang gi phyir gdon mi za bar gcig sems kho na sna tshogs pa'i spyod yul spyod pa nyid du btsal bar bya'o//ci ste yang de kho na mngon du byed pa'i dus kyi snga rol du bdag go zhes pa gcig gi rnam par 'dzin pa yang dag par 'byung ba srid pa'i phyir de yang tha snyad du yod do//gang las bdag gi skyon zad par 'gyur zhe'am goms pa la 'jug pa bgegs med par 'gyur la thob par bya ba'i kun du rtog pa thams cad 'jug par byed pa'o/ /de gal te yod na dngos po de ltar gyur pa las log par yang 'jug pa cis 'grub par byed gang gis de'i tshe rjes su dpag pas de ltar nges pa de ci ltar 'jug ce na/nges pa de'i bdag nyid du gyur pa med pa'i phyir thog ma med pa nas ma rig pa'i bag chags kyis sems dbang du byas pas nges pa nar ma ma yin pa kho na'i tha snyad 'jug pa'i phyir ro/ /de nyid kyi phyir mthong ba'i lam thob kyang bsgom pa'i lam la ltos pa'o//de nyid kyi phyir de'i 'bras bu thob pa las tshu rol gyi goms pa ni ma rig pa kho nas yang dag par 'byung ngo / /de la dang por re zhig rgyas par khams bco brgyad la sogs pa'i rnam pa'i dbye bas dngos po mtha' dag la rnam par dpyad par bya ste 'di tsam kho na chos thams cad do zhes pa de ltar nges nas slar yang sems de kho na la rgyun du gtad par bya'o//de la mdor bsdu na ting nge 'dzin thams cad kyi skyon ni drug tu 'gyur te/ 'di lta ste le lo dang dmigs pa brjed pa dang bying ba dang rgod pa dang rtsod pa med pa dang rtsol ba zhes pa'o/ /'di rnams kyi gnyen po spong ba'i 'du byed brgyad bsgom par bya'o//'di lta ste dad pa dang 'dun pa dang rtsol ba dang shin tu sbyangs pa dang dran pa dang shes bzhin dang sems pa dang btang snyoms shes pa'o/ /de la dang po bzhi'i ni le lo'i gnyen po rnams te de ltar ni ting nge 'dzin gyi yon tan rnams la mngon par yid ches pa'i mtshan nyid can gyi dad pas rnal 'byor pa de la mngon par 'dod pa skyed par byed do//de las rtsol ba'o/ /de las lus dang sems las su rung ba nyid do/ /de las le lo rnam par ldog go/ /dran pa ni dmigs pa brjed pa'i gnyen po'o/ /shes bzhin ni bying ba dang rgod pa dag gi ste des bying ba dang rgod pa dang nye bar mtshon pa'i phyir ro//bying ba dang rgod pa rab tu zhi ba'i dus na ni rtsol ba med pa skyon te de'i gnyen por sems pa bsgom par bya'o/ /bying ba dang rgod pa zhi bar gyur nas gang gi tshe sems rang gi ngang gis 'jug pa de'i tshe rtsol ba skyon te/ de'i gnyen por de'i tshe btang snyoms bsgom par bya'o/ /spong ba brgyad po 'di rnams kyi rgyus ting nge 'dzin las su rung bar gyur la des rdzu 'phrul la sogs pa'i yon tan rnams mngon par 'grub par byed do//de nyid kyi phyir mdo las gsungs pa/ spong ba'i 'du byed brgyad dang ldan pa'i rdzu 'phrul gyi rkang pa sgom mo zhes so/ /zhi gnas kyi rim pa 'di nyid bcom ldan 'das mar gsungs pa/ ji ltar yang byang chub sems dpa' de nang la sems 'jog go//rgyun tu 'jog go/ /glan te 'jog go/ /nye bar 'jog go/ /'dul bar byed do/ /zhi bar byed do/ /rnam par zhi bar byed do/ /rtse gcig tu byed do/ /mnyam par 'jog go zhes so/ /de la 'jog ste ting nge 'dzin gyi dmigs pa la sems gtod do//rgyun du 'jog ste rgyun gyis 'jug pa la de bzhin kho nar 'jog ste gzhan du 'gro ba 'gog pa'i phyir ro/ /glan te 'jog ste sems rang bzhin gyis g.yo ba nyid kyi phyir ci zhig ltar gzhan du 'gro ba na de rtogs nas myur du sdud pa'i phyir ro/ /nye bar 'jog ste sems brtan par gyur kyang rang bzhin gyis rags pa nyid kyis na gzhan du yang rnam par grol ba las gong nas gong du phra bar byed pas de kho na la 'jog pa'i phyir ro//dul bar byed de sems rang bzhin gyis rnam par g.yeng ba la dga' ba ting nge 'dzin la dga' bar byed de ting nge 'dzin gyi phan yon mthong ba las so/ /ting nge 'dzin gyi phan yon rnams kyang de bzhin gshegs pa'i bar gyi yon tan khyad par du 'phags pa thams cad do//zhi bar byed de de ltar na yang gal te ting nge 'dzin la de mi dga' bar gyur pa de'i tshe rnam par g.yeng ba la dga' la de'i phyir de zhi bar byed pa ste/ rnam par g.yeng ba'i nyes pa mthong ba las so/ /rnam par g.yeng ba'i skyon yang mnar med pa ji srid pa'i yang sdug bsngal thams cad do//rnam par zhi bar byed de brnab sems dang yid mi bde ba la sogs pa skyes pa rnams zhi bar byed pa'i phyir mi dga' ba dang ldan pa'o/ /rtse gcig tu byed de dmigs pa gcig la shin tu dang chos mthun pa'i phyir shin tu ba ste shin tu gcig pa de ltar byed cing / rnam pa bdun rnams kyis skyon dang bral ba'i sems rtsol ba las de lta bu kho nar rang gi ngang gis 'jug par byed do zhes pa'i don to//mnyam par 'jog ste rang gi ngang gis zhugs nas ro myong ba med pa'i phyir lhun gyis grub cing rang gi ngang gis 'jug pa nyid kyis yang dag pa'i dmigs pa la sems 'dzin par byed pa'o/ /mdo sde rgyan du gsungs pa/dmigs pa la ni sems gtad nas/ /de rgyun rnam par g.yeng mi bya/ /rnam g.yeng myur du rtogs byas nas/ /de las slar yang glan par bya/ /blo ldan gong nas gong du ni/ /sems ni nang du bsdu bar bya/ /de nas yon tan mthong ba yis/ /ting nge 'dzin la sems dga' bya/ /rnam g.yeng nyes pa mthong ba'i phyir//de la mi dga' zhi bar bya/ /brnab sems yid mi bde la sogs/ /langs pa de bzhin zhi bar bya/ /de nas sdom brtson can gyis ni/ /sems la mngon par 'du byed bcas/ /rang gi ngang gis 'byung ba thob/ /de goms pa las 'du mi byed/ /ces so/ /gzhan yang ting nge 'dzin ni lus dang sems dag rnam par dben pa kho na las 'byung ngo zhes sngar brjod zin to//de ltar gang gi tshe dmigs pa de la mngon par 'du byed pa med par rang gis 'byung ba nyid kyis ji srid 'dod par sems 'jug par 'gyur ba de'i tshe zhi gnas rdzogs par rig par bya'o/ /de ltar ting nge 'dzin bskyed nas sems can la dmigs pa dang /chos la dmigs pa'i snying rje chen po mngon du byas shing dngos po dang dngos po med pa dang rang gi dngos po dang gzhan gyi dngos po la sogs par yid la byed pa med par byas pas thams cad las yid glan te ci yang sems pa med par bya'o/ /de de ltar sems pa med pa las bcom ldan 'das ma shes rab kyi pha rol tu phyin pa skyed par byed de tshad ma dang gzhal bya dang 'bras bu'i cha dang yang dag par bral bas na rang gsal ba'i rang bzhin no//de mthong ba med pa'i tshul gyis mngon sum du rtogs nas de'i mthus/ kye ma ma la gti mug gi nus pa gang gis sems can 'di rnams mya ngan las 'das pa'i rang bzhin yin yang bdag nyid kyis ma rtogs pas 'di rnams ci ltar rtogs par bya zhes rnam par bsams nas de'i bdag nyid kho nar 'gro ba thams cad la dmigs te dmigs pa med pa'i rang bzhin snying rje chen po bskyed nas de'i bdag nyid kho nar bdag dang dngos po thams cad kyi rang bzhin dang snying rje chen po'i bdag nyid bcom ldan 'das ma shes rab kyi pha rol tu phyin pas de'i bdag nyid kyi phyir dbyer med pa'i rang bzhin gnyis su med pa ro gcig tu gyur par blta bar bya'o//de kho na nyid mthong ba 'di ni gang shes rab kyis nges par brtags pa las chos thams cad mthong ba med pa kho na yin gyi/ gnyid log pa dang brgyal ba dag gi mig bzhin du gang yid la byed pa med pa las ni ma yin te/de lta na bag chags ma spangs pa'i phyir 'du shes med pa'i snyoms par 'jug pa la sogs pa las langs pa bzhin du slar yang gzugs la sogs par mngon par zhen pa'i rtsa ba can 'dod chags la sogs pa rnams skye ba'i phyir rnal 'byor pa grol ba med pa kho nar 'gyur ro/ /thog ma med pa'i dus can gyi mngon par zhen pa yid la byed pa yongs su dor ba tsam las spong ba yang ma yin te 'du shes med pa'i snyoms par zhugs pa la sogs pas kyang spang bar thal ba'i phyir ro//gzugs la sogs pa'i yul la the tshom spong ba med par ni de yid la byed pa yongs su spang bar yang nus pa ma yin te me ma spangs na sreg pa mi spong ba bzhin no//de'i phyir the tshom gyi sa bon dang bral ba kho na las gzugs la sogs par mngon par zhen pa dang bral bar bya'o zhes nges so/ /the tshom gyi sa bon dang bral ba la yang zhi gnas dang lhag mthong dag phan tshun rjes su mthun pa'o/ /de ltar ni sems rtse gcig pa'i mtshan nyid can zhi gnas kyi snang ba yod na shes rab kyi ming gzhan pa lhag mthong gis chos thams cad dngos po dang dngos po med pa la sogs pa'i ngo bo rnam par dpyad pa la rnal 'byor pa the tshom dang bral lo//de dang bral na gzugs la sogs par mngon par zhen pa la sogs pa dang bral ba'o/ /de dang bral na chos thams cad rang bzhin med par rtogs so//de nyid shes rab kyi pha rol tu phyin pa'o/ /de'i tshe zhi gnas dang shes rab dag de'i bdag nyid kyi phyir dang / rjod pa'i rim pas shes rab dang snying rje chen po dbyer med pa nyid kyi phyir zung du 'brel ba'i lam byang chub tu sems bskyed pa'i rang bzhin mchog tu rnam par mi rtog pa'i rnal 'byor bsod nams thams cad kyi rang bzhin kun rdzob dang don dam pa'i bden pa gnyis kyi bdag nyid de/byang chub sems dpa' yang de'i rang bzhin yin la/ rnal 'byor de yang gnas skabs der shes rab dang thabs kyi rang bzhin zung du 'brel pa'i ye shes kyi ngo bo nyid de/ 'dod chags la sogs pa'i dri ma dang rnyog pa mtha' dag dang bral ba nyid dang de las gzhan pa'i ye shes khyad par can gyi rgyu nyid kyis me long lta bu'i ye shes kyi rang bzhin no//tha dad pa mtha' dag mchog tu 'dzin pa med pa'i ngo bo nyid kyi phyir mnyam pa nyid kyi ye shes kyi rang bzhin no/ /phyin ci log ma lus pa dang bral ba'i ngo bo nyid kyi phyir so sor rtog pa'i ye shes kyi rang bzhin no/ /'gro ba ma lus pa la phan pa sgrub pa'i ngo bo nyid kyi phyir bya ba sgrub pa'i ye shes kyi rang bzhin no//gzung ba dang 'dzin pa'i rnam pa la sogs pa dang bral ba'i phyir chos kyi dbyings shin tu rnam par dag pa'i ye shes kyi rang bzhin no/ /dmigs pa las ldog pas stong pa nyid kyi bdag nyid do/ /mtshan ma mtha' dag las bzlog pas mtshan ma med pa'i bdag nyid do/ / log pa'i smon lam las ldog pas smon pa med pa'i bdag nyid do/ /phyin ci log gi 'du byed las bzlog pas mngon par 'du byed pa med pa'i bdag nyid do zhes rnam par thar pa sgo bzhi'i rang bzhin no/ /de bzhin du de kho na mig la sogs par dmigs pa las ldog pas nang stong pa nyid kyi rang bzhin no/ /gzugs la sogs par dmigs pa las ldog pas phyi stong pa nyid kyi rang bzhin no//phyi nang gi rten du dmigs pa las ldog pas phyi nang stong pa nyid kyi bdag nyid do/ /dbang po rnams kyi rten ni sems kyis zin pa'i phyi nang dang phyi rol yang ste dbang pos bsdus pa ma yin pa nyid kyi phyir ro/ /stong pa nyid du dmigs pa las ldog pas stong pa nyid stong pa nyid kyi bdag nyid do//snod kyi 'jig rten du lhag par zhen pa las ldog pas chen po stong pa nyid kyi bdag nyid do/ /don dam par dmigs pa las ldog pas don dam pa nyid kyi bdag nyid do/ /'dus byas bsod nams kyi tshogs su dmigs pa las ldog pas 'dus byas stong pa nyid kyi bdag nyid do/ / 'dus ma byas stong pa nyid byang chub kyi tshogs su nye bar dmigs pa las ldog pas 'dus ma byas stong pa nyid kyi bdag nyid do/ /sgro 'dogs pa dang skur pa 'debs pa'i mthar dmigs pa las ldog pas mtha' las 'das pa stong pa nyid kyi rang bzhin no/ /thog ma dang tha ma'i mtha' dang bral ba'i 'khor bar dmigs pa las ldog pas thog ma dang tha ma med pa stong pa nyid kyi bdag nyid do//dge ba'i phyogs yongs su mi 'dor bar dmigs pas dor ba med pa stong pa nyid kyi bdag nyid do/ /chos thams cad kyi rang bzhin du dmigs pa las ldog pas rang bzhin stong pa nyid kyi rang gi ngo bo ste/ de bzhin gshegs pa la sogs pa rnams kyis ma mdzad pa'i phyir chos rnams kyi chos nyid ni rang bzhin no//stobs dang mi 'jigs pa la sogs pa'i ngo bo'i chos kyi skur dmigs pa las ldog pas chos thams cad stong pa nyid kyi bdag nyid do/ /rang dang spyi'i mtshan nyid du dmigs pa las ldog pas rang gi mtshan nyid stong pa nyid kyi bdag nyid do//dmigs pa med par dmigs pa las ldog pas mi dmigs pa stong pa nyid kyi bdag nyid do/ /phan tshun mi dmigs pa'i phyir dmigs pa med pa ni 'dir dus gsum mo/ /dngos po med pa'i ngo bo nyid du dmigs pa las ldog pas dngos po med pa'i ngo bo nyid stong pa nyid kyi bdag nyid do/ / dngos po med pa yang 'di yin la ngo bo nyid kyang yin pas dngos po med pa'i ngo bo nyid de sbyor ba las byung ba'i ngo bo nyid do/ /de ci ltar dngos po med pa yin zhe na/ rten cing 'brel par 'byung ba nyid kyi phyir ro/ /dngos por dmigs pa las ldog pas dngos po stong pa nyid kyi bdag nyid de/ skye bas na dngos po ste phung po lnga rnams so//dngos po med par dmigs pa las ldog pas dngos po med pa stong pa nyid kyi bdag nyid de/ skye ba med pas dngos po med pa ste nam mkha'o/ /rang gi ngo bor dmigs pa las ldog pas rang gi ngo bo stong pa nyid kyi bdag nyid do/ /chos rnams kyi rang bzhin phyin ci ma log par ma bcos pa ni rang gi ngo bo ste stong pa nyid kho na'o//pha rol gyi ngo bor dmigs pa las ldog pas pha rol gyi ngo bo stong pa nyid kyi bdag nyid de/ mchog nyid kyi phyir 'di pha rol yang yin la gzhan rnams kyis ma byas pa nyid kyi rang bzhin yin pa'i phyir yang ngo bo yin pas pha rol gyi ngo bo ste de bzhin nyid do zhes pas 'di ni stong pa nyid nyi shu rnams kyi ye shes kyi bdag nyid do//de bzhin du ser sna dang tshul khrims 'chal pa dang mi bzod pa dang le lo dang rnam par g.yeng ba dang 'chal pa'i shes rab dang thabs ma yin pa dang log pa'i smon lam dang stobs med pa nyid dang mi shes pa las ldog pas sbyin pa dang tshul khrims dang bzod pa dang brtson 'grus dang bsam gtan dang shes rab dang thabs dang smon lam dang stobs dang ye shes kyi pha rol tu phyin pa'i bdag nyid do//dpa' bar 'gro ba la sogs pa ting nge 'dzin gyi rang bzhin no zhes pas bsod nams kyi bdag nyid do/ /'di'i rang bzhin kho na'i ting nge 'dzin rnams gnas skabs kyi khyad par la bya ba rnams so so so sor byed pa'i phyir dpa' bar 'gro ba dang nam mkha' mdzod ces pa la sogs pa ming sna tshogs pa rnams kyis brjod kyi rang bzhin tha dad pa'i phyir ni ma yin no//de ltar ni gang gi dbang gis yo byad thams cad nam mkha' las skye ba de ni nam mkhar ram 'di'i mdzod do zhes pas nam mkha' mdzod kyi ting nge 'dzin zhes pa la sogs pa bya ba tha dad pa ste mdo ji lta bar shes par bya'o//sdug bsngal dang kun 'byung ba dang 'gog pa dang lam gyi bden pa rnams rang bzhin med pa'i phyir rtag pa dang mi rtag pa la sogs pa mi mthun pa'i phyogs dang gnyen po'i phyogs kyi ngo bo'i rnam pa rnam par gcod pa las ldog pa'i bdag nyid de/de nyid kyi phyir med pa la sogs pa thams cad shes pa nyid kyi rnam pa'i bdag nyid dang 'dod chags dang bral ba la sogs pa lam shes pa nyid kyi rnam pa'i bdag nyid kyang ngo / /byang chub kyi phyogs kyi chos sum cu rtsa bdun gyi rang bzhin nyid kyis dang gnyen po'i lam la stong pa nyid dang mtshan ma med pa dang smon pa med pa rnam par thar pa'i sgo rnams dang /sprul pa'i lam la rnam par thar pa gsum dang / mthong ba'i chos la bde bar gnas pa'i lam la thar pa dang mthun par gnas pa'i rang bzhin la gzugs med pa'i snyoms par 'jug pa bzhi dang zhi bar gnas pa'i lam gyi rang bzhin la 'du shes dang tshor ba 'gog pa dang 'jig rten las 'das pa mthong ba'i chos la bde bar gnas pa'i lam la bsam gtan bzhi dang gzugs med pa bzhi dang 'gog pa dang mthong ba'i lam la bar chad med pa'i lam bzhi dang sangs rgyas nyid kyi lam la pha rol tu phyin pa bcu rnams so zhes pa rnam pa sum cu rtsa bzhi nyid kyis dang stobs dang mi 'jigs pa dang so so yang dag par rig pa dang sangs rgyas kyi chos ma 'dres pa dang sangs rgyas thams cad kyis bshad pa'i de bzhin nyid dang /chos thams cad la dbang bsgyur ba'i rang 'byung dang rnam pa thams cad mngon par rdzogs par byang chub pa'i sangs rgyas nyid de rnam pa sum cu rtsa dgu nyid kyis na dmigs pa dang ye shes kyi rnam pa'i rang gi ngo bo thams cad shes pa nyid dang lam shes pa nyid dang rnam pa thams cad mkhyen pa nyid kyi'ang rang bzhin no//de nyid kyi phyir nyan thos dang rang sangs rgyas kyi lam dag nang du 'dus pa'i phyir lam thams cad kyi bdag nyid do/ /nyan thos dang rang sangs rgyas dang byang chub sems dpa' dang rdzogs pa'i sangs rgyas kyi gzungs dang mngon par shes pa la sogs pa 'jig rten pa dang 'jig rten las 'das pa'i yon tan gyi bdag nyid do//tshangs pa la sogs pa nas ba lang rdzi'i bar gyi sems can gyi rgyud la yod pa'i gang cung zad ye shes sam ting nge 'dzin gzhan la phan pa'i thabs su gyur pa de thams cad 'di nyid du ste/de ni thabs thams cad kyi rang bzhin yin pa'i phyir ro/ /'on kyang me long lta bu'i ye shes la sogs pa'i chos 'di rnams rim gyis sems bskyed pa nyi shu rtsa gnyis kyi bdag nyid kyi rnal 'byor 'di sems bskyed pa 'ga' zhig kho na la bya ba la sogs pa'i khyad par gyi sgo nas ldog pa tha dad pas 'ga' zhig kho na rnam par gzhag gi/thams cad du thams cad rnams ma yin no/ /de ltar re zhig byang chub sems dpa' mnyam par gzhag pa'i gnas skabs na spros pa med pa'i shes rab dang thabs kyi rang bzhin gyi rnal 'byor gyi bdag nyid ni gnas skabs kyi dbye ba ji lta bar tha dad par ji ltar rigs par bshad pa'i chos kyi rang bzhin du mgon po rnams kyis rnam par gzhag go//de'i rtags ni phal cher/ mi sems bzhin du snang med dang / /gnyid log bzhin du mi 'phro bar/ /ngal ba ngal bso bzhin du yang / /sems ni bdag med la dmigs nas/ /mig dag rengs par byed pa dang / /mgo bo dud pa nyid dang ni//sems dang sems byung mi g.yo dang / /stong nyid mthong ba'i stong pa nyid/ /gang gi tshe rnal 'byor de las langs pa de'i tshe yang mnyam par ma bzhag pa'i gnas skabs na mos pas de bzhin nyid kho nar bsgom par bya'o/ /ji skad du gsungs pa/ gang rnams rnam par dben pa zhes/ /yid ni g.yo ba'ang mi g.yo ba//de rnams nyon mongs sbrul 'khrugs pa'i/ /srid pa'i rgya mtsho 'jigs rung brgal/ /zhes so/ /rnam par mi rtog pa la 'jug pa'i gzungs su yang gsungs pa/ byang chub sems dpa' rnam par mi rtog pa'i dbyings la gnas pas ni shes bya dang khyad par med pa'i rnam par mi rtog pa'i ye shes kyi chos rnams thams cad nam mkha'i dkyil dang mtshungs par mthong ngo //de'i rjes la thob pas ni sgyu ma dang smig rgyu dang rmi lam dang mig yor dang brag ca dang gzugs brnyan dang sprul pa dang mtshungs par mthong ngo / /de nas bde ba chen po la gnas pa'i sems dang yangs pa nyid 'thob po/ /phun sum tshogs pa'i sems chen po yangs pa nyid dang shes rab chen po dang ye shes yangs pa nyid kyang ngo zhes rgya cher ro//gang gi phyir byang chub sems dpa' thabs bstan pa'i dus su yang phyin ci ma log pa'i phyir/ 'jig rten las 'das pa'i ye shes las sbyor ba dang / 'jug la sgyu ma bzhin du sgom pa ji lta ba bzhin du dngos po'i de kho na nyid la mngon par zhen pa med pa'i shes rab yang dag par 'byung ba kho na'o zhes pa thabs dang shes rab zung du 'brel par 'byung ba'i lam 'byung ba kho na'o//'di kho na rig pa chen mo mchog gi spyod pa bslab pa bla na med pa yang ste/ ji skad du bcom ldan 'das ma yon tan rin po che sdud pa tshigs su bcad par gsungs pa/ rgyal ba'i shes rab pha rol phyin 'di rig sngags che/ /sems can khams mang mya ngan sdug bsngal chos zhi byed/ /gang dag 'das dang gang yang phyogs bcu'i 'jig rten mgon/ /rig sngags 'di bslabs chos kyi rgyal po bla med 'gyur/ /gang zhig 'dir brjod sangs rgyas chos rnams mi rtog ste/ /stobs dang rdzu 'phrul rkang pa byang chub zhi mi rtog /rnam par mi rtog rtog bral byin gyi rlabs kyis spyod/ /'di ni shes rab pha rol phyin mchog spyod pa yin/ /'dzam bu'i gling 'dir sems can ji snyed ma lus pa/ /de rnams thams cad byang chub mchog tu sems bskyed nas/ /lo stong bye ba mang por sbyin pa sbyin byas la/ / kun kyang 'gro ba'i don rgyur byang chub yongs bsngo yang / /gang zhig shes rab pha rol phyin la mngon brtson pa/ /tha na nyi ma gcig cig rjes su mthun byed na/ /de la sbyin pa'i phung pos bsod nams char mi phod/ /de phyir g.yel med rtag tu shes rab 'jug par bya/ /shes rab pha rol phyin mchog spyod pa'i rnal 'byor pa//snying rje chen po bskyed kyang sems can 'du shes med/ /de tshe mkhas pa 'gro ba kun gyi sbyin gnas 'gyur/ /rtag tu yul 'khor bsod snyoms don yod yongs su spyod/ /byang chub sems dpa' gang 'dir yun ring 'brel pa yi/ /lha mi ngan song gsum gyi sems can dgrol ba'i phyir/ /lam yangs pha rol sems can khams la ston 'dod pas//nyin mtshan shes rab pha rol phyin la brtson par bya/ /bslab pa 'di ni 'dren pas bslab pa yongs brjod pa/ /ji snyed kun gyi mchog dang gong na med pa yin/ /mkhas pa gang zhig bslab kun pha rol 'gro 'dod pas/ /sangs rgyas bslab pa shes rab pha rol phyin 'dir slob//de ltar spyod mkhas rnams la lha tshogs mang po rnams/ /thal mo sbyar bar byas shing btud nas phyag 'tshal byed/ /phyogs bcu'i 'jig rten khams kyi sangs rgyas ji snyed pa'ang / /yon tan bsngags pa'i phreng ba yongs su sgrogs par mdzad/ /sems can kun gyi yon tan mchog tu 'gro ba dang / / sangs rgyas ye shes mchog tu rmad byung mchog reg dang / /chos kyi sbyin pa rab mchog dam pa sbyin 'dod gang / /phan mdzad rnams kyis gnas mchog 'di la brten par gyis/ /zhes so/ /de ltar 'di ni dbang po rnon po nyid yin pa'i phyir so so skye bo'i gnas skabs na tshogs gnyis rdzogs pa la rtag tu mngon par sbyor bar 'dod pa kho na ste/shes rab kyi pha rol tu phyin pa'i rang bzhin kho na'i sbyin pa la sogs pa'i thabs la 'jug go/ /thabs kyang sbyin pa la sogs pa'i pha rol tu phyin pa dang tshad med pa dang bsdu ba'i dngos po la sogs pa'i bye brag gis te/ de ltar kho nar yang 'phags pa blo gros mi zad pa dang mdo sde dkon mchog sprin la sogs pa'i mdo sde rnams su gsungs so//shes rab ni thabs de kho na phyin ci ma log pa'i rang bzhin du yongs su gcod pa'i rgyu'o/ /gang gi phyir des yang dag pa'i thabs su rnam par phye nas/ phyin ci ma log pas ji lta ba bzhin du rang gzhan gyi don sgrub pa'i phyir sngags kyis zin pa'i dug za ba bzhin du longs spyad pas kun nas nyon mongs par mi 'gyur ro//de bzhin du yang ga yA mgo'i mdo las gsungs pa/ thabs ni bsdu ba'i ye shes te/ /shes rab yang gcod ye shes so/ /zhes so/ /de'i phyir gnyi ga dus thams cad kho nar bstan par bya'o/ /de ltar ni snying rje chen pos sbyin pa la sogs pa'i thabs kyis gzugs kyi sku 'khor ba la sogs pa'i skal ba chen po nyid kyi 'bras bu phun sum tshogs pa yongs su 'dzin pa'i phyir bcom ldan 'das rnams mya ngan las 'das par mi gnas la shes rab kyis kyang phyin ci log thams cad spangs pa'i phyir 'khor bar ma yin te/'khor ba ni phyin ci log gi bdag nyid yin pa nyid kyi phyir ro//de ltar re zhig byang chub sems dpa' dbang po rnon po goms par byed do/ /dbang po 'bring po dang dbang po rtul po dag kyang de ltar goms par byed la/ 'on kyang dbang po 'bring pos chos thams cad skye mched bcu gnyis kyi rnam pa kho nar dmigs nas zhi gnas skyed par byed cing / dbang po rtul pos ni phung po lnga'i rnam pa kho nar chos thams cad dmigs nas zhi gnas skyed par byed de//dngos su ni rgya mtsho'i chu'i thigs pa myangs pa bzhin no/ /gang gis dngos po gcig lta ba/ /de yis thams cad mthong byed gsungs/ /gcig gis stong nyid gang yin pa/ /de nyid kun gyis stong nyid do/ /zhes so/ /gsang sngags kyi tshul las kyang yungs kar gyi tshad kyi dkar po la sogs pa snang ba la yang dmigs nas zhi gnas dang lhag mthong dag skyed par byed do zhes gsungs so//byang chub sems dpa' rnam pa gsum po 'di rnams kyang spros pa med par sbyin pa la sogs pa'i bya ba mngon par rdzogs te pha rol tu phyin pa thams cad kyi tshogs nyid kyis bya ba'i rang bzhin gyis thabs la goms pa mthar phyin pa nyid kyi phyir bskal pa grangs med pa gsum rnams mngon par rdzogs nas sangs rgyas nyid rnams kyis so//sbyin pa la sogs pas yongs su bskor ba'i byang chub kyi sems goms pa nyid ni rim gyis sems nyi shu rtsa gnyis rnams su bskyed par bya'o/ / de'i phyir shes rab dang thabs kyi rang bzhin gnyis su med pa'i ye shes kyi ngo bo byang chub kyi sems bsgom pa kho na sdig pa thams cad sbyong bar byed pa bag chags dang bcas pa'i nyon mongs pa dang shes bya'i sgrib pa yongs su 'byin pa rang gzhan thams cad legs par byed pa'o zhes pa'o/ /thub pa'i dgongs pa'i rgyan du byang chub kyi sems sgom pa'i snang ba'i le'u ste gnyis pa'o// //sems bskyed pa nyi shu rtsa gnyis po de rnams kho na theg pa chen po'o/ /de yang byang chub sems dpa'i lam 'bras bu dang bcas pa'o/ /de kho na shes rab kyi pha rol tu phyin pa'o/ /de kho na rnam pa thams cad mkhyen pa nyid la sogs pa mngon par rtogs pa brgyad rnams so//de ltar ni shes rab kyi pha rol tu phyin pa kho na rnam pa thams cad mkhyen pa nyid de/ sems bskyed pa la sogs pa'i ngo bo rgyu dang 'bras bu'i bdag nyid rnam pa ma lus pa nyid kyis dngos po mtha' dag yongs su shes pa'i phyir de bzhin gshegs pa rnams dang 'brel ba ste/ gang gi phyir rnam pa thams cad mkhyen pa nyid ni dngos sangs rgyas nyid yin la/de ni skyes bu'i don gyi mchog go/ /de kho na rgyas pa chos kyi sku'i mngon par rtogs pa ste/ gang gi phyir mngon par rtogs pa bdun rnams kyis mngon par rtogs par bya zhing thob par bya ba'o/ /de'i don nyid kyi phyir de'i lam ni rnam pa thams cad mkhyen pa nyid btags pa pa ste mngon par rtogs pa bdun gyi bdag nyid do//rnam pa kun mngon par rdzogs par rtogs pa yang rnam pa thams cad mkhyen pa nyid kyi nang du 'dus pa'i phyir de bzhin du dngos dang btags pa pa'o/ /ji skad du mdo sde rgyan du gsungs pa/ sgrib pa kun gyi dri med pa/ /rnam pa thams cad mkhyen nyid thob/ / rin chen snod ni phye ba ltar/ /sangs rgyas nyid ni yang dag bstan/ /zhes so/ /slob dpon phyogs kyi glang pos kyang / shes rab pha rol phyin gnyis med/ /ye shes de ni de bzhin gshegs/ /bsgrub bya de don du sbyor bas/ /gzhung lam dag la de sgras yin/ /zhes so/ /de nyid kyi phyir 'phags pa byams pas gsungs pa/rnam pa thams cad mkhyen nyid lam/ /ston pas 'di la bshad pa gang / /zhes so/ /'dis ni 'di btsal bya ba'am/ 'dis tshol ba zhes pas lam ste/ mngon par rtogs pa bdun nang du 'dus pa 'bras bu dang rgyu'i ngo bo rnam pa thams cad mkhyen pa nyid gsal bar byas so//de yang 'gro bar 'dod pa dang 'gro ba po'i bye brag bzhin du smon pa dang 'jug pa'i rang bzhin gyi dbye ba las rnam pa gnyis so/ /yang dang po rnam pa gsum smon pa'i sems yin la bcu dgu 'jug pa nyid de nyi shu rtsa gnyis ni stong pa nyid dang snying rje'i snying po can byang chub tu sems bskyed pa rnams so/ /de rnams kyang kun rdzob tu khyad par dang bcas la don dam par khyad par dang bcas pa ma yin khyad par med pa yang ma yin no zhes sgrub byed dang bcas pa sngar brjod zin te/kun rdzob tu yang de rnams kyi chos nyid stong pa nyid la sogs pa ni thun mong ba'o/ /chos 'ga' zhig kyang thun mong ma yin pa ste dran pa nye bar gzhag pa dang sbyin pa la sogs pa sems bskyed pa thams cad kyi gnas skabs kyi rang bzhin te/sngar khong du chud pa'i chos phyi mar rjes su 'jug go zhes pa ni rigs pa'o/ /'ga' zhig ni thun mong ma yin pa ste/ yang dag par spong ba la sogs pa sems bskyed pa'i gnas skabs kyi khyad par ro/ /gang gi tshe gdul bya'i ngor ji skad bshad pa'i ldog pa tha dad pa las stong pa nyid rnam pa nyi shu sems bskyed pa'i gnas skabs kyi khyad par rnams la rnam par gzhag pa de'i tshe de yang thun mong ma yin pa yin pa ste/de ltar ni nang dang phyi dang phyi nang stong pa nyid ni sems bskyed pa dang po nas brtsams te mos pas spyod pa'i sa la'o/ /stong pa nyid stong pa nyid ni sa de'i gnas skabs kyi khyad par bar chad med pa sbyor ba'i lam la'o//chen po stong pa nyid ni kun du 'gro ba'i don gyis sa dang po la'o/ /don dam pa stong pa nyid mchog gi don gyis gnyis pa la'o/ /'dus byas stong pa nyid ni rgyu mthun pa'i don gyis gsum pa la'o/ /'dus ma byas stong pa nyid ni yongs su 'dzin pa med pa'i don gyis bzhi pa la'o//mtha' las 'das pa stong pa nyid ni rgyu tha dad pa med pa'i don gyis lnga pa la'o/ /thog ma dang tha ma med pa stong pa nyid ni kun nas nyon mongs pa dang rnam par byang ba med pa'i don gyis drug pa la'o/ /dor ba med pa stong pa nyid ni sna tshogs pa nyid med pa'i don gyis bdun pa la'o/ /rang bzhin stong pa nyid ni 'dus byas dang 'dus ma byas kyi rnam par 'gyur ba mi brtan pa'i phyir dang chos thams cad stong pa nyid ces pa gnyis ni 'grib pa med cing 'phel ba med pa'i don gyis dang rnam par mi rtog pa dang zhing yongs su dag pa la dbang ba nyid gnyis kyi rten nyid kyis ni 'bras bu'i sa nyid kyi phyir so sor rtog pa dang yongs su sbyong ba'i dbye bas brgyad pa la'o//mtshan nyid stong pa nyid dang mi dmigs pa stong pa nyid dag ni ye shes la dbang ba'i rten nyid kyis de bzhin kho nar dgu pa la'o/ /dngos po med pa'i ngo bo nyid stong pa nyid dang dngos po stong pa nyid dag las la dbang ba'i rten nyid kyis de bzhin kho nar bcug pa la ste/ bcu bzhi pa la sogs pa sems bskyed pa bdun gyi rang gi ngo bo la'o//dngos po med pa stong pa nyid rang gi ngo bo stong pa nyid dang pha rol gyi ngo bo stong pa nyid ni go rims bzhin du nyon mongs pa'i sgrib pa bag chags dang bcas pa spong ba'i rten nyid kyis dang shes bya'i sgrib pa bag chags dang bcas pa spong ba'i rten nyid kyis dang rang byung nyid kyis sangs rgyas kyi sa la ste/ sems bskyed pa gnyis kyi rang bzhin nyid la'o/ /de la sems bskyed pa dang po ni phyi ma rnams kyi rgyu kho na'o/ /tha ma gnyis ni snga ma rnams kyi 'bras bu kho na'o/ /gnyis pa ni phyi ma rnams kyi rgyu dang snga ma'i 'bras bu ste/ de bzhin du bsam pa la sogs pa bcu dgu ni phan tshun rgyu dang 'bras bu'i dngos po'o/ /'dun pa'i snga rol gyi sems srid pa thog ma med pa nas byung ba na nye bar len pa dang nye bar blang bya nyid kyis rgyun du yang gyur pa rnams ni rnam pa 'di lta bu'i rgyu dang 'bras bu'i dngos po ma yin no zhes pa mu bzhi'o//de nyid kyi phyir byang chub sems dpa' rnams rigs kyi gnas skabs na yang de rnams la thugs brtse bas de'i don du ched du bya ba dmigs pa dang bcas pa'i byang chub tu sems bskyed pa'i bdag nyid kho na'i tshogs thams cad sogs par byed pa la 'jug go//rigs 'di ni ci/ dmigs pa ni ci/ ched du bya ba ni ci zhe na/ brjod par bya ste chos kyi dbyings chos thams cad rang bzhin med pa nyid kyi mtshan nyid can kho na 'phags pa'i chos kyi rgyu nyid kyi phyir rang bzhin du gnas pa'i rigs dang gzhi dang ston pa dang rgyu dang rten dang nye bar gnas pa dang sngon du 'gro ba dang gnas dang sa bon dang khams dang rang bzhin zhes pa'i rnam grangs kyis brjod do//de ltar ni gang rang bzhin gyis rnam par dag pa glo bur gyi dri ma rnams kyis mi snang bar byas pa'i rigs de nyid phyis dri ma ma lus pa dang bral ba las gsal bar gyur pa nyid de ni rdo rnams la lcags dang zangs dang dngul dang gser gyi rigs dang 'dra'o//chos nyid bdag nyid kyi rigs 'di kho na de bzhin gshegs pa'i snying po zhes par gsungs so/ /rang bzhin gyi rigs de yod pa nyid na yang srog chags rnams ma rig pa la sogs pa'i glo bur gyi dri mas g.yogs par gyur pa ji srid par rdzogs pa'i sangs rgyas ma yin no//rnam par rtog pa'i dri ma ma lus pa dang bral ba las ni shin tu rnam par dag pa'i chos kyi dbyings gsal bar gyur pa'i byang chub yang dag par 'grub po/ /de nyid kyi phyir khyad par du 'phags pa ni rigs te/ byang chub sems dpa'i sgra 'jug pa'i rgyu mtshan sems bskyed pa nyi shu rtsa gnyis po rnams dang de'i khyad par 'dun pa nas brtsams pa'i go cha'i sgrub pa la sogs pa rnams kyi gzhi'o//de skad du yang / rtogs pa yi ni chos drug dang / /gnyen po dang ni spong ba dang / /de dag yongs su gtugs pa dang / / shes rab snying brtser bcas pa dang / /slob ma thun mong min nyid dang / /gzhan gyi don gyi go rims dang / /ye shes rtsol ba mi mnga' bar/ /'jug pa'i rten la rigs zhes bya/ /zhes pa tshig le'ur byas pa dag gis dang stong phrag nyi shu lnga pa'i gzhung rnam par bshad pa 'phags pa rnam grol sde'i zhabs kyis gsungs pa/gang gi phyir sems bskyed pa nas brtsams te nges par 'byed pa'i cha dang mthun pa rnam pa bzhi rnams la dang / mthong ba'i lam la dang bsgom pa'i lam la de dang der byang chub sems dpa' byang chub sems dpa' zhes brjod pa bcom ldan 'das brjod par bgyi ste zhes pa la sogs pa'o/ / gnyen po ni shes rab kyi pha rol tu phyin pa'o/ /spong ba ni mi mthun pa'i phyogs rnams kyi ste/ chos kyi dbyings rnam par dag pa'i mtshan nyid do/ /gnyen po dang spong ba dag yongs su gtugs pa ni mthar thug par 'gro ba ste gnyen po mchog tu byung ba'i mthar thug pa kho na dang mi mthun pa'i phyogs zad pa'i mthar thug pa'o//seng ge bzang pos yongs su gtugs pa ni de dag skye ba dang 'gag pa dang ldan pa'i rnam par rtog pa spangs pa'o zhes so/ /'o na 'di ni rang bzhin du gnas pa'i rigs thog ma med pa'i dus nas 'ongs pa chos nyid kyis thob pa'o/ /'di ni yang dag par blangs pa las byung ba sngon gyi dge ba'i rtsa ba goms pas thob pa'o//'di ni dus re zhig nges pa nyan thos dang rang sangs rgyas kyi rigs so/ /'di ni rtag tu nges pa de bzhin gshegs pa'i rigs so/ /'di ni nyan thos dang rang sangs rgyas dang de bzhin gshegs pa'i rigs ma nges pa ste rkyen gyis 'phrogs pa'i phyir ro zhes rigs tha dad mi rigs te/ bcom ldan 'das kyis kyang gsungs pa/'jam dpal gal te chos kyi dbyings gcig dang de bzhin nyid gcig dang yang dag pa'i mtha' gcig po de ji ltar snod dang snod ma yin par gdags zhes so zhe na/ de lta bu 'di ni bden te de lta na yang brten pa nyan thos dang rang sangs rgyas dang rdzogs pa'i sangs rgyas kyi chos rnams tha dad pa'i phyir nyan thos la sogs pa'i rigs tha dad du tha snyad du bya ste/dper na nam mkha' la tha dad pa med kyang / lam tha dad pa la chag pa'i lam dang bya'i lam dang nyi ma'i lam zhes pa bzhin te/ gang gi phyir gang nyan thos la sogs pa'i byang chub rtogs pa sngon ma can byang chub chen po rtogs pa de rnams re zhig pa'i dus can du bstan pas nyan thos la sogs pa'i rigs can du bstan to//dang po nas rab tu dga' ba la sogs pa'i sa rtogs nas rim gyis bla na med pa'i byang chub bsten pa rnams ni theg pa chen po'i rigs can no zhes tha snyad las rigs tha dad pa mi 'gal la de kho na nyid du ni ma yin no/ /ji skad gsungs pa/ gang du 'du byed cung zad kyang med pa de ni 'dus ma byas pa ste de ni 'phags pa rnams kyi rigs su mtshungs la rigs de ni nam mkha' dang mnyam pa nyid kyis khyad par med pa'o//rigs de ni chos thams cad ro gcig pa nyid kyis rtag pa ste/ rigs de ni thams cad kyi tshe chos nyid yin pas shes pa la sogs pa'o/ /nges pa'i tshig ni 'di las yon tan rnams gong du sgrol bar byed kun nas skye bar byed pas rigs so//yang na 'gro bas na sems can rnams ni go'o/ /de rnams skyob pas rigs so/ /yang na 'dir ga mi ni gnas pa la 'jug pa ste/ dper na nam mkha' thams cad du song ba'o zhes pa bzhin te/ 'gro'o gnas so zhes pa go ste/ rten pa'i chos so/ /de skyob par byed mi g.yo ba'i tshul gyis 'dzin pa'i phyir rigs zhes pa ste rten no//'o na rang bzhin med pa'i chos kyi dbyings ci ltar sems bskyed rnams kyi rten yin zhe na/ dper na rang bzhin med pa'i nam mkha' zla ba dang nyi ma'i 'od rnams kyi dang mun pa sel ba'i bzhin no/ /dmigs pa ni spang bar bya ba nyid dang blang bar bya ba nyid dag gis dmigs par bya ba'o zhes pas sgrub pa'i yul lo//ci zhe na chos rnams thams cad do/ /de la mi dge ba srog gcod pa la sogs pa rnams dang / lung du ma bstan pa lus kyi las la sogs pa rnams ni spang bar bya ba'o/ /'jig rten pa dang 'jig rten las 'das pa'i dge ba sbyin pa la sogs pa rnams ni blang bar bya ba'o//de ltar byas na rang bzhin gtso bo yin la rnam 'gyur gtso bo dmigs pa ste gnyi gar yang gnyi ga ma bgag go zhes pas rten dang dmigs pa dag gi mtshan nyid kyi dbye ba dang dmigs pa dag par 'gro ba yang 'thad par 'gyur ro/ /de nyid kyi phyir gsungs pa/ rab 'byor byang chub sems dpas chos thams cad chags pa nyid dang yod par gyur pa ma yin pa nyid la bslab par bya'o//zhes so/ /rang bzhin dang 'brel pa'i rnam 'gyur dmigs pa ste rnam 'gyur tsam ni ma yin no zhes pa'i don to/ /de nyid kyi phyir rang bzhin gtso bo dgos pa dmigs par dgongs nas/ rab 'byor rnam pa thams cad mkhyen pa nyid kyi dmigs pa ni dngos po med pa'o zhes gsungs so//'di yi dmigs pa dngos med de/ /bdag po dran pa yin par bzhed/ /rnam pa bzhi nyid ces kyang ngo / /'dir dngos po med pa ni chos thams cad kyi'o/ /bdag po'i rkyen ni dran pa ste de 'di'i rten nyid yin pa'i phyir ro/ /zhi ba nyid ni rang bzhin gyis zhi ba ste dngos po la 'gag pa'i zhi ba nyid ni ma yin no//ci ltar rang bzhin dgos pa yin zhe na/ gang gi phyir chos thams cad kyi chos nyid kyi rang bzhin med pa nyid gsal por 'gyur ba bsten pa sgom pa'i don du nye bar sbyor bas so/ /'o na rang bzhin med pa zhes pa ni dngos po cung zad med pa yin la/ dngos po med pa nyid na'ang dmigs su med pa'o zhe na/bden te dngos po med pa zhes pa ni dngos por dmigs par mi 'gyur ro zhes dgongs pa'i phyir te/ dngos po med pa ni gnyis med dgag go/ /rab 'byor gnyis ni dngos po'o/ /gnyis med pa ni dngos po med pa'o zhes gsungs pa'i phyir ro/ /de dbu mar gsungs pa/ gang rnams rang dngos gzhan dngos dang / /dngos dang dngos med nyid lta ba/ /de rnams sangs rgyas bstan pa la/ /de kho na nyid mthong ba min/ /zhes pa dang / dngos dang dngos med mchog 'dzin pa/ /zad pa mya ngan 'das par brjod/ /ces so/ /don dam par ni dmigs par bya ba dang dmigs par byed pa dang dmigs pa'i spros pa 'ga' yang med de/de nyid kyi phyir shes rab dang thabs kyi rang bzhin dmigs pa med pa kho na rdzogs pa'i byang chub kyi lam zab mor sngar brjod zin to/ /'phags pa byams pas kyang gsungs pa/ bsgom pa'i lam ni zab pa ste/ /zab mo stong pa nyid la sogs/ /zab pa de ni sgro 'dogs dang //skur pa'i mtha' las grol ba nyid/ /ces so/ /'phags pa zhi ba lhas kyang gsungs pa/ stong nyid bag chags goms pa las/ /dngos po'i bag chags spong bar byed/ /ci yang med ces goms pa las/ /de yang phyi nas spong bar 'gyur/ /gang tshe dngos dang dngos med pa/ /blo yi mdun na mi gnas pa//de tshe rnam pa gzhan med pas/ /dmigs pa med pa rab tu zhi/ /zhes so/ /'phags pa rnam grol sdes kyang rnam par mi rtog pa'i ye shes kyis ci dmigs she na/ chos thams cad kyi rang bzhin stong pa nyid du'o/ /'o na dmigs par bya ba stong pa nyid 'di ni mo gsham gyi bu bzhin du med pa yin pa'i phyir/chos thams cad yod pa nyid du 'gyur ro zhe na/ ma yin te gang gi phyir gsod pa po bsad na lhas byin slar 'byung bar 'gyur ba ma yin no zhes so/ /de ltar na ci ltar dmigs par brjod ce na/ kun rdzob tu'o/ /de ltar na stong pa nyid ces bya ba ni dngos po'i tshogs rnams stong pa kho na ste gzhan dang ma 'dres pa'i khyad par/khyad par gzhan gsal bas brjod par bya ba'o/ /de bzhin du yang stong pa nyid sgom pa zhes pa yang dngos po'i tshogs stong par sgom pa zhes pa kho na'i don to/ /'o na de ltar na bsgom par bya ba'i chos thams cad dmigs par 'gyur la dngos po med pa'i dmigs pa'o zhes pa de nyes pa'o/ /ci ste chos nyid dang tha dad pa med kyang tha dad pa bzhin re zhig snang ba de lta na yang lhag par zhen pa las chos su gyur pa kho na bsgom par bya'o zhes pa ni nyes pa de las mi grol te ma 'brel par gnas pa nyid kyis sgom par mi nus pa nyid kyi phyir ro//de ltar yang dngos po skyes pa 'di rang bzhin med pa'o zhes pa'i rnam pa 'di kho na sgom pa las de ci ltar chos kyi de kho na nyid sgom pa'i phyogs la chos kyi 'dus te reg pa yongs su spong /yongs su spong na yang chos gzhan sgom pa kho nar 'gyur gyi chos nyid sgom pa ma yin no zhe na/ bden te gal te yang chos kyi de kho na nyid bsgoms pas kyang chos spyir 'phangs pa de lta de lta na yang de kho na nyid tsam la ched du gtad nas gnas te de kho na nyid sgom pa kho na gsal bar gyur pas 'khor ba'i ngan 'gro 'byin pas so//gang gi phyir 'dod ldan ma lus mchog tu bsgoms pas mngon du byas na 'dod chags zum par 'gyur ba'am dgra bo'i lus kyis zhe sdang 'dzums pa'am gnyis kar sems pa med pas gti mug 'bri ba med de 'on kyang rang bzhin med pa nyid kho nar ro//de nyid kyi phyir de kho na la ched du gtad pas de kho na gsal ba nyid sman du 'gyur gyi chos rnams bsgoms pas ni ma yin no/ /'o na de la ched du gtad na'ang chos nyid kho na gsal bar 'gyur gyi chos ma yin zhes pa'i 'thad pa ci ste/ bsgoms pas gnyis ka yang dbang du byed pa'i phyir te chos la ma reg par chos nyid tsam gsal bar 'gyur ba ci 'dra ba yin zhe na/skyon 'di med de/ chos gsal bar 'gyur ba la ma reg par yang chos nyid tsam gsal bar 'gyur ba mthong ba'i phyir te/ chos nye ba la ma ltos par gsal ba dang gsal byed ces mi 'gyur ba 'ba' zhig go/ /gsal bar gyur kyang de de'i yul 'dus pa na rtsol ba la ma ltos par yud tsam gyis de'i shes pa la de'i rnam pa gsal du zin kyang chos nye ba la ltos pa ni ma nyams te/chos nyid kyi rang gi ngo bo kho na'i phyir dga' ba nyid la sogs pa bzhin no/ /de ltar nim pa'i ro la sogs pa la dga' ba nyid du goms pa ni gsal bar gyur pa mthong ste/nim pa la sogs pa'i chos can gyi de chos so zhes de bsgoms pas/ nim pa la sogs pa rang skye ba'i yul na gnas pa'am lce'i rtse mor son pa la yang ji srid phyin ci log tu sgom pa la mngon par sbyor ba phul byung med pa'i bar du gsal zhing gsal ba yod pa ma yin no/ /gsal bar gyur pa'i dga' ba nyid kyang nim pa la sogs pa nyams su myong ba la ma ltos par 'brel med du gnas pa na mi dmigs kyi/'on kyang gang dang gang gi tshe nim pa la sogs pa nyams su myong ba de'i tshe yud kyis dga' ba nyid nyams su myong ba'i yul sngar bzhin du yid 'byung ba'am/ gnyis ka ma yin pa med na'o zhes pa 'di kho na chos nyid gsal bar 'gyur ba'i don to//ji ltar bzang mo la sogs pa'i chos gsal bar gyur na yang de'i chos nyid gsal bar 'gyur ba med pa de bzhin du gnyis ka phan tshun mi 'khrul na yang de kho na nyid bsgoms pas kyang chos gsal bar 'gyur ba med do zhes pas skyon ci 'dra zhig yod/ ji ltar yang dga' ba nyid ces pa ni bde bar byed pa nyid de/de la yul gang la gang dga' ba nyid du sgom pa de'i sems kyi rgyun bsgoms pas 'dus byas pa rgyur byas nas yul de lhan cig byed pa can gyi bde ba goms pa kho na las skyes pa de bzhin du snying rje la sogs pa'i yid las byung ba rnams la yang sbyar bar bya ste/ sdug bsngal can gdon no zhes pha rol sdug bsngal can gdon par bsgoms pa las gsal bar 'gyur te/de'i yul dang nye ba na yud tsam gyis de'i shes pa de dang rjes su mthun pa'i sgrub pa rab tu bskyed pa'i rgyu ste 'brel pa can kho na dang ngam nye bar cig shos dang lhan cig gsal ba nyid ni ma yin no/ /ji skad du thams cad mkhyen pa grub par gsungs pa/brtse ba la sogs rtogs pa phul byung thob pa rnams ni de yi spyod yul nyer gnas na/ /'di ltar rtsol la ltos pa med par de rnams rang gi rang gis so sor bdag nyid gsal/ /zhes so/ /de'i phyir rang bzhin med pa'i chos nyid goms pa phul du byung bar 'gro na yang ji srid rnal 'byor pas nyams su myong bar bya ba de srid du rang bzhin med pa'i rang gi ngo bo ni so so skye bo la sogs pas mthong ba'i mtshan nyid dang bral ba kho na'o//dngos po dang dngos po med pa la sogs par 'khrul pa las byung ba 'dod chags la sogs pa'i dri mas 'di'i sems mtshan ma med pa'o zhes pa 'di tsam de'i gsal bar snang ba nyid do//'di phyin ci log tu sgom pa mi srid de/ gang gi phyir rtog pa sngon du gtong ba rang gi don nam gzhan gyi don du sgom pa mngon par brtson pa de de tsam kho na nyid du don byas par gyur pas ngal ba gzhan la cis na 'jug ces pa ste/ don med pa nyid kyi phyir dang don byed pa ma yin pa nyid kyi phyir ro//dper na bza' ba dang sman la sogs pa rnams la mngon par 'dod pa dang smin pa thob pa na bzhin te/ ji ltar yang 'dir smin pa gzhan mngon par mi 'dod pa srid kyang / de tsam kho na smin pa phul du byung ba mthar thug par tha snyad byed pa de bzhin du skabs su yang ngo zhes pas skyon ci yang med do/ / gzhan yang / 'tshe ba med dang yang dag don/ /rang bzhin la ni phyin log gis/ /'bad pa ldan yang mi gnod de/ /blo ni de phyogs 'dzin phyir ro/ /zhes rnam 'grel du gsungs pa nyid kyis slar yang dpyod par 'gyur ro/ /de ltar mnyam par ma bzhag pa'i gnas skabs na kun rdzob dang don dam pa'i bden pa'i bdag nyid kho na'i chos rnams dmigs pa'o//mnyam par bzhag pa'i gnas skabs na ni rnam par rtog pa'i spros pa mtha' dag ldog pa na dmigs pa la sogs pa ci yang med do zhes gnas so/ /ched du bya ba ni bsgrub pa rnams kyi ched du bya ba'o zhes las su sgrub pa nyid yin pa'i phyir bag chags dang bcas pa'i nyon mongs pa dang shes bya'i sgrib pa spangs pa dang /sems bskyed pa nyi shu rtsa gnyis rnams lam chags pa nyid kyis ji srid du rnam pa thams cad du chos thams cad rtogs pa'i bar te/ gang bcom ldan 'das ma'i rnam par bshad pa 'phags pas gsungs pa/ de la sems dang po bskyed pa nas bzung ste zhes pa brda las byung ba'o//chos gang gi yang skye ba'am 'gag pa med ces pa ni dran gyi dus su snga ma dang phyi ma'i gnas skabs dag la 'gag pa dang skye ba'i tshul gyis shes pa la sogs pa dang 'khor ba pa dang zhugs pa dang 'bras bu la gnas pa la sogs pa sems can gyi phung po ma lus pa'i mchog nyid kyi sems kyi mtshan nyid ces pa gsum mo//de bzhin du bstan bcos las kyang / sems can kun mchog nyid sems dang / /spangs dang rtogs pa gsum po la/ /chen po gsum gyi rang 'byung gi/ /ched du bya ba 'di zhes bya/ /zhes so/ /rang nyid sangs rgyas su 'byung bar 'gyur ba byang chub sems dpa' rnams kyi'o//dmigs pa dang ched du bya ba'i khyad par ni/ mda' ltong sbyor ba dang 'ben la phog pa dang chos mtshungs par shes par bya ba'o/ /de'i tshe bdag nyid ni dmigs pa ste/ sgrub pa dang dus mnyam pa nyid kyis de'i yul gyi dngos po rnam par gzhag pa'i phyir ro/ /ched du bya ba ni che ge mo pa thag ring ba ste de ni 'byung ba de'i 'bras bu'i gnas skabs kyi rang bzhin nyid kyi phyir ro//de ltar rigs dang dmigs pa dang ched du bya ba dang ldan pa'i sems skyed par byed do/ /sems bskyed pa de'i mtshan nyid ni stong phrag nyi shu lnga par gsungs pa/ byang chub sems dpa' ci nas kyang bdag bla na med pa yang dag par rdzogs pa'i byang chub tu sangs rgyas par bya'o//gzhan gyi don bsgrub par bya'o zhes de ltar don du gnyer ro zhes so/ /bstan bcos su yang / sems bskyed pa ni gzhan don phyir/ /yang dag rdzogs pa'i byang chub 'dod/ /ces so/ /de la yang dag par rdzogs pa'i byang chub 'dod pa nyid ni de don du gnyer ba dge ba'i chos 'dun pa sems las byung ba yin mod/de yod na byang chub tu sems skyed par byed do zhes bya bas rgyu la 'bras bu btags pa ste/ de ltar don du gnyer ba'i dge ba'i chos thams cad 'phel bar 'gyur ro zhes shes par bya ba'i ched du'o/ /yang de don du gnyer ba dang lhan cig spyod pa sems bskyed pa la de'i sgras btags pa ste de ltar don du gnyer ba dang lhan cig tu gyur pa'i sems skyed par byed do zhes shes pa'i ched du'o//yang na sems ni mngon par 'dod pa ste de ltar ni 'gro bar 'dod zer ba ni bdag gi sems 'gro bar zhes pa'o/ /de bskyed pa ni sems bskyed pa'o/ /mngon par 'dod pa ni bskyed pa las mi 'khrul pa las bskyed pa smos pa ni khyad par yongs su gzung ba'i don du'o//yang dag par rdzogs pa'i byang chub la 'dod pa ste mngon par 'dod pa gang gi yin pa ste de'i ngo bo ni de nyid do/ /de'i phyir gzhan gyi don gyi ched du yang dag par rdzogs pa'i byang chub la dmigs pa'i sems bskyed pa ni sems bskyed pa'o zhes pa 'di'i mtshan nyid do//'o na don du gnyer ba ni rtog pa ste de dang lhan cig gyur pa'i sems ci ltar bcom ldan 'das kyi yin zhe na bden te don du gnyer ba'i don du gnyer ba po nyid de byed pa po'i chos sngon gyi sems so so dang / don du gnyer byas zin pa nyid de las kyi chos phyi ma'i sems so so yang ngo / / de'i phyir don du gnyer bas byas zin pa'i sems rnam par rtog pa med pa kho na ni bcom ldan 'das kyi ste/ de ltar mngon par 'dod pa'o/ /yang na ji ltar sngar gyi sdug bsngal dang bral bar 'dod pa'i snying rje chen po rnam par rtog pa'i bdag nyid yin kyang / de bzhin gshegs pa'i rnam rtog med pa yin pa de bzhin du/yang dag rdzogs byang chub 'dod nyid/ /ces pa kha na ma tho ba med do/ /sems bskyed pa de yang dbye na nyi shu rtsa gnyis su bcom ldan 'das ma stong phrag nyi shu lnga pa dang 'bum par yang gsungs so/ /de la thun mong du stong pa nyid kyi ye shes ni shes rab kyi pha rol tu phyin par brjod la/ dbye na ni/ rnam kun mkhyen nyid lam shes nyid/ /de nas thams cad shes pa nyid/ /rnam kun mngon rdzogs rtogs pa dang / /rtse mor phyin dang mthar gyis pa/ /skad cig gcig mngon rdzogs byang chub/ /chos kyi sku dang de rnam brgyad/ /ces pa de kho na mngon par rtogs pa brgyad rnams so/ /de la rgyu dang 'bras bu ma lus pa rtogs pa las ltos pas de bzhin gshegs pa rnams kyi ni rnam pa thams cad mkhyen pa nyid do zhes mngon par brjod pa'i phyir der bshad pa'i lam ni byang chub sems dpa' rnams kyis mi 'gyur ro zhes dogs pa bsal ba'i don du 'bras bu'i gnas skabs mtha'i sems bskyed pa gnyis gzhag pa'i rgyu'i gnas skabs kyi sems bskyed pa nyi shu ni lam shes pa nyid de byang chub sems dpa' rnams kyir rnam par gzhag go//lam gyi rnam pa shes pa nyid ces kyang ngo / /'dir lam shes pa nyid kyi skabs su rang gi mthar thug par son pa bsgrubs nas theg pa gzhan gyis gdul ba'i sems can gyi don du mngon du mi byed par rgyu dang bcas pa'i lam nye bar ston pa la mkhas pa'i phyir byang chub sems dpa' rnams kyis lam thams cad yongs su rdzogs par bya ba de'i phyir thams cad shes pa nyid ni sems bskyed pa lnga pa'i bar ro//de ltar ni/ shes pas srid la mi gnas dang / /snying rjes zhi la mi gnas pa//zhes pas srid pa dang zhi ba la mi gnas pa'o/ /gzugs la sogs pa'i phung po rnams dang sbyin pa la sogs pa rnams kyi mtshan ma dang bcas par dmigs pa ni mi mthun pa'i phyogs te/ mtshan ma med par dmigs pa chags pa mi 'jug pa thabs la mkhas pa ni gnyen po'i phyogs so/ / chags pa spong ba ni chos thams cad rang bzhin med pa nyid du rang bzhin gcig pa nyid kyis na shes pa dang shes bya mnyam pa nyid du gcig par yongs su shes pas so/ /mnyam pa nyid ni spros pa thams cad mi dmigs pa'o/ /de nyid kyi phyir rang bzhin rtogs par dka' ba nyid de bsam gyis mi khyab pa nyid kyang ngo //dran pa nye bar gzhag pa la sogs pa'i bdag nyid thar pa'i cha dang mthun pa dang nges par 'byed pa'i cha dang mthun pa dang mthong ba'i lam yang chos kyi bdag med pa rjes su rtogs pa'i sgo nas/ byang chub sems dpa' rnams kyi thar pa'i cha dang mthun pa dang nges par 'byed pa'i cha dang mthun pa dang mthong ba'i lam gyi nang du 'dus so//de ltar ni nyan thos rnams ni gzugs la sogs pa la mi rtag pa la sogs pa'i rnam pa rnams su dmigs la byang chub sems dpa' rnams ni mi rtag pa la sogs pas khyad par du byas pa kho na'i gzugs la sogs pa rnams stong pa nyid du'o/ /de la gang gi tshe gzugs la sogs pa rnams rtag pa med par rtogs pa de'i tshe 'di rnams nyan thos la sogs pa'i nges par 'byed pa'i cha dang mthun pa la sogs pa rtogs pa rnam par gzhag go//gang gi tshe 'di rnams de ltar gyur pa 'di rnams la mngon par zhen pa med pa la sogs pa bskyed pa de'i tshe rang gi nges par 'byed pa'i cha dang mthun pa la sogs pa rtogs par ro zhes pa'o//nyan thos dang rang sangs rgyas dag gi thams cad shes pa nyid ni chos kyi bdag med pa dang bral ba'i sgo nas srid pa dang zhi ba la gnas pa la sogs pa'i ngo bo'o/ /gang bcom ldan 'das ma bar mar gsungs pa thams cad shes pa nyid shes pa dang mthong bas bltas nas 'da' bar 'dod pa dang lam shes pa nyid yongs su rdzogs par 'dod pa dang rnam pa thams cad mkhyen pa nyid thob par 'dod pa'i byang chub sems dpas shes so//de la shes pa ni gang byang chub sems dpa'i mngon par rtogs pa sa dang po la mthong ba'i lam gyis bsdus pa ste/ byang chub sems dpa'i mthong ba'i lam kho nar nyan thos la sogs pa'i rtogs pa mtha' dag yongs su rdzogs pas so//rjes su dpag pa'i shes pa bsal ba'i don du mthong ba gsungs la/ 'khrul pa'i mthong ba bsal ba'i don du shes pa gsungs so/ /shes pa dang mthong ba gsungs pa ni nyan thos dang rang sangs rgyas kyi sa dag la byang chub sems dpa'i bsgom pa'i lam med par shes pa'i don du'o//'da' ba ni yang rnam pa kun mngon par rtogs pa la 'jug pa'o zhes 'phags pa'o/ /slar yang 'phags pas sems dang po bskyed pa nas bzung ste/ pha rol tu phyin pa rnams la spyod pa'i shes pa dang mthong ba dag gis dkar po rnam par mthong ba'i sa la sogs pas rnam pa brgyad las 'da' ba zhes so//gang nyan thos kyi lam gyis thob par bya ba rgyun tu zhugs pa'i 'bras bu la sogs pa rnams dang gang rang sangs rgyas kyi lam gyis thob par bya ba rang sangs rgyas nyid de rnams ni byang chub sems dpa' thob par mi byed do/ /'on kyang sems can rnams rgyun tu zhugs pa'i 'bras bu nas rang byang chub kyi bar la so sor 'jog go//ji ltar rang gis ma thob pa'i chos gzhan so sor 'god par byed ce na 'di la bcom ldan 'das kyis gsungs pa/ shA ri'i bu gang nyan thos dang rang sangs rgyas rnams kyi shes pa dang spong ba de ni mi skye ba'i chos la bzod pa thob pa'i byang chub sems dpa'i bzod pa'o zhes so//de yang sdug bsngal la chos shes pa'i bzod pa'o/ /de ci las she na/ gang gi phyir lam gzhan la khyad par yod pa na rigs dang dbang po dang tshogs khyad par can nyid kyi phyir ro/ /byang chub sems dpa'i bzod pa'i byed par cig shos rnams kyis rtogs pa'i byed pa ma lus pa bsdus pas gang de rnams kyi shes pa dang spong ba de mi skye ba'i chos la bzod pa yin te rtogs pa dang spangs pa 'di tsam nyid kyis ma yin no//gang gi phyir de rnams kyi bsgom pa'i lam la rtogs pa dang spangs pa lhag na de dag bzod pa 'di nang du 'dus pa las min gyi gtso bo ni nang du 'dus pa las so/ /'o na de lta na bcom ldan 'das mar/mthong ba'i lam kho nar nyan thos dang rang sangs rgyas kyi rtogs pa las 'das par gsungs la/ 'phags pa byams pa'i rnam par thar pa'i mdor yang / dper na rigs chen po'i dbang gis rgyal po'i bu skyes nas ring po ma lon pas blon po rgan po rnams zil gyis gnon pa de bzhin du byang chub kyi sems dang snying rje'i dbang gis de bzhin gshegs pa chos kyi rgyal po'i rigs su skyes pa las dang po pa'i byang chub sems dpa' byang chub tu sems bskyed nas/ring po ma lon pas nyan thos dang rang sangs rgyas rnams zil gyis gnon no/ /de bzhin du bya khyung dbang po'i bu skyes nas ring po ma lon pa'i dpes de ma thag tu gang sems dang po bskyed pa'i byang chub sems dpa' thams cad mkhyen pa nyid du sems bskyed pa'i stobs dang pha rol gnon pa dang lhag pa'i bsam pa'i mig yongs su dag pa'i yon tan te nyan thos dang rang sangs rgyas thams cad la yod pa ma yin no zhes so//dkon mchog sprin gyi mdor yang /mos pas spyod pa'i sar byang chub sems dpa' nyan thos dang rang sangs rgyas kyi sa thams cad las 'das par 'gyur ro/ /byang chub sems dpa'i sa don dam pa ma thob par yang 'gyur ro zhes so/ /'phags pa sa bcu par yang / sems bskyed pa tsam gyis nyan thos dang rang sangs rgyas thams cad lhag pa'i bsam pa'i bdag nyid chen pos zil gyis non gyi rang gi blo'i rnam par dpyod pa'i stobs kyis ma yin no//byang chub sems dpa' sa bdun pa 'di la gnas pa'i byang chub sems dpa' ni rang gi yul gyi ye shes kyi bdag nyid chen po la gnas pa nyid kyi phyir nyan thos dang rang sangs rgyas thams cad kyi bya ba las 'das par 'gyur ro zhes gsungs so//'dir mdo dang por thar pa'i cha dang mthun pa'i gnas skabs su zil gyis mnan par gsungs la/ gnyis par ni nges par 'byed pa'i cha dang mthun pa'i gnas skabs su ste/ gsum par ni sa dang po dang bdun pa la yang ngo / /zhes pa ci ltar mi 'gal zhe na ma yin te/dang po dang gnyis pa'i gnas skabs dag na rtogs pa'i bdag nyid chen po zil gyis mi non gyi/ 'on kyang byang chub tu sems bskyed pa la sogs pa rnams kyis so/ /rab tu dga' bar ni nyan thos dang rang sangs rgyas kyi lam mthong ba ste nyan thos la sogs pa'i lam bsgom pas ni ma yin la/de med kyang de'i lam rtogs pa'i phyir ring du song ba la byang chub sems dpa'i rtogs pa lhag pa nyid kyi phyir ro/ /de ltar yang slob dpon dbyig gnyen gyis sa bcu pa'i 'grel par sa bdun pa la gsungs pa/ de la nyan thos dang rang sangs rgyas kyi sa las rgyu gnyis kyis 'da' bar yongs su gsal bar byas te thabs dang shes rab sgom pa'i stobs dang snying rje'i stobs kyis so zhes pa dang /mtshan ma med pa la gnas pa'i rab tu sbyor ba mthar thug par 'gro ba'i don dang / 'jig rten pa dang / dman pa'i 'jig rten las 'das pa'i lam las 'das pa'i don gyis ring du song ba'o zhes so/ / slob dpon zla ba grags pas kyang / rang sangs rgyas rnams thub dbang dbyangs skyes bcas/ /rdzogs pa'i byang sems dang po la gnas pas/ /bsod nams dbang gis thul zhing rnam par 'phel/ /ring du song bar de ni blos kyang lhag /ces so/ /de nyid kyi phyir sa bcu par gsungs pa las/ nyan thos dang rang sangs rgyas rnams la yang chos thams cad rang bzhin med pa nyid du shes pa yod do zhes gsal bar nges par bya'o//gzhan du na dngos po rang bzhin med par yongs su shes pa dang bral ba nyid kyi phyir ro/ /'jig rten pa'i 'dod chags dang bral ba rnams bzhin du de rnams kyang sems dang po bskyed pa'i byang chub sems dpas kyang rang gi blo'i rnam par dpyod pas kyang zil gyis gnon par 'gyur la/phyi rol pa bzhin kho nar 'di rnams kyi khams gsum na spyod pa'i bag la nyal thams cad spangs par mi 'gyur te/ gzugs la sogs pa'i rang gi ngo bor dmigs pas phyin ci log pa nyid kyi phyir ro/ /bdag nyid la bdag med pa rtogs par yang mi 'gyur te/bdag tu btags pa'i nye bar len pa phung po la dmigs pa'i phyir ro/ /ji skad du/ rgyal po'i rin po che'i phreng bar yang / ji srid phung por 'dzin byed pa/ /de srid de las bzhes su'ang / /nga ru byed pa yod na slar/ /de las las dang skye ba yang / / zhes pa nas/ bde bar mngon par nga rgyal ba/ /sdug bsngal sel don la ji bzhin/ /de bzhin sdug bsngal sngon rlom pa'ang / /bde ba 'joms par byed pa skye/ /bde bar phrad pa'i sred pa nyid/ /rang bzhin med pas rab tu spong / /sdug bsngal bral bar sred pa yang / /de phyir de ltar mthong bas grol//gang gis mthong ba yin zhe na/ /tha snyad du ni sems brjod bya/ /sems byung med pa'i sems med de/ /don med nyid phyir 'byung mi 'gyur/ /de ltar 'gro ba don med pa/ /ji bzhin rtogs nas rten med do/ /nyer len med pas mya ngan 'da'/ /me yi nyer len med pa bzhin/ / zhes pa'i bar du'o/ /gal te yang chos thams cad rang bzhin med par shes pa de lta na yang de rnams la chos kyi bdag med pa yongs su rdzogs par sgom pa med la/ khams gsum na spyod pa'i nyon mongs pa spong ba'i thabs tsam ni yod do/ /de rnams kyi gang zag gi bdag med pa ma lus par sgom par ni shes rab kyi pha rol tu phyin pa la sogs pa rnams su rnam par gzhag go//gzhan rnams na re nyan thos dang rang sangs rgyas dag la gang zag gi bdag med pa shes pa kho na yod kyi chos kyi bdag med pa shes pa med par shes rab kyi pha rol tu phyin pa la sogs pa rnams su mang du gsal por gsungs pa'i phyir/ sa bcu par gsungs pa ni rnam pa gzhan du yang 'thad cing / skad cig tsam bdag med par shes pa yang 'jig rten pa'i 'dod chags dang bral ba rnams dang / phyi rol pa rnams las kyang khyad par du 'phags pa'i phyir dang / bag la nyal spong ba ni bdag gi bdag med par rtogs pas kyang 'gyur ro/ / rin chen phreng bar gsungs pa rnams kyang kha cig skad cig ma'i bdag med du sbyar te nyan thos dang rang sangs rgyas dang byang chub sems dpa'i rigs rnams kyi thun mong du gsungs pa'i phyir ro zhes zer ro/ /zhes pa ste re zhig gzhag go/ /dkyus ma rjes su sbrel bar bya ste/ de ltar na lam shes pa nyid kyi nang du thams cad shes pa nyid 'dus na mngon par rtogs pa log pa nyid du gsungs pa ci zhe na/byang chub sems dpa' rnams kyis mi rtag pa la sogs pa'i rnam pa ldog pa'i sgo nas 'phags pa rnams kyis dngos po ma lus pa yongs su shes pa'i don du thams cad shes pa nyid legs par brjod do/ / de ltar ni chos kyi bdag med dang bral ba'i sgo nas srid pa dang zhi ba la gnas pa la sogs pa'i rang bzhin gang zag gi bdag med pa rtogs pa tsam gyi shes rab kyi pha rol tu phyin pa'i bdag nyid ni nyan thos rnams kyi thams cad shes pa nyid do/ /de bzhin du rang sangs rgyas rnams kyi ste 'on kyang gang zag gi bdag med pa dang /gzung bya'i don gyi rtog pa spangs pa'i phyir chos kyi bdag med pa'i phyogs kyang rtogs pa tsam gyis shes rab kyi pha rol tu phyin pa'i bdag nyid ni thams cad shes pa nyid de/ byang chub sems dpas shes par bya ba'i mngon du bya ba ni ma yin no/ /de nyid kyi phyir 'di rnams kyi bsgom pa'i lam bcom ldan 'das mar ma bstan to//byang chub sems dpa' rnams kyis gzhan gyi don du ni ji ltar mthong ba kho na'i don yang dang yang du mngon du phyogs par bya ba ni bsgom pa'i lam mo zhes nye bar bstan to/ /de lta na yang bcom ldan 'das mar gsungs pa ni rtogs par sla ba nyid kyi phyir ro/ / rnam pa kun mngon par rdzogs par rtogs pa'i mngon par rtogs pa rnam pa thams cad mkhyen pa nyid bzhin du sems bskyed pa nyi shu rtsa gnyis kyi bdag nyid do/ /de ni rnam pa thams cad mkhyen pa nyid kyi thar pa'i cha dang mthun pa gsum dang / nges par 'byed pa'i cha dang mthun pa rnam pa bcu gnyis dang mthong ba'i lam skad cig ma bcu drug dang bsgom pa'i lam brgyad cu'i rnam pa rnams so zhes pa bcu gcig lhag pa'i brgyar so sor phye ba rnams las rang gi mtha' spros pa thams cad las ldog pas cig car nyid du mtshon par bya ba thams cad mkhyen pa nyid gsum gyi rnam pa'i khyad par gyi gnas skabs bcu gcig lhag pa'i brgya'i grangs rnams la thar pa dang nges 'byed cha la phan pa dang mthong ba dang bsgom pa'i lam bcu gcig lhag pa'i brgya'i rab tu dbye ba rnam par gzhag cing /bsgom pa'i lam gyi mtha'i rnam pa gcig ni bsgoms pas btsal bar bya ba nyid kyis na bsgom pa'i lam shin du ba'i ngo bo sems bskyed pa gnyis kyi bdag nyid de/de'i phyir de dag ni 'khor ba dang mya ngan las 'das pa mnyam pa nyid dang / zhing dag pa bla na med par rim pa ji lta bar rnam par gzhag go zhes pa bcu gsum lhag pa'i brgyar rab tu dbye'o/ /de nyid kyi phyir rnam pa kun mngon par rdzogs par rtogs pa btags pa pa ni sbyor ba ste/dngos ni rnam pa thams cad mkhyen pa nyid chos kyi sku'i nang du 'dus pa srid pa dang zhi ba mnyam pa nyid kyi bdag nyid 'bras bu kho na'o zhes mtshan nyid de'i sbyor ba dang / zhes pa la sogs pa tshig le'ur byas pa gnyis su rtogs par bya'o/ /de ltar ni 'phags pas/ srid dang zhi dang mnyam nyid dang / / zhes pa'i 'grel par gsungs pa/ da ni 'khor ba dang mya ngan las 'das pa mnyam pa nyid brjod par bya'o/ /mi slob pa'i dge 'dun gyi mtshan nyid gsal bar bya ba'i don du ste/ de gnyis mnyam pa nyid du rtogs pa las ni mi slob par 'gyur ro zhes so/ /dgongs pa nges par 'grel pa'i mdor yang / nyon mongs pa dang shes bya'i sgrib pa phra mo spangs pa las shes bya ba la ma chags ma thogs pa rnam pa kun mngon par rdzogs par rtogs pa nye bar bzung nas bcu gcig pa sangs rgyas kyi sar brjod do zhes so/ /thar pa'i cha la phan pa la sogs pa 'di rnams su ji ltar rigs par bsgom par bya ba thams cad mkhyen pa nyid gsum gyi rnam pa dang sbyor ba ni yon tan mthong ba dang skyon spong ba dang mtshan nyid yongs su shes pa sngon ma can goms par bya'o//rang gi sangs rgyas kyi zhing dag pa rdzogs pa dang thabs la mkhas pas skal ba ji lta ba bzhin du sangs rgyas kyi phrin las byed do/ /de la/ dngos po shes pa'i bye brag rnams//rnam pa zhes pa mtshan nyid do/ /dngos po ni dmigs pa ste bden pa bzhi la sogs pa'o/ /de'i shes pa dang de'i ched du bye brag rnams te bye brag gang rnams kyis de yongs su shes par bya bar sgro 'dogs pa ste/ rtag pa la sogs par 'dzin pa mi mthun phyogs kyi gnyen po'i chos nyid kyi rang bzhin de rnams kyi rnam pa zhes pa ni mtshan nyid ces bya bar rnam par gzhag go//de rnams kyang rtag pa dang mi rtag pa la sogs pa'i spros par sgro 'dogs pa mtha' dag las log pa'i byang chub kyi sems kho na'i rang gi ngo bo rnams te/ gdul bya'i bsam pa tha dad pa'i ngor de dang de las ldog pa'i dbye bas tha dad pa bzhin du bcom ldan 'das mar rnam par gzhag go//'dir yang gnas skabs ji lta ba bzhin 'ga' zhig rnam par 'jog par 'gyur ro/ /sbyor ba ni mdor bsdu na ji skad bshad pa'i byang chub kyi sems sgom pa kho na'o/ /rgyas par ni bstan bcos su'o/ /sbyor ba'i phan yon bdud kyi mthu bcom pa la sogs pa rnams ni yon tan te/'dun pa la sogs pa rnams su 'chad par 'gyur ro/ /skyon rnams ni sbyor ba'i bar chad do/ /mtshan nyid ni rnam pa bzhi ste 'dis mtshon par bya ba zhes pa la sems can gyi sems kyi spyod pa la sogs pa ni shes pa'o/ /bsam gyis mi khyab pa nyid la sogs pa khyad par ro/ /rang dang gzhan la phan pa la sogs pa byed pa'o//de'ang phan pa ni 'gro ba lnga las rnam par bkrol nas mya ngan las 'das pa la so sor 'god pa'o/ /bde ba ni sdug bsngal thams cad las bkrol nas mya ngan las 'das pa la 'god pa'o/ /skyob pa ni 'khor ba pa'i sdug bsngal rnams spang ba'i ched du chos ston pa'o//skyabs ni skye ba dang rga ba dang na ba dang 'chi ba la sogs pa'i chos can gyi sems can rnams de las yongs su grol ba'o/ /gnas ni chos thams cad dang 'brel pa med pa'i ched du chos ston pa'o/ /dpung gnyen ni mchog thob par byed pa'o/ /gling ni rgya mtsho dang chu bo dag la chus yongs su bcad pa'i phyogs yin pa de bzhin du sngon gyi mtha' 'khor ba dang phyi ma'i mtha' mya ngan las 'das pas yongs su bcad pa'i chos thams cad de 'di lta ste de rnams kyi stong pa nyid dang mi dmigs pa nas mya ngan las 'das pa'i bar yin zhing de thob par byed pa ni gling ngo //ma rig pa'i sgo nga'i sbubs su yongs su bcings pa rnams gang snang bar byed pa de yang gling ste sgron ma dang chos mtshungs pa'i phyir wa yig phyis pa'o//gzhan yang gling thob par byed du 'jug pas na gling ste ded dpon no/ /de'i las kyang gling ste/ 'di lta ste mya ngan las 'das pa rin po che'i gling du khrid par byed pa'o/ /de'i phyir gling ni rnam pa gsum mo//yongs su 'dren pa ni snying rje chen po bskyed de gzugs nas dgra bcom pa nyid kyi bar gyi skye ba med pa'i ched dang 'gag pa med pa'i ched dang kun nas nyon mongs pa med pa'i ched dang rnam par byang ba med pa'i ched du chos ston pa'o/ /lhun gyis grub pa ni lhun gyis ma grub pa 'bad rtsol dang g.yo 'gul 'gro ba dang 'ong ba dag ste de bkag pa'i phyir ro//theg pa gsum gyis nges par 'byung zhing de'i 'bras bu mngon du mi byed pa'o/ /rten ni 'bras bu thob pa'o zhes pa rnam pa bcu gcig go/ /gang mtshon par bya ba tshul bzhin ma yin pa yid la byed pa dang 'dod chags la sogs pa stong pa nyid la sogs pa ni ngo bo nyid do zhes pa'o//yang thams cad mkhyen pa nyid gsum las rnam pa kun mngon par rdzogs par rtogs pa'i khyad par ci zhe na/ thams cad mkhyen pa nyid gsum ni ji skad bshad pa'i rnam pa so sor nges pa nyid kyis rnam pa so sor nges pa'i yul can rnams te/ rnam pa kun mngon par rdzogs par rtogs pa ni rnam pa mtha' dag gi yul can no zhes pa 'di ni khyad par ro//yang na thams cad mkhyen pa nyid gsum mtshan nyid par rnam par gzhag pa ste/ rnam pa kun mngon par rdzogs par rtogs pa ni sbyor ba pa'o/ /yang na rnam pa kun mngon par rdzogs par rtogs pa ni mi mthun phyogs dang gnyen po'i phyogs rnam par gzhag pas rab tu phye ba ste/rnam pa thams cad mkhyen pa nyid ni de lta ma yin te rang bzhin gyis zhi ba'i rnam pa nyid kyi phyir ro zhes pa 'di ni khyad par gzhan no zhes 'phags pas gsungs so/ /gang 'dod pa yang rnam pa kun mngon par rdzogs par rtogs pa la sogs pa mngon par rtogs pa rnam pa gsum la ni sgom pa gong nas gong gi gnas skabs kyi khyad par gyi rnam pa thams cad du khyad par gyi lam gyis bsdus pa'i ye shes zag pa med pa chung ngu dang 'bring dang chen po rim gyis skye'o zhes pas lan cig la skye ba dgag pa'i ched du nges par 'byed pa'i cha la phan pa la sogs pa'i tha snyad du gsungs so//zhes kha cig go zhes rgya cher 'grel du seng ge bzang pos bshad de/gnas skabs gzhan rnams kyi rjes su 'brangs pa las 'di'i yang 'dod pa'o zhes mtshon no/ /de yang 'phags pa'i bzhed pa dang 'gal te/ de ltar ni 'phags pas/ mtshan med rab tu sbyin la sogs/ /yang dag sgrub la mkhas pa ni/ /rnam pa thams cad rtogs 'di la//thar pa'i cha dang mthun par 'dod/ /ces pa'i tshig le'ur byas pa rnam par bshad par stong phrag nyi shu lnga pa'i gzhung bris pa/ sems dang po bskyed pa nas bzung ste thabs la mkhas pa dang ma bral bar sbyin pa sbyin zhing mtshan mar yang mi byed ces pa nas brtsams te ji srid du rnam pa thams cad mkhyen pa nyid sgom zhing /mtshan mar yang mi byed do zhes pa'i bar du'o/ /slar yang rang nyid kyis dad pa dang brtson 'grus dang dran pa dang ting 'dzin dang shes rab kyi rang bzhin rnam pa lnga po thar pa'i cha la phan pa'i dge ba'i rtsa bar rnam par bshad nas/ dad pa la sogs pa 'di rnams dbang por brjod par bya ba ma yin te dbang po'i don med pa'i phyir ro zhes gsungs te/'di rnams drod la sogs pa la dbang po nyid du 'gyur ro zhes dgongs pa'i phyir ro/ /'di rnams khyad par gyi lam la dbang po ma yin pa nyid na chos kyi sku la dbang po ma yin pa nyid du thal ba'i phyir te/ sngar gyi rtogs pa'i rnam pa