CLOSE WINDOW

D3854
བོད་ཡིག

bam po nyi shur byas so//[ @##/ /rgya gar skad du/ ma d+h+ya ma ka rat+na pra dI paM nA me/ bod skad du/ dbu ma rin po che'i sgron ma zhes bya ba/ thams cad mkhyen pa la phyag 'tshal lo/ /yon tan dpag med gzhir gyur cing / /nyes pa'i dri ma bsal gyur pa//dkon mchog gsum la phyag byas nas/ /bden pa gnyis ni bri bar bya/ /'dir sdug bsngal gyi chu bos rab tu g.yengs par gyur cing / nyon mongs pa dang / rnam par rtog pa'i dpa' klong du 'khrugs par gyur pa'i 'gro ba lnga'i skye bo rnams bsgral ba'i don du lta ba rab rib ma lus par sel bar byed pa'i rin po che'i sgron ma bshad par bya'o//'dir 'phags pa chos kyi dbyings kyi rang bzhin dbyer med par bstan pa'i mdo las/ 'jam dpal chos kyi dbyings tshad mar byas na kun rdzob kyang med/ don dam pa yang med do zhes gsungs te/ 'on kyang re zhig mi shes pa'i ling tog gis blo gros kyi mig bkab pa/bdag tu 'dzin pa chen po snying la zhugs pa/ thog ma med pa nas dngos po la mngon par zhen pa/ tshu rol mthong ba'i rmongs pa rnams kyi ngor byas nas bden pa gnyis rnam par dbye bar bya'o/ /'di ltar rjes su dpag pa'i tshad ma gtso bor byed pa'i rtog ge bas ni de kho na nyid dang /sangs rgyas kyi sku dang ye shes shin tu lkog tu gyur pa dag brtags shing dpyad pas shes par mi 'gyur te/ phyi rol pa'i shes pa yin pa'i phyir ro/ /nyi ma dmus long yul min zhing / /mtho ris sdig can yul ma yin/ /de nyid dang ni bsgrub bya ste/ /rtog ge pa la yul ma yin/ / nor bu rin chen brtag pa la/ /long ba tshad ma yin nam ci/ /de la dang por kun rdzob kyi bden pa rnam par gzhag pa ni/ skra shad bal gyi 'khor lo dang / /zla gnyis chu yi zla ba dang / /dri za'i grong khyer rmi lam dang / /sgyu ma smig rgyu sprul pa dang / /brag ca me long gzugs brnyan dang //grib ma chu bur dbang po'i gzhu/ /glog la sogs pa'i dngos po ni/ /snang ba tsam gyis kun rdzob yin/ /chu shing gi ni phung po bzhin/ /ma brtags nyams dga'i mtshan nyid can/ /rgyu las skyes dang don byed nus/ /tshu rol mthong ba'i kun rdzob yin/ /thog ma med pa nas ma rig pa'i gnyid log pa'i rmi lam gyi gnas skabs lta bu'i tshu rol mthong ba'i shes pa dang /shes bya 'di ni skra shad 'dzings pa lta bur brdzun pa yin no/ /'di ltar brdzun pa ni yang dag pa ma yin na 'di la ni/ sngon gyi slob dpon dag gis yang dag pa'i kun rdzob tu bshad pa ni/ 'di ltar bdag cag dbu ma pa'i gzhung gis phyi dang nang gi chos thams cad kun rdzob nyid du yang brdzun pa dang /bcos ma dang / sgyu ma lta bu dang / rmi lam lta bur 'dod de/ slob dpon 'phags pa klu sgrub nyid kyi zhal snga nas/ dbang po rnams kyis gang dmigs de/ /gal te yang dag yod gyur na/ /byis pas yang dag rig par 'gyur//yang dag shes pa ci zhig dgos/ /zhes gsungs pas/ phyi rol gyi dngos po ril gyis brdzun pa nyid du bshad do/ /nang gi chos rnams ji lta bu zhe na/ bcom ldan 'das kyis ji skad du/ /mig dang rna ba sna yang tshad ma min/ /lce dang lus dang yid kyang tshad ma min/ / gal te dbang po 'di dag tshad yin na/ /'phags pa'i lam de su la dgos mi 'gyur/ /zhes gsungs so/ /slob dpon 'phags pa klu sgrub nyid kyi zhal snga nas kyang / dbang po rnams ni bems po dang / /lung du ma bstan nyid dang ni/ /tshad ma nyid kyang ma yin dang / /log par yongs shes khyod kyis gsungs//zhes so/ /de bas na yul dang dbang po rdzas med pas shes pa yang rdzas med de/ yul dang dbang po rdzas med pa la gnas pa'i shes pa yang rdzas su grub pa med de/ gzhi rdzas med pa dang / sems dang sems las byung ba dag kyang mang po 'dus pas rdzas su grub pa med de/ brtags pa tsam gyi rgyu rkyen las//brtags pa tsam gyi 'bras bu 'byung / /brdzun pa rdzas med 'bras bu de/ /gal te 'byung bar mi rigs na/ /chu zla la sogs su yis bskyed/ /ji srid brdzun pa'i rgyu rkyen yod/ /de srid sgyu ma'i skye 'jig gnas/ /slob dpon gyi ni zhal snga nas/ /'di na 'ga' yang skye ba med//'gag par gyur pa cung zad med/ /skye ba dang ni 'gag pa dag /brtags pa'i rkyen rnams kho na'o/ /zhes gsungs so/ /slob dpon zla ba grags pa'i zhal snga nas/ thog mtha' med pa'i srid pa ru/ / ma rig gnyid kyis log pa yi/ /'gro la gang gang snang de nyid/ /brdzun de rmi lam lta bur 'dod//ces gsungs so/ /de bas phyi nang gi dngos po ni brdzun par grub pa yin no/ /don dam pa'i bden pa ji lta bu zhe na/ 'di yang slob dpon gyi zhal snga nas/ dbu ma rtsa ba las/ gang gis rten cing 'brel par 'byung / /'gag pa med pa skye med pa/ /rtag pa med pa chad med pa//tha dad don min don gcig min/ /'ong ba med pa 'gro med pa/ /spros pa nyer zhi zhi ston pa/ /rdzogs pa'i sangs rgyas smra rnams kyi/ /dam pa de la phyag 'tshal lo/ /zhes gsungs pa 'di yin no/ /da ni bden pa gnyis kyi don bshad par bya ste/ bcom ldan 'das kyi zhal nas kun rdzob ces bya ba ni mi brtan pa dang /g.yo ba'o/ /de'i bden pa ni chu zla lta bu'o/ /don dam pa'i bden pa zhes bya ba ni stong pa nyid bco brgyad do zhes gsungs so/ /de'i dgongs pa 'di yin te/ kun rdzob ces bya ba ni gzugs la sogs pa ji ltar snang ba'i dngos po'o/ /de nyid bden pa ste tshu rol mthong ba'i ngo la tshad ma yin pa'i phyir dang /'jig rten gyi tha snyad phyin ci ma log pa'o/ /don zhes bya ba ni brtag par bya ba dang / /go bar bya ba'o/ /dam pa ni mchog go/ /yang na don yang yin la/ dam pa yang yin pas don dam pa'o/ /yang na dam pa'i don te ye shes dam pa'i don yin pas na dam pa'i don to//bden pa ni mi slu ba'o/ /sems can dang po'i las can rnams/ /dam pa'i don la 'jug pa la/ /thabs 'di rdzogs pa'i sangs rgyas kyis / /skas kyi rim pa lta bur gsungs/ /kun rdzob bden pa mi shes par/ /don dam bden pa shes mi 'gyur/ /kun rdzob bden pa shes gyur nas//don dam bden la 'jug par bya/ /kun rdzob bden pa ji lta bu/ /chos rnams kun zhes bya ba gang / /spyi dang rang gi mtshan nyid dag /shes pa kun rdzob bden pa yin/ /kun rdzob 'di ltar snang ba 'di/ /rigs pas brtags na 'ga' mi rnyed//ma rnyed pa nyid don dam yin/ /de phyir kun rdzob shes par bya/ /bcom ldan 'das kyis kyang kun rdzob kyi chos sngon du ma song zhing de ma rtogs par don dam pa'i chos rtogs par mi nus so zhes gsungs so/ /slob dpon zla ba grags pa'i zhal snga nas/ thabs su gyur pa kun rdzob bden pa dang / / thabs las byung ba don dam bden pa gnyis / /gnyis po'i dbye ba gang gis ma rtogs na/ /de ni log par rtogs nas ngan 'gror 'gro/ /zhes gsungs so/ /gzhan du kun rdzob spangs pa yi/ /stong nyid lta la mngon zhen na/ /gsor mi rung ba'i lta can te/ /sman pas btang ba'i nad par bzhin//'dir ni gzhan dag gis rgal ba/ /khyed cag nyid kyis phung po la sogs pa'i chos khas blangs nas/ yang de nyid 'gog par byed pas khas blangs pas gnod do/ /de bzhin du yul so sor nges pa la 'jug pa nyid ni dbang po rnams kyi mngon sum yin pas mthong ba las lhag pa'i tshad ma ni gzhan med la//khyed cag nyid kyang yul rnams nyams su myong ba yin la/ 'jig rten pas kyang mngon sum du nyams su myong ba yin pas de dag yod bzhin du 'gog pas mngon sum gyis kyang gnod do/ /de bzhin du ni khrod pa dang / ba lang rdzi yan chad la grags pa'i sra ba dang / gsher ba dang / tsha ba dang / g.yo ba la sogs pa'i chos 'jig rten la grags pa'i chos thams cad sel bar byed pas grags pas kyang gnod do/ /gzhan yang khyed cag chos thams cad med par lta bas/ chad par smra ba yin pas theg pa chen po yang ma yin la/ sangs rgyas kyi slob ma yang ma yin no zhe na/bshad pa bdag cag dbu ma pas don dam par na zhes dam bcas pa yod pas khas blangs pa'i gnod pa med do/ /gzugs la sogs pa'i chos de dag /byis pa'i blo dang mthun mthong la/ /gang phyir de ni mi 'gog pas/ /de phyir ji skad smras skyon med/ /don dam pa'i shes rab kyi mdun la brtag bzod pa'i dngos po gcig kyang gnas pa med pas skyon de dag med do//da ni bye brag tu lan gdab par bya'o/ /shes bya dang shes pa skye ba med pa bstan pa'i phyir dang / 'du byed kyi tshogs g.yo ba med pa'i phyir dang / dbang po rnams blun pa nyid kyi phyir dang / gcig gis yul 'dzin par yang mi nus la/ tshogs pa las byung ba'i blo yang kun rdzob yin pa'i phyir gang zhig gang gis mngon sum du gyur pa de kho bo la gnod par 'gyur yang mngon sum gyi blo'i spyod yul gyi gzugs bstan du med pa yang dngos po med pa yin te/ 'dus byas yin pa'i phyir bdag gi blo bzhin no//yang rdzas brgyad 'dus pa dang / de la dmigs pa'i blo dag ni dmag dang nags tshal la sogs pa'i blo bzhin du rdzas su yod pa ma yin pas de ltar mngon sum med pa'i phyir kho bo cag la de'i gnod pa med do/ /kho bo cag la grags pa'i gnod pa yang med de/ dper na mig gsal zhing rno ba dag nor bu rin po che rtog pa la dmus long dang /rab rib kyis mig nyams pas ma rtogs shing skabs ma yin pa bzhin du stong pa nyid kyi lta ba'i mig sman bsten pas yongs su dag cing dri ma med pa shes rab kyi mig thogs pa med pa dang ldan pa mkhas pa dag gis nyams su myong ba'i tshul 'di la ma rig pa'i ling thog gis rmongs pa dang /de kho na nyid mthong bar mi nus pa rab rib can dang 'dra ba/ khams gsum gyi dngos po sna tshogs la yang dag pa ma yin pa'i kun du rtog pas kun nas slong ba'i dri mas blo gros kyi mig btab cing dkrug pa/ mi mkhas pa rnams kyi tshig gi skabs med pas grags pa'i gnod pa med do//de bzhin du chad par smra ba yang bdag cag dbu ma pa ma yin te/ 'di ltar chad par smra ba de dag ni 'di skad du/ bzang mo legs par g.yos la zo/ /shi nas spyang ki'i rjes dang 'dra/ /zhes bya ba la sogs pa 'jig rten pha rol la skur pa 'debs par byed do/ /dbu ma pa ni 'di ltar mi 'dod de/'phags pa lha'i zhal nas/ 'jig rten pha rol je tshom yang / /mkhas pas sdig pa rnam par spang / /gal te med na der zad mod/ /gal te yod na chad lta brlag /ces gsungs so/ /yang kun rdzob kyi bden pa snang ba'i phreng ba 'di dag ji lta ba bzhin du kun rdzob kyi bden pa sgyu ma lta bur 'dod pas skyon gyi dri ma gang gis kyang bdag cag la gnod pa med do//gzhan yang don dam pa'i bden pa shes rab ces bya ba rnam par mi rtog pa'i ye shes chos nyid byang chub kyi sems rang byung gi ye shes chen po'i mdun na ci yang med pas chad par smra ba yang ma yin te/dper na 'di na 'ga' zhig la 'di skad du/ ci nam mkha' 'di yangs pa'am dog pa zhig yin nam/ che 'am/ chung ngam/ dri zhim pa'am/ dri mi zhim pa'am/ mngar ba'am/ sgyur ba'am/ 'jam pa'am rtsub pa zhig yin nam/ de bzhin du bong bu dang / rnga mo dang / rta'i rwa rnams kyi kha dog dang dbyibs ci 'dra ba zhig yin/n+ya gro d+ha dang / u dum bA ra dang / nam mkha'i me tog rnams kyi dri ni ci lta bu yin/ mnga' rgyu dang / ku sha dang / ka sha dang /b+hi du la rnams kyi dri ni ci lta bu yin/ rus sbal dang / sbrul gyi spu dang / dri za'i grong khyer gyi bud med rnams kyi reg pa ni ji lta bu yin zhes dris pa na/kye skyes bu khyod kyis nyams su myong ba dag yod dam/ ngas ni 'di dag mthong ba dang / shes pa dang nyams su myong ba ci yang med do zhes zer ba'i skyes bu de med par lta ba dang / chad par lta ba yin nam/ sangs rgyas rnams kyi chos 'di kun/ /bsal ba med cing gzhag pa med//chos rnams chos nyid skye med la/ /ci zhig bsal zhing ci zhig gzhag /slob dpon gyi zhal snga nas kyang / /'di la bsal ba ci yang med/ /gzhag par bya ba gang yang med/ /yang dag nyid la yang dag lta/ /yang dag mthong bas rnam par grol/ /zhes gsungs so/ /dbu ma pa ni sangs rgyas kyi slob ma'i gtso bo yang yin te/ji skad du/ de bzhin gshegs pa rtag tu skye med chos/ /chos rnams thams cad bde bar gshegs dang 'dra/ /byis pa'i blo can log par 'khrul pa dag /'jig rten dag na med pa'i chos la spyod/ /ces gsungs pa dang / thams cad stong pa'i rang bzhin don dam ni//chos can mi dmigs chos nyid yod pa min/ /zhen pa ldog phyir rkyen bshad ma gtogs par/ /chos kyi ngang la tshig med brjod du med/ /ces gsungs pa dang / sngon gyi mthas stong phyi ma'i mthas kyang stong / /skye dang gnas dang 'jig pa'i dngos pos stong //srid pa thams cad yang ye stong pa ste/ /phyogs gcig stong nyid mu stegs can rnams kyi/ /zhes gsungs pa dang / thams cad nam mkha'i mtshan nyid de/ /nam mkha' la yang mtshan nyid med/ /mtshan nyid mtshan gzhi nges grol ba/ /dmigs med khyod la phyag 'tshal lo/ /zhes bya ba la sogs pa mdo sde du mar gsungs pas de dang der blta bar bya'o//'di'i don rgyas par 'og nas 'chad par 'gyur ro/ /bden pa gnyis kyi skabs rdzogs so// //chos kyi dbyings la mnga' brnyes pa'i/ /klu sgrub dang ni 'phags pa'i lha/ /stong nyid smra ba'i seng ge'i sgra/ /zla ba grags pa'i zhabs la 'dud//rjes su dpag pa gtsor byed pa'i/ /dmus long lta bu'i rtog ge pa/ /rang dang gzhan gyi sde pa yi/ /log par rtogs pa bsal bar bya/ /'dir gang zag ni gsum ste/ ma rtogs pa dang / log par rtogs pa dang / the tshom za ba'o/ /de la dang por log par rtogs pa'i 'khrul pa'i kun rdzob kyi shes rab ni/sngon gyi drang srong rjes 'brangs nas/ /ji ltar snang ba'i dngos po la/ /don bzhin ma yin gzung ba ni/ /phyin ci log gi shes rab yin/ /ser skya dang /gzegs zan dang / 'ug pa pa dang / tsa ra ka dang / dbang po dang / gsal ba dang / sde can dang / bden ldan dang / gser can dang / phyogs can dang / sha kun dang / sa la dga' ba dang / 'bri khu dang /ang gi ra sa dang / bu la skya dang / bu la ha dang / sal sba dang / bad rgya ya ni dang / ko bu ru ma dang / nar ya ni dang / lo ma can dang / ma bu dang / dz+nyA na pa la ka dang / b+has dang /a shwad tha dang / b+hA smi dang / shing shun dang / dze'i mi dang / shed dang / rgyun shes kyi bu dang / 'jig rten mig la sogs pas bkod pa'i gzhung la 'jug pa/ 'od srungs rdzogs byed dang / phyugs lhas kyi bu mo ka ri dang / rnam par smra ba'i bu kun rgyal dang / gcer bu ba gnyen gyi bu dang /mi pham skra'i la ba can dang / sgyu rtsal shes kyi bu ring phur dang / rangs byed kyi bu lhag spyod dag gis byas pa'i lta ba'i phreng ba sum brgya drug cu rtsa gsum dang / lta ba drug cu rtsa gnyis dang / 'jig tshogs kyi ri bo nyi shu dang / byed pa'i skyes bu bcu gnyis dang / bdag tu smra ba bcu gnyis dang /lta ba lnga dang / lta ba gsum dang / lta ba gnyis so/ /de la lta ba lnga'i rtsa ba ni brgya rtsa bcur 'gyur la/ de las tha dad par phye na ni sangs rgyas pa dang / 'dzin pa med pa dang / 'tsho ba dang / lo ma can dang / gtsang sbra can dang / khyab 'jug sems pa dang /dbyig gu gsum pa dang / ko lpags dum bu can dang / mnyam par spyod pa dang / lha mchog pa dang / chos kyi mchog sbyin pa dang / gdung ba can dang / rgyal por smra ba dang / me yo u da ri dang / rigs dang / rjes su mthun pa dang / bcings nas 'dug pa dang / 'khor lo skyong ba dang /ri la gnas pa dang / rgyal po'i bsod snyoms can dang / glang po che'i rgyal mtshan can dang / klog can dang / nang can dang / rta 'dul ba dang / ka lan ta ka dang / snod gtsang ma can dang / slong mo rgyu ba dang / yan lag ral pa'i nang du gtums pa dang / sgron ma lhag pa can dang /gser can dang / grub par smra ba dang / dbang po chen po dang / zha nye can dang / byang phyogs kyi 'gram na gnas pa dang / lho phyogs kyi 'gram na gnas pa dang / 'ug pa dang / dge sbyong pa dang / lus gnod pa byed pa dang / ka kan d+ha pa dang / lha'i grong pa dang / sa khud na gnas pa dang /chos sems pa dang / zla ba phyed pa dang / nags na gnas pa dang / b+he'i khang pa dang / tshangs par spyod pa dang / g+he'u ta ma pa dang / pha la gus pa pa dang / zla ba shar ba pa dang / lag par za ba dang / snying gis 'tsho ba dang / phung po gsum pa pa dang / shin tu 'khrus byas pa dang / ba ra pa dang / 'thor byed pa dang / 'khor ba las grol ba dang / ba dan dz+ha la pa dang / lha mchod pa dang / gzhan la mi 'dud pa dang / gos kyi dum bu can dang / 'ug pa'i gshog pa can dang / lan gsum char 'jug pa dang / mkha' lding pa dang / khyim gyi ra ba na gnas pa dang / ba lang dang / ri dgas dang / rta dang / khyi dang / gsol ba mi 'debs pa'i brtul zhugs dang / me'i brtul zhugs pa dang / zhib mo'i brtul zhugs pa dang / gzhon nu'i brtul zhugs can dang / mthong ba'i chos la mya ngan 'da' bar smra ba dang / chu las skyes pa'i phreng ba can dang / bzang po'i brtul zhugs can dang /rdod 'thag pa pa dang / chos dag par lta ba pa dang / skyes nas dag par lta ba pa dang / las kyi dag pa pa dang / chu la byi 'dzul byed pa dang / dgon pa pa dang / sa dang / chu dang / me dang / rlung dang / nam mkha' la sems yod par lta ba dang / nam mkha' la 'byung ba dang /shing rta mang po can dang / bsam gtan la dga' ba dang / chos can pa dang / zas grang mo can dang / phrag pa'i gos can la sogs pa sum brgya drug cu rtsa gsum yod do/ / sngon gyi mtha' la rtog pa bco brgyad dang / phyi ma'i mtha' la rtog pa bzhi bcu rtsa bzhir bshad pa'am/ sngon gyi mtha' la rtog pa bcu drug dang /phyi ma'i mtha' la rtog pa bzhi bcu rtsa bzhi/ da ltar gyi mtha' la rtogs pa gnyis te drug cu rtsa gnyis so/ /snga ma ltar byas na bzhi ni smra ba'o/ /bzhi ni mtha' dang ldan pa dang / mtha' dang mi ldan par smra ba'o/ /bzhi ni ngag gi g.yeng ba can no/ /gnyis ni rgyu medamid par smra ba'o//bzhi bcu rtsa bzhi la bcu drug ni 'du shes dang ldan par smra ba'o/ /brgyad ni 'du shes dang mi ldan par smra ba'o/ /brgyad ni 'du shes yod pa yang ma yin med pa yang ma yin par smra ba'o/ /lnga ni mthong ba'i chos la mya ngan las 'das par smra ba'o/ /bdun ni chad par smra ba'o/ /de dag ni 'khrul pa yin te/slob dpon 'phags pa lha'i zhal snga nas/ yod la med par 'khrul dang mi rtag nyid la 'khrul/ /med la yod par 'khrul dang rtag pa nyid du 'khrul/ /'khrul pas 'khrul pa slu zhing bslus pas 'khrul par grub/ /'khrul pa'i dbang gis yang dag don la 'khrul/ /rgyu las 'khrul te rkyen gyi 'bras bu ngan song gsum du 'khrul//zhes gsungs so/ /bdag dang rdzas dang gtso bo srog /sems can dus dang skyes bu dang / /gang zag gtso bo rdul phran las/ /tshangs pa khyab 'jug dbang phyug che/ /de la bdag ces bya ba ni/ /grangs can dang / bye brag gi gzhung las rgyun du 'gro ba'am/'byung po thams cad kyis brtag par bya ba yin pa'i phyir bdag ce'o/ /de yang rtag pa khyab pa gcig pu las med par yang 'dod pa'o/ /de la rdzas ni bye brag pa'i gzhung gis tshig don drug po dag ste/ rdzas dang / yon tan dang / las dang / spyi dang / bye brag dang / 'du ba zhes bya ba khyad par drug go/ /gtso bo zhes bya ba ni grangs can dag gis brtags pa'i de nyid nyi shu rtsa lnga ste/ gtso bo dang / chen po dang / ngar 'dzin pa dang / blo'i dbang po lnga dang / las kyi dbang po lnga dang / bdag dang / de tsam lnga dang / 'byung ba chen po lnga dang / skyes bu zhes bya ba dag go/ /srog ces bya ba ni gcer bu pa dag gis brtags pa'i tshig gi don dgu ste/ srog dang / zag pa dang / sdom pa dang / reg par dga' ba dang / 'ching ba dang / las dang / sdig pa dang / bsod nams dang / thar pa zhes bya ba dag go/ /sems can zhes bya ba ni rgol ba po'i gzhung gis thams cad kyi rgyud la yod pa'i dngos po ni sems can zhe'am/'gro ba rnams su sbyor ba'i don gyis sems can zhe'o / /de la dus rgyur smra ba dag ni sa bon la sogs pa dang / de dag gi rkyen sa dang / chu dang / me dang / rlung dag yod du zin kyang / myu gu la sogs pa lan 'ga' 'byung bar snang ba'i phyir dus 'di nyid 'jig rten ma lus pa'i skye ba'i rgyu yin no zhes zer ro//skyes bu rgyur 'dod pa dag kyang skyes bu nyid 'jig rten gsum po ma lus pa'i khongs su rgyu ba yin te/ 'di skad du/ ba ni ba sba rnams kyi yin/ /chu shel chu rnams kyi bzhin dang / /blag sha yal ga rnams kyi bzhin//de ni lus can kun gyi rgyu/ /zhes bya bar mngon par zhen to/ /gang zag ces bya ba ni gnas ma bu'i sde pa'i gzhung las/ yang dang yang du 'gro ba len pas na gang zag ces so/ /de yang phung po dang khams dang / skye mched las gzhan pa'i gang zag ces bya ba 'khor ba dang thar pa yod par smra ba'o //gtso bo rgyur smra ba dag ni tshangs pa la sogs pa dang / myu gu'i mthar thug pa bde ba dang / sdug bsngal dang / gti mug gi bdag nyid can 'gro ba mtha' dag skye ba'i rgyu ni gtso bo zhes bya ba yin par sems so/ /de bzhin du rdul phra rab rgyur 'dod pa dag kyang / rdul phra rab kyis brtsams pa'i sa la sogs pa ni rdzas su yod pa ste/rdul phra rab gnyis pa rim gyis mngon par bsgrubs pa'i 'byung ba chen po la sogs pa dag gi rgyu ni/ rdul phra rab rtag pa dag yin par sems so/ /las rgyur smra ba dag ni 'jig rten gsum po ma lus pa las kyi rgyu las byung ba ste/ las las shin tu 'da' bar dka'//zhes so/ /tshangs pa rgyur smra ba dag kyang / thams cad tshangs pa'i sgo nga las byung bar sems so/ /dbang phyug rgyur smra ba dag kyang / skye ba dang / gnas pa dang / 'jig pa dang / snod dang 'gro ba de dag gi gnas 'jig rten sna tshogs kyi rgyu dang / las dge ba dang / mi dge ba dang /mi g.yo bdag gi rgyu ni dbang phyug yin par 'dod do/ /yang kha cig khyab 'jug ces pa ri dang / shing dang / sa dang / chu dang / me dang / rlung la sogs pa thams cad kyi rgyu ni khyab 'jug ces bya ba ste/ de'i khongs su gtogs pa skye ba med pa dang / 'jig pa med pa dang / 'gro ba ma lus pa'i rgyu yin no zhes zer ro//de dag la sogs pa lta ba'i phreng ba dpag tu med pa dag yod de / thams cad 'dir brjod na ni/ gzhung mangs par 'gyur ro/ /blo gros 'khrul pa de dag bsal bar bya ba yin te/ de dag kyang re re nas bkag pa byas na ni gzhung mangs par 'gyur bas spyir bkag pa ni/bdag las mi skye gzhan las min/ /gnyis las mi skye rgyu med min/ /rgyu ngan pa las mi skye zhing / /kun rdzob nyid du'ang skye ba min/ /don dam par ni gcig las du mas dngos mi skye/ /du mas gcig gi dngos mi skyed / /gcig las gcig kyang mi skye zhing / /du ma las kyang du ma min//yod pa nam yang mi skye ste/ /med pa'ang skye bar rigs ma yin/ /yod dang med pa'ang gnyi ga min/ /gnyi ga min pa'ang mi skye'o/ /dngos po gcig tu mi rigs te/ /du ma dag tu'ang rigs pa min/ /gcig dang du ma ma gtogs pa'i/ /dngos gang rnyed par ga la 'gyur/ /dbu ma'i rtsa ba rtsod pa zlog /stong nyid bdun cu rigs drug cu/ /rnam par 'thag pa la sogs pas/ /dngos rnams skye med shes par bya/ /kun rdzob 'khrul pa'i shes rab kyi skabs rdzogs so// //gsung gi nyi ma shar mod kyi/ /'on kyang dman pa'i rigs can yin/ /byis pa blo gros ngan pa dag /'khor ba'i gnas nas drang bar mdzad/ /dngos po'i gdon gyis brlams pa yin/ /zab mo'i tshul gyis skrag pa rnams/ /rim gyis brid par bya ba'i phyir/ /phung po la sogs chos rnams gsungs/ /byis pa'i skye bo dngos por zhen pa shas che ba zab cing rgya che ba thos pa na rna ba 'gebs par byed pa dag drang ba'i phyir phung po dang /khams dang / skye mched la sogs pa'i chos don dam par yod do zhes bka' stsal to/ /'di ltar rdul phra rab 'dus pa'i ngo bo las/ gzugs dang / dri dang / ro dang / reg pa dang / 'byung ba chen po bzhi ste rdzas brgyad 'dus pa la gzugs kyi phung po dang /don dam par grub pa yin la/ de la dmigs pa can yul can gyi blo gros kyang don dam par grub pa yin no/ /de grub pas lam gyi chos thams cad dang / 'bras bu'i chos mya ngan las 'das pa yang don dam par grub pa yin no zhes bsdus nas bstan pa yin no/ /de dag gi 'dod pa phra mo dag ni de dag nyid gzhung chos mngon pa bye brag tu bshad pa chen po la sogs par blta bar bya'o//tshul de lta bu ni bcom ldan 'das thabs mkhas pa rmad du byung bas byis pa'i skye bo de dag brid pa'i phyir drang ba'i don du gsungs pa'o/ /ji lta zhe na/ don dam par de dag rdzas su med cing dngos por grub pa ni skra'i rtse mo 'bum du bgos pa'i yang cha tsam med de/de ci'i phyir zhe na/ dang por rtsom par byed pa'i rdul phra rab gang yin pa de yang mi 'grub ste/ drug gis cig car sbyar ba na/ /phra rab rdul cha drug tu 'gyur/ /drug po dag ni go gcig na/ /gong bu rdul phran tsam du 'gyur//zhes pa'i rigs pas so/ /de ltar rdul phra rab ma grub na de bsags pa'i rdzas brgyad 'grub par ga la 'gyur/ rdzas brgyad grub pa med par gyur na de dag gis bsgrubs pa'i gzugs kyi phung po ma grub po/ /de bas na rgyang ring po nas mthong ba'i dmag dang nags tshal la sogs pa bzhin no//de la dmigs pa'i yul can gyi blo gros kyang rdzas su ma grub ste/ mtshungs pa lngas mtshungs pa'i sems dang / sems las byung ba mang po tshogs pas rdzas su grub pa med par shes par bya'o/ /rdzas su grub pa med par ji ltar shes she na/ 'dir rnal 'byor pa dag gting dang / pha rol gyi mu med pa'i chu la sa'i steng bzhin du rgyu ba dang /nags mes ma ched pa yang / ba mo dang / 'khyag rom ltar bsil bar byed pa dang / brag gi rtse mo rnam par 'joms pa'i 'thor rlung yang sor mo'i rtse mos g.yo ba med par byed pa dang / rtsig pa dang ri la mi thogs par 'gro ba la sogs pa dag ji ltar rung ste/ de'i phyir gang la yang rdzas su ma grub par shes par bya'o/ /'dir smras pa/ rnal 'byor pa'i bsam gtan gyi khyad par gyis de ltar 'gyur bar zad kyi/ dngos po ni 'gyur ba dang / rdzas su med pa ma yin no/ /gal te dngos po rnams 'byung ba dang / rdzas su med pa zhig yin par gyur na/ rnal 'byor pa'i ting nge 'dzin las langs pa na yang /de bzhin du snang bar 'gyur ba dang gzhan srog chags thams cad kyang rang rang gi gnas las ma bskyod cing ma g.yos pas de'i phyir rdzas su grub pa kho na nyid yin no/ /de'i phyir zad par gyi bsam gtan de dag rnal 'byor pa 'ba' zhig la de ltar snang bar zad kyi/gzhan su la yang de ltar mi snang ba'i phyir dang / dngos po gzhan dag nam mkha' la sogs par mi 'gyur ba'i phyir ro/ /rnal 'byor pa'i ting nge 'dzin dang rdzu 'phrul gyi mthus de dag tu snang bar byed pa ni mos pa kho na tsam du zad do/ /smras pa de ni de lta ma yin te/'di ltar de dag rtsig pa dang / ri dang / ra ba la sogs pa dag la thal byung du mi thogs par 'gro ba dang / chu yang sra bar byed cing sa la bya ba bzhin du 'gro ba dang / me yang bsil bar byed cing sems can dmyal ba'i me yang zhi bar byed pa dang / rlung yang thogs par byed de rnam par 'thor rlung chen po yang sor mo'i rtse mos gnon par byed pa dang /che ba dag chung bar byed/ chung ba dag che bar byed/ mang ba nyung bar byed/ nyung ba mang bar byed do/ /ba spu'i nang du 'jig rten gyi khams thams cad shong bar byed/ gcig chung bar mi 'gyur/ gcig che bar mi 'gyur bar byed do/ /kha cig tu gzhan ji ltar 'dod pa'i dngos po 'byung bar byed pa dang / skabs kha cig tu bdag nyid kho na la thogs pa med par ston te/ lhung bzed dang / chos gos dang / 'tsho ba'i yo byad dang bcas pa la sogs pa la thogs pa med par 'gro'o/ /skabs kha cig tu ni gzhan dag kho na la ston te/yi dags dag chu la sogs pa byin pa la sogs pa lta bu'o/ /skabs kha cig tu ni rang gzhan gnyi ga la ston te/ sems can dmyal ba'i me 'bar ba zhi bar byed pa la sogs pa lta bu'o/ /gal te mos pa tsam kho nar zad na ni/ dngos po gzhan du mi 'gyur bas me'i gdung ba yang zhi bar mi 'gyur la/skom yang ngoms par mi 'gyur bar rigs na de lta ma yin no/ /zad par la sogs pa don dam par yin par gyur na yang sa la sogs pa'i ngo bo nyid yod par ma grub po/ /yang kha cig na re sa la sogs pa ni 'dus pa yin mod kyi/rdzas su ni yod pa kho na nyid yin no/ /'di ltar rdul phra rab bshig kyang de'i blo yod pa yin pas de ni rdzas su yod do zhes zer ro/ /de la lan btab pas / sa la sogs pa rdzas yod min/ /tshogs shing 'dus pa nyid yin phyir/ /dper na dmag dang nags tshal bzhin/ /blo yang yod pa ma yin te//sa la sogs pa yul gyi blo/ /de yang rdzas su mi 'dod de/ /rgyu dang bcas phyir 'jig pa'i phyir/ /dmag dang nags tshal blo bzhin no/ /'dir chos mngon pa bas phyir zlog par byed de/ gzugs ni don dam par yod de 'byung ba chen po dag rgyur byas nas kha dog dang dbyibs kyi bdag nyid gzugs rnam pa nyi shu 'byung ba'i phyir te /'di na gang ngo bo nyid med pa ni de rgyur byas nas ci yang mi 'byung ste/ dper na ri bong gi rwa bzhin no/ /'byung ba rnams rgyur byas pa las ni kha dog dang / dbyibs kyi bdag nyid kyi gzugs 'byung ste/ de'i phyir gzugs ni yod pa kho na yin no zhes zer ro//bshad pa/ kun rdzob tu gzugs kyi skye mched ces bya ba yang dag pa ma yin pa'i kun du rtog pas bslang ba de yod pa kho na yin te/de la yang byis pa dag ni sgyu ma dang / smig rgyu dang / dri za'i grong khyer la sogs pa la lta ba bzhin du lta ba rnam par rmongs pa yin la/ 'phags pa chos rnams kyi de kho na nyid gzigs pa dag ni de lta bu ma yin te/dngos po'i ngo bo nyid ji ltar gzigs pa med pa'i tshul gyis gzigs pa'i phyir ro/ /slob dpon gyi zhal snga nas/ khyod mthong na yang bcings par 'gyur/ /ma mthong na yang bcings par 'gyur/ /khyod mthong na yang grol bar 'gyur//ma mthong na yang grol bar 'gyur / /gang gis khyod nyid yang dag tu/ /mthong ba med kyang sgrub par byed/ /bsgrubs pas rnam par grol bar 'gyur/ /de lta bu 'di ngo mtshar che/ zhes gsungs so/ /de bas na gzugs don dam par 'dod pa de la smras pa/ gang phyir gzugs ni don dam du//yod pa min par shes par bya/ /'dus phyir bsags phyir sgra bzhin dang / /'byung ba las gyur de nyid bzhin/ /de la bdag cag dbu ma pa'i blo'i mdun du gzugs ma grub pa bzhin du phung po gzhan dang / skye mched dang khams rnams kyang rdzas su grub pa ma yin no/ /kun rdzob tu brtags pa'i dngos po tsam du ni yod do//bcom ldan 'das kyis kyang / srid gsum brtags pa tsam nyid de/ /dngos po'i ngo bor yod pa min/ /brtags la dngos po'i dngos nyid du/ /ngan rtog rnams ni rtog par byed/ /ces gsungs so/ /yang bcom ldan 'das kyis 'di skad du/ gzugs ni dbu ba rdos pa 'dra/ /tshor ba chu yi chu bur 'dra/ /'du shes smig rgyu 'dra ba ste/ /'du byed rnams ni chu shing bzhin/ /rnam par shes pa sgyu ma ltar/ /nyi ma'i gnyen gyis gsungs pa yin/ /zhes gsungs so/ /'di'i don rgyas par slob dpon zla ba grags pa'i zhal snga nas mdzed pa'i dbu ma phung po lnga pa dang /bdag gis bkod pa rtog ge 'bar ba la sogs par blta bar bya'o/ /dbugs dang mi gtsang keng rus