CLOSE WINDOW

D3831
བོད་ཡིག

bod kyi lots+tsha ba chen po shAkya'i dge slong khu mdo sde 'bar gyis bsgyur cing zhus te gtan la phab pa'o// //[ @##/ /rgya gar skad du/ shUn+ya tA s+ya sap+ta ti br-it+ti / bod skad du/ stong pa nyid bdun cu pa'i 'grel pa/ 'phags pa 'jam dpal ye shes sems dpa' la phyag 'tshal lo//gnas pa'am skye 'jig yod med dam/ /dman pa'am mnyam pa'am khyad par can/ /sangs rgyas 'jig rten snyan dbang gis/ /gsung gi yang dag dbang gis min/ /gnas pa'am skye ba'am 'jig pa 'am/ /yod pa'am med pa'am dman pa 'am//mnyam pa'am khyad par can yang rung ste/ de thams cad ni 'jig rten gyi tha snyad kyi dbang gis sangs rgyas kyis gsung gi de kho na'i dbang gis ni ma yin no/ /'dir smras pa/ bdag ces bya ba de lta bu la sogs pa'i mngon par brjod pa gang yin pa 'di ci nas med pa zhig yin nam bdag med do snyam pa'i blo dag kyang 'jug pas bdag ni gdon mi za ba kho nar yod do//'dir bshad pa/ bdag med bdag med min bdag dang / /bdag med min pas brjod 'ga' wa'ang med/ /ci'i phyir zhe na/ brjod par bya ba'i chos rnams kun//mya ngan 'das mtshungs rang bzhin stong / /'dir smras pa/ dngos po thams cad rang bzhin stong / /zhes bya ba 'di ci ltar rgyal po'i bka'i tshig gam/ 'on te gang gis dngos po thams cad rang bzhin gyis stong ngo zhes bya ba de ltar khong du chud par bya ba'i rigs pa 'ba' zhig yod/'dir bshad pa/ gang phyir dngos po thams cad kyi/ /rang bzhin rgyu rkyen tshogs pa 'am/ /so so rnams la'am thams cad la/ /yod min de phyir stong pa yin/ /gang gi phyir dngos po thams cad kyi rang bzhin rgyu'i rkyen rnams sam/ rgyu rkyen tshogs pa'am/ dngos po thams cad la rung ste/ thams cad la yod pa ma yin pa de'i phyir dngos po thams cad rang bzhin gyis stong ngo zhes smra'o/ /gzhan yang / yod pa yod phyir skye ma yin/ /med pa med pa'i phyir ma yin/ /chos mi mthun phyir yod med min/ /skye ba med phyir gnas 'gag med//dngos po yod pa'i phyir rgyu las skye bar mi 'gyur te/ yod pa ni yod bzhin pa zhes bshad pas so/ /med pa ni med pa'i phyir rgyu las skye ba med do/ /yod med ni mi 'dra ba'i phyir skye ba ma yin te phan tshun 'gal lo/ /'di ltar yod pa dang med pa dag ni phan tshun 'gal ba'i chos can yin pas chos mi mthun pa'i phyir yod pa yang ma yin med pa yang ma yin pa ga la skye/skye ba med pa'i phyir gnas pa dang 'gag pa yang med do/ /'dir smras pa/ 'dus byas kyi mtshan nyid gsum po skye ba dang / gnas pa dang / 'jig pa dang ldan par gsungs la/ skye ba'i tshe skye ba yang ston te/ de lta bas na 'ga' zhig las 'dus byas skye ba yod do/ /'dir bshad pa/ skyes pa bskyed par bya ba min/ /ma skyes pa yang bskyed bya min/ /skye ba'i tshe yang bskyed bya min/ /skye dang ma skyes pa yi phyir/ /re zhig skyes pa ni bskyed par bya ba ma yin no//ci'i phyir zhe na/ skyes zin pa'i phyir te/ skyes zin pa ni bskyed par bya ba ma yin no/ /ma skyes pa yang bskyed par bya ba ma yin te/ ci'i phyir zhe na/ ma skyes pa'i phyir ro/ /gang ma skyes pa de ni bskyed par bya ba ma yin te/ bya ba dang bral ba dang / mthu med pa dang / yod pa ma yin pa de'i phyir bskyed par bya ba ma yin no/ /skye ba'i tshe yang bskyed par bya ba ma yin te/ ci'i phyir zhe na/ de ni skyed pa dang ma skyes par zad la/ skyes pa dang ma skyes pa gang yin pa de yang sngar bshad pa'i rim pa kho nas bskyed par bya ba ma yin te/de la re zhig skyes pa ni skyes zin pa'i phyir bskyed par bya ba ma yin no/ /ma skyes pa gang yin pa de yang ma skyes pa'i phyir dang / skye ba'i bya ba dang bral ba'i phyir dang / mthu med pa'i phyir dang / med pa'i phyir bskyed par bya ba ma yin no//de lta bas na gang gi phyir skyes pa dang ma skyes pa las ma gtogs pa gzhan gsum pa skye ba'i tshe de ni ci yang med pa de'i phyir yang bskyed par bya ba ma yin no/ /gzhan yang / rgyu mi 'thad pa'i phyir yang skye ba med pa yin no/ /ci'i phyir zhe na/ 'bras yod 'bras dang ldan pa'i rgyu//de med na ni rgyu min mtshungs/ /yod min med pa yin na 'gal/ /dus gsum rnams su 'thad ma yin/ /'bras bu yod na 'bras bu dang ldan pa de rgyu yin no/ /'bras bu de med na ni rgyu ma yin pa dang mtshungs par 'gyur ro/ /'bras bu yod pa yang ma yin med pa yang ma yin pa ni 'gal te/med pa dang yod pa dus gcig kho na ni yod pa ni ma yin no/ /gzhan yang / dus gsum du yang rgyur 'thad pa ma yin no/ /ji lta zhe na/ re zhig gal te rgyu snga bar brtags na ni gang gi rgyu yin/ 'on te phyi mar brtags na ni grub zin pa la rgyu ci dgos/'on te rgyu dang 'bras bu cig car yin par brtags na ni rgyu dang 'bras bu cig car skyes pa gnyis gang gi rgyu gang yin/ gang gi 'bras bu gang yin/ de ltar dus gsum car du yang rgyur mi 'thad do/ /'dir smras pa/ grangs 'thad pa'i phyir dngos po thams cad stong pa ma yin te/gcig dang gnyis dang mang po zhes bya ba'i grangs gang dag yin pa 'di ni yod do/ /grangs kyang dngos po rnams yod na 'thad pas de'i phyir dngos po thams cad stong pa ma yin no/ /'dir bshad pa/ gcig med par ni mang po dang / /mang po med par gcig mi 'jug /de phyir brten nas dngos po rnams/ /'byung ba mtshan ma med pa yin/ /gang gi phyir gcig med na mang po mi 'jug la mang po med na yang gcig mi 'jug pa de'i phyir dngos po rnams ni brten nas 'byung ba yin la/ de nyid kyi phyir mtshan ma med pa yin no//'dir smras pa/ mdo sde las/ rten