CLOSE WINDOW

D3871
བོད་ཡིག

@#/ /byang chub sems dpa'i spyod pa la 'jug pa bzhugs so// @##/ /rgya gar skad du/ bo d+hi satwa tsar+ya a ba tA ra/ bod skad du/ byang chub sems dpa'i spyod pa la 'jug pa/ sangs rgyas dang byang chub sems dpa' thams cad la phyag 'tshal lo//bde gshegs chos kyi sku mnga' sras bcas dang / /phyag 'os kun la'ang gus par phyag 'tshal te/ /bde gshegs sras kyi sdom la 'jug pa ni/ /lung bzhin mdor bsdus nas ni brjod par bya//sngon chad ma byung ba yang 'dir brjod med/ /sdeb sbyor mkhas pa'ang bdag la yod min te/ /de phyir gzhan don bsam pa bdag la med/ / rang gi yid la bsgom phyir ngas 'di brtsams/ /dge ba bsgom phyir bdag gi dad pa'i shugs/ /'di dag gis kyang re zhig 'phel 'gyur la/ /bdag dang skal ba mnyam pa gzhan gyis kyang //ci ste 'di dag mthong na don yod 'gyur/ /dal 'byor 'di ni rnyed par shin tu dka'/ /skyes bu'i don sgrub thob par gyur pa la/ /gal te 'di la phan pa ma bsgrubs na//phyis 'di yang dag 'byor par ga la 'gyur/ /ji ltar mtshan mo mun nag sprin rum na/ /glog 'gyu skad cig bar snang ston pa ltar/ /de bzhin sangs rgyas mthu yis brgya lam na//'jig rten bsod nams blo gros thang 'ga' 'byung / /de ltas dge ba nyam chung nyid la rtag/ /sdig pa stobs chen shin tu mi bzad pa/ /de ni rdzogs pa'i byang chub sems min pa/ / dge gzhan gang gis zil gyis gnon par 'gyur/ /bskal pa du mar rab dgongs mdzad pa yi/ /thub dbang rnams kyis 'di nyid phan par gzigs/ /'dis ni tshad med skye bo'i tshogs rnams kyis/ /bde mchog bde blag nyid du thob par byed//srid pa'i sdug bsngal brgya phrag gzhom 'dod cing / /sems can mi bde bsal bar 'dod pa dang / /bde mang brgya phrag spyod par 'dod pas kyang / /byang chub sems nyid rtag tu gtang mi bya//byang chub sems skyes gyur na skad cig gis/ /'khor ba'i btson rar bsdams pa'i nyam thag rnams/ /bde gshegs rnams kyi sras zhes brjod bya zhing / /'jig rten lha mir bcas pas phyag byar 'gyur//gser 'gyur rtsi yi rnam pa mchog lta bu / /mi gtsang lus 'di blangs nas rgyal ba'i sku/ /rin chen [(]ring [,]rin [)]thang med par bsgyur bas na/ /byang chub sems zhes bya ba rab brtan zung / /'gro ba'i ded dpon gcig pu tshad med blos//legs par yongs su brtags na rin che bas/ /'gro ba'i gnas dang bral bar 'dod pa rnams/ /rin chen byang chub sems legs brtan par zung / /dge ba gzhan kun chu shing bzhin du ni/ /'bras bu bskyed nas zad par 'gyur ba nyid//byang chub sems kyi ljon shing rtag par yang / /'bras bu 'byin pas mi zad 'phel bar 'gyur/ /sdig pa shin tu mi bzad byas na yang / /dpa' la brten nas 'jigs pa chen po ltar/ /gang la brten nas yud kyis sgrol 'gyur ba//de la bag can rnams kyis cis mi brten/ /des ni dus mtha'i me bzhin sdig chen rnams/ /skad cig gcig gis nges par sreg par byed/ /de yi phan yon dpag tu med pa dag /byams mgon blo dang ldan pas nor bzangs bshad/ /byang chub sems de mdor bsdus na//rnam pa gnyis su shes bya ste/ /byang chub smon pa'i sems dang ni/ /byang chub 'jug pa nyid yin no/ /'gro bar 'dod dang 'gro ba yi/ /bye brag ji ltar shes pa ltar/ /de bzhin mkhas pas 'di gnyis kyi / /bye brag rim bzhin shes par bya//byang chub smon pa'i sems las ni/ /'khor tshe 'bras bu che 'byung yang / /ji ltar 'jug pa'i sems bzhin du/ /bsod nams rgyun chags 'byung ba min/ /gang nas bzung ste sems can khams/ /mtha' yas rab tu dgrol ba'i phyir/ /mi ldog pa yi sems kyis su//sems de yang dag blangs gyur pa/ /deng nas bzung ste gnyid log gam/ /bag med gyur kyang bsod nams shugs/ /rgyun mi 'chad par du ma zhig /nam mkha' mnyam par rab tu 'byung / /'di ni 'thad pa dang bcas par//lag bzang gis ni zhus pa las/ /dman mos sems can don gyi phyir/ /de bzhin gshegs pa nyid kyis gsungs/ /sems can rnams kyi klad nad tsam/ /bsal lo snyam du bsams na yang / /phan 'dogs bsam pa dang ldan de //bsod nams dpag med ldan gyur na/ /sems can re re'i mi bde ba/ /dpag tu med pa bsal 'dod cing / /re re'ang yon tan dpag med du/ /bsgrub par 'dod pa smos ci dgos/ /pha'am yang na ma yang rung / /su la 'di 'dra'i phan sems yod//lha dang drang srong rnams kyang rung / /tshangs pa la yang 'di yod dam/ /sems can de dag nyid la sngon/ /rang gi don du 'di 'dra'i sems/ /rmi lam du yang ma rmis na/ /gzhan gyi don du ga la skye/ /gzhan dag rang gi don du yang / /mi 'byung sems can don sems gang //sems kyi rin chen khyad par 'di/ /snga na med pa'i rmad cig 'khrungs/ /'gro ba kun gyi dga' ba'i rgyu/ /sems can sdug bsngal rtsir gyur pa/ /rin chen sems kyi bsod nams gang / /de la ji ltar gzhal gyis lang / / phan par bsams pa tsam gyis kyang / /sangs rgyas mchod las khyad 'phags na/ /sems can ma lus thams cad kyi/ /bde don brtson pa smos ci dgos/ /sdug bsngal 'dor 'dod sems yod kyang / /sdug bsngal nyid la mngon par rgyug /bde ba 'dod kyang gti mug pas//rang gi bde ba dgra ltar 'joms/ /gang zhig bde bas phongs pa dang / /sdug bsngal mang ldan de dag la/ /bde ba kun gyis tshim pa dang / /sdug bsngal thams cad gcod byed cing / /gti mug kyang ni sel byed pa / /de dang dge mtshungs ga la yod//de 'dra'i bshes kyang ga la yod/ /bsod nams de 'dra'ang ga la yod/ /phan btags lan lon gang yin pa/ /de yang re zhig bsngags 'os na/ /ma bcol legs par byed pa yi/ /byang chub sems dpa' smos ci dgos/ /'gro ba nyung zad nar ma'i zas sbyor ba//skad cig zas tsam sbyin par byed pa dang / /brnyas bcas nyin phyed 'drangs par byed pa yang / /dge ba byed pa yin zhes skye bos bkur/ /sems can grangs mtha' yas la dus ring du/ /bde bar gshegs kyi bde ba bla na med/ /yid la bsam pa mtha' dag rdzogs byed pa//rtag tu sbyin pa lta zhig smos ci dgos/ /gang zhig de 'dra'i rgyal sras sbyin bdag la/ /gal te ngan sems skyed par byed na de/ /ngan sems bskyed pa'i grangs bzhin bskal par ni/ /dmyal bar gnas par 'gyur zhes thub pas gsungs//'on te gang zhig yid rab dang byed na/ /de yi 'bras bu de bas lhag par 'phel/ /rgyal sras rnams la do gal chen pos kyang / /sdig pa mi 'byung dge ba ngang gis 'phel/ /gang la sems kyi dam pa rin chen de/ /skyes pa de yi sku la phyag 'tshal zhing //gang la gnod pa byas kyang bde 'brel ba/ /bde ba'i 'byung gnas de la skyabs su mchi/ /byang chub sems dpa'i spyod pa la 'jug pa las byang chub sems kyi phan yon bshad pa zhes bya ba ste le'u dang po'o// //rin chen sems de gzung bar bya ba'i phyir//de bzhin gshegs pa rnams dang dam pa'i chos/ /dkon mchog dri ma med dang sangs rgyas sras/ /yon tan rgya mtsho rnams la legs par mchod/ /me tog 'bras bu ji snyed yod pa dang / /sman gyi rnam pa gang zhig yod pa dang //'jig rten rin chen ji snyed yod pa dang / /chu gtsang yid du 'ong ba ci yod dang / /rin chen ri bo dang ni de bzhin du/ /nags tshal sa phyogs dben zhing nyams dga' dang / /ljon shing me tog rgyan spras spud pa dang / /shing gang 'bras bzang yal ga dud pa dang //lha sogs 'jig rten na yang dri dang ni/ /spos dang dpag bsam shing dang rin chen shing / /ma rmos 'khrungs pa'i lo tog rnam pa dang / /gzhan yang mchod par 'os pa'i rgyan rnams ni/ /mtsho dang rdzing bu pad+mas brgyan pa dag /ngang pa shin tu skad snyan yid 'ong ldan//nam mkha' rab 'byams khams kyi mthas gtugs na / /yongs su gzung ba med pa de dag kun/ /blo yis blangs nas thub pa skyes kyi mchog /sras dang bcas pa rnams la legs 'bul na/ /yon gnas dam pa thugs rje che rnams kyis //bdag la brtser dgongs bdag gi 'di dag bzhes/ /bdag ni bsod nams mi ldan bkren chen te/ /mchod pa'i nor gzhan bdag la cang ma mchis/ /des na gzhan don dgongs pa'i mgon gyis 'di/ /bdag gi don slad nyid kyi mthus bzhes shig /rgyal dang da sras rnams la bdag gis ni/ /bdag gi lus kun gtan du dbul bar bgyi/ /sems dpa' mchog rnams bdag ni yongs bzhes shig /gus pas khyed kyi 'bangs su mchi bar bgyi/ /bdag ni khyed kyis yongs su bzung bas na//srid na mi 'jigs sems can phan pa bgyid / /sngon gyi sdig las yang dag 'da' bgyid cing / /sdig pa gzhan yang slan chad mi bgyid do/ /khrus kyi khang pa shin tu dri zhim pa/ /shel gyi sa gzhi gsal zhing 'tsher ba ltar / /rin chen 'bar ba'i ka ba yid 'ong ldan//mu tig 'od chags bla re bres pa der/ /de bzhin gshegs dang de yi sras rnams la/ /rin chen bum pa mang po spos kyi chu/ /yid 'ong legs par bkang ba glu dang ni/ /rol mor bcas pa du mas sku khrus gsol/ /de dag sku la mtshungs pa med pa'i gos//gtsang la dri rab bsgos pas sku phyi'o/ /de nas de la kha dog legs bsgyur ba'i/ /na bza' shin tu dri zhim dam pa 'bul / /gos bzang srab la 'jam pa sna tshogs dang / /rgyan mchog brgya phrag de dang de dag gis/ /'phags pa kun du bzang dang 'jam dbyangs dang //'jig rten dbang phyug sogs la'ang brgyan par bgyi/ /stong gsum kun du dri ngad ldang ba yi/ /dri mchog rnams kyis thub dbang kun gyi sku/ /gser sbyangs btso ma byi dor byas pa ltar/ /'od chags 'bar ba de dag byug par bgyi/ / thub dbang mchod gnas mchog la yid 'ong ba'i/ /me tog man+da ra dang pad+ma dang / /ut+pal la sogs dri zhim thams cad dang / /phreng ba spel legs yid 'ong rnams kyis mchod/ /spos mchog yid 'phrog dri ngad khyab pa yi/ /bdug pa'i sprin tshogs rnams kyang de la dbul//zhal zas bza' btung sna tshogs bcas pa yi/ /lha bshos rnams kyang de la dbul bar bgyi/ /gser gyi pad+ma tshar du dngar ba yi/ /rin chen sgron ma rnams kyang dbul bar bgyi/ /sa gzhi bstar ba spos kyis byugs pa der/ /me tog yid 'ong sil ma dgram par bya //gzhal med pho brang bstod dbyangs yid 'ong ldan/ /mu tig rin chen rgyan 'phyang mdzes 'bar ba/ /dpag yas nam mkha'i rgyan gyur de dag kyang / /thugs rje'i rang bzhin can la dbul bar bgyi/ /rin chen gdugs mdzes gser gyi yu ba can//khor yug rgyan gyi rnam pa yid 'ong ldan/ /dbyibs legs blta na sdug pa bsgreng ba yang / /rtag tu thub dbang rnams la dbul bar bgyi/ /de las gzhan yang mchod pa'i tshogs/ /rol mo dbyangs snyan yid 'ong ldan/ / sems can [(]sngag [,]sdug [)]bsngal tshim byed pa'i/ /sprin rnams so sor gnas gyur cig /dam chos dkon mchog thams cad dang / /mchod rten rnams dang sku gzugs la/ /rin chen me tog la sogs char/ /rgyun mi 'chad par 'bab par shog/ /ji ltar 'jam dbyangs la sogs pas//rgyal ba rnams la mchod mdzad pa/ /de bzhin bdag gis de bzhin gshegs/ /mgon po sras dang bcas rnams mchod/ /yon tan rgya mtsho rnams la bdag /bstod dbyangs yan lag rgya mtshos bstod/ /bstod dbyangs snyan sprin de dag la//nges par kun du 'byung gyur cig /dus gsum gshegs pa'i sangs rgyas kun/ /chos dang tshogs kyi mchog bcas la/ /zhing rdul kun gyi grangs snyed kyi/ /lus btud pa yis bdag phyag 'tshal/ /byang chub sems kyi gzhi rnams dang //mchod rten rnams la bdag phyag 'tshal/ /mkhan po de bzhin slob dpon dang / /brtul zhugs mchog la phyag 'tshal lo/ /byang chub snying por mchis kyi bar/ /sangs rgyas rnams la skyabs su mchi / /chos dang byang chub sems dpa' yi//tshogs la'ang de bzhin skyabs su mchi/ /phyogs rnams kun na bzhugs pa yi/ /rdzogs sangs rgyas dang byang chub sems/ /thugs rje chen po mnga' rnams la/ /thal mo sbyar te gsol ba ni/ /thog ma med ldan 'khor ba nas/ /tshe rabs 'di 'am gzhan dag tu//bdag gis ma 'tshal sdig bgyis pa'am/ /bgyid du stsal ba nyid dang ni/ /gti mug 'khrul pas bdag non te/ /rjes su yid rangs gang bgyis pa/ /nongs pa de ni mthong bgyis nas/ /bsam pa thag pas mgon la bshags//bdag gis dkon mchog gsum dang ni/ /pha ma'am bla ma gzhan dag la/ /nyon mongs sgo nas lus ngag dang / /yid kyis gnod bgyis gang lags dang / /nyes pa du mas skyon chags pa'i/ /sdig can bdag gis sdig pa gang / /shin tu mi bzad bgyis pa de//thams cad 'dren pa rnams la bshags / /bdag ni sdig pa ma byang bar/ /sngon du 'gum par 'gyur du mchi/ /ji ltar 'di las nges thar bar/ /myur ba'i tshul gyis bskyab tu gsol/ /yid brtan mi rung 'chi bdag 'di/ / byas dang ma byas mi sdod pas/ /na dang mi na kun gyis kyang / /glo bur tshe la yid mi brtan/ /thams cad bor te chas dgos par / /bdag gis de ltar ma shes nas / /mdza' dang mi mdza'i don gyi phyir/ /sdig pa rnam pa sna tshogs byas/ /mi mdza' rnams kyang med 'gyur zhing //mdza' ba rnams kyang med par 'gyur/ /bdag kyang med par 'gyur ba ste/ /de bzhin thams cad med par 'gyur/ /rmi lam nyams su myong ba bzhin/ /dngos po gang dang gang spyad pa/ /de de dran pa'i yul du 'gyur/ /'das pa thams cad mthong mi 'gyur//re zhig gson tshe 'di nyid la/ /mdza' dang mi mdza' du ma 'das/ /de dag don du byas pa'i sdig /mi bzad gang yin mdun na gnas/ /de ltar bdag ni glo bur zhes/ /bdag gis rtogs par ma gyur pas/ /gti mug chags dang zhe sdang gis//sdig pa rnam pa du ma byas/ /nyin mtshan sdod pa yod med par/ /tshe 'di rtag tu god 'gyur zhing / /snon pa gud nas 'ong med na/ /bdag lta 'chi bar cis mi 'gyur/ /bdag ni mal na 'dug bzhin du/ /gnyen bshes kun gyis mtha' bskor kyang //srog 'chad pa yi tshor ba dag /bdag nyid gcig pus myong bar 'gyur/ /gshin rje'i pho nyas zin pa la/ /gnyen gyis ci phan bshes ci phan/ /de tshe bsod nams gcig bskyabs na/ /de yang bdag gis ma bsten to/ / mgon po bag med bdag gis ni/ /'jigs pa 'di 'dra ma 'tshal nas/ /mi rtag tshe 'di'i ched dag tu/ /sdig pa mang po nye bar bsgrubs/ /skye bo yan lag bcad pa'i sar/ /di ring khrid pa'ang bred 'gyur te/ /kha skams mig rtsa ngan la sogs/ /snga las gzhan du 'gyur snang na//gshin rje'i pho nya 'jigs 'jigs lta'i/ /sha tshugs can gyis bzung gyur cing / /'jigs chen nad kyis thebs gyur pa/ /rab tu nyam thag smos ci dgos/ /su zhig 'jigs chen 'di las bdag /legs par skyob par byed 'gyur zhes//bred sha thon pa'i mig bgrad nas/ /phyogs bzhir skyabs dag tshol bar byed/ /phyogs bzhir skyabs med mthong nas ni/ /de nas kun du yi mug 'gyur/ /gnas der skyabs yod ma yin na/ /de tshe bdag gis ji ltar bya/ /de bas rgyal ba 'gro ba'i mgon//'gro ba skyob pa'i don brtson pa/ /stobs chen 'jigs pa kun sel la/ /di ring nyid nas skyabs su mchi/ /de yi thugs su chud pa'i chos/ /'khor ba'i 'jigs pa sel ba dang / /byang chub sems dpa'i tshogs la yang / /de bzhin yang dag skyabs su mchi//bdag ni 'jigs pas rnam skrag pas / /kun du bzang la bdag nyid 'bul/ /'jam pa'i dbyangs la bdag nyid kyis/ /bdag gi lus ni dbul bar bgyi/ /thugs rjes spyod pa ma 'khrul ba/ /spyan ras gzigs mgon de la yang / / nyam thag nga ros 'o dod 'bod/ /sdig ldan bdag la bskyab tu gsol/ /'phags pa nam mkha'i snying po dang / /sa yi snying po dag dang ni/ /thugs rje che mgon thams cad la/ /skyabs tshol snying nas 'o dod 'bod/ /gang zhig mthong nas gshin rje yi/ /pho nya la sogs sdang ba rnams//skrag nas phyogs bzhir 'byer byed pa/ /rdo rje can la skyabs su mchi/ /sngon chad khyed kyi bka' las 'das/ /da ni 'jigs pa che mthong nas/ /khyed la skyabs su mchi lags kyis/ /'jigs pa myur du bsal du gsol/ /tha mal nad kyis 'jigs na yang //sman pa'i ngag bzhin bya dgos na/ /'dod chags la sogs nyes pa brgya'i/ /nad kyis rtag btab smos ci dgos/ /de gcig gis kyang 'dzam gling na/ /gnas pa'i mi kun brlag byed la/ /de dag gso ba'i sman gzhan ni/ /phyogs rnams kun nas mi rnyed na//de la sman pa thams cad mkhyen/ /zug rngu thams cad 'byin pa yi/ /bka' ltar mi byed sems pa ni/ /shin tu gti mug smad pa'i gnas/ / g.yang sa tha mal chung ngu la'ang / /bag yod gnas par bya dgos na/ /dpag tshad stong du lhung ba yi//yun ring g.yang sar smos ci dgos/ /di ring kho na mi 'chi zhes/ /bde bar 'dug pa rigs ma yin/ /bdag ni med par 'gyur ba'i dus/ /de ni gdon mi za bar 'byung / /bdag la mi 'jigs su yis byin/ /'di las ji ltar nges thar zhes/ / gdon mi za bar med 'gyur na/ /ji ltar bdag yid bde bar 'dug /sngon chad myong ste zhig pa las/ /bdag la lhag pa ci yod na/ /bdag ni de la mngon zhen nas/ /bla ma'i bka' dang 'gal bar byas/ /gson tshe 'di dang de bzhin du/ /gnyen dang bshes pa rnam spangs nas//gcig pu ga shed 'gro dgos na/ /mdza' dang mi mdza' kun ci rung / /mi dge ba las sdug bsngal 'byung / /de las ji ltar nges thar zhes/ /nyin mtshan rtag tu bdag gis ni/ /'di nyid 'ba' zhig bsam pa'i rigs/ /bdag ni mi shes gti mug pas//rang bzhin kha na ma tho'am / /bcas pa'i sdig pa gang yin las/ /gang yang rung ba bgyis pa rnams/ /mgon po'i spyan sngar mngon sum du/ /thal sbyar sdug bsngal 'jigs sems kyis/ /yang dang yang du phyag 'tshal te/ /de dag thams cad bshags par bgyi//'dren pa rnams kyis bdag gi sdig /nongs pa lags par gzung du gsol/ /'di ni bzang po ma lags pas/ /slan chad bdag ni yong mi bgyid/ /byang chub sems dpa'i spyod pa la 'jug pa las/ sdig pa bshags pa'i le'u ste gnyis pa'o// //sems can kun gyi ngan song gi /sdug bsngal ngal so'i dge ba dang / /sdug bsngal can dag bder gnas la/ /dga' bas rjes su yi rang ngo / /byang chub rgyur gyur dge bsags pa/ /de la rjes su yi rang ngo / /lus can 'khor ba'i sdug bsngal las//nges par thar la yi rang ngo / /skyob pa rnams kyi byang chub dang / /rgyal sras sa la'ang yi rang ngo / /sems can thams cad bde mdzad pa'i/ /thugs bskyed dge ba rgya mtsho dang / /sems can phan pa mdzad pa la/ /dga' bas rjes su yi rang ngo //phyogs rnams kun gyi sangs rgyas la/ /thal mo sbyar te gsol ba ni/ /sems can sdug bsngal mun 'thoms la/ /chos kyi sgron ma spar du gsol/ /rgyal ba mya ngan 'da' bzhed la/ /thal mo sbyar te gsol ba ni/ /'gro 'di ldongs par mi dgod cing //bskal pa grangs med bzhugs par gsol/ /de ltar 'di dag kun byas te/ /dge ba bdag gis bsags pa gang / /des ni sems can thams cad kyi/ /sdug bsngal thams cad bsal bar shog /'gro ba nad pa ji srid du/ /nad sos gyur gyi bar du ni//sman dang sman pa nyid dag dang / /de yi nad g.yog byed par shog /zas dang skom gyi char phab ste/ /bkres dang skom pa'i sdug bsngal bsal/ /mu ge'i bskal pa bar ma'i tshe/ /bdag ni zas dang skom du gyur/ /sems can phongs shing dbul ba la//bdag ni mi zad gter gyur te/ /yo byad mkho dgu sna tshogs su/ /mdun du nye bar gnas gyur cig /lus dang de bzhin longs spyod dang / /dus gsum dge ba thams cad kyang / /sems can kun gyi don sgrub phyir/ /phongs ba med par gtang bar bya//thams cad btang bas mya ngan 'da'/ /bdag blo mya ngan 'das pa sgrub / /thams cad gtong bar chabs gcig la/ /sems can rnams la btang ba mchog /bdag gis lus can thams cad la/ /lus 'di ci bder byin zin gyis/ / rtag tu gsod dang smod pa'am/ /brdeg sogs ci dgar byed la rag /bdag gi lus la rtse byed dam/ /co 'dri ga zha'i rgyu byed kyang / /bdag gi lus 'di byin zin gyis/ /'di yi kha tas ci zhig bya/ /de la gnod par mi 'gyur ba'i/ /las gang yin pa'ang byed du chug /bdag la dmigs nas nam du yang / /'ga' yang don med ma gyur cig /bdag la dmigs nas gang dag gi /khro'am dad pa'i sems byung ba / /de nyid rtag tu de dag gi /don kun 'grub pa'i rgyur gyur cig /gang dag bdag la kha zer ram/ / gzhan dag gnod pa byed pa'am/ /de bzhin phyar ka gtong yang rung / /thams cad byang chub skal ldan gyur/ /bdag ni mgon med rnams kyi mgon/ /lam zhugs rnams kyi ded dpon dang / /brgal 'dod rnams kyi gru dang ni/ /gzings dang zam pa nyid du gyur/ / gling don gnyer la gling dang ni/ /gnas mal 'dod la gnas mal dang / /bdag ni lus can bran 'dod pa/ /kun gyi bran du gyur par shog /yid bzhin nor dang bum pa bzang / /rig sngags grub dang sman chen dang / /dpag bsam gyi ni shing dag dang / /lus can rnams kyi 'dod 'jor gyur//sa sogs 'byung ba chen po dang / /nam mkha' bzhin du rtag par yang / /sems can dpag tu med pa yi/ /rnam mang nyer 'tsho'i gzhir yang shog /de bzhin nam mkha'i mthas gtugs pa'i/ /sems can khams la rnam kun du//thams cad mya ngan 'das bar du/ /bdag ni nyer 'tsho'i rgyur yang shog /ji ltar sngon gyi bde gshegs kyis/ /byang chub thugs ni bskyed pa dang / /byang chub sems dpa'i bslab pa la/ /de dag rim bzhin gnas pa ltar/ /de bzhin 'gro la phan don du/ byang chub sems ni bskyed bgyi zhing / /de bzhin du ni bslab pa la'ang / /rim pa bzhin du bslab par bgyi/ /de ltar blo dang ldan pa yis/ /rab dang byang chub sems bzung nas/ /mjug kyang rgyas par bya ba'i phyir / /sems ni 'di ltar gzengs bstod do/ /deng du bdag tshe 'bras bu yod//mi yi srid pa legs par thob/ /di ring sangs rgyas rigs su skyes/ /sangs rgyas sras su bdag deng gyur/ /da ni bdag gis ci nas kyang / /rigs dang mthun pa'i las brtsams te/ /skyon med btsun pa'i rigs 'di la/ /rnyog par mi 'gyur de ltar bya//long bas phyag dang phung po las/ /ji ltar rin chen rnyed pa ltar/ /de bzhin ji zhig ltar stes nas/ /byang chub sems 'di bdag la skyes/ /'gro ba'i 'chi bdag 'joms byed pa'i/ /bdud rtsi mchog kyang 'di yin no/ /'gro ba'i dbul ba sel ba yi//mi zad gter yang 'di yin no/ /'gro ba'i nad rab zhi byed pa'i/ /sman gyi mchog kyang 'di yin no/ /srid lam 'khyam zhing dub pa yi/ /'gro ba'i ngal so ljon shing yin/ /'gro ba thams cad ngan 'gro las/ /sgrol bar byed pa'i spyi stegs yin//'gro ba'i nyon mongs gdung sel ba'i/ /sems kyi zla ba shar ba yin/ /'gro ba'i mi shes rab rib dag /dpyis 'byin nyi ma chen po yin/ /dam chos 'o ma bsrubs pa las / /mar gyi nying khu byung ba yin/ /'gro ba'i mgron po srid pa'i lam rgyu zhing //bde ba'i longs spyod spyad par 'dod pa la/ /'di ni bde ba'i mchog tu nyer gnas te/ /sems can mgron chen tshim par byed pa yin/ /bdag gis di ring skyob pa thams cad kyi/ /spyan sngar 'gro ba bde gshegs nyid dang ni/ /bar du bde la mgron du bos zin gyis//lha dang lha min la sogs dga' bar gyis/ /byang chub sems dpa'i spyod pa la 'jug pa las/ byang chub kyi sems yongs su gzung ba zhes bya ba ste le'u gsum pa'o// //rgyal ba'i sras kyis de lta bur/ / byang chub sems rab brtan bzung nas/ /g.yel ba med par rtag tu yang / /bslab las mi 'da' 'bad par bya/ /bab col brtsams pa gang yin pa'am/ /gang zhig legs par ma brtags pa/ /de ni dam bcas byas gyur kyang / /bya'am btang zhes brtags pa'i rigs//sangs rgyas rnams dang de yi sras/ /shes rab chen pos gang brtags shing / /bdag nyid kyis kyang brtag brtags pa/ /de la bshol du ci zhig yod/ /gal te de ltar dam bcas nas/ /las kyis bsgrub pa ma byas na/ /sems can de dag kun bslus pas//bdag gi 'gro ba ci 'drar 'gyur/ /dngos po phal pa cung zad la'ang / /yid kyis sbyin par bsam byas nas/ /mi gang sbyin par mi byed pa/ /de yang yi dags 'gyur gsungs na/ /bla na med pa'i bde ba la/ /bsam pa thag pas mgron gnyer nas//'gro ba thams cad bslu byas na / /bde 'gror ji ga 'gro 'gyur ram/ /mi gang byang chub sems btang yang / /de dag thar bar byed pa ni/ /las tshul bsam gyis mi khyab ste/ /thams cad mkhyen pa kho nas mkhyen/ /de ni byang chub sems dpa' la//ltung ba'i nang na lci ba ste/ /'di ltar de ni byung gyur na/ /sems can kun gyi don la dman/ /gang gzhan skad cig tsam yang 'di'i / /bsod nams bar chad gegs byed pa/ /sems can don la dman gyur pas/ /de yi ngan 'gro mu mtha' med/ / sems can gcig gi bde ba yang / /bshig na bdag nyid nyams 'gyur na/ /nam mkha' ma lus mtha' klas pa'i/ /lus can bde bshig smos ci dgos/ /de ltar ltung ba stobs ldan dang / /byang chub sems stobs ldan pa dag /'khor bar res kyis 'dre byed na//sa thob pa la yun ring thogs/ /de ltas ji ltar dam bcas bzhin/ /bdag gis gus par bsgrub par bya/ /deng nas brtson par ma byas na/ /'og nas 'og tu 'gro bar 'gyur/ /sems can thams cad phan mdzad pa'i/ /sangs rgyas grangs med 'das gyur kyang //bdag ni rang gi nyes pas de'i/ /gso ba'i spyod yul ma gyur to / /da dung de bzhin bdag byed na/ /yang dang yang du'ang de bzhin te/ /ngan 'gror nad dang 'ching ba dang / /bcad dang gsheg sogs myong bar 'gyur/ /de bzhin gshegs pa 'byung ba dang //dad dang mi lus thob pa dang / /dge goms rung ba de lta bu / /dkon pa nam zhig thob par 'gyur/ /nad med nyi ma 'di lta bu / /zas bcas 'tshe ba med kyang ni/ /tshe ni skad cig bslu ba ste/ /lus ni thang cig brnyan po bzhin//bdag gi spyod pa 'di 'dras ni/ /mi yi lus kyang 'thob mi 'gyur/ /mi lus thob par ma gyur na/ /sdig pa 'ba' zhig dge ba med/ /gang tshe dge spyad skal ldan yang / /dge ba bdag gis ma byas na/ /ngan song sdug bsngal kun rmongs pa/ /de tshe bdag gis ci byar yod//dge ba dag kyang ma byas la/ /sdig pa dag kyang nyer bsags na/ /bskal pa bye ba brgyar yang ni/ /bde 'gro'i sgra yang thos mi 'gyur/ /de nyid phyir na bcom ldan gyis/ /rgya mtsho cher g.yengs gnya' shing gi/ /bu gar rus sbal mgrin chud ltar//mi nyid shin tu thob dkar gsungs/ /skad cig gcig byas sdig pas kyang / /bskal par mnar med gnas 'gyur na/ /thog med 'khor bar bsags sdig gis/ /bde 'gror mi 'gro smos ci dgos/ /de tsam kho na myong gyur nas/ / de ni rnam thar mi 'gyur te/ /'di ltar de ni myong bzhin du/ /sdig pa gzhan dag rab tu skye/ /'di 'dra'i dal ba rnyed gyur nas/ /bdag gis dge goms ma byas na / /'di las bslus pa gzhan med de/ /'di las rmongs pa'ang gzhan med do/ / gal te bdag gis de rtogs nas/ /rmongs pas phyis kyang sgyid lug na/ /'chi bar 'gyur ba'i dus kyi tshe/ /mya ngan chen po ldang bar 'gyur/ /dmyal me bzod dkas dus ring du/ /bdag gi lus la bsregs gyur na/ /'gyod pa mi bzad me 'bar bas/ /sems gdung 'gyur ba gdon mi za//shin tu rnyed dka' phan pa'i sa/ /ji zhig ltar te rnyed gyur nas/ /bdag nyid shes dang ldan bzhin du/ /phyir yang dmyal ba der khrid na/ /sngags kyis rmongs par byas pa bzhin/ /bdag la 'dir sems med du zad/ /cis rmongs bdag kyang ma shes te//bdag gi khong na ci zhig yod/ /zhe sdang sred sogs dgra rnams ni/ /rkang lag la sogs yod min la/ /dpa' mdzangs min yang ji zhig ltar/ /de dag gis bdag bran bzhin byas/ /bdag gi sems la gnas bzhin du/ /dga' mgur bdag la gnod byed pa//de la'ang mi khro bzod pa ni/ /gnas min bzod pa smad pa'i gnas/ /gal te lha dang lha min rnams/ /thams cad bdag la dgrar langs kyang / /de dag gis kyang mnar med pa'i/ /me nang khrid cing 'jug mi nus/ /nyon mongs stobs can dgra 'dis ni//gang dang phrad na ri rab kyang / /thal ba yang ni mi lus pa/ /der bdag skad cig gcig la 'dor/ /bdag gi nyon mongs dgra bo gang / /dus ring thog mtha' med pa ltar/ /dgra gzhan kun kyang de lta bur/ /yun ring thub pa ma yin no/ / mthun par rim gro bsten byas na/ /thams cad phan dang bde byed la / /nyon mongs rnams ni bsten byas na/ /phyir zhing sdug bsngal gnod pa byed/ /de ltar yun ring rgyun chags dgrar gyur pa/ /gnod pa'i tshogs rab 'phel ba'i rgyu gcig pu/ /bdag gi snying la nges par gnas 'cha' na//'khor bar 'jigs med dga' bar ga la 'gyur/ /'khor ba'i btson ra'i srung mas dmyal sogs su/ /gsod byed gshed mar gyur pa 'di dag ni/ /gal te blo gnas chags pa'i dra ba na/ /gnas na bdag la bde ba ga la yod//de ltar ji srid bdag gis dgra 'di mngon sum du/ /nges par ma bcom de srid bdag 'dir brtson mi 'dor/ /re zhig gnod byed chung ngu la yang khros gyur pa / /nga rgyal bdo rnams de ma bcom par gnyid mi 'ong / /rang bzhin 'chi bas sdug bsngal gyur pa'i nyon mongs dag /g.yul ngor mdar tshe nan gyis gzhom par 'dod pa yang / /mda' mdung mtshon gyis phog pa'i sdug bsngal khyad bsad nas/ /don ma grub par phyir phyogs 'byer bar mi byed na/ /rtag tu sdug bsngal kun gyi rgyur gyur pa/ /rang bzhin dgra des gzhom brtson bdag la deng //sdug bsngal brgya phrag rgyur gyur gang gis kyang / /yi chad sgyid lug mi 'gyur smos ci dgos/ /don med dgra yis rma srol btod pa yang / /lus la rgyan dang 'dra bar srel byed na / /don chen sgrub phyir yang dag brtson gyur pa/ /bdag la sdug bsngal ci phyir gnod byed yin//nya pa gdol pa zhing pa la sogs pa/ /rang gi 'tsho ba tsam zhig sems pa yang / /grang dang tshal sogs pa'i gnod bzod na/ /'gro ba bde phyir bdag lta cis mi bzod/ /phyogs bcu nam mkha'i mthas gtugs pa'i/ /'gro ba nyon mongs las bsgral bar//dam bcas gang tshe bdag nyid kyang / /nyon mongs rnams las ma grol ba / /bdag gi tshod kyang mi shes par/ /smra ba ji ltar smyon pa min/ /de ltar nyon mongs gzhom pa la/ /rtag tu phyir mi ldog par bya/ /'di la bdag gis zhen bya zhing //khon du bzung nas g.yul sprad de/ /rnam pa de 'dra'i nyon mongs pa/ /nyon mongs 'joms byed ma gtogs so/ /bdag ni bsregs te bsad gyur tam/ /bdag gi mgo bo bcad kyang bla'i/ /rnam pa kun du nyon mongs pa'i/ /dgra la mdud par mi bya'o//tha mal dgra bo yul nas phyung yang ni/ /yul gzhan dag tu gnas shing yongs bzung nas/ /nus pa brtas nas de nas phyir ldog gi /nyon mongs dgra tshul de dang 'dra ma yin/ /nyon mongs nyon mongs shes rab mig gis spang / /bdag yid las bsal gang du 'gro bar 'gyur//gang du gnas nas bdag gnod bya phyir 'ong / /blo zhen bdag la brtson pa med par zad/ /nyon mongs rnams ni yul na mi gnas dbang tshogs la min par na'ang min/ /de las gzhan na'ang min na 'di dag gar gnas 'gro ba kun gnod byed//'di ni sgyu 'dra de phyir snying la 'jigs spongs shes phyir brtson pa bsten/ /don med nyid du bdag la dmyal sogs rnams su ci ste gnod pa byed/ /de ltar rnam bsams ji skad bshad pa yi/ /bslab pa bsgrub pa'i ched du 'bad par bya/ /sman pa'i ngag ma mnyan na sman dag gis//bcos dgos nad pa sos pa ga la yod / /byang chub sems dpa'i spyod pa la 'jug pa las/ bag yod bstan pa zhes bya ba ste le'u bzhi pa'o// //bslab pa bsrung bar 'dod pa yis/ /rab tu bsgrims nas sems bsrung ste//sems 'di bsrung bar ma byas na/ /bslab pa bsrung bar yong mi nus/ /sems kyi glang po yan btang bas/ /mnar med gnod pa byed pa ltar/ /glang chen ma thul myos pa yis/ /'di na de 'dra'i gnod mi byed/ /kun nas dran pa'i thag pa yis//sems kyi glang po dam btags na/ /'jigs pa thams cad med 'gyur zhing / /dge ba thams cad lag tu 'ong / /stag dang seng ge glang chen dred/ /sbrul dang dgra rnams thams cad dang / /sems can dmyal ba'i srung ma dang / /byad ma de bzhin srin po rnams//sems 'di gcig pu btags pa yis/ /de dag thams cad btags par 'gyur/ /sems 'di gcig pu btul bas na/ /de dag thams cad thul bar 'gyur/ /'di ltar 'jigs pa thams cad dang / /sdug bsngal dpag tu med pa yang / / sems las byung ba yin no zhes/ /yang dag gsung ba nyid kyis bstan/ /sems can dmyal ba'i mtshon cha rnams/ /su zhig gis ni ched du byas/ /lcags sreg sa gzhi su yis byas/ /me tshogs de dag ci las byung / /de 'dra de dag thams cad kyang / / sdig sems yin par thub pas gsungs/ /de ltar 'jig rten gsum po na/ /sems las 'jigs pa gzhan 'ga' med/ /gal te 'gro ba dbul bor nas/ /sbyin pa'i pha rol phyin yin na/ /da rung 'gro bkren yod na sngon/ /skyob pa ji ltar pha rol phyin/ / bdog pa thams cad 'bras bcas te/ /skye bo kun la btang sems kyis/ /sbyin pa'i pha rol phyin gsungs te/ /de ltas de ni sems nyid do / /nya la sogs pa gang zhig tu/ /de dag gsod mi 'gyur bar bskrad/ /spong ba'i sems ni thob pa las / /tshul khrims pha rol phyin par bshad//sems can mi srun nam mkha' bzhin/ /de dag gzhom gyis yong mi lang / /khro ba'i sems 'di gcig bcom na/ /dgra de thams cad choms dang 'dra/ /sa stengs 'di dag kos g.yogs su / /de snyed ko bas ga la lang //lham mthil tsam gyi ko bas ni/ /sa stengs thams cad g.yogs dang 'dra/ /de bzhin phyi rol dngos po yang / /bdag gis phyir bzlog mi lang gi/ /bdag gi sems 'di phyir bzlog bya'i/ /gzhan rnams bzlog go ci zhig dgos/ /sems gsal gcig bskyed 'bras bu gang //tshangs la sogs pa yin pa ltar/ /lus ngag bcas pa'i 'bras bu mang / /spyod pa zhan pas de lta min/ /bzlas brjod dang ni dka' thub kun/ /yun ring dus su spyad byas kyang / /sems gzhan g.yengs pas byas pa ni/ /de nyid rig pas don med gsungs//gang gis chos kyi gtso bo mchog /sems kyi gsang 'di ma shes na/ /bde thob sdug bsngal gzhom 'dod kyang / /de dag don med gyi nar 'khyam/ /de ltas bdag gi sems 'di ni/ /legs gzung legs par bsrung bar bya/ / sems bsrung brtul zhugs ma gtogs pa/ /brtul zhugs mang pos ci zhig bya/ /ma grangs drol ba'i khrod gnas na/ /sgrims te rma yi bag byed bzhin/ /skye bo ngan khrod gnas pas kyang / /sems kyi rma 'di rtag tu bsrung / /rma yi sdug bsngal chung ngu yis//skrag pa'ang rma yi bag byed na/ /bsdus 'joms ris 'joms skrag pa dag /sems kyi rma lta cis mi srung / /spyod pa 'di 'dras gnas byed na/ /skye bo ngan pa'i khrod gnas sam/ /bud med khrod na gnas kyang rung / /sdom brtson brtan pa nyams mi 'gyur//bdag gi rnyed dang bkur sti dang / /lus dang 'tsho ba med bla zhing / /dge ba gzhan yang nyams bla yi/ /sems ni nams kyang nyams mi bya/ /sems bsrung 'dod pa rnams la ni/ /dran pa dang ni shes bzhin dag /thams cad 'bad pas srungs shig ces//bdag ni de ltar thal mo sbyor / /nad kyis dkrugs pa'i mi dag ni/ /las rnams kun la mthu med pa/ /de bzhin rmongs pas sems dkrugs pa/ /las rnams kun la mthu med do/ /shes bzhin med pa'i sems ldan pa'i/ /thos dang bsams dang bsgoms pa yang //glo rdol bum pa'i chu bzhin du/ /dran pa la ni de mi gnas/ /thos ldan dad pa can dang ni/ /brtson pa lhur len du ma yang / /shes bzhin med pa'i skyon chags pas/ /ltung ba'i rnyog dang bcas par 'gyur/ /shes bzhin med pa'i chom rkun dag /dran pa nyams pa'i rjes 'brang bas / /bsod nams dag ni nyer bsags kyang / /rkun pos phrogs bzhin ngan 'gror 'gro/ /nyon mongs chom rkun tshogs 'di ni/ /glags skabs tshol bar byed pa ste/ /glags rnyed gyur nas dge 'phrog cing / /bde 'gro'i srog kyang 'joms par byed//de bas dran pa yid sgo nas/ /gud du nam yang mi gtong ngo / /song na'ang ngan 'gro gnod pa dag /dran par byas te nye bar bzhag /bla ma dang ni 'grogs pa las/ /mkhan pos rjes su brtan pa dang / /'jigs pas skal ldan gus byed la//dran pa bde blag nyid du skye / /sangs rgyas byang chub sems dpa' dag /kun du thogs med gzigs par ldan/ /de dag thams cad spyan snga na/ /rtag par bdag ni gnas so zhes/ /de ltar bsams nas ngo tsha dang / /gus dang 'jigs ldan de bzhin gnos //des na sangs rgyas rjes dran pa'ang / /de la yang dang yang du 'byung / /gang tshe dran pa yid sgo nas/ /bsrung ba'i don du gnas gyur pa/ /de tshe shes bzhin 'ong 'gyur zhing / /song ba dag kyang 'ong bar 'gyur/ /re zhig dang po 'di 'dra'i sems/ / 'di ni skyon bcas shes byas nas/ /de tshe bdag