dang / /zad par dran pa nyer gzhag sogs/ /bden bzhi la sogs lam gyi chos/ /thams cad drang ba'i don du gsungs/ /'dir nyan thos dag phyir zlog par byed de/bdag cag gi gzhung 'di ni drang ba'i don du ma yin zhing / nges pa'i don du gsungs te/ ji lta zhe na/ 'di ltar 'khor ba'i rgya mtsho'i sdug bsngal las sgrol bar byed pa dang / nyon mongs pa'i sgrib pa dang / shes bya'i sgrib pa spong ba'i thabs kyi dam pa yin pa dang / bsgrub bya dang 'bras bu sangs rgyas de bdag cag gi lam 'dis thob par byed pa'i phyir ro//'khor ba'i sdug bsngal las sgrol bar byed pa yang / bcom ldan 'das kyis ji skad du/brtsam par bya zhing 'byung bar bya/ /sangs rgyas bstan la sbyor bar bya/ /'dam bu'i khyim na glang chen bzhin/ /'chi bdag sde ni gzhom par bya//gang zhig chos 'dul 'di nyid la/ /bag yod gnas par byed pa ni/ /skye ba'i 'khor ba rab spangs nas/ /sdug bsngal zad par byed par 'gyur/ /zhes gsungs so/ /nyon mongs pa'i sgrib pa'i gnyen po yang lugs 'di yin te/ bden pa bzhi'i ye shes bcu drug gi khams gsum gyi/nyon mongs pa mthong bas spang bar bya ba dang / bsgom pas spang bar bya ba ma lus par shes rab kyis spong bar byed do/ /de'i bag chags phra mo ni spong bar mi nus te/ nyon mongs bag chags bcas pa ni/ /skyob pa gcig pu la mi mnga'/ /zhes gsungs so//shes bya'i sgrib pa'i gnyen po yang yin te/ lta ba'i phreng ba sum brgya drug cu rtsa gsum la sogs pa dang / 'jig tshogs kyi lta ba'i ri bo nyi shu la sogs pa'i 'khrul 'khor chen po dag don dam pa'i shes rab ye shes kyi rdo rjes 'joms pa'i phyir dang / 'phags pa rang sangs rgyas kyis rten cing 'brel par 'byung ba'i don ji lta bar rtogs pas shes rab phul du byung ba yang bdag cag la yod pa yin no//bsgrub bya 'bras bu mya ngan las 'das pa'i mtshan nyid kyi rnam pa gzhan yang sangs rgyas zhes bya ba yang / lam 'dis 'thob par 'gyur te / 'di ltar yongs su shes par bya ba dang /spang bar bya ba dang / mngon sum du bya ba dang / bsgom par bya ba'i rnam par sdug bsngal dang / kun 'byung dang / 'gog pa dang / lam mthar phyin pa brnyes pa blo gang gis 'phags pa'i bden pa bzhi po dag yongs su shes pa dang / spangs pa dang / mngon sum du mdzad pa dang /bsgoms pas thugs su chud pa des/ 'phags pa'i bden pa bzhi rtogs pa'i phyir sangs rgyas zhes bya ste/ bcom ldan 'das kyi zhal nas 'di skad du/ yongs su shes bya yongs shes shing / /spang bya spangs shing mngon sum byas/ /bsgom bya dag ni bsgoms pas ni/ / de phyir bzod ldan sangs rgyas yin/ /zhes gsungs pas so/ /'dir smras pa/ khyed kyis smras pa de la kha cig ni bden pa nyid de 'di ltar 'khor ba'i sdug bsngal las 'byin par byed pa dang / nyon mongs pa'i sgrib pa spong bar byed pa dang / gang zag gi bdag med pa rtogs pa'o/ /'di ltar shes bya'i sgrib pa ni spong bar mi nus te/shes rab kyi pha rol tu phyin pa rtog pa dang bral ba'i phyir ro/ /de bas na drang ba'i don yin te/ bcom ldan 'das kyi zhal nas/ thabs dang mi ldan ye shes dang / /bslab pa dag kyang bstan pa ni/ /dpa' bo chen pos nyan thos rnams/ / de la gzud pa'i phyir bshad do/ /zhes gsungs pa yin no/ /khyed kyis bsgrub bya 'bras bu mya ngan las 'das pa mtshan gyi rnam pa gzhan yang sangs rgyas zhes bya ba yang lam 'dis 'thob par byed de zhes pa yang bden pa ma yin zhing / mthar thug pa ma yin te/ re zhig bsti gnas tsam lam drang ba'i don yin te/ji skad du/ 'phags pa shes rab kyi pha rol tu phyin pa chen po las/ sdug bsngal shes pas yongs su mya ngan las mi 'da' zhing / sdug bsngal las kyang mi 'da'o/ /kun 'byung shes pas yongs su mya ngan las mi 'da' zhing / kun 'byung las kyang mi 'da'o//'gog pa shes pas yongs su mya ngan las mi 'da' zhing 'gog pa las kyang mi 'da'o/ /lam shes pas kyang yongs su mya ngan las mi 'da' zhing / lam gyis kyang mi 'da' ste/ 'di ltar 'phags pa'i bden pa bzhi po 'di dag gi mnyam pa nyid gang yin pa de ni ngas rnam par byang bar bstan te/gang mnyam pa nyid de ni mya ngan las 'das pa'o zhes bya ba la sogs pa gsungs so/ /'phags pa sangs rgyas thams cad kyi yul la 'jug pa las kyang / 'jam dpal chos gang yang kun shes pa 'am/ spang ba'am/ bsgom pa 'am/ mngon sum du bya bar 'gyur ba de gang na yang med do zhes gsungs so//gzhan yang khyed kyis mya ngan las 'das pa de yang phan tshun mi mthun te/ 'di ltar bye brag tu smra ba dag ni 'di skad du/ mya ngan las 'das pa ni dngos por yod pa dang / rtag pa dang rdzas su yod do zhes zer ro/ /mdo sde pa dang / gos dmar can gyi sde pa dag ni 'di skad du/mya ngan las 'das pa ni dngos po yod pa yang ma yin te/ mar me shi bar gyur pa bzhin/ /de yi sems ni rnam par thar/ /zhes zer te/ mya ngan las 'das pa me shi ba ltar 'dod do/ /gnas ma bu'i sde pa dag ni 'di skad du/ mya ngan las 'das pa'i dngos po yod pa yang ma yin te/lus dang dbang po med pa'i phyir ro/ /med pa'ang ma yin te/ gtan du ba'i bde ba dang ldan pa'i phyir ro zhes zer ro / /de ltar bcom ldan 'das kyis drang ba'i don gyi lung la brten nas rnam pa sna tshogs rtog par byed de/ byis pa dag brid pa'i thabs yin no//don 'di la dgongs nas 'phags pa klu sgrub kyi zhal snga nas/ bdag sogs bral ba'i 'jig rten 'di/ /phung po skye mched khams rnams te/ /nyan thos dag la phan bzhed pas/ /de bzhin gshegs pas gsungs pa yin/ /yang / bdag tu 'dzin pa bzlog pa'i phyir//phung po skye mched khams rnams bstan/ /sems tsam nyid du rnam gnas nas/ /bskal chen rnams kyis de yang gzhom/ /zhes pa'i rigs pa dang / gzugs la sogs dang dngos po sogs/ /cung zad yod ces bstan pa ni/ /dngos 'dzin gdon gyis zin pa yi//zab mo'i tshul gyis skrag pa la'o/ /zhes bya ba'i rigs pas drang ba'i don yin par shes par bya'o/ /'dir sgra dang / gtan tshigs dang / gso ba dang / bzo rig pa ste bzhi dang / bdag dang gzhan gyi grub pa'i mtha' rgya mtsho lta bu'i thos pa'i pha rol tu son pa 'phags pa klu sgrub kyi zhal snga'i dbu ma chen po'i nye bar bstan pa yod pas sngar ji skad bkod pa'i gzhung de dang de dag dang /gzhan yang thams cad du dpyad cing gtan la dbab par bya'o/ /drang ba'i don gyi yang dag pa'i kun rdzob kyi shes rab kyi skabs rdzogs so// //theg chen rigs can yin mod kyi/ / 'on kyang mi shes sgrib pa can/ /blo gros 'bring dang ldan pa yi/ /byis pa de dag brid pa'i phyir/ /sems tsam nyid du gsungs pa de/ /byed po za po dgag phyir yin/ /shes rab med pa'i thabs rgyas pa/ /thams cad mkhyen pas drang don gsungs/ /'phags pa lang kar gshegs pa las/rang gi sems nyid snang ba'i dbyings / /mi rnams la ni phyi rol snang / /phyi rol snang ba de med de/ /de yi phyir yang don med do/ /zhes bya ba la sogs pa mang du gsungs so/ /'jig rten las 'das pa'i le'u las kyang / kye rgyal ba'i sras dag khams gsum pa ni sems tsam mo zhes gsungs so//de bzhin du 'phags pa rgyan stug po'i mdo dang /'phags pa dgongs pa nges par 'grel pa'i mdo dang / chos chen po'i me long gi mdo la sogs pa las chos thams cad sems nyid du gsungs pa ni phyi rol gyi yul rnam pa thams cad du dgag par ni mi mdzad kyi/'di ltar byed pa de dang / za ba po dag dgag pa de lta bu'i thabs bkod par mdzad de/ ji skad du/ 'phags pa sa bcu pa'i mdo las/ byang chub sems dpa'i sa drug pa la/ byang chub sems dpa'i rten cing 'brel par 'byung ba lugs su 'byung ba dang / lugs su 'byung ba ma yin pa la rnam par lta ba 'di snyam du sems te/ma rig pa la sogs pa yan lag bcu gnyis las sdug bsngal gyi phung po 'ba' zhig pa byed pa po dang / tshor ba po dang / bral ba 'di byung zhing sdug bsngal gyi ljon shing mngon par 'grub par 'gyur ro snyam du de ltar nges pas/ kye/ rgyal ba'i sras dag khams gsum pa 'di dag ni sems tsam ste/ sems kyis mngon par 'dus byas pa dang / sems kyis bris pa yin gyi/ sems las gzhan pa'i byed pa po dang / za ba po ni 'ga' yang med do zhes gsungs so/ /de bas na gzhan mu stegs can dag gis rnam par shes pa las gzhan gyi byed pa po dang /za ba po yod par brtags pa sel bar mdzad pa'i sangs rgyas dang /byang chub sems dpa' rnams kyis sems tsam zhes bstan pa mdzad pa yin gyi/ phyi rol gyi yul bsal ba'i phyir ni ma yin no/ /de bas na mdo sde 'di dag ni drang ba'i don yin par shes par bya'o//shes rab med pa'i zhes sngar smras pa de ni legs par smras pa ste/ 'di ltar sems tsam gyi rnal 'byor pa'i shes rab ni kun rdzob pa'i shes rab yin te/ ji lta zhe na/ 'di ltar rnam pa dang bcas par smra ba dang / rnam pa med par smra ba nyid las ma gtogs pa'i gzhung 'dzin pa ni 'di na med do//de la rnam pa dang bcas par smra ba dag ni 'di skad du/ khams gsum pa thams cad dang / mya ngan las 'das pa thams cad sems tsam yin te/ gzugs la sogs pa'i don gyis stong pa'i phyir/ dper na rmi lam gyi gnas skabs lta bu'o zhes pa dang / gzhan yang 'di skad du/ rnam par shes pa nyid gnyis su snang ba kho na ste/ tshad ma dang 'bras bu yin pa'i phyir ro/ /de la tshad ma ni 'dis rjes su dpag pa'i phyir tshad ma ste/ rab tu snang ba'i phyir rnam par shes pa'o/ /'bras bu de'i yul so sor rtog pa ste/ yul du snang ba'i rnam par shes pa'o// yul du snang ba'i shes pa 'ba' zhig ni tshad ma dang 'bras bu'o/ /gzhan yang phyi dang nang gi chos thams cad sems yin te/ sems nyid yul yin pa'i phyir dper na de ma thag pa'i rkyen bzhin no/ /de bas na nam zhig gzung ba dang 'dzin pa'i dri ma dang bral nas rang gi sems kyi chos nyid la rang nyid gnas pa na de bzhin gshegs pa'i so so rang rig pa'i ye shes kyis rig par bya ba chos nyid kyi gzugs zhes bya ba de rtogs pa ni bsgrub par bya ba yin no zhes zer ro//da ni rigs pa de dag rim pa bzhin du brjod par bya ste/ de la dang por dam bcas pa dang /gtan tshigs de gnyis kyang de la ma grub pa yin la/ rmi lam bzhin no zhes pa'i dpe de yang 'di ltar brtags pa'i don gyis stong pa yin nam/ 'on te brtags pa ma yin pa'i don gyis stong pa'i dpe yin/ 'di yin na shes pa dang / shes bya mi 'grub cing brdzun par 'gyur bas khyed kyi grub pa'i mtha' nyid nyams so//brtags pa'i don gyis stong pa'i dpe yin na ni/ brtags pa ma yin pa'i don gyi cha de sel bar mi byed pas sems tsam nyid du yang mi rung ngo / /dpe 'di yang ma grub ste/ rmi lam gyi shes pa ni chos nyid kyi gzugs la dmigs pa'i phyir yang dag pa ma yin pa'i phyir dpe nyid du mi rung ngo //'di la yul du snang ba'i rnam par shes pa zhes bya'o/ /rnam par shes pa skye bzhin pa nyid kyi yul rtogs par mi byed pa'i phyir shes pa skye bzhin pa nyid gang yin pa de ni tshad mar 'dod do/ /rnam par shes pa skyes pa na yul mthong ba'i phyir shes pa de mngon par grub pa'i phyir/de ni 'bras bu'i yul du snang ba'i shes pa nyid la tshad ma dang / 'bras bu nyid yod par 'dod de/ dper na shing la sta res gzas pa dang / btab pa'i rkyen gyis gnyis su gcod par byed pa dang / des dum bu gnyis su gyur pa bzhin no zhes zer ro/de la brjod pa/ mngon sum gyi shes pa dngos po rang gi mtshan nyid la dmigs pa dang / rtog pa dang / rjes su dran pa'i rnam par rtog pa dang bral bas gzugs la sogs pa sngon po la sogs pa gtan du med pa'i ngo bo nyid la/ de bzhin du gtan du med pa'i ngo bo nyid kho na bzhin du rang rig pa'i rnam par rtog par byed pa/de dag gi phyir de'i phyi'i yul nyid du bsnang ba'i shes pa gcig pu kho na la tshad ma dang / 'bras bu gnyis yod pa'i phyir gtan tshigs ma grub pas sems gcig pu gnyis su snang bar rtogs pa ni 'khrul pa yin no/ /rigs pa gsum pa yang mi bden par smras te/'di ltar chos can dang / de sgrub pa'i chos dam bca' ba dang / gtan tshigs dang / dpe rnams te/ khyed kyis dam bca' ba yang nged la ma grub la/ sems nyid kyi yul yin pa'i phyir zhes pa de yang sems phyi rol na yod na yul yin nam/ 'on te tshor ba la sogs pa nang na gnas pa la yul yin/phyi rol gyi sems yul yin na dam bca' ba'i skabs su phyi nang thams cad sems nyid du 'dod pas yul dang yul can nyid du mi rigs so/ /nang gi sems kyang nang gi sems kyi yul du mi rigs te/ gtan tshigs ltar snang ba yin no/ / gzhan yang 'di lta bu'i skyon yang yod de/ thams cad sems nyid yin par gyur na/ dper na bum pa mthong ba'i dus su sems can thams cad kyi sems kyi rgyud kyang mthong bar 'gyur te/ da mthong bas 'gro ba lnga po la gzhan gyi sems shes pa'i mngon par shes pa yang rang chas su yod par 'gyur ro//gzhan yang thams cad sems yin na rnam pa yang sems bzhin du gzugs can ma yin par 'gyur la/ sems kyang rnam pa bzhin du gzugs can du 'gyur ro/ /de bzhin du sems kyang rnam pa bzhin du bems por 'gyur ba'am/ rnam pa yang rig pa dang shes par 'gyur ro//nam zhig gzung ba dang 'dzin pa'i dri ma dang bral nas zhes bya ba'i thar pa yang khyed la mi 'thad de/ 'di ltar phyi rol gyi yul yod par 'dod pa la ni/ rnal 'byor pas yul ngo bo nyid med par rtogs pas/ gzung ba dang 'dzin pa rtogs pa'i phyir 'jig rten las 'das pa'i rnam par mi rtog pa'i ye shes skye bar 'gyur ba ni rigs pa kho nar 'gyur gyi/khyed yul med par 'dod pa la ni dang po nyid nas phyi rol gyi don med la phyis kyang de bzhin du gzung ba dang / 'dzin pa'i ngo bo nyid du 'jug par 'gyur ba de phyis rgyu gang gis bzlog /'jig rten las 'das pa'i rnam par mi rtog pa'i ye shes skye bar 'gyur ba'i thabs ci yang med do//de bas na khyed 'di skad du/ gang gi tshe gzugs la sogs pa'i dmigs pa rnams sems las phyi rol na mi snang ba de'i tshe rang gi sems kyi chos nyid la nges par gnas pa'i sems ni gnyis su med pa'i ye shes zhes bya ste/de kho na nyid dang / yang dag pa dang / 'chi ba med pa dang / sangs rgyas thams cad kyi go 'phang mthar thug pa sku gsum gyi bdag nyid yin no zhes bya ba de ni log par rtogs pa yin no zhes shes par bya'o/ /'di ltar rnam pa med par smra ba dag la yang don dam pa'i shes pa med de/'di skad du smra ste / 'di dag rnam par rig tsam nyid/ /yod pa ma yin don snang phyir/ /dper na rab rib can dag gis/ /skra zla la sogs med mthong bzhin/ /zhes gzhung 'dzugs par byed do/ /rigs pa'i tshogs kyis yul gyi rnam pa brdzun par bsgrub cing /shes pa dang / ye shes dag don dam par yod par 'dod do/ /de ni rigs pa ma yin te/ 'di ltar rigs pa dang / lung dag gis phyi rol gyi rnam pa brdzun par grub pa nang gi shes pa yang brdzun par grub la/ ji ltar shes pa bden pa ltar rnam pa yang bden pa nyid du 'gyur ro//gzhan yang khyed rang rig pa zhes bya ba zhig yod par 'dod ces grag na/ de brtag par bya ste/ rig par bya ba dang / rig pa po dang / rig pa zhes bya ba gsum las khyed kyis rig par bya ba ni ji lta bu zhig yin/ rig pa po ni ji lta bu zhig yin/ de gnyis ma gtogs pa'i rig pa zhes bya ba des ji lta bu zhig rig nas rang rig pa yin/de bas na rnam pa thams cad mkhyen pa'i ye shes zhes bya ba'i tshig gi don dang mi ldan pas sangs rgyas kyi ye shes su yang ji ltar 'gyur/ khyed nyid kyi rigs pas gtan la phab pa'i don de dag la ser sna mi byed par yang ston cig /gal te 'dir rang rig pa yin pas gzhan la bstan par mi nus so zer na/ ji ltar phyi