cing 'brel bar 'byung ba sdug bsngal gyi 'bras bu can yang rgyas par bstan cing lung 'bogs par byed pa'i slob dpon rnams kyis kyang sems gcig dang sems tha dad pa la bstan te/ de lta bas na dngos po thams cad stong pa ma yin no/ / 'dir bshad pa/ rten 'byung yan lag bcu gnyis gang / /sdug bsngal 'bras can de ma skyes/ /sems gcig la yang mi 'thad la/ /du ma la yang mi 'thad do/ /rten cing 'brel par 'byung ba'i yan lag bcu gnyis la sdug bsngal 'bras bu can gang yin pa de ni ma skyes pa'o/ / de ni sems gcig la yang mi 'thad la/ mang po la yang mi 'thad de/ gang gi ltar na sems gcig yin pa de'i ltar na 'bras bu rgyu dang lhan cig skyes par 'gyur ro/ /gang gi ltar na sems tha dad pa yin pa de'i ltar na yang yan lag snga ma snga ma zhig pa phyi ma phyi ma'i rgyu ma yin no//de lta bas na gnyi ga ltar yang mi 'thad pa de'i phyir rten cing 'brel par 'byung ba ni ma skyes pa yin no/ /ci'i phyir mi skye zhe na/ 'di la rten cing 'brel bar 'byung ba ni ma rig pa'i rgyu las byung bar brtags la/ ma rig pa de yang rkyen phyin ci log par ston te/ phyin ci log de dag kyang rang bzhin gyis stong pa yin pa'i phyir ro//ci'i phyir zhe na/ mi rtag rtag min bdag med pa/ /bdag min mi gtsang gtsang ma yin/ /sdug bsngal bde ba ma yin te/ /de phyir phyin ci log rnams med/ /mi rtag pa ni rtag pa med pa'o/ /rtag pa med na de'i gnyen por gyur pa mi rtag pa yang med do//de bzhin du lhag ma rnams la yang sbyor ro/ /de lta bas na phyin ci log rnams med do/ /de med na ni phyin ci log /bzhi las skyes pa'i ma rig med/ /de med na ni 'du byed rnams/ /mi 'byung lhag ma'ang de bzhin no//phyin ci log de dag med na de las skyes pa'i ma rig pa med la/ ma rig pa med na 'du byed rnams mi 'byung ste/ lhag ma yang de dang 'dra'o/ /gzhan yang / ma rig 'du byed med min 'byung / /de med 'du byed mi 'byung bas/ /de gnyis phan tshun rgyu phyir yang //rang bzhin gyis ni ma grub min/ /gang zhig bdag nyid rang bzhin gyis/ /ma grub de bzhin ji ltar bskyed/ /de lta bas na pha rol po/ /ma grub rkyen gzhan skyed pa min/ /re zhig ma rig pa ni 'du byed med na mi 'byung ngo / /ma rig pa de med par yang 'du byed rnams mi 'byung ste/de gnyis ni phan tshun rgyu las byung ba yin pa'i phyir yang rang bzhin gyis ma grub pa yin no/ /gang zhig bdag nyid rang bzhin gyis ma grub pa des gzhan ji ltar bskyed/ de lta bas na pha rol ma grub pa'i rkyen rnams ni gzhan skyed par byed pa dag ma yin no//gzhan yang / pha bu ma yin bu pha min/ /de gnyis phan tshun med min la/ /de gnyis cig car yang min ltar/ /yan lag bcu gnyis de bzhin no/ /re zhig pha yang bu ma yin la bu yang pha ma yin no/ /de gnyis phan tshun med pa yang ma yin la/ de gnyis cig car yang ma yin no//ji ltar rim pa 'dis pha dang bu dag ma grub pa ltar rten cing 'brel bar 'byung ba yan lag bcu gnyis kyang de dang 'dra'o/ /gzhan yang / rmi lam yul brten bde sdug dang / /yul de'ang med ltar brten nas gang / /'byung ba de yang de bzhin med//brten nas gang yin de yang med/ /dper na rmi lam na yul la brten pa'i bde ba dang sdug bsngal med pa dang / ji ltar yul yang yod pa ma yin pa de ltar brten nas byung ba gang yin pa de dang / brten nas gang yin pa de yang de bzhin du med do/ /'dir smras pa/ gal te dngos rnams rang bzhin gyis/ /med na dman mnyam khyad 'phags nyid/ /yod min sna tshogs nyid mi 'grub/ /rgyu las mngon par grub pa med/ /de lta bas na dngos po rnams rang bzhin gyis med do/ /zhes bya ba de ni mi rung ngo / /'dir bshad pa/ rang bzhin grub brten dngos min 'gyur//ma brten par yang ga la yod/ /rang bzhin med nyid mi 'gyur zhing / /rang bzhin yod pa mi 'jig go/ /gal te dngos po rnams rang bzhin gyis yod par gyur na brten nas dngos por mi 'gyur ro/ /de la 'di snyam du ma brten par yang dngos po yin du zad mod snyam du sems na/'dir bshad pa/ ma brten par yang ga la yod/ /ma brten par yang dngos por mi 'gyur ro/ /gal te ma brten par yang dngos po zhig tu 'gyur na rang bzhin med pa nyid du mi 'gyur zhing / rang bzhin yod par ni 'jig par yang mi 'gyur te/ med par yang mi 'gyur ro/ /zhes bshad pa yin no/ /'dir smras pa/ rang gi dngos po dang / gzhan gyi dngos po dang / dngos po med pa zhes bya ba'i blo 'di rten med pa ma yin te/ de lta bas na dngos po rnams stong pa ma yin no/ /'dir bshad pa/ med la rang gi dngos po 'am/ / gzhan dngos 'jig par ga la 'gyur/ /de phyir gzhan dngos dngos med dang / /dngos dang rang dngos log pa yin/ /med pa la zhes bya ba ni yod pa ma yin pa la zhes bshad pa yin te/ med pa de la rang gi dngos po zhes bya ba'am/ gzhan gyi dngos po zhes bya ba'am/ 'jig pa zhes bya bar lta ga la 'gyur/de'i phyir rang gi dngos po dang / /gzhan gyi dngos po dang / dngos po med pa dang / dngos po dang rang gi dngos po ni log pa yin no/ /'dir smras pa/ gal te dngos po stong yin na/ /'gag par mi 'gyur skye mi 'gyur/ /ngo bo nyid kyis stong pa la//gang la 'gag cing gang la skye/ /gal te dngos po rang bzhin gyis stong pa yin du zin na 'gag par mi 'gyur zhing / skye bar yang mi 'gyur ro/ /ci ste rang bzhin gyis stong pa la skye ba dang 'gag par 'dod na ni / 'dir ngo bo nyid kyis stong pa la gang la 'gag cing gang la skye zhes smra'o//'dir bshad pa/ chos thams cad ni stong pa kho na yin no/ /ci'i phyir zhe na/ dngos