67a1 @##/ /rgya gar skad du/ rat+na mA li nA ma/ bod skad du/ rin po che'i phreng ba zhes bya ba/ 'phags pa 'jam dpal la phyag 'tshal lo/ /khyab bdag ye shes sems dpa' la/ /btud de grub mtha' rim bzhin bshad/ /rgyang pan dpyod pa grangs
67a2 can dang //bye brag gcer bu sangs rgyas pa/ /bstan bcos de drug yin zhes grags/ /rim bzhin gong ma gong ma yis/ /'og ma 'og ma sun yang 'byin/ /de nyid sa chu me rlung bzhi/ /shi nas rten lus zhig pa na/ /mar me shi ba 'od med bzhin/ /sems kyang gzhan du skye
67a3 med 'dod//skye ba snga phyi med pas na/ /sgrib spangs tshogs bsags med 'phags pa'i/ /skye ba du mas bsgrubs pa yi/ /sangs rgyas med cing des gsungs pa'i/ /chos kyang med cing de sgrub pa'i/ /dge 'dun med ces rgyang pan zer/ /rgyu med gzhan la mi ltos phyir/ /rtag tu yod dam med
67a4 par thal//dngos po rnams ni res 'ga' zhig /'byung ba ltos dang bcas phyir ro/ /rgyu med 'bras bu mi 'byung phyir/ /skye ba thog ma med par grub/ /rim dang cig car mi srid phyir/ /rtag la skye ba med phyir dang / /mi mthun nyer len rgyus bskyed na/ /ko tra pa
67a5 las 'bras skyer thal//de phyir 'byung chen la sogs las/ /sems can skye bar mi brjod do/ /nus pa thogs med rgyu las ni/ /ma 'ongs pa yi 'bras bu 'grub/ /rgyu tshogs pa las 'bras skye bar/ /'byung rung ma 'ongs sgrub byed pa'o/ /gang dang gang de goms
67a6 pa las//bsgoms pa'i stobs de rdzogs tsam na/ /de gsal mi rtog blo 'bras bu/ /'dod dang mya ngan mi stsogs bzhin/ /yang dag don ni rab goms las/ /'byung rung rang bzhin gtan tshigs so/ /bden bzhi gsung ba sangs rgyas te/ /gzhan la de nus
67a7 med phyir ro//tshangs stsogs she na de sangs rgyas/ /kho bo ming la ga la rtsod/ /de phyir dkon mchog gsum po grub/ /bdag med bden bzhi gtso don la/ /mi bslu'i phyir na sa sogs grub/ /rig byed sogs la phyogs 'gar ni/ /mthong bas sgrub par 'dod ce
67b1 na//gtso bo bdag dang rtag sogs la/ /slu phyir gzhan la de bzhin no/ /dpyod pa pa ni 'dod chags stsogs/ /sems kyi rang bzhin chos yin pas/ /me la tsha ba ji bzhin du/ /goms kyang spang du mi rung zer/ /de phyir sangs rgyas stsogs kyang med/ /skye ba snga
67b2 phyi'i rgyu 'bras dang //dge sdig chos dang chos min rnams/ /rig byed tshad ma grub pas yod/ /'di yang tha snyad phal cher ni/ /bye brag pa dang mthun pa yin/ /rang bzhin yin na rgyu med phyir/ /rtag tu yod dam med par thal/ /chags stsogs res 'ga' dmigs pa'i
67b3 phyir//rang bzhin ma yin mi rtag phyir/ /sems ni rang bzhin 'od gsal te/ /dad la stsogs dang chags la stsogs/ /nyon mongs dge chos glo bur ba/ /chu khams gser dang nam mkha' bzhin/ /dag pa bzhin du dag par 'dod/ /gser g.ya' sbyangs bzhin rnam
67b4 byang srid//grangs can de nyid nyi shu lnga/ /rang bzhin blo dang nga rgyal gsum/ /snga ma las ni phyi ma bzhin/ /blo dbang lnga dang las dbang lnga/ /de tsam lnga yi yon tan ni/ /bcu drug de dag nga rgyal las/ /de tsam las byung 'byung chen ni/ /skyes bu dang ni nyi shu lnga/ /