rol pas 'dod pa'i bdag dang khyad par med de/ 'di skad du/ bdag ni rtag pa/ gcig pu/ khyab pa/ lus med pa'i zhes pa dang / 'di dang tshul mi 'dra ba ci yang med pas mkhas pa su zhig 'di la yid ches par byed/rang rig pa zhes bya ba dang / bdag ces bya ba ming so sor btags pa tsam mo/ /chos bdag med pa yang ma rtogs te/ 'di nyid bdag tu 'dzin pa chen po yin pas so/ /gzhan yang skyon mang du yod de/re zhig gzhag go/ /'dir rnam pa med par smra ba phyir zlog par byed de/bdag la don dam pa'i shes rab yod do/ /'di ltar nges pa'i don ston pa'i shes rab kyi pha rol tu phyin pa las/ 'di skad du/ byams pa byang chub sems dpa' gzugs kyi bye brag gdags pa rnam pa gsum gyis khong du chud par bya ste/ 'di ni kun brtags pa'i gzugs so//'di ni rnam par brtags pa'i gzugs so/ /'di ni chos nyid kyi gzugs so zhes bya ba la sogs pa rgyas par gsungs pas chos kyi gzugs yul du byed pa'i ye shes don dam pa ni don dam pa'i shes rab yin no zhes so/ /'di ni bcom ldan 'das kyis drang ba'i don du gsungs pas don dam pa'i shes rab tu mi 'gyur ro//blo gros 'bring po dag gis yang smra ba bsgrub bya sangs rgyas kyang nged kyi lugs la yod de/ bcom ldan 'das kyi zhal snga nas/ 'du shes tsam yang spang ba'i phyir/ /rang gi ngo bo brjod du med/ /shes rab rang rig tsam la ni//de la de bzhin gshegs zhes bya/ /zhes gsungs pas so/ /de bas na/ gnas 'di yongs su gyur pa yis/ /'jig rten 'das pa'i ye shes te/ /de ni zag pa med dang dbyings/ /thub pa chen po'i chos kyi sku/ /nam zhig shes pas dmigs pa kun/ /mi dmigs de yi tshe na ni//rnam par rig pa tsam la gnas/ /gzung ba med pas de 'dzin med/ /gnas ni yongs su gyur pa yi/ /ye shes lnga dang sku gsum ldan/ /ji srid 'gro nas 'gro don du/ /mig nas mya ngan 'das par bzhugs/ /'dir lung ni bcom ldan 'das kyi zhal nas/ kun brtags ngo bo nyid la ni//mngon zhen bag chags kun nyon mongs/ /mngon zhen bag chags yod min pa/ /de ni rnam par byang ba yin/ /de la de ni zag bcas pa'i/ /khams yin gnas gyur de nyid ni/ /zag pa med pa'i dbyings yin te/ /de nyid dag pa bla med yin/ /zhes gsungs pas so//'dir brjod par bya ste/ gnas ni yongs su gyur pa yi/ /zhes bya ba de bden pa ma yin te/ 'di'i rigs pa 'phags pa klu sgrub kyi zhal snga nas gsungs te/ gang phyir 'das pa med pas na/ /de phyir ma 'ongs pa yang med/ /gnas ni yongs su gyur pa yi/ /da ltar byung ba gang na gnas//zhes gsungs pa'i rigs pas gnas yongs su gyur pa mi 'grub pas ye shes lnga yang 'grub par mi 'gyur la/ sku gsum yang ma grub pas khyed la bsgrub bya sangs rgyas de yod pa ma yin no/ /de bas na 'phags pa lang kar gshegs pa las/ ji ltar nad pa so so la//sman pa sman dag gtong ba ltar/ /de bzhin sangs rgyas sems can la/ /sems tsam du yang rab tu gsungs/ /zhes gsungs so/ /'phags pa klu sgrub kyi zhal snga nas kyang / 'di dag thams cad sems tsam zhes/ /thub pa yis ni gang gsungs pa/ /byis rnams skrag pa spang phyir te//yang dag tu na de nyid min/ /zhes pa'i rigs pa dang / 'di dag rnam par rig tsam du/ /'gro ba sna tshogs yang dag par/ /gzung dang 'dzin pa'i sbyor ba dang / /bral ba dbu ma'i blo can la'o/ /zhes kyang gsungs so/ /drang ba'i don gyi yang dag pa'i kun rdzob kyi shes rab gnyis pa rdzogs s+ho// //'phags pa klu sgrub 'phags pa'i lha/ /zla ba grags par phyag byas nas/ /rje btsun dag gi gsung bzhin du/ /bden pa gnyis la 'jug par bya/ /skye ba grangs med de dang der/ /legs par sbyangs pa'i bdag nyid can/ /blo gros bzang po de dag la/ /thams cad mkhyen pas nges don gsungs//chos rnams chos nyid ston pas ni/ /bstan pa'i snying por gyur pa nyid/ /klu sgrub las ni 'byung ba 'di/ /slob ma dag la bshad par bya/ /ding sang skye bo phal cher ni/ /dbu ma che la sdang bar byed/ /sangs rgyas kun gyi yul 'di ni/ /klu sgrub zhal nas byung bas na//'di la sdang bar bya mi rigs/ /de ni bde gshegs lung bstan pas/ /sangs rgyas kun la sdang bar 'gyur/ /rnam par smin pa bsam mi khyab/ /'phags pa 'jam dpal gyi man ngag gi mdo las/'jam dpal chos kyi dbyings tshad mar byas nas kun rdzob kyang med don dam pa yang med do zhes gsungs pa dang /rgyal ba bskrun ma chen mo las kyang /chos thams cad ni gdod ma nas skye ba med de/ a'i sgo can no zhes gsungs pas chos kyi dbyings la bden pa gnyis dbyer med par shes par bya'o/ /yang na thog ma med pa nas ma rig pa'i ling tog ma thug pos blo gros kyi mig bkab pas dmus long lta bur gyur pa/dngos por 'dzin pa'i gdon chen po snying la zhugs pas smyon pa lta bur gyur pa/ mi dge ba'i bshes gnyen gyi dbang du song bas nges pa'i don la yid mi ches pa/ dge ba'i bshes gnyen dang bral bas lcags kyu med pa'i glang po che ltar rang dbang med par gyur pas bag chags bzhi'i 'ching ba dam pos bcings pa/dar gyi srin bu ltar gyur pa/ ma rig pa'i gnyid mthug pos log pas rmi lam gyi gnas skabs lta bu'i tshu rol mthong ba'i ngor byas nas sngar yang smras mod kyi/'dir yang bden pa gnyis rnam par dbye bar bya ste/ slob dpon gyi zhal snga nas/ sangs rgyas rnams kyis chos bstan pa/ /bden pa gnyis la yang dag brten/ /'jig rten kun rdzob bden pa dang / /de bzhin don dam bden pa'o/ /zhes gsungs pas de la dang por kun rdzob kyi bden pa slob dpon nyid kyis gsungs pa bzhin du shes par bya'o//ji ltar zhe na 'di skad du/ /sgyu ma dang ni rmi lam dang / /dri za'i grong khyer ji bzhin du/ /de bzhin skye dang de bzhin gnas/ /de bzhin du ni 'jig pa gsungs/ /nyon mongs las dang las can lus //byed pa po dang 'bras bdag nyid/ /smig rgyu rmi lam ji bzhin te/ /dri za'i grong khyer nyid dang mtshungs/ /yang gsungs pa/ lus dang longs spyod gnas dag dang / /sa dang pha rol phyin pa dang / /sangs rgyas rdzu 'phrul cho 'phrul sogs/ /'khor dang mya ngan 'das pa dag /de kun sgyu ma sprul pa dang / /skra shad 'dzings pa lta bur snang / /yang gsungs pa/ dang po brgyad dang dgu nyon mongs/ /gnyis dang bcu pa las yin te/ /lhag ma bdun yang sdug bsngal yin/ /bcu gnyis chos ni gsum du 'dus/ /gsum las gnyis 'byung gnyis las kyang //bdun 'byung srid pa'i 'khor lo ni/ /yang dang yang du 'jug par 'gyur/ /'gro kun rgyu dang 'bras bu ste/ /'di na sems can gzhan ci'ang med/ /stong pa kho na'i chos rnams las/ /stong pa kho na 'byung bar 'gyur/ /kha ton me long mar me rgya/ /me shel skyur dang sa bon sgras//phung po nying mtshams sbyor ba ni/ /mi 'pho bar yang mkhas rtogs bya/ /shin tu phra ba'i dngos la yang / /gang gis chad par rnam brtags pa/ /rnam par mi mkhas de yis ni/ /rkyen las byung ba'i don ma mthong / /zhes gsungs te/ phyi rten cing 'brel par 'byung ba'i tshul yang slob dpon nyid kyis mdzad pa'i 'phags pa sA lu ljang pa'i mdo'i 'grel par blta bar bya'o//de la don dam pa'i bden pa ni yang slob dpon gyi zhal snga nas/ gang gis rten cing 'brel bar 'byung / /'gag pa med pa skye med pa/ /chad pa med pa rtag med pa//tha dad don min don gcig min/ /'ong ba med pa 'gro med pa/ /spros pa nyer zhi zhi ston pa/ /rdzogs pa'i sangs rgyas smra rnams kyi/ /dam pa de la phyag 'tshal lo/ /yang slob dpon gyi zhal snga nas/ rnam shes kyang ni 'od gsal dang / /mya ngan 'das dang kun stong dang //chos kyi skur yang bshad pa yin/ /zhes gsungs pa dang / yang / 'di ni don dam bden pa ste/ /snang ba med cing mtshan ma med/ /don dam bden pa zhes bya ba/ /de bzhin gshegs pa kun gyi gnas/ /zhes gsungs so/ /yang gzhan las/ sha yi mig gis de lta min//lha yi mig gis blta bya min/ /rtog bcas rtog pa med pa yi/ /shes pa yis kyang mthong mi 'gyur/ /zhes gsungs so/ /rje btsun Ar+ya de bas kyang / /yod min med min yod med min/ /gnyi ga med pa ma yin la/ /mu bzhi las ni rnam grol ba/ /de nyid dbu ma pa yis rig /rtag pa ma yin chad pa min/ /rtag dang chad pa gnyi ga min/ /mtha' bzhi las ni rnam grol ba/ /de don dbu ma pa yis rig /ces gsungs so/ /slob dpon zla ba grags pa'i zhal snga nas kyang / zad dang chags bral mya ngan 'das/ /'gog dang stong pa nyid zhi ba//de bzhin nyid kyi chos rnams kyi/ /rang gi ngo bo yin zhes bshad/ /ces gsungs so/ /rtog bcas rtog pa med pa yi/ /shes pa gnyis kyis 'di mi rtogs / /sgra dang tshad ma'i tha snyad dag /de don bsgom la dgos pa med/ /pha rol rgol ba bzlog pa dang / /bstan bcos chen po'i dus dag tu//sngon gyi mkhas pas bkod pa bzhin/ /sgra dang tshad ma'ang smra bar bya/ /long ba rang dgar ri bo la/ /'dzegs pas bde ba thob mi 'gyur/ /rjes su dpag pa gtsor 'dzin rnams/ /rnam par ltung bar dka' ma yin/ /ji ltar mun pa'i nang gi rdzas/ /'ol tshogs dag tu tshol ba bzhin//de bzhin rjes su dpag pas kyang / /de bzhin don ni shes mi 'gyur/ /long bas rkang pa'i tshod dpag gis/ /nyam nga'i lam du rgyug pa ltar/ /rjes su dpag pa gtsor 'dzin rnams/ /rnam par ltung bar dka' ma yin/ /mgon po bde ba chen pos kyang / /rang gi rig pa de nyid ni//gzhan gyis bstan pas mi rtogs te/ /gus par bsgoms pas rtogs 'gyur gyi/ /don de gzhan du rtogs mi 'gyur/ /zhes gsungs so/ /dpal kam pa las kyang / 'di ni rang rig phra ba ste/ /phra ba rnams kyi spyod yul yin/ /bdag cag lta bur gyur pa yi/ /blo gros rtsing bas mi shes so//zhes gsungs so/ /slob dpon phyogs kyi glang pos kyang / 'di na mya ngan 'das lam grong khyer du/ /de bzhin gshegs pa'i gsung gi nyi ma'i 'od can gyis / /bdag med shes pa'i 'phags pa stong phrag 'jug /blo gros rtsing ba dag gi yul ma yin//zhes gsungs so/ /rigs pa shes pa rnams kyi mchog rtog ge pa rnams kyi gtsug gi nor bur gyur pa d+harma kIrtis kyang /de nyid don ni tshol 'dod pas/ rjes dpag gtan tshigs bsten mi bya/ /legs par bsgoms pas myong 'gyur gyi/ /de yis rang rig rtogs pa min/ /de nyid don gyi snying po ni/ /rjes dpag shes pas nyams myong min//bla ma bzang po bsten byas nas/ /bsgoms pas nyams su myong bar 'gyur/ /bdag gzhan sde pa ma lus pa/ /log pa'i lam du zhugs mthong dang / /de dag bdag la'ang sdang bas na/ /rjes su dpag pa'ang smra bar bya/ /thog ma med nas rmongs gyur pas/ / dang po rig pas blo sbyang bya/ /de rjes bsgom par 'dod pa yis / /rjes su dpag pa yid rton min/ /zhes de kho na nyid gsal ba las gsungs so/ /'di lta bu'i bden pa gnyis khong du chud pa ni gzhan gyi sde pa dang / rang gi sde pa'i rgol ba dag la 'jigs pa dang / bag tsha ba ni ci yang med de/tshul gnyis shing rta zhon byas te/ /rigs pa'i srab kyis bsrabs byas nas/ /lung gi lam du legs par zhugs/ /bla ma'i man ngag lcag gis gzhu / /skye ba med pa ji lta ba bzhin du khong du chud pa'i mkhas pa rnams kyi kun rdzob pa'i dngos po gang la yang chags pa dang sdang ba dang rmongs pa med de/chos rnams kyi chos nyid dngos po'i de kho na nyid shes pa'i phyir ro/ /de ci'i phyir zhe na/ 'jig rten pa'i rnal 'byor nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / yod min med min skye mched bsgoms pa dag kyang re zhig gzugs kyi 'du shes dang /thogs pa'i 'du shes rnams thams cad du nub cing / de bzhin du rnam par thar pa brgyad dang / zil gyis gnon pa'i skye mched dang / zad par gyi skye mched bsgom pa goms pa'i mjug tu gzugs kyi 'du shes spong bar 'gyur na theg pa chen po bla na med pa'i rnal 'byor pa bskal pa dpag tu med pa'i dngos po'i ngo bo nyid med par shin tu goms pa bsgoms pa stong pa nyid bco brgyad dang /rnam par thar pa'i sgo gsum mthar phyin pa la gnas pa rnams gzugs su 'dzin par 'gyur ba lta smos kyang ci dgos te/ nam mkha'i dbus su bdag med cing //chos kyi dbyings la thim pa ni/ /shes rab pha rol phyin pa ste/ /mthong bya mthong byed mthong ba med/ /'dir rang gi sde pa dngos por 'dzin pa shas che ba dag ma bzod nas shin tu rngams nas rgol bar byed de/ khyed dbu ma pa dag ni rang gi 'dod pa khas mi len cing gzhan sun 'byin pas/co 'dri bar byed pas g.yo sgyu can yin pa dang / skye ba med pa ni med pa nyid yin no snyam nas/ med pa nyid kho nar lta ba dang / rgyu dang / 'bras bu dang / bden pa dang / dkon mchog la sogs pa'i chos thams cad la skur pa btab pas chad par smra ba yin pa dang /de bzhin gshegs pa'i lung la skur pa 'debs shing lung gis khyed la gnod pa dang / mngon sum la skur pa btab cing mngon sum gyis khyed la gnod pa dang / rjes su dpag pas gnod cing de la skur pa btab par 'gyur ba dang / grags pas gnod cing de la skur pa gdab pa dang /khas blangs pas gnod pa de/ bdag nyid kyang phung la gzhan mkhas pa dag kyang lam 'di la btsud pas phung bar byed pas/ gzhung lugs 'di gtang bar bya'o zhes so/ /de la 'dir brjod par bya ste/ kye ma 'khor ba thog ma med pa nas/ ma rig pa'i mig nad chen pos blo gros kyi mig bkab pas rang de las ma thar pa/zab mo'i tshul ston pa dag la dgrar 'du shes shing rna ba 'gebs par byed pa/ de bzhin gshegs pa'i nges pa'i don gyi lung ji lta ba bzhin du ma rtogs pa tshogs rnam pa gnyis ma bsags pas tshul 'di lta bu la mos pa dang /thos pa dang / 'jug pa'i skabs med pa dag nyon cig /skye bo yi ni chos lugs dang / /shing rta chen po'i lam yin te/ /phyogs su lhung ba'i dug spangs nas/ /gzu bo'i blo yis bshad par bya/ /khyed kyi rgol ba dang po'i skyon gyi dri ma med de/ mthong ba med pa nyid de mchog mthong ba'o zhes gsungs pas mthong ba med pa'i don de la ji lta bu zhig yod nas ji ltar khas blang bar bya ba/slob dpon nyid kyi zhal nas/ gal te dngos shig yod na ni/ /khas ni blang bar bya dgos na/ /dngos po skye ba med nyid la/ /khas blang ba ni ji ltar bya/ /zhes gsungs so/ /bdag cag dbu ma pa la ni khas blang bar bya ba'i dngos po ni rdul phra rab 'bum du gshags pa'i tshad kyang bstan du med do//khas blangs pa yi dngos po ni/ /phra rab tsam yang yod min te/ /gdod nas skye ba med pa'i phyir/ /mo gsham gyi ni bu bzhin no/ /dper na bud med mo gsham la/ /khyod kyi bu ni gang yin dris//de la de ni yod min pas/ /smra bar nus pa ma yin no/ /de bas na bdag cag dbu ma pa'i shes rab kyi mdun na yod pa dang med pa la sogs pa'i dngos po khyed kyi 'dod pa lta bu ci yang med de/ chos thams cad skye ba med cing brjod du med pa'i phyir ro/ /rgol ba gnyis pa'i skyon gyi dri ma yod pa ma yin te/'di ltar yod pa ma yin pa de la dngos por 'dzin par byed pa de dag ni smad par 'gyur te/ mdo sde las/ bdag tu 'dzin pa ri rab tsam yang bla'i/ stong pa nyid du lta ba ni de lta ma yin te/ gsor mi rung ba'i lta ba'o zhes gsungs pa dang / 'phags pa rgyan stug po las kyang / ri rab ri bo tsam gyur pa'i/ /bdag tu lta bas mi gnod kyi/ /stong nyid lta bas gnod pa ni/ /nga rgyal mi bden brtags pas so/ /rnal 'byor spyod pas stong pa nyid/ /gnas min pa la sbyar mi bya/ /gang la gnas min sbyar gyur na/ /bdud rtsi dug tu 'gyur ba yin//lta ba ji snyed gang yang rung / /lus can rnams la yod pa yi/ /lta ba rnam par spang ba'i phyir/ /stong pa nyid kyi tshul bstan to/ /stong pa nyid kyi lta thos kyang / /la la'i lta ba ma zhig na/ /gsor mi rung pa'i lta ba can/ /sman pas btang pa'i nad pa bzhin/ /zhes gsungs so//bdag cag dbu ma pa ni