CLOSE WINDOW

D3801
བོད་ཡིག

/ //paN+Di ta chen po de nyid dang / gnubs lo tsA ba dge slong byams pa'i dpal gyis bsgyur ba'o/ /[ ]@##/ /rgya gar skad du/ a b+hi sa ma yA laM kA ra kA ri kA br-it+ti shud+d+ha ma tI nA ma/ bod skad du/ mngon par rtogs pa'i rgyan gyi tshig le'ur byas pa'i 'grel pa dag ldan zhes bya ba/ 'phags pa 'jam dpal gzhon nur gyur pa la phyag 'tshal lo/ /lo ma me tog dang ldan pa'i/ /yongs 'du'i shing bzhin mtshan mchog gis/ /bsod nams sku brgyan rnam par 'byes/ / yan lag brgyan pa rgyal gyur cig /rgyal ba'i yum gyi mngon rtogs rgyan/ /'phags pa byams pas mdzad pa yin/ /de yi 'grel pa dag ldan 'di/ /rin chen 'byung gnas bdag gis byas/ /grol sde dag gis rgyal yum gyi/ /don ni ma lus ma bkrol zhes/ /rab tu byed las bdag gis ni//rna bar gtam brjod bzhin du shes/ /gang phyir don nyams de la ni/ /bdag nyid nges par blo dman yang / /mgon pos byin gyis brlabs pas na/ /'di don bstan phyir brtsams pa yin/ /bcom ldan 'das ma shes rab kyi pha rol tu phyin pa rnam par dbye bar bzhed nas bla ma dam pa'i yang bla mar gyur pa de nyid la dang por/nyan thos zhi ba tshol rnams kun shes nyid kyis nyer zhir 'khrid mdzad gang yin dang / /'gro la phan par byed rnams lam shes nyid kyis 'jig rten don sgrub mdzad pa gang / /gang dang yang dag ldan pas thub rnams sna tshogs 'di dag rnam pa kun mkhyen pa//sangs rgyas nyan thos byang chub sems dpa'i tshogs dang ldan yum de la phyag 'tshal lo/ /zhes phyag 'tshal bar mdzad do/ /nyan thos zhes smos pas ni 'dir rang sangs rgyas kyang gzung ste/ theg pa de gnyis la khyad par cung zad las med pa'i phyir ro//shes rab kyi pha rol tu phyin pa'i dbye ba ni rnam pa gsum yin te/ des na thams cad mkhyen pa'i dbye bas nyan thos zhi ba tshol rnams thar pa thob par byed pa dang / lam shes pa'i dbye bas 'gro la phan par byed rnams te byang chub sems dpa' rnams kyi mdzad par 'os pa ni 'jig rten gyi don te/gang 'jig rten gyi don sgrub par byed pa'o/ /lhag mar gyur pa dang don gyis rnam pa thams cad mkhyen pa'i dbye bas/ gang dang yang dag ldan pas thub pa ste sangs rgyas so/ /sna tshogs 'di dag rnam pa kun mkhyen pa zhes bya ba la/rnam pa kun ni chos 'di dag rnam pa kun te/ de kun nas mkhyen pa'i'o/ /'di'i yum ni shes rab kyi pha rol tu phyin pa de la phyag 'tshal lo/ /'di ji ltar de rnams kyi yum du 'gyur zhe na/ ji skad bshad pa'i don chen po gsum thob pa'i phyir te/ gang yang 'jig rten gyi phan pa chen po 'dogs pa de ni 'jig rten nam zhes bya'o//gzhan yang ji srid du de dag gi zag pa med pa'i phung po'i bdag nyid ma bskyed cing ma gsos pa de srid du de dag gis ji skad du bshad pa'i don chen po rnams thob par mi nus so/ /de'i phyir don gyis na skyed pa dang gso ba yin par shes par bya'o//de'i phyir yang 'di yum yin no/ /gang gi yum yin zhe na/ nyan thos la sogs pa'i tshogs dang bcas pa'i sangs rgyas kyi'o/ /rigs kyi dbang du byas na gcig gi tshig yin te/ nyan thos la sogs pa'i tshogs dang ldan pa'i sangs rgyas rnams kyi zhes bya ba'i don to//des na 'dir thub rnams zhes bstan to/ /de dag gi tshogs dang ldan pa'i sangs rgyas kyi yum zhes bya ba'i tshig gis 'di de dag gi yang yum yin par shes par bya'o/ /gal te de ltar na bu dang ldan pa'i chung ma de ni bu'i yang chung mar 'gyur ro zhe na/brjod par 'dod pa'i bye brag gis de'i skyon med de/ 'dir ni sangs rgyas tshogs dang ldan zhes bya ba'i ldan pa'i don ni 'dir lhan cig pa la brjod par 'dod de/ nyan thos la sogs pa'i tshogs dang ldan pa'i sangs rgyas rnams kyi zhes bya ba'i don to//de la nyan thos dang byang chub sems dpa' ni 'jig rten gyi bla ma'o/ /sangs rgyas ni bla ma dam pa'o/ /de dag gi yang de ni yum mo/ /des na de ni bla ma dam pa'i yang bla ma'o/ /des na de la phyag 'tshal bar byed do/ /'o na mdo kun las rgya cher bshad na de yang 'di rtsom pa la dgos pa ci yod ce na/rnam pa thams cad mkhyen nyid lam/ /ston pas 'di las bshad pa gang / /gzhan gyis myong ba ma yin te/ /blo dang ldan pas rtogs 'gyur zhes/ /chos spyod bcu yi bdag nyid ni/ /mdo don dran pa las bzhag nas/ / bde blag tu ni rtogs 'gyur ba/ /zhes pa rtsom pa'i dgos pa yin/ /rnam pa thams cad mkhyen pa nyid ni sangs rgyas nyid de/ de yang skyes bu dam pa ste/ ji skad du/ sgrib pa kun gyi dri med pa/ /rnam pa thams cad mkhyen nyid thob/ /rin chen snod ni phye ba ltar/ / sangs rgyas nyid ni yang dag bstan/ /zhes gsungs pa lta bu ste/ de ji ltar lam du 'gyur/ /brtsal bar bya bas lam yin gyi/ tshol bar byed pas na lam ni ma yin no/ /ston pas 'di las bshad pa gang / /zhes bya ba la/ gang 'di las zhes bya ba ni mdo sde mtshon par byed pas na mdo'o//'dir blo ldan ni byang chub sems dpa'o/ /de la rtogs pa ni mngon sum du byed pa ste thob pa mngon sum du byed pa'o/ /bstan bcos 'di la gsal ba nyid du shes pa yin no zhes dgongs so/ /de ji lta bu zhe na/ myong ba ma yin pa ni ma rtogs pa'o/ /gzhan zhes bya ba ni byang chub sems dpa' ma yin pa'o//'dis ni rtsom pa'i gtso bo'i dgos pa bstan te/ mdo 'di'i don bstan bcos 'di las nges par bzung ste/ dran pa la bzhag pa'o/ /chos ni 'dir mdo nyid do/ /spyod pa ni rnam pa bcu ste/ ji skad du/ yi ge 'bri mchod sbyin pa dang //nyan dang klog dang len pa dang / /'chad pa dang ni kha ton dang / /de sems pa dang sgom pa ste/ /spyod pa 'di bcu'i bdag nyid ni/ /bsod nams phung po dpag tu med/ /ces bshad pa lta bu'o/ /de bde blag tu ni rtogs 'gyur ba zhes pa ni/ rjes su sgrubs shig pa'o//de ltar rtsom pa'i dgos pa gtso bo ma yin pa de ni thob pa'i thabs te rjes su sgrub pa'o/ /de nas mdo ma lus pa 'di las ci zhig ston ce na/ shes rab pha rol phyin pa ni/ /dngos po brgyad kyis yang dag bshad/ /dngos po dam pa shes pas na shes rab ste/ stong pa nyid la dmigs pa'i phyir ro//de yang yin la pha rol yang yin pas shes rab kyi pha rol lo/ /phyin pas ni 'gro ba ste pha rol tu phyin pa'o/ /gang gi pha rol zhe na/ 'phags pa byang chub sems dpa' ni rnam par rtog pa'i'o/ /de bzhin gshegs pa rnams kyi ni dag pa'i'o//sbyor ba'i lam la ci'i phyir pha rol tu phyin pa zhes bya zhe na/ de'i rgyu yin pa'i phyir ro/ /chos kyi sku mdzad pa dang bcas pa ci'i phyir shes rab kyi pha rol tu phyin pa zhes bya zhe na/ de'i 'bras bu nyid yin pa'i phyir ro/ /de yang dag bshad ces bya ba ni ma lus par bstan zhes bya ba'i don to//ma lus pa nyid gang zhe na/ dngos po brgyad de brgyad po de yang gang zhe na/ rnam kun mkhyen nyid lam shes nyid/ /de nas thams cad shes pa nyid/ /rnam mkhyen mngon rdzogs rtogs pa dang / /rtse mor phyin dang mthar gyis pa/ /skad cig gcig mngon rdzogs byang chub//chos kyi sku dang de rnam brgyad/ /rnam pa kun gyi mngon par rtogs pa ni yang dag par rdzogs par rtogs pa'o/ /rtogs pa la mngon du phyogs pa ni mngon par rdzogs par rtogs pa'o/ /mngon par rdzogs par rtogs pa yang de yin te/ i na'i khams kyi don ni rtogs pa'i don gyi phyir ro//rtse mor phyin pa ni rtse mo thob pa'o/ /mthar gyis ni rim gyis pa'o/ /de dang ldan pa ni rim gyis pa'o/ /mngon par rtogs pa zhes bya ba'i rjes su sbyar te/ rtse mo'i mngon par rtogs pa dang / mthar gyis pa'i mngon par rtogs pa zhes bya ba'i don to/ / skad cig gcig mngon rdzogs byang chub/ /chos kyi sku dang zhes bya ba la/ chos kyi sku ji ltar mngon par rtogs pa yin zhe na/ mngon par rtogs pa'i 'bras bu nyid yin pa'i phyir ro/ /de rnam brgyad ces bya ba ni dngos po brgyad po 'di dag go/ /mngon par rtogs pa brgyad po 'di ni go rims ji lta ba bzhin du le'u brgyad po 'di'i brjod par bya ba yin no//de la/ sems bskyed pa dang gdams ngag dang / /nges 'byed yan lag rnam bzhi dang / /sgrub pa yi ni rten gyur pa/ /chos kyi dbyings kyi rang bzhin dang / /dmigs pa dag dang ched dang ni/ /go cha 'jug pa'i bya ba dang //tshogs ni nges par 'byung bcas rnams/ /thub pa'i rnam kun mkhyen pa nyid/ /sems bskyed pa dang / gdams ngag dang / nges par 'byed pa'i cha dang mthun pa dang / sgrub pa'i rten dang / sgrub pa'i dmigs pa dang / sgrub pa'i ched du bya ba dang / go cha'i sgrub pa dang /'jug pa'i sgrub pa dang / tshogs kyi sgrub pa dang / nges par 'byung ba'i sgrub pa ste/ de rnams ni thub pa de bzhin gshegs pa'i rnam pa thams cad mkhyen pa nyid kyi dngos po bcu yin no/ /mog mog por byed la sogs dang / /slob ma bse ru'i lam gang dang / / 'di dang gzhan pa'i yon tan gyis/ /phan yon che ba mthong ba'i lam/ /byed pa dang ni mos pa dang / /bstod dang bkur dang bsngags pa dang / /bsngo dang rjes su yi rang ba/ /yid la byed pa bla med dag /sgrub dang shin tu dag pa zhes/ /bya ba 'di ni bsgom pa'i lam/ / byang chub sems dpa' mkhas rnams kyi/ /lam shes nyid ni de 'drar bshad/ /mog mog por byed pa la sogs pa dang / nyan thos kyi lam dang / rang sangs rgyas kyi lam dang / byang chub sems dpa'i mthong ba'i lam phan yon che ba dang / bsgom pa'i lam gyis byed pa dang /mos pa yid la byed pa dang / bstod pa dang / bkur ba dang / bsngags pa dang / bsngo ba yid la byed pa dang / rjes su yi rang ba yid la byed pa dang / mngon par sgrub pa dang / shin tu dag pa zhes bya ba dngos po bcu gcig ni lam shes pa nyid de/ de ni byang chub sems dpa' rnams kyi yin no//shes pas srid la mi gnas shing / /snying rjes zhi la mi gnas dang / /thabs ma yin pas ring ba dang / /thabs kyis ring ba ma yin nyid/ /mi mthun gnyen po'i phyogs dag dang / /sbyor dang de yi mnyam nyid dang / /nyan thos la sogs mthong ba'i lam//de 'drar kun shes nyid du 'dod/ /'khor ba la mi gnas pa dang / mya ngan las 'das pa la mi gnas pa dang / thabs ma yin pas ring ba dang / /thabs kyis ring ba ma yin pa dang / mi mthun pa'i phyogs dang / gnyen po'i phyogs dang / sbyor ba dang / de'i mnyam pa nyid dang /mthong ba'i lam ste dgu po de dag ni nyan thos la sogs pa'i kun shes pa nyid do/ /rnam par sbyor dang bcas rnams dang / /yon tan skyon ni mtshan nyid bcas/ /thar dang nges 'byed cha mthun dang / /slob pa phyir mi ldog pa'i tshogs/ /srid dang zhi ba mnyam nyid dang / /zhing dag bla na med pa yi//rnam kun mngon rdzogs rtogs pa ste/ /'di ni thabs mkhas bcas pa yin/ /rnam pa dang / sbyor ba dang / yon tan dang / skyon dang / mtshan nyid dang / thar pa'i cha dang mthun pa dang / nges par 'byed pa'i cha dang mthun pa dang / slob pa phyir mi ldog pa'i tshogs dang /srid pa dang zhi ba mnyam pa nyid dang / sangs rgyas kyi zhing yongs su dag pa dang / thabs la mkhas pa ste/ dngos po bcu gcig po de dag ni rnam pa kun mngon par rdzogs par rtogs pa'o/ /de yi rtags dang rnam 'phel dang / /brtan dang sems kun gnas pa dang / /mthong zhes bya dang bsgom pa zhes//bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dang ni/ /bar chad med pa'i ting nge 'dzin/ /log par sgrub dang bcas pa ni/ /rtse mo'i mngon rtogs/ rtags dang / rnam par 'phel ba dang /brtan pa dang / ting nge 'dzin dang / mthong ba'i lam la rtog pa rnam pa bzhi'i gnyen po dang / bsgom pa'i lam la rtog pa rnam pa bzhi'i gnyen po dang / bar chad med pa'i ting nge 'dzin dang / log par sgrub pa dag ste/ dngos po brgyad po de dag ni rtse mo'i mngon par rtogs pa'o//mthar gyis pa/ rnam gsum rnam bcu ni/ pha rol tu phyin pa drug dang / rjes su dran pa drug dang / dngos po med pa'i ngo bo nyid de/ de bas na chos bcu gsum po de dag ni mthar gyis pa'i mngon par rtogs pa'o/ /skad cig ma/ gcig gis mngon rdzogs byang chub pa/ / mtshan nyid kyis ni rnam pa bzhi/ /zhes bya ba ni chos thams cad zag pa med par skad cig ma gcig gis mngon par rtogs pa dang / chos thams cad dge bar skad cig ma gcig gis mngon par rtogs pa dang / chos thams cad mtshan nyid med par skad cig ma gcig gis mngon par rtogs pa dang /chos thams cad gnyis su med par skad cig ma gcig gis mngon par rtogs pa ste/ bzhi po de dag ni skad cig ma gcig gis mngon par rtogs pa'o/ /ngo bo nyid longs rdzogs bcas dang / /de bzhin sprul dang rnam gsum dag /chos sku mdzad par bcas pa ste//rnam pa bzhir ni yang dag brjod/ /ces bya ba ni ngo bo nyid kyi sku dang / longs spyod rdzogs pa'i sku dang / sprul pa'i sku dang / de'i mdzad pa ste/ dngos po bzhi po de dag ni chos kyi sku'o/ /de la dang po rnam pa thams cad mkhyen pa nyid bshad par bya ste/ de'i dang po sems bskyed pa'i dngos po zhes bya ba la/sems ni yid dang 'dod pa ste/ 'di ltar 'gro bar 'dod pa dang / 'gro ba'i yid dang / 'gro ba'i sems so zhes brjod do/ /de bskyed pa de yang gzhan gyi don du bskyed pa ste mchog tu khyad par du 'gyur ba yin pa'i phyir/ yang dag par rdzogs pa'i byang chub la dmigs pa gzung ngo / /des na de'i mtshan nyid/ sems bskyed pa ni gzhan don phyir/ /yang dag rdzogs pa'i byang chub 'dod/ /ces gsungs te/ /'dod pa dang / mos pa dang / mngon par 'dod pa zhes bya ba ni rnam grangs so/ /gang la yang dag par rdzogs pa'i byang chub 'dod pa yod pa de la de skad ces bya'o//de'i dngos po ni 'di nyid de/ de 'dod pa zhes bya ba'i don to/ /rang las gzhan du gyur pa ni pha rol te/ sems can thams cad do/ /de dag gi don ni phan pa ste/ shin tu mthar phyin pa'i mya ngan las 'das pa ste/bla na med pa'i byang chub kyi bar du'o/ /de'i phyir ni de'i don nam de'i ched du'o/ /de ltar na de ni gzhan gyi don du bstan te/ yang dag par rdzogs pa'i byang chub la dmigs pa'i 'dod pa ni sems bskyed pa'i mtshan nyid do/ /de dang de ni mdo bzhin du/ /bsdus dang rgyas pa'i sgo nas brjod//ces bya ba la/ mdo bzhin du zhes bya ba ni shes rab kyi pha rol tu phyin pa 'di nyid bzhin du ste/ mdo de las ma 'das pa 'di ni mtshan nyid ces bya ba'i don to/ /'o na mdo de las ni gleng gzhi'i gzhung bor nas 'gres rnam pa bzhis sems bskyed pa'i mtshan nyid de yang bdag gi don dang gzhan gyi don rnam pa mang por phye nas/rab tu mang po la dmigs pa ched du bya ba med par 'dod pa'i mtshan nyid du brjod de/ des na 'di ni mdo ji lta ba bzhin du ma yin no zhe na/ de'i phyir/ de dang de ni mdo bzhin du/ /bsdus dang rgyas pa'i sgo nas brjod/ / ces gsungs te/ mdor yang de dang zhes bya ba ni yang dag par rdzogs pa'i byang chub de nyid tshig dang po gnyis kyis bsdus pa dang rgyas pa'i sgo nas gsungs so/ /de ni zhes bya ba ni gzhan gyi don nyid de/ tshig 'og ma gnyis kyis bsdus pa dang rgyas pa'i sgo nas gsungs so/ / mdo las yang gzhan gyi don gyi ched du shugs kyis bstan te/ gang gi phyir gzhan gyi don gyi ched du byang chub 'dod kyi rang gi don gyi ched du ni ma yin pas so/ /bstan bcos las kyang gzhan gyi don gyi 'dod pa ni shugs kyis bstan te/ gang gi phyir 'dod pa ma yin pa ni ched du bya bar mi 'gyur bas so//de bas na bstan bcos kyi mtshan nyid ni mdo ji lta ba bzhin nyid do/ /de la yang dag par rdzogs pa'i byang chub bsdus pa ni gleng gzhi ltag tu bor nas de'i tshe bcom ldan 'das zhes bya ba nas/ 'tshang rgya bar 'dod pas shes rab kyi pha rol tu phyin pa la brtson par bya'o zhes bya ba'i bar gyis bstan to//rgyas pa ni de ltar zhes bya ba nas/ sbyin pa'i pha rol tu phyin pa yongs su rdzogs pa'o zhes bya ba'i bar gyis bstan to/ /mdo las kyang sems bskyed pa'i mtshan nyid 'ba' zhig bstan pa ma yin gyi/ 'on kyang bdag dang gzhan gyi don gyi thabs kyang bstan pa yin no//de la rang gi don ni yang dag par rdzogs pa'i byang chub bo/ /gzhan gyi don ni sems can thams cad kyi don no/ /de dag gi thabs ni shes rab kyi pha rol tu phyin pa'i rnal 'byor la sbyor ba ste/ de med par de dag mi 'grub pa'i phyir ro//de nyid yang dag par rdzogs pa'i byang chub de nyid mdo dang rgyas pa'i sgo nas bstan to/ /gzhan gyi don yang gzhan gyi don nyid du mdo dang rgyas pa'i sgo nas bstan te/ gzhan gyi don bsdus pa ni gzhan yang zhes bya ba nas/ lhag ma med pa'i mya ngan las 'das pa'i dbyings su yongs su mya ngan las 'da' bar 'god par 'dod pas shes rab kyi pha rol tu phyin pa la bslab par bya'o zhes bya ba'i bar gyis bstan to//gzhan gyi don rgyas pa ni ser sna can zhes bya ba la sogs pas bstan to/ /sems bskyed pa'i mtshan nyid 'dir byang chub sems dpa' sems dpa' chen po zhes bya ba la/byang chub sems dpa' sems dpa' chen po nyid ni 'dir rigs la grags pa'i don to/ /de ltar sems bskyed pa'i mtshan nyid mdo bzhin du brjod nas/ rab tu dbye ba/ de yang sa gser zla ba me/ /gter dang rin chen 'byung gnas mtsho//rdo rje ri sman bshes gnyen dang / /yid bzhin nor bu nyi ma glu/ /rgyal po mdzod dang lam po che/ /bzhon pa bkod ma'i chu dang ni/ /sgra snyan chu bo sprin rnams kyis/ /rnam pa nyi shu rtsa gnyis so/ /zhes gsungs so/ /de yang rdo rje ri sman zhes bya ba gsum la gsum pa'i tshig bstan to//bshes gnyen dang / yid bzhin nor bu nyi ma glu zhes bya ba bzhi la gsum pa'i mang po'i tshig bstan to/ /'dra ba zhes bya ba khong nas dbyung ste/ tshig drug gi mthar gsum pa'i sbyor ba yin no/ /de'i don ni 'di yin te/ de yang sems bskyed pa nyi shu rtsa gnyis te/ 'di ltar sa dang / gser dang / zla ba la sogs pa dang 'dra ste/ 'dir tshigs su bcad pa ni/ bsam pa sbyor dang lhag bsam dang / /pha rol phyin drug tshad med dag /mngon par shes dang bsdu dngos dang / so so rig ston tshogs dag dang //byang chub phyogs mthun zhi gnas stsogs/ /gzungs sogs chos kyi mdo bshad dang / /bgrod gcig lam dang thabs mkhas pa'o/ /zhes bshad do/ /dang po'i sems bskyed pa las gzhan pa ni grogs 'di dag dang go rims bzhin du ldan pa yin te/ 'phags pa blo gros mi zad pa'i mdo las mi zad pa brgyad cu gsungs te/de yang sems bskyed pa nyi shu rtsa gnyis kyis 'grel to zhes mkhas pas bshad do/ /de ltar ni dang po'i sems bskyed pa mi zad pa ni sems bskyed pa mi zad pa zhes brjod do/ /lhag ma'i sems bskyed pa mi zad pa ni gcig pu'i ma yin te/'on kyang bsam pa dang sbyor ba la sogs pa'i grogs dang bcas pa mi zad pa zhes brjod do/ /dus mnga' dus mtsho dus lag pa/ /sum cu rtsa bdun lag rkang mtsho/ /bcu tshan gnyis pa'i tha dad kyis/ /mi zad brgyad cu de dag yin/ /de la sems bskyed pa dang po ni sa dang 'dra ste/sangs rgyas kyi chos thams cad dang de'i tshogs 'phel ba'i rten du gyur pa'i phyir ro/ /de yang gzhan yang zhes bya ba nas/ gzhag par bya'o zhes bya ba'i bar gyis gsungs pa yin no/ /de la byang chub sems dpa' zhes bya ba ni rigs la gnas pa'i chos thams cad rnam pa thams cad du mngon par rdzogs par byang chub par 'dod pas zhes bya ba ni yang dag par rdzogs pa'i byang chub 'dod pa'o//sems dpa' chen po zhes bya ba ni gzhan gyi don chen po 'dod pa'o/ /de nyid spyi'i mtshan nyid de dang po grogs med pa'i mtshan nyid do//lhag ma ni grogs dang bcas pa'i mtshan nyid do/ /de dag las byang chub sems dpa' sems dpa' zhes bya bas ni spyi'i mtshan nyid bstan to/ /bsam pa la sogs pas ni grogs bstan to/ /bsam pa dang ldan pa ni gser bzang po dang 'dra ste/'gyur ba la mi rten pa'i phyir ro/ /de yang 'di ltar zhes bya ba la sogs pas gsungs te/ 'di ltar zhes bya ba ni ji ltar 'chad par 'gyur ba bzhin du'o/ /gnas nas zhes bya ba ni dag pa dang / 'dun pa'i mtshan nyid kyi bsam pas gnas pa'o/ /mi gnas pa'i tshul gyis zhes bya ba mi gnas pa dang /gnas par byed pa dang gnas pa'i gzhi mi dmigs pas so/ /sbyor ba dang ldan pa ni zla ba yar gyi ngo tshes pa dang 'dra ste/ dge ba'i chos 'phel bar 'gyur ba'i phyir ro/ /de yang de ltar zhes bya ba la sogs pa gsungs te/ de ltar zhes bya ba ni bshad pa'i rim pas so//gnas pa zhes bya ba ni bsams la gnas nas so/ /yar gyi ngo ni dran pa nye bar gzhag pa la sogs pa nas btang snyoms chen po'i bar du dkar po'i chos thams cad kyi tshogs so/ /sbyor ba ni goms pa'o/ /de yang skye ba dang 'phel ba ste/ yar gyi ngo'i zla ba tshes pa bzhin no/ /khyad par rtogs par bya ba'i phyir bsam pa ni lhag pa'i bsam pa'o/ /de dang ldan pa ni me dang 'dra ba ste/ de nas de shing gi bye brag gis me bzhin du khyad par du 'gro ba'i phyir ro/ /de yang thams cad mkhyen pa nyid ces bya ba la sogs pa gsungs te/'dir yang chos khyad par can 'dod pas lhag pa'i bsam pa mtshon pa yin no/ /de'i 'og tu pha rol tu phyin pa drug dang ldan pa'i sems bskyed pa drug tu brjod par bya ste/ des na de dag gi mtshan nyid rnam pa lngar brjod de/ rigs nyid dang / smon lam nyid dang /bsam pa nyid dang / dngos po nyid dang / rang gi ngo bo nyid do/ /de la rigs ni chos nyid de/ byang chub sems dpa' gang chos nyid gang la gnas nas byang chub kyi sems la gnas te/ snying rje sngon du 'gro ba'i sems kyis dngos po thams cad yongs su gtong ba'o//de bzhin du sdom pa yang dag par blangs pa thams cad bsrung ba dang / de bzhin du gnod par byed pa thams cad la ji mi snyam pa dang / sdug bsngal dang du len pa dang / chos la nges par sems pa'i bzod pa'o/ /de bzhin du lus dang ngag dang yid kyi las kyi dge ba'i chos thams cad la sgrub par spro ba ste/go rims ji lta ba bzhin du sbyin pa dang / tshul khrims dang / bzod pa dang / brtson 'grus kyi pha rol tu phyin pa'o/ /de bzhin du lus dang / ngag dang yid kyi las rnam pa thams cad du zil gyis mnan te/ sems rnam pa thams cad du gnas pa dang /rnam pa thams cad du chos rab tu rnam par 'byed pa gang yin pa de dag ni go rims bzhin du bsam gtan dang shes rab kyi pha rol tu phyin pa'o/ /sbyin pa dang ldan pa ni gter chen po bzhin te/ zang zing gi longs spyod kyis sems can dpag tu med pa tshim par byed pa dang /mi zad pa'i phyir ro/ /de yang ser sna can zhes bya ba la sogs pa gsungs so/ /tshul khrims kyi pha rol tu phyin pa dang ldan pa ni rin po che'i 'byung khungs lta bu ste/ de las yon tan rin po che thams cad 'byung ba'i phyir ro/ /de yang tshul khrims 'chal pa zhes bya ba la sogs pa gsungs so//rin po che'i 'byung khungs ni rin po che 'byung ba'i ri la sogs pa'o/ /bzod pa'i pha rol tu phyin pa dang ldan pa ni rgya mtsho dang 'dra ste/ nyam nga ba 'byung ba thams cad kyis mi 'khrugs pa'i phyir ro/ /de yang gnod sems la sogs pa zhes bya ba la sogs pa gsungs so//brtson 'grus kyi pha rol tu phyin pa dang ldan pa ni rdo rje dang 'dra ba ste mi shigs pa nyid kyis sra ba'i phyir ro/ /de yang le lo zhes bya ba la sogs pa gsungs so/ /bsam gtan gyi pha rol tu phyin pa dang ldan pa ni ri'i rgyal po dang 'dra ste/g.yeng bas mi g.yo ba'i phyir ro/ /de yang rnam par g.yeng ba'i sems zhes bya ba la sogs pas gsungs so/ /shes rab kyi pha rol tu phyin pa dang ldan pa ni sman gyi rgyal po lta bu ste/ sgrib pa thams cad kyi nad rab tu zhi bar byed pa'i phyir ro/ /de yang shes rab 'chal pa zhes bya ba la sogs pas gsungs so//tshad med pa bzhi dang ldan pa ni mdza' bo chen po dang 'dra ste/ gnas skabs thams cad du sems can rnams yal bar mi 'dor ba'i phyir ro/ /tshad med pa bzhi ni sems can tshad med pa la dmigs pa'i byams pa dang /snying rje dang / dga' ba dang / btang snyoms dag ste/ go rims bzhin du de dag bde ba skyed pa dang / sdug bsngal bsal ba dang / bde ba la gnas pa dang / nyon mongs pa'i gnyen po dang ldan pa'i bsam pas ting nge 'dzin bskyed pa ste/ de yang dge ba'i sems bskyed pa gcig tsam yang zhes bya ba nas/sangs rgyas dang byang chub sems dpa' rnams dang mi 'bral zhes bya ba'i bar gyis gsungs so/ /'dir yang sems can thams cad la zhes bya ba ni sems can thams cad kyi don gyi phyir ro/ /de ni gong dang 'og tu yang sbyar bar bya'o//sems can thams cad kyi don gyi phyir zhes bya ba 'di ni bzod par 'dod pa zhes bya ba 'dir yang sbyar te/ sems can la ltos pa zhes bya ba ni sems can la rjes su brtse ba'i phyir ro/ /'di ni phyi mar yang sbyar bar bya'o/ /de la 'dir tshig gsum gyis ni tshad med pa rnams bstan la/lhag ma rnams kyis ni de'i 'bras bu'o/ /mngon par shes pa dang ldan pa ni yid bzhin gyi nor bu dang 'dra ste/ ji ltar mos pa bzhin de'i 'bras bu 'byor pa'i phyir ro/ /de yang sangs rgyas dang byang chub sems dpa' rnams dang mi 'bral bar 'dod pa zhes bya ba nas/gzhan yang zhes bya ba la sogs pa'i tshig gsum gyis gsungs so/ /'dir gnas par 'dod pa zhes bya ba ni tshe ring bar gnas par 'dod pa'o/ /gang dang gang gis zhes bya ba ni mngon par shes pa rnams kyis so/ /bsdu ba'i dngos po dang ldan pa ni nyi ma dang 'dra ste/gdul bya'i lo thog yongs su smin par byed pa'i phyir ro/ /de yang bsdu ba'i dngos po go rims bzhin du bstan pa'i phyir gzhan yang zhes bya ba la sogs pa'i tshig bzhis gsungs so/ /sems can rnams bsdu ba ni sems can rnams yang dag par sdud pas na bsdu ba'o//de'i dngos po ni thabs te/ sbyin pa dang / snyan par smra ba dang / don spyod pa dang / don mthun pa dag go/ /de la gtso bo ni snyan par smra ba ste/ pha rol tu phyin pa drug ston pa'o/ /mi zad par byed par 'dod pas zhes bya bas ni sems can gyi don spyod pas so/ / ston pas zhes bya ba ni don mthun pa'o/ /so so yang dag par rig pa dang ldan pa ni dri za'i dbyangs snyan pa lta bu ste/ gdul bya 'dun par byed pa'i chos ston pa yin pa'i phyir ro/ /de yang gzhan yang zhes bya ba la sogs pa'i tshig gsum gyis gsungs te/ 'di ltar ting nge 'dzin gyi stobs kyis mngon sum du thogs pa med par shes pa ni yang dag par rig pa'o//ma lus par yang dag par rig pa ni so so yang dag par rig pa'o/ /de yang dmigs pa'i dbye bas rnam pa bzhi ste/ chos so so yang dag par rig pa dang / don so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa'o/ /de la chos ni chos thams cad kyi rnam grangs so/ /don ni de dag gi mtshan nyid do/ /nges pa'i tshig ni de dag gi nges pa'i tshig go/ /spobs pa ni de dag gi rnam par dbye ba'o/ /chos 'di thams cad ni gnyis te/chos dang chos nyid kyis bsdus pa'i phyir ro/ /de la chos nyid ni stong pa nyid de'i dbang du byas nas/ nang stong pa nyid la sogs pa nas yang dag pa'i mtha' dang / de bzhin nyid ces bya ba la sogs pa'i tshig gis gsungs so/ /'dir yang slob par 'dod pa zhes bya ba ni thogs pa med pa'i ye shes 'dod pas so//'di nyid 'di'i spobs pa so so yang dag par rig pa'o/ /de ltar zhes bya ba la sogs pas ni dpe bstan te/ ji ltar 'di la rnam par dbye bas bslab par bya ba de bzhin du chos dang don dang nges pa'i tshig la yang bslab par bya'o zhes bya ba'i don to//de bzhin nyid dang / yang dag pa'i mtha' dang / mtshan ma med pa zhes bya ba la sogs pa ni 'dir chos so so yang dag par rig pa'o/ /'di'i mtshan nyid ni mtshan nyid bcu gcig las yang dag par 'das pa ste/ 'di lta ste/ gzung ba'i mtshan nyid las yang dag par 'das pa dang / 'dzin pa'i mtshan nyid las yang dag par 'das pa dang / dngos po'i mtshan nyid las yang dag par 'das pa zhes bya ba la sogs pa ni don so so yang dag par rig pa'o/ /de bzhin nyid ni rtag tu de bzhin pas te 'gyur ba med pa'i phyir ro//yang dag pa ni de bzhin nyid do/ /de'i mtha' ni rtse mo ste/ de las lhag pa'i de kho na nyid yod pa ma yin pas yang dag pa'i mtha' zhes bya ba la sogs pa ni nges pa'i tshig so so yang dag par rig pa'o/ /chos mtha' yas pa de dag ni mtha' yas pa ste/so so yang dag par rig pa bzhis bsdus so/ /rgya cher ni chos mngon pa'i bstan bcos las rtogs par bya'o/ /de yang dper brjod pa tsam zhig yin te/ gzhan yang zhes bya ba la sogs pas gsungs so/ /'di yang spobs pa so so yang dag par rig pa ste/rdul phra rab mang pos shes shing rtogs pa'i phyir ro/ /rton pa dang ldan pa ni rgyal po lta bu ste/ chud mi za ba'i rgyu yin pa'i phyir ro/ /gang gi phyir rgyal po'i lcags kyus skyes bu dag lam log par mi gtong ste/ rton pa'i lcags kyus byang chub sems dpa' yang de dang 'dra'o//de yang gzhan yang zhes bya ba la sogs pa'i tshig gnyis dang dris pa dang lan gyi tshig gnyis kyis gsungs so/ /de ltar shes pa zhes bya ba ni de nyid shes pa ste/ don la rton gyi tshig 'bru la ma yin te/ des na phal pa'i skad du chos ston kyang gus par nyan par byed do//gzhan yang zhes bya ba'i tshig gnyis pa la/ thabs la mkhas pa sbyin par bya ba dang / sbyin pa po la sogs pa mi dmigs pa'i shes rab kyi pha rol tu phyin pa stong pa nyid ni rigs pas grub pa ste/ rigs pas mtshan ma dang ldan pa'o//des ni chos la rton gyi/ gang 'di ltar chos thams cad stong pa nyid ma yin no zhes smras pa'i gang zag la ni ma yin no/ /sangs rgyas bcom ldan 'das ni mchog tu tshad mar gyur pa yin te/ des na nges pa'i don gyi mdo sde la rton gyi/ drang ba'i don gyi mdo sde la ni ma yin no//bsgoms pa las byung ba'i shes pa ni ye shes so/ /thos pa dang bsams pa las byung ba ni rnam par shes pa ste/ des na ye shes kyis gzigs pa gang yin pa de rnam par shes pas mthong ba ni ma yin no/ /de'i phyir ye shes la rton gyi/ rnam par shes pa la ni ma yin no/ / rton pa 'di gnyis ni zhus pa dang lan gyis gsungs te/ de ltar na sangs rgyas bcom ldan 'das kyis 'di ni nges par mdzad pa ste de la rton par bya'o/ /de nas shA ri'i bu ni rnam par shes pa ste/ zhu ba po yin no/ /de bzhin gshegs pa ni ye shes yin te/ lan bka' stsal pa yin no//bsod nams dang ye shes kyi tshogs dang ldan pa ni mdzod lta bu ste/ bsod nams dang ye shes kyi tshogs mang po'i mdzod kyi gnas yin pa'i phyir ro/ /de yang gzhan yang zhes bya ba tshig dgus gsungs te/ de la tshig bdun gyis ni tshul khrims dang bsgoms pa las byung ba'i bsod nams kyi tshogs kyi phung po chen po bstan te/de gnyis med par ni de lta bu'i mngon par shes pa mi srid pa'i phyir ro/ /tshig brgyad pas ni sbyin pa las byung ba'i bsod nams bstan te/ gsum po des ni bsod nams bstan to/ /dgu pas ni ye shes kyi tshogs bstan to/ /byang chub kyi phyogs dang ldan pa ni lam po che lta bu ste/'phags pa'i gang zag thams cad gshegs shing rjes su gshegs pa'i phyir ro/ /de yang gzhan yang zhes bya ba la sogs pa'i tshig gsum gyis gsungs te/ 'dir shes rab kyi pha rol tu phyin pa ni byang chub kyi phyogs kyi chos sum cu rtsa bdun gyi mtshan nyid do//gzhan thams cad ni de'i 'bras bur bstan to/ /zhi gnas dang lhag mthong dang ldan pa ni theg pa lta bu ste/ bde blag tu khyer ba'i phyir ro/ /de yang nyan thos zhes bya ba la sogs pa nas brtsams te 'das pa'i de bzhin gshegs pa la sogs pa'i zhing blta bar 'dod pa'i bar gyis gsungs so//'dir shes rab kyi pha rol tu phyin pa ni zhi gnas dang lhag mthong gi mtshan nyid do/ /gzhan thams cad ni de'i 'bras bu'o/ /'di la chu yod pas na chu ste/ ldan pa'i don la a rkyen du bya'o/ /bkod ma yang yin la chu yang yin pas bkod ma'i chu'o/ / gzungs dang spobs pa dang ldan pa ni bkod ma lta bu ste/ chu skye zhing mi zad par 'dzin pa dang chos dang mthun par thos pa dang ma thos pa'i chos dang don 'dzin cing 'byin pa'i phyir ro/ /de yang shar phyogs zhes bya ba nas/ steng gi phyogs zhes bya ba'i bar gyis gsungs so//chos bshad pa dang ldan pa ni kun tu dga' ba'i sgra dang 'dra ste/ thar pa 'dod pa'i gdul bya rnams la snyan pa thos par byed pa'i phyir ro/ /de yang shar phyogs zhes bya ba la sogs pa'i phyogs bcu'i bstan pa dang bshad pa'i tshig gnyis gsungs pas ni chos kyi mdo bzhi bstan to//'dir yang shes rab kyi pha rol tu phyin pa zhes bya ba la/ phyogs bcu'i 'jig rten gyi khams thams cad du chos kyi mdo bzhi bstan pa'o/ /chos kyi mdo bzhi ni 'du byed thams cad mi rtag pa/ zag pa dang bcas pa'i chos thams cad ni sdug bsngal ba/ chos thams cad ni bdag med pa/ mya ngan las 'das pa ni zhi ba'o/ /chu bo zhes bya ba ni chu rgyun no/ /bgrod pa gcig pa'i lam dang ldan pa ni klung gi rgyun dang 'dra ste/ mi skye ba'i chos la bzod pa thob na rang gi ngang gis 'byung ba'i phyir ro/ /bgrod pa gcig pa nyid ni der gtogs pa'i byang chub sems dpa' rnams kyi bya ba byed pa tha mi dad pa'i phyir ro//de yang shar la sogs pa'i phyogs bcu dag tu long ba dang / 'on pa la sogs pa'i tshig gis gsungs so/ /'dir yang shes rab kyi pha rol tu phyin pa ni bgrod pa gcig pa'i lam gyi mtshan nyid do//gzhan thams cad ni de'i 'bras bu'o/ /thabs la mkhas pa dang ldan pa ni sprin lta bu ste ji ltar snod kyi 'jig rten gyi 'byor pa thams cad sprin las byung ba ltar/ /dga' ldan gyi gnas kyi gnas na bzhugs pa la sogs pa ston pa'i sgo nas sems can thams cad kyi don bya ba rnam pa de la rag las pa'i phyir ro//de yang de bzhin gshegs pa'i spyod lam zhes bya ba nas brtsams pa nas/ 'dod pa'i yon tan lnga zhes bya ba'i bar gyis gsungs so/ /de dag gis ni sems bskyed pa nyi shu rtsa gnyis bstan to/ /da ni gdams ngag brjod par bya ste/ khong du chud par bya ba'i phyir brjod pa ni gdams ngag ste/yang dag par rdzogs pa'i don gyi man ngag nye bar gdams pa'o/ /de yang yul gyi bye brag gis rnam pa bcu ste/ sgrub dang bden pa rnams dang ni/ /sangs rgyas la sogs dkon mchog gsum/ /ma zhen yongs su mi ngal dang //lam ni yongs su 'dzin pa dang / /spyan lnga dang ni mngon shes kyi/ /yon tan drug dang mthong lam dang / /bsgom zhes bya la gdams ngag ni/ /bcu yi bdag nyid shes par bya/ /zhes bya ba gsungs pa yin no/ /sgrub pa ni spyod pa'o/ /gang la zhe na/ shes rab kyi pha rol tu phyin pa la ste/skabs nyid yin pa'i phyir ro/ /de yang 'di skad du tshe dang ldan pa zhes bya ba la sogs pa nas/ de ltar spyod na byang chub sems dpa' shes rab kyi pha rol tu phyin pa la spyod do zhes bya ba'i bar gyis gsungs so/ /de man chad kyis ni phan yon bstan te/ de yang sangs rgyas kyi chos sbyin par byed pa zhes bya ba'i bar gyis zhus pa dang lan gyis gsungs so//'dir shes rab kyi pha rol tu phyin pa ni rnam par mi rtog pa'i ye shes te/ rnam par g.yeng ba'i rnam par rtog pa bcu'i gnyen po'o/ /de dag kyang gang dag yin zhe na/ 'dir tshigs su bcad pa ni/dngos po med dang dngos po dang / /sgro 'dogs pa dang skur 'debs dang / /gcig pa nyid dang tha dad dang / /ngo bo nyid dang khyad par dang / /ming ni ji bzhin don dang ni/ /don ni ji bzhin ming la zhe na/ /rnam par g.yeng ba'i rnam rtog gang / /de ni rnam pa bcur bshad do//de la dngos po med pa'i rnam par rtog pa'i gnyen por ni byang chub sems dpa' nyid yod bzhin du zhes gsungs te/ byang chub sems dpa' nyid ni chos nyid kyi tshul du yod do zhes bya ba'i don to/ /dngos po'i rnam par rtog pa'i gnyen por ni byang chub sems dpa' la sogs pa yang dag par rjes su mi mthong ngo zhes gsungs te/nye bar mi dmigs pa'o zhes bya ba'i don to/ /'dis ni gang zag dang chos kyi dngos po bkag pa'i phyir ro/ /gal te gzugs la sogs pa'i stong pa nyid chos nyid yin na/ de lta na ni gzugs la sogs pa yang yod par 'gyur bas/des na sgro 'dogs pa'i rnam par rtog pa'i gnyen por byang chub sems dpa' zhes bya ba la sogs pa gsungs so/ /byang chub sems dpa' la sogs pa ni sgra'i brjod par bya ba'o/ /rang bzhin ni byang chub sems dpa' la sogs pa'i rang bzhin te/de ni des stong pa ste/ des na de dmigs su med do/ /de lta na ni med na stong pa nyid kyang med par 'gyur bas skur ba 'debs pa 'di'i gnyen por rang bzhin gyis zhes bya ba la sogs pa gsungs so/ /'dir yang ngo bo nyid ni rnam pa gsum ste/ chos thams cad ni kun brtags pa dang /gzhan gyi dbang dang / yongs su grub pa'o/ /ji ltar snang ba bzhin du yod pa ma yin pa ni kun tu brtags pa'o/ /gang rang bzhin med kyang snang ba'i tshul du yod pa de ni rten cing 'brel par 'byung ba yin pa'i phyir gzhan gyi dbang ngo / / dang pos gnyis pa stong zhing bral ba de ni yongs su grub pa ste/ rtag pa'i ngo bo nyid yin pa'i phyir ro/ /'di la yang / bcom ldan 'das kyis go rims bzhin du brtags pa dang / rnam par rtog pa dang / chos nyid kyis bstan to/ /de ltar yang mdzad pa'i skabs las ston par 'gyur te/ngo bo nyid rnam pa gsum ste/ brtags pa'i ngo bo dang / rnam par rtog pa'i ngo bo dang / chos nyid kyi ngo bo zhes bya ba la sogs pa'o/ /de bas na 'di'i zhes bya ba ni rnam par brtags pa'i gzugs so/ /'di zhes bya ba ni kun brtags pa'i gzugs kyis stong pa'o/ / rang bzhin zhes bya ba ni de nyid la rtag tu yod pa'i phyir ro/ /'di ltar zhes bya ba ni gang gi phyir ro/ /stong pa nyid ces bya ba ni kun brtags pa'i ngo bo nyid kyis stong pa'o/ /gzugs zhes bya ba ni rnam par brtags pa'i gzugs te/ des stong pa nyid ma yin pa ni 'di la stong pa nyid de rtag tu yod pa'i phyir ro//de bzhin du rnam par shes pa'i bar du sbyar bar bya'o/ /gal te de dang de gnyis rang bzhin gcig pa yin pa de'i tshe/ de gnyis gcig tu rnam par rtog pa 'di'i gnyen por gzugs kyi stong pa nyid gang yin pa de gzugs ma yin no zhes bya ba la sogs pa gsungs te/mtshan nyid kyi dbye bas gcig pa ma yin no zhes bya ba'i don to/ /gal te gcig pa ma yin te/ tha dad pa nyid yin pa de'i tshe ni tha dad pa nyid du rnam par rtog pa 'di'i gnyen por gzugs ni stong pa nyid las gzhan ma yin no zhes bya ba la sogs pa gsungs te/ gzhan ma yin no zhes bya ba ni tha dad pa ma yin no zhes bya ba'i don to/ /chos las chos nyid kyi ngo bo gzhan ma yin no zhes bya bar dgongs so/ /de zhes bya ba ni gcig pa nyid du'o/ /gang gi phyir zhes bya ba ni dri ba'o/ /lan du gzugs zhes bya ba la sogs pa gsungs so/ / 'dir gzugs zhes bya ba ni chos nyid kyi gzugs so/ /de bzhin du rnam par shes pa'i bar du sbyar ro/ /gzugs la sogs pa'i stong pa nyid dang / chos nyid kyi gzugs ni phan tshun gcig pa nyid de/ mtshan nyid tha dad pa med do zhes bya bar dgongs so/ /de ci'i phyir zhes bya ba la sogs pa la/byang chub sems dpa' la sogs pa med pa gang zhe na/ de'i phyir byang chub sems dpa' zhes bya ba smos te/ skye ba dang 'gag pa'i tshul gyis ngo bo nyid yod pas khyad par yod par 'gyur te/ nges pa'i shes pa'i yul yin pa'i phyir ro/ /des na re zhig ngo bo nyid kyi rnam par rtog pa'i gnyen por/rab 'byor 'di lta ste gzugs zhes bya ba 'di ni ming tsam mo zhes bya ba la sogs pa gsungs te/ ming ni don gyis stong pa'i ming tsam mo/ /khyad par gyi rnam par rtog pa'i gnyen por ni ngo bo nyid mi skye mi 'gag /kun nas nyon mongs pa ma yin/rnam par byang ba ma yin no zhes bya ba gsungs so/ /de ci'i phyir zhes bya ba las ming tsam nyid ces bya ba ga las zhes pa'o/ /'di ltar gal te ming gi don dngos po la med pa de'i tshe ni dngos po la rag las pa'i ming gi tha snyad kyang med par 'gyur ro/ / des na ming ji lta ba bzhin du don la rnam par rtog pa'i gnyen por 'di ltar ming bcos ma las chos de dag so sor brtags nas zhes bya ba la sogs pa gsungs te/ bcos ma zhes bya ba ni brda tsam mo/ /chos so so la zhes bya ba ni chos dang chos la'o/ /bcos ma zhes bya ba ni brda la brten pa'o//de dag ces bya ba ni chos so/ /brtags pa zhes bya ba ni sgro btags pa ste/ dngos po la de'i don med pas glo bur du ming du tha snyad btags pa ste yod pa ma yin no/ /'o na ming don thams cad ji lta ba bzhin du 'gyur te ming yin pa'i phyir/sangs rgyas zhes bya ba'i tshig bzhin no zhe na/ don ji lta ba bzhin du ming la zhen pa'i rnam par rtog pa'i gnyen por de byang chub sems dpas ming de dag yang dag par rjes su mi mthong zhes bya ba la sogs pa gsungs so/ /ming thams cad ces bya ba ni dngos po thams cad brjod pa'o//mi mthong zhes bya ba ni mi dmigs pa ste/ ming gi don dngos po med pa'i phyir ro/ /sangs rgyas zhes bya ba'i tshig gi brda ji lta ba bzhin la dngos po mi snang ba'i sgo nas dngos po la mi slu ba yin gyi/ dngos po snang ba'i phyir ni ma yin no/ /gzhan yang zhes bya ba la sogs pa ni nye bar sdud pa'o//'di lta ste dper na zhes bya ba ni mdo sde pa la sogs pa'i dpe yin no/ /de la zhes bya ba ni rjod par byed pa yang yin no/ /gal te shA ri'i bu 'dzam bu'i gling zhes bya ba nas sangs rgyas dang / sangs rgyas kyi chos rnams zhes bya ba'i bar gyis bsgrubs pa'i phan yon no//phan yon dang bcas pa'i sgrub pa'i gdams ngag rgya cher bstan no/ /da ni bden pa'i gdams ngag brjod par bya ste/ 'phags pa'i bden pa bzhi ni sdug bsngal dang / kun 'byung ba dang / 'gog pa dang / lam mo/ /de dag la byang chub sems dpa' ji ltar ldan pa dang /rab tu ldan par 'gyur ba de ltar bden pa'i gdams ngag ston par mdzad de/ de la sdug bsngal gyi bden pa'i dbang du byas nas/ de bzhin du zhes bya ba la sogs pa nas/ ldan pa dang mi ldan pa zhes bya bar yang dag par mi mthong ngo zhes bya ba'i bar du gsungs te/de ltar na sdug bsngal yongs su shes par bya ba ni sdug bsngal kho na shes par bya ba ma yin gyi/ 'on kyang 'phags pa'i bden pa bzhi po dag kyang ngo / /de dag gis kyang chos thams cad yang dag par bsdus te/ des na phung po dang /khams dang / skye mched dang / bden pa dang / rten cing 'brel par 'byung ba ste/ de rnams kyi dbye bas tshogs lngar byas te/ de dag gi stong pa nyid dang / nang stong pa nyid la sogs pa la yang ldan pa dang mi ldan pa zhes brjod par bya'o/ /de tsam kho na yang ma yin gyi/'on kyang gang gi tshe de dag la ldan pa dang mi ldan pa nyid du ji ltar yang mi mthong ba de'i tshe ldan pa zhes brjod par bya ba ste/ de ni sdug bsngal gyi bden pa la gdams pa'o/ /kun 'byung gi bden pa'i dbang du byas nas de la gzugs med do zhes bya ba la sogs pa nas/rnam par shes pa nyid stong pa'o/ /stong pa nyid rnam par shes pa'o zhes bya ba'i bar gyis gsungs so/ /de ltar na kun 'byung spang bar bya'o/ /gang gi phyir gzugs la sogs pa de las 'byung ba ma yin pa de'i phyir rgyu ma yin te des na ji ltar kun 'byung yin/gang gi phyir 'gog pa'i chos can ma yin pa de ji ltar spang bar bya ba yin/ ji ltar 'di ma spangs pas ni 'ga' yang kun nas nyon mongs par mi 'gyur la/ spangs pas ni 'ga' yang rnam par byang bar mi 'gyur na/ 'di ji ltar spang bar bya ba yin/ci ste sdug bsngal dang / kun 'byung dag dang ldan pa ni kun nas nyon mongs pa yin la/ mi ldan pa ni rnam par dag pa yin no zhe na/ de yang rigs pa ma yin te/ 'di ltar des gang zhig gang du yang dag par 'du zhing ldan par ma mthong ba de ni kun 'byung ba'i bden pa la gdams pa'o//'gog pa'i bden pa'i dbang du byas nas/ shA ri'i bu stong pa nyid ces bya ba nas/ ldan pa zhes brjod par bya'o zhes bya ba'i bar du gsungs so/ /don ni 'di yin te byang chub sems dpa' chos thams cad stong pa nyid du mthong na/ de la gang gis 'gog pa mngon sum du bya/de la re zhig de nyid ni ma yin te/ stong pa nyid ces bya ba la sogs pa gsungs so/ /de ni mi skye mi 'gag ste/ rtag pa nyid kyi phyir ro/ /kun nas nyon mongs par mi 'gyur/ rnam par byang bar mi 'gyur te/ 'gyur ba med pa'i phyir ro//bri bar mi 'gyur 'phel bar mi 'gyur te/ khyab pa yin pa'i phyir ro/ /'das pa la sogs pa med pa yin te/ rtag pa la sogs pa'i phyir ro/ /des na yang sngar kun nas nyon mongs pa las phyis rnam par byang ba ma yin no/ /gal te sdug bsngal dang /kun 'byung dag de la 'gog pa yin no zhe na/ gang yang 'di lta bu zhes bya ba la sogs pa gsungs so/ /khyab pa 'di la gzugs la sogs pa med do zhes bya ba'i don to/ /des na sdug bsngal med do/ /kun 'byung med do zhes bya ba nas byang chub med do zhes bya ba'i bar ni 'gog pa'i bden pa la gdams pa'o//de la lam gyi bden pa'i dbang du byas nas/ de shes rab kyi pha rol tu phyin pa zhes bya ba nas brtsams te/ gzhan yang zhes bya ba'i tshig bzhi'i bar gyis gsungs so/ /de ltar na lam bsgom par bya ba ni gang gis sdug bsngal yongs su shes par bya ba dang /kun 'byung spang bar bya ba dang / 'gog pa mngon sum du bya ba dang / lam bsgom par bya ba ni gang la slob pa dang mi slob pa'i 'bras bu'i chos rnams yod pa de ni lam yin no/ /des na lam 'khor dang bcas pa des ni chos thams cad yang dag par bsdus pa yin no//de dag mi dmigs pa dang / bdag ldan pa dang / mi ldan pa nyid du dmigs pa ste/ de ni sbyor ba gcig go/ /stong pa nyid la sogs pa'i ting nge 'dzin bsgom pa la ni stong pa nyid la sogs pa dag gis te/ rang gi ngo bo kun brtags pa dag gis mi sbyor ro//stong pa nyid la sogs pa'i rnal 'byor rnams la yang de'i sbyor ba'i sgras kyang mi sbyor ro/ /mi sbyor mi 'byed ces bya ba ni kun brtags pa'i sbyor ba'i mtshan nyid med pa'i phyir mi sbyor ro/ /rang nyid brjod du med cing mtshan ma med pa'i ting nge 'dzin gyi ngo bo nyid kyi phyir mi 'byed do zhes bya ba ni gnyis pa'o//rang gi mtshan nyid stong pa nyid bsgom pa ni gzugs la sogs pa la mi sbyor te/ de la de'i mtshan nyid med pa'i phyir ro/ /de nyid sgom par byed pa yin pa'i phyir/ 'byed par mi byed do zhes bya ba ni gsum pa'o/ /bzhi pa ni rtogs par sla'o//'di ni lam gyi bden pa la gdams pa'o/ /dkon mchog gsum la gdams pa bshad par bya ste/ de la sangs rgyas dkon mchog la gdams pa'i dbang du byas nas/ gzhan yang zhes bya ba la sogs pa'i tshig gis gsungs so/ /de ltar na rnam pa thams cad mkhyen pa nyid ni sangs rgyas nyid do//ji skad du/ sgrib pa kun gyi dri med pa/ /rnam pa thams cad mkhyen nyid thob/ /rin chen snod ni phye ba ltar/ /sangs rgyas nyid ni yang dag bstan/ /zhes ji skad bshad pa lta bu'o/ /des na phung po dang skye mched rnams ni dbye ba ma mthong bas de la des mi sbyor ro zhes bya ba ni sbyor ba gcig go//de bzhin du sbyin pa'i pha rol tu phyin pa la sogs pa lam 'di'i 'bras bur gyur pa zhes bya ba ni gnyis pa'o/ /de bzhin du sangs rgyas dang byang chub rnam pa thams cad mkhyen pa nyid dang mi sbyor ro/ /de yang sangs rgyas dang byang chub dang mi sbyor te/gsum po dag tha dad pa med pa'i phyir ro zhes bya ba ni sangs rgyas dkon mchog la gdams pa'o/ /chos dkon mchog gi dbang du byas te/ gzhan yang zhes bya ba la sogs pa nas/ 'chal pa'i shes rab kyi sems mi bskyed do zhes bya ba'i bar gyi tshig mang pos gsungs so//'di ltar chos ni lam gyi 'bras bu dang lam mo/ /lam gyi 'bras bu ni byang chub ste/ de yang sangs rgyas dkon mchog nyid do/ /lhag ma ni 'dir lam gyi bden pa ste/ chos dkon mchog go/ /de yang snga ma bzhin du bden pa nges pa sngon du 'gro ba'o//de la gang las gzugs la sogs pa dngos po yod ces bya bar mi sbyor ro/ /des na kun 'byung mi dmigs so/ /gang gi phyir dngos po yod ces bya bar yang mi sbyor te/ des na kun 'byung ba spang bar bya zhes bya ba mi dmigs so/ /gzugs la sogs pa rtag ces bya ba dang mi rtag ces bya ba la sogs par mi sbyor te/sdug bsngal gyi bden pa'i rnam pa bzhi dang de las bzlog pa yang mi dmigs so/ /gzugs la sogs pa stong pa nyid dang / mtshan ma med pa dang / smon pa med pa dang / de las bzlog pa yang mi dmigs so/ /spyod ces bya ba dang mi spyod ces bya ba dang /spyod kyang spyod la mi spyod kyang mi spyod ces bya ba dang / spyod pa yang ma yin mi spyod pa yang ma yin zhes bya bar mi dmigs so/ /gang de ltar spyod na shes rab kyi pha rol tu phyin pa la spyod do zhes bya ba ni sbyor ba gcig go/ / sbyin pa'i pha rol tu phyin pa la sogs pa'i don du mi spyod cing ched du mi dmigs so zhes bya ba ni gnyis pa'o/ /mngon par shes pa'i las rnams kyi phyogs bcu dag tu sems can gyi don bya ba la bdag nyid la sogs pa mi dmigs so zhes bya ba ni gsum pa'o/ /chos gang la yang 'du ba dang bral ba mi mthong ngo zhes bya ba ni bzhi pa'o//bdag nyid mngon par rdzogs par byang chub par myur ba dang / mi myur ba ma mthong ngo zhes bya ba ni lnga pa'o/ /chos kyi dbyings ma gtogs par cung zad mi mthong ngo zhes bya ba ni drug pa'o/ /khams bco brgyad dang stong pa nyid du sbyor bar mi byed cing /de yang de dag dang mi sbyor ro zhes bya ba ni bdun pa'o/ /de ltar sbyor ba na yang phan yon mang po thob pa yin te/ de yang yang dag par rjes su mi mthong ngo zhes bya ba ni brgyad pa'o/ /'dir yang stong pa nyid la sbyor ba ni shes rab kyi pha rol tu phyin pa la sbyor ba'o/ / de yang sbyor ba thams cad kyi nang nas mchog yin no zhes bya ba'i tshig gis so/ /shes rab kyi pha rol tu phyin pa nyid nas dkon mchog yin te/ lam rin po che nyid yin pa'i phyir ro zhes bya ba ni chos dkon mchog la gdams pa'o/ /dge 'dun dkon mchog gi dbang du byas nas/ de skad ces bka' stsal pa zhes bya ba nas/ lus dang ngag dang yid kyi las yongs su dag pa la bslab par bya zhes bya ba'i bar gyis gsungs so/ /'di yang dge 'dun ni byang chub sems dpa'i dge 'dun la bya'o/ /de yang gang zag nyi shu ste/ de dag nyan thos kyi gang zag dang ming tsam mthun pa'i sgo nas dge 'dun du yid ches par bya ba'i don du'o//de dag las 'di dag 'ong ba dang 'gro ba'i mtshan nyid kyi dbye bas khyad par du bstan pa'i phyir ro/ /shes rab kyi pha rol tu phyin pa la gnas pas zhes bya ba ni nges par 'byed pa'i cha dang mthun pa la sogs pas so//de la dang po de dag 'dir 'ongs pa ni skyes so zhes bya ba'i bar gyis bshad do/ /de'i 'og tu tshig bzhis ni 'gro ba bshad do/ /de dag las gnyis kyis ni dad pa'i rjes su 'brang ba'i gang zag bstan te/ dad pas lam gyi rjes su 'brang ba'i phyir ro/ /cig shos gnyis kyis ni chos kyis rjes su 'brang ba bstan te/chos ni shes rab ste/ des lam gyi rjes su 'brang ba'i phyir ro/ /des na yod do zhes bya ba'i tshig gcig gis mthong bas thob pa'i mtshan nyid rgyun du zhugs pa'i 'bras bu mngon sum du bya ba de yang yid la mi sems te/ dbang po rnon po thabs la mkhas pa zhes bya ba'i bar gyis gsungs so/ /dang po 'di nye bar dgod pa ni dbang po rtul po yin pa'i phyir dad pas mos pa 'di nyid thabs la mkhas pa dang bral ba yin no zhes mtshon pa'i don du'o/ /mthong bas spang bar bya ba'i nyon mongs pa rnams dang /nyon mongs pa can gyis mi shes pa spangs pa ni rgyun du zhugs pa'i 'bras bu'o/ /de mngon sum du byed pa ni thob pa'o/ /de mi sems pa ni bdag gis 'di thob par bya'o zhes de ltar mi dmigs pa'i phyir ro/ /dad pa lhag pa nyid kyis grol ba ni dad pas mos pa'o/ / 'di man chad mthong bas thob pa bshad par bya ste/ rigs nas rigs su skye ba'i sngon du'o/ /mthong ba ni shes rab yin la des rgyun du zhugs pa'i 'bras bu thob pa ni mthong bas thob pa zhes bya'o/ /de'i mtshan nyid ni sngar bstan te/ zhar la yin pa'i phyir ro/ /de'i dbye ba yang rnam pa drug ste/drug nyid ni yod do zhes bya ba nas/ tshe gcig gis thogs pa zhes bya bas dper brjod par gsungs so/ /mthong bas thob pa ni sngar bstan pa ste/ de nyid ni byang chub kyi gtso bo'i rgyu yin par bstan to/ /ci'i phyir zhe na/ mthong bas thob pa nyid kyis de dag myur du mthar phyin par 'gyur ba'i phyir ro//de la dang po bskal pa bzang po'i sangs rgyas stong du bzhis ma tshang ba'i tshig dang pos bshad do/ /gzhan yang sangs rgyas kyi zhing gzhan dang gzhan dag tu srid pa tha mar gyur pa ni tshig gnyis pas bshad do/ /tshig gzhan bzhis ni dga' ldan nas shi 'phos nas sangs rgyas kyi zhing de dang de dag tu ni go rims bzhin du gang du sangs rgyas bcom ldan 'das la mchod pa'i phyir 'gro ba dang /gang du nyan thos dang rang sangs rgyas kyi theg pa gzhag pa med pa dang / gang dag tu tshe dpag tu med pa yod pa dang / gang dag tu sangs rgyas dang chos dang / dge 'dun gyi sgra mi grag par 'gro ba yin no/ /de nas sems can yongs su smin par bya ba de zhes bya ba'i bar gyis mi'i rigs nas rigs su skye ba bstan to/ /gsol ba gdab par bya'o zhes bya ba 'di'i bar gyis ni lha'i rigs nas rigs su skye ba bstan to//de nas/ rig par bya'o zhes bya ba'i bar gyis ni bar chad gcig pa bstan te/ skye ba gcig gis bar du chod pa ni bar chad gcig pa'o/ /bar chad ni mya ngan las 'das pa'i bar du gcod pa'o/ /de nas/ mngon par rdzogs par byang chub pa la sems can rnams kyi don byed pa 'di'i bar gyis ni bar ma dor mya ngan las 'das pa bstan te/de nyid du zhes bya ba ni 'dir 'og min nyid du ste/ 'dzam bu'i gling du ma yin no/ /des na bar ma dor yongs su mya ngan las 'das pa bstan to/ /de nas/ dam pa'i chos gnas par 'gyur ro zhes bya ba 'di'i bar gyis ni skyes nas yongs su mya ngan las 'das pa bstan to//bskal pa zhes bya ba ni 'dir bar gyi bskal par shes par bya'o/ /de'i phyogs gcig ni bskal pa las lhag pa'o/ /dang po sems bskyed pa nyid kyis zhes bya ba ni 'og min nas dga' ldan du dga' ldan nas 'dzam bu'i gling du gshegs nas khyim gyi gnas nas nges par byung ste/byang chub kyi shing drung du skyil mo krung bcas nas de ma thag tu gang dang po byang chub tu sems bskyed pa de ni de dag gi sems bskyed par brjod par bzhed do/ /de las skyes pa nyid ni phung po lhag ma dang bcas pa'i mya ngan las 'das pa yin te/skyes nas mya ngan las 'das pa yin no/ /de nas/ mngon par rdzogs par sangs rgyas pa zhes bya ba 'di'i bar gyis ni mngon par 'du byed pa dang bcas pa'i yongs su mya ngan las 'das pa bstan to/ /mngon par 'du byed pa dang bcas pa'i yongs su mya ngan las 'das pa ni 'dir sems can gyi don la brtson pa'o//de nas mngon par rdzogs par byang chub pa zhes bya ba 'di'i bar gyis ni mngon par 'du byed pa med par yongs su mya ngan las 'das pa bstan to/ /'dir ni rigs kyi khyad par las 'bad pa chung ngus ches myur ba nyid du mngon par rdzogs par byang chub pa ni mngon par 'du byed pa med par yongs su mya ngan las 'da' ba'o//de nas yang mngon par rdzogs par byang chub pa zhes bya ba 'di'i bar gyis ni 'og min gyi mthar thug par 'gro ba bstan to/ /de nas yang / mngon par rdzogs par byang chub po zhes bya ba 'di'i bar gyis ni 'phar ba bstan to//de nas yang mngon par rdzogs par byang chub pa zhes bya ba 'di'i bar gyis ni phyed du 'phar ba bstan to/ /de nas yang mngon par rdzogs par byang chub pa zhes bya ba 'di'i bar gyis ni gnas skabs thams cad du 'chi 'pho ba bstan to/ /de ltar na rnam pa gsum du bstan to//de nas yang skyes pa zhes bya ba 'di'i bar gyis srid pa'i rtse mo'i mthar thug par 'gro ba bstan to/ /de nas yang skyes pa zhes bya ba zhes bya ba'i bar gyis ni gzugs kyi 'dod chags dang bral ba bstan to/ /de nas/ mngon par rdzogs par byang chub pa zhes bya ba 'di'i bar gyis ni mthong ba'i chos la yongs su mya ngan las 'da' ba yin no//skye ba thams cad du rgyun mi 'chad par tshul khrims la sogs pa'i chos la goms par byas pas mthong ba'i chos la yongs su mya ngan las 'das pa yin no/ /de nas yang / mngon par rdzogs par byang chub pa zhes bya ba 'di'i bar gyis ni lus kyis mngon sum du byed pa bstan to//de nas yang / rang sangs rgyas rnam pa gnyis te/ gcig ni de dang chos mthun pa'i phyir te/ gcig ni bdag dang gzhan la chos thos pa med par sangs rgyas kyi chos snang bar byed pa'i phyir ro/ / cig shos ni rang sangs rgyas kyi cha byad kyang 'dzin pas so/ /'o na nyan thos dang rang sangs rgyas kyi sa thob pa'i 'bras bu byang chub sems dpas thob pa yin nam 'on te ma yin/ gal te thob pa yin na ni des byas pa nyid kyi gang zag rnam par gzhag pa de dag la yang yod par 'gyur te/'bad pa gzhan gyis ci zhig bya/ /ci ste thob pa ma yin na ni 'bras bu de ji ltar gzhan gyis thob par 'gyur zhe na/ de'i phyir/ yod do zhes bya ba la sogs pa gsungs te/ mang po yod pa nyid du ji ltar gsungs pa'o/ /gal te de lta na ni de dag gi bsgom pas spang bar bya ba'i nyon mongs pa zad par 'gyur ro zhe na/shA ri'i bu gang zhes bya ba la sogs pa gsungs so/ /ji ltar bskal pa bzang po 'di la byang chub sems dpa' du zhig mngon par rdzogs par 'tshang rgya bar 'gyur zhe na/ de'i phyir yod do zhes bya ba la sogs pa gsungs te rtogs sla'o//de ni dge 'dun dkon mchog la gdams pa'o/ /ma zhen pa la gdams pa'i dbang du byas nas/ de skad ces bka' stsal to zhes bya ba nas/ sus kyang thub pa med do zhes bya ba'i bar gyis gsungs so/ /lus dang ngag dang yid kyi dge ba bcu dang /pha rol tu phyin pa drug la spyod pa na lus la sogs pa mi dmigs pa ni ma zhen pa ste/ de'i man ngag ni ma zhen pa la gdams pa'o/ /ngal ba'i gnyen po ni mi ngal ba ste/ de la gdams pa de'i dbang du byas nas gzhan yang zhes bya ba nas/ lha dang bcas pa'i 'jig rten zhes bya ba'i bar gyis gsungs so//ngal ba'i rgyu ni rlom sems pa ste/ de'i gnyen po ni phung po dang khams dang skye mched la sogs pa la mi sems pa ste/ de ni mi ngal ba la gdams pa'o/ /dmigs pa med pa'i tshul gyis pha rol tu phyin pa la sogs pa bsgom pa ni lam mo//phyogs bcu kun du de yongs su 'dzin pa ni yang dag par yongs su 'dzin pa ste/ de'i dbang du byas nas shA ri'i bu ye shes de lta bu dang ldan pa zhes bya ba nas/ sangs rgyas kyi chos thams cad kyang yang dag par rjes su mi mthong ngo zhes bya ba'i bar gyis gsungs so//de ni lam yongs su 'dzin pa la gdams pa'o/ /'di ltar yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ /mig lnga rab tu thob pa dang / yongs su sbyong ba yod de/ de la shes rab kyi spyan ni don dam pa'i spyod yul can no//chos kyi spyan ni 'phags pa rnams kyi spyod yul can no/ /lhag ma ni rtogs par sla'o/ /de dag ni rgya cher spyan lnga dag la gdams pa'o/ /de bzhin du mngon par shes pa'i pha rol tu phyin pa rab tu thob po zhes bya ba la sogs pas ni rgya cher mngon par shes pa drug la gdams pa'o//ji ltar na sangs rgyas kyi spyan dang / mngon par shes pa drug pa byang chub sems dpa' la yod ce na/ byang chub sems dpa' sa brgyad pa la ni de gnyi ga thob pa yin la/ sangs rgyas kyi sa la ni gnyi ga yongs su rdzogs pa dang / yongs su dag pa dang / mthar phyin pa yin no//mthong ba'i lam la gdams pa brjod par bya ste/ de'i skabs ni/ de nas bcom ldan 'das zhes bya ba la sogs pa nas/ bstan to zhes bya ba'i bar gyis gsungs so/ /lam de yang skad cig ma bcu drug ste/ de dag gi ji lta ba bzhin du rang rang gi dmigs pa dang mi dmigs pa'i bye brag gis/'di lta zhes bya ba la sogs pa nas rgya cher 'chad par 'gyur ro/ /de dag gi thun mong dag gi cha ni byang chub sems dpa' dang shes rab kyi pha rol tu phyin pa mi dmigs pa ste/ de'i dbang du byas nas/ de nas zhes bya ba nas/ 'di lta ste dper na zhes bya ba'i bar gyis gsungs so/ /ming tsam zhes bya ba ni don gyis stong pa'i ming ste/ gang gi phyir nang gi bdag nyid kyi don gyi ming med de phyi rol du kha bltas pa nyid du shes pa'i phyir ro/ /phyi rol gyi don med bzhin du yang de ltar snang ba'i phyir phyi rol gyi don du yang med do//gnyi gar yang med de gnyi ga las gzhan pa'i phyogs gsum pa med pa'i phyir ro/ /de bas na shes rab kyi pha rol tu phyin pa ni ming tsam mo/ /byang chub sems dpa' zhes bya ba'i ming yang rigs pa 'di nyid kyis gsal bar bstan par bya ba'i phyir de yang zhes bya ba la sogs pa gsungs so//de bas na ming tsam tha snyad tsam btags pa tsam 'di ni de kho na nyid ma yin pa nyid do zhes blta bar bya'o/ /rigs pa la sogs pa'i rnam par rtog pas ni 'dir lhag mthong yang dag par bsdus pa yin par brjod de/ de las mthong ba'i skad cig ma'i mi rtag pa skye ba'i phyir ro//sems can sems can zhes bya ba ni thog ma dang tha ma med pa'i lus can te/ de'i ming ni sems can gyi ming ngo / /skye ba med pa ni ma skyes pa'o/ /'gag pa med pa ni ma 'gags pa'o/ /de nyid la sdug pa dang sdug bsngal gyi mtshan nyid mi dmigs pa ste/de ni sdug bsngal la chos shes pa'i bzod pa'o/ /de nas nang gi phung po dang / khams dang / skye mched dang / lus dang / de'i yan lag dag dang / phyi rol gyi rtswa dang / shing la sogs pa rnams ni rmi lam dang brag ca la sogs pa lta bu ste/de dag kyang ming tsam/ btags pa tsam skye ba med pa dang / 'gag pa med par shes pa ste/ de bzhin du byang chub sems dpa' dang shes rab kyi pha rol tu phyin pa zhes bya ba dang / de dag gi mi dmigs pa ni sdug bsngal la chos shes pa'o/ /de nas de phung po dang skye mched dang khams kyi bye brag gsum dang /gsum 'dus pa las byung ba'i reg pa dang / tshor ba dang / kun nas nyon mongs pa dang / rnam par byang ba rnam pa mang po yang dag par rjes su mi mthong ngo / /de ci'i phyir zhes bya ba ni gang gi don du'o/ /de ltar na spyod do zhes bya bar sbyar ro//shes rab kyi pha rol tu phyin pa ni 'dus byas kyi khams dang 'dus ma byas kyi khams na yang dag par rjes su mi mthong ngo / /de dag kyang mi mthong ba'i phyir ro/ /de ni sdug bsngal la rjes su shes pa'i bzod pa'o/ /sdug bsngal la rjes su shes pa'i dbang du byas nas/rab 'byor de ni 'di ltar zhes bya ba la sogs pa gsungs so/ /chos de dag thams cad la mi rtog pa ni rang gi ngo bor ro/ /rnam par mi rtog pa ni khyad par du ste/ rnam par mi rtog pa'i chos la gnas nas/ dran pa nye bar gzhag pa la sogs pa sgom pa ni sdug bsngal la rjes su shes pa'o//sdug bsngal la rjes su shes pa la sogs pas rnam par mi rtog pa'i chos la gnas te/ dge ba'i chos rnams sgom pa ni mthong ba'i lam mo/ /chos rnams kyi mtshan nyid ni btags pa tsam mo/ /kun nas nyon mongs par yang mi 'gyur rnam par byang bar mi 'gyur ro zhes bya ba ni dngos po med pa'i phyir ro//gang yang kun nas nyon mongs par mi 'gyur zhes bya ba ni kun 'byung ba med pa'o/ /gang rnam par byang bar mi 'gyur zhes bya bas ni de'i spang bar bya ba med pa ste/ de ni kun 'byung la chos shes pa'i bzod pa'o/ / gzugs la chags par 'gyur ba med do zhes bya ba ni yang mngon par chags par mi 'gyur ba'o/ /mngon par chags pa nyid ni dngos su na sdug bsngal dang kun 'byung yin pa'i phyir ro/ /de yang de'i tshe shin tu nyam chung ba nyid kyis gnas skabs phyi ma yin pa'i phyir de skad gsungs so/ / de yang de ni phung po med do/ /mig la sogs pa med do/ /de la rnam par shes pa med do/ /de la shes pa dang reg pa med do/ /reg pa las byung ba'i tshor ba yang med do/ /'dus byas pa yang med do/ /de spong ba la mngon par chags par mi 'gyur ro zhes bya ba ni kun 'byung la chos shes pa'o//pha rol tu phyin pa dang / mig dang / mngon par shes pa dang / stong pa nyid dang / de bzhin nyid la sogs pa dang / sems can yongs su smin pa dang bcas pa la mngon par chags par 'gyur ba med pa ni kun 'byung la rjes su shes pa'i bzod pa'o/ /de ltar de chos thams cad la mngon par chags pa med pa'i pha rol tu phyin pa rnams kyis rnam par 'phel ba ni byang chub sems dpa'i skyon med pa la yang dag par 'jug par 'gyur te/de bas na rnam par byang ba rnams la yang rgyu dang 'bras bu dag tu rjes su rtogs pa'i phyir kun 'byung la rjes su shes pa'o//de ltar spyod pa na phyir mi ldog pa'i sa non par 'gyur ro zhes bya ba ni de'i sgrib pa 'gog pas ni 'gog pa la chos shes pa'i bzod pa'o/ /de ltar spyod pa na mngon par shes pa rnams yongs su rdzogs pa la sogs pa khyad par du mngon par rtogs pa ni 'gog pa la chos shes pa'o//phung po dang / skye mched dang / khams rnams dang / sa la sogs pa khams drug dang / rten cing 'brel par 'byung ba'i yan lag la rnam pa lngar byang chub sems dpa' dmigs pa med pa ni 'gog pa la rjes su shes pa'i bzod pa'o/ /phung po rnams kyi bsdus pa dang / tha dad pa dang / khams nyi shu rtsa bzhi'i bsdus pa dang tha dad pa dang / skye mched bcu gnyis kyi bsdus pa dang / tha dad pa dang / rten cing 'brel par 'byung ba yan lag bcu gnyis kyi bsdus pa dang tha dad pa dag gi de bzhin nyid la rnam pa lngar byang chub sems dpa' gtan du mi dmigs pa nyid kyis byang chub sems dpa' med pas mi dmigs pa'i phyir 'gog pa la rjes su shes pa'o//gzugs ma yin pa dang / gzugs kyi lam ma yin pa dang / sdug bsngal gyi bden pa'i rnam pa dang / de las bzlog pa dang / gzugs kyi stong pa nyid dang /mtshan ma med pa dang / smon pa med pa ma yin pa dang / de las bzlog pa rnams ma yin pa de ni byang chub sems dpa'i tshig bla dgas te/ gzugs dang de dag gi khyad par med pas mi dmigs pa'i phyir ro/ /de bzhin du rnam par shes pa'i bar du ma yin pa dang /de dag gi lam ma yin pa'i bar du bstan te/ de ni lam la chos shes pa'i bzod pa'o/ /gnyis po 'di ni chos dang chos kyi dbyings te/ des na gsungs pa/ chos kyi dbyings yang dag par rjes su mi mthong ngo / chos kyi dbyings kyis kyang chos yang dag par rjes su mi mthong ste/'di ni lam la chos shes pa'o/ /so sor phung po'i dbyings dang / skye mched kyi dbyings kyis chos kyi dbyings yang dag par rjes su mi mthong ngo / /chos kyi dbyings kyis kyang de dag yang dag par rjes su mi mthong ngo / /de ni lam la rjes su shes pa'i bzod pa'o/ / lam la rjes su shes pa'i dbang du byas nas/ rab 'byor 'dus byas kyi dbyings kyis 'dus ma byas kyi dbyings yang dag par rjes su mi mthong ngo zhes bya ba nas/ de nyid rjes su bstan pa yin no zhes bya ba'i bar gyis gsungs so/ /chos kyi dbyings kyi mngon sum du byed cing snang bas na chos kyi rang gi mtshan nyid mi snang ba'i phyir gnyis su med pa snang ba ste/mtha' yas pa snang ba snang ba med pa tsam ni yang dag pa'i ye shes kyi mtshan nyid de/ de ni 'dus byas kyi khams te/ 'dus byas thams cad las phra ba yin pa'i phyir ro/ /de nyid la kun brtags pa'i gzugs la sogs pas stong pa nyid kyi mtshan nyid ni 'dus ma byas kyi khams te/'dus ma byas ni phra ba nyid kyi phyir ro/ /de dag ni snga ma dang phyi ma mi mthong ste/ mi 'dzin pa'i don to/ /'dzin pa ni rnam par rtog pa yin pa'i phyir ro/ /'o na ji ltar rnam par mi rtog pas don dam par mthong bas mthong ba'i lam zhes bya zhe na/ma yin te zhes bya ba la sogs pa gsungs so/ /de bas na 'dus byas kyi dbyings ma gtogs par 'dus ma byas kyi dbyings gdags par mi nus so zhes bya ba la sogs pa gsungs so/ /de gnyis tha dad na ni 'dus byas kyi khams nyid du snang bar 'gyur te/ snang ba'i ngo bo yin pa'i phyir 'dus ma byas kyi dbyings ni ma yin te/ de las bzlog pa'i phyir ro/ /'dus ma byas kyi dbyings ma gtogs par 'dus byas kyi dbyings kyang rnam par gzhag par mi nus te/ stong pa nyid las tha dad na ni stong pa nyid ma yin par thal ba'i phyir te/ sngon po nyid las tha dad pa'i ser po ni sngon po ma yin pa bzhin no//de bas na snang ba'i bdag nyid stong pa nyid kyi mi rtog pa'i shes pa ni mthong ba'i lam ste/ 'dzin pa ni ma yin no/ /phyogs 'dis sdug bsngal la chos shes pa'i bzod pa la sogs pa yang rnam par mi rtog pa stong pa nyid kyi ye shes kyi ngo bo nyid du rig par bya'o//chos gang yang yang dag par rjes su mi mthong zhes bya ba ni chos thams cad kyi rang gi mtshan nyid kyi snang ba nub pa'i phyir ro/ /'di ni bstan pa'o/ /'di nyid rgyas par bshad pa ni gzugs yang dag par rjes su mi mthong ngo zhes bya ba nas/de nyid rjes su bstan pa yin no zhes bya ba'i bar gyis gsungs pa yin no/ /'di ni mthong ba'i lam la gdams pa'o/ /bsgom pa'i lam gyi dbang du byas nas/ de nas tshe dang ldan pa rab 'byor gyis bcom ldan 'das la 'di skad ces gsol to zhes bya ba nas/ chos la