CLOSE WINDOW

D3846
བོད་ཡིག

@#/ /bstan bcos bzhi brgya pa zhes bya ba'i tshig le'ur byas pa bzhugs so/ / @##/ /rgya gar skad du/ tsa tuHsha ta ka shAs+t+rA kA ri kA nA ma/ bod skad du/ bstan bcos bzhi brgya pa zhes bya ba'i tshig le'ur byas pa/ 'phags pa 'jam dpal la phyag 'tshal lo//gang la 'jig rten gsum mnga' bdag /rang nyid 'chi bdag byed po med/ /yong nges rnal bzhin gnyid log na/ /de las ma rungs gzhan ci yod/ /'chi bar bya phyir skyes gyur cing //gzhan dbang 'gro ba'i ngang can la/ /'chi ba bya ba ltar snang ste/ /gson pa bya ba min ltar ro/ /khyod kyis 'das dus thung ngu ltar/ /mthong zhing ma 'ongs gzhan du na//khyod mnyam mi mnyam ltar sems de / /gsal bar 'jigs pa'i 'o dod 'dra/ /gzhan dag la yang spyi mthun phyir/ /khyod la 'chi ba'i 'jigs med na/ / gcig la gnod gang de phrag dog /sgo nas sdug bsngal skyed 'gyur ram/ /nad bcos rga ba gso bya des/ /de dag la khyod mi 'jigs mod/ /chad pa phyi ma bcor med pas/ / khyod ches gsal bar de la 'jigs/ /gsad par bya ba'i phyugs rnams ltar/ /'chi ba kun gyi thun mong zhing / /gzhan yang 'chi bar snang gyur na/ /khyod la 'chi bdag 'jigs cis med//dus la nges pa med pa'i phyir/ /bdag rtag snyam du sems na ni/ /nam zhig dus na 'chi bdag gis/ /khyod la gnod pa byed par 'gyur/ /ma 'ongs pa yi don lta zhing / /gson pa zad pa ma yin na/ / bdag nyid 'tshong la bdag nyid ni/ /rnam dpyod ldan zhes su zhig smra/ /bdag nyid gta' mar bzhag byas te/ /sdig las ci yi phyir na byed/ /nges par khyod ni mkhas rnams ltar/ /bdag la 'dod chags bral bar zad//su la'ang gson pa zhes bya ba/ /sems kyi skad cig las gzhan med/ /skye bos de nges mi rig pa/ /des na bdag nyid shes pa dkon/ /khyod ring gson pa la dga' zhing / /rgan nyid la khyod mi dga' na//e ma khyod spyod skye bo ni/ /'dra la dam pa lta bur snang / /khyod rang 'chi la mya ngan na/ /bu sogs rnams phyir ci ste yin/ /rang nyid spyo bya smra po ni/ /ci lta bur na smad mi 'gyur//gang tshe 'ga' zhig ma bcol bar/ /rang nyid bur gyur de yi tshe/ /ma dris nyid du de 'gro ba/ /rigs par mi 'gyur ma yin no/ /gti mug phyir na bu yi ni/ /rnam par rtog pa med par zad/ /'di yi 'gro bar spro ba nyid/ /rgas pas ston par byed par 'gyur//ji ltar pha la bu sdug pa/ /de ltar de la skye ma yin/ /'jig rten 'di ni 'og tu 'gro/ /de phyir mtho ris kyang rnyed dka'/ /gang tshe rjes su mi mthun pa/ /'ga' yang sdug ces bya yod min/ /de tshe chags pa 'tshong dang ni//'dra ba 'ba' zhig skye bar zad/ /bral bas bskyed pa'i sdug bsngal ni/ /mi rnams snying las myur ldog ste/ /chags la'ang sdug bsngal bral ba yis/ /mtshon pa'i mi brtan pa nyid ltos/ /gnod pas gzir ba byas zin kyang / /yon tan med snyam shes bzhin du//khyod bdag nyid la phyi 'chos 'gyur/ /de yang bdag la mi rigs so/ /sdug bsngal rnam par 'ged lta bur / /'jig rten 'di ni yongs su 'khyam/ /sdug bsngal gyur pa'i skye bo la/ /sdug bsngal 'ged pas ci zhig bya/ /gang gi 'du ba dga' yin de'i//'bral ba ci ltar dga' ma yin/ /'du ba dang ni 'bral ba dag /lhan cig rgyu bar snang min nam/ /'das la thog ma yod min la/ /ma 'ongs tha ma yod min na/ /cis na khyod kyis 'du mthong zhing / /ring por gyur kyang bral ba min//skad cig la sogs dus de rnams/ /nges par dgra dang 'drar 'gyur te/ /des na dgrar gyur de dag la/ /rnam kun khyod 'dod chags mi bya/ /blo ngan bral ba'i 'jigs pa yis/ /khyim nas nges par mi 'byung na/ /mkhas pa su zhig nges par ni//bya dgos chad pas byed par 'gyur/ /khyod 'di byas nas gsal bar ni/ /nags su 'gro bya snyam sems na/ /gang zhig byas kyang gtang bya ba/ /de byas yon tan ci zhig yod/ /bdag ni 'chi'o snyam sems pa/ /gang la nges par yod gyur pa//de ni chags pa yongs btang phyir/ /'chi bdag la yang ga la 'jigs/ /byang chub sems dpa'i rnal 'byor spyod pa bzhi brgya pa las rtag par 'dzin pa spang ba'i thabs bstan pa ste rab tu byed pa dang po'o// // lus ni dgra ltar mthong mod kyi/ /de lta na yang de bsrung bya / /khrims ldan yun ring 'tsho ba ni/ /de las bsod nams chen po byed/ /mi rnams sdug bsngal lus nyid las/ /skye zhing bde ba gzhan las na/ /sdug bsngal kun gyi snod gyur pa/ /khog pa la khyod ci ste gus//gang tshe bde ba sdug bsngal ltar/ /shas cher mi la mi 'byung na/ /de ltar sdug bsngal chen po de/ /chung ngo snyam du sems byed dam/ /'jig rten bde la mngon phyogs shing / /bde gyur dag kyang rnyed dka' ste/ /des na skye bo 'jig 'di la//sdug bsngal rjes su snyegs pa 'dra/ /sdug bsngal 'dod pas rnyed 'gyur gyi/ /'dod pas bde ba ga la yin/ /khyod cis dkon pa la gus shing / /mod la ci ste khyod mi 'jigs/ /bde bar gyur pa'i lus po ni/ /sdug bsngal snod du 'gyur ba de //lus la gus dang dgra la gus/ /de dag gnyis ni mtshungs par snang / /lus ni shin tu 'gor bas kyang / /bde ba'i bdag tu mi 'gyur te/ /rang bzhin gzhan gyis zil gnon ces/ /bya ba rigs pa ma yin no/ /mchog la yid kyi sdug bsngal te//tha ma rnams la lus skyes so/ /sdug bsngal gnyis kyis 'jig rten 'di/ /nyin re nyin re 'joms par byed/ /bde ba rtog pa'i dbang gyur cing / /rtog pa sdug bsngal dbang gyur pa/ /de phyir kun na sdug bsngal las/ /shin tu stobs ldan ci yang med//ji lta ji ltar dus 'gro ba/ /de lta de ltar sdug bsngal 'phel/ /de phyir bde ba lus 'di yi/ /gzhan po lta bur snang bar 'gyur/ /sdug bsngal gyi ni rgyu mang po/ /nad rnams dang gzhan snang gyur pa/ /de snyed du ni mi rnams la/ / bde ba'i rgyu dag snang ma yin/ /'phel bzhin pa yi bde ba las / /ji ltar bzlog pa mthong gyur pa / /de ltar sdug bsngal 'phel bzhin las / /bzlog pa yod pa ma yin no/ /rkyen dang lhan cig bde ba las / /bzlog pa mthong gi sdug bsngal la/ / rkyen rnams nyid dang lhan cig tu/ /bzlog pa yod pa ma yin no/ /khyod 'chi bzhin la dus song zhing / /'gro ba dang ni 'gror 'gyur na/ /'chi bzhin pa ni bde 'gyur zhes/ /rnam pa kun tu rigs ma yin/ /lus can rnams la bkres sogs kyi //gnod pa rtag tu yod gyur na/ /gnod bzhin pa ni bde'o zhes/ /rnam pa kun tu rigs ma yin/ /nus pa med pas 'byung kun la/ /tshogs pa zhes bya skye 'gyur te/ /'gal ba rnams la bde'o zhes/ /rnam pa kun tu mi rigs so/ / grang sogs rnams la phyir 'chos pa / /rtag tu yod pa ma yin na/ /brlag bzhin pa ni bde'o zhes/ /rnam pa kun tu rigs ma yin/ /'bad stsol med par spyod pa zhes/ /bya 'ga'ang sa stengs yod min na/ /las byed bde ba yin no zhes/ /rnam pa kun tu mi rigs so//'di dang gzhan du bdag nyid ni/ /rtag tu sdig las bsrung bar bya/ /ngan 'gro yod na bde ba zhes/ /rnam pa kun tu rigs ma yin/ /gzhon pa sogs la mi rnams kyi/ /bde ba rtag tu yod min te/ /dang por gang la rtsom med pa//de la mthar 'phel ga la yod/ /gser gyi snod du skyug pa la / /ji ltar 'ga' zhig dgar 'gyur ba/ /de bzhin sdug bsngal phyir bcos pa / /bde'o snyam du sems par byed/ /brtsams pas skyes pa ldog 'gyur na/ /sdug bsngal rtsom pa'ang bde ci yod//de phyir thub pas skye 'jig dag /sdug bsngal yin zhes gsungs pa snyam/ /so so'i skye bos sdug bsngal ni/ /bde bas g.yogs ltar mi mthong na/ /gang gis sdug bsngal sgrib 'gyur ba/ /bde ba zhes bya ci yang med/ /khyod sdug chags bral med do zhes//so so'i skye bo bstan bya des/ /nges par de bzhin gshegs rnams kyis/ /gti mug kun gyi