CLOSE WINDOW

D3796
བོད་ཡིག

@##/ /rgya gar skad du/ a b+hi sa ma ya a lang+kA ra kA ri kA pradz+nyA pA ra mi to pa de sha shAs+t+ra TI kA pra san+na pa da nA ma/ bod skad du/ shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa'i 'grel bshad tshig rab tu gsal ba zhes bya ba/bcom ldan 'das ma shes rab kyi pha rol tu phyin pa 'phags pa'i skye bo thams cad kyi yum du gyur pa/sras sangs rgyas dang / byang chub sems dpa' dang / 'phags pa 'dod chags dang bral bar bcas pa thams cad la phyag 'tshal lo//gnyis med ye shes rang bzhin 'phags pa'i gang zag skyed pa'i yum/ /rgyal dang de sras yum gyur zab mo de la phyag 'tshal lo/ /gzhung 'di rgya che rab zab kun gyi 'jug pas pha rol du//legs 'gro dka' zhing gting mi rnyed phyir bdag 'dras mi dpog pa/ mkhas pa rnams la mtshar med smod bral 'di brtsams te/ /bdag phan thabs mkhas su zhig rang gi brtson pa 'dor//gang zhig rtogs pas rgyal ba sras bcas zhabs la lha dbang gtsug gi nor bus 'dud byed cing / /mngon par mtho ba'i bde ba rgya chen zad mi shes pa'ang sngon du yongs su longs spyod cing //rab tu 'jigs rung grang bas spu ldang ngan 'gro'i g.yang sa ma rungs pa las legs sgrol ba/ /lha yi dpag bsam shing ltar skye bo dam pa dga' byed de la su zhig brten mi byed//de phyir skye bo dam pas rigs pa'i shing rta lung gi 'khor los drangs pa chen po yis/ /nyam nga'i lam sbyangs nges pa'i gnas brtan dpag bsam shing chen yal ga rab rgyas gcig la ni/ /legs 'jus de thob gyur pa'i 'bras bu yid 'ong ror ldan bdud rtsi lta bu brtson pas thob//gang yin de 'dir rang gi ched du legs par yongs su spyad pa mkhas pa rnams kyis rtogs/ /bcom ldan 'das shAkya'i rgyal po thugs rje'i thugs brlan pa des 'gro ba thams cad mngon par mtho ba dang nges par legs pa la 'god pa'i thabs su gyur pa rang rang gi rigs dang rjes su mthun pa'i chos bstan pa ji snyed chos kyi phung po brgyad khri bzhi stong bstan pa rnams las rab dang phul dang /gtso bo dang / gya nom pa nyid ni shes rab kyi pha rol tu phyin pa ste/ der gang ma bsdus pa'i don 'ga' yang med pa'i phyir ro/ /de yang kha cig ni don dam pa'i bden pa snying po'i don gtso bor byas pa 'phags pa shes rab kyi pha rol tu phyin pa'i snying po la sogs pa'o//bden pa gnyis ka'i don las mngon par rtogs pa'i don gtso bor byas pa'i gzhung yang kha cig ste rgyal ba skyed ma 'bum pa la sogs pa'o/ /de la snying po'i don ni mdo sde zab mo rab tu mang po las gsal por bstan cing /'phags pa klu sgrub kyi zhal snga nas dbu ma shes rab la sogs par lung gi don gtan la dbab pa nges par mdzad pas the tshom med par mdzad pa'i phyir skye bo phyi ma rnams 'jug tu rung bar mdzad do/ /gang du mngon par rtogs pa'i don bstan pa ni rab tu rgyas pa dang zab par ldan pas 'jug pa'i gang zag phal cher mgron po phyogs bslad pa bzhin gyur pas rab tu rmongs pa'i gnas su gyur te/don 'di nyid 'phags pa byams pa skye ba gcig gis thogs pa des gzigs te/ 'gro ba rab tu ldongs pa dmigs bu med pa de dag gi phyir de dag la shes rab kyi pha rol tu phyin pa'i phyogs kyi sgo snang bar bya ba'i phyir rgyal ba'i yum ma lus pa thugs la bzhag ste/gang rtogs dka' ba'i gnas de dag bde blag tu rtogs par bya ba'i phyir/ nyan thos zhi ba tshol rnams kun shes nyid kyis nyer zhir khrid mdzad gang yin dang //zhes bya ba la sogs pa'i gzhung don rgya chen po yang thabs sla bas nye bar bstan pa 'di mdzad do/ /de bas na 'di ni man ngag gi bstan bcos yin gyi/ mdo rnams ni 'di la ltos na man ngag ma yin te/'jug pa po rnams la nye bar bstan pa ma yin gyi dus yun ring mos go ba skyed pa tsam gyi yan lag tu gyur pa'i phyir ro/ /de ltar myur du khong du chud par byed pa'i man ngag bstan pa yang blo rab tu nyams pa sngon yongs su ma sbyangs pa kha cig gis man ngag gi tshig rab tu bsdus pa khong du chud par mi nus pas na de'i don bde bar rtogs par bya ba'i phyir slob dpon gyi zhal snga nas de'i don dgrol ba shes rab kyi pha rol tu phyin pa la gus phyag 'tshal zhes bya ba la sogs pas don rnam par bshad pa 'di legs par brtsams so//de ltar rim pa gsum du byung bas rgyal ba'i yum legs par gtan la phab mod kyi/ gang dag blo'i stobs rab tu zhan pa'am/ yang kha cig dge ba'i bshes gnyen legs par bsnyen bkur mi nus kyi/ rang gi rtog ge'i shes pa tsam gyis rgyal ba skyed ma'i don shes par 'dod cing mngon pa'i nga rgyal dang ldan pa de dag gi phyir bdag gis 'grel bshad don bsdus pa 'di byas te/de bas na rim pa re re yang don med par nam yang mi bsam mo/ /de la mdo 'chad par 'dod pa rnams kyi man ngag ni 'phags pa byams pa nyid kyi slob ma rim pa gcig gis bar bcad pa slob dpon dbyig gnyen sangs rgyas gnyis pa zhes bya bas rnam par bshad pa'i rigs pa las/mdo rnams smra bar 'dod pa la/ /ngas ni man ngag sbyin par bya/ / dgos dang bsdus pa'i don bcas dang / /tshig don bcas dang mtshams sbyar bcas/ /brgal lan bcas pas bsnyad par bya/ /zhes bshad de 'di yang 'phags pa byams pa nyid kyi man ngag brgyud pa'o/ /de bas na rgyal ba'i yum rnams 'chad par mdzad pa rgyal ba byams pa'i zhal snga nas/dgos pa dang bsdus pa dang / tshig gi don ni dngos su bstan cing / mtshams sbyar ba dang / brgal ba dang / lan ni shugs las rtogs par dgongs te shugs kyis bstan to/ /de yang tshig gi don ni don dang ldan pa'i ming gis bshad pa dang /nges pa'i tshig gis bshad pa dang / rnam grangs kyis bshad pa dang / lung bstan pa'i rigs pas bshad pa dang / don gyi shugs kyis bshad pa tsam mo/ /de dag las 'dir don gyi shugs kyis bshad pa tsam dang rnam grangs kyis bshad pa nyid gzung ngo //mtshams sbyar ba shugs las rtogs par bya ba ni slob dpon gyi zhal snga nas dngos su 'grel pa las smos pa ni/ 'phags pa byams pa bdag nyid dam pa rnams kyi spyod pa dang mthun par rab tu ston pas so so rang gi rig pa'i ye shes kyis shes rab kyi pha rol tu phyin pa'i yul can gyi rab tu dang ba ni legs pa thams cad 'thob pa'i rgyu'i gtso bo yin no zhes bya bar nges par bzung nas/gzhan dag bcom ldan 'das ma yon tan rin po che phul du byung ba'i 'byung gnas la don gyis 'jug par bya ba'i phyir rab tu dang ba bskyed pa'i ched du/re zhig dang por yum la yon tan ji lta ba bzhin du brjod pa can gyi phyag 'tshal ba zhes bya ba la sogs pa smos te/ de yang skabs dang po las ni mtshams sbyor ba'i tshig sum cu rtsa drug smos te/skabs gnyis pa las ni nyi shu'o/ /skabs gsum pa las ni bcu bzhi'o/ /skabs bzhi pa las ni sum cu rtsa lnga'o/ /skabs lnga pa las ni nyi shu rtsa bdun no/ /skabs drug pa las ni gcig nyid do/ /skabs bdun pa las ni lnga nyid do//skabs brgyad pa las ni bcu gsum mo/ /de nas ni skabs bar ma la ni 'jug pa'i mtshams sbyar ro/ /de nas ni skabs bsdus pa la 'jug pa'i mtshams sbyor ro/ /de ltar na mtshams sbyor gyi tshig ni spyir brgya lnga bcu rtsa gsum smos te/de la skabs kyi dang por bstan pa brgyad ni skabs kyi go rims nges par ston pa'i mtshams sbyor yin la/ lhag ma rnams ni ci rigs su sbyar ro/ /brgal ba dang lan dag ni gzhan gyi chos rnams kyang yod la/ shes bya la yang ston pa yis/ / sgrib pa zad par gang brjod pa/ /de la kho bos mtshar du brtsis/ /zhes pa dang / 'di yi dmigs pa dngos med de/ /bdag po dran pa yin par bshad/ /rnam pa zhi nyid 'di la ni/ /rab tu smra rnams brgyud mar rgol/ /zhes bya ba la sogs pa dngos su yang bstan par rung ste/de ltar yan lag lngas mdo bshad pa/ 'di man ngag 'di'i rtsa ba'i gzhung 'chad par 'dod pa dag la phan 'dogs par shes par bya'o/ /slob dpon gyi zhal snga nas tshig le'ur byas pa'i 'grel pa ni tshigs su bcad pa dang pos phyag 'tshal ba 'grel pa brtsams pa'i dgos pa dang bcas pa bstan to//tshigs su bcad pa lhag ma bzhis ni sngon gyi slob dpon gyis gzhung ji ltar phye ba bstan to/ /de'i 'og ma tshigs su bcad pa gcig gis ni/ shes rab kyi pha rol tu phyin pa tshang bar rnyed pa ngo mtshar che ba bdag nyid gzengs bstod pa bstan to//de'i rjes su tshigs su bcad pa gcig gis ni rgyal ba'i yum rnyed pa sangs rgyas kyi byin gyi rlabs yin zhing ston pa la drin du gzo bas bsgrub pa'i mchod pa'i ngo bor yum 'di dbye bar rigs par bstan to//tshigs su bcad pa tha mas ni rang la smad de 'jug pa'i bye brag bstan to/ /de ltar de dag ni 'grel pa brtsams pa la 'jug pa'i tshigs su bcad pa brgyad do/ /de nas ni phyag 'tshal ba'i tshigs su bcad pa gcig bkrol ba'o/ / de nas ni dgos pa la sogs pa bstan pa'i tshigs su bcad pa gnyis bkrol ba'o/ /de nas ni bsdus pa'i don rnam pa gnyis kyi tshigs su bcad pa bcwa lnga'i mtshams sbyar ba tsam bstan cing tshigs su bcad pa smos pa yang mdor bsdus pa dang de las phye ba tsam du bstan cing don 'og tu 'chad pa la ltos par bstan to//de nas ni skabs brgyad rim pas bstan nas bkrol ba'o/ /de nas ni skabs drug tu bzhag pa bstan pa bkrol ba'o/ /de nas skabs gsum du bzhag pa bstan pa phye ba'o/ /de ltar rtsa ba'i gzhung phye nas mdo'i don mdor bstan pa'i tshigs su bcad pa gnyis bstan to//de nas ni gzhung ji ltar brtsams pa rang gi ming gis smos pa dang bcas pa'i tshigs su bcad pa gnyis smos so/ /de nas dge ba yongs su bsngo ba'i tshigs su bcad pa gcig bstan to//de nas ni yum 'di zab pas bdag gi yul ma yin zhing skyes bu dam pa rnams kyi yul du bstan pa'i tshigs su bcad pa gcig go/ /de nas ni nye bar bstan pa bzod par gsol ba'i tshigs su bcad pa gcig bstan te/ 'di ni re zhig 'grel pa'i bsdus pa'i don du shes par bya'o//de ltar spyir sbyar ba'i tshul cung zad cig brjod nas/ da ni yan lag gi don cung zad dgrol te/ /'dir slob dpon gyis dang po nyid du ci'i phyir phyag 'tshal ba rtsom zhe na/ 'grel pa brtsams pa mthar phyin par bya ba'i phyir te/gang zhig yul khyad par can la phyag 'tshal ba ni bsod nams chen po rgyud la bskyed pa bsod nams dang ldan pa'i bsam pa rnams ni nges par 'grub ste/ de bas na 'phags pa rgya cher rol pa las/ bsod nams ldan pa'i mi yi bsam pa rnams kyang 'grub//ces gsungs so/ /gzhan yang dam pa'i spyod pa dang mthun par rab tu bstan pa'i phyir/ des rang gi gzhung la 'gro ba 'byung ba rnams dad par 'gyur te/ 'jig rten pa dam pa rnams ni dang por yul khyad par can rnams la phyag 'tshal nas/rang 'dod pa'i las la 'jug cing gzhung 'dir yang dang por phyag 'tshal ba snang bas na slob dpon 'di ni dam pa'o/ /'dis phyag 'tshal ba'i shes rab kyi pha rol tu phyin pa yang dam pa ste/ dam pas 'dod par bya ba'i phyir ro zhes dad pas rjes su 'brang ba rnams 'jug pa'i thabs su gyur pa'i phyir ro//de ltar dgos pa de gnyis gzigs nas dang po nyid du/ shes rab kyi pha rol tu phyin pa la gus par phyag 'tshal zhes bya ba smos te/ 'dir shes rab kyi pha rol tu phyin pa zhes bya ba ni rnam pa gnyis te/ngo bo nyid dang / der brten pa'o/ /ji ltar zhe na/ chos rnams kyi de bzhin nyid 'di chos rnams la de nyid dang gzhan nyid du brjod par bya ba ma yin pa ni rang bzhin gyis shes rab kyi pha rol tu phyin pa ste/ de'i phyir mkhas pas 'jig rten gnas sam mya ngan 'das kyang rung //chos nyid skyon med chos rnams stong pa 'di gnas te/ /byang chub sems dpas de bzhin nyid 'di rjes su rtogs/ /de phyir de bzhin gshegs zhes sangs rgyas mtshan gsol to/ /zhes gsungs la/ yang de ci'i phyir zhe na/shes rab kyi pha rol tu phyin pa ni yi ge ma yin te/ de la su yang ston pa dang nyan pa dang / shes par byed pa med do zhes kyang gsungs so/ /'dir shes rab kyi pha rol tu phyin pa ni sems las byung ba dge ba khyad par can du bgrang ba ma yin nam/ de ni 'dus byas kyi mtshan nyid yin la de bzhin nyid ni 'dus ma byas kho nar grub pa'i mtha' las bstan te/des na ji ltar de bzhin nyid de shes rab kyi pha rol tu phyin par 'gyur/ de lta na ni 'gro ba rnams la de bzhin nyid yod pas lung snga ma nyid kyis thams cad de bzhin gshegs par 'gyur ro zhe na/sems las byung ba dge ba khyad par can la shes rab kyi pha rol tu phyin par gzhag pa ni rang bzhin gyis shes rab kyi pha rol tu phyin pa de rtogs pa'i mthus de'i ming 'thob kyi gzhan du na de shes rab yin du zin kyang pha rol tu phyin par ni ga la zhig 'gyur/rtog pa gnyis pa ltar yang mi 'gyur te/ lung snga mas ni de bzhin nyid du rtogs pas de bzhin gshegs par bstan gyi/ de bzhin nyid yod pas der bstan pa ni ma yin te/ de bas na de yod pas nges par phan par byed pa yang ma yin te/ rkyen gzhan la ltos pas na dbul pos bdag dbang ba'i sa la gnas pa'i gter lta bu'o//de bas na byis pa rnams ni rang bzhin gyis shes rab kyi pha rol tu phyin pa dang ldan yang de ma rtogs pa'i phyir byis pa zhes bstan te/ byis pa'i sgra ni zhan cing phra ba'i don du 'dren pa'i phyir ro//don 'di las dgongs te 'phags pa byams pa'i zhal snga nas/ 'gro ba dag na de las gzhan yang cung zad yod min la/ /'gro ba ma lus pa yang de la rnam par rmongs pa'i blo/ /yod pa kun nas spongs shing med la mngon zhen gang yin pa/ /'jig rten rmongs pa'i tshabs chen 'di ko ji lta bu//zhes gsungs la/ 'phags pa sangs rgyas phal po che zhes bya ba'i mdo theg pa chen po dang rab tu ldan pa las/ byis pas byang chub mi shes kyang / /de dag de la rab tu gnas/ /zhes gsungs te/ de'i phyir rang bzhin gyis shes rab kyi pha rol tu phyin pa 'di ni gtso bo'i shes rab kyi pha rol tu phyin pa ste/rab tu gces pa'i phyir shes rab kyi pha rol tu phyin pa'i snying po zhes bya'o zhes kyang gsungs te/ ji ltar lus la sogs pa gnas shing 'phel ba ni sems kyis bzung ba'i mthu yin la/ sems de yang snying zhes bya ba'i lus kyi bye brag de la rab tu brtan pas na/bag chags kyis ni dkrugs pa'i sems/ /rnam par rtog pa mang po'i gnas/ /snying gi yul la rab tu gnas/ /zhes gsungs te/ rten du gyur pa'i snying med na sems mi gnas shing / de ma gnas par gyur na dbang po dang bcas pa'i lus nges par mi gnas pas na snying ste/rab tu gces pa ni hri da ya zhes grags so/ /de bzhin du rang bzhin gyis shes rab kyi pha rol tu phyin pa med na rnam par mi rtog pa'i ye shes dmigs pa gang la brten nas kyang skye bar mi 'gyur la/ de ma skyes par gyur na ji ltar lam dang /'bras bu dang gzhung dag 'byung / de bas na 'di yang hr-i da ya zhes gsungs te rab tu gces pa'i phyir ro/ /de la brten pa ni lam lnga dang / de'i 'bras bu rnam par mi rtog pa'i ye shes dang / de dag ston pa'i gzhung rnams so/ /de dag las kyang rnam par mi rtog pa'i ye shes ni shes rab kyi pha rol tu phyin par bzhag pa la bstan pas gtso bo ste/rang bzhin gyis shes rab kyi pha rol tu phyin pa dang gnyis su med pa dang / lam dang gzhung dag kyang de thob par bya ba'i ched du sbyor ba'i phyir ro/ /de bas na slob dpon phyogs kyi glang po'i zhal snga nas kyang /shes rab pha rol phyin gnyis med/ /ye shes de ni de bzhin gshegs/ /bsgrub bya de don sbyor ba yis/ /gzhung dang lam dag de'i sgra yin/ /zhes bshad do/ /de la gzhung ni 'phags pa shes rab kyi pha rol tu phyin pa stong phrag brgya pa la sogs pa sngar bstan pas bsdus pa gnyis so//lam ni 'og nas 'chad do/ /rnam par mi rtog pa'i ye shes kyang 'chad par byed pa las gtan la 'bebs so/ /de ltar rnam par phye bas yum 'di'i ngo bo bstan nas/ da ni nges pa'i tshig bstan par bya ste/shes rab ces bya ba ni/ gzhan sgra shes dang so sor ni/ /rang rig rab tu shes phyir dang / /rab zhi 'thob shes rab phul byung / /yon tan 'thob shes phyir shes rab/ /ces bshad pa ste/ lam dang po gnyis la ni dang po'o/ /mthong ba'i lam dang 'bras bu la ni gnyis pa'o//kun rdzob kyi ye shes la ni gsum pa'o/ /bsgom pa'i lam la ni bzhi pa'o/ /khyad par gyi lam la ni nges tshig lnga pa sbyar zhing gzhung la btags te'o/ /rang bzhin la ni 'bras bu'i ming gis so/ /de la ji ltar na shes rab de dag la pha rol tu phyin pa zhes bya zhe na/byis pa rnams kyi yul du gyur pa 'khor ba ni tshu rol yin te/ de las 'das shing ring du song ba 'jig rten las 'das pa'i pha rol tu phyin pa'i don to/ /des na 'jig rten las 'das pa'i phyir pha rol tu phyin pa ste/ de'i phyir rgyal ba'i yum bar ma las kyang /tshe dang ldan pa shA ri'i bu gang yang 'di skad du shes rab kyi pha rol tu phyin pa gang zhes zer ba ni/ tshe dang ldan pa shA ri'i bu shes rab kyi pha rol tu phyin pa zhes bya ba gang yin pa de ni ring du song ba ste/ gang las ring du song ba zhes bya zhe na/ tshe dang ldan pa shA ri'i bu phung po rnams las ring du song bas na/ de'i phyir ring du song ba zhes bya'o zhes bya ba la sogs pa gsungs te/ de bas na pa ra'i sgra ni pa ra yad ta zhes bya bar bsgyur ro/ /yang na pa ra'i sgras ni mchog bstan la de la dngos po'i rkyen sbyar ba ni dngos po'i mchog nyid ces bya ste/ji lta zhe na/ rgya che ba dang yun ring ched du bya/ /mi zad rgyun mi 'chad cing tshegs med la/ /dbang 'byor bsngo dang rtsom pa dag dang ni/ /'thob dang rgyu mthun 'grub phyir dam pa'i dngos/ /zhes bshad la/ yang / yun ring goms shing thabs dang 'bras bu mchog /'di dag theg pa dman las mchog gyur dngos/ /zhes bshad pas so/ /yang na sangs rgyas dang byang chub sems dpa' gang zag mchog dag gis bstan pa'i phyir yang mchog gi dngos po'o/ /gzhan yang gzhan la sogs pa'i mchog tu gnod pa las thar bar byed pas na gnyis su sgra sbyar ba'o//gzhan dag ni shes bya'i pha rol tu phyin pas na pha rol tu phyin par 'dren te/ de'i tshe ni phyin pa'i sgra rdzogs par drang ste/ i ta saM dzA ta zhes skad kyi byings la 'don pas so/ /yi ge pa'i ring po nyid ni gtsug lag gi tshig yin pas 'gal ba med do//nges pa'i tshig tha ma 'di ni dngos su na 'bras bu la sbyar te/ gzhan la ni btags nas so/ /lhag ma ni ci rigs su ngo bo la sbyar ro/ /de ltar ngo bo dang nges tshig rgyas par bstan pa las 'dir shes rab kyi pha rol tu phyin pa rnam par phye ba de dag las gang la phyag 'tshal zhe na/ma lus pa gzung ba'am/ yang na 'bras bu'i bdag nyid gnyis su med pa'i ye shes de la phyag 'tshal te/ de ni rang bzhin gyis shes rab kyi pha rol tu phyin pa las tha mi dad pa ste/ de ni rnam par mi rtog pa'i ye shes tsam gyis nges par byas pas so/ / de ltar na rnam par mi rtog par mi 'gyur te rang bzhin la rtog pa'i phyir ro/ /zhe na/ des gang yang yul du ma byas pa'i phyir te rang bzhin yin la/ de yang rnam par mi rtog par grub kyi gal te des yul du byas na/ de yang ye shes la ltos pas byas par 'gyur bas rang bzhin ma yin la/de yang rnam par rtog pa nyid du 'gyur ro/ /de'i phyir na yang dag par na rang bzhin ni rnam pa thams cad mkhyen pa'i ye shes kyis kyang mi gzigs te/ de'i don ni ci'i phyir zhe na/ sangs rgyas kyis mkhyen nas chos rnams ma gzigs phyir zhes 'chad par byed do//de bas na ci yang ma mthong ba ni mthong ba dam pa'o zhes mdo las gsungs so/ /de ltar rang bzhin dang dbyer med pas rang bzhin dang 'bras bu dag ni de nyid dang gzhan du brjod du med pa'o/ /gzhung dang lam ni de'i ched du sbyor ba'o zhes sngar bshad do//de'i phyir na shes rab kyi pha rol tu phyin pa gnyis su med pa'i ye shes la phyag 'tshal ba nyid rigs pas na/ rgyal ba'i yum bar ma las kyang / btsun pa shA ri'i bu shes rab kyi pha rol tu phyin pa la phyag 'tshal lo/ /gang shes rab kyi pha rol tu phyin pa la phyag 'tshal ba de ni thams cad mkhyen pa'i ye shes la phyag 'tshal ba'o//de nas bcom ldan 'das kyis lha'i dbang po brgya byin la bka' stsal pa/ kau shi ka de de bzhin no/ /de de bzhin te/ gang shes rab kyi pha rol tu phyin pa la phyag 'tshal ba ni thams cad mkhyen pa'i ye shes la phyag 'tshal ba'o//de ci'i phyir zhe na/ kau shi ka 'di las byung ba ni sangs rgyas bcom ldan 'das rnams kyi rnam pa thams cad mkhyen