CLOSE WINDOW

D3855
བོད་ཡིག

@##/ /rgya gar skad du/ ma d+h+yA ma ka hr-i da ya kA ri kA / bod skad du/ dbu ma'i snying po'i tshig le'ur byas pa/ 'jam dpal gzhon nur gyur pa la phyag 'tshal lo/ /gang gis de nyid rab brtag min//rnam shes bya min gzhi ma yin/ /mtshon min brtag min rig bya min/ /skye 'jig med cing bde ba dang / /rnam brtag ma yin snang ba med / /mtshan ma med cing gsal byed med//gnyis min gnyis med ma yin dang / /zhi dang blo 'jug spangs pa dang / /yi ge med pa yi ge yis/ /thugs rje nyid kyis bstan mdzad pa/ /ston pa ma nor nyid gsung ba/ /de la gus par phyag 'tshal lo//gzhan don bsgrub phyir brtul zhugs kyis/ /byang chub chen por blos byas rnams/ /de nyid bdud rtsir gzung ba'i phyir/ /nus pas cung zhig brjod par bya/ /byang chub sems ni mi gtong dang //thub pa'i brtul zhugs yang dag brtan / /de nyid shes pa tshol ba ni/ /don kun sgrub pa'i spyod pa yin/ /byams pa dang ni snying rje dang / /shes pa chen pos brgyan pa yi//sangs rgyas sa bon byang chub sems/ /de phyir mkhas pas de mi gtang / /blo ldan snying stobs che ba dang / /gzhan gyi sdug bsngal mi bzod cing / /yang dag brtson 'grus brtsams pa dang //mthu dang ldan zhing mkhas pas ni/ /shes rab snang ba med pa yi/ /'jig rten kun la blta byas nas/ /'khor ba mi gtsang sa 'og nas/ /bdag nyid brgal bas bsgral bar rigs//gang zhig shes rab mtshon rnon gyis/ /'ching ba kun bcad grol gyur pa/ /snying rje'i bdag nyid ldan pa yis/ /gang phyir mgon med sdug bsngal ba/ /'khor ba'i btson ra mi bzad par//'dod chags la sogs sgrog gis bcings/ /bag med pa yi chang 'thungs nas/ /gti mug gnyid kyis log pa dang / /rnam par rtog pa'i chom rkun gyis/ /dge tshogs ma lus brkus pa dag /gal te grol bar mi byed na/ /mthu ldan mthu ni ci la phan/ /gang zhig lag pa'i mthus bsgrubs pa/ /'dod pas bskyed pa'i bde chung yang / /gcig pu gdu bas za byed pa/ /de yang mkhas pas smad 'gyur na//'khor los sgyur dang dbang po dang / /tshangs pa la yang rab bkod pa/ /sred pa rnam par gcod pa dang / /thabs kyi sgo nas thun mong ba/ /len dang zad dang mthar thug dang / /sdug la sogs pas mi 'gyur zhing / /sdug bsngal ma lus zhi byed pa'i/ / de nyid don rtogs bdud rtsi ci/ /gzhan yang sngon chad nyon mongs pa'i/ /gdon gyis brlams pa bdag gis ni/ /rma la 'gyur byed 'debs pa bzhin/ /sdug bsngal nad pa gang sdug byas/ /skye ba gzhan du gang dag gis/ /byams dang bsnyen bkur phan pa byas/ /de la lan du phan gdags pa//mya ngan bzla las gzhan ci yod/ /gzhan don byed las byung ba yi/ /dga' bas sems dga' mkhas pa dag /ral gri rab tu 'bar 'dra ba'i/ /srid pa dag gis gnod mi 'gyur/ /tshul khrims 'chal pa mi byed pas/ /ngan 'gro'i sgo kun bcad pa'i phyir//stong nyid lta ba goms byas pas/ /nyon mongs 'jug pa bcom phyir ro/ /mkhas pa bsod nams byas pa yis/ /'gro drug bskyed tshal dus ston ltar/ /mthong ba srid pa'i btson ra yis/ /skrag par 'gyur ba yod ma yin/ /skyon mthong phyir ni srid par min//brtse phyir mya ngan 'das mi gnas/ /gzhan don bsgrub phyir brtul zhugs can/ /srid pa na yang gnas par byed/ /'khor ba dang ni mya ngan 'das/ /gnyis dang gnyis min mi dmigs pa'i/ /mkhas pa gar yang mi gnas shing / /srid pa na yang gnas par byed//byang lag rin chen bdun phyug cing / /yon tan dpag med 'byung ba'i gnas/ /lha dang lha min phyag byas pa/ /dam chos 'khor lo bskor brnyes shing / /mu tig 'pho 'dra'i grags pa dang / /ston zla nya ba'i dri med pa'i/ /'od zer lta bu'i gsung dag gis//phyogs bcu dag ni rgyas mdzad la/ /dkon mchog gsum gdung gnas bya'i phyir/ /yon tan 'byung gnas dam pa'i sras/ /lha klu la sogs spyi gtsug gis/ /bstan pa mchod pa bzhag mdzad de/ /rang dang gzhan don mdzad pa'i phyir/ /de dag mya ngan 'das legs 'das//de las gzhan gang lus bcud chad/ /de yang mya ngan 'das pa yin/ /wa ni glang chen dregs pa yi/ /glad pa 'gems shing dbye mi sems/ /gdol pa rgya mtsho'i mthas klas pa'i/ /sa yi dkyil 'khor bskyang mi sems/ /de bzhin sems can dman pa yang //zab cing bla med rgya che ba/ /yon tan bgrang 'das 'byung ba'i gnas/ /sangs rgyas nyid la re ba'ang med/ /gzhal yas rmad byung bsam mi khyab/ /snang ba thams cad zil gnon pa/ /rdzogs sangs yon tan rin chen la/ /su zhig yid kyis sems mi bskyed//gzhan don byed pa dpa' ba dang / /skyes bu chen po'i tshul ldan pa/ /su zhig 'khor mtha' med par yang / /nyin gcig lta bur gnas mi byed/ /mkhas pa gang zhig 'das gyur kyang / /gang gis gtam gzhi 'phel 'gyur ba/ /'phags pa gzhan don mdzad rnams kyi//lam gyi rjes su 'jug mi byed/ /su zhig chu shing dbu ba ltar/ /snying po med pa'i lus 'di dag /gzhan phan rkyen du sgrub byed pas/ /lhun po snying por sgrub mi byed/ /ya rabs snying rje ldan pas ni/ /skad cig re re rga shi dang / /nad kyi gzhir gyur lus dag ni/ / gzhan la bde skyid gzhir byed do/ /dam chos sgron ma dang bcas la/ /mi khom brgyad spangs khom pa 'di/ /skyes bu chen po'i spyod pa yis/ /'bras bu yod par bya ba'i rigs/ /dbu ma'i snying po las byang chub kyi sems mi gtong ba'i le'u ste dang po'o// //de ltar 'gro la phan pa'i phyir//byang chub chen por brtan blangs pa/ /tshul dang mthun pa'i lam nyid du/ /rab tu zhugs pa rnam par mdzes/ /de ni byams pa gnod med dang / /snying rje phan pa bsgrub pa yis/ /dam chos rtogs pa ngoms med dang / /chos sbyin pa la ser sna med/ / drang dang nga rgyal bcom pa dang / /yid kyis de nyid blta ba dang / /gzhan skyon rtog la long ba dang / /rang skyon 'byung bas 'jigs pa yin/ /rtsod dang 'jig rten 'du 'dzi dang / /'jig rten rgyang pan rgyab kyis phyogs/ /yon tan med la'ang yon tan gyi/ /rgyun rnams skye bar rtag tu gus//snying rjes bskyed pa'i sbyin pa dag /skye bo'i tshogs rnams thams cad kyi/ /sdug bsngal chu bo kun zhi'i phyir/ /thams cad mkhyen nyid 'dod pa skyed / /tshul khrims dri med chus khrus dang / /bzod pa'i se ral phreng dkar dang / /brtson 'grus ral pa'i khur bcings dang //bsam gtan shes pa lhur len te/ /blo mig legs par bye ba dang / /bstan bcos 'jig rten shes la mkhas/ /ngo tsha khrel yod gos dang ni/ /des pa'i ska rags 'ching ba yin/ /snying rje'i pags pa gnag 'chang zhing / /dad pa dri med ril ba dang //dran pas dbang po'i sgo bsrungs shing / /brtan pa'i sba stegs stan la 'dug /theg pa chen po dga' chen gyi/ /dka' thub nags tshal yang dag bsten/ /bsam gtan dga' ba'i 'bras bu za/ /dran pa nyer gzhag spyod yul can/ /zab cing rgya che mdo sde'i mtha'/ / 'don cing sdig pa bcom pa dang / /bden pa gnyis la brten pa yi/ /rten cing 'brel 'byung nyi bshad zlos/ /sgrub pa'i me tog bsngags ldan pa/ /phyogs rnams kun du dris khyab pas/ /rdzogs pa'i sangs rgyas nyi ma la/ /nyin gcig bzhin du bsnyen bkur byed/ /so sor rtog pa'i me thab tu//mi dge'i kun du rtog pa sreg /bla med go 'phang thob bya'i phyir/ /de ltar thub pa'i brtul zhugs spyod/ /dbu ma'i snying po las thub pa'i brtul zhugs la yang dag par bstan pa'i le'u ste gnyis pa'o// //gang la shes pa'i mig yod pa/ /de la mig yod gzhan ma yin/ / des na gang phyir blo ldan dag /de nyid shes pa tshol ba brtson/ /blo ldan 'jig rten gsum po dag /thogs med mthong ba long bas kyang / /blta 'dod thag ring cha phra dang / /bsgribs pa'i don yang mthong bar 'gyur/ /mig stong pa yang blo med na/ /mig dang ldan pa ma yin te/ /mtho ris dang ni byang grol gyi//lam dang lam min mi mthong phyir/ /shes rab mig bye mthong ba dang / /ma mthong khyad par 'dod pa yi/ /'bras bu re ba dug tsher gyi/ /sbyin pa sogs la 'jug mi byed/ /snying rjes thams cad mkhyen pa'i phyir/ /'khor gsum yongs su dag pa yi/ /sbyin la sogs la brtson byed cing //de la 'ang yid ni gnas mi byed/ /shes rab bdud rtsi ngoms byed dang / /sgron ma snang ba thogs med dang / /thar pa'i khang bzangs them skas dang / /nyon mongs bud shing sreg pa'i me/ /blo gros de yang bden gnyis la/ /ltos nas rnam pa gnyis su 'dod//yang dag don rtogs rjes mthun phyir/ /yang dag kun rdzob shes pa yin/ /sbyin dang bsod nams ye shes kyi/ /tshogs rnams yongs su rdzogs byed dang / /rgyu de dag gi 'bras bu dang / /'brel dang mtshan nyid la sogs shes/ /byams dang snying rje bsgom pa dang //sems can sdud dang smin byed dang / /skye mched bcu gnyis brten pa yi/ /shes rab brdar btags shes par bya/ /rtog pa'i dra ba ma lus pa/ /dgag pa sgrub par byed pa dang / /zhi dang so so rang rig dang / /rnam rtog med cing yi ge med/ /gcig nyid tha dad nyid bral dang //mkha' ltar dri med de nyid la/ /'jug pa med pas 'jug pa yi/ /shes rab don dam shes pa yin/ /yang dag kun rdzob rnams kyi skas/ /med par yang dag khang pa yi/ /steng du 'gro bar bya ba ni/ /mkhas la rung ba ma yin no/ /de nyid khang bzangs thog 'dzeg pa//yang dag kun rdzob them pa'i skas/ /med par rung ba ma yin pa/ /gang gi phyir ba de phyir ro/ /mkhas pas sems ni mnyam gzhag phyir/ /mngon par brtson pa nyid du bya/ /de bzhin thos byung shes pa la/ /de las gzhan shes rgyu phyir ro/ /ji ltar chu rnyog g.yo ba la/ /bzhin ni mthong bar mi 'gyur ba//de ltar sems mnyam ma bzhag dang / /sgrib pas bsgribs la de nyid do/ /yid kyi glang po log 'gro ba/ /dmigs pa'i ka ba brtan po la/ /dran pa'i thag pas nges bcings nas/ /shes rab lcags kyus rim dbang bya/ /rgod pa mi rtag la sogs pa/ /yid la byed pas zhi bar bya//zhum pa dmigs pa rgya chen dag /bsgom pas spang ba nyid du bya/ /g.yengs pas g.yeng ba'i mtshan ma la/ /nyes dmigs blta bas bsdu bar bya/ /zhum pa yang ni brtson 'grus kyi/ /phan yon mthong bas gzengs bstod bya/ /'dod chags zhe sdang gti mug gi /rdzab dris sbags shing ma bsdams pa//mi sdug byams pa rten 'byung ba'i/ /chu dag gis ni bkru bar bya/ /dben zhing mi g.yo zhi ba dang / /dmigs pa dag la gzhol ba dang / /las su rung zhing mnyen shes nas/ /de la legs par btang snyoms bya/ /blo gros mnyam gzhag 'og tu ni/ /tha snyad sgo nas gzung bya yi//chos rnams dngos po 'di dag la/ /shes rab kyis ni 'di ltar brtag /blo yis rnam par dpyad pa na/ /'di dag don dam yod dam ci/ /gal te yin na 'di de nyid/ /gal te gzhan na de btsal bya/ /phyogs su lhung bas sems gdungs pas/ /zhi ba nam yang rtogs mi 'gyur//'dus byas 'dus ma byas chos ni/ /phung po skye mched khams rnams so / /nyon mongs sgrib pa spang ba'i phyir/ /nyan thos rnams la rab tu bshad/ /nyon mongs shes bya'i sgrib dri ma/ /spang phyir snying rje ldan rnams la/ /rag phyir dang po kho nar ni/ /gzugs kyi phung po brtag par bya//de la'ang dang por 'byung ba rnams/ /ji skad bstan pa'i gtan tshigs kyis/ /'dir ni sa la sogs pa dag /don dam par na 'byung ba yi/ /ngo bo nyid min byas phyir dang / /rgyu ldan sogs phyir shes pa bzhin/ /sa ni sra ba'i ngo bo min / /'byung ba nyid phyir rlung bzhin no//sa yis las ni 'dzin ma yin/ /byas pa nyid phyir chu bzhin no/ /med kyang gal te de nyid du/ /sa yi dngos nyid sra snyam na/ /rnal 'byor pa dag de la ni/ /'byung dang 'bying ba mi rigs so/ /bsam gtan pa yi bsam gtan mthus/ /sa ni gsher ba nyid mi rigs/ /ngo bo nyid la 'gyur med phyir//yang na de sra nyid ma yin/ /de bzhin chu dang me rlung dag /gsher la sogs pa'i dngos nyid min/ /de dag las kyang sdud pa dang / /smin dang g.yo bar byed mi rigs/ /rlung la sogs pa kun rdzob tu/ /yon tan mnyam par mi 'dod min/ /lus kyi dbang pos dmigs phyir dang //'byung ba yin phyir sa bzhin no/ /sa la sogs pa rdzas yod min/ /tshogs pa'i yan lag min med phyir/ /gang dag ji skad bstan pa de/ /rdzas yod ma mthong nags tshal bzhin/ /sa la sogs pa yul gyi blo/ / de yang rdzas yod ma yin 'dod/ /rgyu dang bcas phyir 'jig pa'i phyir/ /nags tshal la sogs blo bzhin no/ /sa la sogs pa ston pa'i sgra/ /brjod pa rdzas su mi 'dod de/ /mnyam pa yin phyir dmag la sogs/ /ston pa'i sgra dag mi 'dod bzhin/ /pal sha pan d+ha la sogs pa//nags tshal rtsom pa yin mi 'dod/ /rgyu ldan la sogs gtan tshigs kyis/ /dper na rtsa ba la sogs bzhin/ /yan lag can gyi nags tshal ni/ /pa la sha la sogs brtsams min/ /de dag re rer ma rdzogs phyir/ /yal ga la sogs gang yin bzhin//nags tshal sgra ni ma nges pa/ /du ma'i rdzas grangs 'jug ma yin/ /khyad par can gyi blos brtag phyir/ /bum bzangs la sogs sgra bzhin no/ /gang phyir gzugs ni don dam du/ /mig gi dbang po'i gzung ba min/ /bsags phyir dper na sgra bzhin dang / / 'byung las gyur phyir de nyid bzhin/ /gzugs ni mig gis bzung min te/ /'byung las gyur phyir rang gzugs bzhin/ /bde la sogs 'byung rgyu phyir dang / /brjod bya yin phyir ro sogs bzhin/ /de bzhin gzugs ni 'byung 'gyur min/ /'byung phyir me la sogs pa bzhin/ /rgyu ldan la sogs gtan tshigs kyi //yang na sems bzhin shes par bya/ /des ni kha dog dbyibs dang ni/ /bsags dang phra dang rags sogs kyi/ /dbye bas gzugs kyi mtshan nyid dag /ji snyed rnam par brtags pa rnams/ /ji ltar rigs pa'i sbyor ba yin / /bkag par khong du chud par bya//sgra dang dri dang ro dang reg /dgag pa'i tshul yang de bzhin no/ /mig gi dbang po don dam du/ /gzugs la lta ba ma yin te/ /sems dang sems byung las gzhan phyir/ /dper na ri bo'i dbang po bzhin/ /yang na mig ni don dam du/ /gzugs la lta ba ma yin te/ /rnam shes dngos med mi skye'i phyir//pags pa dag la sogs pa bzhin/ /mig ni gzugs kyi yul can min/ /rang gi gzugs la mi 'dzin phyir/ /nyan la sogs pa'i dbang po dang / /gzugs can yin phyir ro sogs bzhin/ /de bzhin lta po mig med pa/ /dpe yang med pas mthong ma yin//blta ba'i ngo bo nyid yin pas/ /ji ltar gzugs la blta bar rigs/ /blta ba'i ngo bo nyid min pas/ /ji ltar gzugs la blta bar rigs/ / gal te lta po nyan po na/ /ci phyir de ni nyan por 'gyur/ /de shes nyid dang rtag mi 'dod/ /bsgyur rung khyad par yin pa'i phyir//gcig nyid ma yin tshul gnyis phyir/ /lus gzhan dag gi gzugs bzhin no/ /de bzhin mig gi dbang po ni/ /gzugs la dmigs pa'i byed mi 'dod/ /yid bral nyid na lta po las/ /gzhan phyir nyan la sogs pa bzhin/ /de ni lta po nyid mi rigs//mig la sogs la ltos pa'i phyir/ /yid bzhin yongs su 'gyur phyir dang / /de bzhin gzugs brnyan 'char phyir ro/ /lta po ji ltar yid dang 'dra/ /dbang po gzhan gyis mi mthong phyir/ /yid ni yang dag nyid du na/ /lta bar mi 'dod bdag bzhin no//de ni lta min tshogs pa dag /rdzas su med phyir de nyid bzhin/ /byed po nyid rung chos gzhan dag /mngon par 'grub phyir dril bu bzhin/ /mig ni 'od zer ldan mi rigs/ /dbang po yin phyir dbang gzhan bzhin/ /mtshan mo rgyu ba'i mig 'bras snang //dbang po snang ba ma yin no/ /mig ni bde sogs bdag nyid min/ /dngos po yin phyir skyes bu bzhin/ /mig ni kun tu song min te/ /g.yo phyir de 'bras la sogs bzhin/ /yang na mig ni kun 'gro min/ /gzhan don nyid phyir bum pa bzhin/ / gzugs dmigs 'gyur ba'i rgyu yin phyir/ /dper na gzugs bzhin de bzhin no/ /mig ni me dang ldan ma yin/ /dbang po yin phyir lpags sogs bzhin/ /'byung chen dang sogs bdag nyid ni / /me shas che ba ma yin no/ /mig ni yul dang phrad ma yin/ / dbang po yin phyir yid bzhin dang / /rgyu phyir rgyu dang ldan pa'i phyir/ /yang na gzugs la sogs pa bzhin/ /sna sogs yul phrad 'dzin mi 'dod/ /phyi don mngon sum 'dzin phyir dang / /'das dang ma 'ongs mi 'dzin phyir/ /dper na mig gi dbang po bzhin/ /sgrub dang 'dra bar bkag pa'i phyir//lus la sogs pa ma nges min/ /mig rna yid kyi mtshan nyid gsum/ /yul dang ma phrad 'dzin ma yin/ /lta ba ji ltar rgyas bshad pas/ /nyan dang snom dang myang ba dang / /lus kyi dbang po gsal ba dag / nges par khong du chud par bya/ /sgra dang dri dang ro dang reg /dgag pa'i tshul yang de yin te/ /mkhas pas gzu bo'i blo dag gis/ /ci rigs par ni shes par bya/ /tshor ba don dam nyid du na/ /myang ba'i bdag nyid yin mi rigs/ /rnam shes mtshungs par ldan pa'i phyir//de las gzhan pa'i sems byung bzhin/ /bde ba phan 'dogs mi 'dod de/ /reg las byung phyir de gzhan bzhin/ /sdug bsngal gnod pa'i bdag nyid min/ /gtan tshigs bstan pas shes par bya/ /sdug min bde min mi 'dod de/ /'bras bu sred phyir gzhan bzhin no//rnam shes ngo bo nyid kyang ni/ /dgag pa smra bar 'dod phyir ro/ /'du shes 'du byed rnam gnyis dag /des ni rnam par bshad gyur te/ /mkhas pas gzu bo'i blo dag gis/ /ci rigs par ni shes par bya/ /rnam shes don dam nyid du na/ /dngos po rnam rig dngos nyid min//dmigs dang bcas phyir 'du shes bzhin/ /yang na 'jig phyir mar me bzhin/ /phung po lnga po rnam dpyad pa'i/ /sgrub pa ji skad bstan pa des/ /phung po rnams kyi khams shes bya/ /skye mched rnams kyang shes par bya/ /skye sogs 'dus byas nyid kyis ni/ / mtshan nyid mtshan gzhi nyid mi rigs/ /'dus byas yin phyir rtogs bya'i phyir/ /de las gzhan pa nyid bzhin no/ /dngos rnams mtshan nyid yod pa'i phyir/ /ngo bo nyid yod nyid mi 'dod/ /de phyir gtan tshigs don ma grub/ /don 'gal nyid du'ang gyur pa yin/ /sa yi mtshan nyid sa nyid kyis//sra ba nyid du mtshon mi rigs/ /lus kyi rnam shes rgyu yin phyir/ /me nyid kyis ni mi rigs bzhin/ /glang gi mtshan nyid glang nyid kyis/ /nog dang lkog shal sogs mi 'dod/ /khyad par can gyi blos brtag phyir/ /dper na bong bu'i mtshan nyid bzhin//gcig na ji ltar mtshan nyid yin/ /des ni de nyid mi mtshon phyir/ /gzhan na ji ltar mtshan nyid yin/ /gzhan gyis gzhan nyid mi mtshon phyir/ /ma song ba la don dam du/ /'gro ba yod par mi 'dod de/ /lam yin phyir dang 'gro med phyir/ /dper na ma 'ongs lam bzhin no//'gom la don dam nyid du na/ /'gro ba yod pa ma yin te/ /song dang ma song ma gtogs par/ /'gom pa rtag tu med phyir ro/ /'gom pa song dang ma song bar/ /brjod pa min la'ang 'gro med de/ /lam yin phyir na 'das pa bzhin/ /yang na ma 'ongs lam bzhin no//'gro ma grub phyir 'gro po med/ /de phyir de ni 'gro mi 'dod/ /'gro po min par 'gro mi rigs/ /'gro dang bral phyir sngon bzhin no/ /rang las gzhan pa'i don 'brel la/ /'gro po snyam pa'i blo 'di 'dod/ /blo dang sgra rjes 'jug pa'i phyir/ /dbyug can bzhin min rjes 'gro med//rgyun chags yul gzhan 'byung ba yi / /'du byed rgyun la brten nas ni/ /me la sogs bzhin 'khrul pa'i 'gro/ /de yang kun rdzob de nyid min/ /ser skya pa yis rnam brtags pa'i/ /'gro po don dam nyid mi rigs/ /tshogs pa rdzas su med phyir dang //yang na g.yo ba med phyir ro/ /gal te tshogs pa rdzas yod de/ /tshogs byed ma bzung gzung med phyir/ /de yi bdag bzhin de mi rigs/ /de dag rdzas su med phyir ro/ /bya ba lhag ma dgag pa yang / /phyogs des rab tu bstan pa yin/ /gal te dngos nyid yod 'dod de//'khor dang thar pa yod phyir na/ /gang tshe ji ltar rnam brtags pa / /de dag rang bzhin rnam dpyad na/ /nges gzung med pa de yi tshe/ /ji ltar bcings shing gang nas thar/ /ngo bo nyid yod ma yin pa/ /sgyu ma rmi lam lta bu dang / /rang gi rgyu dang rkyen dbang las/ /bdag nyid khyad par 'thob la 'thad//ming dang gzugs ni don dam du/ /'khor bar rigs pa ma yin te/ /'dus byas yin phyir phyi rol gyi/ /sa la sogs pa mi 'dod bzhin/ /ming gzugs don dam nyid du na/ /ji ltar yang ni thar mi 'gyur/ /skye dang ldan phyir 'jig pa'i phyir//phyi rol chu la sogs pa bzhin/ /gang zag yang dag nyid du ni/ /'khor dang thar par mi 'gyur te/ /gdags bya yin phyir khang pa bzhin/ /brjod bya yin phyir ri dang 'dra/ /yang na gang zag gang zag min/ /rgyu dang ldan phyir bum pa bzhin/ / skye dang ldan phyir 'jig pa'i phyir/ /shes bya yin phyir 'ong ba bzhin/ /gang zag brjod du med phyir bas/ /rdzas su yod par mi 'gyur ste/ /dri dang dkar sngor brjod med pa'i/ /mo gsham bus ni ma nges 'gyur/ /de ltar phung po bdag med cing / /srog med sems can yod min pa/ / mkhas pas gzu bo'i blo dag gis/ /ci rigs par ni shes par bya/ /lus dang dbang po'i tshogs rnams la/ /de nyid du na bdag med 'dod/ /rgyu dang ldan phyir ka ba bzhin/ /yang na bsags phyir grog mkhar bzhin/ /dran pa dang ni ngo shes dang / /shes skye la sogs gtan tshigs kyi//bdag yod nyid du dam 'cha' ba/ /gtan tshigs rnams ni ma grub nyid/ /gal te dbang bcas lus la ni/ /bdag yod nyid du sgrub byed na/ /gtan tshigs thun mong nyid mi 'gyur/ /rjes su 'gro ba med phyir ro/ /gal te bdag sgra don bzhin te/ /'ga' la nye bar gdags pa'i phyir//seng ge'i sgra dang 'dra zhe na/ /bdag ni grub pa nyid mi 'gyur/ /ci ste rnam shes yul la ni/ /don bzhin gzhan la sgrub byed na/ /rtag dang kun 'gro sogs bral phyir/ /'gal ba nyid du 'gyur ba yin/ /de phyir gang la'ang don dam du/ /bcings dang thar pa yod mi 'dod//song dang ma song 'gom pa yis/ /de bzhin sems la lhag ma bshad/ /gang tshe sems ni 'gag pa la/ /mngon du phyogs shing skyes pa'i tshe/ /gang la gang gis chags par 'dod/ /chags pa 'gags la'ang mi 'dod do/ /gal te skye bzhin chags zhe na/ / de ci gal te skye mngon phyogs/ /ma skyes pa la de mi 'dod/ /gzhi med bya ba mi ldan phyir/ /skye bzhin skyes dang ma skyes par/ /brjod pa mig la'ang chags pa med/ /brjod med sems kyang chags min te/ /brjod du med phyir 'dod chags bzhin/ /gal te sems ni chags pa yi / / rnam par shes pa chags 'dod de/ /shel la tshon chags blo bzhin na/ /de'i blo ji ltar chags nyid yin/ /de ltar chags pa med pa'i phyir/ /'dod chags rtog pa kun rdzob yin/ /'dod chags bzhin du chos rnams kun/ /ci rigs par ni shes par bya/ /dngos po rdzas la rten rigs na//de yang de las dbyer yod min/ /de phyir 'dod chags ji bzhin du/ /sems la'ang chags pa 'thad mi 'gyur/ /'dod chags chags las gzhan mi rigs/ /chags pa ma bzung gzung med phyir/ /chags pa nyid bzhin tha dad na 'ang / /des ni mi chags gzhan bzhin no/ / dngos po rnam par rig pa'i sems/ /'dod chags las gzhan yod min te/ /dmigs pa la sogs mtshungs phyir dang / /tha dad rgyu gzhan med phyir ro/ /de phyir 'dus pa gcig rang nyid/ /skyes la ltos nas 'dus pa can/ /tha dad bstan pa nyid 'dod de/ /me tog rgyas pas shing bzhin no//de spangs phyir ni mya ngan 'das/ /mi rigs de nyid mi 'thad phyir/ /mya ngan 'das pa don dam du/ /dngos dang dngos med mtshan nyid min/ /gal te mya ngan 'das dngos na/ /dngos po yin phyir de 'dus byas/ /gnyen po ma yin 'dus byas phyir/ /dper na 'dus byas 'gags pa bzhin// gal te dngos med gzhan brten 'gyur/ /dngos po med phyir zhig pa bzhin/ /de ni gnyen por mi 'dod de/ /gzhan la brten phyir zhig bzhin no/ /de ni 'dus ma byas mi rigs/ /dgag pa gong du bstan pa'i phyir/ /grangs can dag gis rab brtags pa'i /grol ba'i sems las khyad ci yod/ /nyon mongs rnam rtog gtsub shing las/ /byung ba rang gi ngang zad pa/ /de la bsags pa yod min pas/ /gang zag khyod thar mi zad 'gyur/ /skye ba med la rtog pa yang / /de bzhin med phyir tshul nyid mtshungs/ /zad pa can nam zad med na//gang gi zad pas thar pa smros/ /rang bzhin stong nyid rtogs pa'i phyir/ /de yi blo yang zlog gyur pas/ /zad med mi zad chos nyid 'thob/ /thob pa med pa'i tshul gyis so/ /yang dag ji bzhin yongs rtog pa/ /bdag la phan pa 'dod pa dag /lta ngan nad dri ngan bsgos pa'i/ / sgregs pa'i tshig la rten mi byed/ /phyin ci log dag yod pa'i phyir/ /'dod chags yod par mi rigs te/ /'dod chags bzhin du brtags pa'i phyir/ /rtog pa de yang kun rdzob pa / /sems dang sems las byung ba yi/ /ngo bo nyid phyir sngar bkag phyir/ / gang gi de ni chags 'gyur ba'i/ /'dod chags chags pa'i dngos nyid med/ /des ni sdang dang rmongs la sogs/ /so sor bshad pa byas par 'gyur/ /de ltar bcings thar ma grub phyir/ /ngo bo nyid med g.yo ba med/ /sa ni don dam nyid du na/ /sa las gzhan min nyid mi 'dod//rgyu dang ldan phyir rlung bzhin dang / /dngos po yin phyir shes pa bzhin/ /sa las don dam nyid du na/ /chu ni gzhan par mi bzung ste/ /skye dang ldan phyir rdzas las ni/ /sa gzhan min pa ji bzhin no/ /sa la sogs pa sgra blo dang / /las dang mtshan nyid tha dad pas//de dag gzhan nyid mi 'dod de/ /bsgrub bya'i chos dang mi ldan phyir/ /gzugs kyi bdag nyid mi gzhan yang / /tha snyad yod phyir ma nges 'gyur/ /yongs su brtags pa ma grub phyir/ /de don ma grub nyid du 'gyur/ /sgra sogs bye brag tha dad kyang / /de phyir de dag 'khrul par 'gyur//khyad par brjod par gyur kyang ni/ /'gal bas nges par zlog par 'gyur/ /gnyi ga nyid kyang mi rung ste/ /'gal phyir me la grang dro bzhin/ /gzhan dang gzhan min phyogs dgag pa/ /bstan phyir de yang bzang po min/ /gnyi ga'i bdag nyid nyid yin yang / /kun la grags pa'i cha dper bstan//des na gzhan la dpe med pa/ /rab tu skye bar mi 'gyur ro/ /de ni ltos nas 'grub pa ste/ /gnyis las gang yang rung ba zhig /sngar ma grub na mi 'grub phyir/ /yid kyis rnam par brtags par zad/ /gnyi gar smra ba thams cad la/ /dgag pa'i tshul yang de nyid do//de ltar 'di skad bsgrub bstan pas/ /ngo bo nyid yod nyid ma grub/ /de ltar 'dus byas chos de dag /bsdu bas rnam par brtags pa yin/ /'dus ma byas ni 'gog gnyis dang / /nam mkha' dang ni de bzhin nyid/ /so sor brtags te 'gog pa ni/ / don dam du na dngos po min/ /rtag dang rang bzhin mi 'gyur phyir/ /mo gsham bu yi gzugs bzhin no/ /ma skyes phyir dang rgyu med phyir/ /de bzhin las kyang med phyir dang / /'dus byas ma bsdus phyir dang ni/ /'gag pa med pa'i phyir yang ngo / /gang gi 'bras bur gang 'dod pa//de ni de'i rgyu ma yin te/ /ma skyes la sogs gtan tshigs kyis/ /glang chen glad kyi rwa bzhin no/ /ma skyes rgyu dang ldan pa yi/ /'bras bur mi 'dod shes par bya/ /'bras bu yin phyir sbrang rtsi ni/ /mkha' min sogs rgyu ldan min bzhin/ /des ni nam mkha' de bzhin nyid//phyogs dang dus dang bdag la sogs/ /'dus ma byas pa ji snyed pa/ /bkag par mkhas pas shes par bya/ /rdzas dang gtso bo srog la sogs/ /mu stegs brtags pa'i shes bya dag /rigs dang lung la mkhas rnams kyis/ /ci rigs par ni dgag par bya//rang dang gzhan gyis grub pa'i phyir/ /dngos po rnams la bdag btags pa/ /mkhas pas bdag med rtogs bya zhing / /de nyid shes pa'i bdud rtsi btung / /yang na rnam rtog dra ba yi/ /rgyun 'brel de dag la sogs pa/ /dngos po skye bar 'dzin brten pas/ / nan gyis byis pa 'khrug par byed/ /gang tshe mkhas pa rig sgron gyis/ /yang dag ji bzhin yongs rtogs pa/ /de tshe skye bkag de zhi bas/ /spros pa nye bar zhi bar 'gyur/ /de la re zhig bdag skye ba/ /kun rdzob tu yang mi rigs te/ /bdag nyid yod phyir dper bya na/ / zho ni bdag las mi skye bzhin/ /dngos rnams bdag las ma skyes te/ /dngos po yin phyir skyes bu bzhin/ /ma skyes pa la bdag med de/ /ma skyes phyir na mkha' min bzhin/ /nam mkha'i me tog med pa'i don/ /mkha' la sogs par khyod 'dod pa/ /de dag nam mkha'i me tog min//de phyir kho bo'i phyogs med min/ /gal te rgyu la 'bras bdag yod/ /de las de ni skye snyam zhing / /dngos rnams de las skye ba ni/ /bdag las skye ba nyid 'dod na/ /de la gzhan min bdag bzhin na/ /rgyu ni rgyu min nyid du 'gyur/ /ma skyes phyir ni rgyu min pa/ /ci zhig yin zhing gang gi rgyu//'bras bu bdag nyid nyid yin na/ /rgyur brtags pa ni don med 'gyur/ /de nyid las ni de skye na/ /bskyed dang bskyed bya gcig tu 'gyur/ /gal te 'o ma zho nyid du/ /gnas pas gnod pa med snyam na/ /pha ni bu nyid mi 'gyur bas//gnod pa med pa ma yin no/ /mi mthun phyogs ni med pa'i phyir/ /gtan tshigs 'gal ba nyid mi 'dod/ /de ltar re zhig dngos po rnams/ /bdag las skye bar mi rigs so/ /ngo bo nyid ni med pa'i phyir/ /gang zhig gang las gzhan du 'dod/ /glang ru dang ni ri rtse las/ / rta ru gzhan du mi 'dod bzhin/ /mig la sogs pa rkyen gzhan rnams/ /don dam du na mig sogs kyi/ /rnam shes skyed par byed ma yin/ /gzhan phyir rtsi skyang la sogs bzhin/ /gzugs kyi blo la sogs pa dag /brjod 'dod mi sogs rgyu can min/ /gzhan phyir snga na med pa'i phyir//dper na bum snam la sogs bzhin/ /ma skyes pa yi gzhan nyid ni/ /kun rdzob yin pas don dam min/ /gzhan las skye ba nyid kyang ni/ /rigs pa ma yin gzung bar bya/ /skyes pa brjod du med pa la/ /skye ba don med nyid du 'gyur/ /ma skyes pa la skye med de//ma skyes phyir ni mkha' min bzhin/ /skye bzhin skye bar 'dod pa la/ /brgal zhing brtag pa mtshungs par 'gyur/ /brjod du med la 'ang de med de/ /brjod du med phyir gzhan bzhin no/ /yang na mig la sogs pa dag /brtags pa'i bdag nyid nyid kyis stong / /byas pa'i phyir dang 'jig pa'i phyir//dper na sgyu ma'i 'o ma bzhin/ /bsgrub dang mtshungs par bkag pa'i phyir/ /cig shos kyi ni the tshom med/ /sgyu ma'i bdag nyid ma brtags pa'ang / /yang dag tu na log par 'dod/ /la la'i 'dod chags rgyu yin phyir/ /dper na brtags pa de nyid bzhin//grags pa'i chas ni de grub phyir/ /kho bo'i dpe ni med ma yin/ /yang na mig la sogs pa ni/ /yang dag tu na dngos nyid stong / /byas pa nyid phyir 'jig nyid phyir/ /bdud kyis sprul pa'i sangs rgyas bzhin/ /dngos po rnams kyi dngos nyid gang / /yang dag tu na dngos de med//byas phyir dper na chu yi ni/ /tsha ba nyid dang brtan nyid bzhin/ /dngos rnams rang gi bdag nyid du/ /skye bar 'thad pa ma yin pas/ /gzhan gyi dngos por mi skye ste/ /ba lang bong bur ma mthong bzhin/ /rgyu la sogs pa'i rkyen gzhan las/ /skye ba kun rdzob tha snyad yin//de phyir khas blangs gnod pa med/ /de dag yang dag nyid ma yin/ /yod la rkyen rnams mi rigs te/ /med la'ang mi rigs yod med phyir/ /de las gzhan bzhin rkyen ma skyes/ /rkyen rnams su ni ji ltar 'gyur/ /rgyu ni 'bras bu bskyed ma yin//de yis stong phyir de gzhan bzhin/ /skye bar 'dod pa'ang des bskyed min/ /snga na med phyir de gzhan bzhin/ /des ni skyes dang ma skyes dang / /skyes bzhin skyed pa mi byed de/ /nyes pa bstan phyir ma skyes pa'i/ /rgyu ni yang dag nyid ma yin/ /skyes pa dmigs dang mi phrad de//skyes la'ang skye ba don med phyir/ /ma skyes pa yang ma skyes phyir/ /dper na mi skye chos bzhin no/ /skye bzhin phrad par 'gyur snyam na/ /de yang dmigs pa med par med/ /yan lag ma tshang ba la ni/ /skye ba'i bya ba 'jug mi 'dod/ /yang na sems dang sems byung rnams//yang dag dmigs pa yod mi 'dod/ /skye bzhin phyir dang gzung ba'i phyir/ /dper na gzugs la sogs pa bzhin/ /yang na de dag dmigs bcas pa/ /dus gcig phyir na de mi rung / /de ltar dmigs pa yod min pas/ /gang zhig gang gis dmigs par 'gyur//ma skyes pa la 'gag med de/ /ma skyes nyid phyir mkha' min bzhin/ /'gags pa la yang 'gag med de/ /'gags phyir dper na shi ba bzhin/ /ma 'gags pa la'ang ma 'gags phyir/ /da ltar 'jug pa'i mar me bzhin/ /'gag bzhin pa la mi 'dod de//dgag pa gong du bstan phyir ro/ /de yang dus mnyam nyid cig gam/ /yang na dus gzhan 'gyur grang na/ /mi rigs 'gag bzhin yin pa'i phyir/ /dgra bcom sems kyi tha ma bzhin/ /dngos po yod pa don dam du/ /mi rigs skye ba med pa'i phyir/ /mo gsham bu yi yod pa bzhin//de phyir bdag po med par 'dod/ /'bras bus stong ngam mi stong pa'i / /rkyen zhig bdag por 'gyur grang na/ /stong pa ma yin des stong phyir/ /dper na mig ni sgra blo bzhin/ /sbyang la sogs na gnas pa yi/ /rgyu tsam yod pa nyi tshe la//'bras bu 'bras bur mi 'gyur zhing / /med pa khyod la 'bras bur 'gyur/ /gal te 'bras bu'i nus 'bras na/ /de las gzhan pa'i rgyu ci yod/ /de las gzhan pa ma yin la/ /gzhi dang bzhag pa'i dngos mi 'dod/ /'bras bu'i ming tsam nyid la ni/ / dper na mkha' la mkha' gnas bzhin/ /gal te de nyid rgyu yin na/ /gang gis mi gtong de cir yod/ /yod la skye ba med pa'i phyir/ /gang zhig gang gis bdag por 'dod/ /med las rkyen yang med pa'i phyir/ /gang zhig gang gis bdag por 'dod/ /gal te bum sogs skyes mthong bas//mthong la gtan tshigs don med de/ /mngon sum dang ni grags pa yi/ /gnod pas gnod par 'gyur zhe na/ /bum pa la sogs skye ba dag /byis pa'i blo dang mthun mthong ba/ /gang phyir de ni mi 'gog pas/ /de phyir ji skad smras skyon med/ /gzugs la dmigs pa'i blo la ni//yang dag tu na rang rig med/ /de ma skyes phyir kho bo la/ /de yi gnod pa med phyir ro/ /mngon sum blo ni don dam du/ /don bzhin nyid du mi rigs te/ /byis pa'i blo dang khyad med phyir/ /mgal me'i 'khor lo'i blo bzhin no/ /de yi spyod yul dngos min te//'dus byas yin phyir bdag blo bzhin/ /gzugs la sogs pa rdzas min phyir/ /nged la mngon sum gnod pa med/ /mkhas pa'i tshul la spyod pa la/ /grags pa'i gnod pa yod ma yin/ /de nyid la ni ma rig pa'i/ /ling tog ldongs pa'i tshig skabs min/ /yod la'ang skye bar mi 'dod de//yod pa ci phyir skye bar gyur / /yod pa rags par mi byed de/ /snga na med dang phyis 'byung phyir/ /mig rags pa nyid gang yin pa / /de ni rkyen gyis ma byas te/ /snga na med phyir rdza mkhan bzhin/ /shes bya min phyir za po bzhin/ /za po la sogs kun rdzob tu//thun mong yin par 'dod pa'i phyir/ /de phyir nged la gang du yang / /dpe yi skyon du 'gyur ba med/ /gal te gsal ba skyon med na/ /gang gis ci gsal ji lta bu/ /gal te de dag 'di skad ces/ /dper na mar mes bum pa bzhin/ /yod la mngon gsal byed phyir ro/ / kun rdzob tu yang mar mes ni/ /bum pa snang dang bcas pa dang / /de yi blo'am gnyen po dag /skye bar byed pa nyid yin no/ /mngon par mi gsal gsal mi byed/ /mi gsal phyir na mkha' min bzhin/ /rang tshul gyis kyang dper bya na/ /gtso bo za po bzhin du bstan/ /gal te de yang mngon gsal na//za po kun 'gro ma yin zhing / /rgyu med ma yin shes yod min/ /mi gsal ba yang nyams par 'gyur/ /gal te gtso bo mngon gsal na/ /khyod kyi gtso bo bya ba dang / /dpag yod gsal bar thal 'gyur te/ /de ni de dag min par grags/ / gang gis gsal byed gang dag 'dod/ /de dag de gsal byed mi 'dod/ /rgyu nyid la sogs gtan tshigs kyis/ /rgyu spun la sogs zho min bzhin/ /gal te rgyu spun la sogs la 'ang / /de nus yod phyir dper med na/ /de min rgyu spun la sogs dngos/ /de dag de gsal byed min phyir//bdag dang gzhan las skye ba dang / /bdag nyid yod dang med mi 'dod/ /gnyi gar smra ba yod min te/ /rigs pas gong du brtags phyir ro/ /kun rdzob tu yang 'bras bu ni/ /rkyen rnams kyis ni gsal mi 'dod/ /de zhig bar du rjes sgrub phyir/ / sa la sogs pas bum pa bzhin/ /mig ni kun rdzob nyid du yang / /glo bur skye bar mi 'dod de/ /spyi dang khyad par ldan pa'i phyir/ /de ni dper na bum pa bzhin/ /'bras bu yin phyir rim skye'i phyir/ /'jig pa'i phyir dang yongs 'gyur phyir/ /rgyu rkyen nges pa'i phyir dang ni/ /skye ba'i phyir yang shes par bya//gal te 'jim gong tshe gzhan la/ /'gags pa mi skye zhig pa'i phyir/ /'bras bu yin phyir dper na ni/ /bum pa bzhin du 'dod ce na/ /ji ltar bum pa bum pa yi / /ngo bo nyid 'gags mi skye ba/ /de ltar 'jim gong 'dod na ni/ /'dod pa nyid ni sgrub pa yin//'on te 'gags pa rgyun min na/ /des na gtan tshigs 'gal ba nyid/ /gal te rgyun nyid ma nyams na/ /des na 'khrul pa nyid du 'gyur/ /mngal nas sngon rol blo la ni/ /mdun rol kho nar 'gags blo yod/ /shes bya gzhan gyis de gzhan phyir//yang na blo phyir de 'og bzhin/ /tse'i tra la ni sgra blo dang / /gzugs blo skye ba gang yin pa/ /de gnyis mi gcig yul gzhan phyir/ /dper na rgyud gzhan dag gi bzhin/ /de phyir pha rol phyir yang ni/ /dpe med par ni mi 'gyur te/ /blo phyir de yang gcig nyid min/ / gzhan blos 'khrul par 'gyur phyir ro/ /gal te med smra byis pa yis/ /'chi 'pho'i sems la mtshams sbyor med/ /'chi 'pho'i sems phyir dgra bcom gyi/ /tha ma'i sems bzhin sgrub byed na/ /gtan tshigs ma nges nyid 'gyur te/ /'das pa'i 'chi 'pho'i sems kyis so//tshe rabs dran la sogs yod dang / /tshul smras phyir na de yang yod/ /'phags pa min pa'i 'chi 'pho'i sems/ /sems gzhan bskyed pa nyid yin te/ /ma rig pa dang bcas pa'i phyir/ /sems de skyed par byed pa bzhin/ /gal te lus dang dbang blo dag /rang gi las kyis skyed mi 'dod/ /zhig phyir dper na bum pa bzhin/ /de phyir 'jig rten pha rol med/ /de nyid kyis ni de ma byas/ /de gzhan gyis kyang ma byas phyir/ /'jig rten rang gi las bskyed min/ /gzhan 'di nged la ci zhig gnod/ /las kyis skyed nyid ma yin la//dpe ni yod pa ma yin no/ /shing la sogs pa dus skye ba/ /sems can las kyi dbang gis te/ /sems dmyal gnas dang mtho ris na/ /mtshon dang dpag bsam shing skye bzhin/ /'byung ba rnams la blo gros ni/ /mtshan nyid mi mthun ji ltar 'byung / /'byung ba sems med rnams las ni//shes pa yod pa nyid skye ste/ /skye can yin phyir myos mthu dang / /me shel las ni me bzhin no/ /myos mthu shes yod ma yin pas/ /khyod kyi dpe ni med pa nyid/ /rgyu rnams rigs mthun yin pa'i phyir/ /gtan tshigs kyang ni 'gal ba nyid/ /nang gi 'byung ba rnams kyang ni//shes pa yod pa ma yin te/ /sa la sogs pa'i dngos phyir dang / /'byung ba yin phyir de gzhan bzhin/ /de phyir mngal nas sngon rol sems/ /sems gzhan sngon du song yin par/ /mkhas pa rnams kyis shes bya ste/ /'dzin pa yin phyir de 'og bzhin//be'u yang sngon chad goms byas pas/ /byung ma thag tu zas tshol byed/ /zas kyi don du skyod pa'i phyir/ /dper na dbang po smin pa bzhin/ /khab long gis ni rdo bskyod pas/ /gtan tshigs ma nges