tha mar gsungs/ /mi rtag pa la nges par gnod/ /gang la gnod yod de bde min/ /de phyir mi rtag gang yin pa/ /thams cad sdug bsngal zhes byar 'gyur//rnal 'byor spyod pa bzhi brgya pa las bde bar 'dzin pa spang ba'i thabs bstan pa ste rab tu byed pa gnyis pa'o// //yun ni shin tu ring pos kyang / /yul la mur thug yod min te/ /sman pa ngan ltar khyod yul la/ / ngal ba 'bras bu med pa 'byung / /bsten par byed pa 'ga' zhig la/ /sa sred ldog pa med ji bzhin/ /bsten bzhin pa yi mi rnams la/ /'dod re 'phel ba'ang de bzhin no/ /bud med kun la 'khrig pa la/ /tha dad cung zad yod min zhing / /gzugs gzhan gyi yang longs spyod na//khyod la mo mchog gis ci byed/ /gang la gang yid 'ong 'gyur ba / /de ni de yis 'tshengs par rlom/ /khyi sogs rnams la'ang thun mong pas/ /blo gros ngan pa khyod ci chags/ /khyed la yan lag kun mdzes mo/ /gang de sngar kun thun mong na//de rnyed khyod la ngo mtshar ltar/ /ji ltar yang ni 'gyur ba min/ /yon tan ldan pa sdug pa dang / /bzlog pa la ni bzlog mthong nas / /rnam par gnas med snga ma'am/ /cig shos las ni gang zhig bden/ /blun po'i 'dod chags yon tan dang / / ldan pa 'ba' zhig la mi skye/ /rgyu med pa las 'jug rnams kyi/ /ldog pa rgyu las ga la zhig /ji srid gzhan shes ma gyur na / /de srid de ni khyo la sdug /nad ngan dang mtshungs bud med ni/ /rtag tu rkyen las bsrung bar bya/ /dar mar rang gis byas pa gang / / de ni rgan por mi 'dod na/ /ji lta bur na grol ba rnams/ /de la shin tu gdung mi 'gyur/ /ma chags pa la bde med cing / /de yang blun min la med na/ /gang yid rtag tu phyir phyogs pa/ /de yi bde ba ci 'dra zhig /khyod la gus bzhin rtag par ni/ /mo dang lhan cig phrad pa med//'di nga gzhan gyi ma yin zhes/ /yongs 'dzin 'di ko ci zhig yin/ /gal te 'dod chags bde yin na/ /bud med dag gis dgos med 'gyur/ /bde ba dor bya zhes bya bar/ /ji ltar yang ni ma mthong ngo / /bud med lhan cig sbyor na yang / / bde ba gzhan las skye 'gyur na/ /de rgyu mdza' mo nyid yin zhes/ /blun po min pa su zhig 'dzin/ /mdze po 'phrug bzhin 'dod chags kyis/ /mdongs pas 'dod pa'i skyon mi mthong / /chags bral rnams la mdze po ltar/ /chags can sdug bsngal ldan par snang //mgon med bkres pas nyen rnams la/ /mu ger bya ba gang 'byung ba/ /de ni bud med phrad pa'i tshe/ /sems can kun gyi g.yo ba yin/ /dregs pa yis ni kha cig la/ /bshang khang la yang chags skye zhing / /bud med la la la chags pa/ /'ga' zhig 'ga' la phrag dog byed//mi gtsang ba la gti mug ni/ /'byung zhing khro ba 'byung rigs kyi/ /rnam pa kun tu 'dod chags ni/ /'byung bar rigs pa ma yin no/ /mi rnams ma gtogs mi gtsang ba'i/ /snod ni smad par 'byung 'gyur na/ /gang la mi gtsang 'byung 'gyur ba//de ni smad par cis mi sems/ /dngos po gtsang ba thams cad kyi/ /tha ma gang du dmigs gyur pa / /de la gtsang ba yod do zhes/ /blo ldan mi ni su zhig smra/ /gang zhig bshang khang nang 'dug cing / /de med par ni mi gnas par / / mi gtsang ba yi srin de la/ /rmongs las dregs pa skye bar zad/ /thabs gang gis kyang lus kyi ni/ /nang phugs gtsang bar mi 'gyur na/ /khyod ni nang la 'bad byed pa/ /de ltar phyi rol la ma yin/ /gal te mdze can bzhin de ltar/ /gcin can kun la mtshungs min na//mdze can ji bzhin gcin can de/ /de ltar mi kun gyis spong 'gyur/ /yan lag nyams pa 'ga' zhig ni/ /sna yi tshab mas dag 'gyur ltar/ /mi gtsang phyir 'chos me tog la/ /sogs pa 'dod chags de bzhin 'dod/ /gang du 'dod chags bral skye ba//de gtsang zhes byar mi rigs la/ /nges par 'dod chags rgyur gyur pa'i/ /dngos de gang na'ang yod ma yin/ /mdor na mi rtag mi gtsang dang / /sdug bsngal ba dang bdag med ces/ /bya ba bzhi po thams cad ni/ /gcig nyid la ni srid par 'gyur//byang chub sems dpa'i rnal 'byor spyod pa bzhi brgya pa las gtsang bar 'dzin pa phyin ci log spang ba'i thabs bstan pa ste rab tu byed pa gsum pa'o// //bdag gam bdag gi snyam dregs pa/ /srid par dam pa su la 'gyur//gang phyir lus can thams cad la/ /yul rnams thams cad mtshungs phyir ro/ /tshogs bran drug chos stabs gyur pa/ /khyod kyi dregs pa ci zhig yin/ /gang ngam de ru bya ba ni/ /dbang du byas la rag las 'gyur/ /ji ltar gso bya 'thob thob pa//rje bo gtong por sems de bzhin/ /rje bo sbyin bya byin byas nas/ /bdag ni gtong ba po snyam rlom/ /gzhan rnams kyis ni sdug bsngal gnas/ /khyod la phyin ci log tu dran/ /gzhan gyi las kyis 'tsho khyod kyi/ /dga' ba gang gis bskyed par 'gyur//'jig rten gyi ni bsrung po dang / /bsrung byar sa bdag snang gyur na/ /ci ste gcig gis dregs yod cing / /ci ste gzhan gyi dregs bral min/ /rigs kun nang nas rang las la/ /dga' bas 'tsho rnams rnyed pa dka'/ /gal te khyod la mi dger 'gyur//des na khyod la 'gro bzang dkon/ /gzhan gyis bskul te byed pa gang / /de ni sa stengs blun zhes bya/ /khyod dang mtshungs pa'i gzhan dbang gzhan/ /'ga' yang yod pa ma yin no/ /bsrung ba nga la rag las zhes/ /'jig rten la ni gla len zhing //rang nyid kyis kyang sdig byed na/ /de mtshungs brtse med su zhig yod/ /skye bo sdig to byed rnams la/ /gal te brtse ba bya min na/ /byis pa so so'i skye bo ni/ /thams cad bsrung byar mi 'gyur ro/ /bdag nyid dga' ba skyed pa yi/ /rgyu ni gang du med mi 'gyur//lung la sogs pa'i rgyu rnams kyis / /bsod nams min pa'ang 'jig yod min/ /yang dag srung byed ces bya ba/ /gal te sa bdag chos yin na/ /nyon mongs gzo mkhan rnams la yang / /ci ste chos su 'gyur ma yin/ /'jig rten sa bdag rag las kyi//sa bdag de ni smad de dper/ /dam pas 'jig rten kun gyi ma/ /srid pa yi ni srid pa bzhin/ /blun min rgyal srid mi thob la/ /blun la brtse ba yod min na/ /bsrung po yin yang mi yi bdag /brtse ba med la chos mi gnas/ / drang srong rnams kyi spyod pa kun/ /mkhas pas byed pa ma yin te/ /gang gi phyir na de dag la/ /dman 'bring khyad 'phags yod phyir ro/ /sngar gyi sa bdag dge rnams kyis / /'jig rten bu ltar bskyangs pa de/ /rtsod dus chos la brten rnams kyis / /deng sang ri dgas dgon par byas//glags su bsnun pa'i rgyal po la/ /gal te sdig pa yod min na/ /rkun po gzhan rnams la yang de/ /dang po nyid du yod ma yin/ /chang sogs dag la bdog pa kun/ /yongs gtong mchod pa ma yin na/ /g.yul ngor bdag kyang yongs gtong ba //mchod pa snyam du sems sam ci/ /rgyal po 'jig rten mgon khyod la/ /mgon 'ga' yod pa ma yin na/ /mgon nyid de yis bdag nyid ni / /ma btang su zhig dga' bar 'gyur/ /rgyal po shi bar gyur pa la'ang / / grags pas yon tan 'ga' mi 'byung / /khyod yon med dang khyi 'tshed la/ /grags pa chen po ci ste med/ /gang tshe kun gyi dbang phyug nyid/ /bsod nams kyis bskyed de yi tshe/ /'di ni dbang phyug rten min zhes/ /brjod pa rnyed pa ma yin no/ /'tsho ba'i thabs so cog la yang //'jig rten na ni rigs zhes bsnyad/ /des na sems can thams cad la/ /rigs las dbye ba yod ma yin/ /'das dus shin tu ring ba dang / /mi mo rnams yid g.yo ba ste/ /de phyir rgyal rigs zhes bya ba/ /rigs las 'ga' yang yod ma yin//gal te las kyis dmangs rigs kyang / /rgyal rigs zhes byar 'gyur na ni/ /las kyis dmangs kyang bram zer ni/ /gang gis 'gyur ba min par sems/ /rgyal po sdig la dbang phyug ltar/ /'geng ba yod pa ma yin na//gzhan gyi don du mkhas pa ni/ /su zhig phyi mar 