CLOSE WINDOW

D3897
བོད་ཡིག

@##/ /rgya gar skad du/ saM skr-i ta a saM skr-i ta bi ni Sh+tsa ya nA ma/ bod skad du/ 'dus byas dang 'dus ma byas rnam par nges pa zhes bya ba/ sangs rgyas la phyag 'tshal lo/ /chos rnams spros dang bcas pa ni/ /dpal ldan rang nyid kun mkhyen nas/ /de ltar sems can la gsung gang //thams cad rig pa de la 'dud/ /chos ni 'dus byas 'dus ma byas/ /mdor bsdus nas ni thub pas gsungs/ /de dag rnam par nges pa ni/ /bdag nyid 'ba' zhig dran phyir bshad/ /chos mdor bsdus na rnam pa gnyis nyid de/ 'di lta ste/ 'dus byas dang 'dus ma byas so/ / de la 'dus byas ni mi rtag pa nyid do/ /'dus ma byas ni rtag pa nyid do/ /yang 'dus byas ni kun rdzob kyi bden pa'o/ /'dus ma byas ni don dam pa'i bden pa'o/ /yang 'dus byas ni rten cing 'brel bar 'byung ba'o/ /'dus ma byas ni rten cing 'brel bar 'byung ba ma yin pa'o/ /yang 'dus byas ni bla na yod pa'o//'dus ma byas ni bla na med pa'o/ /yang 'dus byas ni 'jig rten dang 'jig rten las 'das pa'o/ /'dus ma byas ni 'jig rten las 'das pa kho na'o/ /yang 'dus byas ni gzugs can dang gzugs can ma yin pa'o/ /'dus ma byas ni gzugs can ma yin pa kho na'o/ /yang 'dus byas ni zag pa dang bcas pa dang zag pa med pa'o//'dus ma byas ni zag pa med pa kho na'o/ /yang 'dus byas ni nyon mongs pa can dang nyon mongs pa can ma yin pa'o/ /'dus ma byas ni nyon mongs pa can ma yin pa kho na'o/ /yang 'dus byas ni kun nas nyon mongs pa dang rnam par byang ba pa'o/ / 'dus ma byas ni rnam par byang ba pa kho na'o/ /yang 'dus byas ni spang bya dang blang bya'o/ /'dus ma byas ni blang bya kho na'o/ /yang 'dus byas ni brten par bya ba dang brten par bya ba ma yin pa'o/ /'dus ma byas ni brten par bya ba ma yin pa kho na'o/ /yang 'dus byas ni dge ba dang mi dge ba dang lung du ma bstan pa'o//'dus ma byas ni dge ba dang lung du ma bstan pa kho na'o/ /de la dge ba ni gcig ste/ 'di ltar so sor brtag pa'i 'gog pa'o/ /lung du ma bstan pa ni rnam pa gnyis te/ 'di ltar nam mkha' dang so sor brtag pa ma yin pa'o/ /yang 'dus byas ni 'dod pa'i khams kyi rnam grangs su gtogs pa dang gzugs kyi khams kyi rnam grangs su gtogs pa dang gzugs med pa'i khams kyi rnam grangs su gtogs pa'o//'dus ma byas ni zag pa med pa'i khams kyi rnam grangs su gtogs pa kho na'o/ /yang 'dus byas ni sdug bsngal gyi bden pa dang kun 'byung gi bden pa dang lam gyi bden pa'o//'dus ma byas ni 'gog pa'i bden pa kho na'o/ /yang 'dus byas ni sdug bsngal gyis thob pa dang kun 'byung gis thob pa dang 'gog pas thob pa dang lam gyis thob pa dang bsgom pas spang bar bya'o/ /'dus ma byas ni spang bya ma yin pa kho na'o/ /yang 'dus byas ni/ gzugs kyi phung pos kun tu bsdus pa dang /tshor ba'i phung pos kun du bsdus pa dang / 'du shes kyi phung pos kun du bsdus pa dang / 'du byed kyi phung pos kun du bsdus pa dang / rnam par shes pa'i phung pos kun du bsdus pa'o/ /'dus ma byas ni phung pos bsdus pa ma yin pa kho na'o/ /yang 'dus byas ni/mig gi skye mched kyis kun du bsdus pa dang / rna ba'i skye mched kyis kun du bsdus pa dang / sna'i skye mched kyis kun du bsdus pa dang / lce'i skye mched kyis kun du bsdus pa dang / lus kyi skye mched kyis kun du bsdus pa dang / yid kyi skye mched kyis kun du bsdus pa dang / gzugs kyi skye mched kyis kun du bsdus pa dang /sgra'i skye mched kyis kun du bsdus pa dang / dri'i skye mched kyis kun du bsdus pa dang / ro'i skye mched kyis kun du bsdus pa dang / reg pa'i skye mched kyis kun du bsdus pa dang / chos kyi skye mched kyis kun du bsdus pa'o/ /'dus ma byas ni chos kyi skye mched kyis kun du bsdus pa kho na'o//yang 'dus byas ni/ mig gi khams kyis kun du bsdus pa nas/ yid kyi khams kyi bar du kun du bsdus pa dang / mig gi rnam par shes pa'i khams kyis bsdus pa nas/ yid kyi rnam par shes pa'i khams kyi bar du kun du bsdus pa dang / gzugs kyi khams kyis bsdus pa nas/chos kyi khams kyi bar gyis bsdus pa'o/ /'dus ma byas ni chos kyi khams kyis kun du bsdus pa kho na'o/ /de la gzhung du 'chad par 'gyur ba gang 'gog pa'i bden pas kun du bsdus pa'i chos rnams dang nam mkha' ni 'dus ma byas kyi chos so/ /chos gzhan thams cad ni 'dus byas so//de skad du yang / nam mkha' dang ni 'gog pa gnyis/ /'di gsum rtag cing 'dus ma byas/ /'dus byas thams cad skad cig ma/ /bdag gis stong zhing byed po med/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las 'dus byas dang 'dus ma byas rnam par dbye ba nges pa zhes bya ba le'u dang po'o// //de la 'di gsum ni 'dus byas kyi mtshan nyid 'dus byas te/ skye ba dang / gnas pa dang / mi rtag pa'o/ /'di rnams su rgas pa bsdus pas bzhi ni 'dus byas kyi mtshan nyid ces kha cig go//'dus byas ni 'di bskyed par bya ba'i phyir rgyu ni drug ste/ byed pa'i rgyu dang / lhan cig 'byung ba'i rgyu dang / skal ba mnyam pa'i rgyu dang / mtshungs par ldan pa'i rgyu dang / thams cad du 'gro ba'i rgyu dang / rnam par smin pa'i rgyu'o/ /rgyu de rnams kyis khyad par ma yin pa'i 'bras bu ni gcig ste/'di lta ste/ 'dus byas thams cad do/ /khyad par ni 'bras bu bzhi ste/ 'di lta ste/ rnam par smin pa'i 'bras bu ni rnam par smin pa'i rgyu'i'o/ /byed pa'i rgyu'i ni bdag po'i 'bras bu'o/ /skal ba mnyam pa dang thams cad du 'gro ba'i rgyu dag gi ni rgyu mthun gyi 'bras bu'o/ / lhan cig 'byung ba dang mtshungs par ldan pa'i rgyu dag gi ni skyes bu byed pa'i 'bras bu'o/ /rkyen bzhi'o/ /'di lta ste/ rgyu'i rkyen dang / de ma thag pa'i rkyen dang / dmigs pa'i rkyen dang / bdag po'i rkyen rnams so/ /de la chos 'dus byas kyi bdag nyid rang gi ngo bo las gzhan chos thams cad ni byed pa'i rgyu ste/skye ba rnams la gegs med pa'i ngo bos rnam par gnas pas so/ /gang chos phan tshun 'bras bur gyur pa de ni phan tshun lhan cig tu 'byung ba'i rgyu ste/ 'di lta ste/ 'byung ba chen po bzhi'o/ /sngon goms par byas pa 'dra ba'i chos phyi ma 'dra ba rgyas pa'i rgyu mtshan nyid yin par skal ba mnyam pa'i rgyu'o//'di lta ste/ dge ba'i phung po lnga las dge ba dang / nyon mongs pa can las nyon mongs pa can dang / lung du ma bstan pa las lung du ma bstan pa'o/ /gang chos ngo bo lhan cig tu dmigs pa kun du grub pa ste/ yang gang rung ma tshangs pas ni ma yin pa de ni mtshungs par ldan pa'i rgyu ste/'di lta ste/ sems dang sems las byung ba'o/ /rang gis la sngon nye bar skyes pa nyid kun du 'gro ba'i chos rnams ni nyon mongs pa can phyi ma rnams kyi kun du 'gro ba'i rgyu ste/ nyon mongs pa can gyi chos spyi'i rgyu nyid yin pas 'di ni skal ba mnyam pa'i rgyu las tha dad du rnam par gzhag go//'dod chags la sogs pa gang 'ga' zhig gi nyon mongs pa goms pas zhe sdang la sogs pa thams cad kyi rgyun rgyas par byed pa'o/ /bdag nyid dngos po yongs su bzung ba'i phyir mi dge ba dang dge ba zag bcas kyi chos gang de ni rnam par smin pa'i rgyu'o//lung du ma bstan pa yang ma yin te/ sa bon rul ba bzhin du stobs zhan pa'o/ /zag pa med pa yang ma yin te/ sred pas mngon par brlan pa nyid yin pas mngon par brlan pa med pa'i snying po sa bon bzhin du bdag gi ngo bo mngon par 'grub pa'i nus pa med pa'o/ / de la lung du ma bstan pa dang zag pa dang bcas pa'i dge ba dang mi dge bas mngon par grub pa sems can du bstan pa'i chos ni rnam par smin pa'i 'bras bu'o/ /sngon skyes pa las gzhan 'dus byas pa'i chos ni 'dus byas thams cad kyi bdag po'i 'bras bu'o/ /chos gang rang gi rgyu dang 'dra ba de ni rgyu mthun pa'i 'bras bu'o//stobs gang gis gang nye bar skye ba de ni skyes bu byed pa'i 'bras bu ste/ 'di ltar sa 'og ma'i sbyor ba'i sems ni sa gong ma'i ting nge 'dzin dang / zag pa dang bcas pas zag pa med pa zhes bya ba la sogs pa'o/ /de la byed pa'i rgyu ma gtogs pa rgyu lnga ni rgyu'i rkyen no//dgra bcom pa'i tha ma'i sems dang sems las byung ba spangs te/ sems dang sems las byung ba nye bar skye ba thams cad ni de ma thag pa'i rkyen no/ /mig gi rnam shes la sogs pa'i gzugs la sogs pa dang / yid kyi rnam shes kyi chos thams cad ces pa la sogs pa ni dmigs pa'i rkyen no//gang byed pa'i rgyu de ni bdag po'i rkyen no/ /de la 'gog pa la mngon par phyogs te lhan cig 'byung ba dang mtshungs par ldan pa'i rgyu gnyis bya ba byed de/ lhan cig nye bar skye ba'i 'bras bu la de gnyis rtsom pa byed pas so/ /skal ba mnyam pa thams cad du 'gro ba rnam par smin pa'i rgyu rnams ni skye ba la mngon par phyogs te ma 'ongs pa la byed do//de ma thag pa'i rkyen ni skye bzhin pa la bya ba byed de go skabs ster bas so/ /dmigs pa'i rkyen ni 'gag bzhin pa la bya ba byed do/ /da ltar ba'i sems dang sems las byung ba 'dzin pas so//bdag po'i rkyen ni'ang gnas skabs thams cad du sgrib pa med pa'i ngo bos rnam par gnas pa'o/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las rgyu rnam par nges pa zhes bya ba le'u gnyis pa'o// //chos 'dus byas ni rnam pa gnyis te/'di lta ste/ snod kyi 'jig rten dang / sems can gyi 'jig rten no/ /de la snod kyi 'jig rten rnam pa mang du gyur pa yin yang / 'di lta ste/ nam mkha'i mthar thug pa rlung gi dkyil 'khor ro/ /de'i steng na chu'i dkyil 'khor ro/ /de'i steng na dbang chen gser gyi dkyil 'khor ro/ / de skad du yang / de la snod kyi 'jig rten gyi/ /gnas dbyibs bshad de 'og dag na/ /rlung gi dkyil 'khor rngams su ni/ /'bum phrag drug cu grangs med do/ /chu rngam 'bum phrag bcu gcig dang / /stong phrag dag ni nyi shu'o/ /phyis ni rngams su 'bum phrag brgyad/ /lhag ma dag ni gser du 'gyur/ /zhes so//de la lhag ma zhes bya ba ni dbang chen gser gyi dkyil 'khor rngams su dpag tshad stong phrag nyi shus lhag pa'i 'bum phrag gsum gyi tshad do/ /rgyar yangs pa'i tshad kyang / chu dang gser gyi dkyil 'khor la/ /thad kar 'bum phrag bcu gnyis dang / /stong phrag gsum dang brgya phrag ni/ / phyed dang lnga rnams kho na'o/ /khor yug tu ni sum 'gyur ro/ /zhes so/ /dbang chen gser gyi dkyil 'khor gyi steng dbus ni ri rab rin po che bzhi'i rang bzhin no/ /de la rin po che bzhi ni/ 'di lta ste/ gser dang / dngul dang / bai DUr+ya dang / shel lo/ /ri bo rgyud bdun ni gser ro/ / 'di lta ste/ gnya' shing 'dzin dang / gshol mda' 'dzin dang / seng ldeng can dang / blta na sdug dang / rta rna ri dang / rnam par 'dud dang / mu khyud 'dzin no/ /de las phyi rol khor yug ri ni lcags so dgu pa'o/ /gser gyi sa gzhi'i dkyil 'khor gyi steng na chu'i dkyil 'khor rngams su dpag tshad stong phrag brgyad cu dang ri rab la sogs pa ri dgu po rnams bying ba'o//de skad du yang / lhun po rin chen bzhi rang bzhin/ /chu ru stong phrag brgyad cu nub/ /chu las steng du ri bo yang / /stong phrag dag ni brgyad cu'o/ /brgyad po 'phang du phyed phyed dbri/ /de dag rngams su 'phang dang mnyam//zhes so/ /ri bo mchog la sogs pa nas mu khyud 'dzin gyi mthar thug par ri rnams kyi bar dang bar du bsil ba zhes pa rgya mtsho bdun te/ yan lag brgyad dang ldan pa'i chus gang ba'o/ /de la chu'i yan lag brgyad ni 'di lta ste/ bsil ba dang / myang bde ba dang / yang ba dang / 'jam pa dang / dngas pa dang / dri ngan pa med pa dang / 'thung ba na mgrin pa mi 'gag pa dang / 'thungs na yang lto ba la mi gnod pa'o/ /yang gsungs te/ de dag bar bdun rol mtsho yin/ /dang po stong phrag brgyad cu'o/ /de ni nang gi rgya mtsho yin/ /de yi ngos la sum 'gyur te//rol mtsho gzhan rnams phyed phyed do/ /zhes so/ /mu khyud 'dzin dang khor yug dag gi bar du ni ba tshwa can gyi rgya mtsho chen po'o/ /yang gsungs te/ lhag ma phyi yi mtsho chen la/ /'bum phrag gsum dang stong phrag ni/ /nyi shu gnyis so de la ni/ /zhes so/ /mu khyud 'dzin gyi phyi rol phyogs bzhir gling bzhi'o//'di lta ste/ lho ru 'dzam bu'i gling dang / nub tu ba lang spyod dang / byang du sgra mi snyan dang / shar du lus 'phags po'o/ /yang gsungs te/ de yang / 'dzam bu'i gling ni ngos gsum la/ /stong phrag gnyis te shing rta'i dbyibs/ /gcig la dpag tshad phyed dang bzhi//shar gyi lus 'phags zla gam 'dra/ /ngos gsum 'di dang 'dra gcig la/ /dpag tshad sum brgya lnga bcu'o/ /ba lang spyod ni zlum po la/ /stong phrag phyed dang brgyad yin no/ /dbus la stong phrag phyed dang gsum/ /sgra mi snyan brgyad gru bzhir mnyam/ /zhes so/ /bar bar du gling brgyad de/'di lta ste/ 'dzam bu'i gling gi logs gnyis su rnga yab dang / rnga yab gzhan no/ /ba lang spyod kyi ni/ g.yo ldan dang / lam mchog 'gro'o/ /sgra mi snyan gyi ni/ sgra mi snyan dang / sgra mi snyan gyi zla'o/ /shar gyi lus 'phags kyi ni/ lus dang / lus 'phags pa'o//'dir 'dzam bu'i gling la 'dzam bu'i gling gi byang du ri nag po gsum ste/ de las 'das pa na yang gsum mo/ /yang gsum ste dgu'o/ /de'i pha rol na ri kha ba can nyid do/ /de'i pha rol na chu dang zheng du dpag tshad lnga bcu yod pa mtsho ma dros pa zhes bya ba yan lag brgyad dang ldan pa'i chus gang ba'o//de las chu bo chen po bzhi 'bab pa nyid do/ /'di lta ste/ gang gA dang / sin d+hu dang / shI ta dang / pak+Shu'o/ /mtsho 'di'i 'gram byang phyogs na 'dzam bu'i shing yod de/ mtho ba dang rgyar dpag tshad lnga bcu'i tshad dang ldan pa'o/ /gzhi gang zhig gis 'dzam gling zhes grags pa//gang gi 'bras bu mngar dang ro mchog go/ /de'i pha rol na ri spos kyi ngad ldang ba'o/ /'dzam bu gling 'di'i dbus/ rdo rje'i gdan gser gyi rang bzhin gyi sa gzhi las mngon par grub pa/ mtho ru 'dzam bu'i gling gi mtha' dang / zheng du shing rta 'khor lo'i tshad dang ldan pa/gang du srid pa tha ma'i byang chub sems dpa' bzhugs nas rdo rje lta bu'i ting nge 'dzin skyed par byed pa gang yin pa'o/ /'dzam bu'i gling 'di nyid kyi 'og /dpag tshad stong phrag nyi shu na mnar med pa'i dmyal ba chen po yod de rngams dang zheng dag tu dpag tshad stong phrag nyi shu'i tshad dang ldan pa'o//de ltar 'di nas mnar med pa 'di'i 'og gi sa gzhi ni dpag tshad stong phrag bzhi bcur 'gyur ro/ /mnar med pa'i steng / gong nas gong du dmyal ba bdun rnam par gnas so/ /'di lta ste/ rab tu tsha ba dang / tsha ba dang / ngu 'bod chen po dang / ngu 'bod dang / bsdus 'joms dang / thig nag dang / yang sos so zhes mnar med pa'i phyogs bzhi ru phyi rol 'khor nas gnas so zhes gzhan dag go/ /mnar med la sogs pa de rnams ni dmyal ba chen po brgyad do/ /dmyal ba chen po brgyad po rnams so so la nye 'khor gyi dmyal ba bcu drug ste/ 'di lta ste/ku kU la dang / ku Na pa dang / spu gris gtams pa'i lam la sogs pa dang / chu bo rab med do/ /phyogs gcig la'ang nye ba'i dmyal ba bzhi ste/ 'di ltar phyogs gzhan gsum la so sor bzhi kho na nyid de bcu drug go/ /gzhan yang grang ba'i dmyal ba brgyad ni dmyal ba chen po rnams kyi thad du gnas pa nyid do//'di lta ste/ chu bur can dang / chu bur chen po dang / so thams thams dang / ha ha dang / hu hu dang / ut+pa la lta bu dang / pad+ma lta bu dang / pad+ma chen po lta bu'o/ /nyi tshe ba'i dmyal ba rnams ni gnas nges pa med de/ chu bo'i 'gram dang / rgya mtsho'i 'gram dang ri dang mya ngam thang dang yul ngan la sogs pa rnams su gnas pa'o/ /dud 'gro rnams kyi rtsa ba'i gnas ni rgya mtsho che/ skam dang chu dang nam mkha' la'ang / zhes so/ /yi dags rnams kyi rgyal po gshin rje'o/ /de yang 'di nas dpag tshad lnga brgya'i 'og gi cha la/ dpag tshad lnga brgyas mtshams yongs su bcad pa ni rgyal po'i gnas sa'o/ /de las gzhan du rnam par brten pa nyid do/ /lha ma yin ni ri rab la ste/ bang rim 'og ma las 'og gi nang chen po'i phug na kun du gnas so/ /'dod pa na spyod pa'i lha rnams kyi sa ni drug ste/ 'di lta ste/ rgyal po chen po bzhi'i ris kyi lha'i gnas dang /sum cu rtsa gsum pa'i lha'i gnas dang / 'thab bral gyi gzhal yas dang / dga' ldan gyi gzhal yas dang / 'phrul dga'i gnas dang / gzhan 'phrul dbang byed kyi gzhal yas so/ /de la rgyal chen bzhi'i gnas ni rnam pa gsum ste/ 'di lta ste/ri rab kyi bang rim bzhi dang / ri bo rgyud bdun dang / nyi ma dang zla ba dang skar ma'i gzhal yas rnams so/ /de la 'di nas steng du bar snang dpag tshad stong phrag bzhi bcu na/ rlung ni chu'i dkyil 'khor ltar/ ri rab la yongs su bskor te zla ba dang / nyi ma dang skar ma rnams kyi gzhal yas khang rnams rgyu bar byed do//de la zla ba dang nyi ma dag lhun po'i phyed nas te/ mu khyud 'dzin gyi ri'i rtse mo dang mnyam par rgyu bar byed do/ /tshad ni zla ba'i dkyil 'khor la dpag tshad lnga bcu'o/ /nyi ma'i dkyil 'khor la dpag tshad lnga bcu gcig go/ /de skad du yang / lhun po'i phyed na nyi zla ste/dpag tshad lnga bcu gcig dang bcas/ /zhes so/ /skar ma rnams kyi gzhal yas kyi tshad ni/ gang dag chung ba de ni rgyang grags tsam mo/ /nyi ma'i gzhal yas kyi 'og phyi rol ni me shel gyi rang bzhin zlum po ste 'od zer ni tsha ba dang rab tu gsal bar byed do/ /zla ba'i gzhal yas khang gi 'og kyang chu shel zlum po bsil ba dang gsal bar snang bar byed do//zla ba gcig gis gling bzhir bya ba byed do/ /nyi ma gcig gis kyang ngo / /'di lta ste/ gang gi tshe byang sgra mi snyan du mtshan phyed yin pa de'i tshe shar gyi lus 'phags su nyi ma nub pa'o//'dzam bu'i gling du nyi ma phyed do/ /ba glang spyod du shar ba'o/ /de bzhin du gling gzhan la ci rigs su sbyar ro/ /'dir nyi ma'i 'gro ba'i bye brag gis mtshan mo dang nyin mo dag 'phel ba dang 'grib pa'o/ /'di lta ste/ b+hA dra ba da'i nag po'i phyogs kyi dgu nas mtshan mo 'phel lo/ /pA la gu na'i nag po'i phyogs kyi dgu nas mtshan mo 'grib bo//gang gi tshe mtshan mo 'phel ba de'i tshe nyin mo 'grib bo/ /gang gi tshe nyin mo 'grib pa de'i tshe mtshan mo 'phel lo zhes so/ /dkar po'i phyogs kyi dang por zla ba'i dkyil 'khor nyams par mthong ba ci yin zhe na/ nyi ma'i 'od zer gyis zla ba'i dkyil 'khor gyi ngos gzhan la grib ma babs te dkyil 'khor ma rdzogs par mthong ba yin no lo//yang na rgyu ba'i 'tshogs pa gang las de de 'dra ba ste/ res 'ga' ni nyams pa dang phyed dang rdzogs par mthong ba yin no zhes sngon gyi slob dpon rnams gsungs so/ /nyi ma la sogs pa'i gzhal yas 'di rnams la ni/rgyal chen ris bzhi'i gzhal yas khang na gnas pa'i lha rnams gnas so/ /bang rim bzhi pa la rgyal po chen po bzhi gnas pa nyid do/ /'di lta ste/ shar du yul 'khor skyong dang / lho ru 'phags skyes po dang / nub tu mig mi bzang dang / byang du lus ngan po'o/ /yang gsungs te/ 'di la bang rim bzhi yod de/ /bar gyi thag ni stong phrag bcu/ /stong phrag dag ni bcu drug dang / /brgyad dang bzhi dang gnyis thad 'phags/ /de la lag na gzhong thogs dang / /phreng thogs dang ni rtag myos dang / /rgyal chen bzhi pa'i lha rnams gnas//ri bo bdun po rnams la yang / /des na de yi lhun po yi/ /phyed kyis 'og ma bsgribs pa'o/ /ri rab kyi steng sum cu rtsa gsum pa'i lha'i gnas chu dang zheng du stong phrag brgyad cu'o/ /ri mchog gi logs re re la dpag tshad stong phrag nyi shu ste kun du yongs su 'khor bar brgyad cu'o zhes gzhan dag go//de'i dbus na grong khyer blta na sdug ces bya ba brgya byin lha'i dbang po'i rgyal ba'i gnas so/ /yang gsungs te/ dbus na/ grong khyer blta na sdug ces pa/ 'og gzhi gser bzhin bkra zhing mnyen/ /logs la stong phrag phyed dang gsum//'phang du dpag tshad gcig dang phyed/ /ces so/ /grong khyer de'i dbus na rnam par rgyal ba zhes bya ba ni khang bzangs rin po che sna bdun gyi rang bzhin can yod do/ /yang gsungs te/ de na rnam par rgyal byed de/ /logs la nyis brgya lnga bcu'o/ /zhes so/ /grong khyer de'i phyogs bzhi ru skyed mos tshal bzhi rnams so//'di lta ste/ shing rta sna tshogs dang / rtsub 'gyur dang / 'dres pa'i nags dang / dga' ba'i tshal lo/ /skyed mos tshal bzhi po de rnams kyi bar du ni sa gzhi bzang po dpag tshad nyi shur lha rnams kyi rol mo'i gnas phan tshun 'gran pa ltar mdzes pa 'dzin pa'o//grong khyer de'i byang shar gyi mtshams na shing yongs 'dus brtol zhes pa yod do/ /de yang sum cu rtsa gsum pa'i lha rnams kyi 'dod pa'i dga' ba rab tu gyur pa'i rten no/ /de'i rtsa ba sboms su thang kar dpag tshad lnga dang 'phang du dpag tshad gcig go/ /yal ga dang lo ma dang 'dab ma rgyas par gnas pa la ni dpag tshad lnga bcu'o//de la yang me tog thams cad yongs su rgyas pa na dri ni rdzi phyogs su dpag tshad brgya ru ngad ldan zhing / rdzi phyogs ma yin par ni dpag tshad lnga bcu ngad ldang ngo / /shing 'di dag gi rtsa ba na shin tu ches 'jam pa pA Na ru kam pa la zhes pa'i brgya byin lha'i dbang po bzhugs pa'i phyir mngon par grub pa srid du dpag tshad drug cu'o//zheng du dpag tshad lnga bcu'i tshad tsam mo/ /rngams su tshad ni dpag tshad bco lnga'o/ /blta na sdug gi lho nub kyi mtshams na chos bzangs lha'i 'dun sa ste/ gang du bsdad nas sum cu rtsa gsum pa'i lha rnams bya ba dang /bya ba ma yin pa bka' 'gro bar mdzad pa'o/ /ri rab kyi steng gru bzhi la cog bzhi ste/ 'phang du dpag tshad stong phrag bcu'o/ /kha cig gru'i cog ni dpag tshad lnga brgya'i tshad dang ldan pa gdan lha phyag na rdo rje gnas pa gang yin pa'o zhes so/ /gzugs kyi khams la sa gzhi dang /kun 'khor bzhi'o/ /'di lta ste/ bsam gtan dang po'i sa dang / bsam gtan gnyis pa'i sa dang / bsam gtan gsum pa'i sa dang / bsam gtan bzhi pa'i sa'o/ /bsam gtan dang po'i kun 'khor dang / ming gzhan ni mi lcogs pa med pa'o//bsam gtan gnyis pa'i kun 'khor dang / ming gzhan ni bsam gtan khyad par can no/ /bsam gtan gsum pa'i kun 'khor dang / bsam gtan bzhi pa'i kun 'khor ro/ /de la bsam gtan dang po'i sa la gnas gsum mo/ /tshangs ris kyi gzhal yas khang dang /tshangs pa mdun na 'don gyi gzhal yas khang dang / tshangs pa chen po'i gzhal yas khang ngo / /bsam gtan gnyis pa'i sa la gnas gsum mo/ /'di lta ste/ 'od chung gi gzhal yas khang dang / tshad med 'od kyi gzhal yas khang dang / 'od gsal gyi gzhal yas khang ngo //bsam gtan gsum pa'i gnas la gsum ste/ 'di lta ste/ dge chung gi gzhal yas khang dang / tshad med dge'i gzhal yas khang dang / dge rgyas kyi gzhal yas khang ngo / /bsam gtan bzhi pa'i sa la gnas brgyad de/ 'di lta ste/ sprin med kyi gzhal yas khang dang /bsod nams 'phel gyi gzhal yas khang dang / 'bras bu che ba'i gzhal yas khang dang / mi che ba'i gzhal yas khang dang / mi gdung ba'i gzhal yas khang dang / gya nom snang ba'i gzhal yas khang dang / shin tu mthong gi gzhal yas khang dang / 'og min gyi gzhal yas khang ngo //'thab bral la sogs pa bzhi rnams kyi gzhal yas khang gi tshad ni lhun po'i steng dang mnyam mo zhes kha cig go/ /gong ma nyis 'gyur ro zhes gzhan dag go/ /bsam gtan dang po'i gzhal yas khang ni gling bzhi'i tshad tsam mo/ /bsam gtan gnyis pa'i gzhal yas khang ni stong chung ngu 'jig rten gyi khams kyi tshad do//bsam gtan gsum pa'i gzhal yas khang ni stong gnyis kyi 'jig rten gyi khams kyi tshad do/ /bsam gtan bzhi pa'i gzhal yas khang gi tshad ni stong gsum gyi stong chen po'i 'jig rten gyi khams so zhes gzhan dag go//bsam gtan dang po la sogs pa gzhal yas khang gsum gyi tshad ni stong chung ngu la sogs pa'i tshad do/ /bsam gtan bzhi pa'i gzhal yas khang ni dpag tu med pa'o zhes kha cig go/ /de la gnas 'og mar skyes pa'i lha rnams kyis gong ma'i gzhal yas khang mthong ba ni ma yin no//gnas gong mar skyes pa'i lha rnams kyis 'og ma'i gzhal yas khang mthong ba nyid do/ /rdzu 'phrul lam/ rdzu 'phrul dang ldan pa la brten nas gong du 'gro bar 'gyur ro/ /gong du skyes pa 'ongs nas mthong bar 'gyur zhing / khams gong ma ni ma yin no/ /sa gong ma pa zhes pa yang mthong ba ma yin no zhes so//gzugs med pa'i khams ni sa gzhi dang / kun 'khor bzhi'o/ /'di lta ste/ nam mkha' mtha' yas skye mched kyi sa dang / rnam shes mtha' yas skye mched kyi sa dang / ci yang med pa'i skye mched kyi sa dang / 'du shes med 'du shes med min skye mched kyi sa'o//nam mkha' mtha' yas skye mched kyi kun 'khor dang / rnam shes mtha' yas skye mched kyi kun 'khor dang / ci yang med pa'i skye mched kyi kun 'khor dang / 'du shes med 'du shes med min skye mched kyi kun 'khor ro/ /de ltar gyur pa'i 'jig rten gyi khams kyi mtha' ni yod pa ma yin te/nam mkha'i khams ci snyed pa de snyed 'jig rten gyi khams so/ /rnam par gzhag pa 'di rnams ni 'jig rten gyi khams rnams kyi phyogs bcu dang steng dang 'og tu go skabs sam bar chod nas yod pa ma yin te/ 'jig rten gyi khams rnams ni 'jig bzhin pa dang 'chags bzhin pa yin pa dang /'og min las steng na yang 'dod pa'i khams/ 'dod pa'i khams las 'og tu yang 'og min no zhes so/ /gang zhig rgyal chen bzhi'i lha'i gnas la sogs pa nas 'og min gyi mthar thug pa nyi shu nyer gsum gyi gnas rnams kyi 'og dang steng du tshad brjod par bya ste/'di lta ste/ bang rim bzhi pa ni rgyal po chen po bzhi'i rtsa ba'i gnas te/ 'di nas dpag tshad stong phrag bzhi bcu'o/ /de nas 'og gi 'dzam bu'i gling du/ ji srid yod pa de srid nas steng sum cu rtsa gsum gyi gnas so/ /de las yang 'og tu 'dzam bu'i gling du ji srid pa de srid steng du 'thab bral gyi gnas so//de las yang 'og 'dzam bu'i gling du ji srid pa de srid du dga' ldan gyi gzhal yas zhes so/ /de bzhin du rgyas par thams cad la rjes su gzhal lo/ /shin tu mthong nas 'og tu 'dzam bu'i gling du ji srid pa de srid steng du 'og min gyi gnas so//de skad du yang / 'og tu ji srid gnas las gnas/ /gong du de srid de las de/ /zhes so/ /de las steng du yang gnas ni yod pa ma yin no/ /de nas 'di ni thu bor gyur pa nyid pas 'og min zhes brjod do zhes so/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las snod kyi 'jig rten rnam par nges pa zhes bya ba le'u gsum pa'o// //sems can gyi 'jig rten ni rnam pa gnyis so/ /'di lta ste/ so so'i skye bo'i 'jig rten dang / 'phags pa'i 'jig rten no/ /de la dang po ni rnam pa gnyis so/ /'di lta ste/ ngan 'gro'i skye ba dang / bde 'gro'i skye ba'o/ /de la ngan 'gro'i skye ba rnam pa gsum mo/ /'di lta ste/ dmyal ba'i 'gro ba pa dang / dud 'gro'i 'gro ba pa dang / yi dags kyi 'gro ba pa'o/ /bde 'gro'i skye ba la yang rnam pa gnyis te/'di lta ste/ mi'i 'gro ba pa dang / lha'i 'gro ba pa'o/ /yang rnam pa lnga ste/ dmyal ba'i 'gro ba pa dang / dud 'gro'i 'gro ba pa dang / yi dags kyi 'gro ba pa dang / mi'i 'gro ba pa dang / lha'i 'gro ba pa'o/ /'di rnams su lha min gyi 'gro ba pa bcug ste/ rnam pa drug tu 'gyur ro//de la dmyal ba'i 'gro ba la gsum ste/ tsha ba'i dmyal ba brgyad gnas pa dang / grang ba'i dmyal ba brgyad gnas pa dang / nyi tshe ba'i dmyal ba gnas pa'o/ /yi dags kyi 'gro ba la rnam pa gnyis so/ /'di lta ste/ gzi brjid chung ba dang / gzi brjid chen po'o/ /dud 'gro'i 'gro ba la rnam pa gsum mo//'di lta ste/ chu la spyod pa dang / skam la spyod pa dang / mkha' la spyod pa'o/ /mi'i 'gro ba la rnam pa bzhi'o/ /'di lta ste/ 'dzam bu'i gling du skyes pa dang / ba glang spyod kyi gling du skyes pa dang / sgra mi snyan gyi gling du skyes pa dang / lus 'phags po'i gling du skyes pa'o/ /lha'i 'gro ba pa ni rnam pa gsum mo/ /'di lta ste/ 'dod pa na spyod pa dang / gzugs na spyod pa dang / gzugs med pa na spyod pa'o/ /de la 'dod pa na spyod pa la rnam pa drug ste/ 'di lta ste/ rgyal chen gyi lha dang / sum cu rtsa gsum pa'i lha dang /'thab bral gyi lha dang / 'phrul dga' ba rnams kyi'o/ /bltas pas ni 'phrul dga'i lha dang / gzhan 'phrul dbang byed kyi lha'o/ /lha 'di rnams kyi 'khrig pa rnam pa lnga ste/ 'di lta ste/ gnyis gnyis dang / 'khyud pa dang / lag pas bcangs pa dang / bzhad pa dang / blta ba'o/ /de la gnyis sprod kyi 'khrig pa ni sa la gnas pa'i rgyal po chen po pa dang sum cu rtsa gsum pa rnams te/ dper na mi rnams bzhin no/ /de rnams ni rlung grol ba las yongs su gdung ba rnam par 'bral ba'o/ /'khyud pas 'khrig pa ni 'thab bral rnams 'khyud pa tsam gyis yongs su gdung ba dang bral ba'o//de ltar lag pas bcangs pa ni dga' ldan pa rnams kyi'o/ /bzhad pas ni dga' ldan gyi lha dang gzhan 'phrul dbang byed rnams kyi'o/ /'dod pa'i lha drug po 'di rnams ni grags bzhin du lo lnga pa lta bu nas ci srid du lo bcu pa'i byis pa lta bu skye ba'o/ / de la gzugs na spyod pa rnams ni na bza' dang bcas pa yongs su rdzogs pa skye bar 'gyur ro/ /gzugs na spyod pa rnam bzhi ste/ 'di lta ste/ bsam gtan dang po'i gnas su skyes pa dang / bsam gtan gnyis pa'i sa ru skyes pa dang / bsam gtan gsum pa'i gnas su skyes pa dang / bsam gtan bzhi pa'i sa la skyes pa'o/ /de la bsam gtan dang po'i gnas su skyes pa la rnam pa gsum ste/ 'di lta ste/ tshangs ris kyi lha dang / tshangs pa mdun na 'don gyi lha dang / tshangs pa chen po'i lha'o/ /bsam gtan gnyis pa'i sa la skyes pa la rnam pa gsum/ 'di lta ste/ 'od chung gi lha dang / tshad med 'od kyi lha dang / 'od gsal gyi lha'o/ /bsam gtan gsum pa'i sa la skyes pa la rnam pa gsum/ 'di lta ste/ dge chung gi lha dang / tshad med dge'i lha dang / dge rgyas kyi lha'o/ /bsam gtan bzhi pa'i sa la skyes pa la rnam pa brgyad/'di lta ste/ sprin med kyi lha dang / bsod nams 'phel gyi lha dang / 'bras bu che ba'i lha dang / 'du shes med pa'i sems can ni 'bras bu che ba'i phyogs gcig kho na'o/ /bcu gnyis po 'di rnams ni nye bar skye ba'i gnas so/ /gzhan lnga ni gnas gtsang ma'i lha ste/'og nas bshad pa'i 'phags pa'i 'jig rten phyir mi 'ong ba'i nang du bsdu bar bya'o/ /de yang ji ltar/ mi che ba'i lha dang / mi gdung ba'i lha dang / gya nom snang gi lha dang / shin tu mthong gi lha dang / 'og min gyi lha'o/ /gzugs med pa la spyod pa ni bzhi ste/'di lta ste/ nam mkha' mtha' yas skye mched du nye bar song ba'i lha dang / rnam shes mtha' yas skye mched du nye bar song ba'i lha dang / cung zad med pa'i skye mched du nye bar song ba'i lha dang / 'du shes med 'du shes med min skye mched du nye bar song ba'i lha'o/ / dmyal ba yi dags dud 'gro dang / /mi rnams dang ni lha drug dang / /gling bcas dmyal ba'i dbye ba yin/ /'dod pa'i khams la nyi shu'o/ /steng du gzugs khams bcu bdun no/ /gnas ni so sor tha dad do/ /'dir ni bsam gtan sa gsum pa/ /bzhi pa yang ni sa brgyad pa'o//gzugs med khams la gnas med de/ /nye bar skye bas rnam bzhi'o/ /lha rnams ni rnam par smin pa gsum las skyes te/ 'di lta ste/ tshul khrims rnam par smin pa dang ldan pas 'dod pa na spyod pa'i lha rnams so/ /ting nge 'dzin rnam par smin pa dang ldan pas tshangs ris la sogs pa gzugs na spyod pa'i lha bcu gnyis so//shes rab rnam par smin pa dang ldan pas gnas gtsang ma'i lha lnga'o/ /'dod pa na skye ba gsum ste/ 'di lta ste/ 'dod pa rnams so sor nye bar gnas pa'i sems can yod de/ 'di lta ste/ mi rnams dang lha 'ga' zhig go//de yang lha gzhan ni/ 'di lta ste/ rgyal po chen po pa dang / sum cu rtsa gsum pa dang / 'thab bral dang / dga' ldan pa'o/ /'dod pa rnams sprul pa'i sems can yod de/ 'di lta ste/ 'phrul dga'i lha rnams so/ /'dod pa rnams gzhan gyi 'phrul pa'i sems can yod de/'di lta ste/ gzhan 'phrul dbang byed kyi lha rnams so/ /bde bas nye bar skye ba gsum mo/ /'di lta ste/ bsam gtan dang por nye bar skye ba dang / bsam gtan gnyis par nye bar skye ba dang / /bsam gtan gsum par nye bar skye ba'o/ /sems can gyi 'jig rten 'di skye ba'i gnas bzhi ste/'di lta ste/ rdzus skyes kyi skye gnas dang / mngal skyes kyi skye gnas dang / drod gsher las skye ba'i skye gnas dang / sgo nga las skye ba'i skye gnas so/ /de la mi'i 'gro ba ni/ skye gnas bzhi ka yang ngo / /dud 'gro'i 'gro ba la skye gnas bzhi'o//yi dags kyi 'gro ba ni/ skye gnas gnyis so/ /dmyal ba'i 'gro ba ni rdzus skyes kyi skye gnas gcig kho na'o/ /lha'i 'gro ba ni rdzus skyes kyi skye gnas gcig kho na'o/ /yi dags ni 'di lta ste/ mngal skyes kyi skye gnas dang / rdzus skyes kyi skye gnas so/ /srid pa ni bzhi ste/ 'di lta ste/ 'chi ba'i srid pa dang / bar do'i srid pa dang / skye ba'i srid pa dang / sngon gyi dus kyi srid pa'o/ /yang srid pa gnyis 'di lta ste/ mthong ba'i chos kyi srid pa dang / skye ba gzhan gyi srid pa'o/ /yang srid pa gsum ste/ 'di lta ste/'dod pa'i srid pa dang / gzugs kyi srid pa dang / gzugs med pa'i srid pa'o/ /yang srid pa bdun te/ 'di lta ste/ dmyal ba'i srid pa dang / dud 'gro'i srid pa dang / yi dags kyi srid pa dang / mi'i srid pa dang / lha'i srid pa dang / las kyi srid pa dang / bar ma'i srid pa'o/ / de nyid kyis na chos bzhi po 'di shes par nus pa ma yin te/ 'di lta ste/ sems can gyi phung po dang / nam mkha'i khams dang / 'jig rten gyi khams dang / sangs rgyas kyi ye shes so/ /tshogs ni gsum ste/ 'di lta ste/ ming gi tshogs dang / tshig gi tshogs dang / yi ge'i tshogs so/ / skyon ni gsum ste/ lus kyi skyon dang / ngag gi skyon dang / yid kyi skyon no/ /yon po gsum ste/ lus dang ngag dang yid do/ /snyigs ma gsum ste/ lus dang ngag dang yid kyi'o/ /bag med pa'i gnas ni gsum ste/ 'dod pa'i bde ba myong ba dang / bsam gtan gyi bde ba myong ba dang / mya ngan las 'das pa'i bde ba myang ba'o//mngal rnam par gnon pa ni bzhi ste/ 'di lta ste/ blun po'i sems can thams cad ni mngal du 'jug pa dang gnas pa dang 'byung ba ni mi shes so/ /'khor los sgyur ba ni mngal du 'jug pa yang dag par shes pa nyid do/ /rang rgyal gyi byang chub kyi srid pa tha ma pa ni 'jug pa dang gnas pa yang dag par rab tu shes pa'o//yang dag par rdzogs pa'i byang chub kyi srid pa tha ma pa'i byang chub sems dpa' ni mngal du 'jug pa dang 'byung ba yang dag par rab tu mkhyen pa nyid do/ /mngal gyi gnas skabs rnam pa lnga ste/'di lta ste/ nur nur po'i gnas skabs dang / mer mer po'i gnas skabs dang / nar nar po'i gnas skabs dang / gor gor po'i gnas skabs dang / rkang lag 'gyus pa'i gnas skabs so/ /yang mngal gyi gnas skabs bcu ste/ 'di lta ste/ khu ba'i lus kyi gnas skabs dang /mer mer po'i lus kyi gnas skabs dang / sle sle po'i lus kyi gnas skabs dang / snying po'i lus kyi gnas skabs dang / lus dang rjes su mthun pa'i thabs kyi gnas skabs dang / rang bzhin dang rjes su mthun pa'i gnas skabs dang / las dang bcas pa'i lus kyi gnas skabs dang /yongs su rdzogs pa'i lus kyi gnas skabs te/ 'di la phye bas dbye ba gsum ste/ dbang po yongs su rdzogs pa dang / rtags yongs su rdzogs pa dang / srid du dang zheng du yongs su rdzogs pa'o/ /mngal du rnam par gnon pa'i rgyu gsum ste/ 'di lta ste/ ma nyid dge ba'i dus tshigs dang ldan par gyur pa dang / pha dang ma dag chags pas tshogs par gyur pa dang / dri za nye bar gnas par gyur pa'o/ /sems can gnas pa'i ched du zas rnam pa bzhi ste/ 'di lta ste/ kham gyi zas dang / rig pa'i zas dang / sems pa'i zas dang / rnam shes kyi zas so/ /sdug bsngal nyid la gsum ste/ 'di lta ste/ sdug bsngal gyi sdug bsngal dang / 'du byed kyi sdug bsngal dang / yongs su 'gyur ba'i sdug bsngal lo/ /nye bar 'tshe ba ni bcu ste/ 'di lta ste/ 'chi ba dang / kun nas nyon mongs pa dang / dbul ba dang / spyod pa ngan pa dang /'gro ba ngan pa dang / yongs su tshol ba'i ngal ba dang / chos kyis phongs par gyur pa'i las kyi sgrib pa dang / 'dod pa nyams pa dang / spa zhum pa dang / the tshom ci dang ci zhes pa'o/ /'jig rten gyi chos brgyad ni/ 'di lta ste/ rnyed pa dang / ma rnyed pa dang / bde ba dang / sdug bsngal ba dang / snyan pa dang / mi snyan pa dang / smod pa dang / bsngags pa'o/ /phyin ci log rnam pa bzhi ni 'di lta ste/ mi rtag pa la rtag pa'o zhes phyin ci log dang / sdug bsngal la bde ba zhes phyin ci log dang / mi sdug pa la sdug pa zhes phyin ci log dang / bdag med pa la bdag ces phyin ci log go//phyin ci log 'di rnams la so sor 'du shes phyin ci log dang / lta ba phyin ci log rnams sbyar bas phyin ci log bcu gnyis su 'gyur ro/ /kun nas nyon mongs pa ni rnam pa gsum ste/ 'di lta ste/ nyon mongs pa'i kun nas nyon mongs pa dang / las kyi kun nas nyon mongs pa dang /skye ba'i kun nas nyon mongs pa'o/ /'jigs pa lnga ni 'di lta ste/ mya ngan gyi 'jigs pa dang / smre sngags 'don pa'i 'jigs pa dang / sdug bsngal gyi 'jigs pa dang / yid mi bde ba'i 'jigs pa dang / 'khrug pa'i 'jigs pa'o/ /yang 'jigs pa bdun te/'di lta ste/ bdag rjes su rtsod pa'i 'jigs pa dang / gzhan rjes su rtsod pa'i 'jigs pa dang / ngan 'gro'i 'jigs pa dang / 'tshe ba'i 'jigs pa dang / chad pa'i 'jigs pa dang / tshigs su bcad pa ma yin pa'i 'jigs pa dang / 'chi ba'i 'jigs pa'o/ / yang 'jigs pa gcig ste/ 'di lta ste/ 'jig rten gyi chos brgyad kyis nye bar gos pa'i 'jigs pa'o/ /yang 'jigs pa ni gsum ste/ 'di lta ste/ mi shes pa'i 'jigs pa dang / the tshom gyi 'jigs pa dang / log pa'i shes pas 'jigs pa'o/ /mngon par zhen pa gnyis te/'di lta ste/ 'dod pa la lhag par zhen pa dang / lta ba la lhag par zhen pa'o/ /dogs pa bzhi ste/ 'di lta ste/ sdug bsngal gyi dogs pa dang / 'jigs pa'i dogs pa dang / 'jig rten chos brgyad kyi dogs pa dang / mi shes pa'i dogs pa'o/ /khur ni bzhi ste/ 'di lta ste/ phung po'i khur dang / nyon mongs pa'i khur dang / khas blangs pa'i khur dang / brtson pa'i khur ro/ /nyes pa lnga ste/ 'di lta ste/ sdug bsngal dang / longs spyod nyams pa dang / dga' ba dang bral ba dang / bcings pa dang / sgrib pa'o//phongs pa ni lnga ste/ 'di lta ste/ nad med pas phongs pa dang / longs spyod kyis phongs pa dang / nye dus phongs pa dang / tshul khrims kyis phongs pa dang / lta bas phongs pa'o/ /sdug bsngal ni drug ste/ 'di lta ste/ skye ba'i sdug bsngal dang / rgas pa'i sdug bsngal dang /'chi ba'i sdug bsngal dang / dga' ba dang rnam par 'bral ba'i sdug bsngal dang / mi dga' ba dang phrad pa'i sdug bsngal dang / 'dod pa rnam par nyams pa'i sdug bsngal lo/ /log pa ni bcu ste/ 'di lta ste/ log pa'i lta ba dang / log pa'i rtog pa dang / log pa'i ngag dang /log pa'i las kyi mtha' dang / log pa'i 'tsho ba dang / log pa'i rtsol ba dang / log pa'i dran pa dang / log pa'i ting nge 'dzin dang / log pa'i shes pa dang / log pa'i grol ba'o/ /sgrib pa ni gnyis te/ 'di lta ste/ nyon mongs pa'i sgrib pa dang / shes bya'i sgrib pa'o//yang sgrib pa gsum ste/ nyon mongs pa'i sgrib pa dang / shes bya'i sgrib pa dang / snyoms par 'jug pa'i sgrib pa'o/ /yang sgrib pa bzhi ni 'di lta ste/ shes bya'i sgrib pa dang / nyon mongs pa'i sgrib pa dang / rnam par smin pa'i sgrib pa dang / gtong ba'i sgrib pa'o/ / mthong ba'i gegs ni gsum ste/ mi shes pa dang / mun pa dang / mig gi rab rib po/ /'dod tshol ni gsum ste/ 'di lta ste/ 'dod pa'i 'dod tshol dang / srid pa'i 'dod tshol dang / tshangs par spyod pa'i 'dod tshol lo/ /'gro ba ma yin par 'gro ba ni bzhi ste/ 'di lta ste/'dun pa las 'gro ba ma yin par 'gro ba dang / zhe sdang las 'gro ba ma yin par 'gro ba dang / 'jigs pa las 'gro ba ma yin par 'gro ba dang / rmongs pa las 'gro ba ma yin par 'gro ba'o/ /ser sna lnga ni 'di lta ste/ gnas kyi ser sna dang / rigs kyi ser sna dang / rnyed pa'i ser sna dang / kha dog gi ser sna dang / chos kyi ser sna'o/ /rtsod pa'i rtsa ba drug ni 'di lta ste/ khro ba dang / 'chab pa dang / phrag dog dang / g.yo dang / sdig pa 'dod pa dang / rang gi lta ba mchog tu 'dzin pa'o/ /rnam par shes pa'i gnas pa ni bdun te/ 'di lta ste/ lus tha dad la 'du shes tha dad pa'i sems can yod pa dang / lus tha dad la 'du shes gcig pa'i sems can yod pa dang / lus gcig nyid la 'du shes tha dad pa'i sems can yod pa dang / lus gcig nyid la 'du shes gcig nyid kyi sems can yod pa dang / gzugs med pa na nam mkha'i 'du shes dang /rnam shes mtha' yas kyi 'du shes dang / ci yang med pa'i 'du shes so/ /sems can gyi gnas dgu la 'di lta ste/ de ltar rnam shes kyi gnas pa bdun dang / 'du shes med 'du shes med min gyi skye mched dang / 'du shes med pa'o/ /phung po ni gsum la 'di lta ste/yang dag pa nyid du nges pa'i phung po dang / log pa nyid du nges pa'i phung po dang / ma nges pa'i phung po'o/ /snyigs ma lnga ni 'di lta ste/ tshe'i snyigs ma dang / bskal pa'i snyigs ma dang / nyon mongs pa'i snyigs ma dang / lta ba'i snyigs ma dang / sems can gyi snyigs ma'o/ / rnam par rgud pa bzhi ste/ tshe'i snyigs mas 'tsho ba rnam par rgud pa dang / bskal pa'i snyigs mas phan 'dogs pa rgud pa dang / nyon mongs pa'i snyigs ma dang lta ba'i snyigs mas dge ba'i phyogs rgud pa dang / sems can gyi snyigs mas bdag gi dngos po rnam par rgud pa'o/ /de la bdag gi dngos po rnam par rgud pa la brgyad de 'di lta ste/tshad nyams pa dang / gzugs nyams pa dang / nad med pa nyams pa dang / stobs nyams pa dang / blo nyams pa dang / dran pa nyams pa dang / brtson 'grus nyams pa dang / bstan pa nyams pa'o/ /yang phongs pa bzhi ste/ 'di lta ste/ tshul khrims kyis phongs pa dang / lta bas phongs pa dang / kun spyod kyis phongs pa dang / 'tsho bas phongs pa'o/ /'pho ba gnyis te/ 'di lta ste/ rnam par chad pa'i 'pho ba dang / yongs su 'gyur ba'i 'pho ba'o/ /shes pa'i mi mthun pa'i phyogs ni gsum ste/ 'di lta ste/ mi shes pa dang /the tshom gyi shes pa dang / log pa'i shes pa'o/ /sdug bsngal gyi rtags ni lnga ste/ 'di lta ste/ mya ngan dang / sme sngags 'don pa dang / sdug bsngal dang / yid mi bde ba dang / nye bar 'khrug pa'o/ /kun nas mnar sems kyi dngos po bcu ste/'di lta ste/ bdag gi don med pa spyod cing spyod do spyod par 'gyur ro zhes kun nas mnar sems skyed par 'gyur ro/ /bdag gi dga' zhing yid du 'ong ba la don med pa spyad cing spyod do spyod par 'gyur ro zhes kun nas mnar sems skye bar 'gyur ro/ /bdag gi mi dga' ba yid du mi 'ong ba'i don yod pa spyad cing spyod do spyod par 'gyur ro zhes kun nas mnar sems skye bar 'gyur ro//gnas ma yin pa la yang kun nas mnar sems skye bar 'gyur ro/ /rmugs pa dang gnyid kyi rgyu ni lnga ste 'di lta ste/ kha zas kyi tshod ma rig pa dang / snyom las dang / mi dga' ba dang /snyang glal dang / sems zhum pa nyid do/ /bag chags gsum ste/ 'di lta ste/ las kyi bag chags dang / nyon mongs pa'i bag chags dang / skye ba'i bag chags so/ /bag chags gsum po 'di nying mtshams sbyor ba gsum du 'gyur te/ 'di lta ste/ las kyi mtshams sbyor ba dang /nyon mongs pa'i mtshams sbyor ba dang / skye ba'i mtshams sbyor ba'o zhes pa la sogs pa'o/ /paN+Di ta chen po stobs bcu dpal bshes gnyen gyis rnam par bsdus pa 'dus byas dang 'dus ma byas rnam par nges pa las sems can gyi 'jig rten rnam par nges pa zhes bya ba le'u bzhi pa'o// //'dir sems can dang snod kyi 'jig rten dag gzugs 'dus pa thams cad kyi phra ba ni rdul phra rab ces brjod do/ /gang las ches chung ba shes par bya ba med pa de ni rdul phra rab bo/ /'dod pa'i khams su sgra dang bral ba dang dbang po spangs pa'i rdzas brgyad ldan skye bar 'gyur ro//de la rdzas brgyad ni 'di lta ste/ sa dang / chu dang / me dang / rlung dang / gzugs dang / dri dang / ro dang / reg bya'o/ /'di rnams su sgra rab tu bcug pas rdzas dgu ldan 'gyur ro/ /lus kyi dbang po'i rdul phra rab ni rdzas dgu ldan de/de la rdzas dgu ni 'di lta ste/ rdzas brgyad po de nyid dang lus kyi dbang po'i rdzas so/ /sgra dang bcas pa na rdzas bcu'o/ /dbang po gzhan rnams kyi rdul phra rab ni rdzas bcu ldan no/ /de la rdzas bcu ni 'di lta ste/ rdzas dgu po de nyid dang dbang po rang rang gi rdzas so/ / sgra dang bcas pa na rdzas bcu gcig tu 'gyur ro/ /gsungs te/ 'dod na phra rab rdzas brgyad de/ /sgra med pa min dbang med min/ /lus dbang ldan la rdzas dgu'o/ /dbang po gzhan ldan rdzas bcu'o/ /'dis ni gzugs kyi khams na dri dang ro dag med par gsungs pa des na/ de dag na ni rdul phra rab dag ni rim pa bzhin du rdzas drug dang bdun brgyad do zhes gsungs pa'i tshul nyid kyis na ci yang brjod par mi bya'o/ /de ltar gzugs 'di nyid kyi 'grib bzhin pa na mthar thug pa ni rdul phra rab po/ /rdul phra rab la sogs pa'i sgra bcu gcig ni/ gong ma bdun 'gyur te/'di lta ste/ rdul phra rab bdun la rdul phran no/ /rdul phran bdun la lcags so/ /lcags bdun la ri bong ngo / /ri bong bdun la lug go/ /lug bdun la glang ngo / /glang bdun la nyi zer ro/ /nyi zer bdun la rdul lo/ /rdul bdun la sro ma'o/ /sro ma bdun la shig go//shig bdun la nas so/ /nas bdun la sor mo'i tshigs so/ /sor mo'i tshigs gsum la mdzub mo'o/ /logs la gzhal bas/ sor mo nyi shu bzhi la khru gang ngo / /khru bzhi la gzhu gang ngo / /gzhu lnga brgya la rgyang grags so/ /rgyang grags brgya la dpag tshad do//'phags pa gnas brtan pa'i sde pa'i lung las kyang / gzhu 'dom lnga brgya rgyang grags te/ /rgyang grags bzhi la ba lang 'gros/ /ba lang 'gros bzhi dpag tshad do/ /zhes so/ /dus kyi mtha' ni skad cig ma ste/ de yang dus ci srid du rdul phra rab kyis rdul phra rab gzhan brgal bar gyur pa de srid kyi dus la skad cig ces bya'o//yang na stobs dang ldan pa'i skyes bus se gol gtogs pa tsam la skad cig ma drug cu rtsa lnga'o/ /sum cu rtsa bdun zhes pa yang ngo / /skad cig brgya nyi shu la de'i skad cig ces so/ /de'i skad cig drug cu la thang cig go/ /thang cig sum cu la yud tsam mo//na li ka zhes kyang brjod do/ /yud tsam sum cu la nyin zhag go/ /nyin zhag sum cu la zla ba'o/ /zla ba bcu gnyis la lo 'khor ba'o/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las gzugs dang dus rnam par nges pa zhes bya ba le'u lnga pa'o// //'dzam bu'i gling du bskal pa dang po pa'i mi rnams kyi tshe lo dpag tu med pa'o/ /bar du tshe lo nges pa med pa'o/ /tha mar tshe lo bcu pa'o/ /ba glang spyod du mi rnams kyi tshe lo lnga brgya'o/ /byang gi sgra mi snyan gyi mi rnams kyi tshe lo stong ngo //shar gyi lus 'phags gling du mi rnams kyi tshe lo nyis brgya lnga bcu'o/ /mi rnams kyi tshe lo lnga bcu la ni rgyal po chen po pa'i lha rnams kyi nyin zhag gcig go/ /des na tshe lo lnga bcu'o/ /mi rnams kyi rtsis kyis lo dgu bcu tham pa'o/ /mi'i lo brgya la ni sum cu rtsa gsum pa'i lha rnams kyi nyin zhag gcig go//des na tshe lo stong ngo / /mi'i rtsis kyis lo bye ba gsum dang lo 'bum phrag drug cu'o/ /mi'i lo brgya phrag gnyis la 'thab bral gyi lha rnams kyi nyin mtshan no/ /des na lo stong phrag gnyis kyi tshe'o/ /mi rnams kyi grangs rtsis kyis lo bye ba bcu bzhi dang 'bum phrag bzhi bcu'o//mi lo brgya phrag bzhi la dga' ldan pa'i lha rnams kyi nyin mtshan no/ /des na tshe ni lo stong phrag bzhi'o/ /mi'i grangs rtsis kyis lo bye ba lnga bcu rtsa bdun dang lo 'bum phrag drug cu'o/ /mi'i lo brgyad brgya la 'phrul dga'i lha rnams kyi nyin mtshan gcig go//des na tshe ni lo stong phrag brgyad do/ /mi'i grangs rtsis kyis lo bye ba phrag nyis brgya dang lo bye ba phrag sum cu dang lo 'bum phrag bzhi bcu'o/ /mi'i lo brgya phrag bcu drug la gzhan 'phrul dbang byed kyi lha rnams kyi nyin zhag gcig go/ /des na tshe lo stong phrag bcu drug go//mi'i grangs rtsis kyis lo bye ba brgya phrag dgu dang lo bye ba phrag nyer gcig dang lo 'bum phrag drug cu'o/ /lus kyi tshad kyang ni/ 'dzam bu gling pa'i mi rnams kyi ni khru phyed dang bcas pa'i gsum mam/ khru bzhi pa'o/ /shar gyi lus 'phags po'i mi rnams kyi ni lus kyi tshad ni khru brgyad do//ba lang spyod pa rnams kyi lus kyi tshad ni khru bcu drug go/ /byang sgra mi snyan gyi mi rnams kyi lus kyi tshad ni khru sum cu rtsa gnyis so/ /rgyal chen pa'i lha rnams kyi tshad ni rgyang grags kyi bzhi cha'o/ /sum cu rtsa gsum pa'i tshad ni rgyang grags phyed do/ /'thab bral ba rnams kyi tshad ni rgyang grags kyi cha gsum mo//dga' ldan pa'i tshad ni rgyang grags so/ /'phrul dga'i lha rnams kyi tshad ni rkang pa dang bcas pa'i rgyang grags so/ /gzhan 'phrul dbang byed lha rnams kyi phyed dang bcas pa'i rgyang grags ni lus kyi tshad do/ /nub phyogs pa bye brag tu smra ba na re/rta stong phrag dang ldan pa'i shing rta dang / gdugs kyi tshad ni dpag tshad tsam nyid do/ /lha rnams dbang po brgya byin gyi/ /lus kyi tshad ni rgyang grags gsum/ /zhes zer ro/ /tshangs ris kyi lha rnams kyi tshe ni bar gyi bskal pa nyi shu'o/ /tshangs pa'i mdun na 'don rnams kyi tshe ni bar gyi bskal pa bzhi bcu'o//tshangs pa chen po'i lha rnams kyi tshe ni bskal pa chen po gcig go/ /'od chung gi lha rnams kyi tshe ni bskal pa chen po gnyis so/ /tshad med 'od kyi lha rnams kyi tshe ni bskal pa chen po bzhi'o/ /'od gsal gyi lha rnams kyi tshe ni bskal pa chen po brgyad do//dge chung gi lha rnams kyi tshe ni bskal pa chen po bcu drug go/ /tshad med dge'i lha rnams kyi tshe ni bskal pa chen po sum cu rtsa gnyis so/ /dge rgyas kyi lha rnams kyi tshe ni bskal pa chen po drug cu rtsa bzhi'o/ /sprin med kyi lha rnams kyi tshe ni bskal pa chen po brgya dang nyi shu rtsa lnga'o//bsod nams 'phel gyi lha rnams kyi tshe ni bskal pa chen po brgya phrag gnyis dang lnga bcu'o/ /'bras bu che ba'i lha rnams kyi tshe ni bskal pa chen po lnga brgya'o/ /mi che ba'i lha rnams kyi tshe ni bskal pa chen po stong ngo / /mi gdung ba'i lha rnams kyi tshe ni bskal pa chen po stong phrag gnyis so//gya nom snang gi lha rnams kyi tshe ni bskal pa chen po stong phrag bzhi'o/ /blta na sdug gi lha rnams kyi tshe ni bskal pa chen po stong phrag brgyad do/ /'og min gyi lha rnams kyi tshe ni bskal pa chen po stong phrag bcu drug go/ /nam mkha' mtha' yas skye mched dang / rnam shes mtha' yas skye mched dang /ci yang med pa'i skye mched dang / 'du shes med 'du shes med min gyi skye mched rnams la tshe ni grangs bzhin du bskal pa chen po stong phrag nyi shu dang / stong phrag bzhi bcu dang / stong phrag drug cu dang / stong phrag brgyad cu rnams so/ /lus kyi tshad ni tshangs ris kyi lha la sogs pa rnams kyi rim pa bzhin du dpag tshad phyed dang /dpag tshad gcig dang phyed dang / dpag tshad gnyis dang / dpag tshad bzhi dang / dpag tshad brgyad dang / dpag tshad bcu drug dang / dpag tshad sum cu rtsa gnyis dang / dpag tshad drug cu rtsa bzhi dang / dpag tshad brgya dang nyi shu rtsa lnga dang /dpag tshad brgya phrag gnyis dang lnga bcu dang / dpag tshad brgya phrag lnga dang / dpag tshad stong dang / dpag tshad stong phrag gnyis dang / dpag tshad stong phrag bzhi dang / dpag tshad stong phrag brgyad dang / dpag tshad stong phrag bcu drug dang sbyor ro zhes so/ /ngan 'gro rnams kyi ni rgyal chen pa'i lha rnams kyi tshe'i tshad dag dmyal ba chen po yang sos kyi nyin zhag gcig go//des na tshe ni lo lnga brgya'o/ /sum cu rtsa gsum pa'i lha rnams kyi tshe'i tshad ni thig nag gi nyin zhag go/ /des na tshe ni lo stong phrag gcig go/ /'thab bral gyi tshe'i tshad ni dmyal ba chen po bsdus 'joms kyi nyin mtshan no//des na tshe ni lo stong phrag gnyis so/ /dga' ldan gyi lha'i tshe'i tshad ni ngu 'bod dmyal ba chen po'i nyin mtshan no/ /des na tshe ni lo stong phrag bzhi'o/ /'phrul dga'i lha'i tshe'i tshad ni dmyal ba chen po ngu 'bod chen po'i nyin mtshan no/ /des na tshe ni lo stong phrag brgyad do/ /gzhan 'phrul dbang byed lha'i tshe'i tshad ni dmyal ba chen po tsha ba'i nyin mtshan no//des na tshe ni lo stong phrag bcu drug go/ /dmyal ba chen po rab tu tsha ba'i tshe ni bar gyi bskal pa'i phyed do/ /mnar med pa'i tshe ni bar gyi bskal pa gcig go/ /dud 'gro rnams ni nges pa med de tshe mchog tu ring ba'i dud 'gro rnams ni bar gyi bskal pa ste/dga' bo dang nye dga' la sogs pa lta bu'o/ /mi'i zla ba gcig la yi dags kyi nyin zhag go/ /des na tshe ni lo lnga brgya'o/ /bcom ldan 'das kyis grang ba'i dmyal ba'i tshe tshad gsungs pa 'di lta ste/ dge slong dag 'dir til khal nyi shu shong ba'i ma ga d+hA'i bre bo che res kyis rab tu gang bar byas te/spyi phud du 'gyur ba la/ de las skyes bu 'ga' zhig gis lo brgyar gyur pa'i tshe til re re phyung bar gyur pa na/ dge slong dag til gyi phung po de de srid du rim pa 'dis myur du zad cing mthar thug par 'gro bar gyur pa la/ 'dir ngas chu bur can du gyur pa'i sems can rnams kyi tshe'i tshad mthar thug pa ni smra bar bya ba ma yin pa nyid do//ci ltar yang dge slong dag chu bur can gyi nyi shu ni chu bur rdol ba can gyi nyin gcig go/ /chu bur rdol ba can gyi nyi shu ni a Ta Ta'o/ /a Ta Ta'i nyi shu la ha ha'o/ /ha ha ba nyi shu ni hu hu ba'o/ /hu hu ba nyi shu ni ut+pal ltar gas pa'o//de nyi shu la pad+ma ltar gas pa'o/ /pad+ma nyi shu la pad+ma chen po'o/ /sgra ngan spangs te bar du 'chi ba ni/ thams cad du yod la byang na ni nges pa'i tshe tshad yod do zhes pa'i don to/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las lus dang tshe rnam par nges pa zhes bya ba le'u drug pa'o// //rnam par mi snang ba'i 'gro ba pa'i sems can ni/ chos mngon pa mdzod las ni ma gsungs te/ de lta na mdo sde la sogs pa rnams su mang du gsungs pas ni 'dir brjod par bya ste/ ci ltar bcom ldan 'das kyis 'chi 'pho dang skye ba mkhyen pa'i stobs bstan pa'i skabs su gsungs te/de la 'di ni de bzhin gshegs pa'i lha'i spyan yin te/ spyan gang gis phyogs bcu'i 'jig rten chos kyi dbyings kyi mtha'/ nam mkha'i dbyings kyi mthar thug pa tshad med grangs med pa bgrang ba las yang dag par 'das pa'i sangs rgyas kyi zhing du/snang ba de dag thams cad la zhing kha cig ni sreg par byed pa dang 'chags bzhin pa dang 'jig bzhin par snang zhing mthong ngo / /gang sems can du snang ba de dag thams cad la kha cig ni ci ltar las kyi nye bar 'gro ba las 'chi 'pho ba byed pa dang / skye bar byed pa dang /bde bar byed pa dang / ngan 'gror yang snang zhing mthong ngo / /gang byang chub sems dpar snang ba de dag thams cad la kha cig ni 'pho bar byed pa dang / 'chags par byed bzhin pa dang / nges par 'byung ba rnams snang zhing mthong ngo / /gang sangs rgyas su snang ba de dag thams cad la kha cig ni mngon par rdzogs par byang chub bzhin pa dang /chos kyi 'khor lo bskor bzhin pa dang / tshe'i 'du byed 'dor ba dang / yongs su mya ngan las 'da' ba rnams snang zhing mthong ngo / /gang nyan thos su snang ba de dag thams cad la kha cig nges par 'grol bzhin pa dang / yongs su mya ngan las 'da' bzhin pa rnams mkhyen zhing mthong ngo / /gang rang sangs rgyas su snang ba de dag thams cad la kha cig ni rdzu 'phrul ston pa dang / yon tan rnam par dag par byed pa rnams mkhyen zhing mthong ngo / /gang yang mi snang ba'i 'gro ba pa'i sems can rnams phyi rol pa'i mngon shes lnga dang ldan pa rnams kyi mig gi lam du 'gro ba ma yin no//nyan thos rnams kyi ma yin/ rang sangs rgyas rnams kyi ma yin/ byang chub sems dpa' rnams kyi ma yin no/ /de ni de bzhin gshegs pa rnams kyi lha'i spyan gyis snang bar 'ongs pa yin no/ /gang dag yang de bzhin gshegs pa rnams kyis phyogs 'ga' zhig tu shing rta'i 'khor lo'i tshad tsam du/mi snang ba'i 'gro ba pa'i sems can rnams mthong bar yang dag par 'ongs pa de ni shin tu ches mang ba ste/ stong gsum gyi stong chen po'i 'jig rten gyi khams kyi lha dang mi rnams ni de lta bu ma yin no/ / de ltar rnam par mi snang ba'i sems can rnams kyi khams ni tshad med pa'o/ /'di dag yang de bzhin gshegs pa rnams kyi lha'i spyan gyis sems can sangs rgyas kyi spyan gyis gdul byar gyur pa gang yin zhes sangs rgyas kyi zhing thams cad du sems can gyi khams la rnam par gzigs par mdzad do//ci snyed sangs rgyas kyi gdul byar gyur pa'i sems can de snyed pa de dag rnams kyi mdun du de bzhin gshegs pa yang dag par gnas pa nyid do/ /sems can de rnams ni 'dul bar byed do/ /de las gzhan sems can gyis yang dag par shes pa ma yin no/ / 'jig rten gyi khams rnam pa gsum ste/ 'di lta ste/ stong chung ngu'i 'jig rten gyi khams dang / stong gnyis pa'i 'jig rten gyi khams dang / stong gsum gyi stong chen po'i 'jig rten gyi khams so/ /gling bzhi dang zla ba nyi ma'i ri rab 'dod pa na spyod pa'i lha drug bsam gtan dang po la sogs rnams so sor stong stong tshogs pa rnams la/stong chung ngu'i 'jig rten gyi khams so/ /stong chung ngu'i 'jig rten de rnams la ni stong gnyis pa bar ma'i 'jig rten gyi khams so/ /stong gnyis pa de rnams stong la ni stong gsum gyi stong chen po'i 'jig rten gyi khams so//rim pa bzhin du stong phrag gcig dang / 'bum phrag bcu dang / bye ba brgya'i gling bzhi pa la sogs pa rnams cig char du 'jig pa dang 'chags pa yin no/ /gang gsungs te/ gling bzhi dang ni ri rab dang / /nyi zla dang ni 'dod lha dang / /tshangs pa'i 'jig rten stong la ni//stong ni chung ngu dag tu 'dod/ /de stong la ni stong gnyis pa/ /bar ma'i 'jig rten khams yin no/ /de stong la ni stong gsum ste/ /mnyam du 'jig cing chags pa yin/ /zhes so/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las snang ba'i 'gro ba pa'i sems can rnam par nges pa zhes bya ba le'u bdun pa'o// //bskal pa yang rnam pa bzhi ste/ 'di lta ste/ bar gyi bskal pa dang / 'jig pa'i bskal pa dang / chags pa'i bskal pa dang / bskal pa chen po'o//de la bar gyi bskal pa'i tshad ni lcags kyi rang bzhin gyi ra ba gru bzhi pa mtho ba dang logs so so la rgyang grags re re yod pa'i nang du til lam nyungs kar gyis bkang ste spyi phud du byas pa'i nang nas lo brgya tshang ba las/ re re phyung bar gyur pa na ci srid du thams cad yongs su zad pa'i dus su gyur pa de srid kyi dus la bar gyi bskal pa zhes bya'o//bar gyi bskal pa brgyad cu la ni bskal pa chen po'o/ /'jig pa'i bskal pa yang bar gyi bskal pa nyi shur gyur pa yin te/ de la 'jig pa ni gnyis te/ 'di lta ste/ 'gro ba 'jig pa dang khams 'jig pa'o/ /yang 'jig pa ni gnyis te/'di lta ste/ sems can 'jig pa dang snod 'jig pa'o/ /yang 'jig pa gsum ste/ 'di lta ste/ mes 'jig pa dang / chus 'jig pa dang / rlung gis 'jig pa'o/ /'di lta ste/ de'i dus de 'byung bar 'gyur ba yin te/ dmyal ba 'di'i sems can 'pho bar 'gyur la skye bar mi 'gyur ba na/'jig pa'i bskal pa de dbu brtsams pa ste/ /rim gyis dmyal ba'i sems can gcig kyang lhag ma ma lus par gyur par nges pa na 'jig rten 'jig par 'gyur ba yin no/ /'di lta ste/ dmyal ba'i 'gro ba 'jig pa'o/ /de'i tshe dmyal ba 'di dag nges par myong ba'i las 'dzin pa gang de stong gsum gzhan gyi dmyal bar skye bar 'gyur ro//de bzhin du dud 'gro'i 'gro ba 'jig pa'o/ /rgya mtsho chen por gtogs pa'i dud 'gro rnams sngon du 'jig par 'gyur ba yin te/ mi dang lhan cig spyod cing gnas pa'i dud 'gro ni mi nyid dang lhan cig tu 'jig pa yin no//de bzhin du yi dags kyi 'gro ba 'jig pa'o/ /dus de 'byung bar 'gyur ba 'di yin te/ mi 'di rnams su sems can gang yang rung bas rang bzhin gyis slob dpon med par chos nyid kyis thob pa'i bsam gtan dang po yang dag par skye'o/ /de bsam gtan de las langs nas tshig tu smra bar 'gyur te/kye ma bde ba 'di ni dben pa las skyes pa dga' zhing bde ba'o/ /kye ma zhi ba 'di ni dben pa las skyes pa dga' zhing bde ba'o zhes so/ /sgra de thos nas sems can gzhan la yang kun du skye bar 'gyur ba'o/ /dus byas te tshangs pa'i 'jig rten du skye bar 'gyur ro/ /gang gi tshe 'dzam bu'i gling du sems can gcig kyang lus pa med par gyur pa 'di tsam nyid 'di 'jig rten 'jig par 'gyur ba yin te/'di lta ste/ 'dzam bu'i gling gi mi rnams 'jig pa'o/ /de bzhin du shar gyi lus 'phags kyi mi rnams 'jig pa'o/ /de bzhin du ba lang spyod kyi mi rnams 'jig pa'o//de bzhin du byang gi sgra mi snyan gyi mi rnams 'jig pa'o/ /byang gi sgra mi snyan gyi mi rnams ni 'dod pa na spyod pa'i lhar skye bar 'gyur te/ de ru skye ba mi srid pa'i phyir ro/ /nges par 'jig rten 'di 'jig par 'gyur ba yin te/ 'di lta ste/ mi'i 'gro ba 'jig pa'o/ /de bzhin du rgyal chen bzhi pa'i lha rnams su lha rnams kyi bsam gtan dang po bskyed de/tshangs pa'i 'jig rten du skye bar 'gyur ro/ /gang gi tshe de ru sems can gcig kyang lhag ma lus pa med par gyur pa 'di tsam ni 'jig rten 'jig par gyur pa yin te/ 'di lta ste/ rgyal po chen po bzhi'i lha'i 'jig pa'o//de bzhin du sum cu rtsa gsum pa'i lha'i 'jig pa'o/ /'thab bral gyi lha'i 'jig pa ni de bzhin no/ /de bzhin du dga' ldan lha'i 'jig pa'o/ /de bzhin du 'phrul dga'i lha'i 'jig pa'o/ /de bzhin du gzhan 'phrul dbang byed kyi lha'i 'jig pa'o/ /gang tshe 'dod pa na spyod pa'i lha rnams gcig kyang lus pa med par gyur pa 'di tsam ni 'jig rten 'jig par 'gyur ba yin te/'di lta ste/ 'dod pa na spyod pa'i lha'i 'jig pa'o/ /tshangs pa'i 'jig rten du yang sems can gang yang rung bas chos nyid kyis thob pa'i bsam gtan gnyis pa yang dag par skye'o/ / de nas bsam gtan de las langs te/ tshig tu smra bar 'gyur te/ kye ma bde ba 'di ting nge 'dzin las skyes pa dga' zhing bde ba'o/ /kye ma zhi ba 'di ni ting nge 'dzin las skyes pa dga' zhing bde ba'o zhes pa'i sgra de thos nas sems can gzhan la yang bsam gtan gnyis pa yang dag par skye bar 'gyur ro//dus byas te 'od gsal gyi lha ru skye bar 'gyur ro/ /gang tshe tshangs pa'i 'jig rten du sems can gcig kyang lus pa med par gyur pa 'di tsam nyid ni 'jig rten 'jig par 'gyur ba ste/ 'di lta ste/ sems can kun du 'jig pa'o/ /de nas snod sems can gyis stong par gyur pas/de'i tshe 'phen byed kyi las yongs su zad pas lhas char mi 'bebs shing / sa bon gyi grong dang / sdong bu'i grong dang / 'bab chu chung ngu rnams skams par 'gyur ro/ /de'i rjes su nyi ma gnyis pa rab tu 'byung bar 'gyur ro/ /'bab chu chen po thams cad skams par 'gyur ro//de la yang chu bo chen po bdun ni 'di lta ste/ gang gA/ ya mu na/ sar b+hu/ sar b+hu/ a dzi ra ba ti/ ma hI/ ni ma na ga'o/ /de nas nyi ma gsum pa 'byung bar 'gyur ro/ /chu bo chen po bzhi dang ma dros pa la sogs pa mtsho chen po rnams skams par 'gyur ro/ /de la chu bo chen po bzhi ni 'di lta ste/gang gA dang / sin d+hu dang / pak+Shu dang / shI ta'o/ /mtshe'u chen po bdun ni/ sing ha sra sA tA/ hang sa sra sA ta/ ra tha kA ra/ na Da dan ta/ ku nA la/ a na ba tA ba ta/ man tA ki nI'o/ /de'i phyi nas nyi ma bzhi pa 'byung bar 'gyur ro/ /de'i tshe rgya mtsho chen po yang dpag tshad brgya ci srid du chu skams par 'gyur ro//de ma thag tu nyi ma lnga pa 'byung bar 'gyur ro/ /de'i tshe dpag tshad brgya phrag gnyis su chu skams par 'gyur ro/ /de nas nyi ma drug pa 'byung bar 'gyur ro/ /de'i tshe rgya mtsho chen po la chu shin tu nyung ba thigs pa yang lus pa med par 'gyur ro//sa chen po dang ri rab las du ba 'byung bar 'gyur ro/ /de'i rjes su nyi ma bdun pa 'byung bar 'gyur ro/ /de'i tshe stong gsum gyi stong chen po 'jig rten gyi khams bsregs te/ ci srid du thal ba yang shes par bya ba med do/ /bsregs pa dang nyi ma rang nyid kyang med par 'gyur te/bud shing ma tshang ba'i me bzhin no/ /des na nyi ma bdun gyi mes 'jig pa ste/ bsam gtan dang po'i bar du sreg par byed do/ /de bzhin du ba tsha can gyi chu'i char phab nas bsam gtan gnyis pa nyams par byed pa ni chus 'jig pa'o/ /de'i rjes su rnam par 'khrugs pa'i rlung chen pos bsam gtan gsum pa 'thor bar byed pa ni rlung gis 'jig pa'o//bsam gtan bzhi pa la ni 'jig pa med do/ /des na 'jig pa ni mdor bsdu na gsum ste/ 'di lta ste/ mes 'jig pa dang / chus 'jig pa dang / rlung gis 'jig pa'o/ /de'i phyir yang bsam gtan dang po na mes 'jig pa kho na srid pa ste/de dag gi dri ma dang chos mthun pa'i phyir ro/ /de yang 'di ltar bsam gtan dang po na rnam par rtog pa dang rnam par dpyod pa'i dri ma yod de/ de yang yongs su sreg par byed pa'i phyir na me'i bskal pa'o/ /bsam gtan gnyis pa ni chu'i 'jig pa kho na ste/ de'i dri ma dang chos mthun pa'i phyir ro/ /de yang 'di ltar bsam gtan gnyis pa na dga' ba'i dri ma yod de/ de yang shin tu sbyongs pa'i sbyor bas rten 'jam par byed pa'i phyir na chu'i bskal pa'o/ /bsam gtan gsum pa na rlung gi 'jig pa kho na'o/ /de yang 'di ltar bsam gtan gsum pa na dbugs 'byung ba dang /'jug pa'i dri ma yod de/ de yang rlung nyid kho na'o/ /des na gang la nang gi bdag nyid kyi bsam gtan snyoms 'jug ci 'dra ba'i dri ma yod pa de la bsam gtan las skyes pa'i phyi rol yang de 'dra ba'o/ /de nyid kyis na bsam gtan bzhi pa na rnam par rtog pa la sogs pas mi bskyod pas dri ma dang bral ba'i phyir na 'jig pa ni med do//gal te bsam gtan bzhi pa la 'jig pa med na/ ci bsam gtan bzhi pa rtag pa yin nam zhe na ma yin te/ de ru yang lha'i bu rnams skye bar 'gyur ba na gzhal yas khang dang bcas nas skye bar 'gyur ba dang / 'gag pa na yang gzhal yas khang dang bcas nas 'jig par 'gyur ro//des na 'jig pa'i rtse mo ni gsum ste/ 'di ltar mes 'jig pa'i rtse mo ni bsam gtan gnyis pa'o/ /chus 'jig pa'i rtse mo ni bsam gtan gsum pa'o/ /rlung gis 'jig pa'i rtse mo ni bsam gtan bzhi pa'o/ /'phags pa gnas brtan pa'i sde pa'i lung gi tshul las kyang 'jig pa ni drug cu rtsa bzhi ste/de la mes 'jig pa lnga bcu rtsa drug go/ /chus 'jig pa ni bdun no/ /rlung gis 'jig pa ni gcig go/ /'di lta ste/ bar med par mes 'jig pa bdun no/ /chus gcig go/ /de nas mes bdun no/ / chus gcig go/ /de nas mes bdun no/ /chus gcig go/ /de nas mes bdun no/ /chus gcig go/ /de nas mes bdun no/ /chus gcig go/ /de nas mes bdun no/ /chus gcig go/ /de nas mes bdun no/ /chus gcig go/ /de nas mes bdun no/ /rlung gis 'jig pa ni gcig go//de ltar bsdus te 'jig pa ni drug cu bzhi'o/ /yang gsungs te/ me yis lan ni bdun bdun la/ /brgyad pa brgyad pa chu yis so/ /gang tshe rlung mchog gcig bgrangs na/ /drug cu bzhi ni rdzogs par 'gyur/ /zhes so/ /de ltar dmyal ba ru dang po sems can gyi 'pho ba nas bzung ste/ci srid du snod thams cad yang dag par zad par 'gyur ba'i dus 'di ni 'jig pa'i bskal pa ste/ bar gyi bskal pa nyi shu'o/ /de'i rjes su 'jig rten 'di zhig na stong pa nam mkha' tsam nyid du bar gyi bskal pa nyi shu gnas par 'gyur ro/ /de'i phyi nas 'chags pa ni gnyis te/'di lta ste/ snod 'chags pa dang / sems can 'chags pa'o/ /de la snod 'chags pa ni sems can rnams kyi lhag pa'i bdag pos nam mkha' la rlung zhan gyis chung ba rgyu bar 'gyur ro/ /de las ci ltar gsungs pa'i rlung gi dkyil 'khor la sogs pa thams cad skye bar 'gyur te/'di tsam ni 'jig rten 'chags par gyur pa yin te/ snod rnam par 'chags so/ /de nas 'od gsal nas sems can gzhan gang rung 'phos nas tshangs pa'i gzhal yas su skye bar 'gyur ro/ /de ltar de bzhin du de'i 'khor yang ngo / / de nyid nas sems can gzhan dag tshangs pa'i mdun na 'don du 'pho bar 'gyur ro/ /de kho na bzhin du tshangs ris dang / gzhan 'phrul dbang byed rnams su rim gyis ci srid du/ sgra mi snyan du/ ba lang spyod du/ shar gyi lus 'phags po ru/ 'dzam bu gling du/ yi dags su/ dud 'gro ru/dmyal ba rnams su skye bar 'gyur ro/ /sems can 'chags pa'o chos nyid kyis 'di ltar 'byung ba yin te/ gang phyis 'jig pa de dag sngon du 'chags pa yin no/ /gang gi tshe dmyal bar sems can gcig yang byung bar gyur pa de'i tshe 'jig rten 'di chags pa yin te/ sems can 'chags pa'o//bar gyi bskal pa bcu dgus so/ /de nas bzung ste bar gyi bskal pa nyi shur chags pa gnas so/ /'dir bskal pa dang po pa'i mi rnams 'od gsal nas 'phos te 'ongs pa ni gzugs na spyod pa dang 'dra bar gnas shing / yid kyi rang bzhin rang gi 'od dang ldan pa mkha' la kun du 'gro ba dga' ba'i zas can no//des sa'i dri bsnams shing sa'i ro myangs pa dang ldan pa dang zos pa can du 'gyur ro/ /de rnams kyi lus la sra rtsub dang lci bas kun du non cing 'od snang ba yang nub par gyur to/ /de nas mun pa'i rnam par gyur pa la/ nyi ma zla ba dag byung ngo / /dang po sa'i bcud zhag gi rnam pa dang /de nas sa zhag khur ba lta bu dang / de'i rjes su sa zhag gi nags tshal rnams rim gyis byung bar gyur to/ /shin tu zhen chags pas nub par gyur to/ /de ma thag tu ma rmos ma btsugs pa'i dri bzang ba myang bde ba'i 'bras skyes so/ /de la zos pas bshang gci'i lam dang skyes pa dang bud med kyi dbang po dag dang ldan pa 'byung bar 'gyur ro//skyes pa dang bud med dag gi dbyings tha dad par 'gyur ro/ /de'i rjes su sngon goms pa'i dbang gis tshul bzhin ma yin pa yid la byed pas 'dod pa la chags pa shin tu rgyas par gyur pa las skyes pa dang bud med de dag la phan tshun rjes su chags pas sgrub pa ma yin pa skyes pa nyid do//de'i phyi nas le lo las nye bar sdud par byed pa dang bdag gir byed pa bgyis pas 'bras sA lu brngas pa ni yang skye ba med par gyur to/ /de nas zhing rnams rnam par bgos te/ bdag gir 'dzin pa byas shing pha rol gyir byas so/ /de nas skyes bu khyad par du gyur pa la bsrung ba'i don du cha drug pa byin par gyur to//de zhing rnams kyi bdag po yin pas rje'u rigs zhes don dang mthun par ming btags so/ /skye bo mang po 'dun pa mthun pas mang pos bkur ba'o/ /'bangs rnams dge bar mdzad pas rgyal po'o/ /khyim las phyi rol yid la byed pas bram ze'o zhes ming rnams byung ngo //rgyal pos nye bar mnan pa'i rkun po rnams bdag gis de lta bu ma byas so zhes brdzun gyi tshig byung bar gyur to/ /de ltar 'jig rten chags bzhin pa'i mi rnams kyi tshe dpag tu med par gyur pa las/ mi dge ba'i las lam rgyas par gyur nas rim gyis tshe nyams te mthar tshe lo bcu pa rnams chos ma yin pa la chags pa yang ba'i 'dod pas zil gyis non par gyur pa/log pa'i chos la yongs su zhen pa rnams kyi gnod sems kun du 'phel bar gyur pa la/ 'jig pa'i bskal pa gsum 'byung bar 'gyur te/ 'di lta ste/ mtshon gyis 'jig pa dang /nad kyis 'jig pa dang / mu ges 'jig pa'o/ /de la lcug ma la sogs pa rnams mtshon char 'gyur ro/ /des sems can phan tshun gsod par byed pa ni mtshon gyis 'jig pa ste/ mtshon gyis srog gcod pa ni nyi ma bdun 'byung bar 'gyur ro/ /yang skyon de nyid kyis mi ma yin rnams kyis 'tshe ba gtong bar byed do//gang las sems can rnams nad kyis 'chi bar byed do/ /'di ni nad kyi 'jig pa ste/ zla ba bdun dang zhag bdun 'byung bar 'gyur ro/ /yang skyon de nyid kyis char mi 'bab pas mu ge 'byung ste/ de yang mi rnams bkres pa dang skom pa dang nyam chung bas 'tshogs nas 'chi bar 'gyur ro//gzhan dag ni rus pa dkar po bskol nas 'thung bar byed do/ /gzhan dag ni khyim gyi zang zing rnam par bgos te/ thur ma nye bar ston pas de ring ni khyim bdag pho'i bza' ba bya zhing sang ni khyim bdag mo'i zhes bya ba la sogs pa'o/ /gzhan dag so ba'i gnas kyi mtshams bu ga nas thur mas so ba'i 'bras bu phyung nas chu mang po bskol ba 'thung bar byed pa ni mu ges 'jig pa ste/lo bdun dang zla ba bdun dang nyi ma bdun 'byung bar 'gyur ro/ /de ltar bar gyi bskal pa so sor rdzogs pa na 'jig na gsum nyid do/ /ba lang spyod dang shar gyi lus 'phags po'i gnas su ni/mtshon dang nad dang mu ge rnams gzugs brnyan 'byung bar 'gyur ro/ /mtshon ni gnod sems drag po skye ba'o/ /nad ni mdog ngan pa dang nyam chung ba'o/ /mu ge ni bkres pa dang skom pa'o/ /de'i tshe yang kha dog dang stobs chung ba dang bkres pa dang skom pa las gnod sems drag po skye bar 'gyur ro//'dir chags pa rnams kyis gnas pa nyid ni bar gyi bskal pa dang po'o/ /de rnams tshe lo bcu pa las yar 'phel du 'gro ste/ rim gyis tshe lo stong phrag brgyad cur 'gyur ro/ /'phags pa gnas brtan pa ni yar 'phel du phyin pa na tshe lo dpag tu med pa yin no zhes zer ro//yang mar 'grib du phyin pa na tshe lo bcu pa'o/ /'di ni bar gyi bskal pa gnyis pa'o/ /de ltar ci srid du yar 'phel dang mar 'grib bco brgyad do/ /nyi shu pa la ni mar 'grib med de yar 'phel kho na'o/ /tshe lo bcu pa nas tshe lo stong phrag brgyad cu pa'i bar ro//bar gyi bskal pa 'di rnams kyi yar 'phel dang mar 'grib nyid kyi dus ci srid pa bar gyi bskal pa dang po'i mar 'grib kho na'i dus la'ang de srid do/ /tha ma'i bar gyi bskal pa yar 'phel ba'i dus la yang ngo / /des na bar gyi bskal pa thams cad ni dus mnyam pa'o//de la bar gyi bskal pa gcig gis snod chags pa'o/ /bar gyi bskal pa bcu dgur ni gnas pa'o/ /'jig rten chags nas bar gyi bskal pa nyi shur gnas pa'o/ /gcig gis snod rnam par nyams par 'gyur te/ bcu dgus stongs par 'gyur ro/ /'jig rten zhig nas bar gyi bskal pa nyi shur gnas pa'i bar gyi bskal pa brgyad cu la bskal pa chen po'o//'phags pa mang pos bkur ba'i sde pa'i lung las kyang 'di ltar rnam par gzhag ste/ 'di lta ste/ 'jig rten chags bzhin pa na dang po nyid du tshangs pa'i gzhal yas ni 'od gsal nas byung ba'o/ /de'i rjes su 'od gsal gyi lha'i ris nas lha'i bu gzhan dag 'phos nas rang gi las las skyes pa sku lus dkar ba tshangs pa zhes pa tshangs pa'i gzhal yas de nyid du skyes so//de'i tshe de bar gyi bskal pa bcur bsam gtan la snyoms par zhugs par gyur to/ /de nas bskal pa nyi shu'i mtha' ru tshangs pa de gcig pu skye bar gyur pas/kye ma 'di nyid du sems can gzhan dag kyang skye bar 'gyur ro zhes bsams pa dang / des bsams pa nyid kyis de ma thag tu rang rang gi las kyis de dag tu tshangs pa'i 'khor gyi lha rab tu mang ba kun du byung ngo / /de yang tshangs pa rang gis bsams ma thag nyid du byung ba de rnams mthong nas/bdag ni 'di rnams kyi skyed byed zhes log pa'i nga rgyal skyes par gyur to/ /dang por skyes pa rdzu 'phrul chen po dang ldan pa'i tshangs pa de dag tshangs 'khor gyi lha rnams kyis mthong nas kyang 'dis bdag skyed pas bdag gi byed pa po zhes khas blangs so/ /tshangs 'khor gyi lha de yang bskal pa gcig tu gnas so//de'i 'og tu bskal pa gcig gis tshangs ris kyi lha rnams byung ngo / /de nas bskal pa gcig gis tshangs pa mdun na 'don gyi lha'o/ /de nas bskal pa gcig gis 'dod pa'i gnas sa'i rtse mo gzhan 'phrul dbang byed kyi lha'o/ /de nas bskal pa gcig gis 'phrul dga'i lha'o//de nas bskal pa gcig gis dga' ldan gyi lha'o/ /de nas bskal pa gcig gis 'thab bral gyi lha'o/ /'di rnams thams cad ni rang rang gi las kyis gzhal yas khang dang bcas nas grub pa'o/ /de'i phyi nas 'thab bral gyi lha rnams kyis skye ba sngon dang sngon du byung ba'i mtha' rnams yang dag par dran nas/sngon dang sngon du nyams su myong bar gyur pa'i ri rab la sogs pa rnams mthong bar 'dod pas/ rang gi gzhal yas nas 'og tu 'ongs te/ nam mkha'i phyogs 'di na ni ri rab yod par gyur la/ ri rab kyi steng 'di na ni brgya byin lha rnams kyi dbang po'i grong khyer byung bar gyur to//'di ru gnya' shing 'dzin la sogs pa'i ri bo rgyud bdun byung bar gyur to/ /'di ru rgya mtsho byung ba'o/ /'di ru ni 'dzam bu'i gling gnas pa yin zhes pa rnams dran pa sngon du 'gro bas 'di nas de nas 'chags pa nas lus las rlung byung nas steng 'og dang 'khor bar rab tu brkyang ste shin tu che ba 'phel bar song bar gyur to//de'i tshe steng nas sems can rnams kyi thun mong gi las las skyes pa'i sprin mi zad pa'i sgra sgrogs pa glog gi phreng ba dang ldan pa las shin tu ches mang ba'i chu 'bab par gyur to/ / de'i tshe rlung de zab pa gting dpag dka' ba des kyang chu'i phung po'i 'og dang steng dang khor yug tu bskor te gzhi rten byas so/ /de nas rim gyis 'byung ba chen po'i snying por gyur pa la chu'i steng du 'dam gyi yol ba byung bar gyur to/ /'o ma bskol ba'i spris ma bzhin no/ /de'i 'og tu rlung des khu ba'i rang bzhin 'dam gyis g.yogs par gyur pa'i 'dag pa las/ri rab dang ri bo rgyud bdun dang khor yug dang rol mtsho bdun dang sa dang rgya mtsho la sogs pa'i rang bzhin snod kyi 'jig rten bzos par gyur to/ /de nas phyogs bzhir yongs su brtags pa nyid do/ /de la lho phyogs su 'dzam bu gling dang / nub phyogs su ba lang spyod kyi gling dang /byang phyogs su byang gi sgra mi snyan dang / shar phyogs su shar gyi lus 'phags so/ /de nas rim gyis las las skyes pa'i rlung gis sra ba nyid du byas te/ ri rab la sogs pa ri bo dgu rnams rin po che sna tshogs kyi rang bzhin du skyes so/ /sa gzhi ni 'dag pa'i rang bzhin kho na'o//de'i rjes su mtho ba dang dma' bar gyur te snod ma lus pa rnams kyi bar bar du stong par gyur pas so/ /yang thun mong gi las las skyes pa'i sprin las byung ba'i chu bo'i rgyun gyis yongs su gang bar gyur to/ /de nas ri rab kyi steng gru bzhi ru mthon du langs pa'i cog bzhi yang dag par grub po/ / de'i rjes su rgyal po chen po pa'i lha rnams ri rab kyi steng thob par mi 'gyur ba bsod nams chung ba rnams 'byung bar 'gyur ba dag gnas pa'i phyir/ ri rab kyi logs la bskor ba'i rnam pas 'khor mo bzhi'o/ /ming gzhan bang rim zhes brjod do/ /de'i rjes su thun mong ba'i las las ri rab kyi steng du dbang po dang bcas pa'i lha rnams yang dag par byung ngo //de'i rjes su ri rab kyi steng du brgya byin lha'i dbang po'i gnas grong khyer blta na sdug ces pa byung ngo / chos bzang lha'i 'dun sa la sogs pa rnam pa sna tshogs pa mtha' med pa byung bar gyur to/ /gnya' shing 'dzin la sogs pa'i ri rnams la yang rgyal chen pa'i lha rnams gnas pa dang /yul 'khor skyong la sogs pa rgyal po bzhis nang du brgyan pa'i 'khor mo bzhi kun du byung ngo / /'di dag thams cad bskal pa gcig gis te bco brgyad kyis chags so/ /de'i rjes su rang rang gi las las yang dag par byung ba nam mkha' la spyod pa bud med skyes pa/ma ning gi rnam par dbye ba spangs pa rang 'od dang ldan pa'i mi rnams skyes so/ /de nas dus ring ba na rang 'od can gang yang rung bas sa gzhi zhag gi rang bzhin khyad par can yid du 'ong ba'i dri dang ldan pa mthong ste chags par gyur pas sa zhag de rnams la mngon par 'tshal lo//de dang 'dra bar rang 'od can gzhan gyis kyang mngon par 'tshal lo/ /de nas kha zas kyi sbyor ba de dang 'dra bar lus kyi 'od zad par gyur cing lus lci ba nyid du gyur to/ /sa la spyod pa yang gyur to/ /de'i tshe mun pa chen por gyur pa la/ sems can rnams kyi thun mong gi las kyis dus gcig tu shar gyi lus 'phags su rgyu skar skag dang ldan par nyi ma dang /ba lang spyod du rgyu skar gro bzhin dang ldan par zla ba yang dag par byung ngo / /'di tsam gyi bskal pa gnyis rdzogs te bskal pa nyi shus 'chags pa'i gnas skabs rdzogs so// // 'di nas bzung ste chags pa'i gnas skabs brjod par bya ste/ de bzhin du sa la spyod pa rnams la nyi ma dang zla bas snang bar byed do/ /sa'i bcud zhag sbrang rtsi lta bu mang du zos pas kha dog ngan par gyur to/ /nyung ngu zos pas kha dog bzang du gyur to/ /de la kha dog bzang ba'i mis kha dog ngan pa'i mi rnams la brnyas pa byas so//de'i tshe yang zhag nub par gyur cing / sa'i zhag khur ba lta bu byung ngo / /sa'i zhag khur ba za yang gang mang du za ba de dman par gyur la/ nyung ngu za ba mchog tu gyur to/ /de kho na bzhin du yid dga' bar gyur pas/ nga rgyal 'phel zhing gya nom par gyur to//nga rgyal stobs ldan du gyur pas sa zhag khur ba yang log par gyur to/ /de'i rjes su sa gzhi las sbrang rtsi lta bu'i tshal byung ngo / /de yang skye bos zos pas nga rgyal 'phel bar gyur to/ /de nas sa zhag tshal yang log par gyur to/ /de rjes su spun ma med pa ma chags pa dri bzang ba shin tu 'jam pa ches myang bde ba sbrang rtsi lta bu dkar ba ma rmos pa'i 'bras sA lu rnams sa las skyes so//sA lu de las zos pas skyes pa dang bud med tha dad du byed pa'i rtags kyi gzhi byung bar gyur to/ /de'i tshe bud med kyi rtags byung ba mthong bas skye bo gzhan rnams smod par gyur to/ / de'i tshe ngo tsha dang bcas pa'i skyes pa dang bud med rnams rtags sgrib pa'i phyir yid bzhin gyi na bza' rnams byung ngo / /de nas skyes pa bud med rnams phan tshun rnams mthong bas gnyis sprod kyi chags pa skyes so/ /gzhan de rnams la shin tu chags pas 'khrig pa bsten par byas so/ /'khrig pa bsten pa'i mi de dag la gzhan rnams shin tu ches smod par byed do//de nas 'khrig pa'i tha snyad rab tu rgyas pas 'khrig pa'i don du sgrib pa'i phyir khang pa byas so/ /skye bo rnams kyis snga bar bza' ba'i phyir sA lu snga bar len no/ /dgongs mo bza' ba'i don du dgongs mo len no/ /de'i bsod nams dgongs mo rngas pa nang par skye bar gyur to//nang par rngas pa dgongs mo skye bar gyur to/ /de ltar mi rnams khyim du gnas pa'i mi rnams kha cig gis mi gzhan rnams la smras pa/ bza' ba'i dus su 'tshogs zhes smra'o/ /de'i tshe le lo'i rigs can mi 'ga' zhig gis yang 'bras sA lu mang du blangs te/ khyim gang bar byas so/ /de mthong nas gzhan rnams kyis kyang de bzhin du byas so/ /gzhan rnams kyis yang smras pa/ gang gis dang po nyid du sA lu rnams blangs zhes so/ /gzhan gyis yang smras pa/ 'dis so zhes so/ /de bzhin du thams cad kyis de bzhin du byas pas 'bras sA lu yang nub par gyur to//de nas grangs bzhin mi rnams kyis/ /bskal pa gnyis gnyis bgrod pa ni/ /zhag khur tshal dang sA lu'i zas/ /des na bskal pa brgyad song ngo / /de nas bskal pa dgu pa 'jug pa na/ shin tu chags pas 'bras sA lu dkar po med cing sbun ma dang bcas pa chags pa dang bcas pa lus la yang shin tu phan pa ma yin pa byung bar gyur to//de'i tshe skye bo rnams kyis 'bras sA lu dkar ba ma yin pa la sogs pa skyon mthong bas smod par byed de/ ngan pa 'di bdag cag rnams kyi tshul ma yin pa yin no zhes so/ /dang po nyid du sbrang rtsi las ches lhag pa'i sa'i bcud zhag med par gyur/ de nas sbrang rtsi las lhag pa'i sa'i bcud khur ba med par gyur/de nas sbrang chung rtsi lta bu'i tshal yang nub par gyur/ shin tu chags pas mchog tu dkar ba la sogs pa'i yon tan dang ldan pa 'bras sA lu yang rnam par nyams so/ /kyi hud bdag ni chags pas rnam par nyams so/ /bdag da ni legs par char byas te bgo bar byas na phun sum tshogs pa bstan par 'gyur ro zhes so//de nas dbang po'i dkyil du khyim byas te sa rnam par bgo bar byas so/ /de'i sa'i bgo ba byas pa na/ skyes bu re re dpag tshad drug gi tshad tsam zhing bdag gir bzung ngo / /yang sa chen po la dpag tshad bzhi bzhi re re la byin to//de nas yang chos ma yin pa la gzhol bas yid bzhin gyi na bza' nub par gyur to/ /de'i tshe de rnams kyi thun mong gi las las ras bal skyes so/ /de nas chags pa'i rigs can mi 'ga' zhig gis gzhan gyi sA lu rku ba byas so/ /sA lu rku bar byed pa de la/ / mi 'ga' zhig gis yang smras pa/ kye khyod kyis spyod pa ngan pa dang 'jug tshul ngan pa byas so/ /skye bo thams cad ni lugs nges pas gnas te/ khyod la yang zhing rmos pa sA lu yod do/ /des na tshul ma yin pa 'di las log ces so/ /sA lu rku byed de yang sA lu rku bar mi bya'o zhes dam bcas kyang /yang dang yang du gzhan rnams kyi sA lu rku bar byed do/ /des de bzhin du byas pas skyes bu de la skyes bu gzhan rnams kyis shin tu rnam par btsogs so/ /de'i tshe skye bo thams cad kyis rka lag la sogs par mtshon chas brgyab pa'i rkun po'i lus de mthong bas/ skye bo gzhan rnams kyis smod par byed do//gzhan gyi nor phrog par byed pa ni sdug bsngal lo/ /de'i rgyu mtshan gyis phan tshun rtsod pa'o/ /rgyu de las ca co chen po yang byung ngo / /de'i tshe yang mi rnams thams cad kyis mi bde bas 'tshogs te phan tshun bka' gros mdzad do/ /de ni 'di ltar byed par rigs te/'di ltar mi gang zhig dge ba'i tshul lugs nges pa de las mi 'da' ba'i skyes bu shin tu khyad par can mi rnams kyi bdag por bya'o/ /gang dang rjes su mthun pa'i tshar gcod byed pa nam yang rnam par mi 'gyur ba'o/ /skye bo thams cad kyi 'thad pa ji lta ba bzhin du tshar gcod pa dang / rjes su 'dzin pa byed pa de'i tshul lugs ma yin pas gos par ma gyur pa yon tan thams cad kyis lus can rnams kyi bla mar gyur pa'o/ /thams cad 'di dag gi rjes su yi rang zhing rjes su 'dun par gyur to/ /de nas skyes bu des dam pa 'ga' zhig gi drung du smras pa/ gang las mi rnams da ltar 'thad pa ma yin pa la 'jug pa'i skyon dang /gang yang nyin re bzhin du 'byor pa nyams par gyur pa ni khyod kyis mkhyen no/ /'di lta bu mi rnams kyi mi 'thad pa bzlog pa la khyod ma gtogs pa 'ga' la nus pa med do/ /skye bo 'di rnams kyi 'bras sA lu drug cha khyod la ster bar 'gyur ro//khyod kyis mi 'di rnams 'thad pa ci lta ba bzhin du yongs su skyongs shig /sa 'di yang srungs shig /de'i tshe skyes bu shin tu khyad par can de/ tshig de dag khas blangs shing skye bo de rnams kyi bsam pa'i don yongs su rdzogs par bya'o/ /de ma thag tu mi de rnams kyis skyes bu mchog de la rgyal por dbang bskur bas mngon par bkur ro//de skye bo'i tshogs chen pos yang dag par 'dun pa dang / dga' bar mdzad pas rgyal po'o/ /tshig bar ma phyis te mang pos bkur ba chen po zhes pa'i rgyal po byung bar gyur to/ /de'i ming zhing rnams kyi bdag po yin pa nyid kyis k+She tri ya zhes par gyur to//rgyal po'i dpal 'byor kun du thob bo/ /mi srun pa'i skye bo tshar gcod cing zhi legs skye bo rjes su 'dzin par byed cing / sa rnams kyi bdag por grags nas mi phan pa spong zhing phan pa sgrub po/ /tshul ma yin pa btang zhing rnam par 'dzin no/ /de nas skye bo gzhan yang tshul ma yin pa byed cing gzhan dag tshul bzhin byed do//de'i rjes su skye bo rnams skyon rnams kyi 'byung gnas 'dod chags skyes so/ /de'i rjes su khong khro skyes so/ /de'i rjes su nga rgyal yang dag par byung ngo / /de'i rjes su dge ba'i rjes su mthun pa yang dag pa ji lta rnams sbed par byed pa'i rmongs pa byung ngo //de rjes su ma byin par len pa byung ngo / /de nas gzhan gyi bud med la 'gro ba'o/ /de nas brdzun smra ba'o/ /de rjes su dben no/ /de nas tshig rtsub pa'o/ /de nas tshig kyal pa'o/ /de nas gzhan mnar ba'i mtshan ma gnod sems so/ /de nas gzhan gyi nor bslu ba'i mtshan ma brnab sems so//de nas lta ba log pa byung ngo / /rnam pa de lta bur 'tshe ba la sogs pa skyon rnams yongs su 'dzin pa'i tshogs pa las byung ngo / /de ltar kha cig phyogs kyi 'phel ba mthong nas sems skyo bas yongs su 'dzin pa spangs te nags su gnas par gyur to//de ni sdig pa kun mi skyed pas pra h+ma Na zhes 'jig rten rnams brjod do/ /de rnams kyi nang nas gang zhig bsam gtan yongs su spangs te/ rang nyid kyis sngags kyi tshig spros nas 'don pa de las 'don byed ces pa'i ming thob par gyur to/ /gang zhig nags su gnas par mi dga' ba lhag par ches gnas la dga' ba zhing gi las la shin tu spyod pa de la dmangs rigs zhes 'jig rten gyi ming du btags so//gzhan dag khyim la dga' zhing bzo'i cha sna tshogs la rab tu sbyor ba de la gdol rigs zhes 'jig rten gyi ming du byas so/ /de ltar rigs bzhi rnams la gang zhig rku ba de la gcig tu dga' ba de la gtum po zhes pa'i de rnams kyis gnod pa byed pas gtum po zhes 'jig rten gyi ming du btags so//de rjes su 'bras sA lu rnams bcud nyams pas smad par bya bar 'gyur ro/ /de rjes su sA lu brngas pa'i sa phyogs su rjes su bza' ba rnam pa sna tshogs byung bar gyur to//'di lta ste/ nas dang gro dang til dang rgya sran dang mon sran rde'u dang mon sran gre'u la sogs pa'o/ /de la til ni bcud kyis shin tu gang ba dang ldan pas chang bas bzang bas mar nag gi rgyun gsum 'dzag par gyur to/ /nas la sogs pa rnams kyang sems can de rnams kyi bsod nams las de dang rjes su mthun pa'i bcud byung bar gyur to//de'i rjes su pags pa dang lo ma la sogs pa dang bral ba gya nom pa mngar ba rjes su mthun pa'i bcud can bu ram shing mchog gis sa steng rnam par brgyan par gyur to/ /de rjes su rdzus skyes kyi ba mo rang nyid kyis 'o ma'i rgyun rab tu 'bab pa byung ngo //de'i tshe 'o ma'i rgyun 'bab pa'i g.yo bas 'o ma las mar sar byung bar gyur to/ /mar gsar las mar gyi nying khu byung ngo / /zhun mar las mar gyi snying po byung ngo / /de rjes su rang dul ba glang po che dang rta la sogs pa theg pa'i khyad par rnams byung bar gyur to/ /de'i tshe dpal ldan mang pos bkur ba'i mi bdag la rin po che bdun byung bar gyur to//'di lta ste/ bud med rin po che dang / skyes bu rin po che dang / rta rin po che dang / glang rin po che dang / 'khor lo rin po che dang / khyim bdag rin po che dang / blon po rin po che'o/ /de'i tshe rgyal po mang pos bkur ba chen po phan 'dogs pa ma lus pa dang ldan pas/skye bo ma lus pa'i 'dod pa ma yin pa'i rnam pa rnams nub par gyur to/ /des na 'bangs rnams yo byad thams cad phun sum tshogs pas shin tu ring ba nyid du bde bar gyur to/ /sems can de rnams kyi lus dbyibs la cha mdzes pa dge ba'i snang ba'i 'od kyi tshul gyis rnam par brgyan par gyur to//sems can de rnams myur du 'chi ba yang byung ngo / /de nas dus ring du gyur pa na rgyal po chen po mang pos bkur ba shi bar gyur to/ /de'i bu dang tsha bo la sogs pa rgyal bu mang du byung zhing shi bar gyur to/ / de nas de'i 'khor rnams thams cad shi'o/ /mi bdag la mi bdag rnams kyis dbang rnams bskur nas mi yi bdag po'i rgyud ni ding sang gi bar du yang rjes su 'jug go/ /de ltar sa rnams dag kyang rim gyis rnyings par gyur cing rnyings par gyur nas phun sum tshogs pa yongs su spangs shing yongs su spangs nas gsar ba 'grib par 'gyur ba dang 'brel lo//yang gsungs te/ de ltar yang / bdag po dang bral bud med lta bu pa rnams ni/ /lhag pa'i dpal dang rnam par bral zhing rnyings par gyur/ /zhes so/ /de'i tshe lus can lhag ma rnams kyis chos dang bral bar nye bar 'ongs pa dang /yo byad kyi tshogs pa zad pa mthong nas thong lcags dang bcas pa'i gshol stobs kyi glang po lta bur bdag nyid kyis khur te brtson par byed do/ /de'i tshe stobs kyi glang po'i tshogs kyis bdag po'i mi de rnams la 'di skad smras so/ /gshol thong 'di dag ni spongs shig bdag nyid kyis bskur bar bya'o//'bras bu'i dus su 'bras bu'i rnam pa'i cha rnams byin cig ces so/ /de bzhin du khas blangs pa byas nas de nas de dag zhing pa ltar zhing rmo bar byed do/ /mi rnams kyis stobs kyi glang po la bgos pa'i cha ster ro/ /de bzhin du rta dang glang po che la sogs pa rnams kyang ci dang ci mthong ba de dang de ltar smras te mi rnams kyi zhon pa la sogs pa rnams su gyur to//de'i tshe ba rnams kyi 'o ma rang nyid kyis mi ster zhing sbyor ba de dang der 'o ma babs par gyur cing mi rnams 'tshogs nas 'jo bar byed par gyur to/ /bu ram shing yang lo mas rang gi lus la bsgribs pa'i rnam par gyur to//til la sogs pa'i 'bru rnams kyang rim gyis bcud nyams pa nyid du gyur to/ /de ltar bza' ston rnams kyang rnam par nyams pas mi rnams kyi tshe la sogs pa yang 'grib par gyur to/ /de'i rjes su shin tu rgyas pas stobs kyi glang po la zhing thog gi bgos pa'i skal ba mi ster bar gyur to//de nas lo thog gi bgos pa'i cha ma thob par gyur pas stobs kyi glang po gshol thong khur ba la g.yo sgyu rnam par 'dzin par gyur to/ /mi rnams kyis stobs ldan glang rnams kyi g.yo sgyu mthong nas de rnams kyi sna phug go/ /de'i tshe stobs ldan glang rnams kyi smra ba yang nub par gyur to//de'i stobs kyis khyu mchog rnams snying rje med pa'i mi rnams kyi dbang du song bar gyur cing bskur dka' ba'i thong gshol dang gzhan yang khur khur bar byed do/ /de bzhin du rta dang glang po la sogs pa yang rang nyid kyis dul ba med par gyur to//nges pa dang ma nges pa'i dbyu gu bsnun pas kha phyir phyogs par gyur te brtan por gyur pa'i thag gus bcings so/ /de nas sngon ster ba sngon du 'gro bas ba glang skyong gis ba glang 'jo bar gyur to/ /bu ram shing yang lcags pas g.yogs shing rab tu brtson pas bcud khu ba byung bar gyur to//til la sogs pa yang ches bcud dang bral bar gyur to/ /de bzhin du yang 'jig rten mi rnams de 'dra bar bza' ba la sogs pa ro dang ches bral bar gyur cing mi rnams yang dang yang du zad par gyur pa thob bo/ /de'i rjes su rim gyis snyigs ma lngas sun phyung ba'i 'jig rten ni rab tu 'jug ste/gang skyes bu dam par 'dun pa mthun pa'i skyes bu de lta ba log pas dregs pa chos ma yin pa'i lam mi rnams la ston par byed do/ /mi de rnams kyang chos ma yin pa rjes su 'gro ba'i phongs pas gdungs pa/ 'tsho ba'i yo byad don du ches sred pa zhing las dang phyugs skyong dang g.yog dang nyo tshong la sogs rab tu sgrub par 'gyur ro//de rjes su yo byad tshogs pa rnams ches shin tu rnam par nyams so/ /ngal ba chen pos bde ba'i cha tsam ci ltar yang sgrub par ma gyur to/ /ngal ba chen pos bskyed pa'i til dang bu ram shing la sogs pa dang / ba lang dang ma he mi la sogs pa ngal ba chen pos bcud rnams phyung bar gyur to//ngal ba chen pos bskyed pa'i 'bru la sogs pa yang sra ba la sogs pa'i skyon dang ldan pa nyid du byung bar gyur to/ /de nas mi rnams bza' ba dma' bas bgrod pas tshe la sogs pa shin tu ches yongs su nyams pa rab tu byung ngo / /de rjes su yul dang yul du ches ring bar grong dang grong khyer dang grong rdal la sogs pa mi rnams kyi gnas kyi rnam par spras so//de ltar dus dang dus rnams yongs su 'gyur bar gyur pa nyid na/ sangs rgyas bcom ldan 'das 'khor ba 'jig ces pa byung bar gyur to/ /de nas de dag yongs su mya ngan las 'das nas dus ches ring ba na de bzhin gshegs pa gser thub byung ngo //de nas de dag yongs su mya ngan las 'das nas dus ches ring bar gyur pa na thub pa chen po 'od srungs zhes pa byung bar gyur to/ /de dag yongs su mya ngan las 'das nas ches ring ba na rtsod ldan gyi dus zhes pa dus tha ma la bdag cag gi ston pa de bzhin gshegs pa shAkya thub pa zhes bya ba 'jig rten du byung ngo //ston pa bcom ldan 'das shAkya thub pa de ni 'gro ba rnams kyi sdig pa'i sgrub pa mchog tu 'chags pa'o/ /bcom ldan 'das de yang 'gro ba rnams kyi 'gro ba drug gi 'khor ba'i sdug bsngal rnam par nyams par byed pa'i thar pa'i lam rab tu gsal bar byed pa'o//lam des mtha' med pa'i dam pa'i skye bo'i tshogs rnams kyi sdug bsngal ma lus pa nye bar zhi ba'i rang bzhin thar pa'i grong ston par byed pa'o/ /de ltar gyur pa'i lam mchog tu gyur pa lha dang mi rnams la nye bar bstan to//de bzhin gshegs pa sgron ma des dam pa'i chos kyi sgron ma rgyud du bzhag nas rang nyid yongs su mya ngan las 'das so/ /de bzhin gshegs pa yongs su mya ngan las 'das nas zla ba gnyis pa A par+ha'i zla ba dkar po'i phyogs kyi bcu gsum las 'dod chags dang bral ba'i dge slong lnga brgyas sangs rgyas kyi bstan pa lo ma bdun pa'i phug tu yang dag par bsdu bar mdzad do//yang de bzhin gshegs pa yongs su mya ngan las 'das nas lo brgyar gyur pa na 'dod chags dang bral ba dge slong bdun brgyas chos yang dag par bsdu ba mdzad do//yang de bzhin gshegs pa yongs su mya ngan las 'das nas lo bzhi brgya na dka' thub kyi dge 'dun la dge 'dun tha dad du gyur pas rang rang gi sde par gnas pa la gnas ma bu pA ra bAt+sa pu tras sde pa gcig gi tshe bsdus so/ /de nas bzung ste sde pa de las chos smra byed bAt+si pu tra zhes brjod do//yang de bzhin gshegs pa yongs su mya ngan las 'das nas lo bdun brgya na gnas brtan thub pa mang pos bkur bas sde pa de'i lung nyid bsdu ba mdzad do/ /de nas bzung ste sde pa de la mang pos bkur ba'i sde pa zhes brjod do/ /yang de bzhin gshegs pa yongs su mya ngan las 'das nas lo brgyad brgya na gnas brtan b+hu ti ka dang sangs rgyas bshes gnyen gyis sde pa de'i lung rnams bsdu ba nyid du byas so//'di ni mang pos bkur ba'i sde pa'i chos bsdu ba lan lnga zhes brjod do/ /b+hu ti ka dang sangs rgyas bshes gnyen de gnyis kyis/ sbun pa byung ba nas bzung ste/'di ni chags pa'i bskal pa dgu po'i zhes gsungs so/ /gtso bo'i don brjod par bya ste/ da lta ni da ni til bur shing zho la sogs pa las rim pa bzhin du mar nag khu ba mar la sogs pa'i snying po rnams shin tu ches nyung ba skye bar 'gyur ro/ /til la sogs pa rnams sems can gyi skal ba'i dbang las ding sang yang 'byung bar shes par bya'o//ma 'ongs pa'i bskal pa'i mtha' ru mu ge nad mtshon zhes pa 'jig pa gsum gyi me 'byung bar 'gyur ba'i du ba 'thul ba lta bu da lta mtshon pa'o/ /da lta da ni yang mi rnams bdag nye bar mnar ba'i phyir ser sna nyes spyod khro ba la sogs pa'i bud shing gis 'jig pa'i me de rnams kun du 'bar bar byed do//gang las da ni char che ba char med pa phyogs gcig tu 'bab pa dus ma yin pa'i char la sogs pa de dag gis mu ge 'phel bar byed do/ /des na mu ge'i 'jig pa nges par 'byung bar 'gyur ro//nad dang mtshon gyi 'jig pa ni 'di dag gi lhan cig pa'i 'khor yin no/ /de la mu ge can gyi 'jig rten na bza' ba la sogs pa ches rnyed dka' ba 'byung bar 'gyur ro/ /de'i tshe yang gzhan gyi nor len pa dang lus can rnams bsad nas shas 'tsho ba'i bskal pa 'byung bar 'gyur ro//yul ljongs grong khyer grong rdal la sogs pa ni gnas pa'i 'jig rten yang yo byad sgrub par dka' ba dang rim gyis zad par 'gyur ro/ /de phyis mi 'thad pa 'jug pa'i mi rnams kyis dus drug po spang bar gyur cing kun du spyod pas yo byad sun 'byin par 'gyur ro/ / de nas nye bar 'tshe ba dang ldan pa'i sdig pa yongs su smin pa thob pas sha za'i tshogs rjes su spyod pas na nad rnam pa sna tshogs pa 'byung bar 'gyur ro/ /des na gang gi tshe nad sna tshogs dang sha za sna tshogs kyis rab tu gtses pa'i mi rnams de'i tshe nad la sogs pa zhi ba'i don du/ 'tshe ba'i bdag nyid kyis sbyin sreg byas pas nye bar 'tshe ba 'phel bar 'gyur ro//'dir yul 'khor grong khyer la sogs pa rnams su nad kyis mi rnams zad par 'gyur ro/ /'di phyis nye bar longs spyod pa tshol ba'i mi rnams phan tshun 'tshe ba'i sems pas mtsho chen po ldang bar 'gyur ro/ /'di lta ste/ shar dang byang na yod pa dang /nub dang lho na yod pa'i mi'i bdag po rnams kyis/ phan tshun nye bar nyed pa'i don du mngon par bgrod pa 'byung bar 'gyur ro/ /rgyal po rnams ni phan tshun kun du 'khrug pa byas te rgyal ba dang pham pa yang dang yang du nyams su len par 'gyur ro/ /chags pa'i bud shing gis bslang ba'i khro ba'i mes rgyal po rnams phan tshun bsreg cing /rang gi dge ba rnams yongs su zad cing rnam par nyams par byed do/ /lhag ma yul dang grong dang rgyud rnams phan tshun rnam par nyams par byed do/ /las ngan pa las skyes pas rtswa la sogs pa la reg pas mtshon du 'gyur ba na gnyis gsum mam lnga drug yang phan tshun spun par 'gyur ro//lo dang / zla ba dang nyi ma rnams rim pa bzhin du bdun bdun bdun mu ge dang nad dang mtshon gyi 'jig pa gsum mo/ /de nas 'jig pa gsum gyi de ma thag tu lhag ma lus pa'i mi rnams gzugs srid du dang zheng du dang stobs la sogs pa rnams nyams pas tshe lo bcu pa lo bdun cur gnas par 'gyur ro//'dis na sdig pa la gcig tu gzhol ba'i mi'i 'jig rten rab tu mang ba rnams ches cher dman pa'i ngan 'gror 'gro bar 'gyur ro/ /'jig pa gsum po rnams 'dir nye bar 'das nas/mi rnams kyi nang na kha cig 'ga' zhig tu gzhan rnam par bral bar mthong nas/ mi rnams byams pa'i bsam pa skye bar 'gyur ro/ /sdig pa chen po'i dus su yang legs pa'i lam ma dor ba 'ga' zhig gis kyang lhag ma lus pa mthong nas skye bo rgyun chad par gyur cig ces bsam zhing de rnams bsrung bar 'gyur ro//de'i tshe mi de rnams byams pa'i rang bzhin gyis sems bskyed pas bskal pa'i mtha' yang rgyas par mi 'gyur ro/ /de'i rjes su bskal pa bcu pa mgo 'dzug par 'gyur ro/ /de'i tshe mi rnams grogs ltar phan tshun mthong bas dga' ba dang ldan par 'gyur ro//mi de rnams yang dag par 'dzin par byed pa bskal pa bcu par 'byung bar 'gyur ro/ /de'i tshe gdon yang dge ba'i lam la bgrod par 'gyur ro/ /dus tshigs kyang nyes pa dang bral ba 'byung bar 'gyur ro/ /de bzhin du nang gi bdag nyid kyi dngos po rnams rang bzhin mnyam par gyur pa na chos kyi dbang phyug 'byung bar 'gyur ro//bde ba yang phun sum tshogs par 'gro bar 'gyur ro/ /de las mi las mi skye bar 'gyur ro/ /de las mi gzhan/ de las yang mi gzhan no/ /de las yang ni gzhan te rim gyis mi rnams tshe lo stong phrag nyi shur 'byung bar 'gyur ro//'di ni yar 'phel chung ngu'o/ /de nas rim gyis stong phrag bzhi bcu pa'i mi 'byung bar 'gyur ro/ /'di ni yar 'phel 'bring po'o/ /yang rim gyis tshe lo stong phrag brgyad cu pa'i mi rnams 'byung bar 'gyur ro/ /'di ni yar 'phel chen po'o/ /de la yar 'phel rtse mor phyin pa'i mi rnams kyi khyim ni dpal mo bzhin du 'phel ba nyid do//bu mo lo lnga brgya na khyo la gtong bar 'gyur ro/ /mi de rnams tshe lo dang mthun pa 'byung ba'i gzugs la sogs pa legs par 'byung bar 'gyur ro/ /de'i tshe khyim bya'i brjod pa'i yul mi rnams kyi gnas sa gzhi ma lus pa grong dang grong khyer la sogs pa yongs su gang bar 'byung bar 'gyur ro//sa chen pos mi gtsang ba 'og tu byung ste gtsang sbra can 'byung bar 'gyur ro/ /mi rnams bde ba dang lhan cig pa'i phun sum tshogs pas yang dag par tshim par 'gyur zhing sdug bsngal dran par mi 'gyur ro//bsil dro la sogs pa bkres rgas yongs su longs spyod pa rnams 'dod pa tsam byed pa ste/ sdug bsngal yin yang de'i tshe sdug bsngal gyi tha snyad tsam mo/ /'di ni mi rnams yar 'phel chen po thob pa ste/ lo stong dang dpag tu med pa 'phel bar 'gyur ro/ /yang de nas yar 'phel chen mo nas mi rnams kyi tshe nyams par 'gyur ro//de nas mi rnams chos ma yin pas ches nyams pas yang sngon bzhin du tshe lo bcu pa nyid thob par 'gyur ro/ /de'i tshe yang bskal pa bcu par rgyab tu gyur pa 'byung bar 'gyur ro/ /ci ltar bskal pa bcu pa thog mtha' bde sdug ldan pa de bzhin du gzhan yang 'byung bar 'gyur ba bskal pa bcu rnams so sor thog mtha' bde sdug ldan pa 'byung bar 'gyur ro//des na nyi ma shar ba nas bzung ste/ bskal pa nyi shu ni chags pa'i 'jig rten gnas pa'o zhes rnam par gzhag pa'o/ /'chags pa'i bskal pa nyi shu'i tha ma la bar gyi 'jig pa gsum gyi de ma thag tu lhag ma lus pa'i mi rnams phan tshun dga' ba'i bsam pa 'byung bar 'gyur ro//de'i tshe byams pas nye bar bsags pa'i las dbang las phyi rol gyi dngos po yang ches nyams dga' bar 'byung bar 'gyur ro/ /byams pas kun du bskyed pa'i phun sum tshogs pa me'i dus las sngon du nyams su myong bar 'gyur ro//ngan 'gro'i sems can rnams kyang phan tshun byams pa chen po bskrun te/ kha cig lha rnams su nye bar skye bar 'gyur ro/ /de'i tshe 'chad par byed pa'i mi mu stegs kyi tshogs kyis sam/ 'od gsal gyi lha yang smra bar 'gyur te/ chos kyi rgyal po skyes bu bzhin no/ /de las chos thos te 'dod pa la rnam par smad de dga' ba dang ldan pa'i bsam gtan gnyis pa yang dag par bskyed de/bsam gtan gnyis pa'i sa las gzhan ting nge 'dzin rnam par spangs te/ lha'i ris de nyid du 'od gsal du 'gro bar 'gyur ro/ /'di ni bskal pa bcus stong gi 'jig rten gyi sems can rnams 'jig rten par 'gyur ba'o//de'i rjes su bskal pa phyed dang bcas pa'i gcig tu snod kyi 'jig rten stong par ro/ /lha rnams char 'bebs par mi 'gyur ro/ /de'i tshe shing gel pa nyal stong la sogs pa yongs su skams par 'gyur ro/ /de rjes su sum cu rtsa gsum pa'i lha'i ris su nyi ma gnyis pa sngon ma'i gnyis 'gyur gyi tshad kun du shar te 'og tu ma lus pa sreg pa ni phyed dang bcas pa'i bskal pa gcig gis so//de'i tshe 'bab chu la sogs pa chu bzhi thams cad skams par 'gyur ro/ /de rjes su 'thab bral lha'i rtse mo ru nyi ma gsum pa nyi ma gnyis pa'i nyis 'gyur gyi tshad 'og tu sreg pa ni phyed dang bcas pa'i bskal pa gcig gis so//de'i tshe mtsho chen po ma dros pa la sogs pa yongs su skams par 'gyur ro/ /de'i rjes su nyi ma bzhi pa nyi ma gsum pa'i nyis 'gyur gyi tshad dga' ldan gyi rtse mo ru kun du shar te phyed dang bcas pa'i bskal pa gcig gis 'og tu sreg par byed do//de'i tshe chu bo chen po bdun rnam par skams par 'gyur ro/ /de'i rjes su nyi ma lnga pa nyi ma bzhi pa'i nyis 'gyur gyi tshad 'phrul dga'i rtse mo ru kun du shar te phyed dang bcas pa'i bskal pa gcig gis 'og tu sreg par byed do/ /de'i tshe rgya mtsho chen po thams cad lhag ma dang bcas pa rnam par skams par 'gyur te/rim gyis gan rkyal gyi lus su 'byung bar 'gyur ro/ /de'i rjes su nyi ma drug pa nyi ma lnga pa'i nyis 'gyur gyi tshad gzhan 'phrul dbang byed kyi rtse la kun du shar te phyed dang bcas pa'i bskal pa gcig gis 'og tu sreg par byed do/ /de'i tshe ri rab la sogs pa'i ri rnams dang sa chen po rnams las du ba 'thul bar 'gyur ro//de'i rjes su nyi ma bdun pa nyi ma drug pa'i nyis 'gyur gyi tshad bsam gtan dang po'i rtse mo la shar te/ bskal pa gcig gis 'og tu thams cad lhag ma dang bcas pa sreg par byed do/ /de'i tshe bsam gtan dang po'i bar du thal ba'i lhag ma yang ma lus par 'gyur ro//de ltar thams cad bsregs te rang nyid kyis nye bar zhi bar 'gyur te/ bud shing ma tshang ba'i me bzhin no/ /dus gcig tu stong gi 'jig rten gyi khams 'jig par 'gyur ro/ /me chu rlung gi 'jig pa gsum ni bar chad med par rim gyis gsum ka 'byung ba'i nges pa med de/me'i 'jig pa 'byung ba'i tshe chu rlung gi 'jig pa mi 'byung la/ chus 'jig pa na me rlung gi 'jig pa mi 'byung ba'i phyir ro/ /de bzhin du rlung yang ngo / /'jig pa re re la bar gyi bskal pa nyi shu'o/ /des na bar gyi bskal pa nyi shu 'jig pa'i bskal pa chen po'o//de bzhin du gsungs te/ tshangs pa gcig pu bskal pa bcu ru gnas/ /de yi 'khor gnas bskal pa gcig gis bzhengs/ /tshangs ris nas ni 'thab bral mthar thug pa/ /so sor bskal pa re res 'byung bar 'gyur/ /sa gzhi ri sogs bskal pa gcig gis bzhengs//rang nyid 'od zer bskal pa gnyis kyis bzhengs/ /nyi ma shar ba la ni rab tu reg /'di ltar 'chags bzhin pa ste nyi shu'o/ /sa yi zhag dang khur ba tshal dang ni/ /sA lu 'bras te 'di rnams bde gnas ni/ /brgyad de gzhan yang thog mtha' bde sdug 'gyur//spun ma byung ba la sogs bcu gnyis ni/ /'di rnams chags nas 'jig pa nyi shu'o/ /de nas bskal pa bcu yis sems can rnams/ /bde ba ldan par kun du 'jig par 'gyur/ /de nas phyed bcas bskal par char med do/ /de nas gzhan du nyi ma lnga rnams la/ /so so la ni bskal pa gcig dang phyed//rtse la shar te 'og tu sreg par byed/ /bskal pa gcig gis bskal pa bdun pa yi/ /thams cad sreg par byed de nyi shu'o/ /kun du 'jig par 'gyur te 'di rnams ni/ /des na 'jig pa'i bskal pa nyi shu nyid/ /de'i rjes su de ltar gnas rnams stong pa nam mkha' tsam du bskal pa nyi shu nyid du gnas par 'gyur ro//de nas yang sngon bzhin du 'chags pa la sogs pa thams cad do/ /de rjes su 'ga' zhig gi tshe bsam gtan gnyis na gnas pa'i sems can rnams dga' ba dang bcas pa don gyi 'dod pa sun phyung ste/ bsam gtan gsum pa yang dag par bskyed de/de nas 'phos te bsam gtan gsum par kun du skye'o/ /de rjes su de ru zla ba bdun 'char bar 'gyur ro/ /zla ba shar ba'i rkyen gyis chu kun du 'khor bar rab tu 'phel te/ bsam gtan gnyis pa khor yug tu nyams par 'gyur ro/ /de rjes su bde ba dang bcas pa'i 'dod pa ni skyon mang ba snang ba zhes rig ste/bsam gtan gsum pa gnas pa'i sems can rnams bsam gtan bzhi pa yang dag par bskyed de/ de'i rkyen gyis yang bsam gtan gsum pa nas 'phos te/ bsam gtan bzhi pa 'jig pa'i rtse mo 'bras bu che ba zhes pa'i lha'i ris su kun du nye bar skye'o//de'i tshe snod kyi 'jig rten ma lus par zhig par gyur pa na/ shin tu drag pa'i rlung kun du 'khor bar rab tu rgyu'o/ /rlung des thams cad rnam par bshig nas 'jig pa gsum rdzogs par 'byung bar 'gyur ro/ /'di lta ste/ mes 'jig pa dang / chus 'jig pa dang / rlung gis 'jig pa'o//'jig pa gsum po 'dis ni 'jig pa gnyis rdzogs par gyur te/ 'di lta ste/ sems can 'jig pa dang / snod 'jig pa'o/ /de ltar 'jig pa lhag ma la mi mjed ces pa'i 'jig rten gyi khams lhag ma dang bcas pa rnam par rlag par byed do/ /'jig rten gyi khams gzhan yang dus ci lta ba bzhin du de bzhin du 'jig pa dang 'chags pa'i chos can no//yang gsungs te/ 'jig rten gsum gyi mi mjed ces pa'i gnas dang sems can ma lus pa/ /kun kyang med par 'gyur zhing gang 'di 'jig pa rnam gsum g.yang gi dbang / /de ltar gzhan yang khams dang sems can mtha' med gnas rnams zad par 'gyur//des na 'dus byas brtan yod min zhes thub pa'i bstan pa bden pa nyid ces so/ /bskal pa'i tshad kyang / 'phang dang logs la rgyang grags gnyis yongs su gzhal ba'i rgyu bzhi pa byas te/ nyungs kar gyis spyi phud med par yongs su gang bar byas nas/gnas de nas lo brgya brgyar gyur pa na/ nyungs kar re re phyung bas nyungs kar thams cad yongs su zad pa tsam gyis 'dzad par 'gyur ba'i dus de bar gyi bskal pa'o/ /bar gyi bskal pa des 'jig pa dang chags pa'i rnam par gzhag pa ni bar gyi bskal pa brgyad cur 'gyur ba yin no//bar gyi bskal pa brgyad cu ni bskal pa chen po'o/ /yang na bskal pa chen po yongs su gzhal ba ni 'di lta ste/ 'phang dang 'khor bar dpag tshad kyis yongs su gzhal ba'i gnas spyi phud du nyungs kar gyis yongs su gang bar byas te/ gnas de las lo brgya brgya na nyungs kar re re phyung bas nyungs kar ma lus par zad par dus ci srid kyis 'gyur ba'i dus de srid la bskal pa chen po'o zhes so/ /de bzhin du bzang po la sogs pa'i bskal pa chen po ni grangs kyis gnas gzhan drug cur son pa rjes su thob pa ni grangs med ces brjod do//de la gnas drug cu ni 'di lta ste/ gcig gcig bcu la bcu'o/ /bcu bcu la brgya'o/ /brgya bcu la stong ngo / /stong bcu la khri'o/ /khri bcu la 'bum mo/ /'bum bcu la sa ya'o/ /sa ya bcu la bye ba'o/ /bye ba bcu la dung phyur ro/ / dung phyung bcu la ther 'bum mo/ /ther 'bum bcu la ther 'bum chen po'o/ /ther 'bum chen po bcu la khrag