CLOSE WINDOW

D3815
བོད་ཡིག

/[ @##/ /rgya gar skad du/ Ar+ya sap+ta sha ti kA pradz+nyA pA ra mi ta TI kA/ bod skad du/ 'phags pa shes rab kyi pha rol tu phyin pa bdun brgya pa rgya cher bshad pa/ bam po dang po/ kun tu gzigs phyag na ut+pa la sngon po dri ma med pa bsnams pa la rgyun du phyag 'tshal lo//de bzhin gshegs pa'i rang gi ngo bo dang / lam la log par zhugs pa rnams kyi ched du 'di brtsams te/ de'i rang gi ngo bo phyin ci ma log par bstan pa'i phyir ro/ /gang yang bdag gis ji ltar mthong ba de bzhin du de bzhin gshegs pa la blta bar bya'o//shes rab kyi pha rol tu phyin pa la spyod na myur du bla na med pa yang dag par rdzogs pa'i byang chub tu mngon par rdzogs par 'tshang rgya'o zhes bka' stsal to/ /'di skad ces bya ba la sogs pa ni sdud pa pos byas pa'i tshig yin te/ mdo sde'i don mtha' dag bsdus te bstan pa'o//bdag gis zhes bya ba ni bdag las lung nod pa gzhan gyis ma yin pa'o/ /'dis ni bcom ldan 'das kyi zhal gyi pad mo nas mngon sum du thos par bstan to/ /thos pa zhes bya ba ni rna ba'i rnam par shes pas rjes su myong ba yin gyi/ rtogs pa ni ma yin te/chos 'di lta bu de bzhin gshegs pa ma gtogs par gzhan gyis khong du chud pa'i mthu med pa'i phyir ro/ /dus gcig na zhes bya ba ni dus gcig na ste/ dus thams cad du mdo sde rin po che 'di lta bu dmigs pa mi srid pa'i phyir ro/ /'dis ni res 'ga' zhig yin par bstan pa'i phyir 'di rnyed par dka' bar bstan to//yang na dus gcig na bdag gis thos kyi/ gzhan du ni chos kyi rnam grangs gzhan dang gzhan ngas thos so zhes zur gyis bdag nyid mang du thos pa yin par sman pa'i rgyal po snying rje can gyi tshul bzhin du brjod do/ /kha cig ni dus gcig na zhes bya ba ni skad cig thong cig la dus gcig ces bya ste/bcom ldan 'das kyi dbang gis sdud par byed pa de la mdo sde'i don mtha' dag snang ba rna ba'i rnam par shes pa dang mthun pa'i rnam pa can gyi yid kyi rnam par shes pa skad cig ma gcig la byung ba'i phyir te/ rmi lam na lha'i dbang gis dus thung ngur yang lo brgya la sogs pa dmigs pa bzhin no//de nyid kyi phyir mdo sdud par mdzad pas gdul bya'i skye bo gzhan la phan gdags pa'i phyir phyis chos bstan pa mdzad pa na bar skabs su dus kun tu mnyam par gzhag pa mi srid pa dang / gal te na lung du ma bstan pa'i yul gzhan la sems dmigs su zin kyang phyis mdo sde mtha' dag sdud pa 'gal bar mi 'gyur te/de bzhin gshegs pa'i dbang gis don kun rdzogs par snang ba'i shes pa de bzhin du skye ba'i phyir ro/ /de ni yang chos nyan pa'i bdud rtsi'i ros ngoms pa med do//gdul bya'i tshogs lhag ma rnams kyang de ji ltar mi 'gyur ram zhe na/ yongs su dag pa'i byang chub sems dpa'i tshogs ni de ltar 'gyur ba nyid yin no/ /de skad du skad cig ma gcig la shar phyogs kyi 'jig rten gyi khams brjod du med pa'i brjod du med pa dag 'da' bar bya'o/ / phyogs bcur yang de bzhin du sbyar nas 'jig rten gyi khams ji srid ma lus pa dag gi de bzhin gshegs pa rnams la me tog thams cad dang / bkod pa thams cad kyis mchod par bgyi'o/ /sangs rgyas bcom ldan 'das de dag gang 'chad pa dang / ston pa de thams cad 'tshal bar bgyi'o zhes bka' stsal to//lhag ma rnams la ni mi 'gyur te/ khyad par can gyi skal ba med pas na de lta bu nges par 'dzin par nus pa med pa'i phyir ro/ /yang na mnyan du yod pa na bzhugs so zhes bya ba'i tshig tha ma 'di dang dus gcig na zhes bya ba de dang sbyar bar rig par bya'o/ /bdud bzhi bcom pa'i phyir ram/dbang phyug la sogs pa'i yon tan dang ldan pa'i phyir bcom ldan 'das so/ /bzhugs pa ni 'dug pa'o/ /yang na sna tshogs kyi gdul bya'i yid 'phrog cing 'dzud pa'o/ /gzhan gyi tshe na ni/ rgyal po'i khab dang / yangs pa can la sogs pa gzhan du bzhugs pa yod do//ci'i phyir gang gis gzhan gyi don mdzad pa 'di rang gi don lhur mdzad pa bzhin yul gcig la chags te bzhugs she na/ yul de yang de'i phyir mchod par bya ba yin no zhes mdo sdud pas shugs kyis bstan to/ /mnyan du yod pa de yang sa phyogs mang du yod pa'i phyir/ rgyal po rgyal byed ces bya ba smos te/gzhon nu ma dang 'dres pa'i tshal gyi nang du mgon med zas sbyin khyim bdag gis nyos pa'i kun dga' ra ba na ste/ yul gyi dbye ba la sogs pa mdo sdud pas de dag bstan pa gang yin pa de dag ni 'jig rten dang rjes su mthun par bya ba'i phyir te/ 'di ltar 'jig rten pa rnams rtsod par gyur na brda phrad par 'dod pa dag gis yul la sogs pa'i dbye ba brjod pas shags 'gyed pa rnams brda sprod par snang ba bzhin no//dge slong gi dge 'dun chen po dang thabs cig tu bzhugs so zhes bya ba 'di la dge slong gi dge 'dun chen po ni nyon mongs pa'i sgrib pa spangs bar blta bar bya ba dang /yon tan gyi bdag nyid che ba'i phyir ro/ /de nyid kyi phyir dge 'dun zhes bya ste/ bdud la sogs pa'i phyir rgol ba rnams kyis dbyer mi nus pa'i phyir dang / dgos pa gcig la gnas pa la brtan por gyur pa'i phyir ro/ /ci'i phyir byang chub sems dpa' sems dpa' chen po rnams phyis bka' stsal/ji tsam du bu thu bor gyur pa de dag ni dang por smos pa'i rigs so zhe na/ dge slong gi dge 'dun ni rtag pa'i phyir dang por bshad do gzhan dag ni dus thams cad du 'dug pa ma yin pa'i phyir phyis bstan te/ 'di ltar byang chub sems dpa' de dag ni mdo sde zab mo rin po che dpag tu med pa nyan par byed pas na 'di ltar dge ba dag 'jig rten gyi khams dpag tu med par gshegs kyi nyan thos bya ba byas pa dag ni de lta ma yin no//byang chub la bsam pa byas pas byang chub sems dpa'o/ /gzhan gyi don la bsam pa brtan pas de dag sems dpa' chen po yin par dgongs so//de nyid kyi phyir rang dang gzhan gyi don la go bgos pas go cha chen po bgos pa zhes bshad do/ /de dag gi theg pa 'chad pa'i phyir 'dus pa mang ngo / /'phags pa 'jam dpal ni phan pa dang bde ba mang po 'byung bar 'gyur ba la gzigs nas nyi ma 'char ba la yang ma bsdad par shin tu bzhed nas de bzhin gshegs pa'i gnas su gshegs so//skya reng ni snang ba'o/ /de shar ba ni byung ba'o/ /de nyid dus so/ /ci'i phyir gang gis 'di da ltar tshe zhes bya zhe na/ tha snyad kyi yul yin pa'i phyir ro/ /des na de ni tha snyad pa'i dus yin gyi gzegs zan pas btags pa'i dus rtag pa ni yod pa ma yin te/gcig gi ngo bo de ni snga dro la sogs pa'i dbye ba mi 'thad pa'i phyir ro zhes ston to/ /rang gi gnas nas byung ste phyogs gang na bcom ldan 'das de bzhin gshegs pa'i pho brang bcom ldan 'das de bzhin gshegs pa nang du yang dag 'jog pa'i khang pa der song nas phyin pa dang /pho brang gi sgo'i phyi rol na 'dug go/ /yang na byang chub sems dpa' rang gi gnas 'bras bur gyur pa nas langs te/ lam gang nas gshegs pa'i pho brang du phyin par 'gyur ba de nas song ba de ni lam der zhugs pa'o//de bzhin gshegs pa'i pho brang ni rnam pa thams cad dang ldan pa'i chos kyi sku'i pho brang gi sgo'i phyi rol na 'dug go zhes bya ba 'dis ni de bzhin gshegs pa'i pho brang dang nye ba na 'dug pa bstan to/ /blta ba dang zhes bya ba ni mig gis so/ /phyag bya ba dang zhes bya ba ni lus dang ngag dang yid kyis rab tu 'dud pa'i ngo bo yin no//bsnyen bkur bya ba zhes bya ba ni rang gis bkur sti bya ba la sogs pa'o/ /gzhan yang nyan thos chen po rnams zhes bya ba ni 'phags pa shA ri'i bu la sogs pa ste/ rang rang gi gnas nas byung ste/ phyogs gang na de bzhin gshegs pa'i pho brang yod pa der song ba'o//bya ba byas pa yin du zin kyang bka' drin gzo nas bcom ldan 'das la blta ba la sogs pa'i don du son te/ bcom ldan 'das kyi gnas kyi phyi rol phyogs gcig ste/ sa phyogs gcig tu gnas so/ /yang na nang gi gnas kyi phyogs su yang rang gi khyad par ji lta ba dag las langs nas gang zag la bdag med pa rtogs pa thabs su gyur te/rjes su mthun pa'i thabs gang gis bdag med pa gnyi ga'i mtshan nyid de bzhin gshegs pa'i gnas mngon du byed pa'i thabs de mngon du byed pa yin no/ /mngon du gyur nas bdag med pa gnyi ga'i bdag nyid de bzhin gshegs pa'i gnas kyi phyogs gcig ste/gang zag la bdag med pa gcig tu rtogs pa'i phyir 'di la 'khod do/ /de ltar 'dug pa de yang de dag bdag med pa gnyis ston pa'i bdag nyid shes rab kyi pha rol tu phyin pa nyan pa'i 'os su gyur pa yin no/ / 'phags pa 'jam pa'i dbyangs ni thugs byang chub la gzhol ba yin pas de bzhin gshegs pa'i pho brang gi nang du gshegs par dgongs par rigs na/ nyan thos chen po dag go ci zhes dgongs te gshegs de dag gis byang chub chen po nam yang thob par mi nus te/ nyon mongs pa'i shing bsregs pa nyid kyis 'khor ba gcig nas gcig tu byang chub kyi tshogs yongs su rdzogs pa med pa'i phyir ro zhe na/de dag la sa bon med cing byang chub chen po la 'bad pa log pa yin du zin kyang de'i tshe chos zab mo mnyan pa la gus pas 'ongs pas na nyes pa med do/ /gzhan dag sems pa ni de dag ni byang chub chen por yongs su bsgyur ba can yin te/de thos par bya ba'i bsam pa nyid kyis 'ong ba yin no/ /nyon mongs pa bsregs su zin kyang de dag 'gro ba de dang der skye ba len pa 'gal ba med de/ 'di ltar lung las shi ma thag tu sangs rgyas kyi zhing yongs su dag par sems mnyam par bzhag bzhin du pad mo la sogs pa'i nang du skye bar 'gyur ro zhes 'byung ngo //de ltar na de dag la sangs rgyas kyi 'od zer gyis bskul te/ rim gyis dbang po so sor thob nas gang dang gang du sems can gyi don mthong ba de dang der skye bar 'gyur ro/ /de bas na theg pa gcig pa'i tshul gyi rjes su 'brang zhing 'chad pa rigs pa yin no//de ltar byas na theg pa ni gcig ste gnyis su med do zhes bya ba la sogs pa dam pa'i chos pad ma dkar po la sogs pa las gsungs pa dang shin tu mthun pa yin no/ /nyan thos la sogs pa'i rigs tha dad pa yin du zin kyang rim pa de dag gis byang chub chen por yongs su bsgyur ba yin gyi rab tu dga' ba la sogs pa'i sa la 'jug pas ni ma yin la/nyan thos kyi rigs can no zhes bya ba la sogs pa 'gal ba med do/ /de dag kyang skya reng shar ba'i dus kyi tshe bcom ldan 'das kyi pho brang du 'khod par phan tshun dus byas pa yin par mngon no//bcom ldan 'das kyang shes rab kyi pha rol tu phyin pa thos par 'os pa'i 'khor 'dus pa la gzigs nas gzhan la phan par mdzad pa la gcig tu mkhas pa dag rang gi gnas ting nge 'dzin gyi gnas bzang po dag nas byung ngo / /'di yang ngo bo de lta bu la zhen pa'i gdul bya'i 'gro ba rnams kyi bsam pa'i ngor byas te bstan pa yin kyi/ston pa ni dus thams cad du mnyam par bzhag pa dang ldan pa yin pas bzhengs pa mi mnga'o/ /de la 'ongs shing zhes bya ba ni nang gi gnas su 'jug pa'i thabs su'o/ /lhags te zhes bya ba ni phyi rol gnas kyi phyogs gcig tu'o/ nyan thos chen po 'dus par zhes bya ba 'dir nyan thos smos pa ni mtshon pa yin te/ byang chub sems dpa' rnams kyang der 'dus pa'i phyir ro/ /yang na gang dag nyan pa de dag kyang 'dir nyan thos yin par dgongs pa'o/ /'phags pa 'jam pa'i dbyangs ni nyon mongs pa can ma yin pa'i nga rgyal bcom pas mgu bar bya mi dgos par bcom ldan 'das kyis mkhyen gyi/'phags pa shA ri'i bu la ni nyon mongs pa can ma yin pa'i nga rgyal yod pas mgu bar bya dgos so snyam du dgongs nas/ shA ri'i bu khyod ci'i phyir zhes bya ba la sogs pas thog mar dris so//ci'i phyir zhes bya ba ni gtan tshigs sam/ yul gang nas zhes bya ba ste/ 'di ltar rgyu med par ni khyed cag 'dra ba'i ting nge 'dzin gyi bde ba yid du 'ong ba spangs nas rings pa nyid du dus ma yin par 'ong bar rigs pa ma yin no zhes dgongs pa'o/ /btsun pa shA ri'i bus kyang bdag dang por mchis pa ma lags kyi/'jam pa'i dbyangs 'di nyid dang por rings par mchis pa lags so zhes snga ma'i tshul brjod pa'i phyir/ bcom ldan 'das thams cad kyi thog ma nyid du 'jam dpal gzhon nur gyur pa zhes bya ba la sogs pa gsol to/ /de bzhin gshegs pa'i pho brang gi sgo gnyis yang 'jug pa'i thabs yin no//'jam dpal khyod de bzhin gshegs pa la blta ba dang zhes bya ba la sogs pa nas/ sgor 'dug pa bden nam zhes bya ba'i bar ni bcom ldan 'das kyis 'jam dpal dbyangs la 'dri ba'o/ /bcom ldan 'das de de lta lags zhes bya ba la sogs pa ni 'jam dpal gyis kyang 'ongs pa'i dgos pa brjod pa'i phyir smras pa'o//lan gnyis smos pa ni nges par gzung ba'i phyir ram dga' ba'o/ /blta ba la sogs pa ni 'ong ba'i rgyu yin par rigs kyi/ chos kyi de kho na nyid gtan la dbab pa ni ma yin par mi rung ngo zhe na/blta ba la sogs pa bshad pa'i sgo nyid nas de srid pa'i phyir ro/ /de ltar yang de bzhin nyid kyi rnam par de bzhin gshegs pa blta bar bya'o zhes bya ba la sogs pa 'og nas 'chad do/ /tshogs yongs su rdzogs pa yin na blta ba la sogs pa bya ci dgos she na zhes bya ba ni de ci'i slad du zhe na zhes bya ba ni 'dir 'dri ba'i bsam pa yin no//bcom ldan 'das 'di ltar bdag ni zhes bya ba la sogs pa nas/ ma ngoms pa'i slad du'o zhes bya ba'i bar du lan yin no/ /ma ngoms pa yang de'i yon tan 'dod pa'i phyir ro/ /blta ba la sogs pa la 'chel na sems can gyi don nyams par 'gyur ba ma yin nam snyam du dgongs nas/bcom ldan 'das 'di ltar bdag de bzhin gshegs pa la blta ba dang zhes bya ba nas sems can thams cad kyi don gyi slad du ste zhes bya ba gsungs so/ /ci gzhan dag bla na med pa yang dag par rdzogs pa'i byang chub tu mngon par rdzogs par 'tshang rgya bar 'dod pa kun kyang sems can la phan pa byed 'dod nas de dag kyang khyod kho na ltar blta ba la sogs pa byed dam/'on te gzhan du yin zhes de ltar dogs pa la blta ba la sogs pa rnam pa gzhan du drang thad thabs nyid yin pa bsal ba'i phyir/bcom ldan 'das gal te zhes bya ba la sogs pa gsungs so/ /gal te rigs kyi bu myur du sangs rgyas nyid thob par brtson pa'i blo can 'jig rten la phan pa byed 'dod pa kha cig gis de bzhin gshegs pa la blta bar bya na 'di ltar blta bar bya'o/ /de ltar ji ltar bya zhe na ji ltar bdag gis mthong ba dang zhes bya ba la sogs pa gsungs so//ci'i phyir de ltar blta zhe na/ de lta na ni zhes bya ba la sogs pa gsungs so/ /ni zhes bya ba'i sgra ni gang gi phyir zhes bya ba'i don te / gang gi phyir yang dag pa'i lta ba 'di nyid yon tan phun sum tshogs pa thams cad 'dren par byed pa'i phyir ro//bcom ldan 'das bdag ni zhes bya ba la sogs pa'i skabs kyi don mjug sdud pa'o/ /ni zhes bya ba ni de'i phyir zhes bya ba'i don to/ /gzhan dag ni go rims bsnor te bdag dang sems can thams cad kyang thams cad mkhyen pa'i ye shes kyi don du'o zhes bsdu ba'i don yin no zhes kyang 'chad do//khyod kyis de bzhin gshegs pa ji ltar mthong zhe na/ de bzhin nyid kyi rnam pa dang zhes gsungs te/ de bzhin gshegs pa'i dngos po ni de bzhin nyid stong pa nyid la bya'o/ /'di skad bstan te/ gnyis su med pa'i ye shes kyi bdag nyid du bcom ldan 'das blta bar bya'o zhes bya ba yin no//de ci'i phyir zhe na brtags pas dben pa ni gnyis kyis dben pa'i ye shes las tha dad pa med pa'i phyir ro/ /dper na bum pas dben pa ni bum pas dben pa'i sa gzhi las gzhan ma yin pa de bzhin du gnyis kyis dben pa'i ye shes las kyang gnyis kyis dben pa gzhan ma yin no//gal te de bzhin gshegs pa mthong na de'i tshe khyod ni 'dzin pa yin pa'i phyir dang / de bzhin gshegs pa ni gzung ba yin pas gzung ba dang 'dzin pa yod pa'i phyir stong pa nyid dang 'gal bar 'gyur ba ma yin nam/ de bzhin nyid kyi rnam pa dang mthong ngo zhes bya ba ni phan tshun nang 'gal bar yang 'gyur te/de bzhin nyid kyi rnam pa ni gnyis las dben pa yin la/ mthong ba ni myong bar byed pa yod na skye ba yin no/ /de bas na 'di ni nga'i ma mo gshom yin no zhes bya ba'i tshig de dang mtshungs par smras pa yin no zhe na /de la mi dmigs pa'i tshul gyis zhes bya ba gsungs te/ 'di'i dgongs pa ni 'dzin pa la sogs pa spros pa'i mngon par zhen pa'i mtshan nyid ma lus par spangs pa'i sems skye ba'i phyir dang / chos mnyam pa nyid rang rig pa mngon sum du byed pa nyid na brtags pa'i dra ba mtha' dag mi dmigs pas de bzhin gshegs pa mthong ba yin no//ji skad du ci yang ma mthong ba ni de kho na mthong ba yin no zhes bya ba dang / de bzhin du/ chos nyid du ni sangs rgyas blta/ /zhes bya ba la sogs pa gsungs pa yin no/ /de bzhin nyid kyi ngo bo las ma 'das pa ma skyes pa dang / thog ma nas zhi ba dang / rang bzhin gyis mya ngan las 'das pa dang / dngos po med pa zhes 'byung ba thams cad kyang rnam pa'i bar du zhes bya bas bsdus te bstan to/ /de bzhin du mi skye ba'i rnam par zhes bya ba la sogs pa ni don tha dad pa ma yin du zin yang / la la las kha cig grags pa yin pas ji ltar rigs par chos kyi dbyings la 'jug par bya ba'i phyir chos nyid mnyam pa'i tshig gis phye ste bstan to//der yang kun brtags kyi ngo bos stong pa yin no/ /ji skad du/ brtags pa'i ngo bo nyid kyis ni/ /chos rnams thams cad ma skyes pa/ /gzhan gyi dbang la brten nas ni//mi rnams kyi ni rnam rtog skye/ /zhes gsungs so/ /de bzhin du gzhan la'ang sbyar ro/ /gzhan dag 'chad pa 'bras bu skye na rang gi ngo bor gyur pa'i rgyu las sam/ gzhan du gyur pa las sam/ gnyi ga las sam/ rgyu'i byed pa la mi ltos par skye grang / yod pa'am med pa'am gnyi ga'i ngo bo'am rgyu yang du mas 'bras bu gcig gi ngo bo skyed par byed dam gang yang du ma'i ngo bo skyed par byed grang /yang na gcig gis gcig gi ngo bo 'am/ /yang na du ma'i ngo bos bskyed grang / yang rgyu zhig pa las 'bras bu skye'am/ ma zhig pa las skye grang / rnam par rtog pa'i phyogs ji snyed pa de dag thams cad kyang gzhan dag gi phyogs la rjes su chags pas byas pa ni rtog pa'i snying po tsam yin par mngon no//'di ltar rgyu'i rang gi ngo bo 'bras bu yin na rgyu bzhin du skyes zin pa nyid yin no/ /de bas na de las skye ba ma yin te/ skyes zin pa'i phyir rgyu'i rang gi ngo bo bzhin no//gzhan las zhes bya ba'i phyogs gnyis pa la yang dngos po la ltos te brjod na 'dir gnyis pa dngos po yin na go 'bras bu de ni rgyu yod pa'i dus na med la/ de yod pa'i tshe ni rgyu yod pa ma yin na/ de gang la ltos te de gnyis gzhan nyid yin par don dam pas khas blang bar bya/yang rgyur mngon par 'dod pa ni 'bras bur mngon par 'dod pa skyed par byed pa ma yin te/ gzhan yin pa'i phyir mngon par 'dod pa ma yin pa'i dngos po bzhin no/ /gnyi ga'i phyogs las skye ba yang rigs pa ma yin te/ phyogs gnyi gar brjod pa'i skyon du thal bar 'gyur ba'i phyir ro//gzhan yang tha dad pa dang tha dad pa ma yin pa'i ngo bo gnyis ni phan tshun spangs te gnas pa'i mtshan nyid yin pas gcig tu gnas pa mi srid pa'i phyir ro/ /de nyid kyi phyir gnyi ga'i dngos po'i phyogs rung ba ma yin no/ /ma brtags pa'i dngos po yin na tha dad pa dang tha dad pa ma yin pa'i rnam par rtog pa mi 'jug pa ma yin te/gang yin pa de 'di ma yin te zhes byas na ngo bo nyid bsal ba de nyid rnam par log pa yin na de bkag pa nyid rnam par ma log pa yin no zhes bya ba'i tshig rnam pa gzhan dag ga la yod par 'gyur/ rgyu med pa las kyang skye bar rigs pa ma yin te/rtag tu yod pa dang med pa nyid du thal bar 'gyur ba'i phyir ro/ /yod pa yang skye ba ma yin te/ dngos po grub zin pa la skye ba'i don mi 'thad pa'i phyir dus phyi ma bzhin no/ /gzhan yang gal te yod pa skye bar 'gyur na ni skyes zin pa yang skye bar 'gyur ro//med pa yang skye bar rigs pa dang ldan pa ma yin te/ ngo bo nyid med pas ri bong gi rwa la sogs pa bzhin du skye ba mi 'thad pa'i phyir ro/ /de lta ma yin na med pa thams cad dngos po gang yang rung ba 'ga' las skye bar thal bar 'gyur bas rgyu dang 'bras bur nges par mi 'gyur ro//nus pa so sor nges pa yod pas de ltar yang mi 'gyur te/ 'di ltar de dang de la nus pa nges pa yod pa'i dngos po de las dngos po 'ga' kho na skye ba yin gyi/ med pa yin par khyad par med du zin kyang thams cad ma yin no snyam du sems na/ de ni rigs pa ma yin no / /gal te rkyen rnams 'bras bu dang ma 'brel ba'i lus can yin na/ de'i tshe de dag 'bras bu dang so sor 'brel pa med pa'i phyir 'bras bu gang la nus pa so sor nges pa yod/ de bas na nus pa so sor nges pa med par gnas pa yin pas thams cad las thams cad skye bar thal bar 'gyur ba bzlog dka'o//yod pa dang med pa'i phyogs la bstan pa'i skyon du thal bar 'gyur pa'i phyir yang gnyi ga'i ngo bo yang skye bar 'thad pa ma yin no/ /gcig la gnyis kyi ngo bo yang ma yin te/ gnyis dang gcig gnyis 'gal ba'i phyir ro/ /rgyu dang pos kyang 'bras bu gcig gi ngo bo gang yin pa skyed par byed do zhe na/de lta na ni rgyu rang gi ngo bo lhan cig byed pa du mas kyang 'bras bu gcig skyed pa ma yin te/ rgyu tha dad pas tha dad par byed pa yin pa'i phyir ro/ /de ltar na tha dad pa ma yin pa yang tha dad pa ma yin pa byed par mi 'gyur te/ rgyu tha dad pa yin du zin kyang tha dad pa med pa'i phyir ro//gal te tha dad pa las kyang tha dad pa nyid du 'gyur la/ tha dad pa med pa las kyang tha dad pa med pa yin na rigs pa yin te/ 'khrul pa med pa'i phyir ro/ /'dir ni de lta ma yin pas tha dad pa dang tha dad pa ma yin pa mtha' dag rgyu med pa can du 'gyur ro//dngos po 'ga' yang de las gud na med pas dngos po thams cad gzhan gyi dbang las skye ba ma yin par thal bar 'gyur ro/ /gal te 'di snyam du rgyu'i rang gi ngo bo tha dad pa las 'bras bu'i rang gi ngo bo tha dad pa skye ba yin te/ rgyu'i byed pas byas pa'i 'bras bu'i rang gi ngo bo'i bye brag ma 'chol ba'i phyir ro//'di ltar yid la byed pa las ni mig gi rnam par shes pa rtogs pa'i ngo bo yin no/ /dmigs pa'i bdag nyid de nyid mig gi dbang po las ni yul 'dzin pas so sor nges pa'o/ /yul las ni de dang 'dra ba yin gyi gzhan las ni ma yin no/ / rgyu'i byed pa bye brag sna tshogs yod du zin kyang 'bras bu'i rang gi ngo bo'i dbye ba tha mi dad pa yang ma yin te/ gcig gi ngo bo de ltar dmigs pa'i phyir ro zhe na/ de ni rigs pa ma yin te/ 'bras bu gcig gi ngo bo dang bye brag rnams de dang tha mi dad par yang ji ltar 'gyur/ de lta yin na ni sna tshogs su yang mi 'gyur ro//sna tshogs dang gcig gnyis phan tshun 'gal ba'i phyir ro/ /yul snang ba la sogs pa yang rnam par shes pa las tha dad pa ma yin par ji ltar yul la sogs pas byed pa de bzhin du de dang tha dad pa ma yin pa rtogs pa'i ngo bo la sogs par byed pa yid la byed pa la sogs pas kyang byed pas de ltar na 'chol bar 'gyur ba la lan ma btab pa yin no//'on te skyon der mi 'gyur bar bya ba'i phyir bye brag rnams 'bras bu las tha dad pa nyid du 'dod na ni de lta na yang rgyu'i byed pa de dag nyid la nye bar sbyor ba'i phyir 'bras bu rgyu med pa can du 'gyur ro//'bras bu'i bdag nyid du ma las rnam par log pa dang ldan pa'i rgyu dang rjes su mthun par chos tha dad par rtog pas bzhag nas de'i byed pa'i yul tha dad par rtog pas 'jog par byed do zhe na/ yang 'jog la rag ste/ rgyu'i byed pa de ni rtog pa'i bzos byas pa la byed pas rtog pas bzhag pa yin gyi yang dag par ni ma yin no//de lta na yang 'bras bu rgyu med pa can du 'gyur te/ rgyu'i byed pa brtags pa'i bdag nyid la nye bar sbyor ba'i phyir ro/ /ci ste 'bras bu dngos su tha dad pa ma yin yang bye brag rnams tha dad na/ de lta na ni chos can dang chos can dngos su tha dad par 'gyur te/tha dad pa dang tha dad pa ma yin pa'i rang gi ngo bor gnas pa'i phyir ro/ /de lta na yang sngar smos pa'i skyon du 'gyur ro/ /'on te bye brag de dag brtags pa kho na yin na/ de lta na yang rgyu rang gi ngo bo tha dad pa las bye brag tha dad par 'gyur ro zhes bya ba rigs pa ma yin te/rtog pas byas pa'i tha dad pa ni rgyu'i byed pa la ltos pa ma yin pa'i phyir ro/ /gal te rgyu'i rang gi ngo bo gcig gis 'bras bu'i rang gi ngo bo gcig skyed par byed do zhes zer na/ de lta na yang long ba dang 'on pa la sogs par thal bar 'gyur te/mig la sogs pas rang gi rigs kyi skad cig ma phyi ma nyid skyed pa yin na ni rnam par shes pa skyed par mi 'thad pa'i phyir ro/ /rnam par shes pa skyed par byed na yang rang gi rigs kyi skad cig ma phyi ma mtshams sbyor ba med pa'i phyir ro/ /dbang phyug la sogs pa rgyu gcig gis 'bras bu du ma byed par smras pa yang tshad ma thams cad dang 'gal bar 'gyur te/tshogs pa dang rim gyis 'bras bu skye bar snang ba'i phyir ro/ /gal te 'bras bu yang rgyu zhig pa las skye na ni de'i tshe rgyu ma yin pa nyid du thal bar 'gyur te/ zhig pa ni rgyu nyid du mi srid pa'i phyir ro/ /'on te ma zhig pa las skye na ni de lta na yang rgyu dang 'bras bu gnyis dus mnyam par thal bar 'gyur ro//ba lang gi rwa g.yas g.yon rgyu dang 'bras bur mi 'thad pa bzhin du de yang 'dod pa ma yin no/ /'on te phyis 'bras bu skyes pa dang dus mnyam pa de nyid du 'dod pas dus gcig pa mi 'gal lo zhes zer na/de lta na yang skyes ma thag tu 'jig pa dang 'gal bar 'gyur bar 'bras bu skye ba shin tu rigs pa ma yin no/ /'on te rgyu 'jig pa'i tshe 'bras bu skyes pas 'di la nyes pa med do zhes lan 'debs par byed na/ de la yang brjod par bya ste rgyu 'jig pa 'di gang yin/ ci rgyu'i rang gi ngo bo nyid yin te/ji skad du dngos po skad cig ma gnas pa'i chos kho na 'jig pa yin no zhes zer ba lta bu 'am ci rgyu zhig ste med pa la bya ci nyes/ gal te rgyu'i rang gi ngo bo la bya na ni rgyu dang 'bras bu gnyis dus mnyam pa nyid du thal bar 'gyur ro/ /'on te rgyu zhig ste med pa la bya na de lta na yang 'bras bu dang dus mnyam pa nyid du mi 'gyur te/rang gi ngo bo med pa ni res 'ga' ba nyid du mi 'thad pa'i phyir ro/ /res 'ga' ba nyid yin na ni dngos po nyid yin par thal bar 'gyur te/ rnam par shes pa bzhin no/ /de bas na skye ba'i dngos po rnams la ji lta ji ltar rnam par dpyad pa de lta de ltar 'thad pa bzod pa ma yin no//de tshad ma dang 'gal ba med du zin kyang / 'on kyang de nges pas bya ba'i thabs ni 'ga' yang yod pa ma yin te/ 'di ltar rgyu dang 'bras bu'i dngos po ni phal cher mngon sum dang mi dmigs pas sgrub par byed pa yin na/ mngon sum dang mi dmigs pa gnyis kyang rnam pa med pa'am/rnam pa dang bcas pas de 'dzin par 'thad pa ma yin te/ yul gyis byas pa'i snang ba med cing don nye ba'i rgyu mtshan med par ni 'dis myong ngo zhes rnam par bzhag pa mi rigs pa'i phyir ro/ /rnam pa'i dngos po yang don med pa can rmi lam la sogs pa'i shes pa'i rnam pa dngos pos khyab pa med pa'i phyir ro//shes pa gcig la rag las pa dang sna tshogs kyi rnam pa 'byung ba rnams yang dag pa yin par rigs pa ma yin no/ /de ltar skye ba ni mngon sum dang mi dmigs pas rgyu dang 'bras bu 'di bsgrub tu mi rung ba yin pas rnam pa gzhan bsam dgos so//de bas na thams cad mkhyen pas kyang rgyu dang 'bras bu gzhan gyi dbang gi mtshan nyid 'di cung zad tsam yang gsal bar mi mkhyen mi spyod de/ de ltar skye ba ni tshad ma dang 'gal ba'i phyir ro/ /rigs pa'i rjes su 'brang bas ni skye ba med pa'i rnam par blta bar ni skyon mtha' dag dang bral ba'i ye shes kyi bdag nyid ston pas gsungs te/rtag tu skye med chos ni de bzhin gshegs/ /chos rnams kun kyang bde bar gshegs dang 'dra/ /byis pa'i blo can mtshan mar 'dzin pa dag /'jig rten dag na med pa'i chos la spyod/ / 'di rgya cher dpyad pa ni rten cing 'brel par 'byung bar dpyad pa yin pas re zhig gzhag go/ /gal te skyob pa spros pa thams cad dang bral ba yin te/ de bzhin nyid kyi rnam pa gzigs pa yin na de'i bdag nyid yin pa'i phyir de ye shes kyi tshogs bsags pa'i byang chub sems dpar gyur nas phyis bcom ldan 'das de bzhin gshegs par ji ltar 'byung bar 'gyur/sangs rgyas su gyur nas kyang mes shing bsregs te zad pa bzhin du yongs su mya ngan las 'da' ba dang / yongs su mya ngan las ma 'das pa'i gnas skabs na yang yul de dang der gnas pa dang ji ltar 'das pa dang ma 'ongs pa dang da ltar byung ba'i bde bar gshegs pa rnam par gzhag par bya/ci'i phyir thams cad mkhyen pa'i ye shes rnam par bzhag pas shes bya'i mtshan nyid gnyis rnam par bzhag /gzhan yang sems tsam gyi rang gi ngo bo mthong bas gzung ba dang 'dzin pa'i bdag nyid gnyis dang bral ba'i phyir gnyis su med pa'i rnam par bzhag /bde bar gshegs pa dang bde bar gshegs pa ma yin pa'i gnas skabs gnyis su kun nas nyon mongs pa dang rnam par byang ba gang gis rnam par bzhag ces bya ba de dag ni 'khor gyi dkyil 'khor de'i nang nas kha cig dogs pa skyes pa yin no//dogs pa'i dra ba de yongs su spangs pa'i phyir/ de bzhin nyid la gud nas 'byung ba ma mchis te zhes bya ba la sogs pa nas/ de bzhin nyid ni mi skye mi 'gag pa ste zhes bya ba'i bar du lan 'debs pa yin te/ 'di'i bsam pa ni gal te de bzhin nyid ni sngar ma byung ba las byung ba dang /byung nas kyang mi 'byung na ni de ltar na 'gyur ba med pa'i don du mnyam pa ma yin pas mi rtag par thal bar 'gyur ro zhe na/ de ni 'di ltar 'dod pa yin te/ ji skad du de bzhin gshegs pa skyes kyang rung / ma skyes kyang rung chos nyid dang /yang dag pa'i mtha' dang / bsam gyis mi khyab pa'i dbyings la sogs pa de ni gnas pa kho na yin no zhes gsungs so/ /gal te 'di ye shes kyi bdag nyid yin na ye shes bzhin du lus med pa'i phyir yul na mi gnas par 'gyur ro/ /skye ba dang 'jig pa med pa yang 'das pa la sogs pa'i rgyal ba yin par ji ltar gdags/ston pa thams cad mkhyen pa ni de'i bdag nyid yin na yang gnyis su gyur pas stong pa nyid dang mi 'gal bar ji ltar 'gyur/ gnyis su med pa'i ye shes kyi bdag nyid can yin na yang skal ba dang ldan pa rnams kyis rtogs pa na gang gis gnyis su thal bar mi 'gyur/sngar kun nas nyon mongs la phyis rnam par byang ba yin na yang rnam par byang ba dang ldan par 'gyur ro/ /'di de lta yin na yang gal te kun nas nyon mongs pa'i gnas skabs kyi tshe na ni gnyis kyi bdag nyid yin la/ 'di ltar de phyis sngon med pa'i gnyis su med par gyur pas rnam par byang ba yin na ni 'dus ma byas ma yin par 'gyur ro zhe na/'di'i lan glan pa'i ched du rkyen 'dus pa las de bzhin nyid la kun nas 'byung ba ma mchis te/ de bzhin nyid ni sngon med pa'i ngo bo 'byung ba yang ma lags so/ /mi 'dra ba'i rnam pa 'jig pa yang ma lags so//yul ni yul sa'o/ /phyogs ni grong la sogs pa'o/ /'das pa la sogs pa ni dus so/ /gnyis la sogs pa ni gnas skabs so/ /skye ba ni rgyun gyis so/ /de med pas mi skye ba'o/ /'gag pa ni rgyun chad pa'o/ /de med pas mi 'gag pa ste/bcom ldan 'das ni mi gnas pa'i mya ngan las 'das pa yin pa'i phyir ro/ /'dir bsdus pa'i don ni 'di yin te/ de bzhin nyid ni/ de bzhin gshegs pa sngon med pa'i ngo bo skyed par byed pa ma yin gyi/ 'on kyang yang dag pa ma yin pa'i mngon par zhen pa'i skyon mtha' dag sbyangs pas dri ma med pa thob pa yin te/chos la bdag med pa'i ye shes kyi snga rol du gzung ba dang 'dzin par mngon par zhen pa'i ling tog stug pos de khebs pa'i phyir ro/ /de ma rtogs pa yod pa yang de'i phyir yang dag pa ma yin pa'i rnam par rtog pa de snga nas yod pa'i phyir ro//dus phyis ni lan mang du thabs mang pos yun ring por chos bdag med pa'i ye shes goms par byas pas bsgom pa khyad par du gyur nas rnam par rtog pa mtha' dag rgyun chad de de kho na nyid kyi ye shes byung ba dang sgro 'dogs pa'i bag la nyal thams cad kyi gnas kyang med par gyur to/ / de'i bdag nyid gang yin pa'i de bzhin gshegs pa yid bzhin gyi nor bu rin po che lta bu ni 'gro ba ma lus pa'i bsam pa yongs su rdzogs par mdzad pa yin no/ /de bzhin nyid 'di ni 'di ltar kun nas nyon mongs pa'i yang yin te/ yod pa dang med par mngon par zhen pa gnyis dang ldan pa gang yin pa'o//'di nyid 'di ltar rnam par dag pa yang yin te/ de kho na nyid mthong ba'i bdag nyid dang bcas pa'i sems gang la mngon par zhen pa mtha' dag dang bral ba'o/ /de rnam par dag pa yang rim gyis 'gyur ro/ /'das pa la sogs par rnam par bzhag pa ni de bzhin nyid rnam par dag pa'i bdag nyid de bzhin gshegs pa gang du gnas pa dang gshegs pa la sogs pa yang dag pa ma yin pa kho na yin no//'on kyang 'jig rten pa dag de'i dbang gis de lta bur snang ba skye ba gang yin pa'i ngor byas nas de skad du bshad do/ /sangs rgyas bcom ldan 'das ni ci'i phyir mi gnas pa'i mya ngan las 'das pa yin zhe na/de rigs pa dang lung gis yin te/ gang dag gnas pa'i rgyu tshogs pa de dag ni gnas pa dang bral bar mi 'gyur te/ dper na du ba la sogs pa gnas pa'i rgyu me dang shing la sogs pa tshang bar tshogs pa bzhin no//sangs rgyas bcom ldan 'das kyang 'khor ba ji srid par bar ma chad par gnas pa'i rgyu can yin no/ /gnas pa rnam par 'jig pa la khyab par byed pa ni gnas pa'i rgyu nyid tshogs pa ma yin no/ /de ni 'dir 'gal bar bstan pas khyab par byed pa 'gal ba dmigs pa yin no//chos mi mthun pa ni du ba la sogs pa rgyun chad pa'o/ /rgyu ma tshang ba med pa ni 'bras bu 'byung bar mi rigs pa 'gal bar byed pa yin no/ /gtan tshigs ji ltar 'grub ce na/ bshad pa/ gnas pa'i rgyu ma tshang ba ni sems can gyi don sgrub pa'i nus pa med pa'i phyir dang / snying rje chen po dang bral ba'i phyir dang / tshe'i 'du byed bzhag pa'i dbang med pa'i phyir dang / srog gi dbang po rnam par smin pa'i las yongs su zad pa'i phyir dang / sangs rgyas kyis gdul bar bya ba'i sems can med pa rnams yin no/ /de dag las bzlog pa de ni gnas pa'i rgyu yin no//de la ston pa ni ye shes kyi nus pa thogs pa mi mnga' bar zhal gyis bzhes pas rnam par rtog pa dang po ltar yang ma yin te/ de la gzhan du yin na ni bse ru lta bu la sogs pa dang bye brag ci yod/ bram ze gtsang sbra can gyis mi thod can yun ring du bsten pas skyug mi bro ba bzhin du de'i bdag nyid du gyur pa'i phyir thugs brtse ba ni 'bad pa ma byas par nyams pa med do//'bad pa yang skyon du ma mthong bar mi 'byung ngo / /de yang 'di ni yod pa ma yin te/ yon tan gyi rang gi ngo bo yin pa ci'i phyir de nyid la blo lhag par phyogs pa'i phyir yang rnam par rtog pa gnyis pa ltar yang ma yin no//rdzu 'phrul gyi rkang pa bsgom pa mthar phyin par song ba'i phyir rnam par rtog pa gsum pa yang rigs pa dang ldan pa ma yin no/ /de skad du kun dga' bo gang yang rung bas rdzu 'phrul gyi rkang pa bstan cing bsgoms te lan mang du byas na ni 'dod na bskal pa'am bskal pa las lhag par gnas par 'gyur ro zhes gsungs so//'bras bu srog gi las zad pa yang bskal ba mi nyung bar srog gcod pa spangs pa bsags shing goms pa mtha' yas pa'i thabs sbyin pa la sogs pa'i pha rol tu phyin pa dang ldan pa'i 'gro ba'i bla ma la srid pa ma yin no/ /rgyu mchog tu gyur pa gang yin pa'i 'bras bu mchog tu gyur pa dang /mchog tu gyur pa ma yin pa yin na 'bras bu mchog tu gyur pa ma yin no zhes bya ba 'di ni rgyu dang 'bras bu gnyis kyi chos yin no/ /de lta ma yin te/ rgyu mchog tu gyur pa dang / mchog tu gyur pa ma yin pa las 'bras bu de ltar mi 'gyur na ni 'bras bu dang de byed pa'i dngos por ma gyur pa yin te/de'i bye brag la ltos pa med pa'i phyir ro/ /ston pa la yang srog de'i rgyu gzhan gyis srog gcod pa la sogs pa kha na ma tho ba med pa dpag tu med pa yod pa yang ma yin na des ji ltar 'di gnas pa med pa yin/ de kun gyi 'bras bu ni thams cad mkhyen pa 'di yin no zhe na yang ma yin te/srog yun ring du yod par dngos su bstan pa'i phyir te/ srog gcod pa spangs pa dang sbyin pa'i pha rol tu phyin pa gnyis kyi 'bras bu tshe rabs mi nyung ba yin par bstan to/ /gang yang dngos su gang gi rgyu yin par bstan pa de yongs su rgyas shing rkyen nye bar gyur pa na de skyed par byed pa de bzhin du/gal te gzhan gyi rgyu nyid du yang 'gyur na de'i tshe nyes pa ci yod/ gzhan yang chos de kho na nyid goms pa'i dbang gis ni rnam pa thams cad mkhyen pa 'grub par 'gyur la/ bsod nams kyi tshogs ni de'i gnas khyad par du gyur pas na rjes su mthun par 'gyur ro//'di snyam du de bzhin gshegs pas gdul bar bya ba'i sems can med pas yongs su mya ngan las 'das so snyam du sems na/ 'dir bsam par bya ste/ ci sangs rgyas kyi gzugs kyis gdul bar bya ba'i sems can med pa'am/ci gzhan gyi gzugs kyis gdul bar bya ba yang med pa yin/ gal te phyogs snga ma yin na ni de'i che brgya byin la sogs pa'i gzugs bstan pas gdul bar bya ba'i skye bo yod pa'i phyir de'i gzugs kyis ci'i phyir mi bzhugs/ thugs rje dang ldan pa rnams ni 'gro ba'i phan pa bsgrub pa'i phyir khyad par gzhan la yang bstan par mdzad de/ji ltar bcom ldan 'das kyis 'khor los sgyur ba'i gzugs bstan pa lta bu'o/ /gzhan yang 'jig rten gyi khams gcig tu sangs rgyas kyis gdul bar bya ba'i skye bo med du zin kyang 'jig rten gyi khams gzhan dag na de dpag tu med pa yod pa'i phyir ci'i phyir 'di yongs su mya ngan las 'da'//bcom ldan 'das nyid kyis kyang / sangs rgyas mya ngan mi 'da' ste/ /chos kyang nub par mi 'gyur ro/ /sems can yongs su smin bya'i phyir/ /mya ngan 'da' bar bstan pa yin/ /zhes gsungs so//shin tu spros pas chog gis skabs nyid brtsam par bya'o/ /de ltar na de bzhin gshegs pa mthong ba dang / phyag bgyis pa dang zhes bya ba la sogs pa ni skabs kyi don mjug sdud pa'o/ /ji skad du bstan pa'i rnam pa las bzlog ste rnam pa gzhan du mngon par zhen pas de bzhin gshegs pa mthong ba don yod do snyam du kha cig dogs pa la 'jam dpal khyod kyis de ltar bltas na ci zhig mthong zhes bya ba la sogs pa 'di gsungs so//de ltar bltas na mthong ba ci yang ma mchis so zhes bya ba ni lan yin te/ rang khong du chud pa tsam las ma gtogs par zhes dgongs pa'o/ / gzhan dag 'di snyam du dogs te/ 'jam pa'i dbyangs 'di ni don dka' ba'i rjes su zhugs pa yin te/ gang yang mthong ba med pa'i tshul gyis gnas la/ de bzhin gshegs pa yang mthong ba dang / sems can gyi khams mtha' dag la khyab par byed pa'i byams pa'i dgongs pa'i rtsa ba can byang chub kyi sems sngon du song ba'i brtson 'grus kyis bsod nams dang ye shes kyi tshogs rdzogs par mdzad pa dang /rnam par mi rtog pa'i ye shes kyis sems can yang mi dmigs pa dang / rtog pa dang bcas pas kyang mngon par zhen pa med par de la 'jug pa ni re zhig 'dis kyang shin tu don dka' ba yin par srid na/bdag 'dra bas lta smos kyang ci dgos zhes de skad du dogs pa 'di brjod pa la/ 'phags pa shA ri'i bus 'jam dpal de bzhin gshegs pa la khyod kyis de ltar mthong ba dang zhes bya ba la sogs pa nas/ sems can thams cad kyi ched du go cha chen po bgos pa de ni khyod dka' ba byed pa'o zhes bya ba'i bar du gsungs so//byams pa chen po zhes bya ba ni byang chub kyi sems kyis bskul te sems can thams cad kha na ma tho ba med pa'i bde ba skyed 'dod pa'o/ /gzhan dag na re dmigs pa med pa'i byams pa yin no zhes zer ro/ /sems can thams cad yongs su mya ngan las 'da' ba'i phyir zhugs kyang zhes bya ba ni 'gro la phan pa'i phyir sangs rgyas 'grub par shog ces byang chub tu sems bskyed pa'i phyir ro//go cha zhes bya ba ni brtson 'grus kyi bdag nyid 'gro ba gdon par spro ba'o/ /go cha de yang dmigs pa la sogs pa'i tshul gyis yin no/ / ji skad smras pa de de bzhin te zhes bya ba ni dman pa la mos pa'i skye bo la 'tsham pa ma yin pa'i chos la rjes su spyod pa'i phyir dka' ba mdzad pa nyid yin par zhal gyis bzhes so/ /sems can mi dmigs pa yin yang sems can mya ngan las 'da' ba'i go cha mi 'gal bar bstan pa ni sems can thams cad yongs su mya ngan las 'da' ba'i phyir go cha 'di yang mos pas spyod pa'i sa'i gnas skabs su bgos pa yin no//bdag la sems can du dmigs pa gang yang med do zhes bya ba ni gzung ba dang 'dzin pa'i mtshan nyid spangs pa'i phyir ro/ /de ni yang dag pa yin no zhe na yang ma yin te/de med du zin kyang sems can sgro 'dogs pas 'khrul pa nyid yin no/ /ci'i phyir zhe na de'i phyir/ sems can du mngon par zhen pa bdag la gang yang med par gyur pa yin te/ sgyu ma mkhan bzhin du gnas pa'i phyir ro/ /'di ltar sgyu ma mkhan ni sgyu ma'i glang po che la sogs pa la mngon par zhen pa med pa de bzhin du/bdag gis sems can du dmigs pa de yang de bzhin no zhes dgongs pa'o/ /'dir bsdus pa'i don ni 'di yin te/ byams pa chen pos brgyan cing byang chub chen po'i dgongs pa can mngon par zhen pa thams cad spangs pa rnams kyis thog ma nyid du de bsgom pa ni yid kyi chos yin pa'i phyir kun tu rgyu mi thod can skyug bro ba bzhin du/rnam par rtog pa'i rgyu mtha' dag spangs pa na gsal ba kho nar 'gyur bas lhag pa'i bsam pa mi g.yo ba rnams la dka' ba cung zad kyang med do/ /bsgom pa'i sbyor ba la sdar ba rnams la ni mtha' dag shin tu dka' bar snang ngo //spro ba 'di yang 'khor ba dang mya ngan las 'das par gtogs pa'i sems can go rims bzhin du nyung ba nyid dang / yongs su mang ba nyid du bya ba'i phyir brtsams pa ma yin nam/ ji ltar na sems can du dmigs pa dang /mngon par zhen pa de med pa yin zhe na/ de'i phyir/ de ltar ma dgongs so zhes bya ba smras so/ /ji ltar yin zhe na/ 'di ltar bdag gis sems can gyi khams bri ba'am gang bar bya zhes bya ba gsungs so/ /go cha de lta bu yin na nyes pa ci yod ce na/ de'i phyir/ btsun pa sha ra dwa ti'i bu yongs su brtags pa nye bar bzung ste/gal te zhes bya ba la sogs pa gsungs te/ gtan tshigs bstan pa ni gsal ba yin no/ /gal te zhes bya ba ni ji ste zhes bya ba'i don to/ /gang bar mngon pa med do zhes bya ba ni mi dmigs so zhes bya ba yin no/ /de ci'i phyir zhe na zhes bya ba ni yongs su 'dri ba'i don gtan tshigs gang zhes bya ba ste/ci mthong ba'i rgyu dang bral ba'i phyir yod kyang mi dmigs pa yin te/ mun rum gyi nang na bum pa la sogs pa 'dug pa bzhin nam/ med pa'i phyir rta'i rwa la sogs pa bzhin nam zhe na/ 'dir lan du rnam par rtog pa ni sems can dben pa'i phyir dang zhes bya ba smras so//sems can zhes bya ba ni srog chags te/ de dag gi tshogs rgyun gyi gnas skabs kyi bye brag gzung bar bya ba la sogs pa'i ngo bor brtags pa'o/ /sems can med pa ni med pa'o/ /sems can dngos po med pa yin na byang chub pa'i gnas skabs na khyod ji ltar chos 'chad pa 'grub par 'gyur/mo gsham gyi bu rtogs par bya ba'i phyir chos 'chad pa smra bar nus pa'i mkhas pa med par ston to zhes bya ba 'di ni/ 'jam dpal gal te sems can dben ba dang sems can sems can ma yin pa'i phyir zhes bya ba la sogs pa ni rgol ba yin no//de skad ces smras pa dang / 'jam dpal gzhon nur gyur pas tshe dang ldan pa sha ra dwa ti'i bu la 'di skad ces smras so/ /btsun pa sha ra dwa ti'i bu gang gi tshe sems can shin tu mi dmigs pa zhes bya ba la sogs pa ni lan 'debs pa yin te/sems can shin tu mi dmigs pa ni gzung ba la sogs pa med pa'i phyir ro/ /de'i tshe 'gro ba su zhig mngon par rdzogs par 'tshang rgya ste 'ga' yang ma yin no/ /'tshang rgya ba po dang / 'ga' zhig 'tshang rgya bar bya ba dang / 'tshang rgya ba yod pa ma yin pa'i phyir ro zhes bsams pa'o//bstan par bya zhes bya ba ni chos gang zhig bshad par bya ste/ bshad par bya ba'i chos spyi'i rnam pa dang bshad pa'i sgra'i spyi'i bdag nyid dang de 'dzin par byed pa yang med pa'i phyir ro/ /de ci'i phyir zhe na zhes bya ba 'dri ba'i bsam pa ni nyan par byed pa'i sems can mi dmigs pa'i phyir ro zhes bya ba 'di tshig gi don yin no//ji ltar zhe na/ chos thams cad rang dang gzhan gyi rgyud la gzung ba la sogs pa shin tu med pa'i phyir ro/ /'di ltar chos thams cad shin tu mi dmigs pa'i phyir ro zhes bya ba 'dis ni ji ltar bstan pa'i tshig gi don gsal bar byed pa yin no//rang nyid kyis dris pa ni gzhan gyi 'dri ba la sdod na/ rgyun mi 'chad par chos 'chad par byed pa bar chad pa la mi dga' bar 'gyur ba med par bya ba'i phyir dang / 'dri ba po yang mi shes pa'am spobs pa med de 'dri bar mi byed pa la phan gdags pa'i phyir ro/ /'phags pa 'jam dpal gyi tshig de dag gis sgro 'dogs pa'i mtha' spang ba byas pa de'i dgongs pa'i don khong du ma chud nas shin tu sems can la sogs pa med par khong du chud nas skur pa 'debs pa'i mthar lhung ba mngon du gyur pa dang /de'i phyir bcom ldan 'das kyis 'jam dpal gang gi tshe chos thams cad shin tu mi dmigs pa de'i tshe ci sems can du yang 'dogs sam zhes bya ba 'di gsungs te/ci'i phyir ston zhes bya ba'i tha tshig go/ /yang zhes bya ba'i sgras sngon gyi thugs rje dang pha rol tu phyin pa'i tshogs rnams kyang bsdu ba'i phyir ro/ /'dogs pa nyid byed pa ma lags so zhe na/mi rung ste/ de gdags pa ni gdon mi za bar bya dgos pa'i phyir ro/ /'di ltar gal te yang 'ga' zhig sems can ji snyed yod ces de skad 'dri na zhes bya ba ni mthar lhung bar gyur cing the tshom za ba'i blo can dag sems can ji snyed yod ces de skad 'dri ba'o/ /de skad 'dri ba la ji skad brjod par bya zhe na/sangs rgyas kyi chos ji snyed pa de snyed do zhes lan gdab par bya ste/ sems can mtha' med pa dang / gnyis su med par ston pa yin te/ sangs rgyas kyi chos ji snyed pa rtog pa'i dra ba thams cad dang bral ba de snyed kyi sems can gnyis su med pa'i bdag nyid yin no zhes bya ba'i tha tshig go//sems can gyi khams kyi tshad ji tsam zhes bya ba ni 'di'i tshad ji tsam zhes bya ba yin no/ /sangs rgyas kyi yul gyi tshad ji tsam zhes bya ba yang de bzhin no/ /sangs rgyas kyi yul ni chos kyi dbyings te/ de ni thams cad du song ba yin pa'i phyir dpag tu med pa yin