nyid ma yin/ /de ni zas za mthong ba'i phyir/ /ma grub nyid kyang ma yin no//dbang phyug 'jig rten byed po min/ /la la'i dga' ba'i rgyu yin phyir/ /dper na dbang phyug dga' byed pa'i/ /byed po dbang phyug ma yin bzhin/ /dbang phyug kun gyi rgyur mi 'dod/ /ma skyes phyir dang rgyu med phyir/ /dper na nam mkha'i me tog ni//kun gyi rgyur ni mi 'dod bzhin/ /'gro ba ma lus 'di dag gi /rgyu ni dbang phyug rab tu min/ /sems dang ldan phyir dper na ni/ /glang rdzi 'gro rgyu rab min bzhin/ /dbang phyug gcig pu 'ga' yang med/ /dngos rnams tshogs las 'grub pa'i phyir/ /byed po gcig pu 'ga' yang med//de phyir ma nges nyid ma yin/ /gal te mig sogs dbang phyug bcas/ /mang phyir bran bzhin 'dod ce na/ /ma skyes dbang phyug gcig mi 'grub/ /dbang phyug de las zlog par 'gyur/ /ci ste byed por bcas 'dod de/ /bkod phyir bum sogs bzhin zhe na//gal te khyad par ma bstan pa'i/ /byed po yin na grub pa sgrub/ /ci ste rtag cig phra sogs kyi/ /khyad par gyis ni khyod dpe med/ /khyod kyi de ni mi rtag dang / /gzugs can skyes nyid skyon du 'gyur/ /gal te sems can snod bgrang ba'i/ /'jig rten sna tshogs rgyu yi las/ / dbang phyug yin na kun rdzob tu'ang / /grub pa nyid la rab tu sgrub/ /des ni dus dang skyes bu dang / /gtso bo rdul phran khyab 'jug dag /'gro ba 'di yi rgyu min par/ /dgag pa khong du chud par bya/ /gal te lta ba'i mun sel ba/ /gang phyir sangs rgyas 'byung de'i phyir/ /de bzhin skye mched skye 'dod na//lan du rung ba ma yin no/ /dus med skye ba yod min na/ /gang la lta ba gang zhig 'dod/ /de yod ma yin rtogs bya'i phyir/ /sangs rgyas 'byung ba byed po nyid/ /gal te lha dang lha min gcig /des na ji ltar rtag mi 'gyur/ / gal te lha dang lha min gzhan/ /ji ltar chad par mi rigs 'gyur/ /brjod min bum pa bzhin na yang / /chad pa ji ltar spong bar 'gyur/ /yin dang ma yin nyid yin yang / /mya ngan 'das tshe gcig 'da' med/ /gal te 'gags pa skye gyur na/ /des na ji ltar rtag ma yin/ / 'gags pa skye ba med gyur na/ /ji ltar chad smra nyid ma yin/ /rgyun ni rdzas su med pa'i phyir/ /rtag chad de dag ga la yod/ /de med phyir na ma skyes la/ /rtag med chad med rigs pa yin/ /gal te sdug bsngal mi bskyed phyir/ /sangs rgyas rnams ni chos ston pa/ /de phyir de yi 'bras yod phyir//skye ba yod par 'dod ce na/ /gal te de ni skye 'dod na/ /de ni sngar bzhin skye med phyir/ /skye ba med pa de 'bras min/ /de yongs shes pa de'i 'bras yin/ /de ni bdag gis byas mi rigs/ /de nyid kyis de ma byas phyir/ /gzhan gyis byas par mi 'dod de//gzhan gyis gzhan byed 'gal ba'i phyir/ /sdug bsngal rang rgyud skye mi 'dod/ /sems can la sogs med phyir dang / /rdzas med phyir dang dbyer med phyir/ /sdug bsngal de la rgyud kyang med/ /gal te mig sogs 'du byed rnams/ /de nyid du na skye can te//sems can ming du brjod pa'i phyir/ /sangs rgyas nyid du sgrub byed na/ /nged la sangs rgyas skye chos min/ /de phyir de yod ma yin la/ /de bzhin de skye yod min te/ /bdag bzhin sgyu ma bzhin 'byung yod/ /gzugs ni yang dag nyid du na/ /sangs rgyas ma yin rtogs bya'i phyir//'khor los sgyur bzhin rnam shes min/ /rang gzhan snang phyir mig 'phrul bzhin/ /phung po gzugs can sangs rgyas min/ /phung po bsdus pa yin 'dod phyir/ /skye 'jig chos can yin phyir dang / /shes bya yin phyir gzugs bzhin no/ /sku ni sangs rgyas yin mi rigs//de zhig 'jig pa'i skyon phyir dang / /gzhan gyi mtshan nyid med pa'i phyir/ /bdag bzhin de ni ga la yod/ /brjod min rdzas med min 'dod de/ /snga ma bzhin du gsal ba'i phyir/ /bum pa bzhin du brjod min na/ /de ni ji ltar sangs rgyas 'dod//rten cing 'brel par 'byung mthong bas/ /chos dang sangs rgyas mthong ba'i phyir/ /skye mched skye yod mi 'dod de/ /snga ma bzhin du bsal phyir ro/ /bdag dang gzhan gnyis rgyu med min/ /yod med rtag dang mi rtag min/ /gzhan dang gzhan min skye med pas//rtag dang chad pa rnam par spangs/ /skye ba yod min med ma yin/ /yod med ma yin de gang na/ /de mthong ston pa mthong 'gyur bas/ /ji lta bur ni shes par bya/ /de phyir ngo bo nyid smra'i tshig /'dod pa rnam par nyams pa yin/ /gang la skye ba sgyu ma yi / /skye ba yod pa de la rung //smras pa'i nyes pa'i dri bsal bas / /dam chos sgron ma rab bstan phyir/ /mdzad pas phan thogs tshul gyis ni/ /kun rdzob tu ni sangs rgyas mthong / /de ni de nyid mthong min te/ /sgyu 'dra yang dag ma yin phyir/ /rab tu brtag min rnam shes min//brtag bya ma yin dpe med pa/ /mtshan ma med cing snang ba med/ /rnam rtog med cing yi ge med/ /lta ba'i blo yis rtogs bya ba/ /mthong ba med pas de mthong yin/ /de ni don dam nyid du na/ /bdag las ma yin gzhan las min/ /gnyis las ma yin rgyu med min//yod med ma yin gzhan ma yin/ /sred med dbang phyug skyes bu dang / /gtso bo rdul phran la sogs pa'i/ /rgyu las skyes dang gsal bya yi/ /dngos po 'ga' yang yod ma yin/ /de la ngo bo nyid dang las/ /mtshan gzhi mtshan nyid brten pa dang / /gcig nyid gzhan nyid kun nyon mongs//rnam par byung bar bya brten pa/ /dper na mkha' la lcag 'debs dang / /tshon gyi ri mo'i las dang ni/ /sa bon dag ni skye med ltar/ /rtog pa thams cad skye ba med/ /rab rib bral bar gyur pa'i mig /rnam dag dri ma med pa la/ /skra dang sbrang bu zla gnyis dang //rma bya'i mdongs dag mi snang ltar/ /mkhas pa nyon mongs shes bya yi/ /sgrib mun rab rib bral gyur cing / /yang dag mkhyen spyan dri med la'ang / /de bzhin ci yang snang ba med/ /dper na gnyid log gnyid dbang gis/ / bu dang bud med gzhal med khang / /gnas la sogs pa mthong gyur pa/ /sad na de la mi mthong ltar/ /de bzhin kun rdzob shes pa dag /blo gros mig ni bye gyur cing / /mi shes gnyid dang bral gyur nas/ /sad pa'i tshe na mi mthong ngo / /dper na mtshan mo mun khrod na/ / 'byung po yang dag mi mthong ba/ /nyi ma shar cing mig bye'i tshe/ /snang bar gyur pa ma yin ltar/ /de bzhin mkhas pa yang dag gi /shes pa'i nyi mas mi shes pa'i/ /bag chags ma lus bcom pa'i tshe/ /sems dang sems byung yul mi mthong / /dngos rnams ngo bo nyid yod par//mi mthong dngos nyid ma grub phyir/ /yang na dngos nyid skye med phyir/ /sgyu ma'i glang chen ji bzhin no/ /dngos rnams ngo bo nyid yod par/ /mi mthong kun rdzob skye yod phyir/ /yang na rgyu dang ldan pa'i phyir/ /sgyu ma'i glang chen ji bzhin no/ /dngos rnams med ces bya ba'i blo//don bzhin yin par mi 'dod de/ /rtog pa'i sgo nas grub pa'i phyir/ /mtho yor la ni mi blo bzhin/ /yang na yang dag ma yin blos/ /dmigs bya'i dngos bdag log par 'dod/ /rtog pa'i shes pa'i yul yin phyir/ /smig rgyu la ni chu blo bzhin/ /yod med blos ni rtogs bya ba//bkag phyir de bzhin mkhas rnams kyis / /rnam par mi rtog blo gros ni/ /skye ba med pa'i tshul gyis skye/ /chos rnams thams cad stong pa'i phyir/ /de ni gtong ba'i sgo nas kyang / /mi rtog blo gros mi 'dod min/ /de ni sngar bzhin bgag phyir ro//gang phyir stong nyid stong sogs kyi/ /ngo bo nyid kyis stong de'i phyir/ /mkhas pa stong pa nyid la yang / /stong pa nyid du lta mi 'gyur/ /dngos po'i bdag nyid snang med pa/ /mi rtog blo yi spyod yul yang / /don bzhin ma yin dmigs bya'i phyir/ /chu zla la ni zla blo bzhin/ / rnam par mi rtog don yul gyi/ /blo rnams rtog pa med pa'ang brdzun / /bdag med la sogs ngo bo'i phyir/ /dper na rnam rtog bcas blo bzhin/ /shes bya rnam kun ma grub phyir/ /gang la rnam par mi rtog pa'i/ /blo yang skye bar mi 'gyur ba/ /de nyid mnyam med de mkhyen gsung //de rtogs phyir na gang zhig la/ /blo skye med pas sangs rgyas dngos/ /rnam rtog gnyid ni sangs phyir dang / /rtog pa med pas rgyas phyir ro/ /yongs shes byas sogs mthar thug dang / /mnyam nyid rtogs par gyur pa dang / /sprul pa dag gis skal ldan gyi/ / blo yi pad ma kha 'byed phyir/ /chos rnams mtshan nyid tha dad pa/ /skyed dang dgag pa ma mdzad par/ /mnyam pa nyid kyi mnyam nyid dang / /bdag gzhan bdag nyid mnyam pa nyid/ /dmigs med nyid du rdzogs rgyas shing / /rdzogs sangs rgyas med sangs rgyas pas/ / lha mir bcas pa'i 'jig rten na/ /de ni rdzogs sangs rgyas zhes brjod/ /chos rnams gsal dang gzhag med phyir/ /chos nyid ji lta ba bzhin du/ /gang phyir de ni gshegs gyur pa/ /de phyir de ni de bzhin gshegs/ /rtogs bya gtan dang ma lus dang / /mthar lhung rnam par spangs pa dag /rtogs med tshul gyis rtogs pa yis / /bder gshegs phyir na bde bar gshegs/ /gzhal med gzhal yas rtogs pa'i phyir/ /grangs med gzung du med pa'i phyir/ /bsam yas sems yul ma yin phyir/ /bstan min bstan du med pa'i phyir//brtag med de ni 'di'o zhes/ /rnam kun brtag tu med pa'i phyir/ /gsal min gsal byed med pa'i phyir/ /zhi ba gnod pa med pa'i phyir/ /brtag par brjod de snang med pa'i/ /bdag nyid nyid kyis rnam kun tu/ /rnam rtog med pas rtag phyir dang / /rtag tu don ni rab bsgrub phyir//zhi ba ngo bo nyid stong phyir/ /mtshan ma med pa dngos med phyir/ /mtshan ma nyid du mi 'gro dang / /mtshan ma med phyir de yang yin/ /mtshan ma med phyir snang ba med/ /snang med phyir yang mtshan ma med/ /mtshan ma med cing snang med pa/ /lta 'dod bdag nyid grol bas mthong //mi gnas mtshan ma med pa'i phyir/ /rnam par mi rtog mi gnas phyir/ /spros med rnam par mi rtog phyir/ /dmigs med der 'dzin med pa'i phyir/ /skye ba med pa rnam pa med/ /'gyur ba med pa 'od gsal ba/ /mnyam pa mi mnyam mu med pa//rnam par mi rtog mtshan nyid med/ /mkha' bzhin de la lta med par/ /bdag nyid chen po de dag lta/ /gang dag rnam par mi rtog pa'i/ /gnas pas lhun grub dri med mig /'dud par byed dang yid byed dang / /brjod la sogs pa gsal ba dag / mgon po la ni phyag 'tshal ba/ /de dag la ni gus phyag 'tshal/ /sangs rgyas la sogs sgro btags pas/ /sgrub dang rjes su mthun par bstan/ /de nyid du na rnam kun du/ /rnam brtag min phyir brjod mi 'dod/ /'di la tshig dang ldog 'gyur zhing / /'di ni sems kyi spyod yul min//'di la kun rtog ldog 'gyur zhing / /shes pa 'jug par mi 'gyur ro/ /grangs med bsod nams tshogs ldan zhing / /shes bya mtha' yas mkhyen gyur pa'i/ /sangs rgyas rnams kyi chos sku 'di/ /spros pa nyer zhi zhi ba yin/ /sha yi mig gis de lta min//lha yi mig gis blta ma yin/ /rtog bcas rnam rtog med pa yi/ /shes pas kyang ni mthong bar dka'/ /mtho ris sdig can yul min dang / /nyon mongs med pa de bcas min/ /nyi ma dmus long yul min ltar/ /de yang rtog ge'i spyod yul min/ / yod min med min yod med min/ /de las gzhan min gzhan ma yin/ /phra ba ma yin chen po min/ /gcig min ring min nye ba'ang min/ /de las cung zad ji ltar yang / /skye ba med cing gsal ba med/ /'di la 'ga' yang gnas pa med/ /'ga' yang bag la zhar mi 'gyur/ / tshangs la sogs pas gang mi rtogs/ /de ni tshangs pa dam pa yin/ /de ni bden pa dam pa zhes/ /thub pa bden pa gsung bas gsungs/ /'phags pa spyan ras gzigs dbang dang / /'phags pa byams pa la sogs pa/ /mkhas pa thub pa mang po dag /bsnyen med tshul gyis de bsnyen byed//de las dngos nyid mi gzhan dang / /des ni thugs su chud pa'i phyir/ /de bzhin gshegs pa'i skur 'dod de/ /gzhan gyis ma yin de ma rtogs/ /de nyid bsgoms pa goms byed pa/ /dmigs med gnas pa de la yang / /gang la yid ni chags 'gyur zhing //sdang 'gyur rmongs 'gyur ga la yod/ /sdug bral mi sdug phrad pa las/ /byung ba'i sdug bsngal ga las 'byung / /'jig rten chos kyis mi gos te/ /pad+ma la ni chus bzhin no/ /'khor ba las ni byung ma yin/ /'khor ba las gnod bral ba yin/ /mya ngan 'das pa thob ma yin//mya ngan 'das la gnas dang 'dra/ /nyon mongs me yis gdung ba med/ /nyon mongs ldan yang nam mkha' bzhin/ /sems med sems med ma yin te/ /snyoms par 'jug la gnas phyir ro/ /de ni shes rab lhun po'i rtser/ /'dzegs shing mya ngan med gyur kyang //snying rje'i dbang gis 'jig rten pa/ /mya ngan gdungs dang sdug bsngal blta/ /de ni de tshe snying rje yis/ /brlan pa'i mig gis 'jig rten pa/ /rnam rtog bzo las byung ba yi / /rtog pa'i dra bas dkris pa dang / /skye rga na 'chi'i zug rngu yis/ /rma btod na bar gyur pa dang //zhan dang bkren dang mtha' ngan dang / /mgon med dpung gnyen med pa dang / /sdug bsngal nye bar zhi 'dod pas/ /sdug bsngal chu bo cher lhung dang / /sdug bsngal rgyu dag spel ba'i phyir/ /rmongs pa'i yid kyis zhugs pa dang / /de nyid bdud rtsi zhi ba dang //spros pa nyer zhi ston ka yi/ /dri med mkha' la blos dpyod pa'i/ /snang med mig med kun bltas nas/ /snying rjes shin tu yid gdungs pa/ /de la phan phyir brtul zhugs can/ /rdo rje rin chen sra ba'i sems/ /sems can gtso bo legs bslabs pa/ / sbyin pa tshul khrims bzod pa dang / /brtson 'grus bsam gtan shes rab brtson/ /dus gzhan dang ni mthu bzhin du/ /shes rab dran pa sngon 'gro bas/ /sems can kun la phan pa'i phyir/ /sbyin la sogs pa'i ri bo las/ /byung ba'i chu klung bsod nams dang / /dri med dge ba'i chu ldan 'bebs//slong ba kun la dus kun du/ /phyi nang dngos po thams cad kyis/ /dbul dang slong ba'i sdug bsngal kun/ /rnam pa kun du sel bar byed/ /slong ba rnams kyi bsam pa dag /skad cig skad cig dgas rdzogs shing //dus kun mi zad 'bras bu yis / /'byor cing dpag bsam shing ltar byed/ /de ni gzhan phan bde skyid pa'i/ /bde 'gro kho nar skye bar 'gyur/ /yang na 'dod pas gzhan dag tu/ /gzhan phan bde ba skyed par skye/ /'gro ba de dang de dag tu/ /'khor bcugs rtag bzod mtha' yas dang //rgya mtsho bzhin du sgo kun nas/ /bsod nams chu bos yongs rgyas 'gyur/ /sems gnyen rnam par mi g.yeng dang / /shes bya rtogs dang mkhas pa'i blo/ /lhan cig skyes dang ldan gyur cing / /ji srid 'dod pa'i skal bar gnas//grangs med dpag tu med pa yi/ /ting 'dzin nges rtog blo dang ldan/ /'jig rten khams ni mtha' yas dag /rgyan rnams kyis ni brgyan par byed/ /bzo dang las sngon 'du byed dang / /las kyi rnam smin rab tu ston/ /'gro la phan pa bsgrub 'dod pas/ / ji ltar 'dod pa rab tu skye/ /sangs rgyas skus ni gang ba yi/ /'jig rten khams rnams ston par byed/ /ji ltar 'dod pa'i dus dang ni/ /zhing du rdzogs par byang chub ston/ /ye shes mig gis shes bya ba'i/ /de nyid thams cad ston par byed/ /chos rnams bzhag pa nyid rtogs shing //ming la sogs pa thob pa nyid/ /rdzu 'phrul rnam par 'phrul pa yis/ /mtha' yas zhing dag g.yo bar byed/ /dus gcig gam ni rim yang rung / /lus las 'bar dang 'bebs par byed/ /phyogs ni mtha' yas kun tu yang //rang gi 'od kyis spro bar byed/ /tshad med rmad byung bsam mi khyab/ /yon tan rin chen 'od 'bar ba/ /'jig rten rtsa lag sangs rgyas rnams/ /'khor dang bcas pa'ang ston par byed/ /gser dang nor bu bai DUr+ya/ /mu tig rdo rje mthon ka cher/ /ri bo'i dbang po che rnams dang //me nyid grang bar bzhed par byed/ /chen por gyur pa'i lus kyis su/ /rdo rje sogs la mi chags par/ /ngo mtshar byed cing skad cig gis/ /phyogs kun du ni 'gro zhing 'ong / /rang gi lus sam rdul phran la/ /dpag tu med pa'i 'jig rten khams/ / yang dag 'dzud kyang sems can la/ /gnod pa med pa'ang ston par byed/ /'jig rten khams rnams phra rab tu/ /phra rab de yi tshad nyid du/ /bsdus pa'am ni rgyas par yang / /bzhed pa tsam byed 'og stengs kyang / /de'i tshad 'od dang kha dog dang / /dbyangs dang spyod lam phun tshogs kyis//gdul bya 'dul bar 'dod pa'i phyir/ /tshangs pa la sogs 'khor du 'gro/ /snang bar 'gyur zhing mi snang 'gyur/ /de dag 'gas kyang mi shes dang / /gzhan gyis zil gyis gnon par yang / /byed de snying rjes bskul ba'i phyir/ /'gro ba'i gnas ni brjod rnams su//'gro ba dbang byas dgod 'dod pas/ /spobs sogs kyis ni dman pa la/ /spobs pa'i bde ba rab tu ster/ /dmyal sogs sdug bsngal gyis gdungs pa / /'od zer btang ba la sogs kyis/ /zhi bar byed cing lha dbang sogs/ / skal ba mnyam par 'gro bar byed/ /gdul bya ji bzhin sprul pa yi/ /sprul pa yis ni phyogs bkang nas/ /bstan pa rin chen char phab pas/ /'jig rten 'das pa'i bde ba bskyed/ /dus gsum tshad med lus nyid dang / /sangs rgyas zhing ni phun sum tshogs/ /'jig rten khams ni dpag med rnams//'jig pa dang ni chags pa yang / /rang lus bde bar gshegs zhing du/ /de yang rang lus bdag nyid du/ /rang gi zhing ni bde gshegs skur/ /bzhed pa tsam gyis byin gyis rlob / /ba spu'i khung dang 'od zer las/ /nam mkha' la ni rol mo'i sgra//sprul pa yis ni rab bton nas/ /thos na dga' bar 'gyur bas ni/ /mthar thug par ni gsal bar 'gengs/ /ka la ping+ka'i sgra dbyangs ni/ /zab cing rgya chen sgrogs pa yis/ /'jig rten rnams ni gsung gis 'gengs/ /mos pa'i dbang dang dbang po bzhin//zhi bar ro gcig zhi ba dang / /gdul bya rnams ni 'dul ba'i phyir/ /chos 'di rnams ni gsung bar mdzad/ /dman dang bag la nyal bcas dag /bde dang sdug bsngal sogs dang bcas/ /dman dang 'bring dang mchog rnams dang //yang dag gyi nom sogs de rnams/ /gang la ji ltar ji srid du/ /lus can rnams kyi sems 'byung ba/ /de rnams de la de bzhin dang / /de snyed mang rnams rig par byed/ /lha dang sprul pa phra mo dang / /de las bzlog par gyur pa dag /kun tu gzugs ni thams cad kyang //lha yi mig gis de dag mthong / /lha dang 'phags pa bkod dang sprul/ /gsal po'i sgra dang mir bcas dang / /ring na gnas dang bzlog pa dag /lha yi rna ba 'di yis thos/ /sngon gyi gnas rnams thams cad de/ /sems can rnams dang bdag nyid kyi/ / ming dang rigs kyi bye brag rnams/ /dran zhing gzhan dag gi yang dran/ /tha dad 'gro ba'i 'dod pa dang / /mi 'dod las 'bras sna tshogs gnas/ /'chi dang 'pho dang skye ba rnams/ /lus can kun gyi rig par gyur/ /'jig rten khams ni dpag med du/ /'di yis gdul bya 'dul ba'i phyir//dga' ldan gnas 'phos 'jug pa dang / /yang dag byang chub mngon par ston/ /rang gi 'dod pas dpag med pa'i/ /'jig rten khams kyi rdul mnyam pa/ /sangs rgyas zhing yang de snyed du/ /sems can rnams kyang de snyed kyi/ /gdul bya thabs kyis sprul pa ni//rang gi zhing nas ma g.yos par/ /rang gi 'dod pas lus sprul pa/ /re re las kyang de snyed lag /de snyed pa yi mgo las lce/ /so so kun nas de snyed spro/ /lag pa de dag gis bzung ba'i/ /me tog dris bkang sna tshogs pa/ /gang+gA'i klung gi bye ma snyed/ /lhun po'i tshad tsam dri spro zhing //rgyas pa mchog bzang dri dag dang / /rdzogs sangs rnam par sangs rgyas dag /'gro la phan pa byed pa'i mchog /shin tu gus pas mchod par byed/ /lan cig min par bstod pas bstod/ /rin chen gdugs dang bla re sogs/ /mu tig dra bas yongs brgyan pa//tshad med