67b5 skyes bu gcig po za por 'dod/ /nyi shu bzhi pa yon tan gsum/ /mnyam dang mi mnyam ngo bo yis/ /rang bzhin skyes bur ma phye 'khor/ /phye na thar pa yin par 'dod/ /kun ni kun gyi rang bzhin dang / /rgyu dang 'bras bu gcig par 'dod/ /kun kyang kun gyi rang bzhin
67b6 na//zho 'thung zhes ni brjod pa las/ /ci phyir rnga mo la mi rgyug /rgyu dang 'bras bu gcig 'dod na/ /rtswa mchog kyang ni glang stsogs su/ /thal bar 'gyur ro gnas skabs na/ /gnas skabs dang ni rang bzhin dag /gcig na snga ma'i skyon du thal/ /tha dad rgyu 'bras
67b7 gcig pa nyams//skyes bu rtag pa za bo na/ /gcig za thams cad za bar 'gal/ /bde ba za ba sdug bsngal min/ /de phyir rtag na za ba 'gal/ /dbang po stsogs kyang gcig nyid dang / /du ma bral te g.yo mi g.yo/ /bsgribs dang ma bsgribs gcig
68a1 par 'gal//gcig ma grub na du ma med/ /bye brag pa ni tshig don drug /rdzas dang yon tan las dang spyi/ /khyad par 'du ba drug yin no/ /rdzas ni rnam pa dgur 'dod de/ /sa chu me rlung rnam bzhi ni/ /rtag dang mi rtag gnyis su dbye/ /
68a2 rdul phran rnams ni rtag pa ste/ /gnyis 'dus la sogs yan lag can/ /mi rtag gzhan yang nam mkha' dang / /phyogs dang dus dang yid dang bdag /lnga po gcig tu rtag par 'dod/ /bdag dang yid ni phrad pa las/ /yon tan dbang po phrad pas na/ /de
68a3 dang don phrad la sogs la//grang dang tshad dang tha dad dang / /'du dang 'brel dang snga phyi dang / /blo dang sdang dang 'dod pa dang / /'bad dang bde dang sdug bsngal dang / /gzugs sgra dri ro reg bya dang / /chos dang chos min shes pa dang / /'du byed yon tan nyi shu bzhi/ /
68a4 brkyang dang bskum dang 'degs dang 'jog /'gro dang lnga po las yin no/ /spyi rnam gnyis te chen po dang / /chung ngu yod nyid spyi chen yin/ /'ba' zhig spyod yul zhes bya dang / /rjes su 'gro stsogs spyi chung yin/ /khyad par du yang brjod pa dang / /rtag
68a5 pa'i rdzas la 'jug pa yis//tha dad 'di ni khyad par yin/ /yul ni khyad par ma yin la/ /snal ma 'di las snam bu stsogs/ /rten dang brten pa'i blo skye ba/ /'du ba'i 'brel pa zhes bya'o/ /'dod spangs dbang phyug rgyur smra ste/ /de yi dbang gis rab brtags te/ /
68a6 byed po za ba 'dzin par 'dod/ /bdag gi longs spyod la sogs pa/ /sdug bsngal goms pas chags bral nas/ /'gro ba nyid na thar par 'gyur/ /rigs pa can yang de smra ste/ /rdzas ni yan lag can 'dod la/ /gcig na g.yo dang mi g.yo dang / /bsgribs dang
68a7 ma bsgribs med par thal//tha dad na ni rdzas gcig med/ /rdzas med na ni yon tan stsogs/ /de la brten phyir spangs pa'o/ /'gro ba'i byed po dbang phyug min/ /rtag la rim dang cig car gyis/ /don byed nus pa rung ma yin/ /rtag na rtag tu bde ba dang / /
68b1 yang na sdug bsngal nyid du thal/ /rtag la khyad par med pa'i phyir/ /yod na de ni mi rtag 'gyur/ /gcer bu pa ni de nyid bdun/ /dka' thub sdom dang nyon mongs dang / /bcings pa dang ni grol ba dang / /srog dang srog min gnyis te bdun/ /snga ma'i dka' thub
68b2 gdungs pas zad//sdom pas las gzhan ma byas pas/ /skye dgu las kun zad pas na/ /bcings pa grol ba thar par 'dod/ /'di ni shing la sems yod dang / /kun dang kun gyi rang bzhin 'dod/ /dka' thub gdungs pas las 'dzad na/ /dmyal
