CLOSE WINDOW

D3813
བོད་ཡིག

zhu chen gyi lo tsA ba ban+de rin chen bzang pos bsgyur cing zhus te gtan la phab pa//[ ]@##/ /rgya gar skad du/ b+ha ga ba ti pradz+nyA pA ra mi ta na ba sh+lau ka paN+Di ar+tha TI ka/ bod skad du/ bcom ldan 'das ma shes rab kyi pha rol tu phyin pa'i don bsdus pa'i tshigs su bcad pa dgu pa'i rgya cher bshad pa/bcom ldan 'das ngag gi dbang phyug la phyag 'tshal lo/ /shes rab pha rol phyin pa rgya mtsho ste/ /dge ba rin chen 'byung gnas rang nyid yin/ /pha rol phyin pa dag ni thams cad kyang / /de ru de yi bdag nyid dag gis gnas//spros pa med cing snang ba med/ /rtog pa med cing skyon dang bral/ /dngos po med cing shin tu phra/ /blo dang sgra ni rnam spangs pa'o/ /shes rab pha rol phyin yum ni/ /sangs rgyas thams cad bskyed pa'i mchog /rjes su mi dmigs gsum gyi tshul/ / kun mkhyen ye shes rgyu can gyi/ /shes rab pha rol phyin pa ni/ /gang zhig yang dag bsgom 'dod pas/ /des ni tshigs bcad dgu yi don/ /mdor bsdus pa ni bsam par bya/ zhes bya ba la/ shes rab ni gang thos pa dang / bsam pa dang / bsgom pa'i mtshan nyid can no//pha rol tu phyin pa ni rab tu mthar thug par 'gro bas rtog pa thams cad dang bral ba'o zhes bya ba'i bar du ste/ de ni shes rab kyi pha rol tu phyin pa zhes bya ba la/ de gang zhig yang dag bsgom 'dod pas zhes bya ba ni phyin ci ma log pa'i rnam pas yid la byed pas mngon par dga' ba gang yin pa des ni tshigs su bcad pa dgu po 'og nas bshad pa'i don zhes pa don gyi sgo nas bsam par bya zhing yid la bya'o//ci rgyas par ram zhe na/ de ma yin par bstan pa'i phyir mdor bsdus pa ni zhes bya ba smos te/ nyung du bsdus pa'o//tshigs su bcad pa dgu po de nyid rim gyis bstan par bya ba'i phyir/ las kyi mthu las kun byung ba'i/ /skye mched drug gi mtshan nyid can/ /yang srid ces byar grags pa ni/ /de ni mig yor dag dang mtshungs/ /zhes bya ba smos te/ las ni dge ba dang mi dge ba rnams so//las de las byung ba ni las kyi mthu las zhes bya ste/ las bdag por gyur pa'o/ /de las byung ba ni yang dag par skyes pa ste/ de gang zhe na/ skye mched drug gi mtshan nyid can/ /zhes bya ba ste/ skye ba ni rnam par shes pa'o/ /de rgyas par byed pas na skye mched de/nang gi bdag nyid can mig dang rna ba dang / sna dang lce dang lus dang yid dang drug ni skye mched drug gi mtshan nyid can ni mtshan ma ste/ las kyi mthu las byung ba'i skye mched drug gi mtshan nyid can no/ /de ji lta bu zhe na/ yang srid ces bya ste/yang skye bar byed pa'i chos can zhes bya ba'i bar du'o/ /de ltar grags pa ni rab tu brjod cing nges pa zhes bya ba'i bar du'o/ /yang de nyid kyi don dam pa'i ngo bo nyid gang yin pa bstan par bya ba'i phyir/ de ni mig yor dag dang mtshungs/ /zhes bya ba smos te/ mig yor nyid 'dra zhing mtshungs pa gang yin pa de ni mig yor dang mtshungs pa ste/byed pa po las dang bya ba rnams dang bral ba'i phyir stong pa'o zhes bya ba'i bar du'o/ /phyi rol gyi gzugs la sogs pa'i skye mched gang yin pa'i ngo bo nyid de rim bzhin du bstan