khrig go/ /khrag khrig bcu la khrag khrig chen po'o/ /khrag khrig chen po bcu la phyal phyol lo/ /phyal phyol bcu la phyal phyol chen po'o/ /phyal phyol chen po bcu la rab bkram mo/ /de bcu la rab bkram chen po'o//de bcu la gtams pa'o/ /de bcu la gtams pa chen po'o/ /de bcu la mi spyod pa'o/ /de bcu la mi spyod pa chen po'o/ /de bcu la khyad phyin no/ /de bcu la khyad phyin chen po'o/ /de bcu la yang stengs so/ /de bcu la yang stengs chen po'o/ /de bcu la deng 'dren no//de bcu la deng 'dren chen po'o/ /de bcu la pad ma'o/ /de bcu la pad ma chen po'o/ /de bcu la mtha' snang ngo / /de bcu la mtha' snang chen po'o/ /de bcu la rgyu rig go/ /de bcu la rgyu rig chen po'o/ /de bcu la 'od mdzes so/ /de bcu la 'od mdzes chen po'o/ /de bcu la dbang po'o/ / de bcu la dbang po chen po'o/ /de bcu la rgya mtsho'o/ /de bcu la rgya mtsho chen po'o/ /de bcu la legs byin no/ /de bcu la legs byin chen po'o/ /de bcu la rtogs 'gro'o/ /de bcu la rtogs 'gro chen po'o/ /de bcu la gzugs skyes so/ /de bcu la gzugs skyes chen po'o/ /de bcu la dgra rlabs so//de bcu la dgra rlabs chen po'o/ /de bcu la rgya rtags so/ /de bcu la rgya rtags chen po'o/ /de bcu la stobs 'khor ro/ /de bcu la stobs 'khor chen po'o/ /de bcu la brda shes so/ /de bcu la brda shes chen po'o/ /de bcu la rin mchog go//de bcu la rin mchog chen po'o/ /de bcu la shang ku'o/ /de bcu la shang ku chen po'o/ /de bcu la rnam 'byung ngo / /de bcu la rnam 'byung chen po'o/ /de bcu la stobs mig go/ /de bcu la stobs mig chen po'o/ /zhes gnas drug cu pa'o/ /kha cig grangs med ni gnas bco brgyad pa las 'das pa'o zhes zer ro//'phags pa gnas brtan pa ni gcig nas bzung ste sngon bzhin du lnga brgya rtsa lnga pa'i grangs kyi gnas su phyin pa 'di ni bskal pa grang med chung ngu'o/ /de nas bskal pa grangs med chung ngu dang po'i gnas gcig tu bgrangs te/ de kho na bzhin du lnga bcu rtsa lnga pa'i gnas su son pa ni bskal pa grangs med pa'o zhes zer ro//'phags pa mang pos bkur ba ni/ shAkya thub pa 'dis/ grangs med dang po la sngon gyi sangs rgyas shAkya thub pa nas bzung ste/ sangs rgyas stong phrag bdun cu rtsa bdun dang / grangs med gnyis pa la sangs rgyas stong phrag bdun cu rtsa drug dang /grangs med gsum pa la sangs rgyas stong phrag bdun cu rtsa lnga pa sangs rgyas dbang po rgyal mtshan gyi mthar thug pa rnams mnyes par byas te/ yang dag par rdzogs pa'i byang chub tu mngon par rdzogs par byang chub po zhes gsungs so/ /kha che bye brag tu smra ba na re/yang dag par rdzogs pa'i sangs rgyas shAkya thub pa zhes bya ba 'byung bar 'gyur ro/ /gang gi drung du bdag cag gi ston pa bcom ldan 'das byang chub sems dpar gyur pas/ rnam pa 'di lta bu kho nar bdag sangs rgyas su gyur cig ces dang po smon lam mdzad do/ /de nas bzung ste/ bcom ldan 'das shAkya thub pas bskal pa grangs med dang po la yang dag par rdzogs pa'i sangs rgyas rin chen gtsug tor gyi mthar thug pa sangs rgyas stong phrag bdun cu rtsa lnga mnyes par bya'o/ /de nas bskal pa grangs med gnyis pa la rdzogs pa'i sangs rgyas rin chen gtsug tor gyi de ma thag gi sangs rgyas nas bzung ste/sangs rgyas mar me mdzad kyi mthar thug pa sangs rgyas stong phrag bdun cu rtsa drug mnyes par byas so/ /de nas bskal pa grangs med gsum pa la sangs rgyas mar me mdzad kyi de ma thag gi sangs rgyas nas bzung ste/ sangs rgyas stong phrag bdun cu rtsa bdun mnyes par byas so//de'i tshe rdzogs pa'i byang chub tu nges par 'gyur ro/ /de nas phug cig tu de bzhin gshegs pa skar rgyal gzi brjid kyi dbyings su mnyam par zhugs pa mthong zhing rab tu dang ba chen pos brtson 'grus brtsams nas rkang pa gcig gis gnas te/lha'i yul dang zhes pa la sogs pa'i tshigs su bcad pa gcig gis nyi ma bdun du sdod pas/ bskal pa chen po dgu phyir bzlog par gyur to/ /de'i rjes su sangs rgyas rnam par gzigs la sogs pa nas 'od srungs kyi mthar thug par mnyes par byas nas/ bskal pa chen po dgu bcu rtsa gcig tu mtshan bzangs kyi las mdzad de/bskal pa chen po dgu bcu rtsa gcig gi rtse mo la dga' ldan gyi gnas su gnas pa la sogs pa rnam par bzung ste/ bcom ldan 'das shAkya thub pa bla na med pa yang dag par rdzogs pa'i byang chub tu mngon par rdzogs par byang chub pa'o zhes zer ro/ /'phags pa gnas brtan na re/shAkya thub pas bskal pa grangs med pa chen po nyi shu dang bskal pa 'bum phrag gcig lhag pas thams cad mkhyen pa rab tu bsgrubs so zhes zer ro/ /de la bcom ldan 'das byang chub sems dpar gyur pas bskal pa grangs med bdun gyis sangs rgyas stong phrag nyi shu rtsa lnga lhag pa'i 'bum phrag gcig mnyes par byas shing bsam pa tsam nyid kyis byang chub don du smon lam mdzad do//bskal pa grangs med gzhan dgus sangs rgyas stong phrag brgyad cu rtsa bdun pa'i 'bum phrag gsum mnyes par byas te/ byang chub sems dpa'i spyad pa la spyod cing sems dang ngag gis smon lam mdzad do/ /bskal pa grangs med gzhan bzhis sangs rgyas bcu gnyis mnyes par byas shing byang chub don du spyad pa la spyod cing lus dang ngag dang yid kyis byang chub don du smon pa mdzad do//bskal pa 'bum phrag gcig gis bcom ldan 'das byang chub sems dpar gyur pas sangs rgyas bco lnga mnyes par byas te/ byang chub sems dpa'i spyad pa la spyod cing lus dang ngag dang yid kyi las phran thams cad rdzogs par byas te/bskal pa 'bum phrag gi rtse mo la ston pas thams cad mkhyen pa thob par gyur to/ /rab tu spros pa ni dga' ba zhes bya ba'i bskal pa grangs med dang po la bcom ldan 'das lhag pa'i lha zhes bya ba 'khor los sgyur ba mi'i bdag por gyur pas thog ma med pa'i 'khor ba ru sngon ma mthong ba sangs rgyas tshangs pa'i lha mthong bas rnam pa 'di lta bur bdag sangs rgyas nyid du gyur cig ces bsams pa tsam gyis mngon par 'dod do//grangs med dga' ba de la sangs rgyas tshangs pa'i lha la sogs pas sangs rgyas lnga stong mnyes par byas so//grangs med gnyis pa mdzes dga' la sangs rgyas stong phrag dgu mnyes par byas so/ /grangs med gsum pas gzhi'i ming can la sangs rgyas stong phrag bcu mnyes par byas so/ /grangs med bzhi pa snying po zhes pa la sangs rgyas stong phrag bcu gcig mnyes par byas so//grangs med lnga pa 'dzin gzugs zhes pa'i ming can sangs rgyas stong phrag nyi shu mnyes par byas so/ /grangs med drug pa rgya mtsho zhes pa la sangs rgyas stong phrag sum cu mnyes par byas so/ /grangs med pad+ma dkar po la sangs rgyas stong phrag bzhi bcu mnyes par byas so//thams cad bzang po zhes grangs med brgyad pa la sngon gyi shAkya thub pa la sogs pa sangs rgyas stong phrag lnga bcu mnyes par byas so/ /grangs med pad+ma dkar po'i de ma thag tu thams cad bzang po'i dang por 'khor lo rgya mtsho zhes pa'i byang chub sems dpar gyur pas sngon gyi sangs rgyas shAkya thub pa mthong nas rab tu dang ba chen pos yid dang ngag gis 'di lta bur gyur pa bzhin du bdag sangs rgyas su gyur cig ces smon lam mdzad do//de'i rjes su thams cad bzang po zhes pa'i grangs med brgyad pa la sngon gyi shAkya thub pa la sogs pa sangs rgyas stong phrag lnga bcu mnyes par byas so//thams cad rgyas pa zhes pa'i grangs med dgu pa la sangs rgyas stong phrag drug cu mnyes par byas so/ /thams cad rin chen zhes pa'i grangs med bcu pa la sangs rgyas stong phrag bdun cu mnyes par byas so/ /phung po gtso bo zhes pa grangs med bcu gcig pa la sangs rgyas stong phrag brgyad cu mnyes par byas so//nor bu bzang po zhes pa'i grangs med bcu gnyis pa la sangs rgyas stong phrag dgu bcu mnyes par byas so/ /pad+ma zhes pa'i grangs med bcu gsum pa la sangs rgyas stong phrag nyi shu mnyes par byas so/ /khyu mchog ces pa'i grangs med bcu bzhi pa la sangs rgyas stong phrag bcu mnyes par byas so//bshes gnyen dam pa zhes pa'i grangs med bco lnga pa la sangs rgyas stong phrag lnga mnyes par byas so/ /thams cad skyong zhes pa'i grangs med bcu drug pa la sangs rgyas stong phrag gnyis mnyes par byas so//de'i rjes su thams cad skyob ces pa'i grangs med kyi mtha' ma ri bo zhes pa'i grangs med kyi sngon snying po mchog gi bskal pa sangs rgyas rta rna kar dang / yid gzhungs mdzad dang / skyabs g.yogs mdzad rnams mnyes par byas shing / bskal pa de nyid la bcom ldan 'das drang srong yid gzhungs mchog tu gyur pas sangs rgyas mar me mdzad mnyes par mdzad de/sangs rgyas mar me mdzad de nyid las nges pa'i lung bstan pa so sor thob bo/ /grangs med bdun pa ri bo zhes pa la sangs rgyas med pa ngan 'gro lta bu zhes brjod do/ /grangs med ri bo'i mtha' ma grangs med snang ba'i sngon du snying po zhes pa'i bskal pa la bcom ldan 'das 'khor los sgyur ba'i rgyal po rnam par rgyal bar gyur pas sangs rgyas kauN+Di n+ya mnyes par mdzad do//de'i rjes su grangs med snang ba yang sangs rgyas kyis stong pa ngan 'gror 'gyur ro/ /grangs med snang ba'i mtha' ma grangs med rgyal ba'i las sngon du snying po mchog gi bskal pa la bram ze mdzes par gyur pas sangs rgyas bkra shis mnyes par byas so//klu'i rgyal po mnyam med du gyur pas sangs rgyas yid rab ces pa bsnyen bkur ba dang ldan par 'gyur ro/ /bram ze lhag pa'i lhar gyur pas sangs rgyas re ba ta mnyes par byas so//bram ze lhag pa'i lhar gyur pas sangs rgyas mdzes pa mnyes par byas so/ /de rjes su grangs med rgyal ba la sangs rgyas med pa ngan 'gro zhes brjod do/ /grangs med rgyal ba'i mtha' ma grangs med mdzes pa las sngon du bskal pa mchog ces pa la gnod sbyin sde dpon du gyur pa na sangs rgyas kun snang mthong zhes pa mnyes par byas so//seng ger gyur pas sangs rgyas pad+ma mnyes par byas so/ /drang srong rab byung du gyur pas sangs rgyas nA ra dam mnyes par byas so/ /grangs med mdzes pa la sangs rgyas med pa ngan 'gro zhes brjod do/ /grangs med mdzes pa'i mtha' ma bskal pa snying po zhes pa la bcom ldan 'das yul ljongs thams cad pa zhes pa'i ral pa can du gyur pa sangs rgyas pad+ma'i bla ma mnyes par byas so//de rjes su bskal pa chen po stong phrag sum cur sangs rgyas med pa'i ngan 'gror gyur to/ /de rjes su bskal pa maN+Da zhes pa la khye'u bla mar gyur pas sangs rgyas yid gzhungs mchog mnyes par byas so//'khor los sgyur ba'i rgyal po zla ba bzang por gyur pas sangs rgyas don mthong la bsnyen bkur byas so/ /lha'i dbang po brgya byin du gyur pas sangs rgyas chos mthong mnyes par byas so/ /de nas bar med par bskal pa dgu bcu rtsa bzhir sangs rgyas med pa'i ngan 'gror 'gyur ro//de ma thag tu bskal pa snying po la ma ku la zhes pa'i dka' thub par gyur pas sangs rgyas don grub bsten pa dang ldan no/ /de dang bar med par bskal pa dgu bcu rtsa gnyis su sangs rgyas med pa'i ngan 'gror 'gyur ro//de dang bar med par snying po mchog gi bskal pa la rje'u rigs bzang po skyes su gyur pas sangs rgyas skar rgyal mnyes par byas so/ /rje'u rigs rnam par rgyal bar gyur pas sangs rgyas rgyal mnyes par byas so/ /de dang bar med pa'i bskal pa dgu bcu rtsa gcig go/ /de dang bar med par bskal pa snying po zhes pa la klu'i rgyal po mnyam med du gyur pas sangs rgyas rnam par gzigs mnyes par byas so//de dang bar med par bskal pa sum cu rtsa gcig tu sangs rgyas med pa'i ngan 'gror 'gyur ro/ /de ma thag tu snying po mchog gi bskal pa la rgyal po dgu 'dul du gyur pas sangs rgyas gtsug tor can mnyes par byas so//rgyal po blta na sdug tu gyur pas sangs rgyas thams cad skyob mnyes par byas so/ /de ma thag tu bskal pa bzang po la rgyal po bzod par gyur pas sangs rgyas 'khor ba 'jig mnyes par byas so/ /rgyal po ri bo zhes par gyur pas/ sangs rgyas gser thub mnyes par byas so//snang ba gsal ba skyong du gyur pas sangs rgyas 'od srungs mnyes par byas so/ /de'i rjes su dpal gzhon nu don thams cad grub par gyur pas rang nyid kyis thams cad mkhyen pa nyid mngon du mdzad de/ shAkya thub pa zhes pa'i ming can sangs rgyas su gyur to//da ni de ma thag tu dus mi ring bar byang chub sems dpa' byams pa rgyal ba mi pham pa zhes bya ba'i sangs rgyas 'byung bar 'gyur ro/ /bdag cag gi ston pa 'di'i rnam par gzhag pa ni de lta bu'o/ /gzhan gyi ni gzhan du ste/ /yang gzhan rnams ni gzhan du rig par bya'o//'di lta ste/ gang zag ni gsum ste/ 'di lta ste/ lhag pa'i dad pa can dang / lhag pa'i brtson 'grus can dang / lhag pa'i shes rab can no/ /de la lhag pa'i dad pa can ni go bar nges par 'gyur ba yin no/ /lhag pa'i brtson 'grus can ni rnam par spros pas go bar 'gyur ro//lhag pa'i shes rab can ni mgo smos pas go bar 'gyur ro/ /de la lhag pa'i dad pa can ni lung bstan pa thob pa nas bzung ste/ bskal pa stong phrag brgya lhag pa'i bskal pa grangs med bcu drug gis thams cad mkhyen pa mngon du byed pa'o/ /lhag pa'i brtson 'grus can ni lung bstan pa thob pa nas bzung ste/bskal pa 'bum phrag gcig lhag pa'i bskal pa grangs med brgyad kyis thams cad mkhyen pa mngon du thob par 'gyur ro/ /shes rab lhag pa can ni lung bstan thob pa nas bzung ste/ bskal pa stong phrag brgya lhag pa'i bskal pa grangs med bzhis thams cad mkhyen pa mngon du byed do zhes rnam par gzhag pa'o//yang byang chub sems dpa'i theg pa pa bskal pa grangs med gsum gyis sangs rgyas nyid du 'byung ba'o zhes zer ro/ /de ltar yang bskal pa grangs med dang pos tshogs kyi sa nas brtsams te ci srid du sa dang po rdzogs par 'gyur ro/ /bskal pa grangs med gnyis pas dri ma med pa la sogs pa sa drug rdzogs par 'gyur ro//bskal pa grangs med gsum pas mi g.yo ba'i sa nas brtsams te sangs rgyas kyi sa'i bar du rdzogs par 'gyur ro zhes mdo sde la sogs pa las so/ /kha cig na re byang chub sems dpa'i theg pa nyid gsum du chos mthun pa las bskal pa grangs med gsum gyis sangs rgyas nyid thob ste/yang don dam par ni ma yin no zhes zer ro/ /de yang 'di ltar byang chub sems dpa' tshogs kyi sa kun du rdzogs pa ni bskal pa grangs med gcig 'da' bar 'gyur ro/ /de rjes su mos pas spyod pa'i sa yongs su rdzogs par 'gyur ba ni bskal pa grangs med gnyis 'da'o//de'i rjes su sa dang po rab tu dga' ba nas bzung ste sa bcu pa chos kyi sprin gyis ji srid du so sor bskal pa grangs med gsum gyis rdzogs par byas te/ sangs rgyas kyi sa kun du bzang po sgrub par byed par 'gyur ro//de ltar bskal pa grangs med sum cu rtsa gsum gyis sangs rgyas nyid thob po zhes zer ro/ /sangs rgyas 'byung ba yang / skye bo rnams tshe lo stong phrag brgyad cu las 'grib pa nas brtsams te/ ci srid du mi rnams tshe lo brgyar 'gyur ba 'di'i bar du 'byung ba yin no/ /sngon mi rnams kyi tshe lo 'phel ba na mi 'byung ste kun du skyo ba med pa'i phyir ro//phyis skye bo rnams kyi tshe thung ba la yang ma yin te/ gang las de'i tshe snyigs ma rgyas par 'gyur bas so/ /'di lta ste/ tshe'i snyigs ma dang / bskal pa'i snyigs ma dang / lta ba'i snyigs ma dang / nyon mongs pa'i snyigs ma dang / sems can gyi snyigs ma'o/ /dang pos ni 'tsho ba rgud par byed do/ /gnyis pas ni phan pa'i tshogs pa rgud par byed do/ /gsum pa dang bzhi pas ni dge ba'i phyogs rgud par byed do/ /lnga pas ni bdag gi dngos po rgud par byed do/ /tshad gzugs nad med pa stobs blo dran pa brtan pa rnams nyams par 'gyur bas so//rang sangs rgyas ni yar 'phel la yang dang mar 'grib la yang 'byung bar 'gyur ro/ /'khor los sgyur ba ni mi rnams kyi tshe dpag tu med pa dang ci srid du lo stong phrag brgyad cu pa la 'byung bar 'gyur ro/ /mngal skyes sam/ rdzus skyes sam/ pad+ma'i snying po las skyes pa yang 'byung ngo //de la 'khor los sgyur ba'i rgyal po ni bzhi ste/ 'di lta ste/ gling gcig gi bdag po dang / gling gnyis kyi mnga' bdag dang / gling gsum gyi mgon po dang / gling bzhi'i dbang phyug go/ /'di rnams grangs ci lta ba bzhin du bar snang las 'ongs pa'i lcags kyi 'khor lo dang /zangs kyi 'khor lo dang / dngul gyi 'khor lo dang / gser gyi 'khor lo'o/ /'khor lo can 'di thams cad kyi rin po che sna bdun ni 'di lta ste/ 'khor lo rin po che dang / glang po rin po che mche ba drug ldan glang po'i rigs las 'ongs pa glang po che thams cad kyi gong ma'o//rta rin po che dang / nor bu rin po che dang / bud med rin po che dang / khyim bdag rin po che dang / blon po rin po che'o/ /'phags pa gnas brtan na re/ 'khor lo rin po che ni shar gyi rgya mtsho las 'ongs pas rtsibs stong dang ldan pa lte ba dang bcas pa mu khyud dang bcas pa'o//glang po rin po che ni glang po che gso sbyong 'phags kyi rigs las 'ongs pa glang po chen po rnams kyi gtso bo'o/ /rta rin po che ni sprin gyi shugs can gyi rta'i rigs las 'ongs pa'o/ /nor bu rin po che ni ri bo yangs pa las 'ongs pa'o/ /bud med rin po che ni byang gi sgra mi snyan las 'ongs pa'o//khyim bdag rin po che ni 'dzam bu gling gi'o/ /bu thu bo ni blon po rin po che'o zhes zer ro/ /de la glang po rin po che'i rigs bcu ni 'di lta ste/ glang po che nag po dang / glang po che dmar ser dang / glang po che dmar skya dang / zangs kyi glang po che dang / glang po che ser skya'i rigs dang / spos kyi glang po'i rigs dang / glang po che bkra shis kyi rigs dang / glang po che gser gyi rigs dang / glang po che gso sbyong 'phags kyi rigs dang / glang po che mche ba drug ldan gyi rigs so/ /glang po che rigs bcu po 'di rnams thams cad ni so sor phyi ma bcu 'gyur gyi stobs so//glang po che mche ba drug ldan gyi rigs stong phrag dgu'i stobs ni srid pa tha ma'i byang chub sems dpa' stobs kyi glang po stong phrag dgu'i stobs zhes brjod do/ /rta'i rigs ni bzhi'o/ /'di lta ste/ kha Da'i rta'i rigs dang / rnam par smin pa'i rta'i rigs dang / cang shes kyi rta'i rigs dang /sprin gyi shugs can gyi rta'i rigs so zhes so/ /kha cig tu gling bzhi dbang phyug gi 'khor los sgyur ba 'ga' zhig lha'i 'jig rten du 'gro bar yang 'gyur ro zhes zer ro/ /lha'i 'jig rten du 'gro ba'i 'khor los sgyur ba'i rgyal po de yang rnam pa drug ste/ 'di lta ste/rgyal chen bzhi pa'i lha'i 'jig rten du 'gro ba dang / sum cu rtsa gsum pa'i lha'i 'jig rten du 'gro ba dang / 'thab bral gyi lha'i 'jig rten du 'gro ba dang / dga' ldan gyi lha'i 'jig rten du 'gro ba dang / 'phrul dga'i lha'i 'jig rten du 'gro ba dang / gzhan 'phrul dbang byed kyi lha'i 'jig rten du 'gro ba'o//gling bzhi pa 'jig rten gyi khams gcig tu 'khor los sgyur ba gnyis dus gcig tu 'byung ba ma yin te/ 'gran bzod med pa'i las byas pa'i phyir ro/ /sangs rgyas bzhi'o/ /zhing gcig tu sangs rgyas gnyis 'byung ba ma yin te/ sangs rgyas kyi sku gzugs 'dus nas gdul bar bya ba'i skye bo mi srid pa'i phyir dang /myur bar gus pa'i don gyi phyir ro/ /sangs rgyas gcig la shin tu ches gus par 'gyur te/ 'di 'dra ba rnyed dka' ba'o zhes bsams nas bstan pa sgrub pa la shin tu ches gus par 'gyur ro/ /'di ni gshegs pa'i ma yongs su mya ngan las 'das pa na bdag don med par 'gyur zhes so//stong gsum gyi 'jig rten khams gzhan du 'ang sangs rgyas yod pa nyid de/ gang las tshogs bsags pa la 'jug pa mang du mthong ba dang / zhing gcig tu mang po rnams cig car du skye ba mi 'thad pa'i phyir ro/ /stong gsum gzhan du sangs rgyas 'byung ba yod pa gegs yod pa ma yin no//stong gsum gyi stong chen po gzhan du yang sangs rgyas 'byung ngo zhes pa ni nges pa'o/ /bud med kyang 'khor los sgyur ba dang brgya byin la sogs pa thob par 'gyur ba yin te/ bud med ni gzhan dbang du gyur pa dang / bud med la sogs pa'i rin po che rnams nye bar longs spyod pa'i nus pa med pas so//rang sangs rgyas dang bla na med pa'i byang chub tu lhag par 'gro ba yang ma yin no/ /de yang rim pa bzhin du bse ru lta bur 'grogs pa dang / 'jig rten gsum gyi ston pa nyid mi srid pa'i phyir ro/ /de yang skye bo dmu rgod bgrod bya yin pa dang shes rab chung ba dang /slob dpon med par rdzogs par byang chub pa mi rung ba'i phyir dang / kun spyod la yang gzhan dbang yin pa'i phyir ro/ /de nas bskal pa gang la sangs rgyas gang 'byung zhe na/ bskal pa bzang po 'di nyid la sangs rgyas lnga 'byung ngo zhes kha cig go//lnga brgya nyid do zhes gzhan dag go/ sangs rgyas stong ngo zhes yang gzhan dag go/ /bskal pa bzang po'i mdo las byang chub sems dpa'i tshul lugs gsungs te/ bskal pa bzang pos 'di la phyis sangs rgyas med pa'i bskal pa stong phrag drug cu 'byung bar 'gyur ro//de nas phyis bskal grangs pa chen po zhes bya ba 'byung bar 'gyur ro/ /bskal pa gcig po de la sangs rgyas stong phrag brgyad cu 'byung bar 'gyur ro/ /bskal pa skar ma lta bu'i de ma thag tu bskal pa brgya phrag gsum du sangs rgyas 'byung bar mi 'gyur ro//de nas phyis bskal pa yon tan bkod pa zhes bya ba 'byung bar 'gyur ro/ /bskal pa gcig po de la sangs rgyas stong phrag brgyad cu rtsa bzhi 'byung bar 'gyur ro/ /'phags pa gnas brtan pa na re/ sangs rgyas spyan gyi bskal pa lnga nyid de/ 'di lta ste/ snying po zhes pa'i bskal pa dang /snying po mchog ces pa'i bskal pa dang / mchog rab ces pa'i bskal pa dang / snying po'i snying po zhes pa'i bskal pa dang bskal pa bzang po'o/ /de la snying po'i bskal pa la sangs rgyas gcig nyid 'byung bar 'gyur ro/ /snying po mchog gi bskal pa la sangs rgyas gnyis nyid 'byung bar 'gyur ro//mchog rab kyi bskal pa la sangs rgyas gsum nyid 'byung bar 'gyur ro/ /snying po'i snying po bskal pa la sangs rgyas bzhi nyid 'byung bar 'gyur ro/ /bskal pa bzang po la sangs rgyas lnga nyid 'byung bar 'gyur ro/ /sangs rgyas drug la sogs pa'i bskal pa rnam pa thams cad du srid par mi 'gyur ro zhes zer ro//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las bskal pa rnam par nges pa zhes bya ba le'u brgyad pa'o// //sems can gyi 'jig rten 'di ni/ 'ga' zhig tu phung po'i sgo nas rnam par gzhag par byed la/ 'ga' zhig tu skye mched kyi sgo nas rnam par gzhag par byed cing / 'ga' zhig tu khams kyi sgo nas so/ /de la phung po ni lnga ste/ 'di lta ste/ gzugs kyi phung po dang / tshor ba'i phung po dang / 'du shes kyi phung po dang /'du byed kyi phung po dang / rnam par shes pa'i phung po'o/ /spungs pa'i don gyis na phung po'o/ /de la gzugs ni rnam pa gsum ste/ 'di lta ste/ dbang po'i gzugs dang / yul gyi gzugs dang / rnam par rig byed ma yin pa'i gzugs so/ /de la dbang po'i gzugs ni rnam pa lnga'o//'di lta ste/ mig gi dbang po dang / nyan pa'i dbang po dang / sna'i dbang po dang / lce'i dbang po dang / lus kyi dbang po'o/ /yul gyi gzugs rnam pa lnga ste/ 'di lta ste/ yul gzugs dang / yul sgra dang / yul dri dang / yul ro dang /yul reg bya'o/ /de la yul gzugs la rnam pa gnyis te/ 'di lta ste/ kha dog las dang / dbyibs las so/ /de la kha dog la ni rnam pa bzhi ste/ 'di lta ste/ sngon po dang / ser po dang / dmar po dang / dkar po'o/ /de las phye bas mang du 'gyur ro/ /dbyibs la rnam pa bdun te/'di lta ste/ thung ba dang / ring ba dang / rdog po dang / zlum po dang / mtho ba dang / dma' ba dang / mi mnyam pa'o/ /yang gzugs ni rnam pa nyi shu ste/ 'di lta ste/ kha dog bzhi dang / dbyibs brgyad dang / sprin dang / du ba dang / rdul dang / khug rna dang / grib ma dang / nyi 'od dang / snang ba dang / mun pa'o/ /yang gzugs la rnam pa gsum ste/ 'di lta ste/ bstan du yod cing thogs pa dang bcas pa'i gzugs dang / bstan du med cing thogs pa med pa'i gzugs so/ /de la bstan du yod cing thogs pa dang bcas pa'i gzugs ni gcig go//'di lta ste/ mi'i gzung bya'i gzugs so/ /bstan du med cing thogs pa dang bcas pa'i gzugs ni dgu ste/ 'di lta ste/ mig la sogs pa'i dbang po lnga dang / sgra la sogs pa'i yul bzhi'o/ /bstan du med cing thogs pa med pa'i gzugs ni gcig ste/ 'di lta ste/ rnam par rig byed ma yin pa'i gzugs so/ /yang gzugs ni rnam pa gnyis te/ 'di lta ste/ 'byung ba chen po'i gzugs dang / 'byung ba chen po nye bar blang bya'i gzugs so/ /de la 'byung ba chen po ni bzhi ste/ 'di lta ste/ sa dang / chu dang / me dang / rlung ngo / /de la sa'i chos bzhi la 'di lta ste/ srid rung dang / sra ba dang / mkhrang ba dang / 'dzin pa'i las so/ /chu'i chos gsum la 'di lta ste/ gsher ba dang / snum pa dang / sdud pa'i las so/ /me'i chos gnyis la 'di lta ste/ tsha ba dang / smin cing skams par byed pa'i las so//rlung gi chos gsum la 'di lta ste/ yang ba dang / g.yo ba dang / 'phel zhing rab tu rgyas par byed pa'i las so/ /'byung ba chen po nye bar blang ba'i gzugs la rnam pa bcu ste/ 'di lta ste/ dbang po lnga dang / yul lnga'o//sgra la rnam pa gnyis ni 'di lta ste/ zin pa'i 'byung ba chen po'i rgyu las byung ba dang / ma zin pa'i 'byung ba chen po'i rgyu las byung ba'o/ /de la zin pa'i 'byung ba chen po'i rgyu las byung ba la rnam pa gnyis ni 'di lta ste/ sems can du ston pa dang / sems can du ston pa ma yin no/ /ma zin pa'i 'byung ba chen po'i rgyu las byung ba la rnam pa gnyis ni 'di lta ste/sems can du ston pa dang / sems can du ston pa ma yin pa'o/ /yang bzhi po 'di rnams la so sor yid du 'ong ba dang yid du mi 'ong ba'i dbye bas rnam pa brgyad do/ /dri la rnam pa gsum ste/ 'di lta ste/ dri bzang po dang /dri ngan pa dang / dri mnyam pa'o/ /ro la drug ste 'di lta ste/ mngar ba dang / skyur ba dang / lan tshwa dang / tsha ba dang / kha ba dang / bsngal ba'o/ /reg bya rnam pa bcu gcig ni 'di lta ste/ sa dang / chu dang / me dang / rlung dang / 'jam pa dang / rtsub pa dang / lci ba dang / yang ba dang / bsil ba dang / bkres pa dang / skom pa'o/ /rnam par rig byed ma yin pa'i gzugs la rnam pa gsum ste/ 'di lta ste/ sdom pa dang rjes su 'brel pa'i gzugs dang / sdom pa ma yin pa dang rjes su 'brel pa'i gzugs dang / sdom pa dang sdom pa ma yin pa dang rjes su 'brel pa'i gzugs so//tshor ba'i phung po la rnam pa gnyis te 'di lta ste/ lus las byung ba'i tshor ba dang / sems las byung ba'i tshor ba'o/ /de la lus las byung ba'i tshor ba lnga ni 'di lta ste/ mig gi 'dus te reg pa'i rkyen las byung ba'i tshor ba dang / rna ba'i 'dus te reg pa'i rkyen las skyes pa'i dang / sna'i 'dus te reg pa'i rkyen las skyes pa'i dang / lce'i 'dus te reg pa'i rkyen las byung ba'i dang / lus kyi 'dus te reg pa'i rkyen las skyes pa'i'o/ /yid kyi ni gcig ste/ 'di lta ste/ yid kyi 'dus te reg pa'i rkyen las skyes pa'i tshor ba'o/ /des na tshor ba drug tu 'gyur ba yin no/ / yang tshor ba de rnams so sor rnam pa gsum du phye bas bco brgyad du 'gyur ba yin no/ /'di lta ste/ bde ba dang / sdug bsngal dang / sdug bsngal ma yin pa dang / bde ba ma yin pa'o/ /yang rnam pa lnga ste/ 'di lta ste/ bde ba'i dbang po dang / sdug bsngal gyi dbang po dang / yid bde ba'i dbang po dang / yid mi bde ba'i dbang po dang / btang snyoms kyi dbang po'o/ /'du shes kyi phung po la drug ste/ 'di lta ste/ mig gi rnam shes dang mtshungs par ldan pa'i 'du shes dang / rna ba'i rnam shes dang mtshungs par ldan pa'i dang / sna'i rnam shes dang mtshungs par ldan pa'i dang / lce'i rnam shes dang mtshungs par ldan pa'i dang /lus kyi rnam shes dang mtshungs par ldan pa'i dang / yid kyi rnam shes dang mtshungs par ldan pa'i'o/ /yang so sor rnam pa gsum du phye bas 'di lta ste/ chung ngu dang / chen por gyur pa dang / tshad med pa ste zhes bya ba bco brgyad du 'gyur ba yin no/ /'du byed kyi phung po ni rnam pa gnyis te 'di lta ste/sems dang mtshungs par ldan pa'i 'du byed dang / sems dang mi ldan pa'i 'du byed do/ /de la sems dang mtshungs par ldan pa'i mdor bsdu na chos bzhi bcu ste/ 'di lta ste/ sems pa dang / reg pa dang / yid la byed pa dang / 'dun pa dang /mos pa dang / dad pa dang / brtson 'grus dang / dran pa dang / ting nge 'dzin dang / shes rab dang / rnam par rtog pa dang / rnam par dpyod pa dang / bag med pa dang / bag yod pa dang / yid 'byung ba dang / yi rang ba dang / shin tu sbyangs pa dang / shin tu sbyangs pa ma yin pa dang /rnam par 'tshe ba dang / mi 'tshe ba dang / ngo tsha shes pa dang / khrel yod pa dang / btang snyoms dang / rnam par grol ba dang / dge ba'i rtsa ba dang / mi dge ba'i rtsa ba dang / lung du ma bstan pa'i rtsa ba dang / kun du sbyor ba dang / 'ching ba dang / bag la nyal ba dang / nye ba'i nyon mongs pa dang / kun nas dkris pa dang / zag pa dang / chu bo dang / sbyor ba dang / nye bar len pa dang / mdud pa dang / sgrib pa dang / shes pa dang / bzod pa'o/ /rgyas par du/ sems pa rnam pa gsum ste/ 'di lta ste/ dge ba dang / mi dge ba dang / lung du ma bstan pa'o//yang sems pa drug ste/ 'di lta ste/ mig gi rnam shes dang mtshungs par ldan pa nas yid kyi rnam shes dang mtshungs par ldan pa'i bar du'o/ /reg pa drug ni 'di lta ste/ mig gi 'dus te reg pa nas yid kyi 'dus te reg pa'i bar du'o/ /dad pa la rnam pa gsum ste/'di lta ste/ bden pa gnyis dang / bden pa bzhi dang / dkon mchog gsum dang las dang 'bras bu la mngon par yid ches pa'i rnam pa'i dad pa dang / de rnams kyi yon tan dang ldan pa la rab tu dad pa'i rnam pa dang / bdag gis de dag bstan par nus shing thob par nus pa'o zhes mngon par 'dod pa'i rnam pa'i dad pa'o//shin tu sbyangs pa gnyis ni 'di lta ste/ lus shin tu sbyangs pa dang / sems shin tu sbyangs pa'o/ /shin tu ma sbyangs pa la gnyis ni 'di lta ste/ lus shin tu ma sbyangs pa dang / sems shin tu ma sbyangs pa'o/ /btang snyoms rnam pa gsum ni 'di lta ste/dgra bcom pa rnams kyi ye shes kyi rjes su 'gro ba so sor brtags pa'i btang snyoms dang / so so skye bo'i shes pa'i rjes su 'gro ba so sor ma brtags pa'i btang snyoms so/ /dge ba'i rtsa ba gsum ni 'di lta ste/ ma chags pa dge ba'i rtsa ba dang /mi sdang ba dge ba'i rtsa ba dang / rmongs pa med pa dge ba'i rtsa ba'o/ /mi dge ba'i rtsa ba la gsum ni 'di lta ste/ chags pa mi dge ba'i rtsa ba dang / zhe sdang mi dge ba'i rtsa ba dang / rmongs pa mi dge ba'i rtsa ba'o/ /lung ma bstan gyi rtsa ba la gsum ni 'di lta ste/ srid pa lung ma bstan gyi rtsa ba dang /nga rgyal lung ma bstan gyi rtsa ba dang / ma rig pa lung ma bstan gyi rtsa ba'o/ /mi rnams la ma rig pa bzhag ste/ lung ma bstan gyi rtsa ba gsum yin no zhes kha cig go/ /kun du sbyor ba la dgu ni 'di lta ste/ rjes su chags pa'i kun du sbyor ba dang /khong khro ba kun du sbyor ba dang / nga rgyal kun du sbyor ba dang / ma rig pa kun du sbyor ba dang / lta ba kun du sbyor ba dang / mchog tu 'dzin pa kun du sbyor ba dang / the tshom kun du sbyor ba dang / phrag dog kun du sbyor ba dang / ser sna kun du sbyor ba'o/ /de la lta ba kun du sbyor ba la gsum ni 'di lta ste/'jig tshogs la lta ba dang / mthar 'dzin par lta ba dang / log par lta ba'o/ /mchog tu 'dzin pa'i kun du sbyor ba la gnyis ni 'di lta ste/ lta ba mchog tu 'dzin pa dang / tshul khrims dang brtul zhugs mchog tu 'dzin pa'o/ /yang kun du sbyor ba la gnyis ni 'di lta ste/'og ma'i cha dang mthun pa kun du sbyor ba dang / gong ma'i cha dang mthun pa kun du sbyor ba'o/ /de la 'og ma'i cha dang mthun par kun du sbyor ba la rnam pa lnga ni 'di lta ste/ 'dod pa la 'dun pa dang / gnod sems dang / 'jig tshogs la lta ba dang /tshul khrims dang brtul zhugs mchog tu 'dzin pa dang / the tshom mo/ /gong ma'i cha dang mthun pa'i kun du sbyor ba la lnga ni 'di lta ste/ gzugs la chags pa dang / gzugs med pa la chags pa dang / rgod pa dang / nga rgyal dang / ma rig pa'o/ /de la nyon mongs pa re re rab tu 'jug pa na bya ba bcu bcu byed par 'gyur ro//'di lta ste/ rtsa ba brtan par byed pa dang / rgyud rnam par 'jog par byed pa dang / zhing kun du rdzogs par byed pa dang / rgyu mthun nges par byed pa dang / las srid pa mngon par sgrub par byed pa dang / rang nyid khur yongs su 'dzin par byed pa dang /dmigs pa la rmongs par byed pa dang / rnam shes rgyun rgyu bar byed pa dang / dge ba'i phyogs las shin tu 'da' bar byed pa dang / khams las mi 'da' ba'i 'ching ba rgyas par byed pa'o/ /'ching ba la gsum ste/ 'di lta ste/ 'dod chags 'ching ba dang /zhe sdang 'ching ba dang / rmongs pa 'ching ba'o/ /bag la nyal la drug ste/ 'di lta ste/ 'dod chags bag la nyal ba dang / khong khro bag la nyal ba dang / nga rgyal bag la nyal ba dang / ma rig pa bag la nyal ba dang / lta ba bag la nyal ba dang / the tshom bag la nyal ba'o//de la 'dod chags la 'dod pa'i 'dod chags dang srid pa'i 'dod chags zhes rnam pa gnyis su dbye ba byas pas bag la nyal dang bdun du gyur pa yin no/ /yang lta ba'i bag la nyal la rnam pa lngar phye bas bag la nyal bcur gyur pa yin no/ /'di lta ste/ 'dod chags dang /khong khro dang / nga rgyal dang / ma rig pa dang / 'jig tshogs la lta ba dang / log par lta ba dang / mthar 'dzin par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang the tshom mo/ /de la nga rgyal bag la nyal rnam pa bdun te 'di lta ste/nga rgyal dang / lhag pa'i nga rgyal dang / nga rgyal las kyang nga rgyal dang / nga'o snyam pa'i nga rgyal dang / mngon pa'i nga rgyal dang / log pa'i nga rgyal dang / cung zad snyam pa'i nga rgyal lo/ /ma rig pa'i bag la nyal rnam pa gsum ste/ 'di lta ste/ mi shes pa dang / log par shes pa dang / the tshom shes pa'o/ /phra rgyas bcu po 'di rnams ni rnam pa gnyis te 'di lta ste/ khams kyi dbye bas tha dad pa dang / rnam par dbye bas tha dad pa'o/ /de la khams kyi dbye bas tha dad pa ni rnam pa gsum ste 'di lta ste/ 'dod pas bsdus pa bcu dang khong khro ba spangs pa'i gzugs kyis bsdus pa dgu dang /de bzhin du gzugs med pas bsdus pa dgu ste/ phra rgyas nyi shu brgyad du 'gyur ba yin no/ /rnam pa'i dbye bas tha dad pa ni rnam pa lnga ste/ 'di lta ste/ sdug bsngal gyis bsdus pa dang / kun 'byung gis bsdus pa dang /'gog pas bsdus pa dang / lam gyis bsdus pa dang / bsgom pas spang bar bya ba'o/ /de la 'dod pa'i khams su sdug bsngal gyis thob pa bcu ste/ 'di lta ste/ 'dod chags dang / khong khro ba dang / nga rgyal dang / ma rig pa dang / 'jig tshogs la lta ba dang /log par lta ba dang / mthar 'dzin par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom mo/ /de bzhin du khong khro ma gtogs pa gzugs khams su sdug bsngal gyis thob pa dgu'o/ /de kho na bzhin du gzugs med khams su khong khro ma gtogs pa sdug bsngal gyis thob pa dgu'o//de ltar khams gsum la sdug bsngal gyis thob pa phra rgyas nyi shu brgyad du 'gyur ba yin no/ /'dod pa'i khams su kun 'byung gis thob pa bdun ni/ 'di lta ste/ 'dod chags dang / khong khro dang / nga rgyal dang / ma rig pa dang / log par lta ba dang / lta ba mchog tu 'dzin pa dang / the tshom mo/ /de bzhin du gzugs khams su khong khro ma gtogs pa drug dang / de bzhin du gzugs med khams su khong khro ma gtogs pa drug ste/ khams gsum la kun 'byung gis thob pa phra rgyas bcu dgu'o/ / kun 'byung gis bsdus pa ji bzhin du 'gog pas bsdus pa yang de bzhin no/ /khams gsum la bdun dang drug dang drug ste 'gog pas bsdus pa gcig ma tshang ba'i nyi shur 'gyur ro/ /'dod pa'i khams su lam gyis bsdus pa phra rgyas brgyad de/ 'di lta ste/ 'dod chags dang / khong khro dang /nga rgyal dang / ma rig pa dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom mo/ /de bzhin du gzugs khams su zhe sdang spangs pa bdun dang / de bzhin du gzugs med pa'i khams su bdun te/ khams gsum la lam gyis bsdus pa phra rgyas nyi shu nyer gnyis su 'gyur ba yin no//de ltar bden pa bzhi la mthong bas spang bar bya ba spyir bsdus te phra rgyas brgyad cu brgyad du 'gyur ro/ /bsgom pas spang bar bya ba rnam pa gsum ste/ 'di lta ste/ 'dod pas bsdus pa dang / gzugs kyis bsdus pa dang /gzugs med pas bsdus pa phra rgyas so/ /de la 'dod pas bsdus pa bzhi ste/ 'di lta ste/ 'dod chags dang / khong khro dang / nga rgyal dang / ma rig pa'o/ /gzugs kyis thob pa ni gsum ste/ 'di lta ste/ 'dod chags dang / nga rgyal dang / ma rig pa'o/ / de bzhin du gzugs med la gsum dang / khams gsum la bsgom pas spang bar bya ba'i bag la nyal bcur 'gyur ro/ /des na 'dod pas thob pa'i sdug bsngal dang / kun 'byung dang / 'gog pa dang / lam dang bsgom pas spang bya rnams la rnam pa lngas grangs ci bzhin du bcu dang bdun dang brgyad dang bzhi dang ste bag la nyal sum cu so drug tu 'gyur ro//de bzhin du gzugs kyis thob pa dgu dang drug dang bdun dang gsum dang ste bag la nyal sum cu so gcig tu 'gyur ro/ /de bzhin du gzugs med pas bsdus pa dgu dang drug dang drug dang bdun dang gsum ste bag la nyal sum cu so gcig tu 'gyur ro//des na 'di rnams khams dang rnam pa'i dbye ba tha dad pas sum cu so drug dang sum cu so gcig dang sum cu so gcig dang ste bag la nyal dgu bcu rtsa brgyad du 'gyur ba yin no/ /de la 'khor ba'i sa dgu'i nang nas 'dod pa'i khams su bsgom pas spang bya bag la nyal bzhi ste/'di lta ste/ 'dod chags dang / khong khro dang / nga rgyal dang / ma rig pa'o/ /bsam gtan dang po'i sa la gsum ste/ 'di lta ste/ 'dod chags dang / nga rgyal dang / ma rig pa'o/ /de bzhin du bsam gtan gnyis pa'i sa la gsum/bsam gtan bzhi pa'i sa la gsum/ nam mkha' mtha' yas skye mched sa la gsum/ rnam shes mtha' yas skye mched sa la gsum/ ci yang med pa'i skye mched sa la gsum/ 'du shes med 'du shes med min skye mched sa la gsum/ bzhi dang gsum so brgyad de bsgom pas spang bar bya ba bag la nyal nyi shu nyer brgyad du 'gyur ro/ /yang 'dod pa'i khams su 'dod pa khong khro nga rgyal ma rig pa rnams bzlums te/ mchog dang 'bring dang tha ma rnam pa gsum du byas nas/ yang so sor chen po'i chen po dang / chen po'i 'bring dang /chen po'i tha ma dang / 'bring gi chen po dang / 'bring gi 'bring dang / 'bring gi tha ma dang / chung ngu'i chen po dang / chung ngu'i 'bring dang / chung ngu'i chung ngu ste rnam pa dgur byas so/ /de bzhin du bsam gtan dang po'i sa la 'dod chags dang nga rgyal dang ma rig pa zhes pa bag la nyal gsum po bsdoms te/sngon bzhin du rnam pa gsum du byas nas/ yang de bzhin du so sor rnam pa gsum du byas pas dbye ba dgur 'gyur ro/ /de bzhin du sa gzhan bdun la dgu dgu ste/ 'khor ba'i sa dgu la dgu pa dgu ste/ bsgom pas spang bar bya ba bag la nyal rab tu dbye ba brgyad cu rtsa gcig tu 'gyur ro//bsgom pa'i lam yang bzlog nas chung ngu 'bring chen po rnam pa gsum du byas nas/ yang so sor chung ngu'i chung ngu dang / chung ngu'i 'bring po dang / chung ngu'i chen po dang / 'bring po'i chung ngu dang / 'bring po'i 'bring po dang / 'bring po'i chen po dang / chen po'i chung ngu dang / chen po'i 'bring po dang /chen po'i chen po rnams 'khor ba'i sa dgu la dgu pa dgu ste/ nyon mongs pa'i rab tu dbye ba brgyad cu rtsa gcig gi gnyen po'i rab tu dbye ba brgyad cu rtsa gcig tu 'gyur ba yin no/ /nye ba'i nyon mongs pa rnams mang ste/ 'di lta ste/ sgyu dang / rgyags pa dang / bag med pa dang /khon du 'dzin pa dang / g.yo dang / ma dad pa dang / brjed ngas pa dang / shes bzhin ma yin pa dang / rnam par g.yeng ba dang / rang bzhin rnam par g.yeng ba dang / phyi rol rnam par g.yeng ba dang / nang rnam par g.yeng ba dang / mtshan ma rnam par g.yeng ba dang / yid la byed pa rnam par g.yeng ba la sogs pa rnam pa du ma chos mngon pa las bshad do//kun nas dkris pa bcu ni 'di lta ste/ rmugs pa dang / gnyid dang / rgod pa dang / 'gyod pa dang / phrag dog dang / ser sna dang / ngo tsha med pa dang / khrel med pa dang / khro ba dang / 'chab pa'o/ / zag pa gsum ni 'di lta ste/ 'dod pa'i zag pa dang / srid pa'i zag pa dang / ma rig pa'i zag pa'o/ /de la 'dod pa'i zag pa rdzas bzhi bcu rtsa gcig ste/ 'di lta ste/ 'dod pa'i khams su sdug bsngal gyis bsdus pa/ 'dod chags dang / khong khro dang / nga rgyal dang / 'jig tshogs la lta ba dang /log par lta ba dang / mthar 'dzin par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom ste dgu'o/ /kun 'byung gis bsdus pa/ 'dod chags dang / khong khro dang / nga rgyal dang / log par lta ba dang /lta ba mchog tu 'dzin pa dang / the tshom ste drug go/ /de bzhin du 'gog pas bsdus pa drug go/ /lam gyis bsdus pa/ 'dod chags dang / khong khro dang / nga rgyal dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang /the tshom ste bdun no/ /bsgom pas spang bar bya ba 'dod chags dang / khong khro dang / nga rgyal dang / zhen pa dang / kun nas dkris pa bcu dang ni/ 'di lta ste/ rmugs pa dang / gnyid dang / rgod pa dang / 'gyod pa dang / phrag dog dang / ser sna dang / ngo tsha ba med pa dang / khrel med pa dang / khro ba dang / 'chab pa zhes pa ste 'dod pa'i zag pa rdzas bzhi bcu rtsa gcig go/ /srid pa'i zag pa rdzas lnga bcu rtsa gnyis ni 'di lta ste/ gzugs khams su sdug bsngal gyis bsdus pa/ 'dod chags dang / nga rgyal dang / 'jig tshogs la lta ba dang / mthar 'dzin par lta ba dang / lta ba mchog tu 'dzin pa dang tshul khrims dang brtul zhugs mchog tu 'dzin pa dang / the tshom ste brgyad do/ /kun 'byung gis thob pa/ 'dod chags dang / nga rgyal dang / log par lta ba dang / lta ba mchog tu 'dzin pa dang /the tshom ste lnga'o/ /de bzhin du 'gog pas thob pa lnga dang / lam gyis bsdus pa/ 'dod chags dang / nga rgyal dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom zhes pa ste drug go/ /bsgom pas spang bar bya ba 'dod chags dang /nga rgyal zhes pa ste nyi shu nyer drug go/ /de bzhin du gzugs med pas bsdus pa nyi shu drug ste/ nyi shu nyer drug pa gnyis te/ srid pa'i zag pa rdzas lnga bcu rtsa gnyis so/ /ma rig pa'i zag pa rdzas bco lnga ste/ 'di lta ste/ 'dod pa'i khams su sdug bsngal kun 'byung 'gog pa lam mthong ba dang /bsgom pas spang bar bya ba ma rig pa lnga'o/ /de bzhin du gzugs khams su lnga/ de bzhin du gzugs med pa'i khams su lnga ste ma rig pa'i zag pa rdzas bco lnga'o/ /chu bo la bzhi ni 'di lta ste/ 'dod pa'i chu bo dang / srid pa'i chu bo dang / lta ba'i chu bo dang /ma rig pa'i chu bo'o/ /de la 'dod pa'i chu bo ni rdzas nyi shu nyer dgu ste/ 'di lta ste/ 'dod pas bsdus pa sdug bsngal mthong bas spang bar bya ba 'dod chags dang / khro ba dang / nga rgyal dang / the tshom ste bzhi'o/ /de nyid kun 'byung mthong bas spang bar bya ba bzhi dang / de bzhin du 'gog pa mthong bas spang bar bya ba bzhi dang / de bzhin du lam mthong bas spang bar bya ba bzhi dang / bsgom pas spang bya 'dod chags dang / khong khro dang / nga rgyal te gsum mo/ /rmugs pa dang / gnyid dang / rgod pa dang / 'gyod pa dang / phrag dog dang / ser sna dang /ngo tsha med pa dang / khrel med pa dang / khro ba dang / 'chab pa ste/ 'di ni 'dod pa'i chu bo nyi shu nyer dgu'o/ /srid pa'i chu bo rdzas nyi shu nyer brgyad ni 'di lta ste/ 'dod pa na spyod pa'i 'dod chags dang / nga rgyal dang / the tshom ste 'di gsum ni sdug bsngal gyis bsdus pa'o/ / de bzhin du kun 'byung gis bsdus pa gsum dang / de bzhin du 'gog pas bsdus pa gsum dang / de bzhin du lam gyis bsdus pa gsum dang / bsgom pas spang bar bya ba 'dod chags dang / nga rgyal ste 'di rnams rdzas bcu bzhi'o/ /de rnams nyid ni gzugs med pa na spyod pa rdzas bcu bzhi ste/bcu bzhi pa gnyis ni srid pa'i chu bo nyi shu nyer brgyad do/ /lta ba'i chu bo rdzas sum cu rtsa drug ste/ 'di lta ste/ 'dod pa na spyod pa sdug bsngal gyis bsdus pa/ 'jig tshogs la lta ba dang / log par lta ba dang / mthar 'dzin par lta ba dang / lta ba mchog tu 'dzin pa dang /tshul khrims dang brtul zhugs mchog tu 'dzin pa zhes pa lnga'o/ /de bzhin du gzugs kyis bsdus pa lnga'o/ /de bzhin du gzugs med pas bsdus pa lnga ste 'di ni bco lnga'o/ /'dod pa na spyod pa gnyis ni kun 'byung gis bsdus pa ste/ log par lta ba dang lta ba mchog tu 'dzin pa'o//de dag bzhin du gnyis ni gzugs kyis bsdus pa'o/ /de dag bzhin du gnyis ni gzugs med pas bsdus pa ste 'di ni drug go /'gog pas bsdus pa ni drug po de nyid do/ /'dod pa na spyod pa lam gyis bsdus pa/ log par lta ba dang / lta ba mchog tu 'dzin pa dang / tshul khrims brtul zhugs mchog tu 'dzin pa zhes pa ste/gsum dang / de nyid du gzugs na spyod pa gsum/ de nyid gzugs med pa na spyod pa gsum ste dgu'o/ /'di ni lta ba'i chu bo rdzas sum cu rtsa drug go/ /ma rig pa'i chu bo rdzas bco lnga ste 'di lta ste/ 'dod pa na spyod pa sdug bsngal kun 'byung 'gog pa lam mthong ba dang bsgom pas spang bya ma rig pa lnga po de nyid do//de bzhin du gzugs kyis bsdus pa lnga dang / de kho na bzhin du gzugs med pas bsdus pa lnga ste ma rig pa'i chu bo rdzas bco lnga'o/ /sbyor ba bzhi ni 'di lta ste/ 'dod pa'i sbyor ba dang / srid pa'i sbyor ba dang /lta ba'i sbyor ba dang / ma rig pa'i sbyor ba'o/ /de la 'dod pa'i chu bo nyid 'dod pa'i sbyor ba'o/ /srid pa'i chu bo nyid srid pa'i sbyor ba'o/ /lta ba'i chu bo nyid lta ba'i sbyor ba'o/ /ma rig pa'i chu bo nyid ma rig pa'i sbyor ba'o zhes so/ /nye bar len pa ni 'di lta ste/'dod pa'i nye bar len pa dang / lta ba'i nye bar len pa dang / tshul khrims dang brtul zhugs nye bar len pa dang / bdag tu smra ba'i nye bar len pa'o/ /de la 'dod pa'i chu bo nyid ma rig pa lnga dang bcas pas rdzas sum cu rtsa bzhi ni 'dod pa'i nye bar len pa'o/ /lta ba'i chu bo nyid tshul khrims dang brtul zhugs mchog tu 'dzin pa rnam pa drug spangs pa rdzas sum cu ni lta ba'i nye bar len pa'o//tshul khrims dang brtul zhugs mchog tu 'dzin pa rnam pa drug ni tshul khrims dang brtul zhugs nye bar len pa'o/ /srid pa'i chu bo nyid gzugs kyis bsdus pa ma rig pa rnam pa lnga/gzugs med pas bsdus pa ma rig pa rnam pa lnga bcug ste/ rmugs pa dang gnyid dang bcas pas rdzas bzhi bcu ni bdag tu smra ba'i nye bar len pa'o/ /mdud pa bzhi ni 'di lta ste/ ma rig pa'i tshogs kyi mdud pa dang / gnod sems kyi tshogs kyi mdud pa dang /tshul khrims dang brtul zhugs mchog tu 'dzin pa'i tshogs kyi mdud pa dang / 'di ni yod do zhes mngon par zhen pa'i tshogs kyi mdud pa'o/ /sgrib pa ni lnga ste 'di lta ste/ 'dod pa la 'dun pa dang / gnod sems dang / rmugs gnyid dang / rgod 'gyod dang the tshom mo/ /shes pa la bcu gnyis ni 'di lta ste/chos shes pa dang / rjes su shes pa dang / gzhan sems shes pa dang / kun rdzob shes pa dang / sdug bsngal shes pa dang / kun 'byung shes pa dang / 'gog pa shes pa dang / lam shes pa dang / zad pa shes pa dang / mi skye ba shes pa dang / sgra ji bzhin pa shes pa dang /legs par goms par shes pa'o/ /bzod pa la brgyad ni 'di lta ste/ sdug bsngal la chos shes pa'i bzod pa dang / sdug bsngal la rjes su shes pa'i bzod pa dang / kun 'byung la chos shes pa'i bzod pa dang / kun 'byung la rjes su shes pa'i bzod pa dang / 'gog pa la chos shes pa'i bzod pa dang /'gog pa la rjes su shes pa'i bzod pa dang / lam la chos shes pa'i bzod pa dang / lam la rjes su shes pa'i bzod pa'o/ /de la sems dang mtshungs par ldan pa'i 'du byed la rnam pa gnyis ni 'di lta ste/ spang bya dang / blang bya'o/ /de la gtso bo'i dngos kyi spang bya ni 'du byed la bcu bdun ni 'di lta ste/shin tu ma spangs pa dang / 'tshe ba dang / bag med pa dang / shes bzhin ma yin pa dang / mi dge ba'i rtsa ba dang / lung ma bstan gyi rtsa ba dang / kun du sbyor ba dang / 'ching ba dang / bag la nyal dang / nye ba'i nyon mongs pa dang / kun nas dkris pa dang / zag pa dang / chu bo dang / sbyor ba dang / nye bar len pa dang / mdud pa dang / sgrib pa'o/ /gtso bo ma yin pa yang nyon mongs pa la 'byung ba dang / nyon mongs pa dang mi dge ba dang lung du ma bstan dang sems pa la sogs pa zag pa dang bcas pa dang kun rdzob shes pa ni spang bya'o//blang bya'i 'du byed la nyi shu rtsa bzhi ni 'di lta ste/ sems pa dang / reg pa dang / yid la byed pa dang / 'dun pa dang / mos pa dang / dad pa dang / brtson 'grus dang / dran pa dang / ting nge 'dzin dang / shes rab dang / rnam rtog dang / spyod pa dang / bag yod pa dang /yid 'byung ba dang / yi rang ba dang / shin tu sbyangs pa dang / mi 'tshe ba dang / ngo tsha shes pa dang / khrel yod pa dang / btang snyoms dang / rnam par grol ba dang / dge ba'i rtsa ba dang / shes pa dang / bzod pa'o/ /yang sems las byung ba'i 'du byed la rnam pa lnga ni 'di lta ste/ sa chen po pa dang / dge ba'i sa chen po pa dang / nyon mongs pa'i sa chen po pa dang / mi dge ba'i sa chen po pa dang / sa chung ngu pa'o/ /de la sems gang la thams cad 'byung ba de ni sa chen po pa'o/ /'di lta ste/ tshor ba dang / sems pa dang / 'du shes dang / 'dun pa dang / reg pa dang /shes rab dang / dran pa dang / yid la byed pa dang / mos pa dang / ting nge 'dzin no/ /sems gang la dus thams cad du dge ba 'byung ba de ni dge ba'i sa chen po pa ste bcu'o/ /'di lta ste/ dad pa dang / bag yod pa dang / shin tu sbyangs pa dang / btang snyoms dang / ngo tsha shes pa dang / khrel yod pa dang / ma chags pa dge ba'i rtsa ba dang / mi sdang ba dge ba'i rtsa ba dang / mi 'tshe ba dang / brtson 'grus so/ /sems gang dus rtag tu nyon mongs pa can nyid 'byung ba de ni nyon mongs pa'i sa chen po pa ste drug go/ /'di lta ste/ rmongs pa dang / bag med pa dang / le lo dang / ma dad pa dang / rmugs pa dang / rgod pa'o/ /sems gang dag la dus rtag tu mi dge ba'i sems 'byung ba de dag ni mi dge ba'i sa chen po pa gnyis ni 'di lta ste/ ngo tsha med pa dang / khrel med pa'o/ /gang yid kyi sa pa bsgom pas spang bar bya ba ma rig pa tsam nyid kyis rab tu ldan pa de ni sa chung ngu pa ste bcu'o//'di lta ste/ khro ba dang / khon du 'dzin pa dang / g.yo dang / phrag dog dang / 'tshig pa dang / 'chab pa dang / ser sna dang / sgyu dang / rgyags pa dang / rnam par 'tshe ba'o/ /gzhan sems can thams cad la yang nges pa med par gyur pa'i sems las byung ba yin pa ni 'di lta ste/rnam par rtog pa dang / rnam par dpyod pa dang / 'gyod pa dang / gnyid la sogs pa'o/ /'dod pa na spyod pa'i sems kyang rnam pa gsum ste/ 'di lta ste/ dge ba'i sems dang / mi dge ba'i sems dang / lung du ma bstan pa'i sems so/ /de la dge ba'i sems mang du gyur pas rnam pa bcu ste/'di lta ste/ dad pa mtshungs par ldan pa dang / bag yod pa mtshungs par ldan pa dang / shin tu sbyangs pa mtshungs par ldan pa dang / btang snyoms mtshungs ldan dang / ngo tsha shes pa mtshungs ldan dang / khrel yod pa mtshungs ldan dang / ma chags pa mtshungs ldan dang /mi sdang ba mtshungs ldan dang / mi 'tshe ba mtshungs ldan dang / brtson 'grus mtshungs ldan no/ mi dge ba'i sems la rnam pa gnyis ni 'di lta ste/ ma 'dres pa dang / nyon mongs pa gzhan gyis mtshungs ldan no/ /de la ma 'dres pa ni gang las ma rig pa 'ga' zhig gis mtshungs ldan no//nyon mongs gzhan gyis mtshungs ldan ni rnam par dbye ba bco brgyad do/ /'di lta ste/ log par lta bas dang / lta ba mchog tu 'dzin pas dang / tshul khrims dang brtul zhugs mchog tu 'dzin pas dang / 'dod chags kyis dang / khong khro bas dang / nga rgyal gyis dang / the tshom gyis dang / khro bas dang / 'khon du 'dzin pas dang / g.yos dang / phrag dog gis dang / 'tshig pas dang / 'chab pas dang / ser snas dang / sgyus dang / rgyags pas dang / rnam par 'tshe bas dang / 'gyod pas dang ngo / /so so la mtshungs ldan zhes sbyar bar bya'o//lung ma bstan la rnam par dbye ba gnyis te/ 'di lta ste/ sgrib pa lung ma bstan dang / sgrib pa ma yin pa lung ma bstan to/ /de la sgrib pa lung ma bstan la gnyis ni 'di lta ste/ 'jig tshogs la lta bas dang / mthar 'dzin par lta bas dang ngo / /mtshungs par ldan pas so/ /sgrib pa'i lung ma bstan las gzhan lung ma bstan ni sgrib pa ma yin pa lung ma bstan no//de la 'dod pa na spyod pa dge ba'i sems la nges par sems las byung ba nyi shu nyer gnyis su 'gyur ro/ /'di lta ste/ sa chen po pa bcu dang / dge ba'i sa chen po pa bcu dang / rnam par rtog pa dang / rnam par dpyod pa'o//res 'ga' yang 'gyod pa dang / lhan cig pas nyer gsum du 'gyur ro/ /res 'ga'i tshe yang gnyis dang lhan cig pas sems las byung ba nyi shu nyer gsum du 'gyur ba yin no/ /mi dge ba'i sems la 'dres pa la yang sems las byung ba nyi shu ste/ 'di lta ste/ sa chen po pa bcu dang /nyon mongs pa'i sa chen po pa drug dang / mi dge ba'i sa chen po pa gnyis dang / rnam par rtog pa dang / rnam par dpyod pa'o/ /log par lta ba'i mtshungs ldan mi dge ba'i sems la yang de bzhin du nyi shu'o/ /res 'ga' yang gnyis dang lhan cig pas nyi shu nyer gcig go//lta ba mchog tu 'dzin pas mtshungs ldan mi dge ba'i sems la yang de bzhin du nyi shu nyer gcig go/ /tshul khrims dang brtul zhugs mchog tu 'dzin pas mtshungs ldan mi dge ba'i sems la yang de bzhin du nyer gcig go/ /'dod chags mtshungs ldan sems la de bzhin du nyi shu'o//'dod chags dang res 'ga' yang gnyid ces pa dang nyi shu nyer gnyis so/ /khong khro mtshungs ldan sems la de bzhin du nyi shu'o/ /khong khro dang res 'ga' yang gnyid ces pa dang nyer gnyis so/ /nga rgyal mtshungs ldan sems la de bzhin du nyi shu'o//nga rgyal dang res 'ga' yang gnyid ces pa dang nyi shu nyer gnyis so/ /the tshom mtshungs ldan sems la de bzhin du nyi shu'o/ /the tshom dang res 'ga' yang gnyid ces pa ste nyi shu nyer gnyis so/ /khro ba mtshungs ldan la de bzhin du khro ba dang gnyid ces pa ste nyer gnyis so//khon du 'dzin pa mtshungs ldan sems la de bzhin du khon du 'dzin pa dang gnyid ces pa ste nyer gnyis so/ /g.yo mtshungs ldan sems la de kho na bzhin du g.yo dang gnyid ces pa ste nyi shu nyer gnyis so/ /'tshig pa mtshungs ldan sems la de kho na bzhin du 'tshig pa dang gnyid ces pa ste nyi shu nyer gnyis so//'chab pa mtshungs ldan sems la de kho na bzhin du 'chab pa dang gnyid ces pa ste nyer gnyis so/ /ser sna mtshungs ldan sems la de kho na bzhin du ser sna dang gnyid ces pa ste nyer gnyis so/ /sgyu mtshungs ldan sems la de kho na bzhin du sgyu dang gnyid ces pa ste nyer gnyis so//rgyags pa mtshungs ldan sems la de kho na bzhin du rgyags pa dang gnyid ces pa ste nyer gnyis so/ /'tshe ba mtshungs ldan sems la de kho na bzhin du 'tshe ba dang gnyid ces pa ste nyer gnyis so/ /'gyod pa mtshungs ldan sems la de kho na bzhin du 'gyod pa dang gnyid ces pa ste nyer gnyis so//sgrib pa lung ma bstan sems la sems las byung ba bco brgyad du 'gyur te/ res 'ga' yang gnyid dang lhan cig pas bcu dgu'o/ /'di lta ste/ sa chen po pa bcu dang / nyon mongs pa'i sa chen po pa drug dang / rnam rtog dang / rnam par dpyod pa dang / gnyid do/ /sgrib pa ma yin pa lung ma bstan sems las sems byung bcu gnyis te 'di lta ste/ sa chen po pa bcu dang / rnam rtog dang / rnam dpyod dang / res 'ga' yang gnyid do/ /kha cig lung ma bstan la yang / /'gyod pa yod pas 'gyod pa dang / /lhan cig sems byung bcu bzhi'o//zer ro/ /'di ni 'dod khams kyi sems dang sems byung nges pa'o/ /gzugs dang gzugs med khams su mi dge ba dang / sgrib pa lung ma bstan gyi khams rnam pa thams cad du med do/ /dge ba dang sgrib pa ma yin pa lung ma bstan ni yod pa nyid do/ /des na bsam gtan dang po na 'gyod pa dang gnyid dag rnam pa thams cad du med do//'di lta ste/ khong khro dang / khro ba dang / khon du 'dzin pa dang / phrag dog dang / 'tshig pa dang / 'chab pa dang / ser sna dang / rnam par 'tshe ba dang / ngo tsha med pa dang / khrel med pa rnams med do/ /g.yo dang / rgyags pa dang /sgyu ni yod do/ /gzhan thams cad 'dod khams bzhin no/ /bsam gtan khyad par can la yang rnam par rtog pa yang med do/ /bsam gtan dang po las pha rol na bsam gtan gnyis pa la sogs pa rnams su gzugs dang gzugs med pa rnams su 'di ltar rtog pa yang med do/ / rnam par dpyod pa yang med do/ /sgyu dang g.yo yang med do/ /lhag ma ni sngon bzhin no/ /sems dang mi ldan pa'i 'du byed la bcu dgu ni 'di lta ste/ thob pa dang / ma thob pa dang / 'du shes med pa'i snyoms 'jug dang / 'gog pa'i snyoms 'jug dang / 'du shes med pa dang / 'tsho ba'i dbang po dang /skal ba mthun pa dang / gnas so sor thob pa dang / dngos po so sor thob pa dang / skye mched so sor thob pa dang / skye ba dang / rgas pa dang / gnas pa dang / mi rtag pa nyid dang / ming gi tshogs dang / tshig gi tshogs dang / yi ge'i tshogs dang / ma 'tshogs pa dang / 'tshogs pa'o/ /so so skye bo dang / 'jug pa dang / 'jug pa nges pa dang / sbyor ba dang / bang mgyogs pa dang / rim pa dang / dus dang / yul dang / grangs zhes pa chos dgu ni mi ldan pa'o zhes chos mngon pa kun las btus pa las so/ /rnam par shes pa bdun ni rnam par shes pa'i phung po'o//'di lta ste/ mig gi rnam shes dang / rna ba'i rnam shes dang / sna'i rnam shes dang / lce'i rnam shes dang / lus kyi rnam shes dang / yid kyi rnam shes dang / yid kyi dbang po'o/ /'di bdun rnams su nyon mongs pa can gyi yid dang kun gzhi rnam par shes pa dag bsdus pas rnam par shes pa dgu ni rnam par shes pa'i phung po'o//de la chos bdun kun gzhi rnam par shes pa la brten no/ /'di lta ste/ dge ba'i rtsa ba rgyun gcod pa dang / dge ba'i rtsa ba yang dag par 'dzin pa dang / khams la 'dod chags dang bral ba dang / sa la 'dod chags dang bral ba dang /yongs su nyams pa dang / 'pho ba dang / skye ba'o/ /khams la bco brgyad de 'di lta ste/ mig gi khams dang / gzugs kyi khams dang / mig gi rnam par shes pa'i khams dang / rna ba'i khams dang / sgra'i khams dang / rna ba'i rnam par shes pa'i khams dang /sna'i khams dang / dri'i khams dang / sna'i rnam par shes pa'i khams dang / lce'i khams dang / ro'i khams dang / lce'i rnam par shes pa'i khams dang / lus kyi khams dang / reg bya'i khams dang / lus kyi rnam par shes pa'i khams dang / yid kyi khams dang / chos kyi khams dang /yid kyi rnam par shes pa'i khams so/ /skye mched ni bcu gnyis te 'di lta ste/ mig gi skye mched dang / rna ba'i skye mched dang / sna'i skye mched dang / lce'i skye mched dang / lus kyi skye mched dang / yid kyi skye mched dang / gzugs kyi skye mched dang / sgra'i skye mched dang / dri'i skye mched dang /ro'i skye mched dang / reg bya'i skye mched dang / chos kyi skye mched do/ /de la yid kyi skye mched dngos po bdun te/ 'di lta ste/ dbang po drug gi rnam shes dang yid kyi dbang po'o/ /kun gzhi'i rnam par shes pa dang nyon mongs pa'i yid kyi rnam shes dang gnyis kyi lhan cig pas yid kyi skye mched ni dngos po dgu'o//chos bdun ni chos kyi skye mched do/ /'di lta ste/ tshor ba dang / 'du shes dang / 'du byed dang / rnam par shes pa dang / rnam par rig byed pa yin pa dang / nam mkha' dang / so sor brtags pa'i 'gog pa dang / so sor brtags pa ma yin pa'i 'gog pa'o/ /de rnams kun du bsdu ba yang 'di bzhin te/gzugs can gyi skye mched bcu ni gzugs kyi phung po'o/ /yid kyi skye mched ni rnam shes kyi phung po'o/ /chos kyi skye mched ni tshor ba dang / 'du shes dang / 'du byed kyi phung po'o/ /khams rnams su bsdu ba yang 'di bzhin te/ gzugs can skye mched bcu ni gzugs can khams bcu'o//yid kyi skye mched ni rnam par shes pa'i khams drug dang yid kyi khams so/ /chos kyi skye mched ni chos kyi khams so/ /khams bco brgyad po 'di rnams kyi nang na 'dod pa na so sor yang dag par ldan pa du zhe na/ khams thams cad nyid do/ /gzugs na so sor kun du ldan pa du zhe na/khams de rnams la dri dang ro dang sna'i rnam shes dang lce'i rnam shes ma gtogs pa gzhan khams bcu bzhi rnams so/ /gzugs med pa na chos kun du ldan pa du zhe na/ yid kyi khams dang / yid kyi rnam par shes pa'i khams dang / chos kyi khams dang gsum char zag pa dang bcas pa'o//khams gsum na mi ldan pa du zhe na/ gang la zag pa med pa'i yid kyi khams dang / yid kyi rnam par shes pa'i khams dang chos kyi khams so/ /khams bcu ni dge ba dang mi dge ba dang lung du ma bstan pa ste/ 'di lta ste/ mig gi rnam par shes pa'i khams dang /rna ba'i rnam par shes pa'i khams dang / sna'i rnam par shes pa'i khams dang / lce'i rnam par shes pa'i khams dang / lus kyi rnam par shes pa'i khams dang / yid kyi rnam par shes pa'i khams dang / yid kyi dbang po dang / gzugs kyi khams dang / sgra'i khams dang /chos kyi khams so/ /lung du ma bstan pa'i khams brgyad de/ 'di lta ste/ mig gi khams dang / rna ba'i khams dang / sna'i khams dang / lce'i khams dang / lus kyi khams dang / dri'i khams dang / ro'i khams dang / reg bya'i khams so/ /yang khams la rnam pa gnyis ni 'di lta ste/nang dang phyi rol lo/ /de la nang gi ni lhag dang bcas pa'i bcu gnyis so/ /'di lta ste/ dbang po drug gi khams dang / rnam shes drug gi khams dang / chos kyi khams kyi cha 'ga' zhig go/ /phyi rol gyi khams la lhag dang bcas pa'i lnga ni 'di lta ste/ gzugs sgra dri ro reg bya'i khams dang /chos kyi khams kyi cha 'ga'o/ /yang khams ni rnam pa gnyis te 'di lta ste/ dmigs pa dang bcas pa dang / dmigs pa med pa'o/ /de la dmigs pa dang bcas pa ni sems kyi khams bdun no/ /lhag ma ni dmigs pa med pa ste bcu gcig go/ /de nyid ni bden pa bzhi ste/'di lta ste/ sdug bsngal bden pa dang / kun 'byung bden pa dang / 'gog pa'i bden pa dang / lam gyi bden pa'o/ /de la sdug bsngal gyi bden pa ni khams thams cad do/ /kun 'byung bden ni zag bcas chos kyi khams kyi cha'o/ /lam gyi bden pa ni zag pa med pa'i chos kyi khams kyi cha 'ga'o//'gog pa'i bden pa ni 'dus ma byas kyi chos kyi khams kyi cha 'ga' nyid do/ /de nyid ni rang bzhin gsum ste/ 'di lta ste/ kun brtags kyi rang bzhin dang / gzhan dbang gi rang bzhin dang / yongs su grub kyi rang bzhin no/ /de la khams thams cad ni kun brtags dang gzhan dbang nyid do//'dus ma byas kyi chos kyi khams kyi cha 'ga' ni yongs su grub pa'i rang bzhin no/ /de nyid ni bden pa gnyis te/ 'di lta ste/ kun rdzob bden pa dang / don dam pa'i bden pa'o/ /de la khams kun nyid ni kun rdzob bden pa'o/ / 'dus ma byas chos kyi khams kyi cha 'ga' ni don dam pa'i bden pa'o/ /'dir khams drug po 'di ni skyes bu dang gang zag ces pa khams drug ni 'di lta ste/ sa'i khams dang / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams so//yang chos rnams mdor bsdu na rnam pa gnyis te/ 'di lta ste/ gzugs can dang / gzugs can ma yin pa'o/ /de la chos gzugs can ni rnam pa gnyis te/ 'di lta ste/ 'byung ba dang / 'byung ba las byung ba'o/ /chos gzugs can ma yin pa ni gnyis 'di lta ste/'dus byas dang / 'dus ma byas so/ /de la chos gzugs can ma yin pa 'dus byas ni rnam pa gsum ste/ 'di lta ste/ sems dang / sems las byung ba dang / sems dang mi ldan pa'o/ /chos gzugs can ma yin pa 'dus ma byas ni rnam pa bzhi ste/ 'di lta ste/ nam mkha' dang / so sor brtags pa'i 'gog pa dang / so sor brtags pa ma yin pa'i 'gog pa dang / chos rnams kyi chos nyid do/ /des na 'dod pa'i khams thams cad phung po lnga'i bdag nyid can no/ /gzugs khams kyang 'du shes med pa'i sems can spangs pa phung po lnga'i bdag nyid can no//'du shes med pa'i sems can ni phung po gnyis te/ gzugs dang 'du byed kyi phung po tsam yin pas so/ /gzugs med pa'i khams ni phung po bzhi'i bdag nyid can te/ de la gzugs kyi phung po med pa'i phyir ro/ /paN+Di ta chen po stobs bcu dpal bshes gnyen gyis rnam par bsdus pa 'dus byas dang 'dus ma byas rnam par nges pa las phung po skye mched khams rnam par nges pa zhes bya ba le'u dgu pa'o// //snod dang sems can gyi 'jig rten gnyis dag gis skyed par byed pa rten cing 'brel bar 'byung ba rnam pa gnyis te/'di lta ste/ phyi rol gyi rten cing 'brel bar 'byung ba dang / nang gi rten cing 'brel bar 'byung ba'o/ /de la snod kyi 'jig rten skyed par byed pa thun mong gi las ni phyi'i rten cing 'brel bar 'byung ba'o/ /sems can gyi 'jig rten skyed par byed pa thun mong ma yin pa las ni nang gi rten cing 'brel bar 'byung ba'o//de la nang gi rten cing 'brel bar 'byung ba ni yan lag bcu gnyis te/ 'di ltar ma rig pa'i yan lag dang / 'du byed kyi yan lag dang / rnam par shes pa'i yan lag dang / ming dang gzugs kyi yan lag dang / skye mched drug gi yan lag dang / reg pa'i yan lag dang /tshor ba'i yan lag dang / sred pa'i yan lag dang / nye bar len pa'i yan lag dang / srid pa'i yan lag dang / skye ba'i yan lag dang / rga shi'i yan lag go/ /de rnams ni yan lag bzhi nyid du 'gyur te/ 'di lta ste/ 'phen par byed pa'i yan lag dang / 'phangs pa'i yan lag dang /mngon par sgrub par byed pa'i yan lag dang / mngon par bsgrub par bya ba'i yan lag go/ /de la 'phen par byed pa'i yan lag rnam pa gnyis te 'di lta ste/ ma rig pa'i yan lag dang / 'du byed kyi yan lag go/ /'phangs pa'i yan lag la rnam pa lnga ni 'di lta ste/ rnam par shes pa'i yan lag dang / ming dang gzugs kyi yan lag dang / skye mched drug gi yan lag dang / reg pa'i yan lag dang / tshor ba'i yan lag go/ /mngon par sgrub par byed pa'i yan lag la rnam pa gsum ni 'di lta ste/ sred pa'i yan lag dang / nye bar len pa'i yan lag dang /srid pa'i yan lag go/ /mngon par bsgrub par bya ba'i yan lag la rnam pa gnyis ni 'di lta ste/ skye ba'i yan lag dang / rga shi'i yan lag go/ /yang rten cing 'brel bar 'byung ba 'di la dum bu ni 'di lta ste/ sngon gyi dum bu dang / bar gyi dum bu dang / mtha' ma'i dum bu'o//de la sngon gyi dum bu ni de ma thag pa'i skye ba sngon ma dang 'brel pa'i yan lag gnyis ni 'di lta ste/ ma rig pa'i yan lag dang / 'du byed kyi yan lag go/ /bar gyi dum bu'i skye ba lta ba dang 'brel ba'i yan lag brgyad ni 'di lta ste/ rnam par shes pa'i yan lag dang /ming dang gzugs kyi yan lag dang / skye mched drug gi yan lag dang / reg pa'i yan lag dang / tshor ba'i yan lag dang / sred pa'i yan lag dang / nye bar len pa'i yan lag dang / srid pa'i yan lag go/ /mtha' ma'i dum bu ni ma 'ongs pa'i skye ba dang 'brel ba'i yan lag gnyis ni 'di lta ste/skye ba'i yan lag dang / rga shi'i yan lag go/ yang rten cing 'brel bar 'byung ba la mtha' gnyis ni 'di lta ste/ sngon gyi mtha' can dang / phyi ma'i mtha' can no/ /de la sngon gyi mtha' can la gnyis ni bdag nyid de 'di lta ste/ rgyu'i bdag nyid dang 'bras bu'i bdag nyid do//de la rgyu'i bdag nyid ni skye ba sngon ma dang 'brel ba'i yan lag la gnyis ni 'di lta ste/ ma rig pa'i yan lag dang / 'du byed kyi yan lag go/ /'bras bu'i bdag nyid la 'jug bzhin pa'i skye ba dang 'brel ba'i yan lag lnga ni 'di lta ste/ rnam par shes pa dang / ming dang gzugs dang / skye mched drug dang / reg pa dang / tshor ba'o/ /phyi ma'i mtha' can yang gnyis kyi bdag nyid de/ rgyu'i bdag nyid dang / 'bras bu'i bdag nyid do/ /de la rgyu'i bdag nyid ni/ da lta'i skye ba dang 'brel pa'i yan lag gsum ni 'di lta ste/sred pa dang / nye bar len pa dang / srid pa'o/ /'bras bu'i bdag nyid de ma thag pa ma 'ongs pa'i skye ba dang 'brel pa'i yan lag gnyis ni 'di lta ste/ skye ba dang / rga shi'o/ /yang rten cing 'brel par 'byung ba la ni phung po gsum ni 'di lta ste/ nyon mongs pa'i phung po dang / las kyi phung po dang / skye ba'i phung po'o/ /de la nyon mongs pa'i phung po la yan lag gsum ni 'di lta ste/ ma rig pa'i yan lag dang / sred pa'i yan lag dang / nye bar len pa'i yan lag go/ /las kyi phung po la yan lag gnyis ni 'di lta ste/ 'du byed kyi yan lag dang / srid pa'i yan lag go//skye ba'i phung po la yan lag bdun ni 'di lta ste/ rnam par shes pa'i yan lag dang / ming dang gzugs kyi yan lag dang / skye mched drug gi yan lag dang / reg pa'i yan lag dang / tshor ba'i yan lag dang / skye ba'i yan lag dang / rga shi'i yan lag go/ /yang kun nas nyon mongs pa gsum gyi bdag nyid de/'di lta ste/ nyon mongs pa'i kun nas nyon mongs pa'i bdag nyid dang / las kyi kun nas nyon mongs pa'i bdag nyid dang / skye ba'i kun nas nyon mongs pa'i bdag nyid do/ /de la nyon mongs pa'i kun nas nyon mongs pa'i bdag nyid la yan lag gsum ni 'di lta ste/ma rig pa'i yan lag dang / sred pa'i yan lag dang / nye bar len pa'i yan lag go/ /las kyi nyon mongs pa'i bdag nyid la yan lag gnyis ni 'di lta ste/ 'du byed kyi yan lag dang / srid pa'i yan lag go/ /skye ba'i nyon mongs pa'i bdag nyid la yan lag bdun ni 'di lta ste/rnam par shes pa'i yan lag dang / ming dang gzugs kyi yan lag dang / skye mched drug gi yan lag dang / reg pa'i yan lag dang / tshor ba'i yan lag dang / skye ba'i yan lag dang / rga shi'i yan lag go/ /yang kun nas nyon mongs pa gsum gyi bdag nyid rten cing 'brel bar 'byung ba ni gnyis kyi bdag nyid de 'di lta ste/rgyu'i bdag nyid dang / 'bras bu'i bdag nyid do/ /de la rgyu'i kun nas nyon mongs pa'i bdag nyid la kun nas nyon mongs gnyis ni 'di lta ste/ nyon mongs pa'i kun nas nyon mongs pa dang / las kyi kun nas nyon mongs pa dang /'bras bu'i kun nas nyon mongs pa'i bdag nyid la gcig ni 'di lta ste/ skye ba'i kun nas nyon mongs pa'o/ /yang lam gsum ni 'di lta ste/ nyon mongs pa'i lam dang / las kyi lam dang / rnam par smin pa'i lam mo/ /de la nyon mongs pa'i lam ni yan lag gsum ste/'di lta ste/ ma rig pa dang / sred pa dang / nye bar len pa'o/ /las kyi lam la yan lag gnyis te 'di yin te/ 'du byed kyi yan lag dang / srid pa'i yan lag go/ /rnam par smin pa'i lam la yan lag bdun ni 'di lta ste/ rnam par shes pa'i yan lag dang / ming dang gzugs kyi yan lag dang / skye mched drug gi yan lag dang / reg pa'i yan lag dang / tshor ba'i yan lag dang / skye ba'i yan lag dang / rga shi'i yan lag go/ /yang rten cing 'brel par 'byung ba ni bcu gnyis kyi bdag nyid de/ 'di yin te/ gang de ma thag pa'i 'das pa'i skye ba'i nyon mongs pa thams cad kyi gnas skabs ni ma yin no//gang de ma thag pa'i 'das pa'i skye ba'i yang srid len byed kyi las mtha' dag gi gnas skabs de ni 'du byed kyi yan lag go/ /ma'i lto bar skye ba nying mtshams sbyor ba'i dus kyi phung po lnga'i gnas skabs de ni rnam par shes pa'i yan lag go//nying mtshams sbyor ba'i dus phan chad nas skye mched drug ma dod pa'i bar gyi gnas skabs de ni ming dang gzugs so/ /de'i rjes su skye mched drug rdzogs te/ ci srid du dbang po dang yul dang rnam par shes pa rnams 'tshogs par ma gyur pa'i bar gyi gnas skabs de ni skye mched drug gi yan lag go//dbang po dang yul dang rnam par shes pa rnams phrad nas 'tshogs pa gsum yongs su gcod par mi nus pa'i gnas skabs de ni reg pa'o/ /tshor ba gsum yongs su bcad nas ci srid du 'khrig pa'i 'dod chags ma gyur pa de'i gnas skabs ni tshor ba'i yan lag go//'khrig pa'i 'dod chags kun du spyod pa'i gnas skabs de ni sred pa'i yan lag go/ /yul gang gi gnas skabs thob pa'i don du 'tshol ba la zhugs nas thams cad du rgyug pa'i gnas skabs de ni nye bar len pa'i yan lag go//yul gang thob pa'i don kun du rgyug pas yang srid len byed kyi las nye bar sogs pa'i gnas skabs de srid pa'i yan lag go/ /skye ba la 'di nyid kyi rnam par shes pa'i gnas skabs gang yin pa de nyid kyi bar med pa'i ma 'ongs pa'i skye ba'i gnas skabs de ni skye ba'i yan lag go//skye ba 'di nyid kyi ming dang gzugs skye mched drug tshor ba'i gnas skabs gang yin pa de nyid kyi bar med pa'i ma 'ongs pa'i skye ba ni rga shi'i yan lag go/ /yang rten cing 'brel bar 'byung ba ni phan tshun rgyu yin te/ 'di lta ste/ ma rig pa'i rkyen las 'du byed dang / 'du byed kyi rkyen las rnam par shes pa dang /rnam par shes pa'i rkyen las ming dang gzugs ming dang gzugs kyi rkyen las skye mched drug dang / skye mched drug gi rkyen las reg pa dang / reg pa'i rkyen las tshor ba dang / tshor ba'i rkyen las sred pa dang / sred pa'i rkyen las nye bar len pa dang / nye bar len pa'i rkyen las srid pa dang /srid pa'i rkyen las skye ba dang / skye ba'i rkyen las rga shi'o/ /des na de bzhin du skye ba'i rkyen las rga shi dang mya ngan dang smre sngags 'don pa dang / yid mi bde ba dang / 'khrug pa rnams 'byung bar 'gyur ro zhes brjod de/ de ltar sdug bsngal gyi phung po chen po 'ba' zhig kun du 'byung bar 'gyur ro zhes pa ni rjes su mthun pa'o//'ba' zhig ces pa ni gzhan gyis yongs su brtags pa'i bdag la sogs pa dang bral ba'i zhes pa'o/ /rjes su mi mthun pa ni ma rig pa 'gags pas 'du byed 'gag /'du byed 'gags pas rnam par shes pa 'gag /rnam par shes pa 'gags pas ming dang gzugs 'gag /ming dang gzugs 'gags pas skye mched drug 'gag /skye mched drug 'gags pas reg pa 'gag /reg pa 'gags pas tshor ba 'gag /tshor ba 'gags pas sred pa 'gag /sred pa 'gags pas nye bar len pa 'gag /nye bar len pa 'gags pas srid pa 'gag /srid pa 'gags pas skye ba 'gag /skye ba 'gags pas rga shi dang mya ngan dang smre sngags 'don pa dang sdug bsngal dang yid mi bde ba dang 'khrug pa rnams 'gag par 'gyur ro/ /de bzhin du sdug bsngal gyi phung po chen po 'ba' zhig 'gag par 'gyur ro//'ba' zhig ni gzhan gyis yongs su brtags pa'i bdag la sogs pa dang bral ba'i zhes pa'o/ /yang de la ma rig pa ni 'bras bu rnam pa gnyis so sor nye bar gnas par 'gyur te/ 'di lta ste/ dmigs pa sems can rnams kun du rmongs par byed do//'du byed mngon par rdzogs pa'i phyir rgyu yang sbyin par byed do/ /'du byed kyang 'bras bu rnam pa gnyis so sor nye bar gnas par 'gyur te/ 'di lta ste/ ma 'ongs pa'i rnam par smin pa mngon par sgrub par byed pa dang / rnam par shes pa mngon par rdzogs pa'i phyir rgyu yang sbyin par byed do//rnam par shes pa yang 'bras bu rnam pa gnyis so sor nye bar gnas par 'gyur te/ 'di lta ste/ srid pa nying mtshams sbyor ba skyed par byed pa dang / ming dang gzugs mngon par rdzogs pa'i phyir rgyu yang smin par byed ming dang gzugs kyang 'bras bu rnam pa gnyis nye bar gnas par 'gyur te/'di lta ste/ phan tshun nye bar bstan par yang byed pa dang / skye mched drug mngon par sgrub pa'i don du rgyu ster ro/ /skye mched drug kyang 'bras bu rnam pa gnyis nye bar gnas par 'gyur te/ 'di lta ste/ yul rnam par 'byed par byed pa dang / reg pa mngon par sgrub pa'i don du rgyu yang ster ro/ /reg pa yang 'bras bu rnam pa gnyis so sor nye bar gnas par 'gyur te/ 'di lta ste/ dmigs pa dang reg par byed pa dang / tshor ba mngon par rdzogs pa'i ched du rgyu yang ster ro/ /tshor ba yang 'bras bu rnam pa gnyis so sor nye bar gnas par 'gyur te/'di lta ste/ 'dod pa dang mi 'dod pa dang gnyis ka bzlog pa nyams su myong bar byed pa dang / sred pa mngon par rdzogs pa'i don du rgyu yang sbyin par byed do/ /sred pa yang 'bras bu rnam pa gnyis so sor nye bar gnas par 'gyur te/'di lta ste/ kun nas gos par bya ba'i dngos po la kun du chags par byed pa dang / nyer len mngon par rdzogs pa'i don du rgyu yang sbyin par byed do/ /nye bar len pa yang 'bras bu rnam pa gnyis so sor nye bar gnas par 'gyur te/ 'di lta ste/ kun nas nyon mongs pa dang sdom par byed pa dang /srid pa mngon par rdzogs pa'i phyir rgyu yang sbyin par byed do/ /srid pa yang 'bras bu rnam pa gnyis so sor nye bar gnas par 'gyur te/ 'di lta ste/ srid pa'i 'gro ba gzhan dang so sor nye bar gnas par byed pa dang / skye ba mngon par rdzogs pa'i phyir rgyu yang sbyin no/ /skye ba yang 'bras bu rnam pa gnyis so sor nye bar gnas par 'gyur te/'di lta ste/ phung po phye ba byed pa dang / rga ba mngon par rdzogs pa'i phyir rgyu yang sbyin par byed do/ /rga ba yang 'bras bu rnam pa gnyis so sor nye bar gnas par 'gyur te/ 'di lta ste/ dbang po yang rnam par 'gyur bar byed pa dang /'chi ba kun du 'dzin pa mngon par rdzogs pa'i don du rgyu yang ster bar byed do/ /'chi ba yang 'bras bu rnam pa gnyis so sor nye bar gnas par 'gyur te/ 'di lta ste/ 'du byed rnam par 'joms par byed pa dang / yongs su mi shes pa nye bar 'chad par mi byed pa'o/ /de la dmigs la sems can rnams rmongs par byed do zhes pa ni yul gtsang ba la sogs pa'i mtshan mar bzung nas kun du chags par byed pa'o//ma 'ongs pa'i rnam par smin pa mngon par sgrub par byed ces pa ni 'dod pa dang mi 'dod pa'i 'bras bu rdzogs par byed pa'o/ /srid par nying mtshams sbyor ba zhes pa ni skye ba'i srid pa rdzogs par byed do//ming zhes pa ni/ tshor ba dang / 'du shes dang / 'du byed dang / rnam par shes pa'i phung po'o/ /gzugs zhes pa ni gzugs kyi phung po'o/ /de rnams phan tshun nye bar bsten par byed ces pa ni/ phan tshun rjes su 'gro bas mthun par 'dzin pa'o/ / yul rnam par byed ces pa ni/ gzugs la sogs pa'i yul rnam par tha dad par ro/ /dmigs pa reg par byed ces pa ni gzugs la sogs pa'i yul la yang dag par reg pa'o/ /'dod pa mi 'dod pa gnyi ga bzlog pa nyams su myong ba zhes pa ni/ 'dod pa ni bde ba'o mi 'dod pa ni sdug bsngal lo//gnyi ga bzlog ces pa ni sdug bsngal ma yin bde ba ma yin pa'o/ /de rnams kyi nyams myong ni tshor ba'o/ /kun nas gos par bya ba'i dngos po la kun du chags pa zhes pa ni kun nas chags par bya ba'i yul la kun du zhen pa'o/ /kun nas nyon mongs pa dang sdom par zhes pa ni nyon mongs pa dang las dang skye ba'i kun nas nyon mongs pa'i 'ching ba'o//srid pa'i 'gro ba gzhan nye bar gnas pa zhes pa ni/ bar mtshams med par skye ba'i 'dod pa dang mi 'dod pa'i 'gro ba nye bar 'tshogs par byed pa'o/ /phung po phye ba byed pa zhes pa ni bar med par skye ba'i srid pa la phung po nying mtshams sbyor ba'o//dbang po rnam par 'gyur ba zhes pa ni gnas pa gzhan du gyur pa'o/ /'du byed rnam par 'joms pa zhes pa ni phung po rnam par 'jig pa'o/ /yongs su mi shes pa rgyun mi gcod pa zhes pa ni kun du rmongs pa ma nyams pa'o//gzhan thams cad ni go sla'o/ /de la ma rig pa'i rkyen las 'du byed ces pa ni rkyen ma rig pa las 'du byed rnams kyi nye bar mi chad pa dang nye bar bstan pa'o/ /'du byed kyi rkyen las rnam par shes pa zhes pa ni rkyen 'du byed las rnam par shes pa nye bar mi chad pa dang nye bar bstan pa'o//rnam par shes pa'i rkyen las ming dang gzugs zhes pa ni rkyen rnam par shes pa las ming dang gzugs nye bar mi chad pa dang nye bar bstan pa'o/ /ming dang gzugs kyi rkyen las skye mched drug ces pa ni rkyen ming dang gzugs las skye mched drug nye bar mi chad pa dang nye bar bstan pa'o//skye mched drug gi rkyen las reg pa zhes pa ni rkyen skye mched drug las reg pa nye bar mi chad pa dang nye bar bstan pa'o/ /reg pa'i rkyen las tshor ba zhes pa ni/ rkyen reg pa las tshor ba nye bar mi chad pa dang nye bar bstan pa'o/ /tshor ba'i rkyen las sred pa zhes pa ni rkyen tshor ba las sred pa nye bar mi chad pa dang nye bar bstan pa'o//sred pa'i rkyen las nye bar len pa zhes pa ni rkyen sred pa las nye bar len pa nye bar mi chad pa dang nye bar bstan pa'o/ /nye bar len pa'i rkyen las srid pa zhes pa ni rkyen nye bar len pa las srid pa'i nye bar mi chad pa dang nye bar bstan pa'o//srid pa'i rkyen las skye ba zhes pa ni rkyen srid pa las skye ba nye bar mi chad pa dang nye bar bstan pa'o/ /skye ba'i rkyen las rga shi zhes pa ni rkyen skye ba las rga shi nye bar mi chad pa dang nye bar bstan pa'o/ /de la 'du byed rnams kyi rgyu'i rkyen ma rig pa gang yin pa de ni ma rig pa'i rkyen no/ /de rnams kyi ngo bo ni ma rig pa'i rkyen las so//de yang 'du byed rnams kyi nye bar mi chad pa ni rgyun rnam par mi chad pa dang / nye bar bstan pa ni rjes su mthun pas 'dzin pa la brjod do/ /rnam par shes pa'i rkyen 'du byed gang yin pa de ni 'du byed kyi rkyen no/ /de'i ngo bo ni 'du byed kyi rkyen las so/ / de yang nye bar mi chad pa dang nye bar bstan pa zhes pa ni sngon bzhin no/ /de ltar thams cad du sbyar bar bya'o/ /ma rig pa 'gags pas 'du byed 'gag ces pa ni rkyen ma rig pa dngos po med pa las 'du byed rnams kyi nye bar zhi ba dang nye bar bstan pa ma yin pa'o/ /'du byed 'gags pas rnam par shes pa 'gag ces pa ni/rkyen 'du byed ngo bo med pa las rnam par shes pa nye bar zhi ba dang nye bar bstan pa ma yin pa'o/ /rnam par shes pa 'gags pas ming dang gzugs 'gag ces pa ni rkyen rnam par shes pa ngo bo med pa las ming dang gzugs nye bar zhi ba dang nye bar bstan pa ma yin pa'o//ming dang gzugs 'gags pas skye mched drug 'gag ces pa ni rkyen ming dang gzugs dngos po med pa las skye mched drug gi nye bar zhi ba dang nye bar bstan pa ma yin pa'o/ /skye mched drug 'gags pas reg pa 'gag ces pa ni rkyen skye mched drug dngos po med pa las reg pa nye bar zhi ba dang nye bar mi bstan pa'o//reg pa 'gags pas tshor ba 'gag ces pa ni rkyen reg pa dngos po med pa las tshor ba nye bar bstan pa ma yin pa'o/ /tshor ba 'gags pas sred pa 'gag ces pa ni rkyen tshor ba dngos po med pa las sred pa nye bar zhi ba dang nye bar bstan pa ma yin pa'o/ / sred pa 'gags pas nye bar len pa 'gag ces pa ni rkyen sred pa dngos po med pa las nye bar len pa nye bar zhi ba dang nye bar bstan pa ma yin pa'o/ /nye bar len pa 'gags pas srid pa 'gag ces pa ni rkyen nye bar len pa dngos po med pa las srid pa nye bar zhi ba dang nye bar mi bstan pa'o/ / srid pa 'gags pas skye ba 'gag ces pa ni rkyen srid pa dngos po med pa las skye ba nye bar zhi ba dang nye bar bstan pa ma yin pa'o/ /skye ba 'gags pas rga shi 'gag ces pa ni rkyen skye ba dngos po med pa las rga shi nye bar zhi ba dang nye bar bstan pa ma yin pa'o zhes so/ /de la ma rig pa la rnam pa gsum ni 'di lta ste/mi shes pa dang / log par shes pa dang / the tshom zhes pa'o/ /yang nyon mongs pa thams cad ni ma rig pa'o/ /ma rig pa de yang rnam pa gsum ste/ 'di lta ste/ 'dod pas bsdus pa dang / gzugs kyis bsdus pa dang / gzugs med pas bsdus pa'o//de la 'dod pas bsdus pa la rnam pa lnga ni 'di lta ste/ sdug bsngal gyis bsdus pa dang / kun 'byung gis bsdus pa dang / 'gog pas bsdus pa dang / lam gyis bsdus pa dang / bsgom pas spang bar bya ba'o/ /de bzhin du gzugs kyis bsdus pa rnam pa lnga dang /de bzhin du gzugs med pas bsdus pa rnam pa lnga dang / lnga pa gsum ste ma rig pa bco lngar 'gyur ro/ /'du byed kyi yan lag la rnam pa bzhi ni 'di lta ste/ mi dge ba dang / dge ba dang / lung ma bstan dang / mi g.yo ba'o/ /de la mi dge ba'i las la rnam pa gnyis ni 'di lta ste/rang bzhin gyi kha na ma tho ba dang bcas pa'i kha na ma tho ba'o/ /de la rang bzhin gyi kha na ma tho ba la rnam pa gsum ste/ 'di lta ste/ lus kyi las dang ngag gi las dang yid kyi las so/ /de la lus kyi las ni rnam pa gsum ste/ 'di lta ste/ srog gcod pa dang /ma byin par len pa dang / 'dod pas log par spyod pa'o/ /ngag gi yang bzhi ni 'di lta ste/ brdzun du smra ba dang / dbyen dang / rtsub mo dang / ngag kyal pa'o/ /yid kyi las la rnam pa gsum ni 'di lta ste/ brnab sems dang / gnod sems dang / log par lta ba'o/ / de rnams ni mi dge ba bcu'i las kyi lam zhes pa'o/ /bcas pa'i kha na ma tho ba rnam pa mang ste 'di lta ste/ so sor thar pa'i bcas pa'i bslab pa'i gzhi las 'das pa mthar dag go/ /chang gi btung ba ni bcas pa'i kha na ma tho ba nyid do/ /rang bzhin gyi kha na ma tho ba zhes kha cig go/ /dge ba'i las la rnam pa gsum ni 'di lta ste/lus kyi dang / ngag gi dang / yid kyi'o/ /de la lus kyi las rnam pa gsum ni 'di lta ste/ srog gcod pa las log pa dang / ma byin par len pa las log pa dang / 'dod pas log par spyod pa las log pa'o/ /ngag gi la rnam pa bzhi ni 'di lta ste/brdzun smra ba las ldog pa dang / dbyen smra ba las ldog pa dang / tshig rtsub las ldog pa dang / tshig kyal pa las ldog pa'o/ /yid kyi dge ba'i las la rnam pa gsum ni 'di lta ste/ brnab sems med pa'i mtshan nyid ma chags pa dang / gnod sems med pa'i mtshan nyid zhe sdang med pa dang /yang dge ba'i lta ba'i mtshan nyid rmongs pa med pa'o/ /de rnams ni dge ba bcu'i las kyi lam zhes pa'o/ /bcas pa'i kha na ma tho ba las ldog pa yang dge ba nyid do/ /yang las rnam pa gsum ste/ 'di lta ste/ mthong ba'i chos la myong bar bya ba dang / skyes nas myong bar bya ba dang /lan grangs gzhan la myong bar bya ba yin pa'o/ /de la skyes nas myong bar bya ba ni rnam pa gnyis te 'di lta ste/ mtshams med pa'i las dang / nye ba'i mtshams med pa'i las so/ /de la mtshams med pa'i las rnam pa lnga ni 'di lta ste/ ma gsod pa dang / pha gsod pa dang / dgra bcom pa gsod pa dang /de bzhin gshegs pa la sdang ba'i sems kyis khrag phyung ba dang / dge 'dun 'byed pa'o/ /de la dge 'dun 'byed pa la rnam pa gnyis ni 'di lta ste/ 'khor lo 'byed pa dang / las 'byed pa'o/ /de la 'khor lo 'byed pa'i dge 'dun 'byed pa po ni/ dge slong kho na ste lta ba la spyod pa nyid yin gyi sred pa la spyod pa ni ma yin no//tshul khrims 'chal pa ma yin no/ /dge slong ma la sogs pa ma yin no/ /brtul zhugs la gnas pas yin gyi brtul zhugs zhig pas ni ma yin no/ /dbye bar bya ba dge 'dun brgyad dam rab tu mang ba yang rung so so skye bo'i dge slong rnams te 'phags pas ma yin no//'dzam bu'i gling nyid yin pa/ de bzhin gshegs pa 'das pa'i dus ma yin pa nyid do/ /gang gi tshe dge slong rnams sangs rgyas las gzhan ston pa dang / sangs rgyas kyis bstan pa'i lam las gzhan yang thar pa'i lam yod do zhes brjod pa de'i tshe/dge 'dun phye bar 'gyur ba'o/ /ci srid du dge 'dun phye nas/ gnas pa de srid du mnar med pa dang / srid pa'i rtse mo'i bar du 'phags pa ma yin pa'i sems can rnams kyi dge ba'i sems skyed par mi 'gyur ro/ /des na de bzhin gshegs pa'i chos kyi 'khor lo 'byed par 'gyur ba ni 'khor lo 'byed pa zhes brjod do//'khor lo 'byed pa 'di ni dge 'dun phye ba zhag tu mi gnas pa nyid de nges par dge 'dun mthun par 'gyur ro/ /'khor lo 'byed pa 'di dus drug tu 'byung bar mi 'gyur ro/ /'di lta ste/ dang po chos kyi 'khor lo ma bskor ba la ma yin/tha mar bcom ldan 'das yongs su mya ngan las 'das pa'i dus su ma yin/ bar du ci srid du sangs rgyas bstan pa la tshul khrims chu bur dang lta ba'i chu bur ma byung bar ma yin/ ci srid du mchog zung nyan thos gnyis ma byung bar ma yin/ de bzhin gshegs pa yongs su mya ngan las 'das nas ma yin/ ci srid du mtshams ma bcad pa las ma yin no/ /las 'byed pa yang dge slong brgyad dam rab tu mang po rnams gang gi tshe mtshams nang gcig tu 'tshogs pa med par las byed na'o/ /sgra mi snyan pa spangs te gling gsum du 'byung bar 'gyur ro//nye ba'i mtshams med pa'i las lnga ni 'di lta ste/ ma yin cing dgra bcom pa yang yin pa sun phyung ba dang / nges pa la gnas pa'i byang chub sems dpa' bsad pa dang / bslab pa'i gang zag bsad pa dang / mchod rten bshig pa dang / dge 'dun gyi 'tsho ba'i sgo 'phrogs pa'o//nye ba'i mtshams med las 'di la ma nges pa'i zhes kha cig go/ /yang dge ba'i las rnam pa gsum ste/ 'di lta ste/ bsod nams kyi cha dang mthun pa dang / thar pa'i cha dang mthun pa dang / nges par 'byed pa'i cha dang mthun pa'o/ /yang las gsum ni 'di lta ste/las 'ga' zhig byas shing mi 'phel ba dang / las 'ga' zhig ma byas shing 'phel ba dang / las 'ga' zhig byas shing 'phel ba'o/ /yang las rnam pa gsum ni 'di lta ste/ mtha' gcig tu gnag pa'i las dang / mtha' gcig tu dkar ba'i las dang / rnam par 'dres pa'i las so/ /yang las rnam pa gsum ni 'di lta ste/ltung bya dang / spang bya dang / brten bya'o/ /yang las rnam pa lnga ni 'di lta ste/ byas pa'i las dang / byed du bcug pa'i las dang / mngon par rjes su yi rang ba'i las dang / yang dag par rjes su gnang ba'i las dang / rjes su gnang ba'i las so/ /yang las rnam pa gnyis ni 'di lta ste/ rnam par rig byed kyi rang bzhin gyi las dang /rnam par rig byed ma yin pa'i rang bzhin gyi las so/ /de la rnam par rig byed kyi rang bzhin gyi las la rnam pa gnyis ni 'di lta ste/ dge ba dang / mi dge ba'o/ /de la mi dge ba la rnam pa gnyis ni 'di lta ste/ lus kyi dang / ngag gi'o/ /de la lus kyi rnam pa gsum ni 'di lta ste/srog [(]bcod [,]gcod [)]pa dang / ma byin par len pa dang / 'dod pas log par spyod pa'o/ /ngag gi rnam pa bzhi ni 'di lta ste/ brdzun smra ba dang / dbyen gyi ngag dang / rtsub po'i ngag dang / ngag rkyal pa'o/ /dge ba yang rnam pa gnyis ni 'di lta ste/ lus kyi dang ngag gi'o/ /de la lus kyi rnam pa gsum ni 'di lta ste/ srog gcod pa las ldog pa dang / ma byin par len pa las ldog pa dang / 'dod pas log par spyod pa las ldog pa'o/ /ngag gi yang rnam pa bzhi ste/ brdzun smra ba las ldog pa dang / dbyen gyi ngag las ldog pa dang / rtsub po'i ngag las ldog pa dang / ngag kyal pa las ldog pa'o/ /rnam par rig byed ma yin pa'i rang bzhin la rnam pa gnyis ni 'di lta ste/ mi dge ba'i rjes su 'gro ba dang / dge ba'i rjes su 'gro ba'o/ /de la mi dge ba'i rjes su 'gro ba rnam pa gnyis ni 'di lta ste/ lus kyi mi dge ba'i rjes su 'gro ba dang /ngag gi mi dge ba'i rjes su 'gro ba'o/ /de la lus kyi mi dge ba'i rjes su 'gro ba rnam pa gsum ni 'di lta ste/ 'das pa dang ma 'ongs pa dang da ltar 'phen par byed cing 'dzin par byed pa'i 'byung ba chen po nye bar blangs te 'jug par byed pa na sems rnam par 'khrug pa yin yang srog gcod pa las mi ldog pa'i rjes su 'brel pa'i bdag nyid can ni mi ldog pa'i sngon du rnam par chad pa med par rgyu bzhin pa'i las so//de kho na bzhin du ma byin par len pa las mi ldog pa'i rjes su 'brel pa'i bdag nyid can dang / de bzhin du 'dod pas log par g.yem pa la mi ldog pa'i rjes su 'brel pa'i bdag nyid can no//ngag gi mi dge ba'i rjes su 'gro ba rnam pa bzhi ni 'di lta ste/ de bzhin du brdzun du smra ba las mi ldog pa'i rjes su 'brel pa'i bdag nyid can dang / de bzhin du dbyen tshig las mi ldog pa'i rjes su 'brel pa'i bdag nyid can dang /de bzhin du tshig rtsub mo las mi ldog pa'i rjes su 'brel pa'i bdag nyid can dang / de bzhin du ngag kyal pa las mi ldog pa'i rjes su 'brel pa'i bdag nyid can no/ /dge ba'i rjes su 'gro ba yang rnam pa gnyis ni 'di lta ste/ srog gcod pa la sogs pa las [(]sdog [,]ldog [)]pa yang dag par blangs pa thob pa dang /rtag tu mchod rten byed pa la sogs pa yang dag par blangs pa thob pa'o/ /de la srog gcod pa la sogs pa las ldog pa'i yang dag par blangs pa thob pa rnam pa gnyis ni 'di lta ste/ lus kyi dge ba'i rjes su 'gro ba dang / ngag gi dge ba'i rjes su 'gro ba'o/ / de la lus kyi dge ba'i rjes su 'gro ba rnams pa gsum ni 'di lta ste/ srog gcod pa las ldog pa yang dag par blangs pa'i de ma thag nas bzung ste/ ci srid du 'phangs pa de srid du rnam par chad pa med par sems rnam par 'khrugs pa yin yang 'das pa dang ma 'ongs pa dang da ltar ba 'phen par byed pa dang 'dzin par byed pa'i 'byung ba chen po nye bar blangs te/ldog pa ma yin pa'i sngon du 'jug par byed pa rjes su 'brel pa'i bdag nyid can gyi las dang / de bzhin du ma byin par len pa las ldog pa'i rjes su 'brel pa'i bdag nyid can dang / de bzhin du 'dod pas log par spyod pa las ldog pa'i rjes su 'brel pa'i bdag nyid can no//ngag gi dge ba'i rjes su 'gro ba rnam pa bzhi ni 'di lta ste/ de bzhin du brdzun du smra ba las ldog pa'i rjes su 'brel ba'i bdag nyid can dang / de bzhin du dbyen gyi tshig las ldog pa'i rjes su 'brel pa'i bdag nyid can dang / de bzhin du tshig rtsub mo las ldog pa'i rjes su 'brel pa'i bdag nyid can dang / de bzhin du ngag kyal pa las ldog pa'i rjes su 'brel pa'i bdag nyid can no/ /rtag tu mchod rten byed pa la sogs pa yang dag par blangs pa thob pa ni rnam pa mang ste/ 'di lta ste/ ci srid 'tsho'i bar du nyin re bzhin mchod rten nam dkyil 'khor dang sangs rgyas mchod pa la sogs pa byas nas zas bza' ba la sogs pa'i bya ba rnams bya'o zhes yid dam blangs nas sems 'khrul pa yin yang sngon bzhin du dge ba'i rjes su 'brel pa'i bdag nyid can ni/sdom pa nyid ma yin/ sdom pa ma yin pa ma yin pa'i rang bzhin/ci srid du 'phags pa mi ldog pa'i sngon du 'jug par byed pa'i las so/ /de la las rnams kyi kun nas bslang ba dang dmigs pa ni nyon mongs pa'o/ /nyon mongs pa'i rtsa ba ni tshul bzhin ma yin pa yid la byed pa de bzhin nyid ma yin pa'i rnam par rtog pa'o/ /de la rgyu gsum gyis las byed de/'di lta ste/ yang dag ma yin pa'i rtog pas phyi nang zhes rnam par rtog pa las dang / brtan pa bde ba bdag gi bdag ces pa la sogs pa sgro 'dogs pa las dang / bya ba'i las kyi yon tan mthong ba las so/ /byas pa'i las kyi mjug rdzogs par byed pa ni rnam pa mang ngo //'di lta ste/ las byas pa la yongs su mgu ba dang phan yon sgrogs pa la sogs pa'o/ /'dir las byed pa po gang zag gsum ste/ 'di lta ste/ sdom ldan ma yin pa dang / sdom ldan dang / sdom ldan nyid ma yin/ sdom ldan min pa ma yin pa'o/ /de la sdom ldan ma yin pa rnam pa gnyis ni 'di lta ste/rang bzhin gyis sdom ldan ma yin pa dang / don la sdom ldan ma yin pa'o/ /de la rang bzhin gyis sdom ldan ma yin pa rnam pa bcu bzhi la sogs pa'o/ /'di lta ste/ lug 'tshong ba dang / khyi rngon pa dang / phag 'tshong ba dang / bya rngon pa dang / sha 'tshong ba dang / ri dgas rngon pa dang / nya pa dang / rkun po dang / gshed ma dang / btson srung ba dang / glang po che 'dzin pa dang / glang po che 'dul ba dang / rang 'tshed pa dang / dra ba can la sogs pa'o/ /don la sdom ldan ma yin pa ni rnam pa gsum la sogs pa'o/ / 'di lta ste/ rgyal po dang / chad pa len pa dang / nyo tshong pa la sogs pa'o/ /sdom pa can ni rnam pa bcu ste/ 'di lta ste/ dge bsnyen dang / dge bsnyen ma dang / bya rog skrod byed pa dang / dge tshul dang / dge tshul ma dang / bar slob ma dang / dge slong dang / dge slong ma dang / bsnyen gnas pa'o//de la dge bsnyen la rnam pa gnyis ni 'di lta ste/ yan lag gsum rdzogs pa dang / bslab pa'i gzhi lnga dang ldan pa'o/ /de la bslab pa'i gzhi u0f37lnga can la rnam pa gnyis ni 'di lta ste/ rang gi bud med kyis chog par 'dzin pa dang / tshangs par spyod pa'o/ /dge bsnyen ma yang rnam p a gnyis te/'di lta ste/ yan lag gsum rdzogs pa dang / bslab pa'i gzhi lnga can no/ /de la bslab pa'i gzhi lnga 'dzin pa mo la rnam pa gnyis te/ 'di lta ste/ rang gi bdag pos chog par 'dzin pa dang / tshangs par spyod pa'o/ /de la yan lag gsum rdzogs pa'i yan lag gsum ni/ sangs rgyas la skyabs su 'gro ba dang / chos la skyabs su 'gro ba dang / dge 'dun la skyabs su 'gro ba'o/ /yan lag lnga rdzogs pa'i bslab pa'i gzhi lnga ni 'di lta ste/ srog gcod pa las ldog pa dang / ma byin par len pa las ldog pa dang / 'dod pas log par spyod pa las ldog pa dang /brdzun du smra ba las ldog pa dang / 'bru'i chang dang bcos pa'i chang / bag med pa'i gnas las ldog pa'o/ /tshangs par spyod pas ni 'dod pas log par g.yem pa'i gnas su mi tshangs par spyod pa las ldog pa zhes brjod do/ /de bzhin du dge bsnyen ma rnams kyi'o//dge tshul rnams kyi bslab pa'i gzhi bcu ste/ 'di lta ste/ srog gcod pa las ldog pa dang / ma byin par len pa las ldog pa dang / mi tshangs par spyod pa las ldog pa dang / brdzun du smra ba las ldog pa dang / 'bru'i chang dang bcos pa'i chang / bag med pa'i gnas las ldog pa dang /khri stan mthon po dang khri stan chen po las ldog pa dang / gar dang glu dang rtsed 'jo lta ba las ldog pa dang / dri dang phreng ba byug pa mdog sgyur ba 'dzin pa las ldog pa dang / dus ma yin pa'i kha zas las ldog pa dang / gser dang dngul so sor 'dzin pa las ldog pa'o/ /dge tshul ma rnams kyi bslab pa'i gzhi bcu ni/de rnams nyid bzhin no/ /bar slob ma rnams kyi ni dge tshul ma rnams las lhag pa'i chos gnyis ni 'di lta ste/ chos dang rjes su mthun pa'i chos so/ /de la chos la rnam pa drug ni 'di lta ste/ gcig pur grong du mi 'gro ba dang / gcig pur chu'i pha rol du mi bsgral ba dang /skyes pa la mi reg pa dang / skyes pa dang mtshams gcig tu mi gnas pa dang / smyan byed pa mi bya ba dang / kha na ma tho ba mi sbed pa'o/ /rjes su mthun pa'i chos la yang rnam pa drug ni 'di lta ste/ gser dngul la mi reg pa dang / mgo'i 'og lus kyi spu 'byid par mi bya ba dang /sa rko bar mi bya ba dang / sngon po nyams par mi bya ba dang / byin len ma byas pa'i zas mi bza' ba dang / mtshan ma gzhag pa'i zas mi bza' ba'o/ /bsnyen par rdzogs pa yang ni rnam pa bcu ste/ 'di lta ste/ rang byung nyid kyis bsnyen par rdzogs pa ni rdzogs pa'i sangs rgyas dang rang sangs rgyas so//nges par bgrod pas bsnyen par rdzogs pa kun shes kau N+Di n+ya dang rta thul dang mdzes bzang dang rlangs pa dang ming chen rnams lnga ste/ ston pa'i bya ba mang du byed pa'i dge slong rnams so/ /dge slong dag tshur shog ces pas bsnyen par rdzogs pa grags pa la sogs pa rigs kyi bu drug cu rnams so//ston pa khas blangs pas bsnyen par rdzogs pa 'od srungs chen po dang / dris lan gyis bsnyen par rdzogs pa 'char ka dang / bla ma'i chos khas blangs pas bsnyen par rdzogs pa skye dgu'i bdag mo chen mo'o/ /pho nyas bsnyen par rdzogs pa chos kyis byin pa'i dge slong ma'o//'dul ba 'dzin pa lngas bsnyen par rdzogs pa mtha' kho na skye bo'i yul du'o/ /bcu 'tshogs pas bsnyen par rdzogs pa yul dbus su'o/ /skyabs su 'gro ba lan gsum brjod pas bsnyen par rdzogs pa bzang po la sogs pa'i drug cu'o//yang na bsnyen par rdzogs pa rnam pa brgyad de/ 'di lta ste/ rang byung gis bsnyen par rdzogs pa dang / gsum la skyabs su song bas bsnyen par rdzogs pa dang / pho nyas bsnyen par rdzogs pa dang / nges pa rnam par bgrod pas bsnyen par rdzogs pa dang / dge slong tshur shog gis bsnyen par rdzogs pa dang /ston pa khas blangs pas bsnyen par rdzogs pa dang / drin lan gyis bsnyen par rdzogs pa dang / gsol ba dang bzhi pa'i las dang gegs med pa lnga pas bsnyen par rdzogs pa'o/ /rab tu byung ba rnam pa gsum ste/ 'di lta ste/ yang dag par blangs pa thob pa dang /lhag par rtogs pa thob pa dang / nges par mthong ba thob pa'o/ /bsnyen par rdzogs pa'i rgyu bzhi ni 'di lta ste/ dge 'dun gyi tshogs rnams kun du rdzogs pa dang / mtshams bcings pa dang / gsol ba byed pa po tshul khrims dang ldan pa dang / bar chad kyi chos rnams med pa dang / las dam pa'o/ /dge slong gi phun sum tshogs pa ni rnam pa bzhi ste/ 'di lta ste/ cha lug phun sum tshogs pa dang / las phun sum tshogs pa dang / bsam pa phun sum tshogs pa dang / gnas phun sum tshogs pa'o/ /dge slong ma rnams kyi bsnyen par rdzogs pa ni rnam pa gnyis te/'di lta ste/ gsol ba dang bzhi'i las lan gsum brjod pa dang / bla ma'i chos khas blangs pas so/ /de la bla ma'i chos brgyad ni/ 'di lta ste/ bud med rnams ni dge slong gi gzhi las rab tu byung bar bya ba dang / bsnyen par rdzogs pa dge slong ma'i dngos po yang re bar bya ba ni bla ma'i chos dang po'o//dge slong mas zla ba phyed phyed cing gzhi dge slong las yang dag par gdams pa dang rjes su bstan pa btsal bar bya'o zhes pa ni gnyis pa'o/ /dge slong mas dge slong med pa'i gnas su dbyar gnas par khas blang bar mi bya'o zhes pa ni gsum pa'o//dbyar gnas byas pa'i dge slong mas dge 'dun gnyis pa gnas gsum gyi bar du 'chags pa byas te/ mthong bas dang thos pas dang dogs pas so zhes pa ni bzhi pa'o/ /yang dge slong mas dge slong gi rgyud smra ba dang dran par mi bya ste/ 'di lta ste/ tshul khrims rgud pa dang / lta ba'i rgud pa dang / kun du spyod pa rgud pa dang / 'tsho ba rnam par rgud pa'o zhes pa ni lnga pa'o/ /dge slong mas dge slong khro bar mi bya sdang bar mi bya zhes pa ni drug pa'o/ /bla ma'i chos kyi ltung ba byung ba'i dge slong mas dge 'dun gnyi ga la zla ba phyed du dgu pa spyad par bya'o zhes pa ni bdun pa'o//bsnyen par rdzogs nas lo brgya pa'i dge slong mas bsnyen par rdzogs nas nyin gcig pa'i dge slong la gus par smra ba dang / bsnyen bkur dang thal mo sbyar ba'i las dang mnyam du ldang ba'i las rnams bya'o zhes pa ni brgyad pa'o/ /dge slong rnam pa gsum ni 'di lta ste/ slong ba'i ngang tshul gyi dge slong dang /nyon mongs bcom pa'i dge slong dang / bsnyen par rdzogs pa'i dge slong ngo / /bsnyen gnas kyi bslab pa'i gzhi brgyad ni 'di lta ste/ srog gcod pa las ldog pa dang / ma byin par len pa las ldog pa dang / mi tshangs par spyod pa las ldog pa dang 'bru'i chang dang bcos pa'i chang myos par 'gyur ba bag med pa'i gnas las ldog pa dang /brdzun du smra ba las ldog pa dang / khri stan mthon po dang khri stan chen po las ldog pa dang / glu gar sgra snyan rtse bag la lta ba dang dri dang phreng ba dang byug pa dang mdog sgyur ba 'dzin pa las ldog pa dang / dus ma yin pa'i zas las ldog pa'o/ /de bzhin du bslab pa'i gzhi brgyad la dus ma yin pa'i zas las ldog pa spangs pa yang dag par slong ba blangs pa ni bya rog skrod byed ma rab tu byung ba'o//bsnyen gnas sdom pa 'di nyid ci srid 'tsho'i bar du yang dag par blangs pa ni go mi'i sdom pa zhes kha cig gdams par byed do/ /so sor thar pa'i sdom pa bcu po 'di ni dge ba'i las so/ /sdom pa 'di rnams las 'das pa ni ltung ba ste/mi dge ba'i las so/ /ltung ba sde rnam pa brgyad de 'di lta ste/ phas pham pa chos bzhi dang / dge 'dun lhag ma chos bcu gsum dang / ma nges pa'i chos gnyis dang / spang ba'i ltung byed chos bcu dang / ltung byed 'ga' zhig pa chos dgu bcu rtsa gnyis dang /so sor bshags pa chos bzhi dang / bslab pa'i chos lnga bcu lhag dang bcas pa dang / rtsod pa zhi bar byed pa'i chos bdun no/ /de la dge slong rnams kyi phas pham pa'i ltung ba bzhi ste 'di lta ste/ mi tshangs par spyod pa dang / ma byin par len pa dang / mi gsod pa dang /mi'i chos bla mar gyur pa'o/ /dge slong ma rnams kyi bzhi po de nyid dang gzhan yang bzhi ste 'di lta ste/ rnam par chags pa rnam par chags pa'i skyes bu la mi'i 'og nas pus mo'i gong gi bar du nyug par byed pa la sogs pa zhes pa de lta bu rang bzhin no/ /rnam par chags pa rnam par chags pa'i skyes bu dang lhan cig gnas pa dang /rtse ba dang kun du smra ba dang rtags dang mtshan ma dang brda rnams byed pa dang skyes pa 'ongs pa khas len par byed pa dang / de'i rang bzhin gyi yul du dra ba ston pa dang / 'dzud pa las gzhan du skyes pa dang bud med kyi dpang rjes su 'gro bar gyur pa'o zhes de lta bu rang bzhin no//sngon phas pham pa dang gnas ma bcas par gyur cing / de gang gi tshe shi ba'am rnam par 'khrul pa'am yul gzhan du bros par gyur pa na/ de'i tshe 'di bzhin smra ste/ 'phags ma sngon bdag gis mthong ba ni gang gi tshe lkog skye bos dben pa ru dge slong ma 'dis phas pham pa dang gnas ma bcas par 'gyur zhes pa de lta bu rang bzhin no//dge slong gang zhig dge 'dun 'tshogs nas phyi rol du skrod pa'i las byas so/ /dge slong ma dge 'dun 'tshogs nas phyag 'tshal bar mi 'os zhes bca' ba bcas so/ /dge 'dun che ba chung ba la skra 'bul bar byed pa dang nges par 'byung ba la 'jug par byed pa dang 'os pa stobs pa nye bar ston pa dang mtshams kyi nang du gnas te rnam par 'chags pa zhu ba na/dge slong ma gang zhig shes bzhin mthong bzhin du 'di bzhin smra ste/ 'phags pa khyed dge 'dun che chung rnams la skra btogs 'bul ma byed/nges 'byung 'jug pa ma byed/ 'os pa stobs pa nye bar ston pa ma byed/ mtshams kyi nang du gnas pa'i rnam par 'chags pa zhu ba ma byed cig /bdag gis 'phags pa'i lhung bzed kyis dang / lhung bzed dra ba yis dang / chu tshags kyis dang / ske rags kyis dang / mdo ston pas dang / klog pas dang / 'don pa dang / bsam gtan gyis dang / rnal 'byor gyis dang / yid la byed pas dang / gang dang gang gis bar du gcod par gyur pa de dang des bar du gcod par mi 'gyur bar bya'o zhes so/ /de la dge slong ma rnams kyis 'di ltar brjod par bya ste/dge slong gang zhig ces pa la sogs pa sngon bzhin du des nges par gcod par mi 'gyur bar bya'o zhes pa'i mthar thug par phyung ba 'jug pa ldog pa'i ngag gi lam spongs shig ces lan gsum du brjod kyang mi spong na'o zhes pa 'di lta bu rang bzhin no zhes so/ /dge 'dun lhag ma la sogs pa rnams kyi rnam par bshad pa la sogs pa rnams ni mangs pas 'jigs pas 'dir mi bri'o//'dul ba'i gzhung las rtogs par bya'o/ /de ltung ba sde rnam pa gsum ste 'di lta ste/ ltung bar 'gyur ba'i ltung ba'i sde dang / bshags par bya ba'i ltung ba'i sde dang / bsdam par bya ba'i ltung ba'i sde'o/ /de la ltung bar gyur ba'i sde la rnam pa bzhi ni 'di lta ste/ mi tshangs par spyod pa dang / ma byin par len pa dang / mi gsod pa dang / mi'i chos bla mar gyur pa'o/ /bshags bya'i ltung ba'i sde tshan la rnam pa mang ngo / /'di lta ste/ dge 'dun lhag ma dang /spang ba'i ltung byed kyi chos dang / ltung byed rkyang pa la sogs pa'o/ /bsdam par bya ba la rnam pa mang ngo / /'di lta ste/ bsdam bya'i ltung ba la sogs pa'o/ /ltung ba gsum ste/ 'di lta ste/ ma lus pa dang / dge 'dun lhag ma dang / gang zag gi lhag ma'o/ / de la lhag ma med pa bzhi ni 'di lta ste/ phas pham pa'i chos dang / gnyis pa ni dge 'dun lhag ma'i chos dang / gang zag lhag ma ni ltung ba gzhan thams cad do/ /dge sbyong gi dri ma bcu ni 'di lta ste/ brnab sems dang / gnod sems dang / khro ba dang / khon du 'dzin pa dang /brdzun du smra ba dang / dbyen dang / g.yo dang / sgyu dang / sdig pa 'dod pa dang / lta ba log pa'o/ /de rnams nyid ni dge sbyong gi yon po bcu'o/ /de bzhin du de rnams dge sbyong gi rkyen bcu'o/ /de bzhin du de rnams dge slong gi snyigs ma bcu'o/ /dge sbyong du byed pa'i chos bcu ni 'di lta ste/ngo tsha ba dang / khrel yod pa dang / lus kyi las kyi mtha' yongs su dag pa dang / ngag gi las kyi mtha' yongs su dag pa nyid dang / yid kyi las kyi mtha' yongs su dag pa nyid dang / 'tsho ba yongs su dag pa dang / dbang po'i sgo bsdams pa dang /sgrib pa yongs su spangs pa dang / bsam gtan bzhi dang / mngon par shes pa drug go/ /de la sgrib pa lnga ni 'di lta ste/ bu lon sgrib pa dang / bran khol nyid kyi sgrib pa dang / bcings pa'i sgrib pa dang / nad kyi sgrib pa dang / 'jigs pa'i sgrib pa'o/ /dge slong rnams rgyu bar byed pa'i rgyu bco lnga ni 'di lta ste/bya ba yongs su rdzogs pa nyid dang / rang la phan pa tshol ba dang / de bzhin gshegs pa'i byin gyi rlabs dang / phun sum tshogs pa thams cad dang / nyes pa lnga dang rnam par bral ba dang mi dga' ba dang / 'dod chags la sogs pa gzhom pa dang / rnyed pa la sogs pa sred pa dang /nus pa dang / rjes su brtse ba dang / bla ma la gus pa dang / ngo mtshar ba blta ba dang / khyad par gyi don dang / dkon mchog gsum gyi bya ba dang / mchod rten la sogs pa la phyag bya ba'o/ /byang chub sems dpa' rnams kyi ltung ba sde gnyis te/ 'di lta ste/ phas pham pa'i gnas su 'gyur ba dang /nyes byas kyi byas pa'i ltung bas bsdus pa'o/ /de bzhin du rnam pa gsum ste/ 'di lta ste/ ltung bar 'gyur ba dang / bshags par bya ba dang / bsdam par bya ba'o/ /de la ltung bar 'gyur ba ni/ phas pham pa'i ltung ba'i gnas su 'gyur ba'o/ /bshags par bya ba ni nyes byas kyi ltung bas bsdus pa'o//ltung ba gzhan rnams ni yang dag par bsdam par bya ba'o/ /gang zag 'bring ba'i dbang du byas nas phas pham pa'i ltung ba la lnga ni 'di lta ste/ dkon mchog gsum gyi nor 'phrog pa'i phas pham pa'i ltung ba dang / dam pa'i chos spong ba phas pham pa'i ltung ba dang /dge slong tshul khrims 'chal pa yin kyang ser po phrog pa'am brdung ba'am btson khang du 'dzud pa'am gsod pa'am rab tu byung ba ldog pa ste phas pham pa'i ltung ba'o/ /mtshams med lnga la gang rung byed pa phas pham pa'i ltung ba dang / lta ba log par 'dzin pa'ang phas pham pa'i ltung ba'o//gang zag tha ma'i dbang du byas te phas pham pa'i ltung ba brgyad ni 'di lta ste/ yongs su mi smin pa'i sems can la stong pa nyid sgrogs pa phas pham pa'i ltung ba'am/ sangs rgyas byang chub la rab tu gnas pa ldog pa ni gnyis pa'o/ /so sor thar pa yongs su spangs te theg pa chen po la sbyor ba ni gsum pa'o//nyan thos kyi theg pa ni 'dod chags la sogs pa spangs pa ma yin no zhes rang nyid 'dzin pa la gzhan rnams 'dzin du 'jug pa bzhi pa'o/ /rnyed pa dang bkur sti'i rgyu'i rang gi yon tan sgrogs pa'am smon pa ni lnga pa'o/ / nga ni zab mo chos la bzod pa can no zhes pa la sogs pa nyid smra ba ni drug pa'o/ /dge sbyong rnams la chad pa gcod du 'jug pa'am/ dge sbyong rnams skyabs gsum gtong bar byed pa'am dge sbyong rnams la sbyin pa len pa ni bdun pa'o/ /zhi gnas spong ba'am 'don pa la kun du gzhol ba longs spyod 'bul ba'am/byang chub kyi sems yongs su spong ba'am/ ser sna dang 'dod pa drag po dag gis slong ba la mi ster ba'am/ khros nas sems can la brdig pa'am/ sems can brtson pas rab tu dang bar byed pa'i bzod pa mi sun par byed pa'am/ nyon mongs pa'am gzhan gyi rjes su 'jug pas chos ltar snang ba ston pa ni brgyad pa'o//yang phas pham pa'i ltung ba bzhi ni 'di lta ste/ byang chub sems dpa' sdom pa blangs pas rnyed pa dang bkur sti la mchog tu zhen pas bdag la stod par byed cing gzhan la smod par byed pa ni phas pham pa'i ltung bar 'gyur ba dang po'o//sbyin par bya ba'i dngos po yod pa'am chos nges pa yod kyang ser sna drag pos zil gyis gnon pas don du gnyer ba yang dag par nye bar gnas pa la nor dang chos mi ster na phas pham pa'i ltung bar 'gyur ba gnyis pa'o/ /khro ba drag pos zil gyis non pas gzhan pas brdeg pa na yang dag par