CLOSE WINDOW

D3872
བོད་ཡིག

@##/ /rgya gar skad du/ bo d+hi tsAr+ya a ba tA ra pany+tsi kA/ bod skad du/ byang chub kyi spyod pa la 'jug pa'i dka' 'grel/ 'phags pa 'jam dpal gzhon nur gyur pa la phyag 'tshal lo/ /'phags pa spyan ras gzigs dbang phyug la phyag 'tshal lo/ /bam po dang po//bde bar gshegs pa chos sku dang bcas rnams dang bde gshegs sras/ /gti mug ljon pa rtsa nas bton cing spros pa rnams bcom pa/ /skye stsogs sdug bsngal gyis bcom sems can phan la rjes 'jug pa/ /'od zer chen pos rgyal ba rnams la spyi bos phyag 'tshal te/ /byang chub spyod la 'jug pa yi//tshig don zab mo rtogs byed pa/ /tshig dang ngag rnams rab gsal ba'i/ /dka' 'grel bdag gis brtsam par bya/ /byang chub spyod la 'jug pa'i don gang yin la shin tu blo gros gsal ba dang / /gsung rab ro la goms pas zhugs pa'i nang gi bdag nyid can gyis brjod nus te//de yi don la blo gros blun bdag smra bar dbang ba ci zhig de lta na'ang / /gang phyir dge ba goms byas legs pa'i 'bras bur gyur pa des na bdag 'jug yin/ /yon tan bag chags cung zad dang ni spobs pa dang / /yon tan gyis mdzes blo gros bdag la 'ga' med kyang / / de lta mod kyi de 'dra la bdag tshig 'jug gang / /bshes gnyen dam pa bsten pa'i 'bras bur gyur pa yin/ /'dir 'phags pa zhi ba'i lha de gsung rab mtha' dag gi don gyi de kho na nyid rtogs shing / ting nge 'dzin gyi che ba'i bdag nyid brnyes pa/ yang dag par rdzogs pa'i byang chub bzhed pa/ sems can rnams la thugs rje dang ldan pa/ rang gi bde ba la ltos pa med pa/ gzhan la phan pa dang bde ba bzhed pa/ byang chub sems dpa'i yon tan la thugs gzhol ba/ bdag nyid yon tan de la goms pas ro mchog la zhugs shing / gzhan dag la yang lam de bstan pa'i ched du byang chub kyi spyod pa la 'jug pa mdzad par bzhed nas/bde gshegs zhes bya ba la sogs pa'i tshigs su bcad pa gsungs pa la/ tshigs su bcad pa 'dis ni mdor bsdus nas don bdun bstan te/ dkon mchog gsum dang mkhan po la sogs pa phyag bya bar 'os pa rnams la phyag 'tshal ba dang / brjod par bya ba dang /dgos pa dang / de'i 'grel pa brjod pa bstan pa dang / rang bzor rtsom pa spong ba dang / zlos pa'i nyes pa spang ba'o/ /de la/ bde gshegs chos kyi sku mnga' sras bcas dang / /zhes pa ni dkon mchog gsum bstan to/ /phyag 'tshal te zhes bya bas ni phyag 'tshal ba'i bya ba'o/ / gus pas zhes pas ni de nyid kyi khyad par ro/ /phyag 'os kun la'ang zhes pas ni dge ba'i bshes gnyen la sogs pa rnams la'o/ /bde gshegs sras kyi sdom la 'jug pa zhes bya bas brjod par bya ba bstan to/ /bstan par bya zhes pas ni dgos pa brjod do/ /'brel pa ston pa'i tshig ni med de/ de ni shugs nyid kyis rtogs par bya'o/ /lung bzhin zhes pa ni rang bzor rtsom pa spong ba'i tshig go/ /mdor bsdus nas zhes pa ni zlos pa spong ba'i tshig ste/ 'di ni bsdus pa'i don to/ /yan lag gi don yang brjod par bya ste/ bde gshegs zhes pa la/ 'dir gshegs pa'i sgras ni so so'i skye bo rnams las bcom ldan 'das rnam par gcod pa ston te/de rnams ni 'khor ba'i nang na gnas pa'i phyir dang / bcom ldan 'das ni 'khor ba las rnam par gshegs pa'i phyir ro/ /bde ba'i sgra ni mdzes pa la sogs pa don gsum la 'jug pas khyad par 'phags pa'i bde bar gshegs pa nyid gsungs so/ /de bas na don ni 'di yin te/ci lta ba bzhin du bsngags par 'gyur ba ni 'di ltar dbu ma'i don rtogs pas nyon mongs pa la sogs pa'i sgrib pa spangs par gshegs pas bde bar gshegs pa ste/ 'dis ni spangs pa phun sum tshogs pa bstan to/ /yang na bsngags pas chos thams cad rang bzhin med pa'i de kho na nyid du gshegs pa ni rtogs pa ste bde bar gshegs pa'o//'dis ni rtogs pa phun sum tshogs pa bstan to/ /'di nyid kyis ni mu stegs can gyi ston pa rnams las khyad par du 'phags pa'ang bstan pa yin no/ /de rnams ni bdag la sogs par mngon par zhen pa'i lta bas mdzes par 'gro ba med pa'i phyir/bdag la sogs pa yang tshad mas gnod pa'i phyir dang / 'khor ba'i gnyen po ma yin pa'i phyir mdzes par 'gro ba ma yin no/ /slar mi ldog par gshegs pa ni yang skye ba dang 'dod chags la sogs pa'i nyes pa rnams kyi rgyu ngar 'dzin pa'i sa bon ma rig pa rnam pa thams cad du spangs pas bde bar gshegs pa'o//'dis ni rgyun du zhugs pa dang / lan cig phyir 'ong ba dang / byang chub sems dpa' rnams las bcom ldan 'das khyad par du 'phags par bstan pa yin te/ de rnams ni bsngags par gshegs kyang rgyu rnam pa thams cad du ma spangs pa'i phyir slar ldog pa srid pa'i phyir ro/ / ma lus par yang ji srid du bgrod par bya bar gshegs pa ste/ nyes pa thams cad kyi bag chags lus dang ngag dang sems kyi gnas ngan len gyi mtshan nyid dang / rang gi rtogs pa'i lam ston pa la mi gsal ba spangs pa'i phyir bde bar gshegs pa'o/ /de dag gis ni bcom ldan 'das rdzogs par gshegs pa nyid du bstan to//'dis kyang phyir mi 'ong ba dang / dgra bcom pa dang / rang sangs rgyas rnams las bcom ldan 'das thun mong ma yin pa'i yon tan dang ldan pa nyid du rig par bya'o/ /de rnams ni nyon mongs pa can ma yin pa'i lus dang ngag dang yid kyi gnas ngan len dang / rang gi rtogs pa'i lam ston pa la gsal ba mi srid pa'i phyir ro//de lta na sangs rgyas nyid yon tan ma lus pa'i gzhi dang / gzhan dag dang thun mong ma yin no zhes bde bar gshegs pa'i sgras bstan to/ /de lta bur gyur pa'i bde bar gshegs pa de rnams la gus pas te mchog tu dang bas so/ / phyag 'tshal te zhes pa ni phyag byas te bde gshegs sras kyi sdom la 'jug pa brjod par bya zhes bya ba dang sbyar ro/ /ji lta bur gyur pa zhig ce na/ sras bcas zhes pa ste/ thub pa rnams kyi sras kyang 'dir rab tu dga' ba la sogs pa'i sa thob pa'i byang chub sems dpa' nyid gzung ngo / de rnams nyid 'dir dbang bar gyur pa'i phyir de rnams dang bcas pa'o//bye brag 'dis 'phags pa'i dge 'dun la phyag 'tshal ba bsdus pa yin no/ /bye brag gzhan gsungs pa chos sku dang bcas zhes pa la/ bcom ldan 'das kyi spros pa thams cad dang bral ba'i ngo bo nyid kyi chos kyi sku'o/ /de nyid ni rtogs pa'i rang bzhin gyi chos so//yang na sku'i sgra ni tshogs kyi don te/ skye bo'i tshogs dang dpung gi tshogs zhes bya ba yin no/ /des gsung rab kyang gzung ste/ de dang bcas pa'o/ /'dis kyang chos la phyag 'tshal ba bsdus pa yin no/ /de ltar na 'dis ni dkon mchog gsum la phyag 'tshal ba nye bar bstan pa yin no//sangs rgyas las chos/ chos las 'phags pa'i dge 'dun te zhes pa'i go rims ma yin nam/ de ci'i phyir sangs rgyas kyi de ma thag tu 'phags pa'i dge 'dun dang / de'i rjes la chos zhes go rims 'chol bar bstan zhe na/ bden te 'dir tshigs su bcad pa sbyar ba'i ngor byas pa'i phyir go rims 'chol bar bstan par rig par bya'o//sbyar ba ni bde gshegs chos kyi sku mnga' sras bcas la phyag 'tshal te zhes go rims nyid bzhin bya ste/ des na nyes pa med do/ /yang na byang chub sems dpa' rnams la yang rtogs pa'i chos mnga' ba'i phyir rjes su mthun pa'i phyir na chos kyi sku yod pa nyid de/chos kyi sku dang bcas pa de rnams la'ang phyag 'tshal ba bstan pa'i don du'o/ /de rnams kyang chos nyid rtogs par bde bar gshegs pa nyid du nges pa yin te/ bde bar gshegs pa dang 'dra ba'i phyir chos las sngar bstan to/ /des na mi rigs pa cung zad kyang med do//ci'i phyir 'di rnams kho na la yin nam zhe na/ phyag 'os kun la'ang zhes gsungs te/ gzhan phyag bya bar 'os pa mtha' dag la'ang ste/ slob dpon dang mkhan po la sogs pa rnams la yang ngo / /gus pas phyag 'tshal te zhes pa phyed snga mas bde bar gshegs pa la sogs pa la phyag 'tshal bar brjod nas/phyed phyi mas brjod par bya ba la sogs pa bstan pa'i phyir/ bde gshegs sras zhes bya ba la sogs pa gsungs te/ sras ni bde bar gshegs pa rnams las skyes pa'i sras te/ rgyal ba'i sras byang chub sems dpa' zhes bya ba'i don to/ /de rnams kyi sdom la 'jug pa ni bsdam par bya ba'am/'dis sdom par byed pas na sdom pa ste/ byang chub kyi sems gzung ba sngon du song ba'i byang chub sems dpa'i bslab pa yang dag par blang ba yin la/ de yang skabs ji lta ba bzhin du brjod par bya'o/ /de la 'jug par bya ba'am/ 'dis de la 'jug par byed pa'i phyir 'jug pa ni lam ste/gang gis byang chub sems dpa'i go 'phang thob pa na bde bar gshegs pa nyid thob par 'gyur ba de gzhung 'dis bstan par bya'o zhes bya ba'i don to/ /de ltar na 'dis ston par byed pa yin pa'i phyir sdom la 'jug pa ni 'di'i brjod par bya ba yin la/ 'dis ni sdom la 'jug pa'i rjod par byed pa yin no/ /de ltar na rjod par byed pa dang brjod par bya ba'i mtshan nyid kyi 'brel pa yang don gyis bstan pa yin la/ bstan pa ni rjod par byed pa'i dgos pa ste/ dngos su ni brjod par bya ba'i rang gi ngo bo rtogs pa nyid de'i dgos pa'o/ /brjod par bya ba'i dgos pa yang thos pa las byung ba la sogs pa'i shes rab bskyed pa'i rim pas sgrib pa thams cad dang bral ba'i sangs rgyas nyid ni dgos pa mthar thug pa yin no//'di yang bde gshegs sras kyi sdom la 'jug pa'i sgra nyid kyis bsdus pa yin te/ de yang gang zhig phan yon bstan pas zur gyis ston par 'gyur te/mi gtsang lus 'di blangs nas rgyal ba'i sku/ /rin chen rin thang med par bsgyur bas na/ /zhes bstan to/ /de ltar 'brel pa dang / brjod par bya ba dang / dgos pa rnams ni 'jug pa'i yan lag tu bstan te/ gzhan du na brjod par bya ba la sogs pa med par dogs pas 'dir rtog pa dang ldan pa rnams 'jug par mi 'gyur ro//khyod kyis rang bzor brjod pa ma yin nam 'dis su zhig 'dzin par 'gyur zhe na/ lung bzhin zhes gsungs te/ lung las ma 'das par bcom ldan 'das kyis ji ltar gzhan gsung rab tu bstan pa de bzhin du bdag gis de'i don las ma 'das par bstan par bya ba'o//'dis ni lung las rang bzor rtsom pa yongs su spangs pa yin te/ /'di ni rang dga' ma yin no zhes pa'i don to/ /'dis bdag nyid kyis gsung rab kyi don rtogs par yang zur gyis bstan pa yin te/ 'di yang 'jug pa'i yan lag nyid do/ /gal te lung bzhin du bstan par bya ba ma yin nam/de lta na lung nyid la de 'dod pa rnams 'jug par 'gyur na/ des na ci 'dis ci zhig bya zhe na/ mdor bsdus nas zhes gsungs te/ mdor byas nas so/ gal te lung du bstan par gyur pa de lta mod kyis mdo sde sna tshogs pa de rnams su shin tu rgyas par bstan pa'i phyir la/kho bos ni mdor byas shing bsdus nas bstan par bya ba ste 'di ni khyad par ro/ /'dis ni zlos pa yin no zhes brjod pa yin te/ 'di yang 'jug pa'i yan lag ma yin pa spangs pa yin no/ /de'i phyir 'jug pa'i yan lag yin pas na brjod par bya ba la sogs pa bstan pa ni mi rigs pa ma yin no//'o na phyag 'tshal bar brjod pa don med pa yin no zhe na/ de yang legs pa thob pa la sogs pa'i don du rjod par byed pa yin na ji ltar na don med pa nyid yin/ 'di'i dgongs pa ni 'di yin te/ bde bar gshegs pa la sogs pa la phyag 'tshal ba las byung ba'i bsod nams kyi sems kyi rgyud yang dag par brlan pas sngon byas pa'i sdig pa'i rgyun shin tu bsrabs pas bgegs nye bar zhi ba ni brtsams pa yongs su rdzogs par 'gyur ba dang /skye bo dam pa mtha' dag son pa'i lam du bdag nyid rjes su 'gro bar yang bstan par 'gyur ba dang / 'dod pa'i lha la sogs pa la phyag byas pa thos pa las yod pa nyid srid pa yin no/ /zhes nyan pa po rnams bdag nyid dang gzhung la yang gus pa skye bar 'gyur ba'o/ /'dir yang bde bar gshegs pa'i sgras brjod pa'i bcom ldan 'das kyi che ba'i bdag nyid thos pa las de 'dod pas de bskyed pa la gzhol ba'i yid kyi bde bar gshegs pa'i sras kyi sdom pa la 'jug pa yongs su shes par bya ba'i phyir 'bad pa dang ldan pa dag 'dir 'jug par 'gyur ro//'di dag ni 'dod pa'i lha la sogs pa la phyag 'tshal ba'i 'bras bu'o/ /des ni 'di ltar gang gis gang 'dod pa dang byed par 'dod pa des de nyid bya ste/gzhan ma yin la gzhan du byed na skabs ma yin pa brjod pa dang / ha cang thal bar 'gyur la/ de'i phyir 'di yang sdom pa la 'jug pa ston par mdzad pa dgongs pa yin na/ ci'i phyir skabs su ma bab pa'i 'dod pa'i lha la phyag 'tshal bar byed de/ sngar brjod pa'i nyes pa gnyis su thal bar 'gyur ro zhes gang zhig brjod pa de yang bsal bar gyur pa yin la/de ma thag nyid du de la mkho ba bsnyad pa'i phyir skabs su ma bab pa brjod pa ni ma yin no/ /gang zhig de ma thag tu mkho ba de ni brjod par bya ba yin te/ gzhan du ma yin no/ /de ltar na ha cang thal bar 'gyur ba med pa'i phyir thams cad legs par gnas pa ma yin no//ci ste lung las lhag pa ma yin par mdor bsdus nas rjod par byed pa yin na yang don la khyad par med pa'i phyir ci ltar na khyad par du 'jug pa'i yan lag gi sgo nas 'ga' zhig gis blang bar bya bar 'gyur/ de lta bas na 'dir lung las lhag pa cung zad kyang brjod par bya ba yin no zhes dogs nas/sngon chad ces bya ba la sogs pa gsungs te/ 'dir lung las lhag pa sngon chad ma byung ba gzhan cung zad 'dir bdag la lhag pa brjod pa med pa nyid do/ /yang na ni'i sgra ni gang gi phyir gyi don to/ /'o na de las lhag par brjod pa med na yang 'di'i tshig gi don spros pa'i khyad par can du 'gyur te/de lta bas na yang khyad par du 'jug par 'gyur ro zhe na/ 'dir sdeb sbyor zhes bya ba gsungs te/ sdeb sbyor ni don dang tshig bkod pa'i khyad par yang yod pa yin na/ de la mkhas shing brtags pa bdag la yod pa ma yin no/ /yang nas yang gi sgra ni nges par gzung ba'o//gal te de ltar yin na 'di gzhan gyi don la mkho ba nyid du ji ltar 'gyur zhe na/ de phyir gsungs te/ gzhan gyis thal bar brjod pa nyid khas len par byed de/ gang gi phyir sngon med pa brjod pa'i nus pa bdag la med cing / sdeb sbyor mkhas pa yang bdag la yod pa ma yin no//de nyid kyi phyir gzhan don gyi bsam pa bdag la mkho ba 'di yang yod pa ma yin la/ rnam par rtog pa yang bdag la yod pa ma yin te/ de la nus pa dang bral ba'i phyir ro/ /'o na ci'i phyir 'di byed pa'i don du 'bad par byed ce na/ rang gi yid la zhes gsungs te/ bde bar gshegs pa'i sras kyi sdom la 'jug pa goms pa'i ros gong nas gong du bsgom par 'dod pas so//'di zhes te/ rab tu byed pa'am/ sdom pa la 'jug pa bstan pa bdag gis brtsams shing byas pa'o/ /'das pa'i rkyen bstan pa ni nang gi dngos po rdzogs par thugs la gzhag pa yin no/ / re zhig nang gi don du gzhung rtsom pa yang ma mthong la/ rang gis byas pas bdag nyid la khyad par 'jog pa'ang ma yin te/ dngos po la 'dus byas pa'i khyad par yang bdag nyid la sngar nyid nas yod pa'i phyir ro zhe na/ 'dir dge ba bsgom phyir zhes bya ba la sogs pa gsungs te/ gzhung 'dis sam de'i don gyis so//dge ba ni dge legs te/ de yid la byed pa'o/ /bsgom phyir ni bskrun par bya ba'i phyir ro/ /dad pa'i shugs 'phel bar 'gyur ba ni sems dang ba'i rgyun gong nas gong du 'phel bar 'gyur ba ste/ rgyun du 'byung bar rab tu 'jug pa yin no/ /'dis ni rang gi don du byed pa nyid du nyams su myong bas 'di grub par bstan to//gzhan gyi don cung zad byed pa yang srid pa yin no zhes bstan pa bdag dang zhes bya ba la sogs pa gsungs te/ gal te zhes bya ba ni rnam pa gzhan nye bar bkod pa'o/ /rang gi don du byed pa 'di ni re zhig nyams su myong bas grub pa yin la/gal te yang bdag dang rang bzhin mnyam pa gzhan kha cig gis gzhung ngam don 'di mthong zhing rtogs na gzhan gyi don la mkho ba'i phyir 'di yang don bcas yin te/ de'i phyir yang gzhan gyi don la mkho ba'i yang phyir 'di dgos pa dang bcas pa yin no/ / 'dis kyang ni gzhan gyi don la mkho ba yin pa'i phyir 'di don dang bcas shing dgos pa dang bcas pa yin te/ ci zhig ltar yang gzhan gyi don la mkho ba srid pa'i phyir ro/ /tshigs su bcad pa gnyis po 'dis bdag nyid mngon pa'i nga rgyal med pa nyid du bstan to/ /da ni sdom pa la 'jug pa'i bstan pa 'dzin du gzhug pa'i phyir gleng bslang ba sbyar ba/dal 'byor zhes bya ba la sogs pa gsungs te/ mi khom pa brgyad spangs pa ni dal ba 'byor pa'o/ /tshogs pa 'di ni shin tu rnyed dka' ba ste/ shin tu dka' bas rnyed par bya ba yin no/ /rgya mtsho chen po'i gnya' shing gi bu gar ru sbal gyi mgrin pa chud pa lta bur ji zhig ltar thob par bya ba thob pa ni rnyed pa'o//de yang skyes bu'i don sgrub pa ste skyes bu'i don ni mngon par mtho ba dang nges par legs pa'i mtshan nyid do/ /de sgrub pa ni rdzogs par byed pa ste/ de'i yan lag yin pa'i phyir de nus pa yin no/ / zhes bya ba'i tha tshig go/ /gal te de lta bur gyur pa 'di la phan pa ma bsgrubs na ste/ rang dang gzhan la bde ba'i rgyu mtho ris dang thar pa sgrub par byed pa ma blangs na de'i tshe phyis te slar yang ngo / /'di ni de bzhin gshegs pa 'byung ba dang / dad pa dang mi khom pa brgyad spangs pa'i mi'i dngos po zhes bya ba ste/'di yang dag 'byor pa ni phrad pa dang 'du ba dang tshogs pa zhes bya ba'i tha tshig go/ /ga la ni ci ltar ga las kyang 'byung bar mi 'gyur te/ mi khom pa'i gnas skabs na shin tu rnyed par dka' ba'i phyir na chos rab tu rnam par 'byed par bya bar mi nus pa'i phyir ro snyam du dgongs pa'o//ji skad du/ 'phags pa sdong po bkod pa'i mdor/ 'phags pa rgyal ba drod kyi skye mched kyi rnam par thar pa las mi khom pa brgyad las ldog pa yang rnyed par dka'/ mi nyid thob pa yang rnyed par dka'/ dal ba phun sum tshogs pa rnam par dag pa yang rnyed par dka'/sangs rgyas 'byung ba yang rnyed par dka'/ dbang po ma tshang ba med pa yang rnyed par dka'/ sangs rgyas kyi chos nyan pa yang rnyed par dka'/ skyes bu dam pa dang 'grogs pa yang rnyed par dka'/ yang dag pa'i dge ba'i bshes gnyen rnams kyang rnyed par dka'/ yang dag pa'i rjes su bstan pa nye bar sbyor ba yang rnyed par dka'/mi'i 'jig rten na yang dag pa'i 'tsho ba yang rnyed par dka'o zhes gsungs so/ /'di nyid la dgongs nas/ /'jig rten na ni mi rnyed dka'/ /sangs rgyas 'byung ba shin tu dka'/ /de bas dad dang rab byung dang / /grub pa'ang shin tu rnyed par dka'//sems can kun la rjes brtse bas/ /sdug bsngal thams cad rab zhi'i phyir/ /byang chub sems ni bstan pa dag /gcig nas gcig tu dkon pa yin/ /zhes gsungs so/ /yang mi khom pa ni 'di rnams yin te/ dmyal ba yi dags dud 'gro dang / /kla klo tshe rings lha dang ni/ / log lta sangs rgyas mi 'byung dang / /lkugs pa 'di dag mi khom brgyad/ /ces so/ /de bas na da lta nyid du brtson par bya'o/ /da ni byang chub kyi sems yongs su gzung ba'i don du de la 'dod pa bskyed pa'i phyir phan yon la 'jug pa/ ji ltar mtshan mo zhes bya ba la sogs pa gsungs te/ ji ltar mtshan mo'i sprin 'dus pa'i dus su sprin rnams kyis mun nag shin tu stug par gyur pa na glog 'gyu skad cig thang cig tsam snang bar byed de/ dngos por gyur pa cung zad rab tu gsal bar byed do/ /'dir yang dpe de nyid sangs rgyas mthu yis zhes bya ba la sogs pa gsungs te/ sangs rgyas bcom ldan 'das nyid phan pa dang bde ba la sbyor ba'i phyir skal ba can dang skal ba can ma yin pa'i sems can gyi rgyud la gzigs shing rtag tu bzhugs te/gang gi tshe gang du thabs gang gis gang la skal ba dang ldan pa gang yin pa gzigs nas/ de'i tshe der thabs des de la de byin gyis rlob par mdzad cing /skal ba dang mi ldan pa'i gnas skabs su btang snyoms kyis bzhugs so/ /de lta na de bzhin gshegs pa'i byin gyi brlabs kyis ci zhig ltar na rnyed par dka' ba 'byung ba'i phyir 'jig rten te/ skye bo'i bsod nams phan pa dang bde ba'i rgyu dge ba'i las rnams la blo gros yud tsam zhig 'byung ste/de ni der mi brten pa'i phyir dang / 'khor ba thog ma med par 'jig rten gyi mi dge ba'i phyogs nyid la goms pa'i phyir ro/ /des cir 'gyur zhe na/ de ltas zhes bya ba la sogs pa gsungs te/ gang gi phyir de lta bas na dge ba ste/ bsod nams nyam chung ba dang stobs dang bral ba nyid glog 'gyu ba dang 'dra ba'i phyir ro/ /rtag ces bya ba ni dus thams cad du shin tu nyam chung ba yin no/ /de lta na gang la shin tu stobs che ba yod ce na/ sdig pa stobs chen zhes gsungs pa la/ stobs chen ni yang mi dge ba chen po yin te/phyi'i sprin rum gyi mun pa dang 'dra ba'i phyir ro/ /de'i mi bzod pa ni shin tu 'jigs par byed pa ste/ dmyal ba la sogs pa'i sdug bsngal skyed par byed pa'i phyir dang / thub par dka' ba'i phyir ro/ /de ltar 'di la nus pa chen po yod du chug kyang de lta na yang de las gzhan bsod nams stobs dang ldan pas rgyal bar byed par 'gyur te/de ltar yang cung zad kyang nyams pa med do zhe na/ de ni zhes bya ba la sogs pa gsungs te/ nus pa chen po dang ldan pa de lta bu de ni gzhan gang gis te/ cig shos bsod nams kyis zil gyis gnon par 'gyur zhing rgyal bar 'gyur te/ gzhan gang gis kyang ma yin no zhes bya ba'i don to/ /yang ci'i phyir 'di ltar brjod ce na/ rdzogs pa'i byang chub ces bya ba la sogs pa la/ rdzogs pa'i byang chub ste sangs rgyas nyid la sems can thams cad yang dag par gdon pa'i bsam pas de thob par bya ba'i don du lhag pa'i bsam pa sems gang zhig yid la byed pa ste/gal te de med par gyur na'o/ /nus pa chen po yang de las gzhan stobs che bas rgyal bar byed de/ mtshan mo'i mun pa la nyi mas byed pa bzhin du/ byang chub kyi sems las gzhan gnyen po chen po srid pa yang ma yin no/ /de lta bas na de gzhom pa'i phyir byang chub kyi sems nyid blang bar bya ste/gzhan ni ma yin no snyam du dgongs pa'o/ /byang chub kyi sems blang bar bya ba yin no zhes bskal pa zhes pa la sogs pa 'dis kyang gsungs te/ bar gyi bskal pa gcig kyang bskal pa yin la/ bar gyi bskal pa nyi shu yang bskal pa yin zhing /bar gyi bskal pa brgyad cu yang bskal pa yin te/ de la yang bskal pa chen po zhes brjod la/ 'di ni bskal pa chen po nyid du gzung ngo / /bskal pa mang por te bskal pa grangs med pa dang po'i khongs su gtogs pa rnams so/ /rab dgongs mdzad pa ni 'bad pas sems par mdzad pa rnams kyis te/gzigs pa ni rtogs pa'o/ /thub dbang rnams kyis ni sangs rgyas bcom ldan 'das rnams kyis so/ /phan pa'i don thams cad grub par rung ba yin te/ de'i sa bon du gyur pa'i phyir ro/ /'di nyid ni byang chub kyi sems nyid do/ / ci'i phyir 'di kho na phan pa yin zhe na/ gang phyir zhes gsungs te/ gang gi phyir bde 'phel ni phul du byung ba ste/ sangs rgyas kyi mtshan nyid do/ /tshad med ni gzhal du med pa yin la/ skye bo'i tshogs ni sems can gyi phung po'o/ /thob par byed pa ni 'khor ba'i sdug bsngal gyi mtsho las sgrol bar byed pa'o//de'i phyir na 'di nyid phan pa'o/ /yang na gang gi phyir bde ba ni lha dang mi'i bde ba phun sum tshogs pa'i mtshan nyid yin la/ 'phel ba ni 'phel bar gyur pa ste don gyis na byang chub kyi sems nyid do/ /thob par byed pa ni shin tu tshim par byed pa ste bya sla bas ches lhag par gang 'gyur ba de la 'thob par byed pa zhes brjod de/dper na zhos bdag tshim par byas so zhes bya ba lta bu ste/ zhos ches lhag par sla bar gyur to zhes bya ba'i don to/ /yang na rdzogs pa'i byang chub kyi sems gang las bde ba 'phel ba yin no zhes bya bar sbyar bar bya'o/ /ci'i phyir rab tu 'phel zhe na/bde blag nyid du zhes gsungs te/ tshegs med par yin te skra 'bal ba la sogs pa'i dka' ba chen po med pas so/ /'di ltar yang byang chub kyi sems dang sdom pa nyid byang chub sems dpa'i sdom pa rnams dang ye shes kyi tshogs dpag tu med pas lha dang mi rnams kyi phun sum tshogs pa rab tu 'phel ba bde blag tu 'thob cing sems can rnams la ches lhag par tshim par byed pa yin te/de ltar skyo ngal kun bsal ba'i/ /byang sems shing rta zhon nas ni/ /bde nas bde ru 'gro ba la/ /sems shes su zhig sgyid lug 'gyur//zhes gang 'chad par 'gyur ba'o/ /bcom ldan 'das la 'phags pa byams pa'i stobs la sogs pa skyes pa'i rabs rnams su dka' ba chen po mdzad pa thos pa ma yin nam/ de ci ltar na bde blag nyid du bde ba 'phel bar byed ce na/ nyes pa 'di ni med de gang gi phyir snying rje'i bdag nyid can rnams kyi gzhan la phan pa dang bde ba skyed par byed pa'i sdug bsngal ni rang dang gzhan la bskyed par bya'o//pha rol sdug bsngal bas sdug bsngal bar gyur pa'i blo can rnams ni sdug bsngal de 'dra ba la bde ba nyid du mthong bar 'gyur ro/ /rang dang gzhan la phan pa'i rgyu nyid yin pa 'di'i phyir yang byang chub kyi sems yongs su gtong bar mi bya'o zhes bstan pa'i phyir/srid pa'i sdug bsngal zhes bya ba la sogs pa gsungs te/ 'khor bar gnas pa'i dmyal ba la sogs pa'i 'gro ba'i sdug bsngal bde ba ma yin pa myong ba rnams yin la/ brgya phrag ni mthar thug pa med pa'i tshogs so//gzhom 'dod pa ni yongs su 'dor bar 'dod pas de nyan thos dang rang sangs rgyas kyi rigs rnams kyis so/ /bdag nyid 'ba' zhig gi ma yin par 'jig rten pa rnams kyi skye ba la sogs pa'i sdug bsngal yang bsal bar 'dod pa ni bral bar 'dod pa ste/byang chub sems dpa'i rigs rnams kyis so/ /gcig tu rang dang gzhan gyi sdug bsngal bsal bar 'dod pa ma yin gyi/ gzhan yang bde ba dang skyid pa mang po ste/ de rnams kyi brgya phrag ni lha dang mi rnams kyi skye ba 'thob pa nyams su myong bar 'dod pa ste/ 'khor ba'i bde ba 'dod pas kyang ngo / /rtag tu ni dus thams cad du'o/ /gtang mi bya ba ste/ byang chub kyi sems khas blang bar bya'o zhes bya ba'i don to/ /yang na rdzogs pa'i byang chub 'dod pa rnams nyid kyi khyad par dag go/ /yon tan gyi khyad par 'di las kyang byang chub kyi sems gzung bar bya'o zhes bya bar 'khor ba'i btson ra zhes pa la sogs pa gsungs te/'khor ba nyid btson ra yin la/ der bsdams pa ni 'ching ba dag ste/ 'dir 'dod chags la sogs pa nyid yin no zhes tshig rnam par sbyar ro/ /de lta bu'i nyam thag rnams ni nyon mongs pa rnams so//bskyed gyur pa ni dang po nyid du byang chub kyi sems dang sdom pa len pas byang chub kyi sems bskyed pa pa nyid na'o/ /bde gshegs rnams kyi sras zhes brjod bya zhing / /zhes pa ni sangs rgyas kyi sras zhes brjod par bya'o/ /skad cig gis zhes pa ni skad cig de nyid la'o/ / 'di 'ba' zhig ni ma yin no zhes bya bar 'jig rten lha mir bcas zhes pa la sogs pa gsungs te/ lha mir te/ lha dang mi dang lhan cig par gyur pa yin la/ gang lha ma yin gyi 'jig rten la sogs pa de rnams kyi yang phyag byar gyur pa ste/ phyag bya ba'i 'os dang bstod par bya ba'i 'os su yang gyur pa'o//gyur pa'i sgras ni 'das pa bsal bar byed pa'i phyir byang chub kyi sems skyes pa'i dus nyid na gyur pa yin no/ /yon tan dang phan yon mthong ba 'di las kyang byang chub kyi sems blang ba la 'bad par bya'o zhes bya ba ni/ mi gtsang ba zhes bya ba la sogs pa gsungs te/mi gtsang ba'i lus 'di ni mi la sogs pa'i lus kyi rang bzhin de'i rgyu'am de'i ngo bo yin te/ des bskyed pa zhes bya ba'i don to/ /de blangs nas ni bzung nas so/ /rgyal ba nyid rin chen te/ rnyed dka' ba thob pa la sogs pa'i yon tan dang ldan pa'i phyir ro/ /byang chub kyi sems kyis de'i skur bsgyur ba ni skyed par byed pa ste/de bzhin gshegs pa'i skur rdzogs par byed ces pa'i don to/ /ci lta bur gyur pa zhig yin zhe na/ rin thang med pa ste/ gang la rin thang med pa de la de skad ces brjod de/ khams gsum po thams cad yon tan mchog tu gyur pa dang ldan pa'i phyir dang /yon tan gyi mtha' mi shes pa'i phyir ro/ /de nyid kyi phyir gser sgyur rtsi'i rnam pa ste/ shin tu cher sgyur bar byed pa'i phyir mchog tu sgyur ba'o/ /de lta bu'i byang chub kyi sems 'di la gser sgyur rtsi'i rnam pa lta bu dang gzhan byang chub kyi sems zhes brjod do//rab brtan gzung ni ci ltar blangs pa de slar g.yo ba med par ro/ /de lta bas na bdag nyid rgyal ba rin po cher byed par 'dod pas byang chub kyi sems kyi gser sgyur rtsi chen po lta bur rab tu bstan par gzung bar bya'o/ /de yang byams pa'i rnam par thar pa las rigs kyi bu 'di lta ste dper na/dngul chu'i rigs gser du snang ba zhes bya ba yod de/ de srang gcig gis kyang lcags srang stong gser du bsgyur ro/ /dngul chu srang gcig po de ni lcags srang stong po des zad par bya ba'am/ lcags su bsgyur bar mi nus so/ / de bzhin du thams cad mkhyen pa nyid du sems bskyed pa'i bcud kyis len dge ba'i rtsa ba yongs su bsngos pa'i ye shes kyis yongs su gzung ba ni las dang nyon mongs pa'i sgrib pa'i lcags thams cad zad par byas te/ chos thams cad thams cad mkhyen pa'i gser gyi kha dog tu byed kyang thams cad mkhyen pa nyid du bskyed pa'i bcud kyis len gcig po de ni las dang nyon mongs pa'i lcags thams cad kyis kyang nyon mongs pa'am zad par bya bar mi nus so zhes gsungs so//srid pa'i 'gro ba rnams su 'byor pa 'dod pa rnams kyis kyang 'dir the tshom dang phyin ci log mi bya'o zhes nye bar bstan pa'i phyir 'gro ba'i ded dpon zhes bya ba la sogs pa gsungs te/'gro ba nyid tshang rdal te/ zong gi rdzas nyo ba dang 'tshong ba'i grong khyer ni 'dir tshong rdal yin la/ de bzhin du dge ba dang mi dge ba'i las kyis zong gi rdzas nyo ba dang 'tshong ba'i gnas ni 'gro ba'i tshong rdal lo//de rnams su gnas pa ni rnam par gnas pa nyid kyi ngang tshul gyi rang bzhin gang la yod pa de la de skad ces brjod de/ kye 'gro ba'i tshong rdal du gnas pa'i ngang tshul can rnams/ rin chen byang chub sems legs brtan par zung / /zhes de rnams la 'bod pa yin no//byang chub kyi sems nyid rin chen te/ rin po che lta bu'o/ /dper na yid bzhin gyi nor bu rin po ches dbul ba'i ngan 'gro zhi bar byed pa'i rgyu yin pa de bzhin du byang chub kyi sems rin po che 'di yang yin no/ /dgos pa ni khyed cag tshong pa bzhin du bde ba phun sum tshogs pa thob pa don du gnyer ba yin pas rin po che 'di nyid gus pa chen pos zung shig ces bya ba 'di yin no//ci'i phyir zhe na/ rin che bas zhes te/ 'di ni gtan tshigs kyi tshig yin te/ gang gi phyir 'di ni rin thang med pa thams cad las mchog tu gyur pa 'jig rten dang 'jig rten las 'das pa'i phun sum tshogs pa'i rgyur gyur pa'i phyir ro//de'i phyir 'di nyid gzung bar bya'o zhes bya ba'i don to/ /'di ci ltar shes na/ legs par yongs su brtags na zhes gsungs te/ shin tu nges par brtags shing yang dag par gtan la phab pa zhes bya ba'i don to/ /gang dag gis she na/tshad med blos te/ tshad med cing gzhal bar mi nus pa'i blo dang blo gros gang la yod pa de dag gis te/ shes rab chen po dang ldan pa'i sangs rgyas dang byang chub sems dpa' rnams kyis so/ /de dag gis yongs su brtags pa las 'khrul pa mi mnga' ba'i phyir/ legs par yongs su brtags na zhes gsungs so/ /yang ji lta bur gyur pa zhig gis she na/ 'gro ba'i ded dpon gcig pu ste/ 'gro ba na thugs rje'i dbang du gyur pa'i sangs rgyas bcom ldan 'das dang byang chub sems dpa' 'di dag ni ded dpon gcig pu nyid de de dag gis so/ / dper na tshong pa rnams la phan pa dang mi phan pa thob pa dang spong ba dag la phan par 'dod pa dang shes pa dang ldan pa'i ded dpon gyis khrid par byed par gyur na des slu bar byed pa ma yin no/ /de bzhin du 'dir yang yin no snyam du dgongs pa'o/ /de'i phyir byang chub kyi sems rin po che rin thang med pa brten par zung shig ces pa'o//'di yang de nyid du/ rigs kyi bu 'di lta ste dper na/ ji srid du nyi ma dang zla ba'i dkyil 'khor gyi 'od kyis snang bar byed pa de srid du nor dang / 'bru dang / rin po che dang / sa le sbram dang / dngul dang / me tog dang / spos dang / phreng ba dang / byug pa dang /gos dang / longs spyod gang ji snyed pa de dag thams cad kyis nor bu rin po che dbang gi rgyal po'i rin du mi bzod do/ /de bzhin du ji srid du dus gsum du thams cad mkhyen pa'i ye shes kyis chos kyi dbyings kyi yul snang bar mdzad pa de srid du lha dang mi'i sems can thams cad dang /nyan thos dang / rang sangs rgyas kyi dge ba'i rtsa ba zag pa dang bcas pa dang zag pa med pa gang ji snyed pa de dag thams cad kyis byang chub tu sems bskyed pa'i nor bu rin po che chen po dbang gi rgyal po'i rin du mi chog go zhes gsungs so/ / mchog tu thun mong ma yin pa phul du byung ba dang ldan pa'i dpag bsam gyi shing lta bu che ba'i bdag nyid bstan pa'i phyir/ dge ba zhes bya ba la sogs pa gsungs te/ ji ltar chu shing lan cig 'bras bu bskyed nas yang 'bras bu mi skyed pa de bzhin du byang chub kyi sems las gzhan pa'i dge ba kun ni cung zad kyang ma yin pa nyid do//rnam par smin pa yongs su smin nas yang 'bras bu bskyed pa'i nus pa med pa yin te/ de tsam nyid kyis 'di'i rnam par smin pa zad pa'i phyir dang / rnam par smin pa yang lung du bstan du med pas yang 'bras bu dang rjes su 'brel pa med pa'i phyir ro// //bam po gnyis pa/ yang byang chub kyi sems 'di'i khyad par rtag par yang zhes bya ba la sogs pa gsungs te/ rtag par dus thams cad du de las gzhan pa'i dge ba bzhin du lha dang mir skyes pa rnams la bde ba phun sum tshogs pa byung nas zad par 'gyur ba ma yin te/brtan pa'i rang bzhin yin pa'i phyir dang / skad cig so so la dge ba'i tshogs kyi rgyun rnam pa du mas 'gengs pa'i phyir ro/ /'byin pas 'phel ba ni byang chub kyi sems kyi ljon shing ste/ rgyun mi 'chad par bde ba phun sum tshogs pa'i 'bras bu 'byin pa'i phyir dang /gong nas gong du yon tan gzhan dang gzhan gyi khyad par skyed pa'i phyir ro/ /byang chub kyi sems ni ljon shing lta bur dper byas pa yin te/ skyes bu rtag ces bya ba la sogs pa'i tshig bsdus pa lta bu'o/ /gang gi phyir de lta yin pa de'i phyir rgyun mi 'chad cing phul du byung ba dang ldan pa'i bde ba phun sum tshogs pa thob par 'dod pa'i rtog pa dang ldan pa rnams kyis 'di nyid gzung bar bya'o//'di yang blo gros mi zad pas bstan pa las/ btsun pa sha ra dwa ti'i bu 'di lta ste dper na/ rgya mtsho chen por chu'i thig pa lhung ba ni bskal pa'i mthar ma thug gi bar du bar ma dor yongs su zad pa'am gtugs pa med do//de bzhin du byang chub tu yongs su bsngos pa'i dge ba'i rtsa ba ni byang chub kyi snying po la thug gi bar du bar ma dor yongs su zad pa'am gtugs pa med do zhes gsungs so/ /yang byang chub kyi sems ni dge ba ma lus pa 'phel bar byed pa 'ba' zhig ni ma yin te/mi dge ba'i phyogs zad par byed pa'i rgyu yang yin par tshigs su bcad pa phyed dang gnyis kyis bstan pa'i phyir ro/ /sdig pa shin tu zhes pa la sogs pa gsungs te/ byang chub kyi sems yongs su bzung ba las sngar byas pa'i sdig pa mi dge ba'i las rnams ni dmyal ba la sogs pa rnams su bzod par dka' ba'i sdug bsngal skyed par byed pa'i phyir mi bzad pa rnams te/shin tu 'jigs par byed pa'am chen po rnams so/ /byang chub kyi sems gang la brten nas te/brten par byas pa ni bskyed pa dang bsrung ba dang / spel ba dang / brten pa'i mtshan nyid las so/ /yud kyis ni skad cig ma nyid la de bskyed pa tsam gyis bsod nams kyi phung po chen po nye bar stsogs pa'i phyir ro/ /sgrol 'gyur ba ni nges par sgrol bar 'gyur ba ste/ de'i mthus zil gyis mnan cing 'da' bar byed pas zhes bya ba'i don to/ /ji ltar zhe na/ dpa' la brten nas 'jigs pa chen po ltar te/ dper na kha cig gis gnod pa chen po byas pa yang skyes bu stobs dang ldan pa la brten nas sgrol bar 'gyur te/ de gnod pa byas pa'i 'bras bus 'jigs pa med par 'gyur ba de bzhin du skabs su bab pa la yang ngo //byang chub kyi sems de lta bur gyur pa de la mi shes pa'i sems can shes rab dang bral ba rmongs pa'i 'gro ba rnams kyis ci ltar na mi brten cing rten par mi byed ces bya ba'i don te de la brten par bya ba nyid yin no snyam du dgongs pa'o//'di yang de nyid las rigs kyi bu 'di lta ste dper na skyes bu dpa' bo la yang dag par brten pa na dgra bo thams cad kyis mi 'jigs so/ /de bzhin du byang chub tu sems bskyed pa'i skyes bu dpa' bo la yang dag par brten pa'i byang chub sems dpa' ni nyes par spyod pa'i dgra bo thams cad kyis mi 'jigs so zhes gsungs so//byang chub kyi sems kyis sdig pa zad pa'i dpe gzhan yang des ni dus mtha' zhes bya ba la sogs pa gsungs pa la/ dus mtha' ni 'jig pa'i dus so/ /me ni nyi ma bdun shar ba las byung ba'o//dper na bsam gtan dang po dang bcas pa'i 'dod pa'i khams thams cad nges par bsregs te ma lus par nges par bsregs pa na ji ltar thal ba yang lus pa med pa de bzhin du sdig pa rnams so/ /ji lta bur gyur pa zhig ce na/ byang chub kyi sems gang gis chen po ri rab dang mnyam pa ngu 'bod chen po la sogs pa sdug bsngal ba'i rnam par smin pa rnams nges par sreg par byed de/de'i rnam par smin pa nye bar 'joms pas rtsa ba nas med par byed do/ /skad cig gis ni yun mi ring bas so/ /de la mi shes sems can rnams kyis cis mi bsten//zhes sbyar bar bya'o/ /'di yang de nyid las nyes par byas pa thams cad sreg par byed pas sreg pa'i bskal pa'i me lta bu'o/ /mi dge ba'i chos thams cad nub par byed pas sa 'og lta bu'o zhes gsungs so/ /bcom ldan 'das kyis las byas pa chud mi za bar gsungs pa ma yin nam/de ji ltar na 'di skad du brjod ce na/ bden mod kyi brjod par bya'o/ /byang chub kyi sems la sogs pa'i bsod nams kyi tshogs skad cig so so la nam mkha'i khams khyab par byed pa chen po'i nang du chud par gyur pas rgya mtshor lan tshwa srang gcig gi dpe bzhin du mi mngon pa'i phyir dang /gnyen po'i phyogs stobs dang ldan pas zil gyis gnon pa'i phyir 'bras bu skyed pa'i nus pa med pa de bsregs pa nyid yin pas nyes pa med do/ /yang na ma spyad par ni zad ces bya ba ni thabs med pa la dgongs nas gsungs pa yin la/'di ni sdig pa thams cad rtsa ba nas med par byed pa'i thabs chen po yin no/ /'di ltar yang gang gi tshe byang chub sems dpa' nam mkha'i khams khyab pa'i sems can thams cad sdug bsngal thams cad las bton te/ bde ba phun sum tshogs pa thams cad la sbyar bar bya'o snyam du lhag pa'i bsam pa rnam par sems par byed cing sngar byas pa'i sdig pa yang rnam par sun 'byin pa kun tu spyod pas zad par byed do//de'i tshe byang chub kyi sems kyi stobs nyid kyis de'i rgyud la sdig pa ji ltar 'byung zhing / gang gis na rtsod pa'i skabs yod par 'gyur te/thams cad du 'khrugs pa med do/ /de lta bas na/ dge gzhan gang gis zil gyis gnon par 'gyur/ /zhes gsungs pa de yang gsal bar byas pa yin no/ /yang gzhan ni rnam par smin pa ma nges pa la dgongs nas 'di dag thams cad gsungs pa yin te/rnam par smin pa nges pa ni las gang gis kyang dgag par mi nus pa'i phyir ro zhes brjod do/ /'di ltar yang byang chub kyi sems blang bar bya ba nyid du gang gis zhes gsungs te/ byang chub kyi sems gang gi phan yon ni ngo bo nyid du gyur pa'i yon tan no//dpag tu med pa ni gzhal du med pa'o/ /byams mgon ni bcom ldan 'das mi pham pas so/ /ji lta bur gyur pa zhig ce na/ blo dang ldan pa ste/ byang chub sems dpa'o/ /bshad pa ni gsungs par gyur pa'o/ /gang zhig la zhe na/ nor bzangs la ste/ byang chub sems dpa' nor bzangs la'o//de ltar yang sdong po bkod pa las/ rigs kyi bu byang chub kyi sems ni sangs rgyas kyi chos thams cad kyi sa bon lta bu'o/ /'gro ba thams cad kyi dkar po'i chos rnam par 'phel bar byed pas zhing lta bu'o/ /'jig rten thams cad brtan pas sa lta bu'o zhes bya ba nas/byang chub sems dpa' thams cad yongs su bsrung bas pha lta bu'o zhes bya ba'i bar du yang bsgre'o/ /dbul ba thams cad yang dag par gcod pas rnam thos kyi bu lta bu'o/ /don thams cad yang dag par bsgrubs pas yid bzhin gyi nor bu'i rgyal po lta bu'o//bsam pa thams cad yongs su rdzogs par byed pas bum pa bzang po lta bu'o/ /nyon mongs pa'i dgra pham par bya ba la mdung thung lta bu'o zhes bya ba la sogs pa rgya cher gsungs so/ /de la mi shes sems can cis mi brten/ /zhes pa ni 'dir yang sbyar ro//da ni byang chub kyi sems kyi rab tu dbye ba bstan pa'i phyir/ byang chub kyi sems de zhes bya ba la sogs pa gsungs te/ de zhes pa ni phan yon bstan ma thag pa'i byang chub kyi sems so/ /gnyis ni rnam pa gnyis te/ shes bya ni go bar bya ba'o//rigs dang sa la sogs par gyur pas rnam pa du ma srid na/ ji ltar gnyis yin zhe na/ mdor bsdus nas zhes gsungs te/ rnam pa gzhan yod na yang 'di ni mdor bsdus nas gnyis su brjod do/ /gnyis po gang yin zhe na/ byang chub smon pa'i sems shes pa ni gcig yin la/byang chub 'jug pa zhes pa ni gnyis pa'o/ /byang chub la smon pa yin te/ sems de nyid dam de la sems pa'o/ /sems gang smon pa las skyes par gyur pa sbyin pa la sogs pa la 'jug pa bral ba de ni smon pa byang chub kyi sems te/ 'di ltar 'gro ba thams cad bskyab pa'i phyir sangs rgyas su gyur cig ces dang po kho nar smon pa'i sems lta bu'o//'jug pa nyid la sems pa'am 'jug pa nyid kyi sems te/ sems de'i rang bzhin yin pa'i phyir ro/ /sems snga ma sngon du song ba nyid gang nas bzung ste sdom pa len pa sngon du 'gro ba'i tshogs rnams la rab tu 'jug pa de ni 'jug pa byang chub kyi sems so//bstan pa'i rim pas rnam pa gnyis yin te/ dbye ba ni de dag kho na'o zhes bya ba nyid kyi sgras bstan to/ /kyang gi sgras phan tshun sdud pa yin te/ gnyi ga yang byang chub kyi sems yin par bstan to/ /des ni snga ma byang chub kyi sems ma yin no snyam pa'i dogs pa bsal ba yin te/dpa' bar 'gro ba'i mdo las/ btsan thabs su byang chub tu sems bskyed pa de yang sangs rgyas kyi rgyu nyid du bstan pa'i phyir ro/ /de bzhin du sdong po bkod pa las/ rigs kyi bu sems can gyi 'jig rten na sems can gang dag bla na med pa yang dag par rdzogs pa'i byang chub tu sems smon pa de dag kyang dkon no//de bas kyang gang bla na med pa yang dag par rdzogs pa'i byang chub tu 'jug pa'i sems can de dag ni shin tu dkon no zhes gsungs so/ /da ni rab tu dbye ba bstan pa nyid dpes gsal bar bya ba'i phyir/'gro bar 'dod dang zhes bya ba la sogs pa gsungs te/ dper na skyes bu 'ga' zhig mngon par 'dod pa'i yul du phyin par bya ba'i ched du 'gro bar 'dod pa ni 'gro bar bsam pa ste 'gro ba nyid ma yin no/ /yang gzhan ni der phyin par bya ba'i ched du 'jug pa ste 'gro ba nyid do//ji ltar ni ji bzhin du'o/ /de dag gi dbye ba'i khyad par shes pa ni rtogs pa'o/ /de bzhin du ni de ltar ro/ /byang chub smon pa dang 'jug pa'i sems 'di dag gnyis kyi bye brag ni dbye ba yin la/ shes par bya ba ni rtogs par bya ba'o//mkhas pas shes pa ni shes pas so/ /ji ltar zhe na/ rim bzhin te/ sngar gyis smon pa byang chub kyi sems bstan pa dang / phyis kyis 'jug pa'i sems zhes pa ni rim bzhin zhes bya ba'i don to/ /de la smon pa byang chub kyi sems 'di sgrub pa dang bral yang 'khor bar 'bras bu chen po 'byung bar bcom ldan 'das kyis gsungs pa yin no zhes pa ni byang chub smon pa'i zhes bya ba la sogs pa gsungs te/da sgrub pa dang bral ba yin du chug mod kyi/ de lta na'ang sangs rgyas nyid kyi rgyu nyid du re zhig gzhag ste/ dge ba gzhan las chen po yin par rtag par yang 'bras bu 'byin zhes bya ba la sogs pa'i khyad par gyis khyad par du byas pa'i phyir ro//de ltar yang byams pa'i rnam par thar pa las/ rigs kyi bu 'di lta ste dper na rdo rje rin po che ni chag kyang gser gyi rgyan khyad par du 'phags pa thams cad zil gyis gnon cing rdo rje rin po che'i ming yang mi 'dor la/dbul ba thams cad kyang rnam par bzlog go/ /rigs kyi bu de bzhin du thams cad mkhyen par sems bskyed pa'i rdo rje rin po che nan tan dang bral bas nyan thos dang rang sangs rgyas kyi yon tan gyi gser gyi rgyan thams cad zil gyis gnon cing /byang chub sems dpa'i ming yang mi 'dor la/ 'khor ba'i dbul ba thams cad kyang rnam par bzlog go zhes gsungs so/ /de bas na gang gis pha rol tu phyin pa rnams la thams cad kyi thams cad rnam pa thams cad du slob par mi nus pa des kyang byang chub kyi sems bskyed par bya ba ma yin te/'di ltar thabs yongs su bzung bas 'bras bu chen po nyid du 'gyur ba'i phyir ro/ /de yang ji skad du/ 'phags pa rgyal po la gdams pa'i mdo las/ rgyal po chen po 'di ltar khyod bya ba mang ba/ byed pa mang ba ste/thams cad kyi thams cad rnam pa thams cad kyi thams cad du sbyin pa'i pha rol tu phyin pa la bslab pa nas/ shes rab kyi pha rol tu phyin pa'i bar la bslab par mi nus kyi/ de bas na rgyal po chen po khyod yang dag par rdzogs pa'i byang chub la 'dun pa dang / dad pa dang /don du gnyer ba dang / smon pa 'gro yang rung / 'greng yang rung / 'dug kyang rung / nyal yang rung / sad kyang rung / za yang rung / 'thung yang rung / rtag par rgyun du dran par gyis la yid la zung ste sgoms shig/ sangs rgyas dang / byang chub sems dpa' dang / 'phags pa nyan thos dang /rang sangs rgyas dang / so so'i skye bo thams cad dang / bdag gi 'das pa dang ma 'ongs pa dang / da ltar byung ba'i dge ba'i rtsa ba thams cad bsdus shing gzhol te brdzis la rjes su yi rang bar gyis shig/ rjes su yi rang ba'i mchog gis rjes su yi rang bar gyis shig / rjes su yi rang bas kyang sangs rgyas dang byang chub sems dpa' dang / 'phags pa nyan thos dang rang sangs rgyas thams cad la mchod par bya bar phul cig /phul nas kyang sems can thams cad dang thun mong du gyis shig /de nas sems can thams cad thams cad mkhyen pa'i bar du thob par 'gyur ba dang /sangs rgyas kyi chos thams cad yongs su rdzogs par 'gyur ba nyin gcig bzhin du dus gsum du bla na med pa yang dag par rdzogs pa'i byang chub tu yongs su sngos shig /rgyal po chen po khyod de ltar zhugs na rgyal po yang byed la/ rgyal po'i bya ba yang nyams par mi 'gyur zhing /byang chub kyi tshogs kyang yongs su rdzogs par 'gyur ro zhes bya ba la sogs pa gsungs nas/ rgyal po chen po khyod yang dag par rdzogs pa'i byang chub kyi sems kyi dge ba'i rtsa ba'i las kyi rnam par smin pas len du mar lha'i nang du skyes shing /len du mar mi'i nang du skyes te/ lha dang mi thams cad du skyes pa na dbang po byed par gyur kyang da dung zhes bya ba la sogs pa rgya cher gsungs pa yin no/ /des na spyod pa dang bral ba'i byang chub kyi sems kyang brnyes par mi bya ste/ des kyang 'khor ba'i bde ba mtha' yas pa skyed pa'i phyir ro//gang yang sgrub pa snying por byed pa'i byang chub kyi sems de ni shin tu yang 'bras bu chen po nyid du grub pa yin no zhes bya bar ston pa ni/ ji ltar 'jug pa'i zhes bya ba la sogs pa gsungs te/ dper na 'jug pa'i sems kyi bsod nams nyid rgyun chags shing bar med pa'i dge ba 'byung zhing 'jug pa ltar yang 'di ni de lta ma yin no snyam du dgongs pa'o//'di nyid bsod nams rgyun chags nyid yin par tshigs su bcad pa gnyis kyis bsgrub pa'i phyir/ gang nas zhes bya ba la sogs pa gsungs te/ gang nas bzung ste zhes pa ni gang nas brtsams nas so//gang la mtha' ste 'di tsam zhes byar med pa de ni mtha' yas pa ste/ de ni nam mkha'i khams kyis khyab pa'i sems can gyi khams so/ /rab tu grol ba'i phyir ni rab tu dgrol bar bya ba'i don du ste/ sdug bsngal thams cad nye bar zhi bar bya ba'i rgyu mtshan du'o/ / sems de yang dag blangs gyur pa/ /zhes bya ba ni yang dag par rdzogs pa'i byang chub kyi sems yang dag par blangs nas 'jug pa'o/ /ji ltar zhe na/ mi ldog pa yi sems kyis te/ 'jug pa nyams pa med pa'i sems kyis so/ /de nas bzung ste zhes pa ni de dang por byas nas so//gnyid log gam ni sems gnyid kyis non pa yin la/ bag med pa ni rnam par g.yengs pas te/ sems kyang gnyi ga dang 'brel to/ /'di yang nye bar mtshon pa tsam yin te/ 'gro ba dang / 'greng ba dang / 'dug pa dang / za ba dang / brgyal ba la sogs pa'i gnas skabs na yang zhes bya ba la sogs par blta bar bya'o//du ma zhig ces pa ni skad cig so so la rnam pa du ma'i bsod nams kyi rgyun mi 'chad par rtag tu bsod nams kyi shugs rab tu 'byung ste/ nam mkha' dang mnyam pa ni skad cig re re la nam mkha'i tshad tsam mo//de lta bas na byang chub sems dpas sgrub pa snying por gyur par bya'o/ /'phags pa'i ting nge 'dzin gyi rgyal po las/ de lta bas na gzhon nu khyod kyis sgrub pa snying por gyur pa la bslab par bya ste/ ci'i phyir zhe na/ gzhon nu sgrub pa snying por byed pa la bla na med pa yang dag par rdzogs pa'i byang chub dka' ba ma yin no zhes gsungs so//'di la bsod nams rgyun mi 'chad pa nyid du bcom ldan 'das kyis gsungs so zhes bstan pa'i phyir/ 'di ni zhes bya ba la sogs pa gsungs pa la/ 'di nyid bsod nams dpag tu med pa nyid yin te/nyid kyis ni bdag gis so/ /bcom ldan 'das de bzhin gshegs pas gsungs pa ni bka' stsal par gyur pa'o/ /gang du zhe na/ dpung bzangs kyis zhus pa las te/ dpung bzangs kyis zhus pa'i ming can gyi mdo sde las so/ /ji ltar zhe na/ 'thad pa dang bcas pa ste/ rigs pa dang ldan par ro/ /gang gi don du zhe na/ dman mos sems can don du ste/ dman pa ni nyan thos dang / rang sangs rgyas kyi theg pa la'o/ /mos pa ni dad pa'am 'dun pa'o/ /sems can gang la de yod pa de la de skad ces bya ste/ de'i don du 'di yin pa de'i phyir te/ dgos pa de la btang nas zhes bya ba'i don to/ /'di ltar yang rigs ma nges pa yun ring po nas tshogs shin tu mang ba sogs par byed pa la 'jigs pa rnams kyis theg pa chen po la sems bzlog nas yun shin tu thung ngus bsod nams kyi tshogs shin tu chung ba nyan thos dang rang sangs rgyas kyi theg pa la sems skyed par byed de/de bzlog pa'i don du bcom ldan 'das kyis 'thad pa gsungs so/ /'thad pa de nyid tshigs su bcad pa gnyis kyis bstan pa'i phyir/ sems can zhes bya ba la sogs pa gsungs te/ sngags sam sman gyis skye bo nyung zad kyi glad pa'i nad tsam bsal bar bya'o snyam du yid la byed pa na dge ba'i bsam pa can 'di legs par spyad pa tshad med pa dang ldan par blta bar bya ba yin na/'gro ba tshad med pa las sems can re re'i 'khor ba'i sdug bsngal tshad med pa bsal bar 'dod pa lta ci smos/ gzhan yang sems can thams cad kyi nad de bsal nas yon tan thams cad dang ldan par 'dod pas na bsod nams tshad med par 'byung bar ci ste mi 'gyur/rnam dbye bsgyur bas sbyar bar bya ste/ rgyun mi 'chad par bsod nams shugs nam mkha' mnyam par rab tu 'byung ba smos ci dgos zhes bya'o/ /de lta bas na ci ltar sangs rgyas nyid tshogs mang pos bsgrub par bya ba yin pa de bzhin du skad cig ma re re la tshogs kyang rgya che ba'i phyir rgyu'i khyad par las theg pa chen po 'di nyid du rnyed pa chen po yin no//de'i phyir 'jigs pa'i gnas ma yin pa la skrag pas 'di la phyir ldog par mi bya'o zhes bstan par 'gyur ro//gang 'di ni/ byang chub sems kyi stobs nyid kyis/ /sngon gyi sdig pa zad byed cing / /bsod nams rgya mtsho sdud byed pas/ /nyan thos rnam pas myur du 'gro/ /zhes 'chad par 'gyur ro/ /de ltar sems can thams cad la phan pa dang bde ba'i don du gang gis brtson par byed pa de lha la sogs pa rnams kyang yon tan thun mong ma yin pa dang ldan pas bsngags par bya ba bstan pa'i phyir/pha'am zhes bya ba la sogs pa gsungs te/ su la ste sems can la'o/ /gang gis skyed pa ste pha dang / skyed byed ma dang / lha ni zla ba dang chu lha la sogs pa rnams dang /drang srong rnams ni gnas 'jig dang / gau ta ma dang / tshangs pa la yang zhes bya ba ni rig byed can la'o/ /'di 'dra ba ni phan sems 'di yin te/ byang chub sems dpa'i phan pa la sbyor ba'i blo gros bshad ma thag pa 'di lta bu byung ba dang / 'byung ba lta zhog ste/ 'byung ba yang 'gyur ram zhes bya ba yin la/ 'byung bar 'gyur ba yang byang chub sems dpa' las gzhan 'ga' yang ma yin pa nyid do/ /yang ci'i phyir de ltar yin zhe na/ sems can de dag ces bya ba la sogs pa gsungs pa ste/ de dag ni ma la sogs pa yin la/rang gi don du'ang zhes pa ni/ bdag nyid kyi dbang du byas nas kyang ngo / /yon tan dpag med du bsgrub par yid la bsams pa 'di lta ste/ sdug bsngal thams cad dang bral bar 'dod pa'o/ /sngon ma rmis pa ni sngon ma byung ba'o/ /blo sngon du song ba'i sad pa'i gnas skabs nas byung ba lta zhog /rmi lam na yang ngo / /brgya la gzhan gyi don du skye'o zhe na/ gzhan gyi don du ga la skye/ /zhes gsungs te/ 'jig rten na bdag la sogs pa phongs pa yin la/ de nyid la yang med pa yin na gzhan gyi don du lta ga la srid/ yang na gzhan gyi don du rmi lam na yang ga la srid/ ces sbyar ro/ /de ltar byang chub sems dpa'i thun mong ma yin par bstan nas/ mjug bsdu ba'i phyir/ sems can rin chen zhes bya ba la sogs pa gsungs te/ de ltar rmad du byung ba'i las byed pas rnyed dka' ba'i phyir/ sems can nyid rin chen gyi khyad par ro/ /snga na med pa ni sngan chad ma byung ba'o/ /'di zhes pa ni 'dis ji ltar bstan pa'i yon tan can no/ /rmad cig ji ltar 'khrungs zhes pa la/ ji ltar ni rmad du byung ba'o/ /yang ci'i phyir 'di ltar brjod ce na/ gzhan dag ces gsungs te/ bdag nyid chen po gang gzhan gyi don du sems skye ba de ni bstan pa'i rim pa bzhin du sems can gzhan dag la rang gi don du yang mi 'byung ba'i phyir ro/ /'dir byang chub tu sems bskyed pa'i yon tan gzhan yang brjod par bya ste/ 'phags pa sdong po bkod pa las/ bcom ldan 'das 'phags pa byams pas 'phags pa nor bzangs kyi dbang du mdzad nas gsungs pa de yang bstan bcos mdzad pa nyid kyis bslab pa kun las btus par shin tu rgyas par bstan pas de nyid du shes par bya'o//yang byang chub kyi sems kyi phan yon bstan pa'i sgo nas/ byang chub sems dpa'i bsod nams tshad med pa'i bsod nams nyid 'gro ba kun tu dga' ba zhes bya ba la sogs pa gsungs te/ sems can thams cad kyi dga' ba kun gyi rgyu lha la sogs pa'i phun sum tshogs pa thams cad kyi rgyu rin chen sems te/ byang chub kyi sems kyi bsod nams tshad med pa'i bsod nams gang yin pa de ni ji ltar gzhal gyis lang ste/rnam pa gang gis bgrang bar nus te/ 'di shin tu rgya che bas gzhal bar mi nus pa'i phyir ro/ /'di ni 'phags pa dpas sbyin gyis zhus pa las/ byang chub sems kyi bsod nams gang //de la gal te gzugs mchis na/ /nam mkha'i khams ni kun gang ste/ /de bas kyang ni lhag par 'gyur/ /zhes gsungs so/ /spyir bstan du zin kyang de lta na'ang 'jug pa'i sems kyis yin par blta bar bya ste/ de nyid kyi skabs yin pa'i phyir ro/ /yang de nyid kyi khyad par sems can zhes bya ba la/sems can sdug bsngal rtsir gyur pa ni srog chags thams cad kyi lus dang sems las byung ba'i sdug bsngal thams cad ldog par byed pa yin pas nad thams cad 'joms pa'i sman chen po'i rang bzhin yin pa'i phyir ro/ /de'i phyir 'dis byang chub kyi sems mngon par mtho ba dang nges par legs pa'i rgyu yin par bstan to//de bas na 'di'i bsod nams bgrang du med par rigs pa nyid do zhes bstan pa yin no/ /yang 'di ci ltar rigs pa yin snyam du dogs pa la/ de bstan pa'i phyir/ phan par zhes bya ba la sogs pa gsungs te/'gro ba thams cad bskyab pa'i phyir sangs rgyas su gyur cig /ces lhag pa'i bsam pas smon cing 'dod pa 'ba' zhig sgrub pa dang bral ba'i byang chub kyi sems las bsod nams gang zhig 'byung ba ste/ sangs rgyas mchod las khyad par 'phags/ /zhes bya ba'i don te/de ltar bsod nams kyi phung po skye ba'i rgyu yin par lung las 'byung ba nyid do/ /de ltar byang chub kyi sems dang po'i che ba'i bdag nyid bstan pa yin no/ /'di yang de nyid du/ gang gA'i bye ma'i grangs snyed kyi/ /sangs rgyas zhing ni mi gang gis/ / rin chen bdun gyis bkang byas te/ /'jig rten mgon la phul ba bas/ /gang gis thal mo sbyar byas te/ /byang chub tu ni sems bskyed na/ /gang la mtha' ni ma mchis pa'i/ /mchod pa 'di ni khyad par 'phags/ /zhes so/ /sdug bsngal ba'i skye bo thams cad kyi sdug bsngal thams cad bsal nas bde ba phun sum tshogs pa thams cad dang ldan par bya'o zhes 'di ltar brtson par byed pa la bsod nams khyad par can du ci'i phyir mi 'gyur/phan pa dang mi phan pa 'thob pa dang spong ba dag sems can rang nyid mkhas pa ma yin nam/brtson pa de gang du dgos she na/ tshigs su bcad pa gsum gyis lan bstan pa'i phyir/ sdug bsngal zhes pa la sogs pa gsungs te/ sdug bsngal las bral bar 'dod pa rnams srog gcod pa la sogs pa mi dge ba'i las rnams kyis bkres pa la sogs pa'i sdug bsngal phyir 'chos par 'dod pa dag dmyal ba la sogs pa'i g.yang sa'i sdug bsngal nyid myong ba'i rang bzhin la mngon par rgyug go//de nyid la phyogs shing 'jug pa yin te/ phye ma leb mar me'i rtse mo la mchongs pa bzhin du sdug bsngal nyid la rab tu 'jug go zhes bya ba'i don to//de nyid kyi phyir bde ba 'dod pa nyid ni bde ba mngon par 'dod pa nyid rang gi bde ba dgra ltar 'joms so/ /rang gi bde ba gzhom pa'i phyir rang nyid dgra lta bur 'gyur ba ci lta bu zhe na/ gti mug pas zhes pa ste/ phyin ci log gi dbang du gyur pa ste/phan pa dang mi phan pa 'thob pa dang spong ba shes pa med pa'i phyir ro/ /de bas na gang zhig ces pa ni bsod nams kyi bdag nyid can rgyu med par mnyes gshin pa'o/ /de bas na phongs pa ni bde ba 'dod pa rnams rnam pa thams cad du bde ba ma rnyed pa'o//sdug bsngal ni gzir ba'o/ /mang ldan zhes pa ni sdug bsngal rnam pa brgya phrag du ma mang pos gnon pa rnams so/ /de dag la zhes pa ni phyin ci log can la'o/ /lus las byung ba dang sems las byung ba thams cad kyi bde ba kun gyis tshim pa dang ste ngoms par byed pa'o//yang na mang ldan ni tshim pa rnam pa du mar bde ba kun gyis byed do zhes sbyar bar bya'o/ bde ba tsam gyis tshim pa skyed pa ni ma yin gyi 'on kyang sdug bsngal thams cad de/ gzir ba mtha' dag gi tshor ba gcod byed cing ste zhi bar yang byed do/ /sdug bsngal zhi bar byed pa 'ba' zhig ni ma yin gyi bde bas tshim par byed pa yang yin no//gti mug kyang ni sel byed pa/ /zhes bya ba ni yongs su mi shes pa yang zlog par byed pa ste/ 'di ni lam min 'di ni lam yin 'di las 'jigs/ /'di nas 'deng ngo sgyid lug par ni ma byed cig /ces dor bar bya ba dang blang bar bya ba'i lam ston pa'i phyir ro/ /de ltar gang zhig gzhan sdug bsngal ba bzlog pa las gzhan dbang du gyur pa dang / 'byung po thams cad la phan pa dang bde ba bsgrub pa la brtson pa yin no/ /de dang dge mtshungs ga la yod/ ces pa ni bdag nyid chen po de dang mtshungs pa'i legs pa ni gang la yod cing /gang na'ang yod pa ma yin no/ /rgyu med par mchog tu mnyes gshin pa'i phyir ro/ /de 'dra'i bshes kyang ga la yod de/ phan pa dang bde ba la sbyor bar gzhol ba'i yid can mchog tu yid ches pa'i gnas te de 'dra ni de dang mtshungs pa'o//bshes pa ni ga la yod de srid pa ma yin no/ /bsod nams de 'dra'ang ga la yod de/ /de 'dra bar gnas pa'i byang chub sems dpa'i bsod nams gang zhig skyes pa de yang bsod nams gang dang yang mnyam pa ma yin no/ /yang de ltar ci'i phyir brjod ce na/phan btags zhes pa la sogs pa gsungs te/ sngar 'jigs shing dogs pa dang nyon mongs pa rnams la phan btags pa na 'dis phan btags so zhes gang zhig lan du phan 'dogs pa de'ang re zhig 'di ni legs so zhes 'jig rten pas bsngags shing bstod do//gang / ma bcol legs par byed pa yi/ /zhes pa ste/ gsol ba ma btab par dge ba la sbyor ba'i byang chub sems dpa' lta smos kyang ci dgos shing gzhan brjod ci dgos te/ de'i bsngags pa bya bar mi nus so zhes bya ba'i don to/ /mthong ba'i chos la ltos nas byang chub sems dpa'i che ba'i bdag nyid bstan pa'i phyir/'gro ba nyung zad ces pa ste/ sems can tshad yod pa la zas dang skom tsam sbyor zhing ster bas na bsod nams byed pa yin no zhes 'gro ba las dam pa la dga' ba'i 'jig rten rnams kyis bkur zhing mchod par byed de/sbyin pa de yang skad cig ste/ nyi ma rangs pa'am de'i phyed du ma yin te/ 'on kyang yud tsam nyid do/ /zas tsam sbyin par byed pa dang / zhes bya ba ni zas ngan ngon ni zas te gya nom pa ma yin pa'i zas so/ /de 'ba' zhig nyid ni de tsam ste/ rnam pa de lta bu'i tshod ma dang bral ba'o//de sbyin par byed pa ni de gtong bar byed pa'o/ /ci ltar zhe na/ brnyas bcas ni tho 'tsham pa dang bcas pa ste/ bkur sti sngon du ma song bar sbyin pa'i khang par bcug cing khu tshur dang thal lcag la sogs pas bsnun zhing zhes bya ba'i tha tshig yin la/'di ni bya ba'i khyad par ro/ /yang ci lta bur gyur pa zhe na/ nyin phyed 'grangs par byed ces pa ste/ thun gnyis tsam nye bar rton par byed pa'i phyir te/ nyi ma phyed na zos nas yang dgongs ka zas tshol bar byed pa'i phyir ro/ /byang chub sems dpa'i sbyin pa ni 'di las bzlog pa yin no zhes bstan pa'i phyir/sems can zhes bya ba la sogs pa gsungs te/ 'di snyed cig ces mtshams chad pa med par grangs brgya'am stong ngam zhes pa 'di snyed la sbyin gyi de las gzhan pa ma yin no zhes sems can bgrangs nas sbyin par byed pa ni ma yin te/'on kyang mtshams chad pa med pa'i sems can la'o/ /dus nges pa can yang ma yin te/ 'on kyang dus ring du ste/ bskal pa brgya dang / stong dang / 'bum dang / bye ba phrag brgya'i bar du sbyin par bya'o/ /de las gzhan du ni ma yin no zhes sbyin par byed pa ma yin no/ /'o na ji ltar sbyin par byed ce na/nam mkha' zhes gsungs pa la/ nam mkha' dang 'dra ba'i skye bo ni nam mkha'i skye bo ste/ dper na nam mkha' la mthar thug pa med pa de bzhin du skye bo yang zhes bya ba'i don to/ /yang na nam mkha' dang skye bo ni nam mkha'i skye bo ste/ de rnams zad pa ni gtugs pa'o//nam mkha'i khams ji srid pa dang sems can rnams mya ngan las ma 'das pa'i bar de srid kyi mtshams te/ gang / ji srid nam mkha' gnas pa dang / /'gro ba ji srid gnas gyur pa/ /de srid bdag ni gnas gyur te/ /zhes gang 'chad par 'gyur ba'o/ / de'i phyir mi zad pa ni zad pa med pa ste/ 'di la mtha' med do zhes byas nas so/ /'dir dgongs pa ni 'di yin te/ nam mkha' dang skye bo ma zad kyi bar du sbyin pa gang yin pa de ni dngos po la zad pa med pa nyid yin te/ de dag la yongs su zad pa med pa'i phyir ro/ /dngos po so sor nges pa ni ma yin te/'on kyang yid la bsam pa mtha' dag yang dag par rdzogs par byed pa yin te/ gang gis mngon par 'dod pa kha na ma tho ba med pas bsam pa tshim par byed pa de dag thams cad mchog tu brtse ba dang / gus pa dang / bkur sti dang / snyan par smra ba sngon du song zhing yid rab tu dga' bas rab tu ster bar byed pa'i byang chub sems dpa' lta ci zhig smos te/mchod par rigs pa yin pas de la shin tu rigs so zhes sbyar ro/ /gang sred med kyi bus zhus pa las/ dngos po sbyin par bya ba gang la de gtong ba'i sems mi skye ba dang /gtong ba'i blo mi 'jug pa zhes bya ba nas bdag gi lus 'di yang sems can thams cad la sbyin zhing yongs su gtong na/ phyi rol gyi dngos po rnams lta ci smos kyis/ sems can gang dang gang la ci dgos par 'gyur ba de dag la de dang de sbyin no/ /yod de yod na lag pa 'dod pa la lag pa zhes bya ba nas mgo bo 'dod pa la mgo bo yongs su gtong na/phyi rol gyi dag la 'di lta ste/ nor dang / 'bru dang / sa le sbram dang / dngul dang / rin po che dang / rgyan dang / rta dang / glang po che dang / shing rta dang / bzhon pa dang / grong dang / grong khyer dang / grong rdal dang / ljongs dang / rgyal srid dang / yul 'khor dang / rgyal po'i pho brang 'khor dang / tshong 'dus dang / tshong rdal dang / bran pho dang / bran mo dang / las byed pa dang / zho shas 'tsho ba dang / bu dang / bu mo dang / g.yog rnams lta ci smos te zhes rgyas par gsungs so//de ltar yang yon tan rin po che gsum bsdus pa'i gnas gzhan la gcig tu phan pa bsgrub pa/ mchog tu brtul zhugs che ba'i byang chub sems dpa' la bdag nyid la phan par 'dod pas rang gi sems bsrung ba la 'bad par bya'o zhes bstan pa'i phyir/gang zhig ces bya ba la sogs pa gsungs te/ de 'dra ni de ltar brjod pa'i rim pas so/ /sbyin bdag la zhes pa ni thams cad du bde ba ster ba'i bdag po rgyal ba'i sras la ste/ bde bar gshegs pa'i sras po byang chub sems dpa' la zhes bya ba'i don to/ / ngan sems ni sdig pa'i sems so/ /rang gi yid la ni rang gi rgyud la'o/ /byed pa ni skyed pa'o/ /gang bdag nyid ngan pa de dmyal ba rnams su gnas par bcom ldan 'das kyis gsungs te bka' stsal to/ /ngan sems bskyed pa'i grangs bzhin bskal par ni ste/de'i rgyud la ngan sems kyi yid bskyed pa'i skad cig ji snyed kyi bskal par ngan sems kyi yid kyi grangs bzhin du dmyal bar 'gyur ro snyam du dgongs pa'o/ /gang rab tu zhi ba rnam par nges pa cho 'phrul bstan pa'i mdo las/ 'jam dpal byang chub sems dpas byang chub sems dpa' la khong khro ba'i sems skyed cing brnyas pa'i sems bskyed pa de srid du des bdag bskal par dmyal bar gnas par bya'o zhes go cha bgo bar bya'o zhes gsungs so//de bzhin gshegs pa la ngan sems kyis khrag phyung ba'i sems bskyed pa'i skad cig gi grangs bzhin du bskal par mnar med par gnas par ni ma gsungs pa ma yin nam/'jig rten gsum na de bzhin gshegs pa las lhag pa ni yod pa ma yin na/ de ji srid na shin tu dogs par khyer bar byed ce na bden te tshul 'di la sgra ji bzhin du dngos po nyid rnam par gzhag pa ni ma yin te/gsung rab thams cad la drang ba dang nges pa'i don du rnam par gzhag pa yin pa'i phyir ro/ /de bzhin gshegs pa la lha dang bcas pa'i 'jig rten 'gas kyang ngan sems skyed par mi nus te/ bskal pa grangs med par sems can thams cad la byams pa'i thugs goms par bsgoms pa'i phyir 'di'i sku la mtshon gyis mi tshugs so zhes byams pa'i sems kyi phan yon bstan pa'i phyir ro//'dir las kyi rnam par smin pa ni dngos po la ma bstan te/ sangs rgyas rnams ni las kyi rnam par smin pa dang bral ba'i phyir ro/ /de lta bas na gdul bya'i bsam pa la dgongs nas bstan gyi/don dam par ni ma yin no/ /byang chub sems dpa' la gnod pa byas pa ni sangs rgyas nyid rtsa ba dang bcas pa bcom zhing nye bar bcom pa yin te/ de ltar na yang lha dang bcas pa'i 'jig rten gyi don nye bar bcom par 'gyur ro//lung ji lta bar 'dir bstan pa yin te/ 'di la don dam par ni bcom ldan 'das nyid kyis mkhyen to/ /'di yang dad pa'i stobs bskyed pa la 'jug pa'i phyag rgya'i mdo las/ 'jam dpal rigs kyi bu'am rigs kyi bu mo gang la las gang gA'i klung gi bye ma snyed kyi mchod rten bshig pa'am/bsregs la/ yang rigs kyi bu'am/ rigs kyi bu mo gang zhig gis theg pa chen po la mos pa'i byang chub sems dpa' sems dpa' chen po la gnod sems dang tha ba dang khong khro ba'i sems bskyed cing spyos te brgyad na 'di ni de bas ches grangs med pa'i sdig pa skye bar 'gyur ro//de ci'i phyir zhe na/ byang chub sems dpa' las 'khrungs pa ni sangs rgyas bcom ldan 'das so/ /sangs rgyas las byung ba ni mchod rten dang / bde ba'i yo byad thams cad dang / lha'i ris thams cad do/ /byang chub sems dpa' la dam pa ma yin par byas na sangs rgyas thams cad la dam pa ma yin pa byas par 'gyur ro//byang chub sems dpa' la dam par byas na sangs rgyas thams cad la dam par byas par 'gyur ro zhes bya ba la sogs pa gsungs so/ /yang gang zhig de la sems dang ba bskyed pa de'i bsod nams kyi 'bras bu ji tsam zhig skye bar 'gyur zhe na/gal te gang zhig ces bya ba la sogs pa gsungs te/ byang chub sems dpa' la'ang gang gi bsod nams kyi bdag nyid kyis yid dang ba skyed par byed na/ de'i 'bras bu yang de bas lhag par skye ste/ de'i sems dang ba 'phel ba ni nye bar skye bar 'gyur ba'o//de bas na lhag pa ni sngar gyi sdig pa'i 'bras bu de bas ches mang bar bsod nams kyi rnam par smin pa'i 'bras bu khyad par du skye ste 'byung ba'i phyir ro/ /yang na de bas lhag pa'i rnam par smin pa'i 'bras bu skyed par byed pa'i las nyid la 'bras bu zhes brjod do//ches lhag par 'bras bu skyed par byed pa'i las skye'o zhes pa'i don to/ /nges pa dang ma nges pa la 'jug pa'i phyag rgya'i mdo las/ 'jam dpal gal te yongs su brtag pa nye bar bzung ste/ phyogs bcu'i 'jig rten khams kyi sems can thams cad kyi mig bton par gyur la/yang yongs su brtag pa nye bar bzung ste/ gal te rigs kyi bu'am rigs kyi bu mo byams pa'i sems la gnas pa 'ga' zhig de dag thams cad kyi mig skyed par byed pa bas/'jam dpal rigs kyi bu 'am rigs kyi bu mo gang gzhan zhig gis theg pa chen po la mos pa'i byang chub sems dpa' la sems dang bas lta na 'di ni de bas bsod nams ches lhag par skye'o zhes gsungs so/ /de lta bas na bsod nams kyi zhing chen po la mkhas pa rnams kyis dge ba'i sems nyid du bya'o//gzhan yang 'di'i phyir yang dge ba'i sems nyid skyed par rigs pa yin te/ gang gi phyir byang chub sems dpa' rnams la do gal chen pos kyang ste/ tshegs chen pos so/ /sdig pa ni sdig pa nyid dam ngan pa'i phyir sdig pa yin te/nyes par byas pa'i las rnams do gal chen pos kyang ste/ gzhan yang chen pos byed la/ de rnams kyi lus dang ngag dang yid kyi spyod pa mtha' dag dang bas skyed par byed pa'i phyir dang / byang chub kyi sems kyi mthu las yin pa'i phyir byang chub sems dpa' rnams la 'ga' zhig gis gnod pa byed pa'i sems skye bar mi 'gyur ro//'dir yang 'phags pa 'jam dpal gyi rnam par thar pa las/ rigs kyi bu dper na rin po che'i rgyal po yid bzhin gyi nor bu cod pan la btags pa'i klu'i rgyal po rnams la pha rol gyi gnod pa dang 'jigs pa mi 'byung ngo //de bzhin du byang chub kyi sems dang snying rje chen po'i rin po che'i rgyal po yid bzhin gyi nor bu cod pan la bcings pa'i byang chub sems dpa' la ngan song dang ngan 'gro'i pha rol gyi gnod pa dang 'jigs pa mi 'byung ngo zhes gsungs pa yin na/ de'i phyir de rnams la don ma yin pa 'phel ba'i 'bras bu rtsub pa ci'i phyir 'bad cing rtsol bar byed/ de nyid kyi phyir/ dge ba ngang gis te/ bsdu ba'i dngos po rnams kyis sems can thams cad la phan pa dang bde ba'i las byed pa'i phyir dang / las yongs su dag pas gang du yang 'khrul pa med pa'i phyir de rnams la ngang gis dga' ba dang /dang ba dang mchog tu dga' ba skye bar 'gyur ro/ /de'i phyir yang 'bad pa med par dge ba nyid skyed pa yin no/ /da ni byang chub tu sems bskyed pa rnams la bstan bcos byed pa bdag nyid kyi shin tu yang yid rab tu dang ba gsal bar byed pa de la phyag 'tshal ba/gang la zhes pa la sogs pa gsungs te/ skyes bu glang po de'i sku las te/ sku lus la'o/ /phyag 'tshal zhing zhes pa ni rab tu 'dud pa'o/ /gang la ste/ de rnams kyi rgyud la'o/ /sems kyi dam pa rin chen de yid bzhin gyi nor bu dang 'dra ba'i phyir sems nyid rin po che'o//dbul ba'i sdug bsngal thams cad sel ba'i phyir rab dam pa ste mchog go/ /de ni bstan pa'i phan yon can te skyes pa ni byung ba'o/ /de yang yin la sems kyi dam pa rin chen yang de yin pas zhes tshig bsdu ba'am/de zhes bya ba ni logs shig pa'o/ /'di ni yon tan gyi gzhi la lhag par bkur ba yin no/ /de'i khyad par gzhan yang / gang la gnod pa byas kyang zhes bya ba la sogs pa gsungs te/ gang la ni byang chub sems dpa' mchog tu dge ba'i thugs mnga' ba rnams la'o//gnod pa byas kyang ni brnyas pa byas kyang ngo / /bde 'brel pa ni de byed pa la bde ba gong nas gong du 'phel bar 'gyur ba'o/ /dgongs pa ni 'di yin te/ de la gnod pa ni bya bar mi nus la/ brgya la srid na yang de la gnod pa byed pa nyid rgyu mtshan du byas nas 'jug pa dang ba'i bsam pa dang ldan pa rnams la yang rgyu mtshan 'ga' zhig gis de la sems dang ba skyes pas de la gnod pa byed pa mya ngan las 'das pa'i bde ba dang 'brel par 'gyur te/dper na byams pa'i stobs kyi skyes pa'i rabs su lnga dbang du byas nas brjod pa lta bu'o/ / yang na byang chub sems dpa'i smon lam gyis gnod pa byas pa nyid bde ba dang 'brel par brjod do/ /yang na/ gang dag la bdag kha zer ba'am/ /gzhan dag gnod par byed pa'am/ /de bzhin phyar ka gtong ba'ang rung / /thams cad byang chub skal ldan gyur/ /zhes 'chad par 'gyur ro//gang la gnod pa byas kyang ni/ /gang dag bdag la gnod pa byas kyang ste/ bu sdug pas byas pa bzhin du thugs rje chen po'i lhag pa'i bsam pas sdug bsngal gyi rgyu nyid kyang bde ba nyid skyed par byed pa yin te/ ji skad du bzod pa'i le'u las 'chad par 'gyur ba bzhin no//de ltar rnam pa thams cad du bde ba'i rgyu yin pa'i phyir bde ba don du gnyer ba rnams kyis byang chub sems dpa' la brten par bya ba yin te/ rin po che don du gnyer ba rnams kyis rin po che'i 'byung khungs bzhin no zhes bstan pa'i phyir/ bde ba'i 'byung gnas de la skyabs su mchi/zhes pa la/ bde ba'i 'byung gnas ni gcig tu bde ba thams cad skyed par byed pa'i phyir ro/ /de la ste/ ji skad du bstan pa'i rim pas gnod pa byas kyang bde ba'i rgyur gyur pa la skyabs su mchi ba yin la/ de la bstan par bgyi ba ste/ de rnams kyis bdag gi skyabs mdzod cig ces bya bar dgongs pa'o//byang chub sems dpa'i spyod pa la 'jug pa'i dka' 'grel shes rab 'byung gnas blo gros kyis byas pa las/ byang chub kyi sems kyi phan yon gyi le'u ste dang po'o// //bam po gsum pa/ da ni de ltar dal ba phun sum tshogs pa rnyed par dka' ba thob cing /byang chub kyi sems kyi phan yon rig nas/ byang chub kyi sems blang ba'i don du sangs rgyas dang byang chub sems dpa' rnams mngon du byas te phyag 'tshal ba dang / mchod pa dang / gsum la skyabs su 'gro ba dang / sdig pa bshags pa dang /rjes su yi rang ba dang / sangs rgyas la bskul ba dang / gsol ba gdab pa dang / byang chub tu yongs su bsngo ba rnams bya ba'i phyir/ rin chen sems de zhes bya ba la sogs pa gsungs te/ de zhes bya ba ni phan yon bstan ma thag pa'i byang chub kyi sems rin po che yin la/gzung ba'i phyir ni bdag gir bya ba'i phyir te/ de skyed pa'i phyir zhes bya ba'i don to/ /de bzhin gshegs pa rnams ni sangs rgyas rnams te/ bcom ldan 'das la mchod pa'o/ /bdag ces pa ni byang chub kyi sems len pa por bdag nyid bstan pa yin te/ 'di ni sangs rgyas dkon mchog bstan pa yin no//dam pa'i chos dkon mchog ces pa ni lung dang rtogs pa'i mtshan nyid yin la/ dri ma med ces bya ba ni dge ba gsum gyis 'khor gsum dag pa dang / rang bzhin gyis 'od gsal ba yin te/ thams cad du dri ma thams cad kyi gnas ma yin pa'i phyir dang /nyon mongs pa zhes bya ba la glo bur ba yin pa'i phyir dang / dri ma thams cad spong ba la mkhas pa'i phyir ro/ /'dis ni dam pa'i chos dkon mchog bstan pa yin no/ /de sangs rgyas sras te/ sangs rgyas kyi sras po yin la/ yon tan rgya mtsho rnams ni yon tan rin po che'i rgya mtsho ste/'phags pa spyan ras gzigs dbang phyug dang / 'jam dpal dbyangs la sogs pa yin te/ 'dis ni dge 'dun dkon mchog bstan to/ /'di ni dang po dkon mchog gsum la mchod pa'i cho ga yin no/ /mchod ces pa ni thams cad du sbyar bar bya'o//legs par zhes pa ni mchod pa nyid kyi khyad par yin te/ legs par phyin ci ma log la ji lta ba bzhin du gyur pa'am/ sems dang ba drag pos so/ /yang na gzung ba'i khyad par yin te/ legs par zhes pa ni shin tu dang ba'i sems kyis legs par gzung ba'i phyir yin la/ gzhan gyi ngo bo la sogs par ni ma yin te/ ji ltar bzung ba bzhin du nyams par mi 'gyur ba yin no/ /mchod pa nyid bstan pa'i phyir/ me tog 'bras bu ji snyed ces pa la sogs pa gsungs te/ 'di dag gi tshad gang yin pa ni ji snyed yod pa ste/ lhag ma ma lus pa'i me tog dang 'bras bu rnams yin no//nam mkha' rab 'byam khams kyi mthar gtugs pa/ /yongs su gzung ba med pa de dag kun/ /blo yis blangs nas thub pa skyes kyi mchog /sras dang bcas pa rnams la legs par dbul/ /zhes pa gong ma thams cad la sbyar bar bya'o/ /sman gyi rnam pa ni sman gyi bye brag go//dang ba yid du 'ong ba zhes bya ba ni rin po che'i khyad par ro/ /sa 'dzin ni ri bo'o/ /rin chen rang bzhin ni rin po che'i ri'o/ /dben zhing nyams dga' zhes pa ni yid 'phrog cing dben pa ste rjes su mthun pa zhes pa'i don to/ /me tog mdzes rgyan 'bar ba zhes bya ba ni/mdzes pa'i me tog nyid rgyan yin te/ brgyan pa de nyid kyis 'bar ba ste shin tu lhag ge ba'o/ /'bras bzang yal ga dud pa dang / /zhes pa la/ bzang ba ni mdzes pa ste/ kha dog dang dri dang ro phun sum tshogs pa'i 'bras bu de dag yin te/ de rnams kyis dud pa ni dma' bar gyur pa ste/ yal ga gang zhig sa la reg pa bzhin du gyur pa de la de skad ces bya'o/ /dpag bsam gyi shing ni dpag bsam gyi ljon pa'o/ /pad+mas brgyan pa ni pad+ma'i rgyan gang la yod pa de la de skad ces bya'o/ /ngang pa shin tu skad snyan yid 'ong ldan//zhes pa ni ngang pa rnams kyi skad ni sgra'o/ /shin tu yid du 'ong ba ni nyams dga' ba ste/ de gang la yod pa de la de skad ces bya'o/ /ma rmos 'khrungs pa'i zhes pa ni ma rmos pa nyid de thong gshol gyis[(] glogs [,]slogs [)]pa med par skyes pa rnams yin la/ skyes pa'i lo thog gi rnam pa ni 'bru'i khyad par ro//gzhan yang mchod par ni 'os pa'i rgyan rnams zhes pa la/ gzhan yang ni logs shig pa'o/ /mchod par bya ba ni mnyes par bya ba yin te/ rgyan rnams ni mdzes par byed pa rnams so/ /nam mkha'i khams kyi rab 'byams mthar gtugs pa//zhes bya ba la/ nam mkha'i khams rab 'byam ni skabs sam rgya che ba'o/ /de srid kyi mthar gtugs pa ni de'i mthar thug pa'o/ /de dag kun ni brjod pa dang ma brjod pa dang 'dra ba yin la/ yongs su gzung ba med pa ni bdag gi ba ma yin pa rnams te/ gang gis kyang rang gir ma byas pa zhes bya ba'i don to//blo yis blangs nas zhes pa ni yid kyis zhes pa'o/ /thub pa skyes kyi mchog ni thub pa'i khyu mchog ste/ sras dang bcas pa ni byang chub sems dpa' dang ngo / /legs 'bul ni legs par sbyin pa'o/ /yon gnas dam pa ni yon gyi snod bla na med pa'o//thugs rje chen po rnams ni sangs rgyas dang byang chub sems dpa'i sems can thams cad la phan pa dang bde ba'i dgongs pa can no/ /bdag la zhes pa ni zhan cing sdug bsngal ba'i sems can la'o/ /brtser dgongs ni thugs rje mdzod cig pa ste/ bdag rjes su gzung ba'i phyir zhes bya ba'i don to//'di dag ni 'di dag thams cad de dag gis mchod par sbyar ba'i dngos po'o/ /bzhes zhes pa ni bdag gir mdzod cig pa'o/ /de ltar yin na yang 'di ltar yid las byung ba'i mchod pa tsam ci'i phyir byed de/ /re zhig dngos po yid du 'ong ba de dang de dngos su ci'i phyir 'bul bar mi byed ce na/bdag ni bsod nams mi ldan zhes pa la sogs pa gsungs te/ bdag bsod nams ma byas pa de nyid kyi phyir bkren chen te/ bsod nams dag gis yo byad phun sum tshogs par 'gyur ba yin la de dang bral ba'i phyir mchod pa'i nor gzhan te/yo byad gang ci'ang bdag la ma mchis pa'o/ /des na bdag gi don slad ces bya ba ni bdag gi bsod nams bzhed pa ste/ bcom ldan 'das kyang gzhan don dgongs pa ni gzhan la phan pa dang bde bar bzhed pa yin te/ thugs rje chen po dang ldan pa'i phyir ro/ /mchod pa'i yo byad brjod pa 'di bdag gis phul ba des na mgon po nyid kyi mthus te nyid kyi stobs bzhes shig pa'o//yang bdag dbang ba'i lus 'di yod pas de 'bul bar bya'o zhes rgyal dang zhes pa la sogs pa la gsungs pa la/ rgyal ba rnams la bdag nyid kyang dbul bar bgyi ste/rnam pa kun gyis zhes pa ni rnam pa thams cad du bdag gir khas blangs pa yongs su dor nas so/ /de'i sras rnams la'ang ste/ sems dpa' mchog rnams la'o/ /bdag ni yongs bzhes shig ces pa ni bdag so so nas yongs su bzhes shig pa'o/ /skyes bu khyu mchog khyed kyi 'bangs su bran gyi dngos por khas blang bar bgyi ba ste/'tsho ba la sogs pa 'tshol ba ma lags la/ 'on kyang gus pas ni mchog tu gus pa ste/ sems dad pa'i stobs kyis zhes bya ba'i tha tshig go/ /'o na yang 'dir yon tan ci zhig yod ce na/ bdag ni khyed kyis zhes bya ba la sogs pa gsungs te/khyed kyis ni khyed rnams kyis so/ /srid na mi 'jigs sems can phan par bgyi ste/ chen po la brten nas 'jigs pa dang bral nas 'khor bar 'jig rten pa rnams la phan pa'i don bsgrub par bgyi ste/ chen po la brten na'ang las mi dge bas bsgribs pa dag rang la phan pa byed pa'i nus pa yang med pas sngon gyi zhes pa la sogs pa gsungs te/sngon ma shes nas las mi dge ba byas pa las yang dag par 'da' bar bgyid cing rnam par sun 'byin pa kun tu spyod pa la sogs pa rnams kyis spang bar bgyi'o//sdig pa gzhan yang slan chad mi bgyid do zhes pa ni yang slan chad mi byed par sdom pa len pa'o/ /de ltar lus 'bul ba la sogs pa mchod pa'i yo byad thams cad phul nas yang mchod pa'i khyad par bya ba bzhed nas/ rin chen 'bar ba zhes bya ba la sogs pa gsungs te/rin chen ni in+d+ra nI la la sogs pa'o/ /'bar ba ni 'od gsal ba'o/ /gang ka ba yid du 'ong ba de ni 'dod par bya ba ste/ khrus kyi khang pa der de bzhin gshegs pa rnams la bdag gis khrus gsol lo zhes sbyar ro/ /yang ji lta bur gyur pa zhe na/ mu tig rang bzhin zhes pa mu tig gis spras shing bkod pa'o//'od chags ni 'od gsal ba ste/ bla re nyid ni bla re yin la/ gang de dag yod pa de la de skad ces bya'o/ /gsal ba ni shin tu dri ma med pa ste/ 'tsher ba ni 'od zer dang ldan pa'o/ /'di shel gyi yin pas shel zhes pa ste/bstar ba ni sa gzhi spras pa'i khyad par ro/ /gang dri zhim pa der te a ka ru nag po dang tsan dan la sogs pas bdugs shing bsgos pa'i khrus kyi khang pa der yid 'ong dri chu me tog gis bkang ba ni chu dang / me tog dang / yid du 'ong ba'i dri de rnams kyis bkang ba'o/ / rin chen rang bzhin bum pa ni de dag bai DUr+ya chen po yang yin la rin po che'ang yin te/ de'i rang bzhin no/ /du ma yin zhes pa ni brgya dang stong dang bye ba rnams kyis so/ /de bzhin gshegs dang de yi sras rnams la/ /glu dang rol mor bcas pas bdag khrus gsol/ /zhes pa ni yid 'phrog pa'i glu dang gar dang rdza rnga la sogs pa'i rol mo dang bcas pa rnams kyis so//de dag ni de bzhin gshegs pa mtha' yas pa dang de'i sras so/ /mtshungs pa med pa ni mnyam pa med pa ste/ gos ni du ku la'i ras yin la/ gtsang ba ni dri ma bkrus pa ste/ dri ma med pa zhes bya ba'i don to//dri rab bsgos pa ni a ka ru la sogs pa'i bdug spos rnams kyis so/ /sku ni sku ste/ phyi ba ni byi dor bya ba'o/ /de nas zhes pa ni phyis pa'i 'og tu'o/ /legs bsgyur ba ni legs pa'i tshon gyis shin tu legs par bsgyur ba ste/ legs pa'i bdug spos rnams kyis bdugs pa rnams 'bul ba'o//na bza' dam pa ni bla na med pa'i gos so/ /de la ni de rnams te/ bzang po ni lha yul du byung ba lha la 'os pa'o/ /srab pa yang yin la reg bya 'jam pa yang yin te/ 'jam zhing phra ba'o/ /sna tshogs pa ni kha dog du ma'o/ / mdzes par byas pa ste/ gang la na bza' yang yin la rgyan mchog kyang yin pa des te lhab lhub gtso bor gyur pas so/ /de dang de dag gis zhes pa ni cod pan dang / gdu bu dang dpung rgyan dang / do shal dang / rkang gdub la sogs pa de rnams kyis kun tu bzang po dang / mi pham pa dang / 'jam dbyangs dang /'jig rten dbang phyug la sogs pa byang chub sems dpa' rnams la brgyan par bgyi ste chas su bgyi'o/ /stong gsum kun du zhes pa la/ gling bzhi pa stong dang / de bzhin du so sor zla ba dang nyi ma dang / ri rab dang / 'dod pa'i lha dang / tshangs pa'i 'jig rten rnams ni stong spyi phud du 'dod la/de lta bu de stong du bsgres pa ni stong gnyis pa bar ma yin te/ de stong ni stong gsum yin na gling bzhi pa bye ba phrag brgya zhes bya ba'i don to/ /de ltar de phyogs thams cad du 'jig rten gyi khams mtha' yas mu med pa dang / stong gsum thams cad du ngad ldang bar byed pa'i ngang tshul gang la yod pa de la de skad ces bya'o//rnam pa de lta bu'i dri'i byug pa gang la yod pa de la de skad ces bya ste/ dri mchog de rnams kyis te/ gzhi mnyam pa dang / tsan dan la sogs pa rnams kyis so/ /thub dbang gi sku de dag byug par bgyi ste bsku bar bgyi'o/ / ji lta bur gyur pa gang dag la zhe na/ btso ma ni kha sbyar du bskol ba la sogs pas nang gi dri ma yongs su sbyangs pa'o/ /byi dor byas pa ni ro tsa na la sogs pa'i nor bus phyi bdar byas pa'o/ /sbyangs pa ni bul tog dang / skyu ru ra dang / lan tshwa la sogs pas phyi'i dri ma bkrus pa'o//de lta bur gyur pa yang yin la/ gser yang yin pa de'i 'od chags ni 'od zer zhes pa'i don to/ /de dang 'dra bar 'bar zhing 'od zer dang ldan pa'o/ /'di yang 'jig rten la grags pas bshad pa yin te/ de bzhin gshegs pa'i sku mdzes pa la ni 'jig rten na dpe cung zad kyang yod pa ma yin no//da ni phreng ba'i mchod pa/ thub dbang zhes bya ba la sogs pa gsungs te/ man da ra ni lha rnams kyi me tog gi khyad par ro/ /ma li ka ni bar shi ka'o/ /de dag la sogs pa thams cad de/ dri zhim pa'i me tog yid 'phrog pa rnams kyis mchod gnas kyi mchog thub pa'i dbang po rnams la mchod par bgyi'o//me tog kyang yin la phreng ba yang yin te/ spel legs yid 'ong zhes pa ni legs par bsgyur zhing spras pa'i khyad par te/ 'dod par 'os pa rnams kyis so/ /spos kyi mchod pa spos mchog ces bya ba la sogs pa la gsungs pa la/rgyas pa ni sdug pa'o/ /khyab pa ni 'phro ba'am dri che bar ldang ba'o/ /de lta bu'i dri bdug pa'i sprin tshogs gang la yod pa de la de skad ces bya'o/ /bdug pa de rnams sprin lta bur nam mkha'i dkyil du 'khrigs pa'i gzugs can te/ skyes bu stag la sogs pa rnams kyi zhes pa ltar dper byas pa'i tshig bsdu ba'o/ /bdug pa rnams kyi tshogs te sprin bzhin du gyen du 'gro ba rnams kyis zhes pa'i don to/ /de la zhes pa ni thub pa'i dbang po la'o/ /bdug par bgyi zhes pa ni bdug pa rnams kyis lhag par bsgo bar bgyi'o//bshos gtsang gi mchod pa/ zhal zal zhes bya ba la sogs pa gsungs te/ zhal zas ni gang zhig zhal bkang nas gsol ba'o/ /bza' ba ni gang kham du bcad nas te snum khur la sogs pa'o/ /btung ba ni gang btung bar bya ba de nyid de/ skom la sogs pa'o//sna tshogs pa ni rnam pa du ma legs par sbyar ba de rnams kyis so/ /de la zhes pa ni thub dbang rnams la'o/ /dbul bar bgyi ba ni sbyin par bgyi ba'o/ /mar me'i mchod pa/ gser gyi pad+ma zhes pa la sogs pa gsungs te/ rin po che las grub pa'i sgron ma de rnams tshar du dngar ba gang yin pa de dag la de skad ces bya'o//gang du zhe na/ gser gyi pad+ma rnams su'o/ /spos kyis byugs pa der zhes pa ni tsan+dan dang gur kum la sogs pa rnams kyis byugs pa'o/ /mu tig rin chen rgyan phreng zhes pa ni gang mdzes pa'i pho brang yin la/ dpag yas zhes pa ni pho brang gi tshogs te/'jig rten gsal bar byed cing mdzes par byed pa rnams so/ /gser gyi rang bzhin gyi yu ba can dbyibs sdug pa mu tig gis mdzes par byas pa rin po che'i rang bzhin gyi gdugs yin la bsgreng ba ni yu ba gyen du bsgreng ba'o/ /da ni mchod pa'i yo byad nye bar bsdu ba bstan pa'i phyir/de las zhes bya ba la sogs pa gsungs pa/ 'di la sogs pa bdag gis phul ba mchod pa'i sprin dang / gzhan te lha la sogs pas phul ba bskal pa'am bskal pa las lhag pa mchog tu 'jug pas rab tu gnas par gyur cig pa'o//rol mo'i sprin rnams kyang zhes pa ni rdza rnga la sogs pa brdung bar bya ba rnams yin la/ bsdus dbyangs ni tshogs pa'i glu zhes bya ba'i don to/ /yang na bsdus dbyangs ni gar dang glu dang rol mo rnams tshogs pa la brjod do/ /de rnams kyi sprin ni du ma tshogs pa yin la/de yang sems can thams cad tshim pa ste/ sems can thams cad dga' bar byed pa yin la/ mnyan par mi nus pa rab tu gnas par gyur cig ces 'brel pa ni ma yin no/ /dam pa'i chos la sogs pa rnams la spyi mdor bsdus nas mchod pa/ dam chos zhes bya ba la sogs pa gsungs te/ gsung rab yan lag bcu gnyis kyi bdag nyid dam pa'i chos rin chen thams cad la yin la/ rin chen bzhin du rin chen yin te/ dngos po'i de kho na nyid gsal bar byed pa'i phyir dang / mchog tu zhi bar byed pa'i rgyu yin pa'i phyir ro//mchod rten ni de bzhin gshegs pa'i mchod rten yin la/ sku gzugs ni sangs rgyas dang byang chub sems dpa'i sku'i gzugs brnyan rnams so/ /rin chen me tog la sogs char/ /zhes pa ni me tog gi char dang / rin po che'i char ro/ /sogs pa'i sgras kyang tsan+dan gyi phye ma dang /gos la sogs pa bzung la/ /'khor ba ji srid par rgyun mi 'chad pa'o/ /bla na med pa'i mchod pa bstan pa'i phyir/ 'jam dbyangs zhes pa la sogs pa gsungs te/ 'jam pa'i dbyangs dang / kun du bzang po dang /mi pham pa dang / 'jig rten mgon po la sogs pa sa bcu'i dbang phyug gi byang chub sems dpa' rnams so/ /ji ltar zhes pa ni gang gi lhag pa'i bsam pas de bzhin gshegs pa rnams mchod pa de bzhin du de'i mos pas bdag gis kyang de bzhin gshegs pa rnams dang sras byang chub sems dpa'i tshogs dang bcas pa rnams la mchod do//bstod pa'i mchod pa/ bdag gi dbyangs kyi yan lag ces pa la sogs pa gsungs te/ dbyangs ni sa 'dzin bdun la sogs pa yin la/ de rnams kyi yan lag ni rab tu dbye ba yin te/ka mod la sogs pa'o/ /de rnams rgya mtsho bzhin du shin tu mang bas ni rgya mtsho'o/ /de rnams kyis bstod pa ni bstod dbyangs du mas bstod pa rnams te/ glu dbyangs rnams bsdus pa'o/ /de rnams kyi sprin 'byung gyur cig ste/ nye bar gnas par gyur cig pa'o//de rnams yin te/ sangs rgyas dang byang chub sems dpa' rnams yin la/ gzhan ni ma yin te/ ji ltar bdag gis nye bar brtags pa de lta nyid yin no zhes pa'i tha tshig go/ /sangs rgyas dang chos dang dge 'dun dkon mchog gsum la phyag 'tshal ba'i mchod pa/dus gsum zhes pa la sogs pa gsungs pa la/ phyogs bcu'i sangs rgyas kyi zhing ji snyed pa de dag gi rdul phra mo ji snyed pa'i grangs de snyed kyis te/ dus gsum gshegs pa kun zhes pa ni 'das pa dang ma 'ongs pa dang da ltar byung ba'i de bzhin gshegs pa'o/ /ji lta bur gyur pa zhig la zhe na/chos dang tshogs kyi mchog bcas la ste/ tshogs rnams kyi mchog ni rtse mor gyur pa ste/ byang chub sems dpa'i tshogs so/ /chos kyang yin la tshogs mchog kyang yin te/ de dag dang lhan cig pa'o/ /de bzhin gshegs pa'i mchod rten rnams la phyag 'tshal ba/mchod rten rnams dang zhes bya ba la sogs pa gsungs pa la/ steng dang bar dang 'og dag dang / /phyogs dang phyogs mtshams rnams su yang / /skur bcas sku ni med pa yi/ /mchod rten rnams la bdag phyag 'tshal/ /zhes bya ba'i don to/ /byang chub sems kyi gzhi rnams dang //zhes bya ba ni skyes pa'i rabs dang / rtogs pa brjod pa dang / bltams pa la sogs pa'i gnas rnams so/ /phyag 'os zhes pa ni sangs rgyas rnams te mchod par 'os pa'o/ /de ltar 'dis ni mchod pa dang phyag 'tshal ba'i cho ga brjod do//mchod pa'i cho ga 'di yang dam tshig gsum gyi rgyal po las bstan pa yin te/ thang las skyes pa'i rin po che'i ri bo dang / chu las skyes pa'i rin po che'i ri bo dang / chu dang thang las skyes pa'i phyogs bcu na gnas pa'i bdag gir yongs su bzung ba med pa rnams dbul bar bya'o zhes ji skad brjod pa lta bu'o//phyogs 'dis sman thams cad dang / bcud kyis len thams cad dang / chu'i dkyil 'khor kha na ma tho ba med pa rnams dang / 'jig rten gyi khams mtha' yas pa rnams na ro dang reg bya phun sum tshogs pa'i sa zhag dang /bdud rtsi'i shing dang / ma rmos pa'i 'bras dkar dang / byang gi sgra mi snyan rnams dang / 'jig rten gyi khams rnam par dag pa rnams ni shin tu yid du 'ong ba'i longs spyod rnams kyang ngo / /dkon mchog sprin las kyang / mdo sde rnams su brjod pa'i rgya che ba'i mchod pa'i las gang 'di rnams lhag pa'i bsam pa shin tu drag pos de rnams sangs rgyas dang byang chub sems dpa' rnams la yongs su sngo bar byed pa dang /de bzhin du des sna tshogs pa'i mchod pa'i las rnams yongs su sems par byed do zhes gsungs so/ /da ni dkon mchog gsum la skyabs su 'gro ba sngon du song ba'i sdig pa bshags pa/byang chub ces bya ba la sogs pa gsungs pa la/ skyabs kyi don ni skyob pa'i don yin la/ mchi ba ni de'i bka' yongs su skyong ba yin te/ gang zhig gang la skyabs su 'gro ba de ni de'i bka' las 'das pa ma yin no zhes pa'i don to//byang chub snying por zhes pa la/ snying po'i sgra 'di ni snying po'i tshig ste/ mar gyi snying po dang 'o ma'i snying po zhes pa bzhin no/ /de ltar na ji srid du byang chub kyi snying po yang dag par rdzogs pa'i byang chub ma thob kyi bar du zhes pa'i don to//phyogs rnams kun na bzhugs pa'i zhes pa la/ gsol ba ni zhes pa sangs rgyas dang byang chub sems dpa' rnams mdun du dmigs nas bsam pa thag pas 'di skad ces brjod par bya'o zhes pa 'di ston pa ni thal mo sbyar te zhes pas ni lus kyi rnam par rig byed brjod do//lag pa gnyis kha sbyar bar byas pa ni thal mo sbyar zhes pa'i don to/ /thog ma med ldan zhes pa ni sngon gyi skye ba brgyud pa yin la/ tshe rabs 'di zhes pa ni skye ba 'di nyid la yang ste/ snga ma 'ba' zhig ni ma yin no/ /ma 'tshal zhes pa ni bdag nyid gti mug chen po nyid du bstan to//de la lus dang ngag dang yid gsum po rnams kyis rnam pa gsum byas pa'ang ste/ bgyid du stsal ba ni ngag dang yid kyis yin la rjes su yi rang ba yang ngo / /bdag gnod phyir zhes pa ni de'i las kyi 'bras bu bdag nyid la smin pa'i phyir ro//nongs pa de ni zhes pa ni ltung ba ste/ bshags pa ni mthol ba ste bsal bar byed cing mi 'chab pa'o/ /'gyod bgyis nas zhes pa ni dmyal ba la sogs par mi dge ba'i las kyi rnam par smin pa sdug bsngal ba thob pas so/ /de ni ji ltar gtso bor gyur pa'i sdig pa bshags pa/dkon mchog gsum zhes pa la sogs pa gsungs pa/ dkon mchog gsum ni bla na med pa'i zhing yin la/ pha zhes bya ba la sogs pas ni phan 'dogs pa'i zhing yin te/ de la gnod pas ni sdug bsngal gyi rnam par smin pa rgya che bar grags pa yin pa'i phyir ro//nyes pa du mas skyon chags pa ni 'dod chags la sogs pa'i nyon mongs pas skyon chags pa ste/ rang dbang du ni ma yin no zhes bya ba'i don to/ /sdig pa'i las la skyo bar bya ba gsungs pa/ ji ltar 'di las te rnam pa gang gis so/ /mi dge ba 'di las so/ / myur ba ni shin tu myur bar ro/ /khyed ci'i phyir rings she na/ bdag ni zhes bya ba la sogs pa gsungs te/ ji srid du sdig pa byang bar ma byas pa de srid du bdag 'chi bar ma gyur cig ces pa ste/ gzhan du na ngan song du 'gro bas 'jigs pa'i phyir ro/ /ci ste sdig pa byang bar ma byas par khyed la 'chi ba'i go skabs med pa yin nam zhe na/byas dang ma byas zhes pa la sogs pa gsungs te/ re zhig 'di ni byas la 'di ni ma byas so zhes te 'chi bas mi sdod do/ /yid brtan pa ni yid ches par byas nas te des 'joms pa'o/ /bdag nad med pa dang / lang tsho dang / stobs dang ldan pa'i lus yin no zhes brtan par mi bya'o/ /ci'i phyir zhe na/ glo bur thog chen zhes te/ ma bsams par thog 'bab pa dang 'dra'o/ /gang zhig de ltar sdig pas 'jigs na 'o na ci'i phyir de byed ce na/ mdza' dang zhes pa la sogs pa gsungs te/ mdza' ba ni bdag dang bdag gi ba yin la/mi mdza' ba ni de la gnod pa byed pa yin te/ mdza' ba la phan pa dang bde ba dang / mi mdza' ba la zlog par byed pa'o/ /rnam pa sna tshogs byas pa ni srog gcod pa dang ma byin par len pa la sogs pa'i dbye ba ste rnam pa du ma'o/ /'di dag thams cad yun mi ring bar dor bar bya ba ma yin nam/de ci'i phyir na don med pa'i sdig pa sogs par byed ce na/ thams cad ces pa la sogs pa gsungs te/ thams cad ni mdza' ba dang mi mdza' ba yin la/ de bor nas 'gro bar bya ba yin par bdag rmongs pas 'di ma shes te yongs su ma bsgoms so//de ni lhag ma zhig gnas she na/ de de zhes pa la sogs pa gsungs te/ dngos po gang dang gang zhes pa ni bde ba'i rgyu dang sdug bsngal gyi rgyu yin la spyad pa ni de myong ba'o/ /yang ci'i phyir 'di ltar yin zhe na/ rmi lam bzhin du zhes pa la sogs pa gsungs te/dper na rmi lam gyi gnas skabs na nyams su myong ba zhig ste/ mi mthong zhing der dran pa 'ba' zhig lhag ma yin no/ /de bzhin du gzhan yang ste/ mdza' ba la sogs pa dang 'grogs pa thams cad skye ba 'di nyid la mi brten pa yin no zhes bstan pa'i phyir/re zhig gnas pa zhes pa la sogs pa gsungs te/ gnas pa zhes pa ni yod pa nyid na'o/ /'das pa ni mi rtag pa nyid kyis bzung bar bdag gis de ltar mthong ngo / /gal te de ltar na de'i don du byas pa'i sdig pa yang de dang lhan cig tu 'gro bar 'gyur ro zhe na/de dag don du zhes pa la sogs pa gsungs te/ de rnams ni mdza' ba la sogs pa yin la/ de'i don du ni de'i rgyu mtshan du byas pa'i sdig pa yin te/ de yang bdag gi mdun nyid na gnas pa yin la/ de yang bdag dang lhan cig tu 'gro zhes pa'i don to//ci ste de ltar mthong na yang ci ltar bslus she na/ de ltar zhes pa la sogs pa gsungs te/ bdag ni gang gis kyang ngo shes pa dang gang yang bdag gis ngo shes pa ma yin no zhes de ltar bdag gis rtogs par ma gyur te spyad pa ma yin no/ / rgyu des na bdag dang bdag gi ba la rjes su chags pa dang / de dang mi mthun par spyod pa la zhe sdang ba te khong khro ba'o/ /khyed kyi tshe ni shin tu yun ring ba yin na/ 'chi ba'i dogs pa ci ltar yod de ci'i phyir 'di ltar 'jigs she na/ nyin mtshan zhes pa la sogs pa gsungs te/nyin mtshan du tshe 'god par 'gyur te/ tshe'i 'du byed zad par 'gyur ro/ /sdod pa med par zhes pa ni skad cig tsam yang 'god pa la rgyun chad pa med do/ /'ong ba ni rjes su 'jug pa yin la de yang bsnon pa ste/ bsring ba'i cha tsam yang yod pa ma yin no/ / de ltar na bdag ci'i phyir 'chi bar mi 'gyur te/ 'on kyang ring por gnas nas kyang gson pa ni mthar 'chi bar 'gyur ro/ /de ltar na yang gang gi don du sdig pa byas pa de yang dmyal ba la sogs par de'i 'bras bu sdug bsngal nyams su myong ba'i tshe deng yang de dang lhan cig tu skal ba len par 'gyur te/de ci'i phyir na 'jigs par byed ce na/ re zhig 'jig rten phyi ma lta zhog ste/ 'di na zhes pa ni srid pa 'di nyid na'o/ /'chi ba dang nye ba'i sdug bsngal gyis non pa gnyen 'dab dang 'khor gyi nang na gnas nas yang ngo / /gnad chad pa'i tshor ba dag ces pa ni skom pa dang lus tsha ba la sogs pa'i sdug bsngal bdag nyid gcig pus myong bar 'gyur gyi/de'i cha shin tu chung ngu yang gzhan la 'byung ba ma yin no/ /dmyal ba la sogs par ci smos zhes ston pa ni/ gshin rje'i pho nya zhes pa la sogs pa gsungs te/dus kyi pho nyas zin pa ni des byin gyis brlabs pa yin te/ ske la zhags pas bcings nas tho bas brdung bzhin du 'brog dgon pa'i tsher ma stug po can dang pha 'ong thag thug can rnams kyis rkang pa gcod cing grogs med pa'i las nyams su myong ba'i sar khrid pa na/gnyen gyis ci phan bshes ci phan/ /zhes pa ste/ der grogs 'ga' yang skyabs su 'gyur ba ma yin la/ de tshe bsod nams gcig skyabs na/ /de yang bdag gis ma bstan to/ /skyabs su gyur pa'i bsod nams de yang bdag gis ma bsags so/ /yang sdig pa las bskyab par bya ba mgon po zhes pa la sogs pa gsungs pa la/mi rtag pa ni tshe mi gnas pa'o/ /chags pas ni 'dzin pas ste/ 'di 'dra zhes pa ni dmyal ba la sogs pa'i sdug bsngal 'byung bar 'gyur ba ma shes te ma mthong nas so/ /bag med ces pas ni lang tsho dang gzugs dang nor dang /dbang che ba la sogs pas rgyags par gyur pas so/ /yang ci'i phyir khyed la de lta bu'i skyo ba mang du 'byung zhe na/ skye bo yan lag gcod ces pa la sogs pa gsungs te/ dmyal ba'i sdug bsngal bas rkang pa dang lag pa bcad pa las byung ba'i sdug bsngal 'di shin tu chung ba yin te/de lta na yang de la gnas skabs 'di lta bur 'gyur te/ skams pa ni bdag nyid thams cad nye bar skams par gyur pa dang / skom pa ste skom gyis gdungs pa dang / mig rtsa ngan pa ni phongs pa'i lta stangs so//gzhan du ni bzlog par ro/ /dmyal ba'i sdug bsngal shin tu che ba ni gshin rje'i pho nya zhes pa la sogs pa gsungs te/ 'jigs 'jigs lta'i zhes pa ni 'jug pa byed pas so/ /byin gyis brlabs pa ni bdag gir byas pa'o/ /'jigs chen nad kyis thebs gyur pa ni zin par gyur pa'o//mi gtsang byung ba ni de las byung zhing lug pa'o/ /gos pa ni zags pa'o/ /bred sha thon pa ni zhan pa ste/ phyogs bzhir skyabs dag gsol cing tshol bar byed do/ /ji ltar byed ce na/ su zhig ces pa la sogs pa gsungs pa la/legs par ni rgyu mtshan med par byas pa'o/ /skyob pa ni yongs su skyob par byed pa'o/ /de lta na yang gang gi tshe gang du yang skyabs ma mthong nas de'i tshe slar yang skyabs med pas kun tu yi mug 'gyur ro/ /de'i tshe de'i dus na ji ltar bya ste bya ba thams cad la nus pa med pa na/gnas der zhes pa ni rab tu tsha ba la sogs pa dmyal ba'i sar ro/ /de lta bas na da ltar nyid du phyir bcos pa nyams su blang bar rigs so zhes pa ni/ de bas rgyal ba zhes bya ba la sogs pa gsungs te/ 'gro ba'i mgon ni dbugs 'byin pa dang yid brtan pa'i gnas su gyur pa'i 'dren pa'o//stobs chen ni thams cad du nus pa thogs pa med pa ste/ 'gro ba skyob pa'i don brtson pa zhes pa ni/ sems can thams cad yongs su skyob pa'i don du brtson pa'o/ /gal te de lta mod kyi/ de la brten na yang 'jigs pa nye bar zhi bar mi 'gyur na de'i tshe skyabs su 'gro bas ci zhig bya zhe na/'jigs pa kun sel zhes gsungs te/ sdug bsngal ba thams cad sel bar byed pa'o/ /chos dang dge 'dun dkon mchog la skyabs su 'gro ba ni/ de yis zhes pa la sogs pa gsungs te/de yis zhes pa ni sangs rgyas bcom ldan 'das rnams so/ /thugs su chud pa ni mngon du byas pa ste/ mya ngan las 'das pa'i chos zhes pa'i don to/ /'khor ba'i 'jigs pa sel ba ni nyon mongs pa thams cad kyi gnyen por gyur pa'i phyir ro//yang dag ces pa ni mchog tu dad pas te/ sgyu dang g.yos sam the tshom gyi bsam pas ma yin pa'o/ /byang chub sems dpa'i tshogs zhes pa ni dge 'dun la yang de bzhin yang dag par ro/ /da ni ji lta ba bzhin du gtso bor gyur pa'i byang chub sems dpa' rnams la lus 'bul ba ni bdag ni 'jigs pas zhes pa la sogs pa gsungs te/'jigs pas rnam skrag nas ni dmyal ba la sogs pa'i 'jigs pas rnam par 'khrugs nas so/ /kun tu bzang po ni byang chub sems dpa' ste/ bdag nyid 'bul ba ni nges par dbul bar bgyi ba'o//'jam pa'i dbyangs la'ang ste 'jam pa'i mgon po la'o/ /bdag nyid kyis zhes pa ni gzhan gyis bskul bas ma yin te rang nyid kyi sems dang bas zhes pa'i don to/ /de la yang zhes pa ni rab tu grags pa yin la/ spyan ras gzigs mgon ni 'phags pa spyan ras gzigs dbang phyug go//thugs rje'i spyod pa ma 'khrul ba zhes pa ni 'di la spyod pa'i ngang tshul yod pa ni thugs rje'i spyod pa ma 'khrul ba'o/ /'di ni de nyid kyi khyad par ro/ /'o dod 'bod pa ni klong cher 'bod pa'o/ /nyam thag nga ros zhes pa ni bya ba'i khyad par te/sdug bsngal zhing zhan pas bred pa'i nga ro'o/ /'jigs pa ni las kyi rnam par smin pa la skrag pa'o/ /des zhes pa ni bcom ldan 'das spyan ras gzigs kyis so/ /sdig ldan bdag la zhes pa ni sdig pa byas pa bdag la skyobs shig pa'o//'phags pa nam mkha'i snying po zhes pa ni byang chub sems dpa'o/ /sa'i snying po yang byang chub sems dpa' gzhan te/ 'o dod 'bod ces phyi ma dang 'brel to/ /thugs rje chen po thams cad la zhes pa ni gang mtshan smos nas ma brjod pa gang yin pa de dag kyang mchog tu thugs rje dang ldan pa yin te/gzhan sdug bsngal bas sdug bsngal bar gyur pa'o/ /gang zhig mthong nas zhes pa ni gang zhig mthong ba tsam gyis so/ /pho nya la sogs zhes pa la sogs pa'i sgras ni gnod sbyin dang srin po la sogs pa gzhan dag kyang ste/sdang ba rnams 'jigs par gyur nas 'byer byed pa ste thag ring du 'bros par byed pa'i rdo rje can la phyag 'tshal zhes phyag 'tshal bar byed pa'o/ /rdo rje can ni gang la rdo rje yod pa ste/ byang chub sems dpa' phyag na rdo rje'o/ /de ltar skyabs su 'gro ba la sogs pa 'dis ni sdig pa zad par bya ba'i don du rten gyi stobs bstan pa yin no//gang 'phags pa chos bzhi pa'i mdo las/ de la rten gyi stobs ni sangs rgyas dang chos dang / dge 'dun la skyabs su 'gro ba dang / byang chub kyi sems mi gtong ba'o//de stobs dang ldan pa la brten nas sdig pas zil gyis gnon par mi nus so zhes gsungs so/ /yang gzhan du dogs pa bsal ba'i don du sngon chad ces pa la sogs pa gsungs pa la/ khyed kyi bka' las zhes pa ni khyed kyis bka' stsal pa las 'das par byas pa ste/da ni ste da lta'o/ /'jigs pa che mthong nas ni gang gi phyir de las 'das pas mi 'dod pa'i 'jigs pa ste/ mi 'dod pa'i 'bras bus skrag nas skyabs su mchi lags kyis so/ /de lta bas na gzhan du dogs par mi bya bas de'i phyir 'jigs pa bsal du gsol zhes pa yin te/sngon byas pa'i sdig pa'i 'jigs pa bsal bar mdzod cig pa'o/ /myur ba ni skyen par te/ bdag ni zhes khong nas 'byung ngo / /de ltar na yang khyod kyi tshig la su zhig yid ches par mi 'gyur ba ma yin nam zhes dogs pa la 'dir don bstan par bya ba'i phyir/tha mal nad ces pa la sogs pa gsungs te/ tha mal ni 'gro bzhin par 'jigs pa ste/ yun ring du mi gnas zhes pa'i don to/ /yang ni yang ba'o/ /'di de yang yin la nad kyang yin pa ste/ de la 'jigs pa yis sman pa'i ngag bzhin bya dgos na ste/bdag gi nad ni 'phel bar ma gyur cig ces pas sman pa'i ngag las 'da' bar mi bya zhe na nad rgyas thebs pas 'da' bar mi bya ba lta ci smos te/ yang lta smos ci dgos/ bzhi brgya bzhi yis lhag pa yin zhes pa la/ bzhi yis lhag pa'i bzhi brgya rnams kyis zhes pa'i don te//dus ma yin par 'chi ba brgya dang dus su 'chi ba gcig ni brgya rtsa gcig go/ /de dag so so la yang rlung dang mkhris pa dang bad kan dang de dag 'dus pa las gyur pa ni nad bzhi brgya rtsa bzhir 'gyur ro/ /rgyu tha dad pas 'bras bu tha dad pa yin la/'bras bu tha dad pas rgyu tha dad par rnam par gzhag pa yin no/ /de lta yang gang zhig med pa de la ci'i phyir 'jigs par byed ce na/ de gcig gis kyang zhes bya ba la sogs pa gsungs te/ nad kyis 'khrugs pa de dag gcig gis kyang ngo / / gang gi phyir 'dzam gling na gnas pa'i mi kun de srog chags rnams so/ /rlag byed pa ni 'chi bar byed pa'o/ /gzhan yang gang dag nad rnams kyi sman de rtsi sman gso ba'i don du gang nas kyang mi rnyed na'o/ /'dir yul ka shi'i rgyal po pad+ma'i skyes pa'i rabs su bstan pa 'di ltar thos te/'das pa'i dus na bcom ldan 'das 'di byang chub sems dpa'i spyad pa spyod pa na ka shi'i rgyal po pad+ma zhes bya bar gyur te/ de'i tshe 'dzam bu'i gling pa'i mi thams cad la nad chen pos btab par gyur nas 'chi ba na de dag gis 'di ltar bgros te bdag cag gi rje rgyal po 'di dag tu snying rje dang ldan pa slar 'chos par mdzad lags kyi 'di nyid la bdag cag gi sdug bsngal zhi bar bya'o zhes de dag gis de ltar nges par bzung nas 'dug ste/kye rgyal po chen po rje mchog tu phan par bzhed pa khyed bzhugs bzhin du yang bdag cag 'di 'dra ba'i gnas skabs su gyur to zhes rgyal po de la rang gi sdug bsngal bsal bar byas par gyur to//rgyal po de yang snying rjes gzhan gyi dbang du gyur pa'i yid kyis de dag gi sdug bsngal ma bzod nas myur du 'di dag gi nad kyi gdung ba sol cig ces sman pa rnams la bka' bsgo'o//de dag gis kyang de bzhin bgyi'o zhes slar mnyan nas gso ba'i bstan bcos bltas pa dang nya ro hi ta'i 'phral gyi sha las skyabs gzhan ma rnyed nas de bzhin du rgyal po la slar gsol to zhes rgya cher ro/ /'di nyid slob dpon lak+Shi nas skyes pa'i rabs kyi bstod par yang bstan to//zug rngu thams cad 'byin pa yi/ /zhes pa ni lus dang yid las byung ba'i zug rngu du ma 'don pa'i'o/ /bdag nyid smad pa'i gnas yin te/ shin tu ngan cing gti mug par gyur pa yin no/ /de ltar shes kyang gal te de bzhin gshegs pa'i bka' ltar mi byed pa ni phyir phyogs shing mi bsten pa yin la/de'i tshe bdag la gti mug mthar thug pa yod pa yin te bdag smad par bya ba yin no zhes pa'i don to/ /ci'i phyir de ltar yin zhe na/ g.yang sa zhes bya ba la sogs pa gsungs te/ g.yang sa tha mal chung ngu ni ri la sogs pa'i g.yang sa chung ngu yin te/gang du rus pa 'chag pa tsam mam 'chi ba tsam gyi sdug bsngal du gyur pa yin la/ dpag tshad stong du ltung ba zhes te dpag tshad stong phrag du ma'i tshad kyi mnar med pa la sogs pa'i g.yang sa zhes pa'i don to//yun ring zhes pa ni gang du bar gyi bskal pa la sogs pas tshe gtugs pa'o/ /de ltar 'chi ba ma mthong ba nyid yin te/ ci'i phyir skabs ma yin par sngar bas bde bar gnas pa 'dor zhes pa'i dogs pa spang bar mi nus so zhe na/ de ring zhes pa la sogs pa gsungs te/gdon mi za bar zhes pa ni 'di nges pa'o/ /de lta na'ang 'jigs par mi rigs so zhe na/ bdag la mi 'jigs zhes pa la sogs pa gsungs pa la/ gang gis na 'jigs par mi 'gyur bar gnas pa ma 'jigs shig ces mi 'jigs pa/ skyes bu dam pa su yis bdag la byin/zhes pa'i don to/ /yang na gal te nges par thar pa'i thabs yod pa de ltar na yang 'jigs par mi rigs te/ de yang yod pa ma yin la/ sdug bsngal 'di las ji ltar nges thar 'gyur te/ 'gyur ba ma yin no/ /bcom ldan 'das kyis gson pa thams cad 'chi ba'i mthar gtugs par 'gyur ro zhes gsungs so//'dis kyang yid bde bar gnas par mi rigs so zhes bstan pa'i phyir/ sngon chad myong ste zhes pa la sogs pa gsungs pa la/ mngon zhen nas zhes pa ni chags nas so/ /bla ma'i zhes pa ni sangs rgyas dang byang chub sems dpa' dang /dge ba'i bshes gnyen rnams kyi'o/ /de'i phyir 'dir nyin mtshan du 'di yid la bya bar rigs so zhes gson tshe 'di dang zhes pa la sogs pa gsungs pa la/ gson tshe ni sems can gyi 'jig rten yin la/ 'di ni mi la sogs pa rigs mthun pa'i mtshan nyid yin te/gcig pu zhes pa ni grogs med pa'o/ /ga shed ces pa ni nges pa med pa'i gnas so/ /mi dge ba las zhes pa ni mi dge ba'i las las te/ de las zhes pa ni mi dge ba'i las so/ /da ni las dang 'bras bu nges par byas pas mngon par zhen pa chen po'i sgo nas yang ltung ba bshags par bya'o zhes bstan pa'i phyir/bdag ni zhes pa la sogs pa gsungs te/ byis pa zhes pa ni mi shes pa nyid yin la/ gti mug pas zhes pa ni gti mug gi mun pas so/ /gang cung zad ces pa ni lus dang ngag dang yid rnams kyis so//rang bzhin kha na ma tho ba ni srog gcod pa la sogs pa mi dge ba bcu'i rang bzhin yin la/ bcas pa'i sdig pa ni sdom pa blangs pa rnams nyid la bcom ldan 'das kyis dus ma yin pa'i zas la sogs pa bcas pa'i rang bzhin no//bshags par bgyi zhes pa ni ngag gi rnam par rig byed bslang ba yin la/ thal sbyar zhes pa ni lus kyi rnam par rig byed do/ /yang dang yang du phyag 'tshal nas zhes pa ni shin tu yang sems skyo bar ston to/ /ltung ba la zhes pa ni dmyal ba la sogs pa rnams su 'dis shin tu ltung bar byed pas na ltung ba'o//las mi dge ba yin pa'i phyir nongs pa nyid de nyes pa nyid du'o/ /gzung du gsol te mkhyen pa dang / gzigs pa dang / rig par mdzod cig pa'o/ /sgrib pa med pa'i sems kyis bdag gis bsal bar bya ste/ bdag la 'chab pa yod pa ma yin no zhes pa'i don to//yang 'chal bar dogs pas spang bar 'dod nas phyin chad mi byed pa'i don du sdom pa len par mgon po zhes pa la sogs pa gsungs te/ gang gi tshe 'phags pa dgyes shing gang du 'phags pa mnyes pa/ mkhas pas bsngags pa ma yin pas mgon po bzang po ma lags pa ni dman pa ste/'phags pa ma yin pa'i las su brjod do/ /de nas bzung ste shes shing mthong bzhin du blo sngon du song bas yang de bdag gis mi bya ste/ slan chad kyang mi bgyid par sdom par 'tshal la zhes pa'i don to/ / de yang phung po gsum pa gdon pa'i skabs su gsal bar 'chad par 'gyur ro/ /byang chub sems dpa'i spyod pa la 'jug pa'i dka' 'grel/ shes rab 'byung gnas blo gros kyis byas pa las sdig pa bshags pa'i le'u ste gnyis pa'o// // bam po bzhi pa/ da ni sdig pa bshags pa'i de ma thag tu bsod nams la rjes su yi rang ba/ sems can kun gyi zhes bya ba la sogs pa gsungs pa la/ dmyal ba la sogs pa'i 'gro bar sdug bsngal nyams su myong bas ngal ba rnams legs par byas pa'i rnam par smin pa la brten nas bde ba thob pas dus cung zad cig tu ngal bso ba'o//dga' bas rjes su yi rang ngo / /zhes bya ba ni sems rab tu dang bas yang dag par dga' bar bgyi ba ste/ rjes su yi rang ba yang rnam pa gsum ste/ yid dang lus dang ngag gis so/ /de la yid kyis ni sems rab tu dang bas yang dag par dga' bar byed pa dang /lus kyis ni ba spu zing zhes byed pa dang / mchi ma 'byung ba dang / lus 'dar ba la sogs pa nyams su myong ba dang / ngag gis ni yang dag par dga' ba'i sems kyis legs par byas so/ / rab tu byas so/ /bzang po zhig byas so zhes de ltar ngag tu brjod cing rjes su yi rang bar byed pa'o/ /sdug bsngal can dag bde bar gnas pa zhes bya ba ni de dag gis gang gi don du las de byas pa de yang de dag gis thob par gyur cig snyam du dgongs pa'o/ /'jig rten pa'i las la rjes su yi rang ba byas nas/'jig rten las 'das pa la rjes su yi rang ba ni lus can zhes bya ba la sogs pa gsungs pa la/ sdug bsngal las nges par thar ba zhes bya ba ni nyan thos kyi byang chub bam/ rang sangs rgyas kyi byang chub bam sems kyang rung ste/ de'i don du bskyed pa de la de skad ces bya'o/ /de'i tshe byang chub gsum la gnas pa de 'ang gzung ngo / /lus can zhes pa ni srog chags so/ /byang chub sems dpa' dang sangs rgyas nyid ces pa la/ byang chub sems dpa' nyid ni bcom ldan 'das kyi rgyu'i gnas skabs so//sangs rgyas nyid ni 'bras bu'i gnas skabs yin no/ /skyob pa rnams ni rang gi thugs su chud pa'i lam ston pa po rnams kyis te/ skyob pa nyid gzigs lam gsung ba zhes gang gsungs pa ste/ de gang la yod pa de la 'di skad ces bya'o/ /yang na skyob pa ni rgyun gyi don to//'khor ba ji srid pa mi gnas pa'i mya ngan las 'das par gnas so/ /byang chub sems dpa' rnams kyi bsod nams la rjes su yi rang ba byed pa ni thugs zhes bya ba la sogs pa gsungs te/ thugs bskyed pa skad cig re re la byung ba yang mtha' yas shing gting thug pa med pas rgya mtsho dang 'dra bas na rgya mtsho'o//de ji lta bur gyur pa zhig yin zhe na/ sems can thams cad bde mdzad pa/ /zhes bya ba ste/ sems can thams cad la bde bar mdzad pa ni ro de la gcig tu zhugs pa'i rang bzhin can zhes bya ba'i don to/ sems can kun la phan mdzad pa//zhes bya ba ni phan pa mdzad pa po rnams so/ /ston pa zhes pa la sogs pa ni bstan pa ste/ sangs rgyas nyid kyi thabs la goms pa yin te/ de'i don yin pas btags pa'i phyir ro/ /de gang la yod pa de la de skad ces bya ste/ ston pa ni byang chub sems dpa' rnams so//de skad du/ 'di ni thabs la goms pa nyid/ /de'i phyir don ni bstan par 'dod/ /ces bstan to/ /yang na 'di la ston pa'i ngang tshul yod pas ston pa zhes bya ste/ byang chub sems dpa' yang sbyin pa la sogs pa bsdu ba'i dngos po rnams kyis sems can rnams bsdus nas yang dag pa'i lam la 'jug par byed pa yin no//de dag gi rjes su yi rang ba bstan nas/ bskul ba bstan pa'i phyir/ phyogs rnams zhes bya ba la sogs pa gsungs pa la/ chos kyi sgron ma sbar du zhes bya ba ni mi shes pas bsgribs pa'i sems can gyi lam dang lam ma yin pa yongs su shes pa med pa rnams la chos ston pa po'i bdag nyid kyis snang ba mdzad du gsol cig ces bya ba'o//de dag gis bskul ba brjod do/ /gsol ba btab pa bstan pa ni/ rgyal ba mya ngan zhes bya ba la sogs pa ste/bya ba byas pas yongs su mya ngan las 'da' bar bzhed pa'i thugs mnga' ba rnams la bskal pa mtha' yas par bzhugs par gsol ba 'debs pa'o/ /ldongs pas mi 'gyur bar zhes pa ni snga ma bzhin du lam mi shes pa dang / sems pa med par ma gyur pa'o/ /'dis kyang gsol ba gdab par bstan nas/ da ni gsol ba gdab pa'i de ma thag tu yongs su bsngo ba ni/ de ltar de dag ces bya ba la sogs pa gsungs te/ de ltar bstan pa'i rim pas de dag kun mchod pa dang / sdig pa bshags pa dang /bsod nams la rjes su yi rang ba la sogs pa byas te/ bsgrubs nas/ dge ba legs par byas pa bdag gis bsags pa ste/ thob pa gang yin pa'i dge ba des ni sems can thams cad kyi ste srog chags mtha' dag gi'o/ /sdug bsngal thams cad rab zhir ni phongs pa ma lus pa rab tu zhi bar byed nus par gyur cig pa ste shog ni gyur cig pa'o//de dag gis spyir yongs su bsngos nas/ yang bye brag tu 'gro ba nad pa zhes bya ba la sogs pa gsungs te/ des ni zhes bya ba ci rigs pa thams cad du sbyar bar bya'o/ /nad pa zhes pa ni nad kyis gdungs pa'o//sman zhes pa ni sman no/ /sman pa ni gso dpyad byed pa'o/ /de'i nad g.yog ni nad pa de'i rim gro byed pa'o/ /nad sos gyur gyi bar zhes pa ni ji srid du nad med par gyur gyi bar du'o/ /bkres pa ni ltogs pa'o/ /skom pa ni kha skom pa ste/de dag gis gnod pa'o/ /de gzhom pa ni bzlog pa'o/ /zas dang skom gyi char phab ste/ bza' ba dang btung ba phun sum tshogs pa'i rgyun rnams kyis so/ /mu ge'i bskal pa bar ma'i tshe zhes pa la/ bskal pa mtshon dang nad dang ni/ /mu ge dag gis tshar phyin byed//ces bya ba yin te/ de la skye dgu rnams tshe lo bcu pa na bar gyi bskal pa mtha' ma la mu ges 'jig pa'o/ /lo bdun dang / zla ba bdun dang / nyi ma bdun 'byung bar 'gyur te/ bskal pa mtshon dang nad dang ni/ /mu ge dag gis tshar phyin byed/ /zhag rnams dang ni zla ba dang //lo bdun dag ste go rims bzhin/ /zhes gang bstan pa'o/ /der zas dang skom med pas gcig la gcig gis sha dang rus pa za ba nyid zas yin no/ /gcig gis de yang mi rnyed la zas med pas 'chi bar 'gyur te/ der zas dang skom du gyur cig pa'o/ / dbul ba zhes bya ba ni nor med pa rnams so/ /mi zad ces bya ba nor gang gis phrogs kyang zad pa med pa'o/ /yo byad mkho dgu sna tshogs su zhes pa ni mal cha dang / stan dang / gnas dang / na bza' dang / rgyan dang / byug pa la sogs pa gang dang gang sems can rnams 'dod pa de dang de'i yo byad de nye bar mkho ba'i bye brag gi rnam par ro//bdag nyid nye bar gnas gyur cig ste so sor nye bar gnas par gyur cig pa'o/ /sems can dbul po de rnams kyi mdun du ni sngon du'o/ /yongs su bsngo ba na 'di yang 'phags pa rdo rje rgyal mtshan gyi mdo las rgya cher bstan te/de las 'di skad du/ des dge ba'i rtsa ba de dag yongs su bsngo ba na 'di ltar yongs su bsngo ste/ dge ba'i rtsa ba 'dis bdag sdug bsngal gyi phung po thams cad bzlog pa'i phyir sems can thams cad kyi gnas su gyur cig /nyon mongs pa thams cad las yongs su dgrol ba'i phyir sems can thams cad skyob par gyur cig /'jigs pa thams cad las bsrung ba'i phyir sems can thams cad kyi skyabs su gyur cig /sa thams cad kyi rjes su 'gro ba'i phyir sems can thams cad kyi rten du gyur cig shin tu grub pa dang bde ba thob par bya ba'i phyir sems can thams cad kyi dpung gnyen du gyur cig /rab rib med pa'i ye shes kun tu bstan pa'i phyir/ sems can thams cad kyi snang bar gyur cig /ma rig pa'i mun pa bzlog pa'i phyir sems can thams cad kyi sgron mar gyur cig ces bya ba la sogs pa rgya cher 'byung ste/de ltar bstan nas/ yang 'di skad du/ de yang lhag pa'i bsam pa thag pa nas yongs su bsngo'i/ tshig tsam gyis ni ma yin no/ /de yang dga' ba'i sems kyis yongs su bsngo'o/ /mgu ba'i sems kyis yongs su bsngo'o//rab tu dad pa'i sems kyis yongs su bsngo'o/ /rab tu dga' ba'i sems kyis yongs su bsngo'o/ /mnyan pa'i sems kyis yongs su bsngo'o/ /byams pa'i sems dang / mdza' ba'i sems dang / phan gdags pa'i sems kyis yongs su bsngo'o zhes rgya cher gsungs so//da ni lus la sogs pa yongs su gtong bar byed pa/ lus dang zhes bya ba la sogs pa gsungs te/ 'gro ba thams cad du 'chi 'pho dang / skye ba dang / bya ba thams cad la ltos pa med par te/ rnam pa thams cad du chags pa med par zhes bya ba'i don to//gtang bar bya zhes pa ni dbul bar bya ba ste sbyin par bya zhes pa'i don to/ /longs spyod ces bya ba ni nye bar spyad par bya ba'i dngos po rnams te/ rta dang glang po che dang / shing rta dang / khang bzangs la sogs pa'i gnas dang / me tog gi phreng ba dang / tsan+dan dang / gos dang / rgyan dang / bu mo la sogs pa'o/ /dus gsum dge ba thams cad kyang zhes bya ba ni khams gsum par bsdus pa'i bsod nams dang / mi g.yo ba'i rang bzhin thams cad do/ /yang na sbyin pa dang tshul khrims la sogs pa dang /bsgoms pa las byung ba ste dus gsum du gtogs pa ni 'das pa dang / ma 'ongs pa dang / da ltar byung ba'o/ /'o na ma 'ongs pa'i rang bzhin yod pa ma yin pa 'di ji ltar gtang du rung zhe na/ bden mod kyi 'on kyang de yod pa'i dus su de la zhen pa bzlog pa'i don du de skad du brjod pa dang /da lta na yang de yongs su btang bas bsam pa rnam par dag pa 'phel bar bya ba'i don du yang yin no/ /de nyid ni ltos pa med pa zhes gsungs pa yin te/ de'i rnam par smin pa la rang gi don du ltos pa med pa'o/ /de ltar na su'i don du nyams su len par byed ce na/sems can kun gyi don bsgrub phyir/ /zhes gsungs te/ sems can kun te khams gsum par gnas pa rnams kyis mngon par mtho ba dang nges par legs pa'i mtshan nyid kyi don rdzogs par bya ba'i phyir ro/ /'das pa dang / ma 'ongs pa'i dge ba'i rtsa ba btang ba ni/'phags pa blo gros mi zad pa'i mdo las bstan pa/ dge ba'i sems dang sems las byung ba rnams rjes su dran la rjes su dran nas kyang byang chub tu yongs su bsngo ba 'di ni 'das pa la mkhas pa'o/ /gang ma 'ongs pa'i dge ba'i rtsa ba nges par sems shing byang chub la mngon du phyogs pa'i las sems pa ste/bdag la dge ba'i sems bskyed pa 'byung ba gang yin pa de dag bla na med pa yang dag par rdzogs pa'i byang chub tu yongs su bsngo ba 'di ni ma 'ongs pa la mkhas pa'o zhes rgya cher gsungs pa dang / thams cad gtong ba la mos pa yongs su rdzogs te/gtong ba'i sems kyi shugs kyis lus kyi sbyor ba des yongs su 'dzin pa thams cad gtong ste/ yongs su 'dzin pa thams cad kyi rtsa ba srid pa'i sdug bsngal las grol ba la grol ba zhes rgya cher gsungs pa gang yin pa'o//'o na bdag gi don du yang cung zad bsrung bar rigs pa ma yin nam snyam pa'i ser sna zlog par byed pa/ thams cad btang bar zhes bya ba la sogs pa gsungs te/ zag pa dang bcas pa'i lus la sogs pa thams cad kyi mya ngan las 'das pa ni thar pa yin la/ bdag gi sems pa ni de don du gnyer ba yin te/ gtang bya na zhes bya ba ni gal te mya ngan las 'das pa'i tshe lus la sogs pa thams cad bdag gis nges par btang la 'gro bar bya ba yin pa de'i tshe sems can rnams la btang ba mchog yin na/ ser sna'i rgyu 'dis bzung la ci zhig bya snyam du dgongs pa'o//de lta bas na 'di dag la 'di 'tsham pa yin no zhes/ bdag gis lus can zhes bya ba la sogs pa gsungs te/ lus can thams cad de/ sems can thams cad kyi ched du ji ltar 'dod pa dang mthun par bya ba la bdag gis rang gi lus sbyar bar bya'o//de nyid ston par byed pa ni/ rtag tu zhes bya ba la sogs pa gsungs pa yin te/ dbyig pa la sogs pas rdeg par byed pa'am/ bsngags pa ma yin pa brjod pas smad du chug la/ lud kyis kyang gtor du chug ste/ rdul gyis kyang 'thor cig pa'o/ /bdag gis de la lus byin gyis//zhes bya ba ni thams cad kyi thams cad du bdag gis de rnams la yongs su btang ba yin la/ bdag la bde ba dang sdug bsngal bas kha das ci zhig bya/ las rnams kyang ni byed du chug /ces bya ba ni kha na ma tho ba med pa dag ste/de nyid ni bdag la zhes pa la sogs pa gsungs te/ bdag la brten nas nam du yang ste/ 'di'am pha rol du srog chags 'ga' la yang mi 'dod par ma gyur cig ces pa'o/ /gang dag gi khro ba'am gang dag gi ma dad pa'i sems te/ blo byung ba de dag gi ni ste/ khro ba'am ma dad pa'i blo can rnams kyi'o/ /de nyid ni rgyur gyur cig te/ khro ba'am ma dad pa'i sems de nyid do/ /don kun 'grub pa'i zhes bya ba ni bdag dang gzhan gyi don mngon par mtho ba dang / nges par legs par rdzogs pa'i ched du'o/ /skur 'debs pa zhes bya ba ni log par brtags pa'i nyes pas sun 'byin par 'gyur ba dang /gzhan du yang gang dag lus sam yid kyis gnod pa byed par 'gyur ba'o/ /kha zer ba zhes bya ba ni bzhad gad du byed pa'am/ co 'dri bar byed pa'o/ /de bzhin gzhan zhes bya ba ni tha mal pa tsam mam/ dad pa rnams te/ thams cad sangs rgyas nyid thob par gyur cig pa'o/ /mgon med rnams kyi zhes bya ba ni mgon dang bcas par 'dod pa rnams kyi'o/ /lam zhugs rnams kyi ded dpon dang / /zhes bya ba ni lam du nye bar zhugs pa rnams kyi ded dpon gyi gtso bor ro/ /rgal 'dod rnams kyi zhes bya ba ni 'bab chu la sogs pa rnams kyi pha rol gyi 'gram du 'gro bar 'dod pa rnams kyi'o//sgron ma zhes bya ba ni mun pa na gnas pa rnams kyi'o/ /gnas mal 'dod pa zhes bya ba ni mal cha 'dod pa rnams la'o/ /bran 'dod pa zhes bya ba ni gang dag rim gro'i don du bran dang las byed pa 'dod pa'o//yid bzhin gyi nor bu zhes bya ba ni bsams pa'i 'bras bu ster bar byed pa'i rin po che'i khyad par ro/ /bum pa bzang zhes bya ba ni dngos po gang dang gang 'dod pa'i bsam pas der lag pa bcug na de dang de thams cad phun sum tshogs par byed pa'o/ / rig sngags grub ces bya ba ni gsang sngags grub pa ste/ gang dang gang las su bya ba de thams cad 'grub pa'o/ /sman chen dang zhes bya ba ni gnod pa dang gzir ba thams cad rab tu zhi bar byed pa'i rgyu gcig pu nyid gang yin pa'o/ /dpag bsam gyi ni shing dag dang / /zhes bya ba ni dpag cing bsam pa'i don grub par byed pa'i shing gi khyad par ro//'dod 'jor zhes bya ba ni gang 'dod pa [(]bzhor [,]bzhir[)] yod pa'o/ /sa stsogs zhes bya ba la sa ni nor 'dzin no/ /stsogs pa'i sgras chu dang me dang / rlung bzung ste/ 'byung ba chen po bzhi po dag go/ /de dag kyang ji ltar mal cha dang /stan dang / 'bru dang / sman dang / me tog dang / 'bras bu dang / rtsa ba la sogs pa'i rten nyid dang / de bzhin du btung ba dang zhugs pa la sogs pa'i rgyu yin pa'i phyir ro/ /de ltar gzhan la yang sbyar bar bya'o/ /nam mkha' mtha' yas par khyab pa'i sems can grangs med pa rnams kyi yongs su spyod pa nye bar 'gyur ba de bzhin du bdag kyang sems can thams cad kyi rnam pa du ma yis nye bar spyod par gyur cig pa'o//thams cad mya ngan 'das par du/ /zhes bya ba ni ji srid du thams cad 'khor ba'i sdug bsngal las rnam par ma grol gyi bar du ste/de lta bas na byang chub don du gnyer ba rnams kyi lus la sogs pa 'di dag gtong bar bya'o/ /sbyin pa 'di dag kyang bslab pa kun las btus pa las shin tu rgya che bar bstan te/ de ni 'di ltar de nyid las byang chub sems dpa'i so sor thar pa las gsungs pa/shA ri'i bu gzhan yang byang chub sems dpa' ni chos thams cad la gzhan gyir 'du shes skyed par byed de/ dngos po 'ga' yang mi len to/ /de ci'i phyir na/ nye bar len pa ni dor bya yin no zhes de skad bstan nas/ yang de nyid las 'di skad ces shA ri'i bu de bzhin du byang chub sems dpa' rnams ni sems dpa' ba yin te/rang gi lag pa'i bar du yongs su gtong ba yin/ rkang pa yongs su gtong ba dang / sna yongs su gtong ba dang / mgo yongs su gtong ba dang / yan lag dang nying lag yongs su gtong ba nas/bdog pa thams cad yongs su gtong ba yin no zhes bstan to/ /de bzhin du sred med kyi bus zhus pa las kyang gsungs te/ dngos po gang la de gtong ba'i sems mi skye ba dang / gtong ba'i blo mi 'jug pa'i dngos po de bsrel bar mi bya'o//rigs kyi bu 'on kyang byang chub sems dpa' de ltar sems bskyed par bya ste/ bdag gi lus 'di yang sems can thams cad la byin zhing yongs su btang na/ phyi rol gyi dngos po rnams lta ci smos kyi zhes pa la sogs pa rgya cher 'byung ngo / /de bzhin du 'phags pa blo gros mi zad pa'i mdo las kyang /lus 'di bdag gis sems can thams cad kyi bya ba ci yod pa la nges par byas te/ dper na sa'i khams dang / me'i khams dang / chu'i khams dang / rlung gi khams dang / 'byung ba chen po bzhi po 'di dag sgo sna tshogs dang / rnam grangs sna tshogs dang / dmigs pa sna tshogs dang / yo byad sna tshogs dang / longs spyod sna tshogs kyis nye bar longs spyod pa dang / yongs su longs spyod par byed pa de bzhin du bdag gis kyang 'byung ba chen po bzhi 'dus pa'i lus 'di sgo sna tshogs dang / rnam grangs sna tshogs dang / dmigs pa sna tshogs dang / yo byad sna tshogs dang / longs spyod sna tshogs kyis rgya cher sems can thams cad kyi nye bar 'tsho bar bya'o zhes rgya cher bstan to/ /rin chen sems de zhes bya ba la sogs pa nas brtsams te/ 'di dag thams cad ni byang chub kyi sems gnod pa'i phyir sngon du sbyor ba yin par rig par bya'o//de ltar mchod pa la sogs pa byas la lus la sogs pa sbyin par btang ste/ byang chub kyi sems kyi phan yon rdzogs pas dal ba phun sum tshogs pa mchog tu rnyed dka' bar rig nas dad pa'i rtsa ba brten por nye bar gzhag ste/sems can skyabs med pa dang / dpung gnyen med pa rnams la snying rje dang ldan zhing rang gi bde ba la ltos pa med par gzhan sdug bsngal bas sdug bsngal ba de dag gdon pa'i bsam pa dang dgongs pa can sangs rgyas nyid kyi thabs 'di dag legs par mthong nas/de la go bgos pa 'di ltar bdag dang gzhan dag kyang 'jigs pa dang sdug bsngal mi 'dod na bdag dang bye brag ci yod kyis/ gang de bsrungs la gzhan de ni mi bsrung snyam ste/ des bdag dang sems can gyi khams rnams kyi/ sdug bsngal mthar 'byin 'dod pa dang //bde ba'i mthar yang 'gro 'dod pas/ /dad pa'i rtsa ba brtan byas te/ /byang chub la yang blo brtan bya/ /snyam du yang dag par rdzogs pa'i byang chub tu sems bskyed par bya ba'i phyir brtson par byed pa ni/ ji ltar sngon gyi zhes bya ba la sogs pa ste/bsam pa gang gis sems can thams cad kyi sdug bsngal thams cad spang ba'i don du'am/ yang na ji ltar gzung ba de nyid bcom ldan 'das kyis mkhyen pa'o/ /byang chub thugs ni zhes pa la/ byang chub ni sangs rgyas nyid yin te/bag chags dang bcas pa'i sgrib pa thams cad spangs pa'i phyir/ chos thams cad rang bzhin med pa nyid thugs su chud pa'o/ /'di yang spros pa dang bcas par shes rab kyi le'ur bshad par bya'o/ /der thugs ni lhag pa'i bsam pas thob par bya ba'i phyir yid la byed pa ste/sems can thams cad la phan pa dang bde ba bsgrub pa'i phyir sangs rgyas su gyur cig ces bya ba'i don to/ /de ltar phyed snga mas byang chub tu sems bskyed pa bstan nas/ bslab pa sdom pa gzung ba bstan pa ni/ byang chub sems dpa' zhes bya ba la sogs pa gsungs te/byang chub sems dpa' rnams kyi bslab pa ni byang chub sems dpa' byang chub tu sems bskyed pa gang gis rtag tu bya bar 'os pa ste/ de la zhes bya ba'i don to/ /rim bzhin zhes bya ba ni go rims bzhin du'o/ /gang gi tshe las dang po pas dang por bya bar nus pa ni de nyid re zhig bya bar 'os pa ste/de bas dka' ba ni bya ba ma yin no snyam du dgongs pa'o/ /gnas skabs bar ma la yang de bzhin du shes par bya ste/ snying rje'i bsam pa ma dag pas/ /lus 'di gtang bar mi bya ste/ /zhes gang 'chad par 'gyur ba yin no//de ltar gzhan la yang blta bar bya'o/ /da ni bdag nyid kyi sdom pa gzung ba brjod pa ni/ de bzhin zhes bya ba la sogs pa la/ de dag gi bzhin du'am/ de dag bzhin du'o/ /sdom pa gzung ba yang byang chub sems dpa'i bslab pa'i gnas la goms pa lhur byed pa sdom pa dang ldan pa'i thad nas mnod do//de ltar byas dang de bslab pa las 'das na ni shin tu yang khrel yod par 'gyur zhing bla ma la bslus par dogs pa'i 'jigs pa yang skye bas de la ni nan tan bya mi dgos par dga' ba dang gus pa 'grub par 'gyur te/'di ni sdom pa'i chos kyi spyi'o/ /de bas na byang chub sems dpa' de bzhin gshegs pa'i spyan snga nas bslab pa rnams las bslab pa gang yang rung ba 'grub par 'dod pa rnams yi dam 'cha' bar byed do/ /de bas na sdom pa nod par 'dod pa rnams dge ba'i bshes gnyen la gsol ba btab la/des gsungs pa dang mthun par smras pas shin tu mnyam par gzhag pas brjod par bya'o/ /slob dpon dgongs su gsol/ bdag ming 'di zhes bgyi ba zhes brjod nas/ ji ltar 'phags pa 'jam dpal gyi sangs rgyas kyi zhing gi yon tan bkod pa'i mdo las/bcom ldan 'das 'phags pa 'jam dpal gyi sngon gyi rtogs pa brjod pa las spyod pa dang ldan pas byang chub tu sems bskyed pa de bzhin du bskyed par bya'o/ /des 'di skad ces brjod de/ /'khor ba tha ma med pa yi//sngon gyi tha ma ji srid pa/ /de srid sems can phan don du/ /spyod pa dpag yas spyad par bgyi/ /'jig rten mgon po'i spyan sngar ni/ /rdzogs pa'i byang chub sems bskyed do/ /'gro ba thams cad mgron gnyer te/ /dbul zhing phongs las dgrol bar bgyi//byang chub nam zhig thob bar du/ /gnod sems dang ni tha ba'am/ /phrag dog dang ni ser sna'ang rung / /de ring phan chad mi bgyid do/ /sdig pa'i 'dod pa spangs nas ni/ /tshangs par spyod pa spyad par bgyi/ /tshul khrims sdom dang des pa la//sangs rgyas rjes su bslab par bgyi/ /zhes bya ba la sogs pa rgya cher 'byung ngo / /rnam pa de lta bu'i dge ba'i bshes gnyen med na/ phyogs bcu na bzhugs pa'i sangs rgyas dang byang chub sems dpa' rnams mngon du bsgoms la sdom pa gzung ste/ sdom pa rang gi nus pa dang sbyar la blang ngo //gzhan du na sangs rgyas dang byang chub sems dpa' thams cad dang / lha dang bcas pa'i 'jig rten rnams bslus par 'gyur ro/ /sdom pa 'di ni bud med nyon mongs pa chung ngu sems byang chub la mos pa rnams la yang skye bar 'gyur te/byang chub sems dpa'i so sor thar ba las/ shA ri'i bu chos bzhi dang ldan na byang chub sems dpa' bden par smra ba yin no zhes bya ba nas brtsams te/ shA ri'i bu 'di la rigs kyi bu'am rigs kyi bu mo bla na med pa yang dag par rdzogs pa'i byang chub tu sems bskyed nas brtson 'grus brtsams te gnas pa dang /dge ba'i chos yongs su tshol ba'i phyir zhes bya ba nas brtsams te gdams pa thams cad gsungs so/ /byang chub tu sems bskyed pa 'di yang rgyu bzhis skye bar 'gyur te/ de ni 'di ltar chos bcu pa'i mdo las bstan pa/rigs kyi bu 'di la byang chub sems dpa' rigs la gnas par gyur pa byang chub tu sems ma bskyed pa na de bzhin gshegs pa'am/ de bzhin gshegs pa'i nyan thos kyis bskul zhing skyo bar byas/ yang dag par 'dzin du bcug ste bla na med pa yang dag par rdzogs pa'i byang chub tu sems bskyed pa 'di ni byang chub kyi sems la mos pa'i rgyu dang po'o//rdzogs pa'i byang chub bam/ byang chub kyi sems kyi bsngags pa brjod pa thos nas bla na med pa yang dag par rdzogs pa'i byang chub tu sems bskyed pa 'di ni rgyu gnyis pa'o//de sems can skyob pa med pa dang / skyabs med pa dang / gling med pa rnams mthong nas snying rje'i sems nye bar gzhag ste/ bla na med pa yang dag par rdzogs pa'i byang chub kyi bar du sems bskyed pa 'di ni rgyu gsum pa'o/ /de bzhin gshegs pa'i sku rnam pa thams cad yongs su rdzogs pa mthong nas dga' ba bskyed de bla na med pa yang dag par rdzogs pa'i byang chub tu sems bskyed pa 'di ni rgyu bzhi pa'o zhes so//'di dag ni byang chub kyi sems dang sdom pa'i dngos gzhi'i las yin par rig par bya'o//de ltar byang chub kyi sems dang sdom pa bstan nas/ mjug bstan par bya ba'i phyir/ de ltar zhes bya ba la sogs pa gsungs pa la/ sbyor ba dang / dngos gzhi dang / mjug gsum dang 'brel par gzung ba ste/ las yongs su rdzogs pa ni 'bras bu yang nges par 'gyur ro//yan lag gcig ma tshang bas ni de las bzlog pa yin no/ /de ltar zhes bya ba ni bstan pa'i rim pas so/ /bzung nas ni yang dag par blangs nas te bskyed nas zhes bya ba'i don to/ /blo dang ldan pa zhes bya ba ni blo gros dang ldan pa ste/ byang chub sems dpa' zhes bya ba'i don to//rab dang bas zhes bya ba ni mchog tu dga' ba dang rab tu mgu ba yis te/ gzhan gyi rjes su 'brang ba la sogs pa'am 'dod rgyal gyis ma yin pa'o/ /rgyas par bya ba'i phyir zhes bya ba ni gzhan du gal te bzung nas gus pa zhan pa'am/ yid la gcags par gyur na de'i tshe mi 'phel ba nyid dam/yongs su zad par 'gyur ro/ /'di ltar ni de bsrung ba dang dag pa dang spel bar 'gyur ro/ /'di ltar zhes bya ba ni 'chad par 'gyur ba'i rim pas gzengs bstod do zhes pa ni spro bar bya ba'o/ /de nyid bstan pa ni/ deng du bdag tshe 'bras bu yod//ces bya ba la sogs pa gsungs pa yin te/ 'khor ba thog ma med pa'i tshe rabs brgyud pa dag tu nam du yang 'di 'dra ba zhig thob par ma gyur to snyam du dgongs pa yin no/ /de ring sangs rgyas rigs su skyes/ /zhes bya ba ni gang gi tshe byang chub tu sems bskyed pa na'o//sangs rgyas sras su da gyur to/ /zhes bya ba ni nga rgyal khyad par du 'phags pa yid la byed pas sems dman pa nyid yongs su dor ba'o/ /rang rigs mthun pa'i las zhes bya ba ni sangs rgyas kyi gdung dang 'tsham pa'i las so/ /skyon med ces bya ba ni thog ma dang bar dang tha mar yongs su dag pa'o//rnyog par mi 'gyur zhes bya ba ni bdag gi nyes par spyad pas sdig pa ci nas kyang mi 'gyur bar ro/ /'di ltar yang rang gi sems yang dag par gzengs bstod par bya ste/ long bas zhes bya ba la sogs pa gsungs pa la/long ba ni mig med pa'o/ /phyag dar phung po nas ni lam po che'i nyal nyil spungs pa nas so/ /'di dag thams cad ni shin tu yang 'phrad par dka' ba'o snyam du dgongs pa'o/ /'dir yang de nyid dpe nyid du de bzhin zhes bya ba gsungs te/ de kho na nyid rtogs pa'i mig med pa dag la phyag dar gyi phung po lta bu 'khor ba nas ji zhig ltar sangs rgyas kyi byin gyi rlabs kyi stobs kyis byang chub kyi sems rin po che dang 'dra ba skyes so//yang 'di ltar rab tu dga' bar bya ste/ 'gro ba'i zhes bya ba la/ 'jig rten gson po'i 'chi ba drung nas med par bya ba'i don du byang chub kyi sems 'di bcud kyis len pa yang yin te/sman gyi khyad par sna tshogs pa legs par sbyar ba gang zhig cho ga bzhin du bsten nas rga shi las grol bar 'gyur ro zhes 'jig rten na grags pa'i bcud kyis len bzhin no/ /'di zhes bya ba ni byang chub kyi sems so/ /skyes pa ni byung ba'o//yang 'di ltar yang dag par rab tu dga' bar bya ste/ 'gro ba'i nad ces bya ba ste/ 'gro ba rnams kyi nad rnams ni na tsha thams cad do/ /mchog ni gtso bo ste/ lus las byung ba dang / yid las byung ba'i nad thams cad rab tu zhi bar byed pa'i phyir ro/ /'di zhes bya ba ni byang chub kyi sems so//srid lam 'khyam pa ni skye ba'i srid pa dang / 'chi ba'i srid pa dang / srid pa bar ma do'i rang bzhin te/ 'khor ba'i lam na 'phyan pa'o/ /des dub pa ni yongs su ngal ba ste/ ngan 'gro ni sems can dmyal ba dang / yi dags dang / dud 'gro rnams so/ /de rnams dgrol bar byed pa ni 'da' bar byed pa ste/ de'i rgyu mtshan du/ spyi ste thun mong gi stegs yin no zhes bya ba 'di ni byang chub kyi sems so/ /bdag la skyes zhes bya ba thams cad du lhag ma'o/ /nyon mongs gdung ba ni tsha ba'o/ /de sel ba'i phyir shar ba ste/rab tu skyes pa'i sems zhes pa ni byang chub kyi sems so/ /de nyid ni zla ba phyed de kha ba'i 'od zer can te/ gdung ba thams cad sel bar byed pa'i phyir ro/ /shar ba ni rab tu skyes pa'o/ /yang 'di ltar 'gro ba'i mi shes zhes bya ba ni mi shes pa nyid ni rab rib yin te/dngos po'i de kho na nyid 'gegs pa'i phyir ro/ /dpyis 'byin ni nges par 'byin pa'o/ /nyi ma chen po ni sems can thams cad kyi nang gi rab rib sel bar byed pa'i phyir ro/ /yang 'di ltar dam chos zhes bya ba ni bcom ldan 'das kyi gsung rab bo//de nyid ni 'o ma lta bu ste/ de bsrubs pa ni thos pa las byung ba la sogs pa'i shes rab kyis dkrogs pa ste dkrugs pa'o/ /mar gyi snying khu dang 'dra ba'i byang chub kyi sems byung ba yin te/ skyes pa yin no/ /rnam pa gzhan yang bde ba'i longs spyod ces bya ba la sogs pa gsungs pa la/bde ba'i longs spyad par bya ba la longs spyod par 'dod pa'i sems can gyi tshogs kyi bye brag ste/ spyad par 'dod pa la zhes bya ba ni longs spyad par 'dod pa'o/ /'di zhes bya ba ni byang chub kyi sems te/ bde ba thams cad 'byung ba'i rgyu yin pa'i phyir ro//'bras bu ma thob pa nyid yin na yang lhag pa'i bsam pa brtan pas 'bras bu thob pa bzhin du brjod de/ dper na char pa 'bab pa na 'bras sA lu skyes so zhes zer ba lta bur byang chub tu sems bskyed pa nas phun sum tshogs pa thams cad thob bo zhes bya ba yang de bzhin no//'gron chen ni 'gron po ste/ de dang de'i 'gro bar 'gro ba dang / 'ong bar byed pa'i phyir ro/ /tshim par byed pa yin zhes bya ba ni bde ba thams cad kyis ngoms par byed pa'i phyir ro/ /da ni byang chub tu sems brtan pa nges par byas pa la sems dang ba bskyed pa ni/bdag gis de ring zhes bya ba la sogs pa gsungs pa yin te/ 'gro ba ni sems can 'jig rten no/ /mgron du bos zin pa ni bde bar gshegs pa nyid dang sangs rgyas nyid la'o/ /bar du bde la ni ji srid du sangs rgyas nyid du ma thob pa de srid kyi bar du lha dang mi'i phun sum tshogs pa'i bde ba la'o//skyob pa thams cad kyi spyan sngar te/ sangs rgyas bcom ldan 'das thams cad kyi mdun du ste/ 'di la bcom ldan 'das rnams kho na dpang du gyur pa yin no snyam du dgongs pa'o/ /lha dang lha min la sogs pa dga' bar gyis shig ces bya ba bdag gi bsam pa 'gro ba thams cad kyi phan pa dang /bde ba'i gzhi la zhugs pa 'di la lha dang / lha ma yin dang / gnod sbyin la sogs pa rnams sems rab tu dang bas yi rang bar gyis shig pa'o/ /byang chub sems kyi spyod pa la 'jug pa'i dka' 'grel/shes rab 'byung gnas blo gros kyis byas pa las le'u gsum pa'o// //bam po lnga pa/ de ltar mjug rgyas par brjod nas/ sgrub pa snying por byed pa la byang chub yod kyi/ de las bzlog pa la ni ma yin no zhes bstan par bya ba'i phyir/ rgyal ba'i zhes bya ba la sogs pa gsungs te/de ltar bstan ma thag pa'i cho gas byang chub kyi sems rab tu brtan par bzung nas/ byang chub sems dpas bslab pa la nan tan du bya ba ste/ byang chub sems dpar gyur pas bslab par 'os pa gang yin pa la zhes bya ba'i don to/ / 'da' ba ni 'gom pa'o/ /de las bzlog pa ni mi 'da' ba'o/ /de la 'bad pa ni dang du blang ba'o/ /g.yel ba med pa ni le lo med pa'o/ /ji skad du 'phags pa ga ya go ri las/ byang chub sems dpa' sgrub pa snying por byed pa rnams la byang chub yod kyi sgrub pa snying por byed pa ma yin pa rnams la ni ma yin no zhes gsungs pa lta bu'o//'phags pa ting nge 'dzin gyi rgyal po las kyang / gzhon nu khyod kyis de lta bas na sgrub pa snying por byed par 'gyur ba de ltar bslab par bya'o/ /gzhon nu de ci'i phyir zhe na/ sgrub pa snying por byed pa la ni bla na med pa yang dag par rdzogs pa'i byang chub rnyed par dka' ba ma yin no zhes gsungs so//byang chub sems dpa'i bslab pa de yang pha rol tu phyin pa dang / tshad med pa dang / bsdu ba'i dngos po la sogs pa'i dbye bas blo gros mi zad pa dang / dkon mchog sprin la sogs pa'i mdo rnams las rgya cher bslab par bya'o//de bzhin du 'jig rten pa'i bslab pa la sogs pa la gnas pa rnams kyi bar la yang byang chub sems dpas bslab par bya na/ 'jig rten las 'das pa'i bsam gtan la sogs pa rnams la lta ci smos/gzhan du na ji ltar rnam pa thams cad du sems can gyi don bya bar nus par 'gyur/ mdor na byang chub sems dpa'i thabs dang shes rab kyi ngo bo grub pa 'di yang shes rab tsam yang ma yin la/ thabs tsam yang ma yin no/ /de la shes rab kyi pha rol tu phyin pa ma gtogs pa'i sbyin pa la sogs pa'i pha rol tu phyin pa dang /bsdu ba'i dngos po la sogs pa 'di dag thams cad ni zhing yongs su dag pa dang / longs spyod chen po dang / 'khor che ba dang / yang dag par sems can yongs su smin pa dang / sprul pa la sogs pa mngon par mtho ba'i chos thams cad sdud par byed pa'i dge ba'i rtsa ba zhes brjod do//shes rab ni thabs de nyid phyin ci ma log pa'i rang bzhin du yongs su gcod pa'i rgyu yin no/ /don 'di yang rgyas par ni ka ma la shI la'i bsgom pa'i rim par blta bar bya'o/ /le'u 'dis kyang de bsrung ba dang dag pa dang spel ba rnams sam/yang na de bsrung ba 'ba' zhig bstan pa yin no/ /thog ma nyid du yang byang chub sems dpa'i sdom pa la bdag nyid kyang nus pa yod dam med shes par byas la sdom pa mnod do/ /de nas sdom pa mnos pa'i byang chub sems dpas 'di ltar bsam par bya'o zhes bab col zhes bya ba la sogs pa gsungs te/bab col zhes bya ba ni bab bab tu'o/ /brtsams pa gang yin pa ni legs par brtags pa'ang ma yin pa ste/ de la ni khas blangs su zin kyang bya ba'am btang zhes res kyis 'gre ba la brten nas de ltar brtag par rigs na/'di ni de lta ma yin no zhes sangs rgyas rnams dang zhes bya ba la sogs pa gsungs te/ sangs rgyas kyi zhes bya ba ni lag bzangs kyis zhus pa la sogs pa'i mdo de dang de rnams las bsngags pa'i phyir ro/ /de'i sras ni shes rab chen pos zhes bya ba ni/'phags pa mgon po byams pa la sogs pa'i byang chub sems dpa' rnams kyis 'phags pa sdong po bkod pa la sogs pa'i mdo rnams las so/ /bdag nyid kyis kyang nus pa bzhin zhes bya ba ni rang gi shes rab kyi nus pa dang mthun par brtags pa'o//de la bshol du ci zhig yod de ci ste bshol bar byed ces bya ba'am/ gang la the tshom du gyur pa'i lhag ma ci zhig yod/ de bas na ji ltar dam bcas pa bzhin du legs par brtsams pa nyid rigs pa yin no/ /gzhan du na 'dir sangs rgyas dang / byang chub sems dpa' thams cad dang /lha dang bcas pa'i 'jig rten bslus par yang 'gyur ro/ /gal te de ltar zhes bya ba la sogs pa la/ de ltar dam bcas nas zhes bya ba ni ma rgal ba bsgral bar bya ba dang / ma grol ba dgrol bar bya ba dang / dbugs ma phyung ba dbugs dbyung bar bya ba dang / yongs su mya ngan las ma 'das pa yongs su mya ngan las 'da' bar bya ba'i phyir dbugs dbyung nas las kyis bsgrub par ma byas na ste/gal te las kyi bya ba yis 'di rdzogs par ma byas na 'dis lha dang mi la sogs pa'i sems can de dag thams cad bslus shing brid na bdag gi 'gro ba ci 'drar 'gyur te/sems can dmyal ba la sogs pa'i 'gro ba las gzhan gyi 'gro ba med do snyam du dgongs pa'o/ /don 'di yang 'phags pa blo gros rgya mtsho'i mdo las bstan pa/ blo gros rgya mtsho 'di lta ste dper na rgyal po'am rgyal po'i blon po chen pos grong khyer gyi skye bo thams cad la sang zan sbyin no zhes mgron du bos la bza' ba dang btung ba ma sbyar na des skye bo'i tshogs de thams cad bslus pa yin te/de la de dag kyang bza' ba dang btung ba'i zas ma thob pas 'phya zhing slar 'dong ba de bzhin du blo gros rgya mtsho byang chub sems dpa' gang ma rgal ba bsgral ba dang /ma grol ba dgrol ba dang / dbugs ma phyin pa dbugs dbyung ba dang / yongs su mya ngan las ma 'das pa yongs su mya ngan las bzla ba'i phyir sems can thams cad dbugs dbyung la mang du thos pa dang / de las gzhan dge ba byang chub kyi phyogs kyi chos rnams kyi bar la yang brtson par mi byed na/byang chub sems dpa' de ni lha dang bcas pa'i 'jig rten bslu ba yin no/ /de lta bu de la sngon sangs rgyas mthong ba'i lha rnams kyis mthong nas 'phya zhing gzhogs 'phyas byed la rnam par smod de/ gang dag mchod sbyin chen po bya bar dam bcas pa nyams 'og tu chud par byed pa'i mchod sbyin gyi bdag po de dag ni dkon no//blo gros rgya mtsho de lta bas na tshig gang gis lha dang mi dang lha ma yin du bcas pa'i 'jig rten slu bar byed pa'i tshig de lta bu byang chub sems dpas smra bar mi bya'o zhes 'byung ngo //dam bcas pa shin tu chung ba las 'da' na yang 'bras bu ltung ba lci bar 'gyur ba yin no zhes/ dngos po phal pa zhes bya ba la sogs pa gsungs te/ zan la sogs pa'i ngo bo'i dngos po cung zad tsam ste nyung zad tsam la yang 'di sbyin par bya'o snyam du sems kyis rnam par bsams te/slar yang de sbyin pa la sogs pa las ldog par byed pa de yang 'jig rten pha rol du yi dags 'gyur gsungs na zhes bya ba ni lung nas brjod pa'o/ /de bzhin du tshig tu dam bcas nas sbyin par mi byed pa sems can dmyal bar 'gro bar gsungs so//bla na med pa ni gang las bla ma ste gong na med pa de ni bla na med pa'o/ /bde ba ni mngon par mtho ba dang nges par legs pa'i mtshan nyid thun mong ma yin pa'o/ /skad gsang mthon po ni rtsom pa chen pos sangs rgyas dang byang chub sems dpa' dang / lha dang bcas pa'i 'jig rten gyi mdun du/bdag gis de ring skyob pa thams cad kyi/ /zhes bya ba la sogs pa dang / bdag gis ma rgal ba bsgral bar bgyi'o zhes bya ba la sogs pa skad cher byas nas so/ /bsam pa thag pas ni gus pa chen pos so/ /don de ma grub na bdag gi 'gro ba ci 'drar 'gyur/ de dag kyang dam pa'i chos dran nye bar gzhag pa'i mdo las/ cung zad tsam zhig bsam pa las ma byin na yi dags kyi 'gro bar skye la/ dam bcas pa las ma byin na sems can dmyal ba'i 'gro bar 'gyur ro zhes bstan na/ 'gro ba ma lus pa'i don bla na med pa dam bcas nas sgrub par mi byed pa lta ci smos/de bas na chos yang dag par sdud pa'i mdo las kyang / rigs kyi bu byang chub sems dpa' bden pa lhur byed par 'gyur bar bya ste/ rigs kyi bu bden pa yang dag par brjod pa ni chos yang dag par brjod pa'o/ /rigs kyi bu de la bden pa gang zhe na/ gang byang chub sems dpa' bla na med pa yang dag par rdzogs pa'i byang chub tu sems bskyed nas sems de srog gi phyir yang mi gtong zhing / sems can rnams la yang log par mi byed pa 'di ni byang chub sems dpa'i bden pa'o/ /gang byang chub sems dpa' bla na med pa yang dag par rdzogs pa'i byang chub tu sems bskyed pa la sems te/phyis yongs su gtong zhing sems can rnams la'ang log par byed pa 'di ni byang chub sems dpa'i brdzun du smra ba tha ma yin no zhes gsungs so/ /de ltar gyur na 'phags pa shA ri'i bus sngon gyi tshe rabs su byang chub tu sems bskyed nas yang dag par rdzogs pa'i byang chub don du gnyer bas tshogs rnams la 'jug par byas shing /sangs rgyas stong phrag bcu la bsnyen bkur byas nas/ de nas bdud kyis tho 'tshams pas byang chub kyi sems btang ngo zhes thos te/ de lta na'ang nyan thos kyi byang chub thob nas sems can gyi don sgrub par nus par 'gyur ba 'di ji ltar drang zhe na/gang zhig ces bya ba la sogs pa gsungs te/ rnam pa thams cad du dngos po thams cad kyi de kho na nyid mkhyen pa'i sangs rgyas bcom ldan 'das kho nas mkhyen gyi las tshul bsam gyis mi khyab pa ste/ las kyi tshul sna tshogs pa'i rang bzhin yin pa'i phyir don 'di tshu rol mthong ba'i spyod yul ma yin no/ /gang sangs rgyas dang byang chub sems dpa' rnams mngon du byas te khas blangs pa'i byang chub kyi sems btang ba sngar dam bcas pa'i yul du bya ba'i sems can de rnams 'khor ba'i sdug bsngal las yongs su thar bar byed pa nyid yin no//'di la rigs pa ni 'di snang ste/ 'phags pa shA ri'i bus thar pa'i sems rnam pa thams cad du yongs su btang ba ni ma yin te/ rdzogs pa'i byang chub kyi sems btang na'ang nyan thos kyi byang chub thob pa'i phyir ro//de'i phyir nus pa de la brten nas bskal pa ji lta ba bzhin du sems can rnams sgrol bar 'gyur ba yin te nyes pa med do/ /zhar la 'ongs pa dor nas skabs la sbyar ba/ des na byang chub sems dpa' zhes bya ba la sogs pa gsungs pa la/ des na ste gang gi phyir sems can thams cad kyi don du khas blangs pa des na rgyu de'i phyir na'o/ /yang ci'i phyir de ltar yin zhe na/ gang phyir zhes bya ba la sogs pa gsungs te/ gang gi phyir byang chub sems dpa' 'di la ltung ba dang bcas par gyur na/ sems can thams cad kyi don la dman par 'gyur ro//gal te yang 'di la gang zag gzhan gyi byed pas sems can gyi don la dman par gyur pa de'i tshe gzhan de nyid kyi ltung ba yang lci bar gyur pa yin no/ /gang gzhan zhes bya ba la sogs pa gsungs te/ gzhan zhes bya ba ni byang chub sems dpa' las gzhan pa'o//skad cig kyang zhes bya ba la mig btsums pa'i bar dang / yud tsam pa dang / chu tshod phyed dang / thun phyed la sogs pa'i dus lta re zhig zhog/ /skad cig gcig tsam gyi bar du yang ste/ bsod nams kyi gegs byed pa de'i ngan 'gro'i grangs bgrang bar mi nus so/ / ci'i phyir zhe na/ sems can don ni bcom gyur pas/ /zhes bya ba ste/ byang chub sems dpa'i dge ba rnam par 'joms par byed pa des kyang sems can ma lus pa'i don nyams par byas par 'gyur ro/ /ji ltar na 'di'i ngan 'gro la mu mtha' med pa yin zhe na/ 'di'i 'thad pa/sems can gcig gi zhes bya ba la sogs pa gsungs te/ phan pa zhes bya ba ni nye bar mtshon pa ste/ bde ba la yang blta bar bya'o/ /nyams gyur na ste/ bde 'gro nyams par byed pa'i phyir ro/ /don 'di yang rab tu zhi ba rnam par gdon mi za ba'i cho 'phrul gyi mdo las bstan te/'jam dpal rigs kyi bu'am rigs kyi bu mo gang la la zhig 'dzam bu'i gling pa'i sems can thams cad srog dang phral zhing bdog pa thams cad phral la/ 'jam dpal rigs kyi bu'am rigs kyi bu mo gang gzhan dag gis byang chub sems dpa'i dge ba'i sems kyi bar chad byed de/tha na dud 'gro'i skye gnas su skyes pa la kham gcig tsam ster ba las byung ba'i dge ba'i bar du gcod na de ni de bas ches grangs med pa'i sdig pa skyed do/ /de ci'i phyir zhe na/ de sangs rgyas 'byung ba skyed par byed pa'i dge ba'i rtsa ba rnams kyi bar chad byed par gnas par gyur pa'i phyir ro zhes gang gsungs pa'o//de lta zhes bya ba ni sngar brjod pa'i rim pas yin te/ rang gi byed pas ltung ba dang bcas par gyur pa dang / byang chub kyi sems rab tu brten par mnos pa'i phyir rgyab tu drangs shing slar yang mdun du khrid par byas pa de ltar res kyis 'gre bar byed pas sa thob pa ste/rab tu dga' ba la sogs pa'i sa thob pa la yun rings thogs shing dus ring po 'khor bar yongs su skye bar 'gyur ro/ /de bas na ji ltar rigs she na/ de ltar zhes bya ba la sogs pa gsungs te/ ji ltar dam bcas ni sems can thams cad gdon par bya ba'i phyir khas blangs pa'o//bsgrub par bya ba ni rdzogs par bya ba'o/ /bdag gis brtson par ni dang du blang ba'o/ /de nas zhes bya ba ni phyi nas bya'o snyam du yid la'ang mi bya'o/ /'og nas 'og tu 'gro bar 'gyur zhes bya ba ni ngan 'gror brgyud nas 'og tu 'gro ba'i phyir ro//de ltar yin du zin kyang de bzhin gshegs pa 'ga' zhig dang phrad pa la brten nas nyes pa thams cad spong ba'i phyir ngan 'gro'i dogs pa ga la yod ce na/ 'dir sems can phan pa zhes bya ba la sogs pa gsungs te/ grangs med pa ni 'khor ba thog ma med pa bzhin du sangs rgyas 'byung ba la thog ma med pa'i phyir ro//sems can thams cad tshol mdzad pa ni 'gro ba ma lus pa la phan pa dang bde bar sbyar ba'i phyir rgyun du gzigs pa'o/ /de lta mod kyi/ rang gi nyes pas te bdag nyid kyi nyes par spyad pas de bzhin gshegs pa de dag gi gso ba'i spyod yul du bdag ma gyur te/gso bar mi rung ba'i nad kyis btab pa'i nad pa bzhin du sman pa chen po yis kyang gso ba'i skal ba med par gyur pa yin no/ /gang zhig nam du yang ma byung ba de ni 'byung bar mi 'gyur ro zhes bya ba 'di la rgyu ci zhig yod ce na/ da dung zhes bya ba la sogs pa gsungs te/de bzhin zhes bya ba ni bslab pa'i sdom pa lhod pa ste mi dge ba las mi ldog pa'o/ /bcad dang ni rkang lag dang rna ba dang sna la sogs pa'o/ /gshegs pa ni de dag nyid la mdung thung dang / gsal shing dang mda' la sogs pa rnams kyis so//sogs pa'i sgras ni gsod pa dang / 'ching ba dang / brdeg pa la sogs gzung ngo / /gzhan yang 'di 'dra'i 'du 'phrod ni shin tu dkon zhes bya ba yin pas de'i phyir deng nas brtson par bya'o zhes bstan pa'i phyir/ de bzhin gshegs pa zhes bya ba la sogs pa gsungs te/ de bzhin gshegs pa 'byung ba zhes bya ba ni sangs rgyas 'byung ba ni brgya la res 'ga' srid pa tsam yin pa'i phyir ro//dad pa zhes bya ba ni 'jig rten pa dang 'jig rten las 'das pa'i don dad pas sdud par byed pa'i phyir ro/ /mi zhes bya ba ni mi khom pa spangs pa'i mi'i dngos [(]pa'o[,]po'o[)]/ /dge goms rung ba zhes bya ba ni dbang po ma tshang ba med pa dang nyams bde ba'o//de dag thams cad ni shin tu dkon pa ste/ bya sla bar rnyed pa ma yin no/ /gang nam zhig thob par 'gyur te/ dus gang gi tshe 'thob par 'gyur ba'o/ /'di ltar yang myur ba kho nar 'dir bya ba nyid du rigs pa/ nad med ces bya ba la sogs pa gsungs te/ nad las rnam par grol ba'i dus so/ /zas bcas zhes bya ba ni zas med pa ma yin pa'o/ /'tshe ba med pa ni chom rkun dang / sbrul dang / gcan gzan dang / sha sbrang dang / sbrang bu mchu rings dang / sdig pa la sogs pa'i 'tshe ba dang bral ba'o//lus dang srog la yid ches pa med pa yin par bstan pa'i phyir/ tshe ni skad cig slu ba ste/ glo bur du thog chen po 'bab pa ltar skad cig nyid la slu bar byed pa'o/ /lus 'di thang cig brnyan po bzhin bdag nyid kyi dbang du ma gyur pa'i phyir pha rol gyi brnyan pa'i rgyan dang 'dra ba ste/glo bur du 'chi bdag gis phral nas 'khyer ba'o/ /mi lus 'thob pa'i nges pa yang med pa yin par bstan pa'i phyir/ /bdag gi spyod pa 'di 'dras ni/ /zhes bya ba la sogs pa gsungs te/ bdag gi spyod pa mi dge ba byed pa rnams kyis te/ slar yang zhes bya ba ni tshe rabs gzhan du ste/de'i tshe ngan 'gro nyid do/ /ngan 'gror lhung na yang sdig pa 'ba' zhig sogs pa'o/ /ngan 'gro la dge ba spyod pa'i skal ba yod pa ma yin no zhes/ gal te zhes bya ba la sogs pa gsungs te dge ba'i nus pa yod kyang ngo / /ngan song sdug bsngal gyis zhes bya ba ni sems can dmyal ba la sogs pa'i gnod pas kun nas non pas kun nas brgyal ba'am/phan pa dang mi phan pa'i yongs su shes pa med pas bya ba thams cad la las su rung ba med pa'o/ /de spyad tshe ni sems can dmyal ba la sogs pa'i sdug bsngal nyams su myong ba'i skabs su'o//dge ba zhes bya ba ni spyod par ma gyur la/ mtho ris ni bdag las 'byung bar shog shig snyam du de lta ma yin no zhes dge ba dag kyang zhes bya ba la sogs pa gsungs te/ dge ba mi byed par sdig pa bsags pa la'o/ /bde 'gro'i sgra yang thos mi 'gyur/ /zhes bya ba ni bde 'gro'i grag pa tsam yang spangs pa'o//bde 'gro'i rgyu ni dge ba nyid yin na/ de med par bde 'gro ga las 'byung snyam du dgongs pa yin no/ /bskal pa bye ba brgyar yang ni/ /zhes bya ba ni ngan song gcig nas ngan song gzhan du 'gro ba'i phyir ro/ /de nyid lung las kyang bstan to zhes/de nyid phyir na zhes bya ba la sogs pa gsungs te/ mi nyid ces bya ba ni mi khom pa brgyad rnam par spangs pa'i mi'i lus so/ /'dir dper brjod pa bstan pa ni/ rgya mtsho cher g.yengs zhes bya ba la sogs pa yin te/ dper na yongs su brtag pa nye bar bzung ste/ 'dzam bu'i gling thams cad rgya mtsho chen po'i chu gcig gi gzhir gyur la/ der yang gnya' shing bu ga gcig pa yongs su 'phyo ba la shar nas rlung gis nub kyi 'gram du nub nas rlung gis shar gyi 'gram du khyer zhing / de bzhin du lho nas byang dang / byang nas lho'i 'gram du ste/ rgya mtsho der rus sbal zhar ba gcig gnas shing /de yang lo brgya 'das pa dang / mgrin pa btegs nas lta'o/ /ji ltar 'ga' zhig tu 'di 'dra ba'i tshogs pa yod par gyur pa ste/ shing gang yin pa mig zhar ba de'i phyogs su song bar gyur pa dang / de la mi lta na yang de'i mgrin pa bu ga der chud pa bzhin du mi'i lus thob pa yang dpe de bzhin no//yang ci'i phyir de lta bu yin zhe na/ skad cig gcig ces bya ba la sogs pa gsungs te/ gang yang sbyor ba'i skad cig ma mang mod kyi/ de lta na yang dngos po gzhi mtshams med pa ni skad cig ma gcig nyid la 'grub par 'gyur te/de ltar gzhan la yang blta bar bya'o/ /yang na shin tu myur bar byed pa'i phyir skad cig ma mang po nyid la skad cig ma gcig ces brjod de/ dper na mig btsums pa du ma'i bya ba la yang myur bar bstan par bya ba'i don du mig btsums pa tsam gyis byed do zhes brjod pa lta bu'o//bskal par gnas gyur na zhes bya ba ni bar gyi bskal pa gcig ste/ mnar med pa bar gyi bskal par brjod do zhes bstan pa'i phyir ro/ /'khor ba thog ma dang tha ma med par yang thog med dus nas byas shing bsags pas te/ byas pa tsam dang bsags pa tsam gyi sdig pa yis so//bde 'gror mi 'gro smos ci dgos te/ bde 'gro'i grag pa tsam yang med do zhes bya ba'i don to/ /'bras bu nyams su myong zin pa'i las ni ldog pa med cing / 'bras bu nyams su myong bzhin pa yang rnam par smin pa yongs su 'dzad na/ de ji ltar na de ltar 'gyur ba yin zhe na/de tsam kho na zhes bya ba la sogs pa gsungs te/ las kyi 'bras bu myong ba tsam kho na myong gyur nas te/ nyams su myong nas so/ /de ni zhes bya ba byed pa pos te/ las des bskyed pa'i sdug bsngal las rnam par grol bar mi 'gyur ba'o/ /gang gis na ci'i phyir de dag mi rigs pa yin zhe na/gang gi phyir de las byas shing bsags pa'i sdig pa'i las kyi 'bras bu myong bar byed cing sdig pa gzhan sogs par byed do/ /de nyid kyi phyir/ rgya mtsho cher g.yengs gnya' shing gi bu gar zhes bya ba la sogs pa'i dper brjod pa rigs pa yin no/ /yang de bzhin du dal ba phun sum tshogs pa thob pa yang shin tu dkon par rig nas gal te dge ba'i phyogs 'phel bar bya ba'i phyir brtson par mi byed na rmongs pa las gzhan 'dir rgyu ci zhig yod snyam du bdag nyid skyo ba skyes nas 'di 'dra'i zhes bya ba la sogs pa gsungs te/bdag nyid kyis kyang bdag nyid la slu ba dge ba'i nor nyams par byed pa 'di las bslus pa chen po gzhan med do/ /gti mug kyang 'di las che zhing mchog tu gyur pa 'byung ba med de/ /gang zhig dge ba'i chos kyi nor lag na gnas pa mthong bzhin du 'phrog pa yin no/ /de nyid bstan pa ni 'di 'dra'i zhes bya ba la sogs pa yin te/'di ltar mi dge ba'i phyogs stobs che ba dang / dal ba phun sum tshogs pa mchog tu dkon pa dang / gti mug ni shin tu nus pa dang ldan par rig nas ji skad du bstan pa'i bslab pa sgrub pa'i phyir dang / rang gi sems brtan par bya ba'i phyir/ gal te bdag gis zhes bya ba la sogs pa'i tshigs su bcad pa rnams kyis bdag nyid kyi tshul 'di brtags nas brtson 'grus bskyed pa ni/de ltar zhes bya ba la sogs pa gsungs te/ de dag brten par spyad par bya'o/ /phyir yang sgyid lug na ni le lor gyur pa ste/ dge ba'i las rnams la spro ba med pa'am yid bsad par gyur na'o/ / ci zhig gis she na/ rmongs pa ste/ gal te rmongs pa'i dbang du gyur nas so/ /de'i tshe mya ngan ldang bar 'gyur te/ mya ngan 'byung bar 'gyur ba'o/ /sems can dmyal ba la sogs pa'i 'gro bar yun ring du ni dus ring por te/ phyir zhing ni ji ltar sngar ma bslabs pas mya ngan dang ldan pa bzhin du slar yang ngo //gshin rje'i pho nyas ni sems can dmyal ba'i srung ma bsdigs pa dang brdeg pa la sogs pa'i las byed pa rnams kyis te/ ci'i phyir khyod kyis sngar 'di lta bu byas zhes brjod cing sngar byas pa'i las rjes su dran pas sam/ de bzhin du brdeg pa la sogs pa sngon du 'gro bas song zhig sdod cig ces zer bas bskul bas na'o//bag med pa'i 'bras bu gzhan yang yod do zhes bstan pa ni/ dmyal me zhes bya ba la sogs pa yin te/ sems can dmyal ba'i me de ni sems can dmyal ba pa rnams bsreg pa'i phyir rab tu spang ba yin pas dmyal ba pa'i'o/ / bzod dka' ni shin tu sdug bsngal bas bstan par mi nus pa'o/ /bdag gis de ltar ci ste bya snyam nas phyis gdung ba de nyid me dang 'dra ba ste/ sems sreg par byed pa'i phyir ro/ /ma bslabs zhes bya ba ni bslab pa med pa ste ma bsdams pa zhes bya ba'i don to/ /yang bdag nyid kyis brtags pa/shin tu zhes bya ba la sogs pa gsungs pa la/ phan pa'i sa ni phan pa dang bde ba'i don du dal ba phun sum tshogs pa dang / dge ba'i bshes gnyen dang phrad pa shin tu rnyed dka' ba ni bstan zin to/ /shes dang yang ldan bzhin du ste/ dpyod pa yang 'byung bzhin du der slar yang khrid nas so//gal te shes pa yod na ji ltar na khrid ce na/ sngags kyis zhes bya ba la sogs pa gsungs pa yin te/ don 'di la bdag gi sems kyis 'phrigs pa med pa'o/ /ci'i phyir de ltar 'gyur/ 'dir rigs pa ni ci yod/ de dag tu yang ji ltar 'gyur zhe na/'dir sngags kyis rmongs par byas pa bzhin zhes gsungs te/ sngags kyang gang gis rmongs par byas she na/ cis rmongs bdag gis kyang mi shes te zhes so/ /khyod kyi khong na gnas pa 'ga' zhig yod par 'gyur ro zhe na bdag gi khong na ci zhig yod ce'o/ / nyon mongs pa'i dgra nyid dag yod pa ma yin nam zhe na/ 'dir zhe sdang zhes bya ba la sogs pa gsungs te/ sogs pa'i sgras ni mgo bo la sogs pa med par brjod de/ 'dis ni de dag dbang po thams cad kyis stong bar bstan to/ /zhe sdang ni khong khro ba'o/ /srid pa ni yang srid la mngon par dga' ba dang dga' ba'i 'dod chags kyi mod la skyes pa'o//sogs pa'i sgras nga rgyal la sogs pa phra rgyas bcu gzung bar bya ste/ srid pa'i rtsa ba phra rgyas drug /'dod chags khong khro de bzhin du/ /nga rgyal dang ni ma rig pa/ /lta ba the tshom de dag bcu/ /zhes gang gsungs pa'o//lta ba rnam pa lngar phye bas bcur 'gyur te/ 'di lta ste/ 'jig tshogs la lta ba dang / log par lta ba dang / mthar 'dzin par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa'o/ /de dag ni lam dang khams bden pa'i rab tu dbye bas dgu bcu rtsa brgyad du 'gyur ro//yang byang chub sems dpa'i ni brgya nyi shur 'gyur ba yin no/ /dpa' ba ste dpa' brtan dang mi ldan pa'o/ /mdzangs min te yid gzhungs pa dang ldan pa ma yin pa'o/ /de lta bur gyur pa'i yan lag thams cad ma tshang ba rnams kyis kyang ji zhig ltar de dag gis bdag bran bzhin byas so snyam du rang nyid la rnam par dpyod par byed pa yin no//'di ni shin tu yang ngo mtshar che ba yin no zhes/ bdag gi sems la zhes bya ba la sogs pa gsungs te/ bdag gi sems nyid la brten bcas nas bdag nyid la gnod pa byed pa ste/dga' mgur zhes bya ba ni 'jig rten pa med par ram sems pa'ang med par ro/ /bsten pa rnams ni de mi rigs so/ /de la'ang ni de ltar na dran yang ste/ mi rigs pa'i tshul can de dag la'ang bdag mi khro'o zhes tshig zur gyis ston pa yin no/ /byang chub tu sems bskyed pas ni gzhan gnod pa byed pa la ji mi snyam pa rigs pa nyid ma yin nam zhe na/'dir/ gnas min zhes gsungs te/ yul 'di lta bu la bzod pa'i ngang tshul can ni smad pa yin no/ /ci'i phyir de ltar de dag khyod mi bzod ce na/ gal te zhes bya ba la sogs pa gsungs te/ de dag gis ji ltar dmyal ba la sogs pa'i sdug bsngal skyed par byed pa de ltar dgra gzhan dag gis khrid cing spyod par mi nus shing mi lcogs so/ /mnar med pa'i me ci 'dra ba zhig ce na/ ri rab kyang zhes bya ba la sogs pa gsungs pa yin te/ ri rab kyang zhes bya ba ni gzhan ngan ngon ltar re zhig zhog /ri'i rgyal po dang me phrad na yang thal ba yang mi mngon par byed de/ me drag po'i 'bar ba chen pos sreg par byed pa'i phyir ro/ /der bdag skad cig gcig la 'dor te 'di 'dra ba'i mer ro/ /mtshams med pa'i las kyi rgyu rnams ni stobs can nus pa dang ldan pa ste/gnyen pos kun nas slong ba med pa'i phyir ro/ /'o na khyod de dag la la ni de ltar 'khon du 'dzin pa dam por byed la dgra gzhan dag la ni ma yin pa ji lta bu yin zhe na/ bdag gi zhes bya ba la sogs pa gsungs pa yin te/ thog mtha' med pa zhes bya ba ni sngon dang phyi ma'i dus te/'khor ba mthar thug pa ma yin pa'i phyir ro/ /gzhan dag la ni nyi ma so sor nges par gnas pa yin pa'i phyir ro/ /dgra gzhan kun ni lha dang mi la sogs pa'o/ /'o na de dang mthun par spyad na dbang du 'gyur ba dang phan pa dang bde ba sgrub par byed par 'gyur ba ma yin nam zhe na/ 'dir mthun par zhes bya ba la sogs pa gsungs te/ nyon mongs pa 'di dag ni de bzhin du rjes su 'brang na mi phan pa byed pa yin pa'i phyir sems can dmyal ba la sogs pa'i sdug bsngal shin tu skyed par byed pa yin te/ rang bzhin mi srun pa'i phyir nan gyis gzhom par bya ba nyid yin no//de bas na nges par 'di dag nyid bdag gis bya bar 'os pa yin no zhes gsungs pa/ de ltar zhes te de bzhin du rgyun chags shing bar med par te/ dus thog mtha' med par nye bar gnas pa'i phyir dang / nye bar 'joms par byed pa yin pa'i phyir/ yun rings dgrar gyur pa yin no//glegs bam la lar rgyun zhes 'don pa der ni rgyun bar ma chad par 'jug pa'i phyir ro zhes bshad par bya'o/ /yang khyad par du byed pa ni/ gnod pa zhes pa yin te/ sems can dmyal ba la sogs pa'i sdug bsngal gyis gnod pa ji snyed pa rnams te/ de skye ba'i rgyu gcig pu kho na'i snying la legs par gnas bcas pa de dag nyid/yod na 'khor bar bdag 'jigs pa med de 'jigs pa dang bral zhing dga' bar ga la 'gyur te/ mi rigs so zhes bya ba'i don to/ /yang nyon mongs pa'i dgra bo rnams spangs pa'i phyir/ sha khon zhugs par zhen pa yid la brten par gzhag pa'i phyir/'khor ba'i btson ra'i zhes bya ba la sogs pa gsungs pa yin te/ nges par 'byung ba'i gnas byed pa'o/ /dmyal sogs na'ang gsod byed gshed ma ni gshin rje'i skyes bu de dag yin te/ nyon mongs pa'i dbang du gyur pa la las kyi rnam par smin pa'i dbang gis de dag snang ba'i phyir ro//de ltar zhes nyes pa ma lus pa'i 'byung gnas su gyur pa de dag gal te yid kyi khyim du chags pa'i rang bzhin gyi gzeb gang yin pa der gal te gnas par gyur na ste/ rdzong la brten nas gal te 'dug na bdag la ga la bde/ de bas na 'dir bdag gi 'di nyid ni rigs pa yin no snyam du bstan par bya ba/de ltar zhes bya ba la sogs pa gsungs te gang gi phyir de ltar de dag nyes pa thams cad kyi rgyu yin pa de'i phyir ro/ /khur zhes bya ba ni glang gi rgyab tu bkal ba'i khal zhes bya'o/ /khur dang mtshungs pas na khur te dam bcas pa 'dzin pa'o//'di zhes bya ba ni nyon mongs pa'i rang bzhin te/ mdun na 'dug pa'i phyir mngon sum du sgros btags na 'di zhes bstan to/ /mngon sum du zhes bya ba ni bdag gis mthong ba bzhin du'o/ /nges par bcom pa ni rtsa ba nas med par ro/ /chung ngu la yang ni gnod pa chung ngu byed pa la'ang ste pha dang mas byas pa'i 'khon gyi rgyu mtshan la'ang ngo //yang na dngos po rgyu chung ngu la'o/ /khros gyur pa ni snying la dgrar byas pa'i zhen pa brtan po gzhag pa ste/ 'khon du 'dzin pa zhes bya ba'i don to/ /nga rgyal bdo rnams ni nga rgyal 'bar ba'i nga rgyal can rnams so//de zhes pa ni gnod pa byed pa'o/ /ma bcom pa ni de gzhom par ma byas par ro/ /gnyid mi 'ong ni sems las med pa dang bde ba dang ldan par mi 'gyur ba'o/ /skabs su bab pa dor nas go bgos pa nyid bstan par bya ba/ rang bzhin zhes bya ba la sogs pa gsungs te/ rang bzhin gyis ni ngo bo nyid kyis 'chi ba ste/gson pa'i mtha' ni 'chi ba yin no zhes bya ba'i phyir ro/ /gang la de yod pa de la de skad ces bya ste/ de yang yin la de sdug bsngal ba yin pa'o/ /de dag skye ba la sogs pa'i sdug bsngal gyis gzir bar gyur pa'am/ des sdug bsngal bar gyur pa'o//de nyid kyi phyir nyon mongs pa dag yin te/ snying rje ba'o/ /g.yul ngor dngar tshe ni g.yul sprad par bya ba'i gnas gtso bo ste/ g.yul gyi sa gzhi'i stobs dang ldan pa'i dpung gang na bar zhes bya ba'i don to/ /nan gyis zhes bya ba ni btsan thabs su ste/ nus pa ji lta ba bzhin du zhes bya ba'i don to//gzhom phyir ni srog dang bral ba'i phyir ro/ /drag shul can ni gzi mdangs can te/ brtson pa brtsams pa zhes bya ba'i don to/ /ji lta bur gyur pa zhig ce na/ mda' mdung gi mtshon gyis phog pa'i sdug bsngal khyad bsad nas te/ g.yul ngor mtshon gyis smas pa mi sems par te/ skyes bu dpa' bo zhes bya ba'i don to/ /phyir phyogs 'byer bar mi byed na ni kha phyir ldog par mi 'gyur ba'o/ /don ma grub pa ni mngon par 'dod par grub par ma byas par ro/ /brtan pa rnam pas nyon mongs pa lhag par gsungs pa/rtag tu zhes bya ba la sogs pa gsungs pa yin te/ rtag tu ni dus thams cad du'o/ /rang bzhin gyis te gnod pa ma byas shing rgyu med pa'i dgra rnams so/ /brtson pa ni 'bad pa ste/ brtson par byas pa zhes bya ba'i don to/ /deng zhes pa ni dus 'dir zhes pa ste/'di ni 'jig rten gyi smra lugs so/ /sgyid lug pa ni bya bar 'os pa rnams la ni nus so snyam pa'i zhan pa'o/ /yi chad ni sems zhum pa'am/ dang ba med pa'am/ bsam pa dman pa'o/ /'di ni tshig bsdus pa ste/ yi chad pa mi 'byung ba sgyid lug pa mi 'byung ba zhes bya ba'o//smos ci dgos zhes bya ba ni de bas kyang lhag pa zhes bya ba'o/ /sdug bsngal brgya phrag ni ngal ba brgya phrag gam/ sdug bsngal brgya phrag gi'o/ /rgyur gyur pa gang gis kyang zhes pa ni rang gi sems kyi rtog pa ste/ mi rigs pa yin no zhes bya ba'i don to/ / ji ltar na mi rigs pa yin zhe na/ don med ces bya ba la sogs pa gsungs te/ don med ces bya ba ni 'dir 'jig rten pha rol la sogs par dag par 'gyur ba'i dgos pa gzhan cung zad kyang med pa'o/ /de lta na yang dgra'i mtshon cha yis smas pa'i rma brla dang / snying ga dang / dpung pa dang / lag pa la sogs pa lus la rgyan dang ldan pa ste/ rgyan cha bzhin du yid dga' bas 'chang bar byed na/ 'di bdag la ji ltar mi rigs she na/ don chen zhes bya ba la sogs pa gsungs te/ don chen ni 'gro ba thams cad sangs rgyas nyid du sgrub pa ste sgrub par byed pa de'i don du'o//brtson 'grus brtsams pa la ci'i phyir zhes spong bar byed pa yin no/ /mchog tu dad pa'i rgyu sdug bsngal de 'dra ba ni ci bdag la rigs pa nyid ma yin nam/ gang 'gro ba'i gdung sel sdug bsngal la/ dga' ba 'ba' zhig 'dir bya rigs/ /zhes brjod par 'gyur ba'o//gal te de ltar brtson par byed pa de lta yin na yang rang gi bde ba dang mi 'gal ba nyid du brtson par bya bar rigs pa yin no zhe na/ 'dir nya pa zhes bya ba la sogs pa gsungs te/ rang gi chung ma dang bu la sogs pa dgang ba dang gso ba la sogs pa bya ba la sems chags pa'i nya pa ni nya'i dgra ste/nya 'tshe ba la yid chags pa'o/ /dgun gyi dus kyi mtshan mo kha ba'i tshigs sdug par 'jug par byed pa dang / chom rkun dang / stag la sogs pa'i 'jigs pa la mi ltos pa dang / de bzhin du shan pa la sogs pa dang / de ltar gdol pa yang rtag tu las ma yin pa la dga' ba/gzhan gyi nor 'phrog pa la sogs pa'i bsam pa can ni tsher ma can dang thag thug dang gseg ma can bgrod dka' ba'i sa'i cha 'brog gi lam du rlung dang tshad pa dang / thog dang / char bab pa dang / mun pa dang ldan pa'i mtshan mo sdig sbrul la sogs pa'i 'jigs pa'i sdug bsngal rtsis med par 'gro ba na srog la the tshom za ba bya dka' ba'i las la 'jug par byed do//de bzhin du gzhan gyi bud med la spyod pa la sogs pa dang / de ltar zhing pa ste rmod par byed pa po zhing gi las kyis nye bar 'tsho ba zhing rmod pa la sogs pa'i byed pa byas pa rnams kyang nyin mtshan du grang ba dang /tsha ba dang / rlung la sogs pa'i sdug bsngal nyams su myong ba mthong ba nyid yin no/ /de bzhin du bdag gi gdong du lta zhing 'tsho ba zhabs 'bring ba la sogs pa dang / de ltar dman pa'i las la mngon par dga' ba de dag kyang grang ba dang tsha ba la sogs pa'i gnod pa bzod na 'gro ba la phan pa dang bde ba'i don dang skyes bu mchog gi don gyi phyir ji ltar na bdag gis mi bzod/bdag gis slar shin tu yang bsten par bya bar rigs pa yin no snyam du dgongs pa'o/ /'o na gal te sems can thams cad la phan pa dang bde ba bsgrub pa'i phyir smon lam btab pa de lta yin na/de'i tshe de nyid la nan tan bya ba'i phyir brtson par bya ba nyid yin na/ ci'i phyir rang nyid kyi sred pa la sogs pa spong ba gtso bo ma yin zhing dgos pa med pa'i don du brtson 'grus rtsom par byed ce na/ de'i phyir/ phyogs bcu'i zhes bya ba la sogs pa gsungs te/ phyogs bcu'i nam mkha'i tshad kyi 'tsho ba'i 'jig rten gyi sdug bsngal thams cad rnam par dgrol ba'i phyir sems bskyed cing tshig tu yang cher bton nas gzhan dag lta zhog /gang gi tshe bdag nyid kyang sred pa la sogs pa'i nyon mongs pa rnams ma grol ba de'i tshe rang gi nus pa la ma bltas pa kho nar tshig tu rjod par byed pa ni sems rnam par 'khrugs par gyur pa yin no snyam du bsams nas phyir mi log par dam bcas pa las brtan par 'gyur bar bya'o//'dir dgongs pa ni 'di yin te/bdag gi nyon mongs pa ma spangs par gzhan gyi nyon mongs pa spang ba zhes bya ba ni mi nus te/ de bas na de'i thabs yin pa'i phyir de nyid dang por nges par nyams su blang bar bya ba nyid yin te/ bdag nyid kyang ma dul bar gzhan gdul bar mi nus par mi 'gyur ro/ / de lta bas na sdug bsngal thams cad khyad du bsad nas/ 'dir zhen bya zhing ste 'dir nyon mongs pa gzhom pa'i don du brtson 'grus brten pa la nan tan du bya'o/ /khon du bzung nas ni khon ma brjed pa'o/ /g.yul sprad ni rtsod pas yid byung ba spangs pa rnam pa thams cad du 'thab mo brtsam pa'o//yang na 'o na gal te thog ma nyid du bdag nyid kyi nyon mongs pa spangs par ma gyur na 'di la mi rigs pa ci zhig tu 'gyur/ gang gis na gus pa chen pos de nyid la brtson par bya zhe na/ 'dir phyogs bcu'i zhes bya ba la sogs pa gsungs te/ 'dir bsdus pa'i don ni 'di yin te/thams cad la'ang gzhan pas rang 'dul ba ni rang la rag pa yin la/ gang la bdag rang la'ang nus pa med pa de la gzhan gyi rgyud la lta ga la 'gyur te/ 'di ni mi srid pa'i phyir bzhad gad byed par zad de/ rang gi tshod mi shes par dam 'cha' bar 'gyur ba smyon pa'i tshig lta bu yin no//de bas na bdag nyid yongs su sbyang ba la dang por 'bad par bya'o/ /gzhan thams cad ni snga ma dang 'dra'o/ /'o na gal te nyon mongs pa rnam pa thams cad du spang bar 'dod pa de lta yin na ni de'i tshe nyon mongs pa spang ba po mngon par zhen pa gang yin pa de yang spang bar bya ba nyid du 'gyur te/de yang bag la nyal gyi rang bzhin yin pa'i phyir ro/ /ji ste de ltar na yang nyon mongs pa spong ba nyid du mi 'gyur ro zhe na/ 'dir ma gtogs pa zhes bya ba gsungs te/ nyon mongs pa gang zhig nyon mongs pa 'joms par byed pa'i gnyen po dang 'brel ba rnam pa de 'dra ba ni rnam pa de lta bu ste der snang ba tsam yin gyi de nyid ni nyon mongs pa mtshan nyid pa ni ma yin te/de dag la gzhan zhes bya ba'i don to/ /de dag gis ni nyon mongs pa thams cad rnam pa thams cad du spangs pas 'khor bar mi skye ba'i phyir/ bla na med pa'i byang chub 'thob par mi 'gyur ro zhes bya ba'i thal bar 'gyur ba 'di yang bsal ba yin no//nyon mongs pa gang dag nges par 'chi ba'i rgyur gyur pa de dag ni 'dir nges par gzhom par bya ba yin la/ gang yang tshogs sog pa'i rgyu skyed pa de dag ji srid du tshogs rdzogs par ma gyur gyi bar du rta shin tu dul ba bzhin du dul bar byas te gzhag par bya'o//phyis ni de dag kyang gzhom par bya ba kho na yin te/ 'di nyid gsungs pa ni nyon mongs 'joms pa dang 'brel pa zhes bya ba yin no/ /yang nyon mongs ma bsregs rtswa ltar chung zhing yang ba nyid du bya zhes gang gsungs pa'o//de bas na rnam pa thams cad du thams cad spong bar ni mi 'dod do/ /don 'di ni bya dka' ba brgya phrag du mas thob par bya ba yin te/ der yang sdug bsngal brgya phrag mtha' yas pas 'joms pa 'byung bar 'gyur ba ma yin nam/ de bas na de'i rjes su 'brang ba nyid bla ste legs par byas par 'gyur ro zhe na/bdag ni bsrogs zhes bya ba la sogs pa gsungs te/ shin tu chung ba brjod pa yin te/ bdag gi dam bca' 'di nges pa nyid yin par zung shig /rgyu ma zhes bya ba rnams kyang ji ltar 'dod pa bzhin du 'og tu lhug la dum bur brul bu brul bu byas pa'am/sha dang khrag zhig cing zags par byas kyang nyon mongs pa'i dgra bo rnams la mgo bo 'dud par byas nas rjes su bsgrub par mi bya ste de'i bka' bzhin byed par mi bya zhes bya ba'i don to// //bam po drug pa/ rnam pa kun tu zhes bya ba ni nam du yang ngo //khyod kyis rang gi gnas las bton yang gal te stobs dang ldan pa'i gnas la brten nas dgra gzhan bzhin du dgra tshar gcod du 'ong ba ma yin nam/ de'i tshe 'dir ci ltar slar bcos par bya zhes dogs pa la/ tha mal dgra bo zhes bya ba la sogs pa gsungs te/tha mal pa'i dgra bo gzhan dag ni yul nas phyung yang gnas gang zhig nas nus pa brtas shing stobs rnyed nas dgra tshar phyin par bya ba'i phyir/ phyir la ldog pa'i gnas yul gzhan de ni srid kyis nyon mongs pa'i dgra la ni ma yin te/ dgra gzhan ltar de'i spyod pa mi snang ngo //yang de ltar 'dod kyang ga la 'gyur zhe na/ nyon mongs nyon mongs zhes bya ba la sogs pa gsungs te/ bdag gi sems las yul phyung na/ nyon mongs pa'i dgra 'di gang du song nas gnas par byed gang du gnas par byas nas bdag la gnod pa bya ba'i phyir 'bad rtsol byed de/'di'i gnas ni ma mthong ngo / /rtsa ba nas med par gyur pa la slar ldang bar mi rigs pa'i phyir ro snyam du dgongs so/ /blo'i rgyu ba mi zin pa'i phyir bdag la spro ba med pa 'ba' zhig tu zad kyi nyon mongs pa 'di ni rtsa ba med pa'i phyir don dam pa de kho na nyid mthong ba tsam gyis spang bar bya ba yin pas na nyon mongs yin no//de nyid rab tu bsgrub pa'i phyir nyon mongs rnams ni zhes bya ba la sogs pa gsungs te/ yid du 'ong ba la sogs pa'i yul mthong yang dbang po bsdams pa kha cig ni nyon mongs pa mi skye ba'i phyir dang / rnam par brtags na rdul phra rab kyang de la ma mthong ba'i phyir yul na mi gnas so//mig la sogs pa'i dbang po'i tshogs la yang snga ma bzhin du mi gnas te/ chos la sems pa la sogs pa'i gnas skabs na dbang po'i dngos po yod kyang mi dmigs pa'i phyir ro/ /yul dang dbang po dag gi bar na ste/dbus na gnas pa'ang min ste/ snang du rung ba mi dmigs pa nyid yin pa'i phyir ro/ /de dag las gnas gzhan 'ga' zhig tu yang gnas pa'i nges pa med do/ /de bas na rtsa ba med pa'i phyir de kho na nyid du stong pa ste glo bur ba nyid yin te/ yang dag pa ma yin pa'i kun tu rtogs pa tsam las byung ba'i phyir ro//de lta bur gyur na yang 'gro ba kun gnod byed de 'khrug par byed do/ /de ltar yin na ci ltar bya bar rigs she na/ gsungs pa 'di ni sgyu 'dra ste/ dper na sgyu ma ni de'i rnam pas stong yang sngags dang sman gyi mthu las de rkyen 'di tsam gyis de kho na nyid du med kyang glang po che la sogs pa'i rnam par snang ba de bzhin du nyon mongs pa 'di rnams kyang phyin ci log gi rgyu mtshan dang tshul bzhin ma yin pa yid la byed pa las byung ba ste/rkyen 'di dag tsam gyis de kho na nyid du med pa nyid du snang ngo / /de'i phyir snying la 'jigs pa spangs te nyon mongs pa rnams las so//don dam par rnam par dpyad na brdzun pa 'di ci zhig tu rung ste/ de'i phyir brtson pa bsten cig ste spro bar gyis shig pa'o/ /shes phyir ni de kho na nyid rab tu rnam par 'byed pas rtogs pa'i don du'o/ /don med nyid du dgos pa med pa nyid du'o//dmyal ba rnams su ni bsdus 'joms la sogs pa rnams su'o/ /nyon mongs pa'i dbang du gyur pas bdag la gnod pa ni gzir ba ste ci ste bya ba'o/ /da ni sngar bstan pa'i don ma lus pa nye bar bsdu ba'i phyir/ de ltar zhes bya ba la sogs pa gsungs te/ de ltar ni bstan ma thag pa'i le'u ma lus pas bstan pa'i don nam/bstan ma thag pa'i sgyu ma'i rang bzhin la rnam par bsams te brten par byas nas 'bad par bya'o/ /ci'i don du zhe na/ ji ltar bshad pa'i bslab pa bsgrub pa'i rgyur te ji skad gsungs pa'i bslab pa ni mdo de dang de dag las byang chub sems dpa'i bya bar 'os pa gang zhig bstan pa'am/bstan bcos 'di nyid las mdor bsdus nas de dang der nye bar bstan pa de dag bstan pa'i don du'o/ /bcom ldan 'das kyis mdo sde rnams su byang chub sems dpa'i bslab pa'i gzhi gsungs pa ni/ ji skad du/'phags pa dkon mchog sprin las/ rigs kyi bu ji ltar na byang chub sems dpa' rnams byang chub sems dpa'i bslab pa'i sdom pas bsdams pa yin zhe na/ 'di la byang chub sems dpa' 'di ltar dpyod de/ so so thar pa'i sdom pa tsam gyis bdag bla na med pa yang dag par rdzogs pa'i byang chub tu mngon par rdzogs par 'tshang rgya bar mi nus kyis de bzhin gshegs pas gang 'di mdo sde de dang de dag las byang chub sems dpa'i spyod pa dang /byang chub sems dpa'i bslab pa'i gnas bcas pa de dag la bdag gis bslab par bya'o zhes rgya cher gsungs pa lta bu ste/de bas na bdag lta bu blo zhan pas rgya cher gsungs pa'i phyir byang chub sems dpa'i sdom pa shes par dka' na/ des na ji ltar bya ba'i rigs/ /gang gis ltung bar mi 'gyur ba'i/ /gnad kyi gnas rnams 'dis rigs bya/ / gnad kyi gnas de gang zhe na 'di lta ste/ bdag gi lus dang longs spyod dang / /dge ba dus gsum skyes pa rnams/ /sems can kun la btang ba dang / /de bsrung dag pa spel ba'o/ /zhes gsungs so/ /gang la byang chub sems dpa' rnams goms pa glod can yang ltung bar rnam par gzhag pa 'di ni byang chub sems dpa'i sdom pa mdor bsdus pa yin no//ji skad du byang chub sems dpa'i so sor thar pa'i mdo las gsungs pa lta bu ste/ byang chub sems dpa' sems can thams cad kyi phyir sdug bsngal zad par 'gyur ba'i lam gang yongs su bzung ba ste/gal te byang chub sems dpas lam de yongs su bzung nas gnas pa na/ bskal pa bye ba 'das nas tha na 'dug pa tsam gyi bde ba 'dod pa'i sems gcig bskyed na yang de la byang chub sems dpas sems 'di ltar bskyed par bya ste/ bdag gis sems can thams cad kyi nyes pa dang du blangs nas 'dug pa gang yin pa de yang mangs pa yin no zhes so//de nyid kyi phyir/ sman pa'i ngag ces bya ba la sogs pa gsungs pa la/ dper na sman pa'i ngag ltar mi byed na gang la sman bsgrub par bya ba'i sman gyis bsgrub par bya ba'i nad pa skyon med cing nad med par 'gyur ba ga la yod/de bzhin du thams cad mkhyen pa'i sman pa chen pos lung phog pa'i bslab pa bsgrub par ma byas par skyon med par 'gyur ba las dang nyon mongs pas bskyed pa'i skye ba la sogs pa'i sdug bsngal gyi 'jigs pa chen po las rnam par grol bar 'gyur ba lta ga la yod/de ltar sdom pa yang dag par bzung ba la ltung ba'i mtshan nyid gang dang ldan pa'i dngos po bdag nyid kyis brtags shing spong ba dang / ltung ba'i gzugs brnyan dang / ltung ba ma yin pa'i gzugs brnyan la rmongs par mi 'gyur ba'i ltung ba spyi'i mtshan nyid brjod par bya'o//byang chub sems dpas sems can thams cad kyi da ltar dang ma 'ongs pa'i sdug bsngal dang / yid mi bde ba thams cad zhi bar bya ba dang / da ltar dang ma 'ongs pa'i bde ba dang / yid bde ba thams cad bskyed pa'i phyir g.yo med par lus dang / ngag dang /yid brtson pas nan tan mi byed pa dang / de'i rkyen tshogs pa mi tshol ba dang / de'i bar du gcod pa'i 'chos pa po la mi 'bad pa dang / sdug bsngal dang yid mi bde ba chung ngus sdug bsngal dang yid mi bde ba chen po'i 'chos par 'gyur ba mi skyed pa dang / don chen po bsgrub pa'i phyir don chung ngu nyams par mi byed pa dang /skad cig gcig tsam yang yal bar 'dor na ltung ba dang bcas pa yin no/ /mdor na rang gi nus pa ma yin pa'i bya ba'i yul rnams la ltung ba med de/ de la 'bras bu med pas bslab pa bcas pa med pa'i phyir ro/ /gzhan ni rang bzhin gyis kha na ma tho ba dang bcas pa yin pas bzung ba nyid do//rang gi nus pa'i spyod yul ma yin pa gang la brtson pa ni shugs kyis ltung bar 'gyur te/ de bsam mi dgos par spyir sdig pa bshags pa'i nang du 'dus pas de las grol bar 'gyur ro/ /de dag ni mdor na byang chub sems dpa'i bslab pa'i lus yin te/rgyas par bshad na bskal pa dpag tu med pa'i mthas bstan dgos pas so/ /yang na mdor bsdu na byang chub sems dpa'i ltung ba gnyis te/ ci nus kyis rigs pa dang mi rigs pa brtags nas rtsom pa'am/ mi ldog pa'am/ btang snyoms su 'jog pa ni ltung ba dang bcas pa yin no//brtags te ji ltar 'os pa las 'da' bar byed la/ tha na gdol pa'i bran gyis dpyas na'ang ltung ba dang bcas pa yin no/ /gang zhig de dag goms par bya ba'i don du bye brag tu rtogs par 'dod pa des re zhig bslab pa kun las btus pa las spyod pa'i sgo tsam bslab pa'i don du mngon par brtson par bya'o//bslab pa la rtsom pa tsam yang 'bras bu che ba yin pa'i phyir te/ ji skad du rab tu zhi ba rnam par nges pa'i cho 'phrul las bsngags pa lta bu'o/ /byang chub sems dpa'i bslab pa mdor bsdus nas bstan pa brjod pa yin no//byang chub sems dpa'i spyod pa la 'jug pa'i dka' 'grel/ shes rab 'byung gnas blo gros kyis byas pa las le'u bzhi pa'o// //de ltar lus la sogs pa btang ba dang bsrung ba bstan nas/ yang rgyas par bsrung ba dang sbyang ba dang dag par bya ba rgyas par bstan par bya ba'i phyir rtsom par byed de/byang chub tu sems bskyed pa'i byang chub sems dpas lus btang ba yang bsrung ba dang sbyang ba dang spel ba dag bya ste/ gang gi phyir/ sems can rnams kyi longs spyod phyir/ /lus la sogs pa sbyin par bya/ma bsrungs longs spyod dag las 'ong / /gang mi spyod la ci zhig sbyin/ /de bas sems can longs spyod phyir/ /dge ba'i bshes gnyen mi gtong zhing / /mdo sde dag la rtag lta bas/ /lus la sogs pa bsrung bar bya/ /zhes bstan to/ /lus la sogs pa yongs su bskyang ba la sogs pa de yang bslab pa bsrungs pa las 'gyur ba nyid yin te/gzhan du na mi 'gyur te/ sems can dmyal ba la sogs pa log par ltung bar 'gro ba'i phyir ro/ /de bas na 'di brjod par bya ste/ bslab pa zhes bya ba la sogs pa la bslab pa ni blang bar bya ste/sdom pa bzung bas gnang ba rnams la bya ba dang / bkag pa rnams la mi byed par bslab pa'o/ /de bsrung bar bya ste/ yongs su bskyang bar ro/ /'dod pas ni 'dod pa'i byang chub sems dpas te/ bdag gi sems bsrung bar bya'o/ /rab tu bsgrims nas ni 'chad par 'gyur ba dag gis so//ci ste bslab pa bsrung ba'i skabs su ci'i phyir sems bsrung bar bya ba zhe na/ bslab pa zhes bya ba gsungs te/ gzhan du na bslab pa bsrung ba nyid du mi nus so/ /g.yo zhing dbang du ma gyur pa'i sems ma bsrungs na sems g.yo ba'i bslab pa la bstan pa mi rigs pa'i phyir ro//'di las kyang sems kho na bsrung bar bya'o zhes/ /glang chen ma dul zhes bya ba la sogs pa gsungs te/ byang bar ma byas pa'o/ /myos pa ni glang po che mchog ste/ 'jig rten 'di dang 'jig rten pha rol du mnar med pa la sogs pa gang byed pa'i gnod pa de mi byed do//rang 'dod pa la spyod cing gnas pa'i sems nyid ni glang po che myos pa dang 'dra ba'ang yin te/ de bzhin gshegs pa'i bka'i lcags kyus ji zhig ltar dbang du byed pa'i phyir ro/ /de dbang du byas pa'i yon tan ni/ btags na zhes bya ba la sogs pa gsungs pa gal te ji zhig ltar bcings par gyur na'o//dran par ni 'chad par 'gyur ba'i mtshan nyid can no/ /de nyid ni thag pa dang 'dra ba ste/ 'ching ba'i thabs yin pa'i phyir ro/ /kun nas ni rnam pa thams cad du ste/ dam pa ma yin pa'i phyogs la 'jug pa 'gegs pa'i phyir ro/ /de'i tshe 'jigs pa med 'gyur te nub par 'gyur ba'o//thams cad ni ma lus pa'o/ /dge ba thams cad ni mngon par mtho ba dang / nges par legs pa'i mtshan nyid do/ /'ongs pa ni thob pa ste/ dper na char bab pa na 'bras sA lu skyes so zhes zer ba lta bu'o/ /gcan gzan khro bo dang sbrul la sogs pa nye bar 'tshe bar byed pa mang po yod pa ma yin nam/de dag las sems dbang du byas pas ji ltar 'jigs pa 'byung bar mi 'gyur zhe na/ stag dang zhes bya ba la sogs pa gsungs te go sla'o/ /yang 'di ci'i phyir zhe na/ 'di ltar zhes bya ba la sogs pa gsungs te/las kyi 'phen pa'i dbang gis 'di dag thams cad mi 'dod pa ster bar byed pa yin no/ /las kyang sems nyid yin te/ sems pa las yin te zhes gsungs pa'i phyir ro/ /ngag dang lus kyi las kyang sems nyid kyis kun nas slong bar byed pa yin pas de med par de dag mi 'byung ste bsams pa'i las zhes brjod pa'i phyir ro//de bas na 'di dag thams cad ni las kyi sprul pa yin la/ de yang sems las gzhan na med pa'i phyir ro/ /de ni/ las las 'jig rten sna tshogs skyes/ /de ni sems pa dang des byas//sems pa yid kyi las yin te/ /des skyed lus dang ngag gi las/ /zhes bstan to/ /gnod pa byed pa'i sems med pa la ni su yang gnod pa byed par mi 'gyur te/ gang gi phyir/ 'jig rten na ni sdig pa'i sems/ /med la sdang dang 'jigs pa med/ /gang gi sems ni dbang byas pa//de yi bde ba nyams pa med/ /de'i phyir 'di skad du/ sems 'dul ba ni legs pa ste/ /sems dul ba ni bde ba 'thob/ /ces gsungs so/ /yang dag gsungs pa ni bcom ldan 'das te/ dngos po'i de kho na nyid gsungs pa'i ngang tshul can yin pa'i phyir ro//des de kho na nyid 'di bstan pa ni thams cad sems las byung ba yin no zhes rab tu gsal bar byas pa'o/ /de bas na thams cad du sems nyid gtso bo yin no/ /de ltar de dag ni gzhan ma yin no zhes rab tu bsgrub pa'i phyir ro//sems can zhes bya ba la sogs pa gsungs te/ dmyal ba'i srung ma rnams kyis mdung dang / ral gri dang / gtun shing la sogs pa'am/ lo ma ral gri lta bu'i nags byung ba dag su yis byas te de la dbang phyug la sogs pa byed pa po 'ga' yang med de/de byed pa po gzhan du bkag pa'i phyir dang / 'dir yang 'gegs par 'gyur ba'i phyir ro/ /lcags bsregs pa'i rang bzhin gyi sa gzhi su yis byas/ bud med de dag gi rgyu'i tshogs pa gzhan gyi bud med la spyod pa rnams kyis shal ma li'i shing gi 'og dang steng du snang ba dang /shal ma li gang yin pa de yang ga las skyes te de'i phyir 'dir sems las gzhan pa'i rgyu yod par brtag par mi bya'o/ /gang / sems can 'jig rten snod kyi 'jig rten dag /sna tshogs sems nyid kyis ni spros pa ste/ /'gro ba ma lus las las skyes par bstan//sems las ma gtogs las ni yod pa min/ /zhes gsungs pa'o/ /de bas na 'dir sems nyid rgyu yin te/ gzhan med do zhes de'i phyir/ sdig sems zhes bya ba la sogs pa gsungs te/ sdig pa'i las nye bar 'dus byas pa'i sems nyid de dag gi rgyu yin par bcom ldan 'das kyis gsungs te/gzhan cung zad kyang yod pa ma yin pa nyid do/ /gang gi phyir de ltar yin pa de'i phyir 'jig rten gsum na sdig pa'i sems las gzhan 'jigs pa'i rgyu 'ga' yang med do/ /de'i phyir sems kho na dbang du bya'o/ /gang 'phags pa dkon mchog sprin las/sems ni chos thams cad kyi sngon du 'gro ba ste/ sems yongs su shes na chos thams cad yongs su shes par 'gyur ro zhes gsungs so/ /gzhan yang / 'jig rten sems kyis khrid pa ste/ /sems kyis sems ni mi mthong ngo / /dge ba'am yang na mi dge ba'i//las ni sems kyis sogs pa'o/ /sems ni mgal me bzhin du 'khor/ /sems ni rlabs dang 'dra bar g.yo/ /sems ni nags kyi me bzhin sreg /sems ni chu chen bzhin du bskyed/ /ces so/ /des de ltar nye bar brtags pas na sems la dran pa nye bar gzhag nas gnas te/sems kyi dbang du mi 'gro'o/ /'on kyang sems de'i dbang du sems nyid 'gro bar 'gyur te/ de'i dbang du sems gyur pa na chos thams cad dbang du gyur pa yin no/ /de ltar yin na ji ltar na sbyin pa'i pha rol tu phyin pa la sogs pa las sems gtso bo yin/de ni sems can thams cad kyi dbul ba sel bar byed pa'i mtshan nyid yin no zhe na/ gal te 'gro ba zhes bya ba la sogs pa gsungs te/ dbul po zhes bya ba ni zag pa dang bcas pa'i bde ba'i longs spyod kyis bkren zhing sems bkren pa'am yo byad med pa ste/gal te de dang 'gro ba bral bar byas pas sbyin pa'i pha rol tu phyin pa rdzogs pa yin no zhes brjod na/ de'i tshe sngon skyob pa ste sngon mngon par rdzogs par sangs rgyas pa'i bcom ldan 'das rnams kyi de ji ltar te/ ji ltar yang rigs par mi 'gyur ro/ /ci'i phyir zhe na/da dung 'gro bkren yod na ste/ da dung yang ji srid du 'gro ba'i dbul po nye bar zhi ba med do/ /gal te de ltar mi 'dod na 'o na de ji ltar 'gyur zhe na/ bdog pa zhes bya ba la sogs pa gsungs te/ bdog pa thams cad ni phyi dang nang gi dngos po thams cad de sbyin pa dang / sbyin pa'i 'bras bu sems can thams cad la yongs su gtong ba goms pa'i rab kyi mthar phyin pa'i phyir/gang gi tshe chags pa med pas ser sna'i dri ma dang bral ba'i sems skye ba de'i tshe sbyin pa'i pha rol tu phyin pa rdzogs zhes brjod do/ /de bas na sems nyid las gzhan sbyin pa'i pha rol tu phyin pa med do//tshul khrims kyi pha rol tu phyin pa yang shin tu sems nyid yin no zhes bya ba de'i phyir/ nya la sogs pa zhes bya ba la sogs pa gsungs te/ srog gcod pa la sogs pa kha na ma tho ba thams cad spong ba'i sems nyid ni tshul khrims yin te/de'i rten du gyur pa pha rol gyi yul bzlog pa'i rang bzhin ni ma yin no/ /gal te gsad pa la sogs pa'i yul gyi dngos po med pas de gsod pa la sogs pa med pa'i phyir tshul khrims su 'gyur ro zhe na/ de'i tshe nya la sogs pa dang / gzhan gyi bdog pa dang / bud med dang chang la sogs pa de dag gang zhig tu de dag mi mthong bar 'gyur bar bskrad par bya/gzhan du na de dag gsad pa la sogs pa la 'jug par byed pa na tshul khrims su mi 'gyur ro/ /de ltar ma yin pa de'i phyir de dag yod pa rnams la yang spong ba'i sems ni thob pa ste/ sems ldog par yid la byed pa ni tshul khrims kyi pha rol tu phyin par 'dod de de'i rang bzhin rigs pa rnams 'dod do//de bas na de yang sems nyid yin no/ /bzod pa'i pha rol tu phyin pa yang sems las tha dad pa ma yin no zhes/ sems can zhes bya ba la sogs pa gsungs te/ gzhan gnod pa byed pa la sogs pa yod na'ang sems 'khrugs pa med pa nyid ni bzod pa yin no//gzhan du na gal te dgra thams cad log par ltung bar byed pas dgra tshar phyin par byas par gyur pa ni gang gis kyang dgra med pas nye bar zhi ba dang / dgra la yang gnod pa byed pa med par 'gyur bas bzod pa ni bzod pa yin na de'i tshe de dag ni bsgrub par mi nus te/dgra bo rnams ni nam mkha' dang mtshungs pa'i phyir mtha' yas pa nyid yin te/ de dag gsad par mi nus so/ /de lta bas na khro ba la sogs pa las sems log pa nyid de dag thabs kyis bsad pa dang 'dra ba yin te/des gnod pa byas par mi brtsi ba'i phyir dang / tshe rabs gzhan la dgra bo mi 'byung ba'i phyir de dag bsad pa dang 'dra ba yin na/ /mi nus pa 'di la yang thabs kyis 'jug pa na dpe nye bar bstan pas nus pa nyid du/ sa stengs zhes bya ba la sogs pa gsungs te/tsher ma la sogs pa'i gnod pa bsrung ba'i don du sa stengs g.yogs par ni rigs na de ni mi nus te/ de snyed kyi ko ba med pa'i phyir dang / yod du zin kyang g.yogs par byed mi nus pa'i phyir ro/ /yang thabs kyis nus pa ni/ lham mthil tsam gyi go bas ni sa stengs thams cad g.yogs pa dang 'dra bar 'gyur ro//dpe bstan nas don rnal ma la sbyar ba/ de bzhin zhes pa la sogs pa gsungs te/ de bzhin ni sa stengs ko bas g.yogs pa lta bur ro/ /dgra la sogs pa'i dngos po bdag gis phyir bzlog par mi lang gi gnod pa byed pa'i bya ba las rang gi sems kyi nus pa nyid phyir bzlog pa ste/gzhan bzlog pa la don med pa'i phyir dang / rang gi sems bzlog pa kho nas de 'grub pa'i phyir ro/ /de bas na de ni sems nyid yin no/ /brtson 'grus kyi pha rol tu phyin pa'i dge ba'i las la spro ba'i rang bzhin yang sems nyid yin par shin tu gsal bas/sems gsal zhes bya ba la sogs pa gsungs te/ dge ba'i phyogs la lus dang ngag dang bcas kyang sems kyi 'jug pa zhen pas bsam gtan la sogs pa yul la gsal bar rab tu 'jug pa sems gcig pu zhig na yang 'bras bu tshangs pa la sogs pa 'byung ba ji lta ba de ltar 'bras bu mi skye ste/de lta bas na de yang sems nyid yin no/ /bsam gtan ni sems rtse gcig pa'i mtshan nyid yin te/ sems las gzhan du smra bar mi nus pas/ bzlas brjod ces bya ba la sogs pa gsungs te/gsang sngags la sogs pa zlos pa'i mtshan nyid dag gis byed pa ni bzlas brjod do/ /dka' thub ni lus kyis te dbang po 'dul ba'i mtshan nyid do/ /de rnams zhes bya ba ni dus ring por goms par byas pa rnams kyang ngo / /gzhan du na ni sems chags pas sam/ gnyid kyis bcom pa'i sems kyis te/bsam gtan la gsal ba med pas zhes bya ba'i don to/ /don med pa ni 'bras bu med pa nyid do/ /'bras bu shin tu nyung ba'i phyir ram/ 'dod pa'i don la mkho ba med pa'i phyir ro/ /dper na bu'i bya ba mi byed pa'i phyir/ bu yang bu min pa dang 'dra ba yin pa lta bu'o//thams cad mkhyen pa ste/ bcom ldan 'das kyis gsungs so/ /de lta bas na bsam gtan gyi pha rol tu phyin pa yang sems nyid yin no/ /shes rab ni rtsod pa med par sems nyid yin pas/ gang gis zhes bya ba la sogs pa gsungs te/'gro ba lnga'i skye ba la sogs pa'i sdug bsngal spangs pa'i phyir de spong bar byed pa dang / mya ngan las 'das pa'i bde ba thob par bya bar 'dod kyang sems can de dag 'khor bar 'bras bu med cing don med pa gyi na nyid du nam mkha' la me tog ka shi bzhin du 'khyam mo/ / de nyid kyis me lnga bstan pa dang skra bsal ba la sogs pa'i brtul zhugs 'bad par byas pa gang du yang 'brel pa med par brjod pa yin no/ /su zhig de ltar 'khyam zhe na/ gang gis te 'khor ba'i 'jigs pas bred pas bde ba don du gnyer ba rnams kyis chos kyi bdog pa kun te 'jig rten dang 'jig rten las 'das pa'i chos kyi gter du gyur pa'o//sems can byis pa rnams kyi spyod yul ma yin pa'i rang bzhin yin pa'i phyir gsang ba ste/ gang gis ma bsgoms pa ni de kho na nyid kyi sems kyis yang nas yang du brtan par ma byas pa'o/ /de bas na 'di ni shin tu yang sems nyid yin no//ji skad du 'phags pa sdong po bkod pa'i mdo las kyang bsngags te/ byang chub sems dpa'i spyod pa thams cad ni rang gi sems la brten to/ sems can thams cad smin par bya ba dang / gdul ba ni rang gi sems la brten to/ /de bzhin du sbyar ro//rigs kyi bu de la bdag 'di snyam du sems te/ dge ba'i rtsa ba rnams kyis rang gi sems nyid nye bar brten par bya'o/ /chos kyi sprin rnams kyis rang gi sems yongs su brlan par bya'o/ /sgrib par 'gyur ba'i chos can rnams las rang gi sems yongs su sbyang bar bya'o//brtson 'grus kyis rang gi sems nyid brtan par bya'o zhes bya ba la sogs pa'o/ /de ltar thams cad du sems kyi rang bzhin yin par bstan nas mjug bsdu ba de lta zhes bya ba la sogs pa gsungs te/ de ltar byang chub kyi sems bskyed pas bslab pa la bsrung ba la 'bad pa dang ldan par yid la bya'o//'chad par 'gyur ba'i tshul gyis dran pas shin tu brtan pa dang / shes bzhin gyis shin tu bsrung bas bdag gis rang gi sems rtse gcig pa'i yid du bya ste/ 'di nyid kyi nang du thams cad 'dus pa'i phyir ro/ /de bas na sems bsrung ba nyid brtul zhugs gtso bo yin te/de bor nas brtul zhugs mang po gzhan gyis kyang bdag la ci zhig dgos te/ phan pa cung zad kyang med de/ de dang bral na de la 'bras bu med pa'i phyir ro/ /re zhig byang chub sems dpa'i bslab pa ni 'di yin te/ 'di lta ste sems yongs su sbyang bar bya'o//de ni sems can gyi don thams cad kyi rtsa ba yin pa'i phyir ro/ /de ni 'di ltar chos yang dag par sdud pa las bstan te/ byang chub sems dpa' rnam par gnon pa'i blo gros kyis gsol ba/ chos chos zhes bgyi ba'i chos gang lags pa de ni yul na mi gnas/ phyogs na mi gnas te/ chos rang gi sems la rag las pa ni ma gtogs pas de lta bas na de dag gis rang gi sems shin tu gzung ba dang / legs par mgu ba dang / shin tu mthar gtugs pa dang shin tu dul ba dang shin tu mnyam par brtsams pa dang / shin tu tshar gcod par bya'o/ / de ci'i phyir zhe na/ sems gang na mchis pa de ni yon tan dang nyes pa rnams mchis kyi/ sems ma mchis pa la ni yon tan dang nyes pa rnams ma mchis snyam ste/ de'i phyir byang chub sems dpa' nyis pa rnams las sems bzlog nas yon tan rnams la 'jug ste/ de lta bas na chos ni sems la rag las/byang chub ni chos la rag las zhes bgyi'o zhes so/ /de ltar thams cad du sems la rag las pa nyes par byas nas sems brtan par bya ba'i dpe brjod pa/ ma grangs zhes bya ba la sogs pa gsungs te/ skye bo mnyam par ma bzhag pa'i khrod na yang nye bar gnod pa'i 'jigs pas der brtad pa'i yid kyis bag yod pa 'ga' zhig ji ltar srung ba rma'i bag byed pa bzhin du de bzhin te de ltar bslab pa bsrung bar 'dod pas don med par byis pa'i skye bo'i nang na gnas pa na brtson pas sems kyi rma dus thams cad du bsrung ngo // grags pa ji bzhin du 'dir dper brjod pa yin te/ yang cung zad du yang 'dra ba med par gsungs pa/ rma'i zhes bya ba la sogs pas te/ rma yis byas pa'i sdug bsngal cung zad tsam ni sdug bsngal chung ngu'o/ /de yis skrag pa'ang rma'i bag byed na'ang ste/ gus pas ni lhur blang ba nas so/ /bsdus 'joms ni sems can dmyal bar lhung ba'i sdug bsngal lo/ /stong phrag du mar myong bar 'gyur ba'i ris 'joms pa thams cad du khyab pa'i bsnun pa'i skrag pa yis/ sems kyi rma lta cis mi bsrung ste bsrung bar bya'o zhes skabs kyis 'brel to//yang na bdag gis cis te bsrung bar mi bya zhes sgyur te sbyar bar bya'o/ /yang na byang chub tu sems bskyed pas de ltar yid kyis bsam par bya'o zhes drangs la/ de'i tshe bsrung bar bya'o zhes gdon cing sbyar bar bya'o/ /de ltar gyur pa la yon tan ci zhig yod ce na/ yod pa zhes bya ba la sogs pa gsungs te/ gang gi phyir khang bzangs kyi steng na bud med kyi 'gro ba'i khrod na yid la byed pa 'di lta bus gnas pa na 'dod pa rnams las shin tu bzlog par mi nus pa 'di yin pa de'i phyir/ sdom brtson brten pa zhes bya ba gsungs pa yin te/ yid la byed pa 'di la nges par sems pa'o//nyams mi 'gyur te/ bslab pa bsrung ba'i yid la byed pa 'khrul par mi 'gyur ba'o/ /yang de ltar bya bar 'os pa yin no zhes don 'di la mngon par zhen pa brtan par bya ba bstan pa/ bdag gis zhes bya ba la sogs pa gsungs te/ chos gos dang / bsod snyoms la sogs pa rnyed pa nyams bla zhing ni brlag kyang bla'i'o/ /bdag gi 'dod pa ni ji ltar 'dod pa'o/ /bkur sti ni gus pas stan gding ba dang / zhabs la phyag 'tshal ba la sogs pa'i mchod pa'o/ /lus dang 'tsho ba ste de dag thams cad nyams pa bla zhing gzhan yang ste/bde ba dang / yid bde ba'i rgyu mtshan gang ci yang rung ba de dag nyams su chug gi/ bdag gi sems dge ba ni dus nam du yang nyams par mi bya ba'o/ /yang 'dir gus pa bskyed par bya ba'i phyir bstan bcos mdzad pas sems zhes bya ba la sogs pa gsungs te/thal mo sbyar te gsol ba 'debs/ ci'i don du zhe na/ dran pa dang ni shes bzhin dag ste/ dran pa 'ba' zhig kyang ma yin la/ shes bzhin 'ba' zhig kyang ma yin no zhes pa ste/ rang gi don ni phan tshun du ltos pas so/ /de la dran pa ni 'phags pa gtsug na rin po che'i mdo las bshad de/dran pa gang gis nyon mongs pa thams cad 'byung bar mi 'gyur ba dang / dran pa gang gis bdud kyi las thams cad kyi skabs mi 'byed pa dang / dran pa gang gis lam gol ba'am ngan par mi 'gro ba dang / dran pa sgo ba lta bur gyur pa gang gis sems dang sems las byung ba'i chos mi dge ba thams cad kyi skabs mi 'byed pa 'di ni yang dag pa'i dran pa zhes bya'o zhes so//mdor na dran pa ni 'di yin te/ gnang ba dang bkag pa gnyis ci rigs par dran pa ni dran pa zhes bya ste/ gang gi phyir dran pa dmigs pa ma brjed pa'o zhes bstan pa yin no//shes bzhin yang shes rab kyi pha rol tu phyin pa las gsungs te/ spyod na yang bdag spyod do zhes rab tu shes so/ /'greng na bdag 'greng ngo snyam du rab tu shes so/ /'dug na bdag 'dug go snyam du rab tu shes so/ /nyal na bdag nyal lo snyam du rab tu shes so//de'i lus ji lta ji ltar gnas par 'gyur ba de lta de ltar rab tu shes so/ /de bzhin du sbyar te/ de 'gro ba dang 'ong ba yang shes bzhin du spyod pa yin no/ /lta ba dang rnam par lta ba dang / bskum pa dang / brkyang ba dang / chos gos snam sbyar dang / thang ba dang /lhung bzed dang / chos gos 'chang ba dang / za ba dang / 'thung ba dang / 'cha' ba dang / gnyid dang / snyom pa bsal ba dang / 'ong ba dang / 'gro ba dang / 'greng ba dang / 'dug pa dang / gnyid kyis log pa dang / gnyid kyis ma log pa dang / smra ba dang / mi smra ba dang / nang du yang dag par 'jog pa na shes bzhin du spyod pa yin no//'di nyid nas kyang / lus dang sems kyi gnas skabs la/ /yang nas yang du lta ba gang / /'di nyid kho na mdor bsdus na/ /shes bzhin bsrung ba'i mtshan nyid do/ /zhes 'chad par 'gyur ro/ /gang gis 'di dag bsrung bar bya bar bstan pa 'di dag med na nyes pa ci zhig yod ce na/nad kyis zhes bya ba la sogs pa gsungs te/ nad kyis nus pa nyams pa'i skyes bu ji lta bar las rnams kun la ste/ 'gro ba dang ston mo la sogs pa'i las rnams kun la las su rung bar mi 'gyur ba de bzhin du dran pa dang shes bzhin med pa'i sems kyis bsam gtan dang kha ton la sogs pa'i mtshan nyid de las rnams kun la'o//'di dag bsdoms nas med pa'i nyes pa bstan nas/ re re med par brjod pa'i phyir/ shes bzhin med pa'i zhes bya ba la sogs pa gsungs te/ gang la shes bzhin yod pa ma yin pa de ni shes bzhin med pa ste/sems can de gang la yod pa de la thos pa dang / bsams pa dang / bsgoms pa las byung ba'i shes rab kyis dngos po yongs su shes kyang dran pa la mi gnas so/ /de dge ba thams cad kyi rtsa ba yin no/ /ci dang 'dra ba zhig ce na/ji ltar bum pa glo rdol du kha nas chu blugs pa 'og tu 'gro zhing mi gnas pa bzhin no/ /gzhan yang 'di med pa yi skyon/ /thos ldan zhes bya ba la sogs pa gsungs te/ mang ba ni mang du thos pa'o/ /de bzhin du dad pa dang ldan pa brtson pa lhur len pa ste/ bslab pa la gus par byed pa rnams kyang /shes bzhin med pa'i skyon chags pas ltung ba'i rnyog pa dang bcas par 'gyur te/ lus dang sems kyi spyod pa so sor mi rtog pa'i phyir ro/ /de med pa'i skyon gzhan yang / shes bzhin med ces bya ba la sogs pa gsungs te/ shes bzhin med pa ni shes bzhin dang bral ba'o//nyon mongs pa'i dngos po'i ngo bo ni chom rkun te/ dge ba'i nor 'phrog par byed pa'i phyir ro/ /des dran pa nyams pa'i rjes su 'brang bas bsrung zhing skyong bar 'gyur ba'i dran pa brjed pa'i dngos po'i rjes su 'brangs nas/ phrogs pa ni dge ba'i nor yod pa dang bral ba'o//bsod nams dag ni nye bar bsags kyang ste/ dge ba'i nor rnams bsags par byas nas kyang ngan 'gror gzhol bar 'gyur ro/ /de ci'i phyir zhe na/ de ltar na bstan pa'i don nyid gsal bar byed pa nyon mongs zhes bya ba la sogs pa gsungs te/chom po dang rkun po de dag gi tshogs glags skabs tshol bar byed pa ste/ sha za bzhin du glags skabs kyi lam lta zhing skyon tshol ba la sogs pa zhes bya ba'i don to/ /glags rnyed gyur nas de 'jug pa'i las dang phrad nas dge ba 'phrog cing / de'i phyir 'gro ba bzang po'i srog thob pa 'joms par byed de/dge ba'i brgyags med pa'i phyir ro/ /da ni dran pa'i dbang du byas te gsungs pa/ de bas zhes bya ba la sogs pa la gang gi phyir dran pa med pa'i nyes pa de ltar 'gyur ba de'i phyir te/ 'dir nyes pa 'di mthong nas dran pa dmigs pa ma brjed pa'i mtshan nyid do//yid sgo nas yid kyi khyim gyi 'jug pa'i sgo nas gud du mi gtang zhing ma spang bar rtag tu gzhag par bya'o zhes bya ba'i don to/ /ji ste brgya zhig la bag med pas de de nas song nas de'i tshe song na'ang slar bzlog nas de nye bar gzhag ste/ de nyid du gtad de gzhag par bya'o//ji ltar zhe na/ ngan song ste sems can dmyal ba la sogs pa ngan 'gro'i gnod pa dran par byas shing yid la gzhag la'o/ /de la dran pa bcu gnyis po 'di dag gi 'bras bu med pa'i spyod pa spang ba'i phyir te/ de bzhin gshegs pa'i bka' las mi 'da' bar srung zhing rnam par smin pa la gus par bya ba'i dran pa dang zhes bya ba la sogs pa bslab pa kun las btus pa las rab tu bstan nas te/de nyid nas rnam par phye ste gzung bar bya'o/ /dran pa de yang gus pa drag pos skye'o/ /gus pa yang zhi gnas kyi bdag nyid chen po khong du chud nas lhur blangs pa las skye ste/de dag kyang skabs ji lta ba bzhin du bshad par bya'o/ /kha cig la rnam pa gzhan du yang dran pa skye bar 'gyur te/ de bstan pa ni bla ma dang ni zhes bya ba la sogs pa gsungs te/ slob dpon dang mkhan po dang nye ba'am/ de las gzhan yang rung ste mgu bar bya ba tshangs pa mtshungs par spyod pa dang nye bar ste 'grogs pa'o//de'i rjes su bstan pa 'jigs pa ni des 'jigs pa la'ang ngo / /gus pas ni bya ba rnams la dngos po kun gyis phyogs pa nyid de brnyas pa'i gnyen po'i chos yin no/ /de byed pa ni mkhas pa 'bad pa dang ldan pa'o/ / de'i rjes su bstan pa ni phan pa dang mi phan pa sgrub pa dang dgag pa nges pa rjes su 'dzin pa tshegs chung ngus dran pa skye bar 'gyur ro/ /'di ltar yang gnas na dran pa yid la byed pa mang du gnas par 'gyur ro zhes tshig le'ur byas pa gnyis kyis bstan pa/ sangs rgyas zhes bya ba la sogs pa gsungs pa yin te/sangs rgyas dang byang chub sems dpa' dus kun tu dngos po'i yul mtha' dag thogs pa med pa'i spyan mnga' ba rnams kyi spyan snga na dngos po'i rnam pa thams cad dus kun tu gnas pa yin te/ dngos po thams cad ltar bdag kyang de rnams kyi spyan snga na 'dug pa nyid yin no zhes yid la bzhag la/de bzhin du bdag nyid legs par bsdams shing bsdad do/ /ngo tsha shes gus 'jigs bcas zhes bya ba la/ mi mthun pa'i las la 'jom pa ni ngo tsha shes pa dang / bslab pa la gus pa dang / de las mi 'da' bar 'jigs pa'am/'dir khrel yod pa la sogs pa sangs rgyas dang byang chub sems dpa' rnams la go bar bya'o/ /de ltar gyur na khyad par gzhan yang yod pas na/ de ni zhes bya ba la sogs pa gsungs te/ de ltar gnas pa de la skad cig re re zhing mi 'dod bzhin du sangs rgyas rjes su dran par yang 'gyur ro//shes bzhin du skye ba dang brten pa dag gis yang rgyu dran pa nyid yin no zhes brjod pa/ gang tshe zhes bya ba la sogs pa gsungs te/ gang gi tshe dran pa yid kyi sgo nas nyon mongs pa'i chom rkun gyi tshogs 'jug pa phyir bzlog pa'i don du sgo ba ltar gnas par gyur pa na de'i tshe shes bzhin yang 'bad pa med par 'byung ngo //byung ba yang brten par 'gyur ro/ /de ltar re zhig 'di dag gi rjes su 'gro ba dang ldog pa gang gi yon tan dang skyon brjod nas/ don med pa spang ba'i don du don med pa'i spyod pa spang ba re zhig ces bya ba la sogs pa gsungs te/dang po re zhig 'di 'dra'i sems/ /zhes bya ba nang du bsam par bya'o/ rtag tu dus thams cad du 'di 'dra ba'i bstan pa'i rim pa dang ldan par nye bar gnas par bya ste/ de las gzhan 'bras bu med pa'i spyod pa spang ba'i don du dbang po'i tshogs dang bral bas gzugs la sogs pa'i yul 'bras bu med pa 'dzin pa'i rnam par rtog pa thams cad bsdus la bdag gis gnas par bya'o//ci 'dra bar zhe na/ shing bzhin du zhes gsungs te/ mig la sogs pa'i byed pas stong pa'i phyir ro/ /'di nyid gsal bar byed pa/'bras med ces bya ba la sogs pa la/ rdzi ma gnyis cung zad phye la/ sna'i rtse mor gtad pa'am/ gnya' shing gang tsam du rnam par blta bar bya ste/ dang po rtsom pa na'o/ /rtag tu goms par byed bzhin du ngal ba spang ba'i don du lta ba zhes bya ba la sogs pa gsungs te/lta ba dang sems skyo ba spang ba'i phyir res 'ga' ste bar skabs su phyogs su rnam par lta'o/ /ji ste brgya la 'ga' zhig de dang nye bar 'ongs na de'i tshe de'i 'ongs pa'i zhad tsam rig par byas la/ legs par byon nam zhes smra bas phebs par smra ba'i don du rnam par blta bar bya'o//gzhan du na der de la 'phya bas mi dge ba 'byung bar 'gyur ro/ /lam du 'gro zhing de ltar lta ba na yang gnod pa bsal ba'i don du/ lam sogs zhes bya ba la sogs pa gsungs te/ 'jigs pa'i rgyu rkun mo la sogs pa rig par bya ba'i don du rnam par blta bar bya ba'i rim pa bzhin du'o//gzhan du na lus bsrung bar byas par mi 'gyur ro/ /phyogs thams cad du rnam par lta bar byed pa na rgod pa'i gnod pa spang bar bya ba'i don du bsdad de bya'o/ /rgyab tu rnam par lta ba na legs par log ste kha phyir bltas par 'gyur bas bya'o/ /mnyam par gzhag pa bsrung bar bya ba'i don du/mdun dang zhes bya ba la sogs pa gsungs te/ 'gro ba ni mdun du'o/ /'ong ba ni phyir la ste/ g.yang sa la sogs pa'i gnod pa blta bar bya'o/ /de ltar bstan pa'i rim pa'i zur gyis rang dang gzhan la phan pa dang dgos pa khong du chud par byas na sgrub pa snying por gyur pa yin no// //bam po bdun pa/ da ni shes bzhin gyi bya ba bslab pa'i phyir/ lus kyis zhes bya ba la sogs pa gsungs te/ spyod lam bzhi'i nang nas spyod lam gang yang rung ba zhig la/ lus kyis 'di ltar zhes bya ba ni 'greng bas sam 'dug pas gnas par bya ste/de ma thag tu kha ton la sogs pa'i bya ba'i las brtsams nas yang lus 'di ji lta bur gnas pa yin zhes skabs su rnam par blta bar bya'o/ /spyod lam de nyid la'am/ de ste spyod lam logs shig la'o/ /logs shig pa la yin na yang snga ma bzhin du legs par gnas par bya'o//lus la so sor rtog pa brjod nas sems la so sor rtog pa/ sems kyis zhes bya ba la sogs pa gsungs te/ bdag dang gzhan la phan pa'i mtshan nyid kyi chos la sems pa ni ka chen te/ 'ching ba dag las thar bar byed pa'i rgyu yin pa'i phyir ro/ /de la btags pa yang yang dang yang du brtag par bya ba yin pas/ ci nas zhes bya ba la sogs pa gsungs te/ yang bdag gis yid 'di gang na spyod ces dmigs pa snga ma'am/ dmigs pa bzhin du brtags la/ song bar rtogs na de nas bzlog la de nyid du sbyar bar bya'o//rang gi ngang gis 'bab na ni btang snyoms su bya'o/ /de ltar zhi gnas kyi khur skad cig gcig kyang ji ltar mi 'chor ba de ltar gzung bar bya'o/ /re zhig de dag gis ni tshul khrims ni ting nge 'dzin sgrub par byed pa yin no zhes bstan pa yin no/ / ji skad du zla ba sgron ma'i mdo las/ nyon mongs med pa'i ting 'dzin myur thob ste/ /de ni tshul khrims rnam dag phan yon no/ /zhes gsungs so/ /de bas na ting nge 'dzin gyi rgyur gyur pa'i sbyor ba ji snyed pa gang ci yang rung / bza' ba de dag ni tshul khrims rjes su song ba yin par rig par bya'o//de lta bas na ting nge 'dzin don du gnyer bas dran pa dang shes bzhin gyi ngang tshul can du bya'o/ /de bzhin du tshul khrims don du gnyer bas kyang ting nge 'dzin la nan tan du bya'o/ /ting nge 'dzin yongs su spong ba'i skabs na/ 'jigs dang zhes bya ba la sogs pa gsungs te/'jigs pa ni me'i sreg pa la sogs pa'o/ /de bzhin du dkon mchog gsum la mchod pa la sogs pa ni dga' ston no/ /de bas ches lhag pa'i sems can gyi don la sogs pa'ang rung ste/ de dag byung ba na gal te gnas par mi nus na de'i tshe 'dod pa bzhin du spyod do zhes gnang ba ste/ltung ba dang bcas par mi 'gyur ro zhes bya ba'i don to/ /yang ci'i phyir 'di nges pa med par 'gyur zhe na/ 'di ltar zhes bya ba la sogs pa gsungs te/ gang yang tshul khrims ni sbyin pa bas mchog tu byung ba yin mod kyi/ de lta na yang bslab pa gzhan slob pa'i de ma thag tu phyi nas bslab pa'i gnas la goms pa gsal ba med pa'i phyir/ji zhig ltar dus de srid du de las ldog par byed na'ang ltung ba med pa yin no/ /'di sbyin pa'i dus yin gyi tshul khrims kyi ni ma yin pa ste/ de nyid kyi phyir gsungs pa/ gal te mi nus zhes so/ /de dag tsam nyid kyi dpe brjod pa yin no//ji skad du/ de la bslab pa gcig rdzogs par byed pa bslab pa phyi ma goms par ma byas pas mi nus pa la ltung ba med do zhes bstan to/ /'phags pa blo gros mi zad pa'i mdo las kyang / ji skad du/ sbyin pa'i dus su tshul khrims nye bar bsdus te btang snyoms su bya'o zhes rgya cher gsungs so//de lta bas na lhod par mi bya'o/ /dge ba'i phyogs gang la spyod na yang ting nge 'dzin 'ga' zhig gi gegs su 'gyur ba de blang bar bya ba ma yin pas/ gang zhig bsams te zhes bya ba la sogs pa gsungs te/ rang nyid kyi rigs pa dang lung gis sam dge ba'i bshes gnyen gyi gsung gi nus pa ji lta ba bzhin du nges par bzung nas bsam gtan dang bsam pa la sogs pa las gang cung zad cig brtsams pa der yid gzhol bas dang por de nyid re zhig bsgrub par bya ste/de ma grub bar du yongs su dor nas gzhan brtsam par ni mi bya'o//gal te de ltar ma gyur na ci nyes she na/ de lta na ni zhes bya ba la sogs pa gsungs te/ gang gi phyir de ltar nan tan byas pas thams cad legs par byas par 'gyur gyi de las bzlog pa ni sngar khas blangs pa dang phyis dam bcas pa gnyi gar ma 'brel par 'gyur ro//'jug pa mi brtan pa ni shes bzhin ma yin par rjes su 'jug pas 'phel bar 'gyur ro/ /de lta na'ang 'bras bu med pa spang bar bya'o zhes gsungs pa/ bre mo'i gtam ni zhes bya ba la sogs pa yin te/ 'brel pa med pa rnam pa du ma brjod pa dang gzhan dag gis byas pa la 'jug pa ngo mtshar ba'i dngos po mtha' dag la'am rang gis kyang bya ba de la lta ba dang mnyan pa'i phyir ngag dang sems zhugs pa las bzlog par bya'o//gzhan yang 'bras bu med pa spang bar bya ba'i phyir so sor thar pa las bstan par bya ba spyad par bya'o zhes bya ba ni/don med sa rko zhes bya ba la sogs pa gsungs pa yin te/ sa dang byang bu la sogs pa la sen mo dang / dbyug pa la sogs pa'i ri mo 'dren cing 'bri ba la sogs pa dgos pa med pa byed pa ni ltung bar 'gyur bas/ bcom ldan 'das kyis 'di las bzlog par bya bar bka' bsgo ba dran par byas la rnam par spang bar bya ste/de las 'dir ni 'bras bu rnam par smin pa 'jigs pa'i phyir ro/ /de'i mod la zhes bya ba ni dus der 'gro bar mi bya'o/ /kun nas nyon mongs pa'i spyod pa la shes bzhin du bya bar bslab pa ni gang tshe zhes bya ba la sogs pa'i tshigs su bcad pa bdun gyis bstan pa yin te/gang tshe zhes bya ba la sogs pa la dang por rang gi sems brtags nas gsungs pa ni kun nas nyon mongs pa med pa'i gnas skabs ltar bya ba bstan pa'o/ /de nyid ni chags pa'am zhes bya ba la sogs pas bstan par byed de/gang gi tshe rang gi sems chags pa'am sdang bar mthong ba de'i lag pa dang rkang pa la sogs pa bskyod pa tsam yang mi bya zhing ngag gis kyang brjod par mi bya ste/ gzhan du na des bslang ba'i lus dang ngag gi rnam par rig byed kyang kun nas nyon mongs pa can du 'gyur ro/ /de'i phyir dbang po phyi rol gyi byed pa'i rnam par rtog pa bsdus la de tshe shing bzhin du gnas par byas te/byed pa thams cad dang bral ba'i phyir chos thams cad ni byed pa po med pa'o zhes yid la bzhag la shing bzhin du gnas par bya'o/ /gzhan yang rgod dang zhes gsungs pa ni dam pa'i chos la sogs pa nyan pa la dad pa las kyang rgod pa ste/rnam par g.yeng ba mang ba zhes bya ba'i don to/ /ga zhar bcas pa ni ngag gi tho 'tshams pa la brtson par byed pa ste/ de dag ldan pa'am nga rgyal ni sems khengs pa'o/ /rgyags pa ni rang gi chos la sems mngon par zhen pa ste/de dag dang ldan pa ni de dag dang yang dag par ldan pa'o/ /mtshang 'bru ba ni lus kyi tho 'tshams pa ste/ de dang ldan pas rgod pa'o/ /skyor 'byin ni gya gyu can nam g.yo can no/ /slu sems ni slu bar byed pa'am sgyu can te/ gang gi tshe yid de ltar gyur pa na/ de tshe shing bzhin gnas par bya//zhes bya bar 'bral to/ /bdag la bstod pa ni rang gi yon tan shin tu yang ston pa'o/ /der snang ba ni de ru snang ba ste/ der rnam par brtags pa'i phyir ro/ /gzhan la smod pa ni gzhan tshar gcod pa'am nyes pa bsal bar byed pa ste/ de dang ldan pa'o/ / gshe bcas ni gzhan gyi tshig la smod pa'o/ /'gyed pa ni rtag tu 'thab pa dang rtsod pa'i rgyu mtshan la sems pa ste/ 'dir gnyi ga la de dang bcas par gnas pa zhes tshig bsdus pa yin no/ /de ltar gang gi tshe mthong ba na rang gi yid/ de tshe shing bzhin gnas par bya/ zhes spyir bstan pa dang sbyar ro//grags pa ni snyan pa'o/ /'khor ni bran pho dang bran mo dang las byed pa la sogs pa'o/ /rim gro ni rkang pa 'khru ba dang nyed pa la sogs pa'o/ /'di dag don du gnyer ba ni 'dod pa ste bdag gis sems de dag las shing bzhin du gnas par bya'o/ / gzhan don yal bar 'dor ba ni gzhan gyi don la phyir phyogs pa'o/ /rang don gnyer ba ni rang gi don la mngon par zhen pa'o/ /g.yog 'khor ni slob ma dang nye gnas la sogs pa 'dus pa ste/ 'di dag mngon par 'dod cing 'khor de dag don du gnyer ba'o/ /mi bzod pa ni bzod pa med pa'i ngang tshul lo//le lo ni bya ba la las su mi rung ba yin te snyom las zhes bya ba'i don to/ /'jigs pa ni lus dang 'tsho ba'i 'jigs pa'am 'jigs pa'i rgyu las so/ /spyi brtol ni spyis brtson pa'o/ /mur cor smra ba ni tshig ngan pa can nam rigs pa dang mi rigs pa la ltos pa med par rjod par byed pa'o//rang gi phyogs ni slob ma dang nye gnas dang gnyen dang pha la sogs pa'o/ /zhen pa ni shin tu phyogs su ltung ba dang ldan pa'o/ /da ni phyir bcos pa'i phyogs tsam gsungs pa/ de ltar zhes bya ba la sogs pa ste bstan pa'i rim pas so//kun nas nyon mongs te kun nas nyon mongs pa dang ldan pa'o/ /rang gi sems 'bras bu med pa'i byed pa dang ldan pa shes par byas nas 'jug pa thams cad bkag la nus pa mthu chung bar byas nas tshar gcad par bya zhing zil gyis mnan par bya'o//bstan pa ni ji nas slar yang 'jug par mi 'gyur ba'i chos can no/ /nyon mongs pa'i dgra'i g.yul las rnam par rgyal bar bya ba'i phyir ga dar byas pa'i dpa' bo ste byang chub sems dpa'o/ /gnyen po yis ni gang zhig gang du gnyen por bstan pa ste/ ji ltar 'dod chags pa la sogs pa'i mi sdug pa la sogs pa lta bu'o//des de las bzlog par bya'o zhes bya ba'i don to/ /rtag tu ni dus thams cad du ste gang dang gang gi tshe kun nas nyon mongs pa rtogs pa na'o/ /drag shul can gyis zhus pa las/ byang chub sems dpa' khyim pa'i dbang du byas te gsungs pa/des 'bru'i chang dang sbyar ba'i chang bag med pa'i gnas spang bar bya ste/ de ra ro ba med pa dang / myos pa med pa dang / 'khrul pa med pa dang / tshig ma 'chal ba dang / mi 'char ba dang / mi khengs pa dang / mi rgod pa dang / mi g.yeng ba dang / dran pa nye bar gnas pa dang /shes bzhin dang ldan par bya'o zhes so/ /de nyid las rab tu byung ba'i byang chub sems dpa'i dbang du byas te gsungs pa/ dran pa dang shes bzhin ni mi g.yeng ba'o zhes so/ /de bzhin du 'phags pa de bzhin gshegs pa'i gsang ba'i mdo las bstan te/ rigs kyi bu byang chub sems dpa' ngag ni chags pa'am/ sdang ba'am/ nyon mongs pa can nam/ skad cig gsal bar byas pa'am/ rang gi phyogs bstod pa'i tshig gam gzhan gyi phyogs tshar bcad pa'i tshig gam/ bdag la bstod pa la rjes su chags pa'i tshig gam/ gzhan gyis bstod pa la gnod pa'i tshig gam/ kha 'og tu lus 'khrus par mi byed pa'i tshig gam/ mngon pa'i nga rgyal gyis lung ston pa'i tshig mi 'byin zhes so/ /de ltar 'bras bu med pa'i spyod pa spangs pas/ don med pa spang ba'i phyir lus bsrung ba bstan pa yin no/ / de lta bas na bdag gis tshul khrims la legs par gnas pa dang / mi bskyod pa dang / mi lhod par gyur par bya'o/ /de dag kyang sems mnyam par gzhag pas 'grub par 'gyur ro/ /de'i phyir zhi gnas kyi bdag nyid chen po 'di rtogs nas de lhur blangs te bsgom par bya'o/ /'dis ni bslab pa rnams la gus pa drag por 'gyur ba yin la/des kyang dran pa nye bar gnas te/ dran pa nye bar gnas pas 'bras bu med pa spong zhing de la don med pa phyir 'byung ngo / /de lta bas ni lus bsrung bar 'dod pas rtsa ba dran pa btsal te dran pa nye bar gnas par rtag tu gyur par bya'o//de nyid ni/ de la lus bsrung gang yin na/ /gang zhig don med spang ba'o/ /de kun gang gis 'thob ce na/ /'bras bu med pa'i spyod spangs las/ /de yang rtag tu dran pas 'grub/ /dran pa shin tu gus las 'byung / /gus ni zhi ba che bdag nyid/ /shes par gyur nas brtun pa skye//zhes gsungs pa yin no/ /zhi gnas kyi che ba'i bdag nyid kyang skabs ji lta ba bzhin du 'di las 'chad par 'gyur ro/ /'dir don med pa spang ba'i don du bsdus pa'i don 'di khong du chud par bya'o zhes tshigs su bcad pa gsum gyis bstan pa/ shin tu nges dang zhes bya ba la sogs pa gsungs te/shin tu nges pa ni the tshom dang phyin ci log spangs pa'o/ /rab dang ni rtag tu dga' ba dang yid bde ba mang ba'o/ /brtan pa ni ma brtags pa'o/ /gus pa ni bshad pa nyid yin no/ /zhe sa ni mnyes par bya ba rnams la sems 'dud pa ste/ de dag dang lhan cig 'jug pa'o//ngo mtshar bcas ni snga ma bzhin no/ /'jigs bcas ni 'khrul pa byung bas 'jig rten la 'jigs pa'o/ /zhi ba ni dbang po yang dag par sdom pa'o/ /sems can mgu bar byed pa la brtson pa dang ldan pa dang / skye bo gcig gi 'dod pa gang yin pa de gzhan la bzlog pa yin pas so so'i skye bo'i 'dod pa phan tshun mi mthun pa rnams kyis mi skyo ba ste yid la gcags pa med pa'o//ji ltar zhe na/ brtser ldan te/ 'di ni gtan tshigs kyi tshig yin no/ /gang gi phyir nyon mongs pa skyes pas te rang dbang med pas so/ / 'di zhes pa ni de dag ste byis pa 'di dag gi phan tshun mi mthun pa'i spyod pa'o snyam du shes par byas nas so/ /bdag dang sems can dbang byas shing ni rang dang gzhan la rag las par te dus thams cad du'o/ /ci thams cad du'am zhe na ma yin te/ kha na ma tho med dngos la ste/kha na ma tho ba gnyi gas stong pa rnams la'o/ /ci dang 'dra bar zhe na/ sprul pa bzhin du ste sprul pa byas pa ltar nga rgyal dang bral ba ste/ nga rgyal legs par gzung bar bya ste bdag 'di lta bu yin no snyam du byang chub sems dpa' yid la gzhag par bya'o/ /skye ba yid la byed pa 'di las kyang sems kyi don med pa spangs pas bsrung bar bya'o zhes gsungs pa/ring zhig ces bya ba la sogs pa yin te/ dus shin tu mang ba zhig gis thob pa'i dal ba mchog bstan pa dran pa'i sems kyis yang dang yang du bar med par byas shing brtan par bya'o/ / de lta bur ni brtan pa'i rang bzhin can du'o/ /rab tu mi g.yo ni 'dod pa la sogs pa rnam par rtog pa'i rlung rnams kyis ri'i rgyal po ltar bskyod par mi nus pa'o/ /de ltar tshul khrims dang ting nge 'dzin phan tshun 'phel bar byed pa de dag gis sems kyi las yongs su bsgrub pa yin no/de lta bas na byang chub sems dpa'i bslab pa ni sems yongs su sbyang ba nyid yin no zhes bya ba de dag gnas so/ /des na gang / sems bsrung brtul zhugs ma gtogs pa/ /brtul zhugs mang pos ci zhig bya/ /zhes gsungs te/ de gnas pa yin no/ /yang de nyid gcig tu nges par legs par gzung bar bya ba'i phyir lus la so sor brtags pa/bya rgod ces bya ba la sogs pa gsungs te/ lus la ni rnam pa thams cad du gang yang byed pa med de/ bdag rang nyid la'ang nus pa med pa'i phyir ro/ /gzhan du sems dang bral ba'i lus bya rgod la sogs pa rnams kyis phan tshun kun tu drangs shing glongs kyang bdag nyid bsrung ba'i don du slar bcos pa ci ste mi byed ces 'dri ba'o//nus pa thams cad med pa'i phyir te/ de nyid kyi phyir ni sems yongs su sbyang ba nyid bsgrub par bya ba yin no/ /de yongs su sbyangs nas 'bad pa med par lus yongs su sbyangs pa 'grub ste de ni de la rag las pa'i phyir ro//zhes bstan par 'gyur ro/ /de ltar rnam pa thams cad du mkho ba ma yin pa'i lus la ltos pa dang bcas pa dgag pa/ lus 'di zhes bya ba la sogs pa gsungs te/ kye yid bdag nyid ma yin pa la bdag nyid du khas blangs nas sha dang rus pa'i tshogs lus kyi ming can la ci'i phyir na khyod srung bar byed/ci ste de ltar mi bya zhe na/ gal te khyod dang lus 'di tha dad pa yin na/ de ste 'di god pas khyod la ci zhig god par 'gyur/ sngar nas yun ring por bdag gir byas pas so zhe na/ gsungs pa/ rmongs pa kye bdag gir mi byed pa ste/ khyod rmongs pas 'gyings pa 'di gtsang ma ni dag byed do/ /'di ni mi gtsang ba yin no/ /mi gtsang zhes bya ba 'di gsungs te/ rul pa ni sums pa'i chos so/ /'o na de lta na/ ci gzhan la med pa'i ngang skyon brjod dam zhe na/ 'dir re zhig ces bya ba la sogs pa gsungs te/pags pa'i rang bzhin gyi rim pa'o/ /rang gi blo gros kyi khyad par gyis tha dad phyi zhig pa ni rang gi lus rus pa las byas pa'i dra ba'i 'khrul 'khor las sol cig pa'o/ /shes rab kyi bdag nyid kyis mtshon gyis sha chod la/ de ma thag tu rus pa rnams kyang dum bur so sor tha dad par gyis la rkang la blta bar bya ste/rnam par ltos shig /lus kyi nang gang yin pa 'byung ba chen po bzhi las byung ba/ pha dang ma'i mi gtsang ba nur nur po las byung ba/ sdug bsngal gyi rang bzhin byas pa mi gzo ba'o zhes rgya cher rtogs par bya'o/ / 'di la snying po ci yod ces bya ba ni mkhas pas bsngags pa'am rig pa dang ldan par te/ de ltar bdag nyid kyis brtags par gyis shig /de ltar ni brjod pa'i tshul du'o/ /legs par smras pa yin no zhe na/ da dung du ci'i phyir te khyod da dung yang yon tan thams cad dang bral bar de ltar rigs bzhin du yang lus srung bar byed smros shig /de lta mod kyi/ 'di las cung zad blang bar bya ba yod do zhe na/ bzar mi rung zhes bya ba ste/ mdor na gang zhig yod pa de ni mkho ba ma yin no zhes bya ba'i don te/ de'i phyir mi mkho ba'i lus kyis ci byed/ 'di la chags par mi rigs so zhes bya ba'i don to/ /dgos pa gzhan med pa'i phyir/ 'di ni rigs par blta bar bya'o zhes gsungs pa ni/ nyis na zhes bya ba la sogs pa gsungs pa yin no/ /gang gi phyir las la gang gis kyang lhan cig byed par dngos pos sbyar bar bya ba yin pas na mkho ba ni chags par bya'o zhe na/de lta mod kyi/ 'di la mngon par zhen par mi bya'o zhes/ 'di ltar zhes bya ba la sogs pa gsungs te/ 'chi bdag snying brtse ba med pas khyod kyi lus phrogs te zhes bya ba stobs kyis khyer te bya rgod rnams la byin pa na/de'i tshe na yang 'ga' yang slar 'chos par mi 'gyur ro snyam du dgongs pa yin no/ /de ltar gyur pa yin mod kyi/ zas dang bgo ba la sogs pa tsam gyis bskyang bar bya'o snyam na/ 'dir/ bran g.yog ces bya ba la sogs pa gsungs te/ gal te bran g.yog la sogs pa bkol bar bya ba yin du zin na/de lta mod kyi/ de la 'khor du mi btub pa'i rang bzhin mdzangs pas shes par byed nas 'jug par byed do/ /de bzhin du skabs su bab par yang de'i chos can yin na/ kye yid khyod bsam pa gang gi yo byad zad zad du sha thang gso/ 'o na ci de la rnam pa thams cad du skabs mi dbye 'am zhe na/ma yin te/ 'di la zhes bya ba la sogs pa gsungs te/ gla rngan ni las kyi rin no/ /de snyed tsam lus 'gro ba'i tshul can 'di la byin la ste/ las la mkho bar bya ba'i phyir ro/ /kye yid rang gi dgos pa sgrubs shig / ci'i phyir 'di la nyid kyis bsags pa ci'i phyir 'di la sbyin par mi bya zhe na/ gang gi phyir gang cung zad byed pas sgrub pa las byed pa de la sbyin par bya'o zhes bya ba'i rigs pa ni yod pa ma yin te/ de bas na 'jug pa dang zlog pa'i rgyur lus la gru'i blor bzhag nas nye bar rton pa tsam byin nas/sems can gyi don bsgrub cing rdzogs par bya ba'i phyir 'dod pa la rag las pa'i lus su gyur cig pa ste/ kye yid ces skabs yin par sbyar bar bya'o/ /de ltar lus so sor brtags nas de'i rang bzhin mkho ba yang dpyad de/ lus kyi dgos pa nges pa'i nye bar bsdu ba ni/de ltar zhes bya ba la sogs pa gsungs pa yin te/ bstan pa'i tshul du'o/ /bdag gi sems dang lus kyi mtshan nyid rag las par gyis te'o/ /dus thams cad du dang ba'i bzhin du gyis shig pa ste/ smin ma dpral bar bsdus la gnyer ba ste/ dang ba nyams par byas pa thang zhig pa'o//de bzhin du gzhan gyis sngar ma bskul ba nyid du legs par 'ongs sam zhes bya ba la sogs pa'i ngag gis phebs par smra ba'i ngang tshul dang / rgyu med par sems can thams cad kyi gnyen du gyur par gyis shig pa'o/ /de ltar yang don med pa spangs pa'i phyir bslab pa'i bya ba/khri la sogs pa zhes bya ba la sogs pa gsungs pa yin te/ bab col du rtab rtab por dgos pa med par lag pa dang dbyug pa la sogs pas sgo glegs kyang brdung bar mi bya'o/ /mdor na rtag tu sgra med par bcom bskyung ba la mngon par dga' bar gyur par bya'o//de ltar byas pa la yon tan ci yod ce na/ chu skyar zhes bya ba la sogs pa gsungs te/ de dag thams cad kyis bcom bskyungs shing sgra med pa dang mi rgod par gnas pas brjod par 'dod pa'i don 'thob pa de bzhin du brtul zhugs can gyis kyang ting nge 'dzin gyi tsher ma spangs la gnas par bya'o//'di ltar bslab par bya'o/ /gzhan la zhes bya ba la sogs pa gsungs te/ mdor na 'gyod pa sel ba dang / gdams ngag dang / rjes su bstan pa la gus pa can 'dul ba la sogs pa mkhas pa gsol ba ma btab par phan par 'dod cing phan 'dogs pa'i tshig ni spyi bos blang bar bya ste/de dag la sems sun dbyung bar mi bya ste khyad du gsad par yang mi bya'o snyam du dgongs so/ /sems can thams cad la bla mar gus pa'i blos legs par dpyad par bya'o snyam pas thams cad la thams cad bslab par bya'o//phrag dog gi dri ma rab tu bkru ba'i phyir/ legs par gsungs pa zhes bya ba gsungs pa la/ gzhan dag la yon tan dang ldan par brjod pa la de mgu bar bya ba'i phyir legs so legs so 'di ni bzang ngo zhes bya ba'i sgra lhag pa'i bsam pas brjod par bya'o//dge ba'i las byed pa dag mthong na yang legs par byas so/ /skal ba dang ldan pa'o/ /legs par bya ba'i las byed pa yin no zhes bya ba la sogs pa'i bstod pa brjod pa rnams kyis spro ba bskyed par bya'o/ /kha gsag tu dgos pa bzlog pa'i don du/lkog na zhes bya ba la sogs pa gsungs te/ gzhan la yon tan yod par gyur pa yin na'ang lkog tu brjod par bya ste/ mngon sum du ni ma yin no/ /gzhan du na kha cig kha gsag yin snyam par 'gyur ro/ /gzhan gyis de'i mngon sum du gzhan gyi yon tan smra bar byed pa na/de dang mthun par smra bar byed pas de'i mngon sum du brjod par bya'o/ /gzhan du na 'di de la ma dga'o snyam nas pha rol rang gi sems sun 'byin par byed do/ /rang gi yon tan la yon tan gyi phyogs su lhung bas dang ba 'ga' zhig gis mngon sum dang lkog tu grags par byed pa na sems kyi khengs pa bzlog cing yon tan rjod par byed pa de la yon tan la rjes su chags pa yin par yid la bya'o//gzhan gyi yon tan la mi bzod pa spang ba gal te zhes bya ba la sogs pa gsungs te/ sems can tha ma dang 'bring dang phul du byung ba thams cad kyi'am/yang na brtson pa'o/ /sdug bsngal yongs su spong bas dga' phyir te/ yongs su ngal ba'i rtsom pa thams cad kyis ni dga' ba nyid bskyed par bya'o zhes bya ba'i don te/ dga' ba de yang nor btang bas kyang rnyed par dka' ste rnyed par 'gyur ba ma yin pa'o//'dir ni 'bad pa med par grub cing nye bar gnas pa yin na ci'i phyir 'dor bar byed snyam du shes par byas la dga' ba'i bde ba la longs spyad par bya ste nyams su myong bar bya'o/ /ci ste gzhan gyis 'bad pas bsgrubs pa'i yon tan rnams kyis bskyed pa la ma yin na/bu sdug pa'i yon tan srung ba ni mi rigs so snyam du bsgoms la gzhan gyi yon tan thos pa las sems rtsub par 'gyur ba spang bar bya'o/ /'di la sogs pa yin pas bdag la zhes bya ba la sogs pa gsungs te/ don 'di la 'jug par 'gyur ba bdag la 'jig rten 'dir zad pa'i zhad tsam yang 'byung ba ma yin la bsags pa ni yod do zhes ston par byed pa pha rol du'ang bde ba che ste/gzhan gyi yon tan la mngon par dga' ba'i phyir ro/ /de ltar mi byed pa la 'grib pa 'jig rten gnyi gar yang sdug bsngal ba mthong ste/ gzhan gyi yon tan ma bzod pa'i phyir ro/ /de bas na sdig pa thams cad yongs su spangs te/ rigs pa'i las bya ba la bslab par bya'o zhes gsungs pa ni/ smra na zhes bya ba la sogs pa yin te/ kha na ma tho ba thams cad las rnam par grol ba'i phyir yid phebs pa'o/ / rim par rnam par gnas pa'i tshig dang / the tshom med pa'i don dang / yid tshim par byed pa dang / mnyan na tshim par byed pa dang / snying rje'i ro'i rgyu mthun pa las byung ba dang / 'dod chags la sogs pa rgyu ma yin pa dang / 'jam pa ni rtsub pa'i tshig spangs pa dang / ran pa'i tshig ni sgra ji tsam gyis go bar bya ba rtogs par 'gyur ba ste/de las gzhan pa yang ma yin/ ha cang lhug pa yang ma yin par brjod par bya'o/ /drang por lta ba ni yon po ma yin zhing gya gyu can ma yin pa ste/ mchog tu dga' ba'i ro'i khur gyis dud par gyur pa'i mig gis skom pa chu grang mo mchog tu tshim par byed pa legs par 'thung ba bzhin du sems can rnams la rnam par blta bar bya ste/chags pas ma yin/ sdang bas ma yin/ rmongs pas ma yin te/ de dag ni mchog tu phan 'dogs par byed pa yin no/ /ci'i phyir zhe na/ gang gi phyir sems can de dag la brten nas rnyed par dka' ba'i sangs rgyas nyid 'thob par bdag 'gyur ba ste skye bar 'gyur ro//de ltar gnas pa na deng sang nyid nas kyang sems can gyi don nus pa nyid yin te/ gang / kun du mi rgod 'jam pa dang / /ran cing mnyan par smra ba yis/ /skal can skye bo 'dun par 'gyur//gzung bar 'os pa'ang skye bar 'gyur/ /zhes gsungs pa yin te/ de dag ni byang chub sems dpa'i chos la yang dag par sdud pa yin no/ /de ltar mi byed na ci nyes she na/ de ni gzung 'os ma yin na/ 'jig rten rgyal ba'i myu gu brnyas//thal bas g.yogs pa'i me bzhin du/ /sems can dmyal la sogs par bsreg /ces so/ /de lta bas na sems can mgu bar bya ba nyid byang chub sems dpa'i las yin no/ /phan 'dogs pa'i zhing ni bsod nams 'byung ba'i rgyu thun mong ma yin pa yin pas de'i zhar la 'ongs pa gzhan yang bstan pa/rtag tu zhes bya ba la sogs pa gsungs te/ mngon par zhen pa las byung ba ni yi dam du byas pa'i dang ba drag pos bskyed pa'o/ /gnyen po'i phyogs kyi nyon mongs pa'i gnyen po stong pa nyid la sogs pa bsgoms pa las byung ba'o//yon tan gyi zhing ni sangs rgyas dang byang chub sems dpa' la sogs pa'o/ /phan 'dogs pa'i zhing ni pha ma la sogs pa'o/ /sdug bsngal ba'i zhing ni nad pa la sogs pa ste/ de dag la nyung ngu zhig byas pas kyang dge ba tshad med pa'i rgyu skye bar 'gyur ro//byang chub sems dpa' rnams kyis te 'di yang goms par bya ba yin no zhes gsungs pa/ mkhas shing zhes bya ba la sogs pa yin te/ thams cad du spyod pa sgrin pa'o/ /ldang dang ldan pa ni le lo spangs pa'i phyir te brtson 'grus dang ldan par gyur pa'o//de nyid kyi phyir bdag nyid kyis thams cad bya ba ste/ las 'ga' la yang gzhan la ltos pa med par bya'o zhes pa 'di nyid skabs dbye bar zhes bya ba la sogs par bstan pa yin no/ /pha rol tu phyin pa goms par byed pa na don med pa spang bar bya ba'i phyir mthar gyis bya ba sbyin pa'i zhes bya ba la sogs pa gsungs te/gong nas gong du ni sbyin pa bas tshul khrims khyad zhugs la/ tshul khrims pas bzod pa'o zhes bya ba la sogs pa'o/ /de'i phyir pha rol tu phyin pa gzhan gyi rgyur gong ma mi btang ste/ de dang 'gal bas mi bsten snyam du dgongs pa'o/ /ci rnam pa thams cad du 'am ma yin zhe na/ spyod pa'i zhes gsungs te/ byang chub sems dpa' rnams kyi spyod pa bslab pa sdom pa mtshan nyid gang yin pa de nyid ni dge ba'i chu bsrung ba'i ched du chu lon byas pa'o/ /de bas na las gzhan du zhes bya ba ni ma gtogs pa ste/de ji ltar mi nyams par zhe na/ bya ba'i don to/ /de bas tshogs bsags par 'dod pa snying rje gzhan gyi dbang du gyur pas thams cad bya bar gsungs pa yin no zhes brjod pa de ltar zhes bya ba la sogs pa gsungs te/ de ltar bla na med pa shes par byas la sems can rnams kyi phan pa dang bde ba bsgrub par bya ba'i phyir/rtag tu brtson 'grus brtsams par 'gyur bar bya'o/ /don bkag pa la 'jug pa dag ji ltar na ltung bar bcas pa ma yin zhe na/ 'ga' zhig bkag pa yang bya bar 'os pa bcom ldan 'das kyis gnang ste/bcom ldan 'das kyis bstan pa la nges par 'byung ba dang bcas pa yin no/ /de yang thams cad la ma yin gyi/ 'on kyang thugs rje mnga' ba ste thugs rje rab kyi mthar phyin pa la 'jug pa'i phyir ro/ /de'i gzhan dbang du gyur cing gzhan gyi don la ro gcig pa can rang gi dgos pa la phyir phyogs par blta ste/de ltar shes rab dang snying rje las byung bas gzhan gyi don la 'jug pa thabs mkhas pas rab tu 'jug par byed pa la ni ltung ba med do/ /'dir yang nye ba 'khor gyis zhus pa las ltung ba dang ltung ba med pa'i rnam par 'byed par rig par bya'o//de bzhin du thabs la mkhas pa'i mdo las/ bram ze'i khye'u skar ma'i dbang du byas te ltung ba dang ltung bar mi 'gyur ba'i cha shes par bya'o/ /'di ni bdag lus bsrung ba ste sman dang gos la sogs pa rnams kyis zhes bya ba de dag bstan par bya ba'i phyir/log par ltung dang zhes bya ba la sogs pa gsungs te/ sman dang gos la sogs pas bdag gi lus yongs su bskyang bar bya ste gzhan gyi don la mkho ba'i phyir ro/ /ji skad du sngar bstan pa lta bu ste/ de la sman ni rnam pa gnyis te/ rtag tu bya ba'i sman dang / na ba'i gsos sman no/ /de la rtag tu bya ba'i sman ni zan la sogs pa'o/ /zas de ni don du spyod yul du spyod pa grong du 'jug pa na ji skad du bstan pa'i bslab pa la dran pa gzhag ste rgyu bar bya'o/ /de nas bsod snyoms rnyed pa las cha bzhir bgos la/ log par ltung bar gyur pa dang / mgon med pa dang brtul zhugs la gnas pa la legs par bgo bar bya ste/bgo skal gcig ni log par ltung ba rnams la/ gnyis pa ni mgon med pa rnams la/ gsum pa ni tshangs pa mtshungs par spyod pa rnams la byin nas/ bzhi pa bdag nyid bza' bar bya'o//de za ba na 'dod chags med par bza' ste/ chags par ma yin/ brkam par ma yin/ zhen par ma yin gyi/ gzhan du na ji tsam du lus 'di gnas par bya ba dang / bskyang bar bya ba'i phyir ran pa tsam du bza'o/ /ji ltar ha cang yang nyams dma' ba dang / ha cang yang lus lci bar mi 'gyur ba de ltar bza'o//de ci'i phyir zhe na/ ha cang yang nyams dmas na ni dge ba'i phyogs la rgyab kyis phyogs par 'gyur ro/ /lus ha cang yang lcis na gnyid kyis non par 'gyur ro/ /des bsod snyoms de zos nas dge ba'i phyogs la mngon du phyogs par bya'o zhes 'phags pa dkon mchog sprin las gsungs so//'phags pa rin po che'i phung po las kyang zas za ba na sems 'di ltar bskyed par bya ste/ lus 'di la srin bu'i rigs stong phrag brgyad cu yod pa de dag de'i mthus bde bar gnas par gyur cig/ de lta na ni 'di dag zang zing gis bsdu bar bya'o//byang chub thob nas ni chos kyis bsdu bar bya'o zhes rgya cher 'byung ngo / /yang de nyid las/ 'od srungs ngas gnyis la dad pas byin pa gnang ste/ gnyis gang zhe na/ rigs pa dang stong pa'o zhes so/ /phyogs 'dis longs spyod thams cad sems can thams cad kyi don du byin gyis brlab par bya'o//gzhan du na bdag nyid la chags pas longs spyod pa las ni nyon mongs pa can gyi ltung ba 'byung bar 'gyur ro/ /ji skad du zla ba'i sgron ma'i mdo las/ de dag kha zas ro zhim bsod pa dag /rnyed nas rnal 'byor mi brtson za zhing 'thung //de dag la ni zas de dug par 'gyur/ /ba glang phru gu pad rtsa ma bkrus bzhin/ /zhes gsungs pa lta bu ste/ de dag rgya cher ni bslab pa kun las btus par blta bar bya'o/ /bza' ba dang btung ba ni thun tshod du bya ba dang / nyin zhag tu bya ba dang ji srid du 'tsho ba'i bar du zhes bya ba ste rnam pa gsum mo//de dag kyang dge slong gi 'dul bar bstan pas de nyid las khong du chud par bya'o/ /gos la sogs pa lus bsrung ba chos gos gsum ma gtogs par sbyin zhes bya ba la sogs pa gsungs te/ gal te byang chub sems dpa' la lhung bzed dang chos gos slong ba 'ga' zhig 'ongs na/des shin tu gtong bar mi bya ste/ 'on kyang bcom ldan 'das kyis gnang ba gang yin pa dge sbyong la rung ba chos gos gsum po de las lhag pa gang yin pa ni slong ba la sbyin par bya ste/ gzhan du ni ma yin no//byang chub sems dpa'i so sor thar pa las gsungs pa/ yang gal te la la zhig 'ongs nas lhung bzed dang chos gos slong ba na/ gal te de la sangs rgyas kyis gnang ba'i chos gos gsum las lhag pa zhig yod na ji lta ba bzhin du btang zhing sbyin par bya'o/ /gal te de la chos gos gsum las nyung bar gyur na gang la brten nas tshangs par spyod pa la gnas pa de ni yongs su gtong bar mi bya'o//de ci'i phyir zhe na/ de bzhin gshegs pas chos gos gsum gtong bar mi bya'o zhes gsungs pa yin no/ /shA ri'i bu gal te byang chub sems dpa' chos gos gsum yongs su btang nas slong ba po la gtso bor byed na des ni 'dod pa chung ba bsten pa ma yin par 'gyur ro zhes ha cang btang ba bkag pa'i phyir ro//yang bdag bsrung ba bstan par bya ba'i phyir/ dam pa'i chos ni zhes bya ba la sogs pa gsungs te/ dam pa ste skyes bu dam pa byang chub sems dpa' rnams kyi 'am/dam pa'i chos te gzhan la phan pa dang bde ba 'jig rten pa dang 'jig rten las 'das pa bsgrub pa ste/ de bstan pa'i lus la rgyu mtshan cung zad kyi don ched du gzir bar mi bya ste/ gzhan du ni don chen po'i phung po nyams par 'gyur ro//de'i phyir 'di dag ni snga ma'i gtan tshigs kyi tshig yin no/ /ci'i phyir de ltar zhe na/ gang gi phyir shin tu 'jam pa'i brtson pa 'di nyid 'phel bas myur du sems can thams cad la phan pa dang bde ba bsgrub par nus par 'gyur ba yin no/ /gang gi phyir de bas na rang gi lus dang mgo sbyin pa la sogs pa mi bya'o zhes bkag go//gang gi tshe zhe na/ mdza' ba dang mi mdza' ba dang cig shos dang skye bo phongs pa thams cad la thun mong du 'jug pa snying rje'i sems ma dag pa na'o/ /brtson 'grus ha cang brtsams na yang bdag dang gzhan la phan pa'i don la gnod par 'gyur ba yin no//bdag dang gzhan la mnyam pa'am lhag par 'jug pa'i bsam pa can la ni ma bkag ste/ gang de bzhin du bdag dang gzhan gyi byang chub kyi phyogs dang thos pa la sogs pa'i bar chad byed pa la gtong ba dang mi gtong ba mi bya'o/ /sems can gyi don la nus pa lhag pa'am nus pa mnyam pa dang /byang chub sems dpa' lhag pa'am mnyam pa'i dge ba'i bar chod byed pa la gtong ba dang mi gtong ba mi bya'o zhes gsungs te grub pa yin no/ /'di nyid la dgongs nas byang chub sems dpa'i so sor thar pa las bshad de/ shA ri'i bu byang chub sems dpa' khyim gyi gnas nas mngon par 'byung ba byang chub kyi yan lag la mngon par brtson pa des ji ltar sbyin pa sbyin par bya ba gang sbyin par bya/ji tsam zhig sbyin par bya de bzhin du sbyar ro/ /chos sbyin par byed pa dang chos kyi sbyin bdag tu bya'o/ /shA ri'i bu byang chub sems dpa' khyim pa gang zhig gis sangs rgyas kyi zhing gang gA'i klung gi bye ma snyed rin po che sna bdun gyis yongs su bkang ste/de bzhin gshegs pa dgra bcom pa yang dag par rdzogs pa'i sangs rgyas rnams la dbul ba phul ba bas/ shA ri'i bu rab tu byung bar gyur pa'i byang chub sems dpa' gang zhig tshig bzhi pa'i tshigs su bcad pa gcig bstan na 'di ni de bas ches bsod nams mang du bskyed de/shA ri'i bu de bzhin gshegs pas rab tu byung bas zang zing gi sbyin pa bya bar ma gnang ngo / /de bzhin du shA ri'i bu gang gis lhung bzed du 'ongs pa lhung bzed du chud pa'i rnyed pa chos dang mthun pa chos kyis rnyed par gyur na des tshangs pa mtshungs par spyod pa rnams dang lhan cig tu thun mong du bza' bar bya'o zhes so//de nyid du gsungs pa/ shA ri'i bu khyim gyi gnas nas mngon par ma byung ba gang yin pa des ni chos kun nas bsten par bya'o//des de la brtson par bya'o zhes so/ /gzhan du na sems can gcig gi don bsdu ba'i phyir sems can gyi tshogs chen po dang sems can des kyang byang chub sems dpa'i bsam pa yongs su sbyong ba'i bar chad byas pas don chen po nyams par byas par 'gyur ro/ /thabs la mkhas pa 'dis gnas na byang chub kyi lam la nyams par mi 'gyur ro//'dir dgongs pa ni 'di yin te/ sngon du lus sems can thams cad la byin mod kyi/ 'on kyang dus ma yin par longs spyod pa las bsrung bar bya ba 'ba' zhig yin te/ des na ser sna'i go skabs kyang med cing dam bcas pa'i don las nyams pa yang med do//gang / sman shing ljon pa blta na sdug ces pa'i/ /rtsa ba la sogs spyad 'os sa bon ltar/ /rdzogs sangs rgyas kyi sman shing de bzhin du/ /byis pa dus min spyod las legs bsrung bya/ /zhes gsungs pa'o/ / sems can gyi bsam pa bsrung ba las kyang bdag bsrung bar bya'o zhes bstan pa ni/ ma gus pa la zhes bya ba la sogs pa yin te/ bcom