rin chen myu gu las/ /mche ba lta bu'i 'od zer 'phro/ /steng g.yogs ka ba 'bar bas dga'/ /mu tig phreng ba 'phyang ba dang / /rin chen sna tshogs du ma las/ /sna tshogs las kyis bzo sbyar ba/ /rin chen 'bar ba'i gzhal yas khang / / 'od zer sgron ma brgya snyed 'bar/ /shin tu mtho ba mkha' mnyam pa/ /rin chen 'od kyis phyogs khyab byed/ /de yis rnam grangs du ma yis / /bstan pa rtag tu mkhas pa des/ /thos nas gus pa gzhan dag la/ /lhag chad med pa'i yi ges ston/ /mkhas pa legs par bslabs pa des//bskal pa grangs med dpag med par/ /bsod nams ye shes stobs kyis 'phags/ /pha rol phyin rnams pha rol phyin/ /'di ni 'di ltar skyes bu mchog /rdzogs sangs nyi mar gyur nas ni/ /gdul bya'i sems can pad+ma'i mtsho/ / bstan pa'i 'od kyis rgyas par byed/ /dri ma med pas dri ma sbyong / /gangs phreng bsil ba'i 'od zer dang / /tsan+dan pas lhag bsung gi chus/ /lus can yid kyi nyon mongs mes/ /rab tu gdungs pa zhi bar byed/ /skye ba'i 'khor ba dba' klong can/ /'chi ba'i chu srin bcas mtsho las//theg pa gsum gyi gru chen gyis/ /'di yis skye bo myur du sgrol/ /bdag gis legs bshad chu rgyun gyis/ /thog ma med dus 'gro ba rnams/ /shin tu skom pa sel bar byed/ /yon tan gyis phongs kyang sel byed/ /srid pa'i dgon par lam stor bas/ / ma rig pas bsgribs lam ston byed/ /'gro rnams shes rab mig phye nas/ /mya ngan 'das par phyin par byed/ /nyon mongs sbrul gdug mche bas btab/ /rang la phan pa'i thabs la brgyal/ /ye shes sman ni yang dag pa/ /rig pa bstan pas 'gro rnams gso/ /srid par mgon med srog chags rnams//yun rings gnyid kyis log pa la/ /bstan pa rnga yi sgra dag gis/ /snying rje yid ni sad par byed/ /yun ring 'khor ba'i btson ra na/ /srid pa'i lcags sgrog gis bsdams pa/ /bdud bzhi las ni rgyal byas nas/ /bcings pa las ni grol bar byed//byin za ngoms pa med pa bzhin/ /lha dang mi yi yul dag gis/ /shes rab bdud rtsi'i ro bzang pos/ /lus can rnams ni tshim par byed/ /'khor du stong nyid seng ge yi/ /sgra chen sgra ni bsgrags pa yis/ /gdul dka' mu stegs myos pa ni//shes pas myos pa'i nga rgyal sel/ /dbang po chen po'i gzhu 'dra ba/ /'dom gang 'od kyis kun tu bskor/ /gzugs nas 'bar ba yongs rdzogs pa'i/ /mtshan dang dpe byad rnams kyi dpal/ /dpal nyid rgyan du gyur pa yi/ /yid dang mig ni 'phrog byed pa'i//gzugs ni mnyam pa'i gzugs med pa/ /mdzes pa thams cad zil gyis gnon/ /de yis rnam pa drug cu dang / /ldan pa'i gsung gi cho 'phrul dang / /bcas pas lha dang lha min mi/ /la sogs yid ni dga' bar byed/ /de yi gsung dang sku rnams kyis//yid bzhin nor bu dpag bsam ltar/ /gdul ba'i dbang gis phyogs kun tu/ /sna tshogs bdag po'i gzugs su bsgyur/ /de dag de ltar sogs grangs med/ /dpag med rmad du byung ba'i gnas/ /che ba'i bdag nyid mkhas pas lam/ /'di la brten nas thob par 'gyur//dbu ma'i snying po las de kho na nyid kyi shes pa tshol ba'i le'u ste gsum pa'o// //rtogs par dka' ba'i lugs 'di la/ /rtogs pa'i nus pa chung gyur pa/ /gnas min skrag pa'i dman mos dag /yang dang yang du rtsod par rtsom //ston pa'i rnam par mi rtog blo/ /sku la brten pa ma yin te/ /lus can yin phyir ba rdzi yi/ /lus la ji lta ba bzhin zer/ /yang dag lta sogs lam gyis ni/ /rdzogs pa'i sangs rgyas byang chub cher/ /'dren byed yang dag rab rtogs byed/ /byang chub yin phyir slob ma'i bzhin//ston pa'i dbang po khyad 'phags pas/ /kun mkhyen ye shes srid pa yin/ /lam gcig na yang 'dod pa bzhin/ /'ga' yi so so yang dag rig /shes bya'i sgrib pa zad byed pa/ /de yang lam de nyid kyis yin/ /sems las byung ba'i sgrib yin phyir//nyon mongs sgrib pa ji bzhin 'dod/ /theg chen du yang lam 'di yis/ /kun rig thub pa 'thob byed de/ /theg pa gzhan nyid yin pa'i phyir/ /rang rgyal theg pa bzhin du 'dod/ /mdo sde sogs su ma bsdus dang / /lam gzhan nye bar ston phyir yang / /theg chen sangs rgyas gsung ma yin//rig byed mtha' pa'i lta ba bzhin/ /chad par lta ba ji bzhin du/ /rgyu dang 'bras bur skur 'debs pas/ /sde pa bco brgyad khongs su yang / /gtogs pa med pas ma yin nges/ /gzugs la sogs la dmigs pa'i blo/ /rang rig nyid du yod pas kyang //mngon sum gnod pa gang yin des/ /skye med smra ba de la gnod/ /srid pa rnams ni de nyid du/ /skye med ces bya'i khyad par gyis/ /mngon sum dang ni grags pa dag /gnod pa 'di la med ce na/ /bgrod min la yang yang dag tu/ /bgrod par bya ste bud med phyir//bud med gzhan bzhin zer ba yi/ /skyon bcas tshig kyang skyon med 'gyur/ /bden pa mthong ba de nyid min/ /de nyid med par thal bar 'gyur/ /nam mkha'i lha yis bstan pa ltar/ /de nyid yin par mi 'dod do/ /phyi rol skye mched yod pa las/ / der snang ba yi blo 'byung bas/ /yod par rigs te sems nyid ni/ /yod la dga' ba ji bzhin gyis/ /gal te sems yod mi 'dod na/ /khyod kyi 'gro ba sems tsam min/ /'gro ba phyogs su bya ba dang / /gtan tshigs bsgrub pa khyod la med/ /de la sngar smras rigs pa ni//rang gi phyogs nyams dogs pas gzhan/ /mi 'dod gyur pa gang smra ba/ /de ni rigs pa ma yin no/ /ston pa'i rnam par mi rtog blo/ /bdag med pa la dmigs par 'dod/ /yul can gyi ni blo yin phyir/ /gang zag bdag med pa bzhin no/ /sbyor las byung sogs blo dag ni//'byung ba gal te 'gog byed na/ /shes bya kun du ma grub pas/ /blo gang gang gi rjes 'byung ba/ /de ni rtog med sngon byang chub/ /shes bya de nyid ma log phyir/ /de yi ngo bo rnam rtog sogs/ /bral ba'i blor ni mngon 'dod pas/ / de yi rten ni 'gog byed na/ /grub pa nyid ni rab sgrub byed/ /de ni zhi nyid sogs bstan pa/ /rtog pa rnams kyis sgro btags pa'o/ /mthong ba med pa rtog med pa/ /brjod pa med pa byed med pa/ /'tsho ba med pa rtsom med pa/ /de bzhin dga' med gnas med pa//de tshe lam ni de nyid kyis/ /sangs rgyas byang chub 'dod phyir bdag /grub pa sgrub pa'i skyon yang yin/ /bsgom nyid la yang btag par bya/ /ji ltar lung dang mi 'gal bar/ /rjes su dpag pa'i rjes 'brangs pa/ /'di ltar de nyid bsgom pa ste/ / de ni de bzhin mkhas pas 'dod/ /gang gis de rtogs te sangs rgyas/ /gzhan ni mi yi la du mtshungs/ /theg chen sangs rgyas gsung min zhes/ /zer ba 'di yang gtan la dbab/ /sngar bstan pa yi lam 'di yis/ /sangs rgyas byang chub thob mi nus/ /sdug bsngal rnam par rtogs byed phyir//rang sangs rgyas kyi theg pa bzhin/ /rjes su dpag pas gnod pa yang / /gzhan gyi phyogs la 'byung bar 'gyur/ /dpe ni ma grub pa nyid kyang / /de la zhugs pa bzlog par dka'/ /mi skye zad par shes pa ni/ /ji bzhin don gyi don dam min/ / 'khrul bzhin rnam rtog bcas pa'i phyir/ /de rtogs ji ltar de nyid yin/ /theg pa gzhan nyid rgyu yin zhes/ /zer ba de yi lan yang btab/ /ji ltar sgrib pa yod bzhin du/ /dgra bcom mya ngan 'da' bar rigs / /ma rig nyon mongs can spangs pas/ /de ni grol gyur sangs rgyas bzhin//de ni mi bden med pa'i phyir/ /dngos dang sprul pa'i sangs rgyas la/ /yang dag tu na theg chen gyi / /lam gyi sangs rgyas byang chub dag /sgrub min rtog bcas mtshan bcas phyir/ /'jig rten pa yi lam bzhin no/ /ji srid 'ga' zhig skrag pa yis//thag pa la ni sbrul zhes 'khrul/ /'khri shing bsdogs par shes pa ni/ /gnyen po'i phyogs kyis shes par 'byung / /des na gtan tshigs ma nges bcas/ /rgol ba'i smra ba spangs pa yin/ /kun nas nyon mongs gnyen po'i phyir/ /'dis ni lan yang btab pa byas//theg chen sangs rgyas gsung yin te/ /bdag med la sogs ston pa dang / /dkon mchog gsum gyi bdag nyid che/ /ston phyir slob ma'i theg pa bzhin/ /phyir rgol tshad mas gnod pa'i phyir/ /de yi gtan tshigs ma grub nyid/ /bla ma kun dga' pa ta li/ / sdug bsngal phung po sa pa dang / /'char byed stong pa 'char ba dang / /gang po spangs pa ram pa dang / /mya ngan 'das dang yul 'khor skyong / /zhes bya gzhan yang 'gro ba'i mdo/ /rtsa ba'i sdud par ma tshang bas/ /rgyas pa min par rtogs par bya/ / yang dag lta ba sngon 'gro ba/ / gang phyir theg chen las gsungs pa/ /de phyir gtan tshigs ma grub nyid/ /sdug bsngal skye ba bkag bstan pas/ /ma skye sdug bsngal yin mi 'dod/ /skyes pa sdug bsngal ngo bo na/ /de stong ci'i phyir khas mi len/ /'dus byas yin phyir sgyu ma'am/ /zag med phung po ji bzhin no//khyod ci sdug bsngal bden 'dod pa/ /yang dag lta ba'i blos 'dod pa/ /tshor ba sdug bsngal sdug bsngal yin/ /skye sogs sdug bsngal nyid ji ltar/ /mi rtag phyir na sdug bsngal na/ /rgyu dang lam yang sdug bsngal nyid/ /sdug bsngal rgyu yin phyir zhe na/ /kun 'byung sdug bsngal nyid du 'gyur//sdug bsngal nyid ni tshig tsam phyir/ /de shes ji ltar sdug bsngal shes/ /sdug bsngal yul can shes pa de / /de nyid du na bden pa min/ /sdug bsngal nyid du de shes phyir/ /phung sogs sdug bsngal blo bzhin no/ /rgyu ni sdug bsngal rgyu nyid du//mi rigs kun 'byung bdag nyid phyir/ /ral gris gshags sogs bzhin du'am/ /sems byung yin phyir lam bzhin no/ /sdug bsngal rgyu yi yul can gyi/ /blo de brdzun pa nyid du 'dod/ /rgyu sogs rnam par rtog pa'i phyir/ /sdug bsngal rgyu yi blo can bzhin//skye med 'gag pa yod min te/ /sngar smras pa yi dgag pa nyid/ /skyes pa 'gag na ma skyes la/ /nam mkha'i me tog bzhin mi rigs/ /gang tshe skyes pas de ma skyes/ /'gog pa nyid kyis 'gog yin par/ /mi 'dod de tshe mkhas pa khyod/ / ci zhig bden pa yod par smros/ /ma skyes pa yi 'gog pa yang / /yang dag tu na 'gog pa min/ /ma skyes pa yi 'gog yin phyir/ /so sor brtags min 'gog pa bzhin/ /'gog pa'i ngo bo nyid med na/ /khyod kyi lam gyis ci zhig len//ma skyes lam yang ji ltar yin/ /gang gis ci zhig thob par byed/ /lam gyis ngan grol thob min te/ /'dus byas yin phyir gzhan bzhin nam/ /'gog pa la ni dmigs pa'i phyir/ /de las gzhan pa'i 'gog pa bzhin/ /spyi la dmigs pa yin phyir ram//'dus byas yin phyir de bzhin du/ /sdug bsngal la sogs mthong ba brdzun/ /brdzun pa'i shes pa bzhin du 'dod/ /'dis ni yang dag rtog pa dang / /rtsol ba sogs kyang brdzun nyid phyir/ /lam gyi bden pa don dam du/ /mi bden par ni grub pa yin/ /des na bsgom de mi rigs la//sdug bsngal la sogs ma mthong rigs/ /mthong ba rnams kyis ma mthong gzugs/ /thams cad du yang de bzhin gnas/ /gal te blo ngan 'ba' zhig ni/ /bden pa mthong ba mi 'dod phyir/ /khyod ni thar par rigs min te/ /byis pa'i skye bo bzhin zhe na//sdug bsngal des sdug ma skyes phyir/ /su zhig thar pa gang la 'dod/ /grol ba'ang sgyu ma byas pa bzhin/ /'khrul pa'i dbang gis bstan pa yin/ /sdug bsngal la sogs gang dag rnams/ /gtan du ma mthong grol bar 'dod/ /de phyir dpe yang yod min la//de bzhin gtan tshigs ma grub nyid/ /yang dag lta ba sngon 'gro ba'i/ /ji ltar 'byung ba'i lam 'di nyid/ /theg chen du yang nyer bstan pas/ /de phyir gtan tshigs ma grub nyid/ /bden pa gnyis la nyer brten nas/ /sangs rgyas rnams kyis chos bsten te//'jig rten kun rdzob bden pa dang / /don dam nyid kyi bden pa'o/ /rig byed mtha' yang legs bstan gang / /de kun sangs rgyas gsungs pa yin/ /de phyir dpe ni ma grub ste/ /the tshom za na brtag par gyis/ /yod dang med pa'i rtog bral zhing //shes rab spyod pas gnas pa la/ /rgyu dang 'bras bu skur 'debs pa'i/ /lta ba gang yod 'dod pa gang / /rgyu dang 'bras bu 'brel pa dag /'jig rten grags pa ji lta bar/ /de bzhin de ni 'gog pa min/ /de phyir gtan tshigs ma grub nyid/ /dngos po mngon sum spyod yul gyi//kun rdzob byis pas gzung ba 'di/ /'dir ni lan yang snga ma bzhin/ /de yi gnod pas mi gnod do/ /mkhas pa'i lugs kyis brtags pa la/ /grags pas gnod pa ma yin te/ /ji ltar chos bdag med pa dang / /skad cig ma zhes brjod pa bzhin//gzugs kyi de nyid byis rnams kyi / /yul nyid 'gyur ba ma yin te/ /nang la rig pa ma sbyangs phyir/ /bdag sogs stong pa ji bzhin no/ /byis rnams blo la yang dag tu/ /gzugs kyi de nyid ldan pa min/ /ma rig rab rib kyis bsgribs phyir/ /mya ngan 'das pa'i spyod yul bzhin//srid pa rnams ni yang dag tu/ /skye med ces bya'i khyad par gyis/ /mngon sum dang ni grags pa dag /gnod pa bstan pas gnod pa med/ /yang dag par na chos rnams ni/ /zhi zhing mkha' dang mnyam pa la/ /bud med nyid kyang ma grub na//dpe yi gnod par ji ltar 'dod/ /bgrod bya bgrod pa bgrod po dang / /gsum po ji ltar yod bzhin du/ /bgrod min bgrod par sgrub byed pa/ /de bzhin skyon zhig 'dogs par 'dod/ /grags pas gnod pa nyid ni bden/ /khyad par can la ma grub phyir/ /des na mi mthun phyogs 'di la//bdag gi phyogs gnod nus pa med/ /spros pa med cing rang rig la/ /rnam rtog dri ma dang bral ba/ /du ma nyid dang gcig nyid bral/ /zhi ba de nyid mkhas rig pa/ /nam mkha'i lha yis bstan pa nyid/ /de nyid yin par mi rigs kyang / /tshangs pa dang po'i lha las byung //lha de la gus de skad smra/ /gzugs sogs skye mched snang ba nyid/ /blo yi yul du 'dod pa yin/ /de yi yod pa thun mong nyid/ /bsgrub bya zhe na nga yang 'dod/ /'byung las gyur sogs ngo bo yi/ /gzugs sogs skye mched yod nyid ni/ /bsgrub bya'o zhe na dpe yang med//phyir rgol rtog ges gnod pa'ang yod/ /gzugs sogs skye mched 'byung ba dang / /'byung ba las gyur mtshan nyid min/ /rang bdag rnam par snang ba'i blo/ /skyed pa'i rgyu phyir yid bzhin no/ /sems dang sems byung ngo bo nyid//sems dang sems byung rab tu grags/ /gtan tshigs dang ni dpe yang med/ /phyogs kyang rnal 'byor pa la med/ /rnam shes tsam zhes bya ba 'dir/ /phyi rol don ni bzlog pa'i phyir/ /tshig don 'di ni de spong zer/ /bdag gi phyogs nyams ji ltar 'dod/ / 'ga' yi tshig gis smrar med par/ /bya bar mi nus zhi ba'i blo/ /snying po yod dam snying po med/ /mkhas pas de la dpyad par gyis/ /dbu ma'i snying po las nyan thos kyi de kho na nyid la 'jug pa'i le'u ste bzhi pa'o// //rang gi lugs kyi nga rgyal gyis / /mkhas par rlom gzhan 'di skad smra//de nyid bdud rtsir 'jug pa dang / /rnal 'byor spyod pas legs bstan zer/ /dngos po gnyis po med pa'i phyir/ /gnyis dngos med pa'i yod pa ni/ /yod la sogs pa'i blo yi yul/ /dam pa'i don du 'dod do lo/ /med pa'i dngos po bdag med pa//de bzhin nyid dang chos gnas dang / /rnam par mi rtog blo'i gzung ste/ /de shes par ni bya ba yang / /dmigs pa la ni brten byas nas/ /mi dmigs pa ni rab tu skye/ /mi dmigs pa la brten byas nas/ /mi dmigs pa ni rab tu skye/ /brtags pa nye bar mi dmigs shing //gzhan gyi dbang yang gzung med pas/ /de nyid mthong ba yongs grub pa'i/ /ngo bo nyid la blta ba yin/ /brtags pa rgyu mtshan bcas phyir dang / /gzhan du gnyis po med phyir dang / /kun nas nyon mongs dmigs pa'i phyir/ /gzhan dbang yod pa nyid du 'dod/shes rab pha rol phyin tshul 'di/ /thams cad mkhyen nyid thob pa yin/ /skye dang 'gag la sogs pa dag /dgag pa lhur len ma yin no/ /'dir bshad de bzhin gshegs bka' kun/ /kho bo cag gi tshad ma yin/ /tshad ma yid ches lung yin phyir//bzang po dag ni sgrub par byed/ /lung gzhan dag gis the tshom dang / /log pa'i blo can gzhan mi byed/ /de phyir de dag sgrub gzhug phyir/ /rigs pa ldan pa'i tshul btsal bya/ /gnyis med pa yi dngos po ni/ /rigs pa ma yin 'gal ba'i phyir/ /nam mkha'i me tog med dngos sam//de dngos yin par brtag mi bya/ /gal te yang dag brtags med phyir/ /de la dbye ba med snyam na/ /mtshan gzhi mtshan nyid rnam bzhag la/ /de ni mtshungs phyir lan ma yin/ /gal te de dngos ma btang gang / /de ni de dngos yin 'dod na//de ltar dngos nyid mi gtong ba/ /de phyir de ni dngos ma yin/ /des na de nyid gzigs rnams kyi/ /mkhyen pa dngos med dmigs par 'gyur/ /de yang chos bdag med yin te/ /med pa'i blo yi rgyu phyir ro/ /gal te dngos med dmigs pa'i blo/ / rnam par mi rtog yin 'dod na/ /des na gzugs blo mi rtog pa'ang / /dam pa yin pa nyid du gyur / /gal te gzung bar snang 'dod pas/ /gzugs blo yang dag ma yin na/ /des na gtan tshigs 'khrul 'gyur zhing / /dam bcas pa yang nyams par 'gyur/ /ngo bo nyid la dmigs yin na//ston pa'i byang chub rtog can dang / /dmigs pa can du 'gyur ba dang / /rnam par mi rtog blor mi 'gyur/ /sems tsam du ni dmigs pa dang / /gzugs la sogs pa mi 'dzin na/ /khas blangs pa dang grags pa yis / /dam bcas pa la gnod par 'gyur//de ltar snang ba skye ba'i phyir/ /rmi lam gzugs sogs blo bzhin du/ /gzugs la sogs pa don med par/ /rnam par shes zhes byar mi rung / /gang phyir rmi lam la sogs pa'i/ /rnam shes chos la dmigs pa'i phyir/ /de phyir dpe yang med pa dang //yul la skur pa 'debs par 'gyur/ /gal te yul du snang ba nyid/ /sems kyi dmigs pa yin 'dod na/ /yul du snang ba ma gtogs par/ /sems kyi bdag nyid gzhan ci yod/ /gzhan ltar skyes phyir de gnyis snang / /shel dang 'dra bar mi 'dod de/ / nye bar bzhag las der skye bas/ /shel gyi skad cig min phyir ro/ /de 'gags gzhan ni skyes pa la/ /de yi blo ni 'khrul par 'dod/ /gnyis su snang med nus pa ni/ /tha dad min phyir yul snang bzhin/ /sems ni rang dang gzhan snang ba/ / lhan cig 'dra bar 'byung ba'i phyir/ /gzugs brnyan bzhin du mi 'dod de/ /de phyir gnyis su snang ma yin/ /gal te tshad ma 'bras yod phyir/ /gnyis su snang bar 'dod ce na/ /gzhan du'ang de dag 'grub pa'i phyir/ /rtog pa de yang mi 'dod do/ /yul du snang ba 'dzin pa yi //rnam par shes pa skye bzhin pas/ /gzhal bya gang yin 'jal byed pa/ /des na de ni tshad mar 'dod/ /bstan du med pa'i ngo bo nyid/ /de bzhin rtogs pa gang thob pa/ /gal te smra 'dod bsgrub bya ba/ /phyi don sems kyi dngos nyid de/ /rnam par shes pa'i yul yin phyir//dper na de ma thag bzhin na/ /des na sems byung so so yis / /gtan tshigs 'khrul pa nyid du 'gyur/ /mdo las sems tsam gsungs pa ni/ /byed po za po dgag phyir ro/ /gal te rnam brtags don mthong bas/ /rnam par shes pa sgrub byed na//brtags pa ma yin don yod phyir/ /yul med par ni mi 'gyur ro/ /rmi lam la yang brtags min pa'i/ /ngo bo nyid blos ma nges 'gyur/ /dmigs pa med par mi 'dod de / /dpe ni rab tu ma grub phyir/ /ci ste blo yul rnam gnyis te/ /gcig dang 'dus pa yin snyam na//rigs pas yongs su brtags pa na/ /de ni gnyi gar mi rigs so/ /de la gzugs rdul gcig pu ni/ /gzugs blo'i spyod yul ma yin te/ /de snang nyid du mi 'gyur phyir/ /dbang gzugs spyod yul ma yin bzhin/ /phra rab gzugs ni du ma de//sems kyi spyod yul yin mi 'dod/ /rdzas su yod pa ma yin phyir/ /dper na zla ba gnyis bzhin no/ /de la gal te pha rol po/ /bsags pa min pa'i gzugs sems kyis/ /spyod yul min par sgrub byed na/ /der ni grub pa nyid sgrub 'gyur/ /ci ste bsags pa'i gzugs la ni//gtan tshigs ma grub nyid 'gyur te/ /gzugs gzhan dag gis bsags pa ni/ /der snang blo ni skye phyir ro/ /de ni dmigs nyid yin 'dod de/ /der snang blo yi rgyur 'gyur phyir/ /'dod chags bzhin te de yi phyir/ /khyod dam bcas la rjes dpag gnod//gal te rang blo dmigs med de/ /rang gi sa bon las skye'i phyir/ /yid blo bzhin 'dod brtags min phyir/ /khyod kyi dmigs bcas nyid du 'gyur/ /dmigs pa med pa rjes dpog pas/ /de ni blo nyid ma yin 'gyur/ /'dus pa dam ni ma bcas pas//de 'gog pa ni gnod pa med/ /mi rtog blo ni spang min te/ /'phags phyir rnam par mi rtog phyir/ /de skye thar pa ga la yod/ /de yi sa bon ma bcom phyir/ /gnyis kyi 'du shes 'jug pa na/ /sna tshogs snang ba rab tu skye/ /de yi sna tshogs snang gang dang //de rang sa bon las skye'i phyir/ /zha ba de la nus phul dang / /rang bdag nyid dang gzhan las so/ /rnam par shes pa'i ming gis ni/ /de la bdag tu btags par 'gyur/ /gnyis yod sgyu ma lta bu dang / /zad can ma zhi bdag med dang / /gnyis med mi zad yang dag dang //'chi med go 'phang mchog rtogs nas/ /de la 'dra ba med pa'i phyir/ /rnam par rtog pa rnam ldog pas/ /mi rtog blos ni dmigs byas pa'i/ /grol ba khyad par med par 'gyur/ /yang na sems tsam bsgrub pa'i phyir/ /sems las byung rnams sems las ni//tha dad med par khas blang bya/ /yang na rnam rig tsam mi 'grub/ /yang na tshor sogs 'dus pa la/ /sems su gdags par 'dod par gyis/ /des na gzhan gyi rjes smra dang / /rang gi gzhung yang btang bar 'gyur/ /kun nas nyon mongs rnam byang las//gal te sems ni rdzas 'dod na/ /tshor sogs de bzhin skye ba'i phyir/ /de grub pas na gnod pa med/ /ut+pal rtsa ba nus mang las/ /lo ma la sogs rgyun 'byung ltar/ /de bzhin sems rdzas med pa las/ /rgyun rnams sna tshogs 'byung bar 'gyur/ /gnyen pos skye bar mi 'gyur zhing //byed rgyu yod na skye bar 'gyur/ /'di las sna tshogs skyes la sogs/ /brtags pa mi 'dod rdzas med phyir/ /de la dmigs pas mi 'grol te/ /blo 'gag med pa'ang ma yin pas/ /de phyir kun rdzob don dam du'ang / / bdag tu smra dang 'dra mi 'gyur/ /gzugs la sogs pa stong pa ste/ /ngo bo nyid kyis ma skyes phyir/ /rdzas su med phyir 'jig pa'i phyir/ /sgyu ma bzhin goms chags med 'gyur/ /gzugs la sogs pa yod kyang ni/ /yang dag ji bzhin rtogs gyur pa/ /de yod ma yin de yi tshe//log 'dzin ci phyir mi ldog 'gyur/ /gnyis su rnam par rtog pa dag /sems dang sems byung spyod yul na/ /gzugs la sogs pa dgag byas kyang / /'jug par mi 'gyur mi rigs so/ /gal te de ni dgag pa'i phyir/ /sgrub gzhan yongs su 'dzin 'dod na//'dam rdzab 'khru bar byed pa bas/ /ma reg par ni bsrings na bzang / /kun brtags yod pa ma yin te/ /btags phyir sbrul dang 'drar mi 'dod/ /thag pa'i dngos por ma nges phyir/ /yang na grags pas gnod par 'gyur/ /de ni 'khrul min gang gi phyir//du ma'i cha de mthong phyir ro/ /khyod ni dngos la skur 'debs 'gyur/ /rnam pa kun tu yul 'gog phyir/ /de med par yang kun nyon mongs/ /ming las don 'jug las 'byung min/ /smra mi shes pa'i dud 'gro yang / /nyon mongs skye ba mthong phyir ro//gzugs ni gzugs kyi ngo bos stong / /gzugs zhes brjod la ltos bcas par/ /gzugs blo skye bar 'gyur phyir zhes/ /brtag pa bzod par mi 'gyur ro/ /gzugs ni stong nyid mi rigs te/ /gzugs min bdag nyid rnam bcas pa'i/ /dngos por snang blo spyod yul gyi //gzugs kyi bdag nyid de yod phyir/ /mngon par brjod bya spyi yin na/ /spyi ni ci yang yod min pas/ /des na mngon brjod bdag nyid kyis/ /stong pa 'thad par mi 'gyur ro/ /brjod bya spyi ldan dngos po de/ /der snang blo yi rgyu yin phyir/ /de ni de bdag nyid yod pas//brjod med nyid du mi rigs so/ /rigs mi mthun pas stong nyid de/ /blo mthun 'jug pa'i rgyu yin phyir/ /rigs mthun pa la mthun pas na/ /spyi zhes bya bar nges pa yin/ /gzhi ma bzung na gzung med de/ /de bzung gzung du yod pa'i phyir/ /grangs bzhin des na dngos de ni//brtag bya brjod par 'dod gzhan min/ /dbyer med phyir na gcig pa dang / /rdzas med phyir na du mar 'jug /de nyams na yang mi nyams phyir/ /gzhan la'ang de 'dod ma yin min/ /sngon min ut+pal ma yin pa/ /med pa'i dngos pos ma bsal bas//gzhi mthun ldan pa nyid yin te/ /gnyi ga don gcig 'jug phyir ro/ /gzhan sel gzhan gyi spyi ma yin/ /chos gzhan yin phyir khyad par bzhin/ /lkog shal la sogs blo dbye med/ /med la khyad par med phyir ro/ /dngos ma bzung bar de 'dzin phyir/ /brtag bya brjod min yin mi 'dod//de yi sgo nas gzhan brjod na/ /de ni brjod bya'i nyid sogs nyams/ /de ni gzhan gyi ngo bo na/ /des na brjod med nyid mi rigs/ /de phyir rnal 'byor spyod pa yi/ /tshul gyis smra ba mi rigs so/ /dngos rnams ngo bo nyid med de/ /mngon brjod bdag nyid stong phyir ro//de nyid kyis de skye med phyir/ /ma skyes pa dang ma 'gags nyid/ /gang phyir mngon brjod ldan dngos ni/ /ji ltar brjod pa de ltar med/ /de phyir chos rnams dngos med nyid/ /ces bya la sogs gang smras dang / /gzhan dbang yod pa nyid smras pa/ /kun rdzob tu ni grub pa sgrub//gal te don dam dpe med cing / /gtan tshigs 'gal ba nyid du 'gyur/ /gal te gzhan dbang ngo bo nyid/ /skye ba ngo bo nyid med de/ /yod par gyur las ma skyes na/ /skye 'gag la sogs 'gal sgrub yin/ /rkyen rnams las ni gang skyes pa/ /de skye med par thub pas gsungs//don dam du na dngos nyid las/ /de yi skye ba dgag phyir ro/ /chos rnams yang dag nyid min phyir/ /de dag kun rdzob blo dang sgra/ /sna tshogs rang spyi'i spyod yul du/ /'gyur ba la ni 'gal ba med/ /ming ni gang dang gang dag gis/ /chos rnams gang dang gang brjod pa//de la de ni yod min pa/ /de ni chos rnams chos nyid do/ /ci ste rkyen 'byung ngo bo yis/ /gzhan gyi dbang las skye 'dod na/ /rgyu bzhin yang dag nyid min pas/ /'dod pa sgrub par byed pa yin/ /gzhan gyi dbang yang gzung med pa//ngo bo nyid kyis ma skyes 'dod/ /don dam du ni skyes pa la/ /log par snang ba mi rigs phyir/ /gal te ji ltar snang ba ltar/ /der snang bdag nyid yod gyur na/ /ji ltar snang ba der yod phyir/ /chos rnams ji ltar sgyu ma bzhin/ /ma skyes pa dang ma 'gags dang //dngos med ngo bo nyid med pa'ang / /yod pa nyid las ma skyes dang / /rdzas su yod pa ma yin phyir/ /gdags pa skyon chags nyid med de/ /rnam rig tsam du mtshungs phyir ro/ /spang dang spong byed yod pa'i phyir/ /yongs shes sogs yod gang gir 'dod/ / de ni gang phyir rdzas med kyang / /rnam rtog bral bas thar par 'gyur/ /rdzas yod nyid na'ang skye med phyir/ /'di las bzhin du brtag mi 'dod/ /dngos rnams ngo bo nyid med na/ /gdags pa'ang yod par mi 'gyur bas/ /de ni med par lta ba dag /mi gleng bstan par bya min dang //rang yang ngan song gzhol ba dang / /gzhan yang phung bar byed pa yin/ /zhe sdang sha rul sgregs pa 'di/ /nga rgyal ma zhu ston pa yin/ /chos rnams sgyu ma bzhin 'dod de/ /ngo bo nyid ni med phyir dang / /byis pa rmongs pa'i rgyu phyir dang / /ma byung ba las 'byung phyir ro//rnam par mi rtog dngos po ni/ /mkha' dang mtshungs pa nyid mi rigs/ /rnam rtog 'du shes sna tshogs kyi/ /go skabs rab tu 'byed phyir ro/ /skyes pa brjod med nyid mi rigs/ /dgag pa gong du bstan phyir ro/ /brjod du med nyid yin gyur na'ang / / kun rdzob la ni de nyid nor/ /de la de nyid gzhan med phyir/ /gal te de nyid mthong 'dod na/ /bum la'ang bum pa gzhan med pas/ /ci phyir de nyid mthong mi 'dod/ /khyod kyi tshul skyon sba phyir gyi/ /de ni nyon mongs byang mi 'gyur/ /gser la sogs pa rkyen rnams kyi/ / rjes su 'gyur ba yin phyir ro/ /nam mkha' rtag tu rnam dag ste/ /mig ni dag dang ma dag pas/ /dri bcas dri med mkha' 'dod dang / /chos rnams chos nyid de bzhin no/ /ma dag la sogs blo 'khrul te/ /byed pa'i chos yin las kyi min/ /de la dmigs pa dag ma yin//de nyid dmigs byar mi 'dod do/ /de nyid rdzas su yod yin na/ /skyon ni snga ma bzhin du 'gyur/ /'jig rten 'das pa rnam mi rtog /de blor mi 'dod 'jig phyir ro/ /de srid shes pa dmigs yod pa/ /de srid shes bya'i rjes 'jug nyid/ /thams cad mkhyen nyid cig car min//shes pa rang la 'jug pa ni/ /med phyir ral gri'i so bzhin dang / /rang rig 'gog par byed phyir ro/ /rnam par mi rtog 'phags blo'i gzung / /rnam pa kun tu brjod med nyid/ /sngar bzhin skye ba bkag pa'i phyir/ /skye med rdzas su yod min phyir/ / yod dang med pa'i dngos nyid kyi/ /ngo bo don dam nyid yin na/ /sgro 'dogs pa dang skur mtha' las/ /grol ba khyod la ji ltar yod/ /yod min de nyid skye med phyir/ /med min de yod ma yin phyir/ /yod dang med pa gnyis spangs pas/ /de 'dod de phyir gnyis su med//ston pa dmigs med mi 'gyur te/ /de bzhin nyid la dmigs pa'i phyir/ /byang chub mnyam nyid mi 'gyur te/ /de nyid rang snang tha dad phyir/ /de bzhin nyid la dmigs pa'i blo/ /nus pa ma bzhag ga las 'byung / /nam mkha'i me tog snang ba'i blo/ /nus pa ma bzhag mi rigs bzhin//rang tshul sbed pas khyod kyis ni/ /de nyid gcig nyid gzhan mi 'grol/ /rdzas med dmigs su med pa'i phyir/ /nged la ji skad smras de rigs/ /nam mkha' 'dra ba'ang skye med pas/ /khyad par med phyir ma gos phyir/ /shin tu brjod du med nyid kyang //blos ni rnam kun gzung med phyir/ /skye ba rab rib bral ba'i blo/ /'jig rten 'das pa yin par 'dod/ /'jig rten las sgrol don phyir dang / /'jig rten shin tu 'da' phyir ro/ /de ni mi rtogs dmigs med dang / /mtshan ma med cing de yis ni/ /rang gzhan chos nyid cig char du//rtogs med tshul gyis mnyam nyid rtogs/ /chos rnams skye ba med pa ni/ /chos bdag med pa nyid ces bya/ /de la rtog dri'i mtshan ma dag /'byung ba med pa snga ma bzhin/ /gal te de nyid rtog ge yi/ /spyod yul min phyir rjes dpag pas//de mi rtogs pa de yi phyir/ /chos rnams chos nyid brtag min na/ /'di la rjes dpag skyon med pa/ /lung gis rjes su sgrub byed pas/ /brtags pa'i rnam rtog chu bo dag /sna tshogs ma lus bsal mdzad nas/ /sangs rgyas rnam rtog mi mnga' ba/ /dgongs pa mkha' mnyam ye shes kyi//shes bya mtha' dag ji bzhin du/ /chos rnams bzhag pa nyid rtogs shing / /ming la sogs pa thob pa nyid/ /des na rjes su dpag pa'i yul/ /de nyid yin par sgrub mi nus/ /de nyid shes pa'i mi mthun phyogs/ /gang yin de ni des zlog byed/ / lung gi khyad par tha dad pas/ /tha dad gyur pa'i blo la ci/ /lung gi dbye ba med pa la/ /rtogs par gyur pa gzhan ci yod/ /mi mthun phyogs ni spang bya na / /dam bcas tsam gyis ji ltar 'dod/ /rnam par rtog pa ma spangs par/ /rnam par mi rtog blo ji ltar/ /thub pa bden pa gzigs pa yi//'di ltar bden pa gnyis su gsungs/ /tha snyad la ni brten nas su/ /de nyid don ni rtogs 'gyur phyir/ /de bzhin nyid la dmigs pa'i blo/ /dmigs dang bcas phyir brdzun yin te/ /rmi lam sogs yin de shes bya/ /des na de nyid yin mi rigs/ /gzung du med pa brjod med pa//shes pa'i spyod pa rnam spangs pa/ /thub pa'i dbang pos gsungs pa'i chos/ /de yis 'di ltar 'di la gnod/ /de ltar lung rigs ldan pa yi/ /de nyid gang zhig sngar bstan pa/ /rigs pas yongs su brtags na yang / /de la nyams pa med par gnas/ /kha cig phung po'i ljon shing chags//kha cig rnam shes rgyal thogs/ /yang dag mtha' yi g.yang sar yang / /ma lhung rgyal ba'i thugs sras rol/ /shes bya rnam kun ma grub phyir/ /gang la rnam par mi rtog pa'i/ /blo yang skye bar mi 'gyur ba/ /de nyid mnyam med de mkhyen gsung / / dbu ma'i snying po las rnal 'byor spyod pa pa'i de kho na nyid gtan la dbab pa la 'jug pa ste le'u lnga pa'o// //rang bzhin gang zhig rtogs pa med / /yon tan gsum dang skyed bdag nyid/ /de las bzlog pas skyes bu nyid/ /'di dag rtag tu goms par bya/ /rtsa ba'i rang bzhin mi 'gyur ba//chen po la sogs rnam pa bdun/ /rang bzhin 'gyur ba bdun nyid do/ /'gyur ba rnam pa bcu drug kyang / /rang bzhin 'gyur ba min skyes bu/ /yid las snying stobs skyes pa can/ /skyes bu'i gzugs brnyan 'byung ba'am/ /de bzhin yongs su gyur nas ni//blo 'jug pa yi rjes su byed/ /bdag kyang gzhan la rang bzhin gzhan/ /'di ltar de nyid mthong ba yi/ /byed dang bya ba ldog pa yi/ /skyes bu grol ba yin zhes brjod/ /bdag dang bdag med rtogs pa'am/ /don byas pa na rjes gzung ba/ /rang bzhin gyis ni grol yin phyir//de nyid yin par grangs can smra/ /de la gtso bo skyes bu ni/ /ji ltar mi rigs las sngar bstan/ /de yang yang 'dir brtag bya ste/ /bdag ni rtogs pa ma yin no/ /shes bya rtogs pas rtogs yin na/ /shes bya med pas de yang med/ /rtogs pa can nam rtogs med pa/ / 'dir ni bdag tu gang zhig 'gyur/ /ma bsregs sreg par mi rigs te/ /bsregs pa med phyir de sngon bzhin/ /des na sreg byed dpe yis ni/ /rtogs pa'i bdag nyid grub ma yin/ /shes bya'i rnam pa 'dzin byed pas/ /shes la rtogs pa zhes 'dod de/ /dngos po byed pa la brten phyir//de yang skyes bu 'di la brten/ /brtags pa byas pa yin na ni/ /skyes bu 'gyur med rang gi yul/ /de dang 'di ni lugs 'dis 'gal/ /shes las rtogs pa gzhan min pas/ /ci zhig gzhan du brtag par bya/ /rtogs pa blo gros ma yin te/ /rgyu dang ldan phyir bum pa bzhin//des na rtogs pa shes pa min/ /gal te blo la de snyam na/ /rtogs las shes pa gzhan yin par/ /sgrub byed ce na dpe yang med/ /shes pa'ang de dngos med ce na/ /khas blangs pa yis gnod pa yin/ /ma skyes pa ni rtogs min te/ /ma skyes phyir na rigs ldan min//blo yi 'jug pa'i khyad par ni/ /gang phyir shes la 'jug 'dod na'ang / /tha dad khyad can nyid 'gyur gyi/ /de med pas na de yang med/ /gal te bdag gi blo gang yang / /la lar ji bzhin don du 'dod/ /la lar de las bzlog nyid de//mtho la mtho yi blo bzhin no/ /la lar ji ltar ji bzhin don/ /zhe na kun rdzob grub pa sgrub/ /ji bzhin don gyi sems kyi yul/ /bdag ces bya bar bdag cag 'dod/ /ci ste kun la khyab sogs kyi/ /mtshan nyid can blo don bzhin na/ /de nyid du 'am kun rdzob tu'ang / /dpe ni yod pa ma yin no//rtogs pa med pas rtogs pa ni/ /rang bzhin rtogs pa med pa'am/ /gang gi de nyid shes skye bas/ /gang zhig grol bar 'gyur ba yin/ /rtogs pas 'dzin par byed pa na/ /bdag ni 'di ltar zhes sogs des/ /rtogs pa med phyir gzhan mi rigs/ /de med gyur na yang ci zhig /'di yi ldog pa'ang rigs min te/ /mang po dag dang thun mong phyir/ /ji ltar rje gcig shi gyur kyang / /tshogs pa dag gi bran bzhin 'dod/ /tha dad yul la ma bsgribs phyir/ /ji ltar bdag gi dbye ba las/ /skyes bu'i yid la snying stobs dag /lhag pas de nyid mthong bar 'dod//sgra la sogs pa rtogs pa dang / /de bzhin chos dang chos min dag /skyon ni rjes su mtshungs pa'i phyir/ /ma mthong nges pa med pa'ang yin/ /gal te skyes bu 'gyur zhe na/ /skyes bu rtogs pa med pa dang / /rgyu med khyab pa ma yin te/ /skyes bu 'gyur phyir 'o ma bzhin/ / sems ni 'gyur ba med na yang / /gzugs brnyan gyi ni rgyu yin phyir/ /ji skad smras pa'i skyon ldan par/ /'gyur te gdong gi gzugs brnyan bzhin/ /skyes bu rtog pa med pa'i phyir/ /bdag dang gzhan zhes mi rigs so/ /brtags nas skyon med ce na yang / /grol ba brtags pa nyid du 'gyur//gtso bo yod de sna tshogs kyi/ /rjes su 'gro phyir yongs gyur phyir/ /bya dang byed pa'i ngo bo'i phyir/ /nus phyir sna tshogs ngo bo'i phyir/ /ji skad smras pa de bzhin te/ /snod chag pa yi dum sogs ltar/ /de bzhin dbye ba de dang ldan/ /des na dbye ba rgyu dang bcas/ /dbye rnams rgyu dang bcas nyid du//sgrub byed ce na grub pa sgrub/ /kun la khyab par ma grub ste/ /'di yi gtan tshigs ma grub phyir/ /spyi ni sngon du song 'dod de/ /spyi dang ldan pa'i phyir zhe na/ /spyi nyid dam ni khyad par la/ /snga ma bzhin du dpe yang med/ /bde la sogs pa'i ngo bo'i phyir/ /tshor ba'i phung po bzhin mi 'dod//phung po yin phyir bde sdug sogs/ /so sor ma nges pa nyid yin/ /ma nges pa yis spangs pas na/ /de ltar don byed bdag nyid yin/ /rgyu dang ldan pa yin pa'i phyir/ / rjes 'gro sogs kyi rjes dpag gi /dam bcas skyon gyis gnod pa yin/ /skye med mtha' med nyid sogs kyi//de yis khyad par spangs pas na/ /gtso bo'i yon tan 'dod pa yi/ /gtan tshigs ma nges pa nyid yin/ /de bzhin tha dad rgyu las kyang / /'byung bar 'dod pa'i dpe yod min/ /tsan+dan dum bur gyur pa na/ /nyams pa min par rtogs bya ste/ /stobs dang gzugs dang tshad la sogs//nye bar gnas te bdag nyid bzhin/ /nus pa'i bdag nyid nyid du ste/ /yod na sngar bzhin dpe mi 'grub/ /gsal ba'i ngo bor de yod na'ang / /grub pa'i mtha' ni spang bar 'gyur/ /bya dang byed pa gcig nyid du/ /sgrub na'ang smras pa'i tshul nyid yin/ /rigs mthun nyid la gcig nyid du//sgrub na'ang grub pa sgrub pa yin/ /de las don gzhan tog na yang / /snga ma bzhin du skyon kun 'byung / /bde dang sdug bsngal sogs kun du/ /gtan tshigs ma nges pa nyid yin/ /dus dbyer med pas gzhan min na'ang / /grags dang lung dang 'gal ba nyid//tsan+dan ngo bo mi mngon pas/ /med par grub pa ma yin te/ /dus dang drug pas bstan pa'i phyir/ /de ltar skad cig bzhin zhe na/ /de lta na yang spro gyur nas/ /rang gi lugs kyi skyon sbed kyang / /smras pa'i skyon rnams med min te/ /gyen du skra 'greng bum 'dra bzhin/ /de gzugs she na gtan tshigs don//rnam par rtog pa ma nges nyid/ /dbyer med ngo bo yin na yang / /gtan tshigs ma nges pa nyid yin/ /rna sogs spyad bya ba yin te/ /rtogs pa med phyir gal te 'dod/ /khyad par dag ni ma bstan par/ /spyad bya'o zhe na grub pa sgrub/ /ci ste g.yo ba med sogs kyi//khyad par can na rjes 'gro gang / /rtogs par bden yang rtsol med phyir/ /spyod pa por ni mi 'dod do/ /dngos rnams bya ba med nyid du/ /rab tu rtogs te gzhal bya'i phyir/ /smras pa ci ltar de de ltar/ /rtogs te bde dang gti mug bzhin/ /bya ba med par sdug bsngal yang //shes par bya ste rgyud ldan phyir/ /rtogs pa med phyir brjod bya'i phyir/ /gzhal bya yin phyir gti mug bzhin/ /rjes 'gro la sogs gtan tshigs rnams/ /tha dad nyid du 'dod pas na/ /gtso bo'i yon tan la de rnams/ /ma nges ma yin pa de bden//bya dang byed pa sgrub bcas phyir/ /rgyu dang ldan par rjes dpag nyid/ /gtan tshigs rnams kyang khyad bcas pas/ /de ltar 'gal ba nyid du 'gyur/ /de ma bzung bar mi 'dzin pas/ /gzugs sogs gzhan min de dngos bzhin/ /tha dad dngos phyir gzhan min min//gang de rtogs bya rtogs byed phyir/ /des na mi mngon ma yin la/ /bya bar yod pa'ang mi 'dod do/ /da ltar gyi na skad cig kyang / /rjes su yod par ma grags nyid/ /spyod dang bcas pa'i spyad bya 'di/ /spyad bya yin phyir mal sogs bzhin/ /rtogs pa po ni spyod pa nyid//de yi sgrub par byed pa min/ /rtogs pa nges par rtogs yin na/ /de ni gang gi yin pa smros/ /dngos po byed po la