gis shing bzhin du/ /zungs thub par ni gnas par bya/ /don med g.yeng bar lta ba ni/ /nam yang bdag gis mi bya ste/ /nges par sems pas rtag tu ni/ /mig ni phab ste blta bar bya/ /lta ba ngal bso'i ched du ni//res 'ga' phyogs su blta bar bya/ /'ga' zhig mig lam snang gyur na/ /bltas nas 'ongs pa legs zhes brjod/ /lam sogs 'jigs pa brtag pa'i phyir/ /yang dang yang du phyogs bzhir lta / /ngal bsos kha ni phyir bltas nas/ / rgyab kyi phyogs su blta bar bya/ /mdun dang rgyab tu brtag byas nas/ /'gro'am yang na 'ong bya ste/ /de ltar gnas skabs thams cad du/ /dgos pa shes nas spyad par bya/ /lus kyis 'di ltar gnas bya zhes/ /bya ba bsdogs nas de nas ni/ /skabs su lus 'di ji lta bur//gnas pa yin zhes blta bar bya/ /sems kyi glang chen myos pa ni/ /chos la sems pa'i ka chen la/ /ji ltar btags pa mi 'chor bar / /de ltar 'bad pa kun gyis brtag /ci nas ting 'dzin brtson pa ni/ /skad cig gcig kyang mi 'chor bar//bdag gi yid 'di gar spyod ces/ /de ltar yid la so sor brtag /'jigs dang dga' ston sogs 'brel bar / /gal te mi nus ci bder bya/ /'di ltar sbyin pa'i dus dag tu/ /tshul khrims btang snyoms bya bar gsungs/ /gang zhig bsams te byar brtsams pa//de las gzhan du mi bsam ste/ /der gtang ba yi bsam pa yis/ /de nyid re zhig bsgrub par bya/ /de lta na ni kun legs byas/ /gzhan du gnyi gar mi 'gyur ro/ /shes bzhin ma yin nye nyon mongs/ /de lta na ni 'phel mi 'gyur//bre mo'i gtam ni sna tshogs dang / /ngo mtshar ltad mo rnam mang po/ /kun la 'jug par gyur pa na/ /de la chags pa spang bar bya/ /don med sa rko rtswa gcod dang / /sa ris 'dri sogs byed gyur na/ /bde gshegs bslab pa dran byas nas/ / skrag pas de yi mod la dor/ /gang tshe bskyod par 'dod gyur tam/ /smra bar 'dod par gyur na yang / /dang por rang gi sems brtags nas/ /brtan pas rig pa ldan par bya/ /gang tshe rang yid chags pa dang / /khro bar 'dod pa de yi tshe/ /las su mi bya smra mi bya//shing bzhin du ni gnas par bya/ /dgod dang ga zhar bcas pa'am/ /gal te nga rgyal rgyags ldan pa'am/ /mtshang 'bru ba yi bsam pa dang / /gal te skyor 'byin slu sems sam/ /gang tshe bdag bstod lhur len pa'am/ /gzhan la smod pa nyid dang ni//gshe bcas 'gyod dang bcas gyur pa/ /de tshe shing bzhin gnas par bya/ /rnyed dang bkur sti grags 'dod pa'am/ /g.yog 'khor don du gnyer 'dod pa'am/ /bdag sems rim gro 'dod gyur na/ /de tshe shing bzhin gnas par bya/ /gzhan don yal bar 'dor ba dang //rang don gnyer bar 'dod pa dang / /smra bar 'dod pa'i sems byung na/ /des ni shing bzhin gnas par bya/ /mi bzod le lo 'jigs pa dang / /de bzhin spyi rtol mu cor dang / /rang gi phyogs zhen sems byung na/ /de tshe shing bzhin gnas par bya//de ltar kun nas nyon mongs dang / /don med brtson pa'i yid brtags nas/ /de tshe dpa' bos gnyen po yis/ /de ni brtan por gzung bar bya/ /shin tu nges dang rab dad dang / /brtan dang gus dang zhe sar bcas/ /ngo tsha shes dang 'jigs bcas dang //zhi zhing gzhan dga' byed la brtson/ /phan tshun mi mthun byis pa yi/ /'dod pa rnams kyis mi skyo zhing / /nyon mongs skyes pa 'di dag gi/ /sems 'di byung snyam brtser ldan dang / /kha na ma tho med dngos la/ /bdag dang sems can dbang byas shing //sprul pa bzhin du nga med par/ /yid 'di rtag tu gzung bar bya/ /ring zhig lon nas dal ba'i mchog /thob pa yang dang yang bsams nas/ /sems de lta bur ri rab ltar/ /rab tu mi g.yo gzung bar bya/ /bya rgod sha la chags pa yis//phan tshun kun du bshal khrid kyang / /yid khyod mi dgar mi byed na/ /da lta ci phyir kha ta byed/ /lus 'di bdag gir gzung byas nas/ /yid khyod ci phyir srung bar byed/ /khyod dang 'di gnyis so so na / /des ko khyod la ci zhig bya/ / rmongs pa'i yid khyod ci yi phyir/ /shing gzugs gtsang ma gzung mi byed/ /mi gtsang tshogs kyi 'khrul 'khor 'di/ /rul ba bsrungs te ci zhig rung / /thog mar pags pa'i rim pa 'di/ /rang gi blo yis tha dad phye/ /sha yang rus pa'i dra ba las/ /shes rab mtshon gyis gud du phye//rus pa rnams kyang dbye byas nas/ /rkang gi bar du blta bya zhing / /'di la snying po ci yod ces/ /bdag nyid kyis ni brtag par gyis/ /de ltar 'bad de btsal kyang der/ /khyod kyis snying po ma mthong na/ /da dung ci phyir chags tshul gyis/ / khyod ni lus 'di srung bar byed/ /khyod kyis mi gtsang bzar mi rung / /khrag kyang btung du mi rung la/ /rgyu lto'ang gzhib tu mi rung na/ /lus kyis khyod la ci zhig bya/ /nyis na wa dang bya rgod kyis / /zas kyi don du 'di bsrung rigs/ /mi 'o cog gi lus 'di ni/ / bkol bar bya ba nyid du zad/ /'di ltar khyod kyis bsrungs kyang ni/ /'chi bdag brtse ba med pa yis/ /phrogs te bya dang khyir byin na/ /de tshe khyod kyis ci byar yod/ /bran g.yog bkol du mi btub la'ang / /gos la sogs pa mi sbyin na/ /lus 'di bsnyod kyang gzhan 'gro na//khyod ko ci ste sha thang gso/ /'di la gla rngan byin nas ni/ /da ni rang gi don byed chug /phan pa med par 'di la ni/ /thams cad sbyin par mi bya'o/ /'gro dang 'ong ba'i rten tsam du/ /lus la gru yi blo bzhag ste/ /sems can rnams don bsgrub pa'i phyir//yid bzhin gyi ni lus su bsgyur/ /de ltar rang dbang yod kyis de / /rtag tu 'dzum pa'i bzhin du gyis/ /khro gnyer ngo zum yongs thong ste/ /'gro ba'i bshes dang gsong por gyis/ /khri la sogs pa bab col du/ /sgra dang bcas par mi dor ro//sgo yang drag tu mi dbye ste/ /rtag tu gcom bskyungs dga' bar bya/ /chu skyar byi la chom rkun dag /sgra med 'jab cing 'gro ba yis/ /mngon par 'dod pa'i don sgrub pa/ /thub pas rtag tu de bzhin spyad/ /gzhan la bzhen bskul 'debs mkhas shing //ma bcol phan pa byed pa'i ngag /gus pas spyi bos blang gyis te/ /rtag tu kun gyi slob mar gyur/ /legs par smas pa thams cad la/ /dge bar gsungs zhes brjod par bya/ /bsod nams byed pa mthong gyur na/ /bstod pas legs par dga' ba bskyed//lkog na yon tan brjod bya zhing / /yon tan brjod na rjes su brjod/ /rang gi yon tan brjod na de / /yon tan shes par rig par bya/ /rtsom pa thams cad dga' phyir te/ /de ni rin gyis nyo na'ang dkon/ /de ltas gzhan byas yon tan gyis/ /dga' ba'i bde ba spyad par bya//bdag la 'dir gong yong med la/ /pha rol du yang bde ba che/ /nyes pas mi dga' sdug bsngal zhing / /pha rol du yang sdug bsngal che/ /smra na yid phebs 'brel pa dang / /don gsal yid du 'ong ba dang / /chags dang zhe sdang spangs pa dang //'jam zhing ran par smra bar bya/ /mig gis sems can lta na yang / /'di dag nyid la brten nas bdag /sangs rgyas nyid du 'gyur ro zhes/ /drang zhing byams pa'i tshul gyis blta/ /rtag par mngon zhen gyis bslang ba'am/ /gnyen po yis ni bslang ba nyid//yon tan dang ni phan 'dogs zhing / /sdug bsngal ba la dge chen 'gyur/ /mkhas shing ldang dang ldan byas nas/ /las rnams bdag gis rtag tu bya / /las rnams kun la su la yang / /ltos par bya ba ma yin no/ /sbyin pa'i pha rol phyin la sogs/ / gong nas gong du khyad zhugs spyad/ /chung ngu'i phyir ni che mi gtang / /gtso cher gzhan gyi don bsam mo/ /de ltar rig byas gzhan don la/ /rtag tu brtson par gnas par bya/ /thugs rje mnga' ba ring gzigs pas/ /bkag pa rnams kyang de la gnang / /log par lhung dang mgon med dang //brtul zhugs gnas la bgo bya zhing / /ran pa tsam du bza' bya ste/ /chos gos gsum ma gtogs pa sbyin/ /dam pa'i chos ni spyod pa'i lus/ /phran tshegs ched du gnod mi bya/ /de ltar byas na sems can gyi/ /bsam pa myur du rdzogs par 'gyur//snying rje'i bsam pa ma dag par/ /lus 'di gtang bar mi bya ste/ /ci nas 'di dang gzhan du yang / /don chen sgrub pa'i rgyur gtang ngo / /ma gus pa la chos mi bshad/ /mi na bzhin du mgo dkris dang / /gdugs dang 'khar ba mtshon thogs dang //mgo bo g.yogs pa dag la min/ /dman la zab dang rgya che dang / /skyes pa med par bud med min/ /dman dang mchog gi chos rnams la/ /mtshungs par gus pas kun du spyad/ /rgya chen chos kyi snod gyur pa/ /dman pa'i chos la sbyar mi bya/ / spyod pa yongs su dor mi bya/ /mdo dang sngags kyis 'drid mi bya / /so shing dang ni mchil ma dag /dor ba na ni dgab par bya/ /gci la sogs pa'ang longs spyod pa'i/ /chu dang thang la dor ba smad/ /kha bkang ba dang sgra bcas dang / /kha gdangs nas ni bza' mi bya/ /rkang pa brkyang ste mi 'dug cing //lag pa mnyam par mi mnye'o/ /bzhon pa mal stan gnas dag tu/ /bud med gzhan dang gcig mi bya/ /'jig rten ma dad gyur pa kun/ /mthong dang dris te spang bar bya/ /sor mos brda ni mi bya ste/ /gus dang bcas pas g.yas pa yi//lag pa dag ni kun gyis kyang / /lam yang de ltar bstan par bya/ /lag pa shas cher bskyod min te/ /cung zad bskyod la sgra bsgrags pa/ /se gol la sogs brda byas te / /gzhan du ma bsdams par 'gyur ro/ /mgon po mya ngan 'das gzims ltar//'dod pa'i phyogs su nyal bar bya/ /shes bzhin myur du ldang sems la/ /thog ma nyid du nges par sbyar / /byang chub sems dpa'i spyod pa dag /tshad med par ni gsungs pa las/ /sems sbyang ba yi spyod pa ni/ /nges par de srid spyad par bya//nyin dang mtshan mo lan gsum du/ /phung po gsum pa gdon bya zhing / /rgyal dang byang chub sems brten pas/ /ltung ba'i lhag ma des zhi bya/ /rang ngam gzhan gyi dbang yang rung / /gnas skabs gang du ci spyod kyang / /bslab par gsungs pa gang yin pa'i//gnas skabs de la 'bad de bslab/ /rgyal sras rnams kyis mi bslab pa/ /de ni gang yang yod min te/ /de ltar gnas pa'i mkhas pa la/ /bsod nams mi 'gyur gang yang med/ /dngos sam yang na brgyud kyang rung / /sems can don las gzhan mi spyad//sems can kho na'i don gyi phyir/ /thams cad byang chub phyir bsngo'o/ /rtag par dge ba'i bshes gnyen ni/ /theg chen don la mkhas pa dang / /byang chub sems dpa'i brtul zhugs mchog /srog gi phyir yang mi btang ngo / /dpal 'byung ba yi rnam thar las//bla ma bsten pa'i tshul ltar bslab/ /'di dang sangs rgyas bka' stsal gzhan/ /mdo sde bklags nas shes par bya/ /mdo sde rnams las bslab pa snang / /de bas mdo sde bklag par bya/ /nam mkha'i snying po'i mdo sde ni/ /thog ma nyid du blta bar bya//gang phyir rtag tu spyad pa ni/ /de las rgya cher rab ston pas/ /bslab pa kun las btus pa yang / /nges par yang dang yang du blta/ /yang na re zhig mdor bsdus pa'i/ /mdo rnams kun las btus pa blta/ /'phags pa klu sgrub kyis mdzad pa'i //gnyis po 'ang 'bad pas blta bar bya/ /gang las gang ni ma bkag pa/ /de nyid spyad par bya ba ste/ /'jig rten sems ni bsrung ba'i phyir/ /bslab pa mthong nas yang dag spyad/ /lus dang sems kyi gnas skabs la/ /yang dang yang du brtag bya ba//de nyid kho na mdor na ni/ /shes bzhin bsrung ba'i mtshan nyid do/ /lus kyis 'di dag spyad par bya/ /tshig tsam brjod pas ci zhig 'grub/ /sman dpyad bklags pa tsam gyis ni/ /nad pa dag la phan 'gyur ram/ /byang chub sems dpa'i spyod pa la 'jug pa las/shes bzhin bsrung bar bya ba ste le'u lnga pa'o// //bskal pa stong du bsags pa yi/ /sbyin dang bde gshegs mchod la sogs/ /legs spyad gang yin de kun yang / /khong khro gcig gis 'joms par byed/ / zhe sdang lta bu'i sdig pa med/ /bzod pa lta bu'i dka' thub med/ /de bas bzod la nan tan du/ /sna tshogs tshul du bsgom par bya/ /zhe sdang zug rngu'i sems 'chang na/ /yid ni zhi ba nyams mi myong / /dga' dang bde ba'ang mi 'thob la/ /gnyid mi 'ong zhing brtan med 'gyur//gang dag nor dang bkur sti yis/ /drin byin de la brten gyur pa/ /de dag kyang ni sdang ldan pa'i/ /rje dpon de la gsod par rgol/ /de yis mdza' bshes skyo bar 'gyur/ /sbyin pas bsdus kyang bsten mi byed/ /mdor na khro ba bder gnas pa//de ni 'ga' yang yod ma yin/ /khro ba'i dgra yis de la sogs/ /sdug bsngal dag ni byed par 'gyur/ /gang zhig bsgrims te khro 'joms pa/ /de ni 'di dang gzhan du bde/ /mi 'dod byas dang 'dod pa yi/ /gegs byas pa la byung gyur pa/ / yid mi bde ba'i zas rnyed nas/ /zhe sdang brtas te bdag 'joms so/ /de ltas bdag gis dgra bo de'i/ /zas ni rnam par gzhom par bya/ /'di ltar bdag la gnod pa las/ /dgra 'di la ni las gzhan med/ /ci la bab kyang bdag gis ni/ /dga' ba'i yid ni dkrugs mi bya//mi dga' byas kyang 'dod mi 'grub/ /dge ba dag ni nyams par 'gyur/ /gal te bcos su yod na ni/ /de la mi dgar ci zhig yod/ /gal te bcos su med na ni / /de la mi dga' byas ci phan/ /bdag gam bdag gi bshes rnams la//sdug bsngal brnyas dang tshig rtsub dang / /mi snyan zhes bya mi 'dod de/ /dgra la de las bzlog pas so/ /bde ba'i rgyu ni res 'ga' 'byung / /sdug bsngal rgyu ni shin tu mang / /sdug bsngal med par nges 'byung med/ /de bas sems khyod brtan par mnos//dka' zlog dad dang karna pa/ /bsreg dang bcad sogs tshor ba ni/ /don med bzod byed thar pa yi/ /don du bdag go ci phyir sngar/ /goms ni sla bar mi 'gyur ba'i/ /dngos de gang yang yod ma yin/ /de bas gnod pa chung goms pas //gnod pa chen po bzod par byos/ /sbrul dang sha sbrang dag dang ni/ /bkres skom la sogs tshor ba dang / /g.yan pa la sogs bcas pa yi/ /don med sdug bsngal cis ma mthong / /tsha grang char dang rlung sogs dang / /nad dang 'ching dang rdeg sogs la//bdag gis bze re mi bya ste/ /de ltar byas na gnod pa 'phel/ /la la bdag gi khrag mthong na/ /dpa' brtan lhag par skye 'gyur yod/ /la la gzhan gyi khrag mthong na/ /bog cing brgyal bar 'gyur ba yod/ /de ni sems kyi ngang brtan dang //sdar ma'i tshul las gyur pa yin/ /de bas gnod pa khyad bsad cing / /sdug bsngal rnams kyis mi tshugs byos/ /mkhas pas sdug bsngal byung yang ni/ /sems kyi rab dang rnyog mi bya/ /nyon mongs rnams dang g.yul 'gyed la/ /g.yul 'gyed tshe na gnod pa mang //sdug bsngal thams cad khyad bsad nas/ /zhe sdang la sogs dgra 'joms pa/ /de dag rgyal byed dpa' bo ste/ /lhag ma ro la gsod pa'o/ /gzhan yang sdug bsngal yon tan ni/ /skyo bas dregs pa sel bar byed/ /'khor ba pa la snying rje skye/ / sdig la 'dzem dang dge la dga'/ /mkhris pa la sogs sdug bsngal gyi/ /'byung gnas che la mi khro bar/ /sems yod rnams la ci ste khro/ /de dag kun kyang rkyen gyis bskul/ /dper na mi 'dod bzhin du yang / /nad 'di 'byung bar 'gyur ba ltar//de bzhin mi 'dod bzhin du yang / /nan gyis nyon mongs 'byung bar 'gyur/ /khro bar bya zhes ma bsams kyang / /skye bo rnams ni gyi nar khro/ /bskyed par bya zhes ma bsams kyang / /khro ba de bzhin skye bar 'gyur/ /nyes pa ji snyed thams cad dang / / sdig pa rnam pa sna tshogs pa/ /de kun rkyen gyi stobs las byung / /rang dbang yod pa ma yin no/ /rkyen rnams tshogs pa de dag kyang / /bskyed par bya zhes sems pa med/ /des bskyed de yang bdag bskyed ces/ /sems pa yod pa ma yin no/ /gtso bo zhes byar gang 'dod dang //bdag ces brtags pa gang yin pa/ /de nyid bdag ni 'byung bya zhes/ /ched du bsams shing 'byung ba med/ /ma skyes par ni de med na/ /de tshe skye bar 'dod pa gang / /yul la rtag tu g.yeng 'gyur ba / /'gag par 'gyur ba'ang ma yin no//ci ste bdag de rtag na ni/ /mkha' bzhin byed pa med par mngon/ /rkyen rnams gzhan dang phrad na yang / /'gyur ba med la ci byar yod/ /byed pa'i tshe yang sngon bzhin na/ /byed pas de la ci zhig byas / /de yi byed pa 'di yin zhes/ / 'brel par 'gyur ba gang zhig yod/ /de ltar thams cad gzhan gyi dbang / /de yi dbang gis de dbang med/ /de ltar shes na sbrul lta bu'i/ /dngos po kun la khro mi 'gyur/ /gang gis gang zhig bzlog bya ste/ /bzlog pa'ang rigs pa min zhe na/ /de la brten nas sdug bsngal rnams//rgyun chad 'gyur 'dod mi rigs med/ /de bas dgra'am mdza' yang rung / /mi rigs byed pa mthong gyur na/ /'di 'dra'i rkyen las gyur to zhes/ /de ltar soms te bde bar mnos/ /gal te rang dgas 'grub 'gyur na/ /'ga' yang sdug bsngal mi 'dod pas//lus can dag ni thams cad kyang / /su la'ang sdug bsngal 'byung mi 'gyur/ /bag med pas ni bdag la'ang bdag /tsher ma la sogs gnod pa byed/ /bud med la sogs thob bya'i phyir/ /rngam zhing zas gcod la sogs byed//kha cig 'gag cing g.yang sar mchong / /dug dang mi 'phrod za ba dang / /bsod nams ma yin spyod pa yis/ /rang la gnod pa byed pa yod/ /gang tshe nyon mongs dbang gyur pas/ /bdag sdug nyid kyang gsod byed pa / /de tshe de dag gzhan lus la//gnod mi byed par ji ltar 'gyur/ /nyon mongs skyes pas de lta bur/ /bdag gsod la sogs zhugs pa la/ /snying rje rgya la ma skyes na/ /khro bar 'gyur ba ci tha tshig /gal te gzhan la 'tshe byed pa/ /byis pa rnams kyi rang bzhin ni //de la khro ba mi rigs te/ /sreg pa'i rang bzhin me bkon 'dra/ /'on te skyon de glo bur la/ /sems can rang bzhin des pa na'ang / /'o na'ang khro ba mi rigs te/ /mkha' la dud 'thul dkon pa bzhin/ /dbyug pa la sogs dngos bkol te//gal te 'phen pa la khro na/ /de yang zhe sdang gis sbad pas/ /nyes na zhe sdang la khro rigs/ /bdag gis sngon chad sems can la/ /'di 'dra ba yi gnod pa byas/ /de bas sems can 'tshe byed pa/ /bdag la gnod pa 'di 'byung rigs/ /de yi mtshon dang bdag gi lus//gnyi ga sdug bsngal rgyu yin te/ /des mtshon bdag gi lus phyung na/ /gang zhig la ni khro bar bya/ /shu ba mi yi gzugs 'dra ba/ /reg tu mi bzod sdug bsngal can/ /sred mdongs bdag gis bzung gyur na/ /de la gnod