gsol ba byed pa/shad kyis sbyang ba mi len cing bzod pa mi byed na phas pham pa'i ltung bar 'gyur ba gsum pa'o/ /lta bas kun nas dkris pa ni mchog gi theg pa chen po skur ba dang spong ba dang / theg pa chen po'i gzugs brnyan chos gsal bar mi byed pa ni phas pham pa'i ltung bar 'gyur ro zhes pa ni bzhi pa'o//sdom pa ni 'phangs pa'i dus las tshu rol du gtong ba'i rgyu bzhi ni 'di lta ste/ bslab pa phul ba dang / ltung bar 'gyur ba'i chos la lhag par spyad pa dang / mtshan ma gnyis byung ba dang / rten rnam par 'khrugs nas dbang po med pa nyid thob pa'o//bsnyen gnas sdom pa yang rkyen chad pa dang / shi ba las gtang ngo / /sdom pa ma yin pa yang de bzhin no/ /sdom pa can dang sdom pa can ma yin pa las gzhan sdom pa can ma yin pa dang sdom pa ma yin pa de dag gi dge ba'am mi dge ba'i las ni sdom pa ma yin sdom pa ma yin pa ma yin no/ / yang dge ba'am mi dge ba'i las de rnams ni rgyu lnga yis 'phel ba'am 'grib par 'gyur ro 'di lta ste/ zhing las dang / bsam gtan las dang / bya ba nges pa las dang / dngos po yongs su 'chang ba dang / gus pas 'jug pa las so/ /de la zhing las rnam pa gsum ni 'di lta ste/ sangs rgyas gnas pa'i gtsug lag khang bzhengs pa la sogs pa dang /de bzhin du chos gnas pa'i dang / de bzhin du dge 'dun gnas pa'i'o/ /nye bar ma chad kyi bar du nye bar skye ba mi zad pa'o/ /de bzhin du rku ba'i don du gsod pa la sogs pa byed pa las bsod nams ma yin pa'i phung po'o/ / de bzhin du nye bar ma chad kyi bar du'o/ /de bzhin du rdzong gi lha mo'i khang pa byed pa la sogs pa bsod nams ma yin pa'i phung po'o/ /bsam gtan gsum ni 'di lta ste/ sangs rgyas la dga' bas skyabs su 'gro ba las bsod nams dang / ma chad kyi bar du'o/ /de bzhin du chos la skyabs su song ba las bsod nams dang /de bzhin du dge 'dun la skyabs su song ba las bsod nams so/ /ldog pa las bsod nams ma yin pa'o/ /bya ba nges pa las ni rnam pa mang ngo / /'di lta ste/ dam pa'i chos ma ston par/ dman pa la ma byin par/ mchod rten ma rdzogs par/ bskor ba ma byas par/ bla ma mkhan po/ slob dpon/ ma pha la sogs pa la phyag ma 'tshal bar kha zas mi bza'o zhes pa la sogs pa rnam pa rnams bsod nams so/ /bya ba rnam par chad pa las ldog go/ /srog chags gsod pa la sogs pa ma byas par zas mi bza'o zhes pa la sogs pa bya ba nges pa las bsod nams ma yin pa'o//bya ba rnam par chad pa las ldog go/ /dngos po yongs su chad pa las ni yang rnam pa mang ngo / /'di lta ste/ mchod pa'i don du mchod rten la sogs pa 'chang ba yang bsod nams so/ /de dag yongs su spangs pa na ldog pa nyid do//gzhan la gnod pa'i phyir rgya dang 'dzol la sogs pa 'chang ba las bsod nams ma yin pa'o/ /de dag spangs pa na ldog pa nyid do/ /gus pas 'jug pa la yang rnam pa mang ngo / /'di lta ste/ rab tu dad pa'i shugs las dge ba'i las dang / nyon mongs pa'i dge ba'i las gus par byed pa'o//ci srid du rab tu dad pa'i shugs rjes su 'jug pa de srid du bsod nams rjes su 'jug go/ /ci srid du nyon mongs pa'i shugs rjes su 'jug pa de srid du bsod nams ma yin pa rjes su 'jug pa nyid do/ /gang cung zad legs par spyad pa rnams ni rgyu bcu gsum gyis dge bar 'gyur te/'di lta ste/ rang bzhin las dang / 'brel pa las dang / rjes su 'brel pa las dang / kun slong ba las dang / skye ba thob pa las dang / don dam pa'i bden pa las dang / sbyor ba las dang / yongs su lan 'dzin pa las dang / mdun du bdar ba las dang / gnyen po las dang / nye bar zhi ba las dang / mthun pa las so/ /de la rang bzhin las dge ba la rnam pa bcu bzhi ni 'di lta ste/ dad pa dang / brtson 'grus dang / dran pa dang / ting nge 'dzin dang / shes rab dang / ngo tsha shes pa dang / khrel yod pa dang /ma chags pa dang / mi ldang ba dang / ma rmongs pa dang / bag yod pa dang / shin tu sbyangs pa dang / btang snyoms dang / rnam par 'tshe ba med pa'o/ /'brel pa las dge ba ni mang ngo / /'di lta ste/ dad pa la sogs pa dang mtshungs par ldan pa'i chos so/ /rjes su 'brel pa las dge ba ni 'di lta ste/dad pa la sogs pa rnams kyi bag chags so/ /kun slong las dge ba ni 'di lta ste/ dad pa la sogs pas kun nas bslang ba'i lus dang ngag gi las so/ /skye bas thob pa las dge ba ni 'di lta ste/ dad pa la sogs pa rnams goms pa las dad pa la sogs pa'i rang bzhin can mngon par grub pa'o//don dam pa las dge ba ni de kho na nyid do/ /sbyor ba las dge ba rnam pa gsum ni 'di lta ste/ skyes bu dam pa bsnyen pa las dam pa'i chos thos pa dang / tshul bzhin yid la byed pa dang / chos dang rjes su mthun pa'i chos sgrub pa'o/ /rjes su 'dzin pa las dge ba ni 'di lta ste/bsdu ba'i dngos po bzhis sems can rjes su 'dzin pa'i dge ba gang yin pa'o/ /de la bsdu ba'i dngos po bzhi ni 'di lta ste/ sbyin pa dang / snyan par smra ba dang / don spyod pa dang / don mthun pa'o/ /yongs su len pa las dge ba ni 'di lta ste/ sbyin pa'i rang bzhin bsod nams bya ba'i dngos po las nor che ba rigs mthong ba'i skye ba yongs su len pa dang /tshul khrims kyi rang bzhin bsod nams bya ba'i dngos po las bde 'gro skye ba yongs su len pa dang / bsgom pa'i rang bzhin bsod nams bya ba'i dngos po las rnam par byang ba'i rjes su mthun pa yongs su len pa'o/ /mdun du bdar ba las dge ba rnam pa gnyis ni 'di lta ste/de bzhin gshegs pa mdun du byas pa mchod rten nam po ti la sogs pa mchod pa'i cho ga las dang / chos mdun du bdar ba chos kyis byin gyis brlabs pa'i gang zag la mchod pa'i cho ga las so/ /gnyen po las dge ba ni rnam pa lnga'o//'di lta ste/ rnam par sun 'byin pa'i gnyen po dang / rnam par sel ba'i gnyen po dang / ring du gyur pa'i gnyen po dang / nyon mongs pa'i sgrib pa'i gnyen po dang / shes bya'i sgrib pa'i gnyen po dang / nye bar zhi ba las dge ba ni 'di lta ste/ de dang de yongs su blangs pas 'dod chags spangs pa'o//mthun pa'i rgyu las dge ba ni rnam pa bzhi ste/ 'di lta ste/ 'dod chags spangs pa'i bdag pos mngon par shes pa la sogs pa'i yon tan thun mong ba dang / de nyid thun mong ma yin pa dang / de nyid 'jig rten pa dang / de nyid 'jig rten las 'das pa'o/ / de la mi dge ba'i las byas pa rnams dag par byed pa ni rnam pa bzhi ste/ 'di lta ste/ sun 'byin pa kun du spyod pas dang / gnyen po kun du spyod pas dang / sor chud pa'i stobs kyis dang / rten gyi stobs kyis so/ /de la sdig pa byas te/ de ma thag tu rjes su gdung ba'i yid kyis skyon du lta ba dang mi legs pa byas so zhes sun 'byin par byed pa'o//'jug nyams pa'i phyir sdig pa nyam chung bar gyur pa'o/ /'di ni sun 'byin pa kun du spyod pa'o/ /gnyen po kun du spyod pa ni mi dge ba'i las/ dge ba'i las kyi don du shin tu mngon par sbyor ba'i mtshan nyid sdig pa ches nyam chung bar byed pa'o//sor chud pa'i stobs ni slan chad mi byed pa'i sdom pa thob pa'i mtshan nyid can so sor thar pa'i sdom pa yang dag par blangs pas sdig pa ni bya ba cung zad mi byed do/ /rten gyi stobs ni dkon mchog gsum la skyabs su 'gro ba'i mtshan nyid dang /byang chub kyi sems mi spong ba'i mtshan nyid ni/ sdig pa dag mi 'dod pa'i 'bras bu 'byin pa'i nus pa med par byed do/ /gang cung zad mi dge ba rnams su rgyu bcu gnyis kyis 'gyur te/ rang bzhin las dang / 'brel pa las dang / rjes su 'brel pa las dang bslang ba las dang /don dam pa las dang / skye ba las dang / sbyor ba las dang / mdun du byas pa las dang / nye bar gnad 'thab pa las dang / yongs su len pa las dang / mi mthun pa'i phyogs las dang / lam log pa las so/ /de la rang bzhin las mi dge ba ni/ yid dang mtshungs par ldan pa'i gzugs dang /gzugs med pa ni spyod pa'i nyon mongs pa gzhag ste/ de las gzhan nyes spyod kun nas slong bar byed pa'i nyon mongs pa dang nye ba'i nyon mongs pa'o/ /de yang 'dod pa spyod pa rang bzhin dang rang bzhin ma yin pa'i nyes par spyod pa de gnyis kun nas slong bar byed pa'i mi dge ba gang yin pa'o//de las gzhan ni sgrib pa'i lung ma bstan du rig par bya'o/ /'brel pa las mi dge ba ni nyon mongs pa nye ba'i nyon mongs pa de rnams nyid kyi mtshungs par ldan pa'i chos so/ /rjes su 'brel ba las mi dge ba ni nyon mongs pa de nyid kyi bag chags so//kun nas slong ba las mi dge ba'i nyon mongs pa dang nye ba'i nyon mongs pa de nyid kyis kun nas bslang ba'i lus dang ngag gi las so/ /don dam pa las mi dge ba ni 'khor ba thams cad do/ /skye bas thob pa'i mi dge ba ni mi dge ba de goms pa las de las byung ba'i rnam par smin pa mngon par rdzogs pa gang gis mi dge ba 'ba' zhig 'don pa kun du gnas pa'o//sbyor ba las mi dge ba ni/ de dag dam pa ma yin pa'i skyes bu la rten par byed na/ dam pa ma yin pa'i chos nyan pa/ tshul bzhin ma yin pa yid la byed pas gang lus kyis nyes par spyad pa spyod pa dang / yid kyis nyes par spyad pa spyod pa'o//mdun du byas pa las mi dge ba ni/ de dag gzhan gang yang rung ba'i lha'i ris gang yang rung ba rten du byas te/ 'tshe ba sngon du 'gro ba'am lta ba ngan pa sngon du 'gro ba'i mchod bya'i gnas rab tu 'jog par byed pa'o/ /de la mchod pa'i las rab tu sbyor bar byed pa'am/gang du skye bo'i tshogs chen po rnams bsod nams ma yin pa la sbyor ba'o/ /de la 'tshe ba sngon du 'gro ba ni mchod bya'i gnas gang du lug dang ma he la sogs pa gsod pa'o/ /lta ba ngan pa sngon du 'gro ba ni gang du kha zas spong ba la sogs pas bsod nams don du gnyer ba dang mchog don du gnyer ba dag nyon mongs par byed pa'o//nye bar gnad 'thab pa las mi dge ba ni sems can rnams la lus kyis dang ngag gis dang yid kyis log par sgrub par byed pa'o/ /yongs su len pa las mi dge ba ni/ de dag lus kyis nyes par spyod pa spyad pa dang / ngag dang yid kyis nyes par spyod pa spyad pas ngan 'gro'am bde 'gro dag tu 'dod pa'i 'bras bu yongs su len pa nyid de/'phen par byed pa'am yongs su rdzogs par byed pa'o/ /ngan 'gro'i dbang du byas te 'phen byed dang rdzogs byed do/ /bde 'gro ru yongs su rdzogs par byed pa nyid ni gang mi ru skyes pa na dbul po la sogs pa nyams su myong bar 'gyur ba'o//mi mthun pa'i phyogs las mi dge ba ni/ gang gnyen po'i mi mthun pa'i phyogs kyi chos so/ /log pa'i lam las mi dge ba ni/ gang dge ba'i bar chad du gyur pa'i chos rnams te/ de yang tshogs rnams rtag tu 'du ba la sogs pa'o//lung du ma bstan pa ni rgyu bcu bzhis 'gyur te 'di lta ste/ rang bzhin las lung ma bstan du 'gyur ba dang / 'brel pa las dang / rjes su 'brel pa las dang / kun slong las dang / don dam pa las dang / skye bas thob pa las dang / sbyor ba las dang /mdun du byas pa las dang / rjes su 'dzin pa las dang / nye bar spyod pa las dang / yongs su len pa las dang / gnyen po las dang / nye bar zhi ba las dang / rgyu mthun pa las so/ /de la rang bzhin gyis lung du ma bstan pa ni dngos po bcu bzhi'o/ /'di lta ste/ mig dang / rna ba dang / sna dang / lce dang / lus dang / dri dang / ro dang / reg bya dang / kun du sbyor ba dang bcas pa'i yid dang / srog gi dbang po dang / ris mthun pa dang / ming gi tshogs dang / tshig gi tshogs dang / yi ge'i tshogs so/ /'brel pas lung ma bstan na sdang ba ma yin pa rab tu dang ba ma yin pa'i sems kyi ming gi tshogs dang tshig gi tshogs dang yi ge'i tshogs de nyid kyis yongs su bzung ba'i sems dang sems las byung ba'i chos rnams so//sdang ba ma yin pa rab tu dang ba ma yin pa'i sems kyi zhes pa ni dge ba dang mi dge ba las bzlog pa ston par byed pa'o/ /de nyid kyis yongs su bzung ba zhes pa ni ming gi tshogs dang tshig gi tshogs dang yi ge'i tshogs don gyi rnam pa yid kyis brjod pa'i sgo nas rab tu 'jug pas so//rjes su 'brel pa las lung ma bstan na ming gi tshogs la sogs pa de nyid kyis mngon par brjod pa'i bag chags so/ /ming gi tshogs la sogs pa'i sems pa'i sems kyi bag chags kyi phyis su mngon par brjod pa rab tu 'jug par byed do zhes so//kun nas slong ba las lung ma bstan ni/ sems dang sems las byung bas bag chags de yongs su bzung nas kun nas slong ba lus dang ngag gi las so/ /sdang ba ma yin pa rab tu dang ba ma yin pa'i sems kyi ming gi tshogs la sogs pa mngon par brjod pa'i rnam pas so//don dam pa las lung ma bstan ni/ nam mkha' dang / so sor brtags pa'i 'gog pa'o/ /skyes pas thob pa'i lung ma bstan ni/ mi dge ba dang / dge ba zag pa dang bcas pa'i chos rnams kyi rnam par smin pa'o//sbyor ba las lung ma bstan ni/ sems nyon mongs pa can ma yin pa dang / dge ba ma yin pa'i spyod lam mam/ bzo'i gnas so/ /sems nyon mongs pa can ma yin pa dang / dge ba ma yin pa zhes pa ni gang gi tshe nyon mongs pa can ma yin dge ba yang ma yin par gyur pa de'i tshe spyod lam la sogs pa rnams lung du ma bstan par 'gyur te/gzhan du na dge ba'am mi dge ba ci rigs par 'gyur ro/ /mdun du byas pa las lung du ma bstan pa ni/ de dag lha'i rigs gang yang rung ba la brten cing mdun du byas te/ 'tshe ba dang lta ba ngan pa spangs pa mchod pa'i gnas rab tu bzhag ste/ de dag la mchod pa'i las la sbyor ba'am/ gang du skye bo'i tshogs chen po rnams bsod nams dang bsod nams ma yin pa mi bskyed pa'o/ /rjes su 'dzin pa las lung ma bstan ni/ de dag bran dang g.yog dang las byed pa'am/bu dang chung ma la sogs sdang ba ma yin pa dang rab tu dang ba ma yin pa'i sems kyis sbyin pa ster ba'o/ /nye bar longs spyod pa las lung ma bstan pa ni/ de dag so sor ma brtags pa nyon mongs pa med pa'i sems kyis longs spyod la longs spyod pa'o/ /yongs su 'dzin pa las lung ma bstan ni/de dag bzo'i gnas rnams la goms par byas pas phyis de dang mthun pa'i bdag nyid kyis ngo bo yongs su len par byed do/ /gang gis myur zhing mgyogs par bzo'i gnas de rnams la slob pa mthar phyin par 'gyur ro/ /gnyen po las lung ma bstan ni/ de dag nad med pa'i don du nad kyi gnyen po so sor ma brtags pa'i sman bsten par byed pa'o/ /nye bar zhi ba las lung ma bstan ni/ de dag gzugs dang gzugs med pa ni spyod pa'i nyon mongs pa de zhi bar gnas pa'i nye bar sbas pa thob pa'o/ /rgyu mthun pa las lung ma bstan ni/ de dag lung du ma bstan pa ni sprul pa'i sems dang lhan cig tu skyes pa'o//rtogs pa'i rgyu mthun pa las lung du ma bstan pa'o/ /sprul pa'i sems dang lhan cig tu skyes pa zhes pa ni/ sems dang sems las byung ba gang gis rtse rol gyi don du sprul pa'o/ /sems can la phan pa'i don du 'gyur na dge ba nyid do//dge ba'i las byas pa rnams kyis dag par byed pa rnam pa gsum du 'gyur te/ 'di lta ste/ byang chub kyi sems yongs su 'dzin pas dang / rdzogs pa'i byang chub tu yongs su bsngo bas dang / yang dag pa'i don so sor rig pa'o/ /de la mi dge ba dag par byed pa ni zad par byed pa'o//dge ba dag par byed pa ni de dag zad pa med pa'i dge ba nyid bskyed de/ bsod nams kyi tshogs mngon du byed pa'o/ /sdig pa zad pa'i rtags dgu ni 'di lta ste/ rmi lam du mi gtsang ba la sogs pa zag pa dang / rmi lam du 'o ma la sogs pa'i zas za ba dang /rmi lam du zho dang 'o ma la sogs pa skyug pa dang / nyi ma dang zla ba mthong ba dang / 'ongs pa dang / me 'bar ba dang / dug dang bcas pa'i skyes bu nag po pham par byas pa dang / dge slong dang / dge slong ma mthong ba dang / 'o ma'i shing dang glang po che dang ri dang seng ge dang /khang bzangs la 'dzeg pa dang / chos nyan pa'o/ /lung du ma bstan pa'i las gnyis ni 'di lta ste/ sgrib pa lung ma bstan gyi las dang / sgrib min lung ma bstan gyi las so/ /mi g.yo ba'i las la gnyis ni 'di lta ste/ bsam gtan bzhi pa'i sa las byung ba'i las dang /gzugs med pa na spyod pa'i las so/ /las de rnams la gang la 'dod pa'i khams kyi mi dge ba'i las thams cad dang gang yang khams gsum gyi zag pa dang bcas pa'i dge ba'i las thams cad dag bsdoms pa de ni yang srid 'byung ba'i las yin te/ de ni 'du byed kyi yan lag go//mi'i lto ru skye ba nyid dang mtshams sbyor ba'i skabs kyi phung po lnga ni rnam par shes pa'i yan lag go/ /gzugs can ma yin pa'i phung po bzhi ni ming yin la/ gzugs kyi phung po ni gzugs/ gnyi ga ni ming dang gzugs kyi yan lag go/ /mig dang / rna ba dang / sna dang / lce dang / lus dang / yid ces pa skye mched drug po 'di rnams 'tshogs pa ni skye mched drug gi yan lag go/ /reg pa ni rnam pa drug ste/ 'di lta ste/ mig gi 'dus te reg pa dang / rna ba'i 'dus te reg pa dang / sna'i 'dus te reg pa dang / lce'i 'dus te reg pa dang / lus kyi 'dus te reg pa dang /yid kyi 'dus te reg pa'o/ /yang reg pa la rnam pa gnyis ni 'di lta ste/ thogs pa'i reg pa dang / tshig bla dgas kyi reg pa'o/ /de la thogs pa'i reg pa lnga ni 'di lta ste/ mig gi 'dus te reg pa nas lus kyi 'dus te reg pa'i bar du'o/ /tshig bla dgas kyi reg pa gcig nyid de 'di lta ste/yid kyi 'dus te reg pa'o/ /yang reg pa la gsum ni 'di lta ste/ rig pa'i reg pa dang / ma rig pa'i reg pa dang / rig pa ma yin ma rig pa ma yin pa'i reg pa'o/ /yang reg pa la rnam pa gnyis ni 'di lta ste/ nyon mongs pa can ma yin pa'i reg pa dang / nyon mongs pa can gyi reg pa'o//de la nyon mongs pa can ma yin pa ni/ rig pa'i reg pa'o/ /nyon mongs pa can ni ma rig pa'i reg pa'o/ /de la ma rig pa'i reg pa la gnyis ni 'di lta ste/ gnod sems kyi reg pa dang / rjes su chags pa'i reg pa'o/ /rig pa ma yin ma rig pa ma yin pa'i reg pa la gnyis ni 'di lta ste/dge ba zag bcas kyi reg pa dang / sgrib min lung ma bstan gyi reg pa'o/ /yang reg pa la rnam pa gsum ni 'di lta ste/ sdug bsngal myong bar bya ba'i reg pa dang / bde ba myong bar bya ba'i reg pa dang / sdug bsngal ma yin bde ba ma yin pa myong bar bya ba'i reg pa'o/ /reg pa'i yan lag go//tshor ba la drug ni 'di lta ste/ mig gi 'dus te reg pa las skyes pa'i tshor ba dang / rna ba dang phrad pa las skyes pa'i tshor ba dang / sna dang phrad pa las skyes pa'i tshor ba dang / lce'i 'dus te reg pa las skyes pa'i tshor ba dang / lus kyi 'dus te reg pa las skyes pa'i tshor ba dang / yid kyi 'dus te reg pa las skyes pa'i tshor ba'o/ /yang so sor rnam pa gsum du phye ste tshor ba bco brgyad du 'gyur ro/ /'di lta ste/ mig gi 'dus te reg pa las byung ba'i tshor ba bde ba dang sdug bsngal dang sdug bsngal min bde ba min pa dang zhes de bzhin du yid kyi 'dus te reg pa las skyes pa'i tshor ba bde ba dang sdug bsngal dang bde ba min sdug bsngal min pa'i tshor ba'i bar du'o//yang tshor ba la gnyis ni 'di lta ste/ lus kyi tshor ba dang / sems las byung ba'i tshor ba'o/ /de la lus kyi tshor ba lnga ni 'di lta ste/ mig gi 'dus te reg pa las skyes pa nas lus kyi 'dus te reg pa las skyes pa'i tshor ba'i bar du'o//yid kyi tshor ba ni gcig nyid de/ 'di lta ste/ yid kyi 'dus te reg pa las skyes pa'i tshor ba'o/ /sems las byung ba'i tshor ba de rnams 'di ltar nye bar spyod pa'i yid bco brgyad du phye bas rnam pa brgyad du 'gyur ro//'di lta ste/ gzugs la sogs pa'i yul drug la yid bde ba'i rnam par spyod pa'i tshor ba drug dang / de bzhin du yid mi bde ba'i spyod pa'i tshor ba drug dang / de bzhin du btang snyoms kyi rnam par spyod pa'i tshor ba drug go/ /'di ni drug tshan gsum ste tshor ba bco brgyad du 'gyur ro//tshor ba'i yan lag go/ /sred pa ni mngon par 'dod pa ste/ de yang rnam pa gsum ni 'di lta ste/ tshor ba bde ba dang ldan par mngon par 'dod pa dang / tshor ba sdug bsngal dang bral bar mngon par 'dod pa dang / tshor ba bde ba ma yin sdug bsngal ma yin pa ste/ gnyi ga ma yin pa mngon par 'dod pa'o//sred pa de yang / yang srid la dga' ba can gyis 'dod chags dang bcas pa yin te/ de dang de ru mngon par dga' ba can la gsum ni 'di lta ste/ 'dod pa'i sred pa/ srid pa'i sred pa/ srid bral sred pa'o/ /sred pa'i yan lag go/ /nye bar len pa la bzhi ni 'di lta ste/'dod pa'i nye bar len pa dang / lta ba'i nye bar len pa dang / khrims dang brtul zhugs nye bar len pa dang / bdag tu smra ba nye bar len pa'o/ /'di ni nye bar len pa'i yan lag go/ /skye ba da ltar ba la bsags pa'i yang srid 'byung ba'i las ni srid pa'o/ /'di ni srid pa'i yan lag go//ci ltar skye ba 'di nyid du rnam par shes pa'i yan lag ni/ de bzhin du de ma thag pa'i skye ba'i skye ba'o/ /'di ni skye ba'i yan lag go/ /gang skye ba 'di'i ming dang gzugs kyi yan lag bzhi la sogs pa de nyid ni bar med pa'i skye ba'i rga shi'i yan lag go/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las rten cing 'brel bar 'byung ba rnam par nges pa ste/le'u bcu pa'o// //'phags pa'i 'jig rten la rnam pa gnyis ni 'di lta ste/ slob pa dang / mi slob pa'o/ /de la slob pa la gsum ni 'di lta ste/nyan thos kyi theg pa pa dang / rang sangs rgyas kyi theg pa pa dang / byang chub sems dpa'i theg pa pa'o/ /de la nyan thos kyi theg pa la gnyis ni 'di lta ste/ srol du zhugs pa dang / 'bras bu la gnas pa'o/ /de la srol du zhugs pa rnam pa bzhi ni 'di lta ste/ rgyun du zhugs pa'i 'bras bu'i phyir zhugs pa dang / lan cig phyir 'ong ba'i 'bras bu'i phyir zhugs pa dang / phyir mi 'ong ba'i 'bras bu'i phyir zhugs pa dang / dgra bcom pa'i 'bras bu'i phyir zhugs pa'o/ /de la rgyun du zhugs pa 'bras bu'i phyir zhugs pa la rnam pa gnyis ni 'di lta ste/ dad pa'i rjes su 'brang ba dang /chos kyi rjes su 'brang ba'o/ /'bras bu la gnas pa la gsum ni 'di lta ste/ rgyun du zhugs pa dang / lan cig phyir 'ong ba dang / phyir mi 'ong ba'o/ /de la rgyun du zhugs pa la lha'i rigs nas rigs su dang mi'i rigs nas rigs so zhes gnyis su rnam par 'jog go//lan cig phyir 'ong ba ni sa bon gcig pa zhes rnam par 'jog go/ /phyir mi 'ong ba la gnyis ni 'di lta ste/ 'dod pa'i khams kyi 'dod chags dang bral ba dang / khams gnyis kyi 'dod chags dang bral ba'o/ /de la 'dod pa'i khams kyi 'dod chags dang bral ba la lnga ni 'di lta ste/ bar dor yongs su mya ngan las 'da' ba dang /skyes nas yongs su mya ngan las 'da' ba dang / 'du byed dang bcas nas yongs su mya ngan las 'da' ba dang / 'du byed med par yongs su mya ngan las 'da' ba dang / gong du 'pho ba'o/ /khams gnyis la 'dod chags dang bral ba'i phyir mi 'ong ba la bzhi ni 'di lta ste/ bar dor yongs su mya ngan las 'da' ba dang /skyes nas yongs su mya ngan las 'da' ba dang / 'du byed dang bcas nas yongs su mya ngan las 'da' ba dang / 'du byed med par yongs su mya ngan las 'da' ba'o/ /rang sangs rgyas kyi theg pa pa'i dbye ba rnam par ma bzhag go/ /byang chub sems dpa'i theg pa la lnga ni 'di lta ste/lhag pa'i bsam pa rnam par dag pa can dang / rtsol ba dang bcas pa mtshan ma med pa la gnas pa dang / rtsol ba med pa mtshan ma med pa la gnas pa dang / spyod pa nges pa la zhugs pa dang / nges par skye ba gcig gis thogs pa'o/ /yang rnam pa nyi shu ni 'di lta ste/dad pa'i rjes su 'brang ba dang / chos kyi rjes su 'brang ba dang / rgyun du zhugs pa dang / mi'i rigs nas rigs dang / lha'i rigs nas rigs dang / dad pa dang lta bas thob pa lan cig phyir 'ong ba'i 'bras bu'i phyir zhugs pa nyid dang / lan cig phyir 'ong ba dang /bar chad gcig pa dang / dad pa lta bas thob pa phyir mi 'ong ba'i 'bras bu'i phyir zhugs pa nyid dang / bar dor yongs su mya ngan las 'da' ba dang / skyes nas mya ngan las 'da' ba dang / 'du byed dang bcas nas yongs su mya ngan las 'da' ba dang / mngon par 'du byed med par yongs su mya ngan las 'da' ba dang /'phar ba dang / phyed du 'bar ba dang / gnas thams cad du 'pho ba dang / mthong ba'i chos la zhi ba dang / lus kyi mngon sum du byed pa dang / dgra bcom pa'i 'bras bu'i phyir zhugs pa dang / bse ru'o/ /de la sdug bsngal la chos shes pa'i bzod pa nas bzung ste/ 'du shes med 'du shes med min gyi skye mched nyon mongs pa'i dbye ba dgu pa'i gnyen po'i dbye ba'i bsgom pa'i lam la gnas pa'i bar du ni slob pa'i nyan thos so//stan gcig la gnas te rang sangs rgyas kyi lam gyi sdug bsngal la chos shes pa'i bzod pa nas bzung ste/ 'du shes med 'du shes med min gyi skye mched kyi nyon mongs pa'i dbye ba dgu pa'i gnyen po'i dbye ba'i bsgom pa'i lam la gnas pa'i bar du ni slob pa'i rang byang chub kyi theg pa'o//bye brag pa'i tshul la ni/ byang chub sems dpa' byang chub kyi snying por gshegs te/ stan gcig la gnas pa de nyid ni sdug bsngal la chos shes pa nyid yin pa nas bzung ste/'du shes med 'du shes med min gyi nyon mongs pa'i dbye ba dgu pa'i gnyen po bsgom pa'i lam la gnas pa'i bar du ni slob pa'i byang chub sems dpa' chen po'o/ /byang chub sems dpa'i tshul la mthong ba'i lam zhes pa rab tu dga' ba'i sa nas bzung ste/ skad cig gcig la mngon par byang chub pa'i mngon par rtogs pa sems bskyed nyi shu pa bar chad med pa'i lam gyi rang bzhin rdo rje lta bu'i ting nge 'dzin la gnas pa'i bar du ni mi slob pa'i byang chub sems dpa' chen po'o//mi slob pa gsum ni 'di lta ste/ nyan thos kyi byang chub dang / rang rgyal gyi byang chub dang /yang dag par rdzogs pa'i byang chub pa'o/ /de la nyan thos kyi byang chub la drug ni 'di lta ste/ yongs su nyams pa'i chos can dang / sems pa skal ba can dang / rjes su bsrung ba'i skal ba can dang / gnas pa mi bskyod pa dang / mngon du byed pa'i skal ba can dang / mi g.yo ba'i chos can no/ / de la mi bskyod pa'i chos can la gnyis ni 'di lta ste/ brtson pa 'bar bas thob pa dang / dang po nas de'i rigs can no/ /de la yongs su nyams pa'i chos can ni/ gang 'bras bu la yongs su nyams pa'i skal ba can no/ /sems pa skal ba can ni gang dag nyid 'dzin par bya ba skal ba can no/ /rjes su bsrung ba'i skal ba can ni/gang 'bras bu rjes su bsrung ba'i skal ba can no/ /gnas pa mi bskyod pa ni/ gang gnas pa'i skal ba can nyams par mi 'gyur ba mi g.yo ba sngon du mi byed pa'o/ /mngon du byed pa'i skal ba can ni/ gang mi g.yo ba mngon du byed pa'i skal ba can no/ /mi g.yo ba'i sems pa'i chos can no//gang gis mi skye ba'i ye shes skyed pa'o/ /mi g.yo ba'i chos can de yang gsum ni 'di lta ste/ nyan thos kyi byang chub 'ga' zhig dang / rang rgyal gyi byang chub dang / yang dag par rdzogs pa'i sangs rgyas so/ /gal te mi g.yo ba ci lta bu zhe na/ brjod par bya ste nyon mongs pa mi skye ba shes pa ni nyan thos rnams kyi mi g.yo ba'o//kun nas nyon mongs pa mi skye ba shes pa ni rang rgyal byang chub kyi mi g.yo ba'o/ /kun nas nyon mongs pa the tshom shes pa mi skye ba shes pa ni sangs rgyas bcom ldan 'das rnams kyi mi g.yo ba'o/ 'di rnams la yongs su nyams pa'i chos can kho na 'bras bu las nyams par 'gyur te/dgra bcom pa gzhan ni ma yin no/ /dgra bcom pa de ni khyad par rtogs pa las nyams par 'gyur ro zhes pa ni/ ting nge 'dzin gyi khyad par las zhes pa'i don to/ /yang dag par rdzogs pa'i sangs rgyas ni gang las kyang yongs su mi nyams te/kun nas rmongs pa ma yin pa'i chos can yin pa'i phyir ro/ /rang rgyal gyi byang chub gnyis ni 'di lta ste/ bse ru ltar spyod pa dang / tshogs na spyod pa'o/ /yang dag par rdzogs pa'i sangs rgyas ni gcig kho na ste/ gang zag gcig pu gang zag do med pa/ brnyan ma med pa'i gang zag mnyam pa med pa'i gang zag /mi mnyam pa dang mnyam pa'i gang zag /'gran zla mnyam pa med pa'i gang zag ces pa la sogs pa'o/ /so so skye bo yang slob pa yang yin te/ slob pa zhes brjod par mi bya zhing mi slob pa zhes kyang mi brjod do/ / dkon mchog gsum ni 'di lta ste/ sangs rgyas dkon mchog dang / chos dkon mchog dang / dge 'dun dkon mchog go/ /de la sangs rgyas gnyis ni 'di lta ste/ don dam pa pa dang / brdar btags pa'o/ /de la dang po ni gsum ste/ 'di lta ste/ chos kyi sku'i bdag nyid dang longs spyod rdzogs pa'i bdag nyid dang /sprul pa'i sku'i bdag nyid do/ /de la chos kyi sku'i bdag nyid la gnyis ni 'di lta ste/ 'dus ma byas dang / 'dus byas so/ /de la gang 'dus ma byas de ni de bzhin nyid rnam par dag pa las byung ba'i sangs rgyas rnams kyi rang bzhin de nyid don dam pa ru rtogs par bya'o//gang yang 'dus byas ni chos kyi bdag nyid kyi sku/ stobs bcu mi 'jigs pa la sogs pa sangs rgyas kyi mdzad pa'i chos rang bzhin yongs su dag par shes par bya'o/ /longs spyod rdzogs pa'i sku'i bdag nyid ni mtshan dang dpe byad la sogs pas yang dag par brgyan pa/sa bcu la gnas pa'i byang chub sems dpa' chen po rnams kyi spyod yul te gzugs sku'o/ /sprul pa'i bdag nyid ni so so skye bo thams cad kyi spyod yul mtshan dang dpe byad la sogs pas yang dag par brgyan pa/ gzugs sku nyid yin te/ shAkya thub pa la sogs pa lta bu'o//brdar btags pa'i sangs rgyas kyang rnam pa bzhi ni 'di lta ste/ ring bsrel dang / mchod rten dang / sangs rgyas kyi gzugs brnyan dang / tsi t+ya'o/ /byang chub sems dpa'i sku dang lnga yin no zhes byang chub sems dpa'i theg pa pa smra'o/ /chos ni gnyis yin te/'di lta ste/ don dam pa pa dang / brdar btags pa pa'o/ /de la dang po ni gcig nyid de 'di lta ste/ mya ngan las 'das pa'o/ /brdar btags pa la gnyis ni 'di lta ste/ yang dag pa'i lam dang / sangs rgyas kyi gsung rab bo/ /yang chos la rnam pa gnyis ni 'di lta ste/ lung gi chos dang / rtogs pa'i chos so/ /de la lung gi chos ni sangs rgyas kyi gsung rab bo/ /rtogs pa'i chos ni drug ste/ 'di lta ste/ drod dang / rtse mo dang / bzod pa dang / chos mchog dang / mthong lam dang / 'bras bu dang bcas pa'i bsgom lam mo/ /dge 'dun la gnyis ni 'di lta ste/ don dam pa pa dang / brdar btags pa'o/ /de la don dam pa pa gnyis ni 'di lta ste/ nyan thos kyi dge 'dun skyes bu chen po gang zag brgyad dang / phyir mi ldog pa'i byang chub sems dpa' chen po'i tshogs so/ /de la skyes bu chen po gang zag brgyad ni 'di lta ste/ rgyun du zhugs pa'i 'bras bu'i phyir zhugs pa dang /rgyun du zhugs pa dang / lan cig phyir 'ong ba'i 'bras bu'i srol du zhugs pa dang / lan cig 'ong ba dang / phyir mi 'ong ba'i 'bras bu'i phyir zhugs pa dang mi 'ong ba'o/ /dgra bcom pa'i 'bras bu'i srol du zhugs pa dang / dgra bcom pa'o/ /phyir mi ldog pa'i byang chub sems dpa' lnga ni 'di lta ste/lhag pa'i bsam pa dag pa can dang / rtsol ba dang bcas pa'i mtshan ma med pa la gnas pa dang / rtsol ba med pa'i mtshan ma med pa la gnas pa dang / nges pa'i spyod pa la zhugs pa dang / nges par skye ba gcig gis thogs pa'o/ /lhag par mos pa can yang phyir mi ldog pa'i byang chub sems dpa'o zhes smra'o//byang chub sems dpa' lnga po 'di rnams la so sor phye bas sngon du gsungs pa bzhin du dad pa'i rjes su 'brang ba la sogs pa gang zag nyi shu ni dge 'dun no/ /brdar btags pa'i dge 'dun gsum ni 'di lta ste/lhag par mos pa can rdzogs pa'i byang chub tu ma nges pa so so skye bo'i dge 'dun dang / so so skye bo'i dge slong dang / so so skye bo'i dge slong ma'i dge 'dun no/ /des na de nyid skyabs gsum yin te 'di lta ste/ skyabs sangs rgyas dkon mchog dang / skyabs chos dkon mchog dang /skyabs dge 'dun dkon mchog ste/ de la dkon mchog gsum la skyabs su 'gro ba ni 'jigs pa brgyad las skyob pa'i don du'o/ /de la 'jigs pa brgyad ni 'di lta ste/ nyon mongs pa thams cad kyi 'jigs pa dang / nyes par spyod pa thams cad kyi 'jigs pa dang /ka shi'i 'jigs pa dang / nye bar 'tshe ba thams cad kyi 'jigs pa dang / ngan 'gro thams cad kyi 'jigs pa dang / rjes su mthun pa'i ngan 'gro thams cad kyi 'jigs pa dang / 'jig tshogs kyi 'jigs pa dang / theg pa dman pa'i 'jigs pa'o//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las 'phags pa'i 'jig rten rnam par nges pa zhes bya ba le'u bcu gcig pa'o// //'phags pa'i bden pa bzhi ni 'di lta ste/ sdug bsngal 'phags pa'i bden pa dang /kun 'byung 'phags pa'i bden pa dang / sdug bsngal 'gog pa 'phags pa'i bden pa dang / sdug bsngal 'gog par 'gro ba'i lam 'phags pa'i bden pa'o/ /de rnams 'bras bu dang rgyu'i rim pas bstan par bya ba ni 'di lta ste/ sdug bsngal 'bras bu'o//sdug bsngal kun 'byung ba rgyu'o/ /sdug bsngal 'gog pa 'bras bu'o/ /sdug bsngal 'gog par 'gro ba'i lam rgyu'o/ /yang bden pa gnyis ni 'di lta ste/ kun rdzob bden pa dang / don dam pa'i bden pa'o/ /de la 'phags pa'i bden pa gsum ni kun rdzob bden pa'o/de yang ci ltar sdug bsngal bden pa dang / kun 'byung bden pa dang / lam gyi bden pa'o/ /'phags pa'i bden pa gcig ni don dam pa'i bden pa ste/ 'di lta ste/ sdug bsngal 'gog pa'o/ /'phags pa'i bden pa gnyis ni 'di ltar spang bya dang / blang bya'o/ /de la bden pa gnyis ni spang bya'o//'di lta ste/ sdug bsngal gyi bden pa dang / kun 'byung gi bden pa'o/ /bden pa gnyis ni blang bya ste/ 'di ltar 'gog pa'i bden pa dang / lam gyi bden pa'o/ /'phags pa'i bden pa de rnams yongs su bcad pa gsum ste/ 'di ltar/ rang bzhin yongs su bcad pa dang /bya ba yongs su bcad pa dang / bya ba mthar phyin pa yongs su bcad pa'o/ /de la rang bzhin yongs su bcad pa ni 'di lta ste/ 'di ni sdug bsngal lo/ /'di ni sdug bsngal kun 'byung ba'o/ 'di ni sdug bsngal 'gog pa'o/ /'di ni sdug bsngal 'gog par 'gro ba'i lam mo//bya ba yongs su bcad pa ni 'di lta ste/ sdug bsngal shes par bya'o/ /kun 'byung spang bar bya'o/ /'gog pa mngon du bya'o/ /lam bsgom par bya'o/ /bya ba mthar phyin pa yongs su bcad pa ni 'di lta ste/ sdug bsngal shes so/ /kun 'byung spangs so/ /'gog pa mngon du byas so//lam bsgoms so/ /yongs su bcad pa gsum po 'di nyid la yongs su bzlas pa gsum zhes brjod do/ /yang bden pa so so la rnam pa gsum mo/ /de la sdug bsngal bden pa'i rnam pa gsum ni 'di lta ste/ sdug bsngal rang bzhin dang yongs su shes par bya ba nyid dang /yongs su shes pa nyid do/ /kun 'byung gi rnam pa gsum ni 'di lta ste/ kun 'byung ba'i rang bzhin dang / spang bya nyid dang / spangs pa nyid do/ /'gog pa'i rnam pa gsum ni 'di lta ste/ 'gog pa'i rang bzhin dang / mngon du bya ba nyid dang / mngon du byas pa nyid do//lam gyi rnam pa gsum ni 'di lta ste/ lam gyi rang bzhin dang / bsgom bya nyid dang / bsgoms pa nyid do/ /yang sdug bsngal bden pa'i yongs su bzlas pa gsum ni 'di lta ste/ 'di ni sdug bsngal 'phags pa'i bden pa'o zhes pa ni yongs su bzlas pa gcig go/ / de dag yongs su shes par bya ba nyid do zhes pa ni gnyis pa'o/ /de dag yongs su shes pa nyid do zhes pa ni gsum pa'o/ /yongs su bzlas pa so so la mig skye'o/ /shes pa skye'o/ /rig pa skye'o/ /blo skye'o/ /rnam pa bzhi bzhi ste rnam pa bcu gnyis so/ /de la mig ces pa ni sangs rgyas kyi spyan no//shes pa zhes pa ni rnam par mi rtog pa'i ye shes so/ /rig pa zhes pa ni yang dag pa'i don yin pas mi slob pa'o/ /blo zhes pa ni rnam pa thams cad mkhyen pa'o/ /kun 'byung gi yongs su bzlas pa gsum ni 'di lta ste/ 'di ni kun 'byung 'phags pa'i bden pa'o zhes pa ni yongs su bzlas pa gcig go//de dag spangs par bya'o zhes pa ni gnyis pa'o/ /de dag spangs so zhes pa ni gsum pa'o/ /yongs su ldabs pa so so la de bzhin du rnam pa bcu gnyis nyid do/ /'gog pa'i bden pa'i yongs su ldabs pa gsum ni 'di lta ste/ 'di ni 'gog pa 'phags pa'i bden pa'o zhes pa ni yongs su bzlas pa gcig go//de dag mngon du bya'o zhes pa ni gnyis pa'o/ /de dag mngon du byas so zhes pa ni gsum pa'o/ /yongs su ldabs pa so so la de bzhin du rnam pa bcu gnyis so/ /lam gyis yongs su bzlas pa gsum ni 'di lta ste/'di ni lam 'phags pa'i bden pa'o zhes yongs su bzlas pa gcig go/ /de dag bsgom par bya'o zhes pa gnyis pa'o/ /de dag bsgoms pa nyid do zhes pa gsum pa'o/ /yongs su ldabs pa so so la de bzhin du rnam pa bcu gnyis so/ /des na bden pa so so la bzlas pa rnam gsum gyis dang /yongs su bzlas pa re re la rnam pa bzhi ste/ de bzhin gshegs pas rnam pa bcu gnyis dang ldan pa'i chos gsungs pas na/ yongs su bzlas pa gsum rnam pa bcu gnyis kyi chos kyi 'khor lo bskor ro zhes brjod do/ /yang 'phags pa'i bden pa so so la rnam pa bzhi ste rnam pa bcu drug go//de la sdug bsngal bden pa'i mi mthun pa'i phyogs kyi rnam pa bzhi ni 'di lta ste/ rtag par sgro 'dogs pa dang / bde bar sgro 'dogs pa dang / bdag tu sgro 'dogs pa dang / bdag gi bar sgro 'dogs pa'o/ /grangs bzhin du de dag gi gnyen po sdug bsngal gyi rnam pa bzhi ni 'di lta ste/mi rtag pa dang / sdug bsngal ba dang / bdag med pa dang / stong pa'o/ /kun 'byung gi bden pa'i mi mthun pa'i phyogs kyi rnam pa bzhi ni 'di lta ste/ chos thams cad rgyu med par sgro 'dogs pa dang / chos thams cad sems pa med pa'i dus la sogs pa rtag pa'i rgyu can du sgro btags pa dang /chos thams cad sgra'i tshangs pa la sogs pa yongs su 'gyur ba'i dngos po'i rgyu can du sgro btags pa dang / chos thams cad blo dang ldan pa'i dbang phyug la sogs pa'i rgyu can du sgro btags pa'o/ /rim pa bzhin du de rnams kyi gnyen po kun 'byung gi rnam pa bzhi ni 'di lta ste/rgyu dang / kun 'byung ba dang / rab tu skye ba dang / rkyen no/ /'gog pa'i bden pa'i mi mthun phyogs kyi rnam pa bzhi ni 'di lta ste/ thar pa med do/ /thar pa sdug bsngal lo/ /bsam gtan gyi bde ba gya nom pa'o/ /grol ba yang yang 'khor bar ltung ba yod do zhes so//grangs bzhin du de rnams kyi gnyen po 'gog pa'i rnam pa bzhi ni 'di lta ste/ 'gog pa dang / zhi ba dang / gya nom pa dang / nges par 'byung ba nyid do/ /lam gyi bden pa'i mi mthun phyogs kyi rnam pa bzhi ni 'di lta ste/ thar par 'gro ba'i lam med do/ /lam 'di ngan pa'o//lam gzhan yod do/ /phyir ldog pa'i lam mo/ /grangs bzhin du de rnams kyi gnyen po lam gyi rnam pa bzhi ni 'di lta ste/ lam nyid dang rig pa dang / sgrub pa dang / nges par 'byin par byed pa'o/ /byang chub sems dpa' theg pa pa rnams ni stong phrag nyi shu lnga pa'i gzhung gi rjes su 'brangs nas grangs bzhin du 'phags pa'i bden pa bzhi la bzhi dang bcu gcig dang bdun dang bdun te/'phags pa'i bden pa rnam pa nyi shu dgu yin no zhes bshad do/ /de la sdug bsngal bden pa'i rnam pa la bzhi ste/ 'di lta ste/ mi rtag pa dang / sdug bsngal ba dang bdag med pa dang /stong pa'o/ /kun 'byung bden pa'i rnam pa bcu gcig ni 'di lta ste/ nad dang / 'bras dang / zug rngu dang / sdig pa nyid dang / gzhan nyid dang / rab tu nyams pa'i chos nyid dang / g.yo ba dang / 'jig pa nyid dang / 'jigs pa nyid dang / nye bar 'tshe ba nyid dang /nye bar gnod pa nyid do/ /'gog pa'i bden pa'i rnam pa bdun ni 'di lta ste/ bdag med pa nyid dang / zhi ba nyid dang / dben pa nyid dang / stong pa nyid dang / mtshan ma med pa nyid dang / smon pa med pa nyid dang / mngon par 'du byed med pa nyid do/ /lam gyi bden pa'i rnam pa la bdun ni 'di lta ste/bdag med pa nyid dang / zhi ba nyid dang / dben pa nyid dang / stong pa nyid dang / mtshan ma med pa nyid dang / smon pa med pa nyid dang / mngon par 'du byed pa med pa nyid do/ /bden pa rnams kyi rnam par spyad pa yang ni/ dper na sman pas nad pa'i nad mthong nas nad kyi gzhi yongs su rtog go//de nas nad byang ba mtshon par byed do/ /de nas nad sbyong ba'i thabs sman rjes su sbyor ba'i gdams pa byed do/ /de bzhin du bla na med pa'i sman pa de bzhin gshegs pas rnal 'byor pa'i sdug bsngal mthong nas 'di'i rgyu gang yin zhes kun 'byung la nges par spyod do//de nas kun 'byung 'gags pa las sdug bsngal zad pa'i mthar phyin pa skye ba med pa 'gog pa'i bden pa dmigs kyis 'dzin par byed do/ /de nas sdug bsngal zad pa'i thabs lam gyi bden pa goms par byed pa'i gdams pa byed do/ /de la skye ba'i sdug bsngal dang rga ba'i sdug bsngal la sogs pa rnams kyis 'du byed kyi sdug bsngal gyis dang sdug bsngal gyi sdug bsngal dang yongs su 'gyur ba'i sdug bsngal dag gis 'khor ba'i nye bar len pa'i phung po lnga rnam par shes pa ming dang gzugs skye mched drug reg pa tshor ba skye ba rga shi rnams kyi yan lag gi bdag nyid ni sdug bsngal gyi bden pa'o//sdug bsngal gyi rgyu la gsum ni 'di lta ste/ rgyun gyur pa nye bar len pa'i phung po dang / ma rig pa sred pa nye bar len pa'i mtshan nyid ni nyon mongs pa dang / 'du byed dang srid pa'i mtshan nyid kyi las ni kun 'byung bden pa'o/ /sdug bsngal 'phags pa ni 'gog pa'i bden pa'o//'gog pa de yang rnam pa gnyis ni 'di lta ste/ so sor rtog pa'i 'gog pa dang / so sor rtog min gyi 'gog pa'o/ /yang 'gog pa la gnyis ni 'di lta ste/ zad pa shes pa dang / mi skye ba shes pa'o/ /yang 'gog pa la gnyis ni 'di lta ste/phung po lhag ma dang bcas pa'i mya ngan las 'das pa'i dbyings dang / lhag ma med pa'i mya ngan las 'das pa'i dbyings so/ /mya ngan las 'das pa'i dbyings kyi rnam par bzhag pa de dag theg pa gsum la ci rigs par rnam pa bcu gsum du rig par bya'o/ /mtshan nyid las dang /zag pa las dang / de'i cha shas mya ngan las 'das pa dang / don dam pa dang / yongs su ma rdzogs pa dang / yongs su rdzogs pa dang / rgyan med pa dang / rgyan dang bcas pa dang / khyad par can ma yin pa dang / khyad par can dang / lhag ma dang bcas pa dang / lhag ma med pa dang /rnam grangs las so/ /de la mtshan nyid kyis 'gog pa la gnyis ni 'di lta ste/ lam gang gis 'gog par byed pa de ni 'gog pa'o/ /gang dag 'gags pa de 'gog pa'o/ /zad pas 'gog pa rnam pa bzhi ni 'di lta ste/ 'gog pa de ni gzhan du brjod du med do/ / gzhan ma yin par brjod du med do/ /gnyi gar brjod du med do/ /gnyi ga ma yin par brjod par mi bya'o/ /de'i cha shas mya ngan las 'das pas 'gog pa ni gcig ste/ 'di lta ste/ 'jig rten pa'i lam gyis gang nyon mongs pa 'gog pa'o/ /don dam pa'i 'gog pa ni gcig nyid de 'di lta ste/ 'jig rten las 'das pa'i lam gyi sa bon dang bcas pa'i nyon mongs pa yang dag par gcod pa'i 'gog pa gang yin pa'o/ /yongs su ma rdzogs pa'i 'gog pa la bzhi ni 'di lta ste/ rgyun du zhugs pa'i 'bras bus bsdus pa'i 'gog pa gang yin pa dang / lan cig phyir 'ong ba'i 'bras bus bsdus pa'i 'gog pa ma yin pa dang /phyir mi 'ong ba'i 'bras bus bsdus pa'i 'gog pa gang yin pa dang / dgra bcom pa'i 'bras bu'i srol du zhugs pas bsdus pa'i 'gog pa gang yin pa'o/ /yongs su rdzogs pa'i 'gog pa la gcig ni 'di lta ste/ dgra bcom pa'i 'bras bus yongs su bsdus pa'i 'gog pa gang yin pa'o//rgyan med pa'i 'gog pa la gcig ni 'di lta ste/ dgra bcom pa sems rnam par grol ba rnams kyi 'gog pa gang yin pa'o/ /rgyan dang bcas pa'i 'gog pa la gcig ni 'di lta ste/ dgra bcom pa gnyi ga'i cha las grol ba rnams kyi 'gog pa gang yin pa'o//de la gnyi ga'i cha ni sgrib pa gnyis te 'di lta ste/ nyon mongs pa'i sgrib pa dang / snyoms par 'jug pa'i sgrib pa'o/ /khyad du 'phags pa ma yin pa'i 'gog pa la gcig ni 'di lta ste/ nyon mongs pa'i sgrib pa mtha' dag rnam par grol ba nyan thos rnams kyi dang /nyon mongs pa'i sgrib pa mtha' dag dang / shes bya'i sgrib pa phyogs gcig rnam par grol ba rang sangs rgyas rnams kyi 'gog pa gang yin pa'o/ /khyad par du 'phags pa'i 'gog pa la gcig ni 'di lta ste/ shes bya'i sgrib pa lhag ma dang bcas pa rnam par grol ba yang dag par rdzogs pa'i sangs rgyas rnams kyi 'gog pa gang yin pa'o//lhag ma dang bcas pa'i 'gog pa la gcig ni 'di lta ste/ phung po lhag ma dang bcas pa'i mya ngan las 'das pa'i dbyings so/ /lhag ma med pa'i mya ngan las 'das pa'i 'gog pa la gcig ni 'di lta ste/ phung po lhag ma med pa'i dbyings so/ /rnam grangs las 'gog pa la rnam grangs nyi shu dgu ni 'di lta ste/ ma lus par spangs pa dang / nges par spangs pa dang / byang bar gyur pa dang / zad pa dang / 'dod chags dang bral ba dang / 'gog pa dang / rnam par zhi ba dang /nub pa dang / 'dus ma byas dang / blta dka' ba dang / mi g.yo ba dang / mi gzhol ba dang / mi 'chi ba dang / zag pa med pa dang / gnas dang / gling dang / skyob pa dang / skyabs dang / 'dren pa dang / mi 'pho ba dang / rims med pa dang / yongs su gdung ba med pa dang / bde ba dang / zhi ba dang / dngos po mchog las byung ba dang / bde legs grub pa dang / nad med pa dang / mi spyod pa dang / mya ngan las 'das pa'o/ /de la ma lus par spangs pa zhes pa ni mdor bstan pa'o/ /kun nas dkris pa spangs pa ni nges par spangs pa'o/ /bag la nyal byang bar byed pas byang bar 'gyur ba'o//mthong ba'i lam gyis de lta bu de rnams kun du sbyor ba spangs pa'i dbang du byas te zad pa'o/ /bsgom pa'i lam gyis kun du sbyor ba spangs pa'i dbang du byas te chags pa dang 'bral ba'o/ /mthong ba dang bsgom pa'i las dag gis kun du sbyor ba spangs pas yang mi skye ba sdug bsngal 'gags pa 'di ni 'gog pa'o//mthong ba'i chos la yid mi bde ba nye bar zhi bas rnam par zhi ba'o/ /nye bar 'tshe ba ma lus par bral bas nub pa'o/ /de rnams ni ma lus par spangs pa rgyas par bshad pa'o/ /'dus byas kyi mtshan nyid rnam pa gsum dang bral bas 'dus ma byas so//sha dang lha'i spyan gyi spyod yul ma yin pa'i phyir blta dka' ba'o/ /'gro ba lnga ru rgyu ba dang mi ldan pa'i phyir mi g.yo ba'o/ /khams gsum gyi sred pa gsum med pas srid pa rnams su mi dmas pa'i phyir mi gzhom pa'o/ /phung po'i bdud dang mi ldan pas mi 'chi ba'o//nyon mongs pa'i bdud dang mi ldan pas zag pa med pa'o/ /rnam par grol ba'i dga' ba dang rten yin pa'i phyir gnas so/ /khams gsum yongs su bcad pas gling ngo / /nye bar 'tshe ba thams cad bzlog pas skyob pa'o/ /rten gyi sbyor ba 'bras bu yod pa'i gzhi'i gnas nyid yin pas skyabs so//'phags pa dam pa rnams kyis bgrod pa'i gzhi'i gnas yin pas 'dren pa'o/ /mi skye ba nyid yin pas 'khrul pa mi srid pa'i phyir mi 'pho ba'o/ /'dod pa thams cad nyams pa'i gdung ba med pas rims med pa'o/ /mya ngan dang smre sngags 'don pa dang sdug bsngal dang yid mi bde ba dang 'khrug pa la sogs pa'i yongs su gdung ba med pas bsil bar gyur pa'i phyir yongs su gdung ba med pa'o//na ba dang / rga shi'i 'jigs pa dang bral ba 'phags pa'i gnas pa'i rten yin pas bde ba'o/ /dge ba'i chos thams cad kyi rten yin pas zhi ba'o//'jig rten las 'das pa bde ba'i dngos po nyid yin pas dngos po mchog las byung ba'o/ /sbyor ba bde bas bde ba thob pa'i phyir dmigs pa'i ngo bo yin pas bde legs grub pa'o/ /nyon mongs pa la sogs pa sgrib pa'i nad dang bral ba'i phyir nad med pa'o//spros pa'i g.yeng ba thams cad dang bral ba'i phyir mi bskyod pa'o/ /gzugs la sogs pa'i 'du shes thams cad dang bral ba zhi ba dang bde bar gnas pa'i dmigs pa nyid yin pa'i phyir mya ngan las 'das pa'o/ /so sor brtags pa'i 'gog pa la rnam pa mang ste/de ltar yang / kun du sbyor ba'i rdzas ni ci snyed pa/ /kun du sbyor ba bral rdzas de snyed do/ /zhes pa ni grub pa'i mtha'o/ /kun du sbyor ba'i gnyen po ci snyed pa/ /so sor brtags pa'i 'gog pa de snyed do/ /yang gsungs te/ so sor brtags pa'i 'gog pa dang //bral ba so sor tha dad do/ /zhes so/ /lam la gnyis ni 'di lta ste/ 'jig rten las 'das pa'o/ /de la 'jig rten pa gnyis ni 'di lta ste/ grol ba'i cha dang mthun pa dang / nges par 'byed pa'i cha dang mthun pa'i dge ba'i rtsa ba'o/ /de la grol ba'i cha dang mthun pa la rnam pa gsum ni 'di lta ste/dran pa nye bar gzhag pa'i ngo bo dang / yang dag par spong ba'i ngo bo dang / rdzu 'phrul gyi rkang pa'i ngo bo'o/ /nges par 'byed pa'i cha dang mthun pa la gnyis ni 'di lta ste/ dbang po lnga'i rang bzhin dang / stobs lnga'i rang bzhin no/ /dang po la gnyis ni 'di lta ste/ drod thob pa dang / rtse mor phyin pa'o/ /gnyis pa la gnyis ni 'di lta ste/ bzod par rtogs pa dang / chos mchog tu rtogs pa'o/ /'jig rten las 'das pa la gnyis ni 'di lta ste/ byang chub yan lag bdun gyi rang bzhin mthong lam dang / 'phags pa'i lam yan lag brgyad kyi rang bzhin bsgom pa'i lam mo//de la mthong ba'i lam la gnyis ni 'di lta ste/ bar chad med pa'i lam gyi ngo bo dang / rnam par grol ba'i lam gyi ngo bo'o/ /de la bar chad med pa'i lam gyi rang bzhin la rnam pa brgyad ni 'di lta ste/ sdug bsngal la chos shes pa'i bzod pa dang / sdug bsngal la rjes su shes pa'i bzod pa dang /kun 'byung la chos shes pa'i bzod pa dang / kun 'byung la rjes su shes pa'i bzod pa dang / 'gog pa la chos shes pa'i bzod pa dang / 'gog pa la rjes su shes pa'i bzod pa dang / lam la chos shes pa'i bzod pa dang / lam la rjes su shes pa'i bzod pa'o/ /rnam par grol ba'i lam gyi rang bzhin la yang brgyad ni 'di lta ste/sdug bsngal la chos shes pa dang / sdug bsngal la rjes su shes pa dang / kun 'byung la chos shes pa dang / kun 'byung la rjes su shes pa dang / 'gog pa la chos shes pa dang / 'gog pa la rjes su shes pa dang / lam la chos shes pa dang / lam la rjes su shes pa'o//mngon par rtogs pa'i rim pa ni 'di lta ste/ sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa dang / kun 'byung ba chos shes pa'i bzod pa dang /kun 'byung la chos shes pa dang / kun 'byung la rjes su shes pa'i bzod pa dang / kun 'byung la rjes su shes pa dang / 'gog pa la chos shes pa'i bzod pa dang / 'gog pa la chos shes pa dang / 'gog pa la rjes su shes pa'i bzod pa dang / 'gog pa la rjes su shes pa dang /lam la chos shes pa'i bzod pa dang / lam la chos shes pa dang / lam la rjes su shes pa'i bzod pa dang / lam la rjes su shes pa'o/ /skad cig ma bcu drug ni bden pa bzhi la dmigs pa'o/ /de la chos shes pa'i bzod pa dang / chos shes pa'i skad cig ma brgyad ni 'dod pa na spyod pa'i nyon mongs pa'i gnyen po'o//gzhan rjes su shes pa'i bzod pa dang rjes su shes pa'i skad cig ma brgyad ni gzugs dang gzugs med pa na spyod pa'i nyon mongs pa'i gnyen po'o/ /de la bzod pa'i skad cig ma thams cad ni rkun po 'thon pa bzhin du nyon mongs pa spangs pas bar chad med pa'i lam gyi rang bzhin no//nyon mongs pa thob pa gcod par byed pa ste/ sdug bsngal la sogs pa mthong ba rnams shes rab kyi rang gi ngo bo nyid yin pa'o/ /chos shes pa dang rjes su shes pa'i skad cig ma rnams kyang nyon mongs pa spangs pa la sgo glegs gcod pa'i rigs las rtsom pa dang ldan pa'o//rnam par grol ba'i lam gyi rang bzhin ni/ nyon mongs pa bral ba thob pa dang lhan cig tu skye'o zhes kha cig go/ /gzhan dag bcu gnyis ni mngon du byed pa yin la rjes su shes pa nyid ni nges pa'i bdag nyid do zhes zer ro/ /'di dag ni spyad par bya ba yin no/ /de rnams la skad cig bco lnga ni mthong ba'i lam mo//de la gnas pa'i rnal 'byor pa rgyun du zhugs pa'i 'bras bu'i phyir zhugs pa zhes brjod do/ /bcu drug pa lam la rjes su shes pa ni bsgom pa'i lam mo/ /de la gnas pa ni rgyun du zhugs pa nyid do/ /rgyun ni mya ngan las 'da' ba'i rgya mtshor 'gro ba'i lam ste/de la zhugs pa ni thob pa byas pa'o/ /'dir mthong ba'i lam la shes rab dgur 'gyur te 'di lta ste/ 'dod du spang bya sdug bsngal dang / kun 'byung spangs pa dang / 'dod du 'gog pa mthong bas spang bya spangs pa dang / 'dod du lam mthong bas spang bya spangs pa dang / de bzhin du gzugs khams su gsum dang /gzugs med pa'i khams su gsum mo/ /mthong ba'i lam gyis mthong ba'i don yang dang yang du rtsol bas bsgom pa de nyid rtsol bya dang rten bya yin pas lam mo/ /'dis na bsgom pa'i lam zhes bya ste/ de la yang gnyis ni 'di lta ste/ bar chad med pa'i lam gyi rang bzhin dang /rnam par grol ba'i lam gyi rang bzhin no/ /de la bar chad med pa'i lam ni 'dod pa na spyod pa'i nyon mongs pa dbye ba dgu'i gnyen po dbye ba dgu ni 'di lta ste/ chung ngu dang / 'bring po dang / mchog go/ yang re re la gsum du phye ste/ chung ngu'i chung ngu dang /chung ngu'i 'bring po dang / chung ngu'i chen po dang / 'bring po'i chung ngu dang / 'bring gi 'bring dang / 'bring gi rab dang / rab kyi chung ngu dang / rab kyi 'bring dang / rab kyi rab ste dbye ba dgu'o/ /de bzhin du bsam gtan dang po'i sa la nyon mongs pa dbye ba dgu'i gnyen po dbye ba dgu'o//de bzhin du bsam gtan gnyis pa'i sa la nyon mongs pa dbye ba dgu'i gnyen po rnam pa dgu'o/ /de bzhin du bsam gtan gsum pa'i sa la nyon mongs pa dgu'i gnyen po dgu'o/ /de bzhin du bsam gtan bzhi pa la dgu'o/ /de bzhin du nam mkha' mtha' yas skye mched la dgu'o//de bzhin du rnam shes mtha' yas skye mched la dgu'o/ /de bzhin du ci yang med pa'i skye mched la dgu'o/ /de bzhin du 'du shes med 'du shes med min gyi skye mched la dgu ste/ 'khor ba'i sa dgu la so sor dgu dgu ste dgu pa dgu ni lam gyi dbye ba brgyad cu rtsa gcig go//kun sbyor rdzas ni ci snyed pa/ /kun sbyor bral rdzas de snyed do/ /zhes byas so/ /bar chad med pa'i lam de rnams kyi bar dang bar du rnam par grol ba'i lam yang brgyad cu rtsa gcig ni 'di lta bu nyid do/ /kha cig na re lam dbye ba dgu yin te 'di lta ste/ sa dgu'i chen po'i chen po nyon mongs pa'i gnyen po chung ngu'i chung ngu lam dang /sa dgu'i chen po'i 'bring nyon mongs pa rnams kyi gnyen po chung ngu'i 'bring gi lam dang / sa dgu'i nyon mongs pa chen po'i chung ngu'i gnyen po lam chung ngu'i chen po dang / sa dgu'i nyon mongs pa 'bring gi chen po'i gnyen po lam 'bring gi chung ngu dang /sa dgu'i nyon mongs pa 'bring gi gnyen po lam 'bring gi 'bring dang / sa dgu'i nyon mongs pa 'bring gi chung ngu gnyen po lam 'bring gi chen po dang / sa dgu'i nyon mongs pa chung ngu'i chen po'i gnyen po lam chen po'i chung ngu dang / sa dgu'i nyon mongs pa chung ngu'i 'bring gi gnyen po lam chen po'i 'bring dang /sa dgu'i nyon mongs pa chung ngu'i gnyen po lam chen po'i chen po'o/ /dper na skyes bu dpa' bo gcig gis dgra mang po yang rab te 'joms pa de bzhin du/ lam gcig gis nyon mongs pa rab tu mang ba rnams rtsa ba nas 'byin par byed do zhes zer ro//phyogs 'di la gzhan dag na re/ lam gyi rnam pa dgu pas sa dgu'i nyon mongs pa dgu pa chung ngu'i chung ngu spangs pa na/ spang bar bya ba'i nyon mongs pa med pas de nyid kyi tshe rnal 'byor pa khams gsum la 'dod chags dang bral ba'i dgra bcom par thal bar 'gyur ro/ /de lta na/'dod par rnam pa drug pa dang / dgu pa yang dag zad pa las/ /lam gcig 'ong dang mi 'ong ba'i/ /gang zag dag tu 'gyur ba'o/ /zhes pa la sogs pa'i rnam par gzhag pa thams cad nyams par 'gyur bas gus par mi byed do/ /spong ba na yang / dang por mthu rnams kyis gzhis ltar yon tan thams cad kyi rten tshul khrims zhes shes par bya ste/so sor thar pa'i sdom pa yang dag par blangs nas brtul zhugs la gnas pa'i rnal 'byor pas bsgom par rtsom pa na/ sbyor ba'i dus su dam pa ma yin pa'i tshogs pa dang dam pa ma yin pa'i rnam par rtog pa dag yongs su spang bar bya'o//de la gang zag rnam pa gnyis ni 'di lta ste/ 'dod chags la spyod pa dang / rnam par rtog pa la spyod pa'o/ /de la 'dod chags la spyod pas mi sdug pa bsgom pa sngon du 'gro bas zhi gnas bskyed par bya'o/ /de la 'dod chags la dgu ste/ 'di lta ste/ dbyibs la chags pa dang /sdug pa la chags pa dang / lus kyi dri tsan dan la sogs pas skyed pa la chags pa dang / lus mdzes pa rgyan la sogs pas bskyed pa la chags pa dang / lus kyi mdog la chags pa dang / sha rgyas pa la chags pa dang / lus dang yan lag sgeg pa la chags pa dang / so mdzes pa phun sum tshogs pa la chags pa dang /mdog dang dbyibs la chags pa'o/ /grangs bzhin du de rnams kyi gnyen po mi sdug pa bsgom pa'i dbye ba rnam pa dgu ni 'di lta ste/ rnam par spangs pa bzhin du rnam par bam pa'i 'du shes dang / yan lag cha shas tha dad du gyur pas rnam par zhig pa'i 'du shes dang /dri ngan pa rnag gi rang bzhin yin pas rnam par rnags pa'i 'du shes dang / pags pa bshus pa bzhin rnam par dmar ba'i 'du shes dang / rul ba'i rang bzhin yin pas rnam par bsngos pa'i 'du shes dang / mi gtsang ba spungs pa'i 'du shes dang / rnam par ring du gyur pas rnam par 'byer ba'i 'du shes dang /rus pa'i rang bzhin nyid yin pas keng rus kyi 'du shes dang / rnam par tshig pa'i 'du shes so/ /'di bsgom pa las nyon mongs pa rnams rnam par rengs par byed cing zhi gnas rdzogs par byed do/ /rnam par rtog pa la dpyod pas dbugs rngub pa dang 'byung ba rjes su dran pa bsgom pa sngon du 'gro ba zhi gnas skyed par byed do//de la dbugs rngub pa dang 'byung ba rjes su dran pa la drug ni 'di lta ste/ bgrang ba dang / rjes su bgrod pa dang / gnas pa dang / mtshon par byed pa dang / sgyur ba dang / yongs su dag pa'o//de la rngub pa ni dbugs te 'jug pa'i rlung ngo / /'byung ba ni dbugs te phyir 'byung ba'i rlung ngo / /rlung de dag la dmigs par byed pa'i shes rab ni rngub pa dang 'byung ba rjes su dran pa'o/ /de la bgrang ba zhes bya ba ni lus dang sems kyi grangs te 'jug pa dang 'byung ba tsam la sems brlan nas bgrang bar 'gyur ba'o//gcig gnyis nas bcu'i bar du'o/ /de bzhin du yang dang yang du'o/ /'di la skyon gsum ste 'di lta ste/ mtshang ba bgrang ba ni gang gi tshe/ gnyis la gcig tu 'dzin pa dang / lhag pa bgrang ba ni gang gi tshe gcig la gnyis su 'dzin pa'o/ / bsres pa ni gang gi tshe 'jug pa la 'byung bar 'dzin pa dang / 'byung ba la 'jug par 'dzin pa'o/ /de las gzhan du bgrang ba ni yang dag pa'i bgrang ba'o/ /bar du g.yeng bar gyur na/ yang dag pa nas bgrang bar bya'o/ /ci srid du ting nge 'dzin rdzogs par ma gyur pa de srid du bsgom par bya'o//rjes su bgrod pa zhes pa ni/ 'jug pa'i rlung ni mi rtsol la rim gyis mgrin pa snying ga lte ba rked pa brla rje ngar nas zhugs te rkang pa'i bar du nye bar bgrod pa'o/ /'byung ba'i rlung ni mtho gcig gam gnyis sam ci srid du 'dom gyi bar du'o/ /gnas pa zhes pa sna'i rtse nas rkang pa'i mtheb chen gyi bar du gnas pa nor bu'i skud pa bzhin du blta'o//ci 'di dag rjes su 'dzin par byed pa'am nye bar gnod pa byed pa'am bsil ba'am dro ba zhes pa'o/ /mtshon par byed pa zhes pa ni/ 'di dag ni rlung 'ba' zhig kho na ma yin te/ 'di ni 'byung ba chen po bzhi dang de la brten pa dang 'byung ba las gyur pa dang sems dang sems las byung ba'o//phung po lnga ru nye bar mtshon par byed pa'o/ /sgyur ba zhes pa rlung la dmigs pa'i blo bzlog ste/ dge ba'i rtsa ba gong ma la nges par sbyor ba ci srid du chos mchog la sogs pa'i sbyor ba la sogs pa'o/ / yongs su dag pa zhes pa ci srid du mthong lam la sogs pa la nges par sbyor bar byed pa'o/ /dbugs rngub pa dang 'byung ba rjes su dran pa 'di ni nyon mongs pa rnams rnam par nges par byed cing zhi gnas rdzogs par byed do/ /de la mi rtag pa bsgom pa'am 'byung 'jug rjes su dran pa bsgoms pas zhi gnas rdzogs pa la dran pa nye bar gzhag pa bsgom par bya ba yin no//dran pa nye bar gzhag pa bsgom pa ni zhi gnas nges par rdzogs par bya zhes so/ /de la dang po mi gtsang ba la gtsang ba'i 'du shes phyin ci log gi gnyen po lus dran pa nye bar gzhag pa dang / de nas sdug bsngal la bde bar 'du shes phyin ci log gi gnyen po tshor ba dran pa nye bar gzhag pa dang /de nas mi rtag pa la rtag par 'du shes phyin ci log gi gnyen po sems dran pa nye bar gzhag pa dang / de nas bdag med pa la bdag tu 'du shes phyin ci log gi gnyen po chos dran pa nye bar gzhag pa'o/ /dad pa la sogs pa'i chos nyid la dmigs pa nyid kyi phyir ro//bzhi po de rnams ni gzugs par bya ba'i mtshan nyid kyis gzugs so zhes pa la sogs pa rang gi mtshan nyid kyis dang / stong pa'i bdag nyid kyi ngo bo spyi'i mtshan nyid kyis ngal so ba med par sems kyis gzhigs te bsgom mo/ /de'i rjes su sems 'dis yang dag par 'dzin par byed pas yang dag pa'i spong ba zhes pa bsgom par bya'o//bzhi po de ni 'di lta ste/ mi dge ba skyes pa rnams spong ba'i phyir 'dun pa dang / mi dge ba ma skyes pa rnams mi skyed pa'i phyir 'dun pa dang / dge ba skyes pa rnams 'phel ba'i phyir 'dun pa dang / ma skyes pa'i dge ba rnams skyed pa'i phyir 'dun pa'o//'dun pa ni 'dir brtson 'grus so/ /de'i rjes su 'jig rten las 'das pa rdzu 'phrul gyi go 'phang gi gnas yin pa'i phyir rdzu 'phrul gyi rkang pa bzhi bsgom par bya'o/ /'di lta ste/ 'dun pa drag po dang ldan pas sems rtse gcig pa'i mtshan nyid ting nge 'dzin ni 'dun pa'i rdzu 'phrul gyi rkang pa'o//mi dge ba spong ba dang dge ba bskyed pa la yang dag par spong ba'i brtson 'grus kyis rab tu ldan pa'i sems rtse gcig pa'i mtshan nyid ting nge 'dzin ni brtson 'grus kyi rdzu 'phrul gyi rkang pa'o/ /zhi gnas rab tu slong ba btang snyoms kyi mtshan ma sems kyis sbyong bar byed pas sems rtse gcig pa'i mtshan nyid ting nge 'dzin ni sems kyi rdzu 'phrul gyi rkang pa'o//ci bdag ni mi dge ba phra mo la kun du dpyod pa/ bdag ni rtog pa la yongs su dpyod pa'o zhes yang dag par dmigs par byed pa sems rtse gcig pa'i mtshan nyid ting nge 'dzin ni dpyod pa'i rdzu 'phrul gyi rkang pa'o//de rnams rdzogs par skyes pa na kun nas dkris pa rnams spangs shing / bag la nyal rnams spang ba'i phyir yang / yang dag par spong ba'i brtson pa rtsom par byed pa na/ spong ba'i 'du byed brgyad 'byung bar 'gyur ro/ /'di lta ste/ dus nam 'jig rten dang 'jig rten las 'das pa'i snyom par 'jug pa skye bar 'gyur zhes 'dun pa dang /mi dge ba rnams gzhom pa'i phyir brtson 'grus dang / rtogs pa gang ma dad pa dang / dad pa sngon du 'gro ba'i shin tu sbyangs pa dang / de la'ang dran pa shes bzhin gyi phyogs dang / lhag mthong gi phyogs shes bzhin dang /de'ang sems mngon par 'du byed pa'i mtshan nyid sems pa dang / kun nas nyon mongs pa med pa'i mtshan nyid btang snyoms so/ /de rnams ni tshogs kyi lam ste thar pa'i cha dang mthun pa'i dge ba'i rtsa ba zhes brjod do/ /de'i rjes su de bzhin du yongs su sbyang ba byas pas/yul bden pa bzhi mi rtag pa la sogs pa rnam pa bcu drug tu bsgom pa'i rang bzhin/ bdag tu lta ba'i gnyen po'i ngo bo/ 'jig rten pa la sbyor ba'i lam/ nges par 'byed pa'i cha dang mthun pa'i dge ba'i rtsa ba ni rnam pa bzhin 'gyur ba yin no/ /'di lta ste/ gtsub shing gi me'i sngon du dro ba'i ngo bo bzhin du/ 'jig rten las 'das pa'i me'i sngon du yul bden pa bzhi rnam pa bcu drug gi ngo bo drod dang / de nas de dang 'dra ba nyid du g.yo ba'i dge ba'i rtsa ba rnams kyi spyi bo yin pa'i phyir rtse mor phyin pa dang / de nas thams cad bzod pa'i phyir bzod pa dang /de nas 'jig rten pa thams cad kyi rtse mo'i phyir chos mchog go/ /de la drod dang rtse mo'i rang bzhin dad pa brtson 'grus dran pa ting nge 'dzin shes rab lnga ni/ 'jig rten las 'das pa'i chos bskyed pa la bdag por gyur pa thob pa'i phyir na dbang por gyur pa yin no/ /rdzu 'phrul rkang pa la sbyor ba'i rtags mthong ba las gong ma'i chos skyed pa ma nges pa skyes pa'i phyir dang ston pa'i lhag par rtogs pa la mngon par yid ches pa'i phyir dad pa'i dbang po'o//dad pa lhag pa las brtson 'grus dran pa ting nge 'dzin shes rab lhag pa can no/ /dbang po lnga nyid sgom par byed pa ni de ltar 'phel ba las ci ltar bdud la sogs rnams kyis mi thub pa'i phyir dang rnam par nyes par bya ba ma yin pa'i phyir stobs zhes pa'i ming thob bo//stobs de rnams ni bzod pa dang chos mchog gi rang bzhin no/ /de'i rjes su mthong ba'i lam skye ste/ de'ang zag pa med pa yin pas 'phags pa'i lam 'jig rten las 'das pa/mthong bas spang bar bya ba'i nyon mongs pa rtsa ba nas med par byed pa'o/ /'di lta ste/ sdug bsngal la chos shes pa'i bzod pa skye bzhin pa na/ 'dod pa na spyod pa'i sdug bsngal gegs bcu 'dod chags khong khro nga rgyal ma rig pa the tshom 'jig tshogs la lta ba log par lta ba mthar 'dzin par lta ba/lta ba mchog tu 'dzin pa tshul khrims brtul zhugs mchog tu 'dzin pa rnams kyis thob pa gcod par byed do/ /de nas sdug bsngal la chos shes pa nyon mongs pa mi ldan pa thob pa dang lhan cig tu skye'o/ /de'i rjes su sdug bsngal la rjes su shes pa'i bzod pa skye ba na/de rnams la khong khro ma gtogs pa/ gzugs na spyod pa sdug bsngal bden pa'i gegs dgu dang / gzugs med pa na spyod pa sdug bsngal gegs dgu ste/ bag la nyal bco brgyad rnams kyis thob pa rnams gcod pa'o/ /de nas sdug bsngal la rjes su shes pa nyon mongs pa mi ldan pa thob pa dang lhan cig tu skye'o//de'i rjes su kun 'byung la chos shes pa'i bzod pa skye bzhin pa na/ de rnams la 'jig tshogs la lta ba mthar 'dzin par lta ba tshul khrims brtul zhugs mchog tu 'dzin pa ma gtogs pa/ 'dod pa na spyod pa kun 'byung gi gegs bdun rnams kyis thob pa gcod pa'o//de nas kun 'byung la chos shes pa nyon mongs pa mi ldan pa thob pa dang lhan cig tu skye'o/ /de nas kun 'byung la rjes su shes pa'i bzod pa skye bzhin pa na/ de rnams la khong khro ba ma gtogs pa/ kun 'byung gegs 'dod pa na spyod pa drug dang / gzugs med pa na spyod pa drug ste bag la nyal bcu gnyis rnams kyis thob ba rnams gcod pa'o/ /de nas kun 'byung la rjes su shes pa nyon mongs pa bral ba thob pa dang lhan cig tu skye'o/ /de'i rjes su 'gog pa la chos shes pa'i bzod pa skye bzhin pa na/de kho na bzhin du/ 'gog pa'i gegs 'dod pa na spyod pa nyon mongs pa bdun rnams kyis thob pa gcod do/ /de nas 'gog pa la chos shes pa nyon mongs pa mi ldan pa thob pa dang lhan cig tu skye'o/ /de'i rjes su 'gog pa la rjes su shes pa'i bzod pa skye bzhin pa na/ de rnams la khong khro ma gtogs pa 'gog pa'i gegs gzugs na spyod pa drug dang /gzugs med pas bsdus pa drug ste/ bag la nyal bcu gnyis kyis thob pa gcod pa'o/ /de nas 'gog pa la rjes su shes pa nyon mongs pa 'gags pa thob pa dang lhan cig tu skye'o/ /lam la chos shes pa'i bzod pa skye bzhin pa na/de rnams la tshul khrims brtul zhugs mchog tu 'dzin pa dang bcas pa 'dod pa na spyod pa lam gyis bsdus pa bag la nyal brgyad kyis thob pa gcod pa'o/ /de nas lam la chos shes pa nyon mongs pa 'gags pa thob pa dang lhan cig tu skye'o/ /lam la rjes su shes pa'i bzod pa skye ba na/de rnams la khong khro ma gtogs pa/ lam gyi gegs gzugs na spyod pa bdun dang gzugs med pa na spyod pa lam gyi gegs bdun te/ bag la nyal bcu bzhi rnams kyis thob pa gcod pa'o/ /mthong lam skad cig bco lnga 'di rnams ni mthong ba'i lam ste brgyad pa'i sa zhes so//'di la gnas pa'i gang zag ni rgyun du zhugs pa'i 'bras bu'i phyir zhugs pa zhes rnam par bzhag par bya'o/ /bcu drug pa lam la rjes su shes pa'i skad cig ni bsgom pa'i lam gyi rang bzhin te/ 'di la gnas pa ni rgyun du zhugs pa rnam par gzhag go/ / 'di las pha rol du sdug bsngal la sogs pa'i bden pa mthong la/ yang mthong ba'i don rtsol bas sgom pa dang / 'dis mya ngan las 'das pa tshol bar byed pas na bsgom pa'i lam mo/ /de 'ang 'dod pa'i khams su bar chad med pa'i lam gyi bdag nyid nyon mongs pa 'joms par byed pa rnams pa dgu sngon du bshad do//de la 'dod pas bsdus pa'i nyon mongs pa rnam pa lnga'i mthar thug pa spangs pa ni rgyun du zhugs pa kho na ste/ mi'i rigs nas rigs dang lha'i rigs nas rigs kyi rang bzhin gyis lan cig phyir 'ong ba'i 'bras bu'i phyir zhugs pa'o/ /drug pa spangs pa ni lan cig phyir 'ong ba'o//lan cig phyir 'ong ba nyid rnam pa bdun dang brgyad pa zad pa ni phyir mi 'ong ba'i 'bras bu'i phyir zhugs pa'o/ /'dod pas bsdus pa'i nyon mongs pa rnam pa dgu pa zad pa na phyir mi 'ong ba'o/ /de'i rjes su bsam gtan dang po'i sa'i nyon mongs pa'i rnam pa dang po nas bzung ste/'du shes med 'du shes med min skye mched kyi sa'i nyon mongs pa rnam pa brgyad pa tshun chad nyon mongs bdun cu gcig lam rnams bdun cu gcig gis zad par byas pa ni dgra bcom pa'i 'bras bu'i phyir zhugs pa'o/ /nyon mongs pa dgu pa spong bar byed pa'i bsgom pa'i lam gang yin pa de ni bar chad med pa'i lam rdo rje lta bu'i ting nge 'dzin du rnam par gzhag go//de rnams la bar bar du rnam par grol ba'i lam brgyad cu'o/ /brgyad cu rtsa gcig pa'i rnam par grol ba'i lam ni btsal bar bya ba yin pas lam ste zad pa shes pa'o/ /zad pa shes pa yang dag par skyes pa na gang zag chung ngu'i 'bring mchog thams cad khams gsum la 'dod chags dang bral ba dang /yon gyi gnas su 'os pa'i dgra bcom par gyur pa nyid do/ /de la gang zhig mi g.yo ba'i chos can de ni zad pa shes pa'i de ma thag tu mi skye ba shes pa skyed par byed do/ / nyan thos rnams kyi sa yang bcu ste/ 'di ltar/ lhag mthong 'ba' zhig gi gnas skabs nges par 'byed pa'i cha dang mthun pa ni dkar po rnam par mthong ba'i sa dang / chos mchog gi gnas skabs rigs kyi sa dang / rgyun du zhugs pa'i 'bras bu'i phyir zhugs pa ni brgyad pa'i sa dang / rgyun du zhugs pa nyid ni mthong ba'i sa dang / lan cig phyir 'ong ba'i 'bras bu'i srol du zhugs pa'i sa dang / lan cig phyir 'ong ba ni bsrabs pa'i sa dang / phyir mi 'ong ba'i 'bras bu'i srol du zhugs pa'i sa dang / phyir mi 'ong ba ni 'dod chags dang bral ba'i sa dang / dgra bcom pa'i 'bras bu'i srol du zhugs pa'i sa dang / dgra bcom pa ni byas pa srung ba'i sa'o/ /yang na nyan thos kyi sa la bdun ni 'di lta ste/ rigs kyi sa dang / brgyad pa'i sa dang / mthong ba'i sa dang / bsrabs pa'i sa dang / 'dod chags dang bral ba'i sa dang / byas pa srung ba'i sa dang / srol du zhugs pa gsum gyi sa'o/ /'di ni rigs kyi 'jug pa'i rnam par gzhag pa'o/ /gzhan dag ni/ dang po 'jig rten pa'i lam gyi 'dod pas bsdus pa'i bsgom pas spang bar bya ba rnam pa drug spangs na/ de'i rjes su zag pa med pa'i mthong lam skad cig ma bco lngas/ mthong bas spang bar bya ba'i nyon mongs pa rnam pa mtha' dag rtsa ba nas bcad de/bcu drug pa lam la rjes su shes pa'i skad cig ma la lan cig phyir 'ong bar 'gyur ro/ /rnam par gzhag pa 'di la/ rgyun du zhugs pa'i 'bras bu'i phyir zhugs pa dang / rgyun du zhugs pa'i 'bras bu'i rigs dang / rgyun du zhugs pa'i 'bras bu'i phyir zhugs pa'i tha snyad med do/ /yang na dang po 'jig rten pa'i lam gyi 'dod pas bsdus pa'i sgom pa'i spang bya rnam pa dgu spangs nas/ de'i rjes su zag pa med pa'i mthong lam skad cig ma bco lngas/ mthong bas spang bar bya ba nyon mongs pa rnam pa mtha' dag rtsa ba nas bcad de/bcu drug pa lam la rjes su shes pa'i skad cig ma la 'dod pa la 'dod chags dang bral ba phyir mi 'ong ba'o/ /rnam par gzhag pa 'di la rgyun du zhugs pa'i 'bras bu'i phyir zhugs pa rgyun du zhugs pa rigs nas rigs lan cig phyir 'ong ba'i 'bras bu'i phyir zhugs pa lan cig phyir 'ong ba bar chad gcig pa phyir mi 'ong ba'i 'bras bu'i srol du zhugs pa rnams kyi tha snyad med do//yang na 'jig rten pa'i lam gyi khams gnyis la 'dod chags dang bral bar gyur nas/ mthong lam gyi mthong bas spang bar bya ba nyon mongs pa spangs ma thag tu bcu drug pa lam la rjes su shes pa'i skad cig ma la khams gnyis la 'dod chags dang bral ba phyir mi 'ong bar 'gyur ba yin no//de'i rjes su 'jig rten las 'das pa bsgom pa'i lam rnam pa dgus/ gzugs med pas bsdus pa'i nyon mongs pa rnam pa dgu sngon bzhin du spangs te zad pa shes pa skyed par byed do zhes pa ni sngon bzhin du thams cad sbyar bar bya'o//'di kho na bzhin du dbang po 'bring po rang sangs rgyas kyi theg pa pa yang zad pa dang mi skye ba shes pa skyed par byed do/ /de la'ang rim gyis ni mi srid do/ /'di la 'bras bu la gnas pa dang srol du zhugs pa la sogs pa'i tha snyad ni med do//gang 'dis ni stan gcig nyid la gnas nas thams cad rdzogs par byed pa yin no/ /byang chub sems dpa' yang bsod nams dang ye shes kyi tshogs yongs su rdzogs par byas nas/ byang chub snying por byon pa nyid na 'jig rten pa'i lam gyis 'dod pa'i khams nas bzung ste ci yang med pa'i skye mched kyi bar du 'dod chags dang bral bar gyur na/nges par gnon pa 'jig rten las 'das pa mthong ba'i lam skad cig ma bcu drug gis mthong bas spang bar bya ba nyon mongs pa mtha' dag spangs te/ bsgom pa'i lam rnam pa dgus srid pa'i rtse mo'i nyon mongs pa rnam pa dgu spangs nas yang dag par rdzogs pa'i byang chub rjes su thob bo//des na mthong lam skad cig ma bcu drug dang / bar chad med pa'i lam dgu dang / 'di rnams kyi bar bar du 'byung ba rnam par grol ba'i lam skad cig ma dgu ste sems kyi skad cig ma sum cu bzhis bla na med pa yang dag par sangs rgya'o//chos mngon pa mdzod las kyang gsungs te/ skad cig sum cu bzhis thob nyid/ /ces so/ /'di'i bye brag tu bshad pa las/ byang chub sems dpa' rnams kyi skad cig sum cu bzhis rjes su 'thob po lo/ /bden pa'i mngon par rtogs pa bcu drug dang /srid pa'i rtse mo la 'dod chags dang bral ba ste nyon mongs skye ba rnam pa dgu spang ba'i phyir bar chad med pa dang rnam par grol ba'i lam dgu skye bas so/ /des na sum cu rtsa bzhir 'gyur ro/ /ci yang med pa'i skye mched la 'dod chag dang bral ba 'dis nges pa rnam par non pa na sa 'og ma ni spang byar 'gyur ba ma yin no//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las 'phags pa'i bden pa bzhi rnam par nges pa zhes bya ba le'u bcu gnyis pa'o// //'phags pa gnas brtan pa'i sde ba'i lung las 'di ltar rnam par bzhag ste/de la las dang po pa'i rnal 'byor pas rga shi las grol bar 'dod pa dang / 'khor ba'i rgyu yang dag par gcod pa don du gnyer ba dang / ma rig pa'i mun pa rnam par sel ba'i don du gnyer ba dang / 'phags pa'i shes rab thob pa don du gnyer ba rnams kyis gnas lnga la mkhas par bskyed par bya'o//'di lta ste/ phung po la mkhas pa dang / skye mched la mkhas pa dang / khams la mkhas pa dang / rten cing 'brel par 'byung ba la mkhas pa dang / 'phags pa'i bden pa la mkhas pa'o/ /de la phung po lnga ni 'di lta ste/gzugs kyi phung po dang / tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po'o/ /de la gzugs kyi phung po ni gnyis te 'di ltar/ 'byung ba chen po dang / 'byung ba chen po las byung ba'i gzugs so/ /de la 'byung ba chen po la bzhi ni 'di ltar/sa dang / chu dang / me dang / rlung ngo / /'byung ba chen po las byung ba'i gzugs ni nyi shu nyer drug ste/ 'di ltar/ mig dang / rna ba dang / sna dang / lce dang / lus dang / gzugs dang / sgra dang / dri dang / ro dang / reg pa dang / bud med kyi dbang po dang / skyes pa'i dbang po dang /srog gi dbang po dang / lus kyi rig byed dang / ngag gi rig byed dang / nam mkha'i khams dang / gzugs kyi spang ba nyid dang / gzugs kyi 'jam pa nyid dang / gzugs kyi las su rung ba nyid dang / gzugs kyi 'phel ba dang / gzugs kyi rgyud dang / gzugs kyi skye ba dang /gzugs kyi rga ba dang / gzugs kyi mi rtag pa dang / kham gyi zas dang / dngos po'i ngo bo dang / gnyid do/ /de'i phyir 'byung ba chen po bzhi dang nye bar bslang ba'i gzugs nyi shu nyer drug ste/ gzugs sum cur 'gyur ro/ /gzugs sum cu rnams rgyu lnga las bye brag tu gyur pa shes par bya'o/ / 'di lta ste/ kun slong dang / tshogs pa dang / skye ba dang / sna tshogs pa nyid dang / gcig nyid do/ /de la kun slong ni bzhi ste 'di ltar/ las kyis kun du bslang ba dang / sems kyis kun du bslang ba dang / dus kyis kun du bslang ba dang / kha zas kyis kun du bslang ba'o/ /de la gzugs dgu ni las kyis kun du bslang ba ste 'di ltar/mig dang / rna ba dang / sna dang / lce dang / lus dang / bud med kyi dbang po dang / skyes pa'i dbang po dang / srog gi dbang po dang / dbang po'i ngo bo'o/ /gzugs gnyis ni sems kyis kun du bslang ba ste/ 'di ltar/ lus kyi rig byed dang / ngag gi rig byed de/ / gcig ni dus dang sems kyis kun du bslang ba ste sgra'o/ /dus dang sems dang zas kyis kun du bslang ba ni bzhi ste/ 'di ltar gzugs kyi yang ba dang / gzugs kyi 'jam pa dang / gzugs kyi las su rung ba dang / gnyid do/ /dus dang las dang sems dang zas rnams kyis kun du bslang ba la bcu gnyis ni 'di lta ste/gzugs kyi skye mched dang / dri dang / ro dang / nam mkha'i khams dang / gzugs kyi 'phel ba dang / gzugs kyi rgyud dang / gzugs kyi skye ba dang / kham gyi zas dang / sa'i khams dang / chu dang me dang rlung ngo / /gzugs gnyis ni gang gis kyang bslang ba ma yin te/'di lta ste/ gzugs kyi rnyings pa dang / gzugs kyi mi rtag pa'o/ /'on kyang skye ba'i rkyen las rga ba dang / rgas pa'i rkyen las mi rtag pa'o/ /tshogs pa ni las kyis kun nas bslang ba dgu tshogs pa'o/ /'di ltar/ mig bcu dang / rna ba bcu dang / sna bcu dang / lce bcu dang / lus bcu dang /bud med dbang po bcu dang / dngos po bcu dang / skyes pa'i dbang po bcu dang / dngos po bcu dang / srog gi dbang po bcu'o/ /de la mig bcu zhes pa ni/ rab tu dang ba'i mig gi dngos por gyur pa'i 'byung ba chen po bzhi dang / kha dog dang / dri dang / ro dang / gzi brjid dang / srog gi dbang po dang /mig gi rab tu dang ba'o/ /chos bcu po 'di rnams gnas rnam pa tha dad med pa'i gong bu yin pas/ mig bcu zhes brjod do/ /mig bcu ni 'byung ba la ni skye ba zhes brjod do/ /rnyings pa la ni rga ba zhes brjod do/ /'jig pa la ni mi rtag pa zhes brjod do/ /yongs su chad pa ni nam mkha'i khams zhes brjod do//chos bzhi po 'di rnams ni/ tshogs pa de'i rjes su 'jug par byed pa yin no/ /yang mig bcu de nyid kyi rga ba'i dus su/ mig bcu de la brten nas mig bcu gnyis pa skye'o/ /mig bcu de gnyis kyi 'dus pa de ni 'phel ba zhes brjod do/ / gang de rnams kyi rjes su 'brel pa de ni rgyud ces brjod do/ /sngar gyi skye ba la sogs pa bzhi dang / gnyis po 'di dag ste/ chos drug po 'di dag ni de rnams kyi rjes su 'jug byed yin no/ /yang mig bcu gnyis pa'i rga ba'i dus su/ mig bcu gnyis pa de la brten nas mig bcu ldan gsum pa skye'o//gang gnyis pa'am gsum pa 'dus pa de ni 'phel ba zhes brjod do/ /gang de nyid kyi rjes su 'brel pa de ni rgyud ces brjod do/ /bcu ldan sngon ma'i 'jig pa dang / gnyis pa'i rga ba dang / gsum pa'i skye ba rnams dus gcig du 'jug pa'o/ /de ltar 'jug pa'i mig bcu ldan rnams la ni bar gcod dam go skabs mi shes te/skad cig ni myur ba nyid kyi phyir ro/ /sgron me'i 'od bzhin du mthong ba'o/ /'di ni mig bcu ldan zhes brjod do/ /de bzhin du rna ba bcu ldan dang / sna bcu ldan dang / lce bcu ldan dang / lus bcu ldan dang / bud med kyi dbang po bcu ldan dang / skyes pa'i dbang po bcu ldan dang / dngos po bcu ldan dang / srog gi dbang po bcu ldan rnams rgyas par shes par bya'o/ /de bzhin gzugs gzhan rnams kyi yang ci ltar rigs par rgyas par shes par bya'o/ /'dir mangs par 'gyur bas 'jigs pas bdag gis ma brjod do/ /skye ba ni 'di ltar/mngal gyi skye ba'i skad cig la gzugs sum cu 'byung bar 'gyur ro/ /dngos po bcu ldan dang / lus bcu ldan dang / gang gi tshe bud med ni bud med kyi dbang po bcu ldan dang / yang na skye bar 'gyur na de'i tshe skyes pa'i dbang po bcu ldan dang / ma ning rnams kyi ni gzugs nyi shu 'byung bar 'gyur te/'di lta ste/ dngos po bcu ldan dang / lus bcu ldan no/ /'dod pa na spyod pa'i rdzus skyes skye mched yongs su rdzogs pa'i skyes pa dang bud med rnams kyi skye ba'i dus su/ gzugs bdun cu 'byung bar 'gyur/ 'di ltar/ dngos po bcu ldan dang / lus bcu ldan dang / mig bcu ldan dang /rna ba bcu ldan dang / sna bcu ldan dang / lce bcu ldan dang / gang tshe bud med yin pa na bud med kyi dbang po bcu ldan dang / gang tshe skyes pa na skyes pa'i dbang po bcu ldan no/ /ngan song rnams kyi rdzus skyes dmus long bud med dam/ skyes pa rnams skye ba'i dus su gzugs drug cu 'byung bar 'gyur te/mig bcu ldan med pas so/ /de bzhin du skye ba'i 'on pa rnams kyi ni gzugs drug cu ste/ rna ba bcu ldan med pas so/ /dmus long ma ning rnams kyi ni gzugs lnga bcu ste/ mig bcu ldan dang / rna ba bcu ldan med pas so/ /ngan 'gro rdzus skyes skye mched rdzogs pa rnams dang bskal pa dang po pa'i mi rnams kyi skye ba'i dus su gzugs drug cu 'byung ste 'dod pa bcu ldan med pas so//dmus long ma ning rnams kyi skye ba'i dus su gzugs lnga bcu 'byung bar 'gyur te/ mig bcu ldan dang 'dod pa bcu ldan med pas so/ /dmus long ma ning rnams kyi skye ba'i dus su yang lnga bcu ste/rna ba bcu ldan dang 'dod pa bcu ldan med pas so/ /ma ning dmus long 'on pa'i gzugs bzhi bcu ste/ 'di ltar/ dngos po bcu ldan dang / lus bcu ldan dang / sna bcu ldan dang / lce bcu ldan no/ /tshangs pa rnams kyi skye ba'i dus su gzugs sum cu dgu ni 'di lta ste/ dngos po bcu ldan dang /mig bcu ldan dang / rna ba bcu ldan dang / srog gi dbang po dgu ldan no/ /'du shes med pa'i sems can rnams kyi skye ba'i dus su gzugs dgu 'byung bar 'gyur te 'di ltar srog gi dbang po dgu'o/ /sna tshogs pa nyid ni 'di ltar re zhig de srid du/ gzugs la gnyis ni 'di ltar thogs pa dang bcas pa'i don gyis rags pa dang /thogs pa med pa'i don gyis phra mo'o/ /de la gzugs rags pa la bcu gnyis ni 'di ltar/ mig dang / rna ba dang / sna dang / lce dang / lus dang / gzugs dang / sgra dang / dri dang / ro dang / sa'i khams dang / me'i khams dang / rlung gi khams so/ / gzugs phra mo la bco brgyad ni 'di lta ste/ gzhan srog gi dbang po la sogs pa gnyis kyi mthar thug pa'o/ /gzhan yang rnam pa gnyis ni 'di ltar/ nang dang phyi rol lo/ /de la yul dang bcas pa'i don gyis nang gi la rnam pa lnga ni 'di ltar/ mig dang / rna ba dang / sna dang / lce dang / lus so/ /yul dang mi ldan pas na phyi rol ni rnam pa nyi shu lnga ste/'di ltar/ gzugs lhag ma rnams so/ /gzhan yang gzugs la rnam pa gnyis ni/ 'di ltar/ dbang po'i gzugs dang / dbang po min pa'i gzugs so/ /de la bdag po'i don gyis dbang po'i gzugs la brgyad ni 'di ltar/mig dang / rna ba dang / sna dang / lce dang / lus dang / bud med kyi dbang po dang / skyes pa'i dbang po dang / srog gi dbang po'o/ /dbang po dang mi ldan pa'i don gyis dbang po min pa'i gzugs la nyi shu nyer gnyis te 'di ltar/ gzugs lhag ma rnams so/ /yang gzugs thams cad ni rnam pa gsum ste 'di ltar/zin pa'i gzugs dang / ma zin pa'i gzugs dang / rnam par phye ba'i gzugs so/ /de la las las skyes pas zin pa'i gzugs la dgu ste 'di ltar/ dbang po'i gzugs brgyad dang / dngos po'i ngo bo'o/ /las las ma skyes pa'i don gyis ma zin pa'i gzugs la dgu ni 'di ltar/sgra dang / lus kyi rnam par rig byed dang / ngag gi rnam par rig byed dang / gzugs kyi yang ba nyid dang / gzugs kyi 'jam pa nyid dang / las su rung ba dang / rga ba dang / mi rtag pa dang / gnyid do/ /gnyi ga yin pa'i don gyis rnam par phye ba'i gzugs la bcu gnyis ni 'di ltar/lhag ma gzugs bcu gnyis so/ /gzhan yang rnam pa gsum ste/ 'di ltar/ bstan du yod pa'i gzugs thogs pa dang bcas pa dang / bstan du med pa'i gzugs thogs pa dang bcas pa dang / bstan du med pa'i gzug thogs pa med pa'o/ /de la gegs byed pa'i don gyis bstan du yod cing thogs pa dang bcas pa ste gcig go//'di ltar/ gzugs kyi skye mched do/ /mthong du med pa'i don gyis dang gegs kyi don gyis bstan du med pa'i gzugs thogs pa dang bcas pa la bcu gcig ni 'di ltar/ gang gzugs rags pas gsungs pa la gzugs kyi skye mched ma gtogs pa'o//mthong du med pa dang gegs med pa'i don gyis bstan du med pa'i gzugs thogs pa med pa la bco brgyad de 'di ltar/ gang phra mo'i gzugs su gsungs pa gang yin pa de'o/ /yang gzugs thams cad la rnam pa lnga ni 'di ltar rang bzhin gyi gzugs dang /rnam par 'gyur ba'i gzugs dang / mtshan nyid kyi gzugs dang / yongs su chad pa'i gzugs so/ /de la yongs su rdzogs pa'i don gyis rang bzhin gyi gzugs la dbye ba dgu bcu ste/ 'di ltar/ gang rags pa'i gzugs su gsungs pa'i bcu gnyis po de dang /bud med kyi dbang po dang / skyes pa'i dbang po dang / srog gi dbang po dang / chu'i khams dang / kham gyi zas dang / dngos po'i ngo bo dang / gnyid do/ /rang bzhin gyi gzugs rnam par 'gyur ba'i don gyis rnam par 'gyur ba'i gzugs la bdun ni 'di ltar/ lus kyi rnam par rig byed dang /ngag gi rnam par rig byed dang / gzugs kyi yang ba nyid dang / gzugs kyi 'jam pa nyid dang / las su rung ba nyid dang / gzugs kyi 'phel ba dang / gzugs kyi rgyud do/ /'dus byas kyi don gyis mtshan nyid kyi gzugs la gsum ni 'di ltar/ gzugs kyi skye ba dang / gzugs kyi rga ba dang / gzugs kyi mi rtag pa'o/ /tshogs pa yongs su chad pa'i don gyis yongs su chad pa'i gzugs gcig ni 'di lta ste/ nam mkha'i khams so/ /'dir rang bzhin gyi gzugs gang yin pa de'i yongs su chad pa yin gyi lhag ma ni yongs su ma chad pa'o/ /gcig pa nyid kyi gzugs la ming mang du 'gyur te/'di ltar/ rgyu med pa ma yin pa dang / rgyu can dang / mi ldan pa dang / rkyen can dang / 'dus byas dang / 'jig rten pa dang / ro lta bu dang / kun du sbyor bar bya ba dang / mdud par bya ba dang / rmongs par bya ba dang / sbyor bar bya ba dang / sgrib par bya ba dang /mchog tu 'dzin pa dang / nye bar blang ba dang / nyon mongs pa can dang / lung du ma bstan pa dang / dmigs pa med pa dang / sems pa med pa dang / sems dang mi ldan pa dang / chung ba dang / 'dod pa na spyod pa dang / ma nges pa dang / nges par 'byin pa ma yin pa dang / bde ba dang / ldan pa dang / sdug bsngal dang ldan pa dang / 'phel ba nyid du 'gro ba ma yin pa dang / 'grib pa nyid du 'gro ba ma yin pa dang / slob pa nyid ma yin pa dang / mi slob pa nyid ma yin pa dang / mthong bas spang bar bya ba ma yin pa dang / bsgom pas spang bar bya ba ma yin pa'o/ /de bzhin du'ang yang gzugs kyi phung po shes par bya'o//tshor ba ni mtshan nyid kyis gcig ste/ 'di ltar/ gang sems kyi dmigs pa nyams su myong ba'o/ /dngos po'i dbang gis rnam pa gnyis ni 'di ltar/ lus las byung ba dang / sems las byung ba'o/ /rang bzhin gyi dbang gis rnam pa gsum ni 'di ltar/bde ba'i tshor ba dang / sdug bsngal ma yin pa'i tshor ba'o/ /chos kyi dbang gis rnam pa bzhi ni 'di ltar/ dge ba'i tshor ba dang / mi dge ba'i tshor ba dang / rnam par smin pa'i tshor ba dang / bya ba'i tshor ba'o/ /dbang po'i dbang gis rnam pa lnga ni 'di ltar/bde ba'i dbang po dang / sdug bsngal gyi dbang po dang / yid mi bde ba'i dbang po dang / btang snyoms kyi dbang po'o/ /dkar nag gi dbang gis rnam pa drug ni 'di ltar/ zang zing dang bcas pa sdug bsngal gyi tshor ba dang / zang zing med pa sdug bsngal gyi tshor ba dang / zang zing dang bcas pa'i bde ba'i tshor ba dang /zang zing med pa'i bde ba'i tshor ba dang / zang zing ldan pa bde min sdug min tshor ba dang / zang zing med pa bde min sdug min tshor ba'o/ /sgo'i dbang po rnam pa bdun ni 'di ltar/ mig gi 'dus te reg pa las skyes pa'i tshor ba dang / rna ba'i 'dus te reg pa las skyes pa'i tshor ba dang /sna'i 'dus te reg pa las skyes pa'i tshor ba dang / lce'i 'dus te reg pa las skyes pa'i dang / lus kyi 'dus te reg pa las skyes pa dang / yid kyi tshor ba phrad pa las skyes pa dang / rnam par shes pa'i khams 'dus te reg pa las skyes pa'o/ /rgyas par ni tshor ba brgya dang brgyad du 'gyur ro//'di ltar/ khyim gyi re ba la brten pa'i yid bde ba drug dang / khyim gyi re ba la brten pa'i yid mi bde ba drug dang / nges par 'byung ba la brten pa'i yid bde ba drug dang / nges par 'byung ba la brten pa'i yid mi bde ba drug dang / khrims kyi re ba la brten pa'i btang snyoms kyi drug dang /nges par 'byung ba la brten pa'i btang snyoms kyi drug go/ /'di ltar 'di dus gsum la tshor ba drug tshan drug ste/ tshor ba brgya dang brgyad du 'gyur ro/ /'di ni tshor ba'i phung po zhes brjod do/ /'du shes ni mtshan nyid kyis gcig ste/ 'di ltar/ gang sems kyis dmigs pa la 'du shes pa ni 'du shes so//dkar nag gi dbang gis 'du shes rnam pa gnyis ni 'di ltar/ phyin ci log dang / phyin ci ma log pa'o/ /mi dge ba'i dbang gis rnam pa gsum ni 'di ltar/ 'dod pa'i 'du shes dang / gnod pa'i 'du shes dang / rnam par 'tshe ba'i 'du shes so/ /dge ba'i dbang gis rnam pa gsum ni 'di ltar/nges par 'byung ba'i 'du shes dang / mi gnod pa'i 'du shes dang / rnam par 'tshe ba'i 'du shes so/ /bdag gi rang bzhin yongs su mi shes pa'i sgo nas bzhi ni 'di ltar/ mi sdug pa la sdug pa'i 'du shes dang / sdug bsngal la bde ba'i 'du shes dang / mi rtag pa la rtag pa'i 'du shes dang /bdag med pa la bdag gi 'du shes so/ /bdag gi dngos po yongs su shes pa'i sgo nas bzhi ni 'di ltar/ mi sdug pa'i 'du shes dang / sdug bsngal gyi 'du shes dang / mi rtag pa'i 'du shes dang / bdag med pa'i 'du shes so/ /'dul ba'i dbang gis rnam pa lnga ni 'di ltar/rung ba ma yin pa la rung bar 'du shes pa dang / rung ba la mi rung bar 'du shes pa dang / rung ba ma yin pa la rung ba ma yin par shes pa dang / rung ba la rung bar shes pa dang / rung ba ma yin pa la yid gnyis kyis 'du shes dang / rung ba la yid gnyis kyis 'du shes so/ / dmigs pa'i dbang gis drug ni 'di lta ste/ gzugs kyi 'du shes dang / sgra'i 'du shes dang / dri'i 'du shes dang / ro'i 'du shes dang / reg bya'i 'du shes dang / chos kyi 'du shes so/ /khams kyi dbang gis rnam pa bdun ni 'di ltar/ mig gi khams 'dus te reg pa las skyes pa'i 'du shes dang /rna ba'i khams 'dus te reg pa las skyes pa'i 'du shes dang / sna'i khams 'dus te reg pa las skyes pa'i dang / lce'i khams 'dus te reg pa las skyes pa'i dang / lus kyi khams 'dus te reg pa las skyes pa'i dang / yid kyi khams 'dus te reg pa las skyes pa'i dang / rnam par shes pa'i khams 'dus te reg pa las skyes pa'o//gang 'di lta bu'i 'du shes ni 'du shes kyi de kho na nyid de/ 'du shes kyi phung po zhes brjod do/ /'du byed kyi phung po ni mang ste 'di ltar/ reg pa dang / sems pa dang / rnam rtog dang / rnam par dpyod pa dang / dga' ba dang / dad pa dang / brtson 'grus dang /dran pa dang / ting nge 'dzin dang / shes rab dang / srog gi dbang po dang / sdom pa dang / ma chags pa dang / mi sdang ba dang / ma rmongs pa dang / ngo tsha ba dang / khrel yod pa dang / shin tu sbyangs pa dang / 'dun pa dang / mos pa dang / btang snyoms dang / yid la byed pa dang /chags pa dang / zhe sdang dang / gti mug dang / nga rgyal dang / lta ba dang / rgod pa dang / the tshom dang / rmugs pa dang / ngo tsha med pa dang / khrel med pa dang zhes de lta bu la sogs pa 'du byed mang po rnams la tshor ba dang 'du shes ma gtogs pa ni 'du byed kyi phung po'o/ /rnam par shes pa ni 'di ltar/mig gi rnam shes dang / rna ba'i rnam shes dang / sna'i rnam shes dang / lce'i rnam shes dang / lus kyi rnam shes dang / yid kyi dbang po dang / yid kyi rnam par shes pa'o/ /'di ni rnam par shes pa'i phung po'o/ /yang phung po de rnams ni rgyu mtshan bzhis so sor tha dad par shes par bya'o//'di ltar/ ngo bo'i don dang / mtshan nyid dang / rnam par dbye ba dang / bsdu ba'o/ /de la rten gyi don ni drug ste 'di ltar/ gzugs par bya ba'i don gyis gzugs dang / rig pa'i don gyis tshor ba dang / kun du shes pa'i don gyis 'du shes dang / so sor byed pa'i don gyis 'du byed dang /rnam par rtog pa'i don gyis rnam shes so/ /phung po zhes pa ni rigs mthun pa'i tshogs pa'i don gyis so/ /mtshan nyid ni mtshan nyid lnga ste 'di ltar/ gzugs kyi mtshan nyid ni gzugs par bya ba ste/ bzos pa'i gzugs bzhin no/ /gzugs de'i gzhi'i gnas ni 'byung ba chen po bzhi'o//tshor ba'i mtshan nyid ni so sor yang dag par rig pa ste/ mdze rma'i za phrug ro myong ba bzhin no/ /tshor ba de'i dngos po'i gnas ni reg pa'o/ /'du shes kyi mtshan nyid ni mtshan mar 'dzin pa ste/ mngon par shes pa'i rgyu mtshan bzhin no/ /'du shes de'i dngos po'i gnas ni reg pa'o//'du byed kyi mtshan nyid ni 'du ba 'phen par byed pa ste/ 'khor lo 'phangs pa bzhin no/ /'du byed de rnams kyi ngo bo'i gnas ni reg pa'o/ /rnam par shes pa'i mtshan nyid ni rnam par rtog pa ste/ rnam par shes pa de'i skye ba'i gnas ni ming dang gzugs so/ / rnam par shes pa ni phung po'i rnam par dbye ba ste/ 'di ltar/ phung po lnga dang / nye bar len pa'i phung po lnga dang / chos kyi phung po lnga'o/ /de la phung po lnga gang zhe na/ 'dus byas kyi chos thams cad kyang ngo / /nye bar len pa'i phung po lnga gang zhe na/ zag pa dang bcas pa'i chos thams cad kyang ngo / / chos kyi phung po lnga gang zhe na/ 'di lta ste/ tshul khrims kyi phung po dang / ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba ye shes mthong ba'i phung po'o/ /skabs 'dir nye bar len pa'i phung po la mngon par 'dod do/ /bsdu ba ni sdud pa ste/rnam pa gsum ni 'di ltar/ skye mched du bsdu ba dang / khams su bsdu ba dang / bden par bsdu ba'o/ /de la gzugs kyi phung po ni skye mched bcu gcig gis bsdus pa'o/ /'di ltar/ gzugs kyi skye mched bcu dang / chos kyi skye mched gcig ste phyogs gcig go/ /gzugs can ma yin pa'i phung po gsum ni chos kyi skye mched kyis bsdus pa'o//'di ltar/ tshor ba dang / 'du shes dang / 'du byed do/ /gcig ni yid kyi skye mched kyis bsdus pa ste/ 'di ltar/ rnam par shes pa'i phung po'o/ /gzugs kyi phung po ni khams bcu gcig gis bsdus pa'o/ /gzugs can ma yin pa'i phung po gsum ni chos kyi khams kyis bsdus pa'o//rnam par shes pa'i phung po ni/ rnam par shes pa'i khams bdun gyis bsdus pa'o/ /tshul khrims dang / ting nge 'dzin dang / shes rab dang rnam par grol ba'i ye shes mthong ba'i phung po dang bzhi ni chos kyi skye mched dang chos kyi khams kyis bsdus pa'o//rnam par grol ba'i phung po ni chos kyi skye mched dang chos kyi khams dang yid kyi rnam par shes pa'i khams kyis bsdus pa'o/ /nye bar len pa'i phung po lnga ni sdug bsngal gyi bden pas bsdus pa'o/ /nye bar len pa ni kun 'byung gi bden pas bsdus pa'o/ / tshul khrims ting nge 'dzin shes rab kyi phung po gsum ni lam gyi bden pas bsdus pa'o/ /rnam par grol ba'i phung po ni 'gog pa'i bden pas bsdus pa'o/ /rnam par grol ba'i ye shes mthong ba'i phung po ni sdug bsngal gyi bden pas bsdus pa'o/ /de la phung pos bsdus shing bden pas bsdus pa ma yin pa'i chos yod do//bden pas bsdus shing phung pos bsdus pa ma yin pa'i chos yod do/ /phung pos bsdus shing bden pas bsdus pa'i chos yod do/ /phung pos bsdus pa ma yin zhing bden pas bsdus pa ma yin pa'i chos yod do/ /de la dbang po ma yin pa dang 'brel pa'i gzugs dang /lam dang mtshungs par ldan pa dang / dge sbyong gi 'bras bu chos ni phung pos bsdus shing bden pas bsdus pa ma yin pa'o/ /mya ngan las 'das pa ni bden pas bsdus shing phung pos bsdus pa ma yin pa'o/ /bden pa gsum ni phung pos bsdus shing bden pas bsdus pa'o//btags yod ni phung pos bsdus pa ma yin zhing bden pas bsdus pa ma yin pa'o/ /btags pa yang chos bcu gcig ste 'di ltar/ sems pa dang / phyogs dang / yul dang / dus dang / 'ongs pa dang / sbyangs pa'i yan lag dang / zad par mtshan ma dang / cung zad med pa'i skye mched kyi snyoms par 'jug pa dmigs pa dang / 'gog pa'i snyoms par 'jug pa dang / yang dag pa'i rnam par rtog pa dang / yang dag ma yin pa'i rnam par rtog pa'o/ /gang rnam pa de rnams kyi phung po la mkhas pa zhes brjod do/ /skye mched la mkhas pa gang zhe na/ skye mched ni bcu gnyis te 'di ltar/mig gi skye mched dang / gzugs kyi skye mched dang / rna ba'i skye mched dang / sgra'i skye mched dang / sna'i skye mched dang / dri'i skye mched dang / lce'i skye mched dang / ro'i skye mched dang / lus kyi skye mched dang / reg bya'i skye mched dang / yid kyi skye mched dang / chos kyi skye mched do//de la mig gi skye mched ni khams rab tu dang ba gang gis gzugs yongs su gcod pa'o/ /gzugs kyi skye mched ni khams kyi kha dog gang mig gi spyod yul lo/ /rna ba'i skye mched ni khams su rab tu dang ba gang gis sgra nyan pa'o/ /sgra'i skye mched ni khams kyi grag pa ste gang rna ba'i spyod yul de'o//sna'i skye mched ni khams rab tu gsal ba gang gis dri snom pa'o/ /dri'i skye mched ni gang sna'i spyod yul lo/ /lce'i skye mched ni khams rab tu dang ba gang gis ro myong bar byed pa'o/ /ro'i skye mched ni khams kyi ro gang lce'i spyod yul lo/ /lus kyi skye mched ni khams rab tu dang ba gang gis reg bya la reg pa'o//reg bya'i skye mched ni sa'i khams dang / me'i khams dang / rlung gi khams dang / chu'i khams dang / sra ba dang / 'jam pa dang / dro ba dang / bsil ba ste/ gang lus kyi spyod yul lo/ /yid kyi skye mched ni gang rnam par shes pa bdun gyi khams de'o//chos kyi skye mched ni gzugs can ma yin pa'i phung po gsum dang phra mo'i gzugs bcu dang mya ngan las 'das pa ste 'di ni skye mched bcu gnyis la sogs pa ste rgyas par ro/ /gang rnam pa de rnams kyi skye mched la mkhas pa'i shes pa ni skye mched la mkhas pa zhes brjod do/ /khams la mkhas pa gang zhe na/khams bco brgyad de/ 'di ltar/ mig gi khams dang / gzugs kyi khams dang / mig gi rnam par shes pa'i khams dang / rna ba'i khams dang / sgra'i khams dang / rna ba'i rnam par shes pa'i khams dang / sna'i khams dang / dri'i khams dang / sna'i rnam par shes pa'i khams dang /lce'i khams dang / ro'i khams dang / lce'i rnam par shes pa'i khams dang / lus kyi khams dang / reg bya'i khams dang / lus kyi rnam par shes pa'i khams dang / yid kyi khams dang / chos kyi khams dang / yid kyi rnam par shes pa'i khams dang zhes pa la sogs pa rgyas par ro//'dir phung po dang / skye mched dang khams kyi sgo nas bstan pa na/ khyad par ci zhig bstan par gyur zhe na/ brjod par bya ste/ ris mthun pa'i chos rnams tshogs pa'i mtshan nyid bstan pa ni phung po bshad pa'o/ /sgo'i mtshan nyid bstan pa ni skye mched bshad pa'o/ /rang gi ngo bo'i mtshan nyid bstan pa ni khams bshad pa'o//yang na bcom ldan 'das kyis mgo smos pas go ba'i gang zag rnams la phung po'i sgo nas sdug bsngal gyi bden pa sten par byed do/ /rnam par spros pas go ba'i gang zag rnams la skye mched kyi sgo nas sdug bsngal gyi bden pa ston par byed do/ / tshig la 'chel ba'i gang zag rnams la khams kyi sgo nas sdug bsngal gyi bden pa ston par byed do/ /yang na gzugs can ma yin pa'i phung po la sdug pa'i 'du shes can gyi gang zag la gzugs mdor bstan cing gzugs can ma yin pa'i phung po rnams dbye ba byas te phung po bstan to/ / gzugs la sdug pa'i 'du shes can gyi gang zag la gzugs la mang du dbye ba byas te gzugs can ma yin pa'i phung po mdor bsdus nas skye mched bstan to/ /gzugs can ma yin pa dang bcas pa'i gzugs la sdug pa'i 'du shes can la gzugs can ma yin pa dang gzugs can la mang du dbye ba byas te khams bstan to//yang na gang bdag gi ngo bo dngos po ston pa de ni phung po bstan pa'o/ /gang dngos po'i dmigs pa ston pa de ni skye mched ston pa'o/ /gang dngos po'i dmigs pa nges pa skyed pa ston pa de ni khams ston pa'o/ /gang rnam pa de rnams kyi khams shes pa'i rnam par bzhag pa la mkhas pa 'di ni khams la mkhas pa zhes brjod do//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las gnas brtan pa'i sde pa'i tshul lugs phung po skye mched khams rnam par nges pa zhes bya ba le'u bcu gsum pa'o// //rten cing 'brel par 'byung ba la mkhas pa ni 'di ltar/ ma rig pa'i rkyen gyis 'du byed dang / 'du byed kyi rkyen gyis rnam par shes pa dang / rnam par shes pa'i rkyen gyis ming dang gzugs dang / ming dang gzugs kyi rkyen gyis skye mched drug dang / skye mched drug gi rkyen gyis reg pa dang /reg pa'i rkyen gyis tshor ba dang / tshor ba'i rkyen gyis sred pa dang / sred pa'i rkyen gyis nye bar len pa dang / nye bar len pa'i rkyen gyis srid pa dang / srid pa'i rkyen gyis skye ba dang / skye ba'i rkyen gyis rga shi dang mya ngan dang smre sngags 'don pa dang sdug bsngal dang yid mi bde ba dang 'khrug pa rnams 'byung bar 'gyur ro//de lta bu 'ba' zhig gi sdug bsngal gyi phung po chen po rnams kun du 'byung bar 'gyur ro zhes pa ni lugs su byung ba'o/ /ma rig pa 'gags pas 'du byed 'gag /'du byed 'gags pas rnam par shes pa 'gag /rnam par shes pa 'gags pas ming dang gzugs 'gag /ming dang gzugs 'gags pas skye mched drug 'gag /skye mched drug 'gags pas reg pa 'gag /reg pa 'gags pas tshor ba 'gag /tshor ba 'gags pas sred pa 'gag /sred pa 'gags pas nye bar len pa 'gag /nye bar len pa 'gags pas srid pa 'gag /srid pa 'gags pas skye ba 'gag /skye ba 'gags pas rga shi dang mya ngan dang smre sngags 'don pa dang sdug bsngal dang yid mi bde ba dang 'khrug pa rnams 'gag par 'gyur ro/ /de lta bu 'ba' zhig gis sdug bsngal gyi phung po chen po rnams 'gag par 'gyur ro zhes pa ni lugs las ldog pa'o/ /de la bden pa bzhi la mi shes pa ni ma rig pa'o//lus ngag yid kyi las ni 'du byed do/ /nying mtshams sbyor ba'i dus kyi sems ni rnam par shes pa'o/ /nying mtshams sbyor ba'i sems dang ldan pa'i sems las byung ba'i chos ni ming ngo / /mer mer po ni gzugs te ming gzugs so/ / nang gi bdag nyid kyi skye mched drug ni skye mched drug go/ /reg pa drug gi tshogs ni reg pa'o/ /tshor ba drug gi tshogs ni tshor ba'o/ /sred pa drug gi tshogs ni sred pa'o/ /nye bar len pa bzhi ni nye bar len pa'o/ /'dod pa dang gzugs dang gzugs med pa'i srid pa skyed par byed pa'i las ni sred pa'o//srid pa rnams su phung po rnams 'byung ba ni skye ba'o/ /phung po yongs su smin pa ni rga ba'o/ /phung po 'jig pa ni shi ba'o/ /'dir smras pa/ ma rig pa'i rkyen las 'du byed nas ci srid du skye ba'i rkyen las rga shi zhes pa 'di gang las she na/ brjod par bya ste/ 'dir so so skye bo thos pa dang mi ldan pa bden pa bzhi la mi shes par gyur pas/dus ring po nas nye bar len pa'i phung po lnga la bdag gi bar mchog tu 'dzin par 'gyur te/ 'di dag ni bdag gi'o/ /bdag 'di la'o 'di ni nga'o bdag go zhes lhag par zhen par byed do/ /de dag de bzhin du srid pa la zhen pas srid par kun du 'byung zhing srid pa'i skye mched la rab tu rtog par byed cing rjes su nyal bar byed do//de dag gi sems pa dang rab tu rtog pa dang bag la nyal de rnams ni dngos po yongs su mi shes pa las byung ba'i srid pa thob pa'i ched du srid pa la gnas par 'gyur ro/ /rlan can gyi sa la sa bon bzang po btab pa bzhin no//de la srid pa 'gag pa'i ye shes yod pa ma yin no/ /de'i phyir na ma rig pa'i rkyen las 'du byed do/ /de dag gi mi shes pas rab tu bskrun pa mngon par 'du byed pa'i sems pa des/ srid pa la dga' bas srid par zhugs shing / srid pa mtshan mar dmigs pa rgyas pas yongs su 'gyur ba'i srid pa dang mtshams sbyor ba'i rnam par shes pa skyed par byed do//de dag gi srid pa nges pa'i sems pa rgyun chad pa ni ma yin no/ /de'i phyir 'du byed kyi rkyen las rnam par shes pa'o/ /dper na nyi ma med par 'od zer sa la gnas pa'am rgyu ba ni ma yin no//de kho na bzhin du rnam par shes pa med par ming dang gzugs mngal du 'jug pa'am 'phel ba ni ma yin no/ /na Da phung po'i 'thad pa phan tshun brten pa'i phyir ro/ /de'i phyir rnam par shes pa'i rkyen las ming dang gzugs so/ /yid kyi skye mched ni dngos po la brten te ming dang lhan cig tu 'byung ba dang 'jug par byed do//gzhan skye mched lnga ni ming dang lhan cig tu 'byung ba chen po la brten te zas dang dus kyi rkyen las skye ba dang 'jug par byed do/ /rkyen de med par ni ma yin no/ /de'i phyir ming dang gzugs las skye mched drug go/ / dbang po yul dang rnam par shes pa 'dus pa las reg pa skye bas na/ de'i phyir skye mched drug gi rkyen las reg pa'o/ /reg nas bde ba'am sdug bsngal lam sdug bsngal min bde ba min pa tshor bar byed do/ /reg pa med par ma yin no/ /de'i phyir reg pa'i rkyen las tshor ba'o/ /byis pa so so'i skye bo rnams bde ba nyams su myong bas chags par byas te/yang dang yang du de dag don du gnyer bar byed do/ /sdug bsngal nyams su myong ba na yang sdug bsngal 'joms par byed pa'i bde ba don du gnyer bar byed do/ /sdug bsngal min bde ba min pa nyams su myong ba las lhag par zhan nas tshor bar byed do//de'i phyir tshor ba'i rkyen las sred pa'o/ /zhen pas tshor ba ni sred pa'o/ /dngos po 'dzin pa brtan pos len par byed do/ /de'i phyir sred pa'i rkyen las len pa'o/ /len pa dang bcas pa'i las byas pa rnams srid pa'i sa bon du 'gyur ro/ /de'i phyir len pa'i rkyen las srid pa'o//las kyi bye brag ci lta ba bzhin du 'gro ba rnams su skye bar 'gyur ro/ /de'i phyir srid pa'i rkyen las skye ba'o/ /skyes pas rgas shing 'chi bar 'gyur ro/ /de'i phyir skye ba'i rkyen las rga shi'o/ /gzhan yang rtog pa ni/ dper na spun ma dang sa bon bzhin du ma rig pa dang 'du byed do//dper na sa bon dang myu gu bzhin du 'du byed dang rnam par shes pa'o/ /dper na myu gu dang 'dab ma bzhin du rnam par shes pa dang ming dang gzugs so/ /dper na 'dab ma dang sdong po bzhin du ming dang gzugs dang skye mched drug go/ /dper na sdong po dang yal ga bzhin du skye mched drug dang reg pa'o//dper na yal ga dang me tog bzhin du reg pa dang tshor ba'o/ /dper na me tog dang gong bu bzhin du tshor ba dang sred pa'o/ /dper na gong bu dang 'bras bu bzhin du sred pa dang len pa'o/ /dper na 'bras bu dang sa bon bzhin du nye bar len pa dang srid pa'o/ / dper na sa bon dang myu gu bzhin du srid pa dang skye ba'o/ /rkyen las zhes pa kun la blta'o/ /dper na de ltar sa bon gyi rgyun 'jug pa'i sngon gyi mtha' shes par bya ba nyid ma yin zhing phyi ma'i mtha' shes par bya ba ma yin no/ /de kho na bzhin du ma rig pa la sogs pa'i rten cing 'brel par 'byung ba'i rgyun rab tu 'jug pa ni sngon gyi mtha' shes par bya ba nyid de ma yin zhing phyi ma'i mtha' shes par bya ba ma yin no//de nas ma rig pa'i rkyen gang zhe na/ brjod par bya ste/ ma rig pa nyid do/ /ma rig pa'i rkyen las bag la nyal lo/ /kun nas ldang ba'i rkyen bag la nyal lo/ /bag la nyal gyi rkyen ni kun nas ldang ba'o//sngon ma'i rkyen sngon ma'o/ /phyi ma'i rkyen phyi ma'o/ /yang na kun nas nyon mongs pa thams cad rkyen du 'gyur ba yin no/ /de ltar yang gsungs pa/ zag pa kun du 'byung ba las ma rig pa kun du 'byung ngo zhes so/ /gzhan yang / sems gcig pa'i tshul ni 'di lta ste/dus gang gi tshe byis pa rnams mig gis gzugs mthong ba na 'dod chags skye ste/ mdzes pa bde ba'o zhes sems kun du rmongs pa 'dis ni ma rig pa'o/ /ma rig pas rab tu skyed pa'i lus la sogs pa yongs su g.yo ba 'di ni 'du byed do/ /chags pa'i sems ni 'du byed kyi rkyen las rnam par shes pa'o//de dang ldan pa'i sems las byung ba dang des kun nas bslang ba'i gzugs ni rnam par shes pa'i rkyen las ming dang gzugs so/ /'dod chags las skyes pa'i rkyen dga' ba dang / dga' ba las skyes pa'i rkyen gzugs dag gi dbang po rnams kyi rab tu dang ba ma yin pa ni ming dang gzugs kyi rkyen las skye mched drug go//ma rig pa 'dus te reg pa ni skye mched drug gi rkyen las reg pa'o/ /de'i tshe gang yang bde ba de ni reg pa'i rkyen las tshor ba'o/ /de'i tshe 'dod chags pa ni tshor ba'i rkyen las sred pa'o//chags pas mdzes pa dang bde bar 'dzin pa ni sred pa'i rkyen las len pa'o/ /de'i tshe chags pa'i sems pa ni len pa'i rkyen las srid pa'o/ /chos de rnams mngon par sgrub par byed pa ni srid pa'i rkyen las skye ba'o/ /gnas pa gzhan du gyur pa nyid ni rga ba'o/ /skad cig 'jig pa ni 'chi ba'o//de kho na bzhin du rim gyis skad cig gcig gis yan lag bcu gnyis mnyam du rgyu bar shes par bya'o/ /rten cing 'brel par 'byung ba'i yan lag bcu gnyis de rnams ni rgol ba bcu dang / lan bcus grub po/ /de la rgol ba bcu ni 'di lta ste/ nyon mongs pa du dang /lus du dang / rnam par smin pa du dang / 'das pa du dang / ma 'ongs pa du dang / de ltar ba du dang / rten cing 'brel par 'byung ba gang dang / rten cing 'brel par 'byung ba'i chos gang zhe na dang / rten cing 'brel par 'byung ba dang rten cing 'brel par 'byung ba'i chos dag tha dad pa'i rgyu ci dang /rten cing 'brel par 'byung ba de'i zab mo nyid gang zhe na'o/ /grangs bzhin du brjod par bya ste/ 'di ltar nyon mongs pa ni yan lag gsum ste/ 'di ltar/ ma rig pa dang / sred pa dang / nye bar len pa'o/ /yan lag gnyis ni las te 'di ltar/ 'du byed dang / srid pa'o/ /yan lag bdun ni rnam par smin pa ste/'di ltar/ yan lag lhag ma rnams so/ /de la ri mo'i las la mtshon byed pa'i rigs pas/ nyon mongs pa ni yang srid sgrub pa'i rgyur 'gyur ba yin no/ /ri mor byed pa'i 'thad pas/ las ni dman pa dang gya nom pa tha dad pa byed pa yin no/ /bris pa'i gzugs kyi rigs pas/rnam par smin pa ni las dang nyon mongs pa mngon par grub pa yod pa'i rkyen gyis 'jug pa'o/ /yan lag gnyis ni 'das pa ste 'di ltar/ ma rig pa dang 'du byed do/ /gnyis ni ma 'ongs pa ste/ 'di ltar/ skye ba dang / rga shi'o/ /brgyad ni da ltar ba ste/ de 'di ltar/lhag ma rnams so/ /dus gsum bzung ba 'dis ni thog ma dang tha ma med pa 'khor ba'i lam rjes su 'brel par bstan pa'o/ /gang yan lag bcu gnyis de rnams ni rim pa bzhin du phan tshun rgyu nyid dang / byed po nyid dang / phan 'dogs pa nyid dang / 'di ni rkyen nyid do zhes pa 'di ni rten cing 'brel pa 'byung ba'o//rten cing 'brel par 'byung ba'i chos ni yan lag bcu gnyis so/ /rten cing 'brel par 'byung ba 'di ni 'du byed rnam par 'gyur ba yongs su rdzogs pa ma yin pa zhes brjod par bya ba ma yin/ 'dus byas zhes brjod par bya ba ma yin/ 'dus ma byas zhes brjod par bya ba ma yin no//rten cing 'brel par 'byung ba'i chos ni/ 'du byed yongs su rdzogs pa 'dus byas so zhes pa 'di ni de dag gi tha dad pa'i rgyu'o/ /gang gi tshe rnam pa dang mtshan nyid gang gis ma rig pa 'du byed kyi rkyen du 'gyur ba'i rnam pa de dang mtshan nyid de dag dang rkyen gzhan dang gzhan dag 'phags pa rnams kyi shes rab kyi spyan gyis mngon du mkhyen to//de bzhin du thams cad la'o/ /'di ni rten cing 'brel par 'byung ba de'i zab pa nyid do/ /phyogs gzhan ni/ rten cing 'brel bar 'byung ba 'di dag rnam pa bdun du blta bar bya ste/ 'di ltar/ mtshams gsum dang /mdor bsdus pa bzhi dang / rnam pa nyi shu dang / 'khor lo dang / tshul lugs dang / rnam par dbye