no//dpe rnam pa 'di gnyis kyis kyang de kho na nyid gnyis su med pa rjod par byed pa yin te / yan lag dang yan lag can tsam brjod par 'dod pa'i sgo nas 'dri ba snga phyi gnyis kyi don dbye ba yin no/ /yan lag dang yan lag can tha dad pa med du zin yang 'on kyang 'dri ba po'i bsam pa sna tshogs kyi sgo nas don gcig po gsal bar bya ba'i phyir gnyis bstan to//de ltar na sems can dpag tu med pa yod pa'i phyir chad pa'i mtha' rigs pa ma yin no zhes bya ba bsdus pa'i don yin no/ /'jam dpal khyod la gal te yang 'ga' zhig 'di skad du sems can gyi khams gang du gtogs zhes 'dri na zhes bya ba ni de ltar gal te sems can gyi khams gdon mi za bar yod pa yin na rang gi ngo bo 'ga' zhig dang gzhi yang yod par bya dgos pas na bdag nyid gang yin/gnas kyang gang yin/ de'i bdag gang du 'du zhes bya ba'i don de ni 'dri ba'i bsam pa yin no//bdag gis 'di skad du skye ba med pa bsam gyis mi khyab pa gang du gtogs par gtogs so zhes bgyi'o zhes bya ba ni skye ba med pa nyid dang / bsam gyis mi khyab pa gang du gnas pa'i ngo bo der sems can gyi khams gnas pa yin no/ /skye ba med pa ni sngar bstan pa'i tshul gyis stong pa nyid la bya'o//de nyid bsam gyis mi khyab pa yin te/ bsam pa thams cad kyi gnas ma yin pa'i phyir ro/ /gnas par byed pa'i ngo bo gang du gnas she na/ 'di skad du skye ba med pa'i khams ci la gnas pa de la sems can gyi khams gnas so zhes bgyi ste/ gang du yang gnas pa mchis so zhes bya ba'i tha tshig go//'di ltar yang dag pa ma yin par kun tu rtog pa ma gtogs par ni cung zad kyang yod pa ma yin no/ /kun brtags pa skye bar rnam par rtog pa yang de las logs shig na med do/ /dben pa ni rnam par dben pa'i rang gi ngo bo nyid yin pa'i phyir ro//de lta ma yin te/ dben pa las de log pa'i ngo bor yod pa yin na ni stong pa nyid dang 'gal bar 'gyur ro/ /tha dad pa med pa nyid yin na yang gzhi dang gnas pa med de 'di'i gnas ni rang gi ngo bo tha dad pa yin pa'i phyir ro/ /de bzhin du yang dag pa ma yin par kun tu rtog pa'i bdag nyid kyi sems can gyi khams la yang sbyar bar bya'o//de bas na 'di'i gnas ni ci yang yod pa ma yin no/ /de bas na gnas skabs de lta bu de la sems can gyi khams gnas pa'i tshig gi don ma rtogs nas gnas dang gnas shes par byed pa'i dngos po ni yang dag pa kho na yin par brgya la 'ga' zhig sems shing smra ba gnas dang gnas par byed pa ni dngos su yod pa ma yin nam/de las gzhan ci zhig med pa yin na dam pa gang yin pa bsgom bar bya ba'i phyir stong pa nyid bsgom pa ston zhe na/ de'i phyir bcom ldan 'das kyis 'jam dpal khyod gang gi tshe shes rab kyi pha rol tu phyin pa bsgom pa de'i tshe zhes bya ba la sogs pa gsungs so//gang gi tshe bdag shes rab kyi pha rol tu phyin pa bsgom pa de'i tshe mi gnas par zhes bya ba la sogs pas don ci bstan zhe na/ mi gnas par zhes bya ba ni gnas dang gnas la sogs pa med pa'i phyir gzung ba dang 'dzin pa la sogs par mngon par zhen pa med par bstan to//mngon par zhen pa med na yang bsgom pa ci zhig yod/ 'di ltar bsgom pa ni yang nas yang du goms par byed pa yin la/ de yang rnam par rtog pa yin/ de yang mngon par zhen pa yin no/ /de ltar rnam par rtog pa'i rang gi snang ba la don med bzhin du don du mngon par zhen pa 'jug pa'i phyir ro snyam pa de'i phyir/'jam dpal mi gnas pa la shes rab kyi pha rol tu phyin pa bsgom du yang ci yod ces gsungs so/ /gang ci la yang mi gnas pa de nyid ces bya ba la sogs pa ni lan yin te/gang ci la yang mi gnas pa de nyid ces bya ba ni bsgom pa gang yin pa ni ci la yang mngon par zhen par byed pa ma yin no zhes bya ba'i tha tshig go/ /gzhung gzhan las gang ci la yang mi gnas te zhes 'byung ba der ni gzung ba dang gnas pa la sogs par mngon par zhen pa med ces bya ba'i tha tshig go//thog mar bsgom pa'i gnas skabs na ni rnam par rtog pa 'byung ngo / /yun ring du goms par byas pas gong na med par song zhing mchog tu gsal ba'i gnas skabs su gyur pa na gcig kho nar de rgyu ba med do zhes bya ba ni bsdus pa'i don yin no/ /'o na gal te shes rab kyi pha rol tu phyin pa bsgom pa ni mngon par zhen pa thams cad dang bral ba yin na de ji ltar sgom pa pos dge ba'i rtsa ba 'phel ba dang /mi dge ba'i rtsa ba 'bri bar byed ces 'ga' zhig dogs pa de bcom ldan 'das kyis 'jam dpal khyod gang gi tshe shes rab kyi pha rol tu phyin pa bsgom pa de'i tshe khyod kyi dge ba'i rtsa ba gang 'phel ba'am 'bri bar 'gyur zhes dris so//'am zhes bya ba'i sgras ni mi dge ba'i rtsa ba'i phyogs 'di bsdus pa'i phyir ro/ /bcom ldan 'das de'i tshe bdag gi dge ba'i rtsa ba gang 'phel ba'am zhes bya ba la sogs pa ni lan yin no/ /ci'i phyir zhe na/smras pa/ 'di ltar gang las zhes bya ba 'dzin par byed pa bdag la sogs pa'i rang gi ngo bo byed pa pos shes rab kyi pha rol tu phyin pa sgom par byed pas gang dang 'brel pa'i chos dge ba'am mi dge ba 'ga' zhig 'phel zhing rgyas par 'gyur ba'am/ 'bri zhing 'grib par 'gyur bar byed pa ma mchis so//'di skad du bstan te/ sems can gang dge ba'i rtsa ba stobs dang ldan pas bsgoms pa'i stobs kyis dge ba 'phel bar byed pa dang 'grib par byed pa'i sgom pa po ni dge ba'i chos de las logs shig na 'ga' yang ma mchis so/ /'on kyang de nyid la brten nas sgro btags pa de byed pa po yin no//byed pa po'i tha snyad tsam thams cad kyang de lta bu'i rnam pa yin pa'i phyir ro/ /brtags pa'i ngo bo rjes su 'gro ba ni don byed pa ma yin no/ /de lta mod kyi 'di bsgom pa yang yin te/ 'di gnyis 'phel ba dang rgyas par bya ba'i ched du 'jug pa'i phyir ro//gang gi phyir de lta yin pa de bas na/ gang yang chos 'ga' zhig 'phel ba'i slad du'am 'bri ba'i slad du nye bar gnas pa de ni zhes bya ba la sogs pa gsungs so/ /gal te mi dge ba'am dge ba 'bri ba'am rgyas par bya ba'i don du 'di 'jug pa ma yin na de ji ltar go rims bzhin du so so'i skye bo'i chos 'dod chags la sogs pa spong bar 'gyur/sangs rgyas kyi chos stobs dang mi 'jigs pa la sogs pa len par 'gyur zhe na/ de'i phyir/ bcom ldan 'das gang so so'i skye bo'i chos rnams kyang mi spong la zhes bya ba la sogs pa gsungs so/ /de ci'i slad du zhe na zhes bya ba'i don ci zhe na/ci shin tu bsgoms pa'i dbang gis so so'i skye bo'i chos spong ba dang / sangs rgyas kyi chos bskyed pa med pa nyid kyis spong ba med pa dang / len pa med pa zhes brjod dam/ 'on te mi dmigs pa'i tshul gyis shin tu bsgoms pa las byung ba'i 'phags pa'i shes rab kyi dbang pos gang gi tshe rtsal gyur pa de'i tshe rtsol ba med par yang so so'i skye bo'i chos rnams kyang spong bar 'gyur la/sangs rgyas kyi chos rnams kyang mngon sum du 'gyur/ de dag ni rang las ma gtogs pa rnams mi dmigs pa'i phyir spong ba med pa dang / len pa med pa zhes brjod ces bya ba 'di ni gtan tshigs yongs su 'dri ba'i don yin no//de la 'dir nyon mongs pa dang rnam par byang ba'i gnas skabs med par thal bar 'gyur ba'i phyir phyogs dang po ltar ni ma yin no/ /'on kyang 'og ma ltar yin pas/ bcom ldan 'das 'di ltar shes rab kyi pha rol tu phyin pa bsgom pa ni zhes bya ba la sogs pa gsungs so//chos gang rnam par byang ba'am kun nas nyon mongs pa dmigs pas chos gang la yang mi gnas pa ni so so'i skye bo dang / sangs rgyas kyi chos go rims bzhin du spang pa'am blang ba rnams gzung ba'i mtshan nyid dang bral ba'i phyir ro//gal te de dag 'ga' la yang dmigs pas mi gnas na/ 'o na ji ltar srid ba'i nyes pa brgal ba la sogs pa gang yin pa dang / de dang bral ba'i mya ngan las 'das pa'i yon tan dmigs she na/ de'i phyir/ bcom ldan 'das gang 'khor ba'i skyon du yang mchi la zhes bya ba la sogs pa gsungs te/ 'khor ba'i skyon dang mya ngan las 'das pa'i yon tan du mchi ba dang / nye bar dmigs pa dang / rtog pa'i bar du ma lags pa'o/ /de ci'i slad du zhe na zhes bya ba ni rigs pa gang gis smras/ci med pa'i phyir ram/ 'on te yod kyang dmigs par mi rung ba'i phyir yin zhe na/ rtog pa dang po ltar na ni nyon mongs pa dang / rnam par byang bar rnam par gzhag pa de nyid mi 'thad par 'gyur ro/ /rtog pa gnyis pa ltar na ni rigs pa min pas de'i phyir/bcom ldan 'das 'di ltar 'khor ba nyid kyang mi mthong na zhes bya ba la sogs pa gsungs so/ /dgongs pa ni 'di yin te/ 'dod chags la sogs nyon mongs bsgos / /sems nyid dag ni 'khor ba yin/ /de nyid de dang bral ba na/ /srid pa'i mtha' zhes rab tu bshad//de bas na mi dmigs pa'i ting nge 'dzin goms pa'i rgyu des 'khor ba'i bdag nyid 'bad pa med par rnam par log ste/ du ma dang gcig la sogs par spros pa'i tshogs dang bral te rab tu zhi bar zhugs pa'i rgyun bar ma chad pa ji srid 'khor ba ma lus pa'i srid pa'i rgya mtshor bying ba'i 'gro ba gdon pa la mkhas pa byung ba ni mya ngan las 'das pa zhes bya'o//de bas na sems las ma gtogs par 'khor ba dang mya ngan las 'das pa gnyis dang / de'i skyon dang yon tan dmigs pa ma yin no/ /rang rig pas kyang ma yin te/ rang rig pas yin na ni gzung ba dang 'dzin pa'i dngos por gyur pa yang dag pa ma yin pa'i phyir zhes gsungs so//de lta na gdul bya 'khor ba'i nang nas ji lta ji ltar dogs pa'i yid skye ba ni sngar bstan pa'i tshul gyis dngos su lan glan zin kyang de'i dogs pa skye ba'i rgyun rnams la dogs pa skyed cing dogs pa bsal bar bya'o//de lta ma yin na thog ma nyid du gzhag pa kho nas dogs pa'i skabs ma lus pa med pas bshad pa phyi ma rnams brtsam mi dgos par thal bar 'gyur ro/ /srid pa'i skyon dang / mya ngan las 'das pa'i yon tan ma mthong na bsgom pa 'dis ji ltar mthong ba'i lam skyed par byed cing /bsgom pa'i lam 'dzin par byed/ de gnyis kyis sgrib pa thams cad la nges par 'byin pa sgrub par yang ji ltar 'gyur zhe na/ 'dir bcom ldan 'das chos gang la yang blang ba'am/ gzung ba'am/ dor ba ma mchis pa de zhes bya ba la sogs pa gsungs so//dor ba ni spangs pa'i phyir nges par 'byin pa la bya'o/ /chos gang la yang zhes bya ba ni gang las kyang zhes bya bas rnam par dbye ba bsgyur bar bya'o/ /len par byed pa'i byed pa po dang 'dzin par byed pa'i bdag nyid mi srid pa'i phyir blang ba'am ste/blang bar bya ba'am gzhan du yang rung mi srid do zhes bya ba'i tha tshig go/ /de bas na/ mthong bsgom chos kyi ngo bo yi / /shes rab pha rol phyin pa 'di/ /goms pa 'phel bar gyur na ni/ /sgrib pa thams cad spangs pa yin// //'phags pa shes rab kyi pha rol tu phyin pa bdun brgya pa rgya cher bshad pa/bam po gnyis pa/ 'ga' zhig yang srid pa'i skyon bsal ba dang / rnam par byang ba'i chos bskyed par go rims bzhin du de bzhin nyid 'grib pa dang / 'phel ba mngon par zhen nas 'di snyam du sems te/ blang ba dang gzung ba dang dor ba gal te med na srid pa dang mya ngan las 'das par gtogs pa'i sems can gyi khams de 'grib pa dang 'phel bar ji ltar 'gyur/sgrib pa dang spangs pa yod na ni gdags su rung ngo zhe na de'i phyir/ bcom ldan 'das gang chos gang la yang 'grib pa dang zhes bya ba la sogs pa gsungs so//de ci'i slad du zhe na zhes 'dis khungs 'dri ba'i bsam pa ci zhe na/ ci rig par bya ba'i mtshan nyid dang mi ldan pa'i phyir mi dmigs pa'am/ 'on te de med pa'i phyir zhes bya ba yin no/ /de la rnam par rtog pa dang po ni rang rig pas de dmigs pa la 'gal ba ci yod ce na/rig par bya ba la brtags na med pa'i phyir ro/ /de bas na 'dir ni rnam par rtog pa gnyis pa ltar 'dod pa yin pa'i rigs pa ni/ bcom ldan 'das skye ba ma mchis pa la zhes bya ba la sogs pa gsungs so/ /skye ba med pa ni stong pa nyid do//skye ba med pa de'i tshul gyis na 'grib pa dang 'phel ba ma mchis te/ dus thams cad du ngo bo gcig pa'i phyir ro/ /'grib pa dang 'phel ba de ni rgyas pa dang 'phel bar brtags pa'i ngo bo yin no/ /brtags pa ni lan 'ga' yang yod pa ma yin no//yod pa gang yin pa sngon du song ba yin na ni bri ba yin te/ de ni glo bur gyi dri ma dang bral ba tsam yin par bstan to/ /bcom ldan 'das gang de ltar sgom pa de shes rab kyi pha rol tu phyin pa sgom pa lags so zhes tshig lan du mar smos pa ci'i phyir zhe na/ bsgom pa gces par bstan pas sgrub pa po rnams kyi brtson 'grus 'phel bar bya ba'i phyir ro//byed pa po la sogs pa med na stobs dang byang chub kyi yan lag la sogs pa'i yon tan skye ba dang / sgrib pa thams cad spang ba 'di la ji ltar brtson par byed ce na/ de'i phyir/ bcom ldan 'das gang chos gang yang skye ba'am zhes bya ba la sogs pa gsungs te/byed pa med pa'i phyir dang / 'jig pa la rgyu med pa'i phyir te/ gzhan du gyur pa'i byed pas stong zhing rkyen 'di pa tsam yin no/ /'gag pa dang skye ba'i dngos po med na nyon mongs pa dang rnam par byang ba'i yan lag rnams 'bri ba dang rgyas pa nyid du ji ltar byed ce na/byed pa med pas na/ bcom ldan 'das gang chos gang la yang 'grib pa'am rgyas par mi bgyid pa de zhes bya ba la sogs pa gsungs te/ byed pa med pa'i phyir dang / 'jig pa la rgyu med pa'i phyir ro zhes dgongs pa'o/ / gal te de ltar spros pa med pa yin na ji ltar stobs bcu dang / sa gong nas gong du gnas pa'i byang chub sems dpa' dang 'brel ba'i yon tan rnams de tshol bar byed ce na/ de'i phyir/ bcom ldan 'das gzhan yang bsam gyis mi khyab pa'i chos la yang mi smon cing zhes bya ba la sogs pa gsungs so//bsam gyis mi khyab pa'i chos ni de bzhin gshegs pa'i yon tan rnam pa thams cad dang ldan pa dag par gnas pa gang yin pa'o/ /nyi tshe ba ni byang chub sems dpa' yin te/ dri ma med pa'i ye shes kyi rgyun gyi cha nyi tshe ste/ sgrib pa thams cad spangs pa dang bral ba'i phyir ro//ci'i phyir mi smon zhe na/ de'i phyir 'on kyang bcom ldan 'das gang la smon pa dang gang gis smon pa de nyid kyang ma mchis pa de zhes bya ba la sogs pa gsungs te/ 'on kyang zhes bya ba 'di ni 'di ltar zhes bya ba'i don te/ gtan tshigs ston pa'i phyir ro/ /de yang las dang byed pa por gyur pa'i dngos po go rims bzhin du smon par bya ba gang yin pa yod pa ma yin no//'dir gtan tshigs ni byed pa po la sogs pa thams cad phan tshun bye brag bsgrubs pa yin no zhes bya ba la sogs pas bstan to/ /gal te bsam gyis mi khyab pa dang / nyi tshe pa'i chos yod pa ma yin na de ji ltar go rims bzhin du mchog nyid dang /tha ma nyid du mthong zhe na/ de'i phyir bcom ldan 'das shes rab kyi pha rol tu phyin pa bsgom pa ni 'di ltar chos 'di dag ni mchog go/ /chos 'di dag ni tha ma'o zhes bgyi bar nye bar mi gnas shing zhes bya ba gsungs te/sbyor ba'i dus na'o zhes dgongs pa'o/ /gal te phyis 'jug pa na dmigs par 'gyur ro zhe na yang / chos gang dag mchog dang tha mar 'gyur ba'i chos de dag kyang mi dmigs te zhes bya ba gsungs te/ rig par bya ba mi rigs pa'i phyir ro zhes dgongs pa'o/ / kyang gi sgra ni gtan tshigs bstan pa'i phyir yang yin no/ /'o na nyan thos dang rang sangs rgyas kyi chos rnams phan tshun ltos nas gnas dman pa nyid du ji ltar mthong zhe na/ dmigs pa can de dag gi lan ni/ de ltar shes rab kyi pha rol tu phyin pa sgom pa'i rnal 'byor la zhes bya ba la sogs pa yin no//de ltar zhes bya ba ni sangs rgyas dang byang chub sems dpa'i chos bzhi yin no/ /shes rab kyi pha rol tu phyin pa sgom pa nyid kyi rnal 'byor ni ting nge 'dzin to/ /de la brtson pa ni goms par byed pa'o/ /rigs kyi bu'i sgra ni mchod pa'i tshig go//chos thams cad ces bya ba ni nyan thos la sogs pa dang 'brel pa'i 'o / /mi dmigs so zhes bya ba ni rnam par mi rtog pas kyang nyams su ma myong ba'o/ /de bas na de nyid kyi phyir de sngon du song ba can gyi rtog pas kyang mi rtog go/ /de ci'i slad du zhe na zhes bya bas ci bstan zhe na/nyams su myong ba med du zin kyang gzhan gyi dbang gi rtog pa rang dbang can go ci ste mi 'byung / de gang du 'jug pa na dngos po gang la yang 'jug par mi 'gyur ba ma yin nam zhe na/ lan ni/ bcom ldan 'das skye ba ma mchis pa la zhes bya ba la sogs pa yin no//rnam par rtog pa dang 'brel pa thams cad dang bral pa'i shes rab kyi pha rol tu phyin pa bsgom pa la rnam par rtog pa'i ngo bo yod pa ma yin no zhes bya ba ni tshig lhag ma yin no/ /skye ba med pa la med du zin kyang chos thams cad la yod pa ma yin no zhe na/ de'i phyir/ de bzhin nyid de'i bdag nyid dang chos thams cad kyi bar du ste/de'i ngo bo la yang yod pa ma yin te/ bar la zhes smos pas ni yang dag pa'i mtha' dang / mtshan ma med pa dang / don dam pa la sogs pa bsdu'o/ /skye ba med pa la sogs pa ci'i phyir smos/ skabs la mkho ba yin pa'i phyir chos thams cad smos pa ni rigs pa yin no zhe na/'di snyam du dgongs te/ de kho na nyid bsgoms pa ni skye ba med pa la sogs pa 'di sngon du byas te 'jug pa yin pas rnam par rtog pa dang mi 'thad pa de ni rnam par rtog pa 'di'i skabs med pa'i phyir ro/ /skye ba med pa la sogs pa ji lta ba bzhin du khong du ma chud pa rnams ni 'dzin pa la sogs pa'i rnam par brten pa la 'chel ba 'di dag rang dbang dang ldan par 'gyur ro//yang na 'bri ba'i bsam ba ni 'di yin te/ sangs rgyas dang byang chub sems dpa' rnams la chos mi dmigs pa de ni rigs pa yin te/ de dag ni dmigs pa'i tshogs mtha' dag dang mthun pa ma yin no//nyan thos la sogs pa ni de lta ma yin pas de dag gi mi dmigs pa ji ltar yin zhe na/ bcom ldan 'das skye ba ma mchis pa la mchog gam/ tha ma zhes bgyi ba gang yang ma mchis pa'i slad du ste/ dmigs pa yod pa zhes bya ba'i tshig lhag ma'o/ /lhag ma ni snga ma bzhin no/ /nyan thos la sogs pa'i chos rnams ni rnam par rtog pa'i tshogs dang mi mthun ba med pa yin na dmigs par mngon par zhen pa 'jug pa yod pa yin mod ce na/ dmigs par bya ba ni yod pa ma yin te/gzung ba'i mtshan nyid mi 'grub pa'i rigs pa ni thams cad du mthun pa'i phyir ro zhes bya ba ni bsdus pa'i don yin no/ /tshig lhag ma dang bcas te bshad par bya ba 'di ni nges pa yin no/ /de lta ma yin te/ mchog dang tha ma'i rang gi mtshan nyid med pa yin na ni kun nas nyon mongs pa dang rnam par byang ba'i phyogs nyams par thal bar 'gyur ro//de ltar dogs pa ngan pa 'phros pa rnams rim gyis bsal du zin kyang / kha cig yang bstan pa'i dogs pa skyes pa/ gal te nyan thos la sogs pa'i chos dmigs su yod pa ma yin na/ ji ltar de la ltos nas sangs rgyas kyi chos mchog yin par rnam par gzhag par bya zhe na/de'i phyir bcom ldan 'das kyis/ 'jam dpal sangs rgyas kyi chos rnams mchog ma yin nam zhes gsungs te/ zur gyis ston to/ /lan du gzung du ma mchis pa'i slad du sangs rgyas kyi chos rnams ni mchog lags so zhes gsungs te/sangs rgyas bcom ldan 'das kyis gnyis su sgro 'dogs pa dang / sgrib pa thams cad spangs pa'i phyir ro zhes dgongs pa'o/ /de lta ma yin na nyan thos la sogs pa'i chos las mchog yin par bstan du ci zhig yod/gal te gtan tshigs yod pa'i phyir gzung du med pa kho na yin na ni/ 'o na sangs rgyas kyi chos rnams mchog yin par gang gis gzhag par bya/ re zhig de bzhin gshegs pa ma yin pas ni ma yin te/ yul de la dri ma med pa'i ye shes mi srid pa'i phyir ro/ /de bzhin gshegs pas kyang ma yin te/de'i rang rig pa tsam gyis stong pa nyid rtogs pa na mchog la sogs par rnam par rtog pa mi srid pa'i phyir ro zhes de ltar 'og nas 'byung ba'i don gyi de kho na nyid gsal bar bya ba'i phyir/ bcom ldan 'das chos thams cad stong par de bzhin gshegs pas mngon par rdzogs par sangs rgyas lags sam zhes zhus so//'dir mdor na 'di yin te/ stong pa nyid kyi bdag nyid kyi de bzhin gshegs pa'i dbang gis chos thams cad stong pa'o zhes bya ba la sogs pa'i rnam par rtog pa de 'dra ba yang dag pa nyid la 'jug pa'i rgyur gyur pa dag bsod nams dang ldan pas rnyed par 'gyur ro//de dag kyang chos thams cad stong pa yin par ston pas thugs su chud do zhes lhag par zhen to/ /de bas na de dag gi lhag par zhen pa'i dor byas te/ dang po sbyor ba na mnyan pa la sogs pas yid la byed pa dang mthun par de skad bstan to//stong pa nyid ni rang rig pa tsam gyi bdag nyid rnam par rtog pas ma sbags pa nyid mngon par byang chub pa yin no/ /gal te de lta yin na de'i phyir stong pa nyid la sangs rgyas kyi chos kyi bdag nyid dang nyan thos la sogs pa'i chos kyi bdag nyid dag gdags shing dmigs te/rtog pa thams cad med pa'i phyir zhes bya ba'i tha tshig go/ /de ltar rnam pa thams cad du mchog tu dga' ba'i don bstan pas 'jam pa'i dbyangs la gus pa skyes pa rnams kyi dang ba 'phel bar bya ba'i phyir bcom ldan 'das kyis 'jam dpal legs so legs so zhes bya ba la sogs pa gsungs so//tshig gi don 'di thams cad gsal bar spyod yul ma yin du zin kyang smra bar byed pas mngon sum du rtogs pa bzhin du brjod pa la ngo mtshar du gyur nas yang legs so zhes smras so/ /yang na rang gis smra bar 'dod pa gsal bar brjod pa'i phyir rab tu dgyes ches te yin no//yang na 'di dag la legs par smras pa yin no zhes nges par gzung ba'i ched du yang yin no/ /de ltar gsal bar bstan du zin kyang kha cig gi blo 'khyog pa'i rnam par rtog pa 'di skyes pa ni mchog nyid yin par bcom ldan 'das kyis kyang ma mkhyen na ji ltar bla na med pa yin/bla na yod pa kho nar 'gyur te mchog nyid du mi mngon pa'i phyir nyan thos la sogs pa'i chos bzhin no zhe na/ de'i phyir bcom ldan 'das kyis 'jam dpal sangs rgyas kyi chos rnams bla na med pa yin nam zhes gsungs so/ / 'jam dpal gyis gsol pa/ de de ltar lags te zhes bya ba la sogs pa ni lan yin no/ /de ci'i slad du zhe na zhes bya ba'i brjod par bzhed pa gang zhe na/ gleng ba'i gnas skabs de kho na bzhin te/ cung zad kyang lan ma glan no zhes bya ba'i don to/ /bcom ldan 'das 'di ltar zhes bya ba la sogs pas ni rang gi dgongs pa ston to//cung zad tsam yang ste phra mo tsam yang chos bla na med pa la sogs par rnam par bzhag pa'i rnam par rtog pa sangs rgyas kyi chos de dag la ma mchis te/ 'di ltar bcom ldan 'das kyis kyang ma dmigs te/ rnam par rtog pa'i sa bon thams cad spangs pa'i phyir ro//sa bon dang mi ldan pa'i rgyu des na de dag ni bla na med pa sangs rgyas kyi bdag nyid kyi chos zhes bya ste/ de'i gong na mchog cung zad kyang yod pa ma yin no zhes bya ba yin no/ /gzhan dag yang rnam par rtog pa bsgom pa 'di gal te rnam par rtog pa thams cad dang bral ba yin na de ji ltar nges par 'byed pa'i cha dang mthun pa'i gnas skabs mos pas spyod pa'i sa la sangs rgyas kyi chos rnams bsgrub pa'i ched du 'jug par bgyid/spyod par bgyid ces bya ba'i bar du'o/ /ji ltar yang byang chub sems dpa'i sa bcu la mthong ba dang bsgom pa'i lam gnyis kyis so so'i skye bo'i chos dag rtsa nas gdon pa'i phyir dang /sangs rgyas kyi chos nye ba rnams mngon du bya ba'i phyir 'jug pa lags/ 'dul ba ni nye ba rnams mngon du byed pa'o/ /ji ltar sangs rgyas kyi sa kun tu 'od la mngon du gyur pa rnams 'dzin par bya ba'i phyir dang /kun tu bsrung bar bya ba'i phyir 'jug pa lags/ 'di skad bstan te/ nges par 'byed pa'i cha dang mthun pa dang / slob pa dang mi slob pa'i lam rnams su nye bar ma gyur pa rnams bskyed par bya ba'i phyir dang / nye bar gyur pa rnams mngon du bya ba'i phyir dang /mngon du byas pa rnams 'dzin cing bskyang ba'i phyir mchog tu brtson pa 'di yod pa ma yin te/ rnam par mi rtog pa yin pa'i phyir de lta bur byung ma thag pa la sogs pa'i sems kyi rgyun bzhin no zhe na 'di'i lan go rims bzhin du gdab pa'i phyir/bcom ldan 'das gzhan yang gang sangs rgyas kyi chos rnams sgrub par yang mi bgyid la zhes bya ba la sogs pa gsungs so/ /gzhan yang zhes bya ba ni yang zhes bya ba'i tha tshig go/ /'dir gtan tshigs ni byed pa po la sogs pa thams cad kyi bye brag ni phan tshun nye bar bsgrubs pa yin no zhes bstan pa yin pa'o //'on te 'phags pa rang nyid kyis ci'i phyir gtan tshigs ma gsungs she na/ nye ba na gnas pa'i gdul bya'i bye brag la ltos nas rnam par rtog pa'i ched du 'di brtsams pa yin la/ gdul bya de yang skyon med pa'i dngos po bstan pa la gtan tshigs bstan pa med par yang the tshom med par phyin ci ma log pa'i don yang dag par rtogs par 'gyur bar dgongs nas rigs pa bstan par ma byas kyi gzhan du ni bstan pa kho na yin no//gzhan dag rnam par rtog pa 'di dag la gzung ba dang 'dzin pa'i rnam pa dang bral ba yin na mnyan pa las byung ba'i shes pa'i bdag nyid kyis don rnam par shes par byed pa dang /bsams pa las byung ba'i shes pa'i bdag nyid kyis de nyid sems par byed pa dang / bsgoms pa las byung ba'i shes pa'i bdag nyid kyis de nyid yang yang du goms par byed pa dang /yod ming gnyis don yul can ni/ /mnyam las byung ba'i blo sogs yin/ /zhes bya ba de ji ltar rung / mchog tu gyur pa yin pa'i phyir snang byed bzhin du gcig pu kho na smra'o zhe na/ 'dir lan du/ bcom ldan 'das gzhan yang gang chos gang la yang mi sems la zhes bya ba la sogs pa gsungs te/mnyan pa dang bsam pa'i gnas skabs na ni ming la sogs pa la mngon par ma zhen pa'i tshul gyis gnas so/ /bsgoms pas ni nyi ma re re lus rnam par byang ste/ rnam par rtog pa mtha' dag spangs nas 'khor ba'i mtha' ji tsam par bzhugs pa'i nyi tshe la ming ngam/don nam rnam par shes pa'am/ sems pa 'ga' yang yod pa ma yin no zhes bya ba ni bsdus pa'i don yin no/ /gzhan dag kyang 'di la yang dag pa ma yin pa'i rtog pa skyes pa gal te chos 'di sems par mi byed na 'phags pa 'jam pa'i dbyangs 'di pha rol tu phyin pa'i bdag nyid du gyur pa rdzogs pa'i sangs rgyas kyi chos de ji ltar sems par byed ce na/de'i phyir bcom ldan 'das kyis 'jam dpal khyod sangs rgyas kyi chos rnams la mi sems sam zhes gsungs so//lan du gal te bdag gis sangs rgyas kyi chos rnams yongs su grub par mthong na ni bdag sangs rgyas kyi chos rnams la sems pa lags so zhes gsol te/ ji tsam du mthong ba ma mchis na de ji ltar bsam par bgyi zhes dgongs pa'o/ /yongs su grub pa ni yod pa'o//don yongs su grub par ma mthong ba ni rnam pa gnyis te/ bsgom pa dang dus phyis dag pa 'jig rten pa'i gnas skabs na yang yin te/ chos dang chos can du dbye ba med pa kho na yin pas sangs rgyas kyi chos ni 'di dag go zhes dbye bar ma rtogs pa'i phyir ro//rnam par rtog pa'i skyon dang bral ba'i gnas skabs na yang gzhan dmigs pa med pa kho na yin te 'di 'dra ba'i rnam par rtog pa'i gnas med pa'i phyir ro/ /de nyid kyi phyir/ shes rab kyi pha rol tu phyin pa bsgom pa ni 'di dag ni so so'i skye bo'i chos so zhes bya ba nas/chos gang la yang rnam par rtog pas nye bar gnas pa ma lags so zhes bya ba'i bar du gsungs so/ /chos dang chos can gyi dngos po dang / de dang 'brel pa'am 'du ba la sogs pa'i ngo bor rnam par rtog pa mi 'jug pa'i phyir ro/ /'di dag ni so so'i skye bo'i chos so zhes bya ba la sogs pa gsungs pa/so so'i skye bo'i chos la sogs pa smos pa ni rnam par rtog pa gzhan spang ba'i phyir ro/ /de lta ma yin na yang dag par rdzogs pa'i sangs rgyas kyi chos kho na zhig brjod par bya ba yin par 'gyur te/ 'di nyid la the tshom za ba zhugs pa'i phyir ro//de ci'i slad du zhe na zhes bya ba'i dgongs pa ci zhe na/ gal te shes rab kyi pha rol tu phyin pa bsgoms pa na ji skad du bstan pa'i rnam par rtog pa dag nye bar mi gnas pa yin na byis pa so so'i skye bo dang slob pa dang mi slob pa dang bse ru lta bu dag dang 'brel pa'i chos de ma 'dres par ji ltar ston/dmigs pa med par ni tshig 'byung ba ma yin no/ /de bas na ji lta ba bzhin du 'chad pa ni bshad par bzhed pa med na med pa yin la/ bshad par bzhed pa yang rjes su myong ba mi 'khrul ba can yin no/ /rjes su myong ba chos can dang chos la sogs pa la thug pa yin pas don sgrub pa grub pa yin no zhe na/lan du rnal 'byor la brtson pa'i rigs kyi bus chos de nyid kyang mi dmigs te zhes gsungs te/ chos zhes bya ba ni so so'i skye bo la sogs par rnam par gzhag pa'i chos can gyi don la bya'o//mi dmigs pa ni chos can gang yin pa dang 'brel ba nyid du brtag pa dmigs par bya ba med pa'i phyir ro/ /chos de nyid kyang mi dmigs te zhes bya ba la sogs pa la de nyid ces bya ba bsnan pa'i don gang zhe na/ re zhig chos can de nyid kyang mi dmigs na gang ston par byed pa de'i chos lta dmigs su ga la yod ces bya ba'i tha tshig go//mtha' las 'das pa'i chos can lags pas chos de mi dmigs shing yang dag par rjes su mi mthong ba'i slad du'o zhes bya ba tha mar smos pa ci'i phyir zhe na/ slob pa la sogs pa'i tshig dang po nas re re dang sbyar ba'i don yin te/'dis ci yang bstan pa med do zhes bstan pa yin no/ /de yang dmigs pa med pa la spyod pa'i dbang gis chos dang gang zag la bdag med pa rjod par byed pa'i tshig snang ba'i shes pa bsod nams dang ldan pa rnams la skye ba yin no/ /gzhan dag 'di la yang dag pa ma yin par rtog pa dmigs pa med pa yin du zin na/rigs kyi bu dag 'di la brten nas khams gsum gyi nyon mongs pa spangs pa'i phyir dang / 'dod chags dang bral ba'i dbyings dang / spangs pa'i dbyings dang / 'gog pa'i dbyings dag ji ltar mngon sum du byed ce na/ de'i phyir 'dir bcom ldan 'das shes rab kyi pha rol tu phyin pa bsgom pa'i rnal 'byor la brtson pa'i rigs kyi bu 'di ni 'dod pa'i khams so zhes bya ba nas/ 'di ni 'gog pa'i dbyings so zhes bgyi ba'i bar du yang mi shes so zhes bya ba'i bar du gsungs so/ /de la 'dod chags spangs pa ni 'dod chags dang bral ba'i dbyings so//de las gzhan pa zhe sdang la sogs pa'i nyon mongs pa rnams spangs pa ni spangs pa'i dbyings so/ /nyon mongs pa las rnam par grol ba'i dngos po spangs pa ni 'gog pa'i dbyings so/ /ji skad du/ 'dod chags bral ba 'dod chags zad//gzhan dag spangs pas spangs pa'i dbyings/ /'gog par brjod pa dngos po spangs/ /zhes bshad do/ /de ci'i slad du zhe na zhes bya ba ni ci gal te med pa'i phyir ram/ de lta yin na ni 'o na ni nga'i skye ba zad do/ /tshangs par spyad pa bsnyen to/ /bya ba byas so zhes bya ba la sogs pa de dag gi lhag par zhen par byed pa de dag ji ltar lhag par zhen par byed pa 'di rung zhe na/de'i phyir bcom ldan 'das 'di ltar de 'gog pa'i chos gang lags pa'i chos de gang yang mi mthong ste zhes gsungs so/ /'dis bstan pa ni shes rab kyi pha rol tu phyin pa bsgom pa ni dri ma med pa'i ye shes kyis rab tu phye ba'i bdag nyid yin la/de ni rang rig pa tsam gyi ngo bor 'dug la 'dod pa la sogs pa'i khams gsum yang re zhig yod pa ma yin pa'i phyir rang rig par yod pa ma yin na de na yod pa'i 'dod chags la sogs pa lta dmigs par ga la 'gyur/ gang gis na de dang bral ba'i mtshan nyid 'dod chags dang bral ba la sogs pa'i khams dmigs par 'gyur/ gzhan yang so sor brtags pas 'gog pa'i bdag nyid dam/ skye ba med pa'i bdag nyid rtag pa zhig 'dod chags dang bral ba la sogs pa'i dbyings yin na yang mngon sum du byar mi rung ste/dngos po rtag pa ni khyad par gzhan du byar med pa nyid kyis rim dang rim ma yin pa'i sgo nas rang gi yul la shes pa skye ba la mkho ba ma yin pas yul du mi 'dod pa'i phyir ro/ /khyad par gzhag tu yod na yang dngos po mi rtag par thal bar 'gyur ro/ /de bas na 'dod chags la sogs pa dang mi mthun pa'i sgom pa de nyid skyes pa na 'dod chags dang bral ba la sogs pa'i dbyings nyid du rnam par gzhag go//de ltar na rang las logs shig na 'dod chags dang bral ba la sogs pa'i dbyings 'di la dmigs par byed pa ma yin pa ni thams cad ma 'khrugs pa yin no//gzhan dag sems pa 'dod chags dang bral ba la sogs pa'i dbyings yod pa ma yin no / ji ltar bsgom pa 'di 'ga' zhig la phan par byed pa'am/ gzhan dag la gnod par byed pa yin zhe na/ de'i phyir bcom ldan 'das gzhan yang gang chos gang la yang phan pa'am gnod par mi bgyid pa de zhes gsungs so//sangs rgyas rnams la stobs dang byang chub kyi yan lag rnams 'bul bar bgyid pa de dag phan par bgyid pa dang / so so'i skye bo rnams kyi srid pa dang longs spyod la kun du chags pa la sogs pa rgyun gcod par byed pa de gnod par byed pa ma yin nam zhe na/de'i phyir bcom ldan 'das shes rab kyi pha rol tu phyin pa bsgom pa ni sangs rgyas kyi chos rnams sbyin par bgyid pa yang ma lags zhes bya ba la sogs pa gsungs so/ /gal te 'di byed pa ci yang med na ji ltar de bsgom pa zhes bya zhe na/de'i phyir bcom ldan 'das gang so so'i skye bo'i chos kun tu chags pa la sogs pa rnams kyang mi 'gog mi sems te/ 'jig pa la rgyu med pa'i phyir dang / so sor brtags pa'i 'gog pa la sogs pa yang rigs pa dang bral ba'i phyir nam mkha'i ut+pal la sogs pa bzhin du yang dag par yod pa ma yin no//sangs rgyas kyi chos rnams kyang mi 'thob pa zhes bya ba ni 'thob par byed pa gang yin pa de med pa'i phyir ro/ /de lta yin na ni / dmigs su ga la yod/ /'dir byang grol dang nges par legs pa 'thob par brtson pa kha cig la the tshom 'di skyes te/ci mngon par mtho ba dang nges par legs pa'i them skas 'di'i rgyu na yon tan bla na med pa mtha' dag snang bar byed pa dang / nyes pa'i tshogs ma lus pa thams cad rgyun gcod par byed bzhin du dus thams cad du gnas sam/ci de ma thag tu med par 'gyur zhe na/ de bas na de yongs su mgu bar bya ba'i ched du/ 'jam dpal khyod kyis chos zab mo 'di lta bu 'di bstan pa legs so legs so zhes bya ba la sogs pa gsungs so/ /zab mo zhes bya ba ni nyan thos la sogs pa'i spyod yul ma yin pa'i phyir ro//khyod kyis phyag rtags bzhag pa ni 'khor ba'i mtha' srid du bzhag pa'o/ /byang chub sems dpa' sems dpa' chen po rnams dang zhes bya ba ni dmigs pa med pa la spyod pa rnams so/ /nyan thos kyi theg pa mngon pa'i nga rgyal can rnams dang zhes bya ba ni bya ba byas pa ma yin par bdag ni bya ba byas so snyam pa'i bsam pa can rnams te/mngon pa'i nga rgyal gyis spyod cing tha snyad spyod pa ni mngon pa'i nga rgyal can no/ /de dag gis ni theg pa gcig tu byas pa'am gsal bar bstan pa yin no/ /de lta ma yin na theg pa chen po gcig tu mchog tu gyur pa'i chos kyi rnam grangs 'di dag gis yongs su rtogs par bya ba'i ched du yin par mi 'gyur ro//nyan thos kyi theg pa pa smos pas ni rang sangs rgyas kyi theg pa pa rnams kyang mtshon pa yin no/ /byang chub sems dpa'i theg pa pa dmigs pa can rnams zhes bya ba ni sangs rgyas nyid du smon lam btab la theg pa chen po'i de kho na nyid ma mthong ba rnams la bya'o//thams cad la phan par byed pa nyid du bstan pa de dag gis ni chos kyi rnam grangs nyi tshe ba la phan par byed pa nyid ma yin par 'gyur ro/ /yang dag pa ji lta ba bzhin du rtogs pa ni chos thams cad dngos po med par khong du chad pa'o//mngon pa'i nga rgyal can dang / dmigs pa can dag la yang 'di ji ltar phan par byed pa yin zhe na/ gang dag sangs rgyas gcig la bsnyen bkur byas pa ma yin pa dang / sangs rgyas gcig la dge ba'i rtsa ba bskyed pa ma yin pa gang yin pa de dag la de skad ces bstan to//gal te gsungs pa la sogs pa yang dag pa'i ngo bor yod pa ma yin na des bdag bsad do zhes de ltar skrag par brjod do/ /de ni chung ngu la sogs pa'i dbye bas go rims bzhin du skrag pa dang / dngang ba dang / dngang bar 'gyur ba'i sgras bshad de/des na don ni 'di yin te/ chung ngu dang / 'bring dang / chen po'i 'jigs pa skye bar mi 'gyur ro zhes bya ba yin no/ /de ltar yang dag pa nyid shin tu bstan du zin kyang 'dir kha cig rnam par rtog pa 'phags pa 'di ni thams cad du gang zag dang chos la bdag med pa'i ched du bsgom pa ston pa yin na de khong du chud par byed pa'i rigs pa ni 'ga' yang med do zhe na/de'i phyir 'di skad du/ bcom ldan 'das bdag ni shes rab kyi pha rol tu phyin pa rgya cher ston par spobs pa lags so zhes bya ba la sogs pa gsungs te/spobs pa ni mngon du gyur pa dang / 'dod pa zhes bya ba'i bar du'o/ /rgya cher zhes bya ba ni de ston par byed pa'i tshul phul du byung ba'i rnam pa yin no zhes bstan pa yin no/ /bcom ldan 'das kyis kyang sems can gyi don chen po gzigs nas/ 'jam dpal spobs par gyis shig ces gnang ba mdzad do//de la re zhig rags pa yin pa'i phyir gang zag la bdag med pa bsgrub pa'i ched du/ bcom ldan 'das gang chos gang gi gnas pa mi dmigs pa dang zhes bya ba la sogs pa gsungs so/ /gang gi zhes bya ba ni bdag dang srog la sogs par 'du shes pa'o//gnas pa zhes bya ba ni 'dug pa ste/ rtag pa zhes bya ba'i tha tshig go/ /mi gnas pa ni yongs su 'gyur ba'i mtshan nyid gzhan du gyur pa nyid do/ /de ci'i slad du zhe na zhes bya ba'i dgongs pa ci zhe na/ ci mthong bar byed pa'i mthu med pa'i phyir mi dmigs sam/ 'on te gnas pa dang mi gnas pa'i dngos po med pa'i phyir yin/gal te phyogs dang po ltar yin na ni de lta na gang zag la bdag med pa mi 'grub ste/ mi dmigs pa de lta bu ni dngos po med pa sgrub par byed pa ma yin pa'i phyir ro/ /dngos po mang po la dmigs par nus pa'i mthu dang bral ba'i phyir mi dmigs pa yod de/dper na so so'i skye bo rnams kyis sangs rgyas dang chos la sogs pa lta bu'o/ /de tsam gyis ni med pa yang ma yin no/ /phyogs gnyis pa ltar na yang tshig tsam snying po yin te/ rigs pa dang bral ba'i phyir ro/ /de bas na rigs pa brjod dgos so zhe na/chos thams cad mi gnas pa'i slad du gnas pa dang mi gnas pa mi dmigs pa'o zhes bya bar sbyar ro/ /mi gnas pa nyid ni skad cig ma nyid yin te/ 'di ni khyab par byed pa'i chos can bstan to/ /chos ni rang gi mtshan nyid 'dzin pa la bya'o/ /rang gi mtshan nyid kyang bya ba byed nus pa'i ngo bo yin no//thams cad ces smos pa ni thams cad ma lus par khyab par bstan pa'i phyir gsungs so/ /phyogs kyi chos dang dpe gnyis ni ma gsungs te/ phyogs kyi chos dang dpe gnyis ma gsungs pa ni gdul bya'i bye brag la ltos pa'i phyir ro/ /de ltar sbyor ba ni gsal ba yin te/gang don byed nus pa'i ngo bo 'dzin pa de ni skad cig gcig gnas pa'i chos kho na yin te/ dper na mar me la sogs pa bzhin no/ /don byed nus pa'i ngo bo 'dzin pa'i don kyang pha rol po dag 'dod pa yin pas ngo bo nyid kyi gtan tshigs so/ /phyogs dang mi mthun pa ni nam mkha'i ut+pal la sogs pa yin te/skad cig ma nyid med na ni don byed nus pa'i ngo bo yang med pa'i phyir ro/ /de ltar na skad cig ma nyid grub pas gang zag la bdag med pa grub pa yin no/ /grub par byed pa ni srog dang bcas pa'i lus la sogs pa ni bdag kyang ma yin/bdag gi ba yang ma yin te/ rim gyis 'jug pa'i phyir mar me la sogs pa bzhin no/ /rtag pa dang 'brel pa yin na rim gyis 'jug pa mi 'thad pa ni gnod par byed pa'i tshad ma yin no/ /de ltar na gang zag la bdag med pa bstan nas/ chos la bdag med pa bstan pa'i phyir/bcom ldan 'das gang chos gang la yang lhag par dmigs pa'i slad du nye bar mi gnas pa de zhes bya ba la sogs pa gsungs te/ dmigs pa'i slad du zhes bya ba ni 'dzin pa'i slad du'o/ /de ci'i slad du zhe na zhes bya ba ni kha cig 'di snyam du sems te/ ci 'dzin par nus pa dang bral ba'i phyir ram/'on te gzung ba'i mtshan nyid dang bral ba'i phyir yin/ rnam par rtog pa dang po ltar na ni ji ltar chos bdag med pa yin/ phyogs gnyis pa ltar na ni rigs pa ci yod ce na/ de'i phyir rigs pa ni/ bcom ldan 'das 'di ltar chos thams cad ni dmigs pa ma mchis pa'i slad du ste zhes bya ba la sogs pa gsungs te/rang gi mtshan nyid 'dzin pa ni yul dang bcas pa'i shes pa yin par 'dod pa yin la/ rang gi mtshan nyid 'dzin pa gang yin pa de dag ni dmigs pa med pa yin te/ dper na rmi lam dang rab rib can la sogs pa'i shes pa bzhin no/ /'di ltar shes pa ni rang gi rgyu las gsal ba'i ngo bor skye ba yin la/ de rtogs pa'i ngo bo yin pa nyid kyis na rang gi ngo bo myong ba yin no zhes 'dod pa ni tha snyad tsam du 'dod la rag go/ /de rang rig pa yang ma yin te/gcig gi ngo bo de la rig par bya ba dang / rig pa po dang / rig pa'i mtshan nyid tha dad pa gsum mi 'thad pa'i phyir ro/ /gzhan dag ni bdag gi nang du ma gtogs pa'i phyir ji ltar rig par 'gyur/ bdag gi ngo bo de ni gzhan gyi ngo bo ma yin pa'i phyir gang gis de rig pa na gzhan yang rig par 'gyur/rtogs pa'i ngo bo nyid de ni de'i rgyu las skyes pa dang / de'i phyir yul 'dzin to zhes brjod na yang rtogs pa dang / khong du chud pa dang 'dzin pa la sogs pa ni rnam par shes pa'i rang gi ngo bo ma yin nam/ rnam par shes par bya ba ni rtogs pa de'i bdag nyid kyang ma yin na/ji ltar de'i ngo bo dang bral ba lcags kyi thur ma lta bu de rnam par shes pa de'i ngo bor 'gyur/ re zhig 'phros pa bzhag ste skabs nyid brtsam par bya'o/ /bcom ldan 'das ni shes rab kyi pha rol tu phyin pa bsgom pa'i bdag nyid du gyur pa ma yin nam/ gal te gzung ba'i mtshan nyid du gyur pa cung zad kyang yod pa ma yin na /ji ltar rdzogs pa'i sangs rgyas dang rang rgyal ba la sogs pa'i chos snang bar 'gyur/ 'on te de dag la mi snang na de lta na ni de nyan thos la sogs pa dang bye brag ci yod/ gang gis na thams cad mkhyen par gzhag par bya/de bas na ji ltar de'i shes pa gzung ba dang 'dzin pa can yin pa de bzhin du nyan thos la sogs pa'i yang yin te/ rgyang ring po nas phra ba la sogs pa rtogs pa de'i bye brag lta bu yin no zhes kha cig de snyam du sems na/ de'i phyir 'di skad du/ bcom ldan 'das gzhan yang gang la sangs rgyas kyi chos rnams kyang rang rig pa ma gtogs par rig par bya ba nyid du mngon du mi 'gyur na zhes dgongs pa'o//bsam pa ni 'di yin te/ gnas med snang ba yod ma yin/ /mtshan ma med cing yi ge med/ /rnam rtog thams cad rnam par bral/ / 'khor ba ji srid bar du bzhugs/ /'jig rten phun sum tshogs pa kun/ /yon tan rdzogs mdzad mthu dang ldan/ /de bzhin gshegs pa'i ye shes ni/ /kun blo tshig gi gnas ma yin/ /dpag bsam dag gi shing bzhin du/ /rnam rtog rlung gis thub mi bskyod / /'jig rten phun sum don rnams mdzad//de phyir mthong med ces kyang gsungs/ /lhun gyis grub par ma lus pa'i/ /bya ba thams cad bsgrub pa'i phyir/ /kun du rgyal ba thams cad rig /ces bya ba'o/ /bcom ldan 'das gzhan yang bsgom pa gang la brten nas sangs rgyas kyi chos rnams bsam gyis mi khyab pa la yang zhes bya ba la sogs pa la bsam gyis mi khyab pa ni de bzhin nyid la bya ste/de la yang rnam par rtog pa sel bar byed pa yin no/ /sangs rgyas kyi chos rnams bsam gyis mi khyab pa'o zhes rnam par rtog pa mi 'byung ba zhes bya ba ni don ji lta ba bzhin du zhes dgongs pa'o//rnam par rtog pa mi 'byung ba ni thob pa ste/ don ji lta ba bzhin du bya ba'i phyir mngon par zhen pa spangs pa zhes bya ba'i tha tshig go/ /'di'i don ni 'di yin te/ re zhig rnam par rtog pa 'di sangs rgyas bcom ldan 'das rnams la mi mnga' ste/ma rig pa'i sa bon thams cad spangs pa'i phyir ro/ /byang chub sems dpa' gang dag la nyon mongs pa can ma yin pa'i ma rig pa mtha' dag ma bsal ba yod pa de ga la 'di 'byung bar 'gyur ro/ /rnam par rtog pa ni rang bzhin gyi 'khrul pa nyid kyis yul med pa'i phyir de dag la yang 'di'i don ji lta ba bzhin ni ma yin no//de dag la dngos po yang dag par 'dzin pa nyid du mngon par zhen pa 'di med de / sgyu ma mkhan dang chos mthun par gnas pa'i phyir ro/ /de dag gi 'di'i 'khrul pa yin du zin kyang don dang 'brel pa'i phyir mi rtag pa la sogs pa'i rjes su dpag pa'i rnam par rtog pa bzhin du/dngos po'i de kho na nyid thob par byed par 'dod pa yin no/ /de nyid kyi phyir/ bcom ldan 'das shes rab kyi pha rol tu phyin pa sgom pa 'di ni byang chub sems dpa' sems dpa' chen po rnams kyi chos thams cad la rnam par mi rtog par blta bar bgyi'o zhes gsungs te/chos thams cad la rnam par mi rtog pa ni chos thams cad la rnam par mi rtog pa ste/ rnam par rtog pa thams cad kyi sa bon dang bral ba bcom ldan 'das kyi ting nge 'dzin dmigs pa mi mnga' ba thun mong ma yin pa yin no zhes bya ba'i tha tshig ste/de'i ched du bsgrub po zhes blta bar bya'o/ /de lta bu'i ting nge 'dzin rnam par rtog pa dang ma 'brel ba 'di ji ltar thob par 'gyur zhe na/ de'i phyir bcom ldan 'das gzhan yang bsgom pa gang la brten nas mthong ba ma mchis par zhes bya ba la sogs pa gsungs so//chos thams cad sangs rgyas kyi chos su mthong ba 'di'i don ji lta bu zhe na/ de'i phyir/ chos thams cad bsam gyis mi khyab pa'i chos su mthong ba zhes gsungs te/ sangs rgyas kyi chos ni de dag nyid kyis de bzhin du thugs su chud pa'i phyir dang / bstan pa'i phyir ro/ /chos thams cad bsam gyis mi khyab pa ni bsam par mi nus pa'i phyir te/ de bzhin nyid kyi ngo bor zhes bya ba'i bar du yin no/ /'o na gal te de ltar mthong ba yin na rig par bya ba'i mtshan nyid du grub mod de lta ma yin na phyin ci log la mngon par dga' ba dag ji ltar de kho na nyid mngon sum du byed ce na/de'i phyir/ mthong ba ma mchis par zhes gsungs te/ mngon par zhen pa med pa'i tshul du zhes bya ba'i tha tshig go/ /'dir 'khor ba dang 'dris pa ma yin pa bsam gyis mi khyab pa de nyid la ji ltar mos par 'gyur zhe na/ de'i phyir/ rigs kyi bu'am rigs kyi bu mo gang dag shes rab kyi pha rol tu phyin pa bstan pa 'di thos nas mi skrag mi dngang /dngang bar mi 'gyur ba de dag sangs rgyas brgya stong mang po la bsnyen bkur bgyi bar 'gyur ro zhes gsungs pas 'di skad bstan te/ 'ga' zhig gi bsod nams kyis las dang po pa'i sa la gnas pa rnams kyi lhag par mos pa bcos ma ma yin pa chos kyi dbyings shin