pa nyid do/ /rnam pa thams cad mkhyen pa nyid kyi ye shes las ni shes rab kyi pha rol tu phyin par brjod do zhes gsungs pa'o//'dir ni mi 'dod pa'i bzhi pa nyid de/ de la rnam par rtog pa med pa'i phyir ro/ /gus par zhes bya ba ni dngos po thams cad kyis sam yid rab tu dang bas so/ /phyag 'tshal lo zhes pa ni mchog tu 'dud par byed pa'o/ / 'dir gang la 'dud par bya/ gang yang ma dmigs na btud pas ci zhig sbyin zhe na/ chos thams cad ni rang gi rnam par rtog pa'i dbang tsam gyis skye zhing 'phel ba la sogs par 'gyur bas na yid dang ba'i dbang gis ci yang med pa la'ang btud pas 'bras bu yid du 'ong ba sbyin la/gzhan yang don dam par gang yang med du zin kyang / kun rdzob tu ni rgyal ba'i yum 'di nyid gdul bya dang 'tsham pa'i bkod pas gnas te/ de'i phyir/ gdul bya'i skye bo la brten nas/ /de bzhin gshegs pas de dang der/ /khyod nyid gcig pu gzugs mang dang //sna tshogs mtshan du mngon par brjod/ /ces bstod cing / yang / tshig yul kun las 'das gang yin/ /khyod ni gang la'ang mi brten zhing / /mtshan med gos pa med pas na/ /su yis 'dir khyod bstod par nus/ /bdag ci tshig lam 'di 'dra bas//khyod la bstod pa ma byas kyang / /dgyes mi dgyes las 'das mod kyi/ /'on kyang kun rdzob bden pa'o/ /zhes bstod pa brjod de/ de bas na yum 'di spros pa med cing rtog pa med do zhes te/ mchod pa dang phyag la sogs pa spang bar ni mi bya'o//de ltar phyag 'tshal ba ci zhig 'grub par 'dod pa yin zhe na/ de phyir/ de'i rgyan tshig le'ur byas pa dag /rnam par dbye phyir gus phyag 'tshal/ /zhes tshig snga ma dang sbyar te/ de'i zhes bya ba'i bud med kyi rtags kyis bstan pa'i phyir dang / don gyi dbang gis kyang shes rab kyi pha rol tu phyin pa nyid dang sbyar ro//de ltar na gang la phyag 'tshal ba shes rab kyi pha rol tu phyin pa de nyid kyi rgyan tshig le'ur byas pa dag /rnam par dbye ba'i phyir gus phyag 'tshal zhes tshig rnam par sbyar ro/ /rgyan zhes bya ba ni tshig le'ur byas pa'i man ngag gis shes rab kyi pha rol tu phyin pa'i don shes par bya ste/de shes pas man ngag 'dis mkhas pa rnams dga' zhing 'di la drin du yang gzo bar 'gyur te/ 'di ni dmigs bu lta bu'i phyir ro/ /de ltar dga' ba bskyed pas na 'di rgyan te dpe'i ming nyid do//don 'di las brten te 'phags pa byams pa'i zhal snga nas kyang / gzugs rgyan rang bzhin yon tan ldan pa me long nang song nas/ /mthong ba'i dbang gis mi rnams rab tu dga' ba'i mchog skyed pa/ /de bzhin legs gsung rtag tu rang bzhin yon tan ldan pa yi//chos kyang don rnams phye bas mkhas rnams 'di na dga' mchog skyed/ /ces gsungs so/ /tshig le'ur byas pa dag ces pa ni gzhung gang tshigs su bcad pa rtsa ba bzhi pa yi ge brgyad par byas pa'i ming ste/ dbang po'i rdo rje las khyad par du gyur pa'o/ /rnam par dbye zhes pa ni don tsam zhig ste 'chad par byed pa las 'phags pa rnam par grol sdes/mthu yi don mthong sgo nas ni/ /go bar sla phyir ngag dang ni/ /tshig sogs sbyor ba ma byas par/ /mkhan po yang dag rnam snang mdzad/ /bla ma bzang la phyag 'tshal te/ /tshig ler byas pa'i 'grel gsal ba//'di ni seng ge bzang pos byas/ /zhes smos pas so/ /bzhi pa 'di ni rgyu mtshan nyid du lta'o/ /tshig le'ur byas pa de rnam par dbye ba'i phyir phyag 'tshal bar ni bstan na/ de rnam par phye ba nyid la dgos pa ci yod ces rtog pa la/ kun gyi rgyan du 'gyur ba'i phyir/ /zhes smos te/ kun zhes pa ni ji ltar bstan pa'i shes rab kyi pha rol tu phyin pa thams cad kyi'o/ /rgyan du 'gyur ba zhes bya ba ni 'di skad ston te/ skyes pa'am bud med gang zhig gi gzugs la dga' ba skye ba'i rgyu ni rgyan rnams yin te/ 'on kyang rgyan de dag dri ma dang bcas par gyur na dga' bar byed mi nus pas na rgyan gyis brgyan ni rgyan de'i dri ma med par bya ba yin no/ /de bzhin du mkhas pa dga' bar byed pa'i rgyan ni tshig le'ur byas pa nyid do/ /zhes bstan du zin kyang kha cig ma rtogs pa'am/ log par rtogs pa'i dbang gis tshig le'ur byas pa 'di ni rgyal ba'i yum rnams kyi don legs par ston par nus pa ma yin pas 'di rgyan ma yin no snyam du klan ka'i dri ma skye srid do//slob dpon gyi zhal snga nas 'grel pa don gsal ba sdeb sbyor spangs pas drang thad du bstan pa 'di mdzad pas de dag gis log par rtogs pa dang /ma rtogs pa'i rgyu las byung ba'i dri ma ngan pa 'joms pas na 'grel pa 'di ni rgyan te/ rgyan du byed pas na rgyan gyis brgyan nyid de/ de bas na 'di ni dri ma sel bas rgyan te/ ji skad du slob dpon ka ma la shI la'i zhal snga nas de nyid kyi phyir klan ka ngan pa'i dri ma bsal bas na 'di ni dbu ma'i rgyan zhes bya'o zhes bshad pa lta bu'o//bzhi pa 'di ni rgyu mtshan nyid ston pa'o/ /de ltar na 'grel pa'i gzhung 'di rjod par byed pa ste/ de'i brjod par bya ba yang sgra'i brjod par bya ba ni tshig le'ur byas pa kho na'o//don gyis brjod par bya ba ni rgyal ba skyed ma thams cad do/ /dgos pa yang dngos su ni tshig le'ur byas pa'i don legs par bstan pa ste/ de'i yang dgos pa ni tshig le'ur byas pa de rgol ba rnams la rgyan nyid du bsgrub pa'o/ /gzhan dag ni tshig le'ur byas pa'i don legs par bstan pas de rgyan nyid du grub pa ni dgos pa yin la/des rgyal ba skyed ma'i don ma lus pa shes pa nas bzung ste/ mi gnas pa'i mya ngan las 'das pa'i bar du ni dgos pa'i yang dgos pa'o zhes rtog ste/ de ni de ltar 'grub pa nyid 'grel pa 'ba' zhig gis mi srid la/rtsa ba'i gzhung nyid kyi dbang du byas par yang 'og nas 'chad pas mi 'thad pa nyid do/ /gzhan yang tshigs su bcad pa dang po'i dbang gis gzhung dbye bar dam bca' bas brtsams pa mthar dbyung ba yang ston te/ phung po dang nyon mongs pa dang /khas blangs pa dang dam bcas pa dag ni khur yin la/ skyes bu dam pa rnams ni legs par blangs pa'i khur bya ba ma rdzogs kyi bar du mi 'dor te/ gzhan don brtse ba can rnams srog phyir yang / /rang gi nus pa lhod par mi byed de/ /skyes bu dam pa khur lci khur ba dag /nyam nga'i lam du nam yang 'dor mi byed/ /ces bstan pas so/ /de ltar phyag 'tshal ba dang / bstan par dam bca' ba dang / nyid kyis sbyor ba'i 'grel pa'i dgos pa la sogs pa bstan pa'i tshigs su bcad pa gcig rnam par bkrol ba'o//da ni slob dpon bdag nyid sngon gyi slob dpon gyi lugs la mkhas par bstan pas 'gro ba rnams rang gi 'grel pa la 'jug par bya ba dang / gzhung du ma tshol ba'i 'jug pa po rnams la 'ang phan gdags pa'i phyir/ sngon gyi slob dpon gyis mdzad pa'i gzhung gdags pa bstan pa'i phyir/'gro ba'i chags la chags med mdzad/ /ces pa la sogs pa smos te/ kha cig na re yi ge a ni ring po yin pas lhag par ston te/ des na kun tu chags pa'o zhes zer na/ de dag gis ni mtshams sbyor ba ma rtogs pa ste/ gal te ring po yin na mtshams sbyar bar mi 'gyur ro/ /de'i phyir yi ge a ni thung ngu ste dgag pa nyid do/ /de la mdor bsdus na 'phags pa thogs med dang / slob dpon dbyig gnyen dag gis skabs brgyad du phye mod kyi don gzhan du rnam par rig pa'i grub pa'i mthar rgyal ba'i yum bkrol te/tshig le'ur byas pa theg pa chen po dbu ma'i lta ba 'di ni slob dpon dbyig gnyen gyis de'i yul du ma gyur pas na/ 'phags pa thogs med pa 'od byed pa brnyes pas kyang de 'dul ba dang 'tsham par bkrol te/ sems can gcig gi don gyi phyir//phyi mtha'i bar du gnas par bgyi/ /zhes gsungs pa'i rjes su 'brang bas so/ /de ltar de dag gi skabs kyi don ma brjod cing rnam par rig pa'i zhen pa ma spangs pas na/ des byas byas pa min mthong ste/ /'phags pa'i nang du gtogs pa yi//rnam par grol sde zhes byas kyang / /dbu mar gnas pa'i blos rnam phye/ /zhes rim par byas te mdo bar ma dang sbyar ba mdzad do/ /de yi 'og tu rnam grol sde/ /dad pa'i sa la gnas pa yis/ /zhes pa ni tshogs kyi lam phal pa ste dad pa tsam gyi sa ni dad pa'i sa'o/ / bstan bcos mtha' dag ma rnyed par/ /zhes pa ni grub pa'i mtha' rab 'byam la ma 'dris par ro/ /kha cig na re rgyal ba'i yum mtha' dag ma rnyed par zhes zer te des ni legs par ma smras so/ /rang dang rjes mthun rnam bshad byas/ /zhes pa ni de rang gi shes rab 'phel bar bya ba'i phyir gzhung brtsams kyi/gzhan la phan par 'dod pa'am mngon pa'i nga rgyal gyis ni ma yin te/ ji skad du rig pa brtsams pa ni shes rab 'phel ba'i rgyu'o zhes gsungs so/ /'di ni 'dab gshog cung zad skyes pa'i bya 'phur bar rtsol ba dang 'dra bas bsngags pa'i tshig yin gyi smad par mi sbyar ro//de ltar mkhas pas snang byas shing / /zhes bya ba ni/ 'phags pa rnam par grol sde'i zhal snga nas so/ /kha cig gis ni bstan bcos kun/ /ma rnyed ces bya ba la bstan bcos ni/ /nyon mongs dgra rnams ma lus 'joms pa dang //ngan 'gro srid las skyob pa gang yin pa/ /chos skyob yon tan phyir na bstan bcos te/ /gnyis po 'di dag gzhan gyi lugs la med/ /ces pa'i nges pa'i tshig gi tshul gyis na bstan bcos te/ de yang khyad par can rgyal ba'i yum rnams so/ / kun ma rnyed pa nyid ces pa ni rang rang gi blos ma rtogs pa ste gzhung ma rnyed pa ni ma yin no/ /kha cig gis ni zhes pa ni slob dpon dbyig gnyen dang / btsun pa rnam par grol ba'i sde ste/ 'dul ba'i dbang las 'phags pa thogs med kyang der bgrang ngo / /de rnyed pa gang yin de ni ya mtshan no zhes pa ni bdag ni sngon du yang skal ba bzang bas sngon bsod nams mtshar zhig byas pa lta zhes rjes su dga' ba ston pa'i tshig go//de ltar mkhas pas snang bar byas pa yang bdag gis shes la/ la las ni don tshang bar ma shes la bdag gis tshang bar shes so zhes bstan nas/de yang rang gi lhas byin pa la sogs pa ni ma yin te/ sangs rgyas kyi mthus yin par bstan pa'i phyir/ de ltar shin tu rnyed dka' ba/ /zab mo'i lam can 'di lta ste/ /sangs rgyas dbang gis rnyed pa ni/ /zhes smos te bskal pa mang por yang mtshan tsam yang rnyed par dka' ba'i rgyal ba'i yum don zab mo 'di dang phrad pa ni sangs rgyas kyi byin gyi rlabs kyi dbang nyid yin gyi gnam bcas la sogs pa ni ma yin te/de ltar ni kye rgyal ba'i sras bcu po 'di dag ni de bzhin gshegs pa'i byin gyi rlabs te/bcu gang zhe na/ dang por byang chub tu sems bskyed pa dang / tshe rabs thams cad du byang chub kyi sems mi gtong ba dang / bdud kyi las khong du chud nas de bzlog pa dang / pha rol tu phyin pa thos te nan tan byed pa dang / 'khor ba'i sdug bsngal shes nas mi skyo ba dang /chos zab mo rtogs par byas pas 'bras bu thob pa dang / sems can rnams la nyan thos dang rang sangs rgyas kyi theg pa ston kyang de'i rnam par grol ba la mi mos pa dang / 'dus byas kyi rang bzhin la rtog cing 'dus ma byas la mi gnas la 'dus byas dang 'dus ma byas la mi gnas par 'du shes pa dang /nying mtshams sbyor ba la gnas kyang de sel ba dang / rnam pa thams cad mkhyen pa'i ye shes rtogs kyang byang chub sems dpa'i spyod pa sgrub pa'i rigs kyi rgyun mi gcod pa ste/ kye rgyal ba'i sras bcu po de dag ni de bzhin gshegs pa'i byin gyi rlabs so//zhes gsungs shing / yang yum 'di nyid las kyang / de bzhin gshegs pa'i byin gyi rlabs kyis chung ngus na glegs bam chen po la yi ge gsal ba bris te zhes bya ba la sogs pa gsungs so/ /de ltar sangs rgyas kyi byin gyi rlabs yin na/go thugs rjes phrogs pa de dag btsun pa rnam par grol ba'i sde la sogs pas rnyed pa nyid du ci'i phyir mi mdzad ce na/ rang gi 'bad pa'i rjes su byin gyi rlabs 'brang ba ni chu'i zla ba lta bu ste/ de'i phyir 'phags pa rab kyi rtsal gyis rnam par gnon pas zhus pa zhes bya ba rgyal ba skyed ma snying po'i don bstan pa las/rta cang shes la sogs pa'i dpes bstan la/ 'di las kyang / sangs rgyas rnams la bkur sti byas/ /de las dge ba'i rtsa ba bskrun/ /dge ba'i bshes kyis mgon byas pas//'di mnyan pa yi snod yin no/ /zhes ston no/ /da ltar yum 'di rnyed pa ni sangs rgyas kyi mthu yin pas na de la byas pa shes pa'i mchod pa bya bar rigs pas na/ mkhas pa rnams kyis dbye ba'i rigs/ /zhes smos te/ bka' bzhin 'bad pas bsgrubs pa'i lan klan pas//phan par mdzad pa de la lan du mchod/ /ces bstan pas/ lan du mchod pa yang bka' bsgrub par bya ba yin la/ bka' sgrub pa'i mchog ni rgyal ba'i yum la nan tan byed pa ste/ 'phags pa shes rab kyi pha rol tu phyin pa dpal mchog dang po las/shes rab kyi pha rol tu phyin pa 'di 'dri ba dang / klog pa dang / nyan pa dang / 'don pa dang /kha ton byed pa dang / 'chang ba dang / sems pa dang / sgom pa ni de bzhin gshegs pa thams cad la mchod pa'i cho ga rgyas pa'o zhes gsungs pas so/ /de ltar na mkhas pa ste/nges par rtogs pas su yang rung ston pa la drin du gzo ba rnams kyis lan du mchod pa'i ngo bor yum 'di'i don blo dang gzhung la dbye bar rigs pa de'i phyir slob dpon bdag nyid kyang gzhung 'byed par bstan pa'i phyir/ rnam pa kun tu bdag gis ni/ /spyod yul min yang rang gzhan la//phan gdags 'dod pas bsod nams dag /bsgrub dang mthun phyir sems pa skyes/ /zhes smos te/ rnam pa kun tu bdag gis ni/ /spyod yul min yang zhes pa ni/ /phrag dog la sogs pa'i dbang gis 'grel pa brtsams pa la smod pa srid pas de bkag pa ste/de skad du slob dpon chos kyi grags pas tshad ma rnam 'grel byed pa na/ skye bo phal cher phal la chags shing zhes pa la sogs pa smos pa lta bu'o/ /rang gzhan la phan gdags 'dod nas zhes pa ni/ bsam pa dag par ston cing gdul bya 'jug pa rnams la'ang bslab pa'o//bsod nams dag bsgrub pa dang / zhes pa ni bsgrub pa'i lan du mchod pa ste/ mthun phyir zhes pa ni mchod pa'i thabs bzang po 'di nyid yin pa'i phyir zhes ston pa'o/ /sems pa skyes zhes pa ni brtsams pa'i spro ba 'byung ngo zhes ston pa ste/sems bskyed gcig ces gdams ngag gi rkyen can du yang sbyar ro/ /da ni phyag 'tshal ba bstan pa ni tshig dgrol ba'i phyir/ 'phags pa byams pa bdag nyid dam pa rnams kyi spyod pa dang mthun par rab tu ston pas zhes pa la sogs pa smos te tshig de ni go sla'o//so so rang gis rig pa'i ye shes kyis shes rab kyi pha rol tu phyin pa'i yul can gyi rab tu dang ba ni zhes bya ba la/ so so rang gis rig pa zhes bya ba ni ngag gi lam las 'das pas brjod pa dang bral ba ste/ rang gis yang dag par rig pa de ni gzhan la bstan nus pa ma yin la/gzhan gyis kyang de brten cing gzung bar nus pa ma yin te/ de bas na rang kho nas yang dag par rig pa ni rang gis yang dag par rig pa'o/ /de ltar yang / phra la shes dka' drang srong chen po'i lam/ /mi rtog rtog yul ma yin blta bar dka'/ /rang bzhin zhi zhing 'gag med 'byung ba med//mkhas gsal shes pas khong du chud pa yin/ /ngo bo nyid med zhi zhing sdug bsngal zad/ /rgyud las rnam grol mnyam par mya ngan 'das/ /mtha' dang dbus med tshig gis brjod du med/ /dus gsum grol ba nam mkha' 'dra zhing mtshungs/ / bde gshegs spyod yul zhi zhing nye bar zhi/ /smra ba'i lam rnams kun gyis brjod par dka'/ /de dag sa dang spyod pa de 'dra bas/ /smra bar dka' na bstan par ga la nus/ /de ni bsam yas sems las rnam par spangs/ /ye shes mngon bsgrub rgyal ba'i spyod yul te//phung po skye mched khams kyis bskyed pa min/ /sems kyis mi shes yid kyis rnam ma brtags/ /ji ltar bar snang gnas kyi bya yi rjes/ /shin tu smra dka' bstan par mi nus pa/ /de ltar bde gshegs sras kyi sa rnams kyang / /yid dang sems kyi yul gyis shes mi nus//'on kyang byams dang snying rje'i smon lam gyis/ /de las phyogs tsam rim pa'i tshul bzhin du/ /bshad par bya ste sems kyi spyod yul min/ /ye shes tshul gyis rdzogs par bya ba'o/ /de 'dra'i spyod yul phra zhing blta dka' ba/ / rang rig yin phyir brjod par mi nus kyang / /'on kyang bde bar gshegs pa'i mthus brjod kyis/ /sems dang mthun par nan tan gyis te nyon/ /zhes gsungs so/ /de ltar bstan pa'i dbang las de brjod du med par bstan na/ ci ste ri bong gi rwa ltar shin tu med pas na brjod par mi nus sam/'on te yod du chug na yang brjod par mi nus/ de la phyogs dang po ltar na ni de brjod du med pa yin yang rang rig pa ma yin te/ med pa ni rig par gzhag par mi nus te nam mkha'i me tog la sogs pa lta bu'o/ /des na thal bar 'gyur ba dang / bzlog na gnod pa med pa'i phyir de ni ma grub po/ /phyogs gnyis pa ltar na yang mi rigs te/ gang yod bzhin du brjod du mi nus pa ni mi rigs te/ bum pa la sogs pa yang brjod du med par 'gyur ba'i phyir dang / brjod du med pa'i yod pa'i tha snyad nyid gang gi tshe su las yid ches par 'gyur/bla ma la sogs pas kyang de nges pa skyed par nus pa ma yin te/ brjod par nus pa ma yin pa'i phyir ro/ /de'i phyir so so rang gis rig pa ni mi 'dod pa nyid do zhe na/ ci glags lta ba 'di ni don dam pa'i sgo nas sam/ 'on te kun rdzob kyi sgo can nyid nas 'jug par byed/gal te de don dam par na ni ji skad du smras pa bzhin te/ rang rig pa phra rab tsam yang kho bo yang khas mi len te/ de la rigs pa'i stobs bcom ste gnas pa'i mthu ga la zhig yod par 'gyur/ ci'i phyir zhe na/ sangs rgyas kyis mkhyen nas chos rnams ma gzigs phyir zhes kyang gsungs pas so//'on te glags 'di kun rdzob kyi sgo nas so zhe na/ de ni glags su mi rung ste/ dngos po kun rdzob pa dag las kha cig ni brtags pa tsam ste/ bdag la sogs pa'o/ /kha cig ni rdzas su yod la bstan du rung ba ste bum pa la sogs pa'o//kha cig ni rdzas su yod kyang rang rig pa'i ngo bo byung ba tsam las bstan du med pa ste/ tshor ba la sogs pa'o/ /de'i phyir rang gis rig pa de ni yod kyang bstan par mi nus pa'o/ /gal te bstan par mi nus pa'i rang rig pa de'i dbang du byas na gzhan gyi rgyud yod par ni mi 'gyur te/de med na 'gro ba'i don bya bar mi 'jug pas theg pa chen po'i tha snyad dag med do zhe na/ rang rig pa ni mngon sum gyis grub pas skur pa mi gdab cing / rgyud gzhan yod pa ni rjes dpag las khong du chud par bya ba yin pas na tha snyad mi 'jig go//'di'i don ni tshad ma'i gzhung rnam pa bdun gyis shes pas 'dir mi dpyad do/ /gal te rang rig pa grub na de ni gzhan rig pa dang phan tshun spangs pas 'gal ba'i ngo bo yin pas/ bcom ldan 'das rnams rang rig pa'i ye shes dang ldan pa na ni rnam pa thams cad mkhyen par mi 'gyur te/gzhan gyi rnam pa mi mkhyen pa'i phyir ro/ /de mkhyen pa na ni rang rig pa'i ye shes mi 'grub po zhe na/ sa bcu pa'i bar du ni de gnyis ji skad smras pa'i 'gal ba yin pas na/ de dag la rnam pa thams cad mkhyen par ma brtags shing /rnal 'byor pa rnams kyi tha snyad ni sems can gdul ba'i dbang ma gtogs par thams cad du rtogs pa dang mthun pa kho na yin zhes shes par bya ba'i phyir nye bar brtags nas bshad de/ de lta ma yin na rnal 'byor pa'i rgyud las so so rang gis rig pa'i skad cig ma rnams ji ltar gzhan yid ches par byed pa'i mtshan nyid dag yin zhes 'chad par 'gyur ba'i don yang 'di nyid du gtan la phab pa'o//sangs rgyas kyi sa la ni 'gal ba de dag bsam par mi bya ste/ de ni bsam gyis mi khyab pas na/ grangs med pa la su zhig bgrang //tshad med pa la su zhig 'jal/ /khyod kyi yon tan grangs dang ni/ /mthu la spobs pa ma mchis so/ /zhes bstod pa'o/ /ye shes kyis zhes bya ba ni rang rig pa rnam par mi rtog pa'i ye shes kyis so/ /rnam par mi rtog pa zhes bya ba 'di ci zhig yin/gal te rang bzhin gyis mi rtog pa'o zhe na/ de ltar na ka ba la sogs pa bems po rnams ye shes su 'gyur te/ 'phags pa lha'i zhal snga nas kyang / gal te ye shes mi shes na/ /shing ni ye shes yin par thal/ /zhes bshad do/ /'on te rtog pa dang dpyod pa las 'das pas der bzhag na ni bsam gtan gnyis pa la sogs pa yang der 'gyur te de dag la rtog pa dang dpyod pa med pa'i phyir ro//yang sems dang sems las byung ba rab tu zhi bas der bzhag na ni 'gog pa'i snyoms par 'jug pa yang der 'gyur ro/ /rkyen gyis yul mi 'dzin pas der bzhag na ni rgyal ba la sogs pa yang der 'gyur ro//'on te