sred pa ste skyon du 'gyur ba'o zhes bya ba'i bar gyis gsungs so//yongs su rtogs par 'tshal bas zhes bya bas ni yongs su bcad par 'tshal ba'o/ /shes rab kyi pha rol tu phyin pa la zhes bya ba ni rnam par mi rtog pa ste/ chos thams cad chos kyi dbyings su kun tu 'gro ba mthong ba'o//gang gi phyir 'jig rten las 'das pa'i rjes la thob pa dag pa 'jig rten pa'i ye shes kyi yongs su gcod pa ni bsgom pa'i lam mo/ /de ltar yang theg pa chen po'i lam gyi yan lag brgyad ni bsgom pa'i lam ste/ de rnam par 'grel pa ni dbus dang mtha' rnam par 'byed pa las/yongs su gcod dang go byed dang / /rnam gsum gzhan yid ches par byed/ /mi mthun phyogs kyi gnyen por ni/ /lam gyi yan lag de brgyad do/ /lta dang tshul khrims yo byad bsnyungs/ /gzhan la rnam par rig byed 'dod/ /nyon mongs nye ba'i nyon mongs dbang //mi mthun phyogs kyi gnyen po'o/ /zhes bshad pa lta bu'o/ /de ni bsgom pa'i lam la gdams pa'o/ /dge 'dun dkon mchog la gdams pa la/ byang chub sems dpa'i gang zag ni dge 'dun zhes gsungs pa ste/ gang zhig /du zhig ce na/ dbang po rtul dang rnon po dag /dad dang mthong thob rigs nas rigs/ /bar chad gcig par skye nas dang / /byed dang byed min 'og min 'gro/ /'phar gsum srid rtse'i mthar thug 'gro/ /gzugs kyi 'dod chags bcom pa dang / /mthong chos zhi lus mngon sum byed/ /bse ru dang ni nyi shu'o//zhes gsungs te/ gsum zhes bya ba ni rim pa bzhin du sbyar ba ste/ tha mar sbyar ro/ /dbang po rtul po zhes bya ba nas bse ru zhes bya ba'i bar ni nyi shu ste/ gsum po ni mdo ji lta ba bzhin du rgyun du zhugs pa dang / lan cig phyir 'ong ba dang / phyir mi 'ong ba zhes bya ba'i don to//dbang po rtul po dang rnon po ni dad pas rjes su 'brang ba dang / chos kyis rjes su 'brang ba'o/ /dad dang mthong thob ces bya ba ni dad pas mos pa dang / mthong bas thob pa'o/ /rigs nas rigs zhes bya ba ni mi'i rigs nas rigs su 'gro ba dang / lha'i rigs nas rigs su 'gro ba'o//bar chad gcig ces bya ba ni bar chad gcig pa'o/ /bar zhes bya ba ni bar ma dor yongs su mya ngan las 'da' ba'o/ /skyes nas zhes bya ba ni skyes nas yongs su mya ngan las 'da' ba'o/ /byed dang zhes bya ba ni mngon par 'du byed pa dang bcas pas yongs su mya ngan las 'da' ba'o//byed min zhes bya ba ni mngon par 'du byed pa med pas yongs su mya ngan las 'da' ba'o/ /'og min gyi bar du 'gro bas na 'og min 'gro ste/ 'og min gyi mthar thug par 'gro ba'o/ /bar chad gcig pa zhes bya ba nas/ 'og min 'gro zhes bya ba'i bar gyi tshig drug po 'di dag ni zlas dbye ba'i bsdu ba byas te/tshig de dag la tshig gi phyogs gcig rjes su 'gro ba ni rigs pa yin pa'i phyir ro/ /yongs su mya ngan las 'da' ba dang / mngon par 'du zhes bya ba'i sgra mi mngon par byas pa'o/ /skyes nas zhes bya ba'i sgra ni rdzus te skyes pa ste/de ni khyad par chung ba yin pa'i phyir ro/ /'phar ba zhes bya ba ni 'phar ba dang / phyed du 'phar ba dang / gnas skabs thams cad du 'chi 'pho ba'o/ /srid rtse'i mthar thug 'gro zhes bya ba ni srid pa'i rtse'i mthar thug par 'gro ba'o/ /gzugs kyi 'dod chags bcom zhes bya ba ni gzugs kyi 'dod chags dang bral ba'o//mthong chos zhi zhes bya ba ni mthong ba'i chos la yongs su mya ngan las 'da' ba'o/ /lus kyi mngon sum du byed ces bya ba ni rnam par thar pa brgyad la bsam gtan pa'o/ /bse ru zhes bya ba ni rang sangs rgyas kyi dgra bcom pa ste/de dang chos mthun pa'i phyir ro/ /'dir 'bras bu las ni gang yang rnam par gzhag pa med de/ de bas na 'bras bu la ltos nas zhugs par yang mi 'dod do/ /byang chub la zhugs pa'i phyir zhes bya bar yang rnam par gzhag pa med de/ de tha dad pa med pa'i phyir ro//shes rab kyi pha rol tu phyin pa la spyod pa dang / bden pa shes pa dang / skyabs shes pa dang / ma zhen pa dang / mi ngal ba dang / phyogs bcu dag tu song nas/ de bzhin gshegs pa rnams kyi zhal mthong zhing bsnyen bkur byas te/ de nas de'i lam yongs su 'dzin par 'gyur ba dang /spyan lnga dang ldan par 'gyur ba dang / mngon par shes pa drug dang ldan par 'gyur ba dang / mthong ba dang bsgom pa'i lam dag gis 'phags pa'i sa la gnas par 'gyur ba ste/ 'di ni gdams ngag gi go rims so// //de ltar gdams ngag bshad nas nges par 'byed pa'i cha dang mthun pa rnams brjod par bya ste/dmigs pa dang ni rnam pa dang / /rgyu dang yongs su 'dzin pa yis/ /byang chub sems dpa' skyob pa yis/ /drod sogs bdag nyid ji bzhin du/ /rnam rtog bzhi po ldan sten pa//chung dang 'bring dang chen po rnams/ /nyan thos bse ru lta bu dang / /bcas pa dag las khyad par 'phags/ /zhes bya ba gsungs so/ /nges par byed pa ni nges 'byed de/ gcig tu nges pa dang ldan pa'o/ /de'i yan lag ni rnam pa bzhi ste/ drod dang / rtse mo dang /bzod pa dang / chos kyi mchog go/ /de dag ni nges par 'byed pa'i cha dang mthun pa yang yin te/ rnam par mi rtog pa rtogs pa ni nges par 'byed pa ste/ mthong ba'i lam mo/ /de thob pa ni cha'o/ /de la phan pa ni nges par 'byed pa'i cha dang mthun pa'o/ /la lar ni mang po'i tshig gsal ba'i dbye ba byas te/dro ba rnams dang / rtse mo rnams dang / bzod pa rnams dang / 'jig rten chos kyi mchog rnams zhes bya ba'o/ /la lar ni gyur pa'i sgra spyi'i tshig tu brjod de/ dro bar gyur pa dang / rtse mor gyur pa dang / bzod par gyur pa dang / 'jig rten chos kyi mchog tu gyur pa'o//sems can thams cad yongs su skyob pa'i bsam pa nyid kyis na byang chub sems dpa' rnams ni skyob pa'o/ /de rnams kyi gang chung ngu dang / 'bring dang chen po ni khyad par 'phags zhes bya ba ni khyad par du gyur pa nyid kyi phyir ro/ /gang las she na/nyan thos dag dang bse ru dang bcas pa dag las te/ nyan thos la sogs pa rnams kyi las zhes bya ba'i don to/ /gtan tshigs gang las she na/ dmigs pa dang ni zhes bya ba la sogs pa gsungs so/ /dmigs pa dang / rnam pa dang / theg pa gsum thob pa'i rgyur 'gyur ba dang /thabs la mkhas pa dang / dge ba'i bshes gnyen gyis yongs su gzung ba dang / ji ltar rang rnam par rtog pa bzhi dang ldan pa ste/ de dag rab tu byed pa las ni go rims ji lta ba bzhin du sbyar ro/ /mdo las ni 'di las gzhan du gsungs te/ des na mdo'i rim pas 'di nyid bshad par bya ste/ go rims ji lta ba bzhin du ni ma yin no/ /de la nyan thos la sogs pa dang 'brel pa'i nges par 'byed pa'i cha dang mthun pas ni bden pa bzhi la dmigs pa ste/ bden pa re re la yang rnam pa bzhi bzhi ste/ mi rtag pa dang / sdug bsngal la sogs pa dang /rgyu dang kun 'byung ba la sogs pa dang / 'gog pa dang / zhi ba la sogs pa dang / lam dang rigs pa la sogs pa'o/ /byang chub sems dpa'i drod dang / rtse mo dang / bzod pa dang / chos kyi mchog gang yin pa de dag re re la yang chung ngu dang / 'bring dang / chen po'i dbye bas rnam pa bcu gnyis su 'gyur te/ de la dro ba chung ngu'i ni/ /dmigs pa mi rtag la sogs pa/ /bden pa'i rten can de yi ni/ /rnam pa mngon zhen la sogs 'gog /ces bya ba gsungs so/ /bden pa'i rten can zhes bya ba ni bden pa bzhi'i yul lo/ /mi rtag la sogs zhes bya ba ni mi rtag pa nyid la sogs pa la dmigs pa ste/mdo ji lta ba bzhin no/ /de'i rnam pa zhes bya ba ni de la dmigs pa de dang 'dra ste/ 'di lta ste/ mngon zhen la sogs 'gog ces bya ba ni mngon par zhen pa ma yin pa dang / gnas pa med pa dang / 'du shes med pa'o//de la dngos po nyid kyi shas cher ngar 'dzin pa ni/ mngon par zhen pa'o/ /'bring ni gnas pa'o/ /chung ngu ni 'du shes so/ /de dag 'gog pa'o/ /de dag gis stong pa ni ye shes kyi rang gi ngo bo ste/ dper na bum pas dben pa'i phyogs kyi ngo bo nyid ni phyogs na bum pa med pa'o//de la dang po ni chos la sred pa zhes bya ba nas/ skyon du 'gyur ro zhes bya ba'i bar gyis gsungs so/ /de ni sdug bsngal gyi bden pa la drod chung ngu'i dmigs pa dang rnam pa'o/ /de nas mi mthong ste zhes bya ba'i bar gyis ni kun 'byung gi bden pa la drod chung ngu'i dmigs pa gsungs te/dmigs pa ni gzugs la sogs pa'i gzhi spang bar bya ba la sogs pa'o/ /rnam pa ni de las mngon par zhen pa la sogs pa dgag pa'o/ /de nas de ltar 'gog pa zhes bya ba nas/ yang dag par mi shes pa'o zhes bya ba'i bar gyis ni 'gog pa la sogs pa'i gzhi mngon sum du byed pa la sogs pa'o//rnam pa ni snga ma bzhin du ste/ de la skyon med pa ni 'di yin te/ phyi la sogs pa'i gzhi la stong pa nyid ni dmigs pa'o/ /nang la sogs pa'i gzhi la stong pa nyid du de dag yang dag par rjes su mi mthong ba ni rnam pa ste/ 'di ni skyon med pa'o//de ni 'gog pa'i bden pa la drod chung ngu'i dmigs pa dang rnam pa'o/ /de nas zhes bya ba nas rig par bya'o zhes bya ba'i bar gyis ni lam gyi bden pa la'o/ /de la gzugs la sogs pa'i gzhi shes par bya ba nyid ni dmigs pa'o/ /de ltar yang bsam par bya ba ma yin pa ni rnam pa'o//de bzhin du sems med pa ni de'i rang bzhin 'od gsal ba'o/ /'od gsal ba gang las she na/ gang gi phyir sems de 'dod chags la sogs pa dang ldan pa yang ma yin/ bral ba yang ma yin pa'o/ /de'i sems med pa gang zhe na/ gang de'i rang bzhin ni chos nyid de/'gyur ba med cing rnam par rtog pa med pa'o/ /ji ltar sems ma yin pa ni sems med pa nyid do/ /de bzhin du gzugs la sogs pa yang gzugs la sogs pa med pa nyid de/ des na sems la sogs pa'i rten can gyi rang bzhin ni dmigs pa'o//'od gsal ba ni rnam pa'o/ /de ni lam gyi bden pa la drod chung ngu'i dmigs pa dang rnam pa'o/ /theg pa gsum char thob pa'i rgyu zhes bya ba la byang chub sems dpa'i dro ba la sogs pa'i rnam pa bcu gnyis ni theg pa gsum ste/ byang chub rnam pa gsum thob pa'i rgyu'o//gang dag rigs la sogs pa'i stobs kyis byang chub dman pa yang thob pa'i phyir ro/ /nyan thos dang rang sangs rgyas kyi theg pa'i dro ba la sogs pas ni nam yang byang chub dam pa thob par mi byed do/ /gang nyan thos kyi sa la slob par 'dod pas kyang zhes bya ba nas/ bslab par bya'o zhes bya ba'i bar gyis gsungs so//'bring gis ni/ gzugs sogs skye 'jig gnas pa dang / /zhes bya ba la/ ming gis zhes bya ba ni lhag ma'o/ /gnas pa med pa bral ba ste/ /ming gis zhes bya ba yang lhag ma'o/ /gzugs la sogs pa ni mdo ji lta ba bzhin du rgya cher shes par bya'o//de'i skye ba ni ming gis gzhan las rtogs pa ste de med pa'o/ /'jig pa ni ming gis gzhan dag la ston pa ste/ de med pa de ni dro ba 'bring gi dmigs pa'o/ /ming de ston pa la gnas pa yang med la/ mi gnas pa yang med pa ste/ nyan pa po la bral zhing 'phos pa yang med pa ni rnam pa'o//de yang gang las she na/ ming ni med pa'i phyir ro/ /des na yang de dag med do zhes dgongs pa'o/ /gang de nas tshe dang ldan pa rab 'byor gyis zhes bya ba nas gang yang 'di bcom ldan 'das zhes bya ba'i bar gyis gsungs so/ / gnas pa med pa ma yin mi gnas pa med pa yang ma yin zhes bya ba yang 'dir brjod de/ rnam pa bzhi med par 'dir bstan na ni 'brel pa med par 'gyur ba'i phyir ro/ /bstan bcos su ni gnas pa dang bral ba mi dgag pa ni gtso bo yin pa'o/ /de ni drod 'bring gi dmigs pa dang rnam pa'o//chen po'i ni/ gnas dang btags dang brjod du med/ /ces bya ba la/ 'di dag ni btags pa tsam ste 'di lta ste byang chub sems dpa' zhes chos kyi brdar bgyi ba zhes bya ba nas/ sangs rgyas kyi chos zhes bgyi ba'i ming zhes bya ba'i bar ni dmigs pa'o/ / de phung po'am/ khams sam/ dngos po 'am dngos po med pa gang gis kyang brjod du med do zhes bya ba ni rnam pa'o/ /gang yang 'di bcom ldan 'das zhes bya ba la sogs pa nas/ mi gnas pa'i tshul gyis legs par gnas so zhes bya ba'i bar ni dro ba chen po'i dmigs pa dang rnam pa'o//dper na gtsub shing gis gtsubs pa na me 'byung ba'i snga ltas dro ba de bzhin du 'jig rten las 'das pa'i ye shes kyi me yang de bzhin no/ /des na dro ba dang chos mthun pa'i phyir na drod do/ /rtse mo chung ngu'i ni/ gzugs sogs mi gnas de dag ni/ /de yi ngo bo rang bzhin med//de dag gcig gi rang bzhin gcig /ces bya ba la/ gzugs sogs mi gnas zhes bya ba ni gzugs la sogs pa la mi gnas pa'o/ /gzugs la sogs pa gang yin pa de dag gi dngos po stong pa nyid ni de dmigs pa'o/ /gzugs sogs kyi stong pa nyid gang yin pa de gzugs ma yin te/mtshan nyid tha dad pa'i phyir ro zhes bya ba 'di ni gzugs la sogs pa'i stong pa nyid gang lags pa de gzugs ma yin no zhes bya ba gsungs so/ /de dag gcig gi rang bzhin gcig /ces bya ba ni phan tshun gyi ngo bo nyid de gzugs la sogs pa nyid stong pa nyid kyang gzugs la sogs pa'o zhes bya ba ni rnam pa'o//gzhan yang / de mi rtag sogs par mi gnas/ /de rnams de yi ngo bos stong / /de dag gcig gi rang bzhin gcig /ces bya ba la/ gzugs la sogs pa la mi rtag pa la sogs par mi gnas pa ni gnas pa med pa'o//gang gzugs la sogs pa'i mi rtag pa la sogs pa ni gzugs mi rtag pa la sogs pas stong pa nyid de dmigs pa'o/ /gzugs mi rtag pa la sogs pa nyid stong pa nyid do/ /stong pa nyid kyang gzugs mi rtag pa la sogs pa nyid de/de ni rnam pa'o/ /gang mi gnas pa'i tshul gyis legs par gnas pa zhes bya ba nas/ rang gi ngo bo stong pa nyid nye bar blang bar bya'o zhes bya ba'i bar gzhan gyis gsungs te/ de ni rtse mo chung ngu'i dmigs pa dang rnam pa'o/ /'bring gi ni/ chos rnams mi 'dzin gang yin dang //zhes bya ba la/ gzugs la sogs pa'i chos rnams mi 'dzin pa gang yin pa de ni dmigs pa'o/ /de dag mtshan mar mi mthong phyir/ /zhes bya ba la/ gzugs la sogs pa nyid mtshan ma'o/ /mtshan ma nyid nyon mongs pa'o/ /de yid la mi byed pa'i phyir te/ de ni rnam pa'o/ /gang de ci'i phyir zhe na/ de ltar na rnam pa thams cad mkhyen pa nyid mtshan mar mi gzung ngo zhes bya ba nas/ chos thams cad yongs su mi gzung ba'i slad du'o zhes bya ba'i bar gyis gsungs te/ de ni rtse mo 'bring gi dmigs pa dang rnam pa'o/ /chen po ni/ thams cad dmigs su med par ni//shes rab kyis ni yongs rtogs pa'o/ /zhes bya ba la/ shes rab kyi pha rol tu phyin pa zhes bya ba ni gang yin/ chos gang ci yang rung ba mi dmigs pa'am zhes pa ste/ de ni dmigs pa'o/ /gang mi dmigs pa zhe na/ pha rol tu phyin pa la sogs pa'i chos thams cad mi dmigs pa ste/de ni rnam pa'o/ /gang gzhan yang bcom ldan 'das zhes brtags pa bya ba nas brtsams nas/ rig par bya'o zhes bya ba'i bar gyis gsungs so/ /de ni rtse mo chen po'i dmigs pa dang rnam pa'o/ /dge ba'i rtsa ba g.yo ba thams cad kyi rtse mo yin pa'i phyir rtse mo'o//bzod pa chung ngu'i ni/ gzugs sogs ngo bo nyid med nyid/ /de med pa yi ngo bo nyid/ /ces bya ba la/ gzugs la sogs pa'i ngo bo nyid med pa ni rang gi mtshan nyid dang bral ba ste dmigs pa'o/ /gang gi phyir gzugs la sogs pa de'i dngos po med pa'i ngo bo de ni rnam pa'o//gang de nas tshe dang ldan pa shA ri'i bus zhes bya ba nas/ rnam pa thams cad mkhyen pa nyid du nges par 'byung ngo zhes bya ba'i bar gyis gsungs te/ de ni bzod pa chung ngu'i dmigs pa dang rnam pa'o/ /'bring gi ni/ de dag skye med nges 'byung med/ /dag dang zhes bya ba la gzugs la sogs pa de dag rang gi dngos po med pa'i phyir skye ba med cing nges par 'byung ba med pa ste/de ni dmigs pa'o/ /de ltar spyod pa ni lus la sogs pa dag pa thob pa zhes bya ba de nyid dag pa ste rnam pa'o/ /gang de ci'i phyir zhe na/ 'di ltar tshe dang ldan pa zhes bya ba nas/ yang dag par rdzogs pa'i byang chub ces bya ba'i bar gyis gsungs te/de ni bzod pa 'bring gi dmigs pa dang rnam pa'o/ /chen po'i ni/ de dag de yi mtshan med nyid/ /de yi mtshan mar mi rten pas/ /mos min 'du shes med pa yin/ /zhes bya ba la/ gzugs la sogs pa'i mtshan ma med pa ni dmigs pa'o//rnam pa yang de'i mtshan ma la mi rten pa dang bcas pa'i mos pa ma yin pa dang / 'du shes med pa yin no/ /gang de nas tshe dang ldan pa zhes bya ba nas/ rnam pa thams cad mkhyen pa nyid ces bya ba'i bar gyis gsungs so/ /de ni bzod pa chen po'i dmigs pa dang rnam pa'o//chos kyi mchog la bzod pa'i phyir na bzod pa'o/ /chos kyi mchog chung ngu ni/ ting 'dzin da yi byed pa nyid/ /ces bya ba la/ ting nge 'dzin ni dmigs pa ste/ chos thams cad len pa med pa zhes bya ba gsungs so/ /gang las she na/ gang gi phyir chos thams cad ni len pa med pa ste/des dngos po med pa'i ngo bo nyid kyi phyir ro/ /de'i byed pa ni myur du mngon par rdzogs par byang chub pa ste/ de ni rnam pa'o/ /gang de yang tshe dang ldan pa zhes bya ba la sogs pa nas/ nam mkha' ltar chags pa med pas rnam par grol zhing gos pa med pa zhes bya ba'i ting nge 'dzin ces bya'o zhes bya ba'i bar gyis gsungs te/'di ni chos kyi mchog chung ngu'i dmigs pa dang rnam pa'o/ /'bring gi ni/ lung ston pa dang rlom pa zad/ /ces bya ba la/ de ltar spyod pa na dus gsum du gshegs pa'i de bzhin gshegs pa rnams kyis lung bstan pa ni dmigs pa'o//ting nge 'dzin dang bdag dang snyoms par zhugs pa zhes bya ba mi dmigs shing rlom pa zad pa ni rnam pa'o/ /gang de nas zhes bya ba la sogs pa nas/ mi dmigs so zhes bya ba'i bar gyis gsungs te/ 'di ni chos kyi mchog 'bring gi dmigs pa dang rnam pa'o//chen po'i ni/ /gsum po phan tshun ngo bo gcig /ting 'dzin rnam par mi rtog pa/ /zhes bya ba la/ byang chub sems dpa' dang ting nge 'dzin dang shes rab kyi pha rol tu phyin pa dag gi phan tshun rang gi ngo bo gcig pa ni dmigs pa'o/ /de yang ting nge 'dzin la rnam par mi rtog pa ni rnam pa'o//gang shA ri'i bus smras pa zhes bya ba la sogs pa nas/ yang dag par mi shes so zhes bya ba'i bar gyis gsungs te/ de ni chos kyi mchog chen po'i dmigs pa dang rnam pa'o/ /'jig rten pa thams cad kyi chos kyi mchog yin pas na chos kyi mchog go/ /de ltar nges 'byed cha mthun ni//chung dang 'bring dang chen pos yin/ /zhes bya ba la/ re re la yang chung ngu dang 'bring dang / chen po'i dbye bas rnam pa bcu gnyis ni nges par 'byed pa'i cha dang mthun pa'o/ /de ltar zhes brjod pa ni de bzhin te/ dmigs pa dang rnam pa'i dbye bas go rims bzhin du shes par bya'o/ / drod la sogs pa'i rnam par rtog pa dang yang dag par 'brel pa brjod par bya ste/ de'i gnas skabs ni mdo las/ de nas bcom ldan 'das zhes bya ba nas/ rnam par dag pa zhes brjod do zhes bya ba'i bar gyis gsungs te/ zhi dang de yi gnyen po yis/ /gzung bar rtog pa rnam pa gnyis//rmongs dang phung sogs bye brag gis/ /de ni so sor rnam pa dgu/ /zhes bya ba la/ gzung ba'i rtog pa zhes bya ba ni gzung ba'i rnam par rtog pa'o/ /de ni rnam pa gnyis te/ dang po bzhi ni 'jig rten la grags pa'o/ /cig shos ni de'i gnyen po ste/ nyan thos la sogs pa la rab tu grags pa'o//de dag re re la yang rnam pa dgu dgu ste/ ma rig pa dang phung po la sogs pa'i dbye ba dang / phung po dang skye ba'i sgo la sogs pa'i dbye bas te/ go rims bzhin du dang po ni dro ba dag la/ gnyis pa ni rtse mo dag la'o/ /de la med pa'i don ni ma rig pa'i yul yin pa'i phyir ro//de 'dzin pa'i rnam par rtog pa ni ma rig pa'i rnam par rtog pa ste/ gang shA ri'i bus gsol pa zhes bya ba nas/ de'i phyir med ces bya'o zhes bya ba'i bar gyis gsungs so/ /phung po'i rnam par rtog pa ni gang shA ri'i bus gsol pa zhes bya ba nas/dngos po med pa'i ngo bo nyid stong pa nyid nye bar blang bar bya'o zhes bya ba'i bar gyis gsungs so/ /ming dang gzugs la mngon par zhen pa'i rnam par rtog pa ni gang de la byis pa zhes bya ba nas/ mngon par zhen pa zhes bya ba'i bar gyis gsungs so/ /mtha' gnyis la mngon par zhen pa'i rnam par rtog pa ni gang de dag chos rnams la mngon par zhen pa zhes bya ba la sogs pa nas/grangs su 'gro'o zhes bya ba'i bar gyis gsungs so/ /kun nas nyon mongs pa dang / rnam par byang bar mi shes pa'i rnam par rtog pa ni gang de dag ma rig pa dang / sred pa'i rkyen zhes bya ba la sogs pa nas/chos rnams las nges par mi 'byung ngo zhes bya ba'i bar gyis gsungs so/ /'phags pa'i lam la mi gnas pa'i rnam par rtog pa ni gang de dag yid mi ches zhes bya ba la sogs pa nas/ rnam pa thams cad mkhyen pa nyid la zhes bya ba'i bar gyis gsungs so/ /dmigs pa'i rnam par rtog pa ni yang shA ri'i bus gsol pa/ji ltar yang zhes bya ba la sogs pa nas/ mi dmigs pa'i tshul gyis zhes bya ba'i bar gyis gsungs so/ /bdag la sogs pa'i rnam par rtog pa ni gang shA ri'i bus gsol pa gang gis zhes bya ba la sogs pa nas/ shin tu rnam par dag pa nye bar blang bar bya'o zhes bya ba'i bar gyis gsungs so//skye ba la sogs pa'i rnam par rtog pa'i gnyen por ni gang skye ba med pa zhes bya ba la sogs pa nas/ rnam par dag pa zhes bya ba'i bar gyis gsungs so/ /de ni gzung ba'i rnam par rtog pa dang po rnam pa dgu'o//phung po'i don gyi rnam par rtog pa ni gang thabs la mi mkhas pas gzugs la sogs pa zhes bya ba gsungs so/ /skye ba'i sgo'i don gyi rnam par rtog pa ni gang mig la rtog cing zhes bya ba la sogs pas gsungs so/ /rigs kyi don gyi rnam par rtog pa ni gang mig dang gzugs dang /mig gi rnam par shes pa'i khams zhes bya ba la sogs pas gsungs so/ /rten cing 'brel par 'byung ba'i don gyi rnam par rtog pa ni gang ma rig pa zhes bya ba la sogs pas gsungs so/ /stong pa nyid kyi don gyi rnam par rtog pa ni gang de nang stong pa nyid ces bya ba la sogs pas gsungs so//pha rol tu phyin pa'i don gyi rnam par rtog pa ni gang pha rol tu phyin pa drug ces bya ba la sogs pas gsungs so/ /mthong ba'i lam gyi rnam par rtog pa ni gang byang chub kyi phyogs kyi chos sum cu rtsa bdun zhes bya ba la sogs pas gsungs so/ /bsgom pa'i lam gyi rnam par rtog pa ni gang bsam gtan dang /mngon par shes pa dang / tshad med pa la sogs pas gsungs so/ /mi slob pa'i lam gyi rnam par rtog pa ni gang de bzhin gshegs pa'i stobs bcu zhes bya ba la sogs pas gsungs so/ /de ni gzung ba'i rnam par rtog pa rnam pa dgu'o//bdag sogs rang dbang ngo bo dang / /de bzhin phung sogs rten sgo nas/ /rdzas dang btags pa'i rten can gyi/ /'dzin pa'ang rnam pa gnyis su 'dod/ /'dzin pa zhes bya ba ni 'dzin pa'i rnam par rtog pa'o/ /de yang rnam pa gnyis su 'dod do/ /ji ltar zhe na/ gang gi phyir bdag rang dbang la sogs pa'i ngo bos rdzas la brten pa dang / phung po la sogs pa la brten pas btags pa la brten pa ste/ de dag ni go rims bzhin du bzod pa dang chos kyi mchog la sbyar ro/ /de bzhin du zhes bya ba ni ji ltar gzung ba'i rnam par rtog pa so sor rnam pa dgu yin pa de bzhin du 'dzin pa'i rnam par rtog pa yang de bzhin no zhes bya ba'i don to//de la bdag rang dbang can gyi rnam par rtog pa'i gnyen por ni/ gang shA ri'i bu bdag nye bar mi dmigs zhes bya ba la sogs pas gsungs so/ /bdag gcig pur rnam par rtog pa'i gnyen por ni/gang shA ri'i bu gzugs zhes bya ba la sogs pas gsungs so/ /de nas bdag rgyur rnam par rtog pa'i gnyen por ni/ gang shA ri'i bu mig ces bya ba la sogs pas gsungs so/ /de nas bdag lta ba po la sogs pa rnam par rtog pa'i gnyen por ni/ gang shA ri'i bu mig dang gzugs dang /mig gi rnam par shes pa zhes bya ba la sogs pas gsungs so/ /de nas bdag kun nas nyon mongs pa'i rten du rnam par rtog pa'i gnyen por ni/ gang shA ri'i bu rten cing 'brel par 'byung ba zhes bya ba la sogs pas gsungs so/ /de nas bdag 'dod chags dang bral ba'i rten du rnam par rtog pa'i gnyen por ni gang bsam gtan dang po la zhes bya ba la sogs pas gsungs so//de nas bdag mthong ba'i lam gyi rten du rnam par rtog pa'i gnyen por ni gang 'phags pa'i bden pa zhes bya ba la sogs pas gsungs so/ /de nas bdag bsgom pa'i lam gyi rten du rnam par rtog pa'i gnyen por ni gang rnam par thar pa brgyad ces bya ba la sogs pas gsungs so//de nas bdag don dam pa'i rten du rnam par rtog pa'i gnyen por ni gang stobs bcu zhes bya ba la sogs pas gsungs so/ /de ni 'dzin pa'i rnam par rtog pa dang po dgu'o//sgyu ma'i ngo bo nyid kyi phyir btags pa'o/ /de la dang por phung por btags par rnam par rtog pa ni bcom ldan 'das de lta ma lags so zhes bya ba'i bar gyis gsungs so/ /de nas skye mched la btags par yod pa'i rnam par rtog pa ni bcom ldan 'das de lta ma lags so zhes bya ba'i bar gyis gsungs so//de nas khams btags par rnam par rtog pa ni sgyu ma nyid rnam par shes pa'i khams so zhes bya ba'i bar gyis gsungs so/ /de nas rten cing 'brel par 'byung ba btags par rnam par rtog pa ni sgyu ma nyid rga shi zhes bya ba'i bar gyis gsungs so/ /de nas rnam par byang bar btags par rtog pa ni bcom ldan 'das ma lags so zhes bya ba'i bar gyis gsungs so//de nas mthong ba'i lam btags par rnam par rtog pa ni/ bcom ldan 'das ma lags so zhes bya ba'i bar gyis gsungs so/ /de nas bsgom pa'i lam btags par rnam par rtog pa ni bcom ldan 'das ma lags so zhes bya ba'i bar gyis gsungs so//de nas khyad par gyi lam btags par rnam par rtog pa ni bcom ldan 'das ma lags so zhes bya ba'i bar gyis gsungs so/ /de nas mi slob pa'i lam btags pa'i rnam par rtog pa ni rnam pa thams cad mkhyen pa nyid rjes su thob par 'gyur ro zhes bya ba'i bar gyis gsungs so//de ni 'dzin pa'i rnam par rtog pa gnyis pa dgu yin no/ /rnam par rtog pa dang yang dag par 'brel pa bshad nas/ yang dag par yongs su 'dzin pa'i dbang du byas te/ sems mi 'gong ba nyid sogs kyi//ngo bo nyid med sogs ston byed/ /de yi mi mthun phyogs bor ba/ /rnam pa kun tu yongs 'dzin yin/ /zhes bya ba la/ skrag pa nyid ni chung ngu dang 'bring dang chen po'i rim pa ji lta bar skrag pa dang dngang ba dang shin tu dngang bar 'gyur ba ste/ de'i gnyen por mi 'gong /yang dag par mi 'gong / yang dag par 'gong bar mi 'gyur ba'o/ /gang gi phyir de bzhin du gang las sems mi 'gong ba la sogs par 'gyur ba de la de skad ces bya ba ste/ thabs la mkhas pa zhes bya ba'i don to/ /ngo bo nyid med ces bya ba ni chos thams cad ngo bo nyid med pa'o//sogs pa zhes bya ba'i sgras ni rnam pa thams cad mkhyen pa nyid yid la byed pa dang / yongs su bsngo ba la sogs pa'o/ /de ston par byed pa ni 'chad par byed pa ste/ dge ba'i bshes gnyen zhes bya ba'i don to/ /de'i mi mthun pa'i phyogs ni thabs la mi mkhas pa dang / sdig pa'i grogs po'o//de'i mi mthun pa'i phyogs bor ba ni yongs su gtong ba'o/ /gang bzhi po de dag ni rnam pa kun tu ste rnam pa thams cad du'o/ /de yang dag par yongs su 'dzin pa zhes bya ba la/ yang dag par yongs su 'dzin pa nyid ni nang dang phyi rol gyi 'dren pa dag gis mi mthun pa'i phyogs med pa'o//'di dag gi skabs kyi mdo ni de nas tshe dang ldan pa rab 'byor zhes bya ba la sogs pa nas/ rab 'byor gyis gsol pa zhes bya ba yan chad kyis gsungs so/ /de dag so sor nges par bstan pa ni rab 'byor gyis gsol pa zhes bya ba sngon du 'gro bas rnam pa bzhi'i rgyun gyis te/shes par byas nas yongs su spang bar bya'o zhes bya ba'i bar du'o/ /nges par 'byed pa'i yan lag rnam pa bzhi bstan nas/ sgrub pa'i rten yang brjod par bya ste/ de yang byang chub kyi rigs te/ de yang / rtog pa yi ni chos drug dang / /gnyen po dang ni spong ba dang //de dag yongs su gtugs pa dang / /shes rab snying brtser bcas pa dang / /slob ma thun mong min nyid dang / /gzhan gyi don gyi go rims dang / /ye shes rtsol ba mi mnga' bar/ /'jug pa'i rten la rigs zhes bya/ /zhes gsungs so/ /sgrub pa dang / 'jug pa dang /tshogs dang / nges par 'byung ba zhes bya ba las 'di nas bzung ste/ de'i rten dang / dmigs pa dang / ched du bya ba rnams bshad de/ de dag las rigs zhes bya ba ni skabs kyi byang chub kyi rigs te/ nges par 'byed pa'i cha dang mthun pa dang / mthong ba dang / bsgom pa'i lam ste/ rtogs pa'i chos ni drug go/ /des na dro ba la sogs pa bcu gsum gyi rten gang yin pa ni rab tu gnas pa ste/ rten de ni byang chub kyi rigs te/ 'di dag nyid kyis byang chub yang dag par sgrub pa'i phyir ro/ /gang byang chub kyi rigs de ni 'di dag gi rten te/ rigs med pa dang /rigs dman pa ni 'di dag gi rten ma yin pa'i phyir ro/ /go zhes bya ba ni 'gro ba dang gnas pa la 'jug pa'o/ /'dir ni gnas pas na 'jug pa ste/ rten pa zhes bya ba'i don te/ dper na nam mkha' ni thams cad du 'gro ba zhes bya ba lta bu'o/ /mi g.yo ba'i tshul gyis 'dzin pas skyob pa ste/des na rigs ni rten no/ /des na byang chub kyi rigs kyi skabs nas/ rab 'byor gyis gsol pa/ bcom ldan 'das kyis byang chub sems dpa' byang chub sems dpa' zhes gsungs pa/ bcom ldan 'das byang chub sems dpa' zhes bya ba'i tshig gi don gang lags zhes bya ba la/ gang byang chub sems dpa' zhes bya ba byang chub kyi rten sems dpa' ni byang chub sems dpa' zhes bya ba nas te/ de byang chub sems dpa' zhes brjod do/ /des na byang chub sems dpa' zhes bya ba'i tshig 'di ni byang chub kyi rten sems dpa' tshig go/ /tshig gi don gang yin pa zhes bya ba ni brjod par bya ba gang yin zhes pa ste/bdag skye mched drug gang yin zhes dris pa'i don to/ /bcom ldan 'das kyis bka' stsal pa/ rab 'byor byang chub sems dpa'i tshig gi don ni tshig gi don med pa ste/ rab 'byor byang chub sems dpa'i tshig gi don zhes bya ba la/ bdag dang skye mched drug gi ngo bo ni tshig gi don te/ tshig gi don du mngon par 'dod pa nyid kyi phyir ro/ /tshig gi don med pa ni tshig gi don to/ /gzhan gyi dbang gi ngo bo'i skye mched drug gi rdzas la gang kun brtags pa'i ngo bo de dag med do/ /de dag gi chos nyid stong pa nyid chos kyi dbyings ni 'dir byang chub sems dpa'i tshig gi don to zhes bya ba'i tha tshig go//'o na rdzas 'ga' zhig gi gzhir 'gyur ba de ni dper na rgya shug gi snod bzhin no/ /dngos po med pa ni rdzas su med de/ de ji ltar byang chub kyi gzhir 'gyur snyam na/ de ci'i phyir zhe na zhes bya ba la sogs pas gsungs so/ / gzhi las skye ba dang yod pa ni rdzas yin la/ de'i gzhi rdzas nyid du 'gyur te/ dper na lo thog gis dang rgya shug gi snod lta bu'o/ /byang chub la ni skye ba med/ yod pa yang med/ med pa med/ grub par bya ba med/ dmigs su med de/ 'di lta ste/ chos kyi dbyings sgrib pa thams cad dang bral ba 'am/rnam pa thams cad du shin tu gsal ba ni byang chub po/ /de yang chos kyi dbyings las tha mi dad pas de bzhin du byang chub de skye ba med do/ /yod pa med do/ /grub par bya ba med do/ /dmigs pa med de/ chos kyi dbyings las tha dad pa'i byang chub med pa'i phyir ro//med pa nyid kyang ma yin te/ kun rdzob tu yod pa'i phyir ro/ /chos kyi dbyings rnam par dag pa gang yin pa yod pa nyid la dmigs pa de dag kho na la byang chub tu nye bar gdags pa'i phyir ro/ /de'i phyir byang chub kyi rten pa yod pa rdzas su ma yin no/ /chos kyi dbyings kyang de'i rten du ji ltar 'gyur zhe na/dper na zhes bya ba la sogs pas gsungs so/ /nam mkha' la ni rjes med de/ /gzugs can gyi mtshan nyid rjes med pa'i phyir ro/ /de de nyid kyis na med do/ /des na mi dmigs so/ /nam mkha' la cha shas med pas bya'i rjes med cing mi dmigs kyang nam mkha' de'i gzhir yang 'gyur ro//de bzhin du zhes bya ba ni nam mkha' bzhin du'o/ /byang chub sems dpa'i tshig gi don chos kyi dbyings ni med cing mi dmigs so/ /des na yang cha med cing bral bas na byang chub ni med cing mi dmigs te/ bya'i rjes bzhin no/ /de ni de'i rten du 'gyur te/de ni byang chub kyi rten no/ /rtogs pa drug ni drod la sogs pa'i rtog pa ste/ don dam pa rtogs pa nyid kyi phyir ro/ /de dag gi khyad par ni dpe'i khyad par las shes par bya'o/ /de la gzhi'i gzung ba yod par 'gyur ba ma yin par nges pas na dro bar gyur pa ni byang chub po/ /des na de'i de dang 'dra ba nyid kyi dpe ni rmi lam la sogs pa ste/'di ltar rmi lam la sogs pa ni rmi lam la sogs pa nyid kyis nges par rmi lam la sogs pa'i sgrar brjod do/ /de'i gzung ba'i dngos po'i gnas mi dang / glang po dang / rta la sogs pa med cing mi dmigs te/ de nyid med par nges pa'i phyir ro/ / byang chub sems dpa'i tshig gi don zhes bya ba la/ byang chub ni drod do/ /de'i tshig gi don du mngon par 'dod pa'i bdag dang skye mched drug gi rang gi ngo bo yang med cing mi dmigs te/ kun brtags pa nyid kyi phyir ro/ /des na gang zag gi chos kun brtags pas stong pa nyid kyi mtshan nyid chos kyi dbyings nyid de'i rten te/de'i de ni drod du gyur pa'i rten no/ /rtse mor gyur pa'i byang chub ni gzung ba'i gnyen po ji ltar snang ba med par nges pa'i phyir ro/ /des na de'i de dang 'dra ba'i dpe nyid ni yang dag pa'i mtha' la sogs pa ste/ gzung ba med par nges pa'o/ /de'i gzung ba'i gnas ni yang dag pa'i mtha' la sogs pa'o//lhag ma yang rjes su dpag par bya ste/ de ni rtse mor gyur pa'i rten no/ /bdag gi rdzas de nyid kyi yang gzugs la sogs pa med par nges pa ni bzod pa'i byang chub po/ des na de'i dpe ni sgyu ma'i skyes bu zhes bya ba la sogs pas gsungs so/ /sgyu ma nyid du nges pa'i skyes bu'i rdzas ni sgyu ma'i skyes bu ste/de'i gzugs la sogs pa'i gnas de nyid ni skyes bu'o/ /de yang med cing mi dmigs so/ /shes rab kyi pha rol tu phyin pa la zhes bya ba ni bzod pa la ste/ de'i phyir gzung ba med par nges pa'i pha rol tu phyin pa ni shes rab po/ /lhag ma ni rjes su dpag par bya ste/'di ni bzod par gyur pa'i rten no/ /btags pa'i bdag nyid kyang med par nges pa'i phyir/ chos kyi mchog gi byang chub ni shes rab kyi pha rol tu phyin pa ste/ bzod bzhin no/ /des na 'di'i dpe ni sgyu ma'i skyes bu'i nang stong pa nyid ces bya ba la sogs pa gsungs so//btags pa pa'i yang bdag nyid sems can bkag pas sgyu ma'i skyes bu ste/ skyes bu 'di'i zhes bya ba ni sgyu ma'i skyes bu'o/ /de'i nang stong pa nyid la spyod pa'i zhes bya ba ni bzhi pa'i don gyi drug pa'o/ /byang chub 'dod pa'i sems dpa' ni byang chub sems dpa' ste/ de nyid tshig gi don to//rten gyi dngos po ni bdag dang skye mched de med cing mi dmigs pa ste/ de bzhin du zhes bya ba la sogs pas snga ma bzhin du bkag pa'i phyir ro/ /shes rab kyi pha rol tu phyin pa zhes bya ba ni chos kyi mchog ste/ chos kyi mchog gi byang chub po/ /de'i rten sems dpa' ni byang chub sems dpa'o//lhag ma ni snga ma bzhin te/ de ni chos kyi mchog gi rten no/ /chos thams cad kyi chos nyid tsam mthong ba'i phyir mthong ba'i lam gyi byang chub po/ /de nyid shes rab kyi pha rol tu phyin pa ste/ rnam par rtog pa'i pha rol du 'gro ba'i phyir ro/ /des na de'i dpe gsungs pa ni de bzhin gshegs pa'i gzugs la sogs pa'i tshig gi don ni kun brtags par med de/ga las she na/ gang gi phyir de mi dmigs pas so/ /lhag ma ni snga ma bzhin te/ de ni mthong ba'i lam gyi rten no/ /bsgom pa'i lam gyi 'bras bu ni sgrib pa thams cad spong ba'o/ /de'i rnam grangs ni skye ba med pa la sogs pa ste/des na 'dir nye ba'i rigs pas 'dir dper bstan pa ste/ ji ltar de dag gis tshig gi don rten gyi dngos po med cing mi dmigs te/ 'on kyang chos kyi dbyings nyid ni rten te/ de bzhin du shes rab kyi pha rol tu phyin pa la zhes bya ba ni bsgom pa'i lam la'o/ / des na ji ltar mthong ba'i don dam pa yongs su gcod pa'i phyir ro/ /de nyid kyi phyir de nyid 'dir byang chub ste/ de'i rten sems dpa' ni byang chub sems dpa'o/ /lhag ma ni snga ma bzhin te/ de ni bsgom pa'i lam gyi rten no/ /gnyen po'i snang ba'i 'od ni snang ba ste nyi ma'i 'od do/ /de'i gnas nam mkha' med cing mi dmigs te/gzugs can gyi rdzas kyi mtshan nyid med pa'i phyir ro/ /shes rab kyi pha rol tu phyin pa la zhes bya ba ni gnyen po ste/ de nyid yin la de'i rten sems dpa'o/ /lhag ma ni snga ma bzhin du ste/ de ni gnyen po'i rten no/ /mi mthun pa'i phyogs spangs pa'i dpe ni bskal pa'i me 'bar ba'i tshe na sa la sogs pa'i 'du byed thams cad kyi rten pa'i gnas med pa yin te/shi ba'i 'du byed bzhin no/ /de'i gnas ni nam mkha'o/ /yang na sa la sogs pa'i 'du byed zad par 'gyur ba ni dpe ste/ de dag gi rten ni med de/ gang du yang mi gnas pa'i phyir ro//shes rab kyi pha rol tu phyin pa la zhes bya ba ni gnyen por gyur pa'o/ /chos kyi dbyings dag pa ni byang chub ste/ mi mthun pa'i phyogs spangs pa'i mtshan nyid do/ /de'i rten sems dpa'o/ /lhag ma ni snga ma bzhin te de ni spong ba'i rten no/ /de dag ni gnyen po dang spong ba dag go//yongs su gtugs pa ni mthar 'gro ba ste/ gnyen po khyad par du gyur cing mthar thug pa dang / mi mthun pa'i phyogs zad pa'i mthar thug pa'o/ /de la dpe ni de bzhin gshegs pa'i tshul khrims la sogs pa la 'chal pa'i tshul khrims la sogs pa zad pa'i mthar thug pa'o//shes rab kyi pha rol tu phyin pa la zhes bya ba ni gnyen por gyur pa la'o/ /de nyid ni byang chub ste/ de'i rten sems dpa'o/ /lhag ma ni snga ma bzhin te/ de ni de dag yongs su gtugs pa'i rten no/ /shes rab dang snying rje'i rten de'i dpe ni nyi ma dang zla ba'i 'od de/ de'i gnas ni nam mkha'o/ /shes rab kyi pha rol tu phyin pa la zhes bya ba ni chos thams cad mnyam pa dang / sems can thams cad la mnyam pa nyid du shes pa'o/ /de gnyi ga yang byang chub ste/ don dam pa shes pa'i phyir ro/ /de'i rten sems dpa'o/ /lhag ma ni snga ma bzhin te/de ni shes rab dang snying rje'i rten no/ /nyan thos dang rang sangs rgyas dang thun mong ma yin pa'i ye shes ni slob ma dang thun mong ma yin pa nyid do/ /nyan thos la sogs pa'i ye shes kyi dpe ni gza' dang rgyu skar la sogs pa'i 'od do/ /de dag gi gnas ni go rims ji lta ba bzhin du gang zag la bdag med pa dang /nam mkha'i phyogs so/ /de gnyi ga med do/ /shes rab kyi pha rol tu phyin pa la zhes bya ba ni yang dag par rdzogs pa'i byang chub kyi mtshan nyid do/ /de nyid byang chub ste/ nyi ma dang zla ba'i 'od dang 'dra la/ de'i rten sems dpa'o//lhag ma ni snga ma bzhin no/ /de ni slob ma dang thun mong ma yin pa'i rten no/ /rgyal chen ris bzhi nas 'og min gyi bar gyi mthar thug pa'i rim pa ni byang chub sems dpa' gzhan gyi don te/ de bstan pa las nges par skyes pa nyid kyi phyir ro/ /de ni nye bar gyur pa rigs pa 'dis de dag gi 'od ni gzhan gyi don gyi go rims kyi dpe yin no//de dag gi 'od kyi gnas ni nam mkha'o/ /shes rab kyi pha rol tu phyin pa la spyod pa zhes bya ba ni de nyid go rims su ston pa'o/ /de nyid ston pa ni byang chub ste/ byang chub kyi rtsa ba nyid kyi phyir ro/ /de'i rten sems dpa'o//lhag ma ni snga ma bzhin te/ de ni gzhan gyi don gyi go rims kyi rten no/ /ye shes rtsol ba mi mnga' ba zhes bya ba ni sangs rgyas rnams kyi ste/ de nye ba'i rigs pa 'dis de bzhin gshegs pa'i rang bzhin gyi 'od de 'dra ba dper bstan to/ /de'i gnas ni nam mkha'o/ /shes rab kyi pha rol tu phyin pa la zhes bya ba ni lhun gyis grub par 'byung ba'i ye shes so//ye shes de nyid ni byang chub ste/ de'i rten sems dpa'o/ /lhag ma ni snga ma bzhin no/ /de ci'i phyir zhes bya ba la/ ye shes rtsol ba mi mnga' ba de ga las she na'o/ /'di ltar zhes bya ba ni gang gi phyir ro/ /byang chub gang yin pa zhes bya ba ni chos rnams kyi ye shes gang gis so//byang chub sems dpa'i tshig gi don zhes bya ba ni skye mched drug gi khyad par ro/ /ldan pa ma yin pa ni kun rdzob tu tha dad pa med pa ma yin pa'o/ /mi ldan pa ma yin zhes bya ba ni don dam par tha dad pa med pa'o/ /gzugs can ma yin pa ni gzugs kyi phung po med pa'o//de med pa ni bems po la gsal ba dang bral ba'i phyir ro/ /gzugs med pa'i phyir bstan du med cing thogs pa med pa'o/ /gal te de lta na yang sngon po dang / ser po la sogs pa'i rang gi mtshan nyid kyi dbye ba grub po zhe na/ mtshan nyid gcig pa zhes gsungs te/tha dad na ni cig car nyams su myong ba dang mi ldan no snyam du bsams pa yin no/ /gal te de lta na spyi'i mtshan nyid yod do zhe na/ 'di ltar mtshan nyid med pa zhes gsungs so/ /gang gi phyir khyad par med pas spyi yang med par 'gyur te/ de bas na don dam par ni gsal ba tsam mtshan nyid med pa yin no//rang la rag las pa'i phyir lhun gyis grub pa nyid du thams cad du thams cad mkhyen pa mthar byang chub sems dpa' rnams la grub po/ /rgyu gzhan yang chos thams cad kyi zhes bya ba la sogs pa gsungs so/ /de nyid kyis na gang gi phyir zhes bya ba'i sgra ni rgyu'o//rtog pa med pa ni 'du shes med pa ste/ des na chags pa med pa nyid do/ /rnam par rtog pa med pa ni mngon par zhen pa med pa'o/ /des na yang dag par med pa nyid de/ des na rnam par rtog pa dang bral ba'i phyir chos thams cad ni rtsol ba med par shes par bya'o//des na yang thams cad du rtsol ba mi mnga' bas ye shes mthar grub pa ste/ de ni ye shes rtsol ba mi mnga' bar 'jug pa'i rten no/ /chos kyi dbyings la dbyer med phyir/ /rigs ni tha dad rung ma yin/ /zhes bya ba la/ gang gi phyir chos kyi dbyings ni rigs zhes brjod de/ de yang thams cad du ro gcig pa yin pa'i phyir tha mi dad do//tha dad pa ma yin pa'i phyir 'di ni nyan thos kyi rigs so/ /'di ni rang sangs rgyas kyi rigs so/ /'di ni yang dag par rdzogs pa'i sangs rgyas kyi rigs so zhes rigs tha dad par rung ba ma yin no zhe na/ rten pa'i chos kyi bye brag gis//de yi dbye ba yongs su brjod/ /ces bya ba ni len no/ /nyan thos kyi chos rnams kyi rten gyi dbyings gang yin pa de ni de'i rigs so/ /gang rang sangs rgyas kyi gang yin pa dang / gang yang dag par rdzogs pa'i sangs rgyas kyi gang yin pa'i yang de bzhin no/ /dper na bum par khyad par med kyang kha cig ni til mar gyi bum pa/kha cig ni sbrang rtsi'i bum pa lta bu'o/ /sgrub pa'i rten brjod nas/ de'i dmigs pa brjod par bya ste/ de ni/ dmigs pa chos rnams thams cad de/ /de yang dge la sogs pa yin/ /'jig rten pa yi rtogs pa dang //gang dag 'jig rten 'das 'dod dang / /zag bcas zag pa med chos dang / /gang dag 'dus byas 'dus ma byas/ /slob ma thun mong chos rnams dang / /gang dag thub pa'i thun mong min/ /zhes bya ba gsungs te/ dge la sogs pa zhes bya ba ni dge ba dang mi dge ba dang /lung du ma bstan pa'o/ /rtogs par bya bas na rtogs pa ste/ dge zhes bya ba'i don to/ /'jig rten pa dang 'jig rten las 'das pa'i rtogs pa ni 'jig rten dang 'jig rten las 'das pa'i rtogs pa'o/ /de dag ni phung po gnyis te lhag ma ni rtogs par sla'o/ /'di dag gi bshad pa ni mdo nyid las bstan par rig par bya'o//bcom ldan 'das chos thams cad ni gang lags zhes bya ba nas/ rtog pa med cing rnam par rtog pa med pa'i phyir blang bar bya'o zhes bya ba'i bar gyis gsungs so/ /byang chub kyi phyogs kyi chos sum cu rtsa bdun zhes bya ba la/ 'dir byang chub ni yang dag par rdzogs pa'i byang chub ste/des na thun mong ma yin pa nyid do/ /sgrub pa'i dmigs pa bshad nas de'i ched du bya ba bshad par bya ste/ de'i skabs su/ rab 'byor gyis gsol pa zhes bya ba la sogs pa la/ gang byang chub sems dpa' de ji ltar sems dpa' chen po zhes bya ba'i sgrar brjod ce na zhes bya ba'i don to//bcom ldan 'das kyis bka' stsal pa/ sems can gyi phung po chen po'i phul zhes bya ba la sogs pa gsungs so/ /'di snyam du sems can gyi phung po chen po'i mchog byed par 'dod pa'i bsam pa gang yin pa de ni 'dir sems pa ste/ spyi'i sgrar yang khyad par la brjod pa'i phyir ro//chen po gsum gyi che ba'i sems pa 'di la yod pas na sems dpa' chen po'o/ /chen po gsum gang zhe na/ sems chen po nyid dang / spong ba chen po nyid dang / rtogs pa chen po nyid de/ mdo ji lta ba bzhin no/ /de la sems chen po ni bcom ldan 'das kyis rdo rje lta bu'i sems zhes bya ba la sogs pa gsungs so//de nas lta ba thams cad spang ba'i phyir ston par byed pa ni spong ba chen po ste/ shA ri'i bus gsol pa'o/ /de nas byang chub sems la sogs pa la yang chags pa med pa nyid ni rtogs pa chen po nyid du rab 'byor gyis 'phags pa gang po'i tshig gi sngon du bstan to//de'i phyir/ sems can kun mchog nyid sems dang / /spong dang rtogs dang gsum po la/ /chen po gsum gyi rang byung gi /ched du bya ba 'di zhes bya/ /zhes bya ba gsungs te/ byang chub sems dpa' rnams kyi zhes bya ba'i don to/ /ched du gnyer ba yin pas na ched du bya ba ste/las su sgrub pa'o/ /'di ni rang byung gi sgrub pa'i ched du bya ba yin par shes par bya'o/ /gang sems can thams cad kyi mchog ni ci 'dra zhe na/ chen po gsum gyis bsgrub par bya ba'o/ /gsum po gang dag ce na/ sems dang / spong ba dang / rtogs pa nyid gsum mo//de'i phyir de la de rnams dang 'brel ba'i phyir de yang chen po'o/ /de la sems dpa' ba yin pa de yang chen po'o/ /des na sems dpa' chen po zhes brjod do/ /sgrub pa'i rten dang dmigs pa dang ched du bya ba brjod nas sgrub pa dag bshad par bya ste/ de la gnas brtan gang pos go cha dang 'jug pa'i sgrub pa'i skabs bstan to//go cha chen po bgos pa'i sems ni sems dpa' chen po ste/ tshig bar ma mi mngon par bsdus pa'o/ /de ni dang po'o/ /theg pa chen po la yang dag par zhugs shing theg pa chen po la yang dag par gnas pa ni sems dpa' chen po ste/ de ni gnyis pa'o//go cha ni thams cad nye bar bsdogs pas go bgos pa ste/ dpung gi tshogs go cha bgos pa bzhin no/ /re re la yang thams cad nye bar gnas pa ni go cha chen po'o/ /'phags pa shA ri'i bus ji tsam zhes bya ba la sogs pa'i bar gyis smras so/ /'phags pa gang pos 'di la zhes bya ba la sogs pa nas/de nas 'di ltar zhes bya ba la sogs pa'i bar gyis gsungs so/ /'di yang so sor sbyin pa la sogs pa la gnas zhes bya ba ni mi gnas pa'i tshul gyis gnas pa ste/ bya ba dang byed pa po sgyu ma lta bu nyid du mthong ba'i phyir ro/ /'di dag gis ni shes rab kyi pha rol tu phyin pa la nye bar gnas pa gsungs so//sems can thams cad kyi don du byang chub kyi phyir spyod pa ni zhes bya ba ni rnam pa thams cad mkhyen pa nyid dang ldan pa'i yid la byed pas zhes bya ba'i don to/ /des ni gsum po 'di dag gis nye bar gnas pa ston par byed do/ /'di ltar nyan thos la sogs pa'i yid la byed pas mi byed cing /yongs su spangs pa gang yin pa de ni tshul khrims kyi pha rol tu phyin pa'o/ /gang yang rnam pa thams cad mkhyen pa nyid yid la byed pa de dag la bzod pa dang / 'dod pa dang / nye bar spyod pa ni dad pa dang / dga' ba dang / gus pa'i mtshan nyid de/de ni bzod pa'i pha rol tu phyin pa'o/ /gang yang de dag la sems brtan zhing nyan thos la sogs pa'i yid la byed pa'i skabs mi 'byed de/ de ni bsam gtan gyi pha rol tu phyin pa'o/ /de ltar yang 'di bdag gis kyang pha rol tu phyin pa yongs su rdzogs par bya zhing sems can thams cad kyang de dag la gzhag par bya'o zhes bya ba la/sems can thams cad dang thun mong du yongs su bsngo'o zhes dgongs pa yin no/ /de la 'dis ni nye bar gnas pa gnyis ston te/ 'di ltar sems can thams cad dang thun mong nyid kyis sems can thams cad la pha rol tu phyin pa sbyin pa ni sbyin pa'i pha rol tu phyin pa'o//de la sbyin pa chen po la spro ba ni brtson 'grus kyi pha rol tu phyin pa'o/ /de tsam gyis zhes bya ba ni spyi'i mtshan nyid 'dis so/ /de'i 'og tu khyad par gyi mtshan nyid ni drug tshan drug gis gsungs so/ /de'i 'og tu thabs la mkhas pa gnyis po gang yin pa de yang go rims bzhin du lnga pa dang drug pa dag la drug tu sbyar te/shes rab kyi pha rol tu phyin pa la nye bar gnas pa'o/ /tha mas ni go cha'i sgrub pa'i phan yon ston to/ /des na bstan bcos mdzad pas/ sbyin pa la sogs rnam drug la/ /de dag so sor bsdus pa yis/ /go cha'i sgrub pa gang yin de//drug tshan drug gis ji bzhin bshad/ /ces bya ba la gsungs pa/ sbyin pa la sogs rnam drug la/ /zhes bya ba ni sbyin pa nas shes rab kyi bar ro/ /so so zhes bya ba ni re re la'o/ /de dag bsdus pa ni thams cad nye bar gnas pa'o/ /gang go cha chen po'i sgrub pa'i ngo bo ni go cha'i sgrub pa ste/ drug tshan drug gis mdo las ji ltar gsungs pa bzhin no/ /go cha'i sgrub pa bshad nas/ 'jug pa'i sgrub pa bshad par bya ste/ de'i dbang du byas nas bstan bcos mdzad pas/ bsam gtan gzugs med sbyin sogs dang / /lam dang byams la sogs pa dang / /dmigs pa med dang ldan pa dang //'khor gsum rnam par dag pa dang / /ched du bya dang mngon shes drug /rnam kun mkhyen pa'i tshul la ni/ /'jug pa'i sgrub pa theg chen la/ /'dzeg pa yin par shes par bya/ /zhes gsungs te/ 'gro ba'i rtsom pa ni 'jug pa'i sgrub pa'o/ /de nyid theg pa chen po'i lam gyi rang bzhin la 'dzeg par byed pa'o//de yang bsam gtan dang gzugs med pa nas/ rnam pa thams cad mkhyen pa nyid kyi bar te/ des na rnam pa dgu'o/ /mdo las/ shA ri'i bus smras pa zhes bya ba la sogs pa ni shA ri'i bus dris pa'o/ /gang pos smras pa zhes bya ba la sogs pa ni lan no//'dod pa dag las dben pa zhes bya ba nyon mongs pa'i 'dod pa dag dang bral ba'i phyir dang / dngos po'i 'dod pa dag la mi dmigs pa'i phyir ro/ /sdig pa mi dge ba'i chos kyis dben pa zhes bya ba la/ 'dod pa'i nyon mongs pa dag ni 'dod pa'i rgyu ste/ lus dang ngag dang yid kyis nyes par spyod pa dag gis so//rtog pa dang dpyod pa dang bcas pa zhes bya ba ni 'dod pa dag gi gnyen po rtog pa dang dpyod pa dang yang dag par ldan pa'i phyir ro/ /dben pa las skyes pa ni 'dod pa dag las dben par skyes pa'o/ /dga' ba dang bde ba zhes bya ba ni 'dod pa'i don sgrub pa dang / lus dang sems shin tu sbyangs pa'i dga' ba dang bde ba dang bcas pa'o//bsam gtan dang po nye bar bsgrubs te zhes bya ba ni snyoms par zhugs pa'o/ /gnas so zhes bya ba ni rang gi rjes su myong ba'o/ /de bzhin du gnyis pa zhes bya ba ni de rnam par rtog pa dang / rnam par dpyod pa nye bar zhi bas nang yongs sa dang ba ste/sems kyi rgyud gcig tu gyur pas rtog pa med pa/ dpyod pa med pa'i bsam gtan gnyis pa nye bar bsgrubs te gnas so/ /de zhes bya ba ni rnal 'byor pa de nyid do/ /rnam par rtog pa dang rnam par dpyod pa dag la sems 'khrug par byed pa nyid kyi skyon mthong nas de dag las bzlog ste sems yang dag par 'dzin to//rnam par rtog pa dang dpyod pa nye bar zhi bas zhes bya ba ni ting nge 'dzin gyi stobs kyis so/ /sems kyi rgyud gcig tu gyur pa zhes bya ba ni rnam par rtog pa dang rnam par dpyod pa rgyun mi 'chad par 'jug pa med pa'o/ /rtog pa med cing dpyod pa med pa zhes bya ba ni thams cad kyi thams cad du spangs pa'i phyir ro//gsum pa zhes bya ba ni de dga' ba las 'dod chags dang bral bas dran pa dang ldan zhing shes bzhin du btang snyoms la gnas te/ bde ba lus kyis myong la 'phags pa rnams kyis de la dran pa dang ldan pa bde ba la rnam par spyod pa btang snyoms pa'o zhes brjod pa ste/dga' ba las 'dod chags dang bral ba zhes bya ba ni de ni rigs pa yin pa'i phyir ro/ /btang snyoms pa'o zhes bya ba ni rnam par rtog pa dang rnam par dpyod pa'i dga' ba la btang snyoms pa'i phyir ro/ /dran pa dang ldan shes bzhin du/ /zhes bya ba ni shes rab lan mang du byas pas dga' ba'i skabs mi 'byed pa'i phyir ro//bde ba zhes bya ba ni tshor ba'i bde ba dang shin tu sbyangs pa'i bde ba'o/ /lus kyi zhes bya ba ni gzugs kyi lus dang sems kyi lus kyis so/ /'phags pa zhes bya ba ni nyan thos dang rang sangs rgyas so/ /bde ba la gnas so zhes bya ba'i bar gyis 'di nyid bsam gtan pa 'di'o zhes bya ba ni lhag ma'o//bzhi pa zhes bya ba ni de bde ba yang spangs/ sdug bsngal yang snga nas spangs shing yid bde ba dang yid mi bde ba nub pas sdug bsngal yang med pa bde ba yang med pa/ btang snyoms dang dran pa yongs su dag pa'i bsam gtan bzhi pa nye bar bsgrubs te gnas so zhes bya ba la/de la bde ba spangs pa ni bsam gtan bzhi pa'o/ /sdug bsngal gyi ni gnyis pa'o/ /de nyid kyi phyir snga nas zhes bya ba smos so/ /yid bde ba ni gsum pa la'o/ /yid mi bde ba ni gnyis pa la'o/ /snga nyid nas zhes bya bar rjes su 'brang ngo //btang snyoms nyid ni 'dir tshor ba ste/ sdug bsngal yang med bde ba yang med pa'o/ /des ni bde ba yang med sdug bsngal med ces bya ba gsungs so/ /btang snyoms dang dran pa yongs su dag pas zhes bya ba de dag ni 'dir shin tu rnam par dag pa thob pa'i phyir ro//de bsam gtan dang po la yan lag lnga ste/ rnam par rtog pa dang rnam par dpyod pa dag ni gnyen po'i yan lag go/ /dga' ba dang bde ba ni phan yon gyi yan lag go/ /sems rtse gcig pa nyid ni de gnyi ga'i gnas kyi yan lag go/ /bsam gtan gnyis pa la yan lag bzhi ste/nang yongs su dang ba ni gnyen po'i yan lag go/ /yan lag lhag ma ni snga ma bzhin no/ /gsum pa la ni yan lag lnga ste/ btang snyoms dang dran pa dang shes bzhin ni gnyen po'i yan lag go/ /bde ba ni phan yon gyi yan lag go/ /lhag ma ni snga ma bzhin no/ /bzhi pa la yan lag bzhi ste/btang snyoms yongs su dag pa dang / dran pa yongs su dag pa ni gnyen po'i yan lag go/ /sdug bsngal yang ma yin bde ba yang ma yin pa ni phan yon gyi yan lag go/ /lhag ma ni snga ma bzhin no/ /gzugs med pa'i dbang du byas nas de bzhin du nam mkha' mtha' yas skye mched ces bya ba la sogs pa gsungs te/de rnam pa thams cad du gzugs kyi 'du shes las yang dag par 'das te/ thogs pa'i 'du shes rnams nub par gyur cing sna tshogs kyi 'du shes rnams yid la mi byed pas nam mkha' mtha' yas so zhes te/ nam mkha' mtha' yas skye mched nye bar bsgrubs te gnas so zhes bya ba la/gzugs kyi 'du shes ni sngon po dang / ser po la sogs pa'i 'du shes so/ /de dag la ma chags pa ni de dag thams cad las yang dag par 'das pa ste/ thams cad du nam mkha'i 'du shes bsgoms pas snang ba med pa'i phyir ro//thogs pa'i 'du shes zhes bya ba ni rtsig pa dang / ra ba la sogs pa'i sgrib pa'i 'du shes so/ /sna tshogs kyi 'du shes zhes bya ba ni khang bzangs dang / skyed mos tshal dang / ri dang / chu bo dang / zla ba dang / nyi ma la sogs pa'i 'du shes so/ /nam mkha' mtha' yas zhes bya ba ni 'di la nam mkha' mtha' yas skye mched la dmigs pa yod pa de la de skad ces bya'o//de rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so zhes rnam shes mtha' yas skye mched nye bar bsgrubs te gnas so/ /ji ltar 'di las yang dag par 'das she na/de rnam par shes pa gang gis nam mkha' mtha' yas par mos pa de de nyid mtha' yas pa las grol ba ste/ rnam pa thams cad du nam mkha'i 'du shes bzlog pa'i phyir ro/ /de rnam pa thams cad du rnam shes mtha' yas skye mched las yang dag par 'das te/cung zad med pa'i skye mched nye bar bsgrubs te gnas so zhes bya ba la/ rnam shes mtha' yas las gyen du bskyod pa'i dmigs pa cung zad kyang mi mthong ba de ni cung zad med pa nyid du dmigs pa byas te snyoms par zhugs pa'o/ /de rnam pa thams cad du cung zad med pa'i skye mched las yang dag par 'das te/'du shes med 'du shes med min skye mched nye bar bsgrubs te gnas so zhes bya ba la/ cung zad med pa'i 'du shes las kyang chags pa dang bral nas de las kyang zlog par byed de/ cung zad med pa'i 'du shes kyang snga ma nyid nas bzlog pas 'du shes med pa'o//'du shes phra bar 'jug pa nyid de/ des na 'du shes med min no/ /gang la 'du shes med 'du shes med min skye mched nye bar 'dzin pa de la de skad ces brjod do/ /bsam gtan dang gzugs med pa brgyad po de dag la byang chub sems dpa' nyin re zhing snyoms par zhugs pa de'i sngon dang phyis ni nam mkha'i rnam pa dang /rtags dang / mtshan ma yid la byed pa'i phyir ro/ /de la chos 'di dag thams cad dang ldan pa yang ma yin mi ldan pa yang ma yin zhes bya ba ni nam mkha'i rnam pa ste/ tha dad pa dang tha dad pa ma yin pa khas mi len pa'i phyir ro/ /gzugs can ma yin pa dang /bstan du med pa dang / thogs pa med pa zhes bya ba nam mkha'i rtags te/ de dang chos mthun pa'i phyir ro/ /mtshan nyid med par mtshan nyid gcig pa zhes bya ba ni nam mkha'i mtshan ma ste/ nam mkha' lta bur stong pa nyid kyi mtshan mar snang ba'i phyir ro/ /gal te sbyin pa'i pha rol tu phyin pa la spyod pa de'i tshe/dge ba'i rtsa ba thams cad sems can thams cad dang thun mong du byas te bla na med pa yang dag par rdzogs pa'i byang chub tu yongs su bsngo ba de ltar sbyin pa'i pha rol tu phyin pa nyid du 'gyur ro/ /gal te tshul khrims kyi pha rol tu phyin pa la spyod pa'i tshe/ nyan thos la sogs pa'i yid la byed pa gtan du spangs pa ni tshul khrims kyi pha rol tu phyin pa'o//de bzhin du lhag ma ni go cha drug gi rjes su 'brangs nas shes par bya'o/ /bsam gtan dang gzugs med pa'i snyoms par 'jug pa ni de lta bu'o/ /pha rol tu phyin pa drug gi 'jug pa ni mdo ji lta ba bzhin no/ /lam la 'jug pa yang mdo ji lta ba bzhin te/lam gyi rab tu dbye ba yang lam gyi tshogs nas rnam par 'grel bar 'gyur ro/ /tshad med pa'i rab tu 'jug pa bshad par bya ste/ sems can dpag tu med pas dmigs pa'i phyir tshad med pa'o/ /de ni bzhi ste/ byams pa dang / snying rje dang / dga' ba dang /btang snyoms so/ /de la bde ba yang dag par ldan pa'i bsam pa ni byams pa'o/ /sdug bsngal dang bral ba'i bsam pa ni snying rje'o/ /bde ba dang mi 'bral ba'i bsam pa ni dga' ba'o/ /kun nas nyon mongs pa dang mi ldan pa'i bsam pa ni btang snyoms so/ /kye ma ma la sems can thams cad bde ba dang ldan par smon pa dang /sdug bsngal dang bral bar smon pa dang / bde ba dang mi 'bral bar smon pa dang / nyon mongs pa las grol bar smon pa dang / bzhi po yang mos pas spyod pa'i sa la ni sems can la dmigs pa'o/ /rab tu dga' ba la sogs pa bdun la ni chos la dmigs pa'o//de las gong mar gyur pa rnams la ni dmigs pa med pa'o/ /byams pa dang ldan pa'i sems kyis zhes bya ba la/ 'di tsam gyis ni yon tan dang ldan par bstan to/ /lhag mas ni yon tan bstan to/ /yangs pa zhes bya bas ni bsam pa chen po bstan to/ /chen pos zhes bya bas ni 'phel ba'o//tshad med pas zhes bya bas ni dmigs pa las so/ /mi gnyis pa zhes bya bas ni bdag nyid gcig pa nyid kyis rnam par mi rtog pa'i phyir ro/ /'gran zla med pa zhes bya ba ni mi mthun pa'i phyogs spangs pa'i phyir ro/ /de la byams pa la sogs pa'i mi mthun pa'i phyogs ni go rims bzhin du gnod sems dang /rnam par 'tshe ba dang / mi dga' ba dang / rjes su chags pa dang khong khro ba dag go/ /lhod pa med pa zhes bya ba ni gnyid dang / rmugs pa nye bar zhi ba'i phyir ro/ /sgrib pa med pa zhes bya ba ni rgod pa dang 'gyod pa nye bar zhi ba'i phyir ro/ /gnod pa med pa zhes bya ba ni gsum po de dag nyid kyis sems dri ma dang bral ba'i phyir ro//thams cad kyi rjes su song ba zhes bya ba ni bshes dang dgra dang tha mal pa gsum po dag la yang dag par rab tu 'jug pa'i phyir ro/ /shin tu bsgoms pa zhes bya ba ni ji skad brjod pa'i rnam pas gsum po dag la mnyam pa nyid du gyur pa'i phyir ro//rgyas par yang zhes bya ba ni khyab pa'o/ /'jig rten zhes bya ba ni sems can gyi 'jig rten no/ /thams cad dang ldan pa zhes bya ba ni lha dang / klu dang / gnod sbyin la sogs pa'i dbye bas thams cad dang ldan pa'o/ /phyogs gcig ces bya ba ni phyogs gcig tu gyur pa'o//gang du zhe na/ 'jig rten du zhes gsungs te snod kyi 'jig rten du'o/ /chos kyi dbyings kyis klas pa zhes bya ba ni chos kyi dbyings bzhin du mtha' yas pa'o/ /nam mkha'i khams bzhin du 'di la mtha' gtugs pa yod pas na de skad ces bya'o/ / nye bar bsgrubs te zhes bya ba ni sems yang dag par byas pas so/ /gnas so zhes bya bas ni 'phags pa'i gnas pas so/ /phyogs bcur zhes bya ba ni phyogs bcur gyur pa'o/ /de ltar zhes bya ba ni rtogs par sla'o/ /sems yangs pa zhes bya ba ni snying rje dang dga' ba dag la yang brjod par bya'o//tshad med pa dag kyang pha rol tu phyin pa drug gi go cha bzhin du mdo'i rjes su 'brang ste/ de ni tshad med pa'i 'jug pa'o/ /de'i 'og tu tshig drug gis ni theg pa chen po la mi dmigs pa dang ldan pa'i 'jug pa'o/ /'khor gsum yongs su dag pa'i 'jug pa ni mdo ji lta ba bzhin no/ / bsgom pa dang rnam par bsgom pa'i don du zhes bya ba la/ bsgom pa zhes bya ba ni bsgom par bya ba dang / sgom pa po'i gzugs la sogs pa cung zad kyang med pa'o/ /de bas na chos 'di dag thams cad ni ming tsam ste/ de ni bsgom pa'o/ /de'i rnam par bsgom pa ni dmigs pa med pa'o/ / de'i don ni bsgom pa'i de'i don du ste/ ched du bya ba'i 'jug pa'o/ /mngon par shes pa drug gi 'jug pa ni mdo ji lta ba bzhin no/ /rnam pa thams cad mkhyen pa nyid kyi 'jug pa ni mdo ji lta ba bzhin no/ /'jug pa'i sgrub pa bshad nas tshogs kyi bsgrub pa bshad par bya ste/ de yang bstan bcos mdzad pas/brtse dang sbyin la sogs pa drug /zhi gnas lhag mthong bcas pa dang / /zung du 'brel ba'i lam gang dang / /thabs la mkhas pa gang yin dang / /ye shes dang ni bsod nams dang / /lam dang gzungs dang sa bcu dang / /gnyen po'i tshogs kyi bsgrub pa yi/ / rig pa yin par shes par bya/ /zhes bya ba gsungs te/ tshogs ni bcu bdun te/ snying rje'i tshogs dang / sbyin pa'i tshogs dang / tshul khrims kyi tshogs dang / bzod pa'i tshogs dang / brtson 'grus kyi tshogs dang / bsam gtan gyi tshogs dang / shes rab kyi tshogs dang /zhi gnas kyi tshogs dang / lhag mthong gi tshogs dang / zung du 'brel ba'i lam gyi tshogs dang / thabs la mkhas pa'i tshogs dang / ye shes kyi tshogs dang / bsod nams kyi tshogs dang / lam gyi tshogs dang / gzungs kyi tshogs dang / sa'i tshogs dang / gnyen po'i tshogs so/ /de la snying rje'i tshogs ni sems can shin tu mang po rnams ngan song dag las rnam par bkrol te/ lha dang mi'i dngos po la sogs pa thob par byed pa las snying rje'i tshogs te/ mdo ji lta ba bzhin no/ /sbyin pa la sogs pa drug gi tshogs ni mdo ji lta ba bzhin no/ / bdag gam phyogs bcu'i sems can thams cad pha rol tu phyin pa drug po de dag la rab tu 'god pa ni zhi gnas te/ de ni zhi gnas kyi tshogs so/ /sems can dpag tu med pa thams cad lam de'i 'bras bu la rab tu 'god pa 'di ni zhi gnas kyi tshogs gzhan no/ /sems can gzhal du med pa rnams pha rol tu phyin pa nas thams cad mkhyen pa'i ye shes kyi bar du bkod kyang 'ga' yang bkod pa med de/sprul pa lta bu nyid kyi phyir dang / thams cad rang gi mtshan nyid stong pa nyid kyi phyir dang / chos thams cad ma byas rnam par ma byas pa mngon par 'dus ma byas pa'i phyir ro/ /rnam par ma byas pa ni 'phel ba dang nyams pa dag go//mngon par 'dus byas pa ni yon tan gyi khyad par rnams kyis so/ /de ni lhag mthong gi tshogs so/ /zhi gnas dang lhag mthong ni zung ngo / /de dang 'brel ba'i phyir zung du 'brel ba'i lam mo/ /'brel zhing bcings pa ni yang dag par ldan pa'o//grol ba ni mi ldan pa'o/ /med pa dang dben pa dang zhi ba nyid kyi phyir de gnyi ga mi dmigs te/ de'i phyir chos thams cad ma bcings ma grol ba'o/ /de'i zung du 'brel ba'i lam gyi tshogs so/ /theg pa chen po ni gang lags/ ci tsam gyis na yang dag par zhugs par rig par bgyi ba lags/de ni gang nas 'byung ba lags/ de ni gang du gnas par 'gyur ba lags/ des ni su zhig 'byung bar 'gyur zhes bya ba lnga ni rab 'byor gyis zhus pa'o/ /bcom ldan 'das kyis bka' stsal pa/ pha rol tu phyin pa drug ni theg pa chen po'o/ /de yang mdo ji lta ba bzhin te/de ni thabs la mkhas pa'i tshogs so/ /mdo 'di las gsungs pa'i stong pa nyid nyi shu ni ye shes kyi tshogs so/ /de nye bar dgod pa dang bshad pa ni mdo nyid las so/ /de la mi gsal ba bshad par bya ste/ yongs su brtags pa'i ngo bos thams cad med de/ med pa de'i phyir gnas pa med cing 'jig pa med de/rtag pa dang mi rtag pa med ces bya ba'i don to/ /de'i phyir des stong pa'o/ /phyi nang stong pa nyid ces bya ba la ni nang ni phyis stong ste yul med pa'i phyir ro/ /phyi ni nang gis stong ste de dag gi yul can ma yin pa'i phyir ro/ /stong pa nyid stong pa nyid ces bya ba ni chos thams cad kyi so so'am bsdus pa stong pa nyid de/de nyid kyis stong pa ni stong pa nyid stong pa nyid do/ /chen po stong pa nyid ni phyogs rnams kyi stong pa nyid do/ /phyogs bcur khyab pa'i phyir ro/ /skye ba dang 'jig pa dang / gnas pa dang / gzhan du 'gyur ba zhes bya ba ni 'dus byas kyi mtshan nyid de/rab tu skyes pa dang / rgyun chad pa'i mtshan nyid dang / skad cig cing 'jug pa dang / rgyun 'jug pa dang / snga ma dang / phyi ma rgyun mi 'dra ba zhes bya ba'i don to/ /de las bzlog pa ni 'dus ma byas pa'i mtshan nyid do/ /de gnyis stong pa nyid ni go rims bzhin du 'dus byas stong pa nyid dang /'dus ma byas stong pa nyid do/ /mtha' med pas na mtha' las 'das pa ste/ longs spyod rdzogs pa'i sku'o/ /de'i stong pa nyid ni mtha' las 'das pa stong pa nyid de/ thog ma dang tha ma dag gi mtha' med pa'i phyir thog ma dang tha ma med pa ste 'khor ba'o//de stong pa nyid ni thog ma dang tha ma med pa stong pa nyid do/ /dor ba med pa ni gtang bar bya ba ma yin pa ste theg pa chen po'o/ /de'i stong pa nyid ni dor ba med pa stong pa nyid do/ /de bzhin gshegs pa la sogs pas ma byas pa'i phyir rang bzhin te/ chos rnams kyi rang bzhin gyi chos nyid de de'i stong pa nyid do//dus gsum phan tshun mi dmigs pa'i phyir mi dmigs pa ste de'i stong pa nyid do/ /'dus byas pa las byung ba'i ngo bo de ni dngos po med pa yang ma yin la ngo bo nyid kyang yin pas na dngos po med pa'i ngo bo'o/ /sbyor ba las byung ba'i ngo bo nyid de ji ltar med ce na/nye bar len pa yod kyang gzhan med na med pa'i phyir ro/ /de nyid kyi phyir 'dus pa la sogs pa'i chos rnams kyi dngos po med pa ste/ rten cing 'brel par 'byung ba'i phyir ro zhes gsungs so/ /de stong pa nyid ni dngos po med pa'i ngo bo nyid stong pa nyid do/ /skye bas na dngos po'o//de de'i bdag nyid kyis stong pa nyid ni dngos po stong pa nyid do/ /skye ba med pas na dngos po med pa ste/ de de'i bdag nyid kyis stong pa nyid ni dngos po med pa stong pa nyid do/ /chos rnams kyi phyin ci ma log pa'i ngo bo ni rang gi ngo bo ste/ ye shes dang mthong ba dag gis ma byas pa'i phyir ro//de ni de'i bdag nyid kyis stong pa nyid do/ /'di ni dam pa yang yin pa'i phyir gzhan yang yin la gzhan gyis ma byas pa'i ngo bo nyid yin pa'i phyir ngo bo yang yin pas de ni gzhan gyi ngo bo ste/ de bzhin nyid do/ /de ni de'i bdag nyid kyis stong pa nyid de/ de ni ye shes kyi tshogs so/ /de na dpa' bar 'gro ba zhes bya ba la sogs pa nas/nam mkha' ltar chags pa med pas rnam par grol zhing gos pa med pa zhes bya ba'i bar gyis ting nge 'dzin dag ni sangs rgyas dang byang chub sems dpa' thams cad kyi rnam par mi rtog pa zag pa med pa 'jig rten las 'das pa'i sems kyi rang bzhin no//sngon gyi yid la byed pa'i stobs kyis so so so sor bya ba byed pa na ming sna tshogs su brjod do/ /de nyid dang ldan pa ni bsod nams kyi tshogs so/ /lam gyi tshogs bshad par bya ste/ byang chub kyi phyogs la sogs pa ni lam mo/ /de la gang gis yang dag par shes pa ni dran pa nye bar gzhag pa ste/dran pa nye bar gzhag pa de dag ni dmigs pa'i bye brag gis bzhi ste/ lus dran pa nye bar gzhag pa dang / tshor ba dran pa nye bar gzhag pa dang / sems dran pa nye bar gzhag pa dang / chos dran pa nye bar gzhag pa'o/ /de la nang