68b3 stsogs grol ba nyid du 'gyur//las dang gdung ba 'gal med phyir/ /mi 'gal na yang bsal bya dang / /sel byed nyid du mi 'grub po/ /sdom stsogs las kyi rgyu yin na/ /des 'dzad pa ru ji ltar 'gal/ /rtag phyir bcings dang grol ba med/ /yod na
68b4 mi rtag pa ru grub//sangs rgyas pa ni rnam bdun te/ /bye brag smra dang mdo sde pa/ /rang rgyal rnam bcas rnam med dang / /sgyu ma rab tu mi gnas pa/ /gzhi lnga dus gsum 'dus ma byas/ /rdzas yod rnam med dus mnyam 'dzin/ /gzugs ni dbang po lnga dang
68b5 don//rnam rig byed min rgyu gzugs bzhi/ /yul la rnam shes rnam rig drug /rnam med gcer mthong sems kyi gzhi/ /tshor ba la sogs lnga bcu gcig /don gyi khyad par rang stobs kyis/ /re re gcod la gzhan stobs chung / /sems dang lnga
68b6 mtshungs sems kyi gzhi//gzugs med bems po 'dus byas rnams/ /bcu bzhi'am bdun brgya mi ldan gzhi/ /'gog gnyis nam mkha' 'dus ma byas/ /bya ba byas pa 'das pa'i rdzas/ /ma byas ma 'ongs byed da ltar/ /skye gnas mi rtag bral ba yi/ /
68b7 rtag pa'i rdzas gsum 'dus ma byas/ /sdug bsngal gsum zhes de yi rgyu/ /kun 'byung las dang nyon mongs spong / /las ni sems pa bsams pa'o/ /dge dang mi dge mi g.yo gsum/ /sdom dang sdom min bar ma gsum/ /srid pa'i rtsa ba phra rgyas drug /
69a1 lta ba lnga ru phye na bcu/ /de yang bdag med goms pa las/ /sdug bsngal rgyu spangs zhi ba 'gog /bden bzhi rnam pa bcu drug tu/ /goms pas ma chags rigs stobs kyis/ /nyan thos myur ba srid pa gsum/ /bse ru bskal pa
69a2 brgya yis thob//skyob pa grangs med gsum thob 'dod/ /ston pa mya ngan ma 'das na/ /dge can sdig can kun gyis mthong / /'das pa'i bya zhig ma 'ongs pa'i/ /bya ba ma byas da ltar gyi/ /bya ba rgyun chad myang 'das 'dod/ /chu chad nya bzhin bye brag
69a3 lugs//bstan med thogs med rnam rig min/ /de phyir mngon sum gyis mi grub/ /phyogs 'gar ma grub 'brel mi 'grub/ /de phyir rjes su dpag pas min/ /sgrub byed med la gnod mthong phyir/ /de phyir rnam rig min gzugs med/ /sdom
69a4 stsogs 'du byed sems pa yin//gzugs dang sems dang sems byung gis/ /gnas skabs la gdags min ldan med/ /de las gzhan nam de nyid yin/ /de las gzhan na mngon sum stsogs/ /sgrub byed med pa gong bzhin no/ /ma grub pa
69a5 las yod ces pa'i//tha snyad mkhas la rung ma yin/ /de nyid yin na logs bshad cing / /'gog stsogs 'dus ma byas rnams ni/ /rgyu med phyir na rta ru bzhin/ /rkyen dang mi ldan dngos po ni/ /'ga' yang gang na rung ma yin/ /rkyen med phyir na
69a6 sangs rgyas kyi//spyan gyis kyang ni gzigs mi rung / /don mi byed na de brtags ci/ /ma ning gzugs bzang mi bzang zhes/ /'dod ldan rnams kyis brtags ci phan/ /kha dog las gzhan dbyibs grub med/ /bya ba las gnyis de nyid dam/ /gzhan
69a7 nyid du ni brtag ce na//de nyid yin na bya ba yang / /grub na 'grub pas bya ba med/ /rang ma grub pas byed pa med/ /gzhan na grub na bya ci dgos/ /ma byas na ni rtag par thal/ /de phyir mya ngan 'das pa yang / /rgyun mi 'chad par 'dod pa'o/ /mdo
69b1 sde pa yi grub mtha' ni//de nyid phung po lnga nyid tsam/ /'das dang ma 'ongs 'gag ma skyes/ /med de da lta rdzas su yod/ /rig byed ma yin gzugs mi 'dod/ /sdom stsogs 'du byed sems pa ni/ /grogs dang bcas pa yin par 'dod/ /mi ldan 'du byed