tu rnam par dag pa'i rgyu mthun pa thos pa'i bag chags las byung ba gang yin pa de nyid bsgoms na ting nge 'dzin de mngon du 'gyur ba yin no//chos thams cad la rnam par mi rtog pa'i phyir bsgom pa yin na/kun nas nyon mongs par 'gyur ba 'phags pa ma yin pa dang / de las gzhan pa rnam par byang ba yin par bsgom pa la mngon par dga' ba rnams kyis ji ltar mthong / so so'i skye bo dmyal ba dang / dud 'gro'i skye gnas dang / gshin rje'i 'jig rten la la sogs pa dang /nyan thos 'phags pa'i gang zag brgyad dang / tshogs spyod pa dang / bse ru lta bu'i rang sangs rgyas rnams dang / bcom ldan 'das gser thub dang / 'od srungs la sogs pa yang dag par rdzogs pa'i sangs rgyas rnams la so so'i skye bo la sogs par yul dbye ba ji ltar bya zhes gzhan dag sems shing dogs pa la de'i phyir dngos su sngar bstan zin kyang yang de la phan gdags shing gsal bar bya ba'i phyir lan du/bcom ldan 'das gzhan yang kun nas nyon mongs pa'am/ rnam par byang ba'i chos gang yang yang dag par rjes su mi mthong zhes bya ba la sogs pa gsungs pa ni rtogs par sla'o//sangs rgyas mtha' yas pa la bsnyen bkur ma byas par ni 'khor ba na gnas pa'i sems can bzhin du spobs pa de lta bu 'byung bar mi 'gyur ro/ /de bas na sangs rgyas mtha' yas pa la bsnyen bkur byas pa'i 'phags pa 'jam dpal blo rgya che ba dang ldan pa 'di ni de lta bur rtogs par dka' zhing yid du 'ong ba'i chos ston par mdzad pa yin no//bsnyen bkur byed pa yang g.yog 'khor 'bum pa dang / des bstan pa nyan zhing mchod pa la sogs pa byed pa yin la/ de yang dmigs pa mi 'khrugs pa can yin no//de bas na 'phags pa gang du shes rab kyi pha rol tu phyin pa bsgom pa'i rang bzhin yang rdul phra rab kyis bskyed pa'i dmigs pa la spyod pa yin na de la gzhan dag lta smos kyang ci dgos snyam du dogs pa bsal ba'i phyir/ 'jam dpal khyod kyis de bzhin gshegs pa ji snyed cig la bsnyen bkur byas zhes rgyas par gsungs so//bcom ldan 'das la kun rdzob tu bsnyen bkur byas pa yin gyi don dam par ni ma yin te/ de nyid kyi phyir/ bcom ldan 'das sgyu ma'i skyes bu'i sems dang sems las byung ba ji snyed 'gags pa de snyed la zhes gsungs te/sgyu mas sprul pa'i skyes bu ni sgyu ma'i skyes bu'o/ /de la ni sems dang sems las byung ba yod pa ma yin te/ sngon med pa'i sems can 'byung bar thal bar 'gyur ba'i phyir ro/ /de dag gi 'gag pa lta gal yod de/ de ni skye ba sngon du 'gro ba can yin pa'i phyir ro/ /de bzhin du gzugs kyi sku ston pa po mdzad par snang ba'i de bzhin gshegs pa blta bar bya ba yod pa ma yin na de dag la bsnyen bkur bya ba lta ga la yod de/de ni dmigs pa sngon du 'gro ba can yin pa'i phyir ro/ /bsnyen bkur byas pa yod pa ma yin na khyod sangs rgyas kyi chos la yang dag par zhugs pa lta ga la yod de/mu stegs bzhin no zhes dgongs nas/ 'jam dpal khyod sangs rgyas kyi chos la yang dag par ma zhugs sam zhes bya ba 'di gsungs te/ sangs rgyas kyi chos kyi rgyu mtshan dang de skyed pa'i don du yid brtson par byed ces bya ba'i tha tshig go/ /'dir lan du bcom ldan 'das gang sangs rgyas kyi chos la yang dag par zhugs pa'i chos de gang yang dmigs su mchis sam zhes gsol te /bdag la sogs pa rtag pa med pa'i phyir bdag la sogs pa gang yang yod pa ma yin no/ /phung po'i tshogs mi rtag pa yang skyes ma thag tu 'jig pa 'jug pa mi rigs pa'i phyir ro//de bas na de'i ngo bo rgyun mi chad par skye ba 'dus byas skad cig ma'i rgyun la brten te gcig pa nyid du brtags nas yang dag par zhugs par brtags pa yin te/ yang dag par zhugs pa ni brtags pa kho na yin na ci 'ga' zhig yod dam zhes yang dag pa ma yin par tshig zur gyis bstan to//gal te yang dag par zhugs pa 'ga' yang yod pa ma yin na su zhig gis bsgoms pa de grub na sangs rgyas kyi chos 'grub par 'gyur/ phan tshun rtog pa la brten pa ni rnam par dbye ba med par tha dad pa'i dngos por mi 'thad de/ chos rnams kyi chos zhes bya ba bzhin no/ /de bas na gang gis 'brel pa'i rjes su myong ba'i gang zag la sogs par yang dag par zhugs pa de dag na yod pa yin no zhes 'dri ba ni 'jam dpal 'o na sangs rgyas kyi chos de dag su yod ces bya ba yin no//lan du/ bcom ldan 'das nyid la yang zhes bya ba la sogs pa yin te/ dbang phyug dam pa skyon ma lus pa dang bral ba'i ye shes thogs pa med pa'i bdag nyid dag la yang de dang 'brel pa nyid kyi sangs rgyas kyi chos ma mchis te/de nyid kyi phyir mi dmigs te/ de'i ngo bo la ma gtogs pa med pa'i phyir ro/ /bdag dang srog la sogs pa gzhan rnams la mchis par 'gyur ba lta ci smos/'di ni sangs rgyas de rnams kyi chos so zhes so sor phye ste/ gnyis su sbyor yang gcig tu brjod de/ sangs rgyas kyi bdag nyid kyi chos so zhes shes par bya ba'i phyir ro/ /'di ltar chos dang chos can gyi tshig gi sgra gnyis yod du zin kyang brjod par bya ba'i don la ci yang dbye ba yod pa ma yin no//'o na de ltar chos dang chos can tha dad pa nyid yod pa ma yin na ji ltar 'phags pa 'jam pa'i dbyangs 'di yang dag par zhugs pa na chags pa med pa'i chos rnyed pa yin zhes de ltar 'dri ba ni 'jam dpal khyod kyis chags pa med pa nyid rnyed dam zhes bya ba yin no/ / spobs pa chags pa med pa ni chags pa med pa'o zhes bar gyi tshig mi mngon par byas pa yin no/ /chags shing thogs pa 'di la yod pa ma yin pas spobs pa chags pa med pa'o/ /de'i dngos po ni chags pa med pa nyid do/ /de'i bdag nyid du skyes pa las ma gtogs par bdag gis chags pa med pa nyid thob pa ma mchis te/'di ltar bcom ldan 'das bdag nyid chags pa ma mchis pa nyid lags te/ chos dang chos can gyi dbye ba mi srid pa'i phyir ro/ /bdag gis yang phyis kyang chags pa ma mchis pa nyid 'thob par 'gyur ram/ 'di ltar de'i ngo bor skyes pa'i dngos po rnams ni yang de'i bdag nyid du skye ba dang 'brel pa'i rigs la sogs pa 'thob pa ma yin no//yang nas yang thob pa ma yin te/ de las ma gtogs pa bdag mi srid pa'i phyir ro/ /gang zhig gi blo la 'di snyam du 'jam pa'i dbyangs 'di'i spobs pa ni de bzhin gshegs pa dang khyad par med pas rdo rje'i gdan la bzhugs par gsal ba yin no//de lta ma yin na gzhan ji ltar 'dir thogs pa med cing ma nor bar nyan thos la sogs pa kun dang thun mong ma yin pa ston par 'thad/ de bas na 'di ni rdo rje'i gdan la bzhugs pa yin no snyam du sems pa de'i phyir/ 'jam dpal khyod ci byang chub kyi snying po la 'dug gam zhes gsungs te/byang chub kyi snying po ni rdo rje'i gdan te/ zad pa dang mi skye ba shes pa'i bdag nyid kyi byang chub ni 'di la bzhugs te skyed pas snying por byas pa'i phyir ro/ /snying po'i sgra ni dam pa'i rnam grangs te/ mar gyi snying khu bzhin no/ / de nyid kyi phyir phyogs gzhan thams cad pas mchog tu gyur pa ni mthong ba la sogs pa bsod nams rgya chen po la sogs pa'i gnas yin pa'i phyir ro zhe na/ lan du/ bcom ldan 'das nyid kyang ste/ bdud bzhi bcom par rab tu grags pa yang der ma bzhugs na/ bdag de ltar ma grags pa lta mchis par ji ltar 'gyur/ci las dgongs te de skad du bstan zhe na/ de'i phyir/ yang dag pa'i mtha' brtsan par bgyis na zhes gsol te/ kun rdzob kyi bden par ni ma yin no/ /'o na yang dag pa'i mtha' yod dam/ de la bcom ldan 'das bzhugs na ni des na skyon de nyid du 'gyur ro zhes yang dag pa'i mtha' ngo bo ma rtogs pa rnams la phan gdags pa'i phyir/'jam dpal yang dag pa'i mtha' zhes bya ba de gang gi tshig bla dgas zhes gsungs te/ 'jig tshogs zhes bya ba la/ 'jig tshogs kyi sgra ni 'dir ma ma'i tshig mi mngon par byas pas 'jig tshogs la lta ba zhes bstan pa yin te/de la blo phyin ci log tu gyur pa'i phyir ro/ /ji ltar yang dag pa mchog tu gyur pa yin zhe na/ de'i phyir 'jam dpal khyod ci las bsams te de skad smra zhes gsungs te/ khyod kyis ci las bsams te de skad smras zhes bya ba yin no/ /rang gi bsam pa gsal bar bya ba'i phyir/bcom ldan 'das 'jig tshogs de ni ma mchis pa zhes gsungs so/ /ma mchis pa zhes bya ba ni gzung ba dang 'dzin par brtags pa'i bdag nyid med pa la bya'o/ /'jig tshogs ma lags pas zhes bya ba ni yod pa ma yin pa'o/ /ci'i phyir zhe na/ gang gi phyir brtags pa'i dra ba dang bral ba'i phung po rnams 'dir de ni mi 'pho ste/ rdo rje'i gdan la sogs pa'i yul du gshegs pa ma yin no/ /'pho ba dang bral ba yang ma lags te zhes bya ba ni der bzhugs pa ma lags so/ /gtan tshigs de'i slad du 'jig tshogs de ni 'jig tshogs ma lags te/'di yod pa po yang ma yin la 'jig tshogs kyang ma yin pa'i phyir ro/ /de bas na yang dag pa'i mtha' yin par gsungs so/ /ji skad du/ gzugs las stong pa nyid gzhan ma yin te/ stong pa nyid gzugs so/ /gzugs nyid stong pa nyid yin te/ gnyis su med cing gnyis su byar med do/ /rnam par shes pa'i bar du yang de bzhin no zhes gsungs so/ /da ni chos kyi rnam grangs sman gyi sdong po lta bu'i mdo 'di la rab tu spro ba 'phel ba'i phyir blo dang ldan pas de'i 'og tu bsngags pa rjod par byed pa ni dngang bar mi 'gyur ba de dag ni byang chub tu nges par 'gyur ba lags so zhes bya ba yin te/mos pas spyod pa'i sa la gnas pa nyid byang chub la gcig tu gyur pa'i phyir ro/ /byang chub ni rtogs pa la bya ste/ byang chub tu nges par 'gyur ro zhes bya ba'i tha tshig go/ /shin tu myur bar zhes dgongs pa ste/ myur ba ni mi dmigs pa'i tshul gyis mos pas spyod pa'i sa yongs su sbyong ba'i phyir ro//dngang bar mi 'gyur ba de dag ni byang chub la nye bar gyur pa lags so zhes bya ba ni phyir mi ldog pa'i sa thob pa'i phyir ro/ /de ci'i slad du zhe na zhes bya ba ni bskal pa mtha' med pas bsgrub dgos pa'i phyir mi ldog pa'i sa 'di myur du 'grub par 'gyur ro zhes bya ba 'di la gtan tshigs ci yod ces bya ba yin no//'di ltar bcom ldan 'das gang ji skad du bstan pa'i gzugs la sogs pa'i chos de dag rjes su rtogs shing rab tu 'byed pa de nyid byang chub mchog lags pa'i slad du ste/ de dag ni shin tu mchog yin no zhes dgongs pa'o//dngang bar mi 'gyur ba de dag ni sangs rgyas nyid du blta bar bgyi'o zhes bya ba ni btags pa yin pa'i phyir te/ myur du 'gyur ro zhes dgongs pa'o/ /de ci'i slad du zhe na zhes bya ba ni bskal pa dpag tu med pas thob par bya ba'i sangs rgyas nyid ji ltar 'grub par 'gyur zhes bya ba'i tha tshig go//'di ltar sangs rgyas zhes bgyi ba de ni don dam par na skye ba ma mchis pa'i tshig bla dgas lags pa'i slad du ste/ de dag kyang de la shin tu gzhol ba'i phyir ro/ /skye ba med pa rtogs pa zhes bya ba brjod par bya ba ma yin nam zhe na/ skye ba med pa zhes gsungs pa ni tha ma'i tshig mi mngon par byas pa'i phyir dang / nyi ma bzhin du khyad zhugs pa'i phyir de skad du gsungs so/ /'di skad bstan te thabs log par zhugs pa ni yun ring pos kyang 'grub par mi 'gyur gyi/ de dang rjes su mthun pa'i thabs la zhugs pa de dag ni myur du 'grub par 'gyur bas ngo mtshar ci che/yang na rab tu dga' ba'i sa la ni nges pa nyid yin te/ 'di ltar de mngon par rtogs pa thob pas de bzhin gshegs pa'i rigs su skyes pa yin no/ /chos kyi sprin gyi tshe ni nye bar gyur pa yin te/ 'di ltar de'i tshe ni bar du ma chod par des sangs rgyas kyi sa kun du 'od 'thob par 'gyur ro//de'i tshe ni sgrib pa thams cad dang bral bas sangs rgyas yin no/ /yang na nye bar gyur pa la brten te 'di kun gyi nang du lta bu zhes bya ba khong nas 'byung bar gsungs te/ nges pa lta bu dang / nye bar gyur pa lta bu dang / sangs rgyas lta bu zhes bya ba'i tha tshig go//gtan tshigs gnyis dris pa'i don ni ji ltar na so so'i skye bo'i sa la gnas pa kho na dag mos pa tsam bskyed pa'i phyir de skad du bstan zhes bya ba yin no/ /de nyid byang chub mchog lags pa'i slad du'o zhes bya ba ni nye bar gyur pa nyid kyi mchog yin par rang gi tshig gis ston par byed pa'o//dris pa snga ma'i gtan tshigs kyang 'di nyid yin te/ gang dag gis chos gang dag rjes su rtogs pa lhag par che ste/ don dam par skye ba med pa la gzhol ba de nyid gtan tshigs su brjod par bzhed pa yin gyi/ khong du chud pa ni ma yin no/ /de bas na de dag ni 'khrul ba yin no// // 'phags pa shes rab kyi pha rol tu phyin pa bdun brgya pa rgya cher bshad pa / bam po gsum pa/ kha cig chos de dag khong du chud par brtson zhing don dam par skye ba med pa khong du chud pa la gzhar yang smra bar bzhed pa de dag gi gtan tshigs khong du ma chud pa de'i phyir de dag ni 'khrul nas chos gang dag khong du chud pa de dag nyid byang chub yin pa dang /sangs rgyas kyi chos gang dag rjes su rtogs pa de nyid byang chub ces bya ba dang / sangs rgyas zhes bya ba ni skye ba med pa'i tshig bla dgas yin du zin mod kyi/ 'on kyang ci'i phyir nye bar gyur pa nyid sangs rgyas yin par blta bar bya snyam pa la de nyid gtan tshigs kyis gsal bar bya ba'i phyir/sring mo dmigs pa med pas zhes bya ba ni khyad par blo gros rnam par 'phro ba zhes bya ba byang chub sems dpa' yin bzhin du bud med kyi gzugs 'chang bas 'di skad ces gsol pa ni bcom ldan 'das byang chub sems dpa' sems dpa' chen po gang dag ces bya ba nas/dngang bar mi 'gyur ba de ni so so'i skye bo'i chos la sogs pa la lhag par dmigs par mi 'gyur ba lags so zhes bya ba yin te/ lhag par dmigs pa ni de dag gis 'dzin pa dang /de la dmigs shing 'dug ces bya ba'i bar du yin no/ /de ci'i slad du zhe na zhes bya ba'i bsam pa ni 'di yin te/ 'khor bar gtogs pa'i rnam par shes pa yod bzhin du ji ltar mi dmigs par rung / 'di ltar rnam par shes pa ni don gnyis byed pa'i rang gi ngo bo yin te/'di ltar rnam par rig cing rnam par rig pas rnam par shes pa yin no zhes rnam par gzhag go/ /dmigs par bya ba med na ni ci zhig shes na rnam par shes pa zhes bya snyam pa la/ de'i phyir 'dir 'di ltar chos thams cad ni ma mchis pa'i slad du mi dmigs pa ste zhes gsungs te/chos thams cad ces smos pa ni 'dir rnam par shes pa nyid la bya bar gsungs te/ 'di ltar gzhan dag gis de nyid dmigs pa dang bcas par rjod par byed do/ /ma mchis pa'i slad du zhes bya ba ni rnam par shes pa'i ngo bo yin par bstan te/ 'di ltar rnam par rig pa 'di ni gzung bar 'dod pa'i dngos po la ltos te/rnam par shes pa nyid yin par rnam par gzhag go/ /de med pa'i phyir gzhan khong du chud pa'i ngo bo 'di yang bkag pa yin no/ /de bas na 'di ni dri za'i grong khyer la sogs pa'i shes pa bzhin du gzhan med pa'i rnam par shes pa'i bdag nyid yin du zin kyang shes pa 'khrul nas rig par bya ba dang reg par byed pa'i rnam par ston par byed de/de nyid la brten nas rnam par shes pa nyid du brtags so/ /yang dag par na de rnam par shes pa yin no zhes bya bar brjod par nus pa ma yin te/ rnam par rig par bya ba med pa'i phyir ro//de ltar re zhig kun nas nyon mongs pa la sogs pa rgyu mtshan gang yin pa de dag ni med par rig ste/ gang du yang bstan du med pa yin no/ /de'i slad du zhes bya ba ni ma mchis pa'i slad du ste/ chos de dag la dmigs pa ma mchis so/ /kha cig bcom ldan 'das kyi bka' med par glang po chen po dag gis gsungs su zin kyang bsngags pa myur du khong du mi chud de/de bas na bcom ldan 'das la dang ba skyed pa kho na'i phyir rnam pa gsum gyi bsngags pa yang zhal gyis bzhes pa'i phyir/ de de bzhin no zhes gsungs te/ dang po'i zhal gyis bzhes pa ni byang chub tu nges par 'gyur ro zhes bya ba yin no//gnyis pa ni phyir mi ldog pa'i sa la gnas pa yin zhes bya ba yin te/ phyir mi ldog pa'i sa yang mi g.yo ba yin no zhes brjod do/ /spyi bos len pa ni shin tu dad pa can du ston to/ /gal te mos pa'i phyir mi ldog pa nyid yin na/'o na ni sbyin pa la sogs pa mi dgos par 'gyur ro zhe na/ de'i phyir de dang de dag ni sbyin bdag dam par 'gyur zhes bya ba la sogs pa gsungs te/ pha rol tu phyin pa rnam par dag pa'i lam bstan pas ni phyir mi ldog pa'i sa nyid gsal bar byed pa'o/ /rnam pa thams cad kyi mchog dang ldan pa'i thams cad mkhyen pa'i ye shes dang ldan pa'i bar du 'gyur zhes bya ba ni tha ma'i zhal gyis bzhes pa yin no//de la de dang de dag ces lan gnyis 'byung ba ni thugs dgyes nas nges pa kho nar de kho na yin no zhes bya ba'i tha tshig ste / thabs shes yang dag par zhugs pa'i phyir ro//de la sbyin pa ni zang zing dang mi 'jigs pa dang / chos kyi sbyin pa'i bye brag gis rnam pa gsum ste/ de'i dbang du byas nas/ sbyin bdag dam pa dang / sbyin bdag chen po dang / sbyin bdag khyad par du 'phags par 'gyur zhes gsungs so/ /tshul khrims kyang sdom pa'i tshul khrims dang /dge ba'i chos sdud pa'i tshul khrims dang / sems can gyi don byed pa'i tshul khrims dang gsum mo/ /de'i dbang du byas pa ni tshul khrims phun sum tshogs par 'gyur zhes bya ba la sogs pa tshig bzhi yin no/ /de la dang po ni bstan pa'i tshig go/ /yang na tha ma ni mjug bsdus pa'i tshig go//tshul khrims dang ldan pa'i mchog tu 'gyur zhes bya ba la/ de tshul khrims kyang yin mchog kyang yin pa de gang dag la yod pa'o/ /tshul khrims dang ldan pa khyad par du 'phags par 'gyur zhes bya ba ni tshul khrims dang ldan pa khyad par du 'phags pa mchog gang dag la yod pa'o//yon tan rnams kyi lam ni yon tan gyi lam ste/ tshul khrims nyid yon tan lam ste/ de rnyed par 'gyur ro/ /bstan pa 'di thos nas mos te zhes bya ba ni de bzhin no zhes nges par 'dzin pa'o/ /bzod pa'i mchog ces bya ba ni dmigs pa med pa dag la bya ste/blo gros mi zad pas bstan pa la sogs pa las ji snyed brjod pa yin no/ /bar du zhes bya ba'i tshig gis ni thabs dang smon lam dang / stobs dang / ye shes kyi pha rol tu phyin pa dang ldan par gzung ngo / /rnam pa thams cad ces bya ba ni so so yang dag par rig pa dang /thugs rje chen po la sogs pa'i yon tan brjod par bya ba ste/ de dang ldan zhing 'brel pa ni thams cad mkhyen pa gang yin pa 'gro ba mtha' dag la phan par mdzad pa'i ye shes can yin no/ /de dang ldan pa'i thams cad mkhyen pa'i ye shes dang ldan pa'i bar du 'gyur ro zhes bya ba ni myur ba la dgongs pa'o//rnam grangs gnyis su na shin tu nye bar gyur pa nyid kyis ni nges pa nyid kho na yin te/ phyir mi ldog pa'i sa la gnas pa bye brag tu byas pa'o/ /pha rol tu phyin pa yongs su dag pa bstan pas ni chos kyi sprin la gnas par bstan te/ de la ni pha rol tu phyin pa thams cad rnam par byang bar 'gyur ro//gal te chos kyi rnam grangs 'di la mos pa tsam yang byang chub mchog 'grub par 'gyur na/ ci'i phyir 'phags pa 'jam dpal 'di kho nas yun ring por 'di dag ston pa mdzad/ dus ring por rjes su bsgrubs bsgoms kyang da dung byang chub mchog ma thob ces dogs pa'i the tshom bsal ba'i phyir/'jam dpal khyod kyis don gyi dbang ci zhig mthong zhe na zhes bya ba la sogs pa dris so/ /bla na med pa yang dag par rdzogs pa'i byang chub mngon par rdzogs par 'tshang rgya bar mi 'dod ces bya ba'i tshig 'dis 'di skad bstan te/khyod la brten pa mtha' med pa dag gis kyang 'bad pa ma byas par 'di thob na/ bsod nams dang ye shes kyi tshogs mtha' dag rdzogs pa khyod kho na ci'i phyir 'di la 'bad pa chen pos sgrub par byed/ de bas na gzhan la rag las pa'i don cung zad cig mthong nas thob par mi 'dod dam zhe na/lan du/ bcom ldan 'das gal te bdag byang chub tu zhugs na ni zhes bya ba la sogs pa yin te/ ci ste bdag byang chub kyi ched du yang dag par zhugs par gyur na ni de'i tshe de mngon du bgyi bar bdag 'dod de/ 'bad pa ni 'dod pa la mi 'khrul ba can yin pa'i phyir ro/ / ji tsam du/ bcom ldan 'das bdag ni byang chub tu smon pa ste/ byang chub don du gnyer ba ma lags so/ /de ci'i slad du zhe na zhes bya ba ni byang chub sems dpa' byang chub don du gnyer bar mi byed pa ji ltar rigs zhes bsams pa'o/ /'di ltar 'jam dpal gzhon nur gyur pa gang lags pa de byang chub nyid yin no//dgongs pa ni 'di yin te/ byang chub ni gzung ba la sogs pa yang dag pa ma yin pa la mngon par zhen pa'i spros pa dang bral ba'i ye shes kyi bdag nyid kho na yin gyi/ gzhan gyi rang bzhin ni ma yin no/ /'jam dpal yang de lta bu'i ye shes kyi bdag nyid kyi lus can kho na yin te/dar las bsgribs pa la sogs pa dper bya ba tsam yin no/ /yang na sgrib pa med pa don du gnyer bar rigs pa ma yin nam zhe na/ ma yin te 'di ltar gang zhig byang chub yang dag par don du gnyer ba de ni de skyed pa'i dbang yod pa ma yin no/ /bdag ni 'di 'dod pa tsam la rag las pa yin no//de bas na don du gnyer bar mi byed de / yang na don dam par skye ba med pa'i rang gi ngo bo nyid du ni gnyis ka yang dbyer med pas byang chub nyid 'jam dpal yin zhes dgongs pa'o/ /'phags pa 'jam dpal 'di ci'i rgyus zab mo 'chad pa la mkhas snyam du the tshom za ba'i phyir/'jam dpal khyod zab mo zab mo'i gnas 'di lta bu ston pa legs so legs so zhes bya ba bka' stsal to/ /zab mo zab pa zhes bya ba ni bse ru lta bu la sogs pa'i yul ma yin pa'i phyir ro/ /gnas zhes bya ba ni phyogs la bya'o/ /'di ltar khyod ni zhes bya ba ni gang gi phyir zhes bya ba'i tha tshig go//sngon gyi rgyal ba la sbyin pa la sogs pa'i mtshan nyid kyi bya ba gang gis byas shing bsgrubs pa de la de skad ces bya'o/ /yang na sngon gyi rgyal ba rnams kyis chos zab mo 'chad pa'i bya ba byed par gang zhig bsgos pa byas pa'o/ /mi dmigs par tshangs par spyod pa yun ring du ni dus ring por gang gis spyad cing goms par byas pa de la de skad ces bya'o//tshangs pa ni mya ngan las 'das pa ste/ de'i ched du pha rol tu phyin pa la sogs pa spyod pa'o/ /gang gi phyir 'phags pa 'jam dpal 'di de lta bur gyur pa de bas na 'di de lta bu ston to zhes bya ba ni mdo'i don yin no//'phags pa yang bdag nyid dmigs su med pa goms pa yin par zur gyi tshul gyis de ston pa ni bcom ldan 'das gal te bdag mi dmigs par spyod pa lags na ni chos thob pa nyid du 'gyur ba lags so zhes gsol to/ /'dis ci bstan zhe na/mi dmigs par spyod par byed pas gal te bdag pha rol tu phyin pa rnams la spyod pa yod na ni de'i tshe chos dang chos can du sgro btags nas 'dzin pa la sogs par mngon par zhen pa'i mtshan nyid kyi chos thob pa kho nar yang 'gyur ba zhig na sgro 'dogs pa thams cad spangs pa'i phyir 'di bdag gis thob pa yang ma yin no//pha rol tu phyin pa la sogs pa de dag la bdag mi dmigs par spyod pa yang ma yin te/ rang nyid dmigs su med pa'i bdag nyid pha rol tu phyin pa la sogs pa'i rang bzhin yin pa'i phyir ro/ /bcom ldan 'das kyis kyang 'di bkag pa ma yin te/gnang ba'i phyir ro/ /gal te 'phags pa 'jam dpal 'di dmigs su med pa'i bdag nyid yin na/ 'o na ni bcom ldan 'das kyi nyan thos phun sum tshogs pa nges par 'byed pa'i cha dang mthun pa la sogs pa dbye bas tha dad du gyur pa lha dang bcas pa'i 'jig rten gyis rtogs par bya ba rnams 'dis dmigs par mi 'gyur ro snyam na/de'i phyir 'jam dpal khyod kyis nga'i nyan thos phun sum tshogs pa 'di dag mthong ngam zhes dris so/ /phun sum tshogs pa ni mchog tu gyur pa'i don gang yin pa'o/ /bdag gis ji ltar mthong ba de ltar ni lha dang bcas pa'i 'jig rten gyis ma yin no zhes bya ba'i phyir //'jam dpal gyis gsol pa/ bcom ldan 'das mthong lags so zhes gsol to/ /ma rtogs pa de'i bsam pa la ltos nas bcom ldan 'das kyis bka' stsal pa/ ji ltar ci 'dra bar mthong zhes bka' stsal te/ji lta ji lta bu zhes bya ba'i don dang de mthong na mi dmigs pa'i bdag nyid yin na ji ltar mi 'gal zhes bya ba'i bar du yin no/ /so so'i skye bo'i dro bar gyur pa la sogs pa thob pa'o/ /slob pa ni zhugs pa bzhi dang 'bras bu la gnas pa gsum mo/ /mi slob pa ni dgra bcom pa'o//thams cad kyang don dam pa'i tshul la gnas pa'i tshe mthong ba yang ma mchis so/ /sngar ni re re nas tshig rdzogs par byas pa yin no/ /'di ni spyir bstan pa yin te/ bye brag ni de yin no/ /kun rdzob kyi lam la gnas pa ni ma mthong pa yang ma mchis pa lags te/mthong ba kho na lags so zhes bstan to/ /'jig rten gyi bden pa'i dbang du byas nas mthong ba yang bdag gis mngon par zhen pa med par mthong ba yin pa de ltar mthong ngo zhes gsol to/ /ji ltar de ltar yin zhe na/ 'dir mang du yang mi mthong zhes bya ba la sogs pa gsungs so//mang ba ni so so'i skye bo ste/ de dag phal che ba'i phyir ro/ /nyung ngu ni slob pa dang mi slob pa ste/ de dag dkon pa nyid kyis nyung ba'i phyir ro/ /nyung ba ni su yin/ mang ba ni su yin zhes dogs pa la/ de'i dbye ba bstan pa'i phyir/ dul bar yang mi mthong ma dul bar yang mi mthong ba de ltar mthong ngo zhes bya ba la sogs pa gsungs so//gzhan yang mi dmigs pa nyid la ltos nas brgal ba dang / gal te mi dmigs pa'i rang bzhin yin na bcom ldan 'das kyi 'khor phun sum tshogs pa dag dang / byang chub sems dpa' de dag ji ltar dmigs par 'gyur snyam na/de'i phyir 'jam dpal khyod kyis nyan thos kyi theg pa pa rnams de ltar mthong na zhes bya ba ni de bzhin nyid kyi ngo bor rang bzhin mnyam pa yin pa'i phyir ro/ /byang chub sems dpa' rnams la yang de kho na bzhin no zhes lan glan pa'i phyir ro/ /byang chub sems dpa' zhes bya ba'i chos kyang rjes su mi mthong zhes gsungs te/thams cad yod par dbye ba la sogs pa'i rnam par rtog pa dang bral ba dang / gnas skabs kyang bdag dang 'dzin pa la sogs pa'i rang gi dngos po ni rang bzhin gyis yongs su zhi ba yin pa'i phyir ro/ /de la byang chub kyi phyir sems dpa' ste/byang chub kyi sems bskyed pa thob pa mos pas spyod pa'i sa thog ma'i gnas skabs kyi byang chub sems dpa' yin no/ /byang chub tu zhugs pa zhes bya ba ni mos pas spyod pa'i sa la gnas pa'o/ /byang chub kyi phyir spyod do zhes bya ba ni rab tu dga' ba nas bzung ste/ skye ba gcig gis thogs pa'i bar yin no//mngon par rdzogs par sangs rgyas zhes bya ba ni srid pa tha ma pa'o / /yang brgal ba gal te de bzhin gshegs pa dmigs na ni de'i tshe mi dmigs pa'i rang bzhin nyid yin pa 'gal bar 'gyur ro/ /'on te ma yin na ni de'i tshe mthong ba la bstan pa'i dge ba'i lo tog phun sum tshogs pa de dag ji ltar bdag dang gzhan gyi rgyud la sogs par 'gyur snyam du dgongs nas/'jam dpal khyod kyis de bzhin gshegs pa ji ltar mthong zhes gsungs so/ /glang po chen po zhog shig ces bya ba ni lan bka' stsal pa yin no/ /glang po chen po ni de bzhin gshegs pa la bya ste/de bzhin gshegs pa glang chen ni/ /rtag tu mnyam gzhag spyod pa yin/ /zhes bya ba la sogs pa gsungs pa yin no/ /glang po chen po ma bskyod cig/ /de bskyod na ni de mthong ste mngon par zhen pas bskyod pa'i dge ba'i lo tog phun sum tshogs pa mtha' dag med par 'gyur te/yang dag par mos pa dang bral nas med pa'i lta bar ltung ba'i phyir ro/ /de bas na ma brtags na dga' ba nyid kyis bcom ldan 'das ni gdul bya'i bye brag gi phyir bzhugs na ches legs pa yin no/ /'dir 'dus pa de kho na nyid zab mo thos pa rnams la ya mtshan bskyed pa'i phyir dang /bar du chod pa'i bya ba dag bya ba'i phyir yang gsungs pa yin te/ de lta ma yin na de ma thag tu gsungs pa'i dogs par ga la 'gyur/ gzhan dag blo ma sbyangs shing khyad par can gyi skal ba thob pa dang bral ba 'dus pa dag de bzhin gshegs pa'i dbang gis de dag mi nyan to//de bas na lhag par ya mtshan du gyur pa'i chos 'khor la gzigs nas skabs la bab pa dang skye bo mang po la phan par bya ba'i phyir glang po chen po'i rang gi ngo bo thog ma nyid du 'dri ba ni/ 'jam dpal sangs rgyas zhes bya ba de gang gi tshig bla dgas zhes gsungs so/ /de'i ngo bo mdor ston pa ni/bdag ces bya ba de gang gi tshig bla dgas zhes bya ba yin te/ bdag ces bya ba ni mu stegs pas yongs su brtags pa bdag go snyam pa'i yul lo/ /skye ba med pa zhes bya ba ni mtshan mar bya ba dngos po'i cha 'ga' yang der ma skyes pa'i phyir ro/ /bdag ces bya ba de gang gi tshig bla dgas yin pa sangs rgyas zhes bya ba de yang de'i tshig bla dgas so zhes bya ba ni de'i ngo bo zhes bya ba'i tha tshig ste/de la yang sgra 'jug pa'i rgyur gyur pa mtshan mar bya ba'i dngos po'i bag tsam yang yongs su ma grub pa'i phyir ro/ /de nyid kyi phyir 'di lta ste sangs rgyas zhes bya ba ni gzhi med pa'i tshig bla dgas so zhes gsungs te/'di ltar bstan pa yin te/ 'di 'am 'di la gzhi med pas gzhi med pa ste/ de'i tshig bla dgas so/ /'dis don rtogs par byed cing khong du chud par byed pas gzhi ste tshig la bya'o/ /gang gis skye 'gro mtha' dag gi yid la re ba yongs su rdzogs par mdzad pa la mkhas pa'i yon tan gyi rang bzhin bcom ldan 'das kyi sku la rjod par byed pa dang 'brel pa'i gnas 'ga' yang yod pa ma yin gyi/dngos po'i de kho na nyid brtag pa la rgyab kyis phyogs pa'i blo can byis pa rnams kyi spobs pa rang dbang du byung nas mtshan sangs rgyas zhes bya'o zhes yang dag par mngon par zhen to//sangs rgyas zhes bya bar brjod pa 'jug pa'i rgyu mtshan de la yang yod pa ma yin te/ ston par byed pa'i tshig bla dgas yin te de dag gis sgro btags pa yin no/ /don gnyis pa 'di yang sgrub pa'i tshul dang mthun par 'brel bar bstan to//de la dang po rab tu bsgrub pa'i phyir/ sangs rgyas zhes bya ba ni tshig gis shes par dka' ba'o zhes gsungs te/ ci'i phyir zhe na/ 'di ltar re zhig tshig kyang 'di ni tshig go zhes brtag par dka' ste/ shes par bya zhing gtan la dbab par mi nus te sla ba ma yin na/des bzhag cing bstan par bya ba'i don sangs rgyas zhes bya ba lta ci smos/ dgongs pa ni 'di lta ste/ rjod par byed pa yang sgra'i ngo bo la tshig ces brjod na/ de yang sgra'i mtshan nyid dam/ spyi'am blo la gzugs brnyan du 'dug pa zhig yin grang / kun kyang rigs pa ma yin no/ / de bas na 'di ni 'khrul pa'i dbang gis sgra'i tha snyad 'jug pa yin pas dngos po'i de bzhin nyid dpyod pa lhur len pa khyod kyis brtag par nus pa ma yin no/ /rjod par byed pa'i ngo bo bkag pa nyid kyis de la ltos te rab tu brtags pa brjod par bya ba nyid kyang rab tu bkag pa kho na yin no / /'on kyang de bkar te yang dgag par bya ba'i phyir gnyis pa'i don du/gang yang dag par ma grub pa dang zhes gsungs te/ rkyen tshogs pa las thog mar byung ba ma yin no/ /ma skyes pa dang zhes bya ba ni de'i 'og tu rgyun du 'jug cing gnas par 'du shes pa'i ma skyes pa'o/ /mi 'gag pa ste zhes bya ba ni rgyun chad par 'gags pa med pa'o//bdag la sogs pa mtshan mar bya ba'i tshig gi gnas su gyur pa gang chos gang dang yang mi ldan pa'i bcom ldan 'das de la gzhi tshig gang yang med do/ /ji lta bu zhe na gzhi dbyer med pa 'di la dbyer med pas dbyer med pa ste/ kun du 'gro ba spyi zhes bya ba'i bar du yin no//de'i gzhi ni 'di'i gnas dang rten zhes tshig sbyar te/ de'i gzhi med pa dang / gnas med pa dang / tshig gi yul ma yin pa zhes bya ba'i don gang yin pa de yin no/ /'di lta ste/ sangs rgyas zhes bya ba de ni de'i tshig bla dgas so zhes bya ba ni shes rab kyi spyod pa yongs su ma dag pas sgro btags pa ste/de kho na nyid la 'jug par bya ba'i phyir ro/ /'dir mdo ni 'di lta ste/ tshig gis brjod par bya ba'i don rang gi mtshan nyid gcig gam/ mtshan ma la sogs pa'am/ spyi'am/ blo la gzugs brnyan yod pa zhig yin grang / de la rang gi mtshan nyid ni skyes ma thag tu med par gyur pas zhes pa la sogs par ma nus shing brjod par bya ba med do//mtshan ma la sogs pa yang rtogs pas rang dgar byas pa nyid kyi phyir yang dag par med do/ /dngos po nyid yod na ni rang gi mtshan nyid kyi bdag nyid yin te de la yang skyon smras zin to//spyi yang logs shig pa la sogs pa'i ngo bor yod pa ni blo la yod pa ma yin te/ sna tshogs snang ba'i blo las nyams su myong ba med pa'i phyir ro/ /gang ming tsam dang rjes su 'brel zhing rnam par rtog pa la gzugs brnyan tsam phyi rol na yod pa 'dra bar snang ba de la don yin par gtam dgod par 'dod de smra ba de ni 'khrul pa'i dbang gis 'byung ba yin no//'khrul te snang ba de yang ji ltar snang bzhin du 'dod pa'i phyir gang yang dag par ma grub pa la sogs par gsungs pa yin no/ /'di don gyi ngo bor yang rigs pa ma yin te mi gsal ba la sogs pa yin pa'i phyir ro//bcom ldan 'das kyi sku 'di dag gi spyod yul thams cad las 'das pa yin na thabs gang gis rtogs par bya zhe na/ de'i phyir btsun pa sha ra dwa ti'i bu de bzhin gshegs pa tshol bar 'dod pas ni bdag btsal bar bya'o zhes gsungs te/brtag par bya'o/ /de gnyis 'brel pa ci zhig yod na gang gis de rtogs par bya ba'i phyir de la tshol bar byed ce na/ bdag ces bya ba de ni sangs rgyas kyi tshig bla dgas te zhes gsungs te/ chos nyid du mtshungs pa'i phyir ro zhes dgongs pa'o/ /mtshungs pa nyid ston pa ni ji ltar bdag ces bya ba mu stegs kyis yongs su brtags pa de ni shin tu med cing yod pa ma yin pa de nyid kyi phyir mi dmigs so//de bzhin du sangs rgyas kyang shin tu med cing mi dmigs so zhes bya ba yin no/ /'das pa la sogs pa'i dngos po ma lus pa rtogs pa'i phyir sangs rgyas zhes brjod pa ma yin nam/ji skad du/ sangs rgyas kyis ni 'das pa gzigs/ /zhes bya ba la sogs pa gsungs so zhe na de lta ma yin te/ 'di ltar rtogs pa po yang med/ rtogs pa yang med/ rtogs par bya ba yang med de/ gzung ba dang 'dzin pa dang bral ba'i phyir ro/ /de bzhin gshegs pa'i dbang gis ni 'das pa la mi slu ba'i mkhyen pa 'byung ste/de'i ngo bo la mngon par zhen pa'i dbang gis de skad brjod do/ /de nyid kyi phyir/ ji ltar bdag ces bya ba 'das pa la sogs pa yongs su shes pa'i chos gang gis kyang tshig tu brjod par bya ba ma yin pa ltar ston pa yang de bzhin no//de ltar ston pa gang la yongs su shes par bya ba dang / yongs su shes pa la sogs pa'i ngo bo grangs su bgrang ba gang yang yod pa ma yin yang de'i dngos por 'dzin pa'i 'khrul pa'i dri ma thams cad kyis ma sbags pa'i mkhyen pa'i byin rlabs kyis 'gro ba rnams kyi dang ba phun sum tshogs pa sgrub par mdzad pa la sangs rgyas zhes bya'o//gal te thabs 'dis bcom ldan 'das la blta bar bya ba yin na de ni sla ba kho na yin na de'i phyir 'di la 'bad pa chen po byed ce na/ thos pa dang bsams pa las byung ba'i shes pa la snying por blo skyed cing rtog pa bsal ba'i phyir/bdag ces bya ba'i gzhi'i tshig bla dgas de ni shes par sla ba ma yin no zhes gsungs te/ nga'o snyam pa ni thog ma med pa nas goms pa yin pa'i phyir bsgoms pa mchog tu mthar phyin pa las skyes pa'i shes pa med par thos pa tsam snying por byed pas bsal bar mi nus te/ 'di ltar bdag ni yul byed pa nyid rnam par sun 'byin pas sel bar byed la/de sun 'byin pa yang med par bsgoms pa mthar phyin pa las 'gyur ro/ /ji skad du/ gal te chos la bdag med so sor rtog /so sor brtags te gal te sgom byed na/ /rgyu des 'bras bu mya ngan 'das pa thob/ / rgyu gzhan gyis ni zhi bar 'gyur ba med/ /ces gsungs so/ /bdag ces bya ba'i gzhi'i tshig bla dgas de ni gzhi med pa nyid kyis yang dag par shes par sla ba ma yin no zhes bya ba ni bsdus pa'i don yin no/ /sangs rgyas zhes bya ba'i gzhi'i tshig bla dgas kyang de bzhin no/ /dngos por mngon par zhen pa ni thog ma med pa nas bsags pa'i phyir mi dmigs pa bsgom pa med par ni mi 'gyur ro//de bas na 'dir don ni bsgoms pa las byung ba'i shes pa kho na mngon du bya dgos pa yin pas 'di nyid la 'bad de gnas par bya'o/ /'phags pa 'jam dpal nyid kyi mthus shes par byas zin pa rang nyid la rjes su brtse ba yod pa dang bcas pa bzhin du gsar du zhugs pa rnams la yin la/ji ltar las dang po pas 'tshal bar 'gyur ba de lta bur mi ston to zhes brjod/ ci'i phyir gsal bar ma bstan te/ don gyis ni las dang po pa rnams kyang khong du chud par 'gyur ba de ltar bstan to//'phags pa yang rnam par rtog pa lhag ma brtsam par bzhed nas bdag nyid kyi shes pa 'byung ba 'di gsal bar bya bar bstan pa'i phyir/ btsun pa sha ra dwa ti'i bu kho bo ni ji ltar dgra bcom pa byas pa srung ba can gyis kyang zhes bya ba la sogs pa gsungs so//rtogs pa ni byas pa ste/ mthong ba'i chos la bde bar gnas pa la sogs pa sems las byung ba rnams ched du srung zhing yod par byed pa'i ngang tshul can gang dag yin pa de dag ni byas pa srung ba can yin te/ dgra bcom pa rtogs pa rnam par grol ba dbang po rnon po zhes bya ba'i bar du yin no//kho bo ni ji ltar sus kyang zhes bya ba'i tshig ni thams cad kyi mjug sdud pa'o/ /des na bcom ldan 'das kyi bar du yang gzung bar bya'o/ /des na 'di skad bstan te/ ji ltar shes pa dang brjod pa mtha' dag las yang dag par 'das par bya ba'i phyir byang chub kyi ched du de ltar bdag ston to//de dag gi spyod yul yang ma yin na las dang po pa dngos po'i mtha' la gnas pa rnams kyis lta smos kyang ci dgos/ byang chub ni de dag nyid la shes pa dang brjod pa thams cad kyi yul las yang dag par 'das pa yin no//dri ba brtsam pa'i phyir de ci'i phyir zhe na zhes gsungs te/ gal te shes pa dang tshig gi yul ma yin na bcom ldan 'das kyis 'di ji ltar mngon du byas nas bstan zhes bya ba ni dris pa'i don yin no/ /'di ltar byang chub ni sus kyang rnam par ma shes zhes bya ba nas ma bstan pa'i phyir ro zhes bya ba'i bar gyi phyir ro//rnam par shes pa dang bstan pa'i bar du sngar bstan pa'i tshul gyis 'di la ma gtogs par byed pa po 'dzin pa'i bdag nyid kyi ngo bo med pa'i phyir ro/ /de la sus kyang rnam par ma shes pa ni spyi'i rnam par ro/ /sus kyang mngon par rdzogs par ma rtogs pa ni bye brag gi ngo bor ro//ma mthong ba ni mig gi rnam par shes pas so/ /ma thos pa ni rna ba'i rnam par shes pas so/ /bye brag ma phyed pa dang rnam par ma shes pa gnyis kyang brjod par bya ba yin te/ gnyis ni nye bar mtshon par bya ba'i phyir ro/ / yang na yul ring po 'di gnyis kyang re zhig gzung bar bya ba ma yin na gzhan lta smos kyang ci dgos zhes shes par bya ba'i phyir gnyis bstan to/ /yang na tshig snga ma gnyis ni bye brag phyed pa dang / rnam par shes pa'i dbang du byas pa yin no/ /ma dran pa ni rjes su myong ba sngon du song ba'i dran pa'i shes pas so//ci'i phyir rnam par mi shes pa nas ma dran pa'i bar du yin zhe na/ 'di ltar ma skyed pa ste/ bskyed na ni de ma thag tu 'dzin pa srid pa'i phyir ro/ /ji ltar ma dran zhe na/ gang gis ma bkag pa ste/ dran pa'i yul ni 'das pa yin pa'i phyir ro/ /ma smras pa ni rang gis so//ma bstan pa ni dris pa'i tshe'o/ /gal te de ltar byang chub ni nang gi yin na de thob par bya ba'i phyir 'bad par byed de dgos pa yang ci yod ce na/ ji tsam du byang chub ces bya ba ni 'di lta ste zhes gsungs te/ ji tsam du byang chub ces bya ba ni 'di lta ste/ byang chub ces bya ba'i tha tshig ste/de ni rang dang gzhan gyi don byed pa 'di lta bu gang yin pa yin no/ /'dis ni mchog yin par bstan te/ phun sum tshogs pa thams cad kyi mchog tu gyur pa thams cad kyi bdag nyid yin pa'i phyir byang chub de yang yod pa yin no/ /de ltar na byang chub ni byed pa'i ngo bo yin pa'i phyir la/byed pa po la ltos pa'i phyir byed pa po yod pa thob par 'gyur ro/ /byed pa po yang las la rtsom pas byang chub par bya ba'i las kyang yod par 'gyur ro/ /de ltar na byang chub kyis mngon par rdzogs par 'tshang rgya bar bya ba ci yang med cing zhes bya ba rjes bzhin du ston pa thams cad dang 'gal bar 'gyur ro zhe na/byang chub de yang dngos po ma yin no zhes gsungs te/ byed pa zhes bya ba'i tha tshig go/ /de ci'i phyir zhe na zhes bya ba ni gal te byed pa med na go ji ltar byang chub ces bya/ 'di ltar byang chub dang rtogs pa dang dngos po nyams su myong ba zhes bya ba ni rnam grangs yin no zhe na/'di ni kun brtags te brjod pa yin gyi/ don dam pa ni ma yin no zhes bstan pa'i phyir byang chub kyis mngon par rdzogs par 'tshang rgya bar bya ba ci yang med cing zhes gsungs te/ gzhan gyi ngo bo la 'dzin pa mi srid pa'i phyir ro/ /'o na rang la 'dzin pa la ltos nas byed pa rnam par gzhag par 'gyur ro zhe na 'di yang med do zhes bstan pa'i phyir byang chub kyang byang chub kyis mngon par rdzogs par 'tshang rgya ba ma yin pa'i phyir ro zhes gsungs te/rang rig pa la yang bya ba dang byed pa dang byed pa po'i dngos po gzhag tu gcig la gsum gyi dngos po mi 'thad pa'i phyir ro//byang chub byed pa'i ngo bo la rgol ba pos brgal ba ma yin nam/ byed pa po'i ngo bo la ma rgal bar byang chub kyis mngon par rdzogs par 'tshang rgya bar bya ba ci yang med cing zhes bya ba la sogs pas ji ltar de sel bar byed/ byed pa'i ngo bo de ni byang chub la med cing gang la byang chub pa dang bdag nyid la yang yod pa ma yin no zhes bsal ba'i rigs te/de la brgal ba'i phyir ro zhe na/ bden te 'on kyang byed pa po'i gnas skabs kyi bye brag kho na nyid bdag nyid du gyur pa ni byed pa zhes bya ba yin gyi/ de las 'di gzhan pa yang ma yin te/ byed pa po de'i ngo bo ma yin par thal bar 'gyur ba'i phyir ro//byed pa po de'i ngo bo yang logs shig na yod pa ma yin no zhes bstan pa'i phyir/ byang chub kyis mngon par rdzogs par 'tshang rgya bar bya ba ci yang med cing zhes bya ba la sogs pa gsungs so/ /de bas na gnyis su med pa rang rig pa tsam dri mas ma sbags pa gtso bor byas te/byang chub ces btags te gzhag go/ /'dis ni sgro 'dogs pa'i mtha' spangs pa yin no/ /byang chub kyis mngon par rdzogs par 'tshang rgya bar bya ba ci yang med na/ byang chub ni bdag nyid bcom ldan 'das kyis chos kyi dbyings de ji ltar mngon par rdzogs par sangs rgyas she na/de'i phyir/ 'jam dpal bcom ldan 'das kyis chos kyi dbyings mngon par rdzogs par sangs rgyas sam zhes tshig zur gyis dris te/ ma yin nam ci zhes bya ba'i don to/ /lan ni btsun pa sha ra dwa ti'i bu de ni ma yin no zhes bya ba yin no//de ci'i phyir zhe na zhes bya ba ni de bzhin nyid rtogs pas rab tu phye ba'i ston pa'i rtogs pa de sel bar byed na grub pa'i mtha' dang ji ltar 'gal bar mi 'gyur zhes bsams pa'o/ /'og ma'i don khas mi len pa ma yin pa'i phyir ro zhes bstan pa'i phyir/ 'di ltar chos kyi dbyings nyid bcom ldan 'das yin pa'i phyir ro zhes gsungs te/dgongs pa ni 'di yin te/ dri ma med pa'i bdag nyid kyi mkhyen pa'i ngo bo ni byang chub bo/ bcom ldan 'das kyang de'i bdag nyid do/ /chos kyi dbyings kyang de'i bdag nyid kho na yin te/ rnam par dben pa las dben pa tha dad pa med pa'i phyir ro zhes rtag tu bka' stsal to//dben pa ma yin pa'i ngo bo 'di la ni byang chub par bya ba dang / byang chub pa po dang / byang chub pa'i ngo bo yod par ga la 'gyur/ yod na ni gzung ba dang 'dzin pa yod par 'gyur ba'i phyir ro/ /dben pa'i mtshan nyid ni stong pa nyid de/ stong pa nyid med par 'gyur ro snyam nas/btsun pa sha ra dwa ti'i bu gal te bcom ldan 'das kyis chos kyi dbyings mngon par rdzogs par sangs rgyas par gyur na zhes bya ba la sogs pa gsungs te/ gal te chos kyi dbyings mngon par rdzogs par sangs rgyas par gyur na/ 'o na ni gnyis su med pa'i ye shes kyi bdag nyid gang yin pa de skye ba med pa'i dbyings yin par sngon rnam pa du mar bzhag pa de dang yang 'gal zhing mi mthun par 'gyur te/dngos su na rig par bya ba dang rig par byed pa po yod pa'i phyir ro/ /de'i bdag nyid ston pa'i phyir de mngon par rdzogs par sangs rgyas zhes bstan na/byang chub pa'i bdag nyid bcom ldan 'das ma yin nam/ de ltar chos kyi dbyings kyi bdag nyid ces bya zhes mi shes pas dris pa dang / de'i phyir btsun pa sha ra dwa ti'i bu chos kyi dbyings de nyid byang chub bo zhes gsungs so/ /de ci'i phyir zhe na zhes 'dri ba'i bsam pa ni 'di yin te/ byang chub gang yin pa ni sgrib pa thams cad dang bral ba'i ngo bo yin pa'i phyir dngos po'i ngo bo yin no/ /chos kyi dbyings ni gnyis su med pa'i mtshan nyid yin pas chos thams cad dngos po med pa'i ngo bo yin na de ci'i phyir byang chub kyi ngo bo nyid du dam 'cha' ste/ dngos po dang dngos po med pa gnyis ni gcig tu gnas pa mi srid pa'i phyir ro zhe na/de la 'dir lan ni chos kyi dbyings ni sems can med pa'i phyir ro zhes gsungs te/ 'di ltar chos kyi dbyings ni sems can med pa zhes bya ba de ni byang chub kyi tshig yin no/ /de bzhin du chos thams cad ngo bo nyid med pa'o zhes bya ba de ni byang chub kyi tshig bla dgas te/de ci'i phyir byang chub kyi tshig yin/ ci brtags pa la bya'am/ don rang bzhin gyis dngos po med pa'i phyir chos kyi dbyings ni sems can med pa'o zhes brjod par rigs so/ /'on kyang sgrib pa med pa'i ye shes kyi bdag nyid kyi byang chub la brgal ba'i lan ci yang ma btab pa yin no zhe na/de'i phyir byang chub pa'i bdag nyid bcom ldan 'das bstan ma thag pa de ni chos kyi dbyings kyi rnam grangs su 'gro ba'o zhes gsungs te/ de'i bdag nyid de ni byang chub de'i tshig bla dgas yin gyi/ brtags pa ni ma yin no zhes bya ba'i tha tshig go/ /'di yang chos kyi dbyings nyid bcom ldan 'das so zhes bya ba 'di nyid gsal bar byed pa'o/ /des na don ni 'di yin te/ rig par bya ba dang rig pa po med pa'i mtshan nyid ni chos kyi dbyings gang yin pa de yin no/ /de nyid byang chub ces bya ste/rnam par dben pa dang dben pa can tha dad pa med par bstan pa'i phyir ro/ /chos kyi dbyings ni ngo bo med cing gtan med pa'i ngo bo yang ma yin no/ /'on kyang dngos po'i rang gi ngo bo kho na ste/ brtags pa'i rnam pa ma lus pa dang bral ba'i rang gi ngo bo la chos kyi dbyings dang byang chub ces bya'o//thams cad kyang chos