ldan 'das kyi chos lha dang mi la sogs pas mchod pa gus par mi byed pa la chos bshad na des na lha la sogs pa rnams 'phya bar 'gyur te/de dag bcom ldan 'das kyis bkag pa yin pas de'i bka' las 'da' ba ni ltung ba dang bcas par 'gyur ro/ /ras la sogs pas mgo bo bcings pa la ma yin te/ bcas pa'i sgra ni gsum ka dang yang 'brel to/ /de bzhin du mchod phyir thogs pas mgo bo dkris pa la yang ma yin no//mi na bzhin du zhes bya bas ni re re la sbyar bar bya'o/ /na ba la ni ltung ba med do/ /de dag ni nye bar mtshon pa yin te/ nyal ba dang 'dug pa la 'greng bas ma yin zhing / nyal ba la 'dug pas ma yin la/ 'dug pa la stan med pas kyang ma yin te/ lam gol ba nas 'gro bas lam nas 'gro ba la ma yin no//mdun nas 'gro ba la rgyab nas 'gro bas ma yin te/ rgyan dang ldan pa la sogs pa'ang ma yin par blta bar bya'o/ /don med pa spang bar bya ba'i phyir rtsa ba'i ltung ba'i rgyu 'di yang mi bya'o zhes bstan pa/ dman la zhes bya ba la sogs pa yin la/zab mo ni yid gzhungs pa ma yin pas gting mi dpogs pa'i phyir ro/ /rgya che ba ni rab kyi mthar thug pa'i phyir ro/ /de 'dra ba'i chos kyang dman pa la ni blo legs par ma sbyangs pa'am/ dman pa la mos pa rnams la ste mi bshad do zhes skabs su bab pas sbyar bar bya'o//bud med la gcig pu dben par song ste chos mi bshad mi smra ste/ bshad na ltung ba dang bcas par 'gyur ro/ gal te skyes pa yod na nyes pa med do/ /nyan thos kyi theg pa bshad pa'am/ theg pa chen po bshad pa'i chos rnams la sems dad pa la sogs pas mnyan par bya ste/gzhan du na dam pa'i chos spong bar 'gyur ro/ /sems can zab mo dang rgya che ba'i chos kyi snod du rgyu mtshan gyis shes nas nyan thos la sogs pa'i chos la gzhug par mi bya'o/ /sdom pa'i bslab pa'i spyod par bya bar 'os pa rnams dor nas mdo sde la sogs pa bklags pa nyid kyis khyod dag par 'gyur ro zhes chos 'dod pa la bstan par mi bya'o// //bam po brgyad pa/ yang 'dir gsungs pa/ gzhan yang don med pa ni dkon mchog brtsegs pa las gsungs pa mthong ste/ sems can yongs su smin par ma byas pa rnams la yid rton te ston pa byang chub sems dpa'i 'khrul pa dang /sems can snod du ma gyur pa rnams la sangs rgyas kyi chos rgya chen po ston pa byang chub sems dpa'i 'khrul pa dang / rgya chen po la mos pa'i sems can rnams la theg pa dman pa ston pa byang chub sems dpa'i 'khrul pa zhes so//'phags pa chos thams cad rnam par 'thag pa thams cad bsdus pa las kyang don med phra mo gsungs te/ 'jam dpal dam pa'i chos spong ba'i las kyi sgrib pa ni shin tu phra'o/ /'jam dpal gang la la zhig de bzhin gshegs pas gsungs pa'i chos la la ni bzang bar 'du shes par byed/la la ni ngan par 'du shes na de dam pa'i chos spong ba'o/ /gang 'di ni rigs pa'o 'di ni mi rigs pa'o zhes smra ba des dam pa'i chos spangs pas de bzhin gshegs pa la skur pa 'debs pa yin/ dge 'dun la ngan du brjod pa yin no zhes rgya cher ro//'phags pa nam mkha'i snying po'i mdo las kyang / rtsa ba'i ltung ba'i skabs su gsungs te/ gzhan yang byang chub sems dpa' las dang po pas kha cig la 'di skad du/ khyod kyis so sor thar pa dang 'dul ba'i tshul khrims la legs par bslabs te/khyod myur du bla na med pa yang dag par rdzogs pa'i byang chub tu sems bskyed pas ci zhig bya/ theg pa chen po lhogs shig dang / des na nyon mongs pa'i rkyen gyis lus dang ngag dang yid rnams kyis mi dge ba'i las gang bsgrubs pa de dag rnam par smin par mi 'gyur bar dag par 'gyur ro zhes smra ba 'di ni byang chub sems dpa' las dang po pa'i rtsa ba'i ltung ba gsum pa ste/gong du ji skad smos pa'i bar du'o zhes so/ /de'i phyir 'di yang so sor thar pa las bkag pas spyod par mi bya'o zhes so/ /shing zhes bya ba la sogs pa gsungs pa yin te/mchil ma ni bad kan no/ /dor bar bya ba ni gzhag par mi bya ba'o/ /longs spyod pa'i chu dang thang ni longs spyod par bya ba ste/ gci ba dang phyi sa la sogs pa yang smad pa'o/ /'dir yang lha la sogs pa 'phyo bas bsod nams ma yin pa 'byung ngo //kha bkang ba ni kha gang bar byas pa ste/ kham chen por bcad nas so/ /sgra bcas ni cag cag la sogs pa'i sgra dang ngo / /kha cher phye ba ste/ rkang pa brkyang ba ni khri la sogs pa la 'dug pa nas sa la sogs pa la rkang pa brkyang ste 'dug par mi bya'o/ /dpung pa gnyi ga yang mnyam pa ste dus gcig tu mi mnye'o//rim gyis mnye ba la ni nyes pa med do/ /rkyen yod pas gcig pu ste/ gnyis pa med par gzhan gyis bud med la sogs pa dang ste bzhon pa la sogs par gnas par mi bya'o/ /'dir 'di ni khyim pa dang rab tu byung ba gnyi ga'i thun mong yin pas gzhan gyi zhes smos pa yin no//mdor bsdus nas bstan pa ni/ 'jig rten zhes bya ba la sogs pa gsungs te/ 'jig rten rnams kyi dang ba skyed par byed pa ma yin pa gang yin pa de thams cad bstan bcos sam tha snyad bltas shing mkhas pa la dris nas spang bar bya'o zhes/de dag ni 'dis bstan pa yin no/ /mthong ba yang ni gang gnod pa byed pa'i rnam pa de lta bu de spang bar bya ste ltung bar 'gyur ba yin no/ /gang / de phyir rgyal ba'i sdom pa'i mdor/ /gang gis sems can ma dad gyur/ /de ni bsgrims te rnam spang zhes//dkon mchog sprin las bka' stsal to/ /ji skad du byang chub sems dpa'i legs par spyod pa de gang zhe na/ 'dir ji tsam du byang chub sems dpa' gnas dma' ba na dus ma yin par ma yin/ dus ma yin par smra ba ma yin/ dus mi shes pa ma yin/ yul mi shes pa ma yin/rgyu gang las de'i thad du sems can ma dad pa smra ba ni de sems can thams cad rjes su bsrung ba dang / bdag gi byang chub kyi tshogs yongs su rdzogs par bya ba'i don du spyod lam phun sum tshogs shing 'jam par smra ba dang / dal bus smra ba dang / 'du 'dzi mi mang ba dang / rab tu dben pa la mngon par phyogs pa dang /bzhin gyi mdangs rab tu dang ba yin no zhes gsungs pa lta bu'o/ /byang chub sems dpas byang chub sems dpa' 'ga' la yang khyad du gsad par mi bya'o zhes gsungs pa/ sor mos zhes bya ba ni mdzub mo la sogs pa'i sor mo gcig gis ci yang bstan par mi bya ste/'on kyang kun gyis kyang ste lag pa g.yas pa mtha' dag gis bya'i/ lag pa g.yon pas ni gus pa ma yin pa'i dngos po gzhan la re zhig zhog /lam yang bstan par mi bya'o zhes 'jig rten la ma dad pa spang ba'i phyir/ lag pas shas cher zhes bya ba la sogs pa la/dgos pa chung ngu la lag pa brten te 'ga' zhig la bod par mi bya'o/ /shin tu gal che ba la nyes pa med do/ /se gol gtogs pa la sogs pa'i sgra bya ste/ de mi byed na mnyam par ma bzhag pa dang spyod pa ma bsdams par 'gyur ro/ /de dag gis ni rgod pa spang ba yang bstan pa yin no//des nyal ba yongs su brtag pa ni 'di ltar yongs su brtag par bya'o zhes bstan pa mgon po zhes bya ba la sogs pa gsungs te/ bcom ldan 'das mya ngan las 'das pa chen po gzims pa bzhin nyal ba brtag par bya'o/ /mngon par 'dod pa'i phyogs su mgo bstan la glo g.yas pa phab ste rkang pa'i steng du rkang pa bzhag la/lag pa g.yas pa sngas su byas nas g.yon pa'ang brkyang ste byin pa'i steng du gzhag la chos gos kyis lus legs par g.yogs pa/ dran pa dang shes bzhin dang ldan pas ldang ba'i 'du shes dang snang ba'i 'du shes kyis nyal bar byed de/sems gnyid kyis non pa ma yin pa dang / gnyid kyi bde ba myong bar mi byed pa dang / ma nyes pa'i bde ba yang ma yin te/ gzhan du na ji tsam du 'byung ba chen po rnams gnas pa dang 'tsho bar bya ba'i phyir ro/ /myur du ldang ba ni skyen par ldang bar bya ba'o//bya rmyangs dang / lus gcu ba dang le los nyams pas gnas par mi bya ste/ de dag thams cad kyang snga nas so/ /gzhan yang 'di dag mdor bsdus te bstan pa/ byang chub ces bya ba la sogs pa gsungs te/ bslab par bya ba tshad med cing grangs med pa byang chub sems dpa'i so sor thar pa la sogs pa las rab tu bstan pa de dag bsdus pa'i tshul dang po nyid du sems sbyang ba nyid kyi spyod pa nges par gdon mi za bar spyad par bya'o//ltung ba spyir sbyong ba/ nyin dang zhes bya ba la sogs pa gsungs te/ nyin lan gsum mtshan lan gsum du phung po gsum pa ste/phung po gsum po rnams ni sdig pa bshags pa dang / bsod nams la rjes su yi rang ba dang / byang chub tu bsngo ba rnams kyis mdor bsdus pa'i phung po gsum pa rab tu gdon par bya'o/ /lhag ma ni rtsa ba las gzhan pa'am/ yang na bsams bzhin du byas pa gang slar bcos pa ste/de las gzhan pa'am/ dran pa brjed ngas pa'am/ shes bzhin ma yin pas byas pa de dag rab tu zhi bar bya ba ni phyir bcos pa ste/ des zhes pa ni phung po gsum 'don pa dang / byang chub kyi sems dang / rgyal ba bcom ldan 'das la yang dag par brten pas so//de dag gis rnam par sun 'byin pa kun tu spyod pa la sogs pa bstan pa yin no/ /de la sdig pa sbyang ba ni chos bzhi pa'i mdo las bstan pa/ byams pa byang chub sems dpa' sems dpa' chen pos chos bzhi dang ldan na sdig pa byas shing bsags pa zil gyis non par 'gyur ro//bzhi gang zhe na/ 'di lta ste rnam par sun 'byin pa kun tu spyod pa dang / gnyen po kun tu spyod pa dang / nyes pa bzlog pa'i stobs dang / rten gyi stobs so/ /de la rnam par sun 'byin pa kun tu spyod pa'i stobs ni/ mi dge ba'i las spyad na de nyid la 'gyod pa mang ba yin no/ /de la gnyen po kun tu spyod pa ni mi dge ba'i las byas nas kyang dge ba'i las la shin tu brtson pa'o/ /de la nyes pa bzlog pa'i stobs ni sdom pa yang dag par blangs nas mi byed pa'i sdom pa thob pa'o/ /de la rten gyi stobs ni sangs rgyas dang chos dang dge 'dun la skyabs su 'gro ba dang /byang chub kyi sems mi gtong ba ste/ de stobs dang ldan pa la brten nas sdig pa byas pas zil gyis gnon par mi nus so/ /byams pa byang chub sems dpa' sems dpa' chen po chos bzhi po de dag dang ldan na sdig pa byas shing bsags pa zil gyis gnon par 'gyur ro zhes so//khyad par du byang chub sems dpa'i ltung ba lci ba dang yang ba rnams kyi bshags par bya ba ni 'phags pa nye ba 'khor gyis zhus pa las gsungs te/ de dag bslab pa kun las btus par blta bar bya'o//byang chub sems dpas ltung ba thams cad sangs rgyas bcom ldan 'das sum cu rtsa lnga'i spyan sngar gcig pus bshags par bya'o/ /de la bshags pa ni 'di yin te/ bdag ming 'di zhes bgyi ba sangs rgyas la skyabs su mchi'o zhes bya ba nas brtsams na/dge 'dun la skyabs su mchi'o zhes bya ba'i bar dang / de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phyag 'tshal lo/ /rdo rje snying pos rab tu 'joms pa la phyag 'tshal lo zhes bya ba nas brtsams te/ thal mo sbyar bar bgyis te skyabs su nye bar mchi zhes bya ba'i bar rgya cher bstan nas gsungs pa/shA ri'i bu 'di ltar byang chub sems dpas sangs rgyas sum cu rtsa lnga po 'di dag la sogs pa de bzhin gshegs pa thams cad kyi rjes su song ba yid la byed pas sdig pa rnam par dag par bya'o//de ltar sdig pa rnam par dag par gyur pas de la sangs rgyas bcom ldan 'das rnams zhal nye bar ston to/ /de bzhin du sbyar ro/ /byang chub sems dpas nyin mtshan du sangs rgyas bcom ldan 'das de dag gi mtshan 'dzin pa dang / yongs su brjod pa dang /phung po gsum pa'i chos kyi rnam grangs gdon pas ltung ba 'gyod pa las byung ba dang / ting nge 'dzin yang thob pa gang yin pa de ni nyan thos dang rang sangs rgyas kyi theg pa pa thams cad kyi ltung ba 'gyod pa'i gnas rnam par sbyang bar mi nus so zhes so/ / de dag ma lus par bslab pa kun las btus pa las rig par bya'o/ /rnam par sun 'byin pa kun tu spyod pa bstan to/ /gnyen po kun tu spyod pa dang / nyes pa bzlog pa'i stobs kyang rgyas par bslab pa kun las btus pa nyid las blta bar bya'o/ /'phags pa byams pa'i rnam par thar pa las/byang chub kyi sems kyis sdig pa rnam par dag par gsungs te/ de yang sngar bstan pa nyid yin no/ /rgyal ba la brten nas sdig pa rnam par dag par 'gyur ba ni phag mo'i rtogs pa brjod pa dper bya ste/ gang dag sangs rgyas skyabs song ba//de dag ngan 'gror 'gro mi 'gyur/ /mi yi lus 'di spangs nas su/ /de dag lha yi lus 'thob bo/ /zhes te/ de ltar chos dang dge 'dun gyi dbang du byas nas kyang brjod do/ /'dis kyang gnyen po'i stobs bstan to/ /yang nges pa med par bstan pa/rang ngam zhes bya ba la sogs pa gsungs te/ rang ste bdag nyid dam gzhan la rag las pa'ang rung ste sems can gyi don la rab tu 'jug pa'o/ /yang ci ltar nges pa med par brjod ce na/ rgyal sras zhes bya ba la sogs pa gsungs te/ gang gi phyir dngos po thams cad kyi de kho na nyid rnam pa thams cad du khong du chud nas thams cad la phan pa dang bde ba bsgrub pa'i don du brtson pa'i sangs rgyas kyi sras po rnams kyis bslab par bya ba gang yin pa de ni cung zad kyang yod pa ma yin te/gzhan du na sems can gyi don thams cad du bya bar mi nus la de ltar rnam par spyod pa ni bsod nams kyi tshogs kyang mthar thug pa med par 'gyur ro//bslab pa'i gzhi'i rgyu 'di yang gzung bar bya'o zhes gsungs pa/ dngos sam zhes bya ba la sogs pa yin te/ tha na rang zas la sogs pa byed pa'am/gzhan bskul ba'am/ brgyud nas pho nya bskul ba'am/ dngos su rang nyid zang zing gi sbyin pa la sogs pa byed pa'ang rung ste/ gang sems can rnams kyi phan pa dang bde ba'i rgyur mi 'gyur ba de mi bya'am byed du mi gzhug go/ /de dag 'ba' zhig tsam ni ma yin te/'khor ba sdug bsngal bar ltung ba'i sems can rnams de nas dbyung ba'i phyir dge ba'i rtsa ba chung ngu'ang thams cad bla na med pa yang dag par rdzogs pa'i byang chub tu yongs su bsngo bar bya'o/ /tshigs su bcad pa gnyis po de dag gis ni bsod nams 'phel ba nye bar bstan pa yin no//dge ba'i bshes gnyen mi gtong zhing / /zhes gang gsungs pa de rtag par zhes bya ba la sogs pa gsungs te/ dge ba ni mngon par mtho ba dang nges par legs pa 'thob pa'i mtshan nyid kyi las so/ /gnyen ni thun mong ma yin pa'i nye ba ste/ de lus dang srog chud za ba'i 'jigs pas 'jigs kyang mi btang ngo //dge ba'i bshes gnyen gyi phan yon yang shes rab kyi pha rol tu phyin pa brgyad stong pa'i rtag par rab tu ngu ba'i le'u las shes par bya'o/ /chos bzhi pa'i mdor yang gsungs pa/ dge slong dag byang chub sems dpa' sems dpa' chen pos ji srid 'tsho ba'i bar du dge ba'i bshes gnyen srog gi phyir yang gtang bar mi bya'o zhes so//yongs su mi gtang ba ni dge ba'i bshes gnyen gyi mtshan nyid gsungs pa/ byang chub sems dpa' zhes bya ba la byang chub sems dpa' bslab pa'i sdom pa la rnam par gnas shing /theg pa chen po'i don la mkhas pa ste/ shin tu rnyed par dka' ba de lta bu'o/ /dge ba'i bshes gnyen gyi bsnyen bkur yongs su shes par bya ba'i don du dpal 'byung ba'i zhes gsungs te/ 'phags pa sdong po bkod pa'i mdo le'u dpal 'byung ba'i rnam par par thar pa las/dge ba'i bshes gnyen gyi bsnyen bkur bslab par bya ste shes par bya'o/ /ji skad du 'phags pa sdong po bkod pa las/ 'phags pa dpal 'byung gis bstan pa/ dge ba'i bshes gnyen gyis yang dag par zin pa'i byang chub sems dpa' rnams ni ngan 'gror ma ltung ngo zhes bya ba nas dge ba'i bshes gnyen ni bya ba ma yin pa rnams khong du chud par byed pa'o//bag med pa'i gnas las yang dag par bzlog pa'o/ /'khor ba'i grong khyer nas 'don pa'o/ /rigs kyi bu de lta bas na de ltar yid la bya ba rgyun ma chad pas dge ba'i bshes gnyen rnams kyi drung du 'gro bar bya'o//khur thams cad bkur bas yongs su mi skyo bas sa lta bu'i sems dang / bsam pa mi phyed pas rdo rje lta bu'i sems dang / sdug bsngal thams cad kyis mi bsgul ba'i phyir khor yug lta bu'i sems dang / las thams cad nyams su blang ba la mi smod pas 'jig rten gyi bran lta bu'i sems dang /nga rgyal dang che ba'i nga rgyal rnam par spong bas phyag dar ba lta bu'i sems dang / khur lci ba khur bas theg pa lta bu'i sems dang / mi khro bas khyi lta bu'i sems dang / 'gro zhing 'ong bas yongs su mi skyo ba'i gru lta bu'i sems dang /dge ba'i bshes gnyen gyi ngor lta bas bu mdzangs pa lta bu'i sems kyis dge ba'i bshes gnyen la bsnyen bkur bya'o/ /rigs kyi bu khyod kyi bdag la ni nad par 'du shes bskyed par bya'o/ /dge ba'i bshes gnyen la ni sman pa'i 'du shes dang /rjes su bstan pa la ni sman gyi 'du shes des/ nan tan nyams su blang ba la ni nad 'tsho ba'i 'du shes bskyed par bya'o/ /rigs kyi bu khyod kyis bdag la ni 'jigs pa'i 'du shes bskyed par bya'o/ /dge ba'i bshes gnyen la ni dpa' bo'i 'du shes dang / rjes su bstan pa la ni mtshon cha'i 'du shes dang / nan tan la ni dgra sel ba'i 'du shes bskyed par bya'o zhes bya ba'i bar du gsungs pa lta bu'o/ /mdo sde dag la rtag lta bas/ /zhes gang gsungs pa de bstan par bya ba'i phyir gsungs pa/ 'di dang zhes pa bstan bcos 'dir bstan pa 'di dang /gzhan yang ste gang 'dir ma bstan pas sangs rgyas bcom ldan 'das kyis byang chub sems dpa' rnams kyi bslab pa bstan pa gang yin pa ste/ mdo sde sna tshogs pa'i don de dag 'dris par rig par bya'o/ /de nyid ni mdo sde rnams la ste/theg pa chen po'i mdo sde dkon mchog sprin la sogs pa rnams na'o/ /bslab pa snang zhes pas ston pa yin te/ bslab pa ni byang chub sems dpa' rnams kyis blang bar bya ba dang dor bar bya ba'i mtshan nyid do/ /gang gi phyir de ltar yin pa de'i phyir khyad par 'di bstan pa/nam mkha' zhes bya ba la sogs pa gsungs te/ 'phags pa nam mkha'i snying po'i mdo las/ rgyal rigs spyi bo nas dbang bskur ba'i rtsa ba'i ltung ba lnga dang / de bzhin du spyi'i rtsa ba'i ltung ba gcig dang / de bzhin du byang chub sems dpa'i las dang po pa'i rtsa ba'i ltung ba brgyad bstan pa yin no//de ltar yang de nyid las gsungs pa/ rigs kyi bu rgyal rigs spyi bo nas dbang bskur ba'i rtsa ba'i ltung ba lnga ste/ rtsa ba'i ltung ba de dag gis rgyal rigs spyi bo nas dbang bskur ba dge ba'i rtsa ba sngon bskyed pa thams cad thal bar brlag ste pham par gyur cing lha dang mi'i bde ba'i dngos po thams cad bcad nas ngan song du 'gro bar 'gyur ro/lnga gang zhe na/ rigs kyi bu rgyal rigs spyi bo nas dbang bskur bas mchod rten gyi rdzas 'phrog gam/ dge 'dun gyi'am/ phyogs bzhi'i dge 'dun la phul ba 'phrog gam/'phrog tu 'jug pa 'di ni rtsa ba'i ltung ba dang po'o/ /de bzhin du theg pa gsum du bshad pa'i chos spong ba ni gnyis pa'o/ /rab tu byung ba tshul khrims dang ldan pa'am/ tshul khrims 'chal ba'i ngur [(]smig [,]smrig [)]'phrog pa'am/ khyim na gnas par byed pa'am/ lus la brdeg pa'am/btson rar 'jug pa'am/ srog dang bral bar byed pa las ni gsum pa'o/ /mtshams med pa lnga las gang yang rung ba'i mtshams med pa byed pa las ni bzhi pa'o/ /log par lta ba dang / mi dge ba bcu'i las kyi lam yang dag par blangs pa'am/ gzhan yang dag par len du 'jug pa las ni lnga pa'o/ /de bzhin du grong 'joms pa la sogs pa byed pa las ni thams cad kyi thun mong ba gcig go zhes so/ /de nyid las gsungs pa/ rigs kyi bu'am rigs kyi bu mo theg pa chen po la yang dag par zhugs pa las dang po pa rnams kyi rtsa ba'i ltung ba ni brgyad de/rtsa ba'i ltung ba de dag gis theg pa chen po la yang dag par zhugs pa'i las dang po pa rnams dge ba'i rtsa ba sngon bskyed pa thams cad ces bya ba la sogs pa snga ma bzhin no/ /brgyad gang zhe na/ sems can gang dag sngon nyes par spyad pa'i rgyus snyigs ma lnga pa'i 'jig rten gyi khams nyon mongs pa can 'dir skyes pa de dag dge ba'i rtsa ba chung la zhes bya ba nas de dag gi nang na stong pa nyid dang ldan pa'i mdo sde mchog tu zab pa 'di zhes pa'i bar dang mdun du rgyas par dran par byed cing ston la/de dag ni nan tan du ma sbyangs pa'i byis pa so so'i skye bo dag ste mnyan nas skrag cing zhes bya ba'i bar dang /bla na med pa yang dag par rdzogs pa'i byang chub kyi sems las phyir ldog ste/ nyan thos kyi byang chub la smon na 'di ni byang chub sems dpa' las dang po pa'i rtsa ba'i ltung ba dang po ste rtsa ba'i ltung ba des zhes bya ba la sogs pa ni snga ma bzhin no//de bas na byang chub sems dpas sems can pha rol dang gang zag pha rol gyi bsam pa dang / bag la nyal dang por shes par byas nas sems can rnams kyi bsam pa ji lta ba bzhin du mthar gyis chos bstan par bya ba yin pa las thabs dang bcas pa'i bla na med pa yang dag par rdzogs pa'i byang chub las bzlog ste/theg pa dman pa la gzhan gyi sems skyed par byed pa 'di ni gnyis pa'o/ /so sor thar pa'i bslab pa'i sdom pa spangs nas theg pa chen po la sems bskyed pa tsam dang de klog pas pha rol dag par bstan pa las ni gsum pa'o//nyan thos la sogs pa'i theg pa dag de'i 'bras bu gsungs te/ nyes pa rab tu ston pa dang / theg pa chen po la ni thams cad dag par rab tu ston pa dang / gzhan dag kyang de brjod du 'jug pa las ni bzhi pa'o/ /grags pa dang rnyed pa la sogs pa'i rgyus theg pa chen po klog pa la sogs pa byed cing /de bzhin du de'i rkyen gyis pha rol la bshung zhing smod pa la sogs pa smra ba dang / bdag la bstod pa dang / mi'i chos bla ma khas len pa las ni lnga pa'o/ /bklags pa tsam gyis zab mo'i chos rtogs par ston pa dang /gzhan dag kyang de bzhin du yang dag par len du 'jug pa las ni drug pa'o/ /rgyal rigs mdun na 'don dang / zhang blon gdol pa rnams kyis dge slong gang dag la nor gyi chad pas chad pa bcad cing / dge 'dun gyi'am/ mchod rten gyi 'am/phyogs bcu'i dge 'dun gyi rdzas phrogs nas de dag la 'bul bar byed de/ rgyal rigs dang gnyi ga la yang rtsa ba'i ltung bar 'gyur te 'di ni bdun pa'o/ /chos dang chos ma yin pa bzlog nas sngar med pa'i bslab pa ston pa dang / rtsa ba des cho ga nyams pa rnams dang bkur sti nyams par byed pa rnams kyis nye bar spyod pa dang /yongs su spyod pa la yongs su bsngos pa ma gtogs par gnyi gar yang rtsa ba'i ltung ba dang bcas par 'gyur te/ 'di ni brgyad pa'o/ /rtsa ba'i ltung ba 'di dag bde blag tu bzung bar bya ba'i don du bstan bcos mdzad pas bsdus pa'i tshig le'ur byas pas bstan pa brjod par bya ste/dkon mchog gsum gyi dkor rku ba/ /phas pham pa yi ltung bar 'dod/ /dam pa'i chos ni spong byed pa/ /gnyis par thub pas gsungs pa yin/ /tshul khrims 'chal ba'i dge slong la'ang / /ngur smrig 'phrog dang brdeg pa dang //btson rar 'jug par byed pa dang / /rab tu byung las 'bebs pa dang / /mtshams med lnga pa byed pa dang / /log par lta ba 'dzin pa dang / /grong la sogs pa 'jig pa yang / /rtsa ba'i ltung bar rgyal bas gsungs/ /blo sbyangs ma byas sems can la//stong pa nyid ni brjod pa dang / /sangs rgyas nyid la zhugs pa dag /rdzogs pa'i byang chub bzlog pa dang / /so sor thar ba yongs spangs te/ /theg pa che la sbyor ba dang / /slob ma'i theg pas chags la sogs/ /spong bar 'gyur ba min zhes 'dzin/ / pha rol dag kyang 'dzin 'jug dang / /rang gi yon tan brjod pa dang / /rnyed pa dang ni bkur sti dang / /tshigs bcad rgyu yis gzhan smod dang / /bdag ni zab mo bzod pa'o zhes/ /log pa nyid ni smra ba dang / /dge sbyong chad pas gcod 'jug dang / /skyabs gsum gyis ni sbyin byed dang //sbyin pa len par byed pa dang / /zhi gnas 'dor bar byed pa dang / /yang dag 'jog pa'i longs spyod rnams/ /kha ton byed la sbyin pa rnams/ /de dag rtsa ba'i ltung ba ste/ /sems can dmyal ba chen po'i rgyu/ /rmi lam nam mkha'i snying po yi/ /mdun du 'dug ste bshags par bya//byang chub sems ni yongs 'dor dang / /chags dang ser sna mi bzod pas/ /slong la sbyin par mi byed dang / /khros nas sems can brdeg pa dang / /bsgrims te dga' bar byed pa na/ /sems can la ni mi bzod dang / /nyon mongs pa dang gzhan mthun pas//chos ltar bcos ma brjod pa'o/ /zhes so/ /'di dag gso ba ni mdo sde nyid nas gsungs so/ /bslab pa kun las btus par yang byang chub sems dpa' rnams kyis bya bar 'os pa bstan pa yin pas de nyid kyang blta bar bya'o zhes gsungs pa ni/mdo sde zhes bya ba la sogs pa la bslab pa kun las btus par yang ni rang nyid kyis mdzad pa'o/ /nges par ni gdon mi za bar ro/ /yang dang yang du ni lan cig min par blta bar bya ste/ goms par bya'o snyam du dgongs pa'o/ /ci'i phyir zhe na/gang gi phyir byang chub sems dpa' dam pa rnams kyi spyod pa ste/ spyod pa ni de ltar bya ba nyid yin te bslab pa kun las btus pa de las rgya cher rgyun chags par rab tu bstan par te/ rnam par gsal bar byas shing rab tu phye ba'o/ /de'i phyir gal te de la goms par byed mi nus na de'i tshe mdo sde sna tshogs pa nas phyogs gcig tu bdag nyid kyis mdor bsdus nas btus shing byas par blta ste/gzhung ngam don rnam par blta bar bya'o/ /'dir yang dgongs pa ni snga ma nyid yin no/ /yang na 'phags klu sgrub kyis mdzad pa'i bslab pa kun las btus pa dang mdo kun las btus pa gnyis po'ang 'bad pa ste/gus pas blta bar bya'o/ /gang 'dir mi snang ba de ni de la snang ngo snyam du dgongs pa'o/ /bslab pa nges par mthong ba rnams kyang ma lus par thams cad la nye bar mkho ba gsungs pa/gang las zhes bya ba la sogs pa yin te/ gang las te dor bar bya ba ste bya bar 'os pa ma yin pa las bzlog par bya zhing mi bya ba ste/ de dag ni rab tu grub pa yin no/ /gang las ni bslab pa kun las btus pa'am mdo kun las btus pa las so/ /de nyid las su bya ba ste/de la sbyar bar bya ba ni bsgrub par bya ba'o/ /bkag pa dang sgrub pa de yang 'jig rten pa'i sems te bsam pa yin la/ de bsrung ba'i don du'o/ /de ji ltar 'khrug par mi 'gyur ba ste/ bslab pa kun las btus pa la sogs pa las bslab pa mthong nas rtogs par byas la ste yang dag par dpyad do//gang las gang zhig ji ltar dpyad par bya ba de la de bzhin du tha snyad du 'jug par bya'o/ /gzhan du tha snyad kyi don la rmongs pa ni ltung ba'i dri ma can du 'gyur ro/ /de dag gis ni lus dag pa bshad pa yin no/ /lus kyi dag pa gang zhe na/ sdig dang nyon mongs rnam sbyong yin/ /rdzogs sangs rgyas kyis gsungs tshul du/ /'bad pa med na ngan song 'gro/ /zhes gang gsungs pa'o/ /rtag tu dran pa dang shes bzhin dpyad par bya'o zhes gang gsungs pa de la dran pa ni rang gi ming gis rang gi ngo bo bstan te/ shes bzhin mi shes pas shes bzhin ci 'dra ba zhig ce na/ de'i rang gi ngo bo bstan pa'i phyir/ lus dang zhes bya ba la sogs pa gsungs te/ lus kyi gnas skabs dang / sems kyi gnas skabs gang yin pa'i spyod lam rnams la dus thams cad du so sor brtag par byed cing nges par rtog pa ste/sngar ji skad du bstan pa bzhin no/ /bstan pa'i bslab pa de dag thams cad la mkhas par bya ba dang / las rnams bsgrub par bya ba'i tshig tsam gyis ni ma yin no zhes nges par bya ba'i phyir/ /lus kyis zhes bya ba la sogs pa gsungs te/ yid ni lus kyis byed pa'i sngon du 'gro ba'i phyir de yang 'dis bstan pa yin no//nan tan gyis thams cad bsgrub par bya'i/ sgra tsam bsgrags pas ni ma yin te/ 'bras bu med pa'i phyir ro/ /byang chub sems dpas 'bad par bya'o/ /ji ltar zhe na/ sman pa'i bstan bcos bklags pa tsam gyis de'i bya ba mi byed pas nad kyis thebs pa la 'bras bu ci zhig sgrub par 'gyur/de tsam gyis ni de'i nad med par mi 'gyur ro snyam du dgongs pa yin no/ /de lta bas na bya ba de dag thams cad nan tan gyis rdzogs par bya'o/ /byang chub sems dpa'i spyod pa la 'jug pa'i dka' 'grel/shes rab 'byung gnas blo gros kyis mdzad pa las le'u lnga pa'o// //de ltar tshul khrims rnam par dag pa rnam pa mang po ston pa na lus la sogs pa bsrung ba dang dag pa yang bstan nas/ dge ba rnam par dag pa bstan par bya ba'i phyir/bzod bya thos pa btsal bar bya/ /de nas nags su gnas par bya/ /mnyam par gzhag la brtson bya zhing / /mi sdug la sogs bsgom par bya/ /zhes bya ba de dag mngon par brjod par bya ba'i phyir brtson par byed pa/ bskal pa zhes bya ba la sogs pa yin te/de dag kun zhes bya ba ni tshul khrims kyi sdom pa yang dag par blangs pa las byung ba'i legs par spyad pa ste/ dge ba'i ngo bos so/ /sbyin pa ni spyir rnam pa gsum mo/ /bde gshegs mchod pa yang rnam pa gsum mo/ /bskal pa stong phrag du mar bsags shing byas pa gang yin pa de dag thams cad khong khro ste sems can thams cad la rnam par sdang bas 'joms par byed de/me chung ngus rtswa'i tshogs bzhin du sreg par byed do/ /'phags pa 'jam dpal rnam par rol pa'i mdo las/ 'jam dpal khong khro khong khro zhes bya ba ni bskal pa brgyar bsags pa'i dge ba 'joms par byed pa ste/de'i phyir khong khro zhes bya'o zhes gsungs so/ /'phags pa thams cad yod par smra ba las kyang gsungs te/ dge slong dag dge slong 'di dbu'i skra dang / sen mo'i mchod rten la yan lag thams cad kyis phyag 'tshal nas sems dang bar byed pa ltos/btsun pa de ltar lags so/ /dge slong dag dge slong 'dis sa ji tsam zhig non pa'i 'og tu dpag tshad brgyad khri bzhi stong na gser las grub pa la thug pa'i bar na rdul phran ji snyed yod pa de snyed du dge slong 'dis 'khor los sgyur ba'i rgyal srid stong 'gyur du yongs su spyod par 'gyur zhes bya ba nas tshe dang ldan pa nye ba 'khor gyis bcom ldan 'das gang na ba der logs su thal mo sbyar ba btud nas 'di skad ces gsol to//bcom ldan 'das kyis dge slong 'di'i de ltar dge ba'i rtsa ba che ba gang gsungs pa ltar na/bcom ldan 'das dge ba'i rtsa ba 'dis gang du bsrabs pa dang / yongs su byang ba dang / yongs su bas par 'gyur ba las bka' stsal pa/ nye ba 'khor ji srid du tshangs par spyod pa dam pas tshangs pa mtshungs par spyod pa la sdang ba'i sems ma bskyed pa de srid du zad pa dang nyams par ngas yang dag par rjes su ma mthong ngo //nye ba 'khor der dge ba'i rtsa ba chen po 'di yang bsrabs pa dang / yongs su byang ba dang / yongs su zad par 'gyur ba de lta bas na mgal dum la yang sems kyis khro bar mi bya na rnam par shes pa dang bcas pa'i lus la lta ci zhig smos zhes so//de'i phyir zhe sdang lta bu'i zhes bya ba la sogs pa gsungs pa la/ zhe sdang lta bu'i sdig pa med de/ mi dge bas bsod nams zil gyis non pa'i rgyu med de/ bzod pa sran tshugs pa lta bu dang mnyam pa'i dka' thub med do//shin tu ngal ba cher byas pas bsgrub par bya ba'i phyir legs spyad do/ /gang gi phyir de ltar yin pa de'i phyir bzod pa ni bzod pa ste/ lhur blang ba thams cad kyis bsgom par bya ste goms par bya'o/ /sna tshogs ni 'og nas 'chad par 'gyur ba'i thabs rnam pa sna tshogs pas so//mthong ba'i chos kyi nyes pa tshigs su bcad pa gsum gyis bstan pa zhe sdang zhes bya ba la sogs pa gsungs te/ zhi ba ni rab tu zhi ba'o/ /nyams mi myong ni rten pa med pa'o/ /nye bar ma zhi ba nyid ni rtag tu zhe sdang gi me 'bar ba'i phyir ro//dga' dang bde ba ni yid bde ba dang bde ba mi 'thob la mi rnyed pa ste des mnan pa'i phyir ro/ /gnyid mi 'ong zhing rten med na sems bde ba thob pa med pa ste/ lus dang sems kyi rgyun gdung bar byed pa'i zhe sdang zug rngu snying la gnas 'cha' bas so/ / mchod pa ni bkur sti ste gang dag rnyed pa dang bkur sti rnams kyis so/ /gang yang rjes su 'tsho ba ste/ rje dpon zhe sdang can de la gnod par bya bar 'dod pa'o/ /ci ste zhe na/ zhe sdang skal ngan te mi sdug pas zhes bya ba ste 'di ni gtan tshigs kyi tshig go/ /mdza' bshes ni bshes pa rnams kyang skyo bar 'gyur te/zhe sdang can des skrag par 'gyur ro/ /sbyin pa la phyogs kyang bran gyi tshogs rnams kyis sten par mi byed rjes su 'gro bar mi byed do/ /mang du smra ci dgos/ 'dir mdor na zhes bya ba 'di ni nges par gzung bar bya ste/ gang gis khro bar byed pa la bde ba thob pa nye bar zhi ba'i rgyu de ni cung zad kyang yod pa ma yin no//sems kyi rtsub pa'i gnas ni zhe sdang ngo / /de las byung ba'i 'jug pa ni khro ba ste/ gang gi dbang gis dbyug pa la sogs pa len par byed pa'o/ /de ltar tha dad pa gnyi ga yang spang bar bya ba nyid kyis tha mi dad par bstan te/de bzhin du 'dir mthong ba'i chos la yang zhe sdang gi nyes pa rtogs par byas nas de spang bar bya ba'i phyir 'bad rtsol dang ldan par bya'o zhes gsungs pa/ khro ba zhes bya ba la sogs pa yin te/ ji skad du gsungs pa'i rnam pas gang gi phyir sdug bsngal skyed par byed pa de'i phyir/gang zhig legs par spyad pa'i bdag nyid kyis bsgrims te drag tu mngon par zhen pas te/ brtson 'grus brtsams pas zhes bya ba'i don to/ /de ni 'jig rten 'di dang 'jig rten pha rol du bde'o/ /da ni zhe sdang gzhom par bya ba'i ched du de la rgyu gzhom par bya ba'i phyir rnam par gzhag pa mdzad pa mi 'dod ces bya ba la sogs pa gsungs te/'dod pa dang mi 'dod pa ni bdag dang bdag gir 'dzin pa las byung ba ste/ bdag dang bdag gi la bde ba bsgrub pa ni 'dod pa ste/ de las bzlog pa ni mi 'dod pa'o/ / de ltar na de dag ni rtog pa byas su zad kyi/ don dam par ni 'dod pa'am mi 'dod par srid pa cung zad kyang med do/ /de lta bas na log par mngon par zhen pa'i bag chags kyis mi 'dod pa byas pa dang 'dod pa bshig pas yid mi bde ba ste/ yid la sdug bsngal 'byung ngo //de lta bas na de byed pa'am de dang 'gal bar byed pa la zhe sdang skye bar 'gyur ro/ /de ltar na zas nus pa dang ldan pa yid mi bde ba nyid la brten nas stobs yod pa dang zhe sdang gis bdag 'joms so snyam du nges par byas nas de rgyas pa'i rgyu nyid dang por gzhom par bya'o//de bcom pas ni bde ba nyid du 'gyur te/ de'i rtsa ba bcom pa'i phyir dang / rtsa ba dang bcas pa'i bcom pa ni slar ldang ba mi rigs pa'i phyir ro/ /'o na khyed kyis shin tu mngon par zhen pa 'di ci lta bu yin zhe na/ de ltar zhes bya ba la sogs pa gsungs te/gang gi phyir bdag la gnod pa ma gtogs pa zhe sdang gi dgra 'di la nyin dang mtshan du gzhan cung zad kyang bya ba med do/ /de ltar zhe sdang nyes pa dang ldan pa rnam par bsgoms la thabs thams cad kyis de'i gnyen por gyur pa bzod pa bskyed par bya'o/ /de la bzod pa ni rnam pa gsum ste/chos yang dag par sdud pa'i mdo las bshad pa/ 'di lta ste/ sdug bsngal dang du len pa'i bzod pa dang / chos la nges par sems pa'i bzod pa dang / gzhan zhig gis gnod pa byed pa la ji mi snyam pa'i bzod pa'o zhes so/ de la re zhig sdug bsngal dang du len pa'i bzod pa'i dbang du byas te/ci la bab kyang zhes bya ba la sogs pa gsungs te/ sdug bsngal dang du len pa'i bzod pa'i mi mthun pa'i phyogs ni mi 'dod pa byung ba la brten nas sdug bsngal bas 'jigs pa dang / 'dod pa'i gegs la brten nas bde ba la chags pa ste/de dag gis ni yid mi bde la/ de las sems zhe sdang ba'am/ zhum par 'gyur ro/ /de nyid kyi phyir zla ba'i sgron ma'i mdo las/ bde ba la mi chags pa dang / sdug bsngal la phyir mi phyogs par mi bya'o zhes so/ /dkon mchog sprin gyi mdo las kyang gsungs te/gang nang gi mya ngan dang smre sngags 'don pa dang / sdug bsngal ba dang / yid mi bde ba dang 'khrugs pa de dag bzod cing dang du len to zhes so/ /de bas na gal te bdag gi mgo gcod na de lta na yang bdag gis dga' ba dkrug par mi bya'o/ /khong nas ldang bar mi bya'o//dga' ba ni yid mi bde ba'i gnyen po yin te/ sdug bsngal byung yang sems rab tu dga' ba la yid mi bde ba'i go skabs med pa'i phyir ro/ /de ltar yid mi bde ba spang bar bya ba'i phyir dga' bas 'bad pas bsrung bar bya'o/ /ci'i phyir zhe na/ yid mi bde ba byas kyang 'dod pa'i gegs yod na 'dod pa mi 'grub ste/mngon par 'dod pa 'grub par mi 'gyur ba'o/ /'di ni khyad par du yod de yang dge ba nyams par 'gyur ba'o/ /yid dga' ba yang 'phags pa blo gros mi zad pa'i mdo las rab tu bsngags te/ de la dga' ba gang zhe na/gang sangs rgyas kyi chos rnams dran pa dang / rjes su dran pa la dga' ba dang / dad pa dang mchog tu dga' ba dang / sems mi 'gong zhing mi brdzi ba dang / 'dod pa'i dga' ba med pa dang / 'dod pa'i dga' ba thams cad btang bas chos kyi dga' ba thams cad kyi rten dang /sems rab tu dga' ba dang / lus rab tu tshim pa dang / sangs rgyas la dga' zhing yid 'phar ba dang / de bzhin gshegs pa'i sku la dga' zhing mos pas zhes bya ba la sogs pa rgya cher brjod do/ /gzhan yang yid mi bde ba ni ma spyad pas skye ba yin no zhes gsungs pa/gal te zhes bya ba la sogs pa yin te/ gal te 'dod pa'i gegs bzlog pa'i phyir dang mi 'dod pa byung ba phyir bcos pa'i thabs gzhan yod na de'i tshe de la mi dgar ci zhig yod/ de nyid la nan tan du gyis shig /ci ste med na de'i tshe yang de la mi dga' byas ci phan/dgos pa cung zad kyang med de/ de thabs med pa'i phyir de dag ni thams cad du 'das pa yin no/ /de ltar rnam par dpyad nas yid mi bde ba bsal ba nyid mchog yin no/ /goms pa sdug bsngal gnod pa med par 'gyur ba yin no zhes rab tu bsgrub pa'i phyir brtson par byed pa/sdug bsngal zhes bya ba la sogs pa yin te/ sdug bsngal ni rnam pa gnyis te/ lus la gnod pa byung ba dang sems la gnod pa byung ba'o/ /de la lus la gnod pa byung ba ni dbyug pa la sogs pa bsnun pa las byung ba'o//yid la gnod pa byung ba ni brnyas pa la sogs pa'i rgyu mtshan las so/ /de la brnyas pa ni ngan pa byed pa'o/ /tshig rtsub ni gnad 'byed pa'i tshig ste/ mi snyan pa ni grags pa ma yin pa dang / yon tan dang bral bar brjod pa'o/ /de dag thams cad ni mi 'dod pa yin no//gal te gzhan las byung na legs pa ma yin nam zhe na/ de'i phyir gsungs pa/ bshes rnams la zhes gsungs te/ gang la bdag nyid kyis khas blangs pa mdza' ba'i gnas de de dag dang bdag nyid la yang ngo / /sdug bsngal la sogs pa byed pa po dgra de las bzlog pa 'byung /de la ni sdug bsngal ba la sogs pa mngon par 'dod pa yin no/ /de la sdug bsngal mi bzod pa de re zhig zlog par byed pa/ bde ba'i rgyu zhes bya ba la sogs pa gsungs te/ 'bad pa chen pos dge ba'i phyogs nye bar bsten pa res 'ga' 'am brgya la ste 'khor bar zag pa dang bcas pa'i bde ba shin tu rnyed par dka'o//sdug bsngal ni thams cad du rnyed par sla ste 'bad pa med par 'grub pa'i phyir ro/ /de bas na de goms pa ni dka' ba ma yin te/ thams cad du 'dris pa'i phyir ro/ /'di ltar yang 'khor ba nas nges par 'byin pa'i thabs kyang sdug bsngal nyid yin te/de lta na yang rgyags kyi tshul du de yongs su bzung bar rigs pa nyid yin no/ /gang gi phyir de ltar yin pa de'i phyir kye sems sdug bsngal nyams su myong bar bya ba'i phyir brten par gyis la sdang ba la gnas brtan par ma byed cig///bam po dgu pa/ 'on kyang sdug bsngal 'di don chen po bsgrub pa'i phyir bsten par rigs so snyam du yid la bya'o zhes bya ba ni rdzong gtum mo zhes bya ba la sogs pa gsungs te/ rdzong gtum mo'i bu ni gtum mo'i bu ste/ston zla 'bring po'i tshes dgu'i dus la sogs par zhag gsum mam zhag gcig tu gso sbyin byas nas lus sreg pa dang gcod pa dang 'bigs par byed pa'i sdug bsngal tshor ba 'bras bu med pa nyams su myong bar byed pa'o/ /de bzhin du yul kar Na Ta la sogs par byung ba lho phyogs kyi rgyud du gong ma'i ming 'bri ba tsam gyi nga rgyal gyis phan tshun du 'gran par byed pa'i byed pa du mas sdug bsngal nyams su myong zhing srog kyang 'dor bar byed na/bdag ni bdag dang gzhan mchog tu dkon pa'i sangs rgyas nyid du bsgrub pa'i phyir brtson par byas pa yin na ci'i phyir sdug bsngal rnams kyis bdar bar bya/'o na de ltar gyur na gal te sdug bsngal shin tu chung ba ni bsten par nus kyis/ lag pa dang / rkang pa dang / mgo bo bcad pa la sogs pa'am/ sems can dmyal ba la sogs pa'i sdug bsngal las thar pa'i don du ji ltar na bsten par bya zhe na/'dir goms na zhes bya ba la sogs pa gsungs te/ bstan bcos goms par byed pa dang / sgyu rtsal la sogs pa la mkhas pa la sogs pa'am/ sdug bsngal chung ngu dang 'bring dang chen po tsam nyams su myong bar bya ba'i dngos po gang zhig goms pa'i spyod yul du mi 'gyur ba de cung zad kyang yod pa ma yin te thams cad ni goms pas bdag gir bya ba nus so snyam du dgongs pa yin no//gang gi phyir gnod pa shin tu chung ngu la sogs pa goms par 'gyur ba de'i phyir sems can dmyal ba la sogs pa'i gnod pa chen po'ang bsten par mi nus te/yun ring por shin tu goms par byas pas slar yang de nyid bde ba'i ngo bor yongs su 'gyur ba 'gro ba yin pas na byang chub sems dpa' rnams kyi bde ba nyid ni sdug bsngal te/ ji skad du gsungs pa/ de la sdug bsngal chung ngu la goms pa sngon du btang na dga' ba shin tu dka' ba yang goms par 'gyur te/dper na goms pa'i dbang gis ser sna can rnams sdug bsngal la bde bar 'du shes pa de bzhin du sdug bsngal 'byung ba thams cad bde ba'i 'du shes nye bar gnas pa goms pas bde ba'i 'du shes nyid du nye bar gnas par 'gyur ro zhes so//de ltar na rgyu mthun pa'i 'bras bu yang chos thams cad bde bar 'gro ba zhes bya ba'i ting nge 'dzin 'thob po/ /yab dang sras mjal ba las/ bcom ldan 'das chos thams cad la bde bar 'gro ba zhes bgyi ba'i ting nge 'dzin mchis te/ting nge 'dzin de gang gis thob pas byang chub sems dpa' dmigs pa'i dngos po thams cad la bde ba'i tshor ba sha stag myong bar 'gyur zhing sdug bsngal gyi tshor ba mi myong la/ sdug bsngal yang ma lags/ bde ba yang ma lags pa mi myong ste/de la sems can dmyal ba'i gnod pas gnod pa bgyis kyang bde ba'i 'du shes nye bar gnas par 'gyur ba dang / mi'i gnod pas gnod pa bgyis kyang bde ba'i 'du shes nye bar gnas pa dang / lag pa bcad dam/ rkang pa'am/ rna ba'am/ sna gtubs kyang bde ba'i 'du shes nye bar gnas par 'gyur ba dang / rtsa lcag gis gzhus sam/ rtsa lcag phyed tshal lam/ lcag gis gzhus kyang bde ba'i 'du shes nye bar gnas pa dang / btson rar bcug gam/ dug gi snod ltar bdugs sam/ bu ram shing brdungs pa ltar brdungs sam/'dom bu gzhom pa ltar bcom mam/ 'bru mar gyi mar me ltar 'bar bar byas sam zhes bya ba nas kAr ShA pa Na tsam du gtubs sam/ 'bras phye btso ba ltar btsos sam/ glang po che rnams kyis ma nyes kyang bde ba'i 'du shes 'jug go zhes rgya cher 'byung ngo //gal te dang po gnod pa chung ngu goms par 'gyur ba de ltar 'gyur na/ 'on kyang de nyid med do zhe na/ 'dir sbrul dang zhes bya ba la sogs pa gsungs te/ sbrul la sogs pas byas pa'i sdug bsngal don med pa ci ma mthong ste/ de ni 'bad pa med par grub pa yin te/gnod pa chung ngu goms pa'i rgyu mtshan ni yod pa nyid do snyam du dgongs pa'o/ /yang gzhan du rang gi sems brtan par bya ba'i phyir/ tsha grang zhes bya ba la sogs pa gsungs te/ sems bze re can la ni sdug bsngal shin tu cher gnod par 'gyur te/sems brtan pa la ni sdug bsngal yang bzlog nas so/ /sems brtan pa'i yang sdug bsngal mi bzod pa nyid ma yin nam zhe na/ 'dir la la zhes bya ba la sogs pa gsungs te/ sems brten pa la ni mi nus pa zhes bya ba cung zad kyang med de/ 'di ltar skyes bu dpa' bo la la g.yul ngo'i sar bdag gi khrag mthong yang lhag par dpa' ba brtan par byed do//yang sems kyi rgyud sdar ba la la ni gzhan gyi khrag mthong bas kyang shi la thug pa'i sdug bsngal nyams su myong bar 'gyur te/ de dag gnyi ga yang gcig la gcig sems goms pa dang bzlog pa las yin no//de ltar shes par byas nas sdug bsngal rnams kyis mi tshugs byos te/ sdug bsngal rnams kyis kyang zil gyis mi non par bya ste/ sems mi bsgul ba'i phyir ro/ /de bas na gnod pa zil gyis non cing des ni zil gyis mi gnon no//de ltar na yang gnod pa khyad du gsad par bya'o zhes mkhas pas zhes bya ba la sogs pa gsungs te/ mkhas pas sngar bstan pa'i dang ba nyams par mi bya'o/ /ci'i phyir zhe na/ gang gi phyir nyon mongs pa'i dgra rnams dang thabs cig tu g.yul 'gyed par rtsom pa na/g.yul du yang gnod pa zhes bya ba mi 'gyur ro zhes bya ba ni dkon te/ gnod pa ni mod pa nyid yin no/ /de lta mod kyi shin tu bya dka' ba 'di 'dra ba snang ba ma yin nam zhe na/ 'dir gang zhig ces bya ba la sogs pa gsungs te/ g.yul ngor dgra bo zil gyis gnon pa la mngon du phyogs pa ni des mtshon brdeg pa brang du phog na'ang phog phog tu dgra las rgyal bar byed pa gang yin pa de dang de dag ni skyes bu dpa' bo yin te/ mchog tu dgra las rnam par rgyal bar byed pas 'di rnam par rgyal ba thob par byas so zhes bsngags par byed do//yang gzhan gang zhig don gyis rma la sogs pas dgra zil gyis gnon pa de dag ni cung zad kyang byed pa min pas ro la gsod pa ltar dpa' bo rnams kyis smad par 'os pa yin no/ /yon tan bstan pa 'dis kyang sdug bsngal dang du blang bar bya'o zhes gsungs pa ni/gzhan yang zhes bya ba la sogs pa yin te/ gzhan yang sdug bsngal 'di'i yon tan ni 'di yin te/ dge ba'i rgyu rdzogs pa'i lam dang rjes su mthun pa'o/ /sdug bsngal gang yin la zhugs na skyo ba skye bar 'gyur ro/ / de'i phyir na gzugs dang lang tsho dang nor la sogs pas byas pa'i dregs pa sel bar byed de nyams par 'gyur ba dang / 'khor ba la ste 'khor ba sdug bsngal gyis gzir ba rnams la snying rje ba'i sems dang / 'di ni sdig pa'i 'bras bu yin no snyam du rig nas sdig pas 'jigs te/mi bya ba'i sems dang / sangs rgyas bcom ldan 'das nyid kyis sdug bsngal zad par 'gro ba'i lam nye bar bstan pa'o snyam nas gus pa dang / dad pa dang / sems dang ba'o/ /sdug bsngal dang du len pa yang gzhan gyi rkyen gyis byung bar brtag pa mkhris pa zhes bya ba la sogs pa gsungs te/lus 'di mkhris pa la sogs pa nyes pa gsum gyi bdag nyid de/ de yang rnam pa de lta bu'i zas dang gnas pa dang bral bas ma snyoms pa'i gnas skabs su gyur nas nad skyed par byed de/ sdug bsngal thams cad kyi rgyur 'gyur ro/de lta mod kyi de dag la ni bdag mi khro ste sems pa med pa'i phyir ro/ /de dag bsams bzhin du sdug bsngal skyed par byed pa ni ma yin te/ 'on kyang rang gi rgyu tshogs pa'i dbang gis rab tu 'khrug par 'gyur ba yin no zhe na/ gal te de ltar yin na sems yod rnams la ci ste khro ci ste ma yin zhe na/de dag kyang sngon gyi las la rag las pa'i phyir rang gi rgyu tshogs pa rab tu 'khrugs par gyur pas sdug bsngal bskyed pa yin no/ /de bas na mkhris pa la sogs pa bzhin du de dag la yang bdag khro bar mi rigs so/ /'dir gnyi ga yang mtshungs par rgyu la rag las pa'i phyir ro zhes nye bar ston pa dper na zhes bya ba gsungs te/dper na rang gi rkyen gyis nye bar bskyed pa'i nus pa can mkhris pa la sogs pa 'dod pa med par yang nges par na tsha bskyed pa de bzhin du rang gi rgyu yongs su 'gyur ba la brten pa'i nus pa yid mi bde ba la sogs pas khro ba bskyed do//de ltar na 'di dag thun mong du rgyu dang rkyen la rag las pa yin no/ /ji ste de ltar na 'dir sems pa dang bcas pa rnams bsams nas rnam pa de ltar mi 'dod pa byed pa yin la/ cig shos ni de ltar ma yin no zhe na/ khro bar zhes bya ba la sogs pa gsungs te/de ni rkyen tshogs pa med par khro bar bya'o zhes de ltar blo sngon du btang nas bsams bzhin du skye bo rnams rang dgar ni med/ khro bar mi byed do/ /khro ba yang bskyed par bya'o snyam du dgongs nas rang dbang can du mi skye'o/ /de lta bas na 'dir 'di nyid ni tshad mas grub po zhes nyes pa zhes bya ba la sogs pa gsungs te/'di dag thams cad ni rkyen 'di dag tsam nye bar gnas pa'i rang bzhin yin te/ rang dbang du 'jug pa ni 'ga' yang yod pa ma yin te/ rkyen rnams tshogs pa de dag kyang rang gi 'bras bu bskyed pa na legs par bsams nas mi skyed de/de ni rang gi rgyu yongs su 'gyur ba nye ba'i chos nyid kyis rnam pa de 'dra ba'i 'bras bu skyed pa yin te/ bsams nas ni ma yin la/ des bskyed de yang ste 'bras bu yang tshogs pa 'di dag gis bskyed do zhes sems pa yid la byed pa yod pa ma yin no//de lta bas na chos thams cad byed pa med pa'i phyir ro/ /'di yod pas 'di 'byung la/ 'di skyes pa'i phyir 'di skye ba yin pas/ 'gro ba 'di ni rkyen las byung ba tsam ste/ 'dir 'ga' yang rang dbang can 'byung ba med de/ chos thams cad rgyu dang rkyen la rag las pa'i phyir ro//'o na de ltar yin na rang dbang can ni yod pa ma yin te/ ji ltar grangs can pa'i gtso bo dang / bdag dang rigs pa can la sogs pa'i nam mkha' la sogs pa'o/ /des na ci'i phyir 'di la rang dbang can ni 'ga' yang med do zhes rjod par byed ces dogs pa la/gtso bo zhes bya ba la sogs pa gsungs te/ khyed kyis gang rdul dang mun pa dang snying stobs kyi cha mnyam pa'i rang bzhin ni gtso bo zhes 'dod pa'o/ /da zhes bya zhes pa ni de ni tshad mas grub pa med do zhes mi 'dod pa ston par byed pa'o//dngos po 'ga' zhig la bdag ces brtags shing zhen pa gang yin pa de yang tshad ma dang mi ldan no zhes gsungs pa'o/ /gang gi phyir de nyid ni rang nyid de/ de las gzhan pa'i rgyu med pa'i phyir 'byung ngo skye'o zhes bsams nas skye ba med do//ci'i phyir zhe na/ gang gi phyir ma skyes par ni de ste gtso bo la sogs pa snga nas yod pa ma yin pa nyid yin la/ med pa yang mo gsham gyi bu la sogs pa lta bu yin na skye bar 'dod par gyur pa gang yin/ ji ste med pa ni 'ga' yang mi skye ste/ 'on kyang mi gsal ba'i gnas skabs las gsal ba'i gnas skabs su yongs su 'gyur ba tsam yin no zhe na/gal te de lta yin na yongs su 'gyur ba dang / gsal ba'i gnas skabs kyang med na ji ltar skyed/ yongs su 'gyur ba dang gsal ba'i gnas skabs de de'i rang bzhin yin na de yang skye bar thal bar 'gyur ro//tha dad pa yin na 'brel pa med pa dang / 'brel pa brtags pa yin na yang thug pa med par 'gyur te/ 'og nas rgyas par gtso bo 'gegs par 'gyur ro/ /'o na de ltar na yang bdag la yang nyes pa 'di med pa nyid de/ de la ni bdag cag skye bar mi 'dod de/de ni dus thams cad du rtag pa'i rang bzhin skye ba med pa kho na'o zhe na/ de ltar 'dod du chug na yang 'di ni rnam pa thams cad du bong bu'i rwa dang 'dra ba nyid yin te/ skye ba med pa'i phyir ro/ /de bas na 'di la/ ma skyes par ni de med na/ /de tshe skye bar 'dod pa gang //zhes bya ba'i nyes pa ldog par mi 'gyur ro/ /yod na yang 'di la bdag nyid la yang rang dbang nyid med do/ /de yang gtso bos gtad pa'i yul nyid la longs spyod pa yin na/ de'i tshe yang lus la longs spyod pa las sngar 'di la longs spyod pa po nyid med do/ / phyis skyes pa yang de'i rang bzhin nyid yin te/ gzhan du na de'i longs spyod pa po nyid mi rigs pa'i phyir ro/ /de skye ba na yang de yang yin pa'i phyir ji ltar na bdag la skye bar mi 'dod/ yang de nyid/ ma skyes par ni de med na/ /de tshe skye bar 'dod pa gang / /zhes bya ba 'di 'thob po//'dir gzhan yang sun dbyung ba gsungs pa/ yul la rtag tu g.yengs 'gyur bas/ /zhes bya ba la/ gang gi tshe 'di gtso bos gtad pa'i yul la longs spyod pa'i phyir 'jug pa yin no zhes 'dod na/ de'i tshe sngar 'jug pa med pas phyis kyang 'jug par mi rigs so/ / ji ste brgya la 'jug go zhe na/ de'i tshe yang yul la g.yengs pa las ldog par mi 'gyur ro/ /de nyid na 'gag par 'gyur ba'ang ma yin no zhes gsungs pa yin te/ de'i tshe yul la longs spyod pa ldog par yang spro ba med par 'gyur te/ de'i rang bzhin de yin pa'i phyir ro/ / de yang rtag pa'i phyir mi ldog ste/ ldog na yang mi rtag pa nyid du thal bar 'gyur ba'i phyir ro/ /rigs pa can la sogs pa'i bdag tu brjod pa ni rtag pa'i phyir de'i khyad par gsungs pa ci ste zhes bya ba la sogs pa la/ 'dir grangs can las bye brag ni sems pa med pa yin te/gzhan ni mtshungs pa nyid do/ /de la rtag pa ni dus snga phyir rang bzhin gcig pa'o/ /sems pa med pa yang sems med pa'i rang bzhin te bems po zhes bya ba'i don te/ sems can ni gzhan dang 'brel pas sems par byed pa'o/ /mkha' bzhin ni khyab pa'o/ / de'i phyir mngon te byed pa med par gsal ba'o/ /gang gzhan dag /'dod pa la sogs rten pa dang / /rang ni sems med ngo bo dang / /rtags dang de bzhin kun khyab dang / /dge dang mi dge'i las rnams kyis/ /byed pa po dang de 'bras bu/ /longs spyod pa dang sems pa dang //ldan phyir sems pa'i rang bzhin gyi/ /bdag tu 'di ni 'dod pa yin/ /zhes bstan pa yin no/ /de ltar na 'di ni ci yang mi byed pa yin te/ bya ba 'ga' la yang mi mkho ba'i phyir ro/ /'on te byed pa med pa la lhan cig byed pa'i rkyen gzhan nye ba las de la yang byed pa khas blang bar bya ste/gang shes pa dang rtsal ba dang 'brel pa de la byed pa nyid du bshad ces gsungs so zhe na/ 'dir rkyen gzhan zhes bya ba la sogs pa gsungs te/ shes pa dang rtsol ba la sogs pa rkyen gzhan rnams dang phrad na yang rtag pa'i phyir 'gyur ba med pa sngar gyi rang bzhin las 'pho ba med pa'i bdag la ci byar yod/de la bya ba yod par mi rigs so/ /byed pa'i zhes bya ba la sogs pa la/ ji ltar gang zhig sngon byed pa med pa'i dus na yin pa de byed pa'i dus na yang yin na byed pa po'i rang bzhin dang bral ba de la byed pa pos ci zhig byas/gang gis na rkyen gzhan dang phrad pa de la bya ba rnam par 'jog par byed pa yin/ gzhan yang 'brel pa gnyi ga med pa'i phyir na bdag de'i byed pa 'di yin no zhes 'brel par 'gyur ba gang zhig yod de/ rgyu mtshan gzhan ci yod/ ci yang yod pa ma yin te/bdag dang dbang phyug kyang rgyas par 'gegs par 'gyur ba'i phyir te/ rang dbang can 'ga' yang yod pa ma yin no/ /de ltar thams cad du rang dbang can ma yin par bsgrubs nas mjug bsdu ba ni/ de ltar zhes bya ba la sogs pa gsungs te/ de ltar bstan pa'i tshul gyis phyi dang nang gi dngos po'i rnam pa thams cad gzhan gyi dbang ste gzhan la rag las pa yin no/ /de ltar na 'o na gang gi dbang yin pa de ni gzhan la rag las pa ma yin no zhe na ma yin te/ gang gi dbang gis de dbang med de/ rang gi rgyu'i gzhan gyi dbang yin no//de ltar na rgyu de yang rang gi rgyu las skye ba'i phyir thog ma med par 'khor ba'i brgyud pa la 'ga' yang rang dbang can du gyur pa mi srid do/ /de'i phyir chos thams cad ni byed pa med pa yin no/ /don dam par su zhig su la gnod pa byed/ de bas na gnod pa byed pa gang la gnod pa byas pa gang zhig gang zhe sdang 'byung bar 'gyur/de nyid gsungs pa/ mya ngan 'das lta'i zhes bya ba la sogs pa ste/ byed pa'i rtog pa thams cad dang bral ba'i phyir mya ngan las 'das pa bzhin du sems pa med cing g.yo ba med pa'i chos thams cad de ltar gyur pa rnams pa su la khro bar byed de/rtog pa dang ldan pa dag 'ga' la yang khro bar mi rigs so snyam du dgongs pa yin no/ /'o na de ltar yin na gcig bsgrub pa na gnyis pa nyams par 'gyur ro snyam du dogs pa/ gang gis zhes bya ba la sogs pa gsungs te/ bsgrub pa'i rigs pa bzlog pa'ang ste phyir bzlog pa'ang myang 'das lta bu'o//sems med dngos rnams la mi rigs so/ /de ltar zhes bya ba ni gang gi tshe rang dbang can 'ga' yang ma mthong ste/ thams cad rkyen tshogs pa la brten te skyes pa yin pa de'i tshe bzlog pa po yang mi rigs so//gal te de ltar yin pa de ltar na yang ji ltar mi rigs/ byed pa po rang dbang can gang gis bzlog par bya/ rang dbang can 'jug pa gang zhig bzlog par bya dgos pa ni 'di yin te/ rigs pa mtshungs pa la lar ni 'jug la/ la lar ni ldog par mi rigs so/ / gcig tu ldog pa na thams cad du ldog par rigs kyi la lar ni ma yin te/ rigs pa mtshungs pa'i phyir ro/ /de bas bzlog pa rigs pa min/ /zhes bya ba de rigs pa yin no zhes gal te de ltar sems na/ 'dir lan gsungs pa/ bzlog par rigs so/ /ci'i phyir zhe na/brten nas so/ /gang gi phyir byed pa med pa'i dngos po rnams la 'di la brten nas 'di skyes so zhes rten cing 'brel par 'byung ba yod pa de'i phyir bzlog par rigs pa yin te/ de bas na 'gal ba med do/ /'di skad du bstan par 'gyur te/ gang yang chos rnams thams cad byed pa med pa yin mod kyi/de ltar na yang rten cing 'brel par 'byung ba'i stobs kyis gzhan gyi dbang can du bstan te/ de ltar thams cad gzhan gyi dbang / /zhes bstan pa'i phyir ro/ /de bas na ma rig pa la sogs pa'i rkyen gyi stobs kyis gong nas gong du 'bras bu 'dren pas 'du byed la sogs pa'i ngo bo 'jug cing /snga ma snga ma log pa na ldog ste/ de dag kyang phyi nas rgyas par ston par 'gyur ro/ /de'i 'khor ba'i sdug bsngal rgyun chad pa ldog par mngon par 'dod de/ de bas na zhe sdang la sogs pa sdig pa 'jug pa las bzlog pa 'thad pa yin no//de dag la brten nas rnam pa de lta bu'i mngon par mtho ba dang / nges par legs pa'i rang bzhin gyi 'bras bu skye'o/ /da ni skabs nyid la sbyar bar bya ste/ de bas zhes bya ba la sogs pa gsungs te/ gang gi phyir thams cad brten nas skyes pa de'i phyir mi mdza' ba dang cig shos gnod pa byed pa rkyen las gyur to zhes bde ba nyid du dmigs par bya'o//ci'i phyir zhe na/ 'di ni gnod pa byed pa'i rgyu'i ngang tshul can mi mdza' ba'am cig shos 'di 'dra ba yin pa ste/ de ltar nges par byas la bde bar 'dug la yid mi bde bar mi bya'o//gzhan yang sdug bsngal dang nye bas sems 'khrugs na yang sdug bsngal ldog par mi 'dod do zhes bstan pa/ gal te zhes bya ba la sogs pa gsungs te/ bdag nyid kyi 'dod pa tsam gyis rgyu med pa yang mngon par mi 'dod pa ldog pa dang /mngon par 'dod pa gnas par 'gyur ba med de/ de ltar gyur na sems can su la yang sdug bsngal bar mi 'gyur ro/ /ci'i phyir zhe na/ bdag nyid sdug bsngal bar 'dod pa su yang med do/ /de ltar na sems can thams cad ni rang bde bar 'dod pa yin no//sdug bsngal dang du len pa'i bzod pa brjod nas/ da ni gzhan gnod pa byed pa la ji mi snyam pa'i bzod pa bstan pa/ bag med pas ni zhes bya la sogs pa gsungs te/ ma brtags par byed pa ni bag med pa'o/ /rang nyid ni rang nyid kyi lus la tsher ma dang dong dang /gyo mo dang / rdo ba dang / gseg ma la sogs pa dang / bgrod dka' ba'i lam du las ma yin pa la 'jug pa'am/ tsher ma bting ba la nyal ba la sogs pa'am/ de bzhin du zas dang skom dang / bgo ba la sogs pa rnams kyis gnod pa byed pa'o//ci'i phyir zhe na/ rngam pa ste/ bgrod par bya ba ma yin pa gzhan gyi bud med dang nor la sogs pa thob par 'dod pa'i don du'o/ /'gegs pa ni dpyangs pa'o/ /g.yang sa ni ri la sogs pa'i g.yang ngo / /chu dang mer 'jug pa la sogs pa dang / dug dang mi 'phrod pa la sogs pa za ba ste/ ha cang za ba dang / ha cang mi za ba la sogs pa'o/ /'ga' zhig ni mi rmongs pa'o/ /rang la ni bdag nyid kyi lus la gzhan gyi gnod pas gnod pa byed pa yod de gsod par byed pa'o/ /bsod nams ma yin spyod pa yis ni gzhan bsad pa'i bsam pas g.yul ngo la sogs par mi dge ba'i las byed pas so//gang gi tshe de ltar bstan pa'i rim pas nyon mongs dbang du gyur pa ste/ nyon mongs pa'i gzhan dbang du gyur pa'i phyir/ sems can de dag bdag sdug nyid kyang ste/ phangs pa'ang gsod byed pa gzir bar byed pa de'i tshe de dag gzhan lus la gzhan gyi lus po la gnod pa spong bar ji ltar 'gyur/de ltar na de dag snying brtse ba'i gnas yin pas zhe sdang gi gnas ni ma yin no zhes gsungs pa/ nyon mongs zhes bya ba la sogs pa yin te/ sha za bzhin du nyon mongs pas smyo bar byas pa gnod pa byed pa de dag rang la gnod pa'am/gzhan la gnod pa byed pa'i sgo nas bstan pa'i tshul du zhugs pa rnams la snying rje med pa tsam ma yin pa ste/ de tsam ma yin pa'o/ /tha mal pa'am bar ma yang de la mi rigs na/ brtse ba'i gnas rnams la zhe sdang bskyed pa ci tha tshig ste/shin tu cher phyin ci log pa yin no/ /de ltar yang rang gi sems bzlog par bya'o zhes bya ba ni/ gal te zhes bya ba la sogs pa gsungs pa yin te/ 'di ltar 'dir brtag pa rnam pa gnyis bya ste/ gal te byis pa so so'i skye bo rnams kyi rang bzhin gzhan la gnod pa byed pa de 'dra ba yin na/de'i tshe khyod kyi rang bzhin la ni ci ste gzhan la gnod pa byed ces brgal zhing brtag par mi rigs so zhes yongs su brtags nas bya ste/ de dag la bdag gis zhe sdang bar mi rigs te/ dper na me sreg par byed pa'i phyir me sreg par byed pa rang bzhin yin pa lta bu'o/ /gzhan du de med na de'i rang bzhin nyid nyams par thal bar 'gyur ba'i phyir ro/ /brtag pa gnyis pa'i dbang du byas te/ 'on te zhes bya ba la sogs pa gsungs la/ 'on te skyon 'di glo bur te de'i rang bzhin du gyur pa las gzhan nyid yin la yang sems can gyi rang bzhin ni sems rang bzhin gyis 'od gsal ba yin pa'i phyir nges pa yin na ste/gya gyu can ma yin la/ zhe sdang nyid ni sdang ba'i rang bzhin te/ sems can ni ma yin na/ de ltar na'ang sems can des pa'i rang bzhin can de dag la khro bar mi rigs so//gang dang 'dra zhe na/ gang na du ba dku ba 'thul ba yod pa de dang 'dra ste/ nam mkha' dri ma med pa de la du ba dku ba'i rang bzhin med pa yin te/ 'on kyang du ba'i yin no/ /de bas na nyes pa de ni du ba nyid kyi nyes par rigs te/rang bzhin gyis yongs su dag pa'i nam mkha' la ni ma yin no/ /de bas na nyes pa rnams la khro bar rigs kyi sems can rnams la ni ma yin no/ /gzhan yang sdug bsngal gyi rgyu gtso bo gang yin pa de la khro ba rigs par 'gyur gyi gtso bo ma yin pa la ni ma yin no zhes/dbyug pa la sogs zhes bya ba la sogs pa gsungs te/ sems ma bsgoms pa'i lus la dbyug pa brdegs pas sdug bsngal 'byung ba de bas na dbyug pa nyid sdug bsngal gyi rgyu dngos yin pas de nyid la khro bar rigs so/ /'on te gzhan gyis 'phangs pa yin pas dbyug pa la sogs la nyes pa ci yod ce na/de'i phyir 'phen par byed pa nyid nyes pa can du 'gyur ro/ /'o na de ltar na de yang dbyug pa bzhin du zhe sdang sbod par byed pas sbad pas zhe sdang la bdag khro bar rigs kyi/ sbad pa la ni ma yin no/ / gzhan yang bde ba dang / sdug bsngal la ma gtad pa ni 'ga' yang longs spyod par mi byed do zhes rnam par bsams la/ gzhan gnod pa byed kyang de la sems khro bar mi bya'o zhes/ bdag gis zhes bya ba la sogs pa gsungs te/ gang gi phyir bdag gis kyang tshe rabs snga ma gzhan la sems can rnams la rnam pa 'di lta bus gzir bar byas pa de'i phyir bu lon 'jal ba'i rigs pas bdag la gnod pa byed par rigs pa nyid yin te/gnod pa de ni bdag gi las kyi 'bras bu smin pa'i phyir ro snyam du dgongs pa'o/ gang zhig gang gi rgyu yin pa de las de 'byung ste/gzhan las ni ma yin no zhes brtag cing gzhan gnod pa byed pa ji mi snyam par zhes bstan pa/ de'i mtshon dang zhes bya ba la sogs pa gsungs te/ rgyu'i tshogs pa ma tshang ba med pa ni 'bras bu thams cad kyi rgyu yin no zhes/tshad mas nges pa yin no/ /de ni 'dir yang rnam pa de lta bu yod de/ 'di ltar gnod pa byed pa de'i mtshon ral gri la sogs pa dang bdag gi lus te/ de dag gnyi ga tshogs pa'i ngo bo ni sdug bsngal gyi rgyu yin no/ /de lta bu nus pa can gyi rgyu yod par gyur pa na'ang ji ltar na 'bras bu mi skye/gzhan du na de de'i rgyu ma yin par 'gyur ba dang / de las gzhan pa yang de las skye bar 'gyur ro/ /de lta bas na gal te rgyu nye ba la khro bar byed na de'i tshe bdag la'ang khro bar rigs so/ /de bas na khyed rang yang sdug bsngal gyi rgyu 'dzin cing nye bar byed pas rang la mi khro na gzhan la yang mi rigs so snyam du dgongs pa yin no//bstan pa'i don rnam pa gzhan gyis gsal bar byed pa ni/ shu ba zhes bya ba la sogs pa gsungs pa yin te/ bdag gis shu ba smin pa lus kyi rnam pa 'di bzung ba ste/sdug bsngal thams cad kyi rgyu yin pa'i phyir ro/ /'joms pa thams cad mi bzod pa ni brdung ba dang brdeg pa la sogs pas kyang nyams par bya ba yang ma yin pa'i phyir ro/ /sdug bsngal spong bar bya ba'i phyir dang / bde ba thob par bya ba'i sred pa'i ste 'dod pa gang yin pa'o//des ldongs pa na shes rab kyi mig bkag pas de la gnod pa yod pa su la khro bar byed/ shu ba rtsig pa la sogs pa la thugs pa las byung ba'i sdug bsngal ba la rtog pa dang ldan pa gang la khro bar mi rigs so/ /gzhan yang gang 'bras bu don du mi gnyer ba des de'i rgyu spang bar bya ba yin na//bdag ni blo phyin ci log tu gyur pa yin no zhes dpyad pa la byis pa zhes bya ba la sogs pa gsungs te/ byis pa zhes bya ba ni byis pa'i chos phyin ci log dang ldan pa'o/ /sdug bsngal te dbyug pa la sogs pas bsnun pa las byung ba mi 'dod cing /yang de'i rgyu lus dang slar gnod pa ste/ byed rgyu las brkam pas na ste/ de'i phyir na rang gi lus kyi sdug bsngal gang yin pa de ni rang gi nyes pa las gyur pa 'di yin no/ /de bas na ci'i phyir gzhan la ste/de'i lhan cig byed pa tsam la bkon du yod/ bdag nyid la gnod pa'i don du rang gis mtshon bya 'dus byas pa lta bu yin pas gzhan la bdag khro ba mi rigs so zhes/ dper na dmyal ba'i zhes bya ba la sogs pa gsungs te/ral gri lo ma'i nags tshal ni sems can dmyal ba 'byung ba ste/ 'di la ral gri lo ma yod pas na ste de'i phyir ro/ /ral gri smos pa ni gtso bo'i phyir te/ sems can dmyal ba'i sdug bsngal gyi rgyu'i 'khrul 'khor dang mtshon cha gzhan dag kyang bzung ngo //nags tshal de na gnas pa'i bya rgod dang 'ug pa dang khwa la sogs pa'i bya rnams ji lta ba bzhin du rang gi las kyis bskyed pa sdug bsngal gyi rgyur gyur pa ste/ sdug bsngal gyi rgyu gzhan yod pa ma yin pa de bzhin du gzhan gyi mtshon cha la sogs pa 'di yang sdug bsngal gyi rgyu yang yin no//rang gi las kyis 'di bskyed pa yin pas gang zhig la khro bar bya/ 'di ltar yang 'di ni phyin ci log yin no zhes bstan par bya ba'i phyir/ bdag gi las kyis zhes bya ba la sogs pa gsungs te/ gang gi bdag gi las kyis bskul byas nas te/sbad nas bdag la gnod pa byas pas gnod pa byed pa rnams byung ste yod pa sems can dmyal bar dong nas de'i phyir bdag gis 'di dag la gnod pa byas te ma brlag gam zhes rang gi sems la 'bad par byed pa yin te/ nga ni 'di dag gis ma brlag go/ / dgongs pa ni 'di yin te/ gal te bdag gis 'di 'dra ba'i las ma byas na de'i tshe de dag kyang gnod pa byed par mi 'gyur bas de bas na bdag gis byas pa'i las nyid gnod pa byed pa yin/ bdag gi blo ni phan 'dogs pa rnams la rmongs pa'i dbang gis gnod pa byed par 'dzin pa'o zhes tshig le'ur byas pa gnyis kyis bstan pa/'di dag la ni zhes bya ba la sogs pa gsungs pa yin te/ 'di dag la ni gnod pa byed pa'o/ /brten bcas nas ni rgyu mtshan du byas nas te/ bzod pas ni bzod pa la dmigs pas so/ / bdag gis sdig pa tshe rabs snga ma la byas pa ste/ gzhan la gnod pa byas pa las byung ba'o/ /mang ba ni rnam grangs du mas byas pa'o/ /'byung ste sdug bsngal de nyams su myong ba rnam par smin pas zad par 'gyur ro/ /bdag la brten nas ni bdag gi las kyis bskul ba ste de ltar bdag la gnod pa byas nas yang 'di dag ni dmyal ba'i tshor ba mi bzad pa bstan par dka' ba'i sdug bsngal nyams su myong bar dong ngo //de'i phyir bstan pa'i rim pas/ bdag ni de la gnod byed la/ /zhes bya ba la sogs pa ni go sla'o/ / gal te khyod gnod pa byed pa ma yin nam/ de lta na ni khyod sems can dmyal bar 'gro bar rigs la de dag ni ma yin no zhe na/ bdag la bsams pa'i yon tan gyis/ /zhes gsungs pa yin te/ slar gnod pa byed pa las log pa'i mthar thug pa de dag ni bdag gi bsam pa'i che ba'i bdag nyid yin te/dmyal bar 'gro ba las log pa'i rgyu yin no/ /dmyal bar mi 'gro ba gang yin pa de ni bdag gi bsam pa'i che ba'i bdag nyid kyi stobs kyis yin la/ 'di dag ni bsam pa ngan pa'i phyir bdag dmyal bar ma lhung ba ni ma yin no snyam du dgongs pa'o//de ltar na yang / gal te zhes bya ba la sogs pa gsungs te/ 'dir bsdus pa'i don ni 'di yin te/ gal te bdag nyid gnod pa byed pa yin yang thabs la mkhas pa 'ga' zhig gis gal te sems can dmyal bar mi 'gro yang de'i tshe phan 'dogs par byed pa de dag la ci zhig 'byung ste ci zhig zad ci zhig nyams zhes bya ba'i don to//re zhig bdag nyid gcig pus khyed cag gzhan ni ma bsrungs la/ bdag nyid ni bsrung ba yin te/ de dag gis de dag gi yon tan dang skyon la cung zad kyang lhag pa'am ma tshang bar 'gyur ba med do//gal te de lta na yang khyod kyi bdag nyid bsrung ba yang mi rigs pa yin te phan 'dogs pa byas pa shes pa'i phyir ro zhes dogs pa la/ 'on te zhes bya ba la sogs pa gsungs te/ gal te byis pa la sogs pa rdeg par byed pa la len du gnod pa byas na de ltar na'ang de dag ma bsrungs par 'gyur te/de dag sems can dmyal bar 'gro ba la sogs pa la slar bcos pa ci yang ma byas par 'gyur la/ brdegs kyang bdag gis slar brdeg par mi bya ba dang / de bzhin du sems can thams cad la byams pa'i sems bdag gis spang bar mi bya ba dang / tha na mgal dum la yang khong khro bskyed par mi bya'o zhes bya ba la sogs pa byang chub sems dpa'i spyod pa las bdag nyid slar nyams par 'gyur ro/ /de lta bas na da ni slar 'chos pa'i thabs med pas nyon mongs re sdug bsrung bar mi nus pa'i phyir brlag par 'gyur te/ngan 'gror ltung bar 'gyur ba yin pas da lta re zhig btang snyoms su byas la phyin nas thabs la brten te ji nas 'di dag la sdug bsngal rdul tsam yang med par 'gyur ba de bya'o/ / de ltar gzhan gyis gnod pa byas pa la ji mi snyam pa'i bzod pa bstan nas/ da ni chos la nges par sems pa'i bzod pa nye bar bstan pa'i phyir/ yid ni zhes bya ba la sogs pa gsungs te/ ma brtags na gnod pa skye ba'i sdug bsngal rnam pa gnyis te/ lus kyi dang /sems kyi'o/ /de la yid la ni sus kyang dbyig pas brdeg pa la sogs pa byar mi nus te/ yid ni lus can ma yin pa'i phyir ro/ /de ltar na de las byung ba'i sdug bsngal don dam par med do/ /rtog pa las byas pa'i yid mi bde ba yod de/ de nyid bstan pa lus la zhes bya ba la sogs pa la/bdag gi lus 'di snyam du rnam par rtog pa goms pa'i dbang gis sdug bsngal dag gis non te/ de la yang sdug bsngal gyi rgyu nges pa nyid yin no zhes/ brnyas dang zhes bya ba la sogs pa gsungs pa la/ brnyas pa la sogs pa'i tshogs pa ni lus kyi sdug bsngal gyi rgyu ma yin te/gang gi phyir 'di ni lus la cung zad kyang gnod pa byed par min pa de'i phyir na sems khyod rgyu ci'i phyir khro bar byed/ 'on te gal te brnyas pa la sogs pa la lus la gnod par byed pa ma yin mod kyi/ de thos pas kyang bdag la 'jig rten rnams sems ma dad pa skye ba yin pas bdag mi 'dod pa yin no zhe na/brnyas dang zhes bya ba la sogs pa gsungs te/ de ltar yin du chug kyang / de lta mod kyi 'di dpyad par bya'o/ /bdag la brnyas pa la sogs pa thos pa la sogs pas 'gro ba rnams la ma dad pa 'jig rten 'di'am 'jig rten gzhan du ci bdag la za bar 'gyur ram/gang gi phyir 'jig rten ma dad pa de la bdag mi dga'/ de ltar rnam par dpyad la 'di la mngon par zhen par mi bya'o/ /yang na 'di la mngon par zhen pa'i rgyu yod de/ rnyed pa'i bar chad byed par mi 'gyur ba yin no zhes/ rnyed pa'i zhes bya ba la sogs pa gsungs te/ 'di ltar brnyas pa la sogs pa thos pas 'jig rten rnams mi dad la/ de yis rnyed pa 'bul ba las phyir phyogs par 'gyur te/ de bas ni brnyas pa la sogs pa'i tshogs de dag mi 'dod pa yin no zhe na/ de ni mi rigs te/ bdag gi rnyed pa 'di nyid du yang nyi ma so sor nges par 'dor te/'jig pa'i ngang can gyi chos yin pa'i phyir 'bral bar 'gyur zhing 'jig rten pha rol tu yang rjes su 'brang bar mi 'gyur ro/ /de'i rgyu mtshan gyis brnyas pa la sogs pa byed pa rnams la khros pa'i sdig pa gang yin pa de nyid ni pha rol du gnas par 'gyur te/'jig rten pha rol du rjes su 'brang bar 'gyur ro/ /brten par zhes bya ba ni de'i 'bras bu de longs ma spyad par 'jig par mi 'gyur ba'o/ /rang nyid kyis 'dir 'di dag dpyad par bya'o zhes/ bdag ni zhes bya ba la sogs pa gsungs te/ rnyed pa gang yin pa de med pas nyi ma 'di nyid du bdag shi ba ni rung gi gzhan la gnod pa byas pa'i sgo nas rnyed pa rnyed pas log 'tsho yun ring ni ma yin te/dus yun ring por ro/ /ci'i phyir zhe na/ gang gi phyir 'tsho ba'i mtha' ni 'chi ba yin no zhes gsungs pas dus mang po zhig tu 'tsho yang nges par 'ongs par 'gyur ro//'chi ba'i sdug bsngal de nyid yin te/ bdag la phyis lo brgya 'das nas byung ba gang yin pa de nyid da lta nyid du 'chi bar 'gyur ba yin no/ /de'i phyir yun ring por 'tsho yang khyad par ni med do/ /'di dag gis kyang khyad par med pa yin no zhes tshigs su bcad pa gnyis kyis bstan pa/rmi lam zhes bya ba la sogs pa gsungs te/ dper na 'ga' zhig rmi lam du lo brgyar bde ba myong ba rmis te sad pa dang / gzhan zhig skad cig tsam du ste/ de de tsam zhig tu bdag nyid bde bar gyur par rlom ste/'di dag gnyi ga la yang rmi lam du bde ba myong bar rmis pa sad par gyur pa na rmis pa'i bde ba zhig pa de ni phyir 'ong ba med do/ /sad pa'i gnas skabs na rjes su 'brang ba med de/ dran pa tsam zhig las ma lus pa yin pa'i phyir ro/ /de 'drar zad na ni rmi lam du rmis pa bzhin du skyes bu'i'o//'chi ba'i dus na ni 'chi ba'i tshe na'o/ /tshe ring ba dang tshe thung ba'i bde ba ni phyir mi 'ong ba yin te/ de bas na log pa'i 'tsho ba zhog cig /'di dag gis kyang rnyed pa dang ma rnyed pa la khyad par 'ga' yang med do zhes bstan pa/ rnyed pa zhes bya ba la sogs pa gsungs te/rnyed pa mang po ni shin tu bungs che ba'o/ /'thob gyur kyang ni thob nas dus yun ring por longs spyad pa'i bde ba dag kyang ngo / /yang 'chi ba la brten nas lag pa stong pa ste lag stongs su'o/ /rnyed pa la sogs pa de dag las rgyags ma bzung zhing bde ba las lhag ma cung zad kyang gnas pa med de/rked pa'i srad bu tsam yang ma lus pas sgren mo ste/ chom pos phrogs pa bzhin du 'jig rten 'di nas 'jig rten pha rol du 'gro rnyed pa la ni khyad par yod pa nyid ma yin nam/ chos gos la sogs pa'i gegs med pas tshe'i dus byed nye bar ston pa las yun ring por 'tsho bar 'gyur te/des na ni sngar byas pa'i sdig pa dag rnam par sun 'byin pa kun tu spyod pa la sogs pas yongs su zad par bya ba dang / bslab pa sdom pa yongs su bsrung bas byang chub kyi sems bsten pa la sogs pa dang / dge ba'i phyogs 'phel bar bya ste/gang / chos la spyod pa ji srid yun ring 'tsho/ /de srid dge ba'i rgyun ni rab tu 'phel/ zhes gsungs pa lta bu'o/ /de bas na rnyed pa'i bar chad byed pa la khro bar rigs pa yin no snyam du dogs pa la/ gal te rnyed pas zhes bya ba la sogs pa gsungs te/gal te bstan pa'i rim pa bzhin du rnyed pas 'tsho ba bstan pa dang sdig pa zad pa dang / bsod nams bya'o zhes bya ba la sogs par sems na de ltar ma yin te/ de bas na lhag pa'i nyes pa ma mthong nas brjod pa yin no zhe na/ rnyed pa'i don du zhes bya ba la sogs pa gsungs te/rnyed pa'i don du ni rnyed pa'i rgyu mtshan du'o/ /de'i bar chad byed pa la zhe sdang byed na legs par spyad pa nyid zad par 'gyur te/ gang / bskal pa stong du bsags pa yi/ /sbyin dang bder gshegs mchod la sogs/ /legs spyad gang yin de kun kyang / / zhes bya ba gsungs pa'o/ /khyad par ni 'di yin te/ bzod pa ma yin pa las byung ba sdig pa'i phung po mngon par 'phel ba'o/ /ji ste 'di ltar ji zhig ltar dus yun ring po de srid du rnyed pas 'tsho bar 'gyur na de tsam zhig bdag gi dgos pa yin no zhe na/ gang gi don du zhes bya ba la sogs pa gsungs te/byang chub sems dpa' sems can ngan ngon gyi 'tsho ba dgos pa med pa nyid 'dod par bya ba ni ma yin te/ 'on kyang tshogs mngon par 'phel bar bya ba'i don dang / sdig pa zad par bya ba'i don du gal te de legs par spyad pa zad par byed pa'i rgyu mtshan du 'gyur na/de'i tshe mi dge ba 'ba' zhig gi las byed pa'i ngang tshul can des ko ste de 'dra bas ci zhig bya// //bam po bcu pa/ de ni smad pa nyid yin no snyam du dgongs pa'o/ /'o na de lta mod kyi rnyed pa'i bar chad byed pa'i phyir bdag la bsngags pa ma yin par smra ba rnams la khong khro'i sems skye ba ni ma yin te/'on kyang yon tan 'chab pa la sogs pa'i las kyi sdug bsngal gyi rgyu yin pa'i phyir ro zhe na/ gal te zhes bya ba la sogs pa gsungs te/ mi snyan pa smra ba ni grags pa ma yin pa brjod pa'o/ /gal te khyod kyi khro ba gang yin pa 'di mi snyan pa smra ba de skyon gsal bar byed cing yon tan 'chab par byed pa'i phyir khyod nyams par byed cing sun 'byin par byed pa'o snyam du rig nas de'i rgyu mtshan gyis sam/yang na sems can de 'jig rten nyams par byed pa mi snyan par smra bas bdag la 'dzin par byed pa ste/rang sems ma dang bas de dag kyang sems ma dang bar byed do zhes bya ba'i don to/ /des na mi snyan pa smra ba la khro ba yin no zhes brjod na de'i tshe gzhan la ste/ sems can pha rol po la mi snyan pa brjod pa gang yin pa de la yang ci ste khro ba'ang mi byed/mi snyan pa smra ba de yang sems can nyams par byed pa yin te/ de bas na 'di la yang khro ba'i tshul rigs pa yin no/ /'dir len te dogs pa ma dad ces bya ba la sogs pa gsungs pa/ gzhan te sems can pha rol la ma dad pa rag las shing brten pa ste/sems can gzhan yul du byas pa las byung ba yin no/ /de'i dngos po ni de nyid de/ de bas na ma dad pa gzhan la brten pa nyid kyi phyir ro/ /dad pa med pa ni sems ma dad pa dang mi snyan pa smra ba la'o/ /khyod bzod na ni bzod pa skye na'o zhes rang gi sems nyid la 'dri ba'o//'dir gsungs pa/ nyon mongs skye la zhes bya ba la sogs pa la/ gal te khyod ma dad pa gzhan la rag las pa gang yin pa de la bzod pa yin na/ de'i tshe rang la mi snyan smra la cis mi bzod/ ci'i tshul gyis so/ /nyon mongs skyes la rag las pa'i nyon mongs pa rnams kyi skyes pa ni gzhan gyi dbang yin te/ma dad gzhan la rag las pa nyid la bzod pa'i rgyus 'dir gnyi gar mtshungs pa yin no zhes bya ba'i don to/ /sku gzugs la sogs pa 'jig par byed pa rnams la ni dad pa'i dbang gis kyang khong khro'i sems bskyed par mi bya'o zhes gsungs pa/sku gzugs zhes bya ba la sogs pa ste/ 'jig par byed pa ni rnam par 'khrug par byed pa'o/ /'khyal ba ni skyon gyi blos tshul dang mi mthun par smra ba'o/ /de rnams la bdag gi zhe sdang mi rigs so/ /ci'i phyir zhe na/ gang gi phyir sangs rgyas la sogs pa ste/byang chub sems dpa' dang 'phags pa nyan thos dang rang sangs rgyas la sogs pa rnams la log par mngon par zhen pa las byung ba'i bdag tu 'dzin pa la log cing chags pa med pa'i phyir gnod pa ni mi mnga' ste/ sems gzir ba'i mtshan nyid yang mi bde ba mi mnga'o snyam du dgongs pa'o//de bas na sku gzugs la sogs pa 'jig par byed pa rnams la zhe sdang gi sems bskyed par mi bya'o/ /de'i tshe 'gal ba'i chos byed pa de dag la dam pa rnams kyis snying brtse ba nyid du rigs so/ /gzhan du na de khyad par med pa'i phyir sdig pa 'ba' zhig skye bar 'gyur ro//gal te chos kyis bzlog par nus na de'i tshe nyes pa med de/ gang la chos 'dod pas bla ma dang pha ma la sogs pa la gnod pa byed pa rnams la zhe sdang gi sems skye ba de yang bzlog par bya'o zhes gsungs pa/ bla ma gnyen la zhes bya ba la sogs pa la/bla ma ni chos kyi lam ston par byed cing mi dge ba'i phyogs las log par byed pa'o/ /gnyen ni ma lto gcig pa dang / gnyen 'dab dang / rus chags dang / gnyen 'dun la sogs pa gzhan dag kyang ste/ de dag la gnod pa byed pa dang /de bzhin du bshes la ste phongs pa'i gnas rnams la gnod pa byed pa rnams la yang khro ba bzlog par bya'o zhes sbyar ro/ /ji ltar zhe na/ snga ma'i tshul du rkyen dag las 'byung ba mthong nas gang / nyes pa ji snyed thams cad dang / /sdig pa rnam pa sna tshogs pa/ /zhes bya ba la sogs pa gsungs te/de bas na 'di dag thams cad kyang sngar gyi las kyis bskyed pa'i 'bras bu longs spyod de/ 'di la 'ga' yang bcos pa'i rgyu yod pa ma yin no/ /de bas na 'dis ni ji skad du gzhan gyi gzhung lugs las lha dang mi dang bram ze dang pha dang ma la sogs pa'i don du sdig byas kyang nyes pa med do zhes 'dod pa de ltar 'dir mngon par 'dod pa ma yin no zhes bstan pa yin no//gzhan yang dngos po'i de kho na nyid 'di yang yid la byed pas sems can rnams la khro bar mi bya'o zhes gsungs pa/ lus can zhes bya ba la sogs pa la/'bras bu mtha' dag gis skyed par byed pa po nyid du rjes su 'gro ba dang ldog pa dag gis tshogs pa'i mtshan nyid ni rgyu yin par nges par bzung ste tshogs pa de yang dngos po'i chos yin pa'i phyir 'ga' zhig tu nus pa yod pa'i rang bzhin yin no/ /de la sems yod pas byas pa ni lag pa dang rkang pa la sogs pa bsnun pas so//sems med pas ni dbyig pa dang mtshon cha dang nad la sogs pas te/ de dag la yang sems yod pa bzhin du byed pa yod pa nyid yin te/ khyad par ni dngos dang brgyud pas byas pa yin no//rang nyid 'dod rgyal gyis sam/ bong ba dang rtsig pa la sogs pas gnod pa byas pa las byung ba'ang rung ste/ lus can rnams la gnod byas na ste/ nges par byung ba na 'di las gzhan gnod pa'i rgyu ni med do/ /de ltar rgyu'i tshogs pa rnam pa gnyis po skabs su bab pa de yang sems yid rnam par shes pa dang bcas pa'i lus la mthong ba tshad mas yongs su nges pa de bas na de nyid de'i skye bo'i gnas yin gyi gzhan ni ma yin te/sems med pa la tshor ba mi rigs pa'i phyir ro/ /de bas na gang zhig gang gi skye ba'i gnas yin pa de ni de nyid du 'byung gi/gzhan du ni ma yin te/ dper na 'dam bu 'dam skyes 'byung gi skam la ni ma yin pa lta bu'o/ /de bas na rigs pa 'di yis de dag ste brjod ma thag pa'i gnod pa'i ngo bo nyid bzod par gyis sran par gyis shig pa'o/ /da ni gnyi ga la yang thun mong du sun dbyung ba'i phyir su la yang khro bar mi rigs so zhes brjod par bya ba'i phyir/la la rmongs pas zhes bya ba la sogs pa gsungs te/ bdag dang bdag gir 'dzin pa la mngon par zhen pa phyin ci log gis la la kha cig gnod pa byed de/ dbyug pa la sogs pas brdeg pa'am brgyad bkag smra ba'i nyes pa de rang gis byas pa yin te/gzhan ni gnod pa byas pas de la khro bar gyur na ste 'tshig par 'gyur na'o/ /rmongs pas ni rnam par rmongs nas te/ rang gis byas pa'i las dang 'bras bu'i 'brel pa mi gnyer ba ste/ ma rig pa'i sgrib pas slar brdeg pa dang / 'khyal pa la sogs pa brtson par byed pa'o/ /de ltar na nyon mongs pa'i srin pos brlams pas dbang du byas pa de la gang skyon med par smra zhes pa med pa dang nyes pa dang ldan par gang la smra/ 'di dag gnyi ga yang thun mong du nyes pa dang ldan pa'i phyir ro//'di ltar yang bdag gi tshul nyid la bsams te khong khro'i sems bzlog par bya'o zhes gsungs pa/ gang gis zhes bya ba la sogs pa la gang gi phyir te/ ci ste de bzhin du 'bras bu de dag gi rgyu'i las byas/ gang gis zhes bya ba 'di ni 'jig rten pa'i smra ba'i tshul lo//yang na gang gi phyir las la nus pa yod pa'i rgyus 'khyal ba dang / 'ching ba dang brdeg pa la sogs pas gzhan dag pha rol pos gnod pa byed gzir bar byed pa'o/ /gal te de lta yin na yang phyir bcos par rig pa ma yin nam zhe na/ thams cad ces bya ba la sogs pa gsungs te/sdug bsngal gyi rgyu thams cad las kyi rkyen gyis bskyed cing rab tu 'jug pa yin te/ de lta na de'i 'bras bu bzlog pa'i don du 'di la gzhan du bdag gis byar ci yod ste/ 'bras bu bskyed pa la phyogs pa'i las la gang gis kyang bzlog par mi nus pa'i phyir ro//yang 'dir rigs pa'i tshul 'di yin no zhes/ de ltar mthong nas zhes bya ba la sogs pa gsungs te/ sems can 'di dag ni las dang nyon mongs pa la rag las pa ste gnas pa'o/ /phan tshun du mi rigs pa'i las byed pa rnams bzlog par mi nus so zhes de ltar rtogs nas te shes nas yang bsod nams dag dge ba'i las rnams la de ltar bdag gis bsgrims te bya ste/gang gis rnam pa de lta bu'i nus pa thob par byas nas yang dag pa'i lam du zhugs par gyur pa na thams cad phan tshun gcig la gcig byams pa'i sems dang phan pa dang bde ba bsgrub pa la brtson par 'gyur ba'i rnam pa de lta bus brtson 'grus brtsam mo//phangs pa'i dngos po 'joms par byed pa la gnod pa'i sems las bzlog par bya ba'i ched du 'jig rten pa'i dpe brjod pas zhe sdang las ldog par bya'o zhes tshigs su bcad pa gnyis kyis bstan pa/ dper na zhes bya ba la sogs pa gsungs te/ dper na khyim gcig na mes tshig par gyur pa na/ khyim de nas khyim gzhan du me song nas gang na rtswa dang shing la sogs pa la mched par byed pa 'phel bar 'gyur ba na de'i nang du chud pa'i rdzas gzhan dag kyang tshig par dogs pas/ de ni phyung ste dor bar rigs te so sor byas te bstsal bar bya'o/ /de ltar dpe'i rim pas skabs la sbyar bar bya ste/ de bzhin zhes bya ba la sogs pa gsungs te/ de ltar bstan pa'i dpe brjod pa'i tshul gyis dngos po gang la sems yid chags na ste zhen pas/zhe sdang me ni khong khro ba'i me yin la mched par gyur pa ni yongs su gdung bar byed pa ste/ chags pa'i gnas su gyur pa'i dngos po de de'i mod la ni dus gzhan du mi 'gong bar yongs su dor te/ de la mngon par zhen pa yongs su spang ngo / /ci'i phyir zhe na/ bsod nams bdag nyid ni lus te/bsod nams kyi phung po zhes bya ba'i don to/ /de ni bstan pa'i rim pas tshig par te yongs su zad par ma gyur cig ces pas so/ /gzhan du na khyim gzhan du song ba'i dngos po bzhin du zhe sdang gi mes de yang sreg par byed do/ /gzhan yang mi'i sdug bsngal gang yin pa rnams kyis sems can dmyal ba'i 'bras bu'i las smin par 'gyur ba bya ba 'di ni rnyed pa rnyed pa yin no zhes bstan pa ni/bsad pa'i zhes bya ba la sogs pa gsungs pa yin te/ gang zhig bsad pa'i rigs pa de gal te lag pa tsam bcad de btang na de'i tshe 'di la nyams pa gang yang med kyi/slar yang 'chi ba'i sdug bsngal bas lag pa bcad pa'i sdug bsngal 'di shin tu chung ba yin no zhes bdag nyid rnyed pa de rnyed do snyam du sems so/ /de bzhin du gang ma'i sdug bsngal brdeg pa dang 'ching ba dang brnyas pa la sogs nyams su myong bar byas pas sems can dmyal ba'i sdug bsngal las thar bar 'gyur ba de la cung zad kyang god pa med do//'di ni cung zad kyang sdug bsngal ma yin te/ sems can dmyal ba'i sdug bsngal la ltos na bde ba rang nyid yin no/ /de bas na gal te mkhas pa yin na de'i tshe 'dir 'di la yid bde ba nyid du bya bar rigs pa yin no//ji ste bdag gis sdug bsngal shin tu chung ngu yang bzod par nus so zhe na/ 'dir da lta'i sdug bsngal zhes bya ba la sogs pa gsungs te/ khu tshur dang thal lcag dang bong ba la sogs pas bsnun par byas pa'i sdug bsngal cung zad tsam yang de ltar bzod par te brten par mi nus shing mi lcogs na de 'dir khyod la 'dri bar bya ste/gal te de ltar yin na sems can dmyal ba'i sdug bsngal gyi rgyu khro ba ste khong nas ldang ba 'di ci'i phyir na ldog par mi byed/ 'jil bar mi byed/ 'di nyid ni shin tu yang sems can dmyal ba rnams su sdug bsngal skyed par byed pa yin pas sdug bsngal gyi 'jigs pa rnams ldog par bya bar rigs pa yin no//gzhan yang gal te brten par mi nus pa de ltar yin mod kyi khyod kyis de'i rgyu'i las byas pas mi 'dod kyang sdug bsngal du 'bab par 'gyur gyi 'bras bu cung zad kyang mi 'byung la/bzod pa las ni de la don chen po rnyed par 'gyur ba yin no zhes tshigs su bcad pa gnyis kyis bslab par bya ba'i phyir/ khro ba'i don du zhes bya ba la sogs pa gsungs te/ khro ba'i rgyu mtshan nyid kyis so/ /de bzhin du 'bras bu med par sems can dmyal ba yang sos la sogs pa rnams su stong phrag ste lan stong phrag du mar bcas pa dang /dbyug pa dang brtsal ba la sogs pa'i rgyu rnams kyis gzir ba bdag gis myong bar byas kyang de bzhin du sdug bsngal nyams su myong ba yang bdag gis rang gi don mthong ba dang ma mthong ba'i 'bras bu bsgrub pa'am/bdag gis pha rol dag gi don phan pa dang bde ba bsgrub pa'i mtshan nyid ma byas so ste ma bsgrubs so/ /de ltar dgos pa med pa kho nar sems can dmyal bar sdug bsngal stong phrag myong bar gyur to/ /de bas na da dung yang de bzhin du bdag mi bzod pa bya bar rigs pa ma yin no zhes gsungs pa/'di ni zhes bya ba la sogs pa ste/ sdug bsngal 'di ni sems can dmyal bar byung ba ci 'dra ba ma yin la/ 'on kyang don chen po sems can thams cad la phan pa dang bde ba'i gter du gyur pas sangs rgyas nyid bsgrub par 'gyur ba'o//de'i phyir na 'gro ba'i gnod sel 'gro ba gsum du gtogs pa ste sems can thams cad kyi sdug bsngal thams cad rab tu zhi bar byed pa'i sdug bsngal dga' ba 'ba' zhig 'dir bya rigs kyi mi 'dod par mi bya'o snyam du dgongs pa yin no/ /gzhan gyi yon tan thos pa na phrag dog gi dri ma bkru bar bya ba'i phyir/gzhan gyis zhes bya ba la sogs pa gsungs te/ yon tan lhag pa yod par bstod pas gal te dga' ba'i bde ba 'ba' zhig thob na de'i tshe kye yid khyod kyang de'i yon tan yang dag par brjod nas ci ste dga' ba'i bde ba nyams su myong bar mi byed/ci'i phyir dgos pa med par de la phrag dog gi me 'bar bas rang gi rgyud bud shing lta bur byed/ bde ba thams cad ni chags pa'i bdag nyid yin pa'i phyir/ rten pa bkag pa nyid ma yin nam/ de bas na bdag ni bde ba thams cad las phyir phyogs pa yin pa'i phyir 'di yang len par mi byed de/bde bar rnam par rmongs pa'i yid/ /gang dang gang la chags gyur pa/ /de dang de bsdongs stong gyur du/ /sdug bsngal nyid du gyur cing ldang / /zhes 'chad par 'gyur ba yin no zhe na/ khyod kyis zhes bya ba la sogs pa gsungs te/dga' ba'i bde ba thams cad ni dgag pa ma yin te/ 'on kyang kha na ma tho ba dang bcas pa mi dge ba'i rgyu de dag dgag pa yin no/ /khyod kyis gzhan gyi yon tan la brten pa'i dga' ba'i bde ba kha na ma tho ba med pa 'di ni mi dge ba'i rgyu ma yin no/ / de'i phyir na bde 'byung ste 'di la bde ba 'byung ba yod pas zhes de ltar yin pas so/ /de nyid kyi phyir yon tan ldan pa rnams kyis snang ba ste/ bcom ldan 'das kyis bstan pa'i chos shes pa rnams kyis so/ /gzhan yang 'di'i yon tan gang gzhan sdud pa'i mchog kyang yin te/ gzhan gyi yon tan rnams la dga' bas 'di ni yon tan dag la phrag dog med pa yin no snyam nas sems can gzhan yang sdud par 'gyur ro/ /de bas na 'dir dga' ba'i bde ba blang bar rigs pa yin no/ /'on te pha rol gyi yon tan dag la bdag mi bzod pa ni gang yang med de/ /'on kyang bstod pa byed pa'i bde ba de bdag gis bstan par mi nus so zhe na/'dir/ gzhan la zhes bya ba la sogs pa gsungs te/ gzhan la ni bstod pa byed pa'o/ /bde 'gyur zhes pa ni de lta bas na dgongs pa 'dis khyod gal te gzhan gyi yon tan bstod pa'i dga' ba las byung ba'i bde ba gang yin pa 'di mi 'dod na de'i tshe shin tu dogs par lhung bar 'gyur ba yin no//ji ltar zhe na/ bran la gla rngan sbyin sogs spang / /gzhan yang khyod bdag rang bde ba'i rgyu mtshan du rang gi bran la sogs pa la bran gyi gla rngan las kyi rin sbyin pa dang / de bzhin du phan 'dogs pa la len du phan 'dogs pa ste/de dag la sogs pa spong ba de/ phyir phyogs pa'i phyir gzhan gyi bde ba la sdang ba can la de yang mi bya ba nyid du 'gyur ro/ /gang gi phyir des kyang de la bde ba nyid du bsgrub par 'gyur te/ de lta bas na mthong ba ni tshe 'di'i 'bras bu dang ma mthong ba ni 'jig rten pha rol gyi ste gzhan gyi bde ba phun sum tshogs pa la mi bzod pa'i gnyi ga nyams par 'gyur ro//gzhan yang 'di ni khyod kyi log pa'i lan yin no zhes bstan pa/ rang gi yon tan zhes bya ba la sogs pa gsungs te/ gal te 'ga' zhig khyod la yon tan rjod par byed na ni de'i tshe gzhan de la mi 'dod kyang bde bar 'dod la ji ste gzhan gyi yon tan gyi rjes su bsngags pa byed pa ni de'i tshe phrag dog gi dri ma dang ldan pa'i yid kyis rang gi bde ba yang mi 'dod byed/gzhan gyi bde ba ltar re zhig zhog cig ces bya ba ni 'ang gi sgra'o/ /de bas na khyod kyi yon tan phun sum tshogs pa la phrag dog pa nyid yin te/stod par byed pa po'i bde ba mi bzod pa ni ma yin no/ /gzhan yang de ltar bde 'gyur zhes/ /gal te khyod bde ba 'di mi 'dod ces gang gsungs pa de la khyad par sun 'byin pa/ sems can thams cad ces bya ba la sogs pa gsungs te/khyad par du byang chub tu sems bskyed nas pha rol gzhan gyi bde ba phun sum tshogs pa mi bzod pa zhes bya ba gang yin pa ni shin tu smad pa kho na yin no/ /gang gi phyir bdag gis sangs rgyas nyid thob nas khams gsum par gtogs pa'i sems can thams cad la bde ba phun sum tshogs pa mtha' dag 'byor par bya'o snyam du yid la byed pas/byang chub tu ni sems bskyed nas te/ de bskyed nas sems can la ji ste khro bar byed de dad par bya ba'i gnas rang gi sems mngon par dang bas byas nas bdag rang gi bde ba thob pa rnams la da ko ste/da lta ci ste khro bar byed/ de bas na byang chub sems dpas gzhan gyi bde ba la phyir phyogs pa de lta bu mi bya'o snyam du dgongs pa yin no/ /yang byang chub tu sems bskyed pa gang zhig bdag gi rnyed pa dang bkur sti phun sum tshogs pa mthong nas sems phrag dog gis nyon mongs pa'i mya ngan des tshig pa des spyo ba'i don du/'jig rten gsum zhes bya ba la sogs pa gsungs so/ /yang na de ltar gyur mod bdag gis bde ba de mi bzod pa ni ma yin no/ /'on kyang des brjod pa'i yon tan gzhan gyis thos pa na yid dad pas de dag la rnyed pa dang bkur sti 'bul bar byed pa mi bzod pa yin no zhe na/'jig rten gsum mchod ces bya ba la sogs pa gsungs te/ 'jig rten gsum ni 'dod pa dang / gzugs dang / gzugs med pa'i mtshan nyid dam/ 'jig rten du grags pa'i mtho ris la sogs pa'i rang bzhin gyi 'jig rten gsum ste de dag bsdus pa'o/ /de la mchod par 'os pas na mchod bya ste/ rjed par bya ba'o/ /'dis ni thams cad las phul du byung ba nyid du bstan pa ste/ de lta bur gyur pa'i sangs rgyas nyid du du'o//sems can rnams ni 'dod ce na zhes bya ba la lo zhes bya ba 'dis ni phyin ci log tu mthong nas ma mgu bar ston par bsnyen bkur zhes bya ba ni nye bar mtshon pa ste rnyed pa yang ngo / /lhag ma ni go sla'o/ /rnyed pa la bsams nas/ gso bya zhes bya ba la sogs pa gsungs te/khyod kyis gso bar bya ba phongs pa'i bu la sogs pa khyod nyid kyis gso ba gang yin pa de khyod kyis ni sbyin par bya ba ste des ni khyod kyi zad par byas par 'gyur ro/ /de'i phyir khyod kyi gnyen gyis 'tsho ba ste/ khyod kyi bza' yis 'tsho ba gang yin pa ste rnam pa de lta bu'i skyes bus rnyed gyur na ste/thob par gyur nas dga' bar mi 'gyur ram zhes zur gyis 'dri ba'o/ /slar khro'am dga' bar mi byed dam zhes bya ba'i don to/ /de ltar skabs la yang sbyar te/ gang gi phyir sems can thams cad bdag gir bzung ba de'i bde bas bde ba nyid du rigs pa yin no//'on te de dag sangs rgyas nyid du bya bar bdag gis dam bcas kyi/ bde ba gzhan la ni ma yin no snyam du dogs pa la/ de ci zhes bya ba la sogs pa gsungs te/ de dag kyang yang dag pa ma yin te/ gang gi phyir/ bdag gis de ring skyob pa thams cad kyi//spyan sngar 'gro ba bde gshegs nyid dang ni/ /bar du bde la mgron du bos zin gyis/ /zhes dam bcas pa yin no/ /de ltar gyur mod de ltar na byang chub tu sems bskyed pa ni sems can de dag byang chub ste/ sangs rgyas nyid bya bar 'dod kyi/ ci ste gzhan gyi 'jig rten pa dang 'jig rten las 'das pa'i don gyi rnam pa mi 'dod pa yin nam zhe na/ji ste de ltar mi 'dod na de'i tshe byang chub kyi sems kyang nyams par 'gyur ro zhes gsungs pa/ de la byang chub sems ni rang la yod de byang chub sems dpa' log par dam bcas pa la'o//su la zhe na/ gang zhig gzhan 'byor khro de la/ /'byor pa ngan ngon rnyed pa dang bkur sti byung ba la'o/ /de ltar gnod byed pa ni byang chub sems dpa'i dge ba'i las ldog pa'i rgyu yin no/ /gzhan yang gzhan la rnyed pa dang bkur sti phun sum tshogs pa med na yang dngos po de khyed la ni mi 'byung na/de ci'i phyir rgyu med par de la sdang bas bdag nyid 'joms pa'i don du 'bad par byed ces bstan pa/ gal te zhes bya ba la sogs pa gsungs te/ gal te zhig na khyod mi bzod pa'i yul du gyur pa'i sems can des ster bar byed pa'i dngos po de ma thob pa de ltar na yang sbyin bdag khyim du gnas par gyur pa de las khyod la ci zhig byung bar gyur/rnam pa kun tu'ang des rnyed pa'ang / khyim na gnas pa'ang rung ste/ dngos po de khyod la yod pa ma yin no/ /de bas na byin dang ma byin rung des ci bya/ khyod la dgos pa cung zad kyang med do/ / de'i phyir na de la ni mkhas pas btang snyoms su bya bar rigs so/ /gzhan yang re zhig 'di ltar yang brtag par bya'o zhes bstan pa/ bsod nams dang ni zhes bya ba la sogs pa gsungs te/ sbyin pa byed pa dang sbyin bdag la sogs pas mngon par dad pas rnyed pa dang bkur sti rnams kyis gang zhig la mchod pa byas pa'i bsod nams de ci'i phyir dor bar bya/gang gi dbang gis de la rnyed pa dang bkur sti byung bar gyur pa sngon gyi las kyis byas pa'i rnam par smin pa mngon par phyogs pa dang / des te rab tu dang ba dang / sbyin pa po dang sbyin bdag dor ram/'on te gang la brten nas 'di dag gi dad pa skye ba de 'gro ba 'di dag bdag la ma dad par gyur cig ces rang gi yon tan dor ba'am/ ji ste rnyed par 'gyur ba yang de dag las mi blang bar bya ba'am/ rnam pa gang gis 'dir khyod mgu bar mi 'gyur bar smros shig /de la bsod nams la sogs pa ni ldog par mi nus pa'i phyir dang / rnyed par 'gyur ba 'dzin pa la yang kun tu de khyod la med na zhes bya ba la sogs pa gnod pa gang gsungs pa'i phyir/ mgu ba'i rgyu cung zad kyang med do/ /ji ste yang gzhan ni rnyed pa dang bkur sti phun sum tshogs pa yod la/'on te bdag la ni med pa de'i tshe gzhan la'ang byung bar ma gyur cig snyam ste de dag bdag gi rgyu yin no zhe na/ de'i phyir khyod ni rang gis zhes bya ba la sogs pa gsungs te/ go sla ste sdug bsngal gang ci yang rung ba de dag thams cad ni sdig pa las byung ba yin la/mngon par 'dod pa'i gegs kyang sdug bsngal yin te/ gang 'dod pa btsal te ma rnyed pa de yang sdug bsngal ba'o zhes gsungs pa'i phyir ro/ /gang / 'dod pa rnams dang bral ba ni/ /sdig pa spyod la 'byung bar 'gyur/ /zhes 'chad par 'gyur ba'o//gang ci yang rung ba de dag thams cad ni bsod nams las byung ba yin no zhes de ltar byas nas bde ba 'dod pa rnams dge ba'i las la brtson par bya'o/ /gang / bsod nams byed pa bde 'dod pa/ /zhes bya ba la sogs pa 'chad par 'gyur ba'i phyir/ji ltar na bsod nams byas pa dang lhan cig 'gran par rigs/ legs par byas pa byed pa nyid la bde ba nyid mngon par 'dod pa ni 'gran par rigs so zhes bya ba'i don to/ /gzhan yang 'di 'dri bar bya ste/ gal te khyod kyi dgra bo zhe sdang gi yul du gyur pa la khyod 'dod pa tsam gyis mi dga' ba mi 'dod pa byung zhing skyes na re zhig de la mi 'dod pa byung yang gyur mod/khyod la de tsam zhig gis cir 'gyur/ yang gzhan la gyur rung ma gyur rung bdag gi cung zad de tsam zhig gis dgos pa yin zhes gzhan gyi bsam pa'i dogs pa bsu ba/ khyod kyis zhes bya ba la sogs pa la/khyod kyis yid smon ni 'dod pa ste mngon par 'dod pa zhes bya ba'i don to/ /de tsam gyis rgyur mi 'gyur na 'di la rgyu yod pa ma yin pa ni rgyu med pa'i don te/ mi 'gal ba'i mi 'byung ngo / /de ltar gyur du zin mod ces khas blangs nas kyang brjod par bya ba yin pas na/ji ste zhes bya ba la sogs pa gsungs te/ gal te zhig na khyod kyi 'dod pa'i dgra la mi dga' ba bsgrub cing rdzogs na de lta na yang de la sdug bsngal 'byung ba la khyod bder ci yod/ cung zad kyang med de 'dod pa 'di ni dgos pa med pa yin no zhes bya ba'i don to//de sdug bsngal bas bdag dga' ba gang yin pa 'di nyid dgos pa yin no zhe na/ gal te zhes bya ba la sogs pa gsungs te/ de ltar yang pha rol sdug bsngal ba la dga' ba de gal te 'tshengs par dang dgos pa yin no zhe na/ de'i tshe de las gzhan phung ba ci yod/ci zhes bya ba ni khyad par te/ 'di nyid ni phung ba chen po'o zhes bya ba'i don to/ /ji ltar na 'di don med pa yin zhe na/ nyon mongs zhes bya ba la sogs pa gsungs te/ gang gi phyir 'di ni ste rnam pa 'di lta bu gzhan phung na rung snyam pa'i sems mchil pa mi bzad gze ba cher 'jigs par byed pa'o//ji lta bur gyur pa zhig yin zhe na/ nyon mongs nya bas btab pa'i ste/ nyon mongs pa nyid nya ba bzhin du spyod pa yang yin pas nya ba ste des btab pa ni btab pa'o/ /nyon mongs nya ba gang gis nya ba nya la bya ba bzhin du dmyal ba'i srung ma gshin rje'i skyes bus khyod bzung nas bum par ni sems can dmyal ba'i bye brag tu 'tshed des te skol zhing gdung bar byed do//de lta bas na 'di la 'dod par mi bya'o snyam du dgongs pa yin no/ /gang bstod pa la sogs pa'i gegs byed pas sdug bsngal skye ba de yang ma brtags pa kho na yin no zhes nye bar bstan pa/bstod dang grags pa zhes bya ba la sogs pa gsungs te/ don rnam pa lnga ni mkhas pa dag skyes bu'i don du 'dod pa yin te/ 'di lta ste/ bsod nams dang tshe 'phel ba dang / stobs 'phel ba dang / nad med pa 'thob pa dang / lus bde ba 'thob pa dang / bstod pa la sogs pa ni de dag 'ga' la yang mi mkho'i/ rang gi don du 'gyur na ni 'di dag 'gyur la rang don shes pa ni shes rab dang ldan pa ste/ gzhan la ni gzhan du'ang 'gyur ro zhes bdag nyid la spyod de/gal te rang gi don shes pa yin na yang de lta mod kyi rang gi don shes pa'i thabs ma yin pa'i phyir logs shig tu ma bstan to/ /blo ldan zhes bya ba ni skabs de dang 'brel pa'i phyir de yang bstan pa yin no/ /'o na yid bde ba yod pa ma yin nam/ de'i phyir nges par gzung bar mi rigs so zhe na/'dir rgyan sogs zhes bya ba la sogs pa gsungs te/ yid bde ba ni sems bde ba ste de tsam zhig 'dod na ni chang dang rgyan po dang smad 'tshong ma dang gzhan gyi bud med la sogs pa bsten par bya dgos par 'gyur ro/ /dam pa'i chos la sogs pa thos pa las yid bde ba gang yin pa de ni bsod nams smos pas bsdus pa yin pas na nyes pa med do//de lta bas na yid bde ba'i rgyus bstod pa la sogs pa byis pa'i skye bo dga' bar byas pa ni blang bar bya ba nyid ma yin no/ /de lta na yang bstod pa la sogs pa ni byis pa skye bo'i tshig yin no zhes grags pa'i don du zhes bya ba la sogs pa gsungs te/skyes bu rmongs pa 'ga' zhig yon tan de 'dra ba rang las shin tu ring ba gnas na yang brgya byin la sogs pa'i yon tan gyis skye bo slong mo gzhan dag gis stod par byed pa ni/ mig gdangs pa'i bzhin gyis grags pa don du gnyer bas glang po che dang rta la sogs pa'i nor rtswa bzhin du sbyin par byed do//de bzhin du yon tan de dag dang ldan par yid la byas pas bdag brgya byin ltar dgra las rnam par rgyal ba las byung ba'i bdag gis grags pa 'gro bar rgya cher 'byung bar 'gyur ro snyam du mngon par zhen pas bzod par dka' ba'i g.yul du chas te gsod par byed do//'di la don dam par dgos pa cung zad kyang med de/ gzhan du na log pa'i rnam par rtog pa yin pa'i phyir ro zhes bstan pa/ tshig 'bru rnams kyis zhes bya ba la sogs pa gsungs te/bstod pa la sogs pa rjod par byed pa'i yig 'bru ste yi ge rnams kyis ci bza' zhing myur du rung ngam/ grags pa'i don du shi bar gyur na grags pa thos pa las byung ba'i bde ba de ko su la bde/ de lta bas na de dag byis pa'i rtsed mo dang mtshungs so zhes nye bar bstan pa/bye ma'i zhes bya ba la sogs pa gsungs te/ byis pa kha cig rdul las byas pa'i khang bus shin tu dga' zhing yongs su rtse ba na 'ga' zhig gis de bshig pa dang / sdug bsngal chen pos zin te/ mchog tu nyam thag par gzir bas nga'i khang pa bshig go zhes snying rje rjer cho nges 'debs pa'o//dpe de nyid ltar 'dir yang gsungs pa/ de bzhin zhes bya ba la de bzhin du bstod pa dang grags pa nyams na ste rnam par bcom na/ rang gi sems ni sdug bsngal zhugs pas byis pa bzhin snang ste/ rnam par dpyad na 'dir yang bdag gi dngos por gyur pa sus kyang bshig pa med do zhes brtag par bya'o//yang gzhan du dpyad na 'di ni byis pa'i tshig yin no zhes tshigs su bcad pa bzhin gsungs pa/ re zhig ces bya ba la sogs pa yin te/ sgra ni rjod par byed pa'i bdag nyid de phyi rol gyi don yin pa'i phyir sems med cing sems med pa ste de'i dngos po ni de yin pa'i phyir ro//sgra de bdag la bstod sems te bdag gi bsngags pa brjod pa'i bsam pa yod mi srid de de mi 'byung ngo / /de ji ltar na yid bde bar 'gyur zhe na/ bdag la gzhan zhes bya ba gsungs te/ skyes su pha rol sems pa'i bdag nyid can no//grag ces bya ba ni 'di yang don med pa yin no zhes mi 'dod pa ston par byed pa'o/ /bdag la dga' ba ni mngon par 'dod pa'o/ /de ni ste bsams pa de dga' ba'i rgyu yin grang na de la yang 'brel pa med pa'i phyir byis pa'i spyod pa kho nar zad ces sbyar ro//'brel pa med pa nyid bstan pa gzhan nam zhes bya ba la sogs pa gsungs te/ gang gi phyir sems can gzhan la'am/ bdag la dga' ba gzhan gyi rgyud la yod pas ci zhig 'ongs te/ bdag la phan pa cung zad kyang med do/ / ci'i phyir zhe na/ de nyid kyis te de'i phyir ro/ /bde ba gang yin pa ni bstod pa byed pa de'i dga' ba yin gyi gzhan gyi ni ma yin no/ /de bas na shas ni gzhan gyi rgyud la yod pa'i dga' ba de de las cung zad tsam ste bdag gis mi 'thob bo/ /de lta yin mod byang chub sems dpa' rnams ni gzhan bde bas bde bar gyur pa yin na de ci'i phyir de la cha shas mi 'thob ce na/'dir bde ba yis zhes bya ba la sogs pa gsungs te/ gal te pha rol bde bas bde ba dang ldan par 'gyur na/ de'i tshe thams cad la'ang ste gzhan dga' bas bde bar gyur pa la yang de bzhin du bya dgos na/ci'i phyir bdag la gzhan mngon par dang bas ni gzhan la slar dga' zhing gzhan la dad pas bde bar gyur pa'i sems can la bdag bde ba ma yin/ /de lta bas na des ni tshig tsam yin gyi don dam pa ni ma yin no zhes bstan par bya ba'i phyir/ de bas zhes bya ba la sogs pa gsungs te/de las rgyu mtshan gzhan med pa'i phyir ro/ /bdag la bstod do zhes de ltar rnam par rtog pas rang la dga' ba skye bar 'gyur zhing gzhan bde bas bde bar mi 'gyur ba'i phyir ro/ /de la yang ste de gzhan la dga' bas bde bar mi 'gyur ba 'ba' zhig tu ma zad kyi/bdag nyid kyang de ltar bstan pa'i rim pas mi 'thad cing 'brel pa med pas de dag gi ni byis pa'i rtsed mo 'ba' zhig tu zad do/ /gzhan yang bstod 'dod pa la sogs pas ni bdag la god pa nyid bsgrub pa yin no zhes nye bar bstan pa bstod sogs zhes bya ba la sogs pa gsungs te/bstod pa la sogs pa 'di dag ni bdag gi legs pa ste dge ba'o/ /yang na dge ba ni dge ba'i phyogs yongs su skyong ba'o/ /de bzhin du skyo ba ni 'khor ba'i sdug bsngal la skyo ba ste/ 'jig par byed pa ni 'joms par byed pa'o/ / de dag tsam du ma zad kyi 'on kyang yon tan ldan la phrag dog dang ste bdag gi yon tan lhag par bya'o snyam pa des gzhan gyi yon tan sbed pa'i phyir ram/ de'i yon tan la mi bzod pa'i phyir ro/ /phun sum tshogs pa ni rnyed pa dang bkur sti la sogs pa'i ngo bo'o/ /khro bar byed pa ni de dag la mi bzod par byed pa'o//bdag nyid kho na yon tan lhag pa dang / bdag kho na la phun sum tshogs pa thams cad rigs kyi gzhan dag la ni ma yin no snyam nas so/ /gang gi phyir bstod pa la sogs pa la nyes pa de dag 'byung ba de lta bas na bstod la sogs gzhom phyir te/dgag par bya ba'i phyir sems can gang dag nye bar gnas pa ste 'bad par byed pa'o/ /ngan song du lhung ba ni sems can dmyal ba la sogs par ltung ba'o/ /de las bdag ni bsrung ba'i phyir te bskyab pa'i don du ste/ bsrung bar bya ba'i rgyu mtshan du zhugs shing brtson par byed pa min nam/de'i phyir de dag ni dge ba'i bshes gnyen yin te gnod pa byed pa ma yin pas rnyed pa la sogs pa'i gegs byed pa la/ rnam pa thams cad du bdag khong khro ba'i sems su mi rigs so zhes bstan par bya ba'i phyir bdag ni grol ba zhes bya ba la sogs pa gsungs te/ rnam par grol bar 'dod pa la ni rnyed pa dang bkur sti rnams 'ching ba dang 'dra ste/ chags pa'i gnas yin pa'i phyir ro/ /mi dgos pa ni thar pa'i 'dod pa la 'ching ba mi rigs pa'o/ /bdag bcings pa las 'khor ba sdug bsngal gyi mtshan nyid dam/ rnyed pa la sogs pa'i ngo bo las dgra bo mngon par 'dod pas dge ba'i bshes gnyen gyi bya ba byed pas grol bar byed pa ste bral bar byed pa'o//de dag ste mchog tu phan 'dogs pa dga' ba'i gnas dag la bdag ni ji ltar khro ste mi rigs so snyam du dgongs pa yin no/ /de ji ltar mi rigs she na/ bdag ni zhes bya ba la sogs pa gsungs te/rnyed pa dang bkur sti la mngon par zhen par gyur pas te/ 'khor ba'i sdug bsngal las grol bar 'dod pa la/ skyes bu dam pa'i bye brag gang zhig sgo 'phar nyid de sgo glegs nyid du gyur pa ste son pa'o/ /gang las she na/ sangs rgyas rnams kyi byin rlabs mthu chen po bzhin du ste/de la bdag ni ji ltar khro'o/ /dge ba 'joms par byed pa rnams la yang sdang ba bzlog par bya ba gsungs pa/ 'di ni bsod nams kyi gegs byed do zhes bya ba la sogs pa ste/ 'dis ni dge ba'i gegs byas so zhes de ltar yid la bzhag la/'dir bsod nams kyi gegs byed pa rnams la sdang bar rigs pa min te/ ci'i phyir zhe na/ gang gi phyir bzod pa ste sron pa dang mtshungs shing mnyam pa'i dka' thub ni legs par spyod pa yod pa ma yin na ste/ dge ba'i las thams cad kyi rgyu yin pa'i phyir te/bzod pa lta bu'i dka' thub med/ /ces gsungs pa'i phyir ro/ /de la ste 'bad rtsol 'di nyid la gnas shing bsgrub pa ma yin nam/ bsod nams kyi gegs byed pa lta bu'i dor gyis bsod nams kyi rgyu nye bar gnas pa de la khro na bdag nyid kyis bsod nams kyi gegs byas par 'gyur ro zhes gsungs pa/gal te bdag ni zhes bya ba la sogs pa yin te/ ji ste gal te bdag nyid kyi skyon mi bzod pa'i bdag nyid kyis gegs byed pa 'di la bzod cing sron par mi byed na de'i tshe bdag nyid kyis te gzhan gyis ni ma yin par bsod nams 'di la gegs byas par zad do/ /ci'i phyir zhe na/bsod nams kyi rgyu la bsod nams kyi gegs byed pa nyid du mngon par 'dod pas nye bar gnas pa ste nye bar gyur pas so/ /yang na 'di la ni bsod nams kyi rgyu 'di la zhes sbyar ro/ /gal te bsod nams kyi gegs byed na 'di ji ltar na bsod nams kyi rgyur gyur/ 'on kyang de nyid ni gegs yin no zhe na/gang zhig gang med ces bya ba la sogs pa gsungs te/ dngos po gang 'bras bur mngon par 'dod pa gang zhig rgyur mngon par 'dod pa gang med na mi 'byung la ste/ de log na med pa'i 'bras bu mngon par 'dod pa de'i skyed par byed pa'i rgyu gzhan ma yin pa ste/de dang rjes su 'gro ba dang ldog pa ldan pa'i phyir ro/ /de bzhin du skabs su bab pa la yang skyed par byed pa de ji ltar na bskyed par bya ba'i gegs su brjod do/ /gegs kyi rgyu zhes rjod par byed/ rnam pa de lta bu la yang de ltar tha snyad du byed na ming la log par rtog par zad do/ / bstan pa'i don dpe nye bar bstan pa'i sgo nas gsal bar byed pa dus su zhes bya ba la sogs pa gsungs te/ 'di ltar sbyin bdag 'ga' zhig sbyin pa byed pa'i dus la bab pa na/ slong mo pa slong bar byed pas sbyin pa'i gegs byed pa ma yin par brjod de/ gang gi phyir de ni sbyin pa'i rgyu nyid yin no//rab tu byung bar 'dod pa gang la la'i rab tu 'byin par byed pa dang phrad pa na rab tu 'byung bar sdom pa la sogs pa len pa'i ngo bo de'i tshe gegs zhes bya bar ni mi rung ngo / /'on kyang de ni rgyu nyid yin te/ de med par de mi 'byung ba'i phyir ro/ /de ltar skabs su babs pa la yang blta bar bya'o// //bam po bcu gcig pa/ gzhan yang bzod pa'i rgyu ni shin tu dkon pa yin pas de dang phrad pa na dga' ba kho nar rigs so zhes bstan pa/ 'jig rten na ni zhes bya ba la sogs pa gsungs te/ thams cad du thams cad na 'jig rten na slong bar byed pa ni shin tu mang bar gyur pa yin te/de ltar sbyin par byed pa na phyir mi ldog pa'i phyir ro/ /gnod pa byed pa ni de lta ma yin te de bas na de dag dkon pa ste/ stong phrag brgya'i nang nas gal te ji zhig ltar 'ga' zhig 'byung ba'am ma yin no/ /de de ltar yin pa ci'i phyir zhe na/'di ltar zhes bya ba gsungs te/ gang gi phyir phar gnod pa ma byas na ste/ pha rol la gnod pa byed pa las ldog na bdag la rgyu mtshan med pas 'ga' yang ste gcig kyang gnod pa mi byed do/ /de ltar na shin tu dkon pa'i phyir dang / mchog tu phan 'dogs pa'i phyir gnod pa byed pa la mngon par dga' bar bya'o zhes gsungs pa/de bas ngal bas zhes bya ba la sogs pa gsungs te/ gang gi tshe ji zhig ltar gnod pa byed pa dang phrad na de'i tshe khyim du byung ba'i gter bzhin du ngal ba ma byas par thob pa'i dgra la bdag gis 'dod par bya'o//byang chub spyod pa ni sangs rgyas nyid kyi tshogs nye bar rdzogs pa na grogs byed par gyur pas so/ /rnam pa de lta bur skyes bu mchog gi don la grogs byed pa la byas pa shes pa'i phyir bdag len du phan gdags par rigs pa yin no zhes nye bar bstan pa/'di dang bdag gi zhes bya ba la sogs pa gsungs te/ gang gi phyir de la 'dis grogs su byas pas rgyu nyid yin gyi gegs ma yin pa de'i phyir bdag gis bzod pa goms par byas pa dang / 'dis kyang gnod pa byas pa yin te gnyi gas bskyed pa yin no//'di zhes bya ba ni bsgrub par bya ba'i phyir grogs byas shing bsten pa'i bzod pa'i 'bras bu ste/ bsod nams thob pa'i mtshan nyid do/ /'di la ste chos kyi grogs la thog mar phud bdar bar bya'o/ /dper na byang chub sems dpa' byams pa'i stobs kyis lnga sde'i ched du smon lam btab pa ltar bdag gis smon lam gdab par bya'o//de la rgyu gsungs pa ni gang gi phyir zhes so/ /gal te bsams pa de nyid kyis de 'jug na de de ltar rigs na/ 'on kyang 'di ni gnod pa byed pa'i bsam pa can yin no zhes dogs pa/ gal te bzod bsgrub ces bya ba la sogs pa gsungs te/byang chub sems dpa'i bzod pa bsgrub bo snyam pa'i bsam pa med par gnod par brtson pa de'i phyir na gal te dge ba'i rgyu yin yang dgra 'di mchod par 'os pa ma yin no zhe na/ 'on te de ltar na dgos pa mi mnga' ba'i dge ba 'grub pa'i rgyu dam pa'i chos gsung rab kyi mtshan nyid ci ste mchod par byed de yang bsam pa des stong pa'i phyir mchod par 'os par mi 'gyur ro snyam du dgongs pa yin no/ci ste dam pa'i chos la bsam pa med pa'i phyir gnod pa bya ba'i bsam pa'ang med la/ 'di la de las bzlog pa snang ngo zhes gal te dgra 'di zhes bya ba la sogs pa gsungs te/gal te dgra 'di gnod pa bya ba'i bsam pa yod do snyam du bsams nas/ dgra bo mchod bya ma yin te/ /sbyin pas bsnyen bkur mi bya'o/ /zhe na/ sman pa bzhin du zhes bya ba ste gnod pa byed pa la khro ba'i sems ma bzlog na ji ltar bdag gi bzod pa 'grub/gnod pa byed pa la mi bzod pa'am/ slar gnod pa bya bar mi rigs so zhes bya ba'i don to/ /'on te gzhan du gyur mod ce na/ gzhan du yang sman pa bzhin du phan brtson na ste/ sman pa bzang po ltar phan pa dang bde ba sgrub par byed pa la ni gang la rtag tu dga' ba dang gus pa yod pa yin te/zhe sdang gi rgyu'i dri yang med do/ /zhe sdang gi sems log pa las ni bzod pa zhes brjod de/ /de lta bas na gnod pa byed pa nyid la khong khro ba'i sems bzlog na bzod pa yin no zhes de nyid bstan pa de bas zhes bya ba la sogs pa gsungs te/gang gi phyir sman pa phan par brtson pa la bzod pa mi rigs pa de bas na ste/ gtan tshigs 'di las sdang ba'i bsam pa can de la bstan nas rgyu mtshan du byas te bzod pa yang dag par skye ba yin gyi/ dge ba'i bsam pa las ni ma yin no/ /de'i phyir gang gi bsam pa la brten nas bzod pa skye ba de ni bzod pa'i rgyu yin gyi/gang zhig sman pa bzhin sdang ba'i bsam pa med pa la ni ma yin no/ /de bas na bzod pa bsgrub pa'i bsam pa med kyang dam pa'i chos ltar 'di bdag gis mchod par bya'o/ /'di skad du bstan par 'gyur te bdag la bsam pa dpyad pa 'dis dgos pa ci zhig yod/bsgrub byar mngon par 'dod pa 'grub pa yin na mkho ba yin te de tsam zhig bdag gis blang bar bya bar gyur pa yin no/ /bsam pa yon tan med pa can gyi 'bras bu ni bsam pa yon tan med pa gang yin pa de nyid kyi yin la/bdag la ni dge ba 'byung ba'i rgyu nyid 'di yin pas na ji ltar mchod par 'os par mi 'gyur zhes so/ /de lta bas na tshogs la mkho ba'i rgyu dag la rang gi ngo bo dpyad pas ci zhig bya ste/ de dag 'di'i tshogs kyi rgyur gyur pa yin no zhes lung las rab tu bsgrub pa'i phyir sems can zhes bya ba la sogs pa gsungs te/tshogs 'byung zhing 'phel ba'i rgyu yin pa'i phyir sems can gyi zhing ngo / /sangs rgyas bcom ldan 'das rnams kyang de bzhin du zhing yin te/ de lta bu de yin pas na sangs rgyas nyid kyi byed pa'i rgyu yin pa'i phyir rnam pa 'dis bcom ldan 'das kyis bsngags so//ci'i phyir zhe na/ 'di ltar gang gi phyir sems can dang rgyal ba de dag rjes su mthun par bsgrubs pas mgu bar byas te mang po zhig sangs rgyas nyid thob nas 'jig rten dang 'jig rten las 'das pa thams cad kyi phun sum tshogs pa thams cad mthar thug pa thob pa yin no//'o na de ltar yin na/ gal te zhig na sems can rnams kyang phun sum tshogs pa thams cad kyi rgyu yin na de lta na yang de bzhin gshegs pa rnams dang mtshungs pa mi rigs so zhe na/ sems can rnams dang zhes bya la sogs pa gsungs te/gnyi ga las kyang sangs rgyas kyi chos stobs dang mi 'jigs pa la sogs pa 'grub pa dang 'thob pa la mtshungs shing khyad med de/ gnyi ga yang de la rgyu nyid yin par khyad med do snyam du dgongs pa yin no/ /de lta bas na rgyu'i dngos po thun mong yin yang rgyal ba rnams la gus par bya ba ci 'dra ba de bzhin du sems can rnams min pa de lta bu ci'i tshul dang go rims yin/rtog pa dang ldan pas mi rigs so zhes bya ba'i don to/ /'o na sems can rnams la 'dod chags la sogs pa'i dri ma rnams kyis bsam pa zhen par gyur pa'i phyir rgyu nyid yin na yang ji ltar na bcom ldan 'das dang mtshungs pa nyid du rigs pa yin snyam du dogs pa la/bsam pa'i zhes bya ba la sogs pa gsungs te/ 'di la yang bcom ldan 'das ni bsod nams dang ye shes dpag tu med pas bskyed pa bla na med pa'i bdag nyid chen po'o//de ltar yang nye bar mkho bar sbyor ba nyid kyi phyir rgyu'i dngos po mtshungs pas na che ba'i bdag nyid mnyam par brjod do/ /gtan tshigs de'i phyir sems can de dag rgyal ba rnams dang mnyam pa yin te 'dra bar zhes brjod do/ /de ltar na 'dir byed pa la khyad par med pa yin no//gang du so sor nges pa'i bdag nyid kyi tshul la ni khyad par de bstan pa'i phyir/ byams sems zhes bya ba la sogs pa gsungs te/ sems can rnams la byams pa'i sems su gnas pa la skye bo rnams kyis mchod pa gang yin pa de ni byams sems ldan pa de'i so so rang gi rnam pa'i che ba'i bdag nyid de gzhan gyis ni ma yin no//de bzhin du de bzhin gshegs pa la dmigs nas rang gi sems dad par byed pa'i bsod nams skye ba gang yin pa de ni bcom ldan 'das nyid kyi che ba'i bdag nyid thun mong ma yin pa ste/ gzhan la rnam pa de lta bu'i yon tan med pa'i phyir ro/ /de ltar thun mong ma yin pa'i yon tan brjod nas/ skabs la bab pa'i mjug bsdu ba/ sangs rgyas chos 'grub byed ces bya ba la sogs pa gsungs te/ 'dir mtshungs par bsgrub pa'i sa bon ni 'di yin no zhes bya ba'i don to//don dam par ni sangs rgyas bcom ldan 'das rnams dang mtshungs pa'i sems can du gyur pa 'ga' yang med do/ /gal te rnam pa de lta bur gyur na de'i tshe yang sangs rgyas nyid yin no/ /ji ltar gyur pa'i zhe na/ yon tan rgya mtsho mtha' yas pa'i/ /yon tan rnams kyi rgya mtsho ni yon tan rin po che'i 'byung gnas yin te/gting mtha' mi dpogs pa'i phyir na de rnams dang ngo / /yang de dag gi khyad par du byed pa gsungs pa/ mtha' yas cha ni mtha' yas shing mu med pa'i cha nyid ni phyogs kyang ste/ yon tan rgya mtsho gang la yod pa de la de skad ces bya ste sems rnams dang ngo //bstan pa'i don nyid gsal bar byed pa yon tan mchog ces bya ba la sogs pa gsungs te/ yon tan rnams la gtso ba'i phung po gcig pu mnga' ba'i bcom ldan 'das gang yin pa dang de dag gi yon tan shas tsam ni rdul phra rab tsam yang ste/yon tan phra mo yang zhes bya ba'i don to/ /gal te sems 'ga' zhig la khyad par snang na yang de la ste yon tan rgya mtsho de mchod pa'i rgyu mtshan du khams gsum phul yang chungs par 'gyur/ 'jig rten gsum du byung ba'i rin po che la sogs pa rnams 'tsham pa yin no zhes bya ba'i don to//gal te de lta yin na ji ltar na sems can mgu bar bya ba bstan ce na/ sangs rgyas chos mchog ces bya ba la sogs pa gsungs te/ sngar bshad pa nyid yin no/ /'di dag gis kyang sems can mgu bar bya bar rigs pa yin no zhe na/gzhan yang zhes bya ba la sogs pa gsungs te/ g.yo med gnyen gyur pa ni bcos ma ma yin pa'i shes pa sangs rgyas dang byang chub sems dpa' rnams te/ phan 'dogs pa mtha' yas pa mdzad pa rnams la lan ldon pa ni des phan gdags pa byas pa'i lan glen pa ste/lan khyer ba zhes bya ba'i don to/ /gzhan gang zhig gis 'gyur sems can mgu bar bya ba min par te/ de nyid mchog tu lan ldon par byed pa yin no zhes bya ba'i don to/ /bdag po'i sems dang mthun par 'jug pa nyid bran gyi 'dod pa 'grub par 'gyur ro snyam du shes par byas nas sems can mgu bar bya ba kho na blang bar bya ba yin no zhes bstan pa/gang gi phyir zhes bya ba la sogs pa gsungs te/ gang dag la phan pa dang bde ba bsgrub pa'i phyir lag pa dang rkang pa dang mgo dang mig la sogs pa bcad cing rab tu ster bar byed pa dang /de bzhin du gang gi dbang du byas te de dag gi gnod pa zhi bar bya ba'i don du gzhan sdug bsngal bas sdug bsngal bar gyur pa rnams mnar med par yang 'jug pa ste/ skabs su bab pa'i phyir sangs rgyas dang byang chub sems dpa' rnams yin no//de la ste sems can rnams la phan gdags lan ldon 'gyur bas na gzhan du ni phan btags kyang lan lon par mi 'gyur ro/ /lan gyi sgra ni 'dir skabs kyi dbang du byas pas legs par byed pa la 'jug go/ /gang gi phyir de ltar yin pa des na mchog tu gnod pa rnams la yang sems khro bar mi bya ste/'on kyang thams cad de rnam pa du mar lus sam/ ngag gam/ yid dag gis bzang dgu zhig tu 'di dag la phan pa dang bde ba bsgrub par bya ba'o/ /bstan pa nyid bsgrub pa ni re zhig ces bya ba la sogs pa gsungs te/bdag gi rjer gyur nyid ni sangs rgyas la sogs pa'o/ /rang gi bdag nyid kyi ste re zhig ces pa ni dpyod pa'o/ /gang gi phyir ni gang dag gi rgyu mtshan du ste/ rang gi sku la'ang ni rang nyid kyi lus 'tsho ba la yang bstan pa'i rim pas mi gzigs pa ste/mngon zhen med par rtswa bzhin du yongs su 'dor ba'o/ /de bas na bdag ni de dag gi bran du gyur pa yin na/ sems can bdag po lta bu dang bu ltar mchog tu sdug pa de dag la ci ltar na nga rgyal bya zhing ste re zhig shes bzhin du ci'i phyir mi mthun par bya zhing bran gyi dngos mi bya ste bran du gyur te brnyas par mi bya/'di dag gis kyang sems can la gnod pa byed pa yongs su dor la de dag mgu bar bya ba kho na bya'o zhes/ gang dag bde bas zhes bya ba la sogs pa gsungs te/ bu sdug pa lta bu'i sems can gang dag gi lus dang yid las byung ba bde bas pha lta bu'i thub pa'i dbang po sangs rgyas bcom ldan 'das rnams la dgyes par 'gyur zhing de dag la sdug bsngal na mi dgyes 'byung bar 'gyur ba ni yongs su mi mgu bar 'gyur ba ste de dag mi mnyes pa'i phyir bcom ldan 'das la de skad du brjod do//de ni ste'u dang tsan dan lta bu yin te/nyan thos rnams la yang khong khro bas rjes su chags pa ni mi 'byung ba'i phyir ro/ /gzhan ni go sla'o/ /ji ltar na de la gnod pa byas pas thub pa rnams la gnod pa byas par 'gyur zhe na/ 'dir ji ltar zhes bya ba la sogs pa gsungs te/ ji ltar skyes bu'i lus la kun nas yan lag thams cad la khyab par me 'bar ba na 'dod pa'i yon tan lngas yid bde bar mi 'gyur zhing / lus la'ang bde ba med de/ de la rab tu 'bar ba'i sdug bsngal de nyid kyis non pa'i phyir ro/ /de bzhin te de ltar sems can rnams la gnod pa byas na yang ste sdug bsngal myong ba na thugs rje'i bdag nyid sangs rgyas bcom ldan 'das rnams dgyes pa ste/yid bde ba'i thabs dang rgyu med do/ /de ni de lta yin pas na yongs su ma shes pas sam/ nyon mongs pa'i gdon dang bcas pa'i dbang gis sems can rnams la gnod pa byas pa'i mi dge ba gang bsags pa de yang mjug bsdu ba'i sgo nas bshags par bya ba/de bas zhes bya ba la sogs pa gsungs te/ gang gi phyir de ltar sems can la gnod pa byas na thub pa rnams la gnod pa byas par 'gyur ba de'i phyir/ sdig pa de ring da lta so sor bshags par bgyi/ skyob pas thugs rje chen po de dag gi spyan sngar bshags par bgyi zhing / yang de bzhin du shes bzhin du mi bgyid do zhes slan chad bsdam par bgyi'o/ /mi mthun pa gang zhig spyad pa de la thugs brtse ba nye bar bzung ste bdag la bzod pa mdzad du gsol/bzod pa gsol nas da ni de bzhin gshegs pa rnams mnyes par bgyi slad du zhes bya ba la sogs pas de la bdag nyid gcig pu gzhol bar ston par byed do/ /de bzhin gshegs pa rnams kyi bzhed pa bsgrub pa'i phyir 'jig rten dang 'jig rten gyi yul du bdag gi lus thams cad kyis sam ngag gam yid kyis bran gyi dngos por khas blang bar bya'o//de dag kyang bdag la spyi bor rdog pas bzhag kyang de dag gi rkang pa la rab tu dga' ba'i sems kyis mgo bor blang bar bgyi'o/ / 'dis kyang bdag gis sngar nyes pa byas pa spangs pas 'gro ba'i bdag po bcom ldan 'das thugs dgyes par mdzod cig /bcom ldan 'das la gus pa byed pa rnams kyis sems can rnams la ma gus par bya'o zhes rab tu bsgrub pa gsungs pa/ 'gro ba 'di kun zhes bya ba la sogs pa yin te/thams cad du chos kyi dbyings so sor rtogs pa'i phyir sems can thams cad mnyam par bsgrub pas sam/ gzhan dang bdag brje ba la sogs pa'ang rung ste/ 'gro ba 'di kun thugs rje'i bdag nyid ma yin pa la bdag gir mdzad cing zhal gyis bzhes te/'ga' tsam la ni ma yin no/ /gzhan du na sangs rgyas nyid du mi rigs pa'i phyir ro/ /de bas na sems can gyi ngo bor te sangs rgyas bcom ldan 'das nyid du sems can 'di dag mthong ba nyid yin