mi rtog pa'o snyam sems pas rtog pa gzhan ma skyes pas der bzhag na ni de nyid rtog par red pas mi rtog pa ga la yin zhe na/ de dag ni 'dir mi bsam gyi so sor rtog pa'i shes rab kyis yun ring por dngos po rnams la bltas pa las/dngos po'i cha shas phra rab tsam yang mi dmigs par nges par bags kyis brtan par 'gyur zhing / nam zhig na yul gang la yang rnam par mi rtog cing rang bzhin gyis 'od gsal ba'i ye shes kyi snang ba rab 'byam tshad med pa rang gis rig pa de skye ba ni rnam par mi rtog pa'i ye shes te/tshu rol mthong ba rnams kyis cung zad kyang ma myangs pas na ji ltar na nges par byed nus te/ khyab dang dbang la sogs ma myong / /dpag tu med par gnas pa'i rgyu/ /'jig rten spyi bor gyur pas kyang / /myong bar gyur pa ma yin pa//yang dag bdud rtsi dag pa 'di/ /thugs rje dag pa'i rgyu can gyi/ /de bzhin gshegs pa ma gtogs par/ /gzhan gyi longs spyod ma yin no/ /zhes bstan te/ de bzhin gshegs pa'i rjes su 'brang ba rnams kyis ni ci rigs su myong ba nyid do/ /ye shes 'di ni rgyu las dpags te nges par yod par yid ches par bya'i/bum pa la sogs pa'i dngos po ltar gsal por gzung bar ni nam yang mi nus pas na slob dpon gyi zhal snga nas kyang / bsgom pa'i stobs grub nas kha cig la nor bu dang dngul la sogs pa'i shes pa bzhin du 'khrul pa'i mtshan ma mtha' dag spangs pa sgyu ma lta bu'i bdag nyid du snang ba'i blo rnam par mi rtog pa so so rang gis rig par bya ba ci zhig ltar yang dag par skyes na rnal 'byor pas shes bya'i sgrib pa yang dag par spong ngo zhes 'chad pa yang don 'dir gtan la phab pa ste/ci zhig ltar zhes pa ni bstan par mi nus pa'i tshig nyid do/ /gal te so sor rtog pa'i shes rab la goms pa'i rgyu las 'bras bu rnam par mi rtog pa'i ye shes 'byung na/ rgyu ni rnam par rtog pa nyid yin la/ de'i 'bras bu de las bzlog pas rgyu dang 'bras bu 'gal bas na/ye shes de rgyu ma yin pa las byung bas gang las kyang de 'byung ba 'am/ rgyu med par ji ltar mi 'byung zhe na/ ji ltar na 'di rgyu ma yin/ so sor rtog pa na yang spros pa med par mos pas zhugs la 'bras bu'i skabs na yang spros pa med pa nyid thob po/ / phyogs ma lus pas rgyu dang 'bras bu khyad par med na ni rgyu dang 'bras bur yang ji ltar 'gyur/ rgyus kyang ci zhig bya ste/ phyogs 'ga'i rjes su 'gro bas kyang rgyur 'dogs so/ /gzhan yang 'phags pa stug po bkod pa las kyang / rwa las lan tshwar gyur pa dang / /'dam bu las kyang sgog par 'gyur//mi gtsang srin bu la sogs las/ /sbrang mar 'gyur gzhan mi 'dra mang / /rgyu dang 'dra ba'i 'bras bus ni/ /sa rnams gang na'ang mi snang ste/ /gyur pa'i rgyu las 'bras bu 'byung / /zhes gsungs la/ tsan+dan gyi shing las me byung ba'i dpes mi 'dra ba'i rgyu las mi 'dra ba'i 'bras bu 'byung ba yang chos rnams kyi chos nyid bsam gyis mi khyab pas kyang 'di la gnod pa med do//de ltar rang rig pa rnam par mi rtog pa'i ye shes ni 'thad pa nyid na/ de mi rtog bzhin du ji ltar na shes rab kyi pha rol tu phyin pa'i yul can gyi rab tu dang ba zhes gzhag /dang ba ni sems las byung ba dad pa yin no zhe na/ 'di'i don ni sngar smras te/ rnam par mi rtog pa'i ye shes kyi yum 'di nges par byas nas/ de'i rjes la thob pas ji ltar bzung ba la rab tu dang bar byed pa ste/ mig gis mthong ba'i gzugs dag la yid kyis rjes su chags pa lta bu'o//yang na so so rang gis rig pa'i ye shes kyi yul can shes rab kyi pha rol tu phyin pa la rab tu dang ba zhes gzhan du sbyar ba la yang nyes pa med do/ /lhag ma rnams ni go sla ste/ cung zad du na 'dir phyag 'tshal ba'i dgos pa ni bdag nyid dam pa'i grangs su gtogs par gzhan gyis shes pa ste/de yang dgos pa ni bdag gis brtsams pa'i tshig le'ur byas pa la gdul bya rnams 'jug pa'o zhes dgongs nas phyag 'tshal ba'o/ /gcig dang du ma'i ngo bo nyid dang bral ba zhes bya ba la sogs pa'i tshad mas zhes pa ni/bdag dang gzhan smras dngos 'di dag /yang dag du na gcig pa dang / /du ma'i rang bzhin bral ba'i phyir/ /rang bzhin med de gzugs brnyan bzhin/ /zhes pa dang / dngos po gang gang rnam dpyad na/ /de dang de la gcig nyid med/ /gang la gcig nyid yod min pa/ / de la du ma nyid kyang med/ /gcig dang du ma ma rtogs par/ /rnam pa gzhan dang ldan pa yi/ /dngos po mi rung 'di gnyis ni/ /phan tshun spangs te gnas phyir ro/ /zhes bstan pa ni gcig dang du ma'i ngo bo nyid dang bral ba zhes bya'o/ /sogs pa zhes bya ba ni rdo rje gzegs mar/ / rang las ma yin gzhan las min/ /gnyi ga las min rgyu med min/ /dngos po gang dang gang la yang / /skye ba nam yang yod ma yin/ /zhes bya ba dang / rten cing 'brel par 'byung ba'i rigs par/ rkyen las skyes pa gang yin de ma skyes/ /de la ngo bo nyid kyis skye ba med/ /ces bya ba la sogs pa dang /gzhan yang / skye med rab tu ston nus pa/ /du mas dngos po gcig mi byed/ /ces pa la sogs pa rnams so/ /tshad mas zhes bya ba ni gdod ma nas ma skyes pa la yid ches par byed pa'i rgyu gtan tshigs de dag nyid 'jal bar byed pas tshad ma zhes kyang bya ste/de bzhin du tshul bzhin yid la byed pa'i dbang las rigs pa zhes bstan cing blo dngos po dang mthun par sgrub cing der 'dren pa'i phyir na sgrub pa dang 'dren pa nyid du bstan to/ /de yang dang po nyid du chos nyid kyi rigs pa la mos par bya ste/ de nyid la the tshom la sogs pa srid na rigs pa gzhan gyis de la nges par bya ste/de nyid la brten par rigs te/ 'di ni yid ches par byed pa la gtso bo ste dngos po'i stobs las 'ongs pa ni sus kyang 'gal bar bya ba ma yin pas so/ /de'i phyir bstod par byed pa las/ rnam grol nang na mi g.yo ltar//rigs pa'i nang na chos nyid ltar/ /shes rab nang na kun mkhyen ltar/ /khyod ni lus can kun gyi mchog /ces bstod pa brjod do/ /gzhi dang / lam dang / rnam pa zhes bya ba ni 'chad par 'gyur ba las gsal lo/ /skye ba med pa yongs su shes pa'i don can gyi tshigs su bcad pa'i mtshan nyid kyi yum la gnod pa ma mthong nas zhes bya ba la/skye ba med pa yongs su shes pa'i don can zhes bya ba ni/ skye ba med pa yongs su shes pa'i don dang ldan pa ni yum ste/ yum de yang 'dir tshigs su bcad pa gcig gis mtshan nyid bstan pa ste/mtshan nyid ni nus pa'i mtshan nyid gtso bor byas pa'o/ /de ltar yum skye ba med pa yongs su shes pa dang ldan pa sras gsum skyed par nus pa'i mtshan nyid 'di la skye ba yod do zhe 'am/ sras gsum skyed pa'i mtshan nyid dang mi ldan no/ /zhes rigs pa 'ga' zhig gis gnod pa yod par ma mthong ba ni/yum 'di'i chos nyid de nyid yin pa'i phyir te/ rgyu mtshan gzhan gang gis kyang btsan thabs su ni de ltar bsgrub par mi nus pas so/ /nas zhes pa ni phyir zhes pa'i don to/ /shes rab kyi pha rol tu phyin pa thams cad mkhyen pa nyid gsum gyi bdag nyid tshul gsum pa can ni zhes pa la/'dir shes rab kyi pha rol tu phyin pa zhes pa ni khyad par gyi gzhi'o/ /de'i khyad par ni thams cad mkhyen pa nyid gsum gyi bdag nyid ces pa smos te/ yum de yang kun rdzob tu yang dbyer med pa'o snyam pa dgag pa'i phyir dang /sras gsum car skye bar bstan pa'i phyir tshig 'di smos te/ sangs rgyas rnams dang rang sangs rgyas/ /nyan thos rnams kyis nges bsten pa'i/ /thar lam khyed nyid gcig pu ste/ /gzhan zhes bgyi ba ma mchis nges/ / zhes bstod pa dang / nyan thos kyi sa la slob par 'dod pas kyang shes rab kyi pha rol tu phyin pa 'di nyid la bslab par bya'o/ /zhes pa la sogs pas gsungs la/ yang rgyal ba'i yum bar ma las kyang / shes rab kyi pha rol tu phyin pa 'di las ni theg pa gsum po nyan thos kyi theg pa dang /rang sangs rgyas kyi theg pa dang / yang dag par rdzogs pa'i sangs rgyas kyi theg pa rnams rgya cher bstan to zhes gsungs so/ /de ltar na yum 'di ni nyan thos dang rang sangs rgyas rnams bskyed pas gang zag la bdag med pa tsam zhig yin la/ byang chub sems dpa' dang /sangs rgyas rje btsun rnams bskyed pas gang zag dang chos la bdag med pa nyid yin la/ de ni 'phags pa dam pa'i chos dran pa nye bar gzhag pa la sogs pa dang / 'phags pa sdong po bkod pa la sogs pa las kyang bstan pas/ bstan pa 'di la yang don lhag ma med la yum 'di la yang rang rang gi rtogs pa las lhag pa'i rmad du byung ba ci zhig yod snyam na/de bsal ba'i phyir tshul gsum pa can ni zhes bya ba smos te/ 'dir don ni yum la thams cad mkhyen pa nyid gsum du phye ba ni rang bzhin gsum du phye ba ma yin te dbye bar mi nus pa'i phyir ro//'o na ci zhe na/ gdul bya'i bsam pa'i dbang gis sras gsum gyi yum yin no zhes bstan gyi/ rnam par nges pa'i dbang du byas pa'i tshe ni sangs rgyas rje btsun kho na'i yum yin gyi/ nyan thos dang rang sangs rgyas g.yung po la sogs pa lta bu ni bud med rin po che lta bu'i yum 'dis ga la skyed/de'i phyir 'di'i mthu che ba ni 'gro ba ma lus pa sangs rgyas bcom ldan 'das chos kyi rgyal po kho nar bsgrubs pas na rab tu mtshar du bya ba'o/ /yum gyi mthu'i khyad par de nyid ston pa'i gzhung dag kyang gzhung gzhan pas mchog nyid do//'phags pa dam pa'i chos dran pa nye bar gzhag pa la sogs pa de dag las ni 'dod chags dang bral ba'i 'jug pa'i rim pa la sogs pa tsam zhig gtsor bstan pas gzhung phyogs gcig pa'o/ /'phags pa sdong po bkod pa la sogs pa de dag tu yang theg pa chen po'i bya ba'i tshul dang /'bras bu la sogs pa gtsor bstan gyi/ nyan thos dang rang sangs rgyas rnams kyi lam dang 'bras bu ni ma bstan to/ /de'i phyir de dag kyang gzhung phyogs gcig pa'o/ /rgyal ba'i yum 'dir ni rigs can thams cad kyi bstan pa bsgrags pas na gzhung chen po shin tu rgyas pa'i sde yin te/don 'di nyid la brten te/ gang yang dag par skyon med pa la zhugs pa de dag ni bla na med pa yang dag par rdzogs pa'i byang chub tu sems skyed pa'i mthu med de/ de ci'i phyir zhe na/ de dag gis 'khor ba'i rgyun gyi mtshams bcad pa'i phyir te/'on kyang de dag gal te bla na med pa yang dag par rdzogs pa'i byang chub tu sems bskyed na de dag la yang rjes su yi rang ngo / /khyad par du 'phags pa'i chos rnams las khyad par du 'phags pa'i chos rnams 'thob par 'gyur ba de dag gi dge ba'i phyogs la kho bo ni bar chad mi byed do zhes gsungs la/slob dpon nyid kyi zhal snga nas kyang 'chad par 'gyur ba las de'i don bstan pa/ theg pa gsum rnam par gzhag pa ni dgongs pa can yin gyi mtshan nyid pa ni ma yin no/ /zhes lugs las 'byung bas/ skye bo thams cad bla na med pa yang dag par rdzogs pa'i byang chub kyi mthar thug pa yin te/de'i phyir 'dod chags dang bral ba dang cig shos kyi rnal 'byor pas kyang sangs rgyas nyid thob par bya ba'i phyir lam shes pa nyid bsgom par bya ba yin pas khyab pa yin no zhes bstan pa yang 'di nyid du gtan la phab pa yin la/'chad par byed pa las de lta na phyag 'tshal ba dang / bstod pa sngon du 'gro ba'i bstan bcos mngon par rtogs pa'i rgyan zhes bya ba la sogs pa rgal ba dang lan rnams kyang 'di nyid du gtan la phab par shes par bya'o/ /de'i phyir tshul zhes pa'i sgra ni rang bzhin gcig kho na las med par rkyen gzhan kha cig gis du mar snang ba'i du ma nyid ji snyed pa ni 'dir tshul gyi sgras bstan pa ste yum 'di la thams cad mkhyen pa nyid gsum du phye ba yang rang bzhin phye ba ni ma yin te/'jig rten mgon pos thugs rje yis//lus can rnams la bstan slad du/ /tha snyad mngon du mdzad nas ni/ /khyod ni bstan cing bstan ma lags/ /zhes slob dpon gyi zhal snga nas rnam par mi rtog par bstod pa las bstan to/ /de ltar na du mar snang ba gcig nyid du bsgrub pa ni tshul gsum pa can ni zhes bya ba yin la/gcig du mar ston pa'i mthu dang ldan par brjod pa ni thams cad mkhyen pa nyid gsum gyi bdag nyid ces smos pas so/ /de lta bu'i mthu'i ngo bo de su'i snyam pa la/ shes rab kyi pha rol tu phyin pa zhes smos pa ste/ don gyi go rims ni de ltar blta bar bya'o//rgyu'i gtso bo zhes pa ni byed pa'i rgyu nyid do/ /de la thams cad mkhyen pa nyid gsum gyis ni don brgyad bsdus la/ de ni shes rab kyi pha rol tu phyin pa yin no/ /des kyang 'chad par 'gyur ba'i tshul gyis don thams cad phun sum tshogs pa yin no zhes de ltar thugs la bzhag nas zhes bya ba la/dngos po brgyad du rnam par phye ba de dag ni dngos kyi tshul du dpyad na rnam pa thams cad mkhyen pa nyid kyi skabs zhes gcig kho nar gdags par rigs te/ de ci'i phyir zhe na/ sngar bstan pa'i rigs pas lam thams cad ni 'bras bu rnam pa thams cad mkhyen pa nyid gcig pu brgyud pa'am/dngos su bsgrub pa'i phyir ro/ /de bas na slob dpon gyi zhal snga nas 'chad par 'gyur ba las rnam pa thams cad mkhyen pa nyid ni sangs rgyas nyid kyi lam ste mngon par rtogs pa thams cad nye bar mtshon pa lhur len pa yin no//zhes smos pa yang 'dir bstan pas chog go/ /'on kyang dman pa la mos pa kha cig ni 'tshang rgya bar nges kyang bdag ni byang chub chen po'i snod ma yin no zhes bdag la rnam par smad nas spyad pa spyod la kha cig ni 'tshang rgya ba'i phyir spyad pa spyod kyang 'bras bu ma thob pas lam la gnas pa yin la/kha cig ni yun ring po nas bzhed pa'i don yongs su grub pas/ chos kyi rgyal po srid pa gsum gyi bdag por dbang brnyes pa nyid de/ de ltar thams cad gsum du bsdus pas na skabs brgyad du phye ba yang skabs gsum du bsdu bar shes par bya ba'i phyir/de la thams cad mkhyen pa nyid gsum gyi don brgyad bsdus la de ni shes rab kyi pha rol tu phyin pa yin te zhes bya ba smos so/ /de ltar na skabs gcig ce'am/ gsum zhes mi bzhag par dngos po brgyad nyid skabs brgyad kyis brjod par bya ba rnam par phye ba 'di ci la dgongs she na/don 'di ni 'og nas ston par 'gyur bas 'dir mi bsam mo/ /da ni dngos po brgyad thams cad mkhyen pa nyid gsum du ji ltar bsdu ba cung zhig 'dir brjod de/ dang po re zhig gang zag dbang po rtul po rim gyis sangs rgyas nyid thob pa'i rim pas dang por nyan thos kyi 'bras bu'i dbang du byas te/rnam pa thams cad mngon par rdzogs par rtogs pa'i rnam pa thams cad mkhyen pa'i rnam pa'i dbang du byas te/ byang chub kyi phyogs kyi chos sum cu rtsa bdun lam bdun du bsdus pa 'di nyid gzhir bstan to/ /de nas de la rnam pa ji snyed cig yod ces rtog pa la/mthong ba'i lam gtsor byas te/ rang gi rnam pa bcu drug med pa nas 'dul ba med pa'i bar du shes par bya'o/ /de'i mtshan nyid ji lta bu zhes rtog pa la ni mtshan nyid nyi shu bstan pa'o/ /de dag gi sbyor ba'i lam gang zhe na zhes rtog pa la ni/'phags pa nyan thos lam la ni/ /zhes pa la sogs pa dang / gzugs sogs de mi rtag sogs dang / /zhes pa la sogs pa gsungs so/ /sbyor ba'i lam las ni mthong ba'i lam 'byung bas na/ skabs gnyis pa dang gsum par mthong ba'i lam rnam pa dang bcas par bstan to//'bras bu ni 'dir ma bstan te go sla bas sam/ rang gi gzhung la ltos pas sam/ don gzhan yin yang gdams ngag gi skabs su/ dbang po rtul dang rnon po dag /ces bya ba la sogs pas thun mong du bstan du rung ba'o/ / thams cad shes pas bsdus pa rang sangs rgyas rnams kyi dbang du byas te/ skabs gnyis pa las sbyor ba'i lam dang / mthong ba'i lam dag khyad par dang bcas par bstan la/ skabs bzhi pa las de dag gi bsgom pa'i lam rnam pa'i sgo nas bstan te/ rang sangs rgyas kyi dbang du byas te/de ni de tsam du zad do/ /de'i phyir skabs dang po dang / lnga pa dang drug pa dang / bdun pa dang / brgyad pa las ni thams cad shes pa bsdus pa'o/ /'brel ba ma bstan te skabs gnyis pa dang / gsum pa dang / bzhi pa dag las bsdus pa'o/ / yon tan dang skyon dag la mi sbyor te/ gtsor ma byas pa'i phyir ro/ /thams cad shes pa'i skabs bsdus pa'o/ /lam shes pa'i dbang du byas te/ nyan thos dang rang sangs rgyas te/ de dag zhi ba'i dbyings nas langs te/ lam mchog shes par byed pa ni skabs dang po nas bstan pa'i sems bskyed pa thog ma dang /gnyis pa dang / gsum pa dang por byas te/ gdams ngag la brten nas tshogs kyi lam phal pa sbyangs nas/ skabs bzhi pa las bstan pa'i thar pa'i cha dang mthun pa bskyed de/ skabs dang po nas ji ltar bstan pa'i nges par 'byed pa'i cha dang mthun pa dang /go cha dang / skabs bzhi pa dang / lnga pa las bstan pa'i sbyor ba'i lam sbyangs te/ de dag gi rtags thob par byas nas/ yang de yan chad rigs la gnas shing 'jug pa dang / rang gi skabs nas bstan pa dang / skabs lnga pa'i mthong ba'i lam gyi rnam par rtog pa dag spangs nas/ yang rang gi skabs kyi bsgom pa'i lam dang / tshogs dang / skabs lnga pa las ji ltar bstan pa'i rnam par rtog pa rnams spangs te/ lam de gnyis rang rang gi rnam pa dang / mtshan nyid dang / rtags dang bcas par sbyangs nas/ yang skabs drug pa yongs su sbyangs te/ de nas bsgom pa'i lam khyad par can skabs lnga pa las ji skad bstan pa gtsor gyur pa skabs bdun pas dngos po kho nar bstan pa rnam pa dang bcas shing nges par 'byung ba'i sgrub pa'i ngo bo can rdzogs par byed de/lam de dag thams cad la yang sems bskyed pa dang / rigs dang / gdams ngag dang / dmigs pa dang / ched du bya ba dang / yon tan dang / skyon dag ni thun mong du ci rigs par sbyar te/ 'di ni skabs brgyad las lam shes pa nyid kyi skabs bsdus pa'o//da ni sngar rnam pa thams cad mkhyen pa nyid ni mngon par rtogs pa thams cad nye bar mtshon pa lhur len pa ste zhes smos pa dang / skabs brgyad pa las rnam pa thams cad mkhyen pa'i skabs phyogs gcig tu bsdu ba cig car bstan te/ re zhig rnam pa thams cad mkhyen pa de ni rgyu la ma ltos par 'thob pa med pas de'i rgyu bstan pa lam thams cad bsdus pa byang chub kyi sems bcu dgu rgyu'i ngo bor bstan to/ /de yang gdams ngag gis smin par bya ba byed pas gdams ngag bstan to/ de yang gdams ngag gis legs par zin pa ni nges par 'byed pa'i cha dang mthun pa yin pas de bstan to//nges par 'byed pa'i cha dang mthun pa rigs la gnas pa yin pas rigs kyi dbye ba bstan to/ /rigs la gnas pa rnams la ni dmigs pa dang ched du bya ba bstan to//yang slar thabs gzhan gyis sbyor ba'i lam go cha'i sgrub pa bstan to/ /yang sngar mthong ba dang / bsgom pa dang / khyad par gyi lam gyi ngo bor 'jug pa dang / tshogs dang nges par 'byung ba'i sgrub pa rnams bstan to/ /de'i 'bras bu ni sems bskyed pa tha ma gsum dang /skabs brgyad pa ril gyis bstan cing / skabs drug pa ni 'bras bu 'thob par bya ba la rab tu 'dris par byed pas lam spyir sbyar te/ de ltar na kha cig ni rnam pa thams cad mkhyen pa'i rgyu'o/ /kha cig ni skabs bdun pa nas bstan pa'i rnam pa dang mtshan nyid do//kha cig ni ngo bo dang / dbye ba dang / phrin las so/ /kha cig ni 'bras bu gzhan pas khyad par du bstan pa ste/ de'i phyir rnam pa thams cad mkhyen pa'i skabs kho nar skabs thams cad 'dus pas na 'og nas 'chad pa las kyang / rnam pa thams cad mkhyen nyid lam/ /ston pas 'di las bshad pa gang / /zhes lam gcig pu kho na 'bras bu dang bcas par bstan to/ /'di ni rnam pa thams cad mkhyen pa'i skabs su skabs thams cad rab tu bsdus pa'i tshul lo/ /da ni zhar la bstan pa ni ngo bor skabs kyi bsdu ba gzhan bstan te/re zhig skabs dang po gsum ni thos pa dang / bsam pa'i shes rab kyis skabs ma lus par skabs de dag tu drangs te byang bar bya ba ste dang po'o/ /skabs bzhi par ni ji ltar 'dris pa'i skabs gsum du bsdus pa rnams bsgom pa'i shes rab kyis goms par bya ba ste gnyis pa'o//skabs lnga pa ni bsgom pa cung zad grub pas bstan pa ste gsum pa'o/ /yang skabs drug pa ni shin tu ring du 'dris par byed pa ste bzhi pa'o/ /de bzhin du skabs bdun pa ni yun ring du 'dris pa'i dbang gis lhun gyis grub par skad cig gis sdud par mthar gyur pa ste lnga pa'o//brgyad pa ni 'bras bu ste drug pa'o/ /'di ni 'chad par 'gyur ba las/ /mtshan nyid de yi sbyor ba dang / /de rab de yi go rims dang / /de mtha' de yi rnam