gi lus la lus kyi rjes su lta zhing gnas nas mi dmigs pa'i tshul gyis lus dang ldan pa'i rtog pas rnam par mi rtog go//phyi'i lus la lus kyi rjes su lta ba yang de bzhin no/ /phyi nang gi lus la lus kyi rjes su lta ba yang de bzhin no/ /nang dang phyi dang / phyi nang gi tshor ba dang / sems dang / chos dag la tshor ba'i rjes su lta ba nas/chos kyi rjes su lta ba'i bar gyis gnas nas mi dmigs pa'i tshul gyis chos kyi rjes su lta zhing rtul ba dang shes bzhin can dran pa dang ldan pas 'jig rten gyi chags sems dang / yid mi bde ba bsal zhing rnam par dpyod kyang chos dang ldan pa'i rnam par rtog pas rnam par mi rtog go/ / de la nang gi lus ni rang gi mig la sogs pa drug go/ /phyi'i lus ni rang gi lus las phyi rol gyi 'dus byas so/ /phyi nang gi lus ni rang gi lus su gyur pa'i lhag ma 'byung ba dang 'byung ba las gyur pa'o/ /tshor ba la sogs pa'i rnam pa gsum yang ngo / /lus rnam pa gsum la dmigs pa'i bya bas so//tshor ba ni bde ba dang / sdug bsngal dang / sdug bsngal yang ma yin/ bde ba yang ma yin pa'o/ /chos ni sems las byung ba dge ba dang mi dge ba'o/ /lus la sogs pa la rjes su lta ba zhes bya ba ni lus la sogs pa'i chos nyid la rjes su lta ba'o/ /lus la sogs pa dang ldan pa zhes bya ba ni lus la sogs pa'i 'du shes dang ldan pa'o//rtog pa zhes bya ba ni rnam par rtog pa'o/ /lus 'di gcig dang bdag gi lus dang / rtag pa dang / mi rtag pa dang / bde ba dang / sdug bsngal zhes bya ba de lta bu la sogs pa mi dmigs pa'i tshul gyis de rjes su mi mthong zhing rnam par mi rtog go//gus par byed pa dang rtag tu byed pa dang ldan pa'i rtul ba dang ldan pa'o/ /rjes su lta ba dang / shes bzhin dang ldan pa ni shes bzhin can no/ /mi brjed pa'i bdag nyid kyis kun tu srung bar byed pa dang / rnam par mi g.yeng ba'i dran pa dang 'brel pas dran pa dang ldan pa'o/ / brtson 'grus dang / shes rab dang / dran pa dang / 'di dag nyid kyi phan yon ni 'jig rten gyi chags sems dang yid mi bde ba rnam par bsal zhes gsungs so/ /bsal ba zhes bya ba ni spangs pa'o/ /'jig rten zhes bya ba 'jig rten gyi chos la rnyed pa dang / grags pa dang / bde ba dang / bstod pa dag la ni brnab sems dang / chags pa'o/ /ma rnyed pa dang / ma grags pa dang / sdug bsngal ba dang / smod pa la ni yid mi bde ba'o/ /de ltar byang chub sems dpa'i tshul la dran pa nye bar gzhag pa bstan nas nyan thos kyi tshul la lus dran pa nye bar gzhag pa nyid rnam pa bcu bzhi gsungs te/de la shes bzhin gyi sgo nas ni gsum ste/ dbugs ring du 'gro ba dang 'ong ba la sogs pa de dag la ni gcig go/ /thung ngu 'ong ba la sogs pa dag la gnyis pa'o/ /dbyung ba dang rngub pa dran pa la ni gsum pa'o/ /khams kyi rab tu dbye ba'i sgo nas ni bzhi pa'o//mi gtsang ba'i rdzas sum cu rtsa drug gi sgo nas ni lnga pa'o/ /mi sdug pa'i sgo nas ni dgu'o/ /de la mngon du 'ong ba zhes bya ba ni 'gro ba'o/ /phyir mi ldog pa zhes bya ba ni ldog pa'o/ /kun tu lta ba zhes bya ba ni mdun du'o/ /rnam par lta ba zhes bya ba ni phyogs mtshams su'o/ /bskum par bya ba ni bsdus pa'o//nang du yang dag par 'jog pa ni zhi gnas dang / lhag mthong la mngon par brtson pa'o/ /dran pa 'di la yod pas na dran pa dang ldan pa'o/ /lus kyi rlung sna nas 'jug pa ni brngub pa'o/ /'byung ba ni phyir 'byung ba ste/ rdza mkhan legs par bslabs pa 'am/ de'i nye gnas kyi slob ma bzhin no//pags pa dang rlog pa ni phyi nang gi dbye bas so/ /rgyus pa ni rtsa'o/ /mkhal ma ni mkhal ma'o/ /mchin pa ni mchin pa'o/ /glo ba ni glo ba'o/ /mcher pa ni mcher pa'o/ /zhu ba dang ma zhu ba ni zas so/ /mchil ma'i thal ba ni bad kan gyi gong bu'o/ /khrag ni khrag rul ba'o//chun pa ni zhing rmo ba'o/ /bang ba ni 'bru rnams kyi snod do/ /dur khrod ces bya ba ni bstan pa'o/ /ro bor ba'i gnas zhes bya ba ni rjes su bstan pa'o/ /shi nas zhag gcig lon pa zhes bya ba la sogs pa ni go rims bzhin rnam par bam pa la sogs pa gsum mo/ /gang rnam par rnags pa de nyid ni rnam par 'bus gzhigs pa yin te/srin bu skyes pa nyid kyi phyir ro/ /yang na rnam par zos pa ni rnam par 'thor ba'o/ /de la dur khrod kyi lus mthong ba na bdag nyid kyang de dang 'dra ba nyid du nye bar sbyor ro/ /chos nyid 'di zhes bya ba ni bstan pa'o//'di lta bu'i rang bzhin can zhes bya ba ni rjes su bstan pa'o/ /'o na gson po'i lus ni de lta bu ma yin la shi ba'i lus ni de lta bu yin no zhes dogs pa la/ de'i phyir chos nyid 'di las ma 'das so zhes smos te/ 'gal ba'i rkyen nye bar gnas pa yod na nges par de bzhin du 'gyur ba'i phyir ro//sems 'dis nges par 'dor ba ni yang dag par spong ba ste/ de dag ni rnam pa bzhi'o/ /'di lta ste/ sdig pa mi dge ba'i chos ma skyes pa rnams mi skyed pa'i phyir 'dun pa skyed do/ /'bad do/ /brtson 'grus rtsom mo/ /sems rab tu 'dzin to/ /yang dag par 'jog go/ / de bzhin du skyes pa rnams spang ba'i phyir dang / de bzhin du dge ba'i chos ma skyes pa rnams bskyed pa'i phyir dang / de bzhin du skyes pa rnams gnas pa dang / 'phel bar bya ba dang / phyir zhing 'byung bar bya ba'i phyir ro/ /de la 'dun pa skyed pa ni go cha'i brtson 'grus so/ /de ltar 'bad pa bya'o zhes bya ba ni sbyor ba'i brtson 'grus so//brtson 'grus rtsom pa ni mi skyo ba'i brtson 'grus so/ /sems rab tu 'dzin pa dang / yang dag par 'jog pa ni thabs kyi brtson 'grus so/ /de las zhum pa la sems rab tu 'dzin pa'o/ /rgod pa la sems yang dag par 'jog pa ste/ mngon par 'jog pa'o//rdzu 'phrul ni 'jig rten las 'das pa'i chos so/ /rdzu 'phrul gyi rkang pa ste/ gnas yin pa'i phyir rdzu 'phrul gyi rkang pa'o/ /de yang bzhi ste/ 'dun pa'i ting nge 'dzin dang / brtson 'grus kyi ting nge 'dzin dang / sems kyi ting nge 'dzin dang / dpyod pa'i ting nge 'dzin to//'di ltar kha cig ni sems 'dun pa drag pa dang ldan pa nyid kyis sems rtse gcig pa'i mtshan nyid kyi ting nge 'dzin skye bar 'gyur ro/ /kha cig gi yang dag par spong ba ni brtson 'grus dang shin tu ldan pas mi dge ba yang dag par spangs te dge ba'i chos skyed pa nyid kyis so/ /kha cig gi ni zhi gnas dang /rab tu 'dzin pa dang / btang snyoms kyi rgyu mtshan dag gis sems yongs su sbyangs pa las so/ /kha cig ni ci bdag mi dge ba phra mo la kun tu mi spyod dam/ ci yang kun tu mi spyod ces gang bdag nyid la/ yongs su dpyod pa ni yang dag par nye bar dpyod pa'o/ / de dag skyes pa la kun nas dkris pa ni ring du gyur la/ bag la nyal rnams spang ba'i phyir yang yang dag par spong ba rtsom pa ni spong ba 'du byed pa brgyad mngon par 'byung ste/ 'dun pa dang / brtson 'grus dang / dad pa dang / shin tu sbyangs pa dang / dran pa dang / shes bzhin dang /sems pa dang / btang snyoms so/ /de la gang gi tshe 'jig rten dang / 'jig rten las 'das pa rnams kyi snyoms par 'jug pa bskyed par bya snyam pa ni 'dun pa'o/ /mi dge ba'i chos thams cad nges par 'joms pa ni brtson 'grus so/ /dad pa ni bla ma'i chos rtogs pa la bya'o//de'i sngon du 'gro ba ni shin tu sbyangs pa'o/ /de la yang dran pa ni shes bzhin gyi phyogs so/ /shes bzhin ni lhag mthong gi phyogs so/ /de la sems mngon par 'du byed pa ni sems pa'o/ /nyon mongs pa med pa ni btang snyoms so/ /de 'dun pa la sogs pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa sgom par byed de/dben pa ni nyon mongs pa las so/ /'dod chags dang bral ba ni srid pa'i 'dod chags dang bral ba'o/ /'gog pa ni sdug bsngal lo/ /de dag la bstan nas rnam par spong ba ni sdug bsngal te/ de dag la brten pa'o/ / de'i phyir yongs su grub pa sgom mo/ /mchog tu dbang byed pas na dbang po ste/ dad pa la sogs pa lnga'o/ /'jig rten las 'das pa'i chos skyed cing thob pa la bdag por gyur pas na dbang po ste/ dad pa'i dbang po dang / brtson 'grus kyi dbang po dang / dran pa'i dbang po dang /ting nge 'dzin gyi dbang po dang / shes rab kyi dbang po'o/ /rdzu 'phrul gyi rkang pa dang ldan pa'i rtags mthong ba las phyis khyad par can du 'byung ba la nges pa skye ba'i phyir ston pa dang nyan thos de dag gi rtogs pa la dad pa skye ba de ni 'di'i dad pa'i dbang po'o/ /dad pa lhag pas na brtson 'grus la sogs pa yang lhag par 'gyur te/des na dbang po lngar 'gyur ro/ /de ltar dbang po sgom pa na bdud la sogs pa mi mthun pa'i phyogs kyis mi brdzi ba'i phyir dad pa'i stobs nas shes rab kyi bar ro/ /byang chub ni yang dag pa ji lta ba bzhin du rtogs pa'i mthong ba'i lam ni rdzogs pa'i byang chub ste/dran pa yang dag byang chub kyi yan lag nas/ btang snyoms yang dag byang chub kyi yan lag gi bar du'o/ /de la chos rab tu rnam par 'byed pa dang / brtson 'grus dang / dga' ba ni lhag mthong gi phyogs so/ /shin tu sbyangs pa dang /ting nge 'dzin dang / btang snyoms ni zhi gnas kyi phyogs so/ /dran pa ni gnyi ga'i phyogs so/ /des de dag thob pas mthong bas spang bar bya ba'i nyon mongs pa spangs par bdag nyid kyis mthong nas bsgom pas spang bar bya ba dag spong ba'i phyir 'phags pa'i lam yan lag brgyad phung po gsum du sgom par byed do//de la yang dag pa'i lta ba dang / yang dag pa'i rtog pa dang / yang dag pa'i brtson pa ni shes rab kyi phung po'o/ /yang dag pa'i ngag dang / las kyi mtha' dang / tshor ba ni tshul khrims kyi phung po'o/ /yang dag pa'i dran pa dang /ting nge 'dzin ni ting nge 'dzin gyi phung po'o/ /'phags pa ni slob pa rnams so/ /de dag gis ni nyon mongs pa thams cad spang ba'i phyir dang / rnam par grol ba mngon sum du bya ba'i phyir 'phags pa slob pa'i lam 'di skyed par byed do/ /de bas na 'di 'phags pa rnams kyi yan lag brgyad yin pas na 'phags pa'i lam yan lag brgyad do//de dag ni dran pa nye bar gzhag pa la sogs pa ste/ sde tshan bdun re rer rnam par dbye ba byas nas byang chub kyi phyogs dang mthun pa sum cu rtsa bdun du 'gyur ro/ /byang chub ni zad pa dang mi skye ba shes pa'i ye shes so/ / de'i rjes su mthun pa ni byang chub kyi phyogs so/ /ting nge 'dzin gsum zhes bya ba ni rnam par thar pa'i sgo gsum gyi ste/ rang gi mtshan nyid kun brtags pa de'i ngo bo gtan du med pas des stong pa'o/ /yongs su grub pa'i rang gi ngo bo ni brjod du med pas mtshan ma med pa ste/ des na mtshan ma med pa'o//gzhan gyi dbang gi ngo bo ni 'khrul pa ste/ med pa'i ngo bor snang ba'i phyir ro/ /'khrul pa'i rtsa ba yang nyon mongs pa ste/ de'i phyir de ni spang bar bya ba yin gyi/ smon par 'os pa ni ma yin te/ des na smon pa med pa'o/ /shes pa bcu gcig ni mdo ji lta ba bzhin te/ sdug bsngal mi skye bar shes pa ni sdug bsngal 'byung ba mi skye ba ste de shes pa'o/ /spangs pa shes pa zhes bya ba ni kun 'byung gi bdag nyid nyon mongs pa la sogs pa spangs pa ste de shes pa'o/ /sdug bsngal 'gog pa shes pa zhes bya ba ni sdug bsngal dag 'gog pa ste de shes pa'o/ /'gog pa mngon sum du bya ba de lam gang gis 'gog pa mngon sum du byed pa ni de'i shes pa ste/'dis sdug bsngal 'gog pa'o/ /'dod chags la sogs pa zad pa shes pa ni zad pa shes pa'o/ /'dod chags la sogs pa mi skye ba shes pa ni mi skye bar shes pa'o/ /rnam par grol ba mngon sum du byed pa shes pa ni chos shes pa'o//mi rtag pa nyid la sogs pa de rjes su dpag pas shes pa ni rjes su shes pa'o/ /gcig tu kun brtags pa la dmigs pa nyid yin pa'i phyir gzhan gyi sems shes pa ni kun rdzob shes pa'o/ /lam la 'dris pa ni lam la goms pa'o/ /sgra ji bzhin shes pa ni de bzhin gshegs pa rnams dang lha dang mi la sogs pa thams cad kyi skad shes pa'o//dbang po gsum ni mdo ji lta ba bzhin te/ rnam par byang ba'i chos rnams la bdag po yin pa'i phyir dbang po'o/ /dbang po gang la mi shes pa kun shes par byed pa yod pa de la de skad ces bya'o//kun shes pa'i dbang po dang kun shes pa bsrung ba'i dbang po ni kun shes pa dang ldan pa'i dbang po'o/ /snang ba med pa zhes bya ba ni nyan thos la sogs pa'i phyin ci log bzhi snang ba med pa'i phyir dang / byang chub sems dpa' rnams kyi yang spros pa'i mtshan ma thams cad nub pas chos nyid tsam la dmigs pa'i phyir ro//dregs pa 'dul ba ni ji ltar 'os pa nyon mongs pa 'dul ba'i phyir ro/ /rnam par rtog pa dang rnam par dpyod pa dang bcas pa la sogs pa'i ting nge 'dzin gsum ni mdo ji lta ba bzhin no/ /sangs rgyas la sogs pa rjes su dran pa bcu ni mdo ji lta ba bzhin no/ / bsam gtan dang gzugs med pa ni 'jug pa'i sgrub par bstan pa'o/ /tshad med pa yang 'jug pa'i sgrub pa'i tshad med pa bzhin no/ /rnam par thar pa brgyad ni gzugs can gzugs rnams la lta ba 'di ni rnam par thar pa dang po'o/ /nang gzugs med par 'du shes pas phyi rol gyi gzugs rnams la lta ba ni rnam par thar pa gnyis pa'o//sdug par mos pa ni rnam par thar pa gsum pa'o/ /gsum po 'di dag ni sprul pa'i sgrib pa'i gnyen por 'gyur ba'i phyir rnam par dag pa'o/ /de la dang po gnyis ni mi sdug pa'o/ /gsum pa ni sdug pa'o/ /rnal 'byor pa kha cig 'dod pa na spyod pa'i kha dog gi 'dod chags la sogs pa'i gnyen por nang gi sgra la sogs pa la dmigs pa'i snyoms par 'jug pa la snyoms par zhugs nas de nyid kyi 'og tu phyi rol gyi sngon po la sogs pa la dmigs te/bsam gtan dang po la snyoms par 'jug go/ /bsam gtan dang po'i kha dog gi 'dod chags la sogs pa'i gnyen por bsam gtan gnyis pa la snyoms par 'jug pa de bstan te/gzugs can gzugs rnams la lta ba zhes bya ba ni nang gi gzugs la dmigs pa'i phyir gzugs can zhes brjod do/ /phyi rol gyi gzugs la dmigs pa'i phyir gzugs la lta ba zhes brjod do//rnal 'byor pa la la nang la mi dmigs pa nyid kyis phyi rol gyi dngos po la sogs pa 'ba' zhig la dmigs shing snga ma bzhin du bsam gtan dang po'am gnyis pa la snyoms par zhugs pa yang brjod do/ /de ni nang gzugs med par 'du shes pas phyi rol gyi gzugs rnams la lta ba zhes bya'o//de bzhin du mi sdug pa rnam par sgom pas sems kyi rgyud zhum pa dga' bar bya ba'am/ ci bdag yid du 'ong ba'i gzugs rnams sdug pa nyid du yid la byed pa na kha dog la 'dod chags la sogs pa skye 'am zhes sad pa'i phyir yid du 'ong ba'i gzugs la dmigs nas/ bsam gtan bzhi pa la snyoms par 'jug pa la sdug par mos par 'gyur zhes brjod par bya'o/ /de ni gzugs can gyi rnam par thar pa gsum mo/ /gzugs med pa'i rnam par thar pa la ni lnga ste/ nam mkha' mtha' yas skye mched kyi rnam par thar pa nas/ 'du shes dang tshor ba 'gog pa zhes bya ba'i rnam par thar pa zhes bya ba'i bar du'o//de la nam mkha' mtha' yas skye mched la sogs pa gzugs med pa bzhi'i dag pa pa ni de'i ro myang ba'i sgrib pa'i gnyen po yin pa'i phyir rnam par thar pa ste/ zhi bar gnas pa zhes kyang brjod do/ /'du shes dang tshor ba 'gog pa yang thar pa dang rjes su mthun par gnas pa'o//'du shes med 'du shes med min skye mched la rten cing langs nas sems dang sems las byung ba rnams 'gog pa ste/ de'i sgrib pa spangs pa'i phyir rnam par thar pa ste zhi bar gnas pa zhes kyang brjod do/ /mthar gyis gnas pa'i snyoms par 'jug pa dgu zhes bya ba ni bsam gtan bzhi dang /gzugs med pa'i snyoms par 'jug pa bzhi dang / 'du shes dang tshor ba 'gog pa'o/ /de bzhin gshegs pa'i stobs bcu ni gnas dang gnas ma yin pa mkhyen pa'i stobs dang / las kyi rnam par smin pa mkhyen pa'i stobs dang / khams sna tshogs mkhyen pa'i stobs dang / mos pa sna tshogs mkhyen pa'i stobs dang / dbang po mchog dang mchog ma yin pa mkhyen pa'i stobs dang / thams cad du 'gro ba'i lam mkhyen pa'i stobs dang / bsam gtan dang rnam par thar pa dang ting nge 'dzin dang snyoms par 'jug pa'i kun nas nyon mongs pa dang rnam par byang ba dang ldang ba mkhyen pa'i stobs dang /sngon gyi gnas rjes su dran pa mkhyen pa'i stobs dang / 'chi 'pho dang skye ba mkhyen pa'i stobs dang / zag pa zad pa mkhyen pa'i stobs zhes bya ba la/ de dag gi mtshan nyid mdo'i go rims ji lta ba bzhin no/ /gnas la yang gnas su gnas pa la yang gnas ma yin par rab tu shes zhes bya ba ni nyes par spyod pa rnams las mi 'dod pa'i rnam par smin pa ni gnas so//'dod pa ni gnas ma yin pa'o/ /legs par spyod pa rnams las 'dod pa ni gnas so/ /mi 'dod pa ni gnas ma yin pa'o/ /ser snas dbul ba ni gnas so/ / longs spyod chen po ni gnas ma yin pa'o/ /sbyin pa las longs spyod chen po ni gnas so/ /dbul por gyur pa ni gnas ma yin pa'o/ /'chal pa'i tshul khrims kyis ngan 'gror skye ba ni gnas so/ /bde 'gro ni gnas ma yin pa'o/ /tshul khrims kyi bde 'gror skye ba ni gnas so/ /ngan 'gro ni gnas ma yin pa ste/de la sogs pa gnas dang gnas ma yin pa rab tu mkhyen pa ni dag pa dang ma chags pa dang thogs pa med pa'i ye shes kyis de nyid kyi phyir yang dag pa ji lta ba bzhin du mkhyen pa ni phyin ci ma log par ro/ /des na dag pa nyid ces brjod do/ /gang dang gang yang dag pa zhes zlos pa ni chags pa med par bstan to//rnam pa gang dang gang gis yang dag pa zhes bya ba ni/ rnam pa thams cad mkhyen pa'i phyir thogs pa med pa bstan to/ /ye shes de nyid stobs te gtan du gzhan gyis mi thub pa'i phyir dang gtan du gzhan dag zil gyis gnon pa'i phyir ro//'das pa zhes bya ba la sogs pa la 'dir gnas dang rgyu zhes bya ba ni gnas dang rgyu dang bcas pa'o/ /phyogs gang du de'i las byed pa de ni gnas so/ /nyan thos la sogs pa gang gi rgyu de'i las te rgyud dang bcas pa'o/ /rnam par smin pa ni bde ba dang sdug bsngal la sogs pa'o/ /khams sna tshogs zhes bya ba ni bstan pa'o//khams du ma zhes bya ba ni rjes su bstan pa'o/ /khams ni lhag pa'i bsam pa ste/ bsod nams dang bsod nams ma yin pa dang mi g.yo ba la sogs pa skyed par byed pa'o/ /mos pa sna tshogs zhes bya ba ni 'dir 'dod pa ni mos pa ste/ dper na chags pa la gnas pa yang zhe sdang la mos pa dang /zhe sdang la gnas pa yang chags pa la mos pa lta bu'o/ /dbang po'i rim pa zhes bya ba ni dad pa la sogs pa'i dbang po tha dad pa nyid de/ 'di ni dbang po rtul po'o/ /dbang po 'bring po'o/ /dbang po rnon po'o/ /dbang po med pa'o zhes bya ba la sogs pa'o//thams cad du 'gro ba'i lam mkhyen pa ni 'dir byang chub sems dpa' sems can gyi khams yang dag pa nyid du nges pa dang ma nges pa shes pa ni de dag gi rjes su mthun pa'i lam mkhyen cing ston pa dang / log pa nyid du nges pa ni btang snyoms su bya ba dang mthun par btang snyoms su byed do//'di ni 'dod chags kyi gnyen por gyur pa'i lam mo/ /'di ni zhe sdang gi gnyen por gyur pa'i lam mo zhes bya ba la sogs pa'o/ /bsam gtan dang rnam par thar pa dang ting nge 'dzin dang / snyoms par 'jug pa'i kun nas nyon mongs pa dang rnam par byang ba dang ldang ba zhes bya ba la/ bsam gtan ni bzhi pa'o/ /rnam par thar pa ni brgyad do/ /ting nge 'dzin ni gsum ste/ rtog pa dang bcas pa dpyod pa dang bcas pa la sogs pa'o/ /snyoms par 'jug pa ni gzugs med pa'i snyoms par 'jug pa bzhi dang mthar gyis gnas pa'i snyoms par 'jug pa dgu'o/ /kun nas nyon mongs pa la sogs pa de la kun nas nyon mongs pa ni ro myang ba'o//rnam par byang ba ni mi dmigs pa la sogs pa'o/ /ldang ba ni seng ge rnam par bsgyings pa'am thod rgal ba'o/ /lhag ma gsum ni mdo ji lta ba bzhin no/ /seng ge bzhin du shin tu bsnyengs pa med pas rigs par gsungs pa ni mi 'jigs pa ste/de'i dngos po'am las ni de nyid do/ /mi 'jigs pa ni bzhi ste/ mngon par rdzogs par byang chub pa la mi 'jigs pa dang / zag pa zad pa la mi 'jigs pa dang / bar du gcod pa'i chos la mi 'jigs pa dang / nges par 'byin pa'i lam la mi 'jigs pa'o/ / mngon par rdzogs par byang chub pa zhes bya ba la sogs pa la/ mi 'jigs pa ni der dam 'cha' ba dang / dgod pa la zhes bya ba'i don to/ /dang po gnyis ni ye shes dang spangs pa'i mtshan nyid de rang gi don to/ /tha ma gnyis ni gzhan gyi don te gzhan dag la de ston pa'i phyir ro/ /mtshan nyid rgya cher ni mdo ji lta ba bzhin no//'dir yang dge sbyong dang bram ze smos pa ni shes rab kyi mngon pa'i nga rgyal byed pa'i phyir ro/ /lha dang bdud smos pas lha'i mig dang pha rol gyi sems shes pa phun sum tshogs pa'i phyir ro/ /tshangs pa ni mthu la sogs pa che ba'i phyir ro/ /rgyu de mi mthong zhes bya ba ni de dag gis brgal ba'i rgyur gyur pa'i skyon no//bde ba thob pa dang / bag tsha ba med pa thob pa dang / mi 'jigs pa thob pa zhes bya ba ni go rims bzhin du lus la sogs pa'i las rnam par dag pa ste/ sku la spu ldang ba dang / spa bkong ba la sogs pa dang / gsung la zhum pa dang / dman pa la sogs pa dang /thugs la dogs pa dang zhum pa nyid la sogs pa dang bral ba'i phyir ro/ /de nyid kyi phyir go rims bzhin du khyu mchog gi gnas su dam bca' seng ge'i sgra yang dag pa sgrog /tshangs pa'i 'khor lo skor bar mdzad/ /tshangs pa ni de bzhin gshegs pa ste/ 'jig rten thams cad las mngon par 'phags pa'i phyir ro//tshangs pa de rnams kyi'o/ /yang na tshangs pa ni thar pa ste/ de'i don gyi phyir tshangs pa'i 'o/ /'gro ba'i don gyis na 'khor lo ste/ chos kyi 'khor lo zhes bya ba'i don to/ /de bzhin gshegs pa rnams kyi gsung rab yan lag bcu gnyis ni chos so//de'i brjod par bya ba ma lus pa ni don to/ /de dag nyid kyi ming gi tshogs la sogs pa rnam pa mang po'i tshig nges pa ni nges pa'i tshig go/ /yang na rgyu'i chos thams cad ni chos so/ /'bras bu'i chos thams cad ni don to/ /'gro ba drug tu gtogs pa'i sems can rnams kyi skad thams cad ni nges pa'i tshig ste/de dag so sor rig pa ni go rims bzhin du chos so sor rig pa dang / don so sor rig pa dang / nges pa'i tshig so sor rig pa'o/ /chos la sogs pa gzhan dag la ston pa'i phyir chos la sogs pa so so yang dag par rig pa mngon sum du gyur pa ni spobs pa ste/'di ni de yang yin la so so yang dag par rig pa yang yin pas na spobs pa so so yang dag par rig pa'o/ /ma 'dres par spyod pa'i phyir chos ma 'dres pa dag ste/ gzhan dag dang thun mong ma yin pa zhes bya ba'i don to/ /de yang bco brgyad de/ mdo ji lta ba bzhin no//de la dang po lus kyi las dang / gnyis pa ngag gi las dang / de nas bzhi ni yid kyi las yongs su dag pa'o/ /de nas drug ni de bzhin gshegs pa'i dbang po'i rten dang bcas pa dang / 'bras bu dang bcas pa la ma thob pa'i yongs su nyams pa med pa'i phyir ro/ /de la rten ni 'dun pa'o//'bras bu ni rnam par grol ba'o/ /dbang po ni brtson 'grus la sogs pa'o/ /de nas ni gsum ni lus la sogs pa'i las rnams la ye shes gnas pa nyid kyis ye shes kyi rgyu nyid dang / ye shes dang lhan cig spyod pa nyid kyis so/ /de nas dus gsum la ma chags ma thogs pa'i ye shes 'jug ste/des na gsum ste drug po de dag gis bco brgyad du 'gyur ro/ /'khrul pa mi mnga' ba zhes bya ba ni 'di ltar dgra bcom pa rnams grong la sogs par bsod nams kyi phyir rgyu ba na glang po che dang / ba glang dang / khyi gtum po dang / tsher ma dang / sdig sprul la sogs pa'i gnod pa 'byung ba dang /yang na dgon pa na chom rkun dang stag la sogs pa'i 'jigs pa de lta bu'i 'khrul pa de bzhin gshegs pa la rnam pa thams cad du mi mnga' ba ste/ rtag tu yang dag par rtog par mdzad pa nyid kyi phyir ro/ /ca co med pa zhes bya ba ni ji ltar dgra bcom pa dag dgon pa na lam stor nas ca co'i sgra 'byin pa bag chags kyi dbang gis gad mo rta gad 'byin pa de lta bu sangs rgyas la mi mnga' ste/rtag tu mnyam par bzhag pa'i phyir ro/ /bsnyel ba mi mnga' ba zhes bya ba ni ji ltar dgra bcom pa rnams brjed pas bya ba shor ba dang / dus las yol bar 'gyur ba de ltar sangs rgyas la mi mnga' ste/thugs rje chen po mnga' ba'i phyir ro/ /thugs mnyam par ma bzhag pa med pa zhes bya ba ni 'di ltar dgra bcom pa dag gang gi tshe snyoms par zhugs pa nyid ni mnyam par gzhag pa yin gyi tshe ni ma yin no/ /de ltar sangs rgyas ni ma yin te/ rtag tu mnyam par gzhag pa'i phyir ro/ /tha dad pa'i 'du shes med pa zhes bya ba ni ji ltar dgra bcom pa dag ni phung po la gcig tu mi mthun par 'du shes la mya ngan las 'das pa la ni zhi bar 'du shes pa de ltar sangs rgyas ni ma yin te/ gnyi ga la rnam par mi rtog pa nyid kyi phyir ro/ / so sor ma brtags pa'i btang snyoms med ces bya ba ni ji ltar dgra bcom pa rnams so sor ma brtags par sems can gyi don yal bar 'dor gyi/ de ltar sangs rgyas ni ma yin te/ de ni dus la sogs pa so sor brtags nas yal bar 'jog pa yin gyi/ gzhan du ni ma yin no/ / 'dun pa nyams pa med pa zhes bya ba la sogs pa ni dgra bcom pa dag ni sangs rgyas kyi sa dang sangs rgyas kyi mdzad pa la 'dun pa la sogs pa mi skye ste/ de bas na de dag las ma thob pa'i yongs su nyams pas yongs su nyams pa yin te/ de ltar sangs rgyas ni ma yin te/ de dag las khyad par gyi chos ma thob pa mi mnga' ba'i phyir dang /thob pa rnams ni rtag pa nyid kyi phyir ro/ /lhag ma ni go sla'o/ /de ni lam gyi tshogs so/ /gzungs kyi tshogs bshad par bya ste/ de la gzungs kyi sgo rnams la zhes bya ba la gzungs ni bzhi ste/ bzod pa'i gzungs dang / chos kyi gzungs dang /don gyi gzungs dang / gsang sngags kyi gzungs so/ /de rnams kyi sgo ni yi ge rnams so/ /yi ge nges par bsams pa'i stobs kyis de dag 'byung bar 'gyur ro/ /gcig nyid la mang po'i tshig ni 'bras bu la rgyu nye bar btags pa yin te/ de yang 'dir gzungs kyi sgo las skyes pa'i ye shes nyid la gzungs kyi sgo zhes bya'o/ /yi ge'i tshul mnyam pa nyid ces bya ba la/ yi ges 'dren par byed shes par byed pas na yi ge'i tshul te/ don dam par de nyid chos thams cad kyi mtshan nyid yin la de la dmigs pa'i ye shes la de skad ces brjod do//yi ge'i sgo zhes bya ba ni 'di'i sgo yi ge yin pas na yi ge'i sgo'o/ /yi ges 'jug par byed pa ste/ thob par byed pa zhes bya ba'i dbang du byas pa'o/ /a zhes bya ba ni gzod ma nas ma skyes pa'i phyir chos thams cad kyi sgo yin no zhes bya ba la/ yi ge a'i sgo ni yang dag pa ji lta ba bzhin rtogs par 'gyur ba'i phyir chos thams cad kyi sgo dang rgyu'o//ci'i phyir zhe na gzod ma nas skye ba med pa'i phyir te/ gang gi phyir chos thams cad gzod ma nas dri ma dang bcas pa'i gnas skabs nyid na skye ba med pa de'i phyir rnal 'byor spyod pa pa 'di yi ge a ma skyes pa'i don du sgro btags nas sgom pa na goms pa'i stobs las yi ge a tsam shin tu bsgoms pas chos thams cad mi skye ba'i bzod pa thob ste/de bas na bzod pa'i gzungs su 'gyur ro/ /de nas phyogs bcu'i sangs rgyas dang byang chub sems dpa' thams cad kyi bshad pa'i tshogs 'dzin pa'i rgyur gyur pa ni chos kyi gzungs so//de nas de'i don 'dzin pa'i rgyu ni don gyi gzungs so/ /sems can thams cad kyi yams dang gnod pa yang dag par zhi bar bya ba'i don gyi sngags kyi gzhi ni gsang sngags kyi gzungs so/ /skye ba med pa la sogs pa ni chos thams cad kyi de bzhin nyid yin te/ de yang nam mkha' dang mtshungs pa de bas na ji ltar nam mkha' skye ba med pa bzhin du de bzhin nyid kyang ngo //tshul 'dis yi ge thams cad blta bar bya'o/ /rdul dang bral ba'i phyir zhes bya ba ni ji ltar nam mkha' rdul gyis ma gos pa nyid kyi phyir rdul dang bral ba de bzhin du de bzhin nyid kyang ngo / /don dam par khyad par med pa nyid kyi phyir zhes bya ba ni de bzhin nyid la don dam par tha dad pa med pa'i phyir ro//'chi 'pho dang skye ba mi dmigs pa nyid kyi phyir zhes bya ba ni de bzhin nyid la 'chi ba'i srid pa dang skye ba'i srid pa mi dmigs pa'i phyir ro/ /ming dang bral ba'i phyir zhes bya ba ni de bzhin nyid la ming du brjod pa dang bral ba'i phyir ro//'jig rten las 'das shing sred pa'i 'khri shing gi rgyu dang rkyen yang dag par bcom pa nyid kyi phyir zhes bya ba la/ de bzhin nyid la zhes bya ba ni lhag ma'o/ /'das pa nyid ni 'das pa'i ye shes thob pa nyid kyi phyir dang 'dus ma byas pa nyid kyi phyir ro/ /yang dag par bcom pa nyid ni yang dag par bcom pa thob pa nyid kyi phyir ro//dul ba dang dul bar gnas pa yongs su gcod pa nyid kyi phyir zhes bya ba la/ de bzhin nyid ni ma dul bar byed pa nyon mongs pa dag dang ma dul bar gnas pa'i ngo bo nyid kyi las dag med pa'i phyir dul ba dang dul bar gnas pa nyid du yongs su gcod pa'o//bcings pa las grol ba nyid kyi phyir zhes bya ba ni 'dod chags dang zhe sdang dang gti mug gi 'ching ba de dag las grol ba nyid kyi phyir ro/ /khrag khrug dang bral ba nyid kyi phyir zhes bya ba ni nyon mongs pa dang las dang rnam par smin pa'i dbang gis khrag khrug ste rnam par g.yeng ba gang yin pa de dag dang bral ba nyid kyi phyir ro//chags pa mi dmigs pa nyid kyi phyir zhes bya ba ni nyon mongs pa dang las dang rnam par smin pa'i sgrib pa'i chags pa gsum po de dag med pa'i phyir ro/ /ngag gi lam ni sgra yang dag par chad pa nyid kyi phyir zhes bya ba ni ngag gi tha snyad kyi bdag nyid kyi sgra rnams yang dag par chad pa nyid kyi phyir ro//de bzhin nyid las ma g.yos pa nyid kyi phyir zhes bya ba ni de bzhin nyid kyi rang gi ngo bos ma spangs pa nyid kyi phyir ro/ /ji lta ba bzhin du ma skyes pa nyid kyi phyir zhes bya ba ni ji ltar rigs pa bzhin du ma skyes pa nyid kyi phyir ro/ /khengs pa mi dmigs pa nyid kyi phyir zhes bya ba ni khengs pa ste/nye ba'i nyon mongs pa dang spa bkong ba nyid med pa'i phyir ro/ /byed pa po mi dmigs pa nyid kyi phyir zhes bya ba la byed pa po ni bdag dang dbang phyug la sogs pa mi mthun pa'i rgyu rnams dang / rgyu dang rkyen gyi chos rnams te/ de dag mi dmigs pa'i phyir ro/ /mnyam pa nyid las mi 'da' ba nyid kyi phyir zhes bya ba ni chos thams cad mnyam pa nyid gang yin pa las mi 'da' ba'o//nga yir 'dzin pa mi dmigs pa nyid kyi phyir zhes bya ba ni bdag gi ba nyid kyi sgo nas sred pa'i 'dzin pa med pa'i phyir ro/ /'gro ba mi dmigs pa nyid kyi phyir zhes bya ba ni de ni bde 'gro dang ngan 'gro'i 'gro ba med pa'i phyir ro//gnas mi dmigs pa'i phyir zhes bya ba ni rgyun gyi mtshan nyid can gyi gnas pa med pa'i phyir ro/ /skye ba mi dmigs pa'i phyir zhes bya ba ni ma byung ba las byung ba'i mtshan nyid can skye ba med pa'i phyir ro/ /dbugs mi dmigs pa'i phyir zhes bya ba ni stobs med pa'i phyir ro//chos mi dmigs pa'i phyir zhes bya ba ni chos kyi rnam pa mi dmigs pa'i phyir ro/ /zhi gnas mi dmigs pa'i phyir zhes bya ba ni zhi gnas med pa'i phyir ro/ /nam mkha' dang mnyam par mi dmigs pa'i phyir zhes bya ba ni chos thams cad nam mkha' dang mnyam pa nyid kyis dmigs su med pa'i phyir ro//zad pa mi dmigs pa'i phyir zhes bya ba ni mi rtag pa nyid kyis mtshan nyid can gyi zad pa med pa'i phyir ro/ /bstod pa mi dmigs pa'i phyir zhes bya ba ni bstod pa med pa'i phyir ro/ /shes pa mi dmigs pa'i phyir zhes bya ba ni shes bya med pas shes pa'i mtshan nyid med pa'i phyir ro//gzhan mi dmigs pa'i phyir zhes bya ba ni gzhan med pa'i phyir ro/ /rgyu ba mi dmigs pa'i phyir zhes bya ba ni rgyu'i mtshan nyid med pa'i phyir ro/ 'jig pa mi dmigs pa'i phyir zhes bya ba la/ 'jig pa ni rnam par nyams pa'o/ /mdog mi dmigs pa'i phyir zhes bya ba ni de bzhin nyid la kha dog ste 'od de med pa'o//dran pa mi dmigs pa'i phyir zhes bya ba ni de bzhin nyid ni dran par byed pa'i shes pa'i spyod yul ma yin no/ /bod pa mi dmigs pa'i phyir zhes bya ba ni brjod par bya ba nyid med pa'i phyir ro/ /spro ba mi dmigs pa'i phyir zhes bya ba ni chos thams cad g.yo ba med pa'i phyir ro//stug po mi dmigs pa'i phyir zhes bya ba ni stug po'i rnam par rtog pa log pa'i phyir ro/ /rnam par bsgrub pa mi dmigs pa'i phyir zhes bya ba la/ rnam par bsgrub pa ni 'dus byas pa dang rnam par sbyar ba ste/ de med pa'i phyir ro/ /nyon mongs pa med pa nyid kyi phyir zhes bya ba ni nyon mongs pa'i nyon mongs pa dang rnam par rtog pa'i nyon mongs pa dang bral ba'i phyir ro//'bras bu mi dmigs pa'i phyir zhes bya ba ni 'bras bu'i chos rnams mi dmigs pa'i phyir ro/ /phung po mi dmigs pa'i phyir zhes bya ba ni nyon mongs pa dang las dang rnam par smin pa'i phung po dag med pa'i phyir ro//rga ba mi dmigs pa'i phyir zhes bya ba la/ rga ba ni gnas pa las rnam pa gzhan du 'gyur ba'i phyir ro/ /spyod pa mi dmigs pa'i phyir zhes bya ba la/ spyod pa ni 'gro ba dang 'ong ba'o/ /bsdigs pa mi dmigs pa'i phyir zhes bya ba la/ bsdigs pa ni rnam par 'tshe ba'o//ngar 'dzin pa mi dmigs pa'i phyir zhes bya ba la/ ngar 'dzin pa ni lta ba dang nga rgyal gyi bdag nyid do/ /de yan chad ni zhes bya ba ni de bzhin nyid las gzhan du'o/ /gang zhes bya ba ni ming ngo / /de zhes bya ba ni chos so/ /tha snyad 'dogs pa zhes bya ba ni ston pa po dang nyan pa po dag go//brjod pa dang bstan pa zhes bya ba ni ston pa po ste/ de la rang gi ngo bo brjod pa ni ba lang zhes bya ba dang / khyad par bstan pa ni dkar po zhes bya ba lta bu'o/ /rtogs pa ni mngon sum ma yin pa'i shes pas so/ /mthong ba ni mngon sum gyis so/ /de lta bu zhes bya ba ni chos nyid kyi tshul gyis so//gang yang med do zhes bya ba ni chos gang yang med pa ste/ chos rnams kyi mtshan nyid ji lta ba bzhin du med pa'i phyir ro/ /gzungs kyi sgo la 'jug pa zhes bya ba la/ gzungs ni don la nges pa ste/ a la sogs pa'i yi ge bstan pa la 'jug pa ni yi ge gang yin pa des don nges par bstan pa de la 'jug pa ni nges pa'o//yi ge dag gi don la mkhas pa ni mkhas pa'i yul can nyid yin pa'i phyir ro/ /gang gis gang la 'jug par shes pa de ni de la 'jug pa'o/ /de yang 'dir gzungs kyi gzhung gi tshogs so/ /sgra gang la yang thogs par mi 'gyur zhing zhes bya ba ni brjod pa thams cad la don dam pa tshol bar byed pa'i phyir ro//'di zhes bya ba ni sgra'o/ /mnyam pa nyid kyis yang dag par sgrub par 'gyur zhes bya ba ni de bzhin nyid du yang dag par sbyor bar byed pa'o/ /sgra shes pa la mkhas pa zhes bya ba ni skad thams cad la bsam pa shes pa'o/ /yi ge nyid ni phyag rgya ste/don dam pa brda gzungs kyi gzhung gi tshogs zhes bya ba'i don to/ /tshul dang ldan pa ni rigs pa'i rjes su 'gro ba can no/ /rgyud ni sems kyi rgyun no/ /dran pa ni yang dag par ma brjed pa'o/ /blo gros ni don dam pa'i rjes su 'brang ba can no/ /rtog pa ni yid gzhungs pa dang gang gi dbang gis shes rab myur bar 'gyur ba'o//blo ni kun rdzob kyi spyod yul can no/ /lhag ma ni go sla'o/ /de ni gzungs kyi tshogs so/ /sa bcu po dag ces bya bas sa'i tshogs ston pa de dag brjod par bya ba yin no/ /de dag kyang gang zhe na/ rab tu dga' ba dang / dri ma med pa dang / 'od byed pa dang / 'od 'phro ba can dang / shin tu sbyang dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin no/ /gang gi phyir dang po 'di la rang dang gzhan gyi don sgrub par byed pa'i nus pa thob pa las rab tu dga' ba de'i phyir rab tu dga' ba'o//gang gi phyir 'dir 'chal pa'i tshul khrims kyi dri ma dang bral ba'i phyir dri ma med pa'o/ /gang gi phyir 'dir ting nge 'dzin las nyams pa med cing chos kyi snang ba chen po'i gnas su gyur pa de'i phyir 'od byed pa'o/ /gang gi phyir 'dir byang chub kyi phyogs dag gis sgrib pa thams cad sreg pa'i phyir 'od 'phro ba can no//gang gi phyir 'jig rten pa dang 'jig rten las 'das pa'i rigs pa dang bde ba shes pa dag phan tshun 'gal ba'i phyir bya dka' ba de bas na 'di na shin tu sbyang dka' ba'o/ /gang gi phyir 'dir rten cing 'brel par 'byung ba'i rab tu rnam par 'byed pa las shes rab kyi pha rol tu phyin pa la gnas pa chags pa med pa'i sgo zhes bya ba mngon du gyur pa de'i phyir mngon du gyur pa'o//gang gi phyir 'dir byang chub kyi phyogs dang bden pa dang rten cing 'brel par 'byung ba la mtshan ma med par dmigs pa la gnas pa'i 'bad pa'i rgyu can yin pa de'i phyir 'di ni ring du song ba'o//gang gi phyir 'dir de nyid kyi rang gi ngang gis 'jug pa las g.yo ba med pa de'i phyir mi g.yo ba'o/ /gang gi phyir 'dir so so yang dag par rig bdag gis chos chen po ston pa nyid kyis byang chub sems dpa' legs pa yin pa de'i phyir 'di ni legs pa'i blo gros so/ /gang gi phyir 'dir byang chub sems dpa' chos kyi rgyal tshab tu dbang bskur ba de'i phyir 'di ni chos kyi sprin no//ci'i phyir 'di la theg pa chen po zhes bya zhe na/ de dag la rim gyis 'pho ba na byang chub thob pa'i phyir ro/ /ji ltar 'pho zhe na/ thabs la mkhas pas so/ /de yang gang zhe na/ bden pa gnyis la yang dag par brten pa ste/kun rdzob kyi bden pa la brten nas yongs su sbyong ba'i phyir dang / don dam pa'i bden pa la brten nas de dag thams cad dbyer med par mthong ba'i phyir ro/ /yongs su sbyong ba'i rim pa bzhin du bstan pa dang 'grel pa ni mdo nyid du bstan to/ /rab tu byed pa dag gis ni mdor bsdus pa tsam yin te/yongs su sbyong ba rnam bcu yis/ /sa ni dang po 'thob 'gyur te/ /sbyong ba bcu po dag gis zhes bya ba'i don to/ /de dag kyang gang zhe na/ bsam dang phan pa'i dngos nyid dang / /sems can rnams la sems mnyam nyid/ /gtong dang bshes gnyen bsten pa dang //dam chos dmigs pa tshol ba dang / /rtag tu nges 'byung sems nyid dang / /sangs rgyas skur 'dod dga' ba dang / /chos ston pa dang bden pa yi/ /tshig ni bcu pa yin par 'dod/ /ces gsungs te/ bsam pa ni dad pa dang 'dun pa'o/ /phan pa'i dngos po ni sems can thams cad la phan par 'dod pa nyid do//de'i rgyu ni sems mnyam pa nyid do/ /gtong ba ni sbyin pa'i pha rol tu phyin pa nyid do/ /tshol ba ni yongs su tshol ba ste/ de yang dam pa'i chos la dmigs nas chos tshol bar 'dod ces bya ba'i tha tshig go/ /nges par 'byung ba ni khyim gyi gnas nges par 'byung ba'o//nges par 'byung bar sems pa ni de 'dod pa nyid do/ /dga' ba ni zhes bya ba 'dir rtag tu zhes bya ba dang sbyar ro/ /bden pa'i tshig ces bya ba ni bden par smra ba ste/ de ni bcu'o/ /'di dag rang bzhin mi dmigs pas/ /yongs su sbyong ba shes par bya/ /'di dag ces bya ba ni bsam pa la sogs pa'o//tshul khrims byas pa gzo dang bzod/ /rab tu dga' dang snying brtse che/ /bkur sti gus par nyan pa dang / /brgyad pa sbyin la sogs la brtson/ /zhes bya ba la/ tshul khrims ni tshul khrims yongs su dag pa nyid do/ /bzod pa ni bzod pa'i stobs so/ /rab tu dga' ba nyid ni rab tu dga' ba'o//snying rje chen po ni sems can thams cad yongs su mi gtong bas so/ /bkur sti ni bkur bar 'os pa dag la'o/ /bla ma la gus par nyan pa ni dge ba'i bshes gnyen dag la ston par 'du shes pa'o/ /sbyin pa la sogs pa ni zhes bya ba ni pha rol tu phyin pa dag la'o//brgyad pa smos pas ni gnyis pa'i yongs su sbyong ba ni brgyad kho na yin no/ /thos pa mi ngoms nyid dang ni/ /zang zing med par chos sbyin dang / /sangs rgyas zhing kun sbyong ba dang / /'khor bas yongs su mi skyo dang / /ngo tsha khrel yod ces byas pa/ /rlom med bdag nyid de rnam lnga//zhes bya ba la/ thos pa zhes bya ba ni thos pa mang ba'o/ /kun tu sbyong ba ni bsod nams de nyid yongs su bsngos pa'i phyir ro/ /rlom med bdag nyid ces bya ba ni des khengs pa med pa'i phyir ro/ /de rnam lnga zhes bya ba ni gsum pa'i yongs su sbyong ba ni lnga kho na yin no/ / nags gnas 'dod chung chog shes dang / /sbyangs pa yang dag sdom sten dang / /bslab pa yongs su mi gtong dang / /'dod pa rnams la smod pa dang / /skyo ba dang ni bdog kun gtong / /mi zhum pa dang ltos pa med/ /ces bya ba la/ nags gnas ni dgon par gnas bcas pa ste/ de'i 'bras bu yin pa'i phyir ro//chog shes pa ni kun nas chog shes pa yin no/ /sbyangs pa yang dag sdom sten ni mi 'dor ba'o/ /skyo ba dang ni bdog kun gtong / /zhes bya ba ni yid byung ba dang bdog pa thams cad yongs su gtong ba'o/ /mi zhum pa dang ltos pa med/ /ces bya ba ni sems zhum pa med pa nyid dang dngos po thams cad la ltos pa med pa nyid de zhum pa med pa ni bag 'khums pa med pa nyid do//bcu zhes bya ba 'og nas 'byung ba 'dir yang sbyar ro/ /de bas na bzhi pa'i sbyong ba ni bcu kho na yin no/ /'dris dang khyim la 'khren pa dang / /'du 'dzir gyur pa'i gnas dang ni//bdag bstod gzhan la brnyas pa dang / /mi dge las kyi lam bcu dang / /rlom pas khengs dang phyin ci log/ /yid gnyis dang ni nyon mongs bzod/ /bcu po 'di dag rnams spangs na/ /sa lnga pa ni yang dag 'thob/ /khyim pa dag dang rab tu byung ba dang 'dris pa dang /khyim ste nye bar 'gro bar bya ba'i khyim la 'khren pa dang / 'du 'dzi ni tshul ma yin pa'i gtam mo/ /bstod pa ni stod par byed pa'o/ /brnyas pa ni smod pa'o/ /las kyi lam ni las kyi gzhi'o/ /rlom pa ni sems mtho ba'o/ /khengs pa ni lus kyis bla ma la mi 'dud pa'o//phyin ci log ni don la log par 'dzin pa'o/ /yid gnyis ni the tshom mo/ /nyon mongs pa bzod pa ni 'dod chags dang zhe sdang dang gti mug la gnas pa ste/ chos bcu po de dag rnam par spangs nas lnga pa 'thob par 'gyur ro/ /sbyin dang tshul khrims bzod brtson 'grus//bsam gtan shes rab rab rdzogs pas/ /slob ma dang ni bse ru la/ /dga' dang skyo ba'i sems spangs pa/ /bslangs na mi zhum bdog pa kun/ /btang yang mi dga' med pa dang / /dbul yang slong ba mi spong bas/ /sa ni drug pa yang dag 'thob/ /ces bya ba la/ sbyin pa la sogs pa'i pha rol tu phyin pa de dag so sor yongs su rdzogs pa ste/ de ltar chos drug dang / de bzhin du nyan thos la dga' ba dang / rang sangs rgyas la dga' ba dang / skyo ba'i sems yongs su spangs pa ste/ de ltar gsum dang / bslangs na mi zhum pa ste sems zhum pa med pa nyid dang //bdog pa kun btang yang yid mi bde ba med pa dang / bkren yang slong mo pa dag mi spong ba dang / de ltar gsum ste chos bcu gnyis po de dag gis sa drug pa thob par 'gyur ro/ /bdag dang sems can 'dzin pa dang / /srog dang gang zag chad rtag dang / /mtshan ma rgyu dang phung po dang //khams dang skye mched dag dang ni/ /khams gsum pa la chags gnas dang / /sems ni rtag pa la zhen dang / /dkon mchog gsum dang tshul khrims la/ /der lta ba yi mngon zhen dang / /stong pa nyid la yid gsod dang / /de dang 'gal ba'i nyes pa ni/ /nyi shu gang la rnam chad pa//de yis sa ni bdun pa 'thob/ /rnam thar sgo gsum shes pa dang / /'khor gsum rnam par dag nyid dang / /snying rje dang ni brnyas med dang / /chos mnyam dang ni tshul gcig shes/ /mi skye ba dang bzod shes dang / /chos rnams rnam pa gcig tu ston/ /rtog pa kun tu 'joms pa dang //'du shes lta dang nyon mongs spong / /zhi gnas nges par sems pa dang / /lhag mthong la ni mkhas pa dang / /sems dul ba dang thams cad la/ /thogs pa med pa'i ye shes dang / /chags pa'i sa min gar 'dod par/ /zhing gzhan du ni mnyam 'gro dang //kun tu bdag gi ngo bo ni/ /stong pa nyid dang nyi shu'o/ /zhes bya ba la/ nyi shu pa'i sgra gnyis pa'i 'og tu yongs su rdzogs pas zhes bya ba ni lhag ma'o/ /bdag tu 'dzin pa la sogs pa nyes pa'i dri ma nyi shu gang las rnam par chad pa ste/ rnam par thar pa'i sgo gsum shes pa la sogs pa yon tan nyi shu yongs su rdzogs pas sa bdun pa thob par 'gyur zhes bya ba ni bsdus pa'i don to//'dzin pa ni mngon par zhen pa ste/ de'i yul ni bdag la sogs pa nas skye mched kyi bar du'o/ /rtag pa la zhes bya ba ni tshogs pa gtso bor gyur pa'i zlas dbye ba'i bdun pa'o//dkon mchog gsum ni sangs rgyas dang chos dang dge 'dun te/ der lta ba ni sangs rgyas dang chos la sogs pa la lta ba'o/ /de la mngon par zhen pa ni gnas pa'o/ /yid gsod pa ni skyo ba'o/ /de dang 'gal ba ni stong pa nyid dang mi mthun par byed pa'o/ /mnyam zhes bya ba ni 'dra ba zhes bya ba'i don to//bdag tu 'dzin pa dang / sems can du 'dzin pa dang / srog tu 'dzin pa dang / gang zag tu 'dzin pa dang / chad par 'dzin pa dang / rtag par 'dzin pa dang / mtshan mar 'dzin pa dang / rgyur 'dzin pa dang / phung por 'dzin pa dang / khams su 'dzin pa dang / skye mched du 'dzin pa dang /khams gsum pa la gnas pa dang / khams gsum pa la chags pa dang / khams gsum pa la brten pa dang / sangs rgyas su lta ba la gnas pa dang / chos su lta ba la gnas pa dang / dge 'dun du lta ba la gnas pa dang / tshul khrims su lta ba la gnas pa dang /stong pa nyid kyi chos la yi gsod pa dang / stong pa nyid dang 'gal ba zhes bya ba ni nyes pa bstan pa'i don to/ /stong pa nyid yongs su rdzogs pa dang / mtshan ma med pa mngon sum du bya ba dang / smon pa med pa shes pa dang / 'khor gsum yongs su dag par bya ba dang / sems can thams cad la snying brtse ba dang /de dag la brnyas pa med pa dang / chos thams cad mnyam pa nyid du mthong ba dang / yang dag par rtogs pa dang / mi skye ba'i bzod pa shes pa dang / chos thams cad tshul gcig tu ston pa dang / rtog pa kun tu 'joms pa dang / 'du shes su lta ba rnam par bzlog pa dang /nyon mongs pa rnam par bzlog pa dang / zhi gnas nges par sems pa dang / lhag mthong la mkhas pa dang / sems dul ba nyid dang / thams cad la thogs pa med pa'i ye shes nyid dang / chags pa'i sa ma yin pa dang / gang du 'dod pa'i zhing du 'gro ba dang /de yang sangs rgyas kyi 'khor gyi nang du bdag nyid yang dag par ston pa zhes bya ba ni yon tan bstan pa'i don to/ /sems can kun yid shes pa dang / /mngon par shes pas brtse ba dang / /sangs rgyas zhing bzang sgrub pa dang / /yongs su brtag phyir sangs rgyas bsten/ / dbang po shes dang rgyal ba yi/ /zhing sbyong sgyu ma ltar gnas dang / bsams bzhin srid pa len pa dang / /las ni rnam pa 'di brgyad bshad/ /ces bya ba la/ bzang zhes bya ba ni yongs su dag pa ste/ sgrub pa zhes bya ba dang sbyar ro/ /rnam brgyad ces bya ba'i tshig gis brgyad pa la yongs su sbyong ba rnam pa brgyad kho na yin te/'di lta ste sems can thams cad kyi sems kyi rjes su 'jug pa dang / mngon par shes pas rnam par brtse ba dang / sangs rgyas kyi zhing bsgrub pa dang / sangs rgyas bsten pa dang yongs su brtag pa zhes bya ba gcig tu byas pa dang / dbang po mchog dang mchog ma yin pa shes pa dang /sangs rgyas kyi zhing yongs su sbyong ba dang / sgyu ma lta bu'i ting nge 'dzin la yang dang yang du snyoms par 'jug pa dang / bsams bzhin du srid pa len pa'o/ /sangs rgyas kyi zhing ni rnam pa gnyis te/ dang por snod kyi 'jig rten dang / de nas sems can gyi 'jig rten no//smon lam dag ni mtha' yas dang / /lha la sogs pa'i skad shes dang / /spobs pa chu bo lta bu dang / /mngal du 'jug pa mchog dang ni/ /rigs dang rus dang cho 'brang dang / /'khor dang skye ba dag dang ni/ /nges 'byung byang chub shing rnams kyi/ /yon tan phun sum tshogs pa yin//sa brgyad pa'i de ma thag tu dgu pa yin te/ de'i yongs su sbyong ba dag ni smon lam mtha' yas pa dang / lha la sogs pa'i skad shes pa dang / spobs pa yongs su rdzogs pa dang / mngal du 'jug pa phun sum tshogs pa dang / rigs phun sum tshogs pa dang /rus phun sum tshogs pa dang / cho 'brang phun sum tshogs pa dang / 'khor phun sum tshogs pa dang / skye ba phun sum tshogs pa dang / nges par 'byung ba phun sum tshogs pa dang / byang chub kyi shing phun sum tshogs pa dang / yon tan thams cad yongs su rdzogs pa phun sum tshogs pa ste bcu gnyis so//sa dgu 'das nas ye shes ni/ /gang gi sangs rgyas sar gnas pa/ /de ni byang chub sems dpa'i sa/ /bcu pa yin par shes par bya/ /zhes bya ba la sa dgu zhes bya ba ni rigs kyi sa la sogs pa'o/ /de la mya ngan las 'da' ba'i rigs can ni rigs kyi'o//rgyun du zhugs pa'i 'bras bu la zhugs pa ni brgyad pa'i sa'o/ /mthong ba'i sa ni rgyun du zhugs pa'o/ /lan cig phyir 'ong ba ni bsrabs pa'i sa'o/ /phyir mi 'ong ba ni 'dod chags dang bral ba'i sa'o/ /bya ba byas so zhes shes pa'i phyir byas pa rtogs pa can ni dgra bcom pa ste/ de'i sa ni byas pa rtogs pa can gyi sa'o/ /nyan thos kyi sa ni nyan thos kyi sa ste drug po de nyid do/ /rang sangs rgyas kyi sa ni rang sangs rgyas kyi'o/ /byang chub sems dpa'i sa ni gong du bstan pa'i byang chub sems dpa'i sa dgu po ste/ sa dgu po de dag las 'das pa'i ye shes gang gis byang chub sems dpa' sangs rgyas kyi sar gnas par 'gyur ba de ni byang chub sems dpa'i sa bcu pa yin no//de ni sa'i tshogs so/ /sa'i tshogs kyi 'og tu nges par 'byung ba'i sgrub pa'i gong du mdo las rgyas par gnyen po'i tshogs bshad de/ de'i dbang du byas nas/ mthong dang goms pa'i lam dag la//gzung dang 'dzin pa'i rnam rtog rnams/ /nye bar zhi bar bya ba'i phyir/ /gnyen po rnam pa brgyad ces bya/ /zhes gsungs pa la/ goms pa ni bsgoms pa'o/ /'dzin pa ni 'dzin par byed pa'o/ /mthong ba'i lam gyi mi mthun pa'i phyogs rnam par rtog pa bzhi po dag ni mthong bas spang bar bya ba yin te/de la gzung ba'i rnam par rtog pa gnyis ni dngos po tsam la brten pa can dang / gnyis po la brten pa can no/ /'dzin pa'i rnam par rtog pa gnyis ni gang zag rdzas su yod pa la brten pa can dang / skyes bu btags pa'i rten can no/ /rnam par rtog pa bzhi po de nyid ni bsgom pa'i lam gyi mi mthun pa'i phyogs bsgom pas spang bar bya ba'ang yin no//de bas na de dag spang bar bya ba'i don du lam gnyis ni gnyen po rnam pa brgyad po kho na yin no/ /de la dang po ni rab 'byor khyod kyis gang yang 'di skad du theg pa de gang nas nges par 'byung bar 'gyur zhes smras pa zhes bya ba nas/de bzhin gshegs pa'i sprul pa ngo bo nyid kyis stong zhes bya ba'i bar gyis gsungs so/ /'dir gzung ba'i dngos po de bzhin nyid la sogs pa dang / gzugs la sogs pa dang / rmi lam la sogs pa mi dmigs pa'i chos nyid tsam mthong ba'i lam 'di ni gzung ba'i rnam par rtog pa dang po'i gnyen po'o//gnyis pa ni sbyin pa'i pha rol tu phyin pa zhes bya ba nas brtsams te/ sangs rgyas kyi chos rnams kyi ngo bo nyid kyis stong pa zhes bya ba de dag gi bar gyis so/ /'dir sbyin pa la sogs pa gnyen po'i phyogs kyi dngos po dag mi dmigs pa mthong ba'i lam zhes bya ste/mthong ba'i lam 'di ni gzung ba'i rnam par rtog pa gnyis pa'i gnyen po'o/ /gsum pa ni rab 'byor gang mtshan nyid med pa'i chos rnams 'byung bar 'dod pa de'i dgra bcom pa zhes bya ba nas/ rnam pa thams cad mkhyen pa nyid kyi ngo bo nyid kyis stong pa'i phyir zhes bya ba'i bar gyis so//'dir dgra bcom pa la sogs pa gang zag rdzas su yod pa mi dmigs pa ni mthong ba'i lam ste/ mthong ba'i lam 'di ni 'dzin pa'i rnam par rtog pa dang po'i gnyen po'o/ /bzhi pa ni rab 'byor mtshan nyid med pa'i chos rnams 'byung bar 'dod pa de ni ming zhes bya ba de nas brtsams te/gnas de ni bskyod du med pa zhes bya ba de dag gi bar gyis so/ /'dir ni ming dang brda dang tha snyad la sogs pa mi dmigs pa ni mthong ba'i lam yin te/ mthong ba'i lam 'di ni 'dzin pa'i rnam par rtog pa gnyis pa'i gnyen po'o/ /lnga pa ni rab 'byor gang yang khyod kyis 'di skad du theg pa de gang du gnas par 'gyur zhes smras pa zhes bya ba de nas brtsams te/bskyod du med pa'i tshul gyis gang du yang gnas par 'gyur ba med do zhes bya ba'i bar gyis gsungs so/ /chos thams cad mi gnas pa nyid kyis gnas pa med pa dag ni chos kyi dbyings gnas pa med pa'i tshul gyis gzung ba ni dngos po dag mi dmigs pa'i goms pa'i lam yin te bsgom pa'i lam 'di ni gzung ba'i rnam par rtog pa dang po'i gnyen po'o//drug pa ni rab 'byor gang yang khyod kyis 'di skad du theg pa des su zhig 'byung bar 'gyur zhes bya ba de nas brtsams te/sangs rgyas kyi chos ma 'dres pa rnams mi dmigs so zhes bya ba'i bar gyis so/ /'dir ni sbyin pa'i pha rol tu phyin pa la sogs pa mi dmigs pa ni goms pa'i lam yin te/ bsgom pa'i lam 'di ni gzung ba'i rnam par rtog pa gnyis pa'i gnyen po'o/ /'dun pa ni shin tu rnam par dag pa'i phyir rgyun du zhugs pa'o zhes bya ba nas brtsams te/shin tu rnam par dag pa nye bar gzung na zhes bya ba de dag gi bar gyis so/ /'dir ni rgyun du zhugs pa la sogs pa'i gang zag rdzas su yod pa mi dmigs pa ni goms pa'i lam yin te/ bsgom pa'i lam 'di ni 'dzin pa'i rnam par rtog pa dang po'i gnyen po'o//brgyad pa ni rgyun du zhugs pa'i 'bras bu zhes bya ba nas brtsams te/ rnam pa thams cad mkhyen pa nyid du gnas par 'gyur ro zhes bya ba'i bar gyis so/ /'dir ni rgyun du zhugs pa'i 'bras bu la sogs pas rgyun du zhugs pa'i skyes bu btags par yod pa dag mi dmigs pa ni goms pa'i lam yin te/bsgom pa'i lam 'di ni 'dzin pa'i rnam par rtog pa gnyis pa'i gnyen po'o/ /de ni gnyen po'i tshogs so/ /tshogs kyi sgrub pa bstan nas/ rnam pa thams cad mkhyen pa nyid kyi dbang du byas pa yongs su rdzogs pa'i bar gyis nges par 'byung ba'i sgrub pa bstan par bya ba'i dbang du mdzad nas/ched du bya dang mnyam nyid dang / /sems can don dang 'bad med dang / /shin tu nges par 'byung ba dang / /thob pa'i mtshan nyid nges 'byung dang / /rnam pa thams cad mkhyen nyid dang / /nges 'byung lam gyi spyod yul can//rnam pa brgyad kyi bdag nyid 'di/ /nges 'byung bsgrub pa yin zhes bya/ /zhes bya ba gsungs pa la/ theg pa chen po'i mtshan nyid gsungs pa/ 'chad par 'gyur ba de la ci'i phyir theg pa chen po zhes bya zhe na/ gang gi phyir 'jig rten zil gyis mnan nas nges par 'byung bar 'gyur ba'i phyir ro//ci'i phyir theg pa chen po zhes bya zhe na/ gang gi phyir nam mkha' dang mnyam pa dang / sems can thams cad la go 'byed pa'i phyir dang / 'gro ba dang 'ong ba dang gnas pa dang bral ba'i phyir dang / dus gsum mnyam pa nyid kyi phyir ro/ /de la 'dir 'jig rten ni khams gsum pa'o//de las shin tu 'das pa'i phyir mchog go/ /de yang gang zag dgu po dag gi chos so/ /dgu gang zhe na/ rigs kyi sa dang / brgyad pa dang / rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa dang / rang sangs rgyas dang / byang chub sems dpa' dang /sangs rgyas so/ /de yang sems can thams cad kyi ste/ theg pa chen po ni nam mkha' dang mnyam pa nyid kyi phyir sems can thams cad kyi mchog go/ /de yang nges par 'byung ba'i gzhung dang po rab 'byor gal te sems dang po bskyed pa zhes bya ba de'i gong du rgyas par bstan to sems dang po bskyed pa la sogs pa zhes bya ba'i gzhung gis sems bskyed pa chen po nyid dang /ye shes rdo rje lta bu zhes bya ba la sogs pa'i gzhung gis rtogs pa chen po nyid dang / gang zag dgu'i chos kyi sgrib pa spang ba'i phyir chos kyi 'khor lo bskor ba'i gzhung gis spangs pa chen po nyid de/ chen po nyid gsum po de dag gis sems can thams cad kyi mchog nyid du bsgrub par bya ba ni/ ched du bya ba'o/ /ched du bya ba de'i don du sgrub pa rnam pa bzhi la spyad pa'i phyir ro/ /de skad du yang / sems can kun mchog nyid sems dang / /spong dang rtogs pa gsum po la/ /chen po gsum gyi rang byung gi//ched du bya ba 'di zhes bya/ /zhes gsungs so/ /de'i nges par 'byung ba ni 'gro ba'i bya ba ma lus pa yongs su rdzogs pa yin te/ yongs su rdzogs pa dang yongs su sbyangs pa las so/ /'dod pa'i khams la sogs pa dang / /sems can thams cad chos kyi 'khor lo bskor ba'i mthar thug pa dag la dngos po med pa'i ngo bo nyid du yongs su shes pa'i phyir yongs su sbyangs pa'o//de ni ched du bya ba'i nges par 'byung ba'o/ /phyogs dang kha dog dang dus dang 'phel ba dang 'grib pa la sogs pa dang bral ba'i phyir theg pa chen po nam mkha' dang mnyam pa nyid du shes pa ni mnyam pa nyid do//de'i nges par 'byung ba ni mnyam pa nyid du nges par 'byung ba'o/ /theg pa chen po ni nam mkha' dang 'dra bar sems can tshad med grangs med dpag tu med pa dag gi go skabs 'byed pa de bas na de dag gi don byed pa'i phyir ro/ /'di ltar sems can med pa nyid kyis nam mkha' dang mnyam pa med pa nyid de/de med pa nyid kyis theg pa chen po med pa nyid do/ /gsum po dag kyang mi dmigs pa'i phyir zhes bya ba la sogs pas rgyas par sems can gyi don gyi nges par 'gyur ba bstan to/ /theg pa chen po ni nam mkha' dang 'dra bar 'ong ba dang 'gro ba dang gnas pa mi dmigs te/g.yo ba med pa'i phyir zhes bya ba la sogs pa'o/ /g.yo ba dang 'gul ba dang rtsol ba ni 'bad pa ste/ de med pa'i phyir lhun gyis grub pa'i nges par 'byung ba'o/ /theg pa chen po la sngon gyi mtha' yang mi dmigs pa la sogs pa ste/ dus gsum mnyam pa nyid kyi phyir ro zhes bya ba la sogs pas so//de bzhin du dus gsum mnyam pa nyid kyi mtha' las 'das pa nyid kyi phyir theg pa chen po 'di ni shin tu nges par 'byung ba'o/ /thob pa'i nges par 'byung ba brjod par bya ste/ de la dang por ni theg pa chen po la byang chub sgrub par byed pa nyid dang dus gsum mnyam pa nyid kyis theg pa chen po zhes bya ba'i bsngags pa gsungs so//de nas gang pos gsol pa/ /'dir shes rab kyi pha rol tu phyin pa brjod par bya ba'i theg pa chen po ni ma yin no/ /de bas na gnyi ga tha mi dad pa ni bcom ldan 'das kyis rjes su mthun pa zhes bya ba nas/ston pa zhes bya ba'i bar gyis gsungs te/ byang chub sems dpa'i dmigs pa thams cad ni stong pa nyid du bstan te/ stong pa nyid du bstan pa nyid kyang shes rab kyi pha rol tu phyin pa la yin no zhes bya bar dgongs so/ /rab 'byor gyis rnam pa thams cad mkhyen pa nyid ji ltar 'thob/ de mdor bsdus pa'i tshig bcu gnyis kyis smras te/de la bcom ldan 'das 'di ltar yang byang chub sems dpa' sems dpa' chen po sngon gyi mtha' zhes bya ba la sogs pa ni dang po'o/ /gzugs kun tu mtha' yas pa'i phyir zhes bya ba la sogs pa ni gnyis pa'o/ /gzugs byang chub sems dpa' zhes bya ba la sogs pa ni gsum pa'o//bcom ldan 'das de ltar zhes bya ba la sogs pa ni bzhi pa'o/ /byang chub sems dpa' nyid kyang ril gyis zhes bya ba la sogs pa ni lnga pa'o/ /ji ltar bdag ces bya ba la sogs pa ni drug pa'o/ /bcom ldan 'das de ltar rang bzhin ma mchis pa'i chos thams cad la zhes bya ba ni bdun pa'o//gang mngon par ma grub pa'i gzugs lta zhes bya ba la sogs pa ni brgyad pa'o/ /bcom ldan 'das gang mngon par ma grub pa de ni zhes bya ba la sogs pa ni dgu pa'o/ /mngon par ma grub pa'i mngon par ma grub pas zhes bya ba la sogs pa ni bcu pa'o//byang chub sems dpa' las gud na zhes bya ba la sogs pa ni bcu gcig pa'o/ /gal te de ltar bstan pa'i tshe zhes bya ba la sogs pa ni bcu gnyis pa'o/ /de bas na de dag gi don brjod par bya ste/ thob pa'i bya ba dang thob par byed pa po'i byang chub sems dpa' dang /thob par byed pa'i shes rab kyi pha rol tu phyin pa dang / thob par bya ba'i rnam pa thams cad mkhyen pa dang chos thams cad ni mi dmigs pa ste/ de des de'i sgo nas thob par 'gyur ro zhes bya ba ni bsdus pa'i don to/ / yan lag gi don brjod par bya ste/ byang chub sems dpa' dus gsum du yang thob pa med cing rnyed pa med do zhes bya ba ni dang po'i don to/ /mtha' dang ldan pa 'gro ba pos 'gro bar bya bar phyin par 'gyur gyi/ mtha' med pa nam mkha' la sogs pa ni ma yin te/ byang chub sems dpa' yang mtha' med pa yin te/de ji ltar thob par 'gyur zhes bya ba ni gnyis pa'i don to/ /byang chub sems dpa' gzugs la sogs pa ma yin zhing gang la ci yang med na de ji ltar thob par 'gyur zhes bya ba ni gsum pa'i don to/ /de ltar de dang shes rab kyi pha rol tu phyin pa rnam pa thams cad du mi dmigs pa'i phyir gdams ngag med par 'gyur la/de med pa gang las thob par 'gyur zhes bya ba ni bzhi pa'i don to/ /byang chub sems dpa' zhes bya ba de ni ming tsam ste/ don ci yang med pa de bas na de la gdams pa'am thob pa med do zhes bya ba ni lnga pa'i don to/ / ji ltar bdag bdag ces bya ba de shin tu mngon par ma grub pa de bzhin du byang chub sems dpa' yang yin na gang las gdams pa'am thob par 'gyur zhes bya ba ni drug pa'i don to/ /chos thams cad kyang de bzhin du dngos po med pa'i ngo bo nyid yin na gdams pa 'am thob pa med do zhes bya ba ni bdun pa'i don to//de la byang chub sems dpa' ni gzugs la sogs pa'o/ /de ni rnam pa gsum ste/ kun brtags pa'i gzugs la sogs pa dang rnam par brtags pa'i gzugs la sogs pa dang / chos nyid kyi gzugs la sogs pa'o/ /de la kun brtags dang rnam par brtags pa gang yin pa de ni mngon par bsgrub pa ste/rgyu yod pa'i phyir ro/ /gang yang chos nyid kyi gzugs la sogs pa gang yin pa de ni mngon par sgrub pa ma yin pa dang mngon par 'dus byas pa ma yin te/ rtag tu de kho na bzhin du gnas pa'i phyir ro/ /de la mngon par ma grub pa gang yin pa de gang zhe na/ci yang med de/ mtshan nyid ji lta ba bzhin du kun brtags pa dang ji ltar snang ba bzhin du rnam par brtags pa med pa'i phyir zhes bya ba ni brgyad pa'i don to/ /gang yang mngon par ma grub pa de ni gzugs la sogs pa ma yin no/ /'on kyang gzugs la sogs pa'i chos nyid do zhes bya ba ni dgu pa'i don to//de la gzugs la sogs pa'i chos nyid kyang gzugs la sogs pa'i bdag nyid yin na de'i tshe ji ltar byang chub sems dpa' mngon par ma grub pa la shes rab kyi pha rol tu phyin pa mngon par ma grub pa gdams par bya bar 'gyur te/ go rims bzhin du bems po nyid dang / mngon par brjod pa ma yin pa nyid kyi phyir zhes bya ba ni bcu pa'i don to/ /mngon par ma grub pa las gzhan du byang chub sems dpa' mi dmigs so zhes bya ba ni bcu gcig pa'i don to/ /de ltar rnam pa bcu gcig mi dmigs pa bstan pa na sems gang bstan pa la dmigs pa zhes bya ba'i don to/ /de gang mi zhum pa ste de dmigs pa bor nas gzhan du zhum pa med pa ni rang bzhin gyis g.yo ba'i phyir ro//mi 'gong ba ni dmigs pa de la bsdus par gyur pa'o/ /gzhan du yang zhum pa med de rang bzhin gyis rgya che ba nyid kyi phyir ro/ /yid 'gong bar mi 'gyur zhes bya ba ni yid g.yo ba med pa dang bsdus pa la de dang 'gal bar 'gro bas na 'gong bar 'gyur ba ste/go rims bzhin du zhum pa dang rgod pa'o/ /de la zhum pa ni sems bying ba ste blong ba'o/ /rgod pa ni chags par bya ba'i yul rjes su dran nas 'dod chags kyi char gyur pa nye ba'i nyon mongs pa ste/ de dag zhi bar bya ba'i phyir yid phyir phyogs par mi 'gyur ro//de skad du/ ting 'dzin yon tan mthong ba'i phyir/ /de la mi dga' zhi bar bya/ /rnam g.yeng nyes pa mthong ba'i phyir/ /rgod pa yang ni zhi bar bya/ /zhes bshad do/ /'bad pa btang bar gyur na 'di la 'di dag kyang yod par 'gyur ro snyam ste/ btang ba las skrag pa ni skrag pa ste/de 'bad pas zlog pa ni mi skrag pa'o/ /'bad pa dang 'du byed pa dang rtsol ba zhes bya ba ni rnam grangs so/ /de nas lhun gyis grub pa'i 'jug pa bor nas 'dus byas pa la skrag pa ni dngang ba ste/ des 'du byed pa de btang bar gyur pa la mi dngang ba'o/ /shin tu lhun gyis grub pa'i ting nge 'dzin la yang dngang bar mi 'gyur ba 'di tsam gyis ni rang bzhin gyi spros pa med pa'i ting nge 'dzin yongs su grub pa bstan to//de nyid kyi phyir byang chub sems dpa' de ltar spyod na zhes bya ba la sogs pa gsungs so/ /mdor bsdus pa'i tshig de dag gi 'og tu de dag nyid go rims bzhin du re re ba'am lhan cig tu shA ri'i bus rjes su brjod nas rgyu dris pa de la re re ba la dang po dang gnyis pa dang bcu gcig pa dang bcu gnyis pa la'o//gsum pa dang bzhi pa ni lhan cig pa nyid do/ /lnga pa dang drug pa dang bdun pa dang brgyad pa dang dgu pa dang bcu pa dag kyang lhan cig pa nyid do/ /de dag gi 'og tu go rims bzhin du re re zhing 'dri ba rjes su brjod nas/rab 'byor gyis bcu gnyis nyid kyi lan rgyas par smras te/ de dag gi dang po ni sems can med pa nyid do/ /tshe dang ldan pa khyod kyis gang la yang 'di skad du gzhan yang zhes bya ba ni de ltar gnyis pa la sogs pa thams cad la dang por rjes su bzlas nas tha mar mjug bsdu ba'o//bcu gnyis pa'i lan rgyas pa'i mjug tu gsungs pa ni shes rab kyi pha rol tu phyin pa la spyod pa na zhes gsungs so/ /de bas 'di ltar 'di la spyod pa ni chos kyi rjes su rtogs pa yin la de ni gzugs la sogs pas gzugs la sogs pa la mi dmigs shing mi gnas pa ste/mngon par zhen par mi bgyid la/ 'dogs par mi bgyid do zhes gsungs pa nyid do/ /de dag gi don go rims bzhin du rang rig pas mi shes te/ rang gi mtshan nyid med pa'i phyir ro/ /mi snang ba ste/ gzung ba dang 'dzin pa med pas de bzhin snang ba med pa'i phyir ro//don dam pa nyid kyis rtogs par mi byed brtags pa tsam nyid kyis rnam par rtog par mi byed do/ /de dag gi rnam pa ni de gzugs zhes bya ba la sogs pa smos so/ /ci'i phyir mi shes she na/ med pa'i phyir dang skye ba med pa'i phyir dang zad pa med pa'i phyir ro//gang yang gzugs zhes bya ba la sogs pa dang / de dag ni gnyis su med pa'i grangs su 'gro'o zhes bya ba smos te/ chos nyid kyi gzugs la sogs pa zhes bya bar dgongs so/ /de ni thob pa'i nges par 'byung ba'o/ /rnam pa thams cad mkhyen pa nyid kyi brjod par bya ba yin pa de bas na shA ri'i bus byang chub sems dpa' ni gang /shes rab kyi pha rol tu phyin pa ni gang / yongs su brtags pa ni gang zhes dris pa ste/ rnam pa thams cad mkhyen pa nyid la gsum po de dag ci 'dra ba zhes bya bar bsams pa'o/ /rab 'byor gyis lan du smras pa/byang chub kyi bdag nyid kyi sems dpa' ni byang chub sems dpa'o/ /byang chub des kyang chos thams cad kyi rnam pa shes kyang 'di mngon par zhen pa ni med do/ /chos kyi gzugs la sogs pa'o/ /rnam pa gang gis zhes bya ba la sogs pa la rnam pa zhes bya ba ni bstan pa'o/ /rtags zhes bya ba ni ming dang brda'o//mtshan ma zhes bya ba ni mtshan nyid do/ /bral ba dang ring du song ba de bas na shes rab kyi pha rol tu phyin pa zhes bya ste spang bar bya ba ma lus pa spangs pas bral ba ste mi ldan pa'o/ /song bas na song ba ste bgrod par bya ba rgal ba zhes bya ba'i don to/ /pha rol du 'gro zhing phyin pas ring du song ba de bas na 'di shes rab kyi pha rol tu phyin pa'o//ji ltar yongs su brtags pa ni gang gzugs rtag pa ma yin zhes bya ba dang mi rtag pa ma yin zhes bya bar yongs su rtog pa zhes bya ba la sogs pa'o/ /lam gyi nges par 'byung ba brjod par bya ba de shA ri'i bu ji ltar na byang chub sems dpa' sems dpa' chen po pha rol tu phyin pa drug la spyod pa'i tshe byang chub kyi lam yongs su sbyong ba yin zhes skabs 'byed pa la tshe dang ldan pa zhes bya ba la sogs pa smos te go sla'o//de ni nges par 'byung ba'i sgrub pa rnam pa brgyad yin te/ rnam pa thams cad mkhyen pa nyid yongs su rdzogs pa yang yin no//'dir dang po sems bskyed pa bstan pa ni yang dag par rdzogs pa'i byang chub kyi sa bon yin pa'i phyir ro/ /de nas gdams ngag ni thog mar yongs su shes par bya ba bcu po dag yongs su shes par bya ba'i phyir ro/ /de nas nges par 'byed pa'i cha dang mthun pa dag ni 'jig rten las 'das pa'i lam gyi sbyor ba yin pa'i phyir ro//de nas rten ni sgrub pa'i rten te/ bdag tu 'dzin pa spang ba'i phyir ro/ /de nas dmigs pa ni de la rmongs pa spang ba'i phyir ro/ /de nas ched du bya ba ni log pa'i ched du bya ba spang ba'i phyir dang / yang dag pa'i ched du bya ba'i rang gi ngo bo shes par bya ba'i phyir ro//de nas sgrub pa rnam pa bzhi ste/ de la sgrub pa gang la bar du gcod par byed pa thams cad so sor bcom pa de ni go cha'i sgrub pa drug