ba dang / bsdu ba'o/ /de la mtshams ni gsum ste/ 'di ltar/ 'du byed dang / rnam par shes pa'i bar ni mtshams dang po'o/ /tshor ba dang sred pa'i bar ni mtshams gnyis pa'o//srid pa dang skye ba'i bar ni mtshams gsum pa'o/ /de la 'das pa'i las dang nyon mongs pa ni da ltar gyi rnam par smin pa'i rkyen te mtshams dang po'o/ /da ltar gyi las dang nyon mongs pa ni da ltar gyi rnam par smin pa'i rkyen te mtshams gnyis pa'o/ /da ltar gyi las dang nyon mongs pa ni ma 'ongs pa'i rnam par smin pa'i rkyen te mtshams gsum pa'o//yang na dang po dang gsum pa ni rgyu 'bras kyi mtshams so/ /gnyis pa ni 'bras bu'i mtshams so/ /srid pa'i mtshams ni med do/ /srid pa'i mtshams zhes par don ci zhe na/ brjod par bya ste/ shi nas de ma thag tu 'pho ba ma yin pa'i phung po skye mched khams rnams la yang srid mngon par grub pa 'di ni srid pa'i mtshams zhes brjod do//srid pa'i mtshams de ci ltar 'gyur zhe na/ brjod par bya ste/ byis pa so so'i skye bo de dag ma rig par gyur pa sred pa dang ldan pa bsod nams dang sdig pa bsags pa ste/gang gi tshe 'di nyid 'chi ba'i mtha' can gyi tshor bas zil gyis mnan cing 'chi ba la lhag par ma nye ba de'i tshe 'byung bar 'gyur te/ 'di ltar/ 'jig rten 'di mi mthong zhing rmongs pas dran pa mi rnyed par gyur bzhin pa na/ tshor bas non cing dran pa dang blo gros yongs su nyams/lus kyi stobs dang nus pa yongs su nyams/ dbang po rnams nye bar 'gags/ ta la'i lo ma skams pa bzhin du lus kyi mtha' gnyis nas srog gi dbang po nye bar skams par 'gyur ro/ /de'i tshe de'i rmi lam du gyur pa bzhin du/ las kyi chos bzhi nye bar gnas par 'gyur te/'di ltar/ las dang / las kyi mtshan ma dang / 'gro ba dang / 'gro ba'i mtshan ma'o/ /de la las zhes bya ba/ gang bsod nams dang bsod nams ma yin pa byas pa dang / lci ba 'am yang ba'am/ nye ba 'am sngon byas sam/ las de rnams nye bar gnas par 'gyur ro/ /las kyi mtshan ma zhes pa dngos po gang la brten nas las byas par gyur pa/de'i dngos po nye bar gnas par 'gyur ro/ /de de'i tshe las byed pa bzhin du 'byung ngo / /'gro ba zhes pa bsod nams kyi las bde 'gror nye bar gnas pa dang / bsod nams ma yin pa las ngan 'gro'o/ /'gro ba'i mtshan ma zhes bya ba mngal du skye ba rnams ni dus dang ldan zhing khrag dang ldan pa'i ma'i lto bar nye bar gnas par 'gyur ro//rdzus te skye ba rnams ni gang dang gang du skye ba de dang de'i go skabs nye bar gnas par 'gyur te/ gzhal yas khang ngam/ sems can nam/ nags sam/ shing ngam/ 'gro ba de dang 'dra ba dang ldan pa'i mtshan ma nye bar gnas pa'o/ /de'i tshe de rnams su byin pa lta bu dang bzhengs pa dang bsdad pa dang nyal ba lta bu dang / mthong ba bzhin du dang / len pa bzhin du 'byung ngo / /de'i tshe las sam las kyi mtshan ma dang / 'gro ba 'am 'gro ba'i mtshan ma la dmigs pa byas te skye bar 'gyur ro zhes pa la sogs pa rgyas par ro//mdor bsdus bzhi ni 'di ltar/ 'das pa'i las dang nyon mongs pas bsdus pa dang / da ltar gyi rnam par smin pas bsdus pa dang / da ltar gyi las dang nyon mongs pas bsdus pa dang / ma 'ongs pa'i rnam par smin pas bsdus pa'o//de la ma rig pa dang 'du byed ni/ 'das pa'i las dang nyon mongs pas bsdus pa'o/ /rnam par shes pa ming dang gzugs skye mched drug reg pa tshor ba rnams ni da ltar gyi rnam par smin pas bsdus pa'o/ /sred pa dang len pa dang srid pa ni da ltar gyi las dang nyon mongs pas bsdus pa'o//skye ba dang rga shi ni ma 'ongs pa'i rnam par smin pas bsdus pa'o/ /rnam pa nyi shu ni 'di ltar/ ma rig pa bzung bas 'das pa'i sred pa dang nye bar len pas bzung ba yin te/ nyon mongs pa'i mtshan nyid du mtshungs pas so/ /'du byed gzung bas 'das pa'i sred pa bzung ba yin te/las kyi mtshan nyid yin pas so/ /rnam par shes pa dang ming dang gzugs dang skye mched drug dang reg pa dang / tshor ba bzung bas da ltar gyi skye ba dang rga shi bzung ba yin te/ rnam par smin pa'i mtshan nyid yin pas so/ /sred pa dang nye bar len pa bzung bas da ltar gyi ma rig pa bzung ba yin te/nyon mongs pa'i mtshan nyid yin pas so/ /srid pa bzung bas da ltar gyi 'du byed bzung ba yin te/ las kyi mtshan nyid yin pas so/ /skye ba dang rga shi bzung bas ma 'ongs pa'i rnam par shes pa dang ming dang gzugs dang skye mched drug dang reg pa dang tshor ba bzung ba yin te/rnam par smin pa'i mtshan nyid yin pas so/ /chos nyi shu bzhi po 'di rnams yongs su rdzogs pa bzung bas nyi shur 'gyur ro/ /'di lta ste/ chos mngon pa las/ sngon gyi las kyi srid pa la ma rig pa dang 'du byed dang sred pa dang nye bar len pa dang srid pa ste chos lnga po 'di ni/ 'dir nying mtshams sbyor ba'i rkyen no/ /'dir rnam par shes pa dang ming dang gzugs dang / skye mched drug dang reg pa dang tshor ba ste chos lnga po 'di ni/ 'dir skye ba'i srid pa la sngon byas pa'i las ni rkyen no/ /'dir skye mched la sogs pa rnams yongs su smin pas/ ma rig pa dang 'du byed dang sred pa dang nye bar len pa dang srid pa ste chos lnga po 'di ni/'dir las kyi srid pa la ma 'ongs pa'i nying mtshams sbyor ba'i rkyen no/ /slad ma'i rnam par shes pa dang ming dang gzugs dang skye mched drug dang reg pa dang / tshor ba ste chos lnga po 'di ni/ ma 'ongs par skye ba'i srid pa la/'dir byas pa'i las ni rkyen no/ /bzhi pa lnga ni rnam pa nyi shu yin no/ /'khor lo zhes pa ni ma rig pa'i rkyen las 'du byed zhes pa nas skye ba'i rkyen las rga shi zhes pa'o/ /de bzhin du sdug bsngal gyi phung po chen po 'ba' zhig 'byung ba nyid do/ /de bzhin du yang ma rig pa'i rkyen las 'du byed zhes pa la sogs pa'o//yang de bzhin du ste rten 'brel gyi 'khor lo'i rim pa mtha' med pa'o/ /tshul lugs zhes pa ni tshul gnyis te 'di ltar/ ma rig pa la sogs pa'i tshul dang / rga shi la sogs pa'i tshul lo/ /de la ma rig pa la sogs pa'i tshul ni/ ma rig pa'i rkyen las 'du byed dang /ci srid du rga shi mya ngan dang smre sngags 'don pa sdug bsngal yid mi bde ba 'khrug pa la sogs pa rnams 'byung bar 'gyur ro/ /rga shi la sogs pa'i tshul ni/ rga shi 'gags pas skye ba 'gag /skye ba 'gags pas srid pa 'gag ces pa nas 'du byed 'gags pas ma rig pa 'gag ces pa'i bar du'o//yang na ma rig pa la sogs pa'i tshul ni/ phyi ma'i mtha' yongs su chad pa'i sgo ste ma 'ongs pa'i cha shas shes pa'i lam mo/ /rga shi la sogs pa'i tshul ni sngon gyi mtha' yongs su chad pa'i sgo ste 'das pa'i cha shas shes pa'i lam mo/ /rnam par dbye ba zhes pa ni/ rten cing 'brel par 'byung ba ni gnyis te/ 'jig rten pa dang 'jig rten las 'das pa'o/ /de la 'jig rten pa ni/ ma rig pa'i rkyen la 'du byed nas 'di 'ba' zhig gi sdug bsngal gyi phung po chen po kun du 'byung bar 'gyur ro zhes pa'i bar du'o/ /'jig rten las 'das pa yang sdug bsngal dang / sdug bsngal gyi rkyen las dad pa dang / dad pa'i rkyen las mchog tu dga' ba dang / mchog tu dga' ba'i rkyen las dga' ba dang / dga' ba'i rkyen las shin tu sbyangs pa dang / shin tu sbyangs pa'i rkyen las bde ba dang / bde ba'i rkyen las ting nge 'dzin dang / ting nge 'dzin gyi rkyen las yang dag pa ci lta ba'i ye shes mthong ba dang /yang dag pa ci lta ba'i ye shes mthong ba'i rkyen las yid 'byung ba dang / yid 'byung ba'i rkyen las 'dod chags dang bral ba dang / 'dod chags dang bral ba'i rkyen las rnam par grol ba dang / rnam par grol ba'i rkyen las zad par shes pa'o/ /gzhan dag tu yang gsungs pa/rten cing 'brel bar 'byung ba la rnam pa bzhi ni 'di lta ste/ las dang nyon mongs pa'i rgyu las byung ba dang / sa bon gyi rgyu las byung ba dang / mngon par 'du byed pa las byung ba dang / thun mong gi las kyi rgyu las byung ba'o/ /de la las dang nyon mongs pa'i rgyu las byung ba ni/ma rig pa'i rkyen las 'du byed nas 'di dag 'ba' zhig gi sdug bsngal gyi phung po chen po 'byung bar 'gyur ro zhes pa'i bar du'o/ /sa bon dang myu gu la sogs pa'i rgyun gyi ngo bo/ /mngon par 'du byed pa las byung ba na sprul pa'i gzugs la sogs pa'o/ /thun mong gi las kyi rgyu las byung ba ni sa dang kha ba can dang rgya mtsho dang zla ba dang nyi ma la sogs pa'o//bsdu ba zhes pa ni bsdu ba rnam pa bzhi ste 'di ltar/ phung pos bsdus pa dang / skye mched kyis bsdus pa dang / khams kyis bsdus pa dang / bden pas bsdus pa'o/ /de la phung pos bsdus pa ni 'di ltar/ yan lag drug ni 'du byed kyi phung pos bsdus pa'o//'di lta ste/ ma rig pa dang / 'du byed dang / reg pa dang / sred pa dang / nye bar len pa dang / srid pa'o/ /rnam par shes pa ni rnam par shes pa'i phung pos bsdus pa'o/ /ming dang gzugs ni phung po lngas bsdus pa'o/ /skye mched drug ni gzugs dang rnam par shes pa'i phung po dag gis bsdus pa'o//tshor ba'i yan lag ni tshor ba'i phung pos bsdus pa'o/ /skye ba dang rga shi ni gzugs kyi phung po dang 'du byed kyi phung po dag gis bsdus pa'o/ /skye mched kyis bsdus pa ni 'di ltar/ yan lag dgu ni chos kyi skye mched kyis bsdus pa'o//'di ltar/ ma rig pa dang / 'du byed dang / reg pa dang / tshor ba dang / sred pa dang / nye bar len pa dang / srid pa dang / skye ba dang / rga shi'o/ /rnam par shes pa'i yan lag ni yid kyi skye mched kyis bsdus pa'o/ /ming dang gzugs ni yid kyi skye mched dang chos kyi skye mched dang phyi rol gyi skye mched lngas bsdus pa'o//skye mched drug ni nang gi bdag nyid kyi skye mched drug gis bsdus pa'o/ /khams kyis bsdus pa ni 'di ltar/ yan lag dgu ni chos kyi khams kyis bsdus pa'o/ /'di ltar/ ma rig pa dang / 'du byed dang / reg pa dang / tshor ba dang / sred pa dang / nye bar len pa dang / srid pa dang / skye ba dang / rga shi'o/ /rnam par shes pa'i yan lag ni rnam par shes pa'i khams kyis bsdus pa'o/ /ming dang gzugs ni khams bdun gyis bsdus pa ste/ 'di ltar/ gzugs kyi khams dang / sgra'i khams dang / dri'i khams dang / ro'i khams dang / reg bya'i khams dang / yid kyi khams dang / chos kyi khams so/ /skye mched drug ni khams bcu gnyis kyis bsdus pa'o/ /'di ltar/ mig gi khams kyis dang / rna ba'i khams kyis dang / sna'i khams kyis dang / lce'i khams kyis dang / lus kyi khams kyis dang /yid kyi khams kyis dang / mig gi rnam par shes pa'i khams kyis dang / rna ba'i rnam par shes pa'i khams kyis dang / sna'i rnam par shes pa'i khams kyis dang / lce'i rnam par shes pa'i khams kyis dang / lus kyi rnam par shes pa'i khams kyis dang / yid kyi rnam par shes pa'i khams kyis so//bden pas bsdus pa ni 'di ltar/ yan lag gsum ni kun 'byung gi bden pas bsdus pa ste/ 'di ltar/ ma rig pa dang / sred pa dang / nye bar len pa'o/ /lhag ma yan lag dgu ni sdug bsngal gyi bden pas bsdus pa ste/ 'di ltar 'du byed dang / rnam par shes pa dang / ming dang gzugs dang / skye mched drug dang / reg pa dang / tshor ba dang / srid pa dang / skye ba dang / rga shi'o/ /'jig rten las 'das pa'i rten cing 'brel par 'byung ba la/ sdug bsngal ni sdug bsngal gyi bden pas bsdus pa'o/ /yan lag bcu ni lam gyi bden pas bsdus pa ste/'di ltar/ dad pa dang / rab tu rangs pa dang / dga' ba dang / shin tu sbyangs pa dang / bde ba dang / ting nge 'dzin dang / yang dag pa ci lta ba'i ye shes mthong ba dang / yid 'byung ba dang / 'dod chags dang bral ba dang / rnam par grol ba'o/ /zad pa shes pa ni 'gog pa'i bden pas bsdus pa'o//rnam pa de lta bu rnams kyis rten cing 'brel par 'byung ba la mkhas pa'i shes pa skyes pa ni/ rten cing 'brel par 'byung ba la mkhas pa'o/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las gnas brtan pa'i sde pa'i tshul gyi rten cing 'brel par 'byung ba rnam par nges pa zhes bya ba le'u bcu bzhi pa'o// //'phags pa'i bden pa la mkhas pa brjod par bya ste/ de ltar yang / 'phags pa'i bden pa ni bzhi ste/ sdug bsngal 'phags pa'i bden pa dang / kun 'byung 'phags pa'i bden pa dang /sdug bsngal 'gog pa 'phags pa'i bden pa dang / sdug bsngal 'gog par 'gro ba'i lam 'phags pa'i bden pa'o/ /de la sdug bsngal gyi bden pa gang zhe na/ brjod par bya ste/ skye ba yang sdug bsngal/ rgas pa yang sdug bsngal/ 'chi ba yang sdug bsngal/ mya ngan smre sngags 'don pa yang sdug bsngal/yid mi bde ba 'khrug pa yang sdug bsngal lo/ /mi sdug pa dang phrad pa yang sdug bsngal/ sdug pa dang bral ba yang sdug bsngal lo/ /gang 'dod pa yongs su tshol bar byed pa na mi rnyed pa de yang sdug bsngal/ mdor bsdus pas nye bar len pa'i phung po lnga sdug bsngal lo//de la skye ba ni sems can gyi ris rnams kyi phung po sngar med pa byung ba'o/ /de yang sdug bsngal thams cad nye bar sogs par byed pas sdug bsngal lo/ /rga ba ni skyes pa'i khams rnams yongs su smin pa'o/ /de 'ang dmigs pa dang kha dog dang bya ba dang dbang po dang dran pa dang blo gros rnams nyams par byed pa'i don gyis na sdug bsngal lo//'chi ba ni 'tsho ba dang bral ba ste/ de ni 'jigs pa chen po byed pa'i don gyis na sdug bsngal lo/ /mya ngan ni sdug bsngal du son pa'i sems yongs su 'chang ba'o/ /de ni nang dang phyi rol sred par byed pa'i don gyis na sdug bsngal lo//smre sngags 'don pa ni sdug bsngal du gyur pa'i ngag gis brjod pa'o/ /de dag ni phyi nang sreg par byed pa'i don gyis na sdug bsngal lo/ /sdug bsngal ni lus kyi ste/ de ni lus yongs su mnar ba'i don gyis sdug bsngal lo/ /yid mi bde ba ni sems kyi sdug bsngal te/sems yongs su gzir bar byed pa'i don gyis sdug bsngal lo/ /'khrug ngal ni sdug bsngal du 'gyur ba'i 'jigs pa rgyas pa ste/ de ni kun du rmongs par byed pa'i don gyis sdug bsngal lo/ /mi sdug pa dang phrad pa ni mi 'dod pa'i sems can gyi 'du byed dang mnyam du 'tshogs pa ste/de sdug bsngal byed pa'i don gyis sdug bsngal lo/ /sdug pa dang bral ba ni 'dod pa'i [(]sem [,]sems [)]pa can gyi 'du byed dang bral ba ste/ mya ngan dang smre sngags 'don par byed pa'i don gyis sdug bsngal lo/ /gang 'dod pa ma rnyed pa zhes pa ni mi 'dod pa dang bral ba dang 'dod pa dang phrad pa don du gnyer bar byed pa na de dag ma rnyed pa ste/de yang bsam pa nyams pa'i don gyis sdug bsngal lo/ /mdor bsdus na nye bar len pa'i phung po lnga ni sdug bsngal lo zhes pa ni/ nye bar len pa'i phung po lnga la sdug bsngal dang mi ldan pa yod pa ma yin te/de'i phyir bsdus na nyer len gyi phung po lnga sdug bsngal lo/ /de la sdug bsngal rnam pa gnyis ni 'di ltar/ dngos po sdug bsngal dang / rang rtags kyi sdug bsngal lo/ /de la dngos po ni skye yang sdug bsngal zhes pa nas mdor na nye bar len pa'i phung po lnga ni sdug bsngal lo zhes pa'i bar du'o//rang rtags kyi sdug bsngal ni/ mya ngan dang smre sngags 'don pa dang sdug bsngal dang yid mi bde ba dang 'khrug pa ni sdug bsngal lo zhes pa'o/ /yang sdug bsngal rnam pa gsum ni 'di ltar/ sdug bsngal gyi sdug bsngal dang / yongs su 'gyur ba'i sdug bsngal dang / 'du byed kyi sdug bsngal lo/ /de la lus kyi dang ngag gi sdug bsngal ni sdug bsngal gyi sdug bsngal lo/ /zag pa dang bcas pa'i bde ba myong ba de'i dngos po yongs su 'gyur ba ni yongs su 'gyur ba'i sdug bsngal lo/ /nye bar len pa'i phung po lnga ni 'du byed kyi sdug bsngal lo//'dis ni sdug bsngal 'phags pa'i bden pa zhes brjod do/ /sdug bsngal kun 'byung ba 'phags pa'i bden pa gang zhe na/ gang sred pa yang srid par byed pa dga' ba'i chags pa dang ldan pa de dang de ru mngon par dga' ba can no/ /de dang de ru mngon par dga' ba can ni/gang dang gang du bdag gi dngos po mngon par 'grub pa de dang de ru mngon par dga' ba'o/ /yang gang dang gang du mdza' ba'i rang bzhin nam bde ba'i ngo bo yod pa de dang de ru mngon par dga' ba'o/ /de'ang rnam pa gsum ste 'di ltar/ 'dod pa'i sred pa dang / srid pa'i sred pa dang / srid bral gyi sred pa'o/ /de la srid pa'i sred pa dang srid bral gyi sred pa dag ma gtogs pa/ sred pa thams cad ni 'dod pa'i sred pa'o/ /rtag par lta ba dang ldan pa'i sred pa ni srid pa'i sred pa'o/ /chad par lta ba dang ldan pa'i sred pa ni srid bral gyi srid pa'o/ /'di ni sdug bsngal kun 'byung ba 'phags pa'i bden pa zhes brjod do//sdug bsngal 'gog pa 'phags pa'i bden pa gang zhe na/ gang sred pa de nyid ma lus par 'dod chags dang bral ba dang 'gags pa dang spangs pa dang nges par spangs pa dang / grol ba dang gnas med pa ste/ 'di ni sdug bsngal 'gog pa 'phags pa'i bden pa zhes brjod do//sdug bsngal 'gog par 'gro ba'i lam 'phags pa'i bden pa gang zhe na/ 'di ni 'phags pa'i lam yan lag brgyad de/ 'di ltar/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang /yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin no/ /de la yang dag pa'i lta ba ni bden pa bzhi'i shes pa'o/ /yang dag pa'i rtog pa ni dge ba la kun du rtog pa'o/ /yang dag pa'i ngag ni gang dag gi nyes par spyod pa bzhi las ldog pa'o//yang dag pa'i las kyi mtha' ni lus kyi nyes par spyod pa gsum las ldog pa'o/ /yang dag pa'i 'tsho ba ni gang log pa'i 'tsho ba las ldog pa'o/ /yang dag pa'i rtsol ba ni yang dag pa'i spong ba rnam pa bzhi'o/ /yang dag pa'i dran pa ni dran pa nye bar gzhag pa bzhi'o//yang dag pa'i ting nge 'dzin ni bsam gtan bzhi'o/ /yang na/ gang de dag 'phags pa'i lam bsgoms pa las mya ngan las 'das pa ye shes mthong ba 'di ni yang dag pa'i lta ba'o/ /mya ngan las 'das pa de nyid la rnam par rtog pa ni yang dag pa'i rtog pa'o/ /de nyid kyi log pa'i ngag spangs pa ni yang dag pa'i ngag go//de nyid kyi log pa'i las kyi mtha' spangs pa ni yang dag pa'i las kyi mtha'o/ /de nyid kyi log pa'i 'tsho ba spangs pa ni yang dag pa'i 'tsho ba'o/ /de nyid kyi brtson 'grus ni yang dag pa'i rtsol ba'o/ / mya ngan las 'das pa de nyid la dran pa ni yang dag pa'i dran pa'o/ /mya ngan las 'das pa de nyid la sems rtse gcig pa ni yang dag pa'i ting nge 'dzin no/ /yang shes rab kyi dbang po dang shes rab kyi stobs dang dpyod pa'i rdzu 'phrul gyi rkang pa dang chos rnam par 'byed pa yang dag byang chub kyi yan lag ni yang dag pa'i lta ba'i nang du gtogs pa'o//brtson 'grus kyi dbang po dang brtson 'grus kyi stobs dang brtson 'grus rdzu 'phrul gyi rkang pa dang 'dun pa'i rdzu 'phrul gyi rkang pa dang / brtson 'grus yang dag byang chub kyi yan lag dang / shin tu sbyangs pa yang dag byang chub kyi yan lag dang /yang dag pa'i spong ba bzhi ni yang dag pa'i rtsol ba'i nang du gtogs pa'o/ /dran pa'i dbang po dang dran pa'i stobs dang dran pa yang dag byang chub kyi yan lag dang dran pa nye bar gzhag pa bzhi ni yang dag pa'i dran pa'i nang du gtogs pa'o/ /ting nge 'dzin gyi dbang po dang ting nge 'dzin gyi stobs dang sems kyi rdzu 'phrul gyi rkang pa dang /dad pa'i dbang po dang dad pa'i stobs dang ting nge 'dzin yang dag byang chub kyi yan lag dang dga' ba yang dag byang chub kyi yan lag dang btang snyoms yang dag byang chub kyi yan lag ni yang dag pa'i ting nge 'dzin gyi nang du gtogs pa'o//de ltar 'phags pa'i lam yan lag brgyad kyi nang du byang chub kyi phyogs kyi chos sum cu rtsa bdun 'dus par 'gyur ro/ /'di ni sdug bsngal 'gog par 'gro ba lam 'phags pa'i bden pa zhes brjod do/ /'di rnams ni 'phags pa'i bden pa bzhi rnams so/ /'dir smras pa/ 'phags pa'i bden pa bzhi yin zhing gsum ma yin/ lnga ma yin pa ga las she na/ de la brjod par bya ste/ 'jig rten dang 'jig rten las 'das pa'i 'bras bu dang rgyu bzhi'o 'di lta ste/ sdug bsngal ni 'jig rten gyi 'bras bu'o/ /kun 'byung 'jig rten gyi rgyu'o/ /'gog pa ni 'jig rten las 'das pa'i 'bras bu'o//lam ni 'jig rten las 'das pa'i rgyu'o/ /des na bzhi'o/ /yang na/ yongs su shes par bya ba dang spang bar bya ba dang mngon du bya ba dang bsgom par bya ba dang bzhi yin pas bden pa bzhi'o/ /yang na 'phags pa'i bden pa bzhi po de rnams ni rnam pa bcu gcig gis khyad par so so shes par bya'o//'di ltar/ tshig gi don dang / mtshan nyid dang / go rims dang / mdor bsdu ba dang / dper bya ba dang / rnam par dbye ba dang / bsdom par bya ba dang / gcig nyid dang / sna tshogs pa nyid dang / mthar chags kyis sangs rgyas par bstan pa dang bsdu ba'o/ /de la tshig gi don ni bzhi zhes pa grangs ni yongs su chad pa'o//'phags pa'i bden pa zhes pa ni 'phags pas bstan pa'i bden pa yin pas sam/ de dag mngon du byas pa la 'phags par 'gyur bas so/ /de bzhin nyid kyi la yang de bzhin nyid rang gi mtshan nyid kyis mi slu ba'i don gyis na 'phags pa'i bden pa'o//sdug bsngal zhes pa ni mnar ba'i don gyis so/ /kun 'byung zhes pa ni bskyed pa'i don gyis so/ /'gog pa zhes pa ni rjes su 'gog pa'i don gyis so/ /lam zhes pa ni dam pa'i don goms par byed pas so/ /mtshan nyid zhes pa ni sdug bsngal ni nyes pa'i mtshan nyid dang / kun 'byung ni rgyu'i mtshan nyid dang /'gog pa ni mi skye ba'i mtshan nyid dang / lam ni thabs kyi mtshan nyid do/ /yang na/ sdug bsngal ni gzir ba'i mtshan nyid dang / kun du gdung ba'i mtshan nyid dang / 'dus byas kyi mtshan nyid dang / yongs su 'gyur ba'i mtshan nyid do/ /kun 'byung ni 'phen par byed pa'i mtshan nyid dang /bzhi'i mtshan nyid dang / kun du tshogs pa'i mtshan nyid dang / yongs su spags pa'i mtshan nyid do/ /'gog pa ni nges par 'byung ba'i mtshan nyid dang / dben pa'i mtshan nyid dang / 'dus ma byas kyi mtshan nyid dang / mi 'chi ba'i mtshan nyid do/ /lam ni nges par 'byin par byed pa'i mtshan nyid dang /yang dag par thob par byed pa'i mtshan nyid dang / mthong ba'i mtshan nyid dang / lhag pa'i bdag po'i mtshan nyid do/ /go rims nges pa ni rags pa'i don gyis dang / rkyen gyi don gyis dang po sdug bsngal bstan to/ /'dis ni sdug bsngal skyed par byed pa'o zhes gnyis pa kun 'byung bstan pa'o//kun 'byung 'di 'gags pas sdug bsngal 'di 'gag go zhes gsum pa 'gog pa'i bden pa bstan to/ /'di ni kun 'byung 'gog pa'i thabs so zhes bzhi pa lam gyi bden pa bstan to/ /dper na sman pa mkhas pas dang po nad shes par byed/de nas nad kyi rgyu yongs su tshol ba dang / de nas nad byang ba dang rjes su mthun pa'i sman ston pa'o/ /de kho na bzhin du ci ltar nad de ltar sdug bsngal lo/ /ci ltar nad kyi gzhi de bzhin du kun 'byung ngo / /ci ltar na nad byang ba de bzhin du 'gog pa'o//ci ltar sman de bzhin du lam du blta bar bya'o/ /mdor bsdu ba ni/ 'jug pa ni sdug bsngal lo/ /'jug par byed pa ni kun 'byung ngo / /ldog pa ni 'gog pa'o/ /ldog par byed pa ni lam mo/ /nyon mongs pa'i dngos po ni sdug bsngal lo/ /nyon mongs pa ni kun 'byung ngo //nyon mongs pa spangs pa ni 'gog pa'o/ /nyon mongs pa spong ba'i thabs ni lam mo/ /sdug bsngal rnam par bzhag pa ni 'jig tshogs la lta ba yang dag par 'joms pa'i sgo'o/ /kun 'byung rnam par bzhag pa ni chad pa'i lta ba yang dag par 'joms pa'i sgo'o/ /'gog pa rnam par bzhag pa ni sdug bsngal thams cad yang dag par 'joms pa'i sgo'o//lam rnam par bzhag pa ni bya ba ma yin pa'i lta ba yang dag par 'joms pa'i sgo'o/ /dper bya ba ni/ dper na dug gi sdong po bzhin du sdug bsngal blta bar bya'o/ /dper na sa bon bzhin du kun 'byung ngo //dper na sa bon bsregs pa bzhin du 'gog pa'o/ /dper na me bzhin du lam du blta bar bya'o/ /dper na tshu rol du dogs pa dang bcas pa dang 'jigs pa dang bcas pa bzhin du sdug bsngal blta bar bya'o/ /dper na chu bo bzhin du kun 'byung ngo / /dper na pha rol 'gram na 'jigs pa med pa bzhin du 'gog pa'o//dper na gru bzhin du lam du lta'o/ /dper na khur khur ba bzhin du sdug bsngal blta bar bya'o/ /dper na khur len pa bzhin du kun 'byung ngo / /dper na khur bor ba bzhin du 'gog pa'o/ /dper na khur bor ba'i thabs bzhin du lam blta bar bya'o//rnam par dbye ba zhes pa ni bden pa ni rnam pa bzhi ste/ 'di ltar ngag bden pa dang / so sor bden pa dang / don dam pa'i bden pa dang / 'phags pa'i bden pa'o/ /de la bden pa kho na smra zhing mi bden pa ni ma yin no zhes pa ni ngag bden pa'o/ /lta bar song ba ni so sor bden pa'o/ / de ni dge slong gang brdzun dang rmongs pa'i chos de dag ni mi bden pa'o/ /gang rmongs pa med pa'i chos de ni mya ngan las 'das pa zhes pa ni don dam pa'i bden pa'o/ /'phags pa rnams kyi bsgom par bya ba yin pas zhes pa ni 'phags pa'i bden pa'o/ /'dir ni 'phags pa'i bden pa la mngon par 'dod pa'o//bsdom par bya ba ni srid pa ma gtogs pa'o/ /'dod pa gzugs dang gzugs med pa'i sa gsum gyi dge ba dang mi dge ba dang lung ma bstan gyi chos rnams ni sdug bsngal bden pa'o/ /sred pa ni kun 'byung bden pa'o/ /sred pa spangs pa ni 'gog pa'i bden pa'o/ / 'phags pa'i lam yan lag brgyad ni lam gyi bden pa'o/ /tshul gzhan yang / sred pa dang lhag ma'i nyon mongs pa ni ma gtogs te/ 'dod pa la sogs pa'i sa gsum gyi dge ba dang / mi dge ba dang lung du ma bstan pa'i chos ni sdug bsngal bden pa'o/ /sred pa dang lhag ma nyon mongs pa ni kun 'byung bden pa'o//sred pa dang lhag ma nyon mongs pa dag spangs pa ni 'gog pa'o/ /'phags pa'i lam yan lag brgyad ni lam gyi bden pa'o/ /yang tshul gzhan/ sred pa dang lhag ma'i nyon mongs pa dang mi dge ba thams cad ma gtogs te/ sa gsum gyi dge ba dang lung du ma bstan pa'i chos ni sdug bsngal gyi bden pa'o//sred pa dang lhag ma nyon mongs pa dang mi dge ba thams cad ni kun 'byung bden pa'o/ /sred pa la sogs pa rnams spangs pa ni 'gog pa'o/ /lam gyi bden pa de nyid do/ /tshul gzhan/ sred pa dang lhag ma nyon mongs pa dang mi dge ba thams cad dang sa gsum gyi dge ba rnams ma gtogs te/sa gsum gyi lung ma bstan gyi chos ni sdug bsngal gyi bden pa'o/ /sred pa dang lhag ma nyon mongs pa dang mi dge ba thams cad dang sa gsum gyi dge ba ni kun 'byung ngo / /sred pa la sogs pa spangs pa ni 'gog pa'i bden pa'o/ /lam gyi bden pa ni de nyid do//de la srid pa'i ro myong ba don du gnyer ba gtso bor gyur pa'i don gyis sred pa ni kun 'byung ngo / /srid par kun du sbyor ba gtso bor gyur pa'i don gyis lhag ma nyon mongs pa ni kun 'byung ngo / /spang bar bya ba'i don gyis dang srid pa kun du sbyor ba'i don gyis mi dge ba thams cad ni kun 'byung ngo //srid pa skyed pa'i don gyis sa gsum gyi dge ba'i chos rnams kun 'byung ngo / /des na sred pa dang lhag ma nyon mongs pa dang mi dge ba thams cad dang sa gsum gyi dge ba rnams ni sdug bsngal gyi bden par 'gyur te/ mnar ba dang kun du gdung ba dang 'dus byas dang yongs su 'gyur ba'i mtshan nyid yin pa'i phyir ro//sred pa la sogs pa de nyid kun 'byung gi bden par 'gyur te/ sdud par byed pa dang len pa dang spags pa kun du sbyor ba'i mtshan nyid yin pa'i phyir ro/ /gcig pa nyid ni/ 'phags pa'i bden pa bzhi ni rnam pa bzhis gcig pa nyid de/'di ltar bden pa'i don gyis dang / de bzhin gyi don gyis dang / chos kyi don gyis dang / rigs pa'i don gyis so/ /sna tshogs pa nyid ni/ /bden pa gnyis ni 'jig rten pa dang / zag pa dang bcas pa dang / kun du sbyar ba dang / mdud par bya ba dang / rgyun rgyu ba dang /sbyor bar bya ba dang / sgrib par bya ba dang / mchog tu spyod pa dang / nye bar len pa dang / nyon mongs pa can te/ 'di ltar/ sdug bsngal bden pa dang / kun 'byung bden pa'o/ /bden pa gnyis ni 'jig rten las 'das pa dang / zag pa med pa dang / kun du sbyor ba ma yin pa dang / bcing bar bya ba ma yin pa dang / rgyun rgyu ba ma yin pa dang / sbyor bar bya ba ma yin pa dang / bsgrib par bya ba ma yin pa dang / mchog tu spyod bya ma yin pa dang / nye bar len pa ma yin pa dang / nyon mongs pa can ma yin pa ste 'di ltar/ 'gog pa'i bden pa dang / lam gyi bden pa'o/ / bden pa gsum ni 'dus byas so/ /'gog pa ni 'dus ma byas so/ /bden pa gsum ni gzugs can ma yin pa dang / sdug bsngal gyi bden pa ni gzugs dang gzugs ma yin pa'o/ /kun 'byung gi bden pa ni mi dge ba'o/ /dge ba ni lam gyi bden pa'o/ /lung du ma bstan pa ni 'gog pa'i bden pa'o//dge ba dang mi dge ba dang lung du ma bstan pa ni sdug bsngal gyi bden pa'o/ /sdug bsngal shes par bya ba dang / kun 'byung spang bar bya ba dang 'gog pa mngon du bya ba dang / lam bsgom par bya ba'o/ /mthar chags kyis rgyas par bshad pa ni/ rnam pa gcig gis ni rnam par shes pa dang ldan pa'i lus ni sdug bsngal lo//nga'o snyam pa'i nga rgyal ni kun 'byung ngo / /nga'o snyam pa'i nga rgyal spangs pa na 'gog pa'o/ /lus su gtogs pa dran pa ni lam mo/ /rnam pa gnyis kyis ni/ ming dang gzugs dag ni sdug bsngal lo/ /ma rig pa dang sred pa ni kun 'byung ngo //de dag spangs pa ni 'gog pa'o/ /zhi gnas dang lhag mthong ni lam mo/ /rnam pa gsum gyis ni sdug bsngal gsum ni sdug bsngal bden pa'o/ /mi dge ba'i rtsa ba gsum ni kun 'byung bden pa'o/ /de rnams spangs pa ni 'gog pa'o/ /tshul khrims dang ting nge 'dzin dang shes rab ni lam mo//rnam pa bzhis ni/ bdag gi ngo bo'i dngos po bzhi ni sdug bsngal te/ 'di ltar/ skye ba'i sdug bsngal dang / rga ba'i sdug bsngal dang / 'chi ba'i sdug bsngal dang / na ba'i sdug bsngal lo/ /phyin ci log bzhi ni kun 'byung ngo / /de rnams spangs pa ni 'gog pa'o/ /dran pa nye bar gzhag pa bzhi ni lam mo//rnam pa lngas ni/ 'gro ba lnga ni sdug bsngal lo/ /sgrib pa lnga ni kun 'byung ngo / /de rnams spangs pa ni 'gog pa'o/ /dbang po lnga ni lam mo/ /rnam pa drug gis ni/ reg pa'i skye mched drug ni sdug bsngal lo/ /'di lta ste/ mig gi 'dus te reg pa dang / rna ba'i 'dus te reg pa dang / sna'i 'dus te reg pa dang / lce'i 'dus te reg pa dang / lus kyi 'dus te reg pa dang / yid kyi 'dus te reg pa'o/ /sred pa'i tshogs ni kun 'byung ngo / /gzugs kyi sred pa dang / sgra'i sred pa dang / dri'i sred pa dang / ro'i sred pa dang / reg bya'i sred pa dang / chos kyi sred pa'o//de rnams spangs pa ni 'gog pa'o/ /kun du chags par bya ba'i chos drug ni lam mo/ /de la kun du chags bya'i chos drug ni 'di ltar/ nang gi chos la chos kyi rjes su lta zhing gnas pa 'di ni kun du chags par bya ba'i chos dang po'o/ /de bzhin du phyi rol lam/ de kho na bzhin du phyi nang ngam/kun du skye ba la rjes su lta ba'am chos la chos dang mthun par lta zhing gnas pa'o/ /de bzhin du 'gag pa'i chos la rjes su lta ba'am/ de bzhin du skye ba dang 'gag pa la rjes su lta zhing gnas pa ni kun du chags par bya ba'i chos drug pa'o/ /rnam pa gsum gyis ni/rnam par shes pa'i gnas pa bdun ni sdug bsngal lo/ /sems can lus tha dad pa 'du shes tha dad pa yod do zhes pa ni rnam par shes pa'i gnas pa dang po'o/ /sems can lus tha dad la 'du shes gcig pa nyid yod do zhes pa 'di ni gnyis pa'o/ /sems can lus gcig nyid yin la 'du shes tha dad pa yod pa 'di ni gsum pa'o//sems can lus gcig la 'du shes gcig pa yod do zhes pa ni bzhi pa'o/ /gzugs med pa ru nam mkha'i 'du shes 'di ni lnga pa'o/ /rnam shes kyi 'du shes 'di ni drug pa'o/ /ci yang med pa'i 'du shes ni bdun pa'o/ /bag la nyal bdun ni kun 'byung ste/'di ltar/ 'dod pa'i 'dod chags bag la nyal dang / khong khro bag la nyal dang / nga rgyal bag la nyal dang / lta ba bag la nyal dang / the tshom bag la nyal dang / srid pa'i chags pa bag la nyal dang / ma rig pa bag la nyal lo/ /de dag spangs pa ni 'gog pa'o//byang chub yan lag bdun ni lam mo/ /rnam pa brgyad kyis na/ 'jig rten chos brgyad ni sdug bsngal lo/ /log pa brgyad ni kun 'byung ngo / /'di ltar/ log pa'i lta ba dang / log pa'i rtog pa dang / log pa'i ngag dang / log pa'i las kyi mtha' dang / log pa'i 'tsho ba dang / log pa'i rtsol ba dang /log pa'i dran pa dang / log pa'i ting nge 'dzin to/ /de rnams spangs pa ni 'gog pa'o/ /yang dag pa brgyad ni lam mo/ /'di ltar/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang /yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /rnam pa dgu ni/ sems can gyi gnas dgu ni sdug bsngal lo/ /'di ltar/ lus tha dad cing 'du shes tha dad pa ni/ 'di ltar mi rnams dang lha kha cig go/ /'di ni sems can gyi gnas dang po'o//lus gcig la 'du shes tha dad pa ni 'di ltar/ tshangs ris kyi lha dang por byung ba rnams so/ /'di ni gnyis pa'o/ /lus tha dad pa 'du shes gcig pa ni 'di ltar 'od gsal gyi lha rnams so/ /'di ni gsum pa'o/ /lus gcig la 'du shes gcig ni 'di ltar dge rgyas kyi lha rnams so//'di ni bzhi pa'o/ /nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min gyi skye mched dang / 'du shes med pa'i sems can te/ sems can gyi gnas dgu'o/ /sred pa'i rtsa ba can gyi chos dgu ni kun 'byung ste/'di ltar/ de dag spangs pa ni 'gog pa'o/ /tshul bzhin yid la byed pa'i rtsa ba can gyi chos dgu ni lam ste/ 'di ltar/ rnam pa bcus ni/ phyogs bcu'i 'du byed rnams ni sdug bsngal lo/ /kun du sbyor ba bcu ni kun 'byung ste/ 'di ltar/ 'dod pa'i chags pa kun du sbyor ba dang / khong khro ba kun du sbyor ba dang / nga rgyal kun du sbyor ba dang / lta ba kun du sbyor ba dang / the tshom kun du sbyor ba dang / tshul khrims dang brtul zhugs mchog tu 'dzin pa kun du sbyor ba dang / srid pa'i chags pa kun du sbyor ba dang / phrag dog kun du sbyor ba dang /ser sna kun du sbyor ba dang / ma rig pa kun du sbyor ba'o/ /de dag spangs pa ni 'gog pa'o/ /'du shes bcu ni lam mo/ /'di ltar/ mi rtag pa'i 'du shes dang / don med pa'i 'du shes dang / mi sdug pa'i 'du shes dang / skyon dang bcas pa'i 'du shes dang / srog chags kyi 'du shes dang /'dod chags dang bral ba'i 'du shes dang / 'gog pa'i 'du shes dang / 'jig rten thams cad la mngon par dga' ba ma yin pa'i 'du shes dang / 'du byed thams cad la mngon par mi dga' ba'i 'du shes dang / dbugs phyi nang du rgyu ba'i 'du shes dang bcu'o/ / ci ltar bsdu zhe na/ bsdu ba rnam pa gsum ste/ phung por bsdu ba dang / skye mched du bsdu ba dang / khams su bsdu ba'o/ /de la sdug bsngal bden pa ni phung po lngas bsdus pa'o/ /kun 'byung dang lam gyi bden pa ni 'du byed kyi phung pos bsdus pa'o/ /'gog pa'i bden pa ni phung pos bsdus pa ma yin pa'o//sdug bsngal gyi bden pa ni skye mched bcu gnyis kyis bsdus pa'o/ /bden pa gsum ni chos kyi skye mched kyis bsdus pa'o/ /sdug bsngal gyi bden pa ni khams bco brgyad kyis bsdus pa nyid do/ /bden pa gsum ni chos kyis bsdus pa'o//gang de rnams kyis 'phags pa'i bden pa la mkhas pa'i shes pa skyes pa ni 'phags pa'i bden pa la mkhas pa zhes brjod do/ /'bras bu snyoms par 'jug pa brjod par bya ste/ mtshan ma'i 'du byed thams cad las 'das te/ mya ngan las 'das pa dmigs par byas nas rigs spyod ye shes skye'o//de la don gang gis rigs spyod ce na/ brjod par bya ste/ so so skye bo'i chos rnams zil gyis gnon pas rigs spyod do/ /rigs ni brjod par bya ste/ mya ngan las 'das pa ste/ de dag za bar byed pas rigs spyod do/ /chos mngon pa las gsungs pa/ skye ba rnams zil gyis gnon pa 'di ni rigs spyod do//mi skye ba za ba 'di ni rigs za'o/ /mtshan mar 'jug pa rnams zil gyis gnon pa 'di ni rigs za'o/ /mtshan mar 'jug pa ma yin pa bgrod pa 'di ni rigs za'o/ /dang po mya ngan las 'das pa yid la byed pa dang ldang 'jug gi shes rab ni rigs spyod ye shes so//rigs za ye shes des sdug bsngal yongs su shes par byas/ kun 'byung spangs/ 'gog pa mngon du byas/ lam bsgoms pas/ byang chub kyi phyogs kyi chos 'khor dang bcas pa thams cad dang lhan cig tu rgyun du zhugs pa'i lam shes par skye'o/ /de'i tshe des srid pa'i mthar thug pa 'dus ma byas 'chi med kyi bdud rtsi'i dbyings su mthong ngo //mthong ba'i skad cig de la ye shes 'dis sngon ma yin cing phyis ma yin pa bden pa bzhi mngon du rtogs so/ /'di lta ste/ sdug bsngal yongs su shes pa'i mngon par rtogs pa dang / kun 'byung spangs pa'i mngon par rtogs pa dang /'gog pa mngon du byas pa'i mngon par rtogs pa dang / lam bsgoms pa'i mngon par rtogs pa'o/ /'dir gru dper bstan pa ni/ 'di ltar/ chu la gru bskyod pa'i skad cig la sngon ma yin phyis ma yin pa'i bya ba bzhi byed de/ 'di ltar/ tshu rol gyi 'gram 'dor ba dang /chu bo gcod pa dang / pha rol 'gram thob pa dang / snod rnams bsgrod pa'o/ /de bzhin du grangs bzhin du/ sdug bsngal yongs su shes pa'i mngon rtogs dang / kun 'byung spangs pa'i mngon rtogs dang / 'gog pa mngon du byas pa'i mngon rtogs dang / lam bsgoms pa'i mngon rtogs so//yang sgron me'i dpe bstan te 'di ltar/ sgron me byung ba'i skad cig la lhan cig tu sngon min gyi bya ba bzhi byed de 'di ltar/ sdong bu sreg pa dang / mun pa sel ba dang / snum zad pa dang / snang ba ston pa'o/ /de ltar grangs bzhin du sdug bsngal la sogs pa'i bden pa rnams kyis ngas su shes pa'i mngon par rtogs pa la sogs pa bzhi'o//yang nyi ma'i dpe bstan te/ 'di ltar/ nyi ma shar ba'i skad cig [(]du [,]tu [)]sngon min phyis min gyi bya ba bzhi byed de/ 'di ltar/ gzugs su rtogs pa rnams ston pa dang / mun pa'i rnam pa 'joms pa dang / bsil ba 'gog par byed pa dang / snang ba ston par byed pa'o/ /de bzhin du grangs bzhin du sdug bsngal la sogs pa bden pa rnams kyi yongs su shes pa'i mngon par rtogs pa la sogs pa bzhi'o/ /de la bden pa mngon par rtogs pa 'di don ci zhe na/ brjod par bya ste/ 'phags pa'i bden pa bzhi po rnams skad cig la mnyam du rtogs pa de ni bden pa mngon par rtogs pa zhes brjod do//de'i dus su lam de dang ldan pa la/ bdag po'i don gyis dbang po rnams yang dag par nges par nye bar ldan par 'gyur ro/ /mi skyod pa'i don gyis stobs dang / /nges par 'byin pa'i don gyis byang chub yan lag dang /rgyu'i don gyis lam gyi yan lag dang / nye bar gnas pa'i don gyis dran pa nye bar gzhag pa dang / gtso bos don gyis yang dag pa'i spong ba dang / 'byor pa'i don gyis rdzu 'phrul rkang pa dang / de lta bu'i don gyis bden pa dang / g.yeng ba med pa'i don gyis zhi gnas dang /rjes su mthong ba'i don gyis lhag mthong dang / de dag las mi 'da' bas zung du 'jug pa'o/ /sdom pa yin pa'i don gyis tshul khrims rnam par dag pa dang / mi g.yeng ba'i don gyis sems rnam par dag pa dang / mthong ba'i don gyis lta ba rnam par dag pa dang / grol ba'i don gyis rnam par thar pa dang / mngon du byed pa'i don gyis reg pa dang / yongs su btang ba'i don gyis dam par grol ba dang / kun du chud pa'i don gyis zad pa shes pa dang / rtsa ba yin pa'i don gyis 'dun pa dang / kun nas ldang ba'i don gyis yid la byed pa dang /yang dag par phrad pa'i don gyis reg pa dang / yang dag par gzhol ba'i don gyis tshor ba dang / mngon du phyogs pa'i don gyis ting nge 'dzin dang / bdag po'i don gyis dran pa dang / bar med pa'i don gyis shes rab dang / mthar phyin pa'i don gyis bdud rtsir zhugs pa'o/ / 'gog pa dang mya ngan las 'das pa yang dag pa nges pa zhes par ldan par 'gyur ro/ /des de ltar shes shing de ltar mthong ba na/ kun du sbyor ba gsum rab tu spong bar 'gyur te/ 'di ltar/ 'jig tshogs la lta ba dang / the tshom dang / tshul khrims dang brtul zhugs mchog tu 'dzin pa'o//de dang gcig tu gnas pa'i nyon mongs pa'o/ /de la 'jig tshogs la lta ba ni/ 'dir thos pa dang mi ldan pa'i so so skye bos/ gzugs ni bdag du yang dag par rjes su lta ba dang / bdag ni gzugs dang ldan pa dang / gzugs la bdag yod pa'o/ /de bzhin du tshor ba dang / 'du shes dang /'du byed dang / rnam par shes pa ni bdag du yang dag par rjes su lta ba dang / bdag ni rnam par shes pa dang ldan pa dang / bdag la rnam par shes pa yod pa dang / rnam par shes pa la bdag yod pa yang dag par rjes su lta ba 'di ni 'jig tshogs la lta ba zhes brjod do/ /de 'dis spong bar byed do//de spangs pa las 'jig tshogs la lta ba la sogs pa'i lta bar gtogs pa drug cu rtsa gnyis spong bar 'gyur ro/ /sdug bsngal lam kun 'byung ngam 'gog pa 'am lam mam sangs rgyas sam chos sam/ dge 'dun nam sngon gyi mtha' 'am phyi ma'i mtha' rkyen 'di las rten cing 'brel par 'byung ba'i chos la the tshom za ba ste/mtha' gcig tu ma nges pa'o/ /'di ni the tshom zhes brjod de/ 'di yang spong bar 'gyur ro/ /tshul khrims dang brtul zhugs mchog tu 'dzin pa nyid do/ 'di ltar/ sred pa dang ldan par gyur pa dang / rmongs pa dang ldan par gyur pa'o//de la bdag gis tshul khrims sam brtul zhugs sam dka' thub bam tshangs par spyod pas lha gzhan gang yang rung bar 'gyur bar bya'o zhes pa 'di ni sred pa dang ldan pa'i tshul khrims dang brtul zhugs mchog tu 'dzin pa'o/ /'di las phyi rol du gyur pa ni/ dge sbyong ngam bram ze rnams kyis/tshul khrims kyi dag pa'am/ brtul zhugs kyi dag pa'am tshul khrims dang brtul zhugs kyi dag pa'o zhes gang de lta bu'i tshul gyis lta ba mchog tu 'dzin pa 'di ni rmongs pa'i tshul khrims dang brtul zhugs mchog tu 'dzin pa'o/ /de 'dis spong bar 'gyur ro/ /ngan song du 'gro bar 'gyur ba'i 'dod chags dang /zhe sdang dang gti mug ni de dang gcig tu gnas pa'i nyon mongs pa zhes brjod do/ /de 'dis spong bar 'gyur ro/ /de 'di srid du rgyun du zhugs pa'i 'bras bu mngon du bya ba'i phyir ched du zhugs pa yin gyi/ de srid du rgyun du zhugs pa ni ma yin no/ / ched du zhugs pa'i sa'am/ brgyad pa'i sa'am/ mthong ba'i sa'am/ nges par gyur pa'am gnyi ga la ldang zhing 'jug pa'i shes rab bam rgyun du zhugs pa'i lam shes pa ste/ de rnams ni ming gi rnam grangs kyi tshig go/ /rgyun du zhugs pa'i lam gyi de ma thag tu lam dang mtshungs pa'i chos dang mi ldan par 'dus ma byas la dmigs pa byas te/rgyun du zhugs pa'i 'bras bu shes pa skye bar 'gyur te/ 'bras bu sems gnyis sam gsum mam bar med par 'jug pa'i phyir dang / kun du sbyor ba gsum rnams spangs pa'i phyir ro/ /de nas bar med par srid pa'i yan lag tu 'pho'o//srid pa'i yan lag las langs te lam la so sor rtog go/ /'bras bu la so sor rtog par byed do/ /mya ngan las 'das pa la so sor rtog go/ /spangs pa'i nyon mongs pa la so sor rtog go/ /lhag ma'i nyon mongs pa la so sor rtog go/ /de la ni rgyun du zhugs pa zhes brjod do/ / ngan 'gro med pa'i chos dang / rdzogs pa'i byang chub la nges par gzhol ba dang / mngon par rtogs pa dang ldan pa'i 'bras bu 'ongs pa dang / bcom ldan 'das kyi thugs kyi sras dang / zhal las skyes pa dang / chos las skyes pa dang / chos kyi sprul pa dang / chos kyi bgo skal la dbang ba dang / zang zing gi bgo skal la mi dbang ba dang /de la ni lta ba phun sum tshogs pa zhes kyang bya'o/ /mthong ba la yang dag par zhugs pa yang ngo / /chos 'di chub pa dang chos kyi mthong ba dang / slob pa'i ye shes dang yang dag par ldan pa zhes kyang ngo / /slob pa'i rig pa dang yang dag par ldan pa zhes kyang ngo //chos kyi srol du yang dag par zhugs pa dang / 'phags pa dang / nges par 'byed pa dang / shes rab dang / bdud rtsi'i sgo kun du bsgrubs te gnas pa dang / des na brjod par bya ste/ rang nyid sa steng rgyal po'am/ /bde 'gror bdag nyid bgrod phyir ram/ / 'jig rten kun gyi bdag po'i phyir/ /rgyun du zhugs pa'i 'bras bu mchog /ces so/ /sa de la gnas pa de/ lan cig phyir 'ong ba'i 'bras bu mngon du bya ba'i phyir/ gong ma la mngon par sgrub par byed/ skye ba dang 'gag pa la rjes su lta ba dang por byas te/ bstan pa'i tshul bzhin du lta'o/ / ci ltar mthong ba'i dbang po stobs/ /byang chub yan lag rnams yang dag par blangs pa dang / de bzhin du bden pa mngon par rtogs pa'i lam rnams sgom par byed do/ /de ltar ched du zhugs pa de'i 'dod pa rags pa 'dod chags dang / gnod sems dang de dang lhan cig pa'i nyon mongs pa rnams spong bar 'gyur ro//lam gyi de ma thag tu lan cig phyir 'ong ba'i 'bras bu mngon du byed do/ /sa de la gnas te phyir mi 'ong ba'i 'bras bu mngon du bya ba'i phyir gong ma la mngon par sgrub par byed do/ /skye 'gag la rjes su lta ba dang por byas te/ bstan pa'i tshul bzhin du lta'o/ / ci ltar mthong ba'i dbang po dang stobs dang byang chub yan lag rnams yang dag par blangs te/ de bzhin du bden pa mngon par rtogs pa'i lam rnams sgom par byed do/ /'dod pa'i phra mo dang ldan pa'i 'dod chags dang gnod sems dang / de dang gcig tu gnas pa'i nyon mongs pa rnams spong bar 'gyur ro//de nas lam de'i de ma thag tu phyir mi 'ong ba'i 'bras bu mngon du byed do/ /sa de la gnas pa de dgra bcom pa'i 'bras bu mngon du bya ba'i phyir gong ma las mngon par sgrub par byed do/ /skye 'gag la rjes su lta ba dang por byas te/ bstan pa'i tshul bzhin du rnam par lta'o/ / ci ltar mthong ba'i dbang po dang stobs dang byang chub yan lag dang / de bzhin du bden pa mngon par rtogs pa rnams yang dag par blangs te lam sgom par byed do/ /de ltar ched du zhugs pa de'i gzugs kyi 'dod chags dang / gzugs med pa'i 'dod chags dang / nga rgyal dang rgod pa dang / ma rig pa dang /lhag ma'i nyon mongs pa rnams lhag ma ma lus par spangs te/ de nas lam de'i de ma thag tu dgra bcom pa nyid mngon du byed do/ /lam de la so sor rtog go/ /'bras bu dang mya ngan las 'das pa spangs pa'i nyon mongs pa rnams la so sor rtog go/ /de ni dge slong dgra bcom pa zag pa zad pa tshangs spyod du gnas pa byed pa byas pa khur bor ba bdag gi don rjes su thob pa kun du sbyor ba yongs su zad pa yang dag pa'i kun shes pas sems shin tu rnam par grol ba yan lag lnga rab tu spangs pa/yan lag drug dang yang dag par ldan pa/ gcig kun tu srung ba/rten tha ma la so sor bden pa rab tu spangs pa 'dod tshol la yang dag par kun du dor ba/ kun du rtog pa'i rnyog pa med pa/ lus kyi 'du byed shin tu sbyangs pa/ sems shin tu rnam par grol ba/ shes rab shin tu rnam par grol ba/ tshangs par spyod pa gcig tu gnas pa dang ldan pa/ skyes bu mchog thob pa dam pa thob par gyur pa'o/ /de ni yongs su 'khrug pa spangs pa dang / dba' klong 'khrugs pa la yang dag par rgal ba dang / bag tsha bas tshol ba med pa/ sgo gtan med pa/ 'phags pa'i rgyal mtshan bsgrengs pa/ lo 'dab kyi khur dang mi ldan pa/ bram ze dag byed/ rig byed pa gtsang ma mchod 'os rgal pa dul ba/ grol ba/ zhi ba zhes kyang bya'o/ /de la gang gi tshe yang rgyun du zhugs pa de'i rigs kyis/ gong ma la 'bad pa byed par mi 'gyur ba/ de ni rnam pa gsum gyi mtha' rjes su thob po/ /de ltar yang / rgyun du zhugs pa ni gsum yin te/ 'di ltar/ dbang po rtul po/ /re ltar thogs na lan bdun par 'gyur ba dang / dbang po 'bring / rigs nas rigs su 'gyur ba dang / dbang po rnon po/ bar chad gcig pu par 'gyur ba'o/ /yang gang gi tshe lan cig phyir 'ong ba de'i rigs kyis gong ma la 'bad par byed par mi 'gyur na/ 'di nas 'phos te/mi'i nang 'dir lan cig 'ongs nas sdug bsngal mthar byed par 'gyur ro/ /yang gang gi tshe phyir mi 'ong ba de'i rigs kyis gong ma la 'bad par byed par mi 'gyur na/ 'di nas 'phos na sa gtsang ma'i gnas su skye bar 'gyur te/ de der dbang po'i bye brag gis mthar thug pa rjes su thob pa rnam pa lngar 'gyur ro//phyir mi 'ong ba lnga ni 'di ltar/ bar dor mya ngan las 'das pa dang / skyes nas yongs su mya ngan las 'das pa dang / 'du byed med par yongs su mya ngan las 'das pa dang / 'du byed dang bcas par yongs su mya ngan las 'das pa dang /gong du 'pho ba ste 'og min du 'gro ba'o/ /phyir mi 'ong ba lnga po 'di ni/ mi che ba la sogs pa'i sa gzhi la lnga lnga ste nyi shu'o/ /'og min du gong du 'pho ba med pas phyir mi 'ong ba bzhi'o/ /des na phyir mi 'ong ba nyi shu nyer bzhir 'gyur ro/ /dgra bcom pa ni/ nyon mongs pa thams cad ma lus pa yang dag par bcad pa'i phyir/yang srid med pa nyid de rgyu med pa'i phyir ro/ /dgra bcom pa ni tshe'i dus ci srid par gnas shing / tshe'i 'du byed yongs su zad nas 'di nyid sdug bsngal 'gags te/ gzhan du skye ba med do/ /'di nyid la sdug bsngal gyi mtha' zhes bya'o/ / des na brjod de/ rigs kyi tshor bas 'bar ba yi/ /lcags kyi gong bu nyams pa nyid/ /rim gyis nye bar zhi 'gyur gyi/ /'gro ba shes par bya min ltar/ /de bzhin 'dod pa'i 'dam klung la/ /bgal zhing yang dag rnam grol gyi/ /mi g.yo go 'phang thob rnams kyis/ /gshegs pa gdugs su nges par med//de'i phyir/ 'phags pa'i sa la gnyis te/ de la mthong ba'i sa ni rgyun du zhugs pa'i 'bras bu'i lam mo/ /lhag ma lam gsum dang dge sbyong gi 'bras bu bzhi ni bsgom pa'i lam mo/ /de la lam gsum ni/ 'di ltar/ lan cig phyir 'ong ba'i 'bras bu'i lam dang / phyir mi 'ong ba'i 'bras bu'i lam dang /dgra bcom pa'i 'bras bu'i lam mo/ /dge sbyong gi 'bras bu bzhi ni 'di ltar/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa'i 'bras bu'o/ /de la sngon ma mthong ba'i bden pa mthong ba mthong ba'i sa dang /ci ltar mthong ba de ltar bsgoms pas bsgom pa'i sa'o/ /yang sa gnyis te 'di ltar/ slob pa'i sa dang / mi slob pa'i sa'o/ /de la lam bzhi dang dge sbyong gi 'bras bu gsum ni slob pa'i sa'o/ /de la lam bzhi ni 'di ltar/ rgyun du zhugs pa'i 'bras bu'i lam dang / lan cig phyir 'ong ba'i 'bras bu'i lam dang / phyir mi 'ong ba'i 'bras bu'i lam dang / dgra bcom pa'i 'bras bu'i lam mo/ /dge sbyong gi 'bras bu gsum ni rgyun du zhugs pa'i 'bras bu dang / lan cig phyir 'ong ba dang / phyir mi 'ong ba'o/ /dgra bcom pa'i 'bras bu ni mi slob pa'i sa'o//'jig rten las 'das pa'i dbang po gsum ni 'di ltar/ mi shes pa kun shes par 'gyur ba'i dbang po dang / kun shes pa'i dbang po dang / kun shes pa nyid kyi dbang po'o/ /de la rgyun du zhugs pa'i 'bras bu'i lam shes pa ni/ sngon ma shes pa'i chos shes pas mi shes pa kun shes pa'i dbang po'o//lam gsum gyi ye shes dang / dge sbyong gi 'bras bu gsum gyi ye shes ni kun shes pa'i dbang po ste/ shes pa'i chos rnams shes pa'i phyir ro/ /dgra bcom pa'i ye shes ni/ chos rnams lhag ma med par shes pas kun shes pa nyid kyi dbang po'o/ / rnam par grol ba ni gsum ste/ 'di ltar/ mtshan ma med pa rnam par thar pa'i sgo dang / smon pa med pa rnam par thar pa'i sgo dang / stong pa nyid rnam par thar pa'i sgo'o/ /de la lam dang yang dag par ldan pa'i shes pas mtshan mar mi byed pas mtshan mar mi byed pa ni mtshan ma med pa'i rnam par thar pa'i sgo'o//smon pa mi byed pa ni smon pa med pa rnam par thar pa'i sgo'o/ /mngon par zhen pa mi byed pa ni stong pa nyid rnam par thar pa'i sgo'o/ /rnam par thar pa'i dang rnam par thar pa'i sgo dag tha dad pa'i rgyu ci zhe na/ brjod par bya ste/ lam shes pa de nyid nyon mongs pa las rnam par grol ba ni rnam par thar pa'o//ye shes de nyid bdud rtsi'i sgor gyur pa'i don gyis rnam par thar pa'i sgo'o/ /lam gsum gyis nyon mongs pa nyi shu spong bar 'gyur te/ 'di ltar/ mi dge ba'i rtsa ba dang / 'dod tshol dang / zag pa dang / mdud pa dang / chu bo dang / sbyor ba dang / nye bar len pa dang /'gro ba ma yin par bgrod pa dang / ser sna dang / sgrib pa dang / rtsod pa'i gzhi dang / bag la nyal dang / 'jig rten gyi chos dang / nga rgyal dang / nyon mongs pa'i dngos po dang / mi dge ba dang / kun du sbyor ba dang / log pa nyid dang / phyin ci log dang /mi dge bar sems bskyed pa'o/ /de la mi dge ba'i rtsa ba la gsum ni 'di ltar/ chags pa dang / zhe sdang dang / rmongs pa'o/ /'di rnams la gang zhe sdang ni lam gnyis kyis srab par byas te/ phyir mi 'ong ba'i lam gyis lhag ma med pa'i spong bar 'gyur ro/ /chags pa dang gti mug ni lam gsum gyis srab par byas te/dgra bcom pa'i lam gyis lhag ma med par spong bar 'gyur ro/ /'dod tshol la gsum ste 'di ltar/ 'dod pa'i tshol ba dang / srid pa'i tshol ba dang / tshangs par spyod pa'i tshol ba'o/ /de la tshangs par spyod pa'i tshol ba ni/ rgyun du zhugs pa'i 'bras bu'i lam gyis lhag ma med par spong ngo / /'dod pa'i tshol ba ni phyir mi 'ong ba'i lam gyis so/ /srid pa'i tshol ba ni dgra bcom pa'i lam gyis so/ /zag pa la bzhi ste/ 'di ltar/ 'dod pa'i zag pa dang / srid pa'i zag pa dang / lta ba'i zag pa dang / ma rig pa'i zag pa'o//de la lta ba'i zag pa ni rgyun du zhugs pa'i 'bras bu'i lam gyis spong ngo / /'dod pa'i zag pa ni/ phyir mi 'ong ba'i lam gyis so/ /srid pa'i zag pa dang ma rig pa'i zag pa ni dgra bcom pa'i lam gyis spong ngo / /mdud pa ni bzhi ste 'di ltar/ brnab sems kyi tshogs kyi mdud pa dang /gnod sems kyi tshogs kyi mdud pa dang / tshul khrims dang brtul zhugs mchog tu 'dzin pa'i tshogs kyi mdud pa dang / 'di ni bden zhes mngon par zhen pa'i tshogs kyi mdud pa'o/ /'di rnams la tshul khrims dang brtul zhugs mchog tu 'dzin pa'i tshogs kyi mdud pa dang 'di ni bden pa zhes mngon par zhen pa'i tshogs kyi mdud pa ni/rgyun du zhugs pa'i 'bras bu'i lam gyis spong ngo / /gnod sems tshogs kyi mdud pa ni phyir mi 'ong ba'i lam gyis so/ /brnab sems tshogs kyi mdud pa ni dgra bcom pa'i lam gyis spong ngo / /chu bo la bzhi ni 'di ltar/ 'dod pa'i chu bo dang / srid pa'i chu bo dang / lta ba'i chu bo dang / ma rig pa'i chu bo'o/ /sbyor ba la bzhi ni/ 'di ltar 'dod pa'i sbyor ba dang / srid pa'i sbyor ba dang / lta ba'i sbyor ba dang / ma rig pa'i sbyor ba'o/ /'di rnams ni zag pa bzhi bzhin du spong ba'o/ /nye bar len pa bzhi ni 'di ltar/ 'dod pa'i nye bar len pa dang / lta ba'i nye bar len pa dang / tshul khrims dang brtul zhugs nye bar len pa dang / bdag tu smra ba'i nye bar len pa'o/ /'di rnams la nye bar len pa gnyis ni rgyun du zhugs pa'i 'bras bu'i lam gyis spong ba'o/ /'dod pa'i nye bar len pa ni phyir mi 'ong ba'i lam gyis so//bdag tu smra ba'i nye bar len pa ni dgra bcom pa'i lam gyis so/ /'gro ba ma yin par bgrod pa ni bzhi ste/ 'di ltar/ 'dun pa las 'gro ba ma yin par bgrod pa dang / zhe sdang las 'gro ba ma yin par bgrod pa dang / 'jigs pa las 'gro ba ma yin par bgrod pa dang / gti mug las 'gro ba ma yin par bgrod pa'o/ /bzhi ka yang rgyun du zhugs pa'i 'bras bus spong ba'o/ /ser sna la lnga ni 'di lta ste/ gnas kyi ser sna dang / rigs kyi ser sna dang / rnyed pa'i ser sna dang / bsngags pa'i ser sna dang / chos kyi ser sna'o/ /thams cad ni phyir mi 'ong ba'i lam gyis spong ngo //sgrib pa ni lnga ste/ 'di ltar/ 'dod pa la 'dun pa dang / gnod sems dang / rmugs pa dang / gnyid dang / rgod 'gyod dang / the tshom mo/ /'di rnams la/ the tshom ni rgyun du zhugs pa'i lam gyis spong ba'o/ /'dod pa la 'dun pa dang / gnod sems dang 'gyod pa ni phyir mi 'ong ba'i lam gyis rab tu spong ngo //rmugs pa dang gnyid dang rgod pa ni dgra bcom pa'i lam gyis so/ /gnyis rtsod pa'i gzhi la drug ste 'di ltar/ khro ba dang / 'chab pa dang / phrag dog dang / g.yo dang / sdig pa'i 'dod pa dang / rang nyid kyi lta ba mchog tu 'dzin pa'o/ /'di rnams la g.yo dang sdig pa 'dod pa dang rang nyid kyi lta ba mchog tu 'dzin pa ni rgyun du zhugs pa'i 'bras bu'i lam gyis rab tu spong ngo //khro ba dang 'chab pa dang / phrag dog ni phyir mi 'ong ba'i lam gyis rab tu spong ngo / /bag la nyal ba la bdun ni 'di ltar/ 'dod pa'i 'dod chags bag la nyal dang / khong khro bag la nyal dang / nga rgyal bag la nyal dang / lta ba bag la nyal dang / the tshom bag la nyal dang / srid pa'i 'dod chags bag la nyal dang / ma rig pa bag la nyal lo/ /'di rnams la lta ba'i bag la nyal dang the tshom bag la nyal ni rgyun du zhugs pa'i 'bras bu'i lam gyis rab tu spong ba'o//'dod pa'i 'dod chags bag la nyal dang khong khro bag la nyal dag ni phyir mi 'ong ba'i lam gyis rab tu spong ba'o/ /nga rgyal bag la nyal dang srid pa'i 'dod chags bag la nyal dang ma rig pa bag la nyal ni dgra bcom pa'i lam gyis rab tu spong ngo / /'jig rten chos brgyad ni 'di lta ste/rnyed pa dang / ma thob pa dang / snyan pa dang / mi snyan pa dang / smod pa dang / bstod pa dang / bde ba dang / sdug bsngal lo/ /'di rnams la mi 'dod pa'i dngos po rnyed pa la sogs pa la zhe sdang ba ni phyir mi 'ong ba'i lam gyis spong ba'o/ /'dod pa'i dngos po rnyed pa la sogs pa la rjes su chags pa ni dgra bcom pa'i lam gyis rab tu spong ba'o//nga rgyal la dgu ni 'di lta ste/ nga ni mchog las kyang mchog go snyam pa'i nga rgyal dang / nga ni mchog dang 'dra ba'o snyam pa'i nga rgyal dang / nga ni mchog las dman pa'o snyam pa'i nga rgyal dang / nga ni mnyam pa las mchog go snyam pa'i nga rgyal dang /nga ni mnyam pa dang mnyam pa'o snyam pa'i nga rgyal dang / nga ni mnyam pa las dman pa'o snyam pa'i nga rgyal dang / nga ni dman pa las mchog go snyam pa'i nga rgyal dang / nga ni dman pa dang mnyam mo snyam pa'i nga rgyal dang / nga ni dman pa las dman pa'o snyam pa'i nga rgyal lo/ /nga rgyal dgu char yang dgra bcom pa'i lam gyis rab tu spong ngo //nyon mongs pa'i dngos po la bcu ni 'di ltar/ chags pa dang / zhe sdang dang / gti mug dang / nga rgyal dang / lta ba dang / the tshom dang / rmugs pa dang / rgod pa dang / ngo tsha mi shes pa dang / khrel med pa'o/ /'di rnams la lta ba dang the tshom dag rgyun du zhugs pa'i lam gyis rab tu spong ngo //zhe sdang ni phyir mi 'ong ba'i lam gyis so/ /lhag ma bdun ni dgra bcom pa'i lam gyis rab tu spong ngo / /mnar sems kyi dngos po ni bcu ste 'di ltar/ bdag gis don med pa spyad do zhes mnar sems skye ba dang / spyod do zhes mnar sems skye ba dang /spyod par 'gyur ro zhes mnar sems skye ba/ de bzhin du bdag gis mdza' sdug gi don ma yin pa spyad do/ /spyod do/ /spyod par 'gyur ro/ /bdag gis mi mdza' mi gcugs pa'i don spyad do/ /spyod do/ /spyod par 'gyur ro/ /gnas mal la yang mnar sems skye ba'o/ / mnar sems dngos po bcu char yang phyir mi 'ong ba'i lam gyis rab tu spong ngo / /mi dge ba'i las bcu ni/ 'di ltar/ srog gcod pa dang / ma byin par len pa dang / 'dod pas log par spyod pa dang / brdzun du smra ba dang / tshig rtsub po dang / dbyen dang / ngag kyal pa dang / brnab sems dang /gnod sems dang / log par lta ba'o/ /'di rnams la srog gcod pa dang ma byin par len pa dang / 'dod pas log par spyod pa dang brdzun du smra ba dang log par lta ba rnams ni rgyun du zhugs pa'i 'bras bu'i lam gyis rab tu spong ngo / /rtsub po dang / dbyen dang gnod sems rnams ni phyir mi 'ong ba'i lam gyis so//ngag kyal pa dang brnab sems rnams ni dgra bcom pa'i lam gyis rab tu spong ngo / /kun du sbyor ba bcu ni/ 'di ltar/ 'dod chags dang / khong khro dang / nga rgyal dang / lta ba dang / the tshom dang / tshul khrims dang brtul zhugs mchog tu 'dzin pa dang / srid pa'i 'dod chags dang /phrag dog dang / ser sna dang / ma rig pa'o/ /'di rnams la lta ba dang the tshom dang tshul khrims dang brtul zhugs mchog tu 'dzin pa'i kun du sbyor ba rnams ni rgyun du zhugs pa'i lam gyis rab tu spong ngo / /'dod pa'i 'dod chags dang / khong khro dang phrag dog dang ser sna kun du sbyor ba rnams ni phyir mi 'ong ba'i lam gyis so//nga rgyal dang srid pa'i chags pa ma rig pa'i kun du sbyor ba rnams ni dgra bcom pa'i lam gyis spong ngo / /log pa nyid ni bcu ste/ 'di ltar/ log par lta ba dang / log par kun du rtog pa dang / log pa'i ngag dang / log pa'i las kyi mtha' dang /log pa'i 'tsho ba dang / log pa'i rtsol ba dang / log pa'i dran pa dang / log pa'i ting nge 'dzin dang / log pa'i ye shes dang / log pa'i rnam par grol ba'o/ /'di rnams la log par lta ba dang brdzun du smra ba'i mtshan nyid log pa'i ngag dang log pa'i las kyi mtha' dang log pa'i 'tsho ba dang log pa'i ye shes dang log pa'i rnam par grol ba rnams ni rgyun du zhugs pa'i lam gyis rab tu spong ngo //log pa'i kun du rtog pa dang rtsub po dang dbyen gyi mtshan nyid log pa'i ngag rnams ni phyir mi 'ong ba'i lam gyis so/ /ngag kyal pa'i mtshan nyid log pa'i ngag dang log pa'i rtsol ba dang log pa'i dran pa dang log pa'i ting nge 'dzin ni dgra bcom pa'i lam gyis rab tu spong ngo //phyin ci log la bcu gnyis ni 'di ltar/ mi rtag pa la rtag go zhes pa'i 'du shes phyin ci log dang / sems phyin ci log dang / lta ba phyin ci log dang / de ltar sdug bsngal la bde ba'o zhes 'du shes phyin ci log dang /sems phyin ci log dang / lta ba phyin ci log dang / mi sdug pa la mdzes pa'o zhes 'du shes phyin ci log dang / sems phyin ci log dang / lta ba phyin ci log dang / bdag med pa la bdag go zhes pa 'du shes phyin ci log dang / sems phyin ci log dang /lta ba phyin ci log go/ /'di rnams la mi rtag pa la rtag pa zhes pa'i phyin ci log gsum dang / mi sdug pa la sdug pa zhes lta ba phyin ci log dang / sdug bsngal la bde ba zhes lta ba phyin ci log dang / bdag med pa la bdag go zhes lta ba phyin ci log rnams ni rgyun du zhugs pa'i lam gyis spong ngo //mi sdug pa la sdug par 'du shes pa dang sems phyin ci log pa ni phyir mi 'ong ba'i lam gyis so/ /sdug bsngal la bde ba zhes 'du shes phyin ci log dang sems phyin ci log dang / bdag med pa la bdag go zhes 'du shes phyin ci log dang sems phyin ci log rnams ni dgra bcom pa'i lam gyis rab tu zad par byed do//mi dge ba'i sems bskyed pa ni bcu gnyis te/ 'di ltar/ yid bde ba dang ldan zhing lta bar 'gyur ba dang ldan pa 'du byed las byung ba ma yin pa'i sems bskyed pa dang / 'du byed dang / bcas pa las byung ba'i sems bskyed pa dang /yid bde ba dang ldan zhing lta bar gyur pa dang mi ldan pa 'du byed las byung ba ma yin pa'i sems bskyed pa dang / 'du byed dang bcas pa las byung ba'i sems bskyed pa dang / btang snyoms dang ldan cing lta bar rtogs pa dang ldan pa 'du byed las byung ba ma yin pa'i sems bskyed pa dang / 'du byed las byung ba'i sems bskyed pa dang / btang snyoms dang ldan pa lta bar gyur pa dang mi ldan pa 'du byed las byung ba ma yin pa'i sems bskyed pa dang / 'du byed dang bcas pa las byung ba'i sems bskyed pa dang / yid mi bde ba dang ldan pa zhe sdang dang ldan pa 'du byed las byung ba ma yin pa'i sems bskyed pa dang /'du byed dang bcas pa las byung ba'i sems bskyed pa dang / rgod pa dang ldan pa'i sems bskyed pa dang / the tshom dang ldan pa'i sems bskyed pa'o/ /'di rnams la lta bar gyur pa dang ldan pa'i sems bskyed pa bzhi dang the tshom dang ldan pa'i sems bskyed pa dag ni rgyun du zhugs pa'i lam gyis rab tu spong ngo //yid mi bde ba dang ldan pa'i sems bskyed pa gnyis ni lam gnyis kyis bsrabs par byas te phyir mi 'ong ba'i lam gyis lhag ma med par spong ngo / /lta bar gyur pa mi ldan pa'i sems bskyed pa bzhi dang / rgod pa dang ldan pa'i sems bskyed pa dag ni lam gsum gyis bsrabs par byas te dgra bcom pa'i lam gyis ma lus par spong ngo / /so so'i skye bo dang thun mong ma yin pa'i snyoms par 'jug pa ni gnyis te/ 'di ltar/ 'bras bu snyoms par 'jug pa dang / 'du shes tshor ba 'gog pa'i snyoms par 'jug pa'o//de la dang po la ni dri ba bcu ste 'di ltar/ 'bras bu snyoms par 'jug gang yin/ /gang las 'bras bu snyoms par 'jug /de la snyoms par 'jug pa gang / /ci yi don du snyoms par 'jug /ci ltar snyoms par 'jug yid la byed pa ci/ bsam gtan pa de'i snyoms par 'jug pa'i rkyen du yin/gnas pa'i rkyen du yin/ ldang ba'i can du yin/ ci bsam gtan 'di 'jig rten pa'am 'jig rten las 'das pa'o zhe na/ de la 'bras bu snyoms par 'jug pa gang yin zhes pa/ dge sbyong gi 'bras bu'i sems mya ngan las 'das pa ma gtogs pa de ni 'bras bu snyoms 'jug zhes brjod do//gang las 'bras bu snyoms par 'jug pa zhes pa/ dge ba ma yin/ mi dge ba ma yin/ lam gong ma'i rnam par smin pa'i rang bzhin ma yin/ de'i phyir 'bras bu snyoms par 'jug pa'o/ /de la snyoms par 'jug pa gang zhe na/ dgra bcom pa dang phyir mi 'ong ba ste/'di gnyis kyis ting nge 'dzin yongs su rdzogs par byed pas so/ /ci'i don du snyoms par 'jug zhes pa mthong ba'i chos la bde bar gnas pa'i don du'o/ /de bzhin du'ang bcom ldan 'das kyis bka' stsal pa/ kun dga' bo gang gi tshe de bzhin gshegs pa mtshan ma thams cad yid la mi byed pas tshor ba rnams kyi 'ga' zhig 'gags nas/sems mtshan ma med pa'i ting nge 'dzin nye bar bsgrubs te gnas so/ /kun dga' bo de'i tshe de bzhin gshegs pa'i sku la ches reg par 'gyur ro zhes so/ /ci ltar snyoms par 'jug ce na/de dben par song ste/ 'bras bu snyoms par 'jug pa'i don du/ de dben par phyin te/ 'dug pa'am nyal nas sems bsdus te/ skye ba dang 'gag pa la rjes su lta ba dang por byas nas/ 'du byed rnams la rnam par lta'o/ /de'i tshe rigs la longs spyod pa'i ye shes gang yin pa'o//rigs longs spyod kyi ye shes de'i de ma thag tu mya ngan las 'das pa 'bras bu snyoms par 'jug pa la gtong bar byed do/ /gang dang gang la brten nas lam bsgoms par gyur pa de dang de la mnyam par bzhag ste 'bras bu snyoms par 'jug pa nyid du 'gyur ro/ /yid la byed pa ci zhes pa/'dus ma byas bdud rtsi'i dbyings zhi ba nyid yid la byed pa'o/ /bsam gtan pa de'i snyoms par 'jug pa'i rkyen du zhes pa/ bsam gtan gyi rkyen ni gnyis te 'di ltar/ mtshan ma thams cad yid la mi byed pa dang / mtshan ma med pa'i dbyings yid la byed pa'o/ / gnas pa'i rkyen du zhes pa/ gnas pa'i rkyen gsum ste/ 'di ltar/ mtshan ma thams cad yid la mi byed pa dang / mtshan ma med pa'i dbyings yid la byed pa dang / sngon gyi mngon par 'du byed pa'o/ /ldang ba'i rkyen zhes pa/ ldang ba'i rkyen gnyis te/ 'di ltar/ mtshan ma thams cad yid la byed pa dang /mtshan ma med pa'i dbyings yid la mi byed pa'o/ /ci snyoms par 'jug pa 'jig rten pa'am 'on te 'jig rten las 'das pa zhes pa 'jig rten las 'das pa yin te/ 'jig rten pa ni ma yin no/ /'du shes dang tshor ba 'gog pa'i snyoms par 'jug pa la dri ba bco lnga ni 'di ltar/'du shes tshor ba 'gog pa'i snyoms par 'jug pa gang yin de la snyoms par 'jug pa dang / snyoms par 'jug pa ma yin pa gang / stobs du dang ldan pas snyoms par 'jug /'du byed du zhig 'gags nas snyoms par 'jug /bsam gtan pa 'di'i sngon du bya ba du yin/ ci'i don du snyoms par 'jug /ci ltar snyoms par 'jug /de dag gi ldang ba ci ltar 'gyur/ sems gang gis ldang / langs nas sems ci la gzhol bar 'gyur/ reg pa du la reg par 'gyur/ /dang po 'du byed du zhig 'byung bar 'gyur/ ro dang 'du shes tshor ba 'gog pa tha dad pa'i rgyu ci/ /ci snyoms par 'jug pa de 'dus byas sam 'on te 'dus ma byas she na/'dir brjod par bya ste/ gang sems dang sems las byung ba'i chos rnams kyis 'jug pa med par gnas pa de ni 'du shes dang tshor ba 'gog pa'i snyoms par 'jug pa'o/ /de la snyoms par 'jug pa gang zhes pa/ dgra bcom pa dang phyir mi 'ong ba dag snyoms par 'jug go/ /'di dag gis ting nge 'dzin yongs su rdzogs par byas pas so/ /snyoms par 'jug pa ma yin pa gang zhe na/ so so skye bo dang rgyun du zhugs pa dang lan cig phyir 'ong ba dang gzugs med du skyes pa'o/ /de la so so'i skye bo ni mnyam par 'jog pa ma yin te/yul ma yin pas so/ /rgyun du zhugs pa dang lan cig phyir 'ong ba dag snyoms par 'jug pa ma yin te/ ting nge 'dzin gyi mi mthun pa'i phyogs nyon mongs pa rnams yang dag par bcad pa ma yin pas so/ /gzugs med par skyes pa ni snyoms par 'jug pa ma yin te/phyis ldang ba'i dngos po med pa'i phyir ro/ /stobs du dang ldan pas snyoms par 'jug ces pa/ stobs gnyis kyis te/ zhi gnas kyi stobs dang / lhag mthong gi stobs kyis so/ /de la zhi gnas kyi stobs kyis bsam gtan bzhi dang gzugs med pa'i snyoms par 'jug pa bzhi rnams dbang du 'gyur ba'o//lhag mthong gi stobs kyis rjes su lta ba bdun dbang du 'gyur ba'o/ /de la rjes su lta ba bdun ni 'di ltar/ mi rtag pa rjes su lta ba dang / sdug bsngal rjes su lta ba dang / bdag med pa rjes su lta ba dang / yid byung ba rjes su lta ba dang / chags pa bral ba rjes su lta ba dang /'gog pa rjes su lta ba dang / nges par spangs pa rjes su lta ba'o/ /de la zhi gnas kyi stobs ni bsam gtan gyi yan lag 'gog pa'i don du dang mi g.yo ba la mos pa'i don du'o/ /lhag mthong gi stobs ni 'jug pa rnams nyes dmigs su mthong ba'i don dang /mi 'jug pa rnams la mos pa'i don to/ /'du byed du 'gags nas snyoms par 'jug zhes pa/ 'du byed gsum 'gags nas snyoms par 'jug ste/ 'di ltar/ ngag gi 'du byed dang / lus kyi 'du byed dang / sems kyi 'du byed do/ /de la bsam gtan gnyis pa la snyoms par zhugs pa rnams kyi/ngag gi 'du byed rnam par rtog pa dang rnam par dpyod pa dag rgyun chad par 'gyur ro/ /bsam gtan bzhi pa la snyoms par zhugs pa rnams kyi/ lus kyi 'du byed dang dbugs dbyung ba dang dbugs 'jug pa dag rgyun chad par 'gyur ro/ /'du shes dang tshor ba 'gog pa la snyoms par zhugs pa rnams kyi sems kyi 'du byed 'du shes dang tshor ba dag 'gog par 'gyur ro//'di'i sngon gyi bya ba du yin zhes pa/ sngon gyi bya ba ni bzhi ste 'di ltar/ bcing ba gcig pa dang / rnam par 'tshe ba med pa dang / dus yongs su chad pa dang / las dang las ma yin pa la rnam par gzigs pa'o//de la bcing ba gcig pa zhes pa ni lhung bzed dang chos gos dag lus dang sdom pa gcig tu byin gyis rlob po/ /rnam par 'tshe ba med pa zhes pa ni/ sbyor ba gang dang gang gis lus 'di la nye bar gnod pa kun du 'byung bar ma gyur cig ces byin gyis rlob po//dus yongs su chad pa zhes pa ni/ lus kyi stobs yongs su gzhal nas dus yongs su gcad pa bgyis te gnas so/ /dus 'di srid 'das pa las ldang bar bya'o zhes so/ /las dang las ma yin pa rnam par gzigs pa zhes bya ba dus yongs su chad pa thob par dge 'dun gyi las dang las ma yin pa 'ga' zhig gi don du 'tshogs pa la gaN+DI sgrogs pa'i sgra des ldang bar bya'o zhes byin gyis brlab po//ci'i don du snyoms par 'jug ces pa/ mthong ba'i chos la bde bar gnas pa'i don du'o/ /mthong ba'i chos la bde bar gnas pa ni/ 'phags pa de rnams kyi ting nge 'dzin tshogs pa rnams shin tu mi g.yo bar bya ba'i phyir ram rdzu 'phrul rnam par bsgom pa'i don du snyoms par 'jug pa'o//ci ltar snyoms par 'jug ces pa 'gog pa'i don du 'gog pa'i mngon par 'dod pas de dag dben pa'i gnas su song ste/ 'dug pa'am nyal te sems bzhums nas/bsam gtan dang po la snyoms par 'jug go/ /langs nas de ma thag tu bsam gtan de dag la rnam par lta ste/ mi rtag pa dang sdug bsngal dang bdag med pa nas 'du byed btang snyoms kyi ye shes kyi bar du'o/ /de bzhin du bsam gtan gnyis pa dang / bsam gtan gsum pa dang /bsam gtan bzhi pa dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched la snyoms par zhugs te/ langs nas de ma thag tu snyoms par 'jug pa de la rnam par lta ste/ mi rtag pa dang sdug bsngal dang bdag med pa nas 'du byed btang snyoms pa'i ye shes kyi bar du'o//de nas de ma thag tu 'du shes med 'du shes med min skye mched la snyoms par 'jug go/ /de nas 'du shes med 'du shes med min gyi skye mched la lan gnyis lan gsum du sems bzhag ste/ sems kyi 'jug pa med cing 'gags pa'o//sems mi 'jug pa dang 'gags pa la/ 'du shes dang tshor ba 'gog pa la snyoms par 'jug pa zhes brjod do/ /de'i ldang ba ci ltar gyur zhes pa/ de ni 'di ltar/ bdag ldang bar bya'o zhes yid la byas pas so/ /'on kyang sngon du byas pa'i dus yongs su chad pa thob pa na ldang ba nyid do//sems gang gis ldang zhe na/ phyir mi 'ong ba'i 'bras bu'i sems kyis phyir mi 'ong bar ldang ngo / /dgra bcom pa'i 'bras bu'i sems kyis dgra bcom par ldang ngo / /langs nas sems ci la gzhol bar 'gyur zhe na/ dben pa la gzhol ba'o/ /reg par bya ba dag du la reg par 'gyur zhes pa/gsum la reg ste 'di ltar/ stong pa nyid dang / mtshan ma med pa dang / smon pa med pa'o/ /dang po 'du byed du 'byung zhes pa/ sems kyi 'du byed dang / de nas lus kyi 'du byed do/ /shi ba dang 'du shes med pa'i snyoms par 'jug pa bdag tha dad pa'i rgyu ci zhes pa/ / shi ro ni 'du byed gsum 'gags shing rgyun chad pa ste/ 'di ltar/ tshe yongs su zad pa dang / dro ba nye bar zhi ba dang / dbang po rnams kyi rnam 'gyur zhig pa'o/ /'du shes dang tshor ba 'gog pa'i snyoms par 'jug pa ni 'du byed gsum ma 'gags shing rgyun ma chad pa ste/'di ltar/ tshe yongs su ma zad pa dang / drod ma nyams pa dang / dbang po rnams rab tu dang ba'o/ /'di ni de dag tha dad pa'i rgyu'o/ /ci 'du shes tshor ba 'gog pa'i snyoms par 'jug pa 'dus byas sam yang na 'dus ma byas she na/ snyoms par 'jug pa de ni 'dus byas sam 'dus ma byas zhes brjod du med do//snyoms par 'jug pa de ni ci'i phyir 'dus byas zhes sam/ 'dus ma byas zhes brjod par bya ba ma yin zhe na/ gang gi phyir snyoms par 'jug pa de la ni 'dus byas kyi chos rnams mi srid pas dang / 'dus ma byas la ni snyoms par 'jug pa dang ldang bar shes par byar med pa'i phyir ro//de'i phyir snyoms par 'jug pa de 'dus byas zhes sam/ 'dus ma byas zhes brjod par bya ba ma yin no/ /'di ni 'gog pa'i snyoms par 'jug pa'i mtha'o/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las 'phags pa gnas brtan pa'i sde pa'i tshul lugs las 'phags pa'i bden pa la mkhas pa rnam par nges pa zhes bya ba le'u bco lnga pa'o// //'phags pa mang pos bkur ba'i sde pa'i lung las 'di ltar rnam par gzhag ste/ bag la nyal ma yin pa ni rgyu bzhis 'gyur te/'di ltar/ chos rnam par gzhag pa dang / mtshan nyid rnam par gzhag pa dang / khams kyi dbye ba dang / spang bya'i dbye ba las so/ /de la chos rnam par gzhag pa ni 'di ltar/ ma dad pa dang / ngo tsha ba med pa dang / sgyu dang / g.yo dang / ma brtags pa dang / rgod pa dang / bag med pa dang /rmugs pa dang / zhum pa dang / khrel med pa dang / ches 'dzin pa dang / snyom las dang / gnyid dang / phrag dog dang / 'gyod pa dang / 'chab pa dang / dregs pa dang / ser sna dang / mi bzod pa dang / khon du 'dzin pa dang / zas kyis rgyags pa ste nyer gcig go/ /mtshan nyid rnam par bzhag pa ni 'di ltar/de kho na nyid la lhag par mos pa med pa ni/ ma dad pa'o/ /gang zhig 'ang de kho na nyid ma yin pa la mos pa rab tu skyed kyang / de yang dman pa yin pas dad pa ma yin par shes par bya'o/ /mnga' bdag ma yin pa bzhin no/ /dge ba spyod pa skyed pa la dbang po ma yin pa'am/ nyon mongs pa can gyi spyod pa skyed pa la dbang phyug yin pas so/ /rang nyid la 'dzem pa med pa ni ngo tsha ba med pa'o/ /ngo tsha mi shes pa med par ni nyon mongs pa skye ba ma yin no/ /sgyu ni slu ba ste/ rang dang gzhan shin tu bsgyur ba'o/ /'di la rang bzhin gyi sems slu bar byed pa'o/ /bslu ba med pa la nyon mongs pas go skabs mi rnyed do//g.yo ni sems g.yo ba ste/ 'di ni rang nyid gya gyu can du gyur cing / gzhan yang gya gyu can du drang bar 'dod pa'o/ /drang pos 'gro ba'i rgyud la nyon mongs pa skye ba ma yin no/ /ma brtags pa ni/ yang dag par ma brtags par byed pa'o/ /kun du brtags nas byed pa'i rgyud la nyon mongs pa skye ba ma yin no//nye bar ma zhi ba'i sems ni rgod pa'o/ /nye bar zhi ba'i sems la nyon mongs pa skye ba yod pa ma yin no/ /bag med pa ni nyon mongs pa can gyi chos dang rjes su ldan pa'o/ /bag yod pa'i sems la nyon mongs pa skye ba ni med do/ / 'di rnams la rgyu la sogs pa lnga ni/ mtshungs par ldan pa dang / rab tu mi ldan pa'o/ /de la gang mtshungs par ldan pa de ni kun nas dkris pa dang / gang rab tu mi ldan pa de ni rnam par rig byed kyi rang bzhin dang / rnam par rig byed ma yin pa'i rang bzhin no/ /lnga gang zhe na 'di ltar/ sgyu dang / g.yo dang / gzu lums dang / rgod pa dang / bag med pa'o/ /gang thams cad du kun nas dkris pa'i sems la de rnams thams cad kyang yod pa'o/ /de ltar yang gang gi tshe gzhan slu bar byed pa de'i tshe gtso bor sgyu las bag la nyal ma yin pa'i mtshungs ldan thams cad kyang sgyu dang rjes su 'brel pas 'di dag kun nas dkris par 'gyur ba yin no//gang yang de'i tshe rab tu mi ldan pa lus dang ngag gi rig byed de yang sgyu zhes brjod do/ /rnam par rig byed de dag ni rnam par rig byed kyi rang bzhin no/ /rnam par rig byed 'di rnams kyi rjes su dang lhan cig tu gzhan slu bar byed pas/de dag gi rjes ni rnam par rig byed ma yin pa'i rang bzhin no/ /de bzhin du g.yo la sogs pa bzhi la brjod par bya'o/ /gang lus dang sems kyi zhen pa de ni rmugs pa'o/ /gnas ngan len zhes pa'i don to/ /de la gang sems kyi zhan pa de ni rnam pa gnyis te/nyon mongs pa can dang / nyon mongs pa can ma yin pa'o/ /de la nyon mongs pa can ni kun nas dkris pa'o/ /nyon mongs pa can ma yin pa ni gang lus kyi rnam par rig byed ma yin pa'i rang bzhin de'o/ /zhum pa ni zhan pa'i mtshan nyid de/ sems bkum pa'i ngo bo'o/ /zhan pa 'di ni dngos po gang la chags pa de dag rgud pa las phal cher skye'o//khrel med pa ni 'jig rten pa'i chos lugs la sogs pa la ltos pa med cing mi 'dzem pa ste/ sdig pa spyod pa la sogs pa la rig par byed pa'o/ /ches 'dzin pa ni lta ba mi gtong ba ste/ lta bar bgyis pa la sogs pa dam pa ma yin pa'i 'dzin pas mi gtong ba'o//snyom las ni las lci ba ste/ ldang ba lci ba nyid do zhes pa'i don te/ de yang rnam pa gnyis te 'di ltar/ gang sems kyi las ljid pa de ni nges par kun nas dkris pa'o/ /gang lus kyi rnam par rig byed zhan pa ni rnam par rig byed kyi rang bzhin no//gnyid ni sems sdud pa'o/ /de la gnyid ni 'di ltar/ sems dang bcas pa dang / sems dang mi ldan pa'o/ /de sems dang ldan pa'i gnyid la rnam pa gnyis te 'di ltar/ nyon mongs pa can dang / nyon mongs pa can ma yin pa'o/ /de la gnyid kyi bde ba la mngon par dga' bas gnyid du zhugs pa nyid kyi sems de ni nyon mongs pa can de kun nas dkris pa'o//gang las so sor rtog pa'i dran pa nye bar bzhag nas lus dang sems nye bar brtan pa'i don du gnyer ba de ni nyon mongs pa med pa'o/ /sems dang mi ldan pa'i gnyid ni rnam pa thams cad du sems dang sems las byung ba sdud par byed pa'o//de yang rnam pa gnyis te 'di ltar/ nyon mongs pa las byung ba dang / nyon mongs pa las byung ba ma yin pa'o/ /de la nyon mongs pa las byung ba ni/ gang nyon mongs pa can gyi sems 'gags pa'i de ma thag tu skyes pa'o/ /lhag ma ni nyon mongs pa las byung ba ma yin pa'o//phrag dog ni gzhan gyi phun sum tshogs pa mi bzod pa nyid do/ /'gyod pa la rnam pa gnyis ni 'di ltar/ lags pa byas pa la'am bdag gis ma legs par byas so zhes rjes su gdung ba dang bya ba ngan pa ma byas pa'am bdag gis ma legs pa byas zhes pa ni gang 'di dag ma byas pa zhes rjes su gdung ba'o//'di'i gnyis pa la rnam pa gnyis te 'di ltar nyon mongs can dang nyon mongs can ma yin pa'o/ /de la bya ba ma yin pa la byas pa dang bya ba ma yin pa byas pa la gang 'gyod cing yid la gcags pa de ni nyon mongs pa can kun nas dkris pa'o/ /gang bya ba ma yin pa byas pa dang bya ba yin pa ma byas pa la 'gyod pa yid la gcags pa de ni nyon mongs pa can ma yin zhing kun nas dkris pa ma yin pa'o//sdig pa yongs su sbed pa ni 'chab pa'o/ /nad med pa la sogs pas khengs pa ni dregs pa ste/ kun nas dkris pa'o/ /gang yang chang la sogs pa rnams kyis sems gzengs bstod pa'i mtshan nyid dregs pa ste/de ni rnam pa gnyis te 'di ltar/ nyon mongs pa can dang / nyon mongs pa can ma yin pa'o/ /de la nyon mongs pa can ni kun nas dkris pa dang mtshungs par ldan pa'o/ /nyon mongs pa can ma yin pa ni rnam pa gsum 'di ltar/ dge ba dang / mi dge ba dang / lung du ma bstan pa'o//des na dregs pa ni mtshungs par ldan pa'o/ /rab tu mi ldan pa'i dregs pa dang / dregs pa po'i rnam par rig byed kyi rang bzhin dang / rnam par rig byed ma yin pa'i rang bzhin no/ /ser sna ni nor yongs su gtong bar 'dod pa med pa'o/ /mi bzod pa ni sdug bsngal la sogs pa sran mi bzod pa'o//de yang rnam pa gnyis te 'di ltar/ grang ba la sogs pa'i sdug bsngal mi bzod pa nyid dang / gzhan gnod pa byed pa la mi bzod pa nyid do/ /'di dag la gzhan gnod pa byed pa la mi bzod pa ni kun nas dkris pa'o/ /gzhan ni ma yin pa'o/ /kho na 'dzin ni gzhan gnod pa byas pa sems la 'dzin pa'o//kha zas mangs pas myos pa ni zas kyis rgyags pa'o/ /de ni rnam pa gnyis te 'di ltar/ lus kyi rnam par rig byed kyi rang bzhin dang / sems las byung ba ni kun nas dkris pa'o/ /de rnams ni bag la nyal ma yin pa rnams kyi mtshan nyid do/ /khams dang spang bya'i rnam par gzhag pa ste/'di lta ste/ ma dad pa dang / ngo tsha med pa dang / sgyu dang / g.yo dang / ma brtags pa dang / rgod pa dang / bag med pa dang / dregs pa ste brgyad po rnams so/ /de la yang de rnams rnam pa lnga ste 'di ltar/ 'dod pa'i khams su sdug bsngal gegs dang /kun 'byung gegs dang / 'gog pa'i gegs dang / lam gyi gegs dang / bsgom pas spang bar bya ba'o/ /'di ni brgyad pa lnga ste bzhi bcu tham par 'gyur ro/ /de bzhin du gzugs kyi khams su brgyad pa lnga ste bzhi bcu tham pa'o/ /de bzhin du gzugs med pa'i khams su bzhi bcu'o/ /bzhi bcu la gsum ni brgya dang nyi shur 'gyur ro//khrel med pa dang ches 'dzin pa dang mi ston pa ste/ 'dod pa'i khams su 'di rnams la re re la lnga lnga ste lnga pa gsum ni bco lngar 'gyur ro/ /de bzhin du gzugs kyi khams su bco lngar 'gyur ro/ /gzugs med pa'i khams na ni med do/ /rmugs pa dang zhum pa dang snyom las dang gnyid dang phrag dog dang 'gyod pa dang ser sna dang mi bzod pa dang khon du 'dzin pa ste/dgu po 'di rnams ni 'dod pa'i khams kho na'o/ /de bzhin du lngar phye ste lnga pa dgu ni bzhi bcu rtsa lngar 'gyur ro/ /zas kyis rgyags pa'ang 'dod pa'i khams kyi bsgom pas spang bar bya ba kho na'o//bag la nyal ma yin pa ni khams dang spang bya'i dbye ba tha dad brgya dang dgu bcu rtsa drug tu 'gyur ro/ /yang gsungs pa/ ma dad ngo tsha med dang sgyu/ /g.yo dang rgod dang ma brtags dang / /bag med pa dang dregs pa rnams/ /rnam pa lnga ste khams gsum skyes/ /mi ston khrel med ches 'dzin rnams//'dod dang gzugs su rnam pa lnga/ /ser sna mi bzod 'gyod pa dang / /rmugs dang snyom las khon du 'dzin/ /phrag dog gnyid dang zhum pa rnams/ /rnam lnga 'dod pa'i khams su skye/ /zas kyis rgyags pa bsgom spang ngo / /yang [(]dag [,]bag [)]la nyal min de rnams rnam pa gsum ste/'di ltar/ thams cad du 'gro ba chen po dang / thams cad du 'gro ba chung ngu dang / sa chung ngu ba'o/ /de la thams cad du 'gro ba chen po ni bdun te/ 'di ltar/ ma dad pa dang / ngo tsha med pa dang / sgyu dang / g.yo dang / ma brtags pa dang / rgod pa dang / bag med pa'o/ /thams cad du 'gro ba chung ngu ni drug ste 'di ltar/gnyid dang / zhum pa dang / le lo dang / ches 'dzin pa dang / rmugs pa dang / khrel med pa'o/ /sa chung ngu ba ni brgyad de/ 'di ltar/ mi bzod pa dang / khon du 'dzin pa dang / phrag dog dang / 'gyod pa dang / dregs pa dang / ser sna dang / mi ston pa dang / zas kyis rgyags pa'o/ / yang spang bya las rnam pa lngar 'gyur te/ thams cad du 'gro ba chen po dang / thams cad du 'gro ba chen po lta bu dang / thams cad du 'gro ba chung ngu dang / thams cad du 'gro ba chung ngu dang mtshungs pa dang / sa chung ngu ba'o/ /de la thams cad du 'gro ba chen po ni/ bdun pa drug ste 'di ltar/ ma dad pa la sogs pa bag med pa'i mthar thug pa rnams 'dod pas bsdus pa sdug bsngal mthong bas spang bar bya ba bdun dang /kun 'byung mthong bas spang bar bya ba bdun dang / gzugs kyis bsdus pa sdug bsngal mthong bas spang bar bya ba bdun dang / kun 'byung mthong bas spang bar bya ba bdun dang /gzugs med pas bsdus pa sdug bsngal mthong bas spang bar bya ba bdun dang / kun 'byung mthong bas spang bar bya ba bdun te/ thams cad du 'gro ba chen po'o/ /de rnams nyid ni khams gsum gyi/ /'gog pa'i gegs dang / lam gyi gegs ni/ bdun pa drug ste thams cad du 'gro ba chen po lta bu'o//gnyid la sogs pa drug ni/ gang sdug bsngal gyi gegs dang / kun 'byung gi gegs rnams ni thams cad du 'gro ba chung ngu'o/ /'di nyid 'gog pa'i gegs dang / lam gyi gegs ni/ thams cad du 'gro ba chung ngu dang mtshungs pa'o/ /bsgom pas spang bar bya ba mi bzod pa la sogs pa brgyad/bsgom pas spang bar bya ba ma dad pa la sogs pa bdun dang / gnyid la sogs pa drug ni sa chung ngu ba'o/ /bag la nyal ming 'di rnams la/ /gang thams cad du 'gro ba chen po de rnams dngos su dang gang thams cad du 'gro ba chung ngu de ni dngos chags la sogs pa gzhan la brten nas/gegs kyi sgo nas bden pa'i gegs byed do/ /de la bden pa rnams kyi gegs kyi sgo bcu ni 'di ltar/ sdug bsngal bden pa'i gegs kyi sgo ni bzhi ste/ mi rtag pa la skur ba 'debs pa'i sgo dang / bdag med pa nyid la skur ba 'debs pa'i sgo dang / shes par bya ba nyid la skur ba 'debs pa'i sgo dang /lung du ma bstan pa nyid la skur ba 'debs pa'i sgo'o/ /kun 'byung gi gegs kyi sgo ni bzhi ste/ rgyu la skur ba smra ba'i sgo dang / las bdag gir bya ba la skur ba smra ba'i sgo dang / kun nas nyon mongs pa la skur ba smra ba'i sgo dang / rnam par byang ba la skur ba smra ba'i sgo'o//'gog pa'i gegs kyi sgo gcig ni/ /rtag pa nyid la skur ba smra ba'i sgo'o/ /lam gyi gegs kyi sgo ni gcig ste/ nges par 'byin pa la skur ba smra ba'o/ /mig gi rnam shes la sogs pa lnga char ni nyon mongs pa ldan pa ma yin zhing bskyed pa yang ma yin no/ /'on kyang lhan cig tu tshor ba la sogs pa dang ldan pas bskyed par 'gyur ba dang ldan par 'gyur ro//gang gi dbang po dang bcas pa'i rnam par shes pa skye ba na/ bden pa mthong bas spang bar bya ba'i nyon mongs pa sun phyung ba'i de ma thag pa'i rkyen du gyur pa de dang de'i rnam par shes pa ni bden pa mthong ba dang bsgom pa de dang de'i spang bya'o//so sor spyod pa yang spang bar bya ba gang gis rnam pa ci ltar sun phyung ba de ltar 'gyur ro/ /mig gi rnam par shes pa la sogs pa rnams kyi dag pa'am ma dag pa ni 'khor lo'i tshogs pas drug pa chen po las 'ongs pa ste/ gang gi phyir zhe na/ drug pa chen po 'di ni sa gzhir gyur pas so//de'i phyir mig gi dbang po la sogs pa'i gzugs can rnams kyang / drug pa chen po la ltos nas sbas pa'am sbas pa ma yin par 'gyur ro/ /'khor lo can gyi tshogs pa'ang ci ltar 'gyur ba de ltar bshad par bya ste/ de ltar yang / 'dod chags kyis chags par 'dod pa'i skyes bus mig gis gzugs mthong ba na/de'i mngon par tshogs pa dang po las byung ba'i mig gi rnam par shes pa ni/ rang bzhin lung ma bstan du 'gyur ro/ /skyes bu de 'dra ba'i mig gi rnam par shes pa de'i de ma thag tu rjes su spyod pa zhes pa rnam par shes pa skye'o//'di ci'ang ci 'dra ba zhes dmigs kyis 'dzin par byed pa ste/ rang bzhin lung du ma bstan pa nyid do/ /de ma thag tu so sor spyod pa zhes pa'i rnam par shes pa skye ste/ 'di zhes bya ba 'di lta bu zhes nges pa/ rang bzhin lung ma bstan nyid do/ /so sor spyod pa des gzugs de nges pa'i phyir/de ma thag tu drug pa chen po zhes bya ba 'am ming gzhan yid kyi rnam par shes pa zhes pa sdug pa'i mtshan mar 'dzin pa'i rnam par shes pa skye'o/ /skyes bu de ni drug pa chen po des gzugs de la chags par byas te nyon mongs pa 'dod chags zhes pa de dang lhan cig tu mig gi dbang po sbas pa ma yin pa mi ldan pa skye bar 'gyur ro//drug pa chen po ni sbas pa ma yin pa/ mtshungs par ldan pa dang rab tu mi ldan pa'o/ /skyes bu de'i drug pa chen po de ma thag tu de las gzugs de nyid mthong ba'am de dang 'dra ba mthong ba las/ drug pa chen po'i sa/ bdag po sun phyung ba'i phyir/mig gi rnam par shes pa nyon mongs pa can du 'gyur ro/ /sdom pa ma yin pa dang ldan pa'o/ /de nas de ma thag tu rjes su spyod pa de ni skye ba ma yin te/ gzugs nges pa'i phyir ro/ /so sor dpyod pa ni skye ste/ gzugs de nyid ni 'di yin no zhes dran pa tsam nye bar sad par byed do/ / nyon mongs pa can ma yin zhing sdom pa ma yin pa dang ldan pa'o/ /skyes bu de'i yang de nas de ma thag tu nyon mongs pa can sdom pa ma yin pa drug pa chen po rnams sngon bzhin du de thams cad dus ring du yang dang yang du rnam par shes pa 'khor lo 'byung ste/ 'khor lo ma zhig gi bar du'o/ /de bzhin du zhe sdang gis kyang sun 'byin par byed do//nga rgyal gyis kyang ngo / /gti mug gis kyang ngo / /the tshom gyis kyang ngo / /lta ba rnams kyis kyang ci ltar rigs par cha shas sun 'byin par byed do/ /ci ltar mig gi rnam par shes pa sun phyung ba de bzhin du bag la nyal bcus rna ba'i rnam par shes pa skal ba mthun pa'i sgra rnams sun 'byin par byed do//sna dang lce dang lus kyi rnam shes ni/ bsgom pas spang bar bya ba bag la nyal 'dod chags khong khro nga rgyal ma rig pa bzhis dri dang ro dang reg bya rnams la ci rigs par sun 'byin par byed do/ /gzhan gyis ni ma yin no/ /ci ltar 'khor lo can gyi tshogs pa'i nyon mongs pas/mig gi rnam par shes pa la sogs pa de rnams sun phyung bar gyur pa dang sdom pa ma yin pa skyes pa/ de bzhin du rnam par dag pa yang 'khor lo can gyi tshogs pa dge ba'i rtsa bas ci ltar rigs par sdom pa skye bar rig par bya'o/ /de la ci ltar rigs pa'i don ci zhe na/brjod par bya ste/ 'khor ba'i chags pa las ldog par 'dod pa'i skyes bu 'ga' zhig mig gis gzugs mthong ba na/ de'i mngon par tshogs pa dang po las byung ba mig gi rnam par shes pa ni rang bzhin lung ma bstan du 'gyur ro/ /skyes bu de'i mig gi rnam par shes pa las de ma thag tu rjes su spyod pa skye bar 'gyur te/'di ci 'am ci lta ba zhes spyi nas 'dzin par byed pa ste rang bzhin lung ma bstan nyid do/ /rjes su spyod pa'i de ma thag tu so sor spyod pa skye bar 'gyur te/ 'di zhes bya ba dang 'di lta bu zhes nges pa ni rang bzhin lung ma bstan nyid do//skyes bu de'i gzugs de nges pa'i phyir/ de nas de ma thag tu mi sdug pa'i mtshan mar 'dzin pa drug pa chen po skye bar 'gyur ro/ /mi sdug pa'i mtshan mar 'dzin pa'i drug pa chen po des gzugs de la chags pa dang bral bar byas te/ skyes bu des chags bral dang lhan cig tu mig gi dbang po sbas pa mi ldan pa skye bar 'gyur ro//drug pa chen pos yang sbas pa mtshungs par ldan pa dang rab tu mi ldan pa'o/ /skyes bu de'i drug pa chen po las de ma thag tu gzugs de nyid dam de dang 'dra ba'i gzugs mthong ba las/ sa'i bdag po'i drug pa chen po dag pa yin pa nyid pas/mig gi rnam par shes pa nyon mongs can ma yin pa dag par 'gyur ro/ /sdom pa dang ldan pa'o/ /de nas de ma thag tu rjes su spyod pa ni mi skye ste/ gzugs nges pa'i phyir ro/ /so sor spyod pa ni skye ste/ gzugs de nyid ni 'di yin no zhes dran pa tsam sad par byed pa nyon mongs can ma yin pa sdom pa dang ldan pa'o//skyes bu de'i de nas so sor spyod pa las yang drug pa chen po nyon mongs can ma yin pa sdom par gyur pa'o/ /de ltar sngon bzhin du yang nas yang du dus ring por yang rnam par shes pa'i 'khor lo 'khor te 'khor lo ma zhig gi bar du'o/ /de bzhin du mi sdang ba dang ma rmongs pa dang 'dod chags dang bral ba la yang sbyar bar bya'o//de bzhin lung du ma bstan pa la sbyar bar bya'o/ /yang gsungs pa/ 'khol lo bcing ba lnga rnams kyis/ /sa rnams dag dang ma dag phyir/ /drug pa las skyes dag ma dag /gzugs can rnams kyis sbas ma sbas//zhes so/ /mi dge ba dang dge ba dang lung du ma bstan pa'i 'khor lo'i 'jug pa rnam pa gsum gyi 'jig pa'i rgyu lnga ni/ 'di lta ste/ rnam pa spangs pa dang / dmigs pa btang ba dang / bzung ba 'grib pa dang / bzung ba 'phel ba dang / drug pa las drug par bgrod pa'o/ /de las sdug pa bsams nas mi rtag pa nyid bsams pa las rnam pa spangs pa'o//bud med kyi lus bsams nas skyes pa'i lus bsams pa las dmigs pa btang ba'o/ /mang po bsams nas nyung ngu bsams pa las bzung ba 'grib pa'o/ /chung ngu bsams nas chen po bsams pa las bzung ba 'phel ba'o//'khor lo 'jug pa la drug pa chen pos mi sdug pa bsams nas de ma thag nyid du drug pa chen po skye ba ni drug pa las drug par bgrod pa'o/ /de ltar 'khor lo zhig pa la'ang / yang gzugs de nyid mthong ba las rang bzhin gyi lung ma bstan mig gi rnam par shes pa 'byung ngo //de la rnam par spangs pa dang drug pa bgrod pa dag ni drug pa kho na la srid do/ /mig gi rnam shes la sogs pa lnga la ni ma yin no/ /dmigs pa btang ba dang / bzung ba 'grib pa dang / bzung ba 'phel ba rnams ni/ drug pa'am mig gi rnam shes la sogs pa lnga la srid pa yin no//'khor lo thams cad myur bar 'jig pa ni sems 'dun pa la yin no/ /'di lta ste/ dang po 'phrad pa las byung ba'i mig gi rnam shes dang / de nas rjes su spyod pa dang / de nas so sor spyod pa dang / de nas drug pa chen po dang / de nas yang mig gi rnam shes dang /de nas so sor spyod pa dang / de nas drug pa chen po'o/ /drug pa chen po'i dus de la 'khor lo 'jig go/ /sgrib pa lung ma bstan gyi 'khor lo yang / gzugs khams su/ dge ba'i yul la/ mi dge ba'i yul la/ lung du ma bstan pa'i yul la/ mi sgrib pa'i yul la/ sgrib pa'i yul rnams la/so so la sdug bsngal dang kun 'byung dang 'gog pa dang lam dang bsgom pas spang bar bya ba rnams ni/ 'dod chags la sogs pa rnams kyi sun 'byin pa sbyar bar bya'o/ /de bzhin du 'dod pa'i khams su sgrib pa'i 'khor lo ni 'jig tshogs la lta ba dang mthar 'dzin par lta ba dag gi sun 'byin pa'o//kun nas dkris pas sun phyung ba ni/ sgrib pa'i lung ma bstan/ mig gi rnam par shes pa yin no/ /so sor spyod pa yang ngo / /mi sgrib pa'i lung ma bstan gyi 'khor lo ni/ dge ba'i spyod pa la zhen pa kun du spyod pa nyid kyis sgrub pa zhan par 'gyur bzhin pa'i drug pa dang lhan cig tu mig gi dbang po'i sbas pa dang sgrib pa'i lung ma bstan skye'o//drug pa'i yang mi sgrib pa'i lung ma bstan dang dge ba skye'o/ /drug pa las de ma thag tu gzugs de nyid dam de dang 'dra ba mthong ba las mig gi rnam shes mi sgrib pa lung ma bstan skye'o//de nas bar med par so sor spyod pa yang mi sgrib pa nyid do/ /de nas drug pa mi sgrib pa'o/ /'di ni zad par 'gyur bzhin pa na/ drug pa nyid sgrub pa zhan par 'gyur ba dang 'phel bar gyur pa'o/ /dge ba nyid sgrub pa zhan par 'gyur bzhin pa ni mi sgrib pa'i lung ma bstan du 'gyur ro//yang gsungs pa/ da ltar 'di yi gsum pa la/ /myur du zad dang sbas pa dang / /dkar po nyams pa'i 'du byed ni/ /mang du mi sgrib par 'dod do/ /zhes so/ /de ltar yang / skyes bu 'ga' zhig 'khor ba las ldog par 'dod pas mig gis gzugs mthong ba las/ dang po mngon par 'dus pa las byung ba'i mig gi rnam par shes pa rang bzhin lung ma bstan yin no//de nas rjes su sbyor ba rang bzhin lung ma bstan nyid do/ /de nas so sor spyod pa rang bzhin lung ma bstan nyid do/ /de nas bzhi pa drug pa chen po dge ba'o/ /de nas mig gi rnam shes dge ba nyid do/ /de nas bdun pa drug pa chen po la dge ba'i 'du byed zhan du gyur pa la/dge ba'i sa chen po ba ni log cing / sdom pa 'ba' zhig 'jug pa nyid do/ /'di ni sgrub pa zhan pa yin no/ /sdom pa rjes su 'jug pa'i phyir mi sgrib pa'i lung ma bstan no/ /gang gi tshe'ang sdom pas kyang spang bar 'gyur ba de'i tshe rang bzhin lung ma bstan nyid du 'gyur ro//de bzhin du sgrub pa zhan pa'ang ngo / /gang gi tshe rang bzhin lung ma bstan sems gcig nyid las de ma thag tu ston par byed do/ /de nas yang 'di mi sgrib pa'i lung ma bstan du 'gyur ro/ /yang na sems gcig gis bar chod nas ston par byed na/ de nas dge ba'i sems nyid du 'gyur te/ mi sgrib pa'i lung ma bstan ni ma yin no/ /de yang stod par byed do zhes pa ni/ drug pa chen po 'phel bar 'gyur ba gang gi tshe rab tu bsngags pa nyid kyi gnas skabs thob par gyur pa'o/ /gang las yongs su nyams pa de las dge bar 'gyur ba ni/ drug pa chen po 'og ma min zhes pa'o//yang gang las sgrub pa zhan par gyur/ dmigs pa sgrub pa zhen pa ci zhe na/ brjod par bya ste/ bsgom pa'i rang bzhin gyi sems kyi spyod pa res 'ga' 'du byed zhan par gyur pa ni sgrub pa zhan pa'o/ /de yang drug pa chen po yid kyi rnam shes so/ /ming la dmigs pa dang /mtshan ma la dmigs pa dang / yongs su dag pa la dmigs pa sgrub pa zhan pa ste/ don la dmigs pa ni ma yin no/ /yang sgrub pa zhan pa ci yin zhe na/ sgrub pa de ni bsam gtan ma yin/ bsam gtan lam ma yin no/ /sgrub pa zhan pa de mtshan ma dang yongs su dag pa dag sgrub pa zhan par gyur pa ci srid du bsgom pa'i rang bzhin du'ang 'gyur ro//ming la dmigs pa sgrub pa zhan pa rang bzhin spyod pa can ni ma yin no/ /yang sgrub pa zhan pa bsam gtan ma yin bsam gtan lam ma yin pa ci'i don du zhe na brjod par bya ste/ snyoms par 'jug pa dang lam thams cad ni yongs su rdzogs pa'i bde ba'i dngos po dang ldan pa'i phyir ro//bde ba'i don yang dge ba'i don to/ /bde ba'i don ni rnam pa gnyis te/ 'di ltar/ yongs su rdzogs pa dang yongs su rdzogs pa ma yin pa'o/ /de la gang gi tshe yongs su rdzogs pa de'i tshe dge ba'o/ /gang gi tshe yongs su ma rdzogs pa de'i tshe/mi sgrib pa'i lung ma bstan du 'gyur ro/ /gang gi tshe gang du dmar ba'i dngos po yongs su rdzogs pa de la dmar po zhes brjod do/ /gang yongs su ma rdzogs pa de ni pad+ma'i dmar po zhes brjod do/ /gnyi ga dmar po yin pa de bzhin du dge ba dang mi sgrib pa'i lung ma bstan dag rtogs par bya'o//yang bde ba'i dngos po ma yin pa gang zhe na/ bde ba yin pa'i dngos po de dag gang du yongs su rdzogs pa de ni mi dge ba'o/ /gang du yongs su ma rdzogs pa de ni sgrib pa'i lung ma bstan pa'o/ /dper na bung ba dang zar ma'i me tog dag nag pa nyid tha dad pa de bzhin no/ /yang gang du bde ba'i dngos po med pa bde ba ma yin pa'i dngos po med pa de ru ci ltar zhe na/brjod par bya ste/ gang la gnyi ga yang med pa de ni rang bzhin gyi lung du ma bstan pa nyid du rig par bya'o/ /nam mkha'i ngang bzhin no/ /de la bde ba'i don ni ming gzhan dge ba'i don to/ / thams cad kun nas dkris pa ma yin zhing sdom pa yin no/ /bde ba ma yin pa'i dngos po nyid ni ming gzhan mi dge ba'o/ /thams cad kun nas dkris pa yin zhing sdom pa ma yin pa yin no/ /ci ltar 'khor lo 'di rnam pa bzhir bstan pa/ de bzhin du rang bzhin gyis lung ma bstan 'khor lo yang brjod par bya'o//de la rang bzhin lung ma bstan 'khor lo la yang sngon bzhin du rjes su spyod pa mi skye'o/ /ci ltar mig gi rnam shes kyi de bzhin du rna ba'i rnam shes la yang 'khor lo rnam pa lnga dang / 'khor lo 'jig pa brjod par bya'o/ /'di ltar/ dge ba'i 'khor lo dang / mi sgrib pa'i 'khor lo dang /mi dge ba'i 'khor lo dang / sgrib pa'i 'khor lo dang / rang bzhin lung ma bstan gyi 'khor lo/ /lus kyi rnam par shes pa ni sngon bzhin du rnam pa lnga'o/ /de la 'dod pa'i khams su sgrib pa spangs pa'o/ /gzugs khams su mi dge ba spangs pa'o/ /gnyi ga gcig tu byas pas rnam pa lngar 'gyur ro//de lta na yang / 'dod pa'i khams kyi dang gzugs kyi dang gzugs kyi khams kyi dag gcig tu byas te dge ba gcig go/ /'dod pa'i khams kyi dang gzugs kyi khams kyi dag gcig tu byas te mi sgrib pa ni gnyis pa'o/ /'dod pa'i khams kyi mi dge ba ni gsum pa'o//gzugs khams kyi sgrib pa ni bzhi pa'o/ /'dod pa'i khams kyi dang gzugs kyi khams kyi dag gcig tu byas te/ rang bzhin gyi lung ma bstan ni 'khor lo lnga pa'o/ /khams dang bcas pa'i reg bya la lus kyi rnam par shes pa de ni 'khor lo rnam pa lngar 'gyur ro/ /yid kyi rnam par shes pa la yang rnam pa lnga'o//de'i yang rjes su spyod pa dang so sor spyod pa'i rnam par gzhag pa ni yod pa ma yin te/ yid kyi rnam par shes pa'i rang rgyud can yin pa'i phyir dang / drug pa chen po nyid yin pa'i phyir ro/ /sna'i rnam shes ni sgrib pa spangs pas rnam pa bzhi'o/ /lce'i rnam shes ni/de bzhin du rnam pa lnga'o/ /de dag 'khor lo rnam bzhir bya/ /zhes so/ /yang gzugs la sogs pa la dge ba la sogs ci ltar 'gyur zhe na/ brjod bya ste/ gzugs la sogs pa rnams kyi dge ba la sogs pa rnams ni sems kyis byas pa ste/ de ltar yang rnam par rig byed gang zhig dge bas byas pa de rnams ni dge ba'o//de bzhin du rang bzhin gyi sems kyi skyed pa ni rang bzhin no zhes pa'i bar du'o/ /de la rnam par rig byed kyi gzugs dang / sgra ni dge ba la sogs pa rnam pa lnga'o/ /lhag ma gzugs dang sgra dang dri dang ro dang reg bya dang thams cad ni rang bzhin gyi lung ma bstan to//chos ni dge ba la sogs pa rnam pa lnga'o/ /yang gsungs pa/ gzugs dang sgra dang chos rnams la/ /dge la sogs pa rnam pa lnga/ /dri ro reg bya'i khams rnams ni/ rang bzhin lung du ma bstan pa'o/ /zhes so/ /'di ltar 'ang / rnam par shes pa'i tshogs lnga po 'di rnams kyi lus dang ngag gi rnam par rig byed dag gi dge ba la sogs pa ni drug pas byas pa'o//de bzhin du sdug bsngal la sogs pa mthong bas spang bar bya ba yang drug pas byas pa'o/ /gang gi phyir zhe na/ gang dag rnam par rig byed kyi gzugs dang sgra dag dang / rnam par shes pa'i tshogs rnams sdug bsngal mthong bas spang bar bya ba'i sems las skyes pa de rnams sdug bsngal mthong bas spang bar bya ba yin pas dang /de bzhin du bsgom pas spang bar bya ba'i sems las skyes pa ni bsgom pas spang bar bya ba dang zag pa med pa'i sems las skyes pa ni spang bar bya ba ma yin pa'i bar du'o//rnam par rig byed ma yin pa ni bsgom pas spang bar bya ba kho na'o/ /mig gi rnam par shes pa ni spang bya las rnam pa drug ste/ 'di lta ste/ sdug bsngal mthong bas spang bar bya ba dang / kun 'byung mthong bas spang bar bya ba dang / 'gog pa mthong bas spang bar bya ba dang /lam mthong bas spang bar bya ba dang / bsgom pas spang bar bya ba dang / spang bya ma yin pa'o/ /de bzhin du rna ba'i rnam shes dang / yid kyi rnam shes dang / chos rnams la so sor drug go/ /yang gsungs pa/ mig sna yid kyi sems chos la/ /yang min bzung bas drug yin no/ / zhes so/ /mig gi rnam par shes pa la sogs pa de rnams kyi yang / gang nyon mongs pa can dang rang bzhin ni de nyon mongs pa las 'byung ba zhes brjod do/ /de la rnam pa lnga ste 'di ltar/ sdug bsngal gegs nas bsgom pas spang bar bya ba'i bar du ci rigs par srid pa'o//yang gang nyon mongs pa ma yin pa de ni bsgom pas spang bar bya ba dang spang bya ma yin pa'o/ /sna dang lce dang lus kyi rnam par shes pa rnams ni rnam pa gnyis te 'di ltar/ bsgom pas spang bar bya ba dang / spang bya ma yin pa'o/ /yang gsungs pa/ sna sogs sems la rnam pa gnyis//zhes so/ /rnam par rig byed kyi gzugs dang / sgra'i phyogs gcig ni bsgom pas spang bar bya ba'o/ /yang gsungs pa/ bya min gzugs ni bsgom spang ngo / /zhes so/ /lus kyi rnam par rig byed dang ngag gi rnam par rig byed dag spang bya las rnam pa lnga'o/ /yang gsungs pa/ rnam par rig byed gang rnam lnga/ /zhes so/ /sdom pa ma yin pa yang spang bya las rnam pa lnga'o/ /de la gzugs can gyi dbang po lnga rnams kyi mi ldan pa nyid sdom pa ma yin pa'o/ /rnam par shes pa'i tshogs lnga rnams kyi dang / so sor spyod pa'i mtshungs par ldan pa nyid sdom pa ma yin pa'o/ / drug pa chen po yang mtshungs par ldan pa dang rab tu mi ldan pa'o/ /dri dang ro dang reg bya gsum/ /'di rnams bsgom pas spang bya nyid/ /ces so/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las 'phags pa mang pos bkur ba'i sde ba'i lung gi tshul las bag la nyal ma yin pa rnam par nges pa zhes bya ba le'u bcu drug pa'o// //bag la nyal yang rnam par gzhag pa bzhi ste/ 'di ltar/ chos rnam par gzhag pa dang / mtshan nyid rnam par gzhag pa dang / khams kyi dbye ba dang / spang bya'i dbye ba'o/ / de la chos rnam par gzhag pa ni bag la nyal bcu ste/ 'di ltar/ 'dod chags dang / khong khro dang / nga rgyal dang / ma rig pa dang / log par lta ba dang / rang lus la lta ba dang / mthar 'dzin par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom mo/ /mtshan nyid rnam par gzhag pa ni 'di lta ste/ 'dod chags ni zhen pa'i mtshan nyid do/ /khong khro ni zhe sdang ba'i mtshan nyid do/ /nga rgyal ni mthon po'i mtshan nyid do/ /ma rig ni kun du rmongs pa'i mtshan nyid do/ /log par lta ba ni rnam pa gnyis te/ 'di ltar/ sbyin pa med ces pa la sogs pa'i mtshan nyid yod pa 'jig par byed pa'i log par lta ba dang /gzugs mi rtag zhes pa la sogs pa phyin ci log tu rtogs pa'i log par lta ba'o/ /chos dang sems pa la bdag tu brtags pa ni rang lus la lta ba'o/ /gang zag la rtag pa dang rtag pa ma yin par brtags pa ni mthar 'dzin par lta ba'o//zag pa dang bcas pa'i chos la mchog 'ba' zhig tu rtog pa ni lta ba'i mchog tu 'dzin pa'o/ /zag pa dang bcas pa'i chos la dag par brtags pa ni tshul khrims dang brtul zhugs mchog tu 'dzin pa'o/ /the tshom ni rnam pa gnyis te/ bden pa la skur ba smra ba dang /rnam par bya ba la skur ba smra ba'o/ /de la bden pa la skur ba 'debs pa ni rnam pa bzhi ste/ 'di ltar/ sdug bsngal la skur ba 'debs pa dang / kun 'byung la skur ba dang / 'gog pa la skur pa dang / lam la skur ba 'debs pa'o/ /rnam par byang ba la skur ba ni rnam pa gsum ste/ 'di ltar/ sangs rgyas la skur ba 'debs pa dang / chos la skur ba smra ba dang / dge 'dun la skur ba smra ba'o/ /de la sangs rgyas dang dge 'dun la the tshom za ba ni sdug bsngal gyi gegs nyid do/ /chos la the tshom za ba ni 'gog pa'i gegs so/ /bden pa la skur pa yang so sor bzhi ste 'di ltar/ sdug bsngal gyi gegs dang /kun 'byung gegs dang / 'gog pa'i gegs dang / lam gyi gegs so/ /khams kyi dge bas rnam pa gsum ste 'di ltar/ 'dod pas bsdus pa dang / gzugs kyis bsdus pa dang / gzugs med pas bsdus pa'o/ /de la 'dod pas bsdus pa ni bcu ste/ 'di ltar/ gzugs kyis bsdus pa dgu ste/ de nyid khong khro spangs pa'o/ /gzugs med pas sdus pa dgu ste/ de nyid khong khro spangs pa'o/ /spang bya'i dbye bas bag la nyal rnam pa lngar 'gyur ro/ /sdug bsngal mthong bas spang bar bya ba dang / kun 'byung mthong bas spang bar bya ba dang / 'gog pa mthong bas spang bar bya ba dang /lam mthong bas spang bar bya ba dang / bsgom pas spang bar bya ba'o/ /de la 'dod pa'i khams su 'dod chags rnam pa lnga ste/ 'di ltar/ sdug bsngal kun 'byung 'gog pa lam bsgom pas spang bya'o/ /de bzhin du gzugs khams su rnam pa lnga'o/ / de bzhin du gzugs med khams su rnam pa lnga'o/ /lnga pa gsum ni 'dod chags bco lngar 'gyur ro/ /de bzhin du nga rgyal rnam pa bco lnga dang / de bzhin du rmongs pa bco lnga dang / bco lnga la gsum ni bzhi bcu rtsa lngar 'gyur ro/ /log par lta ba ni 'dod pa'i khams su rnam pa bzhi ste/ 'di ltar/sdug bsngal kun 'byung 'gog pa lam mthong bas spang bar bya ba'o/ /de bzhin du gzugs su rnam pa bzhi'o/ /de bzhin du gzugs med pa'i khams su rnam pa bzhi'o/ /'di ni log par lta ba bzhi pa gsum ste bcu gnyis so/ /de bzhin du lta ba mchog tu 'dzin pa bcu gnyis so//the tshom rnam pa bcu gnyis dang / bcu gnyis pa gsum ni sum cu drug go/ /tshul khrims dang brtul zhugs mchog tu 'dzin pa ni 'dod pa'i khams rnam pa gnyis te/ 'di ltar sdug bsngal dang lam mthong bas spang bar bya ba dang / de bzhin du gzugs khams su rnam pa gnyis dang /de bzhin du gzugs med pa'i khams su rnam pa gnyis so/ /'di ni tshul khrims brtul zhugs mchog tu 'dzin pa gnyis pa gsum ste drug go/ /de la gzugs med pa'i khams su tshul khrims med pas brtul zhugs 'ba' zhig tu rig par bya'o/ /rang gi lus la lta ba ni khams gsum du lus dam par lta ba gsum ni sdug bsngal mthong bas spang bya kho na'o//de bzhin mthar 'dzin par lta ba gsum mo/ /gnyis po 'di las khams gsum du drug tu 'gyur ro/ /zhe sdang ni 'dod pa'i khams su rnam pa lnga ste/ 'di ltar/ sdug bsngal kun 'byung 'gog pa lam bsgom pas spang bar bya ba'o//de ltar bag la nyal de rnams ni khams dang spang bya'i dbye bas phye ba na dgu bcu rtsa brgyad du 'gyur ro/ /yang bag la nyal rnam pa gsum ste 'di ltar/ thams cad du 'gro ba chen po dang / thams cad du 'gro ba chung ngu dang / sa chung ngu ba'o/ /kun du 'gro ba chen po ni gti mug ste/khams re re la spang bya'i dbye ba tha dad pa rnam pa lnga'o/ /kun du 'gro ba chung ngu ni drug ste/ 'di ltar/ log par lta ba dang / rang lus la lta ba dang / mthar 'dzin par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom mo//sa chung ngu ba ni gsum ste/ 'di ltar/ 'dod chags dang / khong khro dang / nga rgyal lo/ /yang gsungs pa/ kun 'gro chen po rmongs pa'o/ /yid gnyis dang ni lta ba lnga/ /kun 'gro chung ngu'o lhag ma ni/ /nyon mongs chung ngu'i sa pa'o/ /zhes so/ /yang rnam pa lnga ste/ 'di ltar/ thams cad du 'gro ba chen po dang / thams cad du 'gro ba chen po dang mtshungs pa dang / thams cad du 'gro ba chung ngu dang / thams cad du 'gro ba chung ngu lta bu dang / sa chung ngu ba'o/ /gang kun du 'go ba nyid du gsungs pa/ khams gsum gyi sdug bsngal gyi gegs dang kun 'byung gi gegs dag bag la nyal de ni kun du 'gro ba chen po nyid do//bag la nyal de nyid 'gog pa'i gegs dang lam gyi gegs dag ni kun du 'gro ba chen po lta bu'o/ /gang kun du 'gro ba chung ngu gsungs pa/ lta ba lnga dang the tshom de ni sdug bsngal gyi gegs dang kun 'byung gi gegs dag ni kun du 'gro ba chung ngu'o//de nyid 'gog pa'i gegs dang lam gyi gegs ci ltar srid pa ni kun du 'gro ba chung ngu lta bu'o/ /'dir ci ltar srid pa'i don ci zhe na/ brjod par bya ste/ rang lus la lta ba dang mthar 'dzin par lta ba dang tshul khrims dang brtul zhugs mchog tu 'dzin pa zhes pa lta ba gsum ni thams cad du yod pa ma yin pas thams cad du 'gro ba lta bu zhes pa'i don to//khams gsum gyi bsgom pas spang bar bya ba ma rig pa dang / 'dod pa'i khams su 'dod chags dang zhe sdang dang nga rgyal rnams sdug bsngal dang kun 'byung dang 'gog pa dang bsgom pas spang bar bya ba nyid kyis rnam pa lnga'o/ /gzugs kyi khams su 'dod chags dang nga rgyal dag de bzhin du rnam pa lnga'o//de bzhin du gzugs med pa'i khams su rnam pa lnga'o/ /'di rnams ni sa chung ngu ba'o/ /yang gsungs pa/ kun du 'gro bar gsungs de gang / /kun 'gro chung ngu dang bcas pa/ /de dag sdug bsngal rgyu mthong bas/ /spang byar ci ltar gsungs shes bya//de 'dir 'gog pa'i gegs dang ni/ /lam gegs ci ltar srid pa rnams/ /kun 'gro la