dang dngos med cig car med/ /dngos med med par dngos po med/ /rtag tu dngos dang dngos med 'gyur/ /dngos med dngos po med mi 'byung / /dngos po dang dngos po med pa dag cig car ba yang med do//ji skad du bshad pa yin zhe na/ dngos po dag dngos po med pa gnyis dus gcig na mi srid do zhes bshad pa yin no/ /de la 'di snyam du dngos po gcig pu yin du zad mod snyam du sems na 'dir bshad pa/ dngos med med par dngos po med//gang gi phyir dngos po med par dngos po mi 'thad do / /mi rtag pa nyid med par de med do/ /gzhan yang / rtag tu dngos dang dngos med 'gyur/ /rtag tu dngos po dang mi rtag pa nyid du 'gyur ro/ /de la 'di snyam du de 'di ltar yin te/ rtag tu dngos po mi rtag pa nyid ni rtag tu dngos po'i rjes su 'brel la/skye ba'i tshe'am gnas pa'i tshe ni las mi byed kyi dngos po 'jig pa'i dngos po 'jig par byed do snyam du sems na/ 'dir bshad pa/ dngos med dngos po med mi 'byung / /dngos po med par dngos po med pa yod pa ma yin no//gang gi phyir 'jig pa med na 'jig pa'i mtshan nyid mi rtag pa nyid mi rung ste/ mi 'jig na mi rtag pa nyid ces bya ba mi 'thad pa nyid kyi phyir rtag tu dngos po med pa kho nar 'gyur ro/ /'dir smras pa/ dngos po med pa gcig pu yin du zad mod/ 'dir bshad pa/ dngos po med par dngos med med/ /bdag las ma yin gzhan las min/ /de lta bas na dngos po med/ /de med na ni dngos med med/ /dngos po med par ni dngos po med pa med la/ dngos po de yang bdag las ma yin gzhan las ma yin no/ /de lta bas na gang gi phyir rigs pa 'dis yod pa ma yin pa de'i phyir dngos po med pa ni ma skyes pa yin no//zhes bshad pa yin no/ /de med na ni dngos po med/ /dngos po de med na dngos po de med pa yang med do/ /de'i dngos po med pa'ang mi srid do zhes bshad pa yin no/ /gzhan yang / dngos po yod pa nyid na rtag /med na nges par chad pa yin/ /dngos po yod na de gnyis min/ /de phyir dngos po khas blangs min/ /gang gi phyir dngos po yod pa nyid yod na rtag par thal bar 'gyur ro / /med pa nyid na ni nges par chad par thal bar 'gyur te/ dngos po yod na de gnyis su thal bar 'gyur bas de'i phyir dngos po khas blang bar mi bya'o//'dir smras pa/ rgyun gyi phyir na de med de/ /rgyu byin nas ni dngos po 'gag /skye ba dang 'jig pa'i rgyun gyi phyir rtag pa dang chad pa 'di gnyi gar mi 'gyur te/ rgyu byin nas dngos po 'gag par 'gyur ro//'dir bshad pa/ snga ma bzhin du 'di ma grub/ /rgyun chad pa yi nyes pa'ang yod/ /kho bo cag ni sngar dngos po dang dngos po med pa gnyis cig car du mi srid do/ /zhes brtags zin te/ de'i phyir rgyun zhes khas len pa gang yin pa de yang snga ma kho na bzhin du ma grub pa yin no//gzhan yang / rgyun chad pa'i nyes pa'ang yod par thal bar 'gyur ro/ /'dir smras pa/ skye 'jig gzigs pas mya ngan 'das/ /lam bstan stong nyid phyir ma yin/ /skye ba dang 'jig pa gzigs nas/ mya ngan las 'das pa'i lam bstan gyi/ stong pa nyid kyi phyir ni ma yin no//'dir bshad pa/ 'di dag phan tshun bzlog phyir dang / /log pa'i phyir na mthong ba yin/ /re zhig bshad pa 'di ni gang ma skyes pa shes pa de'i ma yin gyi/ gang skye ba dang 'jig pa mthong gi skye ba de yang 'jig pa las bzlog par mthong / 'jig pa las skye ba las bzlog par mthong ba de'i skye ba dang /'jig pa 'di gnyis phan tshun bzlog pa yin pa'i phyir dang / shes pa yang bzlog pa yin pa'i phyir skye ba dang 'jig par mthong ba yin no/ /gang gi phyir skye ba la brten nas 'jig pa dang / 'jig pa la brten nas skye ba yin pa de'i phyir yang stong pa nyid kho na yin no//'dir smras pa/ gal te skye dang 'gag med na/ /gang zhig 'gag phyir mya ngan 'das/ /gal te skye ba yang med 'gag pa yang med na gang zhig 'gag pa'i phyir mya ngan las 'das par 'gyur/ 'dir bshad pa/ gang zhig rang bzhin skye med cing //'gag med de thar ma yin nam/ /gang rang bzhin gyis skye ba med pa yang 'a gag pa med pa de thar pa ma yin nam/ gzhan yang / gal te myang 'das 'gog cha dang / /gal te cig shos ltar brtag pa / /de phyir dngos dang dngos med min/ / skye med 'gag pa'ang med pa yin/ /gal te mya ngan las 'das pa 'gog pa yin na chad par thal bar 'gyur ro/ /ji ltar 'gog pa ma yin na ni rtag par thal bar 'gyur ro/ /de lta bas na mya ngan las 'das pa ni dngos po dang dngos po med pa ma yin gyi/skye ba med cing 'gag pa med pa de lta bu mya ngan las 'das pa yin no/ /'dir smras pa/ 'gog pa ni yod de de yang rtag tu gnas pa yin no zhe na/ 'dir bshad pa/ gal te 'gog pa 'ga' gnas yod/ /dngos med par yang der 'gyur ro/ /gal te 'gog pa 'ga' zhig gnas par 'gyur na de'i tshe dngos po med par yang 'gyur te/ma brten par yang 'gyur ro zhes bshad pa yin no/ /de yang rigs pa ma yin te/ /dngos med par yang de med de/ /dngos med med par yang de med/ /dngos po med pa dang dngos po med pa gnyi ga ltar yang 'gog pa de med do//ji skad du bshad pa yin zhe na/ mtshan gzhi las mtshan grub mtshan las/ /mtshan gzhi grub ste rang ma grub/ /gcig las gcig kyang ma grub ste/ /ma grub ma grub sgrub byed min/ /mtshan nyid kyang mtshan gzhi las grub la/ mtshan gzhi yang mtshan nyid las grub pa las rang gi grub pa ma yin no//gcig las gcig kyang ma grub ste/ /phan tshun du yang ma grub bo/ /zhes bshad pa yin no/ /gang gi phyir rim pa 'dis mtshan gzhi dang mtshan nyid gnyis grub pa med pa de'i phyir mtshan gzhi dang mtshan nyid ma