par bya ba'i phyir/ ji ltar sprul pa'i grong khyer la//sprul pa rnam par lta ba bzhin/ /las rnams kyis sprul 'gro ba yis/ /gzugs rnams de bzhin mthong bar 'gyur/ /zhes bya ba smos te/ ji ltar sprul pa'i grong khyer de la/ de las gzhan pa'i sprul pa rnam par lta bar byed pa na/ de gnyis yang yod pa ma yin te/ yang dag pa ma yin pa las kun du 'byung ba'i phyir/ blta bar bya ba dang lta ba po gnyi ga yang de dang 'dra ste/ gzugs rnams de bzhin du phyi rol du snang bar gyur pa na las kyis sprul par 'gro bas khams gsum por mthong bar 'gyur ro zhes bya bar shes par bya ste/sprul pa nyid yin par khyad par med de zhes bya bar dgongs so/ /sgra rnams ni brag ca dang mtshungs so zhes bstan par bya ba'i phyir/ chos rnams ston pa'i sgra dang ni/ /thos pa'i spyod yul gang ci'ang rung / /mnyan bya thos pa byung gyur pa/ /thams cad brag ca lta bu yin//zhes bya ba smos te/ chos rnams ston pa zhes bya ba ni ston pa po'i dbang du byas pa las byung zhing de las grag pa'i sgra rnams so/ /thos pa'i spyod yul ni thos pa'i yul du gyur pa rnams so/ /gang ci'ang rung zhes bya ba ni/ gang de dang rigs mthun pa rnams kyang ngo //mnyan bya thos pa byung gyur pa/ /zhes pa ni/ mnyan par bya ba thos shing nye bar dmigs pa gang ci yang rung ba'i sgra rnams te/ gang las thos par gyur pa yod pa rnams so/ /de bas na khyad par med par bstan par bya ba'i phyir/ thams cad ces bya ba smos so//brag ca lta bu yin zhes bya ba ni gang 'di thams cad kyang brag ca dang mtshungs par 'byung ba yin pa'i phyir ro/ /skyes bu'i rmi lam dang 'dra bar bstan pa'i phyir/ yul la chags pas snom pa dang / /myang dang de bzhin reg pa rnams/ /dmigs su yod pa ma yin te//'di dag thams cad rmi lam 'dra/ /zhes bya ba smos te/ yul la chags pas zhes bya ba ni gang yul 'dod pa de rnams kyis zhes re re la'ang sbyar bar bya'o/ /snom pa dang zhes bya ba ni sna'i rnam par shes pas yul du byas pa ste/ dri'i rdzas rnams so/ / myang zhes bya ba ni ro zhes bya ba rnams so/ /de bzhin reg pa rnams zhes bya ba ni reg bya rnams te/ de ltar yul la chags pa rnams kyis gang zhig spyod pa'i dri dang ro dang reg bya zhes bya bar grags pa de rnams ni dmigs su yod pa ma yin te/ ci'i phyir zhe na/ 'di dag thams cad rmi lam 'dra//zhes bya ba smos te/ de rnams ni rmi lam dang mtshungs shing khyad par med do zhes bya bar dgongs so/ /ci gal te/ mig la sogs pa nang gi skye mched rnams dang gzugs la sogs pa phyi'i skye mched rnams kyang med par gyur na de dang ldan pa'i bya ba dang spyod pa ji ltar snang zhes rtog pa bsal ba'i phyir/ji ltar sgyu ma'i 'khrul 'khor mi/ /bya ba tha dad byed pa ltar/ /lus kyi 'khrul 'khor bdag med 'di/ /de bzhin bya ba byed par 'gyur/ /zhes bya ba smos te/ sgyu ma nyid kyi 'khrul 'khor gyi gzugs brnyan gyi mi gang yin pa de ni sgyu ma'i 'khrul 'khor gyi mi'o//bya ba tha dad byed pa ltar/ /zhes bya ba ni ji ltar de la bya ba dang spyod pa yod pa ma yin yang de la lus kyi spyod pa dang bya ba 'gro ba la sogs pa'i mtshan