na des na 'dir sems rmongs pa dag ci'i phyir gus par mi byed/ rigs pa ma yin no snyam du dgongs pa'o/ /sems can mgu bar byed pa ni don du ma grub par byed pa'i phyir yang de nyid la brtson par bya'o zhes gsungs pa/ 'di nyid de bzhin gshegs pa zhes bya ba la sogs pa ste/ 'di'i rang gi don sangs rgyas nyid kyi tshogs kyi mtshan nyid dam/'jig rten gyi sdug bsngal sel bar byed pa'i rgyu yin pa'i phyir ro/ /'di ni zhes bya ba ni sems can mgu bar bya ba yin pas thams cad du sbyar bar bya'o/ /gzhan yang ma 'ongs pa'i 'jigs pa bstan pas kyang gzhan la gnod pa byed pa la phyir phyogs pa goms par bya'o zhes dpe brjod pas gsungs pa/dper na zhes bya ba la sogs pa gsungs te/ rgyal po gang gi yul na gnas pa de'i skyes bu de skye bo mang po la ste/ grong khyer dang / grong rdal dang / grong dang / tshong rdal na gnas pa rnams la gnod pa byed kyang ste rnam par 'joms par byed kyang de dag kyang ma 'ongs pa'i rgyal po'i chad pas 'jigs pa mthong bas skye bo mang po dag tshig tsam gyis kyang ji tsam du rnam par 'gyur bar 'gro ba tsam yang mi nus so//des de dag shin tu yang sems kyi tshul bskum pa nyid du gnas te/gang gi phyir 'di ltar rgyal po'i skyes bu de grogs med pa nyid du mi blta'o/ /ji ltar na 'di grogs med pa ma yin zhe na/ de'i zhes gsungs te/ rgyal po'i mthu stobs nyid de'i stobs yin te/ de'i phyogs 'dzin pa'i phyir ro/ /de bas na nus pa chung ba yin yang des gnod pa byas nas slar mi bya'o//gang gi phyir de yang gcig pu ma yin pa de'i phyir sems can mgu bar bya'o/ /ci'i phyir zhe na/ 'di ltar dmyal ba'i srung ma dang ste/ de la gnod pa byas pa bzhin du brtun te slar gnod pa byed pa'o/ /thugs rje ldan rnams ni rgyal ba la sogs pa ste de'i phyogs su lhung bas dpung yin no//ji ltar bya zhe na/ ji ltar dmangs kyis rgyal gtum bzhin/ /dper na rgyal po 'jigs su rung ba la rjes su 'phel ba'i las kyis rjes su 'tsho bar byed pa can thams cad ji ltar mnyes par byed pa de bzhin du'o//gzhan yang 'di ni 'jig rten grags pas 'dir bstan pa yin gyi sems can la gnod pa byas pa las byung ba'i 'bras bu dang / rgyal po la gnod pa byas pa'i 'bras bu dag mtshungs pa ma yin no zhe na/ rgyal po lta zhig khros na yang / /zhes bya ba la sogs pa gsungs te/ci'i phyir zhes zur gyis 'dri ba yin te/ ci de'i sdug bsngal gyi rnam pa bskyed par mi'i bdag pos nus sam ma yin no snyam du dgongs pa yin no/ ci 'dra bar gyur pa zhig ce na/ sdug bsngal gyi rnam pa gang gis sems can dmyal ba'i tshor ba nyams su myong bar byed pa yin no//byang chub sems dpa'i spyod pa la 'jug pa'i dka' 'grel shes rab 'byung gnas blo gros kyis mdzad pa las le'u drug pa'o// //rgya gar gyi mkhan po paN+Di ta chen po su ma ti kIrti'i zhal snga nas dang /sgra bsgyur gyi lo tsA ba a tsAr+ya mar pa chos kyi dbang phyug gis bsgyur cing zhus pa// //de ltar mi mthun pa'i phyogs bkag pa'i sgo nas bzod pa gsum bstan nas/ brtson 'grus bstan pa'i phyir/ de ltar bzod pas zhes bya ba la sogs pa gsungs te/ de ltar ni brjod pa'i rim pas yin la/ bzod pa dang ldan pas na bzod pa ste/ rang gis goms par byas pa'i bzod pa'o/ /brtson 'grus brtsams pa ni brtson 'grus la 'bad par bya ba ste/ gzhan du sdug bsngal bzod par mi nus pas brtson 'grus zhen par 'gyur ro//ci'i phyir brtson 'grus blang bar bya ba yin zhe na/ 'di ltar brtson la zhes bya ba la sogs pa gsungs te/ gang gi phyir brtson la byang chub gnas pa ni de'i rgyu nyid kyis yin te/ de la rag las pas sam sangs rgyas nyid do/ /'di yang gang las she na/ gang gi phyir/bsod nams brtson 'grus med mi 'byung / /zhes te bsod nams kyi tshogs yod pa ma yin no/ 'di ni mtshon pa tsam ste brtson 'grus gnyi ga'i rgyu yin pa'i phyir ye shes kyang blta bar bya'o/ /des na brtson 'grus 'di las bsod nams dang ye shes kyi tshogs yin la/de dag las sangs rgyas nyid do zhes brjod pa yin no/ /brtson 'grus kyi rang gi ngo bo mi shes nas brtson 'grus gang zhes 'dri bar byed de/ brtson 'grus zhes bya ba 'di ci yin zhe na/ 'dir gang gsungs pa dge la spro ba ste zhes pa la/ gang 'di dge ba'i las sbyin pa la sogs pa dang thos pa la sogs pa la spro ba de la brtson 'grus zhes brjod do//mi dge ba la spro ba ni le lo nyid do/ /mngon par 'dod pa grub pa la mi mthun pa'i phyogs kyis nyams par byas pa'i brtson 'grus yan lag ma yin pa'i phyir mi mthun pa'i phyogs de spang bar bstan pa'i ched du/de'i mi mthun pa'i phyogs zhes bya ba la sogs pa gsungs te/ de'i ni brtson 'grus kyi'o/ /'ga' zhig nyams par byed pa'i phyogs ni mi mthun pa'i phyogs so/ /de gang la bshad ce na/ le lo zhes pa la sogs pa la/ le lo ni snyom las te/lus dang yid dag las su mi rung ba'o/ /ngan la ni smad par bya ba yin te/ rgod pa dang sgeg pa la sogs pa yin la de la zhen pa'o/ /sgyid lug pa ni sgyid lug pa nyid de dka' ba'i las la sems bzlog pa yin te zhen pa med ces bya ba'i don to/ /des bdag nyid la brnyas pa ste tshod yod byed pa yin la/'di ni de'i mi mthun pa'i phyogs so/ /de le lo dgag pa'i don du de'i rgyu re zhig bstan par 'dod nas mi rtsol ba zhes bya ba la sogs pa gsungs te/ 'khor ba'i sdug bsngal mi skyo las/ /zhes pa ni skyo ba dang bral bas gang zhig mi rtsol ba ni byed pa dang bral ba yin te/de la'ang des bde nyams len pa ni bde ba mngon par 'dod pa ste de dang gnyid ni gnyid kyis non pa yin la/ de dag gis te sred pa ni bstan par 'dod pa'o/ /de las/ le lo nye bar skye bar 'gyur/ /zhes sbyar ro/ /yang na 'gro ba'i sdug bsngal mi skyo las mi rtsol ba yin te/dge ba'i las gang la yang mi 'jug pa'o/ /de las bde nyams len pa yin la/ de las ni gnyid yin te de las kyang bsten sred pa'o/ /de'i phyir 'khor ba'i sdug bsngal la mi skyo ba bzlog pa'i don du 'dir skyo ba bsgom pa 'di mngon du bya'o zhes bya bar/nyon mongs rgya pas zhes bya ba la sogs pa gsungs te/ rgya ni nyi la sogs pa gsod par byed pa'i dra bar brjod la de spyod pa ni nya la sogs pa rnams te de bzhin du nyon mongs pa nyid rgya yin la des bshor ba ni dbang du byas pa yin no/ /'di ci ltar zhe na/skye ba'i rgyar ni chud pa ste/ rigs mthun zhing skal ba mnyam par skyes pa nyid skye ba'i rgyar chud pa yin te/ der chud pa ni de'i nang du son pa zhes pa'i tha tshig go/ /'di 'dir de'i dbang du gyur pa ni 'thad pa'o/ /da dung ni 'di lta bu'i gnas skabs thob par gyur na yang ngo //'chi bdag khar ni song gyur pa/ /yin na yang mi shes sam zhes pa ste/ gal te skyes par gyur na nges par 'chi bar 'gyur ro zhes pa'i don to/ /skyo ba'i rgyu gzhan 'di yang gsungs pa/ rang sde zhes pa la sogs pa'o/ /rang sde ni sde tshan te/gang dang lhan cig tu byis pa la sogs pa'i gnas skabs na rol cing dgod pa la sogs pa rnam par spyad pa'o/ /rang sde de rnams ni gdol pa rnams kyis nges par gsad par bya ba'i ma he dang 'dra'o/ /mthong bar ma gyur tam zhes pa ni/ bdag kyang gnas skabs 'di nyid la gnas so zhes pa'o//'dis dus cung zad cig yongs su thob nas nges par 'chi bar 'gyur te/ des na dus de srid du bdag gis bde ba nyams su myong bar bya ba nyid rigs so zhe na/ gal te de ltar gyur pa de lta na yang nges par 'chi bar 'gyur ba la yid ches par rigs pa ma yin te/thams cad du gsad par bya ba'i skyes bu gshed mas byin gyis brlabs pa gsad par bya ba'i sar khrid pa bzhin du thar par ma mthong na khyod kyi bde ba la spyod par srid pa rigs pa ma yin no/ /de'i phyir skyo ba bsgoms pas rgyu dgag pa las le lo spangs te/ dge ba'i phyogs la spro ba 'phel ba nyams su blang bar bya'o/ /gal te nges par 'chi bar 'gyur ba de lta na yang de dang nye ba dang go bar byas la le lo spang bar bya'o zhes 'dogs nas/ ji srid ces pa la sogs pa gsungs te/ bsags pa ni tshogs par byas pa yin la/ tshogs pa ni gang gis 'chi ba'i don du nad dang rgas pa'i mtshan nyid 'byor pa'o//ji srid ces pa ni 'jig rten pa'i brjod pa yin la/ myur ba ni mgyogs par yin te/ shin tu nye bar gyur pa'i phyir ro/ /de ltar 'chi bdag gi khar son pa de'i tshe dus ma yin par le lo spangs kyang ci zhig bya ste/de'i tshe dgos pa cung zad kyang yod pa ma yin no zhes pa'i don te/ tshigs su bcad pa gsum gyis dus ma yin pa nyid du bsgrub pa'i phyir/ 'di ni ma thob ces pa la sogs pa gsungs te/ 'di ni zhes pa ni phyi nas bya'o zhes pa yid la byas pa ste de ma thob pa'o/ / 'di brtsams pa ni dgos pa gang zhig dang po nyid du byed par 'dod pa'o/ /'di ched byas par gnas pa la/ /zhes pa ni gang gis cung zhig bsgrubs shing ci zhig ma bsgrubs pa'o/ /de'i phyir bya ba mthar ma thug pa nyid du/ glo bur 'chi bdag 'ongs nas ni/ /bdag ni bcom zhes sems par 'gyur//shin tu dka' bas sems te myos par 'gyur tshe ci zhig bya zhes pa phyis 'byung ba dang 'brel to/ /mya ngan ni sdug pa dang bral bas sems yongs su gdung bar byas pa'o/ /de'i shugs ni rgyun mi 'chad par 'jug pa'o/ /des skrangs pa ni chen por gyur pa yin la/ mchi ma ni rlangs pa dang bcas pa'o/ /dmar po ni zangs kyi kha dog yin la/ mig ni lta bar byed pa yin te/ gang gi gdong la de yod pa de la de skad ces bya'o/ /de lta bur gyur pa'i gdong ngam byad nye du gang rnams kyi yin pa de la de skad ces bya ste/ de rnams mthong nas ni rnam par bltas pa na'o//ci lta bur gyur pa na zhe na/ re thag chad pa la'o/ /gang du zhe na/ slar gson pa'i bsam pa dang bral ba'am mgon dang bral ba de la'o/ /'chi ba'i dus na gnas pa'i gshin rje'i pho nya'i bzhin la yang ste/ skyes bu khro ba dang bcas pa khro gnyer can mthong ba na/ myos par 'gyur tshe ci zhig bya/ /zhes so/ /rang sdig dran pas gdungs pa ni 'chi ba'i dus na 'di ci'i phyir bdag gis byas zhes te/ phyis 'gyod pas gdungs pa na'o/ /'di tsam 'ba' zhig ni ma yin te/ 'on kyang dmyal ba'i sgra thos pa na ste sdug bsngal mi bzod pa nyams su myong bas sdug bsngal bar gyur pas bton pa'i 'o dod bos pa'i sgra dmyal ba las byung ba don 'ga' zhig la khro ba'i sgra bzhin du de thos nas bdag kyang gnas skabs 'di nyid la gnas pa yin no zhes so//skrag pas gang zhig la mi gtsang ba 'byung ba ni dor ba ste/ des lus bsgos pa'o//myos pa ni lus dang ngag dang yid kyis 'jug pa dbang du ma gyur pa'o/ /ci zhig bya zhes pa ni bya ba thams cad la byed pa log pa'o/ /'di ltar rtogs par byas nas nad med pa'i gnas skabs nyid du bslab par 'dod nas/ khyod ni nya gson zhes pa la sogs pa gsungs te/rim gyis bza' ba'i don du nya nyid gso bar byed pa yin te/ phal cher na shar phyogs na gnas pa'i skye bo rnams kyis srung bar byed do/ /gson pas mtshon pa'i nya ni nyi gson ma yin te/ de'i dus na'o/ /de dang 'dra bar bdag kyang de ring ngam sang nges pa nyid du 'chi bar 'gyur ro zhes yid la byas nas khyed kyis 'di nyid du 'jigs par rigs so//'dir zhes pa ni shes bzhin ldan pa'i gnas skabs nyid na'o/ /khyed ni zhes pa ni 'chi ba 'thob par gyur pa ste/ sdig pa byas par gyur pa khyed shin tu bzod par dka' ba'i dmyal ba'i sdug bsngal las 'jigs par rigs pa lta smos kyang ci dgos pa'o//mi rtsol ba dang bde nyams len pa'i dbang du byas pa'i chu tshan zhes pa la sogs pa gsungs te/ chu tshan gyis kyang reg pa'o/ /gzhon sha can zhes pa ni bod pa yin te/ shin tu 'jam pa'i lus yin pas bzod par mi nus so//gal te de ltar yin pa de'i tshe sdig byas zhes pa la sogs pa ni go sla'o/ /gzhan gyis yang dbang du byas te/ brtson med ces bya ba la sogs pa gsungs pa la/ bde ba'i rgyu bskyed pa'i don du byas pas stong pa de lta na yang de'i 'bras bu bde ba 'dod pa dang sdug bsngal mi bzod par byed/de lta na'ang gnod pa mang bar byed pa yin te/ sdug bsngal thams cad kyi 'byung khungs yin pa'i phyir ro/ /'chi bdag gis kyang dbang du byed par ci'i phyir byed/ de ltar na'ang bdag nyid mi 'chi bar ci'i phyir sems par byed ces pa'o//de ltar yang 'di la spyod pa'i phyin ci log pa mthong nas snying rje bzhin pas skyo ba dang bcas pas/ kyi hud sdug bsngal dag gis bcom/ /zhes gsungs te 'di rmongs pa chen po nyid kyis dka' ba'i gnas skabs su zhugs so zhes pa dang / bdag nyid la yang skyo bar byed de/de bzhin du gzhan du yang ji ltar rigs par blta bar bya'o/ /brtson med ces pa la sogs pa rnams ni 'bod pa'i tshig rnams yin no/ /gnyid kyi dbang du gyur pa'i dbang du mdzad nas/ mi'i gru zhes pa la sogs pa gsungs pa la/ mi khom pa brgyad las grol ba'i mi'i dngos po thob pa gru dang 'dra ba mngon par mtho ba la sogs pa pha rol du sgrol ba rnyed nas so//sdug bsngal gyi rang bzhin gyi chu bo chen po las sgrol zhes pa ni brgal bar gyis zhes pa ste/ brtson 'grus la brten nas sdug bsngal rnams la rgyab kyis phyogs par gyis shig pa'o//kye rmongs pa'i dbang du gyur pa ji srid du gru 'di dang nye bar gyur pa'i dus 'di ni gnyid log pa'i dus ma yin no/ /gal te de lta nyid du 'bad par mi byed na/ de'i tshe yang ngan song gi 'gro ba las sgrol ba'i gru 'di rnyed par dka' ste/ phyis 'di yang dag 'byor par ga la 'gyur//zhes gang gsungs pa'o/ /de ltar le lo bkag nas/ ngan la mngon par zhen pa spang ba'i phyir/ dam chos dga' ba zhes bya ba la sogs pa gsungs te/ dga' ba ni las rnams la dga' ba'o/ /mchog ni bla na med pa'o/ /ci lta bur gyur pa zhe na/ bar med pa'i dga' ba'i rgyun yin te/ bde 'gro gong nas gong du bskyed pa'i phyir ro/ /mtha' yas pa ni mthar thug pa med pa yin te dga' ba'i rgyun te gang la bde ba'i rgyun yod pa de la de skad ces bya ste/ de nyid kyi phyir mchog tu brjod pa'o/ /de spangs nas te dga' ba ni mngon par dga' ba'o//g.yeng ba ni lus dang sems 'phang bstod pa yin te dgod pa'i ngang tshul zhes pa'i don to/ /dgod pa ni ngag gi rnam par g.yeng ba yin te/ dga' ba dang bcas pa'i ngag gi rnam par 'gyur ba'o zhes bya ba'i don to/ /stsogs kyi sgras ni glu la sogs pa bzung ngo //de la khyod ci'i phyir dga' zhes te rigs pa ma yin no zhes dgongs pa'o/ /ci lta bur gyur pa la zhe na/ sdug bsngal gyi rgyu las te dmyal ba la sogs pa ngan 'gror khyer bar byed pa'i phyir sdug bsngal gyi rgyu'o/ /de ltar ngan la zhen pa spangs nas sgyid lug cing bdag nyid brnyas pa brtson 'grus kyis mi mthun pa'i phyogs spong bar 'dod pas de'i mi mthun pa'i phyogs gzhan yang spang ba'i phyir du bstan pa/sgyid lug med ces pa la sogs pa gsungs la/ sgyid lug pa las phyin ci log pa ni sgyid lug med pa yin la/ dpung tshogs ni tshogs pa yin te/'chad par 'gyur ba'i mtshan nyid can no/ /lhur blang ba ni grims pa'o/ /bdag nyid dbang du bya ba ni bdag nyid dbang du gyur pa'o/ /'di dag thams cad ni zlas dbye ba'i tshig sdud pa yin no/ /yang na 'di rnams dang lhan cig pa'i bdag nyid dbang du byas pa yin no//bdag dang gzhan du mnyam pa dang / bdag dang gzhan du brje ba dag ni bsam gtan gyi le'ur 'chad par 'gyur ba'o/ /'di dag ma lus pa ni le lo spang ba'i phyir brtson 'grus spel ba la mthu dang ldan pa yin no zhes mdor bstan pa yin la/ mdor bstan pa'i don nyid rim gyis rgyas par bstan pa'i ched du/ bdag gis zhes pa la sogs pa gsungs te/ bdag gis byang chub ga la zhes shes pa ni nyon mongs bdag ji ltar yang dag par rdzogs pa'i byang chub kyi snod yin te/ sangs rgyas nyid ni dbang po rnon po brtson 'grus brtsams pa/dpag tu med pa'i bsod nams kyi tshogs bsags pa shin tu dka' ba spyod pa nyams su len pas bskal pa grangs med pa du mas skyes bu khyad par can 'ga' zhig gis bsgrub par bya ba yin la/ bdag ni de lta bu ma yin pa'i phyir bdag ci lta ba de lta bu la sangs rgyas nyid ci ltar srid par 'gyur zhes rnam pa 'di lta bur yid la bya bas sgyid lug cing brnyas par mi bya ste don chen po las nyams pa'i rgyu yin pa'i phyir ro//ji ltar sgyid lug pa yang don med yin/ /zhes gsungs so/ /ci'i phyir zhe na/ gang gi phyir de bzhin gshegs pas te/ 'di ni 'chad par 'gyur ba yin la bden pa ni de las gzhan du ma yin pa yin te/gsungs pa ni bka' stsal pa'o/ /ji ltar shes par bya zhe na/ bden pa gsungs pas zhes te/ ye shes kyi bya ba mnga' bas phyin ci ma log par gsungs pa'o/ /de'i phyir bden pa gsungs pa la 'di ni gtan tshigs kyi tshig yin no/ / ji lta bu'i bden pa gsungs she na/ sbrang bu zhes pa la sogs pa gsungs te/ des kyang zhes pa ni sangs rgyas bcom ldan 'das shAkya thub pa dang / rin chen gtsug tor can dang / mar me mdzad la sogs pa 'khor ba'i rgya mtsho'i 'khor ba'i nang du chud pa sngar gyi so so'i skye bo'i gnas skabs na yongs su 'khor bar gyur pa nyid du gnas pa na/gang gis brtson pa'i stobs bskyed pa ni brtson 'grus 'phel ba'i stobs kyis tshogs bsags pa na'o/ /byang chub thob dka' ni rnyed par dka' ba yin la bla med thob pa ni mchog go/ /brtson 'grus brtsams pa la cung zad kyang dka' ba yod pa ma yin no zhes pa ni bden pa nyid do zhes dgongs so//bdag ni mir skyes pa ste mi ru skye ba thob pa yin la/ phan gnod ngo shes nus pa yis/ /zhes pa 'di ni phan pa yin la 'di ni mi phan pa yin no zhes dge ba dang mi dge ba'i las nye bar ston pa dang ngo shes pa ste/ khong du chud par nus pa'o//de'i phyir bdag la shin tu yang byang chub rnyed dka' ba ma yin no zhes ston pa ni/ bdag gi zhes pa sogs pa gsungs te/ 'di ltar bsams nas so/ /thams cad mkhyen pa ni dngos po'i de kho na nyid mkhyen pa yin la/ tshul 'di ni blang ba dang dor ba'i de kho na nyid ston pa'i theg pa'o//ma btang na ni yongs su ma spangs pa ste/ de len pa dang yongs su 'dzin pa dang bsten pa zhes pa la sogs pa'i don to/ /sangs rgyas nyid bdag gis cis mi 'thob ste tshig zur gyis 'thob pa kho nar bstan to/ /'di bcom ldan 'das kyis dkon mchog sprin du gsungs pa yin te/ji ltar 'di la byang chub sems dpa' 'di snyam du mir gyur pa ni byang chub thob pa dka' ste/ bdag gi brtson 'grus 'di ni chung zhing zhan la/ bdag kyang le lo can te/ byang chub ni mgo'i thod la me 'bar ba bzhin du bskal pa mang po bskal pa brgya phrag mang por bsgrub dgos pas bdag ni de lta bu'i khur bskur bar mi spro snyam du sems mi bskyed de/'on kyang ci 'di ltar byang chub sems dpa' ni 'di ltar de bzhin gshegs pa dgra bcom pa yang dag par rdzogs pa'i sangs rgyas gang mngon par rdzogs par sangs rgyas pa de dag dang / gang mngon par rdzogs par 'tshang rgya ba de dag dang / gang mngon par rdzogs par 'tshang rgya bar 'gyur ba de dag kyang tshul 'di 'dra ba dang / lam 'di 'dra ba nyid dang / brtson 'grus 'di 'dra ba nyid kyis mngon par rdzogs par sangs rgyas/ mngon par rdzogs par 'tshang rgya/ mngon par rdzogs par 'tshang rgya bar 'gyur te/ de bzhin gshegs pa de dag kyang de bzhin gshegs par gyur pa sha stag las mngon par rdzogs par sangs rgyas pa ma yin gyis/ bdag kyang ci nas kyang bla na med pa yang dag par rdzogs pa'i byang chub mngon par rdzogs par 'tshang rgya bar 'gyur bar sems can thams cad dang thun mong gi brtson 'grus dang /sems can thams cad la dmigs pa'i brtson 'grus kyis bdag gis kyang de lta de ltar btsal lo 'bad do zhes so/ /'di ni rigs pa nyid yin te/ 'on kyang gcig pu shin tu dka' ba'i spyod pa thos pas sgyid lug pa bzlog par mi nus so zhes pa'i rnam par rtog pa/'on te rkang lag ces pa la sogs pa gsungs te/ lag pa dang rkang pa dang mgo la sogs pa'i sbyin pa med par sangs rgyas nyid thob pa ma yin no zhes shin tu dka' ba'i las rnams la 'jug pas 'jigs pa spro ba yang ldog pa nyid do zhes gal te sems na/rang gi sems nyid la gsungs pa/ de la lci ba dang yang ba la bdag rmongs pa nyid de chung ngu la chen po nyid dang / chen po chung ngu nyid du gti mug gi dbang du gyur pa yin la/ ma dpyad pa ni ma shes pas te bdag gi don dam par dpyad par ma gyur to//don dam par dpyad na lci ba dang yang ba 'di phyin ci log pa nyid do zhes/ bskal pa zhes bya ba la sogs pa gsungs te/ 'khor ba'i btson rar gnas pa na de lta bu'i las kyi dbang gis bdag bcad pa ste/ lag pa dang rkang pa la sogs pa lus dang yan lag dang nying lag bcad pa'i phyir de dmyal ba la sogs pa rnams su ni ma yin no//de bzhin du phug ste ni mdung dang 'phang mdung la sogs pa rnams kyis so/ /sreg pa ni dmyal ba'i me la sogs pas so/ /gsheg pa ni sog le 'bar bu la sogs pas so/ /lan grangs du mar lan mang du yin te 'khor ba'i lam mthar thug pa med par dmyal ba la sogs pa rnams su sdug bsngal nyams su myong ba yin no//bskal pa bye ba grangs med du/ /zhes pa ni bgrang bar mi nus pa yin no/ /de'i phyir mi 'dod kyang mthar thug pa med pa'i sdug bsngal rnam pa du ma 'byung bar 'gyur te/de sangs rgyas kyi tshogs su gyur pa ni ma yin no/ /'di ni 'khor ba la mthar thug pa med pas sdug bsngal shin tu chen po dang 'bras bu med pa yang yin no/ /sangs rgyas nyid sgrub par byed pa ni shin tu chung ba dang 'bras bu dang bcas pa yang yin no zhes bstan pa'i phyir/ bdag gi zhes pa la sogs pa gsungs te/ sangs rgyas nyid sgrub par byed pa'i bdag gis sdug bsngal 'di ni tshad yod do zhes pa ni dus nges par gyur pa'i phyir dang / yang sdug bsngal gyi rgyud de lta bur gyur pa'i zug rngu des gnon pa de bsal ba'i phyir te/ de sel ba ni ldog par byed pa'o//de'i rgyu mtshan du de btang snyoms su bor nas ji srid 'tsho'i bar gyi sdug bsngal bsal bar byas so zhes pa'i don to/ /de'i zug rngu khong rlag gdon pa'i ched du lus la rma btod nas 'byin cing 'don par byed do zhes pa'i don to/ /dus so sor nges pa'i sdug bsngal shin tu chung ba des yun ring po'i sdug bsngal zhi ba'i rgyu mtshan yin pa de bzhin du sdug bsngal 'di la yang bzod par bya bar rigs so//sman pa kun kyang zhes pa la sogs pa gsungs pa 'dis kyang sdud pa yin te/ sman pa kun kyang ni bdag 'ga' zhig ma yin pa nyid do/ /bsnyung ba dang sman pa la sogs pa byas pas ji ltar 'dod par za ba dang 'dug pa la sogs pa bkag pa las byung ba'i bya ba'i sdug bsngal gyis gdungs pa rnams la nad med pa skyed par byed de/gzhan du na de zhi bar byed par mi nus so/ /gang gi phyir de ltar yin pa de'i phyir shin tu yang sdug bsngal chung ngu'i chung ngu la bzod par bya'o//ci'i phyir zhe na/ sdug bsngal mang po dag gzhom phyir/ /zhes te/ bdag dang sems can thams cad kyi yun ring po'i sdug bsngal thams cad zhi bar byed pa'i phyir ro zhes pa'i don to/ /blo dang ldan pas 'di ltar re zhig khas blangs par rigs te 'dir rigs pa yin yang dka' ba'i las la bcom ldan 'das kyis las dang po pa la dang por rjes su gnang ba ma yin no zhes bstan pa'i phyir/gso dpyad ces pa la sogs pa gsungs te/ gso dpyad 'os pa 'di 'dra ba brjod ma thag pa'i sdug bsngal skyed par byed pa rnams yin la/ 'os pa yin na yang bstan par bya ba yin na yang ngo //sman pa'i mchog ni bcom ldan 'das te nad thams cad 'chos par mdzad pas rnam pa thams cad du dang por gnang ba ma yin la/ las dang po pas bya ba ma yin pa nyid du bstan to/ /'o na ji ltar 'dod chags la sogs pa'i nad sel bar byed ce na/nye bar spyod pa 'jam pos zhes pa la sogs pa gsungs te/ nye bar spyod pa shin tu 'jam po'i rim pas te ji ltar bzod par gso dpyad gsungs pas zhes pa'i don to/ /gso bar mdzad pa ni nad las grol bar mdzad pa'o/ /nad pa chen po ni yun ring po'i nad pa ste/'dod chags la sogs pa'i nad chen pos bzung ba rnams so/ /yang ci ltar nye bar spyod pa 'jam po yin zhe na/ tshod dam zhes pa la sogs pa gsungs te/ ser sna'i dri ma spang ba'i phyir dang bde zhing bde ba'i tshogs spel ba'i don du yongs su gso bar nus pa'i sngo rngad dang phye zan gyi chang bu tsam sbyin pa la thog ma kho nar 'dren pas te bcom ldan 'das kyis sbyor bar mdzad de/yang thabs kyi khyad par gyis sbyor ba mdzad do/ /de la zhes pa ni 'jig rten pa'i brjod pa yin la/ gang de ltar na sbyin pa chung ngu la sogs pa ster ba la goms pa'i rim pas sbyin pa chen po'i chen po la goms pa phul du phyin par gyur pa na phyi nas dka' ba med pa nyid du rang gi sha dang khrag la sogs pa yang dang bas ster bar byed do//yang 'di ci'i phyir zhes dgongs nas/ gang tshe zhes bya ba la sogs pa gsungs te/ gang gi dus na sbyin pa la sogs pa la mchog tu goms pa phul du phyin par gyur pa las ser sna rnam pa thams cad du bral bas rang gi sha la yang sngo rngad lta bu'i zhen pa med pa'i blo skye bar 'gyur la/de'i tshe rang gi sha la sogs pa gtong ba yang nyams su len par mi nus pa ma yin pa'i phyir de'i dus na dka' ba ci zhig yod de cung zad kyang ma yin no zhes bya ba'i don to//'o na de ltar gyur na yang dus yun ring por gzhan gyi don du 'khor ba ji srid kyi sdug bsngal ci dang 'dra bar spang nus she na/ sdig pa zhes pa la sogs pa gsungs te/ sdug bsngal gyi gnod pa pa rnam pa gnyis kho na skyed par byed de/lus las byung ba dang yid las byung ba'o/ /de la gnyis po 'di yang byang chub sems dpa' la srid pa ma yin te/ lus dang ngag dang yid rnams kyis kha na ma tho ba thams cad spang ba'i phyir lus kyi sdug bsngal 'di la skye ba ma yin no//lung dang rigs pa dag gis bdag med pa gnyi ga gtan la phab pa'i phyir yid kyi yang ji ltar srid pa yin/ 'di ltar log par rtog pa dang zhes pa ni gang bden pa ma yin pa'i rnam par rtog pa des bdag dang bdag gir 'dzin pa la 'jug pa dang / dngos po la mngon par zhen par byas pas sems can sdug bsngal ba dang sdig pa ste srog gcod pa la sogs pa'i lus sdug bsngal ba yin no//de ltar re zhig sdug bsngal gyi rgyu spangs pa'i phyir 'di la sdug bsngal skye ba ma yin no zhes bstan pa yin no/ /da ni 'di la bde ba kho na yin no zhes bstan pa'i phyir bsod nams zhes pa la sogs pa gsungs te/gang la bde ba skyes pa'i lus ni bde ba yin la/ bde ba gang la yod pa'i yid ni bde ba yin te/ de ltar gnyi ga la yang bde ba dang ldan pa'i phyir ro/ /thugs rje dang ldan pa gzhan gyi don du 'khor bar 'khor ba na sdug bsngal gang gis skyo bar byed de skyo bar sems/yang na gang gis skyo bar byed de skyo ba'i rgyu med pa'i phyir gang gis kyang ma yin no zhes dgongs so/ /de ltar ci'i phyir rgyu med par 'jigs pas phyir phyogs par byed/ de ltar gyur na yang yun ring por bsten cing bsgom pa mang du byas pa'i bsod nams kyi tshogs chen pos yang dag par rdzogs pa'i byang chub 'thob la de bas rmongs pa rnams byed pa myur bas nyan thos kyi theg pa nyid la brten pa bla'o zhes dogs nas/'di ni byang chub sems stobs zhes pa la sogs pa gsungs te/ sngar byas pa'i sdig pa gang yin pa de rnams ni byang chub kyi sems kyi stobs nyid kyis zad par byed do//ji ltar sngar yang / gang gi dus mtha'i me bzhin sdig can rnams/ /skad cig gcig gis nges par sreg par byed/ /ces brjod pa lta bu'o/ /de bzhin du byang chub kyi sems kyi stobs nyid kyis sdud par byed pa ni ster bar byed pa ste/bsod nams kyi rgya mtsho rnams te/ rgyun mi 'chad par bsod nams shugs/ /nam mkha' mnyam par rab tu 'byung / /zhes gang brjod pa'o/ /rnam pa 'di lta bu'i dad pa'i shugs kyis theg pa chen po la gnas pa'i byang chub sems dpa' ni nyan thos la sogs pa rnam pas kyang myur zhing mgyogs par 'gro'o//de ltar zhes pa la sogs pas bstan pa'i don nyid bsdus nas ston par byed de/ de ltar ni brjod pa'i rim pa yin la/ kha na ma tho ba spangs pa dang sngar byas pa'i sdig pa zad pa'i phyir rmi lam na yang ngan song du 'gro ba dang bral ba'i phyir dang bsam pa shin tu drag pa'i bde ba du mas nyin mtshan du nam mkha' khyab pa'i bsod nams kyi rgya mtsho mngon par 'phel bar bya ba'i phyir bde 'gro brgyud pas lam bzang por 'jug pa'i byang chub kyi sems shing rta dang 'dra ba bskyed cing zhon nas shes pa'i don to//ci lta bur gyur pa zhe na/ skyo bas ni yongs su nyon mongs pa ste/ ngal ba ni dub pa'o/ /de sel ba ni rigs pa sngar bstan pa'i tshul gyis skyon kun sel ba'o/ /de bde ba gcig las gzhan gong nas gong du lhag cing lhag par lha dang mi'i bde ba phun sum tshogs pa'i mtshan nyid du 'gro ste thob par gyur na'o//rtog pa dang ldan pa rnams sgyid lug par 'gyur ba ji ltar srid/ de'i phyir de ltar na rnam pa du mas sgyid lug pa'i rgyu mtshan bkag pas sgyid lug pa med pa nyid du bstan nas/ dpung gi tshogs bstan pa'i phyir/ sems can don ni zhes pa la sogs pa gsungs te/'dir yang mdor bstan pa'i bdag nyid yin no/ /'dun pa ni 'dir dge ba'i 'dod pa yin la/ brtan pa ni brtsams pa la brtan pa yin zhing dga' ba ni dam pa'i las la zhen pa yin te/ gtong ba ni mi nus pa na dus cung zad cig 'jig pa'o/ /'di ni dpung gi tshogs bzhi yin te/cha shas du mas bsdus pa'i bdag nyid yin pa'i phyir glang po che la sogs pa'i dpung bzhin no/ /sems don grub phyir zhes pa la/ 'di brtson 'grus kyi rgyu yin pa'i phyir la/ brtson 'grus kyang mngon par 'dod pa thams cad grub par byed pa'i phyir ro zhes pa'i don to//de la stobs kyi tshogs ni byed pa mang ba'i phyir 'dun pa zhes pa la sogs pas skyed pa'i rgyu gsungs te/ sdug bsngal 'jigs pas shes pa ni mi dge ba'i las las sdug bsngal 'byung bas 'jigs pa las 'dun pa bskyed do/ /de'i phan yon bsam pas zhes te/phan yon ni 'bras bu'i sgo nas yon tan gyi khyad par yin te de yang shugs kyis las dge ba nyid do/ /de bsgom pa ni dge ba'i las las rnam pa du ma'i sgo nas 'bras bu bzang po 'byin par yang nas yang du bsam pas zhes pa'i don to/ /da ni dpung gi tshogs kyi bya ba bstan pa'i phyir/de ltar zhes pa la sogs pa gsungs te/ de ltar ni brjod pa'i rgyun gyi rigs pas so/ /mi mthun pa'i phyogs ni le lo la sogs pa'o/ /spangs pa ni gnyen po bsgom pa'i cho gas sel ba ste brtson 'grus spel ba'i phyir stobs bskyed par bya'o/ /thabs gang gis she na/'dun dang zhes pa la sogs pa smos te/ nga rgyal ni sems mthon po yin la 'di ni brtan pa'i dpung 'phel bar byed pa'am brtan pa'i stobs nyid yin te/ 'di rnams kyi stobs kyis ni mthu rnams kyis so/ /'dir nus pa'i rnam grangs ni stobs kyi sgra yin no/ /de la re zhig 'dun pa bskyed pa dang por bdag dang gzhan gyi zhes pa la sogs pa gsungs te/sems can thams cad la phan btags pas bdag nyid kyi yang nyon mongs pa thams cad spang ba'i ched dang / yon tan ma lus pa bskyed pa'i don du bdag gis byang chub kyi sems bskyed la de yang bya ba zhan pas bsgrub par bya ba ma yin no zhes go bar byas nas kyang gal te brtson 'grus ma brtsams pa yin pas rtsom par zhan par gnas pa yin la/de'i tshe ngan song du lhung ba las gzhan rten yod pa ma yin par bdag gis bsams nas skyo ba mngon du bya ste/ 'dun pa bskyed par bya'o zhes pa ni bsdus pa'i don to//yan lag gi don brjod par bya ste/ dpag tu med pa ni tshad du bya bar mi nus pa'o/ /nyes pa ni lus dang sems la brten pa'o/ /gzhom par bya ba ni spang bar bya ba'o/ /bdag dang gzhan ni rang gi bdag nyid dang / gzhan gyi bdag nyid do//re re la zhes pa ni re zhig mang po rnams bzhag ste/ mang du ni de rnams la'o/ /bskal pa rgya mtsho ste/ bskal pa brgya stong du mas so/ /zad pa ni spong bar byed pas so/ /de la ni de rnams la'o/ /nyes zad rtsom pa ni nyes pa spong ba la spro ba'o/ /cung zad tsam ni cha tsam yang ngo //bdag la ma mthong ba ni mi snang ba'o/ /de'i phyir sdug bsngal dpag tu med pa'i rten te/ sdug bsngal tshad med pa'i snod yin no/ /bdag gi snying mi 'gas pa ni ci'i phyir ral bar ma gyur pa ste/ rnam pa gang gis so/ /bdag dang gzhan gyi zhes pa la sogs pa ni go sla'o//don med pa ni 'bras bu med pa nyid de/ bdag gi skye ba ni mi khom pa brgyad las grol ba yin la khyer ba ni bskyal bas te rgyab tu byas zhes pa'i tha tshig go/ /brgya la na thob pa ni/ rgya mtsho cher g.yengs gnya' shing gi /bu gar rus sbal mgrin chud ltar/ /yun ring pos thob pa yin no//de nyid kyi phyir ngo mtshar ba'i gnas yin pas rmad du byung ba'o/ /'di'i phyir yang nyams pa yin no zhes/ bdag gis zhes pa la sogs pa gsungs te/ de bzhin gshegs pa rnams la bsnyen bkur byas pas dga' ston chen po ste shin tu mngon par dga' ba dang ldan pa yin zhing /des bde ba ni yid bde ba yin la/ ma thob pa ni bdag gis ma rtogs pa'o/ /bsten pa ni sku gzugs dang mchod rten dang / dam pa'i chos la sogs pa la bkur sti dang / lha khang dang / kun dga' ra ba dang / gzims cha la sogs pa'i dngos po dbul ba bya ba ste mchod pa yang ma byas so//dbul ba rnams ni nor zhan pa rnams yin la/ bsam pa 'di 'dod pa yin te/ nye bar mkho ba'i sgo nas rdzogs par ma byas pa'o/ /'jigs pa la ni dgra la sogs pa'i 'jigs pas 'khrugs pa rnams la ma 'jigs shig ces mi 'jigs pa ma byin pa'o//nyam thag ni lus dang yid kyi sdug bsngal gyis gdungs pa yin la/ de bsal nas bde bar byas pa yang ma yin no/ /skyes bu dam pa'i chos 'di dag thams cad dang bral ba'i phyir bdag ma'i mngal gyi zhes pa la sogs pa gsungs te go sla'o//khyed rnams kyi gnas skabs ngan pa 'di yang ci'i phyir thob ce na/ chos la 'dun dang zhes pa la sogs pa gsungs te/ chos la 'dun pa dang bral ba'i sngar gyi skye bar bsags pa nyid kyis bdag la da lta'i skye ba 'di la yang rgud pa 'di 'dra ba 'byung bar 'gyur te/ nus pa thams cad dang bral ba'i rang bzhin sngar brjod pa rnams thob par gyur par 'di ltar shes par byas nas su zhig chos la 'dun pa gtong bar byed de yongs su gtong bar byed cing mkhas pas ci'i phyir len par mi byed ces pa'i tha tshig go//yang ci'i phyir dge ba don du gnyer ba rnams kyis 'dun pa bskyed pa la 'bad par byed ces dgongs nas/gang / 'dun pa sdug bsngal 'jigs pas skyed/ /ces pa la sogs pa gsungs pa de bsal bar bya bar 'dod nas/ dge ba'i phyogs ni zhes pa la sogs pa gsungs te/ rgud pa bsal ba 'ba' zhig gi don du ni ma yin te/dkar po'i chos bsags pa'i don du yang 'dun pa bskyed pa la 'bad par bya'o zhes pa ni 'ang gi sgra'i don to/ /thams cad kyi zhes pa ni 'ga' zhig ma yin pa'o/ /rtsa ba 'dun pa ni rgyu yin par bcom ldan 'das kyis gsungs te/ rang gis btags nas brjod pa ni ma yin no zhes bya ba'i don to//de'i yang ni 'dun pa'i yang ngo / /rtsa ba rtag tu ni dus thams cad du'o/ /rnam smin 'bras bu bsgoms pas ni dge ba dang mi dge ba'i las kyi rnam par smin pa'i 'bras bu 'jig rten pha rol tu 'dod pa dang mi 'dod pa 'thob pa'i mtshan nyid yin la/ de bsgom pa ni yang nas yang du mngon du byed pa'o//de la las mi dge ba'i rnam par smin pa'i 'bras bu bstan pa'i phyir/ sdug bsngal zhes pa la sogs pa gsungs te/ lus dang ngag dang yid ji srid pa rnams kyis dmyal ba la sogs pa'i sdug bsngal sna tshogs pa rnam pa du ma'i 'jigs pa 'di ltar bcing zhing 'khyig pa dang brdeg pa la sogs pa rnams dang /yid kyis tshol ba'i rnyed pa'i bar chad 'dod pa'i gegs byed pa yang sdig pa byed pa rnams nyid las skyed cing 'byung bar 'gyur ro/ /legs spyad kyi las kyi rnam par smin pa'i 'bras bu bstan pa'i phyir dang /yid la bsam pa'i zhes pa la sogs pa gsungs te/ 'dod pa la smon pa'i rnam par rtog pa ni yid la bsams pa yin la/ gang 'jig rten na yid kyi rgyal srid ces rab tu grags pa bzhin no/ /dge ba byas pa na bsod nams byas pa yin la/ gang dang gang du zhes pa ni zlos pa yin te/ 'ga' zhig kho nar ma yin no/ /'gro ba ni bskyod pa'o/ /'bras bu rin gyis zhes pa ni mngon par 'dod pa'i 'bras bu ston par byed pa nyid rin chen bzhin du rin te/ des mchod pa yin no/ /yang mi dge ba'i 'bras bu bstan pa'i phyir/ sdig pa zhes pa la sogs pa gsungs te/bde ba 'dod pa ni bde ba don du gnyer ba'o/ /sdug bsngal mtshon gyis zhes pa ni byed pas te/ sdug bsngal nyid mtshon bzhin du de'i 'dod pa gcod par byed pa'i rgyu nyid yin pa'i phyir ro/ /so so'i skye bo dang thun mong ma yin pa'i dge ba'i las kyi rnam par smin pa'i 'bras bu thun mong ma yin pa/rgya che ba zhes pa la sogs pa gsungs te/ rab tu dga' ba'i sa thob pa'i byang chub sems dpa' rnams mi 'dod bzhin du ma'i mngal du skye ba ma yin te/ 'on kyang bde ba can du sna tshogs pa'i 'dab ma can gyi pad+ma'i nang du skye bar 'gyur ro//de rnams kyi bde ba'i 'byor pa du ma ston par byed de rgya che ba ni shin tu yangs pa yin la/ dri zhim pa ni yid du 'ong ba'i dri yin te/ bsil ba ni bde ba'i reg bya yin zhing de rnams kyang pad+mas te 'dam skyes yin no/ /de dag gi snying po ni yang pad+ma'i snying po'i bye brag yin no/ / de rnams la gnas pa ni bzhugs pa yin la/ shes rab dang thabs dang snying rje chen po las byung ba'i bsod nams dang / ye shes kyi yan lag bsdus pas byang chub kyi sems dang ldan pa'i bde gshegs kyi sras su dge bas 'gyur ro zhes 'brel to/ /pad+ma'i snying po rnams su yang ci ltar rgyas par 'gyur zhe na/rgyal ba'i gsung snyan zhes pa la sogs pa gsungs te/ snyan pa ni dbyangs kyi yan lag thams cad dang ldan pas mchog tu yid bde bar byed pa rnams kyis so/ /rdzogs pa'i sangs rgyas kyi chos kyi dbyings kyi zas te/ zhal zas kyis mdangs 'phel bar byas pa'i lus gang la yod pa de la de skad ces bya'o//de ji ltar skyes she na/ thub 'od ces pa la sogs pa gsungs te/ yongs su smin pa'i dus su mkhyen nas thub 'od de de bzhin gshegs pa'i 'od zer rnams kyis rgyas shing kha phye bar byas pa yang yin la de ni pad+ma 'ang yin no zhes pa'i don to//de las byung ba ni skyes pa yin la/ mtshan dang dpe byad kyis brgyan pa'i lus gang la yod pa de la de skad ces bya'o/ /de lta bur gyur pa'i bde gshegs kyi sras byang chub sems dpa'i rgyud du ste/ bde gshegs spyan sngar bde ba can du bcom ldan 'das 'od dpag med kyi spyan sngar gcig tu dkar ba'i dge ba'i las rnams kyis 'byung zhing skye bar 'gyur ro//de ltar 'di ni ma'i mngal du skye bar 'gyur ba rnams la khyad par 'di las bzlog pa'i sdug bsngal nyams su myong bar 'gyur ro zhes bstan par 'gyur te/ 'di ltar yang de na dog pa dang /dri nga ba dang / pho ba'i me drod kyis tsha ba dang / pha dang ma'i mi gtsang ba nur nur po las yang dag par byung zhing skyes pa dang / mas zos pa dang 'thungs pa skyugs pa dang 'dra bas bskyed pa dang / mngal gyi dri mas gos pa dang / yongs su smin pa'i dus na brgya la srog mgrin par phyin pa dang /bcar la mnan pa bzhin du btsa' ba'i dus na yang yin te phal cher mir skyes pa'i 'dren pa'i las kyi rnam par smin pa bshad pa yin no/ /gcig tu gnag pa'i las kyi rnam par smin pa gshin rje'i skyes bu zhes pa la sogs pa gsungs te/ gshin rje'i skyes bu zhes pa ni dus kyi pho nya bas te bshus pa ni 'bar ba'i thob la sogs pa'i mtshon rnams kyis rnam par phral ba'o//ma lus pa ni mtha' dag yin la pags pa ni shun lpags sam nus pa ste gang la yod pa de la de skad ces bya'o/ /rab tu nyam thag par gyur pa ni shin tu 'bar ba'i lcags kyi sa gzhir ltung ngo //slar yang ci lta bur gyur pa zhe na/ rab tu tsha ba'i mes zhu bar gyur pa'i zangs gang yin pa des lus rnams la blugs pa ste bkrus pa'o/ /de nas yang pags pa ma lus par bshus pa la 'bar ba'i ral gri rnams dang / mdung thung ste mtshon cha'i khyad par rnams kyis de rnams la bsnun pa yin te rnam pa du ma'i mtshon gyis so//lhags shing ni rnam par bcad pa dag yin te sha'i dum bu ni mtha' dag yin la gang gi tshe de ltar gyur pa na shin tu 'bar ba'i rang bzhin gyi sa gzhi rnams su lhung bar 'gyur ba'o//mi dge ba ni dge ba ma yin pa'i las rnams kyis so/ /mang pos zhes pa ni lan mang por yin te/ dus ring por de'i 'bras bu zad pa'i phyir ro/ /de ltar dge ba dang mi dge ba'i las de'i rnam par smin pa'i 'bras bu bstan nas/ 'dun pa'i stobs nye bar bsdu ba'i phyir de bas zhes pa la sogs pa gsungs te/gang gi phyir de ltar dge ba dang mi dge ba'i las kyi 'bras bu rnam par smin pa 'jam pa dang rtsub pa yin pa de'i phyir 'di ltar yongs su bsams nas mi dge ba'i las spangs nas dge ba la 'dun pa nyid la gus par bya'o/ /da ni brtan pa'i stobs bstan par bzhed nas rdo rje rgyal mtshan zhes gsungs te/rdo rje rgyal mtshan gyi mdo las gsungs pa'i cho ga yang nga rgyal te bsgrub par bya ba'i don brtsams nas bsgom par bya'o/ /yang na/ brtsams nas bsgom par bya/ zhes pa ni brtan par yang dag par brtsams nas bsgom par bya ste/sems la brtan par bya ba yin la sbyor ba dman pas ni ma yin no/ /rtsom pa'i rim pa nyid bslab par bzhed nas/ dang por zhes pa la sogs pa gsungs te/ dang por ste snga ma nyid du mngon par 'dod pa'i don bsgrub pa'i ched du 'byor pa ste rgyu mtha' dag go//brtags la de'i stobs dang ldan pa dang stobs dang mi ldan pa rnam par dpyad nas stobs dang ldan na brtsams pa'am/ stobs dang mi ldan na brtsam par mi bya'o/ /'di ltar brtags pa la dgos pa ci yod ce na/ ma brtsams pa ni mchog yin gyi/ /zhes gsungs te/mi nus na dang po nyid du brtsams nas bzlog par mi bya'o/ /ci ste 'di ltar gang gis ci zhig mi 'dod nas ston ce na/ skye ba gzhan du yang zhes pa la sogs pa gsungs te/ de ltar byed pa ni skye ba gzhan la de goms pa ste/ brtsams shing ldog pa zhes bya ba yin la/dam bcas shing yang mi byed pa'i sdig de las sdug bsngal 'phel bar 'gyur ro/ /gzhan ni gang zhig spangs nas de brtsams pa yin la dman pa ni de chud zos pa'o/ /'bras bu'i dus kyang dman pa ni brtsams pa yongs su spangs pa'i 'bras bu'i dus te/ 'di'i 'bras bu de'i dus na gang 'bras bu gzhan bya ba de chud zos pa zhes pa'i don to//de yang ni gang brtsams nas yongs su dor ba de yang ma bsgrubs te 'grub par ma byas pa'o/ /de ltar nyes pa rnam pa lnga yin la des na 'dod pa ma yin no zhes dgongs pa yin no/ /'o na nga rgyal 'di thams cad du bya ba ma yin nam zhe na/gsum po zhes pa la sogs pa gsungs te/ gsum po gang dag la zhe na/ de ni las dang nye ba'i nyon mongs nus zhes gsungs te/ de la nye ba'i nyon mongs pa ni dngos po phran tshegs kyi ming can te/ khro ba dang / 'khon du 'dzin pa dang / 'chang ba dang / 'tshig pa la sogs pa lnga bcu rtsa bdun nam/ 'dod chags la sogs pa'i nyon mongs pa rnams nyid nye ba'i nyon mongs pa rnams su brjod do/ /de la las kyi nga rgyal bshad par 'dod nas/ bdag nyid gcig pus zhes pa la sogs pa gsungs te/ gang cung zad sems can rnams kyi kha na ma tho ba med pa'i las bya bar gyur pa de thams cad bdag nyid gcig pus bya ste/gzhan la skabs dbye bar mi bya'o zhes pa'i don to/ /'di nyid bstan pa'i phyir nyon mongs zhes pa la sogs pa gsungs te/ nyon mongs pas dbang du byas pa ni skye bo'i tshogs 'di thams cad yin te/gang du yang rang gi don bsgrub pa la nus pa dang ldan par mi 'gyur ro/ /gang rnam pa bde ba thams cad bskyed par bya ba'i phyir bdag gis byang chub mchog tu sems bskyed de/ gang gi phyir de ltar yin pa de'i phyir skye bo 'di dag 'di lta bu'i khur bskur ba la bdag la nus pa med pa ma yin no/de'i phyir bdag nyid kyis 'di thams cad bya'o/ /dman pa'i las la yang ldog par mi bya'o zhes pa/ gzhan dag dman pa'i las zhes pa la sogs pa gsungs te/ dman pa ni shin tu smad pa yin te/'jig rten na khur khur ba la sogs pa'o/ /bdag kyang sems can thams cad kyi bran du gyur nas yang 'dug ste yod kyang ngo / /bdag gi bya ba ci ltar gzhan gyis byed de bdag nyid kyis bya bar 'os so zhes pa'i don to/ /'o na las de dag gis rjes su mthun pa nyid do zhes pa'i sems khengs pa bzlog par 'dod nas/'di la nga rgyal gyis zhes pa la sogs pa gsungs te/ bdag ni de'i bu yin la las 'di ni shin tu dman pa yin ste de bdag gis bya bar rigs pa ma yin no zhes nas gal te nga rgyal gyis mi byed na de'i tshe bdag gi nga rgyal brlag na bla ste/nga rgyal don chen po nyams par byed pa 'dis bdag la ci zhig bya/ dman pa'i las la 'jug par mi bya'o zhes pa'i don to/ de ltar las rnams la nga rgyal bshad nas/ nye ba'i nyon mongs pa rnams la nga rgyal bstan par 'dod nas/ sbrul ni zhes pa la sogs pa gsungs te/ gal te nye ba'i nyon mongs pa rnams la nga rgyal bcom pas bdag gi sems zhan par 'gyur te/ de'i tshe phongs pa ste ltung bas gnod par byed de/ gnod par byed cing ltung ba dang bcas par byed do zhes pa'i don to/ /chung ngu yang ni nye ba'i nyon mongs pas bskyod pa'i spyod pas zhen pa'o//ci lta bus she na/ shi ba ste srog dor ba yin la/ de lta bu'i sbrul rnyed par gyur pa na dper na nam mkha' lding lta bur spyod do/ /yang ci'i phyir de ltar yin zhe na/ zhum byas zhes pa la sogs pa gsungs te/ sems kyi dpangs mtho ba bor te zhum par byas pas lus dang sems kyis 'jug pa dman pa na le los bcom pa dang / brjed ngas pa na ltung ba bla ste/ rnyed sla zhing 'byung bar 'gyur ba nyid de ltung ba chung ngus kyang gzhom par bya ba yin pa'i phyir ro/ /ma zhum pa ni sems de skyes pas slar yang spro ba phun sum tshogs pa dang ldan par 'gyur ste/dpyod pa dang ldan pa ni dran pa dang shes bzhin dag gis nye ba'i nyon mongs pa la skabs ster bar mi byed do/ /chen po yis kyang thub par dka' ste rgyal bar mi 'gyur ro/ /de bas zhes pa la sogs pas brten pa'i stobs la brten pa'i mjug bsdu ba ston te/gang gi phyir de ltar yin pa de bas na sems ni brtan pa yin te/ nga rgyal gyi go cha bgos pas so/ /ltung ba nyid nyams par byed pa ste/ gzhom par bya'o/ /rnam pa thams cad du de'i rjes su 'jug pa bkag pas de'i rgyud drungs dbyung bar bya ste/gzhan du ltung ba'i dbang du gyur par phongs pas 'joms par 'gyur ro/ /khams gsum las rgyal bar rtsom pa la bzhad gad de/ khrel gad kyi gnas su 'gyur ro/ /de ji lta bur gyur pa yin zhe na/ bdag gis zhes pa la sogs pa gsungs te/ci'i phyir zhe na/ gang las rgyal ba nyid ni bcom ldan 'das te/ seng ge ni bdud kyi ri dgas thams cad dag gis gzhom par bya ba ma yin pa'i phyir ro/ /de rnams kyi sras bdag kyang ci ltar gzhan gyis pham pa zhes bya ba 'thob par byed/ de ltar yid la byas nas bdag gis nga rgyal 'di la gnas par bya ste/dper na seng ge'i phru gu mi 'jigs pa thob nas ri dgas gzhan thams cad kyis zil gyis mi non pa nyid kyis nags su spyod par byed pa de bzhin du bdag kyang brtan par gnas par bya'o zhes pa'i don to/ /gal te de ltar na de'i tshe gang yang dgra la sogs pa las rgyal ba'i nga rgyal can nga rgyal yod pa de rnams kyang bsngags par bya bar ci'i phyir mi 'gyur zhe na/grong ngam zhes pa la sogs pa gsungs te/ nga rgyal gyis bcom pa ni nga rgyal gyis zil gyis mnan pa ste/ nyon mongs pa'i sdug bsngal can de rnams kyang nga rgyal can du 'gyur ba ma yin pa nyid do//nga rgyal can dgra'i dbang mi 'gro /zhes pa ni 'di 'gro ba ma yin te/ dgra'i skye bo'i rjes su 'jug pa ma yin no zhes pa'i don to/ /gang dag rnams 'dod pa'i nga rgyal can de rnams nga rgyal dgra'i dbang du gyur pa yin te de'i dbang du byas nas 'jug pa yin no//'di nyid tshigs su bcad pa gnyis kyis bsgrub par 'dod nas/ nga rgyal gyis ni zhes pa la sogs pa gsungs pa/ nga rgyal bdun po rnams las gang yang rung ba'i nga rgyal gyis ngan song du khrid pa ni dmyal ba la sogs pa rnams su khrid pa'o//de rnams brgya la mi'i dngos po thob par gyur pa de'i tshe der yang rgyu mthun pa'i 'bras bu dga' ston bcom pa ni dga' ba med pa 'gyur ba yin te/ dman zhing zhan pa'i yid du 'gyur ro zhes pa'i don to/ /gzhan gyi kham za ba ni zas med pa'i phyir te/gzhan gyis byin pa'i slong mo'i zas za ba'o/ /bran ni gzhan dbang du gyur pa'i khol po'o/ /glen pa ni spyod pa thams cad kyis stong pa'o/ /mi sdug pa ni lus mi mdzes pa dang mi dga' ba skyed pa'o/ /nyam chung ba ni lus rjud pa dang stobs med pa'o/ /thams cad du thams cad la gnod pa ma byas kyang lus dang ngag gis brnyas pa thob par 'gyur ro//gang gis 'di ltar yin zhe na/ nga rgyal gyis khengs dka' thub can/ /zhes te nga rgyal gyis khengs pa ni zhum pa ma yin pa'o/ /dka' thub can ni nyon mongs pa ste/ de yang ni de ltar gyur pa yang gal te nga rgyal can gyi nang du gtogs na ji ltar dman pa ste bkren pa yin la snying rje'i gnas yin no zhes pa'i don to//slar yang gzhan ci lta bu zhig tu 'gyur smros zhes pa ni brjod cig ces rgol ba po la bod pa'o/ /gal te rnam pa de lta bu nga rgyal can du mi brjod na 'o na de dag ji lta bur gyur pa yin zhe na/gang zhig nga rgyal zhes pa la sogs pa gsungs [(]ste[,]te[)]/ gang zhig nga rgyal gyi dgra las rgyal bar te rgyal bar 'gyur ba de nyid nga rgyal can du brjod do/ /gang zhig ni byang chub sems dpa' ste/ bde ba yang yin la stobs dang ldan pa'ang yin zhing nga rgyal gyi dgra bcom ste bsal nas 'dod bzhin te ci bder 'dod par skye'o//'jig rten pa las ni lha dang bcas pa las so/ /rgyal ba'i 'bras bu sangs rgyas kyi gnas skabs gsal bar byed do/ /'di lta bu'i nga rgyal de dgra las rgyal ba de 'di lta bu bdag cag rnams la mthong ngo zhes pa'i don to//de nyid ni rnam par rgyal ba yin te rgyal ba thob pa dang / de nyid dpa' bo yin te gzi brjid dang ldan pa yin no/ /tshig gnyis po 'di ni ji ltar rigs par bya'o/ /de ltar nye ba'i nyon mongs pa rnams la nga rgyal bshad nas/ nus pa'i nga rgyal nyon mongs zhes pa la sogs pa gsungs te/ nyon mongs pa'i phyogs ni sde tshan yin la de'i khrod na gnas pa ni rnam pa stong 'gyur du bsran btsugs te shin tu yang brtan pa'i stobs la brten nas so/ /ci lta bur gyur pa zhe na/ nyon mongs tshogs kyis zhes te/ nyon mongs pa'i tshogs kyis tshugs par dka' ba ni mi tshugs pa ste/ ci ltar yang nga rgyal bar mi 'gyur bar ro zhes pa'i don to/ /ci lta bur gyur pa zhe na/ ri dgas tshogs kyis seng ge bzhin/ /zhes te ji ltar ri dgas kyi rgyal po seng ge ri dgas 'khrugs pa'i dbus na gzi brjid chen po can stobs dang ldan par gyur pas nags su gnas pa na ri dgas thams cad rnam par gnon la/de dag gis ni de la gnod pa ma yin pa de bzhin du byang chub sems dpa' la tshugs par dka' bar 'gyur bar ro/ /'di dang rgyu mtshan gzhan yang gzung bar bya'o zhe na/nyam nga che dang zhes pa la sogs pa gsungs te/ che dang ste shin tu phul du byung ba yang ngo / /nyam nga ba ste sdug bsngal yod kyang ngo / /ro ni mngar ba la sogs pa lce'i dbang po'i yul yin yang mig gis mi mthong ste mi rtogs la yul du mi byed do zhes pa'i don to/ / de'i yul gzugs yin pa'i phyir yul ro la 'jug pa ma yin no zhes dgongs pa yin no/ /de ltar brjod pa'i ro dang mig gi tshul gyis nyam nga byung gyur kyang / nyon mongs dbang du mi 'gyur bar ro/ /de ltar brjod pa'i rim pas bstan pa'i stobs bshad nas/ dga' ba'i stobs bstan pa'i phyir rtsed mo'i zhes pa la sogs pa gsungs te/las ni tshogs kyi rgyu mtshan bsam gtan dang klog pa la sogs pa'i mtshan nyid yin la/ gang gyur pa ni rim gyis byed pa la sbyor bas thob par gyur pa'o/ /las de nyid la zhen par bya ste/ bya ba de'i ro la zhugs pa'i sems kyis so/ /las de dga' bar bya ba ni de la shin tu 'jug par 'dod pa'o/ /mi ngoms pa ni yang nas yang du 'dod pa dang ldan pa'o/ /ci dang 'dra bar zhe na/ rtsed mo'i 'bras bu bde ba 'dod pa ltar te/ rgyan po la sogs pa rtsed mo'i 'bras bu gang yin pa'i bde ba de la 'dod pa bzhin du'o//rnam par dpyad pa 'dis kyang las la dga' ba bskyed par bya'o zhes bstan par bya ba'i phyir/ bde ba'i don du zhes pa la sogs pa gsungs te/ thams cad kyis kyang las kyi 'bras bu'i bde ba thob par 'dod pas byed de/gzhan du na de la 'jug par mi 'gyur te/ de ltar na yang 'di ltar sems rab tu zhugs pa yang las 'ga' zhig gis mngon par 'dod pa'i 'bras bur 'gyur zhing / 'ga' zhig gi yang 'bras bu med par 'gyur te/ 'bras bu med par rtsom pa yang srid pa'i phyir la/de ltar na yang skye bos las brtsams pa las yang 'bras bu srid pa'i phyir ldog par 'gyur ba ma yin pa nyid do/ /gang gis te yang las nyid bde bar gyur pa de'i phyis kyi bde ba gzhan 'dod pa des las mi byed de las dang bral na nam zhig bde bar 'gyur te/brgya lam na yang ma yin no zhes bya ba'i tha tshig go/ /'di ltar yang bsams nas las la mngon par zhen par bya'o zhes spu gri zhes pa la sogs pa gsungs te/ gzugs la sogs pa'i yul rnams kyis 'khor bar te/ 'khor ba na yang dang yang du myong bas mi ngoms te tshim pa ma yin no//ji lta bur gyur pas she na/ spu gri'i sor chags sbrang rtsi lta'i/ /zhes te/ spu gri'i so la sbrang rtsi ste gang sbrang rtsi'i ro gang gi tshe myang ba na ser sna'i dbang du gyur pas phyis lce chod pa'i sdug bsngal skye bar 'gyur ba des mtshon pa de lta bu ni dpe ste/ gang dag gis 'dra ba des so//re zhig tsam gyi bde ba yang yongs su gyur pa'i sdug bsngal gyis na sems can de rnams la sdug bsngal drag por 'gyur ro zhes dgongs pa'o/ /bdud rtsi dang 'dra ba'i bsod nams de rnams nyid kyis ji ltar ngoms par 'gyur/ khyad par ji lta bus she na/ rnam par smin pa bde ba ste mngon par mtho ba'i bde ba'i 'bras bu'i rgyu nyid kyis yongs su gyur pas bde ba'i ro yin pa'i phyir mchog tu bde bskyed par byed pa rnams kyis so/ /zhi ba ni dge bar byed pa dag yin te/ nges par legs pa skyed par byed pas skye shi med pa'i 'bras bu 'byin par byed pa'i phyir sdug bsngal thams cad zhi bar byed pas so zhes pa'i don to//de nyid kyi phyir bsod nams bdud rtsis zhes pa ni 'dir 'di gtan tshigs kyi tshig yin no/ /de ltas zhes pas mjug sdud pas las la mngon par dga' ba bstan par bya ba'i ched du gsungs pa yin te/las brtsams pa de mthar phyin na yang ste zin pa'i dus na yang 'jug par byed de/ de la mngon par zhen pa'i ro la zhugs pa nyid na gtong bar byed do/ ci lta bur zhe na/ ji ltar sos ka'i dus na nyi ma phyed du gyur pa'i tshe kun tu chu ma rnyed cing nyi ma shin tu tsha bas gdungs pa'i glang po che mchog tu mngon par zhen pa'i ro dang ldan pas shin tu yang sim par byed pa'i chu bsil bas yongs su gang ba'i mtsho bran dang phrad pa na dang po nyid du nub par byed pa de bzhin du'o zhes pa ni spyi'i don to//gang gis mtsho dang phrad pa de la de skad ces bya ste phyi nas las 'dzin pa yin no//dang por zhes pa dang mjug ces pa ni 'brel to/ /dga' ba'i stobs bshad nas/ da ni dor ba'i stobs ston par 'dod nas/ stobs zad ces pa la sogs pa gsungs te/ bsams pa'i las rdzogs par bya ba la bdag nyid nus pa zad par rig byas nas/nus pa med par gyur pa na slar yang bya'o zhes pa'i bsam pas dus re zhig tu spang zhing dor bar bya ste/ de srid du 'dir rnam par g.yeng bar 'gyur ba ni ma yin la/ gzhan du na de ltar gyur kyang de ma dor na mi 'dod pa dang phrad pa nyid du 'gyur ro/ /gang gi tshe brtsams pa'i las de legs par rdzogs par gyur pa de'i tshe'ang dor bar bya ste/gzhan du na zhen pas de la zhugs nas slar yang bya ba la rnam par g.yeng bar 'gyur ro/ /de lta bas na phyi phyir khyad par 'dod pas spang ste dor bar bya'o/ /'di ni gang sngar/ dang por 'byor pa brtag bya ste/ /zhes pa la sogs pa gsungs pa spyir bstan pa de'i dmigs kyis bsal ba bstan pa yin no//de ltar nang gi khyad par bstan pas stobs kyi tshogs de rnam pa thams cad du brjod nas/ dang po mdor bstan pas rtogs par byas kyang yang 'dun pa la sogs pa'i tshogs kyi nang du brjod pa'i 'bad pa bstan pa'i phyir/nyon mongs mtshon zhes pa la sogs pa gsungs te/ nyon mongs pa rnams kyi mtshon ni gnod pa byed pa yin la/ gzung ba ni bzlog pa ste/ ji ltar de dag gi mtshon gyis phog par mi 'gyur bar ro zhes pa'i don to/ / slar nyon mongs pa rnams ni mtshon gyis gdab par bya ste/ 'jebs par ni shin tu bsnun pas te ji ltar slar skabs rnyed par mi 'gyur bar ro/ /'dir dpe bstan pa ni g.yul ngor ral kha zhes pa ste dper na bslabs pa ste mtshon cha'i rigs pa la mkhas pa dang ldan pa'i dgra dang lhan cig tu shin tu brtson pas ral gri'i g.yul ngor de la rdeg par byed de/de ni ji ltar mi phog par gyur pa de ltar ro/ /de la zhes pa la sogs pas 'bad pa la bslab par bya ba gsungs te/ de la ni ral gri'i gcod pa la'o/ /dper na ral gri lag pa nas brgya la lhung bar gyur na dgras bdag la glags 'di rnyed par ma gyur cig ces pas myur du ste rings pa nyid du len cing 'dzin te dus la sdod pa ni ma yin no zhes pa'i tha tshig go//de bzhin du ni de dang 'dra bar te/ nyon mongs pa'i dgra las rnam par rgyal ba'i dbang du byas te ral gri bzhin du brjed ngas pa med par dran pa ma nyams par bzung bar byas shing mngon du bya'o//dmyal ba dag ni ngu 'bod la sogs pa yin la dran pa brjed par gyur pas na de'i sdug bsngal la brtan pa nyid du yid la bya'o/ /ci ste gang gis na de la btang snyoms su mi byed de nyon mongs pa phra ba kun tu spyod pas kyang nyams pa cung zad kyang med do zhe na/ji ltar khrag la zhes pa la sogs pa gsungs te/ nyes pa rdul tsam la yang skabs dbye bar mi bya la/ gzhan du na de tsam la yang sems la rjes su zhugs na de 'phel ba dgag par mi nus pa'i phyir ro/ /dper na lus kyi rma chung ngu la yang khrag dang lhan cig pa'i dug bzhin du rdul gyi tshad tsam gyis nyon mongs pa chung ngus 'joms pa bzlog pa la 'bad par bya'o//yang ji ltar 'bad pa la brten par bya bar nyungs mar zhes pa la sogs pa gsungs te/ dper na skyes bu 'ga' zhig la rgyal po gtum po'i bkas mar nag gis yongs su bkang ba'i snod bskur nas 'gred pa'i sar 'gror bcug pa na lag na ral gri thogs pa'i rgyal po'i mis mar nag thigs pa tsam gyis bo na yang da lta nyid du khyod kyi srog gcod par bya'o zhes smra bas lta zhing 'gro ba na 'dir gal te bdag nyams par gyur na de'i tshe nges par 'dis gsod par 'gyur zhes nas 'chi bas 'jigs te 'bad par 'gyur ba de bzhin du brtul zhugs can sdom pa 'dzin pas rang bzhin las nyams pas dmyal ba la sogs pa'i sdug bsngal gyis 'jigs nas de skabs mi dbye ba'i ched du 'bad par bya ste lhur byed pa dang ldan par bya'o// brjod zin pa mjug sdud pa/ de bas zhes pa la sogs pa gsungs te/ gang gi phyir de ltar yin pa de bas na pang du ste phang par 'ong ba yin la/ sbrul ni sbrul dug can yin te/ rings pa nyid du bdag la dug gis gzung bar ma gyur cig ces nas/ ldang ba de bzhin gnyid dang snyom 'ongs na ste gnyid dang rmugs pa 'ongs nas bzlog par bya ba ni de'i gnyen po mi rtag pa la sogs pa bsgoms pas phyir bcos par bya'o//yang de ltar 'bad pa dang ldan yang brgya la nyams par gyur na dbang po nyams pa'i tshul gyis nyams par gyur na de'i tshe phyir bcos pa byas nas 'bad par bya'o zhes bstan pa'i phyir/nyes pa byung ba zhes bya ba la sogs pa gsungs te/ dran pa nyams pa na re re ste so sor brgya la nyon mongs pa'i rjes su 'jug pa'i glags rnyed na/ phyir bcos pa'i bsam pas yid la gdung bar byas nas bsam par bya zhing kye ma shin tu dka' ste shes bzhin du glags rnyed pas rnam pa gang gis 'dir de phyir bcos par bya ste yang 'di phyis mi 'byung bar de ltar bstan par rtsom pa blangs nas gnas par bya ste/slar lhod par 'gyur bar mi bya'o zhes pa'i don to/ /de nyid kyi phyir rnam par dben pa 'dod pa rnams kyis dgag pa la yang snang ba phrad pa zhes pa la sogs pa gsungs te/mkhan po dang slob dpon nam de las gzhan pa tshangs par spyod pa rnams dang mang du thos pa dang / sde snod gsum rig pa 'gyod pa sel ba la mkhas pa rnams dang lhan cig tu phrad nas bsgrub par bya zhes 'dod cing smon par bya ste/de la brten pa nyid kyis gnas par bya'o zhes dgongs so/ /las thob pa la zhes pa ni de la gdams pa dang rjes su bstan pa'i mtshan nyid dang / ltung ba las ldang ba'i ched du des chad pa'i las byin pa bsgrub par 'dod par bya'o/ /rgyu 'dis de dag 'jug pa bsrung ba'i bsam pas so//'di nyid bstan pa'i phyir/ ji ltar zhes gsungs te/ thabs gang gis zhes pa'o/ /gnas skabs 'di dag la ni nyon mongs pa 'jug pa'i gnas skabs la'o/ /dran pa goms par 'gyur ba ni 'bad pa med pa nyid la brten nas bdag la brjed pa med par 'gyur ba'o zhes pa ni bsams pa 'dis so//'dir 'di ni bsdus pa'i don te/ dge ba'i bshes gnyen dang nye ba na de'i gdams ngag dang rjes su bstan pa dang / de'i spyod pa mthong bas kyang rtag tu dran pa dang shes bzhin gyis gnas pas nyon mongs pa 'jug pa'i skabs mi rnyed do//de'i phyir 'di la 'gal ba med pa nyid kyis spro ba 'phel bar bya'o zhes so/ /gang dge ba'i bshes gnyen rtag par yang srog gi phyir mi gtong ngo zhes gsungs pa dang / de bzhin du mkhan pos rjes su bstan pa dang / bla ma dang ni 'grogs pa las/ /'jigs pas skal ldan gus byed la//dran pa shin tu skye bar 'gyur/ /zhes so/ /'bad pa bstan nas/ da ni bdag nyid dbang du bya ba bstan par 'dod nas/ bag yod ces pa la sogs pa gsungs te/ bdag nyid kyi lus dang ngag dang yid kyi mtshan nyid las thams cad rgyas par de bzhin bya ste/spro ba goms par byas pas dbang du bya'o zhes pa'i don to/ /ji ltar las byung sngon rol nas/ /zhes pa ni rtsom pa las sngon rol te snga ma bzhin nyid du rtogs shing dbang du gyur pas de'i lam rtogs bzhin du las la 'jug par bya'o/ /brjod pa'i don dpe'i sgo nas gsal bar bya ba'i phyir/ji ltar zhes pa la sogs pa gsungs te/ shing bal ni ras bal la sogs pa las byung ba'o/ /ji ltar rlung 'gro ba dang 'ong bas dbang du byas te de la rag las pa de bzhin du de nyid spro ba'i dbang du gyur pas te brtson 'grus kyi dbang du gyur pas so/ /'di ltar goms pa'i dbang du gyur pas rdzu 'phrul yang ste/nam mkha' la 'gro ba la sogs pa thob par 'gyur ro/ /bdag dang gzhan du mnyam pa dang bdag dang gzhan du brje ba gnyis kar yang mkho ba bsam gtan gyi le'ur 'chad par 'gyur ro/ /byang chub sems dpa'i spyod pa la 'jug pa'i dka' 'grel shes rab 'byung gnas blo gros kyis byas pa las brtson 'grus kyi le'u ste bdun pa'o// //de ltar bzod pa'i rjes la brtson 'grus brjod nas/ de nas nags su gnas par bya/ /mnyam par gzhag la brtson bya zhing / /mi sdug la sogs bsgom par bya//zhes gsungs pa/ de ltar brtson 'grus bskyed nas ni/ /zhes pa la sogs pas rtogs par bya bar 'dod nas 'jug par byed de/ de ltar brjod pa'i gnyen po bstan pa la sogs pas mi mthun pa'i phyogs rtsad nas bton pas brtson 'grus spel bar byas nas lhun gyis grub par 'jug pas bstan par bya zhing ting nge 'dzin te/mnyam par gzhag pa la yid de sems rtse gcig tu gzhag par bya ste/ de la gzhag par bya zhing bsdad par bya'o zhes pa'i tha tshig go/ /ci'i phyir zhe na/ rnam par g.yeng ba'i zhes smos so/ /ni zhes pa ni gtan tshigs yin la gang gi phyir mi ste skyes bus ting nge 'dzin med par rnam par g.yeng ba'i sems te mnyam par ma bzhag pa nye bar spyod pas brtson 'grus dang ldan yang srin po lta bu'i nyon mongs pa rnams kyi mche ba'i phrag na ste/dbus na gnas la des kham du byas nas yod pa'o/ /de lta bas na de la re zhig ting nge 'dzin gyi mi mthun pa'i phyogs rnam par g.yeng ba spang bar 'dod nas gzhi 'cha' ba/lus dang sems ni zhes pa la sogs pa gsungs te/ lus dben pa ni skye bo dang 'grogs pa spangs pa yin la/ sems dben pa ni 'dod pa la sogs pa'i rnam par rtog pa spangs pa nyid de/ de ltar lus dang sems dag gi rnam par mi dben pa la zhen pa med pa nyid kyis rnam par g.yeng ba ste/ de dag gi gzengs bstod pa nyid la dmigs pa nyid kyis rab tu gnas pa zhes bya ba'i don to/ /mi 'byung ba ste mi skye ba'o/ /gang gi phyir de ltar yin pa de'i phyir dang por 'jig rten te/ rang gi gnyen dang bshes la sogs pa'i mtshan nyid spang bar bya ste dor bar bya'o/ /rnam par rtog pa ni sems rnam par g.yeng ba'i rgyu yin te/ yongs su dor zhing yongs su spang bar bya'o/ /de la 'jig rten mi spang ba'i rgyu re zhig dgag par 'dod nas/ rnyed dang zhes pa la sogs pa gsungs te/ bdag dang bdag gi ba'i 'dzin pas yongs su 'jug pa'i mngon par zhen pa ni chags pa ste/ de'i phyir 'jig rten mi spong la/ rnyed pa la sogs pa la sred pas kyang ngo / /sogs pa'i sgras ni bkur sti dang / snyan pa dang / tshigs su bcad pa la sogs pa yongs su bzung ste/de rnams la sred pas te rab tu 'dod pas so/ /ngang gi sgras ni 'jig rten mi spong zhes pas rnyed pa la sogs pa la'ang sdud do/ /gang gi phyir 'di'i rgyu mi spong ba de bas na'o/ /'di dag ste chags pa dang rnyed pa la sogs pa la'am/ 'jig rten na'ang spong ba na rgyu mtshan du gyur pa'o//'chad par 'gyur ba 'di ltar brtag par bya zhing bsam par bya'o/ /de nyid zhi gnas zhes pa la sogs pa gsungs pa la/ zhi gnas ni sems rtse gcig pa'i mtshan nyid kyi ting nge 'dzin yin la/ de dang rab tu ldan pa zhes pa ston to/ /'dir yang rab tu sbyar ro//yang na gtan tshigs kyi don la gsum pa yin te/ zhi gnas kyi rgyus lhag mthong dang ldan pa'am lhan cig pa'i don yin te/ zhi gnas dang lhan cig tu lhag mthong dang ldan pa'o zhes so/ /lhag mthong ni ji lta bur gyur pa'i de kho na nyid yongs su shes pa'i rang bzhin gyi shes rab yin la/de dang ldan pa ni zung du 'jug pas zhugs pa'i lam gyi sbyor bas nyon mongs pa 'joms shing spong bar byed de zhes shes par bya ste go bar byas nas so/ /nyon mongs pa las grol bar 'dod pas zhi gnas thog mar te dang por btsal bya ste nye bar bya zhing bskyed par bya'o zhes pa'i tha tshig go//de'i rjes la ni lhag mthong ste mnyam par gzhag pas ji lta bur gyur pa shes pa nyid du ste/ gang brjod pa/ mnyam gzhag yang dag ci bzhin du/ /shes par 'gyur zhes thub pas gsungs/ /phyi rol g.yo ba bzlog pa yis/ / sems ni zhi las g.yo mi 'gyur/ /de yang ni zhi gnas so/ /'jig rten ni 'jig rten yul du byas pa la'o/ /ltos pa med pa ni mngon par dga' ba spangs pa ste/ de nyid kyis 'grub ste gzhan gyis ma yin no zhes pa'i don to/ /mngon par dga' zhing ltos pa med pa nyid 'chad par 'gyur ba'i gzhung rgyas par bsten par 'dod nas/mi rtag ces pa la sogs pa gsungs te/ sems dang ldan pa su zhig rang nyid mi rtag pa ste bu la sogs pa mi rtag pa rnams la chags par 'gyur bar ji ltar rgyu gang gis te rgyu mtshan gang gis rigs shing rung bar 'gyur stong phrag ni skye ba du ma yin te/mthar thug pa med pa'i 'khor bar 'khor ba na brgya la zhig na yang sdug pa mthong ba ma yin no/ /gzhan yang dga' bar byed pas na sdug par brjod la/ de yang 'di na med do zhes so/ /ma mthong na ni zhes pa la sogs pa gsungs te/ gang gi tshe de re zhig de mthong ba de'i tshe dga' bar 'dir mi 'gyur te/yid mi bde ba de nyid kyis ting nge 'dzin la 'jog par mi 'gyur te mi gnas pa nyid du 'gyur la/ de la dmigs pa la nus pa med pa yin te/ sems rnam par 'khrug pa'i phyir ro zhes pa'i don to/ /'on te gal te yang sdug pa mthong ba 'dir 'gyur ba de ltar na mthong yang ngoms par mi 'gyur te slar yang lhag par sred pas gdungs par 'gyur la/de mthong bar 'dod pas sngar bzhin du ste/ ma mthong ba dang 'dra bar gdung bar 'gyur ro/ /gzhan yang don nyams pa thams cad kyi rgyu sdug pa dang phrad pa yin no zhes bstan pa'i phyir/yang dag gyur pa zhes pa la sogs pa gsungs te sdug pa dang phrad par 'dod pas yang dag par gyur pa ste ma nor ba'i yon tan dang skyon mi mthong ste mi shes so/ /zhen pa de nyid kyis skyo la 'jig rten nyams par 'gyur ro/ /de nyid dang phrad par 'dod pas sreg par 'gyur te mya ngan de yis te/yud tsam yang rgyun ma chad par gyur pas so/ /mya ngan des ni zhes pa ni yid gdung bar gyur pa de nyid kyis sreg par byed do/ /yongs su gdung bar byed do/ /sdug dang phrad par 'dod pa ni sdug pa dang phrad cing sbyor ba'o/ /de la 'dod pas te sred pa rgyur gyur pas slar yang / yang nas yang du lhag cing lhag par tshor bar byed pas so/ /de dang phrad pas ni don med pa'i rgyu nyid de zhes de la sems pa zhes pa la sogs pa 'dis kyang ston par byed de/ de la ni sdug pa yin la/ yang na phrad pa de la'o/ /sems kyis de'i yon tan la rtag tu sems pas so//ci ltar yang bdag sdug pa 'di dang phrad pa rgyun chad par ma gyur zhes pa'am/ de la sems zhugs pas so/ /don med pa nyid ni tshe'i 'du byed skad cig re re la zad par 'gyur ba ste/ dge ba'i las cung zad tsam la yang yang dag par sbyar ba ma yin no zhes dgongs la/gang gi don du tshe zad par byas pa ma yin no zhes so/ /de ltar na yang mdza' bshes brtan pa yin no zhe na/ rtag pa med pa'i zhes pa la sogs pa gsungs te/ nges par 'jig par 'gyur bas mi gnas pa'i phyir mi rtag pa'i mdza' bshes kyi rgyus chos 'jig pas te yongs su nyams par 'gyur ba yin la/rtag pa ni dus ring po'i gnas skabs su tshogs su gyur pa'i phyir dang / 'bras bu chen po nyams pa med pa'i phyir ro/ /de ltar gyur na yang 'ga' zhig dang 'grogs pa las nges par phan pa dang bde ba'i rgyu mtshan thob par gyur na de ci'i phyir rnam pa thams cad du 'gog par byed ce na/'dir byis pa zhes pa la sogs pa gsungs te/ de dang 'grogs pa las don med pa ma gtogs par 'dod pa mchog cung zad kyang thob par mi 'gyur te/ de ltar yang byis pa so so'i skye bo dang lhan cig skal ba mnyam par spyod pa ste/ spyod pa mtshungs pas ngan 'gror nges pa nyid du 'gro bar 'gyur te/de dang 'dra ba'i las spyad pa'i phyir dang / 'phags pa'i chos las phyi rol du gyur pa'i phyir la/ 'on te 'phags pa'i chos kyi rjes su zhugs pa ni de dang mi 'dra ba'i las byed par 'gyur ba de'i tshe skal ba mi mnyam pa ste mnyam por spyod pa'i byis pa mi 'dod de sdang bas na byis pa zhes pa dang 'brel to//'dir byed pa po la gsum pa yin te/ de ltar na 'jig rten gnyi ga la gnod pa'i phyir ro/ byis pa dang 'grogs pas ci zhig 'thob ste/ phan pa dang bde ba'i rgyu de/ lhag pa cung zad kyang med do zhes pa'i don to//rjes su mthun pa spyad kyang bdag gis bya bar mi nus so zhes skad cig ces pa la sogs pa gsungs te/ gang gi dgos pa cung zad la brten nas skad cig tsam gyis mdza' bar 'gyur te grogs su 'gyur ro/ /rgyu mtshan cung zad tsam la dmigs nas skad cig tsam nyid kyis de nyid dgra ste mi mthun par 'gyur te/log par sems pa'i phyir ro/ /de rnams la nges par rgyu mtshan yod pa yang ma yin no/ /gang zhig brgya la sems dga' ba'i gnas te dga' ba'i khyad par la bzlog pa'i dbang gis khro bar byed do/ /so so'i skye bo 'phags pa ma yin pa mgu bar dka' ba yin te/sdug bsngal dang bcas pas mgu bar nus pas so/ /byis pa'i chos gzhan yang spang ba'i don du phan pa zhes pa la sogs pa ston par mdzad do/ 'di ni bya ba yin la 'di ni bya ba ma yin no zhes brjod cing smras pa na khro bar 'gyur te zhe sdang bar 'gyur ro/ / yang phan pa dang mi phan pa brjod pa 'dzin par mi 'gyur te/ slar yang bdag phan pa las zlog par byed la/ khyod gcig pu ngal ba'i 'bras bu 'di nyams su blangs nas ci bya zhes bdag de la zhugs pa de la des zlog par byed do/ /gal te byis pa de rnams kyi tshig ma mnyan na zhes pa ni lhag ma'o//gal te de'i tshig la brnyas nas rang gi phan pa la 'jug par byas pa de'i tshe khro bar byed de/ bdag gis tshig las 'di ma log go zhes pas so/ /de la phan pa ma yin pa byed pa yin no zhes las des bskul bas ngan 'gror 'gro bar 'gyur ro/ /byis pa'i chos gzhan 'di la yang skyo bar bya'o zhes bstan pa'i phyir phrag dog ces pa la sogs pa gsungs te/bdag las khyad par mchog tu gyur pa'i rigs dang rig pa dang nor la sogs pa dang ldan pa la phrag dog ste/ gzhan gyi phun sum tshogs pa la mi bzod pa skye bar 'gyur ba'o/ /don gyis na de rnams dang bdag mnyam zhing mtshungs pa la 'gran pas rtsod do//bdag pas dman pa ste zhan pa la mngon pa'i nga rgyal te ngan mchog yin no zhes mngon pa'i nga rgyal ba'i phyir ro/ /bstod pas dregs pa ni bden pa dang bden pa ma yin pa'i yon tan brjod pa na bdag chen po yin no zhes sgro 'dogs pas dgod par byed do//mi snyan brjod pa ste bdag gi nyes pa bsgrags pa thos pa las te don gyis na mi snyan pa brjod pa las khong khro ba ste zhe sdang skye'o/ /de ltar na nam zhig ste dus 'ga' zhig na byis pa las phan par 'gyur ba nam yang ma yin no zhes pa'i don to//'dis kyang byis pa rnams yongs su spangs nas gnas par bya'o zhes bstan pa'i phyir/ byis las byis pa lan zhes pa la sogs pa gsungs te/ byis pa gcig la byis pa gzhan las 'di lta bu la sogs pa'i mi dge ba ste dge ba ma yin pa nges par skye bar 'gyur ro//ci lta bur zhe na/ bdag la bstod pas de thos pa dang shes pa la sogs pas mchog tu bsngags pa'o/ /thos pa la sogs pa sba ba'i don du gzhan la smod pa ste nyes pa sgrogs pa'o/ /'khor bar dga' ba ni mngon par dga' ba yin te/ de'i gtam ni de la bsngags pa ste/'dod pa'i yon tan rnams la yang dag par bstod pa'i phyir te/ 'di lta bu la sogs pa'i rnam pa de ltar ro/ /de ltar de dang zhes pa ni gzhan dang yin pa ste/ de dang 'brel pa de bzhin gnyis pa dang 'grogs pas so/ /mi dge ba cung zad du nges par gyur to//gang gis de ltar yin pa'i rgyu des na phung bar 'gyur ba ste mi dge ba 'byung bar 'gyur te/ byis pa 'di dang 'grogs pa la thob par 'gyur ro/ /de'i phyir 'phags pa'i chos la rjes su bslab pa'i don du gcig pu ste byis pa dang 'grogs pa dang bral bas gnyis pa med par rgyu bar bya'o//de dang bral bas bde ba ste bya ba 'di ni bya ba'i khyad par yin no/ /ci ltar zhe na/ des na yid ni sbyor bas zhes te/ de dang 'grogs pa spangs pa'i phyir te des byas pa'i nyon mongs pa dang bral ba'i phyir ro/ /snga ma la 'di ni gtan tshigs kyi tshig yin no/ / yang na bde ba ni lus kyi yin la/ nyon mongs med yid kyis zhes pa ni yid las byung ba yin no/ /de'i phyir byis pa'i skye bo dang 'grogs pas sdug bsngal ba spong bar 'dod pas de dang 'grogs par mi bya'o zhes bstan pa'i phyir byis las zhes pa la sogs pa gsungs te/ byis las te thams cad du shin tu thag ring sar byol bar bya ste 'bros par bya zhing ji ltar de dang brgya la yang phrad par mi 'gyur bar bya'o zhes pa'i don to/ /'on te brgya la ste dbang thang gis phrad pa de'i tshe phrad cing tshogs pa na bsten par bya ste dga' bas te/ dga' ba'i rnam pa'i nye bar spyod pas bsten par bya'o//sten pa na yang 'dris chen nyid du mi 'gyur bar te/ bsnyen bkur re ba'i bsam pas ma yin pa'o/ /yang na 'dris chen ni rjes su chags pa ma yin gyi 'on kyang chags sdang dang bral bas tha mal pa bzhin du ste/ dam pa'i spyod pa gzu bo lta bur ro/ /skye bo bzang po dang lhan cig spyod pa 'dis kyang bslab par bzhed nas/chos kyi don tsam zhes pa la sogs pa gsungs te/ chos kyi ched 'di ni chos don te/ de nyid 'ba' zhig tsam ni de tsam mo/ /de blangs nas ni bzung nas te snying po blang bar byas nas zhes pa'i don to/ /bung ba bzhin du ni sbrang rtsi byed bzhin du ste/me tog las sbrang rtsi len pa bzhin du'o/ /yang na chos nyid kyi don ni dgos pa ste/ 'di chos gos dang bsod snyoms la sogs pa yin no zhes tshig bsdu'o/ /byis pa dang 'grogs pa la rgyab kyis phyogs te/ sngon med bzhin du ste zla ba gsar pa dang 'dra bar gnas skabs kun tu'am yul kun tu gnas par bya'o//'dris pa med pa ni ngo shes pa med pa ste/ gnas par bya ni der re dang bral bar zhes pa'i don to/ /de ltar na sdug pa dang 'grogs pa'i rgyu chags pa bsal nas/ da ni rnyed pa la sogs pa la sred pa 'jig rten mi gtong ba'i rgyu spong bar bya'o zhes bstan par bya ba'i phyir/bdag ni rnyed pa mang zhes pa la sogs pa gsungs te/ 'di'i rnyed pa gang yin pa de la de skad ces bya ste/ chos gos dang bsod snyoms la sogs pa'i rnyed pa dang ldan pas bdag rnyed pa can dang bkur sti byas pa'ang yin te skye bos mchod pa yin no//bdag la dga' ba ni 'dod pa yin la mang po yang du ma yin te/ skye bo mang pos 'dod pa zhes pa'i don to zhes pa ni de ltar sems pa na 'di ltar sa steng ste mi yin la/ shi ba'i 'og tu 'jigs pa skye'o/ /ci lta bur gyur pa la zhe na/ma bsams par thob pa la glo bur du'o/ /de ltar na thams cad du nges par 'chi ba yid la byas pas 'jig rten pa'i skye bo la sems pa'i spyod pa yongs su bsam pas ci zhig bya ste dgos pa cung zad kyang med de blang bar bya ba ma yin no zhes pa'i tha tshig go//byis pa dang 'grogs pa sdug bsngal gyi rgyu nyid do zhes sems can rnyed pa med la zhes pa 'dis kyang ston te/ sems can rnyed pa med pa ste rnyed pa dang bral ba yin la/ bsod nams ma byas pa'i nyon mongs pa 'dis bsod snyoms la sogs pa shin tu nyon mongs pas mi rnyed do zhes 'phya bar byed do//rnyed pa can la yang mi snyan par brjod de/ yon bdag gam sbyin pa po rnams kyis dad pas mchod nas sbyin pa po dang yon bdag rnams tshul 'chos la sogs pas dad par byas nas chos gos la sogs pa'i rnyed pa thob pa yin te/ gzhan du na gzhan la yang de lta bu'i yon tan yod na cis na 'di nyid kyis thob la gzhan gyis ma yin zhes de la ma dad par byed cing tshig de ltar smra'o//de ltar gnyi ga la yang de rnams las sems zhi ba yod pa ma yin te/ de 'di ltar rang bzhin gyis sdug bsngal gyi rgyu yin pa'i phyir ro//yang na gang byis pa'i skye bo de rnams sdug bsngal bas gnas pa yin pa de la de skad ces bya'o/ /de dag gis ni de lta bur gyur pas te/ lhan cig tu 'grogs par gyur pas dga' ba ji ltar skye bar 'gyur te ma yin no zhes pa'i don to/ /byis pa snying grogs kyang brten pa ma yin par gang gi phyir byis pa zhes pa la sogs pa gsungs te/grogs po ni snying du sdug pa yin la/ de bzhin gshegs pas gsungs pas ni lung rnams su gsungs pa yin no/ /ci'i phyir zhe na/ gang gi phyir rang la dgos pa med par byis pa gang la yang dga' ba skye bar mi 'gyur te/de'i phyir de med pa las bzlog par 'gyur ro/ /des kyang byis pa dang 'grogs pa yin na yang brtan pa ma yin no/ /de la byams par byas pas kyang so so'i skye bo mgu bar mi nus so/ /de lta bas na de dang 'grogs pa las byung ba'i nyes pa spang ba'i ched du bde ba dang yid bde bas dben pa 'dod pas gnas par bya ste/bdag gis dgon pa la sogs pa bsten pa la gnas par bya'o zhes nas de'i phan yon bstan pa'i phyir/ shing rnams zhes pa la sogs pa gsungs te/ shing rnams smod par mi byed pa ni ljon shing rnams so/ /rab tu bsgrims nas zhes pa ni nags la sogs pa rnams su de dang rjes su mthun pa'i yang dag par spyod pas bsten mi dgos pa ni bstan par bya ba ma yin te/nags na 'grogs pa na bsams pa ngan pa dang bral ba'i phyir ro/ /de'i phyir bdag nam zhig shing rnams dang lhan cig tu 'grogs par 'gyur/ci lta bur gyur pa zhe na/ bde bar 'grogs pas te 'di ltar smon pa yin la bde ba'i rgyu yin pas bde ba yin no zhes sngar bzhin du'ang yang gcig pu rgyu bar bya ba la dga' bar bya bar phug gam zhes pa la sogs pa gsungs pa la/ lha gang ni skye bo'i tshogs dang bral ba yin te/ gnas bcas ni ci ltar 'dod par nub gcig gam gnyis ngal bso zhing gnas pa'o/ /ljon shing gi drung ni shing gi 'og yin la/ phug ni ri la sogs pa rnams su gsang ba'i yul yin te der yang ngo / /ltos pa med pa ni zhen pa med pa yin te/ 'gyur zhig gu ni smon pa'i gnas 'ga' yang med pas so//de nyid kyi phyir rgyab tu mi lta ba ni phyis ldog pa med pa'i phyir ro/ /yang gzhan gsungs pa/ sa phyogs zhes pa la sogs pa la/ 'gegs par byed pa gang gis kyang sngar bdag gir ma byas pa yangs shing rgya che ba yid bde bar byed pa rnams su ste/ rang bzhin gyis ni rang nyid kyis so//de lta bu rnams su bcos ma ma yin pas gnas par bya'o/ /nam zhig bdag ces pa ni smon pa ste/ 'dir gnas pa'i bde ba gang yin pa de bstan pa'i phyir/ rang dbang zhes pa la sogs pa gsungs te/ rang dbang du spyod pa ni gzhan dbang gis 'jug pa ma yin la gnas med pa ni gnas dang bral ba yin te gang la gnas pa la zhen pa dang bral bas gang la gnas med pa ste/gang la yang bdag gir byas pa med pa'i phyir ro/ /de lta bur gyur pa gang dang yang 'brel pa med pa yin te lhag ma ni go sla'o/ /yang 'di ltar 'dod pa chung bas smon par bya ba yin no zhes bstan pa'i phyir/sa'i lhung bzed tsam zhes pa la sogs pa gsungs la/ sa'i lhung bzed ni sa'i rang bzhin gyi slong snod do/ /de nyid 'ba' zhig ni de tsam yin la/ de lta bu'i bdog pa gang gi yin pa de la de skad ces bya'o//kun la mi mkho ba ni phyag dar khrod las gos byas pa'i phyir te yongs su longs spyad par bya ba ma yin pa dang / mkho ba ma yin pa zhes pa'i tha tshig go/ /de lta bu'i chos gos gang gi gos yin pa de la de skad ces bya'o/ /gnyis po 'di gzhan gyis 'phrog pa ma yin te/de nyid kyi phyir 'jigs pa med pa dang / lus gson pa la ltos pa med pa yin la/ de nyid lus 'di sba ba ma byas kyang zhes pas ston te/ phyi dang nang gi bdag nyid kyi yongs su bzung ba med pa'i phyir bsrung ba dang bral ba yin no/ /mi rtag pa 'di yang zhen pa 'dor ba'i rgyu yin pas thams cad du bsten par bya'o zhes tshigs su bcad pa gsum gyis gsungs pa ni/lus kyi gnyug ma'i sar song nas/ /zhes pa la sogs pa yin te/ lus kyi gnyug ma'i sa ni dur gyi sa ste/ lus kyis yun ring por gnas nas kyang de bzhin du mthar gtugs pa'i phyir ro//gzhan rus zhes pa ni sngar shi ba rnams kyi rus pa yin la rus pa ni rnag dang ldan pa'o/ /de'i chos can ni de'i rang bzhin la/ bdag gi lus ni 'di nyid kyang / /zhes pa la sogs pas de nyid mgo snyoms par ston par byed de/ 'di ltar zhes pa ni rus pa gzhan zhu ba dang rang gi lus po 'dra ba la brjod do//rus pa ste smad par 'gyur ba'o/ /ji lta bur gyur pa zhe na/ rang gi dri'i zhes pa la sogs pa gsungs te/ shin tu dri nga bas lce spyang zas de don du gnyer bas kyang bzod par dka' ba yin no/ /sdug pa dang 'grogs pa ni des kyang dgag par ston pa ni lus 'di gcig pu zhes pa la sogs pa gsungs pa la/lus 'di gcig pu byung ba ni gcig pa nyid du brtags pa'i lus yin la/ lhan cig skyes pa ni lus dang lhan cig skyes pa'i rus dum yin la/ so sor 'gyes par gyur pa ni bral bar 'gyur na zhes pa'i don to/mdza' ba dang gzhan lta ci zhig smos pa ni so sor ci'i phyir mi 'gyur zhes pa'i don te/ gang thams cad du bral ba nyid du 'gyur ro zhes pa'o/ /de ltar gyur na yang bu dang chung ma la sogs pa rtag tu bdag gi bde ba dang sdug bsngal gyi grogs su gyur pas de rnams la rjes su chags par bya bar 'os pa nyid do zhe na/skye bo gcig pu zhes pa la sogs pa gsungs te/ skye ba dang 'chi ba dag gi sdug bsngal gang gis kyang thun mong du byed par mi 'gyur te/ thams cad kyi bar skabs su rang gi las kyis bskyed pa'i bde ba dang sdug bsngal nyid myong bar 'gyur te/de'i phyir 'di mngon par zhen pa tsam nyid do/ /sdug bsngal gyi skal ba de gang gi phyir gzhan bdag las tha dad pa rjes su chags pa byas pa de la sdug bsngal ba de'i cha ste shas len par 'gyur/ de'i de yang de nyid kyis myong bar bya ba'i phyir/de'i phyir dge ba'i phyogs kyi gegs byed pa'i mdza' bas dgos pa cung zad kyang yod pa ma yin no/ /de kho na nyid du gang la la'i mdza' ba cung zad kyang gang gis kyang yod pa ma yin no zhes bstan pa'i phyir/ lam dag tu ni zhes pa la sogs pa gsungs te/ lam du zhugs pa ni phyogs 'ga' zhig tu 'gro bar rtsol ba yin la/ji ltar gzhan du 'gro ba dang lhan cig tu gnas gcig ste 'du khang la sogs pa'i gnas 'dzin par 'gyur ba de bzhin du 'khor bar yang las kyi dbang du gyur pas 'khor ba na skye ba ni rigs gcig pa dang snag gi gnyen mtshams la sogs pa rnams dang gnas gcig pa ste/skye ba'i gnas yongs su len to/ /slar yang de spangs nas 'ga' zhig tu gcig pu 'gro bar 'gyur te/ der su zhig kyang de dang lhan cig tu 'gro ba ma yin no/ /de'i phyir gang la la'i dngos por gyur pa'i grogs la la yang yod pa ma yin no//des na don med stong phrag bskyed pa'i rgyu rang nyid kyis brtags nas su zhig gis grogs su byed par 'gyur ro zhes pa'o/ /mdza' ba'i skyon de ltar brjod nas/ yang gcig pu nyid kyi yon tan 'di dag yin no zhes tshigs su bcad pa gsum gyis bstan pa'i phyir/'jig rten zhes pa la sogs pa gsungs te/ da ni gson pa'i mtha' mi 'dod kyang nges par 'chi bar 'gyur bas khyim na gnas pa'i stobs kyis dor bar bya ba yin pa de bas na de ltar rang nyid kyis gson pa nyid na dor bar rigs so/ /de nas zhes pa ni khyim nas so//mya ngan med par zhes pa ni kyi hud ces pa la sogs pa brjod pa'i tshig gis yongs su gdungs pa 'jig rten gyi gnyen la sogs pas ma byas pa de srid nyid du'o/ /de las dang po nyid du nags su 'gro bar bya'o/ /yang 'dir yon tan gyi khyad par ci lta bu yod ce na/ bshes med ces pa la sogs pa gsungs te/ rjes su chags pa dang 'khon pa dang bral ba'i phyir ro/ /shi na yang mya ngan byed pa med pa ni mya ngan gyis bskyed pa'i sdug bsngal brten par mi 'gyur ba'o/ /ci'i phyir zhe na/ 'jig rten na ni sngar nyid shi/ /gang gi tshe khyim nas byung ba de nyid kyi tshe rang gi bshes dang gnyen la sogs pa'i 'jig rten gyi yul na'o//yon tan gzhan 'di yang yod par drung na 'khod par zhes bya ba la sogs pa gsungs te/ drung na 'khod pa ni nye bar gnas pa'i gnyen dang rigs gcig pa la sogs pa rnams yin te/ nad pa de dang bral bas mya ngan te/mya ngan skyed pa dang gnod pa byed pa yang yod pa ma yin te/ bdag nyid kyi lus dang ngag dang yid la gdung bar byed pa ma yin no/ /yang na de rnams kyi mya ngan mthong bas 'chi ba po'i yid gdung bar byed pa ma yin no/ /'di'i zhes pa ni skye bo dang 'grogs pa dang bral ba'i ste/'chi ba'i dus na yon tan 'di 'ba' zhig ni ma yin no/ /'on kyang sangs rgyas rjes dran la sogs pa'ang yin la/ sogs pa'i sgras ni de kho na nyid yid la byed pa'am chos rjes su dran pa yang ngo / /de bas zhes pa la sogs pas ni mjug sdud par byed de/gcig pu ni chags pa med par rgyu bas so/ /nyams dga' ba ni bde ba skyed pa'i rgyu yin pa'i phyir la/ tshegs chung ba ni sdug bsngal gyi gnyen po yin pa'i phyir te/ bde ba skyed pa ni mngon par mtho ba dang nges par legs pa thob pa'i rgyu yin pa'i phyir la/ g.yeng ba thams cad zhi bar byed pa ni lus dang ngag dang yid kyis nyes par spyod pa'i rnam par g.yeng ba thams cad zhi bar byed pa yin te/ zlog par byed pa'i rgyu yin pa'i phyir ro/ /bdag gis rtag tu bsten par bya/ /zhes pa ni 'di nyid la mngon par zhen pas zhen pa med par bya zhes pa'i don to//de ltar skye bo dang 'grogs pa spangs pas lus rnam par dben pa bshad nas/ sems rnam par dben pa bshad pa'i phyir/ bsam pa gzhan ni zhes pa la sogs pa gsungs te/ bsam pa gzhan kun ni mi bden pa'i rnam par rtog pa'i rang bzhin te de rnams btang ba ni de dang bral ba'o//bdag gi sems ni rtse gcig gis zhes pa ni rtse gcig pa ni gtso bo yin te/ sems de yid la byed pa gang la yod pa de la de skad ces bya ste/ de lta bu'i sems gang la yod pa de ni de skad ces brjod pa'am/ sems rtse gcig pas gcig tu dbang du gyur par de'i rgyu ba la lta bar brtson pa'am/dmigs pa nges pa la 'brel ba'i yid gang gi yin pa zhes tshig sdud pa yin la/ de lta bur gyur pa'i yang dag par mnyam par gzhag pa la sems zhi bar gnas pas gzhag par bya ste/ de la brtson par 'gyur bar 'gro bar bya zhing de la rtse gcig pas sbyar bar bya'o zhes pa ni gdul bar bya ste yang dang yang du dmigs pa de nyid la sbyor ba'am phyi'i rnam par g.yeng ba dgag pa'i phyir de la sems mnyam par gzhag pa ni gnyen po yin pa'i phyir ro//'dod pa'i rnam par rtog pa dgag par 'dod nas/'jig rten zhes pa la sogs pa gsungs te/ srid pa la sbyor ba ma spangs pas 'dod par bya ba nyid kyis zhen pa'i phyir 'dod pa ni gzugs la sogs pa'i yul la brjod de/ ni'i sgra ni gang gi phyir gyi don yin la/ de bas 'dod la dga' mi bya/ /zhes pa dang 'brel to//de yang brten pa na phung khrol skyed pa yin te/ mi 'dod pa'i 'bras bu stob pa'i phyir ro/ /'jig rten 'di ni skye ba 'di nyid yin la/ pha rol ni 'jig rten pha rol te skye ba phyi ma zhes pa'i don to/ /de nyid 'dir bsad dang zhes pa la sogs pas ston te/gzhan gyi chung ma 'phrog pa la sogs pas 'jig rten 'dir 'chi ba la sogs pa'i khyad par mngon sum nyid du rtogs la 'jig rten pha rol du ni lung las so/ /de la gzhan 'dod pa'i 'dod chags rnams la 'dod pa'i chags pa ni shin tu yang dka' ba yin te/'di ltar bud med la ste reg pa'i chags pa'o/ /de'i phyir dang por de nyid la chags pa bzlog pa'i phyir smad par bzhed nas/ gang phyir zhes pa la sogs pa gsungs te/ gang gi phyir ni gang gzhan gyi chung ma la sogs pa'i ched du yin la/ pho nya dang pho nya mo la de'i don bsam pas skyes pa dang phrin skur bar byed pa rnams thal mo sbyar nas khyed kyi drin gyis bdag dang de ji ltar phrad par byed pa de bzhin du mdzod cig /de ltar na bdag khyed kyis gson par byas pa yin no zhes gsol ba 'debs pa sngon du song bas lag pa thal mo sbyar te lan du mar gsol ba 'debs so//de'i las kyi rnam par smin pa las 'jig rten pha rol du gnod pa'i mi dge ba'i las de la yang ma bltas pa dang / grags pa ma yin pa 'jig rten 'di la gnod par byed pa yin la sngon te snga ma nyid du de la gsol ba 'debs pa'i dus na ste/ de'i gson pa'i gnas skabs na zhes pa'i don to//'jigs pa la yang bdag zhugs shing / /zhes te de la zhugs pa na 'chi ba la sogs pa'i nyes dmigs kyis 'jigs pa yang de ltar byung ba la ma 'dzems pas bdag nyid ni rang gi lus bcug pa ste sbyar ba'o/ /rdzas kyang zad par byas pas te gos dang rgyan dang byug pa dang ga bur la sogs pa'i byug pa spyad pas rdzas kyang zad par byed do//gnyi gar yang gang gi don du zhes pa dang / sngon zhes pa dang yang 'brel to/ /gang la zhes pa ni rus pa zhes pa dang sbyar bar bya ste/ yongs su 'khyud pa ni brtan par 'khyud pa yin la/mchog tu dga' ba'i ro nyams su myong bar gyur pa yin te/ de nyid kyi rus pa ni shi ba de'i rus pa yin te/ dur khrod kyi sar lhung ba rnams yin la/ gzhan gyi dbang du gyur pa ni ma yin te/ bdag gi dbang du gyur pa yin zhing bdag ma yin pa ni yongs su ma bzung ba dag yin te/gzhan gang gis kyang bdag gir ma byas pa zhes pa'i don to/ /de'i phyir rab tu 'dod cing yongs su zhen nas te/ ci'i phyir ji ltar 'dod par 'khyud pa'i don du brtan par 'gro bar mi byed ces pa'o/ /dga' bar zhes pa ni sngar bzhin no//rang gi chung ma la zhen pa'i dbang du byas nas/ gang zhig dang po zhes pa la sogs pa gsungs te/ ngo tsha'i dbang du gyur pas chung ma'i bzhin 'og tu lta ba na ji ltar yang 'di'i byad bzhin gsal bar blta bar bya bar 'dod pas 'bad pas te 'dod pa can gyis zhes pas bskyed pa'i sems kyis 'degs pa na chung ma ngo tsha'i dbang du gyur pa de yang 'og tu lta bar byed de/ngo tshas nges par 'og tu lta'o/ /sngon ni sngar dur khrod du 'gro ba las snga mar yin la de lta na yang bya sla bas ma mthong ngo zhes mthong ngam ma mthong yang zhes gsungs pa la/ brgya la cung zad mthong ba na rnam pa thams cad du lta bar 'dod pa ci'i phyir ldog /seng ba'i ras kyis gdong g.yogs pa ste yul dbus na phal cher bcom brlag pa'i rigs rnams kyi rigs kyi chung ma bzhin dgab pa'i don du seng ras kyis g.yogs te/ gang gi byang des g.yogs shing bsgribs pa'i byad des da ni dur khrod kyi sa na bya rgod kyis bsal bar byas pas so//g.yogs ma thams cad dang bral bas rnam par bsal bar byas pa ji ltar 'dod par ci'i phyir lta zhing rtog par mi byed/ ci ltar gyur pas she na/ khyod nyon mongs pa'i gdong la mi bzod gyur pa bzhin du de'i gdong blta ba'i don du khyod kyis sngon yongs su ngal bar byas pa de la khyed rnams kyis bzod par mi nus pa bzhin du de la da ltar 'jigs pa mthong nas 'jigs par gyur pa na ci'i phyir 'byer bar byed cing 'bros par byed/'dod pa can la brgal zhing brtags pas bskyod pa gzhan 'di yang bstan pa'i phyir/ gzhan rnams mig gis zhes pa la sogs pa gsungs te/ su yang de la lta bar ma byed cig ces sngar gsungs nas yod pa de/ ji srid du da ni bya rgod la sogs pas za ba la thug pa ste/kye phrag dog can ci'i phyir srung bar mi byed de sbed par mi byed/ gzhan yang da ni shin tu yang bsrung bar 'os so zhes/ sha'i phung po zhes pa la sogs pa gsungs te/ bya rgod la sogs pa gang rnams kyi zas te/ kha zas sha'i phung po'i gzugs la khyod kyis me tog la sogs pa rnams kyis mchod par byed/bya rgod dang gzhan ce spyang la sogs pa rnams kyis sha'i phung po ste sha'i tshogs za ba 'jigs su rung ba mthong ba na ci'i phyir phrag dog can srung bar mi byed ces sbyar bar bya ba dang / da lta ci'i phyir 'byer bar mi byed ces pa bar du chod pa dang yang 'brel to//'di yang khyed rnams kyis ci'i phyir lta bar mi byed ces rus gong zhes pa la sogs pa gsungs te/ mi 'gul yang ste shing dang bong ba la sogs pa dang 'dra ba'i phyir ro/ /khyod skrag na zhes zur gyis 'dri bar byed de/ rus gong las te rus pa'i sgal tshigs las so/ /de ltar zhes pa ni 'di ltar 'jigs pa'i gzugs mthong ba las te bltas pa las so/ /yang na de ltar zhes pa ni skrag pa ste gang ring ba las kyang shin tu ring bar bros par byed ces pa dang sbyar ro/ /gang gi phyir de ltar g.yo ba las ci'i phyir 'jigs she na/ro langs bzhin du zhes gsungs te/ gson par gyur pa 'byung po'i gdon gyis bskyod par byas pa na bskyod pa las cis na 'jigs par mi 'gyur te/ de'i phyir shin tu 'jigs par rigs so zhes pa'i don to/ /re zhig de ltar smad par bya ba nyid du bstan nas/yang gzhan du bstan pa'i phyir/ zas ni gcig pu zhes pa la sogs pa gsungs te/ shes pa gti mug gis bsgribs pa 'ba' zhig dug gis myos par 'gyur ba'i sems 'dod pa can gyi de 'dod par bya ba nyid yin pas de bzhin sbrang rtsi'i btung ba bzhin du rigs nas de'i gdong 'ba' zhig gi mchil ma'i btung ba 'dod pa la brgal zhing rtag pa mtshungs pa yin te/gnyi ga'i yang rgyu gcig pu bza' ba dang btung ba'i rang bzhin las byung ba de la de dag gi nang nas khyed mi gtsang ba bshang ba la mi dga' zhing /kha chu bad kan gyi btung ba la ci'i phyir dga' ste rnam pa gang gis gzhan du ma yin par der dga' bar 'gyur te/ gnyi ga la yang rigs so zhes dgongs so/ /'on te de ltar na gal te yang gnyi ga la yang rgyu tha dad pa ma yin pa de ltar na yang de la shin tu dri mi zhim pas phyir phyogs shing gzhan la ni de med pas dga' ba yin no zhe na/'di de ltar na yang legs par brjod pa ma yin no zhes bstan pa'i phyir/ shing bal zhes pa la sogs pa gsungs te/ ras la sogs pa'i bal gyis yongs su bkang ba'i nang tshangs can la sogs pa'i sngas reg na 'jam pa la 'dod cing dga' bar mi byed de sdug par mi byed par mi gtsang ba las byung ba'i dri nga ba 'dzag pa ma yin no zhes byas nas mi gtsang bas yongs su gang ba'i bud med kyi lus po nyid la ci'i phyir dga' bar byed/de ltar na'ang ci'i phyir 'dod ldan te 'dod pa'i bde ba 'dod pas gang las mi gtsang ba la rmongs te/'di ni gtan tshigs kyi tshig yin la/ mi gtsang ba ste yul mi gtsang ba'am mi gtsang bas rmongs pa'o/ /mi gtsang ba la ste/ gtsang ba las bzlog pa de nyid las shin tu yang mngon par dga' bar nyams su myong bar 'gyur/ de lta bas na gal te rang mi gtsang ba nyid bud med kyi lus mi gtsang ba nyid dang thun mong ba de ltar na yang de gcig ni bsgribs pa yin la/ gzhan ni ma g.yogs pa yin te/ de'i phyir gcig yongs su spangs pas 'di la chags par byed do zhe na/ gang la g.yogs na zhes pa la sogs pa gsungs te/mi gtsang ba'i rang bzhin g.yogs pa gang la ci mthong na yang 'di lta bu mngon par zhen pa ste ma g.yogs par mthong bar gyur na shin tu 'dod pa skye bar rigs te/ de lta bur gyur pa la ci'i phyir 'dod par mi byed/ 'on te de lta bur gyur pa la rnam pa thams cad du cung zad kyang dgos pa med pas phyir phyogs pa nyid yin no zhe na/gang de ltar na ci'i phyir na rgyu ci g.yogs pa bye brag tu tshol te/ de gzhan spangs nas de nyid dang phrad pa la 'bad par byed/ gzhan yang khyod la 'di 'dri bar bya ste/ ci khyod mi gtsang ba la chags pa dang bral ba'am ma yin zhes so//'di rnam par rtog pa dang po'i dbang du byas te/ gal te mi gtsang zhes pa la sogs pa gsungs te/ gal te khyod mi gtsang ba la ma chags shing rnam pa thams cad du zhen pa med na 'o na ci'i phyir gzhan tha dad pa pang du 'khyud/'di ci lta bu zhe na/ sha'i 'dam zhes gsungs te/ sha nyid 'dam dang 'dra ste zhal zhal du chos mthun pa'i phyir la/ des zhal zhal byas pa ni nye bar bskus pa'o/ /ci'i phyir de ltar gyur pa yin zhe na/ rus gzeb rgyus pas sbrel ba la/ /zhes gsungs te/ rgyus pas sbrel ba ni bcings shing dbang du byas pa yin la/rus gzeb ni rus pa mtha' dag yin te/ gzhan du na dum bur 'thor bar 'gyur ro/ /de ltar 'dod chags dang bral ba'i yul du ston par byed do/ /'on te mi gtsang ba la chags pa yin no zhes rnam par rtog pa gnyis pa khas len na/de la khyod nyid ces pa la sogs pa gsungs so/ /yang na gzhan du sbyar bar bya ste/ gang brjod pa pags pa la sogs pa gzhan gyis g.yogs pa la chags par gyur na ma g.yogs pa de la yang gal te zhes pa la sogs pa gsungs te/ gal te pags pa la sogs pas g.yogs pa'i phyir rgyu des khyod mi gtsang ba la chags par gyur na de'i tshe ci'i phyir gzhan te gzhan gyi rus pa la 'khyud par byed/gzhan ni sngar bzhin du'o/ /'di la yang ci'i phyir mi rigs zhes/ khyod nyid ces pa la sogs pa gsungs te/ rang nyid de bdag nyid mi gtsang ba shin tu mang ba ni mchil ma dang snabs dang glad rgyas dang gci ba dang bshang ba rnams khyed la yod pa yin la/mi gtsang ba de nyid kyis dga' bar gyis shig /de'i phyir mi gtsang ba'i rkyal pa ste bshang ba 'byung ba yin la/ gzhan ni tha dad pa bud med kyi lus kyi rang bzhin mi gtsang zhing btsog pa'i bshang ba za ba'i ngang tshul can yin la/rnam dran byed ni yid la bsam par byed pa'o/ /bdag gi sha 'di la zhes pa la sogs pas yang spang ba'i ched du gzhan gsungs pa yin la/ gang gi sha la dga' ba 'di ni sha la dga' ba ste/ bdag yin la 'di ni rus gong gi'o/ /yang na sha la dga' ba ni sha la dga' ba yin la sngar bzhin du bdag ni 'di la'o zhes te bdag 'di'i sha la dga' ba yin no zhes pa'i tha tshig go/ /de ltar na de la zhen pa'i phyir ram slar phan 'dogs pa'i blos reg dang lta bar 'dod pa ste/ mthong ba dang reg pa la dga' ba'o/ /'dir gsungs pa sems med pa ni sems kyis stong pa yin te 'jim gong bzhin du rang bzhin gyis tha mal pa'o/ /yang sems dang ldan pas sems so zhes ji ltar gzhan gyis brjod pa de ltar sha la khyod ni zhes pa ltar rang bzhin ma yin pa ni ma yin no//'dod pa can khyod de cis mi 'dod/ de 'dod pa na 'jim pa'i dum bu la yang 'gyur la de bzhin du yang khyod kyang sems dang bral bar 'gyur ro/ /de la sems kyi rang bzhin gyi sems yod pa de la des 'dod pa yin no zhes pa ni/ gal te sems ni zhes pa la sogs pa gsungs te/gal te sems de sems kyi rang bzhin 'dod na de gzugs med pa'i phyir blta bar mi nus la/ lus med pa'i phyir reg par mi nus te/ gang sha dang rus pa'i rang bzhin gyi lus reg pa dang blta bar nus shing grub pa la de dang ldan pa'i shes pa med pa yin te/ sems dang bral ba'i phyir ro//de'i phyir ci zhig ces te/ sems med pa de la 'khyud par byed cing sbyor bar byed/ rmongs pa zhes pa ni 'bras bu med pa nyid du 'khyud par rigs pa ma yin no zhes pa'i tha tshig ste/ gzhan du na bong ba la sogs pa la yang 'khyud par thal lo/ /gzhan yang 'di yang shin tu smad pa yin no zhes bstan pa'i phyir mi gtsang zhes pa la sogs pa gsungs te/gzhan gyi lus la mi gtsang ba'i rang bzhin du gang mi rtogs pa de la ngo mtshar cung zad kyang med par rigs pa nyid de/ gzhan gyi rgyud kyi rigs pa de bdag nyid la bskal pa yin pa'i phyir ro/ /'di ni shin tu yang ngo mtshar ba'i gnas yin te/rang ste bdag nyid la mi gtsang ba'i rang bzhin gang yin pa'i lus khyod kyis rtogs par ma gyur te ma go ba'o/ /da ni bstan bcos mdzad pa de la skyo bar mdzad pa/ sprin bral zhes pa la sogs pa gsungs te/ sprin bral nyi zer gyis bye ba ni gsal bar byas pa ste de lta bu'i pad+ma gzhon nu ste mngon par gsar ba'i mtsho skyes bor nas mi gtsang zhen pa'i sems kyis mi gtsang ba'i gzeb la su zhig dga' ste rigs pa ma yin no zhes pa'i tha tshig go//gzhan yang zhes pa la sogs pa gsungs pa la/ sogs pa'i sgras ni gos pa la sogs pa yin la/ mi gtsang gis gos pa'i phyir gal te reg par mi 'dod na/ gang las te lus las yin la de byung ba ni mi gtsang ba 'thon pa ste lus de la ci ltar khyod reg par 'dod/ de ltar gyur na yang bdag la brgal zhing brtag pa 'di rigs pa'i ngo bo ma yin te/gang gi phyir mi gtsang ba gcig la yang mngon par zhen pa med do zhes gal te zhes pa la sogs pa gsungs pa la/ mi gtsang ba'i zhing ni ma'i mngal yin te mi gtsang ba du ma'i gnas yin pa'i phyir ro/ /der byung ba ste der skyes pa'o/ /de'i sa bon ni mi gtsang ba de nyid de pha dang ma'i khu ba dang khrag gi rang bzhin gang gi sa bon yin pa de la de skad ces brjod do//des bskyed pa zhes pa ni mas 'thungs pa dang zos pa skyugs pa dang 'dra ba'i mi gtsang ba'i ro des 'phel bar byas pa ste/ mngal na gnas pa bskyed pa'o/ /phyir byung ba na yang rang gis zas zos pa dang 'thungs pa'i yongs su smin pa'i mi gtsang ba'i ros kyang bskyed/gzhan khyod ci'i phyir pang du 'khyud ces pa dang 'brel te gzhan gyi bud med kyi lus so/ /de ltar na khyed la brgal zhing brtag pa yod do/ /'on te bdag mi gtsang ba la chags pa med do zhes pa'i phyogs khas len na de'i tshe yang brgal zhing brtag pa mtshungs pa nyid do zhes mi gtsang las byung zhes pa la sogs pa gsungs te/bshang ba la sogs pa mi gtsang ba'i rdzas las byung ba'i srog chags kyi rigs srin bu yang mi 'dod de zhen par mi byed par yang ma'i lus kyi tshogs mi gtsang ba shin tu mang ba'i rang bzhin mi gtsang ba las byung ba la yang sngar gyi rim pa bzhin du 'dod par byed/'on te 'di ltar yang 'gyur te 'dir lan ci zhig 'debs par byed/ gang gi phyir bdag kyang de'i lus de lta bu yin la/ des na mi gtsang ba mi gtsang ba dang phrad pa la nyes pa ci yod de gnod sbyin ji lta bar gtor ma la de bzhin no zhe na/ 'dir khyod ni zhes pa la sogs pa gsungs te/ 'dir ni rmongs pa chen po'i mthus bdag nyid la yod pa'i mi gtsang ba'i rang bzhin gang la re zhig smad par mi byed cing / slar yang gzhan gyi mi gtsang ba'i rkyal pa la 'dod par byed de/ 'di ni don dang bral ba shin tu smad pa'i gnas yin no/ /mi gtsang rkyal pa zhes spyo ba'i tshig gis de nyid la 'bod pa yin no/ /da ni mi gtsang ba'i rang bzhin mngon sum du byas par bstan pa'i phyir/ ga bur zhes pa la sogs pa gsungs te/gtsang zhing gtsang sbra'i dngos po 'di lta bu gang phyogs gcig dang phrad pa las byung ba'i mi gtsang ba'i rang bzhin du gyur pa'i dngos po de re zhig gzhag ste de dang phrad pa las gzhi gtsang ba'i rang bzhin yang mi gtsang ba nyid du 'gyur ro/ /de ltar re zhig tha snyad 'di mngon sum gyis grub pa de lta na yang gal te mi rtog cing yid mi ches na ste mthong yang dad par ma gyur na zhes pa'i don to//de'i tshe dur khrod du so sor gnas pa na blta bar gyis shig /ji lta bur gyur pa la zhe na/ 'jigs pa ste/ rnam par zos pa dang / rnam par myags pa dang /rnam par rnags pa la sogs pa'i rang bzhin gyis 'jigs su rung ba'am 'jigs par byed pa'o/ /gzhan yang zhes pa ni 'di bas lhag pa'o/ /gzhan yang rang bzhin gyis mi sdug pa thams cad du sbyar te lus po 'di nyid mi dga' ba'i gnas su sbyar ro zhes bstan par 'dod nas/gang zhig pags pa'i kha phye zhes pa la sogs pa gsungs te/ kha phye ba ni rnam par bral ba ste/ gang las zhes pa ni lus las so/ /de'i tshe 'jigs pa chen po skye bar 'gyur ro/ /ji lta bur gyur pa zhe na/ 'di lta bur gyur pa'i rang bzhin shes kyang ji ltar de nyid kyi gnas la 'jigs pa'i gnas su nam zhig na yang ma rtogs par phyir zhing dga' zhing mngon par zhen pa skye bar 'gyur te/de ltar gyur na yang mi gtsang ba'i rang bzhin gyi lus su gal te mngon sum du gyur pa de lta na yang / tsan+dan la sogs pa dang shug pas lus po la bskus pas 'di 'dod par bya ba nyid du 'gyur ro zhe na/lus la bskus pa zhes pa la sogs pa gsungs te/ lus la bskus pa yang tsan+dan la sogs pa las byung ba'i dri 'dis gang la bsgos pa'i lus la 'dod par bya ba'i blo skye bar 'gyur te/ tsan+dan 'ba' zhig las yin la/gzhan min na zhes pa ni lus kyi ma yin pa'o/ /de'i phyir gzhan gyi dri tsan+dan la sogs pa las byung bas 'dir dri zhim par mi 'gyur ba gzhan dag la ci'i phyir mngon par dga' bar byed/ gzhan yang tsan+dan la sogs pa'i legs par sbyar bas kyang bdag nyid la gnod pa 'ba' zhig tu 'gyur te/phan pa'i ched du ni ma yin no zhes bstan pa'i phyir/ gal te rang bzhin zhes pa la sogs pa gsungs te/ rang bzhin gyis dri nga ba ni lhan cig skyes pa'i rul ba'i rang bzhin gyi phyir ro/ /'dir zhes pa ni lus la'o/ /gal te 'dod chags ma skyes na de'i tshe legs min nam ste legs pa nyid du 'gyur ro//'di lta bu'i yon tan yod bzhin du don med pa la sred pa'i 'jig rten rgyu cis lus de la dris skud par byed de rnam pa thams cad du de rigs pa ma yin no zhes pa'i don to/ /stong phrag du mas mngon par 'du byas kyang rang bzhin gzhan du 'gyur ba ma yin no zhes 'on te dri zhim zhes pa la sogs pa gsungs te/lus po rang bzhin gyis dri nga ba las ci zhig byung ste ci lta bur gyur pa cung zad kyang byung ba ma yin no/ /dri zhim tsan+dan na zhes pa ni gang la mdzes pa'i dri yod pa zhes 'bru mang po pa ste de lta na yang de'i rang bzhin la nyams pa med do zhes pa'i tha tshig go//'on te de'i dbang gis de la 'dod par bya ba nyid du bzung nas mngon par 'dod pa skye ba'o zhe na/ gzhan gyi dri yis zhes pa la sogs pa gsungs te/ 'di ltar yang mkhas pa ma yin no zhes pa'i don to/ /skra la sogs pa mngon par 'du byas pa'i sgo nas kyang lus 'di don med pa'i rgyu yin no zhes tshigs su bcad pa gnyis kyis bstan pa'i phyir/gal te 'di skra sen zhes pa la sogs pa gsungs te/ ring ba na lhan cig skyes pa ma bcad pa zhes pa'i don to/ /so skye ba ni dri nga ba dang bcas pas te so shing dang sog le la sogs pas 'dus ma byas pas so//'dam gyi dris bsgos ni dri ma nyid 'dam ste rdzab yin la des bsgos pa de la de skad ces bya ste/ khrus dang byug pa la sogs pa dang bral bas so/ /gcer bu zhes bya ba ni gos dang bral ba'i phyir ro/ /ji ltar skyes bu bzhin du ste ji ltar gyur pas gnas pa'o//gal te lus rang bzhin gyis 'jigs pa yin na yi dags bzhin du rang bzhin gyis 'jigs par byed pa la 'bad pas te skra dang sen mo la sogs pa bcom pa'i khyad par dang / so shing dang so rtsi dang khrus dang byug pa la sogs pa rnams kyis 'di lta bur gyur pa de ci'i phyir byi dor byed/ji lta bur zhe na/ rang la gnod pas mtshon bzhin te bdag nyid la gnod pa'i don du ral gri la sogs pas ji ltar 'dus byas pa de ltar ro/ /'di lta bu rnams rmongs pa'i dbang du gyur pa'i spyod pa la mya ngan mdzad pa/ bdag la rmongs zhes pa la sogs pa gsungs te/'bad pa dang ldan pa'i smyon pa sems rang bzhin du mi gnas pas bdag nyid kyis bsams nas bdag nyid la rmongs pa bskyed cing yang 'di ltar phyin ci log gi lam nyams su blangs pas nyon mongs pa 'di rnams sems rang bzhin du mi gnas so zhes bstan bcos mdzad pas mya ngan mdzad pa'o//'di na bdag nyid shes pa 'ga' yang yod pa ma yin te/ smyon pas 'khrugs pa ste sa yongs su gang ba yin no/ /dris pa la zhar la byung bas lan btab nas skabs su bab pa/ rus gong zhes pa la sogs pa gsungs pa la/ro rnams kyi rus gong 'ga' zhig ste so so na gnas pa'o/ /'di skad brjod par 'gyur te/ gang las pags pa phral byas ni/ /zhes pa la sogs pa gsungs nas/ gang shes kyang ji ltar zhes pa la sogs pa gsungs pa der gzhan gyi len yin no/ /gang gis de bzhin du 'di la yang chags par mi 'gyur ba dur khrod kyi lus dang 'dra ba yod pa ma yin te/dur khrod du de mi gtsang ba'i gnas yin la 'dir ni ma yin no zhes so/ /'dir brjod par bya ba ni rus gong zhes pa la sogs pa yin no/ /grong gi dur khrod ces pa la 'dir khyad par cung zad kyang yod pa ma yin te/dur khrod du btsog pa'i gnas ni lus po de nyid yin la/ grong du yang yin te mngon par dga' ba'i gnas gang yin zhes zur gyis 'dri ba'o/ /'di la mkhas pa'i blo can gyis mnyam par rigs so zhes bsams pa'o//g.yo ba'i rus gong gis khyab pa zhes pa 'dis de nyid ston pa yin no/ /'di tsam khyad par yin gyi khyad par 'dis mi gtsang ba'i rang bzhin gyis mi gtsang ba'i rgyu las bzlog pa ni ma yin te/ gang gis ni 'jug pa'i yan lag gi rang bzhin du 'gyur/ khyab pa ni yongs su 'khrugs pa'o//'di lta bu'i mi gtsang ba'i rang bzhin yang phag la sogs pa rnams la bzhin du mngon par dga' ba'i gnas su gyur na yang de lta na yang rnam pa de lta bu de nor dang bral bas rnyed par sla ba ma yin no zhes bstan pa'i phyir/ de ltar zhes pa la sogs pa gsungs te/ rin med par de nor dang bral bas rnyed cing thob par mi 'gyur la/de'i phyir de don du gnyer bas dang po kho nar nor nyid bsags par bya ste/ de sogs pa la ngal ba'i sgo nas so nam dang tshong dang bsnyen pa la sogs pa la yang dag par brten pas yongs su ngal ba las 'di nyid du chos ma yin pas kyang tshol ba'i phyir dmyal ba la sogs pa rnams su sdug bsngal skyed par byed do//de ltar de tshol ba ni 'jig rten gnyi gar don med pa'i rgyu nyid yin no/ /bsags pa des bde ba 'thob pa yang ma yin te/ sdug bsngal nyid 'ba' zhig yin no zhes bstan pa'i phyir/ byis pa zhes pa la sogs pa gsungs te/byis pa'i gnas skabs na gnas pa la nor spel ba'i nus pa med de/ byis pa nyid kyis nor gang gis sam rnam pa gang gis byis pa 'di dar la bab pa ste lang tsho la bab pa'i gnas skabs na'o/ /bde bar 'gyur te nor dang bral bas cung zad kyang ma yin no zhes pa'i don to/ /gang yang pha dang mes po la sogs pas bsags pa'i nor gyis lang tsho la bab pa na bde ba nyid thob pa de lta na yang thams cad la so sor nges pa nyid ni ma yin no//'dir sngar brjod pa'i sdug bsngal gnyis las grol bar yang ma yin no/ /dang por nor sog pa nye bar mkho ba nyid yin te/ bde ba sgrub pa'i thabs yin pa'i phyir de bsags pa nyid na yang lang tsho las nyams pa las 'ga' zhig la yang mkho ba'i yul ma yin no/ /'on te de ltar gyur na yang de sogs pa na 'dod pa'i bde ba myong bar byed do zhe na/ 'dod ldan zhes pa la sogs pa smos te/ 'ga' zhig dman pa'i 'dod pa la g.yengs pa'i sems kyis shing dang rtswa dang lo ma la sogs pa len pa bran gyi las byed pa'i nyi ma'i mthas gtugs par las khur gyis lus sems dub ste spro ba med la/nyi ma nub pa na rang gi khyim du 'ongs nas ro dang 'dra bar gnyid log pas nyal bar gyur pa'o/ /yang tho rangs langs nas dman pa'i las de nyid la sbyor ro//gyur zhes pa'i sgra ni tshig gi rgyan yin te/ 'das pa'i don yul yin pa'i phyir ro/ /'dod pa can 'ga' zhig de ltar tshe 'dus byas pas skyel bar byed kyi 'dod pa'i bde ba'i ro ni myang ba ma yin no/ /gzhan bstan pa'i dbang du byas te/ tshar gcod ces pa la sogs pa gsungs te/kha cig ni sngar gyi rnams las gzhan ngan pa la chags pa can yin te bsten pa po zhes pa'i don to/ /tshar gcod bgrod pa la sogs pa rnams kyis gzhan gyi dpung las rgyal ba'i don du bgrod pa ste 'gro ba'am/ gzhan gyi yul gyi nor blangs pa'i don du 'gro ba'o//de la sogs pas gang dag mgron du btang ba la sogs pa rnams mthar gyis yul gzhan du bgrod pas nyon mongs pas yongs su ngal ba yin la/ des sdug bsngal gyis yongs su gdung ba can yin no/ /rnam pa thams cad du de ltar gyur pas khyud kor las kyang ste du mar zad par gyur kyang bu dang chung ma mi mthong ste spyod yul du ma gyur to//'dod bzhin du zhes pa ni des bu dang chung ma la sogs pa rnams don du gnyer bas/ de la 'dod pa rnams yin la ste de'i don nyid du gzhan bsten pa la sogs pa khas blangs pa'o zhes pa'i don to/ /kye ma 'di rnams 'bras bu med par nyams su len pa yin no zhes shin tu mya ngan mdzad par bdag ni zhes pa la sogs pa gsungs te/bdag nyid 'dod pas bslus pas gang gi don te bde ba thob pa'i rgyu mtshan du btsongs shing gzhan gyi bran byas nas/ de ma thob pa ni bde ba de ma thob pa yin la/ tshe'i 'du byed pa nyid kho na don med par gzhan gyi las nyams su len par zad par byas pa ste/legs pa'i las 'ga' zhig la ni sbyar ba ma yin no zhes pa'i don to/ bde ba thob par 'dod pas zhugs pa rnams slar sdug bsngal de nyid la 'di rnams lhung ngo zhes bstan pa'i phyir/ la la zhes pa la sogs pa gsungs te/gang gi bde bar spyad par 'dod pas gzhan rnams la btsongs te gzhan gyi dbang du byas pa yin te/ rang gi lus gang yin pa de la de skad ces bya ste/ de ltar gzhan de rnams kyis yin no zhes pa'i don to/ /de nyid kyi phyir rtag tu skul bar byed pa'i ngang tshul can dag bdag po gzhan pha rol po'i dgos pa la 'gro ba na bud med rnams lam nyid du bu byung bar 'gyur ro//shing drung dgon sogs bab bab ces pa la/ sogs pa'i sgras ni ri'i phrag gam chu klung gi 'gram la sogs pa dka' ba'i gnas rnams su'o/ /de rnams la gzhan phyin ci log 'di yang yod pa ma yin no zhes bstan par 'dod nas/'dod pas zhes pa la sogs pa gsungs te/ rang gi dngos po btsongs nas mche ba bzhi 'khrigs pa'i yul du 'jug go/ /ji lta bur gyur pa cig ce na/ srog stor dogs bzhin pas te/ der zhugs pas na gson par 'gyur ram mi 'gyur zhes/ stor dogs pas 'di ltar byas nas so//'dir rnyed pa thob pas 'tsho ba'i rgyur brtags shing 'tsho bar bya'o zhes pa'i tha tshig go/ /khengs phyir bran du 'gro bar byed/ /ces pa ni stobs dang ldan pa 'ga' zhig gis gnod pa byas pa'i dus su rang gi nga rgyal dbyung ba'i phyir sor mo bcad pa dang /dus kyi tshod 'dzin pas bsnyen pa khas len pa'i phyir ro/ /rmongs pa ni shes rab kyi mig gti mug gis mun par byas pa'o/ /de gang yin zhe na/ 'dod pas bslus pa rnams te 'dod pa'i ched du'am 'dod pas bslus pa ste spyos pa'o/ /'dod pa la zhen pa'i sems dang ldan pa rnams la skye ba 'di nyid la'ang sdug bsngal mthong ba de bstan pa'i phyir/'dod ldan zhes pa la sogs pa gsungs te/ gzhan gyi chung ma dang nor 'phrog pa la sogs pa'o/ /lhag ma ni go sla'o/ /gzhan yang 'di bde ba sgrub pa nyid kyis nor len par byed pa na yang don med pa rgud pa skye bar 'gyur ba'i rgyu nyid do zhes bstan par 'dod nas/bsags pa dang zhes pa la sogs pa gsungs te/ sogs pa ni med pa la sogs par byed pa'o/ /bsrung ba ni dka' bas bsags pa de yang chu dang me la sogs pa chud za bar byed pa lnga las yongs su skyong bar byed pa'o//shin tu dka' ba de ltar srung ba yang brgya la rkun ma la sogs pa rnams kyis brlag par byed pas gdung zhing yid mi bde ba sdug bsngal ba'i rgyu ni phung khrol yin la de nyid don med pa rgud pa'i rgyu yin pa'i phyir rgyu la brtags nas nor nyid phung khrol du brjod do/ /bsags pa la sogs pas rtag tu rnam par g.yengs pa'i phyir dang /nor la zhen pa'i sems kyis skad cig tsam yang ting nge 'dzin la brtad pa'i skabs med pa'i phyir 'khor ba la brten pa'i skye ba la sogs pa'i sdug bsngal las grol ba'i skabs med de/ rtag tu de la yid zhugs pa nyid kyis tshe'i 'du byed zad pa'i phyir ro//'di thams cad mjug bsdus nas 'dod pa la zhen pa yongs su spang ba'i ched du skyo ba'i gtam gyis spro bar byed pa/ 'dod ldan rnams la zhes pa la sogs pa gsungs te/ de lta bu ni brjod pa'i rnam pa la blta'o/ /nyes dmigs ni phung khrol yin te mang ba ni rnam pa du ma yin la/'dir bde ba skyed par byed pa ni gtam tsam yang med de/ de ltar na yang phyin ci log las brgya zhig la 'di ni bde ba'o zhes snang ste/ de ltar na gyi na'o/ /shin tu lci ba'i khur gyis mnan pa bas ngal ba'i lus dang ldan pa'i phyugs rtswa cung zad tsam 'dzin pa bzhin du shin tu gsog gyur cing mnog chung ba'i bde ba'i cha 'di lta bur gyur pa de phyugs dang yang thun mong ba gang yin pa de'i don du ste/de'i rgyu mtshan dal 'byor phun sum tshogs pa ste mi khom pa brgyad las grol ba 'di bcom zhing nyams par byas te/ don med par byas so zhes pa'i don to/ /khyad par ji lta bu zhe na/rnyed dka' ba yin te bshad zin to/ /gang gis she na/ las kyis mnar ba ste las ni sngon gyi las yin la/ des mnar ba'i ni phan pa dang mi phan pa shes pa la phyin ci log pa'i blo yin te rmongs pas byas zhes pa'i don to/ /'di dngos po la ni spyod pa'i tshig yin te bskal pa mnar ba nyid du brjod do//nges par 'jig cing chung gyur pa/ /zhes pa la sogs pa tshigs su bcad pa gnyis kyis phyin ci log gi ngo bo nyid du ston par byed de/ nges par 'jig cing zhes pa ni mi brten pa'i rang bzhin yin la/ chung ba ni 'jig rten las 'das pa la ltos nas yin te/shin tu khyad zhugs pas chung ba yin no/ /dmyal la sogs par lhung byed cing / /zhes pa ni dpag tu med pa'i sdug bsngal bsten pas rang gi bde ba skyed pa la yang nus pa med do zhes bya ba'i don to/ /lus ni rang gi lus te 'di'i don ni bde ba skyed pa'i ched du'o//gang 'di ni dmyal ba la sogs pa'i sdug bsngal ma brtsis par byas pa ste dus thams cad du 'khor bar sngar byas pa'i bye bar yongs su ngal zhing nyon mongs pa yin la/ de las te bye ba'i brgya'i cha yongs su ngal bas sangs rgyas nyid du 'gyur la/ de la ltos nas shin tu chung ba'i cha yis sangs rgyas nyid 'thob ste/de ltar na de'i don du blo gros dman pa rnams spro bar mi byed do zhes pa'i don to/ /'on te byang chub kyi spyad pa spyod pa yang dka' ba brgyas rtsom pa'i phyir shin tu sdug bsngal stong phrag du ma skyed pa'i phyir ro zhe na/ 'dod ldan zhes pa la sogs pa gsungs te/gang zhig 'dod pa'i don du 'khor bar spyod pa ni byang chub spyod pa'i sdug bsngal la ltos nas 'di nyid sdug bsngal shin tu chen po yin te/ de rnams mnar med par lhung bar byed pa'i phyir dang / gzhan gyi dbang gis yun ring por nyams su myong ba'i phyir la/ byang chub sems dpa' rnams la ni dus so sor nges par rang nyid 'dod pas nyams su myong ba nyid yin pas na de lta ma yin no//de ltar na gang byang chub sems dpa' rnams gzhan gyi don du sdug bsngal nyams su myong ba de ni byang chub tu 'gyur ba yin la/ 'dod pa dang ldan pa rnams kyis 'dod pa'i don du sdug bsngal myong ba ni byang chub tu 'gyur ba ma yin no zhes pa'i don to/yang khyad par du 'dod pa'i rgyus sdug bsngal ba nyid du rab tu bstan pa'i phyir/ dmyal sogs zhes pa la sogs pa gsungs te/ mtshon la sogs pa 'di rnams sdug bsngal skyed par byed pa'i rgyu nyid du rab tu grags pa dang /'dod pa rnams mtshungs par 'gyur ba ni ma yin no/ /ci'i phyir zhe na/ dmyal ba la sogs pa ngan 'gro'i sdug bsngal lung las bshad pa dran pa las te/ dran pas yul du byas pa las so/ /mtshon cha la sogs pa yang dus nges par 'chi ba la sogs pa 'di rnams sdug bsngal skyed par byed pa po yin la/'dod pa ni dus yun ring por dmyal ba la sogs pa'i sdug bsngal mi bzad pa'i rgyu rnams yin te/ ji lta bur de rnams kyi dper 'gyur/ de ltar lus rnam par dben pa'i rjes la sems rnam par dben pa brjod nas/ skabs su bab pa la sbyar ba'i ched du/ de ltar 'dod pa zhes bya ba la sogs pa gsungs te/'dod pa ste 'jig pa'i rgyu rnams so/ /de ltar brjod pa'i rim pas skyo zhing skrag par byas nas sngar brjod pa'i dben pa'i dga' ba la mngon par dga' ba bskyed par bya'o/ /gang du gnas nas bya zhe na/ de la gsungs pa/ rtsod pa dang zhes pa la sogs pa gsungs te/'gran zla med pas de rtsod pas stong pa dag yin la/ stag dang ri dgas dang sbrul dang rkun po la sogs pa dang bral bas dga' ba yin no/ /de'i phan yon skal ldan zhes pa la sogs pa gsungs pa la/ skal ldan ni legs par spyod pa rnams yin la/ zla ba ni zla ba nyid yin la/ 'od ni 'od zer yin te/ de nyid dkar zhing bsil bar chos mthun pas tsan+dan yin la/ gang rlung bsil ba rnams dang ldan pa'i rdo leb de rnams la 'chag par byed ces pa dang 'brel to/ /khyad par ci lta bu dang ldan pa zhe na/ nyams dga' bar te/ rang bzhin gyis gtsang zhing dag pa rtsub pa la sogs pa'i nyes pa dang bral ba rnams so//yangs pa'i rdo leb khang bzangs ni khang bzangs dang 'dra ba ste yangs pa rnams so/ /ji lta bur gyur pa'i dam pas 'chag par byed ce na/ sgra med pa ste/ mi mthun pa'i sgra dang bral bas so/ /zhi ba ni rtsub pa ma yin pa bde ba'i reg pa dang ldan pas zhes pa'i don to//nags kyi rlung ni g.yob par byed pa'i rlung ngo / /'chag par byed pa ni yang dang yang du dal bas 'chag pa'o/ /'chag pa tsam 'ba' zhig ni ma yin te/ 'on kyang gzhan la phan pa'i ched du sems can rnams la bde ba skyed pa'i sems pa'ang yin no//rnal 'byor pa rnams kyis ni 'di thams cad 'bad pa med par 'grub pa yin la/ 'dod pa can rnams kyis ni 'bad pas bsgrub par bya ba yin no/ /de ltar na 'dis ni rnam par dben pa'i bde ba dbang phyug gi bde ba las kyang khyad par du 'phags par bstan to//dben par gnas pa rnams la bde ba thun mong ma yin pa gzhan 'di yang yod par bstan pa'i phyir/ khang stong zhes pa la sogs pa smos te go sla'o/ /rang dbang spyod cing zhes pa la sogs pa ni bshad pa nyid kyi don gsal bar byed de/ bdag ni rang nyid yin la rang dbang du spyod pa ni 'dod pa yin te/ des rang dbang du spyod pa'i ngang tshul gang la yod pa de ni rang dbang du spyod pa zhes pa'i don to/ /de ltar rnam par dben pa'i yon tan bshad de/ skabs su bab pa bshad par 'dod nas/ de las zhes pa la sogs pa gsungs te/de las zhes bya ba ni sngar brjod pa'i rim pa ste/ sogs pa'i sgras ni gzhan yang de ltar yin la/ rnam pa yis zhes pa ni lus dang sems kyis rnam par dben pa yin la/ yon tan bsgom pa ni 'di ltar yang bde ba phun sum tshogs pa thams cad kyi rgyu ni bde ba yin no zhes sems la yang nas yang du mngon du byas pa'i rgyus so//rnam par rtog pa'i rgyu nye bar zhi ba ni gang gi dam pa ma yin pa'i yid la byed pa de ltar gyur pa na byang chub kyi sems bsgom par bya ste/ 'di ltar sems yongs su byang ba bsgom pa na byang chub kyi sems phul du phyin pa'i go 'phang skye bar 'gyur ro zhes ni'i sgras khyad par ston to//de la re zhig gcig tu gzhan du bdag nyid ma byas pa de srid du gzhan la phan pa dang bde ba'i sems phun sum tshogs par mi 'gyur te/ bdag tu 'dzin pa ni bdag nyid la khyad par du 'jug pa'i phyir ro/ /de'i phyir 'di bzlog par bya ba'i ched du dang por te thog mar bdag dang gzhan du mnyam po bsgom par bya ste/phyi nas ni bdag dang gzhan du brje ba'o zhes pa'i don to/ /'di ltar zhes pa ni 'chad par 'gyur ba'i tshul gyis so/ /'bad pas zhes pa ni mngon par zhen pa chen pos so/ /bde dang sdug bsngal mnyam pas zhes pa ni de nyid kyi rnam pa ston pa yin no//bdag las 'di dag la khyad par cung zad kyang yod pa ma yin te/ gang las ji ltar bdag sdug bsngal zhing gnod pa de bzhin du 'di rnams la yang ngo / /ji ltar bdag gi bde ba yongs su bzung ba ste/ de bzhin du 'di rnams la yang zhes srog chags thams cad la bde ba dang sdug bsngal mnyam par 'gyur ba yin te/de'i phyir bdag bzhin du bdag gis bskyang bar bya ste/ dper na bdag sdug bsngal dang sdug bsngal gyi rgyu las 'byin pa de bzhin du sems can gzhan yang gnod par bya ba dang dper na bdag nyid rnam pa thams cad du bde bar 'dod pa de bzhin du gzhan yang bdag bzhin du yongs su bsrung bar bya'o//'o na bdag nyid las 'gro ba du ma'i rnam pa tha dad pa'i sems can rnams gcig tu 'grub par mi 'gyur ba ma yin nam/ bde ba dang sdug bsngal tha mi dad par yang ji ltar 'dod par 'gyur zhe na/ 'di la lag pa la sogs pa zhes pa la sogs pa gsungs pa la/lag pa dang rkang pa dang mgo bo la sogs pa dbye ba rnam pa mang po ji ltar lus gcig tu zhen pas yongs su bsrung bar bya bar 'gyur te/ sdug bsngal las bzlog pa'i phyir dang / bde ba la gtod pa'i phyir ro/ /de bzhin du 'gro ba ste sems can gyi 'jig rten tha mi dad cing gcig pa nyid du zhen pas bdag gis yongs su bsrung bar bya ba nyid du 'gyur ro//bde ba dang sdug bsngal tha mi dad par yang gi sgra mi mngon par byas pas ston to/ /de ltar lag pa la sogs pa'i dbye ba bzhin du 'di thams cad ces te rnam pa mang po'i 'gro ba'i bye brag tha dad pa yang ngo //bsam pa ni 'di yin te/ lus po 'di la gcig pa nyid med kyang ji ltar goms pas gcig tu zhen pa de bzhin du 'gro ba rnam pa du ma las yang yin te/ khyad par cung zad kyang med do/ /'di de ltar du gyur na gal te khyed dang lhan cig tu 'gro ba gcig gi rang bzhin yin pa de'i tshe ji ltar khyed kyi sdug bsngal gzhan gyi rgyud la gnod par mi 'gyur la/de bzhin du bzlog pa la yang sbyar bar bya'o zhes dogs nas/ gal te gzhan gyi lus zhes bya ba la sogs pa gsungs te/ gal te gzhan gyi lus te gzhan gyi lus po dag la bdag gi sdug bsngal gal te gnod par ma gyur pa de ltar na yang sdug bsngal de nyid bdag gi yin no//ci'i phyir zhe na/ bdag la chags pas bzod par dka' ba yin te mi nus so zhes pa ste 'di ni gtan tshigs kyi tshig yin la/ cha'i sgo nas 'jug na yang sdug bsngal gyi rang bzhin nyid mi 'dor ro zhes pa'i don to//de bzhin du bzlog pa yang bshad par bya'o/ /de'i phyir rang dang gzhan gyi khyad par dor nas sdug bsngal gyi rang bzhin nyid bzlog pa'i gtan tshigs bdag gis zhes pa la sogs pa gsungs pa la/ gang sdug bsngal yin pa de bdag gis bsal bar bya ste/ bdag gi sdug bsngal bzhin no/ /sems can gzhan gyi sdug bsngal yin pas zhes pa ni rang bzhin gyi gtan