go/ /gang gi theg pa chen po la 'dzeg par byed pa de ni 'jug pa'i sgrub pa rnam pa dgu'o/ /gang gis rgyu'i mthar thug pa thob par byed pa de ni tshogs kyi sgrub pa rnam pa bcu bdun no//gang gis 'bras bu'i mthar thug pa sa gnon pa de ni nges par byung ba'i sgrub pa brgyad do/ /de bas na bzhi po 'di ni sgrub pa yin no/ /rab tu dbye ba'i grangs byas nas bzhi bcur 'gyur ro/ /mngon par rtogs pa'i rgyan gyi 'grel pa dag ldan zhes bya ba/ rin chen 'byung gnas zhi bas sbyar ba las rnam pa thams cad mkhyen pa nyid kyi le'u ste dang po'o// //lam shes pa nyid bstan par bya ba la/ rung bar ma byas pa la bstan par rigs pa ma yin te/ de yang rung bar byas pa nyid ni byang chub kyi sems yin no/ /de bas na dang por de nyid khyad par du 'phags pa'i chos rnams las zhes bya ba nas/lhag par dmigs par bya ba de dag gi bar gyis sems bskyed pa gsungs te/ de ni/ lha rnams rung bar bya ba'i phyir/ /'od kyis mog mog por mdzad dang / /yul nges pa dang khyab pa dang / /rang bzhin dang ni de yi las//zhes bya ba smos te/ gsungs so zhes bya ba ni lhag ma'o/ /lha rnams zhes bya ba ni lha'i tshogs rnams so/ /rung bar bya ba'i phyir zhes bya ba ci'i phyir zhe na/ bcom ldan 'das kyis 'jig rten thams cad zil gyis mnan par shes nas de'i dngos por sems bskyed pa'i phyir ro//kau shi ka de las zhes bya ba la sogs pas skabs 'byed pa yin no/ /de bas na byang chub tu sems ma bskyed pa gang yin pa de dag gis sems bskyed par bya'o zhes bya ba ni rung bar bya ba'i phyir bskyed pa'o/ /'od kyis zhes bya ba ni sangs rgyas kyi 'od kyis so/ /mog mog por mdzad ces bya ba ni gzi med par mdzad ces bya ba'i don to//gang yang zhes bya ba ni yul nges pa ste/ yul nyan thos zhi ba phyogs gcig pas ma bskyed pa'i phyir ro/ /'on kyang zhes bya ba la sogs pas bsam gyis mi khyab pa ste/ byang chub tu yongs su gyur pa'i nyan thos dag gis kyang bskyed pa'i phyir ro//dge ba'i phyogs la bdag ces bya ba la sogs pas ni rang bzhin te/ dge ba'i phyogs ni dge ba'i chos so/ /khyad par du 'phags pa zhes bya ba ni byang chub kyi sems yang dag par bzung bas so/ /shin tu khyad par du 'phags pa zhes bya ba ni theg pa chen po yang dag par gzung ba ste de ni las so//lam shes nyid kyi tshul la ni/ /'phags pa'i bden pa bzhi dag gi/ /rnam pa mi dmigs sgo nas ni/ /nyan thos lam 'di shes par bya/ /zhes bya ba la/ dang po nyid du zhes bya ba ni lhag ma'o/ /de'i mdo yang kau shi ka de la zhes bya ba nas brtsams te/bcom ldan 'das zhes bya ba'i gong ma yan chad do/ /gzugs la sogs pa ni rnam pa gnyis te/ sdug bsngal gyi bden pa dang kun 'byung gi bden pa'o/ /de la sdug bsngal ni rnam pa bzhir yid la ste/ mi rtag pa dang / sdug bsngal ba dang / bdag med pa dang / zhi ba ste/go rims bzhin du skye ba dang 'jig pa dang ldan pa'i phyir dang mi mthun pa nyid kyi phyir dang bdag gi mtshan nyid med pa nyid kyi phyir dang bdag gi bas stong pa nyid kyi phyir ro/ /de ltar shi ba'i ro la shi ba zhes bya ba ste/ bdag gi bas stong pa nyid kyi phyir ro/ /kun 'byung ni rnam pa bzhis spang bar 'os par shes par bya ba'i don to//nad dang shu ba dang zug rngu dang sdig pa ste/ go rims bzhin du sdug bsngal gyi rgyu nyid kyi phyir dang / sdug bsngal 'phel bar byed pa'i rgyu nyid dang gdon par dka' ba nyid kyi phyir dang / 'di dang gzhan du sdug bsngal gyi rgyu'i chos mthun pa nyid can yin pa'i phyir ro//yang rnam pa bzhis nus pa nyid du yongs su shes pa'i don te/ pha rol dang 'jig pa'i chos can dang g.yo ba dang rab tu 'jig pa ste/ bdag ni dor bar mi nus pas 'dis ni pha rol lo/ /'jig pa'i chos can ni skad cig ma re rer 'jig pa nyid kyi phyir ro/ /g.yo ba ni dgra bcom pa dag gis lam rnal mas rtsa ba nas bton pa nyid kyi phyir ro//skabs su bab pa'i lam gyis 'jig pa nyid kyi phyir rab tu 'jig pa'o/ /myur du byed pa'i don yang gsum ste/ thog 'bab pa la sogs pa bzhin du 'jig pa'i rgyud nyid kyi phyir 'jig pa'o/ /'byung po dang srin po dang chos mthun pa nyid kyi phyir 'go ba'i nad do//mu ge dang pha rol gyi dmag tshogs la sogs pa dang chos mthun pa nyid kyi phyir 'tshe ba'o/ /de bzhin du rten cing 'brel par 'byung ba lugs las bzlog pa ni ma rig pa 'gags pas 'du byed 'gag ces bya ba nas brtsams te/ sdug bsngal gyi phung po chen po 'ba' zhig 'gag par 'gyur ro zhes bya ba'i bar du ste/de la nges par 'gog pas na 'gog pa ste zhes bya ba ni 'gog pa'i bden pa'o/ /'dis 'gog par byed pas na 'gog pa ste/ lam gyi bden pa'o/ /de dag so so la yang rnam pa bdun te/ bdag med pa dang / zhi ba dang / dben pa dang /stong pa dang / mtshan ma med pa dang / smon pa med pa dang / mngon par 'dus ma byas pa zhes bya ba'o/ /de la rnal 'byor pa'i bdag ni sdug bsngal gyi bdag nyid kyi phung po dag ste/ de bas na sdug bsngal gyi dngos po med pa nyid kyi phyir bdag med pa'o/ /nyon mongs pa nye bar zhi ba nyid kyi phyir zhi ba'o/ / de gnyis ni mi gtsang ba ste/ de dag zad pa nyid kyi phyir dben pa ste/ gtsang ba zhes bya ba'i don to/ /bdag dang bdag gi dang bral ba'i phyir stong pa'o/ /'dus byas kyi mtshan ma thams cad dang bral ba'i phyir mtshan ma med pa'o/ /khams gsum pa la smon pa ni smon lam ste/ de zad pa'i phyir smon pa med pa'o/ /ma 'ongs pa'i las mngon par 'du byed pa med pa'i phyir mngon par 'du byed pa med pa zhes bya ste/ 'gog pa'i bden pa'i rnam pa'o/ /lam gyi bden pa yang de dag kho na yin te/ lam yang mya ngan las 'das pa thob par byed pa yin pa de bas na bdag med pa la sogs pa thob par byed pa nyid kyi phyir bdag med pa la sogs pa'o//de ltar na 'dir rnam pa nyi shu rtsa dgu ni nyan thos kyi lam yin te/ de'i byang chub thob par byed pa yin pa'i phyir ro/ /de ni de dag mi dmigs pas lam shes pa nyid la 'jug ste/ sngar yang byang chub chen po la smon pa'i phyir dang / phyis kyang rnam pa thams cad mkhyen pa nyid du bsngos pa'i phyir ro//khyad par de dag gnyis kyis lam gzhan la yang 'dir 'jug pa'i phyir gzhan yang zhes bya ba'i tshig gnyis gsungs pa yin no/ /yongs su dpyod par byed pa lnga po dag gi gzhung lhag mas ni mi dmigs pa nyid rgyas par byed do/ /de la bstan pa nyid ni chos kyis chos rnams zhes bya ba nas/ so sor dpyod pa zhes bya ba de dag gi bar du'o//'di ltar zhes bya ba ni 'chad par 'gyur ba'i tshig gis so/ /chos kyis zhes bya ba ni byang chub kyi sems sam yongs su bsngo ba'i sems kyis so/ /chos rnams zhes bya bas ni nyan thos kyi lam la sogs pa'o/ /sbyor bar byed pa ni gang zag gis stong pa nyid kyis mnyam pa nyid mthong ba nyid kyi phyir sbyor ba'o//'grogs pas stong pa nyid du sbyor ba las kyang rnam pa gnyi gas brlan pa ni mngon par brlan pa'o/ /phan tshun stong pa nyid du sbyor ba las kun nas brlan pa'o/ /rang bzhin stong pa nyid lhag mar byas pa de sbyor ba ni yongs su rdzogs pa ste/rang bzhin stong pa nyid kyis chos thams cad stong pa nyid yongs su rdzogs shing gsos pa de bas na de mthong ba yongs su rdzogs pa'o/ /yongs su rdzogs pa las kyang rig pa lhag par mthong ba ni yongs su rgyas pa'o/ /dper na bre 'di las bre 'dir tshad 'di tsam gyis lhag par gyur pa 'di lhag pa zhes bya ba'i don to//lhag ma ni bshad pa ste/ de la dang po sbyor ba de'i bshad pa ni bdag med pa zhes bya ba la sogs pa'o/ /de ci'i phyir zhe na zhes bya ba ni mngon par brlan par byed pa de gang las zhes bya ba'o/ /lan ni 'di ltar zhes bya ba la sogs pa'o/ /de ci'i phyir zhe na zhes bya ba ni yongs su brlan par byed pa de gang las zhes bya ba'o//lan ni kau shi ka gang zhes bya ba la sogs pa'o/ /mngon par mi zhen mi dmigs zhes bya ba ni bdag dang bdag gi dngos po med pa'i phyir ro/ /brgya byin gyi dri ba ni/ btsun pa rab 'byor zhes bya ba la sogs pa ste/sems snga ma dag gis sems phyi ma dag la bag chags bsgos pa las de'i sgo nas yongs su bsngo ba'i sems dang 'grogs pa ste/ phan tshun 'dres par gyur pa zhes bya bar bsams pa'o/ /lan ni kau shi ka gang zhes bya ba la sogs pa'o/ /sems ma yin te zhes bya ba la sems kyi stong pa nyid de/chos thams cad rang bzhin med pa nyid kyi phyir te/ rang bzhin med pa dag ni bag chags dang bag chags kyi gzhi'i dngos por med do zhes bya bar bsams pa'o/ /'on kyang sems ma yin pa nyid kyis zhes bya ba ni smon lam gyi sems kyis stong pa nyid do/ /sems ma yin pa nyid la zhes bya ba ni dge ba'i rtsa bas stong pa nyid de/dngos po med pa ni las dang byed pa po la sogs pa'i nus pa dang bral ba'i phyir ro/ /de ltar na zhes bya ba la sogs pa ni yongs su rgyas par bshad pa ste/ de ltar na zhes bya ba ni sems de nyid rang bzhin med pa'i phyir ro/ /sems ma yin pa gang zhes bya ba ni sems gang yin pa stong pa nyid dang /de bzhin nyid dang chos nyid do/ /de ni bsam gyis mi khyab pa zhes bya ba ni rnam par rtog pa'i spyod yul ma yin pa nyid kyi phyir dang rnam par mi rtog pa nyid kyi phyir de ni bsam gyis mi khyab pa ste/ bsam pa las 'das zhes bya ba'i don to/ /bsam gyis mi khyab pa gang yin pa de ni sems ma yin pa zhes bya ba ni sems par byed pas ni sems so zhes bya ba'i rigs pas so/ /sems ma yin pa nyid ni sems yongs su sngo bar byed ces bya ba ni/ rtog pa med pas rnam par mi rtog pa yongs su bsngo bar bya ba'i don to//de ltar na rigs pa ma yin no zhes bya ba ni lhag ma'o/ /de ltar yongs su dpyod pa lnga po dag gis don dam pa'i tshul yongs su bsngo ba bkag pa yin no/ /de lta mod kyi kun rdzob kyi tshul du ni yongs su bsngo ba yin te/ dman pa'i byang chub spangs nas ni/ / drug pas pha rol phyin lnga rdzogs/ /kun rdzob tshul dang bral bas ni/ /de dag bde bar tshogs rdzogs min/ /de ni nyan thos kyi lam gyi rnam pa'o/ /de nas bcom ldan 'das zhes bya ba la sogs pa nas mngon par rdzogs par 'tshang rgya bar 'gyur ro zhes bya ba de dag gi bar gyi skabs 'byed pa yin te/ 'phags pa nyan thos lam la ni/ /gzugs sogs phung po stong pa'i phyir/ /stong pa nyid rnams dbyer med phyir/ /dro ba de dag mi dmigs pas/ /rtse mor gyur pa dag tu 'dod/ /de la rtag la sogs tshul gyis/ /gnas pa bkag pas bzod pa rnams/ /sa bcu dag las brtsams nas ni//mi gnas rgyas par bstan pa yis/ /chos kyi mchog tu 'gyur bshad do/ /ci phyir zhe na sangs rgyas kyis/ /mkhyen nas chos rnams ma gzigs phyir/ /zhes bya ba la/ 'phags pa nyan thos lam la ni/ /zhes bya ba ni nyan thos rnams kyis bstan ma thag pa'i lam gyi rgyu mtshan ni drod yin par 'dod de/ji ltar gzugs la sogs pa'i phung po ni tshogs te de stong pa nyid kyis so/ /stong pa nyid de dag kyang dbyer med pas so/ /de dag ces bya ba ni gzugs la sogs pa mi dmigs pas/ rtse mor gyur pa dag tu 'dod do/ /de la zhes bya ba ni gzugs la sogs pa la'o//rtag pa nyid la sogs pa'i tshul gyis de'i gnas pa bkag pa ste/ dmigs pa bkag pas bzod pa dag tu 'dod do/ /sa bcu dag las zhes bya ba ni dang po dang gnyis pa dag la sogs pa dag las so/ /brtsams nas zhes bya ba ni dang por byas pa'o/ /sa dang po zhes bya ba la sogs pa nas mi bya'o zhes bya ba'i bar gyis ngag gi tshogs rgyas par mi gnas te/mi dmigs pa bstan pa'i phyir ro/ /ji ltar bstan zhe na/ ci'i phyir zhe na sangs rgyas kyis/ mkhyen nas te mngon par rtogs pas so/ /chos rnams ma gzigs pa'i phyir zhes bya ba ni rgyu dang bcas pa'o/ / gang zhe na/ chos kyi mchog tu gyur par 'dod pa'o/ /de nas tshe dang ldan pa rab 'byor zhes bya ba la sogs pa dang / de nas brgya byin zhes bya ba la sogs pa dang / dmigs pa'i tshul gyis gzugs rtag ces bya bar gnas par mi bya'o zhes bya ba la sogs pa dang / gzhan yang shA ri'i bu zhes bya ba la sogs pa nas mi gnas pa'i tshul gyis zhes bya ba de dag gi bar gyis go rims bzhin du drod dang rtse mo dang bzod pa dang chos kyi mchog go//yang ji ltar nyan thos kyi nges par 'byed pa'i cha dang mthun pa de dag nyan thos kyi yin zhe na/ de dag gi 'phags pa'i lam gyi ched du sgom pa'i phyir nyan thos kyi lam zhes gsungs so//rang sangs rgyas kyi lam brjod par bya ste/ de'i skabs 'byed pa ni de nas 'khor de'i zhes bya ba la sogs pa dang / rab 'byor gyis smras pa zhes bya ba'i ltag dang / de'i 'og tu ston pa 'di ni shes rab zab po zhes bya ba'i ltag yan chad do//tshig ces bya ba ni bstan pa'o/ /lhag ma ni bshad pa'o/ /skad ni ngag go/ /rab tu brjod pa ni tshig gi tshogs so/ /smras pa ni brjod pa ste/ rab tu brjod pa de'i tshogs kyis so/ /'chad pa ni 'khor gyi nang du'o/ /ston pa ni de'i rigs can dag la'o/ /yi ge gcig kyang zhes bya ba ni yi ge gcig pu zhig kyang ngo //ma brjod pa zhes bya ba ni gzhan dag gi bse ru lta bu la ma bstan pa'o/ /de ni zhes bya ba ni srid pa tha ma la thos par mi rung ba'o/ /de dag gis shes par mi rung ba ni thos pa'i stobs kyis so/ /yi ge zhes bya ba ni bstan pa med par bdag nyid mngon par byang chub pa'i phyir ro//shes rab kyi pha rol tu phyin pa zhes bya ba ni bse ru lta bu'i 'phags pa'i lam mo/ /ston pa med pa zhes bya ba ni ston pa po med pa'o/ /mi dgos la zhes bya ba ni gzhan gyis bstan mi dgos pa'o/ /ye shes zab pa nyid kyi dbang du byas nas yi ge med pa zhes bya ba la sogs pa gsungs te/bstan pa las mi 'byung ba'i phyir dang / gzhan dag la ston pa med pa'i phyir yi ge med pa'o/ /de ci'i phyir zhe na/ lha'i bu dag de bzhin gshegs pa zhes bya ba la sogs pa la/ de bzhin gshegs pa ni de bzhin nyid thugs su chud pa'i phyir ro/ /dgra bcom pa ni bse ru lta bu'o//yang dag par rdzogs pa'i sangs rgyas ni gzung ba'i rnam par rtog pa spangs pa'i phyir ro/ /byang chub ni 'bras bur gyur pa'i ye shes so/ /ye shes de nyid dpes bstan par mdzad pa ni dper na zhes bya ba nas brtsams te/ rab 'byor de ni med do zhes bya ba'i bar du'o//kye ma gnas brtan rab 'byor 'di ni bdag cag la bse ru lta bu'i lam gsal bar byed do snyam du bsams pa'i de ma thag tu zab pa dang phra ba'i lam las byang chub kyi ye shes shin tu zab pa dang / phra bar bstan pa ni ye shes zab pa nyid do/ /de nas tshe dang ldan pa rab 'byor zhes bya ba la sogs pa nas/sus kyang brjod pa med pa thos pa med pa bstan pa med pa zhes bya ba de dag gi bar gyis gzugs la sogs pa de dag zab pa ma yin/ phra ba ma yin zhes gsungs te/ med pa nyid kyi phyir ro/ /gzugs su brtags pa ste bzhag pa med pa la sogs pa ni med pa nyid kyi phyir ro//de ltar na bse ru lta bu dag ni gzung ba'i rnam par rtog pa spangs pa'o/ /de nas lha'i bu dag ces bya ba la sogs pa nas/ gnyis su byar med ces bya ba'i bar gyis de dag gsungs te/ bdag gi rdzas mi dmigs su zin kyang phung po dag la sems can du btags pa'i phyir sems can dang chos nyan pa sgyu ma lta bu la sogs pa yin la/phyi rol gyi gzugs la sogs pa la yang sgyu ma lta bu la sogs pa ste/ mtshan nyid ji lta ba bzhin du med pa'i phyir ro/ /de ltar na bse ru lta bu dag ni 'dzin pa'i rnam par rtog pa ma spangs pa'o/ /de nas 'di bstan pa na don du gnyer ba dang don du mi gnyer ba dag gnas skabs ji lta ba bzhin du/gnas brtan rab 'byor la gnas brtan drug po de dag dang / lha'i bu bye ba khrag khrig stong phrag brgyas dris pa'o/ /su dag don du gnyer ba ni 'dod pa'o/ /zab pa ni rtogs par dka' ba nyid kyi phyir ro/ / brtag par dka' ba ni so so rang gis rig pa nyid kyi phyir ro/ /rtog ge'i spyod yul ma yin pa ni bsam pa'i lam las 'das pa'i phyir ro/ /phra ba ni rnam par rtog pa'i spros pa thams cad zhi ba'i phyir ro/ /mkhas pa ni chos thams cad yang dag pa ji lta ba bzhin du rtogs pa la mkhas pa'i rgyu yin pa'i phyir ro//mthong bar dka' ba ni rnam par shes pa'i tshogs lnga'i yul ma yin pa'i phyir ro/ /rtogs par dka' ba ni yid kyi rnam par shes pa'i yul ma yin pa'i phyir ro/ /zhi ba ni nyon mongs pa thams cad nye bar zhi ba'i phyir ro/ /gya nom pa ni sdug bsngal thams cad nye bar zhi ba'i phyir ro//chos rnams las shin tu 'phags pa ni shin tu 'phags pa'o/ /mkhas pa dang mdzangs pas rig par bya ba ni phyir mi ldog pa la sogs pas rig par bya ba nyid kyi phyir ro/ /bse ru lta bu'i rigs can dag gi tshig don du gnyer ba'i dgag pa rgol ba dang bcas pa'i lan ni/ de nas tshe dang ldan pa rab 'byor gyis lha'i bu de dag la zhes bya ba nas/de nas bcom ldan 'das kyis lha'i dbang po brgya byin la zhes bya ba'i ltag yan chad do/ /de nas bcom ldan 'das kyis lha'i dbang po brgya byin la zhes bya ba la sogs pas ni bse ru lta bu'i rigs kyang chos kyi dbyings kho na yin no zhes gsungs so//chos kyi mig gis zhes bya ba ni chos kyi mig gis so/ /'di ltar ma skyes pa ni me tog ma yin pa de bzhin du gzugs ma skyes pa ni gzugs ma yin pa nas/ yang dag par rdzogs pa'i sangs rgyas ma skyes pa ni yang dag par rdzogs pa'i sangs rgyas ma yin zhes bya ba'i ni bse ru lta bu'i rigs so//'dir bstan bcos mdzad pas/ rang byung bdag nyid rtogs pa'i phyir/ /gzhan gyis bstan yang mi dgos la/ /bse ru lta bu'i ye shes ni/ /zab pa nyid du mngon par brjod/ /ces gsungs so/ /gzhan gyis bstan pa ni gzhan dag gis bstan pa'o//de mi dgos pa dang ye shes zab pa nyid ces bya ba dang gnyis ni bse ru lta bu ste/ rang sangs rgyas zhes bya'o/ /mi dgos pa ci'i phyir zhe na/ de dag rang byung bdag nyid kyis mngon par rtogs pa'i phyir ro/ /bse ru lta bu ji ltar gzhan gyi don byed ce na/ 'dod pa tsam gyis so/ / ji ltar de dag las thos par 'gyur zhe na/ nyan par 'dod pa tsam gyis so/ /de ni/ gang dang gang don gang gang la/ /ji lta ji ltar nyan de dang / /de la sgra med kyang don de/ /de ni de lta de ltar snang / /zhes bya ba gsungs te/ de nas de dag gi 'phags pa'i lam ji tsam gyis she na/ gzung ba'i rtog pa nyams phyir dang / /'dzin pa ma spangs phyir dang ni/ /rten gyis bse ru lta bu'i lam/ /yang dag bsdus par shes par bya/ /zhes bya ba gsungs so/ /btags pa chos nyid mi 'gal bar/ /ston pa'i rnam pa dro gyur pa/ /rtse mor gyur pa gzugs la sogs//'grib pa med la sogs pas phye/ /nang stong nyid la sogs pa yis/ /gzugs sogs mi 'dzin phyir bzod pa/ /gzugs sogs skye ba med sogs kyi/ /rnam pa can ni chos kyi mchog /ces bya ba la/ gzugs la sogs pa btags pa dang mi 'gal bas gzugs la sogs pa'i chos nyid bstan pa'i rnam pa ni dro ba'o//gzugs la sogs pa'i 'phel ba dang 'grib pa med pa'i rnam pa ni rtse mo'o/ /nang stong pa nyid la sogs pa bcu drug dag gis chos rnams yongs su 'dzin pa dgag pa'i rnam pa ni bzod pa'o/ /gzugs la sogs pa so so la skye ba med pa dang /'gag pa med pa la sogs pa rnam pa bcu ni chos kyi mchog go/ /mdo ni bse ru lta bu'i rigs las 'og tu/ de nas bcom ldan 'das kyis lha'i dbang po brgya byin la zhes bya ba nas/ rnam pa thams cad mkhyen pa nyid la gang slob pa da gnyis su byar med par sangs rgyas kyi chos grangs med tshad med pa la slob po zhes bya ba'i bar ni drod kyi'o//gzugs 'phel bar bya ba dang 'grib par bya ba'i phyir mi slob ces bya ba nas/ gzugs yongs su gzung ba dang med par bya ba'i phyir mi slob po zhes bya ba'i bar ni rtse mo'i'o/ /ci'i phyir zhe na zhes bya ba nas brtsams te/chos thams cad yongs su 'dzin pa med pa'i tshul gyis rnam pa thams cad mkhyen pa nyid du 'byung ngo zhes bya ba'i bar ni bzod pa'o/ /de'i 'og nas mi slob mi 'byung zhes bya ba'i tshul gyis zhes bya ba'i bar ni chos kyi mchog go/ /de ni rang sangs rgyas kyi lam bstan pa'o//de'i 'og tu byang chub sems dpa'i lam brjod par bya ste/ de la dang por mthong ba'i lam phan yon dang bcas pa'i mdo de'i don mdor bsdus pa ni/ bden dang bden la bzod pa dang / /shes pa'i skad cig rnam bzhi yis/ /lam shes nyid la mthong ba'i lam/ /phan yon bcas pa 'di bshad do//zhes bya ba gsungs te/ bden pa so so la skad cig ma bzhi'o/ /bzod pa gnyis dang shes pa gnyis te sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa'o//kun 'byung dang 'gog pa dang lam la yang de bzhin te/ de dag ni 'dir lam shes pa nyid la mthong ba'i lam zhes bya'o/ /phan yon dang bcas pa rgyas par ni/ de bzhin nyid dang sangs rgyas dag /phan tshun rten dang brten med phyir/ /rnam grangs khas mi len pa dang //chen po tshad med nyid dang bcas/ /dpag med mtha' nyid med pa dang / /der gnas gzugs la sogs pa la/ /sangs rgyas nyid du nges 'dzin dang / /blang med dor ba med sogs dang / /byams sogs stong nyid khyab pa dang / /sangs rgyas nyid ni yongs 'dzin dang / /rnam par byang ba kun dang ni//nyam nga ba dang nad kun sel/ /mya ngan 'das 'dzin zhi nyid dang / /sangs rgyas rnams kyis srung la sogs/ /srog mi gcod pa la sogs pa/ /rnam pa kun mkhyen tshul la ni/ /bdag nyid gnas nas sems can dag /'god dang sbyin pa la sogs pa/ /rdzogs pa'i byang chub tu bsngo ba//lam shes nyid kyi skad cig ma/ /zhes bya ba'i tshigs su bcad pa lngas gsungs te/ tshad med pa dang bcas pa ni tshad med pa dang lhan cig pa ste/ chen po nyid dang tshad med pa zhes bya ba'i don to/ /mtha' kho na ni mtha' nyid de dpag tu yod pa dang mtha' nyid do/ / de dag med pa ni dpag tu med pa dang mtha' nyid med pa dang zhes bya ba'i don to/ /gzugs la sogs pa zhes bya ba ni skad cig ma bdun po dag dang sbyar bar bya ste/ gzugs la sogs pa nyid ni sdug bsngal dang kun 'byung nyid kyi phyir ro/ /byams pa la sogs pas gzugs mthong ba nyid ni skad cig ma brgyad pa ste/'di'i dmigs pa ni gzugs la sogs pa nyid de/ sems can du ston pa'o/ /de bas na skad cig ma brgyad ni gzugs la sogs pa la gnas pa'o/ /de la skad cig ma dang po ni gzugs la sogs pa'i de bzhin nyid la de bzhin gshegs pa gnas pa nyid du mthong ngo zhe na/de yang mi rigs te/ de bzhin nyid dang sangs rgyas dag /phan tshun rten dang brten med phyir/ /gang yang gzugs kyi de bzhin nyid la de bzhin gshegs pa med cing de bzhin gshegs pa la gzugs kyi de bzhin nyid med do zhes gsungs pa'i phyir ro/ / rnam grangs zhes bya ba ni rnam pa gzhan no/ /khas len pa ni gnas pa ste/ mi rtag pa la sogs pa dang 'dra bar bdag nyid kyis so/ /gang yang gzugs kyi de bzhin nyid las de bzhin gshegs pa gzhan ma yin/ de bzhin gshegs pa las gzugs kyi de bzhin nyid gzhan ma yin no zhes rgyas par gsungs te/'di ltar de bzhin gshegs pa gzhan ma yin pa de bzhin du shes rab kyi pha rol tu phyin pa yang gzhan ma yin no/ /gzhan nyid du gyur na ni rnam par mi rtog pa mi rigs pa'i phyir ro/ /gang gzugs shes rab kyi pha rol tu phyin pa ma yin/ gzugs las gud na yang shes rab kyi pha rol tu phyin pa med do zhes bya ba la sogs pa nas/rnam pa thams cad mkhyen pa nyid kyi chos nyid las gud na yang shes rab kyi pha rol tu phyin pa med do zhes bya ba'i bar du gsungs so/ /shes rab kyi pha rol tu phyin pa zhes bya ba ni sdug bsngal la chos shes pa'i bzod pa'o/ /chen po la sogs pa la dmigs pa can gyi skad cig ma bzhi po de dag gi skabs 'byed pa ni pha rol tu phyin pa 'di ni rgya che ba yin te zhes bya ba nas brtsams te/de ci'i phyir zhe na zhes bya ba de'i ltag yan chod ni bstan pa'o/ /de'i 'og nas dbang po dang bcas pa zhes bya ba de'i gong yan chad ni bshad pa'o/ /de'i don ni 'di yin te/gzugs la sogs pa'i chen po nyid ni dus gsum du dngos po dang dngos po med pa nyid du yongs su chad pa med pa ste/ de bzhin nyid kyi ngo bo nyid kyis nam mkha' lta bu yin pa'i phyir/ de bas na dmigs pa chen po nyid kyis 'di ni pha rol tu phyin pa chen po yin te/ tshad med pa zhes gsungs pa'i ltag yan chad ni sdug bsngal la chos shes pa'o//'di tsam du yongs su bcad du med pa ni tshad med pa ste/ pha rol tu phyin pa ni dpag tu med do zhes bya ba'i ltag yan chad ni sdug bsngal la rjes su shes pa'i bzod pa'o/ /grangs su mi chod pa nyid dpag tu med pa ste/ gang mtha' med pa zhes gsungs pa'i gong yan chad ni sdug bsngal la rjes su shes pa'o//skye ba ni sngon gyi mtha' yin la 'gog pa ni phyi ma'i mtha' yin te/ de yang yongs su tshad med pa nyid ni gzugs la sogs pa mtha' med pa nyid do/ /rnam pa thams cad mkhyen pa nyid mtha' med pa dang / chos kyi dbyings mtha' med pa dang / de bzhin nyid mtha' med pa dang / sems can mtha' med pa de la dmigs pa'i phyir 'di ni pha rol tu phyin pa mtha' med pa'o/ /gang nam mkha' mtha' yas pa'i phyir pha rol tu phyin pa mtha' yas pa nas brtsams te/ de nas dbang po dang bcas pa'i lha rnams zhes bya ba de'i gong yan chad kyis gsungs pa ni kun 'byung la chos shes pa'i bzod pa'o//der zhes bya ba ni gzugs la sogs pa shes rab kyi pha rol tu phyin pa la gnas pa'o/ /sangs rgyas nyid du nges par 'dzin pa ni sangs rgyas kho na nyid du blta bar bya'o/ /gang de nas dbang po dang bcas pa'i lha rnams zhes bya ba nas brtsams te/sangs rgyas bcom ldan 'das su 'gyur ro zhes bya ba'i bar du gsungs pa ni kun 'byung la chos shes pa'o/ /blang med dor ba med sogs dang / /zhes bya ba ni gzugs la sogs pa yongs su gzung ba med pa dang dor ba med pa ste/ gzugs la sogs pa'i stong pa nyid la gnas pa'o//de nas lha'i bu de dag gis bcom ldan 'das zhes bya ba nas brtsams te/ glags rnyed par mi 'gyur ro zhes bya ba'i bar du gsungs pa ni kun 'byung la rjes su shes pa'i bzod pa'o/ /byams pa la sogs pa dang zhes bya ba ni byams pa dang snying rje dang dga' ba dang btang snyoms so//lhag ma ni phan yon no/ /gang kau shi ka rigs kyi bu'am rigs kyi bu mo zhes bya ba nas brtsams te/ rnam pa thams cad mkhyen pa'i sems dang yang ma bral bar bya'o zhes bya ba'i bar du gsungs pa ni kun 'byung la rjes su shes pa'o/ /stong pa nyid khyab pa zhes bya ba ni stong pa nyid bcu drug dag mthong ba'o//'thad pa dang bcas pa lhag ma ni phan yon no/ /gang kau shi ka gzhan yang zhes bya ba nas brtsams te/ rgyun mi 'chad par bsrung ba dang bskyang ba dang sbed par bgyi'o zhes bya ba'i bar du gsungs pa ni 'gag pa la chos shes pa'i bzod pa'o/ /sangs rgyas nyid ni yongs 'dzin dang //zhes bya ba ni sangs rgyas mi bzhugs pa'i sangs rgyas kyi zhing du sems can gdul bar bya ba'i phyir/ bdag nyid sangs rgyas kyi gzugs su sprul pa'o/ /gang de nas lha'i dbang po brgya byin gyis bcom ldan 'das la zhes bya ba nas brtsams nas theg pa gsum la 'dul ba ni ngo mtshar che'o zhes bya ba'i bar du gsungs pa ni 'gog pa la chos shes pa'o//rnam par byang kun zhes bya ba la/ yongs 'dzin zhes bya bar sbyar ro/ /de ltar na shes rab kyi pha rol tu phyin pa yongs su gzung bas rnam par byang ba'i chos thams cad yongs su gzung bar 'gyur ro//lhag ma ni phan yon no/ /gang de nas lha'i dbang po brgya byin gyis zhes bya ba nas brtsams te/ sdug bsngal mthar 'byin par 'gyur ro zhes bya ba'i bar du gsungs pa ni 'gog pa la rjes su shes pa'i bzod pa'o/ /nyam nga ba dang nad kun sel/ /zhes bya ba la nyam nga ba ni phongs pa dang rnam par rtsod pa la sogs pa'o//nad ni srid pa'i sdug bsngal lo/ /kau shi ka 'di lta ste dper na zhes bya ba nas brtsams te/ rnam par 'phel bar mi 'gyur ro zhes bya ba'i bar du gsungs pa ni 'gog pa la rjes su shes pa'o/ /mya ngan 'das 'dzin zhi nyid dang / /zhes bya ba ni mya ngan las 'das par 'dzin pa zad pa'o//gang de ci'i phyir zhe na kau shi ka zhes bya ba nas brtsams te/ sdig to mi dge ba'i chos de dag thams cad zhi bar byed pa yin te/ rnam par 'phel bar byed pa ma yin no zhes bya ba'i bar du gsungs pa ni lam la chos shes pa'i bzod pa'o/ /sangs rgyas rnams kyis srung la sogs//zhes bya ba ni rdzogs pa'i sangs rgyas kyis srung ba dang skyob pa dang sbed pa dang / dge ba'i chos rnams rnam par 'phel bar 'gyur ba'o/ /gang kau shi ka stong gsum zhes bya ba nas brtsams te rnam pa thams cad mkhyen pa nyid kyi bar du rnam par 'phel bar 'gyur gyi/yongs su 'grib par mi 'gyur ro zhes bya ba'i bar du gsungs pa ni lam la chos shes pa'o/ /srog mi gcod pa la sogs pa/ /rnam kun mkhyen pa'i tshul la ni/ /bdag nyid gnas te sems can dag /'god dang zhes bya ba ni srog gcod pa las ldog pa dang por byas nas/ rnam pa thams cad mkhyen pa nyid la bdag nyid gnas la de bzhin du gzhan dag 'god pa nyid kyi bar du'o//gang de'i tshig blang bar 'os par 'gyur zhes bya ba nas brtsams te/ legs pa brjod cing rjes su dga' bar 'gyur ro zhes bya ba'i bar du gsungs pa ni lam la rjes su shes pa'i bzod pa'o/ / sbyin pa la sogs pa/ rdzogs pa'i byang chub tu bsngo ba/ /zhes bya ba ni sbyin pa la sogs pa la spyad pa gang dang gang yin pa de dang de bla na med pa yang dag par rdzogs pa'i byang chub tu yongs su sngo bar byed pa na dran pa dang ldan pas so/ /kau shi ka gzhan yang de pha rol tu phyin pa drug la spyod pa'i tshe sbyin pa yongs su gtong yang zhes bya ba nas brtsams te/yon tan 'di dag thob par 'gyur ro zhes bya ba'i bar du gsungs pa ni lam la rjes su shes pa'o/ /lam shes nyid kyi skad cig ma/ /zhes bya ba ni 'dir de dag ni lam shes pa nyid la mthong ba'i lam ni skad cig ma bcu drug go/ / de ltar mthong ba'i lam bstan nas/ bsgom pa'i lam brjod par bya'o/ /de'i byed pa rnam pa drug gi mdo nyung bas dang por gsungs te/ kun nas dul dang thams cad nas/ /bdud dang nyon mongs las rgyal dang / /gnod pas brdzi ba med nyid dang / /byang chub dang ni rten mchod nyid//ces bya ba gsungs te/ bdag dang bdag gi la chags pa med pa ni dul ba'o/ /de dag gi khengs pa med pa ni 'dud par byed pa ste/ 'dud pa'o/ /kun nas zhes bya ba'i sgra'i don ni yongs su dul ba dang yongs su 'dud pa zhes bya ba'i tha tshig ste/ de gnyi ga yang dmigs su med pa'i phyir ro//gang de skad du brgya byin gyis gsol pa zhes bya ba nas brtsams te/ nye bar gnas so zhes bya ba'i bar gsungs pa ni yongs su dul ba dang yongs su 'dud pa'i byed pa'o/ /thams cad nas nyon mongs pa las rgyal ba la/ thams cad ces bya ba ni 'dir bdag dang gzhan las so//gang de nas bcom ldan 'das zhes bya ba nas brtsams te/ phog cing zug par mi 'gyur ro zhes bya ba'i bar du gsungs pa ni nyon mongs pa las rgyal ba'i byed pa'o/ /gnod pa brdzi ba med nyid dang / /zhes bya ba ni pha rol gyi gnod pas thams cad du gnod par bya ba ma yin pa dang / gnod pa med pa nyid do/ /gang yang kau shi ka gzhan yang gal te rigs kyi bu zhes bya ba nas brtsams te/ gnyi ga la yang gnod par mi byed do zhes bya ba'i bar du gsungs pa ni gnod pas brdzi ba med pa nyid kyi byed pa'o/ /byang chub ces bya ba ni bla na med pa yang dag par rdzogs pa'i byang chub po//gang de ci'i phyir zhe na zhes bya ba nas brtsams te/ mngon par rdzogs par sangs rgyas so zhes bya ba'i bar du gsungs pa ni mngon par rdzogs pa'i byang chub pa'i byed pa'o/ /rten mchod nyid ces bya ba ni gang 'dir shes rab kyi pha rol tu phyin pa 'dzin pa nas/yid la byed pa'i bar de ni rten te/ de'i lha'i tshogs thams cad kyis mchod pa'o/ /gang kau shi ka 'di lta ste zhes bya ba nas brtsams te/ bkur sti byas par gyur to zhes bya ba'i bar du gsungs pa ni rten mchod pa nyid do/ /'jig rten las 'das pa'i lam gyi byed pa drug po de dag ni bsdus nas tha mi dad pa nyid du gong du gsungs pa yin no//'jig rten pa'i bsgom pa'i lam dang por brjod par bya ste/ dang po nyid yin pa'i phyir ro/ /de yang rnam pa gsum ste/ mos pa yid la byed pa dang / bsngo ba yid la byed pa dang / rjes su yi rang ba yid la byed pa'o/ / de la mos pa'i dbang du mdzad nas/ mos pa rang gi don dang ni/ /rang gzhan don dang gzhan don dang / /rnam gsum shes bya de yang ni/ /zhes bya ba gsungs te/ 'di rang gi don yin pas na rang gi don to/ /de bzhin du rang dang gzhan gyi dang / gzhan gyi nyid kyang ngo / /de yang ni/ so sor rnam pa gsum du 'dod/ /ces bya ba la de zhes bya ba ni rang gi don la sogs pa'o/ /ji ltar rnam pa gsum zhe na/ chung dang 'bring dang chen po ste/ /de ltar zhes bya ba dang 'brel to/ /chung ngu'i chung sogs dbye ba yis/ /de yang rnam gsum so sor zhes bya bar sbyar te/ de ltar na/ rnam pa nyi shu bdun du 'dod/ /de ltar zhes bya ba ni de ltar rnam pa phye bas so/ /de zhes bya ba ni mos pa'o/ /'di lta ste rang gi don gyi mos pa chung ngu'i chung ngu dang / chung ngu'i 'bring po dang / chung ngu'i chen po dang / 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring dang / chen po'i chen po'o/ /de bzhin du rang dang gzhan gyi don gyi mos pa dang / gzhan gyi don gyi mos pa'o/ /mos pa ni dad pa dang 'dun pa ste/ yid ches pa dang 'dod pa'i mtshan nyid do/ /gang la mos she na/ mdo las bstan pa'i bcom ldan 'das ma 'dri ba dang /klog pa la sogs pa de'i spyod pa dang / me tog la sogs pa nas mar me'i mthar thug pa de'i mchod pa la'o/ /spyod pa dang mchod pa las byung ba'i bsod nams de'i 'thad pa yang mdo ji lta ba bzhin no/ /sku gdung rin po che sna bdun gyi mchod rten du stsal ba'am/ rin po che sna bdun gyi snod du stsal te/ de la mchod pa'i bsod nams las bsod nams ches mang ba ni dang po'o/ /mdo ji lta ba bzhin du byang chub ni le lo can dang brtson 'grus med pa dang / mos pa dman pa dang / bsam pa dman pa dang / shes rab 'chal pa dag gis rtogs par dka' bar shes pa'o//lhag ma ni de bzhin te bsod nams lhag par rtogs par bya ste/ gnyis pa'o/ /bcom ldan 'das ma la yang dang yang du spyod pa dang mchod pa dang / de'i nang du chud pa'i sbyin pa'i pha rol tu phyin pa la sogs pa tshul bzhin du yid la byed pa'i spyod pa lhag ma la bsod nams lhag par 'phags te gsum pa'o//thams cad mkhyen pa nyid kyi sems dang ma bral ba zhes bya ba ni khyad par ro/ /lhag ma ni gsum pa dang 'dra ste/ rin po che sna bdun gyi mchod rten dpag tshad tsam byas la de bzhin du mchod pa byas pa'i bsod nams las bsod nams ches mang du 'phel ba zhes bya ba ni bzhi pa'o//lnga pa la sogs pa ni thams cad du bzhi pa dang 'dra ste/ khyad par ni bsod nams lhag pa na de'i mos pa las so/ /bzhi pa las bstan pa'i mchod rten gyis 'dzam bu'i gling yongs su bkang ba zhes bya ba ni lnga pa'o/ /gling bzhi pa'i 'jig rten gyi khams zhes bya ba ni drug pa'o/ / stong gi zhes bya ba ni bdun pa'o/ /stong gnyis pa zhes bya ba ni brgyad pa'o/ /stong gsum gyi stong chen po zhes bya ba ni dgu pa'o/ /dgu po de dag ni rang gi don yin te/ bsod nams 'dis bdag la yon tan shin tu mang po sgrub par 'gyur ro zhes shes pa'i phyir ro/ /de'i 'og tu dgu ni rang dang gzhan gyi don yin te/bdag gi bsod nams 'dis rang dang gzhan gyi don shin tu mang por 'gyur ro zhes shes pa'i phyir ro/ /bcom ldan 'das ma ni 'phags pa'i gang zag thams cad kyi yang dag pa'i rgyu yin no zhes lhag par mos pa dang bsod nams la mos pa lhag pa'i phyir phyogs bcu'i 'jig rten gyi khams kyi sems can rnams kyis ji skad du gsungs pa'i mchod rten re re byas la/bkur sti byas pa'i bsod nams ni bcom ldan 'das ma la bkur sti byas pa'i bsod nams kyi brgya'i char yang nye bar mi 'gro'o zhes bya ba nas nye bar mi bzod do zhes bya ba'i bar ni rang dang gzhan gyi don gyi mos pa dang po'o//shes rab kyi pha rol tu phyin pa 'di zung shig ces bya ba la sogs pas 'jig rten du mi dge ba thams cad yongs su nyams pa la sogs pa rab tu 'byung bar 'gyur ro zhes bya ba de lta bu'i rnam par mos pa lhag pa ni gnyis pa'o/ /mdo ji lta ba bzhin du bcom ldan 'das ma nyid ni sangs rgyas kyi chos thams cad kyi 'dren pa'o zhes lhag par mos pa 'thad pa dang bcas pa ni gsum pa'o//bcom ldan 'das ma 'dzin pa la sogs pas de bzhin gshegs pa dang mnyam par 'gyur te/ nyan thos dang rang sangs rgyas kyi ye shes dang tshul khrims kyi phung po la sogs pa gang yin pa de ni/de'i tshul khrims kyi phung po la sogs pa brgya'i char yang nye bar mi 'gro'o zhes bya ba nas mi bzod do zhes bya ba'i bar gyis mos pa lhag pa ni bzhi pa'o/ /bcom ldan 'das ma spyod pa dang mchod pa la mngon par brtson pa la lha bye ba brgya stong nyan pa'i phyir nye bar 'ong bar 'gyur zhing spobs pa nye bar bsgrub par sems so//de dag la yang bcom ldan 'das ma bsrung ba dang bskyab pa dang sbed pa mdzad par 'gyur ro/ /de ltar na chos thams cad dmigs su med pa la gang las 'jigs pa dang gang 'jigs pa dang 'jigs pa gang yin zhes bya ba ni mos pa lnga pa'o//de 'phags pa'i gang zag thams cad dang lha dang mi dang lha ma yin du bcas pa'i skye dgu dag gi yid du 'ong bar bya ba yin no zhes bya ba ni drug pa'o/ /spobs pa mi 'phrogs pa dang sbyin pa mi 'phrogs pa la sogs pa nas rnam pa thams cad mkhyen pa nyid kyi bar du ste/ mu stegs pa dag chos dang ldan pas tshar gcod pa zhes bya ba ni bdun pa'o//phyogs bcu'i 'jig rten gyi khams kyi lha'i bu 'ga' zhig byang chub tu smon pa byas par gyur pa de dag la chos kyi sbyin pa 'di sbyin par gyur cig ces de ltar gang sems bskyed pa de nas de dag der 'ongs pa nas spyod pa dang mchod pa bya ste/ de la srung ba dang skyob pa dang sbed pa byas nas 'gro bar 'gyur ro zhes bya ba ni brgyad pa'o/ /des snang ba rgya che ba mthong ba'am lha'i dri mnam pa las lha rnams 'ongs par shes par 'gyur te/ des bdag nyid kyang gtsang sbra spyod pa dang ldan par bya/ sa phyogs gtsang ba de yang me tog dri zhim pa dag gi gcal bkram par bya ste/mdo ji lta ba bzhin du phan yon rnam pa mang po yang thob par 'gyur ba ni dgu pa'o/ /de'i 'og tu gzhan gyi don gyi mos pa ni dgu kho na yin te/ gnas skabs de la gzhan gyi don kho na la rtsol ba'i phyir ro/ /de la phyogs bcu'i sangs rgyas nyan thos kyi dge 'dun dang bcas pa la yo byad thams cad kyis bsnyen bkur byas pa dang /nyan thos kyi dge 'dun dang bcas pa yongs su mya ngan las 'das pa dag gi mchod rten rin po che sna bdun las byas pa so sor byed du bcug pa la de bzhin du mchod pa byas pa'i bsod nams las bcom ldan 'das ma mchod pas kyang bsod nams ches mang du 'phel na/spyod pa dang mchod pa dag lta ci smos zhes bya ba ni gzhan gyi don gyi mos pa dang po'o/ /'dzam bu'i gling de bzhin gshegs pa'i sku gdung gis byur bur bltams pa gtad la bcom ldan 'das ma glegs bam du byas pa zhig kyang byin na de las bdag gis 'di nyid blang bar bgyi'o/ /de ltar 'di nyid las skyes pa nyid kyis de dag gi mchod pa brnyes pa yin te/bcom ldan 'das ma ni sangs rgyas kyi chos thams cad stsol bar mdzad pa'o/ /gzung du med pa ni mtshan nyid med pa'i phyir 'ga' zhig gi yang rtsol ba mdzad pa med pa ma yin te/ gnyis su med pa'i phyir ro/ /de ltar na sangs rgyas kyi chos thams cad dang stong pa nyid thams cad dang bcom ldan 'das ma gnyis su med de/de dag gnyis su byar med ces bya ba ni gnyis pa'o/ /bcom ldan 'das ma bsnyen bkur byas pa gang gis 'gro ba dman pa dang / byang chub dman par mi 'gyur ba dang / sems can yongs su smin par byed pa dang ma bral ba ste/sangs rgyas kyi zhing sna tshogs su song nas sangs rgyas rnams la bsnyen bkur sna tshogs byed pa zhes bya ba ni gsum pa'o/ /gal te stong gsum gyi stong chen po'i 'jig rten gyi khams de bzhin gshegs pa'i sku gdung gis byur bur bltams pa zhig dang bcom ldan 'das ma glegs bam la bris pa rnyed na 'di nyid len to//sku gdung bsnyen bkur byas pa las bde 'gro'i bde ba dang / byang chub gsum gyi phun sum tshogs pa gang yin pa de bcom ldan 'das ma las byung ba yin te/ gang bcom ldan 'das ma la blta ba des sangs rgyas la blta ba ste/de bzhin gshegs pa dang bcom ldan 'das ma gnyis su med de de dag gnyis su byar med do zhes bya ba ni bzhi pa'o/ /gang yang phyogs bcu'i de bzhin gshegs pa thams cad cho 'phrul rnam pa gsum gyis bka' yan lag bcu gnyis kyi chos ston par mdzad pa dang /gang yang 'ga' zhig bcom ldan 'das ma bzung zhing bcangs la gzhan dag la rgya cher ston pa de ni de dang mnyam ste/ de bzhin gshegs pa dang cho 'phrul dang gsung rab dag ni 'di las byung ba'o zhes bya ba ni lnga pa'o/ /gang gis stong gsum gyi stong chen po'i 'jig rten gyi khams 'dir sems can rnams kyis 'di 'dzin par 'gyur ba nas tshul bzhin yid la byed pa'i bar du byed pa de la mi dang mi ma yin pas glags rnyed par mi 'gyur/bcom ldan 'das ma de ni sangs rgyas kyi mdzad pa mdzad par 'gyur/ 'jig rten gyi khams der sangs rgyas 'byung ba blta bar bya ste/'dir dpe ni lha'i nor bu rin po che zhes bya ba ste drug pa'o/ /gal te gang gA'i klung gi bye ma snyed kyi 'jig rten gyi khams de bzhin gshegs pa'i sku gdung gis byur bur bltams pa dang / bcom ldan 'das ma glegs bam du bris pa rnyed na bdag ni 'di len to/ /de dag ni de las skyes pa nyid kyis mchod par 'gyur te/de mchod pa byas pa las kyang ngan song bcom nas/ bde 'gro'i bde ba nyung zad nyams su myong ste/ sdug bsngal mthar byed par 'gyur te/ bcom ldan 'das ma 'di bzung ba nas tshul bzhin yid la byas pa'i bar gyis pha rol tu phyin pa la sogs pa nas/ ma 'dres pa'i mthar thug pa yongs su rdzogs pa dang / byang chub sems dpa'i mngon par shes pa thob nas sangs rgyas kyi zhing dag tu 'gro bar 'gyur ro/ /phyogs bcu'i sangs rgyas thams cad blta bar 'dod pas sangs rgyas rjes su dran pa dang 'dus byas kyi chos rnams dang / 'dus ma byas kyi chos rnams bsgom par 'gyur ro zhes bya ba ni bdun pa'o//dus gsum gyi de bzhin gshegs pa dang / nyan thos dang rang sangs rgyas kyi byang chub gang yin pa de thams cad ni kun rdzob tu bcom ldan 'das ma las byung ba yin gyi don dam par ni ma yin te/ gang gi phyir bcom ldan 'das ma gnyis su med pa ste/cung zad kyang dor ba med cing len pa med do zhes bya ba ni brgyad pa'o/ /bcom ldan 'das ma 'di ni pha rol tu phyin pa rin po che ste/ gang 'di la spyod pas sems can thams cad kyi sems kyi spyod pa dag rab tu shes te/ sems can 'ga' yang mi dmigs pa nas/srog dang gso ba dang skyes bu la sogs pa dang / phung po la sogs pa dang / byang chub dang / sangs rgyas dang sangs rgyas kyi chos rnams kyi bar du mi dmigs so/ /gang gis ngo bo nyid kyi chos sna tshogs shes pa 'dir mi dmigs pa de bas na bcom ldan 'das ma dmigs pa med pa ste/de ltar chos thams cad ni ro gcig pa nyid yin no zhes bya ba ni gzhan gyi don gyi mos pa dgu pa'o/ /shes rab pha rol phyin pa la/ /mos pa yis ni chos rnams la/ /dgu tshan gsum gyis bstod pa dang / /bkur ba dang ni bsngags par 'dod/ /ces bya ba ni mos pa dang lhag par mos pa'o//cha dang cha shas dang phyogs 'ga' zhes bya ba ni rnam grangs so/ /shes rab kyi pha rol tu phyin pa la mos pa dgu tshan gsum gyis dbye ba gsungs pa gang yin pa de'i cha rnams la dgu tshan gsum gyis rab tu phye ba dag ni go rims bzhin du bstod pa dang bkur ba dang bsngags pa dag tu 'dod de/byang chub sems dpa'i mos pa rnams la spro bar bya ba'i phyir ro/ /de rnams kyi dgu tshan dang po la ni bstod pa chung ngu ste/ yang dag pa'i yon tan brjod pa'o/ /de dag nyid kyi gnyis pa la ni bkur ba ste/ 'bring ngo / /de dag nyid kyi gsum pa la ni bsngags pa ste chen po'o//gsum po de nyid kyi 'og tu lhag pa dgu tshan gsum gyis brjod par bya ste/ gang gis bcom ldan 'das ma la spyod pa dang mchod pa bdag nyid byed la gang gis de dag glegs bam du bris nas gzhan la byin na 'di nyid snga ma las bsod nams mngon du 'phags te/bcom ldan 'das ma byin pa ni chos sbyin pa bla na med pa nyid yin pa'i phyir zhes bya ba ni bstod pa dang po'o/ /bcom ldan 'das ma ji skad bstan pa bzhin du gzhan gyi drung du song ste/ bshad cing bstan pa dang brjod cing bkrol ba dang / rnam par phye ste gsal bar byas na 'di nyid snga ma las bsod nams mang du 'phel te/de ni ston pa yin no zhes blta bar bya'o/ /ston pa yang gzhan ma yin/ bcom ldan 'das ma yang gzhan ma yin te/ gang gi phyir 'di nyid la bslabs na byang chub gsum thob par 'gyur ro zhes bya ba ni bstod pa gnyis pa'o/ / sems can gcig cig rgyun du zhugs pa'i 'bras bu la bkod pa'i bsod nams gang yin pa de ni 'dzam bu'i gling gi sems can dge dge ba bcu la zhes bya ba ni gsum pa'o/ /de bzhin du lan cig phyir 'ong ba'i 'bras bu la zhes bya ba ni bzhi pa'o/ /de bzhin du phyir mi 'ong ba'i 'bras bu la zhes bya ba ni lnga pa'o//de bzhin du dgra bcom pa la zhes bya ba ni drug pa'o/ /de bzhin du rang byang chub la zhes bya ba ni bdun pa'o/ /gang gis 'dzam bu'i gling gi sems can rgyun du zhugs pa'i 'bras bu la bkod pa bas/ gang gis sems can gcig cig bla na med pa'i byang chub la bkod pa 'di ni de bas bsod nams ches mang du zhes bya ba ni brgyad pa'o//gang gis 'dzam bu'i gling gi sems can lan cig phyir 'ong ba'i 'bras bu la bkod pa bas gang gis sems can gcig cig bla na med pa'i byang chub la bkod pa ni de bas ches bsod nams mang du 'phel lo zhes bya ba ni bstod pa dgu pa'o//gang gis 'dzam bu'i gling bdag phyir mi 'ong ba'i 'bras bu dang / gang gis gcig cig bla na med pa'i byang chub la zhes bya ba ni bkur ba dang po'o/ /gang gis 'dzam bu'i gling pa dgra bcom pa nyid la zhes bya ba dang / gang gis sems can gcig cig bla na med pa'i byang chub la zhes bya ba ni bkur ba gnyis pa'o//gang gis 'dzam bu'i gling pa rang sangs rgyas kyi byang chub la zhes bya ba dang gcig cig bla na med pa'i byang chub la zhes bya ba ni gsum pa'o/ /zag pa med pa'i chos thams cad ni bcom ldan 'das ma las bstan pa dang gang zag thams cad kyi phun sum tshogs pa thams cad dang /lha dang mi rnams kyi phun sum tshogs pa yang bcom ldan 'das ma las byung ba yin te/ de'i phyir phyogs re re zhing gang gA'i klung gi bye ma snyed kyi 'jig rten gyi khams dag gi sems can la la gang yin pas rang byang chub la bkod pa bas/gzhan gyis bcom ldan 'das ma glegs bam du bri ba yang byas la/ gzhan la bri ba dang klag pa'i phyir byin na 'di nyid de bas bsod nams mang du 'phel lo/ /gang gis pha rol tu phyin pa drug la sogs pa nas/ rnam pa thams cad mkhyen pa'i mthar thug pa tshul bzhin yid la byed pa ste/byang chub la gnyis su spyod pa ma yin pa'i phyir stong gsum gyi stong chen po'i 'jig rten gyi khams kyi sems can dag dge ba bcu dang / bsam gtan dang / gzugs med pa dang / tshad med pa dang mngon par shes pa la bkod pa'i bsod nams las ches mang du 'phel lo zhes bya ba ni bzhi pa'o//gang gis 'di gzhan dag la rgya cher ston par byed la don gtan la 'bebs pa ston par byed de 'di ltar de dag ni gnyis su ma yin gnyis su med par blta bar bya ba ma yin te rnam par mi rtog pa'i phyir ro/ /de bzhin du yang dag pa'i mthar ma yin/ yang dag pa'i mtha' ma yin par ma yin pa'i bar du ste/'di nyid bsod nams mang du 'phel gyi/ gang bdag 'ba' zhig gis de dag bzung ba nas tshul bzhin yid la byas pas ma yin no zhes bya ba'i bar ni lnga pa'o/ /bdag gis shes rab kyi pha rol tu phyin pa 'dzin pa nas/ de'i don gtan la dbab par bstan pa gang yin pa de'i bsod nams kyi phung po tshad med grangs med dpag tu med pa zhes bya ba ni drug pa'o//gang gis phyogs bcu re re zhing de bzhin gshegs pa tshad med grangs med dpag tu med pa dag la nam 'tsho'i bar du rgyal mtshan dang / ba dan dang sil snyan dag gi bar gyis bde bar sbyar ba thams cad kyis rim gror byas pa bas gang gis 'di gzhan dag la rnam grangs du mar rgya cher bstan pa nas/yang dag par bstan par byas pa'i bar 'di nyid snga ma las bsod nams ches mang du 'phel te/ gang gi phyir dus gsum du bzhugs pa'i sangs rgyas dag ni 'di nyid la bslabs pa las byang chub brnyes so zhes bya ba ni bdun pa'o//gang la las bskal pa grangs med par dmigs pa'i tshul gyis pha rol tu phyin pa drug po dag gzhan dag la rgya cher brjod pa nas/ yang dag par ston pa'i bar byed pa bas mi dmigs pa'i tshul gyis nam 'tsho'i bar du bcos ma yongs su spangs pa nyid snga ma las bsod nams mang du 'phel lo//de la bdag gis sbyin pa bya/ 'di ni sbyin par bya/ gzhan la sbyin par bya zhes bya de lta bu la mi dmigs pa'i dmigs pa yin la/ pha rol tu phyin pa dag la 'khor gsum yongs su dag pa ni mi dmigs pa ste/ mi rtag pa dang sdug bsngal ba dang /stong pa dang bdag med pa zhes bya ba bcos ma yongs su spangs pa ni brgyad pa'o/ /gang la la zhig gis phyogs bcu re re zhing gang gA'i klung gi bye ma snyed kyi sems can dag rgyun du zhugs pa'i 'bras bu la bkod pa bas/ gang gis 'di gzhan la don dang ldan pa dang / yi ge dang ldan pa rgya cher brjod pa nas yang dag par ston par byas pa'i bar dang / 'di zung shig pa nas nan tan du gyis shig ces bsgo ba'i bar 'di ni de bas bsod nams mang du 'phel te/ 'di las rgyun du zhugs pa rnams 'byung bar 'gyur ro zhes bya ba ni bkur ba dgu pa'o/ /gang gis 'dzam bu'i gling pa'i sems can lan cig phyir 'ong ba'i 'bras bu la bkod pa bas zhes bya ba ni bsngags pa dang po'o//phyir mi 'ong ba'i 'bras bu la zhes bya ba ni gnyis pa'o/ /gang la las phyogs bcu re re zhing gang gA'i klung gi bye ma snyed kyi 'jig rten gyi khams kyi sems can dgra bcom pa nyid la bkod pa bas/gang gis gzhan dag la 'di'i don dang ldan yi ge dang ldan par brjod pa nas/ nan tan du gyis shig ces bsgo ba'i bar 'di nyid snga ma bas ches bsod nams mang du 'phel lo zhes bya ba ni gsum pa'o/ /gang la la zhig gis phyogs bcu nas rang sangs rgyas kyi byang chub la bkod pa bas zhes bya ba'i bar dang /gang gis de dag don du gnyer ba dag la don dang ldan yi ge dang ldan pa dag rgya cher brjod pa nas/ nan tan du gyis shig ces bya ba bsgo ba'i bar de ni snga ma bas bsod nams ches mang du 'phel lo zhes bya ba ni bzhi pa'o/ /gang la la zhig gis 'dzam bu'i gling gi sems can thams cad yang dag par rdzogs pa'i byang chub la yang dag par bskul ba bas/gang gis 'di don dang ldan yi ge dang ldan pa nas nan tan du gyis shig ces pa'i bar du ste/ ji lta ji ltar nan tan du byas pa de lta de ltar yang dag par rdzogs pa'i byang chub dang nye bar 'gyur ro zhes bya ba ni lnga pa'o//gling bzhi pa'i sems can thams cad ces bya ba ni drug pa'o/ /stong gi 'jig rten gyi khams zhes bya ba ni bdun pa'o/ /gang la la zhig gis phyogs bcu nas yang dag par rdzogs pa'i byang chub la bskul na zhes bya ba'i bar ni brgyad pa'o/ /gang la la zhig gis phyogs bcu nas phyir mi ldog pa'i sa la bkod pa'i bar bas/gang gis de dag thams cad dam/ phyir mi ldog pa'i byang chub sems dpa' gcig cig la brjod de bstan pa nas don dang ldan yi ge dang ldan pa rgya cher brjod de bstan nas zhes bya ba de'i bar de ni snga ma bas bsod nams ches mang du 'phel lo zhes bya ba ni bsngags pa dgu pa'o//'di ltar byang chub sems dpa' spro ba bskyed pa'i phyir cha dag la bstod pa dang bkur ba dang bsngags pa gsungs pa de ltar byang chub sems dpa' yang ji lta ji ltar khyad par du 'gyur ba de lta de ltar chos dang zang zing dag gis shin tu rjes su gzung zhing bstod par bya bar 'os pa yin te/dkon mchog gsum po dag byang chub sems dpas rab tu phye ba nyid kyi phyir ro zhes bstan par bya ba'i don du de nas lha'i dbang po brgya byin zhes bya ba la sogs pa nas/ de nas byang chub sems dpa' byams pas zhes bya ba de'i ltag yan chad kyis gsungs so//de ltar mos pa yid la byed pa phan yon dang bcas pa bstan nas/ bsngo ba yid la byed pa ni/ yongs su bsngo ba khyad par can/ /'di yi byed pa mchog yin no/ /de ni dmigs med rnam pa can/ /phyin ci ma log mtshan nyid do/ /dben dang sangs rgyas bsod nams tshogs/ / rang bzhin dran pa'i spyod yul can/ /thabs bcas mtshan ma med pa dang / /sangs rgyas rjes su yi rang dang / /khams gsum gtogs pa ma yin dang / /chung dang 'bring dang chen po yi/ /bsngo ba gzhan ni rnam gsum po/ /bsod nams che 'byung bdag nyid do//zhes bya ba gsungs te/ mdo ni de nas byang chub sems dpa' chen po byams pa zhes bya ba nas brtsams te/ mi mnyam dang mnyam pa'i bar zhes bya ba'i bar du'o/ /'di'i don ni byang chub sems dpa'i bsod nams yongs su bsngo ba ni theg pa dman pa thams cad kyi bsod nams kyi phung po las khyad par du byed pa ni bye brag tu byed pa ste/rab dang dam pa nas mi mnyam pa dang mnyam pa zhes bya ba'o/ /thabs gang gis she na/ sems can thams cad dang thun mong du byas nas yang dag par rdzogs pa'i byang chub tu bsngos pas so/ /de bas na 'di 'dis khyad par du byed pas na khyad par te/des bsngos pa ni yongs su bsngo ba khyad par can no/ /de ci'i phyir zhe na zhes bya ba la sogs pa nas/ yongs su bsngo'o zhes bya ba de dag gi mthar thug pa de ni de'i byed pa'o/ /mdo ni de nas tshe dang ldan pa rab 'byor gyis zhes bya ba nas brtsams te/ yang dag par rdzogs pa'i byang chub tu yongs su bsngo bar bya'o zhes bya ba'i bar yin te/'das pa dang da ltar gyi de bzhin gshegs pa dang de'i nyan thos dang de la mngon par dad pa'i lha dang mi de dag gi dge ba'i rtsa ba gang yin pa de dag la rjes su yi rang ba dang / de'i rjes su yi rang ba dang ldan pa'i bsod nams bya ba'i dngos po byang chub gang du sems gang gis yongs su bsngo ba ste/gang yang sems de la dngos por 'dzin pa dang / gang yang dmigs pa ste 'dzin pa'i yongs su bsngo ba de thams cad ni mtshan nyid ji lta ba bzhin du med pa'i phyir mi dmigs pas yongs su bsngo ba ni mi dmigs pa'i yongs su bsngo ba'o//mdo ni byams pas smras pa zhes bya ba nas brtsams te/ bla na med par yongs su bsngo bar bya'o zhes bya ba'i bar gyis te/ de dag thams cad med pa'i phyir mtshan mas ma yin mngon par zhen pas ma yin pa de bas na phyin ci ma log pa'i yongs su bsngo ba'o//mdo ni gal te zhes bya ba nas brtsams te/ byang chub sems dpa' sems dpa' chen po'i shes rab kyi pha rol tu phyin pa zhes bya ba'i bar du ste/ de dag thams cad rang gi mtshan nyid kyis dben pa de ltar chos thams cad ces bya ba dben pa'i sems kyis yongs su bsngo ba ni dben pa'i yongs su bsngo ba'o//mdo ni gzhan yang zhes bya ba nas brtsams te/ byams pas smras pa zhes bya ba de'i gong yan chad do/ /'das pa dang da ltar gyi phyogs bcu'i sangs rgyas thams cad dang de'i nyan thos la sogs pa dag gis 'das pa'i dge ba'i rtsa ba thams cad gang yin pa de ni zad pa 'gag pas bral ba ste/bsod nams yongs su bsngo ba la sogs pa 'dus byas kyi chos thams cad kyang de nyid kyi chos nyid yin pa de ltar sangs rgyas pa'i bsod nams kyi tshogs kyi rang bzhin rjes su dran pa'i yongs su bsngo ba la sogs pa'i 'dus byas pa gang yin pa de ni sangs rgyas kyi dge ba'i rtsa ba yongs su bsngo ba ste/rang bzhin dran pa'i yongs su bsngo ba'o/ /mdo ni byams pas smras pa zhes bya ba nas brtsams te/ yongs su bsngo ba zug rngu can zhes bya ba'i bar du ste/ thabs la mkhas pa ni shes rab kyi pha rol tu phyin pa nyid kyis bsod nams yongs su bsngos pa de bas na dmigs su med cing mtshan ma med pa'i yongs su bsngo ba ni thabs la mkhas pa'i yongs su bsngo ba'o//mdo ni da ltar dper na zhes bya ba nas brtsams te/ bslab par mi bya'o zhes bya ba'i bar du ste/ ji ltar kha dog dang dri phun sum tshogs pa'i kha zas dug dang bcas pa de bzhin du mtshan ma dang bcas pa'i yongs su bsngo ba yin no//de bas na de yongs su bsngo ba ni mtshan ma med pa'i yongs su bsngo ba'o/ /mdo ni rab 'byor gyis smras pa zhes bya ba nas brtsams te/ dug med cing bdud rtsi'i mthar thug pa zhes bya ba'i bar du ste/ ji ltar sangs rgyas bcom ldan 'das de dag gis bla na med pa'i sangs rgyas kyi ye shes kyi dge ba'i rigs can gang yin pa dang /rang bzhin gang yin pa dang / mtshan nyid gang yin pa dang / chos nyid gang gis yod pa mkhyen pa de ltar bdag kyang rjes su yi rang ngo / /ji ltar sangs rgyas bcom ldan 'das de dag gis bla na med pa yang dag par rdzogs pa'i byang chub gang la yongs su bsngo ba rjes su gnang ba de ltar yongs su bsngo bar bgyi'o zhes bya ba ni sangs rgyas thams cad kyis gnang ba'i yongs su bsngo ba'o//mdo ni gzhan yang zhes bya ba nas brtsams te/ bla na med pa yang dag par rdzogs pa'i byang chub tu yongs su bsngo bar bya'o zhes bya ba'i bar du ste/khams gsum pa thams cad kyi khongs su gtogs pa ma yin pa de bzhin du chos thams cad kyi yang khongs su gtogs pa ma yin pa de ni 'das pa ma yin/ ma 'ongs pa ma yin/ da ltar byung ba yang ma yin no/ /gang yang 'di ltar dngos po med pa ste/dngos po med pa de yang dngos po med pas yongs su bsngo bar mi nus pa gang yin pa de ni khams gsum par ma gtogs pa'i yongs su bsngo ba'o/ /bsngo ba gzhan rnam pa gsum po bsod nams chen po 'byung ba'i bdag nyid de ni rnam pa gsum ste/ chung ngu dang 'bring dang chen po'o//mdo ni de nas bcom ldan 'das kyis zhes bya ba nas brtsams te/ gong na med pa zhes bya'o zhes bya ba'i bar du ste/ mtshan ma med pa'i tshul dang / dmigs pa med pa'i tshul dang / gzhan ma yin pa de bzhin nyid ces bya ba'i bar ni chags pa med pa'i tshul yin la/ des yongs su bsngos pa'i bsod nams gang yin pa ni stong gsum pa'i 'jig rten gyi khams kyi sems can dag dge ba bcu dang /bsam gtan bzhi dang / tshad med pa bzhi dang / gzugs med pa'i snyoms par 'jug pa dang / mngon par shes pa lnga thob pa dag gi bsod nams las gtso bo nas/ gong na med pa zhes bya ba'i bar ni bsod nams chen po 'byung ba'i yongs su bsngo ba chung ngu'o/ /mdo ni rab 'byor gzhan yang zhes bya ba nas brtsams te/ chags pa med pa'i yongs su bsngo bas yongs su bsngo ba de'i bsod nams ches mang du 'phel lo zhes bya ba'i bar du ste/ stong gsum pa'i 'jig rten gyi khams kyi sems can thams cad rang sangs rgyas su gyur pa de dag la la la zhig gis nam 'tsho'i bar du yo byad thams cad kyis bsnyen bkur byas pa de bas chags pa med pa'i yongs su bsngo bas yongs su bsngos pa de'i bsod nams ches mang du 'phel lo zhes bya ba'i bar ni bsod nams chen po 'byung ba'i yongs su bsngo ba 'bring yin no//mdo ni gzhan yang rab 'byor zhes bya ba nas brtsams te/ bsti stang du byas mchod par byas zhes bya ba'i bar du ste/ stong gsum pa'i 'jig rten gyi khams kyi sems can thams cad byang chub sems dpar gyur pa de la phyogs bcu re re zhing gang gA'i klung gi bye ma snyed kyi 'jig rten gyi khams kyi sems can dag gis byang chub sems dpa' re re la yo byad thams cad dang /bde bar sbyar ba thams cad kyis bskal pa gang gA'i klung gi bye ma snyed bsnyen bkur byas pa de dag gi bsod nams de dag chags pa med pas yongs su bsngos pa'i bsod nams kyi brgya'i char yang nye bar mi 'gro ba nas/rgyur yang mi bzod do zhes bya ba'i bar bsod nams chen po 'byung ba'i yongs su bsngo ba chen po'o/ /gal te stong gsum pa'i 'jig rten gyi khams kyi sems can dag byang chub sems dpar gyur pa de dag gi dmigs pa dang bcas pa'i yongs su bsngo ba las byung ba'i bsod nams kyi phung po ni byang chub sems dpa' gcig cig mi dmigs pa la sogs pa'i yongs su bsngo ba'i bsod nams kyi brgya'i char yang nye bar mi 'gro ba nas rgyur yang mi bzod do zhes bya ba'i bar de dag ni/de nas rgyal po chen po bzhi zhes bya ba la sogs pa nas/gong na med pa zhes bya'o zhes bya ba'i bar gyis gsungs so/ /de ltar yongs su bsngo ba yid la byed pa bstan nas/ rjes su yi rang ba yid la byed pa brjod par bya'o/ /de la mdo ni de nas tshe dang ldan pa rab 'byor gyis zhes bya ba nas brtsams te/ de nas tshe dang ldan pa sha ra dwa ti'i bu zhes bya ba'i ltag yan chad do//de'i don ni/ thabs dang mi dmigs pa dag gis/ /dge ba'i rtsa la yi rang ba/ /rjes su yi rang yid byed pa/ /bsgom pa yin par 'dir brjod do/ /zhes bya ba gsungs te/ thabs dang mi dmigs pa dag gis dge ba'i rtsa ba la rjes su yi rang ba gang yin pa de ni 'dir rjes su yi rang ba yid la byed pa sgom pa yin no//de bas na rnam pa gnyis te/ de mi dmigs pa'i sgo nas rjes su yi rang ba ni des dge ba'i rtsa ba de dag mi len mi gtong ba nas/ de ltar bdag gis rjes su yi rang nas bla na med pa yang dag par rdzogs pa'i byang chub tu yongs su bsngo bar bya'o zhes bya ba'i bar du'o//thabs kyi sgo nas rjes su yi rang ba ni theg pa la gsar du zhugs pa dag gis te/ rnam par grol ba ji lta ba bzhin de lta bu'i dge ba'i rtsa ba dag dang / de lta bu'i sangs rgyas la sogs pa dang / de lta bu'i chos thams cad dang /ji ltar bdag gis rjes su yi rang ba de ltar yang dag par rdzogs pa'i byang chub tu yongs su bsngo bar bya'o zhes bya ba'o/ /rab 'byor gzhan yang zhes bya ba'i ngag gnyis pa ni de nyid bsod nams lhag pa nyid du gsungs pa'o/ /de ni rjes su yi rang ba yid la byed pa'o//'jig rten pa'i bsgom pa'i lam yid la byed pa gsum po bstan nas/ 'jig rten las 'das pa'i bsgom pa'i lam ni bsgrub pa dang / shin tu dag pa zhes gong du bstan pa yin no/ /de la bsgrub pa'i dbang du mdzad nas/ de yi ngo bo nyid mchog nyid/ /kun la mngon par 'du mi byed//chos rnams dmigs pa med par ni/ /gtod par byed pa don chen nyid/ /ces gsungs te/ de yi zhes bya ba ni lam gyi'o/ /ngo bo nyid ni shes rab kyi pha rol tu phyin pa'o/ /rnam par rtog pa'i pha rol tu son pas na shes rab bo/ /gang bcom ldan 'das shes rab kyi pha rol tu phyin pa ni shin tu rnam par dag pa'i slad du'o zhes bya ba nas brtsams te/bcom ldan 'das shes rab kyi pha rol tu phyin pa ni dngos po ma mchis pa'i ngo bo nyid stong pa nyid kyi slad du chos thams cad kyi ngo bo nyid kyang stong pa'o zhes bya ba'i bar gyis ni ngo bo nyid gsungs pa'o/ /mchog nyid ces bya ba ni gang shes rab kyi pha rol tu phyin pa nyid ni pha rol tu phyin pa lnga po dag gi mchog dang gtso bo nas/mi mnyam pa dang mnyam pa'i bar gyis ni mchog nyid du gsungs pa yin no/ /kun la mngon par 'du mi byed/ /ces bya ba ni chos thams cad la mngon par 'du mi byed pa gang yin pa de ni de'i mngon par bsgrub pa'o//gang gzugs mngon par sgrub pa med pa nas/ rnam pa thams cad mkhyen pa nyid kyi bar mngon par sgrub pa med pa'i phyir shes rab kyi pha rol tu phyin pa mngon par bsgrub par bya'o/ /gzugs mngon par sgrub pa ma mchis pa'i slad du zhes bya ba nas/ rnam pa thams cad mkhyen pa nyid la mngon par sgrub pa med pa dang /skye ba med pa dang dmigs su med pas shes rab kyi pha rol tu phyin pa mngon par bsgrub par bya'o zhes bya ba'i bar gyis ni mngon par sgrub pa gsungs pa yin no/ /chos rnams dmigs pa med par ni/ /zhes bya ba ni chos thams cad dmigs su med pa nyid kyi sgo nas de sangs rgyas kyi chos gtod par byed pa'o//gang de ltar mngon par sgrub pa'i shes rab kyi pha rol tu phyin pa ni chos gang yang thob par mi byed ces bya ba la sogs pa nas/ rnam pa thams cad mkhyen pa nyid kyang thob par mi byed ces bya ba'i bar gyis ni chos thams cad mi dmigs pa'i sgo nas chos gtod pa gsungs pa yin no//'di lta ste shes rab kyi pha rol tu phyin pa ni pha rol tu phyin pa chen mo ste/ de ni gzugs nas sangs rgyas kyi chos rnams kyi bar du che bar mi bgyid chung bar mi bgyid/ mthu dang ldan par mi bgyid/ mthu dang mi ldan par mi bgyid//gzugs la sogs pa gang yin pa che ba'am chung ba de dag ni de'i rgyu mthun pa ma yin te/ byang chub sems dpa' dag ni dmigs pa'i 'du shes can ma yin no/ /de ltar mi dmigs pa'i tshul gyis byang chub thob par byed pa'i phyir don chen po nyid ces bya ste/ mngon par sgrub pa bstan zin to//'jig rten las 'das pa'i bsgom pa'i lam dang mthong ba'i lam gyi rtsa ba ni mos pa ste/ de'i rgyu gang zhe na/ sangs rgyas bsten dang sbyin sogs dang / /thabs la mkhas pa gang yin pa/ /'di la mos pa'i rgyu dag yin/ /'di la zhes bya ba ni shes rab kyi pha rol tu phyin pa la'o//sangs rgyas bsten zhes bya ba ni phyogs bcu dag gi yang dag par rdzogs pa'i sangs rgyas dag la bsnyen bkur byas nas 'dir 'ongs pa nyid kyi phyir ro/ /gang de nas tshe dang ldan pa shA ra dwa ti'i bu zhes bya ba nas brtsams te/ 'dir skyes te zhes bya ba'i bar gyis sangs rgyas bsten pa gsungs pa yin no//sbyin sogs dang zhes bya ba ni sha ra dwa ti'i bu zhes bya ba nas brtsams te/ de nas tshe dang ldan pa rab 'byor gyis bcom ldan 'das la zhes bya ba de'i gong yan chad sbyin pa la sogs pa yang dag par bskyed pa'o/ /de nas tshe dang ldan pa rab 'byor gyis bcom ldan 'das la 'di skad ces gsol to zhes bya ba nas brtsams te/brtson par byed do zhes bya ba'i bar ni thabs la mkhas pa'o/ /rab 'byor gzhan yang byang chub sems dpa'i theg pa'i zhes bya ba nas brtsams te/ sdig pa'i grogs po'i lag tu song bar 'gyur ro zhes bya ba'i bar ni chos kyis phongs par 'gyur ba'i las yin te/chos kyis phongs pa'i rgyu dag ni/ /bdud kyis thibs kyis non pa dang / /zab mo'i chos la ma mos dang / /phung po la sogs mngon zhen dang / /sdig pa'i grogs pos zin pa'o/ /zhes bya ba la chos kyis phongs pa'i rgyu ni bzhi ste/ bdud kyis byin gyis brlabs pa dang /zab mo'i chos la mos pa med pa dang / phung po la sogs pa la mngon par zhen pa dang / sdig pa'i grogs pos yongs su zin pa nyid ces bya'o/ /de la rab 'byor gzhan yang byang chub sems dpa'i zhes bya ba nas brtsams te/ dpag tu med pa yongs su gzung bar 'gyur ro zhes bya ba'i bar ni chos kyis phongs pa'o//rab 'byor gyis gsol pa zhes bya ba nas brtsams te/ dran pa nyams pa dang shes bzhin dang mi ldan pa zhes bya ba'i bar ni chos kyis phongs pa'i rgyu dag go/ /rnam par dag pa bshad par bya ste/ de la de yi mtshan nyid ni//'bras bu dag pa gzugs la sogs/ /dag pa nyid de gang gi phyir/ /de gnyis tha dad ma yin zhing / /gcad du med pas dag par brjod/ /ces gsungs te rab 'byor gzugs nas byang chub kyi bar du rnam par dag pa gang yin pa de nyid 'bras bu rnam par dag pa'o/ / gang gi phyir de gnyis tha dad pa med cing gcad du med pa ste/ gnyis su med de gnyis su byar med pa zhes bya ba'i tha tshig go/ /de ltar mtshan nyid 'dis dag par brjod pa yin no/ /gang gi dag pa zhe na/ shes rab kyi pha rol tu phyin pa ste bsgom pa'i lam gyi zhes bya ba'i don to/ /de skad du 'di nyid 'di ltar gzugs rnam par dag pa dang 'bras bu rnam par dag pa dang shes rab kyi pha rol tu phyin pa rnam par dag pa ni gnyis su med de de dag gnyis su byar med do zhes gsungs so//shes rab kyi pha rol tu phyin pa rnam par dag pa nyid ni de'i dmigs pa dang de'i 'bras bu rnam par dag pa yin te/gang rab 'byor gzugs rnam par dag pa zhes bya ba nas brtsams te/ rab 'byor gzhan yang zhes bya ba de'i gong yan chad kyis gsungs te/ gnyis su med de gnyis su byar med ces bya ba ni bstan pa'o/ /so so ma yin tha mi dad do zhes bya ba ni bshad pa ste/'di ni rnam par dag pa'i mtshan nyid do/ /de'i dbye ba yang bzhi ste/ nyon mongs shes bya lam gsum gyis/ /nyams phyir slob ma bse ru dang / /rgyal sras rnams kyi dag pa ste/ /sangs rgyas rnam kun shin tu ba/ /zhes bya ba gsungs te/ slob ma ni nyan thos so/ /bse ru ni rang sangs rgyas so//rgyal ba dag gi sras ni byang chub sems dpa' ste de dag gi rnam par dag pa ni go rims bzhin du nyon mongs pa dang / gzung ba'i rnam par rtog pa dang / lam