69b2 gzugs sems dang //sems byung gnas skabs gdags par 'dod/ /'dus ma byas bzhi med par 'dod/ /'gags ma thag pa'i rgyu yin pas/ /de ma thag pa'i 'bras bur 'dod/ /rdul phran 'dus sogs gzung yul gyi/ /rgyur 'dod 'dzin pa las sngar
69b3 'dir//rnam 'jog skyed byed yul du 'dod/ /bden bzhi gzung yul mi rtag stsogs/ /rnam pa bcu drug goms byas pas/ /nyon mongs bag chags bcas pa spong / /mkha' la sprin ni dengs pa'am/ /mtsho la 'khyag pa zhu ba bzhin/ /mar me shi
69b4 ba'i rnam pa ltar//de yi sems ni rnam par thar/ /mya ngan 'das pa thob par 'dod/ /mi rtag sdug bsngal stong bdag med/ /rgyu dang kun 'byung rab skye rkyen/ /lam dang rigs sgrub nges par 'byin/ /'gog zhi gya nom nges par 'byung / /'byung chen la
69b5 sogs gzugs phung rnams//drug gis cig car sbyar ba na/ /rdul phran phyogs cha drug tu thal/ /drug po la sogs go gcig na/ /gong bu rdul phran tsam du thal/ /shes pa cha med rang bzhin la/ /sa bon cha nas dbang po rnams/ /snang ba'i cha nas yul du
69b6 bshad//rig pa'i cha nas rnam shes bshad/ /rang rgyal rnams kyis grub mtha' ni/ /gzung bar rtog pa spangs phyir dang / /'dzin pa ma spangs phyir dang ni/ /gzhan gyis bstan pa ma yin par/ /bden bzhi rten 'brel rtogs nas sgom/ /'bras bu mdo sde pa
69b7 dang mthun//gzung ba med pa de 'dzin med/ /tshu rol med pa'i pha rol bzhin/ /rnam pa sgong gshags lta bur ni/ /smra ba'i sems tsam rnam bden ni/ /bye brag pa dang chos mthun te/ /gzung ba yi ni rnam pa dang / /'dzin pa'i rnam pa tha dad la/ /cer
70a1 mthong 'dod de sgro 'dogs yin//dus mnyam pa la phan 'dogs med/ /snga phyi ba la de 'dzin med/ /phan 'dogs med par 'dzin na ni/ /mig gis kyang ni sgra shes thal/ /don med sems kyi dngos nyid tsam/ /dkar dmar la sogs
70a2 snang na yang //don dam gnyis med sems tsam yin/ /de la gzung 'dzin tha dad la/ /glo bur 'khrul snang 'khor ba ste/ /rnam pa dkar dmar kun snang yang / /gzung 'dzin rtog dang bral ba'i tshe/ /gnyis med ye shes skye ba na/ /mi gnas mya ngan
70a3 'das thob 'dod//ras khra la sogs mthong ba'i tshe/ /dkar sogs tha dad mthong snyam pa/ /rtog bcas shes pas byas pa ste/ /rtog med lhan cig dmigs nges pas/ /tha dad med cing gcig par 'dod/ /kha cig dkar stsogs du mar 'dod/ /shing
70a4 sha pa yis shing bsgrub bzhin//du ma dmigs phyir gcig yod zer/ /bdag med gnyis po goms byas pas/ /de 'gal bdag 'dzin ma rig 'gag /des bskyed the tshom mthar 'dzin dang / /lta dang tshul khrims mchog 'dzin 'gag /des bskyed
70a5 chags dang nga rgyal khro//'gag 'gyur snying rje goms pa las/ /thugs kyang gsal mthar thug par 'gyur/ /bdag lta'i sa bon spangs pa'i phyir/ /slar mi ldog pa nyid phyir ram/ /sdug bsngal bsten mi byed pa'i phyir/ /mdzes par gshegs
70a6 pa nyid phyir ram//shes bya'i yul la mi shes pa/ /spangs phyir rdzogs pa nyid du 'dod/ /dkar snang cha nas dmar snang min/ /yin na dkar po dmar por thal/ /shar snang cha nas nub snang min/ /yin na shar snang nub snang thal/ /gcig ma grub pas du ma