'joms par byed/ /dbang phyug gis bskyed nga rgyal ni/ /mnyam dang khyad par 'phags pa yi/ /pha rol nus ldan blta bya ste/ /dam pa'i snying la mi gnas so/ /rnal 'byor spyod pa bzhi brgya pa las bdag tu 'dzin pa spang ba'i thabs bstan pa ste rab tu byed pa bzhi pa'o// //sangs rgyas rnams kyi g.yo ba ni/ /rgyu med 'ga' yang yod min te/ /dbugs kyang sems can rnams la ni/ /sman slad kho nar yang dag 'byung / /'jig rten kun la 'chi bdag sgra //ji ltar 'jigs pa skyed 'gyur ba/ /de bzhin kun mkhyen sgra 'di ni/ /'chi bdag la yang 'jigs pa bskyed/ /thub la mdzad dang mdzad min dang / /gsung bya gsung bya min mnga' ba/ /des na kun mkhyen kun mkhyen ni/ /min zhes bya la rgyu ci yod//sems ma rtogs pa 'gro sogs la/ /gang phyir bsod nams la sogs pa / /ma mthong de phyir las kun la/ /yid ni don por bsgrub par bya/ /bsam pas byang chub sems dpa' la/ /dge 'am 'on te mi dge rung / /thams cad dge legs nyid 'gyur te//gang phyir yid de'i dbang gyur phyir/ /byang chub sems dpa' sems dang po/ /sa stengs skye bo thams cad ni/ /'khor los sgyur ba nyid 'gyur ba/ /de dag bsod nams las khyad 'phags/ /rin chen rang bzhin mchod rten ni/ / 'jig rten rnyed mtho 'gas byas pa/ /de bas sems bskyed bcug 'dul po/ /mchog tu bkrabs par brjod pa yin/ /de la phan 'dod bla ma yis/ /slob ma la ni sri zhu bya/ /gang phyir nges phan mi shes pa/ /de phyir slob ma zhes bya'o/ /khro yang 'byung bos bzung ba la//sman pa 'khrug pa min pa ltar/ /thub pa nyon mongs dgrar gzigs kyi/ /nyon mongs dang 'brel gang zag min/ /gang zhig gang gang la dga' ba/ /de yis de de sngar dpyad bya/ /nyams par gyur pa dam chos kyi/ /snod ni cis kyang ma yin no//ji ltar ma ni khyad par du/ /nad thebs bu la gdung 'gyur ba / /de bzhin byang chub sems dpa'i brtse/ /dam pa min la khyad par du'o/ /la la'i slob mar 'gyur ba ste/ /la la yi ni bla mar 'gyur/ /thabs rig sna tshogs thabs kyis ni//ma rtogs sems can rtogs par byed/ /ji ltar sman pa mkhas gyur pas/ /nad pa sgrub med dkon de bzhin/ /byang chub sems dpa'i stobs rnyed nas/ /gdul bya ma yin shin tu dkon/ /byang chub sems dpa'i yul du ni/ /gal te 'ga' zhig ma bskul bas //ngan song 'gro bar 'gyur na de/ /blo ldan gzhan gyi smad byar 'gyur/ /gang zhig nyen pa gzhan dag la/ /snying brtse legs zhes mi 'dod pa/ /de rjes brtse bas mgon med pa/ /dag la ji ltar sbyin pa gtong / /'gro la phan phyir gang zhig la//'jig rten srid du gnas yod pa/ /de la sor gnas dag phung na/ /sdang la bsam thag ci zhig yod/ /gang la skye ba thams cad du/ /mngon shes lnga char yang yod pa/ /de yi dman par dman lta'i dngos/ /'di ni shin tu bya dka' ba'o//thabs kyis kun tshe bsod nams gang / /shin tu yun ring bsags pa de/ /thams cad mkhyen pa'i gzhal bya yang / /min zhes de bzhin gshegs pas gsungs/ /'chi dang chos dang srid pa gzhan/ /sbyin pa'i sgra yis gsal byed pa//de phyir byang chub sems dpa' la/ /sbyin pa'i sgra ni rtag tu snyan/ /'dir byin pa yi sbyin pa las/ /'bras bu chen po 'byung 'gyur zhes/ /len dang yongs su gtong ba ni/ /tshong spogs bzhin du smad par 'gyur/ /gang la sngar byas sdig pa yang / / yod nyid yod pa ma yin pa/ /dge ba'i las can de la ni/ /bsgrub min zhes bya yod ma yin/ /rlabs chen yid can de la ni/ /'di na'ang gnod pa yod min te/ /des na de la srid pa dang / /mya ngan 'das la khyad par med/ /gang la kun tshe sems dbang ni//nyid las skye ba yod gyur pa/ /de ko rgyu cis 'jig rten ni/ /kun gyi mnga' bdag 'gyur ma yin/ /phul 'gro las ches phul 'gro ba/ /'ga' zhig 'jig rten 'dir yang snang / /des na bsam mi khyab mthu yang / /nges par yod ces rtogs par gyis//blun la shin tu zab chos la/ /skrag pa skye ba ji lta ba/ /de bzhin zhan la shin tu ni/ /rmad byung chos la skrag pa skye/ /rnal 'byor spyod pa bzhi brgya pa las byang chub sems dpa'i spyod pa bstan pa ste rab tu byed pa lnga pa'o// // bde bas 'dod chags 'phel 'gyur zhing / /sdug pas khro ba 'phel 'gyur na/ /cis bde dka' thub can min zhing / /sdug pa dka' thub can cis yin/ /'dod chags las ni sdud pa ste/ /khro ba'i las ni rtsod pa'o/ /'byung ba kun la rlung bzhin du/ / gti mug las ni gsos 'debs so / /ma phrad pa las 'dod chags ni/ /sdug bsngal spungs med las khro sdug /yongs mi shes las gti mug ste/ /de dag gis de dag mi rtogs / /ji ltar bad kan la mkhris dang / /lhan cig phrad pa med mthong ba/ /de bzhin khro la 'dod chags dang //lhan cig phrad pa med par mthong / /'dod chags bran bzhin bkol bya ste/ /gang phyir mi phangs de'i sman phyir/ /khro la rje bo bzhin lta ste/ /de'i sman phangs pa yin phyir ro/ /dang por gti mug yang dag 'byung / /bar du khro ba 'byung 'gyur zhing //phyis ni 'dod chags 'byung ba ste/ /nyin la rim pa gsum du'o/ /'dod chags mdza' min mdza' 'dra ba/ /des de la khyod mi 'jigs te/ /mi phan mdza' bo khyad par du/ /skyes bus spang bar bya min nam/ /'dod chags rgyu las skye 'gyur zhing //rkyen las kyang ni skye ba ste/ /'dod chags rkyen las skye ba gang / /de ni sgrub sla cig shos min/ /khro ba brtan zhing nges par ni/ /mi dge nyes chen byed pa ste/ /de ltar rnam kun dbye shes pas/ /nyon mongs rnam mthar byed par 'gyur/ / lus la lus dbang ji bzhin du/ /gti mug kun la gnas gyur te/ /de phyir nyon mongs thams cad kyang / /gti mug bcom pas bcom par 'gyur/ /rten cing 'brel par 'byung ba ni/ /mthong na gti mug 'byung mi 'gyur/ /de phyir 'bad pas kun gyis 'dir//gtam de kho na bsnyad par bya/ /rtag tu sa 'dzin sogs dga' la/ /gtong po za po gtsang zhing 'gyur/ /de 'dra la sogs mtshan nyid rnams/ /'dod chags can gyi mi la snang / /sangs rgyas rnams kyis chags can la/ /zas dang chos gos gtsug lag khang //dge legs spangs pa thams cad dang / /rtag tu bla ma'i thad gnas gsungs/ /nus med la khros bdag nyid la/ /mdog mi sdug pa 'ba' zhig byed/ /nus pa gang la'ang brtse med pa / /de ni tha chad ces byar brjod/ / yid du mi 'ong ba yi sgra/ /sngar byas sdig mthar byed par brjod/ /rmongs shing dam pa ma yin pa/ /bdag nyid rnam par dag mi 'dod/ /snyan pa yid du mi 'ong ba / /ngo bo nyid kyis gnod mi byed/ /de phyir rnam rtog las byung ba/ /gzhan las yin no snyam du rlom//ji ltar gshe ba po la ni/ /chad par bya ba mngon brjod pa/ /de bzhin snyan par smra po la/ /mchod par bya ba cis mi 'gyur/ /khyod kyis smad bya ma smras kyang / /gal te gzhan gyis shes na ni/ /smra po la khro mi rigs na/ /yang dag min smra la ci smos/ / dman las mi snyan zhes bya ba/ /nges par 'byung ba ma yin te/ /de phyir dman byung mi snyan pa/ /yan gar nyung zad lta bur snang / /gzhan gnod byas pas bdag la ni/ /yon tan cung zad kyang med na/ /khyod khro yon tan med pa la/ /gus pa zhen pa rkyang bar zad//gal te bzod pas 'bad med par/ /bsod nams chen po thob 'gyur na/ /gang zhig de la gegs byed pa/ /de mtshungs blun po su zhig yod/ /khro ba zhes bya khyad par du/ /stobs ldan dag la skye mi 'gyur/ /des na gzhan 'joms khro ba la//ci nas khyod gus gyur ta re/ /gang zhig khro gnas la bzod pa/ /de la bsgom pa skye bar 'gyur/ /yon tan gnas la 'jigs zhes pa/ /khyod kyi blun pa 'ba' zhig yin/ /su zhig khyad bsad mthar byas nas/ /'jig rten pha rol 'gro ba yod//de phyir bdag ni sdig pa bas/ /brnyas pa legs so snyam du sems/ /gang gis rnam shes gnas la sogs/ /yang dag tu na rnam shes pa/ /de yod na ni nyon mongs rnams/ /nam yang blo gros la mi gnas/ /rnal 'byor spyod pa bzhi brgya pa las nyon mongs pa spang ba'i thabs bstan pa ste rab tu byed pa drug pa'o// //sdug bsngal rgya mtsho 'di la mtha'/ /rnam pa kun tu'ang yod min na/ /byis khyod 'dir ni bying ba la/ /'jigs pa cis na skye mi 'gyur/ /lang tsho rgyab tu byung gyur nas//slar yang mdun du 'byung bar 'gyur/ /gnas kyang 'jig rten 'di la ni/ /'gros kyis 'gram pa lta bur mngon/ /srid par khyod la rang 'dod kyis / /'gro ba gzhar yang yod min na/ /gzhan gyi dbang dang 'jigs med par/ / blo dang ldan par su zhig 'gyur/ /ma 'ongs tha ma yod min zhing / /kun tshe'ang so so'i skye bo ste/ /khyod 'das ji ltar de bzhin du/ /de yang mi 'gyur de ltar byos/ /nyan po mnyan bya 'chad po rnams/ /'byung ba shin tu rnyed dka' ste/ /des na mdor na 'khor ba ni//mthar med ma yin mtha' bcas min/ /phal mo cher na mi rnams ni/ /dam pa ma yin phyogs yongs 'dzin/ /des na so so'i skye bo rnams/ /phal cher nges par ngan 'gror 'gro/ /sa stengs sdig pa'i rnam smin ni/ /co 'dri kho na yin par mthong //des na srid pa gsod gnas dang / /mtshungs par dam pa rnams la snang / /rnam shes gnas pa med pa las/ /gal te smyon par 'gyur na ni/ /srid gnas smyon pa ma yin zhes/ /mkhas pa su zhig smra bar 'gyur/ /'gro la sogs pa'i sdug bsngal dag /bzlog la nyams pa mthong gyur te/ /des na las kun zad pa la/ /blo gros ldan pas blo bskyed do/ /gang tshe 'bras bu gcig gi yang / /thog ma'i rgyu ni snang min pa/ /de tshe gcig la yang rgyas par/ /mthong nas gang la 'jigs mi 'byung / /'bras bu thams cad nges par ni//'grub par 'gyur ba ma yin zhing / /grub la nges par mthar 'gyur na/ /de yi don du ci ste 'joms/ /las ni 'bad pas byed 'gyur zhing / /byas zin 'bad pa med par 'jig /de ltar gyur kyang khyod la ko/ /las la chags bral 'ga' yod min//'das la bde ba yod min zhing / /ma 'ongs pa la'ang yod min la/ /da byung ba'ang 'gro nyid de/ /khyod kyi ngal 'di gang phyir yin/ /mkhas pa rnams la mtho ris kyang / /dmyal ba dang mtshungs 'jigs skyed 'gyur/ /rnam pa kun tu de rnams la//srid gang 'jigs pa mi skyed dkon/ /gal te byis pa'ang rnam kun tu/ /'khor ba'i sdug bsngal shes gyur na/ /skad cig de la sems dang ni/ /lhan cig gtan tu 'jig par 'gyur/ /sems can rlom pa can min dkon/ /rlom can snying rje ldan pa med//des na snang nas snang bar ni/ /'gro ba shin tu rnyed dkar gsungs/ /'di na yul log gyur pa la/ /yul ni dmigs par grags gyur te/ /phyin ci log tu gyur pa'i chos/ /rgyu ci zhig gis yang dag 'dod/ /bsod nams 'bras bu phrug pa ste//de gzhan las ye bsrung bya na/ /rtag tu gzhan las bsrung bya gang / /de ni ji ltar bdag gir 'gyur/ /'jig rten tshul lugs gang dang gang / /de dang de la chos rjes 'jug /de yi phyir na chos pas kyang / /'jig rten stobs ldan lta bur snang //yul ni dge bas yid 'ong na/ /yul de'ang ngan par brtsi ba yin/ /gang zhig btang ba shis gyur pa / /de grub pa yis ci zhig dgos/ /gang la bka' lung dgos med pa/ /de la chos don med par 'gyur/ /gang yang bka' lung don gnyer nyid//de ni skye nang blun zhes bya/ /ma 'ongs pa yi 'bras mthong nas/ /chos 'dod chags pas khyod chags na/ /ma 'ongs mtha' nyid mthong gyur na / /'jigs pa med dam ci zhig byed/ /gla ba lta bu'i bsod nams ni/ /rnam kun rngan pa dang mtshungs 'gyur //gang dag dge ba'ang mi 'dod pa/ /de dag mi dge ji ltar byed/ /gang gis 'gro ba 'khrul 'khor gyi / /tshogs 'dra sgyu ma'i skyes bu ltar/ /mthong bar gyur pa de dag ches/ /gsal bar go 'phang dam par 'gro/ /gang dag la ni 'khor ba na//yul rnams kyis kyang dga' med pa/ /de dag la 'dir rnam kun tu/ /dga' ba 'thad pa ma yin nyid/ /rnal 'byor spyod pa bzhi brgya pa las mi nyid kyis 'dod pa'i longs spyod la zhen pa spang ba'i thabs bstan pa ste rab tu byed pa bdun pa'o// //ji ltar mi mthun mi rnams la/ /mdza' ba yun ring mi gnas pa/ /de bzhin kun la skyon shes la/ /'dod chags yun ring mi gnas so/ /la la de nyid la chags te/ /la la de nyid la sdang zhing / /la la de nyid la rmongs pa/ /de phyir 'dod pa don med pa'o//rtog pa med par 'dod chags la/ /sogs la yod nyid yod min na/ /yang dag don dang rtog pa zhes/ /blo dang ldan pa su zhig 'dzin/ /'ga' la'ang gang dang lhan cig tu/ /bcings pa zhes bya yod min te/ /gzhan dang lhan cig bcings pa la//bral bar rigs pa ma yin no/ /bsod nams chung ngu chos 'di la/ /the tshom za bar yang mi 'gyur/ /the tshom za ba tsam zhig gis/ /srid pa hrul por byas par 'gyur/ /chos gang zhig la thub pa yis / /thar ba'i bar du 'phel ba nyid//gsungs der gang la gus med pa/ /de ni gsal bar blo ldan min/ /bdag ni mya ngan 'da' 'gyur zhes/ /stong min stong ltar mthong min te/ /log ltas mya ngan mi 'da' bar/ /de bzhin gshegs pa rnams gsung ngo / /gang las 'jig rten bstan 'byung ba//de las 'jug pa gsungs pa ste/ /gang las don dam bsnyad 'byung ba/ /de las ldog pa gsungs pa'o/ /kun yod ma yin ci bya zhes/ /khyod la 'jigs pa skye 'gyur grang / /gal te bya ba yod na ni/ /chos 'di zlog byed mi 'gyur ro/ /khyod la rang phyogs chags yod cing //gzhan gyi phyogs la mi dga' na/ /mya ngan 'das par mi 'gro ste/ /gnyis spyod zhi bar yod mi 'gyur/ /byed med mya ngan 'da' 'gyur zhing / /byed pas yang srid 'gyur te des/ /bsam khral med pas mya ngan las/ /'das pa thob sla cig shos min//gang la 'di skyo yod min pa/ /de la zhi gus ga la yod/ /rang khyim las bzhin srid pa ni/ /'di nas 'byung ba'ang bya bar dka'/ /la la sdug bsngal zil mnan cing / /'chi bar 'dod pa dag snang ste/ /de tshe de dag gti mug phyir//go 'phang dam par mi 'gror zad/ /sbyin pa dman pa la gsungs shing / /'bring la tshul khrims gsungs pa ste/ /mchog la zhi ba gsungs gyur pa/ /des na rtag tu mchog tu byos/ /bsod nams min pa dang por bzlog /bar du bdag ni bzlog pa dang //phyi nas lta ba kun bzlog pa/ /gang gis shes de mkhas pa yin/ /dngos po gcig gi lta po gang / /de ni kun gyi lta por bshad/ /gcig gi stong nyid gang yin pa/ /de ni kun gyi stong pa nyid/ /chos chags de bzhin gshegs rnams kyis / /mtho ris 'dod pa rnams la gsungs//thar pa 'dod rnams la de nyid/ /smad 'gyur gzhan du smos ci dgos/ /bsod nams 'dod pas stong pa nyid/ /kun tshe brjod par bya min te/ /gnas min gnas la sbyar ba'i sman/ /dug tu 'gyur ba ma yin nam/ /ji ltar kla klo skad gzhan gyis//gzung bar mi nus de bzhin du/ /'jig rten pa yi ma gtogs pa / /'jig rten gzung bar nus ma yin/ /yod dang med dang yod med dang / /gnyi ga min zhes kyang bstan te/ /nad kyi dbang gis thams cad kyang //sman zhes bya bar 'gyur min nam/ /yang dag mthong na gnas mchog la/ /cung zad mthong na bzang 'gro ste/ /de phyir nang bdag bsam pa la/ /mkhas pas rtag tu blo gros bskyed/ /de nyid shes pas gal te 'dir/ /mya ngan 'das pa ma thob kyang / / skye ba phyi mar 'bad med par/ /nges par thob 'gyur las bzhin no/ /bsams bzhin pa ni bya ba ni / /kun la grub pa shin tu dkon/ /'di na 'ang myang 'das med min gyi / /sbyor dang grol rnams rnyed par dka'/ /lus la yon tan med thos nas/ /'dod chags yun ring mi gnas te//lam de nyid kyis thams cad kyang / /zad par 'gyur ba ma yin nam/ /ji ltar sa bon mtha' mthong zhing / /de la thog ma yod min ltar/ /de bzhin rgyu ni ma tshang phyir/ /skye ba'ang 'byung bar mi 'gyur ro/ /rnal 'byor spyod pa bzhi brgya pa las slob ma yongs su sbyang ba ste rab tu byed pa brgyad pa'o// //thams cad 'bras bu'i don skye ba/ /des na rtag yod min de'i phyir/ /thub pa ma gtogs ji lta'i dngos/ /de bzhin gshegs pa yod ma yin/ /gang zhig gang na nam du yang //ma brten par ni yod nyid med/ /des na nam yang gang zhig tu'ang / /rtag pa 'ga' yang yod ma yin/ /rgyu med par ni dngos po med/ /rgyu ldan rtag pa yod min pa/ /des na rgyu med las grub ni/ /de nyid mkhyen pas grub min gsungs/ / mi rtag byas par mthong gyur nas/ /ma byas gal te rtag na ni/ /byas la yod pa nyid mthong nas/ /rtag pa yod nyid min par 'gyur/ /mkha' la sogs rnams rtag go zhes/ /so so'i skye bo dag gis rtog /mkhas pa rnams kyis de dag la/ /'jig rten pas kyang don ma mthong //phyogs zhes bya ba phyogs can ni/ /kun la gnas pa ma yin te/ /de phyir phyogs can la phyogs ni/ /gzhan yang shin tu gsal bar yod/ /gang zhig yod na dngos po la/ /'jug dang ldog pa'ang dmigs par 'gyur/ / de ni gzhan gyi dbang 'gyur te/ /des na 'bras bur yang 'gyur ro/ /'bras bu med par rgyu la ni/ /rgyu nyid yod pa ma yin te/ /de yi phyir na rgyu rnams kun/ /'bras bu nyid du thal bar 'gyur/ /rgyu ni rnam par 'gyur ba na/ /gzhan gyi rgyu ru 'gyur ba ste/ / gang la rnam par 'gyur yod pa/ /de ni rtag ces byar yod min/ /rtag pa gang gi rgyu yin pa'i/ /dngos de ma byung ba las skye/ /rang nyid 'byung bar gyur de la/ /rgyu ni log par 'gyur ba ste/ /dngos po rtag pa las skyes pa/ /ci lta bur na mi rtag 'gyur/ / nam yang rgyu dang 'bras bu gnyis/ /mtshan nyid mi mthun mthong ma yin/ /gang gi phyogs 'ga' rgyu yin zhing / /phyogs 'ga' rgyu ma yin des na/ /de ni sna tshogs 'gyur na ko/ /sna tshogs rtag par mi rigs so/ /rgyu yi zlum po gang yin pa/ /de ni 'bras bu la yod min//des na bdag nyid kun sbyor ba/ /rdul phran rnams la mi 'thad do/ /rdul phran gcig gi gnas gang yin/ /de ni gzhan gyi yang mi 'dod/ /de phyir rgyu dang 'bras bu gnyis/ /bong tshod mnyam par 'dod ma yin/ /gang la shar gyi phyogs yod pa//de la shar gyi cha yang yod/ /gang gi rdul la phyogs yod na / /des rdul rdul phran min par bsnyad/ /mdun gyis len cing rgyab kyis ni/ /gtong bar gyur na de dag gnyis/ /gang la yod pa ma yin pa/ /de ni 'gro por yang mi 'gyur/ / gang la dang po yod min zhing / /gang zhig la dkyil yod min la/ /gang la tha ma yod min pa/ /mngon med de ni gang gis mthong / /'bras bu yis ni rgyu bshig pa/ /des na rgyu ni rtag ma yin/ /yang na gang na rgyu yod pa/ /de na 'bras bu yod ma yin / / thogs ldan dngos po rtag pa ni/ /gang du 'ang snang ba ma yin te/ /des na nam yang sangs rgyas rnams/ /rdul phran rtag pa nyid mi gsung / /'ching dang bcings dang thabs las gzhan/ /thar pa gal te yod na ni/ /de las ci yang mi skye ste//des na de thar zhes mi brjod/ /mya ngan 'das la phung po rnams/ /yod min gang zag srid ma yin/ /gang du mya ngan 'das gyur pa/ /ma mthong der myang 'das gang zhig /srid dang bral la thar pa'i tshe/ /shes yod yon tan ci zhig yod/ / shes med pa yi yod pa yang / /gsal bar yod pa min dang mtshungs/ /thar par bdag gcig yod na ni/ /shes yod sa bon srid pa yod/ /de med na ni srid pa la/ /bsam pa'ang yod pa ma yin no / /sdug bsngal las thar mi rnams la/ /gzhan la yod pa min par nges//de phyir rnam pa kun du 'ang bdag /zad pa legs zhes bya bar brjod/ /'jig rten pa 'di nyid bla yi/ /don dam rnam kun ma yin te/ /'jig rten pa la cung zad yod/ /dam pa'i don la yod ma yin/ /rnal 'byor spyod pa bzhi brgya pa las dngos po rtag pa dgag pa bsgom pa bstan pa ste rab tu byed pa dgu pa'o// //gang tshe nad bdag bud med min/ /skyes min ma ning ma yin pa/ /de tshe mi shes 'ba' zhig las/ /khyod bdag pho'o snyam du sems/ /gang tshe 'byung ba thams cad la//pho mo ma ning yod min pa/ /de tshe ci ste de dag nyid/ /brten nas pho mo ma ning yin/ /khyod kyi bdag gang nga'i bdag min/ /des de bdag min ma nges phyir/ /dngos po mi rtag pa rnams la/ /rtog pa skye bar 'gyur min nam/ /skye dang skye bar skyes bu ni//lus bzhin rnam par 'gyur bar 'gyur/ /khyod kyi de la lus las gzhan/ /nyid dang rtag nyid mi rigs so/ /reg dang mi ldan dngos po las / /bskul ba zhes bya mi skye ste/ /de phyir lus kyi g.yo ba la/ /srog ni byed pa por mi 'gyur/ / mi 'tshe ba dang bdag rtag pa/ /'di la rgyu ni ci yod snyam/ /rnam pa kun tu 'ang shing srin las/ /rdo rje bsrung byar mi 'gyur ro/ /skye ba dran pa yod pa'i phyir/ /gal te khyod kyi bdag rtag na/ /sngon byas pa yi rma mthong nas/ /khyod kyi lus ko cis mi rtag /sems pa can dang ldan bdag kyang / /gal te shes po nyid yin na/ /de yis sems pa can sems pa/ /min zhing skyes bu'ang rtag mi 'gyur/ /bde ba la sogs dang ldan srog /bde sogs bzhin du sna tshogs mthong / /de phyir bde ba la sogs bzhin //rtag pa nyid du'ang mi rung ngo / /gal te shes pa yod rtag na/ /byed pa log par 'gyur ba ste/ /gal te me ni rtag 'byung na/ /bud shing gis don yod mi 'gyur/ /rdzas ni bya ba ji bzhin du/ /'jig pa'i bar du g.yo ba med/ / des na skyes bu yod shes pa/ /yod pa med ces byar mi rigs/ /gzhan du shes pa yod pa'i khams/ /mthong zhing gzhan du shes yod de/ /lcags kyi zhu nyid bzhin de'i phyir/ /skyes bu rnam par 'gyur bar 'gyur/ /shes yod yid tsam zhig la ste//skyes bu nam mkha' bzhin du che/ /de phyir de yi ngo bo ni/ /shes pa yod nyid min ltar mthong / /gal te kun la bdag yod na/ /gzhan gyis de cis ngar mi rtog /de nyid kyis ni de nyid la/ /sgrib ces bya bar mi 'thad do/ /gang gi yon tan byed po dang //rnam kun shes yod ma yin pa/ /de dag dang ni smyon pa la/ /khyad par ci yang yod ma yin/ /yon tan rnams kyis rnam kun tu/ /khyim la sogs dag byed shes kyi/ /za ba rnam par mi shes pa/ /'di las mi rigs gzhan ci yod/ / bya ba dang ldan rtag pa med/ /kun tu song la bya ba med/ /bya ba med pa med dang mtshungs/ /bdag med la khyod cis mi dga'/ /la lar kun tu song bar mthong / /la lar skyes bu lus tsam zhig /la lar rdul tsam zhig mthong ste / /shes rab can gyis med par mthong //rtag la gnod pa ga la yod/ /gnod med thar pa ga la yod/ /des na gang gi bdag rtag pa/ /de la thar pa mi rigs so/ /gal te bdag ces bya yod na/ /bdag med snyam pa mi rigs shing / /de nyid rig pa nges pa las//mya ngan 'das 'gyur zhes bya'ang brdzun/ /gal te grol ba yod nyid na/ /de ni sngar yang med pa med / /mi ldan pa la gang mthong ba/ /de ni rang bzhin zhes byar bshad/ /gal te mi rtag chad na ni/ /da dung rtswa sogs ci ste yod/ / 'di ni gal te bden 'gyur na/ /su la'ang gti mug kyang mi 'byung / /bdag ni yod par gyur na'ang gzugs/ /gzhan las 'byung bar snang gyur la/ /gzhan las gnas par snang gyur zhing / /gzhan las rnam par 'jig par snang / /ji ltar sa bon byas pa las/ /myu gu byas pa skye 'gyur ba//de bzhin mi rtag thams cad ni/ /mi rtag dag las 'byung bar 'gyur/ /gang phyir dngos po 'jug 'gyur ba/ /des na chad par mi 'gyur zhing / /gang phyir dngos po ldog 'gyur ba/ /des na rtag par mi 'gyur ro/ /rnal 'byor spyod pa bzhi brgya