gsum po dag la srid pa mi shes pa ni lam gyis te/ lam gsum gyis spangs pa'i phyir ro/ /sangs rgyas rnams ni bcom ldan 'das te/'di'i shin tu ba'o/ /mtha' ni mtshams dang skabs yin pa de las shin tu 'das pa ni shin tu ba ste/ bag chags dang bcas pa'i sgrib pa thams cad spangs pa'i phyir ro/ /rnam kun zhes bya ba ni rnam pa thams cad kyis so/ /de la rab 'byor gzhan yang zhes bya ba'i tshig bzhi po dag gis bdag dang sems can la sogs pa rnam par dag pa dang /'dod chags la sogs pa rnam par dag pa ni nyan thos kyi rnam par dag pa'o/ /de nas rab 'byor gzhan yang zhes bya ba'i tshig gis rang rgyal ba'i rnam par dag pa'o/ /de nas rab 'byor gzhan yang zhes bya ba'i tshig gis byang chub sems dpa'i rnam par dag pa'o//rnam pa kun du zhes gsungs pa de nyid/ sa dgu la ni chen po yi/ /chen po la sogs dri ma yi/ /gnyen po'i sgo nas chung ngu yi/ /chung ngu la sogs lam yin no/ /zhes gsungs te/ sa dgu ni 'dod pa'i khams dang / bsam gtan dang / gzugs med pa'o/ /de dag dag pa ni bsgrub par bya ba'o/ /de'i don du sa dang sa la rnam pa dgu ste/ bsgom pa'i lam ni chung ngu'i chung ngu nas chen po'i chen po'i bar ni go rims bzhin du dri ma'i nyes pa chen po'i chen po nas chung ngu'i chung ngu'i bar gyi gnyen pos so/ / de la byang chub sems dpa'i rnam par dag pa'i de ma thag tu rab 'byor gzhan yang zhes bya ba'i tshig gis ni lam chung ngu'i chung ngu'o/ /de nas rab 'byor gzhan yang zhes bya ba'i tshig gis ni chung ngu'i 'bring ngo / /de nas gnyis kyis ni chung ngu'i chen po'o/ /de nas zhes bya ba nas brtsams te/rnam pa thams cad mkhyen pa nyid kyi bar du rnam par dag pa ni zab po zhes bya ba ni 'bring gi chung ngu'o/ /sha ra dwa ti'i bus gsol pa zhes bya ba nas brtsams te/ rnam pa thams cad mkhyen pa nyid kyi bar du rnam par dag pa'i phyir rnam par dag pa snang ba'o zhes bya ba ni 'bring gi 'bring ngo //sha ra dwa ti'i bu zhes bya ba nas brtsams te/ rnam pa thams cad mkhyen pa nyid kyi bar du 'pho ba med cing nying mtshams sbyor ba med pa ni rnam par dag pa'o zhes bya ba'i bar ni 'bring gi chen po'o/ /sha ra dwa ti'i bu zhes bya ba nas brtsams te/ rnam pa thams cad mkhyen pa nyid kyi bar du rang bzhin gyis kun nas nyon mongs pa med pa'i phyir rnam par dag pa'o zhes bya ba'i bar ni chen po'i chung ngu'o//sha ra dwa ti'i bu zhes bya ba nas brtsams te/ rnam pa thams cad mkhyen pa nyid kyi bar du thogs pa med cing mngon par rtogs pa med pa'i phyir rnam par dag pa'o zhes bya ba'i bar ni chen po'i 'bring ngo //sha ra dwa ti'i bu zhes bya ba nas brtsams te/ rnam pa thams cad mkhyen pa nyid kyi bar du mngon par grub pa med pa'i phyir rnam par dag pa'o zhes bya ba'i bar ni chen po'i chen po'o/ /khams gsum po yi gnyen po nyid/ /'jal dang gzhal bya mnyam nyid dang //zhes bya ba la/ de la sogs pa zhes bya ba nas brtsams te/ gzugs med pa'i khams rang bzhin gyis dmigs su med pa'i phyir rnam par dag pa ni skye ba med do zhes bya ba'i bar ni lam khams gsum pa'i gnyen po nyid do/ /gsol pa zhes bya ba nas brtsams te/ chos thams cad dmigs su med pa'i phyir rnam par dag pa ni chos thams cad 'tshal ba ma mchis so zhes bya ba'i bar ni shes pa dang shes bya mnyam pa nyid do//klan ka yongs su spangs pa yis/ /lam ni de yi gnyen por 'dod/ /de dag nyid bsgom pa'i lam du 'dod kyi gzhan ni ma yin no/ /ci'i phyir zhe na/'di'i 'og nas de nyid rgyas par brgal ba dang lan btab pa'i phyir ro/ /de skad du yang gzhung ni bcom ldan 'das gang de ltar rtogs pa de ni byang chub sems dpa' sems dpa' chen po'i shes rab kyi pha rol tu phyin pa'o/ /zhes bya ba'i mthar thug pa'o/ /bcom ldan 'das kyis bka' stsal pa/shin tu rnam par dag pa'i phyir ro zhes bya ba ni shin tu nyes pa med pa nyid kyi phyir ro zhes bya ba'i don to/ /gsol pa/ bcom ldan 'das shes rab kyi pha rol tu phyin pa ni rnam pa thams cad mkhyen pa nyid la zhes bya ba la sogs pa ni 'on te de ni de'i lam ma yin no zhes bya bar bsams pa'o//shin tu rnam par dag pa'i phyir ro zhes bya ba ni lan yin te/ rang bzhin gyis rnam par dag pa'i phyir ro zhes bya ba'i don to/ /gsal bar bya ba'i phyir yang dris pa la/ chos gnas pa nyid kyi phyir ro zhes bya ba ni lan no/ /chos gnas pa zhes bya ba ni chos nyid do/ / de ni rang bzhin gyis 'od gsal ba ste/ lam gyi bya ba ni glo bur gyi sgrib pa zad par byed pa nyid yin no zhes dgongs so/ /ci'i slad du zhes bya ba ni brgal ba gnyis pa ste/ shes rab kyi pha rol tu phyin pa nyid rnam par dag pa rnam par dag pa nyid shes rab kyi pha rol tu phyin pa zhes gal te de bzung ba rnam par rtog par 'gyur la/ma bzung ba shes par mi 'gyur ro zhes bya bar bsams pa'o/ /chos kyi dbyings zhes bya ba la sogs pa ni lan yin no/ /gang gis chos kyi dbyings yongs su ma bzung ba de'i dngos po ni de nyid do/ /chos thams cad rang gi mtshan nyid kyis dmigs su med pa nyid chos kyi dbyings dmigs pa yin no zhes dgongs so//de nas tshe dang ldan pa rab 'byor gyis zhes bya ba la sogs pa la/ bdag dag pa ni 'phags pa dag gi gzugs dag pa dang / ma dag pa ni byis pa dag gis ma dag pa yin pa de bas na bdag rnam par dag pa dang gzugs rnam par dag pa zhes bya ba ni brgal ba'o//shin tu rnam par dag pa'i phyir ro zhes bya ba ni lan yin te/ bdag dang gzugs ni shin tu dngos po med par zhes bya bar dgongs so/ /gsal por bya ba'i phyir yang ci'i phyir zhes bya ba la sogs pa ni brgal ba'o/ /shin tu rnam par dag pa'i phyir ro zhes bya ba ni lan te/bdag dang gzugs yang dag pa ma yin pa'i phyir ro/ /de bzhin du tshor ba la sogs pa nas/ rnam pa thams cad mkhyen pa nyid kyi bar du'o/ /ci'i slad du gnyis su ma mchis shing rnam par dag pa zhes bya ba la sogs pa ni brgal ba gzhan yin te/ lam dang 'bras bu zhes bya ba gnyis la 'bras bu rnam par dag pa thob par bgyi ba ma lags/ lam rnam par dag pa mngon par rtogs par bgyi ba ma lags te/ gnyi ga'i dngos po med pa'i phyir ro zhes bya bar bsams pa'o/ /shin tu rnam par dag pa'i phyir ro zhes bya ba ni lan no/ /gsal por bya ba'i phyir yang brgal ba la/kun nas nyon mongs pa med pa dang / rnam par byang ba med pa ni chos mnyam pa nyid kyi phyir ro zhes bya ba ni lan yin te/ chos rnams kyi mnyam pa nyid ni chos kyi dbyings so/ /kun nas nyon mongs pa med pa yang 'di yin pa ni rang bzhin gyis 'od gsal ba nyid kyi phyir rnam par byang ba ma yin pa yang de yin pa ni kun nas nyon mongs pa sngon du song ba can ma yin pa'i phyir ro//de dag yin la chos mnyam pa nyid kyang 'di yin pas so/ /rgyur byas pa'i phyir zhes bya ba ni de la brten pa'i phyir ro/ /bdag kun tu mtha' yas pa zhes bya ba ni yang brgal ba ste/bdag rtag pa nyid kyi phyir phung po dag kyang rtag pa'i dngos po yin no zhes bya bar bsams pa'o/ /shin tu rnam par dag pa'i phyir ro zhes bya ba ni lan te/ bdag dang phung po dag ni rtag tu med pa nyid kyi phyir ro zhes bya bar dgongs pa'o/ /mtha' las 'das pa stong pa nyid dang thog ma dang tha ma med pa stong pa nyid kyi phyir zhes bya ba ni gsal bar byed pa'o//bcom ldan 'das gang de ltar zhes bya ba ni ji skad du bstan pa kho na bzhin du'am zhes brgal ba'o/ /shin tu rnam par dag pa'i phyir ro zhes bya ba ni lan te/ shin tu nyes pa med pa'i phyir ro zhes bya ba'i don to//ci'i slad du zhes bya ba ni yang brgal ba ste/ ci zhig rgyur byas nas zhes bya ba'i don to/ /lam gyi rnam pa shes pa nyid kyi phyir ro zhes bya ba ni lan no/ /de dag ni rnam par dag pa'i bsgom pa'i lam dang lam shes pa bstan pa'o/ /mngon par rtogs pa'i rgyan gyi 'grel pa rin chen 'byung gnas zhi bas sbyar ba dag ldan zhes bya ba las lam shes pa nyid kyi le'u ste gnyis pa'o// //da ni thams cad shes pa nyid brjod par bya ba yin pas de'i dbang du mdzad nas/ tshu rol pha rol mtha' la min/ /de dag bar la mi gnas pa/ /dus rnams mnyam pa nyid shes phyir/ / shes rab pha rol phyin par 'dod/ /ces gsungs pa la/ shes rab kyi pha rol tu phyin pa zhes bya ba ni thams cad shes pa nyid do/ /de tshu rol mtha' la min zhes bya ba ni 'khor ba la ma yin no/ /pha rol mtha' la min zhes bya ba ni mya ngan las 'das pa la ma yin te/ de dag gi bar la yang gnas par mi 'dod do//ci'i phyir zhe na/ dus gsum mnyam pa nyid du shes pa'i phyir ro/ /gang gsol pa zhes bya ba nas brtsams te/ dus gsum mnyam pa nyid kyi phyir ro zhes bya ba'i bar ni 'khor ba dang mya ngan las 'das par 'dod pa la mi gnas pa nyid do/ /de ni mtshan mar dmigs sgo nas//thabs ma yin pas ring ba ste/ /de ni mtshan mar bcas pa'i dmigs pas thabs ma yin pa de bas na de ring bar 'gyur ro/ /gang gsol pa/ bcom ldan 'das zhes bya ba nas brtsams te/ shes rab kyi pha rol tu phyin pa ring du song bar 'gyur ro zhes bya ba'i bar du ring du gyur pa'o//thabs la mkhas pa 'di nyid ni/ /yang dag nye ba nyid du bshad/ /ces bya ba la/ chags pa med pas 'jug pa ni thabs la mkhas pa yin pa de bas na de nye bar 'gyur ro/ /gang rab 'byor gyis gsol pa zhes bya ba nas brtsams te/ ma chags pa de dag kyang zhes bya ba'i bar du ni nye bar gyur pa'o//gzugs sogs phung po stong nyid dang / /dus gsum gtogs pa'i chos rnams dang / /sbyin sogs byang chub phyogs rnams la/ /spyod pa'i 'du shes mi mthun phyogs/ /zhes bya ba la gzugs la sogs pa nas thams cad shes pa nyid kyi mthar thug pa'i chos kyi tshogs ni 'dir gzugs la sogs pa'i phung po ste/de'i stong pa nyid la gang gzugs stong pa nyid nas/ thams cad shes pa stong pa nyid ces bya ba'i bar ni 'du shes pa'o/ /gang yang dus gsum du gtogs pa dag ni 'das pa zhes bya ba dang / ma 'ongs pa zhes bya ba dang / da ltar byung ba zhes bya bar 'du shes pa'o/ /byang chub kyi phyogs kyi chos rnams la zhes bya ba'i mang po'i tshig ni sogs pa zhes bya ba'i don to/ /de bas na tshad med pa la sogs pa nas/ thams cad shes pa'i mthar thug pa yang gzung ngo / /gang yang sbyin pa la sogs pa dang / byang chub kyi phyogs la sogs pa dag la spyod pa'i 'du shes ni sbyin pa'i pha rol tu phyin pa la spyod na zhes bya ba nas/ thams cad shes pa la spyod na zhes bya ba'i bar du ste/ de thams cad ni mi mthun pa'i phyogs so/ /de nas tshe dang ldan pa sha ra dwa ti'i bu zhes bya ba nas brtsams te/ thams cad shes pa nyid la spyod na chags pa'o zhes bya ba'i bar ni mi mthun pa'i phyogs so//tshig le'ur byas pa las chos rnams zhes bya ba ni tshogs gzhan yin te/ chos dag la 'du shes pa gang yin pa de yang mi mthun pa'i phyogs so zhes bya ba'i bar ni mi mthun pa'i phyogs so zhes bya ba'i don to/ / gang de nas lha'i dbang po brgya byin gyis zhes bya ba nas brtsams te/ yongs su bsngo bar mi nus so zhes bya ba'i bar du 'chad par 'gyur ba yang mi mthun pa'i phyogs yin te/ chos rnams la 'du shes pa ni mi mthun pa'i phyogs yin no zhes gsungs pa'i phyir ro/ /chos rnams la 'du shes med pa ni gnyen po yin no zhes bya ba ni don gyis shes par bya ste/gang yang tshe dang ldan pa sha ra dwa ti'i bu zhes bya ba nas brtsams te/ da ltar byung ba'i chos zhes bya bar 'du shes pa med do zhes bya ba'i bar du gsungs so/ /sbyin pa la sogs ngar 'dzin med/ /gzhan dag de la sbyor byed pa/ /de ni chags pa'i mtha' 'gog pa//zhes bya ba la sbyin pa la sogs pa la/ ngar 'dzin pa med pa ni gang sha ra dwa ti'i bu zhes bya ba nas brtsams te/ spyod pa'i chags pa med pa'o zhes bya ba'i bar gyis gsungs so/ /gzhan dag de la sbyor bar byed pa ni ngar 'dzin pa med pa la sbyor bar byed pa'o//gang kau shi ka gzhan yang zhes bya ba nas brtsams te/ chags pa'i mtha' thams cad yongs su spangs pa yin no zhes bya ba'i bar gyis 'chad par 'gyur ro/ /de ni gang de gnyi ga chags pa'i mtha' 'gog par byed pa ste/ gnyi ga gnyen po'i phyogs zhes bya ba'i don to/ /rgyal la sogs pa chags pa phra//zhes bya ba la sogs pa'i sgras ni de dag dang gzhan dag gi dge ba'i rtsa ba la rjes su yi rang ba la sogs pa ste/ de ni mtshan ma dang bcas par dmigs pa gang yin pa'o/ /gang de nas bcom ldan 'das zhes bya ba nas brtsams te/ de dag dang de ma yin pa'i sems can gzhan rnams kyi dge ba'i rtsa ba la mtshan mar byed de/mtshan mar yid la bya ba ma yin pa zhes bya ba'i bar gyis chags pa phra mo gsungs so/ /chos kyi lam ni rang bzhin gyis/ /dben pa'i phyir ni de zab nyid/ /ces bya ba ni shes rab kyi pha rol tu phyin pa de ni zab pa yin te/ chos thams cad rang bzhin gyis dben pa nyid kyi phyir ro/ /gsol pa/ bcom ldan 'das zhes bya ba nas brtsams te/ sus kyang mngon par rdzogs par 'tshang rgya bar mi nus so zhes bya ba'i bar gyis ni zab pa gsungs so/ /chos rnams rang bzhin gcig par ni/ /shes pas chags pa spong ba yin//chos rnams rang bzhin gcig pa nyid du shes na chags pa thams cad rnam par spong ngo / /rab 'byor de ni zhes bya ba nas brtsams te/ chags pa'i mtha' thams cad rnam par spangs par 'gyur ro zhes bya ba'i bar gyis chags pa'i mtha' thams cad rnam par spangs pa gsungs so//mthong la sogs pa bkag pa yis/ /de ni rtogs par dka' bar bshad/ /ces bya ba ni mthong ba nyid la sogs pa bkag pa de ni rtogs par dka' ba nyid do/ /gsol pa zhes bya ba nas brtsams te/ mngon par rdzogs par sangs ma rgyas so zhes bya ba'i bar gyis ni rtogs par dka' ba gsungs so//gzugs la sogs pa mi shes pas/ /de ni bsam mi khyab par 'dod/ /ces bya ba ni des gzugs la sogs pa nas/ ma 'dres pa'i bar du mi shes pa de'i phyir bsam gyis mi khyab pa'o/ /gsol pa/ bcom ldan 'das zhes bya ba nas brtsams te/ rnam pa thams cad mkhyen pa nyid mi dmigs pa'i phyir ro zhes bya ba'i bar gyis ni bsam gyis mi khyab pa nyid du gsungs so//de ni mi mthun pa dang gnyen po bstan pa'o/ /de ltar kun shes nyid lugs la/ /mi mthun phyogs dang gnyen po dag /rnam par dbye ba ma lus pa/ /ji skad bshad pa 'di shes bya//de ltar zhes bya ba ni bstan bcos las ji skad bshad pa bzhin du bya'o/ /ji skad bshad pa zhes bya ba ni mdo las ji skad bshad pa bzhin du'o/ /da ni sbyor ba brjod par bya ba yin pas de'i dbang du mdzad nas/ gzugs sogs de mi rtag sogs dang //de ma rdzogs dang rab rdzogs dang / /sbyor ba bkag pas spyod pa ni/ /chags pa med dang de dang ni/ /mi 'gyur byed pa med nyid dang / /sbyor ba dka' ba rnam gsum dang / /skal ba ji bzhin 'bras thob pas/ /de yi 'bras bu yod 'dod dang / /gzhan la rag las min gang dang //shes byed rnam bdun snang ba la/ /gzugs la sogs la rlom med pa/ /rnam bzhi de yi mnyam nyid 'dod/ /ces bya ba gsungs te/ /gzugs la sogs pa rtag pa dang mi rtag pa la sogs pa dang / gzugs la sogs pa ma rdzogs pa dang / rab tu rdzogs pa nyid dang / gzugs la sogs pa la chags pa med pa dang / chags pa dang bcas pa'i spyod pa gang yin pa de bkag pas de dag gi sbyor ba ste/ shes rab kyi pha rol tu phyin pa la spyod pa'o/ /de la rab 'byor zhes bya ba nas brtsams te/ thams cad mkhyen pa nyid la mi spyod na shes rab kyi pha rol tu phyin pa la spyod do zhes bya ba'i bar ni gzugs la sogs pa'i sbyor ba'o//gal te gzugs rtag ces bya ba'am mi rtag ces bya bar mi spyod na shes rab kyi pha rol tu phyin pa la spyod do zhes bya ba nas brtsams te/ sdug pa 'am mi sdug pa zhes bya ba'i bar ni gzugs la sogs pa mi rtag pa la sogs pa'i sbyor ba'o//rab 'byor gzhan yang zhes bya ba nas brtsams te/ gsol pa/ bcom ldan 'das zhes bya ba de'i gong yan chad ni gzugs la sogs pa ma rdzogs pa dang rdzogs pa'i sbyor ba'o/ /gsol pa/ bcom ldan 'das de ltar zhes bya ba nas brtsams te/ bla na med pa yang dag par rdzogs pa'i byang chub la chags pa dang chags pa med do zhes 'du shes pa med do zhes bya ba'i bar ni gzugs la chags pa dang chags pa med pa'i sbyor ba'o//gsol pa/ bcom ldan 'das zhes bya ba nas brtsams te/ nyes pa brjod kyang 'grib pa med do zhes bya ba'i bar ni mi 'gyur ba'i sbyor ba'o//rab 'byor 'di lta ste zhes bya ba nas brtsams te/ ma bstan kyang de bzhin no zhes bya ba'i bar ni byed pa po med pa'i sbyor ba'o/ /gsol pa/ bcom ldan 'das zhes bya ba nas brtsams te/ chos rnams kyi slad du go cha 'tshal ba de dag ni go cha chen po 'tshal ba'o zhes bya ba'i bar gyis ni ched du bya ba dka' ba'i sbyor ba'o//bcom ldan 'das zhes bya ba nas brtsams te/ gdeg par 'tshal ba'o zhes bya ba'i bar ni sbyor ba dka' ba'i sbyor ba'o/ /bcom ldan 'das zhes bya ba nas brtsams te/ 'tshal ba lags so zhes bya ba'i bar ni bya dka' ba nyid kyi sbyor ba'o//de nas dge slong zhes bya ba nas brtsams te/ phyag 'tshal lo snyam pa'i zhes bya ba'i bar gyis 'bras bu yod pa'i sbyor ba'o/ /de nas lha'i dbang po brgya byin gyis zhes bya ba nas brtsams te/ dub pa'i skal ba can du 'gyur ro zhes bya ba'i bar gyis ni gzhan gyi rkyen gyis mi 'gro ba'i sbyor ba'o//kau shi ka de ji snyam du sems zhes bya ba nas brtsams te/ sprul pa lta bu'i chos rnams yongs su shes pa zhes bya ba'i bar gyis ni shes byed rnam bdun zhes bya ba'i sbyor ba'o/ /'dir sbyor ba rnam pa bcu gnyis gsungs pa gang yin pa de'i mnyam pa nyid du 'dod do/ /gang zhe na/gzugs la sogs pa rlom pa med pa rnam pa bzhi ste/ gzugs su rlom sems su mi byed/ gzugs kyis rlom sems su mi byed/ gzugs la bdag gi zhes rlom sems su mi byed/ gzugs la rlom sems su mi byed ces bya ba la sogs pa lta bu ste/ gang rab 'byor gyis gsol pa zhes bya ba nas brtsams te/sprul pa la'ang rlom sems su mi byed ces bya ba'i bar gyis sbyor ba'i mnyam pa nyid gsungs so/ /mthong ba'i lam bstan par bya ba de la 'dir sangs rgyas stong dang phyogs bcu'i sangs rgyas stong dag gi bstan pa mnyam pa nyid bstan par bya ba'i phyir/ de nas sangs rgyas kyi mthus zhes bya ba nas brtsams te/ ston cing 'chad par 'gyur ro zhes bya ba'i bar gyis gsungs so/ /de bas na mthong ba'i lam de ni/ sdug bsngal la sogs bden pa la/ /chos shes rjes su shes bzod dang / /shes pa'i skad cig bdag nyid 'di/ /kun shes tshul la mthong ba'i lam//zhes gsungs te/ thams cad shes pa nyid kyi tshul la skad cig ma bcu drug gi bdag nyid de dag ni mthong ba'i lam mo/ /sdug bsngal la sogs pa'i bden pa re re zhing skad cig ma bzhi'i bdag nyid yin pas chos shes pa dang rjes su shes pa'i bzod pa dag dang /shes pa yang chos dang / rjes su shes pa dag ste/ skad cig ma gang yin pa de'i bdag nyid de sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa'o//kun 'byung ba dang / 'gog pa dang lam yang de bzhin no/ /skad cig ma bcu drug po de dag go rims bzhin du/ gzugs rtag ma yin mi rtag min/ /mtha' las 'das dang rnam dag dang / /ma skyes ma 'gags la sogs dang / /mkha' 'dra chags pa spangs pa dang / / yongs su 'dzin las grol ba dang / /ngo bo nyid kyi brjod med dang / /gang phyir 'di don brjod pa yis/ /gzhan la sbyin du med pa dang / /dmigs pa med par byed pa dang / /shin tu rnam dag nad mi 'byung / /ngan song chad dang mi rtog dang / /'bras bu mngon du bya ba la/ /mtshan ma dag dang ma 'brel dang //dngos dang ming dang gnyis po la/ /shes pa skye ba med pa ni/ /kun shes nyid kyi skad cig ma/ /zhes bya ba gsungs te/ gzugs rtag ma yin mi rtag min/ /zhes bya ba ni gzugs zhes bya ba nas/ rnam par shes pa'i bar du rtag pa yang ma yin mi rtag pa yang ma yin pa nas/bcings pa ma yin grol ba ma yin zhes bya ba'i bar dang / gzugs 'das pa ma yin zhes bya ba la sogs pa nas/ rnam pa thams cad mkhyen pa nyid 'das pa ma yin zhes bya ba'i bar du ste/ de skad ces gsol pa dang zhes bya ba nas/ chos ston par mi 'gyur ro zhes bya ba'i bar gyis sdug bsngal la chos shes pa'i bzod pa'o//mtha' las 'das zhes bya ba ni shin tu 'das pa ste/ gzugs shin tu rnam par dag pa nas/ rnam pa thams cad mkhyen pa nyid kyi bar du shin tu rnam par dag pa ste/ gsol pa/ bcom ldan 'das zhes bya ba nas brtsams te/ chos ston par 'gyur ro zhes bya ba'i bar gyis sdug bsngal la chos shes pa gsungs so/ /rnam dag ces bya ba ni yongs su dag pa zhes bya ba'i don te/ gzugs yongs su dag pa nas/ rnam pa thams cad mkhyen pa nyid kyi bar du yongs su dag pa ste/ gang gsol pa zhes bya ba nas brtsams te/shes rab kyi pha rol tu phyin pa yongs su dag pa zhes bya ba'i bar gyis sdug bsngal la rjes su shes pa'i bzod pa gsungs so/ /ma skyes ma 'gags la sogs dang / /zhes bya ba ni gzugs skye ba med pa 'gag pa med pa kun nas nyon mongs pa med pa rnam par byang ba med pa nas/ rnam pa thams cad mkhyen pa nyid kyi bar du ste/gang rab 'byor gzugs zhes bya ba nas brtsams te/ rnam pa thams cad mkhyen pa nyid ces bya ba'i bar gyis ni sdug bsngal la rjes su shes pa gsungs so/ /mkha' 'dra zhes bya ba ni nam mkha' dang 'dra bar gzugs la sogs pa skye ba med pa la sogs pa nas/rnam pa thams cad mkhyen pa nyid kyi bar du ste/ gang rab 'byor gzhan yang zhes bya ba nas brtsams te/ shes rab kyi pha rol tu phyin pa yongs su dag pa zhes bya ba'i bar gyis kun 'byung la chos shes pa'i bzod pa gsungs so/ /chags pa spangs pa zhes bya ba ni nam mkha' dang 'dra bar gzugs gos pa med pa nas/rnam pa thams cad mkhyen pa nyid kyi bar du ste/ gang nam mkha' la 'gro ba ma mchis pa zhes bya ba nas brtsams te/ shes rab kyi pha rol tu phyin pa yongs su dag pa zhes bya ba'i bar gyis kun 'byung la chos shes pa gsungs so/ / yongs su 'dzin las grol ba dang / /zhes bya ba ni nam mkha' dang 'dra bar gzugs yongs su gzung du med pa nas thams cad shes pa'i bar du ste/ rab 'byor gzhan yang zhes bya ba nas brtsams te/ shes rab kyi pha rol tu phyin pa yongs su dag pa zhes bya ba'i bar gyis kun 'byung la rjes su shes pa'i bzod pa gsungs so//ngo bo nyid kyi brjod med dang / /zhes bya ba ni ji ltar sgra brnyan gnyis nam mkha' la grags pa dang 'dra bar brjod du med pa de ltar gzugs brjod du med pa nas/ rnam pa thams cad mkhyen pa'i bar du ste/ gang rab 'byor nam mkha' la tha snyad med pa zhes bya ba nas brtsams te//shes rab kyi pha rol tu phyin pa yongs su dag pa zhes bya ba'i bar gyis kun 'byung la rjes su shes pa gsungs so/ /brjod pa yis zhes bya ba la spangs pa zhes bya ba dang sbyar bar bya ste/ gzugs nas rnam pa thams cad mkhyen pa nyid kyi bar du nam mkha' ltar brjod du med pa'o//ci'i phyir zhe na/ don 'di gzhan la sbyin pa med pa ste/ gang gi phyir brjod par 'dod pa'i don 'di gzhan la tshig tu brjod pas sbyin par mi nus pas so/ /gang rab 'byor gzhan yang zhes bya ba nas brtsams te/ shes rab kyi pha rol tu phyin pa yongs su dag pa zhes bya ba'i bar gyis 'gog pa la chos shes pa'i bzod pa gsungs so//dmigs pa med par byed pa dang / /zhes bya ba ni dmigs par byed pas na dmigs pa ste/ de med pa'i phyir gzugs dmigs su med pa nas/ thams cad shes pa'i bar du ste/ gang nam mkha' dmigs su med pa zhes bya ba nas brtsams te/shes rab kyi pha rol tu phyin pa yongs su dag pa zhes bya ba'i bar gyis 'gog pa la chos shes pa gsungs so/ /shin tu rnam dag ces bya ba ni gzugs shin tu rnam par dag pa nas/ thams cad shes pa'i bar du ste/ gang chos thams cad ces bya ba nas brtsams te/shes rab kyi pha rol tu phyin pa yongs su dag pa'o zhes bya ba'i bar gyis 'gog pa la rjes su shes pa'i bzod pa gsungs so/ /nad mi 'byung zhes bya ba la nad ni lus kyi nad do/ /yang na nyam nga ba rnam pa sna tshogs ni nad yin la/ de dag mi 'byung ba ni bcom ldan 'das ma la mngon par brtson pa la mi skye ba ste/gang rab 'byor zhes bya ba nas brtsams te/ 'di lta ste shes rab kyi pha rol tu phyin pa rin po che chen po zhes bya ba'i bar gyis 'gog pa la rjes su shes pa gsungs so/ /ngan song chad dang mi rtog dang / /zhes bya ba ni ngan 'gro dag chad pa'o//mi rtog pa nyid ni chos thams cad la skye ba dang 'gag pa'i rnam par rtog pa zad pa'o/ /de la ngan song chad dang zhes bya ba ni gang rab 'byor de la zhes bya ba nas brtsams te/ shes rab kyi pha rol tu phyin pa rin po che zhes bya ba'i bar gyis lam la chos shes pa'i bzod pa gsungs so//mi rtog pa nyid ni gang rab 'byor gang pha rol tu phyin pa rin po che zhes bya ba nas brtsams te/ pha rol tu phyin pa rin po che ni dmigs su med do zhes bya ba'i bar gyis lam la chos shes pa gsungs so/ /'bras bu mngon du bya ba la/ /mtshan ma dag dang ma 'brel dang / /zhes bya ba ni 'bras bu mngon du bya ba'i phyir mtshan ma gang yin pa de dag dang ma 'brel ba ni gos pa med pa ste/gang rab 'byor zhes bya ba nas brtsams te/ gos pa med pa'i pha rol tu phyin pa rin po che'o zhes bya ba'i bar gyis lam la rjes su shes pa'i bzod pa gsungs so/ /dngos dang ming dang gnyis po la//shes pa skye ba med pa ni/ /zhes bya ba la/ dngos zhes bya ba ni chos thams cad kyi rang gi mtshan nyid dag la'o/ /ming zhes bya ba ni de dag gi ming dag la'o/ /gnyis po la zhes bya ba ni chos thams cad kyi de bzhin nyid dang de'i shes pa la'o/ /shes pa ni so sor snang ba'o//gang yang skye ba med pa ste/ /chos thams cad spros pa med pa'i de bzhin nyid kyi ye shes zhes bya ba'i don to/ /gang rab 'byor gal te zhes bya ba nas brtsams te/ thams cad shes pa nyid thob par 'gyur ro zhes bya ba'i bar gyis lam la rjes su shes pa gsungs so/ /de la de ltar 'du shes par yang mi byed ces bya ba ni chos thams cad kyi rang gi mtshan nyid dag kyang mi mthong ba'o//de ltar mi rtog cing zhes bya ba ni chos thams cad kyi de bzhin nyid la yang ming dang 'dres pas 'dzin par mi byed pa'o/ /de ltar mi dmigs te zhes bya ba ni chos thams cad kyi de bzhin nyid gzung ba dang de'i ye shes 'dzin par byed pa nyid kyi sgo nas mi mthong ngo zhes bya ba'i don to//de ltar 'phro bar yang mi byed na zhes bya ba ni spros pa gsum po de dag gis te/ phyin ci log gis zhes bya ba'i don to/ /kun shes nyid kyi skad cig ma/ /zhes bya ba ni 'dir de dag ni thams cad shes pa'i mthong ba'i lam la skad cig ma bcu drug yin no//de ltar 'di dang yang 'di dang / /yang 'di yin te rnam gsum po/ /'di ni gnas skabs gsum po dag /rdzogs par yongs su bstan pa yin/ /zhes bya ba la de ltar gyi sgra ni sogs pa'i don te/ /gsum po dag la yang sbyar bar bya'o//yang gi sgra ni dang po la yang sbyar bar bya'o/ /'di'i sgra gsum po ni yang gi sgra las 'og tu blta bar bya'o/ /rnam pa gsum po zhes bya ba ni lhag pa gsum po dag gis te/ 'di ni chos gang yang zhes bya ba la sogs pa dang / rab 'byor de ltar shes rab kyi pha rol tu phyin pa 'di ni zhes bya ba la sogs pa'o//gnas skabs gsum po dag ces bya ba ni bzlog pa'i rim pas thams cad shes pa'i dbang du bya ba dang / lam shes pa'i dbang du bya ba dang / rnam pa thams cad mkhyen pa nyid kyi dbang du byas pa rdzogs par yongs su bstan cing de dag bshad pa nyid do//mngon par rtogs pa'i rgyan gyi 'grel pa rin chen 'byung gnas zhi bas sbyar ba dag ldan zhes bya ba las thams cad shes pa zhes bya ba'i le'u ste gsum pa'o// //da ni rnam pa kun mngon par rdzogs par rtogs pa zhes bya ba brjod par bya ba yin pa de bas na/gzhi yi ye shes bye brag ni/ /rnam pa zhes bya mtshan nyid de/ /zhes bya ba gsungs te/ gzhi ni dmigs pa ste/ bden pa bzhi la sogs pa'o/ /de'i ye shes kyi bye brag ste/ rnam pa gang dag gis de yongs su shes par bya ba de dag rnam pa zhes bya'o//mtshan nyid ni ming ngo / /kun mkhyen pa dag rnam gsum phyir/ /de yang rnam pa gsum du 'dod/ /ces bya ba la/ kun mkhyen pa dag ces bya ba ni rigs kyi mang po'i tshig yin te/ thams cad mkhyen pa nyid la zhes bya ba'i don to/ /de la thams cad shes pa nyid kyi dbang du mdzad nas/med pa'i rnam pa nas bzung ste/ /mi g.yo ba yi rnam pa'i bar/ /bden pa so so la bzhi dang / /lam la de ni bco lngar bshad/ /ces bya ba gsungs pa ste/ 'di ni ma mchis pa'i pha rol tu phyin pa zhes bya ba med pa'i rnam pa nas bzung ba dang / 'di ni mi g.yo ba'i pha rol tu phyin pa zhes bya ba mi g.yo ba'i rnam pa'i bar nyi shu rtsa bdun no//de dag la sdug bsngal dang kun 'byung ba dang 'gog pa la bzhi bzhi dang / lam gyi bden pa la lhag ma bco lnga'o/ /med pa'i rnam pa'i pha rol tu phyin pa ni med pa'i rnam pa'i pha rol tu phyin pa'o/ /de bzhin du 'og ma thams cad la yang ngo //de la sdug bsngal gyi gzhi ni med pa dang / mnyam pa nyid dang / dben pa dang / thub pa med pa'o/ /med pa ni gzugs la sogs pa nam mkha' lta bu'o/ /mnyam pa nyid ni gzugs la sogs pa chos thams cad dmigs su med pas mnyam pa nyid kyi phyir ro/ /dben pa ni shin tu stong pa nyid kyi phyir ro//thub pa med pa ni chos thams cad dmigs su med pa'i phyir ro/ /kun 'byung gi gzhi ni gnas med pa dang / nam mkha' dang / brjod du med pa dang / ming med pa'o/ /gnas med pa ni gzugs la sogs pa phung po lnga med pa'i phyir ro/ /nam mkha' ni gzugs la sogs pa dbugs dbyung ba dang rngub pa med pa'i phyir ro//brjod du med pa ni rnam par rtog pa dang rnam par dpyod pa dmigs su med pa'i phyir ro/ /ming med pa ni gzugs dang tshor ba la sogs pa mi dmigs pa'i phyir ro/ /'gog pa'i bzhi ni 'gro ba med pa dang / /gzung du med pa dang /mi zad pa dang / skye ba med pa'o/ /'gog pa'i 'gro ba med pa ni chos thams cad la 'gro ba med pa'i phyir dang / rang bzhin gyis rnam par grol ba nyid kyi phyir ro/ /'gog pa'i gzung du med pa ni chos thams cad gzung du med pa'i phyir chos kyis chos la 'dzin pa med pa'o/ / mi zad pa ni chos thams cad shin tu zad cing dengs pa nyid kyi phyir te/ shin tu zad pa med cing 'gog pa med pa nyid do/ /skye ba med pa ni chos thams cad skye ba med cing 'gog pa med pa nyid do/ /lam gyi bco lnga ni byed pa po med pa dang / shes pa po med pa dang / 'pho ba med pa dang / 'jig pa med pa dang /rmi lam dang / sgra brnyan dang / mig yor dang / smig rgyu dang / sgyu ma dang / kun nas nyon mongs pa med pa dang / rnam par byang ba med pa dang / gos pa med pa dang / spros pa med pa dang / rlom pa med pa dang / g.yo ba med pa'o/ /lam ni byed pa po med pa ste/ byed pa po dmigs su med pa'i phyir ro//shes pa po med pa ni shes pa po dmigs su med pa'i phyir ro/ /'pho ba med pa ni skye ba dang 'chi ba dmigs su med pa'i phyir ro/ /'jig pa med pa ni chos thams cad rang bzhin gyis 'jig pa med pa'i phyir te/ rang bzhin ni de bzhin nyid do/ /rmi lam ni rmi lam mthong ba dmigs su med pa'i phyir ro//sgra brnyan ni sgrar brjod pa dmigs su med pa'i phyir ro/ /mig yor ni gzugs dang gzugs brnyan dmigs su med pa'i phyir ro/ /smig rgyu ni chu'i phung po dmigs su med pa'i phyir ro/ /sgyu ma ni de'i rgyu mtshan dmigs su med pa'i phyir ro//kun nas nyon mongs pa med pa ni nyon mongs pa'i rang bzhin dmigs su med pa'i phyir ro/ /rnam par byang ba med pa ni kun nas nyon mongs pa'i sems can dmigs su med pa'i phyir ro/ /gos pa med pa ni nam mkha' lta bu'o/ /spros pa med pa ni spros pa thams cad yang dag par bcom pa nyid kyi phyir ro//rlom pa med pa ni rlom sems thams cad yang dag par bcom pa nyid kyi phyir ro/ /g.yo ba med pa ni chos kyi dbyings la gnas pa nyid kyi phyir ro zhes bya ba ni thams cad shes pa nyid kyi rnam pa'o/ /lam shes pa nyid kyi dbang du mdzad nas/ rgyu dang lam dang sdug bsngal dang //'gog pa la ni go rims bzhin/ /de dag brgyad dang bdun dang ni/ /lnga dang bcu drug ces bsgrags so/ /zhes bya ba gsungs te/ rgyu ni kun 'byung ngo / /de bas na 'dir kun 'byung dang lam dang por gsungs pa ni 'bras bu'i thabs su gyur pa nyid kyi phyir la/ sdug bsngal dang 'gog pa ni 'bras bur gyur pa nyid kyi phyir ro//de dag gi rnam pa go rims bzhin du brgyad dang / bdun dang lnga dang bcu drug ces mdo las gsungs so/ /de la kun 'byung gi brgyad de 'dod chags dang bral ba dang / mi gnas pa dang / zhi ba dang / 'dod chags med pa dang / zhe sdang med pa dang / gti mug med pa dang / nyon mongs pa med pa dang / sems can med pa'o/ /'dod chags dang bral ba ni gzugs la sogs pa 'dod chags kyi rgyu mtshan mi dmigs pa'i phyir te/ 'dod chags kyi rgyu mtshan ni zhen par bya ba'o/ /gnas ni zhen pa dang / sred pa yin la/de med pa'i phyir gnas med pa ni gzugs la sogs pa'i chos thams cad dmigs su med pa'i phyir ro/ /zhi ba ni gzugs la sogs pa'i chos thams cad phyin ci ma log pa'i de bzhin nyid du mngon par rdzogs par byang chub pa'i phyir ro/ /'dod chags med pa ni 'dod chags med pa'i phyir ro//zhe sdang med pa ni nyes pa med pa'i phyir ro/ /gti mug med pa ni mun pa bcom pa nyid kyi phyir ro/ /nyon mongs pa med pa ni yongs su rtog pa med pa nyid kyi phyir ro/ /sems can med pa ni sems can dmigs su med pa'i phyir ro/ /lam gyi bden pa ni tshad med pa dang /mtha' gnyis dang ma 'brel ba dang tha mi dad pa dang / mchog tu 'dzin pa med pa dang / rnam par mi rtog pa dang / dpag tu med pa dang / chags pa med pa'o/ /tshad med pa ni chos thams cad las kun nas ldang ba med pa'i phyir ro/ /mtha' gnyis dang ma 'brel ba ni mtha' gnyis dmigs su med pa'i phyir ro//tha mi dad pa ni chos thams cad dbyer med pa nyid kyi phyir dang dben pa'i phyir ro/ /mchog tu 'dzin pa med pa ni nyan thos dang rang sangs rgyas kyi sa las yang dag par 'das pa'i phyir ro/ /rnam par mi rtog pa ni rnam par rtog pa dmigs su med pa'i phyir ro//dpag tu med pa ni chos thams cad kyi tshad dmigs su med pa'i phyir ro/ /chags pa med pa ni chos thams cad nam mkha'i rang bzhin dang mnyam pa nyid kyi phyir ro/ /sdug bsngal gyi lnga ni mi rtag pa dang / sdug bsngal ba dang / stong pa dang / bdag med pa dang / mtshan nyid med pa'o//mi rtag pa nyid ni gzugs la sogs pa'i chos thams cad 'jig pa med pa'i phyir te/ 'jig pa med pa de nyid ni med pa de nyid kyi phyir mi rtag pa ste/ med pa'i don ni mi rtag pa'i don to/ /sdug bsngal ni chos thams cad tshol bar sbyor ba med pa'i phyir te/ tshol ba ni longs spyod do//stong pa nyid ni chos thams cad kyi rang bzhin dmigs su med pa'i phyir ro/ /bdag med pa ni chos thams cad la mngon par chags pa med pa'i phyir ro/ /mtshan nyid med pa ni chos thams cad kyi mtshan ma med pa'i phyir ro/ /'gog pa'i rnam pa bcu drug ni nang stong pa nyid kyi 'gog pa ni nang gi chos rnams dmigs su med pa'i phyir ro zhes bya ba nas dngos po med pa'i ngo bo nyid stong pa nyid kyi 'gog pa ni dngos po med pa'i ngo bo nyid stong pa nyid dmigs su med pa'i phyir ro zhes bya ba'i bar ni lam shes pa'i rnam pa'o//rnam pa thams cad mkhyen pa nyid kyi dbang du mdzad nas/ kun mkhyen nyid gsum bye brag gis//lam gyi bden pa dang mthun par/ /dran pa nyer gzhag nas bzung ste/ tha ma sangs rgyas nyid rnam par/ /slob ma byang chub sems dpa' dang / /sangs rgyas rnams kyi rim bzhin du/ /sum cu bdun dang sum cu bzhi/ /sum cu rtsa dgu dag tu bzhed//ces bya ba gsungs te/ rnam pa thams cad mkhyen pa nyid la dran pa nye bar gzhag pa nas brtsams te/ sangs rgyas nyid kyi rnam pa'i bar du rnam pa brgya rtsa bcu dag yin te/ dran pa nye bar gzhag pa'i pha rol tu phyin pa nas brtsams te/ sangs rgyas kyi pha rol tu phyin pa'i bar du'o//tha ma sangs rgyas nyid kyi rnam pa gang dag la yod pa de dag la de skad ces bya'o/ /kun mkhyen nyid rnam pa gsum gyi bye brag gis nyan thos dang / byang chub sems dpa' dang / sangs rgyas dag gi lam gyi bden pa gang yin pa de dag dang mthun par go rims bzhin du sum cu rtsa bdun dang /sum cu rtsa bzhi dang sum cu rtsa dgu dag go/ /de la byang chub kyi phyogs dag gis nyan thos kyi lam la brten pa'i phyir dang / rnam par thar pa'i sgo gsum dang / rnam par thar pa brgyad dang / mthar gyis gnas pa'i snyoms par 'jug pa dgu dang / bden pa bzhi dang / pha rol tu phyin pa bcu po dag gis byang chub sems dpa'i lam la brten pa'i phyir dang / stobs bcu dang / mi 'jigs pa bzhi dang / so so yang dag par rig pa bzhi dang / ma 'dres pa'i chos bco brgyad dang / de bzhin gshegs pa nyid dang / rang byung nyid dang / sangs rgyas nyid ces bya ba ni sangs rgyas nyid kyi lam la brten pa'i phyir ro/ /'dir chos thams cad las yang dag par 'das pa'i phyir ro zhes bya ba ni nyan thos la sogs pa'i chos rnams las yang dag par 'das pa'i phyir ro/ /chos ji ltar gnas pa de bzhin du gsungs pa'i phyir de bzhin gshegs pa nyid do//ji lta zhe na/ sangs rgyas kyi brjod pa thams cad ni de bzhin nyid kyi phyir ro/ /byung bar gyur pas na byung ba ste/ byung bar gyur zhes bya ba'i don to/ /rang byung zhes bya ba ni rang nyid 'dod pas 'di byung bas na rang byung ngo / /de ji ltar zhe na/ chos thams cad la dbang bsgyur ba nyid kyi phyir ro//ji ltar sangs rgyas nyid ce na/ /chos thams cad mngon par byang chub pa'i phyir te/ rnam pa thams cad mkhyen pa nyid kyi phyir ro/ /rnam pa rnams thams cad gcig tu byas na rnam pa brgya bdun cu rtsa gsum yin no/ /da ni sbyor ba brjod par bya ba yin pas bcom ldan 'das ma mnyan pa cung zad kyang rnyed par dka' na/ci rab tu sbyor ba lta zhes bstan par bya ba'i phyir/ sangs rgyas rnams la bkur sti byas/ /de las dge ba'i rtsa ba bskrun/ /dge ba'i bshes kyi mgon bcas pa/ /'di nyan pa yi snod yin no/ /sangs bsten dang kun 'dri dang //sbyin dang tshul khrims sogs spyod dang / /len dang 'dzin pa la sogs pa'i/ /snod du dam pa rnams bzhed do/ /zhes bya ba gsungs te/ sngon gyi sangs rgyas rnams la bkur sti byas pa dang / de dag la dge ba'i rtsa ba bskrun pa dang / dge ba'i bshes gnyen gyis yongs su zin pa gang yin pa de dag 'di nyid nyan pa ste/rna lam du grag pa'i snod yin gyi/ gzhan dag ni ma yin no/ /gang yang sngon gyi skye bar sangs rgyas mang po yongs su bsten pa dang / kun 'dri ba dang bcas pa'i pha rol tu phyin pa drug la spyod pa de nyid kyis bcom ldan 'das ma len pa dang 'dzin pa nas/de bzhin nyid du shes rab kyi pha rol tu phyin pa la nan tan du byed pa'i bar nyid kyi snod nyid du 'gyur gyi/ rnam pa gzhan du ma yin no/ /de nyid kyi phyir bcom ldan 'das ma rna lam du grag pa gang yin pa de dag ni nges par bkur sti byas pa la sogs pa yon tan gsum dang ldan par rig par bya'o//gang la len pa la sogs pa dang de bzhin nyid du nan tan byed pa de dag ni bkur sti byed pa la sogs pa yon tan gsum dang sangs rgyas bsten pa la sogs pa dang ldan pa yin no zhes bya bar nges par blta bar bya'o/ /gang de nas lha'i dbang po brgya byin gyis zhes bya ba nas brtsams te/yid la zung shig dang ngas bshad do zhes bya ba'i bar ni sbyor ba po rnyed par dka' ba nyid do/ /sbyor ba'i dbang du mdzad nas/ gzugs la sogs la mi gnas phyir/ /de la sbyor ba bkag pa'i phyir/ /de yi de bzhin nyid zab phyir//de rnams gting dpag dka' ba'i phyir/ /de dag tshad ni med phyir dang / /tshegs chen yun ring rtogs pa'i phyir/ /lung bstan phyir mi ldog nyid dang / /nges 'byung bar chad med bcas dang / /byang chub nye dang myur ba dang / /gzhan don 'phel med 'grib med phyir//chos dang chos min sogs mi mthong / /gzugs sogs bsam mi khyab mi mthong / /gzugs sogs de yi mtshan ma dang / /de yi ngo bor rnam mi rtog/ /'bras bu rin chen sbyin byed dang / /de ni dag pa mtshams dang bcas/ /zhes bya ba gsungs pa la/ de ni zhes bya ba ni sbyor ba'o//de gang zhe na/ gang gi phyir/ rnam par sbyor bar bcas pa zhes gong du bstan pa de la rnam par bstan nas sbyor ba'i skabs yin pa'i phyir ro/ /gzugs la sogs la mi gnas phyir/ /zhes bya ba ni gzugs la sogs pa de dag la mi gnas pa ni sbyor ba'o/ / gang kau shi ka zhes bya ba nas brtsams te/ rnam pa thams cad mkhyen pa nyid mi dmigs so zhes bya ba'i bar gyis gzugs la sogs pa la mi gnas pa'i sbyor ba gsungs so/ /de la sbyor ba bkag pa'i phyir/ /zhes bya ba ni gzugs la sogs pa la sbyor ba bkag pa'i sbyor ba ste/ gang rab 'byor gzhan yang zhes bya ba nas brtsams te/ dbus su mi dmigs so zhes bya ba'i bar gyis gzugs la sogs pa la mi sbyor ba'i sbyor ba gsungs so/ /de yi de bzhin nyid zab phyir/ /zhes bya ba ni gzugs la sogs pa'i de bzhin nyid zab pa'i phyir bcom ldan 'das ma zab bo//de nas tshe dang ldan pa zhes bya ba nas zab bo zhes bya ba'i bar gyis ni zab pa'i sbyor ba gsungs so/ /de rnams gting dpag dka' ba'i phyir/ /zhes bya ba ni gzugs la sogs pa gting dpag dka' ba'i phyir/ bcom ldan 'das ma gting dpag dka' ba'o/ /gang gsol pa zhes bya ba nas/gting dpag dka'o zhes bya ba'i bar gyis gting dpag dka' ba'i sbyor ba gsungs so/ /de dag tshad ni med phyir dang / /zhes bya ba la/ gzugs la sogs pa tshad med pa'i phyir bcom ldan 'das ma tshad med pa'o/ /gang gsol pa zhes bya ba nas/ tshad med do zhes bya ba'i bar gyis ni tshad med pa'i sbyor ba gsungs so//'dir dang gi sgra khong nas dbyung bar bya ste/ de la sbyor ba bkag pa nyid ces bya ba 'dir rjes su drang ba'i don to/ /de la zhes bya ba ni zab pa nyid dang / gting dpag dka' ba nyid dang / tshad med pa nyid la spyod pa dgag pa'i sbyor ba gsungs te/ gzugs la sogs pa zab ces bya bar mi spyod na shes rab kyi pha rol tu phyin pa la spyod do//de bzhin du gting dpag dka' ba zhes bya ba dang tshad med pa zhes bya ba ste/ gang gsol pa zhes bya ba nas/ sangs rgyas kyi chos rnams kyi bar du ma yin no zhes bya ba'i bar gyis zab pa la mi sbyor ba'i sbyor ba gsungs so//gzhan yang zhes bya ba nas sangs rgyas kyi chos rnams kyi bar du ma yin no zhes bya ba'i bar gyis gting dpag dka' ba nyid la mi sbyor ba'i sbyor ba gsungs so/ /gzhan yang zhes bya ba nas/ sangs rgyas kyi chos kyi bar du ma yin no zhes bya ba'i bar gyis tshad med pa la mi sbyor ba'i sbyor ba gsungs so//tshegs chen yun ring rtogs pa'i phyir/ /zhes bya ba la/ bcom ldan 'das ma zab pa nyid dang / gting dpag dka' ba nyid dang / tshad med pa de dag ni theg pa la gsar du zhugs pa'i mdun du brjod par mi bya ste/ de 'ga' zhig tu skrag nas 'di spangs te ngan 'gror 'gro ba'i las sogs par 'gyur te/tshegs chen pos yun ring po nas mngon par rdzogs par byang chub par 'gyur ro/ /sha ra dwa ti'i bus gsol ba zhes bya ba nas/ dka' ba de lta bu'i gnas yod do zhes bya ba'i bar gyis tshegs chen pos yun ring po nas rtogs pa'i sbyor ba gsungs so//lung bstan zhes bya ba ni gang gis bcom ldan 'das ma zab mo 'di thos nas skrag par mi 'gyur/ thos nas kyang gong nas gong du 'dzin pa nas/ gnas pa'i bar de ni de bzhin gshegs pa gcig gam gnyis sam gsum las mi 'da' bar yang dag par rdzogs pa'i byang chub tu lung bstan pa thob par 'gyur ro//gang brgya byin gyi zhes bya ba nas/ nye bar 'gyur bar rig par bgyi'o zhes bya ba'i bar gyis lung bstan pa'i sbyor ba gsungs so/ /phyir mi ldog nyid ces bya ba ni gang byang chub sems dpa' de dag phyir mi ldog par 'gyur ba rang nyid la bcom ldan 'das ma 'di nye bar 'gyur te/nye bar gyur nas kyang 'dzin pa nas tshul bzhin yid la byed pa'i bar gyis de byang chub tu lung bstan pa rnyed pa dang nye bar 'gyur ro/ /bcom ldan 'das gang gis zhes bya ba nas phyir mi ldog pa zhes bya ba'i bar gyis phyir mi ldog pa'i sbyor ba gsungs so//nges 'byung zhes bya ba ni bar du gcod pa'i sa las shin tu rgal ba ste/ der bcom ldan 'das ma nyid nye bar gyur pas de gzung ba nas tshul bzhin yid la byed pa'i bar du byas pas lung ston pa la nye bar thob par 'gyur ba ste/ 'brog dgon pa shin tu ring po nas 'byung ba grong la sogs pa'i mtshan ma rnyed pa bzhin no//gang bcom ldan 'das 'di lta ste zhes bya ba nas/ snga ltas so zhes bya ba'i bar gyis ni nges par 'byung ba'i sbyor ba gsungs so/ /bar chad med bcas dang zhes bya ba ni dper na rgya mtshor 'gro ba'i ri la sogs par bar chad dang bral ba'i sa phyogs su phyin pa rgya mtshor phyin pa dang nye ba de bzhin du bcom ldan 'das ma mthong ba la sogs pa'i don rnyed la thos nas 'dzin pa nas/tshul bzhin du yid la byed pa'i bar du byang chub tu lung bstan pa rnyed pa dang nye ba'o/ /gang bcom ldan 'das kyis bka' stsal pa zhes bya ba nas/tshul bzhin yid la byar yod ces bgyi bar rig par bgyi'o zhes bya ba'i bar gyis bar chad med pa dang bcas pa'i sbyor ba gsungs so/ /byang chub nye bar zhes bya ba la/ dper na sdong po lo ma lhags pa dang nye bar shes pa na de dag gi lo ma dang me tog dang 'bras bu de dag ni ring po mi thogs par 'byung bar 'gyur ba de bzhin du 'di lta bu'i lam la sogs pa'i don rnyed pa nas tshul bzhin yid la byed pa'i bar ni yang dag par rdzogs pa'i byang chub dang nye ba yin no//gang bcom ldan 'das 'di lta ste zhes bya ba nas/ bde zhing nyams bde bar 'gyur ro zhes bya ba'i bar gyis byang chub dang nye ba'i sbyor ba gsungs so/ /myur ba zhes bya ba ni byang chub tu zhes bya bar sbyar ro/ /dper na bud med sbrum ma lus lci bar gyur pa bzhin du sdug bsngal bar gyur pa de bas na 'di ni ring por mi thogs par btsa' bar 'gyur ro zhes shes pa de bzhin du gang dag bcom ldan 'das ma 'di nye bar gyur pa nas/tshul bzhin yid la byed pa'i bar ni de dag ring po mi thogs par byang chub tu lung bstan par rig par bya'o/ /gang bcom ldan 'das ma 'di lta ste zhes bya ba nas/ sangs rgyas kyi mthus skyes so zhes bya ba'i bar gyis byang chub tu nye ba'i sbyor ba gsungs so//gzhan gyi don zhes bya ba byang chub sems dpa'i gzhan don gyi sbyor ba rnam pa sna tshogs pa ste/ gang de nas tshe dang ldan pa zhes bya ba nas/ chos kyi 'khor lo bskor ba la yang dag par bskul lo zhes bya ba'i bar gyis gzhan gyi don gyi sbyor ba gsungs so//'phel med 'grib med phyir zhes bya ba ni gang gi tshe shes rab kyi pha rol tu phyin pa la spyod pa na phung po dang khams dang skye mched la sogs pa 'phel ba dang 'grib par mi mthong ba de'i tshe de'i bsgom pa yongs su rdzogs par 'gyur te/ gang de skad ces bya ba nas/bsgom pa yongs su rdzogs par 'gyur ro zhes bya ba'i bar gyis 'phel ba dang 'grib pa med pa'i sbyor ba gsungs so/ /chos dang chos min sogs mi mthong / /zhes bya ba la/ gal te gzugs nas thams cad shes pa'i bar du chos zhes bya ba'am/ chos ma yin zhes bya bar yang dag par rjes su mi mthong ba de'i tshe de'i shes rab kyi pha rol tu phyin pa yongs su rdzogs par 'gyur te/gang rab 'byor gzhan yang zhes bya ba nas/ srog med pa'i phyir ro zhes bya ba'i bar gyis chos dang chos ma yin pa la sogs pa mi dmigs pa'i sbyor ba gsungs so/ / gzugs sogs bsam mi khyab mi mthong / /zhes bya ba la/ gzugs bsam gyis mi khyab pa nas/ thams cad shes pa bsam gyis mi khyab pa'i bar de mi mthong ba ni 'du shes pa med pa'i sbyor ba ste/ gang gsol pa zhes bya ba nas/ shes rab kyi pha rol tu phyin pa yongs su rdzogs par 'gyur ro zhes bya ba'i bar gyis gzugs la sogs pa bsam gyis mi khyab pa mi mthong ba'i sbyor ba gsungs so//gzugs sogs de yi mtshan ma dang / /de yi ngo bor rnam mi rtog /ces bya ba la/ stong pa nyid kyi ting nge 'dzin gyis gzugs su rtog par mi byed/ mtshan ma med pa'i ting nge 'dzin dang /bdag gi dngos po ma byung ba la smon pa med pa'i ting nge 'dzin gyis gzugs la rtog par mi byed rnam par rtog par mi byed pa nas/ thams cad shes pa'i bar du ste/ gang gsol pa zhes bya ba nas zab bo zhes bya ba'i bar gyis rnam par mi rtog pa'i sbyor ba gsungs so//'bras bu rin chen sbyin byed dang / /zhes bya ba la/ rgyun du zhugs pa nas/ yang dag par rdzogs pa'i byang chub kyi bar gyi chos kyi 'khor lo bskor ba ni 'bras bu rin po che ste/ bcom ldan 'das ma de sbyin par mdzad pa'o/ /gang gsol pa zhes bya ba nas/ chos kyi 'khor lo bskor ba'i zhes bya ba'i bar gyis 'bras bu rin po che sbyin pa'i sbyor ba gsungs so//dag pa zhes bya ba ni gzugs rnam par dag pa nas/ thams cad shes pa rnam par dag pa'i phyir bcom ldan 'das ma ni dag pa'i phung po ste/ gang gsol pa bcom ldan 'das ma zhes bya ba nas/ dag pa'i phung po'o zhes bya ba'i bar gyis rnam par dag pa'i sbyor ba gsungs so//mtshams dang bcas zhes bya ba la/ bcom ldan 'das ma ni rin po che chen po nyid kyi phyir bar chad mang ste/ bar du gcod pa de dag kyang brtson 'grus brtan pa de dag la sgrub pa'i gong du yang 'byung bar yang mi 'gyur ro//gang gsol pa bcom ldan 'das zhes bya ba nas/ bar chad bya bar mi nus so zhes bya ba'i bar gyis ni mtshams dang bcas pa'i sbyor ba gsungs so/ /de ltar sbyor ba nyi shu rtsa gsum bstan nas/ yon tan brjod par bya ba de'i dbang du mdzad nas/ bdud kyi mthu bcom la sogs pa//yon tan rnam pa bcu bzhi'o/ /zhes bya ba gsungs te/ bdud kyi nus pa rnam par bcom pa la sogs pa yon tan rnam pa bcu bzhi po dag ni sbyor ba'i phan yon te/ de nas tshe dang ldan pa sha ra dwa ti'i bu zhes bya ba nas/ chos nyid kyi de bzhin te zhes bya ba'i bar ni bdud kyi mthu bcom pa'i yon tan no//sha ra dwa ti'i bu zhes bya ba nas/ sangs rgyas kyis bzung ba yin par rig par bya'o zhes bya ba'i bar ni sangs rgyas kyis dgongs pa'i yon tan no/ /gsol pa/ bcom ldan 'das zhes bya ba nas/ sangs rgyas kyis gzigs so thugs su chud do zhes bya ba'i bar gyis ni sangs rgyas kyi ye shes kyis gzigs pa'i yon tan no//sha ra dwa ti'i bu de la zhes bya ba nas/ nye bar gyur to zhes bya ba'i bar gyis ni byang chub dang nye bar gyur pa'i yon tan no/ /sha ra dwa ti'i bu gang yang zhes bya ba nas/ nam yang 'bral bar mi 'gyur ro zhes bya ba'i bar ni don chen po nyid la sogs pa'i yon tan no//sha ra dwa ti'i bu zhes bya ba nas/ mang du byung ste zhes bya ba'i bar ni yul la dpyad pa'i yon tan no/ /sha ra dwa ti'i bu zhes bya ba nas/ skye bo mang po'i don byed par 'gyur ro zhes bya ba'i bar ni dge ba'i chos thams cad yongs su rdzogs pa'i yon tan no/ /de ci'i phyir zhe na zhes bya ba nas/don rnam pa de lta bu nyid brjod par 'gyur ro zhes bya ba'i bar ni smra ba'i skyes bu'i yon tan no/ /sha ra dwa ti'i bu zhes bya ba nas/ lta ci smos zhes bya ba'i bar ni mi byed pa nyid kyi yon tan no/ /sha ra dwa ti'i bu zhes bya ba nas/ dge ba'i chos la 'god par 'gyur ro zhes bya ba'i bar ni skye bo mang po'i dge ba'i rtsa ba skye ba'i yon tan no//rigs kyi bu dang zhes bya ba nas/ lung ston par 'gyur ro zhes bya ba'i bar ni dam bcas pa'i don ji lta ba bzhin du sgrub pa'i yon tan no/ /sha ra dwa ti'i bu zhes bya ba nas/ yongs su 'dzin par 'gyur ro zhes bya ba'i bar ni 'bras bu rgya chen po yongs su 'dzin pa'i yon tan no//de ltar phyi dang nang gi dngos po zhes bya ba nas/ nyan thos rnams kyang yongs su mkhyen par 'gyur ro zhes bya ba'i bar ni sems can gyi don yongs su sgrub pa'i yon tan no/ /bcom ldan 'das gang yang zhes bya ba nas brtson 'grus nyams par mi byed do zhes bya ba'i bar ni pha rol tu phyin pa drug nges par thob pa'i yon tan no//de ltar yon tan bstan nas/ skyon brjod par bya ba de'i dbang du mdzad de/ skyon ni bcu tshan bzhir bcas pa/ /drug tu nges par rtogs par bya/ /zhes gsungs pa la skyon ni sbyor ba'i bar chad de de yang bzhi bcu rtsa drug ces bya ba'i don to//de nas tshe dang ldan pa zhes bya ba nas/ rig par bya'o zhes bya ba'i bar na yun ring po nas tshegs chen pos 'thob pa'o/ /rab 'byor gzhan yang zhes bya ba nas/ rig par bya'o zhes bya ba'i bar ni spobs pa ha cang myur bar skye ba'o//rab 'byor gzhan yang zhes bya ba'i tshig gsum gyis ni rnam par g.yeng ba dang / rgod pa dang / rnam par 'tshe ba dag ste/ lus kyi gnas ngan len to/ /rnam par shes pa ma chags pa nyid ni sems rjes su bsrung ba tsam yin gyi/ dad pas ni ma yin te/rab 'byor gzhan yang zhes bya ba'i tshig bzhis sems rnam par g.yeng ba bstan to/ /mtshan ma la chags pa nyid ni mig dang gos la sogs pa la spyod pa ste/ tshig gzhan lnga po dag gis ni rigs pa ma yin pas bskyed pa'i kha ton byed pa la sogs pa nyid do/ /de skad ces bka' stsal pa dang zhes bya ba nas/brtson par bya dgos so zhes bya ba'i bar ni phyir phyogs pa'i rgyu mtshan 'dzin pa nyid do/ /de shes rab kyi pha rol tu phyin pa zhes bya ba nas chos rnams la slob pa yin no zhes bya ba'i bar ni rgyu nyams pa'o/ /rab 'byor 'di lta ste zhes bya ba nas/ rig par bya'o zhes bya ba'i bar ni gya nom pa'i ro myang ba nyams pa'o//glang po che'i rjes tshol ba'i tshig gis ni theg pa mchog las nyams pa'o/ /rgya mtsho dang ba lang gi rjes kyi tshig gis ni ched du bya ba nyams pa'o/ /rnam par rgyal ba dang / nyi ma'i gzhal yas khang gi tshig gis ni thabs la rmongs pa'o//'khor los sgyur ba dang / mkhar gyi rgyal po'i tshig gis ni go 'phang mchog dang dman pa la rmongs pa'o/ /spros pa sna tshogs kyi tshig gis ni bcom ldan 'das ma dngos po sna tshogs su rnam par rtog pa'o/ /ngo bo nyid sna tshogs dgag pa'i tshig gis ni bcom ldan 'das ma la yi ge 'dri ba la mngon par zhen pa'o//rab 'byor gal te zhes bya ba la sogs pas ni dngos po med pa la mngon par zhen pa'o/ /tshe dang ldan pa rab 'byor gyis zhes bya ba la sogs pa ni de la yi ger mngon par zhen pa'o/ /gsol pa/ bcom ldan 'das zhes bya ba la sogs pas ni de la yi ge med par mngon par zhen pa'o//ljongs la sogs pa'i rnam par rtog pa la sogs pas ni yid la byed pa'i rnam par g.yeng ba'o/ /rnyed pa dang bkur sti la sogs pa'i tshig gis ni rnyed pa dang bkur sti la sogs pa'i ro myang ba'o/ /bdud kyis nye bar bstan pa'i mdo sde don zab mo gzhan gyi tshig gis nyan thos la sogs pa'i mdo sde gzhan dag las thabs la mkhas pa tshol ba'o//chos smra ba dang chos nyan pa dag gi snrel zhir gyur pa gang yin pa de mi mthun par rig par bya ste/ rab 'byor gzhan yang zhes bya ba'i tshig gnyis kyis ni 'dun pa dang snyom las kyi mi mthun pa'o//de'i 'og mas ni snyom las kyis yul gzhan du 'gro bar mi mthun pa'o/ /de'i 'og mas ni 'dod chen chung ba nyid kyis nyams pa'o/ /de'i 'og mas ni sbyangs pa'i yon tan dang ldan pa dang mi ldan pas nyams pa'o/ /de'i 'og mas ni dge ba dang mi dge ba ma yin par 'dod pa las nyams pa'o//de'i 'og mas ni gtong ba dang ser sna byed pa las nyams pa'o/ /de'i 'og mas ni sbyin pa dang len pa la sogs pa las nyams pa'o/ /de'i 'og mas ni mgo smos pas go ba dang rnam par spros pas go ba las nyams pa'o/ /de'i 'og mas ni mdo la sogs pa mngon par shes pa dang /mngon par mi shes pa nyid las nyams pa'o/ /de'i 'og mas ni pha rol tu phyin pa drug dang ldan pa dang mi ldan pa las nyams pa'o/ /de'i 'og mas ni thabs la mkhas pa dang mi mkhas pa las nyams pa'o/ /de nas gzungs thob pa dang ma thob pa las nyams pa'o//de nas 'dod pa dang mi 'dod pa las nyams pa'o/ /de nas sgrib pa dang bcas pa dang sgrib pa med pa las nyams pa'o/ /de nas rab 'byor gzhan yang zhes bya ba'i tshig gcig gis ni ngan song du 'gro ba la rgyab kyis phyogs pa'o/ /de nas 'khor ba la rgyab kyis phyogs pa'o//de nas rab 'byor gzhan yang zhes bya ba nas tshig gnyis kyis ni gcig pu dang 'khor dang bcas pa dpyod pa nyid las nyams pa'o/ /de nas go skabs 'byed par 'dod pa dang mi 'dod pa nyid las nyams pa'o/ /de nas zang zing cung zad tsam don du gnyer ba dang /de sbyin par mi 'dod pa nyid las nyams pa'o/ /de nas 'chi ba'i phyogs su 'gro ba dang 'gro bar mi 'dod pa las nyams pa'o/ /de nas mu ge'i phyogs su 'gro ba dang mi 'gro ba las nyams pa'o/ /de nas 'jigs pa dang bcas pa'i phyogs su 'gro ba dang mi 'gro ba las nyams pa'o//de nas rab 'byor gzhan yang zhes bya ba'i tshig gcig gis ni khyim la lta ba'i phyir zlog pa'o/ /de nas rab 'byor gzhan yang zhes bya ba'i tshig gsum gyis ni bdud bdag nyid bar chad byed pa'o/ /de nas tshig gnyis kyis ni pha rol tu phyin pa la sogs pa'i bcos ma nye bar bsgrub pa'o//de nas tshig gsum gyis ni sangs rgyas kyi cha lugs can gyi bdud dang de'i 'khor gnyi gar sprul pas dga' bar byed pa bdud kyi las skyes shing 'byung ba zil gyis mnan nas shes rab kyi pha rol tu phyin pa la mang du sbyor ba'o/ /shes rab kyi pha rol tu phyin pa la ches mang du brtson pa gang yin pa de dag phyogs bcu'i sangs rgyas thams cad kyis dgongs shing dge ba'i chos rnams mang du 'phel bar 'gyur ro zhes rab tu bstan par bya ba'i phyir/rab 'byor gzhan yang shes rab kyi pha rol tu phyin pa zhes bya ba la sogs pa nas yang dag par rdzogs pa'i byang chub las nyams par mi 'gyur ro zhes bya ba'i bar gyis gsungs so//des ni skyon bstan pa'o/ /mtshan nyid brjod par bya ba de'i dbang du mdzad nas/ gang gis mtshon de mtshan nyid du/ /shes bya de yang shes pa dang / /khyad par byed dang rnam gsum ste//mtshon bya ngo bo nyid gang yang / /zhes bya ba gsungs te/ 'dis mtshon par byed pas na bya ba byed par sgrub pa'i mtshan nyid gang yin pa de ni rnam pa gsum ste/ shes pa dang / khyad par dang / byed pa po zhes bya'o/ /mtshon par bya ba gang yin pa de yang mtshan nyid de las su sgrub pa'o//de yang ngo bo nyid ces bya ba ste/ mtshan nyid rnam pa bzhi'o/ /de la thams cad shes pa'i dbang du mdzad nas shes pa rnam pa bcu bzhi ste/ de bzhin gshegs pa 'byung ba dang / /'jig rten 'jig med bdag nyid dang / /sems can sems kyi spyod pa dang / /de bsdus pa dang phyir bltas dang //mi zad pa yi rnam pa dang / /chags bcas sogs dang rgya chen dang / /chen por gyur dang tshad med dang / /rnam shes bstan du med pa dang / /sems bltar med dang shes pa de/ /g.yo ba la sogs zhes bya dang / /de las gzhan yang de dag ni/ /de bzhin nyid kyi rnam par shes//thub pas de bzhin nyid rtogs nas/ /gzhan bstan pa zhes bya ba 'di/ /thams cad shes pa nyid skabs kyis/ /shes pa'i mtshan nyid bsdus pa yin/ /zhes bya ba gsungs te/ rnam par shes pa zhes bya ba'i tshig de dag gi bdun pa'i mtha' can du sbyar bar bya'o/ / de bzhin gshegs pa 'byung ba dang / /zhes bya ba ni bcom ldan 'das ma'i thad las de bzhin gshegs pa 'byung ba'i shes pa ste/ gang rab 'byor gyis gsol pa zhes bya ba nas/ de bzhin gshegs pa bskyed do zhes bya ba'i bar gyis de bzhin gshegs pa 'byung ba'i shes pa gsungs so//'jig rten 'jig pa med pa'i shes pa ni gang gsol pa/ bcom ldan 'das de bzhin gshegs pa la shes rab kyi pha rol tu phyin pa 'jig rten ston par gsungs so zhes bya ba'i bar gyis 'jig rten shes pa gsungs so/ /sems can gyi sems kyi spyod pa shes pa ni gang rab 'byor sems can tshad med pa zhes bya ba nas/yod pa'am dmigs pa ga la 'gyur zhes bya ba'i bar gyis sems can thams cad kyi sems kyi spyod pa shes pa'o/ /sems bsdus pa dang rnam par g.yengs pa shes pa ni gang rab 'byor gzhan yang zhes bya ba nas/ yang dag pa ji lta ba bzhin du mkhyen te zhes bya ba'i bar gyis ni sems bsdus pa dang rnam par g.yengs pa'i shes pa gsungs so//mi zad pa yi rnam pa dang / /zhes bya ba de nyid ni gang rab 'byor zhes bya ba nas/ yang dag pa ji lta ba bzhin du mkhyen to zhes bya ba'i bar gyis sems mi zad pa'i rnam par shes pa gsungs so//chags bcas sogs zhes bya ba ni chags pa dang bcas pa dang chags pa dang bral ba ste/ gang rab 'byor gzhan yang zhes bya ba nas/ gti mug dang bral ba'i sems yang dag pa ji lta ba bzhin du rab tu mkhyen to zhes bya ba'i bar gyis chags pa dang bcas pa dang / chags pa dang bral ba'i sems shes pa gsungs so/ /rgya chen dang zhes bya ba ni yangs pa ste/ gang rab 'byor gzhan yang zhes bya ba nas/ sems rgya chen po zhes bya ba'i bar gyis sems rgya chen po'i shes pa gsungs so/ /chen por gyur dang zhes bya ba ni gang rab 'byor gzhan yang zhes bya ba nas/sems yangs zhes bya ba'i bar yang dag pa ji lta ba bzhin rab tu mkhyen to zhes bya ba'i bar gyis sems chen por gyur pa shes pa gsungs so/ /tshad med dang zhes bya ba ni gang rab 'byor gzhan yang zhes bya ba nas/ sems can tshad med ces bya ba'i bar yang dag pa ji lta ba bzhin du rab tu mkhyen to zhes bya ba'i bar gyis sems chen por gyur pa shes pa gsungs so//rnam shes bstan du med pa dang / /zhes bya ba ni sems bstan du med pa ste/ gang rab 'byor gzhan yang zhes bya ba nas/ sems bstan du med ces bya bar yang dag pa ji lta ba bzhin du rab tu mkhyen to zhes bya ba'i bar gyis sems bstan du med pa shes pa gsungs so//sems bltar med ces bya ba ni gang rab 'byor gzhan yang zhes bya ba nas sems bltar med ces yang dag pa ji lta ba bzhin du rab tu mkhyen to zhes bya ba'i bar gyis sems bltar med pa shes pa gsungs so//g.yo ba la sogs zhes bya ba ni sems de 'phro ba dang bsdu ba dang bkram pa dang bcum pa shes pa'o/ /de la 'phro ba ni sgrub pa ste yod ces bya ba'o/ /bsdus pa ni dgag pa ste med ces bya ba'o/ /bkram pa ni gnyi ga ste/ yod kyang yod la med kyang med ces bya ba'o//bcum pa ni gnyi ga dgag pa ste/ yod pa yang ma yin med pa yang ma yin zhes bya ba ste/ de bzhin du rtag pa dang / mi rtag pa dang / rtag kyang rtag la mi rtag kyang mi rtag pa dang / rtag pa nyid kyang ma yin mi rtag pa nyid kyang ma yin zhes bya ba de lta bu la sogs par rig par bya'o//gang rab 'byor gzhan yang zhes bya ba nas/ bcum pa yang dag pa ji lta ba bzhin du mkhyen to zhes bya ba'i bar gyis ni sems g.yo ba la sogs pa gang gsungs pa yin no/ /de las gzhan yang de dag ni/ /de bzhin nyid kyi rnam par shes/ /zhes bya ba ni gang rab 'byor gzhan yang zhes bya ba nas/dmigs su med pa ji ltar de bzhin du mkhyen to zhes bya ba'i bar gyis ni de bzhin nyid kyis rnam par shes pa gsungs so/ /thub pas de bzhin nyid rtogs dang / /gzhan bstan pa zhes bya ba 'di/ /zhes bya ba la/ thub pas de bzhin nyid rdzogs par byang chub pa gang yin pa dang /de nas gang gzhan dag la bstan pa de dag ces bya ba ste/ gang de ltar na/ rab 'byor 'gro ba dang zhes bya ba nas/ thams cad kyi de bzhin nyid do zhes bya ba'i bar gyis gsungs so/ /de ltar na 'dir/ thams cad shes pa nyid skabs kyis//shes pa'i mtshan nyid bsdus pa yin/ /zhes bya ba ni mjug bsdu ba'o/ /lam shes pa nyid kyi dbang du mdzad nas/ stong nyid mtshan ma med bcas dang / /smon pa rnam par spangs pa dang / /skye med 'gag pa med sogs dang / /chos nyid la ni 'khrug med dang / /'du mi byed dang rnam mi rtog /rab dbye mtshan nyid med nyid la/ /lam shes nyid kyi skabs kyis ni/ /shes pa'i mtshan nyid yin par bzhed/ /ces bya ba nas/ shes pa rnam pa dgu gsungs te/ /shes pa'i mtshan nyid ces bya ba shes pa'i sgras ni bdun pa'i mtha' can dag dang sbyar bar bya ste/de dag ni shes pa'i mtshan nyid du 'gyur ba yin no zhes bya bar bzhed do/ /stong pa nyid kyi shes pa ni gang de nas zhes bya ba nas/ 'di ni stong pa nyid kyi mtshan nyid do zhes bya ba'i bar gyis stong pa nyid kyi shes pa gsungs so/ /mtshan ma med bcas zhes bya ba ni lha'i bu dag ces bya ba nas/mtshan ma med pa'i mtshan nyid do zhes bya ba'i bar gyis mtshan ma med pa'i shes pa gsungs so/ /smon pa rnam par spangs pa dang / /zhes bya ba ni lha'i bu zhes bya ba nas smon pa med pa'i mtshan nyid do zhes bya ba'i bar gyis smon pa med pa'i shes pa gsungs so/ /skye med 'gag pa med sogs dang //zhes bya ba ni lha'i bu dag ces bya ba nas/ don dam par ni ma yin no zhes bya ba'i bar gyis skye ba med pa dang 'gag pa med pa la sogs pa'i shes pa gsungs so/ /chos nyid la ni 'khrug med dang / /zhes bya ba ni gang lha'i bu dag ces bya ba nas/ shes par bya ba mi srid do zhes bya ba'i bar gyis ni chos nyid 'khrug pa med pa'i shes pa gsungs so//'du mi byed dang zhes bya ba ni gang lha'i bu zhes bya ba nas/ rnam pa thams cad mkhyen pa nyid kyi bar du 'dus byas pa ma yin no zhes bya ba'i bar gyis 'du mi byed pa'i shes pa gsungs so/ / rnam par mi rtog ces bya ba ni gang lha'i bu dag ces bya ba nas/ nam mkha'i khams ni 'dus ma byas pa'i phyir ro zhes bya ba'i bar gyis ni rnam par mi rtog pa'i shes pa gsungs so/ /rab dbye mtshan nyid med nyid dag /ces bya ba ni rab tu dbye ba dang / mtshan nyid med pa'o/ /de la rab dbye ba zhes bya ba ni gang bcom ldan 'das kyis bka' stsal pa zhes bya ba nas/ mtshan nyid rab tu dbye ba ngo mtshar che'o zhes bya ba'i bar gyis ni rab tu dbye ba shes pa gsungs so/ /de skad ces gsol pa dang zhes bya ba nas/ chags pa mi mnga' ba'i ye shes can zhes bya ba'i bar gyis ni mtshan nyid med pa nyid shes pa gsungs so//lam shes nyid kyi skabs kyis ni/ /shes pa'i mtshan nyid yin par bzhed/ /ces pa ni mjug bsdu ba'o/ /rnam pa thams cad mkhyen pa nyid kyi dbang du mdzad nas/ de ni nyid kyi chos brten nas//gnas dang gus par bya ba dang / /bla ma nyid dang mnyes pa dang / /de la mchod dang byed med dang / /kun du 'jug mkhyen gang yin dang / /ma mthong ston par mdzad pa dang / /'jig rten stong nyid rnam pa dang / /brjod dang shes mdzad mngon sum dang / /bsam mi khyab cing zhi nyid ston//'jig rten 'du shes 'gog pa la/ /rnam pa kun mkhyen tshul la ni/ /shes pa'i mtshan nyid ces bshad do/ /zhes bya ba la/ shes pa zhes bya ba ni thams cad du sbyar bar bya'o/ /nyid kyi chos la brten nas gnas pa'i shes pa ni gang de nas bcom ldan 'das zhes bya ba nas/'di la brten cing rnam par spyod do zhes bya ba'i bar gyis nyid kyi chos la brten nas gnas pa'i shes pa gsungs so/ /gus par bya ba dang / bla ma nyid dang mnyes pa dang / /de la mchod dang byed med dang / /zhes bya ba la/ de la mchod pa byed pa med pa nyid ni chos de la rim gror mdzad pa dang /bla mar mdzad pa dang / mchod par mdzad ces bya ba nas/ byas pa dgongs par blta'o zhes bya ba'i bar gyis ni gus pa la sogs pa shes pa gsungs so/ /byed pa med pa'i shes pa ni gang rab 'byor gzhan yang zhes bya ba nas/ byas pa dgongs pa'o zhes bya ba'i bar gyis byed pa med pa nyid shes pa gsungs so//kun tu 'jug mkhyen zhes bya ba ni gang rab 'byor gzhan yang zhes bya ba nas/ 'jig rten 'di ston pa zhes bya ba'i bar gyis thams cad du 'gro ba shes pa gsungs so/ /ma mthong ston par mdzad pa dang / /zhes bya ba ni gang rab 'byor gyis gsol pa zhes bya ba nas/skyed cing 'jig rten ston to zhes bya ba'i bar gyis ma mthong ba'i don ston pa'i shes pa gsungs so/ /'jig rten stong nyid rnam pa dang / /brjod dang shes mdzad mngon sum dang / /zhes bya ba ni shes pa gsum mo/ /dbang po la brten pa nyid kyi phyir mngon sum ste/mthong bar byed ces pa'i don to/ /gzhung kha cig las ni mthong bar byed pa zhes 'byung ngo / /stong pa nyid kyi rnam pas brjod par mdzad pa dang / shes par mdzad pa dang / ston par mdzad pa zhes bya ba'i don to/ /de la brjod pa ni rab 'byor gzhan yang zhes bya ba nas/ 'jig rten ston par zhes bya ba'i bar gyis ni stong pa nyid du brjod pa'i shes pa gsungs so/ /shes par mdzad pa ni rab 'byor gzhan yang zhes bya ba nas 'jig rten ston pa'o zhes bya ba'i bar gyis ni stong pa nyid shes par mdzad pa'i shes pa gsungs so/ /ston par mdzad pa ni rab 'byor gzhan yang zhes bya ba nas/'jig rten ston pa