smin ni/ /don bsdus gzhan te rnam pa drug /ces bstan pa nyid drang ba'o//yang skabs dang po gsum ni cir shes par bya ba yul tsam ste/ thos pa dang bsam pa dag gis skabs mtha' dag der bsres pa'i tshul gyis 'dris par bya ba yin no/ /skabs lhag ma bzhi ni legs par bsgoms pas rnal 'byor du bya ba yin te/de bzhin du skabs tha ma ni 'bras bu yin pas mdor bsdus pa'i dbang gi skabs gsum nyid do/ /de'i phyir/ yul gyi rgyu ni gsum dag dang / /sbyor ba bzhi yi bdag nyid dang / /chos sku phrin las 'bras bu ni/ /mdor bsdus gzhan te rnam pa gsum/ / zhes ston pa'i don nyid 'dir brjod pa'o/ /de bzhin du rnam pa thams cad mkhyen pa la sogs pa gsum ni las dang po pa'i sa nas brtsams te/ mthong ba'i lam dang / bsgom pa'i lam gyi bar du rim par skye ba 'jig rten dang 'jig rten las 'das pa'i dbang du byas la/rnam pa kun mngon par rdzogs par rtogs pa la sogs pa rnams ni/ lam bden pa mthong ba nas yang bsgom pa'i lam gyi gnas skabs na sngar ji ltar mthong ba rnams la slar yar 'dris par byed pas na/ 'jig rten las 'das pa'i dbang du byas pa yin te/de'i phyir 'chad par byed pa las rnam pa dang / lam dang / gzhi thams cad rnam par bsgom pa'i dbye bas go rims bzhin du rnam pa thams cad mkhyen pa nyid la sogs pa mngon par rtogs pa rnam pa gsum la 'jig rten pa'i nges par 'byed pa'i cha rtogs pa sngon du 'gro bas 'jig rten las 'das pa'i mthong ba'i lam dang /bsgom pa'i lam rtogs pa yin la/ rnam pa kun mngon par rdzogs par rtogs pa la sogs pa mngon par rtogs pa rnam pa gsum la ni/ bsgom pa gong nas gong du gnas skabs kyi khyad par gyis rnam pa thams cad du khyad par gyi lam gyis bsdus pa'i ye shes zag pa med pa chung ngu dang 'bring dang chen po'i rim gyis skye ba yin pas cig car skye ba dgag pa'i phyir/nges par 'byed pa'i cha la sogs pa'i bstan pa gsungs pa yin no/ /zhes bya ba smos te/ nges par 'byed pa'i cha dang mthun pa yang nye bar mtshon pa ste/dran pa nye bar gzhag pa la sogs pa yang nges par 'dris par slar byed pa'i phyir ro/ /de bas na 'chad par byed pa las/ nges 'byed yan lag dang mthong ba'i/ /lam dang bsgom pa'i lam dag la/ /yang dang yang du sems pa dang //'jal dang nges rtog bsgom pa'i lam/ /zhes bstan pa yang dran pa nye bar gzhag pa la sogs pa yang bsdus par rig par bya'o/ /de ltar bstan pas kyang skabs gsum ste/ slob pa'i skabs dang / bslab pa bstan par byed pa'i skabs dang / bstan par gyur pa 'bras bu'i skabs so//'o na skabs gcig kho na dang / gsum dang / drug tu yang bstan la don gyi dbang gis na skabs gnyis kyang yin par nges te/ 'di ltar rgyu'i skabs dang / 'bras bu'i skabs so/ /de ltar nges par bya nus bzhin du 'phags pa byams pa'i zhal snga nas ci'i phyir skabs brgyad la sogs pa nges par bstan ce na/don 'di yang 'og nas 'chad par 'gyur ro/ /de ltar na skabs kyi don phal cher 'dir bshad pa ni/ thams cad mkhyen pa nyid gsum gyis don brgyad bsdus zhes bstan pa'i skabs 'dir cig car kho nar bstan pa ste/gzung ba la tshegs med par bya ba'i phyir ro/ /'dir skabs ji snyed du bstan kyang 'jug par byed pa rnams kyis ni rgyu mtha' dag phyogs gcig tu shes par bya ba dang / de'i 'bras bu gang yin pa'ang shes par bya ba gnyis kho nar nges te/ don 'di'i tshul yang 'og nas mdor 'chad pas 'dir mi bsam ste/'on kyang skabs kyi don gyis blo rnam par 'khrugs par mi bya'i/ rim gyis 'brel pas yid dge bar gnas pa la ni bde ba thob par bya'o/ /rnam par thar pa cung zad tsam zhig gis lhag pa'i zhes bya ba ni/ rang sangs rgyas 'di dag ni snod kyi 'jig rten rnams 'jig pa dang chags pa'i dbang gis rtogs par sla ba dang / sems can gyi 'jig rten pa'i yang lus ni rab tu 'jig pas bdag med par rtogs pas na chos la bdag med pa'i phyogs gcig khong du chud pas rtogs pa lhag pa ste/de'i dbang du byas te/ gzung ba'i rtog pa nyams phyir dang / /'dzin pa ma spangs phyir dang ni/ /rten gyis bse ru lta bu'i lam/ /zab pa nyid du mngon par brjod/ /ces bstan to/ /'phags pa rnam par 'jigs su rung ba lung bstan pa'i mdo las rang sangs rgyas rnams kyi rtogs pa gang zhe na/'di ltar de dag gis ni chos kyi dbyings mtha' dang dbus med pa bdag med par rtogs so zhes gsungs pa yang / chos kyi dbyings dang mnyam pa'i gzung ba'i gzugs kyi phung po las bdag med par rtogs pa ste/ 'dzin pa'i phung po lhag ma bzhi la ni ma yin te/'khor ba rnams su ni rgyun rab tu rtag pas bdag med ces da dag gis ye shes mi 'jug pa'o/ /phung po lhag ma dang bcas pa zhes pa ni phung po nyid lhag ma ste/ 'jig rten dag na yang zad du nye ba'i dngos po tha ma la lhag ma zhes grags so//de dang bcas pa ni 'phags pa de dag gis de ma spangs pa'o/ /de nas gang gi tshe 'phags pa de dag gis phung po'i khur bor ba de'i tshe ni phung po'i lhag ma med pa ste mdo las bdag gi khur bor ba'o/ /zhes gsungs pa yang legs par bor ba yang 'di nyid do/ /glegs bam la la las ni lhag ma'i sgra mi smos so//ji skad du bstan pa'i mtshan nyid kyis mya ngan las 'das pa ni las dang nyon mongs pa'i 'bras bu'i me zhi bas na mya ngan las 'das pa ste/ bA pa tA pa zhes skad kyi byings las 'don pas so/ /'dir phyi rol gyi don du smra ba dang / shes bya nang gi nyid du 'dod pa dag gis ni slar srid pa'i sa bon med pas de dag ga la zhig skye ste/lus zhig tshor ba bsil bar gyur/ /'du shes 'gags shing 'du byed zhi/ /rnam par shes pa nub gyur pa/ /'di 'dra 'di ni sdug bsngal mtha'/ /zhes pa la sogs pa yang brjod do/ / de dgag pa ni 'phags pa lang kar gshegs pa dang / dpal phreng seng ge'i nga ro'i mdo la sogs pa las rgyas par bstan cing / rgyal ba skyed ma las kyang sngar bstan te/ dngos po rnams ni chos nyid kho nas kha cig skye zhing slar shin tu rgyun chad pa'i bye brag dag snang ste/ mar me la sogs pa'o/ /kha cig ni nam yang mi skye zhing de nyid kyis 'gag pa med pa'i ming tsam pa ste/ nam mkha'i me tog la sogs pa'o/ /kha cig ni skye ba la sogs pa dmigs pa gtan med par yang mi 'gyur ba ste/ 'gro ba'i sems kyi khyad par ro/ /de'i phyir ma brtags pa tsam gyis dga' bar byed cing brtags pa na chu shing gi snying po ltar med pa nyid kyi sems dang /de yongs su dag pa'i ye shes kyi sgyu ma tsam 'di ni nam yang med par mi 'gyur la/ de yang dmigs pa'i rkyen la sogs pa med par ni mi rung bas na de dag gis legs par ma smras pa nyid do//de bas na 'khor ba ji srid par 'gro ba'i don byed pa'i byang chub sems dpa' rnams zhes bya ba smos te/ kha cig log par lta ba kho nas sangs rgyas bcom ldan 'das rnams kyi ye shes kyang ming tsam du zad de/ bar chad med pa'i ting nge 'dzin gyi rjes la ye shes ni dngos su med cing de bzhin nyid rnam par dag pa tsam du gyur to zhes smra ba'ang 'dis bsal to//ji lta zhe na/ de bzhin nyid rnam par dag pa ces bya ba ni chos can ye shes rnam par dag pa'i dbang gis de dang tha mi dad cing de nyid kyang ma yin pa'i de bzhin nyid de dag go//zhes kun rdzob nye bar bzung ste/ brjod pa lta zhig na/ log pa'i lta ba'i mtshon gyis ye shes rab tu bcad pa khyed kyi de bzhin nyid de dag par gang gis gzhag /gal te chos can la ma brten pa'i de bzhin nyid yod par gyur na go ji ltar 'phags pa dgongs pa nges par 'grel pa las gal te don dam pa'i bden pa kun rdzob kyi bden pa las gzhan yin na/de'i tshe don dam pa chos rnams kyi spyi'i mtshan nyid du mi 'gyur zhing / don dam pa de mthong bas rnal 'byor pa rnams kyi nyon mongs pa spongs par yang mi 'gyur te zhes bya ba la sogs pa gsungs pa'i glags su yang nges par 'gyur ro//gzhan yang gal te de bzhin nyid dag pa ste 'gro ba rnams kyi de bzhin nyid rnam par ma dag pa dang tha dad na ni chos kyi dbyings cha shas gnyis su ji ltar mi 'gyur/ gal te tha mi dad na de'i tshe mngon par byang chub par gyur kyang 'gro ba phal pa las ji ltar de 'phags/gzhan yang / nyon mongs zad pa'i dge slong gis/ /'khor ba gal te rnam ldog na/ /rdzogs pa'i sangs rgyas rnams kyis kyang / /ci'i phyir de yi rtsom mi bshad/ /rtsom pa yod na nges par yang / /lta bar 'gyur ba yongs su 'dzin//zhes bstan pa'i glags kyang nges par gnas te/ de'i phyir bdag dang gzhan phung bar byed pa'i thabs su gyur pa lta ba ngan pa'i dgon pa chen po 'di lta bu ni mkhas pa de dag gis mnyan pa'i yul du yang mi 'os par spang ngo / /spyod pa'i gnyen por zhes bya ba ni 'dod chags la spyod pa la sogs pa'i rtsa ba'i spyod pa bzhi dang /re re'i yang phye bas brgyad khri bzhi stong rnams so/ /de dag gi gnyen por gyur pa ni thub pa chen po'i chos kyi 'khor lo ma lus pa ste chos ni bstan pa'i chos gtso bor byas pa'o/ /'khor lo ni gdul bya'i rgyud la 'pho bar snang bas na'am/tshogs kyi don gyi phyir 'khor lo ste sgra'i don ni de dag dang nye ba'i phyir ro/ /ma lus pa ni chos kyi phung po brgyad khri bzhi stong ste/ de la chos kyi phung po gcig gi tshad ji tsam zhe na/ de la tshig le'ur byas pa stong nyid do/ /tshigs su bcad pa re re la'ang yig 'bru sum cu rtsa gnyis yod do//de ltar na chos kyi phung po thams cad la ni tshigs su bcad pa bye ba phrag brgyad dang / yang 'bum phrag bzhi bcur 'gyur ro/ /'dir ni re zhig thun mong gi grangs su bgrang ba'o/ /theg pa bla na med pa'i dbang du byas te/dbang po'i glang po che rab brtan gyis bkur bar 'os pa'i snag tshas ni chos kyi phung po gcig 'dri bar nus so zhes gsungs te/ de ltar byas na mdo gang dag las 'phags pa lhas byin gyi glang po che lnga stong gis bkur bar bya ba'i glegs bam rnams kha ton du rjod par byed do zhes gsungs pa 'di yang rigs par 'gyur ro//chos kyi phung po de snyed yod pa nyid na ci'i phyir deng sang 'dzam bu'i gling na rab tu mi snang zhe na/ kha cig ni 'jig rten gyi khams gzhan dag na spyod cing gzhan yang phal cher klu rnams kyi gnas na spyod pa ste/ bstan pa rin chen mchog ltar bzang la 'phan med par//rnam par dag tshul gang yin klu mgo gdengs ka can/ /chen po rnams kyis gtsug gi rgyan bzhin gus mnos nas/ /sa yi gting na gnas pa'i rab rib sel bar mdzad/ /ces bstan pa'o/ /chos kyi phung po de dag kyang sde snod gsum nyid du rnam par gzhag ste/mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde dag ni 'phags pa nyan thos rnams kyi mdo sde'i sde snod du bsdus pa'o/ /gleng gzhi'i sde dang / rtogs pa brjod pa'i sde dang /de lta bu byung ba'i sde dang / skyes pa'i rabs dag 'khor dang bcas te ni 'dul ba'i sde snod du bsdus pa'o/ /shin tu rgyas pa dang / rmad du byung ba'i sde dag ni byang chub sems dpa'i mdo sde'i sde snod du rtogs pa'o/ /gtan la phab pa'i sde ni gnyi ga'i chos mngon pa'i sde snod du bsdus pa'o//sde snod de dag kyang sde snod gsum mam gnyis kyang yin te/ sde snod dag ni gsum mam gnyis kyang rung / /bsdus pa'i phyir ni rgyu ni dgur 'dod do/ /de ni bag chags rtogs dang zhi ba dang / /rab tu rtogs las rnam par grol bar byed//mdo dang chos mngon 'dul ba dag /mdor na don ni rnam bzhir 'dod/ /blo dang ldan pas de shes nas/ /rnam pa thams cad mkhyen pa thob/ /gnas rnams dang ni mtshan nyid dang / /chos don smos phyir mdo yin no/ /mngon du'i phyir dang yang yang dang / / zil gnon rtogs phyir mngon pa'i chos/ /ltung dang 'byung dang ldang ba dang / /nges par 'byung dang gang zag dang / /bcas pa dang ni rab dbye dang / /rnam par nges phyir 'dul ba nyid/ /ces bshad pas so/ /de las rgyal ba'i yum rje btsun 'bum ldan ma la sogs pa 'di dag ni theg pa chen po'i sde snod byang chub sems dpa' rnams kyi mdo shin tu rgyas pa'i sde snod du bsdus pa yin par shes par bya'o//yum 'di nyid la mchod pa dang / bstod pa la sogs pa byas pas ni gzhung gzhan la mchod pa bas ches bsod nams khyad par du 'phags shing 'di la ma gus pa yang de ltar rab tu mi zad de/ji skad du/ 'gro ba de gnas min la skrag pa gdung byed 'gyur/ /bsod nams ma yin phung chen bsags byas yun ring du/ /rigs med grogs ngan dge sngon ma bsags blo ma sbyangs/ /chos 'dis skrag 'gyur 'di ni don chen 'di las ltung //zhes gsungs la/ blo chung de yis thos nas 'di ni spong byed de/ /spangs nas skyabs med gyur pa de ni mnar med ltung / /zhes gsungs shing mtshams med kyi las byas pa las ches yum 'di la spong bar byed pa ma rungs so/ /zhes rgyal ba'i yum rgyas par bstan pa dag las gsal bar gsungs so//ma lus pa rnam pa thams cad du bskor ba mdzad pa zhes bya ba ni/ kha cig na re dang po ni ri dgas kyi nags su 'phags pa kauN+Di n+ya la sogs pa la bden pa bzhi'i chos kyi 'khor lo bskor te 'di ni dman pa'i chos kyi 'khor lo'o/ / de nas ni rgyal po'i khab tu bya rgod kyi phung po'i ri la snying po dang / mngon par rtogs pa'i don ston pa'i chos kyi 'khor lo bstan te/ de ni dgongs pas bshad pa'i 'khor lo gnyis pa yin pas na/ lha'i bu dag gis smras pa/ kye ma a la la 'dzam bu'i gling du chos kyi 'khor lo gnyis pa bskor ba mthong ngo zhes smras pa'i phyir ro//de'i 'og tu ri ma la ya la sogs par chos mngon pa gtan la phab pa'i sde snod mtshan nyid gsum rnam par phye bas nges pa'i don bstan pa'i chos kyi 'khor lo bskor te/ 'di ni chos kyi 'khor lo ma lus pa rnam pa thams cad du bskor ba'o zhes zer ro//de dag gis ni legs par ma smras te/ ji lta zhe na/ thub pa chen pos ni de ltar rim gyis chos bstan pa med de/ ji skad du 'phags pa de bzhin gshegs pa skye ba 'byung ba bstan pa las kyang / rigs kyi bu de bzhin gshegs pa rnams mngon par rdzogs par sangs rgyas nas/sangs rgyas shin tu rnam par sangs rgyas pa zhes bya ba'i ting nge 'dzin la snyoms par 'jug ste/ ting nge 'dzin sangs rgyas shin tu rnam par sangs rgyas pa la snyoms par zhugs ma thag tu sems can rnams ji snyed pa de snyed kyi sku kun tu gnas par 'gyur ro//sku ji snyed pa de snyed kyi gsung dang thugs dag kun tu gnas par 'gyur ro zhes gsungs la/ gzhan las kyang / kye ma rgyal sras khyod ltos shig /'dzam bu'i gling rnams thams cad na/ /bde gshegs 'di na bzhugs snyam byed//bdag cag rnams ni 'di snyam du/ /ri rab rtse la bde gshegs snyam/ /'jig rten khams rnams gzhan na yang / /sangs rgyas ngo mtshar rmad re che/ /zhes gsungs te/ rgya cher ni 'phags pa sum cu rtsa gsum pa'i mdo las shes par bya'o/ /gzhan yang lha'i bu rnams kyis chos kyi 'khor lo gnyis pa bsgrags pa nyid de'i dang po ni gang zhig yin/'phags pa kauN+Di n+ya la sogs pa la bshad pa'o zhe na/ rgyal ba skyed ma'i gzhung rnam pa gsum car las kyang gnyis pa zhes smos na/ de'i tshe gang zhig dang por bya/de'i phyir gnyis pa zhes bya ba ni/ lha'i bu de dag nyid kyis de'i sngar gang thos pa de tsam las gnyis par gzhag gi /dang po nges par bden pa bzhi'i chos kyi 'khor lo zhes bya ba 'di la lung dang rigs pa ci yang med do/ /gzhan yang chos kyi 'khor lo ni mthong ba'i lam mo//zhes bstan pa yang nges pa med pa kho na ste/ chos kyi 'khor lo kha cig ni tshogs kyi lam mo/ /kha cig ni sbyor ba'i lam mo/ /kha cig ni bar chad med pa'i lam gyi bar ro/ /de bzhin du 'khor lo gsum pa ni dgongs pa can ma yin la/ 'khor lo gnyis pa rgyal ba'i yum ni dgongs pa can no//zhes bya ba 'di ni log par brjod pa ste/ gang zhig rigs pas gnod par byar rung ba de ni nges pa'i don du gzhag cing / lung dang rigs pas legs par grub pa ni drang ba'i don du gzhag pa 'di ni rab tu 'khrugs pa'o/ /'on kyang don 'di ni dbu ma'i bstan bcos las gtan la phab par 'gyur bas 'dir mi bsam mo//de ltar na chos kyi 'khor lo ma lus pa rnam pa thams cad du bskor ba ni skad cig gcig kho na la bskor ba ste/ de la gdul bya rnams kyis dus yun ring thung dang gsung tha dad par thos pa la sogs par zad de/'phags pa dam pa'i chos pad ma dkar po zhes bya ba theg pa chen po'i mdo las kyang / sa rum nas 'thon pa'i byang chub sems dpa' rnams kyis bar gyi bskal pa nyi shu rtsa lngar bcom ldan 'das shAkya'i gtso bo la mchod pa byas mod kyi/ 'dzam bu gling pa la sogs pas ni phyi dro gcig yun du shes so zhes gsungs la/bcom ldan 'das 'di ni yongs su mya ngan las ma 'das te da ltar gzugs kyi skur bzhugs shing 'jig rten gyi khams 'di 'jig pa na yang zhing 'di rab tu dag par gnas la/ ma 'ongs pa'i bskal pa dpag tu med pa na yongs su mya ngan las 'da'o zhes gsungs te/de'i phyir chos kyi 'khor lo ma lus pa mtha' dag rnam pa thams cad du bskor ro zhes nges par gzung gi tshul 'di ltar bskor zhes dman pa'i 'du shes kyis ni nges par bya ba ga la nus te/grangs med pa la su zhig bgrang zhes pa la sogs pa sngar smas pa'o/ /mtshan nyid kyi bstan bcos dag la zhes bya ba la gzhung gang dag las dngos po rnams sra ba la sogs pa'i mtshan nyid du yod pa don dam par ston pa ni mtshan nyid kyi bstan bcos so/ / gang dag las don dam par mtshan nyid med par ston pa ni kun rdzob tu rang gi mtshan nyid tsam du gnas par ston kyang mtshan nyid brjod pa'i bstan bcos ma yin te/ kun rdzob ni dngos po ma yin par khas blangs pa'i don nges pa'i mtshan nyid ma yin pas so/ /rnam pa zhes bya ba ni kha dog dang dbyibs te/me lce zlum pa dang me'i kha dog smug pa la sogs pa'o/ /rtags zhes bya ba ni mtshon par byed pa'i mtshan ma ste me'i du ba la sogs pa'o/ /mtshan ma zhes bya ba ni rgyu ste me'i shing la sogs pa'o/ /chos re re'i yang de dag ma lus par skad cig gcig gis mkhyen pa'i phyir rnam pa thams cad mkhyen pa'o//mi rtag pa la sogs pa zhes pa ni bden pa bzhi la rnam pa brgyad dang / /de dag gi bden pa'i rnam pa brgyad do/ /theg pa thams cad kyis nges par 'byung ba zhes pa ni gdul bya'i dbang gis theg pa gsum car gyis yongs su mya ngan las 'da' ba ston pa ste/ji skad du/ dge slong dag nga lan stong du ni nyan thos kyi mya ngan las 'da' bas mya ngan las 'das so/ /lan stong du ni rang sangs rgyas kyi mya ngan las 'da' bas yongs su mya ngan las 'das so zhes gsungs la/ yang gsungs pa/ theg pa rlabs po ches ni skrag 'gyur zhing / /'di na sems can dman la mos rig nas/ /byang chub sems dpa' 'di dag nyan thos 'gyur/ /rang rgyal byang chub bar yang rab tu ston/ /zhes gsungs te/ rgyu mtshan des gtso bor byas te byang chub sems dpa'i sde snod las nyan thos dang rang sangs rgyas kyi lam bstan pa mdzad de de la 'dris pa tsam du bya ba'i phyir ro//de kho na nyid mngon sum du mi byed par rten pa zhes bya ba la de kho na nyid ni gang zag la bdag med pa'i mtha' zhi ba nyid de/ de mngon sum du mi byed pa ni bsgoms pas spang bar bya ba'i nyon mongs pa rnams ni mi spong ba'i phyir te/de ma spangs pas na mya ngan las mi 'da' ste/ de'i phyir slob dpon gyi zhal snga nas kyang / nyan thos kyi lam ni byang chub sems dpas yongs su shes par bya ba yin gyi mngon sum du bya ba ni ma yin pas bsgom pa'i lam ni ma bstan to//zhes ston par 'gyur ro/ /bag chags kyi mtshams sbyor ba zhes bya ba ni bag chags nyid mtshams sbyor ba yin te/ gang dag bag chags zad pa de dag ni yang srid par mtshams sbyor ba med pas so/ /yang na bag chags kyis mtshams sbyor ba ni bag chags kyis mtshams sbyor ba'o zhes gsum pa'i bsdu ba'o//de spangs pa can yin no zhes bya ba ni zad pa dang ldan pa ste/ bral ba'i 'bras bu ston pa'o/ /de lta na yang srid par mtshams sbyor ba ni bag chags kyi rgyu can yin la/ bcom ldan 'das 'di la de mi mnga' bas na rgyal po zas gtsang ma'i sras su gyur pa la sogs pa'i rgyu gang zhig yin zhe na/'di ni thub pa chen po'i bya ba sgrub pa'i ye shes la gdul bya rnams kyi kha dog dang dbyibs su brtags te/ 'di ni gzhon nu don thams cad grub pa'o zhes bya bar bzung bar zad kyi ci yang mtshams sbyor ba med do//de ltar na rgyal ba'i yum bar ma las/ rab 'byor nga'i lus 'di ni rnam pa thams cad mkhyen pa'i ye shes kyi gzhi