70a7 med//rnam med dkar dmar la sogs kyang / /gcig dang du ma'i rigs gnod phyir/ /brdzun te shes pa gnyis med pa/ /rnam pa kun dang bral ba ste/ /dmigs med bsgoms pa las byung ba/ /gnyis med ye shes spyod yul lo/ /gnyis kyi bdag nyid
70b1 thams cad med//gnyis su 'khrul pa'i bdag nyid yod/ /de ni stong pa'i bdag nyid do/ /kun brtags gzhan dbang yongs grub rnams/ /brtags dang rgyus bskyed mi 'gyur ba'o/ /phung po khams stsogs chos rnams ni/ /gnyis med gcig dang du bral phyir/ /
70b2 myong phyir sems pa'ang de rang bzhin/ /ma yin myong ba med phyir ro/ /rtag tu yod dam med thal phyir/ /rgyu med ma yin rim dang ni/ /cig car gnod phyir rtag pa min/ /de phyir shes pa'i bdag nyid yod/ /sngon po la sogs de blo las/ /tha dad ma yin gcig
70b3 tu 'bod//rtogs pa'i bdag nyid mngon sum ste/ /sngo stsogs bdag nyid der 'khrul yin/ /mngon sum don du zhen 'khrul yin/ /mngon sum phyi yul med phyir dang / /sgro btags min phyir rang rig pa/ /rtog pa'i ngo bor gnod med pa/ /sngo stsogs de
70b4 las bzlog pa yin//shes pa thams cad med ce na/ /mngon sum rjes su dpag pa med/ /las 'bras dkon mchog med thal phyir/ /shes pa'ang skad cig med thal phyir/ /shes pa'ang skad cig ma yin phyir/ /skad cig cha shas gsum du thal/ /skye kha
70b5 gnas kha 'gag kha gsum//med na'ang bskal pa skad cig thal/ /mi 'dod ce na rdul phran yang / /mtshungs par 'gyur ro bzlog par dka'/ /rtag la rim dang cig car 'gal/ /rgyu med pa la res 'ga' 'gal/ /rnam pa med phyir sgrub byed med/ /rnam
70b6 pa med pa'i shes pa ni//'ga' yang gang na med phyir ro/ /mngon sum med na rjes dpag med/ /de phyir tshad ma khyod la med/ /gcig dang gzhan las nges bral ba'i/ /shes de brdzun pa'i bdag nyid can/ /ji ltar gnyid kyis log pa yis/ /glang chen
70b7 myos pa mthong ba bzhin//lus dang ljon shing mtsho la sogs/ /sad pa rnams kyis mthong ba 'di/ /gcig dang du ma bral ba yi/ /shes pa de nyid yongs su gsal/ /gang phyir 'di ni ma rig pas/ /lus sogs ngo bo gzhi grub phyir/ /sna tshogs lhan cig rig pa'i
71a1 phyir//mthun phyogs yod phyir 'gal ba med/ /rmi lam brdzun pa mthong ba bzhin/ /thams cad 'dus pas khyab grub phyir/ /ma nges pa yang ma yin no/ /phung po khams stsogs ji snyed kyi/ /mi rtag bdag med ji snyed pa/ /phyi rol don la dpyad par bya/ /
71a2 phyi rol don la dpyad nas ni/ /sems tsam la ni gnas par bya/ /sems tsam la ni gnas nas kyang / /snang ba med la gnas par bya/ /snang med gnas pa'i rnal 'byor pa/ /de yis theg pa chen po mthong / /'jug pa lhun gyis grub cing zhi/ /smon lam dag gis rnam
71a3 par sbyangs//ye shes dam pa bdag med pa/ /byang chub sems dpa' rab tu 'jug /las dang nyon mongs sdug bsngal rnams/ /'khor ba dag gi mtshan nyid de/ /las 'di dmigs dang bcas las skyes/ /dmigs pa med las ma yin no/ /bdag med gzugs
71a4 med dmigs med las//slob ma bse ru rgyal ba thob/ /brtags pa'i yang dag bkag pa yis/ /shugs la rang rig sgyu ma'i lus/ /rigs dpyad yod med mtha' las grol/ /ma brtags nyams dga' bems rig gnyis/ /dngos por khas len yod na ni/ /'dod