zhes bya ba'i bar gyis ni stong pa nyid du ston pa'i shes pa gsungs so/ /bsam mi khyab cing zhi nyid ston/ /zhes bya ba la/ bsam gyis mi khyab pa yang yin la zhi ba yang 'di yin zhing de'i dngos po yin pa'i phyir bsam gyis mi khyab cing zhi ba nyid do//de ston par mdzad pas na de ston pa ste/ gang rab 'byor gzhan yang zhes bya ba nas/ 'jig rten zhi zhes bya bar ston to zhes bya ba'i bar gyis ni bsam gyis mi khyab cing zhi ba nyid shes pa gsungs so/ /'jig rten 'du shes 'gog pa la/ /zhes bya ba ni gang rab 'byor gzhan yang zhes bya ba nas/'jig rten pha rol gyi 'du shes su 'gyur ba'i chos de lta bu med do zhes bya ba'i bar gyis 'jig rten gyi 'du shes 'gog pa shes pa gsungs so/ /rnam pa kun mkhyen tshul la ni/ /shes pa'i mtshan nyid ces bshad do/ /zhes bya ba ni mjug bsdu ba'o//de ltar shes pa'i mtshan nyid bstan nas khyad par gyi mtshan nyid brjod par bya ba yin pas de'i dbang du mdzad nas/ bsam mi khyab sogs khyad par gyis/ /khyad zhugs bden pa'i spyod yul can/ /skad cig ma ni bcu drug gis/ /khyad par mtshan nyid bshad pa yin//zhes bya ba smos te/ mdo las bsam gyis mi khyab pa la sogs pa 'chad par 'gyur ba'i khyad par gyi lam gzhan dag las khyad zhugs pa'i bden pa bzhi'i spyod yul can skad cig ma bcu drug dag gis khyad par gyi mtshan nyid gsungs so/ /bsam gyis mi khyab pa la sogs pa yang gang zhe na/bsam gyis mi khyab mi nyams dang / /gzhal dang bgrang las yang dag 'das/ /'phags pa kun sdud mkhas pa yis/ /rig bya thun mong min shes nyid/ /shes myur bri dang gang med dang / /sgrub dang yang dag 'grub pa dang / /dmigs pa rten dang bcas pa dang //mtha' dag pa dang yongs 'dzin dang / /ro myong med dang khyad par ni/ /bcu drug bdag nyid shes bya ste/ /gang gis lam ni gzhan dag las/ /khyad du 'phags pa khyad par lam/ /zhes bya ba ste/ bsam pa las 'das pa'i phyir bsam gyis mi khyab pa'o//mnyam pa las 'das pa'i phyir mi mnyam pa'o/ /gzhal ba las 'das pa'i phyir tshad med pa'o/ /bgrang ba las 'das pa'i phyir grangs med pa ste/ sangs rgyas nyid do/ /gzugs la sogs pa dang thams cad shes pa nyid kyi mthar thug pa yang de bzhin no/ / khyad par bzhi po de dag nyid chen po nyid dang mi mnyam pa nyid dang mnyam pa nyid de/ gang gsol pa/ bcom ldan 'das zhes bya ba nas/ sangs rgyas su 'gyur ro zhes lung bstan to zhes bya ba'i bar gyis gsungs pa de'i phyir go rims bzhin du khyad par bzhi po de dag gis khyad zhugs pa'i sdug bsngal gyi bden pa'i skad cig ma bzhi dag go//'phags pa kun sdud dang zhes bya ba ni 'phags pa'i chos thams cad sdud pa ni bcom ldan 'das ma ste/ de skad du 'di ni gzugs nas rnam pa thams cad mkhyen pa'i bar la yongs su 'dzin pa med pa dang mngon par chags pa med par nye bar gnas so zhes pa dang /de nas tshe dang ldan pa rab 'byor zhes bya ba nas chags par mi bya/ yongs su gzung bar mi bya zhes bya ba'i bar gyis gang gsungs te/ 'phags pa thams cad sdud pa'i khyad par gyis ni kun 'byung gi skad cig ma dang po'o/ /mkhas pa yis/rig bya thun mong min shes nyid/ /ces bya ba la/ mkhas pas rig par bya ba dang / thun mong ma yin pa shes pa nyid do/ /de la dang po ni de nas 'dod pa na spyod pa dang zhes bya ba nas/ dge ba'i rtsa ba bskyed pa'o zhes bya ba'i bar gyis gang gsungs te/ mkhas pa'i shes pas rig par bya ba'i khyad par gyi skad cig ma gnyis po 'o//nyan thos la sogs pa dag dang thun mong ma yin pa yang de yin la shes pa yang yin pa de'i dngos po ni thun mong ma yin pa shes pa nyid de/ /bcom ldan 'das gal te zhes bya ba nas/ bzod par 'dus so zhes bya ba'i bar gyis gang gsungs pa ni thun mong ma yin pa'i shes pa'i khyad par gyis skad cig ma gsum pa'o//shes myur bri dang gang med dang / /zhes bya ba la/ shes myur nyid ni mngon par shes pa myur ba nyid de/ lha'i bu dag ces bya ba nas/ rgya cher bstan to zhes bya ba'i bar gyis gang gsungs pa ste/ mngon par shes pa myur ba'i khyad par gyis kun 'byung gi bden pa'i skad cig ma bzhi pa'o/ /bri ba dang gang ba med pa ni bri ba dang gang ba med pa ste/ de nas 'dod pa na spyod pa'i zhes bya ba nas/ 'phel ba dang 'grib par yang mi shes so zhes bya ba'i bar gyis gang gsungs pa ni bri ba med pa dang 'phel ba med pa'i khyad par gyis 'gog pa'i bden pa'i skad cig ma dang po'o//sgrub dang yang dag 'grub pa dang / /zhes bya ba la sgrub pa ni bcom ldan 'das ma mnyan pa dang bcas pa'i mos pa la sogs pas nan tan du byed pa ste/ de nas 'dod pa na spyod pa zhes bya bas so/ thos ma thag tu mos par 'gyur//zhes bya ba'i bar gyis gang gsungs pa ni sgrub pa'i khyad par gyis skad cig ma gnyis pa'i 'o/ /yang dag par 'grub pa ni 'bras bu ste/ thos ma thag tu mos pa la sogs pa de dag yang dag par rdzogs pa'i byang chub tu 'gyur ba'o/ /yang 'di thos nas nem nur dang rmongs pa dang zhum pa gang yin pa de dag ni byang chub dman pa'o//gang gsol pa zhes bya ba nas/ de las gcig la gnas par 'gyur bar rig par bya'o zhes bya ba'i bar gyis yang dag par 'grub pa'i khyad par gyis skad cig ma gsum pa'i 'o/ /dmigs pa zhes bya ba ni ji ltar rgya mtsho chen por gru zhig pa'i mis ro dang shing dang shing leb la sogs pa la 'jus na de ni bar ma dor dus ma byas par skam la gnas par 'gyur ba/de bzhin du bcom ldan 'das ma bsam gtan gyi pha rol tu phyin pa la sogs pa nas/ rnam pa thams cad mkhyen pa nyid kyi bar la 'jug pa gang yin pa de dag ni bar ma dor dman pa'i byang chub mngon sum du ma byas par yang dag par rdzogs pa'i byang chub tu mngon par rdzogs par 'tshang rgya bar 'gyur te/gang rab 'byor 'di lta ste zhes bya ba nas/ mngon par rdzogs par 'tshang rgya bar 'gyur ro zhes bya ba'i bar gyis gsungs pa ni dmigs pa'i khyad par gyis 'gog pa'i skad cig ma bzhi pa'o//rten dang bcas pa zhes bya ba ni rten dang lhan cig pa ni rten dang bcas pa ste/ mtha' dag pa la ltos nas bcas pa'i sgra ma ning gi rtags nyid yin no/ /lam gyi rten ni byang chub sems dpa' ste/ de yang shes rab kyi pha rol tu phyin pa dang thabs la mkhas pa la sogs pas yongs su smin pa'i rim gyis yang dag par rdzogs pa'i byang chub mngon par rdzogs par 'tshang rgya bar 'gyur gyi bar ma dor dman pa'i byang chub tu mi ltung ste/dper na bum pa legs par tshos par chu blugs te/ khyim du song na bar ma dor 'jig cing sa la ltung bar mi 'gyur ba lta bu'o//rab 'byor 'di lta ste dper na zhes bya ba nas/ byang chub tu mngon par rdzogs par 'tshang rgya bar 'gyur ro zhes bya ba'i bar gyis gang gsungs pa ni rten gyi khyad par gyis lam gyi bden pa'i skad cig ma dang po'o/ /mtha' dag pa zhes bya ba ni shes rab dang thabs la mkhas pa la sogs pa lam gyi khyad par gyi tshogs nyid de/gang gi phyir des yang dag par rdzogs pa'i byang chub tu mngon par rdzogs par 'tshang rgya bar 'gyur gyi/ bar ma dor byang chub dman par ni ma yin te/ dper na rgya mtshor 'jug pa'i gru legs par bcos shing legs par sbyangs nas mthun pa'i rlung dang chu la btang na mngon par 'dod pa'i gnas su phyin par 'gyur gyi bar ma dor zhig par mi 'gyur ro//rab 'byor 'di lta ste dper na zhes bya ba nas/ rang sangs rgyas kyi sar mi ltung ngo zhes bya ba'i bar gyis gang gsungs pa ni mtha' dag gi khyad par te/ skad cig ma gnyis pa'i'o/ /yongs su 'dzin pa dang zhes bya ba ni/shes rab kyi pha rol tu phyin pa dang thabs la mkhas pa la sogs pas yang dag par yongs su bzung ba'i byang chub sems dpa' ni nges par yang dag par rdzogs pa'i byang chub tu rtogs par 'gyur te/ dper na skyes bu rgan po zhig skyes bu stobs dang ldan pa gnyis kyis g.yas g.yon nas bzung na mngon par 'dod pa'i gnas su phyin pa lta bu'o//rab 'byor 'di lta ste dper na zhes bya ba nas rnam pa thams cad mkhyen pa nyid du 'byung bar 'gyur ro zhes bya ba'i bar gyis gang gsungs pa ni yongs su bzung ba'i khyad par gyis skad cig ma gsum pa'o/ /ro myong med dang zhes bya ba ni 'di la byang chub sems dpa'i dge ba'i rtsa ba thams cad bla na med pa'i byang chub tu yongs su sngo bar byed kyi yang dag par rdzogs pa'i byang chub tu gzugs nas rnam pa thams cad mkhyen pa nyid kyi bar la rtog par mi byed pa ste/dpyod par mi byed ces bya ba'i don to/ /gzugs nas rnam pa thams cad mkhyen pa nyid kyi bar du 'dod pa med pa ste/gang tshe dang ldan pa rab 'byor zhes bya ba nas rigs kyi bu chos thams cad ni ngo bo nyid kyis stong ngo zhes bya ba'i bar gyis ni ro myang ba med pa'i khyad par gyis lam gyi bden pa'i skad cig ma bzhi pa'o/ /khyad par ni zhes bya ba la sogs pas ni khyad par gyi sgra'i don bstan pa'i mjug sdud pa'o//de ltar khyad par gyi mtshan nyid bstan nas/ byed pa'i mtshan nyid brjod par bya ba de la/ phan dang bde dang skyob pa dang / /mi rnams kyi ni skyabs dag dang / /gnas dang dpung gnyen gling dang ni/ /yongs 'dren pa zhes bya ba dang / /lhun gyis grub dang theg gsum gyi//'bras bu mngon sum byed pa'i bdag /tha ma 'gro ba'i mdzad pa ste/ /'di ni byed pa'i mtshan nyid yin/ /zhes bya ba gsungs te/ mi rnams kyi ni zhes bya ba thams cad la sbyar bar bya'o/ /phan pa dang bde ba la sogs pa'i sgras ni de'i byed pa bstan to/ /de la 'jig rten la phan pa dang bde ba'i phyir ni byang chub la zhugs par 'gyur la/byang chub tu mngon par rdzogs par sangs rgyas nas ni 'jig rten gyi skyob pa dang skyabs la sogs par 'gyur ro/ /phan pa zhes bya ba ni sems can dag 'gro ba lnga las thar bar byas nas mya ngan las 'das pa la so sor 'jog par byed pa ste/gang rab 'byor zhes bya ba nas/ 'jig rten la phan pa'i phyir yang dag par zhugs pa yin no zhes bya ba'i bar gyis phan pa'i byed pa gsungs so/ /bde ba zhes bya ba ni sdug bsngal thams cad las thar par byas nas mya ngan las 'das pa la so sor 'god pa ste/ gang rab 'byor ji ltar na zhes bya ba nas/bde ba'i phyir yang dag par zhugs pa yin no zhes bya ba'i bar gyis bde ba'i byed pa gsungs so/ /skyob pa zhes bya ba ni 'khor ba na yod pa'i sdug bsngal dag spang ba'i phyir chos ston pa ste/ gang rab 'byor ji ltar na zhes bya ba nas/ 'jig rten gyi mgon byed pa yin no zhes bya ba'i bar gyis skyob pa'i byed pa gsungs so//skyabs dag ces bya ba ni sems can dag gi skye ba dang rga ba dang 'chi ba la sogs pa'o/ /chos de dag las yongs su thar par byed pa ste/ gang rab 'byor ji ltar na zhes bya ba nas/ skyabs su gyur pa yin no zhes bya ba'i bar gyis skyabs kyi byed pa gsungs so//gnas zhes bya ba ni chos thams cad 'dre ba med par chos ston pa ste/ gang rab 'byor ji ltar na zhes bya ba nas/ 'dre ba med par chos ston to zhes bya ba'i bar gyis gnas kyi byed pa gsungs so/ /dpung gnyen zhes bya ba ni mthar phyin pa'i byed pa ste/ gzugs kyi pha rol gang yin pa de ni gzugs ma yin pa nas/rnam pa thams cad mkhyen pa'i pha rol gang yin pa de ni rnam pa thams cad mkhyen pa ma yin la/ pha rol na rnam par rtog pa gang yang ma mchis so zhes bya ba'i bar gyis de ltar chos ston pa'i phyir ro/ /gang rab 'byor ji ltar na zhes bya ba nas/ dpung gnyen du 'gyur ba yin no zhes bya ba'i bar gyis ni dpung gnyen gyi byed pa gsungs so//gling zhes bya ba ni chu bo dang rgya mtsho'i phyogs chus yongs su bcad pa gling yin pa de bzhin du chos thams cad kyi sngon gyi mtha' dang phyi ma'i mtha' yongs su chad pa dag ni gling ste/ 'di ltar de dag gi stong pa nyid dang /dmigs su med pa nas/ mya ngan las 'das pa'i bar de thob par byed pa ni gling yin no/ /ma rig pa'i sgo nga'i sbubs kyis dkris pa dag gi mun pa de snang bar byed pa gang yin pa de yang gling yin te/ snang ba dang chos mthun pa'i phyir ro/ /gzhan yang gling thob par byed pa'i phyir gling ste/ded dpon no/ /de'i las kyang gling yin te/ 'di ltar mya ngan las 'das pa'i rin po che'i gling du 'dren pa de bas na gling ni rnam pa gsum yin no/ /gang rab 'byor ji ltar na zhes bya ba nas/ ded dpon du gyur pa yin no zhes bya ba'i bar gyis gling gi byed pa gsungs so/ /yongs su 'dren pa zhes bya ba dang zhes bya ba ni snying rje chen po bskyed nas gzugs nas dgra bcom pa'i bar du skye ba med pa dang /'gag pa med pa dang / kun nas nyon mongs pa med pa dang / rnam par byang ba med pa'i chos ston pa ste/ gang rab 'byor ji ltar na zhes bya ba nas/ yongs su 'dren par 'gyur ba yin no zhes bya ba'i bar gyis yongs su 'dren pa gsungs so//'bad pa ni rtsol ba ste/ 'gro ba dang 'ong ba'i g.yo 'gul lo/ /de 'gags pa'i phyir lhun gyis grub pa ste/ gang rab 'byor de ltar na zhes bya ba nas mngon par 'du bya ba med pa la 'gro ba dang 'ong ba mi dmigs so zhes bya ba'i bar gyis lhun gyis grub pa'i byed pa gsungs so//theg pa gsum gyis/ 'bras bu mngon sum byed pa'i bdag /ces bya ba la/ chos thams cad ces bya ba kun nas nyon mongs pa can dang rnam par byang ba de dag go rims ji lta ba bzhin du 'gro ba dang 'ong ba bkag pa ni 'bras bu mngon sum du byed pa'o/ /rmi lam la sogs pa'i tshig gis ni rang rgyal ba'i theg pa dang /sdug bsngal du ma la sogs pa'i tshig gis ni nyan thos kyi theg pa dang / de bzhin nyid la sogs pa'i tshig gis ni byang chub sems dpa'i theg pa ste/ gang rab 'byor chos thams cad kyi mi skye ba zhes bya ba nas/ g.yo ba med de/ 'gro ba'am 'ong ba mi dmigs so zhes bya ba'i bar gyis theg pa gsum gyi 'bras bu mngon sum du byed pa gang yin pa de'i byed pa gsungs so//tha ma 'gro ba'i mdzad pa ste/ /zhes bya ba la/ 'gro ba ni 'bras bu thob pa'o/ /de nyid byed pa ste/ gang rab 'byor chos thams cad ni gzugs kyi ngang tshul can zhes bya ba nas/'di la mos par 'gyur ro zhes bya ba'i bar gyis gang gsungs pa'o/ /'di yang 'gro ba dgag pa ni mi dmigs pa'i tshul gyis thob par bya ba'i don du zhes bya ba ni 'gro ba'i byed pa yin no/ /'di ni byed pa'i mtshan nyid yin/ /zhes bya ba ni mjug bsdu ba'o//ngo bo nyid kyi mtshan nyid shes par bya ba de'i phyir/ nyon mongs rtags dang mtshan ma dang / /mi mthun phyogs dang gnyen po dag /dben dang dka' dang nges pa dang / /ched du bya ba mi dmigs dang / /mngon par zhen pa bkag pa dang / /dmigs pa zhes bya gang yin dang / / mi mthun thogs pa med dang de/ /gzhi med skye med 'gro med dang / /de bzhin nyid ni mi dmigs dang / /ngo bo nyid bcu drug bdag nyid/ /mtshan gzhi lta bur mtshon pas na/ /mtshan nyid bzhi par bzhed pa yin/ /zhes gsungs te/ nyon mongs pa dag gis dben pa ni gsol pa/ bcom ldan 'das zhes bya ba nas/dben pa'i rang bzhin du 'gyur ro zhes bya ba'i bar gyis nyon mongs pa'i dben pa'i ngo bo nyid gsungs so/ /rtags ni nyon mongs pa'i rtags te/ de dag gis dben pa ni gang rab 'byor zhes bya ba nas tshul gyis dben pa'i rang bzhin can du 'gyur ro zhes bya ba'i bar gyis nyon mongs pa'i rtags dben pa'i ngo bo nyid gsungs so//nyon mongs pa'i mtshan ma ni yongs su 'dzin pa la sogs pa ste/ de dag gis dben pa ni gang rab 'byor zhes bya ba nas/ mtshan ma dben pa'i rang bzhin du 'byung ngo zhes bya ba'i bar gyis nyon mongs pa'i mtshan mas dben pa'i ngo bo nyid gsungs so//mi mthun pa'i phyogs dang gnyen po ni 'dod chags la sogs pa dang 'dod chags med pa la sogs pa yin la/ de dag gis dben pa ste/ gang rab 'byor byang chub sems dpa' sems dpa' chen po de dag ni 'dod chags dang 'dod chags med pas dben pa zhes bya ba nas/ ngang tshul can du 'gyur ro zhes bya ba'i bar gyis mi mthun pa'i phyogs dang gnyen po'i dben pa gsungs so//dka' dang zhes bya ba ni gang gsol pa bcom ldan 'das zhes bya ba nas de dag ni dka' ba bgyid pa'o zhes bya ba'i bar gyis dka' ba'i ngo bo nyid gsungs so/ /nges pa zhes bya ba ni nges pa nyid de/ rab 'byor zhes bya ba nas/go cha 'tshal ba ma lags so zhes bya ba'i bar gyis nges pa'i ngo bo nyid gsungs so/ /sems can thams cad yongs su mya ngan las bzla ba dang bdag nyid rnam pa thams cad mkhyen pa nyid kyi phyir ched du bya ba'i go cha ste/ bcom ldan 'das kyis bka' stsal pa zhes bya ba nas/ go cha bgos so zhes bya ba'i bar gyis ched du bya ba gsungs so//mi dmigs dang zhes bya ba ni gsol pa zhes bya ba nas/ bsgom pa'o zhes bya ba'i bar gyis mi dmigs pa gsungs so/ /mngon par zhen pa bkag pa zhes bya ba ni mngon par zhen pa med pa ste/ de nas yang zhes bya ba nas de bzhin nyid du nan tan du byed pa'i phyir ro zhes bya ba'i bar gyis mngon par zhen pa med pa gsungs so//dmigs pa zhes bya gang yin dang / /zhes bya ba ni dmigs pa ni chos thams cad kyi de bzhin nyid do/ /de yang dbyer med pa ste/ gang gi phyir de bzhin nyid ni sangs rgyas sam rnam pa thams cad mkhyen pa'i de bzhin nyid de//gang gsol pa zhes bya ba nas/ chos rnams kyi zab pa nyid do zhes bya ba'i bar gyis dmigs pa'i ngo bo nyid gsungs so/ /mi mthun zhes bya ba ni 'jig rten thams cad kyis yid ches par dka' ba ste/ chos de dag gzung ba'i phyir ram mi gzung ba'i phyir bstan pa ma yin no/ /gzung ba ni 'jig rten pa bdag dang bdag gi zhes spyod pa ste/lha'i bu dag ces bya ba nas/ bsgom par mi nus so zhes bya ba'i bar gyis 'jig rten thams cad kyis yid ches par dka' ba gsungs so/ /thogs pa med dang zhes bya ba ni gzugs nas rnam pa thams cad mkhyen pa nyid kyi bar du thogs pa med pa ste/de nas tshe dang ldan pa zhes bya ba nas/ skye ba ma mchis pa'o zhes bya ba'i bar gyis thogs pa med pa'i ngo bo nyid gsungs so/ /gzhi med 'gro med skye med dang / /zhes bya ba la/ de zhes bya ba ni bstan bzhin pa'i chos te/ gzhi med pa dang 'gro ba med pa dang skye ba med pa'o/ /'dir gzugs la sogs la rten med pa'i phyir gnas pa med pa ste/gang chos 'di ni zhes bya ba nas/ rten ma mchis pa'o zhes bya ba'i bar gyis ni gzhi med pa'i ngo bo nyid gsungs so/ /'di la 'gro ba yod pa ma yin pas 'gro ba med pa ste/ de ltar de bzhin gshegs pa'i de bzhin nyid 'gro ba med pa 'ong ba med pa de bzhin du rab 'byor gyi yang ste/de nas 'dod pa na spyod pa zhes bya ba nas/ tshig tu brjod do zhes bya ba'i bar gyis 'gro ba med pa'i ngo bo nyid gsungs so/ /'di la skye ba yod pa ma yin pas na skye ba med pa ste/ gang rjes su skye ba dang gang gi rjes su skye ba dang / gang gis rjes su skye ba de dag med pa'i phyir ro//de nas gnas brtan zhes bya ba nas/ mi dmigs so zhes bya ba'i bar gyis skye ba med pa'i ngo bo nyid gsungs so/ /de bzhin nyid ni mi dmigs dang / /zhes bya ba ni gzugs la sogs pa dmigs su med pa nyid yin na gzugs la sogs pa'i de bzhin nyid dmigs pa lta yang ga la 'gyur/de nas tshe dang ldan pa zhes bya ba nas/ rang sangs rgyas kyi sar ltung ngo zhes bya ba'i bar gyis de bzhin nyid mi dmigs pa'i ngo bo nyid gsungs pa'o/ /ngo bo nyid bcu drug bdag nyid ces bya ba ni bshad ma thag pa'i rnam pa bcu drug ni ngo bo nyid do/ /de ni mtshan nyid bzhi pa ste/byed pa sgrub pa'i mtshan nyid gsum po dag las lhag pa'i phyir ro/ /ji ltar 'di mtshan nyid du bzhed ce na/ mtshan gzhi ru ni mtshon pas na/ /zhes bya ba smos te/ gang gi phyir 'di mtshan gzhi ste/ mtshan nyid dang ldan zhing 'di mtshon par bya ba yin pas mtshan gzhi'o/ /de ni ngo bo nyid kyi mtshan nyid bstan pa'o//thar pa'i cha dang mthun pa brjod par bya ba yin pas de bas na/ mtshan med rab tu sbyin la sogs/ /yang dag sgrub la mkhas pa ni/ /rnam pa thams cad rtogs 'di la/ /thar pa'i cha dang mthun par 'dod/ /sangs rgyas sogs dmigs dad pa dang / /sbyin sogs spyod yul brtson 'grus dang //bsam pa phun tshogs dran pa dang / /rnam par mi rtog ting 'dzin dang / /chos rnams rnam pa thams cad du/ /shes pa'i shes rab dang rnam lnga/ /rdzogs pa'i byang chub rnon po yis/ /rtogs sla rtul pos rtogs dkar bzhed/ /ces bya ba gsungs te/ tshigs su bcad pa dang pos ni mtshan nyid dang cig shos dag gis ni rab tu dbye ba'o//sbyin pa gtong ba nas rnam pa thams cad mkhyen pa nyid kyi bar du bsgom pa 'di la mtshan mar mi byed cing yang dag par grub pa'i tshogs la mkhas pa gang yin pa de ni skabs 'dir thar pa'i cha dang mthun par 'dod do zhes bya ba ni mtshan nyid do//rnam pa lnga zhes bya ba ni de'i rab tu dbye ba lnga kho na ste/ dad pa dang brtson 'grus dang dran pa dang ting nge 'dzin dang shes rab bo/ /de la sangs rgyas la sogs pa la dmigs pa ni dad pa ste/ gang sha ra dwa ti'i bu zhes bya ba nas/ rang sangs rgyas kyi sa la gnas par mi 'gyur bar rig par bya'o zhes bya ba'i bar gyis dad pa'i mtshan nyid kyi thar pa'i cha dang mthun pa gsungs pa'o//sbyin sogs spyod yul brtson 'grus dang / /zhes bya ba ni ci'i phyir zhe na zhes bya ba nas/ thabs mkhas pa'o zhes bya ba'i bar gyis brtson 'grus kyi bdag nyid gang gsungs pa'o/ /bsam pa phun tshogs dran pa dang //zhes bya ba ni gsol pa/ bcom ldan 'das zhes bya ba nas/ byang chub ni the tshom ma mchis so zhes bya ba'i bar gyis dran pa'i bdag nyid gang gsungs pa'o/ /rnam par mi rtog ting 'dzin dang / /zhes bya ba la/ rnam par mi rtog pa ni kha phyir bltas pa nyid kyi phyir te/ de ci'i slad du zhe na zhes bya ba nas/rnam pa thams cad mkhyen pa nyid kyi bar la spyad par bgyi'o zhes bya ba'i bar gyis ting nge 'dzin gyi bdag nyid gang gsungs pa'o/ /chos rnams rnam pa thams cad du/ /shes pa'i shes rab ces bya ba ni/ de nas 'dod pa na spyod pa dang zhes bya ba nas/ chos thams cad shin tu rnam par dag pa'i phyir ro zhes bya ba'i bar gyis shes rab kyi bdag nyid gang gsungs pa'o//rdzogs pa'i byang chub rnon po yis/ /rtogs sla zhes bya ba ni thob par sla ba ste/ de nas tshe dang ldan pa zhes bya ba nas/ rnam pa thams cad mkhyen pa nyid kyi rang bzhin gyis stong ngo zhes bya ba'i bar gyis rnon po'i thar pa'i cha dang mthun pa gang gsungs pa yin no//rtul pos rtogs dkar bzhed ces bya ba ni de nas tshe dang ldan pa sha ra dwa ti'i bu zhes bya ba nas/ byang chub sems dpa' sems dpa' chen po de 'byung bar 'gyur ro zhes bya ba'i bar gyis gang gsungs pa ste/ 'dir yang bden pa'i tshul bzhin du zhes bya ba ni don dam pa nyid du zhes bya ba'i don to//kun rdzob kyi bden pa la brten nas de ltar byang chub sems dpa' sems dpa' chen pos chos thams cad kyi de bzhin nyid kyi zhes bya ba la sogs pa dang / bla na med pa yang dag par rdzogs pa'i byang chub tu nges par thar pa 'byung bar 'gyur ro zhes bya ba'i tshig gi don khong du chud pa na skrag pa la sogs pa dang bral ba ni rnon po'i thar pa'i cha dang mthun pa yin la/skrag pa la sogs pa bshad pa ni rtul po yin no zhes bya ba ni rtul po'i thar pa'i cha dang mthun pa yin no/ /de ltar thar pa'i cha dang mthun pa bstan nas/ nges par 'byed pa'i cha dang mthun pa brjod par bya ba'i phyir/dro ba rnams kyi dmigs pa 'dir/ /sems can thams cad yin par bsngags/ /de dag nyid la sems mnyam sogs/ /rnam pa dag ni bcur bshad do/ /zhes bya ba gsungs te/ 'dir zhes bya ba ni rnam pa kun mngon par rdzogs par rtogs pa la'o//dro ba rnams kyi dmigs pa ni sems can thams cad do/ /rnam pa bcu ni sems can thams cad la sems mnyam pa la sogs pa ste/ sems mnyam pa dang / byams pa'i sems dang / snying rje'i sems dang / nga rgyal bcom pa'i sems dang / g.yo ba med pa'i sems dang / phan pa'i sems dang / khong khro ba med pa'i sems dang / mi 'tshe ba'i sems dang / ma dang bu mo dang sring mo'i sems dang / pha dang spun zla dang bu'i sems zhes bya ba'o/ /de nas tshe dang ldan pa rab 'byor gyis gsol pa zhes bya ba nas/ dmigs par bya'o zhes bya ba'i bar gyis dro bar gyur pa gang gsungs pa'o//bdag nyid sdig pa las zlog cing / /sbyin la sogs pa gnas dang gzhan/ /de dag la ni 'god pa dang / /bsngags pa brjod dang mthun pa nyid/ /rtser 'gyur zhes bya ba la/ bdag nyid mi dge ba bcu las ldog pa dang / sbyin pa la sogs pa dang / rten cing 'brel par 'byung ba la mnyam par 'jog pa'i bar la gnas pa dang /gzhan dag ldog pa dang gnas pa de dag la 'god pa dang / de dag gi bsngags pa brjod pa dang / rjes su mthun pa nyid ni rtse mo yin te/ /gang bdag gis kyang zhes bya ba nas mi dmigs pa'i tshul gyis gnas par bya'o zhes bya ba'i bar gyis rtse mor gyur pa gsungs pa'o//de bzhin bzod pa ni/ /rang gzhan rten can bden shes pa/ /zhes bya ba ni rang dang gzhan dag gi bden pa'i shes pa skyes pa ni bzod pa ste/ gang bdag gis kyang sdug bsngal shes par bya zhes bya ba nas/ mi dmigs pa'i tshul gyis gnas pa'o zhes bya ba'i bar gyis gsungs pa ni bzod par bzhed pa'o//chos mchog de bzhin sems can rnams/ /smin byed sogs kyis shes par bya/ /zhes bya ba ni rang dang gzhan la brten pas sems can yongs su smin pa la sogs pa chos mchog yin te/ gang bdag gis kyang sems can rnams yongs su smin par bya zhes bya ba nas/mi skye ba'i chos la bzod pa thob par gyur to zhes bya ba'i bar gyis ni chos kyi mchog tu gyur pa gsungs so/ /de ltar nges par 'byed pa'i cha dang mthun pa bstan nas phyir mi ldog pa'i dge 'dun brjod par bya ba yin pa de'i phyir/ nges 'byed yan lag nas bzung ste/ mthong dang goms pa'i lam dag la/ /byang chub sems dpa' gang dag gnas/ /de 'dir phyir mi ldog pa'i tshogs/ /zhes gsungs te nges par 'byed pa'i cha dang mthun pa dag dang / mthong ba'i lam dang bsgom pa'i lam dag gi byang chub sems dpa' gang yin pa de ni theg pa chen po 'dir/phyir mi ldog pa'i dge 'dun yin te/ gang de skad ces bka' stsal pa dang zhes bya ba nas/ rig par bgyi'o zhes bya ba'i bar gyis gsungs te/ 'dir yang so so'i skye bo'i sa gang yin pa nas/ de bzhin gshegs pa'i sa'i bar gang yin pa de dag thams cad ni de bzhin nyid dang tha mi dad par mthong ste/de bzhin nyid la re res yin gyi/ thams cad kyis ma yin na de bzhin nyid ma yin no/ /lhag ma ni go sla'o/ /de ni phyir mi ldog pa'i mtshan nyid do/ /gzugs la sogs las ldog sogs rtags/ /rnam pa nyi shu brjod pa yis/ /nges 'byed yan lag la gnas pa'i//phyir mi ldog pa'i mtshan nyid 'di'o/ /zhes bya ba gsungs te/ nges par 'byed pa'i cha dang mthun pa la gnas pa'i phyir mi ldog pa nyid du shes pa 'di'i rtags nyi shu ste/ gzugs la sogs pa las ldog pa zhes bya ba de lta bu la sogs pa'o/ /nyi shu gang zhe na/ gzugs la sogs las bzlog pa dang //the tshom mi dal zad pa dang / /bdag nyid dge ba la gnas shing / /gzhan dag de la 'god pa dang / /gzhan gyi rten can sbyin sogs dang / /zab mo'i don la'ang som nyi med/ /byams lus sogs dang sgrib pa ni/ /rnam pa lnga dang mi 'grogs dang / /bag la nyal kun 'joms pa dang //dran pa dang ni shes bzhin dang / /gos la sogs pa gtsang ba dang / /lus la srin bu rnams mi 'byung / /gya gyu med sems sbyangs pa ni/ /len dang ser sna med sogs dang / /chos nyid ldan par rtogs pa dang / /sems can don du dmyal tshol dang //gzhan gyis bkri bar mi btub dang / /lam gzhan nye bar ston bdud la/ /bdud ces bya bar rtogs pa dang / /sangs rgyas dgyes pa'i dpyad pa ste/ /rtags ni nyi shu de dag gis/ /drod dang rtse mo bzod bcas dang / /chos mchog rnams la gnas pa ni/ /rdzogs pa'i byang chub las mi ldog /ces bya ba gsungs te/ gzugs la sogs pa las ldog pa ni dmigs pa las ldog pa ste/ de dag ngo bo nyid med pa'i phyir ro/ /gang gsol pa bcom ldan 'das zhes bya ba nas/ rnam pa thams cad mkhyen pa nyid kyi bar gyi ngo bo nyid med do zhes bya ba'i bar gyis gsungs te/nges par 'byed pa'i cha dang mthun pa'i phyir mi ldog pa'i rtags dang po'o/ /rtags gnyis pa la sogs pa'i mdo ni re re zhing rab 'byor gzhan yang zhes bya ba'i tshig nas/ mthar rig par bya'o zhes bya ba dang / rtags bcu dgu pa ni de ni gnas ma yin no snyam na zhes bya ba de yan chad do//the tshom mi dal zad pa dang / /ces bya ba ni the tshom zad pa dang / mi khom pa zad pa'o/ /de la the tshom ni bden pa dang / dkon mchog la yid gnyis te/ de zad pa'i zhes bya ba ni de dag nyid kyi rtags gnyis pa'o/ /log pa'i lta ba la sogs pa ni mi khom pa yin te/ de dag zad pa zhes bya ba ni de dag nyid la rtags gsum pa'o//bdag nyid dge ba la gnas la/ /gzhan dag de la 'god pa zhes bya ba ni de dag nyid la rtags bzhi pa'o/ /gzhan gyi rten can sbyin sogs dang / /zhes bya ba ni sems can thams cad kyi ched du sbyin pa la sogs pa'i spyod pa de ni de dag nyid la rtags lnga pa'o//zab mo'i don la som nyi med/ /ces bya ba ni de dag nyid la rtags drug pa'o/ /byams lus sogs zhes bya ba ni lus la sogs pa'i las de ni de dag nyid la rtags bdun pa'o/ /sgrib pa ni/ rnam pa lnga dang mi 'grogs dang / /zhes bya ba la/ mdo ji lta ba bzhin du sgrib pa lnga dang mi 'grogs pa de ni de dag la rtags brgyad pa'o/ /bag la nyal kun 'joms pa dang / /zhes bya ba ni de dag nyid la rtags dgu pa'o/ /dran pa dang ni shes bzhin dang / /zhes bya ba ni dran pa dang bcas pa'i shes bzhin de ni de dag la rtags bcu pa'o/ /gos la sogs pa gtsang ba dang //zhes bya ba ni de dag nyid la rtags bcu gcig pa'o/ /lus la srin bu rnams mi 'byung / /zhes bya ba ni de dag nyid la rtags bcu gnyis pa'o/ /gya gyu med sems zhes bya ba la lus dang sems dang ngag gya gyu med pa zhes bya ba de ni de dag la rtags bcu gsum pa'o//sbyangs pa ni len dang zhes bya ba ni sbyangs pa'i yon tan yang dag par blangs pa ste/ sbyangs pa'i yon tan bcu gnyis ni phyag dar khrod pa nyid dang / chos gos gsum pa nyid dang / phying pa pa nyid dang / bsod snyoms pa nyid dang / stan gcig pa nyid dang / zas phyis mi len pa nyid dang //dgon pa pa nyid dang / shing drung pa nyid dang / bla gab med pa nyid dang / dur khrod pa nyid dang / tsog pu pa nyid dang / gzhi ji bzhin pa nyid ces bya ba ni de dag la rtags bcu bzhi'o/ /ser sna med sogs dang zhes bya ba la/ pha rol tu phyin pa drug gi mi mthun pa'i phyogs ser sna la sogs pa drug po dang phrag dog ste/de med par ni ser sna la sogs pa med pa ste/ de ni de dag nyid la rtags bco lnga pa'o/ /chos nyid ldan par rtogs pa dang / /sems can don du dmyal tshol dang / /zhes bya ba la/ gzhan las gang chos ci thos kyang zhes bya ba ni sangs rgyas med do zhes bya ba la sogs pa de thams cad kyang chos nyid du rig pas khong du chud pa'o//'on te bdud kyis phyir mi ldog pa dag pa la dmyal ba'i las bstan pa gang yin pa de ji ltar rigs she na/ de yang de dag ni 'jig rten gyi don du dmyal ba tshol ba yin te/ dmyal bar 'gro ba zhes bya ba de ni de dag nyid la rtags bcu drug pa'o//gzhan gyis bkri bar mi btub dang / /zhes bya ba ni de dag nyid la rtags bcu bdun pa'o/ /lam gzhan nye bar ston bdud la/ /bdud ces bya bar rtogs pa dang / /zhes bya ba la/ gzhan dang lam ni lam gzhan te/ /lam la ltos na gzhan nyid skabs kyis nye ba'i phyir te/ lam ma yin pa dang lam zhes bya ba'i don to/ /bdud dang 'brel pas lam nyid la lam ma yin par smra ba'i bdud nyid du shes pa gang yin pa de ni rtags bcu gcig yin la/ lam ma yin pa nyid la lam nyid du smra ba bdud nyid du shes pa gang yin pa de ni rtags gnyis pa'o//de la dang po ni gang rab 'byor gzhan yang zhes bya ba la sogs pa dang / snyan dngags mkhan gyis rang bzor byas pa nas rig par bya'o zhes bya ba'i mthar thug pa de ni de dag nyid la rtags bco brgyad pa'o/ /gnyis pa ni rab 'byor gzhan yang zhes bya ba la sogs pa dang / sdug bsngal gyi mthar phyung shig ces bya ba nas/ de ni gnas ma yin no snyam na zhes bya ba'i mthar thug pas gsungs pa gang yin pa de ni de dag nyid la rtags bcu dgu pa nyid do/ /sangs rgyas dgyes pa'i spyod pa ste/ /zhes bya ba de ni de dag nyid la rtags nyi shu pa'o/ /rtags ni nyi shu de dag gis//zhes bya ba la sogs pa'i tshigs su bcad pas mjug bsdu ba ste/ nges par 'byed pa'i cha dang mthun pa dag la gnas pa'i byang chub sems dpa' rtags nyi shu po de dag gis mtshon pa gang yin pa de ni yang dag par rdzogs pa'i byang chub las phyir mi ldog pa ste/ phyir mi ldog ces bya ba'i don to//mthong ba'i lam la gnas pa'i dbang du mdzad nas/ mthong ba'i lam la bzod pa dang / /shes pa'i skad cig bcu drug ni/ /byang chub sems dpa' mi ldog pa'i/ /mtshan nyid yin par shes par bya/ /zhes bya ba gsungs te/ mthong ba'i lam la gnas pa'i byang chub sems dpa'i phyir mi ldog pa'i rtags yin par rig par bya'o//bzod pa dang shes pa'i skad cig ma ji tsam zhe na/ bzod pa'i skad cig ma dang shes pa'i skad cig ma bcu drug ces bya ba'i don to/ /bcu drug gang zhe na/ gzugs sogs 'du shes ldog pa dang / /sems brtan theg pa dman dag las//rnam log bsam gtan la sogs pa'i/ /yan lag yongs su zad pa dang / /lus sems yang ba nyid dang ni/ /'dod la spyod pa thabs mkhas dang / /rtag tu tshangs par spyod nyid dang / /'tsho ba rnam par dag nyid dang / /phung sogs bar chad byed rnams dang //tshogs dang dbang sogs bcas pa yi/ /g.yul 'gyed ser sna la sogs la/ /sbyor dang rjes su sbyor ba yi/ /gnas pa so sor bkag pa dang / /chos ni rdul tsam mi dmigs nyid/ /rang gi sa la nges nyid dang / /sa gsum la ni gnas pa dang / /chos kyi don du srog gtong ba//de 'dra'i skad cig bcu drug ni/ /blo ldan mthong ba'i lam gnas kyi/ /phyir mi ldog pa'i rtags dag yin/ /zhes bya ba la/ gzugs sogs 'du shes ldog pa dang / /zhes bya ba ni gzugs la sogs pa las sangs rgyas kyi bar gyi 'du shes ldog pa ste/ sdug bsngal la chos shes pa'i bzod pa'o//de skad ces bka' stsal pa dang zhes bya ba nas/ phyir mi ldog par rig par bya'o zhes bya ba yan chad kyis gsungs pa de ni mthong ba'i lam gyi rtags dang po yin no/ /sems brtan zhes bya ba la/ bdud la sogs pas mi byed pa nyid ni sdug bsngal la chos shes pa ste/ gang rab 'byor gzhan yang zhes bya ba nas/skyon med par 'jug par 'gyur ro zhes bya ba'i bar gyis gsungs pa de ni de nyid kyi rtags te gnyis pa yin no/ /theg pa dman rnams las ldog pa/ /zhes bya ba ni sdug bsngal la rjes su shes pa'i bzod pa ste/ gang de nas tshe dang ldan pa rab 'byor gyis zhes bya ba nas/yang dag par rdzogs pa'i byang chub las bzlog par mi nus so zhes bya ba'i bar gyis gsungs pa de ni de nyid kyi rtags te gsum pa'o/ /bsam gtan la sogs pa'i/ yan lag yongs su zad pa dang / /zhes bya ba la bsam gtan dang gzugs med pa la sogs pa'i yan lag ni lus yin no//de yongs su zad pa ni dengs pa nyid de/ 'dod chags dang bral ba la sogs pa thob pa la stobs chung ba de ni sdug bsngal rjes su shes pa ste/ gang rab 'byor gzhan yang zhes bya ba nas/ phyir mi ldog par rig par bya'o zhes bya ba'i bar gyis gsungs pa de ni rtags bzhi pa'o//lus sems yang ba nyid dang ni/ /zhes bya ba la/ dran pa dang shes bzhin dang bcas pa'i spyod lam la lus yang ba nyid dang / lus lci bar mi 'gyur ro zhes bya ba la sogs pa ni lus dang sems yang ba nyid de/ de gnyi ga ni kun 'byung la chos shes pa'i bzod pa ste/ gang rab 'byor gzhan yang zhes bya ba la sogs pa nas/phyir mi ldog par rig par bya'o zhes bya ba'i bar gyis gsungs pa de ni de la rtags lnga pa'o/ /'dod la spyod pa thabs mkhas dang / /zhes bya ba ni khyim pa'i byang chub sems dpa' sems can yongs su smin par bya ba'i don du thabs la mkhas pas 'dod pa sten par byed pa zhes bya ba ni kun 'byung la chos shes pa ste/gang rab 'byor gzhan yang zhes bya ba la sogs pa nas/ phyir mi ldog par rig par bya'o zhes bya ba'i bar gyis gsungs pa ni de dag nyid kyi rtags drug pa'o/ /rtag tu tshangs par spyod nyid dang //zhes bya ba la khyim pa'i byang chub sems dpa' 'dzam bu'i gling la sogs pa rin po che sna bdun gyis yongs su bkang ba sbyin par byed pa dang rtag tu tshangs par spyod pa'i phyi bzhin lag na rdo rje rtag tu 'brang ngo zhes bya ba ni kun 'byung la rjes su shes pa'i bzod pa ste/ gang rab 'byor gzhan yang zhes bya ba la sogs pa nas/phyir mi ldog par rig par bya'o zhes bya ba gnyis pa'i bar gyis gsungs pa de ni de la rtags bdun pa'o/ /'tsho ba rnam par dag nyid dang / /zhes bya ba ni kun 'byung la rjes su shes pa yin te/ gang rab 'byor gzhan yang zhes bya ba la sogs pa nas/phyir mi ldog par rig par bya'o zhes bya ba'i bar gyis gsungs pa de ni de la rtags brgyad pa'o/ /phung sogs zhes bya ba la sogs pa la/ sbyor ba ni zhi gnas dang rjes su sbyor ba ste lhag mthong ngo / /sbyor dang rjes su sbyor ba la/ /gnas pa ni sems kyi spyod pa ste de yongs su bkag pa'o//gang la zhe na/ phung po la sogs pa dang por byas la mi dmigs zhes bya ba ni phung po la sogs pa sbyor ba dang rjes su sbyor ba'i gnas pa zhes bya ba de lta bu la sogs pa zhes bya ba'i don to/ /de la phung po la sogs pa la sbyor ba dang rjes su sbyor ba'i gnas pa so sor bkag pa gang yin pa de ni stong pa nyid de'i sgrub pa nyid yin te/de ci'i phyir zhe na zhes bya ba la sogs pa gsungs pa'i phyir ro/ /de ni 'gog pa la chos shes pa'i bzod pa ste/ gang rab 'byor gzhan yang zhes bya ba la sogs pa nas/ yang dag par rjes su mi mthong ngo zhes bya ba'i bar gyis ni de la rtags dgu pa yin no//bar chad byed rnams zhes bya ba ni mi mthun pa'i phyogs kyi chos rnams gang yin pa ste/ rkun po dang chos mthun pa nyid kyi phyir dang gtam gyi yul yin pa'i phyir rkun po'i gtam bstan pa gang yin pa de ni 'gog pa la chos shes pa ste/ de rkun po'i gtam zhes bya ba la sogs pa nas/yang dag par rjes su mi mthong ngo zhes bya ba'i bar gyis gsungs pa gang yin pa de ni de la rtags bcu pa'o/ /tshogs dang zhes bya ba ni dpung gi sgra brjod pa yin te/ gnyen po'i phyogs kyi tshogs so/ /de ni 'gog pa la rjes su shes pa'i bzod pa ste/ de dmag gi gtam zhes bya ba la sogs pa nas/ yang dag par rjes su mi mthong ngo zhes bya ba'i bar gyis gsungs pa gang yin pa de ni de dag nyid la rtags bcu gcig pa'o/ /dbang sogs bcas pa'i g.yul 'gyed ces bya ba la g.yul 'gyed pa ni mi mthun pa'i phyogs dang gnyen po'i phyogs dag gi g.yul 'gyed pa ste/g.yul 'gyed pa yod na 'gog pa thob par 'gyur ro/ /lus dang gnas dang longs spyod du snang ba'i rnam par rig pa dag shin tu ldog pa ni 'gog pa'o/ /de la lus ni dbang po'i grong yin pa de nyid kyis na grong gi sgras gsungs so/ /lus kyi rten ni gnas yin pa de nyid kyis na grong khyer gyi sgras gsungs so//longs spyod ni yul gyi tshogs yin te/ de yang grong rdal gyi sgras gsungs te/ dbang pos nges par khong du chud par bya ba'i phyir ro/ /'gog pa de yang bdag med pa la sogs pa thob pa yin te/ de dag shin tu med pa'i phyir ro//de bas na g.yul 'gyed pa dang grong dang grong khyer dang grong rdal la sogs pa zhes bya ba la sogs pa'i gtam dag la sbyor ba dang rjes su sbyor ba'i gnas pa so sor bkag pa dang / shes rab kyi pha rol tu phyin pa 'ba' zhig gi gtam dang / rnam pa thams cad mkhyen pa nyid yid la byed pa'i gnas pa sgrub pa yin no//de ni 'gog pa la rjes su shes pa ste/ de g.yul gyi gtam zhes bya ba la sogs pa nas/ yid la bya ba dang ma bral bar gnas te zhes bya ba'i bar gyis gsungs pa gang yin pa de ni de dag nyid la rtags bcu gnyis pa'o/ /ser sna la sogs la zhes bya ba ser sna la sogs pa ni pha rol tu phyin pa drug gi mi mthun pa'i phyogs so//chos 'dod pa la sogs pa dang ldan pa gang yin pa de ni lam la chos shes pa'i bzod pa ste/ de sbyin pa'i pha rol tu phyin pa la sogs pa zhes bya ba nas/ phyir mi ldog par rig par bya'o zhes bya ba'i bar gyis gsungs pa gang yin pa de ni de nyid la rtags bcu gsum pa'o//chos ni rdul tsam mi dmigs nyid/ /rang gi sa la nges pa nyid/ /ces bya ba la chos rdul tsam yang mi dmigs pa de lta na yang bdag the tshom med par yang dag par rdzogs pa'i byang chub par 'gyur ba de gnyis ni lam la chos shes pa ste/ rab 'byor gzhan yang zhes bya ba la sogs pa nas/yang dag par rjes su mi mthong ngo zhes bya ba'i bar gyis gsungs pa gang yin pa de ni de nyid la rtags bcu bzhi pa'o/ /sa gsum la ni gnas pa dang / /zhes bya ba la/ chos rnams ni skye ba med pa dang / yang dag par rdzogs pa'i byang chub la ni thob par bya ba nyid dang / theg pa chen po ni de bzhin gshegs pas gsungs pa nyid de/ gnas gsum zhes bya ba ni sa gsum mo/ /de la gnas pa ni bdud rnams kyis kyang nges par mi phyed pa ste/ de ni 'gog pa la rjes su shes pa'i bzod pa'o/ /rab 'byor 'di lta ste zhes bya ba la sogs pa nas/ gzhan yang rab 'byor phyir mi ldog par rig par bya'o zhes bya ba'i bar gyis gsungs pa gang yin pa de ni de nyid la rtags bco lnga pa'o//chos kyi don du srog gtong ba/ /zhes bya ba la/ chos thams cad stong pa nyid ces bya ba ni chos yin la de'i don du srog kyang gtong ba zhes bya ba ni lam la rjes su shes pa ste/ rab 'byor gzhan yang zhes bya ba nas/ so so yang dag par rig pa mngon par bsgrub po zhes bya ba'i bar gyis gsungs pa gang yin pa de ni de nyid la rtags bcu drug pa'o/ /de 'dra'i skad cig bcu drug ni/ /blo ldan mthong ba'i lam gnas ni/ /phyir mi ldog pa'i rtags dag yin/ /zhes bya ba ni mjug bsdu ba'o/ /bsgom pa'i lam la gnas pa'i dbang du mdzad nas/bsgom pa'i lam ni zab pa ste/ /zhes bya ba gsungs te/ mdo las zab mo'i tshig gis bsgom pa'i lam gsungs pa yin te/ mang po'i tshig ni zlos pa'i sbyor bas so/ /gang la gnas na chos thams cad yongs su rdzogs par byed pa'o/ /rab 'byor gyis gsol pa zhes bya ba nas/ legs par bstan du gsol zhes bya ba'i bar gyis gang gsungs pa'o//de'i zab pa nyid gang zhe na/ zab mo stong pa nyid la sogs/ /zhes pa ste/ bcom ldan 'das kyis bka' stsal pa zhes bya ba nas/ zab mo zab mo zhes bya ba de dag go zhes bya ba'i bar gyis gang gsungs pa'o/ /stong pa nyid la sogs pa'i zab pa yang gang zhe na/zab pa de ni sgro 'dogs dang / /skur pa'i mtha' las grol ba nyid de/ de bzhin nyid la gzugs med pa nas/ byang chub med ces bya ba'i bar gyis sgra 'dogs pa'i mtha' las grol ba nyid dang / gzugs las gzhan pa yang ma yin pa nas/ byang chub las gud na yang de bzhin nyid med de zhes bya ba'i bar ni skur pa'i mtha' las grol ba nyid de/gsol pa de zhes bya ba la sogs pa nas/ de ni ngo mtshar che'o zhes bya ba'i bar gyis gang gsungs pa'o/ /bsgom pa'i lam yang gang zhe na/ yang dang yang du sems pa dang / /'jal dang nges rtog bsgom pa'i lam ste/ gcig tu dben par song nas thos pa las byung ba'i shes rab kyis nges pa'i don la rigs pa bzhis rnam par dpyod pa ni sems pa'o//rigs pa ni ltos pa'i rigs pa dang / bya ba byed pa'i rigs pa dang / 'thad pa sgrub pa'i rigs pa dang / chos nyid kyi rigs pa'o/ /de nas ji ltar bsam pa'i don la rnam pa dgu mthar thug pa ni zhi gnas te/ 'jal ba'o/ /de nas don dgu po de 'byed pa dang / rab tu 'byed pa dang / yongs su rtog pa dang / yongs su dpyod pa'i mtshan nyid ni lhag mthong ste/ nges par rtog pa'o/ /gsum po de dag nyid la yang dang yang du zhes bya ba'i yang dang yang du'o/ /'di ni bsgom pa'i lam gyi mtshan nyid de/ bcom ldan 'das kyis bka' stsal pa zhes bya ba la sogs pa nas/'jal ba dang rtog par gyis shig ces bya ba'i bar gyis gang gsungs pa'o/ /de ltar yin na bsgom pa'i lam gyis dmigs pa gang zhe na/ nges 'byed yan lag dang mthong ba'i/ /lam dang bsgom pa'i lam nyid la/ /de ni rgyun chags yin pa'i phyir/ / bzhed pa ste/ ji skad bstan pa bzhin du bdag gi zhes bya ba la sogs pa nas/ rgyu'i bar du yang nye bar mi 'gro'o zhes bya ba'i bar gyis gsungs pa'o/ /de la gnas par bya zhes bya ba ni nges par 'byed pa'i cha dang mthun pa la'o/ /bslab par bya zhes bya ba ni mthong ba'i lam la'o/ /bsgrub par bya zhes bya ba ni bsgom pa'i lam la'o//de bzhin du sgrub pa dang sems pa dang yongs su rtog pa dang / brtson par byed pa zhes bya ba ni go rims bzhin du drod dang rtse mo dang bzod pa dang chos mchog dag la'o/ /rtsol ba zhes bya ba ni mthong ba'i lam la'o/ /'bad pa zhes bya ba ni bsgom pa'i lam la'o//gzhung lhag ma ni phan yon no/ /rnam pas rnam pa dgur bzhed ces bya ba ni bsgom pa'i lam mo/ /yang zhes bya ba ni de'i mi mthun pa'i phyogs kyi rnam pa'i dbye bas rnam pa dgur 'gyur ba'o/ /de ji ltar zhe na/ chung dang 'bring dang chen po rnams/ /chung ngu'i chung sogs dbye ba yis te chung ngu'i chung ngu dang /chung ngu'i 'bring dang / chung ngu'i chen po dang / 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring dang / chen po'i chen po'o zhes bya ba'i go rims 'di nyid kyis gnyen po'i phyogs kyi rnam pa dgu'i 'thad pa yin te/ de dag skyes pas lugs las bzlog pa'i rim bzhin du mi mthun pa'i phyogs kyi rnam pa chen po'i chen po dang /chen po'i 'bring dang / chen po'i chung ngu dang / 'bring gi chen po dang / 'bring gi 'bring dang / 'bring gi chung ngu dang / chung ngu'i chen po dang / chung ngu'i 'bring dang / chung ngu'i chung ngu'o zhes bya ba spong ste/ gos la dri ma chen po sngar dag par byas nas phyis chung ngu dag par byed pa de bzhin du sems la yang ngo //'di man chad tshig chen po brgyad kyis bde bar gshegs pa mang ngo zhes bya ba'i bar gyis phyed gong ma rnams kyis shes rab kyi pha rol tu phyin pa dang bral ba'i gang zag phung po la sogs pa la mi dmigs pa mi mthun pa'i phyogs kyi mtshan nyid chen po'i chen po la sogs pa rnam pa brgyad gsungs te/de dang ldan pa'i sbyin pa la sogs pa chen po nyid kyang 'bras bu chung ba nyid kyi phyir ro/ /phyed 'og ma 'og mas bcom ldan 'das kyis bka' stsal pa zhes bya ba sngon du song ba can dag gis gnyen po'i phyogs shes rab kyi pha rol tu phyin pa la sbyor ba bsgom pa'i lam gyi chung ngu'i chung ngu la sogs pa rnam pa brgyad gsungs te/de dag gi 'ba' zhig pa dang / sbyin pa la sogs pa chung ngu dang bcas pa yin yang 'bras bu che ba nyid kyi phyir ro/ /de la mi mthun pa'i phyogs brgyad pa ni mngon par 'du byed pa'i phyir rnam par rtog pa ste/ chung ngu'i 'bring yin la/ gnyen po'i phyogs chen po'i 'bring ni mngon par 'du byed pa mi dmigs pa yin no/ /mi mthun pa'i phyogs dgu pa ni mngon par 'du byed pa'i rnam par rtog pa kho na chung ngu'i chung ngu yin la/ gnyen po'i phyogs chen po'i chen po ni mngon par 'du byed pa mi dmigs pa yin te/ gnyis po dag gsol pa/ bcom ldan 'das mngon par 'du byed pa ma mchis pa ni zhes bya ba nas/ tshad med pa'i bsod nams 'phel bar 'gyur ro zhes bya ba'i bar gyis gang gsungs pa'o/ /grangs med pa dang / dpag tu med pa dang / tshad med pa zhes bya ba'i skabs yin pa de bas na rab 'byor gyis gsol pa/ de dag so so la bye brag ci mchis she na/de la bcom ldan 'das kyis gang gzhal bar mi nus pa'o zhes bya ba de yan chad kyis nges pa'i tshig gi dbye ba gsungs pa yin no/ /'di man chad dri ba dang lan gsum gyis stong pa nyid ces bya ba'i rnam grangs kyis chos thams cad mi zad pa dang grangs med pa dang / dpag tu med pa dang / tshad med pa zhes bya ba de bzhin du/ bsgrub par bya ba yin pa de bas na rab 'byor gyis gsol pa/ de bas na don dang yi ge tha dad pa de dag ces bya ba la/ don med pa ste stong pa nyid la tha dad pa med pa'i phyir ro/ /yi ge med pa ste don tha dad pa med pa'i phyir ro/ /'di tsam gyis ni thams cad du rgol ba nyid rab tu bsgrubs pa yin no//bcom ldan 'das kyis bka' stsal pa/ de de bzhin no zhes bya ba la sogs pa nas/ mya ngan las 'das pa'i bar zhes bya ba'i bar gyis gang gsungs te/ de bzhin no zhes bya ba ni zhal gyis bzhes pa ste/ don dam par zhes bya bar dgongs so/ /brjod du med pa las brjod pa zhes bya ba ni don tha dad pa med kyang tha dad pa'i sgo nas brjod pa'i phyir ro//rgol ba'i lan ni mi zad pa zhes bya ba la sogs pa gsungs te/ 'dis bstan pas na bstan pa ste snying rje'o/ /de'i rgyu mthun pa 'di ni bshad pa ste/ mi zad pa zhes bya ba la sogs pa ste/ kun rdzob tu zhes bya bar dgongs so/ / de ji ltar zhe na/ rnam par gcod pa tha dad pa'i phyir ro/ /de bas na bstan bcos las/ grangs med la sogs bstan pa rnams/ /dam pa'i don du bzod ma yin/ /kun rdzob de dag thugs brtse ba'i/ /rgyu mthun gyur pa thub pa bzhed/ /dngos po brjod du med pa la/ /nyams pa dang ni 'phel mi rung / /bsgom zhes bya ba'i lam gyis ni//ci zhig nyams shing ci zhig 'thob/ /ces bya ba gsungs te/ brjod du med pa la zhes bya ba ni brjod par bya ba ma yin pa la'o/ /de bas na bsgom pa'i lam gyis ci zhig nyams shing ci zhig 'phel zhes bya ba ni rgol ba ste/ gsol pa/ bcom ldan 'das zhes bya ba la sogs pa nas/yang dag par rdzogs pa'i byang chub tu mngon par rdzogs par 'tshang rgya bar 'gyur zhes bya ba'i bar gyis gang gsungs pa'o/ /byang chub ji lta de bzhin du/ /'di ni 'dod pa'i don bsgrub bya/ /zhes bya ba la/ 'di zhes bya ba ni bsgom pa'i lam ste/ 'di tsam ni lan yin te/ bcom ldan 'das kyis bka' stsal pa zhes bya ba nas/ji lta ba de bzhin du yongs su bsngo'o zhes bya ba'i bar gyis gang gsungs pa'o/ /de skad du/ byang chub de bzhin nyid mtshan nyid/ /de yang de yi mtshan nyid bzhed/ /ces bya ba gsungs te/ 'phel ba dang 'grib pa med pa'i tshul gyis de bzhin nyid tsam mthong ba zhes bya ba ni dngos su byang chub kyi mtshan nyid yin te/gsol pa/ bcom ldan 'das zhes bya ba la sogs pa nas/ shes rab kyi pha rol tu phyin pa la spyad par bya'o zhes bya ba'i bar gyis gang gsungs pa'o/ /sems ni snga mas byang chub par/ /rigs min phyi mas kyang ma yin/ /tshogs pa dag gis ni nus pa ma yin te/phrad pa med pa'i phyir ro/ /re res kyang ma yin te/ sems dang po nyid kyis kyang byang chub thob par 'gyur ba'i phyir phyi ma dag gis ni don med par thal bar 'gyur ro zhes bya ba ni brgal ba ste/ gsol pa/ bcom ldan 'das zhes bya ba la sogs pa nas/ mngon par rdzogs par 'tshang rgya bar mi nus so zhes bya ba'i bar gyis gang gsungs pa'o//mar me'i dpe'i tshul gyis ni zhes bya ba ni byang chub par 'gyur ro zhes bya bar sbyar ro/ /'di tsam ni lan yin te/ bcom ldan 'das kyis bka' stsal pa zhes bya ba nas/ rten cing 'brel par 'byung ba ni zab po zhes bya ba'i bar gyis gang gsungs pa'o/ /byang chub kyi mtshan nyid ma lus pa yang gang zhe na/zab mo'i chos nyid rnam pa brgyad/ /byang chub ces bya bar sbyar ro/ /chos nyid kyi zab pa rnam pa brgyad gang yin pa de nyid mngon sum du byas pa de ni byang chub bo/ /brgyad gang zhe na/ skye ba dang ni 'gag pa dang / /de bzhin nyid dang shes bya dang / /shes dang spyod dang gnyis med dang //thabs la mkhas pa zab pa nyid/ /ces bya ba gsungs te/ gnyis su med pa dang thabs la mkhas pa zhes bya ba tshogs pa gtso bor gyur pa'i zlas dbye ba'o/ /sems kyi rgyud 'gog pas 'gag pa yang skye ba med pa zhes bya ba ni skye ba med pa zab pa ste/ bcom ldan 'das kyis bka' stsal pa zhes bya ba nas/bcom ldan 'das de ni ma lags so zhes bya ba'i bar gyis gang gsungs pa'o/ /de kho na bzhin du 'gog pa dang 'gog pa'i chos can 'gog par mi 'gyur ro zhes bya ba ni 'gog pa zab pa yin te/ bcom ldan 'das kyis bka' stsal pa zhes bya ba nas/ bcom ldan 'das de ni ma lags so zhes bya ba'i bar gyis gang gsungs pa'o//rnam par rtog pa'i rgyud 'gags pas sems 'gag pa ni spros pa med pa'i ngo bo nyid de bzhin nyid ji lta ba de bzhin du gnas par 'gyur ba'i sems de ni de'i tshe yang dag pa yin gyi/ yang dag pa'i mtha' ni ma yin no zhes bya ba ni de bzhin nyid zab pa ste/ bcom ldan 'das kyis bka' stsal pa zhes bya ba nas/bcom ldan 'das zab po zhes bya ba'i bar gyis gang gsungs pa'o/ /de bzhin nyid ji lta ba bzhin du sems kyi mtshan nyid dngos po med pa ma yin te/ de ni rab tu gsal ba'i mtshan nyid yin pa'i phyir ro/ /sems ni de bzhin nyid las gzhan pa yang ma yin te/ gsal ba dang tha dad pa med pa'i phyir ro//de bzhin nyid gsal bar 'gyur bar rig par bya ba'i de kho na yin no zhes bya ba ni shes bya zab pa ste/ bcom ldan 'das kyis bka' stsal pa zhes bya ba la sogs pa dri ba dang lan gnyis kyis gsungs pa'o/ /de bzhin nyid kyis de bzhin nyid mthong ba yang ma yin te/ dngos po med pa'i mtshan nyid yin pa'i phyir ro zhes bya ba ni shes pa zab pa ste/bcom ldan 'das kyis bka' stsal pa zhes bya ba la sogs pa dri ba dang lan gyis gang gsungs pa'o/ /de bas na chos thams cad kyi de bzhin nyid khong du chud pa byang chub yin la/ de ltar spyod pa gang yin pa de ni bcom ldan 'das ma la spyod cing gang yang de la spyod pa de ni ci la yang mi spyod do zhes bya ba ni spyod pa zab pa ste/bcom ldan 'das kyis bka' stsal pa zhes bya ba nas/ ci la yang mi spyod do zhes bya ba'i bar gyis gang gsungs pa'o/ /gang de la spyod pa ni gnyis su med pa'i don dam pa la spyod cing mtshan mar 'du shes pa med do zhes bya ba ni gnyis su med pa'i zab pa ste/bcom ldan 'das kyis bka' stsal pa zhes bya ba la sogs pa dri ba dang lan gyis gang gsungs pa'o/ /stobs dang mi 'jigs pa la sogs pa yongs su ma rdzogs par chos thams cad stong pa nyid la gnas shing ting nge 'dzin gsum la snyoms par zhugs nas sems can yongs su smin par mdzad pa zhes bya ba ni thabs la mkhas pa zab pa ste/bcom ldan 'das kyis bka' stsal pa zhes bya ba nas/ yongs su smin par byed do zhes bya ba'i bar gyis gang gsungs pa'o/ /de ni zab pa rnam pa brgyad bstan pa'o/ /slob pa phyir mi ldog pa'i tshogs bstan nas/bsgom pa'i lam gyi gnas skabs su srid pa dang mya ngan las 'das pa mnyam pa nyid dang / sangs rgyas kyi zhing yongs su sbyang ba dang thabs la mkhas pa bstan par bya ba yin pa de bas na/ mdo las 'khor ba dang mya ngan las 'das pa mnyam pa nyid kyi dbang du mdzad nas/ de nas tshe dang ldan pa sha ra dwa ti'i bu zhes bya ba nas bsgom pa yang yod par 'gyur ro zhes bya ba'i bar du'o//de'i don ni/ chos rnams rmi lam 'dra ba'i phyir/ /srid dang zhi bar mi rtog pa/ /zhes bya ba smos te/ 'dir 'khor ba dang mya ngan las 'das pa la/ rmi lam gyi nang dang nyin par gyi sgras gsungs pa ni chos mthun pa nyid kyi phyir ro//de'i tshe byang chub sems dpa' yang chos thams cad rmi lam lta bu yin pa de bas na des de la mi rtog pa ste/ tha dad pa'i rtogs pa med pa de mnyam pa nyid du mthong zhes bya ba'i don to/ /las med la sogs klan ka yi/ /lan ni ji skad bshad par zad/ /ces bya ba ni chos thams cad rmi lam lta bu nyid la yang las med pa la sogs pa'i rgol ba kun 'byung bar 'gyur ro//de dag gi lan de yang mdo las ji skad du bshad pa ni smras pa/ tshe dang ldan pa rab 'byor zhes bya ba nas/ bdag ni gdon mi za bar bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur zhes bya ba'i bar yin te/ 'dir 'jig rten na rab tu grags pa nyid kyi rmi lam dang sad par bzung nas chos thams cad rmi lam lta bu nyid yin na ji ltar rmi lam na sbyin pa dang 'tshe ba la sogs pa dag gis bsod nams dang sdig par mi 'gyur te ma bsags pa'i phyir ro/ /de bzhin du sad pa na yang mi 'gyur ro zhes bya ba brgal ba'o/ /rmi lam du srog chags bsad nas sad pa dang /e ma'o bsad do/ /ngas bsad do/ /legs par ngas bsad do/ /zhes gang rnam par rtog na ci de las sdig par 'gyur ram zhes slar dris pa la/ rang nyid kyis dmigs pa dang bcas pa kho na la las skye'i/ dmigs pa med par ni ma yin no zhes smras so/ /gal te sad pa'i rnam par rtog pas rmi lam gyi las dmigs pa dang bcas pa nyid kyi phyir 'bras bu yod pa yin na/gnyid ma log pa de'i tshe las gnyid ma log pa'i rnam par rtog pas dmigs pa dang bcas pa nyid kyi phyir 'bras bu dang bcas pa yin te/ shin tu 'bras bu dang bcas pa yin zhes bya ba 'di tsam ni lan yin no//bcom ldan 'das kyis sems las byung ba thams cad dben par gsungs pa ma yin nam/ de ji ltar na dmigs pa dang bcas pa las yin zhes yang rgol ba'o/ /mtshan mar byas nas dmigs pa dang bcas par yin gyi/ don dam par ni ma yin no zhes bya ba ni lan yin no/ /smras pa tshe dang ldan pa rab 'byor zhes bya ba la sogs pa la/rmi lam gyi nang du zhes bya ba'i sgra ni 'dir mtshan mar mi byed pa nyid chos mthun pa'i phyir mi dmigs pa'i tshul bstan pa yin te/ gang mi dmigs pa la gnas nas pha rol tu phyin pa drug bsgoms te/ byang chub tu yongs su bsngos na de ci yongs su bsngos par 'gyur ram zhes go bar byed pa ni ci zhes bya ba'i sgra med par rtogs pa'i rgol ba'o//mi dmigs pa'i mthar son pa'i mtshan nyid can yang dag par rdzogs pa'i byang chub kyi mi dmigs pa'i tshul nyid ni thabs kyi gtso bor gyur pa yin pas dmigs pa'i gnyen po mi dmigs pa'i tshul nyid rmi lam yin no zhes zur gyis lan bstan nas/'phags pa rab 'byor gyis byams pa ni mi dmigs pa brnyes pa'i mthar byon pa yin pas don 'di dris shig ces smras so/ /dris nas/ des kyang mi dmigs pa rgyas par zur gyis lan btab bo/ /'phags pa byams pa'i tshig de nyid bcom ldan 'das kyis kyang bstan par mdzad pa ni rmi lam yang rnam par mi rtog pa'i phyir mi dmigs pa ma yin nam zhe na/rmi lam rnam par rtog pas stong pa yang ma yin pa rnam par mi rtog pa nyid yin kyang rnam par rtog pa'i gnyen po ma yin pa'i phyir rmi lam lta bu nyid ces bya ba brgal ba'i lan yin no/ /sangs rgyas kyi zhing yongs su dag pa'i dbang du mdzad nas/sems can 'jig rten de bzhin du/ /snod kyi 'jig rten ma dag pa/ /de la dag par bsgrub pa yis/ /sangs rgyas zhing ni dag pa nyid/ /ces bya ba gsungs te/ sangs rgyas kyi zhing ni sems can dang snod kyi 'jig rten te/ des na de dag sbyong ba ni de dag pa yin no//de ga las she na/ sems can gyi 'jig rten bkres pa dang / skom pa dang / sdug bsngal la sogs pa'i mtshan nyid ni ma dag pa'o/ /sems can dag gis de mthong nas/ /rang gi sangs rgyas kyi zhing gi sems can gyi 'jig rten de dag par sgrub par byed de/ sangs rgyas kyi zhing gi sems can dag gi nyes pa 'di rnam pa thams cad du mi 'byung ba dang / lha'i longs spyod yongs su longs spyod pa la sogs pa 'gyur ba de lta de ltar pha rol tu phyin pa drug la spyod par byed pa'o/ /de bzhin du snod kyi 'jig rten gyi ma dag pa na ljan ljin dang lud khung la sogs pa'i mtshan nyid gang yin pa de dag gzhan du mthong nas rang sangs rgyas kyi zhing gi snod kyi 'jig rten de dag par bsgrub pa ste/lag mthil ltar mnyam pa nyid du 'gyur ba'i phyir ro/ /de nas tshe dang ldan pa rab 'byor zhes bya ba nas/ yang dag par rdzogs pa'i byang chub tu sbyar bar byas pa'o zhes bya ba'i bar gyis gang gsungs pa'o//de ni zhing dag pa bla na med pa'o/ /thabs la mkhas pa'i dbang du mdzad nas/ 'di yi yul dang sbyor ba ste/ /dgra rnams las ni 'das pa dang / /mi gnas ji bzhin shugs dang ni/ /thun mong ma yin mtshan nyid dang / /ma chags pa dang mi dmigs dang / /mtshan ma smon lam zad pa dang //de yi rtags dang tshad med dang / /thabs la mkhas pa rnam pa bcu/ /zhes bya ba gsungs te/ 'di zhes bya ba ni thabs la mkhas pa'i'o/ /yul ni mdo las dang por ting nge 'dzin gsum dang / byang chub kyi phyogs gsungs pa'o/ /de'i 'og tu de nyid kyi yul can gyi sbyor ba ni gang gis stong pa nyid la sogs pa la yang bsgom zhing mngon sum du yang mi byed pa'o//dgra rnams las 'das pa la sogs pa sbyor ba bcur dbye bar bya ste/ de dag ni sbyor ba zhes bya ba dang 'brel ba'i phyir ro/ /de bas na thabs la mkhas pa rnam pa bcu yin no/ /de la yul ni de nas tshe dang ldan pa rab 'byor gyis zhes bya ba la sogs pa nas/ma 'dres pa rnams bsgom par bya'o zhes bya ba'i bar gyis gsungs so/ /sbyor ba ni bcom ldan 'das kyis bka' stsal pa zhes bya ba la sogs pa nas/ rang sangs rgyas kyi 'bras bu mngon sum du mi byed do zhes bya ba'i bar gyis gsungs so/ /dgra ni bar du gcod pa'i chos rnams te/de dag tshad med pa bzhis zil gyis gnon cing 'da' ba'i sbyor ba ni rab 'byor 'di lta ste zhes bya ba la sogs pa nas/ gnas par 'gyur ba de lta bu yang mngon sum du mi byed do zhes bya ba'i bar gyis gang gsungs pa'o/ /sbyor ba gang gis stong pa nyid la sogs pa la spyod na yang der nam mkha' la bya dang 'dra bar ni mi gnas pa ste/rab 'byor 'di lta ste zhes bya ba nas/ thob par byed do zhes bya ba'i bar gyis gang gsungs pa'o/ /sangs rgyas kyi chos rnams yongs su ma smin par yang dag pa'i mtha' mngon sum du mi byed do zhes bya ba'i smon lam rgya chen po'i phyir de mngon sum du mi phyed pa zhes bya ba ni shugs ji lta ba bzhin gyi sbyor ba yin te/rab 'byor 'di lta ste zhes bya ba nas/ de ltar yongs su brtag par bya zhes bya ba'i bar gyis gang gsungs pa'o/ /nyan thos la sogs pa'i thun mong ma yin pa'i sbyor ba ni sems can thams cad yongs su ma btang ba ste/gsol pa/ bcom ldan 'das zhes bya ba nas/ yang dag pa'i mtha' mngon sum du mi byed do zhes bya ba'i bar gyis gang gsungs pa'o/ /nga dang nga yi zhes 'dzin pa ni chags pa ste/ de spyod pa'i sems can dag gi de spang bar bya ba'i phyir mngon par rdzogs par sangs rgyas nas chos bstan par bya'o zhes bya ba 'di ni ma chags pa'i sbyor ba ste/rab 'byor gzhan yang zhes bya ba la sogs pa nas/ rang sangs rgyas lta bu ni ma yin no zhes bya ba'i bar gyis gang gsungs pa'o/ /bdag mngon par rdzogs par sangs rgyas nas ji ltar sems can dag bdag gi chos la dmigs pa la spyod pa'i nyes pa de las grol bar 'gyur ba de ltar bya'o zhes bya ba 'di ni mi dmigs pa'i sbyor ba ste/rab 'byor gzhan yang zhes bya ba la sogs pa nas/ yongs su rdzogs par 'gyur ro zhes bya ba'i bar gyis gang gsungs pa'o/ /bdag mngon par rdzogs par sangs rgyas nas ji ltar sems can dag mtshan ma la spyod pa'i nyes pa de las grol bar 'gyur ba de ltar bya'o zhes bya ba ni mtshan ma med pa'i sbyor ba ste/rab 'byor gzhan yang zhes bya ba la sogs pa nas/ yongs su rdzogs par 'gyur zhes bya ba'i bar gyis gang gsungs pa'o/ /bdag mngon par rdzogs par sangs rgyas nas ji ltar sems can dag smon lam la spyod pa'i nyes pa las grol bar 'gyur ba de ltar bya'o zhes bya ba ni smon pa med pa'i sbyor ba ste/rab 'byor gzhan yang zhes bya ba la sogs pa nas/ de ni gnas ma yin no zhes bya ba'i bar gyis gang gsungs pa'o/ /de'i zhes bya ba ni phyir mi ldog pa dang sbyar te/de mtshon par byed shes par byed pas na de'i rtags kyi sbyor ba'o/ /stong pa nyid la sogs pa yang yid la bya zhing sems can thams cad yongs su gtong bar mi bya'o zhes bya ba'i bar 'di ni dris pa'i lan no/ /rab 'byor gzhan yang zhes bya ba la sogs pa nas/ bsrabs pa'i sa gnon pa ma yin no zhes bya ba'i bar gyis gang gsungs pa ste/gsol pa/ bcom ldan 'das zhes bya ba la/ 'dir byang chub sems dpa' sems dpa' chen po zhes bya ba ni byang chub tu sems bskyed pa zhes bya ba'i don to/ /phyir mi ldog par 'gyur ba'i rnam grangs de lta bu mchis sam zhes bya ba ni 'dri ba'o//bcom ldan 'das kyis bka' stsal pa zhes bya ba la sogs pa nas/ 'jig rten gyis mi 'phrogs pa zhes bya ba'i bar ni lan yin no/ /byang chub tu sems bskyed pa shin tu mang po de dag las phyir mi ldog pa ches nyung ba'i dri ba'i lan btab pa ni snga ma bzhin du rig par bya'o//ches nyung ba de dag gi shin tu nyung ba'i sbyor ba ni tshad chung ba de dag nyid kyi phyir tshad med pa yin no/ /bu mo lto chung ba lto med ma yin zhes bya ba bzhin no/ /mngon par rtogs pa rgyan gyi 'grel pa dag ldan zhes bya ba/ rin chen 'byung gnas zhi bas sbyar ba las/ rnam pa kun mngon par rdzogs par rtogs pa'i le'u ste bzhi pa'o// //rtse mo'i mngon par rtogs pa/ de yi rtags dang rnam 'phel dang / /brtan dang sems kun gnas pa dang / /zhes bya ba la sogs pas sngar bstan pa'i dngos po brjod par bya'o/ /de la dang por rtags te/ de'i dbang du mdzad nas/ rmi lam na yang chos rnams kun//rmi lam lta bur lta la sogs/ /sbyor ba rtse mor phyin pa'i rtags/ /rnam pa bcu gnyis dag tu bzhed/ /ces bya ba gsungs te/ rtse mo'i mngon par rtogs pa'i rtags ni rnam pa bcu gnyis dag yin te/ 'di lta ste/ rmi lam gyi nang du yang chos thams cad rmi lam lta bur mthong ba'o//sogs pa'i sgras ni rmi lam gyi nang du byang chub dman pa dang khams gsum po dag las mdo ji lta ba bzhin du 'dod pa mi skyed pa la sogs pa'o/ /de la gzhan yang zhes bya ba'i tshig re res dang po bdun yin no/ /de la rmi lam gyi nang du yang chos thams cad rmi lam la sogs pa dang mtshungs par mthong ba ni rtags dang po'o//rmi lam gyi nang du yang byang chub dman pa dang / khams gsum po dag la 'dod pa mi skye ba la sogs pa ni rtags gnyis pa'o/ /rmi lam gyi nang du 'khor gyi nang na de bzhin gshegs pa mthong zhing des bstan pa thos nas bsgrubs pa la sogs pa ni rtags gsum pa'o//rmi lam gyi nang du de bzhin gshegs pa nam mkha' la 'phags nas chos ston pa dang rdzu 'phrul dang cho 'phrul ston pa zhes bya ba la sogs pa ni rtags bzhi pa'o/ /rmi lam gyi nang du grong dang grong khyer bcom pa bsregs pa la sogs pa mthong na skrag par mi byed sad nas kyang khams gsum po rmi lam lta bur shes pa zhes bya ba la sogs pa ni rtags lnga pa'o//rmi lam gyi nang du dud 'gro dang yi dags dang dmyal ba mthong nas de 'di snyam du ji ltar bdag gis sangs rgyas kyi zhing du rnam pa thams cad du ngan song gsum po med par 'gyur ba de ltar 'jug par bya'o zhes bya ba ni rtags drug pa'o//gal te rmi lam mam sad pa na grong la sogs pa tshig pa mthong na gal te bdag bla na med pa yang dag par rdzogs pa'i byang chub tu lung bstan pa yin na/ de'i tshe me 'di zhi bar gyur cig ces bden pa'i byin rlabs byas na/ gal te me de zhi bar gyur na zhes bya ba la sogs pa de ni 'dir rtags bdun pa'o//gang gi tshe skyes pa dang bud med mi ma yin pas byin gyis brlabs na byang chub sems dpas ji ltar bdag yang dag par rdzogs pa'i byang chub la lhag pa'i bsam pa dang bcas pa'i sems yod pa la/ ji ltar bdag nyan thos la sogs pa'i sems med pa'i bden pa 'dis skyes pa dang bud med dag las mi ma yin pa 'di gud du 'gro bar gyur cig ces bden pa'i byin gyi rlabs byas na/gal te bden pa'i byin gyi rlabs des gud du song na de ni 'dir rtags yin no/ /de nas bdud kyi byin rlabs kyis gud du song ba las lung ma bstan par yang lung du bstan par mngon pa'i nga rgyal ni don med pa'i rgyu yin te/de'i tshe de gud du song ba ni rtags ma yin no/ /'di ltar bdud kyi tshig kyang rnam pa mang du yod la/ gang gi phyir lung ma bstan pa la lung bstan pa'i mngon pa'i nga rgyal ni nyams pa'i rgyu yin no zhes bya ba ni rtags brgyad pa yin te/ gzhan yang zhes bya ba'i tshig brgyad pa nas brtsams te/ lhag pa'i nga rgyal can du rig par bya'o zhes bya ba'i bar gyis gang gsungs pa'o/ /gang zag de lta bu bsten par mi bya/ de yongs su spangs shing de dag la byams pa la sogs pa'i sems bskyed par bya/ ji ltar bdag gi nyes pa 'di dag rnam pa thams cad du med par gyur pa de ltar bya'o zhes rang gis mngon par shes nas pha rol gnon par bya zhing sangs rgyas dang byang chub sems dpa' la sogs pa'i dge ba'i bshes gnyen bsten par bya'o zhes bya ba ni rtags dgu pa ste/byang chub sems dpa' sems dpa' chen po zhes bya ba la sogs pa nas/da ltar byung ba'i sangs rgyas bcom ldan 'das rnams kyis zhes bya ba'i