pa las bdag dgag pa bsgom pa bstan pa ste rab tu byed pa bcu pa'o// //ma 'ongs bum la da ltar ba'i/ /bum yod ma yin 'das pa med/ /gang phyir de gnyis ma 'ongs pa/ /de phyir ma 'ongs yod ma yin/ /gal te zhig pa ma 'ongs pa'i/ / ngo bor ma 'ongs la yod na/ /ma 'ongs bdag nyid du yod gang / /de ni ci ltar 'das par 'gyur/ /gang gi phyir na ma 'ongs dngos/ /ma 'ongs bdag tu gnas 'gyur ba/ /de yi phyir na da ltar bar/ /'gyur te ma 'ongs nyid mi srid/ /ma 'ongs pa yod 'das pa yod//da ltar ba yod ci zhig med/ /gang gi dus kun yod nyid pa/ /de yi mi rtag nyid gang las/ /'das pa las ni 'das gyur pa/ /ci yi phyir na 'das par 'gyur/ /'das pa las ni ma 'das pa/ /ci yi phyir na 'das par 'gyur/ / gal te ma 'ongs skyes yod na/ /ji ltar da ltar bar mi 'gyur/ /ci ste de la skye med na/ /ma 'ongs rtag par 'gyur ram ci/ /skye ba med kyang 'jig pa las/ /gal te ma 'ongs mi rtag na/ /'das la 'jig pa yod min te/ /de ni rtag par cis mi rtog /'das pa dang ni da ltar ba //'di ni mi rtag 'gyur min la/ /de dag las gzhan rnam pa ni/ /gsum pa'ang de la yod ma yin/ /dngos po gang zhig phyis skye ba/ /de ni gal te sngar yod na/ /de yi phyir na phywa smra ba/ /rnams kyi phyogs ni log mi 'gyur/ /gang zhig 'byung bar byed pa ste//sngar yod ces byar mi rigs te/ /gal te yod pa skye 'gyur na/ /skyes zin pa yang 'byung bar 'gyur/ /ma 'ongs pa yi dngos mthong na/ /dngos po med pa cis mi mthong / /gang la ma 'ongs yod 'gyur ba / /de la ring ba yod ma yin//gal te byas pa med kyang chos/ /yod na nges sdom don med 'gyur/ /ci ste cung zad byed na yang / /'bras bu yod pa mi srid do/ /mi rtag yin na ji lta bur/ /'bras bu yod ces bya bar 'gyur/ /gang la thog ma mtha' yod pa/ / de ni 'jig rten mi rtag brjod/ /bsgrim pa med par thal 'gyur te/ /grol la ma 'ongs yod ma yin/ /de lta yin na chags med par/ /'dod chags kyang ni 'byung bar 'gyur/ /'bras bu yod nyid gang 'dod dang / /'bras bu med nyid gang 'dod la/ / khyim gyi don du ka ba la/ /sogs pa'i rgyan ni don med 'gyur/ /dngos rnams yongs su 'gyur ba yang / /yid kyis kyang ni 'dzin mi 'gyur/ /de lta na yang da ltar ba/ /yod par mi mkhas rnams kyis rtog /gnas med dngos po ga la zhig /mi rtag pas gnas ga la yod//gal te dang por gnas gyur na/ /tha mar rnyings par mi 'gyur ro/ /ji ltar rnam shes gcig gis ni/ /don gnyis rnam par mi shes pa/ /de bzhin rnam shes gnyis kyis ni/ /don gcig rnam par mi shes so/ /gal te dus la gnas yod na//gnas pa dus su mi 'gyur ro/ /ci ste gnas med na gnas pa/ /med par mtha' yang yod ma yin/ /gal te mi rtag dngos gzhan na/ /dngos po mi rtag par mi 'gyur/ /gcig na mi rtag nyid gang yin/ /de nyid dngos te ga la gnas//mi rtag nyid gar stobs chung der / /gnas pa stobs chung ma yin na/ /phyi nas de dag nges par go /bzlog par ci yis mthong bar 'gyur/ /gal te mi rtag stobs chung min/ /dngos po kun la yod na ni/ /kun la gnas pa med pa'am //yang na thams cad mi rtag min/ /gal te rtag tu mi rtag nyid/ /yod na rtag tu gnas yod min/ /yang na rtag par gyur zin nas/ /phyi nas mi rtag par 'gyur ro/ /gal te gnas pa mi rtag dang / /lhan cig dngos po la yod na/ /mi rtag log par 'gyur ba'am//yang na gnas pa brdzun par 'gyur/ /mthong zin dngos po mi snang zhing / /slar yang sems skye min des na/ /dran pa zhes bya log pa yi / /don la log pa kho na 'byung / /rnal 'byor spyod pa bzhi brgya pa las dus dgag pa bsgom pa bstan pa ste rab tu byed pa bcu gcig pa'o// //gzur gnas blo ldan don gnyer ba'i/ /nyan po snod ces bya bar bshad/ /smra po yon tan rnam gzhan du/ /mi 'gyur nyan po la yang min/ /srid dang srid thabs zhi ba yi/ / thabs dang de bzhin zhi gsungs te/ /'jig rten yongs su mi shes gang / /de ni thub pa'i lta bur mngon/ /thams cad btang bas mya ngan las/ /'da' bar ya mtshan can kun 'dod/ /kun sun 'byin la de dag ni/ /mi dgar 'gyur ba rgyu ci zhig / gang zhig gtong thabs mi shes de/ /ci zhig gtong bar byed par 'gyur/ /des na nges par thub pa yis/ /gzhan du zhi ba med ces gsungs/ /sangs rgyas kyis gsungs lkog gyur la/ /gang zhig the tshom skye 'gyur ba/ /de yis stong pa nyid bsten te/ / 'di nyid kho nar yid ches bya/ /gang gis 'jig rten 'di mthong dka' / /de ni gzhan la blun pa nyid/ /gang dag de rjes 'gro de dag /shin tu yun rings bslus par 'gyur/ /mya ngan 'das par rang 'gro gang / /de ni shin tu bya dka' byed/ /'dren pa'i slad bzhin dam pa ni//ma yin yid 'gro spro ma yin/ /ma mthong skrag pa mi rtsom ste/ /mthong na rnam kun de ldog 'gyur/ /des na nges par cung zad cig /shes la skrag pa brjod par bya/ /byis rnams nges pa kho nar ni/ /'jug byed chos la goms pa ste//de dag goms pa med pa yis / /ldog byed chos la 'jigs par 'gyur/ /gang zhig gti mug 'ba' zhig gis/ /bsgribs shing de nyid gegs byed pa/ /de la dge legs 'gro ba yang / /med na thar pa ga la yod/ /tshul khrims las ni nyams bla yi//lta las cis kyang ma yin te/ /tshul khrims kyis ni mtho ris 'gro/ /lta bas go 'phang mchog tu 'gyur/ /dam pa min la bdag 'dzin mchog /bdag med ston pa ma yin te/ /gcig ni ngan 'gro nyid 'gro la / /tha mal ma yin zhi nyid du'o//zhi sgo gnyis pa med pa dang / /lta ba ngan rnams 'jig byed cing / /sangs rgyas kun gyi yul 'gyur la/ /bdag med ces ni bya bar brjod/ /chos 'di yi ni ming las kyang / /dam pa min pa 'jigs pa skye/ /zhan la 'jigs pa mi skyed pa'i/ / stobs ldan zhes bya gang zhig mthong / /chos 'di de bzhin gshegs rnams kyis / /rtsod pa'i ched du ma gsungs te/ /de lta'ang 'dis ni gzhan smra rnams/ /sreg ste me yis bud shing bzhin/ /chos 'di gang gis shes gyur pa/ /de ni gzhan la mi dga' ste//des na bdag la chos 'di ni/ /'jigs pa'i sgo dang 'dra bar snang / /de nyid du bdag med snyam du/ /de ltar gang la dgongs gnas pa/ /de ni yod pas ga la dga'/ /med pas 'jigs par ga la 'gyur/ /don min sa bon gyur pa yi/ /mu stegs can mang mthong nas ni//chos 'dod pa yi skye bo la/ /su zhig snying brtse skye mi 'gyur/ /shAkya gos med bram ze ste/ /gsum po rnams kyis chos yid dang / /mig dang rna ba yis 'dzin pa/ /de phyir thub pa'i gzhung lugs smra/ / ji ltar bram ze rnams la chos/ /phal cher phyi 'chos brjod pa ltar/ /de bzhin gcer bu rnams la chos/ /phal cher blun pa brjod pa yin/ /ji ltar rigs pa blangs pa las/ /bram zer gus pa skye ba ltar/ /de bzhin nyon mongs blangs pa las/ /gcer bu pa la brtse bar 'gyur//sdug bsngal las kyi rnam smin phyir/ /ji ltar chos su mi 'gyur ba/ /de bzhin skye ba las kyi ni/ /rnam smin yin phyir chos ma yin/ /chos ni mdor na mi 'tshe bar/ /de bzhin gshegs pa rnams kyis gsungs/ /stong nyid mya ngan 'das pa ste//'dir ni de gnyis 'ba' zhig go/ /rang phyogs 'jig rten thams cad la/ /skyes sa bzhin du sdug 'gyur na/ /de yi ldog par byed pa'i rgyu/ /khyod la gang gis sdug par 'gyur/ /rigs pa'i don ni gzhan las kyang / /blo ldan legs pa 'dod pas blang //nyi ma sa stengs mig ldan la/ /kun gyi spyi thun ma yin nam/ /rnal 'byor spyod pa bzhi brgya pa las lta ba dgag pa bsgom pa bstan pa ste rab tu byed pa bcu gnyis pa'o// //gzugs mthong tshe na bum pa ni/ /thams cad kho na mthong mi 'gyur//bum pa mngon sum zhes bya ba'ang / /de nyid rig pa su zhig smra/ /rnam par dpyad