de ltar 'dod pa ma yin te / don 'di la dgongs nas/ slob dpon gyi zhal snga nas kyang / skye med ces dang stong zhes dang / /bdag med ces pas stong pa nyid/ /dman pa bdag nyid gang smra ba/ /de ni 'di na bdag bsgom mo/ /zhes gsungs pa yin no/ / des na dngos po yod pa nyid bkag nas med pa'i ngo bo nyid du 'dod na ni de ltar yang 'gyur ba zhig na/ gang gi phyir kho bo mtha' gnyis spangs pas/ dbu ma'i lam ston pa'i phyir med pa nyid kyang 'gog par byed de/ dngos rnams med ces bya ba'i blo/ /don bzhin yin par mi 'dod de/ /rtog pa'i sgo nas grub pa'i phyir//mtho yor la ni mi blo bzhin/ /gang dag 'di skad ces dngos po rnams ni gcig tu yod pa nyid kyang ma yin te/ rgyu'i skad cig ma 'gags pa'i phyir ro/ /gcig tu med pa yang ma yin te/ 'bras bu'i skad cig ma skyes pa'i phyir ro/ /de'i blo ni yod med kyi ngo bo nyid kho na'o zhes zer ba la bshad pa/yod med blo ni rtogs bya ba/ /bkag phyir de bzhin mkhas rnams kyis / /rnam par mi rtog blo gros ni/ /skye ba med pa'i tshul gyis te/ /gang phyir stong nyid stong sogs kyi/ /ngo bo stong nyid de yi phyir/ /mkhas pa stong pa nyid la yang / /stong pa nyid du lta mi 'gyur/ / chos rnams kun du ma grub phyir/ /gang la rnam par mi rtog pa'i/ /blo yang skye bar mi 'gyur ba/ /klu sgrub de ltar bzhed pa yin/ /de bas na slob dpon nyid kyi zhal nas/ gang blo yod dang med pa las/ /rnam par 'das shing mi gnas pa/ /de dag zab mo dmigs med pa'i/ /rkyen gyi don la rnam par bsgom//yang / blo chung gang gis yod nyid dang / /med nyid du ni mthong ba dag /de yi spros pa nyer zhi ba'i/ /sgom pa mthong ba ma yin no/ /gang zhig bdag dngos gzhan dngos dang / /dngos dang dngos med mthong lta ba/ / de yi sangs rgyas bstan pa la/ /de nyid mthong ba ma yin no//yang / yod ces bya ba rtag par lta/ /med ces pa ni chad par lta/ /zhes bya ba la sogs pa rgyas par gsungs so/ /slob dpon Ar+ya de bas kyang / /yod min med min yod med min/ /gnyi ga min pa ma yin te/ /mtha' bzhi las ni rnam grol ba/ /de nyid dbu ma pa yis rig//ces gsungs pa'i rigs pa dang /lung gi khungs kyang 'phags pa shes rab kyi pha rol tu phyin pa las/ gang zhig yod pa ma yin de ni med ces bya/ /yod dang med pa 'di gnyis med pa'i chos yin te/ /byis pa rnams kyis de brtags yod dang med par byed/ /ces gsungs so/ / yang bcom ldan 'das kyis/ yod dang med pa 'di gnyis mtha' yin te/ /dag dang ma dag 'di yang mtha' nyid yin/ /de bas mtha' gnyis rnam par spangs nas su/ /mkhas pas dbus la'ang gnas par mi byed do/ /zhes gsungs so/ /rgol ba gsum pa'i skyon gyi dri ma yang med de phyi rol bdag ni 'di skad du/bzang mo legs par g.yos la zo/ /shi nas spyang ki'i rjes dang 'dra/ /ma shi bar du bde bar 'tsho/ /shi nas de yi spyod yul med/ /lus kyang thal ba bzhin song nas/ /slar skye ba yang ga la 'gyur/ /de phyir snga phyi yod pa min/ /tshe 'di nyid la bde ba'i phyir//lha mchod 'dre srin mnan byas nas/ /btsan phyug mthu stobs 'grub par 'gyur/ /zhes zer te/ de lta bu'i chad par smra ba dang / bdag cag dbu ma pa lta ba ga la gcig /de dag ni rten cing 'brel par 'byung ba dang / rgyu dang 'bras bu dang / bden pa dang / dkon mchog la sogs pa la skur pa 'debs pas chad par smra ba yin no//bdag cag dbu ma pa ni bden pa gnyis kyi tshul la gnas pas chad par smra bar mi 'gyur te/ ji lta zhe na/ 'di ltar kun rdzob kyi tshul gyis kyang chad par smra ba ma yin te/ slob dpon gyi zhal snga nas/ ma rig dang po rga shi mtha'/ / rten 'brel bcu gnyis ga la yod/ /sgyu ma rmi lam 'dra ba ru/ /rten 'brel bcu gnyis nged 'dir 'dod/ /ces nang rten cing 'brel par 'byung ba gsungs so/ /phyi rten cing 'brel par 'byung ba yang rigs pa shes pa'i mchog d+harma kIrtis ji skad du/ myu gu sogs dang sngon po sogs/ /nus mthong kun rdzob 'dod ce na//de skad zer na de ltar zad/ /ces gsungs so/ /lung gi khungs kyang ji skad du/ dge dang mi dge gang phyir dngos med kyang / /de lta 'ang dge ba nyid kyang mi dge min/ /'jig rten kun rdzob chu yi zla 'dra bas/ /dge ba yid 'ong sdug bsngal rtag mi dben/ /zhes gsungs so//de bzhin du dkon mchog gsum la'ang skur pa btab pa ma yin te/ 'di ltar dkon mchog gsum ni bdag cag dbu ma pa'i rnal 'byor bsgom pa las 'byung ba yin la/ de yang kun rdzob tu yin te/ bcom ldan 'das kyis ji skad du/ dngos grub rnams kyang kun rdzob pa/ /sangs rgyas rdo rje sems dpa' nyid//kun rdzob nyid du rab grub 'gyur/ /zhes gsungs pa dang / bcom ldan 'das kyis kyang / nga ni thob pa med pa kho nar byang chub kyi snying por langs so zhes gsungs so/ /de bzhin du tshe dang ldan pa shA ri'i bu/ thob pa yang yod / /mngon par rtogs pa yang yod de/ de ni 'jig rten gyi tha snyad kyis gnyis su brjod par zad kyi/ don dam par ni yod pa ma yin no zhes bya ba la sogs pa gsungs pa lta bu'o/ /de bas na thob pa dang / mngon par rtogs pa dang 'bras bu ni kun rdzob tu yin no/ /gzhan yang snying rje chen po las byung ba'i byang chub kyi sems dang ldan pa'i byang chub sems dpa' gang 'di snyam du don dam par ni chos thams cad gdod ma nas skye ba med kyang /kun rdzob tu 'gro ba lnga po'i sems can 'di dag sdug bsngal gyi chu bo las ji ltar bsgral bar bya/ bsdu ba'i dngos po bzhi la sogs pa'i thabs dam pa rnams kyis 'di dag thams cad gcig kyang ma lus par rdzogs pa'i byang chub chen po la 'god par bya'o//nam zhig na bdag mngon par rdzogs par sangs rgyas pa'i sangs rgyas kyi zhing der nyan thos dang / rang sangs rgyas dang / sems can dang / sdug bsngal ba zhes bya ba'i ming yang grag par ma gyur gyur cig snyam du sems pa'i sems can chen po la chad par smra ba ga la yod/slob dpon gyi zhal snga nas kyang / rab lus sbyin par btang ba ni/ /ngo mtshar che ba ma yin gyi/ /chos 'di stong par shes nas su/ /las kyi 'bras bu sten byed pa/ /ngo mtshar las kyang de ngo mtshar/ /rmad byung las kyang de rmad byung //yang / stong nyid lta bas lta byed cing / /rtag tu lus ngag yid dag gis/ /'di ltar sems can don byed la/ /chad par smra ba ga la yod/ /ces gsungs so/ /lung gi khungs kyang 'phags pa 'od srungs kyis zhus pa las/ chos thams cad skye ba med pa nyid du shes kyang /las kyi rnam par smin pa la yid ches pa dang / chos thams cad bdag med pa nyid du khong du chud kyang sems can thams cad la snying rje chen po skyed pa dang / sbyin pa rgya chen po btang yang rnam par smin pa la mi re ba dang / sbyor ba khams gsum na byed kyang bsam pa mya ngan las 'das pa'o zhes gsungs so//don dam pa'i tshul gyis kyang chad par smra ba ma yin te/ 'di ltar mi ngas kyis skye bo bsad pa dang / tho bas bum pa bcom pa 'am/ mes shing bsregs pa ltar dngos po don dam par grub pa yod pa ma yin no zhes zer na chad par smra ba yin pa las/ chos rnams kyi chos nyid sangs rgyas 'jig rten du byung yang rung ma byung yang rung gdod ma nas skye ba dang bral ba yin pas/slob dpon zla ba grags pa'i zhal nas/ zad dang chags bral mya ngan 'das/ /'gog dang stong pa zhi ba nyid/ /de bzhin nyid kyang chos rnams kyi/ /rang gi ngo bo yin zhes bshad/ / ces gsungs so/ /skye ba med ces bstan pa ni/ /dngos por 'dzin pa rnams phyir yin/ /chos rnams ye nas skye med la/ /skye med tha snyad sgro btags tsam/ /dngos med nyid kyang ma grub na/ /der ni dngos po ga la zhig /dngos po gdod nas med nyid la/ /chad ces pa de rigs pa min/ /bdag cag la chad par smra ba'i dri ma med de/slob dpon gyi zhal snga nas/ dngos por khas len yod na ni/ /de la chad sogs 'jigs pa 'byung / /dngos por khas len med rnams la/ /chad sogs 'jigs pa ga la 'byung / /gal te dngos shig yod na ni/ /de la 'jig rten mtha' yod dang //mtha' med la sogs par yang 'gyur/ /zhes bya ba la sogs pa'i bar du gsungs so/ /dper na skyes bu zhig 'di skad du/ nam mkha' ni med do/ /nam mkha'i ut+pal dang / pad+ma ni med do zhes zer na/ chad par smra ba yin nam/ 'dir lung gi khungs kyang 'phags pa shes rab kyi pha rol tu phyin pa chen mo las kyang /rab 'byor gzugs dngos po grub pa yod pa zhig na ni stong pa dang / mi stong pa dang / dben pa dang / mi dben pa dang / bde ba dang / mi bde ba dang / zhi ba dang / ma zhi ba la sogs par 'gyur ba zhig na/ gzugs dngos por grub pa med ces bya ba la sogs pa gsungs nas rnam pa thams cad mkhyen pa'i bar du rgyas par gsungs so//rgol ba bzhi pa'i skyon gyis kyang gos par mi 'gyur te/ ji lta zhe na/ ji ltar khyed nyan thos dang / rnal 'byor spyod pa'i khungs kyi lung thams cad ni drang ba'i don no zhes sngar rgyas par bshad zin pas de dag la yang nged dbu ma pa skur pa 'debs par mi byed de/de dag rim gyis 'dren par byed pa'i thabs yin te/ dgongs pa bzhi dang / ldem por dgongs pa bzhi bzhin no/ /lung gis gnod pa yang de ni 'di ltar/ chos chen po'i me long gi mdo las gsungs pa'i lta ba ngan pa bco brgyad po de dag gis gnod do zhe na/dbu ma pa la ni de dag gis gnod pa med de/ de dag ni bden pa gnyis kyi tshul spangs nas/ 'di skad du/ gang med pa'i don de ni de kho na nyid yin te/ ci yang med de/ thams cad rang bzhin gyis rnam par dag pa'o/ / yang kun rdzob kyi dngos po ni kun rdzob tu med do zhes zer ba de lta bu'i log par lta ba 'dzin pa ni tshar bcad pa'i 'os yin pas/ rgyang bsrings te bshad par bya'o/ /rgol ba lnga pa dang drug pa dang / bdun pa dang / brgyad pa'i skyon gyi dri mas kyang gos par mi 'gyur te/ kun rdzob kyi bden par snang ba'i phreng ba 'di dag thams cad khas blangs pas de dag la skur ba btab pa yang ma yin no//yang don dam par zhes dam bcas pa/ de dag gis gnod par yang mi 'gyur te/ 'di ltar mngon sum gyis kyang mi gnod do/ /yul rnams log pa yin pa'i phyir dang / dbang po rnams blun pa'i phyir dang /mthong ba la sogs pa'i nus pa med bzhin du rab rib can la skra dang / sbrang bu dang / khab 'dzag pa la sogs pa snang ba lta bu dang / brag ca la sogs pa grag pa ltar mngon sum yang mngon pa'i nga rgyal yin pas de'i phyir gang la ci zhig mngon sum du gyur nas des gnod par 'gyur/de bas na mngon sum gyi gnod pa med do / /rjes su dpag pas kyang gnod pa med do / /don dam par 'ga' yang grub pa med pas so / /grags pas kyang gnod pa med de/ gang gi phyir 'jig rten ni mi shes pa'i ling thog gis mdongs pa yin pas don dam pa dpyad pa'i skabs su de ni nor bu rin po che brtag pa'i skabs su dmus long ma gtogs pa bzhin du 'jig rten pa skabs 'dir mi gtogs pas grags pa'i gnod pa med do//bden pa gnyis kyi tshul la gnas pas khas blangs pa'i gnod pa yang med do/ /tshul gnyis shing rtar zhugs byas nas//rigs pa'i kha lo legs bsgyur te/ /lung gi lam du zhugs byas nas/ /lam log par ni 'gro mi 'gyur/ /ji ltar 'dab shog ma nyams bya/ /bar snang gcod pa thogs pa med/ /de bzhin tshul gnyis ldan pa yang / /chos rnams kun la thogs pa med/ /ji ltar seng ge'i nga ro yis//gcan gzan thams cad skrag cing 'jigs/ /de bzhin stong nyid seng ge'i sgras/ /rgol ba thams cad 'jigs shing skrag /dngos po med la dbang thob pas/ /de phyir dngos po kun bdag nyid/ /rang gzhan sde pa thams cad la/ /seng ge'i nga ro smra ba yin/ / nges pa'i don gyi yang dag pa'i kun rdzob kyi skabs rdzogs so// //de la don dam pa'i shes rab ji lta bu zhe na/ rtog pa'i dri ba ma lus pa /bsal bar gyur pa gang yin dang / /zhi dang so so rang rig dang / /rnam rtog med cing yi ge med/ /gcig dang tha dad nyid bral ba/ /mkha' ltar dri med de nyid la//'jug pa med par 'jug pa ni/ /shes rab don dam shes par bya/ /rtog bcas rtog pa med pa yi/ /shes pa gnyis las log gyur na/ /de tshe blo la yul med pas/ /spros pa nye bar zhi bar 'gyur/ /gang tshe shes dang shes bya dag /chos kyi dbyings su gyur pas na//de tshe nam mkha' ltar gyur pas/ /spros pa nye bar zhi bar gyur / /ji srid yid kyis log g.yo ba/ /de srid bdud kyi spyod yul yin/ /yid kyi g.yo bzhi gyur na/ /shes rab gnyis kyang shes mi 'gyur/ /don dam pa'i shes rab kyi skabs rdzogs so// // de lta bu'i zab cing rgya che ba'i lam du su zhig 'jug ce na/ dpag med skye ba de dang der/ /sbyang ba byas pa'i bdag nyid can/ /pha rol phyin drug goms byas pa'i/ /sems can chen po'i spyod yul yin/ /mdo nas ji ltar bstan pa ni/ /ma bstan sbyin sogs ldan pa yin / /rang bzhin dang ni goms pa yi//rigs can de yi spyod yul yin/ /ji skad du/ shes rab kyi pha rol tu phyin pa mngon par rtogs pa'i rgyan las/ sangs rgyas rnams la bsnyen bkur byas/ /de la dge ba'i rtsa ba bskyed/ /dge ba'i bshes kyis mgon byas pa/ /'di mnyan pa yi snod yin no//zhes gsungs so/ /gzhan nas kyang / dri za'i grong khyer lta bu ni/ /bden pa gnyis kyis mtshon pa dag /dpag med bskal pa mang po ru/ /bsgoms pas dag pa'i blo can la'o/ /zhes gsungs so/ /rje btsun 'phags pa lha'i zhal snga nas kyang / shes rab che dang thabs che dang //brtse ba che dang mos pa nyid/ /theg pa chen por yang dag bstan/ /sems can chen po'i spyod yul yin/ /zhes gsungs so/ /de bas na kun rdzob kyi bden pa'i tshul gyis rgya che ba'i pha rol tu phyin pa lnga dang / bsdu ba'i dngos po bzhi dang / 'phags pa'i nor la sogs pa snga ma dag tu goms par byas pa dang /don dam pa'i tshul gyis zab pa'i gnas dag la bsgom par gyur pa dag 'jug go/ /de bas na mgon po byams pas yang 'di skad du/ sangs rgyas bsnyen bkur yang dag zhugs/ /sbyin dang tshul khrims sogs spyad pas/ /snod du de ni dam pa bzhed//ces rgyal ba skyed ma las gsungs so/ /'phags pa ye shes kyi phyag rgya'i ting nge 'dzin gyi mdo las/ phyi ma'i tshe phyi ma'i dus su sangs rgyas brgya dang / stong dang khri dang / 'bum la dge ba'i rtsa ba bskyed pas na ting nge 'dzin 'di thob pa dang / mos pa dang / don go ba dang / stong pa nyid la bzod pa dang /ting nge 'dzin thob pa dang / spobs pa skye bar mi 'gyur ro/ /sangs rgyas bye ba phrag la bsnyen bkur byas pas ni de dag las bzod pa thob pa dang / ting nge 'dzin 'di thob pa dang / spobs pa skye bar mi 'gyur ro/ /sangs rgyas sa ya la bsnyen bkur byas pas ni phyi ma'i tshe 'di thos pa dang /mos pa dang / spong bar mi 'gyur ba dang / yid ches pa dang / don rtogs pa dang / gzhan la ston pa dang / chos la bzod pa thob par 'gyur yang / ting nge 'dzin thob par mi 'gyur/ spobs pa skye bar mi 'gyur ro/ /sangs rgyas bye ba phrag brgyad cu la bsnyen bkur byas pa dge ba'i rtsa ba bskyed pa dang /byang chub tu sems bskyed pas ni thams cad thob par 'gyur ro zhes gsungs so/ /de bas na slob dpon 'phags pa klu sgrub kyi zhal snga nas kyi gzhung lugs dbu ma chen po'i don 'di ni u dum bA ra ltar rnyed par dka' ba yin par shes par bya'o/ /bde ba chen po'i zhal snga nas kyang /dri za'i grong khyer lta bu ni/ /bden pa gnyis kyis mtshon pa dag /dpag med bskal pa mang po ru/ /bsgoms pas dag pa'i blo can la'o/ /zhes gsungs so/ /slob dpon rje btsun zla ba grags pa'i zhal snga nas kyang / so so skye bo'i dus na stong nyid thos / / nang gi dga' ba yang dang yang ni 'byung / /dga' ba las byung mig ni mchi mas gang / /lus kyi ba spu ldang ba'ang skye bar 'gyur/ /gang yin de la byang chub sa bon yod/ /don dam bden pa de la bstan par bya/ /de rtogs pa yi yon tan de las byung / /chos kyi dbyings la mnga' brnyes pas/ / chos kyi dbyings kyi bdag nyid gyur/ /skye med seng ge'i nga ro can/ /'phags pa klu sgrub la phyag 'tshal/ /so so skye bo'i shes pa tshu rol mthong ba dag /de bzhin gshegs pa'i gsung rab la zhugs nas de kho na nyid len par 'dod pas/ 'phags pa klu sgrub kyi zhal snga nas kyi gcig nas gcig tu brgyud pa'i slob dpon dag btsal ba la 'bad par rigs so//'dir rgyu'i stobs can dag ji ltar 'jug par bya zhe na thog mar skyabs su 'gro ba sngon du song bas/ bla na med pa yang dag par rdzogs pa'i byang chub tu sems bskyed cing / byang chub sems dpa'i lhag pa'i tshul khrims kyi bslab pa blang bar bya'o//de yang bslab pa bzhi brgya pa dang / rtsa ba'i ltung ba brgyad dang / pham pa bcu dang / ltung ba bzhi bcu rtsa brgyad dang / slob dpon klu sgrub kyi zhal snga nas/ ji ltar bkod pa rnams dang / 'phags pa thogs med kyis / mdo sde las btus pa'i bslab pa'i grangs nges par byas pa de dag ni las dang po pa blo gros dman pa dag gi phyir 'di yin te/'di ltar bslab pa la grangs nges par 'dod cing / gzhung 'di'i bslab pa'i tshul ni bslab par mi bya'o zhes zer na ni byang chub sems dpa'i 'khrul pa yin te/ 'di ltar sems can yongs su smin par bya ba dang /sangs rgyas kyi chos yongs su rdzogs par bya ba dang / myur du mngon par rdzogs par 'tshang rgya bar 'dod pas/ bcom ldan 'das kyis mdo sde du mar gsungs pa'i bslab pa ma lus par bsrung bar bya'o/ /ltung ba las ldang ba yang blo gros dman pa kha cig gis ni gzhung las ji ltar 'byung ba bzhin du gang zag gi mdun du bshags par bya'o//gzhan 'phags pa chos bzhi'i mdo dang / 'phags pa phung po gsum pa dang / 'phags pa las kyi sgrib pa rgyun gcod pa'i mdo dang / 'phags pa nye ba 'khor gyis zhus pa'i ltung ba bshags pa'i cho gas ltung ba las ldang bar bya'o//byang chub sems dpa' blo gros bzang ba kha cig gis ni nam mkha'i snying po'i mdo dang / 'phags pa sman gyi bla bai DUr+ya 'od kyi rgyal po'i mdo dang / gzungs kyi mdo sde las gsungs pa'i cho gas nga ba las ldang bar bya'o/ /byang chub sems dpa' blo gros mchog tu gyur pa ni 'di ltar chos thams cad skye ba med par bsgoms pas so//de'i don yang 'phags pa theg pa chen po'i man ngag gi mdo las de ltung ba 'dul ba gang zhe na/ ltung ba ni yul na mi gnas pa/ phyogs na mi gnas pa/ phung por ma gyur pa/gzung ba med pa/ snang ba med pa'o/ /sems gang gis ltung bar gyur pa de yang zad pa/ bral ba rnam par gyur pa/yul na mi gnas pa/ phyogs na mi gnas pa/ phung por ma gyur pa/ gzung ba med pa/ snang ba med pa'o/ /sems ji lta ba de bzhin du ltung ba yang de bzhin no//ltung ba ji lta bar chos thams cad de bzhin no/ /rtsa ba med pa'o/ /mi gnas pa'o/ /sems gang la som nyi med pa dang / rnyog pa med pa dang / dang ba dang / zhi ba dang / yongs su gdung ba med pa dang / gsal ba dang / shin tu byang ba dang / bla ma'i tshig la mos pa dang / gcig tu nges par the tshom med cing yid ches pa 'di ni ltung ba 'dul ba'o zhes gsungs so/ /ji skad du/ gang gis shes rab kyi pha rol tu phyin pa 'di las tha na tshig bzhi pa'i tshigs su bcad pa gcig blangs te/ 'chang ngam/ klog gam/ tshul bzhin du yid la byed na de'i tshe rabs snga ma'i mi dge ba de dag tshe 'di nyid la ma lus par zad par 'gyur ro zhes yum chen mo las gsungs te/'di ltar shes rab kyi pha rol tu phyin pa'i don sgom par byed na lta smos kyang ci dgos/ 'phags pa chos thams cad 'byung ba med par bstan pa las kyang / 'jam dpal byang chub sems dpa' gang gis las med cing rnam par smin pa med par shes pa des las kyi sgrib pa rnam par dag pa thob po zhes gsungs so//klu'i rgyal po rgya mtshos zhus pa las kyang / klu'i rgyal po chos bzhis las kyi sgrib pa rgyun chad par 'gyur te/ bzhi gang zhe na/ 'di lta ste/stong pa nyid la nges par sems pa dang / mtshan ma med pa la nges par sems pa dang / smon pa dang bral ba dang / mngon par 'du byed pa med par shes pa ste/ bzhi po de dag go zhes gsungs so/ /gzhan yang de bzhin gshegs pas gsang ba'i mdo dang / las kyi sgrib pa rnam par dag pa'i mdo la sogs pa du ma nas don 'di dag gnas so//'di ltar mos pa spyod pa'i sa gsum sbyangs nas/ 'jig rten las 'das pa'i lam skye bar 'gyur te/ ji lta zhe na/ zhi gnas dang lhag mthong gi rnal 'byor gyis so/ /'di ltar rtsod pa'i rtsa bar gyur cing /'khrug long du byed pa ni rnam par rtog pa yin la/ de nyid ni rlung yin te/ bgrang ba dang / 'gag pa la goms par bya'o/ /bgrang dang rjes 'gro rtog pa dang / /rtog pa dang ni bsgyur ba dang / /yang dag rnam pa 'di drug ni/ /dbugs rngubs 'byung ba dran par 'dod/ /gcig nas bcu nas brgya yi bar //nang du 'jug pa bgrang bar bya/ /rlung de dbang du gyur pa na/ /lus la bde ba 'byung bar 'gyur/ /de rjes khri phrag bcur bgrangs na/ /lo lngar tshe ni bsring bar byed/ /khri phrag nyi shu la sogs par/ /bgrangs pas bcu sogs bgrang bar bya/ /pu ra ka dang tse ra ka /kum+ba ka ste 'gag pa'o/ /chung dang 'bring dang chen po yi//tshad ni rnam pa gsum yin no/ /bsgom pa gang zhig lung dang ni/ /rigs pa dang yang mi 'gal la/ /bla ma'i man ngag rab ldan pa'i/ /bsgom pa de ni bsgom par 'os/ /slob dpon chen po 'phags pa klu sgrub kyi zhal snga nas/ dbu ma chen po'i man ngag ni 'di yin te/ stan bde ba la skyil mo krung gis 'dug ste/'gro ba lnga po sems can gyi khams la bltas la/ 'di dag ni rang rang gi rnam par rtog pa'i bag chags kyis rmongs par gyur cing sdug bsngal brgya rtsa bcus gdungs par gyur pas 'di dag ma bsgral ba bsgral bar bya'o/ / dbugs ma phyin pa dbugs dbyung bar bya'o/ / yongs su mya ngan las ma 'das pa yongs su mya ngan las 'da' bar bya'o zhes snying rje las byung ba'i byang chub kyi sems mngon du byas nas sngar gyi zhi gnas la brtan pa thob pa dang / slob dpon zla ba grags pa'i zhal nas/ dngos po ni gnyis te/ gzugs can dang / gzugs can ma yin no// gzugs can ni gnyis te/ 'byung ba dang / 'byung ba las gyur pa'o/ /gzugs can ma yin pa'i chos ni gnyis te/ 'dus byas dang / 'dus ma byas so/ /'dus byas kyi chos ni gsum ste/ sems dang / sems las byung ba dang ldan pa ma yin pa'o/ /'dus ma byas kyi chos ni bzhi ste/so sor brtags pa'i 'gog pa dang / so sor brtags pa ma yin pa dang / nam mkha' dang / chos rnams kyi de bzhin nyid do zhes gsungs med kyi/ 'on kyang 'di dngos po'i chos bsdus par gyur na ni 'di ltar gnyis te/ gzugs can dang / gzugs can ma yin pa'o/ / 'di ltar gzugs can yang rdul phra rab kyi cha shas su snang ba med par 'gyur la/ rdul phra rab kyang phyogs cha'i bye brag gis mthar snang ba med par 'gyur ro/ /gzugs med pa'i sems yin te/ de 'ang re zhig sems dang sems las byung ba dag ni skad cig mar 'jug pa yin la/ de yang sngon da ltar dang tha ma'i bye brag gis shin tu cha phra ba'i phyir snang ba med pa nyid du 'gyur bas sems dang sems las byung ba dag ma grub cing / chos kyi dbyings kyi rang bzhin du gyur pa de lta bu la gnas par bya'o/ /yum chen mo las/ sems de ni sems ma yin te/ sems kyi rang bzhin 'od gsal ba'i phyir ro zhes pa dang /gang sems med pa de ni bsam gyis mi khyab pa'o zhes gsungs so/ /yang na chos thams cad sems su 'dus la/ sems lus la 'dus shing / lus chos kyi dbyings su 'dus nas thim par gyur par bya'o/ /'di'i don yang slob dpon gyi zhal snga nas/dbu ma srid pa 'pho ba las ji srid du/ 'jig rten rnam par rtog las byung / /rnam par rtog pa sems las byung / /sems kyang lus las byung bas na/ /de phyir lus la rnam par brtag /ces gsungs pa yin no/ /de lta bu'i don la gnas par bya'o/ /skabs der shes pa ci la yang mi gnas/cir yang mi rtog /ci la yang sems pa med pa/ mtha' thams cad la mi gnas pa/ shes pa ci'i ngo bor yang ma skyes pa/ ci yang ma yin par bsgom par bya'o/ /so sor rtog pa'i shes rab de nyid kyang snang ba med pa yin te / dper na shing gnyis drag tu drud pa las me byung bas shing tshig par gyur pa na me de nyid kyang rang shi ba bzhin du shes pa rang nyid kyang med par gyur pa'o//'di'i don 'phags pa 'od srungs kyis zhus pa'i mdo las 'byung ba dang / gzhan yang 'phags pa rgyan stug po'i mdo las kyang / ji ltar sreg par byed pa'i me//bsreg bya med pas mi gnas so/ /de bzhin bsreg bya lta tshig na/ /stong nyid me yang 'gag par 'gyur/ /lta ba 'gog pa'i dus su yang / /ye shes me yang mi 'byung ste/ /nyon mongs thams cad sreg par byed/ /nyon mongs bsregs na rnam par mdzes/ /zhes gsungs so//bde ba chen po'i zhal snga nas kyang / lta ba'i bud shing phung po dag /stong nyid me yis bsreg byas nas/ /'di ni zhi ba la gnas nas / /de bzhin nyid kyi me yang 'gag /ces gsungs so/ /de ltar rags pa'i rnal 'byor bstan nas/ da ni phra ba'i rnal 'byor bstan par bya ste/'di ni phra ba yin te/ ji ltar chos thams cad rang gi sems nyid sgyu ma tsam snang bar 'byung ste/ 'di ltar sems sgyu ma tsam ni dus gsum las 'das pa/ kha dog dag dang dbyibs med pa rang bzhin gyis 'od gsal ba/ snang ba med pas na chos thams cad ni sems nyid sgyu ma yin par shes par bya'o//lung yang yod de/ 'phags pa lang kar gshegs pa las/ /sems tsam la ni brten nas su/ /phyi rol don la mi brtag go/ /de bzhin nyid la brten nas ni/ /sems tsam las kyang 'das par bya/ /sems tsam las ni 'das gyur na/ / snang ba med la gnas par 'gyur/ /snang med gnas pa'i rnal 'byor pa/ /de yis theg pa chen po mthong / /zhes gsungs so/ /'phags pa klu sgrub dang / slob dpon 'phags pa'i lha dang / slob dpon rje btsun zla ba grags pa ni 'di skad du gsungs pa yin te/ 'di ltar kun rdzob kyi bden pa nyan thos kyi tshul du smras pa ni phyi rol gyi dbu ma rags pa yin la/de nyid rang gi sems tsam du gnas pa nang gi dbu ma zhes bya ba phra ba yin no zhes gsungs pa'i don rgyas par ni ji skad du/ slob dpon gyi zhal snga nas/ 'dir ni gang yang skye ba med/ /gang yang 'gag pa yod ma yin/ / sems kyi rang bzhin rnam gnas pa/ /chos rnams nyid ni shes par bya/ /mig la sogs dang yul rnams nyid/ /ye shes lnga po nyid dag ste/ /phyi dang nang du rnam phye ba/ /thams cad sems las gzhan ma yin/ /zhes bya ba la sogs pa mang du gsungs so/ /slob dpon 'phags pa lha'i zhal snga nas/phyi rol don ni yod ma yin/ /rang gi sems ni mthong bar 'gyur/ /de yang sgyu mar bsgom bya zhing / /de bzhin nyid kyang rjes dran bya/ /yang gsungs pa/ gzugs sogs lnga dang de bzhin skye mched bcu gnyis dang / /bco brgyad ces bshad khams ni de rnams dang / shes pa lnga dang 'gro ba ma lus pa/ /thams cad rang gi sems nyid yin gyi gzhan ma yin/ /gang yang ri brgyad dang ni rgya mtsho brgyad rnams dang / gling la sogs dang dmyal ba la sogs dbye/ /gang yang brtan dang g.yo ba nyid du mthong ba de/ /thams cad sems nyid yin gyi gzhan ma yin/ / zhes mang du gsungs so/ /slob dpon zla ba grags pa'i zhal snga nas kyang / ji skad du/ de bas na phyi rol gyi dngos po lta bu dmigs su med cing yod pa ma yin te/ sems kyi rang bzhin yin pa'i phyir ro zhes pa dang / yang chos thams cad sems las phyi rol na mi gnas te/ mig yor tsam du snang ba gang yin pa de thams cad ni rang gi sems te/rang gi sems nyid las gzhan ni ci yang med do zhes pa dang / yang gsungs pa/ sems las dngos po tha dad pa yod do zhe na/ chos med ces bya'o zhes rgyas par gsungs so/ /'dir tshigs su bcad pa ni/ ut+pal rtsa ba mU la las//lo ma la sogs rgyun 'byung ltar/ /de bzhin sems rdzas med pa yang / /chos rnams kun gyi ngo bor gnas/ /de yi don ni 'di yin te/ /ut+pala'i tsa ba gzhan dang ma 'brel zhing chu nyid la gnas shing rtsa ba der gar yang zug pa med kyang / mtsho shin tu rgya che ba dag lo ma dang me tog la sogs pas khyab par nus pa bzhin du sems rdzas su med pa nyid yin yang kun rdzob tu phyi nang gi chos thams cad kyi ngo bor gnas so//yang smras pa/ ji ltar lu ma'i sA lu ka/ /rtsa ba med kyang thams cad khyab/ /rtsa ba med pa'i sems nyid kyang / / nam mkha'i mthas gtugs khyab par gnas/ /'di'i don ni 'di yin te/ /mtshe'u dang / lu ma dag la sA lu ka zhes bya ba'i sngo zhig phan tshun 'brel pas/ me tog ser po zhig gis lu ma'i kha chod par skye la de la rtsa ba ni zug pa med do/ /de bzhin du sems rtsa ba med pa bzhin du nam mkhas ji tsam khyab pa de tsam du chos thams cad kyi ngo bor gnas so//slob dpon 'phags pa lha'i zhal snga nas kyang / de ltar rang gi sems kyi rang bzhin 'gro ba ma lus pa/ /rnam shes thar pa srid pa'i brtags las 'gro ba gang / /srid pa'i sdug bsngal mtsho chen nang du mi 'khor ba'i//'dus byas kun gyi pha rol song ba de la phyag 'tshal 'dud/ /ces gsungs so/ /bla ma'i bla mas kyang don dam par rigs pa'i glu las/ /rang gi sems nyid kun gyi sa bon te/ /gang la srid dang mya ngan 'das 'phro ba/ / 'dod pa'i 'bras bu ster bar byed pa yi/ /yid bzhin 'dra ba'i sems la phyag 'tshal lo/ /zhes gsungs pas 'khor ba dang mya ngan las 'das pa thams cad sems nyid sgyu mar shes par bya'o/ /de bas de dag bdag gi gzhung chen po mang po dag bkod pa ni/ phyi rol gyi dbu ma yin no zhes shes par bya'o//pha rol rgol ba zlog pa dang / /bstan bcos chen po'i gzhung dang ni/ /rtsod pa chen po byung dus su/ /rigs pa'i dbu ma'i gzhung smra bya/ /de nyid don la gtsor byed cing / /rnal 'byor nyams su len dus su/ /phra ba'i rnal 'byor bsgom par bya/ /'di ni zhal gyi gdams pa yin//rje btsun de dag gi zhal gyi gdams ngag ni 'di yin te/ kun rdzob kyi bden par nam mkha' dang / bag chags bzhi'i mthus sems sgyu ma rdzas su med pa brdzun pa nyid phyi dang nang du snang ste/ bdag la sogs pa dang / phung po la sogs pa'i chos ni 'ga' yang med do/ /don dam par na sems sgyu ma de gdod ma nas ma skyes pa/bsal ba med pa/gzhag pa med par yang 'di lta bu'o zhes shes par bya'o/ /rigs pa'i tshogs rgya chen po rnams kyis de ma grub par bya ste/ bsal bar bya'o/ /slob dpon gyi zhal snga nas/ 'di la bsal ba ci yang med/ /gzhag par bya ba gang yang med// yang dag nyid la yang dag lta/ /yang dag mthong bas rnam par grol/ /yang / /bdag dang phung po la sogs dang / /rnam shes rtogs pas ma bsgribs pa/ /sangs rgyas rnams kyi byang chub sems/ /stong pa'i mtshan nyid dag tu bzhed/ /phyi nang thams cad sems nyid ni/ /sgyu ma lta bur gnas pa'o//sems de yang ni 'od gsal ba'o/ /mya ngan 'das bcas kun stong dang / /chos skur yang dag bshad pa yin/ /zhes gsungs so/ /phyi yi yul du snang ba'i sems/ /nang gi sems la bsdu ba dang / /de yang gdod ma nas rang bzhin gyis 'od gsal ba/ gzugs spangs pa/ ci'i ngo bor yang ma skyes pa yul dang / yul can dang / shes pa dang / shes byar ma grub pa/ ci yang ma yin pa/ mtha' gang na'ang mi gnas pa/ brjod pa dang spros pa thams cad kyi skabs med pa/ bsam gyis mi khyab pa/ bsam du med pa/ bsam pa las 'das pa yin pas/ ci la'ang mi gnas pa/ yid la mi byed pa dran pa