nyid can tha dad cing sna tshogs pa rnams byed par 'gyur ro//de bzhin du/ lus kyi 'khrul 'khor bdag med 'di/ /zhes bya ba ste/ lus nyid 'khrul 'khor lta bu yin pas na lus kyi 'khrul 'khor zhes bya'o/ /gang gi phyir bdag dang bral bas na bdag med pa zhes bya ste/ de ltar bdag med pas na 'di la ni don dam par bya ba dang ldan pa 'ga' yang med do zhes bya ba'i bar du'o//de bzhin bya ba byed par 'gyur/ /zhes bya ba ni de ltar bya ba dang ldan pa'i bdag med kyang sgyu ma'i 'khrul 'khor gyi mi'i gzugs brnyan bya ba sna tshogs byed pa de bzhin du 'dir yang de dang khyad par shes par bya'o/ / smig rgyu dang mtshungs par yang bstan par bya ba'i phyir/ dmigs pa sna tshogs gang dang gang / /skad cig re re 'byung 'gyur ba/ /mthong na 'jig cing mtshan nyid bral/ /'di ni smig rgyu dag dang mtshungs/ /zhes bya ba smos te/ dmigs pa rnam pa sna tshogs gang yin pa de ni nye bar dbye bas yongs su brtags pa yin la/gang dang gang zhes bya ba ni skad cig ma'i mtshan nyid can no/ /skad cig re re 'byung 'gyur ba/ /zhes bya ba ni skad cig re re zhing skye bar 'gyur ba'am/ mtshan nyid so sor 'byung bar 'gyur bas na/ skad cig re re 'byung 'gyur ba//zhes bya ba ste/ skad cig ma nyid do zhes bya ba'i bar du'o/ /de yang don dam par ngo bo nyid ji lta bu zhe na/ mthong na 'jig cing mtshan nyid bral/ /'di ni smig rgyu dag dang mtshungs/ /zhes bya ba smos te/ ji ltar sa'i 'gyur ba dang / nyi ma'i 'od zer phrad pa las smig rgyu'i tshogs snang ba dang po mthong ba yang phyis 'jig par 'gyur ba de bzhin du nye bar dmigs pa'i yul rnams la rnam par shes pa 'byung ba ni dngos po med cing mtshan nyid dang bral bas sngon dang phyi ma mi 'phrad pa'i ngo bo nyid yin pa'i phyir/mi 'dra ba'i rang bzhin can yin pa las byis par gyur pas mtha' gcig tu rtog cing 'dug la/kun rdzob kyi bden par rtogs pa'i gzung ba dang 'dzin pa'i cha gnyis su snang ba de yang gang stong zhing rang bzhin gyis 'od gsal ba gzod ma nyid nas ma skyes pa'i sems kyi chos nyid du bstan pa yin no//gzugs brnyan dang 'dra ba nyid du bstan par bya ba'i phyir/ gzung bya gzugs brnyan lta bu ste/ /thog ma med pa'i sems las byung / /rnam par shes pa'ang de 'dra ste/ /phan tshun gzugs brnyan dag dang mtshungs/ /zhes bya ba smos te/ gzung bya zhes bya ba ni kha phyir bltas pa goms pa'i bag chags kyi dbang du byas pa ste/gzung ba nyid du mngon par zhen pas/ gnyis su med na yang ngo bo nyid gnyis su so sor snang bar gyur pa'o/ /gzugs brnyan lta bu ste zhes bya ba ni gzugs brnyan dang mtshungs pa gang yin pa de la ni gzugs brnyan lta bu zhes bya ba ste/me long gi dkyil 'khor gyi nang du chud pa'i bzhin la sogs pa dang 'dra ba'o/ /thog ma zhes bya ba ni thog ma med pa'i dus kyi sems kyi rnam par 'phrul pa las byung ba'o/ /de gang zhe na/ sems las byung zhes bya ba ste/ sems nyid las byung bas na sems las byung ba zhes bya ba yin te/de tsam du rjes su 'brel ba'i phyi'i dngos po la ltos pa med la zhes bya ba'i bar du'o/ /de bas na de ni gzugs