pa 'di nyid kyis/ /blo mchog ldan pas dri zhim dang / /mngar dang 'jam pa thams cad dag /so sor dgag par bya ba yin/ /gal te gzugs mthong ba yis de//thams cad mthong bar 'gyur na ni/ /ma mthong ba yis gzugs mthong ba/ /mthong ba min par cis mi 'gyur/ /gzugs ni 'ba' zhig kho na la/ /mngon sum nyid ni yod ma yin/ /gang phyir de la pha rol gyi/ /cha dang tshu rol dbus yod phyir/ / rdul la cha shas yod med ces/ /dpyad pa der yang 'jug par 'gyur/ /de phyir bsgrub par bya ba yis/ /bsgrub bya 'grub par mi 'thad do/ /kun kyang yan lag tu gyur nas/ /slar yang yan lag can du 'gyur/ /de phyir yi ge brjod pa yang / /'di la yod pa ma yin no//gal te mdog las dbyibs gzhan na/ /ji lta bur na dbyibs 'dzin 'gyur/ /'on te gzhan min na lus kyis/ /mdog kyang ci ste 'dzin mi 'gyur/ /gzugs ni lta zhig ma gtogs par/ /gzugs kyi rgyu ni mi snang ngo / /gal te de ltar 'gyur na ni//gnyi ga yang ni mig nyid kyis/ /'dzin par ci yi phyir mi 'gyur/ /sa ni brtan zhes bya bar mthong / /de yang lus kyis 'dzin par 'gyur/ /des na rag pa 'ba' zhig ni/ /sa 'o zhes ni bya bar brjod/ /blta byar skyes pas bum pa ni//'di la yon tan 'gar mi 'gyur/ /des na blta bya nyid skye ltar/ /yod pa'i ngo bo'ang yod ma yin/ /mig ni 'byung gyur sna de bzhin/ /mig gis mthong gi gzhan gyis min/ /des na nges par las rnam smin/ /thub pas bsam mi khyab par gsungs/ / rkyen ma tshang phyir shes pa ni/ /lta ba'i snga rol yod ma yin/ /'on te phyis na shes don med/ /gsum pa byed pa don med 'gyur/ /mig de 'gros dang ldan gyur na/ /thag ring yun ring gis mthong 'gyur/ /ha cang nye dang ches ring du/ /gzugs de gsal bar ci ste min//gal te gzugs mthong mig 'gro na/ /song bas yon tan 'ga' yang med/ /yang na blta byar 'dod pa ni/ /nges zhes bya ba brdzun par 'gyur/ /mig ma song bar 'dzin na ni/ /'gro ba 'di kun mthong 'gyur te/ /gang la 'gro ba yod min pa//de la ring med bsgribs pa'ang med/ /dngos po kun gyi rang bzhin ni/ /dang por bdag la snang 'gyur na/ /mig ni mig nyid kyis 'dzin par/ /ci yi phyir na 'gyur ma yin/ /mig la rnam shes yod min zhing / /rnam shes la yang lta med la//gnyi ga gzugs la yod min na/ /de dag gis gzugs ji ltar mthong / /gal te smra zhing sgra 'gro na/ /gang gis smra ba por mi 'gyur/ /'on te mi smra bar 'gro na'ang / /gang gis de la shes pa skyed / /gal te phrad de sgra 'dzin na/ / sgra yi dang po gang gis 'dzin/ /sgra ni rkyang par mi 'ong na/ /reng bu ji ltar 'dzin par 'gyur/ /ji srid sgra thos ma gyur pa/ /de yi bar du sgrar mi 'gyur/ /sgra med pa yang mthar sgra nyid/ /'gyur na de ni mi rigs so/ /dbang po rnams dang bral sems kyis / / song ste'ang ci zhig byed par 'gyur/ /de lta yin dang srog 'di ni/ /rtag tu yid med ci ste min/ /sngar mthong ba yi don gang zhig /yid kyis smig rgyu ltar 'dzin pa/ /de ni chos kun rnam gzhag la/ /'du shes phung po zhes bya'o/ /mig dang gzugs la brten nas yid//sgyu ma bzhin du skye bar 'gyur/ /gang la yod pa nyid yod de/ /sgyu ma zhes byar mi rigs so/ /gang tshe mkhas pa sa stengs na/ /ngo mtshar min pa 'ga' med pa/ /de tshe dbang rtogs de 'dra la/ /ya mtshan zhes bya ci zhig yod/ /mgal me'i 'khor lo sprul pa dang //rmi lam sgyu ma chu zla dang / /khug rna nang gi brag ca dang / /smig rgyu sprin dang srid pa mtshungs/ /rnal 'byor spyod pa bzhi brgya pa las dbang po dang don dgag pa bsgom pa bstan pa ste rab tu byed pa bcu gsum pa'o// //dngos po gang zhig gzhan 'ga' la'ang //rag las par ni mi 'gyur na/ /de yi bdag nyid 'grub 'gyur na/ /de ni gang na'ang yod ma yin/ /gzugs nyid bum zhes gcig ma yin/ /gzugs ldan bum gzhan yod min la/ /bum pa la gzugs yod min zhing / / gzugs la bum pa yod ma yin/ /gnyis mtshan mi mthun mthong nas ni/ /gal te dngos las bum gzhan na/ /ma yin de ltar dngos po yang / /bum pa las gzhan cis mi 'gyur/ /gal te gcig bum mi 'dod na/ /bum pa'ang gcig pu mi 'gyur ro/ / ldan 'di mtshungs pa'ang ma yin pa/ /des kyang gcig tu mi 'gyur ro/ /gang tshe rdzas ci tsam gzugs na/ /de tshe gzugs chen ci ste min/ /gal te phyir rgol gzhan min na/ /gzhung lugs bsnyad par bya bar 'gyur/ /mtshan nyid kyis kyang mtshan gzhi ni/ / gang du grub pa yod min pa/ /der ni grangs sogs tha dad par/ /dngos po yod pa ma yin no/ /mtshan nyid rnams dang so so ni/ /min phyir bum pa gcig ma yin/ /re re'i bum pa med na ni/ /mang nyid 'thad par mi 'gyur ro/ /reg ldan reg dang mi ldan dang / / lhan cig sbyor ba zhes bya med/ /de phyir gzugs sogs rnams sbyor ba / /rnam pa kun tu rigs ma yin/ /gzugs ni bum pa'i yan lag ste/ /des na re zhig de bum min/ /gang phyir yan lag can med pa/ /des na yan lag kyang yod min/ /gzugs rnams kun la gzugs nyid ni//mtshan nyid mi mthun ma yin na/ /gcig la bum pa yod 'gyur zhing / /gzhan dag la min rgyu ci zhig /ro sogs dag las gzugs gzhan zhing / /bum las min zhes khyod 'dod na/ /de rnams med par rang med gang / /de gzugs las gzhan ji ltar min//bum pa la ni rgyu yod min/ /rang nyid 'bras bur mi 'gyur te/ /de phyir gzugs sogs las gzhan du/ /bum pa 'ga' yang yod ma yin/ /bum pa rgyu las grub 'gyur zhing / /rgyu ni gzhan las grub 'gyur na/ /gang la rang las grub med pa//de yis gzhan po ji ltar skyed / /'phrod pa 'dus par gyur kyang gzugs/ /dri nyid du ni mi 'thad de/ /des na bum pa bzhin tshogs pa/ /gcig nyid du ni mi rigs so/ /ji ltar gzugs sogs ma gtogs par/ /bum pa yod pa ma yin pa//de bzhin rlung la sogs pa ni/ /ma gtogs gzugs kyang yod ma yin/ /tsha ba me nyid du 'gyur te/ /tsha ba min pa ji ltar bsreg /des na bud shing zhes bya ba/ /yod min de med me yod min/ /gal te zil mnan tsha ba yang / /de yang ci ste mer mi 'gyur//'on te mi tsha na dngos gzhan/ /de la yod ces byar mi rung / /gal te rdul la shing med na/ /des na shing med me yod do/ /gal te de la shing yod na/ /gcig gi bdag can rdul yod min/ /dngos po gang gang yongs btags pa//de dang de la gcig nyid med/ /gang gis gcig kyang yod min pa/ /des na du ma dag kyang med/ /gal te gang na dngos de rnams/ /med der gcig yod ces 'dod na/ /gang gis kun la gsum nyid yod/ /des na gcig nyid yod ma yin/ /yod dang med dang yod med dang //yod med min zhes bya ba'i tshul/ /'di ni mkhas pas gcig nyid sogs/ /dag la rtag tu sbyar bar bya/ /ji ltar rgyun la blta nyes na/ /rtag pa yod ces byar 'gyur ba / /de bzhin tshogs la blta nyes pa / /dngos po yod ces bya bar 'gyur//gang la brten nas 'byung yod pa/ /de ni rang dbang mi 'gyur ro/ /'di kun rang dbang med pa ste/ /des na bdag ni yod ma yin/ /'bras bu med par dngos po ni/ /kun la 'du ba yod ma yin/ /'bras bu'i don du 'du ba gang / /de ni 'phags lam 'dus pa'o//srid pa'i sa bon rnam shes te/ /yul rnams de yi spyod yul lo/ /yul la bdag med mthong nas ni/ /srid pa'i sa bon 'gag par 'gyur/ /rnal 'byor spyod pa bzhi brgya pa las mthar 'dzin pa dgag pa bsgom pa bstan pa ste rab tu byed pa bcu bzhi pa'o// //tha mar med pa skye bar 'gyur/ /des na med pa ga la skye/ /yod pa gdod nas skye 'gyur ba/ /des na yod pa ga la skye/ /'bras bu yis ni rgyu bshig pa/ /des na med pa skye mi 'gyur/ /grub pa las sgrub yod ma yin/ /de phyir yod pa mi skye'o//de tshe skye ba yod min zhing / /gzhan tshe skye