dang yid la byed pa spangs par bsgom par bya'o zhes gsungs pa yin te/skal pa chung ba blo gros dman pa dag la sba bar ma byas na/ byang chub sems dpa' las dang po pa'i rtsa ba'i ltung ba 'byung bar 'gyur bas na bag med pa brjod par mi bya'o//byang chub sems dpa' snying rje phul du byung ba gzhan gyi don kho na gtsor byed 'dod pas/ zhi gnas kyi yan lag rnams phun sum tshogs par byas la mngon par shes pa bskyed par bya'o/ /gal te mngon par shes pa med na spyod lam dang /pra se na'i thabs kyis brtags la man ngag sbyin par bya'o zhes kyang gsungs pa yin pas theg pa chen po 'di la bag yod par spyad par bya'o/ /tshul 'di lta bu bsgom pa rnams ni skad cig ma gcig la mngon par byang chub pa zhes bya ste/ slob dpon gyi zhal snga nas/mthong ba'i chos la mya ngan 'das/ /byas pa byas pa'ang de nyid yin/ /zhes gsungs so/ /de nas mig dag dal bus phye la 'di snyam du/ e ma ho ngo mtshar ro/ /e ma ho ngo mtshar ro/ /phyi nang gi dngos po 'di rnams don dam par skye ba med bzhin du/ 'di ltar snang ba 'di sems skye ba med pa'i cho 'phrul yin pa dang / nam mkha'i cho 'phrul yin pas rmi lam gyi gnas skabs lta bu kho na yin no snyam du bsam zhing / gzugs la sogs pa'i 'dod pa'i yul thams cad la chags pa dang / sdang ba dang / rmongs pa bsal te/'jig rten gyi chos brgyad las rgyal bar bya'o/ /byang chub sems dpa'i tshul khrims kyi sdom pas bsdams shing snying rje'i yid kyis byang chub kyi sems mi brjed pa la brtson par bya ba dang / dran pa dang shes bzhin dang / bag yod pa dag ma nyams par bya ba dang / thabs dang shes rab dang ldan par bya ste/ thabs dang shes rab kyi tshul rgyas pa ni thabs dang shes rab kyis nges par byed pa grub pa zhes bya ba'i bstan bcos su blta bar bya'o/ /de nas dal bus stan las langs te/ nyin lan gsum mtshan lan gsum du phung po gsum pa'i cho ga bya ba dang /'phags pa shes rab kyi pha rol tu phyin pa'i mdo gdon par bya ba dang / 'phags pa bzang po spyod pa'i smon lam dang / slob dpon gyi zhal snga nas mdzad pa'i smon lam nyi shu pa dang / slob dpon ma ti tsi tras mdzad pa'i smon lam bdun cu pa dus rtag tu gdon par byas pas sangs rgyas kyi chos yongs su rdzogs par bya ba dang /sems can yongs su smin par bya ba la shin tu g.yel ba med par 'bad par bya'o/ /'di ltar mos pa spyod pa'i sa rnam pa gsum ni dgur 'gyur te/ dang po la gsum du gnas te/mos pa pa dang / gnas skabs pa dang / lhag par 'dod pa'o/ /lhag ma brgyad po re re zhing gsum gsum du 'gyur te/ rjes su mthun pa pa dang / khyad par pa dang / rab tu rtogs pa'o/ /de sgra'i rjes su 'gro ba'i bzod pa ni dang po gsum gyi gnas skabs su skye bar 'gyur ro//lhag ma brgyad po re re zhing gsum gsum du gnas pas nyi shu rtsa bzhir 'gyur la/ rjes su mthun pa'i bzod pa yang nyi shu rtsa bzhir skye bar 'gyur ro/ /bzod pa de dag ji ltar skye bar 'gyur ba dang / skyes pa'i tshul gyis gnas pa phra mo dag ni/ slob dpon gyi zhal snga nas kyi bka' drin gyis 'tsho ba'i slob dpon dag la zhu bar bya'o//mi skye ba'i bzod pa ni lhag pa'i bsam pa rnam par dag pa'i sas bsdus pa 'jig rten las 'das pa'i lam skye bar 'gyur te/ rab tu dga' ba dang / sa mi g.yo ba dang / bcu pa'i dus dang /yang na sa bcu char du skye bar 'gyur ro/ /sa dang po nas bdun pa'i bar du ni smon lam gyi lus can yin pas chos thams cad mi dmigs bzhin du sems can yongs su smin par byed pa dang / sangs rgyas kyi chos yongs su rdzogs par byed do/ /gang gi tshe sa mi g.yo ba la gnas pa'i tshe/mtshan ma med pa lhun gyis grub pas gzugs kyi lus med de/ lus grub pa'i rgyu spangs pa'o / /gal te de ltar na sems can yongs su smin par byed pa dang / sangs rgyas kyi chos yongs su rdzogs par yang ji ltar 'gyur zhe na/ 'di ltar sa mi g.yo ba de ni gzhon nu'i sa yin pas rnam pa thams cad du mngal gyi dri mas mi g.yo mi gos te/rgyu bzhi dang rkyen gcig gis yid kyi lus rdzus te skye ba des gzhan gyi don byed pa dang / sangs rgyas kyi chos yongs su rdzogs par byed pa ni rjes las thob pa dag pa 'jig rten pa'i ye shes kyis so//gang gi tshe sangs rgyas kyi sa rdo rje lta bu'i ting nge 'dzin brnyes par gyur nas ni/ rjes las thob par mi mnga' ste/rnal 'byor gyi dbang phyug chen po dus rtag tu mnyam par gzhag cing rang byung gi ye shes chos nyid byang chub kyi sems chen po la 'gyur ba mi mnga' zhing 'byung ba dang 'jug pa med pas so//'phags pa sangs rgyas thams cad kyi yul la 'jug pa las/ ji ltar chos kyi dbyings la gnas pa de bzhin du ye shes ni mi 'jug mi ldog go/ /ji ltar ye shes mi 'jug mi ldog pa de lta bur chos nyid kyi tshul gyis 'jug pas zag pa rnams mi skye mi 'gog go zhes gsungs so//de bas na yun ring por pha rol tu phyin pa lnga dang / bsdu ba'i dngos po bzhi la sogs pa'i chos 'khor gsum yongs su dag pas sbyangs pa dang / ma rig pa'i gnyid mthug po las legs par sad pa dang / chos thams cad kyi rang dang spyi'i mtshan nyid skad cig ma gcig la skye ba med par bzod pa dang /phung po lhag ma med pa'i dbyings su yongs su mya ngan las 'das pa na dag pa 'jig rten pa'i ye shes ga la 'grub /gzhan yang sems zhes bya ba'i rdzas kyi ngo bor yod cing grub par gyur na lta/de yongs su dag pa'i gnas su gyur pa'i ye shes kyang yod par 'gyur ba zhig na/ sems gdod nas rdzas kyi ngo bor med par grub pas rnam par mi rtog pa'i ye shes zhes bya ba ji lta bu zhig yod par 'gyur/ de med pas de'i gzugs bstan du yod par gyur pa'i dag pa 'jig rten pa'i ye shes zhes bya ba yang yod par mi 'gyur ro//gal te sangs rgyas la de mnga' ba yin na 'khrul pa dang bcas par 'gyur ba dang / mnyam pa nyid la mnyam par gzhag pa ma yin par 'gyur ba dang / chos kyi sku'i bdag nyid ma yin par 'gyur ba dang /de bzhin gshegs pa la skye ba dang 'gag pa yod par 'gyur ro/ /lung gi khungs ni 'phags pa lang kar gshegs pa las/ 'khrul pa thams cad spangs nas kyang / /gal te 'khrul pa skyer zin na/ /de ni 'khrul pa yang dag ste/ /rab rib yongs su ma dag bzhin//zhes gsungs pa dang / mdo gzhan las kyang / glang chen bzhugs kyang mnyam par gzhag /glang chen bzhud kyang mnyam par gzhag /glang chen mnal yang mnyam par bzhag /glang chen gzims kyang mnyam par bzhag /ces gsungs so//yang 'phags pa sangs rgyas thams cad kyi yul la 'jug pa las/ kha dog dbyibs dang mtshan ma med/ /'gag pa med cing 'byung ba med/ /rtsa ba med cing rten med pa/ /dmigs med khyod la phyag 'tshal lo/ /zhes bya ba la sogs pa mang du rgyas par gsungs so//rgyal ba bskyed ma sum brgya pa las kyang /gang gis nga la gzugs su mthong / /gang gis nga la sgrar shes pa/ /log pa'i lam du zhugs pa ste/ /skye bo de yis nga mi mthong / /sangs rgyas rnams ni chos kyi sku/ /chos nyid du ni 'dren pa ltar / /chos nyid mthong bar bya min pas//de ni rnam par shes mi nus/ /zhes gsungs so/ /'phags pa sangs rgyas thams cad kyi yul la 'jug pa las kyang / de bzhin gshegs pa rtag tu skye med chos/ /chos rnams thams cad de bzhin gshegs dang 'dra/ /byis pa'i blo can mtshan mar 'dzin pa dag /'jig rten dag na med pa'i chos la spyod/ /de bzhin gshegs pa dge chos dpag med ni/ /zag pa med pa'i chos rnams thams cad de/ /de bzhin nyid med de bzhin gshegs pa'ang med/ /'jig rten dag na gzugs brnyan kun du snang / /zhes gsungs so//don 'di nyid gsal bar bya ba'i phyir slob dpon nyid kyi zhal snga nas/ kun rdzob dang ni don dam dag /so so'i cha ni shes gyur na/ /gang du mi byed blo gnas pa/ /de yis zung du 'jug pa shes/ /mnyam par bzhag dang ma bzhag pa/ /gang la 'di dag thams cad med/ / ces gsungs pa dang / don dam par bstod pa las kyang / chos rnams kun la mi gnas pas/ /chos kyi dbyings kyi dngos gyur cing / /mchog tu zab pa nyid brnyes pa/ /zab mo khyod la phyag 'tshal bstod/ /ces mang du gsungs so/ /de bas na mnyam par gzhag ces pa dang / rjes las thob pa zhes bya ba de dag ni gdul bya dngos po la zhen pa'i tshig ste/ chos thams cad zad pa'i mthar gyur pa mya ngan las 'das pa'i dus na ji lta bu zhig yod/ 'phags pa lha'i zhal nas kyang / /re zhig dngos 'di nam mkha'i nags tshal las/ /skyes pa'i pad+ma bzhin du dngos med cing //gnyi ga dag las gzhan pa'ang ri bong rwa bzhin no/ /rnam par thar pa ci 'dra ba zhig yod ces bdag mtshar khyed cag spyod/ /ces gsungs pa yin no/ /sangs rgyas rnams kyis dus kun du/ /de bzhin nyid la mnyam par gzhag / brjod du med pa'i gnas skabs der//'jug pa'ang ldog pa yod pa min/ /ye shes nyid kyang ji lta bu/ /mnyam gzhag rjes thob ga la zhig /gal te de la de mnga' na/ /sar zhugs rnams kyang khyad ci yod/ /da ni bsgom pa'i rim pa nyid la 'jug par bya'o/ /de la byang chub sems dpa' bskal pa grangs med pa gsum dang /bdun dang / sum cu rtsa gsum du rnal 'byor pa thabs dang shes rab gnyis dang / bsdu ba'i dngos po bzhi dang / tshad med pa bzhi dang / byang chub kyi phyogs kyi chos sum cu rtsa bdun dang / gzungs dang / ting nge 'dzin dang / rnam par thar pa dang /byang chub sems dpa'i stobs bcu dang / byang chub sems dpa'i ma 'dres pa bco brgyad dang / dbang bcu dang / so so yang dag par rig pa bzhi dang / sa bcu dang / pha rol tu phyin pa bcu rnams gus pa dang / yun ring ba dang / rgyun mi 'chad par mthar phyin par byas/rdzogs par byas pa sems can yongs su smin par bya ba dang / sangs rgyas kyi chos yongs su rdzogs par bya ba dang / snying rje chen po la legs par goms pa smon lam thams cad la dbang thob pa sa bcu pa'i dbang phyug srid pa tha ma pa des/ sems can gyi khams la bltas na de dag bri ba med par mthong ste/ 'di snyam du/ mdo las/ nam mkha'i mthar thug gyur pa ji tsam par/ /sems can ma lus mtha' yang de tsam mo/ /zhes gsungs pa dang / yang mdo sde las 'di lta ste/ 'jig rten gyi khams thams cad chu'i dkyil 'khor du gyur la/de skyes bu zhig gis lo brgya lon na thigs pa re re dor ba las/ /chu de ni tha mar zad par 'gyur ba yin gyi/ sems can gyi khams ni zad par mi 'gyur ro zhes gsungs pas bdag gis chos kyi sku mngon sum du ma byas par sems can rnams gdon par mi nus pas/bdag gis chos kyi sku mngon sum du bya'o snyam pa'i rjes la/ phyogs bcu'i de bzhin gshegs pas dbang bskur bas stobs bcu la sogs pa'i sangs rgyas kyi yon tan ma lus pa rdzogs pa thob par 'gyur ro/ / slob dpon gyi zhal snga nas ji skad du/ rim gyis 'jug pa'i sbyor ba yis//sangs rgyas sras po grags chen rnams/ /chos kyi sprin gyi ye shes kyis / /chos nyid stong pa mthong gyur nas/ /gang tshe sems ni rab bkrus pa/ /'khor ba'i gzeb las 'das gyur te/ /pad+ma chen po'i rang bzhin gyi/ stan de la ni rab gnas 'gyur/ / 'dab ma rin chen du ma'i 'od/ /'dod par bya ba'i ze 'bru can/ /pad 'dab bye ba du ma yis/ /rnam pa kun du yongs su bskor/ /stobs bcu pa yis yongs su gang / /mi 'jigs pa yis yongs su ngoms/ /bsam gyis mi khyab sangs rgyas chos/ /spros med rnams las nyam mi nga //legs par spyad pa'i las kun gyis/ /bsod nams ye shes rab bsags pa'i/ /zla ba nya la skar ma yis/ /'khor du rnam pa du mas bskor/ /sangs rgyas phyag gis nyi ma der/ /dri med rin chen 'bar gyur te/ /sras kyi thu bor dbang bskur bas/ /dbang bskur ba ni kun du gsol//zhes gsungs pa de'i rjes thogs la/ ston ka'i nyi ma'i gung gi nam mkha' rdul dang bral ba lta bu mtshan ma'i rdul thams cad med pa/ sems dang / yid dang / rnam par shes pa dang bral ba/ de bzhin nyid kyi dbyings su ma lus pa thams cad tha dad pa med cing ro gcig pa de ni sangs rgyas zhes bya ste/de rtogs phyir na gang zhig la/ /blo skye med pa sangs rgyas dngos/ /rnam rtog nyid ni spangs phyir dang / /rtog pa med pa rgyas phyir ro/ /chos rnams mtshan nyid tha dad pa/ /skye dang bkag pa ma mdzad pa / /mnyam pa nyid kyi mnyam nyid pas/ /dmigs med nyid rdzogs sangs rgyas shing //rdzogs sangs rgyas med sangs rgyas pas/ /lha mir bcas pa'i 'jig rten na/ /de ni sangs rgyas zhes brjod do/ /ma rig pa'i gnyid las sangs shing chos nyid byang chub kyi sems rang byung gi ye shes chen pos shes bya'i dkyil 'khor thams cad skad cig ma gcig la mkhyen zhing mngon par rdzogs par byang chub pa ni sangs rgyas yin te/ji skad du/ dngos po kun gyi rang bzhin can/ /dngos po kun gyi rang bzhin 'dzin/ /skye med chos de sna tshogs don/ /chos kun ngo bo nyid 'chang ba/ /chos kun mngon par rtogs pa ste/ /shes rab chen pos skad cig la//chos kun khong du chud pa po/ /zhes gsungs so/ /gzhan las kyang / rdo rje lta bu'i ting 'dzin gyis/ /skad cig gcig la mngon sangs rgyas/ /ngo bo med pa snyoms 'jug pa/ /dmigs med khyod la phyag 'tshal lo/ /zhes gsungs so/ /slob dpon zla ba grags pa'i zhal snga nas kyang /ma rig gnyid las sangs phyir dang / /blo rgyas phyir na sangs rgyas yin/ /zhes gsungs so/ /chos rnams bsal dang gzhag med par/ /chos nyid ji ltar de bzhin du/ /gang phyir de ni gshegs gyur pa/ /de phyir de bzhin gshegs zhes bya/ /rtogs bya brtan du ma lus pa //mthar lhung rnam par spangs pa dang / /rtogs med tshul gyis rtogs pa yis/ /bde bar gshegs pas bder gshegs yin/ /grangs med bsod nams tshogs ldan zhing / /shes bya mtha' yas mkhyen gyur pa'i/ /sangs rgyas rnams kyi chos sku 'di//spros pa nye bar zhi ba yin/ /'di la tshig kyang ldog 'gyur zhing / /'di ni sems kyi spyod lam min / /'di la kun rtog ldog 'gyur zhing / /shes pa 'jug par mi 'gyur ro/ /'dir lung ni 'phags pa ye shes kyi phyag rgya'i mdo las/ sku de sku ma yin zhing sku las yongs su grol//sku yang ma zhig rnyed par gyur pa med/ /chos rnams gang na kun du ldan med mi ldan med/ /bde bar gshegs pa rnams kyi sku ni de ltar gdags/ /'du med 'bral med gnas med rdzas kyang med/ /ma bzung ma grol nyams pa med cing nye ring med/ /rtsol ba med cing thogs med ci la 'ang gnas pa med//bde bar gshegs pa rnams kyi sku ni de ltar bstan/ /zhes pa la sogs pa dang / yang de nyid las de ni lus med pa/ ma byas pa/ ma skyes pa/ ma 'gags pa/ ma byung ba/ las med pa/ rnam par smin pa ma mthong ba/ ma thos pa/ rnam par mi shes pa zhes bya ba la sogs pa tshig nyis brgya brgyad cu thams pas gsungs so//yum chen mo las kyang / sangs rgyas rjes su dran pa ni dran pa med pa dang yid la byed pa med pa'o zhes bya ba la sogs pa gsungs so/ /'phags pa sgo mtha' yas par grub pa las kyang / de la sangs rgyas rjes su dran pa 'ba' zhig bsgom zhing /gzugs las ma yin/ mtshan las ma yin/ dpe byed las ma yin/ yon tan las ma yin/ chos las ma yin/ chos ma yin par ma yin zhes bya ba la sogs pa gsungs pa dang / gzhan yang de bzhin gshegs pa'i le'u las kyang / de bzhin gshegs pa la lta ba ni/stong pa nyid dang / mtshan ma med pa dang / smon pa med pa dang / skye ba med pa dang / 'gag pa med pa dang / 'byung ba med pa dang / dngos po med pa dang / mngon par 'du byed pa med par lta ba yin no zhes gsungs pa dang / 'phags pa blo gros mi zad pas zhus pa'i mdo las kyang /de la sangs rgyas rjes su dran pa gang zhe na/ gzugs dang mtshan gyis rab tu phye ba ma yin pa