nyid 'di las ma 'das pa yin te/ de bas na mnyam pa nyid las dgongs te/ de skad du chos thams cad dngos po med pa de ni byang chub kyi tshig go zhes gsungs so/ /de ci'i phyir zhe na zhes bya ba ni ji ltar chos kyi dbyings sems can med pa dang / chos thams cad ngo bo nyid med pa de ni byang chub kyi tshig yin/ ji tsam du dngos po dang dngos po med pa gnyis ni gcig la 'gal ba'i phyir ro zhe na/ lan du chos thams cad ni tha dad pa med pa'i phyir ro/ /ji ltar zhe na/ sangs rgyas kyi yul du ste/ sangs rgyas kyi yul gyi ngo bor dang / de bzhin nyid kyi ngo bor zhes bya ba'i bar du yin no//'di ltar gang la gzung ba dang 'dzin pa la sogs par rnam par dbye ba'i tha dad pa nyid yod pa ma yin pa de tha dad pa med pa yin no/ /kha cig 'khrul nas tha dad pa med pa nyid ni gang la rang gi ngo bo dbye ba med pa de la de skad ces bya'o zhe na/ de'i phyir 'di skad du/btsun pa sha ra dwa ti'i bu tha dad pa med pa zhes bya ba de ni rnam par rig pa med pa'o zhes lan gsungs te/ 'di la rnam par rig par 'dzin pa yod pa ma yin pa de bas na rnam par rig pa med pa'o/ /kha cig 'khrul nas rnam par rig pa med pa zhes bya ba 'di la sems can yang med pas rnam par rig pa med pa yin no zhe na/de'i phyir de nyid gsal bar byed pa ni/ btsun pa sha ra dwa ti'i bu rnam par rig pa med pa zhes bya ba de ni rnam par shes shing gzung bar mi nus pas na rnam par rig pa med pa zhes bya'i/ rnam par shes pa tsam yang med pa'i phyir ni ma yin no//gang gi ngo bo rnam par shes par mi nus/ ci rdul phra rab la sogs pa'i ngo bor ram zhe na/ 'dus byas su rnam par rig par mi nus pa nas/ 'dus ma byas kyi bar du yang rnam par rig par mi nus pa ste/ bar du zhes bya ba'i sgras 'dus byas kyi dbye ba gzugs dang / tshor ba la sogs pa gzung ngo / /rnam pa thams cad du de dag la rnam par rig pa 'dzin pa gang yang med de chung ngu na rnam par shes pa tsam yang 'di la yod pa ma yin pa'i gtan tshigs des na de rnam par rig pa med pa'o zhes gsungs so/ /rdul phra rab la sogs pa'i ngo bor rnam par rig par byed pa ni rigs te/de dag mi snang ba'i phyir ro/ /'on te sems dang sems las byung ba'i ngo bor yin na ni gsal bar rab tu snang ba'i ngo bo la ji ltar na rnam par rig par byed pa ma yin zhe na/ de'i phyir btsun pa sha ra dwa ti'i bu chos thams cad ni zhes bya ba la sogs pa gsungs te/chos thams cad de sems dang sems las byung ba yang rnam par rig par byed pa ma yin te/ 'dzin pa med par mthun pa'i phyir dang / thams cad du dmigs par bya ba'i mtshan nyid dang bral ba'i phyir ro/ /de ci'i phyir zhe na zhes bya ba ni tshor ba la sogs pa 'byung ba gsal bar snang bzhin du ji ltar gsal bar nus zhes bsams pa'o//lan du 'di ltar tshor ba la sogs pa'i chos thams cad ni skye ba rang gi ngo bo 'thob pa yod pa ma yin no/ /tshor ba la sogs pa rang rang gi ngo bo 'thob pa yod pa ma yin nam/de med du zin na 'jig rten snang ba med par thal bar 'gyur ba'i phyir dang / kun nas nyon mongs pa dang rnam par byang ba med par thal bar 'gyur ba'i phyir ro zhe na/ de'i phyir gsungs pa yang bden te/ de 'byung ba yang gang la gnas te rnam par rig par 'gyur ba'i 'dzin par 'gyur ba'i chos ni yod pa ma yin te/tshor ba la sogs pa rnams lcags kyi thur ma bzhin du gzhan la reg par byed pa cung zad kyang med la/ rang la yang yul dang yul can gyi dngos por ma yin gyi/ rang gi rgyu las gnang ba'i bdag nyid du 'byung ba kho nar zad do zhes ji skad du sngar gsungs pa lta bu'o zhes bya ba ni bsdus pa'i don yin no//chos sna tshogs yod pa ma yin na sems can 'di dag ni ma gsod pa la zhugs pa'i dbye ba 'di ji ltar rung bar 'gyur zhe na/ de dag ni bsam gyis mi khyab pa la zhugs pa ste/ sangs rgyas nyid la zhugs pa zhes bya ba'i tha tshig go//sangs rgyas nyid ni bsam pa thams cad kyi yul ma yin pa'i phyir bsam gyis mi khyab pa yin no/ /sna tshogs pa nyid med na rnam par gzhag pa 'di dag mi rigs so zhes bya ba ni rgol ba'i don yin no/ /lan du gang dag mtshams med pa la zhugs pa de dag ni bsam gyis mi khyab pa la zhugs pa'o zhes bya ba'i go rims bsnor nas kyang bsam gyis mi khyab pa la zhugs pa ni bsam gyis mi khyab pa la zhugs par ma mdzad kyi/mtshams med pa la zhugs pa yang yin te/ 'di yang mnyam pa nyid la dgongs pa kho nas bstan to/ /de nyid kyi phyir gang dag bsam gyis mi khyab pa la zhugs pa de dag ni yang dag pa la zhugs pa'o zhes gsungs so//yang gi sgras mtshams med pa la zhugs par rtogs par bya'o/ /de ci'i phyir zhe na zhes bya ba 'dir dgongs pa ni 'o na yang dag pa zhes bya ba 'di ci yin 'dir ci de kho na yid la byed pa phyin ci ma log pa'i ye shes la brjod na de ni mi rung ste/de thun mong ba med pa'i phyir ro/ /mnyam pa nyid la brjod na ni mtshams med pa la zhugs pa ngan song la gzhol ba rnams ji ltar na bsam gyis mi khyab pa la zhugs pa dang / sangs rgyas nyid la gzhol ba yin zhe na/ de'i phyir btsun pa sha ra dwa ti'i bu yang dag pa zhes bya ba de ni dbyer med pa'i tshig yin no zhes gsungs te/ 'di la dbyer med de thams cad du ngo bo mnyam pa'i phyir ro/ /dbyer med pa'i chos kyi dbyings kyang yod pa ma yin te/ de'i tshig ni ngag yin no/ /de bas na stong pa nyid du na de dag la bye brag gang yang yod pa ma yin no zhes bstan pa yin no//ji ltar bye brag med pa de bstan pa'i phyir dang po rgol bar byed pa rtsom pa ni 'o na gal te thams cad de bzhin nyid dang ldan pa yin na mtshams med pa la zhugs pa de ji ltar ngan song du 'gro bar 'gyur/ byang chub tu smon pa byas pa dang /de las gzhan pa yod pa dag kyang ci'i phyir mya ngan las 'das pa dang mtho ris su 'gro bar 'gyur/ de ltar gyur na ni mtshams med pa la zhugs pa mtho ris dang mya ngan las 'das par gyur te/ de bzhin nyid dang ldan pa'i phyir byang chub la brtson pa bzhin no/ /yang na de dag kyang de bzhin du de ltar mi 'gyur te/khyad par med pa'i phyir ro zhe na/ de'i phyir gang dag bsam gyis mi khyab pa dang ldan pa de dag ni mtho ris su 'gro ba ma yin zhes bya ba la sogs pa gsungs te/ bsam gyis mi khyab pa ni 'dir stong pa nyid la dgongs pa'o/ /de ci'i phyir zhe na zhes bya ba ni bsam pa ni 'di lta ste/dge ba'i chos la 'jug pa dang / stong pa nyid bsgom pa don med par 'gyur te/ de dang ldan pa dang mi ldan par yang bye brag med pa'i phyir ro zhe na/ bsam gyis mi khyab pa ni 'gro ba dang mi 'gro bar nye bar gnas pa ma yin pa nas/ mya ngan las 'das pa'i bar du 'gro ba dang mi 'gro bar nye bar gnas pa ma yin te/mtho ris dang / ngan song du zhes dgongs pa'o/ /de gnyi ga yang srid pa thog ma med pa nas goms pa yin pa'i phyir 'gro ba dang 'ong ba'i tshig ni lan grangs du mar gtong ba dang len pa srid pa yin no/ /mya ngan las 'das par 'gro ba ni yongs su mi nyams pa'i chos can yin pas 'dir 'ong bar byed pa med do//bar gyi sgras de thob par byed pa'i sa la sogs pa yang gzung bar bya'o/ /'gro ba dang mi 'gro ba zhes bya ba ni 'thob pa dang mi 'thob pa'o/ /nye bar gnas pa ni 'jug pa'am rab tu 'byed pa'o//don ni 'di yin te/ stong pa nyid 'di bsgoms na gang zag stong pa bzhin du gzhan la phan pa'i rgyur 'gyur ro/ /de bas na de phyin ci ma log par goms pa las dge ba 'phel bar 'gyur la/ bzlog na bsgrib par 'gyur ro/ /de mngon du gyur pa dang mngon du ma gyur pa yang phan pa dang phan pa ma yin pa thob par byed pa yin gyi/yod pa tsam gyis phan pa dang phan pa ma yin par byed pa ma yin pas sngar smras pa'i thal bar 'gyur ba med de / de'i 'og tu ni 'dul ba 'dzin pa dang / ma mo 'dzin pa rnams kyi dogs pa bsal ba'i phyir bstan pa yin no//de la 'di ni 'dul ba'i don la brtson pa rnams kyi dogs pa yin te/ sna tshogs pa nyid med pa yin na 'dul ba las ltung bar 'gyur ba la gnas pa'i dge slong rnam pa bzhi dang ltung ba med pa zhes ci'i phyir gsungs she na/ de la 'dir re zhig btsun pa sha ra dwa ti'i bu gang dag ltung ba'i rtsa ba bzhi la gnas pa de dag kyang zhes bya ba la sogs pa gsungs te/ltung ba'i rtsa ba smos pas ni dge 'dun lhag ma yang mtshon par byed pa yin no/ /bzhi la gnas pa smos pas ni mi gnas pa yang mtshon par byed pa yin no//de dag kyang rtsa ba med pa la gnas pa'o zhes bya ba ni de dag chos kyi dbyings la gnas pa zhes bya ba'i tha tshig ste/ 'di la rtsa ba thog ma yod pa ma yin pas rtsa ba med pa ni chos kyi dbyings te/ chos nyid ni dus thams cad du gnas pa'i phyir ro/ /de la gnas pa ni de'i bdag nyid du gyur pa ste/chos thams cad de bzhin nyid kyi bdag nyid yin pa'i phyir ro/ /rtsa ba dang rtsa ba med pa la gnas pa med pa zhes bya ba 'di'i tshig gi don sgro btags nas pha rol po dag rgol ba ni de ci'i phyir zhe na zhes bya ba yin te/ de lta na ni shin tu 'dul ba dang 'gal bar ji ltar mi 'gyur zhes bya ba'i tha tshig go//dgongs pa'i tshig gi don brjod pa ni btsun pa sha ra dwa ti'i bu skye ba med pa la rtsa ba'am/ rtse mo zhes bya ba med pa'i phyir ro zhes bya ba ste/ skye ba med pa ni chos kyi dbyings so/ /rtse mo med pa ni tha ma'o/ /de ci'i phyir smos/ ji tsam du rtsa ba med pa zhes bya ba de kho nas skabs kyi don gsal bar gyur pa kho na yin mod ce na/ tha ma smos pas thog ma gsal bar bya ba'i phyir ro/ /de lta ma yin par rtsa ba 'ba' zhig smos na rtsa ba 'byung ba nyi tshe grags par 'gyur gyi skabs la phan pa med par 'gyur ro/ /tha ma med ces bya ba ni chos kyi dbyings rnam grangs gzhan gyis bstan pa'i phyir te/'di ltar de ltar na thams cad kyi chos kyi dbyings ni dus thams cad pa yin no/ /de bas na rtsa ba med pa'i dge slong zhes bya ba de ni mi gnas pa'i dge slong gi tshig bla dgas so zhes gang gsungs pa yin no //rtsa ba med pa zhes bya ba ni rtsa ba byung ba dang bral ba'o/ /mi gnas pa zhes bya ba ni bdag tu 'dzin pa la sogs pa la mi gnas pa dang / stong pa nyid kyi bdag nyid ces bya ba'i bar yin no/ /'dul ba 'dzin pa dang rgol ba ltung ba la rtsod pa dang 'thab pa byung ba la rtsod pa'i dge slong dang /de dag dang bral na sems dang bar byed cing 'jig rten na yon gnas su bya ba rnam pa sna tshogs med na de dag rnam par gzhag par ji ltar 'gyur zhe na/ de'i phyir rtsod pa byung ba zhes bya ba de ni lhag par sgro 'dogs pa zhes bya ba'i tshig bla dgas so zhes gsungs te/lhag par sgro 'dogs pa ni gang la gzung ba la sogs pas lhag par sgro 'dogs pa ste/ lhag par sgro 'dogs pa ni chos kyi dbyings kho na la bya'o/ /sna tshogs par so sor snang ba 'byung ba dang rtsod pa la sogs par gzhag pa yod du zin kyang / 'on kyang thams cad kyang sems kyi chos nyid gnyis su med pa las mi ldog go zhes bya ba ni bsdus pa'i don yin no//de la lhag par sgro 'dogs pa'i chos kyi dbyings zhes bya ba la spyod pa ni 'jig rten na sbyin gnas su 'gyur te/ de la spyod pa ni ji lta ba bzhin du shes pa'o/ /spyod pa ni rtogs pa yin pa'i phyir ro//de bas na bsod nams mi nyung ba bsags pa'i gnas yin pa'i phyir de nyid mchod gnas su 'os pa yin no/ /yi ge kha cig las nyes par sgro 'dogs pa la spyod pa zhes 'byung ste/ de la nyes pa zhes bya ba ni ltung ba la sogs pa la bya la/de chos kyi dbyings gang la sgro 'dogs pa yod pa de la de skad ces bya ba 'bru mang por bya'o/ /btsun pa sha ra dwa ti'i bu lhag par sgro 'dogs pa la spyod pa zhes bya ba 'di'i sgra'i don bzung na lhag par sgro 'dogs pa la spyod pa'am/ rtsod par sgro 'dogs pa la spyod pa ni yon gnas yin no//de ci'i phyir zhe na zhes bya ba ni rgyud rnam par ma dag pa ji ltar yon gnas su'o zhes sems pa'o/ /rnam par phye ste mdor ston pa ni 'di ltar mnyam pa la de lhag par sgro 'dogs pa'i phyir ro zhes gsungs te/ mnyam pa 'dra ba kun la khyab pa de la lhag par sgro 'dogs pa ni chos kyi dbyings la bya ste/'di la lhag par sgro 'dogs pa zhes snga ma bzhin du sbyar ro/ /ma mo'i don la brtson pa dag sems pa sna tshogs pa med na dad pa dang dad pa med pa dang / lhag pa'i sems la spyod pa zhes bya ba'i bar du 'di dag ji ltar rnam par dbye/'di ltar dad pa zhes bya ba ni las dang 'bras bu dang bden pa dang / dkon mchog la mngon par yid ches pa gang yin pa'o/ /rung ba 'di la yod pas rung ba can te/ 'dul ba las gsungs pa bzhin du rung ba la rjes su gnas pa'o/ /tshul yang dag par ma bcom pa ni srid pa'i mtshan nyid 'khor ba la mngon par dga' ba dang /gzugs la dga' ba'i tshul rtsa ba nas bton pa'o/ /skye ba la sogs pa'i 'jigs pa las rgal ba ni gang gis 'jigs pa'i rgyu nyon mongs pa'i tshogs spangs pa'i phyir te/ de ni 'jigs pa las rgal ba'o//bzod pa skyes pa can ni gang zhig sdug bsngal la chos shes pa'i bzod pa skyes pa'o/ /dul ba ni spyod pa bzang po can no/ /lhag pa'i sems la spyod pa ni zag pa med pa'i ting nge 'dzin thob pa'o/ /bzlog pa ni ma dad pa la sogs pa yin no zhe na/ rnam par dbye ba de dag snang ba thams cad kyang chos kyi dbyings ro gcig pa la yang 'gal ba med de/rnam pa du ma snang zhing ston pa'i sems dang sems las byung ba gnyis su med pa la yang de ltar snang ba'i phyir ro/ /de ltar na rnam par byang ba nyid la sogs pa dang ldan pa'i sgo nas ma dad pa la sogs pa rnam par gzhag go//log par lta ba la sogs pa dang ldan pa'i sgo nas dad pa la sogs par gzhag go/ /tha snyad ni brjod par 'dod pas bkod pa'i rnam pa'i rgyu kho na las yin gyi/ dngos su yod pa la ltos pa ni ma yin pas 'di la mngon par zhen par mi bya'o/ /tshig de dag nyid kyi rgyu mtshan ni brjod par 'dod pa'i rnam pa tsam yin par ston pa ni yon tan dang ldan pa tha snyad du ma dad pa la sogs pa nyid yin par bstan pa'i phyir/btsun pa sha ra dwa ti'i bu dge slong dad pa can ni dad pas byin pa spyod pa'i 'os ma yin no zhes bya ba la sogs pa gsungs so/ / de la dad pa ni 'dod pa yin te/ bdag dang bdag gi ba la sogs pa la mngon par chags pa zhes bya ba'i tha tshig go/ /de 'di la yod pas dad pa can no/ /ma dad pa ni bzlog pa ste/ /sred pa dang bral ba'o/ /de ni dgra bcom pa ste/ rgyud yongs su dag pa'i phyir ro/ /zla ba sgron ma'i ting nge 'dzin las 'di skad du de dag ni zas ro brgya dang ldan pa zhes bya ba la sogs pa gsungs pa yin no//rtog par byed pa ni rtog pa ste/ tshul bzhin ma yin par rnam par rtog pa'o/ /de 'di la yod pas brtags pa can no/ /'di yang 'os ma yin te/ rgyud yongs su ma dag pa'i phyir ro//bzlog pa ni brtags pa can ma yin te/ gang dus thams cad du tshul bzhin yid la byed par mngon par dga' ba'o/ /sred pa'am 'khor ba'i rgyun gyi tshul brtson par byas na rgyun ma zad par tshul yang dag par bcom pa zhes bya bar mi srid pas na/ 'jam dpal ci las bsams te de skad smra zhes dris so//rang gi bsam pa ston pa ni mnyam pa nyid yang dag par 'joms par mi byed de/ mnyam pa nyid de nyid tshul yin no zhes bya ba yin no/ /mnyam pa nyid yang dag par 'joms par mi byed de zhes bya ba ni 'dis mi byed ces bya ba khong nas dbyung ngo //mnyam pa nyid ni gang zag stong pa nyid do/ /de 'dis the tshom dang phyin ci log gi shes pa gnyis kyis yang dag par 'joms par mi byed do/ /de gnyis kyis yul du byed pa nyid ni 'joms par byed pa yin no/ /gal te des mnyam pa nyid yang dag par 'joms par mi byed na de lta na mnyam pa nyid yang dag par 'joms par mi byed ces bya bas chog mod/tshul yang dag par ma bcom pa zhes ci'i phyir smos she na/ mnyam pa nyid ces gsungs pa stong pa nyid kyi bdag nyid mnyam pa nyid de nyid sngar bstan pa'i tshul yin te don tha dad pa cung zad kyang med do//de bas na gang gis yang dag par ma bcom pa yang dag par ma rtogs pa de de lta bu yin no zhes bya ba'i tshig gi don du gnas so/ /'jigs pa mtha' dag dang bral ba'i dgra bcom pa ni 'jigs pa nyid dang ma bral bar mi srid do snyom nas/ 'jam dpal ci las bsams te de skad smra zhes dris so//'dir brjod par bzhed pa ni de'i 'jigs pa cung zad tsam yang med na ci zhig las rgal bar 'gyur zhes gsungs te/ 'di snyam du 'jigs pa zhig yod na ni las rgal tam ma rgal zhes brtags grang na/ dgra bcom pa'i gnas skabs na ni 'jigs pa cung zad tsam yang yod na de gang las rgal ba zhes bya ste/sngon nyid nas 'jigs pa lnga las 'das pa'i phyir ro/ /gang gis sdug bsngal la chos shes pa'i bzod pa zhes bya ba la sogs pa chos cung zad tsam yang 'phags pa'i bden pa bzhi bsgoms pas ma skyed pa de ma skyes pa'i bzod pa can gyi 'phags pa'i gang zag ces bya ste/ma skyes pa'i bzod pa can gang yin pa zhes tshig rnam par sbyar nas so/ /'di ltar de ni rang bzhin kho na yin gyi de la ma gtogs par bzod par byed pa'i byed pa po ma yin te/ ma skyes pa yin no/ /de ci'i phyir zhe na zhes bya ba ni ma dul ba ni ngan par spyod pa yin na de las bzlog pa nyid du lus dang ngag zhi bar mi srid do snyam pa yin no//rang gi dgongs pa ni ma dul ba ni dul la/ dul ba ni ma dul ba zhes gsungs te/ gang gis zhes bya ba lhag ma yin no/ /ma dul ba ni smad pa yin pa'i phyir/ gang gis 'dul bar byed cing skrod pa de la de skad ces bya'o//dul ba ni ma dul zhes bya ba ci'i phyir smos/ de ni shugs kyis go bar 'gyur ro zhe na/ de ni bden te/ 'on kyang 'dul ba dang bral ba ma yin na ni 'dul ba yin no zhes bya ba 'di la dgongs nas smos te/ gsal bar bya ba'i phyir ro//zag pa med pa'i ting nge 'dzin dang bral ba rnams ji ltar lhag pa'i sems la spyod pa nyid yin zhes bsams nas 'jam dpal ci las bsams te de skad smra zhes smras so/ /lan du btsun pa sha ra dwa ti'i bus smras pa 'di ltar de lhag par byed pa'i phyir ro zhes bya ba yin te/ lhag par byed pa ni sems nyid la lhag par bdag tu mngon par zhen nas tha snyad du byed do zhes bya ba'i bar du yin no//gzhan dag na re bya ba ma yin pa byed pa bzlog pa'i phyir 'phags pa ni lhag pa'i sems la spyod pa ma yin no zhes bstan pa yin no/ /sems can dman pa gzhan dag 'di snyam du nyan thos dgra bcom pa dang /rang sangs rgyas kyi sa la bkod pa ni blo mchog dang ldan pa yin no snyam pa'i sems 'di skyes nas/ 'phags pa 'jam dpal 'di yang dgra bcom pa zag pa zad pa yin pa snyam/ de lta bu ma yin na shin tu zab pa'i de kho na nyid ston par su zhig nus pa yod ce na/de'i dogs pa la ltos nas/ shes rab mchog dang ldan pas 'jam dpal khyod kyis dgra bcom pa zag pa zad pa ji lta ba de bzhin du smras pa legs so legs so zhes gsungs so/ /zag pa zad pa ni dgra bcom pa nyid kyi gtan tshigs yin no/ /ji ltar de dag 'chad pa de bzhin du khyod kyang de kho na nyid ston te/de'i ngo bo ma yin pa ni 'di lta bu byed par rigs pa ma yin no/ /de bas na khyod kyang dgra bcom pa ma yin no zhe na/ 'jam dpal gyis smras pa/ btsun pa sha ra dwa ti'i bu de de bzhin te zhes bya ba la sogs pas bdag dgra bcom pa ni ma yin gyi zag pa zad pa ni yin par khas blangs so//de ci'i phyir zhe na zhes bya ba ni phan tshun 'gal ba'i tshig 'di ji ltar rung / thams cad la yang dgra bcom pa ma yin par zag pa zad pa nyid yin par mi rung na khyod gzhan du ji ltar gyur zhes bsams pa'o/ /btsun pa sha ra dwa ti'i bu 'di ltar zhes bya ba la sogs pas rang gi bsam pa ston to//'di skad bstan te/ byang chub sems dpa' ni nyan thos dang rang sangs rgyas rnams kyi sa la 'dod pa dag zag pa'i gnas bzhin du spangs pa'i phyir ro/ /de yang nga'i zad do zhes bya ba yin no//de ltar rnam grangs 'dis na kho bo zag pa zad mod kyi zhes gsungs te/ nyan thos kyi sa mi gnas so zhes bya ba'i tha tshig go/ /gzhan dag yid gnyis za ba sna tshogs pa med na/ ci'i phyir srid pa tha ma pa kho na byang chub kyi snying por 'dug nas bla na med pa yang dag par rdzogs pa'i byang chub tu mngon par rdzogs par 'tshang rgya la/gzhan nyan thos la sogs pa ni ma yin na/ de'i phyir de'i dogs pa gnas med pa nyid du bstan pa'i phyir 'jam dpal byang chub sems dpa' sems dpa' chen po byang chub kyi snying por 'dug la zhes bya ba la sogs pa dris te/ ci rnam pa 'di lta bu srid dam zhes bya ba'i tha tshig go//srid do zhes bya ba'i phyir 'jam dpal gyis gsol ba/ bcom ldan 'das byang chub sems dpa' sems dpa' chen po byang chub kyi snying por mchis la zhes bya ba la sogs pa gsol to/ /de ci'i slad du zhe na zhes bya ba ni bsod nams dang ye shes kyi tshogs don med par ji ltar mi 'gyur zhes bya ba yin no//'di'i lan du/ 'di ltar byang chub la chos 'dzin par rnam par rtog pa la sogs pa cung zad tsam yang ma mchis so/ /de nyid kyi phyir mi dmigs so/ /gtan tshigs de'i slad du spros pa thams cad dang bral ba'i ye shes kyi bdag nyid ni bla na med pa yang dag par rdzogs pa'i byang chub ces bgyi'o zhes gsungs so//'di'i phyir yang 'di gnyis med pa kho na yin pa'i phyir gang gis byang chub par byed pa bdag nyid dang byang chub pa'o/ /byed pa po bdag nyid med do zhes sngar bstan pa'i rigs pa bstan pa'i phyir/ byang chub de yang ma skyes pa zhes bya ba la sogs pa gsungs te/ byed pa'i ngo bo'i byang chub de yang ma skyes pa'o/ /de la gang zhig byed pa por 'gyur ba'i byang chub kyi snying po la mchis pa'i ngo bo 'ga' yang ma mchis so/ /su zhig byed pa po kho nar gyur te/ byang chub mngon par rdzogs par 'tshang rgya ba'am/gzhan 'ga' zhig byed par gyur pa gang gis byang chub mngon par rdzogs par 'tshang rgya ba'am/ las su gyur pa gang la byang chub mngon par rdzogs par 'tshang rgya ba 'gal ba'am/ byed pa por gyur pa gang gis mngon par byang chub nas byang chub kyi snying po las ldang ba gang yang ma mchis shing mi dmigs so//gal te de lta na ji ltar byang chub kyi snying po zhes bya zhe na/ 'gal ba med de/ kun rdzob kyi bden pa la brten nas de bzhin bstan pa'i phyir ro/ /kha cig gi blo la gal te byang chub rnam pa de lta bu yin na/ re zhig 'di la byang chub sems dpa' kho na zhes ci'i phyir bya ste/med pa de la ni sems dpa' yin par 'ga' yang dmigs pa ma yin no snyam na/ 'di ni sgyu ma lta bu'i chos rnams la kun brtags te bstan pa yin no zhes dgongs nas/ 'jam dpal byang chub ces bya ba de gang gi tshig bla dgas zhes bka' stsal to//de'i phyir stsal bar bya zhing bkas smos pa'i dgongs pa dang rjes su mthun pa nyid du bcom ldan 'das byang chub ces bgyi ba de ni mtshams ma mchis pa lnga po dag gi tshig bla dgas lags so zhes 'di nyid mnyam pa la dgongs te gsol to/ /dgongs pa ma rtogs na kha cig skrag par 'gyur bas de ci'i slad du zhe na zhes dris te/ji ltar sdig pa'i rang bzhin gyi tshogs dag yon tan gyi tshogs kyi rang gi ngo bor khas blang du rung zhes bya ba'i tha tshig go/ /dgongs pa ston pa ni bcom ldan 'das 'di ltar dngos po ma mchis pas mtshams ma mchis pa lnga po de dag nyid byang chub kyi rang bzhin te zhes bya ba yin te/byang chub nyid kyi rang bzhin gang dag yin pa de la 'di skad ces bya'o/ / ci'i phyir zhe na/ 'di ltar dngos po ma mchis pa ste/ chos thams cad byed pa dang / byed pa po la sogs par brtags pa dang bral ba'i phyir ro//de dag byang chub kyi rang bzhin nyid lags pa'i gtan tshigs de'i slad du byang chub de ni mtshams ma mchis pa lnga'i rang bzhin can lags te/ mtshams med pa dang 'dra bar 'di yang lags pa'i phyir ro/ /mtshams med pa rnams dngos po med pa'i ngo bo nyid du ji skad bstan pa ni rigs grang na/byang chub go ji ltar yin/ de yang mtshams med pa rnams dang / chos gzhan rnams mngon par rtogs pa zhes bya ba ni byed pa'i ngo bo yin la/ byed pas ni byed pa po 'phen par 'gyur ro zhe na/ de'i phyir mtshams ma mchis pa rnams mngon par rdzogs par rtogs pa zhes bya ba la sogs pa gsungs so//de ci'i slad du zhe na zhes bya ba ni ma la sogs pa gsal bar mngon sum du rig pa rnams ji ltar bsad par nus/ de lta bur gyur pa rnams kyang med pa yin na ni sems kyang yod pa nyid kyi tshad ma ci zhig yod ces pas bsams pa'o//lan du skyed par byed pa la sogs pa'i chos thams cad ni shin tu gcig kho nar mngon sum ma lags so/ /de bas na chos de dag ni sangs rgyas dang so so'i skye bo'i bar du gang gis kyang bsgoms pa las byung ba'i shes pas mngon par rdzogs par ma rtogs par mig gi rnam par shes pas ma mthong /rna ba'i rnam par shes pas ma thos/ bsams pa las byung ba'i shes pas ma 'tshal/ de las gzhan pa'i yid kyi rnam par shes pas ma rtogs/ bar gyi tshig gis thos pa dang / myong ba dang / reg pa rnams gzung ngo / / dgongs pa ni 'di yin te/ ma la sogs pa mngon sum gyis rig pa rnams rdul phra mo'i ngo bo yin nam/ cha shas can gyi ngo bo zhig grang / de gnyi ga yang rigs pa dang ldan pa ma yin te/ 'di ltar yul thag ring po na bar med par gnas pa rnams rdul phran yin par mi rigs te/ dus thams cad du cha shas dang bcas par 'dug pa yin no/ /de ltar na rdul phra mo gcig pu ni ji ltar yang 'thad pa ma yin no/ /gcig ma grub na du ma'i ngo bo yang rigs pa ma yin te/ de bas na rdul phra rab phyi rol na gnas pa ni 'ga' yang yod pa ma yin te/ gcig dang du ma'i ngo bo dang bral ba'i mi'i rwa bzhin no//rdul phra rab ma grub pa'i phyir cha shas can yang yod pa ma yin te/ de ltar rdul phra rab rnams kyis de brtsams pa yin par yongs su brtags pa yin no/ /rgya cher dpyad pa'i gtam 'phros pa 'di re zhig gzhag go/ /de lta bu ni byang chub bo zhes bya ba ni mjug sdud pa ste rnam pa de lta bu'i byang chub ni chos thams cad dmigs su med pa'i bdag nyid yin no zhes bya ba'i tha tshig go//'o na ji ltar gzugs dang sgra la sogs pa dmigs pa rnams bcom ldan 'das nyid kyis mngon par rdzogs par sangs rgyas shing mngon sum gyi bar du byas pa yin par bstan ce na/de lta lags kyis kyang bcom ldan 'das mngon pa'i nga rgyal can dag gis mngon par rdzogs par sangs rgyas pa nas mngon sum du bgyis pa'i bar du de dag gzhag go/ /nye bar gzhag go/ /bar gyi sgras mthong ba dang / thos pa la sogs pa'i rnam grangs gzung ngo //khyod kyang mngon pa'i nga rgyal can yin nam zhe na/ de bzhin gshegs pa ni bdag gi de bzhin gshegs pa'o zhes de ltar tha snyad du byed ces dogs pa bsal ba'i phyir/ 'jam dpal ci khyod nga la 'di snyam du de bzhin gshegs pa ni bdag gi de bzhin gshegs pa'o snyam sems sam zhes bka' stsal te/sems la zhes bya ba ni tshig lhag ma'o/ /tshig gnyis kyis mngon par zhen pa ston te/ 'di ltar tha snyad tsam lan du mar brjod pa las mngon no/ /bcom ldan 'das de ni ma lags so zhes bya ba ni mngon par zhen pa de la rtsod pa'o//de ci'i slad du zhe na zhes bya ba ni de bzhin gshegs pa'i sras nyid du shin tu grags pa khyod ji ltar yab la mngon par zhen par mi byed ces dgongs pa'o/ /bcom ldan 'das 'di ltar de bzhin gshegs pa ni bdag gi de bzhin gshegs pa'o snyam du mi sems pa'i slad du'o zhes bya ba ni lan no//brgal ba gang yin pa de nyid lan du byas pa ma yin nam zhe na/ ma yin te bye brag yod pa'i phyir ro/ /gang gis bdag de snyam du mi sems pa ni rang gi ngo bo dmigs pa sngon du song ba'i nyes pa rgyun mi 'chad par rab tu 'jug pa yin no/ /de bzhin gshegs pa ni bdag gi de bzhin gshegs pa yin no zhes bya ba ni tha snyad yin no//de bas na 'di'i rjes su 'brang ste/ bdag gi mngon par zhen pa 'jug pa ma yin no zhes bstan pa yin no/ /de ci'i slad du zhe na zhes bya ba ni yon tan phun sum tshogs pa mchog gi gnas yab la re zhig ji ltar mi dmigs zhes dgongs pa'o//lan ni bcom ldan 'das 'di ltar de bzhin nyid ni de bzhin gshegs pa nyid do zhes bya ba yin no/ /ni zhes bya ba ni gang gi phyir zhes bya ba'i don to/ /de bzhin nyid de bzhin du rnam par gnas pa ni ston pa yin no zhes bya ba'i tha tshig go//de bzhin du zhes bya ba ni gzung ba dang 'dzin pa med pa'i ngo bor ro/ /kha cig la gtan tshigs 'dri ba ni mi smos par de'i de nyid kyang de bzhin nyid de zhes de skad du 'byung ba de'i don yang 'di lta ste/ bcom ldan 'das de nyid kyang de nyid kyi dngos po de nyid de bzhin nyid yin te/gzung ba dang 'dzin pa'i rnam pa dang bral ba nyid de bzhin nyid yin no zhes bya ba'i tha tshig go/ /de'i de nyid kyi dngos po nyid de bzhin nyid yin no zhes brjod par bya ba las dngos po de nyid de bzhin nyid yin no zhes gsungs pa ni chos can gyi ngo bo de las don gzhan du 'gyur ba nyid 'gag pa'i phyir ro//gzung ba dang 'dzin pa'i rnam pa dang bral ba nyid ston pa yin par shes par bya ba'i phyir/ de bzhin gshegs pa nyid kyis de bzhin gshegs pa rnam par rig par mi bgyid cing / de bzhin gshegs pas kyang de bzhin nyid rnam par rig par mi bgyid do zhes gsungs te/'di ni gang gis gzung bar bya ba yang ma yin la/ de bzhin nyid kyi bdag nyid de ni bstan par bya ba'i phyir rnam par rig par mi bgyid do/ /de ci'i slad du zhe na zhes bya ba ni byang chub pa dang chos kyi 'khor lo bskor ba la sogs pa sangs rgyas kyi spyan gyis rnam par gzigs pa rnams gzung ba dang 'dzin pa dang bral bar ji ltar khas blangs zhes dgongs pa'o//lan ni/ bcom ldan 'das 'di ltar don dam par na de bzhin nyid ni dngos po ma mchis shing / de bzhin gshegs pa yang dngos po ma mchis pa'i slad du'o zhes bya ba yin te/ de bzhin nyid ces bya ba ni 'dzin pa dang gzung ba yin par 'jig rten pa'i bdag nyid 'dod la/de la ngo bo de'i dngos po med pa yin no/ /de bzhin gshegs pa yang de ltar kun brtags pa'i dngos po med pa kho na yin te/ de yang de bzhin nyid kyi ngo bo las mi 'da' ba'i phyir ro/ /de ltar na gzung ba dang 'dzin pa rnam par gzhig pa dang /rdul phra mo la sogs pa bkag pa bstan pas 'di bsgrubs zin te yang bstan mi dgos kyi/ tshig gi mtshams sbyar ba dang / dogs pa'i gnas spang ba'i phyir ro/ /don dam par zhes bya ba'i tshig ni rnam par rtog pa ma spangs shing mngon par zhen pa'i dbang gis gzung ba dang 'dzin pa'i dngos po ni kun rdzob yin par zhal gyis bzhes pa yin pa'i phyir ro//yang de nyid gsal bar bya ba'i ched du 'og nas kyang gtan tshigs bstan pa'i phyir de bzhin gshegs pa zhes bgyi ba'i tshig gis bstan pa 'di lta ste/ don gyi ngo bo de ni ming tsam du bas te ming tsam snying po yin gyi/don gyis stong zhes bya ba'i bar du yin te/ don dam par chos thams cad brjod du mi rung ba'i phyir dang / ma skyes pa'i phyir ro/ /yang na de bzhin gshegs pa zhes bya ba'i tshig de ni 'di lta ste/ ming brjod pa tsam du zad kyi brjod par bya bar 'os pa ma yin te/'di skad du/ ming gis ming ni stong pa ste/ /ming la ming ni yod ma yin / /chos rnams thams cad ming med pa/ /ming ni kun du brtags pa yin/ /zhes gsungs so/ /gal te de lta na don dam par yod cing brjod pa'i gnas su gyur pa gang la de bzhin gshegs pa ni bdag gi de bzhin gshegs pa'o zhes brjod pa dang /mngon par zhen par byed pa'i de bzhin gshegs pa de gang yin zhe na/ gang yang med do zhes spong bar byed pa ni gang la bdag 'di snyam du de bzhin gshegs pa ni bdag gi de bzhin gshegs pa'o snyam du zhes bya ba la sogs pa 'di yin no//the tshom gyis blo dkrugs pa dag gis ra chod du yongs su dris su zin kyang kha cig tshig 'di snyam du dogs pa spang ba'i phyir/ bcom ldan 'das kyis 'jam dpal khyod de bzhin gshegs pa la the tshom za'am zhes dris so/ /bcom ldan 'das de ni ma lags so zhes bya ba ni dris ma thag pa gang yin pa'o//'di ltar gal te rgyun la sogs pa'i mtshan nyid kyis de bzhin gshegs pa 'byung ba'am/ rgyun gzhan du gyur pa'i ngo bor yongs su grub pa'am/ rgyun rgyun chad pa'i bdag nyid du de bzhin gshegs pa yongs su mya ngan las 'das pa yang rung ste/de bzhin gshegs par yongs su grub pa 'ga' zhig mchis na ni de bzhin gshegs pa yul de la bdag the tshom 'tshal lo zhes gsungs te tshig de gsum gyis 'dus byas kyi mtshan nyid bstan pa yin te/ skye ba dang rga ba dang mya ngan las 'das par gyur pa gang yin pa'i de bzhin gshegs par tha snyad gdags su rung ba'i don gyis dngos po 'di ni 'ga' yang yod pa ma yin te/'di ltar de bzhin gshegs pa zhes bya ba 'di ni byed pa'i rgyu mtshan du bstan pa yin te/ dngos po ji ltar gnas pa de bzhin du gshegs pa'am/ rtogs pa la bya na/ byed pa rnam pa de gnyis ka yang rgyas par bsal zin to// // 'phags pa shes rab kyi pha rol tu phyin pa bdun brgya pa rgya cher bshad pa[# / bam po bzhi pa/ kha cig gi blo la 'di snyam du gal te 'dus byas kyi mtshan nyid gsum gyi dbye ba yod pa ma yin nam/shAkya'i rigs sam gzhan du de bzhin gshegs pa 'byung ba dang / de bzhin du mya ngan las 'das par ma bstan te bzhugs pa dang / gang gA'i klung gi bye ma dang mnyam pa'i sangs rgyas bcom ldan 'das rnams yongs su mya ngan las 'das pa de ji lta bu de bas ni 'dir 'jam dpal khyod de bzhin gshegs pa 'byung ngo snyam du mi sems sam zhes dris so//'byung ba smos pas gnas pa yang rig par bya'o/ /dang po dang rgyun gyis 'byung ba zhes bya'o/ /lan bcom ldan 'das gal te chos kyi dbyings la 'byung ba mchis na ni bdag de bzhin gshegs pa 'byung ngo snyam du sems par 'gyur ro zhes bya ba yin te/sems zhes bya ba ni lhag ma'o/ /chos kyi dbyings la ni sngon med pa'i skye ba yod pa ma yin no/ /de bas na gnyis la dben pa'i bdag nyid de bzhin gshegs pa la yang sngon med pa'i skye ba yod pa ma yin no/ / de bas na bdag de snyam du mi sems so zhes dgongs pa'o/ /'jam dpal khyod sangs rgyas bcom ldan 'das gang+gA'i klung gi bye ma snyed yongs su mya ngan las 'das par mi smos sam zhes bya bas ni dri ba rnam pa gnyis pa bstan to/ /bcom ldan 'das nyid kyis de'i lan gdab par bzhed nas bcom ldan 'das sangs rgyas bcom ldan 'das rnams ni 'di ltar bsam gyis mi khyab pa'i yul du yul gcig pa ma lags sam zhes gsol to//yul gcig pa zhes bya ba ni rten gcig pa ste/ dper na nya rnams kyi yul chu lta bu'o/ /yul gcig pa'i dbang du byas te yul gcig pa dris pa gang zhe na/'di ltar bsam gyis mi khyab pa'i yul du zhes gsungs so/ /'di ltar zhes bya ba ni tshig gi phrad yin te/ 'di lta ste zhes bya ba'i tha tshig go/ /gang dag gi yul bsam gyis mi khyab pa yin pa de la de skad ces gsungs so/ /bsam gyis mi khyab pa zhes bya ba ni chos kyi dbyings shin tu rnam par dag pa la dgongs pa yin te/thams cad du bsam par mi nus pa'i phyir ro/ /des na 'di skad bstan te/ ci rnam par byang ba skyes shing thugs rje'i snying po dang shin tu ldan pa'i bcom ldan 'das rnams chos kyi dbyings la de'i bdag nyid du rten tam/ci rten pa ma lags sam zhes bya ba yin no/ /'jam dpal de de bzhin te zhes bya ba la sogs pa gsungs te/ gal te de de ltar nges pa yin na re zhig gzhag ste/ 'di yang dris pa bcom ldan 'das shAkya thub pa da ltar bzhugs sam zhe na/ 'jam dpal de de bzhin no zhes bka' stsal to//gal te de ltar na de bzhin gshegs pa rnams mya ngan las 'das pa la mi gnas pa nyid grub pa yin no zhes dgongs nas bcom ldan 'das shAkya thub pa bzhugs pa de'i slad du gang gA'i klung gi bye ma snyed kyi sangs rgyas bcom ldan 'das 'od srungs la sogs pa mya ngan las 'das nas yun ring por bzhed pa de dag yongs su mya ngan las 'das pa lags so//de ci'i slad du zhe na zhes bya ba ni 'dir 'brel pa ci yod na/ gang gcig bzhugs na thams cad kyang bzhugs pa yin/ 'di ltar gcig gi bdag nyid du thams cad rjes su 'dug pa ni ma yin la/tshogs tha dad pa kho nas byang chub so sor thob bo zhe na/ lan ni bcom ldan 'das sangs rgyas bcom ldan 'das rnams ni 'di ltar zhes bya ba la sogs pa yin no/ /dgongs pa ni 'di lta ste/ ji ltar bcom ldan 'das shAkya'i tog dag pa chen po'i mthu dang /thugs rje'i snying po'i dbyings dang da ltar ldan zhing rgyun chad pa'i mtshan nyid yongs su mya ngan las 'das pa ma yin no/ /de bzhin du de dag kyang de'i ngo bo nyid yin pas de ni rigs pa ma yin no/ /'di ltar byang chub sems dpa' shin tu rnam par dag pa'i nus pa dang /thugs rje zhan pa'i gnas skabs na yang re zhig sems can yongs su smin pa'i dus la gzigs shing dus dpag tu med par bzhugs so/ /byang chub brnyes nas kyang shin tu dag pa'i mthu dang / thugs rje chen po brnyes nas dpag tu med pa'i sems can gyi tshogs la myur du phan gdags par bya ba'i phyir bzhugs pa'i de bzhin gshegs pa la dad pa can su zhig yid ches par mi byed/de bas na sangs rgyas bcom ldan 'das rnams ni mi gnas pa'i mya ngan las 'das pa kho na yin no/ /las byed pas rab tu phye ba'i bcom ldan 'das shAkya thub pa skye ba med pa yin du zin kyang gang dag ma 'ongs pa'i dus na 'byung ba 'phags pa byams pa la sogs pa de dag kyang de ltar 'gyur du dogs so zhe na de'i phyir/bcom ldan 'das de bas na bcom ldan 'das nyid kyis mngon par rdzogs par sangs rgyas na zhes bya ba la sogs pa gsungs te/'di ltar rtag pa la sogs pa'i ngo bo bzhin du las byed pas rab tu phye ba rnams tshad ma dang 'gal bas dus thams cad du skye ba med pa yin pas na bcom ldan 'das shAkya thub pa shin tu rnam par dag pa'i ngo bor byung ste mngon par rdzogs par sangs rgyas na/gang dag ma 'ongs pa'i dus na de bzhin gshegs pa 'byung ba mi pham pa la sogs pa yang mngon par rdzogs par sangs rgyas pa kho nar blta bar bya ste/ de nyid kyi ngo bo yin par gtan tshigs mthun pa'i phyir dang / de bzhin gshegs pa thams cad kyang mnyam pa nyid mngon par rdzogs par byang chub pa yin pa'i phyir ro//rnam pa thams cad du gtan tshigs 'dra ba yin la 'bras bu mi 'dra ba ni rigs pa ma yin no/ /mnyam pa nyid 'di la dgongs nas bshad pa yin par khong du ma chud pa dag de ci'i slad du zhe na zhes smras te/ ngo bo tha dad pa yin bzhin du gcig mngon par rdzogs par sangs rgyas na ji ltar de las gzhan pa dag kyang mngon par rdzogs par sangs rgyas zhes bya/de lta na ni shin tu thal bar 'gyur ro zhes bsams pa'o/ /rang brjod par bzhed pa ston pa ni bsam gyis mi khyab pa la 'das pa'am zhes bya ba la sogs pa yin te/sngon med pa'i ngo bo skyes nas zhig pa ni 'das pa'o/ /sngon med pa'i ngo bo skyes nas ma 'gags pa ni da ltar ro/ /sngon med pa'i ngo bo phyis 'byung ba ni ma 'ongs pa'o/ /thams cad kyang nges par las byed pa dang bral ba'i ngo bo kho na yin no/ /des na dus gsum gyi de bzhin gshegs pa yang chos nyid 'di las mi 'da' ba kho na yin no//de lta ma yin na de dag sangs rgyas kho na yin par mi 'gyur te/ tshad ma dang 'gal ba rtogs na phyin ci log yin pa'i phyir ro/ /gang gi phyir de ltar las byed pas rab tu phye ba'i de bzhin gshegs pa 'byung ba la sogs pa yang dag pa ma yin no//bcom ldan 'das de bas na su dag 'di skad du de bzhin gshegs pa skyes so zhes bgyi ba nas/ yongs su mya ngan las 'das pa'i bar du sems pa de dag gi 'jig rten gnas pa ni 'khrul pa ste nor pas de dag lung dang rigs pa'i don ma rtogs pa yin no//yi ge kha cig las 'jig rten gnas pa ni 'khrul pa ste zhes 'byung ba de'i don yang snang ba med pa'i phyir dang / ji lta ba bzhin gyi shes rab kyi snang ba med pa'i phyir ro/ /bcom ldan 'das de dag ni 'jig rten gnas pa zhes bya ba la 'jig rten gnas pa ni shes pa dang shes bya dang /rjod par byed pa dang brjod par bya ba'i mtshan nyid 'jig rten gyi tha snyad la bya ste/ 'jig rten pa rnams shin tu de la mngon par zhen pa'i phyir ro/ /'phros par bgyid pa lags so zhes bya ba ni gzhan du 'dzin pa'am/ ston pa'o/ /de dag kyang gang zhe na/su dag 'di snyam du de bzhin gshegs pa skyes so zhes bgyi ba nas/ yongs su mya ngan las 'das pa'i bar du mngon par zhen pa yin no/ /bar tshig gis skye'o/ /skye bar 'gyur ro/ /gnas zin to/ /gnas so/ /gnas par 'gyur ro/ /yongs su mya ngan las 'das so//yongs su mya ngan las 'da'o/ /yongs su mya ngan las 'da' bar 'gyur ro zhes bya ba de la sogs pa gsungs so/ /gang dag la de ltar mngon par zhen pa med du zin kyang de dag la yang 'khrul pa dang 'jig rten gnas pa ni yod pa yang ma yin nam/byis pa dang mkhas pa gnyis kyi tha snyad ni 'dra ba yin pa'i phyir ro zhe na/ de dag gis ni 'gro ba sgyu ma lta bur 'dug pa khong du ma chud pa'i phyir dang / mngon par zhen pa med pas ma brlan pa'i phyir ro/ /da ni mngon sum du gyur cing dge bar gyur pa rnams 'di la gus pa skyed pa'i ched du bsam gyis mi khyab pa bstan pa 'di zab par brjod pa'i phyir bcom ldan 'das kyis 'jam dpal de'i phyir khyod kyis de bzhin gshegs pa bsam gyis mi khyab pa zhes bya ba la sogs pa gsungs te/shin tu rab tu zab pa 'di gang gis bshad pa la gzhan 'di dang 'dra ba nyan pa yod pa yin te/de bas na khyod kyis de bzhin gshegs pa bsam gyis mi khyab pa 'di de bzhin gshegs pa'i spyan sngar ram/ byang chub sems dpa' 'am/ dgra bcom pa'i mdun du brjod pa rjod cig de bzhin gshegs pa bsam gyis mi khyab pa ni de bzhin gshegs pa bsam gyis mi khyab pa ste/ji skad du gsungs pa'i rang gi ngo bo la bya'o/ /de ci'i phyir bsam gyis mi khyab ce na/ gang gi phyir bsam du med pa ste/ bsam pa med pa'o/ /de nyid kyang ji ltar zhe na/ gang gis bsam pa las 'das pa ste/ bsam par bya bar nus pa'i ngo bo las gang gi phyir 'das pa zhes bya ba'i tha tshig go//de bas na bsam gyis mi lang ba zhes gsungs so/ /de ltar na tshig dang po ni bstan pa yin no/ /bzhi pa ni tshig mjug sdud pa yin no/ /yang na skyes nas thob pa dang / thos pa las byung ba dang / bsams pa las byung ba dang / / bsgoms pa las byung ba shes rab rnam pa bzhi'i spyod yul ma yin pa'i phyir tshig rnam pa bzhi dang go rims bzhin du sbyar ro/ /de ci'i phyir zhe na zhes bya ba ni chos la slob dpon 'chab pa dang bral ba'i byang chub sems dpa' chen po rnams man ngag 'di 'bogs par ji ltar rigs she na/ dgongs pa ni gzhan de bshad na don med par 'gyur ba'i phyir/ 'di ltar de dag ni thos nas bsngags par yang mi 'gyur zhes bya ba la sogs pa lan yin te/ 'di ni phyin ci ma log par bstan pa kho na yin no zhes bsngags par yang mi 'gyur te/ dngos po'i de kho na nyid la reg par bstan pa ma yin no zhes khong du chud pa'i phyir ro//spong bar yang mi 'gyur zhes bya ba ni shin tu rnam par dag pa'i chos kyi dbyings kyi rgyu mthun pa'i phyir dang / brgyud pa'i sgo nas rang gi mtshan nyid kyi phyir mthar thug pa yin no zhes shes pa'i phyir ro/ /bsam pa ni 'di lta ste/chos rnams la slob dpon 'chab pa'i phyir ni ma yin no/ /'di skad bstan te/ chos 'chad par byed na thos pa la dga' bar bya ba'i phyir byed dam/ ma 'ongs pa na phan pa dang bde bar bya ba'i phyir byed grang na/ de la chos zab mo'i bzod pa dang bral ba de la byas na mgu ba nyi tsher ma zad kyi/len par yang mi byed/ phan pa yang mi sgrub kyi/ slar phyin ci log nyid du byed par 'gyur te/ 'di ltar de thos pas dngos po 'am dngos po med par lta bar lhung bar 'gyur te/ 'chad pa dang don gnyis la dngos po dang dngos po med par lhag par mos pa'i phyir ro/ / de bas na spong bar byed pa yang yin no/ /gang gis don med pa la gzhol bar 'gyur ba de bas na snod ma yin pa la lhag pa'i bsam pas 'di brtsams pa ni 'ju stobs chung ngus zas lci ba za ba bzhin du don ma yin pa gcig nas gcig du 'phel bar 'gyur bas 'di dag la ma byas na legs pa kho na yin no//de bas na de kho na nyid mngon sum du byas pa chos kyi de kho na nyid kyi gtam rnam par nges pa'i bdud rtsi'i ro myang bas bskyed pa'i sred pa can kho na'i mdun du yongs su mgu bar bya ba'i phyir bshad na mdzes pa yin no/ /de bas na 'phags pa dkon mchog brtsegs pa las dman pa la lhag par mos pa rnams la chos zab mo 'chad pa ni byang chub sems dpa'i ltung ba yin par gsungs so//de ci'i phyir zhe na zhes bya ba ni so so'i skye bo rnams la 'di ltar de dag shin tu bsngags par yang mi 'gyur/ spong bar yang mi 'gyur ba ga la yod ce na/so so'i skye bo ma yin no zhes bstan pa'i phyir/ 'di ltar 'di bsam gyis mi khyab pa/ bsam du med pa zhes bya ba la sogs pa gsungs te/ 'di yang snga ma bzhin du bsam gyis mi khyab pa zhes bya ba'i tshig dang po ni bstan par 'gyur ba'o//lhag ma tshig gnyis ni 'chad pa yin no/ /yi ge kha cig las 'di ltar bsams pa ni bsam gyis mi khyab pa bsam du med pa zhes 'byung ste der ni bdag gis rtogs pa zhes bya ba khong nas byung ngo / /bsam du med pa bsam gyis mi lang ba ni snga ma bzhin no/ /de dag thams cad kyis ni so so'i skye bo rnams las khyad par du bstan pa yin te/'di lta ste bsam gyis mi khyab pa yongs su shes pa yin no/ /de skad du bcom ldan 'das kyis bka' stsal pa dang / 'phags pa yang bsam gyis mi khyab pa 'chad par bzhed nas/ bcom ldan 'das chos thams cad bsam gyis mi khyab cing bsam du ma mchis pa 'di lta bu 'di la byis pa'am mkhas pa su zhig bsngags pa'am/spong bar 'gyur te/ de dag rjes su bsngags shing spong bar byed na ni stong pa nyid de'i nang du 'dus pa'i phyir chos 'di thams cad don dam pa yin par zhen par 'gyur ro//de bas na gang yang dag par bsngags pa'am/ spong bar 'gyur ba med de/ de'i ngo bo nyid kyi sgra dang don gnyis mi rigs pa'i phyir dang / sgrub pa dang sel ba yang mi 'thad pa'i phyir ro/ /gzhan yang byed pa po la sogs pa'i bye brag bsngags pa la sogs pa thams cad brtags pa yin la/de yang don du yod pa ma yin pa des na thams cad yang dag pa ma yin no zhes bstan to/ /de bas na byis pa rnams kyi bsngags pa sgrub pa dang 'gog pa la sogs pa de dag ni log pa'i mngon pa'i nga rgyal tsam byed par zad kyi/ gang gis ci yang bsngags par byas pa dang /bkag pa med do zhes dgongs pa'o/ /chos thams cad bsam gyis mi khyab par bstan na ni so so'i skye bo rnams kyang de