brten te/ /gos sogs tshon du btsos pa bzhin/ /sgra sogs shes par mi 'gyur ba/ /yin na'ang shes pa ji ltar yin/ /sgra sogs shes par 'gyur ba nyid/ / yin na'ang shes pa ji ltar yin/ /byed pa med pa ma skyes phyir/ /byed po nyid du ji ltar 'dod/ /ma skyes pa la bdogs na yang / /skyes bu btags pa pa ru 'gyur/ /byed po'i sgra yis brjod bya'i phyir/ /me bzhin khyod kyi skyes bu yang / /rgyu bcas bya bcas spyad bya dang / /bya ba rab tu bskyed pa'ang yin//kun khyab ma yin rang bzhin las/ /gzhan pa ma yin skyes bu min/ /de yi rang dngos khyad par ni/ /de yis 'di ltar spong bar 'gyur/ /des na khas blangs pa de la/ /gnod phyir dam bcas skyon med min/ /ji ltar dbang phyug rgyur smra bzhin/ /rtogs pa la sogs spangs pa yin//bdag dang bdag gi min rtogs pa/ /blo yi rjes su rtogs pa yi/ /lta ba log pas grol bar ni/ /khyod kyi skyes bu 'gyur mi rigs/ /skyes bu tha dad mthong ba yis / /thar pa 'thob pa ma yin te/ /blo gzhan yin phyir spyad bya dang / /skyes bu gzhan nyid mthong ba bzhin//ji ltar rnam rtog bcas pa'i phyir/ /mi ni tha dad mthong ba ltar/ /skyes bu tha dad mthong ba yis/ /de bzhin grol ba mi 'dod do/ /de ltar grangs can de nyid ni/ /sngon dang phyi mar 'gal ba dang / /rigs pa dang ni mi ldan la/ /mkhas pa rnams kyi blo mi 'jug /n+ya gro d+ha yi sa bon gyi//nang na yod pa'i n+ya gro dang / /bud med skyes pa 'grogs la bu/ /rnga yi nang na sgra gnas dang / /zas kyi nang na phyi sa sogs/ /shing la 'bar yod mi mthong zhes/ /gang zhig mngon sum spong byed pa/ /de ni bden smra ji ltar yin/ /de ni yod kyang mi gsal bas/ / des na bya ba mngon ma mthong / /zhe na mi gsal med min pas/ /e ma'o bstan bcos shin tu legs/ /dbu ma'i snying po las grangs can gyi de kho na nyid la 'jug pa ste le'u drug pa'o// //blo sogs bdag gi yon tan bcad/ /drungs nas phyung ba'i rnal 'byor pa/ / yid la bdag ces gnas pa ni/ /bye brag pa yis thar par shes/ /rgyas par sngar bstan rim pa yis/ /mi bden skye ba bkag pa'am/ /dngos po yongs su bkag pas na/ /'dod dang sdang sogs yon tan med/ /ma skyes byed por mi rung ste/ /bya ba nges par bya ba la/ /byed po yin phyir sbrang rtsi'i rgyu//nam mkha'i me tog min pa bzhin/ /ma skyes skyes pa ma yin te/ /nam mkha'i me tog ma skyes bzhin/ /'byung ba'i ngo bo la sogs kyi/ /don dam par na yod min te/ /rtag pa'i bdag la shes mi brten/ /rgyu dang ldan phyir bum pa bzhin/ /blo ni bdag gi yon tan du//mi rigs skye dang ldan pa'i phyir/ /ji ltar de yi yon tan du/ /gzugs la sogs pa mi 'dod bzhin/ /'du ba yin phyir bdag med pas/ /rigs te mi rtag pa yi phyir/ /de ltar bde dang sdug bsngal sogs/ /dgag pa mthar thug shes par bya/ /yid ni rtag pa min par 'dod//brjod bya yin phyir bum pa bzhin/ /'di ni bdag gi byed pa min/ /dngos po yin phyir bde ba bzhin/ /bdag yod pa ni bkag zin kyang / /'dir yang brtag par bya ba ste/ /brten nas byung ba ma yin phyir/ /bdag med nam mkha'i me tog bzhin/ / de yi spyi ni yod par yang / /khas len pa yang brtag par bya/ /'di ni khyab min rtag pa min/ /rtogs bya yin phyir bum pa bzhin/ /blo skye 'gyur dang bcas she na/ /khyod kyi bdag nyid nyams par 'gyur/ /'on te 'gyur med shes pa min/ /shes dang shes min ji ltar rung / /'du ba dgag pa byas pas na//de dang 'brel pa'ang rigs pa min/ /bde dang sdug bsngal 'bad dang 'dod/ /sdang la sogs kyang tshul 'di yin/ /brtag pa'i bdag la bde mi rten / /rgyu dang ldan phyir bum pa bzhin/ /yang na bdag gi yon tan ni/ /bde ba yin par ma rtogs te/ /skye dang ldan phyir gzugs la sogs//de yi yon tan mi 'dod bzhin/ /yang na 'di dag 'du ba ni/ /bdag la yod par ma rtogs nyid/ /lhan cig yod chen dang 'brel bar/ /yod dang med pa mi rigs so/ /yod na'ang de sbyor don med la/ /med na de yang med par 'gyur/ /gsal bar byed pa chos gzhan phyir//de ni gsal byed ji ltar yin/ /grangs la sogs dang 'brel ba yang / /'di nyid kyis ni lan btab po/ /gal te spyi sogs dang 'brel bas/ /skyes bu spyi dang gcig rtogs par/ /de sogs rkyen dang phrad tsam gyis/ /skyes bu 'byung bar 'dod na ni//yod min med min du ma min/ /gcig min phra min chen po min/ /'di ni rtag min mi rtag min/ /gzhan min gzhan min min de nyid/ /ji ltar bdag bzhin tshig gi don/ /gzhan yang 'di ltar stong pa de/ /'bad nas gsangs su zin kyang ni/ /gzegs zan pa yis gsal bar byas//'di dag mtshan mar 'dzin pa'i phyir/ /de nyid mthong bar mi rigs so/ /mtshan ma mi bden par skyes pa'i/ /ngo bo rtag par mi bden 'dod/ /bdag las tha dad gyur pa'i don/ /de dang 'brel par mi 'dod de/ /yod pa'i blo phyir blo spyi la/ /spyi zhes bya bar 'dod pa bzhin//de bzhin grangs sogs 'brel pa yang / /bdag gam gzhan pa la la la/ /mkhas pas ji ltar rigs pa bzhin/ /blo de min par rtogs par bya/ /bdag ni blo dang sdug bsngal dang / /bde sogs yon tan dang mi 'bral/ /yon tan yin phyir grangs bzhin no/ / de phyir yon tan med bdag min/ /yul dang ngo bor dbyer med kyang / /gang zhig rang gi bdag nyid 'gyur/ /bdag dang sbyor bar 'dod pa las/ /dran nas shes pa kun tu 'byung / /ma mthong nges pa'ang sngar bzhin du/ /thal 'gyur lan yang 'di la yin/ /med pa'i skye ba bkag pas na//de yi sbyor ba'ang mi 'dod do/ /yid dang bdag gi med pa la/ /rten dang brten par mi 'dod do/ /bdag dang yid ni yod na yang / /rten dang brten par mi 'dod do/ /rnam rtog rgyu mtshan bcas pa'i phyir/ /rdzas sogs mthong bas grol bar ni/ /ji ltar 'ug pa mi 'dod pa//de bzhin 'ug pa pa mi 'dod/ /sa sogs de nyid 'byung ba'i blo/ /thar pa min par gzegs zan 'dod/ /khyad par dag ni mi 'dzin phyir/ /'tsho ba'i de nyid blo bzhin no/ /bye brag pa yi de nyid la'ang / /lta ngan rab rib skyes pas na/ /des na rigs pa dang bral phyir//blo ni dga' bar mi bya'o/ /dbu ma'i snying po las bye brag pa'i de kho na nyid la 'jug pa ste le'u bdun pa'o// //rig byed mthar smras smras pa ni/ /'dus byas stong par smra ba yi/ /phyi rol pa la bdag rig dkon/ /bdag sdang thar pa ga la yod/ /mun pa las gzhan skyes bu ni//chen por gyur pa nyi ma'i 'od/ /dbang phyug chen po bdag de nyid/ /mkhas pas shes na 'chi med 'gyur/ /byed po dbang phyug gser mdog tu/ /gang gis mthong zhing blta ba de/ /sdig dang bsod nams las 'das nas/ /mchog tu zhi ba thob par 'gyur//byung gyur byung dang 'byung ba dag /thams cad skyes bu yin 'dod de/ /de ni phyi nang ring ba dang / /de ni nye dang de las byed/ /srid pa sna tshogs de las skyes/ /dar gyi srin bu'i skud pa bzhin/ /mkhas pa de yi char thim pa/ /yang srid len par mi 'gyur ro/ /'chi bcas rnams la bdud rtsi med//me la grang ba ji bzhin no/ /des na bdud rtsi skyes bu nyid/ /ma rtogs bdud rtsi yod mi rigs/ /gang las mchog gyur gzhan med phyir/ /gang las dam pa gzhan med la / /'di las phra gyur gzhan med pas/ /sna tshogs 'di dag rgyu gcig nyid//de ni phra dang rags dang ldan/ /yang ldan gtso bo dbang bsgyur ba/ /rab phye 'dod pa'i mthar thug gang / /rnal 'byor ji ltar 'dod par 'gro/ /der ni 'byung ba thams cad kyang / /bdag nyid du ni 'dus par mthong / /byis dang mkhas dang gdol pa dang / / bram ze sogs rnams mnyam pa nyid/ /bum pa 'byung zhing 'jig pa ltar/ /nam mkha' de yi bdag nyid min/ /lus can 'byung zhing 'jig pa ltar/ /de bdag yin pas bdag mi 'dod/ /bum pa'i nam mkha' bzhin du gcig /du ma'o zhe na bum pa dag /chag na dbyer med gcig nyid du//thams cad mnyam par 'gyur bar 'dod/ /ji ltar bum sogs tha dad kyang / /sa la tha dad 'ga' yang med/ /de bzhin lus ni tha dad kyang / /bdag la tha dad 'ga' yang med/ /ji ltar bum pa'i nam mkha' gcig /rdul dang du bas bsgribs pa na//thams cad de bzhin ma yin ltar/ /bde sogs de bzhin bdag la min/ /bdag ma shes shing ma rtogs pas/ /rmi lam longs spyod nga rgyal bzhin/ /las rnams sogs shing dge ba dang / /mi dge'i 'bras bu spyod pa yin/ /lus la gnas kyang ma chags dang //spyod par byed kyang mi gos te/ /'dod bzhin spyod kyang rgyal po bzhin/ /sdig pas gnod par mi 'gyur ro/ /gcig po kun khyab rtag pa ste/ /tshangs mchog 'chi ba med pa'i gnas/ /rnal 'byor pa yis goms byas na/ /de ni yang srid len mi 'gyur//de ni rtag par rtog med pa/ /gang gi spyod yul gang ma gyur/ /blo ni dbye bas phrogs rnams kyis/ /de la tshig tu sbyor bar byed/ /phyogs su lhung ba ma yin pas/ /'dir ni 'di yang 'di ltar dpyad/ /phyogs la chags pas bsgribs pa'i blos/ /ji ltar bden pa'ang rtogs mi 'gyur//bdag yod pas ni bkag pa na/ /'gro ba'i rgyu yang de bzhin te/ /des na de mthong grol ba ni/ /mi bden par ni rab brtags nyid/ /byol song rnams la 'jig tshogs lta/ /lhan cig skyes yod zhi ma gyur/ /kun nyon mongs kun rtsa ba'i phyir//de nyid khyod kyis shin tu spel/ /'jig tshogs lta la zhen pa yi/ /bdag 'dzin bdag gir 'dzin pa dag /gang las 'khor bar 'byung 'gyur ba/ /de nyid grol ba yin par smra/ /myos par gyur la myos 'gyur bzhin/ /de lta ba yis zhi gyur na/ /shin tu ma zhu'i nad ldan la//kha zas zos pas phan par 'gyur/ /rig byed smra bas bdag de ni/ /rnam pa gnyis su 'dod byed de/ /lus zhes bya ba bcings bdag dang / /mchog na gnas pa grol ba'i bdag /mchog tu 'dzin pa bdag gi yul/ /bdag blo ji bzhin don ma yin//bdag ni 'di zhes mchog 'dzin phyir/ /lus la bdag gi blo bzhin no/ /yongs su btags pa yod na yang / /khyod kyi bdag gis ci zhig byed/ /gzugs dang sgra sogs yul rnams la/ /blo'o zhe na de mi rigs/ /gzugs sogs yul la blo dag ni//byed po bdag ni med kyang skye / /rkyen la ltos pa'i skye yin phyir/ /me shel gyi ni me bzhin no/ /gang yang yi ge'i bdag nyid sgra/ /de yi byed po bdag min 'dod/ /mnyan bya'i phyir dang sgra yin phyir/ /dper na brag ca ji bzhin no/ /'dis ni lus kyi bya ba gzhan/ /'ong ba dang ni 'gro ba dang //lag pa rkang pa g.yo ba ni/ /mtshan nyid lhag ma rnams kyang bkag /rnam par bcad nas kun shes las/ /kun shes dran pa nyid las dran/ /so sor rnam par rab shes las/ /shes rab nyams su myong las tshor/ /shes sogs byed par smra zhe na//byed pa nyid du sgrub pa'am/ /de las gzhan pa'i byed po nyid/ /gcod byed bzhin du rigs ldan min/ /byed pa po la rkyen ldan zhing / /gang phyir byed pa la min pas/ /des na gtan tshigs ma grub pa'am/ /ma nges pa nyid yin par 'gyur/ /shes la sogs pa byed po nyid//byed po'i sgra yis brjod pa'i phyir/ /lhas sbyin gyis ni gcod do zhes/ /ji ltar byed por mthong ba bzhin/ /'dus byas phung po byed bral nyid/ /'di la byed por brjod bya ste/ /byed pa yin phyir mar me yis / /gsal bar byed pa yin pa bzhin//yang dag gtso gcig byed po min/ /gang phyir gcig gis bum mi byed/ /des na mar me sogs byed po/ /gdags pa par ni mi 'dod do/ /'dod chags sogs kyi dbang phyug sems/ /gzugs sogs yul la mngon zhen pa'i/ /thar pa mi mthun phyogs kyis phrogs//'khor ba'i btson rar bcings pa yin/ /lag pa la sogs tshogs pa ni/ /sems bcas sems can zhes bya ste/ /gtong ba la sogs sems 'byung ba/ /yod pa gtong po la sogs brjod/ /rig pa skyes pas ma rig sogs/ /kun sbyor ldog par gyur pa'i phyir//chags sogs 'ching ba las grol ba/ /grol ba zhes ni brjod pa yin/ /nam mkha' 'dra ba'i bdag la ni/ /'di dag thams cad brjod par dka'/ /gal te bdag la lhag chags na/ /nam mkha'i me tog bdag 'dod kyis/ /gang phyir bdag ni rang bzhin gyis //shes pa'i ngo bor 'dod na ni/ /byed pa la sogs ltos pa'i phyir/ /de ni gcig tu mi rigs so/ /bdag sogs shes bya yod pas na/ /shes pa ldog par mi 'gyur te/ /don byas zin pa'i mar me yang / /rang gi rgyu las skye bar mthong / /ci srid yid la shes 'byung ba//de srid sa bon sogs 'gyur te/ /ji srid sgra ni yod gyur pa/ /de srid sgra brnyan 'byung ba bzhin/ /byed pa med par shes pa ni/ /'khor ba ji ltar shes pa yin/ /kun tu khyab med yin pa'i phyir/ /gang las ji ltar bcings dang grol/ /sdug bsngal las kyang thar min te//thar dang gcig tu smra ba'i phyir/ /bdag las de ni gzhan min phyir/ /ji ltar me dang tsha ba bzhin/ /nyams dang ma skyes pa yi blo/ /byed pa med par ji ltar yin / /gang pos gcod par byed pa yang / /sta re med par ji ltar rigs/ /me yis bsreg ces smras pa na//me yis bsregs kyi byed pas min/ /de bzhin blo yis rig smras pas/ /shes pas rig gi skyes bus min/ /rdza mkhan bzhin du de mi 'grub/ /de yi ngo bor med pa'i phyir/ /sred byed bzhin du'ang 'grub mi 'dod/ /bsreg bya med pas me med phyir/ /gal te mi shes byed po dang //za po khyod kyis shes ci ltar/ /mkha' 'dra rtog pa med pa yang / /lung 'ba' zhig gis brtags ci bya/ /mi shes pa'am shes dngos min/ /'di ni dngos po med par 'gyur/ /dngos med bdag tu mi 'gyur te/ /'di ni mo gsham bu bzhin no/ /gang la gnod dang phan pa las//gang la gnod dang bde mi 'byung / /de de'i bdag tu mi rigs te/ /nam mkha' de ba shar ma'i bzhin/ /nyi tshe'i bdag dang grol bar ni/ /bsam gtan shes sogs kyis 'dod na/ /bdag med don la 'bad pa yis / /shi ba mi 'chir ji ltar 'gyur/ /nyi tshe'i bdag ni bdag las gzhan//zhe na thams cad skyes bu yin/ /de ni nyi tshe gnyis dag dang / /phyi zhes dam bcas nyams pa yin/ /bdag las nyi tshe'i bdag de ni/ /gzhan min zhe na'ang dam bcas nyams/ /gang yang bdag gi bde sdug sogs/ /'gro bas mi shes gtso bo min//gal te phra yin 'di che min/ /chen po yin na phra ba min/ /gcig kyang ma yin gzugs kyi chos/ /ji ltar gzugs med bdag gi yin/ /gcig nyid du ma'i ngo bo ru/ /glang po'i dpe 'di mi rigs te/ /sna ni glang du mi 'dod phyir/ /sna tshogs rnams kyang gcig nyid min//gang yang bdag ni nyi sogs mdog /yin na mdog bral ji ltar yin/ /bdag de du ma'i ngo bo yi/ /dper ni pa la sha mi 'dod/ /gcig pu pa la sha med de / /kun tu 'gyur ba'i bdag nyid dang / /ji ltar rtsa ba sogs du mar/ /rkyen la sogs pas 'byed pa'i phyir//gtso bo nyid dang dam pa nyid/ /de las gzhan la ltos nas 'dod/ /gcig nyid yin na tshul 'di nyid/ /yod par ji ltar 'dod par bya/ /gal te bdag de rdzas yin na/ /rdzas yin phyir na kun khyab min/ /bum pa bzhin du rtag mi 'gyur/ /des na 'gro ba rgyas ji ltar//rdzas ni rten du rigs 'gyur na/ /bdag ni rdzas su mi rigs te/ /nam mkha'i me tog ji lta bar/ /de bzhin ma skyes phyir rdzas med/ /thams cad byung gyur byung ba dang / /'byung 'gyur bdag med ji ltar mthong / /bdag med bdag tu mi rigs te//ji ltar dngos med ngo bo bzhin/ /byis sogs khyad par med ma yin/ /brten med pa dang dpe med phyir/ /bdag gcig yin na du ma yi/ /skyon rnams 'byung bar 'gyur ma yin/ /tse tra'i bdag de me tra'i byed/ /me tra'i bdag gi'ang de bzhin te//tse tra tha dad min dngos phyir/ /yang na yul la dbyer med phyir/ /bde dang sdug bsngal spyod pa dang / /de grol bas kyang grol ba dang / /de bcings pas kyang bcings pa dang / /de sdug pas kyang sdug nyid 'gyur/ /bum pa'i nam mkha' dper bstan pa/ / kun la de ni 'byung ma yin/ /gang phyir nam mkha' gcig nyid du/ /khyod kyi de ni ma grub ste/ /rdzas kyi ngo bos gang stong pa/ /de ni kun rdzob nam mkha' yin/ /de la 'gro ldan 'gro ba dang / /de ni skabs 'dod skabs can no/ /des na nam mkha'i sgrib med min/ /skabs sbyin pa yang ma yin te//de yod gtan tshigs smras pa yis/ /gtan tshigs 'di yang ma grub nyid/ /rgyu las nye bar ma byung ba/ /nam mkha' dngos por mi 'dod do/ /de ni gcig kyang ma yin te/ /mo gsham gyi ni bu bzhin no/ /bum sogs gzugs kyi sa rnams ni/ / sa yi rigs su gcig na yang / /rdza sogs gzhan dang gzhan yin ltar/ /des na bdag ni gcig ma yin/ /bdag ma shes shing ma rtags pas/ /rmi lam longs spyod nga rgyal bzhin/ /shes nyid phyin ci ma log pas/ /shes 'di nga rgyal mi rigs so/ /mi shes nyid na'ang log med pas//mi shes nga rgyal mi 'dod do/ /nam mkha' bzhin du 'gyur med phyir/ /de bzhin chags pa med pa'i phyir/ /bdag ni byed por mi rigs la/ /za ba por yang mi rigs so/ /byed po bdag yin mi gos pa/ /byed po'i 'bras bu 'dod ci ltar/ /mi dbang sdig dang bcas pa'i phyir//rgyal po'i dpe ni mi rigs so/ /phyi rol la ni ma ltos par/ /gcig nyid ngo bo nyid mi rigs/ /gcig nyid dang ldan pas she na/ /de ni de dang ldan ma yin/ /du ma nyid du brtags pa dag /gsal ba gcig nyid yin zhe na/ /ji ltar brtags pa kun rdzob phyir//des na gcig ste don dam min/ /rtag dang gcig sogs ngo bo yis/ /don dam de yod yin zhe na/ /gcig sogs sgra dang blo 'jug pa/ /don yod na ni skyon med 'gyur/ /gcig la sogs par rnam rtog pa/ /'di ni ci ltar mi rtag nyid/ /rnam par rtog pa'i yul don la//tshig 'jug par ni ma bkag go/ /'di ltar blo yi yul min dang / /ngag gi spyod yul min ci ltar/ /brjod med rtog pa med pa yang / /sngar bstan rigs pas brdzun pa nyid/ /shes bya ye nas ma grub pas/ /blo yi yul du mi rigs so/ /blo yi yul las log pas na//ngag gi yul las log pa'ang yin/ /de bzhin gshegs pa'i mi brdzun pa'i/ /lugs 'di dge bar shes nas ni/ /de phyir mu stegs 'dod skyes te/ /de la bdag gir byas pa yin/ /sngon dang phyi mar 'gal ba yi / /de yi lugs la su zhig dad/ / shin tu rigs mi gcig pa'i phyir/ /lcags las nor bu rin chen bzhin/ /'di ltar 'di ni lugs 'di la/ /kha cig dag ni drang phyir dang / /lhag ma 'dzin las bzlog pa'i phyir/ /sna tshogs dag tu bstan pa yin/ /dngos po rnams ni ma skyes nyid/ /rang bzhin bcos ma med pa'i phyir//'di la nyams pa med pas na/ /bdag ces kyang ni brjod pa yin/ /tha dad dngos kyang dbyer med phyir/ /ngo bo gcig phyir gcig nyid yin/ /kun khyab chos rnams thams cad phyir/ /rtag pa'ang de yin mi nyams phyir/ /ma skyes phyir na skye med nyid/ / de nyid phyir na rga shi med/ /'pho ba med phyir 'di 'pho med/ /rab mthar thug phyir mchog yin nyid/ /gzugs dang sgra dang dri sogs min/ /sa dang me dang chu rlung min/ /nam mkha' zla ba nyi ma min/ /yid dang shes pa'i mtshan nyid min/ /thams cad 'di yin rang bzhin phyir//nyams pa med phyir thams cad min/ /de la nyon mongs skye med phyir/ /dag pa 'di yin zhi nyid 'di/ /de ni brtags pas sgro btags nas / /brjod bya yang dag brjod bya min/ /ye nas brjod bya ma yin phyir/ /'di ni dri ma med ces bstan//gang zhig 'di ltar mngon 'dod pa/ /khyod kyis bdag kyang yin na ni/ /ming sogs chos mang 'dra ba la/ /skyon med rigs pa dang bcas yin/ /bdag med nyid kyis 'jigs pa rnams/ /'jigs kyang de nyid la gnas te/ /nam mkha' 'jigs par gyur pa dag /gzhan pa'i gnas 'ga' 'ang med pa bzhin/ /sangs rgyas 'jig rten gnyen rnams kyi/ /de nyid bdud rtsi mchog 'di la/ /'di ni 'ga' yang bkag med pas/ /legs par 'ongs so ngoms par gyis/ /yang dag lta la sgrib med