pa su la khro//byis pa sdug bsngal mi 'dod cing / /sdug bsngal rgyu la brkam pas na/ /rang gi nyes pas gnod gyur pa / /gzhan la bkon du ci zhig yod/ /dper na dmyal ba'i srung ma dang / /ral gri lo ma'i nags tshal ltar/ /rang gi las kyis 'di bskyed pa/ / gang zhig la ni khro bar bya/ /bdag gi las kyis bskul byas nas/ /bdag la gnod byed rnams 'byung ste/ /des ni sems can dmyal dong na/ /bdag gis de dag ma brlag gam/ /'di dag la ni rten bcas nas/ /bzod pas bdag sdig mang du 'byung / / bdag la brten nas de dag ni/ /yun ring sdug bsngal dmyal bar 'dong / /bdag ni de la gnod byed la/ /de dag bdag la phan 'dogs na/ /phyin ci log tu ci yi phyir/ /ma rungs sems khyod khro bar byed/ /gal te bdag la bsam pa yi/ /yon tan yod na dmyal mi 'gro//gal te bdag gis bdag bsrungs na/ /de dag la 'dir ci zhig byung / /'on te lan du gnod byas na/ /de dag bsrungs par ma gyur la/ /bdag gi spyod pa'ang nyams par 'gyur/ /des na dka' thub zhig par 'gyur/ /yid ni lus can ma yin pas//sus kyang gang du'ang gzhom mi nus/ /lus la mngon par zhen pas na/ /lus ni sdug bsngal dag gis gnod/ /brnyas dang tshig rtsub smra ba dang / /mi snyan pa yi tshig de yis/ /lus la gnod par mi 'gyur na/ /sems khyod ci phyir rab tu khro//gzhan dag bdag la mi dga' ba/ /des ni tshe 'di'am tshe gzhan la/ /bdag la za bar mi byed na/ /bdag ni ci phyir de mi 'dod/ /rnyed pa'i bar chad byed pa'i phyir/ /gal te 'di bdag mi 'dod na/ /bdag gi rnyed pa 'dir 'dor gyi/ / sdig pa dag ni brtan par gnas/ /bdag ni deng nyid shi yang bla'i/ /log 'tshos yun ring gson mi rung / /bdag lta yun ring gnas gyur kyang / /'chi ba'i sdug bsngal de nyid yin/ /rmi lam lo brgyar bde myong nas/ /sad par gyur pa gang yin dang / / gzhan zhig yud tsam bde myong nas/ /sad par gyur pa gang yin pa/ /sad pa de dag gnyi ga la'ang / /bde ba de ni phyir 'ong med/ /tshe ring tshe thung gnyi ga yang / /'chi ba'i dus su de 'drar zad/ /rnyed pa mang po thob gyur te/ /yun ring dus su bde spyad kyang //chom pos phrogs pa ji bzhin du/ /sgren mo lag pa stong par 'gro/ /gal te rnyed pas gson gyur na/ /sdig zad bsod nams bya zhe na/ /rnyed pa'i don du khros gyur na/ /bsod nams zad sdig mi 'gyur ram/ /gang gi don du bdag gson pa//de nyid gal te nyams gyur na/ /sdig pa 'ba' zhig byed pa yi/ /gson pa des ko ci zhig bya/ /gal te sems can nyams byed pas/ /mi snyan smra la khro zhe na/ /gzhan la mi snyan brjod la'ang khyod/ /de bzhin ci ste khro mi byed/ / ma dad gzhan la rag las pas/ /dad pa med la khyod bzod na/ /nyon mongs skye la rag las pas / /mi snyan smra la cis mi bzod/ /sku gzugs mchod rten dam chos la/ /'khyal zhing 'jig par byed pa la'ang / /bdag gis zhe sdang mi rigs te/ / sangs rgyas sogs la gnod mi mnga'/ /bla ma gnyen la sogs pa dang / /bshes la gnod pa byed rnams la'ang / /snga ma'i tshul gyis rkyen dag las/ /'gyur bar mthong nas khro ba bzlog /lus can rnams la sems yod dang / /sems med gnyi gas gnod byas na//sems yod ci ste bkar te bkon/ /de bas gnod pa bzod par gyis/ /la la rmongs pas nyes pa byed/ /la la rmongs te khros gyur na/ /de la skyon med gang gis bya/ /skyon dang bcas te gang zhig yin/ /gang gis gzhan dag gnod byed pa'i/ / las de sngon chad ci phyir byas/ /thams cad las la rag las na/ /bdag gis 'di la ci ste bkon/ /de ltar mthong nas ci nas kyang / /thams cad phan tshun byams sems su/ /'gyur ba de ltar bdag gis ni/ /bsod nams dag la bsgrims te bya/ /dper na khyim tshig gyur pa'i me//khyim gzhan zhig tu song nas ni/ /rtswa sogs gang la mched byed pa/ /de ni phyung ste dor ba yin/ /de bzhin gang la sems chags na / /zhe sdang me ni mched gyur pa/ /bsod nams tshig par dogs pa yis/ /de ni de yi mod la dor//gsad bya'i mi zhig lag bcad de/ /gal te thar na cis ma legs/ /gal te mi yi sdug bsngal gyis/ /dmyal ba bral na cis ma legs/ /da lta'i sdug bsngal 'di tsam la'ang / /bdag gis bzod par mi nus na/ /des na dmyal ba'i sdug bsngal rgyu//khro ba ci ste bzlog mi byed/ /'dod pa'i don du sreg la sogs/ /dmyal bar stong phrag myong gyur yang / /bdag gis rang gi don dang ni/ /gzhan gyi don yang ma byas so/ /'di ni de tsam gnod min la/ /don chen dag kyang 'grub 'gyur bas/ /'gro ba'i gnod sel sdug bsngal la//dga' ba 'ba' zhig 'dir bya rigs/ /gzhan gyis yon tan ldan bstod nas/ /gal te dga' ba'i bde thob na/ /yid khyod kyang ni de bstod nas/ /ci phyir de ltar dga' mi byed/ /khyod kyi dga' ba'i bde ba 'di/ /bde 'byung kha na ma tho med//yon tan ldan pa rnams kyis gnang / /gzhan sdud pa yi mchog kyang yin/ /gzhan yang de ltar bde 'gyur zhes/ /gal te khyod bde 'di mi 'dod/ /gla rngan sbyin sogs spangs pa'i phyir/ /mthong dang ma mthong nyams par 'gyur/ /rang gi yon tan brjod pa'i tshe//gzhan la bde ba'ang 'dod par byed/ /gzhan gyi yon tan brjod pa'i tshe/ /rang la'ang bde ba mi 'dod byed/ /sems can thams cad bde 'dod pas/ /byang chub tu ni sems bskyed nas/ /sems can rang gis bde rnyed na/ / des ko ci ste khro bar byed/ /'jig rten gsum mchod 'tshang rgya bar/ /sems can rnams ni 'dod ce na/ /bsnyen bkur ngan ngon tsam mthong nas/ /ci phyir de la gdung bar byed/ /gso bya gang zhig khyod gso ba/ /khyod nyid kyis ni sbyin bya de/ /gnyen gyis 'tsho ba rnyed gyur na//dgar mi 'gyur bar slar khro'am/ /de ci 'gro la mi 'dod na/ /de la byang chub 'dod gang yin/ /gang zhig gzhan 'byor khro de la/ /byang chub sems ni ga la yod/ /gal te des de las rnyed dam/ /sbyin bdag khyim na gnas gyur pa/ / kun du de khyod la med na/ /byin ma byin rung des ci bya/ /bsod nams dang ni dad pa'am/ /rang gi yon tan ci phyir 'dor/ /rnyed pa gyur pa mi 'dzin pa / /gang gis khro ba mi byed smros/ /khyod ni rang gis sdig byas la/ /mya ngan med par ma zad kyi//bsod nams byas pa gzhan dag dang / /lhan cig 'gran par byed 'dod dam// //bam po gnyis pa'o / /gal te dgra zhig mi dga' na'ang / /de la khyod dgar ci zhig yod/ /khyod kyi yid smon tsam gyis ni/ /de la gnod pa'i rgyur mi 'gyur//khyod kyi 'dod pas sdug bsngal de/ /grub na'ang khyod dgar ci zhig yod/ /gal te 'tshengs par 'gyur zhe na/ /de las phung ba'ang gzhan ci yod/ /nyon mongs nya pas btab pa yi/ /mchil pa 'di ni mi bzad gze/ /des bzung sems dmyal bum par yang //dmyal ba'i srung mas bdag 'tshed des/ /bstod dang grags pa'i rim gros ni/ /bsod nams mi 'gyur cher mi 'gyur/ /bdag stobs mi 'gyur nad med min/ /lus bde bar yang mi 'gyur ro/ /bdag ni rang don shes gyur na//de la rang don ci zhig yod/ /yid bde 'ba' zhig 'dod na ni/ /rgyan sogs chang yang bsten dgos so/ /grags pa'i don du nor shor cing / /bdag nyid kyang ni gsod byed na/ /tshig 'bru rnams kyis ci zhig bya/ /sha ni des ko su la bde/ / bye ma'i khang bu rdib gyur na/ /byis pa rnams ni ga chad du/ /de bzhin bstod dang grags nyams na/ /rang gi sems ni byis pa bzhin/ /re zhig sgra la sems med phyir/ /bdag la bstod sems yod mi srid/ /bdag la gzhan dga' zhes grags pa/ / de ni dga' ba'i rgyu yin grang / /gzhan nam yang na bdag la'ang rung / /gzhan dga' bdag la ci zhig phan/ /dga' bde de ni de nyid kyi/ /bdag gis de las shas mi 'thob / /de bde ba yi bdag bde na/ /kun la'ang de bzhin bya dgos na/ /ji ltar gzhan la dga' ba yis//bde bar gyur na bdag mi bde/ /de bas bdag ni bstod do zhes/ /rang gi dga' ba skye 'gyur ba/ /de yang de ltar mi 'thad pas / /byis pa'i spyod pa kho nar zad/ /bstod sogs bdag ni g.yeng bar byed/ /des ni skyo ba'ang 'jig par byed//yon tan ldan la phrag dog dang / /phun sum tshogs pa'ang 'jig par byed/ /de phyir bdag gi bstod sogs ni/ /gzhig phyir gang dag nyer gnas pa/ /de dag bdag ni ngan song du/ /ltung ba bsrung phyir zhugs min nam/ /bdag ni grol ba don gnyer la//rnyed dang bkur sti 'ching mi dgos/ /gang dag bdag bcings grol byed pa/ /de la bdag ni ji ltar khro/ /bdag ni sdug bsngal 'jug 'dod la/ /sangs rgyas kyis ni byin brlabs bzhin/ /mi gtong sgo 'phar nyid gyur pa/ / de la bdag ni ji ltar khro/ /'di ni bsod nams gegs byed ces/ /de la'ang khro bar rigs min te/ /bzod mtshungs dka' thub yod min na/ /de la bdag ni mi gnas sam/ /gal te bdag ni rang skyon gyis/ /'di la bzod pa mi byed na/ /bsod nams rgyu ni nyer gnas pa//'di la bdag gegs byed par zad/ /gang zhig gang med mi 'byung la/ /gang zhig yod na yod gyur pa/ /de nyid de yi rgyu yin na/ /ji ltar de la gegs zhes bya/ /dus su phyin pa'i slong mo bas/ /sbyin pa'i gegs byas yod ma yin/ / rab tu 'byin par byed gyur pa/ /rab byung gegs zhes byar mi rung / /'jig rten na ni slong ba mod/ /gnod pa byed pa dkon pa ste/ /'di ltar phar gnod ma byas na / /'ga' yang gnod pa mi byed do/ /de bas ngal bas ma bsgrubs pa'i/ /khyim du gter ni byung ba ltar//byang chub spyod pa'i grogs gyur pas/ /bdag gis dgra la dga' bar bya/ /'di dang bdag gis bsgrubs pas na/ /de phyir bzod pa'i 'bras bu ni / /'di la thog mar bdar 'os te/ /'di ltar de ni bzod pa'i rgyu/ /gal te bzod bsgrub bsam med pas//dgra 'di mchod bya min zhe na/ /grub pa yi ni rgyur rung ba / /dam pa'i chos kyang ci ste mchod/ /gal te dgra 'di gnod bya ba'i / /bsam yod mchod bya min zhe na/ /sman pa bzhin du phan brtson na/ /bdag gi bzod pa ji ltar 'grub//de bas rab tu sdang sems la/ /brten nas bzod pa skye bas na/ /de nyid bzod pa'i rgyu yin pas/ /dam pa'i chos bzhin mchod par 'os/ /de phyir sems can zhing dang ni/ /rgyal ba'i zhing zhes thub pas gsungs/ /'di dag mgu byas mang po zhig /'di ltar phun sum pha rol phyin/ /sems can rnams dang rgyal ba las/ /sangs rgyas chos 'grub 'dra ba la/ /rgyal la gus bya de bzhin du/ /sems can la min ci yi tshul/ /bsam pa'i yon tan rang gis min/ /'bras bu las yin des mtshungs par //sems can rnams la'ang yon tan yod/ /de phyir de dag mnyam pa yin/ /byams sems ldan la mchod pa gang / /de ni sems can che ba nyid/ /sangs rgyas dad pa'i bsod nams gang / /de yang sangs rgyas che ba nyid//sangs rgyas chos 'grub cha yod pa/ /des na de dag mnyam par 'dod/ /yon tan rgya mtsho mtha' yas pa'i/ /sangs rgyas rnams dang 'ga' mi mnyam/ /yon tan mchog tshogs gcig pu yi/ /yon tan shas tsam 'ga' zhig la/ /snang na'ang de la mchod don du//khams gsum phul yang chung bar 'gyur/ /sangs rgyas chos mchog skye ba'i shas/ /sems can rnams la yod pas na/ /'di tsam ngag gis cha bstun nas/ /sems can mchod byar rigs par 'gyur/ /gzhan yang g.yo med gnyen gyur cing //phan pa dpag med mdzad rnams la/ /sems can mgu bya ma gtogs par / /gzhan gang zhig gis lan lon 'gyur/ /gang phyir sku gtong mnar med 'jug pa la/ /de la phan btags lan lon 'gyur bas na/ /de bas 'di dag gnod chen byed na yang //thams cad bzang dgu zhig tu spyad par bya/ /re zhig bdag gi rjer gyur nyid kyang ni/ /gang phyir rang gi sku la'ang mi gzigs pa/ /de la rmongs pa bdag gis ji ltar na/ /nga rgyal bya zhing bran gyi dngos mi bya//gang dag bde bas thub rnams dgyes 'gyur zhing / /gang la gnod na mi dgyes 'byung 'gyur ba/ /de dag dga' bas thub pa kun dgyes shing / /de la gnod byas thub la gnod pa byas/ /ji ltar lus la kun nas me 'bar ba/ /'dod pa kun gyis yid bder mi 'gyur ba//de bzhin sems can gnod pa byas na yang / /thugs rje che rnams dgyes pa'i thabs med do/ /de bas bdag gis 'gro la gnod byas pas/ /thugs rje che kun mi dgyes gyur pa gang / /sdig de de ring so sor bshags bgyi yis//mi dgyes gang lags de thub bzod par gsol/ /de bzhin gshegs rnams dgyes par bgyi slad du/ /deng nas bzung nas 'jig rten bran du mchi/ /'gro mang rdog pas bdag gi spyir 'tshog gam / /'gums kyang mi bsdo 'jig rten mgon dgyes mdzod//'gro ba 'di kun thugs rje'i bdag can des/ /bdag tu mdzad pa 'di la the tshom med/ /sems can ngo bor mthong ba 'di dag nyid/ /mgon de bdag nyid ci phyir gus mi byed/ /'di nyid de bzhin [(]gshags [,]gshegs [)]pa mnyes byed yin/ /rang don yang dag sgrub pa'ang 'di nyid do//'jig rten sdug bsngal sel ba'ang 'di nyid de/ /de ltas bdag gis rtag tu de nyid bya/ /dper na rgyal po'i mi 'ga' zhig /skye bo mang la gnod byed kyang / /skye bo mig rgyang ring po dag /nus kyang phyir gnod mi byed de//'di ltar de gcig ma yin gyi/ /rgyal po'i mthu stobs de yi mthu / /de bzhin gnod byed nyam chung ba/ /'ga' yang khyad du gsad mi bya / /'di ltar dmyal ba'i srung ma dang / /thugs rje ldan rnams de yi dpung / /de ltar dmangs kyis rgyal gtum bzhin//sems can rnams ni mgu bar bya/ /rgyal po lta zhig khros na yang / /sems can mi mgu byas pa yis/ /myong bar 'gyur ba gang yin pa/ /dmyal ba'i gnod pa des byed dam/ /rgyal po lta zhig mgu na yang / / sems can mgu bar byas pa yis/ /'thob par 'gyur ba gang yin pa/ /sangs rgyas nyid sbyin mi srid do/ /sems can mgu las byung ba yi / /ma 'ongs sangs rgyas 'grub lta zhog /tshe 'di nyid la dpal chen dang / /grags dang skyed 'gyur cis ma mthong / / 'khor tshe bzod pas mdzes sogs dang / /nad med pa dang grags pa yis / /shin tu yun ring 'tsho ba dang / /'khor los sgyur ba'i bde rgyas thob / /byang chub sems dpa'i spyod pa la 'jug pa las/ bzod pa bstan pa zhes bya ba ste le'u drug pa'o// // de ltar bzod pas brtson 'grus brtsam/ /'di ltar brtson la byang chub gnas/ /rlung med g.yo ba med pa bzhin/ /bsod nams brtson 'grus med mi 'byung / /brtson gang dge la spro ba'o/ /de yi mi mthun phyogs bshad bya / /le lo ngan la zhen pa dang / / sgyid lug bdag nyid brnyas pa'o/ /snyom las bde ba'i ro myang dang / /gnyid la brten pa'i sred pa yis/ /'khor ba'i sdug bsngal mi skyo las/ /le lo nye bar skye bar 'gyur/ /nyon mongs rgya bas bshor nas ni/ /skye ba'i rgyar ni chud gyur nas/ /'chi bdag khar ni song gyur pa//ci ste da dung mi shes sam/ /rang sde rim gyis gsod pa yang / /khyod kyis mthong bar ma gyur tam/ /'on kyang gnyid la brten pa gang / /gdol pa dang ni ma he bzhin/ /lam ni kun nas bkag nas su/ /'chi bdag gis ni bltas bzhin du//ji ltar khyod ni za dga' zhing / /'di ltar gnyid log ji ltar dga'/ /myur ba nyid du 'chi 'gyur bas/ /ji srid du ni tshogs bsag bya/ /de tshe le lo spangs kyang ni/ /dus ma yin par ci zhig bya/ /'di ni ma byas brtsams pa dang / /'di phyed byas par gnas pa la//glo bur 'chi bdag 'ongs nas ni/ /kyi hud bcom zhes sems par 'gyur/ /mya ngan shugs kyis skrangs pa yi/ /mig dmar gdong la mchi ma 'dzag /nye du re thag chad pa dang / /gshin rje'i pho nya'i bzhin la blta/ / rang sdig dran pas gdung ba dang / /dmyal ba'i sgra ni thos pa yis/ /skrag pas mi gtsang lus gos shing / /myos par 'gyur tshe ci zhig bya/ /khyod ni nya gson 'gre ba lta'i/ /tshe 'dir 'jigs dang ldan gyur na/ /sdig byas dmyal ba mi bzad pa'i/ / sdug bsngal rnams ni smos ci dgos/ /chu tshan gyis ni reg pa na/ /gzhon sha can la rab tsha ba'i/ /dmyal ba yi ni las byas nas/ /ci phyir 'di ltar bde bar gnas/ /brtson med 'bras bu 'dod pa dang / /bze re can la gnod mang zhing / /'chi bas bzung bzhin lha 'dra ba//kyi hud sdug bsngal dag gis bcom/ /mi yi gru la brten nas su/ /sdug bsngal chu bo che las sgrol / /gru 'di phyi nas rnyed dka' bas/ /rmongs pa dus su gnyid ma log /dga' ba'i rgyu ni mtha' yas pa'i/ /dam chos dga' ba'i mchog spangs nas//sdug bsngal rgyu yis g.yeng ba dang / /rgod sogs la khyod ci phyir dga'/ /sgyid lug med dang dpung tshogs dang / /lhur blang bdag nyid dbang bya dang / /bdag dang gzhan du mnyam pa dang / /bdag dang gzhan du brje bar gyis/ / bdag gis byang chub ga la zhes/ /sgyid lug par ni mi bya ste/ /'di ltar de bzhin gshegs pa ni/ /bden pa gsung bas bden 'di gsungs/ /sbrang bu sha sbrang bung ba dang / /de bzhin srin bur gang gyur pa/ /des kyang brtson pa'i stobs bskyed na/ /byang chub thob dka' bla med 'thob //bdag lta rigs kyis mir skyes la/ /phan dang gnod pa'i ngo shes pas/ /byang chub spyod pa ma btang na/ /bdag gis byang chub cis mi 'thob / /'on te rkang lag la sogs pa/ /btang dgos bdag ni 'jigs she na/ / lci dang yang ba ma dpyad par/ /rmongs pas bdag ni 'jigs par zad/ /bskal pa bye ba grangs med du/ /lan grangs du mar bcad pa dang / /dbug dang bsreg dang gshegs 'gyur gyi / /byang chub thob par mi 'gyur ro/ /bdag gis byang chub sgrub pa yi//sdug bsngal 'di ni tshod yod de/ /zug rngu khong brlag gnod bsal phyir/ /lus rma btod pa'i sdug bsngal bzhin/ /sman pa kun kyang gso dpyad kyi / /mi bde ba yis nad med byed/ /de bas sdug bsngal mang po dag /gzhom phyir mi bde chung bzod bya//gso dpyad phal pa 'di 'dra ba/ /sman pa mchog gis ma mdzad de/ /cho ga shin tu 'jam po yis/ /nad chen dpag med gso bar mdzad/ /tshod ma la sogs sbyin pa la'ang / /'dren pas thog mar sbyor bar mdzad/ /de la goms nas phyi nas ni//rim gyis rang gi sha yang gtong / /gang tshe rang gi lus la ni/ /tshod sogs lta bu'i blo skyes pa/ /de tshe sha la sogs gtong ba/ /de la dka' ba ci zhig yod/ /sdig pa spang phyir sdug bsngal med/ /mkhas pa'i phyir na mi dga' med/ 'di ltar log par rtog pa dang / /sdig pas sems dang lus la gnod/ /bsod nams kyis ni lus