rnams 'gal ba'i rkyen nye bar gnas pa med na phyi mar rjes su 'jug pa kho na'o zhes pa ni rigs pa'o//slar yang dad pa la sogs pa rnams kyi chung ngu dang 'bring dang chen po'i rab tu dbye ba gsungs nas/ 'di thams cad thos pa dang bsams pa las byung bar rig par bya ste/ de las dang por bstan pa la 'jug pa'i rgyu nyid kyi phyir ro/ /'dir thar pa ni bral ba'i khyad par te de'i cha la phan pa nyid kyi phyir thar pa'i cha la phan pa'o zhes te/de ma thag rgyud yongs su smin par 'gro ba'i phyir yongs su smin pa ni nges par 'byed pa'i cha la phan pa zhes brjod par bya'o zhes gsungs so/ /slar yang gsungs pa/ rnam pa thams cad mkhyen pa nyid kyi skabs su bshad pa'i nges par 'byed pa'i cha la phan pa ni mngon par rtogs pa yin la/'di ni sbyor ba pa'o zhes so/ /de la sbyor ba ni rnam pa kun mngon par rdzogs par rtogs pa kho na'o/ /de'i 'di lta ste sems can thams cad la mnyam pa dang byams pa'i sems la sogs pa'i khyad par can no/ /de lta na byang chub sems dpa' dro bar gyur pa la gnas phyir mi ldog pa'i rtags bag la nyal thams cad spangs pa zag pa dang bcas pa'i bsgoms pa las byung ba'i nges par 'byed pa'i cha dang mthun pa la ci ltar 'thad ce na/de'ang 'phags pas gsungs te bag la nyal thams cad kyi thams cad med pa ma rig pa dang lta ba'i zag pas bsdus pa'i bag la nyal rnams yin gyi 'dod pa dang srid pa'i zag pas bsdus pa rnams ni ma yin te byang chub sems dpa' bsams bzhin du srid pa len pa'i phyir ro zhes pa 'dis te 'dir bag la nyal gyi rgyun la mngon par dgongs pas so//de ltar ni rnam pa thams cad mkhyen pa nyid kyi skabs su/ bzod pa 'bring la de'i 'dod chags dang ldan pa'i sems mi bskyed do zhes pa la sogs pa 'phags pas rnam par bshad pa/nyon mongs pa thams cad dang ldan pa'i sems mi bskyed pa'i phyir lus la sogs pa yongs su dag pa thob pa dang zhes so/ /gang rin chen 'byung gnas zhi bas thams cad ji ltar 'gyur de lta bu'i bag la nyal zhe sdang gi rgyun spangs pa ni bag la nyal thams cad spangs pa'o zhes bshad pa/de yang bag la nyal med par 'gyur ro zhes pa la sogs pa bcom ldan 'das kyi gsungs las dang / 'phags pa'i gsungs las gzhan du'o zhes pas mi rigs so/ /yang 'phags pas gsungs pa rtse mor gyur pa'i gnas skabs kyi phyir mi ldog pa'i rtags sems gya gyu med pa ni dge ba'i rtsa ba rnam par dag pa las sems 'khyog po dang bral bas nyan thos la sogs pa'i sa las 'das pa las gong nas gong du lus dang ngag dang sems yongs su dag pa sems yongs su 'dzin pa'i rgyu nyid kyis so zhes so//'dir 'das pa ni mos pa par mngon par dgongs la/ rtogs pa pa ni mthong ba'i lam kho nar gsungs so/ /de nyid kyi phyir khyad par gyi lam du dgongs pa ni ma yin no/ /de bzhin du mthong ba'i lam gyi gnas skabs kyi phyir mi ldog pa'i rtags rgyas par bshad par/ sdug bsngal la rjes su shes pa'i bzod pa'i skad cig la ni rjes su shes pa dang 'brel pas nyan thos la sogs pa'i sar ltung ba srid de/ de ni khams gsum pa'i gnyen por 'byung ba nyid kyi phyir ro/ /sdug bsngal rjes su shes pa'i gnas skabs na byang chub sems dpa' 'dod chags dang bral ba nyid thob pa yongs su spong ste/sems can gyi don dang rjes su mthun pa'i bdag nyid kyi dngos po yongs su 'dzin pas so zhes gsungs so/ /khyad par gyi lam la gnas pa'i byang chub sems dpa' chen pos sa gzhan du ltung ba yang ci ltar srid de/ tshu rol gyis rnams su'ang ma yin pa de ci ltar gong ma rnams su 'gyur/gang yang ring du song ba'i sa la mtshan ma med par gzhan gyi don la 'jug pa ni 'bad pa yod pa kho na las 'byung gi cig shos ltar ni ma yin no zhes dgongs pas 'phags pa dpa' bos gsungs pa/ /yid ni mchog tu g.yo bas log /de phyir de la dbugs ma phyung / /sa bzhin g.yo med ma thob par//brtan med mi g.yo'i sa rtogs dka'/ /zhes so/ /gang yang 'phags pa sa bcu par sa brgyad pa las gsungs pa/ gal te sangs rgyas bcom ldan 'das de rnams byang chub sems dpa' de mngon par sgrub pa'i sgo rnams la 'jug par mi mdzad na de'i tshe nyid 'di'i mya ngan las 'das par 'gyur ro zhes so//de la ldog pa dang yongs su mya ngan las 'das pa ni/ nyan thos la sogs pa ltar/ mar me bzhin du mya ngan 'das/ /de yi sems ni rnam par grol/ /zhes pa ni mya ngan las 'das pa ma yin te/ sems bskyed pa nas brtsams te nyan thos la sogs pa'i theg pa la spro ba'i yid la byed pa rnams ring du spangs pa'i phyir ro//sangs rgyas kyi mya ngan las 'das pa yang ma yin te bsgom pas spang bar bya ba ma spangs pa'i phyir ro/ /'on kyang 'dir dam pa'i chos pad+ma dkar po'i mdo tshad mar byas nas/ ji ltar 'phags pa shA ri'i bu la sogs pa byang chub sems dpa' chen po rnams la nyan thos kyi mya ngan las 'das par rnam par gzhag pa gsungs pa de bzhin du dgongs pa can gyi mya ngan las 'das par rig par bya ste/dus re zhig sems can gyi don rgyun du chad pa gzugs nas so/ /de nyid kyi phyir gsungs pa/ de nyid 'di'i mya ngan las 'das par 'gyur te/ sems can thams cad kyi bya ba rgyun 'chad do zhes so/ /de bzhin du der brgyad pa kun 'byung la rjes su shes pa'i skad cig ma la byang chub sems dpa' la tshad med pa rnams dgos te/ gzhan du na skad cig dgu pa la sems can gyi khams la ltos pa med pas 'gog par ltung ngo zhes pa 'dir yang dus re zhig sems can gyi don rgyun 'chad pa 'gog par shes par bya'o//gang yang brtan pa'i sems can gyi don no yongs su mi gtong bar 'phags pas gsungs pa/ 'di ltar gyur pa'i rtogs pa'i gnas skabs na mya ngan las 'das par ltung ba spang ba'i don du snying rje chen po la mngon par phyogs par byed pa'i sems pas shes pa/der yang mya ngan las 'das par ltung ba ni dus re zhig gzhan gyi don rgyun 'chad pa kho na'o/ /sar ltung ba yang de bzhin du 'gyur ro zhe na/ de lta ma yin te/ nyan thos la sogs pa'i sar ltung ba ni rtog pa ste gzhan gyi don la dga' ba dang bral ba'i ngo bo'i mya ngan las 'das pa'i bdag nyid ni ma yin no//'gyur du chug na yang de'i tshe ni brjod pa dang 'chad par 'gyur ba'i rigs pa rnams shes par bya'o/ /de nyid kyi phyir 'phags pa byams pas/ de ltar yongs su shes pa la sogs pa dang ldan pa'i byang chub sems dpa'i mya ngan las 'das pa gang lags zhes zhus pa dang /bcom ldan 'das kyis bka' stsal pa/ 'di rnams kyi mya ngan las 'das pa zab ste/ gang gi phyir 'di ni mya ngan las 'das pa ma yin mya ngan las 'das pa ma yin pa yang ma yin no/ /de ci ltar zhe na/ gang gzhan gyi don las brtsams te 'khor ba yongs su mi gtong ba ni 'di rnams kyi mya ngan las 'das pa ma yin pa'o//bdag gi don las brtsams te mya ngan las 'das pa yongs su mi gtong ba ni 'di rnams kyi mya ngan las 'das pa'o/ /gcig ma btang na cig shos gtong ba'i phyir gnyis ka dag mi gtong ba mi rigs she na/ gnyis kar rnam par mi rtog pa ste der de dag gis yid 'byung ba med pas de'i phyir gnyis ka mi gtong ba rigs so//de'i tshe de 'khor ba dang mya ngan las kyang 'da'o zhes mi rigs so zhe na sems la dbang thob pa'i byang chub sems dpa'i thabs la mkhas pas gang 'khor ba kun du ston pa de ni 'di'i 'khor ba yongs su mi gtong ba'o/ /gang stong pa nyid kyang yin la dmigs pa med pa la gnas pa yang yin pa de 'di'i mya ngan las 'das pa yongs su mi gtong ba'o zhes so//'di lta bu kho na la dgongs nas slob dpon zla ba grags pas/ sa brgyad pa la rnam par mi rtog pa'i ye shes kyi nyi ma shar bas nyon mongs pa thams cad mun pa bzhin spong ngo zhes khams gsum pa las 'dod chags dang bral ba 'byung bar gsungs pa ni de nyid 'di'i mya ngan las 'das par 'gyur ro zhes pa ste/'dod chags dang ma bral ba la mya ngan las 'das pa thob pa'i dogs pa med pa'i phyir ro/ /'khor ba 'gags kyang dbang bcu thob pa las de rnams yid kyis rang bzhin gyi lus sna tshogs pas srid pa'i 'khor bar sangs rgyas kyi chos yongs su rdzogs par byed pa mi 'gal lo zhes rnam par bshad do//'phags pa rnam par grol ba'i sdes kyang / sa 'di las yang dag par 'da' ba ni sangs rgyas rnams kyis yang dag par bskul ba'i byang chub sems dpa'i bya ba lhag ma mngon par 'du byed pa bzung nas so//'da' ba ni rnam pa gnyis te mthong bas 'da' ba ni nyan thos dang rang sangs rgyas kyi sa dag la ste/ de la byang chub sems dpa'i bsgom pa'i lam med pa'i phyir ro/ /gnas pas 'da' ba ni phyir mi ldog pa'i sa'i bsgom pa'i lam rgyun chags pa'i mtshan nyid kyi phyir ro zhes nges par dpyad do//slar yang 'phags pas/ de ni rgyun chags yin pa'i phyir/ /chung dang 'bring dang chen po rnams/ /chung ngu'i chung sogs dbye ba yis/ /rab tu dbye ba rnam dgur 'dod/ /ces pa'i tshig le'ur byas pa'i rnam par bshad pa rnam par rtog pa chung ngu'i chung ngu ni bsgom pa'i lam gyi dbang du byas pas nas dgu pa la de'i gnyen por lam chen po'i chen po'i rnam par 'gyur ba zhes gsungs so//lam gyi rnam pa 'di ni sa bcu pa ste 'dod khams su tha ma yin na de 'chad par 'gyur ba'i tshul gyis khyad par gyi lam la ci ltar rigs/ de nyid kyi phyir tshig le'ur byas pa 'di'i 'grel par 'dod pa'i khams la sogs pa sa dgu rnams su rnam pa dgu rgyun chags su 'byung ba ni bsgom pa'i lam mo zhes seng ge bzang pos bshad pa/'phags pa'i dgongs pa'i rjes su 'brang na 'thad kyi gzhan du ni ma yin no/ /gang nyan thos dang rang sangs rgyas kyi phun sum tshogs pa shes pas dang mthong bas bltas nas 'da'o zhes pa'i 'da' ba rnam pa kun mngon par rdzogs par rtogs pa las 'dug pa'o zhes gsungs pa de la 'da' ba ni sa dang po la ste/khyad par gyi lam la ni ma yin no zhes dpyad zin no/ /de bzhin du gzhan du yang shes rab can rnams kyis 'gal ba la sogs pa rtogs par bya ste/ chen po 'ga' zhig la yang so so'i skye bo nyid kyis na bdag med pa las 'khrul ba srid pas so zhes pas 'dir ci bya zhes pa shin tu spros pas chog ste/rnam pa thams cad mkhyen pa nyid ji lta bar rnam pa kun mngon par rdzogs par byang chub pa 'di ni sems bskyed pa nyi shu rtsa gnyis kyi bdag nyid kho na'o/ /zhes gnas so//de la sems bskyed pa dang po gsum rnams thos pa dang bsams pa las byung ba'i shes rab dag gis rab tu gyur pa'i gnas skabs thar pa'i cha la phan pa'i dge ba'i rtsa ba dang las dang po ba'i sa dang tshogs kyi lam dang tshogs kyi sa yin la rim pa ji lta bar chung ngu dang 'bring dang chen po rnams ni chen po dang 'bring dang chung ngu'i gang zag gi gdams ngag gi yul rnams te/dran pa nye bar gzhag pa dang / yang dag par spong ba dang / rdzu 'phrul gyi rkang pa'i rang bzhin go cha'i sgrub pa zhes par yang rnam par gzhag go/ /shes rab ni rnam pa gsum ste/ de la gang la la gcig pu gcig dben par song ste lung gi don dpyad pa las byung ba'i shes rab kyi pha rol tu phyin pa de thos pa las byung ba'o//de lta na yang la la the tshom za ste rjes su dpag pa la sogs pa'i stobs las skyes pa de rigs pa bsams pa las byung ba'o/ /de dag gis the tshom gyi rtsa ba phyung bas 'bad pa byed pa las ting nge 'dzin thob pa las bsgoms pa las byung bar 'gyur ro//bsgom pa ni rnam pa gsum ste zhi gnas dang lhag mthong dang zhi gnas lhag mthong dag go/ /zhi gnas rdzogs nas 'jug pa na gang lhan cig spyod par 'gyur ba shes rab lta ba dang rig pa dang blo dang snang ba de lhag mthong ngo / /de gnyis ka bsgoms pa las byung ba'i shes rab bo//de'i phyir mtshan ma med pa nyid du dmigs pa'i ye shes kyi rnam pas sbyin pa la sogs pa'i sangs rgyas kyi chos rnams thams cad rang gi rgyud la 'byung ba las yang dag par 'grub par bya bas shes rab dang thabs la mkhas pa ni thar pa'i cha la phan pa'o/ / 'dir thar pa ni bral ba'i khyad par te/ de'i cha la phan pa nyid kyi phyir thar pa'i cha la phan zhes pa'o/ /thog mar rnam pa kun mngon par rtogs pa'i bdag nyid can gyi bstan pa la 'jug pa'i rgyur gyur pa thos pa dang bsams pa las byung ba'o/ /de bzhin du yang bcom ldan 'das ma brgyad stong par gsungs pa/rab 'byor de'i phyir de'i tshe byang chub sems dpa' sems dpa' chen pos shes rab kyi pha rol tu phyin pa bsgom par bya zhing thabs la mkhas pas 'byung bar bya'o zhes so/ /de la byang chub ni yang dag par rdzogs pa'i byang chub rab tu gyur par son pa ste/ de la 'di'i sems dpa' mngon par 'dod pa rtogs pa'o zhes pa byang chub sems dpa'o//sems can thams cad kyi mtshog nyid du bya ba'i don du gang mngon par 'dod pa de ni chen po ste/ chen po nyid de 'di'i yin pas sems dpa' chen po'o/ /tshig gnyis po 'dis sems bskyed gsungs so/ /shes rab kyi pha rol tu phyin pa ni rnam pa thams cad kyis chos ma lus pa yongs su shes pa'o//thabs ni sangs rgyas la sogs pa'i yul la dad pa dang / sbyin pa la sogs pa la brtson 'grus dang / dge ba 'dod pa nyid la sogs pa'i dran pa dang / byed pa po dang las dang bya ba mi dmigs pa'i ting nge 'dzin no/ /de ltar na dbang po'i don med pa'i phyir dbang po'i ngo bo ma yin pa'i dad pa dang brtson 'grus dang dran pa dang ting nge 'dzin dang shes rab kyi rang bzhin thar pa'i cha dang mthun pa'i dge ba'i rtsa ba bsag par bya'o zhes gsungs par 'gyur ro//de'i phyir shes rab dang thabs la mkhas pa dang bral ba las nyan thos dang rang sangs rgyas kyi sar ltung ngo zhes pa'o//de ltar yang gsungs pa/ mtshan med rab tu sbyin la sogs/ /yang dag sgrub la mkhas pa ni/ /rnam pa thams cad rtogs 'di la/ /thar pa'i cha dang mthun par 'dod/ /sangs rgyas sogs dmigs dad pa dang / /sbyin sogs spyod yul brtson 'grus dang //bsam pa phun tshogs dran pa dang / /rnam par mi rtog ting 'dzin dang / /chos rnams rnam pa thams cad kyis/ /shes pa'i shes rab ces rnam lnga/ /rdzogs pa'i byang chub rnon po yis/ /rtogs sla rtul pos rtogs dkar bzhed/ ces so/ /dad pa la sogs pa'i rim pa yang rigs pa ste/dad pas ni rab tu dga' ba'i dngos po yid la byed pa las brtson 'grus rtsom mo/ /brtson 'grus brtsams pas ni dran pa nye bar gnas so/ /dran pa nye bar gnas pas ni sems mnyam par 'jog go/ /sems mnyam par gzhag pas ni yang dag pa ji lta ba bzhin shes so/ /ji skad du gsungs pa/rab tu dga' ba las dga' ba skye'o/ /yid dga' ba las lus shin tu sbyangs pa'o/ /lus shin tu sbyangs pa ni bde ba myong bar byed do/ /bde bar gyur pa'i sems mnyam par 'jog go/ /sems mnyam par gzhag pa ni yang dag pa ji lta ba bzhin rab tu shes so zhes so/ /'o na bcom ldan 'das ma bar mar gsungs pa/byang chub sems dpa' spyod pa med pa ni shes rab kyi pha rol tu phyin pa la spyod pa'o zhes pas chos thams cad stong pa nyid kyis dmigs su med pa'i phyir 'ga' la yang spyod pa med pa de kho na spyod pa ste go cha la sogs pa sgrub pa bzhi'i ngo bo yin la/ las dang po pa de ci ltar shes rab kyi pha rol tu phyin pa la spyod ce na/bcom ldan 'das ma nyid du gsungs pa ma yin nam/ bcom ldan 'das ci ltar las dang po pa'i byang chub sems dpas zhes pa la sogs pa zhus pa'i mthar sems dang po bskyed pa nas bzung nas chos thams cad la dmigs su med pa'i tshul gyis bslab par bya'o zhes te/'dis ni gal te yang las dang po pa la don dam pa'i spyod pa med mod de'i don du bslab par bya ste/ slob par byed pa kho na spyod pa'o zhes brjod do zhes bstan to zhes slob dpon dbyig gnyen no/ /de nyid kyi phyir 'di 'dra ba ni las dang po pa'i pha rol du phyin pa drug gi bdag nyid kyi shes rab kyi pha rol du phyin pa la spyod pa go cha'i sgrub pa'o//der 'di'i don du gnyer bya'i don du gnyer bya nyid nye bar ston pa gdams pa dang rjes su bstan pa ste/ thob pa'i yon tan yongs su bsrung ba'i don gyis mi nyams par byed pa nye bar bzung nas gdams pa'o/ /de'i 'og tu ma thob pa'i yon tan thob par byed pa nye bar bzung nas rjes su bstan par 'gyur ro//seng ge bzang po ni rim pa bzhin du nyan pa'i skabs su gzhung 'dzin pa'i ched du slob pa dang sems pa'i gnas skabs bzung ba'i don mi brjed pa'i ched dang / bsgom pa'i gnas skabs su sngar med pa bskyed pa'i ched du gsum po 'di'o zhes zer ro//de la bcom ldan 'das ma bar mar/ rnam pa thams cad mkhyen pa nyid dang ldan pa'i sems kyis pha rol tu phyin pa rnams la mtshan mar mi byed cing dmigs su med pa ni go cha chen po nyid kyis go cha'i sgrub pa'i rang gi ngo bo nyid do/ /de bsam gtan rnams la snyoms par 'jug par 'gyur zhing de rnams kyi ro myang bar yang mi byed/de rnams kyis kyang mi 'phrog la de rnams kyi dbang gis kyang mi skye ste/ bsam gtan la sogs pa rnams la stong pa nyid dang / mtshan ma med pa dang smon pa med par mthong bas gnas kyang yang dag pa'i mtha' yang mngon du mi byed do zhes thabs la mkhas pa dang ldan pa'i shes rab kyi pha rol tu phyin pa'i go cha nyid kyis thabs la mkhas pas yongs su gzung ba chos nyid do//phyogs bcu'i 'jig rten gyi khams kyi sangs rgyas kyis bsngags pa la sogs pa gsungs pas dge ba'i bshes gnyen gyis yongs su bzung ba chen po nyid do//de la go cha ni ya lad dang srung byed de dbu ma'i sgrub pa shes rab kyi pha rol tu phyin pa thams cad du rnam pa thams cad kyis ji ltar tshad du bya ba ltar pha rol gnon pa'o/ /ji ltar rgyal po'i rigs rgyal srid 'dod pa 'ga' zhig de la phan pa'i 'dod pa'i spro bas dang por go gyon no/ /de nas 'jug ste glang po che la sogs pa'i theg pa zhon no//de'i rjes su dpung gi tshogs sog go/ /de nas mi mthun phyogs las rgyal nas nges par bgrod bya'i sa rnams su nges par 'gro zhing rgyal srid thob bo/ /de'i rjes su rang gi don byas pa ni snying rje dang bcas pas ji ltar rigs par skye dgu rnams yongs su skyong ba de bzhin du byang chub sems dpa' sgrub pa'i rten chos kyi dbyings kyi rang bzhin gyis yang dag par rdzogs pa'i sangs rgyas kyi rigs can blang bar bya ba dang dor bar bya ba nyid kyis dge ba la sogs pa bsgrub pa'i dmigs pa rnams la ji ltar rigs par dmigs la/gzhan gyi don du yang dag par rdzogs pa'i byang chub 'dod pa/stong pa nyid dang snying rje'i snying po can byang chub tu sems bskyed pa nyi shu rtsa gnyis kyi rang bzhin shes rab kyi pha rol tu phyin pa'i sgrub pa la kun rdzob dang don dam pa'i bden pa las ma 'das par mi dmigs pa'i tshul gyis 'jug par bya'o zhes gdams pa thob pa/sgrub pa de'i dmigs pa'i ngo bo bden pa shes pa/ rten dkon mchog gsum rig pa/ khyad par du 'gro bar byed pa ma zhen pa/ mi ldog pa'i ched du phyogs bcur lta yang yongs su mi ngal ba thob ste/ de las 'di theg pa gzhan gyis mi 'gro ba'i ched du lam yongs su 'dzin par yang 'gyur zhing /ji ltar rigs par spyan lnga dang / mngon par shes pa drug dang mthong ba dang bsgom pa'i lam dag kyang ste 'phags pa'i sa yang dag par gnon no zhes pa gdams ngag gi rim pas thob pa'i yon tan ting nge 'dzin dang shes rab la sogs pa rnams 'phel ba'i ched dang ma thob pa rnams thob pa'i ched du rdzogs pa'i sangs rgyas la sogs pa rnams kyis spror bcug pa ni pha rol tu phyin pa drug gi go cha'i sgrub pa re re la thams cad nye bar gnas su bcug pa/sbyin bya la sogs pa mi dmigs pa la sogs pa'i go cha nyid kyi go gyon te/ 'di la bar du gcod pa'i mda' thams cad thogs pa'i phyir ro/ / de'i rjes su go bgos par byas pa ni rnam pa thams cad sgom pa mngon par sbyor ba las 'jug pa ste/ bsam gtan la sogs pa theg pa chen po'i chos mtha' dag la 'dzeg go/ /de nas rgyu mthar thug par 'gro ba'i don du tshogs sog go/ /de nas nges par 'byung bar bya ba rnams su nges par 'byung zhing 'bras bu'i sa mnan pa'i ched du rdo rje lta bu zhes pa'i bar chad med pa'i lam khong du chud pa na byang chub sems dpa' nyon mongs pa dang shes bya'i sgrib pa'i bag chags kyi rnam pa'i mi mthun phyogs ma lus pa spangs pa las gnon zhing /sangs rgyas kyi sa yang dag pa'i mtha' rtogs pa bag chags kyi mtshams sbyor ba spangs pa 'bras bu'i rang bzhin mur thug pa med pa'i chos kyi rgyal srid thob par byed do//de la chos kyi sku'i mngon par rtogs pa la ni sgrub pa med do/ der 'bras bu nyid kyi bya ba mi srid pa'i phyir te bya ba ni sgrub pa'o/ /de'i rjes su dmigs pa med pa'i snying rje chen pos sngon gyi smon lam gyi 'phen pa las dang /gdul bya sems can gyi bsod nams kyi dbang las nam mkha'i khams kyi mthar thug par rgyun mi 'chad par sems can gyi don sgrub par byed de/ /de'i phyir mthong ba'i lam la brgyud pas sbyor ba'i rang bzhin tshogs kyis ni go cha'i sgrub pa'o/ /dngos su sbyor ba'i rang bzhin mos pas spyod pa'i sa ni 'jug pa'i sgrub pa'o//chos mchog chen po ni brtse ba la sogs pa'i gzungs kyi mthar thug pa'i tshogs kyi sgrub pa'o/ /mthong ba'i lam gyi rang bzhin ni sa rab tu dga' ba'i tshogs kyi sgrub pa'o/ /khyab byed bsgom pa'i lam gyi rang gi ngo bo dri ma med pa la sogs pa'i sa'i tshogs kyi sgrub pa'o//khyab byed bsgom pa'i lam gyi gnas skabs kyi khyad par la khyad par gyi lam gyi gnas skabs rtse mo'i mngon par rtogs pa la gzhag par bya ba'i mthong ba dang bsgom pa'i lam dag gi gnas skabs kyi khyad par ni gnyen po'i tshogs kyi sgrub pa rnam pa brgyad de khyab byed bsgom pa'i lam gyi rang bzhin no//khyab byed bsgom pa'i lam gyi gzhi can du gzhag par bya ba lam de gnyis ka'i spyod yul can nges par 'byung bar bya ba'i dngos po ched du bya ba la sogs pa khyad par gyi lam mthar phyin pa'i mthar thug pa rdo rje lta bu'i ting nge 'dzin ji srid pa dang ni nges par 'byung ba'i sgrub pa ste khyab byed bsgom pa'i lam gyi rang bzhin no//de nyid kyi phyir ched du bya ba la sogs pa rnam pa thams cad mkhyen pa nyid kyi mthar thug pa bdun po rnams kyis 'bras bu sems bskyed pa gnyis kyi rang bzhin sangs rgyas kyi sa thob pa'i ched du/ lam gyi yul can nges 'byung ngo //zhes tshig le'ur byas par gsungs so/ /de bzhin du yang / 'phags pa thogs med kyis/ de la go cha dang 'jug pa'i sgrub pa dag grangs ji lta bar brgyud pas dang dngos su sbyor ba'i rang bzhin tshogs dang mos pas spyod pa'i sas bsdus pa'o/ /tshogs kyi sgrub pa ni brtse ba nas brtsams nas gzungs kyi mthar thug pa ni dngos su sbyor ba'i lam gyi rang bzhin chos mchog chen pos bsdus pa'o//sa dang po rab tu dga' ba'i rang bzhin gyi tshogs kyi sgrub pa ni mthong ba'i lam gyi bdag nyid do/ /sa gnyis pa la sogs pa'i rang bzhin gnyen po'i bdag nyid kyi tshogs kyi sgrub pa lam gnyis ka'i spyod yul can dang nges par 'byung ba'i sgrub pa ni bsgom pa'i lam gyi gzhis so zhes gsungs so//gang nges par 'byed pa'i cha dang mthun pa dang mthong ba dang bsgom pa dang khyad par gyi lam gyi rang bzhin rnams go rims bzhin sgrub pa bzhi rnams so zhes rnam par gzhag pa de ni mi 'thad de/de lta na 'jug pa'i sgrub pa mthong lam gyi rang bzhin du 'gyur gyi/ 'dun sogs gsum gyi dbye ba las/ /smon pa'i sems ni rnam pa gsum/ /'jug pa zhes bya'i sems rnams ni/ /bcu dgu rnams su 'dod pa yin/ /zhes gsungs pa'i drod la sogs pa 'jug pa'i sems bskyed kyi rang bzhin du mi 'gyur ro//seng ge bzang pos 'grel bshad du mjug bsdu ba mthong ba dang bsgom pa'i lam gyi bdag nyid kho na sa'i tshogs so zhes te/ gnyen po'i tshogs kyi sgrub pa sa bcu pa ji srid pa kho nar 'gyur gyi bshad pa'i rnam par gzhag par bya ba mthong ba dang bsgom pa'i lam gyi rang bzhin ni ma yin te/nges par 'byung ba'i sgrub pa kho na khyad par gyi lam gyi rang bzhin nyid du rnam par gzhag pa'i phyir ro/ /'dun pa la sogs pa'i sems bskyed pa gsum yang sgrub pa'i rang bzhin nyid du mi 'gyur la/ bcom ldan 'das kyis thar pa'i cha dang mthun pa sgrub tu bcug pa nyid du'ang gsungs la sems dang po bskyed pa nas bzung ste/thabs la mkhas pa dang ma bral bas sbyin pa sbyin zhing mtshan mar mi byed ces pa la sogs pa ste/ sbyin pa la sogs pa sgrub pa las/ gzhan pa'i sgrub pa'am go cha gzhan med do//slob dpon dbyig gnyen gyis kyang gzhung 'grel du go cha chen po bgos pa zhes pa ni sems dang po bskyed pa nas bzung nas bsam pa rgya che bar bstan pa'o/ /theg pa chen po la yang dag par zhugs pa zhes bya ba ni mos pas spyod pa'i sa nas bzung nas bdun pa ji srid pa 'bad pa dang bcas rnam par rtog pa dang bcas par spyod pa'i gnas skabs bstan pa'o//theg pa chen po la yang dag par gnas pa zhes pa ni brgyad pa nas bzung ste don dam par spyod pa bstan pa'o/ /de la go cha chen po rnam pa gnyis te/ sems can thams cad kyi don la brtson pa'i phyir bsam pa rgya che ba las dang /sgrub pa gcig kho nar sgrub pa thams cad rdzogs pas sgrub pa rgya che ba nas ji srid pha rol tu phyin pa drug gi go cha zhes brjod do zhes pa'i mthar thug pa gsungs so/ /de bzhin du 'di nyid kyis sa bcu pa'i rnam par bshad par gsungs pa/ de la go cha ni smon pa'o zhes so//de nyid kyi phyir gang 'phags pas/ dran pa nye bar gzhag pa la sogs pa sangs rgyas kyi chos ma 'dres pa'i bar rnams ni mthong ba la sogs pa'i lam gyis bsdus pa nyid kyi phyir lam gyi tshogs zhes brjod do zhes gsungs pa de ni 'di rnams kyi gnas skabs der phal cher 'jig rten las 'das pa rnams kho na bsdus pa nyid kyi phyir te/bcom ldan 'das kyis/ 'jig rten pa rnams ni phal cher lam la 'jug pa la gsungs pa nyid kyi phyir ro zhes shes par bya'o/ /gal te de lta na tshogs kyi sa'i rten ma gsungs pa ci ltar zhe na/ bcom ldan 'das kyis gsungs pa kho na ste sems bskyed pa nas brtsams nas nges par 'byed pa'i cha dang mthun pa rnams su dang zhes pa la sogs pas so zhes pa sngar brjod zin to//de nyid kyi phyir/ rtogs pa yi ni chos drug gi/ /zhes pa la sogs pa'i tshig le'ur byas par/ sems bskyed pa nas brtsams nas zhes rtogs par bya ste/mdo'i don thams cad ni de'i rgyan tshig le'ur byas pas bsdus pa med do zhes so/ /drod la sogs pa rnams ni 'jug pa'i sems nyid kyi gtso bo yin pa'i phyir tshig le'ur byas pas bsdus la/ smon pa'i sems rnams ma yin te/ phal ba nyid kyi phyir drod la sogs pa'i rgyu nyid kyi shugs kyis 'thob pas bsdus pa nyid kyi phyir ro zhes pa rgyas pas chog go//dran pa nye bar gzhag pa la sogs pa byang chub kyi phyogs kyi chos sum cu rtsa bdun rnams ni stong pa nyid dang snying rje dbyer med pa'i byang chub kyi sems kyi nang du 'dus pa kho nas byang chub sems dpa' rnams kyis bsgom par bya ste/thun mong gi sgo nas ni sngar bshad pa ji lta ba bzhin no/ /de ni byang chub kyi phyogs pa'i rnam pa rnams kyis bskor ba bsgom par bya ste/ 'di lta kho nas 'di rnams byang chub thams cad mkhyen pa nyid kyi phyogs te rjes su mthun pa rnams su 'gyur ro/ /ji skad du/ bcom ldan 'das ma stong phrag nyi shu lnga par gsungs pa/ sha ri'i bu shes rab kyi pha rol tu phyin pa la gnas nas dran pa nye bar gzhag pa bzhi rnams yongs su rdzogs par bya'o zhes pa la sogs pa'o/ /de bzhin du nang dang phyi dang phyi nang gi lus dang tshor ba dang sems dang chos rnams la lus la sogs par rjes su lta bas gnas shing lus la sogs pa dang ldan pa'i rnam par rtog par rnam par mi rtog la de yang mi dmigs pa'i tshul gyis so zhes so//'dir nang gi lus ni rang gi mig la sogs pa drug go/ /phyi ni rang gi lus las phyi rol gyi 'dus byas so/ /gnyis ka ni lhag ma'i rang gi lus su gtogs pa 'byung ba dang 'byung ba las gyur pa'o//tshor ba la sogs pa rnams kyi rnam pa gsum ni lus rnam pa gsum la dmigs pa'i bye brag gis so/ /chos ni sems las byung ba dge ba dang mi dge ba rnams so/ /lus la sogs pa'i rjes su lta ba ni lus la sogs pa'i chos nyid la lta ba'o//lus la sogs pa'i 'du shes dang ldan pa'i rnam par rtog pa ni 'di ni lus so bdag gi lus so/ /rtag pa'o mi rtag pa'o bde ba'o sdug bsngal ba'o zhes pa 'di lta bu la sogs pa ste de yang rjes su lta ba rnam par mi rtog pa ste mi dmigs pa'i tshul gyis so/ /mi dmigs pa dang bral ba'i sgo nas ni nyan thos la sogs pa'i theg pa pa rnams kyis bsgom par bya ste sngar ji skad brjod pa bzhin no//'o na byang chub kyi phyogs kyi chos sgom pa ni nyan thos dang rang sangs rgyas kyi theg pa pa mya ngan las 'das pa'i dpung gnyen can rnams kho na la rigs kyi byang chub sems dpa' rnams la ma yin te/ji skad du 'phags pa 'jam dpal gyis zhus pa'i rdzu 'phrul gyi cho 'phrul bstan pa'i mdor gsungs pa/ 'jam dpal ma 'ongs pa'i dus na dge slong rnams 'byung ste de rnams mi gtsang ba las lus la lus kyi rjes su lta ba ni dran pa nye bar gzhag par ston par 'gyur ba nas/'di kho na don dam pa'i bden pa'o zhes pa'i bar du'o zhe na/ skyon 'di med de/ byang chub sems dpa' chos thams cad du khong du chud pa don du gnyer ba nyid kyi phyir dang / chos thams cad mchog tu mi dmigs pa nyid kyi phyir dang sems can la phan pa sgrub pa'i rgyu nyid kyi phyir 'khor ba la yang mya ngan las 'das pa bzhin yon tan mthong ba mya ngan las 'das pa la yang sems can la phan pa sgrub pa'i rten ma yin pa nyid las 'khor ba bzhin du/mi mthun par mthong ba/ chos nyid tsam nyid kyi phyir 'khor ba dang mya ngan las 'das pa dag mnyam pa nyid du mthong ba rnams kyang dmigs pa med pa'i rang bzhin so sor rtog pa'i don kho nas byang chub kyi phyogs rnams sgom par byed do//gang bcom ldan 'das ma stong phrag brgya par gsungs pa/ dran pa nye bar gzhag pa mi dmigs pa nyid bzung nas zhes pa la sogs pa'o/ /mdo de nyid du yang gsungs pa/ 'jam dpal gang gis lus nam mkha' dang mnyam par mthong ba 'di ni lus la lus kyi rjes su lta ba'i dran pa nye bar gzhag pa'o//gang gis tshor ba dang sems dang dge ba dang mi dge ba la sogs pa'i chos rnams mi dmigs zhes pa nas ji srid 'jam dpal de ltar don dam par dran pa nye bar gzhag pa bzhi rnams blta bar bya'o de nas ji srid du gang chos thams cad rang bzhin gyis snyoms par zhugs pa dang rang bzhin gyis g.yeng ba med par lta ba 'di ni yang dag pa'i ting nge 'dzin to//'jam dpal gang la la 'di lta bu dran pa nye bar gzhag pa rnams nas 'phags pa'i lam yan lag brgyad pa'i bar du yang dag par rjes su lta ba de ni rgal ba pha rol du 'gro bar nga smra'o nas rnam pa thams cad kyi mchog dang ldan pa'i thams cad mkhyen pa'i ye shes mngon par rdzogs par 'tshang rgya bar 'dod pas chos 'di rnams la mos par bya'o zhes pa'i bar du'o//bsam gyis mi khyab pa'i sangs rgyas kyi yul bstan pa'i mdor yang /'jam dpal dbang po lnga rnams ci ltar blta bar bya/ smras pa/ lha'i bu gang chos thams cad skye ba med par dad par byed pa 'di ni dad pa'i dbang po'o/ /gang chos thams cad la sems 'phro bar mi byed de ring ba dang nye ba'i 'du shes dang bral ba'i phyir te 'di ni brtson 'grus kyi dbang po'o//gang yid la byed pa'i dmigs pa thams cad dang bral ba'i phyir dran pa nye bar bral ba med pa 'di ni dran pa'i dbang po'o/ /gang chos thams cad sogs pa med pa nas dmigs su med pa ji srid pa 'di ni ting nge 'dzin gyi dbang po'o/ /gang chos rnams thams cad skye ba dang bral ba rnam par shes pa dang bral ba rang bzhin gyis stong par mthong ba 'di ni shes rab kyi dbang po'o zhes so//de bzhin du stobs dang byang chub kyi yan lag dang lam gyi yan lag dang dran pa nye bar gzhag pa rnams la yang bcom ldan 'das kyis gsungs so/ /gal te dran pa nye bar gzhag pa rnams kyis chos thams cad shes na 'o na byang chub kyi phyogs phyi ma thams cad kyis ci dgos she na/de lta ma yin te de rnams kyi chos nyid du yongs su shes kyi/ mi rtag pa la sogs pa'i rnam pa nyid kyis ni ma yin no/ /de nyid kyi phyir nyan thos kyi theg pa pa rnams ni mi rtag pa la sogs pa'i rnam par dmigs la/byang chub sems dpa' rnams ni mi dmigs pa'i tshul gyis so/ /de nyid kyi phyir mi rtag pa la sogs pa'i rnam pa dang stong pa nyid kyang 'di rnams kyi yul du 'gyur ro zhes pas nyan thos kyi lam yang chos nyid kyi sgo nas goms par 'gyur ro/ /de ltar byang chub kyi phyogs bcu gnyis rnams sems bskyed pa gsum rnams kyis bsdus pa'o//de ltar tshogs kyi sar dad pa la sogs pa'i dge bas sems yongs su bsgos pa/ byang chub kyi sems yang dag par blangs pa dang sbyin pa la sogs pa'i dge ba bsags pa dang ldan pa nyid kyis bsod nams kyi tshogs yang dag par rdzogs pa ni/ye shes tshogs ni sgrub don du/ /grangs med bskal pas nges 'byung la/ /mngon shes brtan pa gdams pa yis/ /spyod pa'i sa la rab tu 'jug /ces pas so/ /sems bskyed pa bzhi pa mos pas spyod pa'i sa sbyor ba'i lam 'jig rten pa'i bsgoms pa las byung ba zag pa dang bcas pa'i bsgom pa'i lam nges par byed pa bsten pa la phan pa'i dge ba'i rtsa ba dbang po dang stobs kyi bdag nyid de 'jug pa'i sgrub pa yang rnam par gzhag go//de la mos pa ni dad pa la sogs pa dmigs pa lnga la yon tan du 'dzin pa pha rol gyi gdams pa dang rjes su bstan pa dang 'brel pa yongs su dag pa ste mthar thug par song ba na rang nyid yang dag par zhugs pa nyid kyis mos pa bstan pa'i phyir ro//thams cad mkhyen pa nyid gsum gyi sbyor ba bud shing gzhan khyad par can gyi me bzhin du gong nas gong du khyad par du 'gro bar byed pas rab tu gyur pa'i sbyor ba ni rab tu sbyor ba ste bar chad med na mthong ba'i lam shin tu nye bar bskyed pa'o//'jig rten pa'i bsam gtan dang gzugs med pa la brten pa nyid kyis bsgom pa'i lam mo/ /zag pa dang bcas pa'i bsgom pa'i lam ni mos pa dang bsngo ba dang rjes su yi rang ba yid la byed pa rnams so//gang zag pa med pa ni mngon par sgrub pa dang shin tu dag pa dag go zhes 'phags pa'o/ /dgongs pa nges par 'grel pa'i mdor yang / 'dir byang chub sems dpa'i sbyin pa la sogs pa'i dge ba rnams dang ldan par 'gyur zhing 'di nyon mongs pa yang kun du spyod par 'gyur te/'di lta ste mos pas spyod pa'i sa la chung ngu dang 'bring dang chen po'i mos pa la 'jug pa na'o zhes so/ /rnam par mi rtog pas 'byed pa ni nges par 'byed pa ste mthong ba'i lam mo/ /de bsten pa ni cha ste thob pa'o/ /de la phan pa ni nges par 'byed pa bsten pa la phan pa'o//la lar gsal ba'i dbye ba las mang po'i tshig ste/ drod rnams dang rtse mo rnams dang bzod pa rnams dang chos kyi mchog rnams so zhes so/ /gyur pa'i sgra ni kha cig tu spyir brjod pa'o/ /gyur pa dang rnam pa dang bye brag rnams don gcig go zhes chur lhung ngo / /dro bar gyur pa dang rtse mor gyur pa dang bzod par gyur pa dang chos mchog tu gyur pa'o zhes so//de rnams ni/ nges 'byed yan lag rnams kyang ste/ /nges par byed pa ni nges byed de mtha' gcig tu nges pa'o/ /de'i yan lag rnams ni chung ngu dang 'bring dang chen po dang chen po'i chen po nyid kyis phye ba bzhi'o/ / drod ni gtsub shing gtsubs pa na me bzhin du 'jig rten las 'das pa'i ye shes kyi me'i snga ltas nyid kyi phyir ro/ /rtse mo ni dge ba'i rtsa ba g.yo ba'i rtse mo nyid kyi phyir ro/ /bzod pa ni 'jig rten pa'i chos kyi mchog la bzod pa'i phyir ro/ /chos mchog ni 'jig rten pa'i chos thams cad kyi mchog nyid kyi phyir ro//slar yang drod la sogs pa rnams so sor chung ngu dang 'bring dang chen po nyid kyis bcu gnyis su rab tu dbye'o/ /ji ltar bzod pa chen po skad cig gcig yin pa de bzhin du chos mchog rnams kyang ngo zhes gang gsungs pa de ni rang gi don gyi dbang du byas pas nyan thos rnams kyi yin gyi byang chub sems dpa' rnams kyi ma yin te/gzhan gyi don la rim pa nyid kyi gnas skabs srid pa'i phyir de dang 'di mi 'gal lo/ /drod la sogs pa 'di ni byang chub gsum thob pa la rgyu ste/ 'ga' zhig gi rigs la sogs pa'i stobs kyis dman pa'i byang chub kyang thob par byed pa'i phyir ro/ /de ltar nyan thos dang rang sangs rgyas kyi theg pa pa dag gi drod la sogs pa ni byang chub mchog nam yang thob par mi byed do//de la drod gsum po [(]rimo [,]rim [)]pa ji lta bar chung ngu dang 'bring dang chen po'i mos pa'i rang bzhin la/ slar yang chung ngu'i chung ngu la sogs pa'i dbye bas mos pa dgu rnams rang gi don gyi ste/ gang rnams kyis rang don kho na sgrub par byed cing gzhan don kyang ched du bya ba'i ngo bos so/ /rtse mo gsum po de lta bu'i rang bzhin la de lta bu'i mos pa dgu rnams rang gzhan gyi don gyi ste 'dir sbyor ba ni bar chad dang bcas pa'o/ /bzod pa gsum de de lta bu'i rang bzhin la de de lta bu'i mos pa dgu rnams gzhan don gyi ste 'dir sbyor ba ni bar chad med pa yin la/gang gis na gang rnams kyis gzhan kho na'i don du 'gyur zhing rang gi don 'gog pa ni ma yin te/ gzhan gyi don dang 'gal ba med pas de yongs su rdzogs par byed pa'i phyir ro/ /de ltar mos pa nyi shu rtsa bdun sgom par byed pa'i byang chub sems dpa' spro ba'i ched du sangs rgyas la sogs pa rnams kyis mdzad pa'i bstod pa dang bkur ba dang bsngags pa rim pa ji lta bas de lta kho nar nyi shu rtsa bdun no//chos mchog mos pa thams cad rab tu gyur pa'i rang bzhin gyi ni chung ngu'i rnam pa la mos pa yid la byed pa thams cad kyis mngon par 'dus byas pa'i bsod nams byang chub sems dpas bden pa gnyis las ma 'das pas yongs su bsngos nas yang dag par rdzogs pa'i byang chub kyi yan lag tu byed do//'bring gi rnam pa la rang gis yongs su bsngos pa'i bsod nams mngon par 'phel ba'i don du kun rdzob tu dge ba'i rtsa ba rnams dmigs nas rab tu dga' ba'i sems kyis don dam par dmigs su med pa nyid du rjes su yi rang bas rang dang gzhan gyi bsod nams bya ba mnyam pa nyid thob bo//res 'ga' rjes su yi rang ba sngon ma can gyis kyang yongs su bsngo zhes pa 'di dag la rim pa nges pa med do//yongs su bsngo ba dang / rjes su yi rang ba 'di dag 'dun pa la sogs pa rnams na yang yod de 'on kyang 'dir de la ltos pas rab tu gyur pa dag go zhes rnam par gzhag go/ /chen po'i rnam pa mos pa thams cad rab tu gyur pa mthar thug pa'i rang bzhin nas bzung nas sems rang dbang du byas pa nyid kyi phyir bdag dang bdag gi bdag du zhen pa med pas sems dul ba dang /dge ba'i bshes gnyen la sogs pa rnams la bdag dang bdag gi bdag gir mi 'dud pas nga rgyal ba med pa dang ldan pa dang / rang dang gzhan gyi nyon mongs pa zil gyis gnon pa dang /bdud la sogs pas byas pa'i nye bar 'tshe ba'i yul ma yin pa dang / yang dag par rdzogs pa'i byang chub sgrub par rung ba dang / rang gi rten gyi yul mchod bya nyid du byed do zhes pa byed par rnam par gzhag go/ /shAn+ti pas ni sems dul ba nyid la sogs pa byed pa drug po 'di rnams 'jig rten las 'das pa'i bsgom pa'i lam gyir bshad do//nges par 'byed pa bsten pa la phan pa 'di rnams kyang rnam par rtog pa ni byang chub sems dpa' rnams kyi nyon mongs kho na'o zhes pas/ rnam par rtog pa nyon mongs pa rnam pa bzhi bsten pa'o/ /de la rnam pa gnyis ni gzung ba'i rnam par rtog pa ste/gzung byar rnam par rtog par byed pa'i phyir ro/ /log par rtog pa ni rnam par rtog pa ste/ kun nas nyon mongs pa dang rnam par byang ba dang / gnyis ka la dmigs pa dang gnyen po'i phyogs kyi dngos po la dmigs pa'o/ /dang po ni 'jig rten la grags pa'i dngos po la dang / phyi ma ni de'i gnyis pa nyan thos la sogs pa la grags pa la ste/ go rims bzhin du dang po ni drod rnams la'o/ /gnyis pa ni rtse mo rnams la'o/ /rnam pa gnyis ni 'dzin pa'i rnam par rtog pa ste yod pa min pa kho na'i 'dzin pa por rtog par byed pa'i phyir la/ skyes bu rdzas su yod pa la dmigs pa dang skyes bu btags par yod pa la dmigs pa'o//sgyu ma'i rang bzhin nyid kyi phyir btags pa rnams te/ de dag go rims bzhin du bzod pa rnams la dang chos mchog rnams la'o/ /rnam par rtog pa bzhi po 'di rnams kyang yul gyi dbye bas so sor dbye ba rnams so/ /de la dang po'i gzung bya'i dngos po rnams ni ma rig pa dang phung po la sogs pa rnams so//gnyis pa'i phung po dang skye ba'i sgo la sogs pa rnams so/ /'dzin pa'i yul dang po ni bdag rang dbang can la sogs pa'i ngo bos so/ /gnyis pa ni phung po la sogs pa'i rten gyis so/ /'di rnams kyang rab tu dga' ba zhes bya ba mthong ba'i lam la spang bar bya ba ste/gang 'phags pa rnam par grol ba'i sdes gsungs pa/ gzung ba dang 'dzin pa'i rnam par rtog pa bzhi po rnams kyi gnyen po'i mthong ba'i lam mo zhes so/ /chos mngon pa kun las btus par chos kyi bzod pa dang shes pa rnams kyis gzung bar rtogs so/ /rjes su rtogs pa'i bzod pa dang shes pa rnams kyi 'dzin pa rtogs pas so//bzod pa dang shes pa thams cad la yang mtshan ma med par spyod pa'i rnal 'byor can du rig par bya'o zhes pa/ 'dir gzung ba dang 'dzin pa dag rang bzhin med pa nyid du rtogs so/ /de nyid kyi phyir mtshan ma med par spyod pa nyid de de dag tu sgro ma btags pa'i phyir ro//gang yang mdo sde rgyan du/ drod dang rtse mo dang bzod pa dang chos mchog rnams la go rims bzhin 'di rnams spong bar gsungs la de ni chos kyi bdag med pa'i de kho na nyid la lhag par mos pa byas par rig par bya'o/ /drod la sogs pa bzhi ni mos pa brtan pa dang yon tan gyi so sor gnas su gyur pa nyid kyi phyir mos pas spyod pa'i sar brjod do//de ltar ni sems mnyam par gzhag pa chos thams cad bdag med pa nyid du sgom pa po gang gi tshe don tha dad par gyur pa'i mngon par zhen pa med pa las/ ye shes kyi snang ba cung zad gsal bas yid tsam kho nar lta ba de'i tshe 'di'i dro bar gyur pa'i gnas skabs te de kho na snang ba thob pa zhes pa'i ting nge 'dzin du brjod do//de'i rjes su ye shes kyi snang ba 'bring du gsal ba ni rtse mo ste snang ba mched pa'i ting nge 'dzin no/ /gang gi tshe sems tsam la gnas pas phyi rol gyi don du mngon par zhen pa med pa'i ye shes kyi snang ba shin tu gsal ba skye ba de'i tshe bzod pa'i gnas skabs te/gzung ba'i rnam pa med par zhugs pa'i phyir de kho na nyid kyi don gyi phyogs gcig la zhugs pa'i ting nge 'dzin no/ /gang gi tshe yang don 'dzin par byed pa'i rnam par g.yeng ba snang ba med pa'i ye shes kyi snang ba rdzogs par gyur pa de'i tshe 'jig rten pa'i chos kyi mchog gi gnas skabs te de kho na bar chad med pa'i ting nge 'dzin to//de'i de ma thag pa'i skad cig chos thams cad bdag med pa'i de kho na nyid mngon du byed pa mthong ba'i lam mngon sum pa'i gnyen po ste/ de'i phyir de kho na la thams cad spong bar byed do//gang 'dod pa yang / seng ge bzang pos/ gzung ba dang 'dzin pa'i rnam par rtog pa bzhi rnams/ rtse mo'i mngon par rtogs pas bsdus pa mthong ba dang bsgom pa'i lam dag kho na la spang bar bya ba'o zhes bshad pa de mi 'thad de/ de'i tshig dang snang ba thob pa la sogs pa rtogs par byed pa dang 'gal lo//ci ste gnyen po mthong ba'i lam mo zhes pas bsgom pa'i lam nye bar mtshon pa ste/ rtse mo'i mngon par rtogs pa la yang 'phags pas bzhed do zhe na/ de'i tshe mdo sde rgyan du gsungs pa'i rim pa dang 'gal te/ der ni de ltar bshad zin pa'i dro bar gyur pa la sogs pa rnams nges par 'byed pa'i cha dang mthun pa'o//'di las pha rol du mthong ba'i lam gyi gnas skabs gnyis las rnam par grol ba'i ye shes te gzung ba dang 'dzin pa dang mi ldan pa'i phyir ro/ /gzung 'dzin gyi rnam par rtog pa dang mi ldan pa'i phyir rnam par mi rtog go/ /dri ma dang bral ba ste mthong bas spang bar bya ba'i nyon mongs pa spangs pa'i phyir ro//de 'di'i gnas yongs gyur pa ste/ /sa ni dang po yin par 'dod/ /de 'di'i bskal pa dpag med kyis/ /shin tu rnam par dag par 'gyur/ /zhes gsungs so/ /gnyen po'i tshogs kyi sgrub pa'i skabs su ni/ dang po'i gzung bya'i dngos po ni de bzhin nyid la sogs pa rnams dang gzugs la sogs pa rnams dang rmi lam la sogs pa rnams so//gnyis pa ni gzung bya'i gnyen po'i dngos po ni sbyin pa la sogs pa sangs rgyas kyi chos kyi mthar thug pa rnams so/ /'dzin pa yang ste yul dang po ni gang zag rdzas su yod pa rgyun du zhugs pa la sogs pa'o//gnyis pa ni rgyun du zhugs pa la sogs pa gang zag btags par yod pa'o/ /mthong zhes bya dang bsgom pa zhes/ /bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dang ni/ /zhes mdor bstan pa/rtse mo'i mngon par rtogs pas bsdus pa'i mthong ba'i lam la dang bsgom pa'i lam la spang bar bya ba 'di'i yang gzung ba'i rnam par rtog pa dang po ni 'jug pa'i phyogs la brten pa ste/ gang byang chub sems dpas blang bar bya ba de 'di'i 'jug pa'i phyogs te byang chub tu sems bskyed pa nyid dang rigs dang lam yang dag par 'grub pa la sogs pa rnam par rtog pa'i gzung bya'o//gnyis pa ni ldog pa'i phyogs la brten pa ste/ gang byang chub sems dpa'i spang bar bya ba de rnams 'di'i ldog pa'i phyogs khams gsum gyis bsdus pa'i chos dang nyan thos dang rang sangs rgyas kyi chos te rnam par rtog pa'i gzung bya'o//gsum pa 'dzin pa'i rnam par rtog pa sems can rdzas su yod pa la brten pa so so'i skye bo rnams kyi'o/ /'phags pa rnams kyi ni ma yin te de rnams kyis spangs pa nyid kyi phyir la mthong bas spang bya rnams kyi dbang du byas pa'i phyir ro/ /de nyid kyi phyir 'di lta bu'i chos rnams la so so'i skye bo rnams kyi yang chos thams cad bdag med pa zhes yid la byed pa ni lhag par mos pa ste 'dir brjod par 'dod pa ma yin no//'dzin pa rdzas su yod pa'i chos rnams ni 'dzin pa dang 'dor ba la sogs pa rnams te/ de rnam par rtog pa rnams 'phags pa rnams kyis spangs pas so//bzhi pa sems can btags par yod pa la brten pa ni 'phags pa rnams kyi'o/ /de'i dbye ba ched du bya ba ji lta bar nges par mi 'byung ba la sogs pa rnams nyan thos dang rang sangs rgyas rnams kyis ma spangs pa'i phyir la/ so so'i skye bo rnams la ni dang po yang yod pa'i phyir ro//gang bdag de'i dus na rma bya'i rgyal po yan lag ma smad pa zhes bya ba der gyur to zhes pa la sogs pa bcom ldan 'das kyi gsung de ni tha snyad pa ste don dam pa pa ma yin no/ /bsgom pa'i lam la ni/ dang po'i pha rol tu phyin pa la sogs pa rnams kyi de bzhin nyid la sogs pa spyi'i mtshan nyid rnams kyi mdor bsdus pa dang /rang gi mtshan nyid rnams kyis rgyas pa zhes pa mdor bsdus pa dang rgyas pa la sogs pa gzung bya'o/ /gnyis pa'i byang chub kyi sems mi bskyed pa la sogs pa gzung bya'o/ /gsum pa'i rdzas su yod pa'i 'dzin pa pos sems can rnams gdags par bya ba'o/zhes pas sems can btags pa zhes pa la sogs pa yul lo/ /bzhi pa'i gdags par bya ba sangs rgyas dang byang chub sems dpa' la sogs pa dang de'i rgyu rnam pa thams cad mkhyen pa nyid la sogs pa yul lo/ /rnam par rtog pa 'di rnams kyang blo dman pa rnams kyis rtogs pa'i don du bcom ldan 'das mar so sor rnam pa dgur dbye bar mdzad do//shes rab rnon po rnams kyis brnyas pa spang ba'i ched du shin tu phye ba ma yin no/ /mdor bsdus nas ni bzhi po kho nas rtogs par sla'o zhes kha cig tu rnam pa dgur yang dbye ba ma byas te/ de bzhin du kho bos kyang ngo / / spang bar bya ba 'di rnams las sna tshogs su rab tu phye ba gzung ba'i rnam par rtog pa dag rtse mo'i mngon par rtogs par mthong ba'i lam gyi sbyor ba'i gnas skabs su spang bar bya ba dag go/ /gnyis pa 'dzin pa'i rnam par rtog pa dag dngos gzhi'i gnas skabs su spang bar bya ba dag go/ /de bzhin du bsgom pa'i lam gyi'o//de nyid kyi phyir bcom ldan 'das mar gsungs pa/ theg pa chen po de gang nas nges par 'byung bar 'gyur na/ khams gsum pa las nges par 'byung bar 'gyur ro zhes so/ /bar mar yang / bcom ldan 'das rnam par dag pa ni 'dod pa dang gzugs dang gzugs med pa'i khams su skye ba ma lags so//shA ri'i bu khams gsum pa'i rang bzhin mi dmigs pas so zhes so/ /'phags pas kyang rnam par rtog pa 'di brgyad ni khams gsum par 'dod do zhes gsungs so/ /slar yang mthong ba'i lam gyi bzod pa 'di skyes pa na 'dod pa dang gzugs dang gzugs med pa'i khams kyis bsdus pa nyon mongs pa brgya rtsa brgyad mthong bas spang bar bya ba rnam par rtog pa bzhis bsdus pa spong bar byed do zhes so//'dir gzung ba dang 'dzin pa'i rnam par rtog pa bzhi rnams las so sor rnam pa dgur phye bas sum cu rtsa drug ste khams gsum du grangs brgya rtsa brgyad du 'gyur ro//'o na 'chad par 'gyur ba'i tshul gyis/ rtse mo'i mngon par rtogs pa'i lam gnyis la/ bcu drug pa la sogs pa gnyen po'i rnam pa bco lnga rnams kyis bcu drug pa la sogs pas mi mthun pa'i phyogs kyi rnam pa'i dbye ba bco lnga rnams gzugs kyi khams kho nar rnam par rtog pa bdun cu rtsa gnyis po 'di rnams spong bar rigs kyi/ci ltar 'dod pa dang gzugs med pa'i khams brjod ce na/ bden te/ 'on kyang khams gsum gyis bsdus pa nyon mongs pa brgya rtsa brgyad ni 'jig rten pa'i nges 'byed cha mthun gyi gnas skabs dang mtshungs par ldan pa gang de 'dir spong ba ste/shugs kyis rnam par rtog pa bdun cu rtsa gnyis kho na'o zhes pa don gyis mi 'gal lo/ /gang gi phyir ji ltar rnam par rtog pa bzhi'i rab tu dbye ba ma rig pa la sogs pa'i rnam par rtog pa sum cu rtsa drug po khams gsum du brgya rtsa brgyad du 'gyur ba rtogs par sla ba nyid kyis ma brjod pa rnams gzung ba dang 'dzin pa dag gi rnam par rtog pa nyid kyis phyin ci log pa'i phyir dang dngos po dang dngos po med pa la sogs par mngon par zhen pa'i ngo bo phyin ci log gis bskyed pa'i phyir ma rig pa'i nang du 'dus pa rnams/sa rab tu dga' ba la ma rig pa spangs pas spong ba de bzhin du brjod par 'dod pa med pa'i de bzhin nyid la sogs pa'i rnam par rtog pa'i dbye ba rnams dang brjod par 'dod pa med pa'i gzung ba dang 'dzin pa'i rnam par rtog pa'i dbye ba rnams kyang bsgom pa'i lam la 'dod pa'i khams su gnyen po rnam pa dgu rnams kyis ma rig pa dgu spangs pa kho nas spong la/gzugs kyi khams su yang gnyen po rnam pa bco lngas ma rig pa rnam pa bco lnga spangs pa kho nas so/ /gnyen po'i rnam pa bco lnga rnams kyis ma rig pa'i rnam pa bco lnga rnams ni sngar dang 'dra bar gdul bya'i ngor gsungs pa de bzhin nyid la sogs pa gzung ba dang rdzas su yod pa'i rgyun du zhugs pa la sogs pa 'dzin pa'i rnam par rtog pa'i rab tu dbye ba bdun cu rtsa gnyis spong ngo //ma rig pa'i rnam pa gzhan gzung ba dang 'dzin pa'i rnam par rtog pa'i dbye bar ma gsungs pa rnams ni gnyen po'i rnam pa gzhan rnams kyis spong ngo / /bsam gtan bzhi pa dang gzugs med pa'i khams su yang gdon mi za bar 'di ltar gdams par bya'o//gzhan du na 'chad par 'gyur ba'i rnam par gzhag pa dang ci ltar mi 'gal/ 'phags pas mdzad pa'i rnam par gzhag pa rnams la phan tshun 'gal ba rmi lam na yang med do zhes pa rgyas pas chog go/ /rnam par rtog pa'i rnam pa 'di lta bu rnams sngar nyid du spangs pa ma yin nam/mi srid pa'i phyir/ ci ltar rtogs pa rab tu gyur pa mthar thug pa'i gnas skabs 'di la spang bar bstan zhe na/ skyon med de gang gi phyir gsang ba phra mo la 'jug pa dang mngon par shes pa chen po'i gegs kyis kun du rmongs pa dag dang de'i sa bon yang sa bcu pa la spong ngo zhes dgongs pa nges par 'grel pa la sogs pa'i mdor gsungs so//yang dgongs pa nges par 'grel par/ bag la nyal stobs chung ba ni sa drug pa dang bdun pa la nyon mongs pa phra mo kun du spyod pa nyid nye bar bzung nas so//bag la nyal phra mo ni sa brgyad pa la sogs pa rnams la thams cad kyis thams cad du nyon mongs pa kun du spyod pa med pas shes bya'i sgrib pa'i rten tsam nye bar bzung nas so zhes so/ /de'i phyir ji skad brjod pa'i bag chags dang bcas pa'i kun du rmongs pa'i rgyu chad pas/ rgyu can rnam pa 'di lta bu'i gzung ba dang 'dzin pa'i rnam par rtog pa bzhi po rnams rtogs pa rab tu gyur pa mthar thug pa'i rang bzhin nyid kyis sa bcu pa dang 'brel pa'i rtse mo'i mngon par rtogs pa la nges par spong bar rtogs par bya ste/gzhan du ni res 'ga' bas spong zhes sngon gyi slob dpon rnams so//'dir ni mdor bsdus pa'i don te ji skad brjod pa'i gzung ba dang 'dzin pa'i rnam par rtog pa thams cad phyin ci log gis kun nas bslang ba kho na ste phyin ci log de ni thog ma med pa'i dus can dngos po la sogs par mngon par zhen pa'i mtshan nyid can no/ /de'i phyir de las bzlog pa'i dmigs pa dang rnam pa can nyid kyis de dang 'gal ba rang bzhin med pa'i ye shes las spong bar byed pa kho na'o//de spangs na de'i rtsa ba can gzung ba dang 'dzin pa'i rnam par rtog pa la sogs pa rnams ci ltar gnas pa thob ces pa'o/ /de nyid kyi phyir/ mdo 'ga' zhig tu gzung ba dang 'dzin pa'i rnam par rtog pa rnams kyi dbye ba rnam par gzhag pa ma mdzad la/'ga' zhig tu 'dod chags la sogs pa bag la nyal dgu rnams kyi yang ste/ dngos po dang dngos po med par mngon par zhen pa'i ngo bo ma rig pa spangs pa kho na las de'i rgyu can gzung ba'i rnam par rtog pa la sogs pa rnams nges par spong bar mngon par dgongs pas so//de nyid kyi phyir/ dngos su ma rig pa dang 'gal ba'i byang chub kyi sems kho na thams cad kyis nges par bsgom par bya bar nyan thos dang pha rol tu phyin pa dang gsang sngags kyi tshul thams cad du bstan te/skye med 'jig pa med pa yi/ /chos kyi dbyings ni 'gro la snyoms/ /zhes pa la sogs pa nyan thos kyi mdo la sogs pa rnams su bstan to/ /drod la sogs pa rnams dbang po dang stobs kyi bdag nyid du sngar brjod zin la 'jug pa'i sgrub pa'i ngo bo nyid du yang ngo / /de yang theg pa chen po la 'jug pa dang de la 'dzeg pa'o//de yang don gcig pa nyid kyis 'jug pa ni theg pa la 'dzeg pa yin la 'dzeg pa yang 'jug pa'o zhes ming las gcig kho na'o zhes 'phags pa'o/ /bcom ldan 'das mar yang / theg pa chen po la 'jug pa dang theg pa chen po la 'dzeg pa zhes so//'dis 'gro ba dang / der 'gro ba'o zhes pas dang por 'jug pa'i sgrub pas rgyu dang 'bras bu'i bdag nyid kyis chos la 'jug pa yin la/ phyi nas de gong nas gong du khyad par du rtogs pas yang dag par 'dzeg pa'o/ /zhes pa tshig gnyis so/ /de'i phyir 'jug pa ni 'gro bar rtsom pa dang 'gro ba dang gnas nas 'gro ba rnams rim pa ji lta bar mos pa spyod pa'i sa dang /rab tu dga' ba nas bzung ste bdun pa ji srid par dang mi g.yo ba la sogs pa rnams la'o zhes slob dpon dbyig gnyen bzhed pa ste sngar brjod do/ / dang po ni mos pa yin la bdun rnams su 'bad pas 'gro ba yin zhing brgyad pa la sogs pa rnams su lhun gyis grub pa'i theg pa kho na ste/ legs par 'byar ba'i shing rta la sogs pas ltar 'di'i 'gro ba rab tu bsgrub par bya'o/ /de'i phyir dang por byang chub sems dpas theg pa chen po lam gyi rang bzhin la 'jug go//de la lam gyi rab tu dbye ba rnams ni pha rol tu phyin pa drug dang byang chub kyi phyogs kyi bsam gtan dang gzugs med pa dang rnam par thar pa dang mthar gyis gnas pa'i snyoms par 'jug pa dang zil gyis gnon pa'i skye mched dang zad par dang ting nge 'dzin dang shes pa dang dbang po dang ting nge 'dzin dang rjes su dran pa dang tshad med pa dang /nor dang rnam par rtog pa dang spyan dang mngon par shes pa dang gzungs dang dbang po dang stobs dang mi 'jigs pa dang so so yang dag par rig pa dang sangs rgyas kyi chos ma 'dres pa la sogs pa rnams so/ /de la bsam gtan rnam bzhi ste/bsam gtan dang po nyon mongs pa'i 'dod pa dang mi ldan pa dang / dngos po dang 'dod pa rnams mi dmigs pa'i phyir 'dod pa rnams kyis dben pa/ nyon mongs pa'i 'dod pa'i rgyu can lus dang ngag dang yid kyi nyes par spyod pa mi dge ba rnams dang bral ba rtog pa dang bcas dpyod pa dang bcas pa ni 'dod pa'i gnyen po rtog pa dang dpyod pa dag dang ldan pa las te 'dod pa'i don grub pas dang lus dang sems shin tu sbyangs pas dga' ba dang bde ba dang ldan pa'i snyoms par 'jug pa nyams su myong ba'o//gnyis pa ni rtog pa dang dpyod pa rnams sems 'khrug par byed pa nyid kyi skyon du mthong ba'i phyir/de rnams la sems bzlog ste ting nge 'dzin par byed pas de rnams thams cad kyis thams cad spangs pa las rtog pa med la dpyod pa med pa nyid kyis nang rab tu dang ba dang mtshungs par ldan pa'o/ /gsum pa ni btang snyoms pa ste rtog pa dang dpyod pa bzhin du dga' ba yang rags pa nyid kyis btang snyoms su byed pa'i phyir dang dran pa dang shes bzhin dang ldan pa ste/dga' ba'i go skabs mi 'byed pa'i ched du de dag gi shes rab mang du byed pa'i phyir dang / gzugs kyi lus dang yid kyi lus dag tshor ba bde ba dang shin tu sbyangs pa'i bde ba la sbyor ba las bde ba dang ldan pa'o//bzhi pa ni bde ba yang med sdug bsngal yang med pa ste sdug bsngal ba dang / yid bde ba dang yid mi bde ba sngar spangs pa'i phyir/ bsam gtan bzhi pas ni bde ba yang ngo / /btang snyoms dang / dran pa yongs su dag pa ste/ de dag 'dir shin tu rnam par dag pa thob pa'i phyir ro//de la bsam gtan dang po'i yan lag rnam lnga ste/ rtog pa dang dpyod pa dag gnyen po'i yan lag ste de dag gis 'dod pa dang gnod sems dang 'tshe ba'i rnam par rtog pa spong ba'i phyir ro/ /dga' ba dang bde ba dag phan yon gyi yan lag go//sems rtse gcig pa ni de gnyis ka'i rten gyi yan lag ste ting nge 'dzin la brten pa'i stobs kyis dge ba'i rnam par rtog pa la sogs pa 'jug pa'i phyir ro/ /gnyis pa yan lag bzhi rnams te/ nang rab tu dang ba gnyis po'i yan lag yin la/ yan lag lhag ma sngar bzhin no//gsum pa'i yan lag rnam lnga ste/ btang snyoms dang dran pa dang shes bzhin ni gnyen po'i yan lag go/ /bde ba ni phan yon gyi yan lag go/ /rten gyi yan lag ni snga ma bzhin no/ /bzhi pa'i yan lag bzhi rnams te/ btang snyoms yongs su dag pa dang / dran pa yongs su dag pa ni gnyen po'i yan lag go//sdug bsngal yang ma yin pa bde ba yang ma yin pa'i tshor ba ni phan yon gyi yan lag go/ /rten gyi yan lag ni snga ma bzhin no/ /de las bsam gtan dang po bsgoms pas tshangs ris kyi lha rnams nas tshangs pa chen po ji srid par dang skal ba mnyam par skye'o//gnyis pas 'od gsal ba rnams ji srid par dang ngo / /gsum pas dge rgyas pa rnams ji srid par dang ngo / /bzhi pas 'bras bu che ba ji srid par dang ngo / /de'i steng du gnas gtsang ma rnams su 'phags pa rnams kho na skye'o/ /gzugs med pa bzhi rnams kho na ni gzugs med pa kho na nyid rnams te/de la sngon po dang ser po la sogs pa gzugs kyi 'du shes rnams dang gyong dang ra ba la sogs pa sgrib pa'i 'du shes rnams dang khang bzangs dang skyed mos tshal dang ri dang chu bo dang / zla ba dang nyi ma la sogs pa sna tshogs nyid kyi 'du shes rnams la 'dod chags dang bral nas thams cad du nam mkha'i 'du shes bsgoms pas/de rnams rnam pa thams cad du snang ba med pa las nam mkha' mtha' yas so zhes 'di ltar 'dir nam mkha' mtha' yas skye mched la dmigs pas nam mkha' mtha' yas skye mched rdzogs par byas nas gnas so//de shes pa gang gis nam mkha' mtha' yas par mos par byas pa de kho na mtha' yas par mos te thams cad du nam mkha'i 'du shes bzlog pa las rnam shes mtha' yas skye mched do/ /rnam shes mtha' yas skye mched las gong du bskyod pas dmigs pa ci yang mi mthong ba ci yang med do zhes pa ni ci yang med pa ste/de kho na dmigs par byas nas ci yang med pa'i skye mched la snyoms par 'jug go/ /ci yang med pa nyid kyis 'du shes la yang chags pa dang bral ba ni de yang zlog par byed la/ 'du shes med 'du shes med min gyi skye mched gang yang dag par bsgrubs pas na/ci yang gi 'du shes ni sngar kho nar bzlog zin pa de'i phyir 'du shes med cing / 'du shes phra ba ni 'jug pa kho na ste rnam par grol ba ma yin pa ste/ 'du shes med 'du shes med min gyi skye mched la snyoms par zhugs nas/ nyams su myong bar byed do/ / gzugs med pa nyid 'di rnams la yan lag rnam par gzhag pa med de/ zhi gnas su ro gcig pa nyid kyi phyir ro/ /de ltar brgyad po 'di rnams bsam gtan dang gzugs med pa nyid rnams te/ de rnams la byang chub sems dpa' nyi ma so sor snyoms par 'jug la/ snyoms par 'jug pa'i sngon dang rjes la yang nam mkha'i rnam pa dang rtags dang mtshan ma rnams yid la byed do//de la chos 'di rnams thams cad ldan pa ma yin mi ldan pa ma yin pa'o zhes pa nam mkha'i rnam pa ste/ tha dad dang tha dad med par khas mi len pa'i phyir ro/ /gzugs med pa bstan du med pa thogs pa med pa zhes pa rnams nam mkha'i rtags te de dang chos mthun pa nyid kyi phyir ro//'di lta ste/ mtshan nyid med par mtshan nyid gcig pa'o zhes pa nam mkha'i mtshan ma ste nam mkha' lta bu'i stong pa nyid kyi mtshan ma so sor snang ba'i phyir ro/ /rnam par thar pa brgyad rnams la yang snyoms par 'jug ste/bcom ldan 'das kyis ji skad du gsungs pa/ gzugs can gzugs rnams blta'o zhes pa rnam par thar pa dang po'o/ /nang gzugs can ma yin pas phyi rol gyi gzugs rnams la blta'o zhes pa gnyis pa'o/ /sdug pa'o zhes mos par 'gyur ro zhes pa gsum pa'o/ / 'di gsum rnams ni 'di rnams kyis sgrib pa las rnam par grol bar byed pas sprul pa'i sgrib pa'i gnyen po'i phyogs nyid yin pa'i phyir rnam par thar pa rnams so/ /de la dang po dag mi sdug pa ste gsum pa sdug pa'o/ /rnal 'byor pa 'ga' zhig 'dod pa na spyod pa'i kha dog la chags pa la sogs pa'i gnyen por nang gi skra la sogs pa la dmigs pa'i snyoms par 'jug pa la snyoms par zhugs nas de'i de ma thag kho nar phyi rol gyi rnam par bsngos pa la sogs pa la dmigs nas bsam gtan dang po la snyoms par 'jug pa'am bsam gtan dang po'i sa pa'i kha dog la chags pa la sogs pa'i gnyen por bsam gtan gnyis pa la ste de gzugs can gzugs rnams la lta'o zhes brjod par bya'o//nang gi gzugs la sogs pa dmigs pa'i phyir gzugs can zhes brjod la/ phyi rol gyi gzugs la dmigs pa'i phyir gzugs rnams la lta'o zhes pa ste/ mos pas sprul pa rnams yid kyis mthong ngo zhes pa'i don to//kha cig nang gi la ma dmigs pa kho nar phyi rol gyi rnam par bsngos pa la sogs pa la dmigs nas bsam gtan dang po'am gnyis pa la snga ma bzhin snyoms par 'jug pa de nang gzugs med par 'du shes las phyi rol gyi gzugs rnams la lta'o zhes par brjod par bya'o//de bzhin du mi sdug pa bsgoms pas sems kyi rgyud zhum pa dga' bar bya ba'i ched du ci bdag la yid du 'ong ba'i gzugs rnams sdug par yid la byas nas kha dog la chags pa la sogs pa skye ba'am ma yin zhes nyams sad pas yid du 'ong ba'i gzugs rnams la dmigs nas bsam gtan bzhi pa la snyoms par zhugs bzhin pas sdug pa dang mi sdug pa'i gzugs rnams sprul te/de rnams la ro gcig pa'i 'du shes thob pa las rim pa ji lta bar 'bad pa dang mi mthun pa nyid spang ba'i don du sdug pa'o zhes mos par 'gyur ro zhes brjod do//de ltar gzugs can gyi rnam par thar pa rnams so/ /gzugs can ma yin pa lnga rnams te/ nam mkha' mtha' yas skye mched kyi rnam par thar pa nas 'du shes dang tshor ba dang 'gog pa'i rnam par thar pa'i bar ro/ /de la nam mkha' mtha' yas skye mched la sogs pa gzugs med pa bzhi rnams dag pa pa rnams de'i ro myang ba'i sgrib pa'i gnyen po nyid kyi phyir rnam par thar pa yin la/zhi ba'i gnas pa rnams su yang brjod do/ /'du shes dang tshor ba 'gog pa ni thar pa dang rjes su mthun pa'i gnas pa ste/ 'du shes med 'du shes med min gyi skye mched la brten nas 'das te/gang ldang ba las snga rol du sems dang sems las byung ba rnams 'gog pa mchog tu rab tu zhi ba'i gnas pa'o/ /de'i sgrib pa spong ba'i phyir rnam par thar pa rnams so/ /bsam gtan bzhi pa rnams dang gzugs med pa nyid bzhi pa rnams dang 'du shes dang tshor ba 'gog pa zhes pa mthar gyis gnas pa'i snyoms par 'jug pa dgu rnams la snyoms par 'jug go//dgu po de 'jig rten las 'das pa'i lam du sdud pa'i don gyis te/ 'gog pa'i snyoms par 'jug pa ni des thob par bya ba nyid kyi phyir ro zhes 'phags pa'o/ /zil gyis gnon pa'i skye mched brgyad rnams la yang snyoms par 'jug go//dmigs pa zil gyis gnon pa'i phyir zil gyis gnon pa'i skye mched rnams te sems gnas pa rnams zil gyis gnon pa'i skye mched rnams yin la/ de brgyad po rnams so/ /de la rnam par thar pa dang po las gnyis dag mngon par 'grub la/ gnyis po las kyang gnyis dag ste/ gsum pa las bzhi rnams so/ /de ltar yang bcom ldan 'das kyis gsungs pa/ nang gzugs su 'du shes pas phyi rol gyi gzugs chung ngu rnams lta zhing / de rnams zil gyis mnan nas shes shing mthong la de ltar 'du shes par yang 'gyur ro/ zhes pa dang po'o/ /de ltar chen po rnams zhes pa gnyis pa'o/ /nang gzugs med par 'du shes pas phyi rol gyi gzugs chung ngu rnams lta zhing de rnams zhes pa la sogs pa gsum pa'o/ /de ltar chen po rnams zhes pa bzhi pa'o/ /nang gzugs med par 'du shes pas phyi rol gyi gzugs sngon po rnams lta zhing de rnams zhes pa la sogs pa lnga pa'o//de bzhin du ser po rnams zhes pa drug pa'o/ /de bzhin du dmar po rnams zhes pa bdun pa'o/ /de bzhin du dkar po rnams zhes pa brgyad pa'o zhes so/ /de la gzugs chung ngu rnams ni sems can du bgrang ba rnams te tshad chung ba nyid kyi phyir ro//chen po rnams ni sems can du bgrang ba ma yin pa khyim dang gzhal med khang dang ri la sogs pa rnams te tshad che ba nyid kyi phyir ro/ /de rnams ji ltar rigs par rnam par thar pa rnams kyis mos pa zil gyis gnon pa'i skye mched rnams kyis zil gyis gnon te yang dang yang nub cing mi mthong bar byed pa'i phyir ro//zil gyis mnan nas zhi gnas kyis shes shing lhag mthong gis mthong la de ltar 'du shes par 'gyur te mngon pa'i nga rgyal med pa nyid kyi phyir ro/ /zad par bcu rnams la yang snyoms par 'jug ste/ zil gyis gnon pa'i skye mched rnams kyis zil gyis mnan nas 'di rnams kyis sa la sogs pa rnams mtha' dag par kun nas rgyas par byed pa'i phyir zad par rnams su brjod do//res 'ga' de rnams kho na skye mched rnams so zhes pa zad par gyi skye mched rnams su brjod la/ res 'ga' ni sa la sogs pa rnams kyis khyad par du byas nas bstan te/zad par sa dang zad par chu dang zad par me dang zad par rlung dang zad par sngon po dang zad par ser po dang zad par dmar po dang zad par dkar po dang zad par nam mkha' mtha' yas skye mched dang / zad par rnam shes mtha' yas skye mched ces pa'o/ /'di rnams kyang dgongs pa'i don du de kho na nyid ma yin pa'i ngo bo kho nas sgom ste/de'i phyir de kho na nyid ma yin pa'i ngo bo kho nas rnal 'byor pa rnams la 'di rnams so sor snang ngo / /ting nge 'dzin gsum rnams ni rnam par thar pa'i rang bzhin te/ de la chos thams cad kyi rang gi mtshan nyid kun du brtags pa'i rang bzhin no/ / de shin tu yod pa ma yin pa'i phyir des de rnams stong par yongs su shes pa'i ched du stong pa nyid chos kyi bdag med pa sgom par byed do zhes pa stong pa nyid kyi ting nge 'dzin te rnam par thar pa'i sgo stong pa nyid do/ /rang bzhin med pa nyid ni yongs su grub pa'i rang bzhin te gzugs dang sgra dang dri dang ro dang reg bya dang skyes pa dang bud med dang /skye ba dang / rga ba dang / na ba dang / 'chi ba la sogs pa'i mtshan ma rnams dang bral ba nyid kyis brjod du med pa nyid kyi phyir mtshan ma med pa'o/ /des na de rnams mtshan ma med pa mngon du bya ba'i don du sgom par byed do zhes pa mtshan ma med pa'i ting nge 'dzin te rnam par thar pa'i sgo mtshan ma med pa'o//khams gsum pa ni rgyu dang rkyen gzhan gyi dbang gi rang bzhin te/ gang zag dang chos su mngon par zhen pa phyin ci log gi rtsa ba can yang nyon mongs pa'o/ /de'i phyir 'di ni spang bar bya ba ste smon par 'os pa ma yin la/ des na smon pa min pa de rnams la smon par mi byed do zhes pa smon pa med pa'i ting nge 'dzin te rnam par thar pa'i sgo smon pa med pa'o//la lar rnam par thar pa'i sgo bzhi pa yang gsungs pa/ nam mkha' rang bzhin du rang bzhin gyis 'od gsal ba nyid kyi phyir mngon par 'dus ma byas pa'o zhes so/ /shes pa bcu gnyis po sngar brjod pa rnams te de la sdug bsngal phyis skye bar mi 'gyur ro zhes pa'i shes pa ni sdug bsngal shes pa'o//nyon mongs la sogs pa rnams spangs so zhes shes pa ni kun 'byung ba shes pa'o/ /sdug bsngal 'gags so zhes shes pa ni 'gog pa shes pa'o/ /lam gang bsgom pas 'gog pa mngon du byed pa de'i shes pa ste/lam 'dis sdug bsngal 'gags so zhes pa lam shes pa'o/ /'dod chags la sogs pa zad par shes pa ni zad pa shes pa'o/ /'dod chags la sogs pa skye bar mi 'gyur ro zhes shes pa mi skye ba shes pa'o/ /rnam par grol ba mngon du byed pa'i shes pa ni chos shes pa'o//mi rtag pa nyid la sogs pas de'i rjes su rtog pa ni rjes su shes pa ste/ sgom pa'i rang bzhin bsgom pa'i 'bras bu bsgoms pas khong du chud par bya ba thob pa dman pa ma yin pa'o/ /shes pa gang gis 'dod pa na spyod pa dang gzugs na spyod pa'i rgyun du 'jug pa yang dag par mngon du gyur pa pha rol po rnams kyi sems dang sems las byung ba'i chos rnams dang /gcig tu zag pa med pa'i chos rnams kyang shes pa 'di gzhan gyi sems shes par brjod do/ /kun rdzob pa'i shes rab ni kun rdzob shes pa'o/ /lam goms pa ni yongs su 'dres pa shes pa'o zhes pa gang gis lha dang mi dang byol song dang yi dags dang dmyal ba dang sems can rnams thams cad kyi skad thams cad shes pa de sgra ji bzhin pa shes pa'o//dbang po gsum rnams te rnam par byang ba'i chos rnams la lhag par dbang byed pa'i phyir dbang po rnams so/ / mi shes pa kun shes par byed do zhes pa'i dbang po gang yin pa kun shes par byed pa'i dbang po dang / kun shes pa'i dbang po dang / shes zin pa skyong ba'i dbang po kun nas shes pa srung ba dang ldan pa'i dbang po ste rim pa ji lta bar mthong ba dang / bsgom pa dang mi slob pa'i lam rnams su'o/ /gang gi phyir mthong ba'i lam du ni mi shes pa kun shes par bya ba'i ched du zhugs la/bsgom pa'i lam la sngar med pa'i kun du shes par bya ba med kyi de kho na phra rgyas lhag ma spang ba'i don du kun du shes par byed cing mi slob pa'i lam du ni kun du shes zin zhes rtogs pa kun shes pa srung ba yin la de 'di la yod pas srung ba dang ldan pa'am/yang na kun shes pa srung ba'i ngang tshul 'di la yod pa ste zad pa dang mi skye ba shes pa thob pa'i phyir/ bdag gi sdug bsngal yongs su shes te slar yongs su shes par byar med do zhes pa de ltar gyur pa'i dbang po ni kun shes pa srung ba'i tshul can gyi dbang po'o/ /dbyer med par rnam par gzhag pas ni lam 'di gsum kho na dbang po gsum mo//ting nge 'dzin gsum rnams te/ rtog pa dang bcas/ dpyod pa dang bcas pa dang / rtog pa med cing dpyod pa tsam dang rtog pa med pa dpyod pa med pa'o/ /rjes su dran pa rnams bcu ste sangs rgyas dang chos dang dge 'dun dang tshul khrims dang gtong ba dang lha dang skyo ba dang 'chi ba dang lus su gtogs pa dang dbugs rngub pa dang 'byung ba'o//de la dkon mchog gsum rnams rten no/ /tshul khrims dang gtong ba dag gzhi'o/ /lha rnams dbang po'o/ /skyo ba dang 'chi bdag gis dbugs mi 'byin pa'o/ /lus su gtogs pa dang dbugs rngub pa dang 'byung ba dang