sogs lta bu'o/ /lhag ma gang de sa chung ba/ /zhes so/ /yang 'di rnams rnam pa lngar ci ltar gzhag par bya zhe na/ brjod par bya ste/ gang las de rnams kyi byed pa rnam pa lnga ste/yul chen po dang / yul chen po dang 'dra ba dang / yul chung ngu dang / yul chung ngu dang 'dra ba dang / chung ngu ba'o/ /yul kun du 'gro ba la sogs pa de rnams kyi mtshan nyid brjod par bya ste/ thams cad du 'gro ba chen po rnams ni chen po nyid rnam pa bzhi ste/ 'di ltar/ dmigs pa chen po nyid dang / rgyu chen po nyid dang / bag la nyal ba chen po nyid dang / kun du ldan pa chen po nyid do/ /de la thams cad du 'gro ba chen po ni/ shes bya thams cad kyang dmigs par byed pas 'di'i dmigs pa chen po nyid do/ /thams cad du 'gro ba chen po ni/ khams mthun pa dang skal ba mthun pa dang mi mthun pa rnams kyi rgyur gyur pa de ni rgyu chen po nyid do/de thams cad du rjes su nyal bar byed pas 'di ni bag la nyal chen po nyid do/ /thams cad du 'gro ba ni skal ba mthun pa thams cad kyis kyang kun du sbyor bar byed pas 'di ni kun du ldan pa chen po nyid do/ / byed pa chen po nyid rnam pa bzhi dang ldan pa 'dis na/ rmongs pa drug ni kun du 'gro ba chen po ste/ 'di ltar/ 'dod pa ru sdug bsngal gegs dang / kun 'byung gegs dang / gzugs su sdug bsngal gegs dang / kun 'byung gegs dang / gzugs med pa la sdug bsngal gegs dang kun 'byung gegs so//thams cad du 'gro ba chung ngu'i bag la nyal rnams ni chen po nyid rnam pa bzhi ste 'di ltar/ dmigs pa chen po nyid dang / rgyu chen po nyid dang / bag la nyal ba chen po nyid do/ /kun du ldan pa chen po nyid med pas thams cad du 'gro ba chung ngu zhes brjod do/ /ma rig pa 'ba' zhig gi kun du ldan pa ste/phan tshun ni ma yin no/ /thams cad du 'gro ba chen po lta bu dang thams cad du 'gro ba chung ngu lta bu rnams kyi ni chen po nyid ni gnyis te/ 'di ltar/ khams gsum pa dang skal ba mthun pa dag gi rgyu chen po nyid dang / bag la nyal ba chen po nyid do/ /ma rig pa ni chen po nyid gnyis te/'di ltar dmigs pa med pa chen po nyid dang / kun du sbyor ba chen po nyid do/ /lta ba rnams dang the tshom dag ni chen po nyid gcig ste/ 'di ltar/ dmigs pa chen po nyid do/ /de nas 'di ni 'gog pa dang / lam gegs rnams ni de lta bu'o/ /de la ma rig pa ni khams gsum gyi 'gog pa dang lam gyi gegs dag thams cad du 'gro ba chen po lta bu'o//rang lus la lta ba dang mthar 'dzin par lta ba dang tshul khrims dang brtul zhugs mchog tu 'dzin pa ces pa lta ba gsum dang / the tshom dag 'gog pa dang lam gyi gegs ni de dang 'dra ba ste/ thams cad du 'gro ba chung ngu de dang mtshungs pa'o//sa chung ngu ba'i bag la nyal rnams ni/ /chen po nyid rnam pa bzhi ste/ khams mthun pa skal ba mthun pa la'o/ /sa cung zhig pa de yang / khams gsum gyi bsgom pas spang bar bya ba ma rig pa dang 'dod chags dang nga rgyal rnams 'dod pa'i khams su sngon bzhin du rnam pa lnga'o//gzugs khams dang gzugs med pa'i khams su sngon bzhin du rnam pa lngar rig par bya'o/ /bag la nyal ma yin pa rnams ni chen po nyid gsum ste/ 'di ltar/ dmigs pa chen po nyid dang / rgyu chen po nyid dang / kun du ldan pa chen po nyid do/ /gang gi phyir de ni gang du rjes su nyal bar mi byed cing /kun nas dkris pa tsam nyid yin pa'i phyir ro/ /yang gsungs pa/ thams cad la ni dmigs pa dang / /rang gi khams kyi rgyu nyid dang / /rang la rjes su nyal nyid dang / /skal mthun kun gyi sbyor ba ni/ /kun 'gro chen po'i mtshan nyid ni/ /kun du 'gro ba chung ngu ni//de ma thag tu rnam pa gsum/ /kun du sbyor ba med shes bya/ /'dra ba rnams dang chung rnams kyi/ /thams cad skal ba mnyam nyid de/ /ma rig tsam dang ldan pa nyid/ /rgyu don bag la nyal 'don dang / /rang gi skal la sngon bzhin gnyis/ /'dod chags la sogs gsungs rnams kyi//mtshan nyid de rnams nyid yin no/ /zhes so/ /nyon mongs pa'i bdud kyi sde tshogs de rnams ni gang 'gro ba ma lus pa'i kun nas nyon mongs pa'i rgyu'o/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las 'phags pa mang pos bkur ba'i sde ba'i lung gi tshul las bag la nyal rnam par nges pa zhes bya ba le'u bcu bdun pa'o// //de ltar grol ba 'dod pas nyon mongs pa rnams kyi mtshan nyid dang rnam pa dang rgyu shes pas/ bde ba 'bad pa med pa la sogs pa rnam par bsal bar byas te/rnam pa mi ldan pa'i bag la nyal rnams med par byed pa'i rgyu la 'bad pa brtsam par bya'o/ /ci'i phyir zhe na/ gang las sgrib pa ma lus pa rnam par bsal yang / rnam par mi ldan pa'i bag la nyal dang ldan par gyur na/ khams gsum pa'i las rnams rgyas par gyur pa las/yang srid skye ba la nus pa can du 'gyur ro/ /de ltar yang / srog chags 'di rnams rgyu yi 'khor lo gnyis kyis yang dag ldan pa las/ /sdug bsngal rang bzhin 'khor ba'i shing rta nye bar sdod pa med par bskyod/ /'di lta ste/ nyon mongs pa'i 'khor los dang / nyon mongs pa las skyes pa'i las kyi 'khor los so//yang gsungs pa/ de rnams yod las 'phel 'gyur ba'i/ /las gang las ni 'jigs pa 'byung / /'khor lo gnyis kyis rtag tu ni/ /sdug bsngal rang bzhin shing rta 'byung / /zhes so/ /nyon mongs pa'i 'khor lo ni skyes bu byed pas ma tshang bar byed nus te/las kyi 'khor lo rnams yin no/ /las kyi 'khor lo yang skye ba sngon ma yin/ mngon par 'du byed pa rang nyid rnam par smin pa las mi tshang bar 'gyur ro/ /zag pa dang bcas pa'i rgyu dang 'bral bas gsar du skye bar mi 'gyur ro/ /de ni sdug bsngal gyi mtha' nyid do/ / de la nyon mongs pa'i rgyu/ las la rnam pa gsum ste/ 'di lta ste/ bsod nams dang / bsod nams ma yin pa dang / mi g.yo ba'o/ /de la bsod nams ma yin pa ni/ 'dod pas bsdus pa'i nyon mongs pa can la rnam pa gsum ni 'di ltar/ lus kyi dang / ngag gi dang / sems kyi'o/ /'di ni bsod nams ma yin pa'i las kyi tshul mdor bsdus pa'o//de la bsod nams ma yin pa ni mi gtsang ba dang ma dag pa dang mi dge ba'o/ /bsod nams ni rnam pa bzhi ste/ 'di ltar/ 'dod pa'i khams pa dang / gzugs kyi khams pa'o/ /'dod pas bsdus pa'i las la rnam pa gnyis ni 'di lta ste/dge ba'i las dang sgrib pa ma yin pa'i las so/ /gzugs kyis bsdus pa yang gnyis te/ 'di lta ste/ dge ba dang / sgrib pa ma yin pa'o/ /'di gnyi ga yang sgom pa'i rang bzhin te/ gang na dbugs 'byung 'jug yod pa na yod do/ /'di ni bsod nams kyi las kyi tshul mdor bsdus pa'o//bsod nams ni gtsang ba dang / dag pa dang dge ba'o/ /gang na sgom pa'i rang bzhin gyi las dbugs 'byung 'jug gi dngos po med pa de ni mi g.yo ba'i las so/ /'di ni mi g.yo ba'i las kyi tshul mdor bsdus pa'o/ /spyod par bya ba med pa'i mi g.yo ba'i las so//yang gsungs te/ bsod min bsod nams mi g.yo ba/ /las de rnam pa gsum du 'dod/ /dbugs dang bcas dang mnyam gzhag dang / /dag pa gang 'di bsod nams so/ /'byung dang 'jug las rnam par grol/ /bsgom pa'i rang bzhin mi g.yo ba'o/ /zhes so/ / yang de ni rnam pa lnga ste/ 'di lta ste/ sdug bsngal gyis bsdus pa dang / kun 'byung gegs dang 'gog pa'i gegs dang / lam gyi gegs dang / bsgom pas spang bar bya ba'o/ /bsod nams ma yin pa dang bsod nams dag gi rgyu ni rnam par shes pa'i tshogs drug ka'o/ /'di lta ste/ mig gi rnam par shes pa nas yid kyi rnam par shes pa'i bar du'o//mi g.yo ba'i rgyu ni yid kyi rnam par shes pa kho na'o/ /de la lus kyi bsod nams ma yin pa ni rnam pa bzhi ste/ 'di lta ste/ srog gcod pa dang / ma byin par len pa dang / 'dod pas log par spyod pa dang / ma bsdus pa'o/ /ngag gi rnam pa bzhi ni 'di lta ste/brdzun du smra ba dang / dbyen dang / tshig rtsub dang / ngag kyal pa'o/ /yid kyi las la rnam pa gsum ni 'di lta ste/ brnab sems te 'dod pa'i mtshan nyid 'dod pas bsdus pa dang mtshungs par ldan pa'i sun phyung ba'i sems pa'o/ /gnod sems te zhe sdang gi mtshan nyid kyi mtshungs par ldan pas sun phyung ba'i sems pa'o//log par lta ba ste/ rmongs pa'i mtshan nyid kyis mtshungs par ldan pa'i sun phyung ba'i sems te yid kyi las so/ /de skad du yang / srog gcod pa dang rku ba dang / /'dod log g.yem dang rnam 'tshe ba/ /brdzun dang dbyen dang tshig rtsub dang //dgos pa med pa'i brjod pa dang / /brnab sems dang ni gnod sems dang / /log lta de rnams bsod nams min/ /zhes so/ /yang ni/ 'dod khams kyis bsdus nyon mongs can/ /lus ngag yid ni bsod min no/ /zhes so/ /de la lus kyi rnam par rig byed srog gcod pa ni mtshan nyid lnga dang ldan pa'o//'di lta ste/ rang las gzhan yin pa dang / sems can yin zhing sems can min pa ma yin pa dang / sems can du 'du shes pa yin pa dang / bsad pa'i ched du spangs pa dang / shi bar gyur pa'o/ /srog gcod pa ni gsod pa po'i lus kyi rnam par rig byed do//yang gsungs pa/ gzhan gyur sems can der 'du shes/ /spangs dang gang tshe 'dir 'das pa'o/ /zhes so/ /lus kyi rnam par rig byed na/ /byin par len pa ni mtshan nyid lnga nyid de/ 'di lta ste/ gzhan gyi nor du gyur pa dang / /gzhan nor du 'du shes pa min pa dang /rku ba'i sems skyes pa dang / g.yo las g.yos pa dang / bdag gir byas pa'o/ /yang gsungs pa/ gzhan nor de blo rku sems dang / /'phos dang bdag gir byas pa'o/ /zhes so/ /'dod pas log par g.yem pa la rnam pa gsum ni 'di lta ste/ bgrod bya min pa la mngon par bgrod pa'i 'dod pas log par spyod pa dang /bgrod bya min la ci 'gro bya'am 'gro bya min zhes the tshom za zhing / gang su dag rung zhes/ bgrod bya ma yin pa nyid la mngon par bgrod pa'i 'dod pas log par g.yem pa'o/ /gzhan gyi bud med dang skyes pa dang ma ning dang /rang gi chung ma yang lus las skyes pa las yan lag gzhan du yan lag ma yin pa la mi tshangs par spyod pa ste/ bshang ba'i lam la sogs par mngon par bgrod pa'i 'dod pas log par spyod do/ /yang gsungs pa/ bgrod bya min dang sems gnyis dang ni gnas spangs pa'o/ /zhes so//ma bsdus pa ni khros pas sam dregs pas gsad pa'i bsam pa med par sems can rnams la gnod par byed pa'o/ /de ni rnam pa mang ngo / /'di lta ste/ sems can gzhan la brdeg pa dang / /'jog pa dang / 'jar ba dang / rkang pa dang lag pa gcod pa dang / shing gdos dang lcags sgrog la sogs pas 'ching ba dang /btson rar 'dzud pa dang / chang 'thung ba dang / chang skyed pa dang / chang 'tshong ba dang / chang sbyin pa gtong ba dang / phabs byed pa dang / srog chags 'tshong ba dang / srin bu'i sbubs 'tshong ba dang / rgya skyegs 'tshong ba dang / ma btags par til dang yungs kar 'tshong ba dang /bgrod bya la mi tshangs par spyod pa dang / gar dang / glu dang / sil snyan dang / rgod pa sgreg pa dang / 'tshong ba dang / rkyal pa dang / sdang ba'i sems kyis gdos dang sgrog la sogs pa sbyin pa dang / mi tshangs par spyod pa'i bsam pas bud med sbyin pa dang / mi tshangs par spyod pa'i bsam pas rang gi bu mo sbyin pa dang /log par lta ba can nam/ gzhan la log lta gsal bar byed pa'i bstan bcos sbyin pa gtong ba'am 'dri ba'am bshad pa la sogs pa dang / bstan bcos de la yang dag par 'jog pa'o/ /gang cung zad de'i las kyis yongs su 'gyur ba de thams cad ni ma bsdus pa'i las so//brdzun du smra ba'i gzhi la bzhi ni 'di lta ste/ mig gis mthong ba dang / rna bas thos pa dang / sna lce lus kyis bsnoms myangs reg 'dod pa dang / yid kyis rnam par shes pa'o/ /brdzun smra ba la rnam pa bcu gnyis ni 'di lta ste/ mthong zhing mthong bar 'du shes la ma mthong zhes smra ba dang /mthong zhing mthong bar 'du shes la yid gnyis smra ba dang / mthong zhing brjod do ma mthong bar 'du shes te mthong zhes smra ba dang / yid gnyis smra ba dang / ma mthong zhing the tshom za ba mthong ba smra ba dang / ma mthong ba smra ba dang / mthong ba la yang thos zhes pa smra ba dang / mthong ba la 'dod par smra ba dang /mthong ba la rnam par shes pa smra ba dang / thos la yid gnyis smra ba dang / 'dod la yid gnyis smra ba dang / rnam par shes pa la yid gnyis smra ba'o/ /de rnams las bzlog pas yang brdzun smra ba rnam pa bcu gnyis ni 'di lta ste/ ma mthong la ma mthong bar 'du shes shing mthong ba smra ba dang /the tshom smra ba dang / ma mthong zhing brjed de mthong bar 'du shes shing ma mthong ba smra ba dang / the tshom smra ba'o/ /ma mthong la the tshom za zhing ma mthong ba smra ba dang / mthong ba smra ba dang / ma mthong ba thos pa smra ba dang / 'dod pa smra ba dang / rnam par shes la smra ba dang / ma mthong la yid gnyis smra ba dang /'dod pa la yid gnyis smra ba dang / rnam par shes pa la yid gnyis smra ba'o/ /des na mthong ba'i rten la brdzun ni smra ba nyer bzhir 'gyur ro/ /de bzhin du thos pa la rten pa'i nyer bzhi dang / 'dod pa la brten pa nyer bzhi dang / rnam par shes pa la brten pa'i nyer bzhi'o//nyi shu bzhi pa bzhi ste brdzun du smra ba dgu bcu rtsa drug tu 'gyur ro/ /dbyen ni gang dag mdza' bdag bden pas 'byed pa nye bar sgrub pa'i ngag go/ /gnad 'joms pa'i ngag ni rtsub po'o/ /ngag gsum po de las rnam par grol ba/ gang nyon mongs pa can gyi ngag de ni ngag kyal pa'o//yang gsungs pa/ 'du shes phrog dang 'byed pa dang / /'joms dang nyon mongs can gyi sems/ /ngag ni rnam pa bzhi yin no/ /zhes so/ /yang rnam pa gzhan gyis srog gcod pa la sogs pa rnams rnam pa gsum ni/ de la srog gcod pa ni rnam pa gsum mo//'di lta ste/ srog gcod pa'i bsam pa dang / srog gcod pa'i phyir gzhan la bka' bsgo ba dang / srog gcod pa nyams su len pa'o/ /de la srog gcod pa'i bsam pa la rnam pa gsum mo/ /'di lta ste/ srog gcod par 'dod pa dang / srog gcod pa byed du 'jug par 'dod pa dang /gzhan gyis srog gcod par byas pa la yang dag par mgu ba'o/ /de ltar yang / srog gcod pa gsad par bya'o zhes 'dod pa tsam gyi sems bskyed pa'o/ /de'i sems de dang lhan cig tu srog gcod pa la mi ldog pa skye ste/ de nas kun du mi dga' ba'i bar du ni nyin mo dang mtshan mo ru nye bar skye ba'i ngo bo mi dge ba dang rjes su 'brel pa'i rgyun gyi rang bzhin rab tu 'jug go//byed du 'jug par 'dod pa yang 'di lta ste/ gzhan gyis srog gcod du 'jug par bgyi'o zhes sems bskyed pa'o/ /'di yang sngon bzhin du ldog pa ma yin pa nyin mtshan du'o/ /gzhan gyis byas pa la mgu ba ni/'di lta ste/ kha cig 'dis srog gcod zhes mthong ba'am thos pa na/ gang las bsad pa 'di ni legs pa byas so zhes de la de las skyes pa'i mgu ba skye'o/ /'di yid sngon bzhin du mi spong ba ma yin pa nyin mtshan du'o/ /bka' bsgo ba yang rnam pa gsum mo/ /'di lta ste/ bslus te 'jug pa dang / nges par sbyor ba dang / rjes su gnang ba'o/ /de la bslus te 'jug pa ni/ 'di lta ste/ gzhan dag kha cig la rang gsod pa'am gzhan gsod pa la rab tu 'dzud pa'o/ /'dir yang sngon bzhin mi ldog pa nyin mtshan du'o/ /nges par sbyor ba ni 'di lta ste/ g.yog po kha cig la'am rje bo'am gzhan la srog chags ngan pa 'di sod ces nges par sbyor ba'o//'dir yang mi ldog pa'i ngo bo skye bar 'gyur ba nyid sngon bzhin no/ /srog gcod pa rjes su gnang ba ni 'di lta ste/ srog gcod par 'dod pa kha cig srog gcad par bgyi'o zhes spyi nas dri ba'i ma brjod pa ni de ltar mdzod do zhes rjes su gnang ba'am/mi smra bar gyur pas kyang rjes su gnang ba'o/ /de'i mi spong ba yang legs par phyir bcos kyi bar du nyin mtshan du'o/ /nyams su len pa'i srog gcod pa ni rnam pa gsum mo/ /'di lta ste/ lus kyis srog gcod pa nyams su len pa dang / ngag gis srog gcod pa nyams su len pa dang /yid kyis srog gcod pa rjes su sgrub pa'o/ /de ltar ma byin par len pa la sogs pa ngag kyal pa'i mthar thug pa rnams la so sor rnam pa gsum du brjod par bya'o/ /yang na so sor rnam pa bzhi ste/ 'di lta ste/ srog gcod pa yang dag par len pa dang /gzhan srog gcod pa yang dag par len du 'jug pa dang / gzhan gyis srog gcod pa byas pa la rjes su yi rang ba dang / rang nyid srog gcod pa la lhag par spyod pa'o/ /de bzhin du ngag kyal pa'i bar du'o/ /de la gang zhig mi dge ba'i sems kyis yang dag par len pa nas lhag par gcod pa'i bar du byed na/de ni mi dge ba 'chal pa'i tshul khrims sdom pa ma yin pa nyin dang mtshan du 'byung bar 'gyur ro/ /gang yang 'jig tshogs la lta bas dang mthar 'dzin par lta bas yongs su bslad nas/ yang dag par len pa nas lhag par spyod pa'i bar du byed na/ de ni sgrib pa'i lung du ma bstan pa sdom pa ma yin pa nyin dang mtshan du ste/ci ltar rigs par brjod par bya'o/ /yang gsungs pa/ yang dag lan la sogs pa'i rgyus/ /so sor rnam pa bzhi yin no/ /zhes so/ /yang gang zhig tshul khrims 'chal pa thams cad spyad par bya'o zhes pa ni/ de ni ci ltar 'gyur zhe na/brjod par bya ste/ nyes par spyad pa thams cad spyad par bgyi'o zhes yang dag par blangs pa'i sems de dang lhan cig tu 'dod pas bsdus pa'i 'chal pa'i tshul khrims sdom pa ma yin pa brgyad dang / gzugs kyis bsdus pa lus kyis yang dag par ma bsdus pa dang ngag gi ngag kyal pa dang gnyis ni/khams gnyi gar thams cad kyang dus gcig tu skye bar 'gyur ro/ /'dod pas bsdus pa dang gzugs kyis bsdus pa'i sdom pa ma yin pa dag 'di na gnas pa la yang 'byung srid pa'i phyir ro/ /yang gsungs te/ khrims 'chal thams cad blangs mi la//'dod du skyes pa brgyad dang ni/ /gzugs kyis bsdus pa tha ma gnyis/ /khrims 'chal sdom min cig car du'o/ /zhes so/ /'dod pas bsdus pa kho na'i sdom pa ma yin pa bar chad med par nyin mtshan du skye ba ni/ so sor sdom pa ma yin pa nye bar skye bar 'gyur ro//gzugs kyis bsdus pa'i bar med dag la ni ma yin no/ /gzugs kyis bsdus pa'i sdom min de dag ni gegs de srid pa yin pas so/ /gegs de srid pa la ni nye bar 'phel ba yod pa ma yin no/ /yang / de nas 'dod bsdus brgyad rnams las/ /so sor ci bzhin nye bar skye//zhes gsungs so/ /srog gcod pa la sogs pa rnams kyi yan lag gang dang gang yang dag par blangs pa de dang de nyid sdom pa ma yin pa nyin dang mtshan du 'byung ba sngon bzhin no/ /yang na/ yang dag blangs pa'i yan lag gang / /rnam par rig byed rjes kho na'o/ /zhes so/ / de bzhin du yang dag par len du 'jug pa dang yang dag par rjes su gnang ba la yang sbyar bar bya'o/ /lhag par spyod pa ni gang dang gang lhag par spyad pa de dang der shes par bya'o/ /gang dag lus kyi rnam par rig byed kyi lhan cig pa dang ngag gi rnam par rig byed dang lhan cig tu yang dag par len pa'am/yang dag par len du 'jug pa'am yang dag par rjes su gnang bar gyur pa ni/ de'i lus kyi rnam rig gam/ ngag gi rnam rig ni lhag par gyur pa yin no/ /lus dang ngag gi rnam rig de dag gi rnam par rig byed ma yin pa ni grib ma lta bur gnas pa'o zhes so/ /gang yang lus kyi rnam pa bzhi rnams ngag gis lhag par spyod pa dang yi dam len pa dang yang dag par len du 'jug pa dang bsam pa dang bka' 'god pa dang /ngag gi rnam pa bzhi rnams lus kyis lhag par spyod pa la sogs pa dang / de rnams ni mtshan nyid yongs su rdzogs pa ma yin no/ /'on kyang bsam pa'i dbang gis mtshan nyid yongs su rdzogs pa yang 'bras bu mnyam pa'i lhag pa 'byung bar 'gyur ba ni ci rigs par brjod par bya'o//yang / yang dag len la sogs skyes pa'i/ /lus kyi bya ba ngag gis dang / /gang yang lus kyis ngag gi ni/ /gang de mtshan nyid ma rdzogs pa'o/ / zhes gsungs so/ /ci ltar mtshan nyid yongs su rdzogs pa yin zhing ci 'dra ba yin zhe na/ brjod par bya ste/ gang las lus kyi lus kyis dang / /gang dag ngag gi ngag nyid kyis/ /byas te bya ba byas pa gang / /thams cad mtshan nyid rdzogs pa'o/ /zhes so/ /gal te srog gcod pa la sogs pa'i sgras brjod pa'i rnam par rig byed gang yin zhe na/brjod par bya ste/ srog gcod pa ni gang las 'das pa'i sbyor ba gang lus kyi rnam par rig byed kyis gsad bya shi ba de la srog gcod pa'i sgra thob pa'o/ /de ni skad cig yin pas de'i tshe 'das pa yin no/ /'ga' zhig ni da ltar ba nyid de/ rnam par rig byed 'byung bzhin pa gang dag gis/ gzhan gang dag gi srog nye bar 'gag pa'i phyir ro/ /ma byin par len pa yang 'das pa'i lus kyi rnam par rig byed nyid do/ /'ga' zhig kyang da ltar ba'o/ /'dod pas log par g.yem pa ni 'das pa dang da ltar ba ste/ da ltar ba ni ches mang ba nyid do/ / de bzhin du ma bsdus pa lhag par spyod pa la yang sbyar bar bya'o/ /ngag gi las rnam pa bzhi ni/ ngag gi rnam par rig byed da ltar ba nyid brdzun du smra ba la sogs pa'i sgras brjod pa yin te/ gang las brdzun gyi tshig rjod par byed pa nyid na pha rol gyis ma thos kyang brdzun yin no/ /de bzhin du phra ma dang tshig rtsub dang ngag kyal pa'o//yang / srog gcod pa ni lus ngag gis/ /bya ba 'das dang dbu ma nyid/ /rku sogs ngag gis brdzun sogs kyang / /da lta ba ni kho na'o/ /zhes gsungs so/ /gal te gang rnam par rig pa mang po rnams kyis pha rol gyi tshe nye bar 'gag pa na de ci ltar zhe na/ brjod par bya ste/gang zhig rnam rig ci snyed pa rnams kyis pha rol gyi tshe nye bar 'gags pas shi bar gyur pa/ de'i rnam par rig byed de snyed pa de thams cad ni srog gcod pa'o/ /rnam par rig byed gcig gis mang po bsad pa ni srog gcod pa gcig nyid do/ / kha na ma tho ba ni sems can gyi tshad tsam mo/ /gang yang rnam par rig byed ci snyed rnams kyis gzhan gyi nor phrogs pa na/ de'i rnam par rig byed de thams cad kyang rdzas phrogs par gyur pa na ma byin par len pa yin no/ /rnam par rig byed gcig gis phrogs pa na ma byin par len pa gcig nyid do//kha na ma tho ba ni rdzas kyi tshad do/ /de bzhin du 'dod pas log par g.yem pa dang yang dag par ma bsdus pa la ci rigs su shes par bya'o/ /ngag gi'ang smra ba'i rnam par rig byed ci snyed pa de snyed ni brdzun tshig dang phra ma dang rtsub po dang ma 'brel pa'i brjod pa'o zhes ci rigs su'o/ / yang / gang ci snyed kyis dmag sogs la/ /gsod pa rab tu 'jug pa na/ /shi ba la sogs de yis de/ /thams cad srog gcod la sogs nyid/ /ces gsungs so/ /gang yang gsad byas dang lhan cig tu shi ba'am sngon du na/ de la yang srog gcod pa yod pa ma yin no/ /gsad bya 'tsho ba tha ma'i skad cig la mtshon bsnun pa la srog gcod pa yod pa ma yin no//yang / gsad bya lhan cig dang sngon nam/ /shi la srog gcod de yod min/ /'tsho ba phyi ma'i skad cig la/ mtshon bsnun pa la srog gcod med/ /zhes gsungs so/ /gang yang gnyis dag mnyam du mthong bar gyur pa dag gis gzhan la brdeg pas gzhan gsod par byed pa de la srog gcod pa yod pa ma yin no zhes pa la sogs pa brjod par bya'o//gang gi tshe 'das pa dang da ltar ba'i rnam par rig byed ni srog gcod pa la sogs pa yin pa de'i tshe 'das pa'am da ltar ba las ldog par nus pa ma yin te/ lus byas zin pa'i phyir ro//des na de las ci ltar ldog par bya zhe na/ brjod de 'das pa'am da ltar ba'i tshul khrims ngan pa las ldog pa ni 'ga' yang med do/ /'on kyang dus de nas ma 'ongs par mi byed pa'i bsam pas ldog pa'o/ /des na ma 'ongs pa'i brgyad po de las ldog pa skye ba nyid do/ /gang las de rnams dus gsum par rnam par gzhag go//yang / 'das sam ma 'ongs pa dag las/ /ldog min 'on kyang ma 'ongs las/ /mtshan nyid de las ldog pa ni/ /de rnams dus gsum pa gang las/ /zhes gsungs so/ /brnab sems ni gzhan gyi nor la 'dod chags pa'o/ / sems can la gsad pa'i bsam pa med par zhe sdang sha stag gis sdug bsngal 'di dang sems can nam yang phrad par 'gyur zhes pa 'di ni gnod sems so/ /gang yod pa'i ngo bo rnams la med par rtogs pa de ni 'dir log pa'i lta ba'o/ /brnab sems la sogs pa de gsum yang ngan 'gro rnams kyi las dang lam ni ma yin no//'on kyang 'di gsum gyis mtshungs par ldan pa'i sems pa ni ngan 'gro'i rgyu dang lam yin par rig par bya'o/ /'o na ci sems pa rnam pa 'di gsum kho na yid kyi las yin zhe na/ ma yin te gang nyon mongs pa gzhan gyis mtshungs par ldan pa'i sems pa de yang bsod nams ma yin pa'o//gang yang gzhan nyon mongs pa'i sems gang la nyon mongs pa mtshungs par ldan pa ni ma yin te/ 'di lta ste/ rnam par shes pa'i tshogs lnga dang so sor spyod pa'o/ /gang 'di rnams kyis kyang mtshungs par ldan pa'i sems pa de yang bsod nams ma yin par rig par bya'o//gang las lus dang ngag dang yid kyi las de ni nyon mongs pa las byung ba'o/ /de nas nyon mongs pa dang las las dman pa'i 'gro ba ngan pa bzhi 'byung bar 'gyur ro/ /'di lta ste/ dmyal ba'i 'gro ba dang / yi dags kyi 'gro ba dang / dud 'gro'i 'gro ba dang /lha ma yin gyi 'gro ba'o/ /de la zhe sdang yongs su goms pa'i bsod nams ma yin pas dmyal ba'i gnas dang der gnas pa'i sems can du skye bar 'gyur ro/ /chags pa yongs su goms pas yi dags kyi gnas dang yi dags so/ /gti mug yongs su spyad pas dud 'gro'i gnas dang dud 'gro'o//nga rgyal yongs su spyad pas lha ma yin gyi gnas dang lha ma yin no/ /de la dmyal ba la rnam pa gsum ste/ 'di lta ste/ dmyal ba chen po dang / gshin rje'i 'jig rten dang / nyi tshe ba'i dmyal ba'o/ /de la dmyal ba chen po la rnam pa gnyis te/ 'di lta ste/ grang ba'i dmyal ba dang /tsha ba'i dmyal ba'o/ /de la grang ba'i dmyal ba la bcu ste/ 'di lta ste/ chu bur can dang / chu bur rdol ba dang / so thams thams pa dang / ha ha pa dang / hu hu pa dang / ut+pal lta bu dang / ku mu ta lta bu dang / sau gan d+hi ka lta bu dang / puN+Da rI ka lta bu dang / pad+ma lta bu'o/ /'di rnams su mang du 'phags pa la skur pa 'debs pa rnams skye bar 'gyur ro/ /tsha ba'i dmyal ba la dgu ste/ 'di lta ste/ yang sos dang / thig nag dang / bsdus 'joms dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa dang / mnar med chen po'o//'di rnams so so la nye 'khor gyi dmyal ba bcu drug ni sngon bzhin no/ /gshin rje'i 'jig rten yang dmyal ba chen po rnams dang ming mtshungs pa dgu nyid do/ /de bzhin du nye 'khor ba bcu drug go/ /yang sos kyi steng las steng nas steng du gnas so/ /nyi tshe ba'i dmyal ba ni yang 'dzam bu'i gling gi ri dang chu klung dang ngam grog dang dgon pa la sogs pa nyi tshe ba'i sa gzhi la gnas pa'i phyir nyi tshe ba zhes brjod do//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las/ mang pos bkur ba'i sde pa'i lung gi tshul las bsod nams ma yin pa rnam par nges pa zhes bya ba le'u bco brgyad pa'o// //gang 'dir bsod nams ma yin pa de ni mi ldog pa'i rang bzhin rnam pa brgyad du gsungs so/ /de'i phyir bsod nams ma yin pa las ldog pa mi byed pa'i sdom pa rnam pa brgyad nyid do/ /de ni nyon mongs pa ma yin pas bsod nams su rig par bya'o//yang / lus kyi rnam gsum de dang yang / /ma bsdus pa dang de bzhin du/ /ngag gi rnam pa bzhi rnams kyi/ /bsod min las ldog bsod nams so/ /zhes gsungs so/ /de bzhin du ldog pa'i tshul khrims rnam pa brgyad dang de las skyes pa nye bar skye ba dag nyin mtshan du 'gyur ro//yongs su longs spyod pa yang ngo / /rnam par ldog pa'i rang bzhin rnam pa brgyad yin pa de bzhin du rnam par spong ba'i tshul khrims rnam pa brgyad do/ /'di lta ste/ srog gcod pa las ldog pa dang / ma byin par len pa las ldog pa dang / 'dod pas log par g.yem pa las ldog pa dang / ma bsdus pa las ldog pa dang / brdzun du smra ba las ldog pa dang / phra ma las ldog pa dang / tshig rtsub po las ldog pa dang / ma 'brel pa'i brjod pa las ldog pa'o/ /gang zhig 'dod pas bsdus pa'i sems kyis tshul khrims ngan pa thams cad las so sor ldog par bgyi'o zhes yang dag par blangs pa nas/de'i 'dod pas bsdus pa brgyad dang gzugs kyis bsdus pa lus kyis ma bsdus pa dang / ngag gis ma 'brel pa'i las rnam par ldog pa sde rnam par spong ba bcu'o/ /yang dag par blangs pa'i sems kyi de ma thag so sor nyin mtshan du nye bar skye ba nyid skad cig skad cig la skye bar 'gyur ro//ci srid du yi dam ma spangs pa'am/ ci srid 'tshe ba'am 'dod chags dang bral ba thob kyi bar du'o/ /de bzhin du yang dag par 'jog pa dang / yang dag par rjes su gnang ba'o/ /lhag par spyod pa yang lhag par spyod pa'i bar du'o//yang / sdig pa khrims ngan las ldog pa/ /de yi sdom pa brgyad dang gnyis/ /brgyad nyid yang yang nyin mtshan du'o/ /zhes gsungs so/ /de la srog gcod pa las ldog pa ni rnam pa gsum mo/ /'di lta ste/ srog gcod pa las ldog pa'i phyir bsam pa dang / srog gcod pa las bzlog pa'i phyir bka' 'god pa dang /srog gcod pa las ldog pa'i phyir rjes su gnas pa'o/ /bsam pa la rnam pa gsum ste/ 'di lta ste/ 'dod pa dang / byed du 'jug pa la 'dod pa dang / gzhan gyis byas pa la mgu ba'o/ /bka' 'god pa la yang rnam pa gsum ni 'di lta ste/ drangs te 'dzud pa dang /nges par sbyor ba dang / rjes su gnang ba'o/ /rjes su gnas pa la rnam pa gsum ni/ 'di lta ste/ lus kyis rjes su sgrub pa dang / ngag gis rjes su sgrub pa dang / yid kyis rjes su sgrub pa'o/ /sngon bzhin du ci rigs par brjod par bya'o/ /yang / ldog pa bsam dang bka' 'god dang //de dag rjes su sgrub pa nyid/ /re re la yang rnam gsum mo/ /zhes gsungs so/ /de bzhin du brdzun du smra ba la sogs pa la sbyar bar bya'o/ /yang rnam pa gzhan gyis srog gcod pa las ldog pa rnam pa bzhi ni 'di lta ste/ srog gcod pa la ldog par bya'o zhes yang dag par len pa dang /srog gcod pa las ldog pa la gzhan dag yang dag par 'jog pa dang / gzhan rnams la srog gcod pa las ldog pa yang dag par rjes su gnang bar 'gyur ba dang / rang nyid chu 'dzag pa la sogs pa srog gcod pa yongs su spong bar byed cing / srog chags rnams 'tshe byed las skyob pa'o zhes de lta bu la sogs pa'o//de bzhin du lhag ma las ldog pa yang dag par len pa dang / gzhan yang dag par 'jog pa dang / yang dag par gnang bar 'gyur ba dang / lhag par spyod pa zhes brjod par bya'o/ /de ltar brgyad tshan bzhi 'di ni tshul khrims sdom pa sum cu rtsa gnyis su 'gyur ro//'di nyid de rang bzhin rnam par nyams pa las skyes pa'i gnyen po sum cu rtsa gnyis dang / 'tsho ba'i gnyen po sum cu rtsa gnyis te/ sum cu rtsa gnyis pa gnyis ni/ /sdom pa rnam pa drug cu rtsa bzhi yin no/ /sdom pa thams cad las de ma thag tu nye bar skye ba nyin mtshan du nye bar 'phel bar 'gyur ro//ci srid du ma spangs kyi bar du zhes pa la sogs pa sngon bzhin no/ /sdom pa de rnams dge ba'i sems kyis yang dag par blangs na dge bar 'gyur ba dang nyin mtshan du 'byung ba yang ngo / /sgrib min gyi sems kyis blangs pa ni sgrib min du 'gyur ba dang nyin mtshan du 'byung ba yang ngo //'o na sbyin pa'i sdom pa ci ltar zhe na/ brjod par bya ste/ dge ba'i sems kyis sbyin pa byin pa las lus kyi sdom pa nyid skye ba'o/ /sbyin bya yongs su gtong bar byed pa nas yongs su longs spyod pa'i rjes su 'gro ba ni bsod nams yin cing dge ba nyid do//dge ba'i sdom pa las skad cig so so la 'phel lo/ /de dag kyang lus kyis tshul khrims ma bsdus pa las ldog pas bsdus pa nyid do/ /yang / dngos gzhi nyon mongs med sbyin skye/ /de las yongs su longs spyod skye/ /sbyin bya longs spyod pa nyid na/ /dger gyur zhes gsungs so/ /de la sbyin pa la rnam pa gsum ni 'di lta ste/zang zing gi sbyin pa dang / mi 'jigs pa'i sbyin pa dang / chos kyi sbyin pa'o/ /de la zang zing gi sbyin pa ni bza' btung la sogs pa sbyin pa'o/ /mi 'jigs pa'i sbyin pa ni 'jigs pas gzir ba rnams yongs su skyob pa dang / 'jigs pa'i rgyu las ldog pa'o/ /chos kyi sbyin pa ni gzhan don du gnyer ba la dge ba'i sems kyis mngon par mtho ba dang nges par legs pa'i chos de nye bar ston pa'o//de la mi 'jigs pa'i sbyin pa dang chos kyi sbyin pa ni dge bar 'gyur ba'am sgrib pa min pa'i lung du ma bstan par 'gyur ro/ /dge ba de las sdom pa dang nyin mtshan du 'byung ba ni dge ba'o//sgrib pa min pa'i lung du ma bstan pa las sdom pa dang nyin mtshan du 'byung ba ni sgrib min gyi lung du ma bstan pa'o/ /zang zing gi sbyin pa yang sdom pa dang lhan cig pas mtha' gcig tu dge ba'o/ /de las yongs su longs spyod pa'i rjes su 'gro ba yang bsod nams dge ba nyid nye bar 'phel ba'o zhes rgyu bcu gnyis kyis yongs su longs spyod pa'i rjes su 'gro ba'i bsod nams 'phel bar mi 'gyur te/'di lta ste/ kun du longs spyod pa la sbyin pa dang / bcings pa la sogs pa grol ba'i don du sbyin pa dang / dus ci lta bar sdom pa skyed pa dang / rang nyid nye bar longs spyad pa dang /log par yongs su longs spyad pa dang / ma gnang bar longs spyad pa dang / yongs su longs spyad pa dang / gzhan du longs spyad pa dang / phrogs pa dang / dge ba'i rtsa ba kun du chad pa dang / 'dod chags dang bral ba la bgrod pa dang / shi bar gyur pa'o/ /zag pa dang bcas pa'i las rnams bshad do//zag pa med pa'i las ni rnam pa gsum ste/ 'di lta ste/ lam gyi tshul khrims dang / gnyen po'i tshul khrims dang / sdom pa'i tshul khrims so/ /lam gyi tshul khrims ni/ mngon du byed pa'i spyad bya spyod pa dag skye bar 'gyur te/ 'dod pa'i khams sam gzugs kyi khams su skye ba thams cad byang chub yan lag gi sems te/sdug bsngal la chos shes pas bag la nyal bcu dang bag la nyal ma yin pa nyi shu ste nyon mongs pa sum cu rab tu spong ba'o/ /nyon mongs pa de rnams kyi re re la kun nas dkris pa 'dod pas bsdus pa'i sems can tshul khrims ngan pa rnam pa bcu drug tu bya'o//de yang / srog gcod pa la sogs pa ci ltar gsungs pa rnams rang bzhin rnam par nyams pa las skyes pa brgyad dang / 'tsho ba'i rgyu rnam pa brgyad de rnam pa bcu drug [(]du [,]tu [)]'gyur ro/ /de rnams rab tu spangs pa la/ /yang de rnams mi bya'o zhes de rnams spangs pa las tshul khrims sdom pa bcu drug skye bar 'gyur te/'di ltar/ rang bzhin nyams pa las skyes pa'i gnyen po brgyad dang / 'tsho ba'i gnyen po brgyad do/ /de bzhin du nyon mongs pa re re la shes par bya'o/ /rnam pa 'dis tshul ngan pa rnam pa bcu drug kyang spangs pa'o zhes pa ni bcu drug pa gcig go//yang nyon mongs pa re res skyed pa'i nyes spyod kyi gnyen pos nyon mongs pa spangs pa'i dbang las bcu drug pa sum cu'o/ /lam gyi tshul khrims bcu drug pa sum cu gcig skye bar te/ de ltar lam gyi tshul khrims dgu bcu rtsa drug lhag pa'i brgya phrag bzhi ru 'gyur ro//de bzhin du sdug bsngal la so sor rtog pa'i shes pa la'o/ /sdug bsngal la rjes su shes pa ni/ /gzugs kyis bsdus pa'i bag la nyal dgu dang bag la nyal ma yin pa bcu gcig ste/ nyon mongs pa nyi shu rab tu spangs pa'o/ /de la nyon mongs pa so so la nye bar spyod pa gnyis 'byung ste/'di lta ste/ ma bsdus pa dang / ma 'brel pa'i brjod pa'o/ /sngon du bshad pa'i rigs nyes spyod gnyis tshan spong ba ni gcig go/ /nyes spyod nyi shu tshan gnyis kyi gnyen po nyi shu tshan gnyis te/ gnyis tshan nyer gcig sdom pa skye ba'o/ /de bzhin du ye shes lhag ma dang sgom pa'i sa dag la ci rigs par brjod par bya'o//gnyen po'i tshul khrims ni/ gang dang gang du khams mnyam pa skal ba mnyam pa'i nyon mongs thams cad spangs pa/ de dang de ru nying mtshams dang spyad byas spyod pa nye bar skye'o/ /de yang nyon mongs pa 'jig byed kyi ye shes sdug bsngal la chos shes pa la sogs pa dang bsgom pa'i sa dag gi lam gyi tshul khrims bzhin du ci rigs su shes par bya'o//sdom pa'i tshul khrims ni/ thams cad zag pa med pa ste dgra bcom pa'i'o/ /'di lta ste/ dgra bcom pa nyes spyod thams cad las ldog par bya'o zhes de ltar sems bskyed pa na/sems de dang lhan cig tu zag pa med pa'i tshul khrims sdom pa brgyad skye ba'o/ /de la nyin mtshan du 'byung ba ni med do/ /de bzhin du 'dir lus ngag gi rnam par rig byed dag gis yang dag par 'jog par byed pa dang / yang dag par gnang ba dang lhag par spyod pa thams cad ni zag pa med pa'o//'dod pa la 'dod chags dang bral ba'i phyir mi 'ong bas nyes spyod thams cad las ldog pa las 'dod pas bsdus pa'i nyes spyod kyi gnyen po dang gzugs kyis bsdus pa lus kyis ma bsdus pa dang / ngag gis ma 'brel pa'i brjod pa dag gi gnyen po rnams ni zag pa med pa'o//khams gnyis la chags bral gyi phyir mi 'ong ba ni dgra bcom pa ci bzhin no/ /rjes kyi lus ngag gi rnam par rig byed thams cad kyang zag pa med pa nyid do/ /yang / 'dod pa chags bral 'phags pa yi/ /thams cad las ldog pa'i brgyad dang / /gzugs skyes gnyis ni dri med pa'o//gzugs la thams cad kyang zag med/ /ces gsungs so/ /lam gyi tshul khrims dang gnyen po'i tshul khrims dag khyad par ci zhe na/ brjod par bya ste/ sdug bsngal la chos shes pa ni/ spong ba las dang rjes su mthun pa'i stobs las tshul khrims skye'o/ / de yang skad cig nyid yin pas 'gag par 'gyur ro/ /so sor rtog pa'i ye shes ni'ang yang re zhig de bzhin du skye ste/ sngon du spangs pa'i stobs las dang / rjes su mthun pa'i stobs las so/ /sdug bsngal la rjes su shes pa ni/ /spangs pa'i rgyu las dang / rjes su mthun pa'i stobs las skye'o//gang dag chos shes pa ni/ spangs pa'i stobs las dang rjes su mthun pa'i dbang de dag las skye'o zhes kyang kha cig go/ /de bzhin du lhag ma dang bsgom pa'i sa dag la ci rigs su brjod do/ /gnyen po'i tshul khrims ni nyon mongs 'jig byed bzhin du dngos su spong ba'i rgyu las dang sngon du spangs pa'i stobs dag las skye bar 'gyur gyi/gzhan ni ma yin no/ /spangs pa so so'i mtshams su sngon spangs pa'i stobs nyid las so/ /de srid de ni rang bzhin gyi kha na ma tho ba las ldog pa'i tshul khrims brgyad nye bar bstan pa'o/ /bcas pa'i kha na ma tho ba las ldog pa'i tshul khrims kyang /dge slong dang / dge slong ma dang dge tshul pho mo dang bya rog skrod byed dang dge bsnyen dang dge bsnyen mo rnams kyis sangs rgyas kyis bcas pa'i bslab pa'i gzhi yang dag par blangs pa dang yongs su bsrung ba las skyes pa'o/ /de la dge slong gis bslab pa'i gzhi thams cad ni/'dul ba las gsungs pa'i/ nyi shus lhag pa'i bzhi brgya'o/ /bslab pa'i gzhi de rnams la phal cher ni bcas pa'i kha na ma tho ba las ldog pa'i tshul khrims so/ /sdom pa thams cad las kyang yid ma blangs pa'i sems kyis de ma thag tu nye bar skye ba na rnam par ma spangs kyi bar du'o zhes rgyas par brjod par bya'o//de bzhin du dge slong ma yi ci rigs par ro/ /dge tshul pho mo'i bslab pa'i gzhi rtsa dgu dang / bya rog skrod pa'i brgyad dang / de bzhin du bsnyen gnas kyi'o/ /dge bsnyen dang dge bsnyen ma dag gis bslab pa'i gzhi gtan du ba lnga'o//de rnams kyang yang dag par blangs pa'i sems kyis de ma thag tu nye bar skye ba na/ sems kyi skad cig dus kyis yang dag par 'phel ba ste/ ma spangs kyi bar du'o zhes so/ /yang / gang du dge slong gis bcas pa'i/ /nyes pa las ldog sdom pa de'i/ /grangs ni brgya phrag bzhi dang ni//nyi shus lhag pa kho na'o/ /dge slong ma yi de dang gzhan/ /dge tshul dang ni gso sbyong dang / /rtag pa'i dge bsnyen sdom pa ni/ /dgu dang brgyad dang lnga rim bzhin/ /dngos gzhi de las nyes skye ni/ /yang dag len sogs rgyu las so/ /zhes gsungs so/ /des na nyon mongs pa can ma yin pa'i tshul khrims de thams cad ni mngon par bsdu na/rgyu bcu gnyis kyis skye ste/ 'di lta ste/ yang dag par blangs pa dang / yang dag par len du 'jug pa dang / yang dag par gnang ba dang / lhag par spyod pa dang / sdom pa'i rtsa ba nye bar ma chad pa dang / dge ba'i rtsa ba bskyed pa dang / nyes spyod kyi rgyu spangs pa dang /bden pa dang rjes su mthun pa'i stobs dang / bsgom pa'i stobs dang / sngon spangs pa'i stobs dang / dngos po yongs su shes pa dang / khas blangs pa las te ci rigs par brjod par bya'o/ /ci ltar gsungs pa'i nyon mongs can dang nyon mongs med pa'i tshul khrims de rnams kyi kun nas g.yo ba ni rnam pa bzhi yin no//'di lta ste/ gang dang gang du tshul khrims kyi yan lag spangs pa de dang de ni kun nas g.yos pa'o zhes mi mthun pa'i phyogs kyis dang / nyes spyod thams cad bgyi'o zhes yi dam blangs pa byed pa'o zhes thams cad kun nas g.yos pa dang / tshul khrims thams cad spang bar bgyi'o zhes bslab pa'i gzhi spangs pas dang /dge ba'i rtsa ba yang dag par chad pa'o/ /nyes par spyod pa yang spong zhing kun nas g.yo bar byed pa ni bzhi ste/ 'di lta ste/ srog gcod pa las ldog pa yang dag par blangs pa las tshul khrims ngan pa g.yo bar byed pa dang /srog gcod pa las ldog pa yang dag par len du 'jug pa dang / srog gcod pa las ldog pa yang dag par rjes su gnang ba dang / srog gcod pa lhag par mi spyod pa'o/ /de bzhin du ma byin par len pa la sogs pa la yang ci ltar rigs par brjod par bya'o/ /nyes spyod thams cad las ldog par bgyi'o zhes pa'am/tshul khrims thams cad yang dag par len pa'am/ bcom ldan 'das kyis bcas pa'i bslab pa'i gzhi ci snyed pa de la yang dag par gzhug par bgyi'o zhes pa thams cad spong bar byed pa'o/ /yang na/ 'dus byas thams cad mi rtag pa'o//'dus byas thams cad ni sdug bsngal gyi rgyu'o zhes pa 'dis kyang tshul khrims ngan pa kun nas spong bar byed pa'o/ /gzhan du na brten pa dang 'brel pa las sgro 'dogs kyi khang pa la sogs pa'o/ /yang / ma lus pa yi 'dus byas rnams/ /mi rtag pa dang rgyur bsams pas//nyes pa thams cad spong bar byed/ /de bzhin brtan pa ma rtogs pa'o/ /zhes gsungs so/ /bcom ldan 'das kyis sems pa'i las dang / sems pas bslang ba'i las so zhes gsungs so/ /de la sems kyis bslang ba'i las ni/ lus kyi dang ngag gi'o zhes bshad do/ / mtshungs par ldan pa'i sems las byung ba rnams kyi nang nas sems pa gcig pu ni yid kyi las bsod nams so/ /sems pa de ni rnam pa gnyis te/ 'di lta ste/ dge ba dang / sgrib pa ma yin pa'i lung du ma bstan pa'o/ /gang 'dod pas bsdus pa de dge ba dang / sgrib min lung du ma bstan pa'o//gang gzugs kyis bsdus pa'i sems pa de bsam gtan sngon ma gsum mo/ /gang yang bsam gtan gsum dang stobs mtshungs pa'i snyoms par 'jug pa'i mtshungs par ldan pa'i sems pa de bsod nams su mngon par 'dod/ bsam gtan dang stobs snyoms pa'i snyoms 'jug de gang zhe na/brjod de/ byams pa dang snying rje dang dga' ba dang / btang snyoms dang dbugs phyi nang du rgyu ba rjes su dran pa dang / mi sdug pa brgyad la sogs pa'o/ /yang / de bzhin yid kyi bsod nams ni/ /'dod du kar dang zhan pa yi/ / sems pa'o gzugs su bsam gtan gsum/ /de ru gnas pa yang dag bsdu/ /zhes gsungs so/ /paN+Di ta chen po stobs bcu dpal bshes gnyen gyis bsdus pa'i 'dus byas dang 'dus ma byas rnam par nges pa las bsod nams rnam par nges pa zhes bya ba le'u bcu dgu pa'o// // mi g.yo ba'i las ni sems pa nyid do/ /de yang bsam gtan bzhi pa dang mtshungs par ldan pa dang / gang dag zag pa dang bcas pa'i gzugs med pa'i snyoms par 'jug pa bzhi dang mtshungs par ldan pa dang / gang dag bsam gtan bzhi pa dang gzugs med pa'i snyoms par 'jug pa dang stobs mtshungs pa'i snyoms par 'jug pas mtshungs par ldan pa de mi g.yo ba'i las su rig par bya'o//de la rnam par rtog pa la sogs pas bskyed par bya ba ma yin pas na 'di ni mi g.yo ba'o/ /de yang g.yo ba zhes bya ba ni ting nge 'dzin gyi skyon te/ de yang rnam pa bdun no/ /'di lta ste/rnam par rtog pa dang / rnam par spyod pa dang / dga' ba dang / bde ba dang / 'jug pa dang / byung ba'o/ /bsam gtan bzhi pa dang gzugs med pa ni de rnams kyis bskyod par bya ba ma yin pas na mi g.yo ba'o/ /mi g.yo sems pa nyid du 'dod/ /bsam gtan bzhi pa dang gzugs med//mtshungs ldan de 'dra'i stobs nyams kyis/ /zhes gsungs so/ /gang 'dir nyon mongs pa can ma yin pa'i las de rnams gsungs so/ /bsod nams kyi las de las/ gling bzhi la gnas pa'i mi rnams su skye'o/ /'di lta ste/ ma chags pa yongs su bsgoms pa'i bsod nams las byang gi sgra mi snyan gyi mi'o//des na 'di ni yongs su 'dzin pa med pa dang / nye bar longs spyod pa thams cad phun sum tshogs pa'o/ /zhe sdang med pa yongs su bsgoms pa las shar gyi lus 'phags pa'o/ /de nyid kyis na de rnams ni srog chags rnams mi gsod do zhes so/ /nga rgyal med pa yongs su bsgoms pa'i bsod nams las nub kyi ba lang spyod pa'o//de nyid kyis na de ru rigs gcig nyid do/ /de rnams ni tshad dang gzugs mnyam pa nye bar ldan pa'o/ /ma rmongs pa yongs su bsgoms pa'i bsod nams las 'dzam bu gling pa'o/ /de nyid kyis na de rnams ni dran pa dang blo phun sum tshogs shing sems pa dang ldan pa'o//'dod pa na spyod pa'i lha drug go/ /'di lta ste/ rgyal chen ris nas gzhan 'phrul dbang byed kyi bar du/ de ni yang ma rmongs pa mang du yongs su goms pa las lha'o/ /bsod nams kyi las las dbyibs dang gdan dang gzhal yas khang la sogs pa 'byung bar 'gyur ro//bsam gtan dang po'i dman pa dang 'bring dang mchog gi bsod nams bsgrubs pa las/ bsam gtan dang po'i dman pa dang 'bring dang gya nom pa'i sa gsum ste/ rim pa bzhin du tshangs pa'i mdun na 'don gyi lha dang / tshangs ris kyi lha dang /tshangs 'khor gyi lha rnams su skye'o/ /de kho na bzhin du bsam gtan gnyis pa'i gsum du/ 'od chung gi lha dang / tshad med 'od kyi lha dang / 'od gsal gyi lha rnams su skye bar 'gyur ro/ /de bzhin du bsam gtan gsum pa'i gsum du/ dge chung dang / tshad med dang / dge rgyas kyi lha rnams su skye'o//mi g.yo ba'i las kyang bsam gtan bzhi pa dang so sor ldan pa'i dman pa dang 'bring dang mchog las 'bras bu che ba'i lha rnams so/ /mi g.yo ba'i las bsam gtan bzhi pa dang ldan pa dang / byang chub kyi yan lag rnams goms pa dang 'khor dad pa'i dbang po las kyang gya nom snang gi lha'o//de nyid dang 'khor brtson 'grus kyi dbang po las shin tu mthong ba'i lha rnams so/ /de nyid 'khor dran pa'i dbang po las mi che ba'i lha rnams so/ /de nyid dang ting nge 'dzin gyi dbang po'i 'khor las mi gdung ba'i lha rnams so/ /de nyid dang 'khor shes rab kyi dbang po las 'og min gyi lha rnams so//so so'i skye bo ni bsam gtan bzhi pa dang ldan pa'i mi g.yo ba las 'du shes med pa'i sems can du skye ba'o/ /nam mkha' rnam shes cung zad med pa'i skye mched dang 'du shes med 'du shes med min gyi skye mched dang so sor ldan pa'i mi g.yo ba'i las las rim pa bzhin du gzugs med pa bzhi'o//de bzhin du 'dod pa dang gzugs dang gzugs med pa'i khams gsum po ni las las skyes pa'i lus can rnams skye ba'i rten yin no/ /yang / de phyir bsod nams las mi kun/ /'dod na spyod pa'i lha drug dang //de bzhin dang po'i bsam gtan gsum/ /mi g.yo ba las lhag ma'i lha/ /zhes gsungs so/ /'o na ci ltar gsungs pa'i las de rnams ci thams cad thams cad kyi skye ba skyed par byed pa yin nam zhe na/ ma yin te/ de yang / 'dod chags dang bcas pa'i las bsod nams dang bsod nams ma yin pa mi g.yo ba de ni yang srid skye ba'i rgyur 'gyur ro//'dod chags dang bral ba'i ni khams mthun pa ru'o/ /'dod pas bsdus pa'i las 'dod par gtogs pa'i skye ba'o/ /de bzhin du gzugs kyis bsdus pa gzugs su gtogs pa'i'o/ /gzugs med pas bsdus pa gzugs med pa'i'o//bgrod pa 'phel ba'i las de ni yang srid skye bar byed pa'o/ /gegs de srid pa'i las ni ma yin no/ /yang / bgrod pa 'phel dang chags bcas pa'i/ /las de mtshungs pa'i khams rnams su/ /yang srid ljon shing sa bon rgyu/ /zhes gsungs so/ /las la rnam pa gnyis ni 'di lta ste//yang srid skyed pa la nus pa nyid kyis bgrod pa 'phel ba'i las dang / phal cher bya ba'i dus nyid du rnam par smin pa phyung nas yang srid mngon par 'du byed pa la nus pa med pa'i phyir gegs de srid pa'i las so/ /de la bgrod pa 'phel ba'i las ni brgyad de/ 'di lta ste/ 'dod pas bsdus pa'i dge ba dang / sgrib pa ma yin pa dang / mi dge ba dang / sgrib pa dang / gzugs kyis bsdus pa'i dge ba dang / sgrib pa ma yin pa dang / gzugs med pas bsdus pa'i dge ba dang / sgrib pa ma yin pa'o/ /yang / 'dod skyes bzhi dang gzugs skyes gnyis/ / gnyis ni gzugs med skyes pa'o/ /zhes gsungs so/ /gegs de srid pa ni brgyad de/ 'di lta ste/ rmi lam nang gi las dang / srid pa bar ma'i las dang / byis pa'i gnas skabs su byas pa dang / yongs su shes pa skyes pa dang / zag pa med pa dang / rang bzhin gyis lung ma bstan dang / chags bral gyis nye bar bsags pa dang / gzugs dang gzugs med pa'i bsgom pa'i rang bzhin ma yin pa'i las so/ /yang / rmi lam bar srid rnam mi shes/ /yongs shes skyes dang zag med dang / /rang bzhin lung med ma chags bsdus/ /gzugs dang gzugs med lam ma yin//zhes gsungs so/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las mi g.yo ba'i las rnam par nges pa zhes bya ba le'u nyi shu pa'o// //'dod chags la sogs skyon rnams 'dis/ /las so de las yang srid do//yang srid las ni skye ba'o/ /de nas rga shi kun du 'byung / /de las mya ngan sogs de las/ /yang ni nyes rnams 'byung bar 'gyur/ /de nas de bzhin 'khor 'gyur ba'i/ /sngon gyi mtha' ni yod pa min/ /zhes gsungs so/ /'di'i don ni de ltar yang sems can rnams kyi nyon mongs pa las skyes pa'i las ni bsod nams dang bsod nams ma yin pa dang mi g.yo ba'o//de las skye ba'o/ /las kyi rnam par smin pa de las bdag dang gzhan gyi nye bar 'tshe ba las skyes pa dang / grang ba dang rlung la sogs pa'i khams las skyes pa'i bde ba dang sdug bsngal dang bde min sdug min tshor ba nyams su myong ba nyid ma rig pa'i dbang du gyur pas bde bas kun du rmongs pa rnams/bde ba dang phrad par sred pa dang / bde ba dang mi 'bral bar sred pa nye bar skye'o/ /de bzhin du sdug bsngal gyis kun du rmongs pa rnams sdug bsngal dang bral bar sred pa dang / sdug bsngal dang mi phrad par sred pa nye bar skye'o//de bzhin du sdug bsngal ma yin bde ba ma yin pa'i tshor bas kun du rmongs pa rnams srid pa'i sred pa nye bar skye'o/ /de las lta ba rnams dang the tshom rnams nye bar skye'o/ /de las yang las so/ /de las skye ba dang sdug bsngal skye bar 'gyur ro/ /de bzhin du ma rig pa'i sgrib pa'i rgyud dang /sred pa'i sbyor bar byed pa las sems can rnams ni zo ba drug gi 'khrul 'khor la zhon te 'khor ba ni sngon gyi mtha' med pa nyid do/ /de yang / dmyal ba rnams su sreg pa dang gcod pa la sogs pa myong ba'i sdug bsngal dang / yi dags rnams la bkres pa dang skom pa'i sdug bsngal dang /dud 'gro rnams la skyo ba'i sdug bsngal dang / lha ma yin rnams la nga rgyal gyi sdug bsngal dang / mi rnams la tshol ba'i sdug bsngal dang / lha rnams rga ba dang shi ba'i sdug bsngal nyams su myong ba'o/ /gang las de ltar nyon mongs pa las 'byung ngo //las las skye ba'o/ /skye ba las sdug bsngal lo/ /de las yang nyon mongs yang las/ skye ba kun du 'byung ngo / /de'i phyir de ltar 'khor ba'i rgyu'i gtso bo ni nyon mongs pa'o/ /nyon mongs pa'i sa bon du gyur pa ni bag la nyal lo/ /bag la nyal med pa las/ las dang skye ba zad par 'gyur zhing sdug bsngal las grol bar 'gyur ro/ /bag la nyal zad par bya ba'i don du bag la nyal zad pa'i rgyu dbang po la sogs pa brten par bya'o/ /dbang po la sogs pa thob par bya ba'i don du thabs dang rim pa ni 'di'o/ /'di lta ste/ dang po dang lta ba rnam par dag par bya'o//bcom ldan 'das kyis/ mos pa can de lta mod kyi tshangs par spyod pa la gnas pa'i phyir dang po nyid rnam par dag par bya'o/ /tshangs par spyod pa la gnas pa'i phyir dang po gang zhe na/ 'di lta ste/ tshul khrims yongs su dag pa dang / lta ba drang po'o zhes ci skad du gsungs pa'o//de bzhin du rta la dkyus sa ston pa'i rigs pas rnam par dag pa'i lta ba dang tshul khrims dang ldan pas bden pa bzhi'i nye bar spyod par gyur pa/ bzod pa'i rnam pa bzhi bsgom par bya'o/ /yang / /de phyir bag nyal med pa las/ /las skye zad pa don gnyer bas/ /rnam dag lta ba tshul khrims ni//brten bya dang por bzod pa'o/ /zhes gsungs so/ /des na bzod pa dpyad pa'i don du bden pa la 'jug pa'i sgo brjod par bya ste/ de la bden pa ni bzhi ste/ 'di lta ste/ sdug bsngal gyi bden pa dang / kun 'byung gi bden pa dang / 'gog pa'i bden pa dang / lam gyi bden pa'o//de la bden pa rnam par gzhag pa ni gnyis te/ 'di lta ste/ chos rnam par gzhag pa dang / mtshan nyid rnam par gzhag pa'o/ /de la chos kyi dbang gis tha dad du nges par 'gyur ba de ni chos rnam par gzhag pa'o/ /gang mtshan nyid kyi rnam par gzhag pa nges pa de ni mtshan nyid rnam par gzhag pa'o//de la chos kyi rnam par gzhag pa ni 'di lta ste/ sred pa spangs pa'i khams gsum gyi zag pa dang bcas pa nye bar len pa'i phung po lnga ni sdug bsngal lo/ /khams gsum gyi sred pa ni sdug bsngal kun 'byung ba'o/ /sred pa dngos po med pa ni sdug bsngal 'gog pa'o/ / 'phags pa'i lam yan lag brgyad ni lam mo/ /yang / sred spangs zag bcas sdug bsngal lo/ /'di'i rgyu sred pa gcig pu ste/ /sred pa zag pa 'gog pa dang / /yan lag brgyad ni de thob lam/ /'di ni chos su rnam gzhag go/ /mtshan nyid rnam par gzhag pa ni 'di lta ste/ zag pa dang bcas pa dang zag pa med pa'i 'du byed thams cad ni mi rtag pa nyid kyi phyir sdug bsngal lo zhes rnam par gzhag go/ /sdug bsngal gyi don ni/ mi rtag pa'i don nyid do/ /ci skad du bcom ldan 'das kyis dge slong dag gzugs ni mi rtag pa ste/ gang mi rtag pa de ni sdug bsngal lo//de bzhin du tshor ba la sogs pa'o zhes gsungs so/ /de ltar yang / kye ma 'du byed mi rtag ste/ /skye dang 'gag pa'i chos can ni/ /skye zhing 'gag par 'gyur ba'o/ /zhes so/ /de bzhin du zag pa bcas pa'i 'du byed skyed par byed pa'i phyir kun 'byung ste/ kun 'byung gi don ni skyed byed kyi don to//ci skad du bcom ldan 'das kyis 'dir rten cing 'brel par 'byung ba gang zhe na/ gang 'dir rgyu nyid do zhes so/ /'du byed thams cad 'jug pa med cing skye ba med pa ni 'gog pa'o/ /ci skad du bcom ldan 'das kyis gang du ming dang gzugs ma lus par nye bar 'gags pa nyid do zhes gsungs so//thams cad kyang nges par 'byung ba'i chos mya ngan las 'das par bgrod pa'i phyir lam mo/ /ci skad du bcom ldan 'das kyis gang su dag dge ba'i chos byang chub kyi phyogs so zhes gsungs so/ /de la nges par 'byung ba'i chos ni 'di lta ste/ byang chub phyogs kyi chos sum cu rtsa bdun no/ /'di lta ste/ dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad do/ /mya ngan las 'das par bgrod pa'i rang bzhin yin pa'i phyir sdug bsngal 'gog par 'gro ba'i lam mo//gzhan yang bden pa rnams kyi mtshan nyid rnam par gzhag pa ni gnyis te/ 'di lta ste/ spyi'i mtshan nyid dang / so so'i mtshan nyid do/ /de la spyi'i mtshan nyid ni/ /thams cad bdag med pa nyid dang //mi rtag pa nyid la sogs pa'o/ /gnyis pa ni/ sdug bsngal mi rtag pa nyid dang / kun 'byung ni rgyu nyid dang / 'gog pa ni rtag pa nyid dang / lam ni nges par 'byin par byed pa nyid do zhes so/ /yang so so'i mtshan nyid ni rnam pa gnyis te/ 'di lta ste/ drang po ma yin pa'i mtshan nyid dang /drang po'i mtshan nyid do/ /de la drang po min pa'i mtshan nyid ni/ sdug bsngal ni nad dang 'bras dang zug rngu la sogs pa'o/ /kun 'byung ni rkyen dang rab tu skye ba dang khungs nyid do/ /'gog pa ni gnas nyid dang 'dren pa nyid la sogs pa'o/ /lam ni sgo dang theg pa dang stegs dang sman la sogs par rig par bya'o//mtshan nyid drang po ni/ sdug bsngal ni mi rtag pa'o/ /kun 'byung ni rgyu'o/ /'gog pa ni rtag pa'o/ /lam ni nges par 'byin par byed pa'o/ /gang las de ltar bden pa'i rang bzhin dngos su bzung bar gyur pa yin no/ /de nyid kyi na mtshan nyid drang por bden pa mngon par rtogs pa'i shes pas rang bzhin bzung bar gyur pa'o//kha cig na re/ 'gog pa ni skye ba med par yang blta'o zhes sems so/ /gang las thar pa 'dod pa ni rnam pa gnyis te/ 'di ltar/ sdug bsngal gyis 'jigs pa dang / kun nas nyon mongs pas 'jigs pa'o//de la dang po ni sdug bsngal bden pa'i gnyen po 'gog pa zhi bar 'du shes par gyur pa yin no/ /des na des 'gog pa de rtag pa nyid du lta ba'o/ /gnyis pa ni kun 'byung bden pa'i gnyen po 'gog pa zhi bar shes cing / 'gog pa de skye ba med par lta ba'o/ /gang las mtshan nyid drang po 'dis bden pa rnams mngon du rtogs pa yin no//de nyid kyis na grol ba 'dod pas bzod pa drang po bsgom par bya'o/ /gal te chos rnam par gzhag pas yid la byed pa rab tu sbyar bas bden pa mngon par rtogs sam/ 'on te mtshan nyid rnam par gzhag pas she na/ brjod par bya ste/mtshan nyid rnam par gzhag pas so/ /gang tshe de lta na chos rnam par gzhag pa de'i tshe ci bya zhe na/ brjod par bya ste/ gdul bya ni rnam pa gnyis te/ dbang po zhan pa dang / dbang po rnon po'o/ /de la dbang po zhan pa rnams mtshan nyid rnam par gzhag pa ma 'dres par shes pa dang ma rmongs par bya ba'i don du chos rnam par gzhag pa gsungs so//chos rnam par gzhag pa bzung bas/ /bde bar mtshan nyid rnam par gzhag pa 'dzin par 'gyur ro zhes shes par bya'o/ /'du byed thams cad sdug bsngal lo zhes gsungs pa la skrag pa spangs pa'i yang phyir ro/ /blo gsal ba yang mtshan nyid rnam par gzhag pa la skrag par 'gyur te/'du byed 'di rnams tsam zhig gis ci ltar yongs su shes par nus/ de bzhin du 'du byed thams cad kun 'byung ngo zhes gsungs pa la bdag gis 'du byed 'di tsam zhig ci ltar spong bar 'gyur zhes so/ /des na dbang po zhan pa rnams ma rmongs par bya ba'i don dang mi skrag par bya ba'i don du chos rnam par gsungs so//yang / chos rnams gzhag pa dman pa rnams/ /skrag pa spang ba'i don du bstan/ /zhes gsungs so/ /'o na rnal 'byor pas bden pa'i don du sgo gang nas 'jug par bya zhe na/ brjod de/ bden pa mngon par rtogs pa la 'jug pa'i sgo ni bzhi ste/'di lta ste/ phung po'i sgo dang / skye mched kyi sgo dang / khams kyi sgo dang / ming dang gzugs kyi sgo'o/ /sgo ni gtso bo zhes pa'i don to/ /kha cig ni rten cing 'brel par 'byung ba'i sgo dang / dran pa nye bar gzhag pa la sogs pa nas 'jug go/ /byang chub sems dpa' thams cad ni yang rten cing 'brel par 'byung ba'i sgo nyid nas 'jug pa'o//spungs pa'i don gyis phung po ste/ /'bras phung bzhin no/ /'byung gnas kyi don gyis na skye mched do/ gser gyi 'byung khungs bzhin no/ /skye mched ni sgo'i don te bzo'i gnas khang bzhin no/ /khams kyi don ni rang bzhin gyi don te sa la sogs pa'i khams bzhin no//rang bzhin zhes pa ni rang gi ngo bo ste/ de nyid kyis rnam par nyams par byed pas 'di ni khams so/ /myong bar bya ba'i dngos po de la 'dud pa'am/ sems can la 'dud pas ming ngo / /gzugs ni gzugs par bya bas na 'di ni gzugs so//gang gis gzugs par bya zhe na/ dbyug pa reg pas rdeg pa la sogs pa thams cad rnam par bya ba yin pas zhes pa'i don to/ /ming zhes pa dang gzugs zhes pa ni ming dang gzugs so/ /'o na gzugs la sogs pa de rnams chos du yin zhe na/ brjod de/ dbang po lnga dang yul lnga ni gzugs kyi phung po'o/ /bde ba dang sdug bsngal dang sdug bsngal min bde ba min pa'i tshor ba ni tshor ba'i phung po'o/ /khyad par gyi rnam pa rnams so sor 'dzin pa'i bdag nyid can chos ni 'du shes kyi phung po'o/ /sems pa la sogs pa'i chos ni 'du byed kyi phung po'o//mig gi rnam shes la sogs pa ni rnam par shes pa'i phung po'o/ /'di ni phung po lnga'o/ /dbang po drug dang yul drug ni skye mched bcu gnyis so/ /dbang po drug dang yul drug dang rnam par shes pa drug ni khams bco brgyad do/ /ming dang gzugs zhes pa ming ni chos bsdu ba bar ma las chos brgya dang bdun cu rtsa brgyad du gsungs te/'di lta ste/ rnam par shes pa dang tshor ba la sogs pa ste/ gzhung mang bar 'gyur ba'i 'jigs pas bdag gis ma bris so/ /gzugs ni gang cung zad bstan du yod pa dang / bstan du med pa'o/ /de la 'dod chags la spyod pa phal cher ni sdug bsngal gyi 'jigs pa nyid yin pas phung po'i sgo nas 'jug pa'o//zhe sdang la spyod pa phal cher ni kun nas nyon mongs pas 'jigs pa nyid pas skye mched kyi sgo nas 'jug pa'o/ /des na des thog mar kun nas nyon mongs par gyur pa'i skye mched kyi sgo nas bzod pa bsgom par bya'o//cha mnyam pa la spyod pa phal cher ni sdug bsngal dang kun nas nyon mongs pa dag gis 'jigs pas khams kyi sgo nas 'jug pa'o/ /de'i phyir des na thog mar sdug bsngal dang kun nas nyon mongs par gyur pa khams kyi sgo nas bzod pa bsgom par bya'o/ /gti mug la spyod pa ming dang gzugs kyi sgo nas dang por bzod pa bsgom par bya'o//gti mug la spyod pa ni'ang rmongs shes ches pas sems spang ba chung ba dang dbang po zhan par 'gyur ba'o/ /de ni ming dang gzugs tsam nyid shes pa dang spong ba dang / mi dngang ba dang mi rmongs par 'gyur ba'o/ /sems pa dang dbang po rgya che ba srid pa tha ma'i byang chub sems dpa' ni mchog tu zab pa rten cing 'brel par 'byung ba'i sgo nas 'jug cing bzod pa gcad pa bsgom pa'o//de la phung po'i sgo nas bzod pa sgom pa'i rnal 'byor pas/ sdug bsngal dang kun 'byung dang 'gog pa'i bden pa la so sor sum cu rtsa gcig sbyar bar bya'o//ci ltar sbyar zhe na brjod de/ rnam pa gnyis kyis bzod pa bsgom par bya'o/ /'di lta ste/ rgyas pa dang / bsdus pa'o/ /de la so so ni dang po nyid du re zhig rnal 'byor pas/ /skye ba dang 'gag pa'i chos can yin pa'i phyir dang / rgyu'i stobs kyis rnam par gnas pa'i phyir dang / ma byung ba skyes pas dang /byung ba rnam par nyams pas dang / rdul phran bsags pa yin pas dang / /yan lag du ma ma bsdus pas dang / skye ba gnas pa mi rtag pa'i rjes su bgrod pa'i phyir gzugs ni mi rtag pa'o zhes nges pas bsam par bya'o/ /tshor ba yang ma byung ba skye bas dang / gsum nyid nye bar dmigs pas dang /gcig nyams su myong ba dang / gzugs la sogs pa tha dad pa dang / spyod yul dmigs pa'i rnam par rtog pa'i dbang gis skye bas dang / 'gag pa'i chos can nyid kyi phyir mi rtag pa'o zhes spyad par bya'o/ /'du shes ni nye bar mtshon pa dka' bas tshor ba'i rgyu'i dmigs pa'i rnam par khyad par 'dzin pa ni nye bar mtshon pa'i phyir dang /tshor ba dang grub bde gcig pa nyid kyis so/ /tshor ba skye ba dang 'jig pa'i rjes su 'brel pa'i phyir mi rtag pa'o zhes bsgom par bya'o/ /de nas 'du byed ni sems kyi 'du byed so sor 'brel pas/ sems kyi 'du byed skye ba dang nyams pa'i rjes su 'brel pa dang /sems kyi 'du byed ni tshor ba dang 'du shes so/ /lhag ma mtshungs par ldan pa'i 'du byed rnams ni de dag dang so sor 'brel pa'i phyir/ tshor ba dang 'du shes bzhin du mi rtag pa'o zhes bde bar spyad par bya'o/ /des na rnam par shes pa ni tshor ba dang 'du shes dang 'du byed rnams kyi sngon du yid 'gro bas gang las yid gyur pa de las de rnams so//rnam par shes pa rtag pa na mi rtag pa'i tshor ba la sogs pa mi 'tshogs pa nyid do/ /des na rnam par shes pa de yang tshor ba la sogs pa bzhin du mi rtag pa'o zhes mi brtson par skye'o/ /phyis ni rnam par shes pa mi rtag pa'o zhes bsam par bya'o//de ltar de rnams la re re nas mi rtag pa nyid do zhes dga' ba byung ba na/ yang gnyis gnyis mi rtag pa nyid do zhes kyang sgom par byed do/ /'di lta ste/ gzugs ni tshor ba dang / gzugs ni 'du shes dang / gzugs ni 'du byed dang / gzugs ni rnam par shes pa dang / tshor ba ni 'du shes dang / tshor ba ni 'du byed dang / tshor ba ni rnam par shes pa dang / 'du shes ni 'du byed dang / 'du byed ni rnam par shes pa dang / 'du byed ni rnam par shes pa dang mi rtag pa nyid do zhes bsam mo/ /yang gsum gsum mi rtag par bsam mo 'di lta ste/ gzugs tshor ba 'du shes dang /gzugs tshor ba 'du byed dang / gzugs tshor ba rnam shes dang / gzugs 'du shes 'du byed dang / gzugs 'du shes rnam shes dang / gzugs 'du byed rnam shes dang / tshor ba 'du shes 'du byed dang / tshor ba 'du shes rnam shes dang / tshor ba 'du byed rnam shes dang / 'du shes 'du byed rnam shes so//yang bzhi bzhi mi rtag pa nyid du bsam mo 'di lta ste/ gzugs tshor ba 'du shes 'du byed dang / gzugs tshor ba 'du shes rnam shes dang / gzugs tshor ba 'du byed rnam shes dang / gzugs 'du shes 'du byed rnam shes dang / tshor ba 'du shes 'du byed rnam shes so/ /yang lnga ni mi rtag pa nyid du bsam mo//gzugs tshor ba 'du shes 'du byed rnam par shes pa rnams mi rtag pa nyid du bsam par bya'o/ /de ltar rnal 'byor pa de mi rtag pa'i don la dga' ba skye bar 'gyur ba na/ so sor thams cad la yang bzod pa shes par brjod do/ /gang gi tshe phung po lnga char yang de rnams bsdus te mi rtag pa'o zhes dga' ba 'byung ba de'i tshe spyi nas sdug bsngal gyi bden pa la dmigs pa'i bzod par rig par bya'o//so sor bzod pa nas phyi'i bzod par 'pho ba na bcos pa'i 'gron bu dang / rku ba khan te dang srin bu'i bug pa dang rkan nag po'i dpe brjod par bya'o/ /de ltar sdug bsngal ni mi rtag par nges pa na/phyis sdug bsngal 'di gang las 'byung zhes rnam par dpyad par bya'o/ /de nyid kyis na phung po lnga las sdug bsngal 'byung ba'o zhes nges pa rnyed nas/ kun 'byung la so so dang spyi nas bzod pa bsgom par bya'o/ /'di la yang sum cu rtsa gcig sbyar bar bya'o/ / dang po re zhig gzugs ni sdug bsngal gyi rgyu'o zhes bsam par bya'o/ /gang las 'byung ba chen po'i rdul phran rnams ni phan tshun rgyu nyid do/ /de bzhin du nang gi skye ba la sogs pa'i bdun gyi rgyu'o/ /'di lta ste/ gzugs ni skye ba dang / gnas pa dang mi rtag pa dang yang dag par 'tshogs pa dang / rga ba dang log pa'i rnam grol dang nges par 'byin pa ma yin pa rnams kyi rgyu'o/ /log pa'i rnam grol dang nges par 'byin pa ma yin pa spangs te/ gzhan lnga po rnams nyid kyi rnam par smin pas mtshungs par ldan pa'i tshul khrims rnams kyi'o/ /tshor ba la sogs pa yang gang gi rgyu yin pa'i chos de ci rigs par rtogs par bya'o//'di lta ste/ tshor ba sdug bsngal gyi rgyu'o/ /'du byed sdug bsngal gyi rgyu'o/ /rnam par shes pa sdug bsngal gyi rgyu'o/ /de bzhin du lnga po rnams re re nas rgyu nyid du dga' bar gyur pa na/ yang gnyis gnyis kyang rgyu nyid du dpyad par bya'o/ /'di lta ste/ gzugs tshor ba ni mi rtag pa'i rgyu'o/ /de bzhin du gzugs 'du shes dang / gzugs 'du byed dang / gzugs rnam shes dang / tshor ba 'du shes dang / tshor ba 'du byed dang / tshor ba rnam shes dang / 'du shes 'du byed dang / 'du shes rnam shes dang / 'du byed rnam shes dang / /rgyu yin no bsam par bya'o//gzhan yang gsum yang ngo / /'di lta ste/ tshor ba 'du shes dang / gzugs tshor ba 'du shes dang / gzugs tshor ba rnam shes dang / gzugs 'du shes 'du byed dang / gzugs 'du shes rnam shes dang / gzugs 'du byed rnam shes dang / tshor ba 'du shes 'du byed dang / tshor ba 'du shes rnam shes dang /tshor ba 'du byed rnam shes dang / 'du shes 'du byed rnam shes dang / yang bzhi bzhi yang ngo / /'di lta ste/ gzugs tshor ba 'du shes 'du byed dang / gzugs tshor ba 'du shes rnam shes dang / gzugs tshor ba 'du byed rnam shes dang / gzugs 'du shes 'du byed rnam shes dang /tshor ba 'du shes 'du byed rnam shes dang / rgyu nyid du bsam mo/ /de bzhin du de la rgyu'i don du sred pa skye bar 'gyur ba na/ so sor bzod pa zhes brjod do/ /gang gi tshe phung po lnga char yang bsdus te sdug bsngal gyi rgyu'o zhes sred pa de'i tshe kun 'byung bden pa la dmigs pa'i spyi nas bzod par rig par bya'o//de'i rjes su gzugs kyi phung po'i mi 'jug pa dang / gzugs kyi phung po'i mi skye ba dang / gzugs kyi phung po'i 'gog pa ni mya ngan las 'das pa rtag pa nyid du bsam mo/ /de kho na bzhin du tshor ba'i 'gog pa dang / 'du shes kyi 'gog pa dang /'du byed kyi 'gog pa dang / rnam par shes pa'i 'gog pa dang / yang gnyis gnyis te/ 'di lta ste/ gzugs tshor ba'i 'gog pa dang / gzugs 'du shes 'gog pa dang / gzugs 'du byed 'gog pa dang / gzugs rnam shes 'gog pa dang / tshor ba 'du shes kyi 'gog pa dang / tshor ba 'du byed phung po'i 'gog pa dang /tshor ba rnam shes 'gog pa dang / 'du shes 'du byed phung po'i 'gog pa dang / 'du shes rnam shes dag gi 'gog pa dang / 'du byed rnam shes kyi 'gog pa rtag pa zhes bsam mo/ /yang gsum gsum mo yang ngo / /'di lta ste/ gzugs tshor ba 'du shes 'gog pa dang /gzugs tshor ba 'du byed 'gog pa dang / gzugs tshor ba rnam shes 'gog pa dang / gzugs 'du shes 'du byed 'gog pa dang / gzugs 'du shes rnam shes 'gog pa dang / gzugs 'du byed rnam shes 'gog pa dang / tshor ba 'du shes 'du byed 'gog pa dang / tshor ba 'du shes rnam shes 'gog pa dang /tshor ba 'du byed rnam shes 'gog pa dang / 'du shes 'du byed rnam shes 'gog pa dang / yang bzhi bzhi ste/ 'di lta ste/ gzugs tshor ba 'du shes 'du byed 'gog pa dang / gzugs tshor ba 'du shes rnam shes 'gog pa dang / gzugs tshor ba 'du byed rnam shes 'gog pa dang /gzugs 'du shes 'du byed rnam shes 'gog pa dang / tshor ba 'du shes 'du byed rnam shes 'gog pa dang / mya ngan las 'das pa mi rtag pa zhes bsam mo/ /de rnams kyi 'gog pa rtag pa zhes sred pa skye bar gyur pa na/ so sor thams cad la yang bzod pa zhes brjod do//gang gi tshe gzugs la sogs pa'i phung po lnga char yang 'gog pa 'di ni mi rtag pa zhes sred pa byung ba de'i tshe sdom pa'i 'gog pa'i bden pa dmigs pa'i bzod pa zhes brjod do/ /lam la bco lnga sbyar bar bya'o/ /lam ni phung po bzhi'i ngo bo ste/ gang las gzugs ni nges par 'byin pa ma yin zhing zag pa med pa yang ma yin no//des na lam ni tshor ba la sogs pa phung po bzhis bco lngar 'gyur ro 'di lta ste/ tshor ba ni sdug bsngal 'gog par 'gro ba'i lam mo zhes bsam mo/ /de bzhin du 'du shes dang / 'du byed dang / rnam par shes pa dang / de ltar re re nas lam nyid du sred pa 'byung ba na yang gnyis gnyis yang ngo //'di lta ste/ tshor ba 'du shes sdug bsngal 'gog par 'gro ba'i lam zhes bsam mo/ /de bzhin du tshor ba 'du byed dang / tshor ba rnam shes dang / 'du shes 'du byed dang / 'du shes rnam shes dang / 'du byed rnam shes dang /yang gsum gsum yang ste/ 'di lta ste/ tshor ba 'du shes 'du byed dang / tshor ba 'du shes rnam shes dang / tshor ba 'du byed rnam shes dang / 'du shes 'du byed rnam shes dang / sdug bsngal 'gog par 'gro ba'i lam mo zhes bsam mo/ /de bzhin du de la sred pa 'byung ba na/ lam gyi bden pa thams cad la yang dmigs pa so sor bzod pa zhes brjod do/ /gang gi tshe tshor ba la sogs pa'i phung po bzhi char yang sdug bsngal 'gog par 'gro ba'i lam mo zhes sred pa de'i tshe lam gyi bden pa dmigs pa bsdoms pa'i bzod pa zhes brjod do/ /gang gi tshe gzugs 'gog par 'gro ba nges par 'byin pa'i lam mo zhes 'dod na/tshor ba 'gog par 'gro ba'o/ /'du shes 'gog par 'gro ba'o/ /'du byed 'gog par 'gro ba'o/ /rnam shes 'gog par 'gro ba'i lam mo zhes bsam mo/ /de bzhin du re re nas sdug bsngal 'gog pa bgrod pa'i lam nyid du sred nas/yang gnyis gnyis so/ /'di lta ste/ gzugs tshor ba sdug bsngal 'gog par 'gro ba'i lam mo zhes bsam mo/ /gzugs 'du shes 'gog par 'gro ba'o/ /gzugs 'du byed 'gog par 'gro ba'o/ /gzugs rnam shes 'gog pa bgrod pa'o/ /tshor ba 'du shes 'gog pa bgrod pa'o//tshor ba 'du byed 'gog pa bgrod pa'o/ /tshor ba rnam shes 'gog pa bgrod pa'o/ /'du shes 'du byed 'gog pa bgrod pa'o/ /'du shes rnam shes 'gog pa bgrod pa'o/ /'du byed rnam shes 'gog pa bgrod pa'i lam mo zhes bsam mo/ /yang gsum ste/ 'di lta ste/ gzugs tshor ba 'du shes 'gog pa bgrod pa'i lam mo zhes bsam mo/ /gzugs tshor ba 'du byed 'gog pa bgrod pa'o/ /gzugs tshor ba rnam shes 'gog pa bgrod pa'o/ /gzugs 'du shes 'du byed 'gog pa bgrod pa'o/ /gzugs 'du shes rnam shes 'gog pa bgrod pa'o//gzugs 'du byed rnam shes 'gog pa bgrod pa'o/ /tshor ba 'du shes 'du byed 'gog pa bgrod pa'o/ /tshor ba 'du shes rnam shes 'gog pa bgrod pa'o/ /tshor ba 'du byed rnam shes 'gog pa bgrod pa'o/ /'du shes 'du byed rnam shes 'gog pa bgrod pa'i lam mo zhes bsam mo//yang bzhi bzhi ste/ 'di lta ste/ gzugs tshor ba 'du shes 'du byed 'gog pa bgrod pa'i lam mo zhes bsam mo/ /gzugs tshor ba 'du shes rnam shes 'gog pa bgrod pa'i lam dang / gzugs tshor ba 'du byed rnam shes 'gog pa bgrod pa'i lam mo/ /gzugs 'du shes 'du byed rnam shes 'gog pa bgrod pa'o//tshor ba 'du shes 'du byed rnam shes 'gog pa bgrod pa'i lam nges par 'byin pa'o zhes bsam mo/ /de bzhin du rnal 'byor pa nges par 'byin pa'i don la sred pa skye ba de'i tshe lam gyi bden pa la dmigs pa so sor bzod pa zhes brjod do/ / gang gi tshe bsdus nas phung po la 'gog pa bgrod pa'i lam nges par 'byin pa zhes sred pa 'byung ba de'i tshe lam gyi bden pa dmigs pa bsdus pa'i bzod par 'gyur ba yin no zhes pa ni sum cu rtsa gcig sbyar bar bya'o/ /'dir grol ba 'dod pas bzod pa rnam pa bzhi rnams 'di ni rnam pa'i dbye ba gnyis kyis bsgom par bya'o//'di lta ste/ chos shes pa'i rnam pa dang / rjes su shes pa'i rnam pa'o/ /de la 'dod pas bsdus pa'i gzugs mi rtag zhes pa ni chos shes pa'i rnam pa'o/ /gzugs na spyod pa'i gzugs mi rtag zhes pa ni rjes su shes pa'i rnam pa'o/ /de bzhin du phung po lhag ma la so so dang spyi nas sngon bzhin du sbyar bar bya'o//de bzhin du kun 'byung la sogs pa la ci rigs par sngon bzhin du sbyar bar bya'o/ /ci'i don du bzod pa rnam pa gnyis bsgom par bya zhe na/ brjod de/ gang las bsdus sam shes pa rnam pa gnyis kyis bden pa mngon par rtogs pa'o/ / des na bden pa rnams kyi rjes su mthun par bya ba'i don du bzod pa rnam pa gnyis kyang bsgom par bya'o/ /'o na bsdus nas bzod pa bsgom pa'i rtags ci zhe na/ brjod de/ bzod pa rnam pa bzhi sdom pa'i rtags de ni/ 'di lta ste/ phung po ni mi rtag pa'o zhes sred pa dang / phung po ni sdug bsngal gyi rgyu'o zhes sred pa dang /sdug bsngal 'gog pa ni rtag pa'o zhes sred pa dang / sdug bsngal 'gog pa bgrod pa'i lam ni ma nges par 'byin pa'o zhes dregs pa'o/ /yang / de ltar goms pa'i rnal 'byor pa/ /bzod pa'i spyad pa legs goms pas/ /kun nas skyo dang brtson pa dang / / 'khor lo bzhi dang yang dag ldan/ /dus gsum la ni mkhas pa dang / /sgrib pa thams cad ni grol zhing / /bdag gi tshogs rnams sogs pa dang / /rtag tu dam pa byed ldan dang / /mchog tu nges par 'byung 'dod pa'i/ /gsal ba'i bzod pa skye bar 'gyur/ /'dus byas thams cad mi rtag zhes//sdug bsngal rnam par gzhil ba yi/ /bden pa mngon rtogs mngon du byed/ /zhes gsungs so/ /de rnams kyi don ni 'di yin te/ bzod pa'i spyad pa legs goms pas/ /zhes pa ni/ gang gis bzod pa'i don du shin tu goms par gyur pa de la/ kun du skyo ba zhes pa ni/ /gang la yang dag par skyo ba yod pa ste/mgo'i thod la me 'bar ba bzhin no/ /brtson pa ni khur ma bor ba'o/ /'khor lo bzhi zhes pa ni/ 'khor lo chen po bzhi ste/ 'di ltar/ mthun pa'i yul du gnas pa dang / /skyes bu dam pa la brten pa dang / bdag gi smon lam yang dag pa dang / sngon bsod nams byas pa de dang yang dag par ldan pa'o//dus gsum la ni mkhas pa zhes pa ni/ /dus gsum ni 'di lta ste/ zhi gnas kyi dus dang / rab tu bslab pa'i dus dang / btang snyoms kyi dus so/ /yang na snyoms par 'jug pa'i dus dang / snyoms par 'jug pa'i gnas pa'i dus dang / snyoms par 'jug pa las ldang ba'i dus so//gsum po la mkhas pa'o/ /sgrib pa thams cad ni grol zhes pa ni/ bden pa mthong ba'i sgrib pa ni bzhi ste/ 'di lta ste/ las kyi sgrib pa dang / nyon mongs pa'i sgrib pa dang / rnam par smin pa'i sgrib pa dang / 'gro ba'i sgrib pa'o/ /de las grol ba'o/ /bdag gi tshogs ni 'tshogs pa dang //zhes pa ni/ tshogs ni gnyis te 'di lta ste/ /bsod nams kyi tshogs dang / ye shes kyi tshogs so/ /de la bsod nams kyi tshogs ni/ sbyin pa tshul khrims bsgoms pa'i rang bzhin gyi yon tan no/ /ye shes kyi tshogs ni thos bsam bsgoms pa'i rang bzhin gyi yon tan dang /sngon gyi las kyi rnam par smin pa las skyes pa'i ye shes te/ de'i rang bzhin gyi yon tan no/ /yang tshogs la rnam pa gnyis ni 'di lta ste/ tshul khrims rnam par dag pa'i tshogs dang / lta ba rnam par dag pa'i tshogs so/ /de la gzhan la nye bar mi gnod pa'i mtshan nyid dang /gzhan rjes su 'dzin pa'i mtshan nyid kyi tshul khrims so/ /de bdag bden pa dang spong ba rnam par dag pa yis/ /gang zhig rnam par dag pa 'di ni tshul khrims rnam par dag pa'o/ /nye bar zhi ba dang shes rab dag gis lta ba rnam par dag pa'o/ /shes rab med la bsam gtan med//bsam gtan med na shes rab min/ /zhes gsungs pa'i phyir ro/ /de nyid kyi phyir phyogs de ni byin rlabs rnam pa bzhir rnam par gzhag ste/ 'di ltar/ tshul khrims rang bzhin yon tan ni bden pa'i byin rlabs so/ /sbyin pa'i rang bzhin yon tan ni spong ba'i byin rlabs so/ / ting nge 'dzin thams cad kyi rang bzhin yon tan ni nye bar zhi ba'i byin rlabs so/ /thams cad shes pa'i rang bzhin yon tan ni shes rab kyi byin rlabs so/ /tshogs de rnams dman pas nyan thos kyi byang chub bo/ /'bring gis rang rgyal gyi byang chub pa'o/ /khyad par du 'phags pas bla na med pa yang dag par rdzogs pa'i byang chub 'grub par byed do//rtag tu dam par byed pa dang / /mchog tu nges 'byung tshor ba'o/ /zhes pa ni/ rnam par chad pa med par nges 'byung tshol ba dang / gus pas nges 'byung tshol ba dang / mchog tu zhes pa ni gong du 'phags pa'i nges 'byung tshol ba'o zhes rim pa bzhin du sbyar bar bya'o//gsal ba zhes pa ni bden pa'i rang bzhin rtogs par rno ba'o/ /bden pa mngon rtogs mngon du byed/ /ces pa ni/ bden pa'i mngon par rtogs pa ni so sor nges pa'o/ /ci ltar nges she na/ brjod de/ 'dus byas thams cad mi rtag zhes pa dang / /sdug bsngal rnam par gzhil ba zhes smos te/sdug bsngal las yang dag par 'don pa ste sdug bsngal gyi rnam par zhes pa'i don to/ /'dir bzod pa dpyad pa nges par byed pa kun du spyod pa 'jug na 'du shes gsum ste/ 'di lta ste/ dngos po'i 'du shes dang / skye ba'i 'du shes dang / 'gog pa'i 'du shes so/ / sdug bsngal yang dag par gzhil ba'i bzod pa la ni 'gag pa'i 'du shes gsal ba'o/ /cig shos 'du shes gnyis ni zhan pa'o/ /ming gi 'du shes la ni skye ba'i 'du shes ni med de/ 'gag pa'i 'du shes kho na'o/ /'gag pa ni dngos po la brten pa'i phyir dngos po 'du shes ni rjes su 'jug pa'o//de bzhin du mtshan ma'i 'du shes la sogs pa'o/ /de ltar de'i sdug bsngal yang dag par gzhil ba'i bzod pa de dag bsgoms pa na/ zhi gnas dang gzengs bstod pa dang btang snyoms kyi dus la mkhas pa ches mang du 'gyur te/ de yang / sems rgod pa na mi rgod par bya ba'i ched du 'di ni zhi bar gnas pa'i dus so zhes shes par bya ste/rgod pa nye bar zhi ba'i don du shin tu sbyangs pa dang ting nge 'dzin bsgom par bya'o/ /sems bying bar gyur pa'am som nyir gyur pa na/ 'di ni rab tu gzengs bstod pa'i dus so zhes shes par bya ste/ sems gzengs bstod pa'i don du chos rnam par 'byed pa dang brtson 'grus dang dga' ba bsgom par bya'o//sems mnyam pa nyid thob pa na zung 'jug gi rgyu ba rtag tu bsgoms pas gnyi ga rengs par gyur pa na/ 'di ni btang snyoms kyi dus so zhes shes par bya ste/ btang snyoms bsgom par bya'o/ /de las phyogs gnyi ga rtsol ba med cing myur bar dmigs pa mngon du 'gyur ba dang rab tu dang bar 'gyur ro//dran pa ni dus thams cad du bsgom par bya'o/ /de bzhin du bzod pa spyad pa 'di rdzogs pas dge ba'i rtsa ba nye bar bstan pa phan pa'i sems kyi rgyud la/ sdug bsngal la chos shes pa bskyed pa'i don du dbang po gsal lam spyod yul gyi shugs las sdug bsngal la yid yang dag par dkris te/dus gsum pa'i yang 'dod pa'i khams mi rtag pa'o zhes 'jog pa'o/ /de ltar sgom par byed pa na/ gang gi tshe yi ge gcig nyid kyis 'dod pa'i khams mi rtag pa nyid du 'dzin pa ste/ tshigs bcad legs par goms pa'i rigs pa'o//spyod yul de la 'du shes gang yin pa de ni ming gi 'du shes zhes bshad do/ /ming gi 'du shes las pha rol yi ge med par 'dod pa'i khams mi rtag pa nyid rjod par byed pa'i mtshan ma kun du skyes pa gang yin pa'i 'du shes de ni mtshan ma'i 'du shes zhes bshad do//de yang dman pa la sogs pa'i dbye bas gsum du 'gyur ro/ /'di lta ste/ dman pa'i mtshan ma'i 'du shes dang / 'bring dang khyad par can gyi mtshan ma'i 'du shes so/ /yang so sor dman pa'i dman pa la sogs pa'i dbye bas phye bas mtshan ma'i 'du shes ni dbye ba dgu'o//dman pa'i dman pa mtshan ma'i 'du shes dang / dman pa'i 'bring po dang / dman pa'i khyad par can dang / 'bring gi dman pa dang / 'bring gi 'bring dang / 'bring gi khyad par can dang / khyad par can dman pa dang / khyad par can 'bring dang / khyad par can gyi khyad par can no/ /'dir/ 'di la gnas pa'i rnal 'byor pa ni/dang po gsum las dang / 'bring po gsum las brgya lam na nyams pa yang ngo / /phyi ma 'du shes rnam pa gsum ni yang nges par mi g.yo ba'o/ /des ni nyams par mi 'gyur ro/ /khyad par can khyad par can gyi 'du shes ni zag pa dang bcas pa'i chos mchog go/ chos mchog de'i rjes su 'gro ba ni sgom pa'i rang bzhin mtshungs par ldan pa dang mi ldan pa'o/ /de yang mtshungs ldan ni dge ba'i rtsa ba la sogs pa'o/ /'o na gang gi phyir 'di la chos mchog ces brjod ce na/ brjod de/ gang las de zag pa dang bcas pa thams cad kyi nang na 'di ni snying por gyur pa ste/mar gyi nying khu bzhin no/ /des na de'i phyir chos mchog ces brjod do/ /'dir yang mngon par rtogs pa'i nye bar spyod pa la bcu gnyis pa gsum ste sum cu rtsa drug tu bshad do/ /'di lta ste/ 'dod pa la chags bral min par gyur pa'i 'dod pas bsdus pa'i bzod pa dang / 'dod pas bsdus pa'i ming gi 'du shes dang /'dod pas bsdus pa'i mtshan ma'i 'du shes dang / chos mchog go/ /'dod pa la chags bral min par gyur pa'i gzugs kyis bsdus pa'i bzod pa dang / ming gi 'du shes dang / mtshan ma'i 'du shes dang / chos mchog go/ /'dod pa la chags bral min par gyur pa'i gzugs med pas bsdus pa'i bzod pa dang /ming gi 'du shes dang / mtshan ma'i 'du shes dang / chos mchog go zhes pa ste bcu gnyis su 'gyur ro/ /de bzhin du 'dod pa la 'dod chags dang bral ba'i bcu gnyis so/ /'di ni bcu gnyis pa gsum ni/ sum cu rtsa drug tu 'gyur zhes ci rigs par brjod par bya'o//'o na de ltar mngon par rtogs pa'i nye bar spyod pa yongs su sbyangs pa'i rnal 'byor la/ so so'i skye bo thams cad kyi spyi bor gnas pa nyid do/ /'di las phan chad du ci 'byung zhe na brjod de/ chos mchog de las bar med par rnal 'byor pas yang /bden pa rnams rjes su mthun par byed pa las/ 'dod pas bsdus pa'i sdug bsngal la chos shes pa zag pa med pa skye bar 'gyur ro/ /de la chos ni chos nyid kho na ste/ de las skye zhing sems pa las ma yin pas/ de las chos shes pa skye'o/ /chos ni sdug bsngal bden pa ste/de ni dang po nyid du shes pa ni chos shes pa'am/ chos te 'phags pa'i bden pa bzhi'o/ /gang de rnams dang po'i nyid du 'dod pa'i khams mi rtag pa'o zhes pa zag pa med pa'i shes pa de ni chos shes pa'o/ /sdug bsngal la chos shes pa yang dag par rdzogs te gnas pa'i rnal 'byor pa de ni/so so skye bo nyid 'gag cing / /de 'gags pa las/ rgyu 'phags pa brgyad kyi dang por gyur pas brgyad pa zhes brjod de/ rgyun du zhugs pa'i 'bras bu'i ched du zhugs pa'o/ /sdug bsngal la chos shes pa'i yang dag par thob pa na/ 'khor ba'i rgyu 'dod pa na spyod pa'i sdug bsngal gyis bsdus pa bag la nyal nyon mongs pa bcu spong ba ste/'di ltar/ 'dod chags dang / khong khro dang / nga rgyal dang / ma rig pa dang / log par lta ba dang / 'jig tshogs la lta ba dang / mthar 'dzin par lta ba dang / lta ba mchog tu 'dzin pa dang / tshul khrims brtul mchog tu 'dzin pa dang /the tshom mo/ /bag la nyal ma yin pa nyi shu zad par gyur te/ 'di ltar/ ma dad pa dang / ngo tsha med pa dang / sgyu dang / g.yo dang / mi brtan pa dang / rgod pa dang / bag med pa dang / dregs pa dang / khrel med pa dang / shin tu 'dzin pa dang / 'chab pa dang / rmugs pa dang / bying ba dang / le lo dang / gnyid dang / phrag dog dang / 'gyod pa dang / ser sna dang / mi bzod pa dang / 'khon du 'dzin pa ste/ de nyon mongs pa de rnams rab tu spong bar 'gyur ro/ /sdug bsngal la chos shes pa de ma thag tu rjes su shes pa skye ba'i don du sdug bsngal la so sor rtog pa'i shes pa skye'o//ci ltar zhe na/ de dag bzhin du 'dis de bzhin du lhag ma'o zhes pa med par skye ba ni ma yin no/ /des na rjes su shes pa 'grub pa'i don du/ so sor rtog pa'i shes pa skye'o/ /de yang spangs pa la lta bas nyon mongs pa 'jig byed ni ma yin pa'o/ /so sor rtog pa'i shes pa'i bar med par sdug bsngal la rjes su shes pa skye ba'o//de skyes pa na/ bag la nyal de nyid la khong khro spangs pa'i gzugs kyis bsdus pa dgu dang / bag la nyal ma yin pa bcu gcig spong ngo / /'di lta ste/ ma dad pa dang / ngo tsha med pa dang / sgyu dang / g.yo dang / mi brtan pa dang / rgod pa dang /bag med pa dang / dregs pa dang / khrel med pa dang / shin tu 'dzin pa dang / 'chab pa'o/ /de dang 'di ste nyon mongs pa nyi shur 'gyur ro/ /gzugs med pas bsdus pa bag la nyal dgu po de gnyis/ bag la nyal min brgyad de 'di ltar/ ma dad pa la sogs pa de nyid do/ /deng 'di ste nyon mongs bcu bdun spong ngo //de ltar sdug bsngal la shes pa gsum po 'di skye'o/ /des na khams gsum gyi nyon mongs pa drug cu rtsa bdun rab tu spong ngo / /gzhan bden pa gsum la so sor shes pa gsum gsum skye'o/ /de'i rjes su kun 'byung la chos shes pa yang dag grub pa na/lus la dam pa dang / mthar 'dzin pa dang / tshul khrims brtul mchog tu 'dzin pa spangs pa'i 'dod pas bsdus pa'i bag la nyal bdun po de nyid dang / bag la nyal min ma dad pa la sogs pa nyi shu ste nyon mongs pa nyi shu bdun po de rnams rab tu spong ngo / /de'i rjes su kun 'byung la rjes su shes pa skyes pa na/lus dam pa/ mthar 'dzin tshul khrims brtul mchog 'dzin zhe sdang spangs pa bag la nyal drug dang / bag la nyal min bcu gcig zad de/ 'di ltar/ ma dad pa/ ngo tsha med pa/ sgyu dang / g.yo dang / mi brtan pa dang / rgod pa dang / bag med pa dang / dregs pa dang /khrel med pa dang / shin tu 'dzin pa dang / 'chab pa'o/ /gzugs med pas bsdus pa bag la nyal drug po de nyid dang / bag la nyal min brgyad de/ 'di ltar/ ma dad pa/ ngo tsha med pa/ sgyu g.yo/ mi brtan pa/ rgod pa/ bag med/ dregs pa ste/ nyon mongs pa bcu bzhi po rnams rab tu spong ngo //kun 'byung gi shes pa thams cad la nyon mongs pa lnga bcu rtsa brgyad du 'gyur ro/ /de'i rjes su 'gog pa'i shes pa la lnga bcu rtsa brgyad do/ /de'i rjes su lam la chos shes pa yang dag thob pa na/ de nyid la rang lus dam pa/ mthar 'dzin lta ba spangs pa/ 'dod pas bsdus pa'i bag la nyal brgyad dang /bag la nyal min nyi shu ste/ nyon mongs pa nyi shu nyer brgyad rab tu spong ngo / /de rjes su lam la rjes su shes pa skyes na/ de nyid la rang lus la dam pa dang / mthar 'dzin par lta ba dang / zhe sdang spangs pa gzugs kyis bsdus pa'i bag la nyal bdun dang / bag la nyal min bcu gcig po de nyid do/ /de dang 'di ste gzugs med pas bsdus pa bag la nyal bdun dang bag la nyal min ma dad pa la sogs pa nas bag med pa'i mthar thug pa brgyad do/ /de 'di ste/ lam gyi shes pa la nyon mongs pa drug cu rtsa gcig rab tu spong ngo / /des na sdug bsngal chos shes pa nas bzung ste bgrangs na lam la rjes su shes pa bcu gnyis pa yin no//sdug bsngal la chos shes pa dang / sdug bsngal la so sor rtog pa'i shes pa dang / sdug bsngal la rjes su shes pa dang / kun 'byung la chos shes pa dang / kun 'byung la so sor rtog pa'i shes pa dang /kun 'byung la rjes su shes pa dang / 'gog pa la chos shes pa dang / 'gog pa la so sor rtog pa'i shes pa dang / 'gog pa la rjes su shes pa dang / lam la chos shes pa dang / lam la so sor rtog pa'i shes pa dang / lam la rjes su shes pa'o/ /de ma thag [(]du [,]tu [)]bcu gsum pa ni 'bras bu'i sems te nyon mongs pa 'joms byed ni ma yin no//des na 'dod pa la 'dod chags dang ma bral ba'i rnal 'byor pa nges pa la zhugs pa rgyun du zhugs pa 'bras bu'i sems su rnam par gzhag go/ /'bras bu'i sems de nyid ni/ 'jig rten pa'i lam gyis 'dod pa'i khams la chags bral phyed pa nges pa la zhugs pa lan cig phyir 'ong ba'i 'bras bu sems su rnam par gzhag go//bcu gsum pa'i sems de nyid ni/ 'jig rten pa'i lam gyis 'dod pa la 'dod chags dang bral ba'i rnal 'byor pa nges pa la zhugs pa phyir mi 'ong ba'i 'bras bu'i sems su rnam par gzhag go//de bzhin du 'dod pa dang gzugs la 'dod chags dang bral ba'i nges pa la zhugs pa'i rnal 'byor pa'i/ gang bcu gsum pa'i 'bras bu'i sems ni phyir mi 'ong ba 'bras bu'i sems su rnam par gzhag go/ /yang / de las bar med sdug bsngal la//chos shes zag pa med pa ni/ /der gnas so sor skye bo yi/ /sa mtshams shin tu rgal bar 'gyur/ /brgyad par 'gyur ro 'gas pa yi/ /'bras bu don du rgyun zhugs pa'o/ /chos shes so sor rtog pa zhes/ /de nas shes pa rjes su skyes/ /de ltar rgyu dang zhi ba thabs//gsum la blo gsum rim pas so/ /de ma thag tu bcu gsum pa/ /shes pa dag pa skyon spong min/ /sems de 'bras bu gsum du 'gyur/ /chags bcas phyed bcas chags bral lo/ /zhes gsungs so/ /mngon par rtogs pa'i don gang zhe na/ brjod de/ 'jig rten pa'i mchog dang bcu gsum pa 'bras bu'i sems dang shes pa bcu gnyis dang 'phags pa'i bden pa rnams kyi shes bya rnams rnal 'byor pas mngon sum du rtogs pa'o//yang / 'di ru de snyed mngon rtogs ni/ /shes bya mnyam rtogs nyid ces gsungs/ /mngon par rtogs pa de yang rnam pa lnga ste/mthong ba'i mngon rtogs dang / spangs pa'i mngon rtogs dang / mngon du byed pa'i mngon rtogs dang / yongs su shes pa'i mngon rtogs dang sgom pa'i mngon rtogs so/ /yang de ni rnam pa lnga ru 'dod/ /mthong ba dang ni spong ba dang / /mngon du byed pa nyid dang ni/ /yongs su shes dang bsgom pa'o//zhes gsungs so/ /de la mthong ba ni rnam pa bzhi ste/ 'di ltar/ dmigs su 'dzin pa'i mthong ba dang / /mngon par 'dzin pa mthong ba dang / /don gyi rtogs pa mthong ba dang / /mtshan nyid mthong ba'o/ /spong ba rnam pa bzhi ste/ 'di ltar/ rnam par rengs pa'i spong ba dang / bdun pa 'dod chags kyi spong ba dang /'grib pa'i spong ba dang / 'gog pa'i spong ba'o/ /mngon du byed pa rnam pa gnyis te/ 'di ltar/ lus kyis mngon du byed pa rnyed pa dang / shes rab kyis so sor rtog pa'o/ /yongs su ni thams cad do/ /de kho na nyid mkhyen cing zag pa dang bcas pa rnam par 'bral ba de ni yongs su shes pa'o ste rnam pa dgu'o//kun 'byung la chos shes pa yongs su shes pa dang / kun 'byung la rjes su shes pa yongs su shes pa dang / 'gog pa la chos shes pa yongs su shes pa dang / 'gog pa la rjes su shes pa yongs su shes pa dang / lam la chos shes pa yongs su shes pa dang /lam la rjes su shes pa yongs su shes pa dang / bsgom pa'i lam la 'dod pa'i chags pa bral ba yongs su shes pa dang / bsgom pa'i lam la gzugs kyi chags pa bral ba yongs su shes pa dang / bsgom pa'i lam la gzugs med pa'i chags pa bral ba yongs su shes pa'o//de bsgom pa sgom pa bzhi ste/ 'di ltar/ skye ba sgom pa dang / kun du brten pa sgom pa dang / sbas pa sgom pa dang / rnam par ldog pa sgom pa'o/ /'dir bcu gsum pas 'bras bu sems la gnas pa'i rnal 'byor pa ni rgyun du zhugs pa srid pa tha ma lan bdun pa'o/ / thog mtha' med pa'i 'khor ba'i rgya mtsho las/ srid pa'i rten bdun phrag bzhi nyid do zhes pa'i don to/ /de la bdun phrag bzhi ni/ 'di lta ste/ mi'i srid pa bdun dang / mi'i bar gyi srid pa bdun dang / lha ru srid pa bdun dang / lha'i bar ma'i srid pa bdun no/ /'dir rgyun du zhugs pa'i 'bras bu sems la/'bras bu bsdus pa bsam gtan gyi lam/ zag pa med pa thob par gyur cing / de'i bcu gsum pa 'bras bu sems las pha rol du 'dod pas bsdus pa'i kun nas dkris pa skye bar gyur na/ gang las zag pa med pa'i bsam gtan gyi lam thob pa de 'gag go/ /cha shas lhag ma ni ma yin no//yang / bsam gtan lam gyi 'bras thob pa/ /nyams 'gyur 'dir yang 'ga' zhig go/ /de la brten pa'i 'bras thob pa'i/ /nyon mongs skyed par byed pa'o/ /zhes gsungs so/ /'dis ni lam rnam pa gnyis gsungs par 'gyur ba yin te/ 'di ltar/ zag pa dang bcas pa dang /zag pa med pa'o/ /de la zag pa dang bcas pa ni bzhi ste/ 'di ltar/ bzod pa spyad pa dang / ming gi 'du shes dang / mtshan ma'i 'du shes dang / chos mchog go/ /zag pa med pa'i lam ni gnyis te/ mthong ba'i lam dang bsgom pa'i lam mo/ /de la mthong ba'i lam ni sdug bsngal bden pa la sogs pa shes pa bcu gnyis bshad zin to//bsgom pa'i lam bshad par bya'o/ /gal te de'i rjes su rnal 'byor pa bden pa mthong ba thob pa des/ de bzhin du mthong bas spang bar bya ba bag la nyal la sogs pa 'khor ba'i rgyu dang bcas pa rnams/'dun pa chags pa spang ba dang yongs su shes pa'i spang ba dag gi rtsa ba med pas na ci byed ce na/ brjod de/ ci srid du 'khor ba 'jug pa de srid du sdug bsngal 'jug go zhes shes par bya ste/ bsgom pas spang bar bya ba yang 'khor ba'i rgyu yin pas bag la nyal la sogs pa rgyu dang bcas pa rnams spang ba'i phyir/mthong ba'i de kho na nyid yang dang yang du rtsol ba'i mtshan nyid kyis bsgom pa'i lam goms pa'i don du rtsom pa'o/ /bsgom pa'i lam de ni rnam pa gnyis te/ 'di ltar/ byang chub kyi yan lag las byung ba dang / byang chub kyi yan lag las byung ba ma yin pa'o//de la gang bsgom pa'i lam 'phags pa'i bden pa bzhi'i gzhan gang yang rung ba dang dmigs su 'dzin pa dang mngon par nges 'dzin dag gi brtsams pas skye ba de ni yan lag can no/ /gang yang bsgom pa'i lam rags pa dang zhi ba'i rnam pa la sogs pas dmigs pa bsgom pa'i lam gang dag gi mtshan ma 'am yongs su dag pas mngon par nges 'dzin ni byang chub yan lag can ma yin pa'o//de la thams cad zhen pa'i lam gyis kyang sems gsum nye bar bsams pas kun du sbyor ba spong ba'o/ /'di lta ste/ zhen pa'i bsgom pa'i lam skye ba'i cha dang / gnas pa'i cha dang 'gag pa'i cha rnams bsdoms pas kun du sbyor ba spong ba'o//gsal ba'i bsgom pa'i lam ni skye ba'i cha gnyis kyi 'dod pas bsdus pa bsgom pa'i lam gyi spang bya kun du sbyor ba thams cad spong ba'o/ /de bzhin du gzugs kyis bsdus pa'i kun du sbyor ba thams cad spong ba'o/ / de bzhin du gzugs med pas bsdus pa'i kun du sbyor ba thams cad spong ba'o/ /dus gcig tu khams gnyis sam khams gsum gyi kun du sbyor ba spong ba ni med do/ /de la 'dod pas bsdus pa'i 'dod chags pa dang khong khro dang nga rgyal dang ma rig pa'i mtshan nyid dang bag la nyal min nyi shu'i mtshan nyid dag gi nyon mongs pa'i phung po kun du bzlums pa rnams/lam gyi dbang gis cha bcur phye ba'i/ cha dang po gsum spangs pa ni srid pa tha ma lan bdun par 'gyur ro/ /cha bzhi pa kun thob pa ni rigs nas rigs so/ /bzhi pa dang lnga pa spong zhing spangs pa ni rigs nas rigs kho na'o//cha drug pa thob pa ni lan cig phyir 'ong ba yin no/ /de'i tshe rgyun du zhugs pa'i 'bras bu 'gag pa'o/ /cha bdun pa yang 'di nyid do/ /cha phyi ma gsum spong ba ni sa bon gcig pa'o/ /'dod pas bsdus pa kun du sbyor ba ma lus pa spangs pa ni gong du 'pho ba yin te/ 'dod pa'i khams la 'dod chags dang bral ba'i phyir mi 'ong ba'o//gzugs kyis bsdus pa 'dod chags dang nga rgyal dang ma rig pa'i mtshan nyid bag la nyal dang / ma dad pa dang ngo tsha med pa sgyu dang g.yo dang mi brtan pa dang rgod pa dang bag med pa dang dregs pa dang kha zas kyis rgyags pa'i mtshan nyid bag la nyal min rnams kun nas bzlums te/gzugs kyis bsdus pa'i kun du sbyor ba rnams sngon bzhin du rnam pa bcur bya'o/ /de la cha dang po gsum spangs pa ni gong du 'pho ba yin no/ /cha gzhan gnyis spangs pa ni 'du byed dang bcas nas yongs su mya ngan las 'da' bar 'gyur/ gzhan cha gnyis spangs pa ni 'du byed med par yongs su mya ngan las 'da' ba'o/ /gzhan yang cha gnyis spangs pa ni skyes nas yongs su mya ngan las 'da' bar 'gyur ba'o/ /cha bcu pa thob pa ni bar ma dor yongs su mya ngan las 'da' ba'o/ /cha bcu pa bar du spangs pa ni khams gnyis la chags pa dang bral ba'i phyir mi 'ong ba'o//gzugs med pa yang 'dod chags dang nga rgyal dang ma rig pa'i mtshan nyid bag la nyal dang ma dad pa la sogs pa bdun dregs pa dang bcas pa'i mtshan nyid kyis kun du sbyor ba rnams sngon bzhin du rnam pa bcur bya'o/ /gang zag kyang bzhi ste/bar ma dor yongs su mya ngan las 'da' ba spangs pa'o/ /gal te gzugs med pa la chags bral bar dor yongs su mya ngan las 'da' ba med dam/ med pa nyid de/ de bzhin du/ gzugs med khams su gzugs bral phyir/ /bgrod bya yul dag med pa'i phyir//bar ma'i srid pa med pa'o/ /des na bar dor yongs su mya ngan las 'da' ba med pa'o/ /yang / gzugs kyi chags pa kun bral phyir/ /gzugs med pa la bar sred med/ /gang dang de ru yod min pas/ /mya ngan 'da' med bar srid 'dir/ /zhes gsungs so/ /spangs pa'i gang zag gi rnam par gzhag pa ni/gzugs kyi khams ci bzhin no/ /tha ma'i cha gsum ma ni skyes nas yongs su mya ngan las 'da' ba'o zhes pa ni khyad par ro/ /'dir bsgom pa'i lam gang zhe na brjod de/ de la 'dod pas bsdus pa chos rnams yongs su shes pa rnams/ /de'i cha zag pa med pa rnams//mi rtag pa la sogs pa'i rnam pas yid la byed pa na/ 'dod pas bsdus pa'i bsgom pas spang bar bya ba nyon mongs pa spong ba'o/ /gzugs med pas bsdus pa'i chos rnams yongs su shes pa rnams/ de'i cha zag pa med pa rnams mi rtag pa la sogs pa'i rnam pas yid la byed pas/'dod pa dang gzugs kyis bsdus pa bsgom pas spong bar bya ba nyon mongs pa spong ba'o/ /gzugs med pas bsdus pa'i chos rnams yongs su shes shing de bzhin du bsam pas khams gsum gyi nyon mongs bsgom pas spong bar bya ba rnams spong ngo / /khams gsum gyi nyon mongs pa rnams spangs pas bar chad med pa'i lam skye'o//'dir bar chad med pa'i lam la gnas pa'i rnal 'byor pa khams gsum las 'dod chags dang bral ba yin no/ /dgra bcom pa ni ma yin no/ /bar chad med pa'i lam 'gags pa na 'bras bu tha ma dgra bcom pa nyid thob po//khams gsum las 'dod chags dang bral ba dgra bcom pa yin no dgra bcom pa de yang rnam pa drug yin te/ 'di ltar/ yongs su nyams pa'i chos can dang / 'chi bar sems pa'i chos can dang / rjes su bsrung ba'i chos can dang / gnas pa mi skyob pa dang / mngon du byed pa'i skal ba can dang /mi g.yo ba'i chos can no/ /de la yongs su nyams pa'i chos can ni 'bras bu yongs su nyams pa'i skal ba can gang yin pa'o/ /'chi bar sems pa'i skal ba can ni gang bdag nyid mya ngan las 'da' bar 'dod pa'i skal ba can no/ /rjes su bsrung ba'i skal ba can ni gang 'bras bu rjes su bsrung ba'i skal ba can no//gnas par rtog pa ni gnas pa'i skal ba can mi nyams shing mngon du mi byed pa'o/ /mngon du byed pa'i skal ba can ni gang mi g.yo ba mngon du byed pa'i skal ba can no/ /mi g.yo ba ni gang gis mi skye ba'i ye shes skyed pa'o/ /mi g.yo ba'i chos can de yang rnam pa gsum ste 'di ltar/nyan thos kyi byang chub dang / rang rgyal gyi byang chub dang / bla na med pa yang dag par rdzogs pa'i sangs rgyas so/ /gal te mi g.yo ba ji lta bu zhe na brjod de/ nyon mongs pa mi skye bar shes pa mi g.yo ba ni nyan thos kyi'o/ /kun nas nyon mongs pa dang the tshom mi skye bar shes pa mi g.yo ba ni rang rgyal byang chub kyi'o//kun nas nyon mongs pa the tshom mi skye bar shes pa mi g.yo ba de ni bcom ldan 'das sangs rgyas so/ /de rnams la yongs su nyams pa'i chos can ni 'bras bu las yongs su nyams pa yin gyi dgra bcom gzhan ni ma yin no/ / de yang rtogs pa'i khyad par las te snyoms par 'jug pa'i khyad par las zhes brjod pa de las yongs su nyams par 'gyur ba'o/ /yang dag par rdzogs pa'i sangs rgyas ni gang las kyang yongs su nyams pa ma yin te/ kun nas bsnyel ba med pa'i chos can yin pa'i phyir ro/ /gal te lung las 'bras bu bzhi brjod de/'di ltar/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa'i 'bras bu'o/ /'dir 'bras bu la mang du bshad pa 'gal lo zhe na/ brjod de/ 'gal ba ni med de/ cig shos rnams ni 'bras bu bzhi yi khyad par yin 'dod pas//'bras bu rnams ni mang por 'gyur min khyad par nyer skye nyid/ /ces so/ /gang gi tshe de lta na 'bras bu gang gi khyad par gang yin zhe na/ rgyun du zhugs pa'i khyad par ni rigs nas rigs so/ /sa bon gcig pa ni lan cig phyir 'ong ba'i'o/ /gzugs kyi khams su phyir mi 'ong ba'i khyad par lnga ni 'di lta ste/gong du 'pho ba dang / 'du byed dang bcas pas yongs su mya ngan las 'da' ba dang / 'du byed med par yongs su mya ngan las 'da' ba dang / skyes nas mya ngan las 'da' ba dang / bar ma dor mya ngan las 'da' ba'o/ /gzugs med pa'i khams su bar ma dor mya ngan las 'da' ba spangs te bzhi po de nyid do zhes khyad par dgu'o//dgra bcom pa rnam pa drug ni sngon bzhin no/ /des na mthong lam gyi spang bya nyon mongs pa spangs pa la rdzogs pa'i sangs rgyas dang / rang sangs rgyas rnams la khyad par med do/ / de srid du 'di ni 'phags pa'i lam gyi mngon par rtogs pa'i rim pa'o/ /rnal 'byor pa phyi rol gyi lam gyis 'dod pa na spyod pa'i bsgom pas spang bar bya ba'i nyon mongs pa phyogs gcig spangs te/ mthong ba'i lam gyi mthong bas spang bar bya ba'i nyon mongs pa spangs nas bcu gsum la 'bras bu'i sems la lan cig phyir 'ong ba yin no//phyogs 'di la rgyun du zhugs pa'i 'bras bu'i phyir zhugs pa dang / rigs nas rigs su skye ba'i rgyun du zhugs pa dag ni med do/ /de bzhin du 'dod pa'i khams pa'i bsgom pas spang bar bya ba ma lus pa spangs te/ de kho na bzhin du mthong bas spang bar bya ba'i nyon mongs pa spangs nas bcu gsum pa'i sems phyir mi 'ong bar 'gyur ro//phyogs 'di la lan cig phyir 'ong ba dang po sa bon gcig pa med do/ /de bzhin du 'dod pa'i khams pa dang gzugs kyi khams pa dag gi bsgom pas spang bar bya ba'i nyon mongs pa spangs nas khams gnyis la chags bral du gyur pa nyid de kho na bzhin du mthong bas spang bar bya ba nyon mongs pa spangs nas bcu gsum pa'i sems la phyir mi 'ong bar 'gyur ro//phyogs 'di la gzugs khams kyi phyir mi 'ong ba lnga po med do/ /'dod pa'i khams su bar ma dor mya ngan las 'da' ba spangs te/lhag ma lus pa ni phyir mi 'ong ba bzhi nyid do/ /des na phyi rol gyi lam gyi khams gnyis kyi bsgom pas spang bar bya ba'i nyon mongs pa spong ba nyid do/ /gzugs med pa na spyod pa'i bsgom pas spang bar bya ba nyon mongs pa spong bar nus pa ni ma yin no/ /chos de lta bu yin pas so//'phags pa'i lam gyis ni khams gsum ka'i spong ba'o zhes rnam par gzhag pa ni lugs bzang po'o/ /'di ni de srid nyan thos kyi bsgom pa'i lam gyi nyon mongs pa spong ba'i tshul lo/ /rang sangs rgyas kyi theg pa ni yang phyi rol gyi lam gyi 'dod pa dang gzugs dag na spyod pa bsgom pas spang bar bya ba nyon mongs pa nas/de'i rjes su mthong bas spang ba nyon mongs pa spangs te/ 'phags pa'i lam gyis gzugs med pa na spyod pa rnams spangs te rang sangs rgyas kyi byang chub mngon du byed do/ /byang chub sems dpa' chen po rnams ni bskal pa grangs med gsum du pha rol tu phyin pa drug spyad pas bsod nams dang ye shes kyi tshogs bsags nas dga' ldan du gnas pa la sogs pa bgyis te/byang chub snying po la zhugs te lha'i bu'i bdud btul nas rten cing 'brel par 'byung ba lugs dang mthun pa dang mi mthun pa rnam par gzigs nas/bzod pa spyad pa la sogs pa rdzogs par byas te/ khams gsum gyi mthong bas spang bar bya ba'i nyon mongs pa spangs nas sems bcu gsum pa la 'dod pa na spyod pa'i bsgom pas spang bar bya ba nyon mongs pa spangs pas 'dod pa'i 'dod chags dang bral ba'o/ / bcu bzhi pa la gzugs na spyod pa'i bsgom pas spang bar bya ba nyon mongs pa spangs pas gzugs la chags pa dang bral ba'o/ /sems bco lnga la gzugs med pa na spyod pa'i bsgom pas spangs par bya ba nyon mongs pa spangs pas gzugs med pa'i khams su chags pa dang bral ba bgyis nas/sems bcu drug pa ni brtsal bya yin pas lam mo/ /mi slob pa 'bras bu'i gnas skabs te rtogs pa'i khyad par thams cad thob pa dgra bcom pa nyid thob pa'i sems so/ /de kun du sgrub pas yang dag par rdzogs pa'i sangs rgyas su 'gyur ro zhes so/ /mngon par rtogs pa'i shes pa bcu gnyis pa dang bcu gsum pa la sogs pa'i sems bzhi dang ste bcu drug gis sangs rgyas nyid du rnam par gnas so zhes so//yang / de bzhin gshegs pa'i ting nge 'dzin/ /rdo rje lta bu'i sems kyi chas/ /zag pa thams cad spong nus kyang / /mi srid phyir na de des min/ / zhes gsungs so/ /'di'i don ni/ rdo rje lta bu'i ting nge 'dzin dang ldan pa ni de bzhin gshegs pa'o/ /sems kyi chas zhes pa ni/ rdo rje lta bu'i ting nge 'dzin dang ldan pa'i sems kyi skye ba'i cha shas kyis so/ /zag pa thams cad zhes pa ni nyon mongs pa'o/ / nus zhes pa ni don byed pa'o/ /de des min zhes pa ni de lta mod kyi mi spong zhes pa'i don to/ /gang las she na/ mi srid pa'i phyir ro zhes so/ /'o na mi srid pa'i don gang zhe na brjod de/ gzhan gyis gzhan min goms pa las/ /gcig gi spong min khams gnyis kyi/ /skal mi mnyam min de yi phyir//sangs rgyas skad cig bcu drug nyid/ /ces so/ /'di'i don ni gang las gzhan gyis spong ba ni ma yin no/ /de'i phyir na bcom ldan 'das kyis nus kyang gzhan gyi rgyud kyis nyon mongs pa sel ba ni ma yin no/ /'o na sems kyi cha shas gcig gis rang rgyud kyi sel lam zhe na brjod de/goms pa las gcig gis khams gnyis kyi spong ba ni ma yin no/ /gang las goms pa yin kyang sems gcig gis khams gnyis kyi bsgom pas spang bar bya ba spong ba ni mi srid do/ /de bzhin du bsgom pa'i lam gyi/ skal ba mi mnyam pa ste mthong bas spang bar bya ba nyon mongs pa spong ba ni mi srid do//de'i phyir zhes pa ni mi srid pa'i phyir ro/ /sangs rgyas nyid skad cig bcu drug ste bcu gsum pa ni ma yin no zhes pa'i don to/ /'o na mthong bas spang bar bya ba yang phyi rol gyi lam gyis spong ngam zhe na brjod de/ 'phags pa ni lam gnyis ka dang 'dod pas bsdus pa dang gzugs kyis bsdus pa bsgom pas spang bar bya ba spong ba'o//'phags pa ma yin pa yang phyi rol gyi lam gyi 'dod pas bsdus pa bsgom pas spang bar bya ba dang gzugs kyis bsdus pa bsgom pas spang bar bya ba spong ba'o/ / gzugs med pas bsdus pa ni ma yin te/ de ni 'phags pa'i lam nyid kyis spang ba yin pa'i phyir ro/ /'o na phyi dang 'phags pa'i lam dag rnam pa'i khyad par gang zhe na/ brjod de/ zhi ba dang rags pa'i rnam pa ni phyi rol gyi lam mo/ /'di ltar/ 'dod pa'i khams ni rags pa'o zhes pa ni rags pa'i rnam pa'o//gzugs kyi khams ni zhi ba'o zhes pa ni zhi ba'i rnam pa'o zhes pa la sogs pa ste phyi rol gyi lam la rnam pa mang ngo / /'phags pa'i lam ni rnam pa bzhi ste 'di ltar/ mi rtag pa'i rnam pa dang / rgyu nyid kyi rnam pa dang / mi rtag pa'i rnam pa dang / nges par 'byin pa'i rnam pa'o//'di ni de ma thag tu spros pa dang bcas te bshad zin to/ /yang / dad brtson dran pa shes rab dang / /ting 'dzin la sogs sngon 'gro ba'o/ /lam ni zag pa kun spong ba/ /gang gis stong pa'i phyir rgol rnams/ /zhes gsungs pa'i lam 'di ni 'phags pa'i lam mo/ /gang gis zhes pa ni 'phags pa'i lam gyis so//stong pa zhes pa ni ma tshang ba'o/ /phyir rgol zhes pa ni phyi rol pa'i grol bas mngon par nga rgyal ba dbang phyug la sogs pa dang / drang srong byas dang ba shi sta la sogs pa rnams so/ /de ltar yang lam rnam pa gnyis kyis kyang 'dod khams la chags pa dang bral ba ni gzugs khams thams cad du skye ste/tshangs pa chen po dang 'du shes med pa'i sems can ni ma gtogs so/ /'phags pa phyir mi 'ong ba de nyid gang gang gi tshe gzugs khams la chags pa dang bral ba thob pa de'i tshe gzugs med pa'i khams su nye bar skye'o/ /'o na gzugs med pa'i khams la 'dod chags dang bral ba'i 'phags pa 'di ci ltar zhe na/brjod de/ de ltar yang rab tu 'bar ba'i lcags kyi gong bu ni shin tu ches che ba'i bud shing du bcug pa na/ bud shing de rnams ma lus par bsregs te thal bar gyur pa yang bud shing gi kun du tshang ba nyid rim gyis bsil bar 'gyur ro//de bzhin du 'phags pa nyan thos lcags kyi gong bu/ sdug bsngal la chos shes pa la sogs pa'i lam gyi me kun du 'bar ba/ nyon mongs pa'i bud shing phung po ches yang che ba mthong ba bsgom pas spang bar bya bar bcug pa na/ de rnams ma lus pa mthar thug pa bsregs nas nyon mongs pa'i bud shing rab tu zhi ba yang kun du 'bar ba nyid phung po lhag ma dang bcas pa'i mya ngan las 'das pa'i dbyings su gnas pa mi slob pa'i lam gyi me'i lhag ma yin pas so//rim gyis las kyi rnam par smin pa ma lus pa nye bar longs spyod nas rang gi lus bor te phung po lhag ma med pa'i mya ngan las 'das pa bgrod pas bsil bar 'gyur ba'o//rab tu 'bar ba'i lcags gong bzhin/ /nyon mongs bud shing kun bsregs pas/ /dgra bcom lhag bcas la gnas pa/ /rim gyis bsil bar 'gyur ba'o/ /de tshe phung po med pa yi'ang //de yi sngon ma'ang 'gag 'gyur te/ /sdug bsngal gzhan ni mi skye ste/ /rgyu rnams yang dag zad phyir ro/ /zhes gsungs so/ /gal te gang gi tshe de ltar phung po lhag ma med pa'i mya ngan las 'das pa'i dbyings thob pa na/ ci lha 'am mi 'am gzhan zhes ci ltar tha snyad bya zhe na brjod de/ phung po lhag ma med pa'i mya ngan las 'das pa sdug bsngal gyi rgyu rnams rab tu zhi bas nye bar len pa med pa'i phyir 'gro ba drug tu gnas pa med do/ /'gro ba med pas tha snyad thams cad ldog pa yin no/ /lha dang mi zhes pa la sogs pa tha snyad kyi rten ni 'gro ba yin no/ /de'i phyir 'gro ba thams cad med pa 'di'am gzhan zhes pa'i tha snyad ni 'gro ba 'di las ldog pa'o//dper na me'i sreg byed la sogs pa'i tha snyad thams cad kyi rten ni bud shing ngo / /de bzhin du nye bar len pa dang bcas pa'i gang zag la tha snyad thams cad yin no/ /nye bar len pa med pa ni ma yin no/ /yang / tha snyad bya ba ma lus pa/ /de yi rten ni 'gro dngos so/ /'gro ba med phyir ldog pa ste/ /bud shing zad pa'i me bzhin no/ /zhes gsungs so/ /'di ltar yang de nyid kyis na 'di ni gcig nyid dam gzhan nyid gang gis kyang brjod par bya ba ma yin no/ /sems can ma yin sems can ma yin pa ma yin thams cad du grangs las 'das pa'o//mya ngan las 'das pa rnams la thams cad du tha snyad med pa ci zhe na brjod de/ tha snyad yod de/ 'on kyang nye bar len pa'i tha snyad kyis tha snyad