bzhin gshegs pa bzhin du bsam gyis mi khyab pa yin par smras par 'gyur ro/ /de yang 'thad pa ma yin te/ de ltar med pa yin na ni de dag phan tshun du bye brag 'ga' yang yod par mi 'gyur ro zhes kha cig dogs pa bsal ba'i phyir/'jam dpal ji ltar de bzhin gshegs pa bsam gyis mi lang ba de ltar so so'i skye bo rnams kyang bsam gyis mi lang ba yin nam zhes dris te/ ci yin nam zhes bya ba lhag ma'o//yang na tshig zur gyis smras pa'o/ /'di la dogs pa mi bya bar bstan pa'i phyir/ bcom ldan 'das so so'i skye bo rnams kyang de bzhin du bsam gyis mi lang ba lags so zhes gsungs so/ /blo bzang pos smra bar 'dod pa thugs su chud nas 'jam dpal de de bzhin no zhes zhal gyis bzhes so//de ci'i phyir zhe na zhes bya ba ni rgol ba ste/ rgol ba su yang med par gnyis kyis lan 'debs pa gnyis smras zhes bya ba'i tha tshig go/ /de bas na bcom ldan 'das kyis blo bzang po'i brjod par 'dod pa ston pa ni 'di ltar bsam pa thams cad ni bsam gyis mi lang ba'i phyir ro zhes bya ba yin no//dgongs pa ni 'di yin te/ ji tsam ji tsam du rnam par shes pa sems pa'i ngo bo'am/ gzhan yang rung 'ga' zhig la 'byung ba de tsam de tsam du de don gzhan yin par mngon par zhen te 'byung ba yin yang rtog pa'i rang gi ngo bo tsam la 'chel ba kho na yin gyi/don gzhan gyi ngo bo la reg ste 'byung ba ni ma yin no/ /'di ltar don gzhan gyi ngo bo ni de'i ma yin na ji ltar des ma myong ba'i ngo bo la don rjes su myong ba zhes bya/ de bas na so so'i skye bo la sogs pa thams cad ni bsam pa las 'das pa yin no//khyad par du bzhag pa ni de kho na nyid khong du ma chud pa zhes bstan pa yin no/ /bsam pa zhes bya ba ni gzhan gyi mngon par zhen pa'i rjes su 'brangs nas bstan pa yin gyi/ dngos po gnas pa'i phyir ni ma yin te/ ma bkag par thal bar 'gyur ba'i phyir ro/ / bdag gis brjod par 'dod pa ni 'di kho na yin no zhes rang gi brjod par 'dod pa tshig zur gyis bstan pa'i phyir gsungs pa ni gal te dngos po'i chos kyi rang gi ngo bo dang / so so'i skye bo yang bsam gyis mi khyab pa yin na / 'o na dang po 'dri ba'i tshe ji ltar de bzhin gshegs pa bsam gyis mi lang ba de bzhin du so so'i skye bo rnams kyang bsam gyis mi lang ba yin nam zhes bcom ldan 'das kyis gtan tshigs ci'i slad du de skad bka' stsal/ci'i phyir de skad dri bar mi bya zhe na/ lan du bcom ldan 'das so so'i skye bo nyid kyang zhes bya ba la sogs pa gsungs te/so so'i skye bo nyid ces bya ba skal ba mnyam pa zhes bya bar brtags pa yang bsam gyis mi lang ba lags sam/ kyang gi sgras so so'i skye bor ma bas kyi zhes bya ba yin no/ /yang na so so'i skye bo nyid kyang zhes bya ba so so'i skye bo kho na'i bye brag rnams dgag pa'i phyir ston pa yin na ni kyang gi sgras de bzhin gshegs pa yang bsdus pa ma yin no//de ci'i slad du zhe na zhes bya ba ni gzhan gyi dogs pa'i dbang du byas nas dri ba 'di byas kyi/ rang gi bsam pa'i rjes su 'brangs nas byas pa ma yin no zhes bya ba'i tha tshig go/ /'dir lan ni bcom ldan 'das chos thams cad ni bsam gyis mi lang ba'i slad du'o zhes bya ba yin te/ni zhes bya ba'i sgras ni shin tu gsal bar byed pa'i ngo bo nyid ston par byed pa yin pa'i phyir te / 'di ni don shin tu gsal ba yin pas gzhan gyi dogs pa yang yod pa ma yin no zhes bstan pa yin no//de bas na bsam gyis mi khyab pa dngos po mtha' dag la khyab pa 'di rtogs par byas nas gzung ba dang 'dzin pa dang bdag dang bdag gi la sogs par rnam par rtog pa thams cad spang ba'i phyir dmigs su med pa'i ting nge 'dzin goms pas mya ngan las 'das pa 'thob par 'dod pa rnams kyis 'di la brtson par bya ba yin te/'di ni thar pa'i grong khyer du phyin pa dang rjes su mthun pa'i lam yin la/ rnam par rtog pa thams cad zad pa'i rang bzhin kho na ni 'di ltar mya ngan las 'das pa kho na yin no/ /gang la la dag kha cig gis so sor brtags pa'i 'gog pa la sogs pa gud na yod pa kho na mya ngan las 'das pa yin par brtags nas de 'thob par bya ba'i ched du brtson par byed pa de dag ni don med pa'i gnas su gyur pa yin no//de ci'i slad du zhe na/ 'di ltar gang bsam gyis mi lang ba de nyid rnam par rtog pa thams cad spang ba'i phyir/ mya ngan las 'das pa lags te dngos po gzhan du gyur pa ma yin no//de ltar byas na/ rnam par rtog pa ma gtogs par/ /'khor ba nam yang yod pa min/ /zhes bya ba la sogs pa dang shin tu mthun pa yin no/ /de bas na thabs ma yin pa la zhugs pa de dag ni nyam thag par 'gyur te/thabs ma yin pa la zhugs pa de dag ni 'jigs par bcas pa dang nye ba'i lam du 'gro ba bzhin du dka' ba dang / yun ring por 'jigs pa med pa dang / mya ngan las 'das pa'i grong khyer du phyin par mi 'gyur ro/ /gang gi phyir de ltar khyab par bya ba bsam gyis mi khyab pa ste/de'i slad du bsam gyis mi lang ba stong pa nyid la tha dad pa so so'i skye bo dang / rdzogs pa'i sangs rgyas la sogs par dbye ba ma mchis so/ /mya ngan las 'das par zhugs pa yin par brtag par bya ba yang yin no zhes bya ba lhag ma'o/ /bde bar gshegs par khas len pa dag yin na gang dag 'di skad du 'di dag ni so so'i skye bo'i chos 'dod chags la sogs pa dang de dag la sogs pa 'di dag ni 'phags pa'i chos rnams so zhes kha cig ji ltar yang dag pa nyid yin par rtogs par byed par 'gyur/de bas na bcom ldan 'das gang dag 'di skad du 'di dag ni so so'i skye bo'i chos rnams so zhes bya ba la sogs pa gsungs so//de ni 'di skad bstan te/ de dag ni log par rnam par rtog pa kho na yin te dngos po thams cad la khyab par byed pa ni gsal bar rtogs pa dang / lung gis shes par bya ba yin du zin gyis kyang phyin ci log tu mngon par zhen pa yin pa'i phyir ro//de dag la 'di skad brjod par bya ste/ yang dag pa'i ye shes la sogs pa yon tan phun sum tshogs pa thams cad ni dge ba'i bshes gnyen la rag las pa yin pas dge ba'i bshes gnyen sangs rgyas dang byang chub sems dpa' la sogs pa rnams la bsnyen bkur gyis shig dang /de nas phyis 'di dag ni so so'i skye bo'i chos rnams so/ /'di dag ni 'phags pa'i chos rnams so zhes kun rdzob kyi bden pa dang don dam pa'i bden pa yul rnam par dbye ba shes par 'gyur ro/ /gal te dge ba'i bshes gnyen la brten pas rnam par rtog pa 'di dag spong ba yin na dge ba'i bshes gnyen ni dpag tu med pa grangs med pa la bsnyen bkur byas pa khyod kyis 'di lta ste/sems can thams cad kyi mchog de bzhin gshegs pa yin pa dang / de bzhin du bsam gyis mi khyab pa'i chos dang ldan pa dang /nyan thos rnams rnam par 'dul bar mdzad pa dang / bsod nams kyi zhing dam pa yin par rnam par rtog pa gang yin pa 'di dag ci'i phyir snang snyam du kha cig dogs pa la/ de'i lan go rims bzhin du gdab pa'i phyir/ 'jam dpal khyod de bzhin gshegs pa sems can thams cad kyi mchog tu 'dod dam zhes bya ba la sogs pa gsungs so//ji tsam du 'bras bu thob par ston pa la bdag gi rnam par rtog pa 'di ni kun rdzob kyi lam gyi rjes su 'brangs pa yin gyi yang dag pa nyid du mngon par zhen pa nyid ni ma yin no zhes bstan pa'i phyir/ gal te 'di la sems can du yongs su grub pa 'ga' zhig mchis na ni zhes bya ba la sogs pa gsungs te/sems can nyid ni don dam par yongs su ma grub ste/ chos dang gang zag la bdag med pa yin pa'i phyir ro/ /de la ltos nas de bzhin gshegs pa mchog yin par lta ga la 'gyur zhes bya ba'i tha tshig go//gal te bsam pa'i chos dang ldan pa 'ga' zhig mchis na ni zhes bya ba 'di la yang chos dang gang zag la bdag med pa kho na'i chos dang chos can de dang ldan pa'am/ 'thob pa'i ngo bo'am/ 'brel pa'i ngo bo med pa'i phyir bsam pa'i chos dang ldan pa 'ga' yang yod pa ma yin na de la ltos nas de bzhin gshegs pa bsam gyis mi khyab pa'i chos dang ldan pa nyid du lta ga la 'gyur zhes dgongs pa'o//bcom ldan 'das gal te la la zhig bsam gyis mi khyab pa'i dbyings 'dul bar 'gyur na ni zhes bya ba ni 'di ltar 'dul ba ni skyon rnams dang bral ba dang /yon tan rnams 'byung bar byed pa'o/ /nyan thos zhes bya ba de dag 'dul bar byed pa de las ma gtogs pa gzhan bsam gyis mi khyab pa yod pa ma yin te/ 'di ltar 'dod chags la sogs pa'i skyon gang dag yin pa de dag rang gi ngang gis rnam par zhig pa ni btul ba ma yin no//yon tan gang dag yin pa gnyen po goms pa yang rang bzhin gyis rnam par dag par 'gyur ba ste/ de dag kyang sngon ma dul ba ma yin na ji ltar btul ba zhes bya/ de bas na sngon sma ma phab pa'i 'du byed rnams la gcig por mngon par zhen nas byis pa yang dag pa ma yin pa mthong ba rnams kyi mi bden pa'i blos btul lo snyam pa'i tha snyad 'jug pa yin pas bdag la ni nyan thos rnams de bzhin gshegs pas btul lo snyam du rnam par rtog pa mchis pa ma lags so//gzhan yang skyob pa'i rnam par mi rtog pa'i dbang tsam kho nas btul ba grub par 'gyur te/de bas na btul lo snyam pa'i tha snyad 'jug pa yin gyi/ bcom ldan 'das ni de dag 'dul bar lan 'ga' yang mdzad pa ma yin no/ /de bas kyang bdag ni de bzhin gshegs pas btul lo snyam du mi sems so/ /bcom ldan 'das sangs rgyas 'byung ba ni gang la yang phan pa'am/gnod par yang nye bar gnas pa ma lags so zhes bya ba la phan pa ni yon tan gyi tshogs so/ /gnod pa ni skyon gyi tshogs so/ /nye bar gnas pa ni 'jug pa dang blo sngon du btang ste byed ces bya ba'i bar du yin no/ /de ci'i slad du zhe na zhes bya ba ni gal te 'ga' la yang phan pa dang gnod pa gnyis byed par nye bar gnas pa ma yin na/de ji ltar so so'i skye bo la bsam pa'i chos dang ldan pa rnams bsal nas nyan thos la sogs pa la bsam gyis mi khyab pa'i chos dang ldan par sgrub par mdzad ces bya ba'i tha tshig go//de nyid brdzun pa yin no zhes bstan pa'i phyir/ 'di ltar dbyings 'di ni gnas pa nyid dang zhes gsungs te/ so so'i skye bo'i gnas skabs na yang gnas pa nyid do zhes dgongs pa'o/ /dbyings 'di ni ma 'dres pa nyid de zhes bya ba ni bsam par bya ba'i chos dang ldan pa dang ma 'dres par gyur pa ste dus thams cad du dbyings de lta bu yin pa'o//dbyings de gang yin zhe na/ 'di lta ste bsam gyis mi khyab pa'i dbyings lags pa'i slad du'o zhes gsungs te/ stong pa zhes bya ba'i tha tshig go/ /de nyid kyi phyir/ dbyings de la ni nyan thos tha dad pa nas so so'i skye bo tha dad pa'i bar du mi dmigs te kun kyang ngo bo nyid de tsam du mnyam pa'i phyir ro//dbye ba rnam par gzhag pa ni dri ma spangs pa dang / ma spangs pa'o/ /bar du zhes smos pas ni byang chub sems dpa' dang / rang rgyal ba dang / rdzogs pa'i sangs rgyas rnams gzung ngo //bcom ldan 'das dngos po ma mchis pa nyid kyi slad du zhes bya ba 'di la gzung ba la sogs pa'i rnam par rtog pa'i dngos po yod pa ma yin pas de bzhin gshegs pa ni dngos po med pa'o/ /de'i dngos po ni dngos po med pa nyid do/ /de bas na dngos po med pa nyid kyi phyir de bzhin gshegs pa ni rang la yod pa'i bsod nams kyi zhing dang gzhan yin te/de ni de'i ngo bo yin pa'i phyir ro/ /gtan tshigs de'i slad du de ni thams cad pas lhag par bsod nams kyi zhing bla na ma mchis pa'o/ /'di'i phyir yang bla na med pa yin te/ shin tu sbyangs pa yin pa'i phyir dang /yun ring por gnas pa'i phyir dang / 'bras bu mi nyung ba rab tu sbyin pa'i phyir ro/ /de dag nyid go rims bzhin du bstan pa'i phyir de ni zhing gang ba ma lags zhes bya ba la sogs pa gsungs te/ skyon rnams kyis gang ba ma lags/ yon tan rnams kyis ma gang ba yang ma lags pa'o/ / bcom ldan 'das yang de la chos gang yang dag par 'grub par mi 'gyur zhes bya ba ni nyon mongs pa'i bag chags kyang ngo / /bas par mi 'gyur zhes bya ba ni 'jig rten sa'i yon tan dang mya ngan las 'das pa yang ngo / /de la sa bon btab pa ni rnam par mi 'phel zhing yongs su mi 'grib bo zhes bya ba la/de la zhes bya ba ni yul de la'o/ /sa bon ni de la dmigs pa'i dge ba ste/ rang gi rgyud la dge ba'i sa bon bzhag cing yod pa'i tha tshig go/ /gal te 'grib pa med cing 'phel ba med na 'o na ni 'bras bu mnyam par 'gyur ro/ /de lta na yang khyad par du 'phags pa med pa'i phyir bla na med pa nyid ma yin par 'gyur ro zhes dogs nas/'jam dpal khyod kyis ci las bsams te/ zhing de la sa bon btab pa zhes bya ba la sogs pa bka' stsal to/ /bcom ldan 'das 'di ltar zhing de ni zhes bya ba la sogs pa ni brjod par bzhed pa ston pa yin no/ /bsam gyis mi khyab pa zhes bya ba ni lhag ma med pa'o//'di skad bstan te/ yul bsam gyis mi khyab pa la sa bon btab pa ni 'bras bu bsam gyis mi khyab pa nyid du 'gyur te/ 'bras bu ni rgyu dang 'bras bu mthun pa'i phyir ro/ /de la 'bras bu bsam gyis mi khyab pa yang sangs rgyas nyid yin la/de yang 'grib pa med cing 'phel ba med de/ bla na med pa yin pa'i phyir ro/ /de bas na sa bon yang 'bras bu'i sgo nas 'grib pa med pa dang 'phel ba med pa zhes bshad do/ /des na de'i tshe sangs rgyas kyi mthus zhes bya ba la sogs pa ni sgro 'dogs pa dang skur pa 'debs pa dang bral ba'i chos kyi rnam grangs kyi che ba'i bdag nyid ston par byed pa yin no//sa chen po rnam pa drug tu g.yos par gyur to zhes bya ba ni las byed pa'i bye brag yin te/ rnam pa drug ni rab tu g.yo ba dang / mtho ba dang / dma' ba dang / sgra 'byin pa dang / 'gul ba dang / 'khrug pa'o/ /len pa med par zag pa rnams las sems rnam par grol lo zhes bya ba ni phra rgyas yod pa ma yin pas kun nas dkris pa las rnam par grol ba zhes bya ba'i tha tshig go/ /chos kyi mig skyes pa ni bden pa rtogs pa skyes pa ste/ shes rab gang gis gang zag la bdag med pa la sogs pa'i chos rnams mthong ba ni chos kyi mig ces bya'o//chos smos pa ni sha'i mig rnam par gcad pa'i don te/ de ni lung du ma bstan pa yin no/ /'dir ni chos kyi bdag nyid dge ba zhes bya ba'i tha tshig go/ /mig dang gsal ba dang snang ba dang shes rab dang /ye shes bya ba rnams tha dad pa ma yin no/ /chos la zhes bya ba ni sdug bsngal la sogs pa 'phags pa'i bden pa la bya'o/ /mig de yang rdul dang bral ba yin te/ 'dod chags la sogs pa'i rdul med pa'o/ /de nyid kyi phyir dri ma med pa yin te/ 'dod chags la sogs pa'i dri ma dang bral ba'i phyir ro//'di yang tshig snga ma nyid rnam par 'byed pa'o/ /yang lta ba'i ngo bo'i rdul dang bral ba'i dbang du byas pa ni tshig snga ma yin no/ /lta ba ma yin pa'i ngo bo'i dri ma med pa la dgongs pa ni phyi ma yin no/ /chos gos phrag pa gcig la gzar nas zhes bya ba ni chos gos zlum por gyon pa btang nas phrag pa g.yon pa la gzar zhes bya ba'i tha tshig go//'di phrag pa gcig tu zhes tshig rnam par sbyar ro/ /'di'i rgyu gang lags rkyen gang lags zhes bya ba ni rnam grangs yin te/ ji ltar gzhan dag nas/yang dag pa'i lta ba skyed pa'i rgyu gnyis/ rkyen gnyis te/ gzhan gyi sgra dang / nang gi tshul bzhin yid la byed pa'o zhes gsungs pa lta bu'o/ /lha la sogs pa'i mthu yongs su spang ba'i phyir rgyu gang lags zhes gsungs so/ /'di sngon gyi sangs rgyas bcom ldan 'das rnams kyis kyang zhes bya ba ni bcom ldan 'das 'od srungs la sogs pas so//gzhan dag na re 'dis chos kyi rnam grangs sangs rgyas kyi lam ston par byed pa'i phyir de bzhin du thog ma med pa'i dus can no zhes 'chad pa de ni rigs pa ma yin te/ yul de ni kun rdzob tu yang thog ma med pa nyid med pa'i phyir te/'chags pa'i snga rol na med pa'i phyir ro/ /de bas na 'phags pa shA ri'i bus chos kyi rnam grangs kyi cho 'phrul dang / bsam gyis mi khyab cing dpe med pa'i 'bras bu tshe 'di la 'thob pa dmigs nas 'phags pa 'jam pa'i gsung la gus pa skyes te shin tu bstod pa'i ched du bcom ldan 'das 'jam dpal 'di ni bsam gyis mi khyab pa'i dpal lo zhes de skad gsol te/bsam gyis mi khyab pa na lhag pa med pa'o/ /dpal ni 'jig rten las 'das pa'i yon tan shes rab la sogs pa'i 'byor pa ste/ de 'di la yod pa'i phyir ro/ / de ci'i slad du zhe na zhes rgol ba'i bsam pa ni 'di yin te/ rgyud gzhan la yod pa'i yon tan phun sum tshogs pa de ji ltar khyod kyis rtogs par nus/ 'di ltar re zhig khyod kyis sems kyi rnam grangs shes pa'i mngon par shes pa ni 'di la mngon sum du 'jug par nus pa ma yin bdag med pa gnyis khong du chud pas shin tu shes rab kyi dbang po rno ba yin pa'i phyir dang /bde bar gshegs pa'i go 'phang dang nye ba yin pa'i phyir ro/ /sa dang dbang po gang zag gang 'das dang / /zhig dang ma skyes de dag rtog pa med/ /ces gsungs pa yin no/ /yul 'di lta bu la rjes su dpag pa 'jug pa yang med de/'di ltar gzhan gyi skyon dang yon tan rtogs pa nges par bya ba la rtags yod pa ma yin te/ de ni sems kyi chos yin pa nyid kyis dbang po'i yul las 'das pa'i phyir ro/ /rang gi lus dang ngag gi tha snyad la rjes su dpog na yang tha snyad ni skyes bu'i 'dod pa tsam la brten te 'jug pa yin pas de gzhan du bya bar yang nus pa ma yin no//sems la shin tu rnam par ma nges pa 'dod pa dang bral ba khyod 'dra bas ni gzhan gyis brjod par shin tu nus pa ma yin no zhe na/ 'di'i lan du/ 'di ltar 'di'i spobs pa gang dang gang lags pa'i spobs pa de dang de nyid bsam gyis mi khyab pa nyid lags so zhes bya bas 'di skad bstan te/tshig khyad par can gyi rgyu ni rgyud gzhan la yod pa'i yon tan gyi bye brag rtogs pa yin la/ tshig khyad par can de yang tshad ma dang ldan pa'i don ston par byed pa nyid kyis smra ba pos yang dag par rtogs pa dang /phyin ci ma log par mthong ba'i mchog dang / gzhan gyi don gyi rjes su 'brang ba'i bsam pa rtogs par byed pa yin na/ tshig la 'dir shin tu mi 'thad pa ci yod/ bcom ldan 'das kyis kyang brjod par bya ba'i lhag ma lus par gzigs nas gdams ngag gi gtam gyi rgyud mi gcad pa'i phyir gleng slong ba mdzad pa ni/dge slong sha ra dwa ti'i bus tshig ji skad smras pa de de bzhin te zhes bya ba la sogs pa yin no/ /'phags pas kyang de kho na nyid brjod pa'i phyir btsun pas smras pa sel bar mdzad pa ni/ bcom ldan 'das bsam gyis mi khyab na spobs par mi 'gyur ro zhes bya ba la sogs pa yin no//dgongs pa ni 'di lta ste spobs pa de dag thams cad ni bsam gyis mi khyab pa nyid do zhes bya bas ci bstan par 'gyur zhe na/ ci bsam gyis mi khyab pa'i bdag nyid gzung ba'i rnam par snang ngam/ 'on te ci gnyis su med pa nyid bsam gyis mi khyab pa'i bdag nyid du skye'am/ci nang du brjod pa'i ngo bo dang ldan pa'i phyir 'di bsam gyis mi khyab pa yin no zhes gnyis su 'byung ba yin/ btsun pas bdag la smras par gyur pa de gzhan dag las bye brag ci yod ces dgongs pa'o/ /'di snyam du dgongs te/sgra dang de'i don mtha' dag ni bsam par bya bar 'gyur te/ de gnyis rnam par rtog pa'i shes pa'i yul yin pa'i phyir ro/ /de dag ni mi rigs par smras pa ma yin nam/ gang bsam gyis mi khyab pa ma lags pa ni ci yang ma mchis so//de nyid kyi phyir/ bcom ldan 'das sgra thams cad ni bsam gyis mi khyab pa ste zhes gsungs te/ sgra smos pas de'i don yang mtshon par byed pa yin no/ /'di snyam du dgongs te/ sgra dang don de gnyis ni phyi'i gzugs kyi ngo bo gsal ba'i bdag nyid dam/ spyi'i ngo bo'am/blo la snang ba'i mtshan nyid cig yin grang na/ de dag ni don dam par rnam par rtog pa'i shes pa'i yul du mi 'gyur te/ thams cad las kyang / gsal ba gnyis su mi 'gyur te/ /gzhan du 'gro bar snang ba yin/ /shes pa dag lam gtogs par/ / ji ltar don gzhan 'grub par 'gyur/ /de bas log par rnam rtog pa'i/ /sgra don 'di kun rnam par nges/ /bag chags las byung thog ma med/ /rang gi bsam las rnam par log /ces 'byung ngo / /phyogs gsum pa sel ba ni bsam gyis mi khyab pa nyid kyi sgra ni bstan par mi nus so zhes bya ba yin te/bsam gyis mi khyab pa nyid ces bya ba ni bsam gyis mi khyab pa'i ngo bo'o/ /sgra zhes bya ba ni sgra'i don la bya ste/ sgra'i rnam pa'i rjes su 'brang ba'i phyir sgra'i don la sgra zhes gsungs so/ /sgra'i don med du zin kyang rang bzhin la go 'gal ba ci yod ce na/sgra ma lags pa yang zhes gsungs te/ sgra'i don ma lags pa yang bstan par mi nus so/ /brjod par mi nus so zhes bya ba'i tha tshig go/ /don ni 'di yin te nang du brjod pa yang ji ltar de'i spyi'i rnam pa'i sgra'i don nyid du rang gi rnam pa la mngon par zhen pa de bzhin du 'di yang yod pa ma yin te/ji lta ba bzhin du mngon par zhen pa dang ldan pa'i phyir dang / de kho na nyid ji lta ba bzhin du mngon par ma rtogs pa'i phyir ro/ /de nas yang btsun pa'i dgongs pa ni 'di lta ste/ gang gi phyir 'di ni bsam gyis mi khyab pa'i ting nge 'dzin la snyoms par 'jug go//so so'i skye bo la sogs pa ni ma yin no/ /de bas na 'di nyid re zhig de tsam gyis bsam gyis mi khyab pa spobs pa lags so zhes bshad do zhe na/ de'i phyir bcom ldan 'das kyis bka' stsal pa/ 'jam dpal khyod bsam gyis mi khyab pa'i ting nge 'dzin la snyoms par 'jug gam zhes gsungs so//de nyid kyang spong bar byed pa ni bcom ldan 'das de ni ma lags te zhes bya ba yin no/ /'di nyid rnam par 'byed pa ni bsam gyis mi khyab pa'i ting nge 'dzin la bdag snyoms par mi 'jug go zhes bya ba yin no/ / de ci'i slad du zhe na zhes bya ba ni des rab tu phye ba yin na ji ltar de la snyoms par mi 'jug ces bsams pa'o/ /lan du bcom ldan 'das 'di ltar bdag nyid bsam gyis mi khyab pa'i ting nge 'dzin lags pa'i slad du'o zhes bya ba yin no/ /gong du ting nge 'dzin gyi sgra smos pa der yang 'di'i don gyis khong nas dbyung bar bya'o//'di ltar 'gyur te/ bcom ldan 'das gal te bdag bsam du rung ba lags na ni bdag bsam gyis mi khyab pa'i ting nge 'dzin la snyoms par 'jug go/ /bsam gyis mi khyab pa'i ting nge 'dzin las logs shig na yod na zhes bya ba'i tha tshig go//don 'di yang yod pa ma yin te/ 'di ltar bcom ldan 'das bsam du ma mchis pa'i ting nge 'dzin zhes bgyi ba de ni bsam du ma mchis pa/ bsam gyis mi khyab pa bsam gyis mi lang ba lags te gang gi phyir bsam du ma mchis te bsam pa las 'das pa de bas na don bsam gyis mi lang ba lags so//brjod pa tsam du ting nge 'dzin smos so/ /de bas na ji ltar bdag bsam gyis mi khyab pa'i ting nge 'dzin la snyoms par 'jug par bgyi ste/ logs shig na mi srid pa'i phyir mi bgyid do/ /gang gi tshe rnam par shes pa nyid kyi skad cig ma gcig la gnyis su med pa bsam gyis mi khyab pa'i ting nge 'dzin gyi ngo bo dang ldan pa skye ba de la yang dag par snyoms par 'jug pa po dang /snyoms par 'jug pa dang / snyoms par 'jug par bya ba dag med pa yin na/ de'i tshe ji ltar bdag bsam gyis mi khyab pa'i ting nge 'dzin la snyoms par 'jug pa'am/snyoms par zhugs pa'am/ snyoms par 'jug par 'gyur ba yin/ kha cig las bsam pa las 'das pa/ bsam bya med pa/ bsam gyis mi khyab pa zhes 'byung ste/ de'i don yang 'di yin te/ bsam par bya ba'i ngo bo 'di las 'das pas bsam pa las 'das pa yin no/ /de nyid kyi phyir bsam bya med pa yin te/ bsam byar 'os pa ma yin pa'o/ /gsum pa ni mjug sdud pa'i tshig yin no/ /gal te de ltar na bdag ni bsam gyis mi khyab pa'i ting nge 'dzin la snyoms par 'jug go snyam pa 'di ji ltar 'byung bar 'gyur zhe na/de'i phyir gsungs pa/ de lta lags kyis kyang bcom ldan 'das bdag bsgom pa khyad zhugs pa thob pa'i sngon rol las dang po pa thog ma brtson pa'i tshe na 'di snyam du zhes bya ba lhag ma'o//de ji lta bu zhe na/ bsam gyis mi khyab pa'i ting nge 'dzin la snyoms par 'jug go snyam du de ltar bsams par gyur to/ /bde bar gshegs pa'i go 'phang 'dod pas mngon du bya'o snyam mo/ /de bsam pa de ci med dam zhe na/ gsungs pa/ bcom ldan 'das da ltar ni bdag bsam gyis mi khyab pa'i ting nge 'dzin 'di la snyoms par 'jug go snyam du yang phyir yang de la sems pa kun tu 'byung ba ma mchis so//'dir sngar dpe bstan pas lan gdab pa'i phyir ro / /bcom ldan 'das 'di lta ste dper na zhes bya ba la sogs pa gsungs so//'phong gi slob dpon ni 'phen mkhas par gyur pa'o/ /de sngon las dang po pa'i sa ni slob pa'i tshe bsam pa 'di snyam du bdag gis 'ben sbom por gyur pa ba lang gi phur pa dag la phog par bya'o snyam du sems so/ /ba lang gi phur pa zhes bya ba ni phur pa gang la ba lang dag 'dogs pa'o//'phong gi slob dpon de gang gi tshe skra'i nyag ma phra mo la phog par gyur pa de'i tshe 'phong gi slob dpon de yang bsam pa 'di snyam du bdag gis ba lang gi phur pa dag la phog par bya'o snyam du sems pa mi 'byung ngo / /ci'i phyir mi 'byung zhe na/ 'di ltar de skra la phog par legs par lobs pa'i slad du'o/ /skra nyag ma phra mo la phog par mkhas na ba lang gi phur pa la phog pa lta smos kyang ci dgos zhes bya ba'i tha tshig go/ /ci ste goms pa mchog tu gyur ma thag tu gang gi tshe 'phong gi slob dpon de skra la phog par 'tshal zhing 'dod pa de'i tshe bsgrim mi 'tshal bar 'bad pa med par skra la phog par 'gyur te/skra la phog par goms pa'i phyir ro/ /bcom ldan 'das de bzhin du bdag sngon ni zhes bya ba la sogs pas ni don la dpe'i don sbyor bar byed pa yin no/ /gang gi tshe bdag gis rim gyis rnam par rtog pa 'phros pa mtha' dag bsal te ting nge 'dzin de la snyoms pa zhugs par gyur nas ting nge 'dzin 'dis ting nge 'dzin 'di'i ngo bos gnas pa de'i tshe bdag slar yang ting nge 'dzin 'di la bsam pa 'di snyam du ting nge 'dzin 'dis gnas par bgyi'o snyam du mi sems so//slar yang zhes bya ba yang ci ste shin tu bsgoms par ma gyur ba'i tshe sngon ni byung la/ da ni mngon par zhen pa mi 'byung ba de ci'i slad du zhe na/ 'di la de'i bsam pa zhugs nas de 'phel na go de'i bsam pa yang 'phel ba'i rigs so zhes bsams pa'o//'di'i lan ni gang dang gang gi tshe ting nge 'dzin 'dis gnas pa zhes bya ba la sogs pa yin no/ /ting nge 'dzin 'dis gdags su ma mchis zhes bya ba ni rnam par mi rtog pa'i phyir te/ gnas par bya'o zhes bya ba la sogs par 'dogs pa'i rnam par rtog pa med pas na gdags su ma mchis pa'o//rnam par rtog pa de med pa yang ting nge 'dzin gyi ngo bo yin pa'i phyir ro/ /btsun pas zin pa ni shin tu zhi ba'i ting nge 'dzin gzhan yod pa'i phyir 'di la yid rton pa med pas rnam par rtog pa mi 'jug go snyam pa de'i phyir/ bcom ldan 'das 'jam dpal gzhon nur gyur pa ni bsam gyis mi khyab pa'i ting nge 'dzin 'dis gnas pa'i tshe 'di la yid mi rton na zhes gsungs te/'di ltar gdags su ma mchis pa zhes gsungs na/ 'di nyid shin tu zhi ba yin par ma rtogs pa'i phyir/ 'di bas ches zhi ba'i dngos po gzhan zhig yod par mngon no zhes sems can gzhan zhig sems pa'i ngor byas te /bcom ldan 'das bsam gyis mi khyab pa'i ting nge 'dzin 'di bas ches zhi ba'i ting nge 'dzin gzhan lta ma mchis sam zhes dris so/ /re zhig tshig gi skyon bzungs ba ni btsun pa sha ra dwa ti'i bu khyod kyis bsam gyis mi khyab pa'i ting nge 'dzin 'di zhi ba yin par ji ltar shes zhes bya ba yin no//btsun ba ni shin tu zhi ba'i ting nge 'dzin gzhan dris pa ma yin nam/ 'di zhi ba nyid du khas blangs pa ni ma yin na ci'i phyir de skad du brgal zhe na/ 'di snyam du sems te/'di zhi ba nyid yin par rtogs na ni gzhan shin tu zhi ba nyid yin par dri ba'i rigs te/ 'di ltar 'di yang zhi ba'o/ /'di yang zhi ba'o/ /zhi ba 'di gnyis kyi nang na shin tu zhi bar 'dug pa yin no zhes bya bas ni 'di zhi ba nyid du nges pa dang / gzhan shin tu zhi ba yin par 'dri bar rigs so//'di ni zhi ba nyid yin par nges par rigs pa ma yin te/ byang chub sems dpa' rnams kyi ting nge 'dzin ni nyan thos dag gis mngon du byed pa ma yin pa'i phyir ro/ /de ltar tshig gi skyon brjod nas/ da ni ting nge 'dzin gdags su med pa 'di'i don gsal bar byed pa ni btsun pa sha ra dwa ti'i bu 'di skad du bsam gyis mi khyab pa'i ting nge 'dzin 'di bas ches zhi ba'i ting nge 'dzin gzhan lta mchis sam zhes 'dri na zhes bya ba yin no//de la gsungs pa/ btsun pa sha ra dwa ti'i bu gal te bsam gyis mi khyab pa'i ting nge 'dzin 'di yod cing de bzhin du dmigs na ni de'i tshe bsam gyis mi khyab pa'i ting nge 'dzin 'di bas gzhan ches zhi ba'i ting nge 'dzin gzhan yod par gyur na ji tsam du 'di nyid re zhig thog mar yod pa ma yin te/med pa yin pa'i phyir ro/ /de nyid kyi phyir mi dmigs pa ni 'di ji ltar zhi ba nyid du yod par 'gyur/gang gis na 'di bas gzhan ches zhi ba btsal bar bya/ 'di yod pa kho na ma yin nam/ de lta ma yin te/ med pa yin na chos la bdag med pa mngon par rtogs pa med par thal bar 'gyur ba'i phyir dang / byang chub sems dpa' rnams gzhan las shin tu khyad par du rnam par gzhag pa'i rgyu mtshan med par thal bar 'gyur ba'i yang phyir ro//de bas na dmigs pa kho na yin te/ de lta ma yin na yod pa yang med pa dang bye brag med par thal bar 'gyur ba'i phyir ro snyam du sems pa la/ 'jam dpal bsam gyis mi khyab pa'i ting nge 'dzin 'di med cing mi dmigs pa yin par brjod dam ci zhes bya ba dgongs pa yin no//lan ni btsun pa sha ra dwa ti'i bu 'di ltar de ni bsam gyis mi khyab pa'i ting nge 'dzin te zhes bya ba yin te/ 'di la bsam par bya ba gzung ba yod pa ma yin la/ sems gzhan gyis bsam par yang nus pa ma yin no/ /rang la sems shing 'dzin par yang 'os ma yin te/ de bas na bsam gyis mi khyab pa yin no/ / gtan tshigs gang gis de ltar yin pa de bas na bsam gyis mi khyab pa'i ting nge 'dzin 'di ni med de mi dmigs pa'o zhes kyang ston to//'dir bsdus pa'i don ni 'di yin te/ ting nge 'dzin ni sems rtse gcig pa la bya na/ don dam par sems kyi rtse mo dmigs par gdags pa gzhan cung zad kyang yod pa ma yin na/ gang gis 'di rtse gcig pa'i ting nge 'dzin du 'grub par 'gyur/ de bas na brjod pa tsam kho nar zad de/spros pa'i tshogs dang bral ba glo bur du g.yeng ba'i dri mas ma gos pa rnam par mi rtog pa/ 'gyur ba med pa dri ma'i rnam pas dben pa gang la ting nge 'dzin gyi ming du gzhag pa ni kun rdzob tu yod pa yin no/ /'o na so so'i skye bo rnams la yang tshul de lta bur brjod pa'i dngos po gnas pa yin te/dus thams cad du chos kyi dbyings ni 'gyur ba med par yongs su grub pa'i phyir ro/ /de bas na de dag kyang bsam gyis mi khyab pa'i ting nge 'dzin dang ldan par thal bar 'gyur ro zhe na/ de la 'dir re zhig de tsam du brjod par 'dod nas byis pa rnams la yang bsam gyis mi khyab pa'i ting nge 'dzin yod par 'gyur na de'i phyir cung zad kyang mi 'dod par 'gyur ba ma yin par dgongs nas/de lta mod kyi btsun pa sha ra dwa ti'i bu bsam gyis mi khyab pa'i ting nge 'dzin zhes bya ba la sogs pa gsungs so//de ci'i phyir zhe na zhes bya ba ni shes pa gnyis las dben pa yin zhing skabs kyi dngos po yod du zin kyang / sems can 'ga' yang ting nge 'dzin dang ldan par thal bar mi 'gyur ba ma yin nam/ 'di ltar thal ma thag pa'i don gyi yon tan yod pa ma yin no snyam pa 'di sems la bzhag nas yang de'i phyir ro //bsam pa thams cad ni zhes bya ba la sogs pa gsungs te/ bsam par 'os pa bsam par bya ba thams cad ni bsam gyis mi khyab pa ste gzung ba ma yin pa'o/ /des na cir 'gyur zhe na/ gang bsam gyis mi khyab pa zhes bya ba ni bsam par bya ba'i don dang bral ba'i phyir gzung bas dben pa nyid yin la/ de ni bsam gyis mi khyab pa'i ting nge 'dzin te dngos po gnas pa zhes bya'o/ /de bas na de dag gi cha las sems can thams cad kyang bsam gyis mi khyab pa'i ting nge 'dzin thob par rnam par gzhag pa 'gal bar mi 'gyur ro//yang 'jam pa'i gsung la dad pa lhag par skyes pa rnams kyi dang ba bskyed pa'i phyir/ 'jam dpal khyod kyis zab mo zab pa'i gnas 'di lta bu 'di dag thams cad bstan pa legs so legs so zhes bya ba la sogs pa gsungs te/zab mo zab pa'i gnas zhes bya ba ni don zab pa yin te/ skur pa 'debs pa dang / sgro 'dogs pa dang bral ba'i phyir ro/ /skur pa 'debs pa dang / sgro 'dogs par mi byed pa 'di'i rgyu 'di yang go rims bzhin du ston par byed pa ni 'di ltar 'jam dpal khyod ni sngon gyi rgyal ba la bya ba byas pa ste zhes bya ba la sogs pa yin te/de dag gi don ni bstan zin to/ /de la kha cig gi blo la 'di snyam du 'di ni shes rab can yin pa'i phyir de la gnas te smra ba yin gyi/ dngos po'i dbang gis ni ma yin no snyam mo/ /de bas na brnyas pa yongs su spang ba'i phyir bcom ldan 'das kyis ci 'jam dpal khyod shes rab kyi pha rol tu phyin pa la gnas te zhes bya ba la sogs pa gsungs te/gang kha cig 'chad pa ni de ci'i phyir shes rab kyi pha rol tu phyin pa la gnas te 'di skad smra'o snyam du sems shing blo de snyam byed dam zhes bya ba'i tha tshig go//ma lags so zhes bstan pa'i phyir/ bcom ldan 'das gal te bdag gi blo 'di ltar shes rab kyi pha rol tu phyin pa la gnas nas 'di skad mchi'o snyam bgyid na ni de lta na yang de dmigs pa la gnas te/ de skad mchi bar 'gyur te/ dmigs pa ni bdag la sogs par dmigs pa'o/ /de lta na yang bdag tu 'du shes pa la gnas pa nas de skad mchi bar 'gyur te/ rang gi ngo bo tsam la dmigs pa sngon du btang ba can gyi mngon par zhen pa can gyi 'du shes pa'o/ /dngos po'i 'du shes ni gzung ba dang 'dzin pa yod par mngon par zhen pa'o//bar gyi sgras srog dang / skye ba po dang / skyes bu dang / gso ba dang / gang zag la sogs pa'i 'du shes yongs su gzung ngo snyam du mi bgyid do/ /de bas na shes rab kyi pha rol tu phyin pa la gnas te de skad mi mchi'o snyam bdag mi bgyid do zhes khong nas dbyung ngo //de ci'i slad du zhe na zhes bya ba ni shes rab kyi pha rol tu phyin pa la gnas te mchi'o snyam bgyid kyang de tsam gyis bdag la sogs pa'i 'du shes pa la yang gnas te/ de skad mchi'o snyam du bgyid ces bya bar 'brel pa ci yod/ shes rab kyi pha rol tu phyin pa nyid bdag la sogs pa'i 'du shes ma yin no zhes bya ba ni rgol ba po'i bsam pa yin no/ /'di'i lan du/ bcom ldan 'das gal te shes rab kyi pha rol tu phyin pa la gnas su gyur tam zhes bya ba la sogs pa yin no/ /'di skad bstan te/ sgro 'dogs pa dang skur pa 'debs pa'i mtha' dang bral ba ni shes rab kyi pha rol tu phyin pa'o//bcom ldan 'das gal te shes rab kyi pha rol tu phyin pa de la byed pa po 'ga' zhig gnas so/ /'dug go zhes bdag rnam par rtog par gyur na/ de'i tshe sgro 'dogs pa'i mthar ltung bar 'gyur ro zhes kyi sgra ni 'dir khong nas dbyung bar bstan te/gnas so zhes bya ba'i tha tshig go/ /ci ste gnas pa ma lags te/ gnas pa med pa zhig tu gyur na zhes bya ba ni skyon med pa gnyis su med pa'i ye shes kyi bdag nyid kyang de'i bdag nyid du gyur na zhes sbyar ro/ / 'dir yang zhes kyi sgra khong nas dbyung bar bstan te/ de'i tshe yang skur pa 'debs pa'i mthar ltung bar 'gyur ro/ /de ltar gyur na mtha' gnyis dang bral ba'i shes rab kyi pha rol tu phyin pa ma lags par 'gyur ro/ /shes rab kyi pha rol tu phyin pa la gnas pa med na yang bdag la sogs pa'i lta ba rnams spong bar mi 'gyur te/de'i dbang gis byang chub sems dpa' rnams de dag spong bar byed do/ /de ltar na bdag la sogs pa'i 'du shes la gnas nas de de skad mchi'o zhes bya ba rung ba yin no / gnas ma lags pa zhes bya ba ci'i phyir smos/'di dris pa ni med do zhe na/ nyes pa med de/ sgro 'dogs pa dang skur ba 'debs pa'i mtha' dang bral ba shes rab kyi pha rol tu phyin pa yin par de ltar bzhed pa'i phyir te/ de bzhin du bstan pa yin no/ /bstan ma thag pa'i de kho na nyid kyi don gsal bar byed pa'i don du/bcom ldan 'das bdag gi gnas ma lags pa ni shes rab kyi pha rol tu phyin pa'i gnas te zhes gsungs te/ shes rab kyi pha rol tu phyin pa nyid gnas yin pas shes rab kyi pha rol tu phyin pa'i gnas so/ / dri ma med pa gnyis su med pa'i yon tan gyi rten yin pa'i phyir te/ de ni bdag gi gnas ma lags te/ bdag gi rten ma yin zhes bya ba'i tha tshig go/ /bdag smos pas gang zag la sogs pa yang mtshon pa yin no/ /des ni gang zag la bdag med pa bstan to//'o na gzung ba dang 'dzin pa gnyis kyi gnas yod mod ce na/ shes rab kyi pha rol tu phyin pa'i gnas ni gnas ma mchis pa zhes gsungs te/ gzung ba dang 'dzin pa gnyis kyi zhes bya ba lhag ma'o/ /des ni chos la bdag med pa bstan to/ /de gnyis yang dam bcas pa tsam gyi snying por bstan to zhes dogs pa la/gtan tshigs go rims bzhin du bstan pa ni kun nas 'byung ba ma mchis pa lags so zhes bya ba yin te bdag la sogs pa ni 'di las shin tu yang kun nas 'byung ba ma mchis pas kun nas 'byung ba ma mchis pa'i dgongs pa ni 'di yin te gnas dang gnas ma yin pa'i dngos po ni nye bar skyed par byed pa dang nye bar bskyed par bya ba med par mi 'grub pa yin no//shes rab kyi pha rol tu phyin pa gnas yod du zin kyang bdag la sogs pa 'ga' yang shin tu skye ba ma yin te/ rtag pa'i phyir ro/ /'byung ba ma mchis pa lags so zhes bya ba ni gzung ba dang 'dzin pa'i mtshan nyid dag bstan zin pa'i tshul gyis med pa yin no zhes bya ba lhag ma yin no//kha cig las go skabs ma mchis pa/ 'byung ba ma mchis pa lags so zhes 'byung ba de la 'di la gzung ba dang 'dzin pa'i skabs yod pa ma yin no zhes bshad par bya ba yin no//'byung ba ma mchis pa lags so zhes bya ba ni 'di nyid kyi rnam par 'byed pa yin te/ 'di'i don yang snga ma bzhin no/ /yang na dgag pa med par bya ste/ bcom ldan 'das bdag gi gnas pa ni shes rab kyi pha rol tu phyin pa'i gnas te zhes bya ba des ni chos la bdag med pa bstan te/shes rab kyi pha rol tu phyin pa'i gnas gang yin pa de dag ni bdag gi gnas yin no zhes 'di ni dper bshad pa yin te/ gnas bdag lta bu'o zhes bya ba'i tha tshig go/ /dper na nam mkha' la me tog dang 'dra bar bdag la bde ba la sogs pa gnas par pha rol pos brtags pa ni yang dag pa ma yin no//de bzhin du shes rab kyi pha rol tu phyin pa la yang gang yang gnas pa med de/ bdag dang 'dzin pa la sogs pa'i gnas med pa'i phyir ro/ /don de nyid rnam grangs kyis gsal bar byed pa ni gnas ma mchis pa zhes bya ba la sogs pa yin te/shes rab kyi pha rol tu phyin pa ni gnas pa 'di'i gnas dang / gzhi yod pa ma yin pas gnas med pa'o/ /de bzhin du gnas la yang ji ltar rigs par sbyar ro/ /mjug sdud pa ni de ltar na ji skad du bstan pa'i tshul gyis gnas shes rab kyi pha rol tu phyin pa'i bdag nyid yon tan gyi tshogs ma lus pa'i gzhir gyur pa de ni bdag dang 'dzin pa la sogs pa chos gang gi gnas dang gzhi yang ma lags so//gtan tshigs de'i slad du gnas de ni bsam gyis mi khyab pa'i gnas zhes bstan to zhes bya ba ni lhag ma'o//bsam gyis mi khyab pa ni bsam pa thams cad las 'das pa'i phyir ro/ /gnas de gang zhe na/ shes rab kyi pha rol tu phyin pa'i gnas lags so zhes gsungs so/ /sngar ni shes rab kyi pha rol tu phyin pa la gnas pa ni shes rab kyi pha rol tu phyin pa'i gnas so zhes bshad du zin kyang 'di ni shes rab kyi pha rol tu phyin pa nyid gnas yin no zhes bye brag gi tshig bsdu ba yin te/sngar bstan pa dang mtshams sbyar ba'i phyir sgra tsam ni 'dra ba yin no/ / bsam gyis mi khyab pa dang mtshan ma med pa dang / stong pa zhes bya ba rgyun du bstan pa ma yin nam/ ji ltar shes rab kyi pha rol tu phyin pa de nyid bsam gyis mi khyab pa'i gnas zhes bshad ce na/ bcom ldan 'das shes rab kyi pha rol tu phyin pa zhes bgyi ba ni zhes gsungs te/ bshad pa zhes bya ba ni lhag ma'o/ /gang zhe na/ chos thams cad kyi skye ba ma mchis pa gang lags pa zhes gsungs so/ /dgongs pa ni 'di lta ste/ skye ba med pa ni de bzhin nyid dang / stong pa zhes lan du mar bstan to/ /skye ba med pa de yang thams cad du song ba ma yin pa'i phyir byis pa la sogs pa'i sems la yang yod du zin kyang /'on kyang de dag gis mi rtogs te gnyis su sgro 'dogs pa stobs can du gnas pa'i phyir ro/ /shes rab kyi pha rol tu phyin pa ni sgro 'dogs par 'phros pa mtha' dag dang mi mthun pa yin te/ rang rig pas rtogs pa yin no//de bas na skye ba med pas rab tu phye ba yin pa'i phyir/ chos thams cad kyi skye ba ma mchis pa gang lags pa de shes rab kyi pha rol tu phyin pa lags so zhes gsungs so / /de nyid kyi phyir rjes su song ba'i don nyid bstan pa'i phyir yang shes rab kyi pha rol tu phyin pa zhes bya ba 'di gsungs te/shes rab kyi pha rol tu phyin pa mchog mthar phyin cing gshegs pa zhes bya ba'i tha tshig go/ /skabs la rgol ba yongs su spang ba'i phyir/ gang gi phyir chos thams cad skye ba med pa ni shes rab kyi pha rol tu phyin pa zhes bshad pa de bas na/ shes rab kyi pha rol tu phyin pa zhes bgyi ba de ni 'di lta ste bsam gyis mi khyab pa'i dbyings kyi tshig bla dgas so zhes gsungs so/ /bsam gyis mi khyab pa de nyid dbyings yin pas bsam gyis mi khyab pa'i dbyings te stong pa zhes bya ba'i tha tshig go/ /de la bsam gyis mi khyab pa ni bsam pa'i blo thams cad kyi yul du bya bar mi nus pa'i phyir ro//dbyings ni dkar po'i chos thams cad kyi rigs sam rgyu yin pa'i phyir ro/ /de bas na bsam gyis mi khyab pa dang / skye ba med pa dang / shes rab kyi pha rol tu phyin pa la sogs pa ni don tha dad pa ma yin no//de nyid kyi phyir rnam grangs kyi tshul de lta bu yin pa la the tshom mi bya'o/ /rnam grangs de nyid rgyas par brjod par bzhed pa'i phyir/ bsam gyis mi khyab pa'i dbyings gang lags pa de skye ba ma mchis pa'i dbyings so zhes gsungs te/ don de ni bstan ma thag pa yin no//skye ba med pa nyid dbyings yin pas skye ba med pa'i dbyings so/ /dbyings kyi sgra ni 'dir 'og nas 'byung ba'i tshig rnams la yang phal cher sngar bzhin du rigs kyi don yin no/ /skye ba ma mchis pa'i dbyings gang lags pa de ni yid bzhin gyi nor bu dang 'dra ba'i chos kyi dbyings so//'di ltar de'i tshe lhun gyis grub pa nyid du skye bo gdul bya mtha' dag la yod pa/ bcom ldan 'das kyi stobs bcu la sogs pa ni gang las cig car du skye ba yin no/ /chos kyi dbyings gang lags pa de ni sgrib par 'gyur ba'i mtha' dag gi chos kun du 'byung ba dang bral ba'i phyir kun du 'byung ba ma mchis pa'i dbyings te/'di las sgrib pa kun du 'byung ba dang bral bas kun du 'byung ba med pa'o/ /de nyid khams kyang de yin te/ de skad du bstan zin to/ /kun du 'byung ba ma mchis pa'i dbyings gang lags pa de bsam gyis mi khyab pa'i dbyings te rgyud gzhan gyi yon tan bsam gyis mi khyab pa rnams kyi dbyings te/rigs yin pa'i phyir rang yongs su dag pas gzhan yongs su dag pa bskyed pa'i phyir dang / 'bras bu ni rgyu dang mthun pa yin pa'i phyir ro/ /bsam gyis mi khyab pa'i dbyings gang lags pa de bdag gi dbyings te/shin tu rnam par dag pa'i ye shes kyi ngo bo ston pa'i bdag gi dbyings dang rang bzhin yin pas bdag gi dbyings so/ /des ni ma 'dres pa nyid ni de'i rang gi ngo bo nyid yin par bstan to/ /rnam pa de lta bu'i ngo bo nyid khyad par du 'phags pa gang yin pa de shes rab kyi pha rol tu phyin pa'i dbyings so zhes bya ba ni skabs la sbyor ba yin no//shes rab kyi pha rol tu phyin pa nyid dbyings so zhes snga ma bzhin du bsdu'o/ /de ltar na zhes bya ba ni de bas na zhes bya ba'i tha tshig go/ /shes rab kyi pha rol tu phyin pa'i dbyings dang /bdag gi dbyings te dang gi sgras skye ba med pa'i dbyings dang / kun du 'byung ba med pa'i dbyings kyang rig par bya'o/ /de dag thams cad gnyis su ma mchis te/ 'di la gnyis kyi dngos por dbye ba yod pa ma yin pas gnyis su med pa'o/ /'di nyid kyi rnam par dbye ba ni gnyis su dbyer ma mchis so zhes bya ba yin te/'di la gnyis su bya ba la sogs pas gnyis su byar yod pa ma yin pas gnyis su dbyer med pa'o/ /yang don 'di nyid gtan tshigs dang / gtan tshigs can gyi dngos pos gsal bar byed pa ni gtan tshigs gang gi slad du 'di gnyis su ma mchis te gnyis su dbyer ma mchis pa'i gtan tshigs de'i slad du 'di ni bsam gyis mi khyab pa'i dbyings te/gnyis mchis na ni gnyis su dbyer med pa nyid mi 'grub par 'gyur ro/ /gang gi slad du 'di bsam gyis mi khyab pa'i dbyings lags pa de'i slad du 'di ni skye ba ma mchis pa'i dbyings te/brtags pa'i chos rnams skye ba dang ldan pa yod na ni bsam pa'i yul nyid yin par 'gyur ro/ /gang gi slad du 'di skye ba ma mchis pa'i dbyings lags pa de'i slad du 'di ni chos kyi dbyings so/ /de lta ma yin na shin tu dkar ba'i chos rnams kyi rigs yin par mi 'gyur la/de'i sgro 'dogs par 'phros pa thams cad dang bral ba'i skye ba med pa'i dbyings su yang mi 'gyur ro/ /gang gi slad du 'di chos kyi dbyings lags pa de'i slad du 'di ni kun du 'byung ba ma mchis pa'i dbyings so/ /nyon mongs pa can gyi chos kun du 'byung na ni shin tu rnam par byang ba'i chos rnams kyi rigs yin par yang mi 'gyur te/rang nyid rnam par ma dag pa yin pa'i phyir ro/ /gang gi slad du 'di kun du 'byung ba ma mchis pa'i dbyings lags pa de'i slad du 'di ni bsam gyis mi khyab pa'i dbyings te/gal te 'di rgyud gzhan la yod pa'i yon tan bsam gyis mi khyab pa rnams kyi rigs ma yin par gyur na ni de'i tshe 'di kun du 'byung ba med pa'i rigs su yang mi 'gyur te/ 'di ltar kun du 'byung ba med pa nyid ni shin tu rnam par dag pa'i don nyid yid bzhin gyi nor bu lta bu'o/ / gang gi slad du 'di bsam gyis mi khyab pa'i dbyings lags pa de'i slad du 'di ni bdag gi dbyings te/ gal te shin tu rnam par dag pa de'i bdag nyid ma yin na ni de'i tshe byis pa'i rgyud bzhin du de bzhin gshegs pa'i rgyud kyang rgyud gzhan gyi yon tan gyi rgyur mi 'gyur te/ bye brag med pa'i phyir ro//gang gi slad du 'di bdag gi dbyings lags pa de'i slad du 'di ni shes rab kyi pha rol tu phyin pa'i dbyings te/ gal te de lta ma yin na ni shes rab kyi mchog mthar phyin par mi 