dran pa dag gis nang du mi brjed par byed pa'o//lha ni 'dod pa na spyod pa'i lha'i ris drug tu skyes pa rgyun du zhugs pa rnams dang gzugs dang gzugs med pa na spyod pa'i phyir mi 'ong ba rnams so/ /gang mdo gzhan du lha'i ris gnyis dag dran par bya ste dga' ldan pa rnams dang gnas gtsang ma rnams so zhes gsungs pa de ni ma 'dres pa'i gang zag la dgongs pa'o zhes 'phags pa'o//thams cad du yang dngos po med pa'i ngo bo nyid du yid la byed pas dran pa med cing yid la byed pa med pas dran pa'o/ /de la nyin mo sangs rgyas rjes su dran pa ni rgyu bzhi rnams kyis te/dge ba'i phyogs la mngon par brtson pas mchod pa yang dag par bsgrubs pa dang / rnam pa rjes su dran pas dang / phan 'dogs pa rjes su dran pa las te/ ji ltar nyin par sad pa rnams kyis sangs rgyas la sogs pa rjes su dran pa ltar/ de goms pas gnyid log pa rnams kyis de bzhin kho nar rmi lam mthong ba las so//de ltar sangs rgyas la sogs pa rjes su dran pa la yang phan yon bdun rnams te/ skye ba dran par 'gyur ba dang / rab tu dang ba mang ba dang / dman pa'i chos rnams la sems mi 'jug pa dang / gzhan rnams la tho mi 'tshams pa dang / gzhan rnams kyang 'di la tho mi 'tshams pa dang 'gyod pa med par dus byed pa dang /lus zhig nas kyang bde 'gro mtho ris kyi 'jig rten du lha rnams su skye'o zhes pa'o/ /'dod pa na spyod pa'i sems can la dmigs pa tshangs pa'i gnas bzhi rnams so/ /sems can tshad med pa la dmigs pa ni tshad med pa bzhi rnams te/byams pa dang snying rje dang dga' ba dang btang snyoms so/ /de la bde ba dang ldan par 'dod pa byams pa'o/ /sdug bsngal dang bral bar 'dod pa snying rje'o/ /bde ba dang mi 'bral bar 'dod pa dga' ba'o/ /kun nas nyon mongs pa med par 'dod pa btang snyoms te/ kye ma ma la sems can thams cad bde ba dang sbyar bar bya'o//sdug bsngal dang bral bar bya'o/ /bde ba dang mi 'bral bar bya'o/ /kun nas nyon mongs pa las grol bar bya'o snyam pa'i rnam pa 'di rnams kyis so zhes pas/ bzhi po rnams kyang mos pa spyod pa'i sa la sems can la dmigs pa'o/ /rab tu dga' ba la sogs pa bdun rnams su chos la dmigs pa'o//de las gong du dmigs pa med pa'o/ /'phags pa blo gros mi zad pa'i mdor ni/ nyon mongs pa la btang snyoms pa ni rnyed pa dang ma rnyed pa la sogs pa 'jig rten gyi chos brgyad la sogs pa'i nyon mongs pa thams cad spangs pa las so/ / bdag dang gzhan srung ba med pa'i btang snyoms ni bzod pa las so/ /dus dang dus ma yin pa'i btang snyoms ni sbyin pa'i dus su tshul khrims btang snyoms pa las dang / tshul khrims kyi dus su sbyin pa dang / bzod pa'i dus su brtson 'grus dang / brtson 'grus kyi dus su bsam gtan dang / bsam gtan gyi dus su sbyin pa la chags pa dang /shes rab kyi dus su pha rol tu phyin pa lnga rtsom pa btang snyoms pa'o zhes btang snyoms rnam pa gsum gsungs so/ /dad pa dang tshul khrims dang thos pa dang gtong ba dang shes rab dang ngo tsha dang khrel yod pa rnams nang gi nor mchog bdun te/ 'dir dad pa dang shes rab dag gtso bo'o//phyi rol gyi nor ni rin po che dang mu tig la sogs pa ste/ phal cher nyes par spyod pa bskyed pa dang tshim pa med pa dang 'jigs pa dang bcas pa dang / nye bar 'tshe ba dang bcas pa ste/ rgyal po dang chu dang me dang chom rkun dang rang gi skye bo las kyang zhes pa thun mong ba lnga nyid las so//dus thams cad pa ma yin pa 'dzad pa ni longs spyad pa las te/ nang gi ni ma yin no/ /rnam par rtog pa la sogs pa rnams ni skabs ji lta bar 'chad par 'gyur ro/ /tshogs kyi sgrub pa ni chos mchog chen po nas bzung nas rnam par gzhag par bya la/ 'dis byang chub chen po 'dzin pas sam lji ba nyid kyi phyir ram 'gengs pa po ni 'gengs pa yin la/rnam pa thams cad nyid kyi phyir/ ma lus pa 'gengs pa tshogs so/ /de yang bsdu na rnam pa gnyis te bsod nams kyi tshogs dang ye shes kyi tshogs so/ /gal te yang sngon du yang bsod nams dang ye shes dag yang dag par sogs mod/de lta na yang 'di nas bzung nas khyad par du'o zhes rnam par gzhag pa'o/ /rgyas par rnam pa bcu bdun te/ de sgrub par 'chad par 'gyur ro/ /sems bskyed pa bzhi po 'di rnams brda las byung ba dang kun rdzob pa dang 'jig rten pa'o/ /de'i gong ma rnams don dam pa pa dang 'jig rten pa las 'das pa yang ngo //de la sems bskyed pa lnga pa ni sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa dang de bzhin du kun 'byung dang 'gog pa dang lam la yang zhes pa bden pa bzhi la dmigs pa skad cig bcu drug gi bdag nyid chos thams cad rang bzhin med par ma rig pa la sogs pa'i skyon med pa mngon du byas pa'i phyir yang dag pa nyid du nges pa la 'jug pa rab tu dga' ba'i sa'o//de yang chos thams cad rang bzhin med pa nyid du bsgom pa'i stobs rdzogs pa na/cha shas med pa'i ngo bo gcig /rang nyid mngon sum gyur pa la/ /tshad ma rnams kyis brtag bya gang / /ma mthong cha gzhan ci zhig yod/ /ces pa'i rigs pa las rang gi ngo bo rnam pa thams cad so sor rtog par byed pa'i shes pa zag pa med pa chos thams cad kyi yul can skye ba'o//de'i phyir so sor rtog pa'i mngon par rtogs pa las skad cig ma gcig pa'i mngon par rtogs pa'i mthong ba'i lam gyi rang bzhin no/ /de skad du yang bsam gyis mi khyab pa'i sangs rgyas kyi yul rgyas par bstan pa'i mdor gsungs pa 'jam dpal 'phags pa'i bden pa bzhi rnams ci ltar lags/lha'i bu 'dir gang gis 'dus byas rnams thams cad rang bzhin med pa dang ma skyes par mthong ba des sdug bsngal yongs su shes so/ /gang gis chos thams cad shin tu yang dag par chad pa med par mthong ba des kun 'byung yang spangs so//gang gis chos rnams thams cad shin tu yongs su mya ngan las 'das par mthong ba des 'gog pa mngon du byas so/ /gang gis chos thams cad rang gi ngo bo skyes pa med pa nyid kyi phyir shin tu stong par mthong ba des lam bsgom pa byas so zhes so/ /'dir bden pa bzhi'i rnam pa thams cad pa'i rang gi ngo bo'i de kho na nyid ni stong pa nyid kho nar gsungs la/de yang mngon par rtogs par bya ba lan cig kho nar rigs kyi rim gyis ma yin te de la cha shas med pa nyid kyi phyir ro/ /'phags pa klu sgrub zhabs kyis kyang gsungs pa/ ma rig rkyen las skyes pa la/ /yang dag shes pas gzigs pa na//skye ba'am 'on te 'gag pa'ang rung / /ci yang dmigs su yod min te/ /mthong ba'i chos la mya ngan 'das/ /de nyid bya ba byas pa yang / /zhes so/ /chos kyi sgra ni 'dir mya ngan las 'das par rjod par byed pa'o/ /de yang rten cing 'brel par 'byung ba'i rang bzhin las tha dad pa ma yin no//ji skad du gsungs pa/ gang rten cing 'brel par 'byung ba mthong ba des chos mthong ste/ chos kyi rang bzhin las tha dad pa ma yin par 'jug pa nyid kyi phyir sangs rgyas kyang mthong ngo zhes so/ /de yongs su gcod pa'i shes pa gang yin pa de chos shes pa ste chos kyi yul can gyi shes pa ni chos shes pa'o//'dir sdug bsngal la chos shes pa'i bzod pa'i rang bzhin te/ sdug bsngal ni rten cing 'brel par 'byung ba nyid kyi phyir rang bzhin gyis skyes pa med la/ gang rang bzhin gyis skye ba med pa de kho na mya ngan las 'das pa ste/ gnyis ka dag kyang rang bzhin gyis ma skyes pa nyid kyi phyir ro//de ltar yang dbu ma rtsa bar gsungs pa/ mya ngan las 'das 'khor ba la/ /khyad par cung zad yod ma yin/ /'khor ba las kyang mya ngan 'das/ /khyad par cung zad yod ma yin/ /mya ngan 'das pa'i mtha' gang yin/ /'khor ba yi yang mtha' yin te/ /de la khyad par cung zad ni//shin tu phra ba'ang yod ma yin/ /zhes so/ /'dir mtha'i sgra ni rab tu gyur pa brjod la/ rab tu gyur pa zhes bya ba yang / mthong bar gnas pa byis pa'i skye bo'i blo'i spyod yul ma yin pa'i rang bzhin no/ /mya ngan las 'das pa yang de'i rang bzhin nyid du rtogs pa nyid kyi phyir dang /gnyis ka yang skye ba med pa'i rang bzhin yin pa nyid kyi phyir/ rang bzhin skye ba med par 'khor ba dang mya ngan las 'das pa dag gcig pa nyid do/ /de ltar bden pa bzhi po rten cing 'brel par 'byung ba la/ rang bzhin gyis skye ba med pa dang 'gag pa med par dmigs pa'i chos gcig shes pas mthong ba'i phyir mngon par rtogs pa gcig kho na'o//de ltar ni rten cing 'brel par 'byung ba la dmigs pa'i shes pas/ gang sdug bsngal skye ba med pa dang 'gag pa med par yongs su gcod pa de'i bdag nyid kyi sdug bsngal yongs su shes pa'o/ /gang las dang nyon mongs pa dag skye ba med pa dag 'gag pa med par yongs su gcod pa 'di ni kun 'byung yongs su shes pa'o//gang 'di rten cing 'brel par 'byung ba'i rang bzhin gyis skye ba med pa dang 'gag pa med pa yongs su gcod pa de 'gog pa yongs su shes pa'o/ /lam yang rten cing 'brel par 'byung ba nyid kyi phyir/gang rang bzhin gyis skye ba med pa dang 'gag pa med par yongs su gcod pa de lam shes pa'o/ /de ltar chos shes pas skad cig gcig la rten cing 'brel par 'byung ba mthong ba'i lam 'di'i mthong bar bya ba sngar med pa gzhan mi srid kyi/ ji lta ba bzhin mthong ba mtshan nyid gcig pa'i rten cing 'brel par 'byung ba'i don te kho na rim gyis so//goms par byas nas ma rig pa'i lhag ma 'gags pa las rten cing 'brel par 'byung ba'i rang bzhin la dmigs pa'i ye shes la gnas pa po ni mthong ba'i chos la yang / mya ngan las 'das pa dang bya ba byas pa nyid du rnam par gzhag gi gzhan du na ma yin no//gal te skad cig gcig la de kho na nyid mthong na ci ltar mthong ba'i lam skad cig bcu drug tu rnam par gzhag ce na/ ngo bo gcig pa'i ye shes de kho na la cha rnams rnam par phye nas skad cig bcu drug rnams su rnam par gzhag par bya ste rnam pa de lta bus gdul bar bya ba'i skye bo la nye bar bstan pa las rjes su 'dzin pa'i phyir ro//gal te de lta na ci ltar rnam pa bcu drug tu lam sgom zhe na/ 'di yang thar pa 'dod pa rnams rnam pa gzhan gyis de kho na nyid shes pa la gzhug pa'i don du yongs su brtags nas rnam par gzhag gi/de kho na nyid ni gcig kho na'o/ /'o na rnam par rtog pa rnams lhan cig mi 'byung ba'i rang bzhin nyid yin pa'i phyir gang gi tshe sdug bsngal gyi rnam pa rnams rtog pa de'i tshe kun 'byung gi rnam pa rnams ma yin la phyis kyang yul med pa'i rtog pa yin no zhe na/ 'di bden mod bden pa re re la'ang rnam pa bzhir rnam par rtog pa dus gcig pa can ma yin no//'di lta bu'i skyon cung zad kyang med de/ gang gi phyir 'dzin pa zhes pa'i khyad par kho na rnam pa thams cad gsal bar gyur pa mngon du byed pa po yin la gang las rnam par rtog pa rigs mi mthun pa dang ma 'dres par mngon par 'dod pa'i rnam par rtog pa rim gyis gsal bar 'byung ste/dper na sngon po dang g.yo ba dang kha bye ba la sogs pa'i khyad par can gyi ut+pal mthong ba'i skye bo'i de'i yul gyi rnam pa thams cad mngon sum du bya ba la rnam par rtog pa'i rim pas gnod pa med pa/ de bzhin du skabs su yang rtogs par bya'o//skad cig ma phan tshun rnams kyang de bzhin kho nar nyams su myong ba gzhan dang gzhan rnams kyis mngon du bya la/ rnam par rtog pa bzung zin pa rjes su mtshams sbyor ba'i ngo bo rnams kyang ji ltar mngon par 'dod pa ltar rab tu 'jug go/ /rigs pa'i 'dren pas gang gsungs pa//blo gros che rnams mthong nyid las/ /rnam pa thams cad nges par 'byed/ /ces so/ /'o na de ltar na mthong ba'i lam du bden pa'i rnam pa gzhan gyis/ sgom pa gzhan ma bskyed pa'i phyir zhugs pa nyid la sogs pa'i rnam par gzhag par mi 'gyur ro zhe na/ ma yin te/ nya phyis la dngul du sgro 'dogs pa bzhin du 'khrul pa'i rgyu mtshan 'ga' zhig gis rnam pa gzhan du sgro btags pa yod la/ de'i phyir phyin ci log pa nyon mongs pa'i rgyu rtsa ba nas dbyung ba'i ched du rnam pa gzhan gyis sgom pa gzhan srid pa'i phyir brgyad pa la sogs par rnam par gzhag go/ / dgongs pa 'di kho nas rigs pa'i stobs las mthong ba'i lam skad cig gcig gis mngon par rtogs pa yin yang skad cig bcu drug gi mngon par rtogs pa nyid du gsungs so/ /de'i phyir yang rnam par shes pas rang gi ngo bo'i rnam pa thams cad 'dzin pa nyid na yang / cha gang goms pa gsal ba nyid la sogs pas sgro btags pa'i rnam pa sel bar nus pa de kho na la de'i gegs kyi sgrib pa spangs pa'i phyir tshad ma nyid yin gyi gzhan la ma yin te skad cig ma nyid la sogs pa bzhin no//de ltar na 'phags pa rnams so so'i skye bo rnams las khyad par ci yod ces kyang brjod par mi bya ste/ rnam pa ci tsam zhig bsal bar byas na de rnams kyi shes pa 'khrul pa'i rgyu mtshan dang bral ba de tsam gyis de rnams khyad par du 'phags pa'i phyir ro/ /de gsungs pa/ gang gi tshe cha shas med pa nyid kyi phyir chos kyi dbyings bdag nyid thams cad kyis rtogs na yang / nges pa bskyed pa la ltos nas/kun du 'gro ba'i don du rtogs pa las/ chos thams cad rang bzhin med pa nyid du mngon du byed pa'i shes pa shin tu gsal ba skyes pa de'i tshe byang chub sems dpas mthong ba'i lam thob po zhes so/ /de nyid kyi phyir gang sa rab tu dga' bar dang po gzugs la sogs pa rnams gdod ma nas skye ba med pa nyid du rtogs pa'i phyir mi skye ba'i chos la bzod pa'i ngo bo shes rab dang ting nge 'dzin zung du 'brel pa brjod pa med pa sdug bsngal la chos shes pa'i bzod pa'i skad cig kho na la mthong ba'i lam dang /sdug bsngal la chos shes pa la sogs pa rnams ni bsgom pa'i lam mo zhes brjod par bya ba de ni so sor rtog pa'i mngon par rtogs pa las skad cig gcig po mngon par rtogs par bya bas mngon par rtogs pa mthong ba'i lam ste/ma rig pa dang bcas pa'i 'khor ba brgyud pa thog ma med pa rnams su/ ma mthong ba'i de kho na nyid mthong ba'i bdag nyid kyis na gtso bo zhes rtogs pa'i ched du'o//'khrul pa'i rgyu mtshan gyis sgro btags pa'i rnam pa phyin ci log las byung ba'i nyon mongs pa rtsad nas 'byin par byed pa nyid kyis ni sdug bsngal la chos shes pa la sogs pa skad cig bco lnga po rnams kyang mthong ba'i lam mo zhes pa ni tha snyad bya ba kho na'o/ /bsgom pa'i lam du gsungs pas kyang 'di rnams mthong ba'i lam btags pa'o zhes gsal bar byas so//gzhan du na shing rta chen po rnams kyis theg pa chen por mthong ba'i lam skad cig bcu drug po zhes mang du bstan pa dang ci ltar mi 'gal gang rnams yang rgyu ma tshang ba med par spang bar mi nus pa nyid kyi phyir sdug bsngal mthong bas spang ba'i dus su kun 'byung spong ngo //de nyid kyi phyir 'gog pa mngon du byas so/ /de yang gzhan du na mi 'thad pas lam bsgoms so/ /kun 'byung ba la sogs pa la yang de bzhin no zhes pas 'bras bu'i mngon par rtogs pa las theg pa chen por mthong ba'i lam skad cig gis mngon par rtogs par blta bar bya la/bden pa so so la slar yang phyin ci log gsal bas so sor rtog pa'i mngon par rtogs pa las skad cig bcu drug kho nas mngon par rtogs par bya ste de'i phyir zhugs pa nyid la sogs pa las rnam par gzhag pa legs par gnas so zhes zer ba'i de'i lugs kyis skad cig bcu drug rnams kyang gtso bo'i mthong ba'i lam mo zhes gsal lo//de ltar na bden pa bzhi'i de kho na nyid mthong ba de mthong ba'i lam skad cig bcu drug ni sa rab tu dga' ba'o/ /sems kyi skad cig ni sems bskyed pa nyi shu rtsa gnyis po dbye ba dang bcas pa rnams su yang tha snyad pa'i dus kyi khyad par bya ba yongs su rdzogs pa'i mtshan nyid can shes bya la shes pa yongs su rdzogs pa ji srid par rig par bya ste/dper na mi khom pa brgyad la sogs pa'i k+Sha Na bzhin no/ /dus kyi mtha' shin tu thung ba'i dus ni ma yin te/ de ni phra ba nyid kyis tha snyad du bya ba ma yin pa nyid kyi phyir ro//de nyid kyi phyir sa gang gis yongs su sbyong bar gyur pa'i chos gang rnams yongs su ma rdzogs pa ji srid dus yin la/ yongs su rdzogs pa ni sa gzhan du rnam par gzhag go/ /de la nyon mongs spong ba'i phyir bar chad med pa'i lam gyi rang bzhin sdug bsngal la sogs pa mthong ba brgyad rnams bzod pa rnams zhes brjod la/rnam par grol ba'i lam gyi ngo bo nyid nyon mongs pa dang bral ba mngon du byed pa rnams ni shes pa brgyad rnams te/ chos dang rjes su shes pa rnams so/ /de dang lhan cig spyod pa'i nges pa'i shes pa yang brgyad rnams so/ /de la chos shes pa'i bzod pa'i rtogs pa nges par byed pa'i shes pa bzhi rnams so zhes rnam par gzhag go//rjes su rtogs pa'i bzod pa'i rtogs pa nges par byed pa'i shes pa rnams rjes su rtogs pa'i shes pa rnams so zhes pa'o/ /'o na seng ge bzang po'i dgongs pa shes pa gang gis bzod pa'i mjug thogs su rnam par grol ba mngon du byed pa de sdug bsngal la chos shes pa'o zhes dang /rin chen 'byung gnas zhi bas kyang / rnam par grol ba mngon du byed pa'i shes pa ni chos shes pa'o/ /mi rtag pa nyid la sogs par de'i rjes su rtogs pa de ni rjes su rtogs pa'i shes pa'o zhes te/chos shes pa'i bzod pa nges par byed pa'i shes pa rnams kyang chos shes pa'o zhes pa ni ma yin na/ de ci ltar mi 'gal zhe na ma yin te/ gang gi phyir goms pa phul du byung ba ma yin pa'i gnas skabs 'dir shin tu gsal ba med pa na so sor snang ba dang lhag par zhen pa dag gis bzod pas de kho na nyid mngon du byas so zhes rnam par gzhag go//de'i phyir bzod pa'i rjes thogs su nyon mongs pa las rnam par grol ba mngon du byed pa'i shes pa dang lhan cig spyod pa nyid kyis nges par byed pa'i shes pa yang mngon sum du byed pas bshad kyi/ chos shes pa'i bzod pa nges par 'dzin par mi dgongs pa ma yin no//de nyid kyi phyir nye bar mtshon pa nyid kyis na shes pa gang gis rjes su rtogs pa shes pa'i bzod pa nges par 'dzin pa de sdug bsngal rjes su rtogs pa shes pa'o zhes chos mngon pa kun las btus par gsungs so/ /ci ste de bzhin du de dag gis dgongs pa ma yin na de'i tshe chos shes pa'i bzod pa rnams la nges par 'dzin pa yod dam/'on te med/ gal te yod pa nyid na chos shes pa nyid kyis ma yin pas gang gis yin pa ston cig /med pa nyid ni mngon du byas so zhes pa'i tha snyad ci ltar yin/ shin tu gsal ba nyid kyi phyir bzod pa dang shes pa rnams kyis so zhe na/'o na rjes su rtogs pa'i shes pa rnams kyang mngon du byed pa por 'gyur gyi/ nges pa'i bdag nyid can rnams su ni ma yin no/ /gzhan yang shin tu gsal ba nyid du khas len na/ rnam par rtog pa'i bdag nyid nyon mongs pa dang shes bya'i sgrib pa med pa'i phyir da ltar kho na rtogs pa thams cad rdzogs pas na sangs rgyas nyid rtogs par 'gyur ro//ci ste 'dir shin tu gsal ba la yang nges pa yang yod cing / de yang bzod pa dang shes pa rnams kyis ma bstan na ni rjes su rtogs pa'i bzod pa nges par 'dzin pa yang rjes su rtogs pa'i shes pa nyid kyis ma bstan pas na skad cig bcu gnyis nyid 'ongs pa yin no//dper na ma mthong ba mthong ba med pa'i phyir tha ma lam la rjes su rtogs pa'i skad cig tha ma mthong ba'i lam yin pas skad cig bco lnga mthong ba'i lam du brjod pa ltar sngar med pa mthong ba med pa'i phyir rjes su rtogs pa shes pa'i skad cig ma rnams mthong ba'i lam ma yin zhes pas skad cig ma bcu gnyis nyid du thal lo//chos bstan na yang nges par 'dzin pa gzhan yang chos shes pa nyid du ston cig ces pa gzhan gyi lugs bsam pas chog go/ /'di ni 'dir man ngag ste/ gzugs la sogs pa rnams gdod ma nas skye ba med par so sor rtog pa'i phyir/sdug bsngal ba nyid sdug bsngal gyi mtshan nyid mi dmigs pa sdug bsngal la chos shes pa'i bzod pa'i skad cig ma 'di mi skye ba'i chos la bzod pa zhes brjod par bya la/ de 'di yang shes rab dang ting nge 'dzin zung du 'brel pa brjod pa med pa'i skad cig ma'o/ / 'jig rten las 'das pa'i ye shes de'i rjes la thob pa rang gis rtogs pa yongs su gcod pa'i shes rab skyes pa/ gang gis chos 'di rnams stong pa kho na'o zhes stong pa nyid kyi mtshan nyid rnam par dag pa'i ngo bos mngon par brjod pa de sdug bsngal la chos shes pa'o/ /gzugs la sogs pa rnams kyi stong pa nyid mtshan nyid rnam par dag pa'i ngo bo de dang 'di yang dngos po dang dngos po med pa dag gis brjod par bya ba ma yin pa'o zhes rab tu shes pa las slar yang brjod pa med pa'i 'jig rten las 'das pa'i shes rab skye ba de rjes su rtogs pa shes pa'i bzod pa'o//de'i tshe yang khams gsum pa'i chos rnams brjod du med pa nyid du so sor rtogs par byed de/skad cig ma gnyis las thob pas shes rab mchog tu gyur pa'i phyir ro/ /sngon ma ni 'dod pa'i khams kyi sdug bsngal shin tu gcod pa nyid kyi phyir dang shes rab phul du byung ba med pa'i phyir der rtog pa kho na'i chos rnams bdag med pa nyid du rtogs par byed do//de'i phyir de dang mtshungs pa nyid kyis dang de'i rgyu can nyid kyis dang de shes pa'i don can nyid kyis na de'i rjes su rtogs pas bzod par gyur pa ni rjes su rtogs pa shes pa'i bzod pa zhes brjod do/ /de nas de kho na ltar shes rab skye ba chos thams cad brjod du med pa brjod par bya ba ma yin pa kho na'i de kho na nyid mngon par brjod pa ni rjes su rtogs pa'i shes pa zhes brjod do//'phags pa rdo rje gcod par yang gsungs pa/ byang chub sems dpa' rnams chos su 'du shes pa mi 'jug la/ chos ma yin par 'du shes pa ma yin/ 'du shes pa la ma yin/ 'du shes pa med pa ma yin no zhes te//go rims ji lta bar gzung ba dang 'dzin pa'i ngo bo'i chos thams cad mtshan nyid ji lta bar med pa'i phyir dang / gnyis dang bral bas gnyis su med pa'i ngo bos kun rdzob tu yod pa'i phyir dang / gnyis su med pa'i ngo bo yang dngos po dang dngos po med pa dag tu brjod par bya ba ma yin pa nyid kyi phyir dang /tha snyad tsam gyis brjod du med pa yang brjod par bya bar sbyor ba'i phyir ro/ /de ltar chos su 'du shes pa mi 'jug ces pa la sogs pas mtha' bzhi las rnam par grol ba dbu ma'i lam du mngon par dgongs pa ste/ yod pa dang med pa la sogs pa rnams gzung ba'i rnam pa nyid kyi phyir dang g.yo ba thams cad nub par bstan pa'i phyir ro//gang rnam par dag pa'i ngo bo'i dmigs pa yod do zhes 'dod pa de'i lus la gzung ba'i rnam par rtog pa spangs par 'gyur ba kho na'o zhes pas/ ma mthong ba kho nar 'gyur gyis mthong ba'i lam ma yin no//'o na rab tu gsal ba tsam mam sna tshogs pa'i rnam par rang rig pa'i ngo bo 'di ma yin nam zhe na/ de de ltar rtog pa na rab tu rtogs pa ma yin pa kho na'o zhes legs par gsungs te/ 'di ni rnam rig tsam kho na/ /zhes pa nye bar dmigs pa las/ /cung zad mdun du 'jog byed pa//de ni tsam la mi gnas so/ /zhes so/ /de kho na ma yin dgag gi tshul gyis rang rig par mthong ba ni gzung ba dang 'dzin pa dag ma mthong ba ste/ de kho na mthong ba'i lam mo zhe na/ 'di yang da lta mi rnams kyis yongs su brtags pa ste/ dbyig gnyen la sogs rnams kyis ni/ de brjod du med pa kho nar gsungs so//log pa'i kun rdzob tu ni rnam par ma dag pa'i ngo bo dang / gzhan du rnam par dag pa'i ngo bo zhes pa 'di ltar smra la de la dngos po dang dngos po med par rnam par rtog pa dag gi go skabs med do zhes kyang ngo / /de ltar gyur du chug mod de de lta na'ang ci 'di tsam gyis 'di bsgom par bya ba nyid bstan nam/de ltar ro zhe na/ de'i tshe ring ste lam yongs su nyams pa'o/ /de ltar bsgom pa 'di dngos po'i ngo bo nyid las 'da' ba ma yin no/ /de lta bu ni rab tu byed pa rnams su mthong ba med do/ /'o na mthong ba'i don ci ltar zhe na/ yul de la shes pa mi skye ba'i don te mthong ba med pa kho na'i bsgom pa ni mthong ba'o zhes brjod do//shes pa'i skad cig rnams de'i rjes su byed pa nyid kyi phyir mthong ba'o/ /de ltar na de rnams ga las skye zhe na/ rnam par shes pa gnas gyur pa las kun rdzob tu rjod par byed do/ /de bzhin du kun 'byung dang 'gog pa dang lam rnams la yang rtogs par bya'o//de la bzod pa brgyad rnams ni nyon mongs pa spong ba la rkun po 'byin par byed pa'i tshul gyis bya ba can no/ /shes pa brgyad po rnams ni sgo 'phar gcod pa'i tshul gyis so/ /de la chos shes pa'i bzod pa bzhi po la/ 'dod chags dang / nga rgyal dang / khong khro dang /ma rig pa dang / the tshom dang / 'jig tshogs dang mthar 'dzin pa dang log par lta ba dang lta ba mchog tu 'dzin pa dang tshul khrims dang brtul zhugs mchog tu 'dzin pa rnams 'dod pa'i khams kyi ste/ so sor bcu'o zhes pa bzhi bcu'o/ /rjes su rtogs pa'i shes pa'i bzod pa bzhi la ni de rnams kho na khong khro ba bor ba rnams te/bsam gtan bzhi dang gzugs med pa bzhir rtogs pa bdun cu rtsa gnyis so zhes pa nyon mongs pa bcu gnyis lhag pa'i brgya rnams mthong bas spang bar bya ba ste rab tu spang bar bya bas na'o zhes pa'o/ /sems bcu drug po 'di ni bden pa mngon par rtogs pa ste/gang gi dbang du byas nas bcom ldan 'das kyis mdo sde de dang de rnams su gang zag de dang de'i dbang du mdzad de gsungs pa/ chos rnams la chos kyi mig rdul med cing dri ma dang bral ba skyes so zhes so/ /de bzhin du chos mthong ba/ chos thob pa/ chos rig pa/ chos rtogs pa/ som nyi las brgal ba/the tshom las brgal ba/ gzhan gyi dring la mi 'jog pa/ ston pa'i bstan pa la gzhan gyis bkrir mi btub pa chos rnams la mi 'jigs pa thob pa'o zhes so/ /thog mar bden pa rnams la 'phags pa'i shes rab kyi spyan gyi rang bzhin nyid kyi phyir chos rnams la chos kyi mig go//de la chos shes pa'i bzod pa rnams kyis rdul dang bral te de rnams kyis nyon mongs pa'i rdul spong ba'i phyir ro/ /chos shes pa rnams kyis dri ma dang bral ba ste/ de rnams de'i sgrib pa spong ba'i gnas su skyes pa'i phyir ro/ /chos la bzod pa rnams kyis chos mthong ba ste/ de rnams kyis de kho na nyid rtogs pa'i phyir ro//chos shes pa rnams kyis chos thob pa ste/ de rnams kyis nyon mongs pa las rnam par grol ba mngon du byed pa'i phyir ro/ /rjes su rtogs pa'i bzod pa rnams kyis chos rig pa ste/ de rnams kyis 'phags pa'i chos kyi rjes su 'gro ba 'di'o zhes de gnyis ka yang dag par rig par byed pa'i phyir ro//rjes su rtogs pa'i shes pa rnams kyis chos rtogs te/ de rnams kyis shes bya ji snyed pa yongs su rdzogs pa'i phyir ro/ /bzod pa dang shes pa thams cad kyis som nyi las brgal te/ 'jig rten las 'das pa'i lam gyi 'bras bu thob par gyur pa na yun ring po nas 'dod par byas pa'i rang gi rtog pa la som nyi med pa'i phyir ro//thams cad gzhan gyis thob pa la the tshom las brgal te/ de'i gnas skabs pa gzhan rnams kyi yang khyad par rtogs pa la so sor the tshom med pa'i phyir ro/ /lam bsgom pa'i ched du gzhan gyi dring mi 'jog ste/gzhan gyis nye bar bstan pa med par yang rang nyid mkhas pa nyid kyi phyir ro/ /gzhan gyis bkrir mi btub pa ni shes nas dad pa thob pas ston pa'i bstan pa las gzhan mu stegs pa rnams kyis skye ba gzhan du yang mi 'phrogs pa'i phyir ro/ /chos rnams la mi 'jigs pa thob pa ni khong du chud pa las brtsams nas so sor 'dri ba dang lung du bstan pa'i chos rnams las/sdig pa 'dod pa dang mngon pa'i nga rgyal can bzhin du sems zhum pa med pa'i phyir ro/ /slar yang gsungs pa/ don shes shing chos shes nas chos kyi rjes su mthun pa'i chos la zhugs par 'gyur la/ mthun par zhugs shing chos dang rjes su mthun par spyod pa'o zhes pa'o//de ni so so'i skye bo'i gnas skabs su chos thams cad kyi don thos pa las byung ba'i shes pas yongs su shes nas mdo la sogs pa rnams gzings lta bur shes pa ni thos pa tsam gyis ngoms pa spangs pa'i ched du ste/ des na chos shes par 'gyur ro//shes pa de yongs su rdzogs pa'i don du sgrub bzhin pa ni rjes su mthun pa'i chos la 'jug pa ste/ de la rab tu dga' ba'i sa la/ sa de pa'i byang chub sems dpa' rnams dang mthun pa ste mnyam pa nyid la zhugs par 'gyur ro/ /de nas dri ma med pa la sogs pa'i sa rnams la chos kyi rjes su mthun par spyod pa'o zhes pa'o//de la skad cig ma bco lnga la byang chub sems dpa' rgyun du zhugs pa'i 'bras bu la zhugs pa brgyad pa ste rnam pa gnyis so/ /dang po dbang po rtul po ni dad pas rjes su 'brang ba ste/ dad pas de'i lam gyi rjes su 'brang ba'i phyir ro/ /ji skad du gsungs pa/ shA ri'i bu de la byang chub sems dpa' gang mi rnams nas shi 'phos nas mi rnams dang skal ba mnyam par skye ste/ de phyir mi ldog pa'i byang chub sems dpa' rnams ma gtogs par dbang po rtul po rnams su 'gyur ro zhes pa la sogs pa'o/ /gnyis pa phyir mi ldog pa dbang po rnon po chos kyis rjes su 'brang ba mthong bas thob pa ste/chos dang mthong ba ni shes rab ste/ des de'i lam gyi rjes su 'brang ba'i phyir ro/ /gang gsungs pa/ shA ri'i bu yang byang chub sems dpa' gang sangs rgyas kyi zhing gzhan rnams dang dga' ldan gyi lha rnams nas shi 'phos te 'dir skye zhing / de'i dbang po rnams rno bar 'gyur ro zhes pa la sogs pa'o//skad cig bcu drug pa la ni rgyun du zhugs pa'i 'bras bu la gnas pa'o/ /'o na rgyun du zhugs pa'i lam kho nar srid pa med par 'gyur te/ 'jig tshogs la lta ba dang bral ba'i phyir la/ gang gi phyir/ gti mug nyes pa'i rtsa ba ste/ /de yang sems can 'dzin pa yin//zhes bshad pas so/ /de'i phyir lam gzhan don med par 'gyur ro zhe na/ de lta ma yin te/ bden pa mthong ba tsam ni mthong ba'i lam yin la mthong bas kyang mngon par 'du byed pa las byung ba'i bdag tu 'dzin pa rtsa ba med pa'i nyon mongs pa yin pa nyid kyi phyir spong ngo / / de ni nye bar bstan pa las byung ba'i bdag tu lta ba ste/ phyin ci log pa ni mthong ba tsam kho nas spong ba'o/ /'jig tshogs su lta ba lhan cig skyes pa ni yun ring po nas zhugs pa nyid kyi phyir thog ma med pa nas goms pa'i phyir gnyen po sgom pa'i lam kho nas spong ngo / /lhan cig skyes pa'i sems can du lta ba thog ma med pa'i bag chags kyi dbang las byung ba yang nga'o zhes pa'i blos sgrub po//de'i phyir sems can du lta ba lhan cig skyes pa yod pa'i phyir lam dang po kho nar 'khor ba med pa ma yin no/ /sems can du lta ba mtha' dag ma spangs pa'i phyir ro zhes pa nges pa'o/ /de ltar yang tshad ma rnam 'grel du gsungs pa/gal te 'jig tshogs lta bral phyir/ /lam dang por ni srid med 'gyur/ /ma yin lhan skyes ma spangs phyir/ /spangs na yang srid ga la yod/ /bde bar 'gyur ba 'am sdug bsngal bar/ /ma gyur cig ces sred pa yi/ /nga'o snyam pa'i blo gang ste/ /sems can lta zhes lhan cig skyes//nga zhes mthong ba med par ni/ /'ga' yang bdag la chags pa min/ /bdag la chags pa med par yang / /bde bar 'dod pa mngon rgyug yin/ /zhes so/ /'o na bdag zhen pa ni 'jig tshogs la lta ba yin la/ de yang ma rig pa dang mtshungs par ldan pa ste/ de'i phyir lta ba'i sgo nas ma rig pa brjod do zhes rtogs par bya ste/ med na mi 'byung ba nyid kyi phyir ro/ /'jig tshogs la lta ba kho na ma rig pa'o zhes pa ni ma yin no/ /gzhan yang 'jig tshogs la lta ba ni gti mug gi phyogs gcig tu gyur pa yin la gti mug ni nyon mongs pa mtha' dag gi rjes su song ba yang dag par brtags pa ma yin pa'i mtshan nyid can nam rnam pa gzhan yang rung ste de ci ltar 'jig tshogs la lta bar brjod de/khyad par gyi sgra la spyi'i don med pa'i phyir ro/ /de bzhin du gal te lta ba kho na ma rig pa yin na de'i tshe lta ba dang mtshungs par ldan pa ma rig pa'o zhes mtshungs par ldan pa'i don du mi 'gyur te/de de kho na dang mtshungs par ldan pa ni med do zhe na/ rtsod pa 'di ni yongs su spong ba rnam 'grel mdzad pa nyid kyis gsungs pa/ 'gal ba gang yin 'dir bshad bya/ /stong nyid lta dang de 'gal phyir/ /de las byung ba'i nyes kun dang / /'gal ba rab tu grub pa yin//zhes so/ /spyi dang khyad par gyi dngos po yongs su brtags pas ni mtshungs par ldan pa'i don to/ /'di lta ste/ pa lA sha dang ldan pa'i nags zhes pa bzhin/ don dam par pa lA sha'i rang bzhin nyid kho na brjod par byas pa bzhin no/ /de ltar khyad par mngon par brjod pas de'i rang bzhin ma rig pa rgyur gyur pa gtso bor nges par bstan to//gang gi phyir bdag tu lta ba ni ma rig pa yin pa de'i phyir de'i rtsa ba can gyi nyon mongs pa thams cad ni bdag med pa nyid mthong bas rtsa ba chad par byed cing rtsa ba chad pa las rgyun gcod do/ /gang gi phyir nyon mongs pa mtha' dag dang 'gal ba bdag med pa nyid mthong ba ste de yang rnal 'byor pa rnams dang mi 'bral lo zhes pas slar nyon mongs pa 'byung ba ma yin no//'o na skyon dang ldan pa la yon tan sbyor ba ji lta ba de bzhin du yon tan ldan pa la skyon sbyor bas 'khor ba las nges par 'byung ba med do zhe na/ ma yin te/ skyon rnams la yon tan yang dag par 'byung bas gnod pa'i phyir ro//ci'i phyir bzlog par mi 'gyur zhe na/ yon tan rnams dngos po'i rang bzhin yin pa nyid kyi phyir dang skyon rnams ni phyin ci log pa'i phyir ro/ /gang gi phyir sems can 'di rang bzhin gyis 'od gsal ba ste/ gzhan las byung ba'i phyir dang ma rig pas nye bar bslad pa'i phyir dri ma rnams ni glo bur ba'o//yod pa ma yin par gyur pa sgro 'dogs pa ni rtsa ba med pa can nyid kyi phyir don dam par ni chos thams cad dngos po nyid du 'ga' zhig na yang yod pa ma yin no/ /de'i phyir rnam par dpyad na stong pa nyid kyi phyir dri ma rnams glo bur ba'o/ /de phyir sngar yang nus med rnams//de bdag gyur la phyis nus med/ /de'i bdag nyid du gnas pa la skyon skye ba ma yin no/ /de ltar ni/ 'tshe ba med dang yang dag don/ /rang bzhin la ni phyin log gis/ /'bad pa ldan yang gnod med de/ /blo ni de phyogs 'dzin phyir ro/ /rang bzhin ni 'bad pa dang bral bas bzlog par nus pa ma yin zhing /'bad pa yang yon tan rnams la skyon mthong ba dang skyon rnams la yon tan mthong ba las 'jug na/ chos thams cad bdag med par mthong ba de'i tshe bdag nyid du gyur pa la/ skyon rnams la yon tan mthong ba dang / yon tan rnams la skyon mthong ba'am/ yon tan rnams la mi mthong ba ma yin te/bdag med pa mthong ba las nye bar 'tshe ba med pa nyid kyi phyir ro/ /de phyir rang bzhin bdag gyur pa/ /nyer 'tshe med pa kho na'o/ /sems dang ldan pa rnams kyis de/ /yongs btang bya bar ci ltar nus/ /de'i phyir yang nye bar 'tshe ba dang bcas pa yang dag pa ma yin pa'i don can rang bzhin ma yin pa'i skyon rnams kyis de'i bdag nyid du gyur pa'i lam/skyon rnams zil gyis mnan nas skye ba'i mtshan nyid can la mi gnod do/ /lam de'i bdag nyid du gyur pa la skyon bskyed pa'i ched du 'bad pa mi srid pa kho na mod/ de ltar na yang khas blangs nas brjod par bya ste/ skyon skyes pa las 'bad pa ldan du zin kyang mi gnod do//skyon skye ba'i rtsol ba bzlog nas chos thams cad bdag med pa nyid kyi lam yon tan dang ldan pa'i phyogs su ltung bas na skyon zad par byed pa kho na la 'bad pa byed pa'i phyir ro/ /gal te dngos po ma lus pa'i rang bzhin la yongs su lta bar nus pa la yang skyon skyer chug mod/de lta na yang 'di ni ded dpon dam pas spangs pa'i 'gron po ltar shugs dang yang dag par ldan pas las lam kho na la 'bad pas rtsom ste yon tan gyi phyogs su lhung ba'i phyir la skyon la dga' ba ni ma yin no/ /gang gi phyir brtse ba dang ldan pa ni/ rang dang gzhan gyi sdug bsngal spang ba'i ched du 'bad pa 'byung zhing /rang gi sdug bsngal zad pa med par gzhan gyi sdug bsngal bsal bar mi nus la de'i phyir rang gi sdug bsngal zad pa mngon du bya ba dang / dngos po thams cad mngon sum du bya ba la mngon par brtson par bya'o/ /thabs byung de rgyu lkog gyur pas//de 'chad pa ni dka' ba yin/ /gang mtho ris dang byang grol gyi rgyu dang 'bras bu mngon du byas pa med pa des/ pha rol po rnams la de 'chad pa dka' ste/ gang gi phyir de ni de la nus pa med la/ de'i phyir lus can rnams kyi yon tan skyon/ /thams cad goms pa'i rtsa ba can//bdag nyid dbang gyur goms de yang / /yon tan nyid las mchog tu byed/ /ces pa zhar la byung ba rgya che bas chog go/ /dkyus ma brjod par dka'/ drug pa la sogs pa sems bskyed pa bco lnga rnams 'jig rten las 'das pa'i bsgom pa'i lam mo/ /gal te yang 'dus byas dang 'dus ma byas dag ngo bo gcig pa nyid kyis na phan tshun tha dad par gdags par mi nus pa bzhin du ji skad bshad pa'i mthong ba'i lam gyis mngon sum du byas pa'i dngos po las tha mi dad pa la dmigs pa'i phyir/mthong ba dang bsgom pa'i lam dag tha dad du gyur pa med do zhes pas bsgom pa'i lam mtshan nyid pa rnam par gzhag pa med kyi/'on kyang de ni des spang bar bya ba'i dngos po'i gnyen po nyid du rten cing 'brel par 'byung ba'i chos nyid kyis bsgom par bya'o/ /de'i phyir mthong ba kho na rgyun du shes pa sgom pa yin la de kho na lam mo/ /de la lhan cig skyes pa'i 'dod chags dang khong khro dang nga rgyal dang ma rig pa rnams dang lhan cig skyes pa'i 'jig tshogs la lta ba dang log par lta ba dag ste/chos mngon pa kun las btus su ni mthar 'dzin par lta ba gsungs mod/ 'di ni log lta'i bye brag yin pa nyid kyi phyir te/ gang gi phyir 'dir dngos po la yang dag pa nyid du sgro 'dogs pas phyin ci log tu lta ba log ltar gzung gi/rgyu dang 'bras bu la skur pa 'debs pa ni ma yin zhes sngar brjod zin to zhes pa 'dod pa na spyod pa drug dang / gzugs dang gzugs med pa na spyod pa de rnams kho na zhe sdang dor ba bcu rnams so zhes pa nyon mongs bcu drug rnams rim gyis spang bar bya'o/ /bag la nyal yin gyi mngon du rgyu rab tu gyur pa ni ma yin te sngon kho nar bral ba'i phyir ro//de la nyon mongs pa gcig la chen po dang 'bring dang chung ngu'i dbye ba rnam pa gsum ste slar yang chen po'i chen po la sogs par phye bas rnam pa dgu dang / 'dod pa'i khams dang bsam gtan bzhi dang gzugs med bzhir gtogs pa nyid kyi brgyad cu rtsa gcig go//de bzhin du de'i gnyen po skyon skye bar 'dod pa 'joms pa'i phyir skyon dang 'gal ba bshad ma thag pa'i bsgom pa'i lam ste/ bsgoms pas btsal bar bya ba nyid kyis na bsgom pa'i lam shin tu ba yang sems bskyed pa tha ma gnyis kyi bdag nyid do/ /'on kyang chung ngu dang 'bring dang chen po rnams/slar yang chung ngu la sogs pa'i dbye bas rnam pa brgyad cu rtsa gcig go/ /'di kho na'i 'du shes med 'du shes med min skye mched du brgyad cu rtsa gcig chen po'i rnam pa gcig ni shin tu ba'i bsgom pa'i lam mo/ /de bshad pa/ ji skad bstan pa'i bsgom pa'i lam gyi mtha'i skad cig ni gnyen po mtha' dag gis ngo bo nyid do zhes pa rnam par dag pa shin tu ba dngos sangs rgyas kyi'o zhes pa'o//gnyen po rtogs pa'i rnam pa brgyad cu pa rdo rje lta bu zhes bya ba bar chad med pa'i lam gyis rkun po phyung ba bzhin du bag chags dang bcas pa'i nyon mongs pa dang shes bya'i sgrib pa spangs pa las/de ma thag tu sgo 'phar gcod pa bzhin du rnam par grol ba'i lam gyi rang bzhin gnyen po'i rnam pa brgyad cu rtsa gcig pa ste shes bya'i sgrib pa spangs pas dngos po'i mtha' las 'das pa'i phyir dang rtag pa'i chos kyi sku thob pas na dus kyi mtha' las 'das pa'i phyir shin tu ni chos kyi dbyings yin la/de la yod pa ni shin tu ba'i rnam par dag pa yang dag par rdzogs pa'i sangs rgyas kyi'o/ /de skad du yang gsungs pa/ gang 'di rnams ni lam gyi rnam pa brgyad cu rtsa gcig po 'di rnams te/ nyon mongs pa'i rnam pa re re spang bar bya ba la so sor bar chad med pa nyid dang rnam par grol ba'i lam gyi rang bzhin rnams so zhes so//bar chad med pa nyid 'dis btsal bar bya bas na lam ste/ rtogs pa'i rnam pa gnyis pa'i rgyu'o zhes pa bar chad med pa'i lam mo/ /de kho na nyid nyon mongs pa skye ba'i skad cig gis nus pa med pa'i phyir/mi skye bar gyur pa na rnam par grol bar bya bas rnam par grol ba yin la rtogs pa snga mas btsal bar byas pas na lam yang ngo zhes pa rnam par grol ba'i lam mo/ /rnam par grol ba nyid kyi phyir gnyen po ste/ nyon mongs pa mi skye ba'i ngo bo nyid las rab tu spangs pa'i phyir ro/ /de ltar yang chos mngon pa kun las btus par gnyen po'i rnam pa skyes pa dang nyon mongs pa bskyed pa'i nus pa'i bag chags shes bya'i gnas ngan len gyi rnam pa 'gag pa dus mnyam ste snang ba dang mun pa skye ba dang 'gag pa bzhin no//de 'gags pa las ma 'ongs pa'i nyon mongs pa mi skye ba'i chos nyid du gnas par byed pa de ni spangs pa'o zhes gsungs so//de bzhin du gnyis pa la sogs pa'i rtogs pa'i rnam pa rnams kyang so sor bar chad med pa dang rnam par grol ba'i lam gyi ngo bo'o/ /rtogs pa'i rnam pa tha ma ni rnam par grol ba'i lam kho na yin gyi bar chad med pa'i lam ni ma yin te 'bras bu'i rtogs pa'i rnam pa med pa'i phyir ro//de bzhin du mthong ba'i lam la/ so sor de lta bu'i lam gnyis kyi ngo bo ste skad cig ma tha ma yang bsgom pa'i lam rtogs pa'i rnam pa dang po'i bar chad med pa'i lam ste/ dang po rnam par grol ba'i lam yang ngo / /de skad du yang chos mngon pa kun las btus par 'jig rten pa'i chos mchog ni de ma thag pa'i ting nge 'dzin sbyor ba'i lam ste gang gis nyon mongs pa spong ba'o//de'i de ma thag pa'i dmigs pa'i ting nge 'dzin ni mthong ba'i lam mo zhes gsungs so/ /de la 'dod pa'i khams su rnam pa dang po dgu rnams ni sgrub pa'i bsgom lam gyi ngo bo sems bskyed pa drug pa la sogs pa'i rang bzhin dri ma med pa la sogs pa'i sa dgu rnams so//khyad par gyi lam gyi rnam pa rnams ni bsgom pa'i lam shin tu ba rnam par dag pa las dang / rab tu gyur pa'i rgyud dang bcas pa nyid las dang sgrub pa la ltos nas shin tu rnam par dag pa las bsgom pa'i lam rnam par dag pa shin tu bar lam shes pa nyid la gsungs so//de la dri ma med pa dang 'od byed pa dang 'od 'phro ba dang shin tu sbyang dka' ba'i sa'i ngo bo rnam pa dang po bzhi khong du chud pas na rgyun du zhugs pa kho na ste/ mi dang lha'i rigs su skye ba nyid kyis rnam pa gnyis so/ /de la dang po ni thabs la mkhas pas mi rnams su rgyal rigs dang bram ze dang khyim bdag shing sA la chen po lta bu'i rigs su skyed pa'o//gnyis pa ni 'dod pa na spyod pa drug po rnams su'o/ /rnam pa lnga po sa la mngon du gyur pa'i ngo bo la ni lan cig phyir 'ong ba'i 'bras bu la zhugs pa'o/ /drug pa sa ring du song ba'i rang bzhin la ni lan cig phyir 'ong ba'o//de kho na gzhan bar chad gcig pa'o/ /rnam pa bdun pa mi g.yo ba'i sa'i ngo bo rtogs pa na dang / brgyad pa sa legs pa'i blo gros kyi rang gi ngo bo la ni phyir mi 'ong ba'i 'bras bu la zhugs pa'o/ /dgu pa chos kyi sprin gyi sa'i rang bzhin la ni phyir mi 'ong ba ste bar dor yongs su mya ngan las 'da' ba nyid la sogs pa'i dbye ba rnam pa dgu'o zhes pa 'phags pa rnam par grol ba'i sde'i zhabs kyis/'dod pa'i rnam pa drug pa dang / /dgu pa'ang yang dag zad pa las/ /lan cig phyir 'ong phyir mi 'ong / /gang zag dag ni skye bar 'gyur/ /srid rtse'i mtha' zad dgra bcom ste//de rnams lam la yang dag gnas/ /de yi sbyor ba la gnas bzhi/ /de la zhugs pa rnams su bshad/ /dgra bcom mi slob pa yin la/ /bdun gzhan zad par slob phyir ro/ /zhes nyan thos kyi theg pa rnam par gzhag pa'i rjes su 'brangs nas rnam par gzhag pa mdzad pa dang //mdo sde rgyan du/ de bzhin gshegs rigs skye thob dang / /lung bstan pa dang dbang bskur dang / /byang chub rab tu thob pa yang / /ngo mtshar che ba yin par 'dod/ /ces 'di bshad pa ni/ 'bras bu ngo mtshar che ba gsungs te/ bzhi rnams ni byang chub sems dpa'i 'bras bu ste/ dang po dang brgyad pa dang bcu pa la slob pa'i 'bras bu gsum dang /sangs rgyas kyi sa la mi slob pa'i 'bras bu bzhi pa mchog yin no zhes pa de ni brgyad pa mi g.yo ba'i sa la lan cig phyir 'ong ba mthar phyin pa'i dbang du byas nas lung bstan pa thob pa'i 'bras bu rjod par byed pa'i yi ge'o zhes pas 'gal ba med do//de nyid kyi phyir des dge 'dun dkon mchog la gdams pa'i rnam par bshad par/ gang kho na lan cig phyir 'ong ba zhes bshad pa de kho na bar chad gcig pa ste gsungs pa shA ri'i bu byang chub sems dpa' rnams yod de nas/ ji srid du skye ba gcig gis thogs par rig par bya'o zhes pa'i bar ro//de ni nyon mongs pa'i rnam pa bdun dang brgyad spangs pas dang / de'i gnyen po zag pa med pa'i dbang po thob pas dang ba bskyed pa gcig lhag mar lus pa'i phyir lan cig car phyir 'ong ba'i khyad par can no zhes byas nas so/ /gang 'di nyon mongs pa'i rnam pa dgu spangs pa las phyir mi 'ong ba'o zhes bshad la de yang rnam pa lnga ste de nas ji srid du gang 'di phyir mi 'ong ba zhes bshad pa de/gal te srid pa'i rtse mo pa'i nyon mongs pa rnams kyi rnam pa brgyad pa spangs par gyur na de las 'di dgra bcom pa nyid kyi 'bras bu la zhugs pa'o zhes pa'i mthar thug pas dang /sems can gyi don gyi nges 'byung gi rnam par bshad par yang / sa dang po la sems can la sogs pa'i rnam par rtog pa rnams mthong ba'i lam gyi yul ma yin pa'i phyir ro/ /gnyis pa la lam chung ngu'i chung ngus rnam par rtog pa chen po'i chen po spangs par gyur pa na sems can la sogs pa rnams dmigs pa med pa'i phyir ro zhes bya ba nas sa bcu pa la rnam par rtog pa chung ngu'i chung ngu'i gnyen po lam chen po ni nam mkha' ltar shes bya'i sgrib pa dang bral ba tsam du bstan par bya ba nyid kyi phyir ro zhes pa'i mthar thug pas shin tu yang rnam par gzhag par mdzad do// yang bsgom pa'i lam la gnas pa'i phyir mi ldog pa'i byang chub sems dpa'i dge 'dun gyi mtshan nyid 'di ni rgyun chags yin pa'i phyir/ chung dang 'bring dang chen po rnams/ /slar yang chung sogs dbye ba yis/ /rnam pas rnam pa dgur 'dod do/ /zhes pa'i rgyan gyi rnam par bshad pa rnams kyis gsungs te/rnam par rtog pa chung ngu'i chung ngu grangs yod pa dang gzhal du yod pa dang / tshad yod pa rtogs pas bsdus pa/ ji lta bar bsgom pa'i lam gyi dbang du byas pas sa dgu pa la de'i gnyen por lam gyi rnam pa chen po'i chen por 'gyur ro zhes so/ /de la dgu pa ni chos kyi sprin gyi ste/sgom pa'i dbang du byas nas dgu pa yin pa'i phyir dang rab tu dga' ba dang bcas pas bcu pa nyid kyi phyir ro zhes pa thams cad legs par gnas so/ /chos mngon pa kun las btus par yang / bsgom pa'i lam la 'dod pa na spyod pa'i nyon mongs pa'i rnam pa dgu pa spangs pa las bcu par 'gyur ro zhes gsungs so//de la 'bras bu gnyis pa dang gsum pa la zhugs pa dad pas mos pa'i dbang du byas nas gsungs pa/ shA ri'i bu byang chub sems dpa' thabs la mi mkhas pa gang rnams bsam gtan bzhi rnams rdzogs par byed cing / pha rol tu phyin pa drug rnams la spyod la bsam gtan thob pa des kyang lha tshe ring po rnams su skyes te/de nas shi 'phos nas de gal te 'dod pa'i khams lha rnams su'am mi rnams su skyes na/ de rnams kyi dbang po rnams rtul por 'gyur gyi rnon por mi 'gyur ba rnams yod do zhes so/ /gsung rab de nyid kyi phyir na 'phags pas rtogs par byas pa las mi g.yo ba nas bzung ste byang chub sems dpa' rnams thams cad phyir mi ldog pa nyid na yang 'ga' zhig thabs la mi mkhas pa nyid dang dbang po rtul po yang sa legs pa'i blo gros kyi bar du 'gyur la/thams cad ni ma yin te mthong bas thob pa'i zhugs pa gnyis po dang lan cig phyir 'ong ba dang yongs su rdzogs pa'i lan cig phyir 'ong ba yang thabs la mkhas pa nyid dang dbang po rnon po nyid dag mngon par brjod pa'i phyir ro//gang gi phyir 'bras bu gnyis pa dang gsum pa la zhugs pa mthong bas thob pa'i dbang du byas nas gsungs pa/ shA ri'i bu byang chub sems dpa' rnams yod do nas/ji srid du thabs la mkhas pas/ gang na sangs rgyas bcom ldan 'das rnams dgyes par spyod pa de dang der skyes te de rnams shes rab kyi pha rol tu phyin pa dang ma bral bas/ bskal pa bzang po 'di kho na la bla na med pa yang dag par rdzogs pa'i mngon par rdzogs par sangs rgya'o zhes pa'i bar ro//'dir ji srid du sa bcu'i dbang phyug bskal pa bzang po pa rnams kyi log par dad sel dang gser thub dang 'od srungs dang / shAkya thub pa rnams kyis dman pa'i stong du grangs nges pa ni mi mjed kyi 'jig rten gyi khams su ste/ gzhan du thabs la mkhas pa'i stobs kyis sgrub pa dang dgag du med pa'i phyir ro//lan cig phyir 'ong ba'i dbang du byas nas kyang / shA ri'i bu byang chub sems dpa' gang shes rab kyi pha rol tu phyin pa la spyod pa rnams/ thabs la mkhas pas bsam gtan dang gzugs med pa'i snyoms par 'jug pa rnams la snyoms par 'jug pa rnams yod do nas/ji srid du dga' ldan gyi gnas su tshe ji srid par gnas nas de nas shi 'phos te 'dir skyes pa yang dag par bstan nas sangs rgyas kyi zhing sna tshogs rnams su bla na med pa yang dag par rdzogs pa'i byang chub tu mngon par rdzogs par sangs rgya'o zhes so//de rnams 'jig rten 'dir lan cig phyir 'ongs nas gzhan du yongs su mya ngan las 'da' ba'i phyir ro/ /yongs su rdzogs pa'i lan cig phyir 'ong ba'i dbang du byas nas/ shA ri'i byang chub sems dpa' gang bsam gtan bzhi rnams nas ji srid du 'phags pa'i bden pa rnams kyi bar du thob cing de rnams mngon sum du mi byed pa rnams yod de/de rnams skye ba gcig gis thogs par shes par bya'o zhes so/ /sa bcu pa nas bzung ste byang chub sems dpa' thams cad nyid thabs la mkhas pa dang dbang po rnon po kho na rnams su 'gyur ro/ / de la phyir mi 'ong ba'i dbang du byas nas gsungs pa/ shA ri'i bu byang chub sems dpa' mngon par shes pa drug thob pa gang rnams 'dod pa dang gzugs dang gzugs med pa'i khams rnams su mi skye ba yod de/ 'on kyang sangs rgyas kyi zhing nas sangs rgyas kyi zhing du 'gro'o snyam nas ji srid du gang dang gang du sangs rgyas bcom ldan 'das rnams 'byung ba de dang der skye'o zhes pa'i bar ro//phyir mi 'ong ba ni nam yang skye ba'i skye mched de kho nar skye ba gnyis pa mngon par 'grub par byed de khyad par du 'phags par 'gro ba nyid kyi phyir ro/ /de'i rnam pa lnga rnams kyi dang po bar ma dor yongs su mya ngan las 'da' ba ste de ni tshangs ris pa rnams nas brtsams nas 'og min ji srid pa zhes pa 'dir bar ma do ste/lha'i ris gang yang rung bar mngon par rdzogs par sangs rgyas nas 'dir mngon par byang chub pa la sogs pa ston par byed pa'o/ /gnyis pa ni byang chub kyi shing drung du skyil mo krung bcas pa'i 'phral du gang sems dang po bskyed pa 'dir skyes pa ste/skyes pa de kho nas phung po lhag ma dang bcas pa'i yongs su mya ngan las 'da'o zhes pa skyes nas yongs su mya ngan las 'da' ba ste/ gang gsungs pa/ shA ri'i bu byang chub sems dpa' gang sems dang po bskyed pa tsam kho nas bla na med pa yang dag par rdzogs pa'i byang chub tu mngon par 'tshang rgya ba rnams yod do nas/de rnams yongs su mya ngan las 'da' ba rnams kyi dam pa'i chos bskal pa'am bskal pa'i lhag mar gnas so zhes pa ji srid pa'o/ /de ni mngon par brtson pa'i lam las thob pa'o zhes byas nas so/ / 'dir bskal pa ni bar gyi bskal pa ste de'i phyogs gcig ni bskal pa'i lhag ma'o/ /gang chos mngon pa kun las btus par gsungs pa/ skyes nas yongs su mya ngan las 'da' ba ni gang gzugs kyi khams su skyes pa kho nas sdug bsngal gyi mtha' thob par byed pa'o zhes pa de ni nyan thos kho na'i dbang du byas nas so//gsum pa mngon par 'du byed pa dang bcas pas yongs su mya ngan las 'da' ba ni gang gsungs pa/ shA ri'i bu byang chub sems dpa' gang rnams pha rol tu phyin pa drug la spyod pa rnams yod de/ 'jig rten gyi khams nas 'jig rten gyi khams su 'dong zhing de rnams sems can rnams kyi bya ba la rtag tu brtson no nas ji srid du bskal pa grangs med dpag tu med pa rnams kyis bla na med pa yang dag par rdzogs pa'i byang chub tu mngon par rdzogs par sangs rgya'o zhes pa'i bar ro//de ni mngon par brtson pas thob pa'i lam can zhes byas nas so/ /de rnams ni rtag tu sems can gyi don bya ba la gnas pa ste/'phags pa spyan ras gzigs dbang phyug dang sgrol ma dang 'jam pa'i dbyangs la sogs pa lta bu'o/ /'dir sems can gyi don la rab tu brtson pa nyid ni mngon par 'du byed pa'o/ /bzhi pa mngon par 'du byed pa med par yongs su mya ngan las 'da' ba ni gang gsungs pa/shA ri'i bu byang chub sems dpa' gang rnams sems dang po bskyed pa kho nas byang chub sems dpa'i skyon med par 'jug pa rnams yod de nas/ ji srid sangs rgyas kyi zhing gzhan dang gzhan rnams su bla na med pa yang dag par rdzogs pa'i byang chub tu mngon par rdzogs par 'tshang rgya'o zhes pa'i bar ro//de yang mngon par brtson pa med par thob pa'i lam can no zhes byas nas so/ /'dir ni rigs kyi khyad par las shin tu myur bar rtsol ba chung ngus mngon par rdzogs par byang chub pa ni mngon par 'du byed pa med par yongs su mya ngan las 'da' ba'o//lnga pa gong du 'pho ba ni gong du 'gro ba'i gong du skyes pa de kho nar yongs su mya ngan las 'da' ba ma yin pa'o/ /de yang rnam pa gnyis te/ de la gcig ni 'og min gyi mthar thug pa ste/ gang gsungs pa/ shA ri'i bu byang chub sems dpa' gang pha rol tu phyin pa drug rnams la spyod cing 'khor los sgyur bar gyur nas/sems can rnams la bde ba'i yo byad thams cad nye bar sgrub pa rnams yod do nas ji srid du dge ba bcu rnams la sems can rnams so sor bkod nas tshangs ris pa rnams nas 'og min ji srid pa'i lha rnams su skye ste/ sangs rgyas kyi zhing sna tshogs su bla na med pa yang dag par rdzogs pa'i byang chub tu mngon par rdzogs par 'tshang rgya'o zhes pa'i bar ro//de 'di'i 'og min gyi mthar thug pa rnam pa gsum ste/ 'phar ba dang phyed du 'phar ba dang gnas thams cad du 'chi 'pho ba'o/ /de la 'phar ba ni gang bsam gtan gsum las yongs su nyams pas bsam gtan dang po bsgrubs nas tshangs ris pa rnams su skye ste sngon gyi goms pa'i dbang las bsam gtan bzhi pa bskyed nas de nas shi 'phos te 'og min gyi lha rnams su skye ba'o//de ni bsam gtan las nges par rgyal ba'i phyir 'phags pa zhes brjod do/ / phyed du 'phar ba ni gang tshangs ris pa rnams nas shi 'phos te gnas gtsang ma rnams su skyes nas bar gyi gnas gzhan cig kyang brgal te 'og min du 'jug pa'o/ /gnas thams cad du 'chi 'pho ba ni gang gnas gzhan thams cad du yang dag par brgyus nas 'og min du 'jug pa'o/ /gang gsungs pa/shA ri'i bu byang chub sems dpa' gang dga' ldan gyi gnas sbyangs nas tshangs ris pa rnams nas 'og min gyi bar rnams su skye ste thabs la mkhas pas dmyal ba pa dud 'gro'i skye gnas pa dang gshin rje'i 'jig rten pa'i sems can rnams la chos ston par byed cing phyogs bcu rnams su sangs rgyas kyi zhing nas sangs rgyas kyi zhing du 'gro zhing sangs rgyas bcom ldan 'das rnams bsnyen bkur byed/sems can rnams kyang yongs su smin par byed/ bla na med pa'i sangs rgyas kyi zhing rnams kyang yongs su sgrub par byed pa rnams yod do zhes pa la sogs pa'o/ / gong du 'pho ba gnyis pa srid pa'i rtse mo'i mthar thug pa'o/ /gang snyoms par 'jug pa gzhan rnams bsgrubs shing gnas gzhan thams cad du skyes nas gnas gtsang mar ma zhugs pa kho nar gzugs med par rim gyis skyes shing srid pa'i rtse mor son nas sangs rgyas kyi zhing sna tshogs rnams su mngon par rdzogs par 'tshang rgya'o//gang yang gzugs kyi 'dod chags dang bral ba'i phyir mi 'ong ba de ni 'di nas shi 'phos te/ gzugs med pa rnams su skyes nas sangs rgyas kyi zhing sna tshogs rnams su mngon par rdzogs par 'tshang rgya'o/ /mthong ba'i chos la yongs su mya ngan las 'da' ba gang gsungs pa/shA ri'i bu byang chub sems dpa' rnams yod de gang skyes bu chen po'i mtshan sum cu rtsa gnyis kyis brgyan pa'i lus can rnams te nas/ ji srid du tshe dpag du med pa dang ldan zhing 'khor los sgyur ba'i rgyal srid brgya stong phrag du ma rnams yongs su 'dzin te/de la gnas pas kyang sangs rgyas bye ba khrag khrig brgya stong phrag du ma rnams bsnyen bkur nas phyis 'di kho nar bla na med pa yang dag par rdzogs pa'i byang chub tu mngon par rdzogs par 'tshang rgya'o zhes pa'i bar du ste/ skye ba thams cad du rgyun mi 'chad par mthong ba ste sbyin pa dang tshul khrims la sogs pa'i chos la mngon par yang dag par byang chub par byed pa'i phyir ro//gang 'gog pa'i snyoms par 'jug pa thob pa'i phyir mi 'ong ba de ni lus kyis mngon sum du byed pa zhes brjod de/ mya ngan las 'das pa dang 'dra ba'i chos lus kyis mngon sum du byed pa'i phyir ro/ / ji ltar lus kyis mngon sum du byed ce na sems med pa las lus la brten pas de skye ba'i phyir ro zhes phyir mi ldog pa 'khor lo'i mdor gsungs pa/ lus ni rten te de gnas gyur pas lus kyis mngon sum du byed pa ni lus kyis mngon sum du byed pa'o/ /dper na 'phags pa byams pa lta bu ste/snyoms par 'jug pa thob pa'i phyir chos kyi sku mngon sum du byed pa'i phyir ro/ /gang gi phyir sangs rgyas rnams kyi rnam par dag pa mthar thug pas sangs rgyas rnams kyi chos kyi sku mngon sum du bya bas so/ /seng ge bzang pos kyang dgra bcom pa nyid kyi 'bras bu la zhugs pa phyir mi 'ong ba 'gog pa thob par lus kyis mngon sum du byed pa de bzhin du/sangs rgyas nyid la zhugs pa nyid kyis 'phags pa byams pa lus kyis mngon sum du byed par gsal bar bshad do/ /gang bcom ldan 'das mar gsungs pa/ shA ri'i bu byang chub sems dpa' gang shes rab kyi pha rol tu phyin pa la spyod pa bsam gtan dang tshad med pa dang gzugs med pa'i snyoms par 'jug pa rnams kyis rnam par rtsen pa rnams yod de/de rnams bsam gtan dang po la snyoms par 'jug go/ /de las langs nas 'gog pa la'o/ /de las langs nas bsam gtan gnyis pa la nas ji srid du thabs la mkhas pas thod rgal gyi ting nge 'dzin la snyoms par zhugs nas/sangs rgyas kyi zhing sna tshogs rnams su bla na med pa yang dag par rdzogs pa'i byang chub tu mngon par rdzogs par 'tshang rgya'o zhes pa'i bar du'o/ /de nyid kyi phyir gang slob dpon zla ba grags pas phyir mi ldog pa'i 'khor lo'i mdo'i rjes su 'brangs nas/sangs rgyas kyi zhing sa la skyes pa med pa 'gag pa med pa shes pa dang shes bya la sogs pa'i spros pa dang bral ba chos kyi sku ni rnam pa thams cad du sems dang sems las byung ba rnams 'gog pa las de'i yul can rnams 'jug pa med pa'i phyir lus kho nas mngon sum du byed par kun rdzob tu rnam par gzhag la/lus gang gis chos kyi de kho na nyid 'di mngon sum du byed pa de yang zhi ba'i rang bzhin du 'dod de sems dang sems las byung ba dang bral ba'i phyir ro zhes dbu ma la 'jug par gsungs pa de ni/bag chags dang bcas pa'i sgrib pa gnyis kyi rten rdo rje lta bu zhes bya ba bar chad med pa'i lam sems bskyed pa'i skad cig gis yongs mthar gnas gyur pa tsam 'gog pa ste mun pa med pa nyid kyis 'od gsal ba'i chos kyi sku'i dbang du byas nas so/ /de'i tshe ni lus kyang sems dang sems las byung ba bzhin du gnas gyur pa 'gag pa'o zhes pa zhi ba'o//de'i mthar ni 'gog pa'i snyoms par 'jug pa las bzhin du 'gog pa las langs pa sems bskyed pa nyi shu rtsa gcig pa'i rang gi ngo bo snying rje chen po dang shes rab kyi pha rol tu phyin pa zung du 'jug pa longs spyod rdzogs pa'i sku'i bdag nyid du 'di mngon par dgongs pa kho na'o//bag chags mtha' dag dang bral ba 'khor ba'i bar du 'jug pa'i ye shes ni mthar phyin pa ste/ sangs rgyas kyi yon tan rnams thams cad kyis bsags pa nyid kyi phyir sems so zhes pa la sogs pa nges pa'i don du mtha' drug gis 'grel bshad du mngon par brjod pa'i 'o//gang sngon po'i rnam pa 'dzin par skye bzhin pa'i shes pa ni sngon po shes so zhes tha snyad byed pa bzhin du de kho na nyid kyi rnam par shes pa skye bzhin pa ni kho na nyid shes so/ /nye bar btags pa las de kho na nyid rtogs so zhes rnam par gzhag pa ste/ chos nyid sangs rgyas blta bar bya//'dren pa rnams ni chos kyi sku/ /chos nyid rnam par shes bya min/ /de ni rnam par shes mi nus/ /zhes gsungs pa'i phyir/ dngos su na cung zhig kyang gang gis kyang shes par bya ba ma yin te shes pa dang shes bya dag ma skyes pa nyid kyi phyir ro zhes gsungs so/ / 'gog pa de ni zung du 'jug pa nyid kyang ngo zhes mngon par dgongs nas de bzhin gshegs pa'i thugs dang chos kyi sku tha mi dad pa kho na ste ji skad du gsungs pa/ rten cing 'brel bar 'byung ba gang / /stong pa'o de nyid khyod dgongs pa/ /zhes so/ /'di ni gang 'phags pa zhi ba'i lhas gsungs pa/ dmigs par med pa rab tu zhi/ /zhes pa dang / rang rig pa ni de yod min/ /zhes pa de yang don dam par 'gog pa la dang zung 'jug la ste/ gang gi phyir kun rdzob pa'i rang rig pa sems bskyed pa'i rang bzhin mdo dang rgyud la sogs pa rnams su de bzhin gshegs pa rnams kyis mang du gsal bar mdzad pa sba bar dka' bas so zhes pa thams cad la 'gal ba med do//de la sa bcu pa'i gnas skabs kyi khyad par bco lnga pa la sogs pa sems bskyed pa drug rnams khyad par gyi lam mo/ /'dir 'phags pas gsungs pa/ rnam pa thams cad mkhyen pa nyid kyi lam ni phul du dbyung du med pa nyid kyi phyir gcig pu kho nas te/stobs dang mi 'jigs pa dang so so yang dag par rig pa dang sangs rgyas kyi chos ma 'dres pa la sogs pa'i rnam pa'i dbye bas ni 'di'i khyad par ni lam gyi mtshan nyid can thun mong ma yin pa'i rnam pa'i dbye ba 'ba' zhig go zhes so/ /gang bco lnga pa la sogs pa sems bskyed pa brgyad rnams sangs rgyas kyi sa kho na la'o zhes pa dang /gang yang nges pa med pa rnams so zhes 'dod pa de ni shin tu mi 'thad pas btang snyoms su bya'o/ /de la dang po lnga rnams la so sor sbyor ba dang dngos gzhi dang mjug nyid kyis dang / dngos gzhi la yang chung ngu dang 'bring dang chen po dang chen po'i dbye bas dang /slar yang chung ngu la sogs pa rnams so sor chung ngu'i chung ngu la sogs pa rnam pa gsum gyi dbye bas rnam pa bcu bzhi rnams ni gzugs dang gzugs med pa'i khams dag gi gnas bdun rnams su so sor dgu dang brgyad par ni bdun no zhes pa rnam pa bdun cur 'gyur ro//de la sems bskyed pa dang po gnyis dang gsum pa'i rnam pa gnyis ni rtse mo'i mngon par rtogs pa ste cig car skye ba dgag pa'i ched du bstan par bya bas thar pa'i cha dang mthun pa'i bdag nyid gsum dang / rtags dang rnam par 'phel ba dang / rnam par mi rtog pa rtogs pa'i gnas skabs thams cad mkhyen pa nyid gsum gyi chos yongs su rdzogs pa bla na med pa bstan pa dang /ting nge 'dzin gyi rang bzhin nges par 'byed pa'i cha dang mthun pa rnam pa bzhi rnams kyi so sor chung ngu dang 'bring dang chen po'i bye brag gis bcu gnyis dang / sbyor ba'i gnas skabs dang bcas pas lam la rjes su shes pa'i bzod pas bsdus pa mthong ba'i lam skad cig gcig dang /sbyor ba'i gnas skabs dang bcas pa'i bsgom pa'i lam rnam pa dgu zhes pa rnam pa sum cu'o/ /'dir ni lam gnyis kyi sbyor ba'i gnas skabs rnam pa gnyis kyi bdag nyid ni/skad cig gcig kyang rnam pa gnyis kyi ngo bo'o/ /bsgom pa'i lam gyi rnam pa gnyis dgu rnams ni gzung ba'i rnam par rtog pa'i gnyen po dang 'dzin pa'i rnam par rtog pa'i gnyen por ro zhes gsungs pas na gnyen po rnam pa brgyad rnams so/ /bstan bcos kyang / mthong dang goms pa'i lam dag la//gzung dang 'dzin pa'i rnam rtog brgyad/ /nye bar zhi bar bya ba'i phyir/ /gnyen po rnam pa brgyad ces bya/ /zhes so/ /gal te yang 'di'i thar pa'i cha dang mthun pa dngos su gsungs pa med mod/ de lta na yang mngon par rtogs pa snga ma rnams dang phyi mar yang bstan pa'i rjes su 'brangs pa las shugs kyis rtogs par bya ste/de med par nges par 'byed pa'i cha dang mthun pa la sogs pa med pa'i phyir ro/ /'dir bsgom pa'i lam gyi dgra zla'i rnam pa rnam par rtog pa rnam pa gnyis spong ngo / /rnam pa tha ma dang de'i phyi ma'i rnam pa rdo rje lta bu'i bar chad med pa'i lam gyi bar ni sangs rgyas nyid rtogs pa'i bar chad med pa'i ting nge 'dzin du rnam par gzhag go//'ga' zhig tu mngon par rtogs pa 'di yang mthar phyin pa'i lam du brjod par bya'o/ /'ga' zhig tu ni mthar phyin pa'i lam ni rdo rje lta bu'i ting nge 'dzin gyi de ma thag tu zad pa dang mi skye ba shes pa'o zhes so//seng ge bzang pos sdug bsngal la chos shes pa'i bzod pas bsdus pa'o zhes smra ba ni 'khrul pa che ste/ sbyin pa la sogs re rer ni/ /de rnams phan tshun bsdus pa gang / /skad cig gcig pa'i bzod pa yis/ /bsdus pa 'di 'dir mthong ba'i lam/ /zhes pa mngon par rtogs pa'i rgyan ni/re res drug po rnams kyang bsdus pa'i phyir pha rol tu phyin pa drug pa drug pa rnams kho na mthong ba'i lam mo zhes pa'i don rtogs par byed pa dang / de bzhin du bar mar yang ste pha rol tu phyin pa drug rnams lam gyi bden pas bsdus kyi sdug bsngal gyi bden pas ma yin no//ji skad du mdor bsdus par gsungs pa/ pha rol tu phyin pa drug ni lam mo zhes so/ /'dir chos shes pa'i bzod pa'i skabs kyang ma yin te/ 'dod pa'i khams kyi nyon mongs pa'i rnam pa rnams sngar spangs pa nyid kyi phyir khams gong ma'i nyon mongs pa'i gnyen po'i ngo bo nyid rjes su rtogs pa'i shes pa'i bzod pa'i ngo bo nyid du 'thad do zhes pa ste/bdag cag pha rol gyi skyon rab tu gsal bar byas pas ci zhig /rnam par mi rtog pa'i gnas skabs 'di kho nar snying rje chen po la sogs pa mngon du gyur par byed pa las/ yang dag pa'i thabs la mkhas pa'i stobs kyis/byang chub sems dpa' sems can gyi don du mthong ba'i lam la seng ge rnam par bsgyings pa'i ting nge 'dzin la 'di ltar snyoms par 'jug go/ /'di lta ste/ bsam gtan dang po la snyoms par 'jug go/ /yang gnyis pa dang gsum pa dang bzhi pa dang / gzugs med pa dang po dang gnyis pa dang gsum pa dang bzhi pa dang 'gog pa'i snyoms par 'jug pa la yang ste/ 'gog pa'i snyoms par 'jug pa las langs nas gzugs med pa bzhi pa dang gsum pa dang gnyis pa dang dang po dang bsam gtan bzhi pa dang gsum pa dang gnyis pa dang dang po la yang snyoms par 'jug go zhes pa'o//de'i rjes su ma rig pa'i rkyen can 'du byed nas ji srid du skye ba'i rkyen can rga shi dang mya ngan dang smre sngags 'don pa dang sdug bsngal dang yid mi bde ba dang 'khrugs pa'i bar rnams 'byung ngo zhes lugs 'byung dang / ma rig pa 'gags pa las 'du byed 'gag ste/ ji srid du skye ba 'gags pa las rga shi la sogs pa rnams 'gag go zhes lugs las bzlog par rten cing 'brel par 'byung ba la lta'o//de'i rjes su bsgom pa'i lam gyi rang bzhin thod rgal du snyoms par 'jug pa la snyoms par 'jug go/ /'di lta ste/ bsam gtan dang po la snyoms par 'jug go//gnyis pa dang gsum pa dang bzhi pa dang 'gog pa'i snyoms par 'jug pa la yang ste/ 'di ni song ba gcig go/ de las langs nas bsam gtan dang po la'o/ /de las 'gog pa la'o/ /de las bsam gtan gnyis pa la'o/ /de las 'gog pa la'o/ /de las bsam gtan gsum pa la'o//de nas 'gog pa la'o/ /de las bsam gtan bzhi pa la'o/ /de nas 'gog pa la'o/ /de nas nam mkha' mtha' yas skye mched la'o/ /de nas 'gog pa la'o/ /de nas rnam shes mtha' yas skye mched la'o/ /de nas 'gog pa la'o/ /de nas ci yang med pa'i skye mched la'o/ /de nas 'gog pa la'o//de nas 'du shes med 'du shes med min gyi skye mched la'o/ /de las mnyam par ma bzhag pa la'o/ /de nas ci yang med pa'i skye mched la'o/ /de nas mnyam par ma bzhag pa la'o/ /de nas rnam shes mtha' yas skye mched la'o/ /de nas mnyam par ma bzhag pa la'o/ / de nas nam mkha' mtha' yas skye mched la'o/ /de nas mnyam par ma bzhag pa la'o/ /de nas bsam gtan bzhi pa la'o/ /de nas mnyam par ma bzhag pa la'o/ /de nas gsum pa la'o/ /de nas mnyam par ma bzhag pa la'o/ /de nas gnyis pa la'o/ /de nas mnyam par ma bzhag pa la'o//de nas dang po la'o/ /de nas mnyam par ma bzhag pa la'o/ /'ong ba 'di ni thabs la mkhas pa'i stobs kyis mnyam par ma bzhag pa las mnyam par bzhag pa dang / mnyam par gzhag pa las mnyam par ma bzhag pa la 'pho bar gyur pa ni rigs mi mthun par 'gro ba'o/ /de la song ba dang po la gnas dgu rnams so//gnyis pa la bcu bdun rnams so/ /'ong ba la ni bco brgyad rnams so/ /'di las rnam pa gzhan du rnam par gzhag pa ni seng ge bzang po la sogs pa'i ste/ 'phags pa'i dgongs pa dang mi 'grig go/ /thod rgal du snyoms par 'jug pa'i ting nge 'dzin yin na/de mnyam par ma bzhag pa'i sems la ci ltar mi 'gal zhe na/ snyoms par 'jug pa las 'pho ba snyoms par 'jug pa btags pa'o zhes pas 'gal ba med pa'o/ /ting nge 'dzin 'di'i las ni 'chad par 'gyur ro/ /ting nge 'dzin 'di ni rtse mo'i mngon par rtogs pa la bsgom pa'i lam mo//nyan thos kyi theg pa pa rnams kyi ni thabs la mi mkhas pa'i 'di lta bu ma yin no zhes pa ste des ci zhig /'di lta bur gyur pa'i thabs la mkhas pa dang ldan pa'i byang chub sems dpa' rnams kyi bskal pa grangs med pa bye ba khrag khrig brgya stong phrag gis 'jug pa dang sangs rgyas dpag tu med pa la bsnyen bkur ba'i rgyu chen po nyid kyis bsgom pa'i lam rgyun chags pa ni khyad par du 'phags pa'i phyir ro//mthong ba dang bsgom pa'i lam gnyis po 'di las phyi ma nas bzung nas sems bskyed pa nyi shu pa'i bar ni nges par 'byung ba'i sgrub pa ste/ 'dis ma rgyal ba rgyal ba thob cing nges par 'byung ba las 'bras bu mthar thug pa gnon to zhes pa ste rgyas par sngar brjod zin to//gsum pa'i rnam pa bcu gnyis rnams dang sems bskyed pa bzhi pa dang lnga pa ni mthar gyis pa'i mngon par rtogs pa ste/ thar pa'i cha dang mthun pa gsum dang / sngar bzhin du nges par 'byed pa'i cha dang mthun pa'i rnam pa bcu gnyis rnams dang /mthong ba'i lam skad cig bcu drug dang / bsgom pa'i lam rnam pa dgu zhes pa rnam pa bzhi bcu'o/ /gang pha rol tu phyin pa drug dang / sangs rgyas dang / dge ba dang mi dge ba dang lung du ma bstan pa'i chos dang / byang chub sems dpa'i phyir mi ldog pa'i dge 'dun dang tshul khrims dang gtong ba dang / lha rjes su dran pa rnams dang chos thams cad dngos po med pa'i ngo bo nyid rtogs pa ste/ rnam pa bcu gsum gsungs pa de rnams ni mthar gyis pa'i rtogs pa'i rnam pa ma yin te/ rtogs pa'i rnam pa re re la yang / bcu gsum po 'di rnams srid pas so/ /ji skad du gsungs pa/ gal te 'di ltar rtogs pa'i chos dngos po med pa'i ngo bo nyid lags na/ bcom ldan 'das byang chub sems dpa' shes rab kyi pha rol tu phyin pa la spyod pa na mthar gyis bgyi ba dang mthar gyis bslab pa dang mthar gyis sgrub par ci ltar gdags par bgyi zhes so//'dir 'phags pas bgyi ba gzung bas sems bskyed par shes par byas so/ /bslab pa gzung bas nges par 'byed pa'i cha dang mthun pa'o/ /sgrub pa gzung bas mthong ba dang bsgom pa'i lam dag go/ /gsum ka gzung bas ni mngon par rtogs pa'i mthar gyis pa'o zhes gsungs so//de bzhin du rtogs pa mthar gyis pa rtogs par byas pas/ cig car skye ba dgag pa'i ched du gdags par bya bzhin pa'o/ /dran pa nye bar gzhag pa dang yang dag par spong ba dang / rdzu 'phrul gyi rkang pa dang dbang po dang stobs kyi bdag nyid thar pa'i cha dang mthun pa sngon du song ba'i nges par 'byed pa'i cha