byar med do/ /nye bar len pa med pa'i tha snyad kyis tha snyad du bya'o/ /nye bar len pa med pa'i tha snyad ni gsungs te/de yang / grol ba zhi ba bdud rtsi son/ /skyon med yongs su mya ngan 'das/ /sangs rgyas bde gshegs skyob pa rnams/ /de tshe brjod kyi gzhan du min/ /zhes so/ /'dir mdor bsdus nas nyon mongs pa ni rnam pa gnyis te/ bag la nyal dang / bag la nyal ma yin pa'o/ /de la bag la nyal ci lta bu bag la nyal ma yin pa ci ltar zhe na/brjod de/ rlan can rab kyi rdul bzhin du/ /bag la nyal 'di rnams khams gsum du shin tu brtan par rjes su thim zhing 'brel par 'gyur bas bag la nyal zhes brjod do/ /yang / khams gsum du bag la nyal dang / /'brel phyir bag la nyal zhes brjod//zhes gsungs so/ /bag la nyal ma yin pa ni nyon mongs pa nyid yin te/ kun nas dkris pa tsam yin pas/ /de bzhin du bag la nyal ba ni ma yin no/ /de'i phyir bag la nyal ba ma yin pa zhes bya'o/ /bag la nyal ni yang gang las de bzhin du rjes su nyal zhing zag pa dang bcas pa'i chos rnams kyi skye ba dang gnas pa dang 'phel ba'i rgyu yin pa'i phyir ro//des na de ni rnam pa gnyis yin te 'di ltar/ sems dang ldan pa dang / sems dang mi ldan pa'o/ /yang / de ni sems dang ldan pa dang / /mi ldan dag tu shes par bya/ /zhes gsungs so/ /'o na sems dang ldan pa'i don ci yin zhe na/brjod de/ dper na grog mkhar gyi brten pa'i mtha' ni rnam par brten pa sbyang dka' ba grog ma rnams kyi gnas rang gi mkhar mtho ba'i rgyu yin no/ /de bzhin du sems can rnams kyi mi ldan pa'i bag la nyal ni/ de ni rnam par brten pa sbyang dka' ba nyes pa 'byung ba rnams kyi sa bon du gyur pa'o//gang gis nyon mongs pa can spangs pa ma yin pa'i sems kyang brgyal ba dang gnyid mthug po log pa yang sems med pa'i gnyid kyis non pa yang 'du shes med pa'i snyoms par 'jug pa la zhugs pa yang 'du shes med pa'i sems can kyang 'du shes dang tshor ba 'gog pa'i snyoms par zhugs pa yang /de rnams ni mi ldan pa'i bag la nyal dang bcas pa yin par bshad do/ /dper na grog mkhar rnams kyi rtse mo ni rnam par mi brten pa sbyang sla ba rang gi rten las kun du bzhengs pa de bzhin du mtshungs par ldan pa'i bag la nyal lam/ nyon mongs pa gzhan nam nye ba'i nyon mongs pa la sogs pa rnams ni rnam par mi rtag pa kun du spyod pa tsam dang sbyang sla ba rang gi rten du rtogs pa'i sa bon du gyur par rig par bya'o//yang / mi ldan pa yi lhag brten don/ /grog mkhar rnams kyi steng bzhin 'dod/ /zhes gsungs so/ /de bzhin du/ldan pa kun du spyod pa tsam/ /go bya grog mkhar cog bzhin no/ /zhes so/ /gal te de ltar mi ldan pa'i bag la nyal ni rtag tu yod pa nyid yin na ci kun nas dkris pa rtag tu 'byung ba ma yin zhe na/ brjod de/ nyon mongs pa'i rgyu ni gsum ste 'di ltar/ yul dang yul can phrad pa dang //mi ldan pa'i bag la nyal ma spangs pa dang / tshul bzhin ma yin pa yid la byed pa'o/ /gang las 'di gsum ni nyon mongs pa'i rgyu tshang ba'o/ /rgyu rnams kyi tshogs pa ni res 'ga' ba yin pas kun nas dkris pa dus thams cad du 'byung ba ma yin no/ /yang / yul ni yul can gyis thob dang //mi ldan bag la nyal rten dang / /tshul bzhin ma yin yid byed dang / /gsum ni nyon mongs rgyu yin no/ /zhes gsungs so/ /gal te 'phags pa'i lam mam phyi rol gyi lam gyis/ ci mtshungs par ldan pa spong ngam mi ldan pa spong zhe na brjod de/ mi ldan pa rnams spong ste/ldan pa'i sa bon gyi gnas yin pa dang / sgrub dka' ba'i phyir dang rnam par brtan pa'i phyir ro/ /de rnams spangs pa las mtshungs par ldan pa nyid spong ba'o/ /sa bon zad pa las myu gu rnams bzhin no/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las 'phags pa mang pos bkur ba'i sde pa'i lung gi tshul las 'phags pa'i bden pa rnam par nges pa zhes bya ba le'u nyi shu rtsa gcig pa'o// //byang chub sems dpa'i theg pa'i lam rab tu dbye ba ni mang ste/ 'di ltar/ pha rol tu phyin pa dang / byang chub kyi phyogs kyi chos dang /stong pa nyid dang / bsam gtan dang / gzugs med pa'i snyoms par 'jug pa rnams dang / rnam par thar pa brgyad dang / mthar gyis gnas pa'i snyoms par 'jug pa rnams dang / zil gyis gnon pa rnams dang / zad pa dang / ting nge 'dzin rnams dang ye shes dang / dbang po rnams dang / ting nge 'dzin dang / tshad med pa rnams dang / nor rnams dang / rnam par rtog pa dang / spyan rnams dang / mngon par shes pa dang / gzugs dang / dbang du gyur pa la sogs pa rnams dang / tshor ba sems pa la sogs pa'i 'du byed do/ /'di lta ste/ tshor ba dang / sems pa dang / reg pa dang / yid la byed pa dang /'dun pa dang / lhag par mos pa dang / dad pa dang / brtson 'grus dang / dran pa dang / ting nge 'dzin dang / shes rab dang / rnam par rtog pa dang / rnam par dpyod pa dang / bag yod pa dang / skyo ba dang / dga' ba dang / shin tu sbyangs pa dang / mi 'tshe ba dang / ngo tsha ba dang / khrel yod pa dang / rnam par grol ba dang /dge ba'i rtsa ba dang / ye shes dang / bzod pa rnams te 'di dag la sogs pa'o/ /de la pha rol tu phyin pa ni drug ste/ 'di ltar/ sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol tu phyin pa'o/ /de la rgyu mtshan gnyis las sbyin pa 'byung ste/ 'di ltar/ mchod pa'i ched du sbyin pa dang / /rjes su 'dzin pa'i ched du sbyin pa'o/ /rgyu bzhis sbyin pa ngan par 'gyur te/ 'di ltar/ rnyed pa 'dod pas sbyin pa dang / 'jigs pas sbyin pa dang /chags pas sbyin pa dang / brten pa'i don du sbyin pa'o/ /yang sbyin pa rnam pa gnyis te/ 'di ltar/ yang dag min pa'i sbyin pa dang / yang dag pa'i sbyin pa'o/ /dang po la rnam pa bdun te/ 'di ltar/ 'jigs pa'i sbyin pa dang / bdag la byin pa'i sbyin pa dang / bdag la ster bar 'gyur bas sbyin pa dang /bdag gi sngon ma rnams kyis byin pas sbyin pa dang / sngon ma zhes pa ni pha dang mes po dang yang mes rnams kyis byin pas sbyin pa'o/ /bde 'gro'i don du sbyin pa dang / grags pa'i don du sbyin pa'o/ /yang dag pa'i sbyin pa ni bzhi ste/ 'di ltar/ sems brgyan pa'i don du sbyin pa dang /sems yongs su sbyangs pa'i don du sbyin pa dang / sbyor ba tshogs kyi don du sbyin pa dang / dam pa'i don thob pa'i don du sbyin pa'o/ /sbyin pa'i 'bras bu ni rnam pa gnyis te/ 'di ltar/ grol ba 'bras bu dang / longs spyod chen po 'bras bu'o/ /de la yongs su bsngo ba rnam pa gnyis kyis sbyin pa'i 'bras bu ni thar pa ste/'di ltar mya ngan las 'das pa'i don du bsngos pa dang / sems can gyi don du bsngos pa'o/ /rgyu brgyad kyis sbyin pa'i 'bras bu longs spyod chen por 'gyur te/ 'di ltar/ zhing dang / dngos po dang / yid la byed pa dang / bsam pa dang / de las gzhan yongs su 'dzin pa dang / rten dang / mang du byed pa dang / skye bo mang po las so/ /de la zhing zhes pa khyad par bzhis 'bras bu longs spyod chen po nyid du 'gyur te/ 'di ltar/ 'gro ba'i khyad par dang / sdug bsngal gyi khyad par dang / phan 'dogs pa nyid kyi khyad par dang /yon tan dang ldan pa'i khyad par ro/ /de la 'gro ba'i khyad ni mang ste/ 'di ltar/ dud 'gro la byin pas brgya 'gyur dang / tshul khrims 'chal par gyur pa'i mi la byin pas stong 'gyur zhes pa la sogs pa'o/ /sdug bsngal gyi khyad par gyis 'bras bu longs spyod chen por 'gyur ba'i rgyu mtshan ni/nye bar lhag pa'i dngos po las byung ba'i bsod nams bya ba'i dngos po bdun te/ 'di ltar/ phyogs bzhi'i dge slong gi dge 'dun gyi ched du kun dga' ra ba rtsom pa dang / kun dga' ra ba der gtsug lag khang bzhengs pa dang / gtsug lag khang der nyal stan khri stan sbyin pa dang / gtsug lag khang der rtag tu zas sbyin pa dang / gtsug lag khang der 'ong ba dang / 'gro ba'i don du sbyin pa dang / gtsug lag khang der dge slong nad pa'i phyir ram nad pa'i nye gnas kyi phyir sbyin pa dang / gtsug lag khang der bsil dus dang sprin khebs dus sam/ rlung gi dus sam char gyi dus su zas la sogs pa sbyin pa'o//phan 'dogs pa'i khyad par ni gsum ste/ 'di ltar/ ma dang / pha dang / gzhan la phan 'dogs pa'o/ /yon tan gyi khyad par ni brgyad de 'di ltar/ dge bsnyen dang / dge bsnyen ma dang / dge tshul dang / dge tshul ma dang / slob bzhin ma dang / dge slong dang / dge slong ma dang /bsnyen gnas kyi sdom pa can no/ /yon tan can sbyin gnas kyi zhing ni rnam pa bzhi ste/ 'di ltar/ sangs rgyas dang / chos dang / 'phags pa'i dge 'dun dang / gang zag khyad par can no/ /dngos po zhes pa dngos po rnam pa gnyis te/ 'di ltar/ dngos po gya nom pa dang / dngos po rab tu mang po/yang rnam pa lnga ste/ 'di ltar/ mdog phun sum tshogs pa dang / dri phun sum tshogs pa dang / ro phun sum tshogs pa dang / reg bya phun sum tshogs pa dang / dus su bde bar byed pa'o/ /yid la byed pa las 'bras bu longs spyod chen po ni lnga ste/ dad pas sbyin pa dang / dam par byed pas sbyin pa dang /rang gi lag nas ster ba dang / dus su sbyin pa dang / nye bar gnod pa med par sbyin pa'o/ /bsam pa las 'bras bu longs spyod chen po ni gnyis te/ 'di ltar/ mya ngan las 'das pa'i bsam pas sbyin pa dang / sems can thams cad kyi don du yongs su bsngo ba'o/ /'di las gzhan sbyin pa dman pa ni gnyis te/'di ltar/ bde 'gro'i don du sbyin pa dang / /longs spyod kyi ched du sbyin pa'o/ /de las gzhan yongs su 'dzin pas sbyin pa ni/ dper na sbyin byed tshul khrims dang ldan pas sbyin pa'o/ /brten nas sbyin pa ni/ dper na sbyin byed 'jig rten pa'i lam gyis chags bral du gyur pas sbyin pa'o//lan mang du byed pas sbyin pa ni gnyis te/ 'di ltar/ gang gi tshe yang dang yang du goms pas sbyin pa dang / yang dang yang du rjes su rnam par brtags te sbyin pa'o/ /skye bo mang po la sbyin pa ni gnyis te 'di ltar/ rang rigs byas pa'i sbyin pa dang / gzhan byed du bcug pa'i sbyin pa'o//'di ni sbyin pa'i bye brag rnams so/ /yang sbyin pa rnam pa gsum ste 'di ltar/ zang zing gi sbyin pa dang / mi 'jigs pa'i sbyin pa dang / chos kyi sbyin pa'o/ /'di rnams su thabs kyi sbyin pa dang / mkhas pa'i sbyin pa dag bsdus te sbyin pa rnam pa lnga zhes gzhan dag go//de la zang zing gi sbyin pa ni rnam pa bzhi ste/ 'di ltar/ don sbyin pa dang / don mchog sbyin pa dang / yan lag sbyin pa dang / yan lag mchog sbyin pa'o/ /chos kyi sbyin pa ni rnam gsum ste/ 'di ltar/ chos ston pa dang / thabs bshad pa dang / mkhas par bya ba la gzhan sbyor ba'o//sbyin bya ma yin pa'i dngos po ni gsum ste/ 'di ltar/ chang dang / dug dang / mtshon cha'o/ /tshul khrims ni rnam pa gnyis te/ 'di ltar/ lus kyi dang / ngag gi'o/ /de la lus kyi rnam pa gsum ste/ 'di ltar/ srog gcod pa las ldog pa dang / ma byin par len pa las ldog pa dang / 'dod pas log par spyod pa las ldog pa'o/ /ngag gi las la rnam pa bzhi ste 'di ltar/ brdzun smra ba las ldog pa dang / tshig phra ma las ldog pa dang / tshig rtsub po las ldog pa dang / ngag kyal pa las ldog pa'o/ /yang rnam pa lnga ste 'di ltar/ srog gcod pa las ldog pa la sogs pa'i mtshan nyid ldog pa'i tshul khrims kyi ngo bo sdom pa'i tshul khrims dang /'jug pa'i tshul khrims kyi ngo bo dge ba'i chos sdud par byed pa'i tshul khrims dang / sems can don byed pa'i tshul khrims dang / tshogs kyi tshul khrims dang / kun nas slong bar byed pa'i tshul khrims so//de la sdom pa'i tshul khrims ni rnam pa brgyad de/ 'di ltar/ dge bsnyen gyi sdom pa dang / dge bsnyen ma'i sdom pa dang / dge tshul gyi sdom pa dang / dge tshul ma'i sdom pa dang / bar slob ma'i sdom pa dang / dge slong gi sdom pa dang / dge slong ma'i sdom pa dang / bsnyen gnas kyi sdom pa'o//yang sdom pa rnam pa lnga ste/ 'di ltar/ so sor thar pa'i sdom pa dang / tshul khrims kyi sdom pa dang / dbang bskur ba'i sdom pa dang / bsam gtan gyi sdom pa dang / zag pa med pa'i sdom pa'o/ /tshogs kyi tshul khrims ni rnam pa bzhi ste/ 'di ltar/ nye bar 'tshe ba rnam rtog gi gnyen po dbang po rnams sgo sdom pa dang /nye bar 'tshe brten las su mi rung ba'i gnyen po zas kyi tshod rig pa dang / nye bar 'tshe ba mngon par mi brtson pa'i gnyen po srod dang tho rangs la mi nyal bar sbyor ba rjes su ldan pa nyid dang / nye bar 'tshe ba 'gyod pa'i gnyen po shes bzhin la gnas pa'o//slong bar byed pa'i tshul khrims ni sems las byung ba ste rnam pa gsum mo/ /'di ltar/ brnab sems kyi gnyen po ma chags pa'i rang bzhin brnab sems med pa'o/ /gnod sems kyi gnyen po zhe sdang med pa'i rang bzhin mi gnod pa'i sems so/ /log par lta ba'i gnyen po ma rmongs pa'i rang bzhin yang dag pa'i lta ba'o//tshul khrims dri ma med pa ni drug ste/ 'di ltar/ skyon med pa dang / ma nyams pa dang / ma 'dres pa dang / ma nogs pa dang / thun tshags ma yin pa dang / rang dbang can no/ /gnas brtan pa chos mngon pa pas gsungs te/ tshul khrims ni gsum ste/ 'di ltar/ sems pa'i tshul khrims dang / sdom pa'i tshul khrims dang / mi 'da' ba'i tshul khrims so/ /yang tshul khrims rnam pa gnyis te/ 'di ltar/ sdom pa'i don gyis na tshul khrims dang / spong ba'i don gyis na tshul khrims so/ /de la sdom pa'i don gyis na tshul khrims ni bzhi ste/'di lta ste/ rnam par ldog pa'i tshul khrims dang / sems pa'i tshul khrims dang / yang dag par bsdams pa'i tshul khrims dang / sdom pa'i tshul khrims so/ /spong ba'i don gyis na tshul khrims ni/ rnam pa sum cu rtsa bdun te 'di ltar/ nges par 'byung bas 'dod pa la 'dun pa spangs pa'i tshul khrims dang /gnod sems med pas gnod sems spangs pa'i tshul khrims dang / snang ba'i 'du shes kyis rmugs pa dang gnyid spangs pa'i tshul khrims dang / mi g.yeng bas rgod pa spangs pa'i tshul khrims dang / chos rnam par bzhag pas the tshom spangs pa'i tshul khrims dang /ye shes kyis ma rig pa spangs pa'i tshul khrims dang / rab tu dga' bas mi dga' ba spangs pa'i tshul khrims dang / bsam gtan dang pos sgrib pa rnams spangs pa'i tshul khrims dang / bsam gtan gnyis pas rnam par rtog pa dang rnam par dpyod pa rnams spangs pa'i tshul khrims dang /bsam gtan gsum pas dga' ba spangs pa'i tshul khrims dang / bsam gtan bzhi pas bde ba sdug bsngal dag spangs pa'i tshul khrims dang / nam mkha' mtha' yas la snyoms par 'jug pas gzugs kyi 'du shes dang / thogs pa'i 'du shes dang / tha dad pa'i 'du shes rnams spangs pa'i tshul khrims dang /rnam shes mtha' yas skye mched la snyoms par zhugs pas nam mkha' mtha' yas skye mched kyi 'du shes spangs pa'i tshul khrims dang ci yang med pa'i skye mched la snyoms par 'jug pas/ rnam shes mtha' yas skye mched kyi 'du shes spangs pa'i tshul khrims dang /'du shes med 'du shes med min gyi skye mched la snyoms par 'jug pas/ ci yang med pa'i skye mched kyi 'du shes spangs pa'i tshul khrims dang / mi rtag pa rjes su mthong bas rtag pa'i 'du shes spangs pa'i tshul khrims dang / sdug bsngal rjes su mthong bas bde ba'i 'du shes spong ba'i tshul khrims dang /bdag med pa rjes su mthong bas bdag gi 'du shes spong ba'i tshul khrims dang / yid 'byung ba rjes su mthong bas dga' ba spong ba'i tshul khrims dang / chags bral rjes su mthong bas chags pa spong ba'i tshul khrims dang / 'gog pa rjes su mthong bas kun 'byung spong ba'i tshul khrims dang /so sor spong ba rjes su mthong bas nye bar len pa spong ba'i tshul khrims dang / zad pa rjes su mthong bas sdug pa'i 'du shes spong ba'i tshul khrims dang / 'gag pa rjes su mthong bas kun du 'du byed pa spong ba'i tshul khrims dang / yongs su 'gyur ba rjes su mthong bas brten pa'i 'du shes spong ba'i tshul khrims dang /mtshan ma med pa rjes su mthong bas mtshan ma'i 'du shes spong ba'i tshul khrims dang / smon pa med pa rjes su mthong bas smon pa spong ba'i tshul khrims dang / stong pa nyid rjes su mthong bas bdag [(]du [,]tu [)]mngon par zhen pa spong ba'i tshul khrims dang /lhag pa'i shes rab kyis chos rnams nges par mthong bas dpa' zhum pa'i mngon par zhen pa spong ba'i tshul khrims dang / yang dag pa ci lta bar shes pa mthong bas rmongs pa'i mngon par zhen pa spong ba'i tshul khrims dang / 'tsho ba rjes su mthong bas gnas la mngon par zhen pa spong ba'i tshul khrims dang /so sor rtog pa rjes su mthong bas so sor rtog pa ma yin pa spong ba'i tshul khrims dang / rnam par rtog pa rjes su mthong bas kun du sbyor ba'i mngon par zhen pa spong ba'i tshul khrims dang / rgyun du zhugs pa'i 'bras bu'i lam gyis lta ba dang /gnas gcig pa'i nyon mongs pa rnams spong ba'i tshul khrims dang / lan cig phyir 'ong ba'i lam gyis nyon mongs pa rags pa rnams spong ba'i tshul khrims dang / phyir mi 'ong ba'i lam gyis bag la nyal du gtogs pa'i nyon mongs pa rnams spong ba'i tshul khrims dang / dgra bcom pa'i lam gyis nyon mongs pa thams cad spong ba'i tshul khrims so//tshul khrims kyi pha rol tu phyin pa mthar thug pa'o/ /bzod pa rnam pa gsum ste/ gzhan gyis gnod pa la ji mi snyam pa'i bzod pa dang / sdug bsngal dang du len pa'i bzod pa dang / chos la nges par sems pa'i bzod pa'o/ / bzod pa'i pha rol tu phyin pa mthar thug pa'o/ /brtson 'grus rnam pa gsum ste/ 'di ltar/ go cha sbyor ba'i brtson 'grus dang / dge ba la sbyor ba'i brtson 'grus dang / sems can don sbyor ba'i brtson 'grus dang / brtson 'grus kyi pha rol tu phyin pa mthar thug pa'o/ /bsam gtan la rnam pa gsum ste/'di ltar/ yon tan mngon par sgrub pa'i bsam gtan dang / sems can don mngon par sgrub pa'i bsam gtan dang / nyon mongs pa'i gnyen po bde ba mngon par sgrub pa'i bsam gtan no/ /bsam gtan gyi pha rol tu phyin pa mthar thug pa'o/ /shes rab rnam pa gsum ste/'di ltar/ kun rdzob bden pa la dmigs pa dang / don dam pa'i bden pa la dmigs pa dang / sems can gyi don la dmigs pa'o/ /yang shes rab rnam pa gnyis te/ 'di ltar rgyu'i rang bzhin dang / 'bras bu'i ngo bo'o/ /de la rgyu'i ngo bo ni gnyis te/ 'di ltar/ mos pa la spyod pa dang /sa la rab tu zhugs pa'i 'o/ /de la dang po gsum ste/ 'di ltar/ thos pa'i rang bzhin gyi shes rab dang / bsam pa'i rang bzhin gyi shes rab dang / sgom pa'i rang bzhin gyi shes rab po/ /de la sgom pa'i rang bzhin gyi shes rab ni dbye ba gsum ste/ 'di ltar zhi gnas kyi ngo bo dang / lhag mthong gi rang bzhin dang /zhi gnas dang lhag mthong gi ngo bo'o/ /'bras bur gyur pa ni rnam pa thams cad kyi mchog dang ldan pa'o/ /'phags pa gnas brtan pa ni dri ba dgu dang / lan dgus shes rab rnam par bzhag pa byed do/ /de la dri ba dgu ni 'di ltar/ shes rab gang yin/ shes rab mtshan nyid ci/ro ci yin/ nye bar gnas pa ci/ shes rab 'di'i go 'phang gi gnas ci/ shes rab phan yon ci/ shes rab ces pa'i don gang yin/ shes rab thob pa'i nye ba'i rten du yin/ shes rab dbye ba du zhe na/ lam ni 'di lta ste/ shes rab gang yin ces pa brjod de/ yid kyis ci lta ba bzhin du dmigs pa mthong ba 'di ni shes rab zhes brjod do//yang na phan pa dang mi phan pa yid la byed pas yid kyi rgyu rnam pa mang du byed pa 'di ni shes rab zhes brjod do/ /de ltar yang chos mngon pa las gsum ste/ de la smras pa/ shes rab gang zhe na/ gcig med pa'i sum cu'i rnam grangs kyis brjod de/'di ltar/ gang shes rab po/ /rab tu shes pa dang / rnam par 'byed pa dang / rab tu rnam par 'byed pa dang / chos rnam par 'byed pa dang / yang dag par mtshon pa dang / nye bar mtshon pa dang / so sor yang dag nye bar mtshon pa dang / rig pa dang / mkhas pa dang / mthar phyin pa dang / rnam par 'brel pa dang /sems nye bar yongs su rtogs pa dang / chen po dang / yid gzhungs pa dang / yongs su 'dren byed dang / rnam par mthong ba dang / yang dag par shes pa dang / shes rab lcag dang / shes rab dbang po dang / shes rab stobs dang / shes rab mtshon cha dang /shes rab gsal ba dang / shes rab snang ba dang / shes rab sgron ma dang / shes rab de kho na nyid dang / ma rmongs pa dang / chos rab tu rnam par 'byed pa dang / yang dag pa'i lta ba 'di ni shes rab zhes brjod do/ /mtshan nyid ci zhe na smras pa brjod de/ rigs pas mngon du byed pa ni shes rab po//ro ci yin zhes smra ba brjod de/ rab tu rnam par 'byed pa'i shes rab po/ /nye bar gnas pa gang yin zhes smra ba brjod de/ kun nas ma rmongs pa nye bar gnas pa ni shes rab po/ /shes rab 'di'i go 'phang gnas so/ /yang na shes rab kyi mtshan nyid ni shes rab rnam par gsal ba'o/ / shes rab kyi ro ni gting yongs su dpag pa'o/ /shes rab nye bar gnas pa ni ma rig pa'i mun pa 'joms pa'o/ /shes rab de'i go 'phang gnas ni so sor yang dag pa rig pa bzhi'o/ /phan yon gang yin zhes smra ba bsdus nas brjod do/ /shes rab kyis ni tshul khrims sbyong byed bsam gtan la 'jog byed//shes rab kyis ni lam rnams sgom byed 'bras bu mthong bar byed/ /shes rab kyis ni shes rab gong ma dge spyan bla med pa/ /nyams pa'i shes rab sel cing bla med shes rab 'phel/ /pha rol rgol ba 'jug byed cing / /'jig rten chos kyis mi gos pa/ /shes rab ldan pa smra ba na//legs par smras pa shin tu sred/ /'jig rten 'di dang 'jig rten gzhan/ /grol ba grags pa thob pa bde/ /don dang rtsol ba dpa' ba nyid/ /shes rab ldan pa rnam par rtag /rten cing 'brel par 'byung ba na/ /ming dang gzugs ni ston pa'o/ /sems can so sor bden pa ston/ / de rnams shes rab can spyod yul/ /shes rab kyis ni sdig pa spong / /shes rab kyis ni chags dang sdang / /rmongs dang skye 'chi ma lus pa/ /shin tu rgyal dka' rgyal bar byed/ /shes rab zhes pa'i don gang yin zhe na/ brjod de/ rab tu shes pa 'di ni shes rab bam/ nyes pa thams cad rab tu spong bas 'di ni shes rab bo//shes rab tu brnyes pa'i phyir nye ba'i rten gang zhe na zhes pa brjod de/ nye ba'i rten bcu gcig ste/ 'di ltar/ mdo'i don tshol ba nyid dang / yang dag pa mang du gtam pa nyid dang / btegs gnas su gnas pa nyid dang / bden pa la rtog pa dang / dngos po dang rnam par drang ba'i bya ba la gnas pa'i tshul khrims nyid dang /bsam gtan rjes su sbyor ba dang / sgrib pa rnam par bral ba'i sems nyid dang / shes rab 'chal pa'i gang zag yongs su spangs pa dang / shes rab can gyi gang zag bsten pa dang / de la lhag par mos pa'o/ /shes rab rnam par dbye ba du zhe na zhes pa brjod do/ / shes rab rnam pa gnyis te/ 'di ltar/ 'jig rten pa dang 'jig rten las 'das pa'o/ /de la 'jig rten pa'i shes rab ni 'phags pa'i lam dang 'bras bu dang mi ldan pa/ zag pa dang bcas pa/ kun du sbyor bar bya ba/ 'dud par bya ba/ klung du 'bab par bya ba/ sgrib par bya ba/ mchog tu bzung ba/ nye bar bslang ba/kun nas nyon mongs pa la byung ba'o/ /'jig rten las 'das pa'i shes rab ni/ lam dang 'bras bu dang ldan pa/ de ni zag pa med pa/ sbyor bar bya ba ma yin pa/ 'dud par bya ba ma yin pa/ klung du 'bab par bya ba ma yin pa/ sgrib par bya ba ma yin pa/ mchog tu gzung bar bya ba ma yin pa/ nye bar blang ba ma yin pa/nyon mongs pa can la byung ba ma yin pa'o/ /yang shes rab rnam pa gsum ste/ 'di ltar/ bsam pa'i rang bzhin dang / thos pa'i rang bzhin dang / sgom pa'i rang bzhin no/ /de la gzhan las ma thos par rang gi las las shes pa'am/ bden pa dang rjes su mthun pa'i shes pa so sor thob pa'am/bzo'i skye mched rig pa'i gnas la shes rab so sor thob pa 'di ni bsam pa'i rang bzhin gyi shes rab ces brjod do/ /dngos po de nyid la gzhan las thos nas shes rab so sor thos pa ni thos pa'i rang bzhin gyi shes rab ces brjod do/ /snyoms par 'jug pa thams cad kyi shes rab kyang de ni sgom pa'i rang bzhin zhes brjod do//gzhan yang rnam pa gsum ste/ 'di ltar/ skye ba la mkhas pa dang / mi 'byung ba la mkhas pa dang / thabs la mkhas pa'o/ /de 'di yid la byas pas mi dge ba'i chos yongs su spong ba dang / dge ba'i chos yongs su 'phel ba'o zhes pa shes rab gang yin pa 'di ni skye ba la mkhas pa'o//chos 'di yid la byas pas mi dge ba'i chos mngon par 'phel zhing dge ba'i chos yongs su nyams pa'o zhes pa shes rab gang yin pa de ni mi 'byung ba la mkhas pa'o/ /chos de rnams nye bar bzung ste shes rab thams cad kyang de ni thabs la mkhas pa'o/ /yang shes rab rnam pa gsum ste/kun du 'phel bar bgrod pa dang / 'grib par bgrod pa dang / 'grib par 'gro ba yin pa'o/ /de la gang rgyun du zhugs pa dang / lan cig phyir 'ong ba dang phyir mi 'ong ba'i sa gsum gyi shes rab de ni kun du 'phel bar bgrod pa'o/ /gang rgyun du zhugs pa dang lan cig phyir 'ong ba dang phyir mi 'ong ba dang dgra bcom pa'i lam bzhi'i shes rab gang yin pa de ni 'grib par bgrod pa'o//rgyun du zhugs pa dang lan cig phyir 'ong ba dang phyir mi 'ong ba dang dgra bcom pa sa bzhi'i rnam par smin pa dang / sa bzhi'i bya ba lung du ma bstan pa shes rab gang yin pa de ni kun 'phel bar bgrod pa ma yin pa 'grib par ma yin no//yang shes rab rnam pa bzhi ste 'di ltar/ rang gi las las shes pa dang / bden pa rjes su mthun pa shes pa dang / lam dang ldan pa shes pa dang / 'bras bu dang ldan pa shes pa'o/ /de la rang gi las kyis shes pa ni dngos po bcu'i yang dag pa'i lta ba'o/ /de la dngos po ni bcu ste/'di ltar/ sdug bsngal bden pa shes pa dang / /kun 'byung bden pa shes pa dang / /'gog pa'i bden pa shes pa dang / /lam gyi bden pa shes pa dang / /'phags pa'i lam bsgoms pa las gang mya ngan las 'das pa'i ye shes mthong ba dang / shes rab kyi dbang po dang / shes rab kyi stobs dang /dpyod pa'i rdzu 'phrul gyi rkang pa dang / chos rnam pa byang chub kyi yan lag dang / dkon mchog gsum la yid ches pa'o/ /bden pa rjes su mthun pa shes pa ni/ phung po lnga mi rtag zhes pa'am sdug bsngal zhes pa'am bdag med pa'o zhes rnam par lta ba'o/ /gang de lta bu'i ngo bo rjes su mthun pa'i bzod pa 'di ni bden pa rjes su mthun pa shes pa'o//lam bzhi'i shes rab ni lam yang dag par ldan pa'i shes rab bo/ /de la lam bzhi ni 'di ltar/ rgyun du zhugs pa'i 'bras bu'i lam dang / lan cig phyir 'ong ba 'bras bu'i lam dang / phyir mi 'ong ba'i 'bras bu'i lam dang / dgra bcom pa'i 'bras bu'i lam mo//'bras bu bzhi'i shes rab ni 'bras bu dang ldan pa'i shes pa'o/ /de la 'bras bu bzhi ni 'di ltar/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa'i 'bras bu'o/ /yang shes rab rnam pa bzhi ste/ 'di ltar/ 'dod pa na spyod pa dang / gzugs na spyod pa dang / gzugs med pa na spyod pa dang / yongs su ma bsdus pa'o/ /de la 'dod pa na spyod pa dge ba dang lung du ma bstan pa'i shes rab ni 'dod pa na spyod pa'o/ /gzugs na spyod pa'i dge ba dang lung du ma bstan pa'i shes rab ni gzugs na spyod pa'o/ /gzugs med pa na spyod pa'i dge ba dang lung du ma bstan pa'i shes rab ni gzugs med pa na spyod pa'o//lam dang 'bras bu ni yongs su ma bsdus pa'o/ /yang shes rab rnam pa bzhi ni 'di lta ste/ chos shes pa dang / rjes su shes pa dang / gzhan gyi sems shes pa dang / kun rdzob shes pa'o/ /de la lam bzhi dang 'bras bu bzhi'i shes rab ni chos shes pa'o//de chos shes pa 'di dang ldan pa 'das pa dang ma 'ongs pa'i tshul len pa'o/ /de ltar yang / gang kha cig 'das pa'i dus kyi bden pa mngon par shes pa de ni bden pa mngon par shes pa 'di nyid do/ /gang kha cig ma 'ongs pa'i dus su bden pa mngon par shes par 'gyur ba de ni bden pa mngon par shes par 'gyur ba 'di nyid do zhes pa'i shes pa de ni rjes su shes pa'o//gzhan gyi sems la shes pa de ni gzhan gyi sems shes pa'o/ /shes pa 'di gsum ma rtogs pa lhag ma'i shes rab de ni kun rdzob shes pa'o/ /yang shes rab rnam pa bzhi ste 'di ltar/ gang 'phel ba ma yin zhing 'grib pa'i shes rab yod do//gang nye bar 'phel zhing 'grib pa ma yin pa'i shes rab yod do/ /gang 'grib pa dang 'phel ba dag gi shes rab yod do/ /gang 'phel ba yang ma yin 'grib pa ma yin pa dag gi shes rab yod do/ /de la 'dod pa na spyod pa gang dag dge ba'i shes rab de ni 'grib pa yin zhing nye bar mi 'phel ba'o//lam bzhi'i gang shes rab de ni nye bar 'phel zhing 'grib pa ma yin pa'o/ /yang gzugs dang gzugs med pa na spyod pa gang dge ba'i shes rab de ni 'phel ba yin zhing 'grib pa yang yin no/ /sa bzhi'i rnam par smin pa dang / sa gsum gyi rnam par smin pa lung ma bstan pa'i shes rab de ni 'grib pa ma yin nye bar 'phel ba ma yin pa'o//yang shes rab rnam pa bzhi ste/ 'di ltar/ gang skyong zhing mngon du byed pa ma yin pa dag gi shes rab yod do/ /gang mngon du byed cing skyo ba ma yin pa dag gi shes rab yod do/ /gang skyo ba dang mngon du byed pa'i shes rab yod do//gang skyo ba ma yin mngon du byed pa ma yin pa dag gi shes rab yod do/ /de la gang gis 'dod pa las 'dod chags bral bar 'gyur ba'i shes rab de ni mngon shes dang bden pa mngon du byed pa ma yin zhes pa shes rab 'di ni yid 'byung zhing mngon du byed pa ma yin pa'o/ /'dod pa 'dod chags dang bral ba bden pa'i shes rab kyi mngon par shes pa mngon du byed cing bden pa ma yin pa shes rab 'di ni mngon du byed pa yin cing skyo ba ma yin pa'o//lam bzhi'i shes rab ni yid 'byung ba dang mngon du byed pa'o/ /lhag ma shes rab ni skyo ba ma yin cing mngon du byed pa ma yin pa'o/ / yang shes rab rnam pa bzhi ste/ 'di ltar/ don so sor yang dag par rig pa dang / chos so sor yang dag par rig pa dang / nges pa'i tshig so sor yang dag par rig pa dang / spobs pa so sor yang dag par rig pa'o/ /de la don shes pa ni don so sor yang dag par rig pa'o/ /chos shes pa ni chos so sor yang dag par rig pa'o//nges pa'i tshig mngon par brjod pa shes pa ni nges pa'i tshig so sor yang dag par rig pa'o/ /shes pa shes pa ni spobs pa so sor yang dag par rig pa'o/ /tshul gzhan yang de yang / rgyu dang 'bras bu shes pa ni don so sor rig pa'o/ /rgyu shes pa ni chos so sor rig pa'o/ /nges pa'i tshig mngon par brjod pa shes pa ni nges pa'i tshig so sor rig pa'o//shes pa shes pa ni spobs pa so sor rig pa'o/ /tshul gzhan yang de ltar yang / sdug bsngal dang 'gog pa shes pa ni don so sor rig pa'o/ /kun 'byung dang lam shes pa ni chos so sor rig pa'o/ /gnyis ni sngon bzhin no/ /tshul gzhan yang /de ltar yang / mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde dang / de ltar byung ba'i sde dang / skyes pa rabs kyi sde dang / rmad du byung ba'i sde dang / shin tu rgyas pa'i sde ste chos 'di rnams shes pa ni chos so sor yang dag par rig pa'o//de de bzhin du gsungs pa ni don 'di'i don ni 'di'o zhes pa ni don so sor yang dag par rig pa'o/ /de la chos nges pa'i tshig la mngon par brjod pa shes pa ni nges pa'i tshig so sor yang dag par rig pa'o/ /shes pa shes pa ni stobs pa so sor yang dag par rig pa'o/ /tshul gzhan yang / de ltar yang / mig shes pa ni chos so sor yang dag par rig pa'o/ /mthong ba'i don gyis mig shes pa ni don so sor yang dag par rig pa'o/ /gnyis ni sngon bzhin no/ /yang shes rab rnam pa bzhi ste/ 'di ltar/ sdug bsngal shes pa dang / sdug bsngal kun 'byung shes pa dang / sdug bsngal 'gog pa shes pa dang /sdug bsngal 'gog pa bgrod pa'i lam shes pa zhes pa la sogs pa rgyas par ro/ /de la rgyu drug gis sbyin pa la sogs pa rnams pha rol tu phyin par 'gyur te/ 'di ltar/ bsam pa dam pa las dang / gzhi dam pa las dang / thabs la mkhas pa dam pa las dang / yongs su bsngo ba dam pa las dang /rnam par dag pa dam pa las so/ /rgyu gsum gyis sbyin pa la sogs pa rnams kyi go rims nges pa bstan te/ 'di ltar/ sngon ma la kun du brten nas phyi ma skye ba'i phyir dang / phyi ma mchog yin pa'i phyir ro/ /sngon ma rags pa'i phyir dang phyi ma phra ba'i phyir ro/ /bslab pa gsum ni/'di lta ste/ tshul khrims su rtogs pa'i bslab pa dang / sems su rtogs pa'i bslab pa dang / shes rab tu rtogs pa'i bslab pa'o/ /de la dang po ni pha rol tu phyin pa gsum ste/ 'di ltar/ sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa'o//gnyis pa ni pha rol tu phyin pa gcig ste/ 'di ltar/ bsam gtan gyi pha rol tu phyin pa'o/ /gsum pa ni pha rol tu phyin pa gcig ste/ 'di ltar/ shes rab kyi pha rol tu phyin pa'o/ /brtson 'grus kyi pha rol tu phyin pa ni bslab pa gsum ga'i yang grogs su gyur pa'o/ /pha rol tu phyin pa drug ni rnam pa gnyis te/'di ltar/ 'jig rten pa dang / 'jig rten las 'das pa'o/ /yang rnam pa gnyis te/ 'di ltar/ rgyu'i ngo bo dang / 'bras bu'i ngo bo'o/ /yang rnam pa gsum ste/ 'di ltar/ ma dag pa dang / ma dag pa dag pa dang / dag pa'o/ /bsod nams bya ba'i dngos po ni gsum ste/ 'di ltar/ sbyin pa'i rang bzhin gyi bsod nams bya ba'i dngos po dang /tshul khrims kyi rang bzhin gyi bsod nams bya ba'i dngos po dang / bsgom pa'i rang bzhin gyi bsod nams bya ba'i dngos po'o/ /pha rol tu phyin pa drug kyang / pha rol du 'byung ba'i dngos po rnam pa gnyis su 'gyur te/ 'di ltar/ gtso bo dang / phal pa'o/ /de la sbyin pa'i gtso bo'i 'bras bu ni longs spyod chen po nyid do/ /phal pa ni bde 'gro la sogs pa'o/ /tshul khrims kyi gtso bo'i 'bras bu bde 'gro'o/ /phal pa ni gzhan no/ /bzod pa'i gtso bo'i 'bras bu ni phyogs chen po dang 'khor chen po nyid do/ /phal pa ni gzhan no/ /brtson 'grus kyi gtso bo'i 'bras bu ni mi chod pa'i longs spyod la sogs pa nyid dang /phal pa ni gzhan no/ /bsam gtan gyi gtso bo'i 'bras bu ni gnod pa med pa'i lus su skyes pa'o/ /phal pa ni gzhan no/ /shes rab kyi gtso bo'i 'bras bu ni dbang po thams cad rno ba nyid kyis bde zhing yid dga' ba mang du gyur pa nyid dang /skye bo'i tshogs chen po dbang du gyur pa nyid do/ /phal pa ni gzhan no/ /'di'i mthong ba'i chos kyi 'bras bu ni mthong ba'i chos la bde bar gnas pa'o/ /tshogs gnyis te/ 'di ltar/ sbyin pa tshul khrims bzod pa pha rol tu phyin pa gsum dang / brtson 'grus bsam gtan pha rol tu phyin pa dag gi cha shas ni/bsod nams kyi tshogs so/ /shes rab kyi pha rol tu phyin pa dang / brtson 'grus bsam gtan pha rol tu phyin pa dag gi cha shas ni ye shes kyi tshogs so/ /de la rdzas las pha rol tu phyin pa drug tu bshad do/ /ming du ni pha rol tu phyin pa bcur 'gyur ro/ /'di lta ste/ sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol tu phyin pa dang / thabs kyi pha rol tu phyin pa dang / smon lam gyi pha rol tu phyin pa dang / stobs kyi pha rol tu phyin pa dang / ye shes kyi pha rol tu phyin pa'o//de la pha rol tu phyin pa drug nye bar bsags pa'i dge ba ni/ bla na med pa yang dag par rdzogs pa'i byang chub [(]du[,]tu[)]/ yongs su bsngo ba bla na med pas yongs su bsngo ba ni/ thabs kyi pha rol tu phyin pa'o/ /smon lam chen po bcu la sogs pa smon lam mtha' med pa ni/ smon lam gyi pha rol tu phyin pa'o//de la smon lam chen po bcu ni 'di lta ste/ sangs rgyas thams cad la mchod pa dang rim gro'i phyir rnam pa thams cad mchog dang ldan pa rgya che ba'i mos pa rnam par dag pa chos kyi dbyings rnam par spangs pa nam mkha'i dbyings kyi mthar phyin pa phyi ma'i mtha'i mur thug pa grangs thams cad kyis mchod pa chen po dang rim gro'i phyir smon lam chen po mngon par sgrub pa ni dang po'o//de bzhin gshegs pa thams cad kyis gsungs pa'i chos kyi spyan yang dag par bzung ba'i phyir dang sangs rgyas dang byang chub sems dpa' thams cad yongs su bzung ba'i phyir dang rdzogs pa'i sangs rgyas thams cad kyi bstan pa yongs su bsrung ba'i phyir ni gnyis pa'o//'jig rten gyi khams rab 'byams thams cad du dga' ldan gnas su gnas pa la sogs pa byas te 'pho ba dang mngal du 'jug pa dang lhums su gnas pa dang / gzhon nu rol pa dang pho brang nang du gnas pa dang mngon par 'byung ba dang dka' ba spyod pa dang byang chub snying por bgrod pa dang bdud btul ba dang mngon par byang chub pa dang bskul ba dang chos kyi 'khor lo chen po bskor ba dang yongs su mya ngan las 'da' ba chen por nye bar phyin pa'i smon lam ni gsum pa'o//byang chub sems dpas spyod pa pha rol tu phyin pas bsdus pa'i sa yongs su sbyong ba yan lag dang nye ba'i yan lag dang bcas pa yongs su sbyangs pa gdams pa rjes su bstan pa rab tu len pa nye bar rgyas pa'i sems bskyed pa mngon par sgrub pa'i phyir smon lam ni bzhi pa'o//khams 'gro ba skye gnas skye bar gtogs pa ming dang gzugs kyis bsdus pa'i sems can gyi khams ma lus pa yongs su smin pa'i phyir dang sangs rgyas kyi chos la 'jug pa'i phyir dang /'gro ba thams cad kyi grangs rnam par gcad pa'i phyir dang thams cad mkhyen pa'i ye shes la rab tu gnas par bya ba'i phyir smon lam ni lnga pa'o/ /'jig rten gyi khams rgyas pa bsdus pa tshad med pa phra ba rags pa snrel zhi spyi'u gtsug gzhi mnyam 'jug pa yang dag par 'byam klas pa rjes su gzhal te/dbang po dra ba rnam par tha dad pa phyogs bcu ma lus pa dbye ba mi 'dra ba sna tshogs pa 'jug pa rnams tha dad pa ye shes kyi rjes su 'gro ba mngon sum du bya ba'i phyir smon lam ni drug pa'o/ / sangs rgyas kyi zhing thams cad zhing gcig tu yang dag par gzhol ba rab tu sbyong ba dang / tshad med pa'i sangs rgyas kyi zhing 'od zer bkod pa'i rgyan gyis rab tu brgyan pa dang / nyon mongs pa sel ba yongs su dag pa'i lam dang ldan pa dang / tshad med pa'i ye shes kyi rnam pa'i sems can gyis yongs su gang ba dang /rgya che ba'i sangs rgyas kyi zhing na gzhol ba'i sems can thams cad bsam pa ci lta ba bzhin du yang dag par ston pa dang kun du mnyes par bya ba'i phyir smon lam ni bdun pa'o/ /sangs rgyas byang chub sems dpa' dang bsam pa dang sbyor ba gcig pa'i phyir dang /'gran bzod med pa'i dge ba'i rtsa ba bsags pa'i phyir dang / rtag tu bar ma chad par sangs rgyas dang byang chub sems dpa' thams cad dang yang dag par 'grogs shing mi 'bral ba'i phyir dang / ci ltar 'dod par sangs rgyas 'byung ba yang dag par mthong ba'i phyir dang / rang gi sems bskyed pa de bzhin gshegs pa'i mthu stobs ye shes kyi rjes su bgrod pa'i phyir dang /mi nyams pa rjes su 'gro ba'i mngon shes thob par bya ba'i phyir/ 'jig rten gyi khams thams cad du mthun par rgyu bar bya ba'i phyir/ sangs rgyas thams cad kyi 'khor gyi dkyil 'khor du snang ba thob pa'i phyir/bsam du med pa'i theg pa chen po dang ldan pa'i phyir dang / byang chub sems dpa'i spyod pa rnam par chad pa med par spyad pa'i phyir smon lam ni brgyad pa'o/ /phyir mi ldog pa'i 'khor lo la yang dag par gnas pa'i byang chub sems dpa'i spyod pa spyad pa'i phyir dang / lus dang ngag dang yid kyi las don yod pa'i phyir dang /mthong ba dang lhan cig [(]du [,]tu [)]sangs rgyas kyi chos nges pa nyid kyi phyir dang / dbyangs dang lhan cig tu rgya che ba'i mthu stobs ye shes kyi rjes su bgrod pa'i phyir dang / mthong ba dang lhan cig tu sems can rab tu dang ba thob pa dang nyon mongs pa rnams bzlog pa'i phyir dang / sman gyi rgyal po lta bu'i rten thob pa'i phyir dang /yid bzhin gyi nor bu dang mtshungs pa'i lus thob pa'i phyir dang / byang chub sems dpa' thams cad kyi spyod pa spyad pa'i phyir smon lam ni dgu pa'o/ /'jig rten gyi khams thams cad du bla na med pa yang dag par rdzogs pa'i byang chub mngon par rdzogs par byang chub pa'i phyir te/skra'i khyon gcig las mi 'da' zhing skra'i khyon thams cad du skye ba skya ba gzhon nu rol pa pho brang nang du gnas pa mngon par 'byung ba dka' ba spyod pa byang chub snying por nye bar 'gro ba bdud 'dul ba mngon par rdzogs par byang chub pa bskul ba chos kyi 'khor lo chen po bskor ba mya ngan las 'da' ba chen po nye bar bstan pa'i phyir dang /sangs rgyas kyi zhing chen po mthu stobs ye shes kyi rjes su 'gro ba'i phyir dang / chos kyi dbyings yangs pa nam mkha'i mthas gtugs pa phyi ma'i mtha'i mur thug par bskal pa'i grangs thams cad du sangs rgyas 'byung ba'i grangs chad pa med pa'i phyir dang /ye shes chen po mngon par bsgrub pa'i phyir smon lam chen po bcu pa mngon par sgrub pa'o/ /smon lam chen po de rnams ni 'bad rtsol chen po bcu'o/ /de la sogs pa smon lam re re la 'khor ni so sor yongs su sbyong bar byed pa grangs med khrag khrig stong phrag brgya dang gang gis byang chub sems dpa' mngon par sgrub par byed pa thob pa 'di ni smon lam gyi pha rol tu phyin pa'o//stobs kyi pha rol tu phyin pa ni gnyis te/ 'di ltar/ so sor rtog pa'i stobs dang / bsgom pa'i stobs so/ /yang stobs bcu gnyis te/ 'di ltar/ bsam pa'i stobs dang / lhag pa'i bsam pa'i stobs dang / gzungs kyi stobs dang / ting nge 'dzin gyi stobs dang / phun sum tshogs pa'i stobs dang / dbang gi stobs dang / spobs pa'i stobs dang / smon lam gyi stobs dang / pha rol tu phyin pa'i stobs dang / byams pa chen po'i stobs dang / snying rje chen po'i stobs dang / de bzhin gshegs pa thams cad kyi byin gyi rlabs kyi stobs so zhes pa ni stobs kyi pha rol tu phyin pa'o//de bzhin gshegs pa'i ngag ma lus pa dgongs pa dang bcas pa nges par rtogs pa ni ye shes kyi pha rol tu phyin pa'o/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las pha rol tu phyin pa rnam par nges pa zhes bya ba le'u nyi shu rtsa gnyis pa'o// //byang chub kyi phyogs kyi chos sum cu rtsa bdun ni phung po bdun te/ 'di ltar dran pa nye bar gzhag pa dang / yang dag pa'i spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / 'phags pa'i lam yan lag brgyad do/ /de la dran pa nye bar gzhag pa ni bzhi ste/ 'di ltar/ lus dran pa nye bar gzhag dang / tshor ba dran pa nye bar gzhag dang / sems dran pa nye bar gzhag dang / chos dran pa nye bar gzhag pa'o/ /yang dag pa'i spong ba bzhi ste/ 'di ltar/ ma skyes pa'i mi dge ba mi skyed pa'i phyir 'dun pa dang /skyes pa'i mi dge ba rnams spang ba'i phyir 'dun pa dang / ma skyes pa'i dge ba rnams bskyed pa'i phyir 'dun pa dang / skyes pa'i dge ba rnams spel ba'i phyir 'dun pa'o/ /rdzu 'phrul gyi rkang pa bzhi ni 'di lta ste/ 'dun pa rdzu 'phrul rkang pa dang / brtson 'grus rdzu 'phrul rkang pa dang /sems rdzu 'phrul rkang pa dang / dpyod pa rdzu 'phrul rkang pa'o/ /de la bar du spong ba'i 'du byed brgyad skye ste/ 'di ltar/ 'dun pa dang / brtson 'grus dang / dad pa dang / shin tu sbyangs pa dang / dran pa dang / shes bzhin dang / sems pa dang btang snyoms so/ /dbang po lnga ni/ 'di lta ste/dad pa'i dbang po dang / brtson 'grus kyi dbang po dang / dran pa'i dbang po dang / ting nge 'dzin gyi dbang po dang / shes rab kyi dbang po'o/ /stobs lnga ni 'di lta ste/ dad pa'i stobs dang / brtson 'grus kyi stobs dang / dran pa'i stobs dang / ting nge 'dzin gyi stobs dang / shes rab kyi stobs so/ /de rnams ni 'jig rten pa'o//byang chub kyi yan lag bdun ni 'di lta ste/ dran pa yang dag byang chub yan lag dang / chos rnam par 'byed pa yang dag byang chub yan lag dang / brtson 'grus yang dag byang chub kyi yan lag dang / dga' ba yang dag byang chub kyi yan lag dang / ting nge 'dzin yang dag byang chub kyi yan lag dang /btang snyoms yang dag byang chub kyi yan lag go/ /lam yan lag brgyad ni 'di lta ste/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to//de nyid kyis na spong ba'i 'du byed spangs pa'i sum cu rtsa bdun du 'gyur ro/ /stong pa nyid ni bcu drug ste/ 'di ltar/ nang gi chos ni mig la sogs pa drug ste/ de ni de'i rang bzhin gyis stong pa 'di la ni nang stong pa nyid do/ /phyi'i chos ni gzugs la sogs pa drug ste/ de ni de'i rang bzhin gyis stong pa 'di ni phyi stong pa nyid do//de ni nang yin te sems kyis zin pa'i phyir ro/ /phyi rol yin te dbang pos bsdus pa ma yin pa'i phyir ro/ /gang dbang po'i rten du gyur pa phyi rol dang nang gis bsdus pa de'i rang bzhin gyis stong pa 'di ni phyi nang stong pa nyid do/ /gang stong pa nyid nye bar dmigs pa'i stong pa nyid ni dmigs pa'i shes pa'i mtshan nyid stong pa nyid de ni stong pa nyid do//phyogs bcu rang bzhin gyis stong pa dang / snod ni snod kyi rang bzhin gyis stong pa 'di ni chen po stong pa nyid do/ /don dam pa ni mya ngan las 'das pa'o/ /de ni de'i rang bzhin gyis stong pa don dam pa stong pa nyid do/ / 'dus byas ni 'dod pa dang gzugs dang gzugs med pa'i khams te de ni de'i rang bzhin gyis stong pa 'di ni 'dus byas stong pa nyid do/ /gang la skye ba med 'gag pa med gnas pa med gzhan du 'gyur ba med pa de ni 'dus ma byas te/ de ni de'i rang bzhin gyis stong pa 'di ni 'dus ma byas stong pa nyid do/ / gang gis rtag pa dang chad pa'i mtha' nye bar mi dmigs pa de ni mtha' las 'das pa ste/ dbus zhes brjod de/ de ni de'i rang bzhin gyis stong pa 'di ni mtha' las 'das pa stong pa nyid do/ /'khor ba'i tha ma med pa thog ma med pa nyid do/ /de la ni dbus med pa'o/ /des na thog ma dang tha ma dang dbus ni de'i rang bzhin gyis stong pa ni thog ma dang tha ma med pa stong pa nyid do//gang dge ba'i phyogs mi spong ba de ni dor ba med pa ste/ de ni de'i rang bzhin gyis stong pa 'di ni dor ba med pa stong pa nyid do/ /gang chos thams cad kyi rang bzhin nyan thos la sogs pa rnams kyis ma byas pa 'am ma bsgyur ba de ni de'i rang bzhin gyis stong pa 'di ni rang bzhin stong pa nyid do//chos thams cad ni de'i rang bzhin gyis chos thams cad stong pa ni chos thams cad stong pa nyid do/ /gzugs su yod pa'i mtshan gyis gzugs zhes pa la sogs pa rgyas par ro/ /chos de rnams thams cad ni rang gi mtshan nyid kyi rang bzhin gyis dang spyi'i mtshan nyid kyi rang bzhin gyis stong pa 'di ni rang gi mtshan nyid stong pa nyid do//dus rnams ni gdod nas rnam par dag pa'i phyir dang / dngos po btags pa tsam yin pa'i phyir 'das ma 'ongs da ltar nye bar dmigs te zhes mi dmigs pa de'i gang stong pa nyid de ni mi dmigs pa stong pa nyid do//kun nas tshogs pa las byung ba'i chos rnams ni rang bzhin yod pa ma yin te rten cing 'brel bar 'byung ba'i phyir ro/ /des na gang rten cing 'brel par 'byung ba de ni dngos po med pa'i ngo bo nyid do/ /de ni rang gis stong pas 'di ni dngos po med pa'i ngo bo nyid do//dngos po ni phung po lnga ste de ni de'i rang bzhin gyis stong pa 'di ni dngos po stong pa nyid do/ /dngos po med pa ni 'dus ma byas te nam mkha' la sogs pa'o/ /de ni de'i rang bzhin gyis stong pa 'di ni dngos po med pa stong pa nyid do/ /rang bzhin stong pa nyid de/ de des stong pa 'di ni ngo bo nyid stong pa nyid do//pha rol zhes pa ni 'dor ba nyid do/ /ngo bo zhes pa ni gzhan gyis ma byas pa'i rang bzhin yin pa'i phyir ro/ /pha rol ngo bo ni chos kyi dbyings de bzhin nyid nyid do/ /de des stong pa 'di ni pha rol ngo bo stong pa nyid do/ /bsam gtan ni bzhi ste/ 'di ltar/ bsam gtan dang po dang /bsam gtan gnyis pa dang / bsam gtan gsum pa dang / bsam gtan bzhi pa'o/ /de la bsam gtan bzhi ni rnam pa gnyis te/ 'jig rten pa dang / 'jig rten las 'das pa'o/ /de la bsam gtan dang gzugs med pa ni rgyu bzhi'i 'jig rten par 'gyur te/ 'di ltar/ kun nas nyon mongs pa dang /rnam par byang ba dang / rnam par bzhag pa dang / rnam par dag pa'o/ /de la lung du ma bstan pa'i rtsa ba bzhi ni kun nas nyon mongs pa ste/ de rnams kyis nyon mongs pa'i sems kyis nyon mongs pa'i bsam gtan gyi sgo nas nyon mongs par 'gyur te shin tu sbyangs pa'i bde ba kun myang ba'i phyir ro//lta bas lta ba mchog gi bsam gtan pas bsam gtan nyon mongs pa can du 'gyur te/ bsam gtan la brten nas sngon gyi mthar rtog pa la sogs pa lta ba kun nas ldang ba'i phyir ro/ /nga rgyal gyis nga rgyal mchog gi bsam gtan pas bsam gtan nyon mongs pa can du 'gyur te/ des khyad par lhag par rtog pa mthong bas 'gro ba'i phyir ro//ma rig pa the tshom mchog gi bsam gtan pas bsam gtan nyon mongs can du 'gyur te/ de kho na nyid ma rtogs par grol ba 'dod pa'i khyad par lhag par rtogs pa la thar pa ma yin pa zhes the tshom skye ba'i phyir ro/ /de ltar kun nas nyon mongs pa'i sems 'dod pa dang gzugs med pa na spyod pa'i nyon mongs pa nye ba'i nyon mongs pa rnams rab tu 'jug go//rnam par byang ba ni dka' ba'i bsam gtan la sogs pa rnams ni 'jig rten pa yin yang dge ba nyid de/ /kun nas nyon mongs pa la sogs pa'i skyon dang bral ba'i phyir ro/ /rgyu gnyis dag las rnam par byang bar 'gyur te/'di ltar kun nas nyon mongs pa la sogs pa'i skyon dang bral ba dang / kun nas dkris pa'i dri ma dang bral ba'i phyir ro/ /rnam par gzhag pa ni rnam pa bzhi ste/ 'di ltar/ yan lag rnam par gzhag pa dang / snyoms par 'jug pa rnam par gzhag pa dang / tshad bzung ba rnam par gzhag pa dang ming du bya ba'o//de la yan lag rnam par gzhag pa ni bsam gtan dang po ni yan lag lnga'o zhes pa la sogs pa'o/ /de la bsam gtan dang po ni yan lag lnga ste/ 'di ltar/ rnam par rtog pa dang / rnam par dpyod pa dang / dga' ba dang / bde ba dang / sems rtse gcig pa nyid do//de rnams la rnam par rtog pa dang / rnam par dpyod pa dag gnyen po'i yan lag go/ /dga' ba dang / bde ba ni phan yon gyi yan lag go/ /sems rtse gcig pa ni gnyen po'i yan lag dang phan yon gyi yan lag dag gi rten gyi yan lag go/ /yan lag lnga po de dang ldan pas bsam gtan dang po ni/skyon gnyis dang rnam par bral bar 'gyur te/ 'di ltar/ 'dod pas dben pa dang / sdig pa mi dge ba'i chos kyis dben pa dang / rnam par rtog pa dang rnam par dpyod pa dag nye bar zhi ba'i phyir rnam rtog med cing rnam par dpyod pa med pa'i bsam gtan gnyis pa ni yan lag bzhi ste/yan lag bzhi ni 'di ltar/ nang rab tu dang ba dang / dga' ba dang / bde ba dang / sems rtse gcig pa'o/ /de rnams la nang rab tu dang ba ni gnyen po'i yan lag go/ /dga' ba dang bde ba ni phan yon gyi yan lag go/ /sems rtse gcig pa ni rten gyi yan lag go/ /bsam gtan gsum pa ni yan lag lnga ste/de la yan lag lnga ni 'di lta ste/ dga' ba yang btang snyoms su byed pa'i phyir btang snyoms dang / dran pa dang / shes bzhin dang / bde ba dang / sems rtse gcig pa'o/ /de rnams la btang snyoms dang dran pa dang shes bzhin gnyen po'i yan lag go/ /bde ba ni phan yon gyi yan lag go//sems rtse gcig pa ni rten gyi yan lag go/ /bsam gtan bzhi pa ni yan lag bzhi ste/ de la yan lag bzhi ni 'di lta ste/ btang snyoms rnam par dag pa dang / dran pa rnam par dag pa dang / sdug bsngal yid dga' ba yid mi bde ba rnams sngon bzhin du spangs pa nyid kyi phyir/sdug bsngal ma yin bde ba ma yin pa'i tshor ba dang / sems rtse gcig pa'o/ /'di rnams la btang snyoms rnam par dag pa dang dran pa rnam par dag pa ni gnyen po'i yan lag go/ /sdug bsngal min bde ba min pa'i tshor ba ni phan yon gyi yan lag go/ /sems rtse gcig pa ni rten gyi yan lag go//'phags pa gnas brtan pa'i sde pa'i lung las bsam gtan lnga bshad de/ de la rnam rtog dpyod pa dga' ba bde ba sems rtse gcig pa dang ldan pa'i bsam gtan dang po ni yan lag lnga ldan no/ /dpyod pa dga' ba bde ba sems rtse gcig pa dang ldan pa'i bsam gtan gnyis pa ni yan lag bzhi ldan no//dga' ba bde ba sems rtse gcig pa dang ldan pa'i bsam gtan gsum pa ni yan lag gsum ldan no/ /bde ba sems rtse gcig pa dang ldan pa'i bsam gtan bzhi pa ni yan lag gnyis ldan no/ /btang snyoms dang sems rtse gcig pa dang ldan pa'i bsam gtan lnga pa ni yan lag gnyis ldan no//snyoms par 'jug pa rnam par gzhag pa ni/ yid la byed pa bdun gyis bsam gtan dang po la snyoms par 'jug go/ /de bzhin du 'du shes med 'du shes med min gyi skye mched kyi bar du'o/ /de la yid la byed pa bdun ni 'di lta ste/ mtshan nyid so sor rig pa yid la byed pa dang /lhag par grol ba dang / rnam par dben pa dang / dga' ba 'dud par byed pa dang / dpyod pa dang / sbyor ba'i mthar thug pa dang / sbyor ba mthar thug pa'i 'bras bu'o/ /de la mnyam par gzhag pa'i yid la byed pas 'dod pa la skyon du yang dag par mthong bas dang /rags pa'i mtshan nyid so sor myong bar byed de/ de dag dngos po med pa'i phyir bsam gtan dang po la zhi ba'i mtshan nyid so sor myong bar byed do/ /'di ni mtshan nyid so sor rig pa yid la byed pa'o/ /de yang thos pa dang bsam pa mang bar shes par bya'o/ /de las gong du thos bsam las 'das te/mtha' gcig tu sgom pa'i rnam pa yid zhi ba'i mtshan nyid kyis mtshan ma la dmigs pa'i zhi gnas lhag mthong bsgoms pa nas yang ci ltar btsal ba'i rags pa dang zhi ba nyid lhag par mos par byed pa 'di ni lhag par grol ba'o/ /de dag dang po nyid du goms pa'i las spong ba'i lam dang lhan cig tu yid la byed pa ni/rab tu dben pa ste/ des nyon mongs pa'i rnam pa mchog spangs pa'i phyir dang / btang snyoms kyi gnas ngan len spangs pa'i phyir ro/ /rnal 'byor pa de ni la gor du spong ba dang spong ba'i phan yon mthong ba la dga' bar 'gyur zhing / rab tu dben pa chung ngu dga' ba bde ba dang ldan pas/dus dang dus su rab tu dang ba'i yid la byed pas/ rmugs pa dang rgod pa bsal gyi bar du sems kun du dga' bar byed pa 'di ni dga' ba sdud par byed pa'o/ /dge ba'i sbyor ba nye bar bstan pa yang dag par ldan pa'i rnal 'byor pa de nyid kyis/ 'dod pa na spyod pa'i nyon mongs pa kun nas dkris pa kun du spyod pa/de dag rab tu spangs pa nyid rtogs pa'i don du/ de dag mi 'byung ba'i rjes su mthun pa mi sdug pa'i mtshan ma yid la byed pas so sor rtog pa ni dpyod pa yid la byed pa'o/ /rnal 'byor pa de nyid gnyen po spyod pa bsgom pa las/ sbyor ba de srid pa yin gyi/'dod pa spyod pa'i nyon mongs pa spang ba'i phyir ni ma yin no/ /bsam gtan dang po'i sbyor ba mthar thug par phyin pa gnyen po yid la byed pa ni sbyor ba mthar thug pa'o/ /de ma thag tu dngos gzhi bsam gtan dang po la snyoms par 'jug pa rtogs pa'i phyir/ des na sbyor ba mthar thug pa'i 'bras bu zhes so//ci ltar bsam gtan dang po thob pa'i phyir yid la byed pa de bzhin du/ 'du shes med 'du shes med min skye mched thob pa'i phyir yid la byed pa ci rigs par sbyar bar bya'o/ /sa 'og ma thams cad rags pa'i mtshan zhes pa ni ci yang med pa'i skye mched kyi bar du'o/ /tshad bzung ba rnam par gzhag pa ni/bsam gtan dang po chung ngu yongs su bsgoms pas tshangs ris su skye ba'o/ /'bring po yongs su bsgoms pas tshangs pa'i mdun na 'don du'o/ /chen po yongs su bsgoms pas tshangs pa chen por skye ba'o/ /de la sogs pa sngon du gsungs pa ci lta ba bzhin no/ / gzugs med pa la gnas gzhan med par skye ba tha dad pa med pa'o/ /snyoms par 'jug pa chung ngu 'bring chen po yongs su bsgoms pas gzugs med pa rnams kyi skye ba la mtho ba dang dma' ba dang dman pa dang gya nom pa nyid ni shes so/ /de la dma' ba dang mtho ba ni tshe la sogs pa'i khyad par gyis so//dman pa dang gya nom pa ni nyon mongs pa dang nyon mongs pa med pa dang mang ba'i khyad par gyis so/ /ming du bya ba rnam par gzhag pa ni/ bsam gtan dang pos bsdus pa'i ting nge 'dzin de snyed la sangs rgyas bcom ldan 'das dang mthu chen po thob pa'i byang chub sems dpa' rnams snyoms par 'jug go//nyan thos dang rang sangs rgyas kyis ting nge 'dzin de rnams kyi ming yang mi shes na/ snyoms par 'jug pa'am grangs shes par ga la 'gyur/ ci ltar bsam gtan dang pos bsdus pa de bzhin du/ lhag ma bsam gtan dang gzugs med pas bsdus pa nyid do//'di lta ste/ bsam gtan gyi pha rol tu phyin pa la brten pa'o zhes so/ /rnam par dag pa ni bsam gtan dang po ni rab kyi mtha' phyin pa'o zhes pa nas 'du shes med 'du shes med min skye mched kyi bar du'o/ /de ltar bsam gtan dang gzugs med pa dang / gzhan ting nge 'dzin rnam pa dbye ba mtha' med pa/byang chub kyi yan lag dang mi ldan pa thams cad ni 'jig rten pa'o/ /gzugs med pa ni bzhi ste/ 'di ltar/ nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min gyi skye mched do/ /de la nam mkha' mtha' yas skye mched ni 'du shes gsum dang bral te/'di ltar/ sngon po la sogs pa gzugs kyi 'du shes dang / rtsig pa mkhar la sogs pa sgrib pa'i 'du shes dang / pho brang skyed mos tshal ri mtsho zla ba nyi ma la sogs pa tha dad pa'i 'du shes so/ /rnam shes mtha' yas skye mched ni nam mkha'i 'du shes dang bral ba'o//ci yang med pa'i skye mched ni rnam shes kyi 'du shes dang bral ba'o/ /'du shes med 'du shes med min skye mched ni ci yang med pa'i skye mched dang yang bral ba'o/ /gzugs med pa de rnams ni kun nas nyon mongs pa dang rnam par byang ba dang rnam par dag pa dang rnam par gzhag pa gsum gyis kun nas nyon mongs pa can du 'gyur ro//yan lag rnam par gzhag pa 'ba' zhig ni med pa ste/ zhi gnas gcig pu'i ro dang ldan pa'i phyir ro/ /'du shes med 'du shes med min skye mched kyi snyoms par 'jug pa ma gtogs pa/ gang bsam gtan dang gzugs med pa'i snyoms par 'jug pa byang chub kyi yan lag dang ldan pa de ni 'jig rten las 'das pa'o//gal te 'du shes med 'du shes med min gyi skye mched ma gtogs pa ci ltar zhe na/ brjod de/ 'du shes med 'du shes med min skye mched de ni 'jig rten pa nyid du 'gyur te/ 'du shes kyi rgyu ba yongs su gsal ba ma yin pas nyes pa 'joms byed ma yin pa'i phyir ro/ /de nyid kyis na/ bcom ldan 'das kyis/ ci srid du 'du shes nyid snyoms par 'jug pa de srid du kun shes pa mngon du byed do zhes gsungs so/ /dag pa'i bsam gtan ni rnam pa bzhi ste/ 'di ltar/ spong ba'i cha dang mthun pa dang /gnas pa'i cha dang mthun pa dang / khyad par gyi cha dang mthun pa dang / nges par 'byed pa'i cha dang mthun pa'o/ /srid pa'i rtse mo ni dag pa rnam pa gnyis te/ tha ma ni mi srid pas khyad par gyi cha dang mthun pa las gzhan no/ /dag pa 'di'i mtshan ci zhe na/ brjod de/ nyon mongs pa mi skye ba dang rjes su mthun pa ni spong ba'i cha dang mthun pa'o//rang gi sa dang rjes su mthun pa ni gnas pa'i cha dang mthun pa'o/ /sa gong ma dang rjes su mthun pa ni khyad par gyi cha dang mthun pa'o/ /zag pa med pa dang rjes su mthun pa ni nges par 'byed pa'i cha dang mthun pa'o/ /ting nge 'dzin gyi nyes pa ni drug ste/'di ltar/ le lo dang / dmigs pa brjed pa dang / bying ba dang / rgod pa dang / mi rtsol ba dang / rtsol ba'o/ /ting nge 'dzin gyi dri ma bdun te/ 'di ltar/ rnam par rtog pa dang / dpyod pa dang / dga' ba dang / mchog tu dga' ba dang / bde ba dang / dbugs 'jug pa dang / dbugs 'byung ba'o//rnam par thar pa zhes pa ni/ rnam par thar pa brgyad de/ 'di ltar/ gzugs can gzugs la lta ba 'di ni rnam par thar pa dang po'o/ /nang gzugs med pas phyi rol gzugs la lta ba 'di ni gnyis so/ /sdug pa'o zhes mos par gyur pa 'di ni gsum pa'o/ /de gsum ni sprul pa'i sgrib pa'i gnyen po yin pa'i phyir rnam par thar pa ste gzugs can no//nam mkha' mtha' yas skye mched ni rnam par thar pa bzhi pa'o/ /rnam shes mtha' yas skye mched ni rnam par thar pa lnga pa'o/ /ci yang med pa'i skye mched ni rnam par thar pa drug pa'o/ /'du shes med 'du shes med min ni rnam par thar pa bdun pa'o//'du shes dang tshor ba 'gog pa ni brgyad pa'o/ /de lnga ni gzugs med pa'i rnam par thar pa'o/ /de la dag pa'i gzugs med bzhi ni/ de'i ro myang ba'i sgrib pa'i gnyen po yin pa'i phyir rnam par thar pa'o/ /zhi ba la gnas pa zhes brjod do//'du shes dang tshor ba 'gog pa ni thar pa dang 'dra ba'i gnas pa'o/ /'du shes med 'du shes med min skye mched la rten 'das nas/ gang sems dang sems las byung ba rnams 'gags te/ ldang ba tshun chad du mchog tu zhi bar gnas pa'i phyir ro/ /de'i sgrib pa spong ba'i phyir rnam par thar pa zhes so//mthar gyis gnas pa'i snyoms par 'jug pa dgu ni/ 'di lta ste/ bsam gtan bzhi dang gzugs med pa bzhi dang 'du shes dang tshor ba dang 'gog pa'o/ /zil gyis gnon pa'i skye mched brgyad ni 'di lta ste/ nang gzugs su 'du shes pas phyi rol gzugs chung ngu la lta zhing zil gyis mnan nas shes shing mthong ba 'di ni zil gyis mnan pa'i skye mched dang po'o//nang gzugs su shes nas phyi rol gzugs chen po la lta zhing / de dag zil gyis mnan nas shes shing mthong ste/ de lta bur 'du shes par gyur pa 'di ni gnyis pa'o/ /nang gzugs med par 'du shes nas phyi rol gzugs chung ngu la lta zhing /de dag zil gyis mnan nas shes shing mthong ba 'di ni gsum pa'o/ /de bzhin du chen po zhes pa ni bzhi pa'o/ /nang gzugs med par 'du shes nas phyi rol gzugs sngon po la lta zhing de dag zhes pa ni lnga pa'o/ /de bzhin du ser po zhes pa ni drug pa'o//de bzhin du dmar po zhes pa ni bdun pa'o/ /de bzhin du dkar po zhes pa ni brgyad pa'o/ /de la gzugs chung ngu ni sems can du brjod pa ste tshad chung ngu nyid yin pa'i phyir ro/ /chen po ni sems can du brjod pa ma yin pa ste khang pa dang gzhal yas khang dang ri la sogs pa ste/ tshad chen po nyid yin pa'i phyir ro//zad par bcu ni 'di lta ste/ zad par sa dang / zad par chu dang / zad par me dang / zad par rlung dang / zad par sngon po dang / zad par ser po dang / zad par dmar po dang / zad par dkar po dang / zad par nam mkha' mtha' yas skye mched dang / zad par rnam shes mtha' yas skye mched do//ting nge 'dzin gsum ni/ rnam par thar pa'i sgo gsum gyi rang bzhin no/ /'di ltar/ stong pa nyid kyi ting nge 'dzin ni rnam par thar pa'i sgo stong pa nyid do/ /mtshan ma med pa'i ting nge 'dzin ni rnam par thar pa'i sgo mtshan ma med pa'o/ /smon pa med pa'i ting nge 'dzin ni rnam par thar pa'i sgo smon pa med pa'o//'ga' zhig du rnam par thar pa'i sgo bzhi pa yang ste/ 'di ltar/ mngon par 'du byed pa med pa'i rnam par thar pa'i sgo'o/ /shes pa bcu gnyis ni/ 'di lta ste/ sdug bsngal shes pa dang / kun 'byung shes pa dang / 'gog pa shes pa dang / lam shes pa dang /zad pa shes pa dang / mi skye ba shes pa dang / chos shes pa dang / rjes su shes pa dang / kun rdzob shes pa dang / yongs su sbyangs pa shes pa dang / sgra ci bzhin pa shes pa'o/ /dbang po ni gsum ste 'di ltar/ mi shes pa kun shes par byed pa'i dbang po dang / kun shes pa'i dbang po dang / kun shes pa dang ldan pa'i dbang po'o/ /rim pa bzhin du mthong ba dang bsgom pa dang mi slob pa lam rnams su'o/ /ting nge 'dzin ni gsum ste/ 'di ltar/ rtog pa dang dpyod pa dang bcas pa'i ting nge 'dzin dang / rtog pa med cing dpyod pa tsam gyi ting nge 'dzin dang / rtog pa med cing dpyod pa med pa'i ting nge 'dzin no//rjes su dran pa ni bcu ste/ 'di ltar/ sangs rgyas rjes su dran pa dang / chos rjes su dran pa dang / dge 'dun rjes su dran pa dang / tshul khrims rjes su dran pa dang / gtong ba rjes su dran pa dang / lha rjes su dran pa dang / skyo ba rjes su dran pa dang / 'chi ba rjes su dran pa dang / lus su gtogs pa rjes su dran pa dang / dbugs phyi nang du rgyu ba rjes su dran pa'o/ /de la lus su son pa rjes su dran pa ni/ lus kyi mi gtsang ba'i rdzas sum cu rtsa drug nges par sems pa 'di lta ste/ lus 'di nyid ni rkang pa'i mthil nas spyi bo dang skra dang klad pa nas 'og tu dang / sen mo dang spu dang skra'i mthar thug pa mi gtsang ba rnam pa sna tshogs kyis gang ba rnams yang dag pa ci lta ba so sor rtog pa ste/'di lta ste/ lus 'di la yod de/ skra dang / spu dang / sen mo dang / so dang / skyi dang / pags pa dang / sha dang / chu rgyus dang / chu ser dang / rus pa dang / rkang gzhungs dang /snying dang / mkhal ma dang / mtsher ba dang / glo ba dang / mchin pa dang / pho ba dang / rgyu ma dang / gnye ma dang / grod pa dang / phyi sa dang / gcin dang / mchi ma dang / rngul dang / tshil dang / mchil ma dang / snabs dang / rnag dang / khrag dang / mkhris pa dang / bad kan dang / zhag dang / dri ma dang /klad pa dang / mig rnag dang / rna spabs so/ /lus 'di la so sor yang dag pa ci lta ba bzhin so sor rtog go zhes so/ /de la dkon mchog gsum ni rten no/ /tshul khrims dang gtong ba ni gzhi'o/ /lha ni dbang po'o/ /yid 'byung ba dang 'chi ba dang dbugs mi 'byin pa'o/ /lus su son pa dang dbugs phyi nang du rgyu ba rjes su dran pa dag gis na rnam par mi brjed pa'o//de la rgyu bzhis nyin mo sangs rgyas rjes su dran pa ste/ 'di ltar/ dge ba'i phyogs la mngon par brtson pa dang / mchod pa'i cho ga dang / rnam pa rjes su dran pa dang / phan 'dogs pa rjes su dran pa'o/ /ci ltar nyin mo mi nyal bar sangs rgyas rjes su dran pa goms pa de las nyal ba na'ang de kho na ltar rmi lam mthong ba'o//sangs rgyas la sogs pa rjes su dran pa rnams ni phan yon bdun te/ 'di ltar skye ba dran par 'gyur ba dang / rab tu dang ba mang ba nyid dang / dman pa'i chos la 'gyod pa dang bcas par 'chi ba'i dus mi byed pa dang /lus zhig na bde 'gro mtho ris kyi 'jig rten du lha rnams su skye ba'o/ /'dod khams dang gzugs khams kyi sems can la dmigs pas tshangs pa'i gnas bzhi'o/ /de nyid tshad med pa'i sems can la dmigs pas tshad med pa bzhi'o/ /'di lta ste/ byams pa dang /snying rje dang / dga' ba dang / btang snyoms so/ /de la bde ba dang ldan par 'dod pas ni byams pa'o/ /sdug bsngal dang bral bar 'dod pas ni snying rje'o/ /bde ba dang mi 'bral bar 'dod pas ni dga' ba'o/ /nyon mongs pa med par 'dod pas ni btang snyoms so/ /bzhi po de rnams ni mos pas spyod pa'i sa ru ni sems can la dmigs pa'o//rab tu dga' ba la sogs pa'i sa bdun du ni chos la dmigs pa'o/ /de las gong du ni dmigs pa med pa'o/ /'phags pa blo gros mi zad pa'i mdo las kyang / btang snyoms rnam pa gsum bshad de/ 'di ltar/ rnyed pa dang ma rnyed pa la sogs pa 'jig rten chos brgyad la sogs pa'i nyon mongs pa spangs pa'i phyir nyon mongs btang snyoms pa'o//bzod pa byed pa'i phyir rang bzhin kun du bsrung ba'i btang snyoms so/ /dus dang dus ma yin pa'i btang snyoms so/ /dus dang dus ma yin pa'i btang snyoms ni drug ste/'di ltar/ sbyin pa'i dus su tshul khrims btang snyoms pa'o/ /tshul khrims dus su sbyin pa btang snyoms so/ /bzod pa'i dus su brtson 'grus btang snyoms so/ /brtson 'grus dus su bsam gtan btang snyoms so/ /bsam gtan dus su sbyin pa btang snyoms so/ /shes rab dus su pha rol tu phyin pa lnga btang snyoms so//nor ni bdun te/ 'di ltar/ dad pa'i nor dang / tshul khrims kyi nor dang / thos pa'i nor dang / gtong ba'i nor dang / shes rab kyi nor dang / ngo tsha ba'i nor dang / khrel yod pa'i nor ro/ /spyan lnga ni 'di lta ste/ sha'i spyan dang / rnam par smin pa'i lha'i spyan dang /shes rab kyi spyan dang / chos kyi spyan dang / sangs rgyas kyi spyan no/ /mngon par shes pa drug ni 'di lta ste/ rdzu 'phrul gyi mngon par shes pa dang / lha'i mig gi mngon par shes pa dang / lha'i rna ba'i mngon par shes pa dang / gzhan gyi sems shes pa'i mngon par shes pa dang / sngon gyi gnas rjes su dran pa'i mngon par shes pa dang / zag pa zad pa'i mngon par shes pa'o/ /gzungs ni bzhi ste/ 'di ltar/ bzod pa'i gzungs dang / chos kyi gzungs dang / don gyi gzungs dang / gsang sngags kyi gzungs so/ /yang gzungs ni bcu ste/ 'di ltar/ don gyi gzungs dang / gzhung gi gzungs dang / mngon shes kyi gzungs dang / 'od zer rnam par 'gyed pa'i gzungs dang / pha rol rgol ba tshar gcod pa'i gzungs dang / de bzhin gshegs pa'i mchod pa dang dbul po sems can rjes su bsgrub pa nye bar sgrub pa'i gzungs dang / theg pa chen po la gzhol ba'i sems can yang dag par gzengs bstod pa'i gzungs dang /ma chags pa'i smon lam gyi gzungs dang / spobs pa mi zad pa'i gzungs dang / don sna tshogs pa'i spobs pa'i gzungs so/ /'chi ba dang / nyon mongs pa dang / dbul ba dang / nye bar spyod pa dang / ngan 'gro dang / yongs su tshol ba'i 'bad pa dang /chos kyis phongs pa'i las kyi sgrib pa dang / 'dod pa rnam par nyams pa dang / spa gong ba dang / the tshom ste/ nye bar 'tshe ba bcu'i gnyen po ni rim pa bzhin du dbang bcu ste/ 'di ltar/ tshe la dbang ba dang / sems la dbang ba dang / yo byad la dbang ba dang / las la dbang ba dang /skye ba la dbang ba dang / rdzu 'phrul la dbang ba dang / smon lam la dbang ba dang / lhag par mos pa la dbang ba dang / ye shes la dbang ba dang / chos la dbang ba'o/ /paN+Di ta chen po stobs bcu dpal gyi bshes gnyen gyis bsdus pa 'dus byas dang 'dus ma byas rnam par nges pa las byang chub sems dpa'i lam rnam par nges pa zhes bya ba le'u nyi shu rtsa gsum pa'o// //byang chub sems dpa'i theg pa la rtogs par byed pa'i gang zag gi dbye bas byang chub sems dpa'i rnam par gzhag pa gnyis te/ 'di ltar/ gang zag rnam par gzhag pa dang / mngon par rtogs pa rnam par gzhag pa'o//de la gang zag gi rdzas med kyang rgyu rnam pa bzhis gang zag rnam pa bzhi ste/ 'di lta ste/ tha snyad bde ba'i don du dang / mi skrag pa'i don du dang / bdag dang gzhan gyi skyon can yon tan can bstan pa'i don du'o/ /de la tha snyad bde ba'i don du zhes pa ni/ gzugs la sogs pa mang po rnams kyi mtshan nyid tha dad pa/ ming tha dad pa mang po rnams gcig tu bsdus pa'i sems can gyi ming gis brjod pas tha snyad tshegs med pa'i phyir ro/ /'jig rten rjes su 'jug pa'i don gyis zhes pa ni/ 'jig rten chos tsam gyi ming ni sems can med par tha snyad gnas pa ma yin te/de lta mod kyi phal cher ni sems can gyi tha snyad kyis so/ /de'i phyir 'phags pas kyang nges par 'jig rten dang lhan cig tu tha snyad bya zhing / de 'jig rten rjes su 'jug pa'o/ /'jig rten mi skrag pa'i don du zhes pa ni/ rten cing 'brel par 'byung ba'i chos nyid la mi mkhas pa rnams thams cad du sems can med pa thos nas skrag par 'gyur ba'i phyir ro//bdag gzhan gyi skyon yon bstan pa ni/ gang gis gang zag gi rnam par gzhag pa mi byed/ kun nas nyon mongs pa dang rnam par byang ba tsam bstan mod/ sems can du btags pa med pas sems can 'di rnams kyi skyon rnams ni spangs so//yon tan 'di rnams ni bskrun no zhes shes par mi nus so/ /de la gang zag rnam par gzhag pa ni rnam pa bdun te/ 'di ltar/ spyod pa'i dbye bas dang / nges par 'byung ba'i dbye bas dang / nye bar ston pa'i dbye bas dang / sbyor ba'i dbye bas dang / 'bras bu'i dbye bas dang /khams kyi dbye bas dang / bya ba'i dbye bas so/ /de la spyod pa'i dbye bas gang zag bdun te/ 'di ltar 'dod chags la spyod pa dang / zhe sdang la spyod pa dang / gti mug la spyod pa dang / nga rgyal la spyod pa dang / rnam rtog la spyod pa dang / cha mnyam pa la spyod pa dang / zhan pa'i sdug bsngal can no//de la chags par bya ba'i dngos po dman pa la yang 'dod chags chen po skye ba'i phyir dang / skyes pa'i 'dod chags yun ring du rjes su 'brel pa'i phyir drag la rgyun ring ba'i 'dod chags la spyod pa'o/ /de bzhin du zhe sdang drag ring dang / de bzhin du gti mug drag ring dang / de kho na bzhin du nga rgyal drag ring dang /de bzhin du rnam rtog drag ring ngo / /gang nyon mongs tha mal du gnas pa mnyam pa'i cha la spyod pa ste nyon mongs pa mnyam par rnam par gnas pa zhes pa'i don to/ /gang nyon mongs pa shin tu chung ba tha mal du gnas pa ni zhan pa'i rdul can no/ /nges par 'byung ba'i dbye bas gang zag gsum ste/'di ltar/ nyan thos kyi theg pa dang / rang sangs rgyas kyi theg pa dang / theg pa chen po pa'o/ /de la nyan thos kyi theg pa pa ni rang bzhin gyis dbang po rtul ba/ nyan thos kyi chos nyid la nges pa'am ma nges par gnas pa/ bdag nyid 'ba' zhig grol ba'i phyir smon lam mdzad pa/ skyo ba'i bsam pa dang chags bral gyi bsam pa dang grol ba'i bsam pas/nyan thos kyi sde snod la dmigs nas chos dang rjes su mthun pa'i chos bsgrub cing de sdug bsngal gyi mthar phyin pa rjes su thob bo/ /rang bzhin gyis dbang po zhan pa ni yang rang sangs rgyas dang byang chub sems dpa'i dbang po la ltos nas so//rang rgyal ba'i theg pa pa ni/ gang rang sangs rgyas kyi chos nyid du nges pa'am ma nges pa'i gnas pa rang bzhin gyis dbang po 'bring du gyur pa dag kho na grol ba'i phyir smon lam mdzad pa sngon bzhin no/ /skyo ba chags bral rnam grol gyi bsam pas/ nyan thos kyi sde snod nyid la dmigs nas chos dang rjes su mthun pa'i chos sgrub pa bgyis te/nges par 'byed pa'i cha dang mthun pa ma skyes pa'am/ nges par 'byed pa'i cha dang mthun pa skyes pa'am/ sngon du 'bras bu ma thob pa/ sangs rgyas 'byung ba med pa ru rang nyid kyis lam mngon du byas te/bse ru ltar gcig pu gnas pa'am/ tshogs dang spyod par gyur te sdug bsngal gyi mtha' rjes su 'thob bo/ /theg pa chen po pa'i gang zag ni byang chub sems dpa'i chos nyid du nges pa'am ma nges par rnam par gnas pa nyid do/ /rang bzhin gyis dbang po rno ba/ phyogs thams cad du mtha' med pa'i khams gsum pa'i sems can rnams rnam par grol ba'i phyir smon lam mdzad pa/mi gnas pa'i mya ngan las 'da' ba'i bsam pas byang chub sems dpa'i sde snod la dmigs nas chos dang rjes su mthun pa'i chos bsgrubs te/ sems can yongs su smin par byed cing / sangs rgyas kyi zhing yongs su sbyong bar byed pa lung bstan pa rab tu thob ste bla na med pa yang dag par rdzogs pa'i byang chub tu mngon par rdzogs par sangs rgya'o/ /lung bstan pa rab tu thob ces pa ni sa brgyad pa la mi skye ba'i chos la bzod pa rab tu thob ces pa'i don to/ /nye bar ston pa'i dbye bas gang zag gsum ste/'di ltar/ tshogs ma bsags pa dang / tshogs bsags pa dang tshogs ma bsags pa dang / tshogs bsags pa'o/ /de la tshogs ma bsags pa ni gang bden pa'i bdag po'i chos 'di la dmigs pa mos pa rab tu chung ba/ chung ngu nges nges pa med pa'i skye ba dang dus kyis thar pa'i cha dang mthun pa dang ldan pa'o//tshogs bsags pa dang tshogs ma bsags pa ni/ gang bden pa'i bdag po'i chos 'di la dmigs pa/ mos pa dang rab tu dang ba 'bring po/ /[(]'dring [,]'bring [)]des dus dang skye ba nges par thar pa'i cha dang mthun pa dang ldan pa'o/ /tshogs bsags pa ni/gang bden pa'i bdag po'i chos 'di la dmigs pas/ mos pa dang rab tu dang ba rab tu gyur pa/ rab des skye ba dang dus de la thar pa'i cha dang mthun pa dang ldan pa'o/ /gzhan yang tshogs ma bsags pa ni/ gang bden pa'i bdag po'i chos 'di la dmigs nas/ bden pa chos la nges par sems pa'i bzod pa chung ngu ldan pas/chung ngu des skye ba dang dus nges pa med pas nges par 'byed pa'i cha dang ldan pa'o/ /tshogs bsags pa dang ma bsags pa ni/ gang bden pa'i bdag po'i chos 'di la dmigs nas/ chos nges par sems pa'i bzod pa 'bring po dang ldan pas 'bring des skye ba dang dus nges pas nges par 'byed pa'i cha dang ldan pa'o//tshogs bsags pa ni gang bden pa'i bdag po'i chos la dmigs nas bden pa la chos la nges par sems pa'i bzod pa rab dang ldan pas/ rab des skye ba de la nges par 'byed pa'i cha mthun dang ldan pa'o/ /de la phyogs dang po ni/bden pa'i bdag po'i chos la mos pa dang rab tu dang ba'i mtshan nyid kyis nges par 'byed pa'i cha dang mthun pa ste/ dad pa gtso bo yin pa'i phyir ro/ /phyogs gnyis pa ni bden pa'i bdag po'i chos la chos nges par sems pa'i bzod pa'i mtshan nyid kyi nges par 'byed pa'i cha dang mthun pa ste/shes rab gtso bo yin pa'i phyir ro/ /'jig rten chos mchog ni ma gtogs te 'jig rten chos mchog ni rang bzhin gyis skad cig nyid yin pas rgyun med pa'i phyir ro/ /de yang skyes pa dus de nyid pa yin gyi sngon ni ma yin no/ /de la dge ba'i chos la 'dun pa nye bar bzung ste/ gang thar pa'i don du byed pa'i nges par 'byed pa'i bstan pa'i cha dang mthun pa de ni rnam pa bzhi ste/'di ltar/ lhag pa'i skal ba can dang / lhag pa'i mos pa can dang / lhag pa'i 'dod pa dang / lhag pa'i rtogs pa can no/ /dge ba'i chos la 'dun pa dang nye bar bzung ste/ gang thar pa'i don du byed pa de ni lhag pa'i skal ba can no//grol ba dang ldan pa'i bstan pa la lhag par mos pa dang ldan pa gang yin pa de ni lhag pa'i mos pa can no/ /dga' ba dang ldan pa'i thar pa la dmigs pa mang du yid la byed pa gang yin pa de ni lhag pa'i 'dod pa can no/ /skye ba de nyid du nges par 'byed pa'i cha dang mthun pa skyed pa gang yin pa de ni lhag pa'i rtogs pa can no//nges par 'byed pa ni rnam pa drug ste/ 'di ltar/ rjes su mthun pa pa dang / khyad du 'phags pa pa dang / mngon du byed pa can dang / gzhan du yongs su bsngo ba can dang / skye ba gcig pa dang / stan gcig pa'o//de la gang dang po nyid du bden pa dmigs pa'i rnam pa dge ba'i rtsa ba chung ngu skye ba de ni rjes su mthun pa pa'o/ /gang 'bring de ni khyad par du 'phags pa ste/ chung ngu las khyad par can yin pa'i phyir ro/ /gang bden pa mngon du bya ba'i phyir skye ba nyid du chen po yang dag par 'jug pa de ni mngon du byed pa can no//de ni yang dag rigs ma nges pa rnams khyad par can gyi byang chub phyir yongs su bsngo ba dang / mkhan po med pa'i rang sangs rgyas kyi mngon par rtogs pa'i phyir skye ba gzhan du yongs su bsngo ba ni gzhan du yongs su bsngo ba'o/ /gang skye ba de nyid du bden pa mngon du bya ba'i phyir yang dag par 'jug pa de ni skye ba gcig pa'o//gang stan gcig la bden pa mngon du bya ba'i phyir yang dag par 'jug pa de ni stan gcig pa'o/ /sbyor ba las gang zag rnam pa gnyis ni 'di lta ste/ dad pas rjes su 'brang ba dang / chos kyis rjes su 'brang ba'o/ /de la gang tshogs bsags pa dbang po rtul po gzhan gyis nye bar bstan pa la rjes su brten nas bden pa mngon par rtogs pa'i phyir rab tu sbyor ba de ni dad pas rjes su 'brang ba'o//gang tshogs bsags pa dbang po rnon po rang nyid kyis bden pa'i bdag pos chos 'di la rjes su brten nas mngon par rtogs pa'i phyir rab tu sbyor ba de ni chos kyis rjes su 'brang ba'o//'bras bu'i dbye bas gang zag bcu gsum ste/ 'di ltar dad pas lhag par mos pa dang / mthong bas thob pa dang / lus kyis mngon du byed pa dang / shes rab rnam par grol ba dang / gnyi ga'i cha las rnam par grol ba dang / rgyun du zhugs pa'i 'bras bu'i phyir zhugs pa dang /rgyun du zhugs pa dang / lan cig phyir 'ong ba'i 'bras bu'i ched du zhugs pa dang / lan cig phyir 'ong ba dang / /phyir mi 'ong ba'i 'bras bu'i phyir zhugs pa dang / phyir mi 'ong ba dang / dgra bcom pa'i 'bras bu'i phyir zhugs pa dang / dgra bcom pa'o/ /de la rgyun du zhugs pa ni rnam pa gnyis te/'di ltar ro ltar thogs na srid pa lan bdun pa dang / rigs nas rigs so/ /lan cig phyir 'ong ba ni gcig ste/ 'di ltar bar chad gcig pa'o/ /phyir mi 'ong ba ni rnam pa lnga ste/ 'di ltar bar ma dor yongs su mya ngan las 'da' ba dang / skyes nas yongs su mya ngan las 'da' ba dang /mngon par 'du byed pa med par yongs su mya ngan las 'da' ba dang / mngon par 'du byed pa dang bcas nas yongs su mya ngan las 'da' ba dang / gong du 'pho ba'o/ /dgra bcom pa ni rnam pa drug ste/ 'di lta ste/ yongs su nyams pa'i chos can dang / 'chi bar sems pa'i chos can dang /rjes su bsrung ba'i chos can dang / gnas pa las mi g.yo ba dang / mngon du byed pa'i skal ba can dang / mi g.yo ba'i chos can no/ /de la gang 'bras bu dus su dad pas rjes su 'brang ba'i gang zag de ni dad pas lhag par mos pa'o/ /gang 'bras bu dus su chos kyis rjes su 'brang ba de ni mthong bas thob pa'o//gang slob pa rnam par thar pa brgyad kyi bsam gtan pa'i gang zag phyir mi 'ong ba de ni lus kyis mngon du byed pa ste/ rnam par thar pa lus kyis mngon du byas shing snyoms par 'jug pa rnam par gnas pa'i phyir ro/ /rnam par thar pa brgyad ni bshad zin dang bshad par bya'o//gang zhig zag pa zad pa rnam par thar pa brgyad kyi bsam gtan pa ma yin pa de ni shes rab rnam par grol ba ste/ shes rab kyi mi mthun pa'i phyogs kyi sgrib pa tsam lhag ma med par spangs pa'i phyir ro/ /gang zhig zag pa zad pa rnam par thar pa brgyad kyi bsam gtan pa de ni nyon mongs pa dang snyoms par 'jug pa'i sgrib pa thams cad dag las rnam par grol ba'i phyir gnyi ga'i cha las rnam par grol ba'o//gang nges par 'byed pa'i cha dang mthun pa dang mthong ba'i lam gyi skad cig ma bco lnga rnams kyi gang zag de ni rgyun du zhugs pa'i 'bras bu'i phyir zhugs pa'o/ /stan gcig pa nges par 'byed pa'i cha dang mthun pa nas brtsams te 'bras bu dang po thob kyi bar du'o//mthong lam de ni yang dag pa nyid du nges par rnam par gnon pa dang / chos mngon par rtogs pa yang ngo / /yang mthong ba'i lam gyi mjug tu 'bras bu dang po thob pa'i gang zag gang zhe na/ gang mthar gyis pa 'dod pa las 'dod chags dang bral ba ma yin pa/yang dag pa nyid du nges pa la zhugs pa na rgyun du zhugs par gyur pa'o/ /chags pa dang bral ba'i phyogs gcig gis 'dod pa la 'dod chags dang bral ba ma yin pa'o/ /gang 'jig rten pa'i lam gyis 'dod pa na spyod pa'i bsgom pas spang bar bya ba nyon mongs pa rnam pa dang po drug spangs pa ni slar yang 'dod chags dang bral ba/yang dag pa nyid nges pa la zhugs pa na lan cig phyir 'ong bar 'gyur ro/ /yang sngon du 'jig rten pa'i lam gyi 'dod pa na spyod pa'i bsgom pas spang bar bya ba nyon mongs pa rnam pa dang po drug dag spangs te/gang las slar yang 'dod pa la 'dod chags dang bral bar gyur pa na/ phyis yang dag pa nyid du nges pa la zhugs pa de sems kyi skad cig bcu drug pa la lan cig phyir 'ong ba nyid du 'gyur ro/ /'dod pa la 'dod chags dang bral ba/ yang dag pa nyid nges pa la zhugs pa na phyir mi 'ong bar 'gyur ro//gang 'dod pa na spyod pa'i bsgom pas spang bar bya ba'i nyon mongs pa rnams 'jig rten pa'i lam gyis spangs te 'dod pa la 'dod chags dang bral bar gyur pa na nges pa la zhugs pa/ de phyir mi 'ong ba nyid du 'gyur ro/ /gang gi tshe mthong bas spang bar bya ba'i nyon mongs pa rnams spangs pas rgyun du zhugs pa yin grang na/de rgyu gang gis kun du sbyor ba gsum spangs pas rgyun du zhugs pa zhes brjod ce na/ brjod par bya ste/ thar pa thob pa'i gegs kyi gtso bo'i phyir ro/ /gang bsgom pa'i lam la 'dod pa na spyod pa'i nyon mongs pa rnam pa dang po lnga rnams spangs pa'i lam gyis gang zag ni lan cig phyir 'ong ba'i 'bras bu'i phyir zhugs pa'o//gang bsgom pa'i lam la 'dod pa na spyod pa'i nyon mongs pa rnam pa drug pa spangs pa yongs su rdzogs pa'i gang zag ni lan cig phyir 'ong ba'o/ /gang bsgom pa'i lam la lan cig phyir 'ong ba'i 'bras bu'i steng du/ 'dod pa na spyod pa'i nyon mongs pa'i rnam pa bdun pa dang brgyad pa dag spangs pa'i lam gyi gang zag ni phyir mi 'ong ba'i 'bras bu'i ched du zhugs pa'o//gang bsgom pa'i lam la 'dod pa na spyod pa'i nyon mongs pa'i rnam pa dgu pa spangs pa'i lam gyi gang zag ni phyir mi 'ong ba'o/ /'dir smras pa/ gang tshe 'dod pa na spyod pa'i bsgom pas spang bar bya ba nyon mongs pa thams cad spangs pas phyir mi 'ong bar 'gyur grang na/de rgyu gang gis 'og ma'i cha dang mthun pa'i kun du sbyor ba lnga rnams spangs pa'i phyir mi 'ong ba zhes brjod ce na/ brjod de/ gtso bor bsdus pa nye bar bzung ba'o/ /smras pa/ gtso bo nye bar bzung ba ci zhe na/ brjod de/ 'gro ba dman pa'i rgyu dang khams dman pa'i rgyu dang nye bar bzung ba'o/ /de la 'gro ba dman pa ni dmyal ba yi dags dud 'gro rnams so/ /khams dman pa ni 'dod pa'i khams so/ /de la 'jig tshogs la lta ba tshul khrims dang btul zhugs mchog tu 'dzin pa the tshom rnams kyis 'gro ba dman pa las mi 'da' bas/'jig tshogs la lta ba la sogs pa de rnams ni 'gro ba dman pa'i rgyu nyid do/ /'dod pa la 'dun pa dang / gnod sems dag gis khams dman pa las yang dag par 'da' ba ma yin pas 'dod pa la 'dun pa dang gnod sems de dag ni khams dman pa'i rgyu nyid do//phyir mi 'ong ba'i 'bras bu de ma thag tu gang bsgom pa'i lam la/ bsam gtan dang po'i nyon mongs pa'i rnam pa dang po nas brtsams te/ srid pa'i rtse mo'i nyon mongs pa rnam pa brgyad pa'i bar du spangs pa'i lam gyi gang zag de ni dgra bcom pa'i 'bras bu'i phyir zhugs pa'o//gang srid pa'i rtse mo'i nyon mongs pa'i rnam pa dgu pa spangs pa yongs su rdzogs pa'i gang zag de ni dgra bcom pa'o/ /'di la smras pa/ gang gi tshe khams gsum na spyod pa'i nyon mongs pa thams cad spangs pas dgra bcom pa yin grang na/ rgyu gang gis de gong ma'i cha dang mthun pa'i kun du sbyor ba lnga rnams spangs pas dgra bcom par 'gyur ro zhes bshad ce na/brjod de/ gtso bo bsdus pa nye bar bzung ba'o/ /smras pa/ gtso bo nye bar bzung ba ci zhe na/ brjod de/ gong ma nye bar len pa'i rgyu nyid dang / gong ma yongs su mi spong ba'i rgyu dag nye bar bzung ba'o//de la gzugs dang gzugs med pa'i 'dod chags dag las 'dod pa'i khams kyi gong ma nye bar len pa ste gzugs dang gzugs med pa'i khams su nye bar skye ba'o zhes pa'i don to/ /sred pa mchog gi bsam gtan pas kyis de ru kun nas nyon mongs pas so/ /rgod pa dang /nga rgyal dang the tshom rnams kyis gong ma yongs su mi spong ba ste the tshom mchog gi bsam gtan pas kyis de ru kun nas nyon mongs pa'i phyir ro/ /gang rgyun du zhugs pa nyid 'dres pa dang nye bar 'dres pas lha ru bdun dang mi'i bdun gyi srid pa la brten nas sdug bsngal gyi mthar rjes su phyin pa'i gang zag de ni srid pa tha ma lan bdun pa'o//gang lha ru'am mi rigs rim du song ste mi'i nang du sdug bsngal gyi mthar rjes su son pa de ni rigs nas rigs so/ /gang rgyun du zhugs pa nyid lha ru'am mi ru srid pa gnyis la brten te yongs su mya ngan las 'da' ba de ni lan cig phyir 'ong ba'i 'bras bu'i ched du zhugs pa'o//gang lan cig phyir 'ong ba nyid phyir mi 'ong ba'i 'bras bu'i phyir zhugs pa lha'i nang nyid du srid pa gcig la brten te yongs su mya ngan las 'da' ba de ni bar chad gcig pa'o/ /bar chad gcig ni skye ba gzhan gang gi go skabs de ni bar chad gcig ces bya'o//bar ma dor yongs su mya ngan las 'da' ba ni rnam pa gsum ste/ 'di lta ste/ skye ba'i kun du sbyor ba ni spangs la/ mngon par grub pa'i kun du sbyor ba ni ma spangs pas bar ma'i srid pa mngon par grub pa nyid na sngon du goms pa'i lam mngon du byas te sdug bsngal gyi mthar rjes su phyin pa ni gcig go//gang zhig bar do'i srid pa mngon par grub ste/ skye ba'i srid par 'gro ba'i phyir sems pa nyid na lam mngon du byas te sdug bsngal gyi mthar rjes su phyin pa ni gnyis pa'o/ /gang yang skye ba'i srid pa kun du bsams te mngon du gnas pa nyid de/skye ba'i srid pa thob pa ni ma yin pa/ lam mngon du byas te sdug bsngal gyi mthar phyin pa thob pa ni gsum pa'o/ /gang skye ba'i kun du sbyor ba ma spangs shing mngon par grub pa'i kun du sbyor ba ma spangs pas gzugs kyi khams su skyes pa tsam nyid na lam mngon du byas te sdug bsngal gyi mthar rjes su phyin pa de ni skyes nas yongs su mya ngan las 'da' ba'o//gang skyes nas mngon par 'du byed pa med pa ste 'bad pa med par lam mngon du byas te sdug bsngal gyi mthar rjes su son pa de ni mngon par 'du byed pa med par yongs su mya ngan las 'da' ba'o/ / gang skyes nas mngon par 'du byed pa ste 'bad pas lam mngon du byas te sdug bsngal gyi mtha' rjes su thob pa de ni mngon par 'du byed pas yongs su mya ngan las 'da' ba'o/ /gong du 'pho ba rnam pa gnyis te/ 'di ltar/ 'og min du 'gro ba dang / srid pa'i rtse mor 'gro ba'o/ /de la gang ro myang ba mang du skye ba grub pas bsam gtan dang po'i ro myang ba chung ngu tshangs ris su'o//'bring gis tshangs pa'i mdun na 'don du'o/ /chen pos tshangs pa chen po ru'o/ /de bzhin du bsam gtan gnyis pa'i ro myang ba chung ngus 'od chung ngu'o/ /'bring gis tshad med 'od du'o/ /rab kyis 'od gsal du'o//bsam gtan gsum pa ro chung ngu myangs pas dge chung ngu'o/ /'bring gis tshad med dge'o/ /rab kyis dge rgyas su'o/ /bsam gtan bzhi pa ro myang ba chung ngus sprin med du'o/ /'bring gis bsod nams 'phel du'o/ /rab kyis 'bras bu che ba ru'o/ /rnam par bkram pa bsgoms pas bsam gtan bzhi pa yongs su goms pa chung ngus mi che bar ro//yongs su goms pa 'bring gis mi gdung bar ro/ /rab yongs su goms pas shin tu mthong du'o/ /ches rab tu goms pas gya nom snang du'o/ /'di rnams su bar med par lan re re skye'o/ /shin tu ches rab tu goms pas 'og min du zhugs te lam mngon du byas shing yongs su mya ngan las 'da' ba de ni 'og min mthar thug pa'o//gang yang tshangs ris la sogs pa nas 'bras bu che ba'i mthar thug par lan re re skyes nas/ rnam par bkram pa ma yin pa'i bsam gtan bzhi pa bsgoms pas gnas gtsang ma 'ba' zhig yongs su spangs te/de bzhin du nam mkha' mtha' yas skye mched la sogs pa rnams su lan re re skyes nas srid pa'i rtse mor song ste yongs su mya ngan las 'da' ba de ni srid pa'i rtse mo'i mthar thug pa'o/ /gang dbang po rtul po bag med pa'am bag yod pa'am sems pa'am mi sems pa mthong ba'i chos la bde bar gnas pa 'jig rten pa'i bsam gtan las yongs su nyams pa'i skal ba can de ni yongs su nyams pa'i chos can no//de la sems pa'am mi sems pa zhes pa ni rang dga' nyid kyis nye bar gnon bzhin pa ma yin pa ces pa'i don to/ /gang dbang po rtul po rtul po nyid bag med pa'am bag yod pa/mi sems pa mthong ba'i chos la bde bar gnas pa 'jig rten pa'i bsam gtan las yongs su nyams pa'i skal ba can de ni yongs su nyams pa'i chos can no/ /de la sems pa'am mi sems pa zhes pa ni rang bdag nyid kyis nye bar gnon bzhin pa ma yin pa ces pa'i don to//gang dbang po rtul po rtul po nyid bag med pa'am bag yod pa/ mi sems pa mthong ba'i chos la bde bar gnas pa la yongs su nyams pa'i skal ba can no/ /sems pas skal ba can ma yin pa de ni sems pa'i chos can no/ /gang dbang po rtul po nyid bag med pas mthong ba'i chos la bde bar gnas pa las yongs su nyams pa'i skal ba can te/bag yod pas skal ba can ma yin pa de ni rjes su bsrung ba'i chos can no/ /gang dbang po rtul po bag med pa'am bag yod pa dag mthong ba'i chos la bde bar gnas pa las yongs su nyams pa'i skal ba can ma yin pa/dbang po rnams shin tu 'bar bar bya ba'i skal ba can de ni gnas pa las mi bskyod pa'o/ /de la dbang po shin tu 'bar bar bya ba ni rab nyid du drang bar bya zhing rno bar bya ba nyid kyi bar du'o/ /de nyid kyis mi g.yo ba'i chos can ni dbang po shin tu 'bar ba'i skal ba can du ni ma gsungs te/de ni rang bzhin gyis dbang po rno ba nyid yin pa'i phyir ro/ /gang dbang po rtul po bag med pa'am bag yod pa dag mthong ba'i chos la bde bar gnas pa las yongs su nyams pa'i skal ba can ma yin pa/ dbang po rnams shin tu 'bar bar bya ba'i skal ba can de ni mngon du byed pa'i chos can no//gang rang bzhin gyis dbang po rno ba bag med pa'am bag yod pa dag mthong ba'i chos la bde bar gnas pa las yongs su nyams pa'i skal ba can ma yin pa de ni mi g.yo ba'i chos can no/ /khams kyi dbye bas gang zag bcu gsum ste/ 'di ltar/ 'dod pa na spyod pa'i so so skye bo dang /slob pa dang mi slob pa'o/ /de bzhin du gzugs na spyod pa gsum dang / de bzhin du gzugs med pa na spyod pa gsum dang / 'dod pa na spyod pa'i byang chub sems dpa' dang / gzugs na spyod pa'i byang chub sems dpa' dang / 'dod pa na spyod pa'i rang sangs rgyas dang / bsam gyis mi khyab pa'i de bzhin gshegs pa'o/ /gang 'dod pa'i khams su skye bar gyur pa 'phags pa'i chos ma brnyes pa de ni 'dod pa na spyod pa'i so so'i skye bo'o/ /gang 'dod pa'i khams su skye bar gyur pa 'phags pa'i chos rnams thob pa kun du sbyor ba lhag ma dang bcas pa de ni 'dod pa na spyod pa'i slob pa'o//gang 'dod pa'i khams su skye bar gyur pa 'phags pa'i chos rnams thob pa kun du sbyor ba lhag ma med pa de ni 'dod pa na spyod pa'i mi slob pa'o/ /de bzhin du gzugs na spyod pa gsum dang / de bzhin du gzugs med pa na spyod pa gsum mo/ / gang gzugs med pa'i 'grib pa'i bsam gtan dang ldan pa bsam gtan bde bas gnas pa dag 'dod pa'i khams su skye ba de ni 'dod pa na spyod pa'i byang chub sems dpa'o/ /gang gzugs med pa'i 'grib pa'i bsam gtan dang ldan pa bsam gtan bde bas gnas pa dag gzugs kyi khams su skye ba de ni gzugs na spyod pa'i byang chub sems dpa'o//'dir smras pa/ gzugs med pa ni spyod pa'i byang chub sems dpa' med pa rgyu ci zhe na/ brjod de/ nus pa khyad par can thob pa'i byang chub sems dpa' rnams ni skye mched nye bar bzung ste/ sems can yongs su smin par byed pa ni gzugs med pa'i khams su mi skye ba'i phyir ro//gzugs med pa'i 'grib pa'i bsam gtan zhes pa ni/ bsam gtan gang gis gzugs med par skye ba bkag pa'i don to/ /bsam gtan bde bas gnas pa zhes pa ni bsam gtan las yongs su mi nyams pa nyid dang bsam gtan ldog pa la mkhas pa nyid kyis sems can yongs su smin pa'i don du byang chub sems dpa' 'dod pa'i khams su skye bar rig par bya'o//gang sangs rgyas 'byung ba med pa'i 'dod pa'i khams su skye bar gyur nas rang rgyal ba'i byang chub mngon du byed pa de ni 'dod pa na spyod pa'i rang sangs rgyas so//gang 'dod pa'i khams su skye bar gyur pa dga' ldan gnas su gnas bcas pa nas bzung ste yongs su mya ngan las 'das pa'i bar du dang / sngon du byang chub sems dpa'i spyod pa dang rang sangs rgyas kyi spyod pa thams cad ston pa de ni bsam gyis mi khyab pa'i de bzhin gshegs pa dgra bcom pa yang dag par rdzogs pa'i sangs rgyas so//de la byang chub sems dpa'i spyod pa zhes pa ni/ dga' ldan gnas su gnas pa nas bzung ste bdud pham par byas pa'i bar du'o/ /sangs rgyas spyod pa zhes pa ni mngon par sangs rgyas pa nas bzung ste yongs su mya ngan las 'da' ba chen po'i bar ro//spyod pa'i yongs su dbye bas byang chub sems dpa' lnga ste/ 'di lta ste/ lhag par mos pa spyod pa dang / lhag pa'i bsam pa spyod pa dang / mtshan ma dang bcas pa la spyod pa dang / mtshan ma med pa la spyod pa dang /mngon par 'du byed pa med par spyod pa'o/ /de la gang mos pa spyod pa'i sa la bzod pa chung ngu 'bring chen po dang ldan zhing rigs la gnas pa dang po nyid du byang chub chen por smon lam btab pa nas bzung ste ci srid du rab tu dga' ba'i sa la ma zhugs pa ste/ so so bdag nyid 'jig rten las 'das pa'i rtogs pa med pas de ni lhag par mos pa spyod pa'o//gang byang chub sems dpa'i sa bcu la 'jig rten las 'das pa'i rtogs pas bsam pa rnam par dag pa'i gang zag de ni lhag pa'i bsam pa rnam par dag pa spyod pa'o/ /gang rab tu dga' ba dang dri ma med pa dang /snang bar byed pa dang 'od 'phro ba dang sbyang dka' ba dang mngon du gyur pa byang chub sems dpa'i sa rnams kyi gang zag de ni mtshan ma dang bcas pa la spyod pa'o/ /'dir smras pa/ de ci ltar mtshan ma dang bcas pa la spyod ce na/ brjod de/ sa drug la mi 'dod kyang mtshan ma tha snyad du 'jug pa'i phyir ro//gang byang chub sems dpa'i sa bdun pa ring du song ba la gang zag 'bad pa byed pa na mtshan ma mngon du na rgyu ba med pas de ni mtshan ma med pa la spyod pa'o/ /gang byang chub sems dpa'i sa mi g.yo ba dang legs pa'i blo gros dang chos kyi sprin rnams la gang zag de ni mngon par 'du byed pa med pa la spyod pa ste/rnam par smin pa'i rnam par mi rtog pa'i ye shes rab tu brnyes pa'i phyir ro/ /gang rgyun du zhugs pa'i gang zag zhes gsungs pa/ rgyun du zhugs pa rnam pa gnyis te/ 'di ltar mthar gyis pa dang / lan cig gis nges par 'byung ba'o/ /de la mthar gyis pa ni ci ltar bstan pa'o//gang bden pa mngon par rtogs pa mi lcogs pa la brten nas 'jig rten las 'das pa'i lam gyi khams gsum na spyod pa'i nyon mongs pa rnams lan cig gis spang ba de ni lan cig gis nges par 'byin pa dang stabs gcig pa'o/ /de dang 'bras bu gnyis su rnam par bzhag ste/'di ltar/ rgyun du zhugs pa'i 'bras bu dang / dgra bcom pa'i 'bras bu'o/ /stabs gcig pa zhes pa ni/ 'dod pa dang gzugs dang gzugs med pa na spyod pa'i bsgom pas spang bar bya ba chen po nas chung ngu'i bar du mthong bas spang bya ltar spong ba'o/ / 'jig rten pa'i lam bzhin du sa'i rab tu dbye bas tha dad du ni ma yin no zhes pa'i don to/ /sor mo rtse mo'i mdo las 'di skad du gsungs te/ gang ci snyed gzugs dang ci srid du rnam par shes pa 'das pa dang ma 'ongs pa dang da ltar ba zhes pa la sogs pa rgyas par ci srid du ring ba'am nye ba'am de dag thams cad gcig tu bsdus shing cha gcig tu byas te gcig tu bzlums nas gcig tu bsdoms shing gcig tu sbom ste/cha gcig bzlums pa gcig phung po gcig tu byas nas/ 'di dag thams cad mi rtag cing thams cad sdug bsngal ba'o zhes pa la sogs pa rgyas par so sor legs par bslab bo//lan gcig gis nges par 'byin pa ni thog ma dang tha ma'i 'bras bu gnyis su btags pa byas te/ 'bras bu de gnyis grangs bzhin du khams gsum thams cad kyis mthong ba dang bsgom pas spang bar bya ba nyon mongs pa spangs pa rab tu skyed pa'i phyir ro/ / de lan cig phyir 'ong ba dang phyir mi 'ong ba'i tha snyad med de/ lan cig phyir 'ong ba dang phyir mi 'ong ba'i 'bras bu de dag ni bden pa mthong ba/ 'dod pa na spyod pa'i bsgom pas spang bar bya ba kho na lhag ma dang bcas pa dang lhag ma med pa spangs pa rab tu sgrub pa'i phyir ro/ /lan cig gis nges par 'byin pa'i dbang du byas te/rnam par 'byed pa'i mdo las/ rgyun du zhugs pa'i de ma thag tu dgra bcom pa'i rnam par gzhag pa rig par bya'o/ /de gang mthong ba'i chos la kun shes pa brnyes pa lan mang du byed do/ /brgya lam na brnyes par mi byed na/ thams cad las ma lus par 'dod chags dang bral ba nyid ma yin pa'i phyir/myur du mya ngan las 'da' ba'i don du smon lam gyi dbang gis 'dod pa'i khams su nye bar skye'o/ /de la gang mthong ba'i chos la kun shes pa brnyes pa lan mang du byed do zhes pa ni/ mthong ba'i chos la dgra bcom pa mngon du byed de/ tha na 'chi ba'i dus su'o/ /brgya lam brnyes par mi byed na/ myur du yongs su mya ngan las 'da' ba'i phyir de smon lam stobs dang ldan par 'gyur ro/ /smon lam gyi stobs kyis 'dod pa'i khams nyid du skye ste/ sangs rgyas 'byung ba med pa'i zhing du rang sangs rgyas su 'gyur ro/ /mngon par rtogs pa'i rnam par gzhag pa las zhes pa ni/mngon par rtogs pa bcu ste/ 'di ltar/ chos mngon par rtogs pa dang / don mngon par rtogs pa dang / de kho na nyid mngon par rtogs pa dang / rjes kyi mngon par rtogs pa dang / dkon mchog mngon par rtogs pa dang / kun du spyod pa ma yin pa'i mngon par rtogs pa dang /mthar thug mngon par rtogs pa dang / nyan thos kyi mngon par rtogs pa dang / sangs rgyas kyi mngon par rtogs pa dang / byang chub sems dpa'i mngon par rtogs pa'o/ /de la gang dad pa'i rjes su 'brang ba'i mdo'i sde la sogs pa rnams su chos bden pa bzhi dbang du bya ba la/gzhan gyis bstan pa dbang du gyur pa lhag par mos pa rab tu dang ba rab nyid/ thar pa'i cha dang mthun pas bsdus pa'i mtha' brnyes pa de ni chos mngon par rtogs pa'o/ /gang mdo sde'i la sogs pa'i chos bden pa dbang du bya ba la tshul bzhin yid la byed pa'i bdag po'i dbang las sdug bsngal la sogs pa'i bden pa rnams la chos la nges par sems pa'i bzod pa rab nges par 'byed pa'i cha dang mthun pas bsdus pa'i mtha' brnyes pa de ni don mngon par rtogs pa'o//de yang tshul bzhin yid la byed pa rab kyi chung ngus rab tu bsgrubs te/ dus dang skye ba de la drod thob pa la chos nges par sems pa'i bzod pa'o/ /tshul bzhin yid la byed pa rab kyi 'bring gis rab tu bsgrubs te rtse mo dang bzod pa dag la chos nges par sems pa'i bzod pa'o/ /tshul bzhin yid la byed pa rab kyi rab kyis bskrun pa'i 'jig rten chos mchog la chos nges par sems pa'i bzod pa'o//gang mthong ba'i lam sems skad cig ma bcu drug rnams brnyes pa de ni kho na'i nyid mngon par rtogs pa ste mthong lam kho na'o/ /gang mthong ba'i lam las gong du 'jig rten dang 'jig rten las 'das pa'i bsgom pa'i lam ma lus pa de ni rjes kyi mngon par rtogs pa'o//dkon mchog mngon par rtogs pa rnam pa gsum ste/ 'di ltar/ sangs rgyas la mi phyed pa'i dang ba dang / chos la mi phyed pa'i dang ba dang / dge 'dun la mi phyed pa'i dang ba'o/ /de la kye ma yang dag par rdzogs pa'i sangs rgyas bcom ldan 'das so zhes pa dang /bcom ldan 'das kyis chos 'dul ba 'di ni legs par gsungs pa'o zhes pa dang / bcom ldan 'das kyi dge 'dun ni legs par rab tu zhugs pa'o zhes pa'o/ /de ltar mi phyed pa ni nges pa ste 'phags pa nyan thos kyi'o/ /sangs rgyas dang chos dang dge 'dun la rab tu dang ba de ni dkon mchog mngon par rtogs pa'o//gang 'phags pa bzhed pa'i tshul khrims kyis bsdus pa slan chad mi byed pa'i sdom pa rab tu brnyes nas slob pa'i bdag gi dmyal ba zad do dud 'gro zad do yi dags zad do/ /ngan song ngan 'gro log par ltung ba zad do/ / bdag ni ngan song gi las byas te ngan song du rnam par smin pa mngon par 'grub pa'i snod ma yin par nges so zhes pa de ni kun du spyod pa ma yin pa'i mngon par rtogs pa'o/ /ci ltar lam gyi bden pa la mthar thug pa'i lam bstan pa de ni mthar thug pa'i mngon par rtogs pa ste/ gnas ngan len thams cad rgyun chad pa dang /mi ldan pa thams cad thob pa rab tu brnyes pa'i phyir ro/ /mngon par rtogs pa bdun bsdoms pa de nyid ni nyan thos kyi mngon par rtogs pa ste/ nyan thos kyis gzhan las thos pa rtogs nas brnyes pa'i phyir ro/ /mngon par rtogs pa bdun po de nyid gzhan las thos pa rtogs pa ma yin pa rab tu thob pa'i phyir/rang sangs rgyas rnams kyi mngon par rtogs pa'o/ /mngon par rtogs pa bdun po de nyid la gang byang chub sems dpa' rnams bzod pa yang dag par thob pa ni/ nyan thos rang sangs rgyas dag rnam par drang ba'i thabs la mkhas pa'i don du yin gyi mngon du bya ba'i don du ni min te theg pa dman pas nges par 'byung ba ma yin pa'i phyir ro//'on kyang rab tu dga' ba'i sa la byang chub sems dpa' nges pa la zhugs pa de ni byang chub sems dpa'i mngon par rtogs pa'o//'dir smras pa/ nyan thos kyi mngon par rtogs pa las byang chub sems dpa'i mngon par rtogs pa khyad par ci zhe na/ brjod de/ byang chub sems dpa'i mngon par rtogs pa ni nyan thos kyi mngon par rtogs pa las khyad par bcu gcig gis khyad par du 'phags te/'di ltar/ dmigs pa'i khyad par dang / nye bar ston pa'i khyad par dang / mngon du byed pa'i khyad par dang / khas blangs pa'i khyad par dang / nges par 'byung ba'i khyad par dang / yongs su 'dzin pa'i khyad par dang / gnas kyi khyad par dang / 'khor gyi khyad par dang / rigs rgyun gyi khyad par dang / skye ba'i khyad par dang / 'bras bu'i khyad par ro/ /de la dmigs pa rnam par spangs pa nyid kyi phyir dmigs pa'i khyad par ro/ /bskal pa grangs med chen po yongs su rdzogs par bsod nams dang ye shes kyi tshogs yongs su rdzogs pa'i phyir nye bar bstan pa'i khyad par ro//'jig rten las 'das pa'i ye shes kyis gang zag dang chos la bdag med pa mngon du byed pa'i khyad par ro/ /rang bdag nyid dang mnyam pa nyid du sems can thams cad khas blangs pas khas blangs pa'i khyad par ro/ /sa bcus nges par 'byung bas nges par 'byung ba'i khyad par ro//mi gnas pa'i mya ngan las 'da' ba yongs su 'dzin pas yongs su 'dzin pa'i khyad par ro/ /sangs rgyas kyi zhing yongs su dag par byed pas gnas kyi khyad par ro/ /gdul bya'i skye bo nye bar 'dzin pas 'khor gyi khyad par ro/ /pha bzhin du rang gi rgyud yang dag par 'dzin par byed cing thugs las skyes pa'i sras kyi mtshan nyid ldan pas rigs rgyud kyi khyad par ro//byang chub sems dpa'i 'khor gyi dkyil 'khor du nye bar skye bas skye ba'i khyad par ro/ /'bras bu'i khyad par ni khyad par gcig gis khyad par du 'phags te/ 'di ltar/ yongs su 'gyur ba'i khyad par dang / yon tan phun sum tshogs pa'i khyad par dang / rnam pa lnga'i khyad par dang / sku gsum gyi khyad par dang / mya ngan las 'da' ba'i khyad par dang / ye shes sre ba nye bar sre ba'i nus pa thob pa'i khyad par dang / sgrib pa rnam par dag pa'i khyad par dang /sre ba dang nye bar sre ba'i las dang bya ba'i khyad par dang / mngon par rdzogs par byang chub pa mya ngan las 'da' ba kun du ston pa'i thabs kyi khyad par dang / yongs su skyob pa rnam pa lnga'i khyad par ro/ /de gnas ngan len nyon mongs pa can dang / nyon mongs pa can ma yin pa'i rnam pa thams cad spangs pa'i phyir dang bla na med pa'i yon tan gyi rten yin pas rten yongs su 'gyur bas de ni yongs su 'gyur ba'i khyad par ro//stobs mi 'jigs pa sangs rgyas kyi chos ma 'dres pa la sogs dpag tu med pa'i yon tan rdzogs pas yon tan phun sum tshogs pa'i khyad par ro//rnam pa lnga'i khyad par ni lnga ste/ 'di ltar/ nyon mongs pa bag chags dang bcas pa spangs pas rnam par dag pa'i khyad par ro/ /sangs rgyas kyi zhing yongs su sbyong bas yongs su dag pa'i khyad par dang / chos kyi sku nges par rdzogs pa'i phyir sku'i khyad par dang / rtag tu byang chub sems dpa' rnams dang lhan cig tu 'khor gyi dkyil 'khor du chos sna tshogs la longs spyod pas longs spyod pa'i khyad par dang / mtha' yas mu med pa'i 'jig rten gyi khams 'khor yug tu ci ltar 'os pa'i sprul pa rnams kyis sangs rgyas kyi bya ba rjes su sgrub pa'i phyir las kyi khyad par ro//ngo bo nyid longs spyod pa sprul pa'i sku yongs su rdzogs pa brnyes pa'i phyir sku gsum gyi khyad par ro/ /phung po lhag ma med pa'i mya ngan las 'da' ba'i dbyings su sems can thams cad la phan pa'i phyir yon tan thams cad rgyun mi 'chad pas mya ngan las 'da' ba'i khyad par ro//chos kyi dmigs shin du rnam par dag pa khyad par du gyur pa de la brten pa'i rnam pa thams cad mkhyen pa na so sor sangs rgyas rnams nus pa ldan pas sre ba dang nye ba'i sre ba ye shes nus pa thob pa'i khyad par ro/ /nyon mongs pa dang shes bya'i sgrib pa thams cad spangs pas sgrib pa rnam par dag pa'i khyad par ro//gdul bya'i sems can re re'i ched du sangs rgyas kyi bdag po las sre ba dang nye bar sre ba'i las bya ba'i khyad par ro/ /phyogs bcu 'jig rten khams thams cad du ci rigs su ci srid du mthar thug par yang dang yang du sangs rgyas 'byung ba la sogs pa ston pas gdul bya'i skye bo yongs su smin pa dang grol bar byed pas mngon par byang chub pa mya ngan las 'da' ba ston pa'i thabs kyi khyad par ro//yongs su skyob pa rnam pa lnga'i khyad par ni yongs su skyob pa lnga ste/ 'di ltar/ grong khyer du 'jug pa la sogs pas long ba la sogs pa rnams mig la sogs pa brnyes pas nye bar 'tshe ba yongs su skyob pa'o//'jig rten pa'i yang dag pa'i lta ba rab tu bsgrubs pas lta ba ngan pa thams cad rnam par sel bas thabs med pa yongs su skyob pa'o/ /mthong ba'i lam bskyed pas ngan 'gro las yang dag par 'das pas ngan song las yongs su skyob pa'o//dgra bcom pa mngon du byed pas khams gsum las rnam par grol bas lus ngan pa las yongs su skyob pa'o/ /byang chub sems dpa' rnams theg pa dman pa 'dun pa ldog pa'i phyir theg pa yongs su skyob pa'o//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las byang chub sems dpa'i tshul lugs las gang zag rnam par nges pa zhes bya ba le'u nyi shu rtsa bzhi pa'o// //byang chub sems dpa' rnams kyi lam gyi mtshan nyid ni rnam pa gnyis te/'di ltar/ bya ba'i dbang du byas pa dang / rab tu dbye ba'i dbang du byas pa'o/ /de la bya ba'i dbang du byas pa ni lam gyi bya ba bzhi ste/ 'di ltar/ lam gyi sdug bsngal rab tu shes so/ /kun 'byung rab tu spong ngo / /'gog pa mngon du byed do/ /lam sgom par byed do//rab tu dbye bas lam rnam pa lnga ni 'di lta ste/ tshogs kyi lam dang / sbyor ba'i lam dang / mthong ba'i lam dang / bsgom pa'i lam dang / mthar thug pa'i lam mo/ /de la so so skye bos drod la sogs pa mthar chags kyis bden pa mthong ba'i phyir tshogs sogs par byed pas tshogs so//'dis bden pa mthong ba tshol bar byed pas lam ste/ de dag ni tshogs kyi lam mo/ /de ni chos lnga ste/ 'di ltar/ tshul khrims dang dbang po'i sgo bsdams pa dang / kha zas kyi tshod rig pa dang / mtshan gyi cha stod smad la rnal 'byor rjes su brtson pa dang / shes bzhin la gnas pa'o//yang na yid phyir phyogs pa med pa la sogs pa thob pa'i rang bzhin dang bsam pa'i rang bzhin dang bsgom pa'i rang bzhin gyis shes te/ de rnams legs par goms pas mngon par rtogs pa dang / rnam par thar pa'i snod nyid rab tu brnyes pa de ni tshogs kyi lam mo//de bzhin du tshogs kyi lam gyis tshogs bsags pa'i byang chub sems dpa'i nges par 'byed pa'i cha dang mthun pa'i dge ba'i rtsa ba bzhi ni sbyor ba'i lam ste/ 'di ltar/ drod dang / rtse mo dang / bden pa rjes su mthun pa'i bzod pa dang / 'jig rten chos mchog go//mdo'i sde la sogs pa'i chos kyi bden pa'i dbang du byas te/ mnyam par bzhag pas yid kyi brjod pa'i sgo nas don gang kun du brjod pa/ de ru zhi gnas dang lhag mthong ni drod thob pa'o/ /de yang snang ba thob pa'i ting nge 'dzin dang shes rab ste/ de dang ldan pa'o/ /bdag rang ni bden pa la snang ba mched pa'i ting nge 'dzin dang shes rab mtshungs par ldan pa de dag 'phel bas rtse mo'o//bdag rang ni bden pa la phyogs gcig la zhugs pa'i rjes su brten pa'i ting nge 'dzin dang shes rab mtshungs par ldan pa/ mtha' gcig tu gzung bya med pa'i mtshan nyid yin pas phyogs gcig la rab tu zhugs pa 'dzin pa med pa mngon du sad pa'i rjes su mthun pa'i gnas skabs yin pas bzod pa'o//rang bden pa la bar med pa'i sems ting nge 'dzin dang shes rab mtshungs par ldan pa 'jig rten chos mchog ste/ gang de ma thag tu 'jig rten las 'das pa'i lam dang po nyid skye ba'o//mdor bsdu na 'jig rten chos mchog gi de ma thag tu mi dmigs pa'i ting nge 'dzin dang shes rab mtshungs par ldan pa/ rnam par rtog pa'i zhi gnas dang lhag mthong gi mtshan nyid mthong bas spang bya gzung bya dang 'dzin byed kyi ngo bo de bzhin nyid mngon du med pas dmigs bya dang dmigs byed zhi ba mnyam pa nyid du shes pa ni mthong ba'i lam mo//rang rgyud bdag gi mtshan mar mi rtog pas bdag sems can gyi brda dmigs pa gsal ba chos shes pa de yang ngo / /rang rgyud nyid kyi gzugs la sogs pa'i chos kyi mtshan mar mi rtog pa'i phyir bdag chos kyi brda dmigs pa bsal ba shes pa de yang ngo //thams cad du khyad par med pas bdag dang chos kyi mtshan mar mi rtog pas thams cad du gnyis ka'i brda dmigs pa bsal ba chos shes pa de yang mthong ba'i lam mo/ /rab tu dbye na yang mthong ba'i lam skad cig ma bcu drug ste/'di ltar/ 'jig rten chos mchog gi de ma thag tu sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa dang / kun 'byung la chos shes pa'i bzod pa dang /kun 'byung la chos shes pa dang / kun 'byung la rjes su shes pa'i bzod pa dang / kun 'byung la rjes su shes pa dang / 'gog pa la chos shes pa'i bzod pa dang / 'gog pa la chos shes pa dang / 'gog pa la rjes su shes pa'i bzod pa dang / 'gog pa la rjes su shes pa dang /lam la chos shes pa'i bzod pa dang / lam la chos shes pa dang / lam la rjes su shes pa'i bzod pa dang / lam la rjes su shes pa'o/ /de la sdug bsngal ni sdug bsngal gyi bden pa'o/ /sdug bsngal gyi bden pa'i dbang du byas te chos ston pa ni chos so/ /sbyor ba'i lam du bden pa'i dbang du bya ba'i chos rnam par spyod pa ni shes pa'o//sngon gyi rnam par dpyod pas bdag por byas pa/ rang so sor sdug bsngal bden pa la mngon sum du nyams su myong ba zag pa med pa'i shes rab ni bzod pa'o/ /'di skad du gsungs pa yin te/ sbyor ba'i lam du mdo sde'i la sogs pa'i chos sdug bsngal bden pa'i dbang du bya ba rnam par dpyod pa'i shes pa tshul bzhin yid la byed pas bsdus pa bdag por byas nas/rang rgyud kyi sdug bsngal bden pa la/ sdug bsngal gyi de bzhin nyid mngon sum du nyams su myong ba 'jig rten las 'das pa'i shes rab yang dag pa'i lta ba'i rang bzhin skye'o//gang gis sdug bsngal mthong bas spang bar bya ba khams gsum gyi nyon mongs pa nyer brgyad rab tu yod pa de ni sdug bsngal la chos shes pa'i bzod pa'o/ /sdug bsngal la chos shes pa'i bzod pa'i de ma thag tu shes pa gang gis rnam par grol ba mngon du byed pa de ni sdug bsngal la chos shes pa'o//'di skad gsungs pa yin te/ sdug bsngal la chos shes pa'i bzod pa des sdug bsngal mthong bas spang bar bya ba'i nyon mongs pa spangs pas rten yongs su 'gyur ba la de ma thag tu shes pa gang gis yongs su 'gyur ba'i rten de so sor nyams su myong ba de ni sdug bsngal la chos shes pa'o//sdug bsngal la chos shes pa'i de ma thag tu sdug bsngal chos shes pa'i bzod pa dang sdug bsngal la chos shes pa dag gi rjes su 'gro ba ste/ 'di ni slob pa dang mi slob pa'i 'phags pa rnams kyi chos so zhes rang so sor mngon sum du nyams su myong ba zag pa med pa'i shes rab ni sdug bsngal rjes su shes pa'i bzod pa'o rjes su shes pa'i bzod pa de la shes pa gang gis so sor nyams su myong ba de ni rjes su shes pa'o//de bzhin du bden pa lhag ma rnams la ci rigs par bzod pa rnams dang shes pa rnams la rig par bya'o//'jig rten las 'das pa'i lam gyi yul ni rnam pa gnyis te/ de bzhin nyid dang / yang dag pa'i ye shes so/ /de la chos shes pa'i phyogs kyi lam gyi yul ni de bzhin nyid do/ /rjes su shes pa'i phyogs lam gyi yul ni yang dag pa'i ye shes so//de'i phyir chos la bzod pa dang shes pa rnams kyis de bzhin nyid nges par rtogs pas bzung ba nges par rtogs pa'o/ /rjes su bzod pa dang shes pa rnams kyis yang dag pa'i shes pa yongs su shes pas bzung ba nges par rtogs pa'o/ /bzod pa dang shes pa thams cad la rnal 'byor pa mtshan ma med pa la gnas par rig par bya'o//bcom ldan 'das kyis gang zag drug pa ni gang mtshan ma med pa la gnas pa'o zhes gsungs pa/ de ni bzod pa dang shes pa la 'jug bzhin pa rig par bya ste/ mtshan ma thams cad nye bar mi dmigs pa'i phyir ro/ /de la mtshan ma med pa la gnas pa ni/mthong ba'i lam skad cig ma bcu drug ste/ sngon ma mthong ba'i 'phags pa rnams kyis bden pa re re la rnam pa bzhis mthong ba'i phyir ro/ /skad cig ma yang / shes bya la shes pa skye ba yongs su rdzogs pa nyid du rig par bya'o/ / dngos po ma byung ba rnams byung ba tsam gyi skad cig ni ma yin par rig par bya'o/ /lam gyi bden pa thams cad rnam pa bzhis rjes su rtogs par bya'o/ /'di lta ste/ rnam par bzhag pa dang / rnam par rtog pa dang / nyams su myong ba dang / yongs su rdzogs pa'o/ /de la rnam par bzhag pa las ni/nyan thos la sogs pa rnam pa rang gi rtogs pa mthar thug pa ji lta ba bzhin du thob pa/ de'i rjes la thob pa'i shes pas thob pa'i mtshan ma rnams ming gi tshogs dang tshig gi tshogs dang gsal byed kyi tshogs kyi lam gyi bden pa rnam par bzhag par byed pa'o/ /rnam par rtog pa ni gang mngon par rtogs pa dang ldan pa'i 'jig rten pa'i shes pas rnam par bzhag pa ci lta ba bzhin du rtogs par byed cing goms par byed pa'o//nyams su myong ba ni de bzhin du goms pas gang dang po nyid du gang 'jig rten las 'das pa'i mthong ba'i lam zhes pa spros pa med pa'i gnas skabs bdag so sor nyams su myong ba'o//yongs su rdzogs pa ni/ de'i gong du gang rten yongs su 'gyur ba yongs su rdzogs pa ci srid du rtogs pa mthar thug pa rab tu thob pa'o/ /yang rtogs pa mthar thug pa thob pa de'i rjes la thob pa'i shes pas lam gyi bden pa rnam par bzhag par byed pa'o//gang du chos la chos kyi mig rdul med cing dri ma dang bral ba skyes so zhes gsungs pa/ de ni mthong ba'i lam gyi dbang du byas te gsungs pa'o/ /de yang chos la bzod pa ni rdul dang bral ba ste/ des nyon mongs pa'i rdul rnams spangs pa'i phyir ro/ /chos shes pas dri ma dang bral ba ste/chos shes pa de rnams kyi sgrib pa'i dri ma dang bral ba'i rten skyes pa'i phyir ro/ /mthong ba'i lam gyi gong du bsgom pa'i lam ni rnam pa dgu ste/ 'di ltar/ 'jig rten pa'i lam dang / 'jig rten las 'das pa'i lam dang / lam chung ngu dang / lam 'bring dang / lam rab dang /sbyor ba'i lam dang / bar chad med pa'i lam dang / rnam par grol ba'i lam dang / khyad par gyi lam mo/ /'phags pa nyan thos rnams kyi bden pa mngon par rtogs par byed pa na/ bden pa mngon par rtogs pa'i gong du kun du sbyor ba lhag ma rnams spang ba'i phyir ldan pa 'di ni 'jig rten pa la sogs pa'i lam ni bsgom pa'i lam zhes brjod do//de la bsam gtan dang po la sogs pa 'du shes med 'du shes med min gyi bar du nyon mongs pa la sogs pa'i rnam par bzhag pa sngon du gsungs pa ni 'jig rten pa'i lam mo/ /sdug bsngal kun 'byung 'gog pa lam shes pa ni chos shes pa dang /rjes su shes pa'i phyogs brgyad de dag dang ldan pa'i ting nge 'dzin mi lcogs pa med pas bsdus pa bsam gtan dang po nas ci yang med pa'i skye mched kyi bar du ni 'jig rten las 'das pa'i bsgom pa'i lam mo/ /'du shes med 'du shes med min na'ang 'jig rten pa kho na ste/'du shes kyi rgyu ba mi gsal zhing 'phags pa'i lam gyi rgyu ba mi gsal la rten pa ma yin pas/ mtha' gcig tu 'jig rten pa kho na min par rig par bya'o/ /bcom ldan 'das kyis gang ci srid nyid du 'du shes snyoms par 'jug pa de srid du kun shes pa mngon du byed do zhes gsungs so//'gog pa'i snyoms par 'jug pa yang 'jig rten las 'das pa ste/ 'phags pa'i lam gyi rjes la thob pa'i phyir ro/ /dang po mi nyid du skye ste/ mi'am gzugs kyi khams su mngon du 'gyur ba'o/ /sngon bskyed pa nyid phyis mngon du 'gyur ba'o//mi'i skye ba de nyid la'am gzugs kyi khams su skyes nas so/ /lam chung ngu rnam pa gsum ste/ 'di ltar/ chung ngu'i chung ngu dang / chung ngu'i 'bring dang / chung ngu'i rab bo/ /gang gis khams gsum na spyod pa'i nyon mongs pa sa nas sa ru grangs bzhin du rab kyi rab dang /rab kyi 'bring dang / rab kyi tha ma'i nyon mongs pa rnams spong ba'o/ /lam 'bring yang rnam pa gsum ni 'di ltar/ 'bring gi chung ngu dang / 'bring gi 'bring dang / 'bring gi rab bo/ /lam gang gis khams gsum na spyod pa'i nyon mongs pa rnams sa nas sa ru 'bring gi rab dang 'bring gi 'bring dang 'bring gi chung ngu'i nyon mongs pa'i rnam pa rnams rab tu spong ngo //lam rab ni rnam pa gsum ste/ 'di ltar/ rab kyi chung ngu dang / rab kyi 'bring dang / rab kyi rab bo/ /gang gis khams gsum gyi nyon mongs pa sa dang sa ru chung ngu'i chen po dang chung ngu'i 'bring dang chung ngu'i chung ngu'i rnam pa'i nyon mongs pa rab tu spong ba'o//smras pa/ yang chung ngu'i chung ngu'i lam gyis chen po'i nyon mongs pa spong ba rgyu ci zhe na brjod de/ nyon mongs pa chen po'i chen po de yang ngo tsha dang khrel yod pa'i don shin tu rnam par nyams pa ngo tsha med pa'i rgyud la kun du spyod pa mtshon sla ba dang 'di ni yongs su spyad pa bslab pa'o//de'i phyir 'di ni dri ma rags pa bzhin du gnyen po chung ngus kyang rnam par sel bar byed do/ /gang yang yongs su bcad par dka' ba'i kun du spyod pa phra ba rgyud la thim pa nyon mongs pa chung ngu ni dri ma phra mo thim pa bzhin du ches che ba'i gnyen po'i stobs kyis sel bar byed do//'dis ni mi mthun pa'i phyogs kyi rnam pa bzlog pas gnyen po'i rnam pa rnam par bzhag par rig par bya'o/ /lam gang gis sgom par byed pas chen po'i chen po la sogs pa'i nyon mongs pa'i rnam pa'i rigs kyi phyogs kyi gnas ngan len gyi cha shas bsal bas rim gyis rten yongs su 'gyur ba de ni bsgom pa'i lam gyi sbyor ba'i lam mo//lam gang gis de ma thag tu de'i rnam pa'i nyon mongs pa'i rigs kyi gnas ngan len lhag ma med par spong bas gnas ngan len des gnas ngan len med par gyur pa'i rten yongs su 'gyur ba de ni bar chad med pa'i lam mo//lam gang gis nyon mongs pa spongs pa'i rnam par grol ba rten yongs su 'gyur ba'i mtshan nyid mngon du byed pa de ni rnam par grol ba'i lam mo/ /de'i gong du nyon mongs pa lhag ma spong bar byed pa gang sbyor ba dang bar chad med pa dang rnam par grol ba'i lam ni khyad par gyi lam mo//gang yang nyon mongs pa spong ba'i sbyor ba btang snyoms su byas te/ mdo la sogs pa'i chos bsam pa sngon bsam pa'i rtogs pa'i chos so sor rtog pa'i gnas pas gnas pa'am/snyoms par 'jug pa gzhan la snyoms par 'jug bzhin pa'i lam de yang khyad par gyi lam mo/ /gang yang khyad par can gyi yon tan mngon shes la sogs pa mngon par sgrub par byed pa'am bskyed zin pa'i mngon shes la sogs pa'i yon tan gyi rnam par gnas pa'i lam de yang khyad par gyi lam mo//de ltar bsgom pa'i lam rgyas par bstan nas/ gzhan yang lam bsgom pa ni rnam pa bzhi ste/ 'di ltar/ rtsom pa sgom pa dang / nges par rten pa sgom pa dang / nges par dag pa sgom pa dang / gnyen po sgom pa'o/ /de la gang la skyes pa'i dge ba'i chos rnams bskyed pa'i phyir sgom pa de ni rab tu rtsom pa sgom pa'o//gang skyes pa'i dge ba'i chos rnams gnas pa'i phyir dang kun du mi brjod pa'i phyir dang yang yang 'byung ba'i phyir dang 'jug pa rgyas pa'i phyir sgom pa de ni nges par rten pa sgom pa'o/ /gang sdig pa mi dge ba'i chos skyes pa rnams spang ba'i phyir sgom pa de ni nges par dag pa sgom pa'o//gang sdig pa mi dge ba'i chos ma skyes pa rnams mi skyed pa'i phyir sgom pa de ni gnyen po sgom pa'o/ /gzhan yang rnam grangs ni/ de yang / lam gang skye bzhin pa na rang gi bag chags rnam par 'jog par byed pa de ni rab tu rtsom pa sgom pa'o//lam de nyid mngon du gyur pa na sgom par 'gro ba de ni nges par rten pa sgom pa'o/ /lam de nyid mngon du gyur pas rang gi sgrib pa sel ba de ni nges par mkhyud pa sgom pa ste/ rang gi mi mthun pa'i phyogs gnas ngan len mkhyud pa'i phyir ro/ /de nyid sgrib pa spangs pas mi skye ba'i chos nyid la rnam par 'jog par byed pa de ni gnyen po sgom pa ste/rten yongs su 'gyur bas phyis mi skye ba'i chos nyid la rnam par 'jog par byed pa'o zhes pa'o/ /gzhan yang rnam grangs ni/ de yang / gnyen po sgom pa ni rnam pa bzhi ste/ 'di ltar/ rnam par sun 'byin pa'i gnyen po dang /spong ba'i gnyen po dang / rten gyi gnyen po dang / ring du byed pa'i gnyen po'o/ /de la zag pa dang bcas pa'i 'du byed rnams la nyes skyon du mthong nas nad dang 'bras la sogs pa'i rnam par nye bar len pa'i phung po lnga rnam par sun 'byin par byed pa ni rnam par sun 'byin pa'i gnyen po'o//sbyor ba dang bar chad med pa'i lam ni spong ba'i gnyen po ste/ nyon mongs pa rab tu spong ba'i phyir ro/ /rnam par grol ba'i lam ni rten gyi gnyen po ste/ spangs pa thob pa yang dag par 'dzin pa'i phyir ro/ /de'i steng du lam gang zhig na ring du byed pa'i gnyen po ste/spangs pa'i nyon mongs pa thams cad ring du byed pa'i phyir ro/ /yang lam rnam pa bcu gcig ste/ 'di ltar/ dngos po yongs su rtogs pa'i lam dang / 'bad rtsol gyi lam dang / ting nge 'dzin yongs su sbyong ba'i lam dang / mngon par rtogs pa'i sbyor ba las byung ba'i lam dang /mngon par rtogs pa dang 'brel pa'i lam dang / mngon par rtogs pa'i lam dang / rnam par dag pa nges par 'byung ba'i lam dang / bslab pa gsum yongs su dag par byed pa'i lam dang / yon tan thams cad mngon par sgrub par byed pa'i lam dang / lam bsdus pa'i lam mo/ /de la dran pa nye bar gzhag pa ni dngos po yongs su rtogs pa'i lam mo//dang po nyid du mi sdug pa la sogs pa'i rnam pas lus tshor ba sems chos yongs su rtogs pa'i phyir ro/ /yang dag pa'i spong ba ni 'bad rtsol gyi lam mo/ /de bzhin du dngos po thams cad yongs su brtag ste lam gyi sgrib pa spong ba'i phyir brtson 'grus rtsom pa'i phyir ro//rdzu 'phrul rkang pa ni ting nge 'dzin yongs su sbyong ba'i lam mo/ /de ltar sgrib pa yongs su sbyangs pas lam 'dis 'dun pa brtson 'grus sems dpyod pa'i sgo nas ting nge 'dzin las su rung ba skyed pa'i phyir ro/ /dbang po lnga ni mngon par rtogs pa las byung ba'i lam ste/de ltar lam 'dis ting nge 'dzin yongs su sbyang ba byas pas 'phags pa'i lam yang dag par thob pa'i phyir drod dang rtse mo'i sbyor ba las bdag por gyur pa thob pa'i phyir ro/ /stobs lnga ni mngon par rtogs pa dang 'brel pa'i lam ste/ de bzhin du lam 'dis bdag por gyur pa thob pas de ma thag tu bden pa mngon du bya ba'i phyir bzod pa dang chos mchog gi sbyor bas ma dad pa la sogs pa mi mthun pa'i phyogs zil gyis gnon pa'i phyir ro//byang chub kyi yan lag ni mngon par rtogs pa'i lam ste/ bden pa'i bdag nyid so sor yang dag par rtogs pa'i phyir ro//'phags pa'i lam yan lag brgyad ni rnam par dag pa nges par 'byin pa'i lam ste/ de'i gong du lam des bsgom pas spong bar bya ba'i nyon mongs pa spangs pa'i phyir dang dag par bya ba'i phyir nges par 'byung bas so/ /de rnams nyid ni byang chub phyogs kyi chos rnams de ltar mthar gyis rig par bya'o//khyad par med pa byang chub phyogs kyi chos rnams rnam pa lngas rnam par gzhag par rig par bya'o zhes pa la sogs pa mngon pa kun las btus pa las gsungs pa'i rnam par gzhag pa rnams bdag gis 'dir rgyas par ma bris te mangs pas 'jigs pas so//de las rtogs par bya'o/ /rten gyi dbang po tha dad pa'i lam ni rnam pa bzhi ste/ dbang po rtul po bsam gtan gyi dngos gzhi ma thob pa ni mngon par shes pa bul la dka' ba'i lam mo/ /dbang po rnon po dngos gzhi bsam gtan ma thob pa ni mngon par shes pa myur la dka' ba'i lam mo//dbang po rtul po dngos gzhi bsam gtan thob pa ni mngon par shes pa bul la sla ba'i lam mo/ /dbang po rnon po dngos gzhi bsam gtan thob pa ni mngon par shes pa myur la sla ba'i lam mo/ /bslab pa gsum yongs su dag par byed pa'i lam ni dngos po chos bzhi ste/'di ltar brnab sems med pa dang / gnod sems med pa dang / yang dag pa'i dran pa dang / yang dag pa'i ting nge 'dzin no/ /de la brnab sems med pa dang gnod sems med pa dag ni lhag pa'i tshul khrims kyi bslab pa rnam par dag par byed pa ste/ rjes su chags pa dang khong khro'i sgo nas bslab pa'i gzhi nyams par byed pa'i phyir ro//yang dag pa'i dran pa ni lhag pa'i sems kyi bslab pa dag par byed de 'dis kun du ma rmongs par gyur nas sems ting nge 'dzin pa'i phyir ro/ /yang dag pa'i ting nge 'dzin ni lhag pa'i shes rab kyi bslab pa dag par byed do/ /'dis mnyam par gzhag pa'i sems yang dag pa ci lta ba bzhin du yongs su shes pa'i phyir ro//yon tan thams cad mngon par sgrub par byed pa'i lam ni gnyis te/ 'di ltar/ zhi gnas dang / lhag mthong ngo / /de la zhi gnas ni sems kyi gnas pa rnam pa dgu ste/ 'di lta ste/ de ni ci ltar yang nang du sems 'jog par byed pa dang /yang dag par 'jog par byed pa dang / rnam par 'jog par byed pa dang / nye bar 'jog par byed pa dang / dul bar byed pa dang / zhi bar byed pa dang / nye bar zhi bar byed pa dang / gcig nyid du byed pa dang / mnyam par 'jog par byed pa'o/ /de la phyi rol gyi dmigs pa la sa so sor bsdus te nang du sems mngon par bsdus nas nye bar 'ching ba ni 'jog pa'o//de ltar dang po nyid du nye bar bcings pa'i sems de ni g.yo ba rags pa ste/ dmigs pa de nyid la brten pa'i sbyor bas phra bar byed pa'i mngon par sdud pa ni yang dag par 'jog par byed pa'o//de ltar bzhag pa'i sems de ni dran pa kun du rmongs pas phyi rol du rnam par g.yeng ba na/ yang so sor sdud pa ni rnam par 'jog pa'o/ /dang po nyid du sems de dag phyi rol du rnam par mi 'byam pa'i phyir dran pas nye bar gnas pa ni nye bar 'jog pa'o/ /sngon gyi mtshan ma nyid la rnam par g.yeng ba nas gzugs la sogs pa'i nyes skyon gyis 'du shes gtso bor byas te sems g.yeng bar mi bya ba ni dul ba'o//sems kun du 'khrugs par byed pa sems kyi rnam par rtog pa nye ba'i nyon mongs pa rnams la nyes skyon du bltas nas rab tu mi g.yeng ba ni zhi ba'o//dran pa kun du rmongs pas rnam par rtog pa la sogs pa kun du spyod pa na/ de dag lhag par zhi bar byed pa ni nye bar zhi ba'o/ /mngon par 'du byed pas ma nyams shing bar med par ting nge 'dzin rgyun du rnam par gnas pa ni gcig nyid du byed pa'o/ /shin tu goms pa'i phyir mngon par 'du byed pa med cing rtsol ba med pas sems ting nge 'dzin lhun gyis grub pa ngang gis rnam par g.yeng ba med pas rab tu 'jug pa ni mnyam par 'dzin par byed pa'o zhes so//rnal 'byor pa shes rab gang gis brtson pas chos la dmigs pa na shes par bya ba ci rnyed par gzhig pa dang / shes par bya ba ci lta ba bzhin du rab tu rnam par 'byed pa dang /shes rab dang lhan cig pa'i rnam par mi rtog pa'i yid la byed pas rgyu mtshan du byed pa dang yongs su rnam par rtog par byed pa dang / yang dag par sems pa yongs su spyod pa kun du skye ba de ni shes rab lhag mthong yin no/ /lam rnams bsdus pa'i lam ni dbang po gsum ste/'di ltar/ nges par 'byed pa'i cha dang mthun pas bsdus pa la dang mthong ba'i lam sems skad cig ma bco lnga la ni sngon ma shes pa'i de kho na nyid shes pa'i phyir rab tu zhugs pas mi shes pa kun shes par byed pa'i dbang po dang / mthong ba'i lam sems skad cig ma bcu drug ma nas rdo rje lta bu'i ting nge 'dzin gyi bar du slob pa'i lam de rnams la sngon ma yin pa'i shes par bya ba med pas kun shes pa'i dbang po dang /kun shes pa dang ldan pa'i dbang po ni dgra bcom pa'i dbang po zhes bya ste/ de ni mi slob pa'i lam la ni/ kun shes pa dang ldan pa'i dbang po'o//'di yang bsgom pa'i lam gyi dbang du byas te bstan par bya ste/ sa gong ma'i lam ni sngon du gyur pa'i ngo bos sgom par byed bzhin pa na/ sngon du ma gyur pas 'og ma'i dge ba'i rtsa ba yang sgom par 'gro ba yin te/ khyab bdag nyid thob pa'i phyir ro/ /khyab bdag ni shin tu ches gsal ba mngon du gyur pa ste dbang du gyur par rig par bya'o//kun du ldan pa thos pa thams cad yang dag par chad pa'i phyir dang / bral ba thob pa thams cad brnyes pa dang / gang gnas ngan len thams cad rgyun chad pa rdo rje lta bu'i ting nge 'dzin rtogs nas rdo rje lta bu'i ting nge 'dzin de'i de ma thag tu rten yongs su 'gyur ba zad pa shes pa mi skye ba shes pa mi slob pa'i chos bcu ste/mi slob pa'i yang dag pa'i lta ba nas ci srid du mi slob pa'i yang dag pa'i ting nge 'dzin dang / mi slob pa'i yang dag pa'i rnam par grol ba dang / mi slob pa'i yang dag pa'i ye shes ni mthar phyin pa'i lam mo//de la gnas ngan len thams cad ni nyi shu bzhi ste/ 'di ltar/ gang thog ma med pa'i dus nas mig la sogs pa'i chos rnams kyi brjod pa la mngon par zhen pa'i bag chags kun gzhi rnam par shes pa la kun du gnas shing rjes su brten pa gang yin pa de spros pa ni bag chags zhes brjod de/gang las mig la sogs pa'i chos rnams kyi ming dang bcas pa'i mngon par zhen pa yang yang du 'jug pa zhes pa de ni thams cad du 'gro ba mngon par brjod pa'i gnas ngan len no/ /gang zag pa dang bcas pa'i rig pa rnams kyi bag chags de ni rig pa'i gnas ngan len no/ / gang nyon mongs pa rnams kyi bag la nyal ni nyon mongs pa gnas ngan len no/ /gang zag pa dang bcas pa'i las rnams kyi bag chags de ni las gnas ngan len no/ /gang rnam par smin pa las su rung ba ma yin pa de ni rnam par smin pa gnas ngan len no/ /gang nyon mongs pa drag la che ba de ni nyon mongs pa'i sgrib pa gnas ngan len no//gang lam gyi bar chad mtshams med pa la sogs pa'i lam gyi sgrib pa de ni las kyi sgrib pa gnas ngan len no/ /gang bden pa mngon par rtogs pa bral ba nyid dmyal ba la sogs pa bdag ngo bo thob pa de ni rnam par smin pa'i sgrib pa gnas ngan len no//gang dge ba'i phyogs sbyor ba'i bar chad 'dod pa 'dun pa la sogs pa sgrib pa lngas zil gyis mnan pa'i sgrib pa de ni las kyi sgrib pa gnas ngan len no/ /gang rab tu byung ba'i gegs kyi ngo bo 'dod rtog la sogs pas zil gyis mnan pa de ni rnam par rtog pa'i gnas ngan len no//gang zas shin tu nyung ba dang mang du sbyor bar rung ba de ni zas gnas ngan len no/ /gang gnyis gnyis snyoms par 'jug pa byas nas lus sems ngal ba de ni log g.yem gyi gnas ngan len no/ /gang rten gzhan du byas te bskyed pa de ni rmi lam gyi gnas ngan len no//gang khams mi mnyam par byas pas legs par rang bzhin du mi gnas pa de ni nad gnas ngan len no/ /khams mi mnyam par byas pas sgrub par mi nus pa de ni rga ba'i gnas ngan len no/ /gang 'chi bzhin pa na dbang po thams cad 'khrugs pa de ni 'chi ba gnas ngan len no//gang mngon par bgrod pa la sogs pa byas pas lus nyes pa de ni yongs su ngal ba gnas ngan len no/ /mngon par brjod pa gnas ngan len la sogs pa ci ltar srid pa de rnams ni yongs su mya ngan las 'da' ba ma yin pa'i chos can rnams kyi ni de ni brtan po gnas ngan len no//'dod pa na spyod pa ni rags pa gnas ngan len to/ /gzugs na spyod pa ni 'bring po gnas ngan len no/ /gzugs med pa na spyod pa ni phra ba gnas ngan len no/ /gang nyan thos dang rang rgyal gyi mi mthun pa'i phyogs de ni nyon mongs pa'i sgrib pa gnas ngan len to/ /gang mthar gyis gnas pa'i snyoms par 'jug pa la gnas pa'i mi mthun pa'i phyogs de sgom par 'jug pa'i sgrib pa gnas ngan len no//gang thams cad mkhyen pa'i mi mthun pa'i phyogs de ni shes bya'i sgrib pa gnas ngan len no/ /de ltar de snyed gnas ngan len de rnams thams cad kyi ci rigs par rgyun chad pa de ni mthar thug pa'i lam mo//gnas ngan len 'phel ba la ldan pa thob pa zhes btags so/ /gnas ngan len 'grib pa la thob pa zhes btags so/ /gang bsgom pa'i lam gyi mtha' spong ba'i lam gyi gnas skabs de ni rdo rje lta bu'i ting nge 'dzin to/ /ting nge 'dzin 'di bsdu na gnyis te/'di ltar sbyor ba'i lam gyis bsdus pa dang / bar chad med pa'i lam gyis bsdus pa'o/ /de la sbyor ba'i lam gyis bsdus pa ni/ gang nas bzung ste sgrib pa thams cad kyis mi shigs shing / sgrib pa thams cad 'jig pa'o/ /bar chad med pa'i lam gyis bsdus pa ni gang gis de ma thag tu zad pa shes pa dang mi skye ba shes pa dag skyes pa'o//ting nge 'dzin de'ang byang chub chen po la bar chad med pa ches brtan pa dang ro gcig khyab pa'o/ /de la 'jig rten pa'i lam gyis de'i rgyun mi nyams pas bar chad med pas dang sgrib pa thams cad kyis mi chod pa'i dang sgrib pa thams cad 'joms pas snying po yin pa'i phyir ches brtan pa'o//rnam par mi rtog pa nyid du ro gcig pas ro gcig go/ /shes bya thams cad kyi de bzhin nyid dmigs pa'i phyir khyab pa ste/ rdo rje lta bu'i ting nge 'dzin no/ /don 'di dag gzhan la gsal bar bya ba'i don du bcom ldan 'das kyis gsungs pa/dper na brag ri chen po mi chod pa mi shigs pa srubs med pa gcig tu mkhregs pa shin tu zlum pa shar phyogs kyi rlung 'jug pas mi g.yo ba mi bskyod pa'o/ /ci ltar shar gyi de bzhin du phyogs thams cad kyi'o/ /de ma thag tu rten yongs su 'gyur ba zhes pa ni/'dir rten yongs su 'gyur ba rnam pa gsum ste/ 'di ltar/ mi slob pa'i lam thob pas sems kyi rten yongs su 'gyur ba dang / lam gyi rten yongs su 'gyur ba dang / gnas ngan len gyi rten yongs su 'gyur ba zhes pa'i don to/ /sngon du 'jig rten pa'i lam ni mngon par rtogs pa'i dus su 'jig rten las 'das pa nyid du yongs su 'gyur ba ni slob pa zhes brjod de bya ba lhag ma dang bcas pa'i phyir ro//gang gi tshe mi mthun pa'i phyogs ma lus pa rnam pa med par 'gyur zhing khams gsum las 'dod chags dang bral ba de'i tshe lam 'di'i rang bzhin gyi rten yongs su 'gyur bar rnam par gzhag par byas te de ni lam gyi rten yongs su 'gyur ba'o//gang kun gzhi rnam par shes pa'i nyon mongs pa'i bag la nyal spangs pas yongs su 'gyur ba de ni gnas ngan len gyi rten yongs su 'gyur ba'o/ /gang kun 'byung lhag ma med par spangs pa'i ye shes sam/de'i gnas skabs kyi rgyu 'gog pa la dmigs pa'i ye shes de ni zad pa shes pa'o/ /'bras bu mi skye ba la dmigs pa'am/ de bzhin du skye ba med par gyur nas shes pa de la'ang de ni mi skye ba shes pa'o/ /phyis sdug bsngal thams cad shin tu skye ba med pa'i chos nyid kyi bden pa la gang shes pa ste/gang sdug bsngal la bden pa la dmigs pa'i shes pa zhes pa'i don to/ /mi slob pa'i chos bcu ni/ mi slob pa'i tshul khrims kyi phung po dang ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba'i ye shes mthong ba'i phung po'i dbang du byas te gsungs par shes par bya'o//de la mi slob pa'i yang dag pa'i ngag dang / yang dag pa'i lta ba dang / yang dag pa'i 'tsho ba ni mi slob pa'i tshul khrims kyi phung po'o/ /yang dag pa'i dran pa dang / yang dag pa'i ting nge 'dzin ni ting nge 'dzin gyi phung po'o//yang dag pa'i lta ba dang / yang dag pa'i rtog pa dang / yang dag pa'i rtsol ba rnams ni shes rab kyi phung po'o/ /yang dag pa'i rnam par grol ba ni rnam par grol ba'i phung po'o/ /yang dag pa'i shes pa ni rnam par grol ba'i ye shes mthong ba'i phung po'o/ /lam gyi bden pa'i rnam pa mtshan ma nyid bzhi ste/'di ltar/ de kho na nyid kyi don 'dis goms par byed pas las kyi mtshan nyid do/ /mi rigs par gyur pa'i nyon mongs pa rnams kyi gnyen po yin pas rigs pa mtshan nyid dang / de kho na nyid ma rtogs pa'i skyon gyis brtag pa la sogs pa phyin ci log gis phyin ci log pa'i sems ni/phyin ci log pa'i de kho na nyid rtogs pa'i bsgrub pa'i phyir sgrub pa mtshan nyid dang / rtag tu shin tu mchog tu nges par 'byung ba'i go 'phang du 'gro ba'i phyir nges par 'byin pa'i mtshan nyid do/ /de bzhin du gzhan la yang rnam pa bzhi bzhi zhes rnam pa bcu drug ni 'jig rten par yang 'gyur zhing 'jig rten las 'das par yang 'gyur ro//de la 'jig rten pa'i lam las 'jig rten las 'das pa'i lam rnams kyi khyad par ci zhe na/ brjod de/ de la bden pa'i rnam par 'jig rten pa ni de bzhin nyid mngon du rtogs pa med pas shes bya la legs par ma zhugs pas dang /nyon mongs pa'i bag la nyal ba can yin pas sgrib pa dang bcas pa'o/ /mngon par brjod pa'i sgo nas spros par bya ba rnam par rtog pa dang bcas pa'o/ /de la bzlog pas bden pa'i rnam pa 'jig rten las 'das pa ni legs par rab tu zhugs pas sgrib pa med pa dang /rnam par rtog pa med pa'o/ /yang 'di rnam par mi rtog na ci ltar shes bya la legs par zhugs pa yin zhe na brjod de/ 'jig rten las 'das pa'i rnam pa la 'jug bzhin pa mi rtag pa'i don mthong ba ni nyams su myong ba'o/ /mngon par brjod pa spros pa'i sgo nas mi rtag go zhes mthong ba ni ma yin pa'o//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las byang chub sems dpa'i tshul lugs kyi lam rnam par nges pa zhes bya ba le'u nyi shu rtsa lnga pa'o// //byang chub sems dpa'i theg pa pa rnams kyi rgyu dang 'bras bu'i ngo bo dang 'jig rten pa dang 'jig rten las 'das pa'i byang chub sems nyid thog ma nas brtsams te byang chub snying po'i mthar thug par goms pa rab la spangs pa dang /rtogs pa phun sum tshogs par 'gyur ro zhes de ni byang chub sems spros pa dang bcas pa brjod par byas te/ 'di ltar/bdag ci ltar bla na med pa yang dag par rdzogs pa'i byang chub tu mngon par rdzogs par 'gyur ba dang gzhan don bsgrub par bya zhes rdzogs pa'i byang chub don du gnyer ba'i mtshan nyid dge ba'i chos la 'dun pa sems las byung ba'o/ /de yod pa la byang chub sems skye'o/ /de ltar yang / bstan bcos las/sems bskyed pa ni gzhan don phyir/ /yang dag rdzogs pa'i byang chub 'dod/ /ces so/ /'di'i don ni/ yang dag par rdzogs pa'i byang chub 'dod de sangs rgyas nyid 'dod pa'i ngo bo dge ba'i chos la 'dun pa sems las 'byung ba'o/ /de yod pa la byang chub sems skye'o zhes shes nas byang chub don du gnyer ba'i mtshan nyid can gyi rgyu la/'bras bu byang chub sems bskyed pa'i mtshan nyid can gyi ming gis btags pa'o/ /de ltar don du gnyer ba'i byang chub sems dpa'i dge ba'i chos thams cad 'phel bar 'gyur ro zhes shes par bya ba'i don du'am/ byang chub don du gnyer ba dang lhan cig tu spyod pa'i sems bskyed pa/yang dag par rdzogs pa'i byang chub 'dod kyi sgras brtags pa ste/ sems bskyed pa ni rdzogs pa'i byang chub dang ldan pa'o zhes shes par bya ba'i don du'o/ /yang na/ sems ni mngon par 'dod pa ste/ /'di ltar/ bdag gis 'gro bar sems so//zhes 'gro bar 'dod pa smra'o/ /mngon par 'dod pa de'i skye ba ni sems bskyed pa ste/ mngon par 'dod pa'i skye ba ni mi 'khrul pa'i phyir skyed pa bzung ba ni khyad par gzung bar bya ba'i don du'o/ /gang rdzogs pa'i byang chub la 'dod pa ste mngon par 'dod pa de ni de bzhin no/ /de'i ngo bo ni yang dag rdzogs pa'i byang chub 'dod pa'o//gzhan don ched du rdzogs pa'i byang chub la dmigs pa'i sems skye ba ni sems bskyed pa'o zhes pa 'di ni mtshan nyid do/ /de skad du yang gsungs te/ bdag dang phung sogs btags pa yi/ /rtog pa rnams kyis ma bsgribs pa/ /stong nyid mtshan nyid byang chub sems//rtag tu sangs rgyas rnams kyis 'dod/ /ces so/ /de bzhin du/ kun rdzogs nyon mongs las kyis bslang / /las ni sems las kun du byung / /sems ni bag chags rnams kyis zos/ /bag chags spangs las bde ba'o/ /bde ba zhi ba'i sems nyid de//zhi ba'i sems ni mi rmongs so/ /rmongs med nges par de nyid rig /de nyid rig pas grol ba thob/ /byang chub sems ni de nyid mchog /stong pa nyid ces kyang bshad do/ /de bzhin nyid dang yang dag mtha'/ /de bzhin sdug bsngal bdag med sogs/ /gzhan don ro gcig byang chub ni/ / snying rjes brten pa'i rtsa ba dang / /byang sems myu gu las byung ba/ /de ni rgyal sras rnams kyis bsgom/ /gang zhig bsgoms pas mkhas pa rnams/ /bsam gtan bde ba yongs spangs te/ /mnar med dmyal bar zhugs nas ni/ /gzhan gyi sdug bsngal kun sel ba/ /'di ni rmad byung 'di legs pa//'di ni 'jug pa dam pa mchog /rang gi lus dang don ston pa/ /de ni ngo mtshar ma yin nyid/ /ces so/ /de bzhin/ de ltar snying rje des brlan pa'i/ /gang yang bzang sogs rgyal sras rnams/ /tshangs dbang nye dbang drag po sogs/ /gzugs brnyan sprul pa'i mthu rnams kyis//'gro ba 'dren pa'i sbyor ba yis/ /snying rje'i bsam pas gar byed do/ /zhes so/ /byang chub sems kyi sbyor bas zhes pa ni nang du bsdu bar bya'o/ /de nyid kyis na bcom ldan 'das kyis sgrub pa dang bral ba'i byang chub sems kyang 'khor bar 'bras bu chen po zhes nye bar bsngags te/ci ltar 'phags pa rgyal po la gdams pa'i mdo las gsungs pa/ de'i phyir rgyal po chen po yang dag par rdzogs pa'i byang chub tu 'dun pa dang dad pa dang smon pa de nyid ni 'gro yang bzhengs kyang 'dug kyang nyal yang sad kyang za yang 'thung yang rgyun du bar chad med par rjes su dran pa dang yid la byed pa dang bsgom par bya'o zhes pa la sogs pa gsungs nas bka' stsal pa/de yang rgyal po chen po khyod yang dag par rdzogs pa'i byang chub kyi sems kyi dge ba'i rtsa ba yongs su smin pas lan mang du lha ru skye bar 'gyur ro/ /lan mang du mi ru skye bar 'gyur ro/ /lha dang mi'i skye ba thams cad du lhag pa'i rgyal po byed par 'gyur ro zhes so//gang las yang sgrub pa snying por byed pa'i byang chub kyi sems de ni nges par legs pa dang mngon par 'byung ba'i rgyu nyid yin pas shin tu ches 'bras bu che ba nyid do zhes sgrub bo/ /des na dpa' sbyin gyis zhus pa las gsungs te/ gang tshe byang chub sems gang gi /bsod nams de ni gzugs can 'gyur/ /nam mkha'i khams ni kun gang ste/ /de'i yang gong du lhag par 'gyur/ /gang gA'i bye ma'i grangs rnyed kyi/ /sangs rgyas zhing rnams mi gang gis/ /rin chen dam pas yongs bkang ste/ /'jig rten mgon la phul ba bas/ / gang gis lan cig thal sbyar te/ /byang chub ched du sems btud na/ /gang gi mtha' yang yod min pas/ /mchod pa 'di ni khyad par 'phags/ /zhes so/ /'phags pa sdong po bkod pa'i mdo las kyang / /rigs kyi bu byang chub kyi sems ni sangs rgyas kyi chos thams cad kyi sa bon du gyur pa'o zhes rgyas par ro//de yang byang chub sems dpa' dper na long bas sgron ma 'dzin pas gzhan rnams la phan par 'gyur ba de bzhin du don mngon par mi shes pa thob pa 'dzin pa zhes shes nas don nges par bzung nas sdom pa len pa sngon du 'gro bas byang chub tu sems bskyed pa yin no//des na byang chub tu sems yang dag par bskyed pa'i byang chub sems dpa' ni/ dper na so sor rtogs par mi byed pa'i mel tse sgra sgrogs par byed pa nyid sang bzhin du rkun pos 'joms pa ste/ de bzhin du so sor rtogs par mi byed pa sgra tsam dang ldan pa'i mang du thos pa nyon mongs pa'i rkun pos 'joms pas sgrub pa la brtson par bya'o//gzhon nu sgrub pa snying por byed pa la bla na med pa yang dag par rdzogs pa'i byang chub thob dka' bar 'gyur ba ma yin no zhes ting nge 'dzin rgyal po'i mdo las gsungs pa'i phyir ro/ /sgrub pa yang mdor bsdus na byang chub sems bsgoms pa dang sbyin pa la sogs pa pha rol tu phyin pa drug nyams su len pa'o//byang chub kyi sems de ni rnam pa nyi shu rtsa gnyis te/ 'di ltar de la byang chub sems dang po ni 'dun pa dang ldan pa gzhan don ched du yang dag par rdzogs pa'i byang chub don du gnyer ba'i mtshan nyid can sa lta bu ste/sangs rgyas kyi chos thams cad dang bsod nams dang ye shes kyi tshogs rnams kyi gzhir gyur pa'i phyir ro/ /gnyis pa ni bsam pa dang ldan pa gser bzang po lta bu ste/ pha rol tu phyin pa drug gis bsdus pa phan pa dang bde ba'i bsam pa phyis dang da lta dag gi rnam par 'gyur ba mi brten pa'i phyir ro//A ni yang dag par rdzogs pa'i byang chub la thug pa'o/ /sha ya ni mi 'gyur ba ste/ A sha ya zhes shes nas bsam pa de yang rnam pa gsum ste/ 'di lta ste/ de bzhin gshegs pa la mchod par 'dod pa ni yongs su rdzogs pa'i bsam pa dang / sangs rgyas kyi zhing yongs su sbyong ba'i bsam pa dang /sems can thams cad bde ba'i bsam pa'o/ /de bzhin du gzhan yang bsam pa'i dbye ba mang po rnams 'dir mi bshad de mangs pas 'jigs pa'i phyir ro/ /gsum pa ni khyad par lhag par rtogs pa'i ched du bsam pa ni lhag pa'i bsam pa ste de dang ldan pa'o//dkar po'i phyogs kyi chos bzhi zla ba lta bu ste/ dkar po phyogs kyi tshes pa'i zla ba 'phel ba bzhin du sems des dge ba rnams skye ba 'phel ba brnyes pa'i phyir ro/ /byang chub sems de gsum ni rim pa bzhin du dran pa nye bar gzhag pa dang yang dag pa'i spong ba dang rdzu 'phrul gyi rkang pa dang ldan pa'o//thos pa dang bsam pa'i rang bzhin gyi shes rab phul du phyin pa'i gnas skabs thar pa'i cha dang mthun pa'i dge ba'i rtsa ba las dang po pa'i sa tshogs kyi lam/ tshogs kyi sa/ go cha'i sgrub pa smon pa'i sems so/ /gzhan byang chub sems bcu dgu ni 'jug pa'i sems so//bzhi pa ni sbyor ba dang ldan pa dang lhag pa'i bsam pa dang ldan pa ni me lta bu ste/ bud shing khyad par can gyi me bzhin du des sbyor ba khyad par du 'phags par 'gro ba'i phyir ro/ /de ni mos pas spyod pa'i sa'o/ /rab tu dga' ba'i sa'i sbyor ba'i lam/ 'jig rten pa'i sgom pa'i rang bzhin zag pa dang bcas pa'i sdom pa'i lam/nges par 'byed pa ni mngon du byed pa zhes nges par 'byed pa mthong ba'i lam mo/ /de'i cha ni brnyan pa ste de'i phyir phan pa'o/ /nges par 'byed pa'i cha dang mthun pa dang dbang po lnga dang stobs lnga dang ldan pa'i 'jug pa'i sgrub pa'o/ /lnga pa ni 'jig rten las 'das pa zag pa med pa'i sbyin pa'i pha rol tu phyin pa dang ldan pa gter chen po lta bu ste/chos dang zang zing gi longs spyod kyis gzhal du med pa'i sems can yang dag par tshim par byed pa'i phyir dang mi zad pa'i phyir ro/ /byang chub sems dpas 'di la bdag byang chub dang nye bar mthong ba dang / sems can gyi don sgrub pa mthong bas dga' ba rab tu gyur zhes/ rab tu dga' ba'i sa mthong ba'i lam byang chub yan lag dang ldan pa'o/ /drug pa ni tshul khrims kyi pha rol tu phyin pa dang ldan pa'i rin po che'i 'byung gnas lta bu ste/ yon tan rin po che thams cad de las byung ba'i phyir ro/ /'dir rin po che'i 'byung khungs ni ri ro ha na la sogs pa'o//tshul khrims 'chal pas dri ma dang rtsol ba dri ma dag las 'das pa'i phyir dri ma med pa'i sa'o/ /bdun pa ni bzod pa'i pha rol tu phyin pa dang ldan pa rgya mtsho lta bu ste/ mi 'dod pa'i nye bar 'dus pa thams cad kyis mi bskyod pa'i phyir ro//ting nge 'dzin stobs dang tshad med pa'i chos tshol ba'i gzungs dag gis pha rol la chos kyi snang ba chen po byed pas 'od byed pa'i sa'o/ /brgyad pa ni brtson 'grus kyi pha rol tu phyin pa dang ldan pa rdo rje lta bu ste/ rdo rje bzhin du brtan pa'i phyir dang mi phyed pa'i phyir ro/ /shes bya'i sgrib pa dang nyon mongs pa'i sgrib pa dag sreg par byed pas 'od zer du gyur pa byang chub phyogs kyi bdag nyid kyi shes rab de 'di la yod pas 'od 'phro ba'i sa'o//dgu pa ni bsam gtan gyi pha rol tu phyin pa dang ldan pa ri bo lta bu ste/ mi bskyod pa'i phyir g.yeng ba med pas sems can yongs su smin par byed pa dang rang sems bsrung ba'i phyir ro//gang la rgyal bar dka' zhes sbyang dka' ba'i sa'o/ /bcu pa ni shes rab kyi pha rol tu phyin pa dang ldan pa sman gyi rgyal po lta bu ste/ sgrib pa'i nad thams cad zhi bar byed pa'i phyir ro/ /'khor ba dang mya ngan las 'da' ba mngon du byed pas mngon du gyur pa'i sa'o/ / bcu gcig pa ni thabs kyi pha rol tu phyin pa dang ldan pa dang byams pa la sogs pa'i tshad med pa dang ldan pa bshes gnyen lta bu ste/ gnas skabs thams cad du sems can gyi don btang snyoms su mi byed pa'i phyir ro/ /bgrod pa gcig pa'i lam dang 'brel pas sbyor ba mthar thug par phyin pa'i phyir ring du song ba'i sa'o//bcu gnyis pa ni smon lam gyi pha rol tu phyin pa dang ldan pa dang mngon par shes pa dang ldan pa yid bzhin nor bu dang 'dra ba ste/ ci ltar mos pa'i 'bras bu de rnams phun sum tshogs pa'i phyir ro/ /mtshan ma'i 'du shes dang mtshan ma med pa'i rtsol ba'i 'du shes kyis mi g.yo ba'i phyir mi g.yo ba'i sa'o//bcu gsum pa stobs kyi pha rol tu phyin pa dang ldan pa sbyin pa dang snyan par smra ba dang don spyod pa dang don mthun pa'i mtshan nyid bsdu ba'i dngos po bzhi dang ldan pa nyi ma lta bu ste/ gdul bya'i lo thog yongs su smin par byed pa'i phyir ro/ /so sor yang dag par rig pa legs pa'i phyir zhes pa gtso bo yin pa'i phyir legs pa'i blo gros kyi sa'o//bcu bzhi pa ye shes kyi pha rol tu phyin pa dang ldan pa dang so sor yang dag par rig pa dang ldan pa dri za'i glu dbyangs snyan pa lta bu ste/ gdul bya tshogs pa rnams la chos ston par byed pa'i phyir dang / char 'bab pa dang chos mthun pas sprin dang 'dra ba'i phyir chos kyi sprin gyi sa'o//bco lnga pa ni mngon shes dang ldan pa dang ston pa dang ldan pa rgyal po lta bu ste/ mi choms pa'i nus pa gzhan don nyams su len pa'i phyir dang rnam par mi nyams pa'i rgyu yin pas so/ /rgyal po'i bka'i lcags kyus skye bo lam log par mi ltung ste/de bzhin du ston pa'i lcags kyus byang chub sems dpa'o/ /bcu drug pa ni bsod nams ye shes kyi tshogs dang ldan pa mdzod khang lta bu ste/ shin tu mang ba'i bsod nams dang ye shes tshogs kyi mdzod nyid yin pas so/ /bcu bdun pa byang chub phyogs kyi chos sum cu rtsa bdun dang ldan pa lam po che lta bu ste/'phags pa'i gang zag thams cad 'gro ba'i rjes su 'gro bas so/ /bco brgyad pa ni zhi gnas can du gyur pa snying rje dang lhag mthong dang ldan pa bzhon pa lta bu ste/ 'khor ba dang mya ngan las 'das pa gcig tu mi ltung bas bde bar yang dag par bgrod pas so//bcu dgu pa gzungs dang spobs pa dang ldan pa bkod ma'i chu lta bu ste/ bkod ma'i chu ni mi zad pa'i chu'i rgyun no/ /chu'i rgyun mi zad pa 'bab pa dang chos mthun pas thos pa dang ma thos pa'i chos kyi don gzungs mi zad pa ston pa 'byung ba'i phyir ro/ /nyi shu pa ni 'dus byas thams cad ni mi rtag pa'o//zag pa dang bcas pa thams cad ni sdug bsngal lo/ /chos thams cad ni bdag med pa'o/ /mya ngan las 'das pa ni zhi ba'o zhes pa 'di ni chos kyi sbyin pa bzhi dang ldan pas snyan par smra ba lta bu ste/ grol bar 'dod pa rnams kyi mnyan bya snyan pa yin pas/ nyi shu gcig pa ni mi skye ba'i chos la bzod pa thob pa/ sa de'i byang chub sems dpa' rnams kyi 'bras bu dang bya ba mi phyed pas bgrod pa gcig pa'i lam mo/ /de dang ldan pa chu bo'i rgyun lta bu ste/ rang gi ngang gis rgyun 'bab pa'i phyir ro/ /nyi shu gnyis pa ni thabs la mkhas pa dang ldan pa dga' ldan gnas su gnas pa la sogs pa de dang ldan pa dang chos kyi sku dang ldan pa sprin lta bu ste/sems can gyi don ma lus pa kun du rdzogs par byed pa ni de las 'jug pa'i phyir ro/ /sprin las snod kyi 'jig rten phun sum tshogs pa bzhin no/ /de rnams la drug pa la sogs pa sems bskyed pa bco lnga ni 'jig rten las 'das pa'i lam gyi rang bzhin 'phags pa'i lam yan lag brgyad dang ldan pa'o//'di rnams la sems bskyed pa dang po dgu ni dri ma med pa la sogs pa'i sa dgu rnams so/ /gzhan sems skye ba drug ni chos kyi sprin gyi sa'i gnas skabs khyad par ngo bo khyad par gyi lam mo//khyad par gyi lam gyi tha ma sems bskyed pa nyi shu pa ni sangs rgyas kyi sa'i bar chad med pa'i lam mo/ /sems bskyed pa nyer gcig pa dang nyer gnyis pa ni dngos gzhi dang rjes ngag gi kun du bzang po zhes bya ba ming gzhan kun du 'od ces sangs rgyas kyi sa'o//des na 'jig rten ma lus pa la 'das pa mtha' med pa ngo mtshar ba'i yon tan gyi tshogs dang ldan pa'i bdag nyid/ mtshams med pa'i sems can gyi tshogs la phan 'dogs par byed pa'i snying rje'i stobs chen gyis yang dag par byi dor dri ma med par byas pa'i nang gi byed pa'i me long gi nang du nam mkhas khyab pa'i khams gsum gyi 'jug pa'i mtha' bye brag ma lus pa'i gzugs brnyan shar ba/bla na med pa'i mtshan rnams sum cu rtsa gnyis kyi nor bu mnyam pa med pa'i tshogs kyis yongs su spras pa'i dpe byad bzang po brgyad cu'i mu tig gi rgyan gyis sku la brgyan pa'i ston pa de lta bu rmad du byung ba bsam gyis mi khyab pa'i sku rdzogs par bya ba'i ched du rtsa ba rus shing btsugs pa lta bu byang chub kyi sems su nges par rtogs par bya'o//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las byang chub sems dpa'i tshul lugs la byang chub tu sems bskyed pa rnam par nges pa zhes bya ba le'u nyi shu rtsa drug pa'o// //byang chub sems dpa' rnams kyi lam bsgom pa'i rim pa bshad par bya ste/ dper na rgyal rigs 'ga' zhig rgyal po 'dod cing de la phan par 'dod pa rnams kyis spro bar byed pa na/ dang po nyid du go cha gyon to//de nas rab tu gnas te/ glang po la sogs pa'i theg pa la kun du gnas so/ /de rjes su tshogs rnams yang dag par sog go/ /de nas mi mthun pa'i phyogs las rgyal lo/ /nges par 'byung ba'i sa ru nges par 'byung ngo / /rgyal po thob pa'o/ /de'i rjes su rang don byas shing brtse ba dang bcas pas ci ltar rigs par skye bo rnams yongs su skyong bar byed do//de bzhin du byang chub sems dpa' ni yod pa nyid du lhag par mos pas skyed pa'i yang dag par yid ches pa dang / yon tan dang ldan pa nyid du lhag par mos pa'i yang dag par rab tu dang ba dang / nus pa nyid du lhag par mos pas thob pa'i mngon par 'dod pa rnams kyis dad pa dang ldan pa/ chos kyi dbyings kyi rang bzhin/ yang dag par rdzogs pa'i sangs rgyas kyi rigs sgrub pa'i rten dge ba rnams blang bya yin pas dang / mi dge ba rnams spang bya yin pas sgrub pa dag gis dmigs bzhin pa na/gzhan don phyir yang dag par rdzogs pa'i byang chub 'dod pa/ stong pa nyid dang snying rje'i snying po can byang chub kyi sems nyer gnyis rang bzhin shes rab kyi pha rol tu phyin pa ni sgrub pa'o/ /kun rdzob dang don dam bden pa las mi 'da' zhing mi dmigs pa'i sbyor bas 'jug pa zhes bslab pa thob pa/sgrub pa de'i dmigs pa'i ngo bo bden pa mkhyen pa/ rten skyabs gsum rig pa/ khyad par rtogs pa la ma chags pa/ mi ldog pa'i ched du yongs su ngal ba med pa/ phyogs bcu gzigs pa thob pa'o/ /de nas de ni theg pa gzhan du mi 'gro ba'i ched du sgrub pa'i lam yongs su 'dzin par yang 'gyur ro//ci ltar rigs par spyan lnga dang mngon par shes pa drug dang mthong ba dang bsgom pa'i lam dang 'phags pa'i lam rnams yang dag par bgrod pa'o zhes gdams pa'i rim gyis ting nge 'dzin dang shes rab thob pa rnams 'phel ba'i ched du dang ma thob pa de rnams nyid thob pa'i ched du sangs rgyas la sogs pa rnams kyis spro bar byed bzhin pa na/pha rol phyin pa drug gi go cha'i sgrub pas pha rol tu phyin pa re re la pha rol tu phyin pa ma lus pa nye bar gzhag pas sbyin bya la sogs pa mi dmigs pa'i rnam pa la sogs pa go cha nyid kyis go gyon te/ 'di la bar du gcod pa'i mda' thams cad kyis gegs byed do//de'i rjes su go cha bgos nas rnam pa thams cad sgom pa la mngon par brtson pas rab tu gnas so/ /bsam gtan la sogs pa theg pa chen po'i chos ma lus pa la rnam par gnas te/ de nas rgyu mthar thug pa lhag par bgrod pa bsod nams dang ye shes kyi tshogs yang dag par sog go//de nas nges par 'byung bar bya ba 'bras bu'i sa la kun du gnon cing nges par 'byung ngo / /rdo rje lta bu zhes bya ba bar chad med pa'i lam rtogs pa'i byang chub sems dpa' nyon mongs pa dang shes bya'i sgrib pa'i bag chags ma lus pa mi mthun pa'i phyogs kyi dbye ba rnams spangs par sangs rgyas kyi sa kun du bgrod pa'o//yang dag pa'i mtha' mngon du byas pas bag chags kyis mtshams sbyor ba rnams spangs pa 'bras bu'i rang bzhin mtshams med pa'i chos kyi rgyal po thob po/ /de'i tshe yang 'bras bu mngon par rtogs pa'i ngo bo chos kyi sku mngon par rtogs pa nyid kyi bya ba byas pas bya ba mi srid pa'i phyir sgrub pa ni med do//sgrub pa ni bya ba yin no/ /de'i rjes su dmigs pa med pa'i snying rje chen pos sngon gyi smon lam gyis 'phangs pa las dang gdul bya'i bden pa'i bsod nams kyi bdag po las nam mkha'i khams kyi mthar thug par rgyun ma chad par sems can gyi don phun sum tshogs par byed do//des na mthong ba'i lam gyi brgyud pa'i sbyor ba'i lam gyi rang bzhin ni tshogs kyis ste go cha'i sgrub pa'o/ /dngos kyi sbyor ba'i lam gyi rang bzhin ni mos pas spyod pa'i sa ste 'jug pa'i sgrub pa'o//chos mchog rab kyi rang bzhin ni tshogs kyi sgrub pa'o/ /mthong ba'i lam gyi rang bzhin rab tu dga' ba'i sa ni tshogs kyi sgrub pa'o/ /bsgom pa'i lam gyi rang bzhin rab tu dga' ba'i sa ni tshogs kyi sgrub pa'o/ /bsgom pa'i lam gyi gnas skabs kyi khyad par gyis lam gyi gnas skabs khyad par sgom pa'i lam rang bzhin gnyen po ni tshogs kyi sgrub pa'o//bsgom pa'i lam gyi byin gyi rlabs kyis nges par 'byung bar bya ba'i dngos po la khyad par gyi lam mthar thug pa rdo rje lta bu'i sems kyi bar du bsgom pa'i lam gyi rang bzhin nges par 'byung ba'i sgrub pa'o//sems bskyed pa tha ma gnyis kyis bdag nyid 'bras bu'i ngo bo sangs rgyas kyi sa'i rang bzhin ni nges par 'byung ba'i rgyu sgrub pa ste/ nges par 'byung ba lam gyi spyod yul lo zhes gsungs pa'i phyir ro/ /yang 'phags pa thogs med zhabs kyis gsungs pa/ de la go cha'i sgrub pa dang 'jug pa'i sgrub pa dag gi grangs bzhin du brgyud pa dang dngos kyi sbyor ba'i rang bzhin tshogs dang mos pas spyod pa'i sa dag gis bsdus pa'o//dngos kyi sbyor ba'i lam gyi rang bzhin chos mchog rab kyis bsdus pa ni tshogs kyi sgrub pa'o/ /mthong ba'i lam gyi bdag nyid rab tu dga' ba'i sa'i rang bzhin tshogs kyi sgrub pa'o//sa gnyis pa la sogs pa'i rang bzhin gnyen po'i bdag nyid na'ang tshogs kyi sgrub pa nyid do/ /lam gnyis spyod yul lam nges par 'byung ba'i sgrub pa ste bsgom pa'i lam gyi byin rlabs kyis so zhes so/ /zhar la byung ba ste bzhag go/ / skabs su bab pa brjod par bya ste/ byang chub sems de ni byang chub phyogs kyi rnam pas yongs su bskor te bsgom par bya'o zhes gsungs pa'i phyir ro/ /byang chub sems dpas stong pa nyid dang / snying rje dbyer med pa'i byang chub sems nang du gyur pa nyid kyis byang chub phyogs kyi chos sum cu rtsa gsum rjes su 'gro ba'i sgo nas bsgom par bya'o//de nyid kyis na byang chub ni thams cad mkhyen pa ste phyogs ni rjes su mthun par gyur pa'o/ /stong phrag nyi shu lnga pa las ci skad du gsungs te/ shA ri'i bu bcom ldan 'das ma shes rab kyi pha rol tu phyin pa la gnas par dran pa nye bar gzhag pa bzhi yongs su chub par bya'o zhes pa la sogs pa'o//de bzhin du nang dang phyi rol gyi lus dang tshor ba dang sems dang chos rnams la lus la sogs pa rjes su lta zhing gnas so/ /lus la sogs pa dang ldan pa'i rnam par rtog par byed pa ni ma yin no/ /'di ni bdag lus po rtag go mi rtag go bde ba'o sdug bsngal lo zhes pa la sogs pa rnams mi dmigs pa'i sbyor bas so//mi dmigs pa ldog pa'i sgo nas ni nyan thos kyi theg pa pa rnams sgom par byed do/ /de yang / nyan thos kyi theg pa pa de ni rtag pa la sogs pa'i rnam pa nyid kyis dmigs so/ /byang chub sems dpa'i theg pa pa ni de rnams nyid mi dmigs pa'i sbyor bas dmigs te/de nyid kyis mi rtag pa la sogs pa'i rnam pa stong pa nyid kyang byang chub sems dpa' rnams yul can du 'gyur ro zhes chos nyid mngon du gyur pas nyan thos kyi lam yang goms pa yin no zhes so//da ni de bzhin du sems bskyed pa dang po gsum gyi grangs bzhin du dran pa nye bar gzhag pa bzhi dang yang dag pa'i spong ba bzhi dang rdzu 'phrul gyi rkang pa bzhi rnams bsdus pa'o/ /de ni 'di ltar tshogs kyi sa ru dge ba'i sems kyi dad pa la sogs pa yongs su goms pa nyid byang chub sems yang dag par len pa dang sbyin pa dang tshul khrims la sogs pa dge ba bsags pa dang ldan pa bsod nams kyi tshogs yang dag par rdzogs pa des ye shes kyi tshogs grub pa'i don du bskal pa grangs med pa las 'das pas so//bstan pa'i mngon shes gdams ngag gis//sbyong ba'i sa la rab gnas nyid/ /ces so/ /sems bskyed pa bzhi pa ni mos pas spyod pa'i sa/ sbyor ba'i lam/ 'jig rten pa'i sgom pa'i rang bzhin/ zag pa dang bcas pa'i bsgom pa'i lam nges par 'byed pa'i cha dang mthun pa'i dge ba'i rtsa ba dbang po dang stobs kyi bdag nyid 'jug pa'i sgrub par rnam par gzhag go//de la lhag par mos pa ni dad pa la sogs pa'i dbang po lnga dmigs pa'i yon tan 'dzin pa dang gzhan dang ma 'brel pa'i gdams pa dang rjes su bstan pa yongs su dag pa ste/ mthar phyin pa la rang nyid yang dag pa'i sgrub pa nyid kyis mos pa brtan pa'i phyir ro//mkhyen pa gsum gyi tshu rol du bud shing gzhan khyad par gyis me gong nas gong du khyad par du 'gro ba'i phyir khyad par du 'phags pa'i rtsom pa ni sbyor ba'o/ /bar chad med pa mthong ba'i lam ches nye bar skye bar 'gyur ro/ /dgongs pa nges par 'grel pa'i mdo las gsungs te/'dir byang chub sems dpa' sbyin pa la sogs pa'i dge ba yang dag par ldan par 'gyur zhing / nyon mongs pa'ang kun du spyod do/ /'di lta ste/ mos pas spyod pa'i sa la chung ngu dang 'bring dang rab dang rab kyi rab rnams kyi mos pa la 'jug bzhin pa na zhes bya'o/ /nges par 'byed pa'i cha dang mthun pa rnams zhes gsal ba'i rnam dbye mang po'i tshig gis kyang rgyas par bstan te/'di lta ste/ drod rnams dang / rtse mo rnams dang / bzod pa rnams dang / chos mchog rnams zhes so/ /yang ga ta dang bi d+ha dang srA kA rA rnams don gcig pas zhes pa bstan bcos dza li las gsungs pa'i phyir ro//kha cig tu ga ta zhes pa spyi brjod pa ste/ 'di lta ste/ drod kyi rnam pa dang / rtse mo'i rnam pa dang / bzod pa'i rnam pa dang / chos mchog gi rnam pa zhes so/ /de ni nges par 'byed pa'i yan lag ni yang ngo / /'di lta ste/ nges par 'byed pa ni nges 'byed de mtha' gcig tu nges pa'o//de'i yan lag go zhes dbye ba bzhi ste/ 'di lta ste/ nges par 'byed pa'i cha dang mthun pa chung ngu ni drod do/ /'bring ni rtse mo'o/ /rab ni bzod pa'o/ /rab kyi rab ni chos mchog go zhes so/ /de la gtsub shing gtsubs pa'i me bzhin du 'jig rten las 'das pa'i ye shes kyi me'i sngon gyi mtshan ma yin pas drod do//g.yo ba'i dge ba'i rtsa ba rnams kyi rtse mo yin pa'i phyir rtse mo'o/ /'jig rten pa'i chos mchog bzod pa'i phyir bzod pa'o/ /'jig rten pa'i chos thams cad mchog yin pas chos mchog go zhes so/ /yang drod la sogs pa rnams so sor chung ngu 'bring rab kyi dbye bas bcu gnyis so//drod la sogs pa 'di ni byang chub gsum thob pa'i rgyu yin te/ gang zag kha cig rigs la sogs pa'i stobs kyi rtse mo yin byang chub thob pa'i yang phyir ro/ /nyan thos dang rang rgyal theg pa pa dag gis drod la sogs pa mchog gi byang chub nam yang thob par byed pa ma yin no//de la drod gsum la rim pa bzhin du chung ngu 'bring chen po'i mos pa'i rang bzhin la chung ngu la sogs pa'i dbye bas mos pa dgu ste rang don no/ /gang gis rang don nyid phun sum tshogs pa'o/ /gzhan don ni ched du bya ba'i tshul gyis so/ /rtse mo gsum la ci ltar rang bzhin la de bzhin du mos pa dgu ste/rang dang gzhan don no/ /'dir sbyor ba bar chod bcas pa'o/ /bzod pa gsum la ci ltar rang bzhin la de ltar mos pa dgu ste gzhan don no/ /'dir bar chad med pa'i sbyor ba'o/ /gang las 'dis gzhan nyid kyi don du 'gyur ba na/ rang gi don ni mi 'gal bas rang don 'grub pas so//de ltar mos pa nyer bdun sgom par byed pa byang chub sems dpa' spro bar bya ba'i ched du sangs rgyas la sogs pa rnams kyis bstod pa bkur ba sngags pa byed bzhin pa rnams rim pa bzhin du de bzhin du nyi shu nyer bdun no/ /chos mchog la mos pa thams cad rab tu gyur pa'i rang bzhin gyi chung ngu'i rnam pa la mos pa thams cad yid la byed pas mngon par 'dus byas pa'i bsod nams ni bden pa gnyis las mi 'da' bas yang dag par rdzogs pa'i byang chub tu yongs su sngo bar byed pa na byang chub sems dpa' khas len par byed do//'bring po'i rnam pa la rang gis yongs su bsngos pa'i bsod nams mngon par 'phel ba'i don kun rdzob tu dge ba'i rtsa ba nye bar dmigs te yi rang ba'i sems dang / don dam par mi dmigs pas rjes su yi rang bar byed pa na rang gzhan bsod nams bya ba mnyam pa nyid du thob pa'o//'ga' zhig gi tshe rjes su yi rang ba sngon du 'gro bas kyang yongs su bsngo ba'o zhes 'di dag la rim pa ni nges pa med do/ /yongs su bsngo ba dang rjes su yi rang ba 'di dag ni 'dun pa dang ldan pa'i sems bskyed pa la sogs pa la yod mod kyi/ 'on kyang 'di de la ltos nas de mchog tu 'gyur ro zhes rnam par gzhag par bya'o//rab kyi rnam pa ni mos pa thams cad rab kyi mthar phyin pa'i rang bzhin nas bzung ste/ rang sems dbang du byas pa'i phyir bdag dang bdag gi dag nus pa med pas dul ba'i sems dge ba'i bshes gnyen la sogs pa rnams la bdag dang bdag gi nga rgyal mthon po med pas rang bzhin gyi nyon mongs pa zil gyis gnon pa bdud la sogs pas byas pa'i nye bar 'tshe ba'i yul ma yin pa/yang dag par rdzogs pa'i byang chub 'grub par rung ba/ rang gi rten yul mchod bya nyid du byed do zhes pa ni drod la sogs pa'i byed pa rnam par gzhag pa'o/ /de nyid kyis drod la sogs pa rnams mos pa brtan pa dang yon tan gyi gzhir gyur pas mos pas spyod pa'i sa zhes brjod do//de yang / mnyam par gzhag pa'i sems chos thams cad bdag med pa sgom par byed pa na/ don tha dad du gyur pa mngon par zhen pa med pas shes pa'i snang ba cung zad gsal bas yid tsam nyid du mthong ngo //de'i tshe 'di ni drod kyi rnam pa'i gnas skabs so/ /de nyid snang ba thob pa'i ting nge 'dzin zhes brjod do/ /de'i rjes su shes pa'i snang ba 'bring du gsal ba ni rtse mo'i gnas skabs so/ /de ni snang ba thob pa'i ting nge 'dzin no/ /gang gi tshe sems tsam du rnam par gnas pas phyi rol gyi don mngon par zhen pa med pa shes pa'i snang ba ches gsal ba skye ba de'i tshe bzod pa'i gnas skabs so//de ni de kho na nyid kyi don gyi phyogs gcig la zhugs pa'i ting nge 'dzin no/ /gang gi tshe yang don 'dzin par byed pa'i g.yeng ba mi snang ba'i shes pa'i gsal ba rdzogs pa de'i 'jig rten chos mchog gnas skabs so//de nyid bar chad med pa'i ting nge 'dzin no/ /de ma thag tu mthong ba'i lam gyi skad cig ma chos thams cad bdag med pa de kho na nyid mngon du byed pa dngos kyi gnyen po'o/ /des na skad cig de nyid la mthong bas spang bya thams cad spong bar byed do//mdo sde rgyan las gsungs te/ drod kyi rnam pa la sogs pa dang nges par 'byed pa'i cha dang mthun pa rnams ni bshad zin to/ /de las pha rol nas mthong ba'i lam gyi gnas skabs so/ /gnyis rnam par grol ba'i shes pa ste/ gzung bya dang 'dzin byed mi ldan pa'i phyir ro//rnam par mi rtog pa ste/ gzung bya dang 'dzin byed rnam rtog mi ldan pa'i phyir ro/ /dri ma dang mi ldan te mthong bas spang bya spangs pa'i phyir ro/ /de ni 'di rten yongs gyur pa/ /sa ni dang po dag tu 'dod/ /gzhal med dang don thams cad kyis/ /shin tu rnam dag tu nges 'gro'o/ /zhes so/ / des na drod dang rtse mo'i rnam pa dag dad pa la sogs pa dbang po lnga'i bdag nyid du'o/ /bzod pa dang chos mchog dag dad pa la sogs pa stobs lnga'i bdag nyid do zhes drod la sogs pa rnams dbang po dang stobs kyi bdag nyid du grub pa'o/ /'jug pa'i sgrub pa nyid yang ngo / /de rnams kyi sngon du bshad do//'jug pa'i sgrub pa de'ang / theg pa chen po la 'jug pa dang theg pa chen po la gnas pa'o/ /theg pa la dang po gnas pa'am gnas pa dag 'jug pa zhes pa don gcig pas ming gcig nyid do zhes 'phags pa rnam par grol ba'i sdes so/ /bcom ldan 'das ma las theg pa chen po la yang dag par zhugs pa dang /theg pa chen po la yang dag par gnas pa zhes tshig gnyis ni/ 'jug pa'i sgrub pas rgyu dang 'bras bu'i bdag nyid theg pa chen po'i chos la yang dag par zhugs pa'o/ /phyi nas gong nas gong du khyad par lhag par rtogs pas yang dag par gnas pa'o zhes so//slob dpon dbyig gnyen yang gsungs te/ 'jug pa'i sgras 'gro bar rtsom pa dang / theg pa la gnas pa dang / bgrod pa rnams rim pa bzhin du mos pas spyod pa'i sa dang / rab tu dga' ba la sogs pa sa bdun dang / mi g.yo ba la sogs pa'i sa gsum rnams la brjod par bya'o zhes so//des na dang po mos pas spyod pa'i sa la lhag par mos pa'o/ /rab tu dga' ba la sogs pa'i sa bdun pa la rtsol bas bgrod pa'o/ /brgyad pa la sogs pa'i sa gsum la ci zhe na/ rtsol ba med pas so/ /theg pa nyid kyis 'di'i bgrod pa sgrub pa ste/shin tu bzod pa'i shing rta bzhin no/ /des na byang chub sems dpa' dang po nyid du 'jug pa'i sgrub pas lam gyi rang bzhin theg pa chen po la gnas so/ /de la lam gyi rnam pa ni pha rol tu phyin pa drug la sogs pa ste/ lam gyi bden pa'i skabs su rgyas par bshad zin to//de las rtogs par bya'o/ /tshogs kyi sgrub pa ni 'jig rten chos mchog nas brtsams te rnam par gzhag go/ /'dis byang chub chen po bsogs par byed pa'am lci ba nyid kyis sam/ 'gengs par byed pas tshogs so/ /tshogs pas tshogs te/ rnam pa thams cad du tshogs pa'i phyir ro//tshogs de'ang mdor bsdu na rnam pa gnyis te/ 'di ltar/ bsod nams kyi tshogs dang ye shes kyi tshogs so/ /gang gi tshe yang sngon bsod nams dang ye shes kyi tshogs bsags kyang / de bzhin du yang 'di nas bzung ste khyad par gyis zhes rnam par gzhag go/ /rgyas par ni tshogs rnam pa bcu bdun te/'di lta ste/ dmyal ba pa dang yi dags dang dud 'gro rnams kyi sdug bsngal thams cad rab tu zhi ba dang / sangs rgyas dang bcas pa'i lha dang mi dag tu skye ba ni snying rje'i tshogs so/ /sbyin pa'i pha rol tu phyin pa'i tshogs dang / tshul khrims kyi pha rol tu phyin pa'i tshogs dang /bzod pa'i pha rol tu phyin pa'i tshogs dang / brtson 'grus kyi pha rol tu phyin pa'i tshogs dang / bsam gtan gyi pha rol tu phyin pa'i tshogs dang / shes rab kyi pha rol tu phyin pa'i tshogs dang / zhi gnas kyi tshogs dang / lhag mthong gi tshogs dang / zhi gnas dang lhag mthong zung du 'brel pa'i tshogs dang /gang la las mi dmigs pa'i sbyor ba rnam pa thams cad mkhyen pa nyid dang ldan pa'i yid la byed pas pha rol tu phyin pa rnams la spyod cing / gzhan dag de la yang dag par 'jog pa de ni thabs la mkhas pa'i tshogs so/ /gang stong pa nyid nyi shu rnams yongs su shes pa de ni ye shes kyi tshogs so//dpa' bar 'gro ba rin chen phyag rgya dang nam mkha' mdzod dang / seng ge rnam par rol pa la sogs pa'i ting nge 'dzin rnams ni bsod nams kyi tshogs so/ /byang chub phyogs rnam par thar pa snyoms par 'jug pa zil gyis gnon pa'i skye mched zad par la sogs pa lam rnam pa mang po ni lam gyi tshogs sogs so//a ra pa tsa la sogs pa'i yi ge rnams la de'i don de bzhin nyid dmigs nas sgom par byed cing sgom pa yongs su rdzogs pa dag /yi ge de'i don la bzod pa skyed pa de ni bzod pa'i gzungs dang / gzungs dang ldan pa'i blo la'o//phyogs bcu'i sangs rgyas dang byang chub sems dpa'i bstan pa'i phung po 'dzin pa'i rgyu dran pa dang shes rab dag gcig tu byas pa de ni chos kyi gzungs so/ /de'i don 'dzin pa'i rgyu dran pa dang shes rab dag gcig tu byas pa de ni don gyi gzungs so/ /sems can rjes su 'dzin par byed pa sgyu ma lta bu gsang sngags smra ba la dbang du gyur pa de ni gsang sngags kyi gzungs so//gzungs bzhi po de ni gzungs kyi tshogs so/ /rab tu dga' ba la sogs pa'i byang chub sems dpa'i sa bcu rnams ni sa'i tshogs so/ /gzhan dag pa yongs su sbyong bar byed pa'i yongs su sbyong ba ni sa yi tshogs zhes zer ro//mthong ba'i lam la de bzhin nyid la sogs pa dang rmi lam la sogs pa gzung bya dngos po rnams nye bar dmigs pa ni bzung ba'i rtog pa'o/ /de rnams rang bzhin stong pa nyid rtogs pa gnyen po dang / sbyin pa la sogs pa nas sangs rgyas kyi chos kyi mthar thug pa gnyen po'i dngos po rnams nye bar dmigs pa ni bzung ba'i rnam rtog go de rnams rang bzhin stong pa nyid yin pa'i phyir mi dmigs pa gnyen po'o//dgra bcom pa la sogs pa gang zag gi rdzas la nye bar dmigs pa ni 'dzin pa'i rnam par rtog pa'o/ / de bzhin du mi dmigs pa gnyen po'o/ /ming dang brda dang tha snyad la sogs pa nye bar dmigs pa ni 'dzin pa'i rnam rtog go/ /de bzhin du mi dmigs pa gnyen po'o/ /bsgom pa'i lam la/ chos thams cad mi gnas pa'i sbyor bas gnas pa ma yin mi gnas pa ma yin bzung ba'i dngos po rnams mi dmigs pa gnyen po dang /sbyin pa la sogs pa gnyen po'i dngos po rnams mi dmigs pa gnyen po dang / rgyun du zhugs pa la sogs pa'i gang zag gi rdzas rnams mi dmigs pa gnyen po dang / rgyun du zhugs pa la sogs pa gang zag btags pa'i rten rnams kyi rgyun du zhugs pa'i 'bras bu la sogs pa rnams mi dmigs pa gnyen po dang /gnyen po brgyad po de rnams ni gnyen po'i tshogs so/ /sems bskyed pa bzhi po de rnams ni brdar btags pa kun rdzob pa 'jig rten pa'o/ /de la sems bskyed pa lnga ni/ sdug bsngal la chos shes pa'i bzod pa dang / sdug bsngal la chos shes pa rnams so//de bzhin du kun 'byung 'gog pa lam zhes bden pa bzhi dmigs pa mthong ba'i lam skad cig ma bcu drug gi bdag nyid chos thams cad rang bzhin med pa mngon du byas pas yang dag pa nyid nges pa la zhugs pa rab tu dga' ba'i sa'o/ /rab tu dga' ba'i sa de'i chos thams cad rang bzhin med pa nyid sgom pa'i stobs rdzogs pa na/chos thams cad rnam pa thams cad kyis rang gi ngo bo mngon du byed pa zag pa med pa'i shes pa skyes pa'o/ /cha shas med pa mngon sum pa gcig ni rang 'gyur te/ tshad ma rnams kyis brtag bya gang / /ma mthong cha gzhan ci zhig yod/ /zhes pa'i rigs pa las so//des na mthong ba'i lam gyi rang bzhin ni mthong bar rtogs pa skad cig ma gcig go/ /de skad du yang / sangs rgyas kyi yul bsam gyis mi khyab pa bstan pa'i mdo las gsungs te/ 'jam dpal 'phags pa'i bden pa bzhi ci lta bu zhe na/ lha'i bu 'dir gang gis 'du byed thams cad rang bzhin ma skyes pa mthong ba des ni sdug bsngal yongs su shes pa nyid do//gang gis chos thams cad shin tu yang dag par ma chad pa mthong ba des ni kun 'byung rab tu spangs pa'o/ /gang gis chos thams cad shin tu yongs su mya ngan las 'das pa mthong ba des ni 'gog pa mngon du byas pa'o//gang gis chos thams cad shin tu stong pa mthong ba des ni lam bsgom pa byas pa ste/ rang gi ngo bos ma skyes pa'i phyir ro/ /'dis ni bden pa bzhi'i rnam pa thams cad kyis rang gi ngo bo de kho na nyid ni stong pa nyid kho na zhes gsungs pa'o/ /de'ang mngon par rtogs pa byed bzhin pa na lan cig nyid sbyor ba ste/rim gyis ma yin te/ stong pa nyid de la cha shas med pa'i phyir ro/ /sA lu ljang pa'i mdo las gsungs te/ gang rten cing 'brel par 'byung ba mthong ba de ni chos mthong ba'o/ /chos kyi rang bzhin las tha dad med pa'i phyir sangs rgyas mthong ba'o/ /gang 'di yongs su gcod par byed pa'i shes pa de ni chos shes pa'o//chos ni yul lo/ /shes pa ni chos shes pa'o/ /'dis sdug bsngal la chos shes pa'i bzod pa'i rang bzhin no/ /gang las sdug bsngal la rten cing 'brel par 'byung ba'i phyir rang bzhin gyis ma skyes pa'o/ /gang rang bzhin skye ba med pa de nyid 'khor ba dang mya ngan las 'das pa dag gi rang bzhin ma skyes pa yin pas so//dbu ma rtsa ba las gsungs te/ mya ngan las 'das 'khor ba ni/ /tha dad cung zad yod pa min/ /'khor ba las ni mya ngan 'das/ /tha dad cung zad yod ma yin/ /mya ngan 'das kyi mtha' gang yang / /'khor ba rnams kyi mtha' yang yin/ /de dag bar du cung zad cig /shin tu phra ba'ang yod pa min/ /zhes so/ /'dis mtha'i sgra ni rab tu gyur pa brjod pa ste/ rab tu gyur pa zhes bya ba rting du gnas pa'o/ /byis pa skye bo'i spyod yul ma yin pa'i rang bzhin no/ /de ni de bzhin du bden pa bzhi rten cing 'brel par 'byung ba'i rang bzhin skye ba med pa 'gag pa med pa dmigs pas mthong ba'i phyir mngon par rtogs pa gcig nyid do//de yang rten cing 'brel par 'byung ba dmigs par byed pa'i shes pas/ gang sdug bsngal gyi skye ba med pa 'gag pa med pa yongs su gcod pa des bdag nyid kyi sdug bsngal yongs su shes pa'o/ / gang las nyon mongs pa dag gis mi skye ba mi 'gag pa yongs su gcod pa 'di ni kun 'byung yongs su shes pa'o/ /gang rten cing 'brel par 'byung ba'i rang bzhin skye ba med pa 'gag pa med pa yongs su gcod pa de ni 'gog pa yongs su shes pa'o/ /lam rten cing 'brel par 'byung ba nyid yin pas/gang rang bzhin skye ba med pa 'gag pa med pa yongs su gcod pa de ni lam yongs su shes pa'o/ /de ni 'di ltar chos shes pas skad cig la rten cing 'brel par 'byung ba mthong bas 'di sngon ma mthong ba gzhan blta bar bya ba ni srid pa ma yin no/ /des na mthong ba'i lam ni mngon par rtogs pa skad cig ma gcig go//gal te gang tshe skad cig la de kho na nyid mthong na ci ltar mthong ba'i lam skad cig ma bcu drug yin zhe na brjod de/ shes pa de nyid kyi ngo bo gcig nyid yan lag rnam par phye ste skad cig ma bcu drug tu rnam par gzhag go/ /rnam pa de lta bu'i gdul bya'i skye bo rnams gdams ngag des rjes su bzung ba'i ched du'o//gal te de ltar na rnam pa bcu drug lam bsgom pa ci ltar bshad ce na/ 'di yang 'gro ba 'dod pa rnams rnam pa gzhan gyis de kho na nyid shes pa la bzhugs pa'i don du yongs su brtags nas rnam par gzhag pa'o/ /de kho na nyid ni ngo bo nyid do//bsam pa 'di nyid kyis ni rigs pa'i stobs las mngon par rtogs pa skad cig ma gcig yin kyang / mthong ba'i lam mngon par rtogs pa skad cig ma bcu drug tu gsungs so/ /de dag gsungs pa/ gang gi tshe cha shas med pa'i phyir chos kyi dbyings dag nyid thams cad kyis mngon du rtogs kyang nges pa skye ba la ltos pas thams cad du 'gro ba'i don gyis mngon du rtogs pas chos thams cad rang bzhin med pa nyid mngon du byed pa ches gsal ba'i shes pa skye bar byed pa de'i tshe byang chub sems dpa' mthong ba'i lam brnyes pa'o zhes so//de nyid kyis na brjod par bya ste/gang rab tu dga' ba'i sa dang po gzugs la sogs pa rnams gdod nas skye ba med pas mngon du rtogs pas mi skye ba'i chos la bzod pa'i ngo bo shes rab dang ting nge 'dzin dang zung du 'jug pa brjod pa med pa sdug bsngal la chos shes pa'i bzod pa'i skad cig nyid ni mthong ba'i lam mo/ / sdug bsngal la chos shes pa la sogs pa ni bsgom pa'i lam mo zhes so/ /thog ma med pa ma rig pa dang bcas pa'i 'khor ba brgyud pa rnams su ma mthong ba de kho na nyid ni gtso bo yin no zhes bstan pa'i don du/ de dag mngon du rtogs pa mngon par rtogs pa skyed par byed pa skad cig ma mngon par rtogs par bya bas mngon par rtogs pa mthong ba'i lam mo//'khrul pa'i mtshan mas sgro btags pa'i rnam pa'i phyin ci log rab tu skye nyon mongs pa'i rtsa ba nas 'byin pa'i sdug bsngal la chos shes pa la sogs pa skad cig ma bco lnga la yang mthong ba'i lam zhes tha snyad byas pa nyid do//bsgom pa'i lam du bshad pas yang sdug bsngal la chos shes pa la sogs pa de rnams ni brtags pa pa'i mthong lam nyid du brjod pa yin no/ /gang gi tshe de lta ma yin na shing rta chen po rnams kyi theg pa chen po la mthong lam skad cig ma bcu drug go zhes mang du bshad pa dang ci ltar mi 'gal bar 'gyur/yang gang ma tshang ba med pa'i rgyu spang bar mi nus pas sdug bsngal mthong bas spang bya spong ba'i dus su kun 'byung spangs so/ /de nyid kyis na 'gog pa mngon du byas so/ /gzhan du na de'i 'gog pa mngon du byed pa mi 'thad pas lam bsgom pa nyid do/ /kun 'byung la sogs pa la de bzhin no zhes 'bras bu mngon par rtogs pas theg pa chen po la mthong ba'i lam mngon par rtogs pa skad cig ma gcig yin par blta'o//yang bden pa so so'i phyin ci log sel bas mngon du byed pa mngon par rtogs pas skad cig ma bcu drug gis mngon par rtogs par byed pa'o//des na ched du zhugs pa nyid la sogs pa'i rnam par gzhag pa legs par gnas so zhes zer ro/ /de'i 'dod pas skad cig ma bcu drug thams cad kyang dngos kyi mthong lam mo zhes gsal lo/ /de ni de bzhin du bden pa bzhi'i de kho na nyid mthong bas mthong lam skad cig ma bcu drug ni rab tu dga' ba'i sa'o//sems bskyed pa nyi shu rtsa gnyis dbye ba dang bcas pa yang / tha snyad pa'i dus kyi khyad par bya ba yongs su rdzogs pa'i mtshan nyid shes bya dang shes pa yongs su rdzogs pa'i bar du rig par bya'o/ /mi khom pa brgyad kyi skad cig ci lta'o/ /yang dus kyi mthar thug pa'i dus chung ngu ni ma yin te/de ni shin tu phra bas tha snyad bya ba ma yin pa'i phyir ro/ /de nyid kyi phyir sa gang gis yongs su sbyong bar gyur pa'i chos gang dang gang ci srid du yongs su ma tshang ba de srid du sa de'o/ /sa de yongs su rdzogs nas sa gzhan du rnam par gzhag par bya'o/ /de dang lhan cig spyod pa nges pa'i shes pa brgyad de/de la nyon mongs pa spangs pas bar chad med pa'i lam gyi rang bzhin sdug bsngal la sogs pa shes pa brgyad ni bzod pa zhes brjod do/ /rnam par grol ba'i lam yang nyon mongs pa bral ba mngon du byed pa'i shes pa brgyad ni chos dang rjes su shes pa'o//de la chos shes pa'i bzod pas rtogs pa nges pa'i shes pa ni chos shes pa bzhi zhes rnam par gzhag par bya'o/ /rjes su shes pa'i bzod pas rtogs pa nges pa'i shes pa ni yang rjes su shes pa zhes so/ /'dir gdams ngag ni 'di yin te/ gzugs la sogs pa rnams gzod nas skye ba med pa mngon du rtogs pas sdug bsngal ba dang sdug bsngal mtshan nyid dag mi dmigs pa sdug bsngal la chos shes pa'i bzod pa'i skad cig gang mi skye ba'i chos la bzod pa zhes brjod do//de 'di shes rab dang ting nge 'dzin zung du 'jug pa mngon par brjed pa med pa skad cig go/ / 'jig rten las 'das pa'i ye shes 'di'i rjes la thob pa rang gis rtogs pa yongs su gcod pa'i shes rab shar ba gang gis chos thams cad stong pa nyid ces stong pa nyid kyi mtshan nyid rnam par dag pa'i tshul gyis mngon par brjod pa de ni sdug bsngal la chos shes pa'o/ /de gzugs la sogs pa 'di rnams stong pa nyid kyi mtshan nyid rnam par dag pa'i ngo bo dngos po dang dngos po med pa dag gis brjod par bya ba ma yin pa zhes rab tu shes nas/yang mngon par brjod pa med pa 'jig rten las 'das pa'i shes rab shar ba de ni rjes su shes pa'i bzod pa'o/ /de'i tshe'ang khams gsum pa'i chos thams cad brjod bya ma yin pa nyid du mngon du rtogs te/skad cig gnyis pas shes rab phul du phyin pa'i phyir ro/ /sngon ma ni 'dod pa'i khams kyi sdug bsngal shin tu che ba dang / shes rab mchog tu phyin pa med pa'i phyir khams su rtogs pa'i chos rnams nyid bdag med par mngon du rtogs pa'o/ /des na de dang don mnyam pa nyid kyi rgyu dang de'i rgyu can nyid kyis kyang shes pa de don du gnyer ba nyid kyis de'i rjes su 'gro bas bzod pa yin pas rjes su shes pa'i bzod pa zhes brjod do//des na de bzhin du chos thams cad mngon par brjod bya ma yin pa smra bar bya ba ma yin pa nyid de kho na mngon par brjod pa'i shes rab skyes pa ni rjes su shes pa zhes brjod do//de bzhin du kun 'byung 'gog pa lam rnams la rtogs par bya'o/ /de la bzod pa brgyad rnams ni rkun po phyi rol du 'byin pa'i rigs pas nyon mongs pa spong ba'i bya ba dang ldan pa'o/ /shes pa brgyad rnams ni sgo glegs 'gebs pa'i rigs pas bya ba dang ldan pa'o//de la chos shes pa'i bzod pa bzhi la 'dod pa'i khams kyi 'dod chags dang khong khro ba dang / nga rgyal dang / ma rig pa dang / the tshom dang / 'jig tshogs la lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa'o//so sor bcu bcu zhes nyon mongs pa bzhi bcu them pa rab tu spong ba'o/ /rjes su shes pa'i bzod pa bzhi la/ de nyid la khong khro ma gtogs pa/ gzugs khams kyi dgu ste/ so sor dgu dgu ni dgu tshan bzhi'o/ /de bzhin du gzugs med pa'i khams kyi dgu tshan bzhi ste/ 'di ni nyon mongs pa bdun cu rtsa gnyis rab tu spong ba'o//des na nyon mongs pa brgya rtsa bcu gnyis ni mthong ba'i lam gyi spang bya'o/ /'dis ni sems bskyed skad cig bcu drug 'di ni bden pa mngon par rtogs pa'o zhes so/ /de skad cig ma bco lnga rnams la byang chub sems dpa' brgyad pa rgyun du zhugs pa'i 'bras bu'i phyir zhugs pa ste rnam pa gnyis so//'di lta ste/ dang po ni dbang po rtul po dad pa'i rjes su 'brang ba dang / dad pas de'i lam rjes su sgrub pa'i phyir ro/ /gnyis pa ni phyir mi ldog pa'i dbang po rnon po'i chos kyi rjes su 'brang ba lta bas thob pa'o/ /chos dang mthong ba ni shes rab bo/ /de dag gis de'i lam rjes su sgrub pa'i phyir ro//skad cig ma bcu drug pa la rgyun du zhugs pa'i 'bras bu la gnas pa'o/ /drug pa la sogs pa sems bskyed pa bco lnga ni 'jig rten las 'das pa'i bsgom pa'i lam mo/ /de la gang gi tshe yang 'dus byas dang 'dus ma byas dag gi ngo bo gcig nyid yin pas phan tshun tha dad du brjod par mi nus pa bzhin du/ci ltar gsungs pas mthong ba'i lam mngon du byas pa'i dngos po tha dad ma yin par dmigs pas mthong ba dang bsgom pa'i lam dag gi tha dad pa ma yin pas bsgom pa'i lam mtshan nyid can rnam par gzhag go/ /de bzhin du yin na yang /bsgom pa'i lam de ni bsgom pas spang bar bya ba'i dngos po'i gnyen po nyid yin pas rten cing 'brel bar 'byung ba'i chos nyid kyis rnam par bsgom par bya'o/ /des mthong ba'i lam gyis mthong ba'i de kho na nyid rgyun gyis mkhyen pa ni sgom pa'o/ /de nyid lam mo/ /de la lhan cig skyes pa'i 'dod chags dang /khong khro dang / ma rig pa dang / lhan cig skyes pa'i 'jig tshogs la lta ba dang / log par lta ba'o/ /mngon pa kun las btus pa las mthar 'dzin pa lta ba gsum kyang mthar 'dzin pa lta ba ni log par lta ba'i khyad yin pas so/ /'dir yang dngos po rnams dam pa yang dag pa nyid du sgro btags pa'i phyin ci log gi lta ba ni log par lta bar bzung ste/rgyu dang 'bras bu la skur pa 'debs pa ni ma yin no zhes de rnams ni 'dod pa na spyod pa'i nyon mongs pa drug go/ /de nyid gzugs na spyod pa zhe sdang spangs pa'i lnga'o/ /gzugs med pa na spyod pa lnga ste nyon mongs pa bcu drug ni bsgom pas spang bar bya ba rim gyis spong ngo //bag la nyal yin gyi kun du rgyu ba nyams pas ni ma yin te/ sngon nyid du 'gribs pa nyid du yin pa'i phyir ro/ /de la 'dod pa'i khams su 'dod chags la sogs pa nyon mongs pa drug po de rnams chen po 'bring chung ngu'i dbye bas rnam pa gsum ste/ yang so sor chen po'i chen po la sogs pa'i dbye bas gsum ste rnam pa dgu'o//de bzhin du 'dod chags la sogs pa lnga rnams/ gzhan gzugs dang gzugs med pa'i sa la so sor dgu dgu'o/ /'dod pa'i khams la sogs pa 'khor ba'i sa dgu la dgu dgu ste/ nyon mongs pa'i rnam pa brgyad cu rtsa gcig tu 'gyur ro//de rnams kyi gnyen po nyes pa skye bzhin pa nges par 'joms pas nyes pa dang 'gal ba'o/ /de ma thag tu gsungs pa'i bsgom pa'i lam mi mthun pa'i phyogs kyi rnam pa las bzlog pas chung ngu 'bring chen po rnams yang chung ngu'i chung ngu la sogs pa'i dbye bas rnam pa brgyad cu rtsa gcig go//de la dri ma med pa 'od byed pa/ 'od 'phro ba/ sbyang dka' ba'i sa'i rang bzhin lam gyi rnam pa dang po bzhi rtogs pa'i rgyun du zhugs pa nyid de rnam pa gnyis so/ /'di lta ste/ gang thabs la mkhas pas mi rnams kyi nang du rgyal rigs shing sA la chen po lta bu'am/ bram ze'i rigs shing sA chen po lta bu'am/khyim bdag rigs shing sA la chen po lta bur skye ba de ni mi'i rigs nas rigs so/ /'dod pa na spyod pa'i lha drug gi nang du skye ba de ni lha'i rigs nas rigs so/ /rnam pa lnga la mngon du gyur pa'i sa'i rang bzhin rtogs pa ni lan cig phyir 'ong ba'i 'bras bu'i phyir zhugs pa'o/ /drug pa la ring du song ba'i sa'i rang bzhin la lan cig phyir 'ong ba'o//de nyid ni bar chad gcig pa'o/ /rnam pa bdun pa la mi g.yo ba'i sa'i rang bzhin rtogs pa la dang / brgyad pa la legs pa'i blo gros kyi sa'i ngo bo rtogs pa la phyir mi 'ong ba'i 'bras bu'i phyir zhugs pa'o/ /gnyen po rnam pa dgu pa la chos kyi sprin gyi sa'i rang bzhin rtogs pa la phyir mi 'ong ba'o//de yang rnam pa lnga ste/ gang 'di lta ste/ tshangs ris nas brtsams te ci srid du 'og min zhes pa'i bar skabs su lha'i ris gang yang rung bar mngon par rdzogs par sangs rgyas nas/ 'dir mngon par byang chub pa la sogs pa ston pa de ni bar ma dor yongs su mya ngan las 'da' ba'o//gang byang chub shing drung du skyil krung bcas te/ gang dang po sems bskyed pa de ni 'dir skyes nas so/ /bskyed pa des skyes pa nyid du lhag ma nyid du lhag ma dang bcas pa'i mya ngan las 'da' ba de ni skyes nas yongs su mya ngan las 'da' ba'o/ /gsum pa mngon par 'du byed pa dang bcas nas yongs su mya ngan las 'da' ba ste/gang gi dbang du byas nas gsungs pa/ shA ri'i bu byang chub sems dpa' gang dag pha rol tu phyin pa drug la spyod cing 'jig rten gyi khams su yang dag par 'gro ba/ de ni sems can rnams kyi don du bya ba la rtag tu rtsol ba dang ldan pa ci srid du bskal pa grangs med pa dpag tu med pas bla na med pa yang dag par rdzogs pa'i byang chub tu yang dag par sangs rgya'o//de yang rtag tu sems can gyi don gyi bya ba la gnas pa dag yod do/ /dper na 'phags pa spyan ras gzigs dbang phyug dang sgrol ma dang 'jam dpal la sogs pa'o/ /'dir sems can gyi don la brtson pa dang ldan pa ni mngon par 'du byed pa'o//bzhi pa mngon par 'du byed pa med par yongs su mya ngan las 'da' ba ni/ gang gi dbang du byas nas gsungs pa/ shA ri'i bu gang byang chub sems dpa' gang dang po byang chub tu sems bskyed pa nyid kyis byang chub sems dpa' 'am nges pa la zhugs nas ji srid du sangs rgyas kyi zhing gzhan du bla na med pa yang dag par rdzogs pa'i byang chub tu mngon par rdzogs par sangs rgya ba yod do//de yang mngon par sbyor ba'i lam zhes shes nas rigs kyi khyad par las ches myur bar 'bad pa chung ngu nyid kyis mngon par rdzogs par byang chub pa ni mngon par 'du byed pa med par yongs su mya ngan las 'da' ba'o//lnga pa ni gong du 'pho ba ste rnam pa gnyis so/ /'og min gyi mthar thug pa dang / srid pa'i rtse mo'i mthar thug pa'o/ /de la gang gi dbang du byas nas gsungs pa/ shA ri'i bu byang chub sems dpa' gang pha rol tu phyin pa drug la spyod cing 'khor los sgyur bar gyur nas sems can rnams kyi bde ba'i yo byad thams cad nye bar sgrub par byed cing ji srid du dge ba bcu la rab tu bzhag ste/tshangs ris kyi lha nas ci srid du 'og min gyi lha'i bar du skyes nas sangs rgyas kyi zhing sna tshogs su bla na med pa yang dag par rdzogs pa'i byang chub tu mngon par rdzogs par sangs rgya ba yod do//'og min gyi mthar thug pa de ni rnam pa gsum ste/ 'di lta ste/ 'phar ba dang / phyed du 'phar ba dang / gnas thams cad du 'pho ba'o/ /de la gang bsam gtan gsum las/ yongs su nyams nas bsam gtan dang po'i ro myangs pas tshangs ris su skyes te/sngon goms pa'i dbang las bsam gtan bzhi pa skyed de/ de las 'phos te 'og min du skye ba de ni dbus su ma zhugs pas 'phar ba zhes brjod do/ /gang tshangs ris las 'phos te/ gnas gtsang mar skyes nas bar gyi gnas gzhan las gcig kyang rnam par rgal te/'og min du 'jug pa de ni phyed du 'phar ba'o/ /gang gnas gzhan thams cad du kun du brgyus nas 'og min du 'jug pa de ni gnas thams cad du 'pho ba'o/ /gang gi dbang du byas nas gsungs pa/ shA ri'i bu byang chub sems dpa' gang dga' ldan nas bzung ste tshangs ris nas ci srid du 'og min du skyes nas thabs la mkhas pas dmyal ba pa dang dud 'gro'i skye gnas dang gshin rje'i 'jig rten pa'i sems can rnams la chos ston par byed do//phyogs bcu'i sangs rgyas kyi zhing nas sangs rgyas kyi zhing du yang dag par 'gro zhing / sangs rgyas bcom ldan 'das rnams bsnyen bkur te sems can rnams yongs su smin par byas nas bla na med pa'i sangs rgyas kyi zhing dag rdzogs par byed do zhes pa la sogs pa'o//gang snyoms par 'jug pa gzhan gyi ro myangs pas gnas gtsang ma nyid du ni mi 'jug cing / gnas gzhan thams cad du skye zhing gzugs med du rim gyis skyes nas srid pa'i rtse mor song ste/sangs rgyas kyi zhing sna tshogs su mngon par rdzogs par sangs rgya ba yod do/ /yang gang gzugs la 'dod chags dang bral ba phyir mi 'ong ba de 'di nas 'phos te gzugs med par skyes nas sangs rgyas kyi zhing sna tshogs su mngon par rdzogs par sangs rgyas pa de ni gong du 'pho ba srid pa'i rtse mo'i mthar thug pa rnam pa gnyis te/'di lta ste/ mthong ba'i chos la yongs su mya ngan las 'da' ba dang / lus kyis mngon du byed pa'o/ /de la gang gi dbang du byas te gsungs pa/ shA ri'i bu byang chub sems dpa' gang skyes bu chen pa'i mchog sum cu rtsa gnyis kyis brgyan pa'i sku ci srid du tshe dpag tu med pa dang ldan pas 'khor los sgyur ba'i rgyal po stong phrag brgya stong du ma yongs su blangs te/de la gnas nas sangs rgyas bye ba khrag khrig brgya stong du ma mnyes par byas nas phyis 'di nyid du bla na med pa yang dag par rdzogs pa'i byang chub tu mngon par rdzogs par sangs rgya ba yod do zhes de ni mthong ba'i chos la yongs su mya ngan las 'das pa'o//skye ba thams cad du bar chad med par mthong ba la sbyin pa tshul khrims la sogs pa'i chos la mngon par rdzogs par byang chub pa'i phyir ro/ /gang phyir mi 'ong ba 'gog pa'i snyoms par 'jug pa thob pa de lus kyis mngon du byed pa ste/mya ngan las 'da' ba dang 'dra ba'i chos lus kyis mngon du byed pas so/ /lus kyis mngon du byed pa'ang / sems med pas lus la brten pas 'gog pa'i snyoms par 'jug pa skyed pa'i phyir ro zhes phyir mi ldog pa'i 'khor lo'i mdo las gsungs so/ /yang / dgra bcom pa'i 'bras bu'i ched du zhugs pa phyir mi 'ong ba 'gog pa'i snyoms par 'jug pa thob pa de bzhin du/sangs rgyas nyid kyi ched du zhugs pa nyid yin pas 'phags pa byams pa ni lus kyis mngon du byed pa'o zhes brjod par bya'o zhes gsungs so/ /gang gi dbang du byas te gsungs pa/shA ri'i bu byang chub sems dpa' gang shes rab kyi pha rol tu phyin pa la spyod cing / bsam gtan dang tshad med pa dang gzugs med pa'i snyoms par 'jug pa rnams kyis rol cing / de dag bsam gtan dang po la snyoms par zhugs te/ de las langs te 'gog pa la snyoms par 'jug go//de las langs te bsam gtan gnyis pa la'o/ /ci srid du thabs la mkhas pa'i stobs kyis thod rgal gyi ting nge 'dzin la snyoms par zhugs nas sangs rgyas kyi zhing sna tshogs su bla na med pa yang dag par rdzogs pa'i byang chub tu mngon par rdzogs par sangs rgya ba dag yod do zhes so//de ltar rigs nas rigs la sogs pa'i rnam par gzhag pa ni/ 'dod du dbye ba drug pa dang / /dgu pa yang dag zad pa las/ /lan cig 'ong dang phyir mi 'ong / /gang zag dag [(]du [,]tu [)]skye bar 'gyur/ /dgra bcom srid rtser 'ang tha ma ni/ /zad las de yi lam gnas ni/ /bzhi ste de'i sbyor la gnas pa//de'i phyir zhugs pa rnams su gsungs/ /mi slob dgra bcom slob pa ni/ /gzhan bdun zad pa slob phyir ro/ /zhes nyan thos kyi theg pa'i rnam par gzhag pa'i rjes su zhugs pa rnam par bshad pa'o/ /'di rnams ni rnam pa kun mngon par rdzogs par rtogs pa'i mngon par rtogs pa'o zhes 'phags pa rnam par grol sdes gsungs so//sa bcu pa 'di'i gnas skabs kyi khyad par bco lnga pa la sogs pa sems bskyed pa drug ni khyad par gyi lam mo/ /de la sems bskyed pa dang po lnga ni re re la sbyor ba dang dngos gzhi dang rjes rnams kyis so/ /dngos gzhi yang chung ngu dang 'bring dang chen po dang chen po'i chen po dbye bas so//yang chung ngu la sogs pa rnams kyis re re la chung ngu'i chung ngu la sogs pa gsum gyi dbye bas rnam pa bcu bzhir 'gyur ro/ /gzugs dang gzugs med pa dag gi gnas bdun la dgu dgu'o/ /gnas brgyad pa la bdun te/ gnyen po'i rnam pa rnam par phye ba bdun cu tham pa yin no//de la sems bskyed pa dang po gnyis kyi dbye ba dang / sems bskyed pa gsum pa'i dbye ba'i dang po gnyis te rnam pa sum cu ni rtse mo mngon par rtogs pa'o/ /gzhan pa bzhi bcu tham pa ni mthar gyis gnas pa'i mngon par rtogs pa'o/ / de bzhin du rnam par mi rtog pa'i gnas pa'i gnas skabs 'di la gnas pa'i byang chub sems dpa' snying rje chen po la sogs pa mngon du byed pa yod pas yang dag pa'i thabs la mkhas pas sems can du seng ge rnam par bsgyings pa'i ting nge 'dzin la 'di ltar snyoms par 'jug ste/ 'di ltar/ bsam gtan dang po la snyoms par zhugs te/ gnyis pa dang / gsum pa dang / bzhi pa dang / gzugs med pa'i dang po dang gnyis pa dang gsum pa dang bzhi pa dang 'gog pa la snyoms par zhugs pa las bzhengs te/ gzugs med pa'i bzhi pa dang gsum pa dang gnyis pa dang dang po dang / bsam gtan bzhi pa dang gsum pa dang gnyis pa dang dang po la snyoms par 'jug go zhes so/ /de'i rjes su rten cing 'brel par 'byung ba lugs su 'byung ba dang lugs las bzlog pa dag la blta'o/ /de'i rjes su bsgom pa'i lam gyi rang bzhin thod rgal gyi snyoms par 'jug pa la snyoms par 'jug ste/'di lta ste/ bsam gtan dang po la snyoms par zhugs te/ de nas gnyis pa dang gsum pa dang bzhi pa dang / gzugs med pa'i dang po dang gnyis pa dang gsum pa dang bzhi pa dang 'gog pa la snyogs par 'jug pa 'di ni song ba gcig go/ /de las bzhengs nas bsam gtan dang po la'o//de nas 'gog pa'o/ /de nas bsam gtan gnyis pa'o/ /de nas 'gog pa'o/ /de nas bsam gtan gsum pa'o/ /de nas 'gog pa'o/ /de nas bsam gtan bzhi pa'o/ /de nas 'gog pa'o/ /de nas nam mkha' mtha' yas skye mched do/ /de nas 'gog pa'o/ /de nas rnam shes mtha' yas skye mched do//de nas 'gog pa'o/ /de nas ci yang med pa'i skye mched do/ /de nas 'gog pa'o/ /de nas 'du shes med 'du shes med min gyi skye mched do/ /de nas 'gog go/ /de nas 'dod pa na spyod pa mnyam par ma bzhag par ltung ba'o/ /song ba gnyis pa'o/ /'dod pas bsdus pa'i sems kyi mtha' ru 'gro bar bya bar bgrod de/de nas 'gog pa la snyoms par zhugs so/ /de nas mnyam par ma bzhag pa la gnas so/ /de nas 'du shes med 'du shes med min gyi skye mched do/ /de nas mnyam par ma bzhag pa la'o/ /de nas ci yang med pa'i skye mched do/ /de nas mnyam par ma bzhag pa la'o//de nas rnam shes mtha' yas skye mched do/ /de nas mnyam par ma bzhag pa'o/ /de nas nam mkha' mtha' yas skye mched do/ /de nas mnyam par ma bzhag pa'o/ /de nas bzhi pa'o/ /de nas gsum pa'o/ /de nas mnyam par ma bzhag pa'o/ /de nas gnyis pa'o/ /de nas mnyam par ma bzhag pa'o//de nas dang po'o/ /de nas mnyam par ma bzhag pa'o/ /'di ni 'ongs pa ste thabs la mkhas pa'i stobs kyis mnyam par bzhag pa nas mnyam par bzhag pa'o/ /mnyam par bzhag pa las mnyam par ma bzhag par kun du rgyu bar gyur pa ni rigs mi mthun par bgrod pa'i 'ongs pa'o//de las song ba dang po la ni gnas dgu'o/ /gnyis pa la ni bcu bdun no/ /'ongs pa la'ang bco brgyad do/ /'o na thod rgal snyoms 'jug ting nge 'dzin mnyam par ma bzhag pa'i sems su ci ltar mi 'gal zhe na/ brjod de/ snyoms par 'jug pa'i kun du rgyu ba la snyoms par 'jug pa nye bar btags pa ni 'gal ba med do//sems bskyed pa drug pa ni rnam pa bdun cu rtsa gcig pa sangs rgyas kyi sa'i bar chad med pa'i lam/ skad cig gcig la mngon par rdzogs par byang chub par mngon par rdzogs pa bdun pa'o/ /bar chad bya ru ni gegs bya bar nus pa ni bar chad do//bar gzhan med pa ni bar chad med pa'o/ /bar chad med pa'i lam/ thams cad kyi chos kyi dbyings kyi ngo bos gcig tu zag pa med pa'i chos mngon par rdzogs par byang chub pa la lan cig gis chos thams cad nges par rtogs pa'i phyir dang / gnyen po bsgom pa'i rnam par smin pa nyid kyis nges par rtogs pa'i phyir dang /rmi lam bzhin du rang bzhin med pa nyid kyis nges par rtogs pa'i phyir dang / sgrib pa gnyis rtsa bas zad pas gnyis su med pa'i de kho na nyid kyi ngo bos nges par rtogs pas ldog pa bzhi'i bdag nyid do/ /'dir byang chub sems dpa' zhing gi tshogs dpag tu med pa rnam pa thams cad rdzogs par byas nas chos thams cad kyi de kho na nyid skad cig gcig la mngon par rdzogs par rtogs par byed pa na/dper na zo chun gyi rgyud mo skyes bus rkang stabs gcig gis bskyod pa na thams cad cig car du g.yo ba de bzhin du sbyin pa la sogs pa'i sems ldan pa gcig kyang mngon du byas pa na zag pa med pa'i ye shes thams cad 'gugs par byed do//nges par byang chub par byed do/ /sngon bsgoms pa'i 'phen pa'i nus pa las so/ /'dir ni bar chad med pa'i lam gyi bdag nyid shes rab kyi pha rol tu phyin pa rnam par smin pa'i chos nyid kyi gnas skabs so//rnam par smin pa'i chos nyid ni rang bzhin gyis rtsol ba med pas 'jug pa'i gnas skabs 'di'o zhes byas nas 'di la yang zag pa med pa dang zag pa dang bcas pa'i chos thams cad de bzhin du cig car du mngon par rdzogs par rtogs pa'o/ / rnam par smin pa'i chos nyid kyi gnas skabs de yang sa brgyad pa nas bzung ste 'byung mod kyi/ 'dir ni khyad par du 'phags pa thob pa yin no/ /de ltar na sems bskyed pa drug gi rang bzhin khyad par gyi lam rtogs pa la byang chub sems dpa' dgra bcom pa'i 'bras bu'i phyir zhugs pa zhes bya'o//byang chub sems dpa' 'di ni smon lam gyis rang sangs rgyas sku can no/ /gang gi dbang du byas nas gsungs pa/ shA ri'i bu byang chub sems dpa' gang sangs rgyas med cing nyan thos dang bral ba'i 'jig rten gyi khams su rang rgyal gyi byang chub tu mngon par rdzogs par sangs rgyas te/ de thabs la mkhas pa'i stobs kyis srog chags bye ba khrag khrig brgya stong phrag mang po rnams theg pa gsum gyis yongs su smin par bya ste/ bla na med pa yang dag par rdzogs pa'i byang chub tu mngon par rdzogs par sangs rgyas pa dag yod do/ /'di ni bdag nyid gcig pu gcig sangs rgyas te/rang nyid ces pa rang byung ngo / /sgra med par chos ston pa'o/ /rang sangs rgyas rnam pa gnyis te/ 'di lta ste/ rang sangs rgyas dang chos mthun pa ste/ gcig pu bdag dang gzhan mnyam par sangs rgyas kyi chos rnams gsal bar byed pa'i phyir ro/ /gzhan ni rang sangs rgyas su sprul pa yin pa yang byed pa'i phyir ro//de de ltar rgyun du zhugs pa'i 'bras bu'i phyir zhugs pa dang / rgyun du zhugs pa dang / lan cig phyir 'ong ba'i 'bras bu'i phyir zhugs pa dang / lan cig phyir 'ong ba dang / phyir mi 'ong ba'i 'bras bu'i phyir zhugs pa dang / phyir mi 'ong ba dang / dgra bcom pa'i 'bras bu'i phyir zhugs pa dang / gang zag bdun no/ /rab tu dbye bas bcu dgu'o/ /rang sangs rgyas dang nyi shu'o/ /slob pa rnams 'dus pa'i phyir mi ldog pa'i byang chub sems dpa'i 'phags pa'i dge 'dun no/ /lha dang bcas bdud dang bcas pa'i 'jig rten gyi sa dang dman pa'i byang chub kyi sgrub byed kyis dang mi dge ba'i chos rnams kyis yang dag par rdzogs pa'i byang chub las mi phyed cing mi 'phrogs pa'o//kha cig tu rdo rje lta bu'i sems ni mi slob pa zhes gsungs te/ mi slob pa rnam par grol ba sangs rgyas pa'i bar chad med pa'i lam nyid yin pa'i phyir ro//so so skye bo ni slob pa yin zhing mi slob pa yin te slob par brjod du med do/ /'o na ci 'das pa'am ma 'ongs pa'am da ltar ba'i sems rnam par grol zhe na/ smras pa/ ma 'ongs pa'i sems skye bzhin pa mi slob pa sgrib pa las rnam par grol lo/ /'o na lam gyi gnas skabs de las skyes pas sgrib pa spong ba ci zhe na/smras pa/ 'gag bzhin pa nyid kyi lta bu'o/ /'o na sa brgyad pa la phyir mi ldog pa nyid du gsungs pa/ 'dir thams cad ci ltar zhe na/ smras pa/ dbang po rnon po'i byang chub sems dpa' so so skye bo'i gnas skabs mos pas spyod pa'i sa'i tshu rol du yang zhi gnas dang lhag mthong bsgoms pas shes rab kyi pha rol tu phyin nges pas dang snying rje chen po dang ldan pas tshogs gnyis rdzogs pa'i phyir rgyun du mngon par sbyor ba'i dga' ba ni phyir mi ldog pa nyid do//dbang po 'bring ni rab tu dga' ba la phyir mi ldog pa'o/ /dbang po rtul po rnams ni mi g.yo ba la phyir mi ldog pa'o//ring du song ba la thams cad phyir mi ldog pa nyid do zhes kha cig go/ /ldog pa'i ched du skye ba ni phyir ldog pa'o/ /phyir mi ldog pa ni de bzhin ma yin pa'o/ /de yang / rtogs pa'i don byang chub mchog la sogs pa'i rang bzhin chos ni rnam pa lnga ste/ 'di lta ste/ bsgrubs pa dang / bskyed pa dang /bsam pa dang / bsam gyis mi khyab pa dang / yongs su grub pa'o/ /mdo sde rgyan las dpe lngas bstan par rig par bya'o/ /de la kun du rdzogs pa'i theg pa chen po thos pa'i rang bzhin la sogs pa'i shes pa skye ba'i rim gyis log par rtog pa thams cad bsal nas skyabs dkon mchog gsum la brten te sgrib pa spong zhing mngon par shes pa la sogs pa khyad par can gyi yon tan 'phags pa'i nor la longs spyod pa'i rgyu nyid du rig par byas nas/'dun pa la sogs pa'i sems rab tu bsgrubs pas/ ci srid du mos pas spyod pa'i sa la bsgrubs pa sems bskyed pa'i ngo bo chos gser bzang po lta bu dga' ba dam pa skye bar byed do//sa rab tu dga' ba lhag pa'i bsam pa dag pa la mthong bas spang bar bya ba nyon mongs pa khyad par du dben pas bskyed pa mngon du byed pas skyed pa de kho na nyid kyi ngo bo chos pad ma rgyas pa lta bu'o/ /de nyid rtsol ba dang bcas pa mtshan ma med pa la gnas pa'i sa dri ma med pa la sogs pa drug tu bsam par byed pa na tshogs gnyis nus pa dang ldan pa ni legs par byas pa'i zas zos pa lta bu'o//rtsol ba med pa mtshan ma med pa la gnas pa/ sa mi g.yo ba la sogs pa gsum la sngon gyi tshogs yongs su smin pa bsam gyis mi khyab pa/ legs pa'i phrin yig rig pa bzhin no//sangs rgyas kyi sa la yongs su grub pa ste/ byang chub rang bzhin rnam pa thams cad mkhyen pa nyid thob pa sgrib pa thams cad spangs pa nyid rin po che'i sgrom sgo phye ba lta bu nyid de/ sangs rgyas nyid ston par byed do/ /de ltar sangs rgyas dang byang chub sems dpa' rnams kyi rtogs pa'i rnam pa mtha' med cing mtha' yas pa phyogs tsam yang brjod pa'i nus pa med pas gzhag go//cung zad brjod par bya ste/ 'di lta ste/ rtogs pa'i chos rnams shes rab kyi pha rol tu phyin par gcig pas rnam pa gcig go/ /'jig rten dang 'jig rten las 'das pa'i dbye bas dang / rgyu dang 'bras bu'i dbye bas rnam pa gnyis so//rnam pa gsum ste/ de bzhin nyid kyi gnas skabs gsum ste/ 'di lta ste/ so so skye bo'i gnas skabs su de bzhin nyid ma dag pa'i gnas skabs te de bzhin gshegs pa'i snying po can ming can no/ /ma dag pa dang dag pa ste/ rab tu dga' ba la sogs pa'i byang chub sems dpa'i sa bcu la rab kyi rab la sogs pa nyon mongs pa'i rnam pa ci rigs par srid pa'i phyir ro//shin tu dag pa ni sangs rgyas kyi sa'o/ /yang na byang chub sems dpa'i sa rnam pa gnyis te/ 'di lta ste/ sa bdun rnams rtsol ba dang bcas pa'i yid la byed pa nyid yin pas ma dag pa'o//mi g.yo ba la ni sogs pa ni sa ma dag pa'o/ /shin tu mchog tu dag pa ni de bzhin gshegs pa'i sa'o/ /theg pa chen po rgyud bla ma la rtogs pa po'i sgo nas rnam pa bzhi gsungs te/ 'di lta ste/ rab tu dga' ba la dang po sems bskyed pa'i byang chub sems dpa'o/ /dri ma med pa la sogs pa drug la spyod pa la zhugs pa ste/nye bar gos pa med pa'i spyad pa spyod pas so/ /mi g.yo ba la phyir mi ldog pa'o/ /chos kyi sprin la skye ba gcig gis thogs pa ste/ sangs rgyas kyi sa la skye ba tha ma gcig gis thogs pa'i phyir ro/ /'phags pa rnam par grol ba'i sde na re/ mos pas spyod pa'i sa la dang po theg pa la zhugs so//rab tu dga' ba la sogs pa'i sa bdun pa spyod pa la zhugs pa'o/ /mi g.yo ba la sogs pa'i sa gsum la phyir mi ldog pa'o/ /sa bcu pa la skye ba gcig gis thogs pa'i byang chub sems dpa'o zhes gsungs so/ /mdo sde rgyan las/ byang chub sems dpa' rnams kyi sems bskyed pa ni rnam pa bzhi ste/'di lta ste/ mos pas spyod pa'i sa la mos pa las byung ba'o/ /sa bdun pa lhag pa'i bsam pa rnam par dag pa las byung ba'o/ /brgyad pa la sogs pa rnams la rnam par smin pa las byung ba'o/ /sangs rgyas kyi sa la ni sgrib pa med pa'o//'phags pa lang kar gshegs pa'i mdo las/ sa bdun rnams la sogs yin no/ /snang ba med pa'ang sa brgyad 'dir/ /sa gnyis la 'dir rnam par gnas/ /lhag ma sa ni nga yi dngos/ /zhes so/ /slob dpon dbyig gnyen gyis kyang gzhung 'grel las rnam pa lngar bkral lo/ / 'di lta ste/ sa dang po rab tu dga' ba la lhag pa'i bsam pa rnam par dag pa'o/ /sa drug la rtsol ba bcas pa mtshan ma med pa la gnas pa'o/ /brgyad pa la rtsol ba med pa mtshan ma med pa la gnas pa'o/ /sa gnyis la nges pa'i spyod pa la rab tu zhugs pa'o/ /de'i steng du skye ba gcig gis thogs pa'i byang chub sems dpa'o zhes so//de rnams la sogs pa mnyam pa med pa'i brtse ba'i rang bzhin gyi sku kun byang chub sems dpa' rnams kyi mngon par 'dod pa sna tshogs gdul bya'i bsam ngo las rnam par gzhag pa mthar thug pa med mod kyi/ gdul bya'i bsam ngo las de rnams ni mi 'gal ba nyid do//'bad pas don du gnyer bar bya'o/ /gal te yod med thams cad legs par gnas pas gzhag go/ /da ni skabs su bab pa brjod par bya'o/ /de nas bar chad med pa'i lam gyi de ma thag tu rnam par grol ba'i lam gyi rang bzhin 'du shes med 'du shes med min skye mched du mi mthun pa'i phyogs chung ngu'i chung ngu rnam pa bdun cu rtsa gnyis pa'i gnyen po chen po'i chen po rnam pa bdun cu rtsa gnyis pa'o//nyon mongs pa dang shes bya'i sgrib pa ma lus pa spangs pas shin tu rnam par dag pa'i ngo bo'o/ /nyer gcig pa dang nyer gnyis pa'i sems bskyed pa dag ni mnyam bzhag dang rjes kyi rang bzhin/kun du bzang po zhes bya ba'i ming bla dgas gzhan kun du 'od do/ /sangs rgyas kyi rnam pa thams cad mkhyen pa nyid dang des 'bras bu'i gnas skabs chos kyi sku'i mngon par rtogs pa brgyad pa'o/ /chos ni lam ste mngon par rtogs pa bdun gyi ngo bo'o/ /chos kyi thob bya las kyi ni chos sku'o zhes shes nas/'di dag rtogs pa las bcom ldan 'das ni 'bras bu la gnas pa mi slob pa ste/ 'khor ba dang mya ngan las 'das pa mnyam pa nyid bdag nyid yin pas so/ /chos kyi sku de ni rnam pa bzhi ste/ 'di lta ste/ ngo bo nyid kyi sku dang / longs spyod rdzogs pa'i sku dang / sprul pa'i sku dang / mdzad pa'o//de sangs rgyas rnams kyi sku ni gsum ste/ bcom ldan 'das ma chen mo las gsungs te/ rnam pa thams cad yongs su dag pa zag pa med pa'i chos rnams kyi rang bzhin gang yin pa de ni de bzhin gshegs pa dgra bcom pa yang dag par rdzogs pa'i sangs rgyas su rig par bya'o zhes ni chos kyi sku'o//gzhan yang chos de rnams nyid rtogs pa las bla na med pa yang dag par rdzogs pa'i byang chub tu mngon par rdzogs par sangs rgyas pa/ de bzhin gshegs pa dgra bcom pa yang dag par rdzogs pa'i sangs rgyas mtshan bzang po sum cu rtsa gnyis dang dpe byad bzang po brgyad cus brgyan pa'i sku/ bla na med pa'i dga' ba mchog tu dga' ba bde ba nye bar longs spyod par bya ba'i ched du dam par gyur pa theg pa chen po'i chos ston pa ni longs spyod rdzogs pa'i sku'o//gzhan yang chos de rnams nyid rtogs pa las bla na med pa yang dag par rdzogs pa'i byang chub tu mngon par rdzogs par sangs rgyas pa de bzhin gshegs pa dgra bcom pa yang dag par rdzogs pa'i sangs rgyas phyogs bcu mtha' yas mu med pa'i 'jig rten gyi khams su thams cad du sprul pa sna tshogs kyi sprin gyis sems can thams cad kyi don byed pa ni sprul pa'i sku'o//de la ngo bo ni rang bzhin te/ rang bzhin nyid ni ngo bo'o//rang bzhin las byung ba rnam par dag pa'i mthar rab tu phyin pa ni ngo bo nyid kyi sku'o/ /de yang byang chub kyi phyogs kyi chos rnams kyi rang bzhin mi skye ba/ ma byas pa 'dus ma byas pa 'jig rten las 'das pa'i lam gyis thob par bya ba/ sgro btags pa'i spros pa ma lus pa log pa rang bzhin med pa nyid ni ngo bo nyid kyi sku'o//ta phyi pa dang b+hA ba'i rkyen bstan pa dag las/ chos nyid kyi sku ni chos sku'o zhes brjod do/ /'di ru rnam par rtog pa thams cad nub pa ni mya ngan las 'das pa zhes brjod do/ /rgyal po la gdams pa rin po che phreng ba'i rnam 'grel las/ chos nyid kyi sku ni chos sku'o/ /de ni chos thams cad kyi lus nyid yin pas 'gro ba thams cad kyi de bzhin nyid rang bzhin las ma 'das pa'i phyir dang /'jig rten dang 'jig rten las 'das pa'i yon tan thams cad kyi rten yin pa nyid kyi sku'o/ /rten gyi ngo bo yang yon tan thams cad 'jug par blta bar bya'o zhes gsungs so/ /de ltar na rten chos rnams kyi chos nyid de kun rdzob kyis de las byung ba'am de'i bdag nyid las so//de nyid kyi chos kyi sku'i sgras ngo bo nyid kyi sku brjod pa'o/ /de yang yang dag par rdzogs pa'i sangs rgyas nyid kyis so sor rang rig pa'o/ /gang ston pa rang gi chos bstan pa las sa bcu'i dbang phyug rnams zab pa rgya che ba'i chos bstan pa thos nas mchog tu kha na ma tho ba med pa theg pa chen po'i chos kyi longs spyod dga' ba bde ba nyams su myong ba ni longs spyod/yang dag par longs spyod pa ni longs spyod rdzogs pa'o/ /yang na byang chub sems dpa' rnams kyis yang dag par 'tshogs nas longs spyod pa ni longs spyod rdzogs pa'o//longs spyod pa'i ched du nus pa ni longs spyod rdzogs pa'i sku'o/ /yang na longs spyod par bya ba'i sku ni longs spyod rdzogs pa'i sku'o/ /yang na longs spyod rdzogs pa'i ched du sku ni longs spyod rdzogs pa'i sku'o/ /rang don phun sum tshogs pa'i ngo bo gzhan don byed pa mtshan dang dpe byad 'bar ba'o//yang na zab cing rgya che ba'i chos bstan pas byang chub sems dpa' rnams yongs su skyong bar byed pa'am/ yang dag par mnyes par gsol bar byed pa ni longs spyod rdzogs pa'i sku'o/ /yang na 'dir chos de dag bstan pa las byang chub sems dpa' rnams kyis de'i brjod bya dag nyams su myong ba las kun du spyod pa ni longs spyod rdzogs pa'i sku'o//sprul pa ni sprul pa nyid des grub pa'i sku ste sprul pa'i sku'o/ /de yang / thams cad du thams cad kyi tshe 'khor ba ci srid du nam mkha' ci srid du dus ci lta ba bzhin du bsam pa ji lta ba bzhin du mngon par mtho ba ma lus pa nges par legs pa ma lus pa yang dag par sgrub pa ni sprul pa'i las dang sprul pa'i sku'o//de bzhin gshegs pa shAkya thub pa la sogs pa'i ngo bo rang gzhan don phun sum tshogs pa'o zhes so/ /de bzhin du yang / dge bsnyen chen po zla ba'i zhal nas/ chos kyi sku'i dbang du byas nas gsungs pa/'di yi chos sku de bzhin nyid/ /rnam rtog rnams kyi spyod yul min/ /sems can rnams dang don rnams kyi/ /rang bzhin de dag gnyis su med/ /sna tshogs ngo bo'i sku rnams dang / /'gro rnams de nyid ngo bo rnams/ /gang du ro gcig 'gro 'gyur ba/ /rgya mtshor 'bab pa'i chu bo bzhin/ /rnam pa 'di 'dra'i sku de ni//skyob pa rnams kyi chos sku ste/ /rnam pa thams cad rnam dag pa/ /rdzogs byang chub kyi spyod yul nyid/ /de yis nus pa rang dang gis/ /dus rnams kun du 'jig rten du/ /mtha' yas don rnams byed pa ni/ /nyi ma'i 'od zer lta bu'o/ /longs spyod rdzogs pa'i dbang du byas pa ni//dmus long lta bus bdag spangs nas/ /rang nyid bsod nams bsags can gyis/ /de ni gcig pu cig car du/ /nyi ma lta bur kun gyis mthong / /'on pa lta bu bdag spangs nas/ /bsod nams nor bsags snyan rnams kyis/ /dam chos bdud rtsi'i bcud len ni/ /de la de ring yang ldan nyid//ces so/ /sprul pa'i sku'i dbang du byas pa ni/ /mtha' yas phyogs su mtha' med pa'i/ /sems can theg pa gsum gyis 'dir/ /yang dang yang du rnam dag byed/ /sa bon ci bzhin bsam ci bzhin/ /zhes so/ /des na sangs rgyas rnams kyi sku ni gsum nyid do/ / byang chub phyogs la sogs pa chos kyi phung po ni ngo bo nyid kyi skus yongs su bsdus pa ste/ chos dang chos nyid dag dbye ba med pa'i phyir ro/ /kun rdzob tu de rnams kyi mtshan nyid tha dad pa'o/ /gzhan dag [(]du [,]tu [)]chos kyi phung po 'di ni longs spyod rdzogs pa'i skus bsdus so zhes pa'ang rung ngo / /kha cig na re byang chub phyogs la sogs pa'i chos kyi phung po ni sku bzhi pa'o zhes nges par 'chad do//'di ni bsam par bya'o/ /sku gsum po 'di ni rtag pa nyid de/ de la ngo bo nyid kyi sku ni rang bzhin gyis rtag pa nyid kyis rtag pa ste/ thog ma dang tha ma med pas so/ /longs spyod rdzogs pa'i sku ni nyams pa med pas rtag pa ste/dang po ldan yang tha ma med pas so/ /de bzhin du byang chub phyogs kyi chos kyang ngo / /sprul pa'i sku ni rgyun rtag pa nyid kyis rtag pa ste/ mi snang zhing nub kyang yang dang yang du bar med pas yul gyi dbye bas rtag tu 'jug pa'i phyir ro/ /de bzhin du phrin las kyang rtag pa'o/ /des na chos kyi sku ni bcom ldan 'das kyi don dam pa pa'i sku ste/gang yang dag pa'i de bzhin nyid rnam par dag pa rab tu grub pa'o/ /kha cig tu de bzhin nyid ces pa dang chos nyid ces pa ni spyi'i tshig go/ /yongs su dag pa dang yongs su ma dag pa'i de bzhin nyid dag don dam par na dbye ba med do zhes bstan pa'i don du'o/ /gang yang chos kyi sku la rag las pa sangs rgyas su byed pa'i chos byang chub phyogs la sogs pa/longs spyod rdzogs pa'i sku dang sprul pa'i sku rnams te de gsum ni sangs rgyas de rnams kyi kun rdzob pa'i sku'o/ /'jig rten las 'das pa'i lam gyis 'dus byas pa rang bzhin med pa'i chos nyid kyi rang gi ngo bo'o//de la sangs rgyas su byed pa'i chos byang chub phyogs la sogs pa ni yang dag par rdzogs pa'i sangs rgyas kyi spyod yul lo/ /longs spyod rdzogs pa'i sku ni sa bcu pa'i dbang phyug rnams kyi spyod yul lo/ /sprul pa'i sku ni de dang gzhan byang chub sems dpa' la sogs pa rnams kyi spyod yul lo//de bzhin du chos kyi sku'i mngon par rtogs pa sems bskyed pa gnyis kyi bdag nyid/ sku gsum du snang ba'o/ /de la sems bskyed pa nyer gcig pa ni dngos gzhi ste chos dang longs spyod rdzogs pa'i sku rtogs pa'o/ /sems bskyed pa nyer gnyis pa ni rjes la thob pa sprul pa'i skur snang ba'o/ / des na chos sku nyid ni longs spyod rdzogs pa'i sku'i snang ba skyed par byed pa/ 'jig rten ma lus pa'i gzhan don rdzogs par byed pa'o/ /sems bskyed pa de gnyis ni/ ye shes lnga'i rang bzhin te/ de bzhin du 'phags pa sangs rgyas kyi sa'i mdo las gsungs te/ rnam pa lngas sangs rgyas kyi sa spyir bsdus par rig par bya'o//lnga gang zhe na chos kyi dbyings rnam par dag pa dang / me long lta bu'i ye shes dang / so sor rtog pa'i ye shes dang / /mnyam pa nyid kyi ye shes dang / /bya ba sgrub pa'i ye shes so/ /'dir chos dbyings rnam par dag pa shin tu rnam par dag pa'i chos dbyings/ shin tu rnam par dag pa'i chos rnams kyi chos nyid zhes bya ba ni don tha dad pa med do//de bzhin du dngos gzhi'i sems bskyed pa yang ye shes bzhi bdag nyid du rnam par bzhag ste/ des na shin tu rnam par dag pa'i chos kyi dbyings kyi ye shes dang me long lta bu'i ye shes dag chos sku rtogs pa'o/ /gang du mdo sde rgyan las/me long ye shes longs spyod rdzogs sangs rgyas/ /zhes so/ /'di longs spyod rdzogs pa sangs rgyas kyi rgyu nyid yin pas/ longs spyod rdzogs pa'i sangs rgyas zhes brjod do zhes 'grel pa byed pas so/ /des na me long lta bu'i ye shes nyid las ma lus pa'i longs spyod dang sprul pa'i 'khor lo rab tu 'jug go zhes gsungs so//mnyam pa nyid dang so sor rtog pa'i ye shes ni longs spyod rdzogs pa'i sku'o/ /rjes kyi sems kyi bdag nyid sprul pa'i sku bya ba sgrub pa'i ye shes so/ /de la de shin tu rnam par dag pa'i chos