71a5 chags zhe sdang mi bzad skye//rang gi lha la nga rgyal chags/ /gzhan la zhe sdang phrag dog skyes/ /lta ba ma rungs yongs su 'dzin/ /de las byung ba'i rtsod par 'gyur/ /snang srid sgyu ma lta bu la/ /ye shes sangs rgyas sgyu ma la/ /sgyu ma rigs pas grub na ni/ /
71a6 sgyu ma ma yin yang dag thal/ /mi 'gyur sgyu mar grub ce na/ /rigs grub don ni yang dag min/ /sgyu ma'i ming gis ci byar yod/ /de yang dngos 'dzin gdon las ni/ /ma 'das pa ru mkhas rnams 'dod/ /bden pa med pas brdzun pa med/ /su la dngos 'dzin
71a7 yod pa ni//rang gi lha la nga rgyal chags/ /gzhan la zhe sdang khong khro skye/ /de las byung ba'i rtsod par 'gyur/ /ngo bo rab tu mi gnas ni/ /yod min med min gnyi ga min/ /gnyis med ma yin dbu ma min/ /stong pa ma yin mi stong min/ /rgyu med ma yin yang dag
71b1 min//bden pa ma yin brdzun pa min/ /'khor min mya ngan 'das pa min/ /dag pa ma yin ma dag min/ /blang med dor med de kho na/ /ci'i phyir zhe na phan tshun ni/ /ltos pa'i nyes par thal phyir ro/ /gcig med pas na gzhan mi 'grub/ /tshu rol med pa'i pha rol
71b2 bzhin//gang la bdag phyogs yod min na/ /de la gzhan phyogs ga la srid/ /rtsod med che ba'i bdag nyid de/ /'khor ba dang ni mya ngan 'das/ /tha dad yod pa ma yin te/ /'khor ba yongs su shes pa ni/ /de nyid mya ngan 'das shes bya/ /'khor ba spangs nas
71b3 gzhan du ni//mya ngan 'das pa cung zad med/ /'di la bsal ba cung zad med/ /bsnan par bya ba cung zad med/ /yang dag nyid la yang dag lta/ /yang dag mthong nas rnam par grol/ /stong pa nyid kyi me yis ni/ /'gro ba'i bud shing bsregs tsam na/ /de bzhin
71b4 nyid kyi me yang 'gag /dper na shing gnyis drud pa las/ /me 'byung de nyid bsregs pa bzhin/ /ye shes me yis rnam rtog gi/ /bud shing bsregs nas de nyid zhi/ /mya ngan 'das pa dngos po min/ /dngos med ma yin gnyi ga min/ /gnyis med la ni de mi gnas/ /
71b5 bsam med thogs med spros med lus/ /sems can don byed med ce na/ /bsod nams tshogs dang snying rje dang / /sngon gyi smon lam shugs kyis ni/ /rgya mtsho chu 'dra rgyal ba rnams/ /bya'o byed do mi mnga' yang / /sems can don la ro gcig 'gyur/ /dper na shing
71b6 mkhan mkhas pa yis//bzo byas bya ba byed pa bzhin/ /yid bzhin nor bu dpag bsam shing / /bum pa bzang bzhin sku gsum gyis/ /sems can don byed rtag tu 'byung / /dper na mchod sdong bsgrubs pas ni/ /de 'das yun ring lon gyur kyang / /nad la stsogs
71b7 pa zhi ba ltar//zag med dbyings nas sangs rgyas rnams/ /gcig min du ma ma yin te/ /mkha' ltar lus ni med pa'i phyir/ /du ma yang ni ma yin no/ /sngon gyi lus rjes 'brangs pa'i phyir/ /gcig pa yang ni ma yin no/ /phrin las rnams ni mdzad pa na/ /mkha'
72a1 la nyi ma stong shar ba'i//'od zer gcig tu 'dres pa ltar/ /sems can don la ro gcig 'gyur/ /de yis 'gro kun rtogs pa dang / /shes rab zab mo skyes nas ni/ /de don bsgoms pas bla med ni/ /byang chub chen po thob par shog /dbu ma rin
72a2 po che'i phreng ba zhes bya ba/paN+Di ta chen po tsan+d+ra ra hi las mdzad pa rdzogs so// //paN+Di ta de nyid dang lo tsA ba cog ro ting 'dzin bzang pos bsgyur cing zhus te gtan la phab pa'o// //