dang mthun pa dang /byang chub kyi yan lag bdun gyi bdag nyid mthong ba'i lam dang / 'phags pa'i lam yan lag brgyad pa'i rang bzhin bsgom pa'i lam ste rnam pa gsum po'i byang chub kyi phyogs la sogs pa rnam pa thams cad mkhyen pa nyid kyi ye shes kyi mthar thug pa chos kyi sku'i rang bzhin gyi sangs rgyas don dam par dran pa med pa kho nar rjes su dran pa ni sangs rgyas rjes su dran pa'o zhes shes par bya ba'i ched du gsungs so//sems bskyed pa dang nges par 'byed pa'i cha dang mthun pa rnams dang / dran pa nye bar gzhag pa la sogs pa byang chub kyi phyogs yongs su rdzogs pas mthong ba'i lam dang /rnam pa thams cad mkhyen pa nyid kyi ye shes kyi bar yongs su rdzogs pas bsgom pa'i lam mo zhes pa 'di ltar dngos po med pa'i ngo bo nyid yin na yang / mthar gyis bya ba la sogs pa shes par byed pa ni sangs rgyas rjes su dran pa bsgom par rig par bya'o zhes pa'o//sems bskyed pa drug pa ni rnam pa bdun cu rtsa gcig pa sangs rgyas kyi sa la bar chad med pa'i lam skad cig ma gcig gis mngon par rdzogs pa'i byang chub pa mngon par rtogs pa bdun pa'o/ /bar du gcod cing gegs byed par nus pa ni bar chad yin la/bar chad med pa ni bar chad med pa ste/ rang gi don la an te bar chad med pa nyid do/ /thams cad chos kyi dbyings kyi ngo bo nyid kyis na/ zag pa med pa'i chos gcig mngon par byang chub pa na dus gcig la chos thams cad mngon par byang chub pa las dang /gnyen po bsgom pa'i rnam par smin pa nyid du rtogs pa'i phyir dang / rmi lam bzhin du rang bzhin med pa nyid du rtogs pa'i phyir dang / gnyis kyis bag chags rtsa ba med pa nyid kyis na gnyis su med pa'i de kho na nyid kyis ngo bor rtogs pa'i phyir ldog pa bzhi'i bdag nyid do//'dir byang chub sems dpa'i zhing gi bkod pa dpag tu med pa rnams rnam pa thams cad rdzogs nas/ chos thams cad kyi de kho na nyid skad cig gcig kho na la mngon par byang chub pa ni dper na skyes bu rdog thabs gcig gis bskul ba'i zo chun gyi rgyud thams cad lan cig 'gul ba de bzhin du sbyin pa la sogs pa'i sems gcig rab tu ldan par mngon du byed pa na zag pa med pa'i ye shes thams cad 'gugs shing rtogs par byed de sngon gyi bsgom pa'i 'phen pa'i shugs las so//gang gsungs pa/ rab 'byor 'di lta ste/ gzhan 'phrul dbang byed pa'i lha rnams kyi yo byad thams cad yid kyis bsams pa kho nas 'byung ngo //de bzhin du byang chub sems dpa'i yid kyis bsams pa kho nas pha rol tu phyin pa rnams yongs su rdzogs par 'gyur ro zhes pa la sogs pa'o/ /sa bcu par yang gsungs pa/ de'i sems kyi skad cig re re la pha rol tu phyin pa bcu rnams kyis yongs su rdzogs par 'gyur ro zhes rgyas par ro//shes rab kyi pha rol tu phyin pa 'di yang rnam par smin pa'i chos nyid kyi gnas skabs can te rnam par smin pa'i chos nyid rang bzhin te/ lhun gyis grub par 'jug pa 'di'i gnas skabs yin zhes byas nas so/ / 'dir ni zag pa med pa dang zag pa dang bcas pa'i chos thams cad cig car de ltar kho nar mngon par byang chub pa'o/ /gnas skabs de yang sa brgyad pa nas bzung ste 'gyur mod/ 'dir rab kyi mthar thug pa thob pa'o/ /bcom ldan 'das mar ji skad du gsungs pa/ mtshan ma med pa'i tshul gyis shes rab kyi pha rol tu phyin pa yongs su rdzogs par byed do zhes so//mtshan nyid med pa ni rmi lam lta bu ste/ de gsungs pa/ rab 'byor 'di byang chub sems dpa' rmi lam lta bu'i nye bar len pa'i phung po lnga rnams la gnas nas sbyin pa gtong ngo zhes bya ba nas brtsams te ji srid du chos thams cad mtshan nyid med par shes so zhes pa'i bar du'o//'dir rmi lam lta bu rnams la ste rmi lam gyi rang bzhin rnams la mtshan nyid med pa ste rang bzhin med par ro/ /de ltar ni gang chos mthun pa ni dpe'i don yin la/ de ni sbyin pa la sogs pa'i dus su bar dang bcas pa dang bar med par stong pa nyid yid la byed pa lhag par spyod pa las tshogs nye bar mkho ba nyid nyams su myong nas rtogs pa'i gnas skabs su chos nyid dang /ro gcig pa nyid pas/ dbyer med pa'i phyir rang bzhin gyi don yang dag par 'grub ste/ ji skad du gsungs pa/ sring mo phung po rnams ni rmi lam lta bu ste/shin tu mngon par ma grub pa'o/ /byang chub kyang rmi lam gyi rang bzhin te shin tu mngon par ma grub bo/ /de ltar mi dang glang po che dang rta la sogs pa'i rmi lam dang de mthong ba'i bdag nyid la gzung ba dang 'dzin pa la sogs pa gnyis kyi tshul du mi mthong ba ltar chos thams cad gnyis su med pa'i de kho na nyid skad cig gcig kho nas mthong ngo //kha cig ni rim gyis skye bar nges par skad cig bzhi'i ngo bo ni skad cig gcig gis mngon par rtogs pa'o zhes zer ro/ /gzhan rnams ni de bsam par bya'o zhes so/ /de ltar sems bskyed pa 'di ni yang dag pa'i don sgom pa rab kyi mthar thug pa'i gnas skabs te gnas ngan len thams cad 'jig pa'i phyir rdo rje lta bu yang ngo //gang rtogs pa'i rnam pa bdun ni thos pa dang bsams pa las byung ba'i shes pas so sor phigs par dka' ba'i phyir brjod du med pa'i rang bzhin so so rang gis rig par bya ba rdo rje lta bur gsungs pa dang /'di nang du 'dus te/ 'dir rnam pa bdun po ni ma yin no/ /de ltar ni theg pa chen po rgyud bla mar/ sangs rgyas chos tshogs khams dang byang chub dang / /yon tan sangs rgyas phrin las tha ma ste/ /bstan bcos kun gyi lus ni mdor bsdu na/ /rdo rje'i gnas ni bdun po 'di rnams so//zhes gsungs so/ /de la dkon mchog gsum ni 'bras bu'o/ /khams ni nye bar len pa'i rgyu'o/ /byang chub dang yon tan phrin las rnams lhan cig byed pa'i rkyen no/ /dkon mchog gsum yang phan tshun rgyu dang 'bras bu'i dngos po ste/ de nyid du gang gsungs pa/ sangs rgyas dkon mchog las chos dkon mchog 'byung zhes pa dang /theg pa chen po'i chos dkon mchog 'di las phyir mi ldog pa'i byang chub sems dpa'i tshogs 'byung ngo zhes so/ /gsum po de yang bzhi po rnams kyi 'bras bur de nyid du gsungs pa/ dri bcas de bzhin nyid dang dri ma med/ /dri bral sangs rgyas yon tan rgyal ba'i mdzad//gang las dkon mchog dge ba gsum 'byung ba/ /don dam gzigs pa rnams kyi yul nyid do/ /slar yang gsungs pa/ de la gnas bzhi po 'di rnams kyi dang po ni 'jig rten las 'das pa'i chos kyi sa bon nyid kyi phyir/ so so rang nyid tshul bzhin yid la byed pa la brten pas de rnam par dag pa bzung nas dkon mchog gsum 'byung ba'i rgyur rtogs par bya'o zhes pas gcig rgyu'o//ci ltar gsum rnams rkyen yin zhe na/ de bzhin gshegs pa bla na med pa yang dag par rdzogs pa'i byang chub tu mngon par rdzogs par sangs rgyas nas/ stobs bcu mi 'jigs pa bzhi dang /sangs rgyas kyi chos ma 'dres pa rnams kyis de bzhin gshegs pa'i phrin las rnam pa sum cu rtsa gnyis mdzad pa na/ gzhan gyi sgra la brten pas de rnam par dag pa bzung nas/ dkon mchog gsum 'byung ba'i rkyen du rtogs par bya'o zhes pa de ltar gsum rnams rkyen no/ /kha cig ni/sangs rgyas las chos chos las 'phags pa'i tshogs/ /tshogs las snying po ye shes khams thob mtha'/ /ye shes de thob byang chub mchog stobs sogs/ /sems can kun don byed chos rnams ldan pa/ /zhes pa 'dis dkon mchog gsum lhan cig byed pa'i rgyu'o//khams de bzhin kho na'o/ /byang chub dang yon tan dang phrin las rnams 'bras bu'o zhes kyang rnam par gzhag go zhes zer ro/ /tshigs su bcad pa 'dis kyang sngar brjod pa'i don kho nar sbyar bar bya ste/ don rnam pa gnyis su 'byung na yang sngar brjod pa'i don kho na theg pa chen po rgyud bla mar brjod par bzhed pa nyid kyi phyir ro zhes gzhan rnams so//de ltar dri ma med pa byang chub la bar chad med pa'i sems bskyed pa 'di ni chos dang dge 'dun dkon mchog dag gi nang du 'dus so/ /de ltar sems bskyed pa drug gis rang bzhin khyad par gyi lam rnam pa bdun cu rtsa gcig rtogs pa na byang chub sems dpa' dgra bcom pa'i 'bras bu la zhugs par rnam par gzhag la/smon lam las rang sangs rgyas kyi ngo bo can yang byang chub sems dpa' 'di lta ste/ gang gsungs pa/ shA ri'i bu byang chub sems dpa' gang sangs rgyas mi bzhugs shing nyan thos med pa'i 'jig rten gyi khams rnams su so so gcig pu byang chub tu mngon par rdzogs par 'tshang rgya ba rnams yod de/de rnams thabs la mkhas pas srog chags bye ba khrag khrig brgya stong phrag mang po rnams theg pa gsum rnams la yongs su smin par byas nas/ bla na med pa yang dag par rdzogs pa'i byang chub tu mngon par rdzogs par 'tshang rgya'o zhes so/ /'di ni bdag nyid gcig pu rang nyid so sor sangs rgyas pas rang 'byung dang sgra med par chos ston pa ste rang sangs rgyas rnam pa gnyis so/ /de dang chos mthun pa las gcig ni bdag dang gzhan rnams la yang thos pa med par sangs rgyas kyi chos snang bar byed pa'i phyir dang /gzhan ni rang sangs rgyas kyi cha lugs su yang byed pa'i phyir ro/ /ci ltar na chos ston pa dang tha snyad byed pa med pa nyid yin zhe na/ chos ston pa'i 'bras bu thob pa'i rgyu nyid yin pa'i phyir ro/ /de ltar ni tshig smra ba ni/ rnam par ma brtags nas ma yin/ rnam par ma dpyad nas ma yin no zhes pas brjod pa ni rnam par g.yeng ba'i ched du ba yin la de yang rgyud 'khrug par byed do zhes pas byang chub sems dpas 'di ltar smon lam btab ste/ sangs rgyas su gyur nas yid bzhin gyi nor bu bzhin du brjod pa med par yang sems can gyi don bya ba nus par gyur cig ces so//des na sangs rgyas nyid dang 'dra ba nyid kyi phyir/ rang sangs rgyas kyi gnas skabs na yang smon lam la sogs pa'i mthu nyid kyis gang zhig don gang la la rnam pa gang gis nyan 'dod pa de'i rnam par shes pa la/ rnam pa de kho nas sgra med par bya ba'i chos gdul ba'i rgyud la bskrun pa ni ston pa zhes brjod do//ji skad du mdor gsungs pa/ yid kyis brgya byin la tshigs su bcad pas lan btab po zhes pa la sogs pa'o/ /de ltar rgyun du zhugs pa'i 'bras bu la zhugs pa dang / rgyun du zhugs pa dang / lan cig phyir 'ong ba'i 'bras bu la zhugs pa dang /lan cig phyir 'ong ba dang / phyir mi 'ong ba'i 'bras bu la zhugs pa dang / phyir mi 'ong ba dang / dgra bcom pa nyid kyi 'bras bu la zhugs pa zhes pa gang zag bdun rnams rab tu dbye ba las bcu dgu ste/ rang sangs rgyas dang bcas pa nyi shu ni/ slob pa tshogs pa nyid kyi phyir 'phags pa phyir mi ldog pa'i byang chub sems dpa'i dge 'dun te/yang dag par rdzogs pa'i byang chub las lha dang bcas shing bdud dang bcas pa'i 'jig rten gyis dang / dman pa'i byang chub sgrub par byed pa'i chos rnams kyis dang mi dge ba rnams kyis kyang dbyer med cing mi 'phrogs pa'o//la lar ni rdo rje lta bu'i sems ni mi slob rnam par grol ba sangs rgyas kyi sa'i bar chad med pa'i lam yin pa nyid kyi phyir mi slob par gsungs so/ /so so'i skye bo rnams ni slob pa yin yang slob pa nyams pa yang yin zhes pas slob par yang brjod pa ma yin no/ / 'o na ci 'das pa'am ma 'ongs pa'am da ltar byung ba'i sems rnam par grol zhe na/ ma 'ongs pa'i sems skye bzhin pa mi slob pa sgrib pa rnams las rnam par grol lo/ /skyes pas sgrib pa spong ba'i lam ni gnas skabs ci yin zhe na/ 'gag bzhin pa nyid kyis na da ltar ba'o/ /'o na brgyad pa las phyir mi ldog par gsungs pa ma yin nam/ci ltar thams cad yin zhe na de ltar ma yin te/ gang gi phyir byang chub sems dpa' dbang po rnon po ni zhi gnas dang lhag mthong bsgom pas so so skye bo'i gnas skabs na mos pa spyod pa'i sa las sngon du yang shes rab kyi pha rol tu phyin pa nges pa las dang /snying rje chen po dang ldan pa las tshogs gnyis rdzogs par byed pa la rtag tu brtson zhing 'dun pa dang phyir mi ldog pa'o/ /dbang po 'bring ni rab tu dga' bar phyir mi ldog ste/ de ni sngar zhi gnas dang lhag mthong bsgom pas/ shes rab kyi pha rol tu phyin pa gnyis su med pa'i rnal 'byor yang dag par skyes kyang ji srid du sa rab tu dga' ba ma thob kyi bar nges pa dang ldan pa ma yin te/de'i phyir 'di nges pa pa'i rgyu mtshan snying rje chen po med pas tshogs gnyis rdzogs par bya ba la shin tu mngon par brtson par 'dun pa ma yin na/ /dbang po rtul po ni sa mi g.yo ba la phyir mi ldog ste/de ni sngon shes rab kyi pha rol tu phyin pa nges pa dang ldan pa med pa des na/ de'i rgyu mtshan snying rje chen po med pas/ tshogs gnyis rdzogs par bya ba la mngon par brtson par 'dod pa shin tu dman pa yin no/ /de nyid kyi phyir mdo rnams su sa brgyad pa la thams cad nges pa nyid kyis phyir mi ldog pa nyid du rnam par gzhag go//ring du song ba la thams cad phyir mi ldog pa nyid do zhes kha cig go/ /'o na gal te so so'i skye bo nyid la yang zhi gnas dang lhag mthong dag gis yang dag pa'i ye shes skye na ci ltar ma nges pa yin/ ci ltar yang bla na med pa'i de kho na nyid mngon du byas na yang nges pa med pa tsam las phyir ldog par dogs she na/de kho na nyid mngon du ma byas pa ni 'ga' zhig kyang yod pa ma yin gyi/ de las bzlog pa'i nges pa tsam las 'khor ba bar ma brjod do/ /de'i phyir zhi gnas dang lhag mthong gis yang dag pa'i ye shes bskyed pa na de dang rjes su mthun pa'i tha snyad do//gal te thams cad thams cad kyi tshe kho nar de kho na nyid mngon du byed na yang dag pa'i ye shes bskyed pa 'di ci zhe na/ 'di ni gang de dang rjes su mthun pa'i tha snyad kyi byed pa po de'o/ /'o na de kho na nges pa'o zhe na/ de lta ma yin te brtan pa med pa'i phyir ro/ /gang gi phyir nges pa ni rdo rje lta bu'i sems so//de'i tshe ci ltar nges par 'byed pa'i cha dang mthun pa la sogs pa skye zhe na/ de srid tsam pa kho na nyid la mos pa las so zhes de kho na nyid rig pa'o/ /gang yang ci ltar phyir ldog par dogs so zhes brjod pa de ni rdo rje lta bu'i sems med pa kho na las so zhes smra'o/ / 'di nyid la dgongs nas 'phags pa shes rab kyi pha rol tu phyin par/ so so'i skye bo'i gnas skabs dang rab tu dga' ba la sogs pa'i sa'i gnas skabs na yang byang chub sems dpa' rnams phyir mi ldog pa'i rtags dang ldan par rgyas par bstan to/ /'phags pa byams pas kyang / nges 'byed yan lag nas bzung nas//mthong dang goms pa'i lam dag la/ /byang chub sems dpa' gang rnams gnas/ /de 'di phyir mi ldog pa'i tshogs/ /zhes gsungs so/ /phyir ldog pa'i ched du 'byung ba ni phyir ldog pa'o/ /de lta bu ma yin pas na phyir mi ldog pa dang phyir ldog par 'os pa ma yin pa zhes pa don gcig go//byang chub sems dpa' de rnams kyang sems dpa' chen po rnams su yang brjod de chen po nyid rnam pa dgu yis so/ /brtson 'grus chen po nyid kyis ni sems can thams cad yongs su bskyab pa'i ched du chen po'i gnas la yang dag par zhugs pa'i phyir te/chen po rnams kyi gnas theg pa chen po'o/ /rgyu chen po nyid kyis ni theg pa chen po'i chos shes rab kyi pha rol tu phyin pa la sogs pa thos pa dang bsam pa dang / bsgom pa la sogs pa'i rim gyis nges par 'byung ba'i phyir ro/ /dmigs pa chen po nyid kyis ni sems can thams cad la bdag dang gzhan mnyam pa nyid thob pas byams pa chen po la sogs pa dang mnyam par ldan pa'i phyir ro//dus chen po nyid kyis ni dus thams cad la skad cig gcig bzhin du 'jug pas na bskal pa dang bskal pa ma yin pa'i rnam par rtog pa thams cad spangs pa'i phyir ro//'dod pa med pa chen po nyid kyis ni yongs su 'dzin pa thams cad spangs pa nyid kyis bdud thams cad nges par 'joms pa'i phyir te/ blo gros rgya mtsho gang gi tshe byang chub sems dpa' yongs su 'dzin pa thams cad la don du mi gnyer bar 'gyur ba de'i tshe so sor don du gnyer ba'i bdud bcom par 'gyur ro zhes pa la sogs pa gsungs pa'i phyir ro//yid la byed pa chen po nyid kyis ni theg pa dman pa yid la byed pa ring du gyur pa spang ba'i phyir ro/ /nye bar ston pa chen po nyid kyis ni theg pa chen po'i chos kyi bcud kyi dga' ba dang bde ba nye bar ston pa'i phyir ro//yongs su dag pa chen po nyid kyis ni las rnam pa gsum yongs su dag pas/ 'jigs pa thams cad las yang dag par 'das pa'i phyir te/ ngan 'gro la sogs pa'i 'jigs pa'i rgyu tshul khrims 'chal pa nyid la sogs pa'i med pa'i phyir ro/ /'jigs pa rnams ni lnga pa ste/'tsho ba med pa'i 'jigs pa dang / grags pa ma yin pa'i 'jigs pa dang / 'chi ba'i 'jigs pa dang / ngan song gi 'jigs pa dang / 'khor gyis bag tsha ba'i 'jigs pa'o/ /rtogs pa chen po nyid kyis ni thams cad mkhyen pa nyid du lung bstan pa'i sa brgyad pa thob pa las bgrod pa gcig tu gyur pa ste/de las gzhan pa'i byang chub sems dpa' rnams kyis bgrod par byas pa'i lam thob pa'i phyir ro/ /de rnams kyis yang / gser las brdungs byas 'dra zhing pad+ma rgyas pa bzhin/ /bkres pas nyan pa g.yos legs kha zas bzang za 'dra/ / phrin yig legs par rig 'dra rin chen sgrom phye ltar/ /chos de 'dir bshad pas kyang dga' ba'i mchog bskyed do/ /de rtogs pa'i don byang chub kyi phyogs la sogs pa'i rang bzhin gyi chos de ni bsgrub par bya ba dang bye brag tu shes par bya ba dang / bsam par bya ba dang / bsam gyis mi khyab pa dang /yongs su grub pa zhes pa rnam pa lnga/ dpe lnga rnams kyis mdo sde rgyan du rgyas par bstan par rig par bya'o/ /de la rigs phun sum tshogs pa'i theg pa chen po thos pa las byung ba la sogs pa'i shes pa skyes pa'i rim gyis phyin ci log thams cad bsal te/ dkon mchog gsum la skyabs su 'gro ba la brten nas/sgrib pa spangs pa'i mngon par shes pa la sogs pa'i khyad par du 'phags pa'i yon tan 'phags pa'i nor la longs spyod pa'i rgyu nyid du rtogs nas bdun pa la sogs pa'i sems sgrub pas/ mos pas spyod pa'i bar la sgrub pa'i sems bskyed pa'i ngo bo'i chos ni gser bzhin du dga' ba mchog skyed par byed pa'o//rab tu dga' ba lhag pa'i bsam pa dag pa'i sa la mthong bas spang bar bya ba'i nyon mongs pas dben pa'i khyad par du skyes pa mngon sum du byas shing bye brag tu shes par byas pa'i de kho na nyid kyi ngo bo'i chos ni pad+ma rgyas pa bzhin no/ /de kho na dri ma med pa la sogs pa 'bad rtsol dang bcas shing mtshan ma med par gnas pa'i sa drug rnams su bsam par bya ba tshogs gnyis kyis mthu dang ldan pa ni g.yos legs kha zas bzang po bzhin no//mi g.yo ba la sogs pa lhun gyis grub cing mtshan ma med par gnas pa'i sa gsum rnams la sngon gyi 'du byed yongs su smin pa bsam gyis mi khyab pa phrin yig legs po rig pa bzhin no//sangs rgyas kyi sa la yang yongs su grub pa byang chub kyi rang bzhin te/ sgrib pa kun gyis dri med pa'i/ /rnam pa thams cad mkhyen nyid thob/ /rin chen sgrom ni phye ba ltar/ /sangs rgyas nyid ni yang dag bstan/ / byang chub sems dpa' rnams kyis rtogs pa'i chos rnams ni rnam pa sna tshogs par nges par bstan te/ 'di lta ste/ shes rab kyi pha rol tu phyin pa'i bdag nyid kyis rnam pa gcig go/ /'jig rten pa dang 'jig rten las 'das pa'i bye brag dang rgyu dang 'bras bu'i bye brag gis rnam pa gnyis so/ / de bzhin nyid kyi gnas skabs gsum gyi phyir rnam pa gsum yang ste/ so so skye bo'i gnas skabs na ma dag pa'i de bzhin gshegs pa'i snying po'i ming can no/ /byang chub sems dpa'i sa rab tu dga' ba la sogs pa bcu rnams su dag cing ma dag pa ste/ nyon mongs pa'i rnam pa chen po'i chen po la sogs pa rnams ji ltar rigs par srid pa'i phyir ro//slar yang byang chub sems dpa'i sa rnams rnam pa gnyis te/ bdun pa'i bar ni 'bad rtsol dang bcas par yid la byed pa nyid kyis na ma dag pa'o/ /mi g.yo ba la sogs pa rnams dag cing ma dag pa'o/ /de bzhin gshegs pa'i sa la dag pa'o//rnam pa bzhi yang theg pa chen po rgyud bla mar rtogs pa'i sgo nas gsungs pa/ rab tu dga' ba la sems dang po bskyed pa'i byang chub sems dpa'o/ /dri ma med pa la sogs pa drug rnams la gos pa med pa'i spyad pa spyod pa'i phyir spyod pa la zhugs pa'o/ /mi g.yo ba la phyir mi ldog pa'o//chos kyi sprin la skye ba gcig gis thogs pa ste sangs rgyas kyi sa la skye ba tha ma gcig gis bar du chod pa nyid kyi phyir ro zhes so/ /'jig rten las 'das pa'i sems bskyed pa rnams kyi sems dang po bskyed pa ste/ thog mar mngon par rtogs pa nyid kyis gtso bo nyid kyi phyir log par gsungs kyi 'dir spyod pa mi srid pa ni ma yin no//de nyid kyi phyir 'phags pa rnam par grol ba'i sde yis/ mos pas spyod pa'i sa la dang por theg pa la yang dag par zhugs pa'o/ /rab tu dga' ba la sogs pa sa bdun rnams la spyod pa la zhugs pa'o//mi g.yo ba la sogs pa'i sa gsum la phyir mi ldog pa'o/ /sa bcu pa la skye ba gcig gis thogs pa ste/ byang chub sems dpa' rnams so zhes gsungs so/ /'dir rnam pa dang po dag ni 'jug pa'i sa dang tshogs kyi sgrub pa dag go/ /mdo sde rgyan du ni byang chub sems dpa' rnams kyi sems bskyed pa ni rnam pa bzhi ste mos pas spyod pa'i sa la spyod par mos pa las byung ba'o//sa bdun rnams la lhag pa'i bsam pa rnam par dag pa pa'o/ /brgyad pa la sogs pa rnams la rnam par smin pa pa'o/ /sangs rgyas kyi sa la sgrib pa med pa'o zhes rtogs par mdzad do//'phags pa lang kar gshegs pa'i mdor ni/ sems tsam snang ba med pa dang / /gnas pa de bzhin sangs rgyas sa/ /'di rnams sangs rgyas rnams kyis gsungs/ /gsungs dang smra ru 'jug pa yang / /gang phyir sems ni sa bdun rnams/ /snang med 'dir ni brgyad pa'o//sa gnyis 'dir ni gnas pa'o/ /lhag ma'i sa ni bdag nyid che/ /zhes gsungs so/ /sangs rgyas rnams kyis zhes pa ni ji skad gsungs pa/ de bzhin gshegs pa gcig gis gsungs pa'i chos gang de sangs rgyas thams cad kyis gsungs pa ma yin pa cung zad kyang med do zhes so//'phags pa stong phrag nyi shu lnga par yang / gzhung 'grel gyi rnam pa lngar bkrol te/ rab tu dga' ba la lhag pa'i bsam pa dag pa'o/ /de nas bdun pa ji srid par 'bad pa dang bcas par mtshan ma med par gnas pa'o/ /brgyad pa la lhun gyis grub par mtshan ma med par gnas pa'o//de nas bcu pa'i bar la spyod pa nges pa la zhugs pa'o/ /de nas gong du skye ba gcig gis thogs pa'i byang chub sems dpa'o zhes so/ /gang gsungs pa/ lhag par mos pa dang / lhag pa'i bsam pa dag pa dang / mtshan ma med pa la spyod pa sa gnyis pa nas bzung nas drug pa'i bar dang 'jig rten las 'das pa'i drug pa la bar dang bcas par mtshan ma med par gnas pa dang /bdun pa la mtshan ma med par mtha' gcig tu gnas pa dang / brgyad pa nas bzung nas mtshan ma med par lhun gyis grub pa ste/ mngon par 'du mi byed cing / mtshan ma med par gnas pa nyid kyi phyir ro zhes pa rnam pa drug nyid do//de la mtshan ma la spyod pa nyid ni zhi gnas la sogs pa'i rgyu mtshan gsum la mkhas pa'i phyir ro/ /de'i phyir mdo sde'i rgyan du/ lhag pa'i bsam pa dag pa pa nyid na yang sa lnga pa ji srid bar 'bad pa dang bcas par gnas pa'o/ /drug pa dang bdun pa dag mtshan ma med pa yang ngo zhes 'bad pa dang bcas shing mtshan ma med par gnas pa nyid du'ang mngon par dgongs pa kho nar bsgrub par bya ba la sogs pa lnga rnam par gzhag pa dang /sems bskyed pa'i gnas skabs su ni rnam pa bzhi nyid du ste dri ma med pa la sogs pa'i sa rnams kyang lhag pa'i bsam pa dag pa nyid du so sor rtogs pa'i don du'o//'o na brgyad pa nas bzung nas skye ba gcig gis thogs pa nyid du sngar gsungs la/ 'ga' zhig tu ni bcu par dang de'i steng du yang ngo zhes pa ci ltar zhe na/ ji ltar spyod pa la 'jug pa ni sngon rol du nges pa med par yin la brgyad pa nas bzung nas nges pa nyid na yang bcu pa la nges pa mthar thug pas nges pa nyid du gsungs pa de ltar skye ba gcig gis thogs pa ni brgyad pa dang dgu pa dag dang bcu pa dang steng du rim pa ji lta bar nges pa med pa dang /nges pa dang nges pa mthar thug pa rnams kyis rnam par gzhag go/ /gzhan yang gdul bya'i ngor mnyam pa med pa'i snying rje'i rang bzhin gyi sku can rnams kyi chos rnam par gzhag pa mngon par dgongs pa rnam pa sna tshogs pa nyid de/de la 'gal ba med pa kho na 'bad pas btsal bar bya'o/ /de la gal te yod na thams cad legs par gnas so zhes pa 'di gzhag ste/ dkyus ma rjes su sbrel bar bya'o//bar chad med pa'i lam gyis de ma thag pa rnam par grol ba'i lam gyi rang bzhin rnam pa bdun cu rtsa gnyis po nyon mongs pa dang shes bya'i sgrib pa ma lus pa spangs pa las shin du ba'i rnam par dag pa'i ngo bo sems bskyed pa nyi shu rtsa gcig pa dang / nyi shu rtsa gnyis dang dngos gzhi dang mjug gnyis dag ni kun du bzang po zhes bya ba ming gzhan du kun du 'od sangs rgyas kyis dngos kyi rnam pa thams cad mkhyen pa nyid/ 'bras bu'i gnas skabs chos kyi sku mngon par rtogs pa brgyad pa'o/ /de rtogs pa las bcom ldan 'das dgra bcom pa'i 'bras bu la gnas pa mi slob pa ste 'khor ba dang mya ngan las 'das pa mnyam pa nyid kyi bdag nyid yin pa nyid kyi phyir ro//'di tsam du bslab par bya ba ni/ gang 'di kun nas nyon mongs pa dang rnam par byang ba'i rnam par rtog pa dag spangs pa'i ched du yin na de gnyis ka mnyam pa nyid du rtogs pa ni mi slob par 'gyur ro//chos kyi sku de yang rnam pa bzhi ste/ sku gsum rnams dang mdzad pa'o/ /sku ni lus te sangs rgyas rnams kyi lus gsum rnams ni sku gsum rnams so/ /bcom ldan 'das ma chen mo dag tu gsungs pa ni/ rnam pa thams cad yongs su dag pa'i zag pa med pa'i chos thams cad kyi rang bzhin gang yin pa de ni de bzhin gshegs pa dgra bcom pa yang dag par rdzogs pa'i sangs rgyas su rig par bya'o//gzhan yang chos thams cad po de rnams kho na rtogs pa las bla na med pa yang dag par rdzogs pa'i byang chub tu mngon par rdzogs par sangs rgyas nas mtshan sum cu rtsa gnyis rnams dang dpe byad brgyad cu rnams kyis brgyan pa'i sku can de bzhin gshegs pa dgra bcom pa yang dag par rdzogs pa'i sangs rgyas kyis byang chub sems dpa' rnams la theg pa chen po'i chos dam pa/bla na med pa'i rol pa dang dga' ba dang mchog tu dga' ba dang bde ba longs spyod pa'i ched du ston par byed do//gzhan yang chos thams cad po de rnams de kho na rtogs pa las bla na med pa yang dag par rdzogs pa'i byang chub mngon par rdzogs par sangs rgyas nas de bzhin gshegs pa dgra bcom pa yang dag par rdzogs pa'i sangs rgyas ni phyogs bcu mtha' yas pa'i 'jig rten gyi khams rnams su/dus thams cad du sprul pa sna tshogs pa'i sprin gyis sems can thams cad kyi don mdzad do zhes so/ /mdo sde de dang de rnams su yang sku gsum rnams kho na rgyas par bstan to/ /mdo sde rgyan du yang gsungs pa/ sku gsum rnams kyis sangs rgyas kyi//sku bsdus par ni shes bya ste/ /sku gsum rnams kyis rang bzhin gyi/ /don 'di rten dang bcas par bstan/ /zhes so/ /'phags pa klu sgrub zhabs kyis kyang / gang zhig gcig min du ma'ang ma yin rang dang gzhan la phan pa phun tshogs chen po'i gzhir gyur pa/ /zhes pa la sogs pa sku gsum kho na bstod do//'phags pa rnam grol sde'i zhabs kyis kyang / chos kyi sku ni rnam pa gsum du rig par bya ste/ ngo bo nyid dang longs spyod rdzogs pa dang / sprul pa'o zhes pa la sogs pa rgya cher gsal bar mdzad do/ /de'i phyir 'jig rten las 'das pa'i byang chub kyi phyogs la sogs pa rnams sgyu ma lta bu'i gnyis su med pa'i ye shes kyi ngo bo ni chos kyi sku ste bzhi pa'o zhes gang du yang rnam par gzhag pa med de/rnam par gzhag pa de ni seng ge bzang po'i rang dbang las te spang bar bya'o/ /'o na slob dpon dbyig gnyen gyis sangs rgyas bcom ldan 'das rnams kyi sku rnam pa gsum ste chos dang longs spyod rdzogs pa dang sprul pa'o//de la chos kyi sku rnam pa gnyis te 'dus byas dang 'dus ma byas so/ /de la gang 'dus ma byas pa de ni de bzhin nyid rnam par dag pa las byung ba ste/ de kho na don dam par bcom ldan 'das rnams kyi rang bzhin du rtogs par bya'o//gang 'dus byas pa'i chos kyi sku de ni sangs rgyas su byed pa'i chos kyi rang bzhin te/ gang yongs su dag pa'i 'og min gyi gnas su mngon par rdzogs par sangs rgyas pa'o zhes chos kyi sku rnam pa gnyis nyid kyis na sku bzhi rnams su rnam par gzhag go zhe na/ ma yin te rnam pa gsum ste zhes gsungs pa'i phyir ro//chos nyid kyi sku'i nang du chos kyi sku 'dus byas pa bsdus pa kho na brjod par 'dod pas tshul kyogs pa yin gyi sku bzhi pa nyid ni ma yin te/ ji ltar 'chad par 'gyur ba ltar ro/ /de'i phyir gsum kho na mdzad pa'i 'khor dang bcas pas chos kyi sku rnam pa bzhir mngon par rtogs pa'i rgyan du gsungs so//de la dang po ni ngo bo'i rang bzhin yin la/ ngo bo kho na ngo bo nyid de bi na ya la sogs pa rnams las tha ka'o zhes pa rang gi don la tha ka'o/ /de ltar ni byang chub kyi phyogs la sogs pa'i chos rnams kyi ngo bo skye ba med pa ma bcos pa 'dus ma byas pa 'jig rten las 'das pa'i lam gyis thob par bya ba spros pa'i sgro 'dogs pa mtha' dag ldog pa rang bzhin med pa nyid ni ngo bo nyid kyi sku ste/ngo bo'i rkyen phyis pas bstan pa'i phyir chos nyid kyi sku yin pas chos kyi sku yang ngo / /'dir rnam par rtog pa thams cad nges par 'da'o zhes mya ngan las 'das pa dang rang gi don phun sum tshogs pa dang /gzugs sku gnyis kyi rten nyid kyis skal ba ji lta bar phan pa sna tshogs pa'i mdzad pa rgya che ba nyid kyi phyir khyab pa'o/ /de'i tshe gang rnams kyi rang bzhin chos kyi sku yin pa glo bur ba'i dri ma dang bral ba las zag pa med pa/gnas gyur pas yongs su gyur pa/ 'jig rten las 'das pas chos kyi dbyings kyi ngo bo rnam pa thams cad yongs su dag pa spros pa dang bral bar rtogs pa'i bdag nyid byang chub kyi phyogs la sogs pa'i sangs rgyas kyi chos de rnams sku cis bsdus she na/ ngo bo nyid kho nas te/ bag chags dang bcas pa'i sgrib pa ma lus pas dben pas rang bzhin med pa nyid kyi bdag nyid can gyi chos nyid tsam yin pa nyid kyi phyir la/ de rnams kyi mtshan nyid tha dad pa ni de rnams kyi rgyu'i gnas skabs kyi rjes su 'brang bas kun rdzob pa'o/ /de nyid kyi phyir/ gang phyir dben pa dben gyur las//tha mi dad pa nyid du 'dod/ /ces pa dang / gang zhig rten cing 'brel 'byung ba/ /de nyid khyod ni stong par bzhed/ /ces pa'i rigs pas chos dang chos nyid la tha dad med pa'i phyir/ chos de rnams kyang kun rdzob tu yod pa rnams so/ /de nyid kyi phyir sgyu ma'i rang bzhin can gyi chos de rnams rtogs pas khong du chud pa yang dag par rdzogs pa'i sangs rgyas kho na'i so so rang gis rig par bya ba ni ngo bo nyid kyi sku'o//de bzhin du dbu ma la 'jug par/ skye med de bzhin nyid do gang tshe blo yang skye ba dang bral ba de'i tshe de yis de bzhin nyid rtogs bzhin te de'i rnam par bsten pa'i phyir/ ji ltar sems ni gang gi rnam par 'byung ba de ni des na yul/ yongs su shes ltar de'i tha snyad nye bar blangs nas rig par gyur pa'o zhes slob dpon zla ba grags pas gsungs so/ /rgyal po'i rin po che'i phreng ba'i rnam par bshad par yang chos nyid kho na'i sku ni chos kyi sku ste/ de yang chos thams cad kyi lus nyid kyis te 'gro ba thams cad de bzhin nyid kyi rang bzhin las ma 'das pa'i phyir dang /'jig rten pa dang 'jig rten las 'das pa'i yon tan thams cad kyi rten nyid kyis na sku'o/ /rten gyi dngos po yang de'i 'jug pa thob pas blta bar bya'o zhes gsungs so/ /de ltar na rten chos nyid dang chos rnams ni kun rdzob tu de las byung ba rnams dang de'i bdag nyid kyis so zhes pas ni chos rnams kyi sku gang yin pa ni chos kyi sku'o zhes sku bzhi pa ni pha rol tu phyin pa'i tshul la nges par bstan pa med do//sngags kyi tshul las ni gdul bya'i khyad par gyi ngor chos nyid log pa bzhin du rnam par gzhag pas nges par bstan to//dngos por na der yang log par gyur pa med do/ /de nyid kyi phyir 'ga' zhig tu chos kyi sku'i sgras ngo bo nyid skus brjod par bya la/ 'ga' zhig tu ngo bo nyid kyi sku'i sgras chos kyi sku'o/ /kha cig tu yang sku gnyis kyi rang bzhin chos dang chos nyid zung ni de'i bdag nyid kyis 'brel pa'i phyir dang /stong pa nyid dang snying rje dbyer med pa'i rang gi ngo bo nyid kyis 'brel pa zhes zung 'jug dang zung 'jug gi sku dang ngo bo nyid kyi skur yang ngo / /gzhan yang pha rol tu phyin pa'i theg par gsungs pa'i longs spyod rdzogs pa'i sku ni der longs spyod rdzogs pa'i sku dang sprul pa'i skur yang brjod par bya ste/sngon goms pa'i tshogs kyi 'phen pas ngo bo nyid kyi skus sprul pa nyid kyi phyir ro/ /'ba' zhig pa'i longs spyod rdzogs pa'i sku ni der bcom ldan 'das kyi gsung kho na'o/ /gang yang 'dir sprul pa'i sku de ni der yang ngo / /gang rtogs pa'i bdag nyid kyis chos kyi sku'i rang bzhin yang ldog pa'i khyad par tha dad pa las tha dad pa ste/sangs rgyas sku lnga'i bdag nyid can/ /zhes pa la sogs pa sku lnga pa yang gsungs la/ de ni de la mos pa rnams kyis bdag cag gis byas pa'i rgya cher 'grel pa man ngag snye ma dang 'jigs pa med pa'i gzhung 'grel du gsal bar shes par bya ste/'dir brtsam pa'i 'brel ba med pas chog go/ /de'i phyir skabs su ma bab cing mi 'thad pa phyogs gzhan nas gsungs pa'i sku bzhi rnam par gzhag pa ni seng ge bzang po'i 'o zhes gnas so/ /gnyis pa ni gang ston pa rang nyid kyis bstan pa las mchog tu kha na ma tho ba med pa theg pa chen po'i chos la rdzogs par longs spyod pa'i dga' ba dang bde ba nyams su myong bar 'gyur zhing /nyan pa po sa bcu'i dbang phyug rnams la'ang zab pa dang rgya che ba'i chos ston pa'o/ /de de ltar longs spyod de/ yang dag par longs spyod pa ni longs spyod rdzogs pa'am/yang na byang chub sems dpa' rnams kyis 'dus nas longs spyod pa ni longs spyod rdzogs pa'o/ /de'i ched du rab tu 'byung ngo zhes pa longs spyod rdzogs pa'i sku dang / longs spyod rdzogs pa nyid kyi sku dang longs spyod rdzogs pa'i ched du ba'i sku ni longs spyod pa'i sku yang ste/mtshan dang dpe byad mchog tu 'bar ba rang gi don phun sum tshogs pa/ gzhan gyi don phun sum tshogs pa mdzad pa yang ngo / /yang na zab pa dang rgya che ba'i chos bstan pas byang chub sems dpa' rnams longs spyod ste yongs su skyong bar byed pa'am longs spyod du 'jug pa dang /de rnams kyis 'di de dang de'i brjod par bya ba yang nyams su myong ba las yang dag par longs spyad par bya'o zhes pa longs spyod rdzogs pa'i sku'o/ /gang slob dpon zla ba grags pas gsungs pa/ sangs rgyas rnams kyi gzugs sku ni/ /mtshan dang dpe byad rab 'bar zhing / /skye bo rnams la sna tshogs gzugs//rang mos dbang gis 'dzin par byed/ /bsod nams tshogs ni dpag med las/ /'byung ba de ni rgyal ba'i sras/ /sa bcu la ni gnas rnams kyi/ /de lta bu yi skur gzigs so/ /'di de chos rdzogs longs spyod las/ /rgyal sras rnams kyis spyad bya'o/ / chos rnams rang bzhin kho na la/ /gnas pa'i blo la sangs rgyas brjod/ /'og min gzhal yas khang du ni/ /de nyid mngon sum bya bar bzhed/ /rnam par rtog med sangs rgyas kyi/ /gzugs kyi sku rnams yang dag 'byung / /sprul pa'i sku rnams byang chub pa/ /sa yi steng du ston par byed/ / ces so/ /slob dpon tsan+d+ra go mis kyang gsungs pa/ de bzhin nyid ni chos sku'o 'di/ /rnam rtog rnams kyi spyod yul min/ /sems can kun dang don kun gyi/ /rang bzhin de ni gnyis med pa'o/ /sna tshogs gzugs can sku rnams dang / /'gro rnams de bzhin nyid ngo bor/ /gang du ro gcig gyur pa na//rgya mtsho ru ni chu bo bzhin/ /'di ste rnam pa 'di lta'i sku/ /skyob pa 'di yis chos sku'o/ /rnam pa thams cad rnam dag phyir/ /rdzogs pa'i byang chub kho na'i yul/ /'jig rten rnams su lhun grub par/ /rtag tu de yis nus pa rnams/ /nyi ma'i 'od zer rnams bzhin du/ / mtha' yas pa yi don rnams mdzad/ /dmus long lta bu bdag gzhag pa/ /rang gi bsod nams kyis bskyed pa'i/ /mig can kun gyi gcig pu ste/ /cig car nyi ma bzhin du mthong / /de'i chos bdud rtsi'i bcud kyis len/ /'on pa lta bu bdag gzhag pa'i/ /skal ba ldan rnams bsod nams kyis//bskyed pa'i rna bas da lta'ang nyan/ /skad cig skad cig theg gsum gyis/ /sa bon ji ltar bsam ji ltar/ /mtha' med phyogs su mtha' yas pa'i/ /sems can 'di yis sbyong bar mdzad/ /ces so/ /gsum pa yang sprul pa ni sprul par byas pa yin zhing des rdzogs par byas pa'i sku ni sprul pa pa ste/thams cad du thams cad kyi tshe 'khor ba ji srid pa dang nam mkha' ji srid bar dus ji lta ba dang bsam pa ji lta bar mngon par mtho ba dang nges par legs pa mtha' dag sgrub pa ni sprul pa'i phrin las dang sprul pa'i sku ste/ de bzhin gshegs pa shAkya thub pa la sogs pa'i gzugs can gyi don phun sum tshogs pa mdzad pa'o//de ltar ni thang dang chu dang bar snang la spyod pa'i brtan pa dang g.yo ba rnams ji snyed par sku dang gsung gis yang dag par bsdus pa'i chos bcom ldan 'das kyis sprul pa rnams ni sems can rnams 'dul ba'i ched du 'jig rten gyi khams mtha' yas pa rnams su ste/sprul pa'i sku'i mtha' yas pa de rnams kyang sgyu ma'i skyes bu bzhin du sems dang sems las byung bas stong pa'o/ /ji ltar de rnams kyi sku dang / gsung dag sprul pa de ltar sems dang sems las byung ba rnams kyang mi sprul pa ci zhe na/de'i nye bar len pa med pa'i phyir dang / snga na med pa mi 'byung ba'i phyir ro/ /'o na sems dang sems las byung ba sprul pa yang 'dod pa ma yin nam/ sangs rgyas rnams kyi sku dang gsung dang thugs ni sprul pa ste rab tu sbyor ba'i thabs kyi las can no zhes gsungs pa'i phyir ro zhe na/bden te 'dod mod/ 'on kyang nye bar len pa yod na ste/ lha'i byin rlabs kyis rmi lam mthong ba bzhin dang / brjod pas ngag gi don rig pa bzhin no/ /'o na gang sprul pa de rnams ci ltar bcom ldan 'das kyi sku yin/ bcom ldan 'das kyis sprul pa'i phyir ro zhe na ni de'i tshe sgyu ma mkhan gyis sprul pa glang po che la sogs pa rnams sgyu ma mkhan gyi lus su 'gyur ro zhe na/ma yin te/ rang gi sku nyid du byin gyis brlabs nas/ des sprul pa'i phyir dang / rang gi sku bzhin du gshegs pa dang tha snyad byed pa la sogs pa'i dka' spyad rnams la/ bya ba byed pa'i phyir de rnams kyang de'i sku rnams so zhes pa 'di ni bcom ldan 'das kyi sprul pa'i sku'o//sku gsum po de rnams kyang rtag pa rnams te/ de la ngo bo nyid kyi sku ni rang bzhin rtag pa nyid kyis rtag pa ste/ thog ma dang tha ma med pa'i phyir ro/ /longs spyod rdzogs pa'i sku ni ma nyams pa'i rtag pa nyid kyis na rtag pa ste thog ma yod kyang tha ma med pa'i phyir ro//de bzhin du byang chub kyi phyogs la sogs pa'i chos kyi phung po yang ngo / /sprul pa'i sku ni rgyun rtag pa nyid kyis rtag pa ste mi snang bar gyur nas yang dang yang du yul tha dad par 'jug pa'i phyir ro/ /de bzhin du mdzad pa yang rtag pa nyid do/ / de ltar chos kyi sku ni bcom ldan 'das rnams kyi don dam pa pa'i lus so/ /de skad du yang gsungs pa/ rab 'byor de bzhin gshegs pa zhes pa 'di ni yang dag pa'i de bzhin nyid kyi tshig bla dgas so zhes so/ /'dir yang dag pa'i de bzhin nyid ni rnam par dag par byung ba'o/ /'ga' zhig tu ni de bzhin nyid ces pa dang /chos nyid ces pa yang spyir gsungs te/ yongs su dag pa dang yongs su ma dag pa dag don dam par bye brag med par bstan pa'i don du'o/ /gang de la rag las pa sangs rgyas su byed pa'i chos byang chub kyi phyogs la sogs pa dang longs spyod rdzogs pa dang sprul pa'i sku zhes gsum po de ni kun rdzob pa'i lus 'jig rten las 'das pa'i lam gyis 'dus byas pa ste don dam par rang bzhin med pa'i chos kyi dbyings kyi rang gi ngo bo grangs ji lta ba bzhin du yang dag par rdzogs pa'i sangs rgyas dang sa bcu'i dbang phyug rnams la yang dang /de las gzhan pa'i byang chub sems dpa' la sogs pa rnams la yang so sor snang bzhin pa'o//'o na sprul pa'i sku chos kyi sku la rag las par 'gyur mod de/ de'i dbang gis de de dang der mtha' yas par 'byung ba'i phyir yin na/ longs spyod rdzogs pa ci ltar yin te/ gang gi phyir de ni dpag tu med cing shin tu yongs su dag pa'i bsod nams las nges par 'khrungs pa 'og min gyi sa la zhugs pa ste/sku de kho na la brten nas de bzhin gshegs pa'i chos kyi sku rdzogs par byang chub pa'i phyir te de de la rag las pa kho nar rigs so zhe na/ de ltar ma yin te chos kyi sku mngon par rdzogs par byang chub pa yod na gzhan la mi snang ba mchog tu phul du byung ba de 'byung ba kho na'i phyir dang /de'i dbang gis kyang bla na med pa'i chos bstan pas byang chub sems dpa' rnams dang lhan cig bla na med pa'i chos la rdzogs par longs spyod pa'i dga' ba de nyams su myong ba rdzogs par longs spyod pa ston pa'i phyir ro//chos kyi sku ni de'i bsgrub par bya ba nyid kyang ma yin te/ de ni 'dus ma byas pa nyid kyi phyir ro/ /de thob pa'i ngor ye shes kyi tshogs kho na gtso bor nus pa la de'i ngor bsod nams kyi tshogs ni rjes su mthun pa tsam mo/ /ye shes kyi tshogs de yang longs spyod rdzogs pa 'di'i ngor rjes su mthun pa nyid do//don dam par yang longs spyod rdzogs pa dang sprul pa'i sku dag chos kyi skur ro gcig pa nyid kyi phyir chos kyi sku kho na sangs rgyas bcom ldan 'das rnams so zhes pa'o/ /ji skad du 'phags pa rdo rje gcod par gsungs pa/ gang dag nga la gzugs su mthong / / gang rnams nga la sgrar rtogs pa/ /log pas bcom par rab skyes pa'i/ /skye bo des ni nga mi mthong / /'dren pa rnams ni chos kyi sku/ /chos nyid sangs rgyas blta bar bya/ /chos nyid rnam par shes bya'ang min/ /de ni rnam par shes mi nus/ /zhes so/ /gang rnams gzugs kyi sku mthong ba tsam mam dbyangs rjes su thos pa tsam gyis de bzhin gshegs pa bdag cag gis mthong ngo shes so zhes sems pa de rnams log pa ste sangs rgyas mthong ba la gegs byed pa'i las kyi sgrib pas bcom par skyes pa ste de kho na la gus par ltung ba nyid kyis na de rnams kyis bdag mthong ba ma yin pa la mthong bar yang mi 'gyur ro//gal te de bzhin du shes par gyur na de tsam gyis sangs rgyas mthong bar mi 'gyur ro/ /de ni de mthong ba dang rjes su mthun pa nyid do zhes yang dag par rtogs bzhin pa rnams kyis bdag mthong bar gyur kyang gang gi tshe mthong ba nyid kho nar mngon par zhen pa de'i tshe ci ltar mthong bar 'gyur/de'i chos mthong ba ni sangs rgyas mthong ba ste de ni de dang ro gcig pa nyid kyi phyir ro/ /chos de yang chos kyi sku dang chos nyid de so so'i skye bo rnams kyis gzugs dang rjes su thob pa tsam gyis rnam par shes par mi nus la/ don dam par ni yongs su dag pa rnams kyis kyang ste/ shes pa dang shes pa dag nub pa nyid kyi phyir ro/ /chos su sangs rgyas rnams blta bya zhes pa 'dir ni chos thams cad mthong ba med pa kho na sangs rgyas rnams mthong ba'o zhes mngon par dgongs pa'o/ /gal te de bzhin gzugs su blta bar bya ba ma yin na/de'i tshe de dang der gshegs pa dang 'byon pa la sogs pa rnams kyis sems can rnams kyi don mdzad pa ci zhe na/ gshegs pa la sogs pa yang med de/ gang gi phyir ji ltar rtogs par bya ba de ltar rtogs pa ni de bzhin gshegs pa ste/ mya ngan las 'das pa gang zhig tu 'gro ba dang /'khod pa 'ga' zhig nas byon pa ma yin pas ji ltar rtogs par bya ba de ltar gshegs pa ste/ gshegs par mdzad par 'gyur ba ste/ 'khor ba dang mya ngan las 'das pa dag tha dad par dmigs pa la ni don dam par mya ngan las 'das pa thob pa med pa'i phyir ro/ /gang yang de ltar 'khor ba las ma g.yos shing mya ngan las 'das pa thob pa med pa ste/ci ltar yul 'ga' zhig tu bzhud par 'gyur/ sangs rgyas rnams ni lhun gyis grub par phrin las mdzad pas/ gshegs pa la sogs pa rnams ni sprul pa la ste de ltar de bzhin gshegs pa chos kyi dbyings dang ro gcig pa g.yo ba med pa rnams kyi thams cad kyi tshe de lta bu'o//chos kyi dbyings kyi gnas skabs kyang 'di rnams kyi gcig nyid dang gzhan nyid dang bral ba bdag gnyis ka med par rab tu mi gnas pa'o/ /chos dang zang zing la sogs pa rnams kyis tshim par mdzad pa'i de bzhin gshegs pa rnams bdag gi sprul pa'o zhes bdag nyid gsal bar yang mi mdzad de/gzhan du na gdul bya rnams mi gus par 'gyur ro/ /ji skad du rgyas par sems can gyi don la 'jug pa'i phrin las rnams gsungs pa/ ji ltar sgyu ma byed pa bza' bya dang longs spyod kyi dngos po sna tshogs rnams sprul nas dga' bar byed de/de yang 'jig rten gyis 'di thams cad rdzas ma yin pa'o zhes mi shes la/ gang shes rab kyi pha rol tu phyin pa la spyod pa des chos kyi dbyings las log pa cung zad kyang mi mthong zhing / sems can med la sems can du gdags pa yang med de chos thams cad bdag med pa nyid kyi phyir ro zhes so//de ltar chos kyi sku'i mngon par rtogs pa sems bskyed pa gnyis kyis bdag nyid sku gsum du so sor snang ba'o/ /de la dngos gzhi'i sems bskyed pa ni chos dang longs spyod rdzogs pa'i sku ste rtogs pa'o/ /mjug ni sprul pa'i sku so sor snang ba'o//chos kyi sku kho na longs spyod rdzogs pa dang sprul pa'i skur snang ba skyed par byed pa'i sgo nas gzhan gyi don rnam pa nyi shu rtsa bdun mdzad pa nyid kyis na chos kyi sku dang ldan pa dang zhing dag pa bla na med pa yang ngo / /sems bskyed pa 'di dag kyang so sor ye shes lnga'i rang bzhin dag go//de skad du yang 'phags pa sangs rgyas kyi sa'i mdor gsungs pa/ rnam pa lnga po 'di rnams kyis sangs rgyas kyi sa'i tshogs pa yang dag par bsdus pa rig par bya'o/ /lnga po ci rnams kyis she na/ chos kyi dbyings rnam par dag pa dang / me long lta bu'i ye shes dang / mnyam pa nyid kyi ye shes dang /so sor rtog pa'i ye shes dang / bya ba grub pa'i ye shes kyis so/ /'dir chos kyi dbyings rnam par dag pa dang / shin tu rnam par dag pa'i chos kyi dbyings dang / shin tu rnam par dag pa'i chos rnams kyi chos nyid do zhes pa don tha dad pa ma yin no/ /de lta na yang dngos gzhi ni ldog pa gtso bo nyid kyi phyir ye shes bzhi'i bdag nyid du rnam par gzhag go//de la chos kyi dbyings rnam par dag pa'i ye shes dang / me long lta bu'i ye shes ni chos kyi sku dang rtogs pa'i thob pa'o/ /gang mdo sde'i rgyan du gsungs pa/ me long lta bu'i ye shes ni longs spyod rdzogs pa'i sangs rgyas so zhes pa de la longs spyod rdzogs pa'i sangs rgyas kyi rgyu yin pa nyid kyi phyir longs spyod rdzogs pa'i sangs rgyas zhes brjod par bya'o zhes bshad sbyar byed pas so//de nyid du yang longs spyod rdzogs pa dang sprul pa'i 'khor lo ma lus pa rab tu 'jug par gsungs so//mnyam pa nyid dang so sor rtog pa'i ye shes dag longs spyod rdzogs pa'i sku'o/ /mjug ni gtsor ldog pa gcig pa gtso bo nyid kyi phyir bya ba sgrub pa'i ye shes so/ /de la chos kyi dbyings shin tu rnam par dag pa'i ye shes ni gang bag chags dang bcas pa'i sgrib pa gnyis las grol ba/ snying rje dang shes rab gnyis su med pa/chos kyi dbyings khong du chud pa rdzogs pa/ spangs pa dang rtogs pa phun sum tshogs pa yang dag pa'i don bsgom pa rab kyi mthar thug pa las skyes pa gsal bar snang ba ste/ yang dag pa'i don can nyid kyis na mi slu ba'i phyir tshad ma yin la rtog pa dang bral zhing ma 'khrul pa nyid kyis na mngon sum ste nye bar mkho ba'i thams cad mkhyen pa nyid bcom ldan 'das so//me long lta bu'i ye shes ni gang la mtha' yas pa'i khams gsum pa'i sems dang cig shos kyi dngos po thams cad rdul phra rab so so ba ji ltar thag ring ba dang cig shos kyis yul dang 'das pa dang /ma 'ongs pa dang / da ltar byung ba'i dus bzhin gnas skabs so so ba me long la gzugs brnyan bzhin du gsal bar so sor snang ba'o/ /mnyam pa nyid kyi ye shes ni gang gi de ltar gzugs brnyan gyi 'gro ba rnams chos kyi bdag med pa nyid du mnyam pa nyid du rtogs nas sems can thams cad la rtag tu bdag nyid dang mnyam pa'i sems thob pa'o//so sor rtog pa'i ye shes ni gang gis de ltar mnyam par gzhag pa kho na'i bcom ldan 'das rtog pa med kyang rang gi sngon gyi smon lam dang sems can gyi bsod nams kyi dbang las sems can thams cad kyi sems dang spyod pa rnams so sor rtogs par mdzad pa'o//bya ba grub pa'i ye shes ni gang gis de ltar so sor rtog pa'i 'gro ba'i bya ba rjes su sgrub pa'o/ /ye shes bzhi po 'di yang rtog pa phun sum tshogs pa ste de lta kho nar mngon sum dang thams cad mkhyen pa dang bcom ldan 'das so/ /ye shes lnga rnams kyang rnam pa thams cad mkhyen pa nyid de de yang mngon sum mo//de skad du yang zla ba grags pas/ rnam pa kun mkhyen ye shes ni/ /mngon sum mtshan nyid can du 'dod/ /gzhan ni nyi tshe ba nyid kyis/ /mngon sum zhes ni 'dod ma yin/ /zhes so/ /'o na ye shes lnga po 'di rnams cig car phan tshun tha dad pa'am 'on te ma yin/de las ci ltar 'gyur na tha dad na ni shes pa'i rgyun lnga rnams su 'gyur la/ de ltar gyur na'ang rnam par shes pa'i rgyud lnga rnams yod na sems can sngar gdags pa rnams sku so so la cig car thob par 'gyur te lus gzhan gyi rnam par shes pa'i rgyun rnams bzhin no zhe na/de ltar ma yin te ye shes lnga po rnams ni phan tshun rgyu dang 'bras bu'i dngos pos/ gzugs dang ro dang dri dang reg bya'i rdul phra rab kyi rgyun rnams la bum pa gcig tu gdags pa bzhin du tshogs pa gcig la rag las pa'i 'brel pa las dbyer med pa'i 'jug pa nyid kyis sems can gcig tu gdags pa'i yul kho na'o//tshogs pa gcig la rag las pa'i rnam par shes pa'i rgyun gzhan lus la med pa yang ma yin no/ /de'i tshe ye shes lnga bzhin du stobs dang / mi 'jigs pa la sogs pa sangs rgyas kyi ye shes dpag tu med pa mtha' yas pa rnams so so rang rgyud tha dad pa nyid kyis na cig car sems kyi rgyun grangs med par 'gyur ro zhe na/'gyur mod skyon cung zad kyang med de/ sems can gcig tu gdags pa grub pa nyid kyi phyir ro/ /de ltar yang / mos pa gcig gi yul gyur cing / /'bras bu gcig la nyer mkho ba/ /dbye ba med par 'jug rnams la//blo gcig kun gyi yul can gnas/ /zhes pa rigs pa'o/ /gal te de lta na sems can rnams ni rnam par shes pa'i rgyun gcig pa'o zhes pa ci ltar zhe na/ sems can gcig la rnam par rtog pa gnyis dus gcig la med do zhes pa ste/ yid kyi rnam par shes pa'i rgyun gcig nyid kyi phyir ro//de bzhin gshegs pa ni rnam par mi rtog pa'i ye shes mang po 'brel pa rnams cig car rgyun du 'jug go zhes pas 'gal ba med do/ /'o na bcom ldan 'das rnams kyi ye shes re re yang rnam pa dpag tu med cing rnam pa tha dad pas kyang dbye bar bya na ni rdul phra rab nyid tsam yang mi srid pa'i phyir cung zad kyang lhag ma med la/gal te de lta na ye shes lnga la sogs pa rnams phan tshun tha dad pa med pa'i phyogs la yang rnam pa sna tshogs pa'i dbye bas tha dad pa'i phyir/ ye shes gcig po de yang cung zad kyang ma lus pa med do/ /de ltar gyur na/ tha dad pa ma yin tha mi dad pa yang ma yin gnyis ka ma yin no zhes pa ci zhig de kho na nyid du 'gyur zhe na/tha dad pa dang tha mi dad pa la sogs pa'i spros pa mtha' dag gis stong pa nyid kho na'o zhes rgyas pa dang bcas pa sngar brjod zin to/ /gsungs pa ltar yang / dri med dbyings nas sangs rgyas rnams/ /gcig dang mang po nyid kyang min//nam mkha' bzhin du lus med phyir/ /sngon gyi lus rjes 'brang ba'i phyir/ /gnyis dang gnyis dang gcig gis ni/ /'dir ni sku gsum rnam par gzhag /ces so/ /ci de bzhin gshegs pa'i ye shes de med pa kho na'am zhe na/ de ltar smra ba ma yin te/ de ni kun rdzob tu bcom ldan 'das rnal 'byor pa'i dbang phyug dam pa'i so so rang gis rig par bya ba'i phyir ro//de gal te kun rdzob tu 'dod na de la kun rdzob tu yang tha dad pa dang tha mi dad pa la sogs pa bsam mo zhes ni mi brjod de ji lta ba de ltar 'gyur mod bcom ldan 'das rnam par rtog pa med pa la ni brtag pa de med la/ ye shes de gzhan gyi spyod yul yang ma yin te/ gang 'phags pa lang kar gshegs par gsungs pa/ so so rang rig ye shes de/ /rtog ge pa rnams spyod yul min/ /zhes so/ /tshad ma rnam 'grel du yang / rnal 'byor rtog pa bsam mi khyab/ /ces so/ /gang bsam gyis mi khyab pa'i ye shes can rnams kyi ye shes lnga la sogs pa rnams la la lar tha dad pa dang tha mi dad par tha snyad byed pa de ni gdul bya'i bsam pa'i ngor sngon gyi smon lam gyi 'phen pa'i shugs las so zhes pa thams cad logs par gnas so//'o na thams cad rig par byed pa ci ltar srid ce na/ shes rab kyi pha rol tu phyin pa dang thabs la mkhas pa nyid goms pa las te/bskal pa grangs med pa gsum du goms pa gang thob par mi byed pa yod dam ci 'dod chags la sogs pa'i sgrib pa dang bral bar byed pa yin pa'i phyir ro/ /de'i tshe dngos po rnams ji lta ba bzhin du mthong gi/ 'di las 'di dngos po ma lus par rtogs pa'i sprul pa la mkhas par rigs pa ma yin te de kho na nyid sgrib par byed pa nyid ni dri ma nyid yin la/dri ma nyon mongs pa rnams rnam par rtog pas sprul pa la gegs byed pa po ma yin no zhe na/ 'di la brtsad par bya ste/ ci dngos po rnams mthong ba la rnam par rtog pa gegs nyid du ma mthong ngam/'on te nyon mongs pas byas pa ma yin zhes pas so/ /de gnyis ka yang yod pa ma yin te gang gi phyir nyams su myong ba bzhin du rnam pa thams cad pa'i rnam par rtog pa gang na yang med pas so/ /rnam par rtog pa de dang bral ba yang nyon mongs pa med par ma yin te/gang gi tshe dga' ba'i dngos po mthong ba na skyon dang mthong ba la yang skyon med par rtog pa de'i tshe 'dod chags ni gsal bar rgyu yin no/ /gang gi tshe yang mi dga' ba yon tan dang ldan pa yang yon tan med par rnam par rtog pa de'i tshe zhe sdang ngo / /goms pa med pa na thams cad yod pa'i ngo bo ma yin par rnam par rtog pa ni gti mug gis byas pa kho na ste/la ba la sogs pa bzhin du sgrib par byed pa ma yin gyi/ 'on kyang rgyud mi mthun pa skyes pas so/ /de'i phyir ji skad bshad pa'i byang chub kyi sems bsgoms pas ji lta ji ltar gti mug la sogs pa las yongs su rgyal ba de ltar gang nyid kyis mi mthun pa ldog pas gang gi tshe re zhig blo rnams rang gi rnam pa rnams la nges par rten cing mthar thug pa na rnam pa thams cad dang dngos po thams cad la yang 'gyur ro//de bzhin du rnam par rtog pa'i rtogs pa rnams bsgom pa rab tu gyur pa na gsal ba nyid du gdon mi za bar 'gyur la/de yang bsgom pa'i khyad par gyi stobs kho na las te/ lha'i dbang las bden pa'i rmi lam bzhin te/ don gyi rnam pa ni/ don ji lta ba'i bdag nyid med par ma yin la/ de las skye ba las gzhan du yang ngo / /gang tshad ma rnam 'grel du/ gzung ba'i mtshan nyid bsam pa 'di/ /ma dag blo can la yin gyi//rnal 'byor rtog pa bsam mi khyab/ /ces so/ /phyi rol du ni so so skye bo'i 'dra ba nyid dang skyed par byed pa dag gis rig byar gnas la rnal 'byor pa'i 'dra ba tsam gyis kyang ngo / /thob par bya ba ni don 'jug yul nye bar ston par byed pa nyid kyi phyir mi slu ba'o/ /'o na 'byung 'gyur dang byung zin dag dus kyis bar du chod pas na des ci ltar ston zhe na/yul gyis bar du chod pa la yang 'dir thal lo zhes pas 'jug tu rung ba'i yul la yang ston par byed pa tshad ma ma yin par 'gyur ro/ /de ni de tsam du yod do zhe na/ gzhan yang 'byung 'gyur ram 'byung bar ro/ /gal te de'i dus na med pas so zhe na/de'i yul na da lta ba yang med do zhes pa mtshungs so/ /don bya ba yang de ji ltar de'i yul nye ba na yin pa de ltar de'i dus nye ba na'o zhes pa khyad par ci yang med do/ /ci ste thams cad rig par byed na 'dod chags la sogs pa pha rol gyi sems ma lus pa mngon sum du mdzad pa'i phyir/bcom ldan 'das 'dod chags la sogs pa dang ldan pa nyid du 'gyur ro zhe na/ ma yin te gang gi phyir 'dod chags ni rang gi bag chags kyi nus pa dang ldan pa las 'dod chags pa nyid du byed kyi gzhan gyi bag chags kyis stobs dang ldan pa las ma yin te/ nye bar 'jog par grub pa nyid kyis de'i yang dag par rig par bya ba'o//'o na gal te kun rdzob tu ye shes skad cig gcig gis cig car shes bya'i dkyil 'khor ma lus pa la khyab na de'i tshe dngos po rnams 'di tsam zhes yongs su bcad pa'i phyir mtha' med par khas blangs pa la gnod de/ de ltar ni ye shes gcig gis rtogs pa'i dngos po las gzhan pa'i dngos po med do zhes pa 'di ltar yongs su gcad par bya ba rnams ci ltar mtha' dang ldan par mi 'gyur zhe na/de lta ma yin te/ ji ltar sems can dang snod kyi 'jig rten phyogs dang phyogs bral rnams na mtha' yas pa de lta kho nar thams cad mkhyen pa'i thugs mtha' med pas cig car 'dzin pas te/sngon po dang ser po la sogs pa du ma bzhin no/ /thams cad mkhyen pa'i ye shes yongs su chad par byas na ni mthar thug pa nyid kyi skyon no/ /gang gis shes par bya ba nyid kyis na mtha' dang ldan par 'gyur ba dngos po rnams ye shes kyi yongs su bcad pa ma yin pa'i rang bzhin nyid kyis mtha' med par khas blangs pa ma yin gyi/'on kyang yul bkod pa mtha' yas pa nyid kyis snod kyi 'jig rten mtha' yas la/ sems can gyi 'jig rten ni grangs mtha' med pa nyid kyis kyang ngo / /de'i phyir 'di ni 'dir bsdus pa'i don te/ dper na rmi lam bden pa mthong ba'i shes pa/don dam par yul med kyang so sor nges pa'i yul gyi rnam pa rtags dang lung la ma ltos par rten gyi khyad par gyi dbang las skye bas nye bar bstan pas nye bar bstan pa'i don thob par byed pa nyid kyis mi slu bar 'gyur ba de bzhin du rnal 'byor pa rnams kyi ye shes ni shes rab kyi pha rol tu phyin pa'i rnal 'byor goms pa'i stobs kyis ji ltar de bzhin byung ba'am 'byung bzhin pa'am 'byung bar 'gyur ba'o zhes 'das pa dang da ltar byung ba dang ma 'ongs pa'i dngos por gzhan gyis yongs su brtags pa de lta kho nar 'gal ba dang mi 'gal ba dang spang bya dang blang bya la sogs pa nye bar ston pa rnam pa sna tshogs pa'i rab tu dbye ba can gyi spros pa rnams phyi rol bzhin du yongs su gsal ba'i ngo bo gsal bar so sor snang ba/rtags dang lung la ltos pa med pa mi slu ba nyid du skyes pa ni mngon sum tshad mar 'dod do zhes pa'o/ /kha cig gi 'dod pa yang / so sor rtog pa'i ye shes dang bya ba grub pa'i ye shes ni 'jig rten las 'das pa'i ye shes kyi stobs las skyes pa rjes thob/dag pa 'jig rten pa'i rnam par rtog pa'i ngo bo zhes pa'o/ /yang gzhan rnams kyis bya ba sgrub pa'i ye shes kho na de bzhin no zhes so/ /de dang 'di'i 'dod pa dang rnam pa thams cad du mi rigs mod/shing rta chen po rnams kyis gzhan du dpyad zin no zhes pa 'dir zhar 'byung rgya che bas ci bya/ de ltar ye shes lnga rnams mdor bsdus nas rnam par gzhag ste/ rgyas pa las sems dang po bskyed pa la sogs pa'i yon tan rnams 'ga' zhig rnam par 'jog par 'gyur ro/ /de ltar mdor bsdus na rgyu dang 'bras bu'i bdag nyid sems bskyed pa nyi shu rtsa gnyis kyi rang bzhin theg pa chen po//shes rab kyi pha rol tu phyin pa thams cad mkhyen pa nyid kyi mngon par rtogs pa gcig kho na'o/ /phye bas rnam par gzhag pa ni mngon par rtogs pa gsum rnams te rnam pa thams cad mkhyen pa nyid dang lam shes pa nyid dang thams cad shes pa nyid ni mngon par mtshon par bya ba rnams te/'jug pa'i yul nyid kyis na rgyu'i mngon par rtogs pa ste/ spang bya dang blang bya'i mtshan nyid kyi dbang du byas nas de bstan pa'i phyir ro/ /rnam pa kun mngon par rtogs pa dang rtse mor gyur pa dang mthar gyis pa dang skad cig gcig la mngon par rdzogs par byang chub pa rnams ni/'dis rab tu sbyor ro zhes pa de'i sbyor ba'i mngon par rtogs pa'o/ /phrin las dang bcas pa'i chos sku ni 'bras bu'i mngon par rtogs pa'o/ /slar yang gsum po 'di rnams rgyas par mngon par rtogs pa drug rnams te/ rnam pa kun mngon par rdzogs par rtogs pa la sogs pa rnam grangs ji lta bar sbyor ba'i mngon par rtogs pa dang /rab tu gyur pa'i mngon par rtogs pa dang go rims kyi mngon par rtogs pa dang mthar thug pa'i mngon par rtogs pa zhes dbye ba las so/ /shin tu rgyas pa las ni rgyu'i mngon par rtogs pa sngar bzhin gsum nyid kyis na mngon par rtogs pa brgyad rnams so//gang rnam pa thams cad mkhyen pa la sogs pa gsum rnams sbyor ba'i yul yin la/ de las gzhan bzhi rnams sbyor ba dang rgyu'o zhes 'phags pas rnam par gzhag par mdzad pa ni 'di dang don gyis mthun pa kho na'o/ /sems bskyed pa rnams la mngon par rtogs pa rnam par gzhag pa 'di thams cad bdag nyid chen po rnams kyi dgongs pa kho na 'dir brjod pa'o//thub pa'i dgongs pa'i rgyan du mngon par rtogs pa brgyad kyi snang ba'i le'u ste yongs su bcad pa gsum pa'o// //de ltar 'dun pa dang / bsam pa dang / lhag pa'i bsam pa dang / sbyor ba dang / sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / thabs dang / smon lam dang / stobs dang / ye shes kyi pha rol tu phyin pa dang / mngon par shes pa dang / bsod nams dang /ye shes dang / byang chub kyi phyogs kyi chos dang / snying rje dang / lhag mthong dang / gzungs dang / spobs pa dang / chos kyi sdom dang / bgrod pa gcig pa'i lam dang / chos kyi sku dang ldan pa ste/ sems bskyed pa nyi shu rtsa gnyis po so sor pha rol tu phyin pa drug rnams kyis yang dag par bsdus pa 'di rnams la/dad pa dang ldan pa yod pa nyid du mos pas yid ches pa yang dag par skyes pa yon tan dang ldan pa nyid mos pas rab tu dang ba skyes pa thob par nus pa nyid du mos pas mngon par 'dod pa thob pa gang rung rung 'dod pa'am gzhan gyis bskul bas ni ma yin pa bsod nams dang ldan pa rnams kyis mngon par 'dod cing yongs su bsams pa'i don rnams ring po mi thogs pa nyid du phun sum tshogs par byed do zhes/byang chub tu sems bskyed pa len pa dang sbyin pa la sogs pa dge ba'i tshogs nye bar sogs par byed cing byang chub sems dpa' ni dang po re zhig smon pa'i sems skyed par byed do//de'i yon tan yang rnam pa gnyis te/ de la mthong ba'i chos ni da ltar ba'i skye ba'o/ /de la thob par bya ba'i yon tan ni mthong ba'i chos la thob pa dang brgyud pas thob pa'o/ /de la gang la la zhig gis phyogs bcu rnams su zhing mtha' yas pa rnams rin po che sna tshogs las brgyan par byas nas lha dang mi'i bde ba'i yo byad de dang de rnams dang ldan pa rnams skad cig so sor ster bas sangs rgyas kyi zhing gi rdul dang mnyam pa kho na'i bskal par phyogs bcu na bzhugs pa'i sangs rgyas rnams kho na la phul la/gzhan gang zhig gis bla na med pa yang dag par rdzogs pa'i byang chub don du gnyer bzhin pa kho nas/ 'di ni 'di lta kho na'o zhes mos pas sems skyed par byed pa de 'dis ni sngar gyi sbyin pa po de las bsod nams khyad par du 'phags pa thob bo zhes bsod nams kyi mchog nyid thob pa ni mthong ba'i chos la thob pa'i phan yon te/ mos pa dang / bsod nams dag ni skye ba gcig po de la brten pa'i phyir ro/ /de ltar mos pa 'phel bas bsags bzhin pa'i bsod nams kyi chu bos sdig pa'i dri ma bkrus shing /sdig pa las byung ba'i ngan 'gro gsum rnams dang / gzhan don la 'bab pa nyid kyi phyir/ bde 'gro dang zag pa med pa dman pa'i chos kyi bsngags pa smra ba'i sdig pa'i grogs po rnams ring du byed la mu stegs pa dang bdud la sogs pa rnams kyis kyang zil gyis mnan par bya ba ma yin pa dang /'jig rten gsum gyis bkur bar 'gyur zhing de bzhin gshegs pa rnams mthong ba dang / de rnams kyis 'doms par byed/ byang chub sems dpa' dang skal ba mnyam pa nyid thob la tshogs yongs su rdzogs par byed/sangs rgyas nyid kyang rtogs par byed do zhes pa mdor bsdus pa las brgyud pas thob pa'i yon tan rnams te/ rgyas pa las ni skabs ji lta bar 'chad par 'gyur ro/ /'dun pa la sogs pa'i sems bskyed pa nyi shu rtsa gnyis po 'di rnams kyang bcom ldan 'das ma chen mo dag tu gsungs la/'phags pa blo gros mi zad pa'i mdo dag gis ni/ de rnams la rim pa ji lta bar mi zad pa brgyad cu rnams gsungs so/ /'di lta ste/ sems dang po bskyed pa dang / bsam pa dang / sbyor ba dang / lhag pa'i bsam pa dang / pha rol tu phyin pa drug rnams dang / tshad med pa bzhi rnams dang /mngon par shes pa lnga rnams dang / bsdu ba'i dngos po bzhi rnams dang / so so yang dag par rig pa bzhi rnams dang / ston pa bzhi rnams dang / bsod nams dang ye shes kyi tshogs dag dang / byang chub kyi phyogs kyi chos sum cu rtsa bdun rnams dang / zhi gnas dang / lhag mthong dag dang / gzungs dang / spobs pa dag dang / chos kyi sdom bzhi rnams dang / bgrod pa gcig pa'i lam nyid dang / thabs la mkhas pa nyid kyis mi zad pa nyid kyi phyir ro/ /'dir sbyor ba dang lhag pa'i bsam pa dag rim pa bzlog nas bstan pa ni gnyis ka la 'byung bar gsal bar byed pa'o//de nyid kyi phyir 'phags pa thogs med kyis smon pa brgyud pas ni sbyor bar gsungs so/ /sems bskyed pa bco lnga par yang / bcom ldan 'das ma bar ma 'phags pas nye bar bzhag pas mngon par shes pa rnams rtogs par byas pa ni gsal bar byed par 'gyur ro/ /gang gi phyir bcom ldan 'das rnams kyis chos bstan pa ni rnam pa sna tshogs pa ste/mdo la lar chos kha cig gnas skabs 'ga' zhig la bstan pa 'gal ba med do zhes pa skyon cung zad kyang med do/ /sems bskyed pa de rnams kyang byang chub sems dpa' rab tu dang ba skyed par byed pa'i dper brjod pa rnams kyis rgyas par bya'o//de la sems bskyed pa dang po ni ched du bya ba dang bcas pa'i byang chub la 'dun pa'i mtshan nyid can mi zad pas na sa dang mtshungs pa ste/ sangs rgyas kyi chos thams cad dang de'i tshogs rab tu skye ba'i gzhir gyur pa nyid kyi phyir ro/ /dkon mchog brtsegs pa'i mdor don gyis gsungs pa yang byang chub sems dpa' sems dang po bskyed pa nas bzung ste/thog ma dang bar dang tha ma rnams su sems can rnams kyi dge ba'i rtsa ba mngon par sgrub pa'i rten du gyur pa nyid kyis na/ phan pa dang gnod pa byed pa thams cad la mthar thug pa med pa'i sems dang / sa dang mtshungs par yang 'gyur gyi ji ltar yang btang snyoms par 'jug pa'i sa la brten nas/skyes bu'i byed pa des sems can rnams der nye bar 'tsho bar byed pa de lta bu byang chub sems dpa' ma yin no zhes pa la sogs pa'o/ /'di nas bzung ste byang chub sems dpa' ni skyes bu chen po'i rnam par rtog pa brgyad rnams la nyin dang mtshan du mngon du phyogs par byed do//de rnams kyang sems can thams cad kyi sdug bsngal thams cad sel nus par nam zhig 'gyur zhes pa dang / dbul zhing skyo ba'i sems can rnams 'byor pa chen po la nges par sbyor bar nam zhig 'gyur snyam pa dang / rang gi lus sha khrag dang bcas pas sems can gyi don gang gi tshe byed par 'gyur snyam pa dang /dus shin tu ring bar dmyal bar gnas pas kyang sems can rnams la phan pa kho na nam zhig byed par 'gyur snyam pa dang / 'jig rten las 'das pa'i 'byor pas 'jig rten thams cad kyi yid la re ba yang dag par rdzogs par nam mthong bar 'gyur snyam pa dang /sangs rgyas su gyur nas sems can thams cad 'khor ba'i sdug bsngal thams cad las nam gyi tshe 'don par 'gyur zhes pa dang / sems can la phan pa'i 'bras bu med pa'i skye ba dang / sems can gyi don la rab tu sbyar ba dang bral ba'i sems dang gzhan gyi don la ro gcig pa ma yin pa'i bya ba dang /skye bo thams cad dga' bar mi byed pa'i ngag dang / gzhan gyi don dang bral ba'i gson pa dang / gzhan la phan pa dang stobs chung ba'i lus dang / gzhan la phan par byed pa la mi dga' ba'i blo dang / sems can la phan pa'i bya ba mi byed pa'i rdzas nor dang /'gro ba'i don du spyod pa dang bral ba'i dbang phyug dang / gzhan 'tshog pas dga' ba rnams skye ba dang / skye bar ma gyur cig ces pa dang srog chags thams cad kyi sdig pa'i las kyi 'bras bu bdag la gyur cig /bdag gi legs par spyad pa thams cad kyi 'bras bu sems [(]cad [,]can [)]thams cad la gyur cig ces pa skyes bu chen po'i rnam par rtog pa brgyad rnams so//'di'i rjes su bsngags pa ji skad du dkon mchog brtsegs par/ 'od srungs 'di ste/ 'khor los sgyur ba'i rgyal po'i btsun mo dam pa'i mngal du gzhon nu 'khor los sgyur ba'i mtshan dang ldan pa chags nas zhag bdun lon par gyur na/'byung ba chen po mer mer por gyur pa dbang po yongs su ma smin pa de la der lha rnams shin tu stobs dang ldan par dga' ba bskyed kyi gzhon nu mgyogs pa dang stobs dang shugs dang mthu thob pa cher skyes pa de rnams la ni ma yin pa kho na'o//de ci'i phyir zhe na/ da ni 'khor los sgyur ba'i rigs mi 'chad pa'i ched du gnas par 'gyur ba'i phyir ro/ /de bzhin du sems dang po bskyed pa'i byang chub sems dpa' dbang po yongs su ma smin pa/ nyon mongs pa'i 'byung ba chen po nur nur por gyur pa/ tha mal pa sangs rgyas kyi chos thams cad sgrub pa'i ched du 'khor bar 'khor mod/'on kyang der sngon gyi sangs rgyas mthong ba'i lha rnams shin tu stobs dang ldan par dga' ba bskyed kyi/ dgra bcom pa rnam par thar pa brgyad la bsam gtan pa de rnams la ni ma yin pa kho na'o/ /de ci'i phyir zhe na/ de ni sangs rgyas kyi gdung mi 'chad pa'i ched du gnas pa'i phyir ro zhes so//'od srungs 'di lta ste/ bya ka la ping ka'i phru gu sgo nga'i spubs na gnas pa mig ma bye ba yang / 'di lta ste/ zab cing snyan pa'i sgra skad bsgrags pas bya'i tshogs thams cad zil gyis gnon to/ /'od srungs de bzhin du sems dang po bskyed pa'i byang chub sems dpa' ma rig pa'i sgo nga'i sbubs na gnas pa las las dang nyon mongs pa'i mun pa dang rab rib kyi dra bas mig khebs pa yang /'di lta ste/ dge ba'i rtsa ba yongs su bsngo ba'i sbyor ba dang / sgrub pa'i sgra bsgrags pas/ nyan thos dang rang sangs rgyas thams cad zil gyis gnon to//'od srungs 'di lta ste/ ri'i rgyal po gangs ri la sman gang yod pa de rnams nga yir bya ba med/ yongs su gzung ba med/ rnam par rtog pa med de/ nad gang la btang ba de zhi bar byed do/ /'od srungs de bzhin du byang chub sems dpa' gang ye shes kyi sman yang dag par sgrub pa de thams cad rnam par rtog pa med par yang dag par sgrub cing sems can thams cad la sems mnyam pas de rnams gso ba la yang rab tu sbyor bar byed do//'od srungs 'di lta ste/ ji ltar zla ba gsar ba la phyag 'tshal ba de ltar zla ba gang ba la ma yin no/ / 'od srungs de bzhin du nga la shin tu stobs dang ldan par dad pa de rnams kyis byang chub sems dpa' rnams la phyag bya'i de bzhin gshegs pa la ma yin no/ /de ci'i phyir zhe na/ byang chub sems dpa' byung ba ni de bzhin gshegs pa rnams yin la/ de bzhin gshegs pa las byung ba ni nyan thos dang rang sangs rgyas thams cad do zhes so//byang chub sems dpa'i sar yang / 'di gnyis ni byang chub sems dpa' sems dang po bskyed pa brtan pa'i sems bskyed pa'i phan yon dag ste/ sems bskyed ma thag tu sems can thams cad kyi yon gnas su gyur par 'gyur ba dang / bla mar gyur pa dang bsod nams kyi zhing dang skye dgu rnams kyi pha rol 'dra ba dang gnod pa med pa'i bsod nams yongs su 'dzin par byed pa'o/ /de la ni gnod pa med pa'i bsod nams te/ gang gis bsrungs pa'i byang chub sems dpa' gnyid log gam myos