kyi dbyings kyi ye shes ni/ gang bag chags dang bcas pa'i sgrib pa rnam pa gnyis dang bral ba brtse ba shes rab gnyis su med pa chos kyi dbyings rtogs pa rdzogs pa/spangs pa dang rtogs pa phun sum tshogs pa/ yang dag pa'i don bsgoms pa phul du phyin pa las skyes pa yang dag pa'i don gsal bar gyur pa nyid kyis mi slu ba'i tshad ma rtog bral ma 'khrul pa nyid yin pas mngon sum ci lta ba thams cad mkhyen pas bcom ldan 'das so//de'i tshe me long lta bu'i ye shes ni/ gang du mtshams med pa khams kyi rdul phran so so dang sems dang cig shos kyi dngos po thams cad/ ci ltar yun ring ba dang cig shos dang dus 'das pa dang ma 'ongs pa dang da ltar ba'i gnas skabs so sor me long du gzugs brnyan shar ba bzhin du gsal bar so sor snang ngo //de nas mnyam pa nyid kyi ye shes ni/ gang gis de bzhin du gzugs brnyan shar ba'i 'gro ba rnams chos la bdag med pa mnyam pa nyid bsgrubs nas des thams cad du sems can thams cad la sems mnyam pa nyid rab tu brnyes pa'o//de nas so sor rtog pa'i ye shes ni gang gis de bzhin du mnyam par gzhag pa nyid bcom ldan 'das rnam rtog med kyang / rang gi sngon gyi smon lam dang / sems can gyi bsod nams kyi bdag po las sems can rnams kyi sems kyi spyod pa so sor rtog pa nyid do/ /de nas bya ba sgrub pa'i ye shes ni/gang gis de bzhin du so sor brtags pa nyid kyis 'gro ba'i bya ba rjes su sgrub pa'o/ /ye shes bzhi po de rnams ni rtogs pa phun sum tshogs pa'o/ /de bzhin du mngon sum ji snyed pa thams cad mkhyen pa bcom ldan 'das so/ /phrin las rnam pa nyi shu rtsa bdun te/ 'di lta ste/ bcom ldan 'das de gzugs su sprul te gang dmyal ba pa rnams kyi dmyal ba'i me sbubs nas/ dud 'gro rnams la rang gi sha la sogs pa byin zhing yi dags rnams la bza' btung la sogs pa phyin te/ chos bstan pas sems mngon par dang bas/ de rnams lha dang mi rnams su skye bar byed do/ /lha rnams kyang theg pa dman pa la mos pa rnams la chos bstan pas mngon par rab tu dang bas mi rnams su skyes pa nas ci srid du nyan thos kyi byang chub la rab tu 'jog par byed pa ni 'gro ba zhi bar byed pa'i las so//gang dag mi rnams la phyi dang nang gi bdag nyid kyi zang zing gi sbyin pa dang 'jig rten dang 'jig rten las 'das pa'i chos kyi sbyin pa dang /don spyod pa dang don mthun pa rnams la slob par byed pa ni bsdu ba'i dngos po la bkod par byed pa'i las so/ /shes bya'i sgrib pa dang nyon mongs pa'i sgrib pa dag gis kun nas nyon mongs pa dang rnam par byang ba de dag nub par gyur pa ste/ de'ang gang zag dang chos la bdag med pa shes pa las zhes pa ni kun nas nyon mongs pa dang rnam par byang ba shes pa la dgod pa'i las so//ci ltar sgyu ma'i rnam pa sna tshogs pas dngos po rnams sprul te/ sgyu ma'i dngos po de thams cad la/ rdzas med pa zhes 'jig rten rnams mi shes so/ /gang yang shes rab kyi pha rol tu phyin pa la spyod pa de ni phung po la sogs pa rnams rang bzhin stong pa nyid du ro gcig pa nyid du blta'o//don dam par ni sems can med cing sems can du btags pa yang med do/ /chos rnams ni rang bzhin stong pa nyid yin pas so zhes pa ni sems can gyi don ci lta ba'i bdag nyid la dgod pa'i las so//de sbyin pa sbyin par byed cing / gzhan yang sbyin pa la sbyor bar byed pa'o/ /de bzhin du tshul khrims srung bar byed pa la sogs pa brjod par bya'o zhes pa ni pha rol tu phyin pa drug la dgod pa'i lam mo/ /de dag dge ba bcu yang dag par blangs te 'jug go zhes pa la sogs pa ni sangs rgyas kyi lam la dgod pa'i las so//byang chub sems dpa' rnams kyi pha rol tu phyin pa la sogs pa'i chos rnams/ de rnams kyi mtha' gsum dang 'bras bu dag rang bzhin gyis stong pa nyid du ston par byed cing / de de dag sgom par byed de/ ci srid du bla na med pa'i byang chub tu 'gro'o zhes pa ni rang bzhin stong pa nyid la dgod pa'i las so//chos thams cad rang bzhin stong pa nyid rang bzhin stong pa nyid ni chos thams cad de/ de nyid ni rang bzhin stong pa nyid do zhes pa ni/ gnyis su med pa'i chos la dgod pa'i las so/ /yang dag par rdzogs pa'i byang chub la bcom ldan 'das don dam par na chos 'ga' zhig nye bar mi dmigs so//kun rdzob tu chos rnams mngon par rdzogs par byang chub nas phung po khams la sogs pa dang pha rol tu phyin pa la sogs pa dang rnam pa thams cad mkhyen pa nyid la sogs pa ston pa ni brda can gyi shes pa la dgod pa'i las so/ /gang gis pha rol tu phyin pa la sogs pa'i chos rnams la spyod cing de rnams kyi mtha' gsum dang 'bras bu dag nye bar mi dmigs pa/de'i tshe yang dag par rdzogs pa'i byang chub ched du nus pa'o zhes pa ni mi dmigs pa la dgod pa'i las so/ /gang gi tshe yang byang chub sems dpa' shes rab kyi pha rol tu phyin pa la spyod pa na don dam par sems can nye bar mi dmigs te/de ltar yin yang kun rdzob tu sems can rnams dngos po la mngon par zhen pas kun nas nyon mongs par byed do/ /de de'i de dag spang ba'i ched du theg pa gsum la yongs su smin par byed do zhes pa ni/ sems can yongs su smin pa la dgod pa'i las so//de pha rol tu phyin pa la sogs pa re re la spyod cing dkar po'i chos thams cad dang chos thams cad stong pa nyid la sems can rnams slob par byed pa'o zhes pa ni byang chub sems dpa'i lam la dgod pas so/ /de 'di ltar yongs su rtog ste/ chos thams cad stong pa nyid do/ /stong pa nyid kyi stong pa nyid la mngon par zhen pa ni ma yin no//sbyin pa la sogs pa la spyad par bya zhing de la'am de'i 'bras bu la rlom par mi bya'o zhes pa ni mngon par zhen pa thams cad spang ba la dgod pa'i las so/ /byang chub nyid ni lam yin/ lam nyid ni byang chub bo/ /des na byang chub sems dpa' sangs rgyas su mi 'gyur ro//de yang sangs rgyas kyi chos thams cad yongs su rdzogs nas gang gi tshe rdzogs pa'i byang chub tu lhag par dgod pa de'i tshe de bzhin gshegs pa nyid do zhes pa ni byang chub thob pa la dgod pa'i las so/ /de phung po skye mched la sogs pa chos thams cad 'du shes gnas ngan len bzlog cing bdag dang gzhan pha rol tu phyin pa la sogs pa dge ba'i chos thams cad la 'jog par byed do//dge ba de dag rang gi dang gzhan gyis rdzogs pa'i byang chub dang rang gi sangs rgyas kyi zhing yongs su dag pa dag tu yongs su sngo bar byed cing smon lam yang 'debs par byed do zhes pa ni/ sangs rgyas kyi zhing yongs su dag pa la dgod pa'i las so/ /byang chub sems dpa' dang po sems bskyed pa nyid rdzogs pa'i byang chub nges pa nyid yin no/ /nges pa na ngan song du skye ba med do zhes pa ni rdzogs pa'i byang chub nges pa la dgod pa'i las so/ /de shes rab kyi pha rol tu phyin pa la gnas shing phyogs bcu grangs med pa'i 'jig rten gyi khams su sems can rnams kyi don byed cing gos pa med de/stong pa nyid la gnas pas dkar po'i phyogs kyi chos thams cad la gnas pa yin te/ chos thams cad las stong pa nyid gzhan nyid med pas so zhes pa ni gzhal du med pa'i sems can don la dgod pa'i las so//de 'di bzhin du dpyod par byed de/ gang dag gang gA'i klung gi bye ma dang mnyam pa'i phyogs bcu'i 'jig rten gyi khams dang / gang dag de rnams kyi de bzhin gshegs pa dang / de rnams thams cad rang bzhin gyis stong pa nyid do/ /gang tshe yang 'ga' zhig stong pa nyid ma yin par gyur na de nyi tshe bar 'gyur ro//des na chos thams cad chos thams cad kyis stong pa'o zhes shes rab kyi pha rol tu phyin pa la gnas te mngon par shes pa drug mngon par sgrub par byed do zhes pa ni phyogs bcu'i sangs rgyas nye bar dgod pa la sogs pa la dgod pa'i las so/ /byang chub sems dpa'i byang chub yan lag gang zhe na/pha rol tu phyin pa drug nas sangs rgyas kyi chos ma 'dres pa'i bar du zhes pa ni byang chub yan lag la dgod pa'i las so/ /gang gi tshe yang don dam par na chos thams cad rang gi mtshan nyid stong pa'o/ /de ltar na yang kun rdzob tu las yod de'i 'bras bu dag yod do//sems can rnams kyi chos rnams rang gi mtshan nyid stong pa nyid mi shes so/ /ma shes pas gang zag dang chos dag tu rtog par byed cing las mngon par 'du byed do/ /des nyes par spyad pas ngan song gsum du ltung ngo / /legs par spyad pas lha dang mi rnams su nye bar skye'o/ /kha cig yang gang zag la bdag med pa rab tu goms pas bde 'gro dang ngan 'gro spangs nas mya ngan las 'da' bar 'gro bar 'gyur ro//byang chub sems dpa' ni bdag med gnyis rnam par goms nas pha rol tu phyin pa la sogs pa dge ba'i chos rnams yongs su rdzogs par byas nas rim gyis sa bcu bgrod de/skad cig gcig la yang dag par ldan pa'i shes rab kyis chos thams cad mngon par rdzogs par byang chub pa sangs rgyas bcom ldan 'das su 'gyur ro zhes pa ni las dang 'bras bu 'brel pa rnam par ma nyams pa la dgod pa'i las so/ /byang chub sems dpa' ni bden pa shes pas mya ngan las 'da' ba ma yin te/de lta mod kyi bden pa bzhi rang bzhin med pa nyid kyis sdug bsngal yongs su shes so/ /kun 'byung ba rab tu spangs so rab tu 'gog pa mngon du byed do/ /lam sgom par byed do zhes pa ni bden pa bzhi la dgod pa'i las so/ /rtag pa bde ba dag bdag gi phyin ci log bzhi ni gang zag la bdag med pa'i mi mthun phyogs so//dngos po la mngon par zhen pa ni chos la bdag med pa'i mi mthun phyogs so zhes phyin ci log la dgod pa'i las so/ /phyin ci log gis sems can rnams las mngon par 'du byed do/ /de nas tha snyad kyis 'jig rten rnams kun nas nyon mongs pa dang /don dam par na phyin ci log ni dngos po med pa nyid shes pa dgod pa'i las so/ /gang chos thams cad kyi mnyam pa nyid de bzhin nyid yang dag pa'i mtha' mya ngan las 'das pa'o zhes pa ni rnam par byang ba la dgod pa'i las so/ / sems can thams cad kyi phyin ci log rab tu spang ba'i ched du byang chub sems dpa' tshogs sogs pa la spyod cing ci srid du mngon par rdzogs par byang chub nas sems can yongs su smin par byed do zhes pa ni rnam par byang ba dang tshogs la dgod pa'i las so/ /chos nyid ni mnyam pa nyid de/chos nyid la tha dad pa nyid yod pa ma yin no/ /de ni 'dus byas ma yin 'dus ma byas ma yin no/ /gang 'dus byas kyi dbyings dang 'dus ma byas kyi dbyings dag kun du ldan pa ma yin mtshan ma nyid dag pa'o zhes 'dus byas dang 'dus ma byas tha dad med pas shes pa la dgod pa'i las so/ /chos thams cad rang bzhin gyis stong pa ste de bzhin gshegs pas ma byas pa gang dag rang bzhin stong pa nyid ni dngos po dngos po med par mchog tu 'dzin pa zad pas mya ngan las 'da'o zhes pa ni mya ngan las 'da' ba la dgod pa'i las so//phrin las ni kun spyod do/ /de'i khyab pa nyid ni phyogs bcu'i 'jig rten khams su gnas pa'i sems can thams cad la rnam pa thams cad kyis snod ci lta ba bzhin du rnam par thar pa med pas nam mkha' ci srid du 'jug pa'o zhes so//gzhan dag ni/ 'gro ba bzang po dang bzang po ma yin pa mngon par zhen pa'i gnas skabs ma yin pa'i mtshan nyid ni 'gro ba zhi ba'i las dang /bsdu ba'i dngos po bzhi la dgod pa'i las dang / thos pa'i rang bzhin la sogs pas shes pas mi mthun pa'i phyogs dang gnyen po dag spang bya dang spang bya'i sgo nas rtogs pa'i sgo nas nyon mongs pa'i rnam par byang ba rtogs pa la dgod pa'i las dang / gzhan don du byams pa la sogs pa'i mtshan nyid ni sems can gyi don ci lta ba'i bdag nyid la dgod pa'i las dang /pha rol tu phyin pa drug goms pa la dgod pa'i las dang / dge ba bcu'i las kyi lam dang sangs rgyas kyi lam la dgod pa'i las dang / chos thams cad rang bzhin stong pa nyid goms pa la dgod pa'i las dang /sbyin pa la sogs pa'i mthus sa dang po la thams cad du chos dbyings mngon du rtogs pa'i mtshan nyid gnyis zad pa la dgod pa'i las dang / sa gnyis pa la sogs pa la tshogs yongs su rdzogs pa'i rgyur gyur pa tshul khrims la sogs pa'i pha rol tu phyin pa chos thams cad brdar btags pa'i shes pa la dgod pa'i las dang /shes rab kyi pha rol tu phyin pa'i mthus sa drug pa la shes pa shes bya sgom pa mngon par zhen pa med pa'i mtshan nyid chos thams cad mi dmigs pa la dgod pa'i las dang / bdun pa la thabs kyi pha rol tu phyin pa'i stobs kyis sems can yongs su smin pa la dgod pa'i las dang /brgyad pa la stobs kyi pha rol tu phyin pa'i mthus nyan thos la sogs pa thun mong ma yin pa'i byang chub sems dpa'i lam la dgod pa'i las dang / sa de nyid la sgom par mngon par zhen pa spong ba la dgod pa'i las dang / dgu pa la smon lam gyi pha rol tu phyin pa'i nus pa las byang chub yang dag par thob pa la dgod pa'i las dang /bcu pa la ye shes kyi pha rol tu phyin pa'i stobs las sangs rgyas kyi zhing rnam pa gnyis yongs su sbyong ba la 'god pa'i las dang / sa de nyid la skye ba gcig gis thogs pa'i rang bzhin yang dag par rdzogs pa'i byang chub tu so sor nges pa la 'god pa'i las dang /phyogs bcu'i 'jig rten khams kyi sems can don la 'god pa'i las dang 'jig rten khams thams cad du sangs rgyas nye bar 'chags pa la sogs pa'i yon tan la 'god pa'i las dang / de nyid kyi khyad par gyi lam gyi rang bzhin la byang chub ma lus pa thob par byed pa'i chos kyi mtshan nyid byang chub kyi yan lag la 'god pa'i las dang /las 'bras 'brel pa rnam par mi nyams pa la 'god pa'i las dang / phyin ci log thams cad spong ba la 'god pa'i las dang / dngos po med pa'i phyin ci log spong ba'i shes pa la 'god pa'i las dang / byang chub sems dpa' rang bzhin yongs su dag pa'i mtshan nyid rnam par byang ba la 'god pa'i las dang /dri ma thams cad dang bral ba rnam par byang ba'i rgyu tshogs sogs pa la 'god pa'i las dang / rang bzhin gyis stong pa nyid 'dus byas dang 'dus ma byas rnam par tha dad pa med pa yongs su shes pa la 'god pa'i las dang /de bzhin gshegs pa'i sa la mya ngan las 'das pa la 'god pa'i las so zhes zer ro/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las byang chub sems dpa'i tshul lugs la shes rab kyi pha rol tu phyin pa'i don sgom pa rnam par nges pa zhes bya ba le'u nyi shu rtsa bdun pa'o// //de yang zag pa med pa'i dbyings ni chos sku ste gang gi zag pa med pa'i chos rnams kyi chos nyid do/ /zag pa med pa'i chos de ni bcom ldan 'das ma chen mo gnyis las rnam pa nyer gcig gsungs te/ 'di lta ste/ byang chub phyogs dang tshad med pa/rnam par thar pa/ mthar gyis rnam par gnas pa'i snyoms par 'jug pa dang / zad par dang / zil gnon skye mched dang / nyon mongs pa med pa/ smon lam shes pa dang / mngon shes/ so so yang dag rig /rnam pa thams cad dag pa/ dbang gyur/ stobs mi 'jigs pa/ bsrung ba med pa/ dran pa nyer gzhag /bsnyel ba med pa'i chos nyid/ bag chags yang dag par bcom pa/ snying rje chen po/ /sangs rgyas kyi chos ma 'dres pa/ rnam pa thams cad mkhyen pa'o/ /chos de rnams kyi phung po ni/ chos sku ste/ chos nyid kyi sku ni ma yin par rig par bya'o/ /de la byang chub phyogs dran pa nye bar gzhag pa la sogs pa sum cu bdun no//tshad med pa ni bzhi ste/ 'di lta ste/ byams pa dang / snying rje dang / dga' ba dang / btang snyoms so/ /rnam par thar pa brgyad ni/ 'di lta ste/ gzugs can gzugs la lta ba 'di ni rnam par thar pa dang po'o/ /nang gzugs can ma yin pa phyi rol gyi gzugs rnams la lta ba 'di ni gnyis pa'o/ / sdug pa'o zhes lhag par mos par 'gyur ba 'di ni gsum pa'o/ /nam mkha' mtha' yas skye mched kyi rnam par thar pa ni bzhi pa'o/ /rnam shes mtha' yas skye mched rnam par thar pa ni lnga pa'o/ /ci yang med pa'i skye mched rnam par thar pa ni drug pa'o/ /'du shes med 'du shes med min skye mched rnam par thar pa ni bdun pa'o//'du shes tshor ba 'gog pa'i snyoms par 'jug pa ni rnam par thar pa brgyad pa'o/ /mthar gyis gnas pa'i snyoms par 'jug pa dgu ste/ 'di lta ste/ bsam gtan bzhi dang / gzugs med pa bzhi dang / 'du shes tshor ba 'gog pa'i snyoms par 'jug pa'o/ /zad par bcu ste/'di lta ste/ zad par sa dang / zad par chu dang / zad par me/ zad par rlung / zad par sngon po dang / zad par ser po/ zad par dmar po/ /zad par dkar po/ /zad par nam mkha' mtha' yas skye mched dang / zad par rnam shes mtha' yas skye mched do/ /zil gyis mnan pa'i skye mched brgyad ni/ 'di lta ste/ nang gzugs su 'du shes pas phyi rol gzugs chung ngu la lta zhing zil gyis mnan nas shes shing lta ba 'di ni zil gyis gnon pa'i skye mched dang po'o/ /nang gzugs su 'du shes pas phyi rol gzugs chen por gyur pa rnams zil gyis mnan nas shes shing lta ste/ de lta bur 'du shes par 'gyur ba 'di ni gnyis pa'o//nang gzugs med par 'du shes pas phyir gzugs chung ngu la lta zhing zil gyis mnan nas shes shing lta ba 'di ni gsum pa'o/ /de bzhin du chen po zhes pa ni bzhi pa'o/ /nang gzugs med pas phyi rol gzugs sngon po la lta ste/ de dag zhes pa la sogs pa sngon bzhin te lnga pa'o//de bzhin du ser po zhes pa ni drug pa'o/ /de bzhin du dmar po zhes pa ni bdun pa'o/ /de bzhin du dkar po zhes pa ni brgyad pa'o/ /nyon mongs pa ni 'thab rtsod la sogs pa ste/ 'dir ni rtsod pa'i rgyu nyon mongs pa rtsod pa'o/ /bdag dmigs pas 'di rnams kyi rtsod pa mi skye bar bya'o zhes ting nge 'dzin la snyoms par zhugs te/sngon gyi smon lam gyi stobs kyis gang las bzhengs nas grong la sogs par zhugs te de dmigs pas de na 'khod pa'i sems can rnams kyi nyon mongs pa mi skye ba de ni nyon mongs pa med pa'o/ /de dag nyan thos la yang yod mod kyi/ nyan thos dang rdzogs pa'i sangs rgyas dag gi nyon mongs med pa de dag ni phrin las khyad par yod de/de yang / nyan thos kyi nyon mongs pa med pa ni/ grong la sogs par mthong nas sems can gang rnams kyi nyon mongs pa skye bar 'gyur mod kyi/ de rnams kyi mthong ba nyid rnam par spong ngo / /de bzhin gshegs pa ni mthong bar gyur nas kyang /de rnams kyi nyon mongs pa'i rgyu nyid yang dag par gcod par byed kyi/ mthong ba ni ma yin no/ /kha cig nyon mongs pa'i rtsod pa 'gegs pa nyan thos kyi nyon mongs pa med pa ni/ mthong ba na mi rnams kyi nyon mongs pa skye ba rnams rnam par spong ngo //de bzhin gshegs pa rnams kyi ni sems can gzhan rnams kyi yang nyon mongs pa'i rgyun yang dag par gcod par byed do zhes/ spros pa thams cad ni rtsod pa ste/ de rnams dngos por med pas rnam par mi rtog pa'i snyoms par 'jug pa ni nyon mongs pa med pa'o/ /'di ni shes par bya zhes smon pa'i ched du ting nge 'dzin la snyoms par 'jug pa'i gang 'jig rten skye 'gag la sogs pa mkhyen pa skye ba de ni/nyan thos rnams kyi smon pa mkhyen pa'o/ /de bzhin gshegs pa rnams kyi smon pa mkhyen pa ni rnam par rtog pa med pas rtsol ba med pa'o/ /ltos pa med pa'i phyir ma chags pa'o//thams cad du thogs pa med pas gegs med pa'o/ /sems rtag tu mnyam par gzhag ste gnas pas dus thams cad du gnas pa dang lan thams cad 'debs par byed pa'o/ /mngon par shes pa drug ste/ 'di ltar/ rdzu 'phrul gyi mngon par shes pa dang / lha'i mig gi mngon par shes pa dang /lha'i rna ba'i mngon par shes pa dang / gzhan sems shes pa'i mngon par shes pa dang / sngon gnas rjes su dran pa'i mngon par shes pa dang / zag pa zad pa'i mngon par shes pa'o/ /so so yang dag par rig pa bzhi ni 'di lta ste/ don so so yang dag par rig pa dang / chos so so yang dag par rig pa dang /nges pa'i tshig so so yang dag par rig pa dang / spobs pa so so yang dag par rig pa'o/ /yongs su dag pa bzhi ni/ 'di lta ste/ rten yongs su dag pa dang / dmigs pa yongs su dag pa dang / sems yongs su dag pa dang / ye shes yongs su dag pa'o/ /de la rang gi nyon mongs pa thams cad kyi gnas ngan len gyi bag chags rnams kyi rten las shin tu med par byas nas/bdag gi dngos po'i ci ltar 'dod pa bzhin du len pa dang gnas pa dang 'pho ba dmigs pa rnams kyi sprul pa dang yongs su bsgyur ba dang grangs rnams la dbang du gyur pa ni rnam pa thams cad dmigs pa yongs su dag pa'o//sngon bzhin du sems can thams cad gnas ngan len bral ba dang sems rnam pa thams cad dge ba'i rtsa ba nye bar 'phel ba ni rnam pa thams cad sems yongs su dag pa'o/ /sngon bzhin du ma rig pa'i phyogs gnas ngan len thams cad bral bas shes bya dang shes pa la dbang du gyur pa ni rnam pa thams cad ye shes yongs su dag pa'o//dbang bcu ste 'di lta ste/ tshe 'jog pas dang / yongs su spang bas tshe la dbang ba'o/ /'di lta ste/ tshe'i tshad brjod du med pa'i skal bar byin gyis rlob pa la sogs pa'o/ /ci ltar 'dod par bsam gtan ting nge 'dzin snyoms par 'jug pa la sogs pas dang /snyoms par 'jug pa las bzhengs pas sems la dbang ba'o/ /'jig rten thams cad rgyan bkod pa du mas rab tu brgyan pa nyid du byin gyis rlob pa la sogs pa kun du ston pas ci ltar 'dod pa phan 'dogs pa nye bar gnas pas yo byad la dbang ba dang /ci ltar 'dod pa lus dang ngag gi las grub pa dang dus ci lta ba bzhin du las kyi rnam par smin pa byin gyi rlabs kun du ston pas las la dbang ba dang / skye gnas thams cad du ji ltar 'dod pa bzhin skye bas skye ba la dbang ba'o/ /ci ltar 'dod pa mngon par shes pa sangs rgyas kyi zhing thams cad rnam par 'gyur ba kun du ston pa la sogs pa ni rdzu 'phrul la dbang ba'o//smon lam phun sum tshogs pas smon lam la dbang ba'o/ /gang ci lta ba nyid du mos pa de kho na bzhin du 'byung ba 'di ni mos pa la dbang ba'o/ /'di ltar 'jig rten gyi khams thams cad du sangs rgyas yongs su gang ba kun du ston pa la sogs pa'o//gang nyid shes par 'dod pa de nyid shes pa 'di ni ye shes la dbang ba'o/ /'di ltar stobs mi 'jigs pa sangs rgyas kyi chos ma 'dres pa mtshan bzang dpe byad mngon par rdzogs par byang chub pa ston pa la sogs pa'o/ / mdo'i sde la sogs pa rnam par bzhag pa la mkhas pa ni chos la dbang ba'o/ /mi 'jigs pa rnam pa bzhi ste/ 'di lta ste/ mngon par rdzogs par byang chub pa la mi 'jigs pa dang / zag pa zad pa la mi 'jigs pa dang / bar du gcod pa'i chos bstan pa la mi 'jigs pa dang / nges par 'byung ba la mi 'jigs pa'o//bsrung ba med pa gsum ste/ 'di lta ste/ de bzhin gshegs pa'i sku'i phrin las yongs su dag pa ste/ de la lus kyi phrin las yongs su ma dag pa med pa nyid de/ gang kha cig gzhan gyis mi shes par bya ba yongs su 'chab par bya bar sems pa de med do//de ni bsrung ba med pa dang po'o/ /de bzhin du ngag gi las ni gnyis pa'o/ /yid kyi las ni gsum pa'o/ /ma 'dres pa'i dran pa nye bar gzhag pa la gsum ste/ 'di lta ste/ de bzhin gshegs pa chos bstan pa las la la gus par nyan pa dang rna gtod par byed pa dang kun shes pa sems la nye bar 'jog par byed pa dang /chos dang rjes su mthun pa'i chos sgrub par byed pa'o/ /des de bzhin gshegs pa dga' bar mi 'gyur/ yid bde ba ma yin/ sems khyad par du 'phags par gyur pa nyid ma yin no/ /gzhan zhig gis ma gus par nyan par byed do/ /rna rnam par gtod par mi byed do zhes pa la sogs pa'o//de la de bzhin gshegs pa ni mi dga' ba ma yin mnar sems ma yin/ mi bzod pa ma yin/ mi gcugs pa ma yin sems mngon par mi mnyes pa ma yin no/ /kha cig gus par nyan par byed ma gus par nyan par byed/ thos pa nges par 'byin par byed//zhes pa la sogs pa'o/ /des de bzhin gshegs pa dga' ba dang mnar sems gnyi gar 'gyur ba ma yin no/ /thams cad du btang snyoms la rnam par gnas pa nyid dang dran pa dang shes bzhin dang ldan pa'o zhes so/ /sems can gyi don bya ba dus las mi 'da' bas bsnyel ba med pa'i chos nyid do//nyon mongs sangs kyang gang zhig nyon mongs ma spangs pa bzhin du spyod pa de ni nyon mongs bag chags te/ bum snam la sogs pa rnams kyis til gyi me tog la sogs pa bsal yang de dang 'dres pa'i dri phra mo gnas pa bzhin no/ /de la ma rig pa'i bag chags ni gang shes bya yongs su spyod pa'i gegs su gyur pa'o//'dod chags la sogs pa'i bag chags ni lus ngag gis 'jug pa'i khyad par gyi rgyu yang ngo / /dper na dge slong sngon spre'u ru gyur pas 'gro ba na mchong ba dang / sngon bram zer gyur pas dmangs mo smra ba'o/ /de bzhin gshegs pa'i de thams cad kyang nub ste/ nyon mongs pa'i bag chags yang dag par bcom pa de ni bcom ldan 'das zhes brjod do//des na bcom ldan 'das 'di ni bag chags yang dag par bcom pa nyid do/ /gang bcom ldan 'das phan par 'dod pas dus thams cad du lan drug tu ni su ni 'grib su ni 'phel zhes pa la sogs pa'i tshul gyis 'jig rten rnams la rnam par gzigs pa de ni phan par 'dod pa'i snying rje chen po'o//chos thams cad kyi rang bzhin khyad par mtshan nyid dbye ba mthar thug pa mkhyen pa ni rnam pa thams cad mkhyen pa nyid do/ /stobs ni bcu ste/ 'di lta ste/ gnas dang gnas ma yin pa mkhyen pa'i stobs dang / las kyi rnam par smin pa mkhyen pa'i stobs dang /khams sna tshogs mkhyen pa'i stobs dang / mos pa sna tshogs mkhyen pa'i stobs dang / dbang po mchog dang mchog ma yin pa mkhyen pa'i stobs dang / thams cad du 'gro ba'i lam mkhyen pa'i stobs dang / bsam gtan rnam par dag pa'i ting nge 'dzin snyoms par 'jug pa kun nas nyon mongs pa rnam par byang ba bzhengs pa mkhyen pa'i stobs dang /sngon gyi gnas rjes su dran pa mkhyen pa'i stobs dang / shi 'pho dang skye ba mkhyen pa'i stobs dang / zag pa zad pa mkhyen pa'i stobs so/ /de rnams kyi mtshan nyid ni mdo las/ gnas dang gnas ma yin pa ni srid pa dang mi srid pa'o//rgyu dang rgyu ma yin pa'o/ /'di lta ste/ gnas ni gnas nyid dang gnas ma yin pa ni gnas ma yin pa nyid du shes pa'o zhes pa'o/ /de la nyes par spyod pa rnams ni mi 'dod pa'i rnam smin gyi gnas so/ /'dod pa'i gnas ma yin no/ /legs par spyod pa rnams ni 'dod pa'i gnas so//mi 'dod pa'i gnas ma yin no/ /ser snas dbul po gnas yin zhing longs spyod chen po gnas ma yin no/ /sbyin pas longs spyod chen po nyid gnas dang dbul po gnas ma yin no/ /pha ma dgra bcom bsad pa dge 'dun 'byed pa de bzhin gshegs pa la ngan sems kyis khrag phyung ba'i mtshan nyid mtshams med pa'i las byed pa dang /ma nyid dgra bcom ma/ mi tshangs par spyod pas sun phyung ba dang / nges pa la gnas pa'i byang chub sems dpa' gsod pa dang / mi slob pa gsod pa dang / dge 'dun rnyed pa'i sgo 'phrog pa dang / mchod rten 'jig pa'i nye ba'i mtshams med lnga'i las byed pa ni sems rnam par gnas pa ni gnas ma yin zhing 'gyod pa rab tu gnas pa'i sems las su rung ba ni gnas ma yin no//bud med rang gi dngos po nyid kyis 'khor los sgyur ba nyid dang / brgya byin nyid dang tshangs pa nyid la sogs pa gnas ma yin zhing bzlog pas thams cad gnas yin no//de lta bu la sogs pa gnas dang gnas pa yin pa dag la chags pa thogs pa med pa'i ye shes rab tu shes pa'o/ /de la dag pa ni yang dag pa ci lta ba phyin ci ma log pa nyid do/ /gang dang gang yang dag pa la ma chags pa'o/ /rnam pa gang dang gang gis yang dag pa zhes rnam pa thams cad mkhyen pas thogs pa med pa'o//ye shes de nyid ni stobs te/ gzhan gyis ches shin tu mi thub pas so/ /las ni bsod nams dang bsod nams ma yin pa dang mi g.yo ba la sogs pa'o/ /gzugs dang gzugs med pa na ldan pa'i bsod nams ni mi g.yo ba'o//kha cig tu khams gsum na ldan pa'i dge ba yang bsod nams su rnam par gzhag go/ /rnam par smin pa ni bden pa sdug bsngal la sogs pa'o/ /khams sna tshogs ni bsod nams dang bsod nams ma yin pa'i g.yo ba la sogs pa'i skyed pa'i lhag pa'i bsam pa'o/ /mos pa sna tshogs ni sred pa sna tshogs te/'di lta ste/ 'dod chags la gnas kyang zhe sdang la sred pa dang / zhe sdang la gnas kyang 'dod chags la sred pa dang / dman pa'i sbyor ba rgya che ba'i sbyor ba la sred pa dang / rgya che ba'i sbyor ba dman pa'i sbyor ba la sred pa zhes pa de lta bu la sogs pa'o/ /dbang po dad pa brtson 'grus dran pa'i ting nge 'dzin shes rab bo//de rnams kyi mchog dang mchog ma yin pa ni tha ma 'bring rab nyid do/ /'di lta ste/ 'di ni dbang po tha ma'o zhes pa la sogs pa'o/ /thams cad du 'gro ba'i lam ni/ 'dir de bzhin gshegs pa sems can gyi khams yang dag pa nyid du nges pa dang ma nges pa dag shes so//nges pa dang ma nges pa de dag gi rjes su mthun pa rnams kyi lam dag shes shing ston par byed do/ /log pa nyid du nges pa dag mkhyen nas de dag nyid kyi rjes su mthun pa btang snyoms su byed do zhes dus de srid pa'i btang snyoms so/ /'di ni 'dod chags kyi gnyen por gyur pa'i lam mo/ / 'di ni zhe sdang gi gnyen por gyur pa'i zhes pa la sogs pa'o/ /bsam gtan bzhi rnam thar brgyad rtog pa dang bcas dpyod pa dang bcas pa la sogs pa'i ting nge 'dzin gzugs med pa'i snyoms par 'jug pa bzhi mthar gyis gnas pa'i snyoms par 'jug pa dgu rnams kyis kun nas nyon mongs pa rnam par byang ba bzhengs pa shes pa'o//de la kun nas nyon mongs pa ni ro myang ba la sogs pas so/ /rnam par byang ba ni mi dmigs pa la sogs pas so/ /langs pa ni seng ge rnam par bsgyings pa pas thod rgal gyis so/ /sngon gyi gnas ni sngon gyi skye ba'o/ /de rnams rjes su dran pa ni dran pa'o//shi 'pho ni sems can rnams kyi 'chi skye'o/ /de ni 'phags pa gzungs kyi dbang phyug rgyal po'i mdo las gsungs te/ de la 'di ni de bzhin gshegs pa'i lha'i spyan te/ gang gi phyogs bcu'i 'jig rten gyi khams nam mkha'i mtha'i mur thug pa rnams su/ gang zhig tu snang ba de rnams la/kha cig sreg bzhin pa dang / 'jig bzhin pa dang / 'chag bzhin pa rnams mthong ngo / /sems can snang ba de rnams la kha cig 'pho bzhin pa dang / skye bzhin pa dang / gang dag mi snang bar rtogs pa'i sems can ji srid du de rnams de bzhin gshegs pa'i spyan gyis snang bar son pa'o zhes so/ / gang gi tshe yang dbang po rnams gnas ngan len rang bzhin no zhes gsungs pas mi shes pa'i rang bzhin gyi dbang po ni sangs rgyas nyid kyi gnas skabs su spangs pas yid kyi blo bzhin du dbang po'i blos rig pa ste/ yul yongs su gcod pas bcom ldan 'das rnam shes thams cad ni yul thams cad 'dod do//yang dad pa'i stobs skyed pa'i mdo las gsungs te/ 'jam dpal de bzhin du de bzhin gshegs pa'i gtsug tor gyis kyang mthong ngo / /de bzhin du mdzod spus kyang mthong ngo / /de bzhin du mtshan bzang re res kyang mthong ngo / /de bzhin du dus cig car du phyogs bcu'i 'jig rten gyi khams rab 'byams mthong ngo zhes so//de lta mod kyi sngon gyi dbang po'i rjes su 'brangs nas rnam par bzhag pas zhes lha'i spyan dang lha'i rna ba zhes brjod do/ /zag pa ni sems can rnams kyi nyon mongs so/ /thams cad zad pa dang / lam gang gis zad par byed pa dang / de dag gnyi ga zag pa zad pa'o/ / yang sangs rgyas kyi sku ni sred med kyi bu'i stobs su smra'o/ /mtshams mtshams su ni sred med bu'i stobs zhes gzhan dag go/ /ston pa'i yid kyi stobs bzhin du/ /lus kyi stobs kyang mtha' med pa'i stobs zhes gzhan dag go/ /gzhan du na/ ye shes kyi stobs mtha' med pa bzod par mi 'gyur ro//sangs rgyas bcom ldan 'das rnams klu mdud do/ /rang sangs rgyas kyi mtshams rnams lu gu rgyud do/ /'khor los sgyur ba'i mtshams rnams lcags kyu'o/ /sred med bu'i stobs ni tha mal pa'i glang po che bcu'i stobs de ni/ spos kyi glang po che gcig gi'o//de bzhin du chen po che chen po dang rab gnon dang yan lag mchog dang stobs mchog dang sred med bu rnams gong nas gong du bcu 'gyur du brjod par bya'o/ /gang seng ge bzhin du bag tsha ba med par rigs pa smra ba de ni mi 'jigs pa zhes brjod do/ /de'i ngo bo'am yang dag ni mi 'jigs pa ste rnam pa bzhi'o//'di lta ste/ mngon par rdzogs par byang chub pa la mi 'jigs pa ni de bzhin gshegs pa'i ye shes phun sum tshogs pa'o/ /de gnyis ni rang don no/ /bar du gcod pa'i chos ni mya ngan las 'das pa'i gegs byed pa'o/ /nges par 'byin pa ni mya ngan las 'das pa thob par byed pa'o//'di gnyis ni gzhan don te/ gzhan ched du de dag ston pas so/ /de la mi 'jigs pa'o/ /de bzhin gshegs pa'i gsung rab yan lag bcu gnyis ni chos so/ /brjod bya ma lus ni don to/ /chos de rnams kyi rjod par byed pa'i ming gi tshogs dang tshig gi tshogs dang gsal byed kyi tshogs rnam pa mang po nges pa'i gsung ni nges pa'i tshig go//yang na rgyu'i chos thams cad ni rgyu'o/ /'bras bu'i chos thams cad ni don no/ /'gro ba drug tu gtogs pa'i sems can rnams kyi skad ni nges pa'i tshig go/ /de rnams ni chos dang don dang nges pa'i tshig so so yang dag par rig pa'o/ /chos la sogs pa rnams rmongs pa la bstan pa'i ched du chos la sogs pa so so yang dag pa rig pa rnams mngon sum du gyur pa ni spobs pa'o//de nyid so so yang dag par rig pa'o/ /gcig pus spyod pa 'di ni ma 'dres pa ste sangs rgyas rnams kho na'i'o/ /sangs rgyas rnams kyi chos ma 'dres pa de chos bco brgyad de/'di lta ste/ de bzhin gshegs pa la 'khrul pa med do/ /ci ltar dgra bcom pa rnams grong la sogs pa rnams su bsod snyoms kyi ched du rgyu ba na gtum po glang po che dang rta dang ba lang dang khyi dang tsher ma dang sbrul la sogs pa rnams kyi gnod pa dang / rkun ma dang stag la sogs pa rnams kyi 'jigs pa skye'o//de'i 'di lta bu'i de bzhin gshegs pa thams cad nas thams cad du med do/ /yang gzungs kyi dbang phyug rgyal po'i mdo las gsungs te/ sangs rgyas bcom ldan 'das ni sku'i las [(]gyi [,]kyi [)]tshom med pa spyod lam dang spyod lam rnam pa bzhi rnams rab tu dang bar byed pa'o/ /grong dang grong khyer du 'jug pa dang 'byung ba na/zhabs kyi mthil gyis sa la mi reg cing / sa chen po la 'khor lo rtsibs stong dang ldan par 'byung bar 'gyur ro/ /yid du 'ong ba'i dri ngad ldan pa'i pad+ma ni 'byung bar 'gyur ro/ /gang du de bzhin gshegs pa'i zhabs bzhag pa de ru gang dud 'gro'i skye gnas su gyur pa'i sems can de bzhin gshegs pa'i 'od kyis reg par gyur pa de dag zhag bdun du mchog tu bde ba dang ldan par 'gyur ro//'phos nas lha rnams su skye bar 'gyur ro/ /de bzhin gshegs pa'i sku la chos gos rnams sor bzhi'i bar gyis ma reg pa nyid do/ /b+hai ra b+ha'i rlung gis kyang bskyod par mi nus te/sku'i 'od kyis mnar med pa'i mthar thug sems can rnams bde bar byed do/ /des na de bzhin gshegs pa'i sku la gya tshom med pa'o zhes te/ rtag pa nyid du yang dag par rtog par byed pa'i phyir ro/ /de bzhin gshegs pa la ca co med pa'o/ /ci ltar dgra bcom pa nags khrod du zhugs te lam du 'gro ba na/sgra chen po sgrogs par 'gyur ba dang / bag chags kyi stobs las gad mo chen po dgod pa'o/ /sangs rgyas ni de bzhin du ma yin te/ rtag tu mnyam par gzhag pas so/ /de bzhin gshegs pa la bsnyel ba mi mnga'o/ /ci ltar dgra bcom pa mnyam par ma bzhag pas dran pa bsnyel bas bya ba mi byed cing dus las 'da' ba'o//sangs rgyas ni de bzhin du ma yin te snying rje chen po can yin pas so/ /de bzhin gshegs pa la sems mnyam par ma bzhag pa med de/ ci ltar dgra bcom pa zhugs pa nyid ni mnyam par gzhag pa yin gyi dus gzhan du ni ma yin no//sangs rgyas ni de bzhin du ma yin te/ rtag tu mnyam par bzhag pa nyid kyis so/ /de bzhin gshegs pa la tha dad pa'i 'du shes med de/ ci ltar dgra bcom pa phung po la mtha' gcig tu mi mthun pa'i 'du shes dang / mya ngan las 'das pa la zhi ba'i 'du shes so/ / sangs rgyas de bzhin du ma yin te/ rang bzhin bdag med pa nyid kyi gnyi ga ru rnam par mi rtog pa'i phyir ro/ /de bzhin gshegs pa la so sor ma brtags pa'i btang snyoms med pa yin te/ ci ltar dgra bcom pa so sor ma brtags par sems can don yal bar 'dor ba ste/ sangs rgyas de ltar ma yin te/de ni dus la sogs par so sor rtogs pa nyid kyis dbu mar gnas pa yin gyi gzhan du ma yin no/ /de bzhin gshegs pa la 'dun pa nyams pa med de/ de la byams pa snying rje chos ston pa sems can 'dren pa yongs su smin pa rab tu dben pa byang chub yang dag par 'jog pa ni 'dun pa'o/ / 'di ni nyan thos la yod pa ma yin no/ /de bzhin gshegs pa la brtson 'grus nyams pa med pa'o/ /de la gdul bya rnams kyi brtson 'grus dang / chos nyan par byed pa rnams la gdams pa smra ba'i brtson 'grus so/ /de yang de gang gi tshe de bzhin gshegs pa chos nyan par byed pa gang bskal par nyan na yang skyo ba med pa de lta bu'i rang bzhin rnyed pa nyid do//de bzhin gshegs pa zas rnam par spangs pa'i rgyud kyis kyang sems can la ltos pas bskal par chos bshad kyang mi bzhengs so/ /gang du tha na sangs rgyas gdul bya sems can gcig kyang yod par gyur pa de ru/ de bzhin gshegs pa gang gA'i klung gi bye ma dang mnyam pa'i sangs rgyas kyi zhing las kyang 'das par gshegs pa'o//de bzhin gshegs pa la dran pa nyams pa med de/ 'di ltar/ de bzhin gshegs pa dran nas sam bsams nas sam rnam par brtags nas sems can rnams la chos ston par byed pa ni med do/ /de bzhin gshegs pa ting nge 'dzin nyams pa med de 'di lta ste/chos thams cad kyi mnyam pa nyid ci lta ba bzhin mi mnyam pa ma yin pa la mnyam par 'dzin pa ste/ gang gi mnyam pa'i mnyam pa nyid de ni mnyam pa'i ting nge 'dzin no/ /gang mnyam pa'i ting nge 'dzin de ni mnyam pa'i de bzhin gshegs pa ste/ ci srid du khams gsum gang la yang mi brten pas mi nyams shing yongs su mi nyams so/ /des na de bzhin gshegs pa ting nge 'dzin yongs su nyams pa med zhes brjod do/ /de bzhin gshegs pa shes rab yongs su nyams pa med de/ 'di lta ste/ chos thams cad kyi mnyam pa nyid ni shes rab ste/ gzhan gyi dring mi 'jog pa'i ye shes so/ /sems can gzhan la chos ston par byed pa so sor yang dag par rig pa mi zad pa dbye ba la mkhas pa ye shes so/ /tshig gcig la 'jug pas bskal pa brgya stong du byin gyis brlabs te rgyas par ston pa'i ye shes so/ /ci ltar rgyas par ston pa'i don bshad pa the tshom gcod pa theg pa rnam par gzhag pa rgyas par ston pa'i shes pa'o//sems can gyi sems kyi spyod pa stong phrag brgyad cu rtsa bzhi rnams kyi gnyen po/ /chos kyi phung po stong phrag brgyad cu rtsa bzhi rnams kyi mkhyen pa ci ltar 'os par chos ston pa'o/ /'di ni de bzhin gshegs pa rnams kyi mtha' med pa mi zad pa tshad med pa ston pa'i shes rab po//de bzhin gshegs pa rnam par grol ba nyams pa med pa ste/ 'di lta ste/ de bzhin gshegs pa'i rnam par grol ba ni kun du 'dzin pa thams cad rnam par grol ba nyid do/ /sngon gyi mtha' dang ma 'brel phyi ma'i mthar 'pho ba ma yin da lta bar gnas pa ma yin pa rang bzhin 'od gsal ba'i sems te de lta bu nyid kyi ye shes so//des na skad cig gcig gis yang dag par ldan pa'i shes rab kyis bla na med pa yang dag par rdzogs pa'i byang chub tu mngon par rdzogs par sangs rgyas zhes brjod do/ /de bzhin gshegs pa lus kyi las thams cad ye shes sngon du 'gro zhing ye shes kyi rjes su 'brang ba ste/'di lta ste/ de bzhin gshegs pa lus kyi las gang dang ldan pas mthong bas kyang sems can 'dul bar byed do/ /gsung ba na yang cang mi gsung ba yang / gsol ba na yang / spyod lam rnam pa bzhis kyang mtshan bzangs kyis kyang zhes rgyas par ro//ngag gi las thams cad ye shes sngon du 'gro zhing ye shes kyi rjes su 'brang ba ste/ 'di lta ste/ de bzhin gshegs pa chos bstan pa don med cing / chud za ba ma yin pas dang / de bzhin gshegs pa'i ngag de yang yan lag drug cu dang ldan pas so//yid kyi las thams cad ye shes sngon du 'gro zhing ye shes kyi rjes su 'brang ba yin te/ 'di lta ste/ de bzhin gshegs pa'i ye shes de ni sems can thams cad kyi sems kyi rjes su 'gro ba chos thams cad la nges par 'byung ba bsgrub bya thams cad gzhan gyi dring la mi 'jog pa dmigs pa yang dag par 'das pa rten cing 'brel par 'byung ba rtogs pa srid gsum gyi 'gro bas dpag tu med pa bdud kyi lam thams cad las yang dag par 'das pa ci srid du chos kyi dbyings dbyer med pa'o zhes so//de bzhin gshegs pa 'das pa'i dus las ma chags ma thogs pa'i ye shes mthong ba 'jug go//sangs rgyas kyi zhing ci snyed du de rnams kyi rtswa dang sdong po la sogs pa ci snyed dang de'i sangs rgyas bcom ldan 'das ci snyed dang chos ston pa ci snyed dang bdag dang gzhan gyi sems gang gis de ma thag tu sems gang skyes pa de dag thams cad kyi rtsis kyi sbyor bas rab tu mkhyen to//de yang mngon sum shes pas yin gyi rjes su shes pas ni ma yin no/ /ma 'ongs pa'i dus la ma chags ma thogs pa'i ye shes mthong ba 'jug go/ /'di lta ste/ zhing ngam sems can gang su dag 'byung bar 'gyur ba/ sems gang gis de ma thag tu sems gang skye bar 'gyur ba de dag thams cad rtsis kyi sbyor bas rab tu shes so zhes rgyas par ro//de ltar ba'i dus la ma chags ma thogs pa'i ye shes mthong ba 'jug go/ /'di lta ste/ gang de ltar phyogs bcu'i sangs rgyas kyi zhing de rnams shes so/ /chos thams cad dang byang chub sems dpa' rang sangs rgyas nyan thos thams cad ci srid du rigs mdog thams cad dang sa chu la sogs pa'i khams rdul phra rab kyi cha chad pa ci srid du skra'i rtse mo bye ba'i char tshud pa ci srid du dmyal ba la sogs pa'i 'gro bar grub pa sems can gyi khams rnams shes so zhes rgyas par ro//de bzhin gshegs pa la gnyis kyi rjes su 'brang ba'i shes pa med do//gnyis su med pa la zhugs pa'i don du sems can rnams la dam pa'i chos ston par byed do/ /de la dang po ni lus kyi las yongs su dag pa'o/ /gnyis pa ni ngag gi las yongs su dag pa'o/ /gzhan bzhi ni yid kyi las yongs su dag pa'o/ /de las gzhan drug ni de bzhin gshegs pa'i dbang po rnams rten dang bcas pa 'bras bu bcas pa rnams ma thob pa med pas dang thob pa rnams nyams pa med pas so//de la rten ni 'dun pa'o/ /'bras bu rnam par grol ba'o/ /dbang po ni brtson 'grus la sogs pa'o/ /de las gzhan gsum ni lus dang ngag yid rnams kyi las rnams la ye shes kyis byin gyis brlabs pa nyid do//ye shes rgyu yin pa nyid kyis dang ye shes dang lhan cig tu spyod pas so/ /de las gzhan gsum ni dus gsum la ma chags ma thogs pa nyid kyi ye shes so zhes so/ /de rnams ni sangs rgyas kyi chos ma 'dres pa bco brgyad do/ / paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las byang chub sems dpa'i tshul lugs las zag pa med pa'i chos rnam par nges pa zhes bya ba le'u nyi shu rtsa brgyad pa'o// //de bzhin du yon tan gzhan yang / mdo sde sna tshogs bstan te/'di lta ste/ spyod pa sna tshogs kyis 'jug pa'i yon tan te gdul bya ci lta ba bzhin du bdag gi ngo bo skal ba mthun pa kun ston pa 'jug pa'i phyir ro/ /dge ba'i chos skye ba mkhyen pa'i yon tan ni/ dper na rdo'i nang du thim pa'i gser gyi sa gzhi bzhin du/ khye'u sor phreng la sogs pa'i dge ba'i rtsa ba shin tu phra ba nyan thos la sogs pa'i yul las 'das pa yang phyin ci ma log pa'i rnam pa yongs su shes so//mos pa ci bzhin du kun du ston pa'i yon tan ni/ sems can mos pas ltos nas tha dad pa med pa dang ma 'dres pas gser gyi rang bzhin sangs rgyas kyi zhing kun du ston pas so/ / sangs rgyas kyi sku gsum char yang yul yongs su ma chad pa'i yon tan ni/ thog ma dang bar dang tha ma dang bral ba'i sangs rgyas kyi sku gsum gyi bdag nyid ni sa dang zhing thams cad du yul yongs su chags pa med pas mnyam pa nyid du thob pas so/ /'khor ba ji srid du sems can thams cad la phan pa dang bde ba nye bar sgrub pa'i yon tan shin tu rnam par dag pa'i chos dbyings 'khor ba ji srid par gnas pa las/de'i rgyun mdo sde la sogs pa'i chos rnams gdul bya'i dus ci lta ba bzhin du phyis dang da lta dag nye bar sgrub pas so/ /mi zad pa nyid kyi yon tan ni/ nam mkha' bzhin du chos dbyings rnam par bkram pa ni mthar thug pa med pas/'khor ba ci srid par chos dbyings kyi 'gro ba ma lus pa'i don bya ba'i sbyor ba rgyun ma chad pas yon tan zad pa med pa'o/ /yang legs pa slar mi ldog pa ma lus pa rtogs pa'i yon tan ni/ 'dis ni rim pa bzhin du phyi rol slob pa mi slob pa rnams rnam par bcad par rig par bya'o//de la 'jig rten pa'i lam gyis brnyes pa yin pas rab tu legs pa'i rtogs pas te/ phyi rol gyi grol ba ni mtshams dang bcas pa nyid yin pas de'i grol ba ni de bzhin du ma yin pas so/ /slar ldog pa ste/ skye ba dang nyes pa kun 'byung bas so//de gnyis ni slob pa rnams la yod do/ /mi slob pa ni bcom ldan 'das te/ nyon mongs med cing rims nad med pas so/ /lus ngag blo rnams rjes su mi mthun pa dang / lan gsung ba mi gsal ba ni lhag ma ste/ de ni theg pa dman pa'i dgra bcom pa mi slob pa la yang ji srid par yod do//bcom ldan 'das ni ma yin no/ /rig pa dang zhabs phun sum tshogs pa'i yon tan ni/ de la rig pa ni lhag pa'i shes rab bslab pa'o/ /lhag pa'i tshul khrims dang lhag pa'i shes rab kyi bslab pa dag ni rkang pa ste/ de dag ni rig pa sngon du 'gro ba'i zhabs yin pas so/ / rig pas mig bzhin du mthong ste/ cig shos dag gis rkang pa bzhin du de bzhin bgrod pas so/ /dbang phyug gzugs grags pa dpal ye shes brtson 'grus yon tan no/ /de la dbang phyug ni dbang ma yin pa ste phun sum tshogs pa de ni bcom ldan 'das te/ bag chags dang bcas pa'i sgrib pa thams cad spangs pas so//gzugs phun sum tshogs pa ni bla na med pa'i mtshan bzang dang / dpe byad thams cad kyis spras pa'i sku yin pas so/ /grags pa phun sum tshogs pa ni/ phyogs dang mtshams su sgra grags pas so/ /phun sum tshogs pa gang la mang po rnams kyis brten pa de ni dpal phun sum tshogs pa ste/bla na med pa'i bsod nams phun sum tshogs pa'i mtshan nyid yin pas so/ /ye shes phun sum tshogs pa ste gang du shes bya'i rnam pa thams cad la dag pa ma chags ma thogs pa'i ye shes yin pas so/ /brtson 'grus phun sum tshogs pa ste/ bla na med pa'i ngag phun sum tshogs pas so//rang bzhin legs par gnas pa'i me long lta bu'i ye shes brnyes pa'i dbang phyug phun sum tshogs pa'o/ /mnyam pa nyid kyi ye shes rang bzhin bsam gyis mi khyab pa dag gi ngo bo brnyes pas gzugs phun sum tshogs pa'o/ /so sor rtog pa'i ye shes sbyor ba cho 'phrul gyis gdul bya rnams kyi shin tu phra ba mtha' med pa'i sgrib pa spangs pas grags pa phun sum tshogs pa'o//'jig rten khams thams cad du sems can rnams kyi mos pa ci lta bar mtha' med pa'i bsod nams bya ba rjes su sgrub pa'i ye shes nus pa las mi zad pa'i rin po che'i rang bzhin rten la sogs pa kun du ston pas mnyes par byed pa'i dpal phun sum tshogs pa'o//thun mong ma yin pa'i chos kyi sbyor bas thams cad du mkhyen pa dbang du gyur pa thob pas ye shes phun sum tshogs pa'o/ /de lta bur gyur pa'i sems can gyi don shin tu ches brtson pa la ngan pa'i mya ngan las 'das pa mnyam pa nyid rab tu brnyes pas brtson 'grus phun sum tshogs pa'o zhes ye shes zhabs kyis rnam par gzhag go//de lta bu la sogs pa de bzhin gshegs pa'i yon tan mtha' med pa bye ba khrag khrig 'bum ni de bzhin gshegs pa rnams kyi yul du gyur pa yin no/ /sa bcu'i byang chub sems dpa' la sogs pa gzhan rnams kyi ma yin pas gzhag par bya'o//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las mdo sna tshogs nas gsungs pa'i de bzhin gshegs pa'i yon tan rnam par nges pa zhes bya ba le'u nyi shu rtsa dgu pa'o// //longs spyod rdzogs pa dang sprul pa'i sku dag gi yon tan mtshan dang dpe byad dag cung zad rnam par gzhag par bya ste/ de dag gi mtshan la sogs pa 'di tsam zhes bya bar mi nus so/ /de la mtshan sum cu rtsa gnyis te/ 'di lta ste/ phyag dang zhabs mthil 'khor los mtshan pa dang /rus sbal ltar zhabs shin tu gnas pa nyid dang / ngang pa'i rgyal po ltar phyag dang zhabs dra bas 'brel pa nyid dang / phyag dang zhabs 'jam zhing gzhon sha chags pa nyid dang / bdun mtho ba nyid dang / sor mo ring ba nyid dang / zhabs rting pa yangs pa nyid dang / sku 'jam la drang ba nyid dang /zhabs long bu mi mngon pa nyid dang / zhabs dung mtho ba dang / sku'i spu gyen du phyogs pa dang / byin pa ri dgas en ya lta bu dang / phyag sbom la ring ba nyid dang / mdoms kyi sba ba sbubs su nub pa nyid dang / mdog gser 'dra ba nyid dang / pags pa srab 'jam nyid dang / spu re re nas skye shing g.yas su 'khyil ba dang / zhal mdzod spus brgyan pa dang / ro stod seng ge'i 'dra ba dang / dpung mgo shin tu zlum pa nyid dang / thal gong rgyas pa dang / ro bro ba'i mchog shes pa nyid dang / shing n+ya gro d+ha ltar chu zheng gab pa nyid dang / dbu gtsug tor dang ldan pa dang /ljags ring zhing srab pa nyid dang / tshangs pa'i dbyangs dang / 'jig rten gyi khams thams cad du sems can la dam pa'i chos sgrogs pas 'gram pa seng ge'i lta bu dang / tshems shin tu dkar ba dang / tshems mnyam pa dang / tshems thags bzang ba dang / tshems bzhi bcu mnga' ba dang /spyan mthon ting lta bu dang / ba'i rdzi ma lta bu'i spyan nyid do/ /de la zhabs legs par gnas pa ni/ sa la mnyam du reg pa ste/ sa chen po thams cad la dma' ba dang mtho ba dang grog mo dang gseg ma dang / chu dang 'dag pa dang tsher ma dang / 'obs la sogs pa rnams mnyam du gnas pa'o//'jig rten khams 'bum phrag du mas bar chod par gyur pa'i ring du gyur pa dang / nye bar 'gyur ba yin no/ /sor mo ring ba zhes pa ni/ sor mo'i tshigs dang po nas bzung ste bar ma chad kyang sor gdub la sogs pas brgyan du rung ba'i sor mo'o/ /'jam pa ni gnyen po la sogs pa'o//gzhon sha ni mdog la sogs pa dang ldan pa nyid do/ /bdun mtho ba nyid ni phyag gi rgyab gnyis/ rkang pa'i rgyab gnyis/ phrag mgo rgyab gnyis/ mgrin pa'i rgyab rnams sha rgyas pa yin pa nyid kyis so/ /rting pa yangs pa ni/ rkang pa'i mthil thams cad cha bzhir byas te/ cha gsum ni zhabs so//cha gcig ni rting pa'i tshad dang ldan pa nyid do/ /zhabs drung mtho ba dang zhes pa 'di'i mdo las/ mtho ba mi zab pa'i pus mo dang long mo dag nyid yin pas zhabs dung zhes pa'o/ /des na mtho ba'i sgra ni mi zab ces pa'i don to/ /dung zhes pa'i sgra ni pus mo long mo'i rus pa rjod byed de/ des na brla'i rtsa nas 'og tu thams cad zhabs zhes so//ri dgas e n+ya'i yan lag byin pa bzhin du byin pa'i sha rnams rim gyis shin tu rgyas pa'o/ /sor mo dbyibs mnyam pa shin tu zlum pa yongs su 'khor ba sor mo brgyad kyi phyogs su 'gyur ba'o/ /dpung pa sbom pa ni yongs su bskor ba nyid do/ /ring ba nyid ni bzhengs nas ma 'dud par phyag gis reg pa'o//mdoms kyi sba ba ni sbubs su zhugs shing nub pa de de bzhin no/ /mdog gser 'dra ba zhes pas sku'i mthug pa dang 'jam pa 'od gsal ba'i kha dog nyid du bstan pa'o/ /spu g.yas su 'khyil pa ni sbrul 'khyil pa lta bu'o/ /mdzod spu ni smin ma'i bar thig le'i gnas su 'jam pa mnyen pa'i spu dkar ba'o//brkyang na ni khru gang khru gnyis khru gsum la sogs pa'i tshad do/ /bsdus na ni g.yas su 'khor ba'i rtse mo gyen du phyogs pa'o/ /skyu ru ra'i tshad tsam rngul ni chu bur lta bu'i rnam pa'o/ /ro stod seng ge lta bu'i sku stod yangs shing rgya che ba mthong ka sha rgyas pa yin pas so//gang gi rab tu dang bar byed pas dang rgya che ba phun sum tshogs pa shin tu zlum la rtsa'i dra ba mi mngon pa'i dpung mgo'o/ /gser gyi bum pa'i mgrin pa bzhin du yongs su 'khor bar shin tu zlum pa'i ri mo can gyi mgrin pa'o/ /phrag pa gnyis kyi bar ni thal gong ste mthong ka rgyas pa de ni thal gong rgyas pa'o//bcom ldan 'das ni ro drug rnams kyi ro bro ba shes shing tshim ste ro mchog gsol ba'o/ /kha cig tu lus dang yan lag la ro myangs te gsol bas ro bro ba ni rtsa ste de rnams mchog nyid de/ rlung dang mkhris pa dang bad kan la sogs pa rnams kyis gnod pa med pas mnyam du gnas pa nyid do//rlung la sogs pas gnod pa med pas mi sbom mi phra zhing mdud pa ma yin mdog ngan pa ma yin no/ /rtsa de rnams nub pas sku rnam 'gyur ngan pa ma yin no/ /gser gyi byang bu bzhin du 'ong bar 'gyur ro/ /rlung mkhris bad kan gyis gnod pa med pa rtsa de rnams kyis yang dag par gsol ba'o zhes gsungs so//de skad du ni/ skyes bu chen po rnams kyi mgrin pa la ro myong bar byed pa stong phrag bdun kha gyen du phyogs pa rab tu 'jug go/ /ro thams cad kyang zhal du bcug pa na bdud rtsi'i ro dang mtshungs par 'gyur ro zhes so/ /yang na ro ni myang bya ste drug go//ro de rnams kyi ro myong bar byed pa'i mchog go/ /gang de dang ldan pa'i gsol ba de ni de bzhin no zhes bshad pa'o/ /n+ya ni dma' ba ste 'og gi sku'o/ /gro d+ha ni steng gi sku'o/ /chu zheng mnyam pa'o/ /lte ba nas bzung ste 'og gi sku dang steng gi sku dag tshad mnyam pa'o zhes pa'i don to//yang na bcom ldan 'das phyag gnyis 'dom du brkyang ste sku ma lus pa chu dang zheng du mnyam pa ni n+ya gro d+ha ltar chu zheng gab pa'o/ n+ya gro d+ha ni shing pa Ta ste de dang 'dra bar ring dang rgyar bcom ldan 'das kyi sku mnyam pa'o/ /des n+ya gro d+ha ltar chu zheng gab pa'o ste zhes kha cig go/ / gtsug tor dkris pa'i rnam pa yang tog go/ /zlum po yongs su rdzogs pa'o/ /ljags kyi yangs pa ni ring du ste/ rna ba'i mtshams dang dpral ba'i skra mtshams thug par lces reg pa'o/ /shin tu rdzogs pa ma yin pa tshes bcu gnyis zla ba lta bur mthar thug pa legs par 'byor pa zlum pa 'gram pa'i rang bzhin yin pas seng ge'i 'gram pa nyid do//bcom ldan 'das tshems bzhi bcu nyid do/ /gzhan bzhin du sum cu rtsa gnyis sam nyi shu nyer brgyad ni ma yin no/ /lte ba'i dkyil 'khor gyi dbus na ni nag la 'jam pa'o/ /nag pa'i dkyil 'khor gyi dbus logs gnyis ni dkar ba nyid do/ / rdzi ma gnas pa'i go skabs 'jam pa sngo ba'o/ /mtha' ma gnyis kyi bim pa la'i gnyis ni dmar ba'o/ /rdzi ma dang mig 'bras kyi bar du ni gser gyi mdog go/ /de bzhin du rab tu mdzes pa dang ldan pa'i mig gi dkyil 'khor gtso bo nyid yin pas spyan mthon mthing zhes brjod do/ /ba'i be'u gzhon nu ltar steng dang 'og sngo la snum pa'i 'od dang ldan pa nyid yin pas ba'i rdzi ma lta bu'o zhes so//mtshan sum cu rtsa gnyis de rnams kyi so so'i rgyur gyur pa'i bsod nams brjod par bya ste/ 'di lta ste/ bla ma rnams kyi skyel ba dang bsu ba dang chos nyan pa dang 'khor g.yog 'bul ba la sogs pa rnams kyis mtshan dang po'o//yang dag par blangs pa yi dam brten pas gnyis pa'o/ /bsdu ba'i dngos po brtan pas gsum pa'o/ /gya nom pa'i bza' btung la sogs pa sbyin pas bzhi pa dang lnga pa'o/ /bcings pa grol bar byas pas drug pa'o/ /srog 'tsho ba nyid rjes su 'dzin par byas pas bdun pa'o//srog gcod pa las ldog pa'i kun du brten pa las brgyad pa'o/ /dge ba'i chos yang dag par blangs shing bzung bas dgu pa'o/ /chos yang dag par spel bas bcu pa'o/ /gus pas rig pa dang bzo la sogs pa sbyin pas bcu gcig pa'o/ /nor yod bzhin du slong ba po'i skye bo ma spangs pas bcu gnyis pa'o//skye bo thams cad tshangs par spyod pa len du bcug pas dang gsang ba rjes su gsungs pas bcu gsum pa'o/ /gya nom pa'i mal cha sbyin pas bcu bzhi pa'o/ /khang bzangs mchog la sogs pa sbyin pas bco lnga pa'o/ /'tshog 'du la sogs pa spangs pas bcu drug pa'o//gus par bya ba'i skye bo thams cad rim pa ji lta ba bzhin 'jog par byed pas bcu bdun pa'o/ /thams cad du tshig rtsub gzugs mo ma spangs pas bco brgyad pa'o/ /snyan par smra ba dang legs par smra ba dag la rjes su mthun par byed pas bcu dgu pa'o/ / sman gyi sbyin pas nyi shu pa'o/ /nad pa rnams kyi rim gro byas pas nyer gcig pa'o/ /tshal dang kun dga' ra ba la sogs pa rang nyid byed pa dang / gzhan byed du 'jug pas nyer gnyis pa'o/ /gtsug lag khang la sogs pa mang du sbyin pas nyer gsum pa'o/ /tshig 'jam po la sogs pas nyer bzhi pa'o//'jig rten khams thams cad du sems can la dam pa'i chos sgrogs pas nyer lnga pa'o/ /ngag kyal pa las ldog pas nyer drug pa'o/ /skye bo thams cad la ri mor byed pas nyer bdun pa'o/ /'tsho ba rnam par dag pas nyer brgyad pa'o/ /bden par smra bas nyer dgu pa'o//dbyen smra ba ma goms pas sum cu pa'o/ /sems can thams cad la bu gcig pa ltar lta bas so gcig pa'o/ /khong khro la sogs pas dben pa mthong bas sum cu rtsa gnyis pa'o zhes so/ /mtshan bzang po de rnams gsal bar byed pa'am/ mtshan bzang dang rjes su mthun pas skyes bu chen po mtshan par byed pa'am/rjes su mthun pas gsal bar byed pa ste mdzes par byed pa 'di ni dpe byad ste brgyad cu'o/ /'di lta ste/ sen mo zangs kyi mdog lta bu dang / sen mo mdog snum pa dang / sen mo mtho ba dang / sor mo rnams zlum pa dang / sor mo rnams rgyas pa dang /sor mo rnams rim gyis phra ba dang / rtsa mi mngon pa dang / rtsa mdud med pa dang / long bu mi mngon pa dang / zhabs mi mnyam pa med pa dang / seng ge'i stabs su gshegs pa dang / glang po che'i stabs su gshegs pa dang / ngang pa'i stabs su gshegs pa dang / khyu mchog gi stabs su gshegs pa dang /g.yas su ldog cing gshegs pa dang / mdzes par gshegs pa dang / ma yo bar gshegs pa dang / sku 'khyil bag chags pa dang / sku byi dor byas pa lta bu dang / sku rim par 'tsham pa dang / sku gtsang ba dang / sku 'jam pa dang / sku rgyas pa dang / sku rnam par dag pa dang / mtshan yongs su rdzogs pa dang / sku kho lag yangs shing mdzes pa dang / gom pa snyoms pa dang / spyan rnam par dag pa dang / sku shin tu gzhon mdog can dang / sku zhum pa med pa dang / sku rgyas pa dang / sku shin tu grims pa dang / yan lag dang nying lag shin tu rnam par phyed pa dang /gzigs pa rab rib med cing rnam par dag pa dang / dku zlum pa dang / dku skabs phyin pa dang / dku phyal phyang nge ba dang / dku ma rnyongs pa dang / lte ba zab pa dang / lte ba g.yas su 'khyil ba dang / kun nas mdzes pa dang / kun spyod pa gtsang ba dang / sku la sme ba dang gnag bag med pa dang /phyag shing bal ltar shin tu 'jam pa dang / phyag gi ri mo mdangs dang ldan pa dang / phyag gi ri mo zab pa dang / phyag gi ri mo ring ba dang / zhal ha cang yang mi ring ba dang / zhal gzugs kyi gzugs brnyan snang ba dang / 'di la gzugs rnams kyi gzugs brnyan snang ba 'di ni gzugs kyi gzugs brnyan snang ba'i zhal gang gi yin pa de de bzhin no//gzugs rnams kyi gzugs brnyan shar ba'i zhal gang gi yin pa de de bzhin no zhes gzhan dag go/ /ljags mnyen pa dang / ljags srab pa dang / ljags dmar ba dang / glang po che'i dang / 'brug gi sgra dang ldan pa dang / gsung snyan cing 'jebs la 'jam pa dang /mche ba zlum pa dang / mche ba rno ba dang / mche ba dkar ba dang / mche ba mnyam pa dang / mche ba byin gyis phra ba dang / shangs mtho ba dang / shangs gtsang ba dang / spyan yangs pa dang / rdzi ma stug pa dang / spyan dkar nag phyed cing pad ma'i 'dab ma rangs pa lta bu dang / smin dkyus ring ba dang / smin ma 'jam pa dang / smin ma snum pa dang / smin ma'i spu mnyam pa dang / snyan shal sdug cing ring ba dang / snyan mnyam pa dang / snyan ma nyams pa dang / dpral ba legs par 'byes pa dang / dpral ba'i dbyes che ba dang / dbu shin tu rgyas pa dang / dbu skra bung ba ltar gnag pa dang /dbu skra stug pa dang / dbu skra 'jam pa dang / dbu skra ma 'dzings pa dang / dbu skra mi bshor ba dang / dbu skra dri zhim pa dang / phyag dang zhabs dpal be'u dang / bkra shis dag gis brgyan pa'o/ /mtshan dang dpe byad de rnams ni gdul bya skye bo dad pa 'phel bar bya ba'i ched du rnam par gzhag ste de rnams 'di tsam zhes tshad gzung bar mi nus pas so//de bzhin du mdo sde gzhan las ni/ phyag zhabs la sdong ring dang / g.yu drung 'khyil pa bum pa gang ba nya zung rgyal mtshan dung gnas bzang po gdugs dkar po rnga yab la sogs pa yang gsungs so/ /mtshan bzang dang dpe byad de rnams ni byang chub sems dpa' rnams dang 'khor los sgyur ba rnams la yod do//'on kyang de bzhin gshegs pa rnams kyi ni yul na gnas pa shin tu gsal ba rdzogs pa shin tu ches bla mar gyur pa'o/ /yang de bzhin gshegs pa'i phyag dang zhabs kyi mthil la gang rjes su mtshon byed yod de/'di lta ste/ gdugs dang / rgyal mtshan dang / dpal be'u dang / phreng ba dang / lcags kyu dang / dbu rgyan dang / dbyu gu dang / bum pa dang / glang po che dang / rta dang / stag dang / bya khyung dang / chu srin dang / nya dang / rus sbal dang / rma bya dang / bya ka la ping ka dang / bya shang shang ti'u dang /bya tsa Ta dang / ngur pa dang / ne tso dang / ngang pa dang / thib dang / nas dang / sman chen po dang / 'od ma dang / ba men dang / ra dang / khyu mchog dang / bil ba dang / ri dang / dpag bsam shing dang / ri dgas nag po dang / nor bu rin po che dang / ral gri mchog dang / rdo rje dang / gzhu dang / mda' dang /mdung thung dang / rtse gsum dang / gshol dang / gtun shing dang / dgra sta dang / zhags pa dang / chu srin 'khri shing dang / mu tig dang / 'khyil pa dang / sprin dang / tshangs pa dang / dbang po dang / yul 'khor skyong dang / chu bdag dang / spyan mi bzang dang / nor sbyin dang / drang srong chen po dang / dpal mo dang / nyi ma dang / zla ba dang / me dang / rlung dang / me tog pad ma dang / g.yu drung 'khyil pa dang / bkra shis dang / gdan bzang po dang / me long dang / rnga yab dang / su ro Da sha dang / gzhon nu dang / bu mo dang / rnga bo che dang / dung dang / rdza rnga dang / lag gdub dang / dpung rgyan dang / rna rgyan dang /sor gdub rgyan dang 'khyil ba'o/ /sdong bu dang / me tog rgyal po shing dang / 'khor lo'i dbus su seng ge zhes so / /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las sangs rgyas sku'i mtshan dang dpe byad rnam par nges pa zhes bya ba le'u sum cu pa'o// //thugs rje chen po dang ldan pa'i de bzhin gshegs pa 'di'i gsung rab ni rnam pa gnyis te/ 'di lta ste/ nyan thos kyi sde snod dang / byang chub sems dpa'i sde snod do/ /de la nyan thos kyi sde snod ni rnam pa gsum ste 'di lta ste/ mdo'i sde snod dang / 'dul ba'i sde snod dang /mngon pa'i sde snod do/ /byang chub sems dpa'i sde snod kyang rnam pa gsum ste/ 'di lta ste/ mdo sde'i sde snod dang / 'dul ba'i sde snod dang / mngon pa'i sde snod do/ /sde snod gsum po de rnams ni gsung rab yan lag dgur 'gyur te/ 'di lta ste/ mdo'i sde dang / 'dul ba'i sde dang / mngon pa'i sde dang / skyes pa rabs kyi sde dang / ched du brjod pa'i sde dang / gleng gzhi'i sde dang / tshigs su bcad pa'i sde dang / de lta bu byung ba'i sde dang / rnam par nges pa gtams pa'i sde'o/ /yang na yan lag bcu gnyis te/ 'di lta ste/ mdo'i sde dang / dbyangs kyis bsnyad pa'i sde dang / lung du bstan pa'i sde dang /tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la phab pa'i chos kyi sde'o/ /yang rnam pa lnga ste/'di lta ste/ tshigs su bcad pa dang / mngon pa dang / 'dul ba dang / mdo sde dang / ma mo zhes so/ /de bzhin gshegs pa rnams kyi dbyangs ni yan lag drug cu dang ldan pa'o/ /de la de bzhin gshegs pa'i gsang ba'i mdo las gsungs pa'i dbyangs kyi yan lag drug cu ni 'di lta ste/ sems can khams dge ba'i rtsa ba nye bar rgyas par byed pa'i de bzhin gshegs pa'i gsung rab snyan snum pa dang mthong ba'i chos la bde bar reg pas 'jam pa nyid dang /don bzang ba nyid yin pas yid du 'ong ba dang / tshig 'bru bzang bas yid du 'thad pa dang / 'jig rten las 'das pa bla na med pa rjes la thob pa nyid yin pas dag pa dang /nyon mongs pa bag nyal bag chags bral ba nyid yin pas dri ma med pa dang / tshig 'bru gsal bar shes pas gsal ba dang / mu stegs thams cad kyi blo gros lta ba ngan pa rnam par 'joms pas stobs yon tan ldan pa nyid pas snyan cing 'jebs pa dang / sgrub pa rang bzhin nges par 'byin par byed pa nyid pas mnyan par 'os pa dang /phas kyi rgol ba gzhan thams cad kyis mi chod pa nyid pas mi tshugs pa dang / rangs par byed pas brnyan pa dang 'dod chags gnyen po nyid pas dul ba dang / bcas pa'i bslab pa thabs bde ba nyid pas mi rtsub pa dang / bslab pa la 'das pa las yang dag par nges par 'byin pa'i gdams ngag byed pa nyid pas mi slong ba'o//theg pa gsum gdul bya la gdams par byed pa nyid pas rab tu dul ba dang / rnam par g.yeng ba'i gnyen po nyid pas rnar snyan pa dang / ting nge 'dzin kun du skyed par byed pas lus sim par byed pa dang /lhag mthong mchog tu dga' bar skyed par byed pa nyid pas sems tshim par byed pa dang / the tshom thams cad gcod par byed pa nyid pas snying dga' bar byed pa dang / log par nges pa sel bar byed pa nyid pas dga' ba dang bde ba skyed pa dang / sgrub pa 'gyod pa med par byed pa nyid pas yongs su gdung ba med pa dang /phun sum tshogs pa thos pa'i rang bzhin shes pa'i rten nyid pas kun shes par bya ba dang / bsam pa'i shes pa phun sum tshogs pa'i rten nyid pas rnam par rig par bya ba dang / slob dpon dpe mkhyud spangs pa nyid pas rnam par gsal ba dang bdag gi don rjes su thob pa rnams mgu bar byed pa nyid pas dga' bar byed pa dang /bdag don rjes su thob pa rnams reg par bya ba nyid pas mngon par dga' bar byed pa dang / bsam gyis mi khyab pa'i chos yang dag par ston par byed pa nyid pas kun shes par byed pa dang / bsam gyis mi khyab pa'i chos yang dag par ston par byed pa nyid pas rnam par rig par byed pa dang /tshad ma dang mi 'gal ba nyid pas rigs pa dang / gdul bya la ci ltar 'os pa ston par byed pa nyid pas 'grel pa dang / 'bras bu dang bcas pa nyid pas zlos pa'i skyon mi skyed pa dang / mu stegs ri dgas tshogs thams cad skrod par byed pa nyid pas seng ge'i sgra'i shugs dang /rgya che ba nyid pas glang po'i sgra skad dang / zab pa nyid pas 'brug gi sgra dbyangs dang / slad bya mchog yin pa nyid pas klu'i dbang po'i sgra dang / snyan pa nyid pas mi 'am ci'i glu dbyangs dang / bar ma chad pas zhugs ldan pa nyid pas ka la ping ka'i sgra dbyangs sgrogs pa dang /ring du bgrod pas tshangs pa'i sgra dbyangs sgrogs pa dang / dngos grub thams cad la bkra shis pa nyid dang sngon du 'gro ba nyid pas shang shang te'u'i sgra dbyangs bsgrags pa dang / 'dir dbyangs smos pa ni don dang chos la yid ches pa'i mtshan nyid kyi sgra las yid ches pa'i don du'o//sgra smos pa ni brda de dang de la yid ches pa'i don du'o/ /grags pa gzung ba ni sgra de dang de'i brda rjes su smra ba yid ches pa'i don du'o/ /'da' bar bya ba ma yin pa nyid pas lha'i dbang po'i dbyangs ltar snyan pa dang / bdud dang phyir rgol ba thams cad las rnam par rgyal ba sngon du 'gro ba nyid pas rnga bo che'i sgra dang /bstod pa la kun nas nyon mongs pa med pas ma khengs pa dang / smad pa la kun nas nyon mongs pa med pas mi dma' ba dang / lung bstan pa thams cad la mtshan nyid rnam pa thams cad rjes su zhugs pa nyid pas sgra thams cad kyi rjes su zhugs pa dang / dran pa kun du rmongs pa de rnams 'byung ba ma yin pas tshig zur chag med pa dang / gdul bya'i bya ba la dus thams cad du nye bar gnas pa nyid pas ma tshang ba med pa dang / rnyed pa dang bkur sti la mi rten pas ma khums pa dang / bag tsha ba rnams bral bas mi zhen pa dang / skyo ba med pa nyid pas rab tu dga' ba dang /rig pa'i gnas thams cad la mkhas pa rjes su 'gro ba nyid pas khyab pa dang / sems can thams cad la mkhas pa rjes su 'gro ba nyid pas khyab pa dang / sems can thams cad kyi don thams cad phun sum tshogs par byed pas chub pa dang / rgyun nye bar chad pa med pa nyid pas rgyun chags pa dang /rnam pa sna tshogs nye bar gnas pas 'phel ba dang / dbyangs gcig sgra du ma rnam par rig par byed pa nye bar gnas pas dbyangs thams cad rdzogs par byed pa dang / don gcig dang du ma rnam par rig pa nye bar gnas pa nyid pas dbang po thams cad sim par byed pa dang / dam bcas pa ci lta ba nyid pas ma smad pa dang /ma 'ongs pa'i dus su rab tu 'thad pa nyid pas mi 'gyur ba dang / mi 'gyur bar rnam par gnas pas ma brtabs pa dang / nye ba dang ring ba'i 'khor mnyam du thos pas 'khor kun du grags pa dang / 'jig rten pa'i dpe chos yongs su 'gyur ba nyid yin pas rnam pa thams cad mchog dang ldan pa'o//de bzhin gshegs pa'i dbyangs kyi yan lag drug cu 'di ni bsdus pa'i tshul lo/ /de bzhin gshegs pa'i dbyangs ni mtshams med pa'i yan lag dang ldan pa'o/ /gang las byang chub sems dpa' rnams kyi dbyangs kyang mtha' med pa'i dbyangs kyi yan lag dang ldan pa nyid do//de skad du yang gsungs te/ nges pa'i spyod pa la zhugs pa'i byang chub sems dpa' 'di ni gzungs kyi sgo tshad med pa stong phrag brgya brnyes pas phyogs bcu'i gzhal du med grangs med pa'i sangs rgyas bcom ldan 'das rnams kyi drung du chos nyan to/ /thos pa mi brjed do//ci ltar thos pa rnams dbyangs kyi yan lag grangs med 'bum phrag bcu'i rjes su 'gro ba'i thabs la mkhas pas dang / de rnyed pa'i spobs pa tshad med pa'i rjes su 'gro ba'i rnam par 'byed pa'i sgo nas stong gsum gyi 'jig rten gyi khams thams cad du mos pa dang bsam pa dang mos pa ci lta ba bzhin du spro bar byed do zhes pa la sogs pa rgyas par ro//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las de bzhin gshegs pa'i gsung rab rnam par nges pa zhes bya ba le'u sum cu gcig pa'o// //de bzhin gshegs pa 'di'i sems 'dren pa'i thabs la mkhas pa rnam pa mang ste/'di lta ste/ de bzhin du bstan bcos las/ rnam kun mngon rdzogs rtog pa ste/ /'di ni thabs mkhas bcas pa yin/ /zhes so/ /slob dpon dbyig gnyen gyi zhal nas gsungs pa/ chos kyi 'khor lo bskor ba sangs rgyas ye shes rnam par thar pa thabs la mkhas pa'i las ni/bye ba brgya'i 'dzam bu gling rnams su cig car du chos kyi 'khor lo bskor ba'o zhes so/ /de la thabs la mkhas pa ni gtso bor stong nyid snying rje dag gam de las skyes pa'i las nges pa'o/ /'di lta ste/ mi khom pa nas 'ongs pa nyid dang bdag cag rnams kyi don du ma yin zhes pa mi rnams kyi ri mor bya ba chen po ma yin pa yongs su spang ba'i don du gzugs dang gzugs med pa dag tu skye ba rnam par spangs te dga' ldan du skye ba bstan par 'gyur ro/ /rigs mnyam pa'i sems can rnams spro ba bskyed pa'i don du mngal du gnas pa bstan pa nyid do//gzhan la rag las pas dngos grub ma yin no zhes skyes bu byed pa la yang dag par sbyar ba'i don du sangs rgyas gzhan gyi gdams ngag med par rang nyid mngon par rdzogs par byang chub pa bstan to/ /rten cing 'brel par 'byung ba nges par rtogs pa rnams thun mong ma yin pa nyid yongs su gsal bar bya ba'i don du rten cing 'brel par 'byung ba la rnam par gnas pas rnam par gnas so//bdag nyid chos dga' ba'i bde ba chen po skyed par gsal bar bya ba'i don du gzhan ched du mngon par rdzogs par sangs rgyas nas zhag bdun phrag bdun du mo'u nes bskyel lo//yang de ni chos dga' ba'i bde ba chen po bskyed pa rnams de yang de lta bu'i chos dga' ba spangs nas yang sems can rnams la rjes su brtse bas chos ston par byed do zhes sems can rnams kyis de bzhin gshegs pa la dga' ba dang gus pa yang dag par 'phel bar bya ba'i don du dang /chos nyan pa'i don du yongs su sred pa rnams chos la gus par bya ba'i don du de'i cang mi gsung bar gyur to/ /de nas chos ston pa'i don du tshangs pa dang byang chub sems dpa' chen po la sogs pa rnams kyis bskul ba btab po/ / kha cig tu bcom ldan 'das rang gis ston par 'dod pa dag bstan pa'i don du ma bskul bar chos ston par rtsom ste/ gzhan du na 'jig rten rnams kyi ston par 'dod pa nyid ni mi shes so/ /res 'ga' yang nyan thos dang byang chub sems dpa'/ res 'ga' yang sku'i phyag gis/ res 'ga'i tshe ngag gis/ res 'ga'i tshe yid kyis/ res 'ga' gsum gyis kyang chos ston par byin gyis rlob pa nyid de/ de dang de'i rigs can sems can rnams spro ba 'phel bar bya ba'i don du'o/ /bye brag gi las kyi don du 'od zer bcas pa'i cho 'phrul bskul ba 'debs pa dang ston par byed do/ /de yang de bzhin gshegs pa'i 'od zer de ni las brgyad ldan dang lus gnyis ldan no//de la las brgyad ni/ 'di lta ste/ 'od zer dag gis reg pa'i byang chub sems dpa' dag gis de bzhin gshegs pa'i byin gyi rlabs las skyes pa'i stobs la gzigs par byed pa de yang dag par bskul ba'i las can gyi 'od zer ro//gang 'jig rten khams grangs med spro ba dang / 'od 'dom gang tsam du sdud pa de ni spro ba dang sdud pa'i las can dang / 'khor 'od zer grangs med pa'i rgyu yin pa nyid kyis rgyu'i las can dang / 'jig rten khams thams cad du de bzhin gshegs pa dang / des byin gyis brlabs pa'i byang chub sems dpa'i 'khor gyi dkyil 'khor yang dag par ston pas kun du yang dag par ston pa'i las can dang /ngan song thams cad kyi sdug bsngal rab tu zhi bar byed pas rab tu zhi ba'i las can dang / bdud kyi yul thams cad du 'od zer gyis mog mog por byed pas zil gyis gnon pa'i las can dang /bsam gyis mi khyab pa'i sangs rgyas kyi nus pa ston par byed pas 'jug par byed pa'i las can dang / tshigs su bcad pa'i sgra 'byin pas bskul ba 'debs pa'i las can dang / gang gi tshe 'od zer de 'jig rten khams gzhan du spros pa de'i tshe skar mda' lta bu'i lus dang / gang gi tshe sprin thug po dra ba khang bu brtsegs pa lta bur rnam par gnas pa rab tu 'phro ba gcig gis thams cad rnam par snang bar byed pa de'i tshe nyi ma lta bu'i lus so//gzhan yang gang gi tshe bcom ldan 'das 'das pa'i las rnams lung bstan par 'dod par gyur pa de'i tshe 'od zer bcom ldan 'das kyi rgyab tu nub par 'gyur ro//gang gi tshe ma 'ongs pa mdun du'o/ /gang gi tshe dmyal bar skye ba de'i tshe zhabs kyi mthil du'o/ /gang gi tshe dud 'gror skye ba de'i tshe zhabs kyi rting pa la'o/ /gang gi tshe yi dags su skye ba de'i tshe rkang pa'i mtheb chen la'o/ /gang gi tshe mir skye ba de'i tshe pus mo la'o/ /stobs kyi 'khor los sgyur ba'i rgyal po la ni phyag g.yon pa la'o//'khor los sgyur ba la ni phyag g.yas pa la'o/ /lhar skye ba ni lte bar ro/ /nyan thos kyi byang chub ni zhal du'o/ /rang rgyal byang chub ni mdzod spu la'o/ /bla na med pa yang dag par rdzogs pa'i byang chub ni gtsug tor du'o zhes so//'phags pa thams cad dang thun mong ma yin pa phan 'dogs pa la 'jug pa'i spyod lam bzhi ston pa dang snyoms par 'jug pa dang nang du yang dag 'jog ste/ gnas pa bzhis 'og nas bshad pas gnas pa'o/ /sngon du bshad pa bzhin du lan gsum du bzlas pa rnam pa bcu gnyis su chos kyi 'khor lo skor bar byed do//'di tsam nyid 'gro ba'i don phun sum tshogs pa'o zhes shes par 'dod nas/ chos kyi phung po brgyad khri rab tu bstan pa las/ phyi dal byed pa'i sems can rnams rings par bya ba'i don du mya ngan las 'da' bar nye bar bgrod pa bstan to//gang las 'jig rten khams thams cad du gdul bya ji lta ba bzhin sems can yongs su sbyin par bya ba'i ched du sna tshogs pa gzhal du med pa bsam gyis mi khyab pa'i thabs kyis rgyud gcig tu gzhan la phan 'dogs pa/ rang dang spyi'i mtshan nyid kyi yul bya ba sgrub pa'i ye shes so//de bzhin gshegs pa rnams kyi sprul pa sna tshogs kyi rten yin pas sprul pa'i sku'o/ /de ni yang sprul pa ni rnam pa gsum ste/ 'di lta ste/ lus kyi sprul pa dang / ngag gi sprul pa dang / yid kyi sprul pa'o/ /de la dang po ni gsum ste/ 'di lta ste/ rdzu 'phrul kun du ston pa dang / skye ba kun du ston pa dang / las kyi rnam par smin pa kun du ston pa'o/ /de la rdzu 'phrul kun du ston pa ni rnam pa gsum ste/ 'di lta ste/ de bzhin gshegs pa de gang mngon du byas nas gdul bya rnams rab tu dang bskyed par byed pa ste/ lteng rgyas 'od srungs la sogs pa bzhin du gdul bya rnams 'jug par byed pa de ni rdzu 'phrul gyi cho 'phrul lo//gang gis dge ba'i rtsa ba rgyas par byas pa las su rung ba skyed pa gdul bya rnams yongs su smin par byed pa de ni kun brjod pa'i cho 'phrul lo/ /gang rang gi gdams pa'i stobs las 'phags pa'i lam skyed pa khams gsum gyi gdul bya rnams grol bar byed pa/'od zer spro ba la sogs pas sdug bsngal nye bar zhi bas sngon gyi dge ba'i rtsa ba rjes su dran pas bde 'gro la rab tu gnas par byed pa de ni rjes su bstan pa'i cho 'phrul lo/ /cho 'phrul 'dis gdul bya rnams so sor sdud cing 'dzud pas cho 'phrul lo//cho 'phrul de gsum ni gnas pa bzhis byed do/ /gnas pa yang bzhi ste 'di lta ste/ spyod lam gyi gnas pa dang / chos ston pa'i gnas pa dang / snyoms par 'jug pa'i gnas pa dang / nang du yang dag par 'jog pa la gnas pa'o/ /de la spyod lam gyi gnas pa ni bzhi ste/'di lta ste/ bzhengs pa dang / 'chag pa dang / bzhugs pa dang / gzims pa'o/ /ngag gi las thams cad chos ston pa'i gnas pa'o/ /gang la rang bzhin mnyam par gzhag pa'i yid dang gang dag ting nge 'dzin mngon du byed pa'i yid dang / de gnyi ga ni snyoms par 'jug pa'i gnas pa'o//de sangs rgyas spyan gyis sems can thams cad la gzigs pa dang lha la sogs pa nye bar 'du ba dag tu sems can thams cad la dmigs pa'i yid kyi las de gnyi ga ni nang du yang dag 'jog gi gnas so/ /de bzhin gshegs pa ni cig car du 'jig rten khams thams cad du skye gnas nye bar ston pa ni skye ba kun du ston pa'o//de bzhin gshegs pa yang rang gis byas pa'i las dge ba dang / mi dge bdag gi 'bras bu 'dod pa dang mi 'dod pa dag rang nyid longs spyod pa ni las bcu drug slu ti bzhin du ston par byed pa 'di na las kyi rnam par smin pa bstan to//las slu ti ni bcu drug ste/ 'di lta ste/ bcom ldan 'das pad ma'i rtsa lag [(]zhes [,]ces [)]pa'i g.yon can du gyur pas rang sangs rgyas dri mdzes ldan mas bcom ldan 'das la skur pa btab po/ /de bzhin gshegs pa thams cad zil gnon gyi nyan thos dga' ba zhes bya ba la skur pa btab pas bram ze mo tsi na tsa zhes bya bas bcom ldan 'das la skur pa btab po//bcom ldan 'das bram zer gyur pa na drang srong 'jigs byed zhes pa mngon par shes pa lnga dang ldan pa la skur pas gzhan mdzes ldan mas skur pa btab po/ /ma gcig min pa'i spun rdo bas bsnur bas lha sbyin gyis 'phangs pa'i rdo ba'i dum bu bcom ldan 'das kyi zhabs kyi mtheb chen la phog go//bcom ldan 'das khye 'ur gyur pas rang sangs rgyas rdo gseg gi brdungs pas bcom ldan 'das spa ma'i tsher ma la nyal ba dang / bcom ldan 'das glang po che'i kha lo bar gyur pas rang sangs rgyas kyi lam glang po ches bkag pas glang po che nor skyong khros nas de bzhin gshegs pa'i tha dad du brgyugs so/ /bcom ldan 'das rgyal por gyur pa na mtshon gyis skyes bu la brgyab pas bcom ldan 'das zhabs bsnyung ngo //bcom ldan 'das nya ba'i khye'ur gyur pa na nya pa gzhan gyi khye'u dag gis nya bsad pa la yid dga' ba byas pas/ shAkya rnams bsad pa'i nyi ma la bcom ldan 'das dbu bsnyung ngo / /de bzhin gshegs pa bu sa'i nyan thos la nas zo zhig sran chung zo zhig ces pa la sogs pa ngan smras pas bcom ldan 'das bai rany+dza'i drung du zla ba gsum du nas gsol lo//stobs 'gyed pa na gyad stobs ldan gzhan gyi tshigs pa bcag pas bcom ldan 'das rgyab bsnyung ba 'byung ngo / /bcom ldan 'das sman par gyur pas phyin ci log gi gso dpyad byas pas bcom ldan 'das la gra ha na'i nad byung ngo //bcom ldan 'das bram ze snang ba skyong du gyur pas de bzhin gshegs pa 'od srungs la dbu skra bregs la byang chub ga la yod de byang chub ni rnyed par dka'o zhes ngan du smras pas bcom ldan 'das lo drug tu dka' ba spyad do//'phags pa mang pos bkur ba'i sde pa'i chos lugs kyi bcom ldan 'das la 'phar ba bcu drug ste/ 'di lta ste/ yang dag par rdzogs pa'i sangs rgyas 'od srungs la skra bregs la byang chub ga la yod de byang chub ni rnyed par dka'o smras pas las gang byas pa de'i rnam par smin pa byang chub sems dpas dka' ba spyad do//bla ma'i bka' las 'das nas bya ba byas pas las gang byas pa des dge slong lnga sde rnams kyis ston pa spang bar byas so/ /rang sangs rgyas la tshig rtsub mo smras pas las gang byas pa des bram ze b+ha ra d+h+wa dzas sangs rgyas la tshig rtsub po smras so//drang srong gang gis yang slob ma'i tshogs dbye ba byas pas las gang byas pa des grong khyer ko shA pa ru dge 'dun 'byed pa byung ngo / /bcom ldan 'das sman chen por gyur pas 'gran zla'i rgyal po 'byed par byas pas las gang byas pa des lhas sbyin gyis dge 'dun 'byed pa byas so//rang sangs rgyas skrag par bya 'dod nas glang po che smyon pa btang bas las gang byas pa des glang po che nor skyong sangs rgyas kyi thad du brgyugs so/ /nor gyi don du grogs kyis ma gzhan spun bsad pas las gang byas pa des rgyal po'i khab tu lha sbyin gyis sangs rgyas steng du rdo 'phangs so/ / 'phen pa'i mdung thung gis skyes bu bsad pas las byas pa des bcom ldan 'das kyi zhabs las khrag byung ngo / /khros nas de bzhin gshegs pa'i dbang du byas te 'di ni nas za bar 'os pa'o zhes smras pas byas pa'i las gang des bai rany+dza'i grong du dbyar char gyi dus su zla ba gsum du bcom ldan 'das nas kyi bza' ba gsol lo//rang sangs rgyas dga' zhes pa la skur pa btab pas las gang byas pa des bram ze mo tsan tsas brdzun gyis bcom ldan 'das la skur pa btab po/ /smad 'tshong ma bsad nas de'i rgyan rnams rgyal ba'i gnas su bskos nas bzhag pas las gang byas pa des bcom ldan 'das mdzes ldan mas skur to//bsod snyoms la rgyu ba'i rang sangs rgyas kyi lhung bzed sbas pas las gang byas pa des shA la'i grong du bcom ldan 'das bsod snyoms ma rnyed pas lhung bzed stong par gyur to/ /bcom ldan 'das gyad stobs ldan du gyur pas stobs 'gyed pa stobs ldan gyad gzhan tshigs pa bcom pas las gang byas pa des bcom ldan 'das rgyab tu sdug bsngal byung ngo //bcom ldan 'das sman par gyur pa na khros nas nad pa la sman phyin ci log byin nas 'khrugs par byas pas las gang byas pa des bcom ldan 'das bying pa can gyi nad skyes so//de nyid kyis bcom ldan 'das shin tu 'byang ba byung ngo / /bcom ldan 'das mi'i rgyal por gyur pas nya'i tshogs gsod pa'i snang ba mi rnams la byas pa des shAkya'i rigs bsad pa de'i nyin mo bcom ldan 'das dbu la tshor ba drag po skyes so/ /las 'di 'bras bu sdug bsngal ni//ngan song rnams su mang myong 'gyur/ /las dang rjes 'brel 'bras bu ni/ myong ba'i lhag ma tsam shes bya/ /zhes so/ /gdul bya rnams drang ba'i don du dka' ba spyod pa bstan pa dang / tshul khrims brtul zhugs tsam gyis dag par 'gyur ba ma yin te/ye shes nyid kyis dag par rig par bya ba'i don du yang / dge sbyong mgo zlum la byang chub ga la yod de byang chub ni shin tu 'thob par dka' ba'o zhes ngag gi las ngan pa de'i 'bras bu spyod pa dka'o zhes gdul bya rnams kyi ngag gi nyes par spyod pa rnams bzlog par bya ba'i don du de bzhin gshegs pas dka' ba spyod pa bstan to//lus kyi sprul pa de yang rnam pa gnyis te/ rang lus dang 'brel pa dang / gzhan lus kyi 'brel pa'o/ /de la'ang lus dang 'brel pa 'di lus kyi sprul pa ni 'khor los sgyur ba la sogs pa'i gzugs su ston pa'o//'di lta ste/ grong khyer mnyan yod du ka pi Na'i rgyal po gdul bar bya ba'i don du bdag cag gi ston pa 'khor los sgyur ba'i gzugs bzung ste/ rgyan kyang bcangs gzhu yang gzung ba nyid du/ de'i 'khor dgra bcom pa chen po thams cad kyis cha 'og gi rgyal phran dang blon po chen po'i gzugs la sogs pa rnam pa du ma'i rgyan rnams rab tu byung ba la bkag pa rnams gzung ba nyid do zhes pa la sogs pa mtha' med pa'i lus kyi sprul pa de bzhin gshegs pa byang chub sems dpa' nyan thos chen po rnams rig par bya'o// gzhan yang 'ga' zhig tu gdul bya yod pa'i yul du gshegs nas dang / 'ga' zhig tu gdul bya rnams rang gi yul du blangs nas dang / 'ga' zhig tu yul gcig tu gnas pa'i sku phyogs thams cad du 'jig rten khams thams cad du bdag gi dngos po la sogs pa bstan pas gdul bya rnams kyi yang dag pa ma yin pa'i rtog pa rnams dben par byed do//bag med pa rnams bag yod pa'i gnas su rnam par bzhag pas de'i sdug bsngal nye bar zhi bar byed do/ /ci ltar bdag cag gi ston pas dga' bo dang sor mo'i phreng ba dang ma skyes dgra dang bzod pa la sogs pa'o//de'i phyir sangs rgyas bcom ldan 'das dang byang chub sems dpa' rnams dang nyan thos rnams kyi spyod pa ni bsam gyis mi khyab pa'i bdag lta bu ci smos so/ /de rnams la grol ba 'dod pas dad pa nyid kyis bsgrub par bya'o/ /gzhan lus dang 'brel pa'i lus kyi sprul pa ni/bdud la sogs pa rnams kyis sangs rgyas skur ston pa'o/ /ma 'brel pa'i lus kyi sprul pa ni sa la sogs pa'i rin po che sna bdun gyi rang bzhin la sogs pa'i gzugs su ston pa dang / gang yang gzhal du med pa'i sangs rgyas kyi gzugs ston pa dang /gang 'od zer spros pas 'jig rten gyi khams snang bar byed pa dang / gang yang skye ba rnams ston pa'o/ /rang lus dang 'brel pa ngag gi sprul pa ni/ gang tshangs pa'i dbyangs kyis 'jig rten khams mtha' med pa rnams su go bar byed pa'o/ /gzhan lus dang 'brel pa ngag gi sprul pa ni/gang gi nyan thos la sogs pa rnams gting dpag dka' ba'i chos rnams kyang sangs rgyas kyi theg pa chen po'i chos ston par byed do/ /ci ltar 'phags pa rab 'byor la sogs pa'o/ /gzhan lus dang 'brel pa ngag gi sprul pa ni/ sil snyan thams cad kyi rnam pa las dang /gzugs su snang ba thams cad las dang / nam mkha' las kyang chos ston pa'i sgra 'byung ngo / /rang lus dang 'brel pa'i sems kyi sprul pa ni/ gang bdag nyid kyi chos thams cad mngon par rtogs pa'o/ /gzhan dang 'brel pa'i sems kyi sprul pa ni/gang pha rol gyi sems kyang de bzhin gshegs pas tshar gcod pa ste/ gang gis shes rab chung ba rnams kyang phra mo'i chos kyang brnyes pas so/ /dran pa stor ba rnams dran pa rnyed do zhes pa la sogs pa rgyas par ro/ /sangs rgyas sprul pa de rnams ni rnam pa thams cad dus thams cad du rjes su 'gro ba bsam gyis mi khyab par rig par bya'o//bya ba spyod pa grangs med bsam gyis mi khyab pa dang / zhing dbye ba bsam gyis mi khyab pas so/ /sems can don bya ba rgyun mi 'chad par 'jug pas bsam gyis mi khyab pas so//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las thabs la mkhas pa rnam par nges pa zhes bya ba le'u sum cu gnyis pa'o// //thugs rje chen po can de bzhin gshegs pa 'di'i bskal pa grangs med mtshams tshigs med par dka' ba spyad nas yang dag par rnyed pa'i yang dag par rdzogs pa'i sangs rgyas kyi dam pa'i chos rin po che gzhan la phan 'dogs pa tshad med pa dang rab tu ldan pa gsung rab ni yan lag bcu gnyis te/'di lta ste/ mdo'i sde dang / dbyangs kyis bsnyad pa dang / lung du bstan pa dang / tshigs su bcad pa dang / ched du brjod pa dang / gleng gzhi dang / rtogs pa brjod pa dang / de lta bu byung ba dang / skyes pa rabs dang / shin tu rgyas pa dang / rmad du byung ba dang / gtan la phab pa'o/ /de la tshig rkyang lhug gis don mdor brjod pa de ni mdo'o/ /gang mdo nyid bar dang tha ma dag tu tshigs su bcad pas dbyangs su bsnyad pa dang /gang dag bgrang bya'i don mdor bstan pa shes pas brtag par bya ba gzhan yod pa de ni dbyangs kyis bsnyad pa'o/ /gang du nyan thos la sogs pa dang / 'das pa la sogs pa dang / skye ba la sogs pa lung ston par byed pa dang / gang dag don nges par bstan pa ni dpe bye brag tu dgongs pa bshad pas de ni lung du bstan pa'o//gang tshig sbyar bas gsungs pa de ni tshigs su bcad pa'o/ /de yang tshigs bcad rkang pa gnyis pa dang / rkang pa gsum pa dang / rkang pa bzhi pa dang / rkang pa lnga pa dang / rkang pa drug pa rnams so/ /yang thugs dgyes nas ched du gsungs pa de ni ched du brjod pa'o/ /gang cung zad gzhir byas nas gsungs pa de ni gleng gzhi'i sde'o//gang dpe dang bcas nas gsungs pa de ni rtogs pa brjod pa'o/ /gang sngon sbyor ba rab tu ldan pa de ni de lta bu byung ba'i sde'o/ /gang byang chub sems dpa'i spyod pa rab tu ldan pa de ni skyes pa'i rabs so/ /gang byang chub sems dpa'i sde snod ldan pa de ni sems can thams cad la phan pa dang /bde ba byin gyis brlabs pa can yin pas shin tu rgyas pa'o/ /gang nyan thos byang chub sems dpa' sangs rgyas rnams kyi ngo mtshar rmad du byung ba'i chos ston pa de ni rmad du byung ba'i chos so/ /gang du phyin ci ma log pa'i chos kyi mtshan nyid brjod pa de ni gtan la phab pa'o/ /yang de bzhin gshegs pa'i gsung rab yan lag dgu ste/'di lta ste/ mdo dang dbyangs kyis bsnyad pa dang / lung du bstan pa dang / skyes pa rabs dang / ched du brjod pa dang / gleng gzhi dang / tshigs su bcad pa dang / de lta bu byung ba dang / rnam par nges pa'i gtam mo/ /mdo'i sde la sogs pa de rnams ni mdor bsdu na sde snod gsum du 'gyur ro//de la gang mdo'i sde dang dbyangs kyis bsnyad pa dang lung du bstan pa dang tshigs su bcad pa dang / ched du brjod pa 'di rnams ni nyan thos kyi mdo sde'i sde snod do/ /gang gleng gzhi dang rtogs pa brjod pa dang de lta bu byung ba 'khor dang bcas pa 'di ni 'dul ba'i sde snod do/ /de la gleng gzhi'i sde ni 'thad pa dang ldan pa'i bslab pa bcas pa gsungs pa bsdus pa ni 'dul ba'i sde snod do//rtogs pa brjod pa la sogs pa ni de'i 'khor du rig par bya'o/ /gang shin tu rgyas pa dang rmad du byung ba 'di ni byang chub sems dpa'i sde snod do/ /gtan la phab pa ni nyan thos dang byang chub sems dpa' gnyi ga'i mngon pa'i sde snod do//sde snod gsum po de rnams nyid ni chos kyi phung po brgyad khri dang bzhi stong du 'gyur te/ sems can gyi sems kyi spyod pa brgyad khri dang bzhi stong gi sems kyi spyod pa re re'i gnyen po gzhung ci srid kyis yongs su rdzogs pa de srid kyi gsung ni chos kyi phung po zhes chos kyi phung po stong phrag brgyad cu ste gzhung bye ba phrag brgyad dang gzhung 'bum phrag bzhi bcu tham par 'gyur ro zhes mngon pa kun las btus pa las so//chos mngon pa mdzod las/ /thub pas chos kyi phung po ni/ /stong phrag brgyad cu gsungs pa gang / /zhes pa chos kyi phung po stong phrag brgyad cu ni chos kyi phung po'i tshad ni 'di srid cig gsungs te/chos kyi phung po zhes pa'i ming can mngon pa'i bstan bcos kyi tshad ni chos kyi phung po'i tshad do zhes so/ /de ni stong phrag drug go/ /yang gzhan dag smra ba/ phung po khams skye mched rten cing 'brel par 'byung ba bden pa/ zas bsam gtan tshad med pa gzugs med rnam thar zil gnon zad par byang chub phyogs mngon par shes pa so sor yang dag par rig pa smon lam ye shes nyon mongs med pa la sogs pa bshad pa so sor chos kyi phung po zhes so//de bzhin du sems can rnams kyi 'dod chags zhe sdang gti mug nga rgyal la sogs pa spyod pa'i dbye bas spyod pa stong phrag brgyad cu de rnams kyi gnyen po chos kyi phung po stong phrag brgyad cu bcom ldan 'das kyis gsungs so zhes so//bstan bcos tshad ni gcig yin te/ /phung po la sogs de bzhin gcig /spyod pa'i gnyen por gyur pa rnams/ /chos kyi phung por rjes su brjod/ /ces so/ /de bzhin gshegs pa ldem por dgongs pa bzhi bstan pa la/ gzhug pa la ldem por dgongs pa dang /mtshan nyid la ldem por dgongs pa dang / gnyen po la ldem por dgongs pa dang / yongs su sgyur ba la ldem por dgongs pa'o/ /de la gzhug pa la ldem por dgongs pa ni/ bstan pa la gzhug pa'i don du mi skrag par bya ba'i phyir nyan thos rnams la gzugs la sogs pa yod pa nyid bstan pa rig par bya'o//mtshan nyid la ldem por dgongs pa ni/ chos thams cad rang bzhin med pa skye ba med pa bstan pa'i phyir/ don gzhan la dgongs nas yongs su brtags pa gzhan gyi dbang yongs su grub pa rang bzhin gsum du rig par bya'o/ /gnyen po la ldem por dgongs pa ni/ nyes pa rnams kyi rnam par sel bar blta bar bya'o//'di lta ste/ sangs rgyas la brnyas pa'i sgrib pa'i gnyen po yang dag par gsungs pa/ sangs rgyas thams cad kyi chos kyi sku khyad par med pas mnyam pa nyid la dgongs pa'i ldem por dgongs pas/ bdag nyid dus de'i tshe yang dag par rdzogs pa'i sangs rgyas rnam par gzigs zhes bya bar gyur to zhes pa'o//chos la brnyas pa'i gnyen po yang dag par gsungs pa/ gang+gA chu bo bye ma dang mnyam pa'i sangs rgyas la bsnyen bkur ba 'di tsam gyis theg pa chen po la nges par rtogs pa skye'o zhes pa'o/ /'gyed pa'i gnyen po yang dag par gsungs pa/ dus gzhan la dgongs nas gang zhig bde ba can gyi 'jig rten khams su skye ba'i phyir smon lam 'debs par 'gyur ba de de ru skye bar 'gyur ro zhes pa dang /dri ma med pa'i zla ba'i 'od zer gyi mtshan gzung ba tsam gyis bla na med pa yang dag par rdzogs pa'i byang chub tu nges par 'gyur ro zhes pa'o/ /chung ngu tsam gyis chog par 'dzin pa'i sgrib pa'i gnyen po yang dag par gsungs pa/chung ngus chog par 'dzin pa'i gang zag gi bsam pa la dgongs nas gang de dge ba'i rtsa ba 'ga' zhig gi bsngags pa dang / 'ga' zhig gi bsngags pa ma yin pa'o/ /'dod chags la spyod pa'i sgrib pa'i gnyen po yang dag par gsungs pa/ gang du bcom ldan 'das sangs rgyas kyi zhing rnam par 'jig pa rjod par byed pa dang /nga rgyal la spyod pa'i sgrib pa'i gnyen po yang dag par gsungs pa/ gang du bcom ldan 'das lhag pa'i phun sum tshogs pa rjod par byed pa dang / 'gyod pa'i sgrib pa'i gnyen po yang dag par gsungs pa/ gang zhig sangs rgyas byang chub sems dpa' rnams la gnod pa byed par 'gyur ba de thams cad bde 'gror nye bar 'gro bar 'gyur ro zhes pa dang /dus 'phral du 'ongs pa'i byang chub sems dpa' rnams kyi theg pa chen po las 'byed pa'i sgrib pa'i gnyen po yang dag par gsungs pa/ nyan thos chen po rnams sangs rgyas nyid du gsungs pa dang theg pa gcig tu gsungs pa'o//yongs su sgyur ba la ldem por dgongs pa'i rjod par byed pa zab mo ru lta bar byed do/ /'di lta ste/ snying po med la snying po blo/ /phyin ci log la'ang legs gnas cing / /nyon mongs pas ni nyon mongs pas/ /byang chub dam pa thob par 'gyur//zhes so/ /'dir dgongs pa ni snying po med pa ni rnam par g.yeng ba med pa la/ snying po blo gang rnams kyi gtso bo'i blo'o/ /rtag pa dang bde ba gtsang ba bdag rnams su 'dzin pa las bzlog nas mi rtag pa la sogs pa phyin ci log la legs par gnas pa ste yongs su mi nyams pa'o//nyon mongs pas ni dka' spyad rtsol ba'i ngal bas so/ /shin tu don gnyer bas yongs su nyon mongs pa zhes pa'o/ /bdag cag gi ston pa'i dam pa'i chos dus ci tsam du gnas par 'gyur zhe na/ dam pa'i chos lnga brgya phrag lnga ru gnas par 'gyur ro zhes gsungs pa'i phyir na/ brgya phrag lnga rnams kyi tshogs pa ni lnga brgya phrag go/ /lnga brgya phrag lnga ni phyed dang bcas pa'i lo stong phrag gnyis so/ /dam pa'i chos rnam par nub pa yang sgrub po yongs su nyams pa yin no zhes kha cig go/ /gzhan du yang gsungs te/ bcom ldan 'das shAkya thub pa'i dam pa'i chos gnas pa'i dus ni lo stong phrag lnga ste/de rnams brgya phrag lnga lngas phyed du byas pa'i lnga brgya phrag bcur 'gyur ro/ /yongs su 'gyur spyod kyi dus bcu ste/ de la dang po ni re zhig rtogs pa yongs su 'gyur spyod kyi dus dang / sgrub pa yongs su 'gyur spyod kyi dus dang / lung yongs su 'gyur spyod kyi dus so//yang yongs su 'gyur spyod so sor yongs su 'gyur spyod gsum gsum ste/ yongs su spyod pa dum bu dgur 'gyur ro/ /'di lta ste/ lnga brgya phrag dang po la dgra bcom pa'i yongs su 'gyur spyod kyi dum bu'o/ /gnyis pa la phyir mi 'ong ba yongs su 'gyur spyod do/ /gsum pa ni rgyun du zhugs pa yongs su spyod cing 'gyur ba'o//'di tsam nyid kyis rtogs pa yongs su spyod pa rdzogs pa'o/ /bzhi pa la lhag mthong yongs su spyod pa'o/ /lnga pa la ting nge 'dzin yongs su spyod pa'o/ /drug pa la tshul khrims yongs su spyod pa'o/ /'di tsam gyis sgrub pa yongs su spyod pa rdzogs pa'o//bdun pa la ni chos mngon pa'am sde snod yongs su spyod cing 'gyur ba'o//brgyad pa la mdo sde'i sde snod yongs su spyod cing 'gyur ba'o/ /dgu pa la 'dul ba'i sde snod yongs su 'gyur ba'o/ /'di tsam gyis lung la yongs su spyod pa rdzogs pa'o/ /lnga brgya phrag dgu la yongs su spyod 'gyur dum bu dgu'o//lnga brgya phrag bcu pa la rtags tsam nyid khyad par du 'phags pa'o/ /'di nyid ni lnga brgya tha ma zhes so/ /sangs rgyas rnams kyis mnyam pa ni rgyu gsum gyis yin te/ 'di lta ste/ sngon yang dag par grub pa bsod nams ye shes tshogs dang / chos kyi sku yongs su rdzogs pa nyid dang /'jig rten gyi don spyod pa'o/ /tshe dang rigs dang tshad rnams tha dad par 'gyur ro/ /'di lta ste/ ring ba dang ches thung ba 'tsho bas tshe mi mnyam pa'o/ /rgyal rigs dang bram ze rigs su skye bas rigs mi mnyam pa'o/ /'od srungs dang gau ta ma la sogs pas rgyud tha dad pa dang / dus ji bzhin du tshad chung ba dang tshad chung ngu ma yin pas tshad mi mnyam pa'o//gsungs pa/ tshogs dang chos kyi sku dag dang / /'gro ba'i don ni spyod pa las/ /sangs rgyas rnams ni mnyam pa nyid/ /tshe ring tshad ni ma yin no/ /zhes so/ /de lta na yang sngon gyi sangs rgyas tshe ring bar gyur la/ 'phags pa byams pa sangs rgyas su 'gyur ba na ring du gnas par 'gyur ro//bdag cag gi ston pa shAkya thub pa ni lo brgyad cu gnas pa'o/ /'di lta ste/ lo nyi shu nyer dgu khab tu bzhugs pa'i sa dang / lo drug tu dka' spyad la gnas pa dang / sangs rgyas par gyur nas dbyar gnas dang po chos kyi 'khor lo'i gnas su mdzad pa dang /gnyis pa be+e lu ba ne ru'o/ /yang be+e lu ba nar gsum pa'o/ /yang bzhi pa be lu ba nar ro/ /lnga pa me shA l+yi ngo / /drug pa go ler ro/ /bdun pa sum cu rtsa gsum lha ru rdo ar mo ni ga tu'o/ /brgyad pa su shumA ra gi rir ro/ /dgu pa kau shAm+bI ru'o/ /bcu pa sprel btul ba zhes pa glang po che pA ri le ya'i nags su'o//bcu gcig pa rgyal po'i khab tu'o/ /bcu gnyis pa bai rany+dza'i grong du'o/ /bcu gsum pa mchod rten gyi ri la'o/ /bcu bzhi pa rgyal po dze ta ba na'i lha khang du'o/ /bco lnga pa ka pi la ba tu ru shing n+ya gro d+ha'i kun dga' ra bar ro/ /bcu drug pa a Da ba kar ro/ /bcu bdun pa rgyal po'i khab tu'o//bco brgyad pa dz+wa li ni'i brag phug tu'o/ /yang bcu dgu pa dz+wa li ni'i brag phug tu'o/ /nyi shu pa rgyal po'i khab tu'o/ /dbyar gnas bzhi ni mnyan yod du shar phyogs ma mo mr-i gA ri'i kun dga' ra ba ru'o/ /grong khyer mnyan yod du lo nyi shu nyer gcig dbyar gnas mdzad do zhes pa 'phags pa gnas brtan pa 'dod do//des na bcom ldan 'das shAkya thub pa ni lo brgyad cur gyur to zhes so/ /paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las gsung rab rnam par nges pa zhes bya ba le'u sum cu gsum pa'o// // mkhas pa rnams kyi phun sum tshogs pa rnam pa 'di gsum nyid yid la byas pas sangs rgyas bcom ldan 'das rnams kyi drung du dga' ba dang gus pa drag po bskyed par nus so/ /'di lta ste/ rgyu phun sum tshogs pa dang / 'bras bu phun sum tshogs pa dang / phan 'dogs pa phun sum tshogs pa pa'o//de la rgyu phun sum tshogs pa la bzhi ste/ 'di lta ste/ bsod nams ye shes tshogs goms pa dang / dus ring du goms pa dang / bar chad med par goms pa dang / dam par byas te goms pa'o/ /'bras bu phun sum tshogs pa yang rnam pa bzhi ste/ 'di lta ste/ ye shes phun sum tshogs pa dang /spong pa phun sum tshogs pa dang / nus pa phun sum tshogs pa dang / gzugs sku phun sum tshogs pa'o/ /gzhan la phan 'dogs pa phun sum tshogs pa yang rnam pa bzhi ste/ 'di lta ste/ sems can rnams kyi dmyal ba'i sdug bsngal shin tu ches nges par grol ba'i phun sum tshogs pa dang /dud 'gro'i sdug bsngal shin tu ches nges par grol ba'i phun sum tshogs pa dang / yi dags sdug bsngal shin tu ches grol ba'i phun sum tshogs pa dang / 'khor ba'i sdug bsngal shin tu ches grol ba'i phun sum tshogs pa'o/ /yang na sems can rnams nyan thos theg pa la rab tu 'jog pa'i phun sum tshogs pa dang /rang sangs rgyas theg pa la rab tu 'jog pa'i phun sum tshogs pa dang / byang chub sems dpa'i theg pa la rab tu 'jog pa'i phun sum tshogs pa dang / bde 'gro la rab tu 'jog pa'i phun sum tshogs pa'o/ /de la ye shes phun sum tshogs pa ni yang rnam pa bzhi ste/ 'di lta ste/ nye bar bstan pa ma yin pa'i ye shes dang / thams cad shes pa dang / dus dang rnam pa thams cad mkhyen pa dang / 'bad pa med par shes pa'o/ /spong ba phun sum tshogs pa yang rnam pa bzhi ste/ 'di lta ste/ nyon mongs pa thams cad spangs pa dang / shin tu ches spangs pa dang / bag chags dang bcas pa spangs pa dang /ting nge 'dzin dang snyoms par 'jug pa'i bag chags thams cad spangs pa'o/ /nus pa phun sum tshogs pa yang rnam pa bzhi ste/ 'di lta ste/ phyi rol yul sprul pa yongs su bsgyur ba byin rlabs dbang du gyur pa phun sum tshogs pa dang / sku tshe ches ring ba byin rlabs dbang du gyur pa phun sum tshogs pa dang / nam mkha' sgrib pa ring ba myur du bgrod pa chung ngu mang po nyid phun sum tshogs pa dang / rang nyid ngo mtshar ba rnam pa sna tshogs pa phun sum tshogs pa'o/ /gzugs sku phun sum tshogs pa yang rnam pa bzhi ste/ 'di lta ste/ mtshan bzang po phun sum tshogs pa dang / dpe byad bzang po phun sum tshogs pa dang / sred med kyi bu'i stobs phun sum tshogs pa dang /rdo rje snying po btus pa gdung phun sum tshogs pa'o/ /'di ni sangs rgyas kyi bdag nyid chen po mdor bsdus pa ste/ de dbye ba byas na rab tu dbye ba mtha' med par 'gyur te/ de yang gang gi tshe sangs rgyas bcom ldan 'das nyid bskal pa grangs med pa du mar 'tsho bar byin gyis brlabs nas thams cad shes pa dang smra bar nus pa'o//de bzhin du re zhig de bzhin gshegs pa ni rmad du byung ba yon tan ye shes nus pa phan 'dogs pa rin po che'i 'byung gnas so/ /de lta na yang byis pa rnams rang yon tan gyi dbul bas lhag par mos pa nyams pas/ de bzhin gshegs pa de'i de 'dra ba'i yon tan phun sum tshogs pa thos kyang sangs rgyas dang de'i chos la gus par byed do//mkhas pa rnams kyi yang rkang mar gyis kyang sangs rgyas bcom ldan 'das de dang de'i chos la mngon par khas len cing 'jug par byed do/ /de ltar yang de dag dad pa tsam gyis kyang mtha' gcig tu mngon par rab tu dang bas rnam par smin pa nges pa'i sdig pa'i las kyi phung po rnams zil gyis mnan nas lha dang mi'i dpal phun sum tshogs pa nyams su myong nas mya ngan las 'das par yang dag par gzhol bar 'gyur ro//de nyid kyis ni de bzhin gshegs pa bsod nams zhing bla na med pa zhes brjod do/ /gang de bzhin gshegs pa la bsod nams bskyed pa mo gsham ma yin pa'i 'bras bur 'gyur te/ 'di lta ste/ 'dod pa'i 'bras bu dang / 'bras bu khyad par du 'phags pa dang / 'bras bu myur ba dang / thar pa'i 'bras bu 'byung bar 'gyur te/ bcom ldan 'das kyis gsungs pa/ gang zhig rgyal ba rnam 'dren la/ /mchod pa chung ba'ang byed 'gyur ba/ /bde 'gro sna tshogs bgrod nas ni/ /bdud rtsi go 'phang thob par 'gyur//zhes so/ /'di ni re zhig sangs rgyas kyi chos ma 'dres pa'o/ /sangs rgyas rnams kyi yon tan gzhan nyan thos dang thun mong ba yod do/ /kha cig so so skye bo dang thun mong ba'o/ /de yang ci ltar rigs par nyon mongs pa med pa dang / smon lam dang ye shes dang / so sor yang dag par rig pa dang mngon par shes pa dang /bsam gtan dang / gzugs med pa dang / tshad med pa dang / rnam par thar pa dang / zil gyis gnon pa dang / skye mched dang zad par skye mched la sogs pa'o/ /gzhan gyi slob ma dang thun mong / /chos 'ga' so so skye bo ste/ /nyon mongs med smon lam ye shes/ /so sor rig pa'i yon tan sogs//zhes so/ /sangs rgyas kyi chos ma 'dres pa gnyis ni ma yin te/ 'di lta ste/ dbu'i gtsug tor mi mngon pa dang 'od 'dom gang ba'o/ /bcom ldan 'das bsam gtan bzhi pa la gnas te mya ngan las 'da' bar gyur to/ /de ltar yang mya ngan las 'das pa'i mdo las gsungs te/ de nas bcom ldan 'das bsam gtan dang po la snyoms par zhugs so//bsam gtan dang po las bzhengs nas bsam gtan gnyis pa la snyoms par zhugs so/ /gnyis pa las bzhengs nas bsam gtan gsum pa la snyoms par zhugs so/ /gsum pa las bzhengs nas bsam gtan bzhi pa la snyoms par zhugs so/ /bzhi pa las bzhengs nas nam mkha' mtha' yas skye mched la snyoms par zhugs so//de las bzhengs nas rnam shes mtha' yas skye mched la'o/ /de las bzhengs nas ci yang med pa'i skye mched la'o/ /de las bzhengs nas 'du shes med 'du shes med min skye mched la'o/ /de las bzhengs nas 'du shes tshor ba 'gog pa la'o//de las bzhengs nas 'du shes med min skye mched la snyoms par zhugs so/ /de las bzhengs nas ci yang med pa'i skye mched la'o/ /de nas rnam shes mtha' yas skye mched la/ /de nas nam mkha' mtha' yas skye mched la/ /de nas bsam gtan bzhi pa la/ /de nas bsam gtan gsum pa la/ /de nas bsam gtan gnyis pa la//de nas bsam gtan dang po la/ de nas gnyis pa la/ de nas gsum pa la/ bsam gtan gsum pa bzhengs nas/ bsam gtan bzhi pa la snyoms par zhugs so/ /bsam gtan bzhi pa la gnas te de bzhin gshegs pa yongs su mya ngan las 'da' bar gyur to/ /bcom ldan 'das yongs su mya ngan las 'das nas de ma thag tu sa chen po g.yo bar gyur pa la sogs pa rgyas par ro//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las rgyu 'bras gzhan la phan 'dogs pa rnam par nges pa zhes bya ba le'u sum cu bzhi pa'o// //da ni 'dus ma byas brjod par bya ste/'dus ma byas de ni rnam pa gsum ste/ 'di lta ste/ nam mkha' dang so sor brtags pa'i 'gog pa dang / so sor ma brtags pa'i 'gog pa'o/ /de skad du yang / 'dus ma byas kyang rnam gsum ste/ /nam mkha' dang ni 'gog pa gnyis/ /zhes so/ /de la nam mkha' ni sgrib gegs med pa'i rang bzhin te/gang du gzugs kyi bgrod pa'o/ /yang / de la sgrib med nam mkha' ste/ /zhes gsungs pa dang / yang / bu ga nam mkha'i khams su brjod/ /zhes so/ /gang zag pa dang bcas pa'i chos dang bral ba de ni so sor brtags pa'i 'gog pa'o/ /so sor brtags pa ni shes rab bye brag ste/ /sdug bsngal la sogs pa 'phags pa'i bden pa rnams kyi so sor spyod pa'o//so sor brtags pas thob pa'i 'gog pa'o/ /thob pa'i sgra phyis pas so/ /'di lta ste/ ba lang dang ldan pa'i shing rta la ba lang shing rta zhes so/ /so sor brtags pa'i 'gog pa ni/ /bral ba rnams gang gzhan dang gzhan/ /zhes gsungs so/ /yang ci zab pa dang bcas pa'i chos rnams kyi so sor brtags pa'i 'gog pa gcig nyid ce na ma yin te gsungs pa/ldan pa'i rdzas rnams ci snyed pa/ /bral ba'i rdzas rnams de snyed do/ /gzhan du na sdug bsngal mthong bas spang bar bya ba nyon mongs thams cad kyi 'gog pa dngos su mngon du byas par thal bas so/ /de ltar yin na'ang lhag ma gnyen po bsgoms pa don med par 'gyur ro//gang mdo las gsungs pa/ skal ba mi mthun 'gog pa ni/ /zhes pa 'di'i don ci zhen brjod par bya ste/ 'di'i skal ba mnyam pa'i rgyu 'ga' zhig gis ni yod pa ma yin no/ /'dir gang kha cig gis ni ma yin no zhes pa 'di ni ngag 'di'i don yin no/ /'di'i skal ba mnyam pa 'ga' zhig yod pa ma yin pa ni ma yin no//so sor brtags pa'i 'gog pa bshad zin to/ /ma 'ongs pa'i chos rnams skye ba'i shin tu gegs su gyur pas bral ba las 'gog pa gang yin pa de ni so sor ma brtags pa'i 'gog pa'o/ /'dir so sor brtags pas thob par bya ba ni ma yin no/ /'on kyang ni rkyen ma tshang ba las so//yang / 'gog gzhan so sor ma brtags pas/ /skye ba shin tu gegs gyur pa/ /zhes gsungs so/ /'dus ma byas de gsum ni rtag pa ste/ /de skad du/ nam mkha' dang ni 'gog pa gnyis/ /'dus ma byas gsum rtag pa nyid/ /ces so/ /byang chub sems dpa'i theg pa la ni/ /chos thams cad kyi chos nyid de bzhin nyid phyin ci ma log pa de bzhin nyid gzhan ma yin pa de bzhin dngos po rang bzhin ngo bo rnam pa gzhan du ma yin pa'am de bzhin nyid de/de ni dag pa dang ma dag pa dang dag ma dag go/ /sangs rgyas thams cad kyi chos kyi sku shin tu mthar phyin pa'i 'bras bu ngo bo de dag thams cad 'dus ma byas so zhes rnam par gzhag go//paN+Di ta chen po stobs bcu dpal bshes gnyen gyis bsdus pa 'dus byas dang 'dus ma byas rnam par nges pa las 'dus ma byas rnam par nges pa zhes bya ba le'u sum cu lnga pa'o// //rnam pa de ltar chos mtha' med/ /'dus byas 'dus ma byas pa'i chos/ /phung po du mar phye nas ni/ /sangs rgyas rnams kyis bstan pa de//blo ldan byang chub sems dpa' dang / /nyan thos rnams kyi spyod yul lo/ /brtson pas sngon gyi slob dpon gyis/ /mi rnams la ni brtse mdzad nas/ /rgya mtsho che las chu thigs ltar/ /rgya che'i chos ni de rnams las/ /de chos bdud rtsis gang ba yi/ /bstan bcos rgya mtsho chen po ston/ /chu yi thigs pas stong cha ltar//'dus byas 'dus ma byas rnams kyi/ /chos rnams rnam par nges pa dag /de las bdag gis yang bsdus so/ /des na phyogs 'di'i bde legs kyi/ /thar pa sngon 'byung rgyu gcig pu/ /bstan pa rin chen chos rnams kyi/ /rab tu dbyer bcas rgyas zhes bya/ /'dus byas 'dus ma byas chos rnams//gcig tu bsdus las bdag gi gang / /bsod nams des ni 'gro ba rnams/ /'dus byas 'dus ma byas mkhyen gyur/ /'di ltar yang / thub pa'i ngag ni nges par rtogs par dka' ba nyid de'i gsal bar byed pa rnams/ /sngon gyi slob dpon rnams kyis 'grel mdzad rgyas pa bstan bcos chen po thams cad kyang //rtogs par dka' ba de las ji lta bur yang tshig gam ngag dag drangs pa 'di/ /yid gzhungs ngan pa rang yid khrel yod ring du spangs nas gzhung ni 'grel mdzad ces/ /rab tu byed pa tha shal 'di las gang dag rang ngam gzhan don phun tshogs 'byung / /blo ngan 'dis ni 'di ru khyad 'phags byas gang ngal ba 'ba' zhig skye bar zad//de la sogs pa'i rab bslang smra ba'i rdo rje drag pos rang gi mgo la bsnun pa yis/ /rma ni gsal bar rang gis bkod de mi srun don du bdag gis gzhung ma byas/ /'on kyang rgas shing rnyings pa brtan pos non pas bstan bcos mang po rnams/ /rgyun du lta bar mi nus pas yin nga rgyal las ma yin//sde pa sna tshogs dang ni rgyal sras tshul lugs rjes 'brangs nas/ /bslab bya'i yul rnams thams cad 'bad pas gcig tu yongs su bzlums/ /mnyam med rgyal ba'i chos 'di rang nyid kho na yis/ /gzhung 'di gcig pus yul rnams thams cad rtogs par bya ba'i phyir/ / bdag gis brtsams kyang skye bo gzhan don ma yin 'di dag las/ /legs gsungs bdud rtsi ro yang shin tu chung ba 'dir nges mchis/ /des kyang skye bo dam pa'i yid rab tshim zhing mnyes par 'gyur/ /de nyid kyis na bdag gi ngal ba nges par dpal yod lags/ /'on kyang sa stengs dag na skye bo dam pa 'thor bur gnas//mi srid dri ma glang pos spags pa sa stengs khyab par gnas/ /'dus byas dang 'dus ma byas rnam par nges pa zhes bya ba/ shAkya'i dge slong paN+Di ta gnas brtan chen po stobs bcu dpal bshes gnyen gyis mdzad pa rdzogs so// //