grub ste/dngos po 'di dag grub par byed pa ma yin no/ /'dis ni rgyu dang 'bras bu dang / /tshor bcas tshor ba po sogs dang / /lta po blta bya sogs ci'ang rung / /de kun ma lus bshad pa yin/ /'dir smras pa/ dus rig pa dag dus gsum pa du mar sems te / de lta bas na dus ni yod do//'dir bshad pa/ mi gnas phan tshun grub phyir dang / /'chol phyir bdag nyid ma grub phyir/ /dngos po med phyir dus gsum ni/ /yod pa ma yin rtog pa tsam/ /dus ni ma grub bo/ /ci'i phyir zhe na/ mi gnas pa'i phyir te/ dus ni mi gnas pa yin pa yin par bsam pa'o//gang mi gnas pa de ni gzung bar mi nus so/ /gang gzung du med pa de ji ltar gdags par 'gyur/ de lta bas na ma grub bo/ /gzhan yang / phan tshun grub phyir phan tshun las grub par brtag pa ste/ 'das pa la brten nas da ltar dang ma 'ongs pa sgrub par byed/ da ltar la brten nas 'das pa dang ma 'ongs pa sgrub par byed/ ma 'ongs pa la brten nas da ltar dang 'das pa sgrub par byed pas gang gi phyir brten nas grub pa yin par brtag pa yin pa de'i phyir dus ma grub bo/ /de nyid da ltar la brtags nas da ltar zhes bya/ de nyid ma 'ongs pa la brtags nas 'das pa yin la/de nyid 'das pa la brtags nas ma 'ongs pa yin te/ gang gi phyir de ltar 'chol ba yin pa de'i phyir ma grub pa'o / /gzhan yang / bdag nyid ma grub pa'i phyir dus 'di ni bdag nyid kyis ma grub pas de lta bas na ma grub pa yin no/ /gzhan yang / dngos po med pa'i phyir yod pa yang ma yin no/ /dngos po grub na ni dus kyang grub par 'gyur ba zhig na/ dngos po de ni btsal nas rang gi ngo bor grub pa med do/ /de'i phyir dus ni ngo bo nyid kyis grub pa med pa kho na ste/ rnam par rtog pa tsam 'ba' zhig tu zad do/ /'dir smras pa/'dus byas thams cad ni mtshan nyid gsum po skye ba dang / gnas pa dang / 'jig pa dang ldan pa yin la/ de las bzlog pa ni 'dus ma byas yin par gsungs te/ de lta bas na 'dus byas dang 'dus ma byas ni yod do/ /'dir bshad pa/ gang phyir skye dang gnas dang 'jig /'dus byas mtshan nyid 'di gsum med/ /de phyir 'dus byas 'dus ma byas/ /ci yang yod pa ma yin no/ /skye ba dang gnas pa dang 'jig pa gang dag 'dus byas kyi mtshan nyid du gsungs pa de dag dpyad na mi 'thad pa'i phyir med do/ /gang gi phyir de med pa de'i phyir 'dus byas sam/'dus ma byas pa ci yang yod pa ma yin no/ /gzhan yang / 'dus byas khas blangs su zin kyang gang gi phyir dpyad na mi 'thad pa de'i phyir med do/ /zhes smra'o/ /ci'i phyir zhe na/ ma zhig mi 'jig zhig pa'ang min/ /gnas pa gnas pa ma yin te/ /mi gnas pa yang gnas ma yin//skyes pa mi skye ma skyes min/ /'di la skyes pa zhig skye bar 'gyur ram/ ma skyes pa zhig skye bar 'gyur grang na/ de la re zhig skyes pa ni skye ba ma yin no/ /ci'i phyir zhe na/ skyes zin pa'i phyir ro/ /ma skyes pa'ang skye ba ma yin te/ci'i phyir zhe na/ ma skyes pa'i phyir ro/ /skyes pa de nyid gnas pa zhig gnas pa'ang / mi gnas pa zhig gnas par 'gyur grang na/ 'di la yang gnas pa ni gnas pa ma yin te/ gnas zin pa'i phyir ro/ /mi gnas pa yang gnas pa ma yin te/ /ci'i phyir zhe na/gnas par ma gyur pa'i phyir ro/ /da ni zhig pa zhig 'jig par 'gyur ba'am/ ma zhig 'jig par 'gyur grang na/ /gnyis ka ltar yang mi 'thad do/ /gang gi phyir 'dus byas khas blangs su zin yang rim pa 'di gsum gyis btsal na mi 'thad pa de'i 'dus byas med do/ / 'dus byas med pa'i phyir 'dus ma byas kyang mi srid do/ /gzhan yang / 'dus byas dang ni 'dus ma byas/ /du ma ma yin gcig ma yin/ /yod min med min yod med min/ /mtshams 'dir rnam pa 'di kun 'dus/ /dpyad na 'dus byas dang 'dus ma byas 'di ni du ma yang ma yin/gcig kyang ma yin/ yod pa yang ma yin/ med pa yang ma yin/ yod med kyang ma yin no/ /mtshams 'dir te nges par gzung ba 'dir ni 'di kun 'dus te ma lus pa thams cad 'du ba zhes bshad pa yin no/ /thams cad ni mtha' dag go / /'di gnyis kyi rnam pa rnams bsdus zin par rig par bya'o//'dir smras pa/ las gnas pa ni bcom ldan gsungs/ /bla ma las bdag 'bras bu dang / /sems can las bdag bya ba dang / /las rnams chud za min par gsungs/ /bcom ldan 'das kyis mdo sde dag las/ las dang las kyi 'bras bu yang rnam pa du mar yongs su bstan/las rnams 'bras bu med pa ma yin par yang gsungs/ las rnams chud mi za ba dang / /sems can rnams ni las bdag gir bya ba yin no/ /zhes kyang gsungs / de lta bas na las dang las kyi 'bras bu yod do/ / 'dir bshad pa/ gang phyir rang bzhin med bstan pa/ /de phyir de ma skyes pa las/ /mi 'jig bdag 'dzin de las skye/ /de skyed 'dzin de'ang rnam rtog las/ /gang gi phyir las rang bzhin med par bstan zin pa de'i phyir/ de ma skyes pas ni de 'jig pa med do/ /gzhan yang / bdag 'dzin de las skyes/ /de'i phyir las ni bdag tu 'dzin pas skyed la/ de yang rnam par rtog pa las byung ngo / /gzhan yang / gal te las ni rang bzhin 'gyur/ /de las skyes lus rtag par 'gyur/ /gal te las rang bzhin can du 'gyur na/ de lta yin na ni las de las skyes pa'i lus gang yin pa de yang dag par 'gyur te ther zug gi rang bzhin du 'gyur ro zhes bshad pa yin no//gzhan yang / sdug bsngal rnam smin can mi 'gyur/ /las de sdug bsngal gyi rnam par smin pa can du yang mi 'gyur ro/ /gzhan yang / de phyir las kyang bdag tu 'gyur//gang gi phyir las de rtag pa de'i phyir bdag tu 'gyur te/ gang gi phyir mi rtag pa de sdug bsngal ba gang sdug bsngal ba de ni bdag med