tshigs kyi sbyor ba yin te/ sdug bsngal gyi rang bzhin tsam 'byung bar 'gyur ba spong bar bya ba nyid do/ / gtan tshigs ma grub pa yang ma yin te/ sdug bsngal gyi rang bzhin nyid du khyad par med par bsgrub pa'i phyir ro/ /ma nges pa yang ma yin te/ /khyad par med pa'i phyir bdag gi sdug bsngal yang spang bar bya ba ma yin par 'gyur ro zhes pa ni bzlog na gnod pa can no/ /'di nyid kyi phyir 'gal ba yang ma yin no//de bzhin du sbyor ba gzhan 'di yang yin te/ gang sems can yin pa de thams cad la bdag gis phan par bya ste/ ji ltar sems can bdag nyid bzhin no/ /srog chags gzhan yang sems can yin pa zhes pa ni rang bzhin gyi gtan tshigs nyid de/sems can gyi bdag nyid tsam 'byung bar 'gyur ba la phan gdags par bya'o/ /'di yang ma grub pa ma yin te/ sems can gyi bdag nyid kyi phyogs grub pa'i phyir ro/ /bdag nyid la yang phan mi 'dogs par thal bar 'gyur bas ma nges pa yang ma yin la/sngar bzhin du 'gal ba yang ma yin no/ /sdug bsngal la mngon par zhen pa zhes pa bdag dang gzhan la khyad par yod pa ma yin nam/ de'i phyir de ltar na gtan tshigs ni ma nges pa yin no zhe na/ gang tshe bdag dang zhes pa la sogs pa gsungs pa la/ bde ba ste dga' ba 'dod par mtshungs shing mnyam pa nyid la de dag dang gzhan la khyad par ci yod de cung zad kyang med do//gang gi phyir bdag nyid la bde ba bskyed par bya ba'i phyir brtson la gzhan la ma yin zhes pa'i don to/ /gtan tshigs dang po la ma nges pa nyid spang ba'i phyir/ gang tshe bdag dang zhes pa la sogs pa gsungs te/ 'jigs pa ni sdug bsngal gyi rgyu yin la/ gzhan min zhes pa ni gzhan la ma yin pa'o/ /de ltar gyur na yang sdug bsngal gcig gi bdag nyid du khyad par med par gyur pa de lta na yang / gang la sdug bsngal gyis gnod pa de nyid kyis bsrung bar 'os kyi gzhan gyis ni ma yin no zhe na/gal te de la zhen pa la sogs pa gsungs te/ gzhan de'i sdug bsngal gyis bdag la gnod pa dang gdung ba med pa'i phyir rgyu 'dis gal te gzhan ma bsrungs na gzhan 'di nyams par 'gyur te/ gang gi phyir ma 'ongs pa ste 'jig rten pha rol gyi lus dmyal bar skyes pa'i sdug bsngal gyi bdag nyid 'dir skyes pa'i lus po 'di la cung zad kyang gnod par mi srid de/de gzhan yin pa'i phyir ro/ /de zhes pa ni 'jig rten pa'i brjod pa'am de'i don to/ /gang gi phyir de ltar yin pa de'i phyir bsam pa gang gis 'dir bsrung ba lus kyi rang bzhin yin pa'i phyir te/sdig pa las ldog pa'i phyir dang dge ba la 'jug pa'i phyir ro/ /bdag ni dus thams cad du gcig yin te/ lus ngag la tha dad pa yod pa ma yin la/ de'i phyir nyes pa 'di med do zhe na/ bdag gis zhes bya ba la sogs pa gsungs te/bdag ni 'gegs par 'gyur ba'i phyir dang / cung zad bkag pa'i yang phyir gang zhig nga'o zhes rtog pa'i yul du 'gyur/ de'i phyir nga'o zhes shes pa'i yul gang la yang gcig ces pa med pa'i phyir zhen pa'i rnam par rtog pa 'di ni log pa'o/ / bdag nyid de'i tshe yang zhes pa ni 'di srid pa gzhan yin la/ sgyu ma lta bu nye bar len pa'i phung po lnga tsam dmigs pa'i phyir ro/ /'di yang zhen pa'i dbang gis brjod pa yin te/ yang dngos po la ni dmigs pa cung zad kyang yod pa ma yin te rnam par rtog pa'i bdag nyid yin pa'i phyir ro//yang 'di ci'i phyir rnam par rtog pa log pa yin zhe na/ 'di ltar shi ba zhes pa la sogs pa gsungs te/ bdag gcig tu phung po lnga po tsam nyid yin la/ gang gi tshe bdag la sogs pa 'ga' zhig 'jig rten pha rol du 'gro bar srid pa tha ma ma yin pa de'i tshe nges par phung po de 'di nyid du 'jig par 'gyur ba ni ma yin te/de nyid 'jig rten pha rol du skye bar 'gyur ro/ /'on kyang snga ma 'gags nas des rkyen 'dis khyad par du gyur pa'i las dang nyon mongs pas 'dus byas pa bar ma do'i srid pa sngar med pa'i rgyud skyed par 'gyur te/de'i phyir thog ma med pa'i 'khor ba nas 'jug pa'i log pa'i rnam par rtog pa la goms pa'i bag chags kyi dbang la sogs pa'i rkyen gyis phyir phyin ci log pa nyid skye bar 'gyur ro/ /gzhan yang gnod par byed pa gzhan 'di yin no zhes gang gi tshe zhes pa la sogs pa gsungs te/gang gi tshe 'byung bar 'gyur ba'i lus kyi sdug bsngal bsrung ba'i don re zhig zhog la/ 'dir lus po gcig la yan lag tha dad pas sdug bsngal tha dad pa yin te/ de'i phyir gang gzhan gyi sdug bsngal gzhan gyis bsrung ba la 'bad par mi rigs na/ rkang pa la sogs pa la phangs pa gang zhig mthong ba na ci'i phyir lag pa la sogs pas skyong bar byed de/gzhan nyid du khyad par med pa'i phyir 'di rigs pa ma yin no zhes pa'i don to/ /'on te 'di rigs pa yin na yang lus po 'di la bdag gir 'dzin pa ste/ bdag ces pa bdag tu 'dzin pa las bdag med kyang 'jug par 'gyur te/rkang pa la sogs pa la bsrung ba'i yid la byed pa 'byung bar 'gyur ro zhe na/ 'di yang legs pa ma yin te/ ji ltar gang mi rigs pa ste rigs pa dang mi mthun pa de bzlog par bya ste/ bdag dang gzhan gyi yang bsal bar bya ste/nan gyis ni nus pa ci lta bar ro/ /nus pa dang bral bas ni 'dir btang snyoms nyid du bya bar rigs so zhes pa'i don to/ /gal te bdag la sogs pa med par gyur pa de lta na yang rgyud ces pa gcig yod pa yin te/ de bzhin du lag pa dang rkang pa la sogs pa mang po rnams la yang tshogs pa'i lus gcig yod pa yin la/gnyis po 'di 'jig rten 'di dang 'jig rten pha rol du ji ltar srid par bdag sdug bsngal khyer bar byed pa la sogs pa'i nges par byed par 'gyur te/ de'i phyir khyad par ci zhig yod ces pa'i gtan tshigs ma grub pa yin la/snga ma ni ma nges pa yin no zhes dogs nas rgyud dang zhes pa la sogs pa gsungs te/ rgyud ces pa 'ga' zhig don dam par srid pa ma yin te/ 'on kyang rgyu dang 'bras bu'i dngos po 'jug pa skad cig brgyud pa'i rgyun gyi rang bzhin nyid 'di yin te/ de la tha dad pa de ma dmigs pa'i phyir ro//de'i skad cig ma 'di rnams tshig gcig gis blo'i tha snyad bya ba'i don du rgyud ces brdar byas pa yin te/ de ltar na 'di ni brtags par yod pa nyid yin la/ des na 'dir mngon par zhen pa spong bar bya ste/ gzhan du na gang gis khas mi len par 'gyur ba bdag gis gnod pa ci zhig byas/de bzhin du tshogs pa can la sogs pa'i dngos po gcig pur gyur pa yod pa ni ma yin te/ de rnams las de tha dad par ma dmigs pa'i phyir la/ de nyid dang gzhan du brtags pa'i cha shas kyi rnam par dpyad pas mi gnas pa'i phyir 'dir brjod par mi bya ste/de'i phyir 'di yang sngar bzhin du kun rdzob tu yod pa nyid do/ /'di dag go rims ji lta bar dper brjod pa/ phreng ba dmag ces pa la sogs pa gsungs te/ rgyud ni phreng ba bzhin du yin la/ tshogs pa ni dmag la sogs pa bzhin yin pa la sogs pa'i sgras phreng ba dang /nags la sogs pa bzung ngo / /ji ltar grog mo la sogs pa du ma 'di rnams snga phyi'i rim pas gnas pa rnams la rang gi ngo bo las ma gtogs pa me tog brgyus pa bzhin du rgyud gcig ni yod pa ma yin no/ /gang gi tshe glang po che dang rta dang rkang thang la sogs pa bsdus pa rnams las tha dad pa'i dmag la sogs pa gzhan cung zad cig kyang der yod pa ma yin te/de bzhin du tshogs pa'ang yin la 'di yang gzhan du rgyas par dpyad pas 'dir dpyad par mi bya'o/ /de'i phyir shes pa 'di ni brdzun pa yin te/ rtag tu dngos por dmigs pa dang bral ba'i phyir don la dpyad mi bzod pa'i phyir ro//de de ltar na bdag la sogs pa bdag po gang yang med pas gang dang 'brel ba'i sdug bsngal la sogs pa yang med do/ /de'i phyir sdug bsngal de'i bdag por gang zhig 'gyur te gang yang ma yin no zhes pa'i don to//gal te bdag la sogs pa med na de'i tshe bdag sdug bzhin zhes pa dang / sems can yin phyir bdag lus bzhin/ /zhes bya ba'i dpe ji ltar 'thad ce na/ 'di ni bden te 'on kyang phongs pa'i sgo nas sgrub par byed pa ni ma yin te/'on kyang gzhan la bdag tu 'dzin pa'i mngon par zhen pa spang bar bya ba'i don du yin te/ gal te gzhan gyi bdag tu 'dzin pa'i mngon par zhen pa de ldog pa nyid du yin pa de'i tshe rjes su dpag pa'i sbyor ba la dgos pa cung zad kyang yod pa ma yin no/ /'on te ma log pa de'i tshe bsam pa de nyid kyis rang gi cha dang gzhan gyi char byas nas de rtogs par bya ba'i don du sgrub par byed pa dang dpe dgod par bya ba ste/de ltar na dpe ma grub pa yin te/ tha snyad la 'jug par bya ba'i don yin pas so/ /gzhan yang zin pa'i phung po nyid la dgongs nas dpe mdzad pa la nyams cung zad kyang med pas 'di nyid du bdag gi sgra 'jug par mdzad do//da ni skabs su bab pa bsdu bar bzhed nas/ sdug bsngal dpag tu med pa zhes bya ba la sogs pa gsungs pa la/ gsungs pa'i rim pas gang rnams la bdag po med pa zhes pa'i tshig sdud pa yin te/bdag gi ba ma yin pa gang dang yang 'brel pa ma yin no zhes pa'i don to/ /gang cung zad thams cad nyid kyis ma yin no zhes khyad par du byed de/ gang du yang gang gi yang bdag gi ba nyid yod pa ma yin la 'di las khyad par yod pa ma yin pa'i phyir sdug bsngal nyid bdag dang gzhan gyir dbye ba ma byas par bzlog par bya ba nyid du 'gyur la de la bdag gi ba la sogs pa rgyu mtshan gzhan ni yod pa ma yin te des na gang gi bdag gis bdag gi ba nyid ni bzlog par bya ba yin la/gzhan dag gis ni ma yin zhes pa 'di nges par 'gyur bar gang gis byas te khyad par gang gis byas/de ltar na sdug bsngal nyid kyi phyir zhes bya ba'i gtan tshigs nges pa ma yin no zhes smras pa yin no/ ci ste sdug bsngal can 'ga' zhig kyang 'khor ba na gal te yod pa yin na/ de lta na sdug bsngal bzlog par bya ba ma yin pa nyid du 'gyur te/ snying rje'i zhing sdug bsngal can 'ga' yang yod pa ma yin pa'i phyir zhes dogs nas/ ci'i phyir sdug bsngal zhes bya ba la sogs pa gsungs te/ bzlog par bya ba ma yin pa nyid yin te/ bdag med pa'i phyir ro zhes gal te sems na/ de'i tshe 'dir rigs pa ma yin no/ /ci'i phyir zhe na/thams cad rtsod med phyir te/ rgol ba thams cad la rtsod pa med pa'i phyir la log pa med par rtogs pa med pa'i phyir ro/ /tshu rol mdzes pa yang 'dir rang gi sdug bsngal spong bar zhugs pa'i phyir ro/ /de rnams kyis bdag khas blangs pa nyes par ma gyur pa ni ma yin te/de'i rang bzhin ma dmigs pas so/ /khas blangs pa tsam gyi sgo nas de yod par grub pa ni ma yin te/ de la sgrub par byed pa med pa'i phyir dang / gnod par byed pa du ma brjod pa'i phyir ro/ /de ltar na sdug bsngal thams cad bzlog par bya ba yin pa de'i tshe thams cad bzlog par bya'o//gal te bzlog par bya ba ma yin na de'i tshe bdag nyid kyang ste zin pa'i phung po lnga'i rang bzhin gyi sdug bsngal yang bzlog par bya ba ma yin te/ thams cad du khyad par med pa'i phyir ro zhes mjug sdud do/ /ci ste thams cad kyi sdug bsngal bsal bar bya ba'i phyir brtson pa snying rje gzhan gyi dbang du gyur pas gzhan sdug bsngal bas sdug bsngal ba yin pa de lta na lhur sdug bsngal thams cad kyi rgyu de nyid dang po nyid du bskyed par bya ba nyid du sbyar bar mi rigs so zhes gzhan gyi tshig gis dogs par byas nas/snying rje zhes pa la sogs pa gsungs te nan gyis zhes pa ni rtsol bas so//'dir lan gsungs pa/ 'gro ba'i sdug bsngal la sogs pas byas pa'i rnam pa mang po bsam par byas na snying rje byas pa'i sdug bsngal 'di ci ltar mang ste/ snying rje can gyi sdug bsngal ni mang ba ma yin no zhes dgongs so/ /gzhan yang lan 'di yang yod do zhes/gal te sdug bsngal gcig gis zhes pa la sogs pa gsungs te/ skyes bu gcig gi sdug bsngal gyis gal te sems can mang po rnams kyi sdug bsngal med par 'gyur zhing bzlog par 'gyur na de'i de lta bu'i sdug bsngal bskyed par bya zhing bsgrub par bya'o//snying rje'i bdag nyid can gyi dam pas rang dang gzhan gnyi ga'i sdug bsngal bsal bar bya'o/ /brtags pa ni ma yin no zhes bsnyad pa'i phyir/ des na zhes bya ba la sogs pa gsungs te/ gang gi phyir snying rje can gyis rang gzhan gyi sdug bsngal bskyed par bya ba nyid de/de'i phyir byang chub sems dpa' me tog zla mdzes kyis rgyal po nyams pa ste rgyal po las nyams te shes shing go yang ngo / /bdag gi sdug bsngal ma bsal ba ni ma bzlog pa yin te btang snyoms su byas zhes pa'i tha tshig go/ /de bzhin du rgyal po'i phyir ma'i sdug bsngal yang ngo //sdug bsngal thams cad kyis mi zad byas pa ste/ /sdug bsngal gyis zhes skabs su bab pa la drug pa'i mtha' can gyis 'brel to/ /gang me tog zla mdzes kyi de lta bu byung ba'i las 'di ltar yang 'das pa'i dus na rin po che pad ma'i rnam par dag pa mngon par 'phags pa'i rgyal po zhes bya ba'i de bzhin gshegs pa byung zhing rgyal po yang byung bar gyur pa na bcom ldan 'das de yang sangs rgyas kyi mdzad pa mdzad cing yun ring du bzhugs nas yongs su mya ngan las 'das so//de'i tshe yongs su mya ngan las 'das nas bstan pa nub par gyur pa na rgyal po dpas byin zhes bya ba byung bar gyur te/de'i pho brang 'khor ni rin chen ldan pa zhes bya ba yin la/ de'i tshe de'i dus na sems can rnams lta ba log par gyur to/ /de rnams la thugs brtse ba'i don du byang chub sems dpa' rab tu byung ba mang po byung bar gyur te yul 'khor dang grong rdal de las de rnams kyang bskrad nas chos smra ba me tog zla mdzes dang lhan cig tu kun tu bzang po zhes bya ba'i dgon pa'i nags khrod na brten cing gnas so//de nas yang byang chub sems dpa' me tog zla mdzes sems can rnams la snying rje'i bsam pas dben par nang du yang dag 'jog la zhugs te/bdag gis grong dang grong rdal dang yul 'khor du song la sems can lam ngan par zhugs pa rnams dge ba'i lam la gzhag par bya'o zhes sems la rnam par rtog pa skyes te/ tshangs pa mtshungs par spyod pa rnams la don de smras so//de rnams kyis bkag par gyur kyang bdag nyid nyams pa dang rgyal po yang nyams par shes bzhin du nags khrod de las byung bar gyur te/ rim gyis chos ston cing rgyal po de'i pho brang gi 'khor du phyin par gyur to/ /des rgyal po'i bu dang / blon po dang /mdun na 'don la sogs pa sems can mang po rnams la/ ji ltar 'dul bar thabs rnam pa du mas yang dag pa'i lam la 'jog pa'i tshe rgyal po de rgyal po'i lam du mthong ba bzhin du khros te/ phrag dog gis bslangs pa'i sems kyis 'dis skye bo thams cad rangs par byas so snyam nas bsad pa'i don du rang gi bu rnams la bsgo ba dang /de rnams kyang de gsod pa la phyir phyogs par go nas gsod pa'i gshed ma dga' byed la bka' bsgo ba'o/ /des kyang rgyal po'i bka' bzhin du byed pas lag pa dang / rkang pa la sogs pa rim gyis bcad nas mig dag kyang skam pas phyung ste/srog dang bral bar byas so/ /de nas dge slong de rgyal po'i lam du srog dang bral ba'i lus las ngo mtshar rmad du byung ba du ma de mthong nas/ dge slong 'di ni byang chub sems dpa' nyid do zhes rgyal pos cho nge byas nas yongs su gdung bar gyur te/rnam pa du mas smre sngags 'don to/ /de ltar me tog zla mdzes kyi de lta bu byung ba cung zad 'dir mdor bsdus nas brjod pa yin te/ yang rgyas par ni ting nge 'dzin rgyal po'i mdor bstan pas de nyid du rig par bya'o/ /pha rol sdug bsngal bas sdug bsngal ba'i snying rje can rnams ni sdug bsngal chen pos kyang gnod par 'gyur ba ma yin no zhes bstan pa'i phyir/de ltar rgyud ni zhes pa la sogs pa gsungs te/ de ltar ni bdag dang gzhan du mnyam pa'o/ /rgyud bsgoms pa ni sems kyi rgyud lhun gyis grub pas 'jug pa'o/ / gzhan gyi sdug bsngal zhi zhing mnyam par dga' ba ste/ bde ba'i rgyu gang la yod pa de la de skad ces bya ste/ bdag gi bde ba yang gzhan gyi sdug bsngal bas sdug bsngal ba nyid gang rnams kyis yin pa zhes pa'i don to/ /de rnams mnar med par 'jug pa rnams ni gzhan sdug bsngal las gdon pa'i don du sdug bsngal de nyid la bde bar sems pa rnams so//'di nyid 'dir/ pad+ma'i mtsho ru ngang pa ltar/ /zhes gsungs te/ mnar med pa'i sdug bsngal yang bde ba nyid yin te/ gang rnams kyi gzhan gyi sdug bsngal gyi don du yin pas sdug bsngal gyi rgyu gzhan gang gis sdug bsngal bar 'gyur/gzhan yang de rnams kyi bde ba yang thun mong ma yin pa nyid gzhan gyi sdug bsngal gyis skye bar 'gyur te/ de bas na bstan pa'i phyir/ sems can rnams ni grol ba na/ /zhes gsungs te/ sems can rnams la sdug bsngal gyi 'ching ba las grol bar byed pa yod pa la'o//gang yin de zhes pa ni de rnams nyid kyis nyams su myong bas grub pa'i phyir 'di tsam zhes brjod par nus pa ma yin la/ de nyid kyi phyir dga' ba'i rgya mtsho yin te mgu ba'i rgya mtsho snying rje dang ldan pa'i rgyud rnams la skye bar 'gyur ro//dga' ba'i rgya mtsho de nyid kyis mthar phyin pa ni bde ba gzhan la phyir phyogs pa las yongs su thob pa ste/ bde ba thams cad spangs pa yin no zhes bya ba'i tha tshig go/ /ci ste de nyid bde ba'i mthar thug pa ci ltar yin te/ gcig tu nyon mongs pa'i yongs su gdung ba nye bar zhi bas rnam par grol ba'i bde ba yin pa'i phyir shin tu lhag pa yin no zhe na/ro bral thar pa zhes pa la sogs pa gsungs te/ thar pa yang de la ltos nas de rnams ro dang bral ba nyid du snang ngo / /dgongs pa ni 'di yin te/ gzhan la phan pa dang bde ba bsgrub pa nyid de rnams kyi ro'i mchog nyid kyis zhugs pa'i phyir de la mngon par zhen pa yin la/snying rje dang ldan pa rnams la bde ba de nyid dgos pa yin gyi thar pa ni ma yin no/ /de gal te nyams su len pa la ched cher byed na thar pa yang mngon du gyur na yang gzhan gyi don de nyid la ched du gnyer ba ni ma yin no//gang gsungs pa/ 'gro ba ma lus rang bzhin mngon du mdzad gang gi/ /de bzhin gshegs pa nyid ni zhar la byung ba ste/ /gzhan dbang gyur pa khyod kyi yon tan rnams las ni/ /cung zad tsam zhig tshig gi rjod byed snyan dngags mkhan/ /zhes so/ / gang gi phyir thar pa la rings pa med pa de'i phyir te/ rgyu 'di las gzhan gyi don byas kyang ste/ de la sems gzhol bar zhugs pas rlom sems dang rgyags pa ma yin la/ ngo mtshar ba yang med de dka' ba spyad pas rmad du byung ba'i blo yang de rnams la skye bar 'gyur ba ma yin te/ bdag gis dam pa'i las byas pa 'di'i las kyi rnam par smin pa'i 'bras bu 'jig rten pha rol du 'byung bar 'gyur ro zhes pa dang /rnam par smin pa'i 'bras bu la 'dod pa yang skye ba ma yin no/ /'di'i rgyu gcig tu gzhan don la dga' bas zhes gsungs te/ gang gzhan gyi don rnams la gcig tu ste/dgos pa gzhan la ltos pa med pas khyad par du shin tu dga' ba yin te de nyams su len pa la tshim pa med pa yin la rgyu des so/ /'dis ni bdag dang gzhan du mnyam pa'i 'bras bu'i skabs kyi khyad par de bstan par 'gyur ro/ /de ltar na zhar la byung ba de ltar brjod nas skabs su bab pa mjug bsdu ba'i sgo nas bstan par bya ba'i phyir/de bas zhes bya ba la sogs pa gsungs te/ gang gi phyir brjod pa'i rim pas bdag dang gzhan la khyad par cung zad kyang med pa de bas na'o/ /chung ngu na zhes pa ni sdug bsngal gyi rgyu cung zad tsam mi snyan pa las kyang bdag bsrung zhing sba bar bya'o//de ltar gyur na yang bdag dang gzhan du mnyam par bsgrub pa zhes bya ba 'di nyams su blang bar mi nus pa nyid yin la/ de bas kyang bdag dang gzhan du brje ba ni shin tu yang mi nus pa yin te/ de ji ltar na blang bar bya ba yin zhe na/goms pa yis ni zhes bya ba la sogs pa gsungs pa la/ de bzhin du brjod pa'i rim pas 'dir dngos po goms pa'i spyod yul du 'gyur ba ni dka'o zhes pa'i blo bskyed par mi bya ste/ gang gi phyir gzhan dag ste pha ma dang 'brel pa'i khu ba khrag gi thigs pa la lus zhes zhen pa rnams la goms pas bdag go zhes shes par 'gyur te bstan pa nyid kyis 'jug go//'on te bdag gi zhes shes pa'i rgyu mtshan gzhan yod pa yin te/ ci'i phyir 'dir mi 'thad ce na dngos po med par gyur kyang zhes pa la sogs pa gsungs te/bdag la sogs pa'i dngos po'i rgyu mtshan du gyur pa med na yang goms pa 'ba' zhig las de ltar sgom par byed pas gzhan la yang nges pa nyid du 'gyur ro/ /de nyid de bzhin zhes pa la sogs pa gsungs te/ bdag ces ci'i phyir mi bzung ste gzung bar bya ba nyid du shin tu nus pa yin la/de'i rang bzhin nyid du rang gi lus grub pa nyid do/ /gzhan du na de dang mnyam pa nyid du yang mi 'gyur te/ de ltar na bdag dang gzhan du brje ba dka' bas bsgrub dgos pa ma yin no/ /de ltar bdag dang gzhan du mnyam pa bstan nas/bdag dang gzhan du brje ba bstan par bzhed nas/ bdag nyid skyon bcas zhes bya ba la sogs pa gsungs te/ rtogs pa dang ldan pa rnams kyis yon tan dang skyon blang ba dang dor ba dag gi rgyu mtshan bdag dang gzhan la de mthong nas blang ba dang dor bar bya ba dag bsgom zhing goms par bya'o//bdag lus yongs su dor ba ni bdag nyid la gzhan du bya'o/ /gzhan blang ba zhes pa ni gzhan rnams la bdag nyid du'o/ /de ltar na 'dis bdag dang gzhan du brje ba'i thabs gzhan bstan par 'gyur ro/ /de ltar gyur na sems can rnam pa tha dad pa mang po rnams la ji ltar so sor bdag dang gzhan du brje ba bsgom par nus she na/ji ltar lag pa la sogs pa/ /zhes pa la sogs pa gsungs te/ gang ste yang lag pa la sogs pa tha dad pa yin pa de lta na yang lus su zhen pa'i yan lag nyid kyis su zhes de la gcig tu yul du byed pa de bzhin du 'gro ba yang ma lus pa gcig nyid du zhen pas de'i yan lag nyid kyis srog chags la 'gro ba zhes gcig nyid du de ci'i phyir mi 'dzin/bdag dang gzhan du brje ba 'di la dka' ba'i blo gros mi bya ste/ goms pas thob pa yin no zhes bstan pa'i phyir/ji ltar bdag med ces pa la sogs pa gsungs te/ don bshad zin pa la bdag dang gzhan du brjes pa na 'jig rten pha rol du 'bras bu la 'dod pa skyes pa ma yin no/ /gang dang 'dra bar zhe na/ bdag nyid kyi zas zos nas te/ sbyin pa 'dis bdag dang sems can longs spyod phun sum tshogs par gyur cig ces 'bras bu mi 'dod pa bzhin no//de bzhin du ni de ltar ro/ /de ltar na 'di goms pa'i yul nyid du bstan nas/ bzlog pa la goms par bya bar rang gi sems sbyar ba'i phyir/ de bas zhes pa la sogs pa gsungs te/ 'dod pa ni mngon par 'dod pa'i dngos po thob pa'i ched du gdung ba ste/ sems kyi chos yin pa'am lus kyi sdug bsngal yin pa ni dper na 'go ba'i nad lta bu'o/ /mya ngan ni sdug bsngal dang bral ba la sogs pas byas pa'i sdug bsngal lo/ /sogs pa'i sgras ni lus dang sems kyi sdug bsngal gzhan bzung ngo //de nyid dpe'i sgo nas bstan par bya ba'i phyir/ de bas mgon po zhes pa la sogs pa gsungs te/ de nyid kyi phyir bcom ldan 'das 'phags pa spyan ras gzigs dbang phyug gis rang gi mtshan yang byin gyis brlabs te/ 'phags pa spyan ras gzigs dbang phyug ces bdag nyid kyi mtshan byin gyis brlabs pa dang ldan pa yin la/ 'khor gyi 'jigs pa ni skrag pa yin te/ sems bskums nas 'jug pa yin la/ spobs pa dang bral zhes pa'i bar du'o/ /'gro ba ni 'jig rten pa yin la de las 'jigs pa'am de nyid kyis 'jigs pa'o//de bsal ba'i phyir ni de spong ba'i don du'o/ /mtshan gang sems can 'ga' zhig sems mos pas kyang bdag gi ming 'dzin par byed na de la sdug bsngal thams cad rnam pa thams cad du 'byung bar mi 'gyur la/ tha na 'khor gyis 'jigs shing skrag pa yang 'byung bar mi 'gyur ro zhes byin gyis brlabs so//gzhan yang dka' ba'i tshor ba la yang goms pas dga' bar 'gyur bas na bdag cag gi ldog par mi rigs pa nyid do zhes bstan pa'i phyir dka' las shes pa la sogs pa gsungs te/'di ni mi nus so zhes nas ldog par mi bya'o/ /ci'i phyir zhe na/ gang las goms pa'i stobs 'dir mthong ste/ gang gis thos nas 'jigs pa zhes pa ni rna ba'i lam du gyur na skrag pa dang 'jigs pa skye bar 'gyur ba la/ phyi nas rgyu cung zad thob pa las sdug par goms pa'i dbang gis 'jigs pa'i rgyu de nyid kyis med par gyur na mi dga' bar 'gyur ro//gzhan yang dgos pa 'di yang yod par mthong ba yin te/ de la gus pa'i sgo nas goms pa'i dbang du gyur par bya'o zhes bstan pa'i phyir/ gang zhig bdag dang zhes pa la sogs pa gsungs te/gang zhig myur zhing mgyogs pa nyid du sdug bsngal gyi 'jigs pa thams cad las bskyab cing bsrung bar 'dod pas de spyad par bya ste/ bdag dang gzhan du brje ba'o/ /ci lta bur gyur pa zhe na/ gsang ba'i dam pa ste de'i rigs can ma yin pa rnams skrag pa'i rgyu yin pa'i phyir ram/ma dad pa bsal ba'i phyir shin tu yang gsang bar bya ste/ gzhan du na des spangs pas de rnams ngan song du 'gro bar 'gyur ro/ /gang bdag nyid skyon bcas zhes pa la sogs pa gsungs pa'i bdag nyid dang gzhan gyi bdag nyid nyes pa dang yon tan de rnams rgyas par bstan pa'i phyir/bdag lus zhes pa la sogs pa gsungs te/ brtan chags pas zhes pa ni bdag tu 'dzin pas bskyed pa'i mngon par zhen pas so/ /chung zhes pa ni 'khor gyi 'jigs pa skad cig ma cung zad las kyang ngo / / 'khor gyi 'jigs pa'i rgyu yin pas na 'jigs pa 'am/ rnam par rtog pas brtags pa'i 'jigs pa 'di 'jigs pa zhes brjod do/ /'di lta bur gyur pa'i bdag nyid la sems dang ldan pa su zhig sdang bar gyur pa'i bdag nyid la sems dang ldan pa su zhig sdang bar mi byed de sdang bar bya ba nyid de zhes pa'i don to//de gang yin zhe na/ dgra bzhin du gang gi 'jigs pa skyed par byed pa ste/ brjod pa'i rim pas dgra bzhin du gang zhig 'jigs pa skyed par byed pa'o/ /bsam pa ni 'di yin te/ dgra la yang sdang bar byed de/ sdug bsngal skyed par byed pa yin pa'i phyir ro//de 'di la yang yod pas ci'i phyir mi 'jigs te/ 'jigs par bya ba'o/ /de la nyes pa gzhan yang brjod pa'i phyir/ dman gang zhes pa la sogs pa gsungs te/ dman pa ni nad pa yin la/ bkres pa ni bru ba tsha ba yin zhing / skom pa ni ltung ba 'dod pa yin la/sogs pa'i sgras ni gos la sogs pa dang bral ba'o/ /'di rnams las gso ba'i cho ga ni spyir 'chos pa yin te/ nye bar zhi bar byed pa'i tha tshig gam/ 'di dag gi phyir 'chos pa ste/ de gso bar byed 'dod pa des gang zhig na ba'i zas dang sman la sogs pa'i rgyu mtshan gyis bya dang nya dang ri dgas dag gsod par byed de srog dang bral bar byed pa'o//mkhas pa su zhig lus de la/ /'dod cing zhes pa la sogs pa 'chad par 'gyur ba dang 'brel to/ /lam sgug par byed pas gnas te/ lam ma yin pa nas 'jug par byed par 'gyur ba'i rkun mo nyid la brjod de//gzhan gyi rdzas 'phrog par byed do zhes pa'i tha tshig go/ /de bzhin du pha dang ma yang ste de dag kyang bdag nyid kyi rnyed pa'i rgyu dang rim gro'i rgyus kyang gsod par byed de/ 'di dag gson pa'i don gyis rnyed pa'am bkur sti bdag gir gyur cig ces bsams nas gsod par byed do//dkon mchog gsum gyis ni sangs rgyas dang chos dang dge 'dun gyi bdag nyid kyi yin te/ dkor ni nor yin la/ brkus nas ni blangs nas so/ /sngar brjod pa'i rgyu mtshan du 'dir yang / mkhas pa su zhig lus de la/ /zhes bya ba dang 'brel to/ / gang gis te pha bsad pa la sogs pa byas pas mnar med pa la sogs pa'i mes de'i las kyis skyes pa ste sreg par 'gyur te/ 'di ni mtshon pa tsam yin la/ de las gzhan pa'i dmyal ba'i bud shing gis kyang sreg go/ /yang na dkon mchog gsum gyi dkor rku bar byed pa de rab tu tsha ba la sogs pa'i sdug bsngal yin te/mnar med pa'i sdug bsngal dang 'dra ba'i phyir ro/ /'di ltar nyes pa 'di mthong ba na mkhas pa ste/ rig pa dang ldan pa su zhig gis de lta bu'i sdug bsngal thams cad kyi rgyu bdag nyid 'dod cing de la dga' ba'o/ / srung ba ste yongs su skyong ba dang mchod par byed pa ste rnyed pas mchod par byed/ 'di la dgra bzhin du lta bar mi byed de 'on kyang de bzhin du bde blag tu de lta bar rigs te/ sdug bsngal thams cad kyi rgyu yin pa'i phyir zhes zur gyis ston pa yin no/ /'di ltar spyo ba'i gnas la su zhig ste mkhas pa gang zhig brnyas par mi byed cing bsten par byed ces pa'i tha tshig go//de ltar bdag gi nyes pa brjod nas bdag dang gzhan gyi nyes pa dang yon tan rnams bstan par bzhed pas/ gal te byin na zhes pa la sogs pa gsungs te/ dngos po 'di la rnyed nas don du gnyer ba yang 'ongs par gyur pa na de la ci 'di sbyin pa'am 'on te spyad par bya zhes rnam par rtog pas nges par byed do//gal te sbyin na de'i tshe ci zhig spyad par bya ste/ gzhan gyis rnam pa thams cad du dbang du byas pa'i phyir ro/ /de ltar na bdag gi don du ste rang gi bde ba bsgrub pa'i phyir gzhan la rgyab kyis phyogs pas 'jug par 'dod pa rnams kyi 'gro bar gsungs pa yin te/ser sna gtso bor gyur pa'i phyir ro/ /'di las bzlog pa gsungs pa ni gal te zhes pa ste/ 'on te gal te spyad na 'o na ci zhig sbyin par bya ste de'i dus la ltos nas da ltar byung ba'i sgra'o/ /de'i phyir 'di ltar rang don la ltos pa med pa gzhan gyi bde ba bsgrub pa'i ched du zhugs pa rnams lha'i rgyal po ste lha'i dbang phyug go//de ltar gzhan la phan pa dang mi phan pa dag brjod nas gzhan dang bdag gi gnod pa dang phan pa dag gi skyon dang yon tan rnams ji ltar srid pa bstan pa'i phyir/ bdag phyir zhes pa la sogs pa gsungs te/ bdag gi bde ba yid la byed pas lus dang ngag gi chad pa rnams kyis gzhan la gnod par byas nas dmyal ba la sogs pa'i ngan 'gro rnams su sdug bsngal myong bar 'gyur ro//bzlog pas ni 'jig rten pa dang 'jig rten las 'das pa'i phun sum tshogs par 'gyur ro/ /bdag dang gzhan la sems tsam gyis kyang phan pa dang gnod par byed par 'dod pa las yon tan dang skyon gang yin pa bstan pa'i phyir/bdag nyid ces pa la sogs pa gsungs te/ mtho ba ni lang tsho dang gzugs dang nor la sogs pa rnams kyis gzhan las mchog yin no zhes mngon par nga rgyal ba gang zhig de rnams nyid mtho bar 'dod cing gzhan la ste pha rol la spo ba ste 'pho bar byas na sngar gyi las bzlog par 'gyur ro/ /bdag dang gzhan la ngag tsam du yang bde ba'i rgyu ma yin pa nyid do zhes bstan pa'i phyir/bdag gi don du zhes pa la sogs pa gsungs te/ sogs pa'i sgras ni bdag gi dngos po mi sdug pa la sogs pa dang rje dpon nyid la sogs pa zhes pa 'dir yang sogs pa'i sgras rigs la sogs pa dang / gzugs bzang ba la sogs pa'o//da ni brjod pa'i don nyid bsdus nas bstan pa'i phyir/ 'jig rten zhes pa la sogs pa gsungs te/ bdag bde bar 'dod pas kyang de ltar bsgrub pa thams cad bya ba ma yin pa la yang bya ba nyid du zhen par byed do/ /de'i phyir de'i las kyi sgrib pa las 'jig rten pha rol du mi 'dod pa'i las las byung ba'i sdug bsngal skye bar 'gyur ro//bde ba zhes te bde ba dang 'brel pa yin la/ gzhan bde 'dod ces pa ni pha rol po rnams la phan pa dang bde ba la sbyar ba'i ched du bsgrubs pa'i phyir ro/ /da ni bstan pa'i don nyid dpes mdor bsdus te bstan pa'i sgo nas bstan par bya ba'i phyir/mang du zhes pa la sogs pa gsungs te/ rgyas pas bshad pa ci zhig bya ste/ 'di nyid 'dir mdor bsdus pas gsal bar dper brjod pa rtogs par byas pa la bdag la gzhan du brje ba la 'bad par bya'o/ /'di ltar yang so so'i skye bo bdag nyid kyi dgos pa la zhugs pa'i yid can dang thub pa ste/sangs rgyas bcom ldan 'das gzhan gyi don du gzhan dbang du gyur pa'i khyad par 'di bye brag tu ltos la nges par zung shig /ci ltar lung las dpe yod pa yin par bstan pa de ltar 'di rtogs par bya ste/ de'i las bzlog pa la sems dang ldan pas kyang ci'i phyir yang spro ba med par 'gyur ro//de ltar na yang sangs rgyas don du gnyer ba'i gal te lam 'di nyid yin na yang / gang rnams 'khor ba'i bde ba tsam 'dod pa de rnams la de ji ltar bde ba'i lam yin zhe na/ bdag bde zhes pa la sogs pa gsungs te/sangs rgyas nyid de byang chub bsgrub par bya ba ste/ rdzogs par bya ba ni bdag dang gzhan du brje ba'i lam blang bar bya ba yin te/ skyes bu mchog gi don yin pas so/ /'di 'ba' zhig bdag dang gzhan du brje ba med par mi 'grub pa yin la/ 'khor ba na yang lha dang mi dag gi bde ba phun sum tshogs pa'i mtshan nyid de ji ltar 'gyur ba yin te ma yin pa nyid do/ /gang gis mi 'gyur zhe na/ bdag bde ba zhes gsungs te/ bdag gi bde ba dang gzhan gyi sdug bsngal brje bar nges par ma byas pa'i 'o//bdag gi bde ba gzhan gyi yin pa dang / gzhan gyi sdug bsngal bdag gi yin no zhes 'pho bar ma byas so zhes pa'i don to/ /ji ltar/ gal te byin na ci spyad ces/ /zhes pa la sogs pa gsungs so/ /gzhan yang bde ba gzhan yang skye ba 'di nyid la gzhan la phan btags pa med par mi 'byung ngo zhes bstan pa'i phyir 'jig rten pha rol zhes pa la sogs pa smos te/gang 'jig rten pha rol du gzhan la phan btags pa med par bde bar mi 'gyur ro zhes bya ba 'di re zhig gzhag ste ni re zhig de ltar gyur kyang ste/ de ni shin tu lkog tu gyur pa yin pa'i phyir ro//gang yang skye ba 'di nyid la mthong ba ste grub pa'i don yin la mngon par 'dod pa'i bsgrub bya'i mtshan nyid mi grub ste mi rdzogs la/ der log par rtogs pa med pa'i phyir ci zhig brjod par bya/ gang gis mi 'grub ce na/ bran g.yog ces pa la sogs pa smos te/ rje dpon ni bdag po yin la bran g.yog ni las kyi 'bras bu len pa bran gyis rjes su 'tsho ba yin te/de'i las ma byas pa na gnyi ga yang mthong ba'i chos la mi 'grub par de mthong ba nyid do/ /de yang go rims ji lta ba bzhin du de'i bsgrub par bya ba bsnyen bkur gyi bde ba la sogs pa dang de las byung ba'i zas dang gos la sogs pa yin no//'di ltar shes kyang bdag dang gzhan la yod pa'i spyod pa phyin ci log ni rmongs pa'i mthu yin no zhes bstan pa'i phyir/ mthong dang zhes bya ba la sogs pa gsungs te/ phan tshun bde ba skyed pa ni bde ba sgrub par byed do/ /ci lta bur gyur pa zhig ce na/mthong dang ma mthong bde 'grub pa ste/ mthong ba dang ma mthong ba'i 'jig rten du bde ba 'grub pa ste chen po nyid yin la/ bde ba'i dga' ston gyi dga' ba gang la yod pa de la de skad ces bya'o/ /de bor nas phan tshun du mi 'dod pa byas pas sdug bsngal ba'i phyir sdug bsngal skyed par byed pa yin pas sdug bsngal len cing 'dzin pa yin no//mi bzad pas ni dmyal ba la sogs par byas pa'i shin tu 'jigs su rung ba'i rang bzhin yin pa'i phyir ro/ /rmongs pa zhes pa ni smad pa yin te/ rmongs pa'i dbang gis phan pa dang mi phan pa ma mthong ba yin la/yang na rmongs pa zhes pa ni 'dir gtan tshigs kyi tshig yin no/ /gang gi phyir rmongs pa yin pa de'i phyir 'di rnams phyin ci log gi 'jug pa yin te/ de ltar na rmongs pa 'di nyid sems can rnams la gnod par byed pa yin no zhes bstan bcos mdzad pas snying brtse bar mdzad do//'di yid la byas pas kyang bdag tu 'dzin pa'i mngon par zhen pa mi bya'o zhes bstan pa'i phyir/ 'jig rten dag na nyer gnod ces pa la sogs pa gsungs pa la nye bar gnod pa ni yid mi bde ba'i rgyu gnod pa yin no/ /sdug bsngal ba rnams ni lus kyi tshor ba rnams so//'jigs pa ni sdug bsngal gyi rgyu rnams la skrag pa'o/ /'di thams cad kyi rgyu ni bdag tu 'dzin pa yin no/ /gang gi phyir de ltar yin pa de bas na sdug bsngal gyi rgyu yongs su bzung ba 'dis ci zhig bya ste/ dgos pa cung zad kyang yod pa ma yin no/ /de ltar na bdag tu 'dzin pa ni sdug bsngal thams cad kyi rgyu yin pa'i phyir de yod na sdug bsngal la ldog pa med do zhes 'jig rten dag na zhes pa la sogs pa smos te/bdag ni bdag tu 'dzin pa yin la bdag yongs su dor ba 'di nyid bdag tu 'dzin pa yongs su dor ba yin no/ /de ltar na bdag tu 'dzin pa yongs su ma dor ba de nyid bdag tu 'dzin pa gang yin pa nyid do//de'i phyir bdag tu 'dzin pa yongs su mdor na sdug bsngal ldog pa med do zhes rig par bya'o/ /'dir rjes mthun pa'i dpe ji ltar me ni zhes pa la sogs pa gsungs te/ gang zhig sreg pa mi 'dod cing me yongs su ma dor na de'i sreg pa ldog par yang mi 'gyur te/rgyu la nus pa de yod na 'bras bu mi skye bar rigs pa ma yin te/ de'i 'bras bu nyid yin la nyams par thal ba'i phyir dang / rnam pa thams cad du mi skye bar thal bar 'gyur ba'i phyir ro/ /de'i phyir sdug bsngal ldog par 'dod pas bdag tu 'dzin par mi bya'o//de ltar zhes pa la sogs pa skabs su bab pa mjug sdud pa ste/ gang gi phyir bdag tu 'dzin pa 'di ni bdag la sdug bsngal thams cad skyed par byed pa yin la/ gzhan la yang sdug bsngal skyed par byed pa de lta bas na bdag nyid gzhan la gtang bya ste/bdag la gzhan nyid du gzung bar bya ste bdag nyid gzhan yin la/ gzhan ni ma yin no zhes pa'am/ gzhan gyi dbang du bya'o zhes te de brten pa lhur byed pa'i phyir ro/ /de bzhin du gzhan pha rol po gzung bar bya ba ni khas blang bar bya ba yin la/ bdag bzhin du gzhan la bdag gi dngos por gzung bar bya ste/'di nyid bdag yin la bdag ni bdag ma yin no zhes so/ /'di ni 'dir bsdus pa'i don yin te/ ji ltar sngar yongs su ma shes pas bdag la yongs su ngal bas phan pa dang bde ba skyed pa'i phyir spyad la/ da ni gzhan rnams dang bdag gi lus yongs su brje ba spyad par bya ste/dper na gzhan la sngar spyad pa de bzhin du bdag la gzhan nyid du brjes pas na spyad par bya'o/ /ci ste ci ltar bdag med pas bdag la bdag nyid 'khrul pa yin pa de bzhin du gzhan la yang yin te/ de la yang de med pa'i phyir de la ji ltar na 'khrul par khyad par med pa la 'bras bu la khyad par yod ce na/'khrul par khyad par med pa la yang 'bras bu'i khyad par mthong ba ma yin nam/ dper na mar me'i 'od la nor bu zhes zhen pas de'i yul du phyin pa na nor bu dang phrad pa med la/ yang gzhan du nor bu'i 'od la nor bu mthong ngo zhes yid la byas nas de'i yul du phyin pas nor bu dang phrad par 'gyur te/de la gnyi ga la yang 'khrul ba zhes pa yod de 'khrul par khyad par med kyang 'bras bu la khyad par yod pa yin no/ /de ltar yang / mar me nor bu'i 'od dag la/ /nor bu blo yis mngon rgyug pa/ /log pa'i shes par khyad med par//ji ltar don byed la khyad yod/ /ces gang brjod pa'o/ /de ltar na yang ji srid du gang du brgyud pa yod pa de srid du shes pa dngos po dang 'brel pa yod pa der thob pa yod la/ gang du shes pa dang dngos po la brgyud pas kyang 'brel pa med pa na der thob pa yod pa ma yin la thob par bya bar thob par byas pa'i khyad par yod pa ni rigs pa nyid yin te/'dir yang de bzhin du yod pa ma yin te/ gnyi ga la yang khyad par med pa'i phyir la/ de ltar na 'di ni dpe dang mi mthun pa yin no zhe na/ de ni rigs pa ma yin te/ 'khrul par khyad par med kyang 'bras bu la khyad par mthong ste/ 'di tsam gyi khyad par gyis dper brjod pa dang mthun pa yin te/gang 'khrul pa de thams cad la 'bras bu thun mong ba ma yin no zhes khyab pa dran pa tsam 'dir mngon par 'dod pa yin no/ /dpe'i chos dang thams cad du mthun par ni sbyar bar bya ba yang ma yin no/ /de la gal te dpe dang mthun pa ma yin pa de lta na yang ci ltar yang dpe dang mthun par yod pas nyes pa med do//shin tu lkog tu gyur pa'i don la rtogs pa dang ldan pa rnams bcom ldan 'das kyi bka' nyid kyis 'jug par bya'o/ /de ltar 'dir 'khrul pa khyad par med kyang de lta bu'i 'bras bu bsgrubs pa la nus pa yod la/ 'ga' zhig gi yin gyi thams cad kyi ma yin no zhes bya ba de ni lung nyid kyis rtogs par bya ste/ rten cing 'brel par 'byung ba bsam gyis mi khyab pa'i phyir yang ngo / /ji ltar yang gzhan gyi don med par rang gi don kyang mi 'grub ste/ de ltar/ bran g.yog las byed mi btub la/ /zhes bya ba la sogs pas mthong ba'i chos kyi cung zad bstan pa yin no//'dir kun rdzob tu rgyu dang 'bras bu yod pa la ni cung zad kyang 'khrul ba yod pa ma yin te/ de ltar log pa'i kun rdzob tu byas pa dang khyad par yod pa ma yin no/ /rnal 'byor spyod pa'i gzhung gis kyang rgyu dang 'bras bu thams cad kyi tha snyad ni 'khrul pa nyid yin te/phyi rol gyi don la brten pa'i phyir dang / dmigs pa thams cad 'khrul pa yin/ /zhes pa'i tshig las so/ /de'i phyir 'khrul pa khyad par med kyang rgyu mtshan la khyad par yod pas thams cad 'tsham mo/ /de ltar na mthar thug pa'i bsam pas bskul nas rang gi sems bya ba de nyid la sbyar bar bya'o zhes/bdag ni gzhan gyi dbang gyur zhes pa la sogs pa gsungs te/ yid khyod nges par zhes pa ni 'dir the tshom dang phyin ci log tu mi bya'o zhes pa yin te/ 'di nas bzung nas khyod kyis sems can thams cad kyi dgos pa las ma gtogs par rang gzhan de rang gi dgos pa la sogs pa bsam par mi bya ste/yid kyis kyang mi bya zhes pa'i don to/ /ci'i phyir yang rang gi dgos pa yang bsam par mi bya zhe na/ gzhan ni zhes pa la sogs pa gsungs te/ rang gi don ni rang gi dgos pa'o//mig ste lta bar byed pa dang sogs pa'i sgras nyan pa la sogs pa yang yin no/ /de'i ste gzhan gyi yin la mig la sogs pas rna ba la sogs pa gzhan yang gzung ngo / /lag pa la sogs pa zhes pa 'dir yang rkang pa la sogs pa yang gzung ngo / /gang gis gzhan dang 'brel par khyed kyis nges pa na rgyu de nyid kyis sems can gtso bor byas te/sems can gzhan gyi dbang du byas nas de'i dgos pa la zhugs pa'i zhes pa'i tha tshig go/ /bdag gi lus la zhes pa ni de la rten par gyur pa yin te/ gang dang gang gos la sogs pa bde ba'i yo byad mthong zhing rtogs pa de dang de zhes zlos pa'i tshig gis khyad par gsungs pa yin te/thams cad nyid yin la cung zad tsam ni ma yin no zhes pa'i don to/ /rang gi lus las phrogs shing phral nas phan zhing 'dod pa'i dngos po sbyar ro/ /da ni dman pa la sogs pa rnams la nga rgyal la sogs pa'i sems kyi sdig pa bsal bar bzhed nas/dman sogs zhes pa la sogs pa gsungs te/ dman pa la ltos nas nga rgyal dang / mnyam pa la ltos nas 'gran pa dang / mchog la ltos nas phrag dog skye bar 'gyur ba 'di ni byis pa'i chos yin te/ gang sngar/ mtho la phrag dog mnyam la 'gran//zhes gsungs pa'o/ /'di thams cad nyon mongs pa'i rgyu yin yang bdag dang gzhan du brjes pas rnam par byang ba'i rgyu nyid du sgyur bar byed do/ /de ltar na 'di nyid rnam rtog med pa'i zhes pa la sogs pas brjod par bya ste/ rnam rtog med pa zhes pa ni the tshom med pas so//bsgom par bya ba ni 'chad par 'gyur ba'i tshul gyis so/ /phrag dog bsgom pa de nyid 'chad par 'gyur ba'i gzhung gis ston pa ni/ 'di ni zhes pa la sogs pa gsungs pa yin te/ tshul khrims dang yon tan la sogs pas bdag tu mtho ba dang gzhan ni de dang bral bas dma' ba nyid du mthong bar byas pas/bdag la 'di ni bkur byas zhes pa la sogs pa'i rnam pas phrag dog bsgom par bya'o/ /'di ni zhes pa ni bdag dang gzhan du brjes pa nyid yin te/ gzhan nyid la nga zhes bstan pa yin no/ /'chad par 'gyur ba thams cad la gzhan dang bdag tu brjes nas yod pa la sbyar bar bya'o//bstod pa zhes pa ni yon tan bsgrags pa'i sgo nas bsngags pa'o/ /bdag la smod pa zhes pa ni dman pa nyid kyi sgo nas smad par bya ba'o/ /las rnams bdag gis byed pa ni dman pa'i las khur khyer ba la sogs pa byed pa'o//bde bar gnas pa zhes pa ni sems bde bar gnas pa'ang yin no/ /'di 'jig rten la che bar grags pa ni 'dis chen po nyid kyang goms shing 'bad pas bsgrub par bya ba yin te/ de bzhin du gzhan gyis kyang khyod dang 'dra bar rnyed dka' ba ma yin no/ /gong ma gong ma mthong bas na khyed chen po phul du byung bar yang gnas pa ma yin te/tshu rol mthong ba thams cad dman pa yin pa'i phyir ro/ /de ltar na ji ltar bdag kyang yon tan chen po dang ldan pa nyid du 'gyur ba de ltar bdag gis bya ste/ grags pa'i sgras ni 'di gnyi ga la yang bya rog gi lta stangs kyis sbyar bar bstan pa yin no//de ltar gyur na yang bdag gi yon tan med pa ci zhig bya ste/ yon tan dang ldan pa nyid du bya'o zhes kha bskang ngo / /dgos pa cung zad kyang med pas bdag nyid la yon tan dang ldan pa nyid du nges par byas pa 'di nyid kyis mchog ste/ gang gzhan su la yang 'dir yon tan gyi cha shas nyid kyang yod pa ma yin la/gang gi phyir bdag yon tan thams cad ldan pa yin te/ sems can gzhan la ni yod pa ma yin zhing rnam pa thams cad du yon tan dang ldan pa yang yin te/ lta bas phongs pas kyang yon tan thob par 'gyur ro zhes pa'i tshig las so/ /gzhan yang mthon po dang dma' ba dag ni ltos pas byas pa yin te/'di rnams las bdag nyid mthon por byas pa'i skyes bu dam pa de ni yod pa ma yin la/ bdag las shin tu ngan pa'i dman pa yang yod pa yin zhing / gang la ltos nas bdag kyang mchog yin te gang rnams las bdag nyid dam pa'o//de ltar na thams cad las bdag ni dman pa ma yin te/ 'di ni thams cad las mtho ba yang ma yin no/ /de ltar na yang khyed ni tshul khrims la sogs pas phongs pas sdig pa dang bcas pa'i rang bzhin yin pa'i phyir dman pa yin la/ bdag la ni de yod pa ma yin pas dman pa ma yin no zhe na/tshul khrims lta bas zhes pa la sogs pa gsungs pa la/ tshul khrims kyis phongs pa ni so sor thar pa'i sdom pa blangs pa nyams pa yin la lta bas phongs pa ni 'jig tshogs la lta ba la sogs pa rnam pa lta ba lnga po yin te de nyid phongs pa yin pa'am/de rnams kyis phongs par byas pa yin te/ sogs pa'i sgras ni spyod pas phongs pa la sogs pa yang gzung ngo / /'di thams cad nyon mongs pa rnams kyi stobs kyis bdag nyid kyi 'dod pa'i dbang du gyur pa ma yin no/ /de la gal te khyed snying rje dang ldan pa yin na de'i tshe bdag gso bar bya ba yin te khyed la gang dang gang du gso ba'i nus pa yod pa ci lta ba bzhin du ste/gang gi nyes pa dang bral bar bsgrub par bya ba'i blo yod na zhes pa'i don to/ /yang na nus pa ci lta bar bdag gis gnod kyang dang du blang ngo zhes phyi ma dang 'brel te/ brtul zhugs dang nges pa'i dka' ba'i bya ba la sogs pa'i mtshan nyid kyis sdug bsngal ba'o//gal te khyed la bdag gis gso ba'i blo cung zad yod na de yang bdag gir khas blang bar bya'o/ /de ltar gyur na yang gcig tu khyod la 'di gso ba'i nus pa yod pa ma yin te/ bsgrub bya'i nyes pa dang ldan pa'i phyir 'di rigs so zhe na/ 'on te zhes pa la sogs pa gsungs te/ 'on te zhes pa ni rnam pa gzhan dgod pa yin te/gal te 'di la bdag gso ba'i nus pa med na de rgyu cis bdag ni mtho la 'di ni dma' ba yin no zhes 'di nus pa med par yang bdag la brnyas par byed/ 'on te gal te yang gso ba'i nus pa dang bral ba de lta na yang gzhan gyi yon tan de yis bdag la ci zhig bya ste/dgos pa cung zad kyang med la rnam pa thams cad du nye bar mkho ba dang bral ba'i phyir ro/ /'di nyid 'ba' zhig gi dbang du byas te/ gang las bdag nyid de rang nyid kyi yon tan dang ldan pa 'di yin la/ de las yon tan gyi cha cung zad kyang bdag la yod pa ma yin no/ /de ltar gyur na yang snying rje'i yon tan dang ldan pas de las gzhan la yang de'i yon tan nye bar mkho ba yin no zhe na/snying rje yang dngos po la mthong ba ma yin no zhes bstan pa'i phyir/ ngan 'gro zhes pa la sogs pa gsungs te/ gang zhig sdig pa byed pa de ngan 'gror nges pa'i phyir ngan 'gro'i khar gnas par brjod do//yang na ngan 'gror gnas pas 'dir kha zhes pa dang 'brel to/ /yang na ngan 'gro ni dman pa'am mkho ba'i yo byad dang bral ba der gnas pa yin no/ /gdug pa'i khar gnas zhes pa la gdug pa ni sbrul dang gcan gzan gtum po la yang brjod do/ /de rnams kyi khar gnas pa'i skye bo la snying rje ba'i yid kyis snying rje ma yin te/de sdug bsngal dang bral bar 'bad par byed pa ma yin no/ /de tsam 'ba' zhig ni yod pa ma yin la khyad par 'di yang yin te/ gang yon tan rlom pas te yon tan lhag pa yin no zhes nam yang mkhas pa rnams la rgyal bar bsngo ste rgyal bar 'dod do//de ltar re zhig mtho la phrag dog bshad nas/ mnyam pa la brjod pa'i phyir bdag dang mnyam pa la zhes pa la sogs pa gsungs te/ gzhan dang lhan cig tu yon tan la sogs pas bdag mnyam par bltas shing gsal bar byas nas/ gang de las lhag par bya ba'i phyir te/gzhan las yon tan rnams kyis bdag lhag par bya ba'i phyir 'bad par bya'o/ /gal te rnyed pa dang bkur sti 'di la lhag pa mthong na de'i tshe 'di las phrogs nas gzung bar bya'o/ /de ltar na'ang mi ster na rtsod pa dang mtshang 'bru ba la sogs pas kyang bsgrub par bya ste/ bdag gi rnyed pa dang bkur sti zhes zlas dbye ba yin pa'i phyir ma ning gi rtags so//bdag gi zhes pa ni rang gi gang yin pa ste/ ji lta 'di bzung nas 'dug ces pa'i don to/ /gzhan yang gal te rnyed pa la sogs pa'i yon tan mthong ba rnams kyis 'di mchod pa de ltar bdag gis bya'o/ /gang gis rnyed pa la sogs pa'i rgyu 'di 'grib par 'gyur bar bya'o zhes/yang ni bdag gi yon tan zhes pa la sogs pa gsungs te/ yang ni zhes pa ni brtag pa bzung ba'i tshig dag go/ /ji ltar bdag gi yon tan gsal bar 'gyur ba de ltar bdag gis brtsam par bya ste/ bdag gi nus pa brtan par bya zhe na/bdag gi skyon yang zhes pa la sogs pa gsungs te/ yang ni sngar bzhin no/ /'dis kyang cir 'gyur na bdag ni mchod 'gyur 'di la min par 'gyur ro/ /des kyang cir 'gyur zhe na zhes dogs nas bdag deng rnyed pa zhes pa la sogs pa gsungs te/gang gis bdag ni bkur 'gyur 'di la min te/ shin tu legs par rnyed pa des bdag gis thob ces bdag nyid la bstod pa ston par byed de bsgrub bya grub pa'i phyir ro/ /slar yang shin tu dga' ba gsal bar bya ba'i phyir/ 'di ni ma rungs zhes pa la sogs pa gsungs te/ rgyas pa'i mig dang ldan pa'i gdong dang yid rab tu dga' bar re zhig blta'o/ /de ltar rnyed pa 'dod pas ma rungs par byas pa rnyed pa bkur sti las phyi rol du bya ste bsal bar bya'o zhes pa'i don to/ /yun ring po ni dus shin tu ring bar ro/ /nam yang 'di la brten nas kho bo cag la 'di ltar dga' ba skye bar ma gyur pa'o//'dis kyang ma rungs par byas pa zhes bstan pa'i phyir 'gro ba kun gyis zhes pa la sogs pa gsungs te/ de'i nyes pa brjod pas gzhad gad du byed pa'o/ /de der zhes pa ni phyogs thams cad du'o/ /'dir yang blta zhes pa dang 'brel to/ /da ni lhag pa thob par gyur pas sems rangs pas bdag nyid dman pa nyid du bsgom par bya'o zhes bstan pa'i phyir/nyon mongs 'di yang zhes pa la sogs pa gsungs te/ 'di yang ni de ltar spyo ba'i gnas thams cad du dman pa la 'dug pa yang yin te/ de nyid kyi phyir na nyon mongs pa yin la bdag dang lhan cig tu 'gran te mnyam por byed par grags so//grags zhes pa ni mi 'dod pa dang 'di mi rigs zhes pa nyid do/ /ji ltar mi rigs she na/ 'di bdag ces pa la sogs pa gsungs te/ thos pas ni bstan bcos la sogs pa rnams thos pa yin la/ re zhig 'di dang bdag mnyam mam ci zhes te/shes rab ni blo khyad par du gyur pa yin la/ gzugs rigs nor gyis kyang mnyam mam zhes pa'i tha tshig go/ /de ltar nyid du skye bo rnams kyis kyang bdag gi yon tan phyogs bcur bsgrags pa thos shing mnyan nas spu ldang ba skyes par gyur pa ste lus la ba spu ldang ba dang ldan pa'o//dga' ba ni yid rab tu dga' ba dang ldan zhing yongs su longs spyod pa ste bde ba'i dga' ston no/ /'on te brgya la 'ga' zhig nas 'dis bag med pas rnyed par gyur na de'i tshe ji ltar zhe na/ gal te 'di la rnyed yod kyang / /zhes pa la sogs pa gsungs te/ de ltar 'di'i rnyed pa la bar du gcad pa'i phyir 'bad par byas kyang gal te ci ltar yang 'di la rnyed pa yod na de'i tshe 'di'i ske la rdog pas mnan nas blang bar bya ste/bdag gis 'di la stobs kyis blang ngo / /ci ste rnam pa thams cad du 'di'i srog dang bral bar bya ba yin nam zhe na/ nga'i las ni zhes pa la sogs pa gsungs te/'tsho ba tsam zhig ni re zhig srog 'dzin pa de tsam 'di la byin nas gzhan thams cad bdag gis yongs su gzung bar bya'o/ /de lta na yang nam zhig nga'i las ni byed ce na zhes te/ gal te 'di kho bo'i bka' nyan pa la sbyor na'am ma smras kyang rjes su mthun par byed na de'i tshe 'di la 'tsho ba tsam zhig sbyin par bya ste/gzhan du ni ma yin no/ /yang 'di ji ltar na dman pa'i gnas skabs su khyer bar byed ce na/ gang 'di bde las zhes pa la sogs pa gsungs te/ gang zhes pa ni gang las te bde ba las yin la/ nyams par bya ba ni bral bar bya'o/ /'di tsam gyis gtong bar bya ba ni ma yin te 'on kyang bdag gis gnod la rtag tu sbyar bar bya ste dus thams cad du bdag gi sdug bsngal gyi khur 'di'i spyo bar yang dag par bzhag ste de'i phyir 'di la de ltar bya'o//yang ci'i phyir 'di ltar khyod 'di la zhe sdang bar byed ce na/ 'di yis zhes pa la sogs pa gsungs te/ sdang ba'i sems can 'dis sngar 'khor ba thams cad du bdag la lan grangs brgya phrag du mar gnod pa byas pa yin te/ bcing ba dang bsad pa dang brdeg pa la sogs pa rnams kyis sdug bsngal bar byas pa yin no/ /da ni sdug bsngal 'di bzod par ma nus te brgya la 'di las sems ldog par dogs nas thabs sla ba'i rim pas de nyid la sbyar bar bya ba'i ched du nye bar ston pa ni yid khyod ces pa la sogs pa gsungs te/thog ma med pa'i 'khor bar gzhal bar mi nus pa'i bskal par rang gi don byed 'dod pas te goms pas ngal ba chen pos dub par gyur pas sdug bsngal chen po dus yun ring por myong bar gyur pa'i mtshan nyid kyis sdug bsngal nyid bsgrubs pa yin te/las de dang de las dgos pa cung zad kyang thob pa ma yin no/ /byung bar gyur pa de dang de re zhig bzlog par bya ba ma yin par gyur na yang da lta 'ong ba la ci ltar rigs she na/ de ltar bdag gis gsol pa 'debs pa zhes bya ba la sogs pa gsungs te/gsol ba 'debs pa ni bsnyen bkur sngon du song ba'i tshig brjod pa nyid kyis te/ ji ltar sngar rang nyid kyi las de dang de la zhugs pa de ltar bdag dang gzhan du brje ba la goms pa 'di la yang 'jug par gyis shig /dpyod pa med pa zhes bya ba shin tu lkog tu gyur pa'i don la dpyod pa dang bral ba'i phyir ro//ci ste bsgrub bya'i don rtogs pa med par ci ltar 'di la 'jug pa nyid du 'gyur zhe na/ thub pa'i bka' zhes pa la sogs pa gsungs te/ phyis ni dus phyis nas rtogs par 'gyur te/ de'i ste bdag gi tshig gis zhugs pa 'am bdag dang gzhan du brje ba'i yon tan las so//de khyod kyis nyams su blangs nas der 'gyur ro/ /ji ltar shes she na/ thub pa'i bka' ni yang dag pa yin pa ste/ yang dag phyin ci ma log pa rtogs par byed pa yin te/ gang gi phyir bcom ldan 'das kyi bka' yin pa de'i phyir shes so//de ltar gyur na yang bdag gis las 'di du mar byas kyang de ltar na yang khyad par cung zad kyang ma rtogs so zhes dogs nas gal te khyod kyis zhes pa la sogs pa gsungs te/ khyod ni bden par smra ba ma yin te gzhan du gal te las 'di sngar byas nas de tshe khyed la las kyi 'bras bu yang 'byung bar 'gyur ro//de la sangs rgyas kyi phun sum tshogs pa'i bde ba sangs rgyas nyid ma yin pa sangs rgyas nyid kyi bde ba bor nas srid par mi 'gyur te/ gnas skabs ngan pa 'di'i skabs mi srid do/ /las de ma byas na 'bras bu yang skye bar 'gyur ba ma yin no/ /da ni mjug bsdu ba'i tshul gyis rang gi sems de nyid la bstan par bya ba'i phyir/de bas zhes pa la sogs pa gsungs te/ gang las 'di lta bu'i 'bras bu 'di goms pa las skye bar 'gyur ba de'i phyir byas shing bsgrubs pa de ltar ro/ /de'i phyir brjod pa'i 'bras bu 'dod pas de'i bya ba la skyo ba bsal nas rang bzhin nyams su blang bar bya'o zhes bstan pa'i phyir gzhan gyi zhes pa la sogs pa gsungs so//sems can gzhan gyi rtog mkhan zhes pa la sogs pa gsungs te/ rab tu sbas nas de'i dgos par byed pa yin no/ /da ni bdag dang gzhan du brje ba bor nas slar yang phrag dog bsgom pa la rang gi sems sbyang ba'i phyir/bdag skyid pa la sogs pa gsungs te/ de bas gnas pa'i phyir skyid pa yin la sdug bsngal gyi gnas pas mi skyid pa yin no/ /de ltar phrag dog gyis shig ces rang gi sems la 'di ltar gsungs pa/ bdag ni zhes pa la sogs pa gsungs te/bdag ni zhes pa ni bdag gi lus la'o/ /gang tshe zhes pa ni dus nam zhig na'o/ /ci byed ces pa ni rang gi don nam/ gzhan gyi don nam/ dam pa'i las sam/ dam pa ma yin pa'i las sam/ tha mal pa'i las ci byed cing gnas zhes so/ /de ltar 'di'i lus la glags brtags te btsal lo//'on te gang gi tshe 'di la glags ma rnyed na de'i tshe ji ltar bya zhe na/ gzhan gyi zhes pa la sogs pa gsungs pa la/ gzhan gyis byas pa'i nyes pa 'di yang khyod nyid kyi nyes par spyad pa yin no zhes gang gis 'di'i spyod pa yin no zhes de ltar 'di nyid kyi lus kyi mgo la bsgyur bar byos shig /yang na gzhan gyis byas pa'i nyes pa yang 'di nyid zhes bya ba ni nyes par spyod pa yang 'di nyid kyi mgo bo la bsgyur bar byos shig ces de'i las kyi 'bras bu'i cha nyid du gyis shig pa'o/ /gang / 'gro ba'i sdug bsngal gang ci'ang rung / /de kun bdag la smin gyur cig / byang chub sems dpa'i dge 'dun gyis/ /'gro ba bde la gnas par shog /ces 'chad par 'gyur ro/ /gang gi tshe yang nyes pa chung ngu yang 'di la mthong na de'i tshe sba bar mi bya'o zhes bdag gis nyes pa zhes bya ba la sogs pa gsungs te/ chung ngu ste lus 'di'i shin tu phra ba'i yang nyes pa rab tu shogs zhes te mngon par gyis shig pa'o//thub pa chen po ni sangs rgyas bcom ldan 'das te de'i spyan sngar ro/ /gang gis 'di 'jigs pas slar yang mi byed pa'i sdom pa nyid kyis gnas so/ /gal te 'di'i snyan pa gsal bar gyur pa mthong na de la gsungs pa/ gzhan gyi zhes pa la sogs pa ste/'di'i grags pa gzhan rnams kyi de bas lhag pa'i grags pa gsal bar dri ma can du gyis shig ces de rnyog pa dang bcas par gyis shig pa dang sba bar gyis shig ces pa'i don to/ /'di la snying rje'i sems cung zad tsam yang bskyed par mi bya'o zhes bdag ni bran gyis zhes pa la sogs pa gsungs te/nges par dman pa'i bran gyi tha ma ltar gzhan gyi dgos pa sems can gyi don rnams la 'di ltar bkol bar gyis shig ste khur khyer ba la sbyor ba'o/ /gal te 'di la yon tan gyi cha cung zad mthong ba de'i tshe ci bstod pa bya ba'am zhe na/'di ni skyon can zhes pa la sogs pa gsungs te/ brgya la yon tan lhag pa lhan cig skyes pa yod na yang 'di ni bstod par bya ba ma yin pa nyid do/ /ci'i phyir zhe na/ gang gi phyir 'di ni nyes pa du ma'i bdag nyid yin pa'i phyir ro/ /gzhan yang yon tan rtogs pa'i sgo nas bstod par bya bar 'gyur na 'di nyid rtsa ba dang bcas pa nyams pa yin no zhes 'di'i yon tan zhes bya ba la sogs pa gsungs so//'dir yang mang du brjod pas ci zhig bya ste/ mdor na 'di la chad pa'i las bya'o zhes bstan pa'i phyir/ mdor na zhes bya ba la sogs pa gsungs te/ gnod pa zhes pa ni sdug bsngal ba'am gnod pa byed pa'o//'di ltar gal te yang bdag gis sdug bsngal gyi khur khyer bar mi nus so zhes smras na de'i tshe 'dir ci ltar 'jug par bya zhe na/ gang gis ngag rtsub gyur tshul du/ /zhes pa la sogs pa gsungs te/ gang gis ngag rtsub par 'gyur ba ni phod pa che ba yin te dang po nyid du 'di la de ltar skabs dbye bar mi bya'o//'on kyang gzhag par bya ste gzung bar bya'o/ /bag ma gsar ba'i 'jug pa bzhin du'o/ /de nyid gsungs pa/ 'jigs dang zhes te nyams pa las skrag pa'o/ /ngo tsha zhes pa ni bya ba ma yin pa la ngo tsha ba'o/ /thams cad du mi mthun pa la 'jug pa las bzlog pa la brtson par bya la/de ltar gnas pa na yang rnam pa thams cad lcags kyu med par mi bya'o zhes bstan pa'i phyir/ 'di ltar gyis shig ces pa la sogs pa gsungs te/ 'di ltar bka' nyan pa la 'jug par byas nas lus 'di dbang du gyur par bya ste/ rang la rag las pas gzhag par bya ste/ rta dul ba bzhin no/ 'on te 'di ltar dbang du ma gyur na de'i chad pas gcad par bya ste/ de las 'das na ste gal te khyod bka' las 'das pas 'jug na de'i tshe chad pas gcad par bya ste spyo bar bya ba'am/ tshar gcad par bya'o/ /da ni bdag gi sems dang bdag tha dad pa bzhin du yongs su brtags nas brtan pas bsdu ba'i phyir gsungs pa/'on te de ltar zhes pa la sogs pa ste/ gal te yang khyod 'di la rab tu zhugs par gyur te/ brgya la nyams par gyur na de'i tshe nyes pa des khyod nyid tshar gcad par bya'o/ /ci'i phyir zhe na/ nyes pa thams cad khyod la brten pa yin te/rang nyid sems lus med par gyur pa yang khyod nyid kyi bsam pa nyid kyis 'di thams cad du 'jug par byed de/ des gang 'ga' zhig tu ngan g.yo can du rten par byed do/ /der khyod kyis drang po ma yin no zhes bsam pa'o/ /de nas mi bzod pas rang gi sems nyid la bsdigs pa khyod kyis zhes pa la sogs pa gsungs te/bsdigs pa 'di ni 'jig rten pa'i brjod pa'o/ /gang du 'gro ba kho bos blta/ /zhes pa ni de ni khyod kyis gang du 'bros par byed ces so/ /ji ltar khyod kyis mi shes pa na glags rnyed pa de lta ni nus pa ma yin te/ da ni rang bzhin yongs su shes pas bdag nyid stobs dang ldan pa yin te/de nyid gsungs pa/ dregs pa thams cad gzhom bya ste/ /zhes pa ni khyod kyi srog blang bar bya'o/ /'on te 'di ltar khyod kyis sngar bzhin du bdag la da ltar yang stobs yod do zhes sems pa bsam par mi bya ste/ khyod kyis gang du kho bo brlag pa ste/lam ma yin par brid pa ni gang gi phyir sngon gyi dus yun ring po gzhan yin la/ da ni dus 'di gzhan yin te/ sngon dang 'dra ba ma yin no/ /da ni sngon gyi dus ma yin no zhes ci ltar shes par bya zhe na/ da dung zhes pa la sogs pa gsungs te/ sngar ni rang gi don la zhes pa'i sems nyid kyis khyod kyis kho bo bslus pa yin la/de yang bdag la da lta yang yod do zhes yid la ma byed cig /'di ltar shes par byas nas sems can mang po'i don la rab tu zhugs shig /skyo bar sems te dka' ba'i blo bor cig pa'o/ /yang na sems can gyi don gyi khur khyer bar sems pa na/sdug bsngal ba'i blos dor bar ma byed cig/ /ci'i phyir zhe na/ bdag gis gzhan la khyod btsongs kyis/ /zhes te/ sngar nyid du bdag dang gzhan du yongs su brjes pa na/ khyod bdag gis gzhan la rag las pa la sbyar ba yin no/ /de lta na yang bdag nyes pa ma byas pa la yang khyed yongs su ma mgu ba gang gis yongs su gtang ba'i blo skyed ces dogs nas/gal te bag med ces pa la sogs pa gsungs te/ gal te yang ji ltar bag med par gyur te/ blo stor bas bag med pa'am dran pa nyams te sems can rnams la sems khyod ma byin te/rang nyid kyir byas na de'i tshe khyod kyis kho bo dmyal ba'i srung ma rnams te/ dmyal ba'i sdug bsngal skyed pa la sbyar ba gshin rje'i skyes bu rnams la byin par nges te the tshom yod pa ma yin no/ /de ltar rjes su mthun par byas kyang khyod rjes su mi mthun pa yin te/ de'i phyir khyed la gtong ba'i blor 'gyur ro//'on te gang gis na de ltar rjod par byed pa brgya la de ltar gyur tam zhe na/ de ltar zhes pa la sogs pa gsungs te/ de ltar zhes pa ni khyod la rjes su mthun pa spyad pa las te/ lan grangs du mar khyod kyis kho bo sdug bsngal 'ba' zhig gi snod du byas pa yin la/ yun ring ba ni dus ring por ro//ci zhig byas nas she na/ dmyal ba rnams la byin nas so/ /khon rnams te sngar gyi dgra ste dgra nyid du gyur pa rnams yin te/ da ni de rnams dran par byas la gzhom par bya ste/ rtsa ba dang bcas pa brlag par bya'o/ /rang gi don te khol dang bran nyid yin te/ dus thams cad du de'i dbang du gyur pa'i phyir ro//de ltar na rang gi sems de la drag tu bsnun nas slar yang zhi ba'i rim pas bslab par bya ba'i phyir de'i tshe bdag ni zhes pa la sogs pa gsungs te/ gal te khyod bdag nyid yun ring po nges par legs pa 'dod pa'i yin na de'i tshe bdag nyid la dga' bar mi bya ste spang bar bya'o zhes pa'i tha tshig ste/gzhan du na bdag nyid la dga' ba nyid du byas par mi 'gyur ro/ /gal te yang bdag nyid la khyod kyis 'jigs pa thams cad las bsrung ba'i blo yod na de'i tshe lus 'di bsrung bar rigs so zhes rang gi sems la brjod do/ /ci ste de lta na yang 'di la rjes su gzung bar bya bar rigs pa nyid do zhe na/ci lta ji ltar zhes pa la sogs pa gsungs te/ 'di ni zhes pa ni rang bzhin phyin ci log tu gyur pa'i lus so/ /ci lta ci ltar te rnam pa gang dang gang gis ci srid de srid du de dang de'i bde ba'i yo byad bsgrubs pas 'phel bar byed par 'dod pa ni yongs su skyong bar byed pa yin no//de lta de ltar shin tu ni rang bzhin shin tu gzhon par gyur pas ltung bar 'gyur ba nyid de/ rnam pa thams cad du las thams cad la las su mi rung bar 'gyur ro/ /ci ste gal te lhung na yang lhung du chug mod nyams pa ci yod de/ de ltar na yang mngon par 'dod pa thams cad du 'gyur ba las ldog par 'gyur ro zhe na/'di ni de ltar zhes pa la sogs pa gsungs te/ 'di zhes pa ni lus yin la/ de ltar zhes pa ni bde ba 'dod pa ste ltung bar gyur pa nas gzhi 'di dag thams cad ni 'dzam gling 'di thams cad do/ /'dod pa chog pa med pa ni 'dod pa ste mngon par 'dod pa yin la/chog par 'gyur ba'i nus pa dang ldan pa ma yin te/ dper na rgyal po nga las nu 'dzam bu'i gling gi bdag por gyur pas ngoms par ma gyur nas yang gling bzhi'i bdag po thob par gyur cing brgya byin gyi stan phyed thob pa las kyang chog pa med pa bzhin no/ /gang gi phyir de ltar su zhig ste dgang dka' ba'i lus 'di 'dod pa byed par 'gyur te ma yin no//ji ltar shin tu thal ches pa ni mi rigs la/ cung zad tsam gyi skabs yin pa la nyes pa ci yod ce na/ mi nus 'dod la zhen pa la sogs pa gsungs te/ rnyed par dka' zhing mi nus par 'dod de mngon par 'dod na nyon mongs pa ste ma lus pa'i mngon par zhen pa dang /de thob pa'i gegs byed pa la zhe sdang ba dang / bsam pa nyams pa yang 'byung bar 'gyur te/ de las yid mi bde bar 'gyur ram bsam pa ni 'di yin te/ cung zad tsam la rjes su zhugs nas slar yang gong nas gong du lhag pa mngon par 'dod pa la 'jug pas bzlog par mi nus pa'i 'dod pa 'phel ba yang yin te/sred pa la nges pa med pa'i phyir 'dod pa 'di tsam zhes pa med par 'gyur ro/ /slar yang gang zhig dang po nyid du rnam pa thams cad du yul thams cad la skabs med par byas na de'i phun sum tshogs pa ma zhum pa ma yin te/ yi gar mi 'ong ba skyed par byed pa'i phyir dang /de la sems 'jug par mi byed pa'i phyir ro/ /gang gi phyir cung zad la yang 'dod pas tshim pa med pa nyid yin pa de lta bas na lus kyi 'dod pa 'phel ba'i phyir skabs dbye bar mi bya'o ste/ ci ste yul dam pa de lta bu las sems ji ltar bzlog par mi nus she na/gang gis yid 'ong zhes pa la sogs pa gsungs te/ sngar 'di nyid du brjod pa/ rang nyid kyis ni 'gro nyid la/ /brten par byas te rab tu rtogs/ /zhes gang gsungs pa'o/ /gzhan yang gang 'dod par bya ba nyid mi 'dzin pa de nyid ni dngos po bzang po yin te/ gzhan du na sdug bsngal gyi phung po chen po nyid 'phel bar 'gyur ro/ /gzhan yang rgyu mtshan med pa nyid du mi bden pa la mngon par zhen pas bdag gis sdug bsngal bsag par bya ba yin zhes khyod rang nyid kyis dpyad par bya'o zhes/ tha mar thal ba'i zhes pa la sogs pa gsungs te/ tha mar thal pa'i gnas skabs yin la/mthar gtugs pa ni de la thug pa yin te/ 'di gang gi yin pa de la de skad ces bya'o/ /shi bar gyur pa na lus po 'di'i mthar thug pa ni tha mar thal ba yin te/ de las gzhan pa'i rten yod pa ma yin no zhes dgongs pa'o/ /mi gtsang lus 'di lus kyi rnam pa gzung ba yin la/mi bzad pa ni 'jigs su rung ba'am 'jigs par byed pa yin te/ 'jigs pa thams cad kyi rgyu yin pa'i phyir ro/ /mi g.yo ba ni bong ba dang shing lta bu yin no/ /rang nyid byed pa med pa yin na 'di 'gro ba dang 'chag pa la sogs par cir 'gyur zhe na/ gzhan gyis bskyod pa yin te/gzhan yid kyis byed pas 'di bya ba dang ldan pa bzhin du dmigs pa yin no/ /zhen pa'i rgyu mtshan med pa'i phyir rgyu cis lus po 'di la bdag tu 'dzin te rjes su 'jug pa skye bar 'gyur/ gzhan 'di yang khyod kyis dpyad par bya'o zhes bstan pa'i phyir/ ci'i phyir zhes pa la sogs pa gsungs te/'khrul 'khor 'di ste lus kyi bdag nyid kyis so/ /gson pa'am shi ba yang rung ste/ bdag la ci zhig bya ste/ bdag las tha dad pa yin pa'i phyir dang / 'dir rang nyid la bya ba med pa'i phyir ro/ /de'i phyir bong ba la sogs pa dang khyad par ci yod do zhes ston par byed do//'on te bdag tu 'dzin pa'i gzhi nyid kyis khyad yod do zhe na/ 'dir gsungs pa/ kyi hud nga rgyal sel mi byed de/ 'di ltar brtags na yang yun ring po nas 'dris par gyur pa'i phyir ro/ khyod ji ltar 'jigs par mi byed cing ji ltar yang brlag par mi byed ces pa'i tha tshig go//de nyid bstan par 'dod nas/ lus zhes pa la sogs pa gsungs te/ 'di ni bdag gi lus yin no zhes/ bdag tu 'dzin pa'i mngon par zhen pas khyod kyi rgyu mtshan med pa nyid du sdug bsngal gyi phung po nga rgyal la sogs par byed/ yang ci'i phyir 'di ltar brjod ce na/ rjes su chags pa dang zhes pa la sogs pa gsungs te/ bong ba dang 'dra ba'i lus po 'di la rgyu mtshan med par zhe sdang ste khong khro ba dang / rjes su chags pa ste mngon par zhen pas ci zhig bya ste cung zad kyang ma yin no/ /ci'i phyir yang 'di ltar yin zhe na/ bdag gis zhes pa la sogs pa gsungs te/'di ltar thams cad rjes su gzung ba'i rnam pas bskyangs shing gsos pa'am/ bya rgod dang ce spyang la sogs pa rnams kyis za ba na yang phan pa med pa de la chags par byed/ gnod par byed pa'i bya rgod la sogs pa rnams la yang gang la zhe sdang ba med pa'o/ /de lta bu shing dang mtshungs pa sems med pa de nyid la chags par byed/shing dang mtshungs pa nyid du bstan nas/ de ma bzung bas 'bras bu dang bcas par bstan pa'i phyir/ gang zhig ces pa la sogs pa gsungs te/ lus bdag gir ma byas shing spangs pa las khro ba ste zhe sdang ba 'di la med pa dang gang la yang mchod pa ste bsnyen bkur byas pas mgu ba ste/rab tu dga' ba bdag la skye bar 'gyur ba ma yin te/ de nyid la sems med pa'i phyir mi shes pa yin te/ rtogs pa ma yin no/ /de la brten nas khong khro ba dang rjes su chags pa'i bdag nyid kyis ngal zhing dub pas gang la byas pas bdag la cung zad kyang dgos pa med do zhes pa'i don to//de ltar khyed kyis bslab par bya'o/ /de ltar rang gi sems rtogs par byas nas bdag dang gzhan du brje ba'i rang bzhin mjug bsdus te bstan pa'i phyir/ gang zhig lus 'di zhes pa la sogs pa gsungs te/ 'di zhes pa ni bdag gi ste/'ga' zhig gis lus 'dod pa ste phan pa dang bde ba bsgrub par 'dod pa'am/ yid bde bar mthong ba'o/ /de yang bdag gi bshes yin te sdug cing chags pa'i yul yin no zhes pa'i tha tshig go/ /yang gi sgras ni bdag nyid 'ba' zhig gi ma yin no//kho bo zhes pa ni rigs pas brtags na mi bden pa nyid do/ /de lta yin du chug na yang gzhan dang yang thun mong yin no zhes rigs pa nye bar bstan pa'i phyir/ thams cad rang gi lus zhes pa la sogs pa gsungs te/ gal te rang gi lus la rjes su chags pa'i rgyu mtshan gyis zhan pa gzhan te de las gzhan pa'i sems can yang rang gi lus 'dod do//brjod pa'i rim pa rgyu mtshan la khyad par med pas de rnams la bdag ci'i phyir mi dga' ste/ bdag la ni rgyu'i khyad par sngar nyid du bsal ba'i phyir de rnams la yang bdag dga' bar rigs so zhes pa'i don to/ /da ni bstan pa'i don mjug bsdu ba'i phyir/de bas zhes pa la sogs pa gsungs te/ gang gi phyir bdag la zhen pa ma spangs par 'gro ba'i don rdzogs par byed mi nus pa'i spobs pa med pa thams cad kyi thams cad la ltos pa spangs pas so/ /'gro la phan pa zhes pa ni sems can thams cad la phan pa bsgrub pa'i don du gang las 'gro ba la phan pa dang ldan pa des na lus po 'di la nyes pa mang yang ste/nyes pa du ma'i gnas yin yang las byed pa'i spyad bzhin du gzung bar bya ste/ gzhag par bya ba'am bsrung bar bya ste dgos pa'i don la mkho ba'i dngos po bzhin du'o/ /gang gsungs pa/ bsam pa gzhan ni kun btang ste//bdag gi sems ni mchog gcig pus/ /zhes pa la sogs pa de mjug bsdu ba'i phyir des na zhes pa la sogs pa gsungs te/ gang la sems mnyam par gzhag pa med na nyon mongs pa spong bar mi 'gyur ba des na 'jig rten gyi spyod pas chog ste dgos pa cung zad kyang yod pa ma yin no//'jig rten gyi spyod pa ni don med pa'i rgyu yin pa'i phyir ro/ /de'i phyir mkhas pa ste de kho na nyid mkhyen pa'i sangs rgyas dang byang chub sems dpa' rnams dang / de las gzhan de'i bstan pa la gnas pa rnams kyi rjes su bsnyegs te de'i bslab pa la rjes su slob po/ /ji ltar zhe na/bag yod gtam ni dran byas nas te/ le'u bzhi pa dang bdun par brjod pa dang / gzhan yang bslab pa kun las btus pa la sogs par brjod pa'o/ /bag med pa ni lus dang sems kyi rnam par g.yeng ba yin la de las bzlog pa ni bag yod pa yin te/ de la bag yod pa'i don du bag med pa bzlog pa'i gtam ste/de ston par byed pa'i gzhung dran par byas nas te sems la bzhag nas ji ltar brtsams pa'i don la 'khrul par mi 'gyur te/ gnyid dang rmugs pa zlog par byed la/ rmugs pa ni lus po zhum pa yin te/ le lo zhes pa'i tha tshig go/ /gnyid ni gnyid kyis sems dman par byas pa yin la/de bzlog pa na mkhas pa'i rjes su 'brang bar bya'o zhes pa dang 'brel to/ /de ltar mnyam par gzhag pa la mi mthun pa'i phyogs spangs nas mnyam par gzhag pa la gcig tu gzhol bar bya'o zhes bstan pa'i phyir/ de bas zhes pa la sogs pa gsungs te/sgrib pa ni nyon mongs pa la sogs pa yin la/ bsal ba ni 'chad par 'gyur ba'i tshul gyis de dag spong bar 'dod pa ste/ mnyam par gzhag pa ste zhi gnas la 'brel par bya'o/ /rnam pa gang gis she na/ log pa'i lam las zhes pa la sogs pa gsungs te/ sngar brjod pa'i 'dod pa'i rnam par rtog pa la sogs pa rnams las so//yang na log pa'i lam ni le lo la sogs pa'i nyon mongs pa rnams la brjod de/ ji ltar mdor bsdus na ting nge 'dzin thams cad kyi nyes pa ni rnam pa drug yin te/ le lo dang / dmigs pa la brjed ngas pa dang / bying ba dang /rgod pa dang / mi rtsol ba dang / rtsol ba'o/ /'di rnams kyi gnyen po spong ba'i 'du byed bsgom par bya ba yin te/ 'di ltar dad pa dang / 'dun pa dang / rtsol ba dang / shin tu sbyangs pa dang / dran pa dang / shes bzhin dang / sems pa dang btang snyoms rnams so/ /de la dang po bzhi ni le lo'i gnyen po'o//'di ltar ting nge 'dzin gyi yon tan rnams la mngon par yid ches pa'i mtshan nyid kyi dad pas rnal 'byor pa de la mngon par 'dod pa skye la/ mngon par 'dod pa de las brtson 'grus rtsom zhing / brtson 'grus kyi stobs de las lus dang sems las su rung ba sgrub par byed de/de las ni shin tu sbyangs pa'i lus dang sems yin te/ le lo zlog par byed do/ /des na dad pa la sogs pa rnams le lo spang ba'i ched du bsgom par bya'o/ /dran pa la dmigs pa ni brjed pa'i gnyen po yin la/ shes bzhin ni bying ba dang rgod pa'i gnyen po yin te/yang dag pa'i yon tan nye bar mtshon pa'i phyir ro/ /bying ba dang rgod pa'i rab tu zhi ba'i dus na yang mi rtsol ba nyes pa yin te/ de'i gnyen por bying ba dang rgod pa rab tu zhi ba na sems pa bsgom par bya'o/ /gang gi tshe sems gdul dka' ba de'i tshe rtsol ba nyes pa yin no/ / da ni de'i gnyen por btang snyoms bsgom par bya ste/ spong ba'i 'du byed brgyad po 'di rnams dang ldan pa'i ting nge 'dzin mchog tu las su rung bar 'gyur ro zhes rgyas par gsungs so/ /de ltar 'di'i phyir log pa'i lam las sems blan te bzlog nas so/ /'dis ni dam pa'i las kyi sbyor ba bshad pa yin no//rang bzhin ci yin zhe na/ yang dag dmigs la rtag pa ste/ gang cung zad dmigs pa mdor bsdus pas sam rgyas pas sems kyi nges pa de la brtan pa yin te/ mi mthun pa'i phyogs kyi sems bar ma chod par te de'i bar chod dang bral ba zhes bya ba'i tha tshig go//'dis ni mnyam par gzhag pa'i rang bzhin brjod do/ /sems rtse gcig pa de'i rang bzhin yin pa'i phyir/ rgyun mi 'chad pa'i sbyor ba yang brjod pa yin no/ /zhi gnas bsgom pa bsgrub pa'i rim pa 'di yang ka ma la shI la'i bsgom pa'i rim pa las gsal bar bstan te/ der brjod pa ni 'di ltar tshul khrims la sogs pa zhi gnas kyi tshogs rnams la gnas nas yid dang rjes su mthun pa'i gnas rnams su sangs rgyas dang byang chub sems dpa' rnams la phyag 'tshal ba la sogs pa byas nas/sdig pa bshags pa dang bsod nams la rjes su yi rang ba yang byas te/ 'gro ba mtha' dag gdon pa'i bsam pas snying rje chen po nyid mngon du byas te/ bde ba'i stan la 'dug nas lus drang por bsrang ste skyil mo krung bcas nas ting nge 'dzin bskyed par bya'o/ /de la dang por re zhig gang dngos po de la dpyad par bya ste/ ji srid du rnam pa gang gis mdor na dngos po mtha' dag bsdus par gyur pa de la sems brtan par bya'o//yang mdor bsdus na dngos po thams cad ni gzugs dang gzugs med pa'i dbye bas rnam pa gnyis yin te/ de la yang las dang po pa'i rnam par g.yeng ba'i nyes pa spang ba'i phyir re zhig mdor bsdus pa la dmigs par rigs so//gal te yid la byed pa dul bar gyur na/ de'i tshe phung po dang khams la sogs pa'i dbye bas rnam par sbyangs te rgyas pa la yang dmigs par bya ba nyid do/ /ji srid du de las nges par byas nas dngos po thams cad bsdus pa de nyid la yang sems kyi rgyun bsdam par bya'o//gang gi tshe bar skabs su 'dod chags la sogs pas sems kyi phyi rol du rnam par g.yengs pa de'i tshe rnam par g.yengs par tshor bar byas la/ myur du mi sdug pa bsgom pa la sogs pas rnam par g.yeng ba zhi bar byas nas myur du de nyid la sems phyir zhing 'jug par bya'o//gang gi tshe de la sems mngon par mi dga' bar mthong ba de'i tshe ting nge 'dzin gyi yon tan mthong ba de la mngon par dga' ba bsgom par bya'o/ /rnam par g.yeng ba la nyes par mthong bas kyang mi dga' ba rab tu zhi bar bya'o/ /ci ste rmugs pa dang gnyid kyis non te rgyu ba mi gsal bas sems bying ba'am bying du dogs par mthong ba de'i tshe snang ba'i 'du shes sangs rgyas kyi yon tan la sogs pa mchog tu dga' ba'i dngos po yid la byed pas myur du bying ba zhi bar byas la/yang dmigs pa de kho na nyid shin tu brtan por gzung bar bya'o/ /ci ste gang gi tshe sngon dgod pa dang rtses pa rjes su dran par gyur pas bar skabs bar skabs su sems 'phyar ba'am/rgod du dogs par mthong ba de'i tshe gong ma bzhin du mi rtag pa la sogs pa yid 'byung bar 'gyur ba'i dngos po yid la byas la/ g.yeng ba zhi bar bya zhing / de nas yang de kho na nyid la sems mngon par 'du bya ba med par 'jug par 'bad par bya'o//gang gi tshe bying ba dang rgod pa dang bral bar gyur nas mnyam par zhugs te/ de kho na nyid de nyid la sems rang gi ngang gis 'jug par gyur pa de'i tshe rtsol ba glod de btang snyoms su bya'o/ /gal te sems mnyam par zhugs pa la brtsal bar byas na de'i tshe sems rnam par g.yeng bar 'gyur ro//yang gang gi tshe dmigs pa de la mngon par 'du byed pa med par 'jug pas ji ltar 'dod par 'jug par 'gyur te/ de'i tshe zhi gnas grub par rig par bya'o/ /'di yang zhi gnas thams cad kyi thun mong gi mtshan nyid yin te/sems rtse gcig pa tsam gyi rang bzhin yin pa'i phyir ro/ /zhi gnas kyi dmigs pa yang ma nges pa de nyid yin no zhes rgyas par bshad do/ /'dis dmigs pa la bar med pa nyid du bshad pa'am/ mi mthun pa'i phyogs bsal ba yang bstan pa yin no//byang chub sems dpa'i spyod pa la 'jug pa'i dka' 'grel shes rab 'byung gnas blo gros kyis mdzad pa las bsam gtan gyi le'u ste brgyad pa'o// //'phags pa 'jam dpal gzhon nur gyur pa la phyag 'tshal lo/ /gang dag gos pa med pa nyid kyis spros pa kun spangs bla med go 'phang ldan//shes rab la sogs pha rol phyin par kun rdzob tshig gis brjod de zag pa med/ /gang zhig yang dag rtogs pas dri med blo dag mya ngan 'das mchog brnyes de la/ /phyag 'tshal nas ni de yi 'grel pa rab tu gsal ba'i tshig gis rim pa bzhin du bya//yon tan gter gyur slob dpon zhi ba'i lha 'dis gang du gsal bar ni/ /gsung rab rgya mtsho chen po'i pha rol son pas brjod par spyod pa yin/ /blo gros rmongs pa bdag gis de don ji ltar brjod nus de lta na'ang / /shes rab goms pas legs byas gang phyir mnyam med des na de la 'jug /yon tan phra ba 'ga' yi bag chags blo gros med pa ste/ /bdag la spobs pa'i yon tan bsags pa yod pa ma yin la/ /de lta mod kyi gang phyir bshes gnyen dam pa bsten pa yi/ /'bras bu de ltar de lta bu la ngag ni rab tu rgyas/ / de la gang zhig rigs kyi khyad par 'ga' las dge ba'i bshes gnyen bsten pa nyid kyis 'gro ba gsum gyi nang du gtogs pa'i skye bo ma lus pa sdug bsngal gyis sdug bsngal bar gyur pa'i srog 'dzin pa thams cad sdug bsngal ma lus pa las gdon pa'i bsam pas bdag nyid kyi sdug bsngal khyad du bsad de/de zhi ba'i thabs su gyur pa sangs rgyas yin par 'di ltar bsams nas/ de thob par 'dod pas byang chub kyi sems bskyed pa'i che ba'i bdag nyid bde bar gshegs pa sgrub pa'i thabs su gyur pa tshogs gnyis yongs su rdzogs pa'i don du sbyin pa la sogs pa rnams la rim gyis 'jug ste/de de ltar zhugs pa na zhi gnas dang yang dag par ldan par gyur pas bdag kyang sbyin pa la sogs pa shes rab dang bral ba nyid kyis 'gro ba'i don bsgrub pa'i rgyus sangs rgyas nyid thob pa ma yin par bsams nas 'khor ba'i sdug bsngal las nges par 'byung bar 'dod pas shes rab bskyed pa'i don du 'bad par bya ste/ji skad du/ zhi gnas rab tu ldan pa'i lhag mthong gis/ /zhes bya ba la sogs pa gsungs pas so/ /de la zhi gnas bstan nas/ da ni de'i rjes la thob pa'i lhag mthong gi ming can shes rab kyi pha rol tu phyin pa bstan pa'i phyir/ yan lag 'di dag thams cad ces pa la sogs pa gsungs te/ 'di dag ces pa ni bstan bcos 'dir brjod ma thag pa'i mtshan nyid can sbyin pa la sogs pa'o/ /'di zhes pa ni mngon sum du gyur pa nyid la dpyod par byed do/ /yan lag 'di dag ces pa ni 'khor te ris yin la tshogs zhes pa'i tha tshig go//brjod pa dang rjod pa'i rnam pa dang gzhan yang ste/ shes rab don du thub pas gsungs/ /zhes pa dang 'brel to/ /shes rab ni ji ltar gnas pa'i rten cing 'brel par 'byung ba'i dngos po'i de kho na nyid rab tu rnam par 'byed pa'i mtshan nyid can yin la de nyid don yin te/byang chub kyi rgyu'i dngos po yang dag par 'dren par byed pas gang gi sbyin pa la sogs pa'i mtshan nyid kyi yan lag ni dgos pa yin pa de la de skad ces brjod do/ /sbyin pa la sogs pa'i pha rol tu phyin pa'i dngos po rnams las chos rnam par 'byed pa'i rang bzhin gyi shes rab gtso bo yin pa'i phyir ro//de ltar yang sbyin pa ni sangs rgyas kyi byang chub thob pa'i phyir rgyu'i dang po yin te/ bsod nams kyi tshogs su gtogs pa'i phyir ro/ /de yang tshul khrims kyi rgyan du byas pa nyid bde 'gro brgyud par bde ba'i longs spyod kyi nye bar mkho ba phun sum tshogs pa 'byung bar 'gyur bas bla na med pa'i ye shes 'byung ba'i rgyu yin no//bzod pa yang de'i mi mthun pa'i phyogs su gyur pa khong khro'i gnyen po nyid kyis sbyin pa dang tshul khrims kyis legs par spyad pa'i rang bzhin gyi tshogs rjes su skyong bar byed pa yin te bde 'gro nyid thob pa'i ched du rab tu 'jug go//sbyin pa la sogs pa gsum po las byung ba'i bsod nams kyi tshogs su brjod pa 'di yang dge ba yin te/ bsam gtan la sogs pa las byung ba ni ye shes kyi tshogs zhes pa yin la/ de dag brtson 'grus med par mi 'byung bas de ltar na yang tshogs gnyis ka'i rgyu yin pas sgrib pa thams cad spong ba'i ched du byung ba yin no//sems mnyam par gzhag pas yang dag pa ji lta ba bzhin shes par 'gyur bas bsam gtan gyi pha rol tu phyin pa yang bla na med pa'i ye shes thob pa'i rgyu ru 'gyur ba yin no/ /de ltar sbyin pa la sogs pa 'di rnams gus par byas pas bsgrubs na yang /shes rab dang bral na bla na med pa'i go 'phang thob pa'i rgyur mi 'gyur zhing pha rol tu phyin pa'i ming yang thob pa ma yin te/ shes rab kyis dag par byas pa la bsten pas de yang bar chad med par rgya che ba la 'jug pas de'i rjes su 'jug pa na de'i rgyu'i dngos po thob par 'gyur la/pha rol tu phyin pa'i ming yang thob par 'gyur ro/ /de bzhin du gtong ba po dang / sbyin par bya ba dang / len pa po la sogs pa gsum po rnams mi dmigs pa'i sbyor bas shes rab kyis yongs su sbyangs te/ gus shing bar chad med par dus yun ring por goms par byas pas rab kyi mthar thug par 'gro zhing //ma rig pas bskyed pa'i rnam par rtog pa'i dra ba mtha' dag dang bral te/ nyon mongs pa dang shes bya'i sgrib pa las grol ba'i bdag med pa rnam pa gnyis thugs su chud pa'i rang bzhin bdag dang gzhan la phan pa thams cad kyi gzhir gyur pa/don dam pa'i de kho na nyid kyi bdag nyid de bzhin gshegs pa'i chos kyi sku mngon par thob par byed pas shes rab ni gtso bo yin la/ sbyin pa la sogs pa ni phal par brjod do/ /sbyin pa la sogs pa las shes rab gtso bo yin na byang chub sgrub par byed pa'i rgyu de nyid 'ba' zhig zhog la/sbyin pa la sogs pa rnams kyis ci zhig bya zhes ni brjod par mi bya ste/ de las gzhan gyi dgos pa brjod zin pa'i phyir ro/ /sbyin pa la sogs pa 'ba' zhig ni mig dang bral ba yin te/ shes rab kyi mig dang ldan pa nyid kyis ji ltar mngon par 'dod pa'i bde bar gshegs pa nyid kyis sar 'gro bar 'gyur bar byed pa'i phyir shes rab la 'dren par brjod de/shes rab 'ba' zhig kyang yang dag par rdzogs pa'i byang chub sgrub par byed pa ni ma yin no/ /de lta bas na sbyin pa la sogs pa'i 'khor ni shes rab kyi don du grub po/ /rnam par rtog pa thams cad spangs pa'i phyir ram/sgro 'dogs pa dang skur pa 'debs pa'i mtha' gnyis po mi gsung ba'i phyir ram/ mi slob pa'i lus dang ngag dang yid kyi las kyi mtshan nyid thub pa gsum dang 'brel pa'i phyir thub pa ni sangs rgyas bcom ldan 'das so/ /sdug bsngal gsum gyis sdug bsngal ba'i 'gro ba thams cad yongs su bskyab pa'i dgongs pas gsungs te gsungs pa dang ldan no zhes bya ba'i tha tshig go//shes rab kyi pha rol tu phyin pa la sogs pa'i mdo rnams su shes rab kyi don du rim pas sbyin pa la sogs pa'i 'khor gsungs pa yin no/ /ji skad du 'phags pa shes rab kyi pha rol tu phyin pa stong phrag brgya pa las/rab 'byor 'di lta ste dper na/ nyi ma'i dkyil 'khor dang zla ba'i dkyil 'khor ni gling bzhir las byed cing / gling bzhi'i rjes su 'gro'o/ /gling bzhi'i rjes su 'brang ngo / /rab 'byor de bzhin du shes rab kyi pha rol tu phyin pa yang pha rol tu phyin pa lngar las byed cing /pha rol tu phyin pa lnga'i rjes su 'gro'o/ /pha rol tu phyin pa lnga'i rjes su 'brang ste/ shes rab kyi pha rol tu phyin pa dang bral na pha rol tu phyin pa lnga pha rol tu phyin pa'i ming mi 'thob bo/ /rab 'byor 'di lta ste dper na 'khor los sgyur ba'i rgyal po dang bral na/rin po che sna bdun gyis 'khor los sgyur ba'i ming mi 'thob bo/ /rab 'byor de bzhin du pha rol tu phyin pa lnga yang shes rab kyi pha rol tu phyin pa dang bral na pha rol tu phyin pa'i ming mi 'thob bo/ /rab 'byor 'di lta ste dper na chu klung gang ci snyed cig yod pa de dag thams cad ni chu klung chen po gang+gA gang na ba der 'dong ngo //de dag chu klung gang+gA dang 'grogs shing rgya mtsho chen po'i nang du 'dong ngo / /rab 'byor de bzhin du pha rol tu phyin pa lnga yang shes rab kyi pha rol tu phyin pas yongs su zin na rnam pa thams cad mkhyen pa nyid gang na ba der 'dong ngo zhes rgya cher gsungs so/ / de yang ji skad du/ kau shi ka byang chub sems dpa' sems dpa' chen po rnams kyi shes rab kyi pha rol tu phyin pa 'dis ni sbyin pa'i pha rol tu phyin pa zil gyis gnon to/ /tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa zil gyis gnon to//kau shi ka 'di lta ste dper na dmus long brgya'am stong ngam brgya phrag stong yang rung ste/ dmigs bu med par lam du 'jug par yang mi nus na grong khyer du 'gro bar lta ga la nus/ kau shi ka de bzhin du pha rol tu phyin pa lnga po 'di dag ni dmus long lta bur gyur pa ste/shes rab kyi pha rol tu phyin pa med na de dag la dmigs bu med pas byang chub kyi lam yang skyed par mi nus na rnam pa thams cad mkhyen pa nyid kyi grong khyer du 'jug par lta ga la nus/ kau shi ka pha rol tu phyin pa lnga nam shes rab kyi pha rol tu phyin pas yongs su zin par gyur pa de'i tshe mig dang ldan par gyur te/pha rol tu phyin pa lnga po 'di dag ni shes rab kyi pha rol tu phyin pas yongs su bzung na pha rol tu phyin pa'i ming mi 'thob po zhes rgya cher gsungs pa yin no/ /de bzhin du gzhan yang 'dir mdo gzhan gyi rjes su 'brangs nas ji lta ba bzhin du go bar bya'o//'di skad du/ dri med smad pa med khyod la/ /pha rol phyin pa thams cad rnams/ /thams cad du ni rjes 'brang ste/ /zla ba'i rjes su rgyu skar bzhin/ /zhes gsungs pa yin no/ /yang na 'di dag ces gsungs pa yin no/ /de bzhin du gzhan yang ba ni 'das ma thag pa'i zhi gnas kyi bdag nyid kyi rgyun no//yan lag ces pa ni shes rab kun nas slong bar byed pa nyid kyis de'i rgyu tshogs sam gzhi yin no/ /shes rab don du zhes pa ni sngar brjod pa'i shes rab de nyid dgos pa yin zhing bsgrub par bya ba nyid kyis gang gi yin pa ni zhi gnas kyis yongs su dag par byas pa'i sems kyi rgyun la shes rab skye ba'i phyir/legs par sbyangs pa'i zhing las 'bru skye ba dang 'dra'o/ /ji ltar bslab pa kun las bsdus par yang zhi gnas 'di'i bdag nyid che ba ji lta zhe na/ yang dag pa ji lta ba bzhin du shes pa skyed par nus pa yin te/ gang gi phyir mnyam par gzhag pas yang dag pa ji lta ba bzhin du rab tu shes so zhes brjod de thub pas gsungs so zhes pa yin no//'di yang 'phags pa chos yang dag par sdud pa las/ mnyam par gzhag pa'i sems kyis yang dag pa ji lta ba bzhin mthong bar 'gyur ro/ /yang dag pa ji lta ba bzhin du mthong ba'i byang chub sems dpa' sems can rnams la snying rje chen po 'jug ste/bdag gis sems can thams cad la ting nge 'dzin gyi sgo 'di bsgrub par bya'o/ /snying rje chen po des bskul bas lhag pa'i tshul khrims dang lhag pa'i sems dang lhag pa'i shes rab kyi bslab pa yongs su rdzogs pas bla na med pa yang dag par rdzogs pa'i byang chub rdzogs par bya'o zhes rgyas par gsungs so//ni zhes pa ni gang gi phyir te/ sbyin pa la sogs pa'i 'khor ram zhi gnas kyi bdag nyid kyi 'khor shes rab kyi don du yin par thub pas gsungs te/ de lta bas na shes rab bskyed par bya'o zhes sbyar bar bya'o//bskyed par bya'o zhes pa ni bsgrub par bya'o zhes pa'am mngon sum du bya ba'am/ bsgom par bya ba'am/ bsten par bya ba'am/ mang ched du bya ba'o/ /shes rab de yang rnam pa gnyis te/ rgyur gyur pa dang / 'bras bur gyur pa'o/ /rgyur gyur pa'ang rnam pa gnyis te/ mos pas spyod pa dang /sa thob pa'i byang chub sems dpa'i'o/ /'bras bur gyur pa yang mtshan ma med pa'i sbyor bas rnam pa thams cad kyi mchog dang ldan pa'i chos thams cad kyi stong pa nyid rtogs pa'i rang bzhin no/ /de la dang por rgyur gyur pa ni thos pa dang bsam pa dang bsgom pa'i rim pa goms pas sa la rab tu zhugs pa'i shes rab skyed par byed pa yin te/de yang sa gzhan dang gzhan 'thob pa'i sbyor bas mchog tu 'phel bar gyur pa yin te/ ji srid du sgrib pa gnyis dang bral ba rtog pa'i dra ba mtha' dag spangs pa'i sangs rgyas nyid kyi shes rab kyi rang bzhin yongs su rdzogs par byed de/de nyid kyi phyir/ sdug bsngal zhi bar 'dod pas zhes gsungs te/ sdug bsngal ni 'khor ba'i 'gro ba ris lngas yang dag par bsdus pa'i sems can gyi phung por gtogs pa'i bdag nyid la yod pa'i skye ba dang / nad dang / rga ba dang / 'chi ba'i rang bzhin dang / sdug pa dang bral ba dang / mi sdug pa dang phrad pa dang / 'dod pa tshol ba'i gegs byed pa'i mtshan nyid dang / mdor na nye bar len pa'i phung po'i bdag nyid kyang ngo / /zhi ba ni mya ngan las 'das pa yin te/ slar mi skye ba'i nye bar zhi ba'i chos nyid kyis shin tu rgyun chad pa zhes pa'i don to/ /de la 'dod pa ni mngon par 'dod pa dang 'dun pa zhes pa'i tha tshig go//'di ltar phyin ci log pa'i 'du shes can mi bden pa'i de kho na nyid du sgro 'dogs pa'i mngon par zhen pa'i stobs kyis bdag gi bar 'dzin par 'jug pas tshul bzhin ma yin pa'i yid la byed pa las byung ba/ 'dod chags la sogs pa nyon mongs pa'i tshogs yang dag par skye bar 'gyur ro//de las ni las yin la/ de las skye ba yin zhing de las kyang nad dang rga shi mya ngan dang / smre sngags 'don pa dang / sdug bsngal dang / yid mi bde ba'i yongs su ngal ba yang 'byung bar 'gyur ro/ /de ltar na 'di 'ba' zhig las sdug bsngal gyi phung po chen po 'byung bar 'gyur ro//de las de ltar lugs las bzlog pa'i rnam pas rten cing 'brel par 'byung ba la yang dag pa'i shes rab kyis dmigs par byed pas/ yang de nyid bdag nyid med pa dang / bdag po med pa dang / sgyu ma dang / smig rgyu dang / dri za'i grong khyer dang / rmi lam dang / gzugs brnyan la sogs pa dang mtshungs pa'i rnam pa nyid kyis don dam pa rang bzhin med par mthong bas yang dag pa ji lta ba bzhin du yongs su shes shing de'i mi mthun pa'i phyogs kyi bdag nyid rmongs pa'i rang bzhin gyi ma rig pa srid pa'i yan lag zlog par byed la/ ma rig pa 'gags pas de'i rkyen yin pa'i phyir 'du byed 'gag go//de ltar rgyur gyur pa snga ma snga ma rnams 'gags pas 'bras bur gyur pa phyi ma phyi ma rnams 'gag par rig par bya ste/ ji srid du skye ba 'gags pas rga shi dang mya ngan dang / smre sngags 'don pa dang / sdug bsngal ba dang / yid mi bde bas yongs su ngal ba yang 'gag par 'gyur ro//de ltar na gcig tu sdug bsngal gyi phung po chen po 'di 'gag par 'gyur ro/ /de la ma rig pa dang sred pa dang len pa ni nyon mongs pa'i lam du rnam par chad la 'du byed dang srid pa ni las kyi lam du rnam par chad de/ yan lag lhag ma rnams ni sdug bsngal gyi lam du rnam par chad cing /sngon dang phyi ma'i mtha' 'gags pa ni 'gog pa'i lam du rnam par chad do/ /de lta nyid du lam gsum ni bdag med pa ma yin la/ bdag dang bdag gi ba med pa ste/ skye ba'i sbyor bas skye bar 'gyur zhing 'gag pa'i sbyor bas 'gag par 'gyur te/dngos po la smyug ma'i tshigs dang 'dra'o/ /'di yang phyi nas rigs pa dang lung gis rgyas par bstan par bya'o/ /de bas na 'di ltar 'dus byas la shes rab kyis rmi lam dang sgyu ma la sogs pa'i rang bzhin du so sor rtog pa na chos thams cad rang bzhin med par rtogs pas don dam par khong du chud pa las bag chags dang bcas pa'i nyes pa'i phung po ldog par 'gyur zhing /sdug bsngal thams cad nye bar zhi ba'i rgyu shes rab skye bar 'gyur te/ 'dis ji ltar lung dang rigs pa dag gis dpyod pa na dngos po'i de kho na nyid phyin ci ma log pa gsal bar byed pa'i phyir ro/ / kun rdzob dang ma rig pa dang rmongs pa dang phyin ci log ces bya ba ni rnam grangs yin no/ /ma rig pa yang mi bden pa'i don gyi rang bzhin sgro 'dogs par byed pa yin la/ rang bzhin mthong ba la bsgribs pas na kun rdzob tu 'thad do/ /gang sA lu ljang pa las gsungs pa/ gzhan yang de kho na nyid ma rig pa dang log par rtogs pa ni mi shes pa dang ma rig pa yin no zhes so//yang gsungs pa/ ma rig skyes pa nyid kyis na/ /yang dag min pa'i don snang zhing / /yang dag sgrib par byed la 'jug /mig ser gyis ni gnod pa bzhin/ /zhes so/ /des nye bar bstan pa yang rten cing 'brel par 'byung ba'i dngos po'i rang bzhin yin pa de kun rdzob ces bya ste/de nyid la 'jig rten pa'i kun rdzob kyi bden pa zhes brjod la/ 'jig rten pa nyid kyi kun rdzob kyis de la bden pa zhes bya ba las so/ /gang / gti mug kun rdzob yin te rang bzhin la bsgribs pas/ /gang zhig bcos ma kho na de yis bden par ston//dngos po'i don dang byas pa yang ni kun rdzob tu/ /'di ni kun rdzob bden pa zhes byar thub pas gsungs/ /zhes brjod pa'o/ /kun rdzob de yang 'jig rten pa nyid kyis rnam pa gnyis su 'byed de/ log pa'i kun rdzob dang / yang dag pa'i kun rdzob ces so//'di ltar yang gang cung zad rkyen las skyes pa'i dngos po sngon po la sogs pa'i rang bzhin skyon med pa'i dbang pos dmigs pa ni 'jig rten pa nyid las bden pa nyid yin la/ rten cing 'brel par 'byung ba las skyes pa yin yang sgyu ma dang / smig rgyu dang / gzugs brnyan la sogs pa rnams dbang po nyes pa dang ldan pas mthong ba dang /ji ltar mu stegs can gyi rang gi grub mthas yongs su brtags pa yang 'jig rten pa nyid las log pa yin te/ de brjod pa/ gal te dbang po nyams par ma gyur pa'i/ /drug po rnams kyis 'jig rten yul rtog byed/ /de ni 'jig rten nyid la bden yin te/ /lhag ma brtags pa 'jig rten nyid la brdzun//zhes so/ /de ltar de gnyi ga yang / yang dag pa gzigs pa'i 'phags pa rnams la ni brdzun pa yin te/ don dam pa'i gnas skabs su kun rdzob kyi bden pa ni 'khrul pa yin pa'i phyir ro/ /'di de ma thag nyid du rigs pa'i sgo nas rtogs par bya ste/ de lta bas na ma rig pa dang ldan pa la dngos po'i rang bzhin mi snang ngo //dam pa ni mchog yin la/ don ni dam pa'i don yin te/ ma bcos pa dngos po'i rang bzhin gang gi rtog pas sgrib pa'i bag chags dang rjes su 'brel ba'i nyon mongs pa spong bar 'gyur ba'o/ /chos thams cad ngo bo nyid med pa dang / stong pa nyid dang de bzhin nyid dang / yang dag pa'i mtha' dang chos kyi dbyings zhes pa ni rnam grangs yin la/ rten cing 'brel par 'byung ba'i don thams cad rang bzhin med pa don dam pa'i ngo bo yin te/ ji ltar snang ba'i kun rdzob ni mi 'thad pa'i phyir ro/ /'di ltar yang re zhig ji ltar mthong ba'i ngo bos dngos po yod pa'i rang bzhin ma yin te/de'i rjes kyi dus na mi gnas pa'i phyir ro/ /rang bzhin yang thams cad du glo bur ba ma yin pas mi g.yo ba'i rang bzhin yin pa'i phyir ro/ /gang zhig gang gi rang bzhin yin pa de ni ji ltar nam yang ldog pa ma yin te/ gzhan du na de'i rang bzhin nyams par thal bar 'gyur bas/rang bzhin med pa nyid du 'gyur ro/ /de skye ba na yod pa'i ngo bos 'ga' zhig nas 'ongs pa'am/ 'gags pa na 'ga' zhig tu song bar gyur pa yang ma yin te/ 'on kyang sgyu ma bzhin du rgyu dang rkyen tshogs pa'i rang bzhin gyis skye'o/ /de ma tshang ba las 'gag par 'gyur ba yang yin te/rgyu dang rkyen gyi tshogs pa tshang ba las byung zhing gzhan la rag las pas bdag nyid thob pa ni gzugs brnyan nyid du gyur pa yin la ji ltar de'i rang bzhin yin te gang gi don yang don dam pa ma yin la/ rgyu dang rkyen gyi tshogs pa las byung ba srid pa ma yin te/de yang gzhan la rag las pas tshogs pa gzhan las byung ba'i bdag nyid las ngo bo thob pa rnams ni rang bzhin med pa yin pa'i phyir ro/ /de bzhin du gzhan gang zhig snga ma snga ma las rang rang gi rgyu'i tshogs pa las skye bas rang bzhin med pa nyid du blta bar bya'o/ /rgyu dang 'bras bu rjes su mthun pa 'dod pa rnams kyis ji ltar dngos po med pa las dngos po'i rang bzhin skye bar khas blang bar bya/gang 'chad par 'gyur ba/ sgyu mas sprul pa gang yin dang / /rgyu rnams kyis ni gang sprul pa/ /de ni gang las 'ongs gyur cing / /gang du 'gro ba brtag par gyis/ / gang zhig gang ni nye ba yis/ /mthong 'gyur de med na min pa/ /bcos bu gzugs brnyan dang mtshungs pa/ /de la bden nyid ci ltar yod/ /ces pa dang / yang brjod pa/ gang zhig rkyen las skyes pa de ma skyes/ /de la skye ba'i rang bzhin yod ma yin/ /rkyen la rag las gang de stong par bshad//gang gi stong nyid shes de bag yod min/ /zhes pa dang / stong pa kho na'i chos rnams las/ /stong pa'i chos rnams 'byung bar 'gyur/ /zhes pas so/ /rang dang gzhan dang gnyi ga'i rgyu dang 'brel pa dang / rgyu med pa dang 'brel pa las dngos po skye ba ni shin tu legs par 'thad pa ma yin te/ 'di ltar yang rang gi bdag nyid dngos po rnams rang skye ba'i rgyu mtshan gal te yin na skyes pa'am ma skyes pa la yin/ skyes pa ni re zhig ma yin te/ rang gi bdag nyid rgyu yin pa na de'i bdag nyid thams cad rang nyid kyis skyes pa'i phyir ro/ /gang du yang 'di la bya ba dang ldan par 'gyur ba bskyed par bya ba yang 'di la ma skyes pa gzhan gyi rang bzhin med pa'i phyir te/gcig po 'di la cha shas dang ldan pa'i phyir ro/ /phyis skye bar 'gyur ba gzhan 'di ni de'i rang bzhin du rigs pa ma yin te/ de grub pa dang ma grub pa ni de'i rang bzhin ma yin pa'i phyir ro/ /de bas na rang gi bdag nyid las skyes pa ni cung zad kyang srid pa ma yin no//yang rang las skye ba'i phyogs la gang yang 'thad pa ma yin te/ sngar grub pa'i rang bzhin la gcig la gcig brten pa'i nyes par thal bar 'gyur bas so/ /de ma grub pa las kyang ma yin te/ nam mkha'i me tog dang 'dra bar nus pa mtha' dag gis stong pa ni rang grub pa'i rgyu'i dngos por 'gro bar rigs pa ma yin no//gzhan du na bong bu'i rwa yang rang rang gi dngos po bskyed pa'i rgyu nyid du thal ba'i phyir ro/ /gzhan las zhes pa'i phyogs 'di yang ma yin te/ nyi ma las kyang mun pa'am thams cad las thams cad skye bar thal bar 'gyur ba'i phyir dang /bskyed par bya ba dang skyed par byed par mi 'dod pa dag mngon par 'dod pa'i 'bras bu la ltos pa ste gzhan nyid du khyad par med pa'i phyir ro/ /bskyed par bya ba dang skyed par byed pa rgyu gcig pa so sor nges pa yang 'bras bu ma skyes pa na brtags pa nyid kyis dngos po la rigs pa ma yin no//ma 'ongs pa'i chos gnas pa la ltos nas 'bras bu la sogs pa'i tha snyad dngos po ma yin te/ dngos po'i rang bzhin du yod pa dpyod par 'gyur ba'i phyir ro/ /sa bon gnas pa rnams la myu gu yod pa ltos pa ni sa bon las gzhan nyid yin par brtags pa ni yod pa ma yin te/rgyu la 'bras bu yod pa nyid ni 'gegs par 'gyur ba yin pa'i phyir ro/ /gang du mthong ba nyid kyi dngos po rnam par dpyad pas gnas pa ma yin na der ma 'ongs pa la sogs pa rnams srid pa'i bsam pa'ang ci yod/ gnyi ga'i phyogs kyang ma yin te/ so so'i phyogs la brjod pas gnyi ga'i phyogs la skyon du 'gyur ba'i phyir ro//'bras bu ma skyes pa na yang gnyi ga'i rgyu'i ngo bo don dam par med pa'i phyir ro/ /skyes pa la yang cung zad kyang bskyed par byar med pas gang la gnyi ga'i ngo bo'i rgyu'i bya ba dang ldan par 'gyur/ rgyu med pa las zhes pa'i rnam par rtog pa yang ma yin te/gang gi phyir med par dgag pa'i bdag nyid kyis 'di rgyu med pa las zhes pa ni 'thad pa ma yin te/ rgyu med pa na dngos po rnams kyi yul dang dus kyi nges pa med par thal bar 'gyur ba'am/ rtag tu yod pa dang med par thal bar 'gyur ba dang /thabs las byung ba 'dod pas kyang so sor nges pa'i thabs nyams su len par yang mi 'gyur ro/ /gtso bo dang dbang phyug la sogs pa rnams rgyu yin pa nyid 'di 'gegs par 'gyur ba'i phyir ro/ /rgyu med pa las dngos po'i rang bzhin thob pa ni ma yin no/ /de lta bas na dngos po rnams rang dang gzhan dang gnyi ga dang rgyu med pa las yod pa skye ba mi 'thad do//de skad du yang / rang las ma yin gzhan las min/ /gnyis las ma yin rgyu med min/ /dngos po gang dang gang na yang / /skyes pa nam yang yod ma yin/ /zhes gsungs so/ /gcig dang du ma dang bral ba dpyad pas kyang dngos po thams cad rang bzhin dang bral bas yod pa'i dngos po ni ma yin no//de lta bas na rmi lam dang sgyu ma dang gzugs brnyan la sogs pa dang 'dra ba rkyen las byung ba tsam nyid 'di ma brtags na nyams dga' bar gzhag ste ji ltar sdug bsngal thams cad kyi rgyur gyur pa mngon par zhen pas ci zhig bya ste/dgos pa yod pa ma yin no/ /de'i phyir 'di ni don gyi de kho na nyid yin te/ bdag dang gzhan smras dngos 'di dag /yang dag tu na gcig pa dang / /du ma'i rang bzhin bral ba'i phyir/ /rang bzhin med de gzugs brnyan bzhin/ /zhes so//de ltar na rang bzhin med pa nyid dngos po rnams kyi gnyug ma yin te don dam pa'i rang bzhin gyis gnas pa ma yin no/ /de nyid la skyes bu'i dgos pa'i mchog dang khyad par du 'phags par brjod do/ /'di la yang mngon par zhen par mi bya'o/ /gzhan du na dngos po la mngon par zhen pa la khyad par du cung zad kyang yod pa ma yin te/gnyi ga yang brtags pa'i bdag nyid kyis bsgribs pa yin pa'i phyir ro/ /med par brtags pa'i rang bzhin gyis rang gi ngo bo cung zad ni yod pa ma yin la/ dngos po log pa yang dngos po med pa ma yin te/ log pa ni rang bzhin med pa yin pa'i phyir ro//gal te yang dngos po ma yin te/ log pa ni rang bzhin nyid 'ga' zhig gi rang bzhin yin na/ de'i tshe bkag pa'i bdag nyid kyang dngos po med par 'gyur ro/ /dngos po'i rang bzhin med do zhes bstan pa nyid yin no/ /de'i phyir dngos po log pa'i ngo bo dngos med ces bya ba cung zad kyang yod pa ma yin no//dngos po dang dngos po med pa dag brjod pa'i rim pas med par bstan pa na/ de gnyis 'dres pa'i bdag nyid dam gnyi ga bkag pa'i rang bzhin nyid ni yod pa ma yin te/ dngos po'i rnam par rtog pa nyid rnam par rtog pa mtha' dag gi rgyu yin pa'i phyir de bkag pa na 'di rnams thams cad nyid dgag pa gcig gis bsal ba yin no//de'i phyir yod pa dang / yod pa ma yin pa dang / yod pa dang med pa gnyi ga dang / gnyi ga'i bdag nyid kyang ma yin pa la cung zad kyang mngon par zhen pa'i yul du brtag par mi bya'o/ / de 'phags pa shes rab kyi pha rol tu phyin pa las gsungs pa/ rab 'byor gyis smras pa/ tshe dang ldan pa sha ra dwa ti'i bu 'di la byang chub sems dpa'i theg pa pa'i rigs kyi bu'am rigs kyi bu mo thabs mi mkhas pas gzugs stong pa'o zhes yang dag par shes pa ni zhen pa'o/ /tshor ba stong pa'o zhes yang dag par shes na zhen pa'o//'du shes stong pa'o zhes yang dag par shes na zhen pa'o/ /'du byed stong pa'o zhes yang dag par shes na zhen pa'o/ /rnam par shes pa stong pa'o zhes yang dag par shes na zhen pa'o/ /de bzhin du mig dang / rna ba dang / sna dang / lce dang / lus dang / ji srid du chos kyi bar du stong pa'o zhes yang dag par shes na zhen pa'o zhes rgyas par ro//ji skad du yang / kun rtog thams cad spang ba'i phyir/ /stong nyid bdud rtsi ston mdzad la/ /gang zhig de la zhen gyur na/ /de nyid khyed kyis shin tu smad/ /ces gsungs pa yin no/ /yod min med min yod med min//gnyis kyi bdag nyid du yang med/ /mtha' bzhi dag las nges grol ba/ /de nyid dbu mar mkhas rnams bzhed/ /ces so/ /de ltar mtha' bzhi las grol ba gdod ma nas zhi ba ma skyes pa ma 'gags pa rtag pa dang chad pa med pa la sogs pa'i rang bzhin gyis spros pa dang / bral ba'i phyir nam mkha' bzhin du chags pa med pa gnas med par 'gro ba ma lus par blta bar bya'o/ /'di ni bden pa gnyis su 'dod/ /ces te/ gang zhe na/ kun rdzob dang ni don dam ste/ /zhes 'og tu sbyar bar bya'o/ /kun rdzob ni gcig yin la bden pa ni phyin ci ma log pa yin no/ / yang don dam pa ste bden pa gzhan yin la/ dang gi sgras ni bden pa tsam du mtshungs par sdud par byed do/ /de la kun rdzob kyi bden pa ni 'jig rten pa'i phyin ci ma log pa'i ngo bo yin la don dam pa'i bden pa la yang bden pa ni slu bar mi byed pa yin no/ /de kho na nyid ni 'phags pa rnams kyi'o zhes pa ni khyad par ro//don gyi khyad par 'di lta bu mthong bas kyang dang gi sgra ni rigs pa yin no/ /'di skad brjod par 'gyur te/ phyi rol dang nang gi bdag nyid kyi dngos po 'di thams cad rang bzhin rnam pa gnyis 'dzin pas yang dag par skye bar 'gyur te/ 'di lta ste kun rdzob dang don dam pa zhes pa'o//de la gcig ni ma rig pa'i rab rib kyis bsgribs pa'i mig can yang dag pa ma yin pa'i bdag nyid mthong ba'i so so'i skye bo rnams kyis yul brdzun par mthong ba nyid na yang dag par mthong bar zhen to/ /gzhan ni rnam par 'byed pa'i mig sman gyi thur mas ma rig pa'i ling tog bsal bas yang dag pa'i shes pa'i mig can de kho na nyid rig pa'i 'phags pa rnams kyis yang dag pa'i shes pa'i yul du gyur pas rang bzhin rnam par gzhag pa yin no//de ltar dngos po 'di dag thams cad rang bzhin gnyis 'dzin pa yin no/ /rang bzhin 'di dag las byis pa brdzun pa mthong ba rnams kyi yul de ni kun rdzob kyi bden pa yin la/gang yang dag pa'i gnas skabs kyi de kho na nyid rtogs pa rnams kyi yul de ni don dam pa'i bden pa zhes bstan bcos rigs pas rnam par gzhag go/ /gang gsungs pa/ yang dag dang ni brdzun pa'i dngos mthong ba/ /'thob pas dngos kun ngo bo gnyis 'dzin la//yang dag gzigs yul gang de de nyid de/ /brdzun pa mthong ba kun rdzob bden par brjod/ /ces so/ /de ltar gnyis bsdus pa la gnyis so zhes rigs so/ /'dod ces pa ni mngon par bzhed pa'o/ /gang rnams she na/ sgrib pa spangs pa'i thugs dang ldan pa sangs rgyas bcom ldan 'das rnams de'i rjes su zhugs pa'i 'phags pa nyan thos dang rang sangs rgyas dang byang chub sems dpa' rnams so//'di nyid bden pa gnyis yin te/ gzhan bden pa ni yod pa ma yin no zhes dang gi sgra nges par gzung ba'i don du yang 'thad do//de skad du/ bden pa gnyis la brten nas ni/ /sangs rgyas rnams kyi chos bstan pa/ /'jig rten kun rdzob bden pa dang / /dam pa'i don gyi bden pa'o/ /zhes gsungs so/ /yab sras mjal ba las kyang / 'jig rten mkhas pa'i bden pa 'di gnyis te//khyed kyis gzhan las ma gsan rang gis gzigs/ /de ni kun rdzob bden dang don dam ste/ /bden pa gsum pa gang yang ma mchis so/ /zhes gsungs so/ /bcom ldan 'das kyis 'phags pa bden pa bzhi po sdug bsngal dang kun 'byung ba dang 'gog pa dang lam gyi mtshan nyid chos mngon pa las gsungs pa ma yin nam/de ji ltar na bden pa gnyis kho na yin zhe na/ bden te 'on kyang gdul bya'i bsam pa dang bag la nyal gyi dbang gis gnyis po nyid bzhir byas nas bstan pa yin te/ 'di rnams gnyis po nyid du 'dus pa'i phyir ro/ /'di ltar yang sdug bsngal dang kun 'byung ba dang lam rnams ni kun rdzob kyi bden pa'i rang bzhin gyis kun rdzob kyi bden par 'dus la/'gog pa'i bden pa ni don dam pa'i bden pa yin te/ cung zad kyang 'gal ba med do/ /de ltar gyur na yang kun rdzob ni ma rig pas nye bar bstan pas yang dag pa ma yin pa'i sgro btags pa'i rang bzhin yin pa'i phyir rnam par dpyad pa las lan brgya phrag tu nyams par gyur na yang ci ltar bden pa yin zhe na/de la yang bden mod kyi/ 'on kyang 'jig rten pa'i zhen pa las kun rdzob kyi bden pa zhes brjod de/ 'jig rten pa nyid kun rdzob kyi bden pa zhes 'dod cing / de'i rjes su 'brangs nas bcom ldan 'das kyis kyang de kho na'i don de nyid btang snyoms su gzhag nas kun rdzob kyi bden pa zhes gsungs te/de nyid kyi phyir/ 'jig rten kun rdzob bden pa dang / /zhes bstan bcos su khyad par dang bcas pas slob dpon gyi zhal snga nas kyis gsungs so/ / dngos po la ni don dam pa'i bden pa gcig pu kho na yin te/ de bas na cung zad kyang nyams pa med do/ /ji skad du bcom ldan 'das kyis/ dge slong dag 'di ni gcig pu ste don dam pa'i bden pa'o/ /'di lta ste mi bslu ba mya ngan las 'das pa'i chos yin la/ 'dus byas thams cad ni brdzun pa bslu ba'i chos so zhes gsungs so//'di ni bden pa gnyis su brjod pa yin no/ /de la ma rig pas bslang ba'i sems de'i rang bzhin gyis kun rdzob kyi bden pa yin no zhes rtogs la/ don dam pa'i bden pa ni ji lta bu dang mtshan nyid gang yin pa dang rang bzhin gang yin pa ma shes pas de'i tshe mtshan nyid brjod par bya ste/'di ltar/ don dam blo yi spyod yul min/ /zhes gsungs so/ /blo ni shes pa thams cad yin te/ shes pa thams cad kyi yul las 'das pa'i phyir spyod yul ma yin pa ste yul ma yin pa'o/ /blo de thams cad kyi rnam pa gang gis kyang yul du bya bar mi nus pa yin no zhes pa'i tha tshig ste/ji ltar de'i rang bzhin de ltar bstan par nus/ 'di ltar yang spros pa thams cad las rnam par grol ba'i rang bzhin de bzhin nyid don dam pa'i bden pa'i de kho na nyid yin pa de'i phyir ji ltar yang rnam par rtog pas mthong ba ma yin te/ khyad par thams cad dang bral ba'i phyir ro/ /brtags pa las 'das pa'i rang bzhin yang sgra rnams kyi spyod yul ma yin te/ sgra ni rnam par rtog pas bskyed pa yin la yul ma yin pa la rnam par rtog pa'i blo 'jug pa ma yin no/ /de lta bas na rnam par rtog pa'i brjod pa thams cad dang bral bas sgro ma btags pa kun rdzob ma yin pa brjod du med pa ni don dam pa de kho na nyid ji ltar na 'di ltar bstan par nus/de lta na yang snod dang ldan pa'i nyan pa po rnams ji ltar yang rjes su gzung ba'i don du yongs su brtag pa bzung nas kun rdzob kyi bden pa dpe nye bar bstan pas cung zad brjod pa yin te/dper na rab rib can la rab rib kyi mthus nam mkha'i phyogs thams cad du skra shad kyis khyab par mthong nas de dang der gdong sgyur bar byed de/ de ltar byed pa de rab rib med pas rig nas 'di ci byed ces de'i gan du song nas des mthong ba'i skra'i yul du mig phye nas bltas kyang skra'i gzugs ni mthong bar ma gyur la/skra shad de gzhir gyur pa'i dngos po dang dngos po med pa'i khyad par rnams yongs su rtogs pa ma yin no/ /gang gi tshe yang rab rib can gyis rab rib med pa la 'di ni skra yod do zhes rang gi bsam pas ston par byed pa de'i tshe de'i rnam par rtog pa spang ba'i don du de la 'di na skra shad cung zad kyang yod pa ma yin no zhes yang dag pa ji lta ba bzhin du 'di ston par byed de//rab rib can gyis mthong ba'i ngor dgag pa lhur byed pa nyid kyi tshig 'di smras pa yin te/ de rnams kyis de skad smras pa na yang dgag pa'am bsgrub par byas pa ni yod pa ma yin no//skra shad kyi de kho na nyid de yang rab rib can gyis mthong ba gang yin pa de rab rib med pas mthong ba ni ma yin no/ /de bzhin du ma rig pa'i rab rib kyis nyams pa dang ldan pas de kho na nyid ma mthong ba'i byis pas gang phung po dang khams dang skye mched kyi rang bzhin 'di dmigs pa ma yin te/de rnams kyi kun rdzob kyi ngo bo phung po la sogs pa de rnams rang bzhin gang gis rab rib med pas mthong ba'i tshul gyis ma rig pa'i bag chags mtha' dag spangs pa'i sangs rgyas bcom ldan 'das kyis gzigs pa de ni de rnams kyi don dam pa'i bden pa yin no//ji skad du/ bstan bcos mkhyen pas/ gang zhig rab rib snang bas rnam brtags pa/ /skra sogs ngo bo de nyid phyin ci log /mthong dag gang gis yang dag mthong de ni/ /de nyid yin te de bzhin 'dir shes bya/ /zhes gsungs pa yin no/ /de ltar don dam pa brjod par bya ba ma yin yang /don dam pa'i de kho na nyid gzigs pa'i sgo nas nye bar brtags pa bzung ste/ kun rdzob ji ltar yang bstan pa yin la/ kun rdzob kyi tha snyad ma lus pa spangs pa des dngos po'i rang bzhin smra bar nus pa ni ma yin te/ ji skad du/ yi ge med pa'i chos rnams la//nyan pa po gang ston pa gang / /don gang nyan cing ston byed pa/ /sgro btags pas na yi ge med/ /ces gsungs so/ /de lta bas na tha snyad pa'i bden pa nyid la brten nas don dam pa ston pa yin te/ don dam pa bstan pa rtogs pas kyang don dam pa mngon du byed pa yin te/de nyid de'i thabs yin pa'i phyir ro/ /gang bstan bcos las/ tha snyad la ni ma brten par/ /dam pa'i don ni rtogs med par/ /mya ngan 'das pa 'thob ma yin/ /zhes gsungs so/ /de ltar don dam pa bstan pa ni thabs yin la/ don dam pa rtogs pa yang thabs las byung ba yin te/gzhan du na de bstan par mi nus pa'i phyir ro/ /ci ste yang de lta bur gyur pa yang de lta bur gyur pa'i blo'i yul yin te/ don dam par ci'i phyir mi 'gyur zhe na/ 'di la/ blo ni kun rdzob yin par brjod/ /ces gsungs pa yin te/ blo la snang ba dang mi snang ba nyid kyi thams cad brtags pa'i rang bzhin yin te/rtog pa yang thams cad du ma rig pa'i rang bzhin yin te/ dngos po med pa 'dzin pa'i phyir ro/ /gang rnam par rtog pa 'di rang nyid kyis ma rig pa'i ngo bor gyur zhes gsungs so/ /ma rig pa yang kun rdzob yin te/ de'i phyir brgya la yang blo ni don dam pa'i rang bzhin 'dzin par don dam par 'thad pa ni ma yin no//gzhan du na kun rdzob blo'i gzung bar bya ba yin pas don dam pa'i rang bzhin nyid de nyams par 'gyur te/ dngos po la don dam pa ni kun rdzob kyi shes pa'i yul yin pa'i phyir ro/ /bcom ldan 'das kyis 'phags pa bden pa gnyis la 'jug pa der yang /lha'i bu gal te don dam pa'i bden pa lus dang ngag dang yid kyi spyod yul du gyur na de don dam pa'i grangs su mi 'gro zhing kun rdzob kyi bden pa nyid du 'gyur ro/ /lha'i bu 'on kyang don dam pa'i bden pa ni tha snyad thams cad las 'das pa dang / yang dag par ma skyes pa dang / ma 'gags pa dang / brjod par bya ba dang / rjod par byed pa dang / shes bya dang / shes pa dang bral ba yin te/ ji srid du rnam pa thams cad kyi mchog dang ldan pa'i thams cad mkhyen pa'i ye shes kyi yul las 'das pa ni don dam pa'i bden pa yin no zhes rgyas par gsungs so/ /de nyid kyi phyir rnam par rtog pa rnams kyi yul ma yin te/gang dngos po dang dngos po med pa yin pa/ rang dang gzhan gyi dngos po dang / bden pa dang bden pa ma yin pa dang / rtag pa dang / chad pa dang / rtag pa dang / mi rtag pa dang / bde ba dang / sdug bsngal ba dang / gtsang ba dang / mi gtsang ba dang / bdag dang / bdag med pa dang / stong pa dang / stong pa ma yin pa dang / gcig dang du ma dang / skye ba dang / 'gag pa la sogs pa'i khyad par rnams de kho na nyid du srid pa ma yin te/ 'di rnams kun rdzob kyi chos yin pa'i phyir ro/ /'di yang bcom ldan 'das kyis yab dang sras mjal ba'i mdo las ji skad du/'di ltar de bzhin gshegs pas kun rdzob dang / don dam pa gnyis thugs su chud de/ shes par bya ba yang kun rdzob dang / don dam pa 'dir zad do/ /de yang bcom ldan 'das kyis stong pa nyid du rab tu gzigs/ rab tu mkhyen/ legs par mngon du mdzad pas de'i phyir thams cad mkhyen pa zhes bya'o//de la kun rdzob ni 'jig rten gyi spyod par de bzhin gshegs pas gzigs so/ /don dam pa gang yin pa de ni brjod du med pa ste/ shes par bya ba ma yin pa/ rnam par shes par bya ba ma yin pa/ yongs su shes par bya ba ma yin pa/ ma bstan pa/ rab tu ma bstan pa nas bya ba med pa'i bar dang /byed pa med pa nas ji srid du thob pa ma yin pa/ ma thob pa ma yin pa/ bde ba ma yin pa/ sdug bsngal ba ma yin pa/ snyan pa ma yin pa/ mi snyan pa ma yin pa/ gzugs ma yin pa/ gzugs med pa ma yin pa zhes pa la sogs so/ /de ltar na kun rdzob kyi khyad par mtha' dag nub pa khyad par ma lus pa dang bral ba la dngos po mtha' yas shing yangs pa khyab pa'i ye shes kyi snang ba la gsal ba'i nang gi bdag can bcom ldan 'das kyis don dam pa'i bden pa'o zhes gsungs so//'di 'phags pa rnams nyid kyis rang rig pa'i rang bzhin yin pas so so rang gis rig pa yin te/de'i phyir de nyid 'di la tshad ma yin no/ /kun rdzob kyi bden pa ni 'jig rten pa'i tha snyad la brten nas bstan pa yin no/ /de 'di ltar rnam par dbye ba ji lta bar bden pa gnyis shes pas phyin ci ma log par chos rnam par 'byed pa skye bar 'gyur ro/ /de ltar kun rdzob dang don dam pa'i dbye bas bden pa gnyis su rnam par gzhag nas/de la dbang ba'i 'jig rten yang rnam pa gnyis nyid do zhes bstan pa'i phyir/ de la 'jig rten zhes pa la sogs pa gsungs te/ de la ni de dag la ste/ kun rdzob dang don dam pa'i bden pa la dbang bar gnas pa'i bden pa gnyis rtogs par byed pa po zhes bya ba'i tha tshig go//'jig rten ni skye bo yin la gnyis ni rnam pa gnyis yin te/ kun rdzob dang don dam pa'i bden pa rtogs pa dag go/ /'jig rten zhes pa ni spyi'i tshig yin pa des na phung po gnyis yin no zhes pa'i don to/ /mthong ba ni lung dang rigs pas rtogs pa'o//ji ltar na rnam pa gnyis su byas she na/ rnal 'byor pa dang phal pa'o zhes pa ste/ rnal 'byor ni ting nge 'dzin yin la/ chos thams cad ma dmigs pa'i mtshan nyid yin te/ de gang la yod pa de ni rnal 'byor pa yin la/ 'jig rten zhes phung po rnams gcig tu byas so//de bzhin du phal pa ni 'khor bar 'jug pa'i rgyu ma rig pa dang srid pa yin la/ de las byung ba ni phal pa yin te/ phal pa nyid phal pa yin la 'jig rten ni gnyis pa'o/ /de la rnal 'byor pa nyid ni gtso bo yin te phyin ci ma log par mthong ba yin no/ /phal pas dngos po phyin ci log tu mthong ba yin te 'khrul pa'i phyir ro//de ltar na yang gnyi gas rang gi de kho na nyid ci lta ba mthong bas gang zhig ma 'khrul pa can yin zhe na/ gang nyid la gzhan gyis gnod pa'o/ /yang 'di dag las gang gis gnod pa yin zhe na/ de la zhes pa la sogs pa gsungs te/ de la zhes pa ni bdun pa'i mtha' can spyir btang ba'i tshig dang dmigs kyis dga' ba la bdun pa'o//de la rnal 'byor pa dang 'jig rten phal pa de dag gi nang nas 'jig rten phal pa ni phal pa'i rigs kyi spyi las dmigs kyis bsal ba yin te/ dmigs kyis bsal nas kyang gnod ces pa ni gnod par brjod do//gang las ltos nas she na/ rnal 'byor 'jig rten zhes bya ba la sogs pa gsungs te/ rnal 'byor pa nyid 'jig rten yin te rnal 'byor pa'i 'jig rten pa'o/ /des gnod pa ni phyin ci log gi blor rnam gzhag byed pa'o/ /ji ltar zhe na/ blo khyad kyis zhes pa sbyar bar bya ste/rnal 'byor pa la ni 'jig rten pas gnod pa ma yin no/ /'dir bsam pa ni 'di yin te/ ji ltar 'khrul pas bskyed pa'i dngos por rab rib kyis nyams par byas pa'i mig can gyi mi bden pa'i skra shad mthong ba'i shes pa la ni dngos po ji ltar gnas pa'i de kho na nyid 'dzin pa rab rib med pa can gyi shes pas gnod do//de bzhin du rab rib med pa can gyi shes pa la ni rab rib can gyi shes pas mi gnod de/ de bzhin du ma rig pa'i dri [(]mi'i [,]ma'i [)]rab rib kyis blo'i mig skyon can du byas pas dngos po'i rang bzhin phyin ci log tu 'dzin pa ni phal pa'i shes pa yin la/ shes rab kyi chus bkrus pa'i mtshan nyid can dri ma dang bral ba zag pa med pa'i mig dag gis dngos po gnyug ma'i de kho na nyid rig pa'i rnal 'byor pas 'jig rten pa'i shes pa la gnod la/ slar cig shos kyis ni rnal 'byor pa'i shes pa la gnod pa ma yin no/ /ji ltar mthong ba'i rab rib mig can gyis//rab rib med pa'i ye shes la gnod min/ /de bzhin shes pa dri ma'i dbang gyur pas/ /dri med blo la gnod pa yod ma yin/ /zhes gsungs te/ de bas na phal pa'i shes pa 'khrul pa nyid la gnod do/ /'on te ci phal pa nyid la rnal 'byor pa rnams kyis gnod dam/ 'on te rnal 'byor pa la gnod ce na/gong ma zhes pa la sogs pa gsungs te/ rnal 'byor pa la yang rnal 'byor pa gzhan dang gzhan gyis gnod de/ phal pa 'ba' zhig la ni ma yin no zhes bya ba ni yang gi sgra'i don to/ /ji lta bur gyur pa zhe na/ gong ma gong ma'i zhes te/ gong ma las kyang gong ma de rnams kyis so//yon tan gyi khyad par zhes gong nas gong du gnas pa'i dbye bas khyad par thob pa ste lhag cing lhag pas zhes pa'i don te/ de la ltos nas yon tan chung bar gyur pa 'og ma'i gnod par byed pa yin la/ ye shes kyi che ba'i bdag nyid la sogs pa rnams kyis zil gyis gnon to/ / ji ltar zhe na/ blo khyad kyis te/ blo ni ye shes yin te shes rab kyi khyad par des sgrib pa de dang bral bas mchog tu gyur pa yin la 'di yang mtshon pa tsam ste bsam gtan dang ting nge 'dzin dang snyoms par 'jug pa la sogs pa'i khyad par rnams kyis kyang yin no/ /'di ltar yang sa dang po rab tu dga' bar grags pa thob pa'i byang chub sems dpa'i shes rab la sogs pa'i yon tan la ltos na de'i gong ma dri ma med par brjod pa'i sa gnyis pa thob pa'i byang chub sems dpa'i ye shes kyi stobs la sogs pa rnams kyi yon tan khyad par du 'phags so//de bzhin du sa gong ma gong ma gzhan 'thob pa rnams la yang rig par bya'o//de bzhin du bsam gtan dang po la sogs pa thob pa rnams la yang gong ma gong mas gnod par sbyar bar bya ste/ zag pa dang bcas pa rnams la zag pa med pa rnams kyis zhes pa'i bar du'o/ /de ltar bden na yang rnal 'byor pa'i blo'i khyad par las phal pa'i shes pa 'khrul pa yin no zhes ji ltar rtogs par nus she na/gnyi ga yang ni 'dod pa'i dpes/ /zhes gsungs te/ rnal 'byor pa dang phal pa gnyi ga 'dod cing mngon par 'dod pa'i dpe ste nye bar sbyar ba des so/ /gang 'dir mdo rnams su bcom ldan 'das kyis sgyu ma dang smig rgyu dang dri za'i grong khyer dang /gzugs brnyan la sogs pa'i dpe gsungs pa yin te/ de yang gnyi ga la rang bzhin med par grub pa yin la/ de dang chos mthun pas chos thams cad rang bzhin med pa nyid du ston pa'i phyir ro/ /'di ltar re zhig skye bo thams cad kyis rtogs pa'i gzugs la sogs pa rnams rnal 'byor pa de dag nyid kyis rang bzhin med pa nyid du rtogs pa yin te/don dam pa'i bden pa rtogs pa'i phyir ro/ /yang gang dag gis 'di rnams sgyu ma la sogs par dmigs pa de rnams phal pa rnams la yang 'grub ste/ de'i phyir gnyi ga la yang log par rtogs pa med pa'i phyir dpe'i chos rnams nyams pa med do//yang dpyod pa la sogs pa gang rnams yul dang dus gzhan gyi bdag nyid dngos po nyid de de bzhin du snang ba yin no zhes 'dod de/ de rnams kyang gzhan du sun phyung ba'i phyir de'i 'dod pa 'dir 'gegs pa ma yin no/ /rang gi sde pa gang dag kyang sems kyi dngos po yod pa nyid rmi lam la sogs pa rnams la de ltar snang bar 'dod de/de rnams kyang skabs ji lta bar 'og nas rang rig pa 'gegs par sun 'byin par 'gyur ro/ /rigs pas grub pa yang gnyi ga la grub pa yin no/ /de'i phyir dpe des phyin ci log gi dngos po'i rang bzhin 'dzin pa tha mal pa'i shes pa 'khrul pa zhes rnam par 'jog go//de bzhin du rnal 'byor pa'i shes pa la yang ji ltar rigs par shes par bya'o/ /gal te dngos po thams cad rang bzhin med pa zhes pa dngos po'i de kho na nyid yin na/ 'o na sems can thams cad gdon pa'i bsam pas sbyin pa la sogs pa'i tshogs yongs su rdzogs pa'i don du de kho na nyid rtogs pa'i byang chub sems dpa' yang ji ltar 'jug par 'gyur te/de rnams kyang rang bzhin med pa yin pa'i phyir ro zhe na/ de'i phyir/ dgos pa'i don du ma dpyad phyir/ /zhes pa la sogs pa gsungs te/dgos pa ni bsgrub bya dang blang bya dang 'bras bur brjod la de'i don ni de'i rgyu mtshan du'o/ /ma dpyad pa ni ma brtags par de'i rgyu la 'jug pa'i phyir te/ de ltar gyur na yang de la 'di ni rten cing 'brel par 'byung ba'i nges pa yod pa'i phyir rgyu dang 'bras bu la 'gal ba med do/ /'di skad du/gal te yang