dang / skye ba dang / rigs dang / dus kyis rab tu phye ba ma yin pa dang / sngon gyi spyod pa dkar pos rab tu phye ba ma yin pa dang / phyi ma'i shes rab yongs su rlon pas rab tu phye ba ma yin pa dang /da ltar byung ba'i gnas pas rab tu phye ba ma yin pa gang yin pa ste/ sgrib pa thams cad kyi gzhi ma yin pa dang / mtshan ma thams cad kun nas slong ba ma yin pa dang / rtog pa dang / rnam par rtog pa dang / yongs su rtog pa thams cad nye bar zhi ba gang yin pa'o zhes gsungs pa dang /de bzhin du 'phags pa da ltar gyi sangs rgyas mngon sum du bzhugs pa'i mdo dang / 'phags pa sangs rgyas rjes su dran pa'i mdo chen po la sogs pa rnams su yang blta bar bya'o/ /smras pa/ de ltar na snying rje spangs pa nyid kyis zhi ba phyogs gcig par ji ltar mi 'gyur zhe na/ rgyu gsum dang /rkyen gcig gis gzugs kyi sku phun sum tshogs pa dang / kun rdzob tu 'byung bar mi 'gyur te/ mi gnas pa'i mya ngan las 'das pa'i rang bzhin yin pas so/ /ji lta zhe na/ sku gsum gyi tshul gyis so/ /sku gsum rnam par gzhag pa yang / slob dpon nyid kyi zhal snga nas/ ji skad du/ 'og min gyi pho brang du mngon par rdzogs par byang chub pa'i sems kyi mdo las kyang / de bzhin gshegs pa'i sku ye shes kyi bdag nyid yid bzhin gyi nor bu dang / dpag bsam gyi shing ltar mthu sna tshogs dang ldan pa ltar rang byung gi ye shes skad cig ma gcig gis chos thams cad mnyam pa nyid du mkhyen pa/bskal pa bye ba khrag khrig 'bum phrag grangs med par bsod nams dang ye shes kyi tshogs dpag tu med pa nye bar bsags pa las nges par 'khrungs pa/ yid bzhin gyi nor bu gzugs sna tshogs can ltar rtog pa mi mnga' ba/ spros pa thams cad dang bral ba/ sgrib pa rnam pa gnyis spangs pa thams cad la phan gdags pa'i phyir/gnas gyur pa'i mtshan nyid kyi sku dang / lhan cig tu mngon par grub po/ /de bzhin gshegs pa'i sku rnam par mi rtog pa de las gzhan yang phan pa bsgrub pa'i tshul khrims kyis yongs su bsgoms pa'i smon lam gyi shugs kyi dbang gis sprul pa'i skus thams cad la phan 'dogs par mdzad pa/'dzam bu'i gling bye ba phrag brgya dag tu/ dga' ldan gyi pho brang na bzhugs pa thog mar mdzad de/ 'pho ba dang / lhums su zhugs pa dang / bltams pa dang / gzhon nu'i rol pa dang / btsun mo'i 'khor gyi nang na bzhugs pa dang /mngon par 'byung ba dang / dka' ba spyod pa dang / byang chub kyi snying por gshegs pa dang / bdud 'dul ba dang / mngon par byang chub pa dang / chos kyi 'khor lo bskor ba dang / yongs su mya ngan las 'das pa chen po la sogs pa sangs rgyas kyi mdzad pa kun ston pa nyid 'byung ngo //de la brten nas yi ge dang / rtsa ba dang / tshig gi don go rims kyi mtshan nyid gsung dbyangs yan lag drug cu dang ldan pas sems can gyi bsam pa rangs par mdzad pa gang la theg pa mchog gis 'gro ba rnams kyi theg pa chen po zhes bya bar brjod pa 'byung ste/ye shes dang / gzugs dang / gsung gi sku gsum po de dag ni sdom pa gsum las nges par 'khrungs pa/ lus dang / sems dang / ngag gnas gyur pa'i ngo bo nyid yin no zhes gsungs so/ /'phags pa rdo rje sdes ni gzugs kyi sku 'og min gyi spyod yul can chos kyi sku'i gzhi la brten pa ni rnam par smin pa'i sku zhes bshad do//'phags pa thogs med kyis ni de nyid longs spyod rdzogs pa'i skur bshad pa/ stobs la sogs pa sangs rgyas kyi chos thams cad kyi gzhir gyur pa ni chos kyi skur bshad/'dzam bu'i gling du mngon par rdzogs par byang chub pa ni sprul pa'i skur bshad do/ /mdor na stobs dang / mi 'jigs pa dang / ma 'dres pa la sogs pa sangs rgyas kyi yon tan 'dus pa/ shes rab kyi pha rol tu phyin pa dang gnyis su med cing tha mi dad par gyur pa ni chos kyi sku'o//de'i byin gyi rlabs las byung ba de'i gzhi la brten pa ni longs spyod rdzogs pa'i sku'o/ /de'i byin gyi rlabs las nges par byung ba gdul bya la ji ltar mos par 'byung ba ni sprul pa'i sku yin no / /sbyor med gyur kyang ye shes med / / smon lam dbang gis sems can don/ /gdul bya'i rgyud ni ji bzhin du/ /thub pa'i mdzad pa rgyun mi 'chad/ /de bas na slob dpon nyid kyi zhal snga nas/ mgon po sems pa mi mnga' zhing / /rnam rtog g.yo ba mi mnga' yang / /rang nyid ngang gis sems can la//sangs rgyas mdzad pa 'jug par 'gyur/ /rnam rtog rlung dmar thams cad kyis/ /dpag bsam shing ltar mi bskyod kyang / /de ltas sems can thams cad kyi/ /bsam pa ma lus rdzogs par mdzad/ /yang slob dpon gyi zhal snga nas/ dri ma med pa chos kyi sku//dri ma med pa'i chos sku la/ /ye shes rgya mtsho gnas gyur nas/ /de yis sems can don mdzad do/ /zhes gsungs so/ /bsgom pa'i rim pa'i skabs rdzogs s+ho// //'dir sangs rgyas yongs su mya ngan las 'das shing / byang chub sems dpa' rnams kyang 'jig rten gyi khams gzhan du dengs pa dang /lha dang klu la sogs pa rnams kyang / mthong ba'i spyod yul du ma gyur pa na/ theg pa chen po'i rigs can dag la zab cing rgya che ba'i don su zhig 'chad par 'gyur/ su zhig gi tshig la yid ches par bya zhe na/ 'di ltar slob dpon 'phags pa klu sgrub kyi zhal snga nas/ don de 'chad par byed cing / de'i gsung la yid ches par bya ste/ bcom ldan 'das kyis gzhung du ma nas lung bstan pa'i phyir ro/ /'phags pa gser 'od dam pa'i mdo las/ lung bstan pa'i tshig ni med kyi/'di 'on kyang li ts+tsha bI sems can thams cad kyis mthong na dga' bas de bzhin gshegs pa'i ring bsrel las brtsams nas zab mo 'ba' zhig smra bar byed do/ /gzhan yang 'phags pa lang kar gshegs pa dang / mdo gzhan dag nas lung bstan cing / 'jam dpal gyi rtsa ba'i rgyud chen po las kyang ji skad du/dge slong klu sgrub ces bya ba/ /rang bzhin med don de nyid rig /sa ni drug pa sgrub pa ste/ /lo ni drug brgyar 'tsho bar 'gyur/ /zhes gsungs so/ /de bzhin du 'phags pa sprin chen po'i mdo las kyang /ji skad du/ lha'i bu dag bskal pa brjod du med pa'i sngon du de bzhin gshegs pa klu rigs sgron ma'i chos kyi rgyal po'i brtson 'grus chen po'i klu yum bstan pa 'dzin pa/ blon po dam pa'i chos kyi mdzod 'dzin pa/ rgyal po dang blon po gnyis sangs rgyas kyi ring bsrel gyi gtam byas shing /rgyal pos legs par bshad pas dus der 'khor thams cad ngo mtshar skyes nas bcom ldan 'das la zhus pa/ rgyal po 'di zab mo la mkhas pa'o zhes zhus pas/ bcom ldan 'das kyis rgyal po'i yon tan rgyas par gsungs te/mdo de nyid du blta bar bya'o/ /de nas rgyal po 'khor dang bcas pas bcom ldan 'das la rin po che spar gang gtor nas sems 'di lta bu bskyed de/ ma 'ongs pa'i dus na shAkya thub pa'i bstan pa nub pa'i tshe bdag rab tu byung ste/chos kyi mjug la bab pa na sgra chen po lan gsum du bsgrags pa la/ chos gos tsam 'chang ba skra bregs pa rnams yul nas phyung zhing bskrad la/ dam pa'i chos phyung ste dam pa'i chos kyi phyir bdag gi srog gtong bar gyur cig ces smon lam btab po//blon po dang / btsun mos kyang smon lam btab po/ /lha'i bu dag nga 'das pa'i 'og tu lo brgya phrag mang po 'das pa na/ lho phyogs kyi rgyud du mkhar gyi rgyal po bde spyod bzang po zhes bya ba 'byung bar 'gyur te/ de'i tshe lo brgyad cu na dam pa'i chos nub par 'gyur ba'i lhag ma tsam lus pa na nga'i nyan thos 'byung bar 'gyur/dam pa'i chos 'byin par 'gyur/ chos kyi 'khor lo bskor bar 'gyur/ theg pa chen po yang gzhan la rgyas par 'chad par 'gyur ro zhes pa nas dge slong de lung bstan pa nyon cig /de ni nga la brten pa dang /nga'i bstan pa rgyas par byed pa dang / khur chen po khyer ba dang / nga'i shAkya gzhon nu yin te/ nga 'das pa'i 'og tu lho phyogs kyi rgyud du drang srong ri bo zhes bya ba'i yul du grong khyer chen po bsod nams ldan zhes bya ba 'byung bar 'gyur te/ grong khyer chen po de'i byang phyogs su skye ste/'bra go can gyi rje'u rigs rnam par dag pa skye bar 'gyur ro/ /shAkya'i rigs gzhon nu li ts+tsha bI'i bu sems can thams cad kyis mthong na dga' ba byang chub sems dpa' mi mchog 'di/ nga'i dam pa'i chos rgyas par bya ba'i phyir der rigs chen por skye bar 'gyur ro//de'i pha ma la sogs pa'i gnyen sde'i ming yang de'i ming las 'dogs so/ /'bra go can gyi rje'u rigs kyang de bzhin gshegs pa'i rigs yin par blta'o zhes pa nas yang khye'u de yang skye bo thams cad kyis sdug par 'gyur zhing kun gyis bkur bar 'gyur ro//gang gi tshe khye'u rab tu byung ba na de'i 'khor rnams kyang dam pa'i chos kyi phyir srog gtong ba yin zhes pa nas yang de'i tshig la yid ches pa ni nyung zhing phal cher de la mi mos par 'gyur ro/ /chos bzhi dang ldan na de'i tshig la yid ches te/sangs rgyas snga ma dag la mdo 'di thos pa dang / dge ba'i bshes gnyen gyis yongs su zin pa dang / lhag pa'i bsam pa brten pas dge ba'i rtsa ba brtan pa dang / rgya chen po la mos pa lus kyi mngon sum du byas pa'o/ /de la yid mi ches pa thams cad ni bdud kyis byin gyis brlabs pa'i gti mug can no//de la mos pa dag ni sangs rgyas kyis yongs su gzung ba'o zhes pa nas/ yang de la bsnyen bkur byas na dus gsum gyi sangs rgyas thams cad la bsnyen bkur byas par 'gyur ro/ /de'i tshig mnyan pa na dus gsum gyi sangs rgyas thams cad kyi bka' mnyan par 'gyur ro zhes pa nas yang de 'chi ba'i dus byed pa na nga'i dam pa'i chos nub par 'gyur ro//de dang 'dra ba'i gang zag ni med de mi srid do/ /yang de'i phyogs byed pa dang / de'i gzhung rgyas par byed pa dang /de'i 'khor dang / de'i gzhung 'dzin pa de dag ni mngon par sangs rgyas pa'i dus su 'khor gyi gtso bor 'gyur ro/ /bskal pa bzang po de'i rjes la bskal pa drug cur sangs rgyas mi 'byung ngo / /de'i rjes la sangs rgyas bdun 'byung ngo / /de nas 'jig rten gyi khams dang ba'i 'od ces bya bar de bzhin gshegs pa ye shes 'byung gnas 'od ces bya ba la sogs pa dang /de'i ming thos pa yang don che ba'o/ /shAkya thub pa gnyis pa'o/ /dus gsum gyi sangs rgyas thams cad kyi mdzad pa byed pa'o zhes bya ba la sogs pa gsungs te/mdo de nyid du blta bar bya'o/ /gzhan yang dus gsum gyi sangs rgyas thams cad kyi man ngag slob dpon gyi zhal snga nas gnang ba'i gsang sngags kyi gzhung gsang pa las kyang ches gsang ba/ blo gros phul du byung ba/shes rab sbyangs pa dang ldan pa/ ngang gis snying rje che ba/ sngon chad skye ba grangs med cing rgya che ba spyad pa la goms pa yod pa/ dge ba'i bshes gnyen gyis yongs su zin pa/ tshogs rnam pa gnyis bsags pa la goms pa/ tshe 'di nyid la sangs rgyas nyid 'dod pas spyad par bya ste/de ni 'di ltar dbang po rnon po'i spyod yul yin pa dang / spang bar bya ba'i ngo bo nyid yongs su shes pa dang / bde ba nyid du spyod pa dang / tshogs gnyis bsags pa la mkhas pa dang / de kho na nyid kyi ting nge 'dzin bskyed pa la thabs rmad du byung ba mang ba nyid yin pa dang /rnam par rtog pa rgyang ring du spong ba dang / bdag la sgrub pa dang ma bral ba yin no/ /slob dpon gyi zhal snga nas/ byis pa rnams ni gzugs la chags/ / 'bring po rnams ni chags bral 'gyur/ /gzugs sogs ngo bo nyid shes nas/ /blo mchog rnams ni grol bar 'gyur/ /zhes gsungs so/ /'phags pa lha'i zhal snga nas kyang / mkhas pas legs par 'thab pa'am/ /yang na legs par bros par bya//bar ma do yi dngos pos ni/ /don dam pa'am ltung bar 'gyur/ /zhes gsungs so/ /blo gros 'bring po rnams kyis ni/ sngar ji skad bshad pa bzhin du gnas pas brtson 'grus dang / dbang po rab kyis bskal pa grangs med pa gsum gyis sangs rgyas nyid thob la/de las gzhan pa nyid kyis bskal pa grangs med pa bdun dang / bskal pa grangs med pa sum cu rtsa gsum gyis so/ /slob dpon gyi zhal snga nas kyi che ba brjod pa'i skabs rdzogs s+ho// //'di'i don la gnas pa'i byang chub sems dpa'i rnal 'byor pa la/tshe 'di nyid la phan yon dpag tu med pa thob ste/ 'di ltar 'khor ba'i 'jigs pa thams cad kyang mi 'byung zhing / dus ma yin par 'chi ba las kyang rgyal bar 'gyur te/ mtshan nyid med pa'i bde chen po/ /stong nyid rnal 'byor dam pa ni//'chi ba slu ba'i gtso bo ste/ /gzhan gyis 'chi bdag 'joms mi nus/ /zhes gsungs so/ /nad thams cad las rgyal ba thob ste/ 'phags pa lha'i zhal snga nas/ bshang dang gci ba 'byung ba dang / /rims dang nad la sogs pa dang / /rang bzhin rgas pa la sogs pa//rtag tu sgyu mas gso bar bya/ /zhes gsungs so/ /bdud dang gdon gyi rigs thams cad dang / bar du gcod pa thams cad las rgyal bar 'gyur te/ gang 'dir rgyu ba dang ni mi rgyu ba/ /sgyu ma nam mkha'i ngo bor rnam rtog pa/ / 'di ni bsrung ba'i mchog tu gsungs pa ste/ /bsrung ba'i cho ga gzhan dag 'dir ci dgos/ /zhes gsungs so/ /gzhan las kyang / thams cad nam mkha' dang 'dra bar bsgom pa ni bsrung ba'i mchog yin no zhes gsungs so/ /slob dpon d+harmA gras kyang / shes rab kyi pha rol tu phyin pas bsrungs pa la ni srung ba gzhan gyis bsrung mi dgos so zhes gsungs so/ /yang gsungs pa/ stong pa nyid ni rnam bsgoms na/ /'chi bdag gis ni ma mthong zhing / /gzhan yang bdud ni bye bas kyang / /mthong bar 'gyur ba ma yin no//zhes gsungs so/ /sdug bsngal thams cad las kyang rgyal ba thob ste/ 'phags pa mya ngan las 'das pa'i mdo las/ sems can thams cad la de bzhin gshegs pa'i snying po yod do zhes ston par byed pa'i sems can de dag ni yon tan dpag tu med pa dang ldan pa ste/dam pa'i chos 'dod pa'i rigs kyi bu de dag ni/ sdig pa'i las grangs med pa byas pa rnams/ klad pa na ba dang / rims kyis btab pa dang / zug rngu dang / skur pa btab pa tsam gyis byang bar 'gyur ro zhes gsungs so/ /'phags pa ye shes phyag rgya'i mdo las kyang /de'i rgyud la bskal pa mang por bsags pa'i sdig pa'i las kyi sgrib pa yod pa de ni/ klad pan btsam gyis 'byang bar 'gyur ro zhes pa nas/ nam yang tha na rmi lam sdig pa can mthong bas kyang / las kyi sgrib pa de dag kyang 'byang bar 'gyur ro zhes gsungs so//slob dpon gyi zhal snga nas kyang / mthong ba'i chos la mya ngan 'das/ /bya ba byas pa'ang de nyid yin/ /zhes gsungs so/ /sdug bsngal brgya rtsa bcur bshad pa/ /rnal 'byor can la 'byung mi 'gyur/ /'jig rten chos kyis mi gos te//pad+ma la ni 'dam bzhin no/ /'khor ba'i sdug bsngal kun bral yang / /'khor ba las kyang 'byung mi byed/ /rang bzhin mya ngan 'das pa nyid/ /mya ngan 'das la gnas mi byed/ /nyon mongs me yis gdungs pa med/ /nyon mongs ldan pa lta bur ston//sems med sems can ma yin te/ /mnyam gzhag rjes thob med par bsgom/ /phan yon gyi skabs rdzogs so// //nyams dga' 'tshe ba thams cad bral ba yi/ /shing rta chen po'i lam 'di bshad pa las/ /bsod nams bsags pa de yis 'gro ba rnams//rkang gnyis dbang po'i gnas su 'gro bar shog / bka' ma lus pa'i snying po bsdus pa/ de kho na nyid gsal por ston pa dbu ma rin po che'i sgron ma/ bdag dang gzhan thams cad kyi grub pa'i mtha' rgya mtsho lta bu mkhyen pa'i pha rol tu phyin pa sku tshe 'di nyid la sku lus de nyid kyis rig 'dzin gyi gnas su gshegs pa'i slob dpon mkhas pa chen po b+ha byas slob dpon 'phags pa klu sgrub kyi gsung bzhin du mdzad pa rdzogs so// //bla ma rje btsun zangs gling pa dge bsnyen mgon po la/ paN+Di ta chen po dI paM ka ra shrI dz+nyA nas bka' drin zhus pa las/