pa'i phyir ro/ /de lta bas na las rang bzhin med pa'i phyir skye ba med do/ /mi skye ba'i phyir chud mi za'o/ /gzhan yang / las ni rkyen skyes ci yang med/ /rkyen min skye ba'ang yod min te/ /las ni rkyen las skyes pa'ang med la/ rkyen ma yin pa las skyes pa ci yang med do/ /ci'i phyir zhe na/ 'du byed rnams ni sgyu ma dang / /dri za'i grong khyer smig rgyu 'dra/ /gang gi phyir 'du byed rnams ni dri za'i grong khyer dang /sgyu ma dang / smig rgyu dag dang 'dra ba de'i phyir las rang bzhin gyis med do/ /gzhan yang / las ni nyon mongs rgyu mtshan can/ /'du byed nyon mongs las bdag nyid/ /lus ni las kyi rgyu mtshan can/ /gsum ka'ang ngo bo nyid kyis stong / /gang gi phyir las ni nyon mongs pa'i rgyu las byung ba yin pa dang /gang gi phyir 'du byed rnams las dang nyon mongs rgyu las byung ba yin pa dang / gang gi phyir lus kyi rgyu las byung ba de'i phyir de gsum car yang rang bzhin gyis stong ngo / /de ltar yin na/ las med na ni byed pa med/ / de gnyis med par 'bras bu med/ /de med phyir na za ba po/ /med pa yin pas dben pa ni/ /de ltar rigs pas kyang dpyad na 'bras bu rang bzhin gyis med na las med pa yin no/ /las med na byed pa po med pa yin no/ /las dang byed pa po med na 'bras bu med do//de med na za ba po med pa yin te/ de'i phyir dben pa yin no/ /gzhan yang / yang dag mthong phyir las stong par/ /legs par rnam par shes na ni/ /las mi 'byung ste las med na/ /las las gang byung mi 'byung ngo / /de kho na mthong ba'i rgyu las rang bzhin gyis stong pa legs par rnam par shes na las ni mi 'byung ngo //las de med na las de las byung ba gang yin pa de yang mi 'byung ngo / /'dir smras pa/ da ci med pa kho na yin nam/ 'on te 'ga' zhig yod/ 'dir bshad pa yod do/ /gal te ji lta zhe na/ ji ltar bcom ldan de bzhin gshegs//de ni rdzu 'phrul gyis sprul pa/ /sprul pa mdzad la sprul des kyang / /sprul pa gzhan zhig sprul par byed/ /de las de bzhin gshegs sprul stong / /sprul pas sprul pa smos ci dgos/ /rtog pa tsam gang ci yang rung / /de dag gnyi ga yod pa yin/ /de bzhin byed po sprul par mtshungs//las ni sprul pas sprul dang mtshungs/ /rang bzhin gyis ni stong pa yin/ /rtog tsam gang ci'ang rung bar yod/ /ji ltar bcom ldan 'das de bzhin gshegs pa de rdzu 'phrul gyis sprul pa mdzad la/ sprul pa des kyang sprul pa gzhan zhig sprul par byed pa de bzhin du las kyang khong du chud par bya'o//de la re zhig de bzhin gshegs pas sprul pa yang rang bzhin gyis stong na/ sprul pas sprul pa gzhan lta smos kyang ci dgos/ ji ltar rtog pa tsam gang ci yang rung ba gnyi ga la yang yod pa ltar las kyang de dang 'dra'o/ / gzhan yang / gal te rang bzhin gyis las yod/ /mya ngan 'das las byed po med/ /gal te med na las skyed pa'i/ /'bras bu sdug dang mi sdug med/ /gal te las rang bzhin yod na las rang bzhin gyis grub pa phan chad mya ngan las 'das pa med do/ /gzhan yang / las kyi byed pa po yang med do/ /ci'i phyir zhe na/ byed pa po yang med par yang las rab tu 'grub pa'i phyir ro/ /gal te rang bzhin gyis med na ni las kyis skyed pa'i 'bras bu sdug dang mi sdug pa gang yin pa de yang med do/ /'dir smras pa/ mdo sde las yod do zhes rgya cher gsungs na de ji ltar med do zhes bya bar 'gyur/'dir bshad pa/ yod ces pa yod med ces pa'ang / /yod de yod med ces de'ang yod/ /sangs rgyas rnams kyis dgongs na ni/ /gsungs pa rtogs par sla ma yin/ /yod do zhes gsungs pa gang yin pa de yang brtag par yod do/ / med do zhes gsungs pa gang yin pa de yang brtag par yod do / /yod med ces pa gang yin pa de yang brtag pa kho nar zad do/ /sangs rgyas kyis dgongs te gsungs pa rnams ni/ rnam pa thams cad du rtogs par sla ba ma yin no/ /'dir smras pa/ 'di la gzugs ni 'byung ba las gyur pa yin par 'dod de yod la/lhag ma gzugs can ma yin pa'i phyir chos rnams kyang ci rigs par yod do/ /'dir bshad pa/ gal te gzugs 'byung las byung na/ /yang dag min las gzugs 'byung 'gyur/ /rang gi ngo bo las ma yin/ /de med phyir na gzhan las min//gal te gzugs 'byung ba las gyur pa yin par 'dod na/ de lta na ni gzugs yang dag par yin pa las byung ba yin te/ yang dag pa ma yin pa las zhes bya ba ni bdag ma yin pa las bshad pa yin no/ /de ltar gzugs ni rang gi ngo bo las ma yin pa'o/ / 'dir smras pa/ de de bzhin te rang gi ngo bo las ni ma yin te/ gzhan las yin te 'byung ba rnams ni de bzhin no/ /'dir bshad pa/ de med phyir na gzhan las min/ /gzugs de gzhan las ma yin no/ /ci'i phyir zhe na/ de med pa'i phyir gzhan de med pa'i phyir ro/ / ji lta zhe na/ 'di ltar rang gi ngo bo nyid ma grub pa'i phyir gzhan las shes bya ba mi 'thad de/ med pa ni de'i gzhan las shes bya ba mi 'thad/ med pa de'i gzhan zhes bya ba ma yin no/ /gzhan yang / 'byung ba chen po de dag nyid med pa'i phyir te/ 'di la mtshan nyid las byung ba rnams 'grub par 'dod na mtshan nyid de yang 'byung ba rnams sngon rol du 'grub pa mi 'thad do//de ma grub pa'i mtshan gzhi 'byung ba rnams kyang ma grub bo/ /gcig pa'ang bzhi ni yod min zhing / /bzhi la'ang gcig ni yod min na/ /'byung ba che bzhi med brten nas//gzugs ni ji ltar 'grub par 'gyur/ /de lta bas na/ bzhi la'ang gcig nyid med la/ /gcig pa'ang bzhi nyid med pa'i phyir/ /'byung ba chen po bzhi med pa la brten nas/ /gzugs ji ltar 'grub par 'gyur/ /med pa zhes bya ba