par gyur pa la yang sbrul lam gnod sbyin nam mi ma yin pa gnyug mar gnas pa rnams kyis tho 'tshams par mi byed do//tshe brjes na'ang bsod nams des gnod pa nyung ba dang / nad med pa'i rang bzhin can du 'gyur ba nas/ dran pa nyams pa med pa dang / sems nyams pa med pa'i bar du'o/ /de las gzhan pa'i lag tu song ba rnams ma grub pa/sems can rnams kyi yams dang nye bar 'tshe ba dang / nad 'go ba nye bar zhi bar byed pa'i gsang sngags kyi tshig rnams dang / rig sngags kyi tshig rnams kyang de'i lag tu son pa rnams 'grub na/ grub pa rnams slar smra ci dgos/ zhing gang na gnas pa der 'jigs pa dang skrag pa dang / mu ge'i 'jigs pa rnams dang / mi ma yin pas byas pa'i nye bar 'tshe ba rnams kyang / ma byung ba rnams mi 'byung la byung ba rnams kyang zhi bar 'gyur ro/ /gal te sems dang po bskyed pa'i byang chub sems dpa' de brgya la sems can dmyal ba rnams su ngan 'gro'i sar skyes kyang de tshad chen pos shin tu myur bar grol la/dmyal ba pa rnams las shin tu chung ba'i sdug bsngal myong zhing / ches shin tu skyo ba'ang skye'o/ /sems can de rnams la yang snying rje'i sems nyid do/ /de ltar gnod pa med pa'i bsod nams yongs su 'dzin pa pos de lta bu'i cha dang mthun pa'i phan yon mang po rnams thob po zhes gsungs so//bsam pa dang ldan pa ni gser bzang po lta bu ste pha rol tu phyin pa drug gis bsdus pa'i phan pa dang bde ba'i bsam pa ni phyi ma dang de'i dus dag tu rnam par 'gyur ba mi bstan pa'i phyir te/ yang dag par rdzogs pa'i byang chub kyi bar gyi bsam pa ni bsam pa'o//de yang rnam pa gsum ste/ de bzhin gshegs pa la mchod par 'dod pa yongs su rdzogs par byed pa'i bsam pa dang / zhing yongs su sbyong ba'i bsam pa dang / sems can bde ba'i bsam pa'o/ /de la dang po yang ba dang lci ba dang rnam pa gnyis te/phyogs bcu rnams su 'jig rten gyi khams thams cad du gang sangs rgyas bcom ldan 'das gdul bya nye ba med pa nyid kyis mya ngan las 'das pa bstan pa/ gzhan rnams kyis mi mthong ba'o zhes 'das pa rnams dang gang yang gdul bya nye ba rnams kyis mthong bzhin pa nyid kyis na bzhugs pa rnams dang gang yang mngon par rdzogs par sangs rgyas pa don rdzogs par byas pa/myur du mngon par rdzogs par 'tshang rgya bar 'gyur ba zhes pa ma byon pa rnams te/ de rnams bdag gis bla na med pa'i mchod pas mchod par bya'o zhes pa ni yang ba ste/ de rnams kyi ched du sku gzugs rnams dang mchod rten rnams dang nam mkha' la yang mchod pa byed pa'i phyir ro//byang chub sems dpa' sbyin pa la sogs pa'i pha rol tu phyin pa sgrub pa ni sgrub pa'i mchod pa ste/ de yongs su rdzogs par byed pa'i bsam pa ni lci ba'o/ /gnyis pa ni bdag gis sangs rgyas kyi zhing mtho dma' dang sdong dum dang tsher ma dang gseg ma dang gyo mo dang bong ba dang gcan gzan dang sbrul dang chom rkun dang mu ge dang chu dang nad kyi dgon pa dang bral ba nyid kyi phyir rnam par dag cing lag mthil ltar mnyam pa nyid bal ltar 'jam pa yangs pa dang /dpag bsam gyi shing ljon pa la sogs pa dang ldan pa/ngan 'gro'i sa dang bral ba shel dang in+d+ra nI la dang / bai DUr+ya la sogs pa'i rang bzhin du gyur cig ces pa'o/ /gsum pa ni zhing der gang khams dang 'gro ba dang skye gnas dang rigs kyis bsdus pa'i sems can ji snyed pa thams cad ngan 'gro ba rnams kyang lha dang mi'i bde ba rab tu gyur pa ngan 'gro can ma yin pa'i bde bas rtag tu bde bar gyur cig /lus dang sems gnod pa dang bral ba dang / de rnams yo byad gang dang gang gis bde ba 'di dang 'di 'dra ba mngon par 'dod pa'i yo byad de dang de rnams la bdag gi dge ba'i las yongs su smin pa las nye bar 'byung ba dang / rdzogs pa'i byang chub kyi tshogs kyi rjes su mthun par yang gyur cig /de ltar de rnams sangs rgyas kyi chos rnams kyis yongs su smin pa dang / yid la re ba rdzogs pa dang bla na med pa'i sangs rgyas kyi chos rnams dang ldan par bya'o zhes pa'o/ /lhag pa'i bsam pa dang ldan pa ni dkar po'i phyogs kyi zla ba gsar pa lta bu ste/ des dge ba rnams skye zhing 'phel ba'i phyir ro/ /khyad par rtogs pa'i ched du ba'i bsam pa ni lhag pa'i bsam pa ste/ gang bcom ldan 'das mar gsungs pa/ des shes rab kyi pha rol tu phyin pa la gnas te/ byang chub kyi phyogs kyi chos sum cu rtsa bdun rnams bsgom par bya'o nas ji srid du sangs rgyas kyi chos ma 'dres pa bco brgyad bsgom par bya'o zhes pa'i bar du'o//de nyid kyi phyir sbyor ba goms pa 'di yang dag par skye bar byed 'phel bar byed de/ dkar po'i phyogs kyi zla ba gsar pa bzhin no/ /dkon mchog brtsegs par ni/ don gyis na zla ba dang mtshungs par 'gyur gyi yang ji ltar zla ba dkar po'i phyogs kho na snang bar byed cing nag po'i phyogs la ma yin pa de ltar byang chub sems dpa' ma yin te/spyi'i mtshan nyid kyis nag po dang dkar po'i phyogs kyi chos thams cad ye shes kyis snang bar byed pa nyid kyis so zhes so/ /de ltar 'di ni las dang po pa'i ngo bo'i sems bskyed pa gsum la tshogs kyi sar/bsam gtan mngon shes bsgrubs pa las/ /sangs rgyas dpag tu med rnams la/ /mchod pa'i don dang mnyan ched du'ang / /de ni 'jig rten khams su 'gro/ /'di yis sangs rgyas dpag med rnams/ /bskal pa grangs med bsnyen bkur nas/ / de la bsnyen bkur byas pa las/ /sems ni las rung mchog tu gyur/ /chos dang gang zag gi bdag med pa nyid kyi gdams pa dang / rjes su bstan pa dang / shes rab kyi pha rol tu phyin pa yid la byed pa brtsams pa nyid las su rung bar gyur pa na chos kyi rgyun zhes bya ba'i ting nge 'dzin thob ste/gang thob pa las stan gcig la gnas pas/ sangs rgyas dang byang chub sems dpa' thams cad kyis chos bstan pa nyan pa dang gzhung dang don dag 'dzin pa'o/ /ting nge 'dzin de thob na ni ting nge 'dzin dang shes rab dag mngon par 'phel ba'i don du sangs rgyas rnams las gdams pa thob po//de yang phyogs so sor gang gA'i klung gi bye ma dang mnyam pa'i de bzhin gshegs pa rnams lta/ de rnams chos bstan pa yang nyan/ dge 'dun la yang bsnyen bkur byed/ sangs rgyas kyi zhing yongs su dag pa yang lta/ de thams cad la yang bdag dang gzhan du 'du shes pa med/pha rol tu phyin pa rnams la yang spyod do nas/ ji srid sangs rgyas kyi chos rnams thams cad kyang yongs su rdzogs par byed de/ de las kyang thams cad la rlom sems med do zhes pa spyod pa rnams kun nas dang yang dag par yongs su 'dzin pa'i phyir/ lam ji ltar rigs pa tshogs kyi sar dang / gong ma gong ma'i sems kyi gnas skabs su yang rim gyis bskyed pa'i mchog dang rab mchog la sogs pa'i bye brag gis spyan lnga rnams so sor 'thob la/ mngon par shes pa drug rnams kyang ste/ de rnams la yang rlom sems su mi byed la/ gang de rnams kyis shes pa de thams cad kyang mi dmigs so/ /de la sha'i mig ni gang gzugs rnams mthong ba ste/ de bcom ldan 'das mar gsungs pa/ shA ri'i bu byang chub sems dpa' sha'i mig gis dpag tshad brgya mthong ba yod do zhes pa nas brtsams nas/ ji srid du gang stong gsum gyi stong chen po'i 'jig rten gyi khams mthong ba yod do zhes pa'i bar du'o//rnam par smin pa pa nyid kyis na de'i yul so sor nges pa nyid kyi phyir ro/ /sha'i mig gi khyad par bag tsam ni srog chags phal che ba tsam la yod do/ /lha'i mig ni gang gzugs rnams dang 'chi 'pho dang skye ba dag kyang mthong ba'o//de gsungs pa/ shA ri'i bu rgyal chen bzhi'i ris pa rnams nas 'og min gyi bar gyi lha rnams kyi lha'i mig de ni byang chub sems dpas rab tu shes so/ /gang yang byang chub sems dpa'i lha'i mig de ni de lha de rnams kyis rab tu mi shes so zhes so/ /phyogs bcu rnams su sems can 'chi 'pho ba dang skye ba thams cad 'di'i yul yin pa nyid kyi phyir ro//shes rab kyi spyan ni chos thams cad mi dmigs pa rnam par mi rtog pa ste/ gang zag gi bdag med pa mthong ba tsam ni rgyun du zhugs pa'i 'bras bu la zhugs pa rnams la yang yod do/ /chos kyi spyan ni gang 'phags pa'i rtogs pa'i spyod yul can te/de gsungs pa/ 'dir byang chub sems dpa' rnams kyi spyan gyis 'di ltar shes te/ 'di ni dad pa'i rjes su 'brang ba'o/ /'di ni chos kyi rjes su 'brang ba'o nas ji srid 'di ni bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ba'i bar du'o zhes pa'o//'di bag tsam ni dgra bcom pa la yang yod do/ /gnas dang gnas ma yin pa mkhyen pa spangs pa'i mkhyen pa dgu rnams chos kyi spyan no zhes dbyig gnyen no/ /sangs rgyas kyi spyan ni gang chos thams cad rnam pa thams cad du mngon par rdzogs par rtogs pa'o//'di kho na stobs bcu'i ngo bo zhes kha cig go/ /mngon par shes pa rnams ni rdzu 'phrul gyi bya ba dang lha'i rna ba sems can thams cad kyi sems kyi spyod pa shes pa dang / sngon gyi gnas rjes su dran pa dang / lha'i mig dang zag pa zad pa shes pa zhes pa drug rnams so//lha'i mig gi rnam par shes pas 'chi 'pho ba dang skye ba dag shes so/ /'di ni bsgom pa mngon par 'du byed pa las skyes pa ste/ snga ma lha'i spyan ni rnam par smin pa pa'o/ /ci ltar sangs rgyas kyi spyan dang mngon par shes pa drug pa byang chub sems dpa' rnams kyir brjod ce na/ sa brgyad pa la byang chub sems dpa' de dag gnyis ka so sor 'thob pa ste/ sangs rgyas kyi sa la ni de dag yongs su rdzogs pa dang yongs su dag pa mthar thug par 'gyur ro/ /de ltar sbyin pa la sogs pa tshogs kyi go cha dang ldan pa 'di sems bskyed pa 'jug pa'i sgrub pa mngon par sgrub par byed do//de yang sbyor ba dang ldan pa me lta bu ste/ des khyad par rtogs pa ni rab tu gyur par 'gro ba'i phyir te/ bud shing gi khyad par gyis me bzhin no/ /de nyid kyi phyir lhag pa'i bsam pa yang 'di lta ste/ 'di chos rab tu gyur pa 'dod pa nyid kyis so/ /dkon mchog brtsegs par gsungs pa/ don gyis na me dang mtshungs par 'gyur gyi/ yang ji ltar me ni rnam par bsgrubs pa'i sangs rgyas kyi zhing 'jig par byed par 'gyur ba de lta bu byang chub sems dpa' ma yin no/ /'on kyang dge ba'i rtsa ba yongs su smin pa rnams kyi rnam par grol ba yang dag par reg pa mngon par sgrub cing rnam par gnas pa'i ched du yang dag pa'i gdams ngag nye bar sdud pa nyid kyis so zhes so//'phags pa dkon mchog sprin gyi mdor yang / mos pas spyod pa'i sa 'di kho na la gnas pa'i byang chub sems dpa' so so skye bo yin kyang byis pa'i rgud pa thams cad las yang dag par 'das pa ste/ ting nge 'dzin dang gzungs dang rnam par thar pa dang mngon par shes pa'i yon tan grangs med pa dang ldan par gsungs so//de ni bsam gtan dang gzugs med pa la sogs pa dang / pha rol tu phyin pa drug dang / byang chub kyi phyogs kyi chos la sogs pa dang / tshad med pa rnams dang / stong pa nyid nyi shu'i chos thams cad kyang dmigs su med par sbyor ba dang /sbyin pa'i pha rol tu phyin pa nas shes rab kyi pha rol tu phyin pa'i bar la sbyin par bya ba dang ster ba po dang len pa po rnams nas ji srid du pha rol tu phyin pa rnams kyi dang / byang chub sems dpa' dang yid la byed pa rnams kyang mi dmigs pa'i ngo bo 'khor gsum yongs su dag pa la goms par byed do//sgom pa po dang / bsgom par bya ba dang / sgom pa rnams dmigs pa med pa'i ched du bya bas dge ba'i chos thams cad sgom par byed do/ /mngon par shes pa lnga rnams kyis sangs rgyas kyi zhing sna tshogs su 'gro'o/ /der yang sangs rgyas bcom ldan 'das rnams la mchod par byed do//de rnams las theg pa chen po nyan to/ /sems can rnams yongs su smin par byed do/ /rang gi sangs rgyas kyi zhing yongs su sbyong bar byed do/ /rnam pa thams cad mkhyen pa nyid rjes su thob nas chos kyi 'khor lo bskor bar bya zhes spro bar byed do/ / phyogs bcu'i sangs rgyas grangs med pa rnams blta'o/ /de rnams kyis kyang 'di yongs su sgrogs so/ /de ltar dgu po 'di rnams la shin tu legs par so sor 'jug go/ /de bzhin du yang bstan bcos ni/ /bsam gtan gzugs med sbyin sogs dang / /lam dang byams la sogs pa dang //dmigs med sbyor bar son pa dang / /'khor gsum rnam par dag pa dang / /ched du bya dang mngon shes drug /rnam kun mkhyen pa'i tshul la ni/ /'jug pa'i sgrub pa theg chen la/ /nges par 'dzeg par shes par bya/ /zhes so/ /'dir sems can kun gyi mchog nyid kyi sems chen po nyid la sogs pa'i ched du bya ba rnam pa gsum po ched du bya ba'i 'jug par smras pas/seng ge bzang pos stong phrag nyi shu lnga pa'i gzhung 'phags pas drangs pa ma mthong ngo zhes mtshon no/ /de ltar 'jug bzhin pa 'di/ lus la srin bu'i rigs stong phrag brgyad cu dang bral ba dang / bzod pa thob pa ste/las kyi dbang gis ngan song du mi 'gro ste/ ngan 'gro'i rgyu 'dod chags la sogs pa skye ba med pa'i phyir ro/ /gang bzod pa 'bring la gsungs pa/ de nam yang mngal du mi skye ste/ rtag tu rgyun ma chad par rdzus te skye'o zhes pa la sogs pa'o/ /snying rje ni gzhan don du ngan 'gror 'gro ba kho na'o//de bzhin du 'di mi khom brgyad rnams su mi skye'o/ /bud med kyi dngos po yongs su mi 'dzin no zhes pa la sogs pa'o/ /log par lta ba dang / dmyal ba dang / dud 'gro'i skye gnas dang / gshin rje'i 'jig rten du skye ba dang / sangs rgyas kyi gsung mi thos pa dang / yul mtha' 'khob tu skye ba dang /dbang po rnams glen zhing lkugs pa nyid dang / lha tshe ring por skye ba'o zhes pa mi khom pa brgyad rnams so/ /'dir tshe ring po ni gzugs med pa rnams dang 'du shes med pa'o/ /bud med nyid bkag pa ni gzhan gyi dbang nyid kyis sangs rgyas nyid dang rjes su mthun pa rtogs pa la rab tu sbyor ba'i dbang nyid kyi skabs ma yin pa nyid kyi phyir ro//skyes pa'i dngos po kho na rdzogs pa'i byang chub kyi tshogs dang rjes su mthun pa nyid kyi phyir ro/ /ting nge 'dzin rnams kyang rtag par rab tu ngu ba bzhin du so sor thob pa'o/ /ji skad du chos mchog chung ngur chos thams cad skye ba med pa zhes bya ba'i ting nge 'dzin zhes pa la sogs pa nas/dpa' bar 'gro ba dang nam mkha' mdzod dang rin chen phyag rgya dang / seng ge rnam par rtsen pa la sogs pa'i bar myur du bla na med pa yang dag par rdzogs pa'i byang chub pa'i rgyu'i ting nge 'dzin rnams la dmigs so zhes gsungs so/ /chos mchog chen po nas bzung nas tshogs rnams sgrub par byed do//de ltar ni snying rjes phyogs bcu rnams su so sor gang gA'i klung gi bye ma dang mnyam pa'i 'jig rten gyi khams na gnas pa nas/ dmyal ba dang / byol song dang / yi dags la sogs pa'i sems can rnams rang gi lus kyi 'od kyis snang bar byas nas sdug bsngal thams cad zhi bar byas te/sangs rgyas dang bcas pa'i lha dang mi rnams su skyer 'jug ste/ sangs rgyas la sogs pa la phyag 'tshal ba thos pas de yid la byed pa las de rnams ngan 'gro rnams las 'thon te/ rdzogs pa'i byang chub kyi bar du sangs rgyas mnyes par byed pa dang rjes su mthun pa'i skye ba yongs su 'dzin zhing pha rol tu phyin pa drug la sogs pa rnams rgyun du gong nas gong du 'phel bar byed du 'jug go//gzungs rnams kyang so sor 'thob po/ /de yang dran pa dang shes rab kyi rang bzhin bzhi rnams te/ bzod pa'i gzungs dang / chos kyi gzungs dang / don gyi gzungs dang / sngags kyi gzungs so/ /de la a ra pa tsa na la sogs pa'i yi ge rnams la/ de'i don de bzhin du sgro btags nas sgom par byed pa rnams kyi bsgom pa yongs su rdzogs pa ni yi ge de'i don dam pa la bzod pa skye ba de bzod pa'i gzungs te/ shes rab kyi bzod pa 'dzin pa'i phyir ro/ /de nas phyogs bcu'i sangs rgyas dang byang chub sems dpa' thams cad kyis bstan pa'i phung po 'dzin pa'i rgyu ni chos kyi gzungs te/dpag tu med pa'i chos rnams thos pa tsam gyis/ mtha' med pa'i dus su 'dzin pa'i phyir ro/ /de nas de bzhin du de'i don 'dzin pa'i rgyu ni don gyi gzungs so/ /de nas sems can rjes su 'dzin par byed pa'i sngags sgyu ma lta bu rnams 'chad pa la dbang ba ni sngags kyi gzungs so//de la bcom ldan 'das ma chen mo dag tu gsungs pa/ a yig ni chos thams cad kyi sgo ste/ gdod ma nas ma skyes pa nyid kyi phyir ro zhes te/ a yig ni chos thams cad kyi ji lta bu'i yang dag pa so sor rtogs pa'i sgo ste thabs so//ci'i phyir zhe na/ gdod ma nas ma skyes pa nyid kyi phyir te/ gang gi phyir chos thams cad gdod ma dri ma dang bcas pa'i gnas skabs kho na na skyes pa med pa de'i phyir 'dis skye ba med pa'i don du a yig la sgro btags nas sgom pa goms pa'i stobs las a yig tsam legs par bsgoms pa na chos thams cad la skye ba med pa'i bzod pa thob po zhes pas ma skyes pa nyid ni a yig gi don to//de bzhin du ra yig ni chos thams cad kyi sgo ste rdul dang bral ba nyid kyi phyir ro zhes so/ /ji ltar nam mkha' rdul gyis mi gos pa de bzhin du de bzhin nyid kyang nyon mongs pa'i rdul gyis mi gos so zhes pa'i don to//de bzhin du pa yig ni chos thams cad kyi sgo ste/ don dam pa nges par zhugs pa nyid kyi phyir ro zhes so/ /don dam pa ni nges par zhugs pa'am/ chos thams cad la de yang de bzhin no zhes pa ni pa yig gi don to/ /de bzhin du tsa yig ni chos thams cad kyi sgo ste/'chi 'pho dang skye ba mi dmigs pa'i phyir ro zhes so/ /de bzhin nyid la 'chi ba'i srid pa dang skye ba'i srid pa dag med pa tsa yig gi don to/ /de bzhin du na yig ni chos thams cad kyi sgo ste/ ming dang bral ba nyid kyi phyir ro zhes te/ de bzhin nyid la ming du gdags pa mi ldan pa ni na yig gi don to//de ltar la yig la sogs pa rnams kyi don bcom ldan 'das ma dag tu rgya cher shes par bya'o/ /phyi mo'i yi ge rnams ji snyed pa de snyed kyi gzungs kyi sgo rnams so/ /rnam grangs gzhan ni gang bzod pa skye ba'i ched du gsungs pa'i sngags kyi tshig /tad ya thA/ i Ti mi Ti ki Ti ni k+Shan ti pa dA ni swAhA/ zhes pa la sogs pa de rnams don dam par rang bzhin med par sgom par byed cing de'i rjes su 'brang bas chos thams cad kyang stong pa nyid du yang dag par rjes su lta ba las don dam pa'i chos rnams la bzod pa'i phyir de kho na nyid kyi ye shes kyi skye ba dang rjes su mthun pa'i bzod pa skye'o zhes pa'o/ /de la mos pas spyod pa'i sar bzod pa'i gzungs 'thob la/gzhan gsum rnams ni sa rab tu dga' ba nas bzung nas so/ /'dir ni byang chub sems dpa' ting nge 'dzin la dbang ba nyid kyis sngags kyi yi ge rnams byin gyis rlob ste/ sngags kyi yi ge 'di rnams cho ga 'di lta bu sems can thams cad kyi yams dang nye bar 'tshe ba dang nad 'go ba dang /'khrug pa thams cad zhi ba'i ched du dang / sdig pa thams cad dang ngan 'gro thams cad zad pa'i ched du grub par gyur cig ces de ltar byin gyis brlabs pa de rnams cho ga'i khyad par des 'grub pa kho na'o/ /de byin gyis rlob pa'i ye shes ni sngags kyi gzungs so//gzungs de'i dmigs pa'i dngos po nyid kyis na yi ge de rnams kyang gzungs kyi sgras brjod do/ /gzhan yang ma na shes pa la'o/ /trai nya skyong ba la'o zhes pa ye shes dang snying rje ni sngags kyi sgras brjod par bya la/ de dag gis rgyu mthun pa nyid kyi phyir yi ge de rnams kyang sngags su brjod do//ma rig pa spong bar byed pa nyid kyi phyir dang rig pa skyed par byed pa'i phyir de rnams rig sngags so/ /rnam pa thams cad mkhyen pa nyid kyi brten pa'i gnas nyid kyi phyir tshig rnams te/ des na gzungs kyi gsang sngags kyi gnas rnams dang rig sngags kyi tshig rnams so zhes pa yang ming ngo / /de la sa dang po la khyad par can gyi byin gyis brlabs pa zhes pa'i gzungs 'thob ste/de'i dbang las mchog tu gyur pa'i chos rnams kyis byin gyis brlabs par 'gyur ro/ /gnyis pa la sogs pa'i sa dgu rnams la rim pa ji lta bar gong nas gong du rab mchog tu gyur pas/ dri ma med pa dang / legs par rab tu gnas pa dang /thub par dka' ba dang / sems kyi rgyan dang / ye shes dkyil 'khor gyi sgron ma dang / khyad par du 'gro ba dang / rnam par mi rtog pa dang / sgo mtha' yas pa dang / mi zad pa'i za ma tog go/ /de bzhin du yang so so la gzungs re re sngon du 'gro ba'i gzungs stong phrag grangs med cing dpag tu med pa du ma rnams so sor 'thob po//gzhan yang phyogs bcu'i 'jig rten gyi khams na bzhugs pa'i sangs rgyas kyis dgongs pa la sogs pas yongs su gzung bas na/ bar chad bya ba'i ched du rab tu 'bad pa'i bdud kyi nus pa 'joms pa la sogs pa'i yon tan rnams rgyas pa dang bcas pas mdo rnams su brtson 'grus can rnams kyis shes par bya'o//de ltar yang byang chub sems dpa' bshes gnyen dam pas legs par yongs su bzung nas/ dge ba'i rtsa ba legs par bsags pa/ tshogs legs par rdzogs pa/ snying rje chen po la brten pa 'di/ 'gro ba thams cad yongs su bskyab pa'i ched dang rnam pa thams cad pa'i thams cad mkhyen pa'i ye shes thob pa'i ched du dang /chos kyi 'khor lo chen po rab tu bskor ba'i ched du/ chos kyi dbyings kyis klas shing nam mkha'i khams kyi mthar thug pa phyi ma'i mtha'i mur thug par sems lnga pa skyed par byed do/ /sems bskyed pa de yang sbyin pa'i pha rol tu phyin pa dang ldan pa gter chen po lta bu ste/zang zing gi longs spyod rnams kyis sems can dpag tu med pa tshim par byed pa'i phyir dang mi zad pa nyid kyi phyir ro/ /gang skyes pa tsam gyis byang chub sems dpa' byis pa so so'i skye bo dang nyan thos dang rang sangs rgyas kyis thams cad las 'das par 'gyur ro//byang chub sems dpa'i skyon med pa la zhugs par 'gyur/ de bzhin gshegs pa'i rigs su skye bar 'gyur/ srid pa bar ma las khu ba la bzhin du mthong ba'i lam la nges pa ji srid par 'gyur ro/ /rdzogs pa'i byang chub kyi dpung gnyen can no zhes pa 'di'i mthong ba'i lam sa dang po'o/ / gang gi phyir byang chub sems dpa' rnams kyi snying rje la sogs pas yongs su gzung ba'i zag pa med pa'i ye shes kho na char rnam par phye ba ni sa'i ming 'thob ste/ yon tan gyi rten du gyur pa nyid kyi phyir ro/ /de yang gong nas gong du yon tan gyi grangs dang mthu phul du byung ba thob cing sbyin pa la sogs pa'i pha rol tu phyin pa lhag pa dang /rnam par smin pa rab mchog tu gyur pa'i bye brag las/ rab tu dga' ba dang / dri ma med pa dang / 'od byed pa dang / 'od 'phro ba dang / sbyang dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin dang / kun du 'od ces pa rnam pa bcu gcig tu rnam par gzhag gi/'di'i rang gi ngo bo phul du byung bas byas pa'i tha dad pa brjod par bya ba'am mnyan par bya ba med do/ /ji skad du 'phags pa sa bcu par gsungs pa/ de ni bsam dang sems kyi lam rnams spangs/ /ye shes mngon sgrub thub pa'i dbang pos mkhyen/ /phung po skye mched khams kyis phye ma yin//sems kyis rtogs min yid kyis bsam ma yin/ /ji ltar bar snang bya rjes mkhas rnams kyis/ /smra bar mi nus mthong bar nyer 'gro min/ /de ltar rgyal ba'i sras kyis sa kun kyang / /brjod mi nus na mnyan par ga la nus/ /zhes so/ /nam mkha' la 'gro ba'i bya'i rkang rjes ni brjod par mi nus shing blta bar yang ma yin te/nam mkha'i phyogs ni de'i rkang rjes bzhin du yongs su bcad bya'i rang bzhin ma yin pa nyid kyi phyir ro/ /de la de rnam par 'god par mi byed pa yang ma yin no/ /de bzhin du bya'i rkang rjes lta bu'i ming dang tshig dang yi ge'i tshogs rnams kyi gnas su gyur pa 'phags pa byang chub sems dpa'i sa rnams dang /rang sangs rgyas kyi sa rtogs pa'i ye shes kyis bsdus pa rnams kyang sgra ji bzhin pa'i rang bzhin ma yin pa nyid kyi phyir brjod par mi nus la mnyan par yang ma yin mod/ /de rnams de la rnam par 'god pa dbye ba kun rdzob tu mi bya ba yang ma yin no//de la mngal gyi gnas skabs dang 'dra bar byang chub sems dpa' rnams kyi sa bcu'i gnas skabs rig par bya ste/ sa 'di rnams sgrib pa dang bcas pa nyid kyi phyir ro/ /btsas pa'i gnas skabs dang 'dra bas sangs rgyas kyi gnas skabs te/ 'bras bu yongs su rdzogs pa nye bar bzung nas shes bya thams cad kyi spyod yul so sor nyams su myong ba'i phyir ro/ /bcas pa ni lus kyi dbang po thams cad kyi spyod yul so sor nyams su myong ba bzhin no/ /de la mngal gyi gnas skabs bcu ni/ khu ba'i lus kyi gnas skabs dang / nur nur po'i lus kyi gnas skabs dang /ltar ltar po'i lus kyi gnas skabs dang / mkhrang ba'i gnas skabs dang / lus dang rjes su mthun pa'i lus kyi gnas skabs dang / rang bzhin dang rjes su mthun pa'i lus kyi gnas skabs dang / las dang bcas pa'i lus kyi gnas skabs dang / yongs su rdzogs pa'i lus kyi gnas skabs kyang rnam pa gsum ste/dbang po yongs su rdzogs pa dang / mtshan yongs su rdzogs pa dang / chu zheng yongs su rdzogs pa'o/ /de rnams dang rab tu dga' ba la sogs pa'i sa rnams chos mthun par nye bar mtshon par bya'o/ /gang gi phyir 'dir dang por rang gzhan gyi don sgrub par byed pa'i 'jig rten las 'das pa'i lam thob pa las byang chub sems dpa' rab tu dga' ba de'i phyir 'di rab tu dga' ba ste dang po'o//gzhan yang rab tu dga' ba nyid ces bya ba ni sems tshim pa dang / yid bde ba nyid dang / rangs pa yid la byed pa'o/ /de yang rnam pa dgu ste/ dang bas rab tu dga' ba nyid ni dkon mchog rnams la'o//dga' bas rab tu dga' ba ni dmigs pa la dga' zhing tshim pa nyid kyis so/ /gong du son pas mchog tu dga' ba ni bdag nyid rtogs pa'i khyad par mthong bar byed pa nyid kyis so/ /mgu bas mchog tu dga' ba ni rang gi lus dang sems rjes su 'dzin pa rgyas pa nyid kyis so//rlabs kyis mchog tu dga' ba ni rang gi lus dang sems rjes su 'dzin pas khyab pa nyid kyis so/ /spro bas mchog tu dga' ba ni byang chub nye bar mthong ba las so/ /mi 'khrugs pas mchog tu dga' ba ni rang gi rgyud yongs su smin par bya ba'i ched du 'brel pa'i gtam gtan la 'bebs pa'i dus su 'khrug pa med pa nyid kyis so//rnam par 'tshe ba med pas mchog tu dga' ba ni gzhan yongs su smin par bya ba'i ched du sems can sdud pa'i dus su snying rje dang des pa nyid dag gis so/ /khro ba med pas mchog tu dga' ba ni de las log par zhugs pa'i dus su bzod pas so/ /rab tu dga' ba'i sa 'di la gnas pa'i byang chub sems dpa'/'phags pa sa bcu par gsungs pa'i smon lam chen po bcu rnams dang / 'bad pa chen po rnams mngon par sgrub bo/ /'di lta ste/ sangs rgyas thams cad la mchod pa dang rim gro bya ba'i ched du rnam pa thams cad mchog tu ldan pa mos pa rgya chen pos rnam par dag pa/ chos kyi dbyings ltar rgya che ba/nam mkha'i khams kyi mthas gtugs pa/ phyi ma'i mtha'i mur thug pa bskal pa bgrangs pa dang / sangs rgyas 'byung ba bgrangs pa thams cad du rgyun mi 'chad par mchod pa chen po dang rim gro'i ched du/ smon lam chen po dang po mngon par sgrub pa'o/ /de bzhin du de bzhin gshegs pa thams cad kyis gsungs pa'i chos kyi tshul yang dag par gzung ba'i ched dang /sangs rgyas thams cad kyi byang chub yang dag par yongs su gzung ba'i ched dang / yang dag par rdzogs pa'i sangs rgyas thams cad kyi bstan pa yongs su bsrung ba'i ched du gnyis pa'o/ /de bzhin du 'jig rten gyi khams rab 'byams ma lus pa thams cad du/dga' ldan gyi pho brang na bzhugs pa thog mar mdzad nas/ 'pho ba dang 'jug pa dang / lhums na bzhugs pa dang / bltams pa dang / gzhon nu rol pa dang / nang gi grong du bzhugs pa dang / mngon par 'byung ba dang / dka' ba spyod pa dang / byang chub kyi snying por yang dag par gshegs pa dang /bdud 'dul ba dang / mngon par rdzogs par byang chub pa dang / gsol ba btab pa dang / chos kyi 'khor lo chen po rab tu bskor ba dang / mya ngan las 'das pa chen por 'pho ba'i ched du gsum pa'o/ /de bzhin du byang chub sems dpa'i spyod pa thams cad de pha rol tu phyin pas yang dag par bsdus pa/sa yongs su sbyong ba yan lag dang nye ba'i yan lag dang bcas pa'i lam gyi gdams ngag dang rjes su bstan pa rab tu sbyin pas bstan pa'i sems bskyed pa mngon par bsgrub pa'i ched du bzhi pa'o/ /de bzhin du khams dang 'gro ba dang / skye gnas dang ris su gtogs pa'i ming dang gzugs kyis yang dag par bsdus pa'i sems can gyi khams ma lus pa yongs su smin par bya ba'i ched dang /sangs rgyas kyi chos la gzung ba'i ched dang / 'gro ba bgrangs pa thams cad rnam par gcad pa dang thams cad mkhyen pa'i ye shes la dgod pa'i ched du lnga pa'o//de bzhin du 'jig rten gyi khams shin tu rgya che ba dang / chen por son pa dang / tshad med pa dang / phra ba dang / rags pa dang / 'chol ba dang / steng g.yogs med cing gzhi phyal ba dang / 'jug pa'i khyim can dang / rnam par dbye ba mig 'phrul lta bu dang / phyogs bcu tshad med pa ma lus pa 'jug pa'i rnam par dbye ba ste/ye shes kyis khong du chud cing mngon sum du gyur par bya ba'i ched du drug pa'o/ /de bzhin du sangs rgyas kyi zhing thams cad zhing gcig dang / zhing gcig zhing thams cad du mnyam par rgyu so sor sbyong ba dang / sangs rgyas kyi zhing tshad med pa rnams 'od dang bkod pa'i rgyan gyis so sor brgyan pa dang /nyon mongs pa thams cad bsal bas yongs su dag pa'i lam dang ldan pa dang / sems can ye shes tshad med pa'i 'byung gnas kyi yongs su gang ba dang / sangs rgyas kyi yul rgya chen po la yang dag par gzhol ba dang / sems can thams cad kyi bsam pa ji lta bar yang dag par bstan cing tshim par bya ba'i ched du bdun pa'o//de bzhin du sangs rgyas dang byang chub sems dpa' thams cad dang bsam pa dang / sbyor ba mnyam pa nyid kyi ched dang / 'gran zla med pa'i dge ba'i rtsa ba bsags pa'i ched dang / rtag tu rgyun mi 'chad par sangs rgyas dang byang chub sems dpa' thams cad dang 'grogs shing mi 'bral ba'i ched dang /sangs rgyas 'byung ba ji ltar 'dod par bstan pa'i ched dang / rang gi sems bskyed pas de bzhin gshegs pa'i mthu ye shes kyis khong du chud pa'i ched dang / ma nyams shing rjes su 'gro ba'i mngon par shes pa 'thob pa'i ched dang / 'jig rten gyi khams thams cad du rnam par rgyu ba'i ched dang /sangs rgyas kyi 'khor gyi dkyil 'khor thams cad du so sor snang ba 'thob pa'i ched dang / skye ba thams cad du rang gi lus rjes su 'gro bar bya ba'i ched dang / theg pa chen po bsam gyis mi khyab pa dang ldan pa'i ched dang / byang chub sems dpa'i spyad pa spyod pa rnam par mi spyad pa'i ched du brgyad pa'o//de bzhin du phyir mi ldog pa'i 'khor lo la yang dag par gnas pa'i byang chub sems dpa'i spyod pa spyad pa'i ched dang / lus dang ngag dang yid kyi las don yod pa'i ched dang / mthong ma thag tu sangs rgyas kyi chos nges pa nyid kyi ched dang / sgra brjod ma thag tu mthu dang ye shes khong du chud pa'i ched dang /mthong ma thag tu sems can rab tu dang ba thob cing nyon mongs pa ldog par bya ba'i ched dang / sman gyi rgyal po chen po lta bu'i lus thob pa'i ched dang / yid bzhin gyi nor bu dang mnyam pa'i lus thob pa'i ched dang / byang chub sems dpa' thams cad spyod pa spyad pa'i ched du dgu pa'o//de bzhin du 'jig rten gyi khams thams cad du bla na med pa yang dag par rdzogs pa'i byang chub mngon par rdzogs par 'tshang rgya ba'i ched dang / byis pa'i lam gcig las ma 'das par byis pa'i lam thams cad du skye bar 'byung ba dang / gzhon nu rol rtsed dang / nang gi grong du bzhugs pa dang /mngon par 'byung ba dang / dka' ba spyod pa dang / byang chub kyi snying por gshegs pa dang / bdud 'dul ba dang / mngon par rdzogs par byang chub pa dang / gsol ba btab pa dang / chos kyi 'khor lo chen po rab tu bskor ba dang / yongs su mya ngan las 'das pa chen po nye bar bstan pa'i ched dang / sangs rgyas kyi yul chen po mthu dang ye shes kyi rjes su 'gro ba'i ched du/ chos kyi dbyings ltar rgya che ba nam mkha'i khams kyi mthas gtugs pa phyi ma'i mtha'i mur thug pa/ bskal pa bgrangs pa sangs rgyas 'byung ba bgrangs pa thams cad rgyun mi 'chad par ye shes chen po mngon par sgrub pa'i ched du smon lam chen po bcu pa mngon par sgrub po zhes pa de lta bu'i ngo bo 'di rnams smon lam chen po dang dbang ba chen po bcu rnams te/de la sogs pa so so la smon lam grangs med pa khrag khrig brgya stong gi 'khor can sa yongs su sbyong ba rnams te gang byang chub sems dpas sgrub pa rnams so sor 'thob po zhes pa 'di rnams bsgom pa'i lam las yongs su sbyong bar byed pa'i smon lam gyi khyad par rnams so//de la smon lam chen po dang pos ni bsod nams kyi tshogs yongs su rdzogs pa'i ched du'o/ /gnyis pa ni ye shes kyi tshogs kyi'o/ /lnga ni sems can yongs su smin pa'i ched du ste/ rten ci 'dra bas dang / sems ci 'dra bas dang / sems can gang rnams dang gang du gnas pas dang / ji ltar gyur pas yongs su smin par bya ba rnams de rnams su'o/ /gsum rnams bdag nyid kyi sa'i khyad par rtogs pa'i ched dang / byang chub sems dpa'i sa mthar thug par bgrod pa'i ched dang / thams cad kyi mthar thug par 'gro ba'i ched du'o/ /de la don du gnyer ba'i mngon par 'du byed pa ni smon lam ste 'dun pa'i khyad par ro/ /de 'grub par byed pa'i thabs ni 'bad rtsol lo/ /des 'grub par byed pa ni mngon par sgrub pa'o/ /'di gsum sa 'di la rim gyis mngon par sgrub pa'o/ /smon lam dang po la mchod pa rnam pa gsum ste/rnyed pa'i mchod pa ni na bza' la sogs pa rnams kyis so/ /bkur sti'i mchod pa ni gdugs la sogs pa rnams kyis so/ /sgrub pa'i mchod pa ni dad pa la sogs pa'i sgrub pas so/ /rim gro rnam pa gsum ste/ bsnyen bkur dang yang dag par 'tshol ba dang sgrub pa'o//rnam pa thams cad mchog dang ldan pa ni/ dngos po sna tshogs mang ba nyid kyis dang / dngos po gya nom pa nyid kyis so/ /mos pa rgya chen pos rnam par dag pa ni rab tu dang ba drag pos dang byang chub tu yongs su bsngos pa mos pas so/ /chos kyi dbyings ltar rgya che ba ni dge ba'i rtsa ba gzhan thams cad pas mchog nyid kyis so//nam mkha'i khams kyi mthas gtugs pa ni 'dod pa'i 'bras bu mi rtag pa'i rgyu nyid ni mi zad pa nyid kyis so/ /phyi ma'i mtha' mur thug pa ni rtag pa'i 'bras bu mya ngan las 'das pa thob pa'i rgyu nyid kyis so/ /bskal pa thams cad dang sangs rgyas 'byung ba thams cad du rgyun mi 'chad pa'o//gnyis pa la chos kyi tshul ni mdo la sogs pa'i lung rnams brgyud pa'o/ /yang dag par 'dzin pa ni rtogs par byed pa'i gdams ngag ster ba'o/ /lung nod pa dang / kha ton bya ba sbyin pa'i phyir ro/ /byang chub ni thob pa'i chos te byang chub rnam pa gsum mo/ /de yang dag par yongs su gzung ba ni rtogs par bya ba'i gdams ngag sbyin pas so//yongs su bsrung ba ni sgrub pa ste/ nye bar 'tshe ba las skyob pas so/ /de bzhin gshegs pa ni bstan pa phun sum tshogs pas so/ /sangs rgyas dang yang dag par rdzogs pa'i sangs rgyas ni rtogs pa dang thugs su chud pa phun tshogs pa ste/ji snyed pa dang / ji lta ba mngon par thugs su chud pa'i phyir ro/ /drug pa la/ 'jig rten gyi khams thams cad kyi mtha' dag dang / don dam pa dang / dpag tu med pa'i mtshan nyid rnams kyis ye shes khong du chud cing mngon sum du gyur par bya ba'i ched du'o/ /de la yangs pa la sogs pa rnams ni stong pa la sogs pa'i 'jig rten gyi khams gsum rnams so//phra ba ni gang rnams ni yid kyi rang bzhin lus can rnams so/ /rags pa ni gang rnams na yid kyi rang bzhin gyi ma yin pa rnams so/ /'chol ba ni go rims su mi gnas pa rnams so/ /steng g.yogs med cing gzhi phyal pa ni khyim gnas pa ma byas pa rnams so//'jug pa'i khyim can ni khyim gnas pa byas pa rnams te/ 'di ni mtha' dag gi mtshan nyid do/ /mig 'phrul gyi rnam par dbye ba nyid don dam pa'i mtshan nyid de/ las kyi sgyu ma las byung ba'i phyir ro/ /phyogs bcu tshad med pa'i rnam par dbye ba ma lus pa la 'jug pa ni dpag tu med pa'i mtshan nyid do//de la don dam pa'i mtshan nyid ni ye shes kyis khong du chud pa'i ched du'o/ /de las gzhan pa'i mtshan nyid ni so sor mngon sum du rtogs pa nyid kyi ched du'o/ /bdun pa sangs rgyas kyi zhing yongs su sbyong ba la/ de yongs su dag pa rnam pa bdun te/ thun mong ba yongs su dag pa ni zhing thams cad zhing gcig nyid kyis so//dbang du gyur pa yongs su dag pa ni zhing thams cad du mnyam par rgyu ba yongs su sbyong ba nyid kyis so/ /rab tu dang ba nyid yongs su dag pa ni sangs rgyas kyi zhing tshad med pa 'od dang bkod pa'i rgyan gyis so sor brgyan pa nyid kyis te/ 'od kyi rgyan dang gnas pa'i rgyan gyis so//yongs su longs spyad pa yongs su dag pa ni nyon mongs pa thams cad bsal bas yongs su dag pa'i lam dang ldan pa nyid kyis so/ /gnas pa po sems can yongs su dag pa ni/ sems can ye shes tshad med pa'i 'byung gnas kyis yongs su gang ba nyid kyis so/ / rgyu yongs su dag pa ni sangs rgyas kyi yul rgya chen po la 'jug pa mngon par sgrub pa nyid kyis so/ /'bras bu yongs su dag pa ni sems can gyi bsam pa ji lta bar yang dag par ston zhing tshim par byed pa nyid kyis te/ ye shes dang mthu dag gis so/ /brgyad pa la bsam pa dang / sbyor ba gcig pa ni theg pa chen po la 'jug pa'i ched du ste/theg pa gzhan mi 'dod pa'i don gyis so/ /theg pa chen po yang chen po nyid rnam pa bdun dang ldan pa'i phyir te/ dmigs pa che ba nyid ni mdo sde la sogs pa'i chos rgya chen po dpag tu med pa dang ldan pa'i phyir ro/ /sgrub pa chen po nyid ni rang dang gzhan gyi don sgrub pa'i phyir ro//ye shes chen po nyid ni gang zag dang chos la bdag med pa nyid shes pa'i phyir ro/ /brtson 'grus rtsom pa chen po nyid ni bskal pa grangs med pa gsum du rtag tu dang gus par bya ba nyid dag gis sbyor ba'i phyir ro/ /thabs la mkhas pa chen po nyid ni 'khor ba yongs su mi gtong zhing kun nas nyon mongs pa med pa'i phyir ro//yang dag par 'grub pa chen po nyid ni stobs dang mi 'jigs pa dang sangs rgyas kyi chos ma 'dres pa yang dag par 'grub pa'i phyir ro/ /sangs rgyas kyi phrin las chen po nyid ni yang dang yang du mngon par rdzogs par byang chub pa dang mya ngan las 'das pa chen po ston pa'i phyir ro//de nyid kyi phyir 'di la rab tu dang ba tsam yang 'bras bu chen por nye bar gsungs te/ zung gi mdor/ kun du dpa' bo gang la la zhig theg pa chen po la rab tu dang ba bskyed par 'gyur ba de ni bskal pa stong ngan 'gror 'gro bar mi 'gyur ro/ /bskal pa stong phrag lngar dud 'gro'i skye gnas su mi skye'o/ / de bzhin du yi dags rnams su'o/ /bskal pa stong phrag nyi shu rtsa lngar lha'i 'jig rten dang tshangs pa'i 'jig rten du skye'o zhes so/ /'dir dga' ba zhig dge ba'i rtsa ba ma skyes pa sdig pa'i grogs pos yongs su zin pa/ ming du mos pa med pa rnams 'di lta bu shin tu gya nom pa legs par bshad pa theg pa chen po'i chos la yang mchog tu zab pa dang rgya che ba nyid du 'jug par mi byed/rtogs par mi byed/ lhag par mos par mi byed/ skrag par mi byed/ rnam pa mang por smod par byed/ ji srid du sangs rgyas kyi gsung ma yin no zhes pa'i bar du smra'o/ /bcom ldan 'das kyis gsungs pa/ chos kyi rnam grangs de bzhin gshegs pas gsungs pa 'di ni theg pa chen po la yang dag par zhugs pa'i sems can rnams kyi don du'o//de ci'i phyir zhe na/ rab 'byor chos 'di dman pa la mos pa'i sems can rnams kyis mnyan par yang mi nus so zhes so/ /theg pa chen po ci ltar sangs rgyas kyi bka' ma yin/mdo sde dang 'dul ba dang mngon pa las phyi rol du gyur pa nyid kyi phyir ro/ /gsungs pa/ gang mdo sde la 'jug /'dul ba la snang / chos nyid dang yang mi dgal ba de sangs rgyas kyi gsung ngo zhes pas so/ /theg pa chen po de lta bu ma yin pas so zhe na/ ma yin te/ shes rab kyi pha rol tu phyin pa la sogs pa mdo sde dang 'dul ba rnam pa du ma rnams ni der nges par bstan la khyad par du chos thams cad kyi chos nyid do//ci ste pha rol tu phyin par yang yin kyang sde pa'i sde snod gsum du 'di 'di ltar ma bstan to zhe na/ de ltar gyur na rnam pa bco brgyad du gyes pa'i sde snod gsum po phan tshun gzhung dang don shin tu tha dad pa sangs rgyas kyi gsung ma yin par 'gyur ro//gzhan yang 'dul ba rnam par bshad pas gsungs pa/ thub pa'i dbang po yongs su mya ngan las 'das nas lo brgya nas bstan pa'i bye brag gis dang por sde pa gnyis te gnas brtan pa dang dge 'dun phal chen po dag go zhes so/ /bcom ldan 'das 'od srungs kyis kyang lung bstan te/rgyal po kr-i kI'i mi bco brgyad kyis ras yug drangs pa'i rmi lam ston pa na/ shAkya thub pa'i bstan pa rnam pa bco brgyad du gyes par 'gyur ro zhes so/ /gzhan yang chos gang de bzhin gshegs pas bstan pa ste/ tshig dang yi ge de rnams kho nas dang / go rims de nyid kyis yang dag par gzung zhing bstan pa mi nyung ma lhag pa phyin ci ma log pa de'i tshe gzhung 'di bka' mgur nas gsungs pa dpal gyi zhal nas gsungs pa zhes brjod de/ bcom ldan 'das drang srong nyid kyis 'dir zhes byas nas so/ /gang gi tshe de bzhin gshegs pas gsungs pa'i don kho na yi ge gzhan rnams dang go rims gzhan gyis nye bar sbyar ba'am yang dag par bsdus pa'am/'chad pa de'i gzhung 'di rjes su mthun pa'i bka' zhes bkod do/ /gang du don yang gzhan pa de ni bka' yang ma yin la rjes su gnang ba'i bka' yang ma yin te/ 'jig rten pa'i bstan bcos la sogs pa rnams bzhin no/ /da ni sde pa'i gzhung rnams sgra las kyang tha dad pa mang por don las kyang ste/ mdo sde yang phyin ci log tu brjod pa yang klog la/ 'dul ba gcig tu yang kha cig gis ltung bar 'gyur bar smra ba/ gzhan rnams phyir bcos pa dang bcas pa'o zhes so//chos mngon par yang / kha cig gis skad cig gcig gi mngon par rtogs pas 'bras bu khong du chud pa'o/ /kha cig gis ni skad cig bcu gsum gyi mngon par rtogs pas so/ /kha cig gis ni skad cig bcu drug gi mngon par rtogs pas so/ /gal te dgongs pa'i dbye bas skad cig ma'i dbye ba 'di rnams kyang sdud pa po rnams kyis brjod pa srid pas so zhe na/de lta yin na thams cad du sde pa gcig la skad cig ma'i dbye ba srid pa'i phyir bstan par bya bar 'gyur la de lta yang ma yin no/ /kha cig bdag med pa nyid mthong ba btags par yod par rnam par 'jog par byed do/ /kha cig gang zag rdzas su yod par ro//sde pa gcig tu yang / mdo sde pa rnam pa gzhan pa'i phyogs yongs su 'dzin la/ chos mngon pa rnams kyang gzhan du'o/ /kha cig 'dus byas thams cad skad cig par 'dod pas te/ kha cig gnyis par mi gnas pa'i phyir ro/ /kha cig sems dang sems las byung ba rnams kho na skad cig gnyis dag tu yang mi gnas shing 'byung ba dang 'byung ba las gyur pa rnams skad cig gsum du yang dag par ro//kha cig sems dang sems las byung ba rnams kho na skad cig gnyis par mi gnas pa'i phyir ro/ /kha cig sems can ring por yang gnas te/ sa ni bskal pa'i bar du gnas so zhes so//kha cig ni nyon mongs pa dang las dang skye ba zad pa tsam mya ngan las 'das pa ste tha snyad tsam du'o/ /kha cig ni mya ngan las 'das pa gdags par yod pa ste/ gang du lta ba'i nyon mongs pa dang skye ba zad par 'gyur gyi skye ba dang nyon mongs pa thams cad nyid zad pa mya ngan las 'das pa ni ma yin no zhes so//kha cig 'das pa dang ma 'ongs pa'i chos rnams dus thams cad du rdzas su yod do zhes so/ /kha cig med do zhes so/ /kha cig thob pa la sogs pa'i chos rnams rdzas su yod do zhes so/ /kha cig med do zhes so/ /kha cig srid pa bar do'i sems can rnams yod do zhes so/ / kha cig med do zhes so/ /kha cig gzugs med pa'i khams na gzugs med do zhes so/ /kha cig yod do zhes so/ /kha cig gzugs med pa'i khams na gnas med do zhes so/ /kha cig gnas dang bcas pa'o zhes te sngar ji skad bshad bzhin du ji srid sa la sogs pa rnams kyi tshad dang dbyibs nges par bstan pa tha dad pa'i bar du'o zhes so de lta bu la sogs pa phan tshun 'gal ba'i don shin tu mang po rnams de dang der smra ba mthong na de rnams ci ltar bka' nyid du rigs khyad par du yang /gang rnams kyi rtsa ba'i bsdus pa nyams so zhes khas len pa'o/ /'on te gzhung 'di rnams phyis dgra bcom pa rnams kyis mdzad pa'o zhe na ma yin te/dgra bcom pa zag pa zad pa rnams ni 'di ltar phan tshun don 'gal ba'i gzhung mdzad pa ma yin pas so/ /de'i phyir yang gzhung 'di rnams dgra bcom pa rnams kyis mdzad par mi rigs so zhes pa'o/ /'o na ci zhe na so so skye bo rnams kho nas byas so zhes rigs so//de rnams 'dzin stangs tha dad pa'i rgyu mtshan ma rig pa dang the tshom la sogs pa'i bag la nyal rnams ma spangs pa nyid kyi phyir ro/ /rnam pa 'di lta bu da ltar byas pa'i gzhung rnams su theg pa chen po legs par gsungs pa bka' ci ltar gzhug par nus 'di rnams su 'ba' zhig tu ma zad kyi gang yang de'i tshe yang de'i nyan thos kyi theg pa'i gzhung ma nyams pa sdud pa pos bsdus pa bka' de rnams su yang ste/bar shin du ring ba nyid kyi phyir ro/ /gal te dman pa'i theg par theg pa chen po zhugs pa'am nang du 'dus par gyur na ni de'i theg pa chen po nyid kyang nyams par 'gyur te/ ci rgya mtsho chen po khron pa la sogs pa rnams su ma zhugs pa nyid kyi phyir ram nang du ma 'dus pa nyid kyi phyir chu'i rten ma yin par 'gyur ram/de'i phyir de rnams su mi 'jug pa ni theg pa chen po'i yon tan kho na'o/ /de nyid kyi phyir gsungs pa/ rang gi nyid la 'jug phyir dang / /rang gi 'dul la snang phyir yang / /rgya che'i phyir dang zab pa'i phyir//chos nyid dang ni 'gal med nyid/ /ces so/ /gal te da ni sde pa'i gzhung 'di rnams bkar mi 'dod na bsnyen par rdzogs pa la sogs pa'i las rnams ji ltar 'grub/ dge slong nyid med na skyon mang po rnams su 'gyur ro zhe na/ bsnyen par rdzogs pa'i dngos po de yang yod pa'am med pa zhes ci ltar shes par bya ste/mngon sum las ma yin zhing rjes su dpag pa las kyang ma yin te/ rtags med pa'i phyir ro/ /'on kyang gzhung 'di rnams bka' nyid dam bka' ma yin pa nyid na yang bsnyen par rdzogs pa la sogs pa'i las rnams 'grub po/ /bsnyen par rdzogs pa rnam pa bcu'o zhes 'dul ba 'dzin pa rnams smra ba 'di lta ste/rang 'byung nyid kyis ni sangs rgyas rnams dang rang sangs rgyas rnams kyi'o/ /skyon med pa la zhugs pas cang shes kauN+Di n+ya dang rta thul dang bzang ldan dang rlangs pa dang ming chen te lnga rnams kyi'o/ /dge slong tshur shog gis grags pa la sogs pa rnams kyi'o//ston par khas blangs pa las 'od srungs chen po'i'o/ /dris shing mnyes pas legs byin gyi'o/ /lci ba'i chos khas blangs pas skye dgu'i bdag mo chen mo'i'o/ /pho nyas chos sbyin ma'i'o/ /'dul ba 'dzin pa dang lnga pas yul mtha' 'khob rnams su'o/ /bcu'i tshogs kyi dbus rnams su'o//skyabs su 'gro ba gsum brjod pas bzang sde'i tshogs drug cu rnams kyi'o zhes so/ /de ltar rjes su gnang ba'i bka' rnams bklags pas kyang gsol bar byed de/ don gyis de rnams de bzhin gshegs pas gsungs pa nyid du khas blangs pa'i phyir ro/ /de nyid kyi phyir gsungs pa/ sangs rgyas kyi gsung ni don la rton pa ste/tshig 'bru la rton pa ni ma yin no zhes so/ /rgyas pas ci zhig ste/ dka' ba 'di ni brgal dka' ba ste/ gang de bzhin gshegs pa'i bstan pa la zhugs pa rnams kyang chos 'dod pa la bsgribs pas phyin ci log pa rnams theg pa chen po spong ba'i tshul ma yin pa chen po la 'jug pa'o//ji skad du gsungs pa/ theg pa chen po gang zhig tu/ /thams cad snying rje'i rtsa ba can/ /rgyu mthun ye shes dri med bshad/ /de la sems yongs su zhig smod/ /skyon dang yon tan mi shes pa'am/ /yon tan skyon du lta ba'am/ /yon tan ldan la sdang ba zhig /theg pa che la smod byed pa'o//zhes so/ /yang na 'di la mtshar ba ci yod de gang long ba rnams kyis nyams par bya ba yin pas so/ /gang bzlog par byas pa rnams kyang mi nyan zhing / bdag dang gzhan rnams g.yang sa chen por ltung bar byed do zhes rjes su brtse bar bya ba'o zhes pa shin tu 'phros pas chog go/ / dgu pa la de ma thag pa gsum gyis lus la sogs pa'i las bstan to/ /rang bzhin gyis dang / gegs las skyes pa'i sdug bsngal gyi gnyen por go rims bzhin du sman chen po dang yid bzhin gyi nor bu dang mnyam pa nyid do/ /bcu pa la ni byis pa rnams te gdul bya rnams kyi gtso bor gdul ba'i gnas nyid kyi phyir/byis pa'i lam gsungs pa ni 'dzam bu'i gling ngo / /'dzam bu'i gling gcig gi dus su 'dzam bu'i gling thams cad du mngon par rdzogs par byang chub pa ston pa'o zhes pa'i don to/ /mthu ni 'jig rten gyi khams gzhan rnams su gdul bya thams cad la bden pa bstan pa'i ched du'o/ /ye shes kyi rjes su 'gro ba ni gcig mngon par rdzogs par byang chub pas chos la bdag med pa'i rnam pas chos thams cad rang bzhin gyis mya ngan las 'das par mos pa'i phyir ro//chos kyi dbyings ltar rgya che ba ni ngag gcig brjod pas gdul bya mos pa sna tshogs pa rnams kyi sems la cig car go bar byed pas so//smon lam 'di rnams sa gong ma rnams su rnam par dag par 'gyur ro/ /mos pas spyod pa'i sa la ni 'di lta 'di ltar gyur zhes mos pa rnams so/ /de bzhin du sa 'di nas bzung nas byang chub sems dpa' tshul khrims dang ting nge 'dzin dang shes rab dang rnam par grol ba dang rnam par grol ba'i ye shes mthong ba'i phung po rnams yongs su sbyong bar byed do//'dir dang po gsum ni lhag pa'i tshul khrims la sogs pa'i bslab pa gsum mo/ /rnam par grol ba'i phung po ni mi slob pa'i lam mo/ /rnam par grol ba'i ye shes mthong ba'i phung po ni mi slob pa'i yang dag pa'i lta ba'o/ /de bzhin du yang /'di smon lam las dngos po thams cad la ltos pa med pas sangs rgyas kyi ye shes la blo rgya che ba spro ba yang dag par skyes pa/ mnyam pa nyid rtogs pa las rang gi don bzhin du gzhan gyi don rnams la 'jug bzhin pa ni stong pa chen po la rab tu 'jug ste/ gang gang gi don du gnyer ba de de la ster bar byed cing phyi rol lam nang yang rung ba gang yongs su mi gtong ba'i dngos po de med de/de ltar 'di'i gtong ba chen po 'byung ngo / /ji skad du 'phags pa sa bcu par gsungs pa/ sa 'di la gnas pa'i byang chub sems dpa' la sangs rgyas mang po rnams snang bar 'gyur te/mthong ba rgya chen po nyid dang smon lam gyi stobs kyis nas/ ji srid sangs rgyas bye ba khrag khrig 'bum phrag mang po rnams kyi bar dang de de bzhin gshegs pa de rnams mthong nas lhag pa'i bsam pa rgya chen po nyid kyis bkur ster byed/ bla mar byed/ ri mor byed/ mchod par byed do nas ji srid byang chub sems dpa'i bde bar sbyar ba rnam pa thams cad kyang nye bar sgrub pa dang /dge ba'i rtsa ba de rnams kyang bla na med pa yang dag par rdzogs pa'i byang chub tu yongs su sngo bar byed do/ /des sangs rgyas bcom ldan 'das de rnams la mchod pa las sems can yongs su smin par byed pa kun du skyes pa yin te bsdu ba'i dngos po rnams kyis sems can rnams yongs su smin par byed cing de las 'di'i sbyin pa'i pha rol tu phyin pa chos shin du lhag par 'gyur la/pha rol tu phyin pa lhag ma rnams la yang dag par mi spyod pa yang ma yin no zhes so/ /yum chen mo dag tu yang gsungs pa/ bcom ldan 'das ji srid du byang chub sems dpa' bsam pa rgya chen po dang / bdag nyid chen po'i bsam pa ngo mtshar lags so/ /bcom ldan 'das kyis bka' stsal pa/ gang 'di rnams brgya byin nyid dang 'jig rten skyong ba nyid dang 'khor los sgyur ba nyid la sogs pa'i phun sum tshogs pa rnams don du mi gnyer la/bla na med pa yang dag par rdzogs pa'i byang chub tu dge ba yongs su sngo bar byed do nas ji srid du 'di rnams chags pa med pa dang 'dzin pa med pa nyid de/ 'di ni 'di rnams kyi rgya che ba'i bsam pa nyid do/ /gang yang de'i chags pa med pa'i bde ba dang 'dzin pa med pa'i bde ba dang mya ngan las 'das pa'i bde ba ste bde ba de thams cad kyang sems can thams cad dang thun mong du 'dod cing /bla na med pa yang dag par rdzogs pa'i byang chub tu dge ba'i rtsa ba yongs su sngo bar byed pa/ 'khor ba yongs su gtong ba nyid kyis te/ 'di ni 'di rnams kyi bdag nyid che ba nyid kyi bsam pa'o/ /gsol ba/ bcom ldan 'das ngo mtshar zhing rmad du byung ba ni byang chub sems dpa'i chos rnams te de rnams thob par 'dod pa rnams kyis bla na med pa yang dag par rdzogs pa'i byang chub tu sems bskyed par bgyi'o zhes so//de la mthong ba rgya che ba nyid ni gang du mthu'i khyad par gyis gzugs kyi sku mthong ba'o/ /smon lam gyi stobs kyis ni gang nang gi yang dag pa'i smon lam las chos kyi sku mthong ba'o//thabs mkhas pa nyid kyis mang po nyid dang rab tu gyur pa bstan pa'i don du grangs rnam pa mang po'o/ /byang chub sems dpa' rnams kyi pha rol tu phyin pa bsgom pa ni bsam pa la brten pa yang ste de yang rnam pa drug ste/ mi ngoms pa dang /rgya che ba dang / dga' ba dang / phan pa dang / gos pa med pa dang / dge ba'i bsam pa rnams kyis so/ /'dir byang chub sems dpa' sems can gcig la skad cig gcig la yang gang gA'i klung gi bye ma dang mnyam pa'i 'jig rten gyi khams rin po che thams cad kyis bkang pa rnams ster zhing / de dang mnyam pa'i lus rnams kyang de dang mnyam pa'i bskal par skad cig so so la sbyin par byed la/ sems can gcig la ji lta ba de bzhin du sems can gyi khams bla na med pa yang dag par rdzogs pa'i byang chub tu yongs su smin par bya ba ji snyed pa de la yang ngo / /gzhan yang / lam ka'i 'bras mchog ldan pa'i longs spyod shing las ji lta bar//dogs pa dang bral lus can bsam pa rang bzhin gnas rnams kyis/ /gang gi nor rdzas rgya che'ang blangs nas rang nyid longs spyod pa/ /gtong dga' longs spyod can de byang chub sems dpa' las gzhan min/ /zhes so/ /'di lta bus mi ngoms pa kho na ni sbyin pa'i bsam pa'o//byang chub sems dpa' sbyin pa brgyud pa de lta bu'i ngo bo skad cig tsam yang nyams par mi byed cing byang chub kyi snying po la 'dug gi bar du rgyun gcod par mi byed de/ 'di lta bu ni sbyin pa la rgya che ba'i bsam pa'o/ /sems can de rnams de ltar sbyin pas rjes su 'dzin pa po ches dga' bar 'gyur gyi/sbyin pa des rjes su gzung bar bya bzhin pa'i sems can rnams ma yin no zhes pa 'di lta bu'i ngo bo ni sbyin pa la dga' ba'i bsam pa'o/ /gang sbyin pas phan btags pa'i sems can de rnams la byang chub sems dpa' bdag la ches phan 'dogs par blta'i/bdag nyid ni ma yin te/ de rnams bla na med pa yang dag par rdzogs pa'i byang chub nye bar ston pa rgyur byas nas so/ /'di ni phan pa'i bsam pa'o/ /sems can rnams la de ltar sbyin pa las byung ba'i bsod nams rgya chen po mngon par 'dus byas nas kyang lan nam rnam par smin pa don du gnyer bar 'gyur ba ma yin te/'di ni gos pa med pa'i bsam pa'o/ /gal te de ltar sbyin pa'i phung po rgya che ba rab tu sbyor ba'i rnam par smin pa sems can rnams kho na'i yin par mngon par dga' bar byed kyi/ bdag nyid la ma yin zhing / sems can thams cad dang thun mong du yang byas nas bla na med pa yang dag par rdzogs pa'i byang chub tu yongs su sngo bar byed de/'di ni dge ba'i bsam pa'o/ /gang byang chub sems dpa' lus gang gA'i klung gi bye ma dang mnyam pas/ tshe'i tshad de dang mnyam pa'i bskal par rgyun du yo byad thams cad kyis phongs bzhin du stong gsum gyi stong chen po'i 'jig rten gyi khams mes yongs su gang bar spyod lam rnam pa bzhi byed cing /tshul khrims kyi pha rol tu phyin pa'i skad cig ma gcig nas shes rab kyi pha rol tu phyin pa skad cig ma gcig gi bar du sgom par byed pas mi ngoms pa kho na ni de'i tshul khrims kyi pha rol tu phyin pa nas shes rab kyi pha rol tu phyin pa'i bar sgom pa la bsam pa'o//sgom pa brgyud pa de yang byang chub kyi snying po la 'dug gi bar du rgyun mi gcod pa de 'di ni rgya che ba'i bsam pa'o/ /sgom pa des ches dga' bar 'gyur gyi/ phan gdags par bya bzhin pa'i sems can rnams ni ma yin pa kho na'o zhes pa 'di ni dga' ba'i bsam pa'o//gang rnams la phan btags pa'i sems can de rnams la byang chub sems dpa' shin tu phan 'dogs pa por blta'i bdag nyid ni de rnams la ma yin te/ bla na med pa yang dag par rdzogs pa'i byang chub nye bar ston pa rgyur byas nas so zhes pa 'di ni phan par byed pa'i bsam pa'o/ /de ltar tshul khrims kyi pha rol tu phyin pa las byung ba nas shes rab kyi pha rol tu phyin pa las byung ba'i bar gyi bsod nams rgya chen po mngon par 'dus byas nas kyang /lan nam rnam par smin pa don du gnyer bar 'gyur ba ma yin no zhes pa 'di ni gos pa med pa'i bsam pa'o/ /gang de lta bu'i bsod nams kyi phung po rnam par smin pa sems can rnams kho na'i yin par mngon par dga' bar byed kyi bdag nyid la ma yin zhing sems can thams cad dang thun mong du byas nas bla na med pa yang dag par rdzogs pa'i byang chub tu yongs su sngo bar yang byed do zhes pa 'di ni dge ba'i bsam pa'o//slar yang gsungs pa skad cig gcig gis ting nge 'dzin brgya so sor thob cing snyoms par 'jug go//sangs rgyas brgya mthong ngo / /de rnams kyi byin gyi rlabs kyang shes so/ /'jig rten gyi khams brgya g.yo bar byed cing snang bar yang byed do/ /zhing brgyar 'gro ba dang sems can brgya yongs su smin par byed do/ /bskal pa brgyar gnas shing /sngon dang phyi ma'i mthar 'jug go/ /chos kyi sgo brgya rnam par 'byed do/ /lus brgya ston par byed do/ /lus dang lus la yang byang chub sems dpa'i 'khor brgya dang ldan par ston par byed do zhes so/ /'dir ting nge 'dzin gyi las ni sangs rgyas mthong ba la sogs pa'o//g.yo bar byed pa ni gdul bya rnams 'dul bar byed do/ /'gro ba dang snang bar byed pa dag gis song ste mthong nas yongs su smin par byed do/ /'jug pa ni sngon gyi mtha' dang phyi ma'i mtha' las sems can rnams kyi sdig pa dang bral ba'i dbang du byas te las kyi 'gro ba ston par byed do//rnam par 'byed de rang gi blo yongs su smin par bya ba'i don du/ chos kyi rnam grangs rnams kyi don sems so/ /thams cad du brgya smos pa ni nges par 'byung ba nyid kyis so/ /thabs la mkhas pa nyid kyis ni grangs nges pa med pa las grangs nges pa yang ngo / /de nyid kyi phyir 'dir mos pa spyod pa'i sa la yang ting nge 'dzin grangs med pa rnams thob pa dang /sangs rgyas la sogs pa rnams mthong ba la sogs pa yang gsungs so/ /sangs rgyas grangs med pa mthong ba ni tshogs kyi sar yang ste 'phags pa rtag par rab tu ngu ba bzhin no/ /de nyid kyi phyir rab tu dga' ba'i sa la yang ting nge 'dzin rnam grangs med pa nyid na yang rmi lam gyi gnas skabs bzhin dus de srid par snang ba'o zhes pa'i cha ni seng ge bzang po'i legs pa'i cha yin la gang yang rtogs pa'i tshul gyis brtan par so sor snang ba nyid na de rnams kyis bskal pa grangs med pa gsum gyis thob par bya ba sangs rgyas nyid du de'i tshe kho nar 'gyur ro zhes pa ni 'gal ba'i phyir bsam pa de ni legs pa ma yin no//gal te thabs la mkhas pas thams cad kyi tshe ting nge 'dzin rnams so sor snang bar 'gyur mod de lta na yang bsgom pa'i lam gyis spang bar bya ba'i dri ma rnams kyis na cher gsal ba med pa nyid kyi phyir dang /shin du ring bar khyab pa mchog tu gyur pa med pa nyid kyi phyir de'i tshe kho na sangs rgyas nyid du thal ba med do/ /de ltar dpag tu med pa'i yon tan gyi gter byang chub sems dpa' de ni phal cher 'dzam bu'i gling gi dbang phyug tu 'gyur zhing / dbang phyug chen po dbang rab tu thob la/ chos rjes su bsrung zhing gtong ba chen po rtsom pa rnams kyis tshim pa med pa'o//las gang cung zad rtsom pa de sbyin pa'am snyan par smra ba'am/ don spyod pa'am don mthun pa nyid kyis te skye ba thams cad du'o/ /de la sbyin pa ni phyi dang nang gi zang zing sbyin pa ste/ des gdul bya rnams chos sgrub par rung bar bskyed pa'i snod du 'gyur ro//'jig rten pa dang 'jig rten las 'das pa'i chos kyi sbyin pa ni snyan par smra ba'o/ /don spyod pa ni chos la yang dag par 'god pa'o/ /don mthun pa ni gang la pha rol yang dag par bkod pa de la rang yang rjes su 'jug pa'o zhes pa bzhi sems can bsdu ba'i thabs rnams so/ / bsdu ba de yang mos pa spyod pa'i sar phal cher don med pa'o/ /sa bdun rnams la phal cher don yod pa'o/ /brgyad pa la sogs pa'i sa rnams la rnam pa thams cad du don yod pa ste sems can gyi don lhun gyis grub par gdon mi za bar phun sum tshogs pa'i phyir ro/ /byang chub sems dpa' rnams kyi skye ba ni rnam pa bzhi ste las kyi dbang gis ni mos pa spyod pa'i sa la gnas pa rnams kyi ste/las kyi dbang gis mngon par 'dod pa'i gnas su skye ba'o/ /smon lam gyi dbang gis ni sa la bzhugs pa rnams sems can yongs su smin par bya ba'i don du skye ba la dbang ba nyid kyis dud 'gro la sogs pa dman pa'i gnas su skye ba gang yin pa'o//ting nge 'dzin gyi dbang gis ni bsam gtan rnams bzlog nas 'dod pa'i khams su skye ba gang yin pa'o/ /dbang 'byor pa'i dbang gis ni sprul pa rnams kyis dga' ldan gyi gnas la sogs par skye ba kun du ston pa gang yin pa'o zhes pa'o//gzhan yang gsungs pa/ byang chub sems dpa'i snying rje ni/ /srid par gnas pa'i rgyu yin te/ /de ni gnas pa byed kyang blo/ /zhen pa rjes su sems ma yin/ /zhes so/ /der 'khor los sgyur ba'i rgyal srid la chags pa med par spyod cing / 'dod pa la yongs su longs spyod pa rnam pa mang por ston par byed kyang de la chags pa med do//'jig rten pa'i phun sum tshogs pa'i yo byad thams cad sogs par byed cing de la yang zhen pa med par 'gyur ro/ /bdag dang bdag gi bar 'dzin pa sngon ma can nyid kyis na 'dod chags la sogs pa'i nyon mongs pa thams cad ni rnam par smin pa sdug bsngal gyi rgyu kho nar 'gyur la chos thams cad sgyu ma ltar bsgom pas ni sems can gdul ba rgyur byas nas nyon mongs pa la dbang ba nyid thob pas bsam pa'i khyad par las sgyu ma'i skyes bu bzhin du 'dod pa yongs su longs spyod pa/rgyal ba'i sras po rnams la skyon byed pa ma yin pas so/ /de skad du yang / mdo sde rgyan la sogs pa rnams su gsungs pa/ byang chub sems dpa' khyim pa rnams/ /rtag tu 'khor los sgyur bar ni/ /'gyur zhing skye ba thams cad du/ /sems can don ni rab tu byed/ /thabs chen ldan pa rnams la ni/ /nyon mongs byang chub yan lag 'gyur/ /'khor ba'ang zhi ba'i bdag nyid du'o//de phyir rgyal sras bsam mi khyab/ /ces so/ /yang na 'di 'dod na khyim dang chung ma dang longs spyod thams cad dang / 'khor los sgyur ba'i rgyal srid kyang spangs nas de bzhin gshegs pa'i bstan pa la rab tu 'byung ngo / /ji ltar yang 'di 'di la 'di ltar rab tu 'byung ba de bzhin du sa gong ma rnams la yang ngo //byang chub sems dpa' rab tu 'byung ba yang thog ma kho nar/ ma dang pha dang bu dang chung ma la sogs pa yongs su 'dzin pa'i skyon de snyed pas yongs su grol bar 'gyur ro/ /yongs su gzung ba de'i don du zhing las dang nyo tshong dang rgyal po'i skyes bu byed pa la sogs pa'i nyon mongs pas sa yongs su dkrugs pa'i sdug bsngal las kyang ngo //mtha' gcig tu tshangs par spyod pa lu gu rgyud du spyod par nus so/ /byang chub kyi phyogs kyi chos thams cad la mngon par shes pa myur bar 'gyur te/ dge ba gang dang gang kho na rtsom pa de dang de mthar phyin pa kho nar 'gyur ro//brtul zhugs nges pa la gnas pa nyid kyi phyir thams cad du tshig gzung bar 'os par 'gyur ro/ /byang chub sems dpa'i khyim pa ni de lta ma yin no zhes pa de lta bu dang mthun pa'i chos rnams kyis khyim pa dang rab tu byung ba dag gi khyad par ro zhes byang chub sems dpa'i sar gsungs so//de lta bu ni sems bskyed pa 'di'i yon tan rnams so/ /sngar gyi sems bskyed pa'i yon tan can dang mngon par shes pa la sogs pa rnams ni 'di la cher 'bar ba dang ring du khyab pa'o/ /de'i gong ni sems bskyed pa'i yon tan rnams ni 'tsham pa med pa rnams so//ji skad du/ 'phags pa sa bcu par gsungs pa/ de yan chad du byang chub sems dpa' smon lam gyi stobs can rnams smon lam khyad par can gyis rnam par 'phrul te/ gzhan yang lus sam 'od dam rdzu 'phrul lam spyan nam spyod yul lam dbyangs sam spyod pa'am bkod pa'am byin gyis brlabs pa'am mos pa'am mngon par 'du byed pa rnams kyang bskal pa bye ba khrag khrig brgya phrag stong rnams ji snyed pa de snyed du yang bgrang bar sla ba ma yin no zhes so//de bzhin du sa so so la chos kyi sprin gyi bar la gsungs so/ /de la spyan ni rnam pa lnga'o/ /dbyangs ni sprul pa'i gsung ngo / / bkod pa ni sprul pa'o/ /byin gyis brlabs pa ni gang gis pha rol byin gyis rlob pa'o/ /de nas ting nge 'dzin gyi sgo la brten nas mos pa ji lta ba bzhin du mthu'i bya ba'i don sgrub pa'o/ /shes rab kyi spyan gyis bsdus pa'i gzungs kyi sgo la brten nas chos ston pa mngon par 'du byed pa rnams so/ /de lta na yang de'i yon tan rnams bag tsam brjod par bya'o//de la sems bskyed pa drug pa tshul khrims kyi pha rol tu phyin pa dang ldan pa ni ro han la sogs pa'i rin po che'i 'byung gnas lta bu ste/ yon tan rin po che thams cad de las 'byung ba'i phyir ro/ /dri ma med pa'i sa yang ste/ gang gi phyir 'di la tshul khrims 'chal pa'i dri ma dang bral ba de'i phyir dri ma med pa'o//dge ba bcu'i las kyi lam rnams kyang 'di'i lhag cing shin du dag par 'gyur te/ sems bskyed pa lnga pas rtsen pa'i byang chub sems dpa'i de bzhin ma yin no/ /pha rol tu phyin pa bcu rnams las tshul khrims kyi pha rol tu phyin pa ches shas che bar 'gyur ro//sa 'di la gnas pa'i byang chub sems dpa' phal ches gling bzhi la dbang ba'i 'khor los sgyur ba'i rgyal po'i rin po che sna bdun dang ldan pa stobs bcu ru 'gyur ro/ /sems can rnams kyi tshul khrims 'chal pa'i dri ma bzlog pa'i ched dang / dge ba la brten pa rnams dge ba bcu'i las kyi lam rnams la dgod pa'i ched du'o//sangs rgyas bye ba khrag khrig brgya stong mang po rnams kyang 'di la snang bar 'gyur te/ rgya chen po mthong bas dang / smon lam gyi stobs kyis so/ /thabs la mkhas pa'i stobs kyis na so sor snang ba 'di yang nges pa med pa ste gnas skabs snga ma rnams la bzhin no//nges pa las ni skad cig gcig gis ting nge 'dzin stong thob po/ /sangs rgyas stong mthong ngo / /de rnams kyi byin rlabs kyang shes so/ /'jig rten gyi khams stong g.yo bar byed do/ /snang bar byed do/ /zhing stong du yang byed do/ /zhing stong du yang 'gro'o/ /sems can stong yongs su smin par byed do//bskal pa stong du gnas shing / sngon gyi mtha' dang phyi ma'i mthar 'jug go/ /chos kyi sgo stong rnam par 'byed pa'o/ /lus stong ston par byed do/ /lus re re la yang byang chub sems dpa'i 'khor stong ston par byed do/ /snang ba la sogs pa rnams kyi grangs ma nges pa dang nges pa 'di dag kyang sems bskyed pa gong ma gong ma rnams la yang rig par bya'o//de bzhin du spyan dang mngon par shes pa la sogs pa sems bskyed pa snga ma'i yon tan rnams 'di dang phyi mar yang thams cad du rjes su 'jug cing rab tu gyur pa shin du dang ches la sogs pa tha dad pa yang ngo //sems bskyed pa bdun pa bzod pa'i pha rol tu phyin pa dang ldan pa ni rgya mtsho chen po lta bu ste/ mi 'dod pa thog tu bab pa thams cad kyis mi 'khrugs pa'i phyir ro/ /sa 'od byed pa yang ste gang gi phyir 'di la ting nge 'dzin ma nyams pa la brten pa chos kyi snang ba chen po byed pas so//'dir byang chub sems dpa' shin tu so sor rtogs pa'i shes pa can te phyir yang tshad med pa dam pa'i chos tshol ba la mngon par brtson par gnas shing / nyin dang mtshan du chos nyan pa don du gnyer ba dang / chos smra ba la dka' ba byed pa'i 'du shes su 'gyur ro/ /phyi'am nang gi dngos po gang de la mi sbyin pa de cung zad kyang med pa dang /bla ma la bsnyen bkur bya ba gang nyams su mi len pa de cung zad kyang med pa dang / lus kyi gnod pa gang mi len pa de cung zad kyang med do/ /rtag par rab tu sbyor ba'i rgyu ni chos la gus pa mchog tu gyur pa'o//de ni nor dang rgyal srid dang bde 'gror skye ba dang 'jig rten pa'i rnam par dag pa dang bdag nyid kyi lus pas kyang chos shin du gces par byed de/ de ni chos kyis shin du dga' bar 'gyur gyi/ 'khor los sgyur ba'i rgyal srid dang / brgya byin dang / tshangs pa nyid ma yin la chos kyi tshig yang dag par rdzogs pa'i sangs rgyas kyis bstan pa byang chub sems dpa'i spyod pa yongs su sbyong ba gcig gi don du yang stong gsum gyi stong chen po'i 'jig rten gyi khams mes gang bar yang tshangs pa'i 'jig rten gyi bar nas kyang bdag nyid 'dor bar spro na me'i 'obs tha mal par lta ci smos te 'on kyang bdag gis dmyal ba dang ngan 'gro'i sdug bsngal thams cad rgyun du gnas pas kyang sangs rgyas kyi chos yongs su btsal bar bya na mi'i sdug bsngal la kun du gnas pas lta ci smos zhes brtson 'grus drag po rtsom pas ji skad thos pa'i chos rnams la tshul bzhin du so sor rtog pa'i rang bzhin can du 'gyur te chos de rnams thos na gcig tu dben par song bas 'di ltar dpyod de/chos dang rjes su mthun pa'i chos bsgrubs pas sangs rgyas kyi chos 'di rnams khong du chud par bya'i/ ngag gi las yongs su dag pa 'ba' zhig gis ma yin no zhes 'phags pa sa bcu par gsungs so//'dir chos ni de bzhin gshegs pa rnams kyi rnam par grol ba'i chos so/ /de dang rjes su mthun pa'i chos ni rjes su mthun pa'i chos te/ chos dang rjes su mthun pa'i chos sgrub pa'i stobs dag gis sangs rgyas kyi chos rnams rig nas bsam gtan dang gzugs med pa'i ting nge 'dzin la snyoms par 'jug pa dang tshad men pa dang mngon par shes pa rnams sbyor ba las thob kyi/mngon par dga' ba la gnas pa nyid kyis ni ma yin te/ de kun nas nyon mongs pa med pa'i phyir ro/ /de la bsam gtan rnams la ni bde bar mngon par nga rgyal ba'i sems can rnams kyi dbang du byas pa'o/ / gzugs med pa rnams ni thar par mngon par nga rgyal ba rnams kyi'o/ /byams pa dang snying rje dag sdug bsngal can rnams kyi'o/ /dga' ba dang btang snyoms dag grol ba rnams kyi'o/ /mngon par shes pa rnams ni skyabs ngan pa la zhugs pa rnams kyi dbang du byas nas te/ mthu khyad par can gyis gzhug pa'i don du'o//ma nyams pa'i bsam gtan la sogs pa thob pa'i phyir sa 'di ni de rnams kyis rab tu phye ba yin no/ /sa snga ma dag na yang de rnams la snyoms par 'jug pa med pa ni ma yin no/ /'dir mngon par shes pa lnga rnams te/ de skad du yang mdor/ de rdzu 'phrul gyi bya ba rnam pa du ma so sor nyams su myong bar byed de sa yang g.yo bar byed do//gcig tu gyur nas mang por 'gyur ro/ /mang por gyur nas gcig tu 'gyur ro/ /snang bar gyur cing mi snang bar gyur to/ /rtsig pa la yang thad ka dang ra ba la yang thad ka dang / ri la yang thad kar mi thogs par 'gro'o/ /nam mkha' la yang 'gro ba dang /sa la yang steng du 'byung ba dang byi'u zul byed do/ /chu la'ang sa la bzhin du 'gro'o/ /du ba 'thul bar yang byed/ 'bar bar yang byed do/ /sprin chen po bzhin du lus las chu 'byin te/ chu gang gis stong gsum gyi stong chen po'i 'jig rten gyi khams kun du 'bar ba yang zhi bar byed pa'o//nyi ma