brnyan lta bu ste/ spyi dang khyad par gyi dus nyid kyis rnam par brtags na yod pa ma yin no/ /'ba' zhig tu ma zad kyi rnam par shes pa'ang de dang 'dra ste zhes bya ba ni/rnam pa de nyid dang cha 'dra ba'i shes pa gang yin pa de la rnam par shes pa'ang de 'dra ste zhes bya'o/ /'ang zhes bya ba ni bsdu ba ste/ 'dzin pa por yod pa'ang de dang 'dra ste/ gzung bar bya ba dang bral na 'dzin pa po 'ang yod pa ma yin no bya bar dgongs te/'brel pa'i sgras ni phan tshun gcig la gcig ltos pa yin pa'i phyir/ phan tshun gzugs brnyan dag dang mtshungs/ /zhes bya ba smos te/ gzung bar bya ba dang 'dzin po ni gcig la gcig ltos par bya ba yin te/ de gnyis kar dmigs pa'i phan tshun rjes su 'brel pa'i ngo bo nyid ni rang bzhin gyis 'od gsal ba'i sems kyi chos nyid yin no zhes bya bar dgongs so//rang bzhin gyis 'od gsal ba'i sems de nyid kyang gzung ba dang 'dzin pa dang bral zhing / 'dod chags la sogs pa dang ma rig pa'i dri ma spangs te/rnam par dag par gyur pa ni yod do zhes mngon par zhen pa spangs par bya ba'i don du chu zla dang mtshungs par bstan par bya ba'i phyir/ /bsgom pa dang ba'i rgyud la ni/ /ye shes zla ba gang byung ba/ /mngon sum yod pa ma yin te/ /de ni chu zla dag dang mtshungs/ / zhes bya ba smos te/ bsgom pa ni sems rtse gcig pa'i mtshan nyid can te/ de gang la yod pa de ni bsgom pa'o/ /dang ba ni bag chags kyi rnyog pa dang bral ba'o/ /rgyud la zhes bya ba ni lus dang ngag dang yid kyi rgyud de/ rten cing 'brel par 'byung ba lugs las bzlog cing / yang dag pa'i ye shes skyes pa'i bdag nyid can la'o/ /ye shes zla ba gang byung ba/ /zhes bya ba ni yang dag pa'i ye shes ni ma rig pa'i mun pa sel cing nyon mongs pa'i gdung ba zhi bar byed la/ bag chags kyi dri mas ma gos pas zla ba dang chos mthun pa'i phyir/ ye shes zla ba zhes bya la/de rgyud dag pa gang las byung zhing shar ba de yang dngos por gzung du med pa'i phyir/ mngon sum yod pa ma yin te/ /zhes bya ste/ de ltar snang du zin kyang gang gi phyir mngon sum du dmigs shing gzung du med do/ /ci'i phyir zhe na/ stong pa nyid kyi chos rnams las stong pa nyid kyi chos rnams kho na 'byung ba'i phyir ro//de bas na gzod ma nyid nas ma skyes pa'i phyir/ de ni chu zla dag dang mtshungs/ /zhes bya ba ste/ 'di ltar chos kyi dbyings kyi ngo bo nyid yin pas na dngos po la mngon par zhen pa mngon sum du dmigs su yod pa ma yin no//de ltar de kho na nyid yin pa'i phyir chos thams cad dmigs su med pas mngon sum du bya bar mi nus she na/ mngon sum du bya ba'i thabs chos thams cad nam mkha' dang mnyam par bstan par bya ba'i phyir/ rnal 'byor pa yi ye shes gang / /de yang nam mkha'i mtshan nyid de//de bas shes dang shes bya dag /thams cad nam mkha'i mtshan nyid do/ /zhes bya ba smos te/ 'di ltar zhi gnas te/ sems rtse gcig pa'i mtshan nyid dang / lhag mthong ste/ yang dag pa'i shes rab kyi mtshan nyid zung du 'brel par 'jug pa la ni rnal 'byor ces bya la de gang la yod pa de la ni rnal 'byor pa zhes bya ste/de rnams