ni yod pa ma yin pa zhes bshad pa yin no//gzhan yang / shin tu mi 'dzin phyir gal te/ /rtags las she na rtags de med/ /rgyu dang rkyen las byed phyir ro/ /yod na'ang rtags med rigs ma yin/ /shin tu mi 'dzin pa'i phyir gzugs ni yod pa ma yin pa nyid do/ /ci'i phyir zhe na/shin tu mi 'dzin pa'i phyir gzugs ni shin tu mi 'dzin pa nyid de/ gang la 'dzin pa mi srid pa de ji ltar yod do zhes bya bar 'gyur/ 'di la 'di snyam du rtags las te/ gal te 'di'i rtags gzugs so snyam pa'i blo gzugs can gyi blo yod na gzugs zhes bya ba 'grub par 'gyur te/gang gi phyir don med pa la blo mi 'jug pa de'i phyir rtags blo la gzugs yod do snyam du sems na/ 'dir bshad pa/ gal te/ rtags las she na rtags de med/ /rtags de ni med de yod pa ma yin no/ /ci'i phyir zhe na/ rgyu dang rkyen las skyes phyir ro//gang gi rtags blo de ni rgyu dang rkyen rnams las skyes pa de'i phyir de med do/ /gzhan yang / yod na'ang rtags med rigs ma yin/ /gal te gzugs de yod du zin na/ yang de lta na yang / gzugs yod pa'i rtags med pa'i rigs pa ma yin te/rtags yod pa ma yin pa ni mi rigs so/ /gzhan yang / gal te gzugs ni 'dzin 'gyur na/ /bdag gi rang bzhin nyid 'dzin 'gyur/ /med las rkyen las skyes pa'i blos/ /gzugs med ji ltar 'dzin par 'gyur/ /gal te gzugs 'dzin par gyur te / / de lta yin na ni bdag gi rang bzhin nyid ji lta bar 'gyur te/ rang gi bdag nyid la 'dzin par 'gyur ro/ /zhes bshad pa yin no/ /de yang ma mthong ste de nyid kyis de la 'dzin pa ni ma yin no/ /gang gi phyir rang bzhin gyis stong pa de'i phyir med pa rkyen las skyes pa'i blo des gzugs med pa ji ltar 'dzin par 'gyur/'dir smras pa/ mdo sde las gzugs 'das pa dang ma 'ongs pa'i gzugs 'dzin pa mang du gsungs te/ de lta bas na gzugs 'dzin pa ni yod do/ /'dir bshad pa/ gang tshe blo 'byung skad cig pas/ /gzugs skyes skad cig mi 'dzin na//de yis 'das dang ma 'ongs pa'i/ /gzugs ni ji ltar rtogs par 'gyur/ /'di la gzugs dang blo 'di gnyi ga yang skad cig yin par bsams te/ gang gi tshe blo byung ba skad cig yin pas gzugs skyes pa skad cig mi 'dzin na 'das pa dang ma 'ongs pa'i gzugs ji ltar rtogs par 'gyur te/mi srid pa'i phyir rtogs par mi 'gyur ro/ /ji ltar zhes bya ba ni gsal ba'i don yin pa'i phyir ro/ /rigs pa 'di ni gzugs shin tu mi 'dzin no/ /gzhan yang kha dog dang dbyibs khas blangs su zin yang gzugs 'dzin par mi 'thad pa nyid do//ci'i phyir zhe na/ gang tshe nam yang kha dog dbyibs/ /tha dad nyid ni yod ma yin/ /tha dad gcig tu 'dzin pa med/ /de gnyis gzugs su grags phyir ro/ /gal te kha dog dang dbyibs gnyis tha dad nyid du gyur na ni/ de'i phyir de gnyis tha dad du 'dzin pa 'thad par 'gyur /gang gi tshe kha dog dang dbyibs de dag gzugs yin par 'dod pa de'i tshe 'thad par mi 'gyur ro/ /gzhan yang / mig blo mig la yod min te/ /gzugs la yod min bar na'ang med/ /mig dang gzugs la brten nas de/ /yongs su rtog pa log pa yin//de ni brtags na mig gi blo ni mig la yang med/ gzugs la yang med/ de gnyi ga'i bar na yang med na/ de ni mig dang gzugs la brten nas skye bar yongs su rtog pa de ni log pa yin no/ /'dir smras pa/ mig la sogs pa'i skye mched rnams ni yod /de dag gi spyod yul blta bar bya ba la sogs pa yod pa yin no/ /de la mig ni gzugs la lta la/ rna ba la sogs pa yang ci rigs par de dang 'dra'o/ /'dir bshad pa/ gal te mig bdag mi mthong na/ /de gzugs mthong bar ji ltar 'gyur/ / de phyir mig dang gzugs bdag med/ /skye mched lhag ma'ang de dang 'dra/ /mig de rang bdag nyid kyis stong / /de ni gzhan bdag nyid kyis stong / /gzugs kyang de bzhin stong pa ste/ /skye mched lhag ma'ang de bzhin stong / /de bzhin zhes bya ba ni/ ji ltar gzugs rang gi bdag nyid dang gzhan gyi bdag nyid kyis stong pa de bzhin du skye mched lhag ma yang rang gi bdag nyid dang gzhan gyi bdag nyid kyis stong ngo //zhes mthun par bstan te / de lta bas na gzugs ni rang gi bdag nyid dang gzhan gyi bdag nyid kyis stong pa yin no/ /gzhan yang / brten nas byung ba'i phyir yang stong pa yin te / 'di la gzugs nyid kyis 'byung ba rnams rgyur byas nas grub pa de ni brten nas grub pa yin la/ gang la brten nas grub pa de ni rang gi ngo bo ma grub ste/ de lta bas na gzugs ni rang gi ngo bos stong pa yin no/ /gzhan gyi bdag nyid kyis kyang stong pa yin te/de'i gzhan ni mig dang blo yin no/ /blo dang bcas pa'i mig de ni yul can yin la/ gzugs ni yul te yul gang yin pa de ni yul can ma yin no/ /de lta bas na gzhan gyi bdag nyid kyis kyang stong ngo / /rnam pa gcig tu na blo ni nang yin la gzugs ni spyad par bya ba dang phyi rol yin te/nang gi ma yin pa de'i phyir gzhan gyi bdag nyid kyis kyang stong ngo / /gang las she na/ blo nyid brten nas byung ba'i phyir te ji ltar brten grub yin zhe na/ blo nyid ni rtogs byas la sogs pa la brten nas grub pa yin no/ / gang brten nas grub pa de ni rang gi bdag nyid de / de lta bas na blo de ni rang gi bdag nyid med do/ /de'i phyir blo ni don phra mo la sogs pa 'dzin par byed pa yin no zhes bya ba de mi rung ngo / /gzugs kyang de bzhin zhes bya ba ni de dang mtshungs pa ste/ ji ltar mig rang gi bdag nyid dang /gzhan gyi bdag nyid kyis stong pa de bzhin du gzugs kyang rang gi bdag nyid dang gzhan gyi bdag nyid kyis stong ngo / /gzugs ji ltar rang gi bdag nyid dang gzhan gyi bdag nyid kyis