pa'i/ /bdag ni byed po za po sogs//rten med brdzun pa'i 'dzin pa ni/ /des na spang ba kho nar gyis/ /dngos rnams rang bzhin skye med phyir/ /de nyid du na skye med 'dod/ /ngo bo nyid kyis skye med nyid/ /'di yi ngo bo nyid du bstan/ /dngos med nyid ni bdag med pa/ /de ni bdag min 'gal ba nyid//bdag med bdag tu 'gyur zhe na/ /ba lang min pa 'ang ba lang 'gyur/ /dngos po'i ngo bo med 'di ni/ /'di ltar byed po za por rigs/ /gang phyir mo gsham dag gi bu/ /byed po za por ma yin bzhin/ /de ltar gyur la skye ji ltar/ / de las nyams par 'gyur ji ltar/ /mkha' la me tog med pa la/ /ji ltar skye 'jig btags pa bzhin/ /dngos po med pa'i yul dag la/ /ji srid blo ni 'jug gyur pa/ /blo yis btags pas sgro btags phyir/ /de srid gcig la sogs par 'dod/ / rtog bcas rtog pa med pa las / /gang tshe blo ni log gyur pa/ /de tshe blo la yul med phyir/ /spros pa nyer zhi zhi ba nyid/ /dbu ma'i snying po las rig byed kyi mtha' rgyur smra ba'i de kho na nyid la 'jug pa ste le'u brgyad pa'o// //ngo tsha med pa kha cig ni/ / byang grol legs lam bsam gtan dang / /shes la skur 'debs bya ba tsam/ /bdag gis de ni 'thob par sems/ /chags sogs skyon gyis nyams pa'i phyir/ /skyes bu'i tshig ni brdzun nyid yin/ /rig byed skyes bus ma byas phyir/ /des na tshad mar gzung bar bya//byed po mi dran par 'dod phyir/ /rig byed skyes bus ma byas la / /brgyud nas 'ongs pa ma chad phyir/ /des na lung yin de med na/ /sgra rtag dbyangs kyis gsal bar byed/ /don dang 'brel pa rtag pa nyid/ /don la rtogs pa dang ldan la/ /rtogs pa rab tu skye bar 'gyur//lan cig 'jug phyir goms pa'i phyir/ /phyis kyang shes phyir de bzhin du/ /mnyan bya yin phyir sgra nyid bzhin/ /sgra ni rtag par shes par bya/ /mngon sum rjes su dpag pa dang / /sgra las byung dang nyer 'jal bcas/ /don gyis go dang dngos med pa'i//gtan tshigs bsgrub bya sgrub par byed/ /'di ni rjes dpag las tha dad/ /tshad ma yin phyir gzhan de bzhin/ /yang na gcig dang du ma'i yul/ /rtogs par gyur pa ji bzhin no/ /rtags dang 'brel pa ma mthong ba'i/ /dngos don blo yi rgyu phyir ram/ / yang na tha dad blo skye ba'i/ /rgyur gyur pa nyid yin phyir ro/ /sngon med pa yang bya bas gsal/ /thar pa'ang bya bas sgrub par byed/ /mkhas gang zla ba'i btung sogs kyis/ /mthar byed pa las nges par rgyal/ /drang srong lhas bsten dam pas 'dod/ /lam rnying bzang po rig don 'di//phyi rol dmangs rigs bud med gzugs/ /'dzin pas rigs ldan gsum 'di spangs/ /'di la gang yod gzhan la yod/ /'di la gang med 'ga' la'ang min/ /chos la sogs pa bzhi po yang / /de nyid gzhan na'ang mthong ba min//gtan tshigs smra bas gtan tshigs kyis/ /lam gsum po ni sun 'byin te/ /rjes su dpag pa gtsor gyur phyir/ /rang gi lugs ni gsal byed gang / /long ba rkang pa'i tshod dpags kyis/ /nyam nga'i lam du rgyug pa ltar/ /rjes su dpag pa gtsor 'dzin rnams//ltung bar dka' ba ma yin no/ /'di na 'ga' yang kun mkhyen med/ /gang phyir 'di ni ma mthong phyir/ /thams cad mkhyen par sangs rgyas la/ /brtags pa 'jig rten gus bya'i phyir/ /sangs rgyas gsung yang tshad ma min//byas pa'i phyir na gzhan bzhin no/ /rdzogs pa'i sangs rgyas kun mkhyen min/ /skyes bu yin phyir gzhan bzhin no/ /sangs rgyas gsung ni tshad ma yin / /lta ba gsum po sun 'byin phyir/ /ji ltar gang smra de de ltar/ /gcer bur rgyu ba'i lta ba bzhin//sgra don rigs pa shes pa yis/ /phyogs su lta ba'i dug spangs nas/ /yang dag ji bzhin tshol byed na/ /'di la 'di ltar dpyad par bya/ /brgyud nas 'ongs pas ma chad pa/ /lung nyid yin pas lung zhe na/ /kun gyi lung yang 'grub 'gyur bas/ / nges par gang gi de nyid bzung / /gal te rigs pas brtag bzod pa'i/ /tshig gang yin pa de lung yin/ /re zhig de nyid dpyad par bya/ /phyi nas de yis gang bstan pa'o/ /de la de yi gnyen po'i phyir/ /ye shes grol ba zhes 'dod de/ /nad kyi gnyen po yin pa'i phyir//sman gyis nad las grol ba nyid/ /bya bas grol ba 'thob pa min/ /bya ba yin phyir zhing las bzhin/ /blo ma yin phyir brjod bya'i phyir/ /cung zad dus can yin phyir yang / /skyes bu'i tshig ni skyon bcas phyir/ /tshad ma min par 'dod ce na/ / gser tog shes sogs tshig rnams kyis/ /gtan tshigs nyid ni ma nges 'gyur/ /'on te byas pa min pa'i phyir/ /rig byed tshad mar sgrub ce na/ /gtan tshigs thun mong min nyid dang / /ma grub pa yi don yang yin/ /rjes su bstan min skyon med do/ /zhe na sangs rgyas kyi'ang ma byas//sngon gyi sangs rgyas rdzogs sangs rgyas/ /ji ltar rtogs de gsal byas yin/ /byas pa nyid du rjes dpag pas/ /phyogs la rjes su dpag pas gnod/ /byed pa mi dran ma grub pas/ /gtan tshigs 'di ni ma grub nyid/ /gal te sngags kyi byed po sngon//sngags dang bcas par byung gyur pas/ /byed pos byas kyang ma byas par/ /khyod kyi bstan bcos mngon 'dod pa/ /de dang lhan cig byung bcas phyir/ /skye ba dran pas smras pa bzhin/ /bstan bcos byed po dang bcas na/ /'di ltar ci phyir smra mi byed//rtogs dang rjes su mthun phyir ram/ /de bzhin yi ge'i lugs ldan phyir/ /rig byed tshig rnams gzung bya ba'i/ /byed po skyes ba min nam ci/ /'dis kyang rig byed tshig rnams ni/ /skyes bus byas pa yin par 'dod/ /brjod 'dod don gyi blo skye ba'i//rgyu phyir 'dod pa spyod pa bzhin/ /skyes bu mi bzang bas byas par/ /rig byed 'di ni gzhal bya ste/ /'byung po 'tshe dang chang 'thung brdzun / /smra phyir ma ga'i bstan bcos bzhin/ /gal te gnod sems mi 'dod pa'i/ /'bras bu mi sbyin 'dod pa'i 'byin//sngags kyis gzung phyir dug spyod bzhin/ /bstan bcos 'byung phyir sbyin pa bzhin/ /sngags sogs phye mas bkug pa yi/ /bgrod min la yang bgrod bya gang / /sngar bstan chang btung phyi ma yang / /des na ma nges pa nyid yin/ /blo sngon ma song bya ba yis/ / dug zos na yang 'chi byed la/ /las ni blo sngon ma song la/ /'bras bu 'byin par ma bstan to/ /de nyid phyir na dug gi dpe/ /mthun pa min pas rigs ldan min/ /des na sngags kyis phyugs gsod pa/ /rigs pa min par rtogs par bya/ /tshe yi bar du gcod byed phyir//sngags kyis gzung ba 'dod pa yi/ /'bras bu 'byin par mi 'dod de/ /dug mtshon bstan bcos sbyor ba bzhin/ /rang gi lugs las bstan ce na/ /'khor ba sgrol byed pa'i yang 'grub/ /thun mong gtan tshigs smra zhe na/ /gzhan la ma grub pa nyid yin//gang yang sngags kyis ma bzung ba'i/ /bsod nams cung zhig ci byas pa/ /de kun 'bras bu med 'gyur ba/ /mi 'dod pa yi 'bras she na/ /sngags kyis gzhan ni gsod pa gang / /de yang skyon med thal bar 'gyur/ /dbang du byed pa'i sngags gang gis/ / gzhan gyi bud med bsten pa dang / /sngags kyi stobs kyis 'tshe 'gyur gang / /gal te gsod par mi 'dod na/ /gzhan gyi nor ni rku byed pa/ /de yang skyon bcas ma yin 'gyur/ /gal te sngags sngon song ba'i las/ /der ni dger 'dod gzhan ma yin//zhe na lung 'di 'dra ba la/ /gtan tshigs khyad par smra dgos so/ /gal te srog chags sngags btab pas/ /gang yang bcing ba ma byas la/ /g.yo ba med par bya zhe na/ /de lta na yang khyad par med/ /gang phyir sgo kun bsubs nas ni/ /bzung nas nus med byol song dag /mtshon cha rnon pos gsod pa la/ /de la sngags kyis ci zhig bya/ /rang nyid rang byung gyur pa yis/ /mchod sbyin don du byol song bskyed/ /des na de la dgos pa'i phyir/ /mchod sbyin chos yin 'di ltar dper / /bram ze'i don du 'tshe byed pa/ /'di ltar chos min min pa bzhin//mchod sbyin byol song rnams gtses kyang / /'bras bu mi 'dod min de yi/ /don phyir zhe na bram ze'i phyir/ /ci ltar 'dod par 'tshe byed bzhin/ /byol song spyad pa'i phyir bskyed de/ /spyad bya yin phyir bud med bzhin/ /de phyir mchod sbyin phyir ma grub//byol song gtan tshigs ma grub phyir/ /dbus kyi mchog sbyin gnas bsad na'ang / /ma 'khrul bsams bzhin bsad pa'i phyir/ /phyi mar byed po mi 'dod pa'i/ /'bras bur gyur te gzhan bzhin no/ /mchod sbyin la ni bsad pa yang / /mi 'dod pa yi 'bras bu 'byung //bsams bzhin du ni srog 'chad pa'i/ /sdug bsngal bskyed phyir gzhan bzhin no/ /bya ba ji ltar byas pa las/ /de 'dra'i 'bras bu lus la mthong / /byed po de 'dra'i ma mthong yang / /bsad pa yin phyir gzhan bzhin no/ /myos 'gyur btung sogs kyang bshad pas//ci ltar bstan bzhin spang bya ste/ /des na myos 'gyur bsten mi bya/ /myos par 'gyur phyir myos sogs bzhin/ /mchod sbyin sngags kyis yongs bzung ba'i/ /myos 'gyur skyon med ma yin te/ /myos phyir dper na gzhan bzhin te/ /sngags kyis btab pa mthong ba bzhin//rtags ni mthong ba med ces te/ /gal te mtho ris sogs mi nges/ /she na rtags las rjes dpag des/ /nges pas nges pa min nam ci/ /lan cig 'jug phyir zhes bya 'dir/ /mar me'ang lan cig nyid 'jug pas/ /gtan tshigs ma nges nyid yin phyir//sgra yi rtag pa nyid kyang brdzun/ /yod phyir sgra ni mi rtag ste/ /ci phyir bya ba bzhin mi bzung / /yang na lus kyi g.yo ba bzhin/ /blo yi rgyu phyir nyams par 'gyur/ /goms phyir phyis shes phyir zhes pa'ang / /gtan tshigs rjes 'gro med pa nyid//goms dang phyis kyang shes pa ni/ /rtag min nam yang ma mthong phyir/ /sgra nyid rtag pa nyid ma grub/ /sgra nyid dpe yang ma yin la/ /mngon par gsal byed pa yang bkag /'di ni ngag gi gsal byed min/ /gal te sgra de mnyan bya na/ /ngag gis gsal bar ji ltar 'dod//rtogs pa zhes bya'ang brda nyid pas/ /'di nyid sgra ru thal bar 'gyur/ /dang po brda ni med pa na/ /rtogs pa yod par mi rigs so/ /'khor ba thog ma med pa ltar/ /brda yang rjes su 'jug pa nyid/ /rjes su dpag pa'i tshad ma nyid/ /de bdag nyid las tha dad min//des na tshad ma yin phyir zhes/ /bya ba'i gtan tshigs 'di ma nges/ /tha dad spyod yul can gyi blo'i/ /rgyu nyid du ni khyod kyi de/ /ma grub tha dad yul yin phyir/ /gtan tshigs ma grub nyid du 'gyur/ /du ma'i don dngos tha dad phyir/ /don gcig min pa rtogs pa'i rgyu//rjes su dpag par yang 'dod pas/ /de phyir sgra byung las gzhan min/ /rtags dang 'brel ba ma mthong bas/ /mthong ba'i don las rjes dpag nyid/ /gang phyir rtog bya rtogs par byed/ /de phyir de ma thag tu min/ /rjes dpag sgra byung tha dad min//lkog gyur shes pa'i rgyu nyid yin/ /'brel pa dran la ltos bcas phyir/ /ji ltar rjes dpog rang nyid bzhin/ /sngon med bya bas gsal mi byed/ /sgra yis gsal byed bkag pa bzhin/ /gsal bar byas pa'i bum pa ltar/ /sngon med pa yang mi rtag 'dod/ / zla ba'i btung sogs bya ba'i 'bras/ /rtag pa min pa nyid du 'dod/ /bya ba'i 'bras bu yin phyir dper/ /'dod pa'i rgyus byung 'bras bu bzhin/ /zla ba'i btung sogs bya ba yis / /thar pa 'thob par mi rigs te/ /bya ba yin phyir 'dod pa yi / / rgyu mtshan bya ba mi 'dod ltar/ /de'i phyir lam 'di la brten nas/ /mthar byed las rgyal 'gyur ma yin/ /blo yis dpyod pa'i nus med pas/ /gzhan rjes 'brang bas 'di la brten/ /'chi med nyid ni yod pa'i phyir/ /nyer zhi rig byed yod ce na/ /med de 'di ni phyin ci log /mi rtag pa la rtag par btags/ /rig las 'byung ba'i don gsum mo/ /shis brjod bstod dang cho ga dag /gang phyir don 'di gsum po 'dis/ /thar pa nam yang 'thob ma yin/ /gal te snying po nyid yin pas/ /rig byed tshad mar 'dod ce na/ /mi shes phyin ci log lta sogs//ci yi phyir na tshad ma min/ /lan gsum po ni ston byed pa/ /tshangs pa khyab 'jug bde byed rnams/ /nyon mongs bdag nyid spyod mthong bas/ /gang phyir gsum 'di spang ba'i rigs/ /'dod pa med na ji ltar 'di/ /'dod dga' ma la spyod par byed//de bzhin 'dod bral lha mo la/ /'gro gtso stobs kyis ci phyir brjod/ /'di ni skye dgu'i bdag las skyes/ /de ni rang byung bu yin na/ /rang byung tsha mo 'dod ldan la/ /spyad par gyur pa min nam ci/ /rig las drang srong skye bstan pa/ /'di ltar byung 'di brtag mi bya//gnyis skyes rnams kyi gsang ba gang / /kun la brjod par bya ba min/ /rang byung gi ni spyod pa 'di/ /'khrul par gyur pa 'di la ltos/ /tsha mo mthong dang reg pa las/ /byol song bzhin du gang chags nas/ /lus ni 'byung bar gyur pa las/ / mi gtsang shong bar gyur pa 'di/ /mi ni sems dang ldan pa 'ga'/ /mi skye yin na 'di byed dam/ /khyi dang bong bu dag gi ni/ /spyod pa 'phags pas dmad pa la/ /rang byung spyod pas des na des / /de dag dang ni khyad ci yod/ /shes ldan shes pas sdig pa dag / sreg ste me yis shing bzhin no/ /des na mthu yi khyad par gyis / /ngan 'gror de mi 'gro zhe na/ /gang gis nyon mongs sreg nus pa'i/ /mkhas pa shes des shes ldan la/ /de ni sdig pa byed mi 'gyur/ /de rgyu shes ldan la med phyir/ /ltung bar byed pa'i las rnams kyis//rnal 'byor grub la mi gos zhes/ /smra zhing yang dag lam nyams la/ /gzhan dag gi yang nyams par byed/ /tshangs la sogs pas de nyid don/ /blo yis mthong bar mi 'dod de/ /tshangs pa dang ni rtse gsum can/ /thig le mchog mar kun chags phyir/ / dang por khro mes ma bsregs na/ /grong khyer sum rtseg ji ltar bsregs/ /nyi rgyal so phyung ci lta bu/ /nyi skal mig phyung ci lta bu/ /tshangs bsad chang 'thungs 'dod pa can/ /dbang phyug de nyid mthong zhe na/ /de yi lam gyi rjes 'brang ba/ /ji ltar de nyid mi mthong 'gyur/ / khyab 'jug yin na sgra gcan dang / /tsa tu ra dang dmyal la sogs/ /snying rje med par gyur pa yi/ /nor srog phral ba ji lta bu/ /gzhan nor chung ma ma byin len/ /chang sred srog ni gcod pa dang / /de nyid mthong bas 'ongs gyur na/ /ri brags rkun mo shin tu'ang yin/ /skye dgu bskyang la gsal ba'i phyir//lha min lha yi tsher ma dag /bsad kyang skyon ni yod min te/ /de ni chos bsrung phyir zhe na/ /gal te de ni chos bsrung bar/ /'dod pa yin na ci yi phyir/ /gzhan nor bud med rku ba dang / /g.yo sgyu la 'jug spong mi byed/ /'gro ba'i de nyid de rang bzhin//rang bzhin yin phyir dong tshe bzhin/ /'gro ba mi rtag par mthong na/ /de ni ji ltar rtag par 'dod/ /gal te 'gro las de gzhan te/ /sa dang rdza mkhan bzhin zhe na/ /rdza mkhan dang ni sa bzhin du/ /mi rtag par ni mtshon par bya/ /chos min 'dod pa ma yin na//de byed par ni ji ltar 'gyur/ /yang na lkog tu gyur pa'i don/ /mi shes phyir na byas pa yin/ /sred pas 'jig rten skyong zhe na/ /sred pa'i bran du ji ltar 'os/ /snying rje zhe na 'jig rten rnams/ /sgyu mas rmongs par ci phyir byed/ /skye dang 'chi sogs sdug bsngal can//lha ma yin la 'ang cis mi brtse/ /thams cad mnyam par mthong ba'i phyir/ /dgra yi 'du shes mi rigs so/ /rang nyid 'gro ba'i byed po yin/ /skye 'jig dag gi gtso bo ni/ /phan par byed la brtse ba ltar/ /phan byed la brtse de ci ltar//gal te 'gro gtso 'di yin pas/ /'di las lhag pa'i mchog med na/ /ci phyir mdangs ldan ma bcas pas/ /thub pa gos ngan khur bar byed/ /yang na de yi spyod mthong nas/ /skye dgu byed po zhes bya'i blo/ /rang gis byas sam slob yin na'ang / /khur bar byed pa'i blo ci yin//mchod 'os dka' thub lhag ce na/ /dka' thub gtso yin de ma yin/ /dmod pas 'jigs pa yin zhe na/ /byed po yin pa'i yon tan ci/ /'dod chags zhe sdang sogs 'dres pa'i/ /'phrog byed spyod pa 'di ci yin/ /'phags min spyod pa 'di ldan pa//de ni ji ltar skyes mchog yin/ /'gro ba mnyam med 'phrog byed pa/ /gal te de la stobs yod na/ /ci phyir shugs can nag po yis/ /'jigs nas phug tu zhugs zhes drag /shugs can nag pos 'jigs skrag nas/ /rgyal po'i drang srong mu tsu ku'i//khri yi 'og tu zhugs gyur par/ /nag por gyur pa min nam ci/ /grong khyer mang por gnas pa na/ /khung nas rkun mo bzhin 'bros pa/ /gal te srid gsum des bskyed na/ /lha ma yin la ci phyir 'jigs/ /gang tshe rgas byed mdas phog nas/ /'di ni 'chi bar 'gyur ba'i tshe//de nyid mthong ba'i shes pa dang / /de yi stobs kyang gang du song / /sgyu dang g.yo yis rmongs byas te/ /ngan pa'i las la sbyar byas nas/ /bla ma gnyen bsad 'jigs pa yis/ /srid sgrub tu gyur ji lta bu/ /dgra tshogs zad par byas pa la / /nges par rang la nus med pas//gang phyir snying rje med pas gzhan/ /bskul ba'i don du song bar gyur/ /gang yang cung zhig dbang phyug ldan/ /gal te de la gnas yin na/ /de ni kun la khyab nyid min/ /des na gzhung 'di dor bar gyis/ /'og tu zhugs nas sa bteg pa/ / khyab pa yin na ji ltar rung / /'on te 'di der ma gnas na'ang / /khyab par smra ba mi mdzes so/ /'og tu zhugs nas sa 'dzin par/ /nus na drang srong dmod pa yis/ /rang rigs sa 'og 'gro gyur pa/ /'dzin par mi byed ji lta bu/ /de la gus pa mi nyams zhes/ / gang la de lta'i blo yod na/ /de la gus pa'i bud med dag /co bzung dgras khyer ji lta bu/ /de 'ba' zhig kyang ma yin gyi/ /bshes dang gnyen dang bu rnams dang / /de la gus par mthong ba gzhan/ /kun kyang nyams par gyur pa nyid/ /'phrog byed 'di yi dngos gzhan zhig /zhi bar gal te rtog byed la/ /gang mthong dul gang yang srid du/ /'byung bar mi 'gyur gang yin pa/ /'di yi yod min med ma yin/ /yod min med pa min pa'ang min/ /des na med phyir yod pa'i phyir/ /yod med min phyir de ni mchog /nya sogs ngo bo yod pa'i phyir//gzhan yin na yang 'chi med min/ /gzhan min nyid na'ang gzhan min phyir/ /de ni zhi min gzhan bzhin no/ /gal te gcig ni zhi bdag nyid/ /yin na'ang gcig ni ma zhi na/ /bud med 'phyon ma'ang bsngags par 'os/ /lus kyi phyed ni 'dod pa'i phyir//yod sogs sgra yis brjod min phyir/ /mchog ces bya ba'ang rigs pa min/ /yod na mchog tu rigs 'gyur la/ /rgyu nyid du yang rigs pa yin/ /rgyu nyid yin pa spangs pa yin/ /gzhan nyid yin pa 'ang snga ma bzhin/ /rgyu yang ma yin gzhan yang min/ / 'chi med ma yin skye ba'ang min/ /gal te 'chi med dngos yin na/ /'di ni nyams 'gyur ro sogs bzhin/ /gal te 'chi med dngos min na/ /de med nam mkha'i me tog bzhin/ /yod min med min mi rigs te/ /me la grang dang dro bzhin no/ /de bzhin 'chi ba med pa de //brjod med yin par ji ltar rigs/ /brjod du med nyid bdag dang ni/ /'dra na med yin bkag pa nyid/ /'chi med phyir 'chi med ce na/ /'chi med med phyir 'chi med min/ /skyon rnams sba phyir btags pa yi/ /de yi dngos po gzhan zhig ste/ /de la dmigs na ji lta bu//grol 'dod grol bar 'gyur ba yin/ /tshangs pa dang ni nor lha yis/ /glur blangs gsang ba oM zhes bya/ /tshangs pa'i yi ge de nyid ni/ /yod de kun la khyab pa yin/ /de ni tshad gsum gsal ba yin/ /de bzhin shin tu phra bar bstan/ /dang po'i rgyu ni i ge aH //ngag dang snying stobs sa me bsdus / /las dang nam mkha' nyid dag kyang / /yid rtul snying stobs u dang ldan/ /byed po'i yi ge ma'i ming can/ /srog dang mun pa gsum pa yin/ /'gro ba thams cad sdud par byed/ /gnyid chen shin tu log pa'i rgyu'o/ / 'pho dang bsam gtan rlung 'byung 'jug /gzung bar bya dang brtag