bde la/ /mkhas pa yis ni sems bde na/ /gzhan don 'khor bar gnas kyang ni/ /snying rje can dag ci ste skyo/ /'di ni byang chub sems stobs kyis/ / sngon gyi sdig pa zad byed cing / /bsod nams rgya mtsho sdud byed phyir/ /nyan thos rnams pas mchog tu bshad/ /de bas skyo ngal kun sel ba'i/ /byang chub sems kyi rta zhon nas/ /bde nas bde bar 'gro ba la/ /sems shes su zhig sgyid lug 'gyur/ /sems can don grub bya phyir dpung //mos brtan dga' dang dor ba yin/ /mos pa sdug bsngal 'jigs pa dang / /de yi phan yon bsam pas bskyed / /de ltar mi mthun phyogs spangs te/ /mos dang nga rgyal dga' dang dor/ /lhur len dbang bsgyur stobs kyis ni//brtson 'grus spel phyir 'bad par bya/ /bdag dang gzhan gyi nyes pa ni/ /dpag med bdag gis gzhom bya ste/ /gang du nyes pa re re la'ang / /bskal pa rgya mtsho zad 'gyur ba/ /nyes zad rtsom pa de yi ni/ /cha yang bdag la ma mthong na/ / sdug bsngal dpag tu med pa'i gnas / /bdag go ci phyir snying ma gas/ /bdag dang gzhan gyi yon tan ni/ /mang po bdag gis bsgrub bya ste/ /de la yon tan re re yang / /bskal pa rgya mtshos goms 'gyur na/ /bdag ni yon tan cha la yang / /goms pa nam yang ma skyes te//ji zhig ltar rnyed skye ba ni / /bdag gis don med byas pa mtshar / /bdag gis bcom ldan ma mchod cing / /dga' ston chen po'i bde ma byin/ /bstan la bya ba ma byas dang / /dbul po'i bsam pa rdzogs ma byas/ /'jigs la mi 'jigs ma byin dang //nyam thag bde ma byin na bdag /ma yi mngal gyi zug rngu dang / /sdug bsngal 'ba' zhig bskyed par zad/ /bdag ni sngon dang da ltar yang / /chos la mos dang bral ba yis/ /phongs pa 'di 'dra byung bar gyur / /su zhig chos la mos pa gtong //dge ba'i phyogs ni thams cad kyi / /rtsa ba mos par thub pas gsungs/ /de yi rtsa ba rtag tu ni/ /rnam smin 'bras bu bsgoms pas so/ /sdug bsngal yid mi bde ba dang / /'jigs pa rnam pa sna tshogs dang / /'dod pa rnams dang bral ba ni//sdig pa spyod las 'byung bar 'gyur/ /yid la bsams pa'i dge byas pas/ /gang dang gang du 'gro 'gyur ba/ /de dang der ni bsod nams des/ /'bras bu'i yon gyis mngon mchod 'gyur/ /sdig pa byed pa bde 'dod kyang / /gang dang gang du 'gro 'gyur ba//de dang der ni sdig pa des/ /sdug bsngal mtshon gyis rnam par 'joms/ /rgya che dri bzang bsil ba'i pad+ma'i snying por gnas/ /rgyal ba'i gsung snyan zas kyis gzi brjid bskyed byas pa/ /thub 'od kyis rgyas pad+ma las byung lus mchog can/ / rgyal ba'i mdun gnas bde gshegs sras su dge bas 'gyur/ /gshin rje'i skyes bus pags pa ma lus bshus pas shin tu nyam thag cing / /rab tu tsha ba'i me yis bzhus pa'i zangs zhun lus la blugs gyur la/ /'bar ba'i ral gri mdung thung gis bsnun sha yi dum bu brgyar lhags shing //shin tu 'bar ba'i lcags kyi sa gzhir lhung ba mi dge mang pos 'gyur/ /de bas dge la mos bya zhing / /gus pa nyid du bsgom par bya/ /rdo rje rgyal mtshan cho ga yis/ /brtsams nas nga rgyal bsgom par bya//dang por 'byor pa brtags nas ni/ /brtsam mam yang na mi brtsam bya/ /ma brtsams pa ni mchog yin gyi/ /brtsams nas ldog par mi bya'o/ /skye ba gzhan du de goms shing / /sdig dang sdug bsngal 'phel bar 'gyur/ /gzhan dang 'bras bu'i dus kyang ni//dman 'gyur de yang sgrub mi 'gyur/ /las dang nyon mongs nus pas te / /gsum po dag la nga rgyal bya/ /bdag nyid gcig pus bya'o zhes/ /'di ni las kyi nga rgyal nyid/ /nyon mongs dbang med 'jig rten 'dis/ /rang don sgrub par mi nus pas//'gro bas bdag ltar mi nus te/ /de bas bdag gis 'di bya'o/ /gzhan dag dman pa'i las byed na/ /bdag nyid kyang ni ji ltar 'dug /nga rgyal gyis ni mi byas te / /bdag la nga rgyal med pa mchog /shi ba'i sbrul dang phrad gyur na/ / khwa yang mkha' lding lta bur spyod/ /gal te bdag nyid nyam chung na/ /ltung ba chung ngu'ang gnod par byed/ /zhum bcas rtsol ba dor ba la/ /phongs las thar ba yod dam ci/ /nga rgyal rtsol ba bskyed pas ni/ /chen po yis kyang thub par dka'/ /de bas sems ni brtan pa yis //ltung ba rnams ni gzhom bya ste/ /bdag ni ltung bas pham byas na / /khams gsum rgyal 'dod bzhad gad 'gyur/ /bdag gis kun las rgyal bya ste/ /bdag las su yang rgyal mi bya/ /rgyal ba seng ge'i sras bdag gis / /nga rgyal 'di la gnas par bya//'gro gang nga rgyal gyis bcom de/ /nyon mongs nga rgyal can ma yin/ /nga rgyal can dgra'i dbang mi 'gro/ /de dag nga rgyal dgra dbang 'gyur / /nyon mongs nga rgyal gyis khengs ni / /ngan 'gror nga rgyal gyis khrid cing / /mi yi dga' ston bcom pa dang //gzhan gyi zas za'i bran dang ni/ /glen pa mi sdug nyam chung dang / /thams cad du ni brnyas par 'gyur/ /nga rgyal gyis khengs dka' thub can/ /de yang nga rgyal can gtogs na/ /dman pa ci 'dra yin pa smros / /gang zhig nga rgyal dgra las rgyal phyir nga rgyal 'chang //de ni nga rgyal can dang rnam rgyal dpa' de nyid/ /gang zhig nga rgyal dgra bdo ba yang nges bcom ste/ /'gro la 'dod bzhin rgyal ba'i 'bras bu rdzogs par byed/ /nyon mongs phyogs kyi khrod gnas na/ /rnam pa stong du sran gzugs te//wa la sogs pas seng ge bzhin/ /nyon mongs tshogs kyis mi tshugs bya/ /nyam nga che thang byung gyur kyang / /mi yis mig ni bsrung ba ltar/ /de bzhin nyam nga byung gyur kyang / /nyon mongs dbang du mi 'gyur bya/ /bdag ni bsregs te bsad gyur tam//bdag gi mgo bo bcad kyang bla/ /rnam pa kun du nyon mongs pa'i/ /dgra la 'dud par mi bya'o/ /de bzhin gnas skabs thams cad du/ /rigs pa las ni gzhan mi spyad/ /rtsed mo'i bde 'bras 'dod pa ltar/ /'di yis bya ba'i las gang yin//las de la ni zhen bya ste/ /las des mi ngoms dga' bar bya/ /bde ba'i don du las byas kyang / /bde 'gyur mi 'gyur gtol med kyi/ /gang gi las nyid bde 'gyur ba/ /de las mi byed ji ltar bde/ /spu gri'i sor chags sbrang rtsi lta'i//'dod pa rnams kyis mi ngoms na/ /rnam smin bde la zhi ba yi/ /bsod nams kyis lta ci ste ngoms/ /de ltas las tshar phyin bya'i phyir/ /nyi ma phyed dus gdungs pa yi/ /glang chen mtsho phrad mtshor 'jug ltar/ /las de la yang 'jug par bya / / stobs nyams pa dang rjes 'brel na/ /slar bya'i don du dor bar bya/ /legs par zin na phyi ma dang / /phyi ma 'dod pas de spang bya/ /'thab rnying dgra dang lhan cig tu/ /g.yul ngor ral kha lhags pa bzhin/ /nyon mongs mtshon las gzur bya zhing //nyon mongs dgra rnams gzhom par bteg /g.yul du ral gri lhung gyur na/ /'jigs pas myur du len pa ltar/ /de bzhin dran pa'i mtshon shor na/ /dmyal ba'i 'jigs dran myur du blang / /ji ltar khrag la brten bcas nas//dug ni lus la khyab 'gyur ba/ /de bzhin glags ni rnyed pa na/ /nyes pas sems la khyab par 'gyur/ /yungs mar bkang ba'i snod bkur la/ /ral gri thogs pas drung bsdad de / /bo na gsod bsdigs 'jigs pa ltar/ /brtul zhugs can gyis de bzhin sgrim //de bas pang du sbrul 'ongs na/ /ji ltar rings par ldang ba ltar/ /de bzhin gnyid dang snyom 'ongs na/ /myur du de dag bzlog par bya/ /nyes pa byung ba re re zhing / /bdag la smad nas ci nas kyang / /bdag la phyis 'di mi 'byung ba// de ltar bya zhes yun ring bsam/ /ji ltar gnas skabs 'di dag la/ /dran pa goms pa nyid 'gyur zhes/ /rgyu 'di yis ni phrad pa'am/ /rigs pa'i las ni 'dod par bya/ /ci nas las byed sngon rol nas/ /thams cad la ni mthu yod pa/ /de ltar bag yod gtam dran te//bdag nyid ldang ba yang bar bya/ /ji ltar rlung ni 'gro ba dang / /'ong bas shing bal dbang bsgyur ba/ /de bzhin spro bas dbang bsgyur te/ /de ltar na ni 'grub par 'gyur/ /byang chub sems dpa'i spyod pa la 'jug pa las/ brtson 'grus bstan pa zhes bya ba ste le'u bdun pa'o// //de ltar brtson 'grus bskyed nas ni/ /yid ni ting nge 'dzin la bzhag /sems ni rnam par g.yengs pa'i mi/ /nyon mongs mchi ba'i phrag na gnas/ /lus dang sems ni dben pa yis/ /rnam par g.yeng ba mi 'byung ngo //de bas 'jig rten spang bya zhing / /rnam par rtog pa yongs su dor/ /chags pa'i phyir dang rnyed sogs la/ /sred pas 'jig rten mi spong ste / /de bas 'di dag yongs spongs la/ /mkhas pas 'di ltar dpyad par bya/ /zhi gnas rab tu ldan pa'i lhag mthong gis //nyon mongs rnam par 'joms par shes byas nas/ /thog mar zhi gnas btsal bya de yang ni/ /'jig rten chags pa med la mngon dgas 'grub/ /mi rtag su zhig mi rtag la/ /yang dag chags par byed pa yod//des ni tshe rabs stong phrag tu/ /sdug pa mthong bar yong mi 'gyur/ /ma mthong na ni dgar mi 'gyur/ /yid kyang mnyam 'jog mi 'gyur la/ /mthong yang ngoms par mi 'gyur bas/ /sngar bzhin sred pas gdung bar 'gyur/ /sems can rnams la chags byas na//yang dag nyid la kun nas sgrib/ /skyo ba'i sems kyang 'jig par byed/ /tha mar mya ngan gdung bar 'gyur/ /de la sems pa 'ba' zhig gis / /tshe 'di don med 'da' bar 'gyur/ /rtag pa med pa'i mdza' bshes kyis/ /g.yung drung chos kyang 'jig par 'gyur//byis dang skal ba mnyam spyod na/ /nges par ngan 'gror 'gro 'gyur te/ /skal mi mnyam par khrid byed na/ /byis pa bsten pas ci zhig bya/ /skad cig gcig gis mdza' 'gyur la/ /yud tsam gyis ni dgrar yang 'gyur/ /dga' ba'i gnas la khro byed pas//so so'i skye bo mgu bar dka'/ /phan par smras na khro bar byed/ /bdag kyang phan las bzlog par byed/ /de dag ngag ni ma mnyan na/ /khro bas ngan 'gror 'gro bar 'gyur/ /mtho la phrag dog mnyam dang 'gran/ /dma' la nga rgyal bstod na dregs//mi snyan brjod na khong khro skye / /nam zhig byis las phan pa thob/ byis dang 'grogs na byis pa la/ /bdag bstod gzhan la smod pa dang / /'khor bar dga' ba'i gtam la sogs/ /mi dge cis kyang nges par 'byung / /de ltar bdag dang gzhan bsten pa//des ni phung bar 'gyur bar zad/ /des kyang bdag don ma byas la/ /bdag kyang de don mi 'gyur bas/ /byis las thag ring byol bar bya/ /phrad na dga' bas mgu byas te/ /'dris chen nyid du mi 'gyur bar / /tha mal pa tsam legs par bya//bung bas me tog sbrang rtsi bzhin/ /chos kyi don tsam blangs nas ni/ /kun las sngon chad ma mthong bzhin/ /'dris pa med par gnas par bya/ /bdag ni rnyed mang bkur sti bcas/ /bdag la mang po dga' 'o zhes/ /de 'dra'i snyems pa 'chang gyur na//shi ba'i 'og tu 'jigs pa skye/ /de bas rnam par rmongs pa'i yid/ /gang dang gang la chags gyur pa/ /de dang de bsdongs stong 'gyur du/ /sdug bsngal nyid du gyur cing ldang / /de bas mkhas pas chags mi bya/ /chags pa las ni 'jigs pa skye//'di dag rang bzhin 'dor 'gyur bas/ /brtan par gyis te rab tu rtogs/ /rnyed pa dag ni mang byung zhing / /grags dang snyan pa byung gyur kyang / /rnyed dang grags pa'i tshogs bcas te/ /gang du 'dong ba'i gtol med do/ /bdag la smod pa gzhan yod na//bstod pas bdag dgar ci zhig yod/ /bdag la bstod pa gzhan yod na/ /smad pas mi dgar ci zhig yod/ /sems can mos pa sna tshogs pa/ /rgyal bas kyang ni mi mgu na/ /bdag 'dra ngan pas smos ci dgos/ /de bas 'jig rten bsam pa btang //sems can rnyed pa med la smod/ /rnyed pa can la mi snyan brjod/ /rang bzhin 'grogs dka' de dag gis/ /dga' ba ji ltar skye bar 'gyur/ /gang phyir byis pa rang don ni/ /med par dga' ba mi 'byung bas/ /byis pa 'ga' yang bshes min zhes //de bzhin gshegs pa rnams kyis gsungs/ /nags na ri dgas bya rnams dang / /shing rnams mi snyan rjod mi byed/ /'grogs na bde ba de dag dang / /nam zhig lhan cig bdag gnas 'gyur/ /phug gam lha khang steng pa'am/ /ljon shing drung du gnas bcas te//nam zhig rgyab tu mi lta zhing / /chags pa med par 'gyur zhig gu/ /sa phyogs bdag gir bzung med pa/ /rang bzhin gyis ni yangs rnams su/ /rang dbang spyod cing chags med par/ /nam zhig bdag ni gnas par 'gyur//lhung bzed la sogs nyi tshe dang / /kun la mi mkho'i gos 'chang zhing / /lus 'di sba ba ma byas kyang / /'jigs med gnas pa nam zhig 'gyur/ /dur khrod song nas gzhan dag gi/ /rus gong dag dang bdag gi lus/ /'jig pa'i chos can dag tu ni//nam zhig mgo snyoms byed par 'gyur/ /bdag gi lus ni 'di nyid kyang / /gang gi dri yis wa dag kyang / /drung du nyer 'gro mi 'gyur ba/ /de lta bur ni 'gyur bar 'ong / /lus 'di gcig pu byung ba yang / /lhan cig skyes pa'i sha rus dag /zhig ste so sor 'gyes 'gyur na/ /mdza' ba gzhan dag ci zhig smos/ /skye na gcig pu skye 'gyur zhing / /'chi na'ang de nyid gcig 'chi ste/ /sdug bsngal skal gzhan mi len na/ /gegs byed mdza' bas ci zhig bya/ /lam dag tu ni zhugs pa rnams//ji ltar gnas ni 'dzin byed ltar/ /de bzhin srid pa'i lam zhugs pa'ang / /skye ba'i gnas ni yongs su 'dzin/ /'jig rten kun nas gdung bzhin du/ /ji srid skyes bu bzhi yis ni/ /de las de ni ma bteg pa/ /de srid du ni nags su song / / bshes med 'khon pa'ang med byas nas/ /lus 'di gcig pu dben gnas te/ /snga nas shi dang 'drar brtsis nas/ /shi na'ang mya ngan byed pa med/ /drung na 'khod pa su dag kyang / /mya ngan gnod pa byed med pas/ /'di yis sangs rgyas rjes dran sogs/ / sus kyang g.yengs par 'gyur ba med/ /de bas shin tu mdangs dga' ba'i/ /nags tshal tshegs chung bde skyid cing / /g.yeng ba thams cad zhi byed par/ /bdag nyid gcig pu gnas par bya / /bsam pa gzhan ni kun btang ste/ /bdag la sems pa gcig pu yis//sems ni mnyam par gzhag phyir dang / /dul bar bya phyir brtson te bya/ /'jig rten 'di dang pha rol du'ang / /'dod pa rnams ni phung khrol bskyed/ /'dir ni bsad dang bcing dang gcod/ /pha rol du ni dmyal sogs sgrub //pho nya pho nya mo yis sngon/ /gang phyir du mar gsol btab cing / /sdig pa rnams sam grags min la'ang / /gang gi don du ma 'dzems par/ /'jigs pa la yang bdag zhugs shing / /rdzas kyang zad par byas gyur te/ /gang la yongs su 'khyud pas na//mchog tu dga' 'gyur de dag nyid/ /keng rus nyid yin gzhan min na/ /rang dbang dang ni bdag min la/ /rab tu 'dod cing yongs zhen nas/ /ci phyir mya ngan 'das mi 'gro/ /gang zhig dang po 'bad de bteg /drangs kyang ngo tshas 'og tu lta//sngon ni mthong ngam ma mthong yang / /gos kyis gdong ni g.yogs par gyur/ /khyod nyon mongs pa'i gdong de ni/ /da lta mngon sum gyur pa bzhin/ /bya rgod kyis bsal byas mthong nas / /da lta ci phyir 'byer bar byed/ /gzhan rnams mig gis blta na yang //gang zhig yongs su bsrung gyur pa/ /ji srid de ni des za na/ /ser sna can khyod cis mi bsrung / /sha yi phung po 'di mthong nas/ /bya rgod dang gzhan za byed na/ /gzhan gyi zas la me tog gi /phreng ba tsan+dan rgyan gyis mchod/ /rus gong nyid du mthong nas ni//mi 'gul yang ni khyod skrag na/ /ro langs bzhin du 'ga' yis kyang / /bskyod par gyur na cis mi 'jigs/ /gang la g.yogs kyang 'di chags pa/ /de ma g.yogs na cis mi 'dod/ /de la dgos pa med na ni/ /g.yogs pa la ni ci phyir 'khyud//zas ni gcig pu nyid las ni/ /bshang dang kha chu byung gyur na/ /de las bshang la mi dga' zhing / /kha chu la khyod ci phyir dga'/ /shing bal reg na 'jam pa yi/ /sngas la dga' bar mi byed par/ /dri nga 'dzag pa ma yin zhes/ /'dod ldan mi gtsang ba la rmongs//'dod ldan ngan pa rmongs pa rnams/ /shing bal reg na 'jam pa la'ang / /nyal po bya bar mi nus zhes/ /de la khro ba dag tu byed/ /gal te mi gtsang chags med na/ /rus gzeb rgyus pas sbrel ba la/ /sha yi 'dam gyis zhal zhal byas/ / gzhan khyod ci phyir pang du 'khyud/ /khyod nyid mi gtsang mang yod pa/ /de nyid la khyod gtan spyod cing / /mi gtsang rkyal pa gzhan dag la'ang / /mi gtsang brkam pas 'dod par byed/ /bdag ni sha 'di la dga' zhes/ /reg dang blta bar 'dod na ko / /sems med pa yi rang bzhin gyi//sha ni khyod ko ji ltar 'dod/ /'dod pa'i sems gang yin pa de/ /reg dang blta bar mi nus la/ /gang zhig nus de shes pa min/ /don med 'khyud des ci zhig bya/ /mi gtsang rang bzhin gzhan gyi lus/ /mi rtogs ngo mtshar mi che yi//rang nyid mi gtsang nyid yin par/ /rtogs par mi 'gyur ngo mtshar che/ /sprin bral nyi zer gyis phye ba'i / /pad+ma gzhon nu spangs nas ni/ /mi gtsang zhen pa'i sems kyis ni/ /mi gtsang gzeb la ci phyir dga'/ /sa phyogs mi gtsang gis gos pa/ / gal te reg par mi 'dod na/ /gang las de ni byung ba yi/ /lus la ji ltar khyod reg 'dod/ /gal te mi gtsang chags med na/ /mi gtsang zhing las byung gyur cing / /de yi sa bon des bskyed pa/ /gzhan khyod ci phyir pang du 'khyud/ /mi gtsang las byung mi gtsang srin//chung ngu'ang khyod 'dod mi byed la / /mi gtsang mang gi rang bzhin lus/ /mi gtsang skyes pa'ang 'dod par byed/ /khyod ni rang nyid mi gtsang la/ /smod mi byed par ma zad kyi/ /mi gtsang rkyal pa mi gtsang la/ /brkam pas gzhan yang 'dod par byed/ / ga pur la sogs yid 'ong dang / /'bras chan dag gam tshod ma'ang rung / /khar bcug phyir phyung bor ba yis / /sa yang mi gtsang btsog par 'gyur/ /gal te mi gtsang 'di 'dra ba/ /mngon sum gyur kyang the tshom na/ /dur khrod dag tu bor ba'i lus/ /mi gtsang gzhan yang blta bar gyis//gang las pags pa'i kha phye na/ /'jigs pa chen po skye 'gyur bar/ /shes kyang ji ltar de nyid la/ /phyir zhing dga' ba skye bar 'gyur/ /lus la bskus pa'i dri de yang / /tsan+dan sogs yin gzhan ma yin//gzhan gyi dri des gzhan dag la/ /ci yi phyir na chags par byed/ /gal te rang bzhin dri nga bas / /'di la ma chags legs min nam/ /'jig rten don med sreg pa dag /ji ste de la dri zhim skud/ /'on