stong ngo zhe na/ gang phyir dngos po thams cad kyi/ /rang bzhin kun la yod ma yin//zhes sngar bshad pa yin no / /brtags na dngos po thams cad yod pa ma yin te/ dngos po thams cad kyi rang bzhin nyid med do zhes bya ba'i tha tshig go/ /stong zhes bya ba ni mi dmigs pa zhes bya ba'i tha tshig go/ /mig ni brten nas byung ba'i phyir stong ste mig nyid ni brten nas 'grub pa yin no //gang brten nas 'grub pa de ni rang gi bdag nyid du ma grub pa'i phyir de lta bas na mig ni rang gi bdag nyid kyis stong ngo / /ji ste gzhan gyi bdag nyid du yod par 'dod na de yang mi rung ste/ ci'i phyir zhe na/ gang la rang gi bdag nyid med pa de la gzhan gyi dngos po ga la yod de gzhan gyi dngos po yang med do//de lta bas na gzhan gyi bdag nyid kyis stong ngo / /rnam pa gcig tu na gzhan gyi bdag nyid kyis kyang stong zhes bya ba ni de yang de'i gzhan gyi blo yin te/ mig ni blos kyang stong zhes bya ba'i tha tshig go/ /ci'i phyir zhe na/ mig ni shes pa yod pa ma yin pa'i phyir te/ gang gi phyir shes pa med pa ni shes pa yod pa'i bdag nyid du 'gyur bar 'os pa ma yin pa de'i phyir gzhan gyi bdag nyid kyis kyang stong ngo / /gzhan yang blo nyid stong pa yin no/ /'dir smras pa/ mig ni bdag nyid mthong gi /blo ni ma yin no//ci'i phyir zhe na/ blo ni 'dzin par byed pa yin pa'i phyir te/ gang gi phyir blo ni don phra mo la sogs pa 'dzin par byed pa de'i phyir blo yin la/ mig gis ni bdag nyid mthong ngo / /'di lta ste/ mig ni 'byung ba dang ba'i bdag nyid yin te/ de ni mig gi rang bzhin yin no//de 'dzin par byed pa'i blo kho na yin no/ /de bzhin du kha dog dang dbyibs kyi khyad par gzugs rnams 'dzin par byed pa yang blo kho na yin te/ de lta bas na/ gal te mig bdag mi mthong na/ /de gzugs mthong bar ji ltar 'gyur/ /zhes khyod kyis gang smras pa de mi 'thad do//'dir bshad pa/ de ni de lta ma yin te/ ci'i phyir zhe na/ mig de rang bdag nyid kyis stong / /de ni gzhan bdag nyid kyis stong / /de bzhin gzugs kyis stong pa ste/ /skye mched lhag ma'ang de bzhin stong / /'di la mig ni rang gi bdag nyid kyis stong ngo //rang gi bdag nyid ces bya ba ni rang nyid yin no/ /gal te mig gi bdag nyid mi mthong na des gzugs mthong bar ji ltar 'gyur/ gang gi phyir bdag nyid kyang mi mthong na gzugs kyang mi mthong ba de'i phyir mig ni bdag med de rang bzhin med do/ / zhes bshad pa yin no/ /gzhan yang gzugs ni bdag med do/ /mi snang ba ni gzugs ma yin pa ltar skye mched lhag ma de dang 'dra/ rim pa de nyid kyis skye mched lhag ma rnams bdag nyid med de rang bzhin med pa yin no/ /gzhan yang / gal te gcig reg lhan cig 'gyur/ / de tshe gzhan rnams stong pa yin/ /stong pa'ang mi stong mi ston te/ /mi stong pa yang stong pa min/ /gang gi tshe skye mched gcig reg pa dang lhan cig tu gyur pa'i tshe gzhan rnams stong pa yin te/ stong pa yin pa'ang mi stong pa mi brten la/ mi stong pa nyid kyang stong pa nyid mi brten to//gzhan yang / gsum po yod min mi gnas pa'i/ /rang bzhin 'du ba yod min pas/ /de bdag nyid kyis reg pa med/ /de phyir tshor ba yod ma yin/ /gsum po yod pa ma yin pa de med pa mi gnas pa'i rang bzhin rnams la 'du ba med do/ /'du ba med pa'i phyir de'i bdag nyid kyis reg pa med de de las byung ba'i reg pa med ces bshad pa yin no//reg pa med pa'i phyir tshor ba med do/ /gzhan yang / nang dang phyi yi skye mched la/ /brten nas rnam par shes pa 'byung / /de lta bas na rnam shes med/ /smig rgyu sgyu ma bzhin du stong / /gang gi phyir phyi dang nang gi skye mched la brten nas rnam par shes pa skye ba'i phyir rnam par shes pa de yang med de/smig rgyu sgyu ma bzhin du stong ngo / /de la 'di snyam du rnam par shes pa rnam par shes pa byed par yod do snyam du sems na de yang mi 'thad do/ /ci'i phyir zhe na/ rnam shes rnam shes bya brten nas //'byung bas yod min shes pa dang / /rnam shes bya med phyir de'i phyir/ /rnam shes byed pa med pa nyid/ /gang gi phyir rnam par shes pa ni rnam par shes par bya bar brten nas 'byung ba de'i phyir med do/ /rnam par shes par bya ba dang rnam par shes pa med pa'i phyir/ rnam par shes pa yang med pa nyid do/ /'dir smras pa/ thams cad mi rtag go zhes gsungs te thams cad mi rtag par bstan pas mi stong pa nyid kyang bstan pa mdzad pa yin no/ /'dir bshad pa/ thams cad mi rtag mi rtag pa'am/ /yang na rtag pa ci yang med/ /dngos yod rtag dang mi rtag nyid//yin na de ltar ga la yod/ /thams cad mi rtag ces gsungs pa ni 'dir brjod par bzhed pa shes par bya ste/ gang gi phyir mi rtag pa'am rtag pa ni ci yang med do/ /dngos po yod na rtag pa'am mi rtag pa nyid yin na/ dngos po de dag ga la yod de/ med do zhes bshad pa yin no//'dir smras pa/ 'di ltar mdo sde las rgyas par bstan pas 'dod chags dang zhe sdang dang gti mug rnams ni yod do/ /'dir bshad pa/ sdug dang mi sdug phyin ci log /rkyen skyes chags sdang gti mug rnams/ /'byung ste de phyir rang bzhin gyis/ / 'dod chags zhe sdang gti mug med/ /gang gi phyir sdug pa'i rkyen dang / mi sdug pa'i rkyen dang / phyin ci log gi rkyen las 'dod chags dang zhe sdang dang gti mug rnams byung pa de'i phyir rang bzhin gyis 'dod chags dang zhe sdang dang gti mug rnams med do/ /gzhan yang / gang phyir der chags der sdang der//rmongs pa de phyir de dag ni/ /rnam rtog gis bskyed rnam rtog kyang / /yang