dang zla ba dag kyang lag pas yongs su nyug par byed do/ /tshangs pa'i 'jig rten gyi bar du yang lus kyis dbang bsgyur ro/ /so sor snang ba dang / bde ba yang ster ro/ /'od zer yang rab tu 'gyed do/ /de lha'i rna ba'i khams mi'i las 'das pas lha dang mi rnams kyi sgra rnams thos so//dmyal ba dang byol song dang yi dags rnams kyi dang / tha na sha sbrang dang sbrang bu mchu rings dang / srin bu dang bya dang bung ba rnams kyi yang sdug bsngal dang ldan pa rnams kyis nyen pa'i sgra thos nas sdug bsngal de bsal ba'i ched du 'bad cing / 'di nyid du gnas nas zhing sna tshogs pa rnams na sangs rgyas rnams chos ston pa nyan no//des sems can pha rol dang gang zag pha rol rnams kyi sems kyang sems kyis yang dag pa ji lta bar rab tu shes te/ 'dod chags dang bcas pa'i sems la 'dod chags dang bcas pa'o zhes pa dang / de bzhin du 'dod chags dang bral ba dang / zhe sdang dang bcas pa dang / zhe sdang dang bral ba dang / gti mug dang bcas pa dang / gti mug dang bral ba'i sems nas ji srid bla na med pa'i sems la bla na med pa'i sems so zhes yang dag pa ji lta ba bzhin du rab tu shes so/ /skye ba gcig kyang rjes su dran pa dang gnyis dang gsum nas ji srid skye ba bye ba khrag khrig brgya stong gi bar yang rjes su dran no//nyi ma gcig dang gnyis dang gsum rnams nas ji srid du bskal pa bye ba khrag khrig brgya stong gi bar rnams kyang rjes su dran no/ /che ge mo zhig tu bdag ming 'di zhes bya bar 'gyur/ rus 'di lta bu/ rigs 'di lta bu/ kha zas 'di lta bu/ yun 'di lta bur gnas/ tshe'i mtha' ni 'di lta bu thub/ bdag de nas shi 'phos nas che ge mo zhig tu skyes pa na ji srid de nas shi 'phos nas 'dir skyes so zhes pa nas/ ji srid yan lag dang bcas/ rnam pa dang bcas/ ched du bya ba dang bcas/ rgyu mtshan dang bcas pa'i sngon gyi gnas rnam pa du ma rjes su dran no//pha rol po rnams kyi yang sngon gyi srid pa de rnams kho nas dran du 'jug go/ /des lha'i mig rnam par dag pa mi'i las 'das pas sems can rnams mthong ste/ 'chi bzhin pa dang skye bzhin pa dang / skyes pa rnams dang / kha dog bzang ba dang / kha dog ngan pa dang /dman pa dang / gya nom pa rnams dang / bde 'gro dang / ngan 'gro las ji lta bar nye bar 'gro ba'i sems can rnams rab tu shes te/ sems can 'di rnams lus kyis legs par spyod pa dang / ngag gis legs par spyod pa dang / yid kyis legs par spyod pa dang ldan pa 'phags pa rnams la skur pa mi 'debs pa yang dag par lta ba can rnams te/legs par spyod pa'i rgyu des/ lus zhig nas bde 'gro mtho ris kyi 'jig rten du lha rnams su skye'o/ /sems can 'di rnams ni lus kyis nyes par spyad pa dang / ngag gis nyes par spyad pa dang / yid kyis nyes par spyad pa dang ldan pa 'phags pa rnams la skur pa 'debs pa log par lta ba can rnams te/log par lta ba yang dag par blangs pa'i rgyu las/ lus zhig nas shi ba'i 'og tu ngan song ngan 'gro log par ltung ba dmyal ba rnams su skye'o zhes/ lha'i mig gis phyogs bcu'i 'jig rten du 'jig rten gyi khams thams cad du chos kyi dbyings kyis klas pa nam mkha'i khams kyi mthar thug par 'gro ba drug gi sems can rnams kyi 'chi 'pho dang skye ba ji lta ba bzhin rab tu shes so zhes so//'dir mngon par shes pa gcig gis sems can rnams nye bar gnon no zhes pas khyab bdag nyid thob po/ /gnyis kyis chos ston pa sgra dang don so so yang dag par rig pa las te/sems shes nas skad gzhan rnams kyi don shes par byed pas so/ /gnyis dag gis 'ong ba dang 'gro ba shes te/ sems can rnams kyi sngon gyi mtha' dang phyi ma'i mtha'i yongs su smin pa shes so/ /rnam par dag pa ni gsal bar thos pa'i phyir ro//mi'i las 'das pa ni thag ring po thos pa ste/ mi'i sgra las shin tu 'das nas 'og tu ji srid mnar med pa'i bar gyi sgra thos par nus pa'i phyir ro/ /rnam pa ni 'di rnams thams cad tha dad pa'o/ /ched du bya ba ni ming ngo / /rgyu mtshan ni rigs la sogs pa rnams te/gang gis skyes pa'i rgyu mtshan no/ /'di la sangs rgyas bye ba khrag khrig brgya stong phrag mang po rnams snang bar 'gyur te/ mthong ba rgya chen po nyid dang smon lam gyi stobs kyis so/ /de yang phal cher sum cu rtsa gsum pa'i bdag po lha'i rgyal po'i dbang por 'gyur la sems can gyi 'dod pa'i 'dod chags bzlog pa'i thabs yang dag par sgrub pa la mkhas pa ste/sems can rnams 'dod pa'i 'dam las gdon pa'i don du'o/ /pha rol tu phyin pa bcu rnams las bzod pa'i pha rol tu phyin pa shin tu shas che bar 'gyur zhing bsdu ba'i dngos po rnams las don spyod pa'o/ /skad cig gcig gis ting nge 'dzin brgya phrag stong thob pa dang /sangs rgyas 'bum mthong ba dang / de rnams kyi byin rlabs kyang shes so/ /'jig rten gyi khams stong phrag brgya g.yo zhing snang bar byed pa dang / zhing brgya phrag stong du 'gro ba dang / sems can 'bum yongs su smin par byed pa dang / bskal pa stong phrag brgyar gnas pa dang / sngon gyi mtha' dang phyi ma'i mtha' la 'jug pa dang / chos kyi sgo 'bum rnam par 'byed pa dang / lus 'bum ston pa dang / lus so so la yang byang chub sems dpa'i 'khor 'bum ston par byed do/ /de ltar thob pa'i yon tan 'phel ba la spro ba dang ldan pa ni rtogs pa dang ma rtogs pa 'phel ba dang rtogs pa 'byung ba'i phyir yon tan thams cad kyi rgyu brtson 'grus kho na'o zhes sems bskyed pa brgyad pa mngon par sgrub par byed do//de yang brtson 'grus kyi pha rol tu phyin pa dang ldan pa rdo rje lta bu ste/ yid ches pa brtan pa nyid kyis na mi phyed pa'i phyir ro//sa 'od 'phro ba yang ste gang gi phyir 'dir byang chub kyi phyogs rnams kyis kun nas nyon mongs pa'i bud shing bsregs la/ de las ye shes kyi me'i 'od 'byung ba'i phyir 'od 'phro ba'o/ /'dir yang byang chub sems dpa' la sangs rgyas bye ba khrag khrig stong phrag mang po rnams snang bar 'gyur la skad cig gcig gis ting nge 'dzin bye ba brgya so sor thob pa dang /sangs rgyas bye ba brgya mthong ba dang / de rnams kyi byin gyi rlabs kyang shes pa dang / 'jig rten gyi khams bye ba brgya g.yo bar byed cing snang bar yang byed pa dang / zhing bye ba brgyar 'gro ba dang sems can bye ba brgya yongs su smin par byed pa dang /bskal pa bye ba brgyar gnas shing sngon gyi mtha' dang phyi ma'i mthar 'jug pa dang chos kyi sgo bye ba brgya rnam par 'byed pa dang / lus bye ba brgya ston pa dang / lus dang lus la yang byang chub sems dpa' bye ba brgya'i 'khor dang ldan par ston par byed do/ /phal cher lha'i dbang po rab 'thab bral du 'gyur la/sems can rnams kyi 'jig tshogs la lta ba yang dag par 'joms pa la mkhas pa dang gtso bo ste/ sems can rnams yang dag pa'i lta ba la dgod pa'i ched du mkhas pa'o/ /de'i bsdu ba'i dngos po rnams las don mthun pa dang pha rol tu phyin pa rnams las brtson 'grus kyi pha rol tu phyin pa shin tu shas che bar 'gyur ro//de nas sems bskyed pa dgu pa bsam gtan gyi pha rol tu phyin pa dang ldan pa'i ri bo lta bu ste/ dmigs pa'i rnam par g.yeng bas mi bskyod pa'i phyir ro/ /sa sbyang dka' ba yang ste/ gang gi phyir 'di la 'jig rten pa dang 'jig rten las 'das pa dag gi rigs pa dang bden pa shes pa dag phan tshun 'gal ba las yongs su sbyong ba bya ba dka' ba de'i phyir shin du sbyang dka' ba'o//'jig rten gyi khams thams cad na gnas pa'i bdud rnams kyis kyang byang chub sems dpa' 'dir thub par mi nus so zhes pas shin tu rgyal bar dka' ba yang ngo //de ni rdzu 'phrul gyi rnam par 'phrul pa chen po mngon par sgrub pa'i sna tshogs pa'i thabs dang bya ba rab tu sbyor ba rnams kyis kyang sems can rnams yongs su smin par byed do/ /de de ltar sems can yongs su smin par bya ba la mngon par sbyor bas sangs rgyas kyi ye shes kyi rjes su song ba'i sems kyi rgyun dang ldan zhing dge ba'i rtsa ba la sbyor ba la phyir mi ldog pa ste khyad par can gyi chos tshol ba la mngon par brtson pas/sems can la phan pa gang 'jig rten na rab tu spyod pa na/ yi ge dang bstan bcos dang rgya dang grangs dang rtsis dang shod thabs la sogs pa dang /khams kyi rgyud dang gso ba'i rgyud dbul ba dang brjed byed dang 'byung po'i gdon sel ba rnams dang dgu dang ro longs kyi sbyor ba 'joms par byed pa rnams dang / snyan dngags dang gar thabs dang gtam rgyud dang / rol mo dang sngon byung bas rab tu dga' bar byed pa rnams dang / grong dang grong khyer dang skyed mos tshal dang 'bab chu dang mtsho dang mtshe'u dang rdzing bu dang me tog dang 'bras bu dang sman dang nags tshal mngon par sgrub pa rnams dang / gser dang dngul dang nor bu dang mu tig dang bai DUr+ya dang dung dang men shel dang byi ru dang rin po che'i 'byung khungs bstan pa rnams dang / zla ba dang nyi ma dang gza' dang rgyu skar dang 'od dang sa g.yo ba dang gcan gzan gyi lang nge dang rmi lam gyi ltas ston pa la 'jug pa dang /sems can gyi yan lag dang nying lag gi mtshan nyid spyod pa dang rjes su spyod pa'i sbyor ba'i ltas rnams dang / sdom pa'i cho ga dang / bsam gtan dang / mngon par shes pa dang / tshad med pa dang / gzugs med pa'i gnas rnams dang / gzhan yang gang rnam par tho 'tshams pa med pa dang / rnam par mi 'tshe ba dang ldan pa rnams dang / sems can thams cad la phan pa dang bde bar 'gyur ba de rnams kyang snying rje dang ldan pas mthar gyis sangs rgyas kyi chos la 'god pa'i ched du mngon par sgrub po zhes 'phags pa sa bcu par gsungs so//'di la yang sangs rgyas bye ba khrag khrig brgya stong mang po rnams snang bar 'gyur ro/ /skad cig gcig gis ting nge 'dzin bye ba stong thob po/ /sangs rgyas bye ba stong mthong ngo / /de rnams kyi byin rlabs kyang shes so/ /'jig rten gyi khams bye ba stong g.yo bar byed snang bar yang byed do//zhing bye ba stong du yang 'gro'o/ /sems can bye ba stong yongs su smin par byed do/ /bskal pa bye ba stong du gnas shing / sngon gyi mtha' dang phyi ma'i mthar 'jug go/ /chos kyi sgo bye ba stong rnam par 'byed do/ / lus bye ba stong ston par byed do/ /lus dang lus la yang byang chub sems dpa'i 'khor bye ba stong ston par byed do/ /phal cher lha'i rgyal po yongs su dga' ldan du 'gyur te/ sems can thams cad mu stegs pa'i gnas thams cad las rnam par bzlog pa la byang ba dang gtso bo yin zhing sems can rnams bsdu ba'i dngos po rnams kyis bden pa la 'god pa la mkhas pa yin no//bsam gtan gyi pha rol tu phyin pa 'di la shin tu shas che bar 'gyur ro/ /bsam gtan gyi pha rol tu phyin pa rnam par dag pa thob pa de las 'di'i sems bskyed pa bcu pa shes rab kyi pha rol tu phyin pa dang ldan pa sman chen po lta bu ste/nyon mongs pa dang shes bya'i sgrib pa'i nad thams cad rab tu zhi bar byed pa'i phyir ro/ /sa mngon du gyur pa yang ste gang gi phyir 'di la rten cing 'brel par 'byung ba rnam par 'byed pa las chags pa med pa'i sgo zhes bya ba shes rab kyi pha rol tu phyin pa'i gnas pa mngon du 'gyur te de'i phyir mngon du gyur pa'o//'di la yang byang chub sems dpa' la sangs rgyas bye ba khrag khrig brgya phrag stong mang po rnams snang bar 'gyur ro/ /skad cig gcig gis ting nge 'dzin bye ba 'bum so sor thob po/ /sangs rgyas bye ba 'bum mthong ngo / /de rnams kyi byin rlabs kyang shes so//'jig rten gyi khams bye ba brgya phrag stong g.yo bar byed snang bar yang byed do/ /zhing bye ba stong phrag brgyar 'gro'o/ /sems can bye ba 'bum yongs su smin par byed do/ /bskal pa bye ba 'bum du gnas shing sngon gyi mtha' dang phyi ma'i mthar yang 'jug go//chos kyi sgo bye ba 'bum rnam par 'byed par byed do/ /lus bye ba 'bum ston par byed do/ /lus dang lus la yang byang chub sems dpa'i 'khor bye ba 'bum ston par byed do/ /phal cher lha'i rgyal po rab 'phrul dgar 'gyur te/ sems can rnams kyi mngon pa'i nga rgyal rgyun gcod pa la bya ba dang gtso bo yin zhing sems can rnams rten cing 'brel par 'byung ba la 'dzud mkhas pa yin no//'di'i shes rab kyi pha rol tu phyin pa ches shas che bar yang 'gyur ro/ /de ltar/ blo yi 'od zer gsal por snang ba can/ /rang gi lag mthil son pa'i skyu ru ra ji bzhin/ / srid gsum ma lus 'di ni gdod nas ma skyes par/ /rtogs te tha snyad bden pa'i stobs las 'gog pa rtogs/ /'gog pa thob pas 'gro ba yongs su skyob pa'i bsam pa yongs su gtong ba yang ma yin te/ 'khor bar son pa'i sbyor ba dang mya ngan las 'das par son pa'i lhag pa'i bsam pa ni/'di'i 'gro ba mgon med pa la snying rje shin du ches 'phel bar byed pas so/ /de nas sems bskyed pa bcu gcig pa thabs kyi pha rol tu phyin pa dang ldan pa bshes gnyen lta bu ste/ byams pa dang snying rje dang dga' ba dang btang snyoms kyi mtshan nyid can mi zad pa'i tshad med pa dang ldan pa nyid kyis gnas skabs thams cad du sems can gyi don yongs su mi gtong ba'i phyir ro//ji skad du/ bcom ldan 'das ma bar mar gsungs pa/ dge ba'i sems bskyed pa gcig kyang rnam pa thams cad mkhyen pa nyid du yongs su bsngos pas mi zad par byed 'dod pa dang sems can thams cad kyi don gyi ched du dmyal ba dang byol song gi skye gnas dang gshin rje'i 'jig rten gyi sdug bsngal rnams la spro bar 'dod pa dang /bskal pa stong phrag brgyar bsags pa'i tshul khrims kyang sems can la ltos nas gtong bar 'dod pa dang / sangs rgyas kyi rigs su skye bar 'dod pa dang / dpe byad bzang po brgyad cu dang /skyes bu chen po'i mtshan sum cu rtsa gnyis rdzogs par byed 'dod pa'i byang chub sems dpas shes rab kyi pha rol tu phyin pa la bslab par bya'o zhes so/ /'dir sangs rgyas kyi rigs su skye ba ni khyad par du 'phags shing lhun gyis grub pa mtshan ma med par gnas pa'i sa mi g.yo ba thob pa'o//sems bskyed pa 'di yangs ring du song ba ste/ gang gi phyir 'dir byang chub kyi phyogs dang bden pa dang rten cing 'brel par 'byung ba la dmigs pa mtshan ma med pa'i gnas pa 'bad pas 'jug pa ste/ de'i phyir ring du song ba'o/ /'dir yang byang chub sems dpa' sems can la phan pa'i don du bsam gtan dang rnam par thar pa dang ting nge 'dzin gyi snyoms par 'jug pa rnams la snyoms par 'jug ste/mngon par shes pa drug rnams la yang ngo / /de la rdzu 'phrul gyi bya ba shes pa rnam pa gnyis te/ yongs su bsgyur ba pa dang /sprul pa pa'o/ /dang po ni g.yo bar byed pa la sogs pa sngar ji skad bshad pa'o/ /sprul pa pa ni rnam pa gsum ste/ sku dang gsung dang yul gyi sprul pa las so/ /de ltar ni phyogs bcur grangs med pa'i 'jig rten gyi khams rnams su grangs med pa'i sems can gyi don du skad cig gcig la yang 'gro ba drug gi sems can gyi gzugs kha dog sna tshogs pa sprul pa rnams kyis phun sum tshogs par byed do//lha la sogs pa dang nyan thos dang byang chub sems dpa'i 'khor dang ji srid phyogs bcu rnams su grangs med pa'i 'jig rten gyi khams rnams dbyangs kyis sprul pa go bar byed do//dbyangs de las kyang rnam pa du mar chos ston par byed do/ /yang na gzhan sprul pa rnams kyis byed du 'jug go/ /nam mkha' la yang chos ston pa'i sgra 'byung bar byed do/ /yul rnams te/ bza' ba dang / btung ba dang / bzhon pa dang /gos dang / rin po che la sogs pa sna tshogs pa rnams kyang sems can rnams kyi don du sprul par byed do/ /zag pa zad pa shes pas bdag gam pha rol po rnams kyi nyon mongs pa zad pa ji ltar gyur pa bzhin shes so/ /bcom ldan 'das ma chen mo dag tu yang gsungs pa/ de 'di ltar rtogs par bya ste/gang phyogs bcu gang gA'i klung gi bye ma snyed kyi 'jig rten gyi khams de rnams dang gang yang de rnams na de bzhin gshegs pa de rnams thams cad rang bzhin gyis stong pa ming 'ba' zhig pa sngar brtags pa'o nas chos thams cad chos thams cad kyis stong ngo zhes pa'i bar du ste/ de de ltar shes rab kyi pha rol tu phyin pa 'di la gnas nas mngon par shes pa drug rnams mngon par sgrub po/ /gang rnams la gnas nas phyogs bcu rnams su de bzhin gshegs pa thams cad kyi drung du 'gro zhing bsnyen bkur byed de/ de rnams las chos kyang nyan to/ /de rnams la dge ba'i rtsa ba rnams skrun par byed cing mngon par zhen pa med de/stong pa nyid ni stong pa nyid la mngon par zhen pa med pas so/ /de lha'i mig gis phyogs [(]cu'i [,]bcu'i [)]'jig rten gyi khams rnams su sems can rnams mthong nas/ rdzu 'phrul gyi mngon par shes pas der song ste de rnams la chos ston par byed do/ / lha'i rna ba'i khams kyis phyogs bcu'i sangs rgyas thams cad las chos mnyan te bzung nas de rnams la ston to/ /sems kyi rnam grangs shes pas sems can rnams kyi sems rnams rig nas bsam pa ji lta bar de rnams la chos ston to/ /des bdag dang gzhan gyi sngon gyi gnas rnam pa du ma rjes su dran zhing /sngon gyi de bzhin gshegs pa rnams kyi chos rjes su dran nas chos des 'dul ba'i sems can rnams la chos ston to/ /de zag pa zad pa shes pas sems can rnams dang rjes su mthun par chos ston to/ /de mngon par shes pa de rnams kyis sems can rnams ni don gyi ched du lus gang dang gang 'dzin par 'dod pa de dang de kho na so sor 'dzin gyi de la bde ba dang sdug bsngal dang rjes su chags pa dang khong khro ba rnams kyis gos pa med do zhes so//de nyid kyi phyir rtsod pa 'di 'jug pa ma yin te/ sems dang po bskyed pa kho nas byang chub sems dpa' bla na med pa yang dag par rdzogs pa'i byang chub tu nges par 'gyur te/nges pa yang ci ltar ngan 'gro rnams su skye ba yin zhes pa'o/ /gang gi phyir gang yang dag par rdzogs pa'i byang chub tu sems bskyed nas pha rol tu phyin pa drug dang tshad med pa bzhi la spyod cing mi dge ba'i chos bcu spangs nas gnas pa de'i mi khom pa brgyad rnams mi srid na ngan 'gror skye ba lta ci smos/'o na byol song gi skye gnas kyi skyes rabs rnams ci ltar yin zhe na/ de rnams ni zag pa dang bcas pa dang zag pa med pa'i dge ba'i chos thams cad dang ldan pa'i sems can gyi don gyi ched du dbang thob pa nyid kyis bsam pa bzhin du skye ba rnams te/ byol song gi sdug bsngal rnams myong ba yang ma yin no//'di lta ste/ de bzhin gshegs pa dbang gi mchog thob pa la/ 'jig rten gyi khams thams cad du cig car mtha' yas pa'i sku gzhan gyi don gyi ched du sprul pa bzhin no/ /mngon par shes pa drug po 'di rnams byang chub sems dpa' la skye ba nas skye bar 'byung ste/byol song gi skye gnas la sogs par yang mi nyams so/ /de ltar mngon par shes pa rnams kyis rjes su gzung ba'i sems can rnams kyang lhan cig skyes pa'i byams pas de'i gdams ngag dang rjes su bstan pa la khro bar mi byed do/ / gdug pa can dang nga rgyal can dang mu stegs gang de'i tshig la gnas par mi 'dod pa de rnams mgo dgas pa la sogs pas bskul zhing gsal bar byas nas bsdigs pas bdag nyid kyi tshig 'dzin du 'jug ste/ gang byang chub sems dpa' mngon par shes pa dang ldan pa'i tshig la khro ba'i sems can de ni 'ga' zhig kyang yod pa ma yin no//gzhan du byang chub sems dpa' kho nas dus dang dus ma yin pa gzigs pa'i phyir ro/ /zang zing med pa'i sems kyis 'di chos ston par byed de/ snying rjes yang dag par bskul ba shes rab kyis sbyangs pa'i yid can rnams sems can rjes su 'dzin pa'i ched kho nar chos ston par byed pa'i phyir ro//sa gong ma gsol ba rnams ma gtogs par stong gsum gyi stong chen po'i 'jig rten gyi khams su slob dpon du 'os par 'gyur ro/ /'phags pa sa bcu par gsungs pa'i rim pas sa sbyong bar byed pa'i ting nge 'dzin 'bum phrag bcu rnams la snyoms par 'jug ste de thabs dang shes rab kyis yongs su sbyongs pa'i ting nge 'dzin rnams so sor thob pa las dang /snying rje chen po'i stobs kyis nyan thos dang rang sangs rgyas kyi sa las 'da' bar 'gyur ba dang shes rab kyi ye shes kyis rnam par dpyad pas sa brgyad pa la mngon du phyogs par yang 'gyur ba dang /'di'i lus dang ngag dang yid kyi las mtshan ma dang bral ba tshad med par yang 'jug go/ /'o na sa dang po kho nar nyan thos la sogs pa'i spyod pa las 'das pa ma yin nam/ slar yang 'dir ci zhe na/ der ni sangs rgyas kyi chos la lhag par dmigs pa'i bdag nyid che ba nyid kyis te/rang gi blo'i rnam par dpyad pas ni ma yin no/ /ji skad du/ 'phags pa sa bcu par gsungs pa/ kye rgyal ba'i sras 'di lta ste/ dper na rgyal po'i rigs su skyes pa'i rgyal po'i bu rgyal po'i mtshan ma dang ldan pa ni rgyal po'i byin gyis blon po'i tshogs zil gyis gnon gyi/ rang gi blo'i stobs kyis rnam par dpyod pas ni ma yin no/ /de nar son pa na rang gi blo'i stobs bskyed pas kyang ngo / /kye rgyal ba'i sras de bzhin du byang chub sems dpa' sems bskyed ma thag tu lhag pa'i bsam pa'i bdag nyid che ba nyid kyis nyan thos dang rang sangs rgyas thams cad zil gyis gnon gyi/rang gi blo'i rnam par dpyod pas ma yin no/ /sa bdun pa 'di la gnas pa ni rang gi yul shes pa'i khyad par gyi bdag nyid chen po la gnas pa nyid las nyan thos dang rang sangs rgyas thams cad kyi bya ba las shin tu 'das pa yin no/ /lus dang ngag dang yid kyi las zab cing dben la rgyu ba med pa thob pa yin te gong du khyad par 'tshol ba'i brtson pa yang mi gtong ngo zhes so//byang chub sems dpa'i las ni khyad par du 'phags pa ting nge 'dzin la brten pa nyid kyis na mtshan ma dang bral ba'i phyir ro/ /gal te yang nyan thos dang rang sangs rgyas rnams kyi las ni mtshan ma dang bral bar 'jug kyang tshad med pa ma yin te/sems can thams cad kyi don bya ba'i dbang du bya ba med pa'i phyir ro/ /'di'i las ni sbyor ba'i spyod pa yongs su rdzogs pa'i phyir legs par sbyangs pa dang / mi skye ba'i chos la bzod pa snang ba rtogs pa'o/ /ring du song ba nyid kyi phyir zab pa'o/ /de'i mi mthun phyogs kyi sgrib pa spangs pa'i phyir dben pa'o//de las gzhan pa'i 'jig rten las 'das pa dang 'jig rten pa'i sa la mi rgyu ba nyid kyi phyir rgyu ba med pa'o/ /nyan thos dang rang sangs rgyas rnams kyi las de ni mtshan ma dang bral ba yin yang 'di 'dra ba ma yin la/ de tsam la gnas pa ste/ gong ma yongs su mi tshol ba'i phyir ro//gnas pa khyad par can yang ste 'di yang dag pa'i mtha'i gnas pas gnas pa'i phyir dang / 'gog pa mngon du mi byed pa'i phyir ro/ /ji skad du 'phags pa sa bcu par gsungs pa/ kye rgyal ba'i sras sa drug pa nas bzung nas byang chub sems dpa' la snyoms par 'jug go/ /sa bdun pa la ni sems kyi skad cig nas sems kyi skad cig la 'gog pa la snyoms par 'jug cing ldang ste/'gog pa mngon du byas par brjod par bya ba yang ma yin no/ /des na 'di bsam gyis mi khyab pa'i lus dang ngag dang yid kyi las dang ldan pa zhes brjod nas ji srid du rtag par rgyun du dben pa'i sems 'thob pa yang yin/sems can yongs su smin pa'i don du smon lam gyi dbang gis khams gsum par skye ba yang mngon par sgrub pa la 'jig rten gyi nyes pa rnams kyis kyang mi gos so zhes pa'i bar du'o/ /'dir yang dag pa'i mtha' la snyoms par 'jug pa ni 'gog pa la snyoms par 'jug pa ste/de bzhin nyid la 'gog pa zhes brjod pa las te/ 'dir spros pa thams cad 'gog go zhes byas nas so/ /'di la sangs rgyas bye ba khrag khrig brgya stong mang po rnams kyang snang bar 'gyur la skad cig gcig gis kyang ting nge 'dzin bye ba khrag khrig 'bum so sor 'thob pa dang /sangs rgyas bye ba khrag khrig 'bum mthong ba dang / de rnams kyi byin rlabs kyang shes pa dang / 'jig rten gyi khams bye ba khrag khrig 'bum g.yo zhing snang bar yang byed pa dang / zhing bye ba khrag khrig 'bum du 'gro ba dang /sems can bye ba khrag khrig 'bum yongs su smin par byed pa dang / bskal pa bye ba khrag khrig brgya stong du gnas shing sngon gyi mtha' dang phyi ma'i mthar rab tu 'jug pa dang / chos kyi sgo bye ba khrag khrig 'bum rnam par 'byed par byed pa dang / lus bye ba khrag khrig 'bum ston par byed pa dang /lus dang lus la yang byang chub sems dpa'i 'khor bye ba khrag khrig 'bum ston par byed do/ /phal cher ni lha'i bdag po gzhan 'phrul dbang byed du 'gyur te/ sems can rnams kyi mngon par rtogs pa'i ye shes sgrub pa la byang ba dang gtso bo yin zhing /sems can rnams skyon med pa la 'dzud mkhas pa'o/ /'di'i thabs la mkhas pa nyid kyi pha rol tu phyin pa shin tu shas che bar 'gyur ro/ /de ltar yongs su sbyong ba'i sa bdun rnams dang 'bad pa dang bcas pas mtshan ma med par spyod pa'i yon tan rnams rtogs pa las sems bskyed pa bcu gnyis pa smon lam gyi pha rol tu phyin pa dang ldan pa yid bzhin gyi nor bu dang 'dra ba ste/smon lam ji lta bar 'bras bu phun sum tshogs pa'i phyir ro/ /mngon par shes pa mi zad par yang ste/ mngon par shes pa rnams lhun gyis grub par 'jug pa'i phyir ro//sa mi g.yo ba yang ste gang gi phyir byang chub kyi phyogs dang bden pa dang rten cing 'brel par 'byung ba la dmigs pa'i [(]mtshen [,]mtshan [)]ma med par gnas pa rang gi ngang gis 'byung ba nyid kyi phyir g.yo ba med de de'i phyir mi g.yo ba'o/ /phyir mi ldog pa'i sa zhes brjod de/ ye shes mi ldog pa'i phyir ro//'gro ba thams cad kyis shes par dka' ba nyid kyi phyir sgrub par dka' ba'i sa'o/ /kha na ma tho ba med pa'i phyir gzhon nu'i sa'o/ /bsam pa ji lta ba bzhin dbang bsgyur ba'i phyir skye ba'i sa'o/ /yang bya ba med pa'i phyir yongs su rdzogs pa'i sa'o/ /ye shes kyi rnam par dbye ba shin tu byas pa nyid kyi phyir yongs su mthar thug pa'i sa'o//sngon gyi mtha' rnams su smon lam mngon par sgrub pa nyid kyi phyir sprul pa'i sa'o/ /gzhan gyis mi 'khrugs pa'i phyir byin rlabs kyi sa'o/ /sngon gyi mtha' rnams su mngon par sgrub pa nyid kyi phyir lhun gyis grub pa'i sa'o//dge ba'i chos rnams lhun gyis grub pa kho nas rnam par smin pa'i bdag nyid du 'byung ba'i phyir rnam par smin pa'o/ /sangs rgyas rnams las sangs rgyas nyid du lung bstan pa thob pa'i phyir lung bstan pa'i sa'o/ /lung bstan pa yang gang zag gi bye brag gis rigs la gnas pa sems bskyed pa mngon sum dang mngon sum ma yin par gnas pa'i gang zag lung ston pa las so//lung bstan pa chen po ni sa brgyad pa la ste mi skye ba'i chos la bzod pa thob pa'i phyir ro/ /sa 'dir yang byang chub sems dpa' chos thams cad kyi yang dag pa ji lta ba la 'jug cing /sems dang yid dang rnam par shes pa'i rnam par rtog pa'i 'du shes thams cad dang bral zhing mi skye ba'i chos la bzod pa thob pa zhes brjod par bya'o/ /de thob pa las 'di'i gang bde 'gro dang ngan 'gror rnam par smin par bya ba'i las kyi sgrib pa de rnams yang dag par 'chad par 'gyur ro//gzhan du ni de bzhin gshegs pa rnams ma 'ongs pa'i skye bo la rjes su brtse bas ston pa'i phyir ro/ /byang chub sems dpa'i gnas pa zab mo shes par dka' ba dbyer med par mtshan ma thams cad dang bral ba rjes su thob pa nas/ rnam par smin pa'i chos nyid la gnas pa yang ngo //de la rnam pa thams cad du gnyis la kun du spyod pa'am mtshan ma la kun du spyod pa snang bar mi 'gyur ro/ /de 'gog pa la snyoms par 'jug pa sangs rgyas bcom ldan 'das rnams kho nas 'gog pa de las slong bar mdzad de/ ji skad du 'phags pa sa bcu par gsungs pa/ de sngon gyi smon lam gyi stobs bskyed pa dang chos kyi sgo'i rgyun de la gnas pa/ de la sangs rgyas bcom ldan 'das rnams de bzhin gshegs pa'i ye shes nye bar sgrub pa mdzad de/ de la 'di skad ces kyang bka' stsal to/ /rigs kyi bu legs so legs so//sangs rgyas kyi chos rjes su rtogs par bya ba la 'di ni don dam pa'i bzod pa ste/ 'on kyang rigs kyi bu gang nged rnams kyi stobs bcu dang mi 'jigs pa dang sangs rgyas kyi chos ma 'dres pa phun sum tshogs pa de khyod la med kyis sangs rgyas kyi chos phun sum tshogs pa de yongs su tshol ba la mngon par sbyor bar gyis shig /brtson 'grus rtsoms shig /bzod pa'i sgo 'di nyid kyang ma 'dor cig /gzhan yang khyod kyis de ltar zhi ba'i rnam par thar pas gnas pa thob kyang byis pa so so'i skye bo ma zhi ba 'di rnams la soms shig /yang rigs kyi bu sngon gyi smon lam dang sems can gyi don thob par bya ba dang ye shes kyi sgo bsam gyis mi khyab pa rjes su dran par gyis shig ste gang 'di chos thams cad stong pa nyid dang chos thams cad dmigs su med pa'o nas/ji srid du sangs rgyas bcom ldan 'das de rnams kyis byang chub sems dpa' de la de ltar thams cad mkhyen pa'i ye shes mngon par sgrub pa'i sgo rnams su gzhug pa mdzad pa ma yin te de kho nar 'di'i yongs su mya ngan las 'das par 'gyur te/sems can thams cad kyi bya ba rgyun 'chad pa'o zhes so/ /'di yang gang yud tsam cig gis lhun gyis grub pa'i ye shes nyid kyis thams cad mkhyen pa'i ye shes gnon pa de ni sngar gyi rtsol ba dang bcas pa'i las can gyis bskal pa 'bum gyis kyang de snyed du dpag tu med pa rjes su thob par mi nus so//'jig rten gyi khams rnams dang sems can rnams kyi so sor rab tu dbye ba rdul phra rab kyi rdul ji snyed pa de snyed rnams yang dag pa ji lta ba bzhin rab tu shes so/ /sangs rgyas kyi zhing gcig las kyang mi g.yo la/sangs rgyas kyi zhing brjod du med pa rnams su dang / de bzhin gshegs pa'i 'khor gyi dkyil 'khor rnams na yang so sor snang bar 'gyur ba yin no/ /sems can rnams kyi lus rnam par dbye ba kha dog dang rtags dang dbyibs dang chu zheng rnams dang / mos pa dang lhag pa'i bsam pa ci 'dra bar sangs rgyas kyi zhing de rnams su dang /'khor gyi dkyil 'khor rnams su yang de dang de lta de ltar rang gi lus kun du ston te/ dge sbyong dang bram ze dang rgyal rigs dang khyim bdag dang rgyal chen bzhi'i ris dang sum cu rtsa gsum dang 'thab bral dang dga' ldan dang 'phrul dga' dang gzhan 'phrul dbang byed dang tshangs pa rnams kyi gzugs rang rang gi 'khor gyi dkyil 'khor rnams su ston pa nas ji srid du 'og min gyi 'khor gyi dkyil 'khor rnams su 'og min gyi gzugs ston pa'i bar dang /nyan thos dang rang sangs rgyas dang byang chub sems dpa' dang de bzhin gshegs pa'i gzugs su ston te de dang de'i gzugs kyis gdul ba rnams kyi don gyi ched du'o//de ltar gdul bya'i lus dang sems dang skal ba mthun par bdag nyid kyi lus dang sems dag ston te/ 'di yang bsam gyis mi khyab pa ste/ ji skad du 'phags pa sa bcu par gsungs pa/ de sems can rnams kyi sems dang bsam pa mngon par sgrub pa kun du shes nas ji ltar gdul bya yongs su smin pa'i sems mi 'da' bar 'dod na sems can gyi lus rang gi lus su byin gyis rlob pa'o//de bzhin du sangs rgyas kyi zhing gi lus dang / las kyi rnam par smin pa'i lus dang / nyan thos kyi lus dang rang sangs rgyas kyi lus dang byang chub sems dpa'i lus dang /de bzhin gshegs pa'i sku dang / shes pa'i lus dang chos kyi lus dang nam mkha'i lus byin gyis rlob bo/ /rang gi lus sems can gyi lus su byin gyis rlob bo/ /de bzhin du sangs rgyas kyi zhing gi lus la sogs pa nam mkha'i lus kyi bar du rang gi lus byin gyis rlob bo zhes so/ /'dir don dam pa dang kun rdzob kyi ye shes ngag gis ye shes rdzogs par byang chub pa la dbang ba'i sbyor bar rig par bya ste de la don dam pa'i ye shes ni lus su rnam par rtog pa thams cad bral ba nyid kyis dang /lus mnyam pa nyid thob pas bstan to/ /rang dang gzhan gyi rgyud yongs su mi gcod pas so/ /'dis ni nyan thos dang rang sangs rgyas thun mong ma yin pa'i don dam pa'i ye shes yongs su gsal bar byas par 'gyur ro//kun rdzob kyi ye shes ni sems can gyi lus la sogs pa rab tu shes pa ste/ kun nas nyon mongs pa dang rnam par byang ba dang / gnyis ka ma yin pa'i phyogs rab tu shes pa'i phyir ro/ /de la sems can dang snod kyi 'jig rten dag dang de'i skye ba'i rgyu las kyis kun nas nyon mongs pa'i phyogs rig par bya'o//theg pa gsum gyis rnam par byang ba'i phyogs te de yang ye shes gang gis dang chos gang gis rab tu phye ba'o/ /nam mkha'i lus kyis gnyis pa ma yin pa'i phyogs so/ /rang gi lus su byin gyis rlob pas ni dbang de dang de la bya ba mtshungs pa'i sgrub par byed pa'i sbyor ba nyid yongs su gsal bar byed do//dbang bcu rnams kyang sa 'di la so sor thob ste/ gang rnams thob pa las 'khor ba dang mya ngan las 'das pa la ni gnas pa nyid kyis bsam gyis mi khyab pa'i ye shes kyi bdag nyid chen po dang ldan pa yin zhing / rtag par rgyun du de bzhin gshegs pa rnams kyis byin gyis brlabs pa yin/brgya byin dang tshangs pa dang 'jig rten skyong ba la sogs pa rnams kyis bsu ba yin/ lag na rdo rje rnams rtag par phyir 'brang ba yin/ ting nge 'dzin gyi stobs kyis ma btang ba yin/ lus rnam par phye ba tshad med pa mngon par sgrub pa yin/ lus kyi spyod pa'i stobs thams cad dang ldan pa yin/mngon par shes pa chen po'i rnam par smin pa yongs su grub pa yin/ ting nge 'dzin mtha' yas pa la dbang byed pa yin/ lung bstan pa tshad med pa yang dag par tshol ba yin/ 'gro ba ji ltar smin pa ltar mngon par rdzogs par byang chub pa ston pa yin/ theg pa chen po'i dkyil 'khor du zhugs pa yin/bskal pa re re dang 'jig rten gyi khams rab 'byams re rer sangs rgyas bye ba khrag khrig 'bum phrag du ma rnams la bsti stang byed btsun par byed do/ /chos kyi snang ba nye bar sgrub pa yang tshol lo/ /'di dge ba'i rtsa ba de rnams kyang rgya chen por 'gyur/ tshim par byed yongs su dag par 'gyur/'od gsal bar 'gyur ro/ /theg pa chen po'i dkyil 'khor du 'jug pa yang rnam pa dgu ste/ dkyil 'khor gyi don ni mi phyed pa'i don to/ /'di lta ste/ ye shes mi phyed pa dang / bshad pa mi phyed pa dang / rnam par grol ba mi phyed pa dang / zhing yongs su dag pa dbyer med pa dang / theg pa chen po la 'jug pa dbyer med pa dang /mngon par shes pa mi phyed pa dang / dris pa lung ston par nus pa dbyer med pa dang / byang chub kyi snying po la 'dug pa mi phyed pa dang / mngon par rdzogs pa byang chub pa dbyer med pa'o/ /'dis dang po sems bskyed par gyur pas kyang smon lam chen po bcu la sogs pa gang smon lam grangs med pa brgya mngon par bsgrubs pas de rnams 'di'i yongs su dag par 'gyur bas na smon lam gyi pha rol tu phyin pa 'di'i shin tu shas che bar 'gyur ro//de ltar 'di sangs rgyas kyi zhing 'bum phrag bcu'i rdul phra rab kyi rdul dang mnyam pa'i 'jig rten gyi khams rnams byams pa chen po'i snang ba spros nas sems can rnams kyi nyon mongs pa'i yongs su gdung ba rim gyis zhi bar byed cing rten rnams kyang tshim par byed cing rten rnams kyang rten par byed do//sa 'di la yang nyon mongs pa kun du spyod pa shin tu phra ba yang med do zhes pas 'dod pa lnga la yongs su longs spyod pa mi srid pa kho na ste/ de lta na yang sems can yongs su smin pa'i rgyur byang chub sems dpa' rnams 'dod pa'i yon tan lnga rnams nye bar len te/de ltar ni bsdu ba'i dngos po la mkhas pa bdag cag gi byang chub sems dpa' don mthun pa nyid kyis bsdu ba'i don du grags 'dzin ma dang sa skyong ma la sogs pa bud med stong phrag nyi shu rtsa bzhi rnams la so sor sku mngon par sprul nas de rnams thams cad dang rol to//gal te 'dod pa la spyad pa bden pa ma yin na de'i tshe sgra gcan 'dzin sras yin pa yang bden pa ma yin par 'gyur ro zhe na/ mi bden pa ma yin te/ sras rnams ni 'dod pa yongs su longs spyod pa'i rgyu las mngal du gnas shing skye ba kho na ma yin gyi/rdzus te skyes pa rnams kyang 'byung ngo / /sgra gcan 'dzin bzang po yang byang chub sems dpa' chen po ste/ dgos pa'i dbang kho nar mngal du gnas pa'i rnam par bstan pa'o/ /'phags pa chos 'phags sa bcu'i dbang phyug bud med stong phrag drug cu rtsa brgyad dang lhan cig 'dod pa'i yon tan lnga rnams kyis rtsen pa yang shes rab kyi pha rol tu phyin pa'i sbyor ba ni bla na med pa'i yul can gyi dga' ba la dbang ba'i rten nyid kyis na 'gro ba thams cad yongs su smin pa'i don du sems can mnyam pa nyid kyis rgyas par byed pa las te/bud med kyi dngos po dang ldan pa'i sems can rnams kyis kyang rang dang gzhan gyi don rnam par dag pa'i ched du de'i 'khor gyi dngos po don du gnyer bar byed pa'i phyir ro//'phags pa dkon mchog brtsegs par yang gsungs pa/ 'od srungs 'di lta ste/ sngags dang sman gyis yongs su gzung ba'i dug gis ltung bar byed mi nus so//'od srungs de bzhin du shes rab dang thabs la mkhas pa'i sman gyis yongs su zin pa'i nyon mongs pa'i dug gis ltung bar byed mi nus so zhes dang / 'od srungs 'di lta ste/ grong khyer chen po'i ljan ljin gang de/ bu ram shing gi zhing rnams dang rgun 'brum gyi zhing rnams la nye bar mkho bar gyur par 'gyur ro//'od srungs de bzhin du gang byang chub sems dpa'i nyon mongs pa'i ljan ljin de thams cad mkhyen pa nyid la nye bar mkho bar gyur par 'gyur ro zhes so/ /sa 'di la byang chub sems dpa' phal cher stong gi bdag po tshangs pa chen por 'gyur te/ zil gyis gnon pa zil gyis mi gnon pa dang /dbang nyid thob pa gtso bo ste/ sems can rnams kyi pha rol tu phyin pa nye bar sgrub pa'i ched du las thams cad kyang bsdu ba'i dngos po rnams kyis rtsom mo/ /skad cig gcig gis stong gsum gyi stong chen po'i 'jig rten gyi khams 'bum phrag bcu'i rdul phra rab kyi rdul ji snyed pa de snyed kyi ting nge 'dzin rnams so sor thob po//de snyed kyi sangs rgyas mthong ngo / /de rnams kyi byin gyi rlabs kyang shes so/ /de snyed kyi 'jig rten gyi khams g.yo bar byed snang bar yang byed do/ /de snyed kyi zhing rnams su yang 'gro'o/ /de snyed kyi sems can rnams yongs su smin par byed do/ /de snyed kyi bskal par gnas shing sngon gyi mtha' dang phyi ma'i mthar 'jug go//de snyed kyi chos kyi sgo rnam par 'byed do/ /de snyed kyi lus ston to/ /lus so so la yang byang chub sems dpa'i 'khor de snyed do/ /de ltar sa brgyad pa la ye shes kyi las mngon par sgrub pa rnams kyis zhing yongs su dag pa rdzogs par byas nas dgu pa la sems can yongs su smin pa rdzogs par byed do//de yang 'di'i sems bskyed pa bcu gsum pa stobs kyi pha rol tu phyin pa dang ldan pa nyi ma lta bu ste/ mi zad pa'i bsdu ba'i dngos po rnams kyis gdul bya'i sems can yongs su smin par byed pa'i phyir ro/ /sa legs pa'i blo gros kyang ste/gang gi phyir 'dir byang chub sems dpa' so so yang dag par rig pa rnams kyis chos 'chad pa po nyid kyi phyir legs pa ste/ de'i phyir legs pa'i blo gros so/ /de ni so so yang dag par rig pa bzhi rnams kyis chos smra ba po chen po'o/ /de ltar spobs pa mi chod pa can de'i sngon bsags pa'i dge ba'i rtsa ba rnam par smin pa'i bdag nyid yongs su rnam par smin pa 'khor ba ji srid par lhun gyis grub par sems can gyi don dang yang dag par rdzogs pa'i byang chub rdzogs par byed do//de nyid kyi phyir sa dgu pa'i spyod pa 'di nges pa'i spyod pa zhes brjod de/ smon lam gyi stobs kyis mngon par grub pa nyid kyi phyir ro//spyod pa 'dis kyang yongs su smin pa'i sems can rnams theg pa gsum la nges par 'gyur ro/ /rnam par smin pa'i bdag nyid kyi phyir don yod pa'i spyod pa 'jug go/ /de nyid kyi phyir nges pa'i spyod pa la zhugs pa'i byang chub sems dpa'i nyi ma gcig la sems can gyi don gyi bya ba yongs su rdzogs par byas pa la snga ma'i spyod pa can rnams kyis bye ba stong phrag brgya'i char yang nye bar mi 'gro'o//'di yang gzungs kyi sgo tshad med pa grangs med pa 'bum thob pa rnams kyis phyogs bcu rnams su sangs rgyas bcom ldan 'das tshad med pa grangs med pa rnams kyi mdun du chos nyan cing thos nas kyang mi brjed do//ji skad du thos pa yang grangs med pa 'bum phrag bcu dang ldan pa'i dbyangs kyi yan lag la mkhas pas de snyed du tshad med pa dang ldan pa'i spobs pa rnam par phye ba'i sgos stong gsum gyi 'jig rten gyi khams rnams thams cad du rgyas par bkang nas bsam pa dang mos pa ji lta ba bzhin sems can rnams la chos ston te/'khor mtha' yas pa zil gyis gnon pa'i mi 'jigs pa dang ldan zhing chos kyi stan la 'dug pas/ 'dod na sgra skad brjod pas 'khor thams cad la sgra skad sna tshogs pa tshad med pas chos kyi sgo rnams go bar byed do/ /sgra sna tshogs dang dbyangs kyi yan lag tha dad pa rnam par phye ba rnams kyis yang na'o//'dod na yi ge gcig gi sgra la chos thams cad rab tu phye ba'i sgra 'byung bar byed do/ /ba spu'i khung bu las dang / 'od zer rnams las dang / nam mkha' las dang / 'jig rten gyi khams grangs med par son pa'i gzugs la sogs pa'i snang ba rnams las kyang ste/'di ni mdor bsdus pa las 'di'i ston pa phun sum tshogs pa'o/ /de yang rnam pa gsum du yongs su rtogs par bya ste/ ye shes phun sum tshogs pa dang / gsung phun sum tshogs pa dang / smra ba po phun sum tshogs pas so/ /de la ye shes phun sum tshogs pa ni gang theg pa gsum gyi dbye bas rnam par grol ba'i snod nyid la sogs pa ston pa'o//gang yang rigs dang dbang po'i rab tu dbye ba la sogs pa'i dbang du bya ba ni de'i yul lo/ /gsung phun sum tshogs pa ni so so yang dag par rig pas mngon par bsgrubs pa'i chos ston pa'o//de yang rnam pa bzhi ste/ gsung rab yan lag bcu gnyis ston pa dang / de'i bshad pa ston pa dang / gang gi bsam pa ji lta ba de'i rjes su 'jug pa'i phyir rjes su 'jug pa ston pa dang / gang rnam grangs ji snyed pa rnams kyis rtogs par bya ba de ston pa'i phyir rjes su mthun pa ston pa'o/ /gsung rab yan lag bcu gnyis rnams ni mdo dang /dbyangs kyis bsnyad pa dang / lung bstan pa dang / tshigs su bcad pa dang / ched du brjod pa dang / gleng gzhi dang / rtogs pa brjod pa dang / de lta bu byung ba dang / skyes pa'i rabs dang / shin tu rgyas pa dang / chos rmad du byung ba dang / gtan la phab pa rnams so/ /de la mdo sde ni gang rkyang pa rnams kyis don gsal bar byed pa'o//dbyangs kyis bsnyad pa ni gang mdo kho na dbus dang mtha' mar tshigs su bcad pas dbyangs su bsnyad pa'o/ /gang drang ba'i don gyi mdo de yang dbyangs kyis bsnyad pa ste/ rtogs par bya ba nyid kyi phyir ro/ /lung bstan pa ni gang du nyan thos 'das te dus byas pa dang 'byung ba lung ston pa'o//gang nges pa'i don gyi mdor yang ste/ des rnam par phye nas dgongs pa 'chad pa'i phyir ro/ /tshigs su bcad pa ni gang tshigs bcad du gsungs pa ste/ de ni rkang pa gnyis pa dang / rkang pa gsum pa dang / rkang pa bzhi pa dang / rkang pa lnga pa dang / rkang pa drug pa'o/ /ched du brjod pa ni gang yid rangs pas brjod pa'o//gleng gzhi ni gang ched du byas nas gsungs pa'am byung ba dang ldan pa'i bslab pa bcas pa gsungs pa'o/ /rtogs pa brjod pa ni dpe dang bcas par gsungs pa'o/ /de lta bu byung ba ni gang sngon gyi sbyor ba dang ldan pa'o/ /skyes pa'i rabs ni gang byang chub sems dpa'i spyod pa dang ldan pa'o//shin tu rgyas pa ni gang byang chub sems dpa'i sde snod dang ldan pa ste/ sems can thams cad la phan pa dang bde ba'i gnas yin pa'i phyir ro/ /rmad du byung ba'i chos ni gang du nyan thos dang byang chub sems dpa' dang sangs rgyas rnams kyi ngo mtshar rmad du byung ba'i chos ston pa'o/ / gtan la phab pa ni gang du chos kyi mtshan nyid phyin ci ma log par ston pa'o/ /smra ba po phun sum tshogs pa ni rnam pa bzhi ste/ gzungs phun sum tshogs pa dang / rab tu gsal bar byed pa phun sum tshogs pa dang / dris pa lung ston pa phun sum tshogs pa dang / 'dzin pa phun sum tshogs pa'o/ /de la gzungs phun sum tshogs pa ni gzungs rnam pa bcu ste/don gyi gzungs dang / gzhung gi gzungs dang / mngon par shes pa'i gzungs dang / 'od zer rab tu 'gyed pa'i gzungs dang / phas kyi rgol ba tshar gcad pa'i gzungs dang / de bzhin gshegs pa mchod pa dang sems can bkren pa rjes su 'dzin pa nye bar sgrub pa'i gzungs dang /theg pa chen po la zhugs pa'i sems can yang dag par gzengs bstod pa'i gzungs dang / chags pa med pa'i smon lam gyi gzungs dang / spobs pa mi zad pa'i gzungs dang / don sna tshogs la spobs pa'i gzungs so/ /'di ni bskal pa bye ba mtha' yas pa las nges par 'byung ba la mkhas pa yang ste/de ltar ni byang chub sems dpa' rnam par smin pa'i brtson 'grus kyi pha rol tu phyin pa thob pa las bya dka' ba thams cad la bya dka' ba'i 'du shes mi skye'o/ /de'i brtson 'grus shin tu chen po rtsom pas sgrub pa'i bskal pa mang po rnams bsnyil bar 'gyur te/dper na bdag cag bcom ldan 'das shAkya thub pa byang chub sems dpar gyur pa'i/ sangs rgyas nyer rgyal mnyes par byas pas bskal pa dgu bsnyil ba lta bu'o/ /de bzhin du shin tu che ba'i brtson 'grus kyis sgrub bzhin pa'i bskal pa bye ba khrag khrig 'bum phrag mang po rnams kyang bsnyil bar 'gyur ro//gang yang de ltar thams cad khas blangs nas su zhig gi yang bskal pa grangs med pa bsnyil bar mi 'gyur ba kho na'o zhes pa'i 'dod pa de 'phags pas khyad du bsad pa ni/ 'bras bu gnyis pa la zhugs pa mthong bas thob pa'i dbang du byas nas/ shA ri'i bu byang chub sems dpa' rnams yod do nas ji srid du bskal pa bzang po 'di nyid la bla na med pa yang dag par rdzogs pa'i byang chub tu mngon par rdzogs par 'tshang rgya'o zhes pa'i bshad pas/gang gi phyir 'bras bu gnyis pa la zhugs pa ni sa drug pa la gnas pa ste sngar brjod pa'i rim pas bskal pa grangs med pa gnyis pa dang 'brel pa'i bskal pa bzang po nyid la gnas pa/de la yang mngon par rdzogs par 'tshang rgya bar 'gyur ba ni/ ci ltar bskal pa grangs med pa gsum pa bsnyil ba ma yin/ ci ste bskal pa bzang po la 'phags pa byams pa la sogs pa sa bcu gsol ba bskal pa grangs med pa gsum pa la gnas pa rnams kyang mngon par rdzogs par 'tshang rgya bar 'gyur ba'o zhe na 'di las ci ste/gang gi phyir mthong bas thos pas drug pa gsol ba rnams bskal pa bzang po la mngon par rdzogs par byang chub pas na bskal pa grangs med pa bsnyil ba kho na'o zhes gnas so/ /de nyid kyi phyir phul du dbyung du med pa'i shin tu che ba'i brtson 'grus dang thabs kyi khyad par gyis sgrub bzhin pa rnams kyis bskal pa grangs med pa gnyis kyang bsnyil bar 'gyur ba nas ji srid bskal pa gcig la dang /skye ba nyung ngu'i sa dang / ji srid du skye ba 'di kho na la mngon par rdzogs par byang chub pa'o zhes sngags kyi tshul las gsungs so//shas cher ye shes kyi snang ba 'di lta bu 'dzin par rtsom ste/ de gal te skra'i rtse mo'i go re re la 'jig rten gyi khams grangs med pa'i rdul phra rab dang mnyam pa'i de bzhin gshegs pa rnams de snyed kyi 'khor gyi dkyil 'khor rnams la chos ston zhing / de bzhin gshegs pa re res kyang de snyed kyi sems can rnams la don tha dad pa can gyi chos ston te/sems can so so la'ang de snyed kyi chos rnams dang / skra'i rtse mo gcig la ji lta ba de ltar chos kyi dbyings thams cad na ste/ der bdag gis ji ltar skad cig gcig gis de bzhin gshegs pa de rnams kyi chos kyi snang ba so sor nod pa de lta bu'i dran pa rgya chen po mngon par bsgrub par bya zhing /shes rab kyi snang ba rnam par nges pa'i spobs pa yongs su sbyangs nas skad cig gcig gis 'jig rten gyi khams de snyed rnams su sems can thams cad tshim par bya'o zhes pa'o/ /bskal pa gcig la yang sangs rgyas bye ba khrag khrig 'bum phrag du ma rnams mthong ngo / / bsnyen bkur byed do/ /bla mar byed do/ /phal cher stong gnyis kyi bdag po tshangs pa chen por 'gyur te/ pha rol tu phyin pa thams cad ston pa la gtso bo yin zhing / 'dod na tshul de lta bu'i brtson 'grus rtsom ste/ gang skad cig gcig gis stong gsum gyi stong chen po'i 'jig rten gyi khams grangs med pa 'bum phrag bcu'i rdul phra rab ji snyed pa'i grangs de snyed kyi ting nge 'dzin rnams so sor thob po//de snyed kyi sangs rgyas rnams mthong ngo / /de rnams kyi byin gyi rlabs kyang shes so/ /de snyed kyi 'jig rten gyi khams rnams g.yo zhing snang bar yang 'gyur ro/ /de snyed kyi zhing rnams su 'gro'o/ /de snyed kyi sems can rnams yongs su smin par byed do//de snyed kyi bskal par gnas shing sngon gyi mtha' dang phyi ma'i mthar yang 'jug go/ /de snyed kyi chos kyi sgo rnams rnam par 'byed do/ /de snyed kyi lus rnams ston te/ lus so so la yang de snyed kyi byang chub sems dpa'i 'khor lo 'di'i stobs kyis pha rol tu phyin pa shin tu shas che bar 'gyur ro/ /de la bsam pa'i stobs ni nyon mongs pa kun du spyod pa med pa'i phyir ro//lhag pa'i bsam pa'i stobs ni sa'i ye shes yongs su sbyangs pa nyid kyi phyir ro/ /gzungs kyi stobs ni chos mi brjed pa nyid kyi phyir ro/ /ting nge 'dzin gyi stobs ni rtag tu rnam par g.yeng ba med pa nyid kyi phyir ro/ /yang dag pa'i 'byor pa'i stobs ni mtha' yas shing mur thug pa med pa'i 'jig rten gyi khams kyi spyod pa rnam par dbye ba la mkhas pa nyid kyi phyir ro//dbang gi stobs ni yid la re ba thams cad yongs su rdzogs pa 'thob pa'i phyir ro/ /spobs pa'i stobs ni sangs rgyas kyi chos thams cad rnam par dbye ba la mkhas pa nyid kyi phyir ro/ /smon lam gyi stobs ni sangs rgyas thams cad kyi spyod pa la sbyor ba mi gtong ba'i phyir ro//pha rol tu phyin pa'i stobs ni bdag nyid kyis sangs rgyas kyi chos yongs su smin par byed pa dang / sems can yongs su smin par byed pa dang / sems can thams cad la phan pa'i spyod pa mi gtong ba'i phyir ro/ /byams pa chen po'i stobs ni sems can thams cad bskyab pa la mchog tu sbyor ba mi gtong ba'i phyir ro//snying rje chen po'i stobs ni sems can thams cad kyi sdug bsngal thams cad sel bar byed pa'i phyir ro/ /chos nyid kyi stobs ni sgyu ma lta bu la sogs pa'i chos nyid mngon du byed pa'i phyir ro/ /de bzhin gshegs pa thams cad kyi byin gyis brlabs pa'i stobs ni rnam pa thams cad mkhyen pa'i ye shes la mngon du phyogs par gyur pa nyid kyi phyir ro zhes pa mdo sder bstan pa ni stobs rnams so//de ltar sa dgu pa la zhing yongs su dag pa dang sems can yongs su smin pa dag byas nas/ sa bcu pa la shes bya mngon par rdzogs par byang chub pa sgom pa yongs su rdzogs par byed do zhes pas sems bskyed pa bcu bzhi pa ye shes kyi pha rol tu phyin pa dang ldan pa ni dri za'i glu snyan pa lta bu ste/mi zad pa'i so so yang dag par rig pa bzhi rnams kyis gdul bya 'dun par byed pa'i chos bstan pa nyid kyi phyir ro/ /sa chos kyi sprin yang ste/ gang gi phyir sa 'dir byang chub sems dpa' chos la rgyal tshab nyid du dbang bskur bar bya ba de'i phyir chos kyi sprin no//mi ha bran pa la ste g+ha nya'o/ /ming la g+ha nyid do/ /sprin chen po ltar 'jig rten pa'i dge ba'i lo tog mngon par 'phel ba'i don du lhun gyis grub par chos thams cad kyi char pa 'bebs so zhes pas kyang chos kyi sprin no//sprin dang chos mthun pa yang rnam pa gsum ste/ khyab par byed pa las ni sa 'dir thob pa'i chos kyi nam mkha' bzhin du rten la khyab pa'i phyir ro/ /rdul rab tu zhi bar byed pa las ni chos des sems can rnams kyi nyon mongs pa'i rdul rab tu zhi bar byed pa nyid kyi phyir ro/ /'phel bar byed pa las ni dga' ldan gyi gnas na bzhugs pa la sogs pa'i rim gyis sems can gong du sgrol bar byed pa'i phyir te/sprin gyi char pas lo tog 'phel bar byed pa bzhin no/ /de ltar ni 'phags pa sa bcu pa la sogs pa'i mdo sder bstan pa'i rim pas de ting nge 'dzin grangs med pa 'bum phrag bcu ji snyed pa'i mthar thams cad mkhyen pa'i ye shes su mngon par dbang bskur ba zhes bya ba'i ting nge 'dzin du 'gyur te/gang mngon du gyur ma thag la stong gsum gyi mthar thug pa 'bum phrag bcu tshang ba'i tshad kyi rin po che chen po'i pad+ma rnam pa thams cad mchog dang ldan pa'i rin po che las bskrun pa stong gsum 'bum phrag bcu tshang ba'i rdul phra rab kyi rdul ji snyed pa dang ldan pa'i rin po che chen po'i pad+ma'i 'khor can 'byung bar 'gyur te/byang chub sems dpa' de'i lus kyang de dang 'tsham par gnas so/ /de ting nge 'dzin de thob pa las pad+ma de la 'dug par kun du snang ngo / /phyogs bcu'i 'jig rten gyi khams nas 'dus pa'i byang chub sems dpa' rnams kyang byang chub sems dpa' de la bskor nas blta zhing pad+ma'i 'khor de rnams la gnas so//de'i tshe 'jig rten gyi khams thams cad rab tu g.yo bar gyur to/ /ngan song thams cad rgyun chad pa dang / spyod pa mthun pa'i byang chub sems dpa' thams cad 'du ba dang /'jig rten gyi khams thams cad kyi lha dang mi'i sil snyan dang glu dang rol mo'i sgra dang / sems can thams cad bde ba skye ba dang / yang dag par rdzogs pa'i sangs rgyas thams cad la mchod pa dang rim gro bsam gyis mi khyab pa 'jug pa dang de bzhin gshegs pa thams cad kyi 'khor gyi dkyil 'khor gyis kyang rnam par rig par 'gyur ro//byang chub sems dpa' de'i zhabs kyi mthil dag las 'od zer grangs med pa 'bum phrag bcu byung nas phyogs bcu rnams su mnar med pa'i mthar thug pa'i sems can dmyal ba pa rnams snang ba sngon ma can sdug bsngal thams cad zhi bar byed do//de bzhin du pus mo gnyis nas dud 'gro rnams so/ /lte ba'i dkyil 'khor nas yi dags rnams so/ /rtsib logs dag nas mi rnams so/ /phyag dag nas lha dang lha ma yin rnams so/ /phrag pa dag nas nyan thos kyi theg pa pa rnams te/ chos snang ba'i sgo nye bar sgrub pa'o/ /rgyab dang mgrin pa las rang sangs rgyas rnams te zhi ba'i ting nge 'dzin gyi sgo'i tshul lo//zhal gyi sgo nas sems dang po bskyed pa nas bzung ste ji srid sa dgu pa rjes su thob pa'i bar gyi byang chub sems dpa' rnams te/ shes rab dang thabs la mkhas pa'i tshul yang ngo / /smin mtshams kyi mdzod spu nas bdud kyi gnas thams cad mog mog por byas nas dbang bskur ba'i sa thob pa'i byang chub sems dpa' rnams kyi lus la nub par 'gro'o//steng du yan lag dam pa las stong gsum grangs med pa 'bum phrag bcu tshang ba'i rdul phra rab kyi rdul dang mnyam pa'i 'od zer rnams kyis phyogs bcu rnams su nam mkha'i khams kyi mthar thug pa'i de bzhin gshegs pa'i 'khor gyi dkyil 'khor rnams snang bar byed do//'jig rten gyi khams la lan bcur bskor ba byas nas/ steng gi bar snang la 'od zer gyi dra ba'i dkyil 'khor chen po rnams byas te/ de bzhin gshegs pa thams cad la mchod pa dang rim gror bya ba 'jug par byed do/ / phyogs bcu rnams na ma lus pa'i chos kyi dbyings kyi nang du gtogs pa'i me tog la sogs pa dang / gdugs dang na bza' dang rin po che'i rgyan la sogs par gdags pa ji snyed pa de las shin tu 'das pa bkod pa sna tshogs pa rin po che la sogs pa'i char rnams de bzhin gshegs pa re re'i 'khor gyi dkyil 'khor du sprin chen po rnams bzhin du char 'bab po//mchod pa de rnams sems can gang rnams kyis shes pa de rnams thams cad bla na med pa'i byang chub tu nges par 'gyur ro/ /de'i rjes su de bzhin gshegs pa de rnams kyi zhabs kyi 'og gi mthil rnams su nub par 'gyur ro/ / phyogs bcu mtha' yas pa'i 'jig rten gyi khams rab 'byams de rnams nas kyang sa dgu pa ji srid pa la gnas pa'i byang chub sems dpa' grangs med pa rnams lhags nas/ byang chub sems dpa' de la yang dag par mchod pa de blta zhing ting nge 'dzin stong phrag bcu la snyoms par 'jug go/ /byang chub sems dpa' de'i yang thugs ka na gnas pa'i mtshan dpal gyi be'u dang rdo rje dang bkra shis las/bdud kyi dgra thams cad las rnam par rgyal ba zhes bya ba'i 'od zer chen po 'od zer grangs med pa 'bum phrag bcu'i 'khor can spros nas phyogs bcu rnams snang bar byas shing cho 'phrul mu med pa rnams yang dag par bstan te/slar log nas dpal gyi be'u dang rdo rje dang bkra shis kho na la nub par 'gyur ro/ /de'i tshe byang chub sems dpa' de'i mthu stong 'gyur las lhag par mngon par 'phel lo/ /de bzhin gshegs pa de rnams kyi smin mtshams kyi mdzod spu rnams nas thams cad mkhyen pa nyid kyi mngon par shes pa dang ldan pa zhes bya ba'i 'od zer grangs med pa'i 'khor can rnams kyis 'jig rten gyi khams rab 'byams mtha' med pa rnams snang bar byas nas/de bzhin gshegs pa'i rnam par 'phrul pa rnams yang dag par bstan zhing / byang chub sems dpa' grangs med pa rnams bskul te/phyir log nas byang chub sems dpa' de'i yan lag mchog la nub par 'gyur ro/ /de'i 'khor gyi 'od zer rnams ni 'khor gyi byang chub sems dpa' rnams kyi spyi bor nub par 'gyur ro/ /byang chub sems dpa' de yang yang dag par rdzogs pa'i sangs rgyas kyi yul la/ ye shes chen po'i dbang gis dbang bskur bzhes brjod do//rnam par thar pa bsam gyis mi khyab pa zhes bya ba yang 'thob po/ /rang gi smon lam gyi stobs bskyed pas kyang lus sna tshogs pa rnams kyis skad cig gcig la phyogs bcu rnams su 'jig rten gyi khams grangs med pa rnams na rdul phra rab rnams ji snyed pa de snyed kyi 'jig rten gyi khams bkang nas/dge ba bdud rtsi'i rgyun gyi char gyis bsam pa ji lta bar sems can rnams kyi thog ma med pa'i dus can gyi mi shes pa las byung ba'i nyon mongs pa'i rdul dang me lce thams cad rab tu zhi bar byed do/ /de'i phyir sa 'di chos kyi sprin zhes brjod do/ /de snyed kyi 'jig rten gyi khams rnams su yang dga' ldan gyi pho brang du bzhugs pa nas bzung nas ji srid yongs su mya ngan las 'das pa chen po'i bar de bzhin gshegs pa'i mdzad pa thams cad sems can rnams kyi bsam pa ji lta ba dang gdul bya ji lta ba rnams la byin gyis rlob po//ye shes kyi dbang de lta bu dang ldan zhing shin tu rnam par brtags pa'i ye shes dang mngon par shes pa chen po can de 'dod na kun nas nyon mongs pa can gyi 'jig rten gyi khams ni yongs su dag pa nyid du byin gyis rlob po//yongs su dag pa ni kun nas nyon mongs pa can nyid du'o/ /dog pa ni yangs pa nyid du'o/ /yangs pa ni dog pa nyid du yang ngo //rdul phra rab gcig tu 'jig rten gyi khams grangs med pa rnams byin gyis rlob ste/ rdul phra rab de yang 'phel ba med la bya ba de rnams kyang kun du ston to/ /'jig rten gyi khams gcig tu 'jig rten gyi khams grangs med pa'i bkod pa dang / de na gang sems can yod pa rnams kyang kun du ston to//'jig rten gyi khams gcig gi bkod pa dang der sems can gang yod pa rnams kyang 'jig rten gyi khams grangs med pa rnams su'o/ /'jig rten gyi khams grangs med par gnas pa'i sems can rnams skra'i khyon gcig tu ste/ de rnams la gnod pa yang med do/ /sangs rgyas kyi yul gyi bkod pa grangs med pa yang skra'i khyon gcig tu'o//'jig rten gyi khams grangs med pa rnams na rdul phra rab ji snyed pa de snyed kyi lus rnams skad cig gcig la sprul par byed do/ /lus re re la yang de snyed kyi lag pa rnams dang de snyed kyi mgo bo so so la de snyed kyi lce rnams kyang ston par byed do//lag pa de rnams kyis kyang phyogs bcu rnams su bde ba can dang pad+ma can dang 'od zer can la sogs pa sangs rgyas kyi zhing dpag tu med pa rnams su sangs rgyas mchod pa la rab tu sbyor ro/ /lag pa re res kyang gang+gA'i klung gi bye ma snyed dang mnyam pa nyid me tog gi phur ma rnams sangs rgyas bcom ldan 'das de rnams la 'thor ro//de bzhin du dri la sogs pa nas ji srid na bza' dang gdugs dang rin po che la sogs pa'i bkod pa'i bar du yang ngo / /lce de rnams kyis kyang sangs rgyas de rnams kyi bsngags pa brjod pa dang gsol ba 'debs pa yang byed de bcom ldan 'das rnams ji ltar 'os par chos bstan du gsol zhes pa la sogs pa dang /gang yang sems can gyi bya ba rdzogs pa lta bu/ thabs kyis gdul bya rnams brtson par bya ba'i ched du mya ngan las 'das pa ston par bzhed pa mya ngan las 'das par bab pa med pa de rnams la/ 'gro ba ma lus pa la dge ba bskyed pa'i mtshan nyid kyi phan pa'i ched dang mngon par mtho ba dang nges par legs pa'i 'bras bu grub pa'i mtshan nyid kyi bde ba'i ched du/sangs rgyas kyi zhing thams cad kyi rdul phra rab dang mnyam pa'i bskal par bcom ldan 'das rnams bzhugs su gsol zhes bsnyen bkur byas shing phyag 'tshal nas gsol ba 'debs par byed do/ / sems kyi skad cig re re la phyogs bcu khyab par 'gro ste mngon par rdzogs pa'i byang chub par bkod pa nas yongs su mya ngan las 'das pa chen po'i bkod pa ji srid pa rnams byin gyis rlob po/ /dus gsum gyi lus tshad med pa nyid dang / rang gi lus la bcom ldan 'das tshad med pa rnams kyis sangs rgyas kyi zhing gi bkod pa grangs med pa rnams dang /'jig rten gyi khams 'jig pa dang chags pa thams cad kyang ngo / /rlung gi dkyil 'khor thams cad kyang ba spu'i khung bu gcig nas 'byin te sems can rnams la gnod pa yang med do/ /'jig rten gyi khams kyi mthar thug pa'i chu'i phung po gcig tu byin gyis rlob pa dang /der yang pad+ma chen po dang pad+ma de'i 'od kyi bkod pas 'jig rten gyi khams mtha' yas par khyab par byed do/ /der yang byang chub kyi shing chen po ston par byed pa nas rnam pa thams cad mchog dang ldan pa'i thams cad mkhyen pa nyid kyi bar du yang ngo / /rang gi lus la yang phyogs bcu rnams kyi nor bu dang glog dang zla ba'i 'od nas ji srid 'od dang snang ba'i bkod pa thams cad kyi bar du byin gyis rlob po//kha'i dbugs kyis phyogs re re 'jig rten gyi khams mtha' yas pa g.yo bar byed de/ sems can rnams skrag par yang mi byed do/ /phyogs bcu'i rlung gis 'jig pa dang chus 'jig pa dang mes 'jig par yang byin gyis rlob po//rang gi lus kyang de bzhin gshegs pa'i skur dang / de bzhin gshegs pa'i sku la rang gi sangs rgyas kyi zhing dang / rang sangs rgyas kyi zhing la yang de bzhin gshegs pa'i sku'o zhes pa 'di lta bu la sogs pa mtha' yas pa tshad med pa grangs med pa'i ting nge 'dzin dang rdzu 'phrul dang mngon par shes pa'i rnam par rol pa rnams ston par byed do//'di'i yang ye shes kyi snang ba ni sems can rnams ji srid du thams cad mkhyen pa'i ye shes kyi bar la gzhug pa'i ched du gnas pa ni/ sa dgu pa ji srid pa la gnas pa'i byang chub sems dpa' rnams kyi de las gzhan pa'i ye shes kyi snang ba rnams kyis mi 'phrogs so//gang gi phyir 'di'i ye shes kyi pha rol tu phyin pa shas che bas so/ /de yang phal cher gnas gtsang ma'i lha'i rgyal por 'gyur te/ sems can rnams la pha rol tu phyin pa ston pa la byang ba dang gtso bo yin zhing 'dod na rnam pa de lta bu'i brtson 'grus rtsom ste/gang las skad cig gcig gis phyogs bcu'i grangs med pa las 'das pa'i rdul phra rab ji snyed pa de snyed kyi ting nge 'dzin rnams 'thob po/ /de snyed kyi sangs rgyas rnams mthong ngo / /de rnams kyi byin rlabs kyang shes so/ /de snyed kyi 'jig rten gyi khams g.yo zhing snang bar byed do//de snyed kyi lus ston zhing / zhing rnams su 'gro'o/ /de snyed kyi sems can rnams yongs su smin par byed do/ /de snyed kyi bskal par gnas shing sngon gyi mtha' dang phyi ma'i mthar 'jug go/ /de snyed kyi chos kyi sgo rnams rnam par 'byed do//de snyed kyi lus ston zhing / lus dang lus la yang de snyed kyi byang chub sems dpa'i 'khor ro/ /lus kyi ba spu'i bu ga re rer yang grangs las 'das pa'i sangs rgyas bcom ldan 'das re re la 'khor byang chub sems dpa' tshad med pa can rnams skad cig skad cig la rnam pa gzhan dang gzhan yang ston par byed de/rnam par rtog pa la dpyod pa med pa kho nar ro/ /de las gzhan lha dang mi la sogs pa 'gro ba lnga'i dbye ba tha dad pa yang 'khor bar tha dad pa med par te/ brgya byin dang tshangs pa dang 'jig rten skyong ba la sogs pa dang nyan thos dang rang sangs rgyas dang de bzhin gshegs pas 'dul ba'i sems can rnams la 'bad pa med pa kho nar/brgya byin la sogs pa'i gzugs su byas nas chos ston par byed do/ /sgyu ma la sogs pa lta bu'i chos la mos pa ni ji skad du bcom ldan 'das ma bar mar mthar thug par 'gro ba'i sa la gnas pa'i byang chub sems dpa'i yon tan nges par bstan par gsungs pa/sgyu ma dang smig rgyu dang chu zla dang rmi lam dang mig yor dang sgra brnyan dang gzugs brnyan dang sprul pa lta bu'i chos la lhag par mos pa rnams kyis shes so/ /'dir dpe brgyad kyis mtshan nyid brgyad rnams gsal bar byas te/'di lta ste stong pa nyid dang mtshan ma med pa dang smon pa med pa dang rang bzhin med pa dang snang brnyan dang rten cing 'brel bar 'byung ba dang kun brtags dang / gzhan gyi dbang gi mtshan nyid rnams so/ /de ltar thams cad mkhyen pa nyid la dar gyi yol bas bar du chod pa tsam du skye ba gcig gis thogs pa'i bdag nyid chen po 'di'i yongs su dag pa rnams te/cig car gdul bya rnams kyi bsam pa ji lta ba bzhin du rang gi lus yang dag par ston pa dang / skyil krung gcig gis zhing thams cad khyab pa dang / rang gi lus kyi rdul phra rab re re la yang zhing thams cad kyi sangs rgyas dang byang chub sems dpa'i spyod pa dang rnam par 'phrul pa dang sems can gyi khams 'jig pa dang 'chags pa la sogs pa yang dag par ston zhing /rdul phra rab de rnams cher song ba yang ma yin la/ sangs rgyas la sogs pa de rnams chung ba nyid dam 'dres pa yang ma yin te/ de rnams dang der de ltar phan tshun dog pa med pa kho nar bzhugs pa ni gzhan du zhing yangs pa rnams su ji lta ba bzhin no zhes pa la sogs pa sku'i las rnams dang /gsung gcig gis gdul bya rnams kyi bsam pa ji lta bar chos bstan pa thos par byed pa dang / dbyangs gcig gis zhing khams thams cad khyab pa dang / dbyangs kyi dkyil 'khor re rer dbyangs thams cad 'byung ba'o zhes pa la sogs pa ngag gi las rnams dang / ting nge 'dzin gcig gis ting nge 'dzin tshad med pa la snyoms par 'jug pa zhes pa 'di lta bu la sogs pa yid kyi phrin las rnams dang mdor bsdu na/ gom pa 'degs pa dang 'jog pa'i las rnams kyang ji srid byang chub sems dpa' rgyal tshab dam pa thob pa sa legs pa'i blo gros la rab tu gnas pa rnams kyis kyang shes par sla ba ma yin na gzhan rnams kyis lta ci smos/de nyid kyi phyir bar mar gsungs pa/ rab 'byor byang chub sems dpa' sa bcu pa la gnas pa'i byang chub sems dpa' sems dpa' chen po de bzhin gshegs pa kho na zhes par brjod par bya'o shes so//'phags pa blo gros rgya mtsho'i mdor yang / sa bcu pa las pha rol gyi byang chub sems dpa' ni de bzhin gshegs pa kho nar brjod par bya'o zhes so/ /de ni de bzhin gshegs pa'i mdzad pas sems can rnams la so sor nye bar gnas kyi de bzhin gshegs pa'i rtogs pas ni ma yin no//'phags pa byams pas kyang gsungs pa/ sngon gyi 'phen pa'i dbang las dang / /rnam rtog thams cad bral ba'i phyir/ /de ni lus can smin ched du/ /slar yang 'bad pa byed ma yin/ / ston dang gzugs sku dag dang ni/ /spyod dang spyod lam gyis kyang rung / /gang zhig gang gis ji ltar 'dul/ /de 'dis de ltar kho nar shes/ /de ltar nam mkha'i mtha' klas kyi/ /'gro la rtag tu lhun grub par/ /thogs med blo ldan de yis ni/ /sems can don ni yang dag 'jug /byang chub sems dpa' rtogs pa 'di/ /thob pa de bzhin gshegs rnams dang / /sems can yang dag sgrol ba la/ /'jig rten rnams na mnyam pa nyid/ /'on kyang sa gzhi rdul phran dang / /rgya mtsho ba lang rmig rjes kyi/ /khyad par gang yin sangs rgyas dang / / byang chub sems dpa'i khyad de yin/ /zhes so/ /de ltar 'di'i yon tan rnams mdor bsdus pa bstan pa ste/ rgyas par ni bskal pa grangs med pa 'bum phrag du mas kyang mthar thug pa med pa'i rnam pas blta bar bya'o/ /ji skad du gsungs pa/ kye rgyal ba'i sras de ltar re zhig sa chos kyi sprin 'di kho na bskal pa tshad med par bstan kyang phyogs tsam zhig bstan par zad na/de bzhin gshegs pa'i sa lta ci smos/ kye rgyal ba'i sras de gal te phyogs bcu rnams su phyogs re rer 'jig rten gyi khams mu med pa'i rdul phra rab kyi rdul dang mnyam pa'i sangs rgyas kyi zhing rnams 'di lta bu thob pa'i byang chub sems dpa' rnams kyis gang bar gyur kyang /de rnams kyis bskal pa mtha' yas par bsgrubs pa'i byang chub sems dpa'i spyod pa mngon par bsgrubs pas ni/ de bzhin gshegs pa'i ye shes skad cig gcig las byung ba'i de bzhin gshegs pa'i yul gyi yang ji skad bye ba khrag khrig 'bum gyi cha dang grangs dang /rgyu'i bar du yang mi bzod do zhes so/ /de ltar byang chub sems dpa' 'di sa bcu pa 'di kho na'i gnas skabs kyi khyad par bco lnga pa la sogs pa sems bskyed pa drug rnams mngon par sgrub po/ / de la sems bskyed pa bco lnga pa mngon par shes pa dang ldan pa ni rgyal po chen po lta bu ste/ mthu thogs pa med pa nyid kyis gzhan gyi don sgrub pa'i phyir ro/ /ji skad du bcom ldan 'das mar gsungs pa/ byang chub sems dpa' sems bskyed pa gcig gis phyogs bcu rnams su mtha' yas shing mu med pa'i 'jig rten gyi khams rnams su 'gro'o//stong gsum gyi 'jig rten gyi khams kyi rgya mtsho chen po la sogs pa'i chu'i phung po gang de thams cad skra'i rtse mo'i mtha' brgyar gshags pa'i chas 'phen par byed la de la brten pa'i srog chags rnams la gnod pa med do//stong gsum gyi stong chen po'i 'jig rten gyi khams bskal par bsregs pa'i me 'bar ba kha'i dbugs kyis rab tu zhi bar byed do/ /'jig rten gyi khams thams cad khyab pa'i rlung gi dkyil 'khor rnam par bskyod pa chen po sor mo'i tshigs kyi rtse mo gcig gis gnon par byed do//nam mkha'i khams skyil mo krung gcig gis khyab par byed do/ /ri rab chen po la sogs pa'i ri bo rnams skra nyag ma gcig gis bcings te 'jig rten gyi khams dpag tu med par 'phen par byed do/ /phyogs bcu rnams su so sor sangs rgyas kyi zhing thams cad du sangs rgyas bcom ldan 'das rnams lha'i mig gis blta'o//de rnams kyi chos bstan pa yang lha'i rna bas nyan no/ /sems can rnams kyi sems dang spyod pa rnams shes so/ /de rnams kyi yang sngon gyi gnas rjes su dran no/ /zag pa zad pa'i ye shes kyi mngon par shes pa mngon par sgrub la/yang dag pa'i mtha' sngon du byed pa yang ma yin no zhes so/ /rdzu 'phrul gyi rnam par 'phrul pa la sogs pa'i mthu 'di 'dra ba yang dad par dka' ba ma yin te/ bsam gtan pa rnams kyi yang dag par ston pa khyab bdag nyid 'di bsam gyis mi khyab pa'i phyir ro/ /sems bskyed pa 'di ni ston pa mi zad pa yang ngo //de la don la rton gyi legs par sbyar ba la sogs pa'i tshig 'bru la ma yin pa dang / chos ni rigs pa ste/ de la rton gyi gnas brtan la sogs pa'i gang zag la ma yin pa dang / bsgom pa las byung ba'i shes rab ni ye shes te/ de la rton gyi rnam par shes pa thos pa dang bsam pa las byung ba'i shes rab dag la ma yin pa dang /sangs rgyas bcom ldan 'das ni tshad ma mchog ste/ des na nges pa'i don gyi mdo sde gang yin pa de la rton gyi drang ba'i don la ma yin pa'o zhes pa rton pa bzhi rnams so/ /sems bskyed pa bcu drug la bsod nams dang ye shes kyi tshogs dang ldan pa ni bang mdzod lta bu ste/bsod nams dang ye shes kyi tshogs mang po'i mdzod de gnas nyid kyi phyir ro/ /sems bskyed pa bcu bdun pa byang chub kyi phyogs kyi chos sum cu rtsa bdun dang ldan pa ni lam po che lta bu ste 'phags pa'i gang zag thams cad gshegs shing rjes su