'gyur ro/ /de'i tshe ma 'dres pa yin par yang mi rigs te/ thun mong ma yin pa'i phyir ro//gang gi slad du 'di shes rab kyi pha rol tu phyin pa'i dbyings lags pa de'i slad du 'di ni bsam gyis mi khyab pa'i dbyings te/ gal te bsam par nus pa yin na ni blo shin tu mthar phyin par 'gyur ro/ /'di ci'i phyir yang smra bar byed/ 'di sngar yang shes rab kyi pha rol tu phyin pa'i dbyings gang yin pa de ni bsam gyis mi khyab pa'i dbyings yin no zhes ma smras sam zhe na/nyes pa med de skabs la rgol ba sel ba'i mjug bsdu ba'i phyir/ 'di smras pa yin no/ /de bas na 'di nyid gnas pa des na de gnas pa ni bsam gyis mi khyab pa gnas shes rab kyi pha rol tu phyin pa gnas pa yin no//gang gi slad du 'di bsam gyis mi khyab pa'i dbyings lags pa de'i slad du 'di ni yang dag par 'grub pa ma mchis pa'i dbyings te/ srid par gnas pa bzhin du 'khor bar skye ba med do/ /yang dag par 'grub pa ma mchis pa gang lags pa de ni mchis pa ma lags te/ma skyes pa ni yod par mi rigs pa'i phyir ro/ /gang mchis pas lags pa de ni 'khor ba'i chos rnams kyis mi gos te/ shin tu thugs rjes yongs su bzung ba'i phyir bzhugs pa'am / 'ba' zhig kho na yin no zhes bya ba'i bar du yin no//de ni 'jig par mi 'gyur te/ gzhan la phan pa bsgrub par mkhas pa ni 'khor ba ji srid par gnas pa'i phyir ro/ /gang 'jig par mi 'gyur ba de ni bsam gyis mi khyab pa ste/ dngos po thams cad kyi mchog yin pa'i phyir ya mtshan du byed pa yin no//'di yang rnam pa gzhan gyi sgo nas de la rgol ba'i lan gyi mjug sdud pa yin no/ /gang gi tshe de ltar brtags pa'i dra ba thams cad las dben pa ni shes rab kyi pha rol tu phyin pa yin la/ de'i bdag nyid kyang bcom ldan 'das yin no zhes rnam par gnas so//de bas na de ltar na de bzhin gshegs pa'i dbyings dang / bdag gi dbyings 'di ni gnyis su ma mchis te/ gnyis su dbyer ma mchis so zhes gsungs te/ nang gi byed pa'i skyes bu bdag pha rol po dag gis brtags par de'i dbyings ni don dam pa'i rang gi ngo bo nyid du brtags pa mtha' dag las 'das pa'i ngo bo yin te/thams cad du yang med pa yin pa'i phyir ro/ /skyon med cing gnyis su med pa'i ye shes kyi bdag nyid de bzhin gshegs pa yang brtags pa'i ngo bo thams cad las dben par gnas pa'i phyir dang / thams cad du shes pa dang brjod pa'i yul las 'das pa'i phyir ro//de lta bu'i tshul du mnyam pas na de ni gnyis su med do zhes bshad do/ /zla la mdo sde gzhan las gsungs pa'i don kyang ston pa ni mdo sde gzhan las/ bcom ldan 'das kyis gang bdag bsgom pa ni shes rab kyi pha rol tu phyin pa bsgom pa'o zhes bka' stsal pa/de yang gnyis su med cing gnyis su byang med do zhes sbyar te/ bstan ma thag pa'i tshul gyis na bdag dang shes rab kyi pha rol tu phyin pa ngo bo mthun pa'i phyir ro/ /de yang ci'i slad du zhe na zhes bya ba ni dgongs pa ma rtogs nas dris pa ste/bdag bsgom pa ni phyin ci log yin la/ shes rab kyi pha rol tu phyin pa bsgom pa ni phyin ci ma log pa yin no/ /phyin ci log dang cig shos gnyis ni gcig yin par mi rigs te/ 'gal ba'i phyir ro zhes gsungs pa'i bzhed pa ston pa ni/ bcom ldan 'das shes rab kyi pha rol tu phyin pa zhes bgyi ba 'di ni bdag gi dbyings kyi tshig bla dgas lags pa'i slad du'o zhes bya ba yin te/ rnam pa de dag ni bshad zin to/ /'on kyang gsung gi bzhed pa pha rol pos ma rtogs nas de ci'i slad du zhe na zhes dris te ji ltar na shes rab kyi pha rol tu phyin pa brtan pa rang dbang can la sogs pa ni de dang bral te/de las bzlog pa bdag gi ngo bo yin par rtogs par byed par bsams pa'o/ /de nas bzhed pa gsal bar byed pa ni/ bcom ldan 'das gang gis bdag gi dbyings bdag gi don dam pa'i rang gi ngo bo de kho na nyid sgom pa la brtson pas 'tshal ba des chags pa ma mchis pa'i dbyings 'tshal te/de ni bdag gi rang bzhin gyi ngo bo yin pa'i phyir ro/ /'on kyang pha rol po dag dgongs pa ma rtogs pa la gang gi chags pa ma mchis pa nyid 'tshal ba des chos gang yang 'tshal ba ma mchis te zhes gsungs te/de la ni mtshan mar bya ba'i ngo bo med pa'i phyir ro/ /de ci'i slad du zhe na zhes bya ba'i bsam pa ni 'di yin te/ 'di ltar de bzhin gshegs pas chags pa med pa mkhyen pa ni des skad cig ma gcig dang ldan pa'i shes rab kyis shes bya thams cad snang ba yin na ji ltar de ci yang mi mkhyen pa yin zhes bya ba yin no//de'i phyir/ 'di ltar bsam gyis mi khyab pa bsam par mi nus pa'i ye shes ni sangs rgyas kyi ye shes lags te zhes gsungs te/ des ni 'dzin par byed pa'i shes pa gzhan de la yod pa ma yin par bstan to/ /'di'i gzung ba med do zhes bstan pa'i phyir/chos gang la yang shes pa ma mchis pa ni sangs rgyas kyi ye shes lags pa'i slad du'o zhes gsungs te/ gzung ba'i mtshan nyid rnam par bshig pa ni bstan zin pa'i phyir ro/ /des ni 'di skad du de ni gzung ba ma yin la des kyang 'dzin pa ma yin no zhes bstan te/shes pa gzhan dang gzung ba yang stong pa yin no/ /'on kyang thams cad mkhyen pa'i phrin las mdzad pa la khong bzo ba 'gro ba'i bla ma rnams kyi ye shes kyi rang bzhin ni snang ba yin no/ /de ci'i slad du zhe na zhes bya ba'i bsam pa ni 'di lta ste/shes pa po'i ye shes 'di ni dngos po yin la/ dngos po yang byed pa po dang las la ltos pa yin na/ las byed ni gnyi ga dang 'brel pa'i phyir ro zhe na/ de'i phyir/ ye shes de ni don dam par na mchis pa ma lags te zhes gsungs te/ de'i ye shes nyid ni brtags pa yin te/yang dag pa ma yin no zhes bya ba'i tha tshig go/ /gal te ye shes de don dam par med pa yin na/ 'o na des ji ltar chos kyi 'khor lo bskor bar 'gyur/ 'di ltar gsung dbyangs 'byung ba ni ye shes sngon du song ba ma yin no zhe na/ gang don dam par ma mchis pa de chos kyi 'khor lo bskor bar yang ji ltar 'gyur/bden te bskor ba nyid med pa yin no/ /ji skad du 'phags pa de bzhin gshegs pa gsang ba'i mdo las/ zhi ba'i blo gros gang gi nub mo de bzhin gshegs pa mngon par rdzogs par sangs rgyas pa nas/gang gi tshe mya ngan las 'das pa'i bar der de bzhin gshegs pas ye shes gcig kyang brjod pa ma gsungs so/ /de ci'i phyir zhe na/ zhi ba'i blo gros de bzhin gshegs pa ni rtag tu mnyam par gzhag pa'o zhes bya ba la sogs pa gsungs so/ /yang bla ma de'i tshogs kyi shugs kyis yid bzhin gyi nor bu bzhin du ji ltar 'dod par rtsig pa la sogs pa las kyang chos 'chad pa 'byung ngo zhes gsungs so//de ltar byas na mdo sde gzhan las kyang chags pa med pa dang dngos po med pa dang / yul med pa la sogs pa gsungs pa'i don legs par drangs pa yin no zhes dgongs nas zhar la go rims bzhin du ston pa ni gang gi tshe ye shes de don dam par ma mchis pa de'i tshe ye shes de ni chags pa ma mchis pa'o zhes gsungs te/chags pa med pa ni mtshon pa yin te/ gnod sems med pa dang rmongs pa med pa la sogs pa yang rig par bya'o//'di'i chags pa yul la zhen pa'i 'dod chags yod pa ma yin pas chags pa med pa'o/ /dngos po yang las dang 'brel pa'i phyir de la chags pa yin par srid pa yin no/ /'di'i dngos po yang yod pa ma yin te/ gcad par bya ba'i las mi 'thad pa'i phyir ro zhes bstan zin to//'o na yul med pa yin na so so'i skye bo la sogs pa'i shes pa ji ltar chags par 'gyur zhe na/ yul yod par mngon par zhen pa'i phyir ro zhes bya bar khong du chud par bya'o/ /'khrul pa'i sa bon yang spangs pa de la ni mngon par zhen pa yang yod pa ma yin no//gang gis gang la chags pa de la ni gdon mi za bar de yod na dngos po yod par 'gyur te/ chags pa ni de gnyis la brten pa'i phyir ro/ /chags pa med pa la ni dngos po gang la yang dngos por gyur pa ma yin no zhes bstan pa'i phyir/ gang gi tshe ye shes de chags pa ma mchis pa de'i tshe ye shes de ni dngos po ma mchis pa'o zhes gsungs te/gzhan la ma yin te dngos po gang yang yod pa ma yin pas dngos po ma mchis pa'o/ /gang zhig yod na de'i rnam pa'i rjes su byed pa de ni dngos po yin la/ de ni de'i yul yin no zhes bya bar rigs te/rjes su 'gro ba dang ldog pa'i rjes su byed pa'i bye brag rgyu nyid yul yin pa'i phyir ro/ /dngos po med na ni yul yang gang gi yin snyam nas de'i phyir/ gang gi tshe ye shes de dngos po ma mchis pa de'i tshe ye shes de ni yul ma mchis pa'o zhes gsungs so//gang zhig la yul gzugs la sogs pa yod pa de la ni rten mig la sogs pa yin par rigs kyi/ yul med na ni rten yang rigs pa ma yin no snyam nas gang gi tshe ye shes de la yul ma mchis pa de'i tshe ye shes de ni mi gnas pa'o zhes gsungs te/ 'di ltar gzugs la sogs pa'i yul shes par bya ba'i phyir mig la sogs pa'i dbang po skyes pa yin no zhes dgongs pa'o// //'phags pa shes rab kyi pha rol tu phyin pa bdun brgya pa rgya cher bshad pa bam po lnga pa/ ji skad du mig dang gzugs la brten nas mig gi rnam par shes pa skyes zhes bya ba la sogs pa gsungs pa yin no//gang gi tshe yong ye dus thams cad du yul med na de'i tshe gang la gzung bar bya ba'i phyir dbang po byung / yul med par yang rnam par shes pa dbang po la brten par pha rol bo dag 'dod pa ma yin nam/dper na rab rib kyis nyams pa'i mig gis skra la sogs pa shes pa bzhin du 'di yang de bzhin no zhe na/ lan de ni snang ba tsam yin gyi de rnam par shes pa ni ma yin no/ /dngos po'i rang bzhin 'di yang rten la sogs pas bskyed pa yin par mi 'dod na de ci rgyu med pa can yin nam/skal ldan rnams kyi snang ba tsam yin du zin kyang rgyu med pa can ma yin te/ dbang po dang yul med par yang bsod nams dang ye shes kyi tshogs mtshungs pa med pa thugs kyi rgyud la gnas pa'i mthu tsam rgyu yin pa'i phyir ro/ /gang zhig gnas pa yin pa de ni 'dod pa la sogs pa'i khams la brten pa yin no//gnas mig la sogs pa yang der gtogs pa'i phyir ro/ /gnas pa yod pa ma yin na ni nam mkha' la sogs pa bzhin du rten kyang yod pa ma yin no snyam nas/ gang gi tshe ye shes de mi gnas pa de'i tshe ye shes de ni rten ma mchis pa'o zhes gsungs so//gang zhig 'dod pa la sogs pa la brten pa de ni gdon mi za bar der las dge ba dang mi dge ba gzhan dag gis bskyed pa 'thob pa'am/ skye bar 'gyur ba yin no/ /de gang la yang brten pa med na ci'i phyir rnam pa 'di dag mi 'thad snyam nas gang gi tshe ye shes de brten pa ma mchis pa de'i tshe ye shes de ni ma bskyed pa'o//ma thob pa'o/ /skye bar mi 'gyur ba'o zhes gsungs te/ 'di yang bstan pa tsam yin gyi thob par mi 'gyur ba yang khong du chud par bya'o/ /brjod par bzhed pa ma rtogs nas de ci'i slad du zhe na zhes dris pa ni/gal te kha na ma tho ba med pa'i bsod nams dang ye shes kyi tshogs kyi shugs kyi lam gyis 'khor ba ji srid du ye shes de 'jug pa yin na de ci'i phyir ma bskyed pa yin zhes bya ba'i tha tshig go/ /brjod par bzhed pa ston pa na ye shes de ni yon tan gyis 'dus bgyis pa'am/yon tan ma lags pas 'dus bgyis pa ma lags pa'i slad du'o zhes bya ba yin te/ yon tan ni 'dir dge ba zag pa dang bcas pa'i chos rnams yin par bzhed ro/ /yon tan ma yin pa ni mi dge ba ste/ de dag gis 'dus ma byas pa ni zag pa med pa'i chos kyi rgyu mthun pa yin pa'i phyir te/'di ltar byang chub sems dpa'i gnas skabs na yod pa'i zag pa med pa'i chos rnams ni de'i rgyu yin no/ /de ci'i slad du zhe na zhes bya ba ni de yang yon tan dang yon tan ma yin pas 'dus byas ma yin te/ ston pa po yin pa'i phyir bdag cag la sogs pa'i rnam par rtog pa'i shes pa bzhin no zhes bsams pa'o//'di ltar des na rnam par dag pa dang / kun nas nyon mongs pa gnyis ni yon tan dang yon tan ma yin par bstan pa yin pas gtan tshigs 'di ma grub bo zhe na/ 'di ltar ye shes de ni bsam gyis mi khyab pa ste zhes bya ba la sogs pa gsungs te/bsam pa dang / mngon par brjod pa dang / rtog pa rnams las gang gi phyir 'das pa yin pa de bas na bsam gyis mi khyab pa'o/ /mngon par brjod pa ni ngag kun nas slong bar byed pa ste/ mngon par brjod pa thams cad ni rang gi snang ba la phyi rol bzhin du sgra'i don nyid du mngon par zhen pa yin na 'di ni shes bya'i sgrib pa mtha' dag spangs pa'i ston pa po la yod pa ma yin no zhes bstan zin to//de rtog pa dang brjod pa dang bral ba de'i slad du yon tan nam/ yon tan ma lags par yang ji skad du bstan par bgyi/gang gi phyir gtan tshigs 'di 'grub par 'gyur/ gang gi slad du ye shes de bsam gyis mi khyab pa yin te/ rnam par rtog pa'i snang ba stong pa yin pa'i phyir ro/ /de ci'i phyir ye shes de bsam du ma mchis pa ste rtog par mi byed pa zhes bya ba'i tha tshig go/ / bstan zin pa mjug sdud par byed pa ni gang de ltar shes pa de ni mi dmigs pa'i tshul du rnam par gnas pa ni sangs rgyas kyi ye shes lags so zhes tha snyad du bya bar sbyar ro/ /de ltar shes pa po'i shes pa la dngos por rnam par rtog pa bsal nas/ byed pa po dang byed pa la sogs par rnam par rtog pa de sel bar byed pa ni ye shes byed pa po'am byed pa des ni sdug bsngal dang /kun 'byung ba la sogs pa'i chos gang yang kun mthong ba'i tshul du mngon par rdzogs par sangs rgyas pa'am/ rang gi ngo bo med pa'i tshul du mkhyen pa ma mchis so//yongs su 'gyur bar rnam par rtog pa 'di sel bar byed pa ni ye shes de ni sngon gyi mtha' nas mchis pa'am/ phyi ma'i mtha' nas mchis pa ma lags te/ skad cig ma tsam gnas pa'i phyir ro/ /sngon gyi mthar 'ongs pa ma yin/ phyi ma'i mthar 'dug pa ma yin na sngon gyi mtha' nas ma yin zhes bya ba de rigs pa ma yin nam/phyi ma'i mtha' nas ma yin zhes bya ba de yang ji skad du bstan/ 'das pa yang de ltar du 'gyur ba ni med do zhe na ma yin te/ grangs can rnams so sor brjod pa'i phyir ro/ /de dag gis ni 'das pa'i bum pa yang bum par 'gyur te/ gang gi tshe de nyid kyi chag grugs las kyang bum par byed pa yin no//yang na 'di ni 'pho bar smra ba sel bar byed pa yin te/ 'das pa'i dus bor nas 'phos te 'ongs pa yang ma yin no/ /rtag pa dang mi rtag par rnam par rtog pa sel bar byed pa ni ye shes de ni sngon skyes pa yang ma lags zhes bya ste/byang chub sems dpa'i gnas skabs na rnam par rtog pa mtha' dag gi dri ma dang bral ba de lta bu'i shes pa'i rjes su ma skyes pa'i phyir ro/ /ye shes de ni sngon ma skyes pa yang ma lags te/ rang bzhin gyis de kho na nyid mthong ba'i bdag nyid sngon yang skyes pa'i phyir ro//de ci'i phyir zhe na/ sgro btags pa'i rnam pa'i tshul du sngon yang skyes pa'i phyir ro/ /rnam par rtog par 'gyur ba sel bar byed pa ni sngon ma skyes pa'i slad du gang ma skyes pa de ni nub par yang mi 'gyur zhes bya ba yin te/ ji ltar gzung ba dang 'dzin pa med pa'i bdag nyid du ma skyes pa'i phyir de ltar de rnam par dben pa'i ngo bos nub par 'gyur ba ma yin te/ngo bo gzhan du 'gyur ba ma yin zhes bya ba'i tha tshig go/ /chad par rtog pa sel bar byed pa ni chad par yang mi 'gyur ro zhes bya ba yin te/ thams cad du log par gyur pa ma yin te/sngon gyi smon lam gyi stobs kyis 'khor ba ji srid par gnas pa'i phyir ro/ /'dra ba la sogs pa rnam par rtog pa bsal bar bya ba'i phyir/ ye shes de dang 'dra ba'i zhes bya ba la sogs pa gsungs te/ ye shes de dang gzhan nyan thos la sogs pa dang 'brel pa shes pa 'dra ba gang yang ma mchis te/de'i slad du ye shes de ni bsam gyis mi khyab cing ye shes de ni 'dra ba ma mchis pa zhes bya'o/ /ye shes de ni thog ma dang dbus dang tha ma mi dmigs pa ste/ rang bzhin gyis 'od gsal ba ni thog ma med pa'i phyir dang / thugs rje chen po'i shugs kyis srid pa'i chu bo ji srid par gnas pa mtha' med pa'i phyir ro/ /thog ma'i mtha' la ltos nas brtag pa'i dbus kyang mi rigs pa'i phyir ro/ /de'i slad du ye shes de ni nam mkha' dang 'dra ba yin no/ /ye shes de la mnyam pa'am mi mnyam pa mi dmigs te zhes bya ba'i 'am gyi sgra ni mnyam pa dang mi mnyam pa zhes bya ba'i tha tshig go//de la mnyam pa ni tshad ma dang ldan pa'i ngo bo yin te/ rtogs par sla ba yin no/ /mi mnyam pa ni tshad mas gnod pa'i ngo bo yin te/ rtogs par dga' ba yin no/ /gnyis po de ni de la yod pa ma yin te/mnyam pa kho na'i ngo bo yin no zhes bya ba'i tha tshig go/ /yang na 'am gyi sgra ni rnam par rtog pa'i don te/ de la rnam par rtog pa yod pa ni mnyam pa kho na yin te/ rnam pa thams cad du shin tu bzang ba'i phyir de'i ngo bo ma yin no zhes bstan pa yin no/ / de'i slad du ye shes de ni mi mnyam pa dang mnyam pa ste/ chos thams cad kyi mchog mnyam pa med pa de bzhin gshegs pa'i ye shes gzhan dang mnyam zhing mtshungs pa yin no/ /ye shes de la ni de dang 'dra ba cung zad tsam 'dra ba yang mi dmigs te/ de'i slad du ye shes de ni mtshungs pa ma mchis pa ste/'di dang 'dra ba yod pa ma yin pa'i phyir ro/ /de ltar bcom ldan 'das kyi ye shes ni bsam gyis mi khyab pa dang / chags pa dang 'dra ba med pa'i bar du bstan pa thos nas/ kha cig 'di snyam du ye shes 'di ni mi bsgyur ba ma yin nam ci/ gzhan du de skad du bstan du zin kyang 'dir de ltar ma bstan/'di ltar mi 'jigs pa'i skabs su nga yang dag par rdzogs par sangs rgyas pa la dge sbyong dang bram ze la sogs pas mi bskyod pa zhes bya ba la sogs pa gsungs pa yin no zhe na/ ma yin te/ de'i phyir klan ka de spang ba'i phyir bcom ldan 'das kyis/'jam dpal ye shes 'di mi bsgyur ba ma yin nam zhes bya ba gsungs te/ ci zhes bya ba khong nas phyung ste tshig zur du brjod par bya ste/ de ci bsgyur ba yin nam gang gis na khyod kyis de ltar ma brjod ces bya ba'i tha tshig go/ / 'dir lan du bcom ldan 'das ye shes 'di ni ma bgyis pa ste zhes bya ba la sogs pa gsungs te/ yon tan dang / yon tan ma yin pas 'dus ma byas pa'i phyir 'di mi bsgyur ba yin par 'thad pa yin no/ /de bas na logs shig tu ma bstan to zhes bya ba'i tha tshig ste/ zag pa med pa'i chos kyi rgyu mthun pa dang mi mthun pa 'ga' yang yod pa ma yin no zhes dgongs pa'o//gzhan yang 'di la bsgyur ba dang mi bsgyur ba yin par dogs pa'i gnas med pa kho na yin te/ 'di ltar yongs su grub pa'i bdag nyid kyi dngos po kho na zhig yin na ni bsgyur ba dang mi bsgyur ba'i grangs su gzhug par bya ste/kAr ShA pa Na zong du bsgyur ba lta bu'o/ /bcom ldan 'das kyi ye shes de ni chos thams cad mngon par rdzogs par byang chub pa'i ngo bos don dam par ma grub pa kho na yin no/ /de mngon par rdzogs par byang chub pa'i phrin las mdzad pa dag ni kun rdzob tu de ltar bstan pa yin no//de nyid 'jig rten pa'i dpes nye bar bstan pa sngar byas pa'i phyir/ bcom ldan 'das 'di lta ste dper na kAr ShA pa Na rtags ma btab pa ni zhes bya ba la sogs pa gsungs so/ /rtags ma btab pa ni gang legs par ma byas pa ste/ rgyas ma btab pa zhes bya ba'i tha tshig go/ /bcom ldan 'das de bzhin du ye shes 'di yang zhes bya ba la sogs pas ni dpe'i chos don la nye bar sbyor ba yin no/ /ma bgyis pa nas ma 'gags pa'i bar ni mnyam pa nyid du 'dug pa yin te/ rtags kyis rnam par bsgyur ba'i rjes su 'brangs te bsgyur ba yang ma yin/mi bsgyur ba yang ma yin zhes bya ba'i grangs su 'gro ba'o/ /ma bsgrubs pa la sogs pa'i tshig rnams ni snga ma snga ma bstan pa yin no/ /ma 'gags pa'i tshig ni 'dus byas kyi mtshan nyid thams cad med par bstan pas shin tu yang 'dus ma byas pa nyid yin par brjod pa'i phyir ro//gnas pa ma bkag pa ni 'di skye ba las logs shig na med pa'i phyir ro/ /gzhan gyi don du bstan pa 'di ni byang chub sems dpar ma gyur pa gang gis kyang lhag par mos par nus pa ma yin no zhes thabs gzhan gyis byang chub sems dpar gyur pa'i skye bo dag 'di la nyan par gzhug pa nyid du bstan pa'i phyir/'jam dpal de bzhin gshegs pa'i ye shes bstan pa de ltar bstan pa 'di la su dag mos pa zhes bya ba la sogs pa gsungs so/ /bcom ldan 'das gang dag 'khor ba'i chos can yang ma lags la/yongs su mya ngan las 'das pa'i chos can yang ma lags pa dang zhes bya ba ni 'khor ba dang / lhag ma dang bcas pa dang / lhag ma med pa dang / bye brag tu mya ngan las 'das pa gnyi ga la mi gnas pa'i byang chub sems dpa' zhes bya ba'i bar du yin no//'khor bar ma gtogs pa yang ma yin te/ skyon du mthong ba'i phyir ro/ /thugs rje can yin pa'i phyir mya ngan las 'das par bzhugs kyang / srid pa na gnas shing gzhan gyi don skye ba la gzigs pa gang dag yin pa de dag bstan pa shin tu gsal ba 'di la lhag par mos par 'gyur ro//de lta bu de dag kyang gang zhe na gang dag 'jig tshogs las kyang ma bskyod pa dang zhes bya ba la sogs pa gsungs te/ 'jig tshogs kyi sgras 'jig tshogs la lta ba la bya ste/ tshig tha ma khong nas dbyung ba'i phyir ro/ /de ci'i slad du zhe na zhes bya ba ni de gang zag la bdag med par sgom pa'i rang bzhin du gyur pa yin na ji ltar nyon mongs pa zad par mi 'gyur zhe na/'di'i lan ni mi bas pa ni chen po la sogs pa spong ba'i rim gyis bas par mi 'gyur/ rnam par chung ba'i chung ba thams cad nas thams cad spangs pas yongs su pas par yang mi mchi'o//'di la yongs su zad pa yod pa ma yin pas mi bas pa dang / 'jig tshogs dang / 'dod chags la sogs pa zad pa med pa yin no/ /'jig tshogs la sogs pa dang gzung ba dang 'dzin pa'i rnam pas rab tu phye ba rnams ni med pa yin pa'i phyir ro//'di ltar 'jig tshogs la lta ba ni bdag dang bdag gi ba'i rnam par 'jug pa yin no/ /'dod chags dang zhe sdang dang gti mug la sogs pa ni yul yid du 'ong ba dang mi 'ong ba la sogs pa la chags pa'i rnam par 'jug pa yin no zhes dgongs te gsungs so//'o na rnam pa 'di dag gis na so so'i skye bo la sogs pa yang 'jig tshogs las kyang ma bskyod la/ de dag kyang 'dod chags la sogs pa mi zad pa kho na yin te/ zad par mi 'gyur ba dang / yongs su zad par mi 'gro ba yin pas de dag las lhag pa ci yod na byang chub sems dpa' rnams la de skad du bstan zhe na/ma yin te de dag ni chos la bdag med pa goms pa dang bral bas de bzhin nyid rtogs pa med pa'i phyir ro/ /skyes bu brtan po de dag la ni lan mang du thabs mang pos yun ring por chos la bdag med pa bsgoms pas de bzhin nyid rtogs pa yod pa'i phyir ro//de bas na de nyid kyi dbang du byas te de skad bstan pa rigs pa yin no/ /bdag nyid chen po de dag ni chos thams cad rang gi dngos po med pa yin na / sems can rnams ni dngos por mngon par zhen pa yin no zhes thugs rje chen pos dgongs so//de bas na de dag ni thugs rje'i dbang du gyur pa'i thugs kyis srid pa na yun ring du 'gro ba mtha' dag la phan par bya ba'i ched du bzhugs pa yin pas de'i phyir/ gang dag 'khor ba las kyang ma 'das la zhes gsungs te/ lhag ma med pa'i mya ngan las 'das pa'i dbyings su ma bzhugs pa'i phyir ro//'khor ba'i grangs su yang mi mchi ba ni 'khor ba'i rgya mtshor skyes kyang pad mo bzhin du de'i dri ma rnams kyis mi gos pa'i phyir ro/ /de dag gis ni de dag nyid 'khor ba dang mya ngan las 'das pa la mi gnas pa nyid yin par sngar khas blangs pa bstan par byas so//gang dag lam dang bral ba yang ma lags shing zhes bya ba ni chos thams cad dngos po med pa nyid du mngon par rtogs pa'i bdag nyid thugs rje chen po dang ldan pa'i lam de'i bdag nyid du gyur pa'i phyir ro/ /lam gyi 'du shes kyang mi skyed pa ni de'i mtshan ma yin pa la mi byed pa'i phyir ro//de dag gis ni bstan ma thag pa'i 'khor ba dang mya ngan las 'das pa la mi gnas pa'i thabs gsal bar byas pa yin no/ /de dag gis bstan pa 'di'i don 'tshal bar 'gyur ro zhes bya ba ni rnam pa thams cad dang mchog tu zhes bya ba'i bar du yin no//'di bcom ldan 'das kyi dgongs pa ni ma yin gyi/ de skad du 'chad pa ni rang dga' yin no snyam du dogs pa la/ 'jam dpal legs so legs so zhes gsungs te/ khyod kyi tshig de ni legs par bshad pa yin no zhes bya ba yin no//ji skad du/ gang zhig srid par 'khor yang srid pa'i skyon dang bral/ /stong pa smra yang las dang 'bras bu gtong mi byed/ /shes pas 'dod pa bsregs kyang gang dag thugs rjes brlan/ /zhes bya ba la sogs pa bsngags pa gsungs pa yin no/ /skyes bu dam pa mos pa'i snod du gyur pa ni de ltar yang dkon na ci ma 'ongs pa'i dus na yod dam snyam bsams nas btsun pa 'od srungs chen pos/bcom ldan 'das ma mchis pa'i dus na zhes bya ba la sogs pa gsol to/ /gang la la chos 'dul ba zab mo 'di dang zhes bya ba ni mngon par mtho ba'i skas 'og nas btsugs par gyur pa'i mdo sde'i dbang po'i rgyal po chen po la bya'o//shes rab kyi pha rol tu phyin pa zab mo 'di la zhes bya ba ni don gyi ngo bo la bya'o/ /'di la nyan pa ni tshig dang don bshad pa la gang gis gus pas rna ba gtod pa'o/ /mos pa ni gang zhig gis thos nas dad pa'i rjes su 'brang bas kyang 'di ni de kho na yin no zhes nges par 'dzin pa'o//kun 'tshal ba ni gang zhig rigs pas de'i don gtan la phebs pa'o/ /rab tu 'dzin par 'gyur ba ni gang zhig gis gtan la phab nas yang dag par sgrub pas bsgom pa'o//nyan pa la sogs pa de dag gi go rims ni gsal lo/ /yang na mos pa ni gang zhig gis thos nas dad pa dang shes rab gnyis kyi don de kho na yin no zhes rtogs pa'o/ /kun 'tshal ba ni don ji lta ba bzhin gang sgom par byed pa'o/ /rab tu 'dzin par 'gyur ba ni bla ma la gus shing chos 'dul ba 'di glegs bam du bzhugs pa yang klog pa dang /'chang ba dang / mchod cing shin tu 'dzin pa'o/ /de dag ni 'khor 'di nyid na gnas so zhes bya ba lhag ma yin no/ /gang zhig chos kyi rnam grangs 'di 'khor gyi dkyil 'khor 'di'i nang du thos pa de dag nyid ma 'ongs pa'i dus na nyan par 'gyur ba dang /mos par 'gyur ba ni sangs rgyas dang byang chub sems dpa'i bkas byin gyis brlabs pa'i phyir te/ sangs rgyas rnams la bsnyen bkur ma byas par ni 'di thos pa'i lam du 'gro bar 'gyur ba ma yin no zhes bya ba'i tha tshig go//de dag gi bye brag ni 'di yin te/ gang zhig 'di la thos te legs par shin tu yid la byed pa de dag ni gzhan gyi tshe na thos par 'gyur/ mos par 'gyur/ kun shes par 'gyur/ rab tu 'dzin par 'gyur ro/ /gang zhig thos nas legs par yid la byed pa de dag ni kun shes pa'i bar du 'gyur ro//gang zhig thos pa nyi tsher zad pa de dag ni thos par 'gyur/ mos par yang 'gyur ro/ /gnyis pa'i bshad pa yang de bzhin du rig par bya ste/ rgyu chung ngu las 'bras bu chen por 'gyur bas 'di ni ston pa po'i dgongs pa yin par mngon no//'od srungs 'khor 'di nyid ni zhes bya ba ni spyir bstan pa yin no/ /de dag kyang gang zhe na/ dge slong dang / dge slong ma dang / dge bsnyen dang / dge bsnyen ma 'khod pa de dag ni zhes bya ba yin no/ /gang dag ma 'ongs pa'i dus na chos zab mo 'dul ba 'di dang shes rab kyi pha rol tu phyin pa zab mo 'di la nyan pa dang /mos pa dang / kun shes pa dang / rab tu 'dzin par 'gyur ba yod do zhes bya ba ni spyir bstan pa yin no/ /don de dag nyid dpe rnam pa bzhis gsal bar bya ba'i phyir/ 'od srungs 'di lta ste dper na khyim bdag gam zhes bya ba la sogs pa gsungs so//de la nor bu rin po che stor ba dang rnyed pa bstan pas ni chos kyi rnam grangs 'di yid bde ba dang mi bde ba rjes su 'jug pa dang ldog pa'i gzhi yin pa'i phyir ro/ /de dag gis dus gzhan na thos par 'gyur ba na dga' ba dang bde ba dang yid dga' bar 'gyur zhing kun nas dkris pa'i yid la byed pa med par 'gyur te zhes gang gsungs pa la/dga' ba ni yid dga' ba gang gis zin pa zhes sbyar ro/ /sngar ni stor ba bzhin du sngar ma thos pa'i mya ngan gyis yid gdungs pa yin no//bde ba dang zhes bya ba ni bde ba skyes pa ste/ lus shin tu sbyangs pa dang ldan pa'i phyir re/ /yid dga' bar 'gyur ba ni sems shin tu sbyangs pa dang ldan pa'i phyir ro/ /gang dag la kun nas dkris pa'i yid la byed pa med par 'gyur ba de dag la de skad ces bstan to//kun nas dkris pa'i yid la byed pa zhes bya ba ni yid mi bde bas gdungs pa yin par bshad do/ /der khyim bdag dang de'i bu smos pa ni rjes su mthun par bstan pa'i phyir ro/ /sa bdag dang de'i bu ni de stor tam slar rnyed pas yid mi bde ba yang med/ yid bde ba yang med do//ma skyes pa la sogs pa'i don bstan pa'i ched du de bzhin nyid bshad de/ don dam pa dang / de bzhin nyid dag ni rnam grangs te bar gyi sgras bsdu'o/ /shing yongs 'du sa brtol kha 'bus pa bstan pa ni de'i tshe dang dus gzhan na yid bde ba'i gnas yin par bstan te/de'i tshe dga' bar 'gyur ba dang / gang gi tshe me tog thams cad rgyas par 'gyur ba ni/ 'di lta ste/ chos thams cad kyi me tog rgyas par 'gyur zhes bya ba yin no/ /yid dga' ba zhes bya ba ni snga ma bzhin no/ /rab tu dga' bar 'gyur ro zhes bya ba ni dga' ba mchog tu 'gyur ba zhes bya ba'i tha tshig go//sa brtol ni sa las skyes pa'o/ /de nyid yongs 'du yin te/ de'i ming gi rnam grangs yin te / kha 'bus pa zhes bya ba ni hA khyim chags pa'o/ /me tog thams cad rgyas pa ni thams cad du kha bye ba'o/ /nges par zhes bya ba ni gcig tu nges par zhes bya ba'i bar du'o//'dir kha cig dogs pa 'chad pa zhes bya ba ni skyes bu lus 'ga' med par mi rung ba ma yin nam snyam du bsams pa'o/ /thos pa bzhin du skyes bu med par yang yod pa yin te/ de'i dbang gis gzhan du de'i gzugs las sam gzugs brnyan las yin te/bcom ldan 'das mya ngan las 'das par gyur kyang bde bar gshegs pa snang ba yin no/ /de'i tshe 'di thos par gyur pa gang gi dbang gis she na/ 'di ltar 'das pa na mngon sum du byas pa dag yin par khong du chud par bya'o//de'i phyir 'od srungs 'di ltar shes rab kyi pha rol tu phyin pa zab mo ma skyes pa dang ma byung ba nas dngos po med pa'i bar 'di ma 'ongs pa'i dus na/ de bzhin gshegs pa 'das pa'i phyin zhes bya ba la sogs pa gsungs so/ /shes rab kyi pha rol tu phyin pa dang 'brel pa dang lhan cig brjod bar bya ba dang rjod par byed pa'i dngos por 'brel pas 'brel pa zhes bya ba'i tha tshig go//'das pa'i phyin zhes bya ba ni mi bzhugs pa dang / yongs su mya ngan 'das pa bstan pa zhes bya ba'i bar du yin no/ /gnas par 'gyur ba zhes bya ba ni glegs bam la yod pa tsam gyis so//spyod par 'gyur ba zhes bya ba ni rgyun du klog pa dang kha don byed pas so/ /sangs rgyas kyi byin gyi rlabs dang zhes bya ba 'di nyid rnam par 'byed pa ni sangs rgyas kyi mthu yin par shes par bya'o zhes bya ba yin no/ /yang na byin gyi rlabs ni slob ma dang yang slob la sogs pa gcig nas gcig tu bar du chod pa'i rgyu nyid yin pa'o//mthu ni dngos su de'i dbang gis so/ /nor bu mkhan zhig gis nor bu rin po che mthong ba'i dpes ni rtag tu yid bde ba'i gnas nyid 'di yin par bstan pa'i phyir/ 'od srungs de bzhin du gang dag shes rab kyi pha rol tu phyin pa zab mo ma skyes pa dang /ma byung ba nas dngos po med pa'i bar 'di thos nas zhes bya ba la sogs pa gsungs pa yin no/ /rab tu dga' bar gyur pa ni gang dag la dga' pa yod pa de rab tu dga' bar gyur pa'o/ /mgu ba ni yid dga' ba la bya'o//gang dag la rangs pa dang / yid bde ba skyes pa zhes bya bar sbyar ro/ /yid dga' ba'i don ni snga ma bzhin no/ /yang na snying dga' ba la bya ste/ sngon gyi rjes su yang nas yang du zhes bya ba'i tha tshig go/ /nor bu rin po che 'di ni rigs las brjod par bzhed de bstan to//sngon nyams su myong ba'i grong khyer thos pa'i dpes ni bde ba dang yid bde ba sna tshogs kyi gnas nyid yin par de dus gzhan zhig na de'i drung du mi la la zhig song ste grong khyer de'i bsngags pa brjod cing kun dga' ra ba nyams dga' ba dang zhes bya ba la sogs pa gsungs so/ / grong gang yang rung ba zhig tu dgos pa la la'i phyir sngon son par gyur la phyis brjod par gyur zhes dgongs pa'o/ /nyams dga' ba'i dngos po la nyams dga' ba zhes bya'o/ /de ci'i phyir zhe na zhes bya ba rgol ba po'i bsam pa ni 'di yin te/ yang nas yang du bsngags pa brjod par gsol ba 'debs pa tsam mthong ba las nyams su myong ba yod par rjes su dpog pa rigs pa ma yin te/'khrul pa'i phyir ro/ /'di ltar 'dod chags dang ma bral ba dag gnas gtsang ma'i gnas nyams dga' ba dag gi bsngags pa brjod pa thos pas snying ya ya po chen pos g.yengs par gyur nas yang dang yang du gsol ba 'debs par byed kyang des tshe snga ma la yang de mthong bar gyur pa ni ma yin te/lan cig phyir mi 'ong ba kho na dag der skyes pa'i phyir ro zhe na/ 'di ltar de thos nas yid cher dga' ba dang rab tu dga' bar gyur te zhes bya ba la sogs pa ni lan yin te/dga' ba'i bye brag de nyid kyis de lta bu dran pa'i 'du byed skyed par byed pa yin la/ dran pa dang mtshungs par ldan pa yang gang zhig rtags kyi bye brag brjod pa'i ngo bo la gsol ba 'debs pa 'byung bar byed do/ /de las ni kun nas slong bar byed pa'i bye brag rjes su dpog pa yin par shes par bya ste/mtshan ma las rjes su dpog pa'i tshul bzhin du grong khyer la sogs pa mthong bar gyur pa rjes su dpog go zhes bya ba 'di ni bsdus pa'i don to/ /yang dang yang drung du 'gro zhing zhes bya ba ni lan du mar ro/ /rab tu dga' zhing mgu bar gyur te zhes bya ba ni rgya chen por ro//'di nyid rnam par 'byed pa ni dga' ba dang mgu ba cher skyed cing zhes bya ba yin no/ /yang na rab tu dga' zhing mgu bar gyur pa ni dang por ro/ /dga' ba dang mgu ba cher skyed pa ni rgyun ma 'chad par ro/ /dga' ba nyid mgu ba yin par 'grel to//yang na dga' ba yang de yin la mgu ba yang de yin zhes gcig tu sbyar ro/ /de la dga' ba ni yid bde ba'o/ /de sngon du song ba'i rab tu dga' ba dang khong mgu ba ni mgu ba'o/ /gtan la dbab pa'i phyir/ bcom ldan 'das ma mchis pa'i dus na zhes bya ba la sogs pa gsungs so//de dag gi rnam pa dang rtags dang mtshan ma bcom ldan 'das kyis gang dag bka' stsal pa de dag nyid lags sam zhes bya ba ni tshig zur gyis dri ba'o/ /yang na ci lags zhes bya ba khong nas dbyung ngo / /bsam pa ni 'di yin te/ 'dir dpe bzhin du sngon myong ba'i rnam pa sgrogs pa ni cha tsam yang mi dmigs na de dag gis 'jam dpal gzhon nur gyur pa la bsnyen bkur byas pa la sogs pa de ji ltar shes par bya zhe na/bcom ldan 'das kyis bka' stsal pa/ 'od srungs ji skad smras pa de de bzhin te zhes gsungs te/ dgongs pa ni 'di yin te/ dngos po'i chos de nyid rjes su myong ba gsal bar gyur pa gang yin pa des dran pa'i sa bon 'jog par byed kyi gzhan du ma yin no/ /rjes su myong ba de yang de dag la goms pa che ba dang / ches che ba la sogs pa nye bar gyur pa dang bral ba'i phyir gsal bar 'gyur ba dang /bar skabs su mi mthun pa'i rkyen gyis nyams smad pa dang / de bas na 'phral du dran pa 'byung ba ma yin te/ tsha ba dang kha ba'i ro rjes su myong ba mi dran pa bzhin no/ /'di tsam gyis de med pa yang ma yin te/ de'i stobs nyid kyis mngon par 'dod pa la sogs pa ji skad du gsungs pa rjes su 'byung ba yin te/gzhon nu'i gnas skabs na myong ba'i tsha ba dang kha ba la sogs pa srid pa bzhin no/ /rjes su myong ba dang mngon par 'dod pa tsam gnyis 'brel ba 'di ni bcom ldan 'das kyi bka' las dad pa mi g.yo ba'i stobs kyis de rig par bya'o//de la rnam pa ni lus dga' ba'i bye brag ste/ ba [(]sbu [,]spu [)]ldang ba dang / mchi ma zag pa la sogs pa'o/ rtags ni tshig gi bye brag ste dga' ste gsol ba 'debs pa la sogs pa'o/ /mtshan ma ni sgrub pa'i bye brag ste/ nyan pa dang / 'chang ba dang / klog pa dang / mchod pa la sogs pa sngar bshad pa bstan pa yin no/ /de ltar rnam pa la sogs pa bcom ldan 'das kyis bka' stsal pa dang / kha cig dngos por mngon par zhen cing sgro 'dogs pa'i mtha'i 'dam du bying ngo / /de bas na mngon par zhen pa bsal ba'i phyir/ bcom ldan 'das chos de ni rnam pa ma mchis shing zhes bya ba la sogs pa gsungs so//chos ni chos kyi rnam grangs so/ /shes rab kyi pha rol tu phyin pa yang zhes bya ba ni don gyi ngo bo'o / /don ni 'di yin te/ rnam pa dang / rtags dang / mtshan ma 'di dag thams cad ni rnam par ma dag pa'i blas gnyis kyi ngo bo nyid la mngon par 'dod pa yin no//gnyis kyang bden pa ma yin par rtag tu lan grangs du mar gsungs so/ /de gnyis rnam pa la sogs pa dang / bral ba ma yin na rnam pa la sogs pa gnyis dang ldan pa zhes ji skad du bstan/ 'on kyang des thos pa dang ldan pa'i gdul bya rnams de la brtson par mthong ba las sngon thos pa yod par rjes su dpog par byed do//tshul gang gis de gnyis la rnam pa la sogs pa mi rigs pa de ni de nyan pa po la yang mtshungs pa'i phyir ro/ /de nyid kyi phyir gdul bya'i bye brag la ltos nas rnam pa la sogs pa dang bral ba grub pa de gnyis kho na smos pa yin te/de ni nyan pa po rnams la yang de dag mtshungs pa bstan pa'i phyir ro/ /de lta ma yin na rigs kyi bu pho'am/ rigs kyi bu mo de dag la rnam pa ma mchis pa dang / mtshan ma mchis pa lags na/ ji ltar 'gyur zhes go rims bzhin du brjod par bya dgos par 'gyur ro//bcom ldan 'das kyis chos bstan pa gang lags pa de yang rnam pa ma mchis/ rtags ma mchis/ mtshan ma mchis pa'i slad du lags na zhes bya ba ni gtan tshigs kyi snod yin no/ /bcom ldan 'das rnam pa ma mchis pa bstan pa'i chos de ji ltar bstan par 'gyur/re zhig bstan pa yang yod pa ma yin na 'das pa'am/ da lta'i tshe na nyan pa lta ga la yod ces bya ba'i tha tshig go/ /de ltar sgro 'dogs pa'i mtha' bsal nas/ 'dir skur pa 'debs pa'i mthar ltung bar thal bar mi 'gyur bar bya bar dgongs nas kun rdzob kyi bden pa'i dbang du byas te/'jam dpal shes rab kyi pha rol tu phyin pa zab mo shin tu ma skyes pa dang / dngos po med pa'i bar du bstan na zhes bya ba la sogs pa gsungs pa yin no/ /de ni de dag nyid gus par nyan pa dang /legs par shin tu yid la skyed pa la spro ba bskyed pa'i phyir ro/ /'jam dpal phyogs gang du shes rab kyi pha rol tu phyin pa bstan pa der sangs rgyas kyi chos stobs bcu dang / /byang chub kyi yan lag la sogs pa thams cad bstan par blta'o zhes gsungs so//dus de'i tshe byang chub kyi yan lag la sogs pa bdag nyid chen po'i rang gi ngo bo bstan par ma byas pa ma yin nam/ de ci'i phyir der sangs rgyas kyi chos thams cad bstan par blta'o zhes gsungs she na/ de'i phyir 'di ltar der bsam gyis mi khyab pa bstan par blta'o zhes gsungs te/bsam gyis mi khyab pa ni stong pa nyid do/ /don ni 'di ste rnam pa thams cad stong pa nyid bsgoms pas de 'thob par 'gyur ro/ /de yang 'dir rnam par rtog pa thams cad bsal bas bstan pa yin no/ /de bas na de thob pa'i thabs bstan pas de yang yongs su bstan pa yin par bshad do//de dag gis ni sangs rgyas nyid kyi rgyu gtso bo ni shes rab kyi pha rol tu phyin pa la sbyar ba yin par bstan to/ /'di snyam du bcom ldan 'das byang chub sems dpa'i spyod pa mdzad pa na dge ba'i rtsa ba gang dag bsgrubs pa de'i rgyu can sangs rgyas 'di nyid yin na/de ji ltar shes rab kyi pha rol tu phyin pa la sbyor ba'i rgyu can du bstan zhe na/ de'i phyir 'jam dpal ngas sngon byang chub sems dpa'i spyad pa spyod pa na zhes bya ba la sogs pa gsungs te/ de dag kyang shes rab kyi pha rol tu phyin pa la sbyor ba kho na yin no zhes bya ba bsdus pa'i don yin no//de la nyin re bzhin gzhan dag 'chad pa la yid dam du mnyan par bya/ mnyan nas de kho na yin no zhes mos par bya/ dad pas glegs pa ma yi ger bri bar bya/ kha ton bton pas gzung bar bya/ glegs bam la gnas pa tshig tu brjod pas bklag par bya/gzhan las man ngag mnos pas lung ma nod par bya/ kha ton lobs pa rnams yang nas yang du 'don pas kha ton du bya/ tshig tu gdon par bya ba ni grags pas sgrogs zhes bya ba'i tha tshig go/ /kun chub par bya ba ni tshig dang don bye brag tu 'chad pa'i phyir ro//tshul bzhin du yid la bya ba ni rigs pas bsams pa las byung ba'i shes rab kyis de'i don dpyod par byed pa'o/ /bsgom par bya ba ni bsgoms pa las byung ba'i shes rab kyis rnam par rtog pa thams cad bsal nas/ de'i don khong du chud par byed pa'i phyir ro/ /nas zhes bya ba'i tshig gis rin po che'i gzhal med khang nor bu rin po che'i rgyu las byas pa'i khang bzangs la sogs pa gzung ngo //ba dan dang rnam par rgyal ba'i ba dan ni rgyal mtshan gyi bye brag yin no/ /ci nus zhes bya ba 'di'i rnam par dbye ba ni ci phod du'o zhes bya ba yin no/ /yang na ci nus zhes bya ba ni mthu ci yod pas mnyan par bya ba la sogs pa la sbyor ba'o//ci phod du byas pa ni me tog la sogs pas mchod par bya'o/ /rim gror bya'o zhes tshig 'og mas rnam par dbye ba yin no/ /yang na rim gro bya ba ni thal mo sbyar ba dang / bskor ba dang / bya ba byed pa la sogs pas so//de dag thams cad kyis ni chos spyod rnam pa bcu bstan to/ /nyan thos dang rang sangs rgyas kyis thams cad las 'das pas sangs rgyas nyid thob pa ma yin nam/ de ci'i phyir shes rab kyi pha rol tu phyin pa la sbyor bas zhes bshad ce na/ de'i phyir nyan thos dang rang sangs rgyas thams cad kyis las 'da' bar 'dod pa'i zhes bya ba la sogs pa gsungs te /nyan thos la sogs pa'i sa yang 'di nyid la brten nas 'da' ba yin no zhes bya ba'i tha tshig go/ /phyir mi ldog pa'i sa las 'das te sangs rgyas nyid thob pa ma yin nam zhe na de'i phyir 'jam dpal ji ltar phyir mi ldog pa'i sa la 'jug par 'gyur ba zhes bya ba la sogs pa gsungs te/phyir mi ldog pa'i sa ni mi g.yo ba'o/ /de la 'jug par 'gyur ba ni der 'gro ba'o/ /der ji ltar 'gyur ba de lta bu nyan par 'dod pa zhes bya ba ni mtshon pa ste/bsam par 'dod pa dang / bsgom par 'dod pa dag kyang rig par bya'o/ /'di snyam du chos thams cad skye ba med par mnyam pas mos bas sangs rgyas thob par 'gyur ro snyam pa'i phyir/ 'jam dpal chos gang yang rung ste de dag thams cad ma skyes par mnyam pa nyid du zhes bya ba la sogs pa gsungs so//dgongs pa ni 'di yin te/ chos thams cad ma skyes par mnyam pa 'di la rnam par rtog pa thams cad sel bas mnyam pa de lta bu ni gzhan yod pa ma yin no zhes bya ba yin no/ /gzhan dag rnam par rtog pa sangs rgyas kyi chos thams cad mngon par rdzogs par byang chub par 'dod pa de nyid sangs rgyas nyid thob pa 'di'i rgyu'i gtso bo yin no zhe na/de'i phyir 'jam dpal sangs rgyas kyi chos thams cad ces bya ba la sogs pa gsungs te/ sangs rgyas kyi chos thams cad rtogs par 'dod pa yang 'di nyid la sbyor bas shin tu rnam par dag par 'gyur ro zhes bya ba'i tha tshig go//gzhan dag ni bcom ldan 'das kyis chos cung zad ma mkhyen na zhes de lta bu'i zab mo bstan pa 'di la mos pa'i rgyu mtshan gyi gtso bo yin no snyam pa de la/ 'jam dpal chos thams cad de bzhin gshegs pas mngon par rdzogs par sangs ma rgyas so zhes bya ba la sogs pa gsungs so//de ci'i phyir zhe na zhes bya ba ni thams cad rigs pa yin na ji ltar mngon par rdzogs par sangs ma rgyas zhes bsams pa la/ gang mngon par rdzogs par 'tshang rgya bar byed pa 'am zhes bya ba la sogs pa gsungs te/ don bshad zin to//de bas na de ltar don gyi tshul 'di la mos par 'dod pa'i zhes bya ba la sogs pa ni bstan ma thag pa'i mjug sdud pa yin no/ /don gyi tshul ni don gyi rnam pa'o/ /'di nyid la sbyor bas 'di 'dra ba'i mos pa 'di 'byung bar 'gyur ro zhes bya ba'i tha tshig go/ /gzhan dag ni byang chub dang chos thams cad gnyis su med cing mnyam par de ltar mos pa'i mngon sum gyi rgyu mtshan yin no snyam pa de la/gang byang chub ma yin pa'i chos de gang yang med do zhes bya ba la sogs pa gsungs so/ /gzhan dag na re chos thams cad la rnam par mi rtog pa nyid byang chub kyi rgyu'i gtso bo yin no zhe na/de'i phyir chos thams cad la rnam par mi rtog par 'dod pa'i zhes bya ba la sogs pa gsungs so/ /de ci'i phyir zhe na zhes bya ba ni mdo sde gzhan chos thams cad rnam par mi rtog pa ston par byed pa gang yin ba mtha' dag pa yod bzhin du shes rab kyi pha rol tu phyin pa 'di nyid la mnyan par bya bar gsungs pa 'di las lhag pa cig yod ces bya ba'i tha tshig go//lan du shes rab kyi pha rol tu phyin pa ni rnam par rtog pa'am rnam par mi rtog pa go rims bzhin du chos gang yang yongs su grub par rnam par 'jog cing skyed ba'am/ ston pa ma yin pa'i phyir ro zhes bya ba yin te/ rnam par rtog pa skyed par byed pa'i rgyu ma yin te/de'i yul yin pa'i khungs med do zhes bya ba'i tha tshig go/ /'di skad ston de mdo sde gzhan las gdul bya'i bye brag la ltos nas dmigs par ston pa yod pa yang yin no zhes dgongs pa'o/ /'dir ni ji ltar yang yod pa ma yin no zhes bya ba yin no/ / kha cig ni chos thams cad ni kun nas nyon mongs pa can ma yin te/ rang bzhin gyis 'od gsal ba'i phyir ro/ /rnam par byang ba yang ma yin te/ kun nas nyon mongs pa glo bur ba yin pa'i phyir ro zhes de ltar 'jug par 'dod pa dang myur du byang chub mngon par rtogs par 'dod pa de la chos thams cad kun nas nyon mongs pa ma yin zhes bya ba la sogs pa gsungs so//gzhan dag ni dus gsum du sgro 'dogs pa ring du spangs pas myur du byang chub pa yin no snyam pa la/ de'i phyir chos thams cad 'das pa ma yin/ ma 'ongs pa ma yin zhes bya ba la sogs pa gsungs te/ 'di yang 'di la brten pa kho nas sgro 'dogs pa myur du zad par 'gyur ro zhes bya ba'i tha tshig go/ /de ci'i phyir zhe na zhes bya ba ni rgol ba ste/ thos pa la sogs pa'i ngo bo nyid ni 'das pa dang / ma 'ongs pa la sogs par bstan pa ma yin nam/ ci'i phyir chos dus gsum du 'jug pa ma yin zhes rgol ba pos bsam pa la/'jam dpal skye ba med pa ni 'das pa ma yin zhes bya ba la sogs pa gsungs te/ skye ba med pa ni dngos po med pa yin la/ dngos bo med pa la 'das pa dang / ma 'ongs pa dang / de ltar byung ba yang dag par lta ga la yod ces bya ba ni mdor bsdus pa