ba yod ma yin/ /de tshe gzhan tshe mi skye na/ /nam zhig skye ba yod par 'gyur/ /de la de yi dngos po ru/ /ji ltar skye ba yod min ltar/ /de bzhin gzhan gyi dngos por yang / /de la skye ba yod ma yin/ / thog ma bar dang tha ma rnams/ /skye ba'i snga rol srid ma yin/ /gnyis gnyis dag ni med pa ru/ /ji ltar re re rtsom par 'gyur/ /gzhan gyi dngos po med par ni/ /bdag gi dngos po 'byung ba med/ /de yi phyir na bdag gzhan ni/ /gnyis las 'byung ba yod ma yin//sngon dang phyis dang cig car ces/ /brjod pa nyid du mi nus pa/ /de phyir skye dang bum pa la/ /cig car 'byung ba yod ma yin/ /sngar skyes pa yi phyir na ni/ /sngar skyes rnyings par mi 'gyur zhing / /phyi nas kun tu skyes pa yang / /phyi nas skyes par mi 'gyur ro//da ltar ba yi dngos po ni/ /de nyid las 'byung ma yin zhing / /ma 'ongs las 'byung yod min la/ /'das pa las kyang yod ma yin/ /skyes pa la ni 'ong ba dang / /de bzhin 'gags la 'gro ba med/ /de lta yin na ji lta bur/ /srid pa sgyu ma 'dra ma yin//skye dang gnas dang 'jig pa rnams/ /cig car 'byung ba yod min zhing / /rims kyis 'byung ba'ang yod min na/ /nam zhig 'byung ba yod par 'gyur/ /skye la sogs pa thams cad la/ /slar yang thams cad 'byung ba ste/ /de phyir 'jig pa skye 'dra zhing //gnas pa 'jig dang 'dra bar snang / /mtshan las mtshan gzhi gzhan zhe na/ /mtshan gzhi mi rtag nyid gang las/ /yang na bzhi ka'ang yod pa yi/ /ngo bor gsal bar yod ma yin/ /dngos po dngos las mi skye ste/ /dngos po dngos med las mi skye/ / dngos med dngos med mi skye ste/ /dngos med dngos las mi skye'o/ /dngos po dngos por mi 'gyur te/ /dngos med dngos por mi 'gyur ro/ /dngos med dngos med mi 'gyur te/ /dngos po dngos med mi 'gyur ro/ /skye bzhin pa ni byed skyes phyir/ /skye bzhin pa ni skye mi 'gyur//yang na thams cad skye bzhin pa/ /nyid ni yin par thal bar 'gyur/ /skye bzhin pa yi bdag nyid du/ /bya ba skye bzhin par mi 'gyur/ /skye bzhin pa yi bdag nyid du/ /mi bya'ang skye bzhin par mi 'gyur/ /gang gi gnyis po bar med par/ / srid pa yod pa ma yin pa/ /de la skye bzhin po med de/ /gang phyir de la'ang bar yod phyir/ /gang gi phyir na skye bzhin pa/ /'gags pas skyes pa skye 'gyur ba/ /de yi phyir na skye bzhin pa/ /gzhan yang yod pa'i ngo bor snang / /gang tshe skyes pa de yi tshe//skye bzhin pa la srid pa med/ /gang tshe skyes pa skye bzhin na/ /de tshe ci phyir skye bar 'gyur/ /skye bzhin pa ni ma skyes pa/ /kho na skye zhes bya bar grag /khyad par med phyir de yi tshe/ /bum pa med par cis mi rtog /skye bzhin pa ni ma rdzogs kyang //ma skyes pa las phyi rol gyur / /de lta'ang gang phyir skyes pa las/ /phyi rol gyur phyir ma skyes te / /skye bzhin pa sngar ma byung yang / /phyi nas yod pa yin par grag /des kyang ma skyes pa skye ste/ /ma byung zhes bya skye ma yin/ /rdzogs pa yod ces byar 'gyur la//ma byas pa ni med ces brjod/ /gang gi tshe na skye bzhin pa/ /med pa de tshe gang der brjod/ /gang tshe rgyu ni ma gtogs par/ /'bras bu yod pa ma yin pa/ /de yi tshe na 'jug pa dang / /ldog pa 'thad pa nyid mi 'gyur/ / rnal 'byor spyod pa bzhi brgya pa las 'dus byas kyi don dgag pa bsgom pa bstan pa ste rab tu byed pa bco lnga pa'o// //rgyu 'ga' zhig gis stong pa yang / /stong pa min pa lta bur snang / /rab tu byed pa thams cad kyis/ /'di ni so sor 'gog par byed//gang tshe smra po brjod bya na'ang / /stong pa zhes byar mi rung ngo / /gang zhig rten nas kun 'byung ba/ /de ni gsum la'ang yod ma yin/ /gal te stong pa'i nyes pa yis/ /stong pa ma yin 'grub 'gyur na/ /mi stong nyes pas stong pa nyid/ /ci ste 'grub par 'gyur ma yin//gzhan gyi phyogs ni bzlog pa dang / /rang gi phyogs ni bsgrub pa ste/ /gal te sun 'byin byed phyogs gcig /dga' na sgrub byed la cis min/ /gal te yongs su brtags pa na/ /med gang de phyogs mi 'gyur na/ /des na gcig nyid la sogs gsum//kun kyang phyogs ma yin par 'gyur/ /gang du mngon sum gyis bum der/ /stong pa'i gtan tshigs don med 'gyur/ /'di na gzhung lugs las byung ba'i/ /gtan tshigs yod min gzhan du yod/ /mi stong med par stong pa ni//gang las 'byung ba nyid du 'gyur/ /ji lta bur na cig shos ni/ /med par gnyen po 'byung bar 'gyur/ /gal te phyogs nyid du 'gyur na/ /phyogs med phyogs kyi ngo bor 'gyur/ /de ltar phyogs med nyid med na/ /gang zhig mi mthun phyogs su 'gyur//gal te dngos po yod min na/ /me ni tsha bar ci ltar 'gyur/ /tsha ba me yang yod min zhes/ /gong nyid du ni bzlog par byas/ /dngos po mthong nas dngos po ni/ /med pa zhes bya bzlog 'gyur na/ /de ltar phyogs ni bzhi char la//nyes pa spangs pa gang zhig mthong / /rdul phran la yang yod pa'i dngos/ /gang du med der ji ltar 'byung / /sangs rgyas rnams la med nyid kyang / /de nyid phyir na ma 'brel pa'o/ /gal te kun la gnyis min na/ /gzhan gang zhig la yod dngos yod//gal te khyod la'ang de rigs na/ /brgal ba gzhan po ci ste byed/ /dngos po kun gyi dngos med la/ /rnam par dbye ba mi rigs te/ /rdzas rnams kun la gang mthong ba/ /de ni rnam dbyer mi 'gyur ro/ /med phyir gzhan gyi phyogs la lan/ / brjod pa min par grags na ni/ /gtan tshigs kyis bzlog rang phyogs kyang / /ci yi phyir na sgrub mi 'gyur/ /sun 'byin byed pa'i gtan tshigs rnyed/ /sla zhes 'jig rten brjod na yang / /gzhan gyi phyogs la skyon brjod pa/ /nyid du ci yi phyir mi nus/ / yod ces bya ba tsam zhig gis/ /gal te de nyid dngos yod na/ /med ces bya ba tsam zhig gis/ /med par yang ni cis mi 'gyur/ /gang phyir yod bdog ces ming btags/ /de phyir med par mi 'gyur na/ /gang phyir yod ces ming byas pa/ /de phyir yod par mi 'gyur ro//gal te thams cad 'jig rten pas/ /brjod pas 'jig rten pa yod na/ /dngos gang de nyid du yod pa/ /de ni 'jig rten par cis 'gyur/ /gal te dngos kun med pa'i phyir/ /med pa nyid du 'gyur na ni/ / de lta yin dang phyogs rnams kun/ /dngos po med par mi rigs so/ /dngos po med phyir dngos med la/ /srid pa yod par mi 'gyur ro/ /dngos po med par dngos po ni/ /med par gang las 'grub par 'gyur/ /stong pa gtan tshigs las 'gyur ba/ / de phyir stong par mi 'gyur na/ /dam bca' gtan tshigs las gzhan ni/ /ma yin des na gtan tshigs med/ /gang phyir stong pa'i dpe yod pa/ /des na stong par mi 'gyur na/ /bya rog ji lta de bzhin du/ /bdag kyang nag ces brjod nus sam/ /gal te rang bzhin gyis dngos yod//stong mthong yon tan ci zhig yod/ /rtog pas mthong ba 'ching ba ste/ /de ni 'di ru dgag par bya/ /gcig yod gcig med ces bya ba/ /de min 'jig rten pa yang min/ /des na 'di yod 'di med ces/ /brjod pa nyid du nus ma yin//yod dang med dang yod med ces/ /gang la phyogs ni yod min pa/ /de la yun ni ring po na'ang / /glan ka brjod par nus ma yin/ /rnal 'byor spyod pa bzhi brgya pa las slob dpon dang slob ma rnam par gtan la dbab pa bstan pa ste rab tu byed pa bcu drug pa'o// //slob dpon 'phags pa lha'i zhal snga nas mdzad pa/ byang chub sems dpa'i rnal 'byor spyod pa bzhi brgya pa'i tshig le'ur byas pa rdzogs so// //kha che'i grong khyer dpe med kyi dbung rin chen sbas pa'i kun dga' ra bar/rgya gar gyi mkhan po su smra dzA na dang / bod kyi lots+tsha ba pa tshab nyi ma grags kyis bsgyur cing zhus te gtan la phab pa // //sarba mang+ga laM// //