te dri zhim tsan+dan ni/ /lus la 'dir ni ci zhig byung //gzhan gyi dri yis gzhan dag la/ /ci yi phyir na chags par byed/ /gal te skra sen ring ba dang / /so skya drir bcas 'dam gyi dris/ /bsgos pas lus kyi rang bzhin ni/ /gcer bu 'jigs pa nyid yin na/ / rang la gnod pa'i mtshon bzhin du / / de 'bad ci phyir byi dor byed/ /bdag la rmongs pa'i 'bad pa yis/ /smyos pas sa 'di kun tu 'khrugs / /rus gong 'ba' zhig mthong nas ni/ /dur khrod du ni yid 'byung na/ /g.yo ba'i rus gong gis khyab pa'i/ /grong gi dur khrod la dga' 'am/ /de ltar mi gtsang gyur pa de//rin med par ni mi rnyed do/ /de don bsgrubs pas sha thang dang / /dmyal la sogs pa'i gnod par 'gyur/ /byis pa nor spel mi nus pas/ /dar la bab na 'di ci bde/ /nor sogs pa yis tshe gtugs na / /rgas nas 'dod pas ci zhig bya//'dod ldan ngan pa kha cig ni/ /nyin rangs las kyis yongs dub ste/ /khyim du 'ongs nas chad pa'i lus/ /ro dang 'dra bar nyal bar byed/ /kha cig byes bgrod nyon mongs dang / /ring du song ba'i sdug bsngal can/ /bu smad 'dod bzhin bu smad rnams/ / khyud khor los kyang mthong mi 'gyur/ /bdag la phan 'dod rnam rmongs pas/ /gang don nyid du btsong ba yang / /de ma thob par don med pa'i/ /gzhan gyi las kyi rlung gis bdas/ /la la rang gi lus btsong zhing / /dbang med gzhan gyis bkol gyur te/ /chung ma dag kyang bu byung na//shing drung dgon par bab bab 'byung / /'dod pas bslus pa'i glen pa dag /'tsho 'dod 'tsho bar bya'o zhes/ /srog stor dogs bzhin g.yul du 'jug /khe phyir bran du 'gro bar byed/ /'dod ldan la la lus kyang bcad/ /kha cig gsal shing rtse la btsugs//kha cig mdung thung dag gis bsnun/ /kha cig bsregs pa dag kyang snang / /bsags dang bsrung dang brlag pa'i gdung ba yis/ /nor ni phung khrol mtha' yas shes par bya/ /nor la chags pas g.yengs par gyur pa rnams/ / srid pa'i sdug bsngal las grol skabs med do/ /'dod ldan rnams la de la sogs/ /nyes dmigs mang la mnog chung ste/ /shing rta 'dren pa'i phyugs dag gis / /rtswa ni kham 'ga' zos pa bzhin/ /phyugs kyis bsgrubs na'ang mi dkon pa'i/ / mnog chung gang yin de don du/ /dal 'byor phun sum rnyed dka' 'di/ /las kyis mnar ba rnams kyis bcom/ /'dod pa nges par 'jig 'gyur zhing / /dmyal la sogs par ltung byed pa/ /chen po min phyir dus kun du/ /dub pa'i tshegs byung gang yin pa/ / de yi bye ba'i cha tsam gyi/ /tshegs kyis sangs rgyas nyid 'grub na/ /'dod ldan byang chub spyod pa bas/ /sdug bsngal che la byang chub med/ /dmyal sogs sdug bsngal bsam byas na/ /'dod pa rnams la mtshon dang ni/ /dug dang me dang g.yang sa dang / /dgra rnams kyis kyang dper mi phod//de ltar 'dod la skyo byas te/ /dben pa la ni dga' ba bskyed/ /rtsod dang nyon mongs kyis stong pa/ /zhi ba'i nags kyi nang dag tu/ /skal ldan zla 'od tsan+dan gyis bsil ba'i/ /yangs pa'i rdo leb khang bzangs nyams dga' bar/ / sgra med zhi ba'i nags rlung g.yo ba yis/ /gzhan la phan don sems shing 'chag par byed/ /khang stong shing drung phug dag tu/ /gang du ji srid 'dod gnas shing / /yongs 'dzin bsrung ba'i sdug bsngal spangs/ /ltos pa med par bag yangs spyod/ /rang dbang spyod cing chags med la//gang dang yang ni 'brel med pa / /chog shes bde spyod gang yin pa/ /dbang pos kyang ni de rnyed dka'/ /de la sogs pa'i rnam pa yis/ /dben pa'i yon tan bsam byas nas/ /rnam rtog nye bar zhi ba dang / /byang chub sems ni bsgom par bya//bdag dang gzhan du mnyam pa ni/ /dang po nyid du 'bad de bsgom/ /bde dang sdug bsngal mnyam pas na/ /thams cad bdag bzhin bsrung bar bya/ /lag pa la sogs dbye ba rnam mang yang / /yongs su bsrung bya'i lus su gcig pa ltar/ / de bzhin 'gro ba tha dad bde sdug dag /thams cad bdag bzhin bde ba 'dod mnyam gcig /gal te bdag gi sdug bsngal gyis/ /gzhan gyi lus la mi gnod pa/ /de lta'ang de bdag sdug bsngal de/ /bdag tu zhen pas mi bzod nyid/ / de bzhin gzhan gyi sdug bsngal dag /bdag la 'bab par mi 'gyur yang / /de lta'ang de bdag sdug bsngal de / /bdag tu zhen pas bzod par dka'/ /bdag gis gzhan gyi sdug bsngal bsal/ /sdug bsngal yin phyir bdag sdug bzhin/ /bdag gis gzhan la phan par bya//sems can yin phyir bdag lus bzhin/ /gang tshe bdag dang gzhan gnyi ga /bde ba 'dod du mtshungs pa la/ /bdag dang khyad par ci yod na/ /gang phyir bdag gcig bde bar brtson/ /gang tshe bdag dang gzhan gnyi ga /sdug bsngal mi 'dod mtshungs pa la//bdag dang khyad par ci yod na/ /gang phyir gzhan min bdag srung byed/ /gal te de la sdug bsngal bas/ /bdag la mi gnod phyir mi bsrung / /ma 'ongs pa yi sdug bsngal yang / /gnod mi byed na de ci bsrung / /bdag gis de ni myong snyam pa'i//rnam par rtog de log pa ste/ /'di ltar shi ba'ang gzhan nyid la/ /skye ba yang ni gzhan nyid yin/ /gang tshe gang gi sdug bsngal gang / /de ni de nyid kyis bsrungs na/ /rkang pa'i sdug bsngal lag pas min/ /ci phyir des ni de bsrung bya/ /gal te rigs pa min yang 'dir//bdag tu 'dzin pas 'jug ce na/ /bdag gzhan mi rigs gang yin te/ /ci nus par ni spang bya nyid/ /rgyud dang tshogs zhes bya ba ni/ /phreng ba dmag la sogs bzhin brdzun/ /sdug bsngal can gang de med pa/ /des 'di su zhig spang bar 'gyur//sdug bsngal bdag po med par ni/ /thams cad bye brag med pa nyid/ /sdug bsngal yin phyir de bsal bya/ /nges pas der ni ci zhig bya/ /ci phyir kun gyi sdug bsngal ni/ /bzlog par bya zhes brtsad du med/ /gal te bzlog na'ang thams cad bzlog /de min bdag kyang sems can bzhin/ /snying rje sdug bsngal mang gyur pa / /ci phyir nan gyis skyed ce na/ /'gro ba'i sdug bsngal bsam byas na/ /ji ltar snying rje sdug bsngal mang / /gal te sdug bsngal gcig gis ni/ /sdug bsngal mang po med 'gyur na//brtse dang ldan pas sdug bsngal de/ /rang dang gzhan la bskyed bya nyid/ /des na me tog zla mdzes kyis/ /rgyal po'i gnod pa shes kyang ni/ /bdag gi sdug bsngal ma bsal te/ /mang po'i sdug bsngal zad 'gyur phyir/ /de ltar rgyud ni goms gyur pa//gzhan gyi sdug bsngal zhi dga' bas/ /pad+ma'i mtsho ru ngang pa ltar/ /mnar med pa yang 'jug par 'gyur/ /sems can rnam par grol ba na/ /dga' ba'i rgya mtsho gang yin pa/ /de nyid kyis ni chog min nam/ /thar pa 'dod pas ci zhig bya/ /de ltas gzhan gyi don byas kyang //rlom sems dang ni ngo mtshar med/ /gcig tu gzhan don la dga' bas/ /rnam smin 'bras bu'i re ba med/ /de bas ji ltar chung ngu na/ /mi snyan las kyang bdag bsrung ba/ /de bzhin gzhan la bsrung sems dang / /snying rje'i sems ni de ltar bya//goms pa yis ni gzhan dag gi / /khu ba khrag gi thigs pa la/ /dngos po med par gyur kyang ni/ /bdag go zhes ni shes pa ltar/ /de bzhin gzhan gyi lus la yang / /bdag ces ci yi phyir mi gzung / /bdag gi lus ni gzhan dag tu'ang / / bzhag pa de ltar dka' ba med/ /bdag nyid skyon bcas gzhan la yang / /yon tan rgya mtshor shes byas nas/ /bdag 'dzin yongs su dor ba dang / /gzhan blang ba ni bsgom par bya/ /ji ltar lag pa la sogs pa/ /lus kyi yan lag yin 'dod ltar//de bzhin 'gro ba'i yan lag tu/ /ci phyir lus can rnams mi 'dod/ /ji ltar bdag med lus 'di la/ /goms pas bdag gi blo byung ba/ /de bzhin sems can gzhan la yang / /goms pas bdag blo cis mi skye / /de lta na ni gzhan gyi don/ / byas kyang ngo mtshar rlom mi 'byung / /bdag nyid kyis ni zas zos nas/ /lan la re ba mi 'byung bzhin/ /de bas ji ltar chung ngu na/ /mi snyan las kyang bdag bsrung ba/ /de bzhin [(]'gre [,]'gro [)]la bsrung sems dang / /snying rje'i sems ni goms par bya/ /de bas mgon po spyan ras gzigs//thugs rje chen pos 'gro ba yi / /'khor gyi 'jigs pa bsal ba'i phyir/ /rang gi mtshan yang byin gyis brlabs/ /dka' las phyir ldog mi bya ste/ /'di ltar goms pa'i mthu yis ni/ /gang gi ming thos 'jigs pa yang / /de nyid med na mi dgar 'gyur//gang zhig bdag dang gzhan rnams ni/ /myur du bskyab par 'dod pa des/ /bdag dang gzhan du brje bya ba / /gsang ba'i dam pa spyad par bya/ /bdag lus gang la chags pa yis / /'jigs gnas chung la 'jigs skye ba/ /'jigs pa skye ba'i lus de la//su zhig dgra bzhin sdang mi byed/ /lus gang bkres dang skom sogs nad/ /gso ba'i cho ga byed 'dod pas/ /bya dang nya dang ri dgas dag /gsod par byed cing lam sgugs byed/ /gang zhig khe dang rim gro'i phyir/ /pha dang ma yang gsod byed cing / / dkon mchog gsum gyi dkor brkus nas/ /des ni mnar med bsreg 'gyur na/ /mkhas pa su zhig lus de la/ /'dod cing bsrung dang mchod byed kyi/ /'di la su zhig dgra bzhin du/ /blta bar mi byed brnyas mi byed/ /gal te byin na ci spyad ces/ /bdag don sems pa 'dre yi tshul//gal te spyad na ci sbyin ces / /gzhan don sems pa lha yi chos/ /bdag phyir gzhan la gnod byas na/ /dmyal la sogs par gdungs par 'gyur/ /gzhan phyir bdag la gnod byas na/ /phun sum tshogs pa thams cad 'thob/ / bdag nyid mtho bar 'dod pa des/ /ngan 'gro ngan dang glen par 'gyur/ /de nyid gzhan la spo byas na/ /bde 'gro rim gro 'thob par 'gyur/ /bdag gi don du gzhan bkol na/ /bran la sogs pa myong bar 'gyur/ /gzhan gyi don du bdag spyad na/ /rje dpon nyid sogs myong bar 'gyur//'jig rten bde ba ji snyed pa/ /de kun gzhan bde 'dod las byung / /'jig rten sdug bsngal ji snyed pa/ /de kun rang bde 'dod las byung / /mang du bshad lta ci zhig dgos/ /byis pa rang gi don byed dang / /thub pa gzhan gyi don mdzad pa//'di gnyis kyi ni khyad par ltos/ /bdag bde gzhan gyi sdug bsngal dag /yang dag brje ba ma byas na/ /sangs rgyas nyid du mi 'grub cing / /'khor ba na yang bde ba med/ /'jig rten pha rol phar zhog gi /bran g.yog las mi byed pa dang / /rje dpon rngan pa mi ster ba'i//tshe 'di'i don yang 'grub mi 'gyur/ /mthong dang ma mthong bde 'grub pa'i/ /phun sum bde skyid yongs bor zhing / /gzhan la sdug bsngal byas pa'i rgyus / /rmongs pas sdug bsngal mi bzad len/ /'jig rten dag na 'tshe ba gang yod dang //'jigs dang sdug bsngal ji snyed yod gyur pa/ /de kun bdag tu 'dzin pa las byung na/ /'dre chen des ko bdag la ci zhig bya/ /bdag nyid yongs su ma btang na/ /sdug bsngal spang bar mi nus te/ /ji ltar me ni ma btang na/ /sreg pa spong bar mi nus bzhin//de ltar bdag gnod zhi ba dang / /gzhan gyi sdug bsngal zhi bya'i phyir/ /bdag nyid gzhan la gtang bya dang / /gzhan rnams bdag bzhin gzung bar bya/ /bdag ni gzhan gyi dbang gyur ces/ /yid khyod nges par shes gyis la/ /sems can kun don ma gtogs par //da ni khyod kyis gzhan mi bsam/ /gzhan dbang mig la sogs pa yis/ /rang don sgrub par rigs ma yin/ /de don mig la sogs pa yis/ /de la log par bya mi rigs/ /des na sems can gtsor bya ste / / bdag gi lus la ci mthong ba/ /de dang de ni phrogs nas kyang / /gzhan dag la ni phan par spyod/ /dman sogs bdag tu byas pa dang / /gzhan nyid du ni bdag byas nas/ /rnam rtog med pa'i sems kyis su/ /phrag dog 'gran dang nga rgyal bsgom/ /'di ni bkur byas bdag ni min//'di bzhin bdag gis ma rnyed cing / /'di ni bstod byas bdag la smod / /'di bde bdag ni sdug bsngal la/ /bdag ni las rnams byed pa dang / /'di ni bde ba nyid du gnas/ /'di ni 'jig rten la che dang / /bdag dman yon tan med par grag /yon tan med pas ci zhig bya/ /bdag kun yon tan ldan pa nyid/ /gang bas 'di dman de yod cing / /gang bas bdag mchog de yang yod/ /tshul khrims lta ba gud sogs ni/ /nyon mongs stobs kyis bdag dbang min/ /ci nus bdag ni gso dgos te//gnod pa'ang bdag gis dang du blang / /'on te bdag 'di'i gso bya min/ /ci phyir bdag la brnyas pa byed/ /bdag la de yi yon tan gyis/ /ci bya 'di bdag yon tan can/ /ngan 'gro gdug pa'i khar gnas pa/ /'gro la snying rje med par 'di//phyir la yon tan rlom pa yis/ /mkhas pa dag la bdo bar 'dod/ /bdag dang mnyam la bltas nas ni/ /gang gis rang nyid lhag bya'i phyir/ /bdag gi rnyed dang bkur sti ni/ /rtsod pa yis kyang nges par bsgrub/ /ci nas bdag gi yon tan ni/ /'jig rten kun la bsal ba dang //gzhan yang 'di yi yon tan gang / /sus kyang thos par mi 'gyur bya/ /bdag gi skyon yang sba bya zhing / /bdag ni mchod 'gyur 'di la min/ /bdag deng rnyed pa legs rnyed cing / /bdag ni bkur 'gyur 'di la min/ /'di ni ma rungs byas pa la//yun ring bdag ni dga' bas lta / /'gro ba kun gyi bzhad gad dang / /phan tshun smod pa dag tu bya/ /nyon mongs 'di yang bdag dang ni/ /lhan cig tu ni 'gran ces grag /'di dag thos dang shes rab bam/ /gzugs rigs nor gyis mnyam mam ci//de ltar kun la bsgrags pa yi / /bdag gi yon tan thos nas ni/ /spu ldang dga' ba skye gyur pa'i / /bde skyid la ni yongs su spyod/ /ci ste 'di la rnyed yod kyang / /gal te nga yi las byed na/ /'di la 'tsho ba tsam byin nas/ /bdag gi stobs kyis de blang bya//'di ni bde las nyams bya zhing / /bdag gi gnod dang rtag sbyar bya/ /'di yis brgya phrag thams cad du/ /'khor bar bdag la gnod pa byas/ /yid khyod rang don byed 'dod pas/ /bskal pa grangs med 'das gyur kyang / /ngal ba chen po de lta bur//khyod kyis sdug bsngal 'ba' zhig bsgrubs/ /de ltar nges par gzhan dag gi /don la rab tu 'jug gyis dang / /thub pa'i bka' ni mi slu bas/ /de yi yon tan phyis mthong 'gyur/ /gal te khyod kyis snga dus su/ /las 'di byas par gyur na ni/ / sangs rgyas phun sum bde min pa/ /gnas skabs 'di 'drar 'gyur mi srid / /de bas 'di ltar gzhan dag gi /khu ba khrag gi thigs pa la/ /khyod kyis ngar 'dzin byas pa ltar/ /de bzhin gzhan la'ang goms par gyis/ /gzhan gyi rtog chen byas nas ni/ /bdag gi lus la ci snang ba//de dang de nyid phrogs byas nas/ /khyod kyis gzhan la phan pa spyod/ /bdag skyid gzhan ni mi skyid la/ /bdag mtho gzhan ni dma' ba dang / /bdag ni phan byed gzhan min zhes/ /bdag la phrag dog cis mi byed/ /bdag ni bde dang bral gyis te/ / gzhan gyi sdug bsngal bdag la sbyor/ /gang tshe 'di ni ci byed ces/ /bdag gi skyon la brtag par gyis/ /gzhan gyis nyes pa byas pa yang / /rang gi skyon du bsgyur byos la/ /bdag gi nyes pa chung byas kyang / /skye bo mang la rab tu shogs/ /gzhan gyi grags pa lhag brjod pas//rang gi grags pa zil gyis non/ /bdag ni bran gyi tha ma ltar/ /don rnams kun la bkol bar gyis/ /'di ni skyon can rang bzhin te/ /glo bur yon tan chas mi bstod/ /'di yi yon tan ci nas kyang / /'gas kyang mi shes de ltar gyis//mdor na bdag gi don gyi phyir/ /khyod kyis gzhan la gnod byas gang / /gnod de sems can don gyi phyir/ /bdag nyid la ni 'bab par gyis/ /'di ni gnya' drag 'gyur tshul du/ /shed bskyed par ni mi bya ste/ /bag ma gsar pa'i tshul bzhin du/ / ngo tsha 'jigs dang bsdams te bzhag /de bya de ltar gnas bya zhing / /de ltar khyod kyis mi bya ba/ /de ltar 'di ni dbang bya ste / /de las 'das na tshar gcad bya/ /'on te de ltar gdams kyang ni/ /sems khyod de ltar mi byed na/ /khyod la nyes pa kun bsten pas / /khyod nyid tshar gcad bya bar zad//khyod kyis kho bo gar brlag pa'i/ /sngon gyi dus de gzhan yin te/ /ngas mthong nga khyod gang du 'gro/ /khyod kyi dregs pa kun gzhom bya/ /da dung bdag la rang gi don/ /yod snyam sems pa de dor cig /bdag gis gzhan la khyod btsong gis //skyo bar ma sems zho sha phul/ /gal te bag med gyur nas khyod/ /sems can rnams la ma byin na/ /khyod kyis kho bo dmyal ba yi/ /srung ma rnams la byin du nges/ /de ltar khyod kyis re lta zhig /kho bo byin pas yun rings sdug /nga ni khon rnams dran byas te//khyod kyis rang don sems pa gzhom/ /de ste bdag ni dga' 'dod na/ /rang la bdag gis dgar mi bya/ /de ste bdag ni bsrung 'dod na/ /gzhan dag rtag tu bsrung bar bya/ /ji lta ji ltar lus 'di ni / /yongs su skyong bar byed gyur pa / /de lta de ltar shin tu ni//bze re can gyur nyid du ltung / /de ltar lhung ba de yi yang / /'dod pa sa 'di thams cad kyis/ /rdzogs par nus pa yod min na/ /de yi 'dod pa sus byed nus/ /nus med 'dod pa nyon mongs dang / /bsam pa nyams pa'ang skye bar 'gyur/ /gang zhig kun la ltos med pa//de yi phun tshogs zad mi shes/ /de bas lus kyi 'dod pa ni/ /'phel phyir skabs dbye mi bya ste/ /gang zhig yid 'ong mi 'dzin pa/ /de ni dngos po bzang po yin/ /tha mar thal ba'i mthar gtugs shing / /mi g.yo gzhan gyis bskyod bya ba //mi gtsang gzugs ni mi bzad pa/ /'di la ci phyir bdag tu 'dzin/ /gson nam yang na shi yang bla'i/ /bdag la 'khrul 'khor 'dis ci bya/ /bong sogs 'di khyad ci yod na/ /kyi hud nga rgyal sel mi byed/ /lus kyi kha ta byas pa yis/ /don med sdug bsngal nyer bsags nas//rjes su chags dang khong khro ba/ /shing mtshungs 'di la ci zhig bya/ /bdag gis 'di ltar bskyangs pa'am/ /bya rgod sogs kyis zos kyang rung / /chags med zhe sdang yod min na/ /ci ste de la chags par byed/ /gang zhig smod pas khro ba dang //gang zhig bstod pas mgu 'gyur ba/ /gal te de nyid shes med na/ /bdag gis gang gi ngal ba byas/ /gang zhig lus 'di 'dod 'gyur ba / /de dang bdag bshes yin zhe na/ /thams cad rang gi lus 'dod pas/ /de la bdag go cis mi dga'//de bas bdag gis chags med par/ /'gro la phan phyir lus gtang bya/ /des na 'di la nyes mang yang / /las kyi spyad bzhin gzung bar bya/ /de bas byis pa'i spyod pas chog /bdag gis mkhas pa'i rjes bsnyags te/ /bag yod gtam ni