yin no//de ci'i phyir zhe na zhes bya ba ni ci'i phyir de skad du ston / skye ba med pa la 'das pa la sogs pa'i dbye ba med/ chos rnams la go 'di ci ste dbye ba med ces bya ba ni rgol ba po'i bsam pa yin no/ /de la 'jam dpal chos thams cad ni skye ba med pa la ston pa'i phyir ro zhes bya ba gsungs te/skye ba med pa'i ngo bo yin no zhes bya ba'i bar du yin no/ /'dir ni kun brtags pa'i chos la dgongs pa'o/ /de bas na de lta bu'i chos thams cad la the tshom med par zhes bya ba la sogs pa ni bstan ma thag pa'i mjug bsdu ba yin no/ /gzhan dag smra ba skye ba'i dngos po rnams rtag pa ma yin par 'dod du zin kyang don dam par ni mi rung ba kho na yin te/'di ltar re zhig phyi rol gyi cha shas can la sogs pa'i skye ba ni gong du bstan pa'i tshul gyis ma skyes pa kho na min pas yod par rung ba ma yin no/ /nyams su myong ba tsam lhag ma lus pa de yang yod pa don dam pa yin par ni bsgrub par dka' ba kho na yin te/'di ltar ri mo bkram pa la sogs pa la shes pa skye ba ni snang ba rnam pa du mar skyed pa yin no/ /rnam pa de dag kyang de'i bdag nyid kho na yin gyi gzhan du gyur pa nyid yin na ni nyams su myong bar mi rigs pa'i phyir ro/ /de bas na de rnam pa du ma las rnam par ma log pa yin na gcig pa nyid yin par ji ltar rigs pa yin/gcig pa nyid dang du ma nyid dag ni phan tshun rnam par bcad de gnas pa'i mtshan nyid yin pas lhan cig tu gnas bar mi srid pa'i phyir ro/ /'on te yang 'di snyam du nyams su myong ba'i rnam pa de rnams ni yang dag pa ma yin te/'khrul pa'i dbang gis de ltar sna tshogs su gnyis su med pa'i shes pa'i bdag nyid la snang ngo zhe na/ 'o na snang zhes bya ba 'di ci yin te/ nyams su myong ba'i bdag nyid ma gtogs par gzhan snang ba'i sgra'i don rtogs par byar med pa ma yin nam/ 'di ltar snang ba zhes bya ba de ni nyams su myong ba zhes bya ba'i don 'di yin no//mig ser la sogs pas mig nyams pa rnams yod pa ma yin yang ser po la sogs par ji ltar snang zhe na/ de la yang gal te phyi rol gyi ngo bo nyid du yang yod pa ma yin la/ shes pa'i bdag nyid du yang yod pa ma yin na de dag ji ltar snang zhes de la yang mthun par rgal ba 'di ma yin nam/gal te ka ba la sogs pa'i rnam pa gcig gi shes pa de gcig yin no zhe na ma yin te/ de la yang tshu rol dang pha rol dang dbus kyi cha la sogs pa dbye bas sna tshogs su snang ba'i phyir ro/ /de bas na blo yang gcig tu 'thad pa ma yin pas dngos po thams cad ma brtags na dga' ba'i ngo bo nyid tha snyad kyi tshul la 'jug pa yin te/'di ltar ji lta ji ltar yongs su brtags pa de lta de ltar brtag mi bzod pa yin pa'i phyir ro/ /'di kha cig smra ba sngon po dang ser po la sogs pa ni rnam pa thams cad du med pa ma yin te/nyams bde ba la sogs pa bzhin du gsal bar nyams su myong ba'i phyir ro/ /'on kyang shes pa gcig la 'dzin pa'i char 'dod pa dang / cha gnyis pa phyir rgol gyi ngo bor gyur pa de ni yod pa ma yin te/ ji ltar nang du bde ba la sogs pa rang rig pa'i ngo bo yin gyi/gzhan gzung bar char gyur par yod pa ma yin pa bzhin no/ /de bzhin du dkar po la sogs pa yang gzung ba dang 'dzin pa'i rnam par brtags pa dang bral ba yin no/ /de skad du slob dpon d+harma kIrtis kyang / sngo la sogs pa'i ngo bo de'i/ /ngo bo nyid ni nyams myong yin/ / rang gi ngo bo nyams myong yang / /sngo la sogs pa myong zhes sgrogs/ /shes las tha dad ma yin na/ /don gzhan yod par ji ltar 'gyur/ /spyi nyid yin na'ang don nyid na/ /shes pa'i ngo bor thal bar 'gyur/ /zhes brjod do zhe na/ de ltar 'dod pa'i phyir nyes pa med do/ /de bzhin du 'phags pa dgongs pa nges par 'grel pa'i mdo las kyang ting nge 'dzin gyi spyod yul gzugs brnyan ni shes pa las tha dad pa ma yin pa kho nar gsungs so//de bas na bde ba la sogs pa bzhin du sngon po la sogs pa yang rung nyams su myong ba nyid rtogs pa'i ngo bo yin no/ /'o na rnam par shes pa du ma cig car yod pa rnyed par 'gyur ro zhe na/'dod pa'i phyir nyes pa med do/ /'o na rnam pa gcig yin no zhes ji skad du bstan zhe na/ 'di ltar gzhan du cha rnam par dbye ba byas na shes pa gzhan nyams su myong ba yod pa ma yin no/ /de la shes pa gzhan gcig tu de yod do zhes brjod par nus pa yang ma yin te/shes pas nyams su ma myong na yod par mi rigs pa'i phyir dang / rnam par shes pa ni nyams su myong ba yin pa'i phyir ro/ /phyi rol pa la yang rim pa 'di nyid ma yin nam/ de dag ni nyams su myong ba ma yin yang yongs su khas len pa'i phyir ro//'o na gal te bde ba la sogs pa bzhin du sngon po la sogs pa yang shes pa'i ngo bo yin na de ci'i phyir phyi rol du snang zhe na/ 'di ni thog ma med pa'i dus can 'khrul pa'i sa bon gyi dbang gis yin no/ /de la 'dir gzhan dag na re rnam par smin pa'i rnam par shes pa yang lus dang snod kyi 'jig rten la sogs par snang ba'i phyir sna tshogs pa kho na yin no zhe na/de yang gcig pa nyid du mi 'grub pa kho na yin te / ri mo bkra ba la sogs pa dran pa'i shes pa yang rnam pa du ma snang ba nyams su myong ba nyid yin pas de yang du ma nyid du 'gyur ro//de lta yin dang / /de ni rigs dag mthun pa yi/ /rnam par shes pa nges pa yin/ /rnam par rtog pa rim gyis 'byung / /'di ltar yang dag mngon pa yin/ /zhes rnam 'grel byed pa'i tshig dag 'gal ba yin no/ /gzhan dag na re rnam pa thams cad ni du ma sna tshogs yin gyi/sems can thams cad kyi rnam par shes pa'i rgyud ni gcig yin no zhes bya ba'i tshig de ni don gzhan yin te/ gcig gi sgra ni 'ba' zhig ces bya ba'i rnam grangs te/ gtso bo gcig dang gzhan dag gcig /gcig po 'ba' zhig 'dod pa yin//zhes brjod pa'i phyir ro/ /des na 'di skad bstan te/ de dag gi rnam par shes pa'i rgyun ni gcig po 'ba' zhig yin gyi/ de la bdag dang / bdag gi 'am/ gzung ba dang 'dzin pa ni yod pa ma yin no zhes bya ba yin no/ /kha cig las sems gnyis cig car du skye ba de ni gnas med do zhes 'byung ba de yang mi mthun pa'i phyogs kyi sems dang byams pa la sogs pa'i sems dang mtshungs par ldan pa'i dbang du byas te gsungs pa yin te/de gnyis lhan cig mi gnas pa'i mtshan nyid du mi 'gal ba'i phyir ro/ /rnam 'grel byed pas de ni rigs dag mthun pa'i zhes bya ba la sogs pa khungs sngar bstan pa de'i dgongs pa yang 'di nyid yin par mngon no//'di yang slob dpon kha cig 'chad pa dag des smras pa yin no/ /phyi rol du gnas pa nyid la rnam pa'i dngos po 'di dag bstan pa yin gyi/ rnam par shes pa la ni ma yin pas rnam par shes pa ni rnam pa med par ston to//phyi'i don gyis 'di la rnam pa skyed pa yang ma yin no/ /de lta bu yin pa la dgongs nas 'phags pa rnam par snang mdzad mngon par byang chub pa las kyang / gsang ba'i bdag po sems ni sngon po ma yin/ ser po ma yin zhes bya ba la sogs pa gsungs so//gzhan yang rnam pa sna tshogs kyis stong pa'i rnam par shes pa yang yod pa kho na yin te/ cha shas med pa'i rdul phra rab la sogs par snang ba ni yang dag pa'i don bsgoms pa las byung ba yin no/ /'di ltar yang dag yang dag min/ /gang gang de la shin tu bsgoms//bsgoms pa yongs su grub pa na/ 'bras bu mi rtog de blo gsal/ /zhes bya ba yin no/ /rgyas par dpyad pa yod pas re zhig gzhag go/ /de lta bu'i chos thams cad la the tshom med par rtogs par 'dod pa zhes bya ba ni sgro 'dogs pa thams cad dang nges par bral ba thob par 'dod pa zhes bya ba'i tha tshig go//gzhan dag sems pa chos kyi 'khor lo rnam pa bcu gnyis lan gsum du bskor ba'i thabs la gnas pas rgyal ba'i go 'phang shin tu myur bar thob par 'gyur gyi/ shes rab kyi pha rol tu phyin pa la brtson pas ni ma yin no zhe na/ de'i phyir 'jam dpal lan gsum du bzlas te/ji ltar rnam pa bcu gnyis kyi chos kyi 'khor lo bskor ba de nyan par 'dod pa dang zhes bya ba la sogs pa gsungs te/ ji ltar zhes bya ba ni thabs gang gis so/ /gang du rnam pa bcu gnyis lan gsum du bskor ba zhes sbyar ro/ /de la 'di ni lan gsum du bskor ba yin te/'di lta ste/ 'di ni sdug bsngal 'phags pa'i bden pa'o/ /de mngon par shes pas yongs su shes par bya'o/ /yongs su shes so zhes bya ba 'di ni sdug bsngal 'gog par 'gro ba'i lam 'phags pa'i bden pa'o//de ni mngon par shes pas bsgom par bya'o/ /bdag gis bsgoms so zhes bya ba'o/ /dge slong dag sngon ma thos pa'i chos la tshul bzhin yid la byed ba ni mig skyes pa dang shes pa dang / rig pa dang / blo skyes te/ bya ba byed pa'i tshig ni bden pa re re'i gsum po la yang sbyar bar bya'o//de bas na 'phags pa'i bden pa bzhi re re la yang lan gsum du bzlas pa'i phyir lan gsum du bzlas pa yin no/ /de ltar bzlas pa de thams cad bsdoms na rnam pa bcu gnyis su 'gyur bas de'i phyir rnam pa bcu gnyis kyi chos kyi 'khor lo zhes bya'o//de'i mdo de yang dang por yul bA rA Na sIr bshad do/ /chos rnams kyi 'khor lo ni chos kyi 'khor lo ste/ 'khor lo dang 'dra bas 'khor lo yin no/ /dper na 'khor los sgyur ba'i rgyal po ni 'khor lo rin po che'i rjes su 'brang ba dpung gi tshogs thams cad kyang rjes su 'brang zhing tha ma nas 'gro'o//de bzhin du khams gsum gyi bdag po chos kyi dbang phyug dam pa bcom ldan 'das de bzhin gshegs pas kyang mdo sde de dang por gsungs pa'i rjes su bshad pa'i chos kyi sku thams cad 'chad par mdzad pa yin no/ /de nyan par 'dod pa zhes bya ba ni chos kyi 'khor lo bskor pa thabs su gyur pa can gnyis su med pa'i ye shes la'o//de rtogs par 'dod pa zhes bya ba ni bsams pa las byung ba'i shes rab kyis so/ /de nas yul de la mos par 'dod pa ni bsams pa las byung ba'i shes pa'i mjug thogs su byung ba 'di ni de kho na yin no zhes mos pa'o//de la 'jug par 'dod pa ni bsgoms pa las byung ba'i shes rab kyis so/ /shes rab kyi pha rol tu phyin pa 'di nyid mnyan par bya ste/ 'di ltar chos kyi 'khor lo bskor ba'i thabs ni gang zag dang chos la bdag med pa goms par byas pa ma gtogs pa gzhan yod pa ma yin la/de yang 'dir bstan pa yin no/ /gzhan dag sems pa gang zhig sems can thams cad la byams pas khyab par byed cing sems can gyi 'du shes la yang mi gnas pa dang / nga rgyal dang bral ba'i phyir 'jig rten thams cad dang rtsod pa med pa'i mchog yin pa dang / 'jig rten gyi bsam pa la mngon par ma zhen pa'i phyir 'jig rten gyi spros pa mi dmigs pa de 'dra ba des myur du sangs rgyas nyid thob par 'gyur gyi/ shes rab kyi pha rol tu phyin pa la brtson pas ni ma yin no zhe na/ de'i phyir sems can thams cad la byams pas khyab par bya bar yang 'dod pa la zhes bya ba la sogs pa gsungs te/shes rab kyi pha rol tu phyin pa la brtson pa med par de 'dra ba'i spyod pa mi 'grub bo zhes bya ba'i tha tshig go/ /kha cig sems pa chos thams cad thog ma nas zhi ba dang / rang bzhin gyis yongs su mya ngan las 'das pa dang / skye ba med pa la sogs pa rtogs par 'dod pa ni myur du bla na med pa yang dag par rdzogs pa'i byang chub thob par 'gyur ro snyam pa la/de'i phyir chos thams cad skye ba med pa'i bar du rtogs par 'dod pa'i zhes bya ba la sogs pa gsungs so/ /bar du zhes bya ba'i tshig gis thog ma nas zhi ba nyid la sogs pa gzung ngo //chos thams cad skye ba med pa ni mnyam pa nyid do/ /mos pa ni sngar bstan zin to/ /de ni chos thams cad skye ba med pa la 'dod pa yin pas zlos pa ma yin no/ /'di nyid la mi dmigs pa'i tshul gyis bslab par bya'o zhes bya ba la 'di nyid la bslab par bya ba ni nyan pa dang klog pa la sogs pa'i rim gyis so//'dod pa 'di yang shes rab kyi pha rol tu phyin pa la brtson pa kho nas 'phel bar 'gyur gyi/ gzhan dag la ni skye ba med pa la sogs pa gang yang bshad pa yod pa ma yin no/ /gal te de ltar bslab par bya'o zhes brjod pa dang / byed pa po gang dag las gang la slob pa de dag dmigs shing yod par bstan par 'gyur ro zhe na/de'i phyir mi dmigs pa'i tshul gyis zhes gsungs te/ byed pa po dang / las dang bya ba byed pa la mngon par ma zhen par bslab par bya'o zhes sbyar ro/ /'dis ni slob pa 'khor gsum yongs su dag par bstan te /'di yang seng ge lta bu'i tshul gyis skabs mnyan par bya ba la sogs pa'i tshig la yang sbyar ro/ /des na thams cad du 'khor gsum yongs su dag pa'i nyan pa la sogs pa bya bar man ngag phog pa yin no/ /de ltar rang la phan pa dang phan pa ma yin pa thob pa dang yongs su spang ba'i rgyu nyid bcom ldan 'das kyis bstan cing /bcom ldan 'das ma las yon tan bsgrags su zin kyang blo gros kyi go cha mi brtan zhing yon tan la mngon par zhen pa'i 'dam du bying ba de dag de las dbyung ba'i phyir/ bcom ldan 'das shes rab kyi pha rol tu phyin pa yon tan ma mchis pa nus pa ci yang ma mchis pa kun nas slong bar mi bgyid pa zhes bya ba la sogs pa gsungs te/yon tan ma mchis pa ni yon tan gang lags zhes 'ga' zhig gis bar du chod de 'byung ba dang sbyar ro/ /ji ltar yon tan med pa yin zhe na/ shes rab kyi pha rol tu phyin pa ni gang gis nus pa ci yang ma mchis pa'o//byed pa ci yang med pa nyid bsgrub pa'i phyir/ kun nas slong bar mi bgyid pa zhes bya ba nas/ bsam du ma mchis pa ma lags pa/ bgyid pa ma lags pa/ rnam par 'jig par bgyid pa ma lags pa/ dngos po ma mchis pa'i bar du lags na/bcom ldan 'das shes rab kyi pha rol tu phyin pa'i yon tan gang lags zhes bya ba'i bar du gsungs so/ /de la sbyin pa kun nas slong bar mi bgyid pa'o/ /ser sna rnam par 'jig par mi bgyid pa'o/ /chos gang yang mi len pa ni tshul khrims kyi mtshan nyid kyi chos gang yang skyed par mi byed pa'i tha tshig go//mi 'dor ba ni tshul khrims 'chal pa 'dor bar mi byed pa'o/ /g.yo ba ma mchis pa ni bzod pa bsgom pa'i tshe g.yo ba med pa'i phyir ro/ /byed pa ma mchis pa ni khro ba bsal ba'i ched du spyod pa med pa'i phyir ro/ / shes rab kyi pha rol tu phyin pa ni brtson 'grus kyi ngo bo nyid shes pa ma lags pa'o/ /ngo bo nyid mthong ba ma lags pa ni le lo'i chos gang yang sbyin par mi bgyid pa ni bsam gtan dang / ting nge 'dzin dang snyoms par 'jug pa'i mtshan nyid do/ /chos thams cad dang 'gal bar mi byed pa ni mi mthun pa'i phyogs su gyur pa rnam par g.yeng ba la sogs pa thams cad sel bar mi byed ces bya ba'i tha tshig go//thams cad kyi sgra ni brjod par 'dod pa bsdus pa'i tshig yin no/ /chos thams cad skyed par mi bgyid pa zhes yi ge kha cig las 'byung ba de'i don ni rnam par g.yeng ba la sogs pa'i chos thams cad chung par byed ces bya ba dang /shin tu ches chung bar bsgrubs pas rnam par gnon pa dang / rtsa ba nas 'byin pa de dag skyed par mi byed pa ni byed pa med ces bya ba'i tha tshig go/ /chos thams cad tha dad pa nyid du mi bgyid pa zhes bya ba ni mi mthun pa tha dad pas byed cing bya ba'am/tha dad pa nyid du byed pa ni tha dad par byed pa'o/ /de gang la spyod pa ma yin pa de ni tha dad pa nyid du byed pa med pa'o/ /chos thams cad la thos pa la sogs pa tha dad par bgyid pa ma lags pa ni thos pa las byung ba la sogs pa'i shes rab rnams rnam par dbye bar mi byed ces bya ba'i tha tshig go//ma bgyis pa ni mi mthun pa'i phyogs spong ba'i yul la byed pa med pa yin no/ /bzod mi bgyid pa zhes gal te 'byung na ni de'i tshe don gsal ba yin te/ mi bzod pa ni thabs su mi rung ba bsrung ba yin no/ /gang las mi pas pa zhes 'byung ba der bas pa ni byed pa la dgongs pa ste/sgra rnams ni brjod par 'dod pa cam gyi rjes su 'brang ba yin gyi don so sor nges pa med pa'i phyir te/ gang zhig la thabs la bas par byed par bya ba yod pa ma yin pa gang yin pa de ni mi bas pa'o/ /rnam par 'jig par mi bgyid pa ni de'i mi mthun pa'i phyogs lags pa'o//smon lam gyi pha rol tu phyin pa'i dbang du byas nas so so'i skye bo'i chos rnams dang / dgra bcom pa'i chos rnams dang / yi ge kha cig las byang chub sems dpa'i chos rnams dang zhes 'byung ba dang / sangs rgyas kyi chos rnams kyang sbyin bar bgyid pa ma lags pa zhes gsungs so//de la so so'i skye bo'i chos rnams ji ltar sbyin par mi byed ce na/ 'di ltar 'khor ba sgrub par mi bgyid pa zhes gsungs te/ de ltar gyur cig/ /lha gang yang rung bar gyur cig ces bya ba la sogs pa'i smon lam 'debs par mi byed pa'i phyir ro//dgra bcom pa'i chos rnams ji ltar sbyin par mi byed ce na/ mya ngan las 'das pa len par mi bgyid pa zhes gsungs te/ lhag ma med pa'am/ lhag ma dang bcas pa'i mya ngan las 'das pa len par mi byed pa ste/ 'di'i don ni de la sgrub par mi byed pa yin te/de la smos par mi byed pa'i phyir ro/ /ji ltar sangs rgyas dang byang chub sems dpa'i chos rnams sbyin par mi byed ce na/ gang zhig sangs rgyas kyi chos rnams sbyin par bgyid pa ma lags pa zhes gsungs te mi sbyor zhing de'i don smon lam mi 'debs pa'i phyir ro/ / sangs rgyas kyi chos rnams zhes bya ba ni nye bar mtshon pa yin no/ /smon lam mi 'debs pas rnam par 'jig par bgyid pa ma lags pa'o/ /bsam par bgyid pa ma lags pa ni bsam pa'i stobs mngon par sgrub pa ma yin pa'o/ /bsam du ma mchis pa ma lags pa de ni de'i mi mthun pa'i phyogs bsal ba'i phyir shin tu byed pa med pa ma yin pa'o//bgyid pa ma lags pa ni ye shes la'o/ /mi mthun pa'i phyogs dang ldan pa las 'jig par bgyid pa ma lags pa'o/ /de dag thams cad mi dmigs pa'i ngo bo la de nus pa yod pa ma yin pa'o/ / 'jig par bgyid ba ma lags pa nas dngos po ma mchis pa'i bar du ma lags pa'i bcom ldan 'das shes rab kyi pha rol tu phyin pa'i yon tan gang lags zhes gsungs pa la/ bar du zhes smos pas thog ma nas zhi ba dang rang bzhin gyis yongs su mya ngan las 'das pa nyid la sogs pa'i rnam pa rnams gzung ngo //glegs bam kha cig las 'jig par bgyid pa ma lags pa zhes bya ba de'i mjug thogs su tshig gzhan dag kyang 'byung ba ni chos thams cad skyed pa ma lags pa/ 'gog pa ma lags pa/ chad par bgyid pa ma lags pa/ rtag par bgyid pa ma lags pa/'ong bar bgyid pa ma lags pa/ 'gro bar bgyid pa ma lags pa/ rnam par 'byed par bgyid pa ma lags pa/ mi 'byed par bgyid pa ma lags pa/ gnyis su bgyid pa ma lags pa/ mi gnyis par bgyid pa lags pa zhes 'byung ba de dag gi don ni sngar pha rol tu phyin pa'i rnam pa'i skabs su bstan zin mod kyi/de ni phyir bstan pa yin no/ /yang dag par spong ba dang / dbang po dang / stobs dang / byang chub kyi yan lag la sogs pa'i chos thams cad skyed pa ma lags pa/ 'gog pa ma lags pa/ chad par bgyid pa ma lags pa ni mi mthun pa'i phyogs rnams la yin te/'gog pa ni rnam par gnon pa'o/ /chad pa ni de rtsa ba nas drungs 'byin pa'o/ /'dir dgongs pa ni snga ma bzhin no/ /rtag par bgyid pa ma lags pa ni yang dag par spong ba la sogs pa'i yon tan rnams nyid la yin te/ de dag kyang rang gi ngang gis 'gro ba ji srid gnas par gnas pa'i phyir ro//rtag par dus thams cad du 'dug pa'i ngo bo la byed pa med do zhes sbyar ro/ /'ong bar bgyid pa ma lags pa ni ma 'ongs pa'i dus na byung ste/ da ltar byung ba'i dus su 'ong ba ma yin pa ste 'pho bar smra ba dag ji skad brjod pa lta bu'o//'gro bar bgyid pa ma lags pa ni da ltar las byung ba ste 'das par 'jug pa ma yin pa'o/ /de dag gis ni 'di'i rang gi ngo bo sngon dang / phyi ma'i mtha' stong pa yin pa dang / 'bras bu'i dus mi gnas pa yin na de ji ltar ci zhig byed par 'gyur zhes bya ba yin no//de bas na bar med pa tsam la byed do zhes bya ba 'di ni brtags pa kho na yin par rnam par 'jog cing stong pa dang / byed pa med pa nyid sgrub par byed pa ni rnam par 'byed par bgyid pa ma lags pa/ mi 'byed par bgyid pa ma lags pa zhes pa yin te/ chos thams cad rang bzhin gyis rnam par dag pa yin pa'i phyir ro//gnyis su bgyid pa ma lags pa mi gnyis par bgyid pa ma lags pa ni gnyis las dben pa'i dus thams cad du gnas pa'i phyir de dag gis yon tan la sgro 'dogs pa'i mtha' bsal ba yin no/ /yon tan de dag la skur ba 'debs pa'i mtha'i 'dam du gzhan dag 'bying ba de bas na de yang rtsa ba nas 'don pa'i phyir ro//'di nyid shes rab kyi pha rol tu phyin pa 'di'i yon tan du rig par bya'o zhes gsungs so/ /gang zhe na 'jam dpal g.yo ba med pa nas dngos po med pa'i bar zhes bya ba gsungs so/ /'di skad bstan te/ gang gis de dag ni brtags pa'i dngos po thams cad med pa'i ngo bo yin pa dang / yon tan dang skyon thams cad bskyed pa dang spang ba la g.yo ba med pa de dag nyid rang gi ngang gis yon tan thams cad rgyas pa yin pa'i phyir dang / skyon gyi dra ba mtha' dag shin tu ring bar gyur pa'i phyir yon tan dang ldan pa zhes bya'o//de bas na de lta bur gnas pa'i shes rab kyi pha rol tu phyin pa la brtson pa ni sangs rgyas nyid kyi mngon sum gyi rgyu yin no/ /'o na gang dag byang chub don du mi gnyer zhing 'dod chen po ma yin pa'i byang chub sems dpa' dag ting nge 'dzin nyi tshe gang la gnas nas sangs rgyas bcom ldan 'das thams cad dang /sangs rgyas kyi zhing dang bcas te blta ba dang / de dag gi mtshan brjod pa yang shes pa dang / mchod pa bla na med pa yang byed pa dang / de dag gis chos bstan pa yang khong du chud pa dang / mchog de dag tsam don du gnyer ba de dag gis 'di la bslab par bya'o zhe na/de'i phyir 'jam dpal yang byang chub sems dpa' sems dpa' chen po byang chub sems dpa'i ting nge 'dzin la slob par 'dod pa zhes bya ba la sogs pa gsungs so// //'phags pa shes rab kyi pha rol tu phyin pa bdun brgya pa rgya cher bshad pa bam po drug pa'o //byang chub sems dpa'i ting nge 'dzin la slob par 'dod pa zhes bya ba ni de'i thabs yongs su shes pa tshol ba dang / de'i thabs yongs su shes pa bsgrub pas so/ /'di la mngon par brtson pa med par 'grub pa ma yin no zhes bya ba ni bsdus pa'i don yin no//mi bslab pa'i tshul du zhes bya ba ni snga ma bzhin du 'khor gsum yongs su dag pas so/ /de bas na mi dmigs par sbyor ba kho na 'dir thabs yin te/ rang yang mi dmigs pa'i ngo bo yin pa'i phyir ro/ /'o na gal te rang yang mi dmigs pa'i ngo bo yin na de ci'i phyir shes rab kyi pha rol tu phyin pa zhes bya/'di ltar dris pa'i yul ni pha rol tu phyin pa yin par 'dis mthong zhing dmigs pa la de skad ces bya'o/ /de'i phyir bcom ldan 'das ci'i slad du 'di la zhes bya ba la sogs pa gsol to/ /lan ni 'jam dpal ma skyes ma 'gags pa'i phyir zhes bya ba yin no//'di nyid rnam par 'byed pa ni 'di lta ste/ gzod ma nas zhi ba nyid kyi phyir dang zhes bya ba yin te/ gnas pa dang 'jig pa de gnyis zhi zhing bral ba gang gi yin pa de ni gzod ma nas zhi ba'o/ /de'i dngos po ni de nyid do/ /de bas na gzod ma nas zhi ba nyid kyi phyir 'jam dpal ma skyes pa'o//mi 'byung ba med pa nyid kyi phyir zhes bya ba ni gang gi phyir rgyun gyis skye zhing 'byung ba dang bral bas mi 'byung ba ste rgyun chad pa'o/ /de gang la yod pa ma yin pa de ni mi 'byung ba med pa'o/ /de'i dngos po ni mi 'byung ba med pa nyid de 'khor ba ji srid du rtsol ba med par 'jig rten la phan par bya ba'i phyir bzhugs zhes bya ba'i tha tshig go//de bas na mi 'byung ba med pa nyid kyi phyir ma 'gags pa yin no/ /gzod ma nas zhi ba dang mi 'byung ba med pa gnyis go rims bsnor nas rnam par 'byed pa ni bya ba med pa nyid kyi phyir dang /dngos po med pa nyid kyi bar gyi phyir te zhes bya ba yin no/ /'di la bdag gi ched dang gzhan gyi ched du rtsol ba bya ba med pas bya ba med pa'o/ /de'i dngos po ni nyid do/ /de bas na mi 'byung ba med pa yin no/ /'di la kun nas brtags pa'i dngos po thams cad yod pa ma yin pas dngos po med pa'o//de'i dngos po ni nyid do/ /de bas na gzod ma nas zhi ba yin no/ /de ltar na gang dngos po med pa zhes bya ba de ni kun brtags pa'i dngos po thams cad kyis rab tu phye ba yin pa'i phyir ro/ /de shes rab kyi pha rol tu phyin pa yin no zhes bya ba 'di ni mtshon pa tsam du zad kyi/mi 'byung ba med pa gang yin pa la yang blta bar bya'o/ /mjug sdud pa ni de bas na 'jam dpal gtan tshigs de'i phyir shes rab kyi pha rol tu phyin pa yin no zhes bshad do zhes bya ba khong nas dbyung ngo / /'di skad bstan te/ shes rab kyi pha rol tu phyin pa mchog ni sgro 'dogs pa thams cad dang bral ba yid bzhin gyi nor bu mi gnas pa'i mya ngan las 'das pa thob pa'o//pha rol de dang 'dra bar phyin pa dang / son pa dang thob pa ni shes rab kyi pha rol tu phyin pa zhes bya'o/ /yul la mi 'dzin pa'i phyir de skad du bstan pa sus rtogs she na/ de'i phyir gtso bor na/ de ni byang chub sems dpa' sems dpa' chen po rnams kyi spyod yul te zhes gsungs te/so so bdag nyid kyis rig pa'i yul zhes bya ba'i tha tshig go/ /ci de yul yin par blta bar bya ba'am zhe na ma yin na zhes bya ba'i phyir/ gang chos thams cad spyod yul ma yin pa zhes gsungs te/yul thams cad spyod yul du gyur pa ma yin no zhes bya ba'i bar du yin te/ rang rig pa yang brtags pa yin no zhes dgongs pa'o/ /de bas na don 'di la spyod cing rang gis nyams su myong na don de lta bu la spyod pa'i byang chub sems dpa' ni spyod yul la zhugs pa yin no zhes ston pa ni spyod yul 'di la spyod na byang chub sems dpa' zhes bya ba la sogs pa gsungs so//gsungs pa'i don mjug sdud pa ni/ 'di lta ste/ spyod yul ma yin pa theg pa thams cad pa 'di nyid spyod yul yin no zhes bya ba yin te 'di lta ste/ spyod yul ma yin pa zhes bya ba de yang dag pa thams cad pa 'di yin te/theg pa thams cad la byung ba'am de dgongs pa'o/ /'di ltar 'dir bdag med pa gnyi ga yang bstan pa yin no/ /de ci'i phyir zhe na zhes bya ba ni spyod yul yin na ji ltar spyod yul ma yin pa nyid yin te/ gcig la 'gal la zhes bya ba'i tha tshig go//so so la ltog nas tha dad pa'i phyir 'gal ba med do zhes bya ba'i phyir/ spyod yul 'di ni ma byas pa ste zhes gsungs te/ byas pa dang / bcos pa dang / brtags pa zhes bya ba'i bar du yin la/ byas pa med pa ni ma byas pa ste/ ji ltar bya bzhin du gnas zhes bya ba'i tha tshig go//de'i phyir spyod yul ma yin pa zhes bya'o/ /zhar la 'phros pa rdzogs so// //'di brjod par bya ste/ thabs gang gis sangs rgyas dang byang chub bsam gyis mi khyab pa 'di ring po mi thogs par thob par 'gyur zhes bya ba de'i phyir/bcom ldan 'das gang la spyod na zhes bya ba la sogs pa dris so/ /mchod rten la phyag 'tshal ba la sogs pas kyang byang chub thob par 'gyur mod kyi/ de ni yun ring pos so zhes bya ba'i phyir/ myur du zhes gsungs so/ /'jam dpal shes rab kyi pha rol tu phyin pa la spyad na zhes bya ba la sogs pa ni lan ldon pa yin te/shes rab kyi pha rol tu phyin pa la brtson pa ni re zhig gtso bor gyur pa thabs gcig po yin te/ ji skad du sngar bstan pa'i don yin no/ /de'i sngon du song ba'i thabs gzhan yang yod pa de bstan pa'i phyir/ 'jam dpal bkod pa gcig pa zhes bya ba'i ting nge 'dzin yod de zhes bya ba la sogs pa gsungs so//thabs gang gis 'di 'thob par 'gyur/ rgyu mtshan nyid gang gis 'di'i ming de skad ces bya ba'i bsam pa ston pa ni/ bcom ldan 'das bkod pa gcig pa'i ting nge 'dzin la byang chub sems dpa' sems dpa' chen pos ji ltar 'jug par bgyi zhes bya ba la sogs pa gsungs te/rgyu tha dad pa las 'bras bu tha dad pa'i ting nge 'dzin phye ba yin gyi/ bdag nyid tha dad pa'i phyir ni ma yin pas gnyi ga dris te/ 'di ltar sangs rgyas dang byang chub sems dpa' thams cad kyi ting nge 'dzin ni de bzhin nyid la dmigs pa yin no//de la brjod par bya ba nyung ba'i phyir dris pa phyi ma yin du zin kyang / re zhig don ston par byed pa ni 'jam dpal bkod pa gcig pa zhes bya ba 'di ni skye ba med pa'i tshig bla dgas sa zhes bya ba yin te skye ba med pa ni brtags pa'i chos kyis stong pa yin par ni lan du ma bstan to//de yang gcig pa yin te/ dngos po thams cad la khyad par med pa'i phyir ro/ /de lhag par 'dis 'god par byed rtogs par byed/ 'dzin par byed pas bkod pa gcig pa zhes bya'o/ /yang na gcig la lhag par 'dzin cing bkod pa ni bkod pa gcig pa yin no//skye ba med pa spyod yul gyi tshig bla dgas yin no zhes brjod par bya ba yin pa las/ skye ba med pa'i tshig bla dgas so zhes gsungs pa ni skye ba med pa'i las ma gtogs par de'i spyod yul gang yin pa de med do zhes bstan pa'i phyir ro/ /gzhan dag ni 'di skad du/bcom ldan 'das kyis bka' stsal pa/ 'jam dpal bkod pa gcig pa zhes bya ba 'di ni chos kyi dbyings la bkod pa yin no zhes 'don to/ /'di skad 'chad de/ mdo la sogs pa'i chos rnams de bzhin gshegs pa'i mtshan nyid kyi yi ge gcig sa bon mngon du byas pa'i sgo nas rnam pa sna tshogs par mthong bar byed/rtogs par byed/ snang bar 'gyur bar byed pa'i phyir 'di bkod pa gcig pa yin no/ /yang na chos kyi dbyings stong pa nyid la ting nge 'dzin gang gis rtogs par byed/ /mngon sum du byed pa yin no//de yang gcig pa yin te/ stong pa nyid la tha dad pa med pa'i phyir ro/ /de bas na bkod pa gcig pa zhes bya ba'i grangs su 'gro'o/ /yang na dad pa la sogs pa'i chos rnams kyi dbyings sa bon thog ma med pa'i dus can ting nge 'dzin 'di la bkod/ 'phel rgyas par gyur pas des na 'di ni chos kyi dbyings bkod pa gcig pa zhes bya ba'i grangs su 'gro'o//ming gi don bshad zin nas/ de skyed pa'i thabs ston pa ni bkod pa gcig pa'i ting nge 'dzin la 'jug par 'dod pa'i zhes bya ba la sogs pa yin te/ sgom par byed pas thog ma nyid du shes rab kyi pha rol tu phyin pa yongs su dri ba bya dgos pa ni bkod pa gcig pa'i don rtogs pa ni de thos pa la rag lus pa'i phyir ro//de'i 'og tu bkod pa gcig pa'i ting nge 'dzin la 'jug par 'gyur ro zhes bya ba ni bsam pa dang bsgom pa'i rim gyis so/ /gzhan dag ni 'di skad du bkod pa gcig pa'i ting nge 'dzin la 'jug par 'dod pas thog ma nyid du shes rab kyi pha rol tu phyin pa mnyan par bya/mnyan nas don dang tshul yongs su dri bar bya'o zhes 'don to/ /'di skad sgrogs te/ don ni tshig gi don to/ /tshul ni bsdus pa'i don yin pas de ltar na shes rab kyi pha rol tu phyin pa'i don la mkhas par byas nas/bkod pa gcig pa'i ting nge 'dzin la 'jug pa yin no/ /de ci'i phyir zhe na zhes bya ba ni gang na shes rab kyi pha rol tu phyin pa'i tshul yod/ bkod pa gcig pa'i ting nge 'dzin gang na yod/ 'di gnyis yan lag dang yan lag can gyi dngos por ni yod pa ma yin no zhes bya ba'i tha tshig go//lan ni 'jam dpal skye ba med pa ni mi 'khrugs pa ste zhes bya ba yin te/ de ltar byas na ting nge 'dzin dang 'gal ba med par gzung bar bya ba yin no/ /mi 'khrugs pa zhes bya ba 'di'i don ni dkrug tu mi rung ba dkrug par bya ba ma yin pa zhes bya ba yin no//de ci de lta na yul dang yul can gyi dngos por gzung bar bya'am zhe na ma yin te/ 'di ltar de ni bsam gyis mi khyab pa yin te/ gzung bar bya ba med ces bya ba'i tha tshig go/ /'di nyid kyi don ni bsam par mi bya ba/ bsam gyis mi lang ba'o zhes bya ba yin te/so sor nang du rig pas gzung bar bya ba yin gyi/ yul dang yul can nyid du ni ma yin no zhes bstan pa yin no/ /'di ni skye ba rnam par 'jig pa'i chos kyi rnam pa can sgom pa'i ting nge 'dzin yin no/ /skye ba med pa de yang shes rab kyi pha rol tu phyin pa la gsal bar gyur pa yin no//de bas na de don du gnyer bas de dri bar bya dgos pas 'di ni yan lag dang yan lag can gyi dngos po yin no/ /ci shes rab kyi pha rol tu phyin pa'i don la mkhas pa nyi tshe bkod pa gcig pa'i ting nge 'dzin gyi rgyu mtshan yin nam zhe na ma yin no zhes bya bar 'jam dpal bkod pa gcig pa'i ting nge 'dzin la 'jug par 'dod pa'i rigs kyi bu'am rigs kyi bu mos dben pa'i mal stan rnams bstan par bya zhes gsungs so//dben pa zhes bya ba ni btsun pa yin te/ sgyu dang kha gsag la sogs pa log pas 'tsho ba dang bral ba'o//ltung ba dang bcas shing sems la yo byad ma bsnyungs pa'i 'dam gyis gzer ba na sems gnas pa'i mnyam par bzhag pa mi srid pa'i phyir ro/ /mal stan rnams zhes bya ba ni gtsug lag khang la sogs pa la bya'o/ /yang na dben pa ni gtsang ba la bya ste/ me tog gtor ba la sogs pas mdzes par bya'o //de dag ni sems dang ba 'phel ba dang / rjes su mthun pa'i phyir dang / lha rnams 'du ba'i rgyu yin pa'i phyir ro / /lha rnams 'dus na ni bsam gtan pa'i gzi byin 'phel bar byed/ srung ba dang / skyob pa dang / sbed par yang byed do//yang na dben ba ni skye bo gnod par byed pa dang bral ba dgon pa la bya ste/ de dag ni sems rtse gcig pa'i rgyu yin pa'i phyir ro/ /de la gnas nas kyang 'du 'dzi med pa la dga' bar bya'o/ /'du 'dzi ni gnyis te/ lus kyi 'du 'dzi dang / yid kyi 'du 'dzi'o//de la lus kyi 'du 'dzi ni khyim pa dang rab tu byung ba dag dang stan cing gnas pa'o/ /yid kyi 'du 'dzi ni gcig pu gnas pa na yang dag pa ma yin pa'i rnam par rtog pa kun du 'byung ba'o/ /'du 'dzi de dag yang dag par srung bar dga' ba yin gyi/'du 'dzi med pa la mi dga' ba ni ma yin pa de ltar bya ba yin te/ 'du 'dzi la dga' bas ni yon tan thams cad 'joms par byed do/ /mtshan ma thams cad yid la mi bya bar zhes bya ba ni bdag dang bdag gi ba dang / gzung ba dang 'dzin pa la sogs par spros pa la mngon par ma zhen pa ni myur du dmigs su med pa'i ting nge 'dzin mngon du 'gyur ba'i phyir ro//rnyed pa dang / bkur sti dang / mthong ba dang / ma mthong ba dang / bde bar gnas pa'i mtshan ma yid la byed pas phyir sred pa dang rjes su mthun pa nyid kyis thabs ma yin pa'i phyir ro//skyil mo krung bcas te 'dug nas zhes bya ba ni sems rtse gcig pa'i chos nyid kyis de dang mthun par skyil mo krung bcas pa yin pa'i phyir ro/ /de bzhin gshegs pa gcig la bya'o zhes bya ba ni de'i nang nas smos pas/ bcom ldan 'das 'od dpag med la sogs pa gang yang rung ba ste/de yang de ltar bcom ldan 'das de ni zhes sangs rgyas rjes su dran pa las 'byung ba'i rnam pa mtha' dag gam/ mtha' dag ma yin pa gang yang rung ste/ yid la bya ba yin no/ /chos thams cad kyang yid la bya'o zhes bya ba ni yid la bya ba gnyi ga yang shes rab rgyas pa'i rgyu yin pa'i phyir ro//mi dmigs pa'i tshul gyis zhes bya ba'i don ni bshad zin to/ /kha cig ni sems can thams cad ces 'don gyi/ chos thams cad ni ma yin no/ /de ltar na smras pa mgon med pa sdug bsngal ba de dag nam zhig na bdag de dag gi mgon du 'gyur zhes bya ba la sogs pa'i rnam pa yid la bya'o//de la de bzhin gshegs pa yid la bya ba ni shes rab 'phel bar bya ba'i phyir ro/ /sems can thams cad yid la bya ba ni snying rje 'phel bar bya ba'i phyir ro/ /de'i ming yang gzung bar bya'o zhes bya ba ni bcom ldan 'das 'od dpag med la phyag 'tshal lo//pad ma'i spyan la phyag 'tshal lo zhes bya ba la sogs pa yin te/ de'i ming gzung ba thob na de'i yon tan dran pa rgyas pa'i rgyu yin pa'i phyir dang / spobs pa chen po la sogs pa so so yang dag par rig pa'i rgyu yin pa'i phyir ro//ming de yang rang gis brjod pa thos te don gyis rang gi ngo bo dmigs nas de bzhin gshegs pa phyogs ga la bzhugs pa'i phyogs nyi ma 'char ba'am/ gzhan yang rung ba de bzhin gshegs pa de bzhugs pa der dga' ba dang gus pa bskyed nas phyogs der mngon du bltas te 'dug par bya'o//de bzhin gshegs pa de nyid kyang nor bu rin po che sna tshogs kyi rgyu las byas pa'i seng ge'i khri la bzhugs pa byang chub sems dpa' du mas yongs su bskor ba/ yid du 'ong ba'i chos kyi char mngon du 'bebs pa/ mtshan sum cu rtsa gnyis mnga' ba/dpe byad bzang po brgyad cus sku mdzes par byas pa yin no/ /yang dag par ni chos kyi sku yin te/ ji ltar mos pa bzhin du yid la byas na/ de yid la byas pas 'das pa dang / ma 'ongs pa dang / da ltar byung ba'i sangs rgyas bcom ldan 'das rnams yid la byas par 'gyur ro//de ci'i phyir zhe na zhes bya ba ni gcig yid la byas pas thams cad yid la byas par ji ltar 'gyur/ gcig gi sku de ni thams cad kyi ma yin no zhes bsam pa'o/ /lan du de bzhin gshegs pa nyid gcig pa'i phyir ro zhes bya ba ni tshogs dang chos kyi sku dang /'gro ba'i don spyod pa mnyam pa nyid yin gyi/ de bzhin gshegs pa'i sku nyid ni ma yin no zhes bya ba'i tha tshig go/ /sangs rgyas gcig ni kun gyi ngo bo yin/ /sangs rgyas kun kyang gcig gi ngo bo yin/ /gcig gi tshogs la sogs pa mthong gyur na/ /sangs rgyas kun ni de yis mthong ba yin//bar skabs kyi tshigs su bcad pa'o/ /gzhan yang 'dir 'phags pa de kho na nyid bsdus pa'i tshul gyi rjes su 'brangs te/ snying khar zla ba'i dkyil 'khor la de bzhin gshegs pa'i mtshan gyi yi ge bsgoms pa'i bsam gtan dag gdul bya rnams kyi spro ba 'phel bar bya ba'i phyir bshad pa lta bu yin no//ting nge 'dzin 'di'i 'bras bu rgyas par ston pa ni 'jam dpal ji ltar de bzhin gshegs pa gcig gi zhes bya ba la sogs pa gsungs pa yin te/ skye ba med pa gcig gi chos kyi rnam grangs kyi bye brag tshad med par shes par bya'o zhes bya ba ni gcig gi skye ba med pa nyid yin te/rnam pa sna tshogs par chos ston par byed do zhes bya ba'i tha tshig go/ /de ltar ting nge 'dzin bstan du zin kyang byang chub sems dpa'i theg pa la yang dag par zhugs pa gang dag ting nge 'dzin gyi rang gi ngo bo mngon du ma byas pa dag 'di snyam du bkod pa gcig pa'i ting nge 'dzin 'di gang yin snyam du sems na/de dag la ting nge 'dzin gyi rang gi ngo bo bstan par mi nus te/ so so rang gis rig par bya ba yin pa'i phyir ro/ /'on kyang de dag la 'di skad ces yon tan bsam gyis mi khyab pa yongs su bsgrags pa 'di yang dag par zung la 'dug cig dang zhes bya ste/bsam gyis mi khyab pa ni mchog tu gyur pa'o/ /yon tan yongs su bsgrags pa ni yon tan bshad pa ste/ thabs su gyur pa bstan ma thag pa gang nas gsungs pa de bsam gyis mi khyab pa'i yon tan yongs su bsgrags pa'o//de'i dngos po ni bsam gyis mi khyab pa'i yon tan yongs su bsgrags pa nyid do/ /'di yang dag par zung la zhes bya ba ni yang dag par long la zhes bya ba yin te/ rgyun du gus par sbyor ba la sogs pa zhes bya'o / /ji lta ji ltar yang dag par blangs te gan sa pa de lta de ltar ting nge 'dzin 'di'i yon tan sangs rgyas kyi sku zad mi shes pa lta bu mthong zhing snang ba la sogs pa mthong bar 'gyur ro//gal te ji skad bstan pa'i tshul gyis sgrub cing zhum pa med par gyis shig /brtson 'grus lhod par ma byed cig /ji skad bstan pa'i tshul ni dben pa'i mal stan la sogs pa bstan pa yin no/ /ci'i phyir ting nge 'dzin 'di dka' ba yin zhe na/ ting nge 'dzin 'di ni dmigs pa'i lta ba can dag dang / dngos por lta ba can dag nas/ yod par lta ba can dag gi bar gyis bsgrub par mi nus so zhes gsungs te/'di dag dmigs par lta ba ma yin pas de ni dmigs pa'i lta ba can no/ /yi ge kha cig las chos 'di dang rnam pa 'gal bar byed pa de dag gis ni ting 'dzin 'di bsgrub par mi nus so zhes 'byung ba de yang don de dag nyid yin te/ji lta zhe na/ 'di ltar dmigs pa'i lta ba can ni 'di ltar chos 'di dang 'gal bar byed pa yin no/ /gang yang chos la sgrib pas bsgribs par gyur na zhes yi ge gzhan glegs bam kha cig las 'byung ba de yang rigs pa kho na yin te/ rkyen nye ba yin yang des bsgribs na de mi skye ba'i phyir zhes brjod de/de log par sgrub pa'i bsam pa can yin te/ de'i sgrib pa zad pa med do zhes dgongs pa'o/ /kha cig las de de ltar bsgrubs na zhes 'byung ba de yang don de dag nyid kyis bshad zin to/ /'di ltar mtshan ma thams cad yid la byed pa la sogs pa dmigs pa'i lta ba can gyis dga' bar 'gyur ro zhes bya ba yin no//'jam dpal 'di lta ste dper na mi zhig la rin thang med pa'i nor bu rin po che byi dor ma byas pa zhig bdog la zhes bya ba la sogs pa'i dpe bstan pas ni don 'di nyid gsal bar byed pa yin no//byi dor ma byas pa ni ma sbyangs pa'o/ /mi de la 'di skad du zhes bya ba de la zhes bya ba ni mi snga ma la'o/ /yang na gzhan gang yang rung ba la'o/ /mi snga ma des mi phyi ma gang gis dris pa de la bzhag nas so/ /de ltar na sbyin par ma byas pa ste/ gtan du byin pa med pa'i phyir/dper na btso blag mkhan la gos bcol ba bzhin no/ /de nyid kyi phyir byi dor byas pa'i phyir zhes gsungs so/ /yang na bdar ba bya ba'i don la nges pa med pa'i phyir ro/ /'di skad bstan te/ nor bu rin po che bzhin du ting nge 'dzin 'di yongs su sbyangs na shin tu rab tu grags pa'i yon tan nyams su myong bar 'gyur ba kho na yin pas/'di la bag tsha bar mi bya'o/ /sbyor ba ni gang zhig gnyen po yod na 'grib par 'gyur ba'i chos can de ni gnyen pos shin tu rtsa ba nas 'byin par byed pa srid pa yin te dper na nor bu rin po che bzhin no/ /gnyen po yod na 'grib par 'gyur ba'i chos can yang ting nge 'dzin gyi dri ma yin no zhes bya ba ni rang bzhin gyi gtan tshigs yin no//ting nge 'dzin dri ma dang bral ba yang mthong ste/ ji lta zhe na/ ji ltar sbyin pa'i gnas skabs na 'jug pa shin tu cher gyur pa na shin tu gsal ba la sogs par rigs pa yin pas ma grub pa ma yin no//de bzhin du mi mthun pa'i rkyen med na gnas brtan par 'dug pa gang gis cig car du ji ltar yang khyad par du byed de/ yang 'bad pa la mi ltos par de mngon par 'du byed pa khyad par du gyur pa'i bye brag gis gsal bar shes pa sgrub par byed pa yin no //dper na nor bu rin po che rnam par dag pa bzhin no/ /ji skad gsungs pa'i chos dang ldan pa yang ting nge 'dzin rnam par dag par 'gyur ro zhes bya ba ni rang bzhin gyi gtan tshigs yin no/ /'jam dpal bkod pa gcig pa'i ting nge 'dzin thob nas skye ba med pa gcig gi chos kyi rnam grangs tshad med par shes par bya'o//'dir gang dag chud par 'gyur ba dang zhes bya ba de'i shugs kyis 'ongs pa rnams rdzogs par byas nas dpe nye bar ston pas gsal bar byed pa ni/ 'jam dpal 'di lta ste/ dper na nyi ma'i dkyil 'khor gyi 'od zer dag gis dkyil 'khor gyi mthar thug pa gang yang ma khyab pa mi gsal ba med de//thams cad khyab po zhes bya ba'i tha tshig go/ /'jam dpal de bzhin du ngas bkod pa gcig pa'i ting nge 'dzin 'di thob cing zhugs nas rnyed pa de shes rab kyi pha rol tu phyin pa bstan pa ma yin pa'i chos gang yang mi ston te/'on kyang ngas thams cad du shes rab kyi pha rol tu phyin pa ston to zhes bcom ldan 'das bdag nyid gsung ngo / /thob cig zhes bya ba la sogs pa'i tshig gis ni snga ma snga ma'i tshig gi don gsal bar byed do/ /yang na thos pa las byung ba'i shes pa la sogs pas go rims bzhin du thos pa dang zhugs pa dang rnyed pa dang sbyar te 'chad par byed do//thams cad kyang bkod pa gcig pa'i ting nge 'dzin bsgoms pa la brten nas yin par bcom ldan 'das kyis gsungs te/ sngon gyi bde bar gshegs pa'i chos 'chad pa'i dkyil 'khor la yang /shes rab kyi pha rol tu phyin pa 'chad pa'i 'od zer gyis khyab bo zhes bya ba'i tha tshig go/ /de bzhin du gzhan dag kyang thos pa dang sems pa la sogs pa rim gyis 'di zhes bya ba ni bkod pa gcig pa'i ting nge 'dzin 'di shes na zhes bya ba'o//yi ge kha cig las 'di bzhin du shes na zhes 'byung ba der yang bkod pa gcig pa'i ting nge 'dzin la snyegs pa yin la/ 'di bzhin zhes bya ba ni bdag nyid sgom pa dper byed pa yin te ji ltar bdag gis ting nge 'dzin 'di shin tu bsgoms pa de bzhin du gzhan dag kyang de ltar sgom par byed na zhes gsungs pa yin no//skyes bu chen po bstan pa des skye ba med pa dang / 'gal ba'i chos gang yang mi mthong ngo / /chos zhes bya ba ni mdo sde la sogs pa'i chos so/ /skye ba med pa ni ma skyes pa'o/ /'gal ba ni mthun pa ste mdo sde la sogs pa thams cad skye ba med pa ston par byed pa yin no zhes bya ba'i bar du yin no//'jam dpal 'di lta ste dper na rgya mtsho chen po'i phyogs bzhi nas zhes bya ba la sogs pas ci ston ce na/ byed pa po tha dad pa med pas chos rnams tha dad pa med par ma zad kyi/ byed pa po tha dad pa yin du zin kyang chos rnams ni don dam par tha dad pa med pa kho na yin te/thams cad skye ba med pa'i bdag nyid yin pa'i phyir ro/ /rgya mtsho chen po'i phyogs bzhi nas skyes bu bzhi zhes bya ba ni mtshon pa yin te/ thams cad nas thams cad kyis zhes bya bar rig par bya'o/ /'jam dpal de bzhin du ngas chos gang ci bstan pa de dag thams cad ni zhes bya ba de la yang /ngas zhes bya ba ni mtshon pa yin te/ phyogs thams cad na bzhugs pa'i de bzhin gshegs pas bstan pa yang rig par bya'o skye ba med pa de kho na nyid kyi rgya mtsho chen po nas chos 'chad pa'i chu len pa thams cad kun gyis tha dad pa med pa kho na len to zhes bya ba bsdus pa'i don yin no//'jam dpal de ltar na rigs kyi bu'am rigs kyi bu mo de ting nge 'dzin 'di thob nas gang ci ston kyang zhes bya ba la sogs pa ni mjug sdud pa yin no/ /gang ci ston kyang de dag thams cad mi dmigs pa'i tshul du ma skyes pa dang /ma byung ba dang / dngos po med pa ston par 'gyur ro zhes bya ba ni chos gang ci ston kyang de dag ma skyes pa dang / ma byung ba dang / dngos po med pa de dag thams cad la ston par 'gyur ro zhes bshad par bya ba de ltar yin na ni legs pa yin no//yang na gang ci ston pa de dag ma skyes pa'i don ston pa yin te/ de kho na nyid ni de'i ngo bo yin pa'i phyir ro/ /de yang rigs kyi bu'am rigs kyi bu mo des ma skyes pa dang / dngos po med pa kho na ston pa yin no/ /ston pa 'ba' zhig tu ma zad kyi myur du byang chub kyi phyogs kyi chos dran pa nye bar gzhag pa dang /yang dag par spong ba la sogs pa bsgrubs nas ring po mi thogs par rdzogs pa'i byang chub thob par 'gyur bas gong nas gong du phun sum tshogs pa mchog tu gyur pa'i rgyu nyid ni ting nge 'dzin 'di yin par bstan pa'i phyir 'jam dpal gzhan yang