sgyu ma la sogs pa rang bzhin med pas sbyin pa la sogs pa rnams rang bzhin med pa de lta na yang 'khor gsum yongs su dag pas gus pa la sogs pa'i sbyor ba yongs su goms pa na/ don dam pa rtogs pa'i ched du de lta bur gyur pa yang rgyu'i dngos po nyid du 'gyur te/ de rnams kyi thabs yin pa'i phyir dang /rten cing 'brel par 'byung ba yang bsam gyis mi khyab pa yin pa'i phyir ro/ /'di lta bu ni 'bras bur rtogs te de de'i thabs las byung ba yin pa'i phyir ro zhes brjod par bya'o/ /de skad du/ thabs su gyur pa tha snyad bden pa dang / /thabs las byung ba'i don dam bden pa dag /ces gsungs so/ /'di ni nges par de ltar yin te/ gzhan du na dri ma dang bcas pa'i gnas skabs na lam la sogs pa med na dri ma dang bcas pa'i gnas skabs las dri ma med pa la gnas pa dang / rtog pa dang bcas pa'i gnas skabs las rtog pa med par ji ltar skye bar 'gyur te/de don dam par de'i rang bzhin yin pa'i phyir ro/ /'di ni gzhan du yang mtshungs pa yin te/ chos thams cad don dam par rang bzhin med pa'i phyir ro/ /rgyu nyid dang de'i rang bzhin thams cad la 'bras bur 'dod do/ /de'i phyir kun rdzob rang bzhin med pa las kyang rang bzhin med pa'i rtogs pa nyid 'bras bu yin no/ji ltar 'dus byas pa'i lam las gzhan 'dus ma byas pa'i mya ngan las 'das pa thob par 'gyur te/ de ltar na sbyin pa la sogs pa dngos po la rang bzhin med pa yin na yang don dam pa'i de kho na nyid rtogs pa'i ched du sems can rnams la byang chub sems dpa' rnams kyi thugs rjes 'dzin par mdzad de/gzhan du na don dam pa rtog pa dang bral ba'i phyir ro/ /des na sbyin pa la sogs pa la 'jug pa ma bkag pa nyid de/ de bas na 'dod pa dang mi 'dod pa'i 'bras bu thob pa dang spong bar 'dod pas dge ba dang mi dge ba dag la 'jug pa dang ldog par bya ste/'di yang phyi nas gsal bar byed par 'gyur ro/ /de ltar gyur na sgyu ma la sogs pa dang mtshungs pa'i dngos po'i rang gi ngo bo'i rang bzhin rnal 'byor pa rtogs pa de nyid skye bo phal pas rtogs na ji ltar gong du log par rtogs pa yod par 'gyur zhe na/ 'jig rten zhes pa la sogs pa gsungs te/ 'jig rten pa ni skye bo phal pa ste rgyu dang / rkyen la brten nas dngos po rnams rang bzhin thob po zhes so/ /de ltar na dngos po'i sgras ni yod pa'i rang bzhin gyis dngos po med pa brjod pa nyid du rtogs so/ /mthong ba 'ba' zhig ni ma yin gyi yang dag pa nyid du rtog par byed pa'ang yin te/ji ltar rang bzhin rtogs pa nyid don dam par zhen par byed do zhes pa'i don to/ /gang 'di ni bdag gi rtogs pa'i spyod yul du gyur pa'i ngo bo yin te/ de dngos po nyid yin no zhes zhen pa'i phyir la sgyu ma bzhin du ni ma yin te/ yang ji ltar rnal 'byor pas sgyu ma bzhin du ste/sgyu ma lta bur don dam pa'i rang bzhin mthong ba de bzhin du rtogs pa ma yin no/ /de'i phyir 'dir zhes te 'di la spyod pa ste log par rtogs pa yin la/ rnal 'byor pa dang 'jig rten pa spyod de rnal 'byor pa dang 'jig rten pa lhan cig tu'o zhes pa'i don to/ /des rtogs pa'i dngos po'i de kho na nyid la 'jig rten pas ma rtogs pas yang 'jig rten dang lhan cig tu de rab tu rtogs pa la rnal 'byor pas ji lta ba'i don 'gegs pa'i phyir ro//bsam pa ni 'di yin te/ dngos po thams cad la kun rdzob dang don dam pa'i bden pa ngo bo nyid yod pa yin te/ de la gang kun rdzob kyi bden pa de nyid ni 'jig rten pas rtogs pa yin la gang don dam pa'i bden pa de ni rnal 'byor pas rtogs so zhes brjod de/dper na sgyu ma mkhan gyis sprul pa'i glang po che la sogs pa'i gzugs nyid sngags la sogs pa'i mthus bslad pa'i mig can gyi skye bo rnams kyis mthong ste/sgyu ma mkhan gyis ni de'i rang bzhin la sogs pa gnyug ma'i gzugs mthong ngo / /de bzhin du rnal 'byor pa dang 'jig rten pas kyang yin te ji ltar rigs par rtogs par bya'o/ /de ltar gyur na yang gang skye bo ma lus pa la thun mong du mngon sum gyi tshad mas mthong ba'i dngos po'i rang bzhin de don byed nus pa yin la/de la ji ltar bsnyon par nus zhes gzhan gyi sems kyi dogs pa bsu nas/ gzugs sogs mngon sum zhes pa la sogs pa gsungs te/ gzugs la sogs pa gang zhig mngon sum du byas na yang ngo / /sogs pa'i sgras ni sgra la sogs pa dang tshor ba la sogs pa gzung ngo //de yang yongs su grags pa yin te/ 'jig rten pa'i yongs su grags pa yin la tshad mas min te/ tshad mas rtogs pa mngon sum gyi gzugs la sogs pa yod pa ma yin no zhes pa dang 'brel te/ mngon sum la sogs pa tha snyad pa'i tshad ma nyid yin pa'i phyir ro//des rtogs pa'i gzugs la sogs pa yang kun rdzob nyid yin te/ 'jig rten pa'i tshad mas yang dag par rtogs par bya ba de kho na nyid kyi rang bzhin ni ma yin te/ skye bo thams cad kyis de kho na nyid rtogs par thal ba'i phyir ro//gang gsungs pa/ gang zhig /dbang pos gang zhig dmigs pa de/ /gal te de nyid yin gyur na/ /byis la de nyid rtogs skye bas/ /de tshe de nyid shes ci dgos/ /zhes so/ /de lta bas na mngon sum yin yang tshad mas rtogs pa ma yin no/ /gzugs la sogs pa'i de kho na nyid mngon sum yin na yang gal te tshad mas ma rtogs na de ji ltar rab tu grags par 'gyur/rab tu grags pa na yang ji ltar brdzun pa yin zhe na/ mi gtsang zhes pa la sogs pa gsungs te/ ji ltar yang don dam par bud med kyi lus la sogs pa mi gtsang ba la phyin ci log tu zhen pa'i sems kyis de la gtsang ba'i blo skye bar 'gyur ro//sogs pa'i sgras mi rtag pa la sogs pa la rtag pa la sogs pa'i blo skye ba gzung ngo / /de yang de ma yin pa der 'dzin pas brdzun pa yin te/ phyin ci log tu 'dzin pa yin no zhes pa'i don to/ /de bzhin du gzugs la sogs pa rnams la yang khyad par med do//gal te mngon sum gyi tshad mas de ma grub na 'on kyang lung las grub par 'gyur te/ 'di ltar phung po dang khams dang skye mched la sogs pa'i rang bzhin gyis yod par bcom ldan 'das kyis mdo sde las bstan pa dang / skad cig ma la sogs pa'i rang bzhin yang bstan to//der gsungs pa ni 'di yin no/ /bram ze thams cad thams cad ces bya ba ni phung po lnga rnams dang skye mched bcu gnyis po rnams dang khams bcwa brgyad do zhes pa'i bar du bcom ldan 'das kyis gsungs pa dang / 'di ltar yang / 'dus byas thams cad skad cig ma/ / mi gnas bya ba ga la yod/ /'di dag byung ba de nyid ni/ /bya ba de nyid byed par brjod/ /ces so/ /sgyu ma la sogs pa'i rang bzhin rnams la skad cig ma dang skad cig ma yin pa la sogs pa'i chos bstan par rigs pa ma yin te/ rang bzhin med pa rnams la rang bzhin cung zad kyang yod pa ma yin pa'i phyir de ji ltar 'di rnams don dam par yod pa ma yin zhe na/'jig rten gzhug pa'i don du yang / /zhes pa la sogs pa gsungs te/ 'jig rten ni dngos po la mngon par zhen pa phung po la sogs pa bstan pas gdul bar bya ba'i sems can rnams yin te/ re zhig stong pa nyid bstan pa la mi dbang bar gyur pa rnams yin no//stong pa nyid la gzhug pa'i don du rim pa bzhin du 'jam pos gzhug pa'i ched du yin no/ /yang ni gtan tshigs yin te/ gang gi phyir phung po dang khams la sogs pa'i mtshan nyid can gyi chos rnams dngos po la rang bzhin med pa yin pa'i phyir ro//mgon pos ni dmyal ba la sogs pa'i sdug bsngal las sems can rnams yongs su skyob pas mngon par mtho ba dang nges par legs pa'i bde ba thob par 'dod pa la sogs pa'i bsam pa mkhyen pa'i sangs rgyas bcom ldan 'das kyis bstan pa yin te/ gsal bar mdzad pa yin gyi don dam par ni ma yin pa de lta bas na mdo 'gal ba ni ma yin no//de skad du/ rgyal bas bdag dang bdag gi zhes/ /dgos pa'i dbang gis gsungs pa ltar/ /de bzhin phung po skye mched khams/ /dgos pa'i dbang gis gsungs pa yin/ /zhes gsungs so/ /gal te don dam par gsungs pa ma yin na 'o na de rnams ji ltar skad cig ma yin zhe na/de nyid du/ de dag skad cig ma nyid min/ /zhes gsungs te/ de kho na nyid du ste don dam par yin la/ rang bzhin med pa'i phyir skad cig ma yang ma yin no/ /de dag ni dngos po 'di rnams te/ skad cig ma la sogs pas bstan pa'i gdul bya rnams la de'i rang bzhin bstan pa'i phyir ro/ /gal te de kho na nyid du skad cig ma ma yin na/ 'on yang ji ltar bstan zhes yid la bzhag nas/ kun rdzob ces smos te/ gal te kun rdzob tu skad cig mar bstan to zhes brjod na zhes lan gyi dogs pa byas na de'i tshe 'gal bar 'gyur zhes te/kun rdzob tu skad cig ma yin zhing don dam par ma yin no zhes 'gal bar 'gyur te 'brel par mi 'gyur la/ skad cig ma ma yin par rtogs pa dang 'gal lo/ /tha snyad pa rnams kyis skad cig ma ma yin pa'i de kho na nyid du rtogs pa dang / kun rdzob kyi rang bzhin zhes pa ni 'gal lo zhes pa'i don to/ /'di grub pa'i mtha' gsung bas spong ba ni/ rnal 'byor kun rdzob nyes med de/ /zhes pa la/ 'di la rtogs pa dang 'gal ba'i nyes pa med do/ /ci'i phyir zhe na/ gang zag la bdag med pa'i ting nge 'dzin thob pa'i rnal 'byor pa rnams kyi kun rdzob kyi tha snyad yin te/des skad cig ma nyid du rtogs so/ /bsam pa ni 'di yin te/ tshu rol mthong ba rnams kyis gal te skad cig ma nyid ma rtogs mod kyi de lta na yang rnal 'byor pa'i tha snyad kyi yul yin la/ rnal 'byor pa'i tha snyad du yang kun rdzob kyi rang bzhin spong ba ma yin te/blo ni kun rdzob yin par brjod/ /ces pa'i tshig las so/ /rtogs pa dang 'gal ba yang gnod pa ma yin pa nyid de/ de lta bu'i rtogs pa ni tshad ma ma yin pa nyid kyi phyir ro/ /ci'i phyir kun rdzob tu yang skad cig ma nyid la sogs pa rnal 'byor pa nyid kyis mthong gi tshu rol mthong ba rnams kyis ma mthong zhe na gsungs pa/'jig rten las te tshu rol mthong ba'i bdag nyid las so/ /de rnams ni rnal 'byor pa de kho na nyid mthong ba yin te/ dbang po las 'das pa mthong ba yin la/ 'di ni gtan tshigs kyi tshig yin no/ /gang gi phyir de rnams kyis de kho na nyid mthong ba de'i phyir skad cig ma'i bdag nyid la sogs pa 'jig rten pa rnams kyis ma rtogs kyang 'dis rtogs pa yin no//de nyid kyi phyir de rnams la 'jig rten gyi rtogs pas gnod pa yod pa ma yin no/ /nges par 'di khas blang bar bya'o zhes gzhan du zhes pa la sogs pa gsungs te/gzhan du na gal te 'di lta bu khas mi len na de'i tshe khyed kyis khas blangs pa la 'jig rten gyis gnod par 'gyur ro/ /gang du zhe na/ bud med mi gtsang bar nges par rtog pa na ste mi gtsang bar bsgom pa'i dus na 'dod par bya ba'i bud med 'di mi gtsang ngo zhes nges par rtog ste/ bsgom pa'i dus na 'jig rten gyis gnod 'gyur te/'jig rten gyi grags pas gnod par 'gyur la/ 'jig rten pas bud med kyi lus gtsang ba nyid du zhen pa'i phyir ro/ /de lta bas na 'jig rten pa'i rtogs pas rnal 'byor pa'i mthong ba la sogs pa la gnod pa ma yin no/ /'di nyid du/'di ltar rab rib kyis mthong ba/ /zhes pa la sogs pa lhag pa'i gtan tshigs 'dir sbyar bar bya'o/ /lung gis kyang dngos po rnams kyi de kho na nyid grub pa ma yin no/ /de lta bas na chos thams cad ni sgyu ma dang rmi lam la sogs pa'i rang bzhin yin no zhes 'di nges pa yin no/ / de ltar na yang gal te sgyu ma'i rang bzhin gyis thams cad la khyab pa yin no/ /'o na ni sangs rgyas kyang sgyu ma lta bu rmi lam lta bur 'gyur ro/ /'di ni bcom ldan 'das mar gsungs te/ de skad ces smras pa dang / tshe dang ldan pa rab 'byor gyis lha'i bu de dag la 'di skad ces smras so/ / lha'i bu dag sems can de dag ni sgyu ma lta bu/ sems can de dag ni rmi lam lta bu ste/ lha'i bu dag de ltar sgyu ma dang / sems can de dag ni gnyis su med de gnyis su byar med do/ /lha'i bu dag chos thams cad kyang sgyu ma lta bu rmi lam lta bu'o/ /rgyun du zhugs pa yang sgyu ma lta bu rmi lam lta bu'o//rgyun du zhugs pa'i 'bras bu yang sgyu ma lta bu rmi lam lta bu'o/ /de bzhin du lan cig phyir 'ong ba dang / lan cig phyir 'ong ba'i 'bras bu dang / phyir mi 'ong ba dang / phyir mi 'ong ba'i 'bras bu dang / dgra bcom pa dang / dgra bcom pa nyid kyang sgyu ma lta bu rmi lam lta bu'o/ / rang sangs rgyas kyang sgyu ma lta bu rmi lam lta bu'o/ /rang sangs rgyas nyid kyang sgyu ma lta bu rmi lam lta bu'o/ /yang dag par rdzogs pa'i sangs rgyas kyang sgyu ma lta bu rmi lam lta bu'o/ /yang dag par rdzogs pa'i sangs rgyas nyid kyang sgyu ma lta bu rmi lam lta bu'o zhes pa nas ji srid du mya ngan las 'das pa yang sgyu ma lta bu rmi lam lta bu'o//mya ngan las 'das pa las khyad par du 'phags pa'i chos gzhan zhig yod kyang de yang sgyu ma lta bu rmi lam lta bu'o zhes smra'o zhes te de ltar na de la phan pa dang gnod pa dag las ji ltar bsod nams dang sdig pa skye bar 'gyur ro zhes sems shing dogs nas/sgyu 'dra'i zhes pa la sogs pas gsungs te/ gal te bcom ldan 'das kyang sgyu ma lta bu'i rang bzhin yin na de'i tshe sgyu ma lta bur rang bzhin med pa'i rgyal ba ste bcom ldan 'das la bsod nams te/ mchod pa dang bsnyen bkur dang zhabs la phyag 'tshal ba la sogs pa rnams kyis legs par spyad pa ji ltar te/gang dang 'dra bar 'gyur zhes sems te/ 'di yang mchod pa tsam yin la/ de la gnod pa byas pa las sdig par yang ji lta bur 'gyur zhes blta bar bya ste/ sgyu ma mkhan gyis sprul pa'i skyes bu la bkur sti byas pa dang /gnod pa byed pa dag las bsod nams dang sdig pa skye bar rigs pa ma yin no zhes pa ni gzhan gyi bsam pa yin no/ /'dir sngar brjod pa nyid lan yin la/ de bzhin du 'dir gzhan la 'di skad dri bar bya ste/ dngos yod la ste ji ltar te ji lta bur zhes pa'o/ / yod pa ste don dam par yod pa'i bcom ldan 'das la yang ji ltar te ji bzhin du zhes gnyi ga la sbyar bar bya'o/ /dgongs pa ni 'di yin te/ dper na don dam par yod pa'i rgyal ba 'ga' zhig las don dam pa'i bsod nams skye bar 'gyur ba de bzhin du gzhan la yang sgyu ma lta bu las sgyu ma lta bu nyid yin la/khyed dang kho bo cag la khyad par cung zad kyang med de/ 'di rten cing 'brel par 'byung ba tsam du gnyi ga la thun mong yin pa'i phyir ro/ /des na gang khyed kyi lan yin pa de nyid bdag cag gi yang yin te/ khyad par cung zad yod pa ma yin no/ /rigs pas grub pa don dam par yod pa'i dngos po'i rang bzhin ni cung zad kyang yod pa ma yin no zhes bsgrubs zin to//sgyu ma lta bu'i rgyal ba las bsod nams skyer chug pa de lta na yang 'di la lan 'di ji ltar 'debs zhes/ gal te sems can zhes pa la sogs pa smos so/ /yang na gzhan du sbyar bar bya ste/ gal te rgyal ba yang sgyu ma lta bu yin na de ltar na 'khor ba'i sems can rnams la ji ltar brjod de/ de rnams kyang de bzhin du brjod de/ lha'i bu sems can de rnams kyang sgyu ma lta bu'i zhes bya ba'i tshig las so/ /de ltar na nyes pa chen por thal bar 'gyur ro zhes pa/ gal te sems can zhes pa la sogs pa gsungs te/ gal te sgyu ma lta bu sgyu ma'i rang bzhin dang 'dra ba'i chos sems can srog chags rnams yin na shi nas ji ltar skye la ji ltar zhes pa ni 'dri ba'am mi bzod pa'o/ /shi ba ni rigs mthun pas las nyams pa yin la/ ji ltar skye ste yang 'byung bar 'gyur zhes 'dir rgyu mtshan brjod par bya ba 'di rigs pa ma yin no zhes so//sgyu ma'i skyes bu zhig nas skye ba ni yod pa ma yin te/ de lta bas na don dam par yod pa'i dngos po yin no zhes khas blang bar bya'o/ /'di khas blang bar mi bya'o zhes pa ji srid ces pa la sogs pa gsungs te dus ji srid du rkyen rnams te rgyu rnams yin la/ sngags dang sman la sogs pa'i tshogs pa 'dus pa sna tshogs par gyur cing rgyu yin pa na dus de srid du sgyu ma yang 'jug pa yin te sngar ldog pa ni ma yin la/de las phyis kyang 'jug pa ma yin no/ /de bzhin du ji srid du ma rig pa dang las dang sred pa'i rang bzhin gyi tshogs pa de srid du sems can gyi rgyud kyi sgyu ma yang 'byung bar 'gyur te/gang rkyen rnams gang yin pa ni 'jug pa'i phyir ro/ /gal te don dam par sems can med na 'khor ba ji srid du sems can gyi rgyun rnams ji ltar 'jug par 'gyur te/ sgyu ma bzhin du yun thung bar 'byung ba ni ma yin no zhe na/ 'di la brjod pa/ji srid rkyen rnams tshogs gyur pa/ /de srid sgyu ma 'byung bar 'gyur/ /zhes so/ /gzhan yang yun ring du gnas pas kyang yang dag pa nyid du rnam par gzhag pa'i rgyu ma yin no zhes/ rgyun ring tsam gyis zhes pa la sogs pa gsungs te/ rgyun ring ste dus ring por gnas pa'i rgyud 'byung ba de nyid de lta bu tsam 'ga' zhig des ji ltar te rnam pa gang gi sgo nas sems can yod cing bdog ces 'dri ba'o//yod pa ni don dam par ro/ /'di lta bu'i khyad par yod pas gang la yun ring por gnas pa'i rgyu dang rkyen gyi khyad par yod pa de yun ring por 'jug pa yin la/gang la de bzhin du med pa de rjes su ldog pa yin te/ de tsam gyis yang dag pa dang log pa ni ma yin no/ /de lta bas na sgyu ma'i rang bzhin yin na yang slar mi skye ba ni ma yin no/ /de lta na 'o na sgyu ma'i skyes bu bsad pa la sogs pa la srog gcod pa med pa de bzhin du de las gzhan pa'i skyes bu bsad pa la sogs pa la yang mi 'gyur te/rang bzhin tha dad pa ma yin pa'i phyir ro zhe na/ sgyu ma'i skyes bu zhes pa la sogs pa gsungs te/ sgyu ma'i skyes bu bsad pa sogs la ste srog dang bral ba la sogs pa la'o/ /sogs pa'i sgras ni 'di la ma byin par blangs pa la sogs pa yin la rang bzhin med pa nyid du mtshungs na yang sems te rnam par shes pa sgyu ma'i skyes bu'i rgyud la med pa ste mi srid pa'i phyir sdig med de mi dge ba skye bar mi 'gyur ro//de la yang bsad pa'i bsam pas brgyab pa las mi dge bar 'gyur ba kho nar te/ srog gcod pa ni ma yin no//sgyu ma'i skyes bu las gzhan la ni srog gcod par ji ltar 'gyur zhe na/ sgyu ma'i sems zhes pa la sogs pa gsungs te/ sems nyid sgyu ma yin te sgyu ma'i sems yin la de dang mtshungs te ldan pa la'o/ /sgyu ma'i rang bzhin gyi sems dang 'brel zhes pa'i don to/ /ni'i sgras ni sngar las khyad par du byed pa'i don to//bsod nams dang sdig pa ni bsod nams dang sdig pa dag ste/ phan pa dang gnod pa dag gi nyes par dpyad pa dang legs par dpyad pa las byung ba ni tshogs pa'i khyad par las 'bras bu'i yin te/ dper na lci ba dang gzhan las skyes pa'i myu gu dag rnam par mtshungs pa yod kyang rgyu'i khyad par las rang bzhin gyi khyad par yin pa de bzhin du 'di la yang brjod pa'i nyes pa yod pa ma yin no//gang sgyu ma'i sems dang ldan pa la zhes brjod pa na de la gzhan gyi nyams par 'gyur ro zhes sngags so zhes pa la sogs pa smos te/ sngags la sogs pa'i sgras ni sman la sogs pa'i yin la sems bskyed pa la nus pa med pas te/ bya ba mi byed pa'i phyir sgyu ma la sems 'byung ba med cing sgyu ma'i rang bzhin ni sems su 'gyur ba ma yin te dper na gzhan rmongs pa'i rgyu mtshan can rnams la sgyu ma mkhan gyis rab tu sbyar ba'i sngags la sogs pa'i mthus glang po che la sogs pa'i rnam par 'grub la de bzhin du sems yod pa ni ma yin no zhes bya ba ni gzhan gyi bsam pa yin no//'di'i lan/ sna tshogs rkyen zhes pa la sogs pa gsungs te/ yang gi sgras ni nges par gzung ba'am rim pa gzhan du sbyar ba yin te/ sgyu ma de sna tshogs nyid de rnam pa sna tshogs pa nyid yin la/ shin tu yang rkyen sna tshogs las byung ba yin te/ sna tshogs pa'i rkyen rnam pa du ma las byung zhing skyes pa gang yin pa de la de skad ces bya'o/ /dgongs pa ni 'di yin te/ gal te yang sgyu ma sgyu ma zhes bya ba'i sgra mtshungs pa de lta na yang de'i rgyu la tha dad pa med pa ma yin te/sgyu ma'i rang bzhin yin na yang 'bras bu sna tshogs pa'i rang bzhin yin pa'i phyir ro/ /'bras bu gcig pa rgyu gcig pas 'bras bu'i sgra mtshungs pa'i phyir thams cad du de nyid yin no zhes brtag par rigs pa ni ma yin te/ 'on kyang sgra mtshungs pa na yang 'ga' zhig la 'ga' zhig gi nus pa'i rang bzhin tha dad pa'i phyir ro//de nyid bstan pa'i phyir/ rkyen gcig gis ni zhes bya ba la sogs pa gsungs te/ gcig gi nus pa 'ga' zhig la mthong ba'i rkyen gcig ste rgyu thams cad kyi nus pas 'bras bu thams cad la nus pa yod pa ni srid pa ma yin te/'ga' zhig tu mthong zhes byas nas gang na yang ste dus 'ga' zhig gam yul 'ga' zhig tu mthong ba'am 'dod pa ma yin no/ /de'i phyir sgyu ma 'ga' zhig sngags la sogs pa'i nus pas grub pa'i rang bzhin dang 'ga' zhig yang thog ma med pa'i 'khor ba nas 'jug pa'i che ba'i bdag nyid ma rig pa las byung bas rab tu 'jug go//de lta bas na thams cad la ni sngags la sogs pa las nus pa yod pa ma yin no/ /'di thams cad 'jig rten pa'i tha snyad kyi rjes su 'brang ste rtog pas sprul pa'i kun rdzob kyi dngos po'i de kho na nyid la brten nas byung ba yin gyi don dam par ni ma yin te/don dam pa'i gnas skabs na skye ba dang 'chi ba dang 'byung ba dang 'gag pa dang rgyu dang 'bras bu dang dngos po dang dngos po med pa la sogs pa'i brtags pa med pa'i phyir na chos thams cad rang bzhin gyis ldog pa'i phyir ro//'di las ma bzod nas gzhan yang slar yang thal bar 'gyur ba brjod pa ni gal te don dam zhes pa la sogs pa'o/ /mya ngan las 'das pa ni rang bzhin gyis stong pa yin pa'i phyir skye ba dang 'gag pa la sogs pa dang bral ba yin la/ don dam par ni don dam pa'i bden pa yin te/rang bzhin gyis mya ngan las 'das par gdod ma nas zhi ba'i phyir ro/ /gal te kun rdzob ni kun rdzob kyi bden pas te/ brtags pa nyid kyis so/ /'khor bar 'gyur ba ni skye ba dang rga shi la sogs pa dang ldan par gyur pa yin la/ de'i tshe 'gal ba chen por 'gyur ro zhes sangs rgyas kyang ni 'khor 'gyur bas zhes brjod de/'di ltar khas blangs pa na sgrib pa thams cad dang bral bas mya ngan las 'das pa'i sangs rgyas kyang 'khor bar 'gyur te/ skye ba la sogs pa'i cha dang ldan par 'gyur ro/ /gang gi phyir de ltar na rgyu des byang chub kyi spyod pas ci zhig bya ste/byang chub pa'i ched ni sangs rgyas kyi ched du spyod pa ste lag pa dang rkang pa dang mgo bo la sogs pa sbyin pa sngon du 'gro ba'i sdug bsngal du ma'i mtshan nyid kyis ci zhig bya zhing dgos pa cung zad kyang yod pa ma yin te/ brjod pa'i rang bzhin med pa'i phyir ro/ / de yang 'khor ba'i chos thams cad ldog pa'i ched du yon tan thams cad bsdus pa la brten te sangs rgyas thob par bya ba'i phyir yang dag par brten la de lta na yang 'khor ba'i chos ma log na bsgrubs pas ci zhig bya zhes bsams pa'o/ /'di yang ji srid rkyen rnams tshogs par gyur pa zhes bya ba la sogs pa bsal ba yin te/slar yang khyad par bstan pa'i phyir/ rkyen rnams rgyun ni mi chad na/ /zhes bya ba la sogs pa gsungs te/ rkyen rnams te rgyu rnams rgyun ma chad cing ma nyams na'o/ /ni zhes pa ni gang gi phyir te sgyu ma'ang yin te 'khor ba 'ga' zhig ni ma yin la/'ang gi sgras ni sdud pa yin te rgyun chad cing ldog par mi 'gyur ro/ /rkyen rnams te rgyu rnams rgyun chad pa'i phyir ldog pas na kun rdzob kyang rtag pa nyid de/ tha snyad nyid du yang 'khor ba srid pa ma yin no/ /rkyen rnams rgyun chad pa yang de kho na nyid la goms par byas pas ma rig pa la sogs pa rim gyis 'gal bar 'gyur bar shes par bya'o//de ji ltar sA lu ljang pa'i mdo las 'di skad du/ byang chub sems dpa' sems dpa' chen po byams pas tshe dang ldan pa shA ri'i bu la 'di skad ces smras so/ /bcom ldan 'das chos kyi rje thams cad mkhyen pas gang 'di skad du/dge slong dag gang gis rten cing 'brel par 'byung ba mthong ba des chos mthong ngo / /gang gis chos mthong ba des sangs rgyas mthong ngo zhes gsungs pa de la rten cing 'brel par 'byung ba gang zhe na/ 'di lta ste/ ma rig pa'i rkyen gyis 'du byed rnams/ 'du byed kyi rkyen gyis rnam par shes pa/rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung ste/ de ltar sdug bsngal gyi phung po chen po 'di 'ba' zhig 'byung bar 'gyur ro/ /de la ma rig pa 'gags pas 'du byed 'gag ces pa nas/ de ltar sdug bsngal gyi phung po chen po 'di 'gag par 'gyur te/'di la rten cing 'brel par 'byung ba zhes brjod do/ /snga ma bzhin du 'di ni rten cing 'brel par 'byung ba yin te/ rtag pa dang / srog med pa dang / srog dang bral ba dang / ji lta bu nyid dang / ma nor ba dang / ma skyes pa dang / ma byung ba dang / ma byas pa dang /'dus ma byas pa dang / thogs pa med pa dang / dmigs pa med pa dang / zhi ba dang / 'jigs pa med pa dang / mi 'phrogs pa dang / rnam par zhi ba ma yin pa'i rang bzhin gyis mthong ba des chos thams cad mthong ngo / /gang gis 'di ltar rtag pa dang srog med pa nas rnam par zhi ba ma yin pa'i rang bzhin du mthong ba des bla na med pa'i chos kyi skur sangs rgyas mthong ba zhes gong ma bzhin du'o//de la ma rig pa gang zhe na/ khams drug po 'di dag nyid la gang gcig pur 'du shes pa dang / ril por 'du shes pa dang / rtag par 'du shes pa dang / brtan par 'du shes pa dang / ther zug tu 'du shes pa dang / bde bar 'du shes pa dang / bdag tu 'du shes pa dang / sems can du 'du shes pa dang / srog tu 'du shes pa dang / skye bar 'du shes pa dang / shed bur 'du shes pa dang / shed las skyes su 'du shes pa dang / bdag tu nga rgyal dang / bdag gi bar 'du shes pa ste/ 'di lta bu la sogs pa sna tshogs pa/ mi shes pa la ma rig par brjod do/ /de la ma rig pa yod pas yul rnams la 'dod chags dang / zhe sdang dang / gti mug 'jug pa ste/ de la yul rnams la 'dod chags dang / zhe sdang dang / gti mug gang yin pa 'di ni ma rig pa'i rkyen gyis 'du byed rnams zhes bya'o//dngos po so sor rnam par rig pa ni rnam par shes pa'o/ /'byung ba chen po bzhi po nye bar bzung nas/ gzugs gcig po ni gzugs so/ /rnam par shes pa dang lhan cig byung ba nye bar len pa'i phung po bzhi po gzugs can du ma yin pa'i nye bar len pa'i phung po ni ming ste/de dang de ni ming dang gzugs so/ /ming dang gzugs la brten pa'i dbang po rnams ni skye mched drug go/ /chos gsum 'dus pa ni reg pa'o/ /reg pa myong ba ni tshor ba'o/ /tshor ba la zhen pa ni sred pa'o/ /sred pa 'phel ba ni len pa'o/ / len pa las skyes pa yang srid pa skyes pa'i las ni srid pa'o/ /rgyu de las phung po byung ba ni skye ba'o/ /skyes nas phung po smin pa ni rgas pa'o/ /rgas nas phung po 'jig pa ni 'chi ba'o/ /'chi zhing myong ste mngon par chags pa dang bcas pa'i nang gi yongs su gdung ba ni mya ngan no/ / mya ngan las byung ba'i tshig tu smra ba ni smre sngags 'don pa'o/ /rnam par shes pa lnga'i tshogs dang ldan pa'i mi bde ba myong ba ni sdug bsngal myong ba'o/ /yid la byed pa dang ldan pa'i yid kyi sdug bsngal ni yid mi bde ba'o/ /gzhan yang 'di lta bu la sogs pa nyon mongs pa gang yin pa ni 'khrug pa zhes bya'o//de la mun pa chen po'i phyir ma rig pa'o/ /mngon par 'du byed pa'i phyir 'du byed rnams so/ /rnam par rig pa'i phyir rnam par shes pa'o/ /rlom pa'i phyir ming dang gzugs so/ /skye ba'i sgo'i phyir skye mched drug go/ /reg pa'i don gyis reg pa'o//myong ba'i phyir tshor ba'o/ /skom pa'i phyir sred pa'o/ /nye bar len pa'i phyir len pa'o/ /yang srid pa skyed pa'i phyir srid pa'o/ /phung po 'byung ba'i phyir skye ba'o/ /phung po smin pa'i phyir rgas pa'o/ /'jig pa'i phyir 'chi ba'o/ /mya ngan byed pa'i phyir mya ngan no/ /tshig gi smre ba'i phyir smre sngags 'don pa'o//lus la gnod pa'i phyir sdug bsngal ba'o/ /sems la gnod pa'i phyir yid mi bde ba'o/ /nyon mongs pa'i phyir 'khrug pa'o zhes rgyas par gsungs so/ /de ltar nye bar bstan pa'i rkyen rnams rgyun ma chad na 'du byed nyams pa med par 'jug ste/rten cing 'brel par 'byung ba yan lag bcu gnyis po de nyid 'du byed pa yin pa'i phyir ro/ /slob dpon gyi zhal snga nas/ ji ltar 'bangs bzhin rim gyis rgyun/ /skyes nas las dang nyon mongs kyis/ /'jig rten pha rol dag tu 'gro/ /srid pa'i 'khor lo thog ma med/ / de ni rten cing 'brel 'byung ba'i/ /yan lag bcu gnyis cha gsum mo/ /zhes gsungs pa yin no/ /rkyen rnams yang rgyun chad na rnam pa thams cad du 'khor ba med par 'gyur te/ rgyu ma tshang ba'i phyir ro/ /de'i phyir sangs rgyas kyang 'khor bar thal bar 'gyur ba de ni ma yin no//de ltar re zhig mdo sde pa la sogs pa'i brgal ba bsal nas/ rnal 'byor spyod pa'i log par rtog pa bsal ba'i ched du de'i lugs kyi nyes pa brjod pa ni/ gang tshe 'khrul pa zhes pa la sogs pa smos te/ gang gi tshe dbu mar smra ba rnams kyis 'gro ba thams cad sgyu ma'i bdag nyid kyi rang bzhin gyis stong par khas blangs pa na phyi rol bzhin du sgyu ma'i rang bzhin kun rdzob 'dzin par byed pa'i blo yang khyed la yod pa ma yin la/de'i tshe sgyu ma gang gis dmigs par 'gyur te/ gang gis rtogs par 'gyur te 'dzin pa dngos po yod pa'i shes pa ma gtogs pa cung zad kyang yod pa ma yin no zhes pa'i don to//gang gi yang rang gi sems nyid don dam par yod pa ma yin la/ phyi rol gyi rang bzhin nyid kyi 'khrul pas de bzhin du snang ste/ de la ni nyes pa yod pa ma yin no zhes pa ni bsams pa'o/ /de lta bu bsal ba'i don du gang tshe khyod la zhes pa la sogs pa gsungs te/glang po la sogs pa'i rnam par 'jug pas gzung bar bya ba nyid kyis gang gi tshe sgyu ma nyid khyod de/ rnam par shes par smra ba khyed cag la yod pa ma yin te/ 'gro ba sems tsam du khas len pas phyi rol gyi don med pa'i phyir de'i tshe ci zhig dmigs te/de'i tshe 'dir ci zhig snang bar 'gyur/ phyi rol gyi don med pa'i phyir yul la sogs par rnam par chad pa'i snang ba rigs pa ma yin no zhes pa'i don to/ /de la gzhan gyi bsam pa'i dogs pas gal te dngos por zhen pa la sogs pa gsungs te/ rang gi sems nyid 'khrul pas phyi rol gyi gzugs nyid du glang po che la sogs pa'i rnam par snang ba yin no zhes gsungs so zhe na/gsungs pa nyid yin te 'on kyang sems nyid rnam par shes pa nyid yin te/ de ni zhes pa ni yul la sogs pa chad par gzung bar bya ba nyid kyis rab tu snang ba dang ldan pa yin la/rnam pa ni snang ba yin te/ gzhan zhes pa ni nang gi 'dzin pa'i sems kyi rnam pa gzhan yin la/ yod pa ni bdog pa ste de kho na nyid kyi dngos po yin la gal te yang zhes pa ni khas blangs pa brjod pa yin te/ de lta na yang 'di ni 'brel pa ma yin no zhes bstan pa'i phyir/ gang tshe sems nyid sgyu ma ni/ /zhes pa la sogs pa gsungs te/ sems nyid rnam par shes pa nyid yin te/ rig par byed pa po nyid du khas blangs pa yin la gang gi tshe sgyu ma las gzhan ma yin pa'i rig pa po sems las tha dad pa sgyu ma zhes bya ba 'ga' yang yod pa ma yin te/ de'i bdag nyid yin pas de de ltar snang ba khas blangs pa'i phyir ro//de tshe gang zhig gang gis mthong / /zhes te/ gang zhig gang gis rtogs par 'gyur te/ mthong ba nyid 'ba' zhig yod kyi mthong bar bya ba ni med la/ mthong bar bya ba med par mthong ba yang yod pa ma yin te de ni mthong bar bya ba la ltos pa'i phyir ro//de'i phyir gang gis cung zad kyang mthong ba ma yin te/ de lta bas na 'gro ba mtha' dag long ba nyid thob par 'gyur ro zhes dgongs pa yin no/ /gal te de ltar gyur na yang gal te shes pa'i bdag nyid myong ba ma yin par 'gyur la/ 'on kyang rang rig pa nyid kyis rang gi ngo bo myong ba ni de las tha mi dad pa'i sgyu ma la sogs pa yang rtogs pa yin te/de ltar gyur na yang cung zad kyang nyams pa med do zhes rnam par shes par smra ba'i bsam pa'i don dam pas gsungs pa/ 'jig rten gyi ni mgon pos kyang / /zhes pa la sogs pa gsungs te/ 'gro ba rang bzhin gyis stong pa nyid du gang gi tshe rigs pas bstan pa de'i tshe/gang gis gang gi rang bzhin gyi dngos po zhes gang zhig gang gis rtogs par 'gyur/ bcom ldan 'das kyis chos thams cad stong pa yin te/ stong pa nyid kyi mtshan nyid sems yin zhing chos thams cad rnam par dben pa dang /rnam par dben pa'i mtshan nyid kyang sems yin no zhes gsungs so/ /gzhan yang 'jig rten gyi mgon pos kyang gsungs shing bka' stsal pa yin te/ 'jig rten ni sems can thams cad yin la/ mgon pos zhes pa ni skyabs te sangs rgyas bcom ldan 'das kyis so//ci zhig gsungs she na/ sems kyis sems mi mthong zhes te/ sems kyi bdag nyid ni sems kyis shes pa ma yin te/ dngos po de kho na nyid du yod kyang bdag nyid la byed pa 'gal ba'i phyir ro/ /ci lta bu zhe na/ ral gri'i so ni rang la rang / /zhes te/ ji ltar shin tu rno ba'i ral gri'i sos gzhan bzhin du bdag nyid de rang gi lus mi gcod cing gcod par mi byed de/bdag nyid la byed pa 'gal ba'i phyir ro/ /de bzhin du yid kyang ral gri'i so bzhin du bdag nyid kyi sems kyis bdag nyid mi mthong ngo zhes sbyar ro/ /shes pa gcig po de la rig par bya ba dang rig par byed pa dang /rig pa'i bdag nyid gsum mi rigs te/ cha shas med pa gcig la rang bzhin gsum mi 'thad pa'i phyir ro/ /de la 'di 'phags pa gtsug na rin po che'i mdo las/ de sems kun tu tshol ba na sems nang na yang dag par rjes su mi mthong /sems phyi rol na yang dag par rjes su mi mthong zhes pa dang / phung po rnams la yang sems yang dag par rjes su mi mthong khams rnams la yang sems yang dag par rjes su mi mthong / skye mched rnams la yang sems yang dag par rjes su mi mthong ngo //des sems yang dag par rjes su ma mthong bas/ sems gang las byung zhes sems kyi rgyun kun du tshol zhing de 'di snyam du sems te/ dmigs pa yod pa las sems 'byung bar 'gyur ro snyam mo/ /de yang 'di snyam du sems te/ ci dmigs pa de yang gzhan la/ sems de yang gzhan nam/'on te dmigs pa gang yin pa de nyid sems yin/ gal te dmigs pa yang gzhan la sems kyang gzhan na ni sems de gnyis su 'gyur ro/ /'on te dmigs pa gang yin pa de nyid sems yin na sems kyis sems de ji ltar mthong bar 'gyur te/ sems kyis sems mthong bar mi rung ngo //'di lta ste dper na/ ral gri'i so de nyid kyis ral gri'i so de nyid bcad par mi nus pa dang / sor mo'i rtse mo de nyid kyis sor mo'i rtse mo la reg par mi nus pa de bzhin du sems de nyid kyis sems de nyid mthong bar mi nus so zhes rgyas par gsungs so/ /'dir sems tsam nyid du smra bas rang la byed pa 'gal ba bsal bar 'dod cing rang gi phyogs bsgrub pa'i ched du dpe brjod pa ji ltar mar me zhes pa la sogs pa gsungs te/rang gi dngos ni rang gi rang bzhin yin te/ dper na mar me bzhin du ste mar me ltar yang dag par gsal bar byed cing mngon par byed do/ /'di ltar yang nges pas mun pas bsgribs pa'i bum pa la sogs pa'i dngos po rtogs par bya ba'i ched du mar me 'degs par byed la/de bzhin du mar me gsal bar bya ba'i ched du ni mar me gzhan ma yin te/ 'on kyang bum pa la sogs pa gsal bar byed pa gang yin pa de nyid kyis bdag nyid kyang gsal bar byed la/de bzhin du skabs su bab pa'i rang rig pa la yang go bar bya zhing cung zad kyang 'gal ba yod pa ma yin no zhes thams cad du sbyar bar bya ste/ de lta bas na mar me bzhin du 'gal ba med pa nyid do zhe na/ gal te de ltar sems na de'i tshe 'di skad smra bar mi bya'o/ /ci'i phyir zhe na/mar me zhes pa la sogs pa gsungs te/ gsal bar bya ba ma yin pa nyid yin te/ bum pa la sogs pa bzhin du gsal bar bya ba ma yin pa kho na'o/ /gang gi phyir mar me mun gyis bsgribs pa med de mun pas g.yogs pa ma yin no/ /sgrib par byed pa yod pa sel ba ni gsal ba yin no//de'i phyir bum pa la sogs pa gsal ba ni de rnams sngar yod pa'i phyir la/ de ltar mar me ni ma yin te/ de sngar med pa'i phyir ro/ /med pa yang gsal bar rigs pa ma yin te/ med pa nyid kyi phyir ro/ /de'i phyir 'di ltar mar me ni gsal bar bya ba ma yin te/ 'di ltar mi 'dra ba'i phyir ro//mar me'i dpes ni bsgrub bya 'grub pa ma yin no/ /de ltar gyur na yang ji ltar mar me zhes pa la sogs pas mar me'i bdag nyid gang yin pa ni mun pas bsgribs pa gsal bar byed pa yin no zhes 'di skad du brjod pa ni ma yin la/ 'on kyang de'i rang bzhin gyi dbang du byas te/gzhan la ltos pa ma yin pa tsam yin no zhes brjod par bya'o/ /'di nyid bstan pa'i phyir/ shel bzhin du zhes pa la sogs pa gsungs te/ ni zhes bya ba ni gang gi phyir te/ ji ltar shel rdo rang bzhin sngon po ma yin par yod pa yon tan sngon po nyid du skyed pa la rgyu mtshan gzhan gyi khyad par 'dab ma sngon po la sogs pa nye ba la ltos la de bzhin du dngos po rang nyid kyis sngon po yin pa de lta na yang sngon po nyid du bya ba la khyad par gzhan la ltos pa ni ma yin no//de bzhin zhes te rnam pa des bum pa la sogs pa'i dngos po cung zhig mar me la sogs pa gzhan la ltos pas gsal ba mthong la mar me la sogs pa 'ga' zhig yang gzhan la ltos pa ma yin zhing rang nyid gsal ba'i bdag nyid du mthong ste dmigs pa yin la/'di tsam nyid brjod par 'dod pa yin no/ /de bzhin du rnam par shes pa tsam du smra bas khyad par brjod pa la/grub pa'i mtha' smra bas sngon po nyid re zhig gzhan la ltos pa med par dpe'i sgo nas bstan pa dgag pa'i phyir/ sngo nyid min la zhes pa la sogs pa gsungs te/ dpe 'di yang 'dra ba ma yin te/ gang gi phyir sngon po yang sngon po nyid du byed pa la shel bzhin du gzhan la ma ltos pa ma yin te/de'i ngo bor 'gyur ba la rang gi rgyu dang rkyen la ltos pa'i phyir ro/ /'di yang nam gyi tshe gzhan la ltos pa yod par 'gyur zhe na/ gal te sngon po ma yin pa nyid du rang gi rgyu las skyes na yang der 'gyur ba las gzhan la ma ltos par rang nyid kyi sngon po'i bdag nyid du byed na ste de yang yod pa ma yin no//gang gi phyir sngon po ma yin te sngon po'i yon tan dang bral ba ni ma yin no zhes 'gegs par byed de/ de zhes bya ba ni sngon por 'dod pa'i dngos po yin la/ sngon po ste sngon po'i yon tan dang ldan pa yin zhing / bdag nyid de rang gi ngo bo bdag nyid kyi rang bzhin gyis byed pa ma yin la/sngar bzhin du byed par nus pa ma yin te/ bdag nyid la byed pa 'gal ba'i phyir ro/ /de'i phyir sngon po yang sngon po nyid du byed pa la shel bzhin du gzhan la ma ltos pa ma yin te/ 'di ltar shel rdo yang dngos po gnas pa'i ngo bo nyid khyad par gzhan dang nye bas sngon por bsgyur bar gyur pa yin te/'on kyang thams cad rang gi nye bar len pa'i skad cig ma dang sngon po'i khyad par lhan cig byed pa'i rkyen las kyang snga ma rang nyid kyis 'gags nas/ shel rdo sngon po'i yon tan gyis bsgyur ba gzhan nyid skye bar 'gyur ro zhes pa ni grub pa'i mtha' yin no//de la yon tan skyed pa la rgyu dang rkyen la rag las par ni 'di dag thun mong nyid yin la/ de bzhin du skabs su bab pa'i bsgrub bya la yang khyad par cung zad kyang yod pa ma yin no/ /'o na ni mdza' bos yid du 'ong ba bsgrubs pa yin te/ gang gi phyir rang gi rgyu dang rkyen las bems po'i rang bzhin las bzlog gi bdag nyid du bskyed pa'i shes pa nyid gsal ba gzhan la ma ltos par bdag nyid gsal ba la rang rig par brjod de/'di nyid ni kho bos kyang sngon po'i bdag nyid dpyad pas bsgrubs pa yin no/ /'di tsam nyid kyis mar me yang dper byas pa yin la/yang kho bo cag rnams kyis las dang byed pa po dang bya ba tha dad pas shes pa'i bdag nyid gsal bar ni yod pa ma yin te/ yod pa gcig la las la sogs pa'i rang bzhin gsum mi rigs pa'i phyir ro/ /de bya ba tha dad pa'i sgo nas skyon brjod na yang kho bo ni cung zad kyang sun phyung ba ma yin te/rang gi rgyu las skyes pa'i bdag nyid kyi gsal ba ma nyams pa'i phyir ro/ /de ltar na bdag nyid rig pa la skyon brjod pas thal ba med do/ /de brjod pa/ rnam shes bems po'i rang bzhin las/ /bzlog pa rab tu skye ba ste//bems min rang bzhin gang yin pa/ /de nyid bdag nyid shes pa yin/ /gcig la cha med rang bzhin la/ /gsum gyi bdag nyid mi 'thad phyir/ /'di yi rang bzhin rig pa ni/ /bya dang byed po'i dngos por min/ /zhe na/ 'di la brjod par bya ste/ bya ba dang byed pa po'i khyad par gyi tha snyad las grub pa'i sgra'i don rtogs pas nyes pa brjod pa yin te/rang rig pa'i sgras de'i don brjod pa'i phyir ro/ /gal te yang nyes pas 'jigs nas 'jig rten la grags pa'i sgra'i don yongs su spong na/ de'i tshe khyed la 'jig rten pa nyid kyis gnod por 'gyur la/'dis kyang rang rig pa don dam pa 'grub pa ma yin te/ de bzhin du rgyu dang / rkyen las skyes pa'i gzugs brnyan rang bzhin med pa nyid du brjod la/ de ltar rang rig pa'i shes pa ni shin tu yang med pa yin te/ de kho na nyid du gnyug ma'i rang bzhin du med pa'i phyir ro/ /rang bzhin med par yang nam mkha'i ut+pa la'i bdag nyid rang rig par yang rigs pa ma yin no//dbu mar smra ba po rnams kyi dbang du byas te bems po'i rang bzhin yod pa ma yin zhing / gang gis bems po'i las bzlog pa bems po ma yin pa'i rang rig par 'gyur ba don dam par gang zhig kyang yod pa ma yin no//de lta bas na dngos por smra ba gzhan nyid kyi dbang du byas te/ 'di smra bar rigs pa yin no/ /de'i phyir na rang bzhin med pa nyid kyis nam yang rang rig pa grub pa ma yin no/ /'di yang phyi nas dran pa nye bar gzhag pa ston pa'i skabs su rgyas par bstan par bya'o/ /da ni mar me rang nyid gsal bar khas blangs nas blo la rang rig pa ma yin no zhes bstan pa'i ched du mar me zhes pa la sogs pa gsungs te/mar me rab tu gsal ba'i bdag nyid du gyur pa de lta na yang blo rang rig par bsgrub pa la 'dra ba'i dpe ma yin no zhes pa ni bsdus pa'i don to/ /mar me gsal bar byed do zhes pa ni gsal bar byed pa gzhan la mi ltos par rang nyid kyis gsal ba yin no zhes shes par byas nas te/shes pas go bar byas nas blos rjod par byed cing rab tu rtogs par byed de/ mar me shes pa'i yul yin pa'i phyir ro/ /blo ni shes pa yin la gsal ba nyid ces par gang brjod pa de yang gang gis shes nas te go bar byas nas/brjod ces gzhan la dris pa yin te/ 'dir yang blo rtogs par byed pa'i rgyu mtshan cung zad kyang yod pa ma yin no zhes pa'i sgra ni mi srid pa ston par byed pa yin no/ /re zhig shes pa snga mas ni de rtogs pa ma yin te/de'i dus na ma skyes pa'i phyir de med pas so/ /dus phyis 'byung bas kyang ma yin te/ de'i tshe skad cig ma yin pa nyid kyis gzung bar bya ba 'das pa'i phyir ro/ /de dang dus mnyam par gyur pas kyang ma yin te/ des de la phan mi 'dogs pa'i phyir la/ phan mi 'dogs pa yang yul gyi dngos po ma yin te/rgyu ma yin pa ni yul ma yin no zhes pa'i tshig gis so/ /rang gis kyang ma yin te de nyid la log par rtogs pas de ji ltar des rtogs zhes mi shes so/ /rnam pa thams cad du blos ma rtogs pa de'i rang rig pa shin tu yang mi rigs so zhes/ gsal ba'am zhes pa la sogs pa gsungs te/gsal ba'am ste/ mar me bzhin du gsal ba'i bdag nyid dam/ mi gsal ba ni bum pa bzhin du mi gsal ba ma yin la/ phan tshun bsdu ba'i phyir 'am gyi sgra gnyis so/ /blo ni gang che sus kyang mthong ba med pa ste/ rtogs pa po 'ga' yang med la rtogs pa cung zad kyang med de rang dang gzhan gnyi gas kyang ma yin no//gang tshe zhes pa'i tshig gis de tshe zhes pa 'dren par byed de/ de'i tshe mo gsham ni mi skye ba'i chos can gyi bud med yin la/ de'i bu mo'i rol pa ni sgeg pa nyid yin te/ de bzhin du brjod kyang ste bstan kyang ngo //de don med pa ni ste don dang bral ba'o/ /mo gsham gyi bu mo med pa nyid kyis ma rtogs pa'i phyir de'i rol pa shin tu yang mi rtogs pa yin no/ /yang na ma skyes pa dang ma 'gags pa'i rang bzhin yin pas mo gsham gyi bu mo lta bu ni blo yin la/ ma rtogs pa'i rang bzhin yin pas de'i rol pa dang 'dra ste/rang rig pa des ma rtogs pa'i phyir de'i rtogs pa yang med do/ /de ni rang rig pa yin la/ de ltar na brjod kyang rigs pa dang bral ba'i tshig tsam gyis don med pa ni blang bar bya ba ma yin pa'i phyir dgos pa med pa yin no/ /de lta mod kyi 'di ni rigs pas stong zhing tshig tsam ma yin te/gang gi phyir 'di la rigs pa 'di yod do zhes brjod pa/ gal te zhes pa la sogs te/ /gal te rang rig yod min na/ /zhes te/ gal te rang rig pa'i rnam par shes pa med cing yod pa ma yin pa de'i tshe rnam shes ji ltar dran par 'gyur te/ rnam par shes pa la rang rig med pa'i phyir dus phyis dran par mi 'gyur la/nyams su ma myong ba ni dran par mi nus te/ ha cang thal bar 'gyur bas so/ /de lta bas na nyams su myong ba'i 'bras bu dran pa dus phyis dmigs pa'i phyir rang rig pa'i shes pa yod do zhes dpag par bya'o/ /'di yang sgrub par byed pa yin pas 'dis bsgrub par bya ba ma yin te/gang gi phyir rang rig pa'i 'bras bu nyid du dran pa nges par 'gyur na/ me dang du ba bzhin du dran pas rang rig pa sgrub par byed par 'gyur te/ tshad mas rang rig pa ma grub na dran pa de'i 'bras bur 'dzin pa ma yin te/ thams cad du rgyu dang 'bras bu rtogs pa ni gnyi ga rtogs pa med pa ma yin no//mig la sogs pa la rnam par shes pa bzhin du ma mthong yang dran pa de'i 'bras bur ni grub pa ma yin te/ mig med par sngon po la sogs pa'i shes pa med pas ldog pa'i sgo nas de'i 'bras bur rjes su dpog go/ /dran pa ni rang rig pa'i shes pa med kyang 'byung ngo zhes 'chad par 'gyur ro//de'i phyir rang rig pa'i 'bras bu nyid du nges pa med par dran pa ni de med pa yang 'byung bas rang rig pa grub pa ma yin no/ /de'i phyir dran pa yang rnam par shes pa yin pa'i phyir ji ltar grub par 'gyur zhes brjod par bya'o//rang la rtags ma grub par ni gzhan gyi shes par byed pa ma yin la/ dran pa ni rang rig pa la mngon sum nyid kyis 'dzin pa ma yin te/ de dang de gzhan yin pa'i phyir ro/ /shes pa ni shes pa gzhan gyi yul ma yin te phyi rol gyi don bzhin du 'brel pa ma grub pa la sogs pa'i nyes par 'gyur bas so//gzhan nyid du khyad par med pas rgyu gzhan gyi dngos po de yang dran pas 'dzin par 'gyur ro/ /'on te des sngar nyams su ma myong bas na dran par mi 'gyur ro zhe na/ rgyud gcig tu gyur pa yang sngar nyams su ma myong ba'i thal bar 'gyur ba mtshungs so//rgyu dang 'bras bu na yang de la nges byed rigs pa ma yin te/ don dam par rgyu dang 'bras bu nyid med pa'i phyir ro/ /shes pa thams cad la de yod kyang rang nyid rtogs pa la mthar thug pa yin pa'i phyir dang / de 'dzin par mi nus pa'i phyir ro//ji ltar tha snyad khas blangs pa na brtags pa nyid yin te/ brtags pa nyid yin pa na yang tha snyad thams cad rtogs pas sprul pa yin pa'i phyir kun rdzob bsgrub bya yin pas don dam pa ma bsgrubs par 'gyur ro/ /de ltar dran pas rang rig pa grub pa ma yin no/ /ji ltar khyed la yang rang rig pa med par dran pa ji ltar 'grub ce na/gzhan myong ba na 'brel pa las zhes pa la sogs pa gsungs te/ 'dir shes pa las gzhan gzung bar bya ba'i dngos po yul du gyur pa nyams su myong ba ni shes pa la dran pa skye bar 'gyur ro/ /gzhan myong bas gzhan dran pa ni rigs pa ma yin te/shin tu thal bar 'gyur ba'i phyir ro zhe na/ 'brel pa las zhes gsungs te/ yul dran pa na 'brel pa las shes pa dran par 'gyur ro/ /rnam par shes pa yang de'i 'dzin pa nyid yin pas de dang 'brel pa yin te/ de'i phyir rnam par shes pa dran pa yin te gzhan du ma yin no/ / 'brel pa bden yang 'di ma myong na gzhan dran pa ni bslad pa'i dran par 'gyur ro zhe na/ ma yin te/ sngar nyams su myong ba'i yul phyis rjes su dran pa na myong ba khyad par can de nyid dran pa yin te/ des khyad par du byas pa de 'dzin pa'i phyir ro/ /shes pa nyid yul nyams su myong ba yin la gzhan ma yin pa'i phyir yul nyams su myong ba dran pa las de dang 'brel pas shes pa dran par brjod par bya'o//yul spangs pa'i shes pa nyid 'ba' zhig ni dran pa ma yin pa'i phyir nyes pa med do/ /ci ste myong ba'i shes pas gzhag pa'i dran pas bag chags kyi sa bon med par phyis dran pa skyed pa ji lta bu zhe na/byi ba'i dug ces gsungs te/ byi ba'i dug ni ji ltar 'brel par phyis skye bar 'gyur ba de bzhin du dran pa yang yin no zhes pa'i don to/ /'di ltar byi ba'i dug skad cig ma gcig la lus la 'phos nas yang dus gzhan du 'brug gi sgra'i rkyen dang phrad pa las rang rig pas gzhag pa'i dran pa'i bag chags kyi sa bon med par yang rkyen dang phrad pa nyid kyi phyir skad cig ma gzhan du rnam par 'gyur ba thob ste/de bzhin du skabs su bab pa la yang skyon med do zhes dgongs so/ /slar yang rnam par shes pa tsam du smra bas rang rig pa grub par bya ba'i ched du rnam pa gzhan bstan pa'i phyir rkyen gzhan dag dang zhes pa la sogs pa gsungs te/rkyen gzhan ni dus gzhan yin te/ lta ba'i rig pa la sogs pa dang gzhan gyi sems shes pa la sogs pa'i mngon par shes pa dag dang ldan pas de'i tshogs pa dang 'brel pa'i sems mthong ba'i phyir te/ snang ba'i phyir rnam par shes pa rang nyid gsal te rang bzhin gsal zhing rig pa yod do zhes pa'i don to/ /gal te yang de thams cad du lkog tu gyur pa'i rang bzhin yin na ji ltar tshogs pa'i khyad par las brgya la yang dmigs pa ma yin te/ de'i phyir dper na tshogs pa'i khyad par las gzhan gyi sems dmigs pa de bzhin du de ma thag pa'i rkyen dang dmigs pa'i rkyen la sogs pa las rang gi sems kyang dmigs pa yin no zhes bsams pa'o//'dis kyang shes pa'i rig pa sgrub pa ma yin no zhes bstan pa'i phyir grub pa'i mig sman zhes pa la sogs pa gsungs te/grub pa yang yin la mig sman yang yin pas grub pa'i mig sman no/ /de'i sbyor ba ni rnam par sbyor ba'am rab tu sbyor ba'o/ /de las mthong ba ni bum pa'am gter la sogs pa yin la/ de 'di ltar mig sman nyid 'gyur min te/ bum pa la sogs pa mig sman du 'gyur ba ma yin la/gang las rtogs pa de der 'gyur ba ni ma yin te/ de bzhin du lta ba po'i rigs pa la sogs pa dang lhan cig pa'i shes pas gzhan gyi sems bum pa la sogs ltar mthong na re zhig de rigs par grub par mi 'gyur te/ de lta bas na 'di ni bsgrub bya la mkho ba'i sgrub par byed pa ma yin no//gal te shes pa rig pa'i ngo bor ma gyur na don yang rtogs par mi 'gyur ba ma yin na ma shes pa ni mi gsal ba gsal bar byed pa'i phyir te don ni gsal ba ma yin la/ de ma rtogs pa la don ci ltar rtogs par 'gyur te/ 'di ltar rang rig pa bkag pa'i phyir dang /gzhan gyis gzhan 'dzin pa yang mi rigs pa'i phyir phyi ma phyi mas 'dzin par khas blangs pa na yang ma rtogs pa rtogs par bya ba'i ched du shes pa gzhan don du gnyer bas thug pa med par thal bar 'gyur ba'i yang phyir ji ltar yang don rtogs pa ma yin te/ des na gang gzhan myong ba la sogs pa zhes brjod pa de rigs pa ma yin te/ don nyams su myong ba med pa'i phyir 'jig rten na mthong ba'i tha snyad 'di thams cad med par 'gyur ro zhe na/ ji ltar mthong thos zhes pa la sogs pa gsungs te/ gang mthong ba la sogs pa'i tha snyad med par 'gyur ro zhes pa de don dam pa'am/kun rdzob tu med par 'gyur/ de la gal te don dam par med par 'gyur ro zhes brjod na de'i tshe 'di ni bdag 'dod pa ma yin te/ kun rdzob tu don dam pa la dpyad pa 'jug pa yod pa ma yin no/ /'on te 'jig rten gyi grags pas yin na de'i tshe/ji ltar mthong thos shes pa kun/ /'dir ni dgag pa bya min te/ /zhes so/ /ji ltar mthong ba zhes mig la sogs pa'i shes pas mngon sum du mthong ba yin la/ thos pa zhes pa ni gang zag gzhan las dang lung las so/ /shes pa zhes pa ni tshul gsum pa'i rtags las skyes pa'i rjes su dpag par nges pa'o//de nyid 'dir tha snyad thams cad la brten te dgag par bya min zhes pa mi bzlog pa'o/ /gang ji ltar 'jig rten na rab tu grags pa de de bzhin nyid du ma dpyad pa'i ngo bo khas blangs nas 'jig rten na grags pa yin te don dam pa ni ma yin no/ /des na shes pa'i rig pa med pas don rtogs pa la sogs pa med ces pa'i nyes pa don dam pa'i phyogs smra ba la 'dir glags mi rnyed do//gal te de de bzhin du khas len pa na de kho na ji lta bu zhig 'gags she na/ 'dir ni sdug bsngal zhes pa la sogs pa gsungs te/ bden pa ni don dam pa yin te rtogs pas sgro btags pa ma yin pa yang zhes pa'i don ni slar gyi don to//de yang 'dir spyod pa'am grub mtha' bzlog par bya ba yin te/ dgag par bya ba yin no/ /ci'i phyir zhe na/ sdug bsngal gyi zhes te/ 'di ni rgyu'i tshig yin la/ gang gi phyir sdug bsngal gyi rgyu ste byed pa yin pa de'i phyir zhes pa'i don to//nye bar len pa'i phung po rnams yod pa dang med pa la sogs pa brtags pas gzhag pa 'jug pa'i rgyu nyid ni 'khor ba yin te/ sdug bsngal kun 'byung 'jig rten dang / /lta gnas sred pa'ang de dag nyid/ /ces pa'i tshig las de ltar bden par rtogs pa ni sdug bsngal gyi rgyu yin no//de lta bas na 'dir ni bden pa ma yin pa'i 'dogs pa rtogs pa'i mngon par zhen pa dgag pa tsam bzhed pa yin la/ dngos po cung zad gcig ni 'dir dgag pa ma yin no/ de'i phyir de ltar na rang rig pa'i shes pa cung zad kyang rigs pa ma yin te/ rtogs bya rtogs byed rnam pa'i sems//de bzhin gshegs pas gzigs pa med/ /gang du rtogs dang rtogs byed pa/ /de la byang chub sems yod min/ /zhes gsungs so/ /gang der cung zad bcom ldan 'das kyis sems tsam nyid du yod par gsungs pa de phung po dang skye mched la sogs pa bzhin du drang ba'i don nyid yin par bshad par 'gyur ro//da ni zhar la byung ba yongs su rdzogs par byas nas/ skabs su bab pa la sbyar ba'i phyir/ sems las sgyu ma zhes pa la sogs pa gsungs te/ 'di ltar sems las sgyu ma gzhan yin par 'gyur ba'am/ gzhan ma yin par 'gyur ba'am/gnyi ga'i rang bzhin yin pa'am/ gnyi ga'i rang bzhin ma yin pa zhes brtag pa bzhi'o/ /de la re zhig phyogs dang po ni ma yin te/ sems las gzhan khas len na yang 'gro ba sems tsam du 'dod pa'i grub mtha' dang 'gal bar 'gyur ro/ /rnam par rtog pa gnyis pa la yang gang gi tshe/khyod la sgyu ma nyid med na/ /zhes pa la sogs pa bstan pa nyid kyis nyes pa yod do/ /rnam pa gsum pa yang mi 'thad do/ /gcig la phan tshun 'gal ba mi srid pa'i phyir ro/ /'on te brtag pa bzhi pa yin na de yang 'brel pa ma yin la/ de nye bar bzung nas brjod par bya ste/sems las sgyu ma gzhan min zhing / /zhes pas gzhan nyid 'gegs so/ /'o na gzhan ma yin pa yang yin no zhe na/ gzhan min par yang mi rtag na/ /zhes te/ de nyid yin pa'ang 'gegs pa yin la/ de ltar na gnyi ga bkag pa'i phyogs yin no zhes rtog cing rnam pa gzhan byed na/de yang rigs pa ma yin te/ phan tshun spangs pa dang ldan pa ni gcig bkag pa gcig bsgrub pa med na mi 'byung ba yin pa'i phyir te/ de dag gcig la mi srid pa'i phyir brtag pa bzhi pa yang mi 'thad do/ /yang dngos na zhes te gal te sgyu ma de dngos po yin na/ji ltar de gzhan min te sems las gzhan du mi 'gyur/ 'on te gal te gzhan min zhe na/ sems nyid sgyu ma yin te/ de'i tshe dngos por med de/ don dam par yod pa ma yin pa de la ste de'i rang bzhin yin pa'i phyir ro/ /sems 'ba' zhig yin pa zhes pa 'di nyid 'ongs pa yin te/gang tshe khyod la sgyu ma nyid/ /med na de tshe ci zhig dmigs/ /zhes gsungs pa yin no/ /de ni skabs su bab pa'i bsgrub bya bsgrubs nas mjug bsdu ba'i phyir/ ji ltar sgyu ma yod min yang / /zhes pa la sogs pa gsungs te/ dmigs par bya ba'i sgyu ma glang po che la sogs pa ltar dngos po med pa'am med pa'i rang bzhin yin pa ste/de lta bu yang ji ltar blta bya ste mthong ba'i yul sgyu ma yin pa ltar de bzhin lta byed yid kyang yin te/ med pa'i sgyu ma de nyid blta bar bya ba dang / lta ba de bzhin du yid yin te/ don dam par med pa'i rang bzhin yin na yang mthong ba'i nus par 'gyur ro//des na/ gang tshe 'khrul pa'ang yod min na/ /zhes pa la sogs pa pha rol gyis gang brjod pa des bsgrub par bya ba mjug bsdus nas bstan to/ /gzhan yang rnam pa gzhan gyi don dam par yod pa'i rnam par shes pa bsgrub pa'i ched du gzhan gyis 'bad pa'i bsam pas/gal te 'khor ba dngos rten can/ /zhes smras te/ 'di ltar kun nas nyon mongs pa dang rnam par byang ba dor bar bya ba dang blang bar bya ba nyid kyis 'di gnyis yin par ji lta ba bzhin du rtogs par bya ste/ de la 'dod chags la sogs pa'i dri mas bsgribs pa'i sems la kun nas nyon mongs pa zhes brjod la/de yang yang dag pa ma yin pa'i sgro btags pa'i stobs kyis bskyed pa'i phyir glo bur ba'i sems la brten nas 'jug go/ /de las byung ba'i las dang skye ba brgyud pa las byung ba'i 'khor ba skye bar 'gyur te/ de nyid sems yin te don dam par rang bzhin gyis 'od gsal ba glo bur ma yin pa yang dag pa ma yin pa'i kun tu rtog pa las byung ba/gzung ba dang 'dzin pa la sogs pa gnyis su sgro 'dogs pa'i mngon par zhen pa'i bag chags kyis stong pa gnyis su med pa'i rang bzhin glo bur ba'i nyes pa las grol ba gnas gyur pa la rnam par byang ba zhes brjod do//de'i phyir de ltar na kun nas nyon mongs pa dang rnam par byang ba dag yod par gyur pa'i dngos po'i sems med par rnam par gzhag pa mi 'thad do zhes sems te/ 'khor ba dang mya ngan las 'das pa yang sems kyi chos yin pa'i phyir la/sems nyid kun nas nyon mongs shing sems nyid rnam par byang ba'o zhes pa'i tshig las so/ /de ltar na 'di ni gzhan gyi 'dod par nges par byed pa yin te/ dngos po nyid yang dag par gyur pa'i dngos po'i sems nyid la brten pa gang yin pa zhes/ gal te zhes te dngos rten pa/zhes 'khor ba rnam par 'jig par byed do zhe na/ de'i tshe 'khor ba gzhan du 'gyur te/ sems las gzhan yin par 'gyur ro/ /dngos po las gzhan yin na dngos po med par 'gyur te/ sems nyid dngos po yin pa'i phyir ro/ /ci lta bu zhe na/ mkha' 'drar te nam mkha' bzhin du'o/ / 'di skad du gang 'di sems la rten pa la 'khor ba zhes brjod na de ci dngos po yin nam dngos po med pa yin/ dngos po yin na yang sems yin nam de las gzhan yin/ de la gal te dngos po sems nyid yin na de'i tshe sems las 'khor ba gzhan ma yin te/ de la brten pa ni sems nyid yin no//sems de yang rang bzhin gyis 'od gsal ba yin pa'i phyir rnam par byang ba'i rang bzhin yin pas spang bar bya ba ma yin la/ 'on te sems las gzhan yin na de'i tshe sems las tha dad pa gzhan khas blangs pas grub mtha' nyams pa yin no/ /'on te dngos po med pa yin na de'i tshe 'khor ba zhes pa cung zad kyang yod pa ma yin te/ri bong gi rwa bzhin no/ /de nyid kyi phyir mkha' 'drar 'gyur/ /zhes gsungs te/ dper na nam mkha' rtags su yod pa tsam ni med pa'i dngos pos cung zad kyang don byed nus pa yod pa ma yin te/de bzhin du khyed kyi 'khor ba yang yin par 'gyur ro/ /yang na mkha' 'drar 'gyur zhes pa ni rang bzhin med pa yin pa'i phyir kho bo cag gi grub pa'i mthar zhugs pa yin no zhes brjod par 'gyur ro/ /de lta yin na yang gal te yang dngos po yin du chug mod/ de lta na yang yod pa'i dngos por gyur pa'i sems la brten pas de don byed nus par 'gyur ro zhe na/dngos med dngos la brten pas zhes pa la sogs pa gsungs te/ med pa'i rang bzhin ni 'ga' zhig la yang brten par rigs pa ma yin te/ rten dang brten pa'i dngos po ni rgyu dang 'bras bu'i ngo bo yin pa'i phyir ro//dngos po med pa ni gang gi yang 'bras bu ma yin te/ bskyed par bya ba ma yin par khyad par med pa'i phyir ro/ /de lta yin du chug ste/ de lta na yang dngos po la brten pas te/ dngos po yod par gyur pa'i sems la brten pas dngos po med pa'i bdag nyid byed pa dang ldan pa don byed pa nyid du ji ltar 'gyur te/nam yang rigs pa ma yin no zhes pa'i don to/ /gzhan du na de dngos po yod par 'gyur te nus pa ni dngos po'i mtshan nyid yin la/ nus pa thams cad dang bral ba ni dngos po med pa'i mtshan nyid yin no zhes pa'i tshig las so/ / da ni shin tu dpyad pa na khyed la ci zhig gnas par 'gyur zhe na/ khyod kyi sems ni grogs med pa/ /zhes pa la sogs pa gsungs te/ med pa nyid dngos po dang bral ba 'di'i grogs yin pas grogs po med pa yin te/ ni zhes pa nges par gzung bas so/ /khyed sems gcig pu don dam par smra bas gcig pu nyid de/gnyis ma yin pa nyid yin no/ /ci ste gzung ba dang 'dzin pa'i rnam pa dang bral ba gnyis su med pa'i mtshan nyid kyi sems su brjod pa/ de ltar na sems gcig nyid du bsgrubs pas kho bo cag cung zad kyang mi 'dod pa ma yin no zhe na/ de ni rigs pa ma yin te/kun nas nyon mongs pa spang ba'i ched du dngos po nyid brjod pa yin la de sems gcig pu nyid yod par gyur pa de lta na yang gnod par byed pa las grol ba ma yin no zhes/ gang tshe sems ni gzung bral ba/ /zhes pa la sogs pa gsungs te/ gzung ba zhes pa ni nye bar mtshon pa yin te/'dzin pa la sogs pa dang bral ba yang rig par bya'o/ /yang na gzung ba la sogs pa la rag las pa ni 'dzin pa yin no zhes pas de dang bral ba'i phyir 'dzin pa med pa yin la/ 'dzin pa med na yang des nye bar brtags pa'i mngon par brjod pa med pas brjod par bya ba med do zhes bstan pa'i phyir gzung bral ba zhes brjod pa yin no//gzung ba la sogs pa dang bral ba gnyis su med pa'i rang bzhin gang gi tshe 'gro ba thams cad kyi sems yin pa de'i tshe de'i sems su sems can thams cad kyi rgyud nang du 'dus pa'i phyir 'khor ba'i sems can thams cad kyis de bzhin gshegs te/sangs rgyas bcom ldan 'das nyid thob la/ 'ga' yang so so'i skye bor mi 'gyur te/ de'i phyir yang kun nas nyon mongs pa spang ba'i ched du gzhan la ma bsgom pa don med par thal la/ de ltar yang ma yin te/ de lta bas na gzung ba dang 'dzin pa dang bral ba yod na yang dngos po la mngon par zhen pa de bzhin du gnas pas nyon mongs pa spang bar mi 'gyur ro zhes dgongs nas/de ltar na yang zhes pa la sogs pa gsungs te/ de ltar zhes pa ni tshig phrad sdud pa yin la de ltar yin na yang don 'di la yang zhes te 'ang gi don to//de ltar khas blangs na yang yon tan ci zhig yod de/ cung zad kyang yod pa ma yin te/ sems tsam zhes pa ni rnam par rig pa tsam nyid du yang brtags pa la ste/ rtog pas brtags pa na gnyis su med pa'i de kho na nyid yongs su shes pa dang 'brel pa yin na yang /sems can thams cad kyi rgyud la 'dod chags la sogs pa yongs su gnas pa'i phyir ro/ /ci ste khyed dbu mar smra ba dang yang mtshungs pa yin no zhes skyon mtshungs pa nyid du brjod pa'i phyir/ sgyu ma lta bur shes na yang / /zhes pa la sogs pa smos te/ sgyu ma ste sgyu ma'i rang bzhin nyid du yang 'gro bas shes na/ji ltar nyon mongs ldog 'gyur te/ /ji ltar 'dod chags la sogs pa'i nyon mongs pa spong bar 'gyur zhes 'dri'o/ /'dir nyon mongs pa spong ba la mi 'thad pa'i rgyu ci zhig yod ces gang zhig 'dri na/ gang tshe sgyu ma'i zhes pa la sogs pa smos te/'dir mi spong ba'i 'thad pa'i sa bon mthong ste/ gang gi tshe sgyu ma'i bud med ste gang zhig sgyu ma mkhan gyis sprul pa'i bud med la chags pa ste/ zhen pa'i sems skye ste 'byung ngo / /de byed nyid kyang ngo zhes te/ gang rmongs par bya ba'i ched du de sprul pa de rnams 'ba' zhig la ni skye ba ma yin gyi/'on kyang sgyu ma'i bud med de'i byed pa po la yang skye'o/ /de ltar 'di ni kyang gi sgra'i don to/ /gang gi tshe gzhan gyi sems 'khrul pa bskyed pa'i don du shin tu de'i rnam par 'khrul pa la mkhas pa'i sgyu ma mkhan po 'ga' zhig yul gyi bzang mo'i bud med nye bar ston par byed de/de yang sngags dang sman gyi mthus sprul pa'i yan lag dang nying lag thams cad kyi cha shas yongs su rdzogs pa'i mtshan nyid lang tsho gsar la bab cing mdzes pa phun sum tshogs pa yang dag par rdzogs shing gsal la yid du 'ong ba'i kha dog can 'jam zhing mnyen pas mdzes par gyur pa sprul pa mthong bas de'i tshe gzhan 'ba' zhig la 'dod pa'i lha'i mdangs bsnun pa'i sems kyi sdug bsngal skye ba ni ma yin te/'on kyang bdag rang nyid kyis 'di sprul lo zhes de'i rang bzhin la mkhas pa des kyang gnod par bya ba'i mdzes pa phun sum tshogs pa 'dod pa'i bya ba la mkhas pa'i chags pa'i lus mngon par sprul te/'dod pa'i bya ba mchog gi gnas skabs thob pa na des ji ltar yang sems nges par gzung bar mi nus na/ de ji ltar na sgyu ma nyid du nges na yang 'khor ba'i rgyun gcod par 'gyur zhe na/ 'di spang ba'i phyir de byed pa ni zhes pa la sogs pa gsungs te/ kho bo cag la nyes pa 'dir thal bar 'gyur ba ma yin te/ de byed pa ni sgyu ma'i bud med sprul pa po yin la/ gang gi phyir ma spangs shing ma bzlog pa yin no/ /ci zhig ma spangs she na/ shes bya dang / nyon mongs bag chags te/shes bya dang nyon mongs pa'i rang bzhin dang bcas par sgro 'dogs pa las zhen pa la sogs pa'am/ dngos por sgro btags pa yin te/ shes bya'i sgrib pa zhes pa'i tha tshig go/ /de'i dbang gis thog ma med pa'i 'khor bar skye ba brgyud par goms pa log pa'i rnam par rtog pa las byung ba dang de sa bon du gyur pa'i sems kyi rgyun gyis 'dus byas pa yin no//de ma spangs pa'i phyir ro/ /ci ste lan 'di ni rnam par shes par smra ba tsam la yang mtshungs pa yin te/ de la yang gnyis su med pa'i de kho na nyid yod kyang / glo bur ba'i nyon mongs pa'i bag chags ma spangs pa'i phyir thams cad de bzhin gshegs par mi 'gyur ro zhe na/'di ni mtshungs pa ma yin te/ gang gi phyir med pa'i bdag nyid kyi dri ma ni 'bras bu'i tshogs pa dang bral ba ni sgrib par rigs pa ma yin no zhes brjod zin pa nyid do/ /kho bo cag la ni rang bzhin med pa nyid bskyed par bya ba dang skyed par byed pa yin pas mtshungs pa yin te/gang gi phyir de ma spangs pa des na rgyu 'di las de mthong dus na/ de shes bya'i rang bzhin du mthong ste dmigs pa yin la/ de'i dus na'am sgyu ma'i bud med de mthong ba'i dus na ste dmigs pa'i dus na'o/ / de zhes pa ni nyon mongs pa'i bag chags ma spangs pa'i mthong ba po'o/ /stong pa'i bag chags nyam chung zhes pa la/ stong pa ste dngos po'i de kho na nyid dam stong pa nyid ces tshig bsdus te sdeb sbyor gyi ngor dngos po'i rkyen bsubs nas stong pa zhes bstan to/ /bag chags ni 'dus byas pas gzhag pa yin la/de nyam chung ba ni nus pa dang bral ba yin te/ brtags pa'i ngo bo mthong ba'i phyir ro/ /de'i phyir de'i tshe dngos po stobs dang ldan pa yin no/ /'o na ji ltar de bzlog par 'gyur zhe na/ stong nyid ces pa la sogs pa gsungs te/ stong nyid ni sgyu ma'i rang bzhin med pa nyid yin la/bag chags ni des gzhag pa'i shugs yin te/ goms pa'i stobs kyis brten par 'gyur zhes pa'i tha tshig go/ /des na 'gal ba'i rkyen gyis spong bar 'gyur te/ me dang nye bar gyur pas grang ba'i reg pa bzhin zlog par byed de/ci zhig ce na/ dngos po'i bag chags te/ thog ma med pa'i 'khor ba nas goms pas dngos por 'dzin cing zhen pa ni bag chags yin la/ de yang dag pa'i don yin pa'i phyir dang dngos po'i rang bzhin yin pa'i phyir dang / gzhan ni brdzun pa yin pas glo bur ba yin pa'i phyir ro//dngos po la mngon par zhen pa 'am/ stong pa nyid du mngon par zhen pa dag mngon par zhen par khyad par cung zad kyang med pa ma yin nam/ de yang rtog pa las ma 'das pa'i phyir te/ gang / stong nyid lta ba thams cad las//nges par 'byin par rgyal bas gsungs/ /gang dag stong pa nyid lta ba/ /de dag gso bya min par gsungs/ /zhes gsungs pa yin no zhe na/ 'di spang bar 'dod nas ci yang med ces pa la sogs pa gsungs te/ cung zad ces pa ni dngos po'am stong pa nyid do/ /med pa ni yod pa ma yin la yang gi sgra ni snga ma la ltos pas sdud pa yin no//de'i phyir de ltar goms pas bag chags de spangs pa phyi nas stong pa nyid kyi bag chags kyang spong bar 'gyur te bzlog par 'gyur ro/ /bsam pa ni 'di yin te stong pa nyid rtogs pa ni dngos po la mngon par zhen pa'i gnyen po yin pa'i phyir spong ba'i thabs su gyur pa yin la/thabs las byung ba rtogs nas gang gzings dang 'dra ba yin pa'i phyir thabs kyang phyi nas spang bar nyams su blang ngo / /'di nyid gsungs pa/ rnam rtog thams cad spang ba'i phyir/ /stong nyid bdud rtsi bstan pa yin/ / gang zhig de ru 'dzin pa yang / /'di ni khyed kyis spangs pa lags/ /zhes so/ /de ltar gyur na yang gal te cung zad kyang yod pa ma yin no zhes yid la byed pa goms pa las stong pa nyid kyi bag chags spong bar 'gyur ba yin pa de lta na yang / de goms pas yang dngos po med pa'i rnam par rtog pa 'jug pa bzlog par mi nus te/des na lba ba bcug pa las mig 'bras 'byung ba bzhin du khyed kyi nyes pa de bzhin du gnas pa yin no zhe na/ gang tshe zhes pa la sogs pa smos te/ 'di yang dpyad na gnas pa ma yin no zhes ston par byed de/ gang zhig dngos po med do zhes rab tu rtog cing gang gis dngos po 'gegs par byed na de gang gi tshe rtog pa na rab rib can gyis mthong ba'i skra'i dogs pa bzhin du rang bzhin mi rnyed de/mi 'thob po/ de tshe rten bral ba zhes pa la/ gang gi dngos po 'di yongs su rtog pa na de dang 'brel pa'i dngos po med pa'i phyir mi dmigs pa yin te/med pa yin no/ /rtog pas bstan pa'i lus ji ltar blo'i mdun na gnas te/ ji ltar 'di brtags pas blo'i mdun du snang bar 'gyur/ dngos po rang nyid kyis dngos po med par ldog par 'gyur ro/ /yang na gzhan du bshad par bya ste/ stong pa nyid kyi stobs kyis gzhag pas dngos po'i bag chags ldog tu chug na yang de la 'gegs pa med pa'i phyir dngos po med pa'i mngon par zhen pa gang gis ldog par byed ce na/gang tshe zhes pa la sogs pa gsungs te/ gzhan thams cad ni snga ma bzhin no/ /'di ni 'dir bsdus pa'i don yin te/ dngos po la mngon par zhen pa ni chos thams cad stong pa nyid kyis spong bar brjod la/stong pa nyid de yang stong pa nyid mngon du byed pa las phyi nas spong bar 'gyur ro/ /gang yang ji ltar yang dngos por rtog pa skye bar 'gyur na/ de yang de ma thag tu dpyod par 'gyur bas bzlog par 'gyur te/ de nyid kyi phyir rnam par rtog pa'i tshogs du ma bzlog pa'i ched du bcom ldan 'das shes rab kyi pha rol tu phyin mar nang stong pa nyid la sogs pa stong pa nyid bco brgyad rgyas par gsungs te/stong pa nyid ni dngos po las gzhan ma yin te/ dngos po nyid de'i rang bzhin yin pa'i phyir ro//gzhan du na stong pa nyid chos rnams las tha dad pa yin na/ chos rnams dngos po med par mi 'gyur te/ dngos po med pa ni de'i rang bzhin yin no zhes sngar bsgrubs pa yin no/ /'di yang shes rab kyi pha rol tu phyin pa las gsungs pa gzhan yang rab 'byor byang chub sems dpa' sems dpa' chen po shes rab kyi pha rol tu phyin pa la spyod pa na rnam pa thams cad mkhyen pa nyid dang ldan pa yid la byed pas 'di ltar rtogs te gzugs kyi stong pa nyid kyis gzugs stong pa nyid ma yin te gzugs nyid stong pa'o//stong pa nyid gzugs so/ /tshor ba'i stong pa nyid kyis tshor ba stong pa ma yin te/tshor ba nyid stong pa'o/ /stong pa nyid tshor ba'o/ /'du shes kyi stong pa nyid kyis 'du shes stong pa ma yin te/ 'du shes nyid stong pa'o/ /stong pa nyid 'du shes so/ /'du byed kyi stong pa nyid kyis 'du byed stong pa ma yin te/'du byed nyid stong pa'o/ /stong pa nyid 'du byed do/ /rnam par shes pa'i stong pa nyid kyis rnam par shes pa stong pa ma yin te/ rnam par shes pa stong pa'o/ /stong pa nyid rnam par shes pa'o zhes rgyas par ro/ /yang / gang zhig rten cing 'brel par 'byung / /de nyid khyed kyis stong par bzhed//dngos po rang dbang can med ces/ /khyed kyis seng ge'i sgra mtshungs med/ /ces gsungs pa yin no/ /de ltar na stong pa nyid ni chos rnams las tha dad pa ma yin no/ /de lta bas na stong pa nyid la yang mngon par zhen par mi bya'o/ /de ltar rnam par rtog pa thams cad nub pa'i phyir sgrib pa mtha' dag las grol ba skye bo zhes bstan pa'i phyir/gang tshe dngos dang zhes pa la sogs pa gsungs te/ gang tshe dngos po don dam par yod pa'i rang bzhin yod pa ma yin te/ blo ni blo gros yin la mdun ni sngun te/ yang dag par gnas pa yin no//dngos med kyang ma yin te/ dngos po dang bral ba'i mtshan nyid dngos po med pa yang ma yin no/ /gang tshe blo'i mdun na gnas pa de tshe rnam pa gzhan med pas shes te/ dgag pa dang bsgrub pa gzhan med pa'i phyir te/ gnyi ga dang gnyi ga ma yin pa'i phyogs gnyis po 'di bsgrub pa dang dgag pa'i bdag nyid yin pa'i phyir 'di dag las ma gtogs pa 'di gnyis kyi nang du 'dus la der 'dus pas kyang rten med pa yin te/yod pa dang med pa dmigs pa dang bral ba'i phyir ro/ /blo rab tu zhi ba yin la rnam par rtog pa thams cad nye bar zhi ba'i phyir zhi ba yin te/me bzhin du 'das pa ni ma yin no zhes pa'i don to/ /gal te ji ltar rnam par rtog pa mtha' dag dang bral bas bskal pa grangs med pa nas 'dod pa'i gzhan gyi don phun sum tshogs pa'i thabs su gyur pa'i sangs rgyas nyid thob nas bcom ldan 'das kyis gzhan gyi don mngon par rdzogs par byed par ci ltar 'gyur zhe na/'dir yid bzhin nor bu zhes pa la sogs pa gsungs te/ yid bzhin nor bu zhes pa ni bsams pa'i 'bras bu ster ba'i rin po che'i khyad par ro/ /dpag bsam gyi shing zhes pa ni bsams pa'i 'bras bu ster ba'i shing gi khyad par yin te/de ji ltar rnam par rtog pa med kyang snod ji lta bar 'jig rten pa rnams kyi re ba yongs su rdzogs pa yin zhing 'dod pa thob par byed pa yin te/ de bzhin rgyal ba'i skur snang ngo / /zhes pa dang 'brel to/ /rgyal ba ni bdud bzhi las rgyal ba'i phyir ram sdig pa'i chos las rgyal bas rgyal ba ste/bcom ldan 'das so/ /rgyal ba sangs rgyas bcom ldan 'das kyi sku ni skyes bu chen po'i mtshan sum cu rtsa gnyis kyis mdzes par byas pa'i lus so/ /de bzhin du ste rnam pa des snang ste/ rnam par rtog pa thams cad med kyang gzhan la phan pa dang bde ba bsgrub par nus pa rtogs so//yang ji ltar na 'dod pa tsam gyis grub par 'gyur zhe na/ gdul bya smon lam dag gis ni/ /zhes gsungs te/ gdul bya'i dbang gis yin te/ gang sangs rgyas bcom ldan 'das rnams gdul bya de rnams kyi 'bras bu'i khyad par thob pa'i rgyu dge ba'i las kyi rnam par smin pa de'i dbang gis so//smon lam gyi dbang gis te/ gang bcom ldan 'das kyis byang chub sems dpa'i gnas skabs na rnam pa du mas sems can gyi don bsgrub pa'i smon lam des 'phangs pa'i dbang gis rdza mkhan gyi 'khor lo 'khor ba'i tshul gyis lhun gyis grub pa'i 'jug pas/sems can thams cad la phan pa dang bde ba bsgrub par 'thad pa yin no/ /gang gi nub mo de bzhin gshegs pa mngon par rdzogs par sangs rgyas nas gang du mya ngan las 'das pa'i bar 'dir de bzhin gshegs pas yi ge gcig kyang ma gsungs te/de ci'i phyir zhe na/ bcom ldan 'das ni rtag tu mnyam par gzhag pa yin no/ /gang yang yi ge dang dbyangs dang sgra ni de bzhin gshegs pa'i zhal dang mdzod spu dang / gtsug tor las byung ba'i sgra sems can de rnams kyis thos so zhes pa la sogs pa gsungs so//yang / ting 'dzin de la mnyam gzhag pa/ /yid bzhin nor bu bzhin du gnas/ /ji ltar 'dod bzhin rtsig sogs las/ /sgron ma'i sgra ni 'byung ba yin/ /de dag shes par 'dod don rnams/ /mi rnams kyis ni thams cad rtogs/ /skal ba bzhin du phan par yang //myur du thob par 'gyur ba yin/ /zhes gsungs so/ /bstod pa bzhi pa las kyang / /gtso bo khyed kyis 'ga' zhig tu/ /yi ge gcig kyang ma gsungs te/ /chos kyi char gyis gdul bya yi/ /'gro ba ma lus tshim par mdzad/ /ces gsungs so/ /de ltar thun mong ma yin pa'i rgyu bshad nas yang gzhan du rgyu'i gnas skabs nyid gang lhun gyis grub pas gzhan gyi don sgrub par byed pa'i nus pa'i 'bras bu skye bar 'gyur ba de lta bu'i tshigs su bcad pa gnyis kyis bstan pa'i phyir dper na nam mkha'i lding gi ni//zhes pa la sogs pa gsungs te/dper na nam mkha' lding gi ni/ /zhes te/ dug gi de kho na nyid kyi rig pa sngags kyi nus pa thob pas shing gi rang bzhin nam rdo ba'am gzhan gyi yang rung ste/ mchod sdong bsgrubs na sngags kyis mngon par sbyangs te/ kho bo med kyang 'di nyid dug la sogs pa thams cad sel ba la nus pa dang ldan par 'gyur ro zhes nas 'das par gyur te/rang nyid bya ba dang bral bar 'gyur ro/ /mchod sdong de la des sngags btab ste mkha' lding can de 'das nas yun ring lon yang ste/ yun ring por bya ba dang bral yang dug la sogs pa zhi bar byed la sogs kyi sgras ni gdon la sogs pa'i rnam par 'gyur ba yang 'joms par byed do//de ltar dpe nye bar bstan nas/ don la sbyar ba'i phyir byang chub spyod ces pa la sogs pa gsungs te/ dper na zhes pa'i sgras de bzhin du zhes pa 'dren par byed de/ de bzhin du byang chub la byang chub kyi rgyu mtshan sangs rgyas kyi ched kyi spyod pa ni byang chub kyi spyod pa'o//byang chub sems dpa' 'das gyur kyang / /zhes te/ byang chub ni sangs rgyas nyid yin te/ gcig dang du ma dang bral ba skye ba med pa/ 'gag pa med pa/ chad pa med pa/ rtag pa med pa/ spros pa thams cad dang bral ba/ nam mkha' dang mnyam pa/chos kyi skur grags pa la don dam pa'i de kho na nyid du brjod do/ /de nyid kyang shes rab kyi pha rol tu phyin pa dang / stong pa nyid dang / de bzhin nyid dang / yang dag pa'i mtha' dang / chos kyi dbyings la sogs pa'i sgras kun rdzob kyi bden pa la brtsams nas brjod do/ / 'di nyid las dgongs nas/ sangs rgyas rnams ni chos nyid blta/ /'dren pa rnams ni chos kyi sku/ /chos nyid shes par bya min pas/ /de ni rnam par shes mi nus/ /zhes gsungs so/ /yang / mtshan nyid med cing ma skyes pa/ /ngag gi lam ni 'dus ma byas/ /nam mkha' dang mnyam byang chub sems//byang chub gnyis med mtshan nyid yin/ /zhes gsungs te/ de la sems dpa' ni gang gi bsam pa yin pa de la byang chub sems dpa' zhes bya'o/ /de 'das par gyur kyang ngo / /yang gi sgra ni rim pa gzhan du yin te/ mi gnas pa'i mya ngan las 'das pas don dam pa zhi bar gyur kyang ngo //rgyu'i gnas skabs log cing 'bras bu'i gnas skabs thob pa na yang zhes pa'i don to/ /de ltar gnyi gar yang rtog pa dang thams cad du bral yang gzhan gyi don sgrub pa nyams pa med par bstan pa yin no/ /de ltar gyur na yang gal te bcom ldan 'das rnam par rtog pa'i dmigs pa thams cad dang bral bas sems dang sems las byung ba thams cad kyi bya ba 'das pa yin te/'o na ji ltar de bzhin gshegs pa la mchod pa 'bras bu chen por bsngags zhes dogs nas/ sems med ces pa la sogs pa smos te/ kun rdzob kyi sems dang bral ba'i bcom ldan 'das la mchod pa ste mchod pa byas pa las shes par byed pa'i khyad par ro//ji ltar 'bras bur ldan par 'gyur te 'bras bu dang bcas par 'gyur/ longs spyod par byed pa med pa de la sbyin pa po dang sbyin bdag rnams la ji ltar bsod nams su 'gyur zhe na/'di la lan ni gang phyir bzhugs pa'am zhes pa la sogs pa gsungs te/ mtshungs shing mnyam pa nyid du bshad de lung las bstan to/ /gang gi phyir bzhugs pa'am/ mya ngan las 'das pa de la'ang de'i phyir 'bras bu dang ldan par 'gyur ro zhes sbyar ro/ /zhugs pa pa ni mya ngan las ma 'das pa yin la/mya ngan las 'das pa ni phung po lhag ma med pa'i mya ngan las 'das par gyur pa yin te/ bsod nams la khyad par yod pa ma yin no/ /bsam pa ni 'di yin te/ bsod nams ni rnam pa yin la/ gtong ba dang rjes su 'brel pa ni gtong ba nyid las gang skyes pa'o//yongs su longs spyod pa dang rjes su 'brel pa ni sbyin par bya ba'i chos yongs su longs spyod pa las gang skyes pa'o/ /de la gal te bcom ldan 'das mya ngan las 'das pa la len pa med pas yongs su longs spyod pa'i bsod nams su mi 'gyur yang gtong ba dang yongs su 'brel pa gang gis bzlog par bya/ci ste yongs su ma blangs na gang la yang ji ltar yongs su gtong ba dang 'brel pa'i bsod nams su 'gyur zhe na/ len pa po yod na bsod nams su 'gyur la/ med na ni ma yin no zhes pa rgyu ci yin/ yang ci ste len pa po 'ga' yang med pa'i phyir ro zhe na/de ni rgyu ma yin pa nyid yin te/ gang phyir zhes te/ bsod nams gzhan yongs su len pa nyid kyis 'gyur na byams pa tshad med pa la sogs pa dang yang dag pa'i lta ba bsgom pa la bsod nams med par 'gyur ro/ /de lta bas na rang gi sems kyi mthus gzhan yongs su len pa med par yang bsod nams yod par 'dod par bya ste/des na yon tan dang ldan pa 'das pa la yang de la gus par byas pas rang gi sems la bsod nams su 'gyur ba la 'gal ba med do/ /gzhan yang bsod nams dang sdig pa thams cad yod pa dag la lung dbang po nyid du lung las bshad ces te/'dir 'thad pa gzhan gyis ci zhig bya/ lung las te bcom ldan 'das kyis bka' las yin la/ 'bras bu ni bcom ldan 'das la mchod pa byas pas longs spyod chen po la sogs pa'i mtshan nyid rtogs par 'gyur ro//de la zhes pa ni mya ngan las 'das pa'am mya ngan las ma 'das pa'i bcom ldan 'das la mchod pa'i khyad par 'di dag yin te/ kha cig ni 'bras bu kun rdzob yin la/ kha cig ni yang 'bras bu don dam pa yin no zhes 'dod do/ /'di ltar dpyad pa btang snyoms su byas nas khyad par du brjod par bya ste/kun rdzob bam de nyid du'ang rung ste/ bsod nams dang sdig pa byas pa'i 'bras bu bcom ldan 'das kyi bka' las rtogs pa yin te/ de la yang khyed dang kho bo cag la rtsod pa med pa nyid do/ /de la 'di bcom ldan 'das kyis me tog brtsegs pa'i gzungs las/seng ge rnam par rtse ba 'ga' zhig gis de bzhin gshegs pa dgra bcom pa yang dag par rdzogs pa'i sangs rgyas yon tan gyi tshogs dpag tu med pa dang ldan pa de'i phyir de la mchod pa'i rnam par smin pa de yang dpag tu med par bya'o/ /seng ge rnam par rtse ba gang la la dag de bzhin gshegs pa bzhugs kyang rung /yongs su mya ngan las 'das kyang rung / mchod par byed pa de dag thams cad ni 'di lta ste/ theg pa gsum las theg pa gcig gis yongs su mya ngan las 'da' bar 'gyur ro/ /seng ge rnam par rtse ba gang gis de bzhin gshegs pa dgra bcom pa yang dag par rdzogs pa'i sangs rgyas mthong nas sems dang bar 'gyur la/dang ba'i sems kyis rnyed pa dang / na bza' dang / zhal zas dang / gzims cha dang / snyun gsol dang / yo byad dang / bde bar sbyar ba thams cad kyis bsti stang du byas shing ri mor byas te/mchod cing rjed la rim gror byas pa dang / gang zhig gis de bzhin gshegs pa yongs su mya ngan las 'das pa'i ring bsrel yungs 'bru tsam gyi mchod rten la mchod pa bya ba'i rnam par smin pa ni mnyam par shes par bya ste/ bye brag gam tha dad du bya ba de bzhin gshegs pa'i mchod pa la med do zhes gsungs pa yin te/gang zhig bzhugs la mchod pa dang / /mi gnas mya ngan 'das pa la/ /sems ni mnyam par dang ba yis/ /bsod nams la ni khyad par med/ /yang 'di gsungs pa yin te/ gang yang seng ge rnam par rtse ba de bzhin gshegs pa la lo brgya 'am/lo stong yang rung ste/ bde ba'i yo byad thams cad kyis bsnyen bkur byas pa dang / gang zhig gis de bzhin gshegs pa yongs su mya ngan las 'das pa'i mchod rten la/ byang chub kyi sems kyis yang dag par zin pas me tog 'ga' 'bul lam/chu snyim pa gang tsam 'thor ram/ byug pa'i thig le 'dri'am/ me tog gi nyal nyil 'phyag gam/ byug pa 'bul lam/ mar me 'bul zhing phul nas dga' ba'i sems kyis gom pa'i gnas skabs 'ga' bor te sangs rgyas bcom ldan 'das de la phyag 'tshal lo zhes smra ba tsam la seng ge rnam par rtse ba bskal pa'am/bskal pa brgyar ram/ bskal pa stong du'am/ bskal pa 'bum du'am/ ngan 'gro log par ltung bar 'gro bar 'gyur ba de'i gnas med de/ 'di la dogs pa'am yid gnyis sam the tshom za bar mi bya'o zhes gsungs so//'di nges par khas blang bar bya'o zhes/ dper na bden pa'i zhes pa la sogs pa gsungs te/ bden pa'i sangs rgyas te don dam par yod pa'i bcom ldan 'das la mchod pa byas na'o/ /'bras bur bcas zhes pa ni bsod nams dang bcas pa yin na yang ji ltar zhes te ji lta ba bzhin du dper brjod pa ston par byed do//'dir dper brjod pa lung las gzhan yod pa ma yin no/ /de lta bas na bcom ldan 'das kyis mchod pa'i 'bras bu yod pa rnam pa thams cad du lung las go bar bya'o//stong nyid bag chags bsgos pa las/ /zhes bya ba la sogs pa gang gsungs pa de la/ bye brag tu smra ba la sogs pa rnams chos thams cad kyi stong pa nyid kyis sgrib pa thams cad spong bar mi bzod pas 'phags pa'i bden pa bzhi mthong ba dang bsgom pa ni de'i thabs su 'dod pas/bden pa mthong bas zhes pa la sogs pa smos te/ 'phags pa'i bden pa bzhi po rnams ni sdug bsngal ba dang / kun 'byung ba dang / 'gog pa dang / lam gyi mtshan nyid rnams yin la/ mthong ba ni dmigs pa yin te/ mngon sum du byas pas zhes pa'i don to//mthong bas shes pa ni mtshon pa yin te/ bsgoms pas shes pa yang blta bar bya'o/ /de skad du/ bden pa mthong dang bsgoms pa las/ /nyon mongs spong bar bshad pa yin/ /zhes brjod pa yin na/ de la zhugs pas thos pa dang bsam pa dang ldan pa bsgom pa la zhugs pa/mi gtsang ba dang dbugs 'byung ba dang rngub pa dran pa dang / dran pa nye bar gzhag pa bsgom pa grub pa'i rim pas mi rtag pa dang / sdug bsngal ba dang / stong pa dang / bdag med pa zhes pa rnam pa bcu drug po 'di rnams kyis sdug bsngal gyi bden pa la sogs pa mthong ste/dro bar gyur pa la sogs pa nges par 'byed pa'i cha dang mthun pa'i sgo nas sdug bsngal la chos shes pa'i bzod pa la sogs pa skad cig ma bco lnga'i mtshan nyid ni mthong ba'i lam yin la/ de'i rjes la bsgom pa'i lam thob pas mthong ba dang bsgoms pas spong bar bya ba'i khams gsum gyi nyon mongs pa dang nye ba'i phung po spangs pas zad pa dang mi skye ba'i shes pas skye bar 'gyur te/de lta na 'phags pa'i bden pa rnams mngon par rtogs pa'i rim pa mdor bsdus pa yin no/ /'dis 'phags pa'i bden pa mthong ba las grol bar brjod pa yin no/ / de lta bas na grol ba 'di nyid kyis chog pas stong nyid mthong bas ci zhig bya ste/ stong pa nyid ni chos thams cad kyi rang bzhin med pa yin pa mthong bas te rtogs pa dang mngon sum du byas pas so/ /re zhig dgos pa cung zad kyang yod pa ma yin te/ thar pa'i thabs de las gzhan yod pa'i phyir ro zhe na/'di la gang gi phyir lung las zhes pa la sogs pa gsungs te/ thabs gzhan med pa de'i phyir zhes pa'i tha tshig go/ /'di nyid don gyi de kho na ste/ 'di ltar thams cad nyid dngos por sgro btags pa dang ma btags pa zhes ngo bo gnyis su 'gyur ro//de la gang ma rig pas 'phangs pa'i sgro btags pa'i ngo bo de ni skye bo thams cad kyi thun mong ma yin la/ de dmigs pa'i nyon mongs pa spang bar mi 'thad de/ gzhan du byis pa'i skye bo thams cad de bzhin gshegs par 'gyur ro zhes sngar bstan pa'i thal bar 'gyur ba yin no/ / de bas na sgro ma btags pa'i de kho na nyid mi dmigs pa'i sbyor bas de khong du chud de/ mi shes pa dang zag pa zad pa'i ched du nus pa thob pa yin te/ de yang shes rab kyis rnam par 'byed pa na chos thams cad mi dmigs pa'i mtshan nyid rtogs pas chos thams cad kyi stong pa nyid kho nas rnam par 'khrul pa'i sgrib pa thams cad spong ba'i don du nus pa dang ldan par rtogs par bya'o//de ltar rigs pa sngar brjod la phyis kyang stan la 'bebs par 'gyur ro/ /yang 'dir lung nyid kyis 'di'i don rtogs par bya ba'i phyir/ gang phyir lung las lam 'di ni/med par byang chub med ces lung las gsungs te/ gang shes rab kyi pha rol tu phyin pa las/ bcom ldan 'das kyis bka' stsal pa/ rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe gzugs dngos po yod ces bya bar mi sgom mo//tshor ba dngos po yod ces bya bar mi sgom mo/ /'du shes dngos po yod ces bya bar mi sgom mo/ /'du byed dngos po yod ces bya bar mi sgom mo/ /rnam par shes pa dngos po yod ces bya bar mi sgom mo zhes bya ba nas/ lam gyi rnam pa shes pa nyid dngos po yod ces bya bar mi sgom mo//rnam pa thams cad mkhyen pa nyid dngos po yod ces bya bar mi sgom mo/ /bag chags kyi mtshams sbyor ba'i nyon mongs pa spangs pa dngos po yod ces bya bar mi sgom mo/ /de ci'i phyir zhe na/ rab 'byor dngos po'i 'du shes can la shes rab kyi pha rol tu phyin pa sgom pa med do zhes bya ba nas/dngos po'i 'du shes can la sbyin pa'i pha rol tu phyin pa sgom pa med do/ /dngos po'i 'du shes can la nang stong pa nyid sgom pa med do zhes bya ba nas/ dngos po'i 'du shes can la dngos po med pa'i ngo bo nyid stong pa nyid sgom pa med do/ / dngos po'i 'du shes can la mngon par shes pa drug sgom pa med do zhes bya ba nas/ ting nge 'dzin thams cad dang / gzungs kyi sgo thams cad dang / de bzhin gshegs pa'i stobs dang / mi 'jigs pa dang / so so yang dag par rig pa dang / byams pa chen po dang / snying rje chen po dang /sangs rgyas kyi chos ma 'dres pa sgom pa med do zhes pa nas/ bag chags kyi mtshams sbyor ba'i nyon mongs pa spong ba med do/ /de ci'i phyir zhe na/ 'di ltar de dngos po la 'di bdag go zhes bya bar mtha' gnyis la chags te/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab la 'di ni bdag go zhes mtha' gnyis la chags par gyur to/ /nang stong pa nyid dang zhes bya ba nas dngos po med pa'i ngo bo nyid stong pa nyid dang mngon par shes pa drug dang zhes pa nas/ bag chags kyi mtshams sbyor ba'i nyon mongs pa spangs pa la 'di ni bdag go zhes bya bar mtha' gnyis la chags par gyur pas de la ni thar pa med de/de ci'i phyir zhe na/ rab 'byor dngos po'i 'du shes can la sbyin pa med ces bya ba nas/ shes rab kyang med/ lam yang med/ ye shes kyang med/ thob pa yang med/ mngon par rtogs pa yang med/mthun pa'i bzod pa yang med/ gzugs kyang yongs su shes pa med/ tshor ba yang yongs su shes pa med ces pa nas/ rten cing 'brel par 'byung ba yang yongs su shes pa med ces pa nas/ bdag dang / sems can dang / srog dang / skye ba po dang / gso ba dang / skyes bu dang /gang zag dang / shed can dang / shed bdag dang / byed pa po dang / tshor ba po dang / shes pa po dang / mthong ba po'i 'du shes kyang yongs su shes pa med ces pa nas/ bag chags kyi mtshams sbyor ba'i nyon mongs pa thams cad spang ba yang yongs su shes pa med na de thar par 'gyur ba lta ga la 'ong zhes gsungs so//yang de nyid las/ bcom ldan 'das kyis bka' stsal pa/ kau shi ka de de bzhin no/ /de de bzhin te/ 'das pa'i dus kyi de bzhin gshegs pa dgra bcom pa yang dag par rdzogs pa'i sangs rgyas gang ji snyed cig byung ba de dag kyang shes rab kyi pha rol tu phyin pa 'di nyid la brten te/bla na med pa yang dag par rdzogs pa'i byang chub mngon par rdzogs par sangs rgyas so/ /ma 'ongs pa'i dus kyi de bzhin gshegs pa dgra bcom pa yang dag par rdzogs pa'i sangs rgyas gang ji snyed cig 'byung ba de dag kyang shes rab kyi pha rol tu phyin pa 'di nyid la brten cing bla na med pa yang dag par rdzogs pa'i byang chub tu mngon par rdzogs par 'tshang rgya'o//da ltar byung ba'i phyogs bcu'i 'jig rten gyi khams tshad med grangs med pa dag na de bzhin gshegs pa dgra bcom pa yang dag par rdzogs pa'i sangs rgyas gang ji snyed cig bzhugs shing 'tsho skyong ba dang /chos ston pa de dag kyang shes rab kyi pha rol tu phyin pa 'di nyid la brten te bla na med pa yang dag par rdzogs pa'i byang chub tu mngon par rdzogs par sangs rgyas so//'das pa'i dus kyi de bzhin gshegs pa dgra bcom pa yang dag par rdzogs pa'i sangs rgyas rnams kyi nyan thos gang ji snyed cig byung ba dang / ma byon pa'i de bzhin gshegs pa dgra bcom pa yang dag par rdzogs pa'i sangs rgyas rnams kyi nyan thos gang ji snyed cig 'byung ba dang /da ltar byung ba'i de bzhin gshegs pa dgra bcom pa yang dag par rdzogs pa'i sangs rgyas rnams kyi nyan thos gang ji snyed cig yod pa de dag gis kyang shes rab kyi pha rol tu phyin pa 'di nyid la brten te/ rgyun tu zhugs pa'i 'bras bu thob bo/ /'thob bo//'thob par 'gyur ro/ /zhes pa nas dgra bcom pa nyid thob bo/ /'thob bo/ /'thob par 'gyur ro/ /'das pa'i dus kyi rang sangs rgyas gang ji snyed cig 'byung ba dang zhes pa nas/ shes rab kyi pha rol tu phyin pa 'di nyid la brten te rang byang chub thob bo/ /'thob bo/ / 'thob par 'gyur ro/ /de ci'i phyir zhe na/ 'di ltar shes rab kyi pha rol tu phyin pa 'dir theg pa gsum po thams cad rgya cher bsten to/ /de dag kyang mtshan ma med pa'i tshul dang / skye ba med pa'i tshul dang / 'gag pa med pa'i tshul dang / kun nas nyon mongs pa med pa'i tshul dang / rnam par byang ba med pa'i tshul dang zhes pa ji srid du 'jig rten gyi tha snyad kyis yin te don dam pa'i tshul gyis ni ma yin no zhes bya ba'i bar du rgyas par gsungs so/ /gang / sangs rgyas rnams dang rang sangs rgyas/ /nyan thos rnams kyis nges bsten pa'i/ /thar lam gcig pu khyod lags te//gzhan du nges pa ma mchis so/ /zhes gsungs so/ /theg pa chen po'i tshig 'di ma bzod nas/ gal te theg chen zhes pa la sogs pa smos te/ kye stong pa nyid du smra ba de theg pa chen po ni bka' nyid du kho bo cag la ma grub ste/ 'dod pa ma yin la sgrub par byed pa nyid du de brjod pa ni legs pa ma yin no//'dir gzhan dang lan mtshungs pa'i sgo nas sun dbyung ba'i phyir/ khyod kyi lung ni zhes pa la sogs pa gsungs te/ gal te theg pa chen po de ma grub na ji ltar te rnam pa gang gis khyod kyi lung bcom ldan 'das kyi bkar grub/der lung nyid du sgrub par byed pa'i tshad ma lhag pa 'ga' zhig ni mthong ba ma yin no/ /gzhan gyis lan gang phyir zhes bya ba la sogs pa brjod de/ rgyu gang gi phyir bdag gi lung 'di lung nyid du grub pa khyod dang kho bo cag gnyis la nges pa yin te/ bdag gi lung la khyed kyang theg pa chen po'i rjes su 'jug pa sangs rgyas kyi bka' nyid du log par rtog pa yod pa ma yin la/de lta bas na 'di grub pa yin no/ theg pa chen po la ni bdag gis yang dag par rtog pa yod pa ma yin pas/ gang gis ni lan 'dir 'gyur ba yin zhe na/ grub pa'i mtha' smra bas dang po khyod la 'dir ma grub ces gsungs te/ gal te khyod kyis lung lung nyid du gnyi ga la grub pa rgyu yin na de'i tshe 'di brjod par mi bya ste/ ma grub pa'i phyir ro/ /gang gi phyir khyod nyid la 'di lung nyid du grub pa ma yin no/ /gang gi tshe zhe na/ dang por te/de khas len pa las dang po ste sngon rol du'o/ /khas blangs pa las dang por khyod la ji ltar yang grub pa ma yin no/ /de lta bas na gnyi ga la grub pa zhes pa ma grub pa'i phyir sgrub par byed pa ma yin no/ /gal te gnyi ga la grub pa ma grub na/ 'di ltar sgrub par byed pa 'di yod pa yin te/sangs rgyas kyi gsung rab nyid du bla ma dang slob ma brgyud pa las byung ba yin la/ gang yang mdo sde la 'jug /'dul ba la snang ba'i rgyu mtshan blang bar bya zhing gus par bya bar brjod pa yin no/ /der zhes pa ni rang gi lung la yin la chos nyid dang mi 'gal ba de sangs rgyas kyi bka' yin te/gzhan ni ma yin no zhe na/ rkyen gang gis zhes pa la sogs pa gsungs so/ /rkyen te rgyu mtshan gang gis 'di la yid ches pa yin pa de ni de skad du/ gang gis rkyen gyis yid ches pa'i rgyu mtshan blang bar bya zhing gus par bya bar brjod pa yin no//der zhes pa ni rang gi lung la yin la/ re zhig yin yid ches pa de 'ba' zhig 'dir theg pa chen po la yang byos shig ces te/ theg pa chen po la yang brjod pa'i yid ches pa yod pa'i phyir ro/ /'di ni yang sangs rgyas kyi bka' thams cad la thun mong ba'i mtshan nyid ma 'khrul ba yin no//gang lhag pa'i bsam pa bskul ba'i mdo las/ byams pa gzhan yang rgyu bzhis ni spobs pa thams cad ni sangs rgyas kyis gsungs par rig par bya'o/ /bzhi gang zhe na/ byams pa 'di la spobs pa don dang ldan pa yin gyi don dang mi ldan pa ma yin pa dang /chos dang ldan pa yin gyi/ chos dang mi ldan pa ma yin pa dang / nyon mongs pa zad par byed pa yin gyi/ nyon mongs pa 'phel bar byed pa ma yin pa dang / mya ngan las 'das pa'i yon tan dang / phan yon ston pa yin gyi 'khor ba'i yon tan dang /phan yon ston par byed pa ma yin no/ /byams pa rgyu bzhi po 'di dag dang ldan na sngar bzhin du rig par bya'o/ /byams pa dge slong ngam/ dge slong ma'am/ dge bsnyen nam/ dge bsnyen ma gang su yang rung ste/ rgyu bzhi po 'di dag gi spobs pas spobs pa'am/spobs par 'gyur yang rung ste/ de la rigs kyi bu'am bu mo dad pa can dag gis de dag la sangs rgyas su 'du shes bskyed par bya zhing / ston par 'du shes byas nas dam pa'i chos nyan par bya'o/ /de ci'i phyir zhe na/ byams pa legs par smras pa gang ci yang rung ba de dag thams cad ni sangs rgyas kyis gsungs pa yin pa'i phyir ro//byams pa de la gang zag la dang ba'i phyir 'di dag ni sangs rgyas kyis gsungs pa ma yin no zhes spobs pa bzhi po de dag spong zhing de dag la ma gus pa skyed par byed pa des ni sangs rgyas kyis gsungs pa'i spobs pa thams cad spangs pa yin te/chos spangs nas chos kyis phongs par 'gyur ba'i las mngon par 'du byed pas ngan song du 'gro bar 'gyur ro/ /byams pa de lta bas na rigs kyi bu'am/ rigs kyi bu mo dad pa can gang chos kyis phongs par 'gyur ba'i las las yongs su grol bar 'dod pas/gang zag la sdang ba'i phyir chos la sdang bar mi bya'o/ /de la chos nyid dang mi 'gal ba nyid ni yang dag pa'i mtshan nyid yin no/ /gang zhig don ldan chos dang nyer 'brel cing / /khams gsum kun nas nyon mongs spong byed gsung //zhi ba'i phan yon ston par mdzad pa gang / /de ni drang srong gsung yin bzlog pa gzhan/ /zhes gsungs so/ /'di theg pa chen po la yod pas ji ltar blang bar bya ba ma yin par 'gyur/ gang dang por khyod la 'di ma grub ces pa de la gzhan gyis khyad par brjod de/gang gi tshe khyod dang kho bo cag gnyi ga la grub pa zhes mi smra'o/ /'on kyang 'u bu cag las gzhan pa gnyi ga la grub pa'i bdag nyid lung ni blang bar bya ba yin la/ theg pa chen po ni ma yin te/ de las bzlog pa yin pa'i phyir la des na blang bar bya ba ma yin no zhe na/gzhan gnyis 'dod pas bden na ni zhes pa la sogs pa gsungs te/ gal te 'u bu cag rtsod pa dang bcas pa'i phyir 'u bu cag las gzhan pa gang su dag gnyi ga la grub pa de dag 'dod cing mngon par 'dod pa dang yang dag par 'dod pa'i bar du ste de bden pa ji lta ba'i don yin zhing khas blangs pa na rig byed sogs kyang bden par 'gyur te/rig byed kyi ngag skul bar byed pa'i mtshan nyid kyang bden par 'gyur te/ sogs pa'i sgras gzegs zan la sogs pa'i tshig kyang bden par 'gyur la brdzun pa ma yin par 'gyur te/ de yang rgol ba dang phyir rgol ba dag las gzhan gnyi gas 'dod pa srid pa'i phyir khyed la blang bar bya bar 'gyur ro/ /de lta bas na 'di la ni khyad par yod pa ma yin no/ /de ltar gyur na yang kho bo cag gi lung la sangs rgyas kyi bka' nyid du rtsod pa yod pa ma yin la/ theg pa chen po la ni ma yin pa des na de ni blang bar bya ba yin la cig shos la ni ma yin no zhes dogs nas/theg chen rtsod bcas zhes bya ba la sogs pa smos te/ rtsod pa dang bcas pa ni log par rtog pa dang bcas pa yin te kha cig ni sangs rgyas kyi bka' nyid kyis 'jug pa'i yan lag tu 'dod la/kha cig ni phyin ci log gi sgro btags pa nyid du 'dod de/ rgyu de'i phyir gal te gzung bar bya ba ma yin no zhe na/ de'i tshe lung dor byar 'gyur te rang gi lung yang dor bar bya ste/ de yang 'jug pa'i yan lag ma yin par 'gyur ro//ci'i phyir zhe na/ mu stegs te dpyod pa pa la sogs pa rnams dang rtsod pa dang bcas pa yin la log par rtog pa srid pa'i phyir dor bar bya bar rigs so/ /mu stegs can 'ba' zhig dang ni ma yin te/ 'on kyang rang gi sde pa dang yang yin no zhes rang dang zhes gsungs te/bcom ldan 'das kyis bstan pa ni sde pa bzhi las bcwa brgyad du gyes pa yin te/ de la sde pa gcig la yang du mar gyes pa srid pa'i phyir rang gi sde pa las yang phan tshun du rtsod pa srid pa rang zhes te/ rang gi sde pa'i nang gi gyes pa'i khyad par la gnas pa yin la/gzhan gyi zhes pa ni sde pa gzhan la gnas pa yin te/ dang gi sgras ni snga ma dang phyi ma'i don sdud pa yin no/ /rtsod bcas yin phyir lung dor bar bya'o zhes 'brel te khyod kyis khas blangs pa'i lung las gzhan gyi lung / lung gi khyad par de yang rtsod pa dang bcas pa yin pa'i phyir khas blangs par 'os pa ma yin no//khyod kyis lung yang gzhan la ltos nas rtsod pa dang bcas pa yin te/ spang bar bya ba nyid du rigs pa mtshungs pa yin no/ /yang na rang zhes pa ni gyes pa gcig la gnas pa'i mdo sde dang / mngon pa phan tshun du rtsod pa dang bcas pa'i phyir mdo sde dang 'dul ba dang chos mngon pa yongs su dor bar rigs te/ gyes pa gcig la gnas pa mdo sde pa la sogs pa la phan tshun du rtsod pa yod pa yin no/ /gzhan zhes pa ni sde pa gcig la gnas pa la gyes pa gzhan yin no//'dis ni gang bla ma brgyud pa'i rim pas sangs rgyas kyi bka' yin no zhes brjod pa de 'di nyid kyis bsal ba yin par rig par bya'o/ /dran pa ma nyams pa'i man ngag dang ldan pa rnams la phan tshun du rtsod par rigs pa ma yin no/ /thams cad mkhyen pa'i bka' rnams la phan tshun gnod pa yod pa ma yin no//mdo sde dang chos mngon pa dang / 'dul ba rnams la phan tshun dag gcig pa nyid du khyed la srid pa ma yin la/ de la ji ltar mdo sde la sogs pa dang mthun pa sangs rgyas kyi bka' rgyu mtshan du brjod pa de lta bas na cung zad kyang ma yin no//de ltar na lan dang sun 'byin pa mtshungs par brjod nas yang gzhan gyis blangs pa la khyad par gyi sgo nas sun 'byin pa brjod pa'i phyir/ bstan rtsa zhes pa la sogs pa gsungs pas nye bar rtsom pa yin te/ bstan pa ni bcom ldan 'das kyis phan pa dang phan pa ma yin pa len pa dang yongs su spong ba ston pa'i mtshan nyid do//de la yang dge slong rtsa ba yin no/ /yang na lung la log par rtogs pa zhar la bsal nas/ bden pa mthong bas grol 'gyur gyi/ /stong nyid mthong bas ci zhig bya/ /zhes gang brjod pa de sun dbyung ba'i phyir/ bstan rtsa zhes bya ba la sogs pa gsungs te/ bstan pa ni 'di ni bya ba'o 'di ni mi bya'o zhes bka' la gzhol ba la dge slong nyid rtsa ba yin te de la dge slong gi dngos po nyid dge slong yin la/ de nyid rtsa ba yin te/ gang gi rtsa ba yin pa de la de skad ces bya ste/ de la gnas pa yin pa'i phyir ro//ji ltar rtsa ba brtan pa'i shing yun ring du gnas pa nyams su myong ba na sdong bu dang / yal ga dang / yal ga phre'u dang / lo ma dang / 'bras bu dang / grib mas gdung ba sel bar byed pa la sogs pa nye bar mkho ba la nus pa dang ldan par 'gyur ro zhes grags pa de bzhin du bcom ldan 'das kyis bstan pa yang dpag bsam gyi shing dge slong nyid kyi rtsa ba la brten nas dran pa nye bar gzhag pa dang /yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / gzugs med pa'i ting nge 'dzin la snyoms par 'jug pa dang /byang chub kyi phyogs rnams dang mthun pa dang / 'phags pa'i lam yan lag brgyad dang / dge slong gi 'bras bu phun sum tshogs pa dang / rdzu 'phrul gyi cho 'phrul la sogs pa rnams kyis nyon mongs pa'i gdung ba la sogs pa sel nus par 'gyur ro//de ltar na dge slong nyid rtsa ba dang chos mtshungs pa yin te/ de la ming gi dge slong dang / khas 'che ba'i dge slong dang / slong ba'i ngang tshul gyi dge slong dang / gsol ba dang bzhi'i las kyis bsnyen par rdzogs pa'i dge slong dang /nyon mongs pa bcom pas dge slong ste/ de ltar na dge slong ni rnam pa lnga yin no/ /de las bzhi pa dang lnga pa gnyis ni mchog yin la/ gzhan rnams ni mi mtshungs pa tsam gyi brjod bya yin pa'i phyir ro/ /de las gnyis po yang bstan pa gnas pa'i rgyu nyid du 'gal ba yin no/de la yang nyon mongs pa bcom pa'i dge slong nyid gtso bo yin te/ de nyid 'dir bzung la/ de'i dngos po dge slong nyid yin la/ de yang 'phags pa'i bden pa mthong ba des/ de ltar 'thad par 'gyur ba ma yin no/ /dge slong nyid ni nyon mongs pa bcom pa yin te nyon mongs pa spangs pa yin no zhes bya ba'i bar du'o//kyang gi sgra ni bshad pa gzhan sdud pa ste thar pa nyid du 'jug la gang gi phyir dge slong de nyid dka' bas gnas pa yin te/ stong pa mthong ba nyid med par 'tsham pa ma yin la bden pa mthong ba 'ba' zhig gis rigs pa ma yin la/de lta bas na bden pa mthong bas grol ba ma yin te/ des na brjod par mi bya'o zhes bsams pa yin no/ /ji ltar dka' bas gnas pa yin zhe na/ sems ni dmigs par bcas rnams kyi/ /zhes bya ba la sogs pa gsungs te/ dmigs dang bcas pa ste dngos po la mngon par zhen pas 'jug pa ni dmigs pa dang bcas pa yin te/de ni de lta bur gyur pa'i sems yin no/ /gang rnal 'byor pa de rnams kyi yin pa de la de rnams kyi zhes brjod par bya'o/ /gang gi phyir sdug bsngal la sogs pa'i bden pa de rnams kyis nyon mongs pa dang bral ba la yang dngos po nyid du dmigs pas zhes khyed 'dod pa yin la/de'i phyir dmigs pa dang bcas par lta ba rnams la dka' bar gnas pa yin no/ /sems dmigs pa dang bral ba rnams la ni ma yin no/ /gang slar brjod pa bden pa mthong bas grol zhes brjod pa de la brtag par bya ste/bden pa mthong ba rnam pa gnyis srid la/ don dam pa'am kun rdzob po/ /de la gal te brtag pa dang po ltar na de'i tshe kho bo cag la log par rtogs pa med de/ kho bo cag gi phyogs gtso bo yin pa'i phyir la/kho bo cag rnams kyi chos thams cad don dam mthong bar khas blangs pa'i phyir ro/ /'on te gnyis pa yin na de la mi bzod de/ rigs pa dang 'gal ba'i phyir te/ kun rdzob kyi bden pa mthong bas grol ba ni rigs pa ma yin te/ sems can thams cad grol bar thal bar 'gyur ba'i phyir la/'di ltar lung dang rigs pa dag gis de kho na nyid dang de kho na ma yin pa rnam par phye ba'i phyir/ don dam pa'i bden pa nyid kyis nyon mongs pa spong ba'i don du nges pa yin te/ kun rdzob kyis ni ma yin no/ /de yang chos thams cad mi dmigs pa'i mtshan nyid yin la/de med par nyon mongs pa ldog par 'thad pa ma yin no/ /ji srid du dngos po la mngon par zhen pa de srid du rnam par rtog pa ldog pa ma yin la/ ji srid du rnam par rtog pa yod pa de srid du nus pa nyams pa ma yin te/ nyon mongs pa'i sems kyi rgyun gnas pa yin la/ji srid du nyon mongs pa yod pa de srid du las kyis sprul pa'i skye ba brgyud pas rab tu gnas pa yin te/ 'khor ba yang mchog tu nyams pa med par mtha' yas par 'jug go/ /de'i phyir chos thams cad kyi stong pa nyid kho na ma rig pa'i gnyen po yin pa'i phyir 'khor ba'i rgyun gcod pa'i rgyur gtogs par byas la/bden pa mthong ba 'ba' zhig gis ni ma yin no/ /'di nyid slob dpon gyi zhal snga nas kyis/ stong nyid mthong bas grol 'gyur gyi/ /sgom pa lhag ma de don yin/ /zhes gsungs so/ / ji ltar 'phags pa'i bden pa rnams ni bden pa gnyis su 'dus pa yin te/ de bzhin du sngar bstan pa nyid yin no/ /de ltar na shin tu spros pas chog go/ /gzhan yang sems ni dmigs par bcas rnams kyi/ /mya ngan las 'das pa yang dka' bar gnas/ /zhes te//dge slong 'ba' zhig ni ma yin la 'on kyang mya ngan las 'das pa yang yin no zhes 'ang gi don yin te/ mya ngan las 'das pa nyon mongs pa dang bral bas phung po lhag ma med par dka' bar gnas pa yin te/ 'thad pa ma yin no/ /de la re zhig dge slong nyid mi 'thad par nyon mongs pa spangs pas zhes pa la sogs pa gsungs te/gal te 'phags pa'i bden pa mthong bas nyon mongs pa spong bar 'gyur na/ de las grol ba'i ngo bo skye bar 'gyur te/ de'i tshe de ma thag tu nyon mongs spangs pa'i phyir/ de ma thag nyid du grol bar 'gyur ba nyid do//su zhig gis kyang gzhan du yin no zhes smra ba 'di yang yod pa ma yin te/ ci'i phyir 'di ltar yin zhe na/ nyon mongs med kyang zhes pa la sogs pa gsungs te/ mthong zhing rtogs pa'i lung las te gang gi phyir nyon mongs pa de rnams spangs na yang 'phags pa maud gal gyi bu dang /'phags pa sor phreng can la sogs pa rnams la nus pa ste 'bras bu 'byin pa'i nus pa yod pa de lta bas na de ma thag tu grol ba yod pa ma yin no/ /gang gis nus pa mthong zhe na/ las kyis te dge ba dang mi dge ba'i mtshan nyid can gyi'o//gang yin zhe na/ sngar 'phags pa ma yin pa'i gnas skabs na nyon mongs pa dang bcas pa'o/ /nyon mongs pa med kyang yin no zhes bstan pa'i phyir/ nyon mongs med kyang zhes gsungs te/ lhan cig byed pa'i nyon mongs pa dang bral na yang las kyi nus pa mthong ba yin no//ci ste yang bden pa mthong ba las ma rig pa spong ba yin te/ de spangs pa las 'du byed la sogs pa spong ba'i rim pas sred pa yang spong bar 'gyur ba yin la/ sred pa dang phyin ci log dang ldan pa ni slar skye ba'i rgyu mtshan yin te/ de'i phyir de dag bral bas shun phrags med pa'i sa bon bzhin du las yod na yang cung zad kyang nyams pa med pa yin no//de skad du yang / log shes dang ni nges skyed sred/ /bcas pa'i sems kyi dbang gis ni/ /dman pa'i gnas su skye ba yin/ /de spangs pas ni skye ba med/ /ces gsungs te/yang na sred pa nyid 'ba' zhig yang srid kyi rgyu yin te/ kun 'byung ba rgyu yin pa'i phyir bcom ldan 'das kyis kyang de la kun 'byung ba 'phags pa'i bden pa gang zhe na/ gang sred pa ni gang 'byung ba la mngon par dga' ba dang / 'dod chags dang bcas pas de dang de la mngon par dga' ba yin te/'di lta ste 'dod pa'i sred pa dang / srid pa'i sred pa dang / longs spyod kyi sred pa yin no/ /de ltar na gang sred pa med pa de la rgyu kun 'byung ba spangs shing med pa'i phyir yang skye ba srid pa ma yin no zhes gsungs so/ /gzhan gyi bsam pa blangs nas/ re zhig nyer len zhes pa la sogs pa gsungs te/ ma rig pa spangs pas sred pa yang srid kyi nye bar len pa'i rgyu yin pa med cing / yod pa ma yin te zhe na zhes gal te bstan zhing nges par byed na'o/ /de'i tshe 'di skad brjod par mi bya ste/ gang gi phyir dmigs pa dang bcas pa'i lta ba pa rnams la ma rig pa spong ba nyid 'thad pa ma yin te/de yod pas sred pa spangs pa yang yod pa ma yin pa'i phyir ro/ /yin du chug na yang yang 'di ltar brjod par bya ste/ sred pa 'di zhes pa la sogs pa gsungs pa la/ nyon mongs can ma yin pa yod na ste/ nyon mongs pa dang mtshungs par mi ldan pa'i sred pa 'di khyed kyi rnal 'byor pa rnams la med pa ji ltar srid de ci ste med/ji lta bu zhe na/ rmongs pa bzhin du ste/ nyon mongs pa can ma yin pa'i shes pa bzhin du'o/ /'dis kyang srid pa spang bar mi nus so zhes tshor ba'i rkyen gyis zhes pa la sogs pa gsungs te/ reg pa'i rkyen gyis tshor ba yin la tshor ba'i rkyen gyis sred pa yin te/sred pa'i rgyu tshor ba de yang yod pa min pas nyams pa med pa'i rgyu yod na de'i 'bras bu yod pa ma yin no zhes ji ltar brjod par nus/ kha na ma tho ba med pa'i tshor ba med na yang sred pa yod pa ma yin no zhe na/ dngos po la mngon par zhen pa can la kha na ma tho ba med pa nyid kyang 'grub pa ma yin no zhes brjod pa yin no/ /de'i phyir gal te nyon mongs pa can ma yin pa'i mi shes pa yod kyang sred pa khas mi len pa de lta na yang stong pa nyid mthong ba dang bral bas rigs pa'i stobs kyis thob pa yin no//'dir 'di ni bsdus pa'i don yin te/ gang gi tshe rgyud grol ba yin na yang las 'bras bus ster ba la nus pa dang ldan par mthong ba yin la/ sred pa yang tshor ba yod pa yin pa na de'i tshe nyon mongs pa spangs pa la yang the tshom za bas ji ltar grol bar nges par bya/de lta bas na stong pa nyid med par dge slong nyid legs par gnas par snang bar 'gyur zhes pa'o/ /gang / sems ni dmigs par bcas rnams kyis/ /mya ngan 'das pa'ang dga' bas gnas/ /zhes pa de brjod pa'i phyir/ dmigs pa dang ni zhes pa la sogs pa gsungs te/dmigs pa dang bcas pa ni nye bar dmigs pa dang bcas pa'i sems kyis so/ /gnas pa ni zhen pa'o/ /'ga' zhig la ni mngon par zhen pa'i gnas 'phags pa'i bden pa la sogs pa de dang de la'am/ de bsgoms pa'i 'bras bu rnams la zhen pa srid pas yang skye ba ldog pa ni ma yin no//yang skye ba srid pa rnams la ji ltar mya ngan las 'das pa yang the tshom mi za bar 'gyur/ de'i phyir brjod pa'i stong pa nyid mya ngan las 'das pa'i rgyu yin par brjod pa'i phyir/ stong pa nyid dang bral ba'i zhes pa la sogs pa gsungs te/ stong pa nyid med par sems te rnam par shes pa dmigs pa dang bcas pa'o//'gags pa ni dmigs pa la zhen pa'i zhags pas bsdams par 'gyur ba'o/ /yang skye bar 'gyur te/ ting nge 'dzin gyi stobs kyis dus cung zad cig tu lon na yang slar skye ba dang ldan par 'gyur ro/ /yang gang du yang 'di lta bu mthong zhe na/ji ltar shes med pa'i zhes pa la sogs pa gsungs te/ dper na 'du shes med pa'i snyoms par 'jug pa la snyoms par zhugs pa na dus re zhig sems dang sems las byung ba log na yang slar yang skye bar 'gyur te/ de bzhin du gzhan du yang ngo shes pa'i don to//'di ni nye bar mtshon pa yin te/ dper na 'gog pa'i snyoms par 'jug pa bzhin no zhes kyang blta bar bya'o/ /yang na 'du shes med pa'i snyoms par 'jug pa la snyoms par zhugs nas 'du shes med pa'i lha rnams su skyes pa na bskal pa brgya phrag du mar ji srid 'gags par gyur na yang snyoms par 'jug pa'i rnam par smin pa yongs su rdzogs pa na sems dang sems las byung ba slar skye ba de bzhin no//gang gi phyir stong pa nyid med par dge slong nyid dang mya ngan las 'das pa mi 'thad de/ de la gnyi ga don du gnyer ba rnams kyis stong pa nyid bsgom par bya'o zhes des na stong pa nyid ces pa la sogs pa gsungs so//rgyu gang med pa na yang stong pa nyid dang 'brel pa'i sems skye bar 'gyur te/ rgyu des na yang mya ngan las 'das pa la sogs pa don du gnyer bas stong pa nyid bsgom par bya'o/ /de bsgom pa ni nyon mongs pa spangs pa dang /mya ngan las 'das pa yang thob par 'gyur gyi/ gcig tu bden pa la sogs pa bsgom pas ni ma yin no zhes pa'i don to/ /dmigs pa dang bcas pa'i phyir ro/ /gang shes rab kyi pha rol tu phyin pa rdo rje gcod pa las/ rab 'byor 'di ji snyam du sems/ rgyun du zhugs pa 'di snyam du bdag gis rgyun du zhugs pa'i 'bras bu thob bo snyam du sems snyam mam/rab 'byor gyis gsol pa/ bcom ldan 'das de ni ma lags so/ /de ci'i slad du zhe na/ bcom ldan 'das de ni ci la yang zhugs pa ma mchis pa'i slad du ste/ des na rgyun du zhugs pa zhes bgyi'o/ /gzugs la yang ma zhugs/sgra la ma lags/ dri la ma lags/ ro la ma lags/ reg bya la ma lags/ chos rnams la yang ma zhugs te/ des na rgyun du zhugs pa zhes bgyi'o/ /bcom ldan 'das gal te rgyun du zhugs pa de 'di snyam du bdag gis rgyun du zhugs pa'i 'bras bu thob po snyam du sems par gyur na de nyid de'i bdag nyid du 'dzin par 'gyur lags so//sems can du 'dzin pa dang / srog tu 'dzin pa dang / gang zag tu 'dzin par 'gyur lags so zhes bya ba nas/ bcom ldan 'das kyis bka' stsal pa/ rab 'byor 'di ji snyam du sems/ dgra bcom pa 'di snyam du bdag gis dgra bcom pa nyid thob po snyam du sems snyam mam/rab 'byor gyis gsol pa/ bcom ldan 'das de ni ma lags so/ /ci'i slad du zhe na/ gang dgra bcom pa zhes bgyi ba'i chos de gang yang ma mchis pa'i slad du'o/ /bcom ldan 'das gal te dgra bcom pa 'di snyam du bdag gis dgra bcom pa nyid thob bo snyam du sems par gyur na/de nyid de'i bdag tu 'dzin par 'gyur lags so/ /sems can du 'dzin pa dang / srog tu 'dzin pa dang / gang zag tu 'dzin par 'gyur ba lags so zhes par bsgre bar bya'o//bcom ldan 'das kyis bka' stsal pa/ rab 'byor de lta bas na byang chub sems dpa' sems dpa' chen pos 'di ltar mi gnas par sems bskyed par bya'o/ /ci la yang mi gnas par sems bskyed par bya'o/ /gzugs la yang mi gnas par sems bskyed par bya'o//sgra dang / dri dang / ro dang / reg bya dang / chos la yang mi gnas par sems bskyed par bya'o zhes gsungs pa yin no/ /de lta bas na stong pa nyid ni byang chub kyi lam yin no zhes gnas so/ /gang zhig mdo sde la 'jug tshig /ces pa la sogs pa'i tshigs su bcad pa gsum ni 'ga' zhig gis bsnan pa lta bur mtshon par bya ste/skabs su bab pa ma yin pa'i phyir lung la log par rtog par spyad pa'i skabs su yin no/ /bstan rtsa dge slong nyid yin no/ /zhes bya ba la sogs pa'i lung rnams la rtsod pa las skabs gzhan yin pa'i phyir snga ma nyid du brjod par rigs so//'dis brjod ma thag pa'i rtsod pa yang brjod pa'i skabs su ni gzhung rtsom pa po skabs su bab pa la mi mkhas par 'gyur te rkyen gang gis ni zhes bya ba la sogs pas sngar brjod pa'i tshigs su bcad pa gnyis kyis brjod pa'i phyir ro/ /'od srungs chen po zhes pa la sogs pa'i tshig ma 'brel pa'i phyir gzhung rtsom pa pos sbyar ba ma yin no zhes nges so//de lta bas na 'di bcug pa nyid yin no/ /de ltar gyur na yang ji ltar dmigs pa dang bcas pa'i sems la zhen pa srid pa'i phyir thar pa med par 'gyur na/ de bzhin du stong pa nyid la yang 'jigs pa skye bar 'gyur te//de lta bas na gnyi ga spangs te 'khor ba na gnas pa nyid mchog yin par rigs so zhes/ chags 'jigs las ni ma grol ba las zhes te chags pa ni zhen pa yin la/ 'jigs pa ni stong pa nyid kyi sgra thos pas skrag pa ste/ de'i don ma shes pa'i phyir ro//chags 'jigs zhes pa ni zlas dbye ba'i bsdu ba yin no/ /de'i phyir gnyi ga'i phyogs spangs nas 'khor ba ste khams gsum pa'i rang bzhin 'grub ste/ gnas pa'i gnas skabs skye bar 'gyur ro/ /ni'i sgras ni nyes pa spang ba'i don du ste/ 'di ni stong pa nyid khas len pa la nyes par 'gyur te/ skyon thun mong ma yin no zhes pa'i tha tshig go/ /ci'i phyir zhe na/ ma grol bas zhes gtan tshigs kyi don gyi gsum pa ste/ thar pa med pa'i phyir ro zhes pa'i don to/ /'di ji lta bu zhe na/ sdug bsngal can zhes te/ 'gro ba lnga'i 'khor ba rnams su skye ba la sogs pa'i sdug bsngal gyis gdungs par gyur pas gnas pa'o//ji ltar zhe na/ don du zhes te don gyi yul la'o/ /rmongs pas zhes te ma rig pas yin la/ dmigs pa'i zhen pas zhes pa'i don to/ /de'i phyir 'di ni stong pa nyid kyi 'bras bu yin te/gang gis slar yang mya ngan las 'das nas 'khor bar gnas par 'gyur ba'o/ /bsam pa ni 'di yin te/ ji ltar stong pa nyid med par dmigs pa can gyi lta bas grol bar mi 'gyur la/ de bzhin du yul la chags pa'i bde ba'i sems chos thams cad [(]kyi kyi [,]kyi [)]stong pa nyid kyis 'jigs shing skrag ste/sdar ba'i byis pa rnams 'khor ba nyid du gnas pa mchog go zhes sems pas zhi ba'i bde ba las phyir phyogs te/ skye ba la sogs pa'i sdug bsngal nyams su myong bas slar yang de nyid la gnas pa yin pas 'di ci zhig bsgrubs zhes so//gzhan dag gis ni/ chags dang 'jigs mtha' las grol bas/ /zhes pa'i tshig tu sems pas 'di ltar sems par byed de/ zhen pa'i rgyu yin pa'i phyir chags pa ni zhen pa'i gnas so/ /'jigs pa'i rgyu yin pa'i phyir 'jigs shing skrag pa'i gnas so/ / de dag nyid mtha' yin te chags pa dang 'jigs pa'i gnas yin la/ rtag pa dang chad pa'i mtha' zhes pa'i don to/ /'di ltar rtag pa'i lta ba las chags pa dang / chad pa'i lta ba skrag pa dag skye bar 'gyur ro/ /de dag las grol ba ni grol bas zhes snga ma bzhin du gsum pa'o//gang zhig don dam par dpyad pas rtag pa'i mtha' spangs shing / kun rdzob kyi bden pa khas blangs pas chad pa'i mtha' spangs pas sgro 'dogs pa dang skur pa 'debs pa'i mtha' spangs pa'i phyir dbu ma'i rtog pa 'di bstan par 'gyur ro/ / de ltar na ci zhig 'thob par 'gyur zhe na/ 'khor bar gnas pa grub pa ni/ /zhes gsungs te/ shes rab kyis 'khor ba'i nyes pas ma gos pa dang / snying rjes gzhan dbang du gyur pas 'khor ba yang grub par 'gyur te/ gnas pa ni yang dag par gnas pa'o/ /ci'i phyir zhe na/ sdug bsngal can gyi don du ste/sdug bsngal gyis sdug bsngal bar gyur pa'i sdug bsngal can 'khor ba pa'i don du de'i sdug bsngal las gdon par 'dod pas so/ /ci ste 'khor ba pa'i don dam par yod pa ma yin te/ de ji ltar gnas pa yin zhe na/ rmongs pas te phyin ci log gis yin la/ sems can kun rdzob la dmigs pas so/ /'di yang / sdug bsngal nye bar zhi don du/ /'bras bu rmongs pa bzlog mi bya/ /zhes 'dir phyir gsal bar byed par 'gyur ro/ /de lta bas na stong pa nyid kyi 'bras bu ni 'di yin te/ gang snying rjes 'khor bar gnas na yang stong pa nyid mthong bas 'khor ba'i nyes pas mi gos pa yin no//'di ni mi gnas pa'i mya ngan las 'das pa yin te stong pa nyid kyi 'bras bu yin la/ stong pa nyid med na 'di med pa'i phyir ro/ /de lta bas na 'khor ba ji srid du sems can gyi don gnas par 'dod pa rnams kyis stong pa nyid bsgom par bya'o//'di dag thams cad mjug bsdu ba'i sgo nas bshad pa'i phyir/ de ltar zhes pa la sogs pa gsungs te/ de ni 'di yin la/ ltar ni brjod pa'i rim pas yin te/ stong pa nyid la skrag pas 'khor ba na gnas pa'i mtshan nyid yin no zhes stong pa nyid phyogs la sun 'byin pa ni 'thad pa ma yin te/'chad par 'gyur bas lan 'debs pa'i phyir ro/ /'di ltar dang po'i phyogs la sbyar bar bya ste/ gang gi phyir de ltar yin pa des na ste the tshom mi za bar stong pa nyid bsgom par bya ba nyid yin la/ the tshom mi za ba ste the tshom dang bral ba dang /som nyi dang bral bas so/ /de ltar gnas pas bsgom par bya ba nyid de goms par bya ba nyid do/ /stong pa nyid ni chos thams cad rang bzhin med pa nyid de/ rang bzhin gyis mi dmigs pa'i sbyor bas so/ /'dis ni gang lam 'di med par/ /zhes pa'i mjug bsdu bar gyur pa yin no//yang stong pa nyid mthong bas ci zhig bya zhes smras pa de la stong pa nyid kyi khyad par brjod pa nyon mongs shes bya'i zhes pa yin te/ nyon mongs pa ni 'dod chags la sogs pa yin la/ shes bya ni rnam pa lnga yin te/ sgrib ces pa'i sgra ni gnyi ga dang 'brel to/ /nyon mongs pa rnams nyid sgrib pa yin la/shes bya la ni sgrib par byed pas sgrib pa rnams so zhes rnam par phye nas sbyar bar bya ste/ shes bya nyid la sgro btags pa'i rang bzhin yin pa'i phyir ro/ /sgrib pa de nyid ni mun pa ltar mun pa yin te/ dngos po'i de kho na nyid la sgrib par byed pa'i phyir ro//de'i gnyen po ni spong ba'i gnyen po yin no/ /nyid ces pa ni gang gi phyir te/ stong pa nyid yin pas de'i phyir myur zhing mgyogs par thams cad mkhyen pa ste sangs rgyas nyid la 'dod cing mngon par 'dod pa gang gis yin pa de la de skad ces brjod do/ / thams cad mkhyen pa la 'dod pas zhes thams cad mkhyen pa 'dod pa'o/ /de ji ltar sgom mi byed ces te/ stong pa nyid de ji ltar sgom par mi byed de goms par mi byed/ 'on kyang 'bad pa chen pos bsgom par bya ba nyid do/ /gang yang brjod pa/ skrag pas stong pa nyid la 'jug par mi 'gyur ro zhes pa de yang rigs pa ma yin par/dngos gang sdug bsngal skyed byed pa/ /zhes pa la sogs pa gsungs te/ phyogs gnyis pa la slar yang 'di ltar sbyar bar bya ste/ stong pa nyid la phan yon 'di yod pa yin te/ 'on kyang dang po nyid du de la skrag pas 'jug par mi 'gyur ro zhe na/dngos gang sdug bsngal zhes pa la sogs pa gsungs te/ dngos po gang sdug bsngal skyed par byed cing gdung bar byed pa'i dngos po de las 'jigs shing skrag pa skye ste 'byung bar 'gyur na yang / stong pa nyid ni slar yang sdug bsngal de zhi bar byed pa yin te 'khor ba po thams cad kyi sdug bsngal spong bar byed pa yin no//de las te stong pa nyid de la ji ltar zhes te mi 'jigs pa'i gnas las sdar bar gyur pa'i skye bo 'jigs pa ji ltar skye bar 'gyur te/ yon tan thams cad kyi 'byung gnas yin pa'i phyir de la dga' ba nyid du rigs so zhes bsams pa yin no//bdag tu 'dzin pa las byung zhing ngar 'dzin pa las skyes par gyur pa las ni 'jigs pa yin te/ de kho na nyid ma rig pa rnams la skye bar 'gyur ro/ /de yang bdag tu brtags pas sgro btags pa'i ngo bo zhes ngar 'dzin pa yang de la med pa'i phyir gnas ma yin no zhes bstan pa'i don du gal te bdag ces pa la sogs pa gsungs te/ci yang rung las 'jigs pa ni 'jigs pa'i gnas las te 'jigs par 'gyur mod/ nam gyi tshe zhe na/ gal te nga zhes pa cung zad nga'o snyam pa'i bdag ces pa'i yul du brjod pa/bdag ces pa bdag tu 'dzin pa'i shes pas rigs par bya ba 'ba' zhig ste cung zad cig yod par gyur na de'i tshe 'jigs par rigs pa nyid yin te/ gang gi tshe yang bdag nyid cung zad kyang dngos po yod pa dpyod par na bdag cung zad sgra dang rnam par rtog pa las gzhan pa gal te yod par gyur na/de'i tshe bdag gang zhes 'di med pa'i phyir 'jigs par 'gyur te/ skye bar 'gyur na 'di ltar dpyad pas 'jigs pa zhi bar 'gyur ro zhes bsams pa yin no/ /de skad du yang / bdag yod ma yin 'byung 'gyur min//bdag gi ba med yod mi 'gyur/ /'di ltar byis pa skrag 'gyur te/ /mkhas pa yi ni 'jigs pa zad/ /ces gsungs so/ /ji ltar yang bdag shes pa'i yul du gyur pas rtogs pa tsam gyis nye bar bstan pa'i phyir med pa de ltar bstan par bshad pas/ skra dang sen mo zhes pa la sogs pa gsungs te/so dang skra sen bdag min te/ /'di dag so so la bdag tu shes pa'i yul du 'gyur ba ma yin no/ /bdag ni rus pa khrag ma yin te/ rus pa dang khrag gnyis po 'di yang bdag ma yin no/ /snabs min bad kan bdag min te/ snabs dang bad kan bdag ma yin la/ /chu ser ni rma'i rlon pa yin te/ rnag ni rmar khrag yongs su smin pa'o/ /de dag kyang bdag ma yin no/ /bdag ni zhag dang rdul ma yin te/ zhes pa la/ zhag ni lus kyi snum yin la/ /rngul ni rab tu rngul ba'o/ /tshil ni khams bzhi pa yin te 'di dag kyang bdag ma yin no//nang khrol yang ni bdag min te/ /zhes pa la/ nang khrol dang ni grags pa nyid de/ de yang bdag ma yin no/ /zhag kyang bdag ma yin no/ /bdag ni phyi sa gcin ma yin te/ yongs su grags pa de nyid kyang bdag ma yin no/ /sha dang rgyus pa bdag yin te/ rtsa rgyus ni rgyus pa yin la/ dro ba ni lus kyi me'i khams yin te 'di yang bdag ma yin no//rlung yang bdag ma yin te/ rlung ni 'byung ba dang rngub pa'i dbugs kyi mtshan nyid yin la de yang bdag ma yin no/ /bu ga dgu yang bdag min te/ /bu ga dgu ni mig la sogs pa rnams yin la/ de dag kyang bdag ma yin no/ /rnam shes drug ni mig dang rna ba dang sna dang lce dang lus dang yid kyi rnam par shes pa rnams te/de rnams kyang rnam kun du ste/ rnam pa thams cad du bdag ma yin te so sor ram 'dus pa bdag ma yin no/ /so la sogs pa 'dus pa'i bdag nyid la bdag tu dmigs la/ de yang so sor bdag tu shes pas rig par 'gyur