bar gyis gang gsungs pa'o/ /gzhan gyi dring mi 'jog par 'dod pa la sogs pas shes rab kyi pha rol tu phyin pa la gnas par bya ba ni rtags bcu pa yin te/ rab 'byor de bas na zhes bya ba la sogs pa nas/ 'di las rgya cher bstan to zhes bya ba'i bar gyis gang gsungs pa'o//shes rab kyi pha rol tu phyin pa de yang mtshan nyid med pa nyid kyi phyir chags pa med pa'i mtshan nyid yin la chos thams cad kyang de bzhin no/ /de ltar yang kun nas nyon mongs pa ni yod de/ nga dang nga yir 'dzin pas 'khor bar 'khor ba'i phyir ro//rnam par byang ba yang yod de/ gang du de dag med pa der 'dzin pa med pa de bas na 'khor ba med pa'i phyir zhes bya ba ni rtags bcu gcig pa'o/ /rab 'byor gyis gsol pa zhes bya ba la sogs pa nas/ rnam par byang ba yod pa yin zhes bya ba'i bar gyis gang gsungs pa'o/ /byang chub sems dpa' de ltar spyod pa ni 'ga' la yang mi spyod de/de ltar gang spyod pa dang / gang la spyod pa'i chos de dag mi dmigs so/ /de ltar zil gyis mi gnon pa'i sa la gnas na 'ga' zhig gis kyang zil gyis gnon par mi 'gyur ro zhes bya ba ni rtags bcu gnyis pa ste/ gsol pa/ bcom ldan 'das zhes bya ba la sogs pa nas/nye bar 'gyur ba lags so zhes bya ba'i bar gyis gang gsungs pa yin no/ /de ltar rtags bstan nas rnam par 'phel ba'i dbang du mdzad de/ 'dzam bu'i gling gi skye bo snyed/ /sangs rgyas mchod pa'i dge la sogs/ /dper mdzad nas ni rnam mang du/ /rnam 'phel bcu drug bdag nyid do//zhes gsungs te/ ci 'dra ba gang zhe na/ 'dzam bu'i gling gi skye bo gang yin pa de dag snyed kyi grangs kyis mtshon pa'i sangs rgyas gang yin pa de sangs rgyas de dag gi mchod pa'i bsod nams gang yin pa de la sogs pa gang la yod pa de la de skad ces bya'o/ /de shes rab kyi pha rol tu phyin pa 'chad pa la sogs pa gang yin pa dang /de dang ldan pa'i yid la byed pas gnas pa de gnyis ni rnam par 'phel ba dang po ste/ bcom ldan 'das kyis bka' stsal pa zhes bya ba la sogs pa nas/ shes rab kyi pha rol tu phyin pa dang ldan pa'i gtam bya'o zhes bya ba'i bar gyis gang gsungs pa'o/ / de nyin dang mtshan du de dang ldan pa'i yid la byed pas gnas kyi yid la byed pa gzhan gyi go skabs mi 'byed do/ /ji ltar yang yid la byed pa thams cad stong pa nyid yin pa de ltar na yang chos rnams kyi chos nyid de la rtag tu gnas te/ 'phel ba med pa dang 'grib pa med do zhes shes bzhin du de ltar mi 'bral lo zhes bya ba ni rnam par 'phel ba gnyis pa ste/des shes rab kyi pha rol tu phyin pa zhes bya ba la sogs pa nas/ yongs su 'grib pa med do zhes bya ba'i bar gyis gang gsungs pa'o/ /bcom ldan 'das ma la bcom ldan 'das ma stong pa nyid du spyod dam/ ma yin no/ /bcom ldan 'das ma las gud na de la spyod pa dmigs sam/ma yin no/ /de la de nyid spyod dam/ ma yin no/ /stong pa nyid stong pa nyid la spyod dam/ ma yin no/ /stong pa nyid las gud na yang gang de la spyod pa dmigs sam/ gzugs la sogs pa dang / sangs rgyas kyi chos rnams kyang ma yin no/ /de dag gi stong pa nyid kyang ma yin te/de ltar na gang de la spyod pa dang bcom ldan 'das ma gang yin pa de ni gnyi ga mi dmigs shing chos gang yang dmigs su med do/ /de skye ba'am 'gag pa med pa 'di ni byang chub sems dpa' dag mi skye ba'i chos la bzod pa yin te/ gang dang ldan na yang dag par rdzogs pa'i byang chub las phyir mi ldog pa der lung bstan par 'gyur zhing der gzhol ba nas mngon par rdzogs par byang chub par 'gyur ro zhes bya ba ni rnam par 'phel ba gsum pa ste/gsol pa bcom ldan 'das zhes bya ba nas/ nam yang yongs su 'grib par mi 'gyur ro zhes bya ba'i bar gyis gsungs pa'o//chos thams cad kyi mi skye ba dang skye bar bya ba'i phyir byang chub sems dpa' yang dag par rdzogs pa'i byang chub tu lung bstan par 'gyur ram/ ma yin no/ /gang yang lung bstan pa dang / gang yang mngon par rdzogs par sangs rgyas pa de thams cad ni dmigs su med de/ shes rab kyi pha rol tu phyin pa ni rnam par mi rtog pa'i phyir ro zhes bya ba ni rnam par 'phel ba bzhi pa ste/ rab 'byor gyis gsol pa zhes bya ba nas/ rnam par mi rtog pa'i zhes bya ba'i bar gyis gang gsungs pa'o/ /shes rab kyi pha rol tu phyin pa zab mo 'di 'dzin pa na/ de bzhin nyid du nan tan du byed pa dang sems dang sems las byung ba gzhan dag gi go skabs mi 'byed pa nas bla na med pa yang dag par rdzogs pa'i byang chub tu mngon par rdzogs par sangs rgyas pa zhes bya ba'i bar ni rnam par 'phel bar byed pa lnga pa ste/de nas lha'i dbang po zhes bya ba nas/ rang sangs rgyas kyi bslab pa la bslab pa ma yin no zhes gang gsungs pa'o//de ltar slob pa'i byang chub sems dpa' la 'jig rten skyong ba bzhi nas/ 'og min gyi bar nye bar 'ong bar 'gyur ba dang de dag de bzhin gshegs pas kyang dgongs par 'gyur/ pha rol gyis zil gyis gnon pa'i sdug bsngal dang gnod sems la sogs pa mi 'byung ngo zhes bya ba ni rnam par 'phel ba drug pa'o//de ltar slob pa zhes bya ba la sogs pa nas/ byin gyis brlabs so zhes bya ba'i bar gyis gang gsungs pa'o/ /gang gi tshe byang chub sems dpa' de shes rab kyi pha rol tu phyin pa dang ma bral ba de'i tshe bdud rnams mya ngan gyi zug rngus zug par 'gyur te/de la bgegs bya ba'i phyir skar mda' ltung ba gtong zhing 'jigs pa skyed do zhes bya ba ni rnam par 'phel ba bdun pa ste/ dga' bo gang gi tshe zhes bya ba nas/ yongs su grol bar bya ba dag go zhes bya ba'i bar gyis gang gsungs pa'o/ /byang chub sems dpa' byang chub sems dpa'i theg pa pa la bdag gi grogs po theg pa gcig la zhugs pa dang mnyam pa nyid kyis gnas par bya ste/ji ltar 'dis gang la bslab par bya ba de la de ltar bdag gis kyang ste/ 'di ltar pha rol tu phyin pa dag nas/ rnam pa thams cad mkhyen pa dang / stong pa nyid thams cad dang chos thams cad stong pa nyid kyi bar la bslab par bya'o zhes bya ba ni rnam par 'phel ba brgyad pa ste/dga' bos gsol pa zhes bya ba la sogs pa nas/ mngon par rdzogs par 'tshang rgya'o zhes bya ba'i bar gyis gang gsungs pa'o/ /byang chub sems dpas chos gang zad par bya ba'am/ 'dod chags dang bral ba'am/'gog pa'am/ spang bar bya ba'i phyir slob pa ma yin/ chos rnams kyi chos nyid zad pa'am/ bral ba'am/ 'gag pa'am/ spang bar bya ba med de/ de ltar slob na de bzhin nyid la slob pa ste/ pha rol tu phyin pa nas/ rnam pa thams cad mkhyen pa nyid kyi bar la slob pa yin no/ / de ltar slob pa ni bslab pa thams cad kyi mchog gi pha rol tu phyin pa thob par 'gyur ba nas/ sems can thams cad kyi sems kyi spyod pa rnams kyis pha rol tu son par 'gyur ro zhes bya ba ni rnam par 'phel ba dgu pa ste/ gsol pa/ bcom ldan 'das zhes bya ba la sogs pa nas/ pha rol tu phyin par 'gyur ro zhes pa'i bar gang gsungs pa'o//sa chen po'i phyogs gang na 'dzam bu'i chu klung gi gser 'byung ba de lta bu ni nyung ba de bzhin du gang shes rab kyi pha rol tu phyin pa la slob pa'i sems can de lta bu yang ches nyung ste/ nyan thos kyi sa la gnas pa zhes bya ba la sogs pa ni rnam par 'phel ba bcu pa ste/rab 'byor 'di lta ste zhes bya ba la sogs pa nas/ ches mang ngo zhes bya ba'i bar gyis gang gsungs pa'o/ /sems can gang dag shes rab kyi pha rol tu phyin pa dang ma bral ba'i phyir mi ldog pa'i sa gnon pa de dag ni ches nyung la gang dag ma non pa ni ches mang ngo zhes bya ba ni rnam par 'phel ba bcu gcig pa ste/rab 'byor 'di lta ste zhes bya ba la sogs pa nas/ bslab par bya'o zhes bya ba'i bar gyis gang gsungs pa'o/ /de la spyod pas shes rab kyi pha rol tu phyin pa'i mi mthun pa'i phyogs 'dod chags dang zhe sdang dang gti mug gi tha ba dang ldan pa'i sems mi skyed do zhes bya ba ni rnam par 'phel ba bcu gnyis pa ste/rab 'byor gzhan yang zhes bya ba la sogs pa nas/ sems mi skyed de zhes bya ba'i bar gyis gang gsungs pa'o/ /de ni gzugs dang ldan pa ma yin pa nas/ yang dag par rdzogs pa'i byang chub kyi bar dang ldan pa'i sems mi skyed de/ de dag ni dmigs su med pa'i phyir ro zhes bya ba ni rnam par 'phel ba bcu gsum pa ste/gang dang ldan pa zhes bya ba la sogs pa nas thams cad du 'dus so zhes bya ba'i bar gyis gang gsungs so/ /ji ltar 'jig tshogs la lta bar lta ba'i rnam pa drug cu rtsa gnyis 'dus pa de bzhin du shes rab kyi pha rol tu phyin pa la pha rol tu phyin pa thams cad ces bya ba ni rnam par 'phel ba bcu bzhi pa ste/rab 'byor 'di lta ste zhes bya ba la sogs pa nas/ bslab par bya'o zhes bya ba'i bar gyis gang gsungs pa'o/ /bcom ldan 'das ma rang dang gzhan gyi don phun sum tshogs pa mdzad pa'i gnas skabs brnyes shing theg pa dman pa'i 'bras bu mngon du mi mdzad pa gang yin pa de ni rnam par 'phel ba bco lnga pa ste/rab 'byor zhes bya ba nas/ mngon par rdzogs par 'tshang rgya'o zhes bya ba'i bar gyis gang gsungs pa'o/ /'dir ni shes rab kyi pha rol tu phyin pa 'di la de bzhin nyid kyi rnam pa thams cad mkhyen pa nyid bsgrub pa zhes bya ba mi dmigs la 'di'i 'am gang gis sam gang des nges par 'byung ba zhes bya bar des mi dmigs pa ni rnam par 'phel ba bcu drug pa ste/rab 'byor zhes bya ba la sogs pa nas spyod pa yin no zhes bya ba'i bar gyis gang gsungs pa'o/ /de ltar rnam par 'phel ba bstan nas brtan pa'i dbang du mdzad de/sems can don yongs mi gtong ba/ /kun mkhyen chos ni rnam pa gsum/ /yongs su rdzogs pa bla med pa/ /brtan pa zhes ni mngon par brjod/ /ces gsungs te/ kun mkhyen gyi chos rnam pa gsum ste/ sangs rgyas kyi chos rnams dang rang byung gi chos rnams dang /mi 'phrogs pa'i chos rnams yongs su rdzogs pa bla na med pa gang yin pa de sems can gyi don yongs su mi gtong bar 'gyur ba de'i tshe brtan pa zhes bya'o/ /de ji ltar yongs su ma btang ba yin zhe na/ /bdag rgal nas sems can ma rgal ba bsgral bar bya/bdag grol nas ma grol ba dgrol bar bya/ bdag dbugs phyung nas dbugs ma phyung ba dbugs dbyung bar bya/ bdag yongs su mya ngan las 'das nas yongs su mya ngan las ma 'das pa mya ngan las bzla bar bya'o zhes bya ba ste/ de nas lha'i dbang po brgya byin gyis gsol pa zhes bya ba la sogs pa nas/yongs su mya ngan las zlo ba'i bar gyis gang gsungs pa'o/ /de ltar brtan pa bstan nas sems kun tu gnas pa/ sngar bstan pa de yang ting nge 'dzin kho na yin pa de bas na ting nge 'dzin gyi dbang du mdzad nas/ gling bzhi pa dang stong dag dang / /stong gnyis gsum dag dper mdzad nas//bsod nams mang po nyid kyis ni/ /ting 'dzin yongs su bsgrags pa yin/ /zhes bya ba gsungs te/ gling bzhi pa nas stong gsum gyi 'jig rten gyi bar srang tshad du bzung bar gzhal ba dang de bzhin du stong gcig pa dang gnyis pa dang gsum gyi rgya mtsho dag la skra'i rtse mo brgyar gshags pa'i rtse mos chu'i thigs pa blangs pa ni tshad gzung bar nus kyi/'dir theg pa la gsar du zhugs pa'i byang chub sems dpa' nas skye ba gcig gis thogs pa'i bar gyis byang chub sems dpa' rnams kyi dge ba'i rtsa ba thams cad la rjes su yi rang la de'i rjes su yi rang ba'i bsod nams kyi phung po ni ma yin no//des gnyis kyi 'du shes med pa dang / gnyis med pa'i 'du shes med pas bsod nams kyi phung po de dag bla na med pa yang dag par rdzogs pa'i byang chub tu yongs su sngo bar byed pa de bas na de ltar de srid bsod nams kyi phung po la dmigs pa'i ting nge 'dzin ni bla na med pa yang dag par rdzogs pa'i byang chub tu bsngo ba'i rnam pa yin no//gnyis dang gnyis med pa'i 'du shes nub pa sems dang don gzhan la yang mi 'jug pa'i sems ni sems rang bzhin du gnas pa'i ngo bo nyid yin pa'i phyir ting nge 'dzin yin te/ bcom ldan 'das de ltar zhes bya ba la sogs pa nas/ byang chub tu bsngo bar bgyi ste zhes bya ba'i bar gyis gang gsungs pa yin no//de ni sems gnas pa bstan pa'o/ /mthong zhes bya dang bsgom pa zhes/ /bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dag dang / /zhes bya ba gong du gsungs pa de bas na/ de'i dbang du mdzad nas/ 'jug pa dang ni ldog pa la/ /gzung ba'i rnam rtog so sor de/ /dgu yi bdag nyid ji bzhin yul/ /min pa'i bdag nyid dag ces bya/ /zhes bya ba gsungs te/ de la gzung ba'i rnam par rtog pa ni gnyis te/ gzung ba la rnam par rtog pa'o/ /ji ltar gzung ba'i rnam par rtog ce na/gang gi phyir de dag ni ji lta ba bzhin ma yin pa'i yul la ste/ phyin ci log tu rtogs pas na rnam par rtog pa'i dbang du byas pa'o/ /de dag gi yul yang gang zhe na/ 'jug pa'i phyogs dang ldog pa'i phyogs so/ /so sor zhes bya ba ni phyogs gnyi ga la yang dgu'i bdag nyid de/rab tu dbye ba dgu yin no/ /sems can rdzas dang btags yod par/ /rnam rtog 'dzin pa dag tu 'dod/ /so so'i skye bo 'phags dbye bas/ /so sor de dag dgu'i bdag nyid/ /gzhan 'dzin pa'i rnam par rtog pa gnyis so/ /ji ltar gnyis she na/ go rims bzhin du rdzas su yod pa dang /btags par yod pa'i sems can la rnam par rtog pa'i phyir ro/ /de la dang po ni so so'i skye bo dag gi'o/ /gnyis pa ni 'phags pa dag gi ste/ de dag kyang so sor dgu'i bdag nyid yin no/ /de dag ji ltar na 'dzin pa'i rnam par rtog pa yin zhe na/ 'dzin pa med pa kho na la rnam par rtog pa'i phyir te/yang dag par med pa la rnam par rtog pas na rnam par rtog pa'o/ /de nyid ni/ gal te gzung don de bzhin med/ /de dag gang gis 'dzin par 'dod/ /de ltar de dag 'dzin pa yi/ /ngo bo stong pa'i mtshan nyid do/ /zhes bya ba gsungs te/ 'dzin pa'i ngo bo zhes bya ba ni 'dzin pa'i ngo bo sems can gyi rang bzhin gyis so//de dag ces bya ba ni 'dzin pa'i rnam par rtog pa dag go/ /byang chub sems dpa'i blang bar bya ba gang yin pa de ni 'jug pa'i phyogs yin la/ gang yang 'di'i dor bar bya ba de ni 'di'i ldog pa'i phyogs yin no/ /de dag la 'jug pa'i phyogs la brten pa gzung ba'i rnam par rtog pa dang po ni phyir mi ldog pa dag gis zhes bya ba la sogs pa nas/gnyen po'i phyogs kyi gong yan chad kyis gsungs so/ /gnyen po ni gnyis kyi 'du shes su mi 'gyur ba dang gnyis med pa'i 'du shes su mi 'gyur ba'i shes rab kyi pha rol tu phyin pa'o/ /ldog pa'i phyogs la brten par gzung ba'i rnam par rtog pa gnyis pa ni de nas tshe dang ldan pa zhes bya ba la sogs pa nas/rnam par mi rtog pa'i chos mngon par rdzogs par 'tshang rgya'o zhes bya ba'i bar gyis gang gsungs pa'o/ /'dir khams gsum gyis bsdus pa'i chos rnams dang / nyan thos dang rang sangs rgyas kyi chos rnams ni ldog pa'i phyogs yin no//rnam par rtog pa de'i gnyen po ni rnam par rtog pa med pa'o/ /lhag ma ni zhar la 'ongs pa'o/ /'dzin pa'i rnam par rtog pa dang po sems can rdzas su yod pa la brten pa ni so so'i skye bo dag gi yin te/ de dag gis ma spangs pa'i phyir dang / 'phags pa dag gis ni ma yin te/ de dag gis spangs pa nyid kyi phyir dang / mthong bas spang bar bya ba'i skabs yin pa'i phyir te/ de nas tshe dang ldan pa sha ra dwa ti'i bu zhes bya ba la sogs pa dang / snying po la spyod pa zhes bya ba nas shes rab kyi pha rol tu phyin pa la spyod do zhes bya ba'i bar gyis gang gsungs so/ /'dir dpe ni sems can tshad med grangs med dpag tu med pa yongs su mya ngan las bzla bar bya'o zhes bya ba dang /de'i gnyen po ni sems can de dag shin tu dmigs su med do zhes bya ba la sogs pa'o/ /lhag ma ni zhar la 'ongs pa'o/ /'dzin pa'i rnam par rtog pa gnyis pa sems can btags par yod pa la brten pa ni 'phags pa dag gis te/de nyan thos dang rang sangs rgyas dag gis ma spangs pa nyid kyi phyir dang / so so'i skye bo dag la dang po nyid yod pa'i phyir ro/ /de nas bcom ldan 'das kyis zhes bya ba la sogs pa nas/ de ni gnas med do zhes bya ba'i bar du gang gsungs pa ste/ de la dpe ni byang chub sems dpa' sems dpa' chen po zhes bya ba dang /gang gi gnyen po'i phyogs ni bcom ldan 'das ma mchis so zhes bya ba la sogs pa'o/ /lhag ma ni zhar la 'ongs pa'o/ /rnam par rtog pa bzhi po 'di yang rnam pa dgu yin no zhes gsungs pa de la dang po rnam pa dgu gang zhe na/ ngo bo nyid dang rigs dang ni/ /sgrub pa yang dag 'grub pa dang / /shes pa'i dmigs pa ma 'khrul dang / /mi mthun phyogs dang gnyen po dang / /rang gi rtogs dang byed pa dang / /de yi las bya'i 'bras bu dang / /'jug pa'i phyogs kyi rten can gyi/ /rnam rtog de ni rnam dgur 'dod//ces bya ba gsungs te/ byed pa dang de'i las bya ba'i 'bras bu zhes bya ba ni byed pa dang de'i las dang bya ba'i 'bras bu zhes bya ba'i don to/ /rnam rtog de ni zhes bya ba ni gzung ba'i rnam par rtog pa dang po'o/ /rnam pa dgur 'dod pa ni gang gi phyir de'i ngo bo nyid la sogs pa gzung ba'i yul dgu'i dbye ba'i sgo nas rnam pa dgur bzhed do//'jug pa'i phyogs la brten pa de la dang por ngo bo nyid la sogs pa dgu po ni byang chub sems dpa'i blang bar bya ba nyid yin pa'i phyir ro/ /de la dang por ngo bo nyid kyi rnam par rtog pa'i gnyen po dang bcas pa'i dbang du mdzad nas/de nas tshe dang ldan pa rab 'byor gyis zhes bya ba la sogs pa nas/ nye bar gyur to snyam yang mi bgyid do zhes bya ba'i bar gyis gsungs pa'o/ /gnyen po'i phyogs kyi gzhung 'di thams cad zhar la 'ongs pa dang bcas pa ste mthar de ni bcom ldan 'das byang chub sems dpa' zhes bya ba la sogs pas rnam par rtog pa rnams ni don gyis gsungs so//de ltar byang chub sems dpa'i ngo bo ni byang chub tu sems bskyed pa nyid de/ byang chub tu sems bskyed pa nyid ni ngo bo nyid do/ /de bas na byang chub sems dpa' sems dpa' chen po byang chub tu sems bskyed pa nyid kyi phyir nyan thos kyi sa dang rang sangs rgyas kyi sa ni bsring bar bya zhing rnam pa thams cad mkhyen pa nyid dang nye bar gyur to snyam mo zhes bya ba ni ngo bo nyid kyi rnam par rtog pa'o//'di'i 'og nas mdo 'di lta ste zhes bya ba'i tshig brgyad kyis gnyen po'i phyogs ni dngos su gsungs so/ /rigs la sogs pa'i rnam par rtog pa ni dpe chos can dang 'dra ba dang dgag pa las bzlog pas shugs kyis bstan to//sgrub pa'i rten ni rigs yin te/ de bas na bdag dman pa'i byang chub bsring bar bya zhing sangs rgyas kyi byang chub dang nye bar gyur to zhes bya ba ni rigs kyi rnam par rtog pa'o/ /ji ltar na nam mkha' tha dad pa med pa de la cung zhig kyang nye ba dang /ring ba med pa de bzhin du chos kyi dbyings kyi ngo bo nyid kyi rigs la zhes bya ba ni gnyen po'i phyogs yin no/ /shes rab kyi pha rol tu phyin pa la zhes bya ba ni byang chub sems dpa' shes rab kyi pha rol tu phyin pa la spyod pa'o//sgrub pa dag gis yang dag par 'grub pa ni skyed pa ste/ de bas na bdag gis byang chub dman pa bsring bar bya zhing sangs rgyas kyi byang chub dang nye bar gyur to zhes bya ba ni yang dag par 'grub pa'i rnam par rtog pa'o/ /ji ltar sgyu ma'i skyes bu rnam par mi rtog pa nyid kyi phyir 'di snyam du bdag las sgyu ma'i mkhan po nye ba dang ring bar mi sems pa de bzhin du rnam par mi rtog pa'i shes rab kyi pha rol tu phyin pa la spyod pa 'di snyam du bdag las dman pa'i byang chub ni ring la/sangs rgyas kyi byang chub nye'o snyam du mi sems pa zhes bya ba ni gnyen po'i phyogs te/ shes rab kyi pha rol tu phyin pa la ma yin te/shes rab kyi pha rol tu phyin pa la spyod pa rnam par mi rtog pa'i phyir ro/ /shes pa'i dmigs pa ma 'khrul ba ni dmigs pa med pa nyid do/ /de bas na bdag las dman pa'i byang chub dang ring ba dang sangs rgyas kyi byang chub dang nye ba zhes bya ba ni dmigs pa med pa'i rnam par rtog pa'o//ji ltar bzhin gyi gzugs brnyan ni 'di snyam du bdag ni bzhin las gzhan pa dang ni ring la bzhin dang ni nye'o zhes mi sems pa ste/ med pa'i phyir ro/ /de bzhin du shes rab kyi pha rol tu phyin pa la spyod pa 'di snyam du bdag ni dman pa'i byang chub dang ring la/ sangs rgyas kyi byang chub dang nye'o snyam du mi sems so zhes bya ba ni gnyen po'i phyogs yin te/ yod pa ma yin zhes pa'i dmigs pa ni/ med pa nyid kyi phyir ro/ /rnam par mi rtog pa'i shes pa ni gnyen po yin la/ rnam par rtog pa ni mi mthun pa'i phyogs yin no zhes bya ba ni gnyen po dang mi mthun pa'i phyogs kyi rnam par rtog pa ste/de ltar de bzhin gshegs pa la gnyen po dang mi mthun pa'i phyogs su rtog pa mi mnga' ste/ chos kyi dbyings tsam nyid yin pa'i phyir ro/ /de bzhin du shes rab kyi pha rol tu phyin pa zhes bya ba ni gnyen po'o/ /de bas na bdag gis gnyen po'i phyogs las mi mthun pa'i phyogs zad pa thob par 'gyur ro snyam pa'i rang gis rtogs pa'i rnam par rtog pa'o//ji ltar de bzhin gshegs pas rnam par rtog pa thams cad spangs pa de bzhin du shes rab kyi pha rol tu phyin pa zhes bya ba ni gnyen po'i phyogs so/ / byang chub sems dpa' byed pa po dang de'i las gnyen po'i phyogs bsgom pa dang de'i bya ba'i 'bras bu mi mthun pa'i phyogs zad pa zhes bya ba ni byed pa dang las bya ba'i 'bras bu'i rnam par rtog pa'o/ /ji ltar de bzhin gshegs pa'i sprul pa'i rnam par mi rtog pa nyid kyi phyir 'di snyam du bdag ni dman pa'i byang chub dang ring la/sangs rgyas kyi byang chub dang ni nye'o snyam du mi sems pa de bzhin du shes rab kyi pha rol tu phyin pa yang ngo / /ji ltar de de bzhin gshegs pa'i sprul pa rang gi bya ba byed kyang rnam par mi rtog pa de bzhin du byang chub sems dpa' shes rab kyi pha rol tu phyin pa sgom par byed kyang rnam par rtog par ni mi byed do//ji ltar sprul pa bya ba de'i 'bras bu sgrub par byed kyang rnam par mi rtog pa de bzhin du shes rab kyi pha rol tu phyin pa sgom pas rnam par rtog pas zad par byed na yang rnam par mi rtog go zhes bya ba ni gnyen po'i phyogs so/ /de ni gzung ba'i rnam par rtog pa dang po gnyen po dang bcas pa rnam pa dgu bstan pa'o//gzung ba'i rnam par rtog pa gnyis pa'i rnam pa dgu gang zhe na/ srid dang zhi bar ltung ba'i phyir/ /rtog pa dman pa nyid dang ni/ /yongs su 'dzin pa med pa dang / /sgrub pa'i rnam pa ma tshang dang / /gzhan gyi rkyen gyis 'gro ba dang //ched du bya ba log pa dang / /nyi tshe ba dang sna tshogs nyid/ /gnas dang 'jug la rmongs pa dang / /rjes la 'gro zhes bya ba la/ /rnam rtog dgu yi bdag nyid 'di/ /ldog pa'i phyogs kyi rten can te/ /nyan thos la sogs yid las byung / /zhes bya ba gsungs te/ dman pa pa ni zhan pa nyid do//rtog pa dman pa la sogs pa'i skyon byang chub sems dpas spang bar bya ba'i ngo bo rnam pa dgu ldog pa'i phyogs kyi rten can no/ /srid pa dang zhi ba'i don du gnyer bas ma spangs pa nyid kyi phyir nyan thos la sogs pa'i yid la byung ba'o/ /rdzas su yod pa la 'dzin pa mi dmigs pa'i phyir 'khor ba ma yin/pha rol tu phyin pa lnga po dag gis mya ngan las 'das pa ma yin pa de bas na drug pa ci zhig bya zhes bya ba ni brgal ba'o/ /drug pa rnam par rtog pa spong bar byed pas lan btab pa yin no/ /pha rol tu phyin pa lnga po yod du zin kyang drug pa med na rtogs pa dman pa nyid la sogs par 'gyur ro zhes bya ba ni rtogs pa dman pa la sogs pa'i rnam par rtog pa'o//de dag gi gnyen po'i phyogs ni/ drug pa rnam par mi rtog pa kho na yin te/ gang gi phan yon ni dang por de nas tshe dang ldan pa rab 'byor zhes bya ba nas/ ngo mtshar che'o zhes bya ba'i bar gyis gsungs pa'o//de nas 'di lta ste zhes bya ba'i tshig gnyis kyis ni rtogs pa dman pa'i rnam par rtog pa'o/ /de nas 'di lta ste zhes bya ba'i tshig brgyad kyis ni rnam par rtog pa brgyad do/ /drug pa dang bral bas na pha rol tu phyin pa lnga'i ming yang mi thob pa de bas na pha rol tu phyin pa drug gis thob pa'i sangs rgyas kyi byang chub thob par mi 'gyur zhing 'khor bar ltung bar 'gyur ro//zhi ba yang yod de rdzas su yod pa'i 'dzin pa mi dmigs pa'i phyir zhes bya ba ni rtogs pa dman pa'i rnam par rtog pa'o/ /lnga po dag drug pas yang dag par yongs su gzung na bdud la sogs pas mi tshugs pa yin la/drug pa med na de med do zhes bya ba ni yongs su 'dzin pa med pa'i rnam par rtog pa'o/ /de dag drug pa'i go bgos na bdud la sogs pas thub par dka' ba yin la/ drug pa med na de med de zhes bya ba ni sgrub pa'i rnam pa ma tshang ba'i rnam par rtog pa'o/ /rkyen gyi sgra ni rag las pa'i tshig go//gzhan gyi rkyen kho nas yin gyi/ rang gi rgyud du ni ma yin no zhes nges par gzung bar yang khong du chud par bya'o/ /de bas na de dag byang chub chen por drug pa la rag las pa kho nas yin gyi/ drug pa med par ma yin no zhes bya ba ni gzhan gyi rkyen gyis 'gro ba'i rnam par rtog pa'o//chu bo gang gAs chu bran gzhan rgya mtshor 'jug pa ltar sangs rgyas kyi byang chub tu bgrod par bya ba'i phyir lnga po dag gi drug pa ni ched du bya ba yin te/ drug pa med na med do zhes bya ba ni ched du bya ba ldog pa'i rnam par rtog pa'o/ /drug pa ni thams cad du byed pa yin la lnga po dag ni phyogs gcig yin pa de bas na drug pa med par gang zag gi rdzas su mi dmigs su zin kyang nyon mongs pa'i sgrib pa zad par 'gyur gyi/shes bya'i sgrib pa ni ma yin no zhes bya ba ni nyi tshe ba'i rnam par rtog pa'o/ /lnga po drug pa'i nang du 'dus pa ni drug pa dang ro gcig pa nyid kyi phyir pha rol tu phyin pa nyid thob par 'gyur ba de bas na de dag drug pa dag las tha mi dad la/drug pa med na tha dad par 'gyur ro zhes bya ba ni sna tshogs pa nyid kyi rnam par rtog pa'o/ /dper na 'khor los sgyur ba'i dpung gi tshogs ni 'khor lo rin po che 'gro ba dang 'dug pa med par gnas pa dang 'jug pa la 'gro zhing gnas pa med de/bdag nyid kyis mi shes pa'i phyir ro/ /de bzhin du drug pa rnam pa thams cad mkhyen pa nyid kyi phyir 'gro ba dang de nyid la gnas na lnga po drug pa'i rjes su 'brang ba la drug pa med na med do zhes bya ba ni gnas pa dang 'jug pa la rmongs pa'i rnam par rtog pa'o//mig dang ldan pa bzhin du drug pa rnam pa thams cad mkhyen pa nyid kyi phyir sngon du 'gro bar byed la phyis long ba bzhin du lnga po des khrid par 'gyur te/ drug pa med na 'gro bar mi 'gyur ro zhes bya ba ni rjes la 'gro ba'i rnam par rtog pa ste/ 'bras bu la rgyu nye bar btags pa'i phyir ro//de ni gzung ba'i rnam par rtog pa gnyis pa'i rnam pa dgu yin no/ /'dzin pa'i rnam par rtog pa dang po'i rnam pa dgu gang zhe na/ 'dzin dang so sor gtong ba dang / /yid la byed dang khams rnams ni/ /gsum char nye bar 'brel pa dang / /gnas dang mngon par zhen pa dang / / chos kyi dngos por btags pa dang / /chags pa dang ni gnyen po dang / /ji ltar 'dod bzhin 'gro nyams la/ /'dzin pa dang por shes par bya/ /zhes gsungs te/ 'dzin pa dang so sor gtong ba la sogs pa dgu'i chos la 'dzin pa rdzas kyi rnam par rtog pa ni 'dzin pa'i rnam par rtog pa dgu'o//de dag kyang 'phags pa dag gis spangs pa nyid kyi phyir so so'i skye bo'i chos rnams so/ /de dag gi gnyen po ni mdo ji lta ba bzhin du drug pa ste/ rnam par mi rtog pa'o/ /de la gsol pa/ bcom ldan 'das zhes bya ba la sogs pa nas/ mi 'dzin mi gtong ngo zhes bya ba'i bar ni 'dzin pa dang gtong ba'i rnam par rtog pa ste/gnyen po'i phyogs dang bcas par brjod do/ /gsol pa/ bcom ldan 'das zhes bya ba nas/ 'tshang rgya'o zhes bya ba'i bar gyis ni yid la byed pa'i rnam par rtog pa'o/ /gsol pa/ bcom ldan 'das zhes bya ba nas/ chos gang dang yang 'dre bar mi bya'o zhes bya ba'i bar gyis khams gsum char dang nye bar 'brel ba'i rnam par rtog pa'o//gsol pa/ bcom ldan 'das zhes bya ba nas/ gnas par mi 'gyur ro zhes bya ba'i bar gyis gnas pa'i rnam par rtog pa'o/ /gsol pa/ bcom ldan 'das zhes bya ba nas/ shes rab kyi pha rol tu phyin pa la spyod do zhes bya ba'i bar gyis mngon par zhen pa'i rnam par rtog pa'o//gal te yang zhes bya ba nas/ de ni gnas ma yin no zhes bya ba'i bar gyis dngos por btags pa ni rnam par rtog pa'o/ /de nas tshe dang ldan pa zhes bya ba nas/ spyod pa yin no zhes bya ba'i bar gyis chags pa'i rnam par rtog pa'o//gsol pa/ bcom ldan 'das zhes bya ba nas/ gnas par 'gyur ro zhes bya ba'i bar gyis gnyen po'i rnam par rtog pa'o/ /rab 'byor 'di lta ste zhes bya ba nas/ der gnas par 'gyur ro zhes bya ba'i bar gyis ji ltar 'dod pa bzhin du 'gro ba las nyams pa'i rnam par rtog pa'o//de ni 'dzin pa'i rnam par rtog pa dang po rnam pa dgu'o/ /'dzin pa'i rnam par rtog pa gnyis pa rnam pa dgu gang zhe na/ ched bzhin nges par mi 'byung dang / /lam dang lam min nges 'dzin med/ /'gag dang bcas pa'i skye ba dang / /dngos po ldan dang mi ldan dang //gnas dang rigs ni 'dzin pa dang / /don du gnyer dang rgyu med dang / /phyir rgol ba dang dmigs pa la/ /'dzin pa'i rnam rtog gzhan yin no/ /zhes gsungs te/ btags par yod pa'i 'dzin pa mi dmigs pa ni 'dir drug pa'o/ /de med pa ni ched du bya ba ji lta ba bzhin du nges par 'byung bar mi 'gyur ro zhes bya ba la sogs pa thal bar 'gyur ba dgu ni rnam par rtog pa dgu pa'o//de dag kyang so so'i skye bo'i chos ma yin te/ de dag la dang po nyid yod pa yin pa'i phyir ro/ /de lta na ni su'i zhe na/ 'phags pa nyan thos dang rang sangs rgyas kyi chos yin te/ de dag gis ni ma spangs pa nyid kyi phyir ro//mdo ji lta ba bzhin du de dag gi gnyen po'i phyogs ni drug pa de kho na yin te/ /sangs rgyas kyi byang chub tu nges par 'byung ba'i phyir drug pa ni lnga po dag gi kha lo sgyur ba yin la/ drug pa med na dman pa'i byang chub la nges par 'byung bar 'gyur ro zhes bya ba ni ched ji lta ba bzhin nges par mi 'byung ba'i rnam par rtog pa ste/rab 'byor 'di lta ste zhes bya ba nas/ mnyam pa nas 'gro'o zhes bya ba'i bar gyis gang gsungs pa'o/ /rnam pa thams cad mkhyen pa nyid kyi lam ni byang chub sems dpa'i lam la/ nyan thos la sogs pa'i lam ni de dag gi lam ma yin no zhes bya ba ni lam dang lam ma yin pa nges par gzung ba yin la/drug pa med par de med do zhes bya ba ni lam dang lam ma yin pa la nges par 'dzin pa med pa'i rnam par rtog pa ste/ tshig snga ma'i mjug la dgag pa'i yi ge sbyar te yod pas so//gsol pa/ bcom ldan 'das zhes bya ba nas/ lam dang lam ma yin pa'o zhes bya ba'i bar gyis gang gsungs pa'o/ /shes rab kyi pha rol tu phyin pa ni chos gang yang skye ba'am 'gag pa ma yin pa la drug pa med na skye ba dang 'gag par 'gyur ro zhes bya ba ni skye ba dang 'gog pa'i rnam par rtog pa ste/gsol pa/ bcom ldan 'das zhes bya ba nas/ pha rol tu phyin pa drug la brtson par bya'o zhes bya ba'i bar gyis gang gsungs pa'o/ /de dag la ji ltar brtson par bya zhe na/ gzugs nas rnam pa thams cad mkhyen pa nyid kyi bar la ldan pa yang ma yin mi ldan pa yang ma yin no zhes bya ba de ltar ro//drug pa med na de med do zhes bya ba ni ldan pa dang mi ldan pa'i rnam par rtog pa ste/ gsol pa/ bcom ldan 'das zhes bya ba nas/ brtson par bya'o zhes bya ba'i bar gyis gang gsungs pa'o/ /gzugs nas rnam pa thams cad mkhyen pa nyid kyi bar la gnas par mi bgyi'o zhes bya ba ni brtson pa yin la/drug pa med na de dag la gnas par 'gyur ba zhes bya ba ni gnas pa'i rnam par rtog pa ste/ rab 'byor gzhan yang zhes bya ba nas mngon par rdzogs par 'tshang rgya bar bya'o zhes bya ba'i bar gyis gang gsungs pa'o/ / rigs ni sa bon yin te/ de 'dir rnam pa thams cad mkhyen pa nyid la pha rol tu phyin pa drug yin la drug pa med na de rnam par 'jig par 'gyur ro zhes bya ba ni rigs 'jig pa'i rnam par rtog pa ste/ rab 'byor 'di lta ste zhes bya ba nas/ 'khor ba las yongs su bsgral bar zhes bya ba'i bar gyis gang gsungs pa'o//gzhan gyi dring mi 'jog par 'dod pa la sogs pa'i don du pha rol tu phyin pa drug la bslab par bya'o/ /drug pa med na don du gnyer ba 'grub par mi 'gyur ro zhes bya ba ni don du gnyer ba med pa'i rnam par rtog pa ste/ rab 'byor de ltar na zhes bya ba nas/ smra'o zhes bya ba'i bar gyis gang gsungs pa'o//chos thams cad ni shes rab kyi pha rol tu phyin pa las byung ba yin pas shes rab kyi pha rol tu phyin pa yod na rnam pa thams cad mkhyen pa nyid thob par 'gyur gyi/ drug pa dang bral bar ni ma yin no zhes bya ba ni rgyu med pa'i rnam par rtog pa ste/ de ci'i phyir zhe na zhes bya ba nas/rnam pa thams cad mkhyen pa nyid kyi bar la bslab par bya'o zhes bya ba'i bar gyis gang gsungs pa'o/ /drug pa la spyod na bdud la sogs pas thub par dka' ba dang / dus gsum gyi de bzhin gshegs pas dgongs pa mdzad de/ chos thams cad mi dmigs pa'i phyir ro//drug pa med na de gnyi ga med do zhes bya ba'i bar ni phyir rgol ba dang dmigs pa dag la rnam par rtog pa ste/ rab 'byor 'di lta ste zhes bya ba nas dgongs par mi mdzad do zhes bya ba'i bar gyis gang gsungs pa'o/ /de ni 'dzin pa'i rnam par rtog pa gnyis pa'i rnam par rtog pa dgu bstan pa'o//de ltar mthong bas spang bar bya ba'i rnam par rtog pa sum cu rtsa drug dang de'i gnyen po'i phyogs mthong ba'i lam bstan nas/ mthong ba'i lam de nyid kyi phan yon nyid ni de nas lha'i dbang po zhes bya ba nas/ sangs rgyas su 'gyur ro zhes bya ba'i bar gyis gsungs so//de la mthong ba'i lam gyi de ma thag nyid du byang chub pa ni ma yin te/ sa dgu pa dag gis bar du chod pa'i phyir ro/ /de tsam gyis bar du chod du zin kyang gdon mi za bar 'gyur ba'i nges pa rtogs par yang nus pa ma yin no zhe na/ 'dir nus pa kho na yin no zhes bya ba'i rgyu gsum ni/byang chub la gzhan ston pa dang / /de yi rgyu ni yongs gtod dang / /de thob bar chad med pa'i rgyu/ /bsod nams mang po'i mtshan nyid do/ /zhes gsungs te/ bar chad dang bral zhing 'di la de med pas na bar chad med pa ste/ med na mi 'byung ba zhes bya ba'i don to//byang chub 'thob par 'gyur ba med na med par 'gyur ba gang yin pa de ni de thob pa la bar chad med pa'i rgyu ste/ de rtogs par byed pa'o/ /de yang rnam pa gsum ste/ de la dang po ni gang byang chub la gzhan ston pa yin te/ lung ston pa'o/ /gzhan zhes bya ba ni mthong ba'i lam la gnas pa'i dge slong brgya phrag drug cu la ste/de nas 'khor de'i nang nas zhes bya ba nas/ shes rab kyi pha rol tu phyin pa la spyad par bya'o zhes bya ba'i bar gyis gsungs pa'o/ /de'i rgyu ni zhes bya ba ni byang chub sems dpa' da ltar byung ba dang ma 'ongs pa dag la byang chub kyi rgyu don du gtod pa ste/shes rab kyi pha rol tu phyin pa kun dga' bo thos pa 'dzin pa la gtad pa gang yin pa de ni rgyu gnyis pa ste/ kun dga' bo rigs kyi bu'am zhes bya ba nas/ yongs su mya ngan las 'das par 'gyur ro zhes bya ba'i bar gyis gang gsungs pa'i/ shes rab kyi pha rol tu phyin pa la rab tu sbyor bas bsod nams mang po'i mtshan nyid ni rgyu gsum pa ste/kun dga' bo gal te khyod kyis zhes bya ba nas/ shes rab kyi pha rol tu phyin pa la ni tshad med do zhes bya ba'i bar gyis gang gsungs pa'o/ /yang na mthong ba'i lam ni byang chub thob pa de ma thag tu skyed par byed pa yin te/ gang gi phyir/dri ma zad dang mi skye ba'i/ /ye shes byang chub ces brjod de/ /zad med skye med phyir de dag /go rims bzhin du shes par bya/ /zhes gsungs te/ dri ma zhes bya ba ni nyon mongs pa dang rnam par rtog pa dag go/ /zad pa shes pa dang mi skye ba shes pa ni byang chub bo/ /de ni mthong bas spangs pa de dag mthong ba'i lam gyi de ma thag tu 'gyur ro zhes bya ba de la ltos nas bar chad med pa'i rgyu nyid yin no//de la chos rnams kyi zad pa med par shes pa ni zad pa shes pa yin la/ skye ba dngos po med par shes pa ni skye ba shes pa ste/ gsol pa/ bcom ldan 'das zhes bya ba nas/ gzungs ngas bstan pa ni 'di yin no zhes bya ba'i bar gyis gang gsungs pa'o/ /de ga las shes she na/ sangs rgyas dag shes rab kyi pha rol tu phyin pa 'di nyid las byung ba'i phyir ro zhes gsungs te/ 'di zhes bya ba ni byang chub kyi ngo bo nyid yin no zhes bya ba'i don to/ /'o na de la zad pa dang mi skye ba shes pa nyid du ji ltar gsungs she na/yul mi zad pa nyid kyis mi zad pa nyid du gsungs pa'i phyir ro/ /de dag kyang gang las she na/ chos de dag kyang skye ba med de/ gang skye ba med pa de la zad par 'gyur ba lta ga la yod ces gsungs pa'i phyir ro/ /de lta na de ni byang chub kyi mtshan nyid mdor bsdus pas bstan pa'o//dbang po rtul po'i dbang du mdzad nas ljags bkram pas de dag gi dad pa skyed pa dang / phan yon bstan pas spro ba bskyed pa gsungs pa yin no/ /de nas tshe dang ldan pa rab 'byor zhes bya ba nas/ rab 'byor de ltar na byang chub sems dpa' sems dpa' chen po'i shes rab kyi pha rol tu phyin pa bsgom pa yongs su rdzogs par 'gyur ro zhes bya ba'i bar gyis sangs rgyas par byang chub kyi mtshan nyid gsungs te/'di ni zab po zhes bya ba ni zad pa dang skye ba med par shes pa'i mtshan nyid can gyi byang chub po/ /nam mkha' mi zad pa'i phyir zhes bya ba ni bstan pa'o//gzugs mi zad pa zhes bya ba la sogs pa ni gzugs la sogs pa de bzhin nyid tsam du yin pa nyid kyis mi zad pa'i phyir ro/ /gzugs la sogs pa nam mkha' ltar zad mi shes pas zhes bya ba la/ gzugs la sogs pa de bzhin nyid tsam du so sor snang bar gyur pa ni gzugs la sogs pa nam mkha' lta bu'o//de zad mi shes pas zhes bya ba ni bshad pa'o/ /de man chad phan yon yin no/ /ji ltar bsgom pa yongs su rdzogs par 'gyur ba lags zhes pa ni zhi ba'i rgyur 'gyur gyi/ mngon par mtho ba'i rgyu dang mi ldan pa'i phyir ro zhes bya bar bsams pa'o/ / rnam pa thams cad mkhyen pa nyid yongs su bsngo ba'i thabs la mkhas pa des lan btab pa yin no/ /de ni byang chub kyi mtshan nyid rgyas pa'o/ /de ltar bsdus pa dang rgyas pas zad pa dang / skye ba med pa'i shes pa'i byang chub kyi mtshan nyid kyang bstan pa yin no/ /gzhan dag ni sngon byung ba'i rnam par rtog pa dag gnyen po'i phyogs kyis zad par byas pa dang /ma 'ongs pa mi skye bar byas pa dag ni zad pa dang mi skye ba shes pa'i byang chub yin no snyam du sems pa de bstan bcos mdzad pas gsal bar bya ba'i phyir/ 'gog pa med pa'i rang bzhin la/ / mthong zhes bya ba'i lam gyis ni/ /rnam par rtog rigs ci zhig zad/ /skye med rnam pa ci zhig 'thob/ /gzhan gyi chos rnams kyang yod la/ /ston pa la yang shes bya yis/ /sgrib pa zad par brjod pa gang / /de la kho bos mtshar du brtsis/ /'di la bsal bya ci yang med/ /bsnan par bya ba ci yang med/ / yang dag nyid la yang dag lta/ /yang dag mthong na rnam par grol/ /zhes bya ba gsungs te/ rang gi mtshan nyid kyis stong pa ni chos rnams kyi rang bzhin te/ rang gi ngo bo'o/ /de yang thog ma dang tha ma med pa'o/ /de bas na mthong ba'i lam gyis rnam par rtog pa'i rigs ci zhig zad pa'am skye ba med pa gang yang thob pa med do//ji ltar chos rnams kyi mtshan nyid ni yod pa yin la de bzhin du ston pa de dag gi shes bya'i sgrib pa zad pa yin no zhes gzhan gyis brjod pa gang yin pa 'di la kho bos ngo mtshar du brtsis pa yin te/ de dag gi mtshan nyid ji lta ba bzhin du yod pa ma yin te/dpyad mi bzod pa nyid kyi phyir ro/ /de bzhin du shes bya'i sgrib pa yang zad pa ma yin te/ khyad par byed pa log pa'i shes bya'i sgrib pa'i gnyen po'i phyogs su mi rung ba'i phyir ro/ /gang gi phyir mtshan nyid stong pa nyid kyi phyir sna tshogs pa chos nyid tsam yin pa'i rgyu de'i phyir mi mthun pa'i phyogs su gyur pa bsal zhing dor bar bya ba ci yang med cing /gnyen po'i phyogs su gyur pa bsnan par bya ba cung zad kyang med de/ skye ba med pa'i phyir ro/ /'o na ji ltar bya zhe na/ yang dag nyid du yang dag lta ste/ sna tshogs pa chos kyi dbyings tsam nyid du de ltar blta bar bya'o//de de ltar mthong na shes bya'i sgrib pa las kyang grol bar 'gyur ro/ /de la 'dir mthong ba'i lam gyi skad cig ma du zhe na/ sbyin pa la sogs re re la/ /de dag phan tshun bsdus pa gang / /skad cig gcig pa'i bzod pa yis/ /bsdus pa de 'dir mthong ba'i lam/ / zhes bya ba gsungs te/ 'dir zhes bya ba ni rtse mo'i mngon par rtogs pa la'o/ /skad cig ma gcig ni mthong ba'i lam mo/ /de yang bzod pas bsdus pa yin gyi shes pas ni ma yin no/ /re re'i sgra las rang gi don la zlos pa'i rkyen byung ba de bas na/ sbyin pa la sogs re re la gnas pa'o//de dag ces bya ba ni rang las gzhan pa lnga po dag bsdus pa gang yin pa'o/ /phan tshun zhes bya ba ni gcig la gcig go/ /re re ni drug tshan te/ bsdu bar bya ba dang sdud par byed pa dag drug tshan nang 'khrul pa'i phyir ro/ /de ni mthong ba'i lam yin te/ /bcom ldan 'das kyis ji ltar na zhes bya ba nas/shes rab kyi pha rol tu phyin pa la gnas shing / bsam gtan gyi pha rol tu phyin pa yongs su 'dzin to zhes bya ba'i bar du gang gsungs pa'o/ /'dir shes rab kyi pha rol tu phyin pas bsam gtan gyi pha rol tu phyin pa'i bar du bsdus nas gang gsungs pa de bstan bcos mdzad pas/de nas seng ge rnam bsgyings pa'i/ /ting nge 'dzin la snyoms zhugs nas/ /rten cing 'brel 'byung lugs mthun dang / /lugs mi mthun la rtog par byed/ /ces bya ba gsungs te/ don las cung zhig nyung ba las khong du chud par bya'o/ /de nas zhes bya ba ni drug tshan drug pa'i cung zhig nyung ba las 'og tu seng ge rnam par bsgyings pa'i ting nge 'dzin la snyoms par zhugs nas byang chub sems dpa' de mdo ji lta ba bzhin du rten cing 'brel par 'byung ba la so sor rtog par byed do//lugs mi mthun zhes bya ba ni lugs las bzlog pa'o/ /seng ge rnam par bsgyings pa'i ting nge 'dzin de yang mdo drug tshan drug pa'i 'og tu gsungs la de'i 'og tu thod rgal gyi ting nge 'dzin gsungs te/thod rgal de ni bsgom pa'i lam yin no/ /de yang bstan bcos mdzad pas/ 'gog dang bcas pa'i snyoms 'jug dgur/ /rnam pa gnyis su song 'ongs nas//'dod par gtogs pa'i rnam par shes/ /mnyam gzhag min pa'i mtshams bzung ste/ /thod rgal du ni snyoms 'jug pa/ /gcig dang gnyis gsum bzhi dang lnga/ /drug dang bdun dang brgyad rgal nas/ /'gog pa'i bar du mi 'drar 'gro/ /zhes bya ba gsungs te/ yin zhes bya ba ni lhag ma'o//ji ltar yin zhe na/ snyoms par 'jug pa dgur rnam pa gnyis su song nas so/ /ji ltar dgur song nas she na/ 'gog pa'i bar du'o/ /'gog pa'i mthar byas pa ni bsam gtan bzhi dang / gzugs med pa bzhi dang / 'gog pa'i snyoms par 'jug pa zhes bya ba'i don to//de ni 'gro ba gcig yin te/ /rab 'byor byang chub sems dpa' sems dpa' chen po'i thod rgal gyi ting nge 'dzin gang zhe na zhes bya ba nas/ 'du shes dang tshor ba 'gog pa nye bar bsgrubs te gnas te zhes bya ba'i bar gyis gang gsungs pa'o//ji ltar na yang dgur song ba yin zhe na/ 'gog pa dang bcas pa'i gcig dang / gnyis dang gsum dang / bzhi dang lnga dang / drug dang bdun dang / brgyad rnam par rgal ba'i bar du'o/ /'dod par gtogs pa'i rnam par shes/ /mnyam gzhag min pa'i mtshams bzung ste/ / zhes bya ba ni mnyam par ma bzhag pa'i sems kyi mthar thug par 'gro bar byed ces bya ba'i don to/ /de ni 'gro ba gnyis pa ste/ 'gog pa'i snyoms par 'jug pa las langs nas/ bsam gtan dang po la snyoms par 'jug go zhes bya ba nas/ 'gog pa'i snyoms par 'jug pa las langs nas mnyam par ma bzhag pa'i sems la gnas so zhes bya ba'i bar gyis gsungs so//'dir snyoms par 'jug pa brgyad po re re zhing 'gog pa'i rjes la snyoms par 'jug pa yin la/ dgu pa la ni snyoms par 'jug par mi nus te/ 'gog pa las 'gog par ldang ba ni mi rigs pa'i phyir ro//de bas na nye ba'i phyir dang shugs kyis 'du shes med 'du shes med min gyi skye mched la snyoms par zhugs nas de las langs te/ 'gog pa la snyoms par zhugs shing de las langs nas mnyam par ma bzhag pa'i sems la gnas so zhes bya ba ni song ba gnyis te rdzogs so// //'ongs nas zhes bya ba ni gang du song nas mnyam par ma bzhag pa'i sems la gnas pa de las 'ongs pa de nyid ni snyoms par 'jug pa dgu yin no/ /ci 'dra bar gyur pa zhe na/ mi 'dra bar 'gro ba ni rigs mi 'dra bar 'gro ba ste/ mnyam par ma bzhag pa las mnyam par ma bzhag pa dang mnyam par bzhag pa las mnyam par ma bzhag par 'phos par gyur zhes bya ba'i don to//'ongs nas zhes bya ba 'di la yang / /'dod par gtogs pa'i rnam par shes/ /mnyam gzhag min pa'i mtshams bzung ste/ / zhes bya ba de dag rjes su sbyar ro/ /de bas na bsam gtan dang po las langs nas mnyam par ma bzhag pa'i sems la gnas so/ /de ltar gnyis su song ba'i 'og tu lan cig phyir 'ong ba ste/ mnyam par ma bzhag pa'i sems las langs nas 'gog pa la snyoms par 'jug go zhes bya ba nas/bsam gtan dang po las langs nas mnyam par ma bzhag pa'i sems la gnas so zhes bya ba'i bar gyis gang gsungs pa ste/ gnyis su song ba las lan cig phyir 'ong ba'o/ /gal te thod rgal la snyoms par 'jug pa ni ting nge 'dzin yin na/ ji ltar mnyam par ma bzhag pa'i sems dang mi 'gal zhe na/ snyoms par 'jug pa po 'pho ba la snyoms par 'jug pa nye bar btags pa'i phyir 'gal ba yod pa ma yin no/ /mdo ji lta ba bzhin du ting nge 'dzin 'di'i las ni de thod rgal gyi ting nge 'dzin 'di la zhes bya ba nas/ thob par byed de zhes bya ba'i bar gyis gang gsungs pa'o//de ltar bsgom pa'i lam bstan nas/ /bsgom pas spang bar bya ba sum cu rtsa drug brjod par bya'o/ /de la gzung ba'i rnam par rtog pa dang po rnam pa dgu/ mdor bsdus rgyas dang sangs rgyas kyi/ /bstang bas yongs su ma bzung dang //dus gsum yon tan med pa dang / /legs pa'i lam ni rnam gsum dang / /gzung ba'i rnam rtog 'di gcig ste/ /sbyor ba'i rnam pa'i spyod yul can/ /zhes bya ba gsungs te/ gcig ste zhes bya ba ni dang po'o/ /shes rab kyi pha rol tu phyin pa la sbyor ba gang yin pa de ni rnam pa ste/khyad par gang yin pa de'i spyod yul can te/ de'i yul can no/ /mdor bsdus pa ni pha rol tu phyin pa la sogs pa'i de bzhin nyid la sogs pa'i spyi'i mtshan nyid kyis so/ /rgyas par ni rang gi mtshan nyid kyis so/ /de dag mi shes pa ni bsdus pa dang rgyas pa'i rnam par rtog pa'o/ / gang dag gi gnyen po dang ni gnas mang po la bslab par bya'o zhes bya ba nas/ 'dod par gtogs pa'i zhes bya ba'i bar gyis gsungs so/ /sangs rgyas kyi bstang bas yongs su gzung ba gang yin pa de med par rnam par rtog pa ni rtog pa'o/ /gang gi gnyen po ni gal te ji skad du bstan pa zhes bya ba nas/de dag kyang 'di las byung ngo zhes bya ba'i bar gyis gsungs so/ /dus gsum yon tan med pa dang / /zhes bya ba ni phan yon med pa'o/ /sbyor ba'i lam gyi dus dang mthong ba'i lam gyi dus dang bsgom pa'i lam gyi dus kyi yon tan med par rnam par rtog pa ni rtog pa'o//gang gi gnyen po ni byang chub sems dpa' sems dpa' chen po gang zhes bya ba nas shes rab kyi pha rol tu phyin pa sgom pA de la legs pa 'di dag yod par rig par bya'o zhes bya ba'i bar gyis gsungs so/ /legs pa'i lam ni rnam gsum zhes bya ba la/byang chub kyi lam rnam pa gsum ste/ sbyor ba dang mthong ba dang bsgom pa zhes bya ba ste/ de mi shes pa ni rnam par rtog pa'o/ /gang gi gnyen po'i phyogs ni gsol pa/ bcom ldan 'das ji ltar zhes bya ba la sogs pa dang / gang yang 'di skad du zhes bya ba la sogs pas gsungs so//de ltar na gzung ba'i rnam par rtog pa dang po rnam pa dgu bstan pa'o/ /gzung ba'i rnam par rtog pa gnyis pa'i yul gang zhe na/ /gnyis pa sems dang sems byung rnams/ /'jug pa'i yul can yin bzhed de/ /de dag gang las dang rnam pa dgu gang zhe na/ gang gi phyir/sems mi skye dang byang chub kyi/ /snying po yid la mi byed dang / /theg pa dman pa yid byed dang / /rdzogs pa'i byang chub yid mi byed/ /bsgom dang bsgom pa med pa dang / /de dag las ni bzlog nyid dang / /ji bzhin don min rnam rtog pa/ /bsgom pa'i lam la shes par bya//zhes bya ba 'di ni gsol pa/ bcom ldan 'das zhes bya ba nas/ chos kyi dbyings ji lta ba bzhin no zhes bya ba'i bar gyis gang gsungs pa yin no/ /de la sems dang po bskyed pa nas bzung ste zhes bya bas ni byang chub tu sems mi skyed pa'i rnam par rtog pa'o/ /byang chub kyi snying po la thug gi bar du zhes bya ba la sogs pas ni byang chub kyi snying po yid la byed pa'i rnam par rtog pa'o//gsol pa/ bcom ldan 'das ci lags zhes bya ba la sogs pa ni nyan thos dang rang sangs rgyas yid la byed pa'i rnam par rtog pa'o/ /rnam pa thams cad mkhyen pa nyid ces bya ba la sogs pas yang dag par rdzogs pa'i byang chub yid la mi byed pa'i rnam par rtog pa'o//gsol pa/ bcom ldan 'das zhes bya ba la sogs pas bsgom pa'i rnam par rtog pa'o/ /gsol pa/ 'o na ci lags/ ma bsgoms pas zhes bya ba la sogs pas ma bsgoms pa'i rnam par rtog pa'o/ /gsol pa/'o na ci lags/ bsgoms kyang bsgoms la zhes bya ba la sogs pas bsgoms pa yang ma yin la ma bsgoms pa yang ma yin pa'i rnam par rtog pa'o/ /gsol pa/ bcom ldan 'das 'o na ci lags zhes bya ba la sogs pas don ji lta ba bzhin ma yin pa'i rnam par rtog pa'o zhes bya ba ni gzung ba'i rnam par rtog pa gnyis pa'i rnam pa dgu'o//'dzin pa'i rnam par rtog pa dang po dgu ji lta bu zhe na/ sems can btags pa'i spyod yul dang / /chos btags pa dang stong nyid min/ /chags dang rab 'byed bdag nyid dang / /dngos por byed dang theg gsum dang / / yon ni dag pa ma yin dang / /spyod pa rnam par 'khrug pa la/ /'dzin par byed pa dang por de/ /shes par bya ba bsgrag pa yin/ /zhes bya ba gsungs te/ sems can dag tu tha snyad du byed pa zhes bya ba ni sems can btags pa'i rnam par rtog pa ste/ gang gis gnyen po ni gsol pa/ chos kyi dbyings ji lta bu lags zhes bya ba nas/ chos thams cad la bslab par bya'o zhes bya ba'i bar ro/ /gzugs la sogs pa nas/ rnam pa thams cad mkhyen pa nyid kyi bar la bslab par bgyi'am zhes bya ba'i bar gyis ni chos su btags pa'i rnam par rtog pa gsungs so/ /dbri ba med pa dang bsnan pa med pa zhes bya ba ni gnyen po'i phyogs so//de gang yin pa gnyi ga ni gsol pa/ bcom ldan 'das zhes bya ba la sogs pa nas/ chos thams cad rang gi mtshan nyid kyis stong pa nyid du mthong bas mngon par 'du bya ba med pa la bslab par bya'o zhes bya ba'i bar gyis gsungs so//chos thams cad rang gi mtshan nyid kyis stong pa ma yin pa zhes bya ba ni stong pa ma yin pa nyid kyi rnam par rtog pa ste/ gang gi gnyen po'i phyogs ni gsol pa/ bcom ldan 'das zhes bya ba nas/ rab 'byor 'di dag ni gnyis zhes bya ba'i bar gyis gsungs so//chos rnams la dmigs pa'am chos rnams mi dmigs par dmigs pa zhes bya ba ni chags pa'i bdag nyid kyi rnam par rtog pa ste/ chags pa'i bdag nyid kyi rnam par rtog pa'o/ /dmigs pa dang mi dmigs pa gang gis mnyam pa nyid ni gnyen po'i phyogs te/ gnyi ga dmigs su med pa'i phyir 'di lta ste/ gsol pa/ bcom ldan 'das ci lags zhes bya ba nas/ shes rab kyi pha rol tu phyin pa la spyad par bya'o zhes bya ba'i bar gyis gsungs so/ /'di ni gzugs so zhes pa nas/ rnam pa thams cad mkhyen pa nyid ces bya ba'i bar ni chos rnam par 'byed pa'i bdag nyid kyi rnam par rtog pa ste/de'i gnyen po'i phyogs ji ltar dmigs su med pa de ltar de dag rab tu dbye bar bya'o zhes bya ba gang yin pa'o/ /gnyi ga ni gsol pa/ bcom ldan 'das gal te zhes bya ba nas/ de ltar chos thams cad rtogs par mi byed do zhes bya ba'i bar gyis gsungs so//gzugs la sogs pa'i dngos po gzugs kyi don du bcom ldan 'das ma la spyod ces bya ba ni dngos po'i ched kyi rnam par rtog pa'o/ /gzugs kyi don du mi spyod do zhes bya ba gang yin pa de ni gnyen po'i phyogs so/ /gnyi ga ni gsol pa/ bcom ldan 'das gal te zhes bya ba nas/ma byas rnam par ma byas mngon par 'du ma byas pa'i tshul gyis shes rab kyi pha rol tu phyin pa la spyad par bya'o zhes bya ba'i bar gyis gsungs so/ /theg pa gsum la gnas pas zhes bya bas ni theg pa gsum gyi rnam par rtog pa yin la/ de'i gnyen po'i phyogs ni chos cung zad gnas pa yang mi dmigs so zhes bya ba gang yin pa'o//de gnyi ga ni gsol pa/ bcom ldan 'das gal te zhes bya ba nas/ sprul pa lta bur yid ches par byas shing shes rab kyi pha rol tu phyin pa la spyad par bya'o zhes bya ba'i bar gyis gsungs so/ /gal te de bzhin gshegs pa sprul pa lta bu yin na de la ji ltar yon dag par 'gyur zhes bya ba ni yon ma dag pa'i rnam par rtog pa yin pa de bzhin gshegs pa'i ming dang de bzhin gshegs pa'i chos nyid tshad mar byas nas zhes bya ba gang yin pa ni gnyen po'i phyogs so//gnyi ga ni gsol pa/bcom ldan 'das gal te de ltar sprul pa zhes bya ba nas/ bye brag gang yang med par bya ste zhes bya ba'i bar gyis gsungs so/ /shes rab kyi pha rol tu phyin pa la spyod cing chos nyid la 'jug pa 'di ni chos thams cad kyi chos nyid do zhes bya ba ni spyod pa rnam par 'khrug pa'i rnam par rtog pa'o//rnam par 'khrug pa ni tha dad par 'byed pa ste/ de nyid rnam par rtog pa'o/ /gang gi gnyen po'i phyogs ni rab 'byor de ltar zhes bya ba nas/ gnas pa las gzhan du 'gyur ba mi dmigs so zhes bya ba'i bar gyis gsungs te/ chos rnams kyi chos nyid ces bya ba nas/rnam par 'khrug par mi bya'o zhes bya ba'i bar gyis gnyen po'i phyogs bstan pa'o/ /'khrug pa'i rnam par rtog pa ni shugs kyis khong du chud par bya'o/ /de'i 'og nas rab 'byor gyi tshig gis brgal ba dang / bcom ldan 'das kyi bkas lan btab pa yin no//ji ltar 'dzin pa'i rnam par rtog pa dang po dgu bstan nas/ 'dzin pa'i rnam par rtog pa gnyis pa'i dbang du mdzad de/ sems can btags dang de yi rgyu/ /yul can bsgom pa'i lam 'brel ba/ /de la gnod par byed pa yis/ /mi mthun phyogs gzhan rnam pa dgu/ /zhes bya ba gsungs te/sems can du btags pa yang sangs rgyas dang byang chub sems dpa' la sogs par btags pa'o/ /de'i rgyu yang rnam pa thams cad mkhyen pa nyid la sogs pa'o/ /de dag gi yul 'brel pa ji lta ba bzhin du 'di'i yul yin pas na de'i yul can no/ /bsgom pa'i lam 'brel pa/mi mthun phyogs zhes bya ba ni bsgom pa'i lam gyi mi mthun pa'i phyogs so/ /de la gnod par byed pa yis/ /zhes bya ba ni de 'joms par byed pa nyid kyi phyir ro/ /gzhan zhes bya ba ni 'dzin pa'i rnam par rtog pa gnyis pa'o/ /de ji ltar rnam pa dgu yin zhe na/ gang gi phyir/thams cad mkhyen nyid gsum dag gi/ /bdag nyid ji bzhin sgrib rnam gsum/ /zhi lam de bzhin nyid sogs dang / /mtshungs par ldan dang mi ldan dang / /mi mnyam sdug bsngal la sogs dang / /nyon mongs rnams kyi rang bzhin dang / /gnyis su med la kun rmongs pa//rnam par rtog pa tha mar bzhed/ /ces pa gsungs te/ rmongs zhes bya ba ni rmongs pa'i bdag nyid do/ /tha ma zhes bya ba ni gzung ba dang 'dzin pa'i rnam par rtog pa las tha mar gyur pa'o/ /thams cad mkhyen nyid gsum dag gi/ /bdag nyid ji bzhin zhes bya ba la/rang rang dang 'brel ba'i sgrib pa rnam pa gsum ste/ rmongs pa'o/ /de la rnam par rtog pa ni gsol pa/ bcom ldan 'das rnam pa thams cad mkhyen pa nyid ces bya ba nas yang dag par rdzogs pa'i sangs rgyas rnams la bya'o zhes bya ba'i bar gyis ni rnam pa thams cad mkhyen pa nyid la rmongs pa'o//rab 'byor gang yang 'di skad du zhes bya ba nas/ lam thams cad byang chub sems dpa' sems dpa' chen pos shes par bya ste zhes bya ba'i bar gyis ni lam shes pa nyid la rmongs pa'o/ /gsol pa/ bcom ldan 'das ci'i slad du zhes bya ba nas/ lam thams cad du ni ma yin no zhes bya ba'i bar gyis ni thams cad shes pa nyid la rmongs pa'o//gsol pa/ bcom ldan 'das zhes bya ba nas/ ci'i phyir shes rab kyi pha rol tu phyin pa zhes bya ba'i bar gyis zhi ba'i lam la rmongs pa ste/ 'dir yang gang la gnas nas zhi ba mngon sum du byed pa de ni zhi ba'i lam zhes bya ba ste rmongs pa'o//gang yang gnas med pas yang dag pa'i mtha' mngon sum du bya'o zhes bya ba ni gnyen po'i phyogs yin te/ des kyang shes rab kyi pha rol tu phyin pa kho na nyid zhi ba yin te/ 'ga' zhig la yang gnas pa med do zhes bya ba bstan pa'o/ /lhag ma ni zhar las 'ongs pa'o//de bzhin nyid la sogs pas shes rab kyi pha rol tu phyin pa ldan pa dang mi ldan pa zhes bya ba ni ldan pa dang mi ldan pa'i rnam par rtog pa ste/ gang gi gnyen po'i phyogs ni rab 'byor gzhan yang zhes bya ba nas/ mtshan nyid med par mtshan nyid gcig pa'i phyir ro zhes bya ba'i bar gyis gsungs so//shes rab kyi pha rol tu phyin pa lam gzhan mnyam pa nyid ces bya ba ni mi mnyam pa nyid la rmongs pa ste/ gang gi gnyen po'i phyogs ni rab 'byor gzhan yang zhes bya ba nas/ don la spyad par bya'o zhes bya ba'i bar gyis gsungs so/ /shes rab kyi pha rol tu phyin pa la spyod pas mi rtag pa dang /sdug bsngal la sogs pa la spyad par mi bya zhes bya ba la rmongs pa ste/ gang gi gnyen po'i phyogs ni rab 'byor gzhan yang zhes bya ba nas/ de ltar shes rab kyi pha rol tu phyin pa'i don la spyad par bya'o zhes bya ba'i bar gyis gsungs so/ /don yang ma yin don med pa yang ma yin zhes bya ba ni nyon mongs pa rnams kyi rang bzhin yin te/de la rmongs pa'i rnam par rtog pa'o/ /gang gi gnyen po'i phyogs ni gsol pa/ bcom ldan 'das zhes bya ba nas/ gnyis kyi tshul gyis ni ma yin no zhes bya ba'i bar gyis gsungs so/ /gnyis dang gnyis med pa mi dmigs pa ni gnyis med pa'i ngo bo yin te/gang gi thob par 'gyur ba de la rmongs pa ste/ de nyid kyi ni rnam par rtog pa'o/ /gang gnyen po'i phyogs ni gsol pa/ bcom ldan 'das ci lags zhes bya ba nas/ sems can du 'dzin pa las yongs su grol bar byed do zhes bya ba'i bar gyis gsungs so//'dir yang bcom ldan 'das kyis mi dmigs pa na zhes gsungs pa gnyis dang gnyis med pa mi dmigs pa'i dbang du mdzad nas gsungs pa yin no zhes bya ba'i don to/ /de ltar na 'dzin pa'i rnam par rtog pa gnyis ni don ji lta ba bzhin ma yin pa nyid la rnam par rtog pa nyid yin pa'i phyir byang chub sems dpa'i spyod pa don med par 'gyur ro zhe na/'di skad ces gsol to zhes bya ba la sogs pa gsungs te/ byang chub sems dpa' dka' ba spyod pa 'di la don med pa ma yin te/ 'dod pa'i don sgrub pa'i phyir ro zhes bya bar dgongs so/ /de ltar na 'dzin pa'i rnam par rtog pa dgu bstan to//bsgom pas spang bar bya ba'i rnam par rtog pa sum cu rtsa drug gnyen po dang bcas pa legs par bstan na yon tan du 'gyur ba ji ltar yin zhe na/ yams nad 'di rnams zad nas ni/ /yun rings lon nas dbugs phyin ltar/ /rnam pa kun tu 'gro ba yi//bde sgrub yon tan phun tshogs kun/ /rgya mtsho che la chu bo bzhin/ /'bras bu mchog gis sba ba yi/ /sems dpa' chen po de la ni/ /rnam pa kun tu sten par byed/ /ces bya ba gsungs te/ gang mthong ba dang bsgom pas spang bar bya ba rnam par rtog pa bdun cu rtsa gnyis po 'di bstan nas/yams nad de dag nyid yon tan phun sum tshogs pa dag 'byung ba'i gegs nyid yin pa'i phyir 'di rnams zad par gyur na'o/ /yun ring lon zhes bya ba yun ring po lon nas dbugs phyin ltar zhes bya ba ni sngar de dag gis brgyal ba bzhin du gyur pa phyis de dag zad par gyur pa ni 'tsho ba rnyed pa bzhin te/ji lta ji ltar sa'i dbye bas de dag zad pa de lta de ltar bdag nyid 'byung bar 'gyur zhes bya ba'i don to/ /lhag ma ni go sla'o/ /rab 'byor 'di lta ste zhes bya ba nas/ phyag byas par 'gyur ro zhes bya ba'i bar gyis gang gsungs pa'o/ /bsgom pa'i lam gyi 'og tu bar chad med pa'i ting nge 'dzin te/mdo las gsol pa/ bcom ldan 'das zhes bya ba nas/ rgyur yang mi bzod do zhes bya ba'i bar gyis gsungs te/ 'dir byang chub sems dpa' yang 'di yin la zhugs pa yang yin pas so/ /ji ltar de zhugs pa yin zhe na/ sangs rgyas kyi lam bar chad med pa'i ting nge 'dzin la gnas pa nyid kyi phyir ro//'di'i don ni/ stong gsum skye bo nyan thos dang / /bse ru'i rtogs pa phun tshogs dang / /byang chub sems dpa'i skyon med la/ /bkod pa'i dge rnams dper mdzad nas/ /bsod nams mang po nyid kyis ni/ / sangs rgyas nyid kyi bar med de/ /bar chad med pa'i ting nge 'dzin/ /zhes bya ba gsungs te/ stong gsum gyi skye bo ste sems can gyi 'jig rten de dag nyan thos kyi rtogs pa dang rang sangs rgyas kyi rtogs pa dang byang chub sems dpa'i skyon med pa la bkod pa las dge ba gang yin pa dang / bsod nams thob pa gang yin pa de dper mdzad nas/de la bsod nams mang po nyid kyis ches bsod nams mang ba'i rgyu nyid du mtshan pa gang yin pa de ni bar chad med pa'i ting nge 'dzin to/ /bar chad dang bar chod nus pa ni bar chod do/ /bar du chod pa med pa ni bar chad med pa'o/ /de nyid kyi phyir sangs rgyas nyid thob pa la bar chad med ces bya ba gsungs te/sangs rgyas nyid thob pa la bar chad med pa'i rgyu yin no zhes bya ba'i don to/ /de ni rnam pa kun mkhyen nyid/ /ces bya ba ni sangs rgyas nyid de yang rnam pa thams cad mkhyen pa nyid ces bya ba'i don to/ /gsol pa/ bcom ldan 'das zhes bya ba nas/rnam pa thams cad mkhyen pa nyid yid la bya'o zhes gang gsungs pa'o/ /'di yi dmigs pa dngos med de/ /bdag po dran pa yin par bzhed/ /rnam pa bzhi nyid ces bya ba la/ rnam pa thams cad mkhyen pa nyid ni dngos po med pa la dmigs pa ste/ gang chos thams cad mtshan nyid ji lta ba bzhin du dngos po med pa'o//bdag po dran pa yin pa ni de'i gang rten nyid yin pa'i phyir ro/ /chos thams cad kyi rnam pa nub pa ni zhi ba ste/ de ni de'i rnam pa'o/ /gsol pa/ bcom ldan 'das rnam pa thams cad mkhyen pa zhes bya ba nas/ mtshan nyid do zhes bya ba'i bar gyis gang gsungs pa'o//'di la ni/ rab tu smra rnams brgyud mar rgol/ /zhes bya ba la/ 'di la zhes bya ni rnam pa thams cad mkhyen pa nyid de la'o/ /smra rnams brgyud mar rgol ba ni rgal ba dag dang rgal ba dag gis bsnun pas 'jug pa ste/ ber ga'i brgyud ma lta bu'o/ / ji ltar brgyud mar rgol zhe na/ gang gi phyir/ dmigs pa 'thad pa de yi ni/ /ngo bo nyid nges gzung ba dang / /rnam kun mkhyen nyid ye shes dang / /dam pa'i don dang kun rdzob dang / /sbyor dang dkon mchog gsum po dang / /thabs bcas thub pa'i rtogs pa dang / /phyin ci log ni lam bcas dang //gnyen po mi mthun phyogs dang ni/ /mtshan nyid dang ni bsgom pa la/ /smra ba rnams kyi log rtog dang / /rnam pa kun mkhyen nyid rten can/ /rnam pa bcu drug dag tu bzhed/ /ces gsungs te/ rnam pa bcu drug ces bya ba ni bcu dang drug ces bya ba'i don to/ /rnam pa kun mkhyen nyid rten can//zhes bya ba ni rnam pa thams cad mkhyen pa nyid la gnas pa can no/ /ci'i phyir bcu drug yin zhe na/ gang gi phyir de dag ni/ dmigs pa 'thad pa la sogs pa don bcu drug la'o/ /lan ni don bcu drug pa'o/ /de'i yul can gyi phyogs snga ma ni log par rtog pa'o/ /de la rnam pa thams cad mkhyen pa nyid la dmigs pa'i dngos po med pa'i phyir/gsol pa/ bcom ldan 'das zhes bya ba nas/ de ci'i phyir zhe na zhes bya ba'i bar gyis dri ba ni 'thad pa la log par rtog pa ste/ dngos po med pa ni gzugs dang mig la sogs pa ni gzung ba dang 'dzin pa'i sgo nas dmigs so zhes bya bar bsams pa'o//'thad pa ni rab 'byor de ni 'di ltar zhes bya ba nas/ chos thams cad dngos po med pa'i ngo bo nyid du rig par bya'o zhes bya ba'i bar gyis gsungs te/ gzung ba dang 'dzin pa dang bral ba nyid med pa nyid dang / de bzhin nyid la sogs pa'i rang bzhin nyid yin pa'i phyir ro zhes bya ba'i don to//gsol pa/ bcom ldan 'das zhes bya ba nas/ sems can yongs su smin par bgyid pa lags zhes bya ba'i bar gyis de'i ngo bo nyid nges par gzung ba la log par rtog pa ste/ de kho na nyid mthong bas thabs la mkhas pa ci zhig yin zhes bsams pa'o//lan ni bcom ldan 'das kyis bka' stsal pa zhes bya ba nas/ yongs su spang bar gyur te zhes bya ba'i bar te/ sbyin pa la sogs pa dag dngos po med pa'i ngo bo nyid du nges par gzung ba nyid ni de'i tshe thabs la mkhas pa yin no zhes bya ba'i don to/ /de kho na nyid ma mthong ba'i thabs la mkhas pa bstan pa na/'phags pa rnams kyi gang lags zhes shugs kyis khong du chud par bya ste/ log par rtog pa'o/ /lan ni/ rnam kun mkhyen nyid ye shes dang / /zhes bya ba yin te/ de ni nges par sangs rgyas kyi spyan zhes bya ba nas/ don dam par ma yin no zhes bya ba'i bar gyis gsungs te/bsdus pa'i don ni rnam pa ni rab tu dbye ba ste/ thams cad mngon sum gyis nyams su myong bar mdzad pa'i phyir rnam pa thams cad mkhyen pa'o/ /dngos po ni rnam pa thams cad mkhyen pa nyid de/ ye shes de nyid yang dag pa'i ye shes yin pa'i phyir/rnam kun mkhyen nyid ye shes so/ /chos de dag thams cad ni kun brtags pa dang / gzhan gyi dbang dang / yongs su grub pa'i ngo bo nyid gsum ste/ 'di ltar gzung ba dang 'dzin pa'i don dang de snang ba'i blo dang der btags pa'i rang bzhin gyis stong pa'o/ /gsum po de dag kyang dngos po med pa'i ngo bo nyid gsum gyi rnam pa yin no//sangs rgyas kyi spyan zhes bya ba la/ don dam par rtogs pa'i phyir byang chub sems dpa' ni sangs rgyas so/ /de'i spyan ni yang dag pa'i ye shes so/ /des rnam par bltas na zhes bya ba ni gnyis kyis stong pa nyid gzigs nas so/ / dngos po yang mi dmigs na zhes bya ba ni gzhan dbang gi ngo bo nyid de/ de ni dngos por btags pas stong pas bsal ba'i ngo bor gnas pa nyid kyi phyir ro/ /de yang dmigs su med pa ni kun du brtags pa'i ngo bo nyid byis pas bzung ba de ltar med pa nyid kyi phyir ro/ /smos kyang ci dgos zhes bya ba ni shin tu yang ngo //dngos po med pa zhes bya ba ni kun brtags pa'i don te/ de yang mtshan nyid ji lta ba bzhin du med pa nyid kyi phyir ro/ /de nyid kyi phyir gang de dag shin tu mi dmigs pa de nyid ni stong pa nyid la dmigs pa'o/ /gang stong pa nyid dmigs pa de nyid de dag mi dmigs pa yin no zhes phan tshun 'du bar 'gyur ro//gnyis kyis stong pa yang gnyis kyis dngos po med pa'i mtshan nyid yin pa'i phyir dngos po med pa'i ngo bo nyid do/ /de nyid kyi phyir rab 'byor byang chub sems dpa' sems dpa' chen po shes rab kyi pha rol tu phyin pa la spyod pa'i tshe zhes bya ba nas/ dngos po med pa'i ngo bo nyid ces bya ba'i bar gyis gsungs te/dngos po med pa gsum yang rang bzhin gang yin pa de la 'di skad ces bya'o/ /rnam pa gsum po de nyid so so zhing sbyin pa dang sbyin pa po dang len pa po la sogs pa dang sbyar na rnam pa shin tu mang por 'gyur ro/ /dngos po med par zhes bya ba ni gnyis kyis stong pa'i rnam pa zhes bya ba'i don to//shes so zhes bya ba ni yang dag par shes so zhes bya ba'i don to/ /ma byas pa ni byed pa po dang bral ba zhes bya ba rnam pa gzhan no/ /de ci'i phyir zhe na/ rang gi rgyud kyi byed pa po med pa'i phyir ro/ /chos rnams chos nyid dang bral ba zhes bya ba ni rnam pa gzhan te/chos rnams kyi mtshan nyid la las dang bya ba med pa nyid kyi phyir ro/ /chos la dngos po zhes bya ba ni gzhan gyi dbang ngo / /dngos po ma mchis zhes bya ba ni kun du brtags pa dang yongs su grub pa'o/ /'tshal bar mi rung ngo zhes bya ba ni dngos po med pa'i ngo bo nyid de/ shes pa po nyid dang mi ldan pa'i phyir dang gzung ba dang 'dzin pa dang bral ba'i phyir ro//chos thams cad yongs su 'tshal ba ma mchis pas dngos po ma mchis pa'am dngos po ma mchis pas zhes pa dang de ltar mi 'gyur ro zhes bya ba la byang chub sems dpa' de skad du ston pa gang yin pa de ni 'jig rten gyi kun rdzob yin gyi/don dam par ni ma yin no zhes bya ba ni/ rnam pa thams cad mkhyen pa nyid kyi ye shes kyi log par rtog pa'o/ /'jig