ting nge 'dzin 'di thob pa'i byang chub sems dpa' sems dpa' chen po zhes bya ba la sogs pa gsungs so//'jam dpal gzhan yang byang chub sems dpa' chen pos gang gi tshe/ bdag gi dbyings nas zhes bya ba la sogs pas ni rdzogs pa'i byang chub kyi thabs myur ba gzhan yang ston par byed pa yin no//de lta bu'i bzod pa can ni de'i 'dod pa la bya'o/ /de lta bu'i bzod pa can 'di ni ma skyes pa la bzod pa yin te/ shin tu myur bar byang chub 'thob pa'o/ /rnam par mi rtog par bzod pa yang de'i thabs nyid yin par bstan pa'i phyir/gang yang bla na med pa yang dag par rdzogs pa'i byang chub dang / byang chub kyi chos rnams la mi sems pa'i bzod pa can gyi rigs kyi bu de yang myur du bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes bya ba la gang yang bla na med pa yang dag par rdzogs pa'i byang chub la mi sems pa ni 'dzin pa'am gzung ba la sogs par mi rtog ces bya ba'i don te /byang chub kyi chos rnams thob par bya ba'i phyir mi sems pa 'di'i bzod pa can de yang yin te/ byang chub sems dpa'i chos rnams ni sa dang pha rol tu phyin pa'o/ /de dag gis ni de la bzod pa yang byang chub dang nye ba'i chos kyi rgyu nyid yin par ston pa na byang chub kyi rgyu yin par ston pa yin no/ /yang na byang chub sems dpa'i chos rnams zhes bya ba la sogs pa ni yod pa'i don te/byang chub la ma 'dres pa'i chos gang yin ba yod pa de ni byang chub sems dpa'o/ /de yang yod pa de dag yin pas de skad ces bya ste / de dag gis ni dngos po de nyid rgyur bstan te / byang chub ni byed pa med pa'o zhes de ltar bzod pa ni myur du sangs rgyas nyid du 'gyur ba'i rgyu yin no zhes bya ba'i phyir/byang chub ni sangs rgyas nyid kyi phyir sems can gyis thob par byed pa ma yin zhes bya ba la byang chub kyi tshogs rnams la zhes bya ba'i tshig lhag ma ste/ byang chub ni sems can gyis sangs rgyas nyid thob par bya ba'i phyir bcom ldan 'das kyi tshogs rnams la sems can sbyor bar byed pa ma yin te/rnam par mi rtog pa'i phyir ro/ /lhun gyis grub pa nyid du sems can gyi don spyod pa'i 'khor lo byung yang ston pa ni rtag tu mnyam par bzhag pa yin no zhes de lta bu'i bzod pa de yang myur du bla na med pa'i byang chub kyi rgyu mtshan ma yin par bshad do//gzhan las skyes pa med par bzod pa mi 'byung gi /'on kyang smon pa med pa'i chos la bzod pa 'byung ste/ gang yang byang chub ni sangs rgyas nyid la mi smon zhes 'byung ba ni 'di ltar bshad de/ sangs rgyas nyid la yang smon pa med do zhes bya ba'i tha tshig go/ / de ltar chos thams cad la byang chub dang mnyam par mos pa yang myur du byang chub sgrub par byed pa yin no zhes bya ba bstan pa'i phyir/ chos thams cad ni sangs rgyas kyi chos so zhes bya ba la sogs pa gsungs te/ sangs rgyas kyi chos dang mnyam pa nyid kyis na chos thams cad sangs rgyas kyi chos zhes bya ste/ji ltar sangs rgyas kyi chos gnyis su med pa ltar chos thams cad kyang de bzhin no/ /zhum par mi 'gyur ba zhes bya ba ni chos thams cad sangs rgyas kyi chos yin pa'i phyir bdag gis sangs rgyas kyi chos thob pa kho na yin no zhes bya ba yin no/ / de ltar mos shing zhes bya ba ni yal bar 'dor bar mi byed pa'i tha tshig go/ /chos kyi dbyings la glo bur gyi dri ma dang bral bar bya'o zhes de ltar yang mos pa'i phyir ro/ /byang chub las phyir ldog pa ni de nas slar ldog pa'o/ /de'i dngos po ni phyir ldog pa nyid do //nang gi 'gyur ba la sogs pa'i tshogs yod pa'i phyir ro/ /phyir ldog pa ma yin pa ni phyir mi ldog pa'o/ /de lta bu'i bzod pa can de ni sangs rgyas kyi chos thams cad dang ma bral bar brjod par bya ste/ byang chub dang nye bar gyur pa yin pa'i phyir ro/ / 'dir thabs bstan pa la sems la the tshom med pa des kyang myur du thob par 'gyur ro zhes bstan pa'i phyir/ rigs kyi bu'am rigs kyi bu mo gang gis bstan pa 'di thos nas rmongs par mi 'gyur ba dang / som nyi za bar mi 'gyur ba de yang phyir mi ldog par bshad de zhes bya ba'i rjes su snyegs so//gal te thabs de dag gis byang chub byas pa yin na de 'dus byas yin par thal bar 'gyur la/ 'dus byas yin pa'i phyir spong bar yang 'gyur ro/ /de ltar gyur dang byang chub pa po dang / byang chub par bya ba yang yod par bya dgos so/ /de ltar gyur na de nyid stong pa nyid dang 'gal lo zhes kha cig ni dogs pa skyes so//de bas na 'dus byas nyid yin par mngon par zhen pa bsal ba'i phyir/ bcom ldan 'das bla na med pa yang dag par rdzogs pa'i byang chub rgyu las nges par byung ba lags sam zhes zhus te/ de ltar gyur na de dag gis byang chub dang /byang chub pa po dang / byang chub par bya ba rnams 'khrul pa med pa ma yin par dogs so zhes dgongs pa'o/ /rgyu las nges par byung ba ni skyes zhes bya ba'i tha tshig go/ /lan ni 'jam dpal de ni ma yin te zhes bya ba yin no/ /bstan pa gang yin pa de nyid rnam par 'byed pa ni/bla na med pa yang dag par rdzogs pa'i byang chub la ni rgyu med cing rgyu las nges par byung ba yang ma yin no zhes bya ba yin no/ /'o na dogs pa yang med la/ dris pa yang med par ci'i phyir byang chub kyi rgyu nyid 'gog par byed ce na/ rgyu gang yang med pa dang / 'bras bu gang yang med do zhes shin tu bstan par bya ba'i phyir ro/ /de ci'i phyir zhe na zhes bya ba'i bsam pa ni bsam gyis mi khyab pa'i sangs rgyas rnam par rol pa rgyu nyid yin par lan grangs du mar bstan zin la/ bstan ma thag pa yang 'bras bu nyid yin par bstan pa yin na/ci'i phyir rgyu med cing rgyu las nges par byung ba ma yin zhes bya ba yin no/ /skye ba med pa dang / dngos po med pa ni rgyu yang ma yin la zhes bya ba la sogs pa ni lan yin no/ /dngos po 'di'i skye ba yod pa ma yin pas skye ba med pa'o/ / de bzhin du 'di'i dngos po med pa zhes bya ste/ gdul bya'i bye brag nye bar gnas pa la ltos nas khyab pa kho nar bstan pa yin no/ /de'i phyogs kyi chos kho na yin par ma gsungs kyang khong du chud par bya ba kho na yin no/ /sbyor ba ni 'di ltar bya ste/ skye ba med pa'am dngos po med pa gang yin pa de ni rgyu ma yin zhing rgyu las nges par 'byung ba yang ma yin te/mo gsham gyi bu la sogs pa bzhin no/ /skye ba med pa dang dngos po med pa yang byang chub yin pas zhes bya ba ni khyab par byed pa dang 'gal ba yin no/ /de ci'i phyir zhe na zhes bya ba'i bsam pa ni thabs kyis bskyed pa ni sangs rgyas thams cad kyi rnam par rol pa yin na/skye ba dang dngos po dang bral ba la ni de lta bu mi srid do zhes bya ba yin no/ /lan ni chos thams cad ma skyes pa'i phyir ro zhes bya ba yin te/ brtags pa'i ngo bo 'chang ba thams cad ma skyes ma 'byung ba gang yin pa dang / byang chub 'di yang de'i nang du gtogs pa yin te/ 'di ltar byang chub par bya ba la sogs pa yang dag pa ma yin pa de la ni pha rol po dag the tshom du gyur pa yin no/ /gang yang de ni rnam par rtog pa thams cad kyis ma yin zhing byang chub gang yin pa de yang dag pa yin no zhes kyang brjod par mi nus mod kyi/kun rdzob kyi bden pa'i dbang du byas nas/ de rgyu med pa ma yin rgyu las nges par ma byung ba ma yin no zhes de ltar bshad de/ de thabs bstan pa yin pa'i phyir ro/ /gzhan yang sngar bstan pa'i tshul gyis byang chub kyang don dam par ma skyes pa'i ngo bo yin pa'i phyir de skad du bstan pa yin no//de ltar byang chub kyi rgyu dang 'bras bu bsal ba'i don 'di thos nas nur bar mi 'gyur ba ste yal bar mi 'dor ba de yang phyir mi ldog pa yin par ngas bshad do zhes bya ba 'di yang ji lta ba bzhin du 'dus ma byas pa nyid la 'jug pa'i thabs gzhan bstan pa yin no//de 'dus ma byas yin par don ma rtogs pa ni nur bar 'gyur ro/ /de 'di snyam du sems te/ byang chub kyi tshogs la 'bad pa 'dis ci zhig bya/ de ni bya bar nus pa yang ma yin la/ byas na yang ci yang byed pa med do zhes de ltar sngar gdul bya'i skye bo'i dbang du byas te/lhag par dris nas der thabs mdor bstan pa yin no/ /der dang po nas bzung nas gang gis shes rab kyi pha rol tu phyin pa la brtson pa'i rgyu can 'grub par 'gyur ro/ /de bas na bdag nyid thams cad 'dod pas sbyor bar bya ba de bstan pa'i phyir/'jam dpal de lta bas na dge slong ngam dge slong ma 'am zhes bya ba la sogs pa gsungs te rtogs par sla'o/ /shes rab kyi pha rol tu phyin pa la mos pa med par skyabs su 'gro ba dang / rab tu byung ba la sogs pa ni byang chub kyi ched du brtson pa 'jebs par byed pa ma yin no zhes bya ba ni bsdus pa'i don yin no//yang gang dag sems pa mdo sde dang chos mngon pa dang 'dul ba'i tshul tsam nyid kyis smon lam btab cing sbyin pa la sogs pa la 'jug na/ byang chub sems dpa'i bslab pa sgrub par byed pa yin no/ /bsgrubs nas kyang myur ba kho nar byang chub thob par 'gyur ba yin na/shes rab kyi pha rol tu phyin pa la brtson pa ci dgos snyam pa la/ de'i phyir 'di skad ces 'jam dpal rigs kyi bu'am rigs kyi bu mo gang shes rab kyi pha rol tu phyin pa zab mo 'di la mi slob pa de byang chub sems dpa'i bslab pa la mi slob pa'o zhes gsungs te/'di ltar shes rab kyi pha rol tu phyin pa la brtson pa med par ni shes rab rnam par dag pa med do/ /de med par ni dge ba'i tshogs rnam par dag pa med do/ /de med par ni byang chub med do zhes dgongs pa'o/ /don 'di nyid dpes gsal bar byed pa ni 'jam dpal 'di lta ste dper na 'byung po'i grong khyer dang zhes bya ba la sogs pa gsungs te/'byung po'i grong khyer ni ljon shing rnams so/ /sa bon gyi tshogs ni sa bon lnga'o/ /nyan thos kyi theg pa pa rnams kyi yang thabs gzhan gyis dge ba'i chos rnams 'phel zhing rgyas par 'gyur ba ma yin nam/ji skad du rdzas las byung ba'i bsod nams bya ba'i dngos po bdun po 'di dag dang ldan na rtag tu rgyun mi 'chad par bsod nams 'phel ba kho nar 'gyur/ bsod nams skye ba kho nar 'gyur zhes gsungs te/ de dag shes rab kyi pha rol tu phyin pa nyan pa la ni yod pa ma yin na/de ji ltar 'di skad du/ 'jam dpal de bzhin du byang chub sems dpa' sems dpa' chen po rnams kyi dge ba'i chos gang ci yang rung ba de dag thams cad ces bya ba la sogs gsungs she na/ 'di ltar bla na med pa yang dag par rdzogs pa'i byang chub la slu bar mi byed do zhes gsungs te/thabs med par ni bskal pa bye ba grangs med pas kyang byang chub mi thob pa'i phyir ro/ /gang la la dag 'dzin par 'gyur ba nas ston pa'i bar du 'gyur ba ma mchis sam zhes bya ba ni ci zhes bya ba khong nas dbyung ngo //yang na tshig zur du bklag go/ /don 'di nyid sngar yang 'phags pa 'od srungs chen pos dris pa kho na yin pas zlos pa'i nyes par 'gyur ba ma yin nam zhe na/ de ltar 'gyur ba ma yin te/ der ni 'phags pa 'jam pa'i gsung gis bshad pa la dris pa yin gyi/'di ni bcom ldan 'das kyis bka' stsal pa yin pa'i phyir ro/ /lan du sngar bstan pa de nyid bka' stsal pa ni/ 'jam dpal gang dag gis shes rab kyi pha rol tu phyin pa bstan pa 'di da ltar gyi tshe la thob nas zhes bya ba la sogs pa yin no/ /tshe 'di brjes nas zhes bya ba ni tshe 'phos shing tshe gzhan du gyur nas so//mi sgom pa'i tshul gyis zhes bya ba ni bsgom pa la mngon par zhen pa med pa'i tshul gyis so/ /gal te smon lam gyi dbang gis bshad pa 'di rna bas thos pa yin na de dag da ltar bsod nams chung ngus kyang rna bas thos par ji ltar snang zhe na/de'i phyir de dag ni dge ba'i rtsa ba chung bar nga mi 'chad do zhes gsungs te/ gang dag dge ba'i rtsa ba rnams mi chung ba de la de skad ces bstan to/ /dgongs pa ni 'di yin te/ gang dag gis tshe rabs gzhan na bcom ldan 'das kyis yum 'di ma thos pa dang /dkon mchog gsum la gnod pa dang / /mi gsod pa la sogs pa sdig pa chen po'i bsam pa rtag tu bsten cing bsgoms la lan mang du byas pa dang / bshad pa la sogs pa cung zad tsam yang ma byas/ ma bzung ba de lta bu de dag ngan song du 'gro ba'i phyir gzhan dag ci'i phyir 'gyur te/de bas na shes rab kyi pha rol tu phyin pa mnyan pa kho nas de dag gi rnam par smin pa thang cig yud tsam zhig myong nas sdig pa'i tshogs chen po de dag zhu byang bar 'gyur la/ gal te gus pa dang rtag tu sbyor ba la sogs pa med pas ni rnam pa thams cad du yid du 'ong zhing mdzes pa'i skye ba blangs pa ma yin no//gal te chos kyi rnam grangs 'di de ltar 'bras bu bzang po 'thob pa yin no / de 'dod pa thams cad la bshad par bya ba yin nam zhe na ma yin no zhes bya ba'i phyir/ 'jam dpal gang zhig shes rab kyi pha rol tu phyin pa bstan pa 'di la nyan 'dod par gyur pa zhes bya ba la sogs pa gsungs te/'di yang bstan par bya ba'i phyir bstan to/ /de ci'i phyir zhe na zhes bya ba ni dad pa dang / brtson 'grus gnyis de ltar rgyu dam pa yin na thos nas ma dad pa 'am nur bar ji ltar 'gyur zhes bsams pa'o//lan ni/ 'di ltar 'di la chos gang yang yongs su grub par na bstam te zhes bya ba la sogs pa yin te/ don ni bshad zin to/ /'di skad ces bya ste/ sems can de dag phal cher ni chos la mngon par zhen pa yin te/ de yod par bshad pa drang ba'i don gzhan dag la dga' ba yin no//'dir ni de dag yod par yang ma bshad de/ 'dir bshad pa ni gtsor don dam pa ston pa'i phyir ro/ /de dag gi tha snyad kyi bden pa'i nang du gtogs pa'i phyir ro/ /de bas na 'dod pa don med pa'i phyir gdon mi za bar ma dad pa dang nur bar yang 'gyur ro/ / bcom ldan 'das dge slong ngam dge slong ma'am/ dge bsnyen nam dge bsnyen ma gang la la bdag la 'di skad du zhes bya ba la sogs pas 'di skad bstan te/ bcom ldan 'das kyis gdul bya'i skye bo la yongs su brtags nas chos 'di 'chad pa yin par ma zad kyi/ 'dir skye ba med par 'chad pa dang /sems can med par 'chad pa dang / dngos po med par 'chad pa la sogs pa ni ming tsam gyis kyang skrag par byed cing dad par mi byed pa yin no/ /gal te de 'ga' zhig 'di'i ming 'dri na de la yang gang gis skrag par mi 'gyur bar bya ba'i phyir rnam grangs gzhan gyi sgo nas bstan par bya'o//ji ltar bya zhe na/ de'i phyir bcom ldan 'das de skad 'dri ba de la bdag gis 'di skad du chos thams cad dang mi 'gal ba'i gtam mo zhes brjod par bgyi'o zhes gsungs so/ /de ci'i slad du zhe na zhes bya ba ni chos thams cad dang 'gal ba yin te/de dag ni 'di las skye ba med pa la sogs par 'chad pa'i phyir ro/ /chos thams cad dang mi 'gal ba'i gtam mo zhes de ci 'di la brdzun zer ram snyam pa ni rgol bar byed pa'i sems so/ /lan ni bcom ldan 'das gang skye ba ma mchis pa dang 'gal ba'i chos de gang yang ma mchis te zhes bya ba yin te/skye ba med pa dang / dngos po med pa dang 'gal ba'i chos ni gang yang yod pa ma yin te/ thams cad de nyid kyi ngo bo yin pa'i phyir ro/ /yi ge kha cig las gang skye ba ma mchis pa la 'gal ba'i chos de gang yang ma mchis te zhes 'byung ba de'i don ni skye ba med pa'i yul la 'gal ba gang yang yod pa ma yin te/thams cad skye ba med par bsdus pa'i phyir ro/ /ci'i phyir mtha' de nyid rnam par mi dbye/ gang gis na rnam grangs gzhan gyi sgo nas bshad/ 'di la gsal bar byas pa med do zhe na/ bka' mchid de ni sems can gang gis kyang 'tshal bar sla ba ma lags so zhes gsungs te/kyang gi sgra ni mngon du zhes bya ba'i sgra'i don to/ /sla ba zhes bya ba ni las byed pa'i bye brag yin no/ /de ci'i slad du zhe na zhes bya ba ni lan grangs mang du gsal bar byas kyang ji ltar shes par sla ba ma yin zhes bya ba'i tha tshig go//lan ni 'di ltar yod pa gang yang dmigs su ma mchis pa'i slad du'o zhes bya ba yin te/ de la zhes bya ba lhag ma'o/ /yod pa ni gzung ba la sogs pa yod pa dang / de dmigs pa la bya ste/ de ni gang yang gtam de la bstan pa med do/ /srog chags rnams kyis ni phal cher de la mngon par zhen pa'i lhun sdug pas de ltar don gsal bar byas su zin kyang shes par sla ba ma yin no zhes bya ba'i tha tshig ste/'di ltar res 'ga' yang yang dag pa'i don rnam par sgom par byed pa ma yin no/ /bcom ldan 'das gzhan yang zhes bya ba ni yang na gzhan du zhes bya ba'i don te/bdag gis de la 'di skad du mi skye ba zhes bya ba'i chos de bstan par gyur te zhes brjod par bgyi'o zhes bya ba yin na / /de ci'i slad du zhe na zhes bya ba ni 'dir bsam pa ni 'di ji ltar mi skye ba yin/ ci 'di la skye ba yod pa ma yin pa zhes bya ba ni chos gal te de lta na 'o na shin tu thal bar 'gyur te/'di ltar 'chad pa gzhan dag la yang skye ba yod pa ma yin par 'gyur te/ 'di de la ltos na nyes par bstan pa ci yod ces bya ba yin no/ /lan ni/ bcom ldan 'das 'di ltar chos thams cad ni skye ba ma mchis par mnyam pa'i slad du'o zhes bya ba yin no//de ltar bstan pa ni zhes bya ba ni tshig lhag ma'o/ /skye ba med pa'i ngo bor mnyam zhing mthun pa yin te/ de rang bzhin mnyam pa yin pa'i phyir ro/ /bstan pa gzhan la ni de ltar bstan pa med do zhes bya ba 'di lhag ma yin no/ /bka' mchid der ni dgra bcom pa rnams kyi gong ma rtogs pa ma bstan to zhes bya ba des kyang skye ba med pa 'di bstan pa yin no zhes dgongs pa ste/rtogs par skye ba ma bstan pa'i phyir ro/ /gong ma rtogs pa zhes bya ba ni khyad par du rtogs pa dang / thar pa zhes bya ba'i bar du yin no/ /ma bstan to zhes bya ba ni rtogs pa'i gzung bar bya ba yang mi rigs pa'i phyir ro //de dag kyang byang chub yongs su sgyur ba nyid yin pa'i phyir ro/ /theg pa gcig tu bstan pa 'di yang thar pas yid skrag pa'i dbang du byas nas bstan pa yin no/ /dgra bcom pa'i chos rnams kyis so so'i skye bo'i chos rnams rnam par gzhag par byas pa med pas skye bar bstan to zhes ma yin no zhes bya ba'i phyir/ji ltar dgra bcom pa'i chos rnams kyis so so'i skye bo'i chos de dag rnam par bshig pa ma lags pa de ltar bstan to zhes bya ba dgongs pa yin no/ /de dag gis de rnam par bshig pa ma yin te/thog ma nyid nas de rnam par bshig pa nyid yin pa'i phyir ro/ /mi skye ba zhes bya ba'i chos de bstan par gyur to zhes ci'i phyir brjod/ ji tsam du skrag pa yongs su spang ba'i phyir 'di brtsams pa yin na ni de skad du smras pa des kyang shin tu skrag pa kho nar brjod pa ma yin nam zhe na nyes pa med de/gdul bya'i bye brag la ltos nas de ltar bstan pa'i phyir te/ 'di la mi dge ba la sogs pa skye ba ma yin no zhes gang dag 'dzin pa de dag gi ched du de skad bstan pa yin no/ /gzhan dag las ni mi skye ba zhes bya ba'i sa 'dir yang dag par 'di'i mtha' zhes 'byung ba ni 'di ltar bshad de/yang dag pa ni de kho na nyid la sogs pa'o/ /mtha' ni tshogs dang mchog dang mthar phyin pa la bya'o/ /yang na b+hu ta zhes bya ba sems can la bya ste/ de'i mchog gam dngos po rnams yod pa'i mthar phyin pa zhes bya ba la sogs par bshad pa ni mi skrag par bya ba'i phyir yin no//bcom ldan 'das gzhan yang de la bdag gis 'di skad du chos bstan pa 'di la sems can gang yang mya ngan las 'das pa dang / mya ngan las 'da' ba dang / mya ngan las 'da' bar 'gyur ba med do zhes bstan to zhes bya ba ni tshig lhag ma'o//de ltar na yongs su mya ngan las 'das pa med pa zhes bya ba'i chos bstan pa 'di yin no zhes bstan pa yin no/ /de yang mya ngan las 'das pa la skrag pa dag ste de dngos po med par bshad pas 'di la 'dun par bya ba'i phyir bstan pa yin no/ /de ci'i slad du zhe na zhes bya ba ni yongs su mya ngan las 'das pa'i thabs bstan pa'i phyir ram/mnyan pa'i phyir 'di ji ltar bshad ces sems pa'o/ /dgongs pa ni bcom ldan 'das 'di ltar yod pa shin tu mi dmigs pa'i slad du ste zhes gsungs te/ 'di dmigs su yod pa ma yin pas yod pa dmigs su med pa'o//de'i dngos po ni dmigs su med pa nyid do/ /yod pa ni mi dmigs pa dang / dmigs par bya ba ma yin pa'i phyir ro/ /yod pa ni bdag nyid do/ /bcom ldan 'das de skad 'dri na zhes bya ba'o / na zhes bya ba ni yid la byed pa zhes bya ba'i don te/zhes bya ba lhag ma'o/ /bdag gis de skad ces bgyi'o zhes bya ba ni/ ji skad du bstan pa'i tshig zur gyis so/ /'o na gang zhig skal ba can chos yod par mngon par ma zhen pa dag 'di na de la yang tshig zur gyis brjod dam zhe na/ ma yin no zhes bya ba'i phyir/ bcom ldan 'das gzhan yang bdag las shes rab kyi pha rol tu phyin pa zab mo 'di nyan par 'tshal te zhes bya ba la sogs pa gsungs so/ /de nyid kyi tshe don gyi de kho na nyid gzung ba'i ched du/ /de la bdag gis 'di skad du zhes gsungs so / / 'di skad du zhes bya ba ji lta bu zhe na/ gal te khyod nyan par 'dod na de mnyan to snyam du yid ma gtod cig ces gsungs te/ mnyan to snyam du yul gzhan la ma 'jug cig /sems ma skyed cig sems gang zhe na mnyan to snyam du zhes gsungs pa yin no/ /yang na yid ma gtod cig ces bya ba ni mnyan to snyam du de ltar ma 'dug cig ces bya ba yin no//don 'di nyid ni mnyan to snyam du sems ma skyed cig ces bya ba yin te/ mnyan par mngon par zhen par ma byed cig ces bya ba'i tha tshig go/ /gal te de ltar sems mi skyed na/ 'o na ji ltar chos de dag bshad pa nyan par nus she na/de'i phyir/ kye skyes bu sgyu ma'i skyes bu'i shes rab ci 'dra ba de lta bu'i shes rab skyed cig dang / de lta bus chos bstan pa 'di shes par nus so zhes gsungs te/ ji ltar sgyu ma'i rnam pa'i skyes bu ni rang gis sprul pa'i glang po che la sogs pa la mi dmigs shing mngon par ma zhen pa de bzhin du khyod kyang chos bshad pa 'di dag la mnyan par mngon par zhen pa ma byed cig /sgyu ma'i rnam pa'i skyes bu ni sgyu ma'i skyes bu ste/ tshig bar ma khong nas dbyung ba'i phyir ro/ /de ni shes rab la mngon par zhen pa med do//de lta bus zhes bya ba ni 'og nas 'byung ba'i tshul gyis so/ /bdag ni rten med pa gnas par ji ltar spro/ 'di la sgyu ma'i skyes bu'i shes rab kyi dpe yang rigs pa ma yin te/ de la yang rgal ba mthun pa'i phyir dang / 'dri bar byed pa yang rna ba la sogs pa'i don la brten pa'i phyir ro zhe na/de la kye skyes bu gal te khyod kyis chos bstan pa 'di nga las nyan par 'dod na 'di lta bur 'dug cig ces bya ba'i tshig dang sbyar ro/ /de ji lta zhe na/ 'di lta ste dper na nam mkha' la bya'i rjes lta bur gnas par gyis shig ces gsungs so//gang gi phyir de lta bu yin na ni de lta bus chos bstan pa 'di mnyan par nus kyi gzhan gyis ni ma yin no/ /'di skad bstan te/ 'di la gnas gyur pa'i don yod pa ma yin gyi/ ji ltar mngon par zhen pa gang yin pa spong bar byed pa de ltar yin zhes bshad pa yin no//dper na nam mkha' la bya'i gnas ni rang gi sgro gshog gi nang na yod pa'i rlung las ma gtogs par gnas pa mi ltos par dkyil na gnas so/ /de bzhin du khyod kyang nye bar len pa'i phung po lnga tsam las ma gtogs par gnas pa dang bral ba mngon par zhen pa med pa'i shes rab mngon du byos la'ang 'dug cig /bdag dang bdag gis bya ba la yang gnas par ma byed cig /gnyis dang gnyis med pa'i ngo bo ni gdon mi za bar dmigs par bya ba kho na yin no/ /de la mi brten na ni gzhan gang la brten te bdag gi 'du shes bshig par bya/ lta ba'i rnam pa rtog pa dang chad pa la sogs pa las yang dag par 'da' bar bya/ sangs rgyas kyi chos rnams la yang lhag par dmigs par bya/ so so'i skye bo'i chos rnams las kyang bskyod pa yin/ 'di ltar de dag thams cad ni 'di lta ste/ mig dang gzugs nas/ yid dang chos zhes bya ba'i bar de dag yul dang yul can gnyis tsam du nyan thos rnams kyis bzung ba'i phyir bdag tu 'du shes pa dang / de las gzhan du lta bar gyur pa rnams shin tu ring du spong bar byed do/ /byang chub sems dpa' rnams kyis ni gnyis su med pa'i de bzhin nyid tsam la dmigs pa'i phyir gzhan dag spong bar byed do//sangs rgyas kyi chos rnams la yang rten par byed do/ /gtan tshigs de dag gis na de gnyi gas kyang so so'i skye bo'i chos rnams las bskyod pa yin no zhe na/ de'i phyir/ kye skyes bu gal te khyod kyis chos bstan pa 'di nyan par 'dod na de'i phyir gnyis la ma dmigs shig mi gnyis pa la yang ma dmigs shig ces gsungs so//'dir yang de ci'i phyir zhe na zhes dris te/ 'dir ji ltar dgos pa de'i lan ni ma lon no zhes bya ba'i tha tshig go/ /lan du 'di la gnyis su brjod par bya ba yongs su brjod par bya ba'am/gnyis med par brjod par bya ba yongs su brjod pa gang yang med pa'i phyir ro zhes bya ba yin no/ /gzhan dag las gnyis dang gnyis su med par ston pa bstan du zin kyang gdul bya rnams kyi dbang du byas pa yin gyi/ 'dir ni chos kyi rnam grangs 'di gcig kho nar nges pa'i don yin pa'i phyir gnyis gang yang mi 'chad pa'i phyir ro/ /'dir yang gnyis med pa tsam bstan pa ma yin nam zhe na/ ma yin te de la yang gnyis su med pa nyid du dmigs na gnyis kyi ngo bo nyid las ma 'das pa'i phyir ro/ / 'o na ci'i phyir rab tu grags pa'i dbye bas gnyis bstan/ de lta na yang de ltar dogs pa ma bsal ba kho na ma yin nam zhe na de'i phyir/ gal te chos bstan pa 'di nyan par 'dod na bdag tu 'du shes rnams kyang ma bshig cig ces bya ba la sogs pa gsungs so/ /lta bar gyur pa ni lta ba'i rnam pa'o//bdag tu 'du shes logs shig tu smos pa ni nyon mongs pa thams cad kyi rgyur gyur pa nyid kyis na gtso bor bstan pa'i phyir te/ dper na bram ze rnams 'ongs so/ /ba sita yang 'ongs so zhes bya ba bzhin no/ /dgongs pa ni 'di yin te/ bdag tu 'du shes 'jig pa la sogs par byed pa med pa kho na yin te/ de dag ni de kho na nyid shes pa rnams kyi de kho na nyid shes pa yod pa'i tshe de yod pa mi srid pa'i phyir ro/ /'du shes la sogs pa ni 'du shes la sogs pa'i don mi 'thad pa'i yang phyir ro/ /bcom ldan 'das gang zhig bdag la nyan par 'tshal te zhes bya ba la sogs pa ni bstan ma thag pa'i tshig re re dang sbyar ba'i phyir dang /mjug sdud pa'i phyir ro/ /de skad brjod par bgyi'o zhes bya ba ni de skad smra bar bgyi zhes bya'o/ /de skad rjes su bstan par bgyi'o zhes bya ba ni phyin ci log pas de skad ces bya bas 'dul bar bgyi'o//de ltar 'di la gzhag par bgyi'o zhes bya ba ni de ltar mnyan pa dang sems pa la sogs pa dang rjes su mthun pa'i thabs sbyar bar bgyi'o zhes bya ba'o/ /yang na 'di dag ni tshig snga ma rnam par 'byed pa yin no/ /de ltar rjes su gdams pa bstan pa 'di la gal te 'dri ba'i rigs kyi bu'am/rigs kyi bu mo de ltar gnas shing 'di nyid rnam par 'byed pa ni de ltar zhugs na zhes bya ba yin no/ /yang na dang por gnas shing rgyun gyis zhugs na zhes bya ste/ de spobs pa'i phyag rgya 'di la gnas par gyur na slad kyis zhes bya ba 'di nyid kyi don ni rjes la zhes bya ba yin te/dus phyis zhes bya ba'i don to/ /rjes su gdams pa 'di dag nyid la spobs pa'i phyag rgya zhes bya ste/ spobs pa so so'i yang dag par rig pa ston par byed pa dang / 'brel par spobs pa'i phyag rgya dang / rtags yin pa'i phyir te/ 'di ltar rjes su gdams pa ston par byed pa dang / lam la dbang ba nyid kyi phyir ma log pa'i shes pa yod do zhes 'dis mngon par byed pa yin te/ thabs mngon sum du byas pa ni thabs 'di la sbyor ba mi rigs pa'i phyir ro/ /de dag thams cad 'phags pa 'jam dpal gyis rang dgar brjod pa yin gyi/'di bcom ldan 'das kyis gnang ba ma yin no zhes kha cig dogs pa la/ 'jam dpal legs so legs so zhes bya ba 'di gsungs so/ /rigs kyi bu'am rigs kyi bu mo de la yang phyis 'di skad kyis shig ces bya ba la sogs pa yang khyod kyis thabs gzhan gyis man ngag dbog par bya'o zhes slob pa yin no//de lta ma yin te gal te 'bras bu nye bar ma bstan na de'i tshe chos nyan pa 'di don med pa yin no zhes rtogs nas nur bar 'gyur ro/ /de bas na 'bras bu 'di yang bstan par bya dgos so//de bzhin gshegs pa la blta bar 'dod na zhes bya ba la sogs pa 'di ci'i phyir 'phags pa 'jam dpal la bstan/ blo gros yangs pa'i shes pa med pas de dag brjod par mi nus sam zhe na/ de la ni brgal du med de/ 'di ltar 'di ni sangs rgyas dang byang chub sems dpa'i cho 'phrul sna tshogs pa yin no//de la de bzhin gshegs pa la blta ba ni de la bsnyen bkur byed pa'i rgyu yin no/ /yang ston par khas len pa'i rgyu yin no/ /de yang rdzogs par byang chub pa'i rgyu yin no/ /ci de bzhin bshegs pa ni bdag gi ston pa'o zhes khas blangs pa tsam kho nas byang chub pa yin nam zhe na/de lta ma yin no/ /'o na de ji ltar de'i rgyu nyid du bstan ce na/ de khas len pa ni byang chub 'grub par byed pa'i ting nge 'dzin thams cad las mkhas par 'grub pa'i rgyu mtshan ma yin pa'i phyir ro//ting nge 'dzin thams cad la mkhas pa'i tshig gis de dang lhan cig tu spyod pa sa dang pha rol tu phyin pa la sogs pa'i tshogs rnams kyang nye bar mtshon pa yin no/ /yang na pha rol tu phyin pa'i tshogs gang la ting nge 'dzin la mkhas pa yod pas dngos su de nyid bzung ngo / /ting nge 'dzin la mkhas pa ni khong gzo ba'o//shes rab kyi pha rol tu phyin pa 'di nyid la mi dmigs pa'i tshul gyis bslab par bya'o zhes bya ba ni/ ji ltar shes rab kyi pha rol tu phyin pa la sbyor ba mi dmigs pa yin par bstan pa de'i phyir 'di la bslab par bya'o zhes bya ba'i don to/ / gang gi phyir de ltar pha rol tu phyin pa dang / ting nge 'dzin la mkhas pa la sogs pa dang 'brel par byang chub pa yin gyi/ ston par khas blangs pa tsam gyis 'grub pa ma yin pa de bas na/ rnam pa thams cad kyi mchog dang ldan pa'i thams cad mkhyen pa'i ye shes kyi bar du bsgrub par 'dod pa'i rigs kyi bu'am rigs kyi bu mos kyang shes rab kyi pha rol tu phyin pa 'di nyid la dngos po med pa'i tshul gyis bslab par bya'o zhes bya ba ni mjug sdud pa yin no//rnam pa thams cad du mchog gtso bo ni rnam pa thams cad kyi mchog ste/ yon tan yongs su dag pa yin no//de dag dang ldan zhing mnga' ba ni thams cad mkhyen pa'i ye shes te de nyid bla na med pa'i byang chub bo/ /'di zlos pa yang ma yin te/ 'di mjug sdud pa yin pa'i phyir ro/ /de ci'i phyir zhe na zhes bya ba ni ting nge 'dzin thams cad la mkhas pas ye shes de skyed pa yin na ni de shes rab kyi pha rol tu phyin pa la slob pas ci zhig bya/ting nge 'dzin thams cad la mkhas pa kho na la bslab pa'i rigs so zhes bya ba ni rgol ba'i don yin no/ /lan ni 'di ltar rnam pa thams cad kyi mchog dang ldan pa'i thams cad mkhyen pa'i ye shes kyi bar du byas pa ma yin pa dang ma skyes pa dang /dngos po med par 'dir bstan to zhes bya ba ni lhag ma'o/ /'di ltar chos thams cad ni byang chub dang mnyam pa'o zhes bya ba ni lan 'debs pa'i tshig yin te/ gnyis su med pa nyid kyis byang chub dang mnyam pa ni byang chub dang mnyam pa'o/ / de bas na chos gzhan dag la spyod pa yang byang chub kyi ched du spyod do zhes bya ste/ mnyam pa nyid la dgongs nas zhes dgongs pa'o/ /de nyid ston pa ni ji ltar chos thams cad byang chub dang mnyam pa de ltar byang chub kyang chos thams cad dang mnyam pa'o zhes khong nas dbyung ba'o / /mnyam pa nyid gnyi ga la yod pa'i phyir ro//phan tshun mnyam par ston pa de dag gis ni mnyam pa nyid la dgongs pa gsal bar byas pa yin no/ /gzhan dag gis kyang mnyam pa nyid la dgongs par ston pa ni/ byang chub ji lta bar sems can thams cad kyang de bzhin no zhes gsungs te/ mnyam pa zhes bya ba ni lhag ma'o/ /ci'i phyir de ltar yin zhe na med pa'i phyir zhes gsungs te/ rnam par brtags pa'i bdag nyid kyis med pa'i phyir ro/ /des ni mnyam pa nyid kho nar bstan to/ /ci'i phyir med ce na/ gang gi phyir yod pa thams cad ni spyod pa med pa ste/spyod pa ni sgrub pa ste/ de dang bral ba zhes bya ba'i tha tshig go/ /spyod pa de yang byang chub ste mnyam pa nyid kho na yin no/ /de bas na byang chub gang yin pa'i gtan tshigs des na skye ba med pa yang de yin/ 'byung ba med pa yang de yin te mdo sde de dang de dag thams cad las brtan pa zhes bya ba ni tshig ltag ma'o//de ni mtshon par byed pa yin te/ dngos po med pa yang de yin/ mngon par 'du byed pa med pa yang de yin zhes bya ba la sogs pa yang khong du chud par bya'o/ /chos thams cad de lta bu 'di la zhes bya ba ni 'dod chags la sogs pa la ste/byang chub dang 'dod chags de ni gnyis su med cing gnyis su byar med so so ma yin zhes bya ba la sogs pas mnyam pa nyid la dgongs par ston pa la zhes bya ba ni don de zhum pa med pas zhes bya bar sbyar ro/ /de lta bu'i chos 'di la zhum pa med par 'dod pa'i zhes bya ba ni gal te skye ba med pa de byang chub yin na bdag ci'i phyir de skyed pa'i phyir brtson par byed ces dngang bar mi 'gro bar 'dod pas zhes bya ba yin no//da ni bcom ldan 'das rang nyid kyi rgyu dang bcas ba'i 'bras bu yang shes rab kyi pha rol tu phyin pa las byung ba yin par bstan pa'i phyir/'jam dpal gang de bzhin gshegs pa'i rnam par 'phrul pa nas zhes bya ba la sogs pa gsungs so/ /de bzhin gshegs pa'i rnam par 'phrul pa ni byang chub sems dpa' gnas skabs na byang chub sems dpa'i spyod pa mdzad pa'o/ /de bzhin gshegs pa'i rnam par rol pa ni sangs rgyas pa'i gnas skabs na chos kyi 'khor lo bskor ba dang /cho 'phrul chen po dang sprul pa ston pa la sogs pa'o/ /bar gyi tshig gis bdud dang gang po las rgyal ba la sogs pa de bzhin gshegs pa'i sa brjid rnams gzung ngo / /rnam pa de lta bu gzhan dag kyang ngo //de ci'i phyir zhe na zhes bya ba ni sbyin pa dang tshul khrims la sogs pa yang der yan lag nyid yin na shes rab kyi pha rol tu phyin pa la lhag pa ci yod ce na/ lan du de ni bstan du med pa yin te zhes bya ba yin te/ 'di la dpe bstan du yod pa ma yin pas bstan du med pa'o/ /dgongs pa ni 'di lta ste/shes rab kyi pha rol tu phyin pa 'di ni dpe med pa ste/ de yongs su smos pa nyid kyis ni gzhan stobs can dag kyang dpe med pa yin par 'gyur ro/ /de bas na 'di gtso bo yin pa'i phyir shes rab kyi pha rol tu phyin pa 'di nyid las bstan to zhes gsungs so/ /ci don dam pa kho nar de las bstan nam zhe na ma yin te/'di ltar shes rab kyi pha rol tu phyin pa ni mi ston pa'i phyir ro zhes bya ba yin te/ rnam par rtog pa dang ma 'brel pa'i phyir ro zhes dgongs pa'o/ /de'i dbang gis 'jig rten pa rnams la de ltar snang ba yin pas de bas na bstan zhes gsungs so//'di man chad 'jam dpal dge slong ngam dge slong ma'am zhes bya ba la sogs pas ni mdo sde 'chang ba la sogs pa'i phan yon ston to/ /tshig bzhi pa'i tshigs su bcad pa tsam yang zhes bya ba ni gang dag la tshigs su bcad pa 'ga' tsam yang med kyi tshig lhug par 'dug pa la yang de tsam mo//lus kyi sdom pa legs pa ste/ /ngag gi sdom pa legs pa yin/ /yid kyi sdom pa legs pa ste/ /kun tu sdom pa'ang legs pa yin/ /kun tu sdom pa'i dge slong ni/ /sdug bsngal kun las grol bar 'gyur/ /zhes bya ba la sogs pa'i tshigs su bcad pa yang yod pas tshig bzhi pa zhes smos so//phyir mi ldog pa'i sa bon yod pa'i phyir phyir mi ldog pa'o/ /gang dag de bzhin nyid kyi phyir sgrub pa lta ci smos zhes bya ba la/ de bzhin nyid kyi dngos po de lta bu'i phyir shes rab kyi pha rol tu phyin pa 'di don dam pa'i phyir sgrub pa ni shin tu yang phyir mi ldog par 'gyur te/shin tu nye ba yin pa'i phyir ro/ /lta ci smos zhes bya ba ni de la brjod par bya ba yang ci yod/ ma gsungs kyang mngon mod ces bya ba'i bar du yin no/ /rigs kyi bu 'am rigs kyi bu mo de dag ni byang chub tu nges par rig par bya'o zhes bya ba ni de byang chub 'thob pa la rgyud nges pa blangs pa'i phyir ro//nyan thos dang rang byang chub kyi ched du sangs rgyas kyi yul na gnas pa yin par de bzhin gshegs pas mkhyen/ de bzhin gshegs pas gzigs zhes bya ba'i tha tshig go/ /gang dag shes rab kyi pha rol tu phyin pa zab mo ma skyes pa dang /dngos po med pa dang / 'byung ba med pa'i bar 'di thos nas dngang bar mi 'gyur bar du byed pa dang / gong du yang mos par byed pa ni tshig tu brjod pa thos nas mi skrag pa la sogs pa gzung ngo / /de dag ni sangs rgyas kyi chos thams cad la nges par 'gyur ro zhes bya ba ni stobs la sogs pa la ste shin tu nye bar gyur pa'i phyir ro//'ga' zhig rtog pa ci'i phyir sangs rgyas bcom ldan 'das kyis bka' stsal pa/ mtha' med pa dag nas de ltar byang chub sems dpa' bshad pa dag gi yon tan rgyas par ston ce na/ 'dir 'jam dpal ngas sangs rgyas kyis gnang ba de bzhin gshegs pas rnam par mkhyen pa/dgra bcom pa thams cad kyis yang dag par mnos pa'i phyag rgya 'di gzhag par bya ste zhes gsungs te/ tha ma'i tshig 'di dbus la sbyar ba'i phyir ro/ /phyag rgya ni ston pa'i rang bzhin yin te/ chos kyi de kho na nyid kyi rtags su gyur pa'i phyir ro//'di skad bstan te/ rigs kyi bu dag rdo rje'i snying po 'chad pa bzhin du da ltar gyi tshe shod cig ces sangs rgyas kyis gnang ba yin no/ /'chad par gyur pa la yang de'i zhal gzigs nas snyan gyis gtong ba'i phyir de bzhin gshegs pas rnam par mkhyen pa yin no//bshad zin pa yod pa yang dgra bcom pa thams cad kyis khas blangs pa yin no/ /dgra bcom pa smos pa ni so so'i skye bo dang / byang chub sems dpa' la sogs pa yang mtshon par byed pa yin no/ /'di gzhag par bya ste zhes bya ba ni 'jig rten du'o/ /'di sangs rgyas kyis gnang ba 'ba' zhig tu ma zad kyi/'on kyang sangs rgyas thams cad mnyam pa nyid chags pa med par yongs su bstan pa 'di la yang zhes bya ba la mnyam pa kho na mnyam pa nyid de 'dra zhes bya ba'i don to/ /chags pa med pa ni stong pa nyid de/ de yongs su bstan to/ /gang zhe na chos thams cad kyi bar du bstan to//bar gyi sgras ma lus par bstan te/ sbyin pa'i pha rol tu phyin pa la sogs pa gzung ngo / /skabs nas 'phros pa yongs su bstan nas/ yang bsngags pa yongs su ston pa ni 'jam dpal byang chub sems dpa'i theg pa'i rigs kyi bu'am rigs kyi bu mo phyag rgya 'dis btab pa ni zhes bya ba la sogs pa gsungs te/phyag rgyas btab pa ni rtags btab pa ste/ de klog pa dang bsgom pa la brtson pa'i phyir ro/ /ngan song du 'gro ba'i skal ba can ma yin pa ni mi rigs pa'o/ /nyan thos dang rang sangs rgyas su 'gro ba'i skal ba can ma yin pa ni thog mar de'i bsam pas gnas pa ma yin no//'jug pa'i skal ba can ma yin pa ni bsam pa gnas su zin kyang / phyis der 'jug pa'i brtson pa dang / sbyor bar mi byed pa'o/ /de dag gi rna lam du grag par 'gyur ba ni rna ba'i spyod yul du 'gyur ba'o/ /kau shi ka de de bzhin no zhes bya ba ni rjes su gnang ba'i sbyin pa ste/de dag la lha de dag gis bstan pa yin no zhes bya ba'i tha tshig go/ /'di ltar de ltar lha de dag gis byin gyis brlabs pa de dag la sangs rgyas kyi chos thams cad 'grub par blta ste/ nye bar gyur pa'i phyir de ltar lha rnams kyis yongs su bzung ba yin no/ /de dag bla na med pa yang dag par rdzogs pa'i byang chub tu yang nges par shes par bya'o zhes bya ba 'di blta bar bya'o zhes bya ba'i don yin no//'di byin gyis brlab tu gsol/ bde bar gshegs pa byin gyis brlab tu gsol zhes bya ba ni 'di legs par bshad pa yin no zhes de bzhin du khas len pa ste/ ma 'ongs pa'i dus na bdud dang mu stegs la sogs pas shin tu ji ltar yang skabs rnyed par mi 'gyur ro zhes bstan pa'i phyir lan gnyis su gsungs so/ /yang na ji ltar de dag gis rang gi don phun sum tshogs pa ring po mi thogs par 'grub par 'gyur ba de ltar byin gyis brlab tu gsol/ ji ltar gzhan gyi don phun sum tshogs pa bsgrub pa'i phyir/ /de dag myur du 'grub par 'gyur ba de ltar yang byin gyis brlab tu gsol zhes bya ba yin no/ /bcom ldan 'das kyis 'dzum pa mdzad pa ni cung zad bzhad pa'o/ /'jig rten gyi khams 'di snang ba 'od chen pos rgyas par khyab par gyur to//bcom ldan 'das 'di ni de bzhin gshegs pas shes rab kyi pha rol tu phyin pa bstan pa 'di byin gyis brlabs pa'i snga ltas lags so zhes bya ba ni tshig zur du klag pa'am/ ci lags zhes bya ba khong nas dbyung ngo / /'jam dpal 'di dag ni shes rab kyi pha rol tu phyin pa bstan pa 'di byin gyis brlabs pa'i snga ltas rnams te zhes bya ba ni de de bzhin no zhes zhal gyis bzhes pa'o//phyag rgya 'dis btab pa zhes gsungs na de la ji ltar btab pa mi shes pas de'i phyir/ 'jam dpal gang dag chos gang yang med pa yin no zhes mi spang zhing mi zlog la bsngags par yang mi byed pa de dang de dag ni phyag rgya 'dis btab par shes par bya'o zhes gsungs te/de dang de dag ces lan gnyis smos pa ni nges par gzung ba 'am rab tu dgyes pa yin no/ de ci'i phyir zhe na zhes bya ba ni kun tu brtags pa dang / gzhan gyi dbang nyid yul de la 'gag pa dang /khas blangs pa med par ji ltar 'jug ces sems pa'o/ /lan ni 'jam dpal dmigs pa yod na spong bar byed pa dang bsngags par byed par 'gyur ba'i phyir ro zhes bya ba yin no/ /bsam pa ni 'di lta ste sgrub pa dang 'gog pa thams cad ni dmigs pa sngon du song ba can yin par de dag ji ltar sngar bstan pa yin te/gcig la dmigs pa dang / mi dmigs pa med pa'i phyir ro/ /'di mi dmigs pa yin no zhes blos mi dmigs pa ni rtog pa las byung ba yin no/ /de yang kun rdzob kho na yin par tha snyad gdags par rigs kyi/ yang dag pa ni ma yin te dmigs par bya ba rgyas par bkag zin pa'i phyir ro//gtan tshigs de bas na spong bar yang mi byed la/ bsngags par yang mi byed do/ /'jam dpal de lta bas na gang dag phyag rgya 'dis btab pa de dag gi ched du ngas phyag rgya 'di bzhag ste zhes bya ba ni mjug sdud pa yin no/ /de dag gi ched du zhes bya ba ni/ de'i don dang de'i phyir zhes bya ba'i bar du yin no/ /bcom ldan 'das ni sems can thams cad la ste'u dang tsan dan la thugs mnyam pa lta bu yin na/ ci'i phyir nyi tshe ba'i chos 'chad par brtson pa mdzad ce na/ 'di ltar bdag nyid chen po de dag ni chos gang la yang ston pa med do zhes gsungs so/ / ci'i phyir zhe na/ 'di ltar rnam par rtog pa med do zhes bya ba yin te/ chos gang la yang zhes bya bar snyegs so/ /tshig ni rnam par rtog pa sngon du song ba yin no/ /rnam par rtog pa med par 'byung bar nus pa ma yin no zhes bya ba'i tha tshig go/ /de ci'i phyir zhe na zhes bya ba ni ci nus pa dang bral ba'i phyir rnam par mi rtog cing mi 'chad pa yin nam/'on te gtan tshigs gzhan zhig yod/ /gal te rnam par rtog pa dang po ltar yin na ni de'i tshe de dag gzhan las bye brag cung zad kyang yod pa ma yin pas ci'i phyir de dag gi ched du gzhag go zhes bya/ phyogs gnyis pa ltar na ni gtan tshigs gzhan bstan pa med do zhe na/'dir rnam par rtog pa gnyis pa la dgongs pa yin no zhes dgongs nas gtan tshigs gzhan bstan pa'i ched du/ 'jam dpal chos thams cad don dam par ma skyes pa'i phyir ro zhes gsungs te/ brjod par bya ba dang dmigs par bya ba rnam par brtags pa'i ngo bo 'chad pa thams cad ma skyes pa yin no zhes bstan zin to//de bas na de sgom pa la dga' ba rnams 'chad par mi byed/ rnam par rtog par mi byed do/ /'on kyang skyes bu chen po bdag shes pa de dag ni sman gyi ljon shing lta bu'i chos 'chad pa thun mong ma yin pa'i dgongs pas bsgrub pa dag gis kyang de dag la phan pa 'byung ba kho na yin pas de dag gi ched du gzhag go zhes bya'o//stong pa nyid mchog gi dbang du byas te/ de dag ni chos gang yang spong ba ma yin no zhes bya ba la sogs pa 'di dag thams cad brjod pa yin no/ /klog pa la sogs pa tsam 'jug pa yang phyag rgya nyid yin no//bstan ma thag pa'i mdo sde rin po che mtha' dag gi de kho na nyid bcom ldan 'das thugs dgyes shing de skad ces bka' stsal to/ /ji lta bu zhe na dgyes shing thugs dgyes pa'o/ /gzhan dag gis kyang 'dir bshad pa cung zad yod mod kyi/ de ni bcom ldan 'das kyi dbang gis yin pa'i phyir ro//'jam dpal gzhon nur gyur pa dang zhes bya ba la/ dang gi sgra ni phyi ma dag la yang ltos nas de bsdu bar bya ba'i phyir ro/ /yang na snga ma la ltos pa kho na yin te/ bcom ldan 'das thugs dgyes shing de skad ces bka' stsal pa/ de bzhin du 'jam dpal gzhon nur gyur pa yang thugs dgyes shing de skad ces gsungs so zhes sbyar ro//byang chub sems dpa' sems dpa' chen po de dag dang zhes bya ba ni 'phags pa ma pham pa la sogs pa yang thugs dgyes pa'i tshig spros te sbyar bar bya'o/ /nyan thos chen po de dag dang zhes bya ba ni 'phags pa shA ri'i bu la sogs pa'o//lha dang mi dang / lha ma yin dang / dri za rnams dang thabs cig pas lha dang mi dang lha ma yin dang dri zar bcas pa'i 'jig rten zhes bya'o/ /de dag ma gtogs par 'jig rten gzhan su zhig yod na de dag dang bcas pa zhes bya zhe na/ spyi dang spyi can la ltos nas de skad bshad pa'i phyir 'di la nyes pa med do//yang na mi'am ci dang / lto 'phye chen po dang / nam mkha' lding la sogs pa yang yin pas de la brgal du med do/ /de dag thams cad kyang mchog tu dga' ba shin tu skyes nas/ bcom ldan 'das kyis legs par gsungs pa'i chos kyi dbang phyug dam pa thugs rje'i rang bzhin yin gyi rdul phran gyis bsgrubs pa'i sku ma yin pa'i phyir te/de lta bu de la mngon par bstod do/ /ci'i phyir bcom ldan 'das thugs dgyes shing 'jam pa'i dbyangs la sogs pa yang thugs rangs pa skyes she na bshad pa/ bcom ldan 'das kyis dam pa'i chos zab mo thos pas gzhan la phan thogs par 'byung bar gzigs pa dang /de las gzhan dag gis kyang shin tu mchog tu gyur pa'i rang la phan pa dang / gzhan la phan pa rab tu dga' ba'i rgyu yod pa'i phyir/ thugs rab tu dga' ba skyes so zhes bya'o / /'di dag thams cad ni sdud pa po sa 'jig rten gyi tha snyad la ltos nas tshig tu bcom ldan 'das dgyes shing de skad bka' stsal nas zhes bya ba yin no//'phags pa shes rab kyi pha rol tu phyin pa bdun brgya pa rgya cher bshad pa/ slob dpon ka ma la shI las mdzad pa rdzogs so// //rgya gar gyi mkhan po bi ma la mi tra dang /