ba ma yin te/so sor bdag tu 'dzin pa'i shes pa'i yul du de rnams med pa'i phyir ro/ /gzhan dag la yang skra la sogs pa re re la yang bdag tu shes pas rig par bya ba ma yin la bsdus pa de nyid 'ba' zhig yin te sngar bzhin no/ /de rnams bsdus pa la yang gcig srid pa ma yin te/de 'gegs par 'gyur ba'i phyir ro/ /du ma bsdu ba yang shes pa gcig gi yul du rigs pa ma yin la/ du ma rnams la yang gcig tu 'dzin pa'i shes pa ma 'khrul par yang rigs pa ma yin no/ /'khrul pa la de kho na nyid kyi rnam par gzhag pa yang rigs pa ma yin no//de lta bas na bdag go zhes pa 'di ni brtags pa tsam nyid de/ stong zhing dngos po med pa yin no zhes nges so/ /'di yang bslab pa kun las btus par mi sdug pa bsgom pa'i skabs su bshad pa yin te/ 'di lta ste lus 'di la skra dang / spu dang / sen mo dang / so dang / rdul dang / dri ma dang / pags pa dang / sha dang / rus pa dang / rgyus pa dang / rtsa dang / mkhal ma dang / snying dang / mchin pa dang / glo ba dang / rgyu ma dang / gnye ma dang / pho ba dang / sul mangs dang / long ka dang / mcher ba dang / phyis dang / mchi ma dang /mig rdul dang / snabs dang / ngar snabs dang / zhag dang / chu ser dang / rkang dang / tshil dang / mkhris pa dang / bad kan dang / rnag dang / khrag dang / glad pa dang / glad rgyas dang / gcin dag yod de/ dngos po de dag la byang chub sems dpa' yongs su rtog pa'i rang bzhin can yin te zhes gsungs pa'o//de yang lus rjes su dran pa'i mthar phyis ston par 'gyur ro/ /de ltar na ngar 'dzin pa la ni yul med pa nyid do/ /gal te de ltar na yang sgra la sogs pa rnams ngar 'dzin pa'i rig par bya ba gal te yin par 'gyur ba de ltar na yang 'di ni yul med par mi 'gyur te/ gang gi phyir nang gi byed pa dang ldan pa'i skyes bu ngar 'dzin pa'i spyod yul nyid du kho bo cag gis 'dod do zhes rigs pa can la sogs pa rnams brjod do//de yang mi 'thad de/ gang gi phyir bdag ni dkar sham dang skem pa dang / rid pa dang 'gro ba'o zhes pa la sogs pa'i rnam par dpyod pa'i bdag nyid du shes pa 'di la snang ba yin te/pha rol po rnams kyis 'di dag la bdag tu 'dod pa ma yin la rnam pa gzhan pa'i shes pas gzhan 'dzin pa ni mi rigs te/ ha cang thal bar 'gyur ba'i phyir ro/ /'di ltar yang de dang ldan pa 'di ni 'di'o zhes mtshan nyid yin par gzhan rnams kyis brjod pa yin te/de la rigs pa can gyis rtag pa dang / thams cad la khyab pa dang / srog chags so so la tha dad pa dang / sems pa med pa dang / sems pa dang 'brel pas sems pa can dang / bde ba la sogs pa yon tan rgyu'i rten dang / dge ba dang mi dge ba'i las kyi byed pa po dang / de'i 'bras bu longs spyod pa po dang /'jig rten pha rol du 'gro ba zhes pa la gtugs par bdag 'dod de/ rigs pa can bzhin du bye brag pa yang 'dod pa yin la/ gzhan dag 'di ltar bdag 'dod de/ /'dod pa la sogs pa yi rten/ /rang nyid sems pa med pa dang / /de bzhin rtag dang kun du son//dge dang mi dge'i las byed dang / /de'i 'bras la ni longs spyod dang / /sems dang 'brel pas sems ldan te/ /rang gi ngo bos ma yin no/ /zhes brjod do/ /yang rgyal dpog pas ni ldog pa dang rjes su 'gro ba'i bdag nyid dang / blo'i gzugs su yongs su 'gyur ba dang /sems pa dang ldan pa'i ngo bor bdag nyid 'dod do/ /sems pa dang ldan pa de yang blo'i rang bzhin yin la/ de yang 'jug pa dang ldog pa dag ni ma yin la/ de gnyis ka'i rjes su 'gro ba'i rang bzhin yin pa'i phyir ro/ /'di ltar 'khyil ba'i sbrul log ste drang po'i gnas skabs su gyur pa na sbrul nyid ni gnyi ga la yang rjes su 'jug pa yin no//ji skad du/ gzhan gyis bdag gi mtshan nyid dang / /ldog dang rjes 'gro'i bdag nyid dang / /sems ldan blo yi mtshan nyid de/ /sems dang ldan pa'i ngo bor 'dod/ /dper na sbrul ni 'khyil pa'i skabs//dor nas de'i rjes drang po yi/ /gnas skabs su ni 'gyur srid do/ /sbrul nyid ldog par mi 'gyur ro/ /de bzhin bdag gi rang bzhin yang / /rtag pa dang ni sems ldan dang / /gzugs ni ma lus dang 'brel dang / /kun gyi rjes su 'gro ba'ang yin/ /zhes brjod de 'di ni khyad par ro//gzhan thams cad ni snga ma dang 'dra'o/ /rgyal ba pas rgyal dpog pa'i bzhin du sems dang bcas pa'i bdag tu 'dod de/ rdzas dang rnam grangs kyi ngo bo ji ltar rigs par rjes su 'gro ba dang / ldog pa'i bdag nyid yin te/ de ltar yang / rgyal dpog pa bzhin rgyal ba pas//sems kyi mtshan nyid rgyu dang ni/ /rdzas dang rnam grangs ngo bo yis/ /ldog dang rjes 'gro'i bdag nyid can/ /zhes brjod do/ /ser skya pas ni rtag pa dang khyab pa dang yon tan dang bral ba dang / rang nyid sems pa can du bdag 'dod de blo dang 'brel pas ni ma yin la/ blo ni rang nyid rig pa med pa'i phyir ro//rang gi ngo bo ni sems pa dang ldan pa'i ngo bo yin no zhes brjod pa'i phyir ro/ /'bras bu'am 'ga'i yang rang nyid byed pa po ma yin zhing / de'i 'bras bu longs spyod pa po yang ma yin te/ bya ba dang bral ba'i phyir ro/ /rang bzhin nyid byed pa po yin te/bdag de la 'bras bu stobs par byed pa yin no/ /yang phyin ci log gi dbang gis 'di nyid la der sgro 'dogs pa yin no/ /'di ltar yang gang gi tshe skyes bu'i sgra la sogs pa ni yul la longs spyod pa'i rnam par 'dod pa skye bar 'gyur te/ de'i tshe rang bzhin gyis skyes bu'i 'dod pa yongs su shes nas skyes bu dang sbyor bar byed do//de nas sgra la sogs pa 'byin par byed do/ /yid kyis byin gyis brlabs pa'i nyan pa la sogs pa'i 'jug pa rnams kyis yongs su gzung ba'i sgra la sogs pa'i yul rnams la blo zhen par byed do//de nas blo zhen pa'i don la skyes bus sems par byed do/ /de bzhin du sems dang ldan pa'i ngo bo yin pa'i phyir yon tan dang bral ba yin la khyab pa'i phyir bya ba med pa yin te/ grangs can gyi skyes bu'i khyad par yin no/ /de skad du yang / gzhan dag blo yi rang bzhin las//sems pa can ni tha dad 'dod/ /bdag gi gnyug ma'i gzugs nyid ni/ /sems pa can du de rnams rtog /gtso bo yis ni gtad pa yi/ /'bras la longs spyod 'ba' zhig yin/ /byed pa po nyid de la med/ /rang bzhin nyid la de 'dod do/ /zhes so/ /yon tan 'di rnams rang bzhin 'jug pa las//sems pa can la mun bsgribs phyin ci log /rtsa rtse 'gugs pa tsam la dbang med kyang / /bdag gis byas zhes mi shes na yang sems/ /zhes brjod do/ /rig byed kyi mtha' gsang bar smra bas kyang srog chags ma lus pa'i rgyud la yod pa dang gcig pu nyid dang /khyab pa dang rtag pa'i shes par 'dod do/ /de rnam par gyur pa nyid kyi sa dang chu dang me dang rlung la sogs pa ma lus par 'gro ba 'di snang ba yin la/ de'i rang bzhin nyid kyang bdag nyid yin te/ phyi rol ni ma yin la/ cha shas can dang rdul phra rab la sogs pa cung zad ni gzung bar bya ba ma yin la/rtag dang shes pa'i rnam 'gyur 'di/ /sa dang me dang chu sogs ni/ /bdag yin de yi bdag nyid ces/ /gzhan gyis yang dag brjod pa yin/ /gzung ba'i mtshan nyid dang ldan pa/ /'dod na cung zad yod ma yin/ /'di ni rnam shes yongs gyur te/ / des na thams cad yang dag mthong / /zhes brjod pa yin no/ /yang gang zag tu smra ba nang gi mu stegs can rnams kyis phung po rnams las de nyid dang gzhan du brjod du med pa'i gang zag pa'i bdag 'dod de/ gzhan du na mu stegs can gyi grub mtha' la mngon par zhen pa'i lta bar 'gyur ro//'dir yang / bder gshegs pa 'ga' kha cig ni/ /gzhan yang bdag tu rab rjod byed/ /ces brjod pa yin no/ /de'i phyir ji ltar na bdag ngar 'dzin pa'i shes pa'i yul du 'gyur te/ rang rang gi ngo bos de la mi snang ba'i phyir la de ji ltar na ngar 'dzin pa'i shes pa'i yul du bdag snang bar 'gyur/de lta bas na 'di ni snang bar rtog pa tsam ste yul med par skye ba yin no zhes gnas pa yin no/ /de ni sems kyis rang bzhin gyi bdag tu smra ba grangs can la sogs pa rnams rnam par shes pa drug po rnams la bdag 'gegs pa ma bzod nas brjod pa/ sgra la sogs pa'i shes pa sems kyis bdag nyid la bdag nyid du kho bo cag gis brjod de/de ji ltar na 'di'i 'dod pas 'gegs zhes rjod par byed ce na/ de ltar gzhan gyi bsam pa blangs nas grub pa'i mtha' smra bas thal bar 'gyur bar brjod pa'i phyir gal te sgra'i shes zhes pa la sogs pa gsungs te/gal te sgra'i shes pa'i bdag nyid yin no/ /de rtag pa yin pa'i phyir sgra'i shes pa rtag par 'gyur la/ de tshe sgra de yod pa dang med pa'i dus na yang rtag tu 'dzin par 'gyur te/ sgra 'dzin pa'i rang bzhin de yod pa dang med pa'i dus na rtag tu 'jug pa'i phyir ro/ /gzhan du na de rtag pa nyid nyams par 'gyur ro//'di ltar 'gyur ba nyid do zhe na/ shes bya med na zhes pa la sogs pa gsungs te/ shes bya nyid ni bdag tu nye bar gnas pa yin/ sgra ni res 'ga' ba yin pa'i phyir rnam pa thams cad du mngon pas bsal ba ma yin no/ /de'i phyir de med pa'i dus na shes bya med pa ste yul med pa na shes pa des ci zhig rig par bya ste ci zhig shes par bya/gang gi sgras ni med pa'i dus la 'dri ba'i khyad par la 'jug go/ /gang shes par bya bas stong na yang shes par ji ltar brjod de/ mngon par rjod par byed/ shes bya shes pas ni shes par brjod la de med na ji ltar shes pa yin zhes dgongs so//de nyid gal te shes med ces pa la sogs pa gsungs te/ gang yul mi shes pa de lta na yang gal te shes par brjod na de'i tshe shes pa med pa'i rang bzhin gyi shing yang shes par thal bar 'gyur ro//gang gis na mi shes par 'gyur ba des nyes pa byas pa ni cung zad kyang yod pa ma yin no/ /de lta bas na/ dper na yul yongs su shes pa med cing shes par mi 'gyur ba de bzhin du gzhan yang mi 'gyur ro zhe na/ des na zhes pa la sogs pa gsungs te/gang gis yul med par shes par ma gyur pa'i rgyu des na'o/ /shes bya nye bar gnas pa med pa ste/ nye ba ma yin pa ni rung ba'i yul na mi gnas pa shes par bya ba ni gzung ba'i yul gang gi yin pa de la de skad ces brjod par bya ste/ shes pa med de yod pa ma yin no/ /nges pa ni gcig tu 'di la ltos pa'i phyir ro//de ltar gyur pa yang sgra rtag pa yod pa ma yin pa'i phyir sgra'i shes pa yul mi nye ba ma yin te/ brgya la mi 'dzin pa ni gsal ba res 'ga' yin pa'i phyir thal bar 'gyur ba brjod pa'i nyes pa yod pa ma yin no zhe na/ 'di yod pa ma yin te/ gang gi phyir shes pa gang gis yongs su gcad par bya ba'i ngo bo gsal ba zhes brjod la der rtag tu nye ba ma yin pa'i yul yin pas 'dzin par byed pa shes pa ma yin par brjod par bya'o//sgra ni rtag tu yod pa dang med par brjod par 'dod pa ma yin te/ shes pa ni brgya la 'dzin par byed pa ma yin par zhes pa 'di nyid kyis bsgrub bya 'grub bo//de lta bas na shes par bya ba mi nye ba 'dis shes pa 'dzin par byed pa ma yin par sgrub po/ /gang gi ngo bos shes pa'i gzung bar bya ba'i yul de rtag tu nye ba ma yin pas na thal bar 'gyur ba brjod pa'i nyes pa ji ltar mi 'gyur/ sgra ji ltar rtag tu yod pa ma yin par gzhung mangs pa'i 'jigs pas ma brjod do//gzhan yang gal te sgra shes pa nyid bdag yin na de'i tshe 'dzin pa'i bdag nyid yin pa'i phyir de gzugs la 'dzin par mi 'gyur ro/ /de ni yod pa ma yin te/ gang gi phyir de nyid gzugs 'dzin par 'dod do zhe na/ 'di la de nyid kyis zhes pa la sogs pa gsungs te/de nyid ni sgra'i shes pa nyid yin te/ gal te gzugs shes par 'dod na de'i tshe thos pa yang ci ste min/ de'i tshe ste gzugs 'dzin pa'i dus na ci ste thos pa ma yin/ sgra yang ci'i phyir na mi 'dzin te/ sgra'i shes pa yin pa'i phyir ro/ /'on te sgra mi nye ba de'i phyir na de'i shes pa ste sgra de'i shes pa yang med cing yod pa ma yin te/'di ltar sgra'i shes pa nyid du de mi 'gyur ro zhes pa'i don to/ /gzhan yang gal te sgra'i shes pa yin na de'i tshe gzugs 'dzin pa'i bdag nyid mi 'thad do zhes bstan pa'i phyir sgra 'dzin zhes pa la sogs pa gsungs te/ sgra 'dzin rang bzhin ni sgra 'dzin pa'i rang gi ngo bo yin te/sgra'i 'dzin pa po zhes pa'i tha tshig go/ /gang zhig shes pa de sgra 'dzin pa gzugs 'dzin pa'i bdag nyid du ji ltar 'gyur te/ cung zad kyang ma yin te/ cha shas med pa gcig la gzugs gnyis mi rigs pa'i phyir ro/ /ci ste dper na gcig 'ga' zhig la ltos nas pha yin la/'ga' zhig la ltos te/ de nyid du bu yin par 'gyur la/ de bzhin du skabs su bab pa la yang gzugs gnyis po dag gcig tu 'gyur ro zhe na/ gcig ni pha dang zhes pa la sogs pa gsungs te/ gcig kho na pha yin te skyed pa po yin la bu yang bskyed par bya ba yin te/ de nyid 'di yin zhes pa ni brtags pa yin no//de yang de la ltos pa ni brtags par rnam par gzhag par bya ste/ yang dag nyid min de don dam pa ma yin la/ gcig gi rang bzhin nyid gnyi ga'i rang bzhin du rtogs pa'i sgro btags pa yin te gzugs tha dad pas yang gcig nyid de bzhin du sgra sna tshogs par sgra sna tshogs kyis brjod par bya ba min no//dngos po pa'i rang bzhin gnyis gcig tu sbyar bar bya ba yin la/ de yang nam yang rigs pa ma yin no/ /rang bzhin gnyis tha dad pa yin pas dngos po yang gnyis su thal bar 'gyur ro/ /de lta bas na ji ltar dngos po gcig gnyis yin pa la dpe'i chos can yod pa ma yin no//gang yang brtags pas yod pa de ni skabs su bab pa la mkho ba ma yin te/ 'di ni cung zad kyang ma yin no/ /'di'i phyir yang 'di don dam par ma yin no zhes bstan pa'i phyir/ 'di ltar snying stobs zhes pa la sogs pa gsungs te/ 'di yang khyod kyis khas blang bar bya ste/grangs can gyi gzhung lugs kyis 'gro ba yon tan gsum gyi bdag nyid yin la/ de'i phyir snying stobs dang rdul dang mun pa yang zhes tshig phrad bsdus pa ni sdud pa'i don to/ /'di ltar zhes te gang gi phyir yon tan 'di rnams rang gi ngo bos gnas pa yin te/so sor ram bsdus nas so/ /de lta bas na don dam par pha yang ma yin la/ bu yang ma yin te/ thams cad du yon tan gcig kho nar yod pa yin no/ /don ni 'di yin te/ bu'i gnas skabs na gang zhig snying stobs dang rdul dang mun pa'i mtshan nyid kyis yon tan de nyid skyed par byed pa'i dngos por yang 'gyur te/des na snga ma dang phyi ma'i dus dag tu khyad par med pa'i dngos po yin no/ /de lta bas na de la ltos nas pha dang bu ru brjod par bya ste/ de la khyad par ni yod pa ma yin no/ /de lta bas na 'di ni rtag pa nyid kyi tha snyad yin no/ /gal te yang gzugs 'dzin pa'i dus na yang sgra 'dzin pa'i shes pa de gcig nyid yin na de'i tshe de'i rang bzhin dmigs par 'gyur na dmigs pa yang ma yin no//de lta bas na de 'dzin pa'i bdag nyid ma yin no zhes bstan pa'i phyir/ de ni sgra 'dzin zhes pa la sogs pa gsungs te/ sgra 'dzin dang ldan pa ni 'brel ba yin la ni'i sgras ni khyad par brjod pa yin no//rang bzhin de ni gzugs 'dzin pa po yin te/ shes pa de mthong ba ma yin te/ rtogs pa ma yin no/ /de'i phyir de'i tshe sgra 'dzin pa'i bdag nyid de yod pa ma yin no zhes nges par bya'o/ /de ltar gyur na yang gal te rtogs par ma gyur pa de lta na yang de nyid de yin no zhe na/ de ltar na ji ltar gzugs 'dzin par 'gyur zhe na/ de nyid ces pa la sogs pa smos te/ de nyid sgra shes pa yin la gzhan gyi gzugs kyi rang bzhin gzugs 'dzin pa'i bdag nyid kyi gzugs 'dzin pa yin no zhes pa ni lhag ma'o/ /de ji lta bur chos mthun pas chos mthun pa yin zhe na/ gar mkhan lta bu zhes te/ ji ltar gzhan gar gyi dus na gar gyi sa gzhir song ste/ gar mkhan gcig pu nyid sna tshogs pa'i gzugs kyis 'jug pa de bzhin du skabs su bab pa la yang nyes pa med do zhe na/ 'di la brjod pa/ de yang rtag pa min te zhes te/ mi rtag pa yin la snga ma'i rang bzhin yongs su dor nas ngo bo gzhan thob pa yin no//snga ma dang phyi ma dag rang bzhin gcig pa nyid ma yin te/ gar mkhan sna tshogs pa'i gzugs yin pa'i phyir ro/ /gzhan du na de'i gzugs gnyis po yang gcig tu sems la snang bar 'gyur ro/ /de'i phyir bsgrub bya med pa'i dpe ltar snang ba yin no//'on te de lta na yang dngos po de de nyid kyi rang bzhin slar yang gzhan dang gzhan du skye zhing 'gag pa des na nyes pa 'di med do zhe na/ 'di la gal te tshul gzhan zhes pa la sogs pa gsungs te/ de nyid ni bdag gam gar mkhan no/ /tshul gzhan ni rang bzhin gzhan yin par gal te brjod na'o//de'i tshe gcig pu 'di nyid sngon med pa ste/ 'di ni sngar ma byung ba sngar ma mthong ba 'di lta bu'i gcig pa yin no/ /de'i dngos po gzhan skyes pa na yang gcig pa nyid yin zhing tha mi dad pa'i bdag nyid yin na 'di ltar de nyid 'di yin no zhes pa dang / yang gzhan gyi ngo bo yin no zhes de nyid gzhan nyid yin par brjod na phan tshun 'gal ba'i chos gnyis po 'di gcig rigs pa ma yin no/ /gang gis de skye ba dang 'gag par 'gyur ba na yang dngos po la de dag mi 'gyur ba dngos po zhes bya ba rang bzhin ngo bo las gzhan ma yin no/ /de tha mi dad pa'i rang bzhin skye ba dang 'gag pa dag gi dngos po de'i gnas skabs su rigs pa yang ma yin te/tha dad pa ma yin pa med par thal bar 'gyur ba'i phyir ro/ /tha dad pa la 'brel pa grub pa ma yin no zhes bsams pa yin no/ /de ltar gyur na yang gal te bdag 'di rang bzhin gnyis su bden pa yin na thal ba 'dir 'gyur ba ste/'on kyang 'di'i rang bzhin gnyug ma bor nas gzhan gyi ngo bo de kho na nyid ma yin pa yin pa'i phyir/ des na thal bar 'gyur ba brjod pa yod pa ma yin no zhes pa'i dogs pas/ gal te tshul zhes pa la sogs pa gsungs te/ gzhan gyi gzugs de'i yul gyi khyad par can shel gyi rdo bzhin du 'di gcig pa yin no zhes gal te zer na/de ltar na de'i rang bzhin smos zhes te/ rang bzhin gnyug ma'o/ /de'i bdag gi ngo bo'i de kho na nyid brjod cing smra bar gyis shig /de'i gzugs gzhan yod pa nyid yin te/ de gang zhe na/ shes pa nyid ce na zhes te/shes pa'i bdag nyid de dus snga ma dang phyi ma la rjes su 'gro ba can ni de'i gnyug ma'i rang bzhin can te/ gzhan ni ci zhig brjod par bya/ de'i gzugs kyi snga ma dang phyi ma dag tu gzugs gzhan dang 'brel pa na yang shel bzhin du 'di gcig pa yin no zhes gal te zer na'o//de ltar na skyes bu kun gcig tu thal bar 'gyur te/ de ltar na de shes pa nyid du thun mong ba'i chos yin pas so/ /dper na snga ma dang phyi ma'i dus kyi sgra dang gzugs kyi shes pa dag de'i rnam pa tha dad pas tha dad pa yin na yang gcig yin pa de ltar na sems can kun te/ srog chags kyi rgyud du gtogs pa rnams bdag gcig tu thal bar 'gyur ba thob par 'gyur la/dngos po tha dad na yang khyad par med pa'i phyir ro/ /de ltar na yang thal ba 'dir 'gyur ba yin te zhes bstan pa'i phyir/ sems dang zhes bya ba la sogs pa gsungs te/ gal te bar skabs kyi tha dad pa'i rgyu mtshan gyi khyad par spangs nas rnam pa cung zhig la brten nas gcig tu brjod nas/de'i tshe sems dang ldan pa skyes bu'i chos dang sems med pa'i rang bzhin gyi chos so/ /kyang gi sgras ni nyes pa gzhan sdud pa yin te/ de rnams kyang gcig cing tha dad pa med pa'i dngos por 'gyur ro/ /ji ltar zhe na/sems dang ldan pa dang / mi ldan pa de dag gang gi phyir te rgyu mtshan gang gis yod pa ste/ bdog pa de yang dngos po rnams kyi gnyug ma'i gzugs su mtshungs pa ste gnyis po dang 'dra ba yin no/ /ci ste 'di la yang dngos po tha dad na yang 'dra ba'i rgyu mtshan gyis gcig pa nyid yin te de lta bas na gang 'dod pa'i dngos po bsgrubs pas nyes pa med do zhe na/gang tshe bye brag ces pa la sogs pa smos te/ nyes pa gzhan bsal bar byed pas 'ang gi sgra yin no/ /bye brag ni tha dad pa'i dngos po thams cad nges pa med pas gang gi tshe log pa yin zhing mi bden pa gnyug ma'i gzugs yin pa de'i tshe 'dra ba'i rten gang yin te/gang la brten nas 'dra bar rnam par gzhag par byed/ khyad par yod na yang chos mthun pa cung zad tsam gyis 'dra bar 'gyur ro/ /khyad par med na yang de nyid du 'gyur la/ 'dra ba ni ma yin te/ ba lang dang ba men dag la khyad par nyams su myong ba med na ba men ba lang dang 'dra bar mi 'gyur te/'on kyang ba lang nyid du 'gyur ro/ /de'i phyir bye brag nyid 'dra ba'i rten yin la de yang gang gi tshe don dam par mi 'gyur na/ de'i tshe gang 'dra bar 'gyur te/ mtshungs pa'i rnam pa nyid skyes bu'ang gzhan dag la brten pa'i rgyu mtshan du gyur pa cung zad kyang yod pa ma yin no zhes pa'i don to//de'i phyir dngos po la gcig nyid du 'gyur ba yin te/ khyed kyi 'dra bas byas pa ni ma yin la/ de ji ltar na grub pa la sgrub pa'i phyir nyes pa med do zhes rjod par byed/ de bzhin du ser skya pa dang / rgyal dpog pas yongs su brtags pa'i sems kyi rang bzhin gyi bdag yod par ma grub po//rig byed kyi mtha' gsang bar smra bas brtags pa la yang ji ltar srid pas sun dbyung ba brjod par bya'o/ /da ni rigs pa can la sogs pas brtags pa'i sems med pa'i bdag gi yod pa'i tha snyad dgag pa'i ched du sems med pa yang zhes pa la sogs pa gsungs te/sems dang ldan pa'i bdag re zhig brjod pa'i rigs pa mi 'thad la/ sems med kyang bdag ma yin par bstan pa'i ched du min te zhes te/ mi rigs so zhes pa ni 'ang gi sgra'i don te/ ci'i phyir zhe na/ sems med phyir te/ sems dang mi ldan pa'i phyir ro/ / sems med pa gang gi yin pa de ni sems med pa'o/ /de lta bas na sems med pa de'i phyir zhes pa'i don to/ /ji lta bu zhe na/ snam sogs bzhin zhes te/ ji ltar snam bu dang / shing dang ri la sogs pa rnams sems dang bral ba'i phyir bdag ma yin pa de bzhin du mngon par 'dod pa yang ste las dang byed pa po la sogs pa rnams su khas blangs pa'i phyir ro//gzhan du na des cung zad kyang dgos pa yod pa ma yin no/ /sems med pa yang der rigs pa ma yin to/ dper na snam bu la sogs pa yin no/ /gal te yang 'di'i rang nyid sems dang ldan pa ma yin pa de ltar na yang blo'i sems kyis sems dang ldan par byed de/des na nyes pa 'di med ces gzhan gyi bsam pas srid pas 'on te sems dang ldan pa'i phyir/ shes na zhes smos te/ 'on te zhes pa ni 'dri ba'o/ /'on te bdag 'di sems dang ldan pa'i phyir te/ blo dang 'dul ba las rang nyid sems dang mi ldan pa na yang shes par 'gyur na'o//shes par byed pas na shes pa yin no/ /de ltar khas len pa na mi shes 'jigs par thal te/ gang gi tshe 'di ltar ra ro ba dang brgyal ba la sogs pa'i gnas skabs na sems dang ldan pa log pa na bdag nyid mi shes pa ste/ cung zhig kyang mi shes pa de'i tshe 'jigs par 'gyur te/sngar sems dang ldan pa dang 'brel pa'i rang bzhin yongs su gtong bas yongs su 'jigs par thal bar 'gyur ro/ /ci ste sems dang 'brel pa dang ma 'brel pa'i dus na rang bzhin gcig nyid yin pas nyes pa med do zhes pha rol po'i dgos pas ci ste bdag la zhes pa la sogs pa smos te/ci ste sems dang ldan pa skye ba dang 'gag pa dag 'gyur ba med pa nyid yin te/ ma skyes pa dang ma 'gags pa'i rang bzhin nyid bdag yin no zhes so/ /gal te de ltar na sems pas de la ci zhig bya ste/ sems pa dang bral ba dus thams cad du 'gyur ba med par gnas na/bdag 'di sems dang ldan pa'i blo dang 'du bas ci zhig byas la/ khyad par lhag pa ci zhig bsgrubs te cung zad kyang ma yin no/ /blo dang 'du ba yin na yang sngar gyi rang bzhin de lta bu nyid ma nyams pa'i gnas skabs nyid yin pas bdag ni sems dang bcas pa nyid yin no//de ltar gnas na yang khyod kyis ci zhig bsgrub pa yin zhes/ de ltar sems med ces pa la sogs pa gsungs te/ mi shes pa ni phan pa dang mi phan pa cung zad kyang shes par mi bya ba yin la/ bya ba dang bral ba ni bya ba las phyi rol du gyur pa yin te/ bya ba med pa'o/ /de ni phyir bcos pa thams cad dang bral zhing /bya rgyu thams cad la khyad par mi byed pa'o/ /yang na lus thams cad la nus pa dang bral ba'am 'gro ba la sogs pa'i bya bas stong pa yin te/ nam mkha' skabs su bab pa la nye bar mkho ba ma yin pa'i phyir na nam mkha' dang 'dra ba yin te/ 'di ltar yin pa na bdag ni bdag nyid kyi rang bzhin te/rnam par gzhag cing rnam par gzhag pa yin no/ /'di yang rang gi 'dod pa la mjug sdud pa yin te/ ji ltar rang bzhin med pa nyid kyis bya ba thams cad kyis stong pa la brtags pa tsam gyis nam mkha' bzhin du bdag kyang yin no zhes pa'i don nam/gzhan gyi 'dod pa yin te/ ji ltar las dang byed pa la sogs pa la yin pa'i ngo bo ni nam mkha' yin te/ sems pa med pa'i phyir dang / bya ba med pa'i phyir ro/ /da ni yang gzhan du bdag 'gegs par byed pa'i gnod pa bstan par 'dod nas gzhan gyi gzhung lugs dgod pa ni/ gal te bdag ni yod min na//zhes bya ba la sogs pa gsungs te/ gal te 'jig rten pha rol po 'ga' yang med par 'gyur na/ de'i tshe bdag 'jig rten pha rol du 'gro ba yod pa ma yin zhing med na las 'bras 'brel par mi rigs te/ las ni dge ba dang mi dge ba yin la/ 'bras bu ni de nyid 'dod pa dang mi 'dod pa yin no//de dang 'brel pa'am las byas pa 'bras bu dang 'brel pa yin no/ /gang nyid kyis las byas pa de nyid kyis de'i 'bras bu thob pa yin te/ gzhan gyis ni ma yin la/ de cis 'thad pa yin te/ mi rigs shing 'thad pa ma yin no/ /'jig rten pha rol du las dang 'bras bu 'brel pa ni 'dod pa yang yin no//'di la yang bde bar gshegs pa pa rnams dang yang rtsod pa med do/ /de ltar yang mdo las/ 'di nyid kyis byas pa'i las ji ltar gzhan gyis myong bar 'gyur/ dge slong dag byas shing bsags pa'i las ni sa'i khams la smin par 'gyur ba ma yin/ chu'i khams la ma yin/ me'i khams la ma yin/ rlung gi khams la ma yin/ zin pa'i phung po dang khams dang skye mched 'di nyid la smin pa yin no zhes rgyas par gsungs pa yin no/ /yang gsungs pa/ las rnams bskal pa brgyar yang ni/ /chud mi za zhing tshogs dang dus/ /rnyed nas lus can rnams la ni/ /'bras bu dag tu nges par 'gyur/ / zhes so/ /de lta bas na las dang 'bras bu 'brel pa khyed kyis kyang spang ba ma yin la/ de lta bas na nges par bdag khas blang bar bya ste/ gzhan du na 'di thams cad mi rigs par 'gyur te/ bdag med na las dang 'bras bu 'brel par ji ltar 'thad par 'gyur zhes/ las byas nas ni zhes pa la sogs pa smos so//ni'i sgras ni gang gi phyir te/ dge ba dang mi dge ba'i mtshan nyid kyi las byas te/ las bskyed nas zhig pa na zhes te/ zhig cing las byed pa 'gags pa na 'bras bu ga la 'gyur te/ bdag med pa na 'jig rten pha rol du 'gro ba su yang med pa'i phyir ro/ /gang gi sems kyi skad cig mas byas pa'i las de skad cig ma yin pas de las byas pa'i dus nyid na 'gags pa'i phyir las byas pa'i 'bras bu bde 'gro'am/ngan 'gro la bde ba dang sdug bsngal 'jig rten pa gang gi yin par 'gyur zhing skye bar te/ gang gi yang ma yin no/ /'jig rten pha rol du yang las byas pa nyid kyi 'bras bu dang ldan pa gzhan 'ga' zhig skyes pa'i phyir ro//de ltar na byas pa chud za zhing / ma byas pa dang phrad par 'gyur ro/ /'di ni mtshon pa tsam yin te/ dran pa dang ngo shes kyi shes pa dang / the tshom dang / nges pa dang / rang gi bcol ba len pa dang / mthong ba'i don la ngo mtshar dang bral ba dang / rgyu dang 'bras bu nyid dang de rtogs pa'i tshad ma dang / bcings pa dang / thar pa la sogs pa dag tu yang mi 'gyur ro zhe na ste gal te de ltar 'dod na/ de rigs pa ma yin no zhes bya ba/ 'bras bzhi zhes pa la sogs pa gsungs te/ khyod dang kho bo cag gnyis la ste/bdag tu smra ba khyed dang / bdag med par smra ba nged cag la grub cing nges pa yin no/ /ci zhig grub ce na/ bya ba 'bras bu bzhi tha dad par gsungs te/ las ni bya ba yin te/ 'jig rten 'di la'o/ /'jig rten pha rol du de'i 'bras bu'o/ /gzhi tha dad pa de dag la ste/ rten sna tshogs de dag la grub po//'di ltar yang lus ngag gis skye ba de nyid la las byed pa ni ma yin te/ de nyid kyis 'jig rten pha rol du 'bras bu la longs spyod pa yin no/ /de'i phyir las byed pa gzhan nyid yin la/ longs spyod pa po yang gzhan yin no/ /de lta bas na gzhi tha dad pa la bya ba dang 'bras bu dag tu 'gyur la 'di la yang 'u bu cag la rtsod pa yod pa ma yin no//de ltar gyur na yang bdag de'i bya ba med par de nyid byed pa po nyid dang / longs spyod pa po nyid dag tu mi 'gyur ro zhe na/ 'di la brjod pa der bdag byed pa med ces pa la sogs pa gsungs te/ byed pa med pa ni byed pa dang bral ba yin la/de la zhes pa ni las byed pa dang 'bras bu la longs spyod pa dag la'o/ /bdag byed pa med pa nyid ni sems pa med pa'i phyir dang / rtag pa'i phyir gang la yang byed pa la nus pa yod pa ma yin no/ /gang yang brjod pa/ shes pa tsam sogs gang 'brel pa/ /de la byed pa po nyid brjod//bde dang sdug bsngal sogs rigs pa/ /'du ba las ni za ba po/ /zhes so/ /de yang brjod pa'i rim pas snga ma dang phyi ma'i dus dag tu mi g.yo ba'i rang bzhin du rigs pa ma yin no/ /rgyu des na 'dir ni bdag la byed pa med pa nyid yin la/ rtsod pa ni rnam par rtsod pa yin la gang don de khas blangs la ni don med cing 'bras bu med pa yin te/de la de nye bar mkho ba ma yin pa'i phyir ro/ /ma yin nam zhes pa ni gzhan la bod pa'i tshig go/ /gal te bdag med na 'o na ji ltar byas pa chud zos pa la sogs pa'i nyes par mi 'gyur/ de lta bas na rtsod pa don med pa ma yin no zhe na/'di la rgyu ldan zhes bya ba gsungs te/ gang rgyu dang ldan pa ni las dang ldan pa yin la de nyid 'bras bu dang ldan pa yin te/ 'bras bu dang bcas pa'i phyir ro zhes bya ba ni 'di ltar mthong ba de ni srid pa ma yin la dmigs pa ma yin te/ gang gi phyir/ 'jig rten 'chi ba gzhan nyid la//skye ba yang ni gzhan nyid do/ /de'i phyir rgyu dang ldan pa 'bras bu dang bcas pa ma yin no/ /'o na 'di nyid kyis ni byas pa'i las/ /gzhan gyis ji ltar myong bar 'gyur/ /zhes brjod pa de ji ltar rtogs par bya zhe na/ 'di la rgyud gcig la ni zhes pa la sogs pa gsungs te/rgyud gzhan dang gzhan skad cig ma du ma brgyud pa'i mtshan nyid 'bras bu dang rgyu'i dngos pos 'jug pa 'ba' zhig la brten nas du ma rnams la 'jig rten pa'i zhen pas gcig nyid du sgro btags pa nyid kyi rgyu mtshan gyis byed pa po dang za ba po zhes bstan pa yin no/ /las byed pa po gang yin pa de nyid longs spyod pa po yang yin no zhes bstan pa 'di gdul bya'i bsam pa'i dbang gis bcom ldan 'das kyis bstan pa yin la/gzhan du na skye bos las dang 'bras bu rgyun chad par sems la re zhig sems can 'jig rten gnyi ga'i rjes su 'jug par bshad pa ma yin no/ /de nyid kyi phyir de nyid du zin pa'i phung po dang khams dang skye mched 'di nyid smin par 'gyur ro zhes gsungs so//de bzhin du sems pa'i las kyis bsams pas bsams pa'i las yin no zhes gsungs pas so/ /de skad du gsungs pa/ las las 'jig rten sna tshogs skye/ /las ni sems pa dang des byas/ / sems pa yid kyi las yin te/ /des bskyed lus dang ngag gi las/ /zhes so/ /gzhan yang sems can 'jig rten snod kyi 'jig rten ni/ /sna tshogs sems nyid kyis ni sprul pa yin/ /las ni sems las ma gtogs yod min dang / /'gro ba ma lus sems las skye bar gsungs//zhes so/ /de lta bas na sems las ma gtogs pa'i las gzhan ni yod pa ma yin la/ de yang dge ba dang mi dge ba'i sems skyes nas 'gag pa na rang gi nye bar len pa las byung ba'i sems kyi skad cig la/ dge ba dang mi dge ba la sogs pa'i 'du byed pa'i bag chags 'jog go//de yang des gzhag pa'i bag chags gzhan dang gzhan des mngon par 'du byas pa'i skad cig ma gzhan dang gzhan rgyun ma chad pas 'jug pa na yongs su gyur pa'i khyad par nye bar skye'o/ /las kyi khyad par dang rjes su mthun pa de lta bu'i rnam pa bde ba la sogs pa'i rang bzhin gyi sems kyi bdag nyid kyi 'bras bu 'jig rten pha rol du skyed par byed do zhes brjod do//dper na de ni sa dang sa bon la sogs pa phan tshun tshogs pa'i rkyen gyi khyad par las thob pa'i khyad par du gyur pas skad cig ma dang po las bskyed pa'i rang gi nye bar len pa'i 'bras bur gyur pa skad cig ma gnyis par gyur pa'i tshogs pa la 'bras bu bskyed pa'i rjes su mthun pa'i khyad par skyed par gyur nas phyi ma phyi ma khyad par du 'byung ba'i rgyud yongs su gyur pa'i khyad par las mtha'i skad cig ma'i mtshan nyid phul du byung ba skyed pa thob bo//sa bon dang rjes su mthun pa'i sA lu dang / ko Ta ba'i myu gu skyed par byed de/ ji ltar yang rgya skyegs kyi khu bas yongs su bsgos pa ma tu lung ga la sogs pa'i sa bon btab pas de mngon par 'du byas pa rgyud pas 'jug pa me tog la sogs pa rnams dmar por 'byung ba yin no/ /de la cung zad kyang snga ma dang phyi mi'i dus su gcig 'jug pa ni ma yin no//dge ba dang mi dge ba dang mtshungs pa la yang rnam par rtog pas gzhag pa'i phyir nye bar dgod pa ni mi rigs so/ /de ltar yang / gang gi rgyud ni 'di nyid la/ /las kyi bag chags gzhag pa las/ /'bras bu de nyid la 'gyur te/ /ras bal dmar po ji bzhin no/ /de lta bas na sa bon la sogs pa rnams la bdag med na yang 'bras bu so sor nges pa yin te des skye ba yang rim gyis skye bar 'gyur ro//de bzhin du skabs su bab pa la yang 'jig rten pha rol du 'gro ba gcig pu gcig med na yang rgyu dang 'bras bu'i dngos po'i nges pa nyid kyi phyir 'bras bu'i nges pa nyid yin te/ las dang nyon mongs pas 'dus byas pa'i rgyud ma chad par 'jug pas 'jig rten pha rol du 'bras bu thob par 'gyur bar brjod do/ /de'i phyir ma byas pa dang phrad par byas pa chud zos pa'i nyes pa med do/ /de'i phyir bdag med kyang las dang 'bras bu'i 'brel par mi 'thad pa med do/ /ji ltar yang bdag yod par mi 'thad pa de ltar spros na shin tu rgyas par 'gyur bas/'dir rgyas par ma brjod do/ /de ltar yang / bdag med phung po tsam nyid la/ /nyon mongs las kyis mngon du byas/ /srid pa bar ma'i rgyud kyis ni/ /mar me bzhin du mngal du 'jug /ces gsungs so/ /gang zag tu smra ba de rnams kyis kyang de nyid dang gzhan du 'gegs pa'i phyogs khas blangs pa'i phyir rang nyid kyis dngos po dgag pa yin te/dngos po ni 'di nyid dang gzhan gyi khyad par las ma 'das pa'i phyir ro/ /phan tshun spangs pa dang ldan pa gcig dgag pa ni gzhan spangs pa med na med pa'i phyir ro/ / khur khyer ba la sogs pa'i mdo sde yang don 'di la gsal ba yin no/ /de lta bas na bcom ldan 'das kyis dgongs te gsungs pa mi shes pa rnams kyis 'di yongs su brtags pa yin te/ dngos por yod pa ni ma yin no/ /dngos pos blangs pa na yang gzhan ma yin no zhes bdag bkag pa nyid kyis bsal ba yin no//de lta bas na 'dir khyad par du bkag pa ma yin no/ /de ltar yang bcom ldan 'das kyis dge slong dag las yod na 'bras bu yod kyi byed pa po ni ma dmigs so/ /phung po 'di bor nas phung po gzhan nye bar len pa chos kyi brdar byas pa las gzhan ni med do//'dir yang 'di chos kyi brda yin te/ 'di lta ste 'di yod pas na 'di 'byung bar 'gyur zhing / 'di skyes pas na 'di skye bar 'gyur ro zhes gsungs pa yin no/ /de ltar na bcom ldan 'das nyid kyis rkyen 'di pa tsam gyi mtshan nyid rgyu dang 'bras bu'i dngos po yang bstan pa nyid yin no/ /'di yang rgyun cig ces pas tha snyad ji lta ba bzhin du ma brtags pa'i ngo bor bstan pa nyid de/rgyud kyi [(]tshigs [,]tshig [)]gis ni rkyen 'di pa tsam khas blangs pa'i phyir ro/ /gzhan du rgyud nyid med par 'gyur ro/ /des na dngos po la grub pa'i rgyu dang 'bras bu'i dngos po la yod pa'i skyon gyis gos pa ma yin no//'di nyid slob dpon gyi zhal snga nas kyang gsungs pa yin te/ thams cad nus pa med ce na/ /sa bon sogs ni myug sogs la/ /nus mthong gal te de kun rdzob/ /'dod na ji ltar de ltar 'gyur/ /zhes gsungs so/ /rgyu dang 'bras bu'i dngos po so sor nges pa nyid kyis dran pa med pa yang spangs pa yin no//gcig rjes su 'gro ba'i bdag ni yod pa ma yin pa'i phyir dran pa po 'ga' zhig kyang 'dir yod pa ma yin te/ 'on kyang sgro btags pa'i dbang gis dran pa 'ba' zhig tsam yin no/ /dngos po'i yul dran par bya ba yang 'dir dran pa po med na yang nyams par 'gyur ba ma yin no//nyams su myong ba'i dngos po la rnam par shes pa'i rgyud la dran pa'i sa bon gzhag pa las dus phyis te yongs su smin pa'i rgyu las dran zhes bya ba'i 'bras bu skye bar 'gyur ro/ /de bzhin du ngo shes pa la sogs pa yang blta bar bya'o/ /de ltar na shin tu mangs pas 'jigs pas so sor 'dir brjod pa ma yin no//de bsgrubs pa ni gzhan du rgyas par bshad pas der go bar bya'o/ /'di thams cad ni kun rdzob kyi bden pa las brtsams te bsgrub pa yin no/ /don dam par chos thams cad rang bzhin med pa yin pa'i phyir dang /rnam par rtog pa thams cad rgyun chad pa'i phyir cung zad kyang skye ba dang / 'gag pa dang / rgyu dang 'bras bu bdag dang bcas pa dang / bdag med pa yod pa ma yin no/ /rnam par dpyad pa na las dang 'bras bu yod pa ma yin la/ 'jig rten 'di dang 'jig rten pha rol du cung zad kyang yod pa ma yin te rtog pas sprul pa'i phyir ro//de lta bas na 'di thams cad gzugs brnyan dang mtshungs pa yin te/ rang bzhin med pa skye zhing 'gag pa dang / rgyu dang 'bras bu dang / bdag dang bcas pa dang / bdag med pa dang / rtag pa dang mi rtag par brjod do/ /rmi lam bzhin du las dang / byed pa po dang / de'i 'bras bu longs spyod pa po dang / 'jig rten 'di dang / 'jig rten pha rol dang / bde 'gro dang / ngan 'gror 'gro ba yang yin te/ rtog pa rnams ma spangs pa yin pa'i phyir ro/ /de ltar na thams cad legs par gnas pa yin te/ gang 'chad par 'gyur ba/ de ltar 'gag pa yod min zhing / / dngos po yang yod min de'i phyir/ /'gro ba 'di dag thams cad ni/ /rtag tu ma skyes ma 'gags nyid/ /'gro ba rmi lam lta bu ste/ /chu shing bzhin du snying po med/ /ces bya ba la sogs pa gsungs pa yang yin te/ byed pa rang dbang las kyang ni/ /tha snyad du ni khyed kyis gsungs/ /phan tshun ltos nas grub pa ni//gnyis po de dag bzhed pa yin/ /byed po med cing za ba med/ /bsod nams yod min rkyen 'byung ba/ /brten nas 'byung ba ma skyes shes/ /tshig gi dbang po khyed kyis gsungs/ /zhes so/ /ji ltar na chos thams cad bdag med pa la las dang 'bras bu 'brel pa mi 'gal ba yang yin la/rang bzhin med pa yang yin te/ ji ltar mthong ba'i chos mi 'gal ba yang yin te/ de ltar yang yab dang sras mjal ba las gsungs pa yin te/ ci skad du/ bcom ldan 'das kyis bka' stsal pa/ rgyal po chen po de bzhin du byis pa so so'i skye bo thos pa dang mi ldan pa yang mig gis gzugs mthong na btang snyoms su 'gyur ba rnams la yang mngon par zhen par 'gyur te/mngon par zhen nas shin tu rmongs par 'gyur ro/ /shin tu rmongs nas kun nas nyon mongs par 'gyur ro/ /kun nas nyon mongs nas gti mug las byung ba'i las lus kyis ni rnam pa gsum/ngag gis rnam pa bzhi/ yid kyis rnam pa gsum mngon par 'du byed de/ las mngon par 'du byas na de yang thog ma nyid nas zad cing 'gags la bral zhing rnam par 'gyur ba ste/ shar phyogs su brten te gnas pa ma yin te/ lho phyogs dang / nub phyogs dang /byang phyogs dang / 'og dang / steng dang / phyogs mtshams rnams su brten te gnas pa yang ma yin no/ /'di na ma yin/ pha gi na ma yin/ bar don ma yin te/ dus gzhan na 'chi ba'i dus dang / tshod nye bar gnas pa'i tshe srog gi dbang po 'gags te/ tshe yongs su zad cing de dang skal ba 'dra ba'i las rnams kyang zad nas/rnam par shes pa tha ma 'gags pa'i tshe/ 'di lta ste dper na nyal nyal ba las sad pas yul gyi bzang mo yid kyis dmigs par 'gyur ro/ /rgyal po chen po de la rnam par shes pa tha ma'i dbang dang /las dmigs pa de dang rkyen gnyis kyis skye ba'i char gtogs pa'i rnam par shes pa dang po de 'byung ba ste/ dmyal ba'am/ dud 'gro'i skye gnas sam/ gshin rje'i 'jig rten nam/ lha ma yin gyi tshogs sam/ mi rnams sam/ lha rnams su dang po'i rnam par shes pa skye bar 'gyur te/rnam par shes pa dang po skye ba'i char gtogs pa de 'gags ma thag tu bar ma chad par gang la rnam par smin pa myong bar 'gyur ba mngon pa'i sems kyi rgyud skal ba dang 'dra bar 'byung ngo / /de la gang rnam par shes pa tha ma 'gags pa de ni 'chi 'pho zhes bya ba'i grangs su 'gyur/gang rnam par shes pa dang po 'byung ba de ni skye ba zhes bya ste/ rgyal po chen po de ltar na chos gang yang 'jig rten 'di nas 'jig rten pha rol du 'pho ba yang med la/ 'chi 'pho ba dang / skye bar mngon pa yang yod do/ /rgyal po chen po rnam par shes pa tha ma de skye ba'i tshe gang nas kyang mi 'ong /'gag pa'i tshe gang du yang mi 'gro'o/ /las de yang skye ba'i tshe yang gang nas kyang mi 'ong / 'gag pa'i tshe yang gang du yang mi 'gro'o/ /rnam par shes pa dang po de yang skye ba'i tshe gang nas kyang mi 'ong / 'gag pa'i tshe yang gang du yang mi 'gro'o/ /de ci'i phyir zhe na/ ngo bo nyid med pa'i phyir te/ rnam par shes pa'i tha ma ni rnam par shes pa thams stong / las ni las kyis stong / rnam par shes pa dang po ni rnam par shes pa dang pos stong / 'chi 'pho ni 'chi 'phos stong / skye ba ni skye bas stong la/ las rnams 'bras bu med par mi 'gyur bar yang mngon zhing rnam par smin pa myong bar mngon pa yang yod de/de la ming gi brda tsam gtogs par byed pa po'am/ za ba po gang yang med do zhes rgyas par gsungs so/ /de bzhin du zhe sdang dang gti mug gi las rnams kyis 'dus byas pa ji ltar rig par brjod par bya'o/ /sA lu ljang pa'i mdo las kyang gzhan yang de kho na mi rtogs shing log par shes te mi shes pa ni ma rig pa'o//de ltar ma rig pa yod na 'du byed rnam gsum mngon par 'grub ste/ bsod nams su nye bar 'gro ba dang / bsod nams ma yin par nye bar 'gro ba dang / mi g.yo bar nye bar 'gro ba'o/ /de la bsod nams su nye bar 'gro ba'i 'du byed rnams las bsod nams su nye bar 'gro ba'i rnam par shes pa nyid du 'gyur te/'di dag ni ma rig pa'i rkyen gyis 'du byed rnams zhes bya'o/ /bsod nams ma yin par nye bar 'gro ba'i 'du byed rnams las bsod nams ma yin par nye bar 'gro ba'i rnam par shes pa nyid du 'gyur te/'di ni 'du byed kyi rkyen gyis rnam par shes pa zhes bya'o/ /mi g.yo bar nye bar 'gro ba'i 'du byed rnams las mi g.yo bar 'gro ba'i rnam par shes pa nyid du 'gyur te/ 'di nyid rnam par shes pa'i rkyen gyis ming dang gzugs zhes bya'o/ /ming dang gzugs rnam par 'phel bas skye mched drug gi sgo nas bya ba byed pa rnams 'byung ste/de ni ming dang gzugs kyi rkyen gyis skye mched drug ces bya'o/ /skye mched drug po dag las reg pa'i tshogs drug 'byung ste/ de ni skye mched drug gi rkyen gyis reg pa zhes bya'o/ /ji lta bur reg pa 'byung ba de lta bur tshor ba 'byung ste/de ni reg pa'i rkyen gyis tshor ba zhes bya'o/ /tshor ba'i bye brag de dag myong ba dang / mngon par dga' ba dang / lhag par zhen pa dang / lhag par zhen nas 'dug pa de ni tshor ba'i rkyen gyis sred pa zhes bya'o/ /myong ba dang / mngon par dga' ba dang / lhag par zhen nas 'dug pa las bdag sdug pa'i ngo bo dang /bde ba'i ngo bo dang 'bral bar ma gyur cig snyam du yongs su mi gtong bar phyir zhing smon pa 'di ni sred pa'i rkyen gyis len pa zhes bya'o/ /de ltar smon cing yang srid pa skye ba'i las lus dang ngag dang yid kyis kun nas slong ba de ni len pa'i rkyen gyis srid pa zhes bya'o//las de las skyes pa'i phung po lnga gang yin pa de ni srid pa'i rkyen gyis skye ba zhes bya'o/ /skyes nas mngon du grub pa'i phung po rnams kyi 'phel ba yongs su smin pa dang / 'jig par 'gyur ba de ni skye ba'i rkyen gyis rga shi zhes bya'o/ /gzhan la'ang 'dre'o//de la rnam par shes pa ni sa bon gyi rang bzhin gyis rgyu byed do/ /las ni zhing gi rang bzhin gyis rgyu byed do/ /ma rig pa dang sred pa ni nyon mongs pa'i rang bzhin gyis rgyu byed do/ /de la las dang nyon mongs pa dag ni sa bon rnam par shes pa bskyed do//de la las ni sa bon rnam par shes pa'i zhing gi bya ba byed do/ /sred pa ni sa bon rnam par shes pa brlan par byed do/ /ma rig pa ni sa bon rnam par shes pa 'debs te/ rkyen 'di dag med na sa bon rnam par shes pa mngon par 'grub par mi 'gyur ro/ /de la las kyang 'di snyam du bdag gis sa bon rnam par shes pa'i zhing gi bya ba bya'o snyam du mi sems so//sred pa yang 'di snyam du bdag gis sa bon rnam par shes pa brlan par bya'o snyam du mi sems so/ /ma rig pa yang 'di snyam du bdag gis sa bon rnam par shes pa gdab bo snyam du mi sems so/ / sa bon rnam par shes pa yang 'di snyam du bdag ni rkyen 'di dag gis bskyed do snyam du mi sems te/ 'on kyang sa bon rnam par shes pa las kyi zhing la brten pa sred pa'i rlan gyis brlan pa ma rig pa'i lud kyis bran pa skye ba na skye ba'i gnas nying mtshams sbyor ba ma'i mngal de dang der ming dang gzugs kyi myu gu mngon par 'grub ste/ming dang gzugs kyi myu gu de yang bdag gis ma byas/ gzhan gyis ma byas/ gnyi gas ma byas/ dbang phyug gis ma byas/ dus kyis ma bsgyur/ rang bzhin las ma byung / byed pa la rag las pa ma yin/ rgyu med pa las kyang ma skyes te/ 'on kyang pha dang ma phrad pa dang / dus dang ldan pa dang / rkyen gzhan yang tshogs na bdag po med pa'i chos bdag gi med pa 'dzin pa med pa nam mkha' dang mtshungs pa/ sgyu ma'i mtshan nyid kyi rang bzhin dag la rgyu dang rkyen ma tshang ba med pa'i phyir skye ba'i gnas nying mtshams sbyor ba ma'i mngal de dang der myong ba dang ldan pa'i sa bon rnam par shes pa ming dang gzugs kyi myu gu mngon par bsgrub po//gzhan la yang bsgre'o/ /de la chos gang yang 'jig rten 'di nas 'jig rten pha rol du mi 'pho mod kyi/ rgyu dang rkyen ma tshang ba med pa'i phyir las kyi 'bras bu mngon pa yang yod do/ /gzhan la yang bsgre'o//'di lta ste dper na me ni rgyu dang rkyen ma tshang na mi 'bar gyi rgyu dang rkyen tshogs pa las 'bar ro/ /de bzhin du bdag po med pa'i chos bdag gi med pa 'dzin pa med pa nam mkha' dang mtshungs pa sgyu ma'i mtshan nyid kyi rang bzhin dag pa rgyu dang rkyen du mas ma tshang ba med pa'i phyir skye ba'i gnas nying mtshams sbyor ba ma'i mngal de dang der sa bon rnam par shes pa las dang nyon mongs pa rnams kyis bskyed pa'i ming dang gzugs kyi myu gu mngon par bsgrubs te/de ltar nang gi rten cing 'brel par 'byung ba rkyen dang 'brel par blta'o/ /de la nang gi rten cing 'brel par 'byung ba rnam pa lngar blta ste/lnga gang zhe na/ rtag par ma yin pa dang / chad par ma yin pa dang / 'pho bar ma yin pa dang / rgyu chung ngu las 'bras bu chen po 'byung ba dang de dang 'dra ba'i rgyud du'o/ /ji ltar rtag par ma yin zhe na/ gang gi tha ma 'chi ba'i phung po rnams kyang gzhan la skye ba'i char gtogs pa rnams kyang gzhan te/tha ma 'chi ba'i phung po gang yin pa de nyid skye ba'i char gtogs pa rnams yin gyi/ tha ma 'chi ba'i phung po rnams kyang 'gag pa skye ba'i char gtogs pa'i phung po rnams kyang 'byung bas de'i phyir rtag pa ma yin no/ /ji ltar chad par ma yin zhe na/tha ma'i 'chi ba'i phung po rnams sngon 'gags pa las skye ba'i char gtogs pa'i phung po rnams 'byung ba ma yin/ ma 'gags pa las kyang ma yin gyi tha ma'i 'chi ba'i phung po rnams kyang 'gags la de nyid kyi tshe skye ba'i char gtogs pa'i phung po rnams srang mda'i mthon dman bzhin du 'byung bar 'gyur te/de'i phyir chad par ma yin no/ /ji ltar 'pho bar ma yin zhe na/ sems can gyi rigs mi 'dra bas na de skal ba mnyam pa'i skye ba skye bar grub pas de'i phyir 'pho ba ma yin no/ /ji ltar rgyu chung ngu las 'bras bu chen po 'byung zhe na/ las chung ngu byas pa las 'bras bu chen po rnam par smin pa myong ste/de'i phyir rgyu chung ngu las 'bras bu chen po mngon par 'grub bo/ /ji ltar de dang 'dra ba'i rgyud yin zhe na/ ji ltar myong bar 'gyur ba'i las byas pa de lta bur myong bar 'gyur ba'i rnam par smin pa myong bas de'i phyir de dang 'dra ba'i rgyud do//de ltar na nang gi rten cing 'brel par 'byung ba'i rnam pa lnga yin no zhes rgya cher gsungs pa yin no/ /de lta bas na bdag la sogs pa med kyang las dang 'bras bu'i 'brel pa ma nyams par mdo las bcom ldan 'das nyid kyis gsungs pa yin no zhes bstan par 'gyur ro//de ltar na gcig pu zhig gnyi gar 'gro ba yod pa ma yin pa yang cung zad kyang 'gal ba med do/ /gal te ji ltar yang bdag med na 'o na/ bdag nyid bdag gi mgon yin gyi/ /gzhan ni su zhig mgon du 'gyur/ /bdag nyid legs par dul ba yis/ / mkhas pas mtho ris thob par 'gyur/ /zhes tshigs su bcad pa ji ltar gsungs she na/ sems nyid bdag tu 'dzin pa'i rten yin pa'i phyir 'di la bdag gi sgrar gsungs pa yin no/ /mdo sde gzhan du/ sems 'dul ba ni legs pa ste/ /sems 'dul bas ni bde ba 'thob/ / ces sems 'dul ba gsungs pa'i phyir ro/ /de yang bdag tu lta ba'i mngon par zhen par gyur pa la gzhan du bdag 'dzin pa rnam par rtog pa spong ba'i don du drang ba'i don gyis kun rdzob tu sems la bdag ces bstan pa yin te/ don dam par ma yin no/ /'dis ni 'phags pa lang kar gshegs par gsungs pa/gang zag rgyud dang phung po dang / /rkyen dang rgyu dang de bzhin du/ /gtso bo dbang phyug byed pa po/ /sems tsam nyid du nga smra'o/ /zhes pas de yang bsgrub par 'gyur ba yin no/ /gang gi phyir des kyang gzhan du gang zag tu mngon par zhen pa dgag pa'i ched du gsungs pa yin te/sems don dam par yod pa kho nar gsungs pa ni ma yin no/ /de bzhin du phung po la sogs pa rnams la bdag bstan pa yang drang ba'i don yin no/ /de'i phyir dngos po la sems kyang nga'o snyam nas shes pa'i yul ma yin no/ /sems don dam par yod pa yin pa de lta na yang dngos po la de ngar 'dzin pa'i spyod yul ma yin no zhes nye bar bstan pa'i phyir/'das dang zhes pa la sogs pa gsungs so/ /yongs su brtag pa nye bar bzung nas sems ni rnam pa gsum du srid de/ 'das pa dang / ma 'ongs pa dang / da ltar byung ba'o/ /de la 'das pa dang /ma 'ongs pa ni zhig pa dang / ma skyes pa yin la/ de'i sems ni bdag yin te/ bdag tu mthong ba'i yul ma yin no/ /ci'i phyir zhe na/ 'di ni gang gi phyir gyi don te/ 'das pa dang ma 'ongs pa'i sems de ni de ltar yod pa ma yin te/ zhig pa dang ma skyes pa'i phyir ro/ /gang 'das pa de ni zad cing 'gags la bral zhing yongs su gyur pa yin no//gang ma 'ongs pa de ni ma thob pa yin no/ /de ltar na da ltar byung ba'i sems bdag tu 'gyur zhes/ 'on te skyes zhes pa la sogs pa gsungs te/ ji ltar skyes pa'i da ltar byung ba'i sems bdag yin pa de ltar yang 'thad pa ma yin te/gang gi phyir de ni zhig na'ang bdag med de/ yang 'di la da ltar byung ba'i sems zhig ste/ skad cig ma gnyis pa la 'das na yang bdag yod pa ma yin la/ yang phyi nas sngar 'dzin pa'i sems kyang zhig par 'gyur te/ da ltar byung ba gnas par dmigs pa ma yin no//de lta bas na gang gis dmigs par 'gyur ba'i sems ji ltar dmigs par 'gyur/ de lta bas na sems dmigs pa yang yod pa ma yin la/ dmigs pa med pa nyid du ngar 'dzin pa skye bar 'gyur ro/ /de bzhin du bdag med de bdag yod pa ma yin la/ dus gsum du 'byung ba'i sems nyid de'i yul yin pa'i phyir ro//sems bdag tu 'dzin pa'i yul ma yin par bsgrubs nas/ mjug bsdu ba'i phyir/ dper na chu shing zhes bya ba la sogs pa gsungs te/ dper na chu shing gi sdong po ste/ chu shing sdong bu'i dum bu'o/ /phye zhing so sor cha shas su phye ste rnam par gzhig pa byas na dngos po cung zad yod pa yang mi rnyed de/de bzhin du bdag yod par 'gyur ba yang ma yin la/ chu shing bzhin du 'gyur ro/ /bdag kyang bdag tu 'dzin pa'i shes pa'i yul du gyur pa yod par gyur pa ma yin te/ yod pa ma yin pa'i mo gsham gyi bu dang 'dra'o//'di la khyad par cung zad yod pa ma yin no zhes dgongs pa yin no/ /ji ltar zhe na/ btsal zhing brtags te nges par dpyad pa na'o/ /gzhan yang bdag la gnod par byed pa dgag pa'i ched du thal bar 'gyur ba brjod pa/ gal te sems zhes pa la sogs pa gsungs te/gal te rnam pa thams cad du sems can dang / bdag dang gang zag rnam par dpyad pa na yod min te/ med na de'i tshe byang chub sems dpa' rnams kyis snying rje zhing brtse ba bsgom par bya ste/ sems can med par gang la dmigs nas 'jug par 'gyur/ snying rje yang yang dag par rdzogs pa'i byang chub sgrub par byed pa yin te/de sngon du song ba'i tshogs rgyur gyur pa'i sbyin pa la sogs pa la 'jug pa'i phyir ro/ /de lta bas na snying rje sngon du song ba'i sangs rgyas dang chos thams cad rab tu 'jug pa yin no/ /de ltar yang 'phags pa chos yang dag par sdud pa las gsungs pa yin te/des na yang byang chub sems dpa' chen po 'phags pa spyan ras gzigs dbang phyug gis bcom ldan 'das la 'di skad ces gsol to/ /bcom ldan 'das byang chub sems dpas chos mang po rnams la bslab par mi bgyi'o/ /bcom ldan 'das byang chub sems dpas chos shin tu mang po la bslab par mi bgyi'o//bcom ldan 'das byang chub sems dpas chos gcig rab tu gzung zhing rab tu rtogs par bgyis na bcom ldan 'das sangs rgyas kyi chos thams cad de'i lag mthil du mchis pa lags so/ /chos gcig po gang zhe na/'di lta ste snying rje chen po'o/ /bcom ldan 'das snying rje chen pos ni sangs rgyas kyi chos thams cad byang chub sems dpa' rnams kyi lag mthil du mchis pa lags so/ /bcom ldan 'das 'di lta ste dper na 'khor los sgyur ba'i rgyal po'i 'khor lo rin po che gang du mchis pa der dpung gi tshogs thams cad mchi'o//bcom ldan 'das de bzhin du byang chub sems dpa'i snying rje chen po gang du mchis pa der yang sangs rgyas kyi chos thams cad mchi'o/ /bcom ldan 'das 'di lta ste dper na srog gi dbang po mchis na dbang po gzhan rnams 'byung bar 'gyur ro//bcom ldan 'das de bzhin du snying rje chen po mchis na byang chub par byed pa'i chos gzhan rnams kyang 'byung bar 'gyur ro/ /'phags pa ga ya mgo ri las kyang / 'jam dpal byang chub sems dpa' rnams kyi spyod pa gang la brtsam par bya zhing / gang la brten par bya/'jam dpal gyis smras pa/ lha'i bu/ byang chub sems dpa' rnams kyi spyod pa ni snying rje chen po la brtsams te/ sems can la brten pa'o zhes rgya cher gsungs so/ /de lta bas na nges par dang por sems can la dmigs pa'i snying rje khas blang bar bya ste/ sdug bsngal ba'i sems can la brten nas de 'byung bar 'gyur bas so//sems can med na der mi 'gyur ro zhe na zhes pa ni gal te de ltar sems na'o/ /de'i tshe 'di brjod par mi bya'o zhe na/ 'bras bu don du zhes pa la sogs pa gsungs te/ dgos pa ni mngon par 'dod pa'i bsgrub bya ste/ skyes bu'i don zhes brjod do//de'i don du khas blangs pas ste/ des na khas blang bar bya'o/ /rmongs pas kun rdzob tu btags pa gang yin pa ste/ sgro btags pa yin la/ sems can de la'o zhes pa'i don to/ /'di ltar yang rnam par rtog pa thams cad dang bral zhing / sgrib pa thams cad las rnam par grol ba skyes bu mchog gi don yin pas sangs rgyas nyid 'dir bsgrub par bya'o//de yang chos thams cad kyi mi dmigs pa dang bral nas thob par mi 'gyur ro/ /de yang shes rab phul du phyin pas 'grub par 'gyur ro/ /de yang gus shing bar ma chod pa yun ring por goms par byas pa las skye bar 'gyur ro//de rtsom pa yang snying rje'i dbang gis 'byung bar 'gyur te/ de yang dang por sdug bsngal ba'i sems can rnams la 'jug pa na tshogs kyi rgyu rtsom par 'gyur ro/ /de ltar na 'bras bu'i don du rmongs pa kun rdzob kyi bden pa'i ngo bo khas blangs pa yin no//de'i phyir dang por sems can la dmigs pa nyid kyi snying rje yin la/ de nas gzhan don la dmigs pa dang / dmigs pa med pa yin no/ /bsam pa ni 'di yin te rnam pa thams cad du sems can yod pa ma yin la/ phung po la sogs pa rnams la kun rdzob tu bdag gi sgras brjod do//ji skad du bcom ldan 'das kyis/ dge sbyong ngam bram ze gang la la dag bdag ces yang dag par mthong bas phung po lnga po 'di rnams nyid mthong ba yin no zhes gsungs pa de'i phyir gal te yang shes rab kyis dpyad na don dam par sems mi dmigs pa yin te/ de ltar na yang kun rdzob tu 'gegs pa ma yin no//ji skad du/ gang gis shes rab don dam dang ni kun rdzob thugs rje bsten par bzhed/ /khyed ni 'gro ba rang bzhin med par ji ltar don la 'jal bar 'gyur/ /gang gi tshe na stobs bcu skyed par mdzad ma thugs rje dang ldan pa//de tshe khyod ni bu sdug bsngal la pha bzhin 'gro la brtse bar 'gyur/ /zhes gsungs so/ /bstod pa bzhi pa las kyang / mgon khyod sems can 'du shes la/ /rnam pa kun tu 'jug ma yin/ /sems can sdug bsngal gyis nyen la/ /khyod ni shin tu thugs rje'i bdag / ces gsungs so/ /de lta bas na gzugs la sogs pa rnams la 'di ltar kun rdzob kyi bden pa'i sgras brjod de/ de bas na snying rje ni yul med pa ma yin no/ /ci ste don dam par sems can med na gang gi 'bras bu yin/ des na de bsgrub pa'i don du 'ga' zhig 'jug par 'gyur zhes bsams nas/sems can med 'bras zhes pa la sogs pa smos te/ sems can med na zhes pa ni gang gi tshe sems can med na'o/ /de'i tshe gcig rjes su 'gro ba med pas gzugs la sogs pa rnams skyes nas zhig pa'i phyir 'bras bu su'i yin/ su'i yang ma yin no zhes pa'i don to//bden zhes khas len pa yin te/ 'di de ltar yin no/ /'dod ces pa ni 'di ltar kho bo cag 'dod pa nyid de/ cung zad cig kyang don dam par 'bras bu yod pa ma yin te/ chos thams cad bdag po med pa'i phyir ro/ /gal te de ltar na de bsgrub pa'i don du dang por ci'i phyir 'jug ce na/'dir ni zhes te 'di lta bu'i spyod pa ni 'bras bu de don du gnyer bas rmongs pas bya ba dang ldan pa yin no/ /bdag gi 'di kho na 'bras bur 'gyur ro zhes gcig tu zhen pas sems can med na yang kun rdzob tu'o/ /rten cing 'brel par 'byung ba las ma gtogs pa sgyu ma'i rang bzhin nyid kyis chos thams cad la dngos po la 'dod pa med pa'i phyir ro//ji skad du/ 'dod pa med pa stong pa nyid/ /sgyu ma bzhin du rkyen las 'byung / /mgon po khyod kyis chos rnams ni/ /rang bzhin med par rab tu bstan/ /zhes gsungs so/ / de lta bas na kun rdzob nyid du 'bras bu'i don du bya ba dang ldan pa yin no/ /ci ste yang gti mug ma rig pa'i rang bzhin yin pas rnam pa thams cad du blang bar bya ba ma yin pa yin te/ ji ltar na slar yang de nyid khas len par byed ce na/ sdug bsngal zhes pa la sogs pa gsungs te/ rmongs pa ni rnam pa gnyis te/ 'khor bar 'jug pa'i rgyu dang / de nye bar zhi ba'i rgyu'o/ /de la gang 'khor ba'i rgyu yin pa de ni spang bar bya ba nyid do/ /gang gzhan ni sdug bsngal brgyud pa nye bar zhi bar bya ba'i don du yin te/ sems can thams cad kyi skye ba la sogs pa gdung ba ldog pa'i rgyu mtshan yin la/'bras bu rmongs pa ste/ 'bras bu don dam pa'i bden pa'i mtshan nyid rtogs pa'i ched du yin la/ rmongs pa de yang bzlog par mi bya ste/ dgag par mi bya ba yin la/ blang bar bya ba nyid yin te/ don dam pa la mkho ba yin pa'i phyir ro/ /bsam pa ni 'di yin te/dgos pa de yang chen po rnams kyis bdag nyid bde ba 'dod pas legs pa ma yin la/ 'on kyang sems can thams cad kyi mthar thug pa'i sdug bsngal thams cad bcad pa'i don du yin te/ de yang thabs su gyur pa don dam par rtogs pa yin no/ /de'i yang thabs su gyur pa ni kun rdzob kyi bden pa yin te/kun rdzob med par don dam pa mi rtogs pa'i phyir ro/ /de ltar na sdug bsngal nye bar zhi ba'i don ni rmongs pa'i 'bras bu yin no/ /'bras bu 'di ni dgos pa'i don du ma dpyad par zhes pa'i skabs su sngar bstan pa nyid yin te/ slar yang 'di spros nas brjod pa yin no//gal te de ltar na yang / ji ltar sdug bsngal zhi ba'i rgyu yin pa'i phyir 'bras bu rmongs pa'i ma rig pa'i rang bzhin khas len pa de bzhin du bdag tu rmongs pa yang gzhag par bya ste/ de'i rgyu yin pa'i phyir la/ de ji ltar bdag 'gegs par 'bad pa'i sgo nas byed/de yod na bdag bsgoms pas ngar 'dzin pa zad pa'i phyir 'khor ba bzlog par 'gyur la/ de lta bas na bdag med pa bsgoms pas ci zhig bya zhe na/ sdug bsngal rgyu yi zhes pa la sogs pa gsungs te/ ji ltar 'bras bu rmongs pa sdug bsngal zhi ba'i rgyu de bzhin du gnyis pa bdag tu rmongs pa ni ma yin no//de yod pas na ngar 'dzin pa zad par mi 'gyur ba'i phyir ro/ /slar yang bdag tu rmongs par 'gyur te/ bdag med pa la phyin ci log tu mthong ba'i phyir ro/ /slar nga rgyal 'phel bar 'gyur te/ 'phel ba nye bar skye bar 'gyur ro//ji lta bur gyur pa zhe na/ sdug bsngal gyi rgyu ste sdug bsngal ba'i 'khor ba'i sdug bsngal gsum gyi 'khor ba'i rgyu ste byed pa'i rgyu yin la/ ngar 'dzin pa zad pa las kyang sdug bsngal zhi bar 'dod do/ /bdag tu lta ba yod na ji ltar 'di ldog par 'gyur te/rgyu'i nus pa ma tshang ba med pa la 'bras bu ldog pa mi rigs pa'i phyir ro/ /des na sdug bsngal kyang mi ldog go/ /'di ltar yang bdag mthong bas 'dus byas kyi phung po dang khams dang skye mched rnams la bdag go zhes zhen pa'i dran pa skye bar 'gyur ro/ /des na sdug bsngal phyir bcos par 'dod cing /bde ba 'dod pa'i nyes rnams bsgribs nas de don du gnyer bas yon tan du sgro btags pas de bsgrub pa rnams la 'jug ste/ kho bo la phan pa byed pa'o zhes blo skye bar 'gyur ro/ /nga dang bdag ces mthong ba'i phyir gegs byed pa'i zhe sdang du 'gyur la/des na sdug bsngal mtha' dag gi rgyu nyon mongs pa dang nye ba'i nyon mongs pa thams cad nyid thob cing rgyas par 'jug go/ /de ltar na bdag tu rmongs pa rab tu 'jug pas sdug bsngal gyi rgyu ngar 'dzin par 'gyur ro/ /de skad du/ slob dpon gyi zhal snga nas/ gang zhig nga zhes bdag mthong ba//de la rtag pa nyid du chags/ /chags pas bde la sred 'gyur zhing / /sred pas skyon rnams sbed par byed/ /yon tan mthong ba yongs su sred/ /nga yi zhes de'i sgrub byed len/ /des na ji srid bdag sngon chags/ /de srid de ni 'khor ba yin/ / bdag yod na ni gzhan du'ang shes/ /bdag gzhan la chags 'dzin dang sdang / /'di dag dang ni kun 'brel las/ /nyes pa thams cad 'byung bar 'gyur/ /zhes gsungs so/ /'di ltar bdag la chags pa'i ngar 'dzin pa bzlog par nus pa ma yin no/ /de las kyang bzlog med ce na zhes pa las/de las kyang zhes bya ba ni bdag mthong ba las kyang ngo / /bzlog med pa ni bzlog par mi nus pa'o/ /gal te bdag tu 'dzin pa yin na/ de'i tshe bdag med du bsgoms pas mchog yin no/ /bdag med pa ni gang zag la sogs pa dang bral ba yin la/ bsgom pa ni goms pa'o/ /mchog ni gtso bo yin te/ bdag tu lta ba'i mi 'jug pa na ngar 'dzin pa ldog pa'i rgyu yin pa'i phyir ro/ /'di yang re zhig bzhag nas phyi nas spong bar 'gyur te/ dngos por dmigs pa yin pa'i phyir ro/ /'di ltar yang bsgom pa rab kyi mthar phyin pa las/mngon sum du bdag med pa mthong ba'i phyir de dang 'gal ba'i 'jig tshogs la lta ba ldog par 'gyur ro/ /de log na yang gcig tu rjes su 'gro ba mthong ba med pa'i phyir phyi ma dang snga ma ngo bos stong pa'i skad cig tsam mthong ba yin no/ /de lta bas na snga ma dang phyi mar sgro 'dogs pa dang bral bas bdag la ma 'ongs pa'i bde ba sgrub par byed pa gzhan cung zad kyang mthong ba ma yin no//de lta bas na de yul 'ga' la yang chags pa skye bar mi 'gyur ro/ /de dang 'gal ba la zhe sdang ba yang ma yin te/ zhen pa med pa nyid yin pas so/ /gnod pa byed pa la len du gnod pa byed pa'i gnas su mthong ba yang ma yin te/gang gis gang la gnod pa byed pa gnyis po de dag la yang skad cig ma gnyis pa med pa'i phyir ro/ /gzhan gyis gnod pa byed pa la rtogs pa dang ldan pas dgra gzhan 'joms par byed pa rigs pa ma yin no/ /gang la des byas pa de la yang ngo /de ltar 'dod chags la sogs pa log pa dang / gzhan de las byung ba'i nyon mongs pa dang nye ba'i nyon mongs pa skye bar mi 'gyur ro/ /dngos po la ni gnod par bya ba dang gnod par byed pa yod pa ma yin te/ yang na 'di la brten nas 'di skye'o zhes rten cing 'brel par 'byung ba las dmigs pas so//'di ltar yang gang zag gis stong pa dang / 'jig tshogs la lta ba'i log pa la nyon mongs pa spyod par mi 'gyur te/ rtsa ba bcad pa'i phyir ro/ /ji skad du 'phags pa de bzhin gshegs pa gsang ba'i mdo las/ zhi ba'i blo gros 'di 'di lta ste/shing gi rtsa ba bcad pa'i yal ga dang lo ma dang 'dab ma thams cad skam par 'gyur ro/ /zhi ba'i blo gros de bzhin du 'jig tshogs la lta ba nye bar zhi bas nyon mongs pa thams cad nye bar zhi bar 'gyur ro zhes gsungs so/ /de lta bas na bdag med pa bsgom pa mchog yin no//zhar la byung ba rdzogs so// //de ni yang bdag tu 'dzin pa'i yul spyod pa la 'jug go/ /de ltar 'gyur mod/ gal te de ltar na yang bdag dpyad pas/ bong bu'i rwa dang 'dra bar bdag 'dzin pa'i yul med pa de lta na yang yan lag can gyi lus de'i yul du 'gyur ro zhe na/'di la lus ni zhes pa la sogs pa gsungs te/ lus kyang rnam par dpyad pas gcig pa nyid cung zad kyang yod pa ma yin no zhes ston par byed de/ 'di ltar yang lag pa dang rkang pa la sogs pa'i cha nyid 'ba' zhig mthong ste/lus gcig ces pa'i mthong ba ma yin no/ /de rnams las gzhan pa'i lus po yang rig pa ma yin no/ /gang gi phyir lus ni rkang pa min te/ rkang pa dag ma yin no/ /byin pa yang lus su mi 'gyur la/ brla yang min te/ byin pa'i phyogs kyi khyad par ni lus ma yin no//rked pa yang ma yin no/ /rked pa yang lus ma yin pa kho na'o/ /lto ba yang ma yin te/ gsus pa yang ma yin no/ /rgyab 'di yang lus ma yin te/ lus 'di ni rgyab ma yin pa nyid do/ /brang yang ma yin te/ brang gi dkyil 'khor yang lus ma yin no/ / dpung pa yang ma yin te/ dpung pa de yang lus su mi 'gyur ro/ /lag pa yang ma yin te/ lag pa dag lus ma yin no/ /rtsib logs 'di yang lus ma yin te/ 'di'i rtsib logs dag kyang lus ma yin no/ /mchan khung yang ma yin no/ /lag pa'i rtsa yang lus ma yin no//'phrag pa'i mtshan nyid kyang ma yin te/ phung po'i rang bzhin lus ma yin no/ /mgrin pa yang lus ma yin te/ ske ma yin no/ /mgo bo yang lus ma yin te/ mgo bo'i lus su mi 'gyur ro/ /rkang pa la sogs pa yang 'chad par 'gyur ba'i brtags pas rdul phra rab kyang mi gnas pa'i phyir ro//lag pa dang rkang pa la sogs pa gzhan zhig bcad na lus po zhig pas shi bar thal bar 'gyur ba'i phyir dang / gzhan gyis khas blangs pa med pa'i phyir lus 'di rnams so sor bdag ma yin no/ /de bzhin du gang gi tshe lus 'di rnams so so'i rang bzhin ma yin pas 'di dag bsdus pa tsam lus yin no//'di la lus ni gang zhig yin zhes te/ yang 'di la ste rkang pa la sogs pa'i dbye ba 'di rnams mdun gnas shing lus su rtogs pa'i rgyu mtshan 'di rnams la gang zhig lus su 'gyur te/ cung zad kyang ma yin la/ gcig kyang nges par dpyad pa na lus kyi bdag nyid gang yang mi dmigs so zhes pa'i tha tshig go/ /'on te de lta na yang 'di ltar rkang pa la sogs pa rnams so sor lus su brjod par bya ba ma yin gyi/ 'on kyang yan lag thams cad la khyab par byed pa yin pa'i phyir yan lag can dang / yan lag thams cad la 'jug par 'gyur ro zhe na/ /'di la gal te 'di zhes pa la sogs pa gsungs te/ yan lag thams cad la 'di 'jug pa na phyogs gcig gis 'jug gam/ dus gcig tu bdag nyid thams cad kyis 'jug /de la gal te lag pa dang rkang pa la sogs pa yan lag thams cad la lus 'di ste yan lag can gyi lus 'di'o//phyogs re yis ni gnas gyur na/ /zhes te/ cha 'ga' zhig gis cha shas 'ga' zhig la khyab par 'gyur na bdag nyid thams cad kyis thams cad la ma yin no zhes pa'i don to/ /de'i tshe 'di skad brjod par mi bya ste/gang gi phyir gang gi phyogs gcig nyid kyis cha shas rnams la 'jug pa na de rnams la yang phyogs re re la/ gzhan gyi phyogs gcig gis 'jug gam/ bdag nyid thams cad kyis 'jug ces rnam par rtog pa mi ldog go/ /de la yang slar phyogs gcig gis 'jug pa'i rnam par brtag pa thug pa med par ldog par mi 'gyur ro//gzhan yang de la go skabs med pa nyid kyi phyir cha shas rnams la 'jug pa ma yin no zhe na/ cha shas rnams zhes pa la sogs pa gsungs te/ cha shas rnams te dum bu rnams cha shas rang rang gi gnas pa la gnas par 'gyur te/rnam par gnas pa yin la/ dngos po rnams rang rang gi gnas pa yin pa'i phyir ro/ /de rang nyid gang na gnas zhes pa ni de yan lag can rang nyid gang na gnas zhes pa mi rig go/ /'on te rnam par rtog pa gnyis pa yin na/de la bdag nyid kun gyis zhes pa la sogs pa gsungs te/ bdag nyid thams cad kyang 'jug pa srid pa na cha shas rnams la skabs med pa'i phyir/ de yang gang du rang nyid gnas zhes thal bar 'gyur ba gegs med par 'jug go/ /de ltar na yang slar yang gzhan brjod par bya ste/bdag nyid kun gyis te dngos po thams cad kyis yin te/ phyogs gcig gis ma yin pa'o/ /thams cad du lag pa la sogs pa yan lag thams cad la'o/ /sogs pa'i sgras rkang pa la sogs pa'i rnams la yin te/ gnas shing yan lag can gyi lus gal te 'brel ba yin zhe na/de'i tshe slar yang nyes pa gzhan 'dir 'gyur ro zhes bstan pa'i phyir/ lag sogs zhes pa la sogs pa gsungs te/ lus zhes pa ni yan lag can gyi lus yin la/ de rnyed pa de nyid du 'gyur te/ de'i grangs yongs su bcad pa de nyid thob par 'gyur ro//ji tsam du zhe na/ ji snyed pa ste/ lag pa la sogs pa de rnams ni/ lag pa dang rkang pa la sogs pa yan lag ji snyed pa de rnams su 'gyur te/ de'i grangs yongs su bcad pa rnams dang de 'brel pa'i yan lag can rnams kyang de snyed pa rnams su 'gyur te/de cha shas med pa nyid thams cad kyis de rnams la yongs su rdzogs pa'i phyir ro/ /de du ma dang 'brel las du ma yin pa'i phyir gzhan du gcig tu 'gyur ba ma yin no/ /thal bar 'gyur ba 'di du ma yul gcig tu 'jug pa'i phyogs la yang sbyar bar bya ste/de bzhin du kha bsgyur ba dang / ma bsgyur ba dang / bsgribs pa dang / ma bsgribs pa dang / g.yo ba dang / mi g.yo ba la yang ji ltar rigs par brjod par bya'o/ /de ltar na mngon sum la sogs pa'i tshad mas rtogs par bya ba'i lus yod pa ma yin te/ gnod par byed pa'i brjod ma thag pa yod pas zhes bsgrub pa'i don du mjug bsdu ba/phyi dang nang na zhes pa la sogs pa gsungs te/ nang gi byed pa'i skyes bu ni sngar bkag pa'i phyir ro/ /sha dang khrag la sogs pa rnams rnam par dpyad pa'i phyir/ de ni nang gi lus ma yin no zhes te/ da ni yang yan lag can dgag pa'i phyir phyi rol te mngon sum la sogs pa'i spyod yul du gyur pa'i phyi rol du sa ma yin no//de ltar na ji ltar na lus lag pa la sogs pa rnams la rnam par gzhag par byed/ 'on te lag pa la sogs pa las tha dad par 'gyur ro zhe na/ lag sogs zhes pa la sogs pa gsungs te/lag pa la sogs pa'i yan lag rnams las gzhan tha dad pa dmigs pa'i mtshan nyid du gyur pa yod pa ma yin te/ dmigs pa ma yin no/ /lag pa la sogs pa 'ba' zhig dmigs pa yin no/ /de ltar na gang yan lag la sogs pa'i rang bzhin ma yin la/de la brten pa'i 'brel pa yang med do/ /nang yang yod pa ma yin no/ /de la tha dad yang yod pa ma yin no/ /de zhes te lus so/ /ji ltar nyid du yod min zhes te/ ji ltar zhes pa ni ji ltar yang lus ma dmigs pa na de yod pa ma srid pa nyid kyis 'dri bar byed do//ji ltar rnam pa gang gis zhes so/ /kye zhes rnam par dpyod pa'o/ /yod ces te/ de yod pa rnam par gzhag pa'o/ /gang gi tshe 'di ltar rnam par dpyad pas lus rnam par gzhag par mi nus pa de'i tshe/ med pa nyid du de la tha snyad bya'o zhes mjug bsdu ba'i phyir/ des na zhes pa la sogs pa gsungs te/des na lus med ces pa ni gang gi phyir rnam par dpyad pa brjod pas ma dmigs pa de'i phyir dmigs pa'i mtshan nyid du gyur pa'i ma dmigs pa las lus yod pa ma yin no/ /gal te med na 'o na ji ltar lag pa la sogs pa rnams la lus kyi blor 'gyur zhe na/rmongs las zhes pa la sogs pa gsungs te/ rmongs las ni ma rig pa'i dbang las so/ /kyang zhes pa lag pa la sogs pa rdzas gcig dang bral ba rnams la lus kyi blor 'gyur te/ don dam par ni ma yin no/ /yang na kyang gi sgra ni nges par gzung ba yin te/'di ltar yang 'khor ba thog ma med pa nas 'jug pa skye ba brgyud par log par goms pa bsags pa'i dbang gis dngos po ji ltar gnas pa'i de kho na nyid rab tu rtogs kyang de las phyin ci log tu sgro 'dogs pa'i rnam par rtog pa skye bar 'gyur ro//de dang nye bar 'brel pas 'jig rten na lus la sogs pa'i tha snyad 'di 'jug ste/ don dam par ni ma yin no/ /ji ltar gzhan du mi 'gyur zhe na/ 'di la gsungs pa/ dbyibs su bkod pa ste/ lag pa dang rkang pa la sogs pa'i dbyibs su dgod pa la'o//de nyid kyi khyad par gzhan la tha dad pa'o/ /'khrul pa'i rgyu zhes lag pa la sogs pa nyid la yin gyi/ thams cad la ni ma yin te/ yul so sor nges pa nyid 'khrul pa'i 'dod pas ji lta bur zhe na/ mtho yor la ni mi blo bzhin no zhes te/ ji ltar mtho yor la mi'i rang bzhin med kyang skyes pa dang mtshungs pa'i gyen du 'greng ba la sogs pa'o//dbyibs kyi khyad par dmigs pa dang ldan pa na ring po nas khyad par khong du ma chud pa gzhan gyi khyad par 'ga' zhig gi 'khrul pas skyes bu'i blor 'gyur ro/ /de bzhin du skabs su bab pa la yang yin no zhes pa'i don to//de ltar na yang ji ltar yang 'di nyid la brten te rmongs pa nyid kyis lus kyi blo yin la/ dngos po ma yin zhes pas ji ltar zhe na/ 'di la ji srid rkyen zhes pa la sogs pa gsungs te/ de ji srid du/ gang dus kyi mtshams su bcad pa'i rkyen rnams te/ rgyu rnams yin la/ sa la sogs pa'i khams drug dang / reg pa la sogs pa'i skye mched drug dang / yid kyi nye bar rgyu ba bcwo brgyad kyi bdag nyid las la rag las pa'i tshogs kyi bsgrub pa dus de srid kyi mtshams su lus ni skyes bu lta bu ste/ dper na skyes bu'i rang bzhin gyis don dam par stong pa yang yongs su brtags pa'i ngo bo skyes bu'i rang bzhin du rab tu snang ba dang tha snyad kyang byed do//'di ni mtshon pa tsam yin te/ bud med bzhin du zhes blta bar bya'o/ /sngar gyi nur nur po la sogs pa'i gnas skabs na ma yin la/ phyi nas kyang ma yin te/ rnam par 'thor ba'i phyir ro/ /thal ba la sogs pa'i gnas skabs na yang ma yin te/ gnyug ma'i rang bzhin med pa'i phyir ro/ /'dir 'di dang yang mtshungs par bstan pa'i phyir/ de bzhin zhes pa la sogs pa gsungs te/ dper na rkyen tshogs par yod pa'i lus skyes bu bzhin du snang la/de med pa na mi snang la/ de bzhin du ste ji ltar lag pa la sogs pa ji srid du rkyen tshogs pa de srid du lus ni lag pa la sogs par snang ste/ rtog pa'i dbang gis rab tu snang la/ don dam par ni ma yin no/ /de lta bas na lus kyi blo ni tshogs pa tshang ba la 'gyur la/ de ma tshang na ma yin no/ /de lta bas na rmongs pa nyid las lag pa la sogs pa la lus kyi blo yin no zhes nges so/ /'dir bsdus pa'i don ni 'di yin te/ rkyen gyi tshogs pa 'di dang 'di yod pa na dngos po de dang de med par yang 'gyur ro/ /de kho na nyid mthong ba po ni 'khrul pa'i dbang gis rnam par rtog pa 'di skye bar 'gyur ro//de'i dbang gis dbyibs kyi khyad par rnams la bud med dang skyes pa la sogs pa'i lus kyi tha snyad 'jug par 'gyur ro/ /de lta bas na thal ba la sogs pa'i gnas skabs na tshogs pa ma tshang bas ldog par 'gyur ro//de lta bas na lus la sogs pa'i tha snyad dngos po pa ni ma yin no zhes 'chags par 'gyur ro/ /de skad du yang / gang zhig gnas skabs spang ba yi/ /lus kyi rang bzhin smra bar bya/ /mer mer po dang thal ba las/ /de med phra mo dngos po yis/ /de rags spangs pas gnas she na//rang nyid bstan du med par 'thob/ /lus su brjod par ji ltar 'gyur/ /zhes brjod do/ /de skad du/ gang gi rgyu ni srid 'gyur ba/ /rkyen ni med na gnas min te/ /rkyen dang bral bas bral 'gyur la/ /de yod ces ni ji ltar rtog /ces gsungs so//gzhung kha cig las/ ji srid rkyen tshogs de srid du/ /shing ni skyes pa ltar snang ba/ /zhes so/ /de la bshad pa ni 'di yin te/ ji srid du phyin ci log gi shes pa tshogs pa de srid du sdong dum la skyes bu bzhin du rtogs pa yin te/ sdong dum gyi rang bzhin la skyes pa ltar te skyes bu bzhin du rtogs pa yin no//de med na ni ma yin te/ de bzhin du lag pa la sogs pa la'o/ /ji srid du rkyen tshogs pa de srid du lag pa la sogs pa 'di la lus su snang ste/ rab tu gsal ba yin la/ phyi nas ni ma yin no//de'i phyir gti mug nyid las lus kyi blo yin no zhes nges pa yin no/ /gal te lus med na yang lag pa dang rkang pa rnams kyi yan lag rnams mngon sum gyis mthong ba'i phyir dgag par mi nus so zhes dgongs nas/ lag pa la sogs pa rnams la gzhan gyis brtags pa'i rang bzhin nyid do zhes bstan pa'i phyir/de bzhin sor mo'i zhes pa la sogs pa gsungs te/ ji ltar rnam par dpyad pa na lus med pa de bzhin du lag pa dang rkang pa la sogs pa yang yod pa ma yin no/ /gang gi phyir sor mo rnams kyi tshogs te bsdus pa rnams yin la/ sor mo rnams zhes pa nye bar mtshon pa yin te/ rting pa la yang blta bar bya'o/ /de'i dngos po ni de nyid do/ /de lta bas na de'i rang bzhin zhes pa'i don to/ /rkang pa yang gang zhig yin 'gyur te/ de dag bsdus pa ma gtogs par rnam par dpyad pa na cung zad kyang ma yin no zhes dgongs so//sor mo'i tshogs kyang rang bzhin gcig pa ma yin no zhes gsungs pa/ de yang zhes pa la sogs pa ste/ de yang ni sor mo'i tshogs kyang ngo / /rnam par dpyad pa na dngos por yod pa ma yin no/ /ci'i phyir zhe na/ tshigs kyi tshogs rnams bsdus pa yin pa'i phyir ro//gang zhig yin zhes pa'i rang bzhin dang 'brel te/ tshigs kyang so sor dngos po ma yin no zhes gsungs pa tshigs kyang zhes te dngos po ma yin no/ /ci'i phyir zhe na/ che phye bas so/ /rang gis te bdag nyid kyis cha shas rnams phye bas te rnam par phye bas so/ / cha yang de kho na nyid du med do zhes gsungs pa/ cha yang ste rdul phra rab phye bas so/ /cha ni tshogs kyi cha'o/ /yang ni rdul phra rab phye bas te/ rdul phra rab kyi cha'i rnam par phye bas phyir btags pa nyid kyi rdul phra rab rnams kyang so sor don dam par yod pa ma yin no zhes gsungs pa/ rdul de la yang cha'i dbye ba yis zhes te/phyogs ni shar dang nub dang lho dang byang dang steng dang 'og gi phyogs rang bzhin rnams te dbye ba'i sa sna tshogs pa'i phyir ro/ /de ni rnam par dbye bas phye ba nyid kyi rdul phra rab rnams cha drug tu 'gyur ro/ /phyogs dbye ste phyogs re re so so na gnas pa sna tshogs pa'i gzugs kyi cha rdul phra rab rnams de las phye bas de'i rang bzhin gnas pa ma yin no//phyogs kyi cha dbye ba gang la yod kyang de la gcig tu mi rigs so zhes pas so/ /'di ltar yang shar dang nub la sogs pa'i phyogs gnas pa'i rdul phra rab la mngon par phyogs pa gang yin pa'i rdul phra rab dbus na gnas pa'i rang bzhin gyi rdul phra rab de gcig nyid yin nam/gzhan dang gzhan yin/ gal te gcig yin no zhes pa'i phyogs yin na de'i tshe bskor bar gnas pa'i rdul phra rab thams cad gcig tu thal bar 'gyur ro/ /gang gi phyir shar phyogs na gnas pa'i rdul phra rab kyi yul de med par nub phyogs la sogs pa na gnas pa'i rdul phra rab shar gyi yul na gnas pa'i mngon par phyogs pa'i ngo bo'i mngon par phyogs par mi 'gyur ro//gzhan du na rang bzhin tha dad par thal bar 'gyur bas yul gcig na gnas pa yang yin no//de khongs su 'dus pa med pa na shar phyogs na gnas pa ma yin no/ /rdul phra rab gzhan dang gzhan dag dang / rdul phra rab bdag nyid thams cad dang 'brel bas de'i rang bzhin du 'dus pa'i phyir rdzas rdul phra rab tsam du 'gyur ro/ /de ltar yin na yang bsags pa'i ngo bo'i ngo bo la sogs par mi 'gyur ro//de'i phyir sa la sogs pa rnams kyi tshogs 'dod pa rnams kyi phyogs gnyis pa nyid khas blang bar bya'o/ /de'i tshe yang gzhan dang gzhan drug po rnams dang dus gcig tu 'brel pas dbus na gnas pa'i rdul phra rab cha drug tu 'gyur ro//de dang de na gnas pa'i rdul phra rab gzhan dang gzhan dag 'brel pas rdul phra rab de'i rang bzhin tha dad pa'i phyir 'di ltar rdul phra rab kyang gcig tu mi 'thad do/ /de ltar yang slob dpon gyi zhal snga nas/ /drug gis cig car sbyar bas na/ /phra rab rdul cha drug tu 'gyur//drug po dag ni go gcig na/ /gong bu rdul phran tsam du 'gyur/ /zhes gsungs so/ /de rnams kyang cha phra ba rnams yin no/ /de bzhin du dpyad pa na bdag med pa nyid kyi nam mkha'i rang bzhin du rtogs par byed pas/ phyogs dbye yang zhes pa la sogs pa gsungs te/phyogs kyi dbye ba yang phyogs kyi dbye ba rdul phra rab rnams kyi rdul phra rab kyi cha yang sngar bzhin du cha drug tu phye ba na ci zhig yin par 'gyur te/ dngos po cung zad kyang ma yin no/ /snga ma thams cad la sbyar bar bya'o/ /ci'i phyir zhe na/ cha shas dang bral ba'i phyir te/cha med pa'i phyir ro/ /de'i phyir mngon par phye ba dang / rang bzhin med pa nyid kyis nam mkha' stong pa nyid yin no/ /de rgyu des na rdul yang med do/ /rdul phra rab med pa'i phyir 'di ltar lag pa la sogs pa yang rnam par dpyad pas rang bzhin med par blta bar bya'o/ / des na lus kyang don dam par cung zad kyang yod pa ma yin te/ gcig dang du ma dang bral bar bstan pa'i phyir ro/ /de ltar na yang skra la sogs pa rnams bdag kyang ma yin la sems kyang ma yin zhing / lus dngos po la ngar 'dzin pa'i yul ma yin no/ /de lta bas na ma rig pas kun nas bslang ba'i bdag nyid kyis bdag la sogs pa la yod pa ma yin yang bdag ces 'jug par 'gyur bas/shes pa ni yul med pa nyid du skye bar 'gyur ro/ /des ni ji skad du/ bdag nyid gang yang yod min pas/ /'jigs par 'gyur ba su zhig yin/ /zhes bas bsgrubs pa yin no//'di dag thams cad kyis lus dran pa nye bar gzhag pa bstan par 'gyur ro/ /gang gsungs pa chos yang dag par sdud pa las/ rigs kyi bu gzhan yang byang chub sems dpa' nyid 'di ltar lus 'di ni rkang pa dang / rkang sor dang / byin pa dang / brla dang / bcu drug mdo dang / lto ba dang / lte ba dang / sgal tshigs dang / snying dang / rtsib logs dang / rtsib ma dang / lag pa dang / lag ngar dang / dpung pa dang / thal gong dang / mjing pa dang / 'gram pa dang / dpral ba dang / mgo bo dang / mgo bo'i thod pa 'dus pa tsam ste las 'byung ba'i byed pas bsags pa/nyon mongs pa dang nye ba'i nyon mongs pa dang / kun tu rtog pa dang rnam par rtog pa tha dad pa brgya stong gi gnas su gyur pa'o/ /'dir rdzas mang po 'dus pa 'di lta ste/ skra dang / spu dang / sen mo dang / so dang / rus pa dang / pags pa dang / sha dang / sha'i phyi dang / rgyus pa dang / tshil dang / zhag dang / chu ser dang / mcher ba dang / gcin dang / phyi sa dang / pho ba dang / long ka dang / khrag dang / snabs dang / mkhris pa dang / rnag dang / mchil ma dang / glad pa dang / glad rgyas rnams te/ de ltar na rdzas mang po 'dus pa yin na 'di la lus zhes ji skad du bya snyam du lus dran pa nye bar 'jog go//de so sor rtog pa na 'di snyam du sems te/ lus 'di ni nam mkha' dang mtshungs so snyam nas de lus la nam mkha' ltar dran pa nye bar 'jog go/ /de thams cad nam mkha' ltar mthong ngo //de lus yongs su shes pa'i phyir yang gang du yang dran pa mi 'jug go/ /rnam par mi 'jug go/ /rnam par mi 'phro'o zhes 'byung ngo / /yang gsungs pa/ lus 'di ni sngon gyi mtha' nas kyang ma 'ongs/ phyi ma'i mtha' yang mi 'pho/ sngon gyi mtha' dang phyi ma'i mtha' las kyang mi gnas te/gzhan du na yang dag pa ma yin pa'i phyin ci log las byung ba byed pa po dang / tshor ba po med pa/ thog ma dang tha ma dang dbus med pa/ rtsa ba gnas pa med pa/ bdag po med pa/ nga yi ba med pa/ yongs su 'dzin pa med pa ste/ tshigs zhes bya ba dang /lus zhes bya ba dang / longs spyod ces bya ba dang / gnas zhes bya ba dang / ro zhes bya ba dang / skye mched ces bya ba ni glo bur gyi tha snyad rnams kyi tha snyad btags pa'o/ /lus 'di ni snying po med pa ste/ pha ma'i khu ba dang / khrag las byung ba'i mi gtsang ba rul pa/rang bzhin gyis dri mi zhim pa/ 'dod chags dang / zhe sdang dang / gti mug las 'jigs pa dang / sgyid lug pa'i rkun pos dkrugs pa/ rtag tu 'jigs pas 'brul ba bral ba/ rnam par 'thor ba/ rnam par 'joms pa'i chos can/ nang tha dad pa brgya stong gi tshang ngo snyam du lus dran pa nye bar 'jog go zhes 'byung ngo //de bzhin du gang gi tshe rnam par dpyad pa na stong pa nyid kyi rang bzhin gyis nam mkha' dang 'dra bar rnam pa thams cad du lus yin na/ de'i tshe log pa nyid kyi dngos po'i de kho na nyid du sgro btags nas/'dod chags la sogs pa bskyed pas byis pa rnams 'khor nye bar 'phel ba yin no zhes bstan pa'i phyir/ de ltar zhes pa la sogs pa gsungs te/ de ltar zhes pa ste brjod pa'i rim pas so/ /rmi lam lta bu ni rmi lam la dmigs pa nyid kyi dngos po la yid mi bde ba'i gnas la su zhig chags par 'gyur te/gang zhig zhen par 'gyur/ 'di yang mtshon pa tsam yin pa'i phyir su zhig zhe sdang bar 'gyur zhing su zhig rmongs par 'gyur zhes kyang rig par bya'o/ /de bzhin du yid bde ba'i gnas rnams la mig dag gis gzugs sna tshogs mthong nas chags pa skye bar 'gyur ro//yid mi bde ba'i gnas rnams la mig dag gis gzugs rnams su mthong nas zhe sdang skye bar 'gyur ro/ /btang snyoms kyi gnas rnams la mig dag gis gzugs rnams mthong nas gti mug skye bar 'gyur//gang de dag yid dang rjes su mi mthun pa med pa'i gzugs dang rjes su mthun par spyod de/ des 'di la chags pa skye bar 'gyur ro/ /yid dang rjes su mi mthun pa'i gzugs rnams la ni mi mthun par spyod de/ des 'di la zhe sdang skye bar 'gyur ro/ / rjes su mthun par yang ma yin/ rjes su mi mthun pa yang ma yin pa rnams la rmongs pas spyod de/ des 'di la gti mug skye bar 'gyur ro/ /de bzhin du sgra la sogs pa rnams la rnam pa gsum du dmigs shing nyams su myong ba sngar bzhin no/ /de la gang dpyod ldan su zhig ces te/shin tu yang mig gi skye mched kyi rang bzhin gyis stong ngo / /des sngon gyi mtha' yang mi dmigs la/ phyi ma'i mtha' yang mi dmigs shing / dbus kyang mi dmigs te/ rang bzhin gyis stong pa'i phyir ro/ /de bzhin du rna ba la sogs pa gzhan la yang rig par bya'o//de bzhin du shin tu yang gzugs kyi skye mched gzugs kyi rang bzhin gyis stong ngo zhes sngar bzhin no/ /de bzhin du sgra la sogs pa yang brjod par bya'o/ /de ltar na dbang po rnams ni sgyu ma lta bu yin la/ yul rnams ni rmi lam lta bu gang gi yin pa de la ji ltar 'dod chags la sogs pa skye bar 'gyur ro//de nyid kyi phyir gsungs pa/ dpyod ldan zhes te/ dpyod pa po mkhas pa de bzhin du 'di yang dag pa ji lta ba bzhin du yang dag pa'i shes rab kyis mthong ba su zhig chags par 'gyur te/ sdang ba'am rmongs par 'gyur/'di yang rmi lam na mthong ba'i yul gyi bzang mo la sogs pa bcom ldan 'das kyis dpe gsungs pa nye bar bstan par bya'o/ /lus med na yang bud med la sogs pa rtogs pas kyang chags par rigs pa ma yin no zhes bstan pa'i phyir/ lus zhes pa la sogs pa gsungs te/kyang gi sgras ni gtan tshigs sdud pa'o/ /gang gi phyir bud med la sogs pa brtags pas chags par mi 'gyur ro/ /gang gi tshe lus 'di ltar brjod pa'i rigs pas med de/ rang bzhin med pa de'i tshe lus med pa'i phyir bud med gang zhig yin te/chags byed ma gang zhig chags par bya ba nyid kyi skyes bu la ji ltar chags par 'gyur/ skyes bu yang gang zhig yin te/ chags pa po gang zhig dga' bar bya ba nyid kyi bud med la chags par 'gyur/ bud med kyang bdag nyid la bud med ces brtags nas pha rol gyi skyes bu la skyes bu zhes chags pa skyed par byed do//de bzhin du skyes bu yang bdag nyid la skyes bu zhes brtags nas/ bud med la bud med ces brtags nas chags pa skyed do/ /lus med na yang bud med la bud med ces yod pa ma yin no//skyes pa la skyes pa yod pa ma yin no/ /gang yang rang bzhin gyis yod pa ma yin te/ bud med yod pa ma yin zhing skyes pa yod pa ma yin no/ /de lta bas na lus po med pa la bud med la sogs par brtags pas byas pa'i chags par rigs pa ma yin no//de ci'i phyir zhe na/ chos thams cad ni mtshan ma dang bral ba'o/ /ji ltar 'di gtsor bstan pa de bzhin du phreng ba dang tsan+dan la sogs pa la yang rig par bya'o/ /de bzhin du zhe sdang dang gti mug gi yul yang ngo / /de skad du yab dang sras mjal ba las bstan te/rgyal po chen po skyes bu gang zag 'di ni khams drug pa/ reg pa'i skye mched drug pa/ yid kyi nye bar 'khor ba bco brgyad pa ste/ skyes bu 'di ni khams drug pa gang smras pa de ci la brten te smras she na/ rgyal po chen po khams drug ni 'di dag go/ / drug gang zhe na/ 'di lta ste/ sa'i khams dang / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams so/ /rgyal po chen po de dag ni khams drug ste/ skyes bu 'di khams drug po zhes gang ngas smras pa de ni de la brten te smras so//skyes bu 'di ni reg pa'i skye mched drug pa'o zhes gang smra ba de ci la brten te smra zhe na/ rgyal po chen po reg pa'i skye mched drug ni 'di dag ste/ drug gang zhe na/ gzugs rnams la blta ba'i phyir mig gi reg pa'i skye mched dang / sgra rnams la nyan pa'i phyir rna ba'i reg pa'i skye mched dang /dri rnams la snom pa'i phyir sna'i reg pa'i skye mched dang / ro rnams la myang ba'i phyir lce'i reg pa'i skye mched dang / reg bya rnams la reg pa'i phyir lus reg pa'i skye mched dang / chos rnams rnam par shes pa'i phyir yid reg pa'i skye mched do/ /rgyal po chen po de dag ni reg pa'i skye mched drug ste/skyes pa 'di ni reg pa'i skye mched drug pa'o zhes gang smras pa de ni de la brten te smras so/ /rgyal po chen po skyes bu 'di ni yid kyi nye bar 'khor ba bco brgyad po zhes gang smras pa de ci la ste smras she na/ rgyal po chen po yid kyi nye bar 'khor ba bco brgyad ni 'di dag ste/bco brgyad gang zhe na/ 'di la mig gis gzugs mthong ba na yid bde ba dang / yid mi bde ba dang / btang snyoms su 'gyur bar gzugs la nye bar spyod do/ /de bzhin du rna ba la sogs pa la yang brjod par bya'o/ /rgyal po chen po bco brgyad po de la gang dag yid bde ba nye bar spyod pa drug dang /gang dag yid mi bde bar nye bar spyod pa drug dang / gang dag btang snyoms su gyur pa nye bar spyod pa drug po de dag gcig tu bsdus nas yid kyi nye bar spyod pa bco brgyad du 'gyur ro/ /rgyal po chen po bco brgyad po de dag ni yid kyi nye bar spyod pa ste/de bzhin du sbyar te/ rgyal po chen po gang gi sa'i khams gang zhe na/ gang ci yang rung ste/ lus 'di la nang gi khang na sra ba dang / mkhrang ba'i rnam pa dang / nye bar 'gyur ba dang / zin pa'o/ /de yang gang zhe na/ 'di lta ste/ skra dang / spu dang / sen mo dang / zhes pa la sogs pa'o//rgyal po chen po phyi rol gyi sa'i khams gang zhe na/ gang ci yang rung ste phyi rol gyi sra ba dang mkhrang ba'i rnam pa dang / nye bar ma gyur pa dang / ma zin pa 'di ni phyi rol gyi sa'i khams zhes bya'o/ /rgyal po chen po de la nang gi sa'i khams 'byung ba'i tshe gang nas kyang mi 'ong / 'gag pa'i tshe gang du yang sogs par mi 'gro'o/ /rgyal po chen po bud med nang du bdag ni bud med do zhes rtog cing / de nang du bud med ces brtags nas phyi rol du skyes pa zhes rtog go/ /de'i phyi rol du skyes pa skyes pa zhes brtags nas chags par 'gyur te/ phyi rol gyi skyes pa dang phrad par 'dod do//skyes pa yang nang du bdag skyes pa zhes rtog ste/ de nang du bdag ni skyes pa zhes brtags nas/ phyi rol du bud med la bud med ces rtog go/ /phyi rol du bud med la bud med ces brtags nas chags par 'gyur te/ phyi rol gyi bud med dang phrad par 'dod do//phrad par 'dod pas phrad par 'gyur ro/ /phrad pa'i rkyen gyis mer mer po skye bar 'gyur ba'i dus de yod do/ /rgyal po chen po gang la kun du brtags pa dang / gang kun du rtog pa de gnyis ka yang med do/ /bud med la ni bud med med do/ /skyes pa la ni skyes pa med do/ / de ltar med cing yang dag pa ma yin par kun du rtog pa skyes te/ kun du rtog pa de yang ngo bo nyid kyis med do/ /kun du rtog pa ji lta ba bzhin du phrad pa dang / mer mer po yang ngo bo nyid kyis med do/ /gang ngo bo nyid kyis med pa de ji ltar sra ba skye bar 'gyur ro/ /rgyal po chen po de ltar kun du rtog pa shes par byas nas sra ba nyid rtogs par bya ste/ci nas sra ba ni skye ba'i tshe gang nas kyang mi 'ong bar shes par bya'o/ /rgyal po chen po 'di ltar gang lus 'di dur khrod kyi mthar 'gyur ba'i dus de yod de/ de'i sra ba de 'jig cing 'gag par 'gyur ba'i tshe shar phyogs su mi 'gro/lho phyogs dang / nub phyogs dang / byang phyogs dang / steng dang / 'og dang / phyogs mtshams rnams su yang mi 'gro ste/ rgyal po chen po nang gi sa'i khams ni de ltar blta'o/ /snga ma bzhin du de la rgyal po chen po de ltar sa'i khams te 'byung ba yang stong /sa'i khams 'jig pa dang / 'byung ba yang ngo bo nyid kyis stong ngo / rgyal po chen po sa'i khams ni tha snyad tsam ma gtogs par sa'i khams nyid mi dmigs te/ tha snyad de yang bud med ma yin/ skyes pa ma yin gyi/ rgyal po chen po de ltar de yang dag pa ji lta ba bzhin gyi shes rab kyis rtogs shig ces gsungs so//des na ci zhig la dpyad par bya ste/ dpyad par bya ba'i yul ma yin no/ /de ci'i phyir zhe na/ chos thams cad ni dpyad pa dang bral ba'o zhes so/ /de ltar lus dran pa nye bar gzhag pa bstan nas/ tshor ba dran pa nye bar gzhag pa bstan pa'i phyir/tshor ba rnam par dpyad pa gsungs so/ /tshor ba ni rnam pa gsum ste/ bde ba'i tshor ba dang / sdug bsngal gyi tshor ba dang / sdug bsngal yang ma yin bde ba yang ma yin pa'i tshor ba'o/ /de la gzugs bzhin du tshor ba yang don dam par yod pa ma yin no/ /ji ltar zhe na/gal te sdug bsngal de bde ba ma yin pa'i myong ba yin la/ de nyid du ste don dam par yod pa yin na de'i tshe rab dga' la mi gnod de/ dga' ba dang ldan pa'i rnams ci'i phyir na sdug bsngal bar mi 'gyur/ bde ba yang gal te don dam par yod na/ de'i tshe mya ngan gdung sogs la ste/sogs pa'i sgras ni 'dod pa dang / 'jigs pa dang / smyos pa la sogs pas gdungs pa la'o/ /zhim sogs ni gal te bde ba yin na'o/ /zhim pa la sogs pa ni ro mchog gi bza' ba dang btung ba la sogs pa'o/ /sogs pa'i sgras ni me tog dang tsan+dan la sogs pa'i bde ba bzung ste/bde ba'i rgyu yin pa'i phyir ro/ /gal te bde ba yin na ci ste dga' bar mi byed/ gal te dngos po yod pa'i rang bzhin no/ /brgya la yang bzlog par spro ba yang ma yin no/ /de lta bas na bde ba dang sdug bsngal myong bar bya ba ni rtogs pas gzhag pa nyid yin no//de brjod pa ni ci ste rab dga' la mi gnod ces so/ /de la gzhan gyis lan 'debs pa ni stobs dang ldan pa zhes smos so/ /rab tu dga' ba'i gnas skabs na/ sdug bsngal rnam pa thams cad du med pa ni ma yin te/ 'on kyang phul du byung ba'i 'jug pa'i bde bas/mi mngon par byas pa las yod kyang nyams su myong ba ma yin no/ /stobs dang ldan pa ni shin tu stobs dang ldan pas so/ /zil mnan phyir ni mngon par zil gyis mnan cing nye bar bcom pas so/ /de gal te yod na yang bde ba myong ba ma yin te/ rig par bya ba ma yin no zhes brjod do//de'i tshe 'di ni rigs pa ma yin no zhes/ gang zhig nyams myong zhes pa la sogs pa smos te/ myong ba nyid ni tshor ba'i rang bzhin nyid do/ /ji ltar te rnam pa gang gis so/ /bde ba bde ba'i gsal ba gang zhig nyams myong bdag nyid min na ste/ gang gis nyams su myong ba'i rang bzhin ma yin na'o//myong bar byed pas myong ba zhes brjod do/ /myong ba ni nyams su myong ba zhes bya ba'i tshig las so/ /gal te yang myong bar bya ba ma yin pa yang myong bar 'gyur na/ de'i tshe cung zad kyang myong ba ma yin pa med par thal bar 'gyur ro/ / 'on te de ltar na yang rnam pa thams cad du ma myong ba ni ma yin te/ 'on kyang nyams su myong ba na yang phra bas nyams su ma myong ba dang 'dra ba yin no zhe na/ sdug bsngal zhes pa la sogs pa smos te/ phra mo nyid de nye bar mtshon pa nyid kyis so/ /sdug bsngal yod cing bdog pa'o//'o na bde ba stobs dang ldan pa 'di la ci zhig bya zhe na/ 'di yi rags pa gsal yin nam/ /zhes te/ rab tu dga' ba'i gnas skabs na rab tu 'jug pa'o/ /stobs dang ldan pa'i bde bas rags shing stobs dang ldan pas sdug bsngal 'di bsal zhing zil gyis mnan pa ma yin nam zhes pa ni gzhan la 'bod pa'o//kye gal te khyod de ltar 'dod na/ phra ba zhes bya ba'i sdug bsngal bde ba nyams su myong ba'i dus na/ cung zhig kyang dmigs pa ma yin te/ des na ci zhig de'i phra ba yin zhes brjod par bya zhe na/ 'on te/ de ni de las gzhan dga' tsam/ /zhes te/ de las ni phul du byung ba'i bde ba las so/ /gzhan dga' tsam ni gnyis pa bde ba tsam ste/ shin tu chung ba'i bde ba'i cha tsam du gyur pa ste/ sdug bsngal phra bar 'gyur ro zhes gal te mngon par 'dod do zhe na/ ci ste de'ang de'i phra nyid de/gzhan rab tu dga' ba tsam bde ba 'di'i phra ba tsam yin na sdug bsngal ba ma yin te/ dga' ba bde ba'i rigs yin pa'i phyir ro/ /de'i phyir sdug bsngal gyi phra ba nyid ni bde ba myong ba'i rang bzhin gyi dus na med do zhes nges pa yin no/ /de ltar na yang sdug bsngal ni brtags pas glo bur ba yin te/'di ltar rgyu ma tshang ba'i phyir/ brgya la dmigs pa ma yin no zhes pa'o/ /'dir gal te 'gal rkyen zhes pa la sogs pa smos te/ sdug bsngal dang 'gal ba'i bde ba'i rkyen ni rgyu ste gang rig pa'o/ /des skyes pas te/ mngon par phyogs pa yod pa na'o//yang na 'gal ba'i rkyen bde ba'i rgyu skyes shing skye ba na'am/ 'gal ba'i rkyen gang gi yin pa zhes pa'o/ /de skyes pa na yang ste rab tu dga' ba'i gnas skabs na rgyu dang bral ba'i phyir sdug bsngal mi skye ba ni sdug bsngal ma skyes par brjod do zhe na/ de'i tshe rtog pas mngon par zhen pa nyid kyi tshor ba zhes pa 'ongs pa nyid ma yin nam/ci ste gang de nyid ni kho bo cag gis brjod pa de nyid da ltar grub cing 'ongs pa yin te/ ci zhig rtog pas mngon par zhen cing rtog pas byas pa'i mngon par zhen par byed/ nyid ces pa ni nges par gzung ba'i don te/de nyid tshor ba bde ba dang / sdug bsngal dang / de dag las gzhan pa yin te/ gzhan dngos po'i bde ba la sogs pa'am/ bde ba la sogs pa'i rgyu yod pa ma yin no/ /'di ltar yang gnyug ma'i rang bzhin dang bral ba na yang gang zhig bde ba'i rgyu nyid du yongs su brtags pa de mngon par zhen pa las bde ba myong ngo zhes skye bar 'gyur te/gzhan 'di las gzhan no/ /gzhan du na ji ltar gang nyid gzhan sdug bsngal gyis sgrub par byed pa de nyid gzhan bde 'ga' zhig gis sgrub par byed par 'gyur/ gcig po de'i gang zhig sgra thos pa las kyang sdug bsngal du 'gyur na yang dus gzhan du mthong ba las dga' ba'i ngo bo skye bar 'gyur te/de lta bas na bde ba la sogs pa dang / de'i sgrub pa'i thabs ni brtags pa yin te/ dngos po pa ma yin no zhes gsungs pa yin te/ sbrul ni rma bya'i bde ba'i ched du skye 'gyur te//dug la goms dang ldan pas dug ni bcud len yin/ /tshor bas rnga mo'i kha yi zug rngu ni/ /dga' ba'i khyad par gyi ni rgyu ru 'gyur/ /zhes so/ /tshor bar mngon par zhen pa'i rang bzhin yin pas rnam par dpyad pa nyid kyis ldog nus so zhes bstan pa'i phyir/de nyid phyir na zhes pa la sogs pa gsungs te/ gang nyid kyi phyir tshor ba mngon par zhen pa de nyid kyi phyir rnam par dpyod pa 'di ni rnam par rtog pa 'di yin la/ bde ba la sogs pa mngon par zhen pa'i ngo bo 'di'i gnyen po ste/ 'gal 'gegs kyi rgyu yin pa'i phyir ro//bsgom pa ni sems par byed pa yin la/ de'i sgrub par byed pa med na de'i mngon par zhen pa med pa'i phyir ro/ /gzhan yang 'dis kyang tshor ba mngon par zhen pa yin no zhes bstan pa'i phyir/ rnam rtog ces pa la sogs pa gsungs te/ de nyid kyi phyir zhes pa ni 'dir yang 'brel to//rnam par rtog pa nyid zhing yin te/ skye ba'i sa yin pa'i phyir ro/ /der skyes pa ni yang dag par byung ba'o/ /bsam gtan ni 'dod pa dang bral ba dang / sdig pa mi dge ba'i chos rnams dang bral bas rtog pa dang bcas pa dang dpyod pa dang bcas pa dang /ting nge 'dzin las byung ba'i dga' ba dang bde ba zhes pa la sogs pa'i bsam gtan ni bsgom pa yin no/ /ting nge 'dzin ni snyoms par 'jug pa yin no/ /rnam par rtog pa las byung ba yin pa'i phyir ro/ /de nyid zas yin la lus tshim par byed pa'i rgyu yin pa'i phyir te/gang rnams kyi de dag yin pa de la de skad ces bya'o/ /gang rnams kyis she na/ rnal 'byor pa'i ste/ 'di ni gang gi phyir te/ rtog pas sprul pa'i dga' ba dang bde ba'i zas kyis gzung ba'i lus ni rnal 'byor pa'i yin no//de lta bas na tshor ba ni rtog pa'i mngon par zhen pa yin no zhes grub po/ /de ltar rgyu khas blangs nas tshor bar mngon par zhen pa bstan pa'i phyir ni rgyu nyid mi srid pa'i phyir tshor ba dngos po la yod pa nyid du mi rigs par bstan pa'i phyir ro/ /gang gi dbang don zhes bya ba la sogs pa gsungs te/'dir bsdus pa'i don ni 'di yin te/ reg pa'i rkyen gyis tshor ba yin la/ yul dang dbang po dang rnam par shes pa gsum po dag 'dus pa ni reg pa yin te/ reg pa drug 'dus pa las byung zhes pa'i tshig las so/ /gsum 'dus pa las byung ba'i reg pa nyid de yang rigs pa ma yin la/de'i rkyen gyis tshor ba gang las 'gyur/ 'dir yang dbang don bar dang bcas par 'gyur ba'am/ de bar med par 'gyur ba yin/ de la dbang po dang yul te dbang po dang yul dag par dang bcas pa ste/ bar dang bcas pa gal te yin na de'i tshe phrad pa ste/'dus shing tshogs pa gang las 'gyur/ dbang po dang don 'di dag phrad par rigs pa ma yin te/ reg pa yang 'dus pa la brjod la bar chod pa yin na yang der ji ltar 'gyur zhes dgongs pa yin no/ /'on te gnyis pa'i rnam pa yin na de yang rigs pa ma yin no zhes bstan pa'i phyir/bar med na yang zhes pa la sogs pa gsungs te/ bar med na yang bar chad pa med pa yin pas gcig nyid yin te/ dbang po dang yul dag de'i bdag nyid yin no/ /cha chung zhig gis kyang gal te chod pa ma yin na de lta na yang bdag nyid thams cad kyis bar med par 'gyur ro//bdag nyid thams cad kyis der 'dus pa yin na yang de nyid yin no/ /de ltar na yang gang zhig gang dang phrad par 'gyur te/ gcig yin na tha dad pa med pa'i phyir/ gang zhig gang dang phrad par 'gyur/ bdag nyid bdag dang phrad pa ni rigs pa ma yin no/ /de ltar na yang rdul phra rab rnams cha shas med pa nyid dngos po la phrad pa yin la/ de la cha shas dang ldan pa'i phrad pa ma yin te/ rags pa nyid la de srid pa'i phyir ro/ /de la yang phrad pa sun phyung ba nyid kyis cung zad cig sun phyung ba ma yin no zhe na/'di la rdul phran zhes pa la sogs pa gsungs te/ rdul phra rab rnams la yang 'di ltar phrad par rigs pa ma yin te/ gang gi phyir rdul phra rab gcig kyang rdul phra rab gzhan la 'jug pa med de/ nang du 'jug pa yod pa ma yin no/ /ci'i phyir zhe na/de ni gang gi phyir te/ skabs med cing rdul phra rab la mtshams med pa'o/ /mnyam pa de mtshungs pa yin te/ mtho ba dang dma' ba med pa'i phyir ro/ /de'i phyir ji ltar cha med pa la phrad pa yod do/ /de ltar yin na yang rdul phra rab rdul phra rab la 'jug par ma gyur mod/phrad pa tsam 'ba' zhig ni yod pa yin te/ de lta bas na bsgrub bya grub pa ma yin no zhe na/ ma zhugs zhes pa la sogs pa gsungs te/ rdul phra rab ni bdag nyid thams cad kyis 'brel pa ni phrad pa yin te/ gzhan du na cha shas dang bcas par thal bar 'gyur ba'i phyir ro//de ltar na yang de'i rang bzhin bdag nyid thams cad kyis khyab pa yin te/ de ltar na de'i rang bzhin ma 'dres pa la phrad pa med par 'gyur ro/ /de la 'dres pa nyid ni de la zhugs pa med par 'gyur ba ma yin no/ /'dir ma zhugs shing zhugs pa med pa yin na 'dres pa ma yin la/tha dad pa'i rang bzhin ma yin na/ ma 'dres pa la ste 'dres pa med pa la phrad cing tshogs pa ma yin no/ /cha med pa yang rnam pa thams cad du phrad par rigs pa ma yin no zhes bstan pa'i phyir/ cha med pa'ang zhes pa la sogs pa gsungs te/cha med pa ni stong pa nyid kyi dngos po yin la'ang zhes pa ni nyes pa'i gzhan sogs pa yin no/ /phrad pa ni tshogs pa zhes bya ba yin la/ de ji ltar 'thad par 'gyur te zhes smos pa ni srid pa'i tshig ste/ ji ltar phrad par rig par 'gyur/ phra ba thams cad kyang nges par cha gcig gi sgo nas 'gyur bar bya'o//yang gang la cha med pa nyid de'i lus kyi cha med pa las med pa nyid thob bo zhes dgongs so/ /'di la cha tsam yang tshad mas rtogs pa gang na yang yod pa ma yin no zhes bstan pa'i phyir/ rnam shes lus med pa zhes pa la sogs pa gsungs te/ni zhes pa ni shin tu bsgrub pa ste/ rnam par shes pa ni yul rnam par rig pa yin la/ yang phrad par 'thad pa ma yin te/ rigs pa ma yin no/ /ci'i phyir zhe na/ lus med pa'i phyir zhes te/ 'di gtan tshigs kyi tshig yin la/lus kyis stong pa'i rnam par shes pa ni ste/ lus med pa'i phyir zhes pa'i don to/ /phan tshun 'brel pa nyid ni phrad pa yin la/ de yang lus dang ldan pa nyid la yod do/ /gang la yang lus med pa de la ji ltar phrad par 'gyur/ de ltar na gsum ka la yang phrad pa bkag nas/da ni tshogs pa nyid dngos po la yod pa ma yin no zhes bstan pa'i phyir/ tshogs pa zhes pa la sogs pa gsungs te/ 'ang gi sgras ni nyes pa gzhan sdud pa yin la/ tshogs pa 'ang ste 'dus pa yang ngo / /rta'i rwa bzhin du dngos po med pa'i phyir te/dngos po de kho na nyid dang bral ba'i phyir phrad pa nyid du rigs pa ma yin no zhes rang bzhin dang 'brel te tshogs pa nyid med pa'i phyir ro/ /ji ltar yang dngos po med pa nyid yin zhe na/ sngar ni ji ltar rnam dpyad bzhin/ /zhes te/ ji ltar sngar gtan la phab pa bzhin yin te/de bzhin sor mo'i tshogs nyid ces pa la sogs pa gsungs so/ /rgyu med pa nyid mjug bsdu ba'i phyir/ de ltar zhes pa la sogs pa gsungs te/ de lta bas na bstan pa'i rim pas reg pa yod min te/ gsum 'dus pa med pa na tshor ba med pa yin la/tshor ba ni bde ba la sogs pa'i ngo bo yin te/ 'byung ba ni skye ba yin la/ de gang las rigs par 'gyur ba yin te/ rgyu med pa na 'bras bu srid pa ma yin no/ /de'i phyir don dam par tshor ba med par phan pa dang phan pa ma yin pa'i yul med pa'i phyir ci'i don du ngal ba 'di yin/bde ba dang sdug bsngal spang ba'i ched don dag tu ngal ba byed pa yin na/ de ci'i phyir/ nam mkha' ldang ba'i don bzhin du rigs pa ma yin zhes dgongs so/ /bde ba bsgrub pa'i ched du ngal bar ma gyur mod/ sdug bsngal shin tu bzod par mi nus pa'i phyir ro//de spang ba'i don du 'gyur ro zhe na/ gang las gang la gnod par 'gyur/ /zhes gsungs te/ tshor ba rnam par dpyad pas rang bzhin med pa'i phyir ji ltar gnod pa'i yin te rnam par dpyad pas so/ /bdag la sogs pa sngar bsal ba'i phyir tshor ba po med pa'i yin no//dgod par byed pa'i rgyu yang rnam par rtog pas brtags pa'i phyir don dam par yod pa'i ma yin no/ /de'i phyir de ltar na gang gis gnod par 'gyur te/ sdug bsngal gyi tshor ba dang bral ba'i phyir gnod par byed pa'i rgyu dang bral ba'i phyir gang las 'gyur te/don dam par gang gi yang gang las kyang 'gyur ba ma yin no/ /de lta bas na tshor ba po med pa'i phyir tshor ba yang rigs pa ma yin no/ /de ni tshor ba med pa'i phyir de'i rkyen las byung ba'i sred pa yang rgyu dang bral ba'i phyir don dam par skye bar rigs pa ma yin no zhes bstan pa'i phyir/gang gi tshe zhes pa la sogs pa gsungs te/ gang gi tshor ba myong ba de ni tshor ba po yin la/ gang gi tshe bdag la sogs pa cung zad kyang yod pa ma yin te/ de med pa'i phyir dang / de ma thag tu dpyad zin pa'i phyir tshor ba yod pa ma yin la/ de'i tshe gnas skabs 'di lta ste/rnam pa 'di lta bu la'o/ /gang gi skye ba dang bral ba mthong nas ste/ dmigs nas sred pa ci'i phyir ldog mi 'gyur te/ de'i sdug bsngal bas sdug bsngal bar 'gyur na yang / ltos pa med pa nyid du ci'i phyir ldog par mi 'gyur/ gang zhig da ltar yang de dang bdag bral zhing ldog pa nyid du ci ste dor bar mi byed/de ltar gyur na yang gal te tshor bar byed pa po med par tshor ba yang med pa yin na/ gang gis na 'di ltar bde ba sgrub par byed pa nyid kyis dngos po rnams la mthong ba la sogs pa'i tha snyad 'jug par 'gyur zhe na/'di la mthong ba zhes pa la sogs pa gsungs te/ mthong ba yang gang mig gi dbang pos so/ /reg pa yang lus kyi dbang po las skyes pa'i sems kyis shes pas so/ /gal te de ltar na sems kyis tshor ba po dngos po la yod do zhe na/rmi lam sgyu 'dra'i bdag nyid kyis/ /zhes gsungs te/ rang bzhin gyis rmi lam lta bu yin la/ rang bzhin gyis sgyu ma lta bu yin no/ /rten cing 'brel par 'byung ba las skyes pa'i sems nyid kyis yin gyi/ don dam par yod pa ma yin no/ /lan 'ga' yang de las tha dad pa sems kyis mthong ba ni ma yin la/lhan cig skyes pa'i phyir te/ sems dang lhan cig skyes pa nyid du de mthong ba yin te/ tshogs pa gcig la 'brel pa'i phyir dang / rten cing 'brel par 'byung ba bsam gyis mi khyab pa'i phyir ro/ / don dam par mthong ba ni yod pa ni ma yin la/ gang gis 'di ltar mthong ba'i tha snyad du 'gyur ba/ tshor ba de yis mthong ba ma yin te/ gang gis bde ba sgrub par byed pa la sogs pa'i tha snyad mthong ba yang gzhan nyid yin pa'i rgyu des na tshor ba mthong ba ma yin te/ dngos po la mthong ba ma yin no//'on te de ltar na yang lhan cig skyes pa mthong ba ma yin la/ 'on kyang shes pa yul gyi rnam pa can gyis de skye bar 'gyur ba dus phyi ma la 'dzin par brjod do zhe na/ 'di sun dbyung ba'i don du sngar dang shes pa la sogs pa gsungs te/ nges par lhan cig tu skyes pa'i tshor ba yin te/gzhan du na sngar te sngar byung ba dang / phyi mar te phyis kyi dus kyi yin la/ skyes pa ste byung ba'i shes pa des dran par 'gyur gyi myong ba ma yin te/ myong ba ma yin la dran pa'i ngo bos yul du byed pa yin la mngon sum du rigs pa ma yin te/ shes pa de'i dus na de 'das pa'i phyir ro//'das pa'i ni rang gi ngo bo myong bar rigs pa ma yin te/ med pa nyid yin pa'i phyir ro/ /myong ba ni rang gi ngo bo nyams su myong ba yin te/ de lta bas na 'di ni dran pa tsam yin la/ de la rang gi ngo bo myong ba ni rigs pa ma yin no/ /tshor ba ni rang gi ngo bo rnam par 'jog par byed pa'i mtshan nyid du rigs pa ma yin no zhes bstan pa'i phyir/rang gi bdag nyid ces pa la sogs pa gsungs te/ rang gi bdag nyid de rang gi ngo bo yin la/ myong min la ste/ rig pa ma yin te/ rang rig pa sngar sun phyung ba'i phyir ro/ /de ltar na shes pa gzhan des tshor ba myong ba yin no zhes/gzhan dag gis kyang myong ba ma yin zhes gsungs te/ gzhan nyid kyis ni ma yin te/ de dang mtshungs pa'i dus dus su byung ba'i zhes pas myong ba ma yin zhing rig pa ma yin te/ shes pa bzhin shes pa gzhan gyis myong ba med pa'i phyir ro//tshor ba po yang yod pa ma yin te/ gang la zhe na/ tshor ba cung zad kyang ma myong ba las te/ sems sam gzhan gyis myong ba tshor ba po 'ga' yang yod pa ma yin no/ /des na rgyu 'dir tshor ba med pa yin te/ tshor ba'i mtshan nyid kyis stong pa'i phyir ro/ /mngon par zhen pa las ma gtogs pa tshor ba 'dir de kho na nyid du yod pa ma yin la/don dam par yod pa ma yin no/ /de'i rang bzhin ngo bo rtogs par byed pa cung zad kyang yod pa ma yin pa'i phyir ro/ /de skad du 'phags pa blo gros mi zad pa'i mdo las/ 'on kyang yang tshor ba ni mngon par zhen pa'o//tshor ba ni yongs su 'dzin pa'o/ /tshor ba ni nye bar len pa'o/ /tshor ba ni dmigs pa'o/ /tshor ba ni rnam par rtog pa'o zhes bya ba la sogs pa gsungs so/ /chos yang dag par bsdu ba'i mdo las kyang gsungs te/ tshor ba myong ba rab bstan pa//tshor ba po las tshor ba gzhan/ /gud na yod pa ma yin na/ /gang gis de ni tshor bar 'gyur/ /byang chub ci 'dra de bzhin du/ /zhi zhing dag la 'od gsal bar/ /tshor ba 'di la mkhas pa rnams/ /dran pa de 'dra nye bar gzhag /ces gsungs so/ / de lta bas na tshor ba po dang / tshor ba'i rang bzhin stong pa nyid yin la/ ci de lta bas na rten cing 'brel par 'byung ba yin la bya ba med pa yin zhing / bdag po med pa sgyu ma spros pa bzhin du dmigs pa'i spyod yul du gyur pa'i lus 'di snang ngo / /de'i phyir bde ba'am sdug bsngal bdag gir 'gyur ba yod pa ma yin no zhes bstan pa'i phyir/de ltar bdag med ces pa la sogs pa gsungs te/ bdag med pa la gang gi yang bdag la sogs pa'i rigs pa po med pas bdag po med pa'i tshogs 'di la gcig rjes su 'gro ba med pa'i phyir rten cing 'brel par 'byung ba tsam 'di la sgyu ma'i rang bzhin dang 'dra ba/dmigs pa'i spyod yul du nye bar gyur pa nyid mig 'phrul bzhin du mthong ba na/ rmad du 'byung ba smra ba ni/ 'di ci ste gnod par bya zhes te/ 'dis ji ltar brjod pa'i rim pas myong ba po 'ga' yang med pa dang /tshor ba yang 'ga' yang med na/ don dam par tshor ba 'dis gang la gnod par bya ste/ sdug bsngal bar bya la/ rnam par dpyad na cung zad kyang ma yin no/ /de lta bas na 'di ni phyin ci log gi rnam par rtog pa nyid kyis bde ba la sogs pa'i sgrub par byed par zhen pa yin no//de ltar na 'di ni tshor ba dran pa nye bar gzhag pa bstan pa yin no/ /da ni sems dran pa nye bar gzhag pa bstan pa'i phyir/ yid ni dbang rnams zhes pa la sogs pa gsungs te/ de la drug po'i mtha' yid kyi rnam par shes pa la rtog par mdzad pa yin te/'di ltar yang gang na yid kyi rnam par shes pa 'di nye bar gnas par 'gyur te/ de la re zhig dbang po rnams te/ mig la sogs pa rnams la yid gnas shing / nye bar gnas par 'gyur ba ma yin no/ /gzugs la sogs pa'i yul rnams la yid nye bar gnas pa ma yin la/bar na'ang ma yin te dbang po dang yul gyi bar te/ dbus na yang gnas pa ma yin te/ gcig tu yang nges pa'i rang bzhin ma yin pa'i phyir ro/ /nang yang sems min phyi min zhing / /zhes te/ nang ste lus kyi dbus na sems ma yin zhing / phyi min te phyi rol gyi lus kyi yan lag rnams la yang sems rnyed pa ma yin no/ /gzhan du yang ni rnyed ma yin/ /zhes brjod ma thag pa'i gnas rnams las yul gzhan 'ga' zhig tu yang ma yin no/ /gang du ma rnyed pa na/ rnam par brtags pa thob pa ma yin no/ / de bzhin du nang du ji zhig ltar 'gyur ba yin no/ /de ltar na ji ltar de dgag par byed ce na/ gang zhig lus min zhes pa la sogs pa gsungs te/ sems gang zhig lus ma yin te/ phyi rol dang nang gi lus la ma yin no/ /gzhan du yang ma yin te/ lus las gzhan phyi rol gyi dngos po la yang ma yin no//'dres min zhes pa ni bya ba'i bye brag go/ /nang dang phyi'i bdag nyid gnyis po dang 'dris pa la yang gnas pa ma yin no/ /sems gang zhig gsum po la sogs su ma yin no/ /tha dad pa yang ma yin no/ /rang dbang can yang 'ga' yang gnas pa med de/sems gang zhig don dam par cung zad kyang yod pa ma yin no/ /'di dngos por yod pa ma yin te/ rtog pas brtags pa nyid yin no/ /'khor ba ji srid du sems sgyu ma dang 'dra bar rab tu snang ba yin te/ rang bzhin med pa'i phyir ro/ / de'i phyir zhes te/ rgyu des na sems dang srog rnams rang gi ngo bo nyid kyis mya ngan las 'das pa yin la/ yongs su grol ba'i rang bzhin yin zhing / rang bzhin med pa'i mtshan nyid rang bzhin gyis mya ngan las 'das pa sems can thams cad kyi rgyud la rtag tu yod pa'i phyir ro//rang nyid ni bden pa ma yin yang yang dag pa ma yin pa'i rnam par rtog pa'i dbang gis bden par sgro btags nas nyon mongs pa'i bag chags kyis nyams par byas pa'i sems kyi rgyud rnams 'khor ba'i btson rar 'gal bar bkag pas rang dbang du 'jug pa rnams yongs su ma grol bar brjod de/don dam par ni ma yin no/ /'di ltar yid rnam par dpyad kyang mig la sogs pa'i rnam par shes pa rnams dpyad pa'i ched du/ shes bya las zhes pa la sogs pa gsungs te/ 'di ltar yang shes pa ni gang du yang yod pa dang med pa'i dngos po gnas pa ma yin la/'on kyang mig la sogs pa'i tshogs pa'i rkyen las byung ba'i gzugs la sogs pa shes bya'i 'dzin pa por brjod do/ /de ltar gzhan gyi bsam pa dogs par byas nas rtogs par mdzad do/ /de yang shes par bya ba las sngar 'gyur ram/ shes bya dang dus mtshungs pa'am/ shes bya las phyis 'gyur ba yin zhes so/ /de la gal te rnam par rtog pa dang po yin na de la gsungs pa shes bya la ste gzung bar bya ba'i lus las/ sngar te snga ma nyid du shes bya ma skyes pa nyid na gal te shes pa skyes par brjod nas/de'i tshe de ni ci la dmigs te skyes/ sngar shes bya dmigs pa med par ci la dmigs pas te/ ci la brten nas 'byung zhing skye bar 'gyur/ phyogs gnyis pa la brten te gsungs pa/ shes bya ste gzung bar bya ba'i yul dang lhan cig ste/ dus mtshungs par gal te shes pa yin na/de ni ci la dmigs te 'di skye bar 'gyur te/ dus mtshungs pa'i shes par bya ba ni rgyu ma yin pa nyid de/ dmigs pa'i ma yin pa'i phyir yul ni rgyu ma yin zhes pa'i tshig las so/ /rnam pa gsum pa khas len na/ 'on te shes bya zhes pa la sogs pa gsungs te/'on te zhes pa ni 'dri ba yin la/ shes las zhes pa ni sngar gyi shes pa'o/ /phyis zhes pa ni de'i rjes la yin te/ shes bya 'gags pa'i dus la shes pa skye zhing 'byung bar 'gyur na/ de'i tshe shes pa gang las skyes te/ shes pa'i dus na shes bya 'gags pa'i phyir gang la dmigs nas shes par 'gyur te/gang la brten nas skye bar 'gyur/ de lta bas na yul la sogs pa'i tshogs pa las kyang shes pa don dam par mi 'grub bo/ /sems dran pa nye bar gzhag pa 'di ni dkon mchog brtsegs pa las ji skad du gsungs pa lta bu ste/de 'di ltar sems yongs su tshol te/ 'dod chags par gyur pa'am/ zhe sdang bar 'gyur ba'am/ gti mug par 'gyur ba'i sems de gang yin ci 'das pa'am/ ma 'ongs pa'am/ da ltar byung ba zhig yin nam/ de la sems 'das pa gang yin pa de ni zad pa'o//ma 'ongs pa gang yin pa de ni ma phyin pa'o/ /da ltar byung ba ni gnas med do snyam mo/ /'od srungs sems ni nang na yang med/ phyi rol na yang med/ gnyis ka na med pa la yang mi dmigs so/ /'od srungs sems ni dpyad du med pa/bstan du med pa/ rten ma yin pa/ snang ba med pa/ rnam par rig pa med pa gnas pa med pa'o/ /'od srungs sems ni sangs rgyas thams cad kyis kyang ma gzigs mi gzigs gzigs par mi 'gyur ro/ /log par zhugs pa'i 'du shes las chos rnams 'byung ba ma gtogs par sangs rgyas thams cad kyis kyang ma gzigs/mi gzigs/ gzigs par mi 'gyur ba gang yin pa de'i rgyu ba ci 'dra bar rig par bya zhe na/ 'od srungs sems ni sgyu ma dang mtshungs te/ yang dag pa ma yin pa kun du brtags pas skye ba rnam pa mang po yongs su 'dzin to//'od srungs 'bab chu'i rgyun dang mtshungs te/ mi gnas pa skyes nas 'jig cing 'jug pa'o/ /'od srungs sems rlung dang mtshungs te/ ring du 'gro zhing gzung du med par rlung rgyu ba'o/ /'od srungs sems ni mar me'i 'phro ba dang mtshungs te/rgyu dang rkyen las byung ba'o/ /'od srungs sems ni nam mkha' dang mtshungs te/ nye ba'i nyon mongs pa glo bur ba rnams kyis nye bar nyon mongs pa'o/ /'od srungs sems ni glog dang mtshungs te/ skad cig tu 'dzin cing mi gnas pa'o/ /de bzhin du sbyar te/'od srungs sems ni kun du btsal na mi rnyed do/ /gang mi rnyed pa de ni mi dmigs pa'o/ /gang mi dmigs pa de ni 'das pa yang ma yin/ ma 'ongs pa yang ma yin/ da ltar byung ba yang ma yin pa de ni dus gsum las yang dag par 'das pa'o/ /gang dus gsum las yang dag par 'das pa de ni yod pa yang ma yin/med pa yang ma yin no zhes bya ba la sogs pa 'byung ngo / /de ltar sems dran pa nye bar gzhag pa bstan nas/ chos dran pa nye bar gzhag pa bstan pa'i phyir/ brjod pa'i rim pas sbyar bar gsungs pa/ de ltar na yang zhes pa la sogs pa gsungs te/'ang gi sgra ni kho na'i don te/ 'di ltar kho nar ji ltar brjod pa'i tshul gyis chos kun te/ dngos po thams cad skye zhing 'byung bar rig par bya ba ma yin te/ rtogs pa ma yin no/ /de rnams kyang rang gi rgyu las sngar ram/ dus mtshungs pa'am/ phyi nas skye ba la skyon 'di nyid yin par ji ltar srid pa bzlog par bya'o/ /skye ba dang bral ba'i phyir 'gag pa yang rigs pa ma yin te/ ma skyes pa las skye ba mi rigs pa'i phyir ro/ /'di nyid kyi phyir/ ma skyes pa dang ma 'gags pa'i rang bzhin nyid kyis spros pa dang bral ba'i phyir chos thams cad kyi rnam par thar pa'i sgo dang /chos kyi dbyings su nges pa/ nam mkha'i khams kyi mthas gtugs pa/ ma brtags pa/ tha snyad dang bral ba/ brjod du med pa/ brjod par bya ba ma yin pa zhes brjod do//de ltar chos dran pa nye bar gzhag pa brjod pa chos thams cad la zhen pa med par skye bar 'gyur ro/ /chos thams cad dran pa nye bar gzhag pa bsgom pa yang / 'phags pa blo gros mi zad pa'i mdo las ji skad gsungs pa lta bu ste/ byang chub sems dpa' chos la chos kyi rjes su lta zhing gnas pa gang la sangs rgyas kyi chos med pa dang /gang la byang chub med pa dang / gang la lam med pa dang / gang la thar pa med pa dang / gang las 'byung ba med pa'i chos de gang yang mi mthong ngo / /des chos thams cad 'byung ba shes nas sems can rnams la sgrib pa med par shes par bya ba'i phyir snying rje chen po'i ting nge 'dzin gyi sgo thob par 'gyur ro//des chos thams cad dang / nyon mongs pa thams cad la yang sgyu mar 'du shes pa thob ste/ chos 'di dag ni nyon mongs pa med pa 'di dag ni nyon mongs pa dang bcas pa ma yin pa'o//de ci'i phyir zhe na/ 'di ltar de dag ni nges pa'i don gyi don la brten te nyon mongs pa'i tshogs kyang med/ phung por gyur pa yang med/ 'dod chags kyi dngos po yang med/ zhe sdang gi dngos po yang med/ gti mug gi dngos po med kyi nyon mongs pa 'di dag rtogs pa'i phyir byang chub ste/nyon mongs pa'i ngo bo nyid gang yin pa byang chub kyi ngo bo nyid kyang de bzhin no zhes de ltar dran pa nye bar 'jog go zhes 'byung ngo / /de skad du yang / gang las skye ba yod min nyid/ /de la myang 'das ga la yod/ /'gro ba sgyu mar gsal ba'i phyir//dang po nas gzhi 'bad med par/ /gang zhig rten cing 'brel par 'byung / /de la khyod ni stong nyid bzhed/ /de bzhin du ni dam chos te/ /de dang mtshungs pa de bzhin gshegs/ /de ni de nyid don med pa'ang / /de bzhin nyid kyi rdzas su bzhed/ / yang dag de ni mi slu la/ /de rtogs pa ni sangs rgyas brjod/ /ces gsungs so/ /de ltar chos dran pa nye bar gzhag pa bstan pas/ /chos thams cad ma skyes shing ma 'gags par bstan pa yin la/ de ltar na yang kun rdzob kyi bden pa mi 'thad par 'gyur te/ de'i phyir bden pa gnyis kyi rnam par gzhag pa mi 'thad do zhes yongs su spang bar 'dod nas/rgol ba nye bar dgod pa na/ gal te de ltar zhes pa la sogs pa smos te/ gal te don dam par chos thams cad ma skyes pa dang / ma 'gags pa'i rang bzhin yin na de lta na yang kun rdzob med de/yod pa ma yin la tha snyad med par 'gyur zhing don dam pa'i bden pa gcig nyid du 'gyur ro/ /de'i phyir kun rdzob med pas na bden pa gnyis te/ kun rdzob kyi bden pa dang / don dam pa'i bden pa yang ngo / /gang brjod pa/ kun rdzob dang ni don dam yang //'di ni bden pa gnyis su bzhed/ /ces so/ /de la bden pa gnyis po 'di ga la yod de/ 'di ltar mi 'gyur ro/ /de med pas kyang 'jig rten pha rol du 'gro ba'i las dang bya ba'i 'bras bu dang 'brel ba'i rang bzhin nye bar sogs pa la sogs par mi 'gyur te/ tha snyad thams cad med pa'i phyir ro/ /'on te de ltar na gal te med na yang de bzhin du/ smig rgyu la chur gtogs pa nyid kyis kun rdzob kyi rang bzhin gyis rnam par rtog pa'i blos rnam par gzhag pa yin te/ de'i phyir bden pa gnyis 'thad pa yin no zhes dogs pa la/ brjod pa 'on te de yang zhes pa la sogs pa ste/'on te zhes pa ni 'dri ba yin la/ de yang zhes pa ni kun rdzob yin te/ gcig tu don dam pa'i bden pa ni ma yin no zhes pa ni yang gi don to/ /gzhan kun rdzob kyi rnam par rtog pa'i ngo bos rnam par 'jog na'o/ /yang na yang gi sgra ni nges par gzung ba dang /rim pa tha dad pa nyid yin la/ gzhan nyid kyis kun rdzob ces sbyar bar bya'o/ /de ltar na gcig bsgrubs na gzhan nyams par 'gyur ba yin zhes bstan pa'i phyir/ sems can mya ngan ga la 'da'/ /zhes gsungs te/ gal te don dam par de'i rang bzhin gyis stong yang blo'i yul du byas pa'i phyir kun rdzob tu brjod na gang zhig 'di ltar chos thams cad rang bzhin med pa'i mtshan nyid don dam pa'i bden pa mi dmigs pa'i sbyor bas rtogs na spros pa thams cad dang bral ba'i phyir mya ngan las 'das pa thob par 'gyur na/de yang sems can yongs su mya ngan las 'das shing yongs su grol ba gang las 'gyur te ma yin pa nyid de/ de yang blo'i yul du byas pa'i phyir la/ blo yang thams cad nyid du kun rdzob kyi rnam par rtog pa'i rang bzhin yin pa'i phyir te/ blo ni kun rdzob nyid du brjod/ /ces gsungs pa'i phyir mya ngan las 'das pa yang kun rdzob tu 'gyur ro zhe na/'di la lan/ de ni gzhan sems zhes pa la sogs pa gsungs te/ gzhan ni mya ngan las 'das pa'i sems can las gzhan pa sems can gyi sems de'i rnam par rtog pa ni de yin te/ gang zhig mya ngan las 'das pa blo'i yul du byas pa yin la/gzhan gyi sems kyi rnam par rtog pas gzhan kun rdzob tu brjod pa ni ma yin no/ /de lta bas na gzhan gyi blo'i yul du byas nas/ yang 'di ni mya ngan las 'das pa nyid yin no/ /ci'i phyir zhe na/ gang gi phyir de ni rang gi kun rdzob min zhes te/snga ma las khyad par byas pa rang gi kun rdzob ste/ gnyug ma'i kun rdzob rang gi rnam par rtog pas de zhes pa mya ngan las 'das pa min te/ yod pa ma yin la/ mya ngan las 'das pa nyid yin te/ 'di rang nyid ni rnam par rtog pa thams cad dang bral ba'i phyir ro//de ltar na gzhan du yang gzhan kun rdzob kun rdzob tu ji ltar 'gyur zhe na/ phyis de nges par na zhes pa la sogs pa gsungs te/ 'di yod na 'dir 'gyur te/ 'di skyes pa las 'di