rten gyi kun rdzob kyang gzhan don dam pa yang gzhan no zhes bya ba ni log par rtog pa'o/ /lan ni bcom ldan 'das kyis bka' stsal pa zhes bya ba nas/ shes rab kyi pha rol tu phyin pa la de ltar spyad par bya'o zhes bya ba'i bar gyis gsungs te/'di'i don ni de dag gi de bzhin nyid ni 'phags pa'i ye shes kyi yul du gcig pa nyid do/ /kun rdzob ni byis pa'i rnam par shes pa yin pa de bas na de nyid kyis byis pa la dngos po yod ces bya ba 'am dngos po med ces bya bar brjod pa ste/de ltar bden pa gnyis la log par rtog pa'o/ /de nas tshe dang ldan pa rab 'byor gyis zhes bya ba nas/ byang chub tu spyad pa yin no zhes bya ba'i bar gyis ni sbyor ba la log par rtog pa ste/ 'dir de dag gang gi tshig bla dgas yin zhes log par rtog pa'o/ /de ltar ni mtha' gsum la dmigs nas sbyin pa la sogs pa'i spyod pa byang chub sems dpa'i spyod pa yin gyi/rnam pa gzhan du na ni gang gis gang la ci zhig sbyin par 'gyur zhes sems so/ /tshig gi tshogs 'og mas ni lan btab pa yin no/ /chos thams cad stong pa nyid la spyod pa gang yin pa de ni byang chub la spyod pa yin pa de bas na de nyid byang chub sems dpa'i spyod pa yin no zhes bya ba'i don to//de skad ces bka' stsal pa dang zhes bya ba nas/ de'i phyir sangs rgyas so zhes bya ba'i bar gyis sangs rgyas dkon mchog la log par rtog pa ste/ 'dir de gang gi tshig bla dgas yin zhes log par rtog pa'o//'di snyam du gal te shes pa nyid kyi phyir sangs rgyas yin pa de'i tshe/ 'ga' zhig ces bya ba shes pa gang yin pa de thams cad sangs rgyas su 'gyur ba dang / de la shes pa dang ldan pas na sangs rgyas yin pa de'i tshe sems can thams cad sangs rgyas su 'gyur te/ byed pa dang ldan pa'i rkyen mi rigs so//gzhan yang khyab pa'i rigs pas thams cad mkhyen pas na sangs rgyas zhes brjod pa de'i tshe/ gzung ba dang 'dzin pa grub po zhes sems so/ /lhag ma ni lan yin no/ /'dir yang dag pa'i don can ni sangs rgyas zhes bya ba ste zhes bya ba la/ yang dag par phyin ci ma log pa'i don gyi yul gang la yod pa de ni yang dag pa'i don te/chos thams cad kyi de bzhin nyid ro gcig pa rab tu gsal ba gang yin pa de ni sangs rgyas zhes bya ba'i don to/ /rab 'byor gzhan yang zhes bya ba la sogs pas ji skad du bshad pa'i sangs rgyas kyi sgra'i don gyi nges pa'i tshig gnyis gsungs te/chos zhes bya ba ni chos thams cad do/ /yang dag pa zhes bya ba ni de bzhin nyid du ro gcig par gyur pa'o/ /mngon par rdzogs par sangs rgyas pa zhes bya ba ni ma lus par yang dag par mkhyen pa'o/ /des zhes bya ba ni byed pa po'i drug pa'o/ /rtogs pas na sangs rgyas te/de 'di la shin tu ba gsum yod pa'i phyir na sangs rgyas te/ don thams cad nyid dang / phyin ci ma log pa nyid dang / yang dag pa nyid ces bya ba ni shin tu ba gsum mo/ /yang dag pa'i don rab tu rtogs pa zhes bya ba la/ chos thams cad kyi tshogs de bzhin du ro gcig pa ni yang dag pa'i don to//rab tu rtogs pa zhes bya bas ni mngon sum gyis so/ /'di'i don ni rtogs pas na sangs rgyas te/ rab tu rtogs pa dang yang dag pa'i ye shes zhes bya ba ni 'di yin te/ spyi'i sgras kyang khyad par brjod pa'i phyir ro/ /de la shin tu ba 'di yod pas na sangs rgyas te don thams cad nyid dang phyin ci ma log pa'i don dang yang dag pa nyid ces bya ba'o//de ni sangs rgyas kyi sgra'i don dang nges pa'i tshig gzhan gyis chos thams cad ji lta ba bzhin du mngon par rdzogs par sangs rgyas pas na sangs rgyas zhes gsungs te/ 'dir chos thams cad ces bya ba ni sangs rgyas kyi chos thams cad de phul du byung ba'i phyir ro//mngon par rdzogs par sangs rgyas pa zhes bya ba la/ rdzogs pa'i sgras ni sangs rgyas pa nyid do/ /mngon pa ni de nyid ma lus pa ste/ spros pa thams cad kyis dben pa mkhyen pa zhes bya ba'i don to/ /ji lta ba bzhin du zhes bya ba ni shin tu rnam par dag pa'i chos nyid kyi ngo bos so//sangs rgyas zhes bya'o zhes bya ba ni spyi brjod par 'dod pas gcig gi tshig yin no/ /de ni rtogs pa nyid kyis sangs rgyas yin na gang gis shes pa yin zhe na/ chos de dag gang gi yin pa ste/ nye bar gyur pa'i phyir ro/ /spros pa thams cad kyis dben pa dang ji lta ba bzhin du zhes bya ba gang las yin zhe na/spyi'i sgra las kyang khyad par rtogs par 'gyur ro/ /de la 'dir chos kyi tshogs ni sangs rgyas kyi longs spyod rdzogs pa'i sku shin tu rnam par dag pa'o/ /sangs rgyas rnams kyi shin tu rnam par dag pa'i chos nyid ni ngo bo nyid kyi sku yin pa de bas na sangs rgyas zhes bya ba'o//rab 'byor gyis gsol pa zhes bya ba nas/ byang chub ces bya ba'i bar ni chos dkon mchog la log par rtog pa ste/ chos thams cad las phul du byung ba'i phyir bla na med pa'i byang chub ni chos dkon mchog go/ /de bas na gsungs pa/byang chub ces bya ba la sogs pa la/ gang gi tshig bla dgas lags zhes bya ba ni log par rtog pa'o/ /'di snyam du gal te rtogs pa tsam mam khyad du 'phags pa'i shes pa byang chub yin na/ chos de gnyi ga chos thams cad las khyad par du 'phags pa nyid ma yin no zhes bsams pa'o//mdo 'og ma ni lan yin te/ byang chub ces bya ba ni stong pa nyid de/ chos thams cad kyi spros pa thams cad dang bral bas gsal bzhin par gyur pa yin gyi/ rnam pa gzhan du na shin tu thal bar 'gyur ba'i phyir ro/ /de ni tshig bla dgas tsam mo zhes bya ba ni brdar btags pa'i ming yin gyi/don ni ma yin no zhes bya ba ni don to/ /yang na dbyer med pa'i don ni byang chub kyi don to zhes bya ba la/ 'di ltar chos thams cad yang dag par rtogs pas na byang chub ste/ de yang de dag stong pa nyid kyi bdag nyid dbyer mi phyed pa gsal bar gyur pa'o/ /yang na byang chub rtogs pa tsam ma yin te/'o na ci zhe na/ byang chub ni chos thams cad kyi rang bzhin no/ /de'i de bzhin nyid de kho na bzhin du ngo bo nyid kyis gnas pa'o/ /ma nor ba'i de bzhin nyid ces bya ba ni spros pa thams cad kyis dben pa phyin ci ma log pa'o/ /gzhan ma yin pa de bzhin nyid ces bya ba la/ gzhan ni kun brtags pa las gzhan gyi dbang gi ngo bo nyid do//de'i de bzhin nyid ni de bzhin nyid kyi dngos po ste/ btags pa'i rang bzhin gyi so sor snang ba'o/ /de nyid ni 'khrul pa'i mtshan nyid de dang bral bas na gzhan gyi de bzhin nyid ma yin pa'o/ /rnam pa gzhan du mi 'gyur ba zhes bya ba la/ rang gi ngo bo rig pa tsam las ma rig pa'i bag chags kyis byas pa brdzun pa'i lhag ma tsam rig pa ni rnam pa gzhan du 'gyur ba'o//bag chags zad pa las de dang bral ba ni rnam pa gzhan du mi 'gyur ba ste/ de dag thams cad kyis stong pa nyid du gsal bar gyur pa bstan pa de bas na de nyid byang chub ces bya'o//byang chub ces bya ba 'di ni ming dang mtshan ma tsam ste zhes bya ba la/ byang chub ces bya ba'i sgra 'dis ci zhig brjod ce na/ ming dang mtshan ma tsam du brjod pa ste/ gzugs can ma yin pa'i phung po'i mang gi sgrar brjod do/ /ming yang de yin la mtshan ma yang yin pas na ming dang mtshan ma ste/mtshan ma smos pas rgyu med pa'i mi ldan pa'i 'du byed rnam par bcad pa'i phyir ro/ /de bas na ming dang mtshan ma'i sgra 'dis ming dang mtshan mas khyab pa'i ngo bo'i byang chub mtshon par byed pa ste/ byang chub ming dang mtshan ma tsam sna tshogs par rnam par rig pa tsam de ni byang chub ces bya'o//tsam gyi sgras ni nges par gzung ba'i don to/ /byang chub kho na yin gyi/ rtogs par bya ba dang / rtogs par byed pa ni ma yin no zhes bya ba'i don to/ /'di skad du sna tshogs pa rtogs pa tsam nyid rtogs par bya ba dang / rtogs par byed pas stong pa nyid yang dag par gsal bar gyur par byang chub yin no zhes bstan par 'gyur ro//sna tshogs zhes bya ba ni ci'i phyir zhe na/ khyab par rigs pa'i phyir ro/ /ji ltar na tsam gyi don yin zhe na/ tshig gcig las kyang nges par gzung ba khong du chud pa'i phyir chu nyid 'thung zhes bya ba lta bu ste/ nyid kyi don la dngos po gtso bor gyur pa'i phyir ro//yang dag par gsal bar gyur ces bya ba ci'i phyir zhe na shugs las yin te rnam pa gzhan du na rtogs pa med pa dag kyang byang chub tu thal bar 'gyur ba'i phyir ro/ /de ni sangs rgyas bcom ldan 'das rnams kyi byang chub ste zhes bya ba la/ shes par bya ba yin pas na byang chub ste/ de yang byang chub rab kyi mthar phyin pa de bzhin gshegs pa'i gsungs so/ /de yang chos thams cad kyi tha dad pa nub pa'i de bzhin nyid gsal bar gyur pa yin pa de bas na byang chub ni stong pa nyid kho na'o/ /de ni sangs rgyas rnams kyis mngon par rdzogs par sangs rgyas pa de'i phyir byang chub ces bya ba la byang chub kyi sgra ni las su sgrub par byed pa kho na yin no//mngon par rdzogs par sangs rgyas pa de'i phyir byang chub ces bya ba'i sgra ni yang dag pa nyid dang / mngon pa'i sgra ni ma lus pa gsungs te/ 'khrul pa thams cad kyis dben pa'i sgo nas mkhyen pa zhes bya ba'i don to//'khrul pa thams cad kyis dben pa ni byang chub kyi sgra las rab kyi mthar phyin pa thob pa yin la/ khyab pa'i rigs pas chos thams cad kyi zhes bya ba thob pa de bas na byang chub ni stong pa nyid kho na yin te/ de nyid chos dkon mchog yin no/ /gsol pa/bcom ldan 'das zhes bya ba nas/ de ltar dag par mi 'gyur ro zhes bya ba'i bar gyis ni dge 'dun dkon mchog la log par rtog pa ste/ 'dir byang chub sems dpa'i dge 'dun ni dge 'dun dkon mchog ste/ byang chub tu sems bskyed pa thams cad kyang byang chub sems dpa' yin la de dag thams cad kyang dge 'dun dkon mchog gi nang du 'du bar 'gyur ro//de yang rigs pas ma yin te dbyer mi phyed pa'i don ni dge 'dun gyi don yin na/ gal te de pha rol tu phyin pa la sogs pa mi spyod na rgyu med pas gang las de'i byang chub yin/ ci ste spyod na mi dmigs pa dang bcas pa gang las byang chub yin/ci ste gnyis med pa'i tshul gyis spyod na 'di'i byang chub kyi don gyi dge ba'i rtsa ba rnam par 'phel bar mi 'gyur ro zhes bya ba ni log par rtog pa'o/ /'dir lan ni gnyis kyis spyod na dge ba'i rtsa ba mi 'phel la gnyis med pas spyod na 'phel te/'phel bar gyur pa de dag gis gang nas brtsams te/ bdud la sogs pas mi thul bar 'gyur la/ gang mi dge bas kyang bcom pa ni dman pa'i byang chub tu ltung ba de bas na de dag gis mi choms par gyur pa ni dge 'dun dkon mchog gi grangs su 'gro ste/ ji skad du/ nges 'byed yan lag nas bzung ste//mthong dang bsgom pa'i lam dag la/ /byang chub sems dpa' gang dag gnas/ /de 'dir phyir mi ldog pa'i tshogs/ /zhes bya ba gsungs pa yin no/ /lhag ma ni zhar las 'ongs pa'o/ /gsol pa/ bcom ldan 'das zhes bya ba nas/ 'tshang rgya bar mi nus so zhes bya ba'i bar gyis thabs la mkhas pa la log par rtog pa'o//rab tu 'byed pa la mkhas pa'i sgra ma gsungs pa ni yul gyis yul can bstan pa'i phyir ro/ /de la bcom ldan 'das zhes bya ba nas/ de gang lags zhes bya ba'i bar gyis ni log par rtog pa ste/ 'di snyam du gal te bden pa mthong ba dang / ma mthong ba dag la yang thabs la mkhas pa gsungs pa de ltar na yang de tsam gyis dman pa'i byang chub ldog par mi 'gyur ro zhes sems so/ /tshig gi tshogs 'og mas ni lan yin no/ /gsol pa/ bcom ldan 'das zhes bya ba nas/spros pa dang bral ba ni mngon par rtogs pa'o zhes bya ba'i bar gyis ni mngon par rtogs pa la log par rtog pa yin te/ rtogs pa ni byang chub yang dag par rtogs pa yin la mngon du phyogs pas rtogs pa ni mngon par rtogs pa'o/ /thub pa'i zhes bya ba ni thub pa nyid la mngon du bltas pa'o//bcom ldan 'das kyis bka' stsal pa zhes bya ba nas/ gcig tu mi 'gyur ram zhes bya ba'i bar gyis ni log par rtog pa'o/ /bcom ldan 'das kyis bka' stsal pa/ mngon par rtogs pa ni yod med pa ma yin te zhes bya ba la sogs pa ni lan no/ /gsol pa/ bcom ldan 'das zhes bya ba nas/ shes rab kyis rnam pa thams cad mkhyen pa nyid thob par byed do zhes bya ba'i bar gyis ni phyin ci log gi log par rtog pa'o/ /mdo las spros pa'i sgra dang bstan bcos las phyin ci log gi sgra gnyis ni don gcig pa nyid kyi phyir ro/ /spros pa zhes bya ba de yang ji ltar yin zhes bya ba ni log par rtog pa'o//gal te 'di snyam du shes rab kyi pha rol tu phyin pa spros pa dang bral ba phyin ci log bzhi dang bral bar gyur pa'i chos nyan thos kyi lam du 'gyur gyi sangs rgyas kyi lam ni ma yin no zhes sems so/ /bcom ldan 'das kyis bka' stsal pa zhes bya ba ni lan no//mi spro ba zhes bya ba ni chos kyi dbyings nyid yin pa'i phyir rnam par mi rtog pa'o/ /'phro bar mi byed do zhes bya ba ni rnam par rtog par mi byed pa'o/ /ngo bo nyid ni ngo bo nyid 'phro bar mi byed ces bya ba ni ngo bo nyid dang bcas pa'i tha dad pa dag ni dbyer med pa dang mi ldan pa'i phyir ro//dngos po med pa yang dngos po med pa 'phro bar mi byed ces bya ba ni ngo bo nyid med pa la gnyi gar med pa'i phyir ro/ /ngo bo nyid med do zhes bya ba ni dpyad mi bzod pa'i phyir ro/ /skad cig gcig dang ldan pa'i zhes bya ba ni rdo rje lta bu'i ting nge 'dzin dang ldan pa'o//gsol pa/ bcom ldan 'das zhes bya ba nas/ chos thams cad gang yang ma 'dus pa med do zhes bya ba'i bar gyis ni lam la log par rtog pa'o/ /de la bcom ldan 'das kyis bka' stsal pa zhes bya ba la sogs pa ni lan yin la/ de'i ltag yan chad ni log par rtog pa'o//gsol pa/ bcom ldan 'das gal te zhes bya ba nas/ ldan pa yang ma yin mi ldan pa yang ma yin no zhes bya ba'i bar gyis ni mi mthun pa'i phyogs dang gnyen po'i phyogs la log par rtog pa'o/ /de la byang chub kyi phyogs la sogs pa ni gnyen po'i phyogs so/ /ji ltar de dag gis byang chub thob par byed pa yin zhes bya ba ni log par rtog pa'o//lan ni gzhung 'og ma bslab par bya'o zhes bya ba'i bar gyis yin no/ /de'i 'og nas gsol pa/ bcom ldan 'das zhes bya ba la sogs pa ni mi mthun pa'i phyogs la log par rtog pa'o/ /'di snyam du mi mthun pa'i phyogs ni nyon mongs pa dag yin la/de dag 'dul bar byed pa 'di chos 'dul ba yin te/ gal te yod na de'i tshe sems can dang nyon mongs pa dag yod par gyur la de dag dang de dag ldan pa dang bral bar khas blang bar bya'o zhes sems pa'o/ /bcom ldan 'das kyis bka' stsal pa zhes bya ba la sogs pa ni lan yin no//chos 'dul ba de nyid ni gang dang ldan pa dang bral ba'i rnam par rtog pa'i yul ma yin no zhes dgongs so/ /rab 'byor 'di ni zhes bya ba nas/ de bzhin nyid du gnas pa'o zhes bya ba'i bar gyis mtshan nyid la log par rtog pa'o/ /chos kyi mtshan nyid gang yang dmigs par mi 'gyur ro zhes bya ba'i bar gyis ni skabs 'byed pa'o//'khor ba las dgrol bar bgyi'o zhes bya ba'i bar gyis ni log par rtog pa'o/ /de man chad ni lan yin no/ /gsol pa/ bcom ldan 'das zhes bya ba nas/ sems can thams cad phung po gsum du lung bstan par 'gyur ro zhes bya ba'i bar gyis ni bsgom pa la log par rtog pa'o//de la dang por bsod nams bya ba'i dngos po la dgod par mi nus so zhes bya ba yan chad kyis ni log par rtog pa'o/ /'dir mtshan nyid tha dad pa yang ma lags zhes bya ba ni mtshan nyid kyi rnam pa tha dad pa med pa'o//de man chad rgyas par ni lan yin no/ /dri ba gzhan dag ni de dang 'dren ma'o/ /de ltar log par rtog pa bcu drug bstan pa yin no/ /mngon par rtogs pa'i rgyan gyi 'grel pa dag ldan zhes bya ba rin chen 'byung gnas zhi bas sbyar ba las rtse mo'i mngon par rtogs pa ste le'u lnga pa'o// //mthar gyis pa/ rnam gsum rnam bcu zhes gong du gsungs pa de dag tshigs su bcad pa gcig gis/ sbyin pa shes rab bar dag dang / /sangs rgyas la sogs dran dang chos/ /dngos med ngo bo nyid kyis ni/ /mthar gyis pa yi bya bar bzhed//ces bya ba gsungs te/ sbyin pa nas/ shes rab kyi bar du pha rol tu phyin pa drug gi zhes bya ba'i don to/ /sangs rgyas la sogs dran dang zhes bya ba ni sangs rgyas dang / chos dang / dge 'dun dang / tshul khrims dang / gtong ba dang / lha rjes su dran pa dag gis so//chos/ dngos med ngo bo nyid kyis zhes bya ba ni chos rnams ngo bo nyid med pa nyid kyis zhes bya ba'i don to/ /bcu gsum po de dag gis mthar gyis pa'i bya bar bzhed do/ /de zhes bya ba ni rtse mo'i mngon par rtogs pa'i skabs bstan pa gang yin pa'o/ /mdo las dang por 'di'i bcom ldan 'das kyis bka' stsal pa zhes bya ba nas/pha rol tu phyin pa drug la spyod do zhes bya ba'i bar gyis rgol ba dang lan yin no/ /de nas gzhan yang zhes bya ba'i tshig re res pha rol tu phyin pa drug po dag gis mthar gyis pa'i bya ba drug yin no/ /de nas gzhan yang zhes bya ba'i tshig lngas sangs rgyas rjes su dran pa lnga yin te/gzugs la sogs pa'i phung po dang / mtshan dang dpe byad dang / tshul khrims la sogs pa'i phung po dang / stobs dang mi 'jigs pa la sogs pa dang / rten cing 'brel par 'byung ba yid la mi byed pa'o//de nas ji ltar na zhes bya ba'i tshig lngas chos rjes su dran pa la sogs pa lnga'o/ /de nas gzhan yang zhes bya ba'i tshig gcig gis chos thams cad dngos po med pa'i ngo bo nyid kyi'o/ /de nas dris pa dang lan dag yin no/ /mngon par rtogs pa'i rgyan gyi 'grel pa dag ldan zhes bya ba rin chen 'byung gnas zhi bas sbyar ba las mthar gyis pa'i mngon par rtogs pa ste le'u drug pa'o// //da ni skad cig ma gcig gis mngon par rtogs pa brjod par bya ba yin pas na rab 'byor gyis dang por shes rab kyi pha rol tu phyin pa la spyod pa'i tshe/ ji ltar sems bskyed pa gcig gis pha rol tu phyin pa drug la sogs pa'i chos thams cad dang /mtshan dang dpe byad kyi mthar thug pa yongs su 'dzin pa lags zhes bya ba ni 'dri bar byed pa'o/ /bcom ldan 'das kyis bka' stsal pa zhes bya ba la sogs pa ni lan yin no/ /skad cig ma/gcig gis mngon rdzogs byang chub pa/ /mtshan nyid kyis ni rnam pa bzhi/ /zhes sngar gsungs pa yin no/ /de dag gang zhe na/ zag pa med pa'i chos thams cad skad cig ma gcig la mngon par rtogs pa dang / dge ba'i chos thams cad skad cig ma gcig gis mngon par rtogs pa dang /mtshan nyid med par chos thams cad skad cig ma gcig gis mngon par rtogs pa dang / gnyis su med par chos thams cad skad cig ma gcig gis mngon par rtogs pa'o/ /bzhi po de dag tshig gi tshogs bzhis 'chad par mdzad pa de bas na dang po'i dbang du mdzad nas/sbyin pa la sogs re res kyang / /zag med chos kun bsdus pa'i phyir/ /thub pa'i skad cig gcig pa yi/ /rtogs pa 'di ni shes par bya/ /ji ltar skyes bu zo chun rgyud/ /rdog thabs gcig gis bskyod pa na/ /thams cad cig car 'gul ba ltar/ /skad cig gcig shes de bzhin no//zhes gsungs te/ byang chub sems dpa' shes rab kyi pha rol tu phyin pa la spyod pa'i tshe/ sbyin pa la sogs pa re res kyang zag pa med pa'i chos thams cad bsdus shing 'phangs pa'i phyir skad cig ma gcig gis rtogs pa ste/ sems kyi skad cig ma gcig gis mngon par rtogs pa ste dang po'o//ji ltar skyes bu'i rdog thabs gcig gis bskyod pa na/ zo chun gyi rgyud mo thams cad cig car 'gul ba de bzhin du sbyin pa la sogs pa'i sems gcig dang ldan pas zag pa med pa'i shes pa thams cad sngon gyi bsgoms pa'i shugs kyis 'dren par byed de/ rab 'byor 'di la zhes bya ba nas/ting nge 'dzin gyi pha rol tu phyin pa yongs su rdzogs par byed do zhes bya ba'i bar du ste/ 'dir dang por gzhan du ma yin zhes bya ba'i sgra dag ni nges par zhes bya ba'i don to/ /gnyis pa'i dbang du mdzad nas/ gang tshe dkar po thams cad kyi/ /rang bzhin shes rab pha rol phyin//rnam smin chos nyid gnas skabs skyes/ /de tshe skad cig gcig ye shes/ /zhes bya ba gsungs te/ rnam par smin pa'i chos nyid kyi rang bzhin lhun gyis grub pas 'jug pa'i gnas skabs de 'di la yod pas de skad ces brjod do/ /gnas skabs de yang sa brgyad pa la sogs pa'o//dkar po thams cad kyi rang bzhin zhes bya ba ni chos dkar po thams cad kyi rang bzhin no/ /skye zhes bya ba ni 'byung bar gyur pa'o/ /ye shes zhes bya ba ni dge ba'i sems can thams cad do/ /rab 'byor ji ltar na zhes bya ba nas/ rab tu yongs su rdzogs par 'gyur ro zhes bya ba'i bar gyis gang gsungs pa'o//gsum pa'i dbang du mdzad nas/ sbyin pa la sogs spyod pa yis/ /chos kun rmi lam 'drar gnas nas/ /chos rnams mtshan nyid med par ni/ /skad cig ma ni gcig gis rtogs/ /zhes bya ba gsungs te/ rtogs pa zhes bya ba ni khams gsum gyi don sna tshogs pa nyid kyi phyir mkhyen to zhes bya ba'i don to//lhag ma ni rtogs par sla'o/ /de nas tshe dang ldan pa zhes bya ba nas/ sprul pa lta bur yongs su shes so zhes bya ba'i bar gyis gang gsungs pa'o/ /bzhi pa'i dbang du mdzad nas/ rmi lam dang ni de mthong nyid/ / gnyis kyi tshul du mi mthong ltar/ /chos rnams gnyis su med pa yi/ /de nyid skad cig gcig gis mthong / /zhes bya ba gsungs te/ rmi lam dang ni de mthong nyid/ /ces bya ba ni byed pa dang ldan pa yin du zin kyang las [(]gyis [,]kyis [)]gnyis pa ste/ 'bras chan 'tshed du 'gro zhes bya ba lta bu'o//yang gzhung gzhan las de ltar rmi lam de mthong zhes 'byung ste/ de ltar gyi don ni snga ma dang 'dra'o zhes bya ba'i don to/ /lhag ma ni go sla'o/ /gsol pa/ bcom ldan 'das zhes bya ba nas/ mtshan nyid med pa'i tshul gyis shes rab kyi pha rol tu phyin pa la bslab par bya'o zhes bya ba'i bar gyis gang gsungs pa'o//mngon par rtogs pa'i rgyan gyi 'grel pa dag ldan zhes bya ba rin chen 'byung gnas zhi bas sbyar ba las/ skad cig ma gcig la mngon par rdzogs par byang chub pa ste le'u bdun pa'o// //mngon par rtogs pa brgyad pa'i mdor bstan pa ni/ngo bo nyid longs rdzogs bcas dang / /de bzhin sprul dang rnam gsum dang / /mdzad dang bcas pa chos sku ste/ /rnam pa bzhir ni yang dag brjod/ /ces bya ba sngar gsungs te/ ngo bo nyid dang longs spyod rdzogs pa dang / /sprul pa zhes bya ba rnam pa gsum mdzad pa dang bcas pa ni chos kyi sku ste/rnam pa bzhir gsungs so zhes bya ba'i don to/ /de la dang por ngo bo nyid de'i dbang du mdzad nas/ zag pa med chos rnam kun du/ /rnam par dag gyur thob gang yin/ /de dag rang bzhin mtshan nyid can/ /ngo bo nyid kyi sku ru bzhed/ /byang chub phyogs mthun tshad med dang //rnam par thar dang mthar gyis ni/ /snyoms 'jug dgu yi bdag nyid dang / /zad par bcu yi bdag nyid dang / /zil gyis gnon pa'i skye mched ni/ /rab tu dbye ba rnam brgyad dang / /nyon mongs med dang smon mkhyen dang / /mngon shes so so yang dag rig /rnam pa thams cad dag bzhi dang //dbang bcu dag ni stobs bcu dang / /mi 'jigs pa ni bzhi dag dang / /bsrung ba med pa rnam gsum dang / /dran pa nyer gzhag rnam gsum dang / /bsnyel ba mi mnga'i chos nyid dang / /bag chags yang dag bcom pa dang / /skye la thugs rje chen po dang / /thub pa kho na'i ma 'dres chos//bco brgyad bshad pa gang yin dang / /rnam pa thams cad mkhyen nyid dang / /chos kyi sku zhes brjod pa yin/ /zhes bya ba'i tshigs su bcad pa drug gis gsungs te/ zag pa med pa'i chos rnams rnam pa thams cad rnam par dag pa chos nyid kyi ngo bo nyid gang yin pa de ni sangs rgyas bcom ldan 'das kyi ngo bo nyid kyi sku ste/glo bur gyi 'khrul pa thams cad dang bral bas rang bzhin du gnas pa'i phyir ro/ /de skad du yang / sgrib pa kun gyi dri med dang / /rnam pa thams cad mkhyen nyid thob/ /rin chen snod ni phye ba ltar/ /sangs rgyas nyid ni yang dag bstan//zhes bya ba gsungs so/ /zag pa med pa'i chos de dag kyang gang zhe na/ byang chub kyi phyogs kyi chos sum cu rtsa bdun dang / tshad med pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / zad par gyi skye mched bcu dang / zil gyis gnon pa'i skye mched brgyad dang / nyon mongs pa med pa'i ting nge 'dzin dang / smon nas mkhyen pa dang / so so yang dag par rig pa bzhi dang / /rnam pa thams cad yongs su dag pa bzhi dang / dbang bcu dang / stobs bcu dang / mi 'jigs pa bzhi dang / bsrung ba med pa gsum dang /dran pa nye bar gzhag pa gsum dang / bsnyel ba mi mnga' ba'i chos nyid dang / bag chags yang dag par bcom pa dang / thugs rje chen po dang / sangs rgyas kyi chos ma 'dres pa bco brgyad dang / rnam pa thams cad mkhyen pa nyid do zhes bya ba ni de ltar ro/ /chos kyi sku ni chos kyi tshogs su brjod pa yin te/gang gi rang bzhin sangs rgyas rnams kyi ngo bo nyid kyi sku'o zhes bya ba'i don to/ /yang na chos rnams kyi rang bzhin gyi lus ngo bo nyid kyi mtshan nyid bstan cing chos de dag kyang brjod nas/ de ltar chos kyi sku brjod pa yin zhes bya bas mjug sdud pa yin no//tshig snga ma'i dngos po gtso bor gyur pa nyid kyi phyir chos nyid kyi sku ni chos kyi sku ste/ ngo bo nyid kyi sku zhes bya ba'i don to/ /de ltar na ni/ gcig min du ma'ang min zhes bya ba'i chos kyi sku'i bstod pa 'thad par 'gyur ro/ /gzhan dag ni chos de dag nyid kyi sku ste/ sangs rgyas rnams kyi sku bzhi pa yin la/de lta yin dang tshul gzhan las sku bzhir gsungs pa de ni legs par gsungs pa yin no zhes smra'o/ /de ni bden pa ma yin no/ /bcom ldan 'das ma las sku gsum nyid du gzhan yang zhes bya ba'i tshig gsum dang mdo gzhan dag las kyang gsungs pa'i phyir ro//sngags kyi tshul la bzhi yang rnam pa gzhan nyid du yin te/ sku dang gsung dang thugs ni sku gsum yin la/ bzhi pa'i ni de dag nyid kyi las sam mnyam pa nyid do/ /de ltar na ni chos de dag sku gang gis bsdus par 'gyur zhe na/ ngo bo nyid kyis te/ de dag ni 'khrul pa thams cad dang bral bas gsal ba'i bdag nyid chos nyid tsam yin pa'i phyir ro//de dag mtshan nyid kyi dbye ba ni rgyu'i gnas skabs kyi rjes su 'brangs nas kun rdzob yin no/ /spros pas chog go/ /de nyid kyi phyir ngo bo nyid kyi sku ni gzhan yang zhes bya ba'i tshig dang po nas bslab par bya'o zhes bya ba'i bar gyis gsungs te/de la bcom ldan 'das nyid kyis byang chub kyi phyogs la sogs pa thams cad dang / mtshan dang dpe byad bzang po dang bcas pa dang bsdu ba'i dngos po'i nang nas 'jig rten las 'das pa'i chos kyi sbyin par 'chad par gyur la/ bdag gis kyang bsam gtan dang /gzugs med pa la 'jug pa dang / tshad med pa la 'jug pa dang / lam gyi tshogs rgyas par mang du bstan pas de dang de dag rgyas par shes par bya'o/ /nyon mongs pa med pa dang / smon nas shes pa'i mtshan nyid kyang de nyid du 'chad par 'gyur ro/ /de dag gi nyan thos kyi 'bras bu gang yin pa dang /sangs rgyas bcom ldan 'das kyi 'bras bu gang yin pa ni/ nyan thos nyon mongs med pa lta'i/ /nyon mongs yongs su mi spong nyid/ /rgyal ba grong sogs de dag gi/ /nyon mongs rgyun gcod nyon mongs med/ /sangs rgyas smon nas mkhyen pa ni/ / lhun gyis grub dang chags spang dang / /thogs pa med dang rtag gnas dang / /'dri ba kun la lan 'debs byed/ /ces pa'i tshigs su bcad pa gnyis kyis gsungs te/ nyan thos kyi nyon mongs pa med pa ni grong la sogs par sems can gang dag mthong bar gyur pa na/ de'i nyon mongs pa skye bar 'gyur ba na mi rung ngo zhes de dag mthong ba nyid zlog par byed kyi/nyon mongs pa mngon sum du ni ma yin no/ /de bzhin gshegs pa'i nyon mongs pa med pa ni mthong ba yod kyang de dag gi nyon mongs pa'i rgyun nyid gcod par byed kyi/ mthong ba ni ma yin no/ /sangs rgyas dag gi smon nas mkhyen pa lhun gyis grub pa ni rnam par rtog pa med pa nyid kyi phyir ro//chags pa mi mnga' ba ni ltos pa med pa nyid kyi phyir ro/ /thogs pa med pa ni thams cad du thogs pa mi mnga' ba nyid kyi phyir ro/ /rtag tu gnas pa ni rtag tu thugs mnyam pa nyid la gnas pa nyid kyi phyir ro/ /'dri ba thams cad kyi len lon par mdzad pa nyid kyi phyir na/'dri ba kun gyi lan 'debs pa'o/ /nyan thos rnams kyi ni zlog pa dag yin no/ /rgyud ni yongs su smin gyur nas/ /gang dang gang la gang dang ni/ /gang tshe bya ba phan gyur pa/ /de dang de la de snang ngo / /de dang de la phan pa mdzad pa'i phyir ro/ /de zhes bya ba ni ngo bo nyid kyis sangs rgyas so//de dang de'i tshe snang ba'i ni sprul pa'i sku snang ba'i phyir ro/ /ci'i phyir thams cad la thams cad mi snang zhe na/ lha'i rgyal pos char phab kyang / /sa bon mi rung mi 'khrung ltar/ /sangs rgyas rnams ni byung gyur kyang / /skal ba med pas bzang mi myong //de ltar mdzad pa rgya che'i phyir/ /sangs rgyas khyab par nges par brjod/ /de nyid zad pa med pa'i phyir/ /rtag pa zhes kyang brjod pa yin/ /mdzad pa rgya che ba ni skal ba ji lta ba bzhin du sna tshogs pa'i don mdzad pa'o/ /de nyid ces bya ba ni mdzad pa'o/ /zad pa med pa'i phyir zhes bya ba ni bral ba med pa'i phyir ro//gzhan yang zhes bya ba'i tshig gnyis pa nas/ bslab par bya'o zhes bya ba'i bar gyis longs spyod rdzogs pa'i sku gsungs te/ 'dir byang chub sems dpa' smos pa ni gzhan dag rnam par bcad pa'i phyir ro/ /sems dpa' chen po smos pa ni 'phags pa ma yin pa rnam par bcad pa'i phyir ro//mchog tu zhes bya ba ni sgra ji lta ba bzhin du ma yin pa bsam pa ji lta ba bzhin no/ /bla na med pa'i dga' ba dang / /mgu ba dang / rab tu dga' ba dang / bde ba nye bar longs spyod pa'i phyir zhes bya ba de dag gis ni 'di skad du gang de ltar longs spyod rdzogs pa ste/de la nus par gyur pa'i phyir longs spyod rdzogs pa'i sku zhes gsungs so/ /bstan bcos mdzad pas de dag gi dbang du mdzad nas/ mtshan ni sum cu rtsa gnyis dang / /dpe byad brgyad cu'i bdag nyid 'di/ /thub pa'i longs spyod rdzogs skur bzhed//ces gsungs so/ /ci'i phyir longs spyod rdzogs pa yin zhe na/ theg chen nye bar longs spyod phyir te/ sku des theg pa chen po la longs spyod rdzogs pa'i phyir ro/ /byang chub sems dpas thob pa dag gis rdzogs par longs spyod pas na longs spyod rdzogs pa'o//de la dang por mtshan dag ni/ /phyag zhabs 'khor lo'i mtshan dang rus sbal zhabs/ /phyag dang zhabs sor dra bas 'brel ba dang / /phyag ni zhabs bcas 'jam zhing gzhon sha chags/ /'di yi sku ni bdun dag mtho ba dang / /sor mo ring dang rting yangs sku che drang / /zhabs long mi mngon spu ni gyen du phyogs//byin pa e n+ya'i 'dra phyag ring mdzes/ /mdoms kyi sba ba sbubs su nub pa'i mchog /pags pa gser mdog pags pa srab pa dang / /spu ni re re nas g.yas legs 'khrungs dang / /zhal mdzod spus brgyan ro stod seng ge'i 'dra/ /'di yi dpung pa'i mgo zlum thal gong rgyas//'di la ro mi zhim pa'ang ro mchog snang / /sku ni n+ya gro d+ha ltar chu zheng gab/ /gtsug tor yar 'phags ljags ring mdzes pa dang / /tshangs dbyangs 'gram pa seng ge'i 'dra dang tshems/ /shin tu dkar dang tshad mnyam thags bzang dang / /grangs ni bzhi bcu tham pa tshang ba dang //spyan ni mthon mthing spyan rdzi ba mchog gi/ /'dra ba 'di dag sum cu rtsa gnyis mtshan/ /'di'i phyag dang zhabs la 'khor los mtshan pas na/ phyag zhabs 'khor los mtshan pa'o/ /legs par gnas pa nyid kyi phyir 'di la rus sbal dang 'dra ba'i zhabs mnga' bas na rus sbal zhabs te/de yang 'di yin la de yang yin pas na zhes bya ba ni bsdu ba'o/ /'di la phyag dang zhabs kyi sor mo dra bas 'brel pa mnga' bas na phyag dang zhabs sor mo dra bas 'brel pa'o/ /phyag ni zhabs bcas 'jam zhing gzhon sha can/ /'di yi zhes bya ba'i 'og ma dang sbyar ro//'di yi sku ni bdun dag mtho ba dang / /zhes bya ba ni mtshon par byed pa'i gsum pa'o/ /sku ni rten yin no/ /'di'i sku bdun mtho ba dag gis mtshon par byed ces bya ba'i don to/ /de dag gis mtshan lnga bstan pa yin te/ phyag dang zhabs 'khor los mtshan pa nyid/ zhabs shin tu legs par gnas pa dang /phyag dang zhabs dra bas 'brel pa nyid dang / phyag dang zhabs gzhon sha chags pa nyid dang / sku bdun mtho ba nyid ces bya ba'o/ /sor mo ring dang rtings yangs sku che drang / /zhabs long mi mngon spu ni gyen du phyogs/ /byin pa e na ya'i 'dra phyag ring mdzes//mdoms kyi sba ba sbubs su nub pa'i mchog /ces bya ba la/ sor mo ring ba nyid dang rting pa yangs pa zhes bya ba ni tshogs pa gtso bor gyur pa'i zlas dbye ba'o/ /sku che drang zhes bya ba ni sku rgya che la drang ba'o/ /zhabs kyi long bu mi mngon pa dang / spu gyen du phyogs pa ste/ mdo las pus mo'i lha nga dang //long bu mdzes par nub pas na zhabs kyi long bu mi mngon pa zhes gsungs pa de bas na mi mngon pa'i sgra ni shin tu legs par sbas pa'i don yin no/ /long bu'i sgra ni pus mo'i lha nga dang / long bu'i rus pa rjod par byed pa ste/ brla'i rtsa ba man chad kun la zhabs zhes bya bar khong du chud par bya'o//mdoms kyi sba ba ni mdoms kyi sba ba ste/ 'di la mdoms kyi sba ba sbubs su nub pa'i mchog mnga' bas na/ de skad ces brjod do/ /'dis ni sor mo ring ba nyid dang / rting pa yangs pa nyid dang / sku che la drang ba nyid dang / zhabs kyi long bu mi mngon pa nyid dang //spu gyen du phyogs pa nyid dang / byin pa e na ya'i 'dra ba nyid dang / phyag ring la mdzes pa nyid dang / mdoms kyi sba ba sbubs su nub pa nyid ces bya ba mtshan brgyad yin no/ /pags pa gser mdog pags pa srab pa dang / /spu ni re re nas g.yas legs 'khrungs dang //zhal mdzod spus brgyan ro stod seng ge'i 'dra/ /'di yi dpung pa'i mgo zlum thal gong rgyas/ /zhes bya ba la/ 'di la ro stod seng ge dang 'dra ba mnga' bas na ro stod seng ge dang 'dra ba can no/ /mgo zlum zhes bya ba ni shin tu zlum pa ste/ mgur dang rgyud legs par 'brel cing lhun zlum pa nyid kyi phyir ro//phrag pa'i bar ni thal gong ste brang ngo / /'di la de rgyas pa mnga' bas na thal gong rgyas pa can no/ /'dis ni pags pa gser mdog nyid dang / pags pa srab pa nyid dang / spu re re nas g.yas phyogs su 'khyil ba nyid dang /zhal mdzod spus mtshan pa nyid dang / sku ro stod seng ge'i 'dra ba nyid dang / dpung mgo shin tu zlum pa nyid dang / thal gong rgyas pa nyid ces bya ba mtshan bdun yin no/ /'di la ro mi zhim pa'ang ro mchog snang / /sku ni n+ya gro d+ha ltar chu zheng gab/ /gtsug tor yar 'phags ljags ring mdzes pa dang //tshangs dbyangs 'gram pa seng ge'i 'dra dang tshems/ /shin tu dkar dang tshad mnyam thags bzang dang / /grangs ni bzhi bcu tham pa tshang ba dang / /spyan ni mthon mthing spyan rdzi ba mchog gi/ /'dra ba 'di dag sum cu rtsa gnyis mtshan/ /zhes bya ba'i tshigs su bcad pa gnyis po 'dis ro'i mchog mkhyen pa nyid dang /n+ya gro d+ha ltar chu zheng gab pa nyid dang / dbu gtsug tor dang ldan pa nyid dang / ljags ring zhing srab pa nyid dang / tshangs pa'i dbyangs nyid dang / 'gram pa seng ge'i 'dra ba nyid dang / tshems dkar ba nyid dang / tshems mnyam pa nyid dang / tshems thags bzang ba nyid dang / tshems mnyam zhing bzhi bcu tshang ba nyid dang / spyan mthon mthing nyid dang / rdzi ma ba'i lta bu nyid ces bya ba mtshan sum cu rtsa gnyis gsungs so/ /'di la bcu'i tshad kyi tshogs mnga' bas na bzhi bcu tham pa tshang ba ste/ bcu tshan bzhi zhes bya ba'i don to//thams cad gcig tu bsdus na 'di dag sum cu rtsa gnyis yin no/ /ba mchog ni ba dang glang ngo / /yang na ba mchog ni khyu mchog la bya'o/ /de dag bshad pa dang rgyu dang sngon gyi mtshan ma ni mdo ji lta ba bzhin du chos kyi sbyin pa la ste/ 'di la mtshan ni gang gang gis//sgrub par byed pa'i rgyu gang yin/ /de dang de ni rab rdzogs pas/ /mtshan ni 'di dag yang dag 'grub/ /'dir mtshan gang dang rgyu gang dang gang gis sgrub par byed pa gang yin pa de dang de rab tu rdzogs pas longs spyod rdzogs pa'i sku 'di'i mtshan yang dag par 'grub po/ /yang gang gi rgyu gang zhe na/bla ma skyel la sogs pa dang / /yang dag blangs la brtan pa dang / /bsdu ba bsten dang gya nom pa'i/ /dngos po sbyin dang gsad bya ba/ /thar par byed dang dge ba ni/ /yang dag blangs dang spel la sogs/ /sgrub byed rgyu yi mtshan nyid de/ /de la sogs pa mdo bzhin no//zhes bya ba gsungs te/ de la bla ma dag skyel ba dang bsu ba dag dang / chos nyan pa dang / me tog gis mchod pa dang / mchod rten gyi thad du 'gro ba la sogs pa la g.yog byas pas phyag dang zhabs 'khor lo'i mtshan dang ldan pa yin no/ /yi dam la shin tu brtan pas zhabs shin tu gnas pa dang /bza' ba dang btung ba la sogs pa gya nom pa byin nas phyag dang zhabs 'jam zhing gzhon sha chags pa nyid dang / bdun mtho ba nyid do/ /gsad par bya ba thar par bya ba mang po'i tshig ni sogs pa'i don to/ /gsad pa thar par byas pa dang / /srog rjes su gzung bar byas pa dang /srog gcod pa las ldog pa kun nas bsten pas sor mo ring ba nyid dang / rting pa yangs pa nyid dang / sku che zhing drang ba nyid do/ /dge ba'i chos yang dag par blangs pa rnam par spel zhing 'grib par ma byas pas zhabs kyi long bu mi mngon pa nyid dang / sku'i spu gyen du phyogs pa nyid do//de la sogs pa ni de lta bu la sogs pa'o/ /mdo bzhin du zhes bya ba ni chos kyi sbyin pa ji skad du 'chad par 'gyur ba'o/ /skyes bu chen po'i bya ba byed pa nyid kyi phyir de bzhin gshegs pa dang / byang chub sems dpa' ni skyes bu chen po ste/ de dag gsal bar byed pas skyes bu chen po'i mtshan sum cu rtsa gnyis so//de dag mdzes par byed pa'i phyir dpe [(]byed [,]byad [)]bzang po brgyad cu ste/ de dag gi dbang du byas nas/ thub pa'i sen mo zangs mdog dang / /mdog snum mtho dang sor mo rnams/ /zlum rgyas byin gyis phra ba dang / /rtsa mi mngon dang mdud pa med//ces bya ba 'dis ni sen mo zangs kyi mdog nyid dang / sen mo mdog snum pa nyid dang / sen mo mtho ba nyid dang / sen mo zlum pa nyid dang / sor mo rgyas pa nyid dang / sor mo byin gyis phra ba nyid dang / rtsa mi mngon pa nyid dang / rtsa mdud pa med pa nyid ces bya ba dpe byad bzang po brgyad gsungs pa yin no//long bu mi mngon zhabs mnyam dang / /seng ge glang chen bya dang ni/ /khyu mchog stabs gshegs g.yas phyogs dang / /mdzes gshegs drang dang 'khril bag chags/ /byi dor byas 'dra rim par 'tsham/ / zhes bya ba'i tshig rkang pa gcig gis lhag pa'i tshigs su bcad pas ni long bu mi mngon pa nyid dang / zhabs mi mnyam pa med pa nyid dang / seng ge'i stabs su gshegs pa nyid dang / glang po che'i stabs su gshegs pa nyid dang / ngang pa'i stabs su gshegs pa nyid dang / khyu mchog gi stabs su gshegs pa nyid dang / g.yas phyogs su ldog cing gshegs pa nyid dang / sku mdzes par gshegs pa nyid dang / sku drang ba nyid dang / sku 'khril bag chags pa nyid dang / sku byi dor byas pa nyid dang / sku rim par 'tsham pa nyid ces bya ba bcu gnyis so//gtsang dang 'jam dang dag pa'i sku/ /mtshan ni yongs su rdzogs pa dang / /sku yi kho lag yangs shing bzang / /zhes bya ba'i tshig rkang gsum gyis ni sku gtsang ba nyid dang / sku 'jam pa nyid dang / sku rnam par dag pa nyid dang / mtshan rdzogs pa nyid dang / sku'i kho lag yangs shing mdzes pa nyid ces bya ba dpe byad bzang po lnga yin no//gom snyoms spyan ni dag pa dang / /shin tu gzhon mdog can nyid dang / /sku zhum med dang rgyas pa dang / /shin tu grim pa'i sku nyid dang / /zhes bya ba 'dis ni gom pa snyoms pa nyid dang / spyan rnam par dag pa nyid dang / sku shin tu gzhon sha chags pa nyid dang /sku zhum pa med pa nyid dang / sku rgyas pa nyid dang / sku shin tu grims pa nyid ces bya ba drug go/ /yan lag shin tu rnam 'byes dang / /gzigs pa mun med dag pa dang / /dku zlum skabs phyin ma rnyongs dang / /phyang nge ba dang lte ba ni/ /zab dang g.yas phyogs 'khyil ba dang //kun nas blta na sdug pa dang / /zhes bya ba'i tshigs su bcad pa phyed dang gnyis po 'dis ni yan lag dang nying lag shin tu rnam par 'byes pa nyid dang / gzigs pa rab rib med cing dag pa nyid dang / /dku zlum pa nyid dang / dku skabs phyin pa nyid dang /dku ma rnyongs pa nyid dang / phyal phyang nge ba nyid dang / lte ba zab pa nyid dang / lte ba g.yas phyogs su 'khyil ba nyid dang / kun nas mdzes pa nyid ces bya ba dgu'o/ /kun spyod gtsang dang sku la ni/ /sme ba gnag bag med pa dang / /phyag ni shing bal ltar 'jam dang / / phyag ris mdangs yod zab ring dang / /zhal ni ha cang mi ring dang / /zhal gzugs gzugs brnyan 'byung ba dang / /zhes bya ba la/ zhal 'di la gzugs kyi gzugs brnyan 'byung ba gang yin pa de la de skad ces bya'o/ /zhal zhes bya ba ni zhal gdong ste/ zhal gdong la gzugs kyi gzugs brnyan mnga' ba'o//tshigs su bcad pa phyed dang gnyis po 'dis ni kun tu spyod pa gtsang ba nyid dang / sku la sme ba gnag bag med pa nyid dang / phyag shing bal ltar 'jam pa nyid dang / phyag gi ri mo mdangs yod pa nyid dang / phyag gi ri mo zab pa nyid dang / phyag gi ri mo ring ba nyid dang /zhal ha cang yang mi ring ba nyid dang / zhal gdong la gzugs brnyan mthong ba nyid ces bya ba brgyad do/ /ljags mnyen pa dang srab pa dang / /dmar dang 'brug gi sgra nyid dang / /gsung mnyen 'jam dang mche ba zlum/ /rno dang dkar dang mnyam pa dang / /byin gyis phra dang shangs mtho dang //mchog tu dag pa nyid dang ni/ /zhes bya ba la/ mchog ni shin tu ba'o/ /tshigs su bcad pa phyed dang gnyis po 'dis ni ljags mnyen pa nyid dang / ljags srab pa nyid dang / ljags dmar ba nyid dang / glang po'i nga ro nyid dang / 'brug gi sgra dang ldan pa nyid dang / gsung snyan cing mnyen la 'jam pa nyid dang /mche ba zlum pa nyid dang / mche ba rno ba nyid dang / mche ba dkar ba nyid dang / mche ba mnyam pa nyid dang / mche ba byin gyis phra ba nyid dang / shangs mtho ba nyid dang / gtsang ba nyid ces bya ba bcu gnyis so/ /spyan yangs pa dang rdzi ma stug / pad+ma'i 'dab ma 'dra ba dang / /smin tshugs ring dang 'jam pa dang / /sbrum dang spu ni mnyam pa dang / /phyag ring rgyas dang snyan mnyam dang / /nyams pa rnam par spangs pa dang / /'phral ba legs par 'byes pa dang / /dbyes che ba dang dbu rgyas dang / /zhes bya ba'i tshigs su bcad pa gnyis po 'dis ni spyan yangs pa nyid dang /rdzi ma stug pa nyid dang / spyan dkar nag 'byes shing pad+ma'i 'dab ma lta bu nyid dang / smin tshugs ring ba nyid dang / smin ma 'jam pa nyid dang / smin ma snum pa nyid dang / smin ma'i spu mnyam pa nyid dang / phyag ring zhing rgyas pa nyid dang /snyan mnyam pa nyid dang / snyan ma nyams pa nyid dang / dpral ba legs par 'byes pa nyid dang / dpral ba dbyes che ba nyid dang / dbu shin tu rgyas pa nyid ces bya ba bcu gsum mo/ /dbu skra bung ba ltar gnag dang / /stug 'jam mi 'dzings ngo bo dang / /mi gshor skyes bu'i yid 'phrog dang //dpal gyi be'u dang bkra shis ni/ /sangs rgyas dpe byad bzang por bzhed/ /ces bya ba tshig rkang lnga po 'dis ni dbu skra bung ba ltar gnag pa nyid dang / dbu skra stug pa nyid dang / dbu skra 'jam pa nyid dang / dbu skra mi 'dzings pa nyid dang / dbu skra ma gshor ba nyid dang / dbu skra dri zhim pa nyid dang / phyag dang zhabs kyi mthil la dpal gyi be'u dang / bkra shis dang g.yung drung 'khyil pas brgyan pa nyid ces bya ba bdun yin no/ /de dag gcig tu byas nas sangs rgyas kyi dpe byad bzang po brgyad cu dag yin no/ /gang gis srid pa ji srid bar/ /'gro la phan pa sna tshogs dag /mnyam du mdzad pa sku de ni/ /thub pa'i sprul pa rgyun mi 'chad/ /de ltar de'i las 'khor ba'i bar/ /rgyun mi 'chad par bzhed pa yin/ /zhes bya ba la/ srid pa ji srid par zhes bya ba ni 'khor ba ji srid pa dang nam mkha' ji srid pa'i bar du'o/ /de ltar sku gsum gyi bdag nyid can gyi chos kyi sku bstan nas/de'i dbang du mdzad pa brjod par bya ba de la/ dngos po med pa nyid du mngon sum du mdzad pa'i chos thams cad la dge ba dang / mi dge ba la sogs pa rnam par gzhag pa mi rigs pa'i phyir mi rung ngo snyam pa'i rab 'byor gyi dri ba dang / bcom ldan 'das kyi lan dag yin no//de'i mdzad pa yang rnam pa du zhig ce na/ de'i phyir/ 'gro rnams zhi ba'i las dang ni/ /bsdu rnam bzhi la 'god pa dang / /kun nas nyon mongs bcas pa yi/ /rnam par byang ba rtogs pa dang / /sems can don rnams ji bzhin gyi/ /don dang pha rol phyin drug dang //sangs rgyas lam dang rang bzhin gyis/ /stong pa nyid dang gnyis zad dang / /brda dang dmigs pa med pa dang / /lus can rnams ni yongs smin dang / /byang chub sems dpa'i lam dang ni/ /mngon par zhen pa bzlog pa dang / /byang chub thob pa sangs rgyas zhing / / rnam par dag dang nges pa dang / /sems can don ni tshad med dang / /sangs rgyas bstan sogs yon tan dang / /byang chub yan lag las rnams ni/ /chud mi za dang bden mthong dang / /phyin ci log ni spang ba dang / /de bzhin med pa'i tshul dang ni/ /rnam par byang dang tshogs dang ni//'dus byas 'dus ma byas pa la/ /tha dad yongs su mi shes dang / /mya ngan 'das la 'god pa ste/ /chos kyi sku yi 'phrin las 'di/ /rnam pa nyi shu bdun du bzhed/ /ces bya ba gsungs te/ mtha' 'god pa'i sgra ni dbus ma kun la sbyar bar bya'o/ /de la ngas 'di nas zhes bya ba'i tshig gsum gyis dmyal ba dang yi dags dang dud 'gro'i 'gro ba dag rab tu zhi ba yin te/de spangs nas bde 'gror 'gro ba'i phyir ro/ /ngas 'di nas zhes bya ba'i tshig bzhi pa dang / lnga pa dag gis 'dod pa'i yon tan gyis rgyal ba dang / tshig de'i nang nas yod pa'i lha'i bu'i sgra yis de dang 'dra ba lha ma yin dag kyang gzung ba'i phyir lha dang lha ma yin dang tshangs pa dag rang gi gnas kyi nyes pa mthong bas mi rnams kyi nang du 'ong ba srid pa'i phyir ro//mi las gzhan pa nyid kyi 'gro ba rab tu zhi ba'i las gsungs pa yin gyi/ mi rnams kyi ni ma yin no/ / ngas 'di nas zhes bya ba'i tshig drug pa nas brtsams te/ rab 'byor de ltar byang chub sems dpa' sems dpa' chen po chos kyi sbyin par rig par bya'o zhes bya ba nas/ bsdu ba'i dngos po rnam pa bzhi la 'god pa'i las kyi bar du ste/ de la sbyin pa'i bsdu ba'i dngos po'i dbye ba rnam pa gsum ste/zang zing gi sbyin pa dang / 'jig rten pa'i chos kyi sbyin pa dang / 'jig rten las 'das pa'i chos kyi sbyin pa'o/ /de la dang po ni grub pa dang bde ba dang ldan pa'i lam la bkod de zhes bya ba'i bar du'o/ /gnyis pa ni rnam pa thams cad mkhyen pa nyid kyi bar la 'god par byed do/ / zhes bya ba'i bar du'o/ /de la gsum pa ni rab 'byor byang chub sems dpa' sems dpa' chen po'i 'jig rten las 'das pa'i chos kyi sbyin pa zhes bya ba la sogs pa rgyas par 'byung ba'o/ /rab 'byor gzhan yang byang chub sems dpa' sems dpa' chen po zhes bya ba nas/'di ni bla na med pa yang dag par rdzogs pa'i byang chub kyi bar zhes bya ba'o zhes chos ston to zhes bya ba'i bar gyis ni kun nas nyon mongs pa dang rnam par byang ba'i shes pa la 'god pa'i las so/ /rab 'byor 'di lta ste/ dper na sgyu ma'i mkhan po zhes bya ba nas/ sems can du gdags pa yang mi dmigs te zhes bya ba'i bar gyis ni sems can gyi don ji lta ba bzhin la bdag nyid 'god pa'i las so//bdag kyang sbyin pa gtong zhing zhes bya ba nas/ mthun pas dga' bar spyod pa zhes bya ba'i bar gyis ni pha rol tu phyin pa drug la 'god pa'i las so/ /bdag kyang dge ba bcu'i zhes bya ba nas shes rab kyi pha rol tu phyin pa bsgoms te zhes bya ba'i bar gyis ni sangs rgyas kyi lam la 'god pa'i las so//rab 'byor gal te yang dag pa'i mtha' yang gzhan la zhes bya ba nas/ the tshom za bar 'gyur ba lta ga las 'ong zhes bya ba'i bar gyis rang bzhin gyis stong pa nyid la 'god pa'i las so//rab 'byor 'di lta ste dper na de bzhin gshegs pa'i sprul pa zhes bya ba nas mngon par rtogs par byed pa med de zhes bya ba'i bar gyis gnyis su med pa'i chos la 'god pa'i las so/ /rab 'byor de yang 'jig rten gyi tha snyad du btags pa zhes bya ba nas/sems can gyi don byed do zhes bya ba'i bar gyis ni brdar btags pa shes pa la 'god pa'i las so/ /de nas tshe dang ldan pa rab 'byor zhes bya ba nas/ bla na med pa yang dag par rdzogs pa'i byang chub tu 'jog go zhes bya ba'i bar gyis ni dmigs su med pa'i ye shes la 'god pa'i las so//gsol pa/ bcom ldan 'das zhes bya ba nas/ sems can gang yang mi dmigs so zhes bya ba'i bar gyis ni sems can yongs su smin par byed pa la 'god pa las so/ /de nas tshe dang ldan pa rab 'byor zhes bya ba nas/ chos rnam par 'god pa byas shing sems can rnams la chos ston to zhes bya ba'i bar gyis ni byang chub sems dpa'i lam la 'god pa'i las so//rab 'byor de la zhes bya ba la sogs pa nas/ lam des sems can rnams 'khor ba las thar par byed do zhes bya ba'i bar gyis ni mngon par zhen pa thams cad spangs pa la 'god pa'i las so//gsol pa/ bcom ldan 'das ci lags zhes bya ba nas/ dbang bsgyur bar bya'o zhes bya ba'i bar gyis ni yang dag par rdzogs pa'i byang chub thob par bya ba la 'god pa'i las so/ /rab 'byor gyis gsol pa zhes bya ba nas/ byang chub tu nges par 'gyur ro zhes bya ba'i bar gyis ni sangs rgyas kyi zhing yongs su dag pa la 'god pa'i las so//de nas tshe dang ldan pa rab 'byor gyis zhes bya ba nas/ ngo mtshar che'o zhes bya ba'i bar gyis ni yang dag par rdzogs pa'i byang chub tu nges pa la 'god pa'i las so/ /bcom ldan 'das byang chub sems dpa' sems dpa' chen po chos dkar po zhes bya ba nas/thabs la mkhas pa la spyod par rig par bya'o zhes bya ba'i bar gyis ni sems can gyi don tshad med pa la 'god pa'i las so/ /de nas tshe dang ldan pa rab 'byor zhes bya ba nas/ bla na med pa yang dag par rdzogs pa'i byang chub med do zhes bya ba'i bar gyis ni sangs rgyas bsten pa la sogs pa la 'god pa'i las so//rab 'byor gyis gsol pa zhes bya ba nas/ sems can rnams kyi don byed do zhes bya ba'i bar gyis ni byang chub kyi yan lag la 'god pa'i las so/ /de nas tshe dang ldan pa rab 'byor gyis zhes bya ba nas/mngon par rdzogs par 'tshang rgya'o zhes bya ba'i bar gyis ni las dang 'bras bu chud mi za ba la 'god pa'i las so/ /mngon par rdzogs par sangs rgyas nas zhes bya ba nas/ sems can rnams la chos ston to zhes bya ba'i bar gyis ni bden pa mthong ba la 'god pa'i las so//de nas tshe dang ldan pa rab 'byor gyis zhes bya ba nas/ dngos po las rnam par 'brel to zhes bya ba'i bar gyis ni phyin ci log spangs pa la 'god pa'i las so/ /de ni don rgyas pa nyid kyi phyir bdag gis kyang rgyas par bshad par bya ste/ gzugs la sogs pa la ji ltar bslab par bgyi zhes bya ba ni ji ltar tshul bzhin du yongs su shes par bya ba yin zhe na/bcom ldan 'das kyis bka' stsal pa/ gzugs la sogs pa ming tsam du zad par bslab par bya'o zhes bya ba ni ming tsam du zad pa ni stong pa nyid do zhes bya ba'i bar dgongs so//ming thos pa na dngos po la dmigs pa'i phyir ming tsam du zad pa mi rigs pa nyid dang / dngos po med pa nyid la ni ming de nyid kyang med par 'gyur ro zhes bya ba ni byams pas so/ /bcom ldan 'das kyis bka' stsal pa/ byams pa gang 'di gzugs zhes bya ba la sogs pa la glo bur ba zhes bya ba'i ngo bo nyid ma yin pa'i phyir te/'du byed kyi mtshan ma'i dngos po zhes bya ba la/ rgyu dang rkyen gyis sprul pa nyid kyi phyir 'du byed do/ /de yang 'di yin la mtshan ma yang de yin pas na rnam par shes pa so sor snang ba yin pa'i phyir dngos po ni dngos po'o//bla dgas ni ngo bo nyid med pa'i phyir ro/ /btags pa ni tha snyad 'dogs par byed pa rnams kyis so/ /'di nyid kyi rgyu ni gang gi phyir zhes bya ba la sogs pa gsungs te/ dngos po ma gtogs pa zhes bya ba ni dngos po med du zin kyang ngo / /yid ches pa dang khong du chud pa dang so sor rig par 'gyur zhes bya ba ni rnam grangs so//byams pa de ji snyam du sems zhes bya ba la sogs pas ni 'dir rgyu gnyis pa gsungs pa yin no/ /de 'gal ba nyid du bstan par bya ba'i phyir byams pas bcom ldan 'das de ltar na zhes bya ba la sogs pa gsol to/ /bcom ldan 'das kyis 'du byed kyi mtshan ma'i dngos po la ming dang 'du shes dang gdags pa dang tha snyad du gzugs zhes bya ba gang yin pa de ji snyam du sems/gzugs kyi ngo bo nyid dam btags pa tsam du zad ces gsungs pa la/ des bcom ldan 'das btags pa tsam du bas so zhes gsol te/ dngos por med du zin kyang de ltar rtogs so zhes bya bar bsams so/ /bcom ldan 'das kyis 'o na byams pa khyod ji lta na zhes bya ba la sogs pa gsungs pa la/ byams pas bcom ldan 'das de ste zhes bya ba la sogs pa gsol te/ gzugs la sogs pa btags pa tsam nyid lags pa de'i tshe/btags pa tsam nyid de'i ngo bo nyid dmigs pa nyid du mi 'gyur ram/ bcom ldan 'das kyis bka' stsal pa/ btags pa tsam nyid ni ngo bo nyid med pa yin te/ skye ba dang 'jig pa la sogs pa dang mi ldan pa'i phyir ro/ /de ltar gzugs la sogs pa'i ngo bo nyid bkag pa na/byams pas bcom ldan 'das ci lags zhes bya ba la sogs pa ni zhus pa'o/ /bcom ldan 'das kyis gzugs la sogs pa 'jig rten gyi brda dang tha snyad du yod kyi/ don dam par ni yod pa ma yin no zhes bya ba gsungs so/ /byams pas de ltar bdag gis bcom ldan 'das kyis bka' stsal pa'i don 'tshal ba ltar na dbyings 'di ni don dam par brjod du ma mchis so zhes gsol te/de ste zhes bya ba ni gal te zhes bya ba'i don to/ /de la ji ltar zhes bya ba'i don ni mthar dgag par byed pa'o/ /de ji ltar don dam par 'gyur zhe na bya ba ste/ bcom ldan 'das ci don dam par yod dam med ces bya ba'i don to//de skad ces zhus nas sun 'byin pa ni de yang zhes bya ba la sogs pa gsol te/ gal te dngos po de don dam par ma mchis na'o/ /de zhes bya ba ni de'i tshe dbyings don dam par brjod du ma mchis pa ji ltar mchis par 'gyur te/ mi 'gyur ro/ /gang gi phyir 'du byed kyi mtshan ma'i dngos po brjod du med pa'i dbyings zhes bya bar mi rigs te/ med pa ni rten dang mi ldan pa nyid kyi phyir ro zhes bsams pa'o/ /rten du 'dod na yang mtshungs par 'gyur te/ gang de ni de nyid kyi chos nyid de/ de nyid kyi ngo bo nyid yin no/ / bcom ldan 'das kyis de bas na byams pa khyod ces bya ba la sogs pa gsungs te/ bzod cing 'dod pa dang spobs pas so zhes bya ba'i don to/ /shes rab spyod pa zhes bya ba ni rnam par mi rtog pa nyid kyi phyir mthar phyin pa'i shes rab bo/ /de spyod pa na mnyam par bzhag pa nyid kyi phyir rgyun gyis 'jug pa'o//de ni ma lags so zhes bya ba ni dmigs su ma mchis so/ /de rnam grangs 'dis kyang zhes bya ba la/ de zhes bya ba ni tshig nye bar dgod pa'o/ /kyang gi sgras ni 'chad par 'gyur ba yang ngo / /rnam grangs zhes bya ba ni rnam pa'o/ /gzhan ma yin zhes bya ba ni chos dang chos nyid dbyer med pa'i phyir ro//gzhan ma yin pa ma yin no zhes bya ba ni chos nyid yang dag par rig pa'i ye shes la de so sor mi snang ba'i phyir ro/ /'du byed ces bya ba la sogs pas ni rnam grangs gzhan gsungs te/ gzhan yin par gyur na zhes bya ba ni gal te gzhan yin par gyur na'o//de ltar na zhes bya ba ni de ltar yin na zhes bya ba'i don to/ /mya ngan las 'das pa'am bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes bya ba ni gzhan nyid yin na ni dngos por gyur pa'i nyon mongs pa dang 'brel pa'ang med pa'i phyir ro//gzhan ma yin pa nyid yin na ni de'i mtshan ma yang byis pas dmigs su med par 'gyur te/ brjod du med pa'i dbyings dang 'dra ste/ gang gi phyir mtshan ma dmigs pa la'ang de'i gnyen po'i phyogs la rab tu sbyor ba'i sgom pa ltar brjod du med pa'i dbyings thob par 'gyur ro//byams pas gsol pa/ brjod du med pa'i dbyings dang nye bar 'brel pa'i shes rab kyi spyod pa la dngos po de dmigs su ma mchis na de ci ma mchis pa'am mchis pa yang lags/ bcom ldan 'das kyis bka' stsal pa/ de la 'ga' zhig yod pa nyid dam med pa nyid du 'gyur ba gang yang med la 'on kyang gang gi tshe rnam par rtog par gyur pa de'i tshe rnam par rtog pa la snang bar gyur la//rnam par rtog pa dang bral ba na snang bar mi 'gyur ba de bas na/ don dam par yod pa ma yin te/ ye shes dam pa'i yul ma yin pa nyid kyi phyir ro//med pa nyid kyang ma yin te/ rnam par rtog pa'i snang ba yin pa'i phyir ro/ /chos rab tu 'byed pa la mkhas pa zhes bya ba ni chos rnams kyi rab tu 'byed pa ni ngo bo nyid gsum ste/ gang gzhan dag las kun brtags pa dang / gzhan gyi dbang dang / yongs su grub pa gsungs pa 'dir go rims bzhin du kun brtags pa'i gzugs la sogs pa dang /rnam par brtags pa'i gzugs la sogs pa dang / chos nyid kyi gzugs la sogs par bstan to/ /de la snang ba yin yang med pa'i phyir kun brtags pa'o/ /rgyu dang rkyen gyis bskyed pa'i phyir gzhan gyi dbang ngo //gzhan gyi dbang la kun du brtags pa'i ngo bo nyid kyis stong pa gang yin pa de ni yongs su grub pa'i ngo bo nyid de/ dus thams cad du de kho na bzhin du yod pa'i phyir ro/ /gzhan gyi dbang gang yin pa de ni rnam par brtags pa ste/ rnam pa gzhan du yod pa la rnam pa gzhan du snang ba'i phyir ro//chos rnams kyi chos nyid stong pa nyid gang yin pa de ni de bzhin nyid de/ de bas na yongs su grub pa'i ngo bo nyid ni chos nyid ces bya'o/ /gsol pa/ de dag gang gi rdzas su mchis gang gi rdzas su ma mchis/ gang ni rdzas su ma mchis pa dang rdzas su mchis pa ma lags pa'i don dam pas rab tu phye ba lags/bcom ldan 'das kyis gsum po dag go rims bzhin du bka' stsal to/ /de la rnam par brtags pa ni rdzas su yod pa nye bar blangs nas zhes bya ba gsungs so/ /gsol pa bcom ldan 'das kyis 'di ltar gzugs zhes bgyi ba gnyis su ma mchis par brtsi ba nas/chos thams cad gnyis su ma mchis par brtsis zhes bya ba ji ltar zhe na/ bcom ldan 'das kyis bka' stsal pa/ kun du brtags pa la sogs pa gsum po gzugs kyi rab tu dbye ba ni gzugs ma yin/ gzugs ma yin pa yang ma yin la/ gang gzugs ma yin gzugs ma yin pa yang ma yin pa de ni gnyis su med de/de bzhin du sangs rgyas kyi chos ma 'dres pa rnams kyi bar du yin pa de bas na gnyis su med pa'i grangs su byas pa yin no/ /gsol pa/ byang chub sems dpa' de ltar gnyis su med pa la mkhas pas ji ltar mtshan nyid yongs su shes pa dang /ji ltar mtshan nyid spang ba dang / ji ltar mtshan nyid mngon sum du bgyi ba dang / ji ltar mtshan nyid bsgom pa blta bar bgyi/ bcom ldan 'das kyis bka' stsal pa/ mtha' gnyis spangs nas de dbu ma'i lam la rab tu zhugs pa'i gang gi gzugs yongs su shes pa yang ma yin yongs su mi shes pa yang ma yin pa nas/sangs rgyas kyi chos rnams kyi bar du yongs su shes pa yang ma yin yongs su mi shes pa yang ma yin pa de nyid de'i yongs su shes pa'o/ /gang spong ba yang ma yin mi spong ba yang ma yin pa de nyid de'i spong ba'o//gang mngon sum du byed pa yang ma yin mngon sum du mi byed pa yang ma yin pa nyid de'i mngon sum du byed pa'o/ /gang gzugs nas sangs rgyas kyi chos rnams kyi bar du spang bar bya ba'i phyir lam bsgom pa yang ma yin/ mi sgom pa yang ma yin pa de nyid de'i bsgom pa'o//gsol pa/ de ltar yongs su shes pa la sogs pa dang ldan pa'i byang chub sems dpa' ji ltar yongs su mya ngan las 'das pa lags/ bcom ldan 'das kyis bka' stsal pa/ byams pa mchog tu zab pa ste/ de ltar na de mya ngan las 'das pa yang ma yin/mya ngan las ma 'das pa yang ma yin pa ni gzhan gyi don gyi dbang du mdzad nas 'khor ba yongs su ma spangs pas mya ngan las 'das pa ma yin la/ rang gi don gyi dbang du mdzad nas mya ngan las 'das pa yongs su ma btang bas mya ngan las ma 'das pa ma yin te/de ni 'khor ba las 'khor ba dang mya ngan las 'das pa la yang mya ngan las 'das par rnam par mi rtog go/ /de bas na 'di la gnyi ga yang srid par 'gyur te/ gnyi ga la yang skyo ba med pa de bas na gnyi ga yongs su mi spong ngo / /gsol pa/ gnyi ga ma blangs na ji ltar gnyi ga btang ba ma lags/bcom ldan 'das kyis bka' stsal pa/ gnyi ga blang ba'am blang bar bya ba ma yin pa mi smra'i/ 'on kyang stong pa nyid la dmigs su med pa'i dbyings la gnas pa nye bar blangs nas byang chub sems dpas mya ngan las 'das pa yongs su mi gtong bar smra'o/ / de yongs su mya ngan las 'das kyang rnam par mi rtog pa'i dbyings la dmigs pa'i ye shes kyis sems la dbang du gyur pa'i thabs la mkhas pas phyogs bcu'i 'jig rten gyi khams kyi 'khor bar bstan pa'i phyir 'khor ba yongs su mi gtong bar smra'o/ /chos thams cad dang / de'i stong pa nyid dang /gang dngos po dang / dngos po med pa gnyis su med pa dang / gang spros pa med pa 'di rnam par mi rtog pa'i mtshan nyid ma lus pa'o/ /gsol pa/ nyan thos thams cad zhi ba phyogs gcig pa'i mya ngan las 'das pa la gnas pa lags sam/ bcom ldan 'das kyis bka' stsal pa de ni ma yin no//sems can rnams ni khams sna tshogs pa dag ste/ kha cig dang po nas gya nom pa ste khyad par du 'phags pa don du gnyer te/ de nyid khong du chud par byed la de nyid kyis mgu bar 'gyur ro/ /kha cig dang po nyid nas dman pa'i khyad par don du gnyer zhing de nyid thob pa des mgu bar 'gyur ro//'ga' zhig ni dang po nyid nas khyad par dman pa don du gnyer zhing de nyid thob nas de nyid kyis mi mgu bar 'gyur ba yod de/ de la dang po ni byang chub sems dpa'o/ /gnyis pa ni nyan thos zhi ba phyogs gcig pa'o/ /gsum pa ni nyan thos byang chub tu 'gyur ba'o//de ji ltar dgra bcom pa nyid du gyur nas yang dag par rdzogs pa'i byang chub don du gnyer ba de dang der skye bar 'gyur zhe na/ byams pa ngas las dang nyon mongs pa'i dbang gis skye bar smras pa ni ma yin gyi/ 'on kyang mya ngan las 'das pa'i mthar thug par 'gro ba'i dgra bcom pa la yang bsam gyis mi khyab pa skye bar 'gyur ba dag gis so//gsol pa/ byang chub sems dpa'i bsam pa rgya che ba dang / de dag gi lhag pa'i bsam pa mthu che ba gang lags/ des na de dag gya nom pa'i khyad par don du gnyer zhing de nyid thob par 'gyur ba lags/bcom ldan 'das kyis bka' stsal pa/ gang 'di ni brgya byin nyid dang 'jig rten skyong ba nyid dang 'khor los sgyur ba nyid la sogs pa 'jig rten pa'i phun sum tshogs pa la rnam pa thams cad du don du mi gnyer gyi bla na med pa'i byang chub tu dge ba'i rtsa ba yongs su sngo bar byed de/de dag la yang chags pa med pa nyid dang / 'dzin pa med pa 'di ni de dag gi bsam pa rgya che ba'o/ /gang yang de la chags pa med pa'i bde ba dang / 'dzin pa med pa'i bde ba dang mya ngan las 'das pa'i bde ba/ sems can thams cad dang thun mong du byed par 'dod cing byang chub chen por dge ba'i rtsa ba yongs su sngo bar byed pa de ni 'dir de dag gi lhag pa'i bsam pa mthu che ba'o//de nas tshe dang ldan pa rab 'byor gyis zhes bya ba la sogs pa ni rab 'byor gyis dri ba'o/ /de nas bcom ldan 'das kyis zhes bya ba la sogs pas ni bcom ldan 'das kyi lan no/ /de bas na byang chub sems dpa' de ltar shes rab kyi pha rol tu phyin pa la spyod pa na 'khrul pa log par 'dzin pa gang yin pa de dag ni phyin ci log ste/de dag kyang byams pa dang rab 'byor gyi tshig gis ston par byed do/ /de dag spangs pa dang / dor ba la 'god pa ni bcom ldan 'das kyi bkas so//de ni 'dis phyin ci log spangs pa la 'god pa'i las te nyi shu rtsa gnyis pa'o/ /rab 'byor gyis gsol pa zhes bya ba nas/ kun nas nyon mongs pa dang rnam par byang ba med do zhes bya ba'i bar gyis phyin ci log bzhi med pa la 'god pa'i las so//de nas tshe dang ldan pa rab 'byor gyis zhes bya ba nas/ tshig gi lam las 'das pa zhes bya ba'i bar gyis ni rnam par byang ba la 'god pa'i las so/ /gsol pa/ bcom ldan 'das zhes bya ba nas/ don dam par ma yin no zhes bya ba'i bar gyis ni rnam par byang ba'i tshogs la 'god pa'i las so//gsol pa/ bcom ldan 'das de bzhin gshegs pas chos gang mngon par rdzogs par sangs rgyas zhes bya ba nas/ khyu mchog gi mthar mi 'gyur ro zhes bya ba'i bar gyis ni 'dus byas dang 'dus ma byas tha mi dad par shes pa la 'god pa'i las so/ / gsol pa/ bcom ldan 'das zhes bya ba nas/ yod par 'gyur re skan zhes bya ba'i bar gyis ni mya ngan las 'das pa la dgod pa'i las so/ /de ni chos kyi sku'i phrin las nyi shu rtsa bdun bstan pa'o/ /ji ltar na sku gsum po chos kyi sku yin zhe na/ gzhes shing nam yang 'jig par mi 'gyur bas na chos so//chos kyang 'di yin la sku yang 'di yin pas na chos kyi sku ste/ lus nyid yin pa'i phyir ro/ /de bzhin gshegs pa'i sku ni rtag pa yin pa'i phyir ro zhes gsungs te/ de la ngo bo nyid kyi sku ni rang bzhin gyis rtag pa nyid kyis rtag pa yin te/ thog ma dang tha ma med pa'i phyir ro//longs spyod rdzogs pa'i sku ni 'jig pa med pa'i rtag pa nyid kyis rtag pa ste/ thog ma dang ldan yang tha ma med pa'i phyir ro/ /sprul pa'i sku ni rgyun chags pa'i rtag pas rtag pa yin te/ yul tha dad par rtag par 'jug pa'i phyir ro/ /de bzhin du mdzad pa yang rtag par 'jug pa yin no//ji ltar na mdzad pa chos kyi sku yin zhe na/ mdzad pa dang mdzad pa po tha dad pa med pa'i phyir ro/ /ji ltar na rnam pa bzhi yin zhe na/ 'jig rten pas tha dad pa brtags pa'i phyir ro/ /de ltar na shes rab kyi pha rol tu phyin pa gcig la bsdus pa'i don rnam pa brgyad bstan pa yin no//mtshan nyid de yi sbyor ba dang / /de rab de yi go rims dang / /de mtha' de yi rnam smin ni/ /don bsdus gzhan te rnam pa drug /'di ni 'di'i bsdus pa'i don gzhan rnam pa drug ste/ de ltar mtshan nyid ni kun mkhyen rnam pa gsum mo/ /mtshan nyid de'i sbyor ba ni/ rnam pa kun mngon par rdzogs par rtogs pa'o//sbyor ba'i rab ni rtse mo'i mngon par rtogs pa'o/ /sbyor ba'i go rims ni mthar gyis pa'i mngon par rtogs pa'o/ /sbyor ba'i mtha' ni skad cig ma gcig gis mngon par rtogs pa'o/ /sbyor ba'i 'bras bu ni chos kyi sku'o/ /yul gyi rgyu ni rnam gsum dang //sbyor ba bzhi yi bdag nyid dang / /chos sku phrin las 'bras bu ni/ /don bsdus gzhan te rnam pa gsum/ /'di ni 'di'i don bsdus pa gzhan rnam pa gsum yin te/ rgyu dang sbyor ba dang 'bras bu zhes bya ba'o/ /de ltar rgyu ni rnam pa gsum ste/ thams cad mkhyen pa nyid gsum ni sbyor ba'i yul lo//sbyor ba bzhi'i bdag nyid ni rnam pa kun mngon par rdzogs par rtogs pa dang / rtse mo'i mngon par rtogs pa dang / mthar gyis pa'i mngon par rtogs pa dang / skad cig ma gcig gis mngon par rtogs pa'o/ /sbyor ba'i 'bras bu ni chos kyi sku dang chos kyi sku de'i phrin las kyang ngo //thub pas tshig gi spyod yul dag las 'das par mkhyen nas gsung gi pha rol phyin mchog gang gsungs pa/ /la lar gzhan gyi stobs las cung zhig bsags par gyur kyang bdag la de don brjod nus ga la yod/ /bdag gis sangs rgyas yum gyi mngon rtogs rgyan gyi 'grel byas las//shel ltar dngas shing mkha' bzhin mnyam med bsod nams gang thob pa/ /de las byang chub chen po thob nas 'gro ba mtha' med pa'i/ /lam gyur srog chags kun gyis de las rtag pa'i gnas thob shog /mngon par rtogs pa'i rgyan gyi ni/ /'grel pa dag ldan zhes bya ba//rin chen 'byung gnas 'bad pa yis/ /mdor bsdus tshig gsal sbyar ba yin/ /'phags pa 'jam dpal gyi dngos grub brnyes pa/ mkhas pa chen po rin chen 'byung gnas zhi bas mdzad pa/ mngon par rtogs pa'i rgyan gyi 'grel pa dag ldan zhes bya ba rdzogs so// //dbang phyug dam pa'i mnga' bdag lha btsan po khri bkra shis 'od lde btsan gyi bkas rgya gar gyi mkhan po shrI su b+hU ti shAn+ti'i zhal snga nas dang / lo tsA ba dge slong shAkya blo gros dang / dge slong dge ba'i blo gros kyis bsgyur cing zhus te gtan la phab pa/ /slad kyi paN+Di ta chen po shAn+ta b+ha dra dang /