ste zhes gsungs pas sku de nyid ye shes su ma bstan pa ci'i phyir zhe na/ byis pa rnams ni rang gi mngon par zhen pa rab tu bstan pas na 'di nyid ye shes so zhes brjod pas yid ches par rab tu dka' bas na gzhi'o zhes 'jig rten pa'i mthun par 'jug pa tsam ste/rang gi ngo bos ni ye shes nyid kha dog dang dbyibs su snang zhing ring bsrel la sogs par snang bas na/ 'phags pa dge ba'i rtsa ba yongs su 'dzin pa zhes bya ba theg pa chen po'i mdo las kyang /nga yis rigs rnams gzhag ma yin/ /skye ba'ang blangs pa ma yin zhing / /de yi kha dog phye ba'ang min/ /gzugs kyi sku las dman pa med/ /ces gsungs la/ slob dpon gyi zhal snga nas kyang / kun rdzob tu ye shes kho na longs spyod rdzogs pa'i sku la sogs par snang ba bskyed pa'i sgo nas don bya ba mdzad pa yin pas chos kyi sku yin no zhes 'chad par mdzad de/de'i phyir bcom ldan 'das 'di ni rtag tu ye shes kyi snang ba rab 'byam tshad med pa gcig kho na yin mod kyi/ ye shes gcig po de kho na la gdul bya'i don mdzad pa'i dbang gis sku dang ye shes du mar btags par zad do/ /de bas na gdul bya'i so sor 'dzin pas rgyal ba'i ngo bo nyid tha dad par ni mi dbye ba nyid do/ /gzhi zhes bya ba ni byis pa rnams la bdag dang bdag gir 'dzin pa'i gzhir gyur pa phung po la sogs pa yin la de bdag med par shes pa dang /spong ba la sogs par 'byed pas na gzhi ste/ lhan cig spyod pa'i ming lhan cig spyod pas thob pa'o/ /yang na lam thams cad kyi gzhir gyur pa ni gzhi ste/ dang por ni de la brten par bya ba'i phyir ro//de'i phyir 'phags pa sa'i snying po 'khor lo bcu pa zhes bya ba theg pa chen po'i mdo las kyang / byis pa dbang po zhen cing le lo can/ /theg pa gnyis la nan tan mi byed pa/ /theg pa chen po'i 'khor lo ldan mi 'gyur/ /de ni rgya chen theg chen snod ma yin//zhes gsungs so/ /de'i tshe ni gzhi'ang yin la/ ye shes kyang yin zhes gzhi mthun pa'i bsdu bar bstan to/ /de ltar phyag 'tshal ba bstan nas/ da ni dgos pa la sogs pa bsnyad pa'i don dgrol bar bya ste/ don la the tshom skyed pa nyid kyis zhes bya ba la/don ni rgyal ba'i yum mngon par rtogs pa'i rim pa bstan pa thams cad de 'dir brjod par bya ba'i don du gzung ngo / /de rnams la the tshom skyed pa nyid ni dgos pa la sogs pa ston pa'i tshigs su bcad pa gnyis dang por smos pa nyid yin te/ ji lta zhe na/dang por smos pa'i dbang gis rtog pa dang ldan pa dag 'di snyam du dgos pa la sogs pa yod pa nyid du dam bcas pa 'di dag kho na ltar yod dam/ ci ste ma yin pa ni bdag nyid kyi gzhung 'di mnyan pa la sogs pas shes par 'gyur gyi gzhan du ni ma yin no//gal te 'di la dang por ji skad smras pa'i dgos pa la sogs pa yod par lta na na kho bo yang 'di la gus pas gnas par bya'o zhes 'di nyan pa la sogs pa la 'jug ste/ de'i phyir dgos pa la sogs pa bar dang mthar ma bstan gyi/ dang por bstan pa kho nas don la the tshom skyed pa nyid yin la/de nyid kyis 'jug pa'i yan lag kyang yin no/ /de ltar na phyag 'tshal ba'i dang por yang ci'i phyir mi bstan zhe na/ las brtsams nas phyag 'tshal ba ni 'jig rten na tshul ma yin pa'i phyir dang / ji skad bstan pa'i tshul gyis na dang por yum gyi yon tan brjod pas ni rtog pa dang ldan pa rnams kyang dad par 'gyur la/dad par gyur nas dgos pa la sogs pa de'i yon tan la zhib tu yang dpyad pas na phyag 'tshal ba yang dgos pa la sogs pa ltar 'jug pa yan lag gi sngon du bya ba'i yan lag yin pas nyes pa med do//rang gi bstan bcos zhes bya ba ni rgyal ba'i yum mngon par rtogs pa'i rim pa ston pa thams cad kyi man ngag gi tshig le'ur byas pa 'di ste/ rtsa ba'i gzhung lta bur gyur pa'o/ /brjod par bya ba ni rgyal ba'i yum gang dag mngon par rtogs pa'i rim pa ston pa thams cad de/'og nyid nas rgyal ba'i yum rnam pa gsum car zhes smos pa ni nye bar mtshon pa'i don nyid do/ /dgos pa ni tshig le'ur byas pa 'di la brten nas rgyal ba'i yum de dag gi don legs par rtogs pa'o/ /dgos pa'i yang dgos pa ni ji ltar rtogs pa ltar bsgrubs pas sa rab tu dga' ba la sogs pa thob pa nas brtsams te/mi gnas pa'i mya ngan las 'das pa thob pa'i bar du'o/ /'grel pa kho na yod pa zhes bya ba ni tshig le'ur byas pa ni rjod par byed pa ste/ shes par byed pa nyid yin la/ rgyal ba'i yum rnams ni brjod par bya ba 'bras bu shes par bya ba yin te/de bas na rjod pa dang brjod par bya ba 'di dag ni rgyu dang 'bras bu shes bya dang / shes par byed pas ched du ma byas kyang shugs nyid kyis rang dbang med par 'brel pas na khong na yod pa ste/ des na 'brel pa ni thabs yin par yid ches par byed pa'o//de la/ rnam pa thams cad mkhyen nyid lam/ /ston pas 'di las bshad pa gang / /gzhan gyis myong ba ma yin te/ /zhes bya ba ni brjod par bya ste/ chos spyod bcu yi bdag nyid kyi/ /mdo don dran pa la gzhag nas/ /blo dang ldan pas rtogs 'gyur zhes//zhes bya ba rim pa gzhan du sbyar ba ni dgos pa'i dgos pa ston pa'o/ /bde blag tu ni rtogs 'gyur ba/ /rtsom pa yi ni dgos pa yin/ /zhes bya ba ni dgos pa ste/ /dgos pa'i sgra ni 'dir dgos pa dang de'i yang dgos pa gnyi ga la blta bar bya'o//'brel pa ni gang du yang tshig gis mi ston to/ /da ni slob dpon gyi zhal snga nas tshigs su bcad pa'i don dgrol ba'i phyir rnam pa thams cad mkhyen pa nyid ni zhes bya ba la sogs pa smos te/ rnam par bshad pa 'di las ni dang po brjod par bya ba ston to/ /de nas ni 'brel pa ston to//de nas ni dgos pa'i dgos pa ston to/ /de nas ni dgos pa ston to/ /de la ngag dang po ni bdag gis sngar bshad zin te skabs dang po nyid do/ /bcom ldan 'das zhes bya ba ni/ /bdud bcom 'jigs med skal ba bzang po dang / /srid par 'gro las 'das dang shes rab dang //'khrul dang bral zhing yon tan dpag med snod/ /yon tan 'di dag rab rgyas bcom ldan 'das/ /zhes ji skad du bshad pa'i tshul gyis bcom ldan 'das so/ /cho 'phrul rnam pa gsum gyis zhes bya ba ni rdzu 'phrul dang / kun brjod pa dang / rjes su bstan pa'i cho 'phrul gyis te/de yang dang po ni nam mkha' la 'gro ba la sogs pa'i rdzu 'phrul bstan pas pha rol zil gyis gnon cing / de nas ni gdul bya'i sems kyi rgyu ba lung bstan pas de rab tu dad par byed la/ de nas rjes su mthun pa'i gdams ngag sbyin pa rjes su bstan pa'i cho 'phrul gyis don dngos su bstan par mdzad pa ni/'gro ba mtha' dag la rjes su bstan par mdzad pa de nyid kyis zhes smos pa'o/ /rgyal ba'i yum rnam pa gsum char las brjod par bya ba nyid du bstan pa gang yin pa dang zhes bya ba ni 'dir tshig le'ur byas pa ni brgyud de brjod par bya ba 'am/don gyis brjod par bya ba yin la/ mdo rnams kyi ni dngos kyis brjod par bya ste sgra'i brjod bya yin no/ /tshig le'ur byas pa'i brjod par bya ba dngos te sgra'i brjod par bya ba ni rgyal ba'i yum gyi gzhung nyid yin te/ji lta zhe na/ tshig le'ur byas pas ni rgyal ba'i yum gyi gzhung shes par 'gyur la/ gzhung de dag shes pa las ni don sangs rgyas nyid kyi lam 'bras bu dang bcas pa shes par 'gyur bas so/ /de'i phyir 'dir gtsor ni don gyi brjod bya bstan te/ sgra'i brjod bya ni go sla bas so//rjod pa dang brjod par bya ba dag thabs dang thabs kyis bsgrub par bya ba'i tshul gyis 'brel par mdzad pa zhes bya ba ni sngar bstan pa kho nar zad do/ /phyi rol pa dang cig shos kyi 'dod chags dang bral ba la sogs pa chos thams cad bdag med par goms par ma byas pa rnams kyis ma myangs pa de zhes bya ba ni don gyis brjod par bya ba de'i che ba bstan pa de/sngar khyab pa dang dbang la sogs pa ma myong zhes bya ba la sogs pa'i lung gis bstan pa nyid de go sla'o/ /da ni dgos pa'i dgos pa ston te/ byang chub sems dpa' zhes bya ba ni byang chub kyi sems bskyed pa thams cad de/khyad par du ni rigs la gnas pa'i phyir mi ldog pa bcu gsum po rnams te/ de dag ni nges par 'gyur ba'i phyir ro/ /thos pa las byung ba la sogs pa shes pa'i rim gyis zhes bya ba ni shes rab gsum gyi rim gyis 'jug pa'o//de lta na rgyal ba'i yum 'bad pa chung ngus cig car rtogs pa dgag pa'o/ /rang dang gzhan gyi don phun sum tshogs par bsgrub pa ci la yang ma rig par chas pa dag kho nas zhes pa ni/ sngar byang chub sems dpa' zhes bya ba smos pa'i don nyid bstan pa'o/ /nyams su myong ba shin tu gsal ba zhes pa ni shes rab rnam pa gsum gyis yum gyi ming dang don sems la gsal por byas pa'o//de dag gis gzhag pa'i bag chags zhes pa ni yang dang yang goms pa'i dbang las sems de'i rnam par 'byung ba bstan pas lhun gyis grub pa yin gyi/til 'bru la sna ma'i me tog gi dris gos pa ltar ni mi bsam mo/ /de ltar goms pa'i dbang de'i mthu las byung ba'i sems las byung bar gdags pa 'dris pa'i dngos po ma brjed pa de nyid dran pa'i shes pa ste/ 'dir dran pa dang ldan pa'i shes pa ni dran pa'i shes pa'o//de'i phyir thams cad du sems nyid gcig pu'i mthu'i bye brag las sems dang sems las byung ba'i gnas skabs kyi dbang gis bzhag pa ni slob dpon chos skyong gi zhal snga nas 'di dag gi de'i gnas skabs tsam la bzhag gi dngos su ga la yod/ ces bshad pa'o//de ltar byang chub sems dpa' rang dang gzhan gyi don phun sum tshogs par bsgrub par ci la yang rag ma las par chas pa shes rab rnam pa gsum gyi rim gyis nyams su myong bas gsal por byas pa'i bag chags kyi ngo bo dran pa'i shes pa ring du yang ji ltar thos pa la sogs pa mi brjed pa'i ngang du gyur pa de la legs par bzhag nas zhes sbyar te/legs par bzhag pa ni 'dres pa'i dngos po rab tu ma brjed pas tshe rabs gzhan du yang rjes su 'brang bar gsal ba'i phyir ro/ /ci zhig dran pa'i shes pa la legs par bzhag nas she na/chos spyod bcu yi bdag nyid kyi/ /mdo don zhes smos pa bstan pa'i phyir shes rab kyi pha rol tu phyin pa'i mdo'i don ma lus pa zhes smos te/ mdo don zhes pa dang sbyar ro/ /mdo'i don de yang gleng gzhi la sogs pa'i gzhung ma lus pa'i don nam/ yang na snying po'i don tsam zhig dran pa'i shes pa la bzhag nas snyam pa la/gnyi ga'i gtso bo ma yin pa'i phyir mngon par rtogs pa brgyad kyi bdag nyid ces pa smos te/ 'di ni don gtso bor gyur pas na dran pa'i shes pa la bzhag par bya ba ste snying po'i don yang de'i nang du 'dus pa'i phyir ro//gleng gzhi la sogs pa gzhung ma lus pa ni dran pa'i shes pa la nges par bzhag pa yang med de/ lung gi chos ni rtogs pa'i chos yid la byed pa na gzings dang 'dra ba'i phyir ro/ /rnam par g.yeng ba'i ngo bos dman pa'i phyir ro/ /mngon par rtogs pa brgyad kyi bdag nyid de'i rang bzhin bsdus pa ni/chos spyod bcu'i bdag nyid ces smos pa pha rol tu phyin pa bcu yin pas na de bstan pa ni byang chub kyi sems dang sbyin pa la sogs pa bsgrub pa'i spyod pa zhes bya ba smos te/ byang chub kyi sems smos pa ni las dang po pa'i sa nas sangs rgyas kyi sa'i bar du rgyu dang 'bras bu'i ngo bos byang chub kyi sems dang nam yang mi 'bral bas na sbyin pa'i pha rol tu phyin pa la sogs bdag la yang de dang ldan par bstan pa'i phyir smos te/stong pa nyid dang snying rje'i snying po can gyi byang chub kyi sems des byin gyis ma brlabs par gyur na sbyin pa la sogs pa yang bsgrub pa'i spyod par mi 'gyur ba'i phyir de gtso bor smos so//de'i phyir byang chub kyi sems dang ldan pa'i zhes bya ba las bar gyi tshig mi mngon par byas pa'o/ /sbyin pa la sogs pa zhes pa ni/ sbyin dang tshul khrims bzod brtson 'grus//bsam gtan shes rab pha rol phyin/ /thabs stobs smon lam ye shes te/ /'di dag pha rol phyin bcur 'dod/ /ces bshad pa rnams so/ /de dag nyid bsgrub pa'i spyod pa ste/ theg pa chen po la spyod pa gsum ni/ dang po smon pa byang chub kyi sems ni 'jug pa'i spyod pa'o//de nas 'jug pa byang chub kyi sems pha rol tu phyin pa bcu ni bsgrub pa'i spyod pa ste sngar ji ltar smon pa bsgrub pa'am/ 'bras bu legs par bsgrubs pas so/ /de nas sangs rgyas kyis ni grub pa'i spyod pa ste/ chos kyi sku'i phrin las rnams so//kha cig ni 'dir chos spyod bcu'i bdag nyid ni 'phags pa byams pa nyid kyi zhal snga nas gzhan du/ yi ge 'dri mchod sbyin pa dang / /nyan dang klog dang len pa dang / /'chad dang kha ton byed pa dang / /de sems pa dang bsgom pa'o/ /zhes gsungs pa'o zhes 'chad pa ni mi 'thad de/de dag ni sbyor ba'i lam gyis bsgrub pa'i spyod pa tsam gtsor gyur pa'i phyir thams cad du mchog ma yin pa dang / slob dpon gyi zhal snga nas kyang 'grel par de dag gi zur tsam yang ma smos pa'i phyir ro/ /de bzhin du kha cig chos spyod bcu ni rang dang gzhan gyi don gyi las can dge ba bcu'o zhes 'dod pa yang mi 'thad de/slob dpon gyi zhal snga nas 'dir de zur gyis kyang ma bstan pas so/ /de ltar grub pa'i spyod pa de spyad pa'i 'bras bu ci zhe na/ chos kyi dbyings kun tu 'gro ba'i mtshan nyid sa rab tu dga' ba la sogs pa rtogs pa'i rim pas zhes pa la sogs pa smos te/chos ni gzugs la sogs pa ji snyed pa chos can du bsdu ba rnams te/ de rnams kyi dbyings ni rang bzhin no/ /ji ltar me'i rang bzhin tsha ba nyid de la me'i khams zhes brjod pa na/ me dang de'i khams tsha ba nyid ni cung zad kyang dbye bar yang mi nus la/thams cad nas thams cad du gcig par yang mi brjod de 'dzin pa tha dad pa'i phyir ro/ /de bzhin du chos rnams dang de'i dbyings kyang de ltar blta'o/ /don de nyid legs par mthong ba na chos thams cad mtha' yas pa ltar de'i dbyings kyang da dag las gzhan du mi dmigs pas na/kun tu 'gro bar rtog pa'i mtshan nyid ces smos so/ /mtshan nyid de'i mtshan gzhi gang la gdags she na/ sa rab tu dga' ba zhes bya ba smos te/ sa dang po la de ltar rtogs pa yin la/ mtshan nyid de dang ldan pas na rjes kyi ye shes la bdag nyid chos kyi dbyings mthong ba'o zhes dga' ba skye bas na de'i ming de skad ces bya ste/byang chub la ni nye ba dang / /sems can don grub mthong ba la/ /rab tu dga' ba skye 'gyur te/ /de'i phyir rab dga' zhes brjod do/ /zhes gsungs pa ni don gzhan gyi ming sbyar bar zad do//de ltar chos kyi dbyings rtogs na ci ste sangs rgyas nyid du ma gyur zhe na/ de bzhin gshegs pa la mchod pa'i las bskal pa gang gA'i klung gi bye ma snyed du bya ba la sogs pa'i bsod nams kyi tshogs ma rdzogs pa'i phyir ro/ /gzhan dag ni de dag gi chos kyi dbyings rtogs pa ni 'jig rten las 'das par bzhag pa'i rgyu mtshan du gyur pa tsam yin gyi/de yang dag pa ji lta ba bzhin du ni yang dag par rdzogs pa'i sangs rgyas kho na'i thun mong ma yin pa'i gzigs pa yin te/ de ltar byas na nga'i de bzhin gshegs pa'i snying po shin tu phra zhing blta dka' la zab pa yang sa bcu pa'i byang chub sems dpa' rnams kyis de lta bu ma mthong ba las mthong bar gyur to//zhes gsungs pa 'di yang legs par drangs par 'gyur ro zhes zer ro/ /sogs pa'i sgras ni sa gnyis pa dri ma med pa la sogs pa bsdu'o//de dag rtogs pa'i rim pas zhes bya ba ni sa de dag gi rim pa ni rang gis rtogs pa tsam gyis gzhag gi rnam pa gzhan du lha'i ris la sogs pa ltar mtho dman dag med pa'i phyir ro/ /rnam pa thams cad mkhyen pa nyid mngon sum du byed par 'gyur ba zhes bya ba dgos pa'i yang dgos pa zhes bya ba la/rnam pa thams cad mkhyen pa nyid ces bya ba ni skabs tha ma las ji skad du bstan pa dang rnam pa dang mtshan nyid dag las ji ltar bstan pa'i bdag nyid do/ /de mngon sum du byed par 'gyur ba ni skad cig ma gcig pa'i mngon par rdzogs par byang chub pa las ji skad du bstan pa'i skad cig ma bzhis so//des mngon sum du byas pa de nyid dgos pa'i dgos pa ste/ 'bras bu mthar phyin cing phul du byung ba de las 'ga' yang mi rnyed pa'i bdag nyid can no//da ni dgos pa de grub pa'i rgyur gyur pas sngon du 'gro ba'i tshig le'ur byas pa'i dgos pa bstan pa'i phyir/ gdul bya rnams kyis bde blag tu rtogs par 'gyur ba ni bstan bcos rtsom pa'i dgos pa yin no/ /zhes bya bar sbyar te man ngag bzung bde ba 'di/ las ni don rtogs par sla la/ de nyid kyis rgyal ba'i yum rnams kyi don bde blag tu 'dis rtogs par 'gyur bas na thabs sla ba'i dgos pa nyid yod do/ /rgyal ba'i yum gyi don gang zhen snyam pa la byang chub kyi sems dang sgrub pa la sogs pa'i mtshan nyid ces bya ba smos te/ byang chub kyi sems kyis ni spyod pa rnam pa gsum car bsdus la/ sgrub pa ni sgrub pa'i spyod pa nyi tshe gzung ba ste/ des na mtshan nyid 'di gnyis kyis ni mngon par rtogs pa'i snying po bsdus so/ /de dag nyid ni rtogs shing thob pa mngon par 'dod pa'i shes rab kyi pha rol tu phyin pa'i don gang yin pa de bstan pa yin la/de la yang ci'i phyir mngon par 'dod pa skyed ces rtog pa la ni/ sngar ji skad du bshad pa'i dgos pa'i yang dgos pa'i ched du de rtogs pa dang thob par 'dod ces sbyar te 'di ni don gyi go rims ltar bshad pa'o/ / de ltar bstan pa ni sngar/ dgos pa bsdus pa'i don bcas dang / /zhes brjod pa las dgos pa la sogs pa bstan pa ste/ da ni bsdus pa'i don bstan pa dgrol bar bzhed nas/ de ltar 'brel pa la sogs pa bsnyad nas gdul bya rnams kyis bde blag tu rtogs par bya ba'i phyir dang zhes bya ba la sogs pa smos te/mdor bsdus pa dang por bstan pas ni dkyus kyi sar bstan pa'i rta thogs pa med par rgyug par 'gyur ba ltar phyis don rgyas pa rnams mi 'khrugs par 'gyur te/ de bas na bde blag tu rtogs par bya ba'i phyir zhes smos so/ /bstan bcos don rnam par phye ba byas pa yang ma 'dzings pa nyid kyis bshad par sla ba zhes bya ba ni 'chad pa po rnams kyis kyang dang po bsdus pa'i don khong du chud na/skyes bu rta'i kha lo ba yang dkyus kyis sngar mthong bas sems stobs che bar 'gyur zhing rta tshar gcod pa nus par 'gyur ba lta bu'o//gzigs nas zhes bya ba ni tshig gnyi ga'i mthar sbyar ro/ /mdo dang zhes bya ba ni 'grel pa las/ de la tshig le'ur byas pa dang po gnyis kyis ni dngos po brgyad bsdus pa'i phyir mdor bsdus pa yin no zhes bshad pa'o/ /rgyas par zhes pa ni 'grel pa las tshig le'ur byas pa lhag ma bcu gsum gyis ni de dag nyid kyi don bsdus nas rgyas par bshad de zhes bstan to//lus rnam par gzhag pa ni spyir bstan pa rnam par gzhag pa ste/ ji srid du phye ba rnams ni yan lag dang nying lag dag lta bu yin pa'i phyir ro//legs par bshad pa yin no zhes bya ba ni thabs bzang po sbyar ba nyid do zhes bya ba'i tha tshig go/ /da ni bsdus pa'i don rgyas par rab tu bshad na zlos bu'i nyes pas gos kyis dogs pas de mi dgrol ba'i rgyu mtshan bstan par bsdus pa'i don gyi tshig le'ur byas pa rnams ni zhes bya ba la sogs pa smos so//da ni bsdus pa'i don dang tshig gi don gyi bar skabs 'di nyid du brjod par bya ba rab tu mang po zhig yod pa de dag bdag gis brjod par bya ste/ shes rab kyi pha rol tu phyin pa'i man ngag gi bstan bcos mngon par rtogs pa'i rgyan zhes bya ba tshig le'ur byas pa 'dis rgyal ba'i yum thams cad kyi don bsdus pa'o zhes bstan par bya ba yin pa las/ji ltar bsdus pa'i tshul la sogs pa nges par brjod dgos pas/ de brjod pa'i phyir 'di dran par bya ste/ re zhig mdo rnams kyi dbang du byas pa dang /mdo rnams dang tshig le'ur byas pa 'brel pa'i dbang du byas te/ gzhung rgyas par bstan pa ni yan lag gcig nyid do/ /don rnam par nges pa ni yan lag gnyis pa nyid do/ /de la yan lag dang po'i dbang du byas te/ mdo'i don ston pa'i skabs su don gcig ston pa las rgyas pa dang /'bring dang / mdor bsdus pa'i gzhung rnam pa lnga dang / rab tu bsdus pa 'phags pa shes rab kyi pha rol tu phyin pa sdud pa'i tshigs su bcad pa zhes bya ba dang bcas pa 'byung zhe na/ gdul bya khams dang mos pa sna tshogs pa rnams gnas pa'i dbang las/thub pa chen pos lung rnam pa du ma bstan te/ de'i dbang gis don gcig sgrub pa'i gzhung du ma byung ba 'di la don med pa'i nyes pa med do/ /de las deng sang ni rgyal ba'i yum bar ma'i nyung ngu gnyis 'di lta ste/ 'phags pa shes rab