dag nyid du yod ma yin/ /gang gi phyir gcig po de nyid la chags/ de nyid la sdang / de nyid la rmongs pa de'i phyir 'dod chags dang zhe sdang dang gti mug rnams ni rnam par rtog pas bskyed pa yin no//gzhan yang / rnam par rtog pa dag kyang yang dag pa ma yin te/ rnam par rtog pa gang dag gis 'dod chags dang zhe sdang dang gti mug rnam par skyed par byed pa de dag kyang yang dag par med do/ /ji ltar med ce na/ de bshad pa/ rnam brtag bya gang de yod min/ /brtag bya med rtog ga la yod/ /de phyir rkyen las skyes pa'i phyir/ /brtag bya rnam par rtog pa stong / /rnam par brtag par bya ba gang yin pa de ni med do/ /rnam par brtag par bya ba med na rnam par rtog pa yod par ga la 'gyur te/rkyen las skyes pa'i phyir rnam par brtag par bya ba yang rang bzhin gyis stong la/ rnam par rtog pa yang rang bzhin gyis stong ngo / /gzhan yang / yang dag mthong phyir phyin ci log /bzhi las skyes pa'i ma rig med/ /de med phyir na 'du byed rnams/ /mi 'byung lhag ma'ang de bzhin no//de ltar yang dag par rtogs pas phyin ci log bzhi las skyes pa'i ma rig pa mi 'byung ngo / /de med pa'i phyir na ma rig pa de med pas 'du byed rnams mi 'byung ste/ de bzhin du lhag ma mi 'byung ngo / /gzhan yang / gang brten gang skyes de de las/ /skyes de de med mi 'byung ngo //dngos dang dngos med 'dus byas dang / /'dus ma byas shing mya ngan 'das/ /gang la brten nas gang skyes pa de ni de las skyes pa yin te de med na mi 'byung ngo / /dngos dang dngos po med pa zhi ba dang / 'dus byas dang 'dus ma byas zhi ba dang / mya ngan las 'das pa yin no//gzhan yang / rgyu dang rkyen las skyes dngos rnams/ /yang dag par ni rtog pa gang / /brten pa'i dngos por mngon par zhen pa dang lta ba dang rtog pa dang 'dzin pa dang / de ni ston pas ma rig gsungs/ /de las yan lag bcu gnyis 'byung / /gzhan yang /yang dag mthong phyir dngos stong par/ /legs shes ma rig mi 'byung ba/ /de ni ma rig 'gog pa yin/ /de phyir yan lag bcu gnyis 'gag /dngos po de dag rang bzhin gyis stong pa yang dag pa ji lta ba bzhin du legs par shes na ma rig pa ni 'byung ba de ni ma rig pa 'gog pa yin no//de'i phyir yan la bcu gnyis 'gog go / /ci'i phyir zhe na/ 'du byed dri za'i grong khyer dang / /sgyu ma smig rgyu chu bur dang / /chu yi dbu ba mtshungs pa ste/ /rmi lam mgal me'i 'khor lo 'dra/ /gang gi phyir yongs su brtags nas 'du byed rnams sgyu ma dang /smig rgyu dang / dri za'i grong khyer dang 'dra ba de'i phyir rang bzhin gyis stong par de dag legs par rnam par shes pa ma rig pa mi 'byung ba de nyid ma rig pa 'gog pa yin te/ de'i phyir yan lag bcu gnyis 'gag par 'gyur ro/ /rang bzhin gyis ni dngos 'gag med/ / 'di la dngos po med pa'ang med/ /rgyu dang rkyen las skyes pa yi/ /dngos dang dngos med stong pa yin/ /btsal na don dam par rang bzhin gyis dngos po 'ga' yang med la/ 'di la dngos po med pa 'ga' yang med de/ rgyu dang rkyen las skyes pa'i dngos po dang dngos po med pa ni stong pa yin no//dngos po thams cad rang bzhin gyis/ /stong pa yin pas dngos rnams kyis/ /rten 'byung de ni de bzhin gshegs/ /mtshungs pa med par nye bar bstan/ /dngos po thams cad rang bzhin gyis stong pa yin pas/ dngos po rnams kyi brten nas 'byung ba 'di de bzhin gshegs pas nye bar bstan to//dam pa'i don ni der zad do/ /sangs rgyas bcom ldan 'das kyis ni/ /'jig rten tha snyad brten nas su/ /sna tshogs thams cad yang dag 'phags / /don dam par ni rten cing 'brel bar 'byung ba'i dngos po thams cad rang bzhin gyis stong ngo //zhes bya ba der zad do/ /sangs rgyas bcom ldan 'das kyis ni 'jig rten pa'i tha snyad la brten nas/ sna tshogs ma lus pa thams cad yang dag pa de bzhin nyid du brtag par zad do/ /'jig rten pa yi bstan mi 'jig /yang dag chos bstan ci yang med//de bzhin gshegs bshad ma rtogs nas/ /de phyir sgrub rtog med 'dir skrag /'jig rten pa'i chos bshad pa gang yin pa de yang mi 'jig la/ yang dag par na nam yang chos bstan par mdzad pa ma yin no/ /de ltar brten pa'i don dam par mi shes te/ de bzhin gshegs pas bshad pa ma rtogs nas de'i phyir rmongs pa rnams sgrub pa rtog pa med pa/mtshan nyid med pa 'di la skrag par 'gyur ro/ /'di brten 'di 'byung zhes bya ba ni / 'jig rten sgrub 'di 'gog mi mdzad/ /rten 'byung gang de rang bzhin med/ /ji ltar de yod yang dag nges//'di la brten nas 'di 'byung ngo / /zhes bya ba'i 'jig rten pa'i sgrub pa 'di ni mi 'gog go/ /brten nas skyes pa gang yin pa 'di ni rang bzhin gyis med na/ gang med pa de ni ji ltar yod ces bya ba 'di ni de'i nges pa yin no/ /dad ldan yang dag tshol lhur len/ /chos bstan gang la'ang mi brten gang //sgrub 'dir rigs pas rjes gnyer te/ /dngos dang dngos med spangs nas zhi/ /dad pa dang ldan pa yang dag tshol ba lhur len pa/ chos bstan pa gang la yang mi brten pa 'gag zhig bsgrub pa 'di rigs pas rjes su gnyer zhing / rjes su 'dod pa ni dngos po dang dngos po med pa spangs nas zhi bar 'gyur ro//rkyen nyid 'di pa 'di shes nas/ /lta ngan dra ba'i rtog pa ldog /chags rmongs khong khro spang phyir te/ /ma gos mya ngan 'das nyer 'gro/ /stong pa nyid bdun cu pa'i bshad pa/ slob dpon 'phags pa klu sgrub kyis mdzad pa rdzogs so// //rgya gar gyi mkhan po dzi na mi tra dang / zhu chen gyi lo tsA ba ban+de ye shes sde la sogs pas zhus te gtan la phab pa'o/