kyi ye shes gang yin pa de dag kyang chos thams cad nam mkha'i mtshan nyid yin pa'i phyir/ 'khor ba dang mya ngan las 'das pa la mi gnas pa'i ngo bo nyid thabs dang shes rab gnyis su med par gyur pa'i de bzhin nyid kyi ye shes de ni de bzhin gshegs pa'i bdag nyid can te/de yang phung po dang khams dang skye mched la sogs pa spros pa'i bdag nyid can ma yin te/ gang de bzhin nyid kyi bdag nyid can chos kyi dbyings mi g.yo ba'i ngo bo nyid kyis gzod ma nyid nas ma skyes pa'i rang bzhin te/ 'gro ba dang 'ong ba la sogs pa'i ngo bo nyid dang bral ba'i phyir dngos po med pa'o zhes kyang brjod par nus pa ma yin te/dgag par byed pa med pa'i phyir ro/ /ma skyes pa'i ngo bo nyid du yang yod pa ma yin te/ de bas na/ de yang nam mkha'i mtshan nyid de/ /zhes bya ba smos te/ spros pa thams cad dang bral ba'i phyir/nam mkha' dang 'dra bas na nam mkha' ste/ de nyid kyi mtshan nyid can gyi mtshan ma gang yin pa de nam mkha'i mtshan nyid de/ gang gi phyir rgyu des na chos thams cad sgrib pa med pa'i ngo bo nyid yin pa'i phyir ro/ /gtan tshigs de bas na shes pa ste/ khams gsum par zhugs pa'i sems dang /sems las byung ba rnams kyang nam mkha'i mtshan nyid yin la/ shes bya dag ste/ des mthong ba'i yul ma rig pa'i rjes su zhugs pas snod dang bcud kyi 'jig rten gyi mtshan nyid can sems can rnams kyi phung po khams dang skye mched la sogs pa'i ngo bo nyid ni shes bya ste/shes pas yul du byas pas shes bya nyid tsam du rjes su 'brel cing khong du chud par bya ba'i shes bya gang yin pa de ni yul nyid du yongs su brtags pas shes bya zhes bya la/ thams cad mkhyen pa'i ye shes la ni/ de gnyi ga yang nam mkha' dang mnyam mo//de bas na de'i khyab pa nyid bstan pa ni thams cad ces bya ba ste/ phyogs gcig tsam ma yin te lhag ma med par ro/ /gang 'di ltar nyan thos rnams kyis gang zag tsam la bdag med kyi phung po la sogs pa yod pa dang / de rnams kyi thar pa'i mtshan nyid du phung po lhag ma dang bcas pa'i mya ngan las 'das par 'dod pa dang /gzhan du na lhag ma med pa'i mya ngan las 'das par 'dod cing smra la/ bcom ldan 'das kyis ni de dag thams cad nas thams cad du dngos po thams cad stong pa nyid du gsungs kyi/ mu stegs pa lta bu'i phyogs gcig pa'i stong pa nyid ni ma yin no//de bas na de'i don ni 'di yin te/ 'gro ba gang ci'ang rung nam mkha'i mtshan nyid du ma gyur pa ni 'ga' yang med de/ de bas na/ thams cad nam mkha'i mtshan nyid do/ /zhes bshad do/ /de ltar tshigs su bcad pa dgus de kho na nyid bstan nas/'dir dngos po med pas thob pa'i 'bras bu med par dogs pa bsal cing byang chub sems dpa'i rigs can rnams kyi 'bras bu nye bar bstan pa'i phyir/ de ltar de bzhin nyid sems pa/ /dngos po kun la mi gnas te/ /byang chub smon pa'i sems kyis ni//ye shes de ltar 'byung bar 'gyur/ /zhes bya ba smos pa yin no/ /bcom ldan 'das ma shes rab kyi pha rol tu phyin pa'i don bsdus pa tshigs su bcad pa dgu pa'i rgya cher bshad pa slob dpon chen po kam pa la'i zhal snga nas mdzad pa rdzogs so// //