kyi pha rol tu phyin pa khri brgyad stong pa zhes bya ba dang /stong phrag bcu pa zhes bya ba yul shar phyogs na yongs su spyod cing / yul dbus na ni mdor bsdus pa'i gzhung stong phrag brgya pa spyod pas ston par byed do/ /'o na de dag gi khyad par ci zhe na/ 'di ni slob dpon gyi zhal snga nas/la la las don gzhan las tshig /gzhan las rnam grangs ming gis te/ /mkhas pa rnams kyis yum kun la'ang / /don bsdus de tsam shes par bya/ /de la bsdus sogs rab dbye ba'i/ /khyad par yod pa kho nar zad/ /de lta min na thams cad kyi//rim pa legs par bsdus ma yin/ /zhes 'chad par 'gyur ba ste/ la la las ni don zhes bya ba ni rgyal ba'i yum bsdus pa las ni don tsam du skabs kyi don ston gyi tshig gis rdzogs par ston mi nus so/ /gzhan las tshig ces pa ni yum bar ma las ni skabs kyi don gang yin pa tshig tsam du bstan par gyur kyang rnam grangs rgyas par ni ma yin no//gzhan las rnam grangs ming gis te/ /zhes bya ba ni rgyal ba skyed ma rgyas pa las ni don tha dad pa'i rnam grangs gzugs nas rnam pa thams cad mkhyen pa'i bar du yang dang yang du smos pas ston cing /ming gi gdags pa mi 'dra bas kyang don gcig nyid rgyas par ston te de bzhin nyid dang / yang dag pa'i mtha' dang / bsam gyis mi khyab pa'i dbyings la sogs pa mang du smos pas so/ /de nyid kyis na/ de la bsdus sogs rab dbye ba'i//khyad par yod pa kho nar zad/ /ces gsungs te/ rgyal ba'i yum rnams kyi khyad par ni de tsam du zad ces pa'i don to/ /kha cig ni rgyal ba'i yum rnams kyi khyad par ni/ de la bsdus sogs rab dbye ba'i/ /khyad par yod pa kho nar zad/ / ces bya bas bstan la/ khyad par du byas pa'i yum rnam pa gsum las mngon par rtogs pa'i don bsdu ba ni don tsam gyis bsdu ba dang tshig tsam gyi bsdu ba dang / rnam grangs dang ming tsam gyis bsdu ba ni/ la la las don gzhan las tshig /gzhan las rnam grangs ming gis te//zhes bya bas ston to zhes zer ro/ /de ltar khyad par du byas pa'i rgyal ba'i yum de dag las yang dang yang du bstan pas zlos bur gyur pa sbyor ba'i lam nyid lan bcu gsum du bstan pa la sogs pa 'di ji ltar 'thad/ rnam pa thams cad mkhyen pa'i skabs ni mngon par rtogs pa mtha' dag bsdus pa yin zhes bstan pas de'i skabs 'ba' zhig gis kyang cis na don yongs su rdzogs she na/zlos bu dang 'dra bar byung ba 'di ni zlos bu ma yin par sngar skabs kyi don nges par 'byed pa na yang don gyis bstan zin to// //gzhan yang gdul bya rgyal ba'i yum nyan par 'dod pa rnams kyang kha cig ni dang po nas tha ma'i bar du 'khod de 'phags pa rab 'byor la sogs pa'o/ /kha cig mgo smos pas go ba'am/ yongs su rdzogs par nyan pa'i skal ba med pas skabs de dang de thos nas 'khor gyi dkyil 'khor de nas dong ba ste/de nas lha'i bu de dag gis bcom ldan 'das la zhes bya ba nas/ rgyang mi ring ba zhig nas mi snang bar gyur to zhes slar song bar bstan pa lta bu'o/ /yang kha cig ni gzhung dang po nas ma thos kyi skabs de dang de dag yongs su rdzogs nas 'khor der 'dus pa ste/dper na rnam pa thams cad mkhyen pa nyid kyi skabs yongs su rdzogs pa'i tshe/ de nas stong gsum gyi stong chen po'i 'jig rten gyi khams 'di na rgyal po chen po bzhi'i ris ji snyed cig yod pa de dag thams cad kyang lha bye ba khrag khrig brgya stong phrag du ma dang lhan cig 'khor der 'dus par gyur to zhes bya ba la sogs pa skabs de dang der glo bur du 'dus pa rnams la bstan pas de dag la thugs brtse ba'i phyir yang sngar 'das pa'i don rnams tshig gzhan gyis bstan te/des gdul bar bya ba ma thos pa rnams kyi don du 'gyur bas na zlos bu ni med do/ /gzhan yang sbyor ba'i lam lta bu don gcig nyid la lan du mar bstan pa yang kha cig ni don gyi rang bzhin nyid ston pa ste/ skabs dang po las sbyor ba'i lam gyi dmigs pa dang rnam pa'i dbye ba bstan pa lta bu'o//kha cig ni don de las tha mi dad kyang tshig gzhan gyis bstan te/ skabs dang po de nyid du yang sems bskyed pa dang / rigs dang / go cha'i sgrub pa dag gis sbyor ba'i lam de bstan to/ /kha cig ni don gyi rnam grangs snga ma las tha dad pas de bstan te/lam shes pa'i skabs su nyan thos dang rang sangs rgyas kyi sbyor ba'i lam snga ma las don gzhan du gyur pa bstan pa dang / skabs bzhi pa dang lnga pa las sbyor ba'i lam gyi rtags la sogs pas don gzhan du gyur pa bstan pa lta bu'o/ /de bas na la la las don gzhan las tshig /gzhan las rnam grangs ming gis te/ /zhes bya ba'i tshigs su bcad pa'i don yang kha cig gis zlos bu lta bu spangs te don gcig tu bsgrub par 'chad pa yang yum gyi don bsdu ba'o zhes bshad pa yin la/ slob dpon phyogs kyi glang po'i zhal snga nas kyang /shes rab pha rol phyin la brten/ /mdor bsdus don ni 'di dag yin/ /slar yang don gzhan la brten nas/ /don de nyid ni 'das pa yin/ /zhes bshad cing / smra ba'i dam pa khyod kyi bka'/ /rnam grangs du ma nyid mchis shing / /zlos bu yang ni ma mchis la//sbyor ba'i lugs kyang rigs pa lags/ /zhes bstod pa byed pa las brjod pas na zlos bu'i nyes pa ni ga la zhig yin/ zlos bu'i skyon med du zin na yang 'dir skabs re re zhig gis byang chub sems dpa'i don rnams ston par nus pa glo bur du 'dus pa'i 'khor gyi dbang du byas pa ltar nges sam/'on te skabs ma lus pas byang chub sems dpa' rnams kyi don ston par 'gyur/ gzhan yang gzhung 'di dag las ni don mthun du zin kyang ming sbyor ba'i lam dang mthong ba'i lam la sogs pa mi gdags par rnam pa gzhan du ston pa'i dgos pa ni ci zhig 'di la gzigs/chos mngon pa la sogs pa'i mdo kha cig las bstan pa ni dang po mi sdug pa bsgom pa dang / dbugs rngub pa dang / 'byung ba bgrang ba'i zhi gnas la brten te/ dran pa nye bar gzhag pa la sogs pa'i byang chub kyi phyogs kyi chos lhag mthong gi bdag nyid bsgom mo zhes bstan na 'dir rim pa de ltar mdzad pa'i dgos pa yang ji lta bu zhig gzigs she na/skabs re res kyang byang chub sems dpa'i don ston par nus pa'i phyir glo bur du lhags pa'i 'khor gyi dbang du byas pa kho na ltar nges par brjod cing skabs ma lus par byang chub sems dpa'i don bsgrub par nus pa ni ci zhig smos su yod/gzhan yang sems bskyed pa la sogs pa dag re res kyang byang chub sems dpa'i rnams kyi don thams cad ston par 'gyur bas na/ slob dpon gyi zhal snga nas/de ltar na sems bskyed pa dang po dang tha ma'i las bstan pa'i go rims bstan pa 'dis lhag ma bar gyi tshig gi don rnams kyi go rims kyang khong du chud par bya ste/ tshig mangs su dogs nas bdag gis ma bris so zhes 'chad par 'gyur ba'i phyir ro/ /'dir don ni tshig gi zur tsam mam don gyi dbang yang rung ste/ngag re re la yang skabs brgyad car gyi don rdzogs par sbyar yang zlos bur ni mi 'gyur ro zhes dgos pa'o/ /de bas na nges par yang ngag re re la don mtha' dag rnam par gzhag par bya'o zhes lhag par ston pa yang med do//kha cig na re skabs dang pos skabs thams cad bsdus pa'i dbang las bya ba yongs su rdzogs par 'gyur ba ni mgo smos pas go ba'i dbang du byas pa'o/ /sngar bstan pa'i rjes su 'brangs te thams cad mkhyen pa nyid gsum gyis skabs thams cad bsdus pas don yongs su rdzogs par 'gyur ba ni dbang po bar ma'i dbang du byas pa'o//skabs brgyad du rnam par phye ba ni dbang po zhan pa rnams kyi dbang du byas pa ste/ skabs gsum pa dang / drug pa dang / brgyad du bstan pa ni yang dbang po'i bye brag ste gsum car la yang bsdus pa dang 'bring dang rgyas pa la dga' ba'i mos pa tha dad pa'i dbang tsam du bstan pa'o zhes zer ro//gzhan yang 'di las ming gzhan du gdags pa byas pa la dgos pa ci zhig gzigs zhes smras pa ni/ gal te 'o na de lta na gzhung gzhan du rgyal ba'i yum 'di dag las bstan pa ltar ci'i phyir mi bstan zhes 'dri na de la yang ji skad du smra bar byed/de bas na 'di ni don dang ming dang tshig rnams lugs gzhan kho na yin par shes par bya ste/ de bas na slob dpon gyi zhal snga nas mdor bsdus te rnam par dgrol ba tsam du brjod par 'dod pas ma spros te/de bas na 'di ltar 'di ni lugs gzhan kho na yin pas gang du yang theg pa gzhan la brten nas sun dbyung ba brjod par mi bya'o zhes 'chad par mdzad pa yang don 'di nyid thugs la bzhag nas gsung bar mdzad do/ /de bas na tshig le'ur byas pa rnam par bshad pa dang bcas pa las mthong ba'i lam la sogs pa zhar la gdags par mdzad pa ni gdul bya blo bul la rab tu ma sbyangs pa dag la yul gzhan gyi skad yul gzhan pa la nges pa'i tshig so so yang dag par rig pa'i mthus dngos po la brten nas bslab pa dang 'dra bar bstan gyi/sangs rgyas rnams la bkur sti byas/ /zhes bya ba la sogs pas snod du gyur pa'i phyir mi ldog pa rnams la ji skad du gdags pa mdzad pa kho nas don yongs su rdzogs par 'gyur ba kho nas 'di la ni log par tha snyad mdzad pa ci yang med kyi so so rang gi khong du ma chud par zad do//gzhan yang mi sdug pa bsgom pa la sogs pa 'jug pa'i rnam pa mi 'dra ba 'dir bstan pa yang 'jug pa po rnams ni khams sna tshogs dang / mos pa sna tshogs su rnam par gnas pa'i phyir gcig ji ltar 'jug pa de kho na ltar thams cad kyang 'jug par nges pa'o zhes ni cis bzhag par nus/de'i phyir mi sdug pa bsgom pa dang / dbugs rngub pa dang / 'byung ba dran pa dag ni chos mngon pa'i mdo la sogs par sbyor ba'i lam yongs su sbyong ba'i dang por bstan la/ 'dir ni sems bskyed pa'i skabs su sems bskyed pa gsum pa lhag pa'i bsam pas bsdus pa/thar pa'i cha dang mthun pa'i dge ba'i rtsa ba'i skabs su 'di lta ste/ tshogs kyi lam de yongs su sbyong ba'i mtha' la bstan cing / de bzhin du yang thams cad du gtogs pa dmigs pa'i khongs su gtogs par mdzad kyi gcig kho nar tshogs kyi lam gyi dang po 'ba' zhig tu nges pa med la/chos mngon pa'i mdo la sogs par ji skad du bstan pa ltar 'dir nges par bkag pa yang ci zhig yod de/ dmigs pa thams cad du gtogs pa yin pa'i phyir ro/ /de bzhin du gzhan la yang ci rigs su sbyar ro//gal te 'di ni shin tu rgyas pa'i sde'o zhes bstan pa ma yin nam/ de ltar na mdo gang dag las rab tu gsal bar bstan pa shin tu 'dus pa chos lngas sangs rgyas kyi sa bsdus te me long lta bu dang zhes bya ba la sogs pa bstan pa dang / byang chub sems dpa' rnam par dgod pa bcu bstan pa dang / bdud kyi las yang dag phul nyi shu la sogs pa bstan pa de dag 'dir ci'i phyir ma bstan zhe na/ gal te don de dag 'dir tshig tu ma smos pa ci'i phyir zhes 'dri na ni kho bos kyang slar 'dri ste de dag tu yang rgyal ba'i yum 'di'i tshig sems bskyed pa la sogs pa ci'i phyir smos pa ma mdzad/gal te don gyi dbang du byas te'o zhe na/ de'i tshe ni kha cig ni rgyus bsdus pa dang / kha cig ni 'bras bus bsdus pa dang / kha cig ni grogs kyis bsdus pa dang / kha cig ni rnam grangs kyis bsdus pa dang /kha cig ni ched du ma brtsal ba yang shugs kyis 'du ba'i phyir rtsod pa de'i gnas med la gzhung rnams phan tshun ltos pa dang bcas pas lcags sgrog gis 'ching ba lta bu yin pas na 'di las ma bstan pa rnams ni de dang de nyid la gzung bar dgongs te/ma bstan pas kyang nyes pa med la/ rnam pa gzhan yang gdul bya rnams khams dang mos pa sna tshogs pa'i phyir ro zhes sngar nan tan du smos par zad do/ /de ltar ji skad du bstan pa'i rim pas legs par smras pa ni dge mod kyi/ rnam par rtog pa gzhan nye bar gnas te/sbyor ba'i lam la sogs pa rnam pa re re yang lan du mar bstan pa de dag bar du rnam pa gzhan gyis yongs su ma bcad pa 'di mi bstan par 'di'i dgos pa ci zhe na/ 'di ni sngar skye bo ma thos pa rnams kyi phyir bar bar du yongs su bstan par zad ces bya ba dang /sngar 'jig rten pa'i lam nas 'jig rten las 'das pa'i lam gyi bar du rim gyis 'jug pa dang / de ltar zhugs te bsgom pa'i lam la ni sngar ji ltar zhugs pa kho na la rab tu zhen par rnal 'byor du byed do zhes bstan pa dang / skabs re re'am ngag re re la yang don thams cad rdzogs par bstan pas zhi gnas las mi nyams par bya ba'i phyir te/gzhung gang dag las zhi gnas kyi yon tan bstan pa'i dbang du byas te/ bstan pa'i chos thams cad bye brag med par ro gcig par lhag par mos te mnyam par 'jog cing phung po la sogs pa don gyi rnam pa tha dad pa'i 'du shes dang bral bas mdo la sogs pa'i chos kyi dga' ba la chos kyi dga' ba 'thob po zhes bstan la/'phags pa zla ba sgron ma'i mdo las kyang / phyogs bcu'i 'jig rten gyi khams su mdo rnams bstan kyang /mdo gcig gi rang bzhin gcig tu thams cad gnas par bstan pa yang don gyi dbang 'di nyid la dgongs par zad do/ /de'i phyir rim pa 'khrugs par bstan pa ni 'khrugs pa yang yin pas phyogs gcig tu bya la yang na ji ltar bstan pa ltar nyid nges par gzung gi 'di la go rims bzhin bstan pa 'di ni ci yang med do zhes shes par bya'o//da ni tshig le'ur byas pa dang 'brel pa'i gzhung gi don gzhan bstan par bya ste/ 'phags pa mi pham pa'i zhal snga nas tshig le'ur byas pa 'dis ci'i phyir gleng gzhi le'ur ma bsdus/de bzhin du rje btsun nyid kyis zhus pa'i le'u la sogs pa yang ma bsdus she na/ dang por gleng gzhi'i le'u ni rgyal ba'i yum 'di ji ltar byung bar gyur pa'i 'khor 'dus pa la sogs pa bstan pa yin pas rab tu rtogs par sla zhing / gdul bya rnams kyi rang rang gis rtogs par nus bzhin du yang bstan pa ni ji skad du bshad pa'i dgos pa la sogs pa dang mi ldan pas blo dang ldan pa dag 'bad pa'i gnas ma yin no//de'i 'og tu sems bskyed pa'i le'u la sogs pa'i le'u grangs lhag ma chos nyid 'gyur ba med pa'i mthar thug pa ni rab tu rtogs par dka' bas na thog mar bshad pa'i dgongs pas tshig le'ur byas pa dang sbyar ba bstan te/de nas byang chub sems dpa'i bslab pa rab tu dbye ba'i le'u ni mtshan nyid gsum gyi dbye bas ni don dam pa'i bden pa yongs su grub pa'i mtshan nyid snying po'i don theg pa gcig nyid dang rigs gcig nyid du bstan pa yin la/snying po'i don ni mdo sde zab mo du ma 'phags pa 'jam dpal gyi man ngag la sogs pa las kyang gsal por bstan la/ 'phags pa klu sgrub kyi zhal snga nas kyang dbu ma shes rab la sogs par gsal bar mdzad pas 'dir bstan mi dgos so zhes dang por bstan to//de'i 'og tu byang chub sems dpa' rtag par rab tu ngu ba'i le'u dang / 'phags pa chos 'phags kyi le'u dag ni slob ma dang dge ba'i bshes gnyen gyi tshul bstan pa ste/gdul bya ma 'ongs pa rnams la de ltar bslab pa'i ched du sngon byung ba bstan pa ste go bar sla'o/ /le'u tha ma ni gzhung nye bar bsdu ba'i tshul rgyas pa ste/ de'i phyir de dag tshig le'ur byas pa dang ma sbyar ro zhes shes par bya'o/ /de lta na gzhung ma lus pa skabs kyi don du mi bsdur mi 'thad pa ni ma yin gyi/mdo'i don rtogs dka' ba tsam zhig skabs kyi don gyis bsdus par zad do/ /de ni de lta na ji ltar sbyar ba'i skabs kyi don ston pa'i tshig rnams dang / tshig le'ur byas pa sbyar ba'i rim pa ji lta zhe na/'di ni rgyal ba'i yum bar ma'i dbang du byas te/ 'phags pa rnam par grol ba'i sdes sbyar ba yang dag par mdzad la/ slob dpon gyi zhal snga nas kyang mdor bsdus pa'i yum brgyad stong pa dang legs par sbyar zhing / sangs rgyas ye shes zhabs kyi zhal snga nas kyang /rab tu bsdus pa'i tshigs su bcad pa rnams dang tshig le'ur byas pa dang sbyar te/ de dag la brten te rgyal ba'i yum ma lus par sbyar bar nus pas na yang 'dir sbyar ba'i ngal ba ni mi bya'o/ /de ltar yang dag par sbyar ba'i gnas su kha cig ni man ngag gi tshig dang mdo'i tshig sbyar bar 'thad pa nyid du snang na/gang yang shA ri'i bu 'di la byang chub sems dpa' sems dpa' chen pos gnas pa med pa'i tshul du shes rab kyi pha rol tu phyin pa la gnas te sbyin pa dang gtong ba dang yongs su len pa dmigs su med pa'i phyir yongs su gtong ba med pa'i tshul gyis sbyin pa'i pha rol tu phyin pa yongs su rdzogs par bya'o zhes pa la sogs pa bsam pa ste/gser bzang po ltar byang chub kyi bar du yongs su mi 'gyur ba'o zhes pa la sogs pa 'di dag la gcig kho nar nges par byed nus pa ma yin pa dag rgyu mtshan gang gis man ngag gi tshig dang sbyar bar 'gyur/gzhan yang dro bar gyur pa'i gnas skabs su bud med du ni mi skye bar brjod pa la sogs pa mdo'i tshig gang dag man ngag gi gzhung gis ma bsdus pa rnams ni ji ltar brjod par bya/ yang mdo sde'i glegs bam kha cig las man ngag gi bstan bcos su smos pa rnams snang ba yang gang du sbyar zhe na/gang dang gang du man ngag gi tshig dang mdo'i tshig sbyar bar bya ba la nges par byed pa'i rgyu mtshan med pa ltar gnas pa ni 'ga' zhig tu zad de/ de dag tu yang sbyar ba'i rgyu mtshan ni gnyis te/kha cig sbyar bar rigs pa dag ma sbyar ba na de'i lhag ma ni de dang sbyar bar shugs nyid kyis bstan te/ shugs ni 'brel pa ste dngos su brjod pa la gtsor ma gyur pa'i phyir ro/ /gzhan yang yang dag par rdzogs pa'i sangs rgyas kyis de ltar sbyar ba'i lung bcom ldan 'das byams pa 'di la mnga'o zhes kyang shes par bya ste/'di ni rgyal tshab tu dbang bskur bas dam pa'i chos kyi mdzod gzhan gyis blta bar bya ba ma yin pa la pha'i lung gis spyod pa'i phyir ro/ /de'i phyir gang du rgyu mtshan med pa ltar snang ba yang / la la las don gzhan las tshig /gzhan las rnam grangs ming gis te/ /zhes bstan pa'i tshul gyis na thub pa chen pos don de dang de ston pa'i mtshan ma tsam gyis tshig rab tu bstan par nges par shes par bya ste/ 'jig rten na yang res 'ga' ni dngos po kha cig tshig dang ming gi rnam grangs dang /rgyu dang / 'bras bu dang / las la sogs pas zhib mor ston cing / kha cig tu ni dngos po la la brda tsam gyis ston cing des kyang de bstan par 'gyur ba bzhin no/ /de bas na yum rab tu bsdus pa la sogs pa'i tshig kha cig la nges pa kho nar rgyu mtshan mthus btsal bar ni mi bya'i thub pa chen po'i gsung gi phyag rgya don rgya chen po'i bya ba la nye bar gnas pa tsam du shes par bya'o//mdo'i tshig gang dag man ngag tu ma bsdus pa dro bar gyur pa'i gnas skabs su bud med du mi skye bar mdo las bstan pa la sogs pa kha cig ni zlas bsdus pas rang gi skabs der gtogs par shes par 'gyur ro//kha cig ni gtso bos yan lag bsdus pa ste rgyal po gshegs par brjod pa lta bu'o/ /kha cig ni skabs brgyad kyi gzhung gi khongs su bstan pa yang go sla bas na ched du bsdus pa med de/dge slong rab tu mang po lung bstan pa la sogs pa ste/ de ltar rang gi blo dri ma med pas ci rigs su rjes su dpag go/ /tshig le'ur byas par smos pa las kha cig mdo'i glegs bam la la las mi snang ba ni/ gzhung rab tu rgyas pa 'di dag ni 'bri ba la sogs pa dka' bas 'grub par 'gyur ba dang /lnga brgya tha ma la 'gro ba rnams ni blo'i stobs rab tu chung ba'i phyir lung gi tshig rab tu nyams par zad kyi/ 'di la log par bstan pa'i dri ma ni mi bsam ste/ bcom ldan 'das byams pas shes rab kyi pha rol tu phyin pa gtan la phab pa'i phyir ro//de ltar de dag ni gzhung rnam pa gnyis kyi tshul brjod pa mdor bsdus pa'o/ /da ni yan lag gnyis pa'i don mdor bsdus pa mngon par brjod par bya ste/ de yang re zhig snying po'i don bsgom pa don dam pa'i bden pa gtsor byas pa dang / mngon par rtogs pa'i don yid la bya ba kun rdzob kyi bden pa'i dbang du byas pa'o/ /de la snying po'i don bsgom pa'i dbang du byas te/ slob dpon gyi zhal snga nas rtse mo'i mngon par rtogs pa'i skabs su de la skye ba dang 'jig pas stong pa'i phyir/ bdag med do snyam du bsgoms pas bdag tu mngon par zhen pa yongs su bor la des dben pa'i phung po la sogs pa rten cing 'brel bar 'byung ba skye ba dang 'jig pa'i chos can la yang dag par dmigs te/sngon po dang de'i blo dag lhan cig dmigs par nges pa'i phyir 'di ni sems tsam kho na yin gyi phyi rol gyi don med do zhes yid la byed cing /'dzin pa'i rnam pa can gyi sems la mngon par zhen pa yongs su ma bor bas phyi rol gyi don du mngon