dran byas nas/ / gnyid dang rmugs pa bzlog par bya/ /rgyal sras thugs rje che rnams ltar / /rigs pa'i sran ni gzugs bya ste/ /nyin mtshan phyad par ma 'bad na/ /bdag gi sdug bsngal nam mthar phyin/ /de bas sgrib pa bsal ba'i phyir/ /log pa'i lam las sems blan te/ /yang dag dmigs la rtag par yang //bdag gis mnyam par gzhag par bya/ /byang chub sems dpa'i spyod pa la 'jug pa las/ /bsam gtan bstan pa zhes bya ba ste le'u brgyad pa'o// //yan lag 'di dag thams cad ni/ /thub pas shes rab don du gsungs/ de yi phyir na sdug bsngal dag /zhi bar 'dod pas shes rab bskyed/ /kun rdzob dang ni don dam ste/ /'di ni bden pa gnyis su 'dod/ /don dam blo yi spyod yul min/ /blo ni kun rdzob yin par brjod/ /de la 'jig rten rnam gnyis mthong //rnal 'byor pa dang phal pa'o/ /de la 'jig rten phal pa ni/ /rnal 'byor 'jig rten gyis gnod cing / /rnal 'byor pa yang blo khyad kyis/ /gong ma gong ma rnams kyis gnod/ /gnyi ga yang ni 'dod pa'i dpes/ /'bras bu'i don du ma dpyad phyir/ 'jig rten pa yis dngos mthong zhing / /yang dag nyid du'ang rtog byed kyi/ /sgyu ma lta bur min pas 'dir/ /rnal 'byor pa dang 'jig rten rtsod/ /gzugs sogs mngon sum nyid kyang ni/ /grags pas yin gyi tshad mas min/ /de ni mi gtsang la sogs la/ /gtsang sogs grags pa bzhin du brdzun//'jig rten gzhug pa'i don du ni/ /mgon pos dngos bstan de nyid du/ /de dag skad cig ma nyid min/ /kun rdzob tu yang 'gal zhe na/ /rnal 'byor kun rdzob nyes med de/ /'jig rten la ltos de nyid mthong / /gzhan du bud med mi gtsang bar//nges rtog 'jig rten gyis gnod 'gyur/ /sgyu 'dra'i rgyal las bsod nams ni/ /ji ltar dngos yod la ji bzhin/ /gal te sems can sgyu 'dra na/ /shi nas ji ltar skye zhe na/ /ji srid rkyen rnams 'tshogs gyur pa/ /de srid sgyu ma'ang 'byung bar 'gyur/ / rgyun ring tsam gyis ji ltar na/ /sems can bden par yod pa yin/ /sgyu ma'i skyes bu bsad sogs la/ /sems med phyir na sdig med de / /sgyu ma'i sems dang ldan pa la/ /bsod nams dang ni sdig pa 'byung / /sngags sogs rnams la nus med phyir/ /sgyu ma'i sems ni 'byung ba med//sna tshogs rkyen las byung ba yi/ /sgyu ma de yang sna tshogs nyid/ /rkyen gcig gis ni kun nus pa/ /gang na yang ni yod ma yin/ /gal te don dam mya ngan 'das/ /'khor ba kun rdzob de lta na/ /sangs rgyas kyang ni 'khor 'gyur bas/ /byang chub spyod pas ci zhig bya//rkyen rnams rgyun ni ma chad na/ /sgyu ma'ang ldog par mi 'gyur gyi/ /rkyen rnams rgyun ni chad pas na/ /kun rdzob tu yang mi 'byung ngo / /gang tshe 'khrul pa'ang yod min na/ /sgyu ma gang gis dmigs par 'gyur/ /gang tshe khyod la sgyu ma nyid/ /med na'ang de tshe ci zhig dmigs//gal te de nyid du gzhan yod/ /rnam pa de ni sems nyid yin/ /gang tshe sems nyid sgyu ma na/ /de tshe gang zhig gang gis mthong / /'jig rten gyi ni mgon pos kyang / /sems kyis sems mi mthong zhes gsungs/ /ral gri so ni rang la rang / / ji ltar mi gcod de bzhin yid/ /ji ltar mar me rang gi dngos/ /yang dag gsal bar byed bzhin na/ /mar me gsal bar bya min te/ /gang phyir mun gyis bsgribs pa med/ /shel bzhin sngon po sngo nyid la/ /gzhan la ltos pa yod ma yin/ /de bzhin 'ga' zhig gzhan la ni//ltos dang ltos med pa yang mthong / /sngo nyid min la sngon por de/ /bdag gis bdag nyid byas pa med/ /mar me gsal bar byed do zhes/ /shes pas shes te rjod byed na/ /blo ni gsal ba nyid yin zhes/ /gang gis shes nas de skad brjod/ /gang tshe 'gas kyang mthong min na//gsal ba'am ni mi gsal ba/ /mo gsham bu mo'i 'gying bag bzhin/ /de na brjod kyang don med do/ /gal te rang rig yod min na/ /rnam shes dran par ji ltar 'gyur/ /gzhan myong ba na 'brel pa las/ /dran 'gyur byi ba'i dug bzhin no/ / rkyen gzhan dag dang ldan pa ni/ /mthong phyir rang nyid rab gsal na/ /grub pa'i mig sman sbyor ba las/ /bum mthong mig sman nyid 'gyur min/ /ji ltar mthong thos shes pa dag /'dir ni dgag par bya min te/ /'dir ni sdug bsngal rgyur gyur pa/ /bden par rtog pa bzlog bya yin//sems las sgyu ma gzhan min zhing / /gzhan min par yang mi rtag na/ /dngos na ji ltar de gzhan min/ /gzhan min zhe na dngos por med/ /ji ltar sgyu ma bden min yang / /blta bya de bzhin lta byed yid/ /gal te 'khor ba dngos rten can/ /de ni gzhan du mkha' 'drar 'gyur//dngos med dngos la brten pas na/ /byed dang ldan par ji ltar 'gyur/ /khyod kyi sems ni grogs med pa / /gcig pu nyid du 'gyur ba yin/ /gang tshe sems ni gzung bral ba / /de tshe thams cad de bzhin gshegs/ /de lta na yang sems tsam du//brtags la yon tan ci zhig yod/ /sgyu ma lta bur shes na yang / /ji ltar nyon mongs ldog 'gyur te/ /gang tshe sgyu ma'i bud med la/ /de byed nyid kyang chags skye 'gyur/ /de byed pa ni shes bya la/ /nyon mongs bag chags ma spangs pa / /des na de mthong ba na de/ / stong nyid bag chags nyam chung nyid / /stong nyid bag chags goms pas ni/ /dngos po'i bag chags spong 'gyur zhing / /ci yang med ces goms pas ni/ /de yang phyi nas spong bar 'gyur/ /gang tshe gang zhig med do zhes/ /brtag bya'i dngos po mi dmigs pa/ /de tshe dngos med rten bral ba//blo yi mdun na ji ltar gnas/ /gang tshe dngos dang dngos med dag /blo yi mdun na mi gnas pa/ /de tshe rnam pa gzhan med pas/ /dmigs pa med par rab tu zhi/ /yid bzhin nor bu dpag bsam shing / /ji ltar re ba yongs skong ba/ /de bzhin gdul bya smon lam gyi //dbang gis rgyal ba'i skur snang ngo / /dper na nam mkha' lding gi ni/ /mchod sdong bsgrubs nas 'das gyur pa/ /de 'das yun ring lon yang de/ /dug la sogs pa zhi byed bzhin/ /byang chub spyod pa'i rjes mthun pas/ /rgyal ba'i mchod sdong sgrub pa yang //byang chub sems dpa' mya ngan las/ /'das kyang don rnams thams cad mdzad/ /sems med pa la mchod byas pas/ /ji ltar 'bras bur ldan par 'gyur/ /gang phyir bzhugs pa'am mya ngan 'das/ /mtshungs pa nyid du bshad phyir ro/ /kun rdzob bam ni de nyid du'ang //rung ste der 'bras lung las yin/ /dper na bden pa'i sangs rgyas la/ /ji ltar 'bras bur bcas pa bzhin/ /bden pa mthong bas grol 'gyur gyi/ /stong nyid mthong bas ci zhig bya/ /gang phyir lung las lam 'di ni/ /med par byang chub med par gsungs/ /gal te theg chen ma grub na//khyod kyi lung ni ji ltar grub/ /gang phyir gnyis ka la 'di grub/ /dang po khyod la 'di ma grub/ /rkyen gang gis ni der yid ches/ /de ni theg chen la yang mtshungs/ /gzhan gnyis 'dod pas bden na ni / /rig byed sogs kyang bden par 'gyur/ / theg chen rtsod bcas phyir zhe na/ /lung la mu stegs pa rnams dang / /lung gzhan la yang rang gzhan dag /rtsod bcas yin phyir dor byar 'gyur/ /bstan rtsa dge slong nyid yin na/ /dge slong nyid kyang dka' bar gnas/ /sems ni dmigs dang bcas rnams kyi/ /mya ngan 'das pa'ang dka' bar gnas//nyon mongs spangs pas grol na de'i/ /de ma thag tu der 'gyur ro/ /nyon mongs med kyang de dag la/ /las kyi nus pa mthong ba yin/ /re zhig nyer len sred pa ni/ /med ces nges pa nyid ce na/ /sred de nyon mongs can min yang / / kun rmongs bzhin du ci ste med/ /tshor ba'i rkyen gyis sred pa yin/ /tshor ba de dag la yang yod/ /dmigs pa dang ni bcas pa'i sems/ /'ga' zhig la ni gnas par 'gyur/ /stong nyid dang ni bral ba'i sems/ /'gags pa slar yang skye 'gyur te/ /'du shes med pa'i snyoms 'jug bzhin//des na stong nyid bsgom par bya/ /ngag gang mdo sde la 'jug de / /gal te sangs rgyas gsungs 'dod na/ /theg chen phal cher khyed cag gi /mdo dang mtshungs 'dod min nam ci/ /gal te ma gtogs gcig gis ni/ /thams cad skyon dang bcas 'gyur na//mdo mtshungs gcig gis thams cad ni/ /rgyal bas gsungs pa cis ma yin/ /ngag gang 'od srungs chen po la/ /sogs pas gting dpogs ma gyur pa/ /de ni khyod kyis ma rtogs pas/ /gzung bya min par su zhig byed/ /rmongs pas sdug bsngal can don du//chags dang 'jigs mtha' las grol ba / /'khor bar gnas pa grub 'gyur ba/ /'di ni stong nyid 'bras bu yin/ /de ltar stong pa nyid phyogs la/ /sun 'byin pa ni 'thad ma yin/ /des na the tshom mi za bar/ /stong pa nyid ni bsgom par bya/ / nyon mongs shes bya'i sgrib pa yi/ /mun pa'i gnyen po stong pa nyid/ /myur du thams cad mkhyen 'dod pas/ /de ni ji ltar sgom mi byed/ /dngos gang sdug bsngal skyed byed pa/ /de las skrag pa skye 'gyur na/ /stong nyid sdug bsngal zhi byed pa/ / de la 'jigs pa ji ltar skye/ /gal te bdag 'ga' yod na ni/ /ci yang rung las 'jigs 'gyur na/ /bdag nyid 'ga' yang yod min pas/ /'jigs par 'gyur ba su zhig yin/ /so dang skra sen bdag ma yin/ /bdag ni rus pa khrag ma yin/ /snabs min bad kan ma yin te//chu ser dang ni rnag kyang min/ /bdag ni zhag dang rdul min te/ /glo mchin dag kyang bdag ma yin/ /nang khrol gzhan yang bdag min te/ /bdag ni phyi sa gcin ma yin/ /sha dang pags pa bdag min te/ /drod dang rlung yang bdag ma yin/ /bu ga bdag min rnam kun du//rnam shes drug kyang bdag ma yin/ /gal te sgra yi shes rtag na/ /thams cad tshe na sgra 'dzin 'gyur/ /shes bya med na ci zhig rig /gang gis shes pa zhes rjod byed/ /gal te shes med shes yin na/ /shing yang shes par thal bar 'gyur//des na shes bya nyer gnas pa/ /med par shes pa med ces nges/ /de nyid kyis ni gzugs shes na/ /de tshe thos pa'ang ci ste min/ /gal te sgra mi nye phyir na/ /des na de yi shes pa'ang med/ /sgra 'dzin rang bzhin gang yin pa/ /de gzugs 'dzin par ji ltar 'gyur//gcig ni pha dang bu nyid du/ /brtags yin yang dag nyid min te/ /'di ltar snying stobs rdul dang ni/ /mun pa bu min pha yang min/ /de ni sgra 'dzin dang ldan pa'i/ /rang bzhin du ni mthong ma yin/ /gar mkhan lta bur tshul gzhan gyis/ /de nyid mthong na de rtag min//gal te tshul gzhan de nyid na/ /gcig nyid de ni sngon med gcig /gal te tshul gzhan bden min na/ /de yi rang gi rang bzhin smros/ /shes nyid ce na de lta na/ /skyes kun gcig tu thal bar 'gyur/ /sems pa sems med de dag kyang //gcig 'gyur gang phyir yod nyid mtshungs/ /gang tshe bye brag phyin ci log /de tshe 'bra ba'i rten gang yin/ /sems med pa yang bdag min te/ /sems med nyid phyir bum sogs bzhin/ /'on te sems dang ldan pa'i phyir/ /shes na mi shes 'jig par thal//ji ste bdag la 'gyur med na/ /sems pas de la ci zhig byas/ /de ltar shes med bya bral ba/ /nam mkha' bdag tu byas par 'gyur/ /gal te bdag ni yod min na/ /las 'bras 'brel pa rigs min te/ /las byas nas ni zhig pas na//su yi las su 'gyur zhe na/ /bya ba 'bras bzhi tha dad dang / /de bdag byed pa med par yang / /yu bu gnyi ga la grub pas/ /'dir brtsad don med ma yin nam/ /rgyu ldan 'bras bu dang bcas zhes/ /mthong ba 'di ni srid ma yin/ /rgyud gcig la ni brten nas su//byed po spyod po zhes byar bstan/ /'das dang ma 'ongs pa yi sems/ /bdag min de ni med pa'i phyir/ /'on te skyes sems bdag yin na/ /de zhig na yang bdag med do/ /dper na chu shing sdong po dag /cha shas phye na 'ga' med pa//de bzhin rnam par dpyad pa yis/ /btsal na bdag kyang yang dag min/ /gal te sems can yod min na/ /su la snying rje bya zhe na/ /'bras bu'i don du khas blangs pa'i/ /rmongs pas brtags pa gang yin pa'o/ /sems can med 'bras su yi yin//bden te 'on kyang rmongs las 'dod/ /sdug bsngal nye bar zhi don du/ /'bras bu'i rmongs pa bzlog mi bya/ /sdug bsngal rgyu yi nga rgyal ni/ /bdag tu rmongs pas 'phel bar 'gyur/ /de las kyang bzlog med ce na/ /bdag med bsgom pa mchog yin no//lus ni rkang pa byin pa min/ /brla dang rked pa'ang lus ma yin/ /lto dang rgyab kyang lus min te/ /brang dang dpung pa'ang lus ma yin/ /rtsib logs lag pa'ang lus min te/ /mchan khung phrag pa'ang lus ma yin/ /nang khrol rnams kyang de min la//mgo dang mgrin pa'ang lus min na/ /'di la lus ni gang zhig yin/ /gal te lus 'di thams cad la/ /phyogs re yis ni gnas gyur na/ /cha rnams cha la gnas gyur mod/ /de rang nyid ni gang la gnas/ / gal te bdag nyid kun gyi lus/ /lag sogs rnams la gnas na ni/ /lag sogs de dag ji snyed pa/ /de snyed kyi ni lus su 'gyur/ /phyi dang nang na lus med na/ /ji ltar lag sogs la lus yod/ /lag sogs rnams las gzhan med na/ / de ni ji ltar yod pa yin/ /des na lus med la sogs la/ /rmongs pa yis ni lus blor 'gyur/ /dbyibs su bkod pa'i khyad par gyis/ /tho yor la ni mi blo bzhin/ /ji srid rkyen tshogs de srid du/ /lus ni skyes bu ltar snang ba/ /de bzhin ji srid lag sogs la//de yod de srid de lus snang / /de bzhin sor mo'i tshogs yin phyir/ /lag pa'ang gang zhig yin par 'gyur/ /de yang tshigs kyi tshogs yin phyir/ /tshigs kyang rang gi cha phye bas/ /cha yang rdul du phye bas te / /rdul de'ang phyogs cha'i dbye ba yis//phyogs dbye'ang cha shas dang bral phyir/ /mkha' bzhin des na rdul yang med/ /de ltar rmi lam lta bu yi/ /gzugs la dpyod ldan su zhig chags/ /gang tshe de ltar lus med pa/ /de tshe skyes gang bud med gang / /sdug bsngal de nyid du yod na//ci ste rab dga' la mi gnod/ /bden mya ngan gdung sogs la/ /zhim sogs ci ste dga' mi byed/ /stobs dang ldan pas zil mnan phyir/ /gal te de myong ma yin na/ /gang zhig nyams myong bdag nyid min/ /de na tshor ba ji ltar yin//sdug bsngal phra mo nyid du yod/ /'di yi rags pa bsal min nam/ /de ni de las gzhan dga' tsam/ /zhe na phra nyid de yang de'i/ /gal te 'gal rkyen skyes pas na/ /sdug bsngal skyes pa min na ni/ /tshor bar rtog pa mngon zhen nyid/ /yin zhes bya bar grub min nam//de nyid phyir na 'di yi ni/ /gnyen po rnam dpyod 'di bsgom ste/ /rnam brtags zhing las byung ba yi/ /bsam gtan rnal 'byor pa yi zas/ /gal te dbang don par bcas na/ /de dag gang du phrad par 'gyur/ / bar med na yang gcig nyid de/ /gang zhig gang dang phrad par 'gyur/ /rdul phran rdul phran la 'jug med/ /de ni skabs med mnyam pa yin/ /ma zhugs pa la 'dre med cing / /ma 'dres pa la phrad pa med/ /cha med pa la'ang phrad pa zhes/ /bya ba ji ltar 'thad par 'gyur//phrad pa dang ni cha med par / /gal te mthong na bstan par gyis/ /rnam shes lus med pa la ni/ /phrad pa 'thad pa ma yin nyid/ /tshogs pa'ang dngos po med phyir te/ /sngar ni ji ltar rnam dpyad bzhin/ /de ltar reg pa yod min na//tshor ba gang las 'byung bar 'gyur/ /ngal 'di ci yi don du yin/ /gang gis gang la gnod par 'gyur/ /gang tshe tshor po 'ga' med cing / /tshor ba'ang yod pa ma yin pa / /de tshe gnas skabs 'di mthong nas/ /sred pa ci phyir ldog mi 'gyur//mthong ba 'am ni reg pa yang / /rmi lam sgyu 'dra'i bdag nyid kyis/ /sems dang lhan cig skyes pa'i phyir/ /tshor ba de yis mthong ma yin/ /sngar dang phyi mar skyes pas kyang / /dran par 'gyur gyi myong ma yin/ /rang gis bdag nyid myong min la //gzhan dag gis kyang myong ma yin/ /tshor po 'ga' yang yod min te/ /des na tshor ba de nyid min/ /de ltar bdag med tshogs 'di la/ /'di yis ci ste gnod par bya/ /yid ni dbang rnams la mi gnas/ /gzugs sogs la min bar na'ang min//nang yang sems min phyi min zhing / /gzhan du yang ni rnyed ma yin/ /gang zhig lus min gzhan du min/ /'dres min logs su'ang 'gar med pa / /de ni cung zad min de'i phyir/ /sems can rang bzhin mya ngan 'das/ /shes bya las sngar shes yod na//de ni ci la dmigs nas skye/ /shes dang shes bya lhan cig na/ /de ni ci la dmigs nas skye/ /'on te shes bya'i phyis yod na/ /de tshe shes pa gang las skye/ /de ltar chos rnams thams cad kyi/ /skye ba rtogs par 'gyur ma yin//gal te de ltar kun rdzob med/ /de la bden gnyis ga la yod/ /de yang kun rdzob gzhan gyis na/ /sems can mya ngan ga la 'da'/ /'di ni gzhan sems rnam rtog ste/ /de ni rang gi kun rdzob min/ /phyis de nges na de yod de/ / min na kun rdzob med pa nyid/ /rtog dang brtag par bya ba dag /gnyis po phan tshun brten pa yin/ /ji ltar grags pa la brten nas/ /rnam par dpyad pa thams cad brjod/ /gang tshe rnam par dpyad pa yi/ /rnam dpyod kyis ni dpyod byed na/ / de tshe rnam dpyod de yang ni/ /rnam dpyod phyir na thug pa med/ /dpyad bya rnam par dpyad byas na/ /rnam dpyod la ni rten yod min/ /rten med phyir na mi skye ste/ /de yang mya ngan 'das par brjod/ /gang gi ltar na 'di gnyis bden/ /de nyid shin tu dka' bar gnas//gal te shes dbang las don grub/ /shes yod nyid la rten ci yod/ /'on te shes bya las shes grub/ /shes bya yod la rten ci yod/ /de ste phan tshun dbang gis yod/ /gnyi ga yang ni med par 'gyur/ /gal te bu med pha min na//bu nyid gang las byung ba yin/ /bu med par ni pha med pa/ /de bzhin de gnyis med pa nyid/ /myu gu sa bon las skye zhing / /sa bon de nyid kyis rtogs bzhin/ /shes bya las skyes shes pa yis/ /de yod pa ni cis mi rtogs/ /myu gu las gzhan shes pa yis//sa bon yod ces rtogs 'gyur na/ /gang phyir shes bya de rtogs pa / /shes pa yod nyid gang las rtogs/ /re zhig 'jig rten mngon sum gyis/ /rgyu rnams thams cad mthong ba yin/ /pad+ma'i sdong bu sogs dbye ni/ /rgyu yi dbye bas bskyed pa yin//rgyu dbye gang gis byas zhe na/ /sngar gyi rgyu dbye nyid las so/ /ci phyir rgyu yis 'bras skyed nus / /sngar gyi rgyu yi mthu nyid las/ /dbang phyug 'gro ba'i rgyu yin na/ /re zhig dbang phyug gang yin smros/ /'byung rnams zhe na de lta mod//ming tsam la yang