pa dang / /ting 'dzin zhes bya rnal 'byor gyi/ /yan lag drug tu brjod pa yin/ /dbang po kun gyi shes pa ni/ /yul la g.yo bar byed pa rnams/ /yang dag bsdus la srog ldan ni / /yid la bsam gtan bya ba ste//gnas dag tu ni spo zhi bya/ /dbang po dag dang dbang don dag /rus sbal yan lag bzhin bsdus la/ /dran pas yi ge oM brjod na/ /de gus skyes bu grol bar 'gyur/ /'phrog byed gus pas grol bar ni/ /'phrog byed mthong bas mi rigs nyid/ /rnam rtog mtshan ma dang bcas phyir//dper na 'phrog byed mthong ba bzhin/ /grol phyir rnal 'byor ldan pa yi/ /mi rtog blo yang mi 'dod de/ /mtshan mar 'dzin phyir brdzun yin na/ /yongs su brtags pa smos ci dgos/ /chags sogs kun tu spyod pa'i phyir/ /tshangs sogs rnams ni phyugs rdzi bzhin/ / de nyid rig pa spangs pa'i phyir/ /rgyu la mkhas pa ma yin no/ /bden pa'i chos ni bstan pa'am/ /rang nyid sgrub par byed pa yis/ /chos ni bsrungs par 'gyur yin na / /de la 'di ni gnyi ga med/ /kun kyang bskyed pa'i rgyu nyid du/ /smra la rang bdag tha dad pa / /gang gi tshig la bden pa'am//mi bden par ni brtag par bya/ /de gcig phyir skyon med ce na/ /tshangs pas tshangs bsad ji lta bu/ /gcig nyid rab tu bkag pa'i phyir/ /gcig nyid yin par mi rigs so/ /bdag las dbye ba mi rigs pas/ /gsum nyid du yang ji ltar 'gyur/ /sdug bsngal rgyu la rmongs rnams la//de zhi'i gtam yang ga la yod/ /rig las rnal 'byor bstan pa ni/ /de bstan pa las nyams pa'i phyir/ /chos bsrung bar ni nus pa yi/ /re zhig chos bden smra mi nus/ /sgrub pa las ni nyams pa'i phyir/ /gzhan dag zhi bar khrid mi nus/ /ji ltar g.yang sar rang lhung ba//gzhan dag 'dren par mi nus so/ /rtog pa'i dra bas btags pa yi/ /log pa'i gtan tshigs gsum po la/ /rigs sam mi rigs dpyad nas ni/ /gsum po 'di ni gtang ba'i rigs/ /sna tshogs byed pa byed byed sogs/ /rigs pa min pas sngar smras so/ /byed po yin par bden nyid na//'di dag gis ni ci zhig byas/ /re zhig bdag ni ma skyes phyir/ /de yis byas par mi 'dod do/ /chos dang chos min des ma bskyed/ /de'i yon tan phyir da lta bzhin/ /gal te 'di dag byed pos yin/ /las kyis bya ba'i ma yin na/ /las dang bya ba de dag gis//rgyu dang 'bras bu ji ltar 'gyur/ /bde dang sdug bsngal nyer dmigs pa'i/ /lus kyang de dag la 'jug pas/ /des na lus can rnams kyi lus/ /dbang phyug sogs kyis byas mi rigs/ /bskal pa dang po'i lus can lus/ /sngon byas ma mthong rgyu can te/ / bde sogs 'byung ba'i rgyu yin phyir/ /dper na da ltar lus bzhin no/ /gal te dbang phyug gi dbang phyug /de yang bsod nams byas she na/ /de yang bsod nams gzhan dbang phyir/ /dbang phyug dbang phyug min par 'gyur/ /gal te dbang phyug gi dbang phyug /glo bur gyur par 'dod na ni//des na gzhan dang mtshungs pa'i phyir/ /dbang phyug dbang phyug min par 'gyur/ /dbang phyug shes dngos yin zhe na/ /des na des byas 'gro ba rnams/ /rgyu yi rjes su byed pa'i phyir/ /kun kyang sems dang ldan par 'gyur/ /gal te dbang phyug rgyu yin na/ /'gro ba phra sogs ldan par 'gyur//las byed dbang phyug yin zhe na/ /de yang dmyal ba dag tu 'tshed/ /de min gzhan dag 'tshed na ni/ /byas nyams ma byas 'phrad par 'gyur/ /thar pa med pa yang yin te/ /rtag tu sdug bsngal rgyu ldan phyir/ /de yi sdug bsngal ga la zhi/ /me ni 'bar bar gyur pa yi/ / tsha ba ma zhi mthong ba bzhin/ /gcig pu sna tshogs min zhe na/ /'bras bu sna tshogs ji lta bu/ /'dod pas sna tshogs yin zhe na 'ang / /gcig pu sna tshogs mi rigs so/ /rtag pa cha med phra ba dang / /'gro ba'i byed po gcig pu nyid/ /kun la khyab pa yin no lo/ /'di las mtshar ba gzhan ci yod//phan tshun za bas 'jigs pa yi/ /bde ba rnyed dka'i dud 'gro dang / /zhib tu 'thag cing gcod 'bigs pa'i/ /sdug bsngal gyis gzir dmyal ba dang / /mi rnams skye rga nad dag dang / /sdug bsngal zug rngu'i rma btod nas/ /dga' 'gyur gang yin drag po zhes/ /ming don ldan pa de phyag 'tshal//'dzin pa can gang nor ldan dang / /gzhan gyi mtsho bcas dge ba can/ /chos min can 'ga' mtho gnas ldan/ /dbang phyug spyod par gsal ba yin/ /yon tan nor ldan tshe thung dang / /ngan par spyod rnams tshe ring dang / /gtong ldan dbul po mthong bas na/ /dbang phyug gis byas gsal ba yin//kha cig sangs rgyas pa yang bde/ /de la gus pa kha cig sdug /dbang phyug bkas ni bsod nams can/ /dag kyang ci phyir sdig mi byed/ /sna tshogs las la mi shes pas/ /de rgyu nyid du smra ba yin/ /sna tshogs byed por tshangs pa ni/ /mi rigs sngon du bstan pa bzhin//tshangs pa byed por bden na yang / /de yis ci zhig byas par 'gyur/ /dang por sems ni mnyam bzhag pas/ /blo yi sgo rnams legs bsdams la/ /yid la shi ba gzhag par bya/ /'di ltar yi ge oM bsgoms te/ /snying la gzungs kyis bzung byas pa/ / sa sogs gzugs la goms par bya/ /bde byed mnyes na sdug bsngal las/ /grol 'gyur zer ba 'di mi bden/ /ci srid yid kyi shes 'byung bas/ /de srid grol bar mi rigs te/ /yid shes 'byung phyir ji ltar sngar/ /grol bar ma gyur pa bzhin no/ /dbang phyug la gus grol 'gyur bar/ / mi rigs bde byed mthong ba yang / /dmigs la gnas pa yin pa'i phyir/ /dper na mtho yor mthong ba bzhin/ /sdug bsngal rgyu ni dbang phyug na/ /de ni rtag phyir bcos su med/ /des na sdug bsngal mthar 'gro bar/ /dbang phyug nam yang 'gyur ma yin/ /'dis ni lhag ma'ang dgag byas phyir//tshangs pa khyab 'jug bdag smra la/ /mi rigs phyir na dbang phyug sogs/ /btags la blo ni dga' mi byed/ /dus chen shin tu mang po 'das/ /bud med sems ni shin tu g.yo/ /de phyir bram ze zhes bya'i rigs/ /'ga' yang gang la'ang yod ma yin/ /rtsal dang rtsal gyi sde dag dang //de bzhin thos pa'i rtsa can dag /drang srong chen po gau ta ma/ /bran song nyal ba'i mngal nas skyes/ /gzhung ni rtsom par byed pa yi/ /kun 'da' bram ze'i drang srong yang / /thub pa chen po tun 'da' yis / /gdol pa mo dang nyal las skyes/ /nya pa yi ni bu mo la/ /pha ni mchog 'gro zhes bya bas//nyal las drang srong gling lam skyes/ /de yang bram ze zhes brjod do/ /bram ze'i drang srong 'jig rten grags/ /thos mang rig byed 'don byed pa/ /drang srong rwa zhes bya ba'i ma/ /dud 'gror skyes pa'i ri dgas yin/ /sbom dang de bzhin ras bal can/ /dmangs rigs bu yin bram zer grags//zla ba'i btung ba yang 'thungs nas/ /'jig rten drang srong chen por grags/ /'jig rten du ni grags gyur pa/ /bram ze lung phu zhes bya ba/ /thos mang de yang gdol pa'i rigs/ /lung ma zhes bya ba las skyes/ /bur shing bu mo las skyes pa'i/ /drang srong drang srong ka na ya //ka n+wa ya yi rigs bcas pa/ /skyes pa yin zhes rjod par byed/ /drang srong ka pi dza la yang / /drang srong dbang byed chen po yis / /gdol pa phreng ba mo la ni/ /nyal las skyes pa yin zhes thos/ /a gasta dang dbang byed ni/ /bum pa'i nang nas skyes zhes thos/ / bum pa'ang bum pa'i nang nas skyes/ /de bzhin gtsang skyes chu las skyes/ /pad+ma'i 'dab las shes rab myur/ /ka bad t+ya ni thal ba las/ /mgo la thod pa can nyid ni/ /thod pa las ni skyes zhes zer/ /chu yis sdig pa dag pa 'khrul/ /dge sogs nyo tshong byed pa dag /nyes bstan gsum la mthong bas na//gang phyir gsum 'di gtong ba'i rigs/ /'dis ni sdig pa dag mi 'gyur/ /ma reg phyir dang ma mthong phyir/ /ma bsgoms phyir dang bag chags phyir/ /dran pa'i shes dang dge ba bzhin/ /pad snying rkang phyung klung sogs kyi/ /chus ni sdig pa 'dag mi 'gyur//reg bya'i phyir ram bsgo bya'i phyir/ /khyim gyi ngan skyugs chu bzhin no/ /rang bzhin bsod nams ma yin las/ /chur zhugs sogs kyis zad 'gyur na/ /'bab stegs sogs su khrus byas rnams/ /sdug bsngal mi 'gyur rgyu med phyir/ /las rnams zad pa'ang ma yin pas//sdig pa zad pa 'ga' yang med/ /nang gi bdag nyid mi 'dag ces/ /bstan pa yod pas de yang brdzun/ /rgyud gzhan las ni rgyud gzhan du/ /sdig pa 'pho ba min par bzung / /lus can min phyir 'dod chags dang / /zhe sdang gti mug mi 'pho bzhin/ /de tshe bsod nams blangs par ni//mi rigs zhes ni nges par bya/ /sems dang mtshungs par ldan pa'i phyir/ /dper na bde dang sdug bsngal bzhin/ /'bar sogs nang du mchongs pa nyid/ /tshangs pa'i 'jig rten sogs 'gro bar/ /bstan pa'i lugs ngan gsum las mthong / / de phyir spang bar rigs pa yin/ /mer mchong la sogs tshangs pa yi/ /'jig rten sogs 'thob rgyu ma yin/ /srog la gnod par byed pa'i phyir/ /phye ma leb sogs mthong ba bzhin/ /bza' dang btung ba spangs pa yis/ /mtho ris thob par mi 'dod de/ /bkres dang skom pa'i rgyu yin phyir//zas ma zos pas gdungs pa bzhin/ /zas ma zos sogs bsod nams 'gyur/ /spangs phyir sdig spangs bzhin zhe na/ /bden sogs spangs pas gtan tshigs 'di/ /ma nges pa nyid yin par 'gyur/ /zas spangs bsod nams mi 'gyur te/ /bya ba de la sdig med phyir//dge ba yid la byed pa yi/ /yid la byed pa spangs pa bzhin/ /mtha' gsum dag pa'i sha gang dag /zos kyang sdig tu mi 'gyur te/ /dngas ma sogs su 'gyur ba'i phyir/ /slong mo'i zas la sdig med bzhin/ /gang yang sha ni zos pa yis/ /sdig pa'i rgyur ni mi 'gyur te//bkres pa zlog pa'i rgyu yin phyir/ /ma blangs byin pa'i zas skom bzhin/ /sha ni mi bza' ba yin phyir/ /mi za zhe na lus la rtogs/ /sa bon dang ni brtan byed pa/ /mi gtsang mi gtsang srin bu bzhin/ /khu ba sogs las byung ba'i phyir/ /nya sha sogs ni smad ce na/ /mar dang 'o sogs rgyu yin pas//'di ni ma nges pa nyid yin/ /sha za srog gcod nyid yin te/ /de yi rgyu mtshan phyir zhe na/ /lpags sogs thogs pas gtan tshigs ni/ /ma nges pa nyid yin par 'gyur/ /'jal dang srang la g.yo byed dang / /nye bar 'dod pa mi dge mnyam/ /'tsho byed nor ni rnyed pa de'i//gang yang sdig pa dag las ni/ /skyon ni gnyis kyis lhag pa ru/ /nyo ba po la 'byung bar 'dod/ /de bzhin bud med bdag po gzhan/ /'dod pa'i kha zas sbyin byed dang / /skal bar ldan pa'i bud med dang / /gang dag chos de ston pa dang / /tshul khrims med la smod pa dang //skyon tshogs 'joms phyir ti ti ri/ /dgra gsos las kyang nges par ni/ /chos ma yin pa thob par 'gyur/ /kun dga' ra ba khron pa rdzing / /der ni lus can shi gyur na/ /byed pa'i skye mched yin pa'i phyir/ /de la skyon 'di yod par 'gyur/ /gsad bya yod pas gsod yod kyis//gang phyir med na ma yin no/ /des na gsad bya gsod pa gnyis/ /sdig pa mnyam par thob par 'gyur/ /mthong dang thos dang bsnams pa dang / /reg dang dran pa nyid dang ni/ /sha las byas na'ang chos min 'brel/ /'di lta bur ni 'gyur ba yin/ / gsal bar byed pa'i nyi ma dang / /skye ba'i rgyu yi pha dag dang / /skyong bar byed pa'i mi bdag rnams/ /de rnams sdig pa'i byed po nyid/ /gos byed pa yi ltar byas na/ /zas kyi bya ba'ang mi rigs te/ /gang phyir skyon ni gnyis 'byung ba/ /ma zos pa la ma yin te/ /zos las srog chags skye 'gyur zhing //de dag thur du 'byung bar 'gyur/ /skyes pa nyams gyur ma zos na/ /ma skyes skye bar mi 'gyur ro/ /gal te gzhan gyi rgyu mtshan gyi/ /skyon de khyod ni mi 'dod na/ /gzhan gyis bsad par gyur pa yi/ /sdig de spyod la ga la 'ong / /gang phyir mi sdig gnas mi sbyin//des na sdig de yod ma yin/ /de phyir sha sogs rjes gnang ba/ /skyon med par ni gzung bar bya/ /sha za ba ni skyon bcas min/ /de tshe srog chags gnod min phyir/ /mu tig rma bya'i sgro sogs dang / /'bras dang chu yi dgos pa bzhin/ /'dod chags kun rtog las byung phyir//sha zos de yi rgyu ma yin/ /de ma zos la'ang de 'byung ste/ /rtswa zan ba lang la sogs bzhin/ /sems med pa yi brtan pa la'ang / /sems ni yod par rtogs byed pa'i/ /nyes bstan gsum la mthong bas na/ / gsum po 'di ni spang ba'i rigs/ /ljon shing sems dang bcas pa min/ /skye gnas bzhir ni ma bsdus phyir/ /dkyil du bcad kyang bzod pa'i phyir/ /phag dum bzhin du bems po yin/ /gal te srog chags rkang brgya ltar/ /reg na 'khums par 'gyur bas na//sa ma ga dang thal sbyar ni/ /sems dang bcas par 'dod ce na/ /me yis reg pa'i skra sogs dang / /skra la 'tshal phyes blugs pa yi/ /khyad par de dag nyid kyis kyang / /'di ni ma nges pa nyid yin/ /gso ba yod pas shing rnams ni/ /sems dang bcas par mi 'grub ste/ / chang la sogs pa nyams pa dag /ldog pa yod par the tshom 'gyur/ /mthun pa las skyes 'phel 'gyur dang / /sdang sems dus ldan skye ba'i phyir/ /de bzhin gnyid log smyo ba'i phyir/ /sems yod rta sogs bzhin du 'dod/ /lhog pa byu ru bai DUr+ya/ /rin chen gser gyi myug sogs kyis//shing rnams sems dang bcas par ni/ /'di ltar ma nges pa nyid yin/ /'di dag la ni sems med phyir/ /sdang sems zhes bya 'ang ma grub nyid/ /gtan tshigs don yang mi 'grub ste/ /lhog pa sogs kyis ma nges nyid/ /sems can rnams kyi las dbang gis//rtsa bas 'byung ba dus su skye/ /dmyal ba dang ni mtho ris kyi/ /mtshon dang dpag bsam shing bzhin no/ /lam gsum ji bzhin don ldan yin/ /tshangs pas bstan phyir sman dpyad bzhin/ /'das dang ma 'ongs mkhyen pa po/ /des bstan bsgrub bya yin zhe na//tshangs smras zhes bya'i gtan tshigs dag /skyed byed sogs kyis smras pa ni/ /nyes par brtags par bsgrubs pa'i phyir/ /des na khyod kyi 'di ma nges/ /'ga' zhig don bzhin mthong ba yis/ /kun tu don bzhin ma yin te/ /gnag rdzi smyon pa'i tshig rnams ni/ / kun tu ji bzhin don min bzhin/ /'das dang ma 'ongs shes pa nyid/ /yi dags la sogs la yang yod/ /de yis smras pa'i thams cad min/ /de phyir gtan tshigs dpyad bya yin/ /chos sogs 'di la gang yod pa/ /de nyid gzhan la'ang yod ces pa/ /res 'ga' srin bu'i yi ge'i tshul//legs bshad 'ga' zhig mthong ba yin/ /ji ltar mi gtsang phung po'i nang / /rin chen 'ga' zhig mthong gyur pa/ /rab tu skye dang de yi mthu/ /shes dang ldan pas de shes 'gyur/ /legs bshad 'ga' zhig gsum pa la/ /rab tu mthong ba'ang de dang 'dra//khyim srang mi gtsang phung po las/ /rin chen 'byung ba ma yin no/ /skyon med rjes su dpag pa yis/ /rigs sam mi rigs ma dpyad par/ /blo ni gzhan gyis bskyed pa'i phyir/ /lung gzhan dag la the tshom za/ /ji ltar klung chen rgal 'dod pa/ / gzings dag yongs su 'dzin pa ltar/ /de bzhin gtang bya yin na yang / /rjes su dpag pa gzung bar rigs/ /sgra tsam rjes su 'brang byed cing / /song ba'i rjes su 'gro byed pa'i/ /dmus long bzhin du dkyil 'khor 'dir/ /byis pa 'khor bar 'khor ba yin/ /rten pa med pa'i dmus long dag /nyam nga'i lam du 'gro byed ltar/ /sgra tsam gtso bor byed pa rnams/ /ltung bar dka' ba ma yin no/ /kun mkhyen zhes bya'i sgra 'di yang / /yul 'ga' zhig la ji bzhin yin/ /seng ge'i sgra yang la la bden/ /kha cig nye bar btags pa nyid//chos dang sprul pa'i sku dag ni/ /nga la mi nyid du ma grub/ /de bzhin gshegs pa'ang ma grub ste/ /des na ma nges pa nyid yin/ /gal te ji ltar khyod bcom ldan/ /thams cad mkhyen pa min par 'dod/ /bde byed khyab 'jug sogs dag gis/ /shes pa de ltar min zhe na//ji ltar de dag gis shes ltar/ /thams cad mkhyen pa de bden na/ /rab rib can gyis mthong ba ltar/ /dri med mig gis mi mthong bzhin/ /yang na 'di ltar thams cad mkhyen/ /chog shes nyid du 'dod na ni/ /gang phyir mdze ni mi sogs kyis/ /gtan tshigs 'di ni ma nges nyid//cung zhig shes kyi kun mi shes/ /she na thub pas gang ma mkhyen/ /mtho ris byang grol lam zhe na/ /bstan pa 'di las bstan pa nyid/ /bstan du zin kyang mi rigs zhes/ /gal te khyod kyi blo 'byung na/ /mi shes pa nyid yin pas na//de yi lan yang smras zin to/ /bstan bcos blo sgra'i phyogs byas kyang / /gtan la dbab par 'dra ba yin/ /dpyad pa can sogs ma nges nyid/ /byas pa'i phyir na skyon dang ldan/ /gsum po sun 'byin par 'dra bas/ /gcer bur rgyu ltar bdag 'dod pas//bsgrub bya'i rjes su 'gro med phyir/ /dpe ni med pa nyid yin no/ /dbu ma'i snying po las dpyod pa'i de kho na nyid gtan la dbab pa la 'jug pa ste le'u dgu pa'o// //gcer bur rgyu bas thub pa la/ /kun ma bstan pas kun mkhyen min/ /zhes smras khyu mchog sogs ma nges//brjod du med par brjod pa'i phyir/ /'khor ba'i thog ma ma rig cing / /rgyu yang rab tu ma shes la/ /de phyir ma rig rig med phyir/ /de bzhin nam mkha'i ro bzhin no/ /gal te thub pa'i mthus nus na/ /sems can thams cad mya ngan 'da'/ / mu stegs rnams kyis zhag bdun na/ /nor dang phrag dog dag gi phyir/ /mdzes ma bdag gis bsad do zhes/ /rang nyid kyis ni bstan pa yin/ /ji ltar thag pa chad gyur nas/ /shing gshong sa la lhung ba ni/ /rgyal bcas skye bo'i 'khor mthong nas/ de dag ngo mtshar che bar gyur//mngon du bstan par bya ba'i phyir/ /skyob pas gzhan du de ma bsgyur/ /sA la can grong zhugs pa ni/ /sems can don gyi bya ba mdzad/ /gang phyir bdud las rgyal zin pas/ /bdud kyi las ni de na med/ /nyan thos tshogs bcas dpa' bo ni/ /der ni bsod snyoms chad gyur pas//sems ni zhum par ma mthong tshe/ /mang po byang chub tu nges 'gyur/ /glang chen dul bar bya phyir dang / /'gro ba rnams ni gdul ba'i phyir/ /bcom ldan grong khyer gshegs pa yin/ /thub pa bcom ldan mi mkhyen min/ /lha sbyin gyis ni sgyogs 'phangs pa//de yang 'gro la phan phyir te/ /gzhan gyi gnod las grol ba yi/ /che ba'i bdag nyid bstan pa yin/ /skyes bu lngas brgyab brten pa'i rdo/ /chen po 'phangs par gyur pa ni/ /gnod sbyin kim pas de mthong nas/ /rang gi lus la bzed pa yin/ / lha dang lha min rnams dang ni/ /stong phrag dag ni brgya snyed kyis/ /dad pa'i dbang po sogs thob nas/ /srid pa las ni grol bar gyur/ /lhas sbyin khyim na gnas na ni/ /'khor los sgyur ba'i stobs ldan zhing / /'khor dang stobs ni thob gyur nas/ /bstan pa 'di ni nyams par byed//blo ngan 'di ni rab byung na/ /nga la ci yang byed mi nus/ /de ltar ston pas gzigs nas ni/ /rab tu byung ba ma bzlog go/ /cho 'phrul dag ni mthong 'gyur zhing / /chos ni thos par gyur nas 'di/ /bsod nams sog par gzigs gyur nas/ /rgyu skar bzang po bzhag pa yin// dbu ma'i snying po las thams cad mkhyen pa nyid du grub par bstan pa ste le'u bcu pa'o// //tha snyad la yang rmongs gyur pa/ /lta ba'i phreng 'khrugs 'gro rnams las/ /gnyis med de nyid nam mkha' 'dra/ /skal ldan sems can bkri phyir dang //'jig rten gnyis la phan gdags phyir/ /gang gis 'jig rten kun rdzob ni/ /'jig rten 'das kyang ston mdzad pa/ /'jig rten rig pa de la 'dud/ /de ltar 'di ni dbu ma yi/ /snying po mdor bsdus byas pa yin/ /blo ldan mdo sde du ma yi/ / gzugs brnyan blta ba'i me long yin/ /dbu ma'i snying po las bstod pa dang mtshan bstan pa'i le'u ste bcu gcig pa'o/ / dbu ma'i snying po tshig le'ur byas pa slob dpon chen po b+ha byas mdzad pa rdzogs so// //ra sa 'phrul snang gi gtsug lag khang gi gzhir/