par zhen pa spangs te/ gzung ba med na 'dzin pa med do snyam du nges par bsam zhing / 'dzin pa'i rnam pa'i mtshan nyid rnam par rig pa tsam de yang bsal te/gnyis su med pa'i ye shes de 'ba' zhig yang dag par yod pa'i ngo bo yin no snyam du nges par byas nas/ de yang rten cing 'brel par 'byung ba yin pa'i phyir sgyu ma bzhin du ngo bo nyid med pa ste/ yang dag par na gcig tu dngos po dang dngos po med pa la sogs par brtags pa'i ngo bo dang bral ba yin no snyam du bsgoms te/bsgom pa'i stobs grub pa na kha cig la nor bu dang dngul la sogs pa'i mchog shes pa bzhin du 'khrul pa'i mtshan ma mtha' dag spangs pa/ sgyu ma lta bu'i bdag nyid du snang ba'i blo rnam par mi rtog pa so so rang gis rig par bya ba ci zhig ltar yang dag par skyes na rnal 'byor pas shes bya'i sgrib pa yang dag par spong ngo //de lta ma yin te dus thams cad du nam mkha' rdzas med pa tsam gyi ngo bo 'dzin pa bzhin du bskyed du med pa dang spang du med pa'i rang gi ngo bo 'dzin pa'i phyir skad cig ma'i chos shes pa tsam gyi ngo bo dang shes bya'i mtshan nyid rnams gal te don dam par yod pa zhig tu gyur na de'i tshe gnyen po bsgoms pas nam mkha' bzhin du de dag la cung zad kyang mi byed do//de'i phyir gzhan dag gi dngos por mngon par zhen pa'i phyin ci log mi ldog pas bcom ldan 'das kyis shes bya'i sgrib pa rnam pa thams cad du spangs pa gang yin pa dang /chos rnams kyang yod par khas len pa gang yin pa de ni phan tshun 'gal ba'i don khas len pas kho bos ya mtshan du brtsis so zhes bya ba yin no//zhes log par rtog pa'i phyogs smad pa dang bcas par brjod pa 'di la brten te bsgom pa'am/ yang na slob dpon byang chub sems dpa' ka ma la shA la'i zhal snga nas rnam par sbyar ba/ shes rab kyi pha rol tu phyin pa bsgom pa'i man ngag mdor bsdus pa las ji skad du bstan pa'i man ngag la brten te bsgom par bya'o//snying po'i don dang mngon par rtogs pa'i don gnyi ga dag la yid la byas pa'i mthar slob dpon gyi zhal snga nas sbyar ba'i rgyal ba'i yum 'di'i bstod pa rnam par mi rtog par bstod pa zhes bya ba yid btud pas gus par brjod par bya'o//gang gi tshe mnyam par ma gzhag pa de'i tshe mngon par rtogs pa ma lus pa bsdus par gyur pa'i rim pa rab tu gsal ba'i shes pa gnyid dang rmugs pa la sogs pa bsal zhing / yid nang du bsdus pas rim pa bzhin du rnam par bsams te/de nas skyon bzhi bcu rtsa drug la sogs pa ni rnam par spang bar go cha bgo bar bya'o/ /yon tan rnams yid la dran pas dbugs dbyung bar bya'o/ /rnam pa dang mtshan nyid la sogs pa rnams ni ma 'dres par shes par bya'o//de nas dub pa dang bral ba na slar yang spong ba'i 'du byed brgyad kyis bsam gtan gyi skyon rnam pa lnga spangs la snying po'i don bsgom par bya ste/ de ltar yang dag par zhugs pa'i rigs kyi bu dge ba'i bshes gnyen nam yang mi 'dor ba de ni ring po mi thogs par tshogs kyi lam la sogs pa sbyangs te bden pa mthong nas chos kyi rgyal po gcig pu'i go 'phang yang thob par 'gyur ro//de ltar yang dag par brtson pa'i rigs kyi bu 'am rigs kyi bu mo des/ 'jig rten rgyang pan pa'i gtsug lag la 'dod chags dang bral bar 'gyur zhing yid 'gyur ba dang /sems rnam par dag par mi 'gyur ba'i gzhung la klog pa la sogs pa spangs te nyin gcig bzhin du shes rab kyi pha rol tu phyin pa'i glegs bam yi ge rab tu gsal ba ci nus su klog cing / lha dang klu la sogs pa la chos kyi sbyin pa rgyas par bya'o//rang gi cho ga dang 'dul ba dang bya ba'i nges pa gang yin pa rnams las kyang mi 'da' bar bsrung bar bya'o/ /da ni mngon par rtogs pa'i don yid la bya ba brjod par bya ste/ byang chub sems dpa' yid la spro bar bya ba dang / zhes bya ba la yang ma rmongs par bya ba'i phyir snying po'i don sgom par byed pa btang ba na yang 'du 'dzi dang bral ba'i gnas su skyil mo krung drang por bcas te 'dug pa'am yang ji ltar bde bas kyang rung ste/stan bde zhing 'jam pa la nye bar 'dug la chos kyi phung po ji snyed pa ni rgyal ba'i yum 'dir snying po bsdus pa'o zhes bsams te/de nas rgyal ba'i yum yid la bya ba ni lam dang 'bras bu gnyis su rnam par phye ste'o/ /de la dang por lam yid la bya ba yin te de yang tshogs dang / sbyor ba dang / mthong ba'i lam dang / bsgom pa'i lam rnams gcig nas phye ste rtogs par yid la bya'o//de la dang po tshogs kyi lam gyi dbang du byas te de ni ming tha dad pa'i don gcig rnam par dbye'o/ /ming tha dad pa'i don gyi dbang du byas te/ de ni tshogs kyi lam dang / las dang po pa'i sa dang / dad pa'i sa zhes bsgrags pa'o/ / rnam par dbye ba'i dbang du byas te/ de ni phal pa dang khyad par can gyis rnam pa gnyis so/ /phal pa nye bar gzung ste de phal par gzhag pa'i rgyu mtshan nyid dang / ngo bo nyid bstan par byang chub kyi phyogs dang mthun pa dang rab tu sbyar ba dang / rnam pa'i dbang du ni de nyid dngos po la yongs su rtog pa'i lam dang /rtsol ba'i lam du bsdus pa las dbye ba dang / sems bskyed pa'i dbye ba las ni 'dun pa dang / bsam par brjod pa dang / gdams ngag las ni sgrub pa dang / dkon mchog gsum dang ma zhen pa dang / yongs su mi ngal ba dang /lam yongs su 'dzin pa dag bden pa'i phyogs tsam par brjod pa dang / dmigs pa dang ched du bya ba rnams ril gyis sbyar ba dang / mtshan nyid la ma lus pa shes par bya ba dang / chos kyi sku'i phrin las las 'gro ba rab tu zhi ba dang bsdu ba'i dngos po bzhi dang /blang ba dang dor bar bya ba rnams rtogs pa dang / dngos por 'dzin pa la cung zad grol bas tshad med pa bzhi sgrub pa dag dang de'i rtags te/ de ltar na de'i ngo bo nyid dang / rnam pa dang / mtshan nyid dang / sems bskyed pa dang / gdams ngag dang / dmigs pa dang / ched du bya ba dang / thub pa chen po'i phrin las dang / yang dag par sbyar ba dang / rtags dag ste rnam pa dgus yid la bya'o/ /de la rtags kyi dbang du byas te de ni mdo de dang de las rnam pa du ma bstan la/ 'phags pa klu sgrub kyi zhal snga nas kyang / so so'i skye bo nyid na 'ang stong nyid thos/ /nang gi dga' ba yang dang yang du 'byung / /dga' las byung ba'i mchi mas mig ni brlan/ /lus kyi spu rnams ldang ba'ang 'byung bar 'gyur/ /zhes bya ba la sogs pa gsungs pa'o//phrin las dang sbyar ba ni bdag cag lam yang dag pa la zhugs shing log pa'i lam du ma zhugs pa ni rje btsun sangs rgyas kyi mthu'o/ /zhes shes pas ston pa la drin du gzo bas bka' bzhin du byed pa la 'jug pa'i yan lag tu 'gyur ba ste/ byang chub tu sems bskyed pa la sogs pa sangs rgyas kyi byin gyi rlabs so zhes pa ni/lung gi dang por bstan cing lan du mchod pa'i tshul yang sngar de nyid du bstan to/ /don 'di las bsams te slob dpon zhi ba 'tsho'i zhal snga nas kyang / de phyir log par bstan pa yi/ / grub mthar 'che ba'i blo can la/ /de lugs rjes 'jug skye bo rnams/ /snying rje nyid ni rab tu skye/ /blo nor ldan pas lugs gzhan la/ /ji ltar snying po med mthong ba/ /de ltar de dag skyob pa la/ /gus pa shin tu skye bar 'gyur/ /zhes bshad do/ /tshogs kyi lam khyad par can gyi dbang du byas te/yang ming tha dad pa'i don dang / ngo bo bstan pa byang chub kyi phyogs kyi chos las rdzu 'phrul gyi rkang pa bzhi'i bdag nyid dang / de nyid dang rnam pa'i dbang du byas te/ ting nge 'dzin yongs su sbyong ba'i lam las dbye ba dang / sems bskyed pa las ni lhag pa'i bsam pa dang /gdams ngag dang / dmigs pa dang / ched du bya ba las snga ma lta bu dang / mtshan nyid dag kyang ma lus par shes par bya ba dang / skabs bzhi pa las rang gi ngo bo ji skad du bstan pas legs par bshad pa dang / rnam par dbye ba dang /rtags dang / thub pa'i dbang po'i byin gyi brlabs dang sbyar ba dag gis bstan te/ de la ming tha dad pa'i don gyi dbang du byas te ni tshogs kyi lam khyad par can dang / thar pa'i cha dang mthun pa'i dge ba'i rtsa ba zhes grags so/ /khyad par can du gzhag pa'i rgyu mtshan ni 'di ni ma nges pa'i phyir mi ldog pa zhes bya ba'i tshul gyis so//rnam par dbye ba ni gnas skabs su rtogs pa dang / mos pa las gyur pa dang / lhag par 'dod pa las gyur pa dang / 'thob pa las gyur pa ste rnam pa bzhi'o/ /rtags kyi dbang du byas te ni tshe dang lus dang /rdzu 'phrul dang / byin gyi brlabs la dbang ba ste 'bras bu'i rtags so/ /rang bzhin gyis dbang du byas te ni thams cad la mngon par zhen pa med pa zhes bya'o/ /thub pa'i dbang po'i byin gyi brlabs kyi dbang du byas te/ 'khor gsum rnam par dag pas rab tu phye ba'i pha rol tu phyin pa drug po dag la goms par byed pa ste/de ltar na thar pa'i cha dang mthun pa'i dge ba'i rtsa ba yang bstan pa'i tshul rnam pa bcu gnyis kyis shes par bya'o/ /de bzhin du sbyar te sbyor ba'i lam dang mthong ba'i lam dang / bsgom pa'i lam tha mal pa dang / de nyid kyi khyad par gyi lam dang / de nyid sangs rgyas kyi sa'i bar du gyur pa dag dang / yang dang po gzhung rnam par dbye ba dang bcas pa'i man ngag gi lugs dge ba'i bshes gnyen mnyes par byas pas thos par 'gyur ba ni bdag gis 'dir bri bar mi 'thad pas na/byang chub sems dpa' rnams kyis rang gi tshogs yongs su rdzogs par bya ba'i phyir dge ba'i bshes gnyen mgu bar gyis la snying po blang bar byos shig /de ltar na 'phags pa mi 'khrugs pa'i sngon gyi dam bcas pa bstan pa la sogs pa'i mdo la sogs pa dang /sems can rnam par dbye ba med par chos kyi sbyin pa bya bar bstan pa la sogs pa dang 'gal bar 'gyur ba ma yin nam/ der ni dge ba'i bshes gnyen mnyes par bya ba la sogs pa'i yan lag ma bshad do zhe na/ dge ba'i bshes gnyen gyis sems rnam par dag pa ston pa ni de ltar 'thad par 'gyur te/'phags pa 'jig rten las 'das pa'i le'u'i mdo la sogs par zang zing dang 'brel bar chos ston pa ni bdud kyi las yang dag phul lo zhes gsungs pas so/ /nyan pa'i byang chub sems dpa'i dbang du byas te ni byang chub sems dpa' rtag par rab tu ngu bas/dge ba'i bshes gnyen byang chub sems dpa' chos kyi 'phags pa mnyes par bya ba'i phyir rang gi sha dang khrag dang rkang yang yongs su btang ba'i rjes su 'brang bar bya'o/ / de bas na 'dir chos nyan pa dang / chos smra ba dag gi tshul cung zad cig brjod par bya ste/ byang chub sems dpa' chos nyan par byed pas chos bcu'i bdag nyid dang ldan par bya ste/ de dag ni ji skad du gsungs pa/ kye rgyal ba'i sras bcu po 'di dag ni byang chub sems dpa'i chos yongs su tshol ba ste/bcu gang zhe na/ 'di ltar g.yo dang sgyu med pas bsam pa thag par chos yongs su tshol ba dang / brtson 'grus lhod pa med par sran 'dzug pas brtson 'grus kyis chos yongs su tshol ba dang / lus dang srog la mi lta bar chos yongs su tshol ba dang /rnyed stobs dang bkur sti dang grags pa'i phyir ma yin gyi/ 'gro ba thams cad kyi nyon mongs pa spang ba'i phyir chos yongs su tshol ba dang / bdag 'ba' zhig la phan pa'i phyir ma yin gyi/ bdag dang gzhan dang 'gro ba thams cad la phan pa'i phyir chos yongs su tshol ba dang /chos kyi mdangs kyis ras chod bya ba'i phyir ma yin gyi/ shes rab la 'jug pa'i phyir chos yongs su tshol ba dang / gob lob la dga' ba'i phyir ma yin gyi rab tu brten par bya ba'i phyir chos yongs su tshol ba dang /byang chub kyi sems ma btang bas sems can rnams la snying brtse'i phyir chos yongs su tshol ba dang / yid gnyis dang bral ba'i phyir sems can thams cad kyi the tshom bcad pa'i don du chos yongs su tshol ba dang / rlom sems med cing 'dod pa med pa'i phyir/ sangs rgyas kyi chos yongs su rdzogs par bya bar chos yongs su tshol ba dang zhes bya ba rnams so/ /de de ltar yongs su chos tshol ba na dge ba'i bshes gnyen chos smra ba la sems bskyed pa bcus nye bar gnas par bya ste/ de dag ni ji skad du gsungs pa/ kye rgyal ba'i sras byang chub sems dpa' gang gis bla na med pa yang dag par rdzogs pa'i byang chub kyi sems bskyed pa des kyang thams cad mkhyen pa'i ye shes mngon par rdzogs par 'tshang rgya ba'i phyir dge ba'i bshes gnyen rnams la rim gro dang bkur sti dang bsnyen bkur bya'o//de dge ba'i bshes gnyen rnams la rim gro dang bkur sti dang bsnyen bkur byed pa'i tshe/dge ba'i bshes gnyen rnams la sems bskyed pa bcu po 'di dag bskyed par bya ste/ bcu gang zhe na/ 'di ltar rim gro bya ba'i sems dang / dgyes par bya ba'i sems dang / ji skad bsgo ba bzhin du nan tan bya ba'i sems dang /thugs mi 'byung ba'i sems dang / rnam par spyo ba dang yongs su 'khor ba la sogs pa la ji snyam yang mi byed pa'i sems dang / gcig tu nges pa'i sems dang / dge ba'i rtsa ba thams cad la rgyud kyi tshul gcig tu gyur pa'i sems dang /smon lam gcig pa'i sems dang / ston pa'i sems dang / spyod pa mtshungs par yongs su rdzogs par bya ba'i sems te/ kye rgyal ba'i sras bcu po 'di dag ni nyan pa dge ba'i bshes gnyen rnams la sems bskyed pa rnams so/ / de sems bskyed pa bcu po 'di dag bskyed pa'i tshe yongs su dag pa bcu rab tu thob par 'gyur te zhes pa la sogs pa'o/ /de'i phyir rgyal ba bskyed ma las/ chos smra ba dang nyan pa 'gal bar gyur pas bdud kyi las su 'gyur ba srog gi bar chad du 'gyur ba'i phyogs la sogs par 'gro ba'i dbang du byas pa'i tshe yang slob mas dge ba'i bshes gnyen gyi bka' ni mi 'gom gyi rang gi srog la ni 'gom par bya ste/ji ltar bram ze rgyal ba'i drod kyi skye mched kyis 'phags pa nor bzangs me'i g.yang sa chen por mchong bar bya ba'i phyir bsgo ba'i gtam rgyud la yang sbyar bar bya'o//yang chos nyan pa des thun mong du bya ba'i chos bcu bzhi la gnas par bya ste/ de dag ni ji skad du 'phags pa don rgyas pa'i mdo las/ tshe dang ldan pa dag chos nyan par 'dod pas rnam pa bcu bzhis chos mnyan par bya ste/'di lta ste/ dus su mnyan pa dang / gus par mnyan pa dang / ma rangs pa med par mnyan pa dang / bsgo ba bzhin du mnyan pa dang / klan ka mi tshol ba dang / chos la gus par bya ba dang / chos la mi brnyas pa dang / chos smra ba'i gang zag la mi brnyas pa dang /bdag la mi brnyas pa dang / rtse gcig pa'i sems dang / kun shes par bya ba'i sems dang / rna blags te mnyan pa dang / sems bsdus te mnyan pa dang / sems thams cad kyis bsams te chos mnyan par bya'o zhes gsungs so//de ltar chos legs par mnyan pa zhig yin nam ci ste ma yin zhe na/ dge ba'i bshes gnyen gyis ring du lta bas brtags te/ gal te yang dag par tshul phun sum tshogs pa lta na rgyal ba'i yum 'di'i snying po sbyin par bya'i/ dang po nyid du ni gzugs brnyan gyi yon tan ston srid pa'i phyir ro//de la dgongs te/ 'jig rten 'di ni legs par ma bsdams pa/ /phal cher legs bsdams rtags kyi rgyu byed pas/ /legs par ma brtags bar du mi dag gi /mdog gzugs lan 'ga' mthong bas yid mi rton/ / ra gan kha bsgyur lta bu mi 'tsham zhing / /lcags phye gser gyis g.yogs pa ji lta bar/ /khong pa rab gdug phyi rol 'phags tshul gyis/ /'jig rten 'di na 'khor dang bcas pa rgyu/ /zhes gsungs la/ slob dpon gyi zhal snga nas kyang 'og nas 'chad pa las/ byang chub sems dpa' dus yun ring mo zhig nas dge ba'i bshes gnyen yang dag par mgu bar byas pa'i man ngag phyin ci ma log pa dang ldan pa zhes ston par 'gyur ro/ /rgyu mtshan de nyid tshad mar mdzad pa dang / slob ma'i tshogs yongs su rdzogs par bya ba'i yan lag tu 'gyur ba la gzigs te/rje btsun bzang po'i zhal snga nas bdag gis dge ba'i bshes gnyen la lo bcu bdun du bsnyen bkur byas pa yongs su rdzogs nas rgyal ba skyed ma'i snying po rab tu bsdus pa'i man ngag rmi lam gyi chos su bstan pa ste/ rmi lam gyi gnas skabs su bstan pa yang ngo mtshar du byin gyi brlabs dang ldan pas yid ches par bya ba dang /rje btsun gyis gsungs pa'i brtul zhugs ma rdzogs pas dam bcas pa la brten pa'i mthu bstan pa'i phyir ro/ /de ltar chos nyan pa po'i tshul mdor bstan nas/ da ni chos smra bar byed pa'i 'jug pa brjod de/byang chub sems dpa' rnams kyis dang por chos smra ba ni snying rje chen po bskyed cing slob dpon gyis dpe mkhyud med par byas te chos sbyin par bya'o/ /don 'di gnyis gtso bor bstan pa'i phyir 'phags pa 'jam dpal rnam par 'phrul pa'i mdo las kyang /chos ston kyang chos nyan pa rnams la snying rje chen po mi bskyed pa yang bdud kyi las so zhes pa dang / yang mang du thos kyang gzhan gyis shes kyis dogs te chos la slob dpon gyis dpe mkhyud byed par yang bdud kyi las so zhes gsungs so//gzhan yang snying rje chen po'i rgyu mtshan las zang zing dang ma 'brel bar chos bstan par bya ste/ sngar ji skad du bstan pa'i bdud kyi las su gyur pa spang ba'i phyir dang / 'phags pa dgongs pa nges par 'grel pa'i mdo las kyang / 'dod phyir su dag dam chos ston byed pa//de dag 'dod pa btang ba phyir len te/ /myos pa de dag thar med rin chen chos/ /thob par gyur kyang sprang por rgyu bar byed/ /ces gsungs la/ 'phags pa dam pa'i chos pad ma dkar po'i mdo las kyang / 'khor la cung zad tsam yang bslang mi bya//zhes gsungs shing / rgyal ba skyed ma nyid las kyang / tha na legs so zhes bya ba yang mi 'dod de zhes gsungs pa'i rjes su 'jug go/ /gzhan yang 'phags pa byams pa'i zhal snga nas/ brtan pa rnams ni srog dang longs spyod tshegs chen rnyed cing snying po med pa dag /rab dga'i yid kyis sems can sdug bsngal rnams la sbyin rnams rgya chen rtag gtong na/ /chos yangs skye dgu rnams la rnam pa kun tu phan byed tshegs chen rnyed min zhing / /shin tu btang yang zad med 'phel 'gyur ba lta lan cig ma yin smos ci dgos//zhes gsungs la/ yang 'phags pa byams pas zhus pa zhes bya ba'i mdo las kyang gsungs pa/ byams pa sus stong gsum gyi stong chen po'i 'jig rten gyi khams gang gA'i klung gi bye ma snyed rin po che sna bdun gyis yongs su bkang ste/de bzhin gshegs pa dgra bcom pa yang dag par rdzogs pa'i sangs rgyas rnams la 'bul ba phul ba bas/ gang gis snying rje bas tshigs su bcad pa gcig gzhan gyi rgyud la bzhag na/ byams pa bsod nams kyi phung po 'di la bsod nams kyi phung po snga ma des brgya'i char yang nye bar mi 'gro/stong gi cha dang / 'bum gyi cha dang / bye ba'i cha dang / bye ba khrag khrig 'bum gyi cha dang / grangs dang / cha dang / bgrang ba dang / dpe dang / rgyur yang mi bzod do zhes pa dang / gang gis gang gA'i bye snyed 'jig rten khams//de dag rin chen byur bur bkang byas te/ /dga' ba'i sems kyis rgyal la phul ba bas/ /gang gis tshigs bcad gcig cig sems can byin/ /rin chen sbyin pa shin tu rgya che des/ /snying rje skyes nas tshigs bcad sbyin pa la/ /gang gA'i cha dang grangs su mi phod na//lan gnyis lan gsum sems la ga la zhig /ces so/ /de bzhin du rgyal ba skyed ma las kyang / byang chub sems dpa' bdag nyid kyis mnyan pa dang bsams pa la sogs pa yang dag pas ni/ ches gzhan la byin pa la sogs pa bsod nams dang ldan par rgyas par gsungs so//gzhan yang rnam par bshad pa'i rigs pa las ji skad du bshad pa'i 'jug pa'i bya ba rnams dang 'brel bar yang bya'o/ /'di ni rgyal ba'i yum smra ba po dang / nyan pa po rnams la bdud kyi las dang bral ba'i thabs mdor bstan pa nyid do/ /de ltar bsdus pa'i don gyi skabs su brjod par bya ba rnams kyis rgyal ba'i yum rnams kyi don ma lus par bstan pa la 'jug par byas nas/da ni yan lag gi don rnams las rtogs par dka' ba 'ga' zhig brjod par bya mod kyi/ gang gis sngar bshad pa'i rjes su 'brangs te/dge ba'i bshes gnyen gyis nye bar bstan pa rnyed na ni/ de la thams cad dka' ba med par blos rtogs par nus la/ gang dag gis de ma rnyed pa rnams kyis ni dka' bas gnas kyang dus yun ring mos kyang yum 'di'i don rim par 'brel bar 'gyur ba rab tu dka' ste/sngon yang dag par sbyangs pa dang / rje btsun 'phags pa 'jam dpal la sogs pa lha'i khyad par dag kho nas byin gyi brlabs pa dag ni ma