ci zhig ngal/ /'on kyang sa sogs du ma dang / /mi rtag g.yo med lha min zhing / /'gom bya nyid dang mi gtsang bas/ /de ni dbang phyug nyid ma yin/ /dbang phyug mkha' min g.yo med phyir/ /bdag min sngar ni bkag zin phyir//bsam min pa yi byed po yang / /bsam min brjod pas ci zhig bya/ /des bskyed 'dod pa'ang gang zhig yin/ /bdag ni de dang sa sogs dang / /dbang phyug ngo bo'ang rtag min nam/ /shes pa shes bya las skye dang / /thog med bde sdug las las yin/ / de yis gang zhig bskyed pa smros/ /rgyu la thog ma yod min na/ /'bras bu'i thog ma ga la yod/ /rtag tu ci phyir byed min te/ /de ni gzhan la ltos pa min/ /des byas min gzhan yod min na/ /des 'di gang la ltos par 'gyur/ /gal te ltos na tshogs pa nyid/ / rgyu yin 'gyur gyi dbang phyug min/ /tshogs na mi skye dbang med cing / /de med par ni skye dbang med / /gal te dbang phyug mi 'dod bzhin/ /byed na gzhan gyi dbang du thal/ /'dod na'ang 'dod la rag las 'gyur/ /byed na'ang dbang phyug ga la yin/ /gang dag rdul phran rtag smra ba//de dag kyang ni sngar bzlog zin/ /gtso bo rtag pa 'gro ba yi/ /rgyu yin par ni grangs can 'dod/ /snying stobs rdul dang mun pa zhes/ /bya ba'i yon tan mnyam gnas ni/ /gtso bo zhes byar rab brjod de/ /mi mnyam 'gro ba yin par brjod//gcig la rang bzhin gsum nyid ni/ /rigs min des na de yod min/ /de bzhin yon tan yod min te/ /de yang so sor rnam gsum phyir/ /yon tan med na sgra sogs kyang / /yod nyid shin tu rgyang ring 'gyur/ /sems med gos la sogs pa la//bde sogs yod pa srid pa'ang min/ /dngos rnams de rgyu'i rang bzhin na/ /dngos po rnam dpyad ma zin nam/ /khyod kyi rgyu yang bde sogs nyid/ /de las snam sogs 'byung ba'ang med/ /snam sogs las ni bde sogs yin/ / de med phyir na bde sogs med/ /bde sogs rtag pa nyid du yang / /nam yang dmigs pa yod ma yin/ /bde sogs gsal ba yod nyid na/ /myong ba ci phyir 'dzin ma yin/ /de nyid phra mor gyur na de/ /rags dang phra ba'ang ji ltar yin/ /rags pa dor nas phra gyur pas//phra rags de dag mi rtag nyid/ /de bzhin dngos po thams cad ni/ /mi rtag nyid du cis mi 'dod/ /rags pa bde las gzhan min na/ /bde ba gsal ba mi rtag nyid/ /gal te med pa 'ga' yang ni/ /skye min med phyir zhes 'dod na/ / gsal ba med pa skye bar ni/ /khyod mi 'dod kyang gnas pa nyid/ /gal te rgyu la 'bras gnas na/ /zan za mi gtsang za bar 'gyur/ /ras kyi rin gyis ras bal gyi/ /sa bon nyos la bgo bar gyis/ /'jig rten rmongs pas ma mthong na/ /de nyid shes kyis bzhag de nyid//shes de 'jig rten la yang ni/ /yod pas ci ste mthong ma yin/ /'jig rten tshad ma nyid min na/ /gsal ba mthong ba'ang bden ma yin/ /gal te tshad ma tshad min na/ /des gzhal brdzun par mi 'gyur ram/ /de nyid du na stong pa nyid//sgom pa de phyir mi 'thad 'gyur/ /brtags pa'i dngos la ma reg par/ /de yi dngos med 'dzin ma yin/ /de phyir brdzun pa'i dngos gang yin/ /de yi dngos med gsal bar brdzun/ /des na rmi lam bu shi la/ /de med snyam pa'i rnam rtog ni//de yod rnam par rtog pa yi/ /gegs yin de yang brdzun pa yin/ /de bas de ltar rnam dpyad pas/ /'ga' yang rgyu med yod ma yin/ /so so ba'am 'dus pa yi/ /rkyen rnams la yang gnas ma yin/ /gzhan nas 'ongs pa'ang ma yin la//gnas pa ma yin 'gro ma yin/ /rmongs pas bden par gang byas 'di/ /sgyu ma las ni khyad ci yod/ /sgyu mas sprul pa gang yin dang / /rgyu rnams kyis ni gang sprul pa/ /de ni gang nas 'ongs gyur cing / /gang du 'gro ba'ang brtag par gyis//gang zhig gang ni nye ba yis/ /mthong gyur de med na min pa/ /bcos su gzugs brnyan dang mtshungs pa / /de la bden nyid ji ltar yod / /dngos po yod par gyur pa la/ /rgyu yis dgos pa ci zhig yod/ /'on te de ni med na yang / / rgyu yis dgos pa ci zhig yod/ /bye ba brgya phrag rgyu yis kyang / /dngos po med pa bsgyur du med/ /gnas skabs de dngos ji ltar yin/ /dngos 'gyur gzhan yang gang zhig yin/ /med tshe dngos yod srid min na/ /dngos po yod par nam zhig 'gyur/ / dngos po skyes par ma gyur par/ /dngos med de ni 'bral mi 'gyur/ /dngos med dang ni ma bral na / /dngos po yod pa'i skabs mi srid/ /dngos po'ang med par 'gyur min te/ /rang bzhin gnyis su thal 'gyur phyir/ /de ltar 'gag pa yod min zhing //dngos po'ang yod min de yi phyir/ /'gro ba 'di dag thams cad ni/ /rtag tu ma skyes ma 'gags nyid/ /'gro ba rmi lam lta bu ste/ /rnam par dpyad na chu shing 'dra / /mya ngan 'das dang ma 'das pa'ang / /de nyid du na khyad par med/ /de ltar stong pa'i dngos rnams la//thob pa ci yod shor ci yod/ /gang gis rim gro byas pa'am/ /yongs su brnyas pa'ang ci zhig yod/ /bde ba'ang sdug bsngal gang las yin/ /mi dgar ci yod dgar ci yod/ /de nyid du ni btsal byas na/ /gang zhig sred cing gang la sred//dpyad na gson po'i 'jig rten 'di/ /gang zhig 'dir ni 'chi 'gyur te/ /'byung 'gyur gang yin byung gyur gang / /gnyen dang bshes kyang gang zhig yin/ /thams cad nam mkha' 'dra bar ni/ /bdag 'dras yongs su gzung bar gyis//bdag nyid bde bar 'dod rnams ni/ /'thab dang spro ba'i rgyu dag gis/ /rab tu 'khrug dang dga' bar byed/ /mya ngan 'bad rtsol rtsod pa dang / /phan tshun gcod dang 'bigs pa dang / /sdig dag gis ni tshegs chen 'tsho/ / bde 'gror yang dang yang 'ongs te/ /bde ba mang po spyad spyad nas/ /shi nas ngan song sdug bsngal ni/ /yun ring mi bzad rnams su ltung / /srid pa na ni g.yang sa mang / /der ni de nyid min 'di 'dra/ /der yang phan tshun 'gal bas na/ /srid na de nyid 'di 'dra med//de yang dpe med mi bzad pa'i/ /sdug bsngal rgya mtsho mtha' las 'das/ /der ni de ltar stobs chung zhing / /der ni tshe yang thung ba nyid/ /der yang gson dang nad med kyi/ /byed dang bkres na'i ngal ba dang / /gnyid dang 'tshe dang de bzhin du//byis dang 'grogs pa don med kyis/ /tshe ni don med myur 'da' yi / /rnam dpyod shin tu rnyed par dka'/ /der yang rnam g.yeng goms pa ni / /bzlog pa'i thabs ni ga la yod/ /der yang ngan song chen por ni/ /ltung phyir bdud ni brtson par byed/ /der ni log pa'i lam mang zhing //the tshom las kyang brgal dka' ste/ /slar yang dal ba rnyed dka' zhing / /sangs rgyas 'byung rnyed shin tu dka'/ /nyon mongs chu bo spang dka' ste/ /e ma sdug bsngal brgyud par gyur / /de ltar shin tu sdug bsngal yang / /rang sdug mi mthong gang yin pa//sdug bsngal chu bor gnas 'di dag /kyi hud mya ngan bya bar 'os/ /dper na 'ga' zhig yang yang khrus/ /byas te yang yang mer 'jug pa/ /de ltar shin tu sdug bsngal bar/ /gnas kyang bdag nyid bder rlom bzhin/ /de ltar rga dang 'chi med pa//bzhin du spyod pas gnas rnams la/ /dang po nyid du bsad byas nas/ /ngan song ltung ba mi bzad 'ong / /de ltar sdug bsngal mes gdungs la/ /bsod nams sprin las legs 'khrungs pa'i / /rang gi bde ba'i tshogs char gyis/ /zhi byed par bdag nam zhig 'gyur//nam zhig dmigs pa med tshul du/ /gus pas bsod nams tshogs bsags te/ /dmigs pas phung bar 'gyur rnams la/ /stong pa nyid ni ston par 'gyur/ /byang chub sems dpa'i spyod pa la 'jug pa las/ shes rab kyi pha rol tu phyin pa'i le'u ste dgu pa'o// //bdag gis byang chub spyod pa la/ /'jug pa rnam par brtsams pa yi/ /dge ba gang des 'gro ba kun/ /byang chub spyod la 'jug par shog /phyogs rnams kun na lus dang sems/ /sdug bsngal nad pa ji snyed pa//de dag bdag gi bsod nams kyis/ /bde dga' rgya mtsho thob par shog /de dag 'khor ba ji srid du/ /nam yang bde las nyams ma gyur/ /'gro bas byang chub sems dpa' yi/ /bde ba rgyun mi 'chad thob shog /'jig rten khams na dmyal ba dag /gang dag ji snyed yod pa rnams/ /de dag tu ni lus can rnams/ /bde can bde bas dga' bar shog /grang bas nyam thag dro thob shog /byang chub sems dpa'i sprin chen las/ /byung ba'i chu bo mtha' yas kyis/ /tsha bas nyam thag bsil bar shog /ral gri lo ma'i nags tshal yang / /de la tsan+dan nags stug shog /shal ma ri yi sdong po yang / /dpag bsam shing du 'khrungs par shog /[(]'thing [,]thing [) ril ngur pa dag dang ngang pa dang / /bzhad sogs skad snyan 'byin pas mdzes gyur cig / pad+ma dri bsung che ldan mtsho dag gis/ /dmyal ba'i sa phyogs dag ni nyams dgar shog /sol phung de dag rin chen phung por gyur/ /sa bsregs shel gyi sa gzhi bstar bar shog /bsdus 'joms ri bo rnams kyang mchod pa yi/ /gzhal med khang gyur bde gshegs gang bar shog /mdag ma rdo bsregs mtshon gyi char pa dag /deng nas bzung ste me tog char par gyur/ /phan tshun mtshon gyis 'debs pa de yang ni/ /deng nas rtse phyir me tog 'phen par shog /chu bo rab med me dong 'dra nang bying ba dag /sha kun zhig gyur rus gong me tog kun+da'i mdog /bdag gi dge ba'i stobs kyis lha yi lus thob nas/ /lha mo rnams dang lhan cig dal gyis 'bab gnas shog /ci phyir 'dir ni gshin rje'i mi dang khra dang bya rgod mi bzad rnams skrag byed//kun nas mun bsal bde dga' bskyed pa'i mthu bzang 'di ko su yi mthu snyam ste/ /gyen du bltas na nam mkha'i dkyil na phyag na rdo rje 'bar ba bzhugs mthong nas/ /rab tu dga' ba'i shugs kyis sdig dang bral nas de dang lhan cig 'gro bar shog /me tog char pa spos chu dang 'dres babs pa yis/ /dmyal ba'i me mdag chil chil gsod par mthong gyur nas/ /glo bur bde bas tshim pa 'di ci bsam pa dang / /sems dmyal rnams kyis phyag na pad+ma mthong bar shog /grogs dag 'jigs pa bor la rings par tshur shog 'u bu'i thad du ni/ /gang gi mthu yis sdug bsngal kun bral dga' ba'i shugs phyin la/ /'gro ba kun nas yongs skyob byang chub sems dang brtse ba skyes gyur pa/ / gzhon nu zur phud can 'bar 'jigs pa med par byed pa ci zhig phyin/ /khyod kyi lha brgya'i cod pan dag gis zhabs kyi pad+ma la mchod cing / /thugs rje'i rlan spyan dbu la me tog du ma'i tshogs kyis char 'bab pa/ /khang brtsegs yid 'ong lha mo stong phrag bstod dbyangs sgrogs ldan 'di ltos zhes//'jam dbyangs de 'dra mthong nas da ni sems dmyal ca co 'don par shog /de ltar bdag gi dge rtsas kun du bzang la sogs/ /byang chub sems dpa' sgrib pa med sprin bde ba dang / /bsil zhing dri zhim dang ldan char pa 'bebs mthong nas//sems can dmyal ba de dag mngon par dga' gyur cig /dud 'gro rnams ni gcig la gcig /za ba'i 'jigs dang bral bar shog /sgra mi snyan pa'i mi bzhin du/ /yi dags rnams ni bde bar gyur //'phags pa spyan ras gzigs dbang gi /phyag nas 'bab pa'i 'o rgyun gyis/ /yi dags rnams ni tshim byas shing / /khrus byas rtag tu bsil bar shog /long ba rnams kyis mig mthong zhing / /'on pas rtag tu sgra thos shog /lha mo sgyu 'phrul ji bzhin du //sbrum ma'ang gnod med btsa' bar shog /gcer bu rnams kyis gos dag dang / /bkres pa rnams kyis zas dang ni/ /skom pa rnams kyis chu dag dang / /btung ba zhim po thob par shog /bkren pa rnams kyis nor thob shog / mya ngan nyam thag dga' thob shog /yi chad rnams kyang yid sos shing / /brtan pa phun sum tshogs par shog /sems can nad pa ji snyed pa/ /myur du nad las thar gyur cig /'gro ba'i nad ni ma lus pa/ /rtag tu 'byung ba med par shog / skrag pa rnams ni 'jigs med shog /bcings pa rnams ni grol bar 'gyur / /mthu med rnams ni mthu ldan zhing / /sems ni phan tshun mnyen gyur cig /'dron pa dag ni thams cad la/ /phyogs rnams thams cad bde bar shog /gang gi don du 'gro byed pa//de 'bad mi dgos grub gyur cig /gru dang gru chen zhugs pa rnams/ /yid la bsam pa grub gyur te/ /chu yi ngogs su bder phyin nas/ /gnyen dang lhan cig dga' bar shog /mya ngan lam gol 'khyams pa rnams/ / 'dron pa dag dang phrad gyur nas/ /chom rkun stag sogs 'jigs med par/ /mi ngal bde blag 'dong bar shog /dgon sogs lam med nyam nga bar/ /byis pa rgan po mgon med pa/ /gnyid log myos shing rab myos rnams/ /lha dag srung bar byed par shog /mi ngal kun las thar ba dang / /dad dang shes rab brtse ldan zhing / /zas dang spyod pa phun tshogs nas/ /rtag tu tshe rabs dran gyur cig /thams cad nam mkha'i mdzod bzhin du/ /longs spyod chad pa med par shog /rtsod pa med cing 'tshe med par//rang dbang du ni spyod par shog /sems can gzi brjid chung ngu gang / /de dag gzi brjid chen por shog /dka' thub can gang gzugs ngan pa/ /gzugs bzang phun sum tshogs gyur cig /'jig rten bud med ji snyed pa//de dag skyes pa nyid gyur cig /ma rabs rnams ni mtho thob cing / /nga rgyal dag kyang bcom par shog /bdag gi bsod nams 'di yis ni/ /sems can thams cad ma lus pa/ /sdig pa thams cad spangs nas ni/ / rtag tu dge ba byed par shog /byang chub sems dang mi 'bral zhing / /byang chub spyod la gzhol ba dang / /sangs rgyas rnams kyis yongs gzung zhing / /bdud kyi las rnams spang bar shog /sems can de dag thams cad ni/ /tshe yang dpag med ring bar shog /rtag tu bde bar 'tsho 'gyur zhing / /'chi ba'i sgra yang grag ma gyur/ /dpag bsam shing gi skyed mos tshal/ /sangs rgyas dang ni sangs rgyas sras/ /chos snyan sgrogs pas gang ba yis/ /phyogs rnams thams cad gang bar shog /thams cad du yang sa gzhi dag /gseg ma la sogs med pa dang / /lag mthil mnyam pa bai DUr+ya'i/ /rang bzhin 'jam por gnas par gyur/ /'khor gyi dkyil 'khor yod dgur yang / /byang chub sems dpa' mang po dag /rang gi legs pas sa stengs dag /brgyan par mdzad pas bzhugs gyur cig /lus can kun gyis bya dang ni/ /shing dang 'od zer thams cad dang / /nam mkha' las kyang chos kyi sgra/ /rgyun mi 'chad par thos par shog /de dag rtag tu sangs rgyas dang //sangs rgyas sras dang phrad gyur cig /mchod pa'i sprin ni mtha' yas pas/ /'gro ba'i bla ma mchod par shog /lha yang dus su char 'bebs shing / /lo tog phun sum tshogs par shog /rgyal po chos bzhin byed gyur cig / 'jig rten dag kyang dar bar shog /sman rnams mthu dang ldan pa dang / /gsang sngags bzlas brjod grub par shog /mkha' 'gro srin po la sogs pa/ /snying rje'i sems dang ldan gyur cig /sems can 'ga' yang sdug ma gyur/ /'jigs dang brnyas par mi 'gyur zhing //'ga' yang yid mi bde ma gyur/ /gtsug lag khang rnams klog pa dang / /kha thon gyis brgyan legs gnas shog /rtag tu dge 'dun mthun pa dang / /dge 'dun don yang grub par shog /bslab pa 'dod pa'i dge slong dag /dben pa dag kyang thob par shog /g.yeng ba thams cad spangs nas ni/ /sems ni las rung sgom gyur cig /dge slong ma rnams rnyed ldan zhing / /'thab dang gnod pa spang bar shog /de bzhin rab tu byung ba kun/ / tshul khrims nyams pa med gyur cig /tshul khrims 'chal pas yid byung nas/ /rtag tu sdig pa zad byed shog /bde 'gro dag kyang thob gyur nas/ /der yang brtul zhugs mi nyams shog /mkhas pa rnams ni bkur ba dang / /bsod snyoms dag kyang rnyed par shog /rgyud ni yongs su dag pa dang / /phyogs rnams kun tu grags par shog /ngan song sdug bsngal ma myong zhing / /dka' ba spyad pa med par yang / /lha bas lhag pa'i lus kyis ni/ /de dag sangs rgyas myur 'grub shog /sems can kun gyis lan mang du//sangs rgyas thams cad mchod byed cing / /sangs rgyas bde ba bsam yas kyis/ /rtag tu bde dang ldan gyur cig /byang chub sems dpa' rnams kyis ni/ /'gro don thugs la dgongs 'grub shog /mgon po yis ni gang dgongs pa//sems can rnams la de 'byor shog /de bzhin rang sangs rgyas rnams dang / /nyan thos rnams kyang bde gyur cig /bdag kyang 'jam dbyangs bka' drin gyis/ /sa rab dga' ba thob par du/ /rtag tu tshe rabs dran pa dang / /rab tu byung ba thob par shog /bdag ni kha zas [(]gyi [,]kyi [)]nas kyang / /nyams dang ldan zhing 'tsho bar shog /tshe rabs kun du dben gnas par / /phun sum ldan pa thob par shog /gang tshe blta bar 'dod pa'am/ /cung zad dri bar 'dod na yang / /mgon po 'jam dbyangs de nyid ni//gegs med par yang mthong bar shog /phyogs bcu'i nam mkha'i mthas gtugs pa'i/ /sems can kun don bsgrub pa'i phyir/ /ji ltar 'jam dbyangs spyod mdzad pa/ /bdag gi spyod pa'ang de 'drar shog /ji srid nam mkha' gnas pa dang / /'gro ba ji srid gnas gyur pa//de srid bdag ni gnas gyur nas / /'gro ba'i sdug bsngal sel bar shog /'gro ba'i sdug bsngal gang ci'ang rung / /de kun bdag la smin gyur cig /byang chub sems dpa'i dge 'dun gyis/ /'gro ba bde la spyod par shog /'gro ba'i sdug bsngal sman gcig pu//bde ba thams cad 'byung ba'i gnas/ /bstan pa rnyed dang bkur sti dang / /bcas te yun ring gnas gyur cig /gang gi drin gyis dge blo 'byung / /'jam pa'i dbyangs la phyag 'tshal lo/ /gang gi drin gyis bdag dar ba/ /dge ba'i bshes la'ang bdag phyag 'tshal//byang chub sems dpa'i spyod pa la 'jug pa las bsngo ba zhes bya ba ste le'u bcu pa'o// //byang chub sems dpa'i spyod pa la 'jug pa slob dpon shan+ta de bas mdzad pa rdzogs so// //rgya gar gyi mkhan po sarba dz+nyA de ba dang / zhu chen gyi lo tsA ba ban+de dpal brtsegs kyis kha che'i dpe las zhus te gtan la phab pa las/slad kyis rgya gar gyi mkhan po d+harma shrI b+ha dra dang / zhu chen gyi lo tsA ba ban+de rin chen bzang po dang / shAkya blo gros kyis yul dbus kyi dpe dang 'grel pa dang mthun par bcos shing bsgyur te gtan la phab pa'o //yang dus phyis rgya gar gyi mkhan po su ma ti kIrti dang / zhu chen gyi lo tsA ba dge slong blo ldan shes rab kyis dag par bcos shing bsgyur te legs par gtan la phab pa'o// //