gshegs pa'i phyir ro//sems bskyed pa bco brgyad pa zhi gnas dang lhag mthong dang ldan pa ni bzhon pa lta bu ste de zung du 'brel par 'gro ba nyid kyis 'khor ba dang mya ngan las 'das pa gang yang rung bar mi ltung bar bde blag tu 'gro ba'i phyir ro/ /sems bskyed pa bcu dgu pa gzungs dang spobs pa dang ldan pa ni bkod ma'i chu lta bu ste chu 'dzin zhing mi zad par 'byin pa dang chos mthun par thos pa dang ma thos pa'i chos dang don 'dzin zhing mi zad par ston par 'byung ba'i phyir ro//sems bskyed pa nyi shu pa chos kyi sdom dang ldan pa ni kun dga'i sgra lta bu ste thar pa 'dod pa'i gdul bya rnams la snyan par sgrogs pa'i phyir//ji skad du bcom ldan 'das mar gsungs pa/ byang chub sems dpa' phyogs bcu so sor dus ring por mun pas 'thoms pa'i 'jig rten gyi bar rnams lus kyi 'od kyis snang bar byas nas der skyes pa'i sems can rnams sangs rgyas kyi sgra dang chos kyi sgra dang dge 'dun gyi sgra sgrogs par byed cing /de rnams kyang yang dag par lta ba la so sor bgrod par byed do zhes so/ /de la chos kyi sdom rnams ni 'dus byas thams cad mi rtag pa dang / zag pa dang bcas pa rnams sdug bsngal ba dang /chos thams cad bdag med pa dang mya ngan las 'das pa zhi ba'o zhes pa so sor rtogs pa rnams so/ /de la mi rtag pa ni rtag tu med pa ste/ med pa'i don ni mi rtag pa'i don to/ /kun rdzob tu skad cig gis 'jig pa'i don yang mi rtag pa'i don no/ /rnam par rtog pa thams cad nye bar zhi ba ni zhi ba'o zhes pa mdor bsdus te sa'i yon tan rnam par gzhag pa ste/bcom ldan 'das kyis kyang gsungs pa/ kye rgyal ba'i sras 'di rnams byang chub sems dpa'i sa bcu rnams te/ mdor bsdus nas bstan pas bstan gyi rgyas par ni bskal pa mtha' yas par ston par byin gyis brlabs pa las rjes su rtogs par bya'o//gang 'das pa dang ma byon pa dang da ltar byung ba'i sangs rgyas bcom ldan 'das rnams kyis gsungs pa dang gsung bar 'gyur ba dang gsungs pa de rnams kyang kye rgyal ba'i sras byang chub sems dpa'i sa bcu po rnams te/rnam pa thams cad mkhyen pa'i ye shes kyi rjes su song ba rnams su blta bar bya ste/ rim gyis mngon du phyogs pa nyid kyi phyir ro zhes so/ /thams cad mkhyen pa'i ye shes de yang skad cig gcig kho na la bcom ldan 'das kyis rtogs pa ste/ ji ltar bum pa la sogs pa tha dad na yang / mi sgrib pa nyid du mtshungs pa nyid kyi phyir/ der son pa'i nam mkha' tha mi dad pa de bzhin du gzugs dang tshor ba la sogs pa'i dngos po tha dad na yang der son pa'i de kho na nyid skye ba med pa'i mtshan nyid can tha mi dad pa'i phyir de kho na nyid gcig kho nar shes par bya zhing / de yang shes pa'i skad cig gcig kho nas rtogs pa'i phyir ro//thams cad mkhyen pa'i ye shes de yang sems bskyed pa gnyis te ye shes lnga'i bdag nyid do/ /de la sems bskyed pa nyi shu rtsa gcig pa bgrod pa gcig pa'i lam dang ldan pa ste/ bla na med pa'i mi skye ba'i chos la bzod pa thob pas na sa de pa rnams byang chub sems dpa' rnams kyi byang chub kyi rang gi ngo bo'i sems de'i bdag nyid du sbyor ba las byang chub sems dpa' rnams kyi 'bras bu dang bya ba dang tha mi dad pa'i phyir bgrod pa gcig pa'i lam mo//de dang ldan pa ni chu'i rgyun lta bu ste rang gi ngang gis 'byung ba'i phyir ro/ /bgrod pa gcig pa'i lam ni 'dres pa dang nye bar 'dres pa nyid kyis mi g.yo ba nas bzung nas te 'on kyang 'di ni bla na med pa'o//sems bskyed pa nyi shu rtsa gnyis pa chos kyi sku dang ldan pa'i sprin lta bu ste/ sems can thams cad kyi don bya ba rnams de las 'jug pa'i phyir/ sprin las snod kyi 'jig rten phun sum tshogs pa rnams bzhin du'o//thabs la mkhas pa mi zad pa yang dga' ldan gyi gnas na bzhugs pa la sogs pa kun du ston pa ni thabs la mkhas pa'o/ /de ltar yang bstan bcos kyang / /rnam kun mngon rdzogs rtogs pa ste/ /'di ni thabs mkhas bcas pa yin/ / zhes so/ /slob dpon dbyig gnyen gyis kyang gsungs pa/ chos kyi 'khor lo rab tu bskor ba'i sangs rgyas kyi ye shes ni rnam par thar pa dang thabs la mkhas pa'i phrin las can te/ 'dzam bu'i gling bye ba phrag brgyar cig car chos kyi 'khor lo rab tu bskor ba'i phyir ro zhes so/ /thabs la mkhas pa ni stong pa nyid dang snying rje chen po dag gam/de las skyes pa'i las la mkhas pa'o/ /ci'i phyir dga' ldan du bzhugs pa kun du ston gyi gzugs dang gzugs med pa rnams su ma yin zhe na/ mi khom pa nas 'dir 'ongs pa bdag cag gi rgyu mtshan du ni ma yin pa kho na'o zhes rim gro mang du mi byed pa yongs su spong ba'i don du'o//ci'i phyir gzhan 'phrul dbang byed du ma yin zhe na/ nus pa yod kyang khyad par du 'phags pa'i skye ba spangs nas sems can la thugs brtse bas dga' ldan du skyes so zhes rim gro mang du lhag par bskyed pa'i don du'o/ /ci'i phyir mi rnams su ma yin zhe na/lha'i bde ba spangs nas bdag cag la thugs brtse bas mir byon no zhes rim gro mang du lhag par bskyed pa'i don du'o/ /ci'i phyir mngal du gnas pa ston zhe na/ rigs mthun pa spro ba bskyed pa'i don du'o/ /ci'i phyir rang nyid mngon par byang chub pa bstan gyi/sangs rgyas gzhan gyi nye bar bstan pa ma yin zhe na/ /skyes bu'i byed pa la sbyor ba'i don du ste/ gzhan la rag las pas mi 'grub ces pa'o/ /ci'i phyir rten cing 'brel par 'byung ba'i gnas pas gnas she na/ de mngon par rdzogs par rtogs pa thun mong ma yin par gsal bar bya ba'i don du'o//ci'i don du gzhan gyi don du mngon par rdzogs par sangs rgyas pa nyi ma bdun du 'das par mdzad ce na/ bdag nyid chos kyi kun dga' dgyes pa chen po nyid gsal bar bya ba'i don du'o/ /de yang ci'i don du zhe na/ sems can rnams de bzhin gshegs pa dga' ba dang gus pa yang dag par 'phel ba'i don du ste/de ltar gyur kyang de 'dra ba'i dgyes pa spangs nas sems can rnams la thugs brtse bas chos ston par byed do zhes pa'o/ /ci'i phyir cang mi gsung bar gyur ce na/ yongs su skom pa rnams kyis gsol ba btab pas chos la gus par bya ba'i don du'o//de las tshangs pa dang byang chub sems dpa' chen po la sogs pa rnams kyis gsol ba btab pa'o/ /ci'i phyir 'ga' zhig tu gsol ba ma btab pa kho nar ston par rtsom zhe na/ gzhan du na ci ston par bzhed pa'am zhes 'di'i ston par bzhed pa nyid mi shes pas so//cis yang byang chub sems dpa' la sogs pa rnams la bstan pa'i ched du byin gyis rlob par byed ce na/ de'i rigs rnams spro ba yang dag par 'phel ba'i don du'o/ /byin gyis rlob pa yang rnam pa gsum ste/ sku'i phyag gis reg pa las sogs pa'o//kha cig tu ni gsung gis so/ /kha cig tu ni thugs kyis so/ /kha cig tu ni gsum kas kyang ngo / /ci'i don du 'od zer dang bcas pa'i cho 'phrul dang gsol ba 'debs pa ston par byed ce na/ las kyi khyad par gyi don du ste/ 'od zer de ni las brgyad dang lus gnyis can no//de la yang dag par sad par byed pa'i las can ni/ gang des reg pa'i byang chub sems dpa' rnams bdag nyid kyi de bzhin gshegs pas byin gyis brlabs pas skyes pa'i stobs snang bar byed pa'o/ /sdud pa dang 'gyed pa'i las ni grangs med pa'i 'jig rten gyi khams su bkye nas 'od 'dom gang tsam du bsdus pa'o//rgyu nyid kyi las ni grangs med pa'i 'od zer gyi 'khor gyi rgyu nyid kyis so/ /ston par byed pa'i las ni 'jig rten gyi khams thams cad na de bzhin gshegs pa'i 'khor gyi dkyil 'khor dang der gnas pa'i byang chub sems dpa' kun du ston pa'o//rab tu zhi bar byed pa'i las ni ngan song gi sdug bsngal thams cad rab tu zhi bar byed pa'i phyir ro/ /zil gyis gnon pa'i las can ni bdud thams cad kyi mthu dman par byed pa ste skrag cing brtabs pas gdul bya rnams la bgegs byed pa la mi 'jug pa'o//'dun par byed pa'i las ni bsam gyis mi khyab pa'i sangs rgyas kyi phrin las dang mthu gsal bar byed pa las so/ /gsol ba 'debs pa'i las ni tshigs su bcad pa'i sgra 'byin pa las so/ /lus gnyis ji ltar zhe na/ skar mda' lta bu'i lus ni gang gi tshe khams gzhan du 'gyed pa'o//nyi ma lta bu'i lus ni gang gi tshe sprin gyi dra ba mthug po'i khang pa brtsegs pa byas nas thams cad gnas te gcig gi mthus so sor snang ngo / /de ltar 'khor gyi dkyil 'khor de rnams su gcig tu gyur pa bzhin du phan tshun mthong bas bstan pa yang sla bar 'gyur la nyan pa yang ngo //gzhan yang gang gi tshe bcom ldan 'das 'das pa'i lung ston par bzhed par gyur pa de'i tshe 'od zer rnams bcom ldan 'das kyi rgyab tu nub par 'gyur ro/ /'on te ma 'ongs pa ma yin na mdun du'o/ /dmyal bar skye ba ni zhabs kyi mthil du'o/ /byol song du skye ba ni zhabs kyi rting par ro//yi dags su skye ba ni zhabs kyi mthe bong la'o/ /mir skye ba ni pus mo dag la'o/ /stobs kyi 'khor los sgyur ba'i rgyal po ni phyag g.yon pa'i mthil du'o/ /'khor los sgyur ba'i rgyal po ni phyag g.yas pa'i mthil du'o/ /lhar skye ba ni lte bar ro/ / nyan thos kyi byang chub ni zhal du'o/ /rang sangs rgyas kyi byang chub ni smin mtshams su'o/ /bla na med pa yang dag par rdzogs pa'i byang chub ni gtsug tor du'o zhes so/ /ci'i don du spyod lam bzhi dang / ston pa dang / snyoms par 'jug pa dang / nang du yang dag par 'jog pas gnas pa ste/sku dang gsung dang / thugs kyi spyod pa dang / bya ba dang bral ba'i mtshan nyid bzhi rnams kyis gnas she na/ gnas pa thams cad kyis 'phags pa thams cad dang thun mong ma yin pa'i phan 'dogs pa chen po rab tu 'jug pa las so/ /gzhan yang 'jig rten pa'i bsam pa'i dbang las bcom ldan 'das kyi nang du yang dag par 'jog pa yin gyi rang gi ngo bo las ma yin no//ci'i phyir lan gsum du bzlas te/ rnam pa bcu gnyis su chos kyi 'khor lo bskor zhe na/ 'di tsam gyis 'gro ba'i don bsgrub pa'i phyir ro/ /de la chos ni bstan pa'o//de nyid 'khor lo ste gdul bya'i rgyud rnams la 'khor bar byed pa'i phyir ro zhes chos kyi 'khor lo ste/ bden pa bzhi'o/ /de gsum du bzlas pa ni/ 'di ni sdug bsngal lo/ /'di ni sdug bsngal kun 'byung ba'o/ /'di ni sdug bsngal 'gog pa'o/ /'di ni sdug bsngal 'gog par 'gro ba'i lam mo zhes bden pa bzhi'i rang bzhin yongs su gcad pa ni lam dang po'o//de kho na rim pa ji lta bar yongs su shes par bya ba dang / rab tu spang bar bya ba dang / mngon du bya ba dang / bsgom par bya ba 'di tsam nyid du yongs su gcad pa ni lan gnyis pa'o/ / de kho na'i bdag nyid kyis yongs su shes pa spangs pa dang mngon du byas pa dang bsgoms zin pa nyid du yongs su gcad pa ni gsum pa'o/ /de'i phyir de ni lan gsum du bskor ba'o/ /sdug bsngal gyi bden pa'i sdug bsngal gyi rang bzhin dang / yongs su shes par bya ba nyid dang yongs su shes pa nyid ces pa rnam pa gsum dang /kun 'byung gi bden pa'i de'i rang bzhin dang spong bar bya ba nyid dang spangs pa nyid ces pa gsum dang / 'gog pa'i bden pa'i de'i rang bzhin dang mngon du bya ba nyid dang mngon du byas pa nyid ces pa gsum dang / lam gyi bden pa'i de'i rang bzhin dang bsgom par bya ba dang bsgom pa nyid ces pa gsum ste/de'i phyir de ni rnam pa bcu gnyis so/ /yang na 'di ni sdug bsngal ba'o/ /yongs su shes par bya'o/ /yongs su shes so zhes pa lan gsum du bskor ba'o/ /so so la sangs rgyas kyi spyan dang rnam par mi rtog pa'i ye shes dang yang dag pa'i don can nyid kyi phyir rig pa dang mi slob pa'i rnam pa thams cad mkhyen pa'i ye shes kyi blo 'byung ba'i phyir zhes pa rnam pa bcu gnyis rnams so//de ltar bden pa so so la ste gsum dang bcu gnyis su chos mthun pa nyid kyi phyir/ lam gsum dang rnam pa bcu gnyis su chos kyi 'khor lo bskor te/chos kyi phung po stong phrag brgyad cu rtsa bzhi bstan pa las so/ /'dod chags la sogs pa la spyod pa stong phrag brgyad cu rtsa bzhi rnams kyi spyod pa re re'i gnyen po gzhung ji snyed kyis yongs su rdzogs pa de snyed kyi gzhung gi phung po ni chos kyi phung po'o zhes pa chos kyi phung po stong phrag rnams so//ci'i phyir yongs su mya ngan las 'das par gshegs she na/ le lo can rnams myur ba'i don du'o/ /bcom ldan 'das shAkya thub pa'i dam pa'i chos yun ji srid du gnas par 'gyur zhe na/ lnga brgya pa tha ma ji srid par ro/ /brgya phrag lnga rnams 'dus pa ni lnga brgya pa'o//tha ma ni lnga brgya pa lnga pa ste/ lnga brgya pa lngar dam pa'i chos gnas par 'gyur ro zhes pa'i gsung las te dam pa'i chos sgrub pa nyams pa'o zhes kha cig go/ /gzhan rnams ni de bzhin gshegs pa'i dam pa'i chos gnas pa'i dus ni lo stong phrag lnga rnams te/de rnams brgya phrag lnga lnga rnams kyis phyed mar byas pa ni lnga brgya pa bcu rnams su 'gyur ro/ /dus bcu rnams te/ sngon la re zhig rtogs pa'i dus dang sgrub pa'i dus dang lung gi dus zhes pa gsum mo/ /slar yang so sor rnam pa gsum ste/ dgra bcom pa dang phyir mi 'ong ba dang rgyun du zhugs pa dang /lhag mthong dang ting nge 'dzin dang tshul khrims dang chos mngon pa dang / mdo sde dang 'dul ba'i sde snod kyi dus te/ dgu po rnam grangs ji lta bar lnga brgya pa dgu rnams la'o/ /bcu pa'i dus ni rtags tsam ste/ 'di nyid lnga brgya pa tha ma'o zhes smra'o//spros pas chog go/ /ye shes lnga po rnams kyang sngar ni mdor bsdus pas rnam par gzhag la/ 'dir ni rgyas par bya'o/ /de la dang po ni chos kyi dbyings shin tu rnam par dag pa dang bdag nyid gcig pa'i ye shes so/ /de yang chos kyi rnam grangs mtha' dag thos pa'i bag chags yongs su smin pa las/sa ma lus pa sgom pa'i rgyu can rtag tu sems can thams cad la phan pa dang bde ba bskyed pa'i ched du nye bar gnas pa ting nge 'dzin dang gzungs kyi sgo dang tshad med pa'i bsod nams dang ye shes kyi rjes su song ba dang / nyon mongs pa dang shes bya'i sgrib pa thams cad las grol ba ni/chos kyi dbyings shin tu rnam par dag pa dang / chos thams cad kyi de bzhin nyid dang / phyin ci ma log pa'i rang bzhin dang / 'phags pa'i chos thams cad bskyed pa'i rgyu dang / de bzhin gshegs pa thams cad kyi bdag nyid do/ /gal te de bzhin gshegs pa chos kyi dbyings kyi rang bzhin yin la/chos kyi dbyings kyang de bzhin nyid yin zhing / de yang chos thams cad kyi spyi'i mtshan nyid yin na/ chos kyang rnam pa sna tshogs pa rnams te so so rang gi mtshan nyid tha dad pa'i phyir/ de'i rjes su son pa'i chos kyi dbyings ci ltar tha dad pa ma yin te/tha dad pa de'i bdag nyid yin pa'i phyir ro/ /tha dad par gyur na yang ji ltar spyi'i mtshan nyid yin zhe na/ dper na nam mkha' dngos po med pa bum pa dang snam bu la sogs pa tha dad pa thams cad kyi rjes su son kyang tha dad pa ma yin par rtogs par bya ste/ bum pa'i nam mkha' dang snam bu'i nam mkha' zhes pa la sogs pa ni tha snyad tsam mo//de bzhin du chos nyid de'i bdag nyid kyis gzugs la sogs pa tha dad pa thams cad kyi rjes su son yang tha dad pa ma yin te/ spros pa ma lus pa las ldog pa ni chos thams cad kyi spyi'i mtshan nyid yin pa'i phyir ro//gzugs kyi stong pa nyid nas ji srid du rnam par shes pa'i stong pa nyid ces pa la sogs pa ni khyad par gzhan spangs pas tha snyad tsam mo/ /khyad par gzhan mi spong ba ni rab 'byor gzugs stong pa'o nas rnam par shes pa stong pa'o zhes pa'i bar kyang ngo / /gang zhig rten cing 'brel par 'byung //de ni stong pa nyid du brjod/ /de ni brten nas brtags pa'o/ /dbu ma yi ni lam nyid do/ /zhes pa dang / gang phyir dben pa dben gyur las/ /tha mi dad pa nyid du 'dod/ /ces pa'i rigs pa las so/ /don dam par ni chos kyi dbyings 'dir rang gi ngo bo spong ba'am ngo bo gzhan nye bar len pa ma yin no//de gsungs pa/ ldog pa rang bzhin med nyid phyir/ /tha dad tha dad med rtag min/ /zhes so/ /bcom ldan 'das kyis kyang gsungs pa/ nam mkha' nam mkha' zhes brjod de/ nam mkha' ni brjod du med pa'o/ /de bzhin du stong pa nyid stong pa nyid ces brjod de stong pa nyid ni brjod du med pa'o zhes so//chos bstan pa don med par thal ba yang ma yin te/ de rtogs pa'i rgyu mtshan nyid kyi phyir te/ brgyud par phrin gyi yi ge mthong bas don rtogs pa de bzhin du de bzhin gshegs pa rnams kyi thugs rje chen po'i rgyu mthun pa gang brjod du med pa'i don brjod pas gsal bar byed pa de 'di nam mkha' la tshon gyi ri mo 'god pa bzhin du shin tu ngo mtshar ba'o//ji skad du gsungs pa/ blo gros rgya mtsho 'di lta ste skyes bu 'ga' zhig kho na nam mkha' gzugs med pa bstan du med pa thogs pa med pa rnam par rig byed ma yin pa 'di tshon sna tshogs pas bkra bar byed do//ji srid du blo gros rgya mtsho de bas kyang sangs rgyas bcom ldan 'das rnams shin tu dka' ba mdzad pa ste/ gang brjod du med pa'i chos mngon par rdzogs par byang chub nas brjod pas sems can pha rol rnams la rnam par rig par byed pa'o zhes pa la sogs pa'i bar du'o//chos kyi dbyings yongs su dag pa 'di yang rang bzhin gyis rnam par dag pa nyid kyi phyir sems can thams cad la sems mnyam pa nyid yongs su rdzogs pas thams cad du dbyer med par 'jug ste/ ji ltar rang gi sems rnam par dag par yongs su grub cing rtag tu rang bzhin gyis 'od gsal ba'i phyir rang bzhin yongs su dag pa de bzhin du sems can thams cad kyi sems kyi yongs su 'jug pa rang bzhin gyis yongs su dag pa'o//'on kyang glo bur ba'i dri ma dang bral ba'i phyir rnam par gzhag par mi bya'o/ /de'i tshe yang skyon rnams kyis gos pa yang ma yin te/rang bzhin gyis yongs su dag pa nyid kyi phyir ro/ /gang gi phyir 'dod chags la sogs pa ni skyon rnams te sun dbyung bar bya ba nyid kyi phyir dang sems dri ma can du byed pa nyid kyi phyir ro/ /de rnams kyang glo bur ba ste brtags pa'i stobs kyis 'jug pa'i phyir de'i rang bzhin ma yin pa nyid kyi phyir ro//de nyid kyi phyir de rnams spang bar bya ba ste rang bzhin ni spang bar mi nus pa nyid kyi phyir ro/ /de gsungs pa/ sems 'di ni rang bzhin gyis 'od gsal ba'o zhes so/ /ji ltar nam mkha' rang bzhin gyis yongs su dag kyang mig ma dag pa rnams la rab rib la sogs pas nye bar bcom pa las rnam par ma dag par snang ba de bzhin du chos kyi dbyings rnam par dag kyang rang gi rtog pas kun nas bslang ba'i 'dod chags la sogs pa'i rgyu mtshan las shes rab kyi mig ma rig pa'i rab rib kyis nye bar bcom pa rnams la rang bzhin gyis yongs su dag pa yang phyin ci log tu snang ngo //rnam pa thams cad yongs su dag pa'i shes rab kyi spyan can rnams ni de ltar mi dgongs so/ /chos kyi dbyings rnam par dag pa de yang rnam pa thams cad yongs su dag pa ni/ khyad par med pa de bzhin gshegs pa thams cad kyi chos kyi sku bstan par bya ba'o//de kho na don dam par de bzhin gshegs par brjod do/ /dus thams cad du de bzhin kho nar yod pa'i phyir ro/ /de nyid kyi phyir sems can thams cad kyi sems kyi rgyud rnams la yang yod pa'i phyir/ sems can thams cad de bzhin gshegs pa'i snying po can no zhes gsungs so//thams cad la gnas kyang de sems can rnams kyi rang gi sgrib pa'i stobs bskyed pa las dmus long gis nyi ma bzhin du mi mthong ngo / /ji skad du theg pa chen po bsdus par gsungs pa/ snod chag pa yi zla ba bzhin/ /sems can skyon can la snang min/ /zhes so//gal te de bzhin gshegs pa rnams chos kyi dbyings rnam par dag pa'i rang bzhin yin na de ni spros pa thams cad dang bral ba'i tshul can yin pa nyid kyi phyir 'bad rtsol med pas ci ltar sems can gyi don mdzad pa'i rgyu can gyi ye shes rnams skyed par byed ce na/ nam mkha' bzhin te/dper na/ nam mkha' ni lus dang ngag dang yid kyi las rnams skye ba la gegs mi byed pa'i ngo bos skabs ster bar byed cing rnam par rtog par yang mi byed pa dang / dper na zla ba dang nyi ma dang sgron ma la sogs pa rnams kyi 'od zer rnams de la 'bad rtsol med par skyes nas gzugs la sogs pa rnams rab tu gsal bar byed pa dang /yid bzhin gyi nor bu rnams kyang 'bad rtsol dang bral bar sems can gyi bsam pa ji lta ba bzhin yongs su rdzogs par byed pa de bzhin du de bzhin gshegs pa chos kyi dbyings rnam par dag pa la de'i bdag nyid kyis gnas pa ni 'bad pa med par don thams cad mdzad par rnam par gzhag ste/de'i phyir chos kyi dbyings rnam par dag pa ni de bzhin gshegs pa'i ye shes lnga la sogs pa thams cad bskyed pa la rgyu mtshan gyi dngos por 'gyur ba'am/ ye shes kyi sprul pa longs spyod rdzogs pa dang sprul pa'i sku'i bdag nyid sems can gyi bya ba sgrub pa'i rgyu mtshan rnams thams cad la nam mkha' bzhin du go skabs 'byin par byed do//mi zad pa nyid kyis rgya che ba nyid kyi phyir dang thogs pa med pa'i phyir rnam par rtog pa med pa las kyang sngon gyi mngon par 'du byed pa'i dbang las de'i bdag nyid rkyen gyis skye ba'i phyir ro//'di kho na yang de bzhin gshegs pa rnams kyi mchog tu bsam gyis mi khyab pa'i ngo bo ste/ gang mtshan dang dpe byad thams cad kyis yongs su brgyan pa rnams 'khor ba'i mtha'i bar gyi bskal par byin gyis rlob pa dang sngon gyi smon lam gyi stobs bskyed pas chos kyi sku'i gnas skabs las rnam par rtog pa med pa yang thams cad mkhyen pa nyid dang /sprul pa rnams kyis sems can gyi don mdzad pa'o/ /gal te yang de'i tshe de bzhin gshegs pa rnams la 'di ni bya ba'o/ /'di ni bya ba ma yin pa'o zhes bya ba la sogs pa'i rnam par rtog pa med mod/ de lta na yang sngon gyi 'phen pa'i dbang las rab tu nges par bzung nas/gnyid sad pa bzhin dang 'gog pa'i snyoms par 'jug pa las ldang ba bzhin du/ ji skad brjod pa'i bya ba rnams rab tu mkhyen te/ ji skad du 'phags pa blo gros rgya mtshos nges par bstan par gsungs pa/ 'di lta ste/ dge slong gaN+DI byin gyis brlabs nas/'gog pa la snyoms par 'jug par 'gyur gyi/ gaN+DI'i sgra de'i rna bar nye bar ltung ba yang ma yin la rnam par rtog par byed pa yang ma yin te/ 'on kyang ldang bar 'gyur ro zhes pa la sogs pa'o/ /chos kyi dbyings rnam par dag pa de yang ye shes dang sprul pa thams cad kyis sems can gyi bya ba sgrub pa la dbyer med par 'jug gi /skye ba dang 'gag pa dag ni ma yin no/ /de kho na mngon par dgongs nas gsungs pa/ 'jam dpal skye ba med pa dang 'gag pa med pa zhes pa 'di ni de bzhin gshegs pa'i tshig bla dgas so zhes pa la sogs pa dang / lha'i bu chos thams cad skye ba med pa ni sangs rgyas 'byung ba ste/ de lta na thob pa med do/ /mngon par rtogs pa med do zhes pa la sogs pa'o/ /gzugs la sogs pa don dam par de bzhin nyid kyi ngo bo can rnams la yang skye ba la sogs pa rnams yod pa ma yin pa la kun rdzob tu ni rnam par gzhag go//de bzhin du ye shes dang sprul pa la sogs pa thams cad kyang ngo / /gal te de bzhin gshegs pa chos kyi dbyings kyi rang bzhin yin na/ de sems can thams cad la phan pa dang bde ba nye bar sgrub pa'i ched du gsungs pa dang bzhud pa dang 'byon par byed pas/de dang tha mi dad pa'i phyir chos kyi dbyings kyang smra ba dang 'gro ba dang 'ong bar thal bas cig shos dang 'dra bar rnam par dag pa med pa dang skye ba la sogs par thal lo zhe na/ de lta ma yin te/ chos kyi dbyings kyi rang bzhin ni don dam par de bzhin gshegs pa ste chos kyi dbyings kyang sems can thams cad kyi rgyud kyi rjes su son pa'o//de rnams kyang rang gi sa bon yongs su smin pa'i dbang las dang de'i bdag po nyid las de'i ngo bo'i bya ba so sor snang ba'i rnam par rig pa nye bar skyes pas na de ltar rab tu 'jug ste/ gang de bzhin gshegs pa ste/ chos bstan pa dang bzhud pa la sogs pa sems can gyi don gyi bya ba mdzad do zhes tha snyad 'dogs pa'o//de bzhin gshegs pa ni bdag po nyid tsam ma gtogs pa'i bya ba gzhan yod pa ma yin te/ gang las de'i ngo bo'i bya bar 'gyur ba'o/ /ji skad du 'phags pas gsungs pa/ khyod kyis yi ge gcig kyang ni//cung zad bshad pa med par ni/ /gtso bos gdul bya'i skye bo kun/ /chos kyi char pas tshim par mdzad/ /ces so/ /bcom ldan 'das ma bar mar yang / rigs kyi bu nges par de bzhin gshegs pa ni gang du yang bzhud pa'am byon pa med de/ gang gi phyir de bzhin nyid ni g.yo ba med pa'o nas/ji srid du de bzhin nyid de ni de bzhin gshegs pa'o zhes pa la sogs pa'o/ /gzugs kyi sku la mngon par dgongs nas de bzhin gshegs pa gshegs so zhes pa la sogs pa gsungs te 'gal ba med do/ /gal te sangs rgyas thams cad kyi dbyings rnam par dag pa'i bdag nyid yin na ci ltar khyed dang bdag gi don nyid du 'bad rtsol med par 'khor gyi dkyil 'khor tha dad ce na/chos kyi sku tha dad pa med pa'i de bzhin gshegs pas spros pa med pa'i ngo bo can sngon gyi smon lam gyi dbang las longs spyod rdzogs pa dang sprul pa'i sku tha dad pa can rnams kyi yang rang gi 'dus byas pa'i stobs kyis byung ba rnam pa thams cad phun sum tshogs pa'i 'khor gyi dkyil 'khor rnams nye bar dmigs la/sna tshogs pa'i sangs rgyas kyi zhing dang bkod pa sna tshogs pa rnams kyang ngo / /me long lta bu'i ye shes ni bdag dang bdag gir 'dzin pa dang / gzung ba dang 'dzin pa'i rnam rtog gis dben pa dmigs pa dang rnam pa yongs su ma chad pa/ nyon mongs pa'i dri ma dang rnam par rtog pa mtha' dag spangs pa/ g.yo ba med pa/ ye shes ma lus pa'i rten gyi rang bzhin dmigs pa ma lus pa la brjed ngas med pa/ yul dang dbang po dang shes pa'i gzugs brnyan 'char ba'i rgyu mtshan shes pa thams cad kyi rten du gyur pa/de bzhin nyid rnam par dag pa la dmigs pa'o/ /de yang shes bya thams cad la khyab par byas nas 'byung ba ste/ de bzhin gshegs pa ni de'i bdag nyid kyi phyir/ des rang rig pa'i rnam pas rang dang spyi'i mtshan nyid kyi rjes su son pa'i skye mched la sogs pa gzugs brnyan dang 'dra bar so sor snang ba rnams de'i rnam pa nye bar 'dzin pa'i phyir na de bzhin gshegs pas rab tu mkhyen to//de bzhin gshegs pa ni brjed ngas pa med pa'i chos nyid can du yang de nyid kyi phyir rig ste/ shes bya mtha' dag la brjed ngas pa med pa'i phyir ro/ /gzhan du na me long lta bu'i ye shes med na ci ltar thams cad mkhyen pa nyid yin te/ shes bya'i phung po mtha' dag rang gi ngo bo bzhin du de la rab tu gsal bas so/ /dus gsum pa'i srog chags su gyur pa thams cad kyi shes pa yang des yang dag par mi rig pa 'byung ba med de/thams cad yang dag par rig pa kho na'o/ /yang na de bzhin gshegs pa'i me long gi ye shes kyi dkyil 'khor la brten nas/ rgyud gzhan rnams la yang skye mched dang de'i yul dang rnam par shes pa'i gzugs brnyan rnams 'jig rten gyis shes par 'gyur te/de med na de rnams mi 'byung ba'i phyir la/ 'byung ba'i dus nyid na yang yang dag par rig pa'i phyir ro/ /de'i phyir 'di gsungs te/ de bzhin gshegs pa'i me long lta bu'i ye shes kyi dkyil 'khor la brten nas/ skye mched dang de'i yul dang rnam par shes pa'i gzugs brnyan rnams rnam par rig par byed do zhes so//de'i dbang gis de rnams 'byung ba'o zhes dgongs pa ste/ sa bon yod na'ang sa gzhi la sogs pa med pa las myu gu mi skye ba bzhin dang / gzugs yod kyang me long med pa'i phyir gzugs brnyan mi 'char ba bzhin no//'di yang mi g.yo ba bskyod bya ma yin pa ste/ rnam par rtog pa'i yongs su g.yo ba thams cad dang bral ba nyid kyi phyir dang / rgyun gyis rtag tu rjes su son pa nyid kyi phyir ro/ /mnyam pa nyid kyi ye shes la sogs pa gsum rnams ni g.yo ba yang ste res 'ga' ba nyid du tha snyad bya ba nyid kyi phyir ro//gal te 'di shes pa 'byung ba'i phyir rgyu mtshan yin na de'i phyir de'i dbang gis 'byung ba srog chags thams cad kyi shes pa'i gzugs brnyan rnams cig car ram thams cad kyi tshe 'char bar thal bar ci ltar mi 'gyur zhe na/ ji ltar me long gi dkyil 'khor ni gzugs brnyan sna tshogs 'char ba'i rgyu mtshan du 'gyur zhing rtag tu gzugs brnyan 'char bar byed pa'ang ma yin te/gzugs brnyan gyi rkyen la ltos pa nyid kyi phyir ro/ /de bzhin du me long gi ye shes ni sems can dang / dus kyi rkyen gyi khyad par la ltos pa ste/ mu stegs pa la sogs pa kha cig ni mi dge ba'i bshes gnyen dang phrad pa las dam pa ma yin pa'i chos nyan pas bsgribs/kha cig ni dam pa'i chos spong ba'i mtshan nyid kyis dam pa'i chos kyis phongs par gyur pa'i las byed/ kha cig ni nyon mongs pa'i sgrib pas bsgribs/ kha cig ni las kyi sgrib pa drag pos bsgribs/kha cig ni ngan song gsum dang byang gi sgra mi snyan pa'i mi dang 'du shes med pa'i sems can gyi ngo bo rnam par smin pa'i sgrib pas bsgribs/ kha cig ni mi khom par ltung / kha cig ni theg pa dman pa'i rigs can rnams te/ 'di rnams thams cad dus re zhig pa'i snod ma yin pa rnams so//ji skad du mdo sde rgyan du gsungs pa/ ji ltar chu yi snod chag na/ /zla ba'i gzugs ni mi snang ba/ /de bzhin sems can ngan pa la/ /sangs rgyas gzugs ni mi snang ngo / /ji ltar me ni gzhan du 'bar/ /slar yang gzhan du zhi ba ltar/ /de bzhin sangs rgyas rnams la yang //snang dang mi snang shes par bya/ /zhes dang / sangs rgyas kyis gdul bar bya ba rnams yod pa na/ sangs rgyas 'byung ba'i phyir de snang gi rnam par brtul zin pa na/ mya ngan las 'das pa'i phyir de mi snang ngo / /gsungs pa/ skye bo'i bsod nams kyis dang smon lam khyad par las//'phangs phyir 'di yi 'jug pa shin tu bsam mi khyab/ /ces so/ /snying rje [(]chan [,]chen [)]po'i rang bzhin chos kyi sku ni rtag pa ste/ rgyu ni yongs su smin gyur na/ /gang dang gang la gang tshe dang / /gang tshe bya ba phan 'gyur ba/ /de dang de la de snang ngo / /thams cad kyi tshe yid bzhin gyi nor bu ltar gnas kyang sems can rnams kyi rang gi las kyi nyes pas bskyed pas rgyu ma tshang ba las 'bras bu ster bar snang ba ma yin te/dper na lha'i rgyal pos char phab tu zin kyang rul bar gyur pa la sogs pas sa bon du mi rung bar gyur pa'i shA li la sogs pa'i sa bon ni myu gu skyed par mi byed pa bzhin no//mnyam pa nyid kyi ye shes ni gang byang chub sems dpa' sa mthong ba'i lam mngon par rtogs pa'i dus su bdag dang gzhan mnyam pa nyid kyi ye shes thob la/ de nyid la dmigs pa de kho na sa gong nas gong du sgom pa rab tu gyur pa'i rnal 'byor gyis byams pa dang snying rje chen po dang ldan pa sangs rgyas kyi sa la mi gnas pa'i mya ngan las 'das pa la zhugs pa/dbyibs dang kha dog gi bdag gi dngos po sku rnam pa sna tshogs pa ston pa'i thabs su rnam par gzhag go/ /de nyid kyi phyir me long lta bu'i ye shes las khyad par ro//rten cing 'brel par 'byung ba'i dngos po tsam dang de'i chos nyid kyi yul can gyi me long lta bu'i ye shes la dmigs pa'o/ /ji skad du gsungs pa/ tshangs pa chos thams cad ni rten cing 'brel par 'byung ba rnams so/ /rten cing 'brel par 'byung ba khong du chud pa yang byang chub ste/ji ltar de bzhin gshegs pas chos thams cad gzigs pa ste 'dra ba kho na ni tshangs pa chos de rnams so zhes dang / slar yang gsungs pa/ gang rten cing 'brel par 'byung ba ma gtogs pa'i chos de rdul tsam yang ma mthong ngo zhes so/ /rten cing 'brel par 'byung ba'i chos nyid la rten cing 'brel par 'byung ba'i sgra yang dag par 'jug pa nyid du mngon par dgongs nas gsungs pa/gang rten cing 'brel par 'byung ba mthong ba de ni chos mthong ba'o/ /gang chos mthong ba de ni sangs rgyas mthong ba'o zhes so/ /don dam pa'i chos yin pa nyid kyi phyir dang don dam pa'i sangs rgyas yin pa nyid kyi phyir te/de ni thams cad du tha dad pa med do/ /tshad med pa rnams kyang mi g.yo ba nas bzung nas rnam par smin pa pa dang / mngon par 'du byed pa med par 'byung ba dang / mnyam pa nyid kyi ye shes dang mtshungs par ldan pa dang / chos kyi dbyings kyi yul can dang rnam par rtog pa med pa'i phyir dang chos thams cad ma dmigs pa'i phyir dmigs pa med pa zhes brjod do//de rnams nyid sangs rgyas kyi sa la rnam pa thams cad yongs su rdzogs shing rtag tu rjes su son pa ste/ bya ba rgyun mi 'chad pa'i phyir ro/ /de rnams kyi mnyam pa nyid de/thams cad du khyad par med par 'jug pa'i phyir ram yang na de rnams kho na mnyam pa nyid de mnyam pa nyid la dmigs pa'i phyir ro/ /'khor ba dang mya ngan las 'das pa dag dang lam dang 'bras bu dag kyang mnyam pa nyid de rang bzhin gyis nye bar zhi ba nyid kyi phyir ro/ /rnyed pa dang ma rnyed pa la sogs pa 'jig rten gyi chos brgyad rnams thams cad du ro gcig pa nyid kyi phyir/gcig tu mnyam pa nyid dang byang chub kyi phyogs la sogs pa yon tan rnams kyang mnyam pa nyid du yongs su rdzogs pas na mnyam pa nyid kyi ye shes so/ /so sor rtog pa'i ye shes ni gzungs dang bsam gtan dang ting nge 'dzin dang snyoms par 'jug pa dang so so yang dag par rig pa dang stobs dang mi 'jigs pa la sogs pa rnams thams cad kyi yang dag par 'dzin pa nyid kyis skye ba'i sgo/shes bya'i rnam pa tha dad pa thams cad la thogs pa med par 'jug pa bai DUr+ya la sogs pa'i rang bzhin gyi sku yang dag par ston pa'i thabs/the tshom thams cad gcod pa'i rgyu'i chos rab tu gsal bar byed pa'o/ /rang dang spyi'i mtshan nyid kyi yul can/ rnam pa shin tu rnam par phyed pa ste/ ji ltar chos de rnams mngon par tha dad pa'i rnam pas phyed pa yin pa de lta kho nar so sor rtog pa'i phyir ro//longs spyod rdzogs pa'i rgyu ste longs spyod rdzogs pa'i sku yis 'byor pa sna tshogs pa bstan pa las byang chub sems dpa' chen po dang dam pa'i chos rdzogs par longs spyod pa so sor nyams su myong ba'i phyir ro/ /khams dang 'gro ba dang skye gnas gzhan gyi rgyu dang 'bras bus bsdus pa'i sems dang sems las byung ba so sor snang ba ste/gang gi phyir de'i bdag rkyen las rtogs pa po rnams de ltar rnam par gzhag pa nye bar 'dogs pas so/ /dga' ba'i rgyu yang ste pha rol tu phyin pa la sogs pa chos sna tshogs pa rnams kyis dga' bar bya ba nyid kyis dga' ba nges par 'brel par byed pa nyid kyi phyir ro//de la ni byang chub sems dpa' rnams dga' bas so/ /bya ba sgrub pa'i ye shes ni 'jig rten gyi khams thams cad du gdul bya ji lta bar sems can yongs su smin par bya ba'i ched du tshad med cing bsam gyis mi khyab pa'i thabs sna tshogs pa rnams kyis pha rol la phan pa byed pa'i rgyud gcig pa can te rang dang spyi'i mtshan nyid kyi yul can no//de ni de bzhin gshegs pa rnams kyi sprul pa sna tshogs pa'i rten nyid kyi phyir sprul pa'i sku'o/ /de yang rnam pa gsum ste/ sku'i sprul pa dang /gsung gi sprul pa dang / thugs kyi sprul pa'o/ /de la sku'i sprul pa rnam pa gsum ste/ rdzu 'phrul kun du ston pa dang / skye ba kun du ston pa dang / las kyi rnam par smin pa kun du ston pa'o/ /de rnams ni rdzu 'phrul gyi cho 'phrul gyis 'dun par mdzad de/ dang por mngon du phyogs pa bskyed pa las rab tu dang ba bskyed pa'i phyir te/ dper na/ lteng rgyas 'ong srungs la sogs pa bzhin no/ /kun brjod pa'i cho 'phrul gyis yongs su smin par mdzad de/ las su rung ba nyid du bskyed pa las dge ba'i rtsa ba rgyas par mdzad pa nyid kyis so/ /rjes su bstan pa'i chos 'phrul gyis khams gsum pa dang ngan 'gro las rnam par grol bar mdzad de/de'i nye bar bstan pa'i stobs kyis 'phags pa'i lam bskyed pa'i phyir dang / 'od zer 'gyed pa la sogs pas sdug bsngal nye bar zhi bar byas shing sngon gyi dge ba'i rtsa ba dran par byas nas bde 'gro la rab tu dgod pa'i phyir ro//cho 'phrul gsum rnams kyang gnas pa bzhi rnams kyis byed de/ de la spyod lam gyis gnas pa ni sku'i las thams cad do/ /ston pas gnas pa ni gsung gi las thams cad do/ /ting nge 'dzin gyis gnas pa ni gang rang bzhin gyis mnyam par gzhag pa dang /gang yang ting nge 'dzin la yang dag par phyogs par byed pas te de gnyis yid kyi las so/ /snyoms par 'jug pas gnas pa ni gang sangs rgyas kyi spyan gyis sems can rnams la gzigs pa dang lha la sogs pa nas 'pho ba na yang ste/ de gnyis ka yid kyi las so/ /skye ba kun du ston pa ni de bzhin gshegs pa rnams cig car 'jig rten gyi khams thams cad du skye ba'i skye mched thams cad du skye ba nye bar ston pa'o//las kyi rnam par smin pa kun du ston pa ni las kyi 'gro ba yang dag par ston pa ste/ 'dod pa dang mi 'dod pa'i las kyi 'bras bu la nye bar longs spyod pa yang dag par ston pa'i phyir ro//gang gi phyir bde ba dang sdug bsngal lus kyis myong ba sngon gyi las kyi 'bras bu las kyi lus kyi rten can skye la/ sngon gyi las kyis sprul pa'i lus ni las kyi lus so/ /bya ba sgrub pa'i ye shes kho na sku sprul pa po las kyi sku ste so sor snang ba'i rnam par shes pa bskyed pa'i rgyu mtshan nyid kyi phyir ro zhes pa ste/de lta bu byung ba dang spyod tshul gyi mtha' ston pa dang skyes pa'i rabs thams cad sgrol la sogs pa'o/ /de thams cad kyang sprul pa'i skur ston pa ste/ dper na mthe bo'i rtse mo snad pa la sogs bstan pa bzhin no/ / de bzhin gshegs pa rnams ni rdo rje'i snying po'i sku can nye bar 'pho ba med pa'i chos can te/ gang gi phyir byang chub sems dpa' la yang 'dod pa'i khams kyi dbang phyug 'byung po bye ba khrag khrig 'bum phrag brgyad cu'i 'khor can gyis 'bad pa drag pos/ mtshon cha'i khyad par de dang de rnams kyis nye bar bsnun pa'i khyad par rnams kyis kyang /ba spu gcig langs pa'i nyams pa'ang skyes pa med na rnam pa gzhan du lta ci zhig /de yang dag par rdzogs par sangs rgyas pa la yang lhas byin ming tsam nyid kyis nyes par spyod pa byas so zhes pa 'di ji ltar zhe na/ de'i phyir 'di thams cad ni srog chags rnams dge ba dang mi dge ba'i bya ba la rab tu 'jug pa dang ldog pa'i don du de dang skal ba mnyam pa nyid bstan pas gdul ba'i phyir ro//dka' ba spyod pa ston pa ni de ltar bstan pas gdul bar bya ba rnams gdul bya'i don dang tshul khrims dang brtul zhugs tsam gyis dag par mi 'gyur gyi ye shes kyis dag pa'o zhes rab tu bstan pa'i don du yang ngo //byang chub ni mchog tu rnyed par dka' ba yin pas dge sbyong mgo reg la byang chub ga la yod ces pa 'di'i 'bras bu'o zhes gsungs pa ni ngag gi nyes par spyod pa las bzlog pa'i don du'o/ /sku'i sprul pa dang gsung gi sprul pa de yang rang dang gzhan gyi lus dang 'brel pa dang ma 'brel pa yang ngo //thugs kyi sprul pa ni rang dang gzhan dang 'brel pa kho na'o/ /de la sku'i sprul pa rang gi lus dang 'brel pa ni bdag nyid 'khor los sgyur ba la sogs pa'i gzugs su ston pa ste/ bsam gyis mi khyab pa'i thabs la mkhas pa dang ldan pas na sangs rgyas bcom ldan 'das rnams dang byang chub sems dpa' rnams dang nyan thos rnams kyi sku dang gsung gi 'jug pa ni 'jig rten rjes su gzhug pa las kyang rig par bya ste/ ji ltar mnyan yod du rgyal po ka pi na gdul ba'i don du bdag cag gi bcom ldan 'das kyis 'khor los sgyur ba'i gzugs 'dzin pas rgyan rnams kyang bzung zhing gzhu yang bzung la/'khor de nyid du nyan thos chen po rnams thams cad kyis kyang rgyal phran la sogs pa'i gzugs kyis rab tu byung ba la bkag pa'i rgyan rnam pa sna tshogs pa bzung ba nas/ji srid ka pi na dang blon po la sogs pa'i 'khor stong phrag bco brgyad bsnyen par rdzogs te/ dgra bcom pa nyid la rab tu bkod pa dang / mnyan yod de nyid du bram ze'i khye'u 'dul ba'i dus na bcom ldan 'das tshangs pa'i gzugs gdong bzhi pa ral pa'i cod pan 'chang bar gsungs pa dang /rgyal po'i khab tu brgya byin gyi cha lugs su sprul nas bram ze stong phrag drug cu mtho ris kyi 'bras bu dang byang chub la rab tu bkod pa dang / drang srong gnas 'jog gi rigs can gyi bram ze mo 'dul ba na/ mnyan yod du bcom ldan 'das kyis bud med kyi ro bzung zhing 'di ni bdag gi chung ma'o zhes kyang gsungs pa dang /ko sa la'i gar mkhan 'dul ba'i don du yul ma ka ra koT+Ta bal+li ru bcom ldan 'das gar mkhan gyi cha lugs 'dzin par gsungs pa dang / dri za zur phud lnga pa gdul ba'i ched du dri za tha mal pa'i gzugs can bcom ldan 'das kyis pi wang bsnams shing glu blangs la pi wang gi rgyud stong po bcad pa na sgra stong phrag yongs su rdzogs pa nam mkha' las byung ba lta bu'o//de bzhin du rab tu byung ba dang 'gal ba 'dul ba la bkag pa gzhan rnams kyang khyim pa tha mal pa'i gzugs kyis spyod par gsungs te/ji skad du bstod pa mdzad pas gsungs pa/ mchog tu zhi ba la gnas kyang / /thugs rje'i dbang du gyur nyid kyis/ /rol mo mkhan gyi sgyu rtsal la'ang / /khyod kyi zhabs ni bkod pa mdzad/ /ces so/ /rol mo mkhan ni rol rtsed mkhan rnams so/ /de rnams kyi sgyu rtsal ni bzo ste pi wang sgrogs pa la sogs pa yang ngo //de yang mdzad pa'i ched du gshegs pa'o/ /sde pa'i lung rnams su yang gsungs pa/ mar me mdzad pa nas bzung nas/ /de bzhin gshegs pa chags bral te/ /sgra gcan 'dzin sras bstan zhes pa/ /'di ni 'jig rten rjes gzhug pa'o//zhes te/ cho 'phrul sna tshogs pa rnams ston pa'o/ /byang chub sems dpa' rnams kyis kyang yang dag pa ma yin pa'i phyag la sogs pa'i las mthun pa ma yin pa rnams kyang ston pa nas dman pa bran nyid kyi bar du yang ngo / /de'i phyir sangs rgyas bcom ldan 'das rnams dang byang chub sems dpa' rnams dang nyan thos rnams kyi spyod pa ni 'di 'dra ba'o zhes bsam gyis mi khyab pa ste/de la thar pa 'dod pa rnams kyis dad pa kho na bya'o/ /gzhan yang kha cig tu gdul bya dang 'tsham pa'i yul du gshegs pas dang / kha cig tu gdul bya rnams rang gi yul du bkug pas dang /kha cig tu gnas pa'i sku las/ phyogs thams cad du 'jig rten gyi khams tshad med pa rnams su sku la sogs pa yang dag par bstan pas so/ /bcom ldan 'das ni dbang thams cad so sor rtogs pa'i dbang nyid thob pa'i phyir sku la sogs pa rnams kyi rdul phra rab kyi dkyil 'khor gyi bar la 'jug pa dang /mos pa ji lta ba bzhin du sems can rnams kyi yang dag pa ma yin pa'i rtog pas dben par mdzad de/ dper na ser skya'i gzhi'i nags su seng ge dang 'phrog byed dang dbyig gi snying po dang brgya byin dang dpal mo dang ri skyes dang gzhon nu la sogs pa lha dang klu dang gnod sbyin dang srin po dang dri za dang lha ma yin dang nam mkha' lding dang mi'am ci brgya phrag stong du ma rnams mya ngan las 'das pa dang ldan pa'i bstan pas btul lo zhes pa la sogs pa lta bu rim pa ji lta bar dper brjod par rig par bya'o//bag med pa dang ldan pa rnams kyang bag yod pa'i gnas la bkod pas/de dang de'i sdug bsngal zhi bar mdzad de/ dper na bdag cag gi bcom ldan 'das kyis dga' bo dang sor phreng dang mthong ldan dang bde byed la sogs pa rnams bzhin no/ /de ltar ni dga' bo zhes bya ba shAkya'i gzhon nu chags pa drag po can thams cad du rang gi chung ma la shin tu lhag par chags pa de med par yud tsam yang mi sdod pa de 'dra ba de/de bzhin gshegs pas khyim nas bkug nas rab tu byung du bcug cing rab tu byung nas kyang bud med de nyid nyin dang mtshan du sems par byed kyi chos ma yin pa byed pa/de lta na yang de bzhin gshegs pas ji ltar dgra bcom pa nyid thob par mdzad do/ /de bzhin du bram ze rmongs pa sor phreng can zhes bya ba des bla ma'i bka'i bya ba ched du 'gyur ro zhes mi stong du gcig gis ma tshang ba 'tsho ba dang bral bar byas pa de yang phyis de bzhin gshegs pas rab tu phyung zhing khams gsum pa'i 'dod chags dang bral bar mdzad do/zhes pa dang / mthong ldan ni ma skyes dgra yin la/ de'ang zhe sdang can te/ de ltar ni des mi dge ba'i bshes gnyen dang 'grogs pa dang / sngon gyi 'khon rjes su 'brel pa las pa chos dang ldan pa'i rgyal po srog dang phral la/de yang de bzhin gshegs pa kho na'i dge ba'i bshes gnyen la brten nas dmyal ba'i me'i bud shing las thar ro zhes pa dang / rigs kyi bu bde byed kyang tshul bzhin ma yin pa yid la byed pa'i dbang las/ pha rol gyi bud med dang 'grogs pa la brten nas/ma 'tsho ba dang phral te/ de bzhin gshegs pa'i bstan pa kho na la brten nas pho long brdabs pa dang 'dra bas dmyal ba las 'das te mtho ris kyi 'jig rten gyi bde ba nyams su myong ngo zhes thos so/ /sku'i sprul pa gzhan gyi lus dang lus 'brel pa ni bdud la sogs pa rnams sangs rgyas la sogs pa'i gzugs su ston pa'o//ma 'brel pa ni sa la sogs pa rnams rin po che sna bdun la sogs pa'i rang bzhin la sogs pa'i gzugs su ston pa'o/ /gang yang tshad med pa'i sangs rgyas kyi sku ston pa dang / gang yang 'od zer bkye nas 'jig rten gyi khams snang bar byed pa dang /gang yang skye ba la sogs pa ston pa'o/ /de bzhin du gsung gi sprul pa bdag gi lus dang 'brel pa ni tshangs pa'i dbyangs kyis mtha' yas pa'i 'jig rten gyi khams su go bar mdzad pa'o/ /gzhan gyi lus dang 'brel pa ni gang gis nyan thos la sogs pa chos ma gtogs pa rnams kyang sangs rgyas kyi dbyangs kyis theg pa chen po'i chos ston pa ste/dper na 'phags pa rab 'byor la sogs pa rnams bzhin no/ /ma 'brel pa ni rol mo'i rnam pa thams cad dang / gzugs snang ba thams cad dang /nam mkha' las kyang chos ston pa'i sgra 'byung bar mdzad pa'o/ /thugs kyi sprul pa ni bdag nyid kyi chos thams cad thugs su chud pa'o/ /gzhan gyi'ang de ltar sems nges par 'dzin pa ste/ gang gis shes rab dman pas kyang chos phra mo yang so sor rtogs par mdzad pa dang /dran pa nyams pa rnams kyang dran pa theb po zhes pa la sogs pa'o/ /sangs rgyas kyi sprul pa de yang rnam pa thams cad du rtag par rjes su son pa bsam gyis mi khyab par rig par bya ste/ mdzad pa bya ba dang grangs dang zhing gi bye brag las bsam gyis mi khyab pa nyid kyi phyir dang /sems can gyi don gyi bya ba la mi ldog par 'jug pa'i phyir ro/ /chos kyi dbyings dang ye shes lnga po 'di rnams kyi go rims rnam par gzhag pa ni rgyu dang 'bras bu dang de'i rab tu dbye ba las so/ /de la rgyu ni chos kyi dbyings shin tu rnam par dag pa'o/ /'bras bu ni 'phags pa'i ye shes te/de la dmigs par skyes pa'i phyir dang / de la brten pa'i phyir dang / de'i ldog pa'i dbye ba rnam pa lnga'o/ /ji ltar skye ba las so zhes pa gzhan rnams so/ /yang na de bzhin gshegs pa'i rang bzhin dang rgyu dang 'bras bu'i rim pa ste/ gang yang de bzhin gshegs pa'i rang bzhin de bzhin nyid rnam par dag pa'i mtshan nyid can dang /de la dmigs pa'i rnam par mi rtog pa'i ye shes gnyis rab tu gyur pa'o/ /rgyu ni tshad med pa dang ldan pas sems can thams cad la mnyam pa nyid kyi ye shes phul du byung ba'o/ /'bras bu ni gzhan gyi don byed pa ste/de yang skal ba dang ldan pa dang skal ba med pa'i sems can so sor rtog pa las dang de dang rjes su mthun pa'i bya ba sgrub pa las so/ /yang na sangs rgyas thams cad rnam par gzhag pa'i rim pa ste/ ngo bo nyid dang longs spyod rdzogs pa dang bya ba sgrub pa'i sangs rgyas ni chos kyi dbyings rnam par dag pa'i rang bzhin gnyis dag dang /gnyis dag dang gcig gis rim pa ji lta ba bzhin te/ sngar ji skad bshad pa bzhin no/ /gal te yang mnyam pa nyid kyi ye shes de nyon mongs pa can gyi yid gnas gyur pa'i mtshan nyid can nyid kyi phyir me long lta bu'i ye shes la dmigs pa de lta na yang longs spyod rdzogs pa'i sku kho nas bsdus te/me long lta bu'i ye shes ni mi g.yo ba nyid kyis na chos kyi skus bsdus pa'i phyir ro/ /de slob dpon tsan+d+ra go mis gsungs pa/ 'ga' zhig de bzhin nyid dmigs pa//me long ye shes su ni 'dod/ /gzhan rnams don kun rnam pa can/ /don kun spyod yul can du 'dod/ /mnyam nyid ye shes gang yin pa/ /de ni de bzhin nyid la dmigs/ /bya ba sgrub pa'i ye shes ni/ /dgos don rnam pa can du 'dod/ /rnam pa kun du thams cad nyid/ / 'di yi rnam shes nus kun ldan/ /zhes so/ /de'i phyir mnyam pa nyid dang so sor rtog pa'i ye shes dag longs spyod rdzogs pa'i sku ste/ ji ltar khong du chud pa'i chos la nye bar longs spyod pa'i rten nyid kyi phyir ro/ /de la 'bras bu'i gnas skabs ni sangs rgyas kyi sa kun du bzang po zhes bya'o//'bras bu de yang ye shes dang spangs pa'i bdag nyid do/ /chos kyi dbyings rnam par dag pa rtogs pa'o/ /ye shes de yang rnam pa lnga'o/ /'di tsam kho na sangs rgyas kyi sa ste/ mtha' dag par der sangs rgyas kyi chos ma lus pa bsdus par rnam par gzhag pa'i phyir ro/ / de'i bdag nyid kyis gnas pa las bya ba gcig tu bya ba rnams ni rang gi mtshan nyid kyis bsdus so/ /de la dran pa nye bar gzhag pa bzhi rnams ni so sor rtog pa'i ye shes kyis bsdus pa ste lus la sogs pa las so sor rtog pa'i phyir ro/ /yang dag par spong ba bzhi ni brtson 'grus kyi rang bzhin te/brtson 'grus kyang de bzhin gshegs pa rnams kyi shes rab kyis yongs su bzung ba 'dor ba med cing gzhag pa med pa'i mtshan nyid can te/ mnyam pa nyid kyi ye shes so/ /tshad med pa bzhi dang rdzu 'phrul gyi rkang pa bzhi rnams ni ting nge 'dzin gyi rang bzhin nyid kyi phyir so sor rtog pa'i ye shes te/ting nge 'dzin gyi sgo can rnams kyi gnas su 'gyur ro zhes pa'i gsung las so/ /gang yang gzhan bsam gtan dang rnam par thar pa dang ting nge 'dzin dang snyoms par 'jug pa la sogs pa dang ting nge 'dzin dang gzungs kyi sgo dang / zag pa zad pa mkhyen pa dang / rdzu 'phrul gyi mngon par shes pa dag kho na las gzhan pa'i mngon par shes pa rnams dang /nyon mongs pa med pa dang smon nas shes pa dang so so yang dag par rig pa dang mi 'jigs pa dang sangs rgyas kyi chos ma 'dres pa bco brgyad dang / lam shes pa rnams dang kun du 'gro ba'i lam dang zag pa zad pa mkhyen pa'i stobs dag las gzhan pa'i stobs rnams ni me long lta bu'i ye shes kyi bdag nyid do//kha cig ni mi 'jigs pa rnams dang dad pa la sogs pa rnams mnyam pa nyid kyi ye shes kyi bdag nyid do zhes zer ro/ /rdzu 'phrul gyi mngon par shes pa ni bya ba sgrub pa'i ye shes kyis so//zag pa zad pa mkhyen pa'i ye shes mngon par shes pa dang zag pa zad pa mkhyen pa'i stobs ni zag pa zad pa'i rgyud la brjod par 'dod pa na/ rgyu gang gis zag pa rnams zad pa'o zhes ye shes lnga rnams kyis so/ /yang na mya ngan las 'das pa ni zag pa rnams zad pa'o zhes pa ste chos kyi dbyings shin tu rnam par dag pa dang me long lta bu dang mnyam pa nyid kyi ye shes rnams kyis so//kun du 'gro ba'i lam mkhyen pa'i stobs ni me long lta bu la sogs pa'i ye shes bzhi rnams so/ /shes rab kyi dbang po dang shes rab kyi stobs ni me long lta bu dang mnyam pa nyid kyi ye shes dag gis so//byang chub kyi yan lag dang lam gyi yan lag rnams mnyam pa nyid kyi ye shes kyis so/ /sdug bsngal shes pa la sogs pa shes pa bcu gnyis rnams me long lta bu dang / mnyam pa nyid kyi ye shes dag gis so/ /bsnyel ba mi mnga' ba'i chos nyid ni me long ye shes kyis so//bag chags kyi mtshams sbyar ba thams cad spangs pa ni chos kyi dbyings rnam par dag pa dang me long ye shes dag gis so/ /pha rol tu phyin pa rnams kyang ngo / /pha rol tu phyin pa zag pa dang bcas pa rnams ni lam gyi gnas skabs su so sor rtog pa dang bya ba sgrub pa'i ye shes dag gis so//mtshan dang dpe byad rnams ni bya ba sgrub pa'i ye shes kyis bsdus so/ /ye shes kyis nye bar mtshon pa'i sems dang sems las byung ba'i tshogs smos pa'i phyir/ de las gzhan pa'i sangs rgyas kyi chos rnams kyang sbyar bar bya'o/ /de bzhin du me long ye shes dang de'i rten can gyi mnyam pa nyid kyi ye shes zhes pa gnyis po tshul gcig pa ste/chos kyi dbyings rnam par dag pa la dmigs pa nyid kyi phyir ro/ /de las gzhan pa'i ye shes gnyis kyang ro gcig pa ste/ gzhan la phan par byed pa rgyun gcig pa nyid kyi phyir dang / de bzhin nyid la dmigs pa nyid kyi phyir ro/ /gnyis can gnyis dang chos kyi dbyings shin tu rnam par dag pa'i ye shes ni rang gi ngo bo tha dad pa med pa ste/ de'i bdag nyid kyis chos kyi dbyings shin tu rnam par dag pa la dmigs pa'i phyir ro/ /ji skad du sangs rgyas kyi sa'i mdor gsungs pa/chos kyi dbyings rnam par dag pa na 'dres pa dang nye bar 'dres pa bya ba ro gcig pa can gyi ye shes kyi rdzogs par longs spyod pa'o zhes so/ /gsung de nyid las sems bskyed pa snga ma rnams su ro gcig pa ma yin no zhes rtogs par bya'o/ /'dres pa ni gcig tu gyur pa'o/ / gcig tu gyur pa yang res 'ga' tha dad par byed la/ de ni nam yang tha dad par bya ba med pa'o zhes pa nye bar 'dres pa shin tu dbyer med pas mnyam par dmigs par bya ba dang dmigs par byed pa nyid du nye bar ldan pa'i phyir ro/ /bya ba ro gcig pa ste ro ni snying po ste rang bzhin no/ /ye shes kyis rdzogs par longs spyod pa ni yul te/chos kyi dbyings yang dag par longs spyad par bya ba nyid kyi phyir ro/ /ye shes kyis rdzogs par longs spyod pa gang gis dgongs pa ye shes chos kyi dbyings la dmigs nas skye ba'i phyir ro gcig pa yin pa zhes tshig rnam par sbyar ro/ / yang na yang dag par longs spyod pa ni rdzogs par longs spyod pa myong byed de/ ye shes kyis yang dag par longs spyod par bya ba nyid kyi phyir na/ 'di ye shes kyis rdzogs par longs spyod pa yin la/ de yang bde ba ste rten gcig pa nyid kyi phyir ro gcig pa ste/ de la sdug bsngal dang btang snyoms kyi dbye ba med pa'i phyir ro//'bras bu yang ste chos kyi dbyings kyi'o/ /yang na ye shes kho na rdzogs par longs spyod pa ste/ kun rdzob tu rang rig pa nyid kyi rnam pas yang dag par longs spyad par bya ba nyid kyi phyir ro/ /de yang ro gcig pa ste bdag dang gzhan la sogs pa gnyis kyi rnam par rtog pa med pa'i phyir ro//'bras bu yang ste/ rgyu las gnyis kyi 'du shes kyis dben par dus thams cad du 'jug pa'i phyir ro/ /mdo'i ngag gi don 'di yang / 'dir thams cad rig pa kho na'o/ /ye shes lnga po 'di rnams kyis byang chub sems dpa'i sa rnams kyang bsdus te/'on kyang mngon par 'du byed pa dang bcas pa 'byung ba'i lam la gnas pa rnams la 'bras bu ro gcig pa ye shes rdzogs par longs spyod pa ni mi 'byung ngo / /sa brgyad pa nas bzung nas ni byang chub sems dpa' gnyis kyi 'du shes dang bral ba'o/ /gnyis ni bdag dang bdag gi ba dang yod pa dang med pa dang rtag pa dang mi rtag pa dang /byung ba dang ma byung ba dang / skyes pa dang ma skyes pa dang / bdag dang gzhan zhes bya ba la sogs pa'o/ /de'i gnyen por thams cad du sems mnyam pa nyid thob po/ /de nas bzung nas gnyis kyi 'du shes dang bral ba las/ 'bad pa thams cad dang bral ba zag pa med pa mtha' gcig tu yongs su dag pa lhun gyis grub par 'byung ba rnam par rtog pa med pa'i ye shes kyi gzugs brnyan nyid kyi phyir 'bras bu ro gcig pa ye shes rdzogs par longs spyod pa'o/ /'on kyang sgrib pa'i lhag ma dang bcas pa nyid kyis na yongs su ma dag pa'o//lhun gyis grub pa'i ye shes kyi spyi la mngon par dgongs nas gsungs pa'i phyir 'gal ba med do/ /mi g.yo ba la ni chos thams cad gdod ma nas ma skyes pa'o zhes mi skye ba'i chos la bzod pa chen po thob pas so/ /gal te yang rab tu dga' ba la bdag dang gzhan mnyam pa nyid thob pa yod pa de lta na yang 'bad pa dang bcas par 'byung ba nyid kyis na yongs su dag pa ma yin pa nyid kyi phyir rnam par ma bzhag go//byang chub sems dpa'i sa thams cad kyang rgya mtshor chu bo chen po rnams bzhin du sangs rgyas kyi sar zhugs pa rten tha dad med pa rnams su 'gyur te/de bzhin gshegs pa thams cad kyi de bzhin nyid yongs su dag pa rten tha mi dad pa nyid kyi phyir ro/ /de ltar yang 'bras bu ro gcig pa can ye shes kyis rdzogs par longs spyod pa'o/ /de nyid kyi phyir yang zag pa med pa'i dbyings la sangs rgyas rnams du mar rnam par ma bzhag go//gang kho na chos thams cad kyi de bzhin nyid kyi ngo bo phyin ci ma log pa'i ngo bo de kho na nyid stong pa nyid de ni shin tu rnam par dag pa 'jig rten las 'das pa'i ye shes kyi lam thob pa las sgrib pa gnyis kyi sa bon shin tu bral bar gyur pa na yongs su dag pa'i chos kyi dbyings de bzhin nyid gnas gyur pa zhes brjod do//zag pa med pa'i dbyings kyang ngo / /de ni ye shes chos kyi dbyings shin tu rnam par dag pa'i ye shes te/ so sor rang gis rig par bya ba nyid kyis de la dmigs pas na mtha' med pa'i dus su gnas pa'i phyir ro/ /chos kyi dbyings de dang chos thams cad kyang me long lta bu'i ye shes kyis dmigs pa ste/rang dang spyi'i mtshan nyid la dmigs pa nyid kyi phyir ro/ /gang kho na rnam par rtog pa'i bdag nyid gnas ngan len mtha' dag gi rten kun gzhi'i rnam par shes pa/ gnyen po'i stobs kyis gnas ngan len gyi dri ma ma lus pa dang bral ba las gnas gyur pa de kho na me long ye shes zhes bya'o//gang slob dpon tsan+d+ra go mis gsungs pa/ gang yang kun gzhi'i rnam par shes/ /me long ye shes nyid gyur pa/ /de yang chos kyi dbyings kyi ni/ /ngo bo nyid du 'ga' zhig 'dod/ /ces so/ /kun gzhi'i rnam par shes pa 'di ci zhe na/yid kyi rnam par shes pa kho na ste/ ji ltar de kho na bdag dang bdag gi bar sgro 'dogs pas rab tu 'jug pa na nyon mongs pa can gyi yid du tha dad par rnam par gzhag pa de bzhin du de kho na gnas ngan len la sogs pa mtha' dag gi rten nyid kyis dang / chad pa dang mtshams sbyor ba dang /'dod chags dang bral ba dang nyams pa dang 'chi 'pho ba dang skye ba la sogs pa'i rten nyid kyis na gnas ngan len la sogs pa rnams 'dir gzhi 'cha'o zhes pas kun gzhi'i rnam par shes pa yang ngo / /de nyid kyang de las gzhan pa'i rnam par shes pa dang lhan cig tu gyur pa'i chos gzhan dge ba dang mi dge ba de dang de rnams kyis bsgo bya ste/ji ltar rigs par sa bon rgyas pas rgyu byas pa gang las rgyud yongs su gyur pa'i khyad par rgyur blangs pa las stobs ji lta bar dgod par byed pa'i 'jug pa thob par gyur pa na/ phyis de'i 'bras bu 'dod pa'am mi 'dod pa mngon par 'grub ste/dper na rgya skyegs kyi khu bas yongs su bsgos pa'i ras bal gyi sa bon la me tog dang 'bras bu yang dmar po nye bar skye ba bzhin no/ /ji skad du gsungs pa/ gang phyir rgyud gang kho na la/ /las kyi bag chags bsgos gyur pa/ /de kho na la 'bras bu 'brel/ / ras bal la ni dmar nyid bzhin/ /zhes so/ /de kho na yang dgongs pa nges par 'grel pa'i mdor gdul bya'i khyad par gyi ngor gsungs pa/ len pa'i rnam par shes pa zab cing phra/ /sa bon thams cad chu bo'i rgyun bzhin 'bab/ /bdag tu rtog par gyur na mi rung zhes/ /'di ni byis pa rnams la ngas ma bstan//zhes so/ /de ni yang srid par nying mtshams sbyor ba rnams su lus len pa'i phyir len pa'i rnam par shes pa zhes brjod do/ /chos thams cad kyi sa bon rnams kyi gzhi nyid kyi phyir kun gzhi'i rnam par shes pa'o/ /skye ba snga ma'i rnam par smin pa yin pa'i phyir rnam par smin pa'i rnam par shes pa'o//gang 'di kun gzhi'i rnam par shes pa 'di dang rnam par rtog pa can nyon mongs pa can gyi yid kyi rnam par shes pa dang dbang po lnga'i rnam par shes pa rnams las gzhan pa kho na kun gzhi'i rnam par shes pa'o zhes sems pa de'i dmigs pa dang rnam pa ci yin/dmigs pa dang rnam pa yongs su ma chad pa'o zhe na/ ci ltar rnam par shes pa zhes bya ba yang yin la 'di 'dra ba yang yin/ de ltar ni rang gsal la thun mong ma yin pa rnam par shes pa'o zhes pa mtshan nyid do/ /brjod pa'i rnam par shes pa rnam pa brgyad ma gtogs pa gzhan ni 'dir cung zad kyang so sor rang gi rnam pa dang bcas par nyams su myong ba med do//mi gsal bar yod do zhes 'dod pa yang rnam par shes par sma ba rnams kyi ma yin te/ bdag la sogs pa phyi rol du gyur pa yang yod pa nyid du thal ba'i phyir ro/ /rnam pa med pa'i rnam par shes pa ni rmi lam du yang nyams su myong ba med do zhes gzhan du legs par dpyad zin to//de'i phyir rta'i rwa bzhin du de la mngon sum med la rjes su dpag pa yang med do/ /de ltar na yang gal te kun gzhi'i rnam par shes pa yongs su rtog na bdag kyang yongs su rtog cing de kho na yang bdag gi rang gi ngo bo'o//de nyid kyi phyir 'di la yang mngon par dgongs nas bdag tu yongs su rtog par bcom ldan 'das kyis gsungs so/ /gang bye brag tu smra ba'i khyad par rnams ni legs pa'o/ /sems dul gyur las bde ba 'byung / /zhes pa dang / gang phyir bdag nyid bdag gi mgon//pha rol mgon du su zhig 'gyur/ /zhes pa la sogs pa bstan pa na dgongs pa mi shes pa rnams sems kho na bdag go zhes mngon par rlom ste/ de rnams kyis gal te kun gzhi'i rnam par shes pa ston pa'i gsung rab nyan thos kyi theg pa thos par gyur na/ de'i tshe rnam par shes pa de bdag go zhes shin tu brtan par rlom par 'gyur ro//de'i phyir 'di ltar yang mngon par dgongs nas gsungs pa/ byis pa rnams la zhes pa la sogs pa'o/ /gang rig pa'i mtshan nyid dang bral yang kun gzhi'i rnam par shes pa rtog pa de ni chen po rnams kyang bag med pa las/rigs med pa dang nyan thos dang rang sangs rgyas kyi rigs nges par khas len pa bzhin dang / don dam par grub pa'i shes pa tsam khas len pa bzhin du 'khrul pa'o zhes pa ste/ 'dir skyes bu tshad mas ci zhig /'dir brjod pa'i rigs pas sems med pa'i snyoms par 'jug pa dag dang 'du shes med pa la yang sems yod do zhes 'dod pa ni yang dag par rtogs pa ma yin no zhes pa rgyas pas ci bya ste/skabs su bab pa gzhag par bya'o/ /ye shes gzhan gsum yang gnas gyur pa ste/ gang slob dpon tsan+d+ra go mis gsungs pa/nyon mongs can yid gnas gyur pa/ /mnyam nyid ye shes brjod par bya/ /so sor rtog pa'i ye shes ni/ /yid kyi rnam shes nyid de'o/ /de dag longs spyod rdzogs sku nyid/ /chos la rdzogs longs spyod ston phyir/ /byang chub sems dpa' chen po rnams/ /chos la rdzogs longs spyod phyir yang //kha cig me long ye shes kyang / /longs spyod rdzogs pa'i sku ru rtogs/ /de yang de la rgyu nyid phyir/ /nye bar btags las de bzhin gzhan/ /dbang po lnga yi rnam shes gang / /de ni don kun yongs su 'dzin/ /sems can kun gyi don du ni/ /bya ba sgrub pa tsam nyid thob//de yang rtag par thams cad du/ /dus ji bzhin dang bsam ji bzhin/ /sangs rgyas rnams kyi sprul sku ste/ /sprul pa kun gyi rgyu nyid phyir/ /kha cig yid kyi kho na la/ /sprul pa'i sku nyid du ni rtog /dbang po lnga yi rnam shes gang / /de yi longs spyod rdzogs skur ro//zhes so/ /de ltar ye shes lnga po 'di rnams ni yongs su dag pa'i 'jig rten las 'das pa'i kun rdzob tu mchog tu zag pa med pa'i chos kyi dbyings las nye bar skyes pa ste de'i rang bzhin rnams so/ /zag pa med pa'i chos kyi dbyings de yang chos kyi sku ste/ zag pa med pa'i chos gang rnams kyi chos nyid yin pa'i chos de thams cad bcom ldan 'das ma chen mo dag tu gsungs la/de'i phyir bstan bcos ni/ byang chub phyogs mthun tshad med dang / /rnam par thar dang mthar gyis ni/ /snyoms 'jug dgu yi bdag nyid dang / /zad par bcu yi bdag nyid dang //zil gyis gnon pa'i skye mched ni/ /rab tu dbye bas rnam brgyad dang / /nyon mongs med dang smon mkhyen dang / /mngon shes so so yang dag rig /rnam pa thams cad dag bzhi dang / /dbang bcu dang ni stobs bcu dang / /mi 'jigs pa ni bzhi rnams dang / /bsrung ba med pa rnam gsum dang //dran pa nyer gzhag rnam gsum dang / /bsnyel ba mi mnga'i chos nyid dang / /bag chags yang dag bcom pa dang / /skye la thugs rje chen po dang / /thub pa kho na'i ma 'dres chos/ /bco brgyad bshad pa gang yin dang / /rnam pa thams cad mkhyen zhes pa'ang //chos kyi sku ru mngon par brjod/ /ces so/ /byang chub kyi phyogs rnams dang tshad med pa rnams dang zhes zlas dbye'o/ /mthar gyis ni snga ma'i rjes su phyi mas 'brel pa'o/ /bsrung ba med pa ni bsrung bar bya ba ma yin pa ste mi bsrung ba'o zhes pa'i don to/ /de ni rnam pa gsum mo//chos kyi sku zhes pa ni zag pa med pa ste/ 'dir sangs rgyas kyi chos kyi tshogs so/ /de la skabs ji lta bar bdag gis mang po rnams gsal bar byas la/ lhag ma rnams 'dir gsal bar bya'o/ /nyon mongs pa ni ku co dang 'thab rtsod la sogs pa ste/ 'dir ni 'thab pa'i rgyu nyon mongs pa ni 'thab pa'o//bdag la dmigs nas 'di rnams kyi nyon mongs pa skye bar ma gyur cig ces ting nge 'dzin gang la snyoms par 'jug pa ste/ sngon gyi smon lam gyi stobs las gang las longs nas grong khyer la sogs par zhugs pa de la dmigs nas der de rnams kyi 'thab pa mi skye ba de ni 'thab pa med pa'o//de ni nyan thos la yang 'gyur zhing sangs rgyas la yang ste/ de dag gi byed pa la khyad par ro/ /nyan thos kyi nyon mongs pa med pa ni grod la sogs par sems can gang rnams kyis mthong bar gyur pa na de la nyon mongs pa mi skye ba ste/de rnams kyi mthong ba nyid rnam par spong ba'o/ /de bzhin gshegs pa'i ni mthong bar gyur pa na yang de rnams kyi nyon mongs pa rgyun gcod pa nyid yin gyi/ mthong ba ni ma yin no zhes pa nyon mongs pa 'thab pa dang 'gog pa'o/ /nyan thos kyi nyon mongs med pa ni mthong bas mi rnams kyi nyon mongs pa skye ba rnam par spong la/de bzhin gshegs pa yi ni gzhan rnams kyi yang nyon mongs pa'i rgyun no zhes pa gzhan no/ /rnam par rtog pa'i spros pa thams cad kyang 'thab pa'o/ /de rnams med pa las rnam par mi rtog pa'i snyoms par 'jug pa ni 'thab pa med pa'o/ /'di shes par gyur cig ces smon nas/bsam gtan la snyoms par zhugs pa'i 'jig rten gyi byung ba'i mtha' la sogs pa la gang shes pa skye ba de ni nyan thos rnams kyi smon nas shes pa'o/ /de bzhin gshegs pa rnams kyi smon nas mkhyen pa ni lhun gyis grub pa ste/ rnam par rtog pa med pa nyid kyi phyir ro//kun nas chags pa med pa ste ltos pa med pa nyid kyi phyir ro/ /thogs pa med pa ste/ thams cad du gegs pa med pa nyid kyi phyir ro/ /rtag tu gnas pa ste/ rtag tu thugs mnyam par gzhag pa la gnas pa nyid kyi phyir/ dri ba thams cad la yang lan 'debs par byed do/ / yongs su dag pa rnam pa bzhi rnams ni rten yongs su dag pa dang dmigs pa yongs su dag pa dang thugs yongs su dag pa dang ye shes yongs su dag pa'o/ /de la nyon mongs pa'i phyogs thams cad kyi bag chags gnas ngan len rnams rten nas shin tu bral bar byas te rang gi bdag nyid kyi dngos po la yang len pa dang gnas dang 'pho ba rnams la ji ltar 'dod pa bzhin du dbang bsgyur ba nyid ni rnam pa thams cad du rten yongs su dag pa'o//dmigs pa thams cad kyi sprul pa dang yongs su bsgyur ba dang / grangs rnams la dbang bsgyur ba nyid ni rnam pa thams cad du dmigs pa yongs su dag pa'o//snga ma bzhin du sems gnas ngan len thams cad dang bral ba dang sems la dge ba'i rtsa ba rnam pa thams cad bsags pa yang rnam pa thams cad du thugs yongs su dag pa'o/ /sngar bzhin du ma rig pa'i phyogs kyi gnas ngan len thams cad dang bral ba dang shes bya thams cad kyi ye shes la dbang bsgyur ba ni rnam pa thams cad du ye shes yongs su dag pa'o//dbang bcu ni 'chi ba dang kun nas nyon mongs pa dang bkren pa dang / nyes pa spyod pa dang ngan 'gro dang yongs su tshol bas ngal ba dang / chos kyis phongs par gyur pa'i las kyi sgrib pa dang / 'dod pas bar du gcod pa dang 'jigs pa dang /ci ltar smra bar bya zhes pa nye bar 'tshe ba bcu'i gnyen po rnams so/ /de la tshe la dbang ba ni ji ltar 'dod pa bzhin du tshe gnas pa'i phyir dang gtong ba'i phyir te/ 'di lta ste brjod du med pa'o/ /brjod du med pa'i bskal par tshe'i tshad byin gyis rlob pa la sogs pa na'o//sems la dbang ba ni ji ltar 'dod par bsam gtan dang ting nge 'dzin dang snyoms par 'jug pa la sogs pa la snyoms par 'jug pa'i phyir dang ldang ba'i phyir ro/ /yo byad la dbang ba ni ji ltar 'dod par phan par byed pa so sor nye bar gnas par byed pa'i phyir te/ 'jig rten gyi khams thams cad bkod pa du ma'i rgyan gyis so sor brgyan par byin gyis rlob pa la sogs pa yang dag par ston pa nyid kyis so//las la dbang ba ni ji ltar 'dod par sku dang gsung gi phrin las grub pa'i phyir dang dus ji lta bar las kyi rnam par smin pa byin gyis rlob pa yang dag par ston pa'i phyir ro/ /skye ba la dbang ba nyid ni skye ba'i skye mched thams cad du ji ltar 'dod par skye ba'i phyir ro//rdzu 'phrul la dbang ba ni ji ltar 'dod par mngon par shes pa rnams dang sangs rgyas kyi zhing thams cad du rnam par 'phrul pa kun du ston pa la sogs pa'o/ /smon lam la dbang ba nyid ni smon lam thams cad yang dag par grub pa'i phyir ro/ /mos pa la dbang ba nyid ni gang ji ltar mos pa de de bzhin kho nar 'gyur ba ste/dper na 'jig rten gyi khams thams cad sangs rgyas kyis yongs su gang ba yang dag par ston pa la sogs pa lta bu'o/ /ye shes la dbang ba ni gang kho na shes par 'dod pa de kho na shes pa ste/ 'di lta ste/stobs dang mi 'jigs pa dang / sangs rgyas kyi chos ma 'dres pa dang / mtshan dang dpe byad dang / mngon par byang chub pa yang dag par ston pa la sogs pa'o/ /chos la dbang ba nyid ni mdo la sogs pa'i chos rnam par gzhag pa rnams la mkhas pa'o/ /bsrung ba med pa gsum rnams ni de bzhin gshegs pa ni sku'i spyod pa yongs su dag pa ste/de bzhin gshegs pa de la sku'i kun du spyod pa yongs su ma dag pa gzhan gyis shes par 'gyur ro zhes 'chab par bya bar dgongs pa cung zad mi mnga' ba 'di ni bsrung ba med pa dang po'o/ /de bzhin du gsung gi las ni gnyis pa'o//de bzhin du yid kyi las ni gsum pa'o/ /dran pa nye bar gzhag pa gsum ni/ ji skad du gsungs pa ste/ de bzhin gshegs pa chos ston pa ni kha cig gus par nyan 'dod rna gtod par byed kun shes pa'i sems nye bar 'jog chos kyi rjes su mthun pa'i chos sgrub par byed pa des de bzhin gshegs pa dgyes par mi 'gyur yid bde bar mi 'gyur thugs mthon po yang ngo bo nyid du mi 'gyur ba dang gzhan rnams gus par mi nyan rna mi gtod ces pa la sogs pa de bzhin gshegs pa khong khro ba ma yin mi bzod pa ma yin thugs mi ches pa ma yin thugs mi mnyes pa ma yin pa dang /kha cig gus par nyan 'dod pa dang gus par nyan mi 'dod pa des de bzhin gshegs pa gnyis su mi 'gyur ro zhes pa dgyes pa dang khong khro bar te/ thams cad du btang snyoms par gnas pa dran pa dang ldan pa'i shes bzhin can no zhes pa'o/ /bsnyel ba mi mnga' ba'i chos nyid ni sems can gyi don bya ba'i dus las mi 'da' ba'i phyir ro//bag chags yang dag bcom pa ni/ nyon mongs pa spangs kyang gang nyon mongs pa ma spangs pa dang 'dra bar spyod pa de nyon mongs pa'i bag chags te til gyi me tog la sogs pa bsal yang bum pa dang snam bu la sogs pa rnams la des yang dag par bsgos pa'i dri phra mo lhag par gnas pa bzhin no//de la ma rig pa'i bag chags ni shes bya yongs su gcod pa'i gegs su gyur pa'o/ /'dod chags la sogs pa'i bag chags ni lus dang ngag gi spyod tshul gyi khyad par gyi rgyu yang ste/ ji ltar dgra bcom pa'i sngon du spre 'ur gyur pas mchongs nas gshegs pa dang /sngon bram zer gyur pa'i rmongs mo zhes brjod pa lta bu'o/ /de thams cad nyid kyang de bzhin gshegs pa la nub par gyur pa'o zhes pa nyon mongs pa'i bag chags yang dag par bcom pa de bcom ldan 'das su brjod do/ /thugs rje chen po ni phan pa'i bsam pa nyid de gang gis bcom ldan 'das dus thams cad