skyes pa zhes pa ni 'di'i rkyen las byung ba tsam kun rdzob bo//de ltar na chos rnams skye ba ni phyi nas byung ba'i yod pa yin no/ /de lta bas na phyi nas nges pa'i chos gal te yod pa ma yin na de'i tshe kun rdzob yod pa nyid yin no/ /de gal te yod pa ma yin pa yin zhe na/ de'i tshe kun rdzob med pa nyid yin te/ nam mkha'i ut+pa la sngon po la sogs pa rnams rkyen 'di med pa'i phyir ro//'di skad brjod par 'gyur ba yin te/ gal te yang mya ngan las 'das pa blo'i yul du byas nas/ gzhan gyis rnam par rtog pa tsam gyis de mya ngan las 'das par mi 'gyur ba kho na ni ma yin te/ 'di rang gi rnam par rtog pa spros pa nye bar zhi ba'i phyir ro//chags pa dang bcas pa'i sems kyi dmigs pas rang nyid kyi nyon mongs pa'i sgrib pa spangs pa'i 'dod chags dang bral ba yang 'dod chags dang bral ba ma yin par mi 'gyur ro/ /de lta bas na rnam par rtog pa dang thams cad dang bral ba'i phyir gzhan gyi kun rdzob kyis dmigs na yang rang nyid 'di don dam par mya ngan las 'das pa nyid yin no//de nyid kyi phyir chos thams cad rang nyid kyis rnam par rtog pa dang bral ba'i phyir ma skyes pa dang / ma 'gags pa'i rang bzhin yin pa'i phyir rang bzhin gyis mya ngan las 'das pa dang /gdod nas zhi ba yin no zhes brjod do/ /de ltar na yang de lta bu rnams nyid las de lta bu'i chos gzhan skye ba dang 'gag par yang 'gyur te/ sgyu ma'i rang bzhin bzhin no/ /des na yang rang bzhin gyis rnam par rtog pa'i dbang las yang dmigs pa na/ kun rdzob yin te/dngos po'i ngo bo med pa'i phyir ma skyes pa dang ma 'gags par brjod de/ bong bu'i rwa bzhin no/ /de gsungs pa/ stong pa nyid kyi chos rnams las/ /stong pa'i chos rnams 'byung bar 'gyur/ /zhes so/ /'phags pa rgya cher rol pa las kyang gsungs pa yin te/ 'du byed mar me'i 'od ces so/ /de lta bas na don dam par skye ba dang / 'gag pa med na yang kun rdzob kyi bden pa las 'gal ba ma yin te/ thams cad 'thad pa yin no/ /gal te don dam par chos thams cad ma skyes pa dang ma 'gags pa yin na de'i tshe dngos po la shes pa med cing /shes bya yod pa ma yin pa ma yin nam/ de lta na 'dir gang zhig gang gis 'gegs par 'gyur te/ rnam par dpyod pa yang med par gyur la/ de lta bas na cang mi smra bar gnas par bya'o zhe na/ rtog ces pa la sogs pa gsungs te/rtog pa ni sgro 'dogs pa'i blo yin la/ brtags pa de des sgro btags pa yin no/ /'ang zhes pa ni sdud pa yin te/ gnyis po 'di dag gnyi ga phan tshun rten cing yang dag par brten pa yin no/ /rtog pa la ltos nas brtags pa yin la/ brtags pa la ltos nas rtog pa yin te/ji ltar 'jig rten la grags pa'i tha snyad la brten nas te bzung nas rnam par dpyod pa yin no zhes bya ba'i don to/ /thams cad brjod pa ni mngon par brjod pa'o/ /thams cad ces pa ni 'ga' zhig ma yin pa nyid do/ /rnam par dpyod pa yang kun rdzob kyi bden pa la brten nas spros pa yin la/don dam pa'i bden pa la ma yin te/ de ni tha snyad thams cad las 'das pa'i phyir zhes pa'i don to/ /rnam par dpyod pa yang rnam par dpyad par bya ba bzhin du brtags pa'i rang bzhin yin pa'i phyir dpyad par bya'o zhe na/ dpyad pa po la dpyad par mi nus pa'i phyir zhes dgongs nas/ gang tshe rnam par dpyod pa zhes pa la sogs pa gsungs te/ rnam par dpyod pas te/ yongs su rtog pa yang gang gi tshe rnam par dpyod pas rnam par dpyad cing / nges par byed na de'i tshe thug pa med par te/ mi gnas par thal bar 'gyur ro//ci'i phyir zhe na/ rnam dpyod de la yang rnam par dpyod pa'i phyir te/ gang zhig 'di la rnam par dpyad pa na yang rnam par dpyad pa'i don du rnam par dpyod pa nye bar byed na rnam par dpyod pa la yang rnam par dpyod pa'i rgyus so/ /rnam par dpyad par bya ba la ji ltar dpyad pa na ji ltar thug pa med pa 'dir mi 'gyur na/dpyad bya zhes pa la sogs pa gsungs te/ dpyad par bya ba la ste/ yongs su brtag par bya ba la yang dngos po rnam par dpyad par byas nas te/ gtan la phab pa ni rnam par dpyad cing gtan la phab pa yang dus phyis rnam par dpyad pa'i gzhi yod pa ma yin no//gang la brten nas yang dpyod cing tshol ba la thug pa med pa ma yin te/ rnam par dpyad par bya ba la dpyad pas don byas pa'i phyir na yang 'dod pa med pa'i phyir ro/ /de nyid kyi phyir/ rnam dpyod la ni rten min te/ / zhes te/ rten med pa'i phyir yang dpyod par byed pa ma yin no/ /sgro 'dogs pa thams cad dgag pa byas nas dngos po'o/ /de kho na nyid yongs su shes pas bya ba byas pa'i phyir/ 'jug pa'i ldog pa med pa'i phyir gang la yang re ba med pa ste/ gang la yang 'dod pa ma yin la/de yang mya ngan las 'das par brjod de/ tha snyad thams cad log pa'i phyir ro/ /thams cad du bya ba med pa'i phyir rang bzhin gyis zhi bas de nyid la mya ngan las 'das par brjod do/ /rtog pa'i yul la thams cad du nges par dpyod par byed pa yin te/ don dam par ma yin no zhes/gang gis ltar na zhes pa la sogs pa gsungs te/ gang gi yang don dam par yod par smra ba'i gnyis po 'di dpyod par dang dpyad par bya ba zhes pa 'di gnyi ga yang bden pa yin te/ don dam pa'i bden pa yin zhing / kun rdzob ma yin la/ de nyid dngos po'i rang bzhin du smra ba la shin tu dka' bar gnas pa yin te/shin tu ni ches shin tu'o/ /dka' bas gnas pa ni sdug bsngal gyi sgo nas gnas pa yin te/ dka' ba'i byed pa yin pa'i phyir ro/ /'di nyid nye bar bstan pa'i phyir/ gal te zhes pa la sogs pa smos pa yin te/gal te shes dbang la ste/ shes pa tshad ma'i dbang las te mthu las so/ /don te gzhal bya rnam par 'jog na/ de'i tshe yin du chug na yang / tshad ma las gzhal bya rnam par 'jog pa zhes bya ba gang gis zlog par byed pa yin te/ 'on kyang 'dir 'di dpyad par bya ba yin te/shes yod nyid la rten ci yod/ /shes pa tshad ma la yang yod do zhes gang la nges par yod ces brjod par bya ste/ rang rig pa med pa'i phyir tshad ma gzhan tshol ba na thug pa med par thal bar 'gyur bas rten ci zhig yod de/ brten par bya ba'o//de ltar na yang gal te shes pa yod pa la tshad ma gzhan tshol bar byed na thug pa med par 'gyur la/ 'on kyang gzhal bya nyid las tshad ma rnam par 'jog ste/ de ji ltar thug pa med par 'gyur zhes dogs nas/ 'on te zhes pa la sogs pa smos te/'on te zhes pa ni gzhan gyi bsam pa gsal bar byed pa yin no/ /'on te shes par bya ba ste/ gzhal bya'i dbang gis zhes pa rnam par gzhag byed na'o/ /de ltar na/ shes bya yod la rten ci yod/ /ces te/ gal te shes bya'i dbang gis shes pa'i rnam gzhag byed na/de'i tshe shes byas shes pa yod par gzhag pa'i rgyu mtshan du 'gyur na/ de yang tshad ma gang las grub ces 'dri bar byed do/ /shes bya yod pa nyid la rten cing yod ces gzhal bya grub pa'i ched du shes pa gzhan tshol ba las shes pa gzhan de yang gang las grub ces brjod par bya'o//de lta bas na shes par bya ba las so zhe na/ shes par bya ba gang las grub pa yin te/ de grub pa la shes pa gzhan tshol na yang thug pa med cing mthar thug pa med par 'gyur ro/ /de ltar gyur na yang / gal te shes pa'am shes bya grub pa'i ched du de shes pa gzhan ltos par gyur na der 'gyur te/'on kyang phan tshun du gcig la gcig gis grub na de'i phyir brjod pa'i nyes par thal bar ji ltar 'gyur zhes gzhan gyi bsam pa sngon du song bas/ ci ste phan tshun zhes pa la sogs pa gsungs te/ci ste yang 'di ltar rjod par byed na phan tshun du ste/ shes pa dang shes bya yang phan tshun gyi dbang gis te/ stobs kyis shes pa dang shes par bya ba dag kyang yod pa nyid du nges par byed na ni/ shes pa'i dbang gis shes bya dang / shes bya'i dbang gis shes pa'o zhes pa'i tha tshig go zhe na/de de ltar yin na gnyi ga yang ni med par 'gyur te/ shes pa dang shes bya gnyi ga yang med par 'gyur la/ gcig kyang med cing grub pa med na gcig la gcig brten pa'i phyir gcig ma grub na gnyis pa yang grub par mi 'gyur ro//'dir rang bzhin dang mthun pa'i dpe bstan pa'i phyir/ gal te pha ming zhes pa la sogs pa gsungs te/ pha ni skyed par byed pa yin la/ gal te bud med de/ bu med par gyur na'o/ /bu skyed pa la ltos nas 'di tha snyad yin la/ de ltar na gang las bu 'byung ba yin/gang ste gang gi phyir pha med pa'i phyir bskyed par bya ba'i bu 'byung zhing skye ba yod/ ci'i phyir zhe na/ bu med par ni pha med pas/ /zhes pa 'di ni gtan tshigs kyi tshig yin no/ /gang gi phyir bu med de yod pa ma yin na pha yod pa ni ma yin te/ phar mi 'gyur la/phas kyang bu bskyed par bya ba ma yin la/ de yang bu ji srid du skyed par byed pa ma yin na de srid du pha nyid du mi 'gyur te/ de srid du bu las bur 'gyur bar srid pa ma yin pa'i phyir gcig la gcig brten pas na gcig med pas gzhan med par 'gyur ro zhes/ gnyi ga yang ni med par 'gyur//zhes te/ bsdus pa'i don to/ /don 'di dpe las byung ba la sbyar ba'i phyir/ de bzhin zhes gsungs te/ ji ltar 'dir pha dang bu dper brjod pa de bzhin du shes pa dang shes bya'i gnyis po de dag yod pa ma yin te/ de bzhin du dngos po ma yin te/ 'di ltar yang shes par bya ba'i shes pa la shes byar yang brjod do//shes pa yongs su gcad par bya bas kyang shes bya yin no zhes so/ /ji srid du shes pa ma grub pa de srid du yongs su shes pa mi grub la/ de srid du de'i yongs su gcad par bya ba nyid kyis shes par bya ba mi 'grub pas gcig la gcig brten pa nyid kyi phyir gnyi ga med par 'gyur ro zhes dgongs pa yin no//de ltar gyur na yang phan tshun gyi dbang gis grub po zhes mi smra ste 'on kyang shes bya'i 'bras bu shes pa yin la/ shes pa de las myu gu dang sa bon bzhin du shes pa grub ces gzhan gyi bsam pa dgod pa'i ched du/myu gu sa bon las skye zhing / /zhes pa la sogs pa gsungs te/ sa bon gshong dang bu ga'i nang du chud pa'i las te/ sa bon de nyid las myu gu skyes par brjod cing go bar byed pa ji ltar yin pa de bzhin du 'dir shes bya ste/ gzhal bya las so/ / shes pa skyes te grub pa yis so/ /de yod pa ste shes par bya ba de yod cing yang dag par yod pa'o/ /cis mi rtogs te/ 'dir yang sa bon dang myu gu bzhin du rgyu dang 'bras bu dngos po yod pa yin pa'i phyir ro/ /'di ni dpe dang 'dra ba ma yin zhes bstan pa'i phyir/myu gu zhes pa la sogs pa gsungs te/ myu gu ste 'bras bu las sa bon yod ces rtogs na/ de 'di nyid 'ba' zhig gi mthu ma yin te/ 'on kyang gzhan te myu gu las tha dad pa'i shes pa las de yod do zhes rtogs pa ste/ 'di ltar rung ba tsam gyis rgyu 'bras bus rtogs par byed pa ma yin te/gzhan du na sa bon nyid myu gu skyed pa ma gtogs pas kyang go bar byed pa nyid du 'gyur/ rang gi ngo bo rtogs pa tsam gyis ma gtogs pa'i 'bras bu dang rgyu'i dngos po yang rtogs par thal bar 'gyur ba'i phyir te/ 'on kyang med na mi 'byung ba nyid kyi nges pa yin no//de'i phyir sngar rgyu dang 'bras bu dngos po rtogs pa la yang phyi nas 'ga' zhig tu sa bon las byung ba'i myu gu dmigs pa dang ldan pas sa bon du zhen pa'i bdag nyid rjes su dpag pa skye bar 'gyur ro/ /des sa bon yod de zhes zhen par byed do//de lta bas na shes pas yul du byas pa'i 'di ltar myu gu sa bon rtogs pa'i rgyu yin la/ shes pa yod pa nyid de/ shes pa dngos po la yod pa gang las te/ gang gis shes pa yod par rtogs par byed de/ rang rig pa med pa'i phyir dang thug pa med pa'i 'jigs pas shes pa gzhan mi tshol ba'i phyir ro//shes bya gang zhig de yis go bar 'gyur ba gang las te/ shes par bya ba shes pas shes bya'i 'bras bu des go zhing zhen par 'gyur/ rang nyid ma nges pa'i rtags bsgrub bya go bar byed pa'i rigs pa ma yin no/ / shes par byed pa'i rgyu 'di shes bya'i go bar byed pa yin no/ /de lta bas na dngos po'i phyogs la shes pa dang shes bya grub pas dpyad par nus pa ma yin te/ brtags pa'i phyogs la ni ji ltar grags pa bzhin du tha snyad la brten nas nus pa yin no zhes nges so/ /da ni/ rang las ma yin gzhan las min//gnyis las ma yin rgyu med min/ /dngos po gang dag gang na yang / /skyes pa nam yang yod ma yin/ /zhes pa'i don bsgrub pa'i don du rgyu med pa yang ma yin no zhes pa mtha' bzhi pa bsgrub pa'i don du re zhig dngos por smra ba'i 'dod pa dgag pa'i phyir/re zhig 'jig rten zhes pa la sogs pa gsungs te/ 'di ltar yang de rnams kyis rang dang gzhan gyi rang bzhin gyi rgyu la ma ltos pa nyid dngos po'i tshogs rnam pa sna tshogs pa skye bar 'gyur ro zhes skye bar byed do zhes rjod par byed do/ /gang gi phyir pad+ma la sogs pa rnams kyi rtsa ba dang 'dab ma dang yal ga dang /ze'u 'bru la sogs pa rnam pa du ma'i khyad par tha dad pa rnam pa sna tshogs pa sems dang bral ba'i chu dang 'dam la sogs pa las bskyed par mi nus so zhes so/ /sems pa dang ldan pa gzhan 'ga' zhig las de lta bus sprul pa las gzhol ba dmigs pa yang ma yin la/gus par byed pa yang ma yin te/ las la mthar thug pa med pa'i phyir dang / dus gcig tu mthar thug pa med pa'i khyad par rnams la bya ba dang ldan pa'i phyir ro/ /de lta bas na rgyu cung zad kyang med par 'gro ba 'di thams cad rnam pa sna tshogs par skye'o zhes pa ni de rnams kyi lugs so//de skad du yang / rang bzhin smra ba de rnams kyis/ /rang nyid kyang ni rgyu ru brjod/ /thams cad rgyu la re med par/ /dngos po rnams kyi skye ba yang / /pad+ma nyi ma ge sar sogs/ /sna tshogs gang gis byed pa yin//rma bya'i mdongs la sogs pa yang / /sna tshogs gang gis sprul pa yin/ /ji ltar tsher ma la sogs pa'i/ /rno ba la sogs rgyu byed dam/ /glo bur yin phyir de bzhin du/ /sdug bsngal la sogs rgyu med nyid/ /ces brjod do/ / de la 'di ltar smra ba la ni 'jig rten gyi rtog pa nyid kyis rgyu la nus pa med pa nyid la gnod par 'gyur ro zhes ston te/ 'jig rten pa ni skye bo thams cad yin la/ mngon sum gyi dbang po la brten pa ni shes pa'i yin la/ mngon sum zhes pa 'di nye bar mtshon pa yin pa'i phyir rjes su dpag pas kyang yin te/de rtogs pa'i phyir na mngon sum dang rjes su dpag pa yin zhes pa'i tha tshig go/ /thams cad ni rnam pa du ma yin la/ rgyu ni 'jig rten sna tshogs pa'i rgyu yin la/ mthong ba ni de'i rjes su 'gro ba dang /ldog pa'i byed pa yang 'bras bu skyed par mthong la/ 'bras bu ni gang zhig yod na yod la/ de med na med par rtogs pa de ni de'i rgyu yin no zhes nges pa yin no/ /de'i phyir 'jig rten gyi rtogs pa nyid kyi rgyu'i byed pa las rgyu med pa'i dam bca' ba nyid las gnod par byed la/de nye bar bstan pa'i phyir/ pad+ma'i sdong po zhes pa la sogs pa gsungs te/ pad+ma'i sdong po la sogs pa gang yin pa de rnams te/ lo ma dang / 'dab ma dang / yal ga dang / ze'u 'bru la sogs pa de rnams la de skad ces brjod de/ gang gi phyir de rnams kyi khyad par sna tshogs pa nyid yin no//rgyu'i dbye bas zhes pa'i rgyu ste rgyu'i dbye ba las khyad par skye bar gyur te 'byung bar 'gyur la/ gzhan du ni ma yin te/ nges pa med par thams cad du 'byung bar thal ba'i phyir ro/ /de'i phyir gang gang gis rjes su 'gro ba ldog pa'i rjes su byed par rtogs pa de nyid kyi 'bras bu yin te/de gzhan las ma byung zhes khas blang bar bya ba yin no/ /de lta bas na rgyu so sor nges pa nyid las khyad par so sor nges par skye ba yin te/ de'i khyad par gyi khyad par yin pa'i phyir rgyu med pa ni ma yin no/ /ci ste gal te rgyu nyid la rang nyid kyi khyad par 'di grub pa yin la/'on kyang de nyid gang las srid par 'gyur zhes brjod par bya ste/ khyad par med pa las khyad par skye ba ma yin te/ yang rgyu med par thal bar 'gyur ba'i phyir ro zhes pa'i dogs pa 'di spang ba'i phyir/ rgyu dbye gang gis zhes pa la sogs pa dogs pa spang ba smos te/gang gis byas zhes pa ni su zhig byas shing / gang las byung zhes pa'o/ /rgyu'i dbye bas byas shes na/ gang gis rgyu'i dbye ba khyad par yin no zhes brjod na'o/ /sngar gyi rgyu dbye ba nyid las so zhes te/ sngar gyi ste/ snga ma nyid las yin la/de skyed par byed pa'i rgyu dbye ba las te/ khyad par gyi dbye ba las so/ /de'i yang rgyu snga ma gang las khyad par du 'gyur zhe na/ de la yang slar rgyu'i khyad par las zhes brjod par bya ste/ de ltar phyi ma phyi ma'i khyad par 'dod pa rnams la snga ma snga ma'i khyad par las zhes lan brjod par bya la/thug pa med pa mi 'dod pa cung zad du yang 'gyur ba ma yin te/ 'khor ba la thog ma med pa'i sngon gyi mtha' shes par 'gyur ba ma yin zhes khas blangs pa'i phyir ro/ /de nyid kyi phyir na 'bras bu phyin ci log pa yang rang gi las ma yin no zhes bstan pa'i ched du gzhan gyis dogs pa ci'i phyir zhes pa la sogs pa slong ba smos te/rgyu gang las 'bras bu skyed pa'i khyad par 'bras bu 'byin pa'i mthu ste rgyu yin zhe na/ sngar gyi rgyu'i mthu las yin te/ sngar gyi de skyed par byed pa'i rgyu las te/ mthu las so/ /gang gis na lhan cig byed pa'i khyad par gyis skyed pa 'bras bu skyes pa'i yon tan gyi khyad par phan tshun yongs su gyur pa'i lhag par gyur pa ni gegs dang ma tshang ba mi srid na/de lta bu'i rnam pa nyid kyis 'bras bu skyed par byed do/ /de lta bas na phyin ci ma log pa'i 'bras bu skyed par yang rang gi rgyu'i nus pas skyed pa nyid yin no//des na mngon par mtho ba dang nges par legs pa'i sgrub par byed pa'i rgyu las go rims ji lta ba bzhin du mngon par mtho ba dang nges par legs pa'i 'bras bu skye bar 'gyur ro/ /de phyin ci log pa la'ang phyin ci log pa yin no zhes pa brgya la yang phyin ci log pa ma yin no//'di yang nges par rang bzhin du smra ba rgyu dang bcas par mi 'dod na yang khas blang bar bya ba ste/ gzhan du na gtan tshigs med par dngos po rnams kyi rgyu med par dam 'cha' ba ji ltar grub par 'gyur te/ dam bcas pa tsam gyis de su zhig gis kyang 'dzin pa ma yin pa'i phyir ro//gtan tshigs kyi byed pas de sgrub par byed pa rang nyid kyis slar yang rgyu dang bcas pa nyid du khas blangs pa'i phyir mo gsham yang yin la/ bdag gi ma yang yin no zhes smra ba bzhin du dam bcas pa la rang gi tshig gis gnod par 'gyur te/de'i phyir ngos gnyis kyis thag pa'i zhags pa bzhin du dogs par sdug pa 'di chud pa yin no/ /de skad du yang / rgyu ni med ces brjod pa gtan tshigs dang ldan par/ /dam bcas rang nyid kyis ni bsal ba ma yin nam/ /'on te gtan tshigs brjod la le lor gyur na ni//dam bca' 'ba' zhig gis ni 'di la ci zhig 'gyur/ /zhes gsungs so/ /de lta bas na 'di lta ba ngan pas sprul pa nyid yin te/ tshad mas gnod pa'i phyir ro/ /de ltar na rang bzhin du smra ba bsal nas/ rnam pa gnyis pa bsgrub pa'i ched nyid du dbang phyug 'gro ba'i rgyu yin pa nyid du bstan pa'i ched du de slong bar byed pas dbang phyug ces pa la sogs pa smos te/dbang phyug rgyur smras pas kyang rang bzhin du byed pa'i 'dod pa sun phyung ba thos nas khur phyed phyogs par bsams nas/ khyad par brjod pa'i ched du khyed rnams kyis grogs nyid byas pa yin te zhes smras te/rgyu med par 'gro ba rnam pa sna tshogs su 'byung ba ma yin te/ yul la sogs pa nges pa med par thal ba'i phyir la/ sems pa med pa 'ba' zhig gis chu dang 'dam la sogs pa 'di rnams kyis rnam pa sna tshogs pa nus pa ma yin te/zhes pa 'di brjod pa ni rigs pa yin/ de la bcom ldan 'das rnam pa sna tshogs pa sprul pa la mkhas pa 'gro ba'i ded dpon gcig pu/ 'gro ba mtha' dag gi dang por gyur pa rtag pa'i bdag nyid kyis rnam pa thams cad du nyams pa med pa'i nus pa'i mthu dang ldan pas dngos po thams cad kyi rgyu dang 'bras bu'i dngos po la sogs pa de nyid mkhyen pa dbang phyug gi che ba'i bdag nyid tshu rol mthong ba mtha' dag gi spyod yul ma yin pa'i rgyu des na g.yo ba dang mi g.yo ba 'di mtha' dag rgyu dang bcas pa'i 'gro ba zhes sems dang bcas pa las gzhan du smra bar nus zhes rigs pa can la sogs pas khyim du 'gro bas dbang phyug 'gro ba'i rgyu yin no zhes smra bar byed do//dbang phyug ces pa ni bde byed du grags pa yin la de nyid 'gro bas te/ sna tshogs rgyu yin la 'byin pa dang gnas pa dang 'jig par byed pa'i rgyu yin no/ / de lta bas na sna tshogs ma lus pa 'di nyid skye bar 'gyur la/ gzhan du na sems med pa rgyu yin pa'i phyir ri dang chu klung dang sa gzhi dang rgya mtsho la sogs pa skye ba la brten pa ji ltar 'gyur/ sems dang ldan pas byin gyis brlabs pa las slar yang 'di rnams skyed par nus pa yin te/ de'i byed pa nyid kyis sgrub par byed pa'i phyir ro//de skad du yang / skyed ldan gzhan ma thams cad kyi/ /dbang phyug rgyu ru rjod par byed/ /ri la sogs pa sems med pas/ /rang nyid kyis ni brtson nus min/ /dbang phyug rdza mkhan bzhin du sna tshogs sprul pa byed par ma gyur na//ri rab 'di ni 'grub cing sa gzhi 'di min rgya mtsho ma yin nyid/ /nyi zla gza' skar ldan 'dir dgod pa mig yul 'di dag tu mi 'gyur/ /yod pa'i phyir na dbang phyug 'gro ba'i byed pa yin zhes 'ga' zhig smra/ /zhes brjod do/ /de lta bas na 'gro ba nyid sems pa med pa nyid dang /sna tshogs pa'i dngos po'i rgyu dbang phyug yin no zhes bdag nyid brjod do zhe na/ 'di la brjod par bya ste/ 'dis rang gi khyim du brtags pa'i gzhal yas dgod pa dang / tshig gis dgod pa spros pa'i tshogs kyis 'di ltar brjod pa la yang rang gi grub pa'i mtha' la mngon par zhen pa'i blo gros rtul po rnams la dga' bar byed pa yin la/tshad ma dang bral ba la mkhas pa rnams la dga' ba skye ba ma yin no/ /'di ltar yang 'di gal te snying rje dang ldan pa yin na yang ci'i phyir srog chags rnams la dmyal ba la sogs pa rnams su gdung bar byed/de ltar gyur na yang snying rje dang ldan pa nyid dad pas rtogs par bya ba nyid du 'gyur ro/ /rang gis byas pa'i dam pa ma yin pa'i las kyi 'bras bu nye bar longs spyod pas de la gtod pa dang / sel ba la gang zhig 'jug par 'gyur bas ji ltar snying rje med par 'gyur zhe na/gang gis mi 'dod pa'i 'bras bu myong ba 'di'i las snying rje dang ldan pas mi byed par 'gyur ba ji ltar mi byed de/ de la yang de'i bya ba ldan pa'i phyir la/ skye ba dang ldan pa thams cad kyi rgyu mtshan yin pa'i phyir ro/ /gzhan yang de la bya ba byed pa ma yin na las de'i 'bras bu la longs spyod pa yin nam ma yin/gal te phyogs dang po yin na/ de skad du/ rang gi bde ba sdug bsngal la/ /mi shes skye bo rang dbang min/ /mtho ris dang ni g.yang sa ru/ /dbang phyug gis bskul 'gro bar 'gyur//zhes brjod pa der ji ltar 'gyur/ 'bras bu thams cad la yang de'i byed pa khas blangs pa la 'di nyid kyis ma nges par thal bar 'gyur ro/ /'on te phyogs gnyis pa yin na de'i tshe 'di snying rje dang ldan pa yin na/ gal te 'bad pas grogs nyid du de la rtog par byed na/ de la btang snyoms ci'i phyir sgom par mi byed/'on te byas pa'i las chud zos par 'gyur ba'i phyir nges pa des de'i 'bras bu myong bar bya zhes de longs spyod pa'i ched du byed pa yin no zhe na/ yang 'di la bya ba mi byed na nges par des ji ltar nyams su myong bar bya ste/ tshogs pa dang bral ba'i phyir ro//yang 'di ltar chud zos na yang nyes pa ji ltar 'gyur te/ 'bad pa nyid kyis snying rje can des 'grub par rigs pa yin te/ 'di ltar yang de 'dod pas 'jug pa nyid kyis de ma smin pa'i phyir te/ des na dbang phyug gis bstan pa nyid du de la 'gyur ro/ /'on te sems can rnams kyi las des bskul ba de yang snying rje dang ldan pas gnas par nus pa ma yin no zhe na/kye ma dbang phyug rang nyid kyis 'di ltar gzhan du ched gsal bar 'gyur na 'ga' zhig las kyis yang dag par drangs pa'i bdag nyid dbang du gyur pa thob par ma gyur pa'i 'di ltar dbang phyug las kyang las nyid nus pa chen po dang ldan pa nyid du gsal bar byas par 'gyur ro//gang zhig stobs kyis yang dag par 'dren pa na dbang phyug chen po yang gnas par mi nus te/ des na lhur las nyid rten par gyis shig /de lta bas na 'di ni nyams pa med pa nyid de/ skyed pa po yang gang rnams la//nus med las bden la phyag 'tshal/ /zhes pas bstan par bya'o/ /'on te snying rje can ma yin na de'i tshe 'di 'dod chags dang bral ba min nam/ 'dod chags dang bcas pa yin/ gal te rnam par rtog pa dang po yin na de'i tshe gal te yang snying rje dang bral ba'i phyir 'gro ba la bde ba ster bar mi byed cing /sdug bsngal ba ci'i phyir skyed par byed ces brjod par bya'o/ /sdug bsngal yang 'dod chags la sogs pa'i dbang gis 'ga' zhig la gtod par byed pa yin la/ de yang 'di la med la/ ji ltar na rgyu med pa nyid du 'gro ba sdug bsngal bar byed/rol pa'i don du sdug bsngal bar byed do zhe na/ rol pa'i don du 'dod chags dang bral ba 'jug pas 'di nges par 'dod chags dang bral ba yin te/ 'dod chags la sogs pa dang ldan pa'i dbang po thul ba rnams kyang rol pa'i don du 'jug pa ma mthong na/chags pa dang bral ba 'di ci'i phyir yang 'jug par 'gyur/ sha za gtum po la sogs pa ma yin pa gzhan gyis gzhan sdug bsngal bas rol pa yang srid pa ma yin no/ /'on te 'dod chags dang ma bral ba'i phyogs yin na de'i tshe 'di skye bo gzhan dang thun mong bar yod na/ji ltar dbang phyug ma yin par mi rigs te/ 'dod chags la sogs pa'i nyon mongs pa'i zhags pa'i dbang du gyur pas 'jug pa'i 'gro ba dbang phyug ma yin pa'i phyir ro/ /gzhan du na de'i tshe de lta bu dang mtshungs pa gzhan de yang thal bar 'gyur ba'i phyir ro/ / 'khor ba'i btson rar bcings pa dang rang dbang can ma yin pa la de las gzhan bzhin du rnam pa sna tshogs pa sprul pa la mkhas par rigs pa yang ma yin no/ /gang zhig rnam pa 'di lta bu yang ji srid du dbang phyug tu khas len pa yod pa de ltar de nyid kyis khyed bslu bar 'gyur ro/ / de lta bu'i byed pa por gyur na 'gyur ba yang yin no/ /de ltar na yang 'di'i rang bzhin du gnas pa'am/ rang bzhin gnas pa ma yin pa yin/ gal te rang bzhin du gnas pa yin na ci'i phyir 'gro ba don med par sdug bsngal bar byed/ rang bzhin du gnas pa ni gnod par byed pa med par skye bo sdug bsngal bar byed pa ma mthong ngo //'on te log pa'i lam du 'gro ba nyid du gnod pa byas kyang gdung bar byed pa yin no zhe na/ log pa'i lam du 'gro ba yang 'di nyid kyis byed pa yin la/ de ltar gyur par yang byas nas yang gdung bar byed pa de ni 'jig rten gyi dbang phyug bsten pa bas kyang shin tu yang smad pa yin no//de rnams kyi rang nyid kyis nyes pa byas pa nyid kyis nyes pa po la chad pa'i las byed do/ /slar yang 'di ni rang nyid kyis byed du bcug pas na khyad par che'o/ /'on te rang bzhin du mi gnas pa yin na de'i tshe mtho ris dang thar pa don du gnyer ba'i rtogs pa dang ldan pa rnams kyis de brten pa la 'jug pa legs pa yin te/smyon pa bsten pa ni smyon pa las gzhan gyis byed pa rigs pa ma yin no/ /'di ltar yang mtho ris la sogs pa'i 'bras bu 'dod pas rtogs pa dang ldan pa rnams rab tu 'jug par byed de/de yang yongs su ma nges pa'i rang bzhin yin pas de las 'byung ba ma yin no/ /de bsten pa'i phyin ci log kyang srid pa yin no/ /de ster ba la 'jug pas dad pa brtan pa'i dbang gis smyon pa la brten pas bdag nyid kyang smyon pa nyid du ston pa yin te/gzhan du na de bsten pa la ji ltar 'jug par 'gyur/ de la smyon pa gzhan gyis nyes pa ci zhig byas te/ gang gis na des sten par mi byed/ de rnams ni nus pa khyad par can dang bral ba'i phyir ro zhe na/ skabs su bab pa la yang khyad par du gyur pa'i nus pa mthong ba yang ma yin no//'gro ba thams cad khyad par du nus pa'i smyon pa zhes pa ni smyon pa las gzhan gyis smra bar rigs pa ma yin no/ /de la 'di shin tu rnam par dpyad pa na 'ga' zhig tu gnas pa'i rnyed pa ma yin no/ /de bas na blo gros ngan pa rnam par g.yo ba la gus pas ci zhig bya ste/de lta bas na 'di legs par dpyad pa yin no/ /gang brjod pa/ bde dang sdug bsngal la ni 'byin byed med/ /gzhan gyis phyung zhes pa 'di blo ngan yin/ /'jig rten rang gi las kyi zhags pas mdud/ / byed par 'gyur zhes nga rgyal don med yin/ /zhes so/ /de lta bas na rgyu gzhan mthong ba las gzhan pa'i rang dbang can sems pa dang ldan pa'i byed pa po 'ga' yang yod pa ma yin no/ /'di nyid rgyas par bstan pa'i phyir/ grub pa'i mtha' smra bas re zhig dbang phyug gang yin smros zhes gsungs te/dbang phyug rgyur smra ba la 'dri ba yin la/ smros zhes pa ni brjod cig pa'o/ /gang yin zhes pa ni khyed 'dod pa'i dbang phyug go/ /re zhig gi smras 'di brjod pa yin te/ sa la sogs pa gang rnams dang / rjes su 'gro ba dang ldog pa las kyi 'bras bu mthong ba de la khyed rnams kyis dbang phyug tu brjod pa de gang yin la/ma dmigs pa'i rjes su 'gro ba dang ldog pa'i bya ba dang ldan pa'i rgyu ru brtags par rigs pa ma yin te/ shin tu thal ches pa'i phyir ro/ /de lta bas na de nyid 'dod pas mthong ba'i rjes su 'gro ba dang ldog pa'i khyad par nyid khas blang bar bya'o//sa dang sa bon la sogs pa las tha dad pa'i rjes su byed pa'i 'bras bu mthong ba ma yin no/ /de ji ltar na de'i 'bras bu la mkho ba rnam par gzhag /de skad du/ gang dag yod na gang nyid 'gyur/ /de dag las gzhan rtog pa na//de rgyu nyid du thams cad na/ /rgyu rnams thug pa med par 'gyur/ /zhes brjod do/ /'on te sa la sogs pa'i 'byung ba rnams nyid dbang phyug yin no zhes gzhan gyis bsam pa len pas 'byung ba rnams she na zhes smos te/ gal te 'byung ba rnams te sa la sogs pa rnams dbang phyug tu brjod na/de'i tshe khas len pa nyid yin te/ de lta mod ces pa ni 'di nyid yod du chug cig /'di la kho bo log par rtogs pa ma yin no/ /sa la sogs pa dang rjes su 'gro ba dang ldan pa la 'bras bu mthong ba'i phyir ro/ /gcig tu ming tsam la yang ci zhig ngal te/ming 'ga' zhig don gyis dbye ba stong pa'i ming tsam la'o/ /yang zhes pa ni nges par gzung ba'o/ /ming tsam nyid la 'dir rtsom pa chen pos de sgrub pa'i ched du ci'i phyir ngal bar byed/ nga'i sa la sogs par brjod la/ khyod kyis yang de nyid la 'byung ba chen po'i dbang phyug ces pa la don la khyad par cung zad kyang yod pa ma yin no//log par rtogs pa'i don gyis stong pa 'di la 'bras bu cung zad kyang dmigs pa ma yin no/ /'on te don gyi khyad par yod na/ de'i tshe 'di dbang phyug nyid du rigs pa ma yin no zhes bstan pa'i phyir/'on kyang zhes pa la sogs pa gsungs te/ 'on kyang zhes pa'i sgras lhag blo gros chen po can sa la sogs pa rnams la/ khyed rnams kyis dbang phyug nyid du brtag par rigs pa ma yin te/ de'i mtshan nyid dang mi ldan pa'i phyir ro/ / ji ltar byas pa zhe na/ du ma ste sna tshogs pa'i rang bzhin yin la mi rtag pa ni 'jig pa'i dngos po yin zhing / g.yo ba med pa ste/ shes pa nyid kyis bya ba dang bral ba yin la/ lha min te bsten par bya ba'i rang bzhin ma yin la/ bsgom bya nyid de 'da' bar bya ba nyid yin la/ gus pa ma yin pa'i phyir ro/ /mi gtsang ba yang yin te/ btsog pa'i phyir sa la sogs pa rnams la yang sa la sogs par srid pa'i phyir ro/ /sa la sogs pa rnams ni sa la sogs pa'i chu dang me dang rlung gang yin pa de rnams la de skad ces brjod do/ /de dbang phyug de lta bu'i rang bzhin du mi 'gyur te/rnam pa drug po 'di phyin ci log yin pa'i phyir ro/ /gal te sa la sogs pa dbang phyug ma yin na 'o na nam mkha' dbang phyug yin no zhe na/ dbang phyug mkha' min zhes pa la sogs pa gsungs te/ nam mkha' yang dbang phyug tu 'gyur ba ma yin no//ci'i phyir zhe na/ g.yo med phyir te rang bzhin dang bral ba yin pas g.yo ba med pa'i phyir te/ gzhan gyi 'dod pas kyang bya byed med pa'i phyir ro/ /'o na bdag yin no zhe na/ bdag min te/ sngar bkag zin pa'i phyir la/ sngar nyid du rgyas par bdag bkag pa'i phyir rang bzhin med pa yin te/'di ri bong gi rwa dang 'dra ba'o/ /'on te de ltar na yang brtag par bya ba ma yin na che ba'i bdag nyid las 'di tshu rol mthong bas 'di 'di ltar yin no zhes de'i phyir rang bzhin rnam par dbye bar mi nus so zhe na/ bsam min pa'i zhes pa la sogs pa gsungs te/ gal te 'di bsam pa las 'das pa'i bdag nyid chen po yin na/de'i tshe bsam pa yin pa yang bsam pa'i lam las shin tu 'das pa'i dbang phyug byed pa po ste/ dus gcig tu skyed par byed pa yang bsam min pa ste/ dpyad par bya ba ma yin pa brjod pas ci zhig bya ste/ brjod pa ci dgos 'di byed pa po nyid kyang bsam gyis mi khyab pa yin pa'i phyir brjod par rigs pa ma yin no//de ltar yin mod 'di shin tu mtshon par dka' ba'i rang bzhin yin pa'i phyir bsam par nus pa ma yin la/ 'bras bu de ni skye ba po thams cad kyi thun mong du rtogs pa'i phyir bsam gyis mi khyab pa yin no zhes smra ba'i dbang du byas nas/des skyed ces pa la sogs pa gsungs te/ de'i 'bras bu bsam gyis mi khyab pa yin du chug mod/ de ltar na yang gang gis na/ /des skyed 'dod pa gang zhig yin/ /zhes te/ dbang phyug bsam gyis mi khyab che ba'i bdag nyid 'bras bu ci zhig skyed cing sprul pa 'dod do//mngon par 'dod pa yang yin/ gzhan gyi dogs pa dgod pa'i tshul gyis bdag yin no zhe na/ bdag des skyed pa yin no zhes bdag 'dod na de 'gegs par byed pa yin te/ 'di rtag pa ma yin nam/ kye 'di rtag pa ma yin te/khyed rtag par 'dod pa yin na des ji ltar mi byed 'gyur/ gzhan du na de rtag pa nyid nyams par 'gyur ro/ /yod cing rgyu med pa ni rtag pa yin no zhes pa'i mtshan nyid med par thal bar 'gyur bas so/ /gzhan la yang de'i skyed pa'i bya ba ma dmigs so zhes bstan pa'i phyir/'dir sa sogs zhes pa la sogs pa gsungs te/ sogs pa'i sgras chu dang me dang rlung dang nam mkha' dang dus dang phyogs dang yid rnams gzung bar bya'o/ /de rnams kyi rang bzhin rtag pa yin te/ de yang des byed pa ma yin te/ sa la sogs pa'i rdul phra rab rnams rtag par khas blangs pa'i phyir ro//rags pa'i gzugs la yang de'i bya ba 'gegs par 'gyur ba'i phyir ro/ /nam mkha' la sogs pa yang brtag pa yin pa'i phyir ro/ /yon tan la sogs pa yang dpyad par bya ba yin pa'i phyir ro/ /dbang phyug ces pa ni dbang phyug kyang rtag pa yin pa'i phyir 'dis bdag nyid byed pa ma yin no//shes pa shes bya la skyes dang / /zhes pa la/ shes pa'ang shes bya las skyes pa/ /'ang zhes pa ni 'khor ba ji srid kyi bar du shes bya la dmigs nas rab tu 'jug pa'i phyir de yang des byed pa ma yin no//bde sdug las la yin zhes pa ni las ni dge ba dang mi dge bas te/ ji ltar srid par bde ba dang sdug bsngal bar yang 'gyur ro/ /'dod pa dang mi 'dod pa'i rnam par smin pa las byung ba de la yang de'i bya ba yod pa ma yin no/ /de ltar yin pas na/de yis gang zhig bskyed pa smos/ /zhes te/ da ni dbang phyug des ci zhig sprul cing spros pa yin pa smros shig /de ltar na de'i nus pa ni 'ga' zhig tu yang dmigs pa ma yin na de ji ltar 'gro ba'i skyed pa por brjod/ da ni thams cad thun mong ba'i skyon rgyu la zhes pa la sogs pa smos te/'di ltar yang 'gro ba'i rgyur rtag pa'am mi rtag pa 'gyur ba yin/ rtag pa nyid du de smra ba rnams kyis 'di yongs su brtags pa yin te/ de la gal te rtag pa yin na rgyu ste byed pa po la thog ma yod pa ma yin no/ /de'i tshe 'bras bu la thog ma ga la yod de/de la 'bras bu'i dang po ga las yod/ de'i 'bras bu'i bskyed par bya ba rtag tu 'jug pa'i phyir thog ma ga las 'gyur te/ ma yin no zhes pa'i don yin la/ rtag tu nye bar gnas pa'i grub pa'i rang bzhin gyi rgyu las 'bras bu yang ste de'i bskyed par bya ba rgyun ma chad par skye bar 'gyur ro//de'i phyir de'i nus pa thogs pa med pa'i 'bras bu rtag tu skye bar 'gyur ro/ /de gang gis na rtag tu mi byed de/ 'bras bu thams cad skyed par mi byed/ de ltar na 'ga' zhig gis 'bras bu brgya la chad par ga la 'gyur/ yang na gzhan du bshad par bya ste/ gal te dbang phyug 'gro ba'i byed pa po ma yin par 'gyur na/ ji ltar zhig pa'i rjes la dang por 'di chags pa'i char 'gyur zhe na/ 'di la rgyu la zhes pa la sogs pa gsungs te/ thog ma med pa nas byung ba'i 'khor ba yin la/ rgyu de las las dang nyon mongs pa la sogs pa'i mtshan nyid kyi thog ma ste/sngon gyi mtha' gal te yod pa ma yin na/ 'bras bu ste sems can gyi 'jig rten dang / snod kyi 'jig rten chags pa la sogs pa'i mtshan nyid kyi thog ma dang po'i rtsom pa gang las yod de/ yod pa ma yin no zhes pa'i don to/ / thog ma med pa'i 'khor ba yang sems can rnams las kyi dbang gis gnas shing chags pa dang 'jig pa'i bdag nyid rnams 'jug pa'i phyir ro/ /de brjod pa nyid yin te/ bde sdug las las yin zhes pa 'dis bstan pa yin no/ /yang na 'dir yang dbang phyug nyid las bsams nas rgyu zhes smos pa yin te/rgyu dbang phyug la thog ma yod pa ma yin na 'jig pa'i dus na yang de'i nus pa ma nyams pa nyid kyis che ba'i bdag nyid khas blangs pa'i phyir 'bras bu des byas pa'i chags dang 'jig pa'i thog ma'i mtshan nyid kyi dang por ga las 'gyur/ rtag pa nyid yin pas de'i rgyu rtag tu nus pa dang ldan pa'i phyir chags pa la sogs pa yang rtag pa nyid du 'gyur ro/ /des na rtag pa nus pa dang ldan pa la der 'chags pa la sogs pa'i thog mar mi 'gyur ro/ /des na ji ltar 'chags pa la sogs pa la de'i bya bar 'gyur/ gzhan yang 'di byed pa por 'gyur na de'i tshe rtag pa yin pa'i phyir ci'i phyir rtag tu mi byed ces te/'chags pa la sogs pa ni zhes pa ni lhag ma'o/ /'di ltar yang gal te 'chags par byed na de'i tshe de'i rgyu byed pa'i rang bzhin yin pas rtag tu de nyid byed par 'gyur ro/ /de bzhin du gnas pa dang 'jig pa yang brjod par bya ste/dus gcig tu 'am 'chags pa la sogs pa'i bya ba de yir 'gyur ro/ /de nyid kyi phyir rgyu la rgyun chad pa med pa de'i 'bras bu yang rgyun mi 'chad par 'gyur te/ gzhan snga ma yin no/ /'on te de ltar na yang 'di rtag tu nus pa'i rang bzhin gal te yin pa lta na yang brgya la lhan cig byed pa'i rkyen dang bral bas mi byed do zhe na/de ni gzhan la ltos pa min/ /zhes te/ nus pa'i rang bzhin gyi rgyu'i dbang phyug de'o/ /ni zhes pa ni gang gi phyir te/ gzhan lhan cig byed pa'i rgyu la mi ltos te/ rtag pa nus pa'i rang bzhin gyis yod na de'i ltos pa mi rigs pa'i phyir ro//rtag pa nyid kyis khyad par du bogs byar med pa yin te/ gzhan la ltos pa zhes pa'am/ khyad par gzhan 'byung ba ni de la tha dad pa'i rang bzhin gzhan de las skyes par thal bar 'gyur ba'i phyir ro/ /khyad par las tha dad pa nyid kyis 'bras bu skyes pas de rgyu nyid ma yin par 'gyur ro//'di de'i khyad par yin no zhes pa 'brel par sems pa na ni thug pa med pa nyid dang 'brel pa ma grub par 'gyur ro/ /de skad du yang / gal te bya ba cung zad cig /yod na gzhan la ltos 'gyur na//dngos gang cung zad mi byed la/ /ci phyir 'ga' zhig gis ltos 'gyur/ /zhes brjod do/ /lhan cig byed pa yod pa yin pas de lta na yang de rtag pa'am mi rtag par 'gyur ba yin/ re zhig gang rnams rtag pa yin na rdul phra rab la sogs pa de rnams yod pa'i dngos po ma tshang ba mi srid do//de la rag las pa'i nye ba rnams nye ba dang bral ba ma yin no/ /mi rtag pa rnams kyang de la rag las pas skye bo'i nye ba rnams yin te/ gang gis na lhan cig byed pa'i rgyu dang bral bas mi byed do zhes brjod pa/ ci'i phyir na ma tshang ba zhes bya ba yin/ des na 'di 'dir len ma yin no//de nyid kyi phyir/ des byas min zhes pa la sogs pa gsungs te/ des te dbang phyug gis so/ /ma byas pa ste skyed pa dang ldan pa des ma byas pa yin la/ de nyid yod pa ma yin te/ yod pa ma yin no/ /gzhan ni 'gro ba gzhan yin no/ /rgyu des na de la rag las nas 'jug pa'i lhan cig byed pa rnams rtag tu nye ba rnams yin pa'i phyir rtag par byed pa po 'di ltos par ji ltar 'gyur te/ji ltar ltos pa dang ldan pa yin/ brgya la yang 'bras bu med par mi 'gyur ro/ /de ltar na brgya la yang de la ltos pa med pa'i phyir rtag tu 'bras bu byed pa na 'gyur ba'i phyir ro//'on te de ltar gyur na yang 'du ba'i rgyu dang 'du ba ma yin pa'i rgyu dang / rgyu mtshan gyi rgyu yang yin te/ rgyu gsum po rnams las 'bras bu 'byung la/ de 'di'i rgyu mtshan gyi rgyu yin pas tshogs pa la ltos nas 'bras bu med pa na brjod pa'i thal bar 'gyur ba yod pa ma yin no zhes gzhan gyis bsams pa'i dogs pa blangs nas/gal te ltos nas zhes pa la sogs pa gsungs te/ gal te yang 'di rtag tu 'bras bu thams cad byed par nus pa de ltar na yang / tshogs pa la ltos pa yin te/tshogs pa med par yod na yang nus pa'i byed pa po 'bras bu skyed pa yod pa ma yin te/ ji ltar snam bu skyed pa la nus pa yod pa yin na yang snal ma dang / 'ul bu dang thag bzangs la sogs pa med par snam bu 'byung bar yod pa ma yin la/ de bzhin du skabs su bab pa la yang 'gyur bar gal te zhes gsungs te/yang dbang phyug ma yin la/ gal te tshogs pa yod pas byed la de med na mi byed do zhes khas blangs pa yin la/ de'i tshe dbang phyug rgyu ru mi 'gyur te/ tshogs pa nyid las skyes pa'i phyir ro/ /de las kyang skyes pa ma yin pa'i phyir te/ de yod pa dang med pa dag las 'bras bu yod pa dang med pa mthong ba'i phyir ro//dbang phyug yod pa dang med pas ni ma yin la/ tshogs pa'i dus na yang de gzhan gyi ngo bos byed pa po'i ngo bo yang 'di'i sngar nyid du nus pa yin no/ /ji ltar nam zhig na byed pa rgyun chad par 'gyur/ gang yang tha ga pa la sogs pa bzhin du brgya la byed pa yin no zhes gang brjod pa de yang rigs pa ma yin te//gang gi phyir tha ga pa la sogs pa rnams sngar nus pa med pa nyid yin la yang phyi nas thag bzangs la sogs pa'i tshogs pa rnyed pa las sngar med pa'i tshogs pa rnyed pa thob pas snam bu la sogs pa tshogs pa 'bras bu byed pa yin no//gzhan du na de rnams kyang sngar de'i nus pa yod pa na de byed par thal bar 'gyur ba bzlog nus pa ma yin pas dpe bsgrub byas stong pa yin no/ /gzhan yang tshogs pas bskyed na yang de nyid rgyu yin te/ de thams cad du nye ba'i rang bzhin yin pas ji ltar brgya la 'di tshogs pa dang bral ba yang yin/de nyid kyi phyir 'di bstan pa'i don du/ tshogs na mi skyed dbang med cing / /zhes pa la sogs pa gsungs te/ mi byed pa la dbang ba ma yin te/ byed par mi nus pa ma yin no/ /tshogs pa ste tshogs pa'i yul la 'bras bu thams cad byed pa la nus pa dang bral ba'i phyir tshogs pa skyed pa la yang btang snyoms su 'dug par nus pa ma yin no//skyed pa na yang 'di ltar tshogs pa yin no zhe na/ de med par ni skyed pa min/ /zhes gsungs te/ bskyed pa la yang tshogs pa la dbang ba yin no//ci'i phyir zhe na/ de med pa'i phyir te/ de'i tshogs pa med pas med pa'i phyir ro/ /med pa'i rang bzhin la mo gsham gyi bu bzhin du byed pa'i nus pa cung zad kyang yod pa ma yin te/ rang bzhin med pa'i phyir ro/ /gang 'chad par 'gyur ba/bye ba brgya phrag rgyu yis kyang / /dngos po med la rgyu ru med/ /ces so/ /tshogs pa yod pa na byed pa yod par gyur du chug pa de lta na yang ci tshogs pa'i stobs kyis rang nyid mi 'dod kyang drangs nas byed pa yin nam/ 'on te 'dod nas yin zhes rnam par brtag pa yin te/de la dang po'i rnam par rtog pa'i dogs pa ni/ dbang phyug mi 'dod bzhin zhes pa la sogs pa gsungs te/ mi 'dod bzhin du ste 'dod pa ma yin pa dbang phyug tu 'dod na'o/ /'bras bu byed cing bsgrub pa yin la/ gzhan gyi dbang du thal te/ gzhan la rag las shing gzhan gyi dbang du thal te yongs su thal ba yin no//tshogs pa'i dbang gis mi 'dod na yang byed pa ni de'i dbang du gyur par thal bar 'gyur ro/ /gzhan gyi dbang du myong ba yang ma yin te/ dbang phyug nyid dor bar thal bar 'gyur ba'i phyir ro/ / rnam par rtog pa gnyis pa'i dbang du byas te gsungs pa/ 'dod na'ang 'dod la rag las 'gyur/ /zhes so/ /'on te 'dod nas byed do zhes pa'i phyogs khas len na/ de'i tshe yang 'dod la rag las par 'gyur te/ 'dod pa yod na 'bras bu byed pa yod pa'i phyir la/ de la ltos pa yod pa'i phyir ro/ /de'i phyir zhe na/ dbang phyug gang la yin te/ 'di ltar byed cing 'bras bu sgrub par byed pa yin na de ji ltar na dbang phyug yin te/ gang las dbang phyug yin/ 'dis ni gang brjod pa 'ga' zhig gis blo dang ldan pa yin pa'i phyir dbang phyug la nyes pa 'di med la/blos stong pa la ni rang nyid yod pa tsam gyis bskyed par bya ba rim ma yin pa nyid kyis 'bras bu byed la/ blo dang ldan pa la ni byed pa la dbang ba la yang mi 'dod na byed pa ma yin te/ de'i phyir 'di la ci'i phyir brgal zhing brtag par byed ces pa de yang bsal ba yin no//de ltar yang 'dod pa de ni rang nyid yod pa tsam rgyu mtshan yin pas ci'i phyir mi byed/ de lta bas na klan ka de nyid so na gnas so/ /gzhan yang gal te lhan cig byed pa'i rgyu ma yin na ci'i phyir de rnams dang bral bas mi byed/ lhan cig byed pa'i rgyu dang bral na yang 'bras bu byed pa la thams cad du de dbang du gyur pa'i phyir ro//lhan cig byed pas yin no zhe na/ de lta na yang yod pas kyang 'bras bu thams cad ci'i phyir mi byed/ lhan cig pa'i rgyu tshang bas nus pa'i phyir 'ba' zhig pa nus pa med pa ni byed pa po ma yin nam zhe na/de la 'di ci gzhan gyi ngo bos byed pa po yin nam/ de bzhin du yin no zhe na/ byed pa po ma yin pa nyid yin te/ byed pa po zhes bya ba ni rang gi ngo bos mi byed pa ma yin no/ /rang gi ngo bo 'di yang gnyug ma'i nus pa sgra'i brjod bya yin te/ 'bras bu la mkho ba yin no zhe na/dgos pa med pa yin te/ de ni glo bur ba'i nus pa med pa rnams la ltos pas so/ /nus pa yod pa 'di yang rang bzhin gyis lhan cig byed pa'i rgyu dang nye ba ma yin na byed pa po ma yin no zhe na/ ma yang yin la rang bzhin gyis mo gsham yang yin no zhes pa 'di yang 'di ltar lha rnams dga' bar brjod par bya ste/de'i phyir re zhig gzhag go/ /mi rtag pa yin par yang rgol ba de rnams 'dod pa ma yin no/ /de ltar yod na yang gzhan mthun mong ba'i rang bzhin ni ji ltar dbang phyug nyid yin/ de ltar na 'gro ba sna tshogs pa dbang phyug gi 'bras bu ma yin no zhes grub pa yin no//gal te blo dang ldan pa'i 'gro ba'i byed pa po ma yin na 'on kyang 'gro ba rdul phra rab kyi phung po rang bzhin rdul phra rab gnyis pa la sogs pa'i rim pas sa dang / shing dang ri la sogs pa'i don du 'gyur ro zhes gang dag ces pa la sogs pa smos te/gang dag dpyod pa la sogs pa'i rgol ba rnams rdul phra rab rnams rtag pa yin te rdul phra mo rnams so/ /smra ba ni 'gro ba sna tshogs pa'i rgyu zhes smras pa'o/ /rgol ba de dag kyang sngar cha shas yang rdul du phye ba'i zhes pa la sogs pas rdul phra rab dpyod pa'i dus su de bkag pas bzlog pa'i yin te/bsal ba yin no/ /de'i phyir rtag pa'i rdul phra rab kyi rang bzhin yang 'gro ba 'di'i rgyu ma yin no/ /de ltar de dbang phyug rgyu yin pa dang bar skabs su tshigs su bcad pa phyed kyis rdul phra rab rtag pa'i rang bzhin yang 'gro ba'i rgyu yin pas bsal te/rnam pa bzhi pa de nyid bsgrub pa'i ched du gtso bo yongs su gyur pa'i rang bzhin bsal bar 'dod pas grangs can gyi 'dod pa dgod pa'i phyir/ grangs can zhes pa la sogs pa gsungs te/ grangs can ni ser skya ste/ gtso bo ni rang bzhin zhes ming gzhan gzung ba yin la/'dod pa ni sems pa'o/ /rtag pa ni 'jig rten pa'i rgyu yin te/ de yang rtag pa mi 'jig pa'i rang bzhin no/ /'jig rten te g.yo ba dang mi g.yo ba'i 'gro ba thams cad yin la/ rgyu ni yongs su gyur pa'i ngo bos rgyu ru 'dod do/ /gtso bo zhes bya ba 'di ci zhig ce na/snying stobs zhes pa la sogs pa gsungs te/ snying stobs rdul dang mun pa zhes pa ni yon tan gsum po 'di mnyam par gnas pa rnams mnyam par gnas pa'i gnas skabs thob pa na gtso bo zhes brjod de/ gtso bo zhes pa smras so/ /'di rnams re zhig rang bzhin gyi gnas skabs yin la/mi mnyam 'gro bar brjod la/ mi mnyam par gnas pa thob pas yang yon tan 'di rnams 'gro bas brjod la/ sna tshogs shing rnam pa sna tshogs par yongs su gyur pa brjod do/ /'di ltar de rnams kyi rgyu ni gang gi tshe skyes bu yul la longs spyod pa'i rnam par 'dod pa skye ba de'i tshe skyes bu'i 'dod pa rang bzhin gyis yongs su shes nas/skyes bu dang sbyor bar byed do/ /de'i tshe yang sgra la sogs pa 'byin pa'i ngo bos yongs su gyur pas nye bar 'gyur ro/ /de'i tshe rim pa ni 'di yin no/ /rang bzhin las ni chen po de las ni//ngar 'dzin de las tshogs ni bcu drug yin/ /bcu drug po yi nang nas lnga po rnams/ /de las kyang ni 'byung ba lnga rnams yin/ /'di yi don ni 'di yin te/ rang bzhin las chen po ni gtso bo las chen po yin la/ chen po zhes pa ni glo bur du brjod pa yin no//de las zhes te chen po las ngar 'dzin pa yin te/ ngar zhes pa'i shes pa'o/ /ngar 'dzin pa de las tshogs bcu drug yin no/ /tshogs bcu drug zhes pa ni dbang po bcu gcig dang de tsam lnga rnams yin te/ de la las kyi dbang po lnga po ni kha dang rkang pa dang lag pa dang gci ba dang bshang ba'i lam rnams so//blo'i dbang po lnga ni rna ba dang lus dang mig dang lce dang sna'o/ /gnyi ga'i bdag nyid ni yid yin te/ 'di ltar bcu gcig tu 'gyur ro/ /yang de tsam lnga ni sgra dang reg bya dang gzugs dang ro dang dri'o/ /lnga po rnams las 'byung ba lnga rnams ni sgra la sogs pa lnga rnams las 'byung ba lnga rnams su 'gyur te/'byung ba lnga rnams ni nam mkha' dang rlung dang me dang chu dang sar grags pa rnams so/ /dang po'i rang bzhin ni rgyu nyid yin te 'bras bu ma yin no/ /chen po dang ngar 'dzin pa dang sgra la sogs pa lnga ni 'bras bu yang yin la rgyu yang yin no//dbang po bcu gcig po rnams dang / nam mkha' la sogs pa lnga po rnams 'bras bu nyid yin la/ rgyu ni ma yin no/ /skyes bu ni yang gnyi ga'i rang bzhin spangs pa yin no/ /gang brjod pa/ rtsa ba'i rang bzhin las ni 'gyur ba med/ /chen sogs bdun po rgyu dang 'gyur ba yin//bcu drug po ni rnam par 'gyur ba ste/ /skyes bu rang bzhin ma yin rnam 'gyur min/ /zhes so/ /gtso bo de yang 'bras bu ma lus pa nus pa'i rang bzhin nyid yon tan gsum gyi rang bzhin kho nas 'bras bu sgrub par byed pa yin te/ gzhan du na ji ltar de la yod pa ma yin pa 'bras bu sna tshogs pa'i gzugs skyed par byed/ de skad du yang / ma lus nus pa'i tshogs rnams kyi/ /rang bzhin 'ga' zhig kho na las/ /'bras bu'i khyad par 'jug pa ni/ /dngos po de yi rang bzhin no/ /gal te rgyu yi bdag nyid la//nus pa'i ngo bor 'bras med na/ /de nyid byed par nus yin te/ /med phyir nam mkha'i pad+ma bzhin/ /zhes so/ /'di ltar gtso bo la nges pa kho nar 'bras bu'i gzugs kyis 'gro ba 'jug pa dang ldog par byed do zhes ser skya zer ro/ / 'di ltar de dag thams cad nam mkha' la mngon par spras pa'i ri mo bzhin du snang ba yin zhes bsams nas/ grub pa'i mtha' smra bas sun dbyung bar bzhed nas/ gcig la zhes pa la sogs pa gsungs te/ gcig tu yod na rang bzhin gsum nyid ni zhes te/ rdul dang mun pa dang snying stobs yon tan gyi dbye ba gsum gyi bdag nyid rigs pa min te 'thad pa ma yin no/ /rgyu des na yon tan gsum gyi gtso bo de yod min te/ med pa yin no/ /gcig dang du ma'i rang bzhin du/ /zhes pa 'di ni phan tshun 'gal ba yin no/ /de'i phyir de nyid sun phyung ba na de'i 'bras bu thams cad sun phyung bar 'gyur ro//ma gyur mod gcig gi rang bzhin de yon tan gsum gyi bdag nyid de/ yon tan de'i rang bzhin gyi yod pa yin no zhe na/ de bzhin zhes pa la sogs pa gsungs te/ de bzhin du ste gtso bo bzhin du'o/ / yon tan te snying stobs dang rdul dang mun pa'i rang bzhin te yod min no/ /de yang gsum ste/ gang gi phyir yon tan de rnams kyang so so re re la gsum ste rnam pa gsum gsum mo/ /de bzhin du thams cad yon tan gsum gyi bdag nyid yin no zhes smra ba la/ so sor yang yon tan gsum gyi rang bzhin gyis yon tan gsum gyi bdag nyid thob po//de bzhin du de'i yon tan yang yon tan gsum gyi bdag nyid kyis gcig gi rang bzhin yod pa ma yin no/ /gang gi tshe yang 'di ltar rnam par dpyad pa na yon tan rnams yod pa ma yin la/ de'i tshe de las gyur pa'i sgra la sogs pa yang rigs pa ma yin no//yon tan med na zhes pa la sogs pa gsungs te/ yon tan te snying stobs la sogs pa rnams yin la/ med de yod pa ma yin no/ /kyang zhes pa ni nyes pa gzhan sogs pa yin te/ sgra la sogs pa ste sogs pa'i sgra smos pas reg bya la sogs pa gzung ngo //yod pa nyid de yod pa ni dngos po'o/ /shin tu ring du ste/ rnam pa thams cad du rigs pa ma yin la/ rgyu med pa la 'bras bu yod pa nyid du mi rigs pa'i phyir ro/ /de yang / 'di dag bde sogs dang ldan pa/ / gsal ba gsal por mthong ba yin/ /bde dang sdug bsngal btang snyoms sogs/ /rang bzhin gcig po dmigs pa las/ /zhes brjod de/ de yang mi rigs so zhes bstan pa'i phyir/ sems med ces pa la sogs pa gsungs te/ 'ang gi sgra ni snga ma bzhin yin te/sems med pa ni bems po'i ngo bo yin pa la'o/ /gos la sogs pa sems med pa'i snam bu la sogs pa la'o/ /bde sogs kyang sems kyi bdag nyid de/ bdag nyid gcig por srid pa'ang min te yod pa ma yin no/ /gang gi phyir snying stobs dang rdul dang mun pa'i bdag nyid ni bde ba dang sdug bsngal dang btang snyoms su brjod pa yin la/de rnams la yang yon tan yod pa ma yin la/ de ji ltar na de la bde ba la sogs par 'gyur ba yin/ de ltar gyur na yang bde ba'i bdag nyid yin pa'i phyir snam bu la sogs pa rnams bde ba'i rang bzhin yin no zhes ni mi smra'i/'on kyang bde ba la sogs pa de las skyes par dogs nas de dngos zhes pa la sogs pa gsungs te/ de ni bde ba la sogs pa yin la/ rgyu'i ngo bo ni byed pa po'i rang bzhin phyi rol du gyur pa yin par snam bu la sogs pa yang gal te 'dod na'o//dngos po rnams dpyad zin nam zhes te/ snam bu la sogs pa 'di rnams yan lag can gyi ngo bo ma yin la/ rdul phra rab kyi rang bzhin yang med cing / yon tan gsum gyi bdag nyid du med de/ 'di ltar dngos po rnam par dpyad cing brtags pa na rigs pas dngos po snang ba rnams kyang sgyu ma lta bu yin te/rang bzhin med pa'i phyir ro/ /de la dngos po 'di ji ltar na bde ba la sogs pa'i rgyu'i ngo bor 'gyur/ gzhan yang gsal ba bde ba la sogs pa'i rang bzhin yin na snam bu la sogs pa nyid bde ba la sogs pa'i bskyed par bya bar 'gyur ro zhes khyod kyis bde sogs zhes pa la sogs pa gsungs te/snam bu yang bde ba la sogs pa nyid kyi rgyu yin te/ khyod de khyod cag la rgyu nyid du 'gyur te/ gsal ba ni bde ba la sogs pa'i rgyu yin pa'i phyir ro//de ltar na yang de las snam sogs te/ sogs pa'i sgras ni tsan+dan gyi phreng ba la sogs pa gzung ngo / /slar 'di phyin ci log tu dmigs pa yin no zhes snam sogs zhes pa la sogs pa smos te/ sogs pa'i sgras ni tsan+dan la sogs pa yin la/bde sogs yin te sogs pa'i sgras sdug bsngal la sogs par 'gyur ro/ /de med phyir na ste snam bu la sogs pa med pa'i phyir ro/ /bde sogs med pa yin te/ snam bu la sogs pa'i 'bras bu yin pa'i phyir ro/ /bde ba la sogs par mi 'gyur ro/ /de'i rjes su 'gro ba ldog pa'i rjes su byed pa'i phyir bde ba la sogs pa de'i 'bras bu nyid yin no//snying stobs la sogs pa'i yon tan gyi bdag nyid yin pas gang yang bde ba la sogs pa rtag par 'dod pa na/ de yang yang dag pa ma yin no zhes bstan pa'i phyir/ bde sogs kyang zhes pa la sogs pa gsungs te/bde ba dang sdug bsngal dang btang snyoms kyang ngo / /kyang gi sgras ni nyes pa lhag pa brjod par 'dod pa yin no/ /rtag pa nyid ni rtag pa'i rang bzhin nyid yin la/ nam yang dmigs pa yod pa ma yin mthong ba ma yin te/ yon tan la sogs pa med pa'i phyir la/de rnams rtag pa la sogs par mi rigs pa'i phyir ro/ /gal te yang bde ba la sogs pa rnams rtag par gyur na de'i tshe rtag tu dmigs par 'gyur ro zhes bstan pa'i phyir/ bde ba'i gsal ba nyid yod na/ /zhes te/ gal te bde ba la sogs pa rtag pa'i rang bzhin du gnas pa yin na/de'i tshe ji ltar nam zhig bde ba'i rang bzhin yin pa de bzhin du nam yang zhes pa ni rtag tu de rigs par 'gyur te/ de'i rang bzhin yongs su ma dor ba'i phyir ro zhes pa ni bsdus pa'i don to/ /bde ba'i bden yod nyid yin na yang bde ba'i gsal ba 'ga' zhig na gyur pa'i bde ba rtag pa yin na/myong ba ci'i phyir 'dzin pa ma yin te/ bde ba'i myong bar ni thams cad du ci'i phyir mi 'gyur/ thams cad du myong ba yang ma yin no/ /de lta bas na nam zhig na mi dmigs pa de na de'i tshe yod pa ma yin no zhes ji ltar rtag pa nyid du nges pa yin/de ltar gyur na yang rtag tu gsal ba'i ngo bor gyur na nyes pa 'dir 'gyur na/ gang gi tshe yang de nyid nus pa'i ngo bo nyid kyis mi mngon par gyur pa'i tshe nyes pa med do zhes/ de nyid phra mo zhes pa la sogs pa gsungs te/ de nyid gsal bar gnas par byas nas dngos po la brten pas phyi nas mi dmigs pa'i dus na phra mor 'gyur ba yin te/nyin mo'i skar ma la sogs pa bzhin du mi dmigs pa'i rang bzhin la yang dag par brten pa yin no zhe na/ de ni rigs pa ma yin no/ /ci'i phyir zhe na/ gang ste gang gi phyir rags pa gsal ba'i ngo bo rang bzhin du yod na phra ba ji ltar yin te/de ltar mi gsal ba'i rang bzhin bde ba la sogs pa de rtag pa yin pas gcig pu ni du ma'i rang bzhin nyid du gcig pu mi rigs so zhes bsams pa yin no/ /'on te de lta na yang phan tshun 'gal ba dag dus gcig tu gcig la rigs pa ma yin te/sngar gyi chos log na yang chos gzhan skyes pas nyes pa med do zhes/ rags pa dor nas zhes pa la sogs pa gsungs te/ rags pa mngon par gyur pa'i ngo bo dor nas te/ yongs su bor bar gyur na mi mngon par gyur pa yin no zhe na/ 'di ltar khas len pa na/ phra rags de dag mi rtag nyid/ /ces te/ skye ba dang 'jig pa'i dbang du gyur pa'i phyir ro/ /rags pa bstan pa ma yin pa phra ba nyid du 'gyur ro/ /gyur du chug na yang rtag pa la nyams pa ci zhig yod ce na/ de bzhin dngos po thams cad ni/ / zhes pa la sogs pa gsungs te/ dngos po thams cad ni de kho na nyid nyi shu rtsa lnga'i mtshan nyid yin la/ de bzhin du ste/ rags pa phra ba bzhin du mi rtag nyid du ces mi 'dod de/ ci'i phyir rjes su 'gro ba med pa nyid kyi 'jig par khas mi len/ bsam pa ni 'di yin te/ rags pa dang phra ba dag kyang rjes su 'gro ba med pa'i 'jig pa skye ba med par mngon pa dang mi mngon pa'i dngos por rigs pa ma yin no//gzhan du na brgya la 'ga' zhig gi ngo bos gnas pa'i phyir snga ma bzhin du yang mngon par thal bar 'gyur ro/ /de lta bas na nges par de dag rjes su 'gro ba med par 'jigs pa yang dag par skye ba nyid du khas blang bar bya'o//de ltar na yang de dag 'di ltar gyur pa na de bzhin du gzhan yang khyad par med pa'i phyir 'gyur ba yin no/ /gzhan yang gal te rags pa dang phra ba dag 'jig pa dang skye bar 'dod na/ de'i tshe bde ba la sogs pa rnams mi rtag par thal bar 'gyur te/'di ltar yang rags pa de bde ba la tha dad pa'am tha mi dad par 'gyur/ de la gal te tha dad pa yin na de'i tshe der log na yang sngar bzhin du bde ba'i myong bar 'gyur ro/ /snam bu log na yang bum pa mi dmigs pa rigs pa ma yin te/de ni 'di zhes 'brel pa rtogs pa la thug pa med par thal bas so/ /'brel pa yod na yang rgyu ma yin pa log pas gzhan ldog pa yod par rigs pa ma yin te/ ba lang log pas de'i bdag po mi ldog pa bzhin no/ /bde ba'i rgyu yang de ma yin te/snam bu la sogs pa nyid las bde ba skyed pa'i phyir ro/ /de yang rgyu ma yin te/ de ni bde ba la sogs pa dang dus mnyam pa nyid kyi phyir ro/ /'on te tha dad pa ma yin no zhes bya ba'i phyogs yin na/ 'di la brjod par bya ste/ rags pa bde ba gzhan min zhes te/gal te rags pa bde ba las gzhan te tha dad pa yin na de'i tshe 'di bde ba nyid du 'gyur ro/ /de'i tshe bde ba gsal bar mi rtag nyid yin te/ de'i rang bzhin yin pas rags pa 'gags pa na bde ba yang 'gags pa'i phyir bde ba mi rtag pa nyid de/ 'jig pa nyid du gsal te nges pa yin no//gal te de ltar gyur na yang gal te rnam pa thams cad du zhig par 'gyur na/ de'i tshe bde ba slar skye bar mi 'gyur te/ gtan med pa ni nam mkha'i ut+pal bzhin du skye bar mi rigs pa'i phyir ro zhes gzhan gyi 'dod par dgod pa'i phyir/ gal te med pa zhes pa la sogs pa smos te/ gal te rnam pa thams cad du rgyu med pa'i bdag nyid la yod pa ma yin pa de ni skye ba ma yin te/ dper na nam mkha'i pad+ma bzhin no/ /de bzhin du gal te gzhan yang yin par gyur na de'i tshe skye ba ma yin no/ /de'i phyir med pa ni cung zad kyang skyes pa ma yin la/gtan med pa'i rang bzhin cung zhig skye ba ma yin no/ /ci'i phyir zhe na/ med pa'i phyir te/ yod pa ma yin pa'i phyir la/ de ltar gal te 'dod na'o/ /'di ltar gal te 'dod na de'i tshe 'di brjod par mi bya'o zhes gsal bar zhes pa la sogs pa smos te/gsal bar med pa yin te/ sngar yod pa'i gnas skabs na yod pa ma yin pa'i gsal ba skye ba ste/ phyi nas skye bar mi 'dod kyang ste/ 'dod pa ma yin pa yang khyod de yod par smra ba khyod la gnas pa nyid de yod pa yin no/ /gzhan du na sngar yang de yod pa yin na phyi ma bzhin du sngar yang de dmigs par thal bar 'gyur ro//ji ltar gsal ba med pa skyes pa de bzhin du gal te gzhan yang yin pa de'i tshe 'gal ba cung zad kyang yod pa ma yin no/ /gzhan yang yod pa 'bras bur smra ba la rgyu'i gnas skabs na 'bras bu yod pa'i phyir nyes pa gzhan du yang 'gyur ro zhes brjod pa'i phyir/gal te rgyu la zhes pa la sogs pa gsungs te/ bza' bar bya ba'i don gyis na zas yin la/ zas za ba po mi gtsang bar 'gyur te/ btsog pa za bar 'gyur ro/ /ji ltar zhe na/ gal te rgyu la 'bras gnas na ste/'bras bu gal te rgyu la yod pa'i rang bzhin yin na'o/ /'di ltar yod par smra ba la yang zas kyi 'bras bu mi gtsang ba nyid yin na de yang zas kyi gnas skabs nyid na yod pa yin no/ /de'i phyir zas za bas na de za ba'i dogs par 'gyur ro/ / gzhan yang thal bar 'gyur ba gzhan 'di yang yod pa 'bras bur smra ba la brjod pa'i phyir/ ras kyi rin zhes pa la sogs pa gsungs te/ gal te rgyu la 'bras bu gnas na zhes pa dang 'brel te/ ras bal gyi sa bon te rgyu la 'byung bar 'gyur ba'i 'bras bu ras yod pa'i phyir/ras kyi rin gyis te/ de nyo ba'i rin gyis ras bal gyi sa bon nyos la ste/ bzung nas bgo bar gyis te/ gos su gyis shig /'on te de ltar na gal te don dam par rgyu la 'bras bu yod pa de ltar na yang 'di kun rdzob tu ma rig pa'i rab rib kyis ye shes kyi mig nyams par byas pa'i tha snyad pa'i 'jig rten pas 'di mi mthong ba yin no zhes 'jig rten rmongs pas zhes pa la sogs pa gsungs te/rmongs pas te mi shes pas so/ /dngos po'i de kho na nyid yod na yang mi mthong ste 'jig rten gyis mthong ba ma yin la/ de'i phyir brjod pa'i nyes par thal bar mi 'gyur ro//gal te brjod do zhe na/ de kho na nyid shes pa yang gnas pa ma yin nam/ gal te yang 'jig rten pas ma mthong bas de ltar tha snyad byed pa ma yin na de kho na nyid shes pa la rigs pa yin te/ gang gi phyir de kho na nyid shes pas kyang rgyu las 'bras bu yod do zhes shes pa ma yin pa'i phyir ro//don dam par rigs pa'i grangs can de yang yod pa yin te/ de nyid tha snyad pa'i skye bo thams cad pa'i thun mong du gnas pa yin la/ de rnams kyang zas za ba la sogs pa ni 'jug pa dang / ras don du gnyer bas ras bal gyi sa bon bsnyon par bya ba ma mthong ba yin no//'di ni 'di lan du rigs pa ma yin no zhes 'jig rten zhes pa la sogs pa gsungs te/ 'jig rten pa ste tha snyad pa'i so so'i skye bo la yang shes pa gang gis rgyu la 'bras bu yod do zhes rtogs pa de yod la de kho na nyid shes pa 'ba' zhig la ni ma yin no//de ltar yang 'bras bu mthong nas rgyu la de yod do zhes de kho na nyid shes pa dang / 'jig rten pa gnyi ga la thun mong du nges pa yin no/ /des 'jig rten pas rgyu gang gis mi mthong / de la 'jig rten pas mi mthong ba la rgyu mtshan brjod par bya'o/ / 'jig rten pa'i mthong ba tshad ma yin no zhes 'jig rten zhes pa la sogs pa gsungs te/ tshad ma nyid min te de'i shes pa tshad ma ma yin pa nyid la gsal bar mthong ba yang med pa nyid do/ /gsal bar mthong bar gyur pa'i rang bzhin mthong ba de yang yod pa ma yin pa ste/ tshad ma ma yin par 'gyur ro/ /de lta bas na dngos po'i de kho na nyid kyis rnam par gzhag pa thob pa ma yin no/ /'di yang kho bo cag gis 'dod pa nyid yin te/ tha snyad pa'i tshad ma thams cad don dam par tshad ma ma yin pa'i phyir ro/ /de bzhin du yang khyed cag kyang kho bo cag gi phyogs su lhung ba yin no//de ltar yongs su gnas pa la ser skya grub pa'i mtha' smra ba yang nyes pa mtshungs par rgol bas/ gal te tshad ma zhes pa la sogs pa gsungs te/ gal te tshad ma yang don dam par tshad mar mi 'gyur ro zhes pa khyed kyis phyogs yin na/de gzhal brdzun par mi 'gyur ram/ tshad ma tshad ma ma yin pa nyid yin na des gzhal ba ste/ tshad ma des yongs su bcad pa brdzun zhing bden pa ma yin pa thob po/ /gzhan cir 'gyur zhe na/ de'i phyir de nyid du dngos rnams stong pa nyid ni 'thad pa ma yin/ gal te tshad ma ma yin de nyid yin na/des bcal ba yang brdzun pa yin no/ /de'i tshe gang 'dir de nyid du ste/ don dam pa yin la/ dngos po rnams ni chos yin te/ stong pa nyid ni chos thams cad rang bzhin med pa yin la/ tshad ma de'i nges pa de yang 'thad pa ma yin zhing / rigs pa ma yin te/ tshad ma thams cad kyis nye bar bstan pa yang brdzun pa yin pas so/ /chos thams cad gang na med pa de yang de dpyod pa'i tshad ma nye bar bkod pas rigs pa mtshungs pa yin no zhe na/ 'dir lan/ brtags pa'i zhes pa la sogs pa gsungs te/ brtags te rtog pas sgro btags pa'o//dngos po ni chos yin la/ ma reg pa ste/ rtog pa'i blos ma bzung bar de'i dngos po 'dzin pa ma yin te/ dmigs pa ma yin no/ /'di ltar yang bum pa btags pa'i ngo bos yongs su brtags nas de dang 'brel pa bum pa med pa 'jig rten pas rtogs te/bum pa la rnam par dpyad pas 'jig rten la grags pa nyid/ gang gi tshe cung zad kyis ngo bor mi gnas pa de'i tshe med pa nyid yin te/ de las phyin ci log gi ngo bo shin tu 'ga' yod pa ma yin no/ /de nyid brtags pa bstan pa'i phyir/ de'i phyir zhes pa la sogs pa gsungs te/gang gi phyir brtags pa'i dngos po'i dbye bas dngos po med pa 'dzin pa ma yin pa de'i phyir brdzun pa'i gang la dngos po gang na med pa'i dngos po gang yin pa'o/ /de yi dngos med gsal bar brdzun/ /de'i ste dngos po med pa'i rang bzhin gyis dngos po med cing bral ba gsal ba ste/nges par brdzun zhing bden pa ma yin pa yin te/ de yang yongs su brtags pa'i dngos po yin pa'i phyir ro/ /'di ltar yang dngos po dang dngos po med pa dag yongs su brtags pa'i ngo bo la chos thams cad rang bzhin med pa nyid kyis gnas pa yin no//yang 'di nyid mjug bsdu ba'i zur gyis gsal bar bstan pa'i phyir/ des na rmi lam zhes pa la sogs pa gsungs te/ gang gi phyir na dngos po dang dngos po med pa brtags pa'i nye bar gzhag pa'i phyir brdzun pa'i don yin pa de lta bas na rmi lam ste/gnyid kyis sems mnan pa'i gnas skabs su bu skyes te/ zhig pa na bu med do zhes pa'i rnam par rtog pa ni de med pa'i rnam par rtog pa'o/ /ci zhig byed ce na/ de yod rnam rtog skye ba'i bgegs yin te/ de yod na ni bu yod pa'o/ /de yod pa ni dngos po nyid do/ / de'i rnam par rtog pa ni sgro 'dogs pa yin te/ de rnams skyes shing byung ba yin la/ de bgegs yin te/ 'gegs par byed pa yin no/ /de lta bu de nyid de yin no zhe na/ brdzun pa yin te de brtags pa yin no/ /de yod par rtog pa 'gegs pa yang brdzun yin la/ bden pa ma yin te/rmi lam gyi bu ni ma skyes pa dang ma 'gags pa'i phyir ro/ /yang na bden par mngon par 'dod pa'i bu nyid rmi lam du shi ba la 'di thams cad sbyar bar bya'o/ /de ltar na chos thams cad kyi skye ba dang 'gag pa rtogs pas brtag par blta bar bya'o/ /'di brjod par 'gyur te/dper na rmi lam ni mthong ba'i dngos po ma skyes pa dang ma 'gags pa rtog pas nye bar bstan pa'i dngos po dang dngos po med pa dag don dam par yod pa ma yin te/ 'on kyang rnam par rtog pas tha snyad kyi yul du nye bar gyur pa rab tu snang la/ rtog pa de yang med pa'i yul can yin pas tshad ma ma yin te/de'i yul yang don dam par rang bzhin med pa'i phyir ro/ /de bzhin du sad pa'i gnas skabs na dmigs pa yang dngos po dang dngos po med pa'i tha snyad kyi lam la zhugs pa dag la rnam par rtog pas bstan pa'i rnam par gzhag pa yin no/ /de ltar na de tshad ma ma yin pa la yang chos thams cad rang bzhin med pas mi 'gal lo zhes gang gsungs pa/skye dang gnas dang 'jig pa yang / /'jig rten bsam pas khyed kyis gsungs/ /de phyir brtags pa tsam nyid du/ /chos rnams thams cad bstan pa yin/ /gang gi stong nyid rnams brtags pas//rtog pa'ang med par brjod pa'o/ /zhes te/ thams cad 'tsham pa yin no/ /de ltar rgyur med pa'i rang bzhin dang / dbang phyug dang / gtso bos byas pa nyid kyis 'gro ba bsal bas/ rgyu med pa las kyang ma yin no zhes bya ba'i don bsgrubs nas/ mjug bsdu ba'i phyir/ de bas de ltar zhes pa la sogs pa gsungs te/ gang gi phyir rang bzhin la sogs pa las gyur pa'i 'bras bu cung zad kyang skye ba ma yin no/ /de'i phyir de ltar rnam par dpyad pa ste/ brjod ma thag pa'i rnam par dpyad pas so/ /'ga' yang rgyu med yod ma yin te/rang gi ngo bo la sogs pa rgyu ma yin pa las skyes pa'i 'bras bu 'ga' zhig yod pa ma yin te/ med pa yin no/ /'di ni nye bar mtshon pa yin no/ /skyes bu dang / dus la sogs pas byas pa yang yod pa ma yin te/ de rnams kyang rgyu med pa'i phyir ro//de'i phyir rgyu med pa yang ma yin zhes grub pa yin no/ /ci ste gal te rang bzhin dang / dbang phyug dang / gtso bo la sogs pa'i rgyu med pa las 'ga' zhig med pa de ltar na yang mthong ba'i rgyu 'di las don dam pa skye ba yin te/ de ltar na thams cad rang bzhin med par ji ltar grub par 'gyur zhes gzhan gyi dogs pa bsu nas/rang las ma yin gzhan las min/ /gnyis las ma yin zhes pa'i mu gsum gyis don bstan pa'i phyir/ so so'am ni zhes pa la sogs pa gsungs te/ so so'am 'dus pa rnams la zhes te/ so so ba rnams dang 'dus pa rnams la ma yin pa nyid do//de la so so ba rnams ni re rer rang dang gzhan las ma yin no/ /'dus pa rnams la'ang ma yin te/ rang dang gzhan gnyis po dag rkyen rnams te/ rgyu rnams la'o/ /gnas pa ste skyes pa'i ngo bos gnas cung zad kyang ma yin no//de la re zhig rang las dngos po rnams skye ba ma yin te/ skye ba las sngar de'i rang bzhin med pa'i phyir gang las skye bar 'gyur/ skyes pa na yang ngo bo yod pa de yang grub pa'i phyir ci zhig skye bar 'gyur/ gzhan yang nyid las skye ba la skyes pa nyid slar yang skyes par 'gyur la/de yang rigs pa ma yin te/ byas pa la yang byed pa mi 'thad pa'i phyir ro/ /skyes pa yang skye ba la ni sa bon la sogs pa nyid 'khor ba ji srid du 'jug pa'i phyir myu gu la sogs pa rnams brgya la yang bskyed pa la yang skabs la yod pa yang ma yin na/'di khas blangs pa na yang 'jig rten pa'i nyams su myong bas grub pa ma yin te/ sa bon la sogs pa la myu gu la sogs pa skye ba mthong ba'i phyir ro/ /sa bon dang myu gu gcig pa ni ma yin te/ gnyis ka yang gzugs dang ro dang nus pa dang smin par byed pa tha dad pa'i phyir ro//rang gi ngo bo bskyed par bya ba yin na yang 'ga' zhig skye bar yang mi 'gyur te/ gcig la gcig brten pa yin pa'i phyir ro/ /'di ltar re zhig rang gi ngo bor ma gyur pa de srid du skye ba mi 'thad la/ ji srid skyes par ma gyur pa de srid du rang gi ngo bor mi 'gyur te/ de'i phyir gcig la gcig brten pa yin no//de lta bas na rang las skye ba cung zad kyang yod pa ma yin no/ /gzhan las kyang ma yin te/ gzhan las skye bar 'dod pas na sa bon gyis kyang khre'i myu gu bskyed par thal te/ sA li dang khre dag kyang khre'i myu gu la ltos nas gzhan nyid du khyad par yod pa ma yin no//thams cad las kyang thams cad skye bar 'gyur te/ thams cad gzhan dang gzhan du khyad par med pa'i phyir ro/ /'on te gal te gzhan yin par khyad par med kyang de lta na yang rgyu dang 'bras bu dag phan tshun du bskyed par bya ba dang / skyed par byed pa'i dngos po nges pa yin pa'i phyir thams cad skye ba ma yin no zhe na/'bras bu ma skyes pa la yang gang gis nus pa zhes brjod par bya/ skyes pa la yang rgyu dang 'bras bu med pa'i phyir gang gis nus pa zhes brjod par bya/ rgyu dang 'bras bu dag dus mi mtshungs pa'i phyir bskyed par bya ba dang / skyed par byed pa'i dngos po so sor nges pa 'ga' zhig kyang yod pa ma yin no//de nyid kyi phyir rgyun gcig tu nges pa yin par yang rigs pa ma yin te/ rgyu dang 'bras bu med par rgyun mi srid pa'i phyir te/ de skad cig ma gcig tu gnas pa yin pa'i phyir rgyun zhes bya ba ci zhig yin/ snga ma dang phyi mar skad cig mar 'jug pa yang rtog pas sgro btags pa yin pa'i phyir dngos por gyur pa'i rgyun yod pa ma yin no//'dis ni 'dra ba'i nges par byed pa yang 'dir gsal ba yin te/ de ltar na yang 'ga' zhig dang 'ga' zhig na rgyun du gyur pa'am 'dra ba'am bskyed par bya ba dang skyed par byed pa'i dngos po'i nges yod ma yin te/bskyed par bya ba dang skyed par byed pa yang 'dir dpyad par bya ba yin pa'i phyir ji ltar 'dis de lan du 'gyur ba yin/ de lta bas na gzhan las kyang cung zad kyang srid pa ma yin la/ gnyi ga yang ma yin te/ so so'i phyogs la brjod pa'i phyogs nges par thal bar 'gyur ba'i phyir ro//so so'i gnyis po la nus pa med pa tshogs pa la yang nus pa med pa'i phyir ro/ /long ba gcig gis ma mthong ba'i lam mang po rnams kyis kyang mthong bar nus pa ma yin no/ /bye ma so so la mar khu 'byin pa'i nus pa med na tshogs pa la yang de'i nus pa yod par mi 'gyur ro//de'i phyir phyogs gnyi ga la brjod pa der thal bar 'gyur ba'i phyir gnyi ga las kyang skye ba ma yin no/ /de ltar na rang dang gzhan dang gnyi ga las skyes pa dang / rgyu med pa las skyes pa yang de kho na nyid du yod pa ma yin no/ /de bas na don dam par ma skyes pa dang ma 'gags pa'i rang bzhin sgyu ma dang smig rgyu mtshungs pa rten cing 'brel par 'byung ba rang bzhin gyis stong pa nyid sna tshogs pa thams cad kyi ngo bor snang ngo //rkyen 'di ba tsam 'di ni 'dir kun rdzob tu 'gegs pa ma yin no/ /gang bcom ldan 'das kyis sA lu ljang pa'i mdo las gsungs pa yin te/de la rten cing 'brel par 'byung ba mthong ba ji lta bu zhe na/ 'di la bcom ldan 'das kyis sus rten cing 'brel par 'byung ba rtag pa dang / srog med pa dang / srog dang bral ba dang / ji lta bu nyid dang / ma nor ba nyid dang / ma skyes pa dang / ma byung ba dang / ma byas pa dang / 'dus ma byas pa dang / thogs pa med pa dang / dmigs pa med pa dang / zhi ba dang / 'jigs pa med pa dang / mi 'phrogs pa dang / rnam par 'gyur ba ma yin pa'i rang bzhin du mthong ba des chos mthong ba yin te/ gang gis tshul 'di dang 'dra bar chos la yang rtag pa dang /srog med pa dang / srog dang bral ba zhes pa la sogs pa ni snga ma bzhin no/ /ji srid du rnam par 'gyur ba ma yin pa'i rang bzhin du mthong ba de 'phags pa'i chos nye bar rtogs te/ yang dag pa'i ye shes dang ldan pa'i bla na med pa chos kyi sku sangs rgyas mthong ngo zhes gsungs so//smras pa ci'i phyir rten cing 'brel par 'byung ba zhes bya/ smras pa rgyu dang bcas rkyen dang bcas pa la bya'i/ rgyu med rkyen med pa la ni ma yin te/ snga ma bzhin du'o/ /'di ltar yang rten cing 'brel par 'byung ba 'di gnyis kyis phyir 'byung ste/gnyis gang zhe na/ 'di lta ste/ rgyu dang 'brel pa dang / rkyen dang 'brel pa'i phyir ro/ /de yang phyi dang nang gi rnam pa gnyis su blta'o/ /de la phyi rol gyi rten cing 'brel par 'byung ba rgyu dang 'brel pa gang zhe na/ 'di lta ste/ sa bon las myu gu/ myu gu las 'dab ma/'dab ma las sdong bu/ sdong bu las sbu gu/ sbu gu las snying po/ snying po las me tog /me tog las 'bras bu'o/ /sa bon med na myu gu mi 'byung ste/ me tog med na 'bras bu'i bar du yang mi 'byung ngo / /sa bon yod na myu gu mngon par 'grub par 'byung ste/de bzhin du me tog yod na 'bras bu'i bar du mngon par 'grub par 'gyur ro/ /de las sa bon ni 'di snyam du bdag gis myu gu mngon par bsgrub po snyam du mi sems so/ /myu gu yang 'di snyam du bdag ni sa bon gyis mngon par bsgrubs so snyam du mi sems so/ / de bzhin du me tog kyang 'di snyam du bdag gis 'bras bu mngon par bsgrub po snyam du mi sems pa'i bar du ste/ 'bras bu yang 'di snyam du bdag ni me tog gis mngon par bsgrubs so snyam du mi sems mod kyis/ 'on kyang sa bon yod de myu gu mngon par bsgrub cing 'byung bar 'gyur bas na de bzhin du me tog yod na 'bras bu'i bar du yang mngon par 'grub cing 'byung bar 'gyur te/de ltar phyi rol gyi rten cing 'brel par 'byung ba rgyu dang 'brel par blta'o/ /phyi rol gyi rten cing 'brel par 'byung ba rkyen dang 'brel bar ji ltar lta zhe na/ khams drug 'dus pa'i phyir te/khams drug po gang dag 'dus pa'i phyir zhe na/ 'di lta ste/ sa dang chu dang me dang rlung dang nam mkha' dang / dus kyi khams rnams 'dus pa las phyi rol gyi rten cing 'brel par 'byung ba rkyen dang 'brel par blta'o/ /de la sa'i khams ni sa bon brten pa'i bya ba byed do//chu'i khams ni sa bon brlan pa'i bya ba byed do/ /me'i khams ni sa bon yongs su dro ba'i bya ba byed do/ /rlung gi khams ni sa bon 'bu ba'i bya ba byed do/ /nam mkha'i khams ni sa bon la mi sgrib pa'i bya ba byed do/ /dus ni sa bon 'gyur ba'i bya ba byed do/ /rkyen ni 'di rnams med par sa bon las myu gu mngon par 'grub par mi 'gyur gyi/nam phyi rol gyi sa'i khams ma tshang ba med par 'gyur la/ de bzhin du chu dang me dang rlung dang nam mkha' dang dus kyang ma tshang ba med par 'gyur te/ thams cad 'dus pa la sa bon 'gag pa na de las myu gu mngon par 'grub par 'gyur ro//de la sa'i khams kyang 'di snyam du bdag gis sa bon brten pa'i bya ba bya'o snyam du mi sems so/ /de bzhin du chu'i khams kyang 'di snyam du bdag gis sa bon brlan par bya'o snyam du mi sems so/ /me'i khams kyang 'di snyam du bdag gis sa bon yongs su dro bar bya'o snyam du mi sems so//rlung gi khams kyang 'di snyam du bdag gis sa bon 'bu bar bya'o snyam du mi sems so/ /nam mkha'i khams kyang 'di snyam du bdag gis sa bon la mi sgrib pa'i bya ba bya'o snyam du mi sems so/ / dus kyang 'di snyam du bdag gis sa bon bsgyur ba'i bya ba bya'o snyam du mi sems so/ /sa bon yang 'di snyam du bdag gis myu gu mngon par bsgrub po snyam du mi sems so/ /myu gu yang 'di snyam du bdag ni rkyen 'di dag gis mngon par bsgrubs so snyam du mi sems mod kyi 'on kyang rkyen 'di dag yod la sa bon 'gag pa na myu gu mngon par 'grub par 'gyur ro//de bzhin du me tog yod na 'bras bu'i bar du yang mngon par 'grub par 'gyur te/ myu gu yang bdag gis ma byas/ gzhan gyis ma byas/ gnyis kas ma byas/ dbang phyug gis ma byas/ dus kyis ma bsgyur/ rang bzhin las ma byung / rgyu med pa las kyang ma skyes te/ 'on kyang sa dang chu dang me dang rlung dang nam mkha' dang dus kyi khams rnams 'dus pas sa bon 'gags pa na myu gu mngon par 'grub par 'gyur te/ de ltar phyi rol gyi rten cing 'brel par 'byung ba rkyen dang 'brel par blta'o//de ltar phyi rol gyi rten cing 'brel par 'byung ba rnam pa lngar blta ste/ lnga gang zhe na/ rtag pa ma yin pa dang / chad pa ma yin pa dang / 'pho ba ma yin pa dang / rgyu chung ngu las 'bras bu chen po mngon par 'grub pa dang / de dang 'dra ba'i rgyud du'o//ji ltar rtag pa ma yin zhe na/ gang gi phyir myu gu yang gzhan la sa bon yang gzhan te/ myu gu yang yin pa de nyid sa bon ma yin la/ sa bon 'gags pas myu gu 'byung ba ma yin/ ma 'gags pas kyang ma yin te/ sa bon yang 'gags la/ de nyid kyi tshe myu gu 'byung ste/de'i phyir rtag par ma yin no/ /ji ltar chad par ma yin zhe na/ sngon 'gags pa'i sa bon las myu gu skye ba ma yin/ ma 'gags pa las kyang ma yin gyis/ sa bon yang 'gags la/ de nyid kyi tshe srang mda'i mthon dman bzhin du myu gu skye bas de'i phyir chad par ma yin no/ / ji ltar 'pho bar ma yin zhe na/ gang gi phyir myu gu yang gzhan sa bon yang gzhan la/ myu gu gang yin pa de nyid sa bon ma yin te/ de'i phyir 'pho bar ma yin no/ /sa bon chung ngu btab pa la 'bras bu chen po mngon par grub par 'gyur te/ de'i phyir chung ngu las 'bras bu chen po mngon par 'grub po//sa bon ji lta bu btab pa de lta bu'i 'bras bu mngon par 'grub pa de'i phyir de dang 'dra ba'i rgyud du ste/ de ltar phyi rol gyi rten cing 'brel par 'byung ba rnam pa lngar blta'o/ /de bzhin du nang gi rten cing 'brel par 'byung ba sngar gyi rgyas par bshad pa nyid kyis bstan pa yin te/'di yang sbyar bar bya'o/ /'di ltar don dam par dpyad pa na kun rdzob 'gegs pa ma yin pa nyid do/ /ci ste dngos po ni gtan med pa'i dngos por 'gyur ba ni ma yin gyi 'on kyang rgyu dang rkyen gyi stobs kyis ma 'ongs pa'i dus las da ltar byung ba'i dus su 'gyur la/slar yang mi rtag pa nyid kyi stobs kyis da ltar byung ba las 'das pa'i dus su 'gyur te/ 'di ltar skye ba dang gnas pa dang 'jig par brjod la/ rten cing 'brel par 'byung ba yang ji lta ba bzhin du 'di ltar 'gyur ro zhes de ltar dus gsum du smra ba'i dogs pa blangs nas/gzhan nas shes pa la sogs pa gsungs te/ gzhan nas ni yul dang dus las so/ /'ongs pa ma yin pa ni cung zad kyang ma 'ongs pa'o/ /'gro ba yang ma yin pa ni da ltar byung ba'i dus las 'gar yang 'gro ba ma yin pa'o/ /rang bzhin de gcig po de nyid kyis gang du yang gnas pa ma yin no//'di ltar yang gal te ma 'ongs pa'i dus na da ltar byung bar 'gyur zhing da ltar byung ba las 'das pa yin na de'i tshe 'dus byas pa yang rtag par 'gyur te/ thams cad du yod pa'i phyir ro/ /mi rtag ces bya ba yod min te/ de chos rtag pa ma yin no zhes pa de ji ltar 'gyur/'on te snga ma dang phyi ma'i dus byed pas stong pas dus rnams su chos kyi khyad par yin te/ 'di ltar gang gi tshe byed pa ma thob pa ci bya ba mi byed pa de'i tshe ma 'ongs pa zhes brjod do/ /gang gi tshe byed pa de'i tshe da ltar byung ba yin la/gang gi tshe byas na ldog pa de'i tshe 'das pa ma yin pas khyad par yod pa yin no zhe na/ 'di yang cung zad kyang ma yin te/ bdag nyid de nyid kyi de'i tshe yang de yod pa'i phyir byed pa yang ci'i phyir byed par mi 'gyur zhes brjod par bya'o/ /rkyen gzhan la ltos pa yang rtag tu gnas pa'i ngo bo las 'thad pa ma yin no//byed pas stong pa yang dngos po yin na rta'i rwa la sogs pa yang de kho na nyid du thal bar 'gyur ro/ /byed pa yang ji ltar 'das pa dang ma 'ongs pa dang da ltar byung ba yang rjod par byed de/ ci de las gzhan pa'i byed pa yod pas sam/rang nyid kyis yin/ snga ma la ni zhugs pa med pa yin la/ phyi ma la yang chos kyang rang nyid kyis 'das pa la sogs pa'i rnam par gzhag pa la nyams pa cung zad kyang med do/ /gal te yang ji ltar da ltar byung ba rdzas su yod cing / de bzhin du 'das pa dang ma 'ongs pa yang yod na de'i tshe 'di ltar rang bzhin gyis yod pa'i chos yin par ji ltar ma skyes pa dang 'jig pa'i rang bzhin yin/ ci 'di ltar ma byung ba gang med pa las skyes pa yin no zhes rjod par byed do/ /gzhan yang phyi nas med pa yin te/ gang med pas na zhig pa zhes brjod/de nyid kyis kyang bdag nyid snga ma dang phyi ma'i dus rtag tu yod pa na/ da ltar byung ba bzhin du dmigs pa la sogs par thal bar 'gyur ro/ /de lta bas na ma byung ba'i phyir med pa'i chos 'gro ba ma yin te/ ji ltar yang dus gsum dang ldan pa'i de kho na nyid khas len pa na 'das pa la sogs pa yod pa ma yin no//de la 'di ni 'dir bsdu ba'i tshigs su bcad pa yin te/ rang bzhin thams cad du yod la/ dngos po rtag par yang mi 'dod/ /dngos las dngos min gzhan min pa/ /gsal bar dbang phyug spyod pa yin//zhes pa'o/ /gang yang 'das pa'i las yod pa ma 'ongs pa'i 'bras bu yod do zhes mdo'i tshig las 'das pa la sogs pa'i dngos po brjod pa de yang rgyu dang 'bras bu la skur pa 'debs pa'i lta ba de bzlog pa'i ched du bcom ldan 'das kyis te/ 'das pa yod do ma 'ongs pa yod do zhes gsungs pa yin te/'das pa ni gang sngar byung zhing skyes pa zhig pa yin la/ ma 'ongs pa ni gang rgyu yod na 'byung bar 'gyur ba yin la/ de ltar rgyu la sogs pa yod do zhes brjod pa yin te/ yod pa'i sgra tshig phrad yin pa'i phyir dus gsum du 'jug pa yin no/ /de'i phyir 'di 'di ltar don dam par stong pa nyid du bcom ldan 'das kyis gsungs pa yin te/dge slong dag mig skye ba na gang nas kyang 'ongs pa med do/ /'gag pa na gang du yang 'gro ba med do/ /'di ltar dge slong dag mig ma byung ba las 'byung bar 'gyur zhing byung nas kyang 'gag par 'gyur ro zhes gsungs so//gal te yang mig ma 'ongs pa na yod pa yin na ma 'ongs pa las byung ba yin no zhes mi brjod par 'gyur ro/ de lta bas na dus gsum du 'pho ba ma yin no/ /gal te yang de bzhin du gang nas 'ongs pa'am/ 'gro ba zhes pa ma yin no/ /mig yor dang mtshungs pa de ltar 'byung ba'i dngos po rang bzhin med pa yin te/cung zhig kyang rnam par dpyad pas mi gnas so/ /de'i tshe sgyu ma las ni khyad ci yod/ sgyu ma las de mig 'phrul mkhan gyis sprul pa'i glang po che la sogs pa'i ngo bo mig yor dang mtshungs pa yang rang bzhin med pa nyid du khyad par ci yod de/cung zad kyang yod pa ma yin no/ /'di zhes pa ni rgyu dang rkyen gyis bskyed pa'i dngos po'i ngo bo yongs su snang ba'o/ /ci'i phyir khyad par med ce na/ yang 'di nyid gsal por bshad par bzhed pas sgyu mas zhes bya ba la sogs pa gsungs te/ sgyu ma'i sgras 'dir sgyu mas sprul pa'i sgyu mar shes pa la sogs pa'i khyad par brjod par bya ste/rgyu las 'bras bu btags pa'i phyir rgyu dang sgyu ma'i rang bzhin rtogs par bya ba'i phyir don dang des sprul pa yang rtogs par bya ba'i ched du sgyu ma'i rgyus sgyu ma'i rang bzhin gyis gang zhig sprul pa zhes pa'i tha tshig go//gang yang dngos po'i ngo bo rgyu rnams kyis te/ 'jig rten las grags pa'i rgyu rnams kyis sprul cing bskyed pa'o/ /yang dang dang gi sgra gnyis ni phan tshun sdud pa'i ched du'o/ /sprul pa ni byung ba'o/ /de lta bas ni sgyu ma sprul pa'am/ rgyu'i sprul pa dngos po'i rang bzhin ni gang na ste/gang las so/ /gang du 'gro ba ste zhig par gyur pa na gang du 'di 'gro bar 'gyur/ de'i phyir 'di ltar brtag par gyis te/ gal te de gang nas 'ongs pa'am/ gang du 'gro bar dmigs pa zhib pa'i lta bas brtag par gyis shig//ci ste rgyu dang rkyen gyi mthus byung ba dngos po'i ngo bo de'i tshe/ ji lta bur 'khrul par 'gyur zhe na/ de nyid kyi phyir brdzun pa yin no zhes bstan pa'i phyir/ gang zhig gzhan dang zhes pa la sogs pa gsungs te/ gang zhig dngos po'i ngo bo gzhan rgyu dang rkyen nye bar mthong ba ste/dmigs par gyur pa de med na min pa ste/ de las gzhan pa med na ma mthong ba yin te/ de gzhan la rag las nas 'jug pa yin te de'i phyir ro/ /gzugs brnyan dang mtshungs pa ni me long gi dkyil 'khor la mthong ba'i gzugs brnyan gdong pa la sogs pa dang 'dra bas mtshungs par gyur pas gdong la sogs pa'i gzugs brnyan me long gi dkyil 'khor la sogs pa la nye ba na gzugs brnyan snang ba yin la/de med na ni snang ba ma yin la/ de bzhin du dngos po'i ngo bo yang rgyu dang rkyen nye ba dang mi nye ba dag go/ /'di lta bur gyur pa'i dngos po bcos su gzhan la rag las pas 'jug pas rang bzhin med pa la bden pa nyid de brdzun ma yin pa ji ltar yod de rigs pa ma yin no//gzhan gyi khyad par gyi rang bzhin las bcos ma ma yin pa ni mi rigs so/ /de skad du/ gang dag rgyu las 'byung ba rnams/ / de med par ni yod min gang / /de rnams gzugs brnyan dang mtshungs par/ /gsal bar ci yi phyir mi bzhed/ /ces gsungs pa yin no/ /de lta bas na rgyu dang rkyen gyis bskyed pa ni don dam par cung zad kyang yod pa ma yin no/ /rgyu dang rkyen rnams la yang nus pa gang na yang yod pa srid pa ma yin no//'di ltar rang dang gzhan dang gnyi ga'i bdag nyid rgyu rnams kyi dngos po yod pa dang / dngos po med pa gnyi ga'i rang bzhin byed pa de la med pa ni byed pa ma yin no zhes bstan pa'i phyir dngos po yod par zhes pa la sogs pa gsungs te/ yod pa la rgyu'i byed pa med pa'i phyir snga ma nyid du rang bzhin yod pa la rgyu yin te/rgyu rnams kyi dgos pa ci zhig yod de/ 'bras bu grub pa'i bdag nyid yin pas bsgrub par bya ba'i rang bzhin med pas na rgyu'i byed pa nye bar mkho ba ma yin pa'i phyir ro/ /rtag pa gnyis pa'i dbang du byas te/ 'on te de ni zhes bya ba la sogs pa gsungs te/ 'on te zhes pa ni rnam pa gzhan gsal bar byed pa yin te/ de med pa ni med pa'i rang bzhin yin no/ /'o na rgyu'i dgos pa ci zhig yod de/ de'i tshe yang ci yang yod pa ma yin te/ de yang med pa'i rang bzhin yin pa'i phyir de la rgyu'i byed pa med pa'i phyir ro//de ltar na yang gal te yang yod pa ni grub pa'i phyir rgyu'i byed pa med pas rgyu yod na yang dgos pa yod pa ma yin la/ med pa la yang ci'i phyir mi 'byung zhe na/ bye ba brgya zhes bya ba la sogs pa gsungs te/ dngos po med pa ste/ yod pa ni ma yin pa'i rang bzhin la bsgyur du med pa yin te/dngos po'i rang bzhin nyid la gzhan nyid yod pa ma yin la dpyad pa nyid kyis de la yang bya rgyu med pa'i phyir ro/ /bye ba brgya phrag rgyu yis kyang ste/ re zhig rgyu brgya dang / rgyu stong rnams gzhag ste/ bye ba brgya'i rgyu yis kyang de rang bzhin med pa yin pas rnam par bsgyur bar mi nus pa'i phyir ro//rnam par 'gyur ba med du chug mod dngos po'i rang bzhin du 'ga' zhig 'di yod pa yin no zhe na/ 'di la gnas skabs de zhes pa la sogs pa gsungs te/ gnas skabs de yongs su 'dor ba med pa'i rang bzhin nyid ni dngos por mi 'gyur ro//med pa nyid dngos por 'gyur ba ma yin te/ 'on kyang med pa'i rang bzhin log pa na dngos po'i rang bzhin du 'gyur ro/ /'dir/ dngos 'gyur gzhan yang gang zhig yin/ /zhes gsungs te/ gal te sngar med pa dngos po'i rang bzhin du mi 'gyur na 'o na gang zhig de/med pa la gzhan med pa nyid las tha dad par gyur pa med pa yongs su bor nas dngos por gyur pa gang zhig yin/ gzhan cung zad kyang rtogs par gyur pa ma yin te/ /rgyu 'bras bu'i rang bzhin yin pa snga ma nyid du bkag pa'i phyir ro/ /de ltar gyur na yang gzhan 'ga' zhig dngos por 'gyur ba ma yin gyi/'on kyang dngos po med pa dang 'gal ba yod pa las sngar yod pa'i dngos por 'gyur ba ni ma yin la/ phyi nas yang de dang bral bar 'gyur ro zhe na/ med tshe dngos yod ces pa la sogs pa gsungs te/ med pa'i rgyun gyi dus na dngos yod min te/ gal te dngos por mi 'gyur na/dngos po yod par nam zhig 'gyur te/ med pa'i dus na dngos po ma skyes pa yin na brgya la yang dngos por mi 'gyur te/ dngos po med pa'i 'gal bas rtag tu gegs byed pa'i phyir ro/ /de nyid kyis bskyed pas na dngos pos dngos po med pa nyams par 'gyur ro zhe na/dngos po skyes par zhes pa la sogs pa gsungs te/ na zhes pa ni gang gi phyir te/ skyes par ma gyur cing 'byung bar ma gyur na/ dngos med dang ni bral mi 'gyur te/ snga na med pa'i ngo bo dang mi 'bral zhing bral ba ma yin no/ /'on te de ltar gyur na yang med pa dang bral bar mi 'gyur mod/de dang ma bral ba nyid du dngos po 'gyur bar 'gyur te/ dngos pos byung na yang dngos po dang dngos po med pa dag phan tshun spangs pa'i phyir phyi nas dngos po med pa nyid dang bral bar 'gyur ro zhe na/ dngos med ces pa la sogs pa gsungs te/ gal te sngar dngos po nyid du gyur na rim pa 'dir 'gyur ba zhig na/ 'di yang yod pa ma yin no/ /yang ni gang gi phyir te/ ma bral ba nyid yin zhing ma 'gags pa yin na/ dngos po med pa la dngos po yod pa'i skabs mi srid la/ skabs yod pa ma yin te/ der 'gyur zhing dngos po yod pa srid pa ma yin te/dngos po 'byung ba dang 'gal ba dngos po med pa nyid yod pa'i phyir ro/ /rgyu nyid kyis med pa'i dngos po de zlog par byed do zhe na/ ma yin te/ rgyu de ni 'bras bu nyid la byed pa'i phyir ro/ /gang 'bras bu bskyed pa de nyid kyis de med pa yang zlog par byed pa yin no zhe na/'bras bu skyed par byed pa de nyid kyis gal te de dang 'gal ba'i med pa bzlog pa bskyed par gyur na 'gyur ba yin mod kyis de la nus pa ma nyams pa la de'i 'bras bu skyed par nus pa ma yin no/ /rgyu yis de med pa de dang 'gal ba byed pa ma yin te/ rgyu'i dus na yang snga na med pa de yod pas na lhan cig gnas pa'i phyir ro//de lta bas na yod pa'i bdag gam med pa'i bdag nyid kyis 'bras bu la rgyu'i byed pa mi 'thad do/ /gnyi ga dang gnyi ga ma yin pa'i phyogs la yang mi 'thad de/ phyogs de nyid so so bkag pa nyid kyis rgyu'i byed pa dgag pa byas par 'gyur ro zhes blta bar bya'o//de dag srid pa yang ma yin no/ /'gal ba dag gcig la dus gcig na dgag pa dang sgrub pa'i dngos po med pa dang / dngos po dag mi rigs pa'i phyir ro/ /de skad du yang / dngos po yod pa mi skye zhing / /med pa'ang ma yin yod med min//rang las ma yin gzhan las min/ /gnyi ga las min ji ltar skye/ /zhes gsungs so/ /de ltar re zhig don dam par dngos po skye ba ji ltar yang rigs pa ma yin la/ skyes pa yang ji ltar rang bzhin nyams par mi rigs so zhes dngos po'ang zhes pa la sogs pa gsungs te/'ang gi sgras ni snga ma la ltos nas yin te/ ji ltar dngos po med pa dngos por mi 'gyur ba de bzhin du dngos po yang med par 'gyur ba ma yin no/ /ci'i phyir zhe na/ rang bzhin gnyis su thal phyir te/ dngos por yod pa gang gi tshe dngos po med pa'i rang bzhin du 'gyur na de'i tshe dngos po gcig nyid rang bzhin gnyis su thal bar 'gyur te/gcig nyid dngos po dang dngos po med pa'i ngo bo yin pa'i phyir ro/ /dngos po nyid yongs su spangs nas dngos po med pa'i ngo bor 'gyur ro zhes pa brjod par mi rigs so/ /de'i tshe yang dngos po nyid dngos po yin pa'i phyir gang zhig med pa'i dngos por 'gyur ro zhes pa ni rigs pa ma yin la/yod pa'i rang bzhin don dam pa ma yin na ldog par rigs pa ma yin te/ don dam pa nyid med par thal bar 'gyur ba'i phyir ro/ /de ltar dngos po skye ba dang 'jig pa dag don dam par med par bsgrubs nas/mjug bsdu ba'i phyir/ de ltar zhes pa la sogs pa gsungs te/ de ltar te brjod pa'i rim pas skye ba dang 'gag pa mi rigs pa'i phyir ro/ /'ang zhes pa ni gtan tshigs te/ gang gi phyir 'gag pa med de/ 'jig pa med pa yin la/ dngos po yang yod min te/yang gi sgras ni sdud pa yin te/ thams cad kyi tshe thams cad kyi dus na/ de bzhin gshegs pa rnams byung yang rung / de bzhin gshegs pa rnams ma byung yang rung / chos rnams kyi chos nyid 'di ni gnas pa yin te/ chos mnyam pa nyid dang / chos gnas pa nyid dang / chos nges pa nyid dang / chos kyi dbyings nyid dang / de bzhin nyid dang / phyin ci ma log pa'i de bzhin nyid dang zhes pa la sogs pa gsungs pa'i phyir ro/ /de nyid kyi phyir 'gro ba 'di dag thams cad ni rtag tu ma skyes ma 'gags pa nyid yin te/ don dam par ma skyes pa ni ma byung ba nyid yin la/ma 'gags pa ni ma zhig pa yin no/ /de lta bas na sngar brjod pa'i skye ba dang / 'gag pa dang bral bas ma lus pa 'di dag thams cad rang bzhin med pa dang gzhi mthun pa yin no/ /'gro ba ni sna tshogs pa yin te/ sems can dang snod kyi 'jig rten gyi ming can nam g.yo ba dang mi g.yo ba yin la/ sgyu ma skye ba dang 'gag pa bzhin du tha snyad kyi dbang gis yang skye ba dang 'gag pa gnyi ga yin no/ /'di ni kun rdzob kyi bden pa mi 'gag go zhes bstan pa yin te/ chos yang dag par sdud par yang de skad du/rigs kyi bu de bzhin nyid ces bya ba ni stong pa nyid kyi tshig bla dgas te/ stong pa nyid de ni mi skye mi 'gag go/ /smras pa gang 'di bcom ldan 'das kyis 'di skad du chos thams cad ni stong pa'o zhes gsungs te/ de bas na chos thams cad ni mi skye mi 'gag go/ /byang chub sems dpa' rtsom pa med kyis smras pa/rigs kyi bu de de bzhin no/ /ji ltar khong du chud pa bzhin te/ chos thams cad mi skye zhing mi 'gag go/ /smras pa/ gang 'di bcom ldan 'das kyis 'dus byas kyi chos thams cad ni skye'o 'gag go zhes gsungs na/ de bzhin gshegs pas 'di ci la dgongs te gsungs/smras pa/ rigs kyi bu 'jig rten gnas pa skye ba dang / 'gag pa la mngon par chags pas de la de bzhin gshegs pa thugs rje chen pos 'jig rten skrag pa'i gnas bsal ba'i phyir/ tha snyad kyi dbang gis skye'o 'gag go zhes gsungs te/'di la chos gang yang skye ba dang 'gag pa med do zhes gsungs so/ /de lta bas na chos thams cad ma skyes pa dang ma 'gags pa'i rang bzhin yin pas gdod ma nas zhi ba rang bzhin gyis mya ngan las 'das pa yin te/ de ltar na 'gro ba rang bzhin med pa nyid yin la de'i khongs su gtogs pa'i dmyal ba la sogs pa'i 'gro ba rnams kyang rang bzhin med pa nyid yin no zhes bstan pa'i phyir/rmi lam zhes pa la sogs pa gsungs te/ rmi lam dang mtshungs pa gang rnams yin pa de rnams la de skad ces brjod de/ nges nyid ces pa ni nges par gzung ba'o//rmi lam na mthong ba'i rang bzhin gyi 'gro ba rnams ni dmyal ba dang / yi dags dang / dud 'gro dang / mi dang / lha'i rigs mthun pa'i khyad par rnams so/ /dper na rmi lam na yul gzhan la sogs par 'gro ba dang / 'ong ba dang bde ba dang / sdug bsngal ba la sogs pa myong ba de bzhin du don dam pa'i de kho na nyid khong du ma chud pa dmyal ba la sogs pa rnams su rig par bya ste/de kho na nyid ni ma yin no/ /ji ltar zhe na/ rnam par dpyad na chu shing dang mtshungs pa yin te/ 'di ni gtan tshigs kyi tshig yin no/ /chos thams cad rang bzhin med pa nyid kyis rnam par dpyad cing rnam par brtags pa na gang gi phyir chu shing dang mtshungs pa yin te/chu shing bzhin du snying po med pa'i 'gro ba rnams yin no zhes pa'i don to/ /'dis ni sngar brjod pa'o/ /'di ni sgyu 'dra de phyir snying la 'jigs spong shes phyir brtson pa bsten/ / zhes pa la sogs pa de yang bsgrub par bstan par 'gyur ro/ /gang gi phyir chos thams cad ma skyes pa dang ma 'gags pa de'i phyir mya ngan dang zhes bya ba la sogs pa gsungs te/ mya ngan las 'das pa'i ched du chos thams cad kyi sgrib pa spangs pas 'ching ba thams cad las grol ba yin no//mya ngan las ma 'das pa ni 'dod chags la sogs pa'i nyon mongs pa'i zhags pa'i dbang du gyur pa'i sems kyi rgyud 'khor ba'i btson ra'i nang du chud pa yin no/ /de dag gnyi ga yang khyad par med de/ tha dad pa yod pa ma yin la/ srid pa ma yin no/ /ji ltar zhe na/dngos po la ste don dam par chos thams cad don dam par rang bzhin med pa nyid kyis rang bzhin gyis mya ngan las 'das pa yin pa'i phyir ro/ /yang kun rdzob tu ni khyad par yod pa yin no zhes lan grangs du mar bstan pa yin no/ /de nyid kyi phyir gsungs pa/ sangs rgyas rnams dang sems can khams//don gyis de dang tha dad med/ /bdag nyid kyang ni gzhan rnams kyang / /de dang mnyam par khyod bzhed lags/ /zhes so/ /de'i phyir byis pa'i skye bo don dam pa'i de kho na nyid yongs su ma shes pa mngon par zhen pas sgro btags pas 'gro ba'i tshogs nye bar brtags nas bdag nyid kyis bdag nyid 'khrug par byed do zhes nye bar bstan pa'i phyir/de ltar zhes pa la sogs pa gsungs te/ 'di ltar bshad pa'i tshul gyis stong pa ste/ rang bzhin med pa rnams la thob pa ci yod de/ rnyed pa gang gis gar 'gyur ba cung zad gang las kyang thob pa ma yin no//shor ci yod de/ rnyed pa gang zhig shor bas khro bar 'gyur ba ci zhig gang gis yang shor bar 'gyur/ rim gro byas pa ni mchod pa yin la/ yongs su brnyas pa ni gnod pa byas pa yang yin te/ gang gis gang zhig srid par 'gyur//dngos po'i rang bzhin med pa na/ /gang gis gang la'ang ma yin no/ /zhes pa'i don to/ /ci'i phyir zhe na/ bde ba dang sdug bsngal gang las yin te/ sdug bsngal gyi rgyu med pa'i phyir ro/ /'ang gi sgras ni gnyi ga phan tshun bsdu ba'i don to/ /gang zhig thob pa dang spang ba'i don du 'bad pa byed pa dga' ba ci yod de/de dga' ba'i rang bzhin nyid kyis phongs pa ci zhig yod de/ brtags pa'i ngo bo yin pa'i phyir ro/ /mi dga' ba ci yod de/ 'dod par bya ba ma yin pa ci zhig yod/ 'dod par bya ba ma yin pa yang don dam par cung zad kyang med do/ /de ltar na ci'i don du sdug pa dang /mi sdug pa dang phrad pa dang bral ba'i don du 'bad par byed/ gang zhig srid de skye bo gang zhig rnyed pa'i don du sred par byed/ gang la de sred par byed de/ zhen pa'i gnas kyi dngos po 'ga' zhig la sred/ de nyid du ni btsal byas nas te/ rang bzhin gyis yongs su btsal bas so//de'i yul med pa'i phyir yul med pa nyid kyis de yang med pa yin no/ /gang gi dbang gis las de dang de sogs pa na/ rnam par dpyad pa na ste/ don dam par rang bzhin gyis ngo bo nges par dpyad pa na'o/ /gson pa'i 'jig rten ni sems can gyi 'jig rten na'o//gang zhig te 'ga' zhig nyid ma yin pa yin te/ de med pa'i phyir ro/ /gang zhig 'dir ni 'chi 'gyur te/ /gson pa'i 'jig rten la dpyad pas sems can gyi 'jig rten med pa'i phyir ro/ /gang zhig 'dir gson pa'i 'jig rten 'chi 'gyur te/ srog gi dbang po rgyun chad par 'gyur/'byung 'gyur gang yin te/ gang zhig skye bar 'gyur ba yin/ byung gyur gang yin te/ sngar skyes par 'gyur ro/ /de ltar na 'das pa la sogs pa'i tha snyad ni brtags pa nyid yin no/ /gnyen gang bshes kyang gang zhig yin/ /gang gis gang sdug pa yin/ gang gis gang bshes yin te/ 'dir zhes pa ni thams cad du sbyar bar bya'o/ /gang zhig mngon par zhen pas mi dge ba yang 'grang bar mi byed/ de ltar rang bzhin gyis stong pa nyid yin pa'i phyir rtogs pas sgro btags pa nyid de de kho na nyid yin no zhes bstan pa'i phyir thams cad ces pa la sogs pa gsungs te/ thams cad ni brjod pa 'di dang gzhan yang ngo //nam mkha' 'dra ba ni brtags pa'i de kho na nyid stong pa nyid yin pa'i phyir nam mkha' dang mtshungs pa yin no/ /yongs su gzung bar gyis zhes pa ni med pa nyid la yang rang gi ngo bo sgro btags so/ /bdag 'dras zhes pa ni gzhung rtsom pa po bdag nyid dper brjod par mdzad pa yin no//bdag 'dra ni don dam pa'i de kho na nyid yongs su shes pa'i byis pa'i skye bo rnams so/ /mi bden pa'i rnam par rtog pas dkrugs pa'i sems rab tu 'khrug par byed do/ /log pa'i mngon par zhen pa khro bar byed de/ dga' bar byed pa ni brdzun pa'i rnyed pa dang ma bral bas rab tu dga' bar 'gyur ba yin no//gang rnams kyis she na/ 'thab dang spro ba'i rgyu rnams kyis te/ 'thab pa'i rgyu rnams kyis ni rtsod pa'i rgyu rnams kyis so/ /spro ba'i rgyu rnams kyis te/ dga' ba'i rgyu rnams kyis yin la/ ji ltar rigs par sbyar bar bya'o/ /de lta bas na don dam pa'i de kho na nyid kun rdzob nyid kyis dngos po'i rang bzhin la bden pa nyid du mngon par zhen pa rnams 'di dag thams cad 'dod par byed de/don dam par rtog pa rnams kyis ni ma yin no/ /de skad du yang / 'di rnyed kho na shes par bya ste/ 'di lta ste/ kun rdzob dang don dam pa'o/ /de yang bcom ldan 'das kyis stong pa nyid du legs par gzigs/legs par mkhyen/ legs par mngon sum du mdzad pa yin te/ de'i phyir thams cad mkhyen pa zhes brjod do/ /de la kun rdzob ni 'jig rten pa'i spyod pa yin la/ de bzhin gshegs pas gzigs pa gang zhig ni yang don dam par yin te/ de ni brjod du med pa shes par bya ba ma yin pa dang / rnam par shes par bya ba ma yin pa dang / bstan pa ma yin pa dang / rab tu bstan par bya ba ma yin pa yin te/ ji srid du bya ba ma yin pa dang byed pa ma yin pa nas/ rnyed pa ma yin mi rnyed pa ma yin/ bde ba ma yin/sdug bsngal ma yin/ grags pa ma yin/ ma grags pa ma yin/ gzugs can ma yin/ gzugs can ma yin pa ma yin no zhes pa la sogs pa'o/ /de la rgyal bas 'gro ba'i dbang byas nas/ /'jig rten la ni phan phyir kun rdzob bstan/ /gang gis 'gro ba bde gshegs la bsnyen te//bde ba'i ched du dang ba skye bar 'gyur/ /mi yi seng ges kun rdzob bcas pa yi/ /sems can gyur pa 'gro ba drug tu gsungs/ /dmyal ba dud 'gro de bzhin yi dags dang / /lha min mi dang lha yi tshogs rnams dang / /dman pa'i rigs dang de bzhin rigs mtho dang //phyug po'i rigs dang dbul po'i rigs rnams so/ /zhes bya ba la sogs pa'o/ /'di yang de kho na nyid shes pa'i 'bras bu yin no zhes bstan pa'i phyir/ mya ngan 'bad rtsol zhes bya ba la sogs pa gsungs te/ bu dang bu mo la sogs pa dang bral bas byas pa'i mya ngan dang bde ba dang sdug bsngal spang ba dang thob pa'i rgyu mtshan gyis yongs su ngal ba'i dub pa dang /mya ngan dang bral ba de rnams kyis bdag dang 'dra ba'i 'tsho bar byed pa yin te/ tshegs chen gyis zhes pa dang 'brel to/ /mi dga' ba yang yin te/ rnyed pa dang bkur sti la sogs pa dang bral ba ni mi dga' ba ste/yid mi bde ba yang yin no/ /phan tshun gcod pa dang 'bigs pa dang zhes pa la/ phan tshun te phan tshun du'o/ /gcod pa ni rkang pa dang lag pa dang mgo bo dang sna dang rna ba la sogs pa rnams so/ /'bigs pa ni phyi rol gyi byin pa dang bla dang brang dang rtsib logs dang dpung pa la sogs pa rnams so//dang gi sgra rjes su 'jug pa yin no/ /gcod pa dang 'bigs pa de rnams kyis kyang 'tsho bar byed pa yin te/ dus kyi rim pas tshe'i 'du byed pa 'phan pa yin no/ /tshegs chen ni dka' ba chen po ste/ ji ltar thob pa'i zas dang gos la sogs pa'o//ji ltar gyur pa'i rgyud kyis she na/ sdig gi bdag nyid bder 'dod rnams/ /zhes pa la/ sdig gis te/ mi dge ba'i las rnams kyis so/ /bdag nyid de rang nyid yin la/ bde ba 'dod pa ni bde ba 'dod pa'i ngang tshul lo/ /ji ltar gyur pa dang yang dag par dpyad par gyis kyang shi nas ltung ba yin te/gang gang rnams su 'chi ba ni srog gi dbang po bor ba yin la/ ltung ba ni 'gro ba yin no/ /ngan song rnams ni dmyal ba dang / /yi dags dang / dud 'gro rnams so/ /ji lta bur gyur pa rnams su zhe na/ yun ring mi bzad rnams su ste//yun ring ba ni dus ring por gyur pa'o/ /mi bzad pa ni shin tu bzod par mi nus pa myong bar bya ba'i rnam par smin pa yin pa'i phyir ro/ /de bzhin du ngan song de rnams su de rnams yin pa de la de skad du brjod do/ /de rnams su yang yin te/ 'ang gi sgras ni brjod pa sdud pa'am/ tha dad pa'i rim pa yin no//rnam pa gang gis she na/ yang dang yang 'ongs te zhes pa la sogs pa gsungs te/ bde ba mang po spyad spyad nas/ /zhes pa ni bde ba bskyed par gyur nas so/ /ji ltar zhe na/ bde 'gro yang dang yang 'ongs nas te/ mdzes pa'i lha dang mi'i 'gro ba'o/ /slar yang dang yang thob nas de lta bur gyur pa rnams kyi sdug bsngal brgyud pa'i rgya mtsho mi mngon par gyur pa dang /mngon par gyur pa yin no zhes bstan pa'i ched du srid pa na zhes pa la sogs pa gsungs te/ srid pa ni 'khor ba yin te/ 'dod pa dang gzugs dang / gzugs med pa'i rang bzhin du'o//g.yang sa dang yang shin tu mang ba'i nye bar gnod pa'o/ /der ni 'di nyid mi 'dra zhes pa la/ der ni sred pa'am/ g.yang sa'o/ /de nyid min 'di 'dra ba ni rmongs pas bslu ba 'di lta bu ste/ skye bo thams cad kyi thun mong ma yin la rnam pa ji lta bar bstan pa'am yongs su snang bzhin pa'o//der yang phan tshun 'gal bas na ste der yang rnam pa 'di ltar de kho na nyid ma yin na phan tshun 'gal bas te log par rtogs pa yin no/ /rgyu gang gis she na/ srid pa 'di nyid 'dra ba med/ /ces te/ de lta bas na dngos po'i rang bzhin ni 'di lta bu yin te/ rnam pa du mar sgro btags pa'i phyir ro/ /der yang dpe med pa'i mi bzad pa mtha' yas pa'i sdug bsngal gyi rgya mtsho'o/ /der yang 'di lta bu dpe dang bral ba yin no/ /de dang gzhan 'di 'dra ba'i sdug bsngal med pas na dper brjod par mi nus pa mi bzad pa/ bzod par dka' ba'i tshor ba'o//mtha' yas pa ni dus chad pa med par rnam par smin pas mthar gtugs pa med pa'i sdug bsngal rnams shin tu drag pa'i phyir theg pa chen po ma gtogs pa rnams kyis thar par mi nus pa'i phyir rgya mtsho yin no/ /de ltar na yang ji ltar yang brtson 'grus chen pos dge ba'i phyogs bsags pas dus yun ring po nas bde gshegs thob nas gnas par nus pa yin no zhes dogs pas/der ni zhes pa la sogs pa gsungs te/ der de lta bu'i gzugs kyis zhugs pa na 'di ltar yongs su mthong bar gyur pa'i gzugs stobs chung ba dang / brtson 'grus dman pa zhes pa'i tha tshig ste/der yang tshe thung ba dang / der yang 'di lta bur gyur pa yod pa yin na yang / thung ba ste ring ba ma yin pa'o/ /tshe ni tshe'i 'du byed pa rnams so/ /der yang gson pa dang nad med pa'i byed pa rnams kyis so/ /gson pa ni yun ring po'i dus su 'tsho ba'i bya ba rnams kyis te/khrus dang bsku byug la sogs pa rnams kyis so/ /nad med pa ni nad med pa'i shugs te/ nad nye bar zhi ba'i don du bya ba'i khyad par dge ba'i rtsa ba bsags pa med par tsha ba dang kha ba dang bska ba la sogs pa'i sman rnams kyis so/ /tshe ni don med myur 'da' zhes pa 'chad par 'gyur ba dang 'brel to//de bzhin du bkres ni ngal ba dang ste/ bkres pa ni ltogs pa yin no/ /na ba ni nad pa'o/ /ngal ba ni lam gyis dub pa la sogs pa ste/ de rnams kyis so/ /gnyid dang 'tshe ba zhes te/ gnyid ni rmi lam mo//'tshe ba ni rgod pa dang / rab tu rgod pa dang / rnam par 'tshe ba la sogs pa byas pa'o/ /sbrul dang stag dang ri dgas dang sbrang bu dang sha sbrang la sogs pa rnams kyis byas pa'i bsad pa dang / bcings pa dang / brdegs pa la sogs pa'i mtshan nyid kyis de bzhin du yin no/ / byis dang 'grogs pa don med kyi/ /de bzhin du yin te/ byis pa rnams ni so so'i skye bo rnams yin la/ 'grogs pa ni 'brel pa'o/ /ji lta bur gyur pas she na/ don med kyis te/ bdag la bstod pa la sogs pa dag 'khyal pa la sogs pa mang po rnams kyis so/ /de bzhin du zhes pa ni sngar brjod pa'i rim pa 'ba' zhig gis ma yin gyi/'dis kyang don med par tshe ni don med 'gyur ba yin no/ /don med pa ni 'bras bu med pa nyid yin te/ dge ba'i phyogs bsags pa dang bral ba'i phyir ro/ tshe don med par 'da' ba ni 'gro ba'o/ /myur ba ni mgyogs pa de dam pa ma yin pa'i bya ba la zhugs pas myur ba nyid du yongs su zad pa'i phyir ro//de ltar na yang da ltar byung ba'i dus su yang rnam dpyod shin tu rnyed par dka' ste/ rnam par dpyod pa ni blang bar bya ba dang dor bar bya ba shes pa'am/ rnam par g.yengs pa dor ba'o/ /rnyed par dka' ba ni/ ji ltar ni shin tu dka' bas kyang mi rnyed pa'o/ /de ltar gyur pa de ltar na yang gal te brgya la mnyam par gzhag pa skye bar 'gyur la/ de'i tshe dge bar 'gyur na/ de yang med do zhes bstan pa'i phyir/ der yang zhes bya ba la sogs pa gsungs te/ der yang de de lta bu'i gnas skabs su gyur pa na'o//rnam par goms pa ni yongs su 'dris pa'i rgod pa'o/ /de bzlog pa ni zhi bar byed pa'o/ /'gro ba der gyur pa na gang las kyang yod pa ma yin no/ /der yang don med pa brgyud pas gnas pa rnams brgya la dge ba'i phyogs la rtog cing skyed par byed pa ni ngan song chen por nyon mongs pa'i bdud dam lha'i bu'i bdud ltung phyir brtson par byed do//ngan song chen por ltung bar byed pa'i phyir te/ ltung ba'i rgyu mtshan du yin la mnar med pa'i dmyal ba la sogs pa rnams su dor ba'i don to zhes pa'i tha tshig go/ /de ltar yang brgyal bden pa dang / dkon mchog la sogs pa la mngon par yid ches pa'i dbang gis ji ltar yang dge bas nye bar skye bar 'gyur ro zhe na/ der ni log pa'i lam zhes pa la sogs pa gsungs te/ der 'di lta bu'i gnas skabs thob par 'gyur te/ yang dag pa'i lta ba'i mi mthun pa'i phyogs log pa'i lam tshu rol mdzes pa dang /spyod pa la sogs pas yongs su bstan pa mang ba'i phyir te/ mi che ba'i phyir ro/ /the tshom ni yang dag pa'i lam la ma yin te/ blo gros phyin ci log pa yang yin no/ /brgal dka' ste brgya la bde 'gro thob kyang brgya la yang the tshom dor bar nus pa ma yin no//slar yang dal ba rnyed dka' ba yin te/ mi khom pa brgyad dang bral ba rnyed par dka' zhing mchog tu rnyed par dka' ba nyid yin te/ rgya mtsho cher yangs pa'i gnya' shing gi bu gar rus sbal gyi mgrin pa chud pa ltar yin no/ /brgya lam zhig na dal ba gzhan yod kyang //sangs rgyas 'byung ba shin tu dka' ste/ sangs rgyas bcom ldan 'das 'gro ba mtha' dag snang bar mdzad pa sdug bsngal thams cad kyi rtsa bar gyur pa nyon mongs pa'i zug rngu 'byin pa 'byung ba ste/ skye ba shin tu rnyed par dka' ba yin te/ ji ltar yang 'ga' zhig tu/ u dum+WA ra'i me tog bzhin du 'khor ba'i rgya mtsho las thar pa'i thabs su gyur pa rnyed par dka' ba yin no//ji ltar yang / sangs rgyas 'byung ba yod na yang / /nyon mongs chu bo spang dka' ste/ /nyon mongs pa rnams ni 'dod chags la sogs pa yin la/ chu bo ni rgyun mi chad par 'bab pa yin te/ de yang dka' ba yin te/ sdug bsngal bas kyang spong bar mi nus pa ma yin no/ /de'i phyir e ma sdug bsngal brgyud par 'gyur te/ de'i phyir de ltar na kye ma zhes skye ba'o/ /sdug bsngal te dka' ba brgyud pa yin no/ /sdug bsngal gcig las thar yang sdug bsngal gzhan du ltung ba'i phyir ro//da ni sems can rjes su sdug bsngal bar gyur pa rnams nyid bltas nas snying rjes gdungs pa'i thugs dang ldan pa gzhan sdug bsngal bas sdug bsngal bar gyur pa'i bstan bcos mdzad pa'i sems can rnams kyis sdug bsngal la mya ngan mdzad pas/ kye ma sdug pa zhes pa la sogs pa gsungs te/kye ma dang sdug ces pa ni skyo ba la sdud pa'i tshig yin no/ /shin tu mya ngan 'os ni shin tu yang mya ngan du bya bar 'os pa yin te/ phan pa dang mi phan pa ngo mi shes pa'i sems can 'di rnams sdug bsngal gyi rgya mtsho de'i dba' rlabs brgyud par skye ba dang 'jig pas dkrugs pa'i sems dang ldan pa rnams so//mya ngan bya bar 'os pa'i sems can 'di rnams gang zhe na/ de ltar shin tu sdug bsngal yang / /zhes bya ba la sogs pa gsungs te/ sems can gang dag ma rig pas long bar byas pas ye shes kyi mig gis mi mthong bar gyur pa de rnams so//rang sdug par gnas pa mi mthong ba yin no/ /rang ni bdag nyid yin la/ sdug bsngal bar gnas pa nyid kyang shin tu sdug bsngal bar gnas pa'o/ /de ltar zhes pa ni brjod pa'i rim pas so/ /sdug pas gnas pa ni shin tu sdug bsngal bar gnas pa ste/ sdug bsngal ni nye bar thob pa yin no zhes bya ba'i tha tshig go//'di'i rjes su mthun pa'i dpes gsal bar bstan pa'i phyir/ dper na 'ga' zhig ces pa la sogs pa gsungs te/ yang yang khrus byas pa ni chu'i nang du khrus byas shing byas nas so/ /dper na 'ga' zhig ste/ blo nyams pa grang bas nyen pa'i bde ba 'dod pa 'jug pa yin no//rab tu 'jug pa yin no/ /yang dang yang zhes pa ni skad cig ma so so'am/ yang nas yang du'o/ /de ltar zhes pa ni sems can rang nyid bde bar gnas pa bdag nyid bde ba phun sum tshogs par sems shing go ba yin no/ /de bzhin du yang sdug bsngal bar gnas pa yin no//de ltar zhes pa ni brjod pa'i rim pas so/ /sdug par gnas pa ni sdug bsngal gyi me 'bar ba'i nang du zhugs pa yin no/ /kye ma sdug bsngal shin tu mang ba'i mi shes pa'i mun pas mnan pa 'di rnams bdag nyid la yod par gyur pa'i bag med pa yang mi mthong ngo zhes bstan pa'i phyir ro//rga dang zhes pa la sogs pa gsungs te/ rgas shing gog pa gang rnams la med pa de ni rga ba med pa yin la/ 'chi ba dang bral ba ni 'chi ba med pa yin te/ de rnams ni rga ba dang 'chi ba med pa bzhin du rol pa'i spyod pas gnas pa gang rnams yin pa de rnams la de skad ces brjod do//de rnams nyid ni rol pa 'dis gnas shing nges par spyod pas gnas pa rnams la 'ong bar 'gyur ba yin te bsnyen par byed do/ /rgud pa ni de rnams thams cad kyi sdug bsngal gyi rgyu dag pa dang / nad la sogs pas rgud par byas pa'o//ji ltar 'gro bar 'gyur zhe na/ dang po nyid du bsad byas nas/ /zhes te/ mthar phyis bcos su med cing spang du med pa/ dang por bsad par byas nas te/ sngar byas nas so/ /de ltar yang bcom ldan 'das kyis rgyal po la gdams pa'i mdo las/rgyal po chen po 'di lta ste dper na phyogs bzhi nas ri chen po sra ba/ brtan pa/ snying po dang ldan pa/ ma zhig pa/ ma gas pa/ 'phan med pa/ shin tu mkhregs pa/ gcig tu stug pa/ gzhi nam mkha' la reg cing sa bzlog pa ste/ rtswa dang shing dang shing gel pa dang yal ga dang lo ma thams cad sems can srog chags 'byung po thams cad phye mar 'thag cing 'ong ba de dag ni mgyogs pas 'bros pa'am/stobs kyis bzlog pa'am/ nor gyis bzlog pa'am/ rdzas dang sngags dang sman rnams kyis bzlog par sla ba ma yin no/ /rgyal po chen po de bzhin du 'jig pa chen po bzhi 'di dag 'ongs te/de dag las mgyogs pas 'bros pas stobs kyis bzlog pa'am/ nor gyis bzlog pa'am/ rdzas dang sngags dang sman gyis bzlog par sla ba ma yin no/ /bzhi gang zhe na/ rga ba dang / na ba dang / 'chi ba dang / rgud pa'o/ /rgyal po chen po rga ba ni dar la bab pa 'joms shing 'ong /nad ni nad med pa 'joms shing 'ong / rgud pa ni phun sum tshogs pa thams cad 'joms shing 'ong / 'chi ba ni srog 'joms shing 'ong / de dag las mgyogs pas 'bros pa'am/ stobs kyis bzlog pa'am/ nor gyis bzlog pa'am/rdzas dang sngags dang sman rnams kyis zhi bar bya bar sla ba ma yin no/ /rgyal po chen po 'di lta ste dper na ri dgas kyi rgyal po seng ge ni ri dgas kyi tshogs nang du zhugs nas ri dgas bzung ste/ ji ltar 'dod pa bzhin du bya ba byed do/ /ri dgas de ni stobs che ba'i kha mi bzad par bzung bas dbang med par 'gyur ro//rgyal po chen po de bzhin du 'chi bdag gi gsal shing gis zug ste rgyags dang ni bral/ mgon ni med/ skyabs ni med/ dpung gnyen ni med/ shi bas ni 'jigs/ tshigs ni 'bye zhing bral/ sha dang khrag ni skam/ lus ni nad kyis gdung / skom ni skom/ bzhin ni gyur/ rkang lag ni g.yo ba/ las ni mi nus/ mthu ni mi byed/ kha chu dang / snabs dang / gcin dang / ngan skyugs kyis ni lus la gos/ mig dang / rna ba dang / sna dang / lce dang / lus dang / yid kyi dbang po ni 'gags/ skyigs bu ni 'byung / sgra ngar ngar po ni 'don/ sman pas ni bor/ snam dang / kha zas dang bza' ba dang /thug pa thams cad kyis ni gles la bor te/ 'gro ba mtha' dag tu ni 'gro/ mal gyi tha ma la ni nyal/ thog ma med pa'i skye ba dang / rga ba dang / na ba dang / 'chi ba dang / 'khor ba'i rgyun du ni nub/ srog ni cung zad cig lus/ gshin rje'i mis ni 'jigs skrag /byur gyi dbang du ni song /dbugs rgyu ba ni chad/ kha dang sna ni 'gags/ so ni gtsigs/ sbyin pa sbyin no zhes de skad gsol ba ni 'debs/ las kyi srid pa las yang srid pa la ni 'jug /nga gcig pu gnyis su med cing grogs ni med de/ 'jig rten 'di ni 'dor/ 'jig rten pha rol du ni 'gro/ lam chen por ni 'jug /mun pa chen por ni zhugs/ g.yang sa chen por ni lhung / khrod stug por ni 'jug /dgon pa chen por ni 'gro/ rgya mtsho chen pos ni khyer/ las kyi rlung gis ni bdas/ sa tshugs med pa'i phyogs su 'gro/ g.yul ngo chen por ni 'jug /gdon chen pos ni zin/ nam mkha' la ni 'chel/pha ma dang / phu nu dang / sring mo dang / bu dang bu mos ni bskor/ dbugs ni chad/ nor bgo bsha' bya zhes ni zer/ kyi hud ma/ kyi hud pha/ kyi hud bu zhes zer te/ skra ni bshig ste/ sbyin pa dang / dka' thub dang / chos 'ba' zhig grogs su gyur pa na/ chos ma gtogs par skyabs gzhan med/mgon gzhan med/ gnas gzhan med/ dpung gnyen gzhan med do/ /rgyal po chen po de'i tshe de'i dus na chos ni gling dang / gnas dang / mgon dang / bzhon pa dang / nyal ba la mal 'jam po dang / skom pa la chu grang mo dang / shin tu bkres pa la kha zas bzang po dang /mya ngan gyis gnod pa la dbugs 'byin pa dang / gdungs pa la tshim pa dang / dgon par lam stor ba la lam ston pa dang / nad kyis btab pa la sman dang / sman pa dang nad g.yog byed pa dang / chus khyer ba la gzings dang / 'dam bu bying ba la 'jus dang /brgal dka' ba'i zam pa dang / nyam nga ba la 'bab stegs dang / mun khung la sgron ma dang / rgya mtsho chen po la gru dang / lhags pas nyen pa la rlung med pa'i gnas dang / yul gzhan du 'gro ba la lam rgyags dang / dbul po la nor dang / byed par 'dod pa la grogs dang /gcad par 'dod pa la lag cha dang / gzhig par 'dod pa la rdo rje dang / g.yul ngor zhugs pa la go cha dang / 'jigs pa la stobs dang / ldan pa'i grogs dang / 'thab pa la dpung gnyen dang / dogs pa la go 'byed pa dang / mu ge la nor dang ldan pa dag mgon dang / skyabs dang / gnas dang / rten du gyur pa de bzhin du zhes bya ba la sogs pa rgya cher gsungs pa yin no/ /de lta bas na 'jigs pa 'di dag spong ba'i don du dge ba'i phyogs nyid shes rab kyis dag par bya ba rnams la 'bad par bya'o/ /da ni skye ba la sogs pa'i sdug bsngal gyis sdug bsngal ba rnams kyi sdug bsngal bsal ba'i ched du rang gi bsam pas smon pas/de ltar zhes pa la sogs pa gsungs te/ de ltar zhes pa ni sngar brjod ma thag pa'i tshul gyis so/ /sdug bsngal mes gdungs la zhes pa ni sdug bsngal nyid me yin te/ des gdungs pa'i sems can rnams so//zhi ba ste skye ba la sogs pa'i sdug bsngal gyi me'i gdung ba zhi bar byed par bdag nam zhig 'gyur te/ dus nam byed cing bsgrub par 'gyur/ ji ltar zhe na/ rang gi bde ba'i yo byad kyis/ /zhes te/ bde ba'i yo byad ni bde ba sgrub par byed pa'i gos dang / rgyan dang / byug pa dang / mal stan la sogs pa rnams so/ /ji lta bu zhig nye bar bsags pas yin la gzhan gyis ma yin zhe na/ rang gi sa te rang gis bdag nyid kyis yin la/ bdag rang nyid kyis nye bar bsags pas yin no zhes pa'i don to/ /ci sprul pa la sogs pa bstan pas yin nam/gzhan gyis yin zhe na/ bsod nams sprin las legs byung bas/ /zhes te/ bsod nams nyid sprin yin te/ sdug bsngal gyis gdung ba thams cad kyis nyen pa/ zhi ba bde ba'i yo byad bsil ba'i char pa sbyin pa'i rgyu yin pa'i phyir ro/ /de rnams las legs par byung ba ni nges par 'byung ba ste de rnams kyis so//de ltar mngon par mtho ba phun sum tshogs par gzhan rnams kyis sems byas nas/ nges par legs pa phun sum tshogs pa bstan pa'i phyir/ nam zhig dmigs pa zhes pa la sogs pa gsungs te/ nam zhig ces pa ni dus nam zhig na'o/ /dmigs pa'i lta ba can rnams dngos po la 'dzin pa'i mngon par zhen pa can rnams la bstan par bya ste/rab tu bstan par bya'o/ /stong pa nyid ni chos thams cad rang bzhin med pa nyid do/ /ji ltar zhe na/ kun rdzob kyi tha snyad kyis yin te/ gzhan du na rnam par rtog pa'i yul du gyur pas don dam par stong pa'i stong pa nyid bstan par mi nus pa'i phyir ro//de ltar nges par legs pa'i rgyu ye shes kyi tshogs kyi rgyu mtshan nye bar bstan nas/ de'i rgyu bsod nams kyi tshogs kyi rgyu nye bar bstan pa'i phyir/ bsod nams zhes pa la sogs pa gsungs te/ bsod nams ni sbyin pa la sogs pa yin la/ tshogs pa ni phung po yin no//de nam zhig dmigs pa'i lta ba can rnams la ston par 'gyur zhes pa dang 'brel to/ /gus par zhes pa ni gus pa chen pos te/ bkur stis yin gyis ji ltar yang rung bas ni ma yin no/ /rnam pa gang zhig gis she na/ dmigs pa med pa'i tshul gyis te/ sbyin pa dang / gtong ba po dang / len pa po la sogs pa mi dmigs pa la sogs pa'i sbyor bas te/ 'khor gsum yongs su dag pas zhes pa'i tha tshig go/ /de ltar bsod nams kyi tshogs nye bar bsags pas sangs rgyas nyid thob par 'gyur ro/ /de nyid ni 'di dag thams cad kyis nyon mongs pa ma lus pa'i rgyu sgro 'dogs pa mtha' dag gi gnyen po nyid kyis sgrib pa thams cad spong ba'i thabs yin pa'i phyir dang /de bzhin gshegs pa'i ma lus pa thob pa'i rgyu nyid yin pa'i phyir/ sdug bsngal thams cad nye bar zhi ba'i thabs su gyur pa shes rab skye bar 'gyur zhes bstan par 'gyur ro//gang rnams kyis ni zab mo'i tshul rtogs shes rab sgrin pos 'khrul pa rab spangs pa/ /kun nas nyon mongs rnam byang phyogs la dri med mkhyen pa mtho ba'i dpa' bo rnams/ /mkhas la de rnams kyis ni yon tan skyon ni 'dres las de yis snying po blang //gal te nyes pa brjod na dri ma thams cad dug bzhin du ni dor bar bya/ /bdag gis 'dir ni rigs pa ma yin brjod pa dang / /bdag gis 'khrul pa de nyid mchog tu skyes gyur pa/ / 'dir ni bdag gis blo gros mkhas pa rnams kyis ni/ /rang gir byas te de ltar gzung bar bya min nam/ /kun rdzob gang zhig brgya la yid kyis spyod yul du ni gyur pa yi/ /de 'dra'i don la bdag 'dra'i blo gros gang gis mi 'khrul yin/ /de phyir legs gsungs don ni nges pa dang ldan dbu ma'i lugs bsten pa//'dir ni yon tan phra ba cung zad mthong blang bya yis glo bur 'gyur/ /yang dag shes pa mi mthun phyogs kyi lta ba sdug pa'i rmongs pa zhi bar bya ched du/ /shes rab kyis ni gsal bar rnam par bshad pa'i tshig gi 'grel pa byas pa yis//bdag gis bsod nams gang zhig nyer bsags phan pa'i 'bras bu de yis myur bar skye bo kun/ /'jam dpal bzhin du yon tan dam pa gcig gis gnas la shes rab 'byung gnas skye bar shog /byang chub sems dpa'i spyod pa la 'jug pa las shes rab kyi le'u'i rgya cher bshad pa/dge slong mkhas pa shes rab 'byung gnas blo gros kyis mdzad pa rdzogs so// //byang chub sems dpa'i spyod pa la 'jug pa'i 'grel bshad las le'u dang po gnyis dang / brtson 'grus bsam gtan shes rab kyi TI ka mkhas pa chen po su ma ti kIrti dang / lo tsA ba dar ma grags kyis bsgyur ba'o/ /dbu ru byang ngos skyung ka mkhar grags su/ /mkhas pa chen po blo gros bzang grags pa/ /ldong stong mchod gnas rgya sgom mched grogs kyis//gsol btab dge slong dar ma grags kyis bsgyur// //