du lan drug tu su ni 'grib su ni 'phel zhes pa la sogs par 'jig rten la gzigs pa'o//rnam pa thams cad mkhyen pa nyid ni chos thams cad kyi rang bzhin dang khyad par dang mtshan nyid dang dbye ba mthar thug pa shes pa'o/ /stobs bcu rnams ni gnas dang gnas ma yin pa mkhyen pa'i stobs dang las kyi rnam par smin pa mkhyen pa'i stobs dang /khams sna tshogs mkhyen pa'i stobs dang / mos pa sna tshogs mkhyen pa'i stobs dang / dbang po mchog dang mchog ma yin pa mkhyen pa'i stobs dang / thams cad du 'gro ba'i lam mkhyen pa'i stobs dang /bsam gtan dang rnam par thar pa dang ting nge 'dzin la snyoms par 'jug pa'i kun nas nyon mongs pa dang rnam par byang ba dang ldang ba mkhyen pa'i stobs dang / sngon gyi gnas rjes su dran pa mkhyen pa'i stobs dang / 'chi 'pho dang skye ba mkhyen pa'i stobs dang / zag pa zad pa mkhyen pa'i stobs so//'di rnams kyi mtshan nyid ni mdo las ji skad du gsungs pa bzhin te/ de la srid pa dang mi srid pa ni gnas dang gnas ma yin pa dag ste/ rgyu yang gnas so/ /'di lta ste/ gnas kyang gnas su/ gnas ma yin pa yang gnas ma yin par rab tu mkhyen to zhes so//nyes par spyod pa rnams kyi rnam par smin pa mi 'dod pa ni gnas so/ /'dod pa ni gnas ma yin pa'o/ /legs par spyad pa rnams kyi 'dod pa ni gnas so/ /mi 'dod pa ni gnas ma yin pa'o/ /ser snas dbul ba nyid ni gnas so/ /longs spyod chen po nyid ni gnas ma yin pa'o/ / sbyin pas longs spyod chen po nyid ni gnas so/ /dbul ba nyid ni gnas ma yin pa'o/ /ma dang pha dang dgra bcom pa gsod pa dang dge 'dun gyi dbyen dang de bzhin gshegs pa la ngan sems kyis khrag 'byin pa'i mtshan nyid can gyi mtshams med pa lnga byed pa'i ngang can dang / ma dang dgra bcom ma la mi tshangs par spyod pas sun 'byin pa dang /byang chub sems dpa' nges pa la gnas pa bkrongs pa dang / slob pa yang dang / dge 'dun 'du ba'i sgo phrogs pa dang / mchod rten 'jig pa zhes pa mtshams med pa dang nye ba lnga byed pa'i sems gnas pa ni gnas ma yin pa'o/ /'gyod pas gnas pa'i sems rab tu sbyangs pa ni gnas ma yin pa'o//bud med kyi lus de nyid kyis 'khor los sgyur ba dang tshangs pa nyid la sogs pa ni gnas ma yin pa'o/ /bzlog pa thams cad gnas so/ /'di lta bu la sogs pa'i gnas dang gnas ma yin pa mkhyen te/ dag pa chags pa med pa thogs pa med pa'i ye shes kyis so//dag pa ni yang dag pa ji lta ba ste phyin ci ma log pa'o/ /gang dang gang gyur pa'o zhes 'dod pas chags pa med pa'o/ /rnam pa gang dang gang gis gyur pa zhes rnam pa thams cad mkhyen pa'i phyir thogs pa med pa'o/ /mkhyen pa de nyid stobs te shin tu yang gzhan rnams kyis brdzi bar bya ba ma yin pa nyid kyi phyir dang /gzhan rnams shin tu yang zil gyis gnon pa'i phyir ro/ /las ni bsod nams dang bsod nams ma yin pa dang / mi g.yo ba la sogs pa'o/ /gzugs dang gzugs med pa dang mtshungs par ldan pa'i bsod nams ni mi g.yo ba'o/ /kha cig tu khams gsum ka dang mtshungs par ldan pa'i dge ba yang bsod nams su rnam par gzhag go//rnam par smin pa ni bde ba dang sdug bsngal la sogs pa'o/ /khams sna tshogs pa ni bsod nams dang bsod nams ma yin pa dang mi g.yo ba la sogs pa bskyed pa'i bsam gtan no/ /mos pa sna tshogs pa la 'dir mos pa ni 'dod pa ste/'di ltar 'dod chags la gnas pa'i yang zhe sdang la 'dod pa dang / zhe sdang la gnas pa'i 'dod chags la 'dod pa dang / sbyor ba dman pa'i sbyor ba rgya chen po la dang / sbyor ba rgya chen po'i sbyor ba dman pa la'o/ /dbang po rnams ni dad pa dang brtson 'grus dang dran pa dang ting nge 'dzin dang shes rab bo//de rnams kyi mchog dang mchog ma yin pa tha ma dang 'bring dang mchog ste/ 'di ni dbang po tha ma'o/ /'di ni dbang po 'bring ngo zhes pa la sogs pa'o/ /thams cad du 'gro ba'i lam ste 'dir byang chub sems dpa' sems can gyi khams yang dag pa nyid du nges pa dang ma nges pa yang shes shing de dag gi rjes su mthun pa'i lam yang shes la ston par yang byed do//log pa nyid du nges pa rnam mkhyen nas/ de rnams la btang snyoms kho na rjes su mthun no zhes re zhig gi dus su btang snyoms su byed pa dang 'di ni 'dod chags kyi gnyen por gyur pa'i lam mo/ / 'di ni zhe sdang gi'o zhes pa la sogs pa'o/ /bsam gtan bzhi rnams dang / rnam par thar pa brgyad rnams dang / rtog pa dang bcas shing dpyod pa dang bcas pa la sogs pa ting nge 'dzin gsum rnams dang / gzugs med pa'i snyoms par 'jug pa bzhi rnams dang / mthar gyis gnas pa'i snyoms par 'jug pa dgu rnams kyi kun nas nyon mongs pa la sogs pa ste/de la kun nas nyon mongs pa ni ro myong ba la sogs pas so/ /rnam par byang ba ni dmigs pa med pa la sogs pa'o/ /ldang ba ni seng ge rnam par bsgyings pas sam thod rgal gyis so/ /sngon gyi gnas ni skye ba snga ma'o/ /de'i rjes su dran pa ni dran pa'o//'chi 'phos pa dang / skye ba dag ni sems can rnams kyi 'chi ba dang skye ba dag go/ /de 'phags pa gzungs kyi dbang phyug rgyal pos mdor gsungs pa/ de la 'di ni de bzhin gshegs pa'i lha'i spyan te/ gang gis phyogs bcu'i 'jig rten nam mkha'i khams kyi mthar thug par zhing du snang ba gang 'ga' zhig bsreg bzhin pa de rnams gzigs pa dang /'jig bzhin pa rnams dang / 'chags bzhin pa rnams dang / gang du sems can du snang ba de rnams 'chi bzhin pa dang / skye ba rnams thams cad dang / gang yang snang ba med pa'i sems can ji snyed pa de rnams kyang de bzhin gshegs pa'i lha'i spyan la snang bar 'gyur ro zhes so//gal te yang dbang po rnams gnas ngan len gyi rang bzhin no zhes gsungs pa'i phyir/ mi shes pa'i rang bzhin gyi dbang po sangs rgyas nyid kyi gnas skabs na spangs pa na yid kyi blo bzhin du dbang po'i blo la sogs pa rnams kyis yul thams cad yongs su gcod pas bcom ldan 'das kyis rnam par shes pa thams cad ni yul thams cad par 'dod de/ji skad du dpal 'khor lo sdom pa'i rgyud du gsungs pa/ thams cad du ni phyag zhabs mtha'/ /kun du can dang dbu dang zhal/ /kun nas thos ldan 'jig rten du//thams cad khyab par byas te gnas/ /zhes so/ /'phags pa dad pa'i stobs bskyed pa'i mdor yang gsungs pa/ 'jam dpal de bzhin du de bzhin gshegs pa'i gtsug tor gyis kyang gzigs so/ /de bzhin du mdzod spus kyang gzigs so/ /de bzhin du dus cig car phyogs bcu rnams su 'jig rten gyi khams rab 'byams thams cad du gzigs so zhes so//de ltar na yang dbang po'i blor sngon gyi rjes su 'brangs pas rnam par gzhag go zhes pas lha'i mig ces pa la sogs par brjod par bya'o/ /zag pa ni nyon mongs pa rnams so/ /de rnams kyi zad pa gang yin pa dang / lam gang gis zad pa de gnyis ka yang zag pa zad pa ste/ sems can rnams kyi'o/ /seng ge bzhin du bsnyems pa shin tu mi mnga' bar rigs par gsungs pa ni mi 'jigs pa ste de'i dngos po'am las ni mi 'jigs pa nyid do/ /mi 'jigs pa nyid bzhi rnams te/ mngon par rdzogs par byang chub pa la mi 'jigs pa nyid dang /zag pa zad pa la mi 'jigs pa nyid dang / bar du gcod pa'i chos la mi 'jigs pa nyid dang / nges par 'byung ba'i chos la mi 'jigs pa nyid do/ /mngon par rdzogs par byang chub pa ni de bzhin gshegs pa'i ye shes phun sum tshogs pa'o/ /zag pa zad pa ni spangs pa phun sum tshogs pa'o//de gnyis ni rang don no/ /bar du gcod pa'i chos ni mya ngan las 'das pa'i gegs so/ /nges par 'byung ba'i chos ni mya ngan las 'das pa thob par byed pa'o/ /'di gnyis ni gzhan gyi don te pha rol po rnams la de 'chad pa'i phyir ro/ /de rnams la mi 'jigs pa nyid de/de dam bca' ba so sor 'god pa rnams la'o/ /de byed pa po mgon med pa sems can rnams te/ de rnams kyi mgon dang skyabs ni sangs rgyas bcom ldan 'das so/ /de bzhin gshegs pa rnams kyi gsung rab yan lag bcu gnyis ni chos so/ /de'i brjod par bya ba mtha' dag ni don no//de rnams kho na'i ming gi phyogs gcig la sogs pa rnams kyi rnam pa mang por nges par bshad pa ni nges pa'i tshig go/ /yang na rgyu'i chos thams cad ni chos so/ /'bras bu'i chos thams cad ni don no/ /'gro ba drug tu gtogs pa'i sems can rnams kyi skad thams cad kho na ni nges pa'i tshig go//de rnams so so yang dag par rig pa ni rim pa ji lta bar chos so so yang dag par rig pa dang / don so so yang dag par rig pa dang / nges pa'i tshig so so yang dag par rig pa dang / chos la sogs pa rnams pha rol po rnams la bstan pa'i ched du chos la sogs pa so so yang dag par mngon du gyur pa ni spobs pa'o//de yang 'di yin la so so yang dag par rig pa yang ngo zhes pa spobs pa so so yang dag par rig pa'o/ /ma 'dres par spyod pa zhes pa ni ma 'dres pa'i chos te/ gzhan rnams dang thun mong ma yin pa zhes pa'i don no/ /de rnams kyang ji skad du 'khrul pa dang / ca co dang dran pa nyams pa med pa nyid dang /thugs mnyam par ma bzhag pa dang / tha dad pa nyid kyi 'du shes dang / so sor ma brtags pa'i btang snyoms med pa nyid dang 'dun pa dang brtson 'grus dang dran pa dang ting nge 'dzin dang shes rab dang rnam par grol ba rnams nyams pa med pa nyid dang / sku dang gsung dang thugs kyi phrin las thams cad kyi ye shes sngon du 'gro zhing ye shes kyi rjes su 'brang ba dang dus gsum rnams la thams cad du ma chags ma thogs pa'i ye shes rab tu 'jug pa'i pha rol tu phyin pa'o zhes pa bco brgyad do//de la dang po ni sku'i phrin las yongs su dag pa'o/ /gnyis pa ni gsung gi phrin las so//de nas bzhi pa ni thugs kyi phrin las so/ /de nas drug pa ni de bzhin gshegs pa'i dbang po rten dang bcas pa 'bras bu dang bcas pa rnams ma thob pa'i yongs su nyams pa med pa las te/ de la rten ni 'dun pa'o/ /'bras bu ni rnam par grol ba'o/ /dbang po ni brtson 'grus la sogs pa rnams so//de nas gsum ni sku la sogs pa'i phrin las rnams ye shes kyis byin gyis brlabs pa rnams te/ ye shes rgyu nyid kyis dang / ye shes dang lhan cig spyod pa nyid kyis na'o/ /de nas gsum ni dus gsum rnams la ma chags ma thogs pa'i ye shes rnams so//'dir mdo ni de bzhin gshegs pa la 'khrul pa med do zhes pa'o/ /ji ltar dgra bcom pa grong la sogs par bsod snyoms kyi ched du rgyu ba rnams glang po che dang rta gtum po dang ba lang dang khyi dang tsher ma dang sbrul la sogs pa rnams kyis gnod pa skyel ba dang / 'brog dgon par chom rkun dang stag la sogs pas 'jigs pa ste/'di 'dra ba'i 'khrul pa de bzhin gshegs pa la thams cad kyis thams cad du mi mnga'o/ /'phags pa gzungs kyi dbang phyug rgyal po'i mdor yang gsungs pa/ sangs rgyas bcom ldan 'das rnams ni sku'i phrin las 'khrul pa mi mnga' ba/rab tu dang ba bskyed pa'i spyod lam can/ spyod lam bzhis grong dang grong khyer du 'jug pa dang 'byung ba na zhabs kyi mthil gnyis sa la mi reg cing / sa chen po la 'khor lo rtsibs stong phrag can rnams 'byung ba dang / dri yid du 'ong ba can gyi pad+ma rnams 'byung ngo / /gang du de bzhin gshegs pa'i zhabs dag bzhag pa der gang byol song gi skye gnas su gtogs pa'i sems can rnams de bzhin gshegs pa'i zhabs kyi 'od kyis reg pa de rnams zhag bdun du mchog tu bde ba dang ldan par 'gyur ba dang /shi 'phos nas kyang lha rnams su skye bar 'gyur ro/ /de bzhin gshegs pa'i sku la na bza' sor bzhi'i bar gyis mi reg par gnas la rtsom chen gyi rlung gis kyang g.yo bar byed ma nus so//sku'i 'od kyis mnar med pa'i mthar thug pa'i sems can rnams bde bar byed do/ /des na de bzhin gshegs pa la sku 'khrul pa med par brjod par bya'o zhes te/ rtag pa kho nar yang dag par gzigs nas mdzad pa'i ngang can nyid kyi phyir ro//ca co mi mnga'o zhes pa ste/ ji ltar dgra bcom pa rnams 'brog dgon par lam nor bas sgra mthon po 'don par 'gyur ba'am/ bag chags kyi dbang las gad mo cher dgod pa de lta bu sangs rgyas la mi mnga' ste rtag tu mnyam par gzhag pa'i phyir ro//dran pa nyams pa mi mnga'o zhes pa ste/ ji ltar dgra bcom pa mnyam par ma bzhag pa las dran pa nyams pas bya ba mi byed pa dang / dus las kyang 'da' ba de lta bu sangs rgyas la mi mnga' ste/ thugs rje chen po dang ldan pa nyid kyi phyir ro/ /thugs mnyam par ma bzhag pa mi mnga'o zhes pa ste ji ltar dgra bcom pa snyoms par zhugs pa kho na mnyam par bzhag pa yin gyi gzhan gyi tshe ma yin pa de lta bu sangs rgyas ma yin te rtag tu mnyam par gzhag pa nyid kyi phyir ro//tha dad pa nyid kyi 'du shes mi mnga'o zhes pa ste/ ji ltar dgra bcom pa mtha' gcig tu phung po rnams la mi mthun pa'i 'du shes can dang /mya ngan las 'das pa la zhi ba'i 'du shes can yin pa de ltar sangs rgyas ma yin te/ rang bzhin gyis bdag med pa nyid kyis na gnyis ka la rnam par mi rtog pa nyid kyi phyir ro/ /so sor ma brtags pa'i btang snyoms mi mnga'o zhes pa ste/ji ltar dgra bcom pa so sor ma brtags par sems can gyi don bya ba btang snyoms su byed pa de lta bu sangs rgyas la mnga' ba ma yin te/ de ni dus la sogs pa rnams so sor brtags pa rnams kho nas bar mar gnas par 'gyur gyi rnam pa gzhan du ni ma yin no/ /'dun pa yongs su nyams pa mi mnga'o zhes pa la sogs pa ste/dgra bcom pa rnams ni rigs kyi dbang las sangs rgyas kyi sa dang sangs rgyas kyi mdzad pa la 'dun pa la sogs pa mi 'byung ngo / /de'i phyir de rnams de rnams las ma thob pa'i yongs su nyams pas yongs su nyams pa rnams so/ /de lta bu sangs rgyas rnams la ma yin te/de rnams kyis ma thob pa'i khyad par gyi chos med pa'i phyir ro/ /de la 'dun pa la sogs pa rnams gzungs kyi dbang phyug rgyal po'i mdor so sor rtog par mdzad pa ni byams pa dang snying rje dang chos ston pa dang sems can gdul ba dang yongs su smin par byed pa dang /rab tu dben pa dang byang chub yang dag par len du 'jug pa ni 'dun pa'o/ /brtson 'grus ni 'di lta ste/ gdul bya 'gugs par byed pa'i brtson 'grus dang / chos nyan pa rnams la mi sgrub pa med pa'i brtson 'grus te/ gal te de bzhin gshegs pa de gang bskal par mi skyo bar nyan pa de lta bu'i ngo bo'i chos nyan pa po rnyed na bskal par yang de bzhin gshegs pa chos ston bzhin pa mi bzhengs te/bza' ba dang bral ba'i rgyud kyis dang sems can la ltos pas kyang de bzhin gshegs pa gang gA'i klung gi bye ma dang mnyam pa'i sangs rgyas kyi zhing rnams 'das par mdzad nas gang du tha na sems can gcig sangs rgyas kyi gdul byar 'gyur bar yang gshegs so//dran pa nyams pa mi mnga' ste/ de bzhin gshegs pa dran nas sam bsam par mdzad nas sam/ rtogs par mdzad nas sems can rnams la chos ston pa ma yin pa'o//ting nge 'dzin mnyam pa nyid de/ chos thams cad kyi mi mnyam pa med pa nyid dang ji lta ba bzhin nyid do/ /gang mnyam pa dang mnyam pa nyid de dang ting nge 'dzin mnyam pa nyid do/ /gang dang ting nge 'dzin mnyam pa de dang de bzhin gshegs pa rnams mnyam pa nas/ ji srid du khams gsum la yang brten pa med pa nyid kyi phyir nyams pa med cing yongs su nyams pa med pa ste/des na ting nge 'dzin nyams pa med do zhes brjod par bya'o/ /shes rab mnyam pa nyid ni chos thams cad la gzhan gyi rkyen gyis rtogs pa ma yin pa'i ye shes dang / sems can pha rol rnams la chos rab tu gsal bar byed pa'i ye shes dang /so so yang dag par rig pa mi zad pa la mkhas pas rab tu dbye ba mkhyen pa'i ye shes dang / tshig gcig rab tu 'jug pas bskal pa stong phrag brgyar lhag par gnas pa ston pa'i ye shes dang / ji ltar bris pa'i don gsungs pas the tshom gcod pa dang theg pa'i rnam par gzhag pa ston pa'i ye shes dang /sems can gyi sems kyi spyod pa brgyad khri bzhi stong rnams mkhyen pa dang / chos kyi phung po brgyad khri bzhi stong rnams ji ltar so sor 'os pa'i chos ston pa'i ye shes so zhes pa 'di ni de bzhin gshegs pa'i mtha' yas pa/ mur thug pa med pa mi zad pa tshad med pa ston pa'i shes rab bo//de bzhin gshegs pa'i rnam par grol ba ni chags pa dang 'dzin pa thams cad dang bral ba/ sngon gyi mtha' dang ma bcings pa/ phyi ma'i mthar mi 'pho ba/ da ltar byung ba la mi gnas pa sems rang bzhin gyis 'od gsal ba de bzhin kho nar shes pa ste de'i phyir skad cig gcig dang yang dag par ldan pa'i shes rab kyis bla na med pa yang dag par rdzogs pa'i byang chub tu mngon par rdzogs par sangs rgyas so zhes brjod par bya'o//sku'i phrin las thams cad ye shes sngon du 'gro zhing ye shes kyi rjes su 'brang ba ste/ sku'i phrin las gang dang yang dag par ldan pa'i de bzhin gshegs pa lta bas kyang sems can rnams 'dul bar mdzad do//gsung bzhin pa'am rung / cang mi gsung bar gyur pa'ang rung gsol bas kyang rung spyod lam gyis kyang rung / mtshan rnams kyis kyang zhes rgya cher ro/ /gsung gi phrin las thams cad ye shes sngon du 'gro zhing ye shes kyi rjes su 'brang ba ste/de bzhin gshegs pa ni 'bras bu dang ldan pa'i chos ston par mdzad do/ /gsung de yang dbyangs kyi yan lag drug cu dang ldan pa'o/ /thugs kyi phrin las thams cad ye shes sngon du 'gro zhing ye shes kyi rjes su 'brang ba ste/ de bzhin gshegs pa'i ye shes de yang sems can thams cad kyi sems kyi rjes su son pa/chos thams cad nges par rtogs pa ting nge 'dzin thams cad la gzhan gyi rkyen gyis ma yin pa/ dmigs pa las yang dag par 'das pa/ rten cing 'brel par 'byung ba rtogs pa/ srid pa gsum gyi 'gro ba dpag tu med pa'i bdud kyi las thams cad las yang dag par 'das pa ste/ji srid du chos kyi dbyings dang / dbyer med pa'i bar du yang ngo / /'das pa'i dus la ma chags ma thogs pa'i ye shes gzigs pa 'jug ste/ sangs rgyas kyi zhing ji snyed pa dang / de rnams na rtswa dang 'khri shing la sogs pa ji snyed pa rnams dang sangs rgyas bcom ldan 'das ji snyed pa rnams dang /chos ston pa ji snyed pa rnams dang / rang dang gzhan rnams kyi sems gang gis de ma thag tu sems gang skyes pa de thams cad bgrang ba'i sbyor bas mkhyen to/ /de yang mngon sum gyi ye shes kyis te/ rjes su rtogs pa'i ye shes pas ni ma yin no/ /ma 'ongs pa'i dus la ma chags ma thogs pa'i ye shes gzigs pa 'jug ste/zhing ngam sems can gang ci yang rung ba skye bar 'gyur ba rnams dang sems gang skye bar 'gyur ba de thams cad bgrang bas mkhyen to zhes rgyas par ro/ /da ltar byung ba'i dus la ma chags ma thogs pa'i ye shes gzigs pa 'jug ste/ gang da ltar byung ba phyogs bcu rnams su sangs rgyas kyi zhing rnams dang chos rnams dang byang chub sems dpa' dang nyan thos dang rang sangs rgyas thams cad mkhyen pa nas ji srid du rigs thams cad dang sa la sogs pa'i khams thams cad dang / rdul phra rab kyi char bcas pa dang / ji srid du skra'i rtse mo'i mthas blangs pa'i bar dang /ji srid du dmyal ba la sogs pa'i 'gro bar skyes pa'i sems can gyi khams kyi bar yang mkhyen to zhes rgyas par ro/ /de bzhin gshegs pa ni gnyis kyi rjes su 'brang ba shes pa med de/ gnyis su med pa la 'jug pa'i ched du sems can rnams la chos ston par yang mdzad do//'o na gal te don dam par mtha' dag stong pa nyid kho na yin zhing / bcom ldan 'das kyang de kho na nyid gzigs pa yin na/ de ji ltar bcom ldan 'das phyi rol gyi don dang rnam par shes pa dag ston par mdzad de/ de kho na nyid gzigs pa ni de kho na nyid ma yin pa ston par byed pa med la/ston na yang ci ltar de kho na nyid mthong ba'o zhes rtogs par bya zhe na/ 'dir brjod par bya ste/ phyi rol gyi don dang rnam par rig pa dag sgrub pa'i don du bcom ldan 'das de ston pa ma yin gyi/ 'on kyang rjes su brjod pa'i don du ste/ phung po lnga po kho na dang rnam par shes pa tsam kho na yod kyi bdag ni med do zhes bdag bkag pa de rjes su brjod pas 'chad par bzhed pa'i phyir ro//rjes su brjod pa yang ci ltar na stong pa nyid gzigs pa la yin te/ de so sor snang ba med pa'i phyir ro zhe na/ ma yin te 'jig rten pa'i blo kho nas rjes su brjod pa srid pa'i phyir ro/ /'jig rten pa'i blo ni de lta bu ste/thog ma med pa'i ma rig pa goms pa'i phyir ro/ /'o na gal te bcom ldan 'das la 'jig rten pa'i blo yin na ji ltar de kho na nyid gzigs pa yin zhe na/ ma yin te sngon gyi 'phen pas ston pa srid pa'i phyir te 'khor lo 'khor ba bzhin no/ /de'i phyir rnam pa du mar ston pa ni 'jig rten gzhug pa'i ched du 'gal ba med de/'di lta ste/ ldem por dgongs pa rnam pa bzhis ston pa'o/ /de la gzhug pa la ldem por dgongs pa ni nyan thos rnams la blta bar bya ste/ bstan pa la gzhug pa'i don du mi skrag pa'i ched du gzugs la sogs pa yod pa nyid du ston pa'i phyir ro/ / mtshan nyid la ldem por dgongs pa ni don gzhan la dgongs pas na kun brtags la sogs pa ngo bo nyid gsum rnams la blta bar bya ste/ ngo bo nyid med pa dang / ma skyes pa la sogs par chos thams cad ston pa'i phyir ro/ /gnyen po la ldem por dgongs pa ni nyes pa rnams 'dul ba la blta bar bya ste/ji skad du sangs rgyas la brnyas pa'i sgrib pa'i gnyen por gsungs pa ni/ nga nyid de'i dus na yang dag par rdzogs pa'i sangs rgyas rnam par gzigs pa der gyur to zhes pa'o/ /mnyam pa nyid la 'dir ldem por dgongs pa ste chos kyi sku khyad par med pa nyid kyi phyir ro/ /chos la brnyas pa'i sgrib pa'i gnyen por gsungs pa ni/gang gA'i klung gi bye ma dang mnyam pa'i sangs rgyas 'di snyed la bsnyen bkur byas nas theg pa chen po khong du chud par gyur to zhes pa'o/ /le lo'i sgrib pa'i gnyen por gsungs pa ni/ gang rnams bde ba can du smon lam byed par 'gyur ba de rnams der skye bar 'gyur ro zhes pa dang sangs rgyas dri med zla 'od kyi mtshan gzung ba 'di tsam gyis bla na med pa yang dag par rdzogs pa'i byang chub tu nges par 'gyur ro zhes pa ste/dus gzhan du zhes pa dgongs pa'o/ /cung zad tsam gyis chog pa'i gnyen por gsungs pa ni 'ga' zhig la sbyin pa la sogs pa'i dge ba gang yin pa de nyid bsngags par mdzad la 'ga' zhig la smod pa ste/cung zad tsam gyis chog pa'i gang zag gi bsam pa la dgongs pas so/ /'dod chags la spyod pa'i sgrib pa'i gnyen por gsungs pa ni gang du bcom ldan 'das kyis sangs rgyas kyi zhing gi 'byor pa bsngags par mdzad pa'o//nga rgyal la spyod pa'i sgrib pa'i gnyen por gsungs pa ni/ gang du bcom ldan 'das kyis sangs rgyas 'ga' zhig gi phun sum tshogs pa lhag par bsngags par mdzad pa'o/ /'gyod pa'i sgrib pa'i gnyen por gsungs pa ni/ gang rnams sangs rgyas dang byang chub sems dpa' rnams la gnod pa byed pa de rnams thams cad mtho ris su nye bar 'gro bar 'gyur ro zhes pa'o//re zhig tsam ma nges pa'i byang chub sems dpa' rnams theg pa chen po las 'byed pa'i sgrib pa'i gnyen por gsungs pa ni nyan thos chen po rnams sangs rgyas nyid du ston pa dang / theg pa gcig tu ston pa yang ngo / /bsgyur ba la ldem por dgongs pa ni rjod byed zab pa nyid la blta bar bya ste/ 'di lta ste/ snying po med la snying por shes/ /phyin ci log la shin tu gnas/ /nyon mongs kyis kyang rab nyon mongs/ /byang chub dam pa thob par 'gyur/ /zhes pa ste/'di ni 'dir ldem por dgongs pa ste/ snying po med pa rnam par g.yeng ba med pa la gang rnams kyi snying po'i blo can dang / rtag pa dang bde ba dang gtsang ba dang bdag tu 'dzin pa las bzlog pas mi rtag pa la sogs pa'i phyin ci log la shin tu gnas pa yongs su ma nyams pa dang /nyon mongs pa ste dka' ba spyod pa'i rtsol ba'i ngal bas shin tu yongs su nyon mongs pa'o zhes pa'o/ /dbyangs kyi yan lag drug cu rnams kyang de bzhin gshegs pa'i gsang ba'i mdor ji skad du gsungs pa rnams te/ de la gsung gi gnyen po ni sems can gyi khams la dge ba'i rtsa ba ston par byed pa'i phyir ro//'jam pa ni mthong ba'i chos kho na la bde ba la reg par byed pa nyid kyi phyir ro/ /yid du 'ong ba ni don bzang ba nyid kyi phyir ro/ /yid du 'thad pa ni yi ge bzang ba nyid kyi phyir ro/ /dag pa ni 'jig rten las 'das pa bla na med pa'i rjes la thob pa'i phyir ro//dri ma med pa nyid ni nyon mongs pa'i bag la nyal dang bag chags thams cad dang bral ba nyid kyi phyir ro/ /gsal ba ni tshig dang yi ge so sor grags pa nyid kyi phyir ro/ /snyan cing 'jebs pa ni mu stegs can blo gros ngan pa can thams cad kyi lta ba 'joms pa'i stobs kyi yon tan dang ldan pa'i phyir ro//mnyan par 'os pa ni sgrub pas nges par 'byung ba'i phyir ro/ /mi tshugs pa ni pha rol gyi smra ba po thams cad kyis gcad par bya ba ma yin pa nyid kyi phyir ro/ /snyan pa ni dga' bar byed pa nyid kyi phyir ro/ /dul ba ni 'dod chags kyi gnyen po nyid kyi phyir ro/ /mi rtsub pa ni bslab pa bca' ba'i bde ba'i thabs nyid kyi phyir ro//mi brlang ba ni de las 'das pa na yang dag par nges par 'byung ba nye bar ston pa nyid kyi phyir ro/ /rab tu dul ba ni theg pa gsum gyis 'dul ba nye bar ston pa nyid kyi phyir ro/ /rna bar snyan pa ni rnam par g.yeng ba'i gnyen po nyid kyi phyir ro//lus tshim par byed pa ni ting nge 'dzin skyed par byed pa nyid kyi phyir ro/ /sems tshim par byed pa ni lhag mthong gi rab tu dga' ba skyed par byed pa nyid kyi phyir ro/ /snying dga' bar byed pa ni the tshom gcod par byed pa nyid kyi phyir ro/ /dga' ba dang bde ba bskyed pa ni log par nges pa sel ba'i phyir ro//yongs su gdung ba med pa ni sgrub pa po 'gyod pa med pa'i phyir ro/ /kun du shes par bya ba ni thos pa las byung ba'i shes pa phun sum tshogs pa'i rten nyid kyi phyir ro/ /rnam par rig par bya ba ni bsams pa las byung ba'i shes pa phun sum tshogs pa'i rten nyid kyi phyir ro//rnam par gsal ba ni slob dpon gyis dpe mkhyud med par chos ston pa'i phyir ro/ /dga' bar bya ba ni rang gi don rjes su thob pa rnams dga' bar byed pa nyid kyi phyir ro/ /mngon par dga' bar 'os pa ni rang gi don rjes su thob pa rnams kyis spro bar bya ba nyid kyi phyir ro/ /kun shes par bya bar gzhug tu 'os pa ni bsam gyis mi khyab pa'i chos yang dag par ston pa nyid kyi phyir ro//rnam par rig par byar gzhug tu 'os pa ni bsam par bya ba'i chos yang dag par ston pa nyid kyi phyir ro/ /rigs pa ni tshad ma dang mi 'gal ba'i phyir ro/ /'brel pa ni ji ltar 'os par gdul bya la ston pa nyid kyi phyir ro//zlos pa'i skyon med pa ni 'bras bu med pa ma yin pa'i phyir ro/ /seng ge'i sgra'i shugs ni mu stegs can gyi tshogs thams cad skrag par byed pa'i phyir ro/ /glang po che'i sgra skad ni rgya che ba nyid kyi phyir ro/ /'brug gi sgra dbyangs ni zab pa nyid kyi phyir ro//klu'i dbang po'i sgra dbyangs ni gzung bar 'os pa nyid kyi phyir ro/ /dri za'i glu dbyangs ni snyan pa nyid kyi phyir ro/ /ka la ping ka'i sgra dbyangs ni rno ba dang 'jebs pa'i phyir ro/ /tshangs pa'i sgra dbyangs bsgrags pa ni thag ring por grags pa nyid kyi phyir ro/ /shang shang te'u'i sgra dbyangs su grags pa ni grub pa thams cad la bkra shis pa nyid kyis sngon du 'gro ba nyid kyi phyir ro//de la sgra bzung ba ni don rtogs par byed pa'i mtshan nyid can gyi sgra rtogs par bya ba'i don du'o/ /dbyangs bzung ba ni thag ring por de dang de'i brda rtogs par byed pa'i don no/ /grags pa bzung ba ni de dang de'i dbyangs kyis brda rjes su ston pa rtogs par byed pa'i don to//lha'i dbang po'i dbyangs ltar snyan pa ni 'da' bar bya ba ma yin pa'i phyir rnga'i sgra ni bdud dang glags tshol ba thams cad las rgyal ba'i sngon du 'gro ba nyid kyi phyir ro/ /ma khengs pa ni bstod pas kun nas nyon mongs pa med pa'i phyir ro//mi dma' ba ni smad pas kun nas nyon mongs pa med pa nyid kyi phyir ro/ /sgra thams cad kyi rjes su zhugs pa ni lung ston pa thams cad la mtshan nyid rnam pa thams cad la rjes su zhugs pa nyid kyi phyir ro/ /sgra zur chag pa med pa ni dran pa nyams pas mi gsung ba'i phyir ro//ma tshang ba med pa ni gdul bya'i bya ba rnams la dus thams cad du nye bar gnas pa'i phyir ro/ /ma zhum pa ni rnyed pa dang bkur sti la mi brten pa nyid kyi phyir ro/ /ma zhen pa ni 'jigs pa dang bral ba nyid kyi phyir ro/ /rab tu dga' ba ni mi skyo ba'i phyir ro/ /khyab pa ni rig pa'i gnas thams cad mkhas pa dang ldan pa nyid kyi phyir ro//chub pa ni sems can rnams kyi de'i don thams cad phun sum tshogs par byed pa nyid kyi phyir ro/ /rgyun chags pa ni rgyun mi 'chad pa nyid kyi phyir ro/ /'brel pa ni rnam pa sna tshogs su nye bar gnas pa nyid kyi phyir ro/ /sgra thams cad rdzogs par byed pa ni sgra gcig las sgra'i rnam par rig pa du ma nye bar gnas pa'i phyir ro//dbang po thams cad tshim par byed pa ni gcig las don du ma'i rnam par rig pa nye bar gnas pa'i phyir ro/ /ma smad pa ni dam bca' ba ji lta ba bzhin pa'i phyir ro/ /mi 'gyur ba ni dus la bab par rab tu sbyor ba'i phyir ro//ma brtabs pa ni rtab rtab por mi gsung ba'i phyir ro/ /'khor kun du grag pa ni ring ba dang nye ba'i 'khor du mtshungs par thos pa nyid kyi phyir ro/ /rnam pa thams cad mchog dang ldan pa ni 'jig rten pa'i don thams cad dpe'i chos su bsgyur ba nyid kyi phyir ro zhes so/ /de bzhin du yon tan gzhan rnams kyang mdo sna tshogs rnams su rgyas par bstan pa 'di lta ste/spyod pa sna tshogs pa rnams kyis 'jug pa'i yon tan ni gdul bya ji lta bar bdag nyid kyi lus yang dag par phye ba kun du ston pas 'jug pa nyid kyi phyir ro/ /dge ba'i chos skye ba mkhyen pa'i yon tan ni/ dper na sor mo'i phreng ba la sogs pa rnams la bzhin te/ nyan thos la sogs pa'i yul las 'das pa dge ba'i rtsa ba'i sa bon phra mo yang rdo'i gseb tu son pa'i gser gyi sa bon bzhin du phyin ci ma log pa'i rnam par mkhyen pa'i phyir ro/ /ji ltar mos pa bzhin du ston pa'i yon tan ni yid bzhin gyi nor bu bzhin du rnam par rtog pa med par yang de bzhin gshegs pa'i dbang dang /rang gi mos pa'i dbang las de bzhin gshegs pa gser gyi kha dog la sogs pa'i sku can du mthong ba ste/ de bzhin gshegs pa rtog par mi mdzad pa rnam par rtog par mdzad ces pa la sogs pa mdo ji lta ba bzhin no//tshad med pa'i rten gyis sems can 'dul ba la rab tu sbyor ba'i yon tan ni tshad med pa'i byang chub sems dpa'i rten rnams kyis sems can 'dul ba'i ched du rab tu sbyor ba ste/ de ni de bzhin gshegs pa'i dbang gis dam pa'i chos nyan pa dang sems pa dang / sgom pa'i rim gyis ye shes kyi khyad par thob pa'i byang chub sems dpa' rnams la rjes su 'dzin pa dang yongs su gtang ba dag gis yongs su chad pa med par brgyud pas rab tu 'jug pa'i phyir ro/ /chos kyi sku dang pha rol tu phyin pa mnyam par rdzogs pa'i yon tan ni gnyis su med pa'i chos kyi sku can sangs rgyas kyi sa la sbyin pa la sogs pa'i pha rol tu phyin pa rnams mtshungs par rdzogs pa'i phyir ro//'dres pa med pa'i sangs rgyas kyi zhing ji ltar mos pa bzhin yang dag par ston pa'i yon tan ni/ sems can gyi mos pa la ltos pas 'dres pa med cing ma 'dres par sangs rgyas kyi zhing gser la sogs pa'i rang bzhin du yang dag par ston pa'i phyir ro//sangs rgyas kyi sku gsum po rnams kyi yang yul yongs su chad pa med pa'i yon tan ni thog ma dang bar ma dang tha ma spangs pa'i sangs rgyas sku gsum gyi bdag nyid rnams kyi sa rnams dang sangs rgyas kyi zhing rnams su thams cad du yul yongs su gcad pa med pas mnyam pa nyid du 'gro ba'i phyir ro//'khor ba'i mtha'i bar du sems can thams cad la phan pa dang bde ba nye bar gnas pa'i yon tan ni chos kyi dbyings shin tu rnam par dag pa 'khor ba'i bar du gnas pa las de'i rgyu mthun pa mdo la sogs pa'i chos rnams gdul bya rnams kyi dus ji lta ba bzhin phyi ma'i mthar dang de'i tshe nyid na yang so sor nye bar gnas pa'i phyir ro//mi zad pa nyid kyi yon tan ni chos kyi dbyings la rnam par bkod pa rnams nam mkha' bzhin du mthar thug pa med pa las 'khor ba ji srid par chos kyi dbyings las 'gro ba mtha' dag gi don bya ba rgyun mi 'chad par rab tu sbyor ba nyid kyi phyir yon tan mi zad pa nyid do//mdzes pa dang slar mi ldog pa dang ma lus pa rtogs pa'i yon tan te/ 'dis kyang rim pa ji lta bar phyi rol pa dang slob pa dang mi slob pa rnams rnam par gcod par rig par bya'o//de la 'jig rten las 'das pa'i lam gyis thob pa de nyid kyis na mdzes par rtogs pa yin la de bzhin du phyi rol pa rnams kyi ma yin te/ mtshams dang bcas pa nyid kyis de'i thar pa ni thar pa ma yin pa nyid kyi phyir ro/ /ldog pa'o zhes brjod pa na skye ba dang skyon kun du 'byung ba ste/de dag kyang slob pa rnams kyi yin la bcom ldan 'das ni mi slob pa'o/ /lus pa ni nyon mongs pa med cing nad med la lus dang ngag dang yid las su mi rung ba'am lam 'chad pa la mi gsal ba'o/ /de theg pa dman pa'i mi slob pa dgra bcom pa rnams la yang ji ltar srid pa bzhin yod la/bcom ldan 'das la ni ma yin no/ /rig pa dang zhabs su ldan pa'i yon tan te/ de la rig pa ni lhag pa'i shes rab kyi bslab pa'o/ /lhag pa'i tshul khrims dang lhag pa'i sems kyi bslab pa ni zhabs so/ /rig pa sngon ma can de dag zhabs nyid kyi phyir te/gang gi phyir rig pa mig dang 'dra bas bltas pas cig shos zhabs dang 'dra ba dag gis de ltar 'gro bar byed pa'i phyir ro/ /dbang phyug dang gzugs dang grags pa dang dpal dang ye shes dang brtson 'grus phun sum tshogs pa'i yon tan te/ de la dbang phyug ni gzhan gyi dbang ma yin pa yin la/de ni bcom ldan 'das kyi phun sum tshogs pa ste/ bag chags dang bcas pa'i sgrib pa thams cad spangs pa'i phyir ro/ /rnam pa thams cad du yon tan thams cad phun sum tshogs pa'i mtshan nyid can yang ngo / /gang gi phyir bcom ldan 'das sgrib pa med pa ni bde ba chen po'i bdud rtsis mngon par bran zhing bla na med la sgrib pa med pa'i sku dang gsung dang thugs phun sum tshogs pa rtogs par mdzad pas so//bcom ldan 'das mar gsungs pa/ gang yang yang dag par rdzogs pa'i byang chub ni bde ba'o zhes so/ /yang dag par rdzogs pa'i byang chub kho na bde ba ste/ sdug bsngal ma lus pa nye bar zhi ba'i bde ba nyid kyi phyir ro/ /gsungs pa yang / rab tu zhi ba mi g.yo mchog /dbang bsgyur mnyam dang mi mnyam pa/ /rnam par mi rtog bde de'i phyir/ /byang chub sems dpa' rtogs par byed/ /ces so/ /de nyid kyi phyir pha rol tu phyin pa'i tshul la bcom ldan 'das ni btang snyoms kyi ye shes kyi rang bzhin no zhes 'dod pa ni mi 'thad par rig par bya'o//gzugs phun sum tshogs pa ni bla na med pa'i mtshan dang dpe byad thams cad kyis rnam par gsal ba'i sku can nyid kyi phyir ro/ /grags pa phun sum tshogs pa ni phyogs dang phyogs mtshams rnams su sgra grag pa nyid kyi phyir ro//phun sum tshogs pa gang gis na mang po rnams kyis bstan par bya ba de ni dpal te/ bsod nams kyi tshogs bla na med pa'i mtshan nyid can no/ /de phun sum tshogs pa ni 'jig rten pa dang 'jig rten las 'das pa'i phun sum tshogs pa thams cad 'dod pa rnams kyis bstan par bya ba nyid kyi phyir ro//ye shes phun sum tshogs pa ni shes bya thams cad la rnam pa thams cad du dag pa dang chags pa med pa dang thogs pa med pa'i ye shes can nyid kyi phyir ro/ /brtson 'grus phun sum tshogs pa ni bla na med pa'i gsung phun sum tshogs pa ste/lhun gyis grub pas chags pa med cing mi ldog la 'bad pa med par 'byung ba dang 'gro ba thams cad bsam pa ji lta ba bzhin tshim par byed pa dang / dbyangs kyi yan lag thams cad dang ldan pa dang / 'gro ba grol bar byed pa'i gsung ste/ gzhan gyi don rnam pa thams cad la longs spyod rdzogs pa dang sprul pa'i sku dag gis rtag tu mi ldog pa'i bya ba can nyid kyi phyir ro//ye shes zhabs kyis ni/ rang bzhin legs par rnam par gnas pa me long ye shes kyis thob pa'i phyir dbang phyug phun sum tshogs pa'o/ /mnyam pa nyid kyi ye shes kyi rang bzhin bsam gyis mi khyab pa'i bdag nyid kyi lus thob pa'i phyir gzugs phun sum tshogs pa'o//so sor rtog pa'i ye shes dang ldan pas na cho 'phrul thams cad kyis shin tu phra ba'i mtha' yas pa'i gdul bya'i sgrib pa spong ba'i phyir grags pa phun sum tshogs pa'o/ /'jig rten gyi khams thams cad du mos pa ji lta bar sems can thams cad kyi mtha' yas pa'i bsod nams dang bya ba grub pa'i ye shes kyi byin gyi rlabs las mi zad pa'i rin po che'i rang bzhin gyi rten la sogs pa ston pas tshim par byed pa'i phyir dpal phun sum tshogs pa'o//thun mong ma yin pa'i chos dang ldan pa thams cad du ye shes la dbang nyid thob pa'i phyir ye shes phun sum tshogs pa'o//de ltar gyur pa'i shin tu sems can gyi don la mchog tu sbyor ba na mchog tu mya ngan las 'das pa mnyam pa nyid thob pa'i phyir brtson 'grus phun sum tshogs pa'o zhes rnam gzhag mdzad do//de la longs spyod rdzogs pa'i sku ni rang gi sangs rgyas kyi zhing yongs su dag par skye ste/ nam mkha' gnas pa ji srid par bzhugs so/ /de ci'i phyir sangs rgyas kyi zhing yin zhe na/ de nyid der gtso bor 'byung ba'i phyir ro/ /'jig cing rab tu 'jig pas na 'jig rten te/ skye dgu dang de'i snod do//des na 'jig rten gyi khams ni rnam pa gnyis te sems can gyi 'jig rten dang snod kyi 'jig rten no/ /de la snod kyi 'jig rten du sa gzhi lag mthil ltar mnyam pa khang bzangs skyed mos tshal dang 'bab stegs dang dpag bsam gyi shing la sogs pas bskor ba'i sems can gyi gnas mchog tu 'bar ba gser dang dngul dang bai DUr+ya dang mu sa ra gar+b+ha dang rdo'i snying po dang mu tig dmar po dang kar ke ta na ste/rin po che sna bdun gyi rang bzhin dpag tu med pa'i 'jig rten gyi khams gzhan du 'gro ba'i 'od zer chen po 'gyed pa/ steng du yang nam mkha' dang rjes su mthun par snang ba'o//der sems can gang su dag skyes pa de rnams thams cad kyang 'phags pa'i sa thob pa'i byang chub sems dpa' rnams te/ slar yang bcom ldan 'das kyis byang chub tu smin par bya'o/ /sems can de rnams kyang sa dang chu dang me dang rlung dang nam mkha' dang rnam par shes pa'i khams kyi rang bzhin gyis ni khams drug pa can te/dge slong skyes bu 'di ni khams drug pa'o zhes gsungs pa'i phyir ro/ /de rnams kyi lus kyang mdzes pa dang ldan pa 'od kyi dkyil 'khor can te/ sa gzhi dang rjes su mthun pa'i kha dog dang dbyibs can no/ /de na sems can rnams kyi longs spyod la yongs su longs spyod pa yang lha'i 'jig rten thams cad las so sor khyad par du 'phags pa ste/gang rnams kyi longs spyod ni mtha' gcig tu dge ba bde ba mtha' gcig tu kha na ma tho ba med pa mtha' gcig tu dbang bsgyur ba'o/ /'di 'dra ba ni khams drug yongs su dag pa ste/mtha' yas pa nyid dang / mtshams dang bral ba nyid kyi phyir dang / shin tu rol pa nyid kyi phyir ro/ /der skyes pa'i byang chub sems dpa' rnams kyang mtha' yas pa'i 'jig rten gyi khams su song nas der sems can de rnams kyi mi dge ba bsags pa spang bar bya ba dang /de'i gnyen po dge ba sogs pa rnams rab tu mkhyen nas dge ba'i chos bskyed pa'i ched du chos ston par byed do/ /byang chub sems dpa' rnams la yang yon tan 'di rnams thams cad yod la mchog tu rnam par dag par son pa ni ma yin no/ /de ltar mtshams med pa'i yon tan gyi gter gyi sangs rgyas kyi zhing du mtha' yas pa'i rin po che'i rang bzhin gzhal med khang gi 'khor gyi nang na/skyes bu chen po'i mtshan dang dpe byad mchog tu 'bar bas sku rnam par gsal ba ni bcom ldan 'das longs spyod rdzogs pa'i sku'o/ /de la gzugs tshad mar byed pa'i gang zag rnams kyi ngor dad pa mngon par 'phel ba'i ched du skyes bu chen po'i mtshan sum cu rtsa gnyis rnams dang dpe byad bzang po brgyad cu rnams rnam par gzhag gi 'di rnams kyi grangs 'di tsam du bya bar nus par bya ba ni ma yin no//de la mtshan rnams ni phyag dang zhabs 'khor los mtshan pa nyid dang /rus sbal bzhin zhabs shin tu gnas pa nyid dang / phyag dang zhabs kyi sor mo ngang pa'i rgyal po ltar dra bas 'brel pa nyid dang / phyag dang zhabs 'jam zhing gzhon sha chags pa nyid dang / bdun mtho ba nyid dang / sor mo ring ba nyid dang / rting pa yangs pa nyid dang /sku che zhing drang ba nyid dang / zhabs 'bur mi mngon pa nyid dang / sku'i spu gyen du phyogs pa nyid dang / byin pa ri dgas e ne ya lta bu dang / dpung pa ring zhing mdzes pa nyid dang / mdoms kyi sba ba sbubs su nub pa nyid dang / mdog gser 'dra ba nyid dang / pags pa 'jam pa nyid dang / spu re re nas g.yas su 'khyil ba nyid dang / zhal mdzod spus mtshan pa nyid dang / ro stod seng ge'i 'dra ba nyid dang / dpung mgo shin tu zlum pa nyid dang / thal gang rgyas pa nyid dang / ro bro ba'i mchog mkhyen pa nyid dang / n+ya gro d+ha ltar chu zheng gab pa nyid dang /dbu gtsug tor dang ldan pa nyid dang / ljags srab cing ring ba nyid dang / 'jig rten gyi khams thams cad kyi sems can gyis dam pa'i chos go bar byed pa'i phyir tshangs pa'i dbyangs nyid dang / 'gram pa seng ge'i 'dra ba nyid dang / tshems shin tu dkar ba nyid dang / tshems mnyam pa nyid dang /tshems thags bzang ba nyid dang / tshems bzhi bcu tshang ba nyid dang / spyan mthon mthing nyid dang / spyan rdzi ma ba'i lta bu nyid do/ /zhabs shin tu gnas pa nyid ni sa la mnyam par reg pa ste/ sa chen po thams cad la yang dma' ba dang mtho ba dang / gseg ma dang rdo ba dang chu dang 'dam dang /tsher ma dang bu ga la sogs pa med par mnyam por gnas la/ 'jig rten gyi khams brgya stong phrag du ma'i bar gyi dbang gis ring ba yang nye bar 'gyur ro/ /sor mo'i tshigs dang po nas brtsams pa'i sor mo'i bar la seng seng po med na yang sor gdub la sogs pa'i rgyan gzhug tu rung ba'i sor mo can no//'jam pa ni shin tu gzhon pa nyid do/ /gzhon sha chags pa ni kha dog phun sum tshogs pa dang ldan pa nyid kyi phyir ro/ /bdun ni phyag dang zhabs kyi rgyab gnyis dang / phrag gang gnyis dang ltag pa ste shas khengs pa nyid kyi phyir ro/ / zhabs kyi mthil thams cad cha bzhir byas nas cha gsum rnams la zhabs dang / cha gcig la rting pa ste tshad dang ldan pa'o/ /zhabs 'bur mi mngon pa zhes 'dir mdo ni shin tu pus mo dang long bu mi mngon pa nyid kyi phyir zhabs 'bur mi mngon pa'o zhes so/ /de'i phyir shin tu yang sbas pa'i don can ud sgra'o//pus mo dang long mo'i rus pa rjod par byed pa ni sham kha'i sgra'o/ /brla'i rtsa ba las 'og thams cad la zhabs zhes rtogs par bya'o/ /e ne ya'i yan lag ni e ne ya ste/ byin pa dang 'dra ba ni byin pa ste/ sha shin tu rgyas pa dang rim gyis phra ba dang /mnyam par gnas pa dang / shin tu 'dril zhing yongs su zlum pa ste sor brgyad kyi phyogs su 'gyur ro/ /phyag dag mdzes pa nyid ni rgyas pa nyid kyi phyir ro/ /ring ba nyid ni ring ba ste/ ma btud par pus mor sleb pa nyid kyi phyir ro/ /mdoms kyi sba ba sbubs su nub pa ni gang gis mdoms kyi sba ba mi mngon pa'o//mdog gser 'dra ba nyid kyis na sku mkhregs shing snum la 'od gsal ba'i kha dog can nyid du bstan pa'o/ /spu g.yas su 'khyil ba nyid ni g.yas phyogs su 'khor bas so/ /mdzod spu ni smin mtshams kyi bar na thig le'i gnas na 'jam pa dkar ba mnyen pa drangs na khru gang dang khru gnyis dang khru gsum la sogs pa'i tshad 'byung la/btang na g.yas su 'khyil pa/ rtse mo gyen du phyogs pa skyu ru ra'i 'bras bu'i tshad tsam pa dngul 'bur gyi rnam pa'o/ /ro stod seng ge'i 'dra ba nyid ni rgyas pa yangs pa sha rgyas pa'i brang can nyid kyi phyir dang / mdzes pa nyid dang rgya che ba phun sum tshogs pa nyid kyi phyir ro//shin tu zlum pa rtsa'i dra ba mi mngon pa ni gang gi dpung mgo ste/ gser gyi bum pa'i mgrin pa yongs su zlum pa'i mgrin pa legs par 'brel pa can no/ /dpung mgo dag gi bar dang bar ni thal gong ste 'di'i de nye bar rgyas pa'o zhes pa thal gong rgyas pa'o/ /ro drug po rnams kyi bro ba mkhyen zhing tshim par byed pa ste ro bro ba'i mchog nyid kyi zhal zas can ni bcom ldan 'das so zhes kha cig tu brjod do//yan lag dang nying lag rnams su ro rnams bro bar byed gsol bar byed ces pa ro bro ba ste rtsa rnams so/ /de rnams kyi mchog nyid ni rlung dang mkhris pa dang bad kan la sogs pa rnams kyis ma dkrugs pa nyid kyis mnyam par gnas pa ste/'di'i rlung la sogs pas ma dkrugs pa rnams ni mtho bar mi 'gyur 'dus khongs su ma yin/ 'khyil par byas pa ma yin/ kha dog ngan pa ma yin te/ mi mngon par rtsa de rnams kyis rnam 'gyur ma byas pa'i sku ni gser gyi gtan pa bzhin du yid du 'ong bar 'gyur ro//rlung la sogs pa rnams kyis ma dkrugs pa de rnams kyis kyang yang dag par gsol ba'o/ /de gsungs pa/ skyes bu chen po rnams kyi mgrin pa ro gsol bar byed pa stong phrag bdun po gyen du kha phyogs pa rnams 'jug go zhes so/ /ro thams cad kyang zhal du bcug pas bdud rtsi'i ro dang mnyam pa 'gyur ro//yang na ro bro bar bya'o zhes pa ro ste drug rnams so/ /de rnams kyi bro ba ste/ zhim pa'i mchog nyid do/ /de dang ldan pa'i zhal zas gang la yod pa ni de skad do zhes bye brag tu bshad do/ /n+yag ni dma' ba ste sku smad do/ /ro d+ha ni sku stod do/ /yongs su gab pa ni mnyam pa ste/lte ba nas bzung nas sku smad dang sku stod tshad mnyam pa'o/ /yang na 'dom ni n+ya gro d+ha ste sku bzhengs par gyur nas bcom ldan 'das kyi phyag gnyis 'dom du byas pa na sku mtha' dag chu dang zheng dag mnyam pa'o/ /n+ya gro d+ha ni shing kha Ta ste de dang 'dra bar chu dang zheng mnyam pa'o zhes kha cig go//gtsug tor ni dbu dkris pa'i rnam par zlum zhing legs par yongs su rdzogs pa'o/ /ljags che ba nyid ni ring ba nyid kyi phyir te/ snyan gyi bug pa'i bar dang dpral ba'i skra mtshams kyi mthar thug par ljags kyis reg pa'o/ /shin tu yang dag par rdzogs pa ma yin pa tshes bcu gnyis kyi zla ba'i dkyil 'khor dang 'dra ba legs par 'brel pa dang 'gram pa'i mtha' zlum pa nyid kyi phyir/'gram pa seng ge'i lta bu nyid do/ /tshems bzhi bcu tshang ba ni gzhan rnams kyi bzhin du sum cu rtsa gnyis sam nyi shu rtsa brgyad ma yin pa'o/ /spyan ni zlum pa'i dbus snum zhing gnas pa dang nag po zlum po'i logs gnyis dkar ba dang /rdzi ma gnas pa'i go skabs snum la mthing gar 'dug pa dang / mtha' gnyis shing pim+pa la'i shun pa ltar dmar ba dang / rdzi ma dang spyan gyi bar gser gyi kha dog go zhes pa 'di lta bu dang ba lnga rnams dang ldan kyang spyan gyi dkyil 'khor gtso bo nyid kyi phyir spyan mthon mthing ngo zhes gsungs so//be'u gzhon nu'i bzhin du bla 'og shin tu snum zhing 'od dang ldan pa nyid kyi phyir dang / ma 'dzings pa nyid kyi phyir spyan rdzi ma ba'i lta bu nyid do/ /mtshan 'di rnams rjes su gsal bar byed pa'am mtshan dang rjes su mthun par gsal bar byed pa'am/skyes bu chen por rab tu gsal bar byed ces pa'am/ rjes su mthun par mdzes par byed ces pa dpe byad bzang po brgyad cu rnams te/ sen mo zangs kyi mdog lta bu nyid dang / sen mo snum pa nyid dang / sen mo mtho ba nyid dang /sor mo zlum pa nyid dang / sor mo rgyas pa nyid dang / sor mo byin gyis phra ba nyid dang / rtsa mi mngon pa nyid dang / rtsa mdud pa med pa nyid dang / long bu mi mngon pa nyid dang / zhabs mi mnyam pa med pa nyid dang / seng ge'i stabs su gshegs pa nyid dang / glang po che'i stabs su gshegs pa nyid dang /ngang pa'i stabs su gshegs pa nyid dang / khyu mchog gi stabs su gshegs pa nyid dang / g.yas phyogs su bskor bas gshegs pa nyid dang / mdzes par gshegs pa nyid dang / mi g.yo bar gshegs pa nyid dang / sku 'khril bag chags pa nyid dang /sku byi dor byas pa lta bu nyid do/ /sku rim par 'tsham pa nyid dang / sku gtsang ba nyid dang / sku 'jam pa nyid dang / sku rnam par dag pa nyid dang / mtshan yongs su rdzogs pa nyid dang / sku kho lag yangs shing bzang ba nyid dang / gom pa snyoms pa nyid dang / spyan rnam par dag pa nyid dang /sku shin tu gzhon sha can nyid dang / sku zhum pa med pa nyid dang / sku rgyas pa nyid dang / sku shin tu grims pa nyid dang / yan lag dang nying lag shin tu rnam par 'byes pa nyid dang / gzigs pa rab rib med cing dag pa nyid dang / dku zlum pa nyid dang / dku skabs phyin pa nyid dang /dku ma rnyongs pa nyid dang / phyal phyang nge ba nyid dang / lte ba zab pa nyid dang / lte ba g.yas phyogs su 'khyil ba nyid dang / kun nas mdzes pa nyid dang / kun du spyod pa gtsang ba nyid dang / sku la sme ba dang gnag bag med pa nyid dang / phyag mthil shing bal ltar shin tu 'jam pa nyid dang /phyag gi ri mo mdangs yod pa nyid dang / phyag gi ri mo zab pa nyid dang / phyag gi ri mo ring ba nyid dang / zhal ha cang mi ring ba nyid dang / shin tu dang zhing 'od 'bar ba nyid las zhal la gzugs brnyan 'char ba'i phyir/ zhal la gzugs kyi gzugs brnyan snang ba nyid dang /ljags mnyen pa nyid dang / ljags srab pa nyid dang / ljags dmar ba nyid dang / glang po che'i nga ro dang 'brug gi sgra dang ldan pa nyid dang / gsung snyan zhing mnyen la 'jam pa nyid dang / mche ba zlum pa nyid dang / mche ba rno ba nyid dang / mche ba dkar ba nyid dang / mche ba mnyam pa nyid dang /mche ba byin gyis phra ba nyid dang / shangs mtho ba nyid dang / shangs gtsang ba nyid dang / spyan yangs pa nyid dang / /rdzi ma stugs pa nyid dang / spyan dkar nag 'byes shing pad+ma'i 'dab ma rangs pa lta bu nyid dang / smin tshugs ring ba nyid dang / smin ma 'jam pa nyid dang /smin ma snum pa nyid dang / smin ma'i spu mnyam pa nyid dang / phyag ring zhing rgyas pa nyid dang / snyan mnyam pa nyid dang / snyan ma nyams pa nyid dang / dpral ba legs par 'byes pa nyid dang / dpral ba dbyes che ba nyid dang / dbu rgyas pa nyid dang / dbu skra bung ba ltar gnag pa nyid dang /dbu skra stug pa nyid dang / dbu skra 'jam pa nyid dang / dbu skra ma 'dzings pa nyid dang / dbu skra mi bshor pa nyid dang / dbu skra dri zhim pa nyid dang / dpal gyi be'u dang bkra shis dang g.yung drung 'khyil pas thugs kha dang phyag dang / zhabs brgyan pa nyid ces pa'o//thugs kar yang dpal be'u la sogs pa 'byung ba ste/ thugs ka na gnas pa'i dpal be'u la sogs pa rnams las 'od zer rnams 'byung ngo zhes pa gsungs pa'i phyir ro/ /mdo gzhan du phyag dang zhabs la sdod ris dang bum pa gang ba dang nya dang gnya' shing dang rgyal mtshan dang /dung dang khri bzang po dang gdugs dkar po dang / rnga yab la sogs pa rnams kyang gsungs so/ /mtshan dang dpe byad 'di rnams kyang byang chub sems dpa' chen po rnams dang 'khor los sgyur ba rnams la yang 'byung ste/ 'on kyang de bzhin gshegs pa rnams kyi yul na gnas pa dang / gsal ba dang rdzogs pa nyid rnams kyis bla na med par phul du 'byung ba'o/ /phal cher ni 'di rnams bcom ldan 'das longs spyod rdzogs pa'i sku ste/ gzugs kyi sku gang la gnas nas de de bzhin gshegs pa chos kyi sku mngon du mdzad pa'i sku de bsam gyis mi khyab cing sna tshogs gzugs can te/gzugs can de dang des byang chub sems dpa' rnams chos la rdzogs par longs spyod pa'i rgyu nyid kyis yongs su 'gyur bar mdzad do/ /de las sgra gang byung ba de las 'jig rten yang rnam pa de lta bu'i chos bstan pa'i snod du 'gyur zhing phyin ci ma log pa'i de kho na nyid rtogs par 'gyur ro//gang gi phyir 'dis sngon byang chub sems dpar gyur pas smon lam bskyed pa ste/ ji ltar sangs rgyas bcom ldan 'di rnams dus 'dir 'di ltar rnam par mi rtog par yid bzhin nor bu dang dpag bsam gyi shing dang 'dra bar ji ltar rjes su mthun par sems can gyi don sgrub pa rdzogs par mdzad mod kyang skad cig kyang chos kyi dbyings las mi g.yo ba dang /sems can gdul ba'i dus las mi 'da' ba de bzhin du bdag kyang 'gyur bar bya'o//nam mkha' ji srid pa dang sems can ji srid pa dang ji srid du nyon mongs pa dang / las rnams rab tu gdags pa de srid du bdag srog chags gcig gi yang bya ba la/ sangs rgyas kyi bya ba yongs su rdzogs kyang / gnas par bya zhing pan pa rnams bya'o zhes pa 'di'i smon lam gyi 'phen pa'i dbang las dang /gdul bya rnams kyi yang rnam pa de lta bu'i chos nyan pa 'jug pa'i las yongs su smin pa las/ de 'dra ba'i bya ba'i khyad par rnams rab tu gdags te/ gang la rnam par rtog pa med par gyur kyang mtha' med pa'i dus su nam mkha' ji srid par ji ltar gdul bya dang rjes su mthun pa'i bya ba 'jug pas mtha' yas pa'i sems can gyi khams kyi don mdzad do//sku 'di yang sa bcu'i dbang phyug kho na'i byang chub sems dpa' rang gi bsod nams dang ye shes kyi tshogs nye bar bsags pas dri ma med pa'i shes rab kyi me long can rnams la so sor snang gi sa 'og ma rnams la ma yin no//sems can 'dul ba'i rgyu mthun du ji skad brjod pa'i sku las/ gzhan rgyu mtshan pa'i sku 'jug pa rnams ni chos kyi sku'i mthu las yang dag par byung ba'am/gzugs kyi sku'i mthu las yang dag par byung ba yang rung ste/ de rnams kyi yang mthu phul du byung ba bsam gyis mi khyab po/ /de ltar ni gang thams cad mkhyen pa'i ye shes kyi gnas skabs las gang sngon thog ma med pa dang ldan pa'i 'khor bar rang gi skye ba'i gnas skabs 'gag pa spyod pa'i mtha' sna tshogs pa du ma de rnams gsal ba ste/lus pa med pa'i spyod pa'i mtha' bstan pa las phan tshun 'dres pa med pa de rnams thams cad shin tu yongs su dag pa'i me long gi dkyil 'khor la gdong gi gzugs brnyan bzhin du cig car nyid du rgyu mthun pa'i sku gcig kho na la/'bad pa med pa kho nar kun nas ston par byed do/ /sbyin pa'i pha rol tu phyin pa sngon spyad pa rnams te/ bcom ldan 'das kyis sangs rgyas bcom ldan 'das gang bsnyen bkur byas pa rnams/gang 'dra ba'i sangs rgyas kyi zhing bai DUr+ya dang / pad+ma rA ga dang / in+d+ra nI la dang / shel la sogs pa'i rang bzhin rin po che'i ljon shing la sogs pas mdzes par byas pa/ zheng dang chu dang zlum skor la sogs pa rnams dang bcas pa de la brten pa'i sems can rnams kyi khyad par gyis nye bar mdzes par/sangs rgyas bcom ldan 'das rnams bltams pa la sogs pa ston par bshad pa de ma lus pa sku gcig la ston par mdzad do/ /sangs rgyas de rnams kyi yang sku dang spyod pa dag gi mthu phul du byung ba dang / ji snyed du de rnams kyi dge 'dun 'dus par gyur pa'am/chos dang rjes su mthun pa'i chos sgrub pa'i rnam pa gang gis nyan thos dang bcas pa'i dge 'dun du gyur pa dang / sangs rgyas de rnams kyi sangs rgyas kyi zhing du gang 'dra ba'i byang chub sems dpa' de rnams mtshan dang dpe byad kyis rnam par bkra ba'i sku can dbyibs dang ldan pa zhal zas dang chos gos dang gnas la sogs pa yongs su spyod pa dang ldan pa rnams byung ba dang /theg pa gcig dang theg pa gsum la brten pa'i chos nye bar bstan pa gang 'dra ba dang / bdag nyid bram ze la sogs pa'i rigs su rab tu skyes pa gang 'dra ba dang /gzugs dang blo dang ldan pa dang / khyim pa dang rab tu byung bar gyur pa dang / chos mnyan nas spyod pa gang la spyod pa dang / lhag ma dang bcas pa dang lhag ma med pa'i bslab pa khas blangs pa dang / sangs rgyas de rnams dang nyan thos dang bcas pa'i byang chub sems dpa'i dge 'dun rnams la bza' ba la sogs pa dang chos gos dang / rin po che'i rgyan la sogs pa dus ji srid du tshad gang phul ba dang / ji ltar yang 'di sbyin pa'i pha rol tu phyin pa la spyod pa'i spyod tshul gyi mtha' ston pa de bzhin du tshul khrims dang /bzod pa dang / brtson 'grus dang / ting nge 'dzin dang shes rab la spyod pa yang gang sngon gyi gnas skabs ma tshang ba med pa de rnams ma lus par sku gcig la ston par mdzad do/ /de lta bu lta zhog /gzhan yang ba spu'i khung bur yang bdag nyid kyi spyod pa thams cad gsal bar ston par mdzad do//gzhan yang 'das pa dang ma 'ongs pa dang / da ltar byung ba'i sangs rgyas rnams kyi thugs dang po bskyed pa nas bzung nas ji srid byang chub snying po'i bar gyi spyod pa gang rnams dang /dus gsum gyi byang chub sems dpa' dang / rang sangs rgyas dang / nyan thos rnams dang / skye bo ma lus pa rnams kyi yang gnas skabs thams cad ba spu'i khung bu re rer cig car ston par mdzad do/ /nam mkha'i mtha' klas pa'i 'jig rten gyi khams kyang bzhed na rdul phra rab gcig gi nang du ste/'jig rten phra rab gyur pa yang ma yin la/ rdul phra rab che bar yang ma yin no/ /rdul phra rab gcig gis kyang mtha' med pa'i yul la khyab pa dang 'jig rten ma lus pa brten pa ston par mdzad do/ /'jig rten gyi khams ma lus pa rnams na ji snyed pa'i rdul phra rab de snyed las lhag pa'i spyod pa rnam par bkra ba rnams skad cig gcig la rnam par rtog pa med par 'khor ba ji srid kyi bar du ston par mdzad do//de ltar 'gro ba'i dbang phyug sangs rgyas bcom ldan 'das rnams dang byang chub sems dpa' rnams ni thun mong ma yin pa'i yon tan phul du byung ba rnam pa de lta bu'i mig 'phrul gyi ngo bo las ma 'das pa'i rang bzhin mngon sum pa yang dag par ston par nus pa'o zhes mkhas pa rnams kyis mos par bya'o//de ltar bcom ldan 'das khams gsum las 'das pa yang /sprul pa'i sku rnams kyis 'jig rten rjes su gzhug pas yum dang yab dang sras la sogs pa'i 'brel pa yang dag par ston zhing khams gsum par bzhugs nas ji ltar rjes su mthun pa'i chos ston pa yang dag par 'jug pas rnam pa sna tshogs pa spyod pa'i sems can gyi khams bla na med pa yang dag par rdzogs pa'i byang chub la/grags pa dang lan du phan 'dogs pa la sogs pa 'dod pas ma yin par thugs rjes 'gro ba rab tu zhi ba la sogs pa'i phrin las rnams kyis rab tu 'god par mdzad do/ /de ltar ni/ 'gro rnams zhi ba'i las dang ni//zhes pa la sogs pa ji srid du/ chos kyi sku yi phrin las 'di/ /rnam pa nyi shu bdun du 'dod/ /ces pa mngon par rtogs pa'i rgyan no/ /phrin las de rnams kyang bcom ldan 'das sku de rnams su sprul pa ste/ gang dmyal ba pa rnams kyi dmyal ba'i me shi bar byas pas dang /chos ston pas dang / de bzhin du byol song rnams la yang rang gi sha dang khrag la sogs pa ster bas dang / de bzhin du yi dags rnams la bza' ba dang btung ba la sogs pa byin pa dang / chos ston pas kyang sems mngon par dang bar byas nas/ mngon par dang bas de bas kyang rang gi 'gro ba rnams nas shi 'phos nas lha dang mi rnams su skye bar byed pa dang /lha theg pa dman pa la mos pa rnams kyang chos bstan pas mngon par dang bar byas nas dmigs su skye ba nas ji srid du nyan thos kyi byang chub la 'god do zhes pa la sogs pa rnams mdo ji lta bar/bdag gis gong du gnas skabs ji ltar brjod zin to/ /gzhan yang bcom ldan 'das 'di ji ltar rang nyid thugs dang po la sogs pa rnams bskyed pa de bzhin du sems de dang de bskyed pa'i ched du gdul bya rnams la chos ston par mdzad do zhes mdor bsdus nas 'di'i phrin las bstan pa'o//bcom ldan 'das kyi yon tan ji skad brjod pa 'di rnams kyang sangs rgyas kyi sa kun du 'od la rnam pa thams cad yongs su dag par 'gyur ro/ /gang rnams kyis rnam pa thams cad yongs su rdzogs pa'i phyir/ bsam gyis mi khyab pa'i ye shes kyi yul can de las gzhan pa'i yon tan mtha' dag dang ldan pa'i de bzhin gshegs pa chos kyi sku las tha dad pa med par 'jug pa nam mkha' gcig pu dpe dang dper bya ba'i yon tan re rer yon tan ma lus pa rgyas pa rnams ni/phyogs bcu'i 'jig rten gyi khams thams cad na gnas pa'i 'gro ba mgon med pa/rnam pa thams cad kyis snod ji lta ba bzhin du rgyun chad pa med par nam mkha' 'jug pa ji srid par mgon du 'gyur ro/ /ci sangs rgyas thams cad rnam pa thams cad mnyam par 'gyur ram zhe na/ rgyu gsum rnams kyis mnyam pa nyid de/sangs rgyas thams cad kyi bsod nams dang ye shes kyi tshogs yang dag par 'grub pa dang / chos kyi sku yongs su rdzogs pa dang / longs spyod rdzogs pa dang / sprul pa'i sku dag gis 'jig rten gyi don spyod pa'o/ / sku tshe dang rigs dang tshad kyis byas pa'i tha dad par ni 'gyur te/ shin tu ring ba dang thung bar 'tsho ba'i phyir dang bram ze dang rgyal rigs su rigs tha dad pa'i phyir dang / 'od srungs dang gau ta ma la sogs pa rus tha dad pa'i phyir dang / chung ba dang che ba'i bong tshod tha dad pa'i phyir te/dus ji lta ba'o/ /phun sum tshogs pa rnam pa gsum po 'di nyid yid la byed pa'i mkhas pas sangs rgyas bcom ldan 'das rnams kyi drung du shin tu dga' ba dang gus pa bskyed par bya nus te/ 'di lta ste rgyu phun sum tshogs pa dang / 'bras bu phun sum tshogs pa dang phan pa byed pa phun sum tshogs pa'o//de la rgyu phun sum tshogs pa rnam pa bzhi ste/ bsod nams dang ye shes kyi tshogs thams cad la goms par byed pa dang / dus ring por goms par byed pa dang / rgyun du goms par byed pa dang / bkur stir byas te goms par byed pa'o//'bras bu phun sum tshogs pa rnam pa bzhi ste/ ye shes dang / spangs pa dang / mthu dang / gzugs kyi sku phun sum tshogs pa'o/ /phan par byed pa phun sum tshogs pa rnam pa bzhi ste/ ngan song gsum dang / 'khor ba'i sdug bsngal las shin tu nges par 'grol ba phun sum tshogs pa dang /theg pa gsum dang bde 'gro la 'god pa phun sum tshogs pa'o/ /ye shes phun sum tshogs pa yang rnam pa bzhi ste/ nye bar ma bstan par mkhyen pa dang / thams cad mkhyen pa dang / rnam pa thams cad du mkhyen pa dang /'bad pa med par mkhyen pa'o/ /spangs pa phun sum tshogs pa rnam pa bzhi ste/ nyon mongs pa thams cad spangs pa dang / shin tu spangs pa dang / bag chags dang bcas pa spangs pa dang / ting nge 'dzin thams cad la snyoms par 'jug pa'i sgrib pa spangs pa'o//mthu phun sum tshogs pa yang rnam pa bzhi ste/ phyi rol gyi yul rnams sprul zhing yongs su bsgyur ba dang byin gyis rlob pa la dbang ba nyid phun sum tshogs pa dang / sku tshe gtong ba dang byin gyis rlob pa la dbang ba nyid phun sum tshogs pa dang / bsgribs pa dang nam mkhar dang ring ba la myur bar gshegs pa dang /phra ba mang por 'jug pa la dbang ba nyid phun sum tshogs pa dang / sku'i 'od kyis mtha' yas pa'i 'jig rten gyi khams snang bar byed pa la sogs pa rnam pa sna tshogs pa'i gnyug ma'i ngo mtshar ba phun sum tshogs pa'o//gzugs kyi sku phun sum tshogs pa yang rnam pa bzhi ste/ mtshan phun sum tshogs pa dang / dpe byad phun sum tshogs pa dang / stobs phun sum tshogs pa dang / rdo rje'i snying po'i rus pa'i lus phun sum tshogs pa'o/ /longs spyod rdzogs pa'i sku'i yang 'khor gyi dkyil 'khor tha dad pa dang zhing tha dad pa ste/longs spyod rdzogs pa'i sku 'ga' zhig gi sangs rgyas kyi zhing ni shel gyi rang bzhin/ 'ga' zhig gi ni bai DUr+ya'i rang bzhin te/ de lta bu la sogs pa'o/ /ming tha dad pa ni 'od dpag med dang / rnam par snang mdzad ces pa 'di lta bu la sogs pa'o//sku tha dad pa ni 'ga' zhig gis rnam pa 'ga' zhig tu mthong ba ste/ shel gyi rang bzhin la sogs pa tha dad pa'am/ sku chung ba dang sku che ba tha dad pas so/ /chos la rdzogs par longs spyod pa tha dad pa ni sa bcu pa dang blo gros mi zad pa'i chos kyi rnam grangs la sogs pa chos kyi rnam grangs tha dad pas so//'khor gyi dkyil 'khor tha dad pa ni der 'dus pa'i byang chub sems dpa' la ltos pa ste/ bskor ba tha dad pa yang ngo / /ji ltar sems bskyed pa nyi shu rtsa gnyis po 'di rnams 'khor dang bcas pa 'dir nges par bstan pa de ltar kho nar rtogs par bya ste/gnas gang de rnams bsams na byis pa nus pa zad pa las skyo zhing smyo la brgyal ba dang 'chi bar 'gyur ba'i gnas de rnams ni bsam gyis mi khyab pa rnams te/ rtog ge'i spyod yul ma yin pa'i phyir ro/ /de rnams kyang ji ltar bcom ldan 'das rnal 'byor can gyi dbang phyug gi gtso bos gzigs shing bstan pa de kho na ltar bdag gis 'dir gdams ngag ji lta bar nges par bshad pa'o//de ltar 'di ni sangs rgyas rnams kyi bdag nyid chen po nyid mdor bsdus pa ste/ phye bar bya na ni dbye ba mtha' yas par 'gyur ro//sangs rgyas rnams kho nas sangs rgyas bcom ldan 'das rnams kyi ba spu'i khung bu re rer dang dpe byad dang skyes bu'i mtshan dang / stobs dang mi 'jigs pa dang / sangs rgyas kyi chos ma 'dres pa la sogs pa'i yon tan gyi khyad par de rnams kyang yongs su gcod par nus la/mngon par brjod par yang nus mod/ ye shes kyi yul bsam gyis mi khyab pa'i bskal pa grangs med par sku tshe'i tshad byin gyis brlabs par gyur cing / myur zhing myur bar las gzhan med par gyur nas gal te brjod par gyur pa de lta na yang yon tan yongs su rdzogs par mi 'gyur ba nyid na/byang chub sems dpa' rnams kyis lta ci smos la rang sangs rgyas sam nyan thos rnams kyis ni sangs rgyas kyi yon tan gyi mtha' shes pa'am brjod par mi nus par sngar kho na'o/ /gshog pa'i rgya shin tu yangs pa'i rlung gi shugs rlob cing pha rol gnon pa'i nam mkha' lding yang /nam mkha' yongs su zad do snyam nas nam mkha' las 'bab pa ma yin gyi/ 'on kyang rang gi stobs dang pha rol gnon pa nyams pas so/ /de bzhin du gang sa bcu la gnas pa'i byang chub sems dpa' de rnams kyang bsam gyis mi khyab pa'i rnam par thob pa ste/de rnams kyang de bzhin gshegs pa'i yon tan de snyed mngon par brjod pa nus pa las/ yon tan yongs su zad pas nam mkha' bzhin du mtha' med pa'i yon tan rnams las ldog pa ma yin gyi/ rang gi blo'i stobs yongs su nyams pas ni log nas gnas na/rang sangs rgyas rnams dang nyan thos rnams kyis yon tan gyis rtogs par 'gyur ba lta ci smos/ gang gi tshe sangs rgyas kyi yon tan yongs su shes pa'am mngon par brjod pa la 'di lta bu'i gtam 'di lta ste/ de'i phyir bdag lta bu'i ma rig pa'i rab rib kyis long ba ji lta ba bzhin gyi de kho na nyid shin tu lkog tu gyur pa can rnams la de bzhin gshegs pa'i yon tan brjod pa'i skabs ga la yod/gal te yang de lta ste/ de lta na yang 'phags pa klu sgrub dang / 'phags pa rnam par grol ba'i sde la sogs pa la brten pa las/ the tshom med par bdag gis yon tan phyogs gcig gi cha tsam brjod do//de ltar yang de bzhin gshegs pa rnams ni mtha' yas shing rmad du byung ba'i yon tan rin po che chen po'i 'byung gnas yin no/ /'on kyang slar yang byis pa rang yon tan gyis bkren pas mos pa dang bral ba rnams yon tan phun sum tshogs pa de 'dra ba thos kyang sangs rgyas de'i chos la gus par mi byed la/mkhas pa rnams ni rkang gi khong nas kyang bcom ldan 'das de dang de'i chos la'ang mngon par rab tu dang bar byed do/ /de rnams de la dad pa tsam gyis kyang mngon par bsgrubs pa rnams/ rnam par smin pa ma nges pa'i sdig pa rnams kyi phung po rnams zil gyis mnan te/lha dang mi'i dpal nyams su myong zhing / rdzogs pa'i byang chub bla na med pa mchog tu 'gro bar 'gyur ro zhes pa'o/ /thub pa'i dgongs pa'i rgyan las yon tan gyi snang ba'i le'u ste yongs su bcad pa bzhi pa'o// //zhes pa thub dgongs dpag bsam ljon shing rtog pa'i rlung gis ni//g.yos shing lta ngan chu yis rgyun du rab zhir mthar zhugs pa/ /mi mthun phyogs rnams nye bar gyur las 'bras bu bzang rnams bsdus/ /kye snying slar yang skye ba dag pa 'byung ba ga la zhig /snang ba 'di las phan dang mi phan pa yang rnam bltas nas//gang las mtho bas yon tan rang bzhin theg pa 'di zhon te/ /bdag nang stobs ldan dgra bo'i rigs kyi rtsa ba myur chod la/ /srid gsum rnam rgyal phun tshogs byang chub gnas kyis phun tshogs byon/ /tshul gsum rnams la bden pa zung gi srog /mdor bsdus bdag gis 'di ru nye bar bkod/ /gal te nyes par zin na de bzod mdzod/ /bden pa gnyis la sa brnyes tshad ma yin/ /gzhung lugs smad med bshad pa'i legs byas 'dod bya zla ba ni/ /rab rib 'joms byed gnyid bral de yis skye bo tshim byed shog / bdag kyang so so'i sku 'dzin bsam mi khyab sku phun tshogs kyis/ /rtsod pa dang bral bskal par rol pa'i ched du 'du bar shog /yon tan dam pa bsgrigs pa'i rgyan/ /brten pa 'od 'bar dri med pa/ /snang ba 'di ni skyo bo yi/ /mgrin pa rnams la gdags par mdzod/ / snang ba dang bcas rgyan 'di ltar/ /sems can sems la sdong bu bzhin/ /thub pa nang 'od 'jug ched du/ /nam mkha' ji srid gnas par shog /thub pa dgongs pa'i rgyan slob dpon mkhas pa chen po 'jigs med 'byung gnas sbas pa'i zhabs kyis mdzad pa rdzogs so// //rnam gnon tshul mkhas 'jigs med kyi/ /gnas la reg pa'i tshul 'di ni/ /dpal ldan dga' skyong rgyal srid kyi/ /sum cu'i lo la byas pa yin/ /phyed dang bcas pa'i stong phrag lnga/ /mkhas pa rnams kyis sdom pa'i tshad/ /bsngags 'os brgyan pa'i ched du 'di'i//tshad bzhin snying la dngos po rnams/ /zhes pa'o/ /bde gshegs bstan pa bsam 'phel nor bu skye bo kun gyi rang gi mi shes mun pas bsgribs nas don med 'gyur/ /de rtogs don du shes rab sgron ma 'degs par byed pa'i dbang gyur shing rta chen po rnams kyang nub gyur te/ /'gro ba kun la shin tu don med lta bur mi 'jigs seng ge'i thugs rje'i spyan gyis rab gzigs nas//yon tan rang bzhin thub chen dgongs pa'i sgron ma 'di ni mi shes mun pa bsal phyir mdzad/ /de lta na yang 'phags pa'i skad kyis dben pa'i skye bo dag la don med lta bur kho bos rab rtogs nas/ /de dag kun gyis yid kyi mun pa shin tu stug po rnam par bsal phyir bdag gis legs par 'di bsgyur nas//byung ba'i bsod nams chu 'dzin 'od zer lta bur shin tu gsal zhing dga' ba skyed pa gang yin des/ /'di ru skye bo kun gyi yid kyi mun pa shin tu stug po rnam par bsal nas zab mo'i lam rtogs shog///mkhas pa rnams kyi gtsug gi nor bu bde bar gshegs pa'i bka' rab 'byams la shes pa'i snang ba skyes pa'i mkhas pa chen po de nyid las mnyan nas/ de nyid kyi zhal sngar shAkya'i dge slong dpang zho gsal ba grags zhes bya bas/yul dbus kyi grong khyer chen po mkhas pa'i 'byung gnas dpal nA len+d+rar bsgyur cing zhus te gtan la phab pa'o// //dus phyis lung dang rigs pa'i dbang phyug stag sde pa chen po seng ge rgyal mtshan gyi bka' drin dang / de nyid kyi sras kyi thu bo bsam gyis mi khyab pa'i blo gros kyi stobs kyis mtha' yas pa'i shes bya'i chos la dbang bsgyur ba shong ston lo tsA ba rdo rje rgyal mtshan gyis legs par bshad pa'i srol la sogs pa la brten nas/phyi dang nang gi gzhung lugs du ma rnams la blo'i snang ba cher rgyas pa/ zhu chen gyi lo tsA ba dpang dge slong dpal ldan blo gros brtan pas/dge ba'i bshes gnyen dog shing dbon po dang / bde ba chos kyi bzang po la sogs pas/ mthun rkyen bsgrubs pa la brten nas/ legs par bcos nas dag par bsgyur cing zhus te gtan la phab pa'o// // slar yang dpal ldan blo gros brtan pa de nyid kyis gzhung 'di'i skabs dang gzhung lugs gzhan gyi skabs mthun pa ji snyed rnyed pa rnams sbyar zhing rgya dpe dang gtugs te legs par brtags shing dpyad nas zhus chen bgyis la/ don la yang legs par dpyad pas shin tu dag par bgyis pa'o//sgra don snang ba nyin byed 'od/ /brtson pas yang yang brten pa yis/ /gzhung mchog zab yangs 'dab brgya'i tshal/ /dgongs don ge sar rab gsal gyur/ /'gro ba mang po la phan gyur cig/ //