gtogs so/ /de ltar bsdus pa'i don kun bstan nas/ byang chub sems dpa' byang chub rjes su thob par 'dod pas 'bras bu yin pa'i phyir rnam pa thams cad mkhyen pa nyid thob par bya dgos pas/dang po rnam pa thams cad mkhyen pa nyid sdud pa'i tshig le'ur byas pas rnam par bshad pa'i sgo nas bshad par bzhed de zhes bya ba dang /rnam pa thams cad mkhyen pa nyid rtogs pa ni lam shes pa nyid yongs su shes pa med na med pas lam shes pa nyid ces gsungs te/ de nas yang gzhi thams cad legs par yongs su shes pa med par lam legs par yongs su shes pa med pas thams cad shes pa nyid ces gsungs te/de'i 'og tu yang thams cad mkhyen pa nyid gsum yongs su shes pa ni dbang du bya ba'i phyir/ yang rnam pa thams cad dang lam dang gzhi shes pa bsdu ba'i sgo nas thams cad mkhyen pa nyid gsum sgom par byed pas rnam pa kun mngon par rdzogs par rtogs par gsungs te/de'i rjes la ni rnam pa thams cad mngon par rdzogs par rtogs pa las rab kyi mthar phyin pa'i rtogs pa 'byung ngo zhes go sla bar bya ba'i phyir/ rtags la sogs pa bsnyad pa sngon du 'gro ba'i rtse mo'i mngon par rtogs pa gsungs te/de nas yang rtse mo'i mngon par rtogs pa thob pa so so ba dang bsdus pa nyid du rtogs pa'i don rnams go rims bzhin du blags nas/ brtan por bya ba'i phyir rnam par sgom par byed pas mthar gyis pa'i mngon par rtogs pa gsungs te/de'i 'og tu ni mthar gyis pa'i mngon par rtogs pa rnam par bsgom pa ni de dag nyid shin tu goms par byas pa'i phyir skad cig gcig gis bsgoms pas skad cig ma gcig pa'i mngon par rdzogs par byang chub pa gsungs te/ de ltar rgyu thams cad bstan nas/de nas skad cig ma gcig pa'i mngon par rdzogs par byang chub pa rnam par bsgom pa'i skad cig ma gnyis pa la chos kyi sku mngon par byang chub pa gsungs te zhes go rims nges par mdzad pa'i rgyu mtshan rim gyis smos pa rnams cig car bdag gis bkod pa ni tshegs chung zhing dran pa la 'dzin dka' ba med pa'i phyir ro//gal te mdo de dang de dag las ni le'u grangs rab tu mang pos bstan pa mdzad pa ma yin nam/ ji ltar na rje btsun gyi zhal snga nas skabs kyi don de snyed du mdzad/ skabs kyi don de yang gcig gi bar du ni bsdu ba bstan na/gal te dgu la sogs par ci'i phyir mi mdzad ce na/ mdo de dang der le'u grangs de snyed du mdzad pa ni gdul bya rab tu dman pa rnams le'u re re zhig kyang bri ba dang / klog pa la sogs pas rim gyis 'jug par rung ba nyid kyis ston pa ste/gzhan las tha na tshigs su bcad pa gcig tsam yang 'dzin par byed na zhes pa la sogs pa bstan pa bzhin no/ /byang chub sems dpa' mthu dang ldan pa rnams kyi dbang du byas te ni yongs su rdzogs par bzung bar gsungs la/ rgyal ba skyed ma tshang bar rnyed pa dang zhes yon tan gyi grangs su yang bgrang bar mdzad pa'i phyir ro//de bas na tshig le'ur byas par ni rje btsun gyi zhal snga nas ni mngon par rtogs pa'i don rnams la gdul bya rnams mi rmongs par bya ba'i phyir skabs brgyad la sogs par bstan te/ dgu la sogs par bsdu ba la ni don med de/ rgyas pa'i dus na ni nyung bar byed pa nyid bsngags shing / bsdus pa dbye ba'i tshe yang rnam par rab tu mang po bsngags pa'i phyir dang / skabs dgu la sogs par phye na ji ltar brgyad du bstan pa las ci zhig yon tan thob par 'gyur/de bas na don med pa'i phyir skabs kyi don dgu la sogs par ma mdzad par nges so/ /sems bskyed pa zhes bya ba la/ 'di kha cig ni sems bskyed pa dngos gtsor ston pa ste 'dun pa la sogs pa'o/ /kha cig ni sems bskyed pa 'phel bar byed pa'i grogs la der gdags te sbyin pa la sogs pa'o//kha cig ni sems bskyed pa'i 'bras bu la der gdags te bgrod pa gcig pa'i lam la sogs pa'o/ /dmigs pa zhes bya ba ni gang la 'dod par bya ba ste don du gnyer bar bya ba yang dag par rdzogs pa'i byang chub nyid do//dmigs par bya ba ni bsgrub par bya ba'o zhes ji ltar bstan pa lta bu'o/ /rang gi ngo bo zhes pa ni 'dod pa zhes pas bstan te 'og nas 'chad par byed pa'o/ /ci'i phyir 'dod par byed ce na/ gzhan don byed phyir zhes pas bstan te/ de ltar na byang chub sems dpa' sems can rnams la phan par 'dod pa'i sems dang ldan pas byang chub kyi sems dang ldan pas na byang chub sems dpa'i ming yang 'thob pa'o//de ltar na de ni sems bskyed pa'o zhes bstan to/ /smon pa zhes pa ni smon pa tsam te tshogs bsags pas sems bskyed pa'i cho gas blang ba yang ma byas pa'o//'jug pa zhes pa ni dge ba'i bshes gnyen mnyes par byas te yang dag par blangs pa las byung ba'i sems bskyed pa nas brtsams te/ bar chad med pa'i lam gyi bar du gtogs pa'i sgrub pa'i spyod pa'o//don 'di ni slob dpon zhi ba lha'i zhal snga nas kyang / byang chub sems de mdor bsdu na/ /rnam pa gnyis su shes bya ste/ /byang chub smon pa'i sems dang ni/ /'jug pa byang chub nyid yin no/ /'gro bar 'dod dang 'gro ba yi/ /bye brag ji ltar bstan pa ltar//de bzhin mkhas pas 'di gnyis kyi/ /bye brag rim bzhin shes par bya/ /zhes bshad do/ /slob dpon dpal sangs rgyas ye shes zhabs kyi zhal snga nas ni/ so so'i skye bo'i sa'i sems can thams cad ni smon pa byang chub kyi sems nyid du brjod la/sa rab tu dga' ba nas brtsams te ni ye shes kyi khyad par chos kyi dbyings ji lta ba bzhin la 'jug pa byang chub kyi sems so zhes bstan to/ /yang kha cig na re/ grogs stobs rgyu stobs rtsa ba'i stobs/ /thos stobs dge ba goms pa las//mi brtan pa dang brtan 'byung ba/ /gzhan gyis bstan pa'i sems bskyed bshad/ /ces pa dang / rdzogs pa'i sangs rgyas rab bsten byas/ /bsod nams ye shes tshogs rab bsags/ /chos la mi rtog ye shes ni/ /skyes phyir de ni dam par 'dod/ / ces gsungs pa'i dbang las phyir mi ldog pa'i sar gnas pa dang / de ma thob pa las smon pa dang 'jug par bzhag ste/ chos la mi rtog pa dang po thob pa ni dro bar gyur pa ste/ zab mo'i don la som nyi med/ /ces pa dang / rmi lam na yang chos rnams kun/ / rmi lam lta bur lta la sogs/ /zhes pa la sogs pa gsungs pas so zhes zer ro/ /da ni 'di snyam du 'dun pa dang / snying rje zhes bya ba sems las byung ba gnyis dang mtshungs par ldan pa'i sems sems can dang yang dag par rdzogs pa'i byang chub kyi yul la dmigs te skyes pa ni sems bskyed pa yin na/ci'i phyir tshig le'ur byas pa las sems las byung ba 'dun pa 'ba' zhig la sems bskyed pa'i sgrar bstan zhes bsams nas dri ba dang lan rnams 'byung ba ni yang dag par rdzogs pa'i byang chub 'dod pa nyid ni zhes bya ba la sogs pa smos te ni zhes bya ba ni gang gi phyir zhes bya'o//lhag ma ni go sla'o/ /yang 'dod pa'i bdag nyid gang yin pa de ni gang yin zhes bya bar sbyar te/ de'i lan bstan pa ni 'dod pa de yang sgyu ma ltar 'dod pa nyid yin gyi/ dngos po nyid du zhen pas 'dod pa ni ma yin te/ ji ltar sgyu ma'i mkhan po zhig /sprul pa thar pa bya phyir brtson/ /de ni snga nas de shes pas/ /de la dregs pa cung zad med/ /de bzhin srid gsum sgyu 'dra bar/ /rdzogs pa'i byang chub mkhas pas shes/ /'gro ba'i ched du go bgos te/ /'gro ba de ltar snga nas shes//zhes gsungs pa'i tshul gyis ni/ /'gro ba'i phan pa 'byung ba'i rgyu yang dag par rdzogs pa'i byang chub 'dod pa yang sgyu ma'i dpe rnam pa brgyad kyis bstan pa ltar 'dod par ston pa ni/ sbyin pa la sogs pa thams cad la sbyin par bya ba dang / sbyin pa po dang /len pa po la sogs pa mi dmigs pas bsgrub par bya'o zhes bya bar shes par bya ba'i phyir dang zhes bstan pa'o/ /de bzhin du yang gang gi don du sems bskyed pa yang dag par rdzogs pa'i byang chub de ni gang yin zhes dris pa'i lan ni/ sems can thams cad skal ba ji lta ba bzhin du mya ngan las 'das pa la dgod par 'dod pa zhes bya ba ste/'di ni byed pa'i rang bzhin gyi las kyis byed pa por bstan par 'gyur bas yang dag par rdzogs pa'i byang chub ni nyan thos la sogs pa dang thun mong ma yin pa'i las can du bstan to//gzhan gyi don ni gang yin zhe na zhes dris pa slar brjod pa ni/ ser sna can la sogs pa sbyin pa la sogs pa la dgod par 'dod pas zhes pa'i tshig snga ma de'i 'bras bur yang sbyar bas ni gzhan gyi don bstan te 'di ni don bsdus pa'o/ /da ni gzhung brjod de/yang dag par rdzogs pa'i byang chub dang gzhan gyi don dag gang yin zhe na zhes dris pa'i lan du/ rje btsun gyi zhal snga nas nyid kyi bstan pa spang zhing mdo las shes par bya ba'i phyir/ ji ltar dris pa de dang de ni bla ma'i lung gis mdo las ji skad bstan pa bzhin du shes par bya zhing mdo las kyang /de dag bsdus pa dang rgyas pa'i sgo nas brjod par shes par bya'o zhes tshig rnam par sbyar ro/ /da ni slob dpon gyi zhal snga nas bsdus pa dang rgyas pa'i sgo zhes bya ba dgrol bar rgyal ba'i yum shes rab kyi pha rol tu phyin pa rnam pa gsum char las zhes smos te/dris pa de dag bstan to zhes bya ba tshig gi lhag ma'o/ /gzhan dag ni mdo re re la yang de dag bsdus pa dang rgyas pa'i sgo nas bstan to zhes zer na/ de ni mdo rab tu bsdus pa dang rgyas pa las de ltar ga la zhig bstan/ mi 'gal ba zhes bya ba ni 'di rje btsun gyi zhal snga nas rang bzor ni ma bstan gyi/mdo las kyang de dang de dag de kho na skad gsungs so zhes tshig zur gyis bstan pa ste/ 'di ni tshig le'ur byas pa'i ril la sbyar ro/ /gal te de dang de dag mdo las gsungs na/ ji skad du gsungs pa 'dir smos dgos so zhes 'dri ba srid pa la ni de'i lan du/gtsug lag gi gzhung skabs kyi don ston pa lhur len pa ni thams cad las kyang gsungs mod kyi tshig mangs su dogs nas khungs nyid du ma bris so zhes bya ba smos te/ de'i phyir kho bos de dag brjod par mi nus pa ni ma yin mod kyi gzhung mangs na gdul bya phal cher don bsdus pa'i blo rnam par 'khrugs par 'gyur bas na mi brjod de/de'i phyir 'og nas 'chad pa las kyang / go bar sla phyir ngag dang ni/ /tshig sogs sbyor ba ma byas par/ /zhes ston te/ ji tsam du gzugs rgyas par bstan cing tshig bsdus pa ni myur du go ba skye ba'i rgyu yin pa'i phyir ro//de la rgyal ba'i yum bar ma'i dbang du byas te ni/ shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par 'tshang rgya bar 'dod pas shes rab kyi pha rol tu phyin pa la brtson par bya'o//zhes bya ba'i tshig 'dis yang dag par rdzogs pa'i byang chub ste mdor bstan pa'o/ /shA ri'i bu 'di la byang chub sems dpa' sems dpa' chen po gnas pa med pa'i tshul gyis shes rab kyi pha rol tu phyin pa la gnas te sbyin pa dang /sbyin par bya ba dang / len pa po mi dmigs pa'i phyir yongs su btang ba med pa'i tshul gyis sbyin pa'i pha rol tu phyin pa yongs su rdzogs par bya'o/ /de bzhin du chos thams cad dmigs su med pa'i phyir shes rab kyi pha rol tu phyin pa la bslab par bya'o zhes pa'i bar du gang gsungs pas de rgyas par bstan pa yin no//yang gzhan gyi don gang yin pa de mdor bstan pa ni byang chub sems dpa' sems dpa' chen po phyogs bcu re re zhing gang gA'i klung gi bye ma snyed kyi 'jig rten gyi khams re re na sems can gang dag yod pa de dag thams cad ces bya ba'i mthar phung po lhag ma med pa'i mya ngan las 'das pa'i dbyings su yongs su mya ngan las 'da' bar 'dod pas shes rab kyi pha rol tu phyin pa la bslab par bya'o zhes bya ba'i bar gyis so//yang sems can pha rol tu phyin pa drug gi mi mthun pa'i phyogs la gnas pa rnams de dang bral bar 'dod pas kyang shes rab kyi pha rol tu phyin pa 'di nyid la bslab par bya'o zhes bya ba'i tshig gis ni/gzhan gyi don de rgyas par bstan par shes par bya'o/ /de ltar de dag la sogs pa mdo gtsor byas pa gnas skabs kha cig tu bstan pa yang nye bar mtshon pa ste/rnam pa thams cad mngon par rdzogs par rtogs pa'i rtse mo'i skabs su bdag nyid kyang srog gcod pa spong / gzhan yang srog gcod pa spong ba la yang dag par bskul/ sems can gzhan gang dag srog gcod pa spong ba yang dag par blangs pa de dag gi yang legs pa brjod cing mthun pas dga' bar byed do zhes bya ba la sogs pa yang tshig zur gnyis su sbyar bas 'dir yang drangs te/de bzhin du mdo'i khungs rnams ni ji ltar bde bar sbyar ba rim pa du ma tshig re re la brjod kyang nyes pa med de/de'i mthu ni gcig pu zhig tu ston par yongs su chad pa ma yin pas so/ /kha cig mdo'i don khungs su drangs pa'i tshul gyis bsdus pa dang rgyas pa'i sgo nas brjod ces bya ba ni gzhan gyi don 'ba' zhig la sbyor bar byed de/ /mdo'i don tshig khungs su sbyar ba'i skabs 'dir slob ma la bshad pa dang /mngon par brtson pa'i tshogs la bshad pa'i bye brag dag brjod par bya ba yin mod kyi/ de dag ni rab tu grags pa nyid yin pas 'dir bstan pa la rag las pa ma yin pa'i phyir gzhag go/ /de ltar sems bskyed pa dmigs pa dang rang gi ngo bo dang bcas pa brjod nas/da ni de'i rab tu dbye ba nyi shu rtsa gnyis par skabs kyi tshigs su bcad pa dag gis bshad de zhes bya ba la sogs pa ni go sla bas rnam par mi dbye'o/ /dga' ldan gyi gnas na bzhugs pa la sogs pa kun tu ston par rung ba nyid ces bya ba la/sems bskyed pa tha ma gsum ni sangs rgyas kyis kun tu 'od kyi bdag nyid do zhes 'chad pa ma yin nam/ dga' ldan gyi gnas na bzhugs pa ni bsgom pa'i lam gyi mtha' sa bcu pa'i byang chub sems dpa' nyid yin na/ 'di ji ltar sangs rgyas kyi sa'i yon tan du sbyar bar bya/'chad par 'gyur ba chos kyi sku'i phrin las bstan pa las kyang sa bcu pa'i dbang du byas te/ yang de nyid la skye ba gcig gis thogs pa'i ngo bo yang dag par rdzogs pa'i byang chub tu so sor nges pa dang zhes ston to/ /skye ba gcig gis thogs pa ni byang chub sems dpa' dga' ldan na bzhugs pa kho na'o zhe na/'di ni bden mod kyi 'on kyang dga' ldan na bzhugs pa'i tshul ston pa'i byang chub sems dpa'i gzugs ni gnyis te/ 'jig rten gyi khams kha cig na ni sangs rgyas bcom ldan 'das rnams kyi sprul pa'i sku nyid gdul bya'i dbang gis dga' ldan na bzhugs pa'i byang chub sems dpar snang bas rim gyis yang byang chub par ston te/don 'di nyid nye bar gzigs nas 'phags pa lang kar gshegs pa las/ yang dag sangs rgyas der sangs rgyas/ /sprul pa rnams ni 'dir sangs rgya//zhes bya ba gsungs te/ mdo der gzugs kyi khams 'og min la ni der zhes gsungs la/ 'dod pa'i khams la ni 'dir zhes gsungs te/ byis pa rnams ni rang gi rtog pa tsam gyis nye ba dang ring bar 'dogs pa'i dbang du byas pa'i tha snyad do//'jig rten gyi khams kha cig tu ni byang chub sems dpa' sa bcu'i dbang phyug dag dga' ldan na bzhugs shing rim gyis 'dzam bu'i gling 'dir mngon par rdzogs par sangs rgyas pa yang dag pa 'am sprul pa ston te/ don de'i dbang du mdzad nas ni 'phags pa 'jig rten las 'das pa'i le'u las/kye rgyal ba'i sras bcu po 'di dag ni byang chub sems dpa' dga' ldan gyi gnas na gnas pa'i las te/ bcu gang zhe na/ 'di ltar 'dod pa'i khams kyi lha'i bu rnams 'dod pa'i bde ba bstan pa dang / dbang phyug mi rtag par bstan pa dang /phun sum tshogs pa thams cad rgud par 'gyur bar bstan pa dang / de dag byang chub kyi sems la yang dag par dgod pa 'di ni/ dga' ldan na gnas pa'i las dang po'o/ /gzugs kyi khams kyi lha'i bu rnams la bsam gtan dang / rnam par thar pa dang /ting nge 'dzin dang / snyoms par 'jug pa dang / rnam par ldang ba ston cing bsam gtan dang bsam gtan gyi yan lag de dag la mngon par zhen pa dang / srid pas byung ba'i 'jig tshogs su lta ba dang / gti mug gis shas che ba'i nyon mongs pa rnams yang dag pa ji lta ba bzhin du bstan pa dang /gzugs med pa'i phyin ci log la zhugs pa thams cad la sdug par yid la byed pa thams cad mi rtag par yongs su bstan te/ byang chub kyi sems la dgod pa 'di ni dga' ldan na gnas pa'i las gnyis pa'o/ / kye rgyal ba'i sras dga' ldan gyi gnas na gnas pa'i byang chub sems dpa' rnams ni rgyan bzang po zhes bya ba'i ting nge 'dzin la gnas te lus las 'od bkye zhing stong gsum gyi stong chen po'i 'jig rten gyi khams snang ba chen pos rgyas par bkang nas/ sems can rnams la ji ltar dad pa bzhin du chos sna tshogs kyi sgra skad rab tu brjod de/chos kyi sgra skad de dag thos nas sems dang bar 'gyur te/ dga' ldan gyi lhar brtul zhugs mthun par skye bar 'gyur zhing de ltar skyes nas kyang byang chub kyi sems la dgod pa 'di ni dga' ldan na gnas pa'i las gsum pa'o zhes bya ba la sogs pa rgyas par gsungs nas/yang dga' ldan nas 'chi 'pho ba ston pa'i las bcu gsungs te/ rgya cher mdo de nyid las shes par bya ba ste/ gzhung mangs par 'gyur bas 'jigs pa'i phyir 'dir ma brjod do/ /dbye ba zhar la brjod nas zhes bya ba la dang po nyid du/sems bskyed pa ni gzhan don phyir/ /yang dag rdzogs pa'i byang chub 'dod/ /ces bya ba'i dbang 'dis sems bskyed pa'i ngo bo nyid gtsor ston cing ngo bo nyid kyi gnas skabs tsam la rnam par dbye bar bzhag pa'i phyir 'dir zhar la bstan pa kho na'o//dus ji lta ba bzhin du don du gnyer bar byed pa zhes bya ba ni rgyu'i rang bzhin gyi sems bskyed pa rnams rang rang gi sa mtshams gang yin par mi nyams shing 'phel bar bya ba'i phyir 'bad pa ni don du gnyer bar byed pa ste/ de yang de'i rgyur gdams ngag don du gnyer bar byed pa nyid do zhes don du gnyer ba'i sgra ni tshig zur gnyis su sbyar ro//des 'phags pa'i chos 'grub par bya ba'i phyir zhes bya ba la/ des zhes bya ba ni byang chub kyi sems dang po dang rtags mthun pa'i phyir rgyu'i byang chub kyi sems rnams kyis so//de rnams kyis 'phangs pa'i chos ni 'bras bu'i byang chub kyi sems gsum gyis bsdus pa sangs rgyas kyi sa'i rnams so/ /'grub par bya ba'i phyir gdams ngag don du gnyer bar byed ces sbyar ro/ /gzhan dag ni des zhes bya ba 'di ni bar chad med pa'i phyir dang / byang chub kyi sems bskyed pa zhes bya ba dang / yang rtags mthun pa'i phyir de nyid dang spyir sbyar la 'phangs pa'i chos ni sems bskyed pa 'phel bar byed pa'i bslab pa ji snyed pa rnams yin pas/ de dag 'grub par bya ba'i phyir gdams ngag don du gnyer bas na yon tan thob pa ni mi sdug pa bsgom pa la sogs pa yin la/de dag yongs su bsrung ba'i don gyis zhes bya ba ni sems bskyed pa 'phel bar byed pa dang bcas te bsrung ba'i phyir don du gnyer ro zhes zer ro/ /'di ni legs par ma smras te de ltar na 'chad par byed pa las sems bskyed pa dang po dang tha ma'i las bstan pa'i rim pas lhag ma bar gyi tshig gi don rnams kyang khong du chud par bya'o zhes bstan pa yang ji ltar drangs te/de'i tshe khyed ni sems bskyed pa'i ngo bo tsam las khas mi len pa'i phyir ro/ /yang de dang des 'phangs par khyed smra ba na sangs rgyas kyi sa la khyed kyis ci byar yang med do//de'i phyir nges par tshul snga ma khas blangs te yon tan thob pa yongs su bsrung ba'i don gyis zhes bya ba snga ma snga ma mi nyams par bya ba'i dbang gis gong ma gong ma yang mngon par 'phel bar bya ba'i phyir don du gnyer bar byed ces shes par bya'o//'dir yang bar chad med pa'i lam la ni de don du gnyer ba med de/ rang byung gi ye shes bskyed par nus pa'i phyir ro/ /'o na mdo dag las de bzhin gshegs pa 'ga' zhig chos gsungs pa'i gnas su thub pa chen po phal mo che tshogs te/ mjug tu legs so zhes bya ba gnang ba bstan pa der de dag gdams ngag nod pa ma yin na ci zhig la 'du ba mdzad/tshul 'di las ni bar chad med pa'i lam la de las ji ltar log ce na/ der ni dam pa'i chos la gces spras mdzad pa dang / chos la byas pa gzo ba dang / chos kyi tshul yun ring du gzhag pa'i phyir de lta bu dag bstan gyi/ de dag ni yang gdams ngag la ltos pa dang bcas pa ga la zhig yin/ 'doms pa ni gdams ngag ste zhes bya ba la/ 'dir ni don du gnyer bar byed po ni zhes brjod par rigs pa ma yin nam/ ji ltar na 'doms pa ni bstan zhe na/ kha cig na re 'di ni byed pa'i lam bstan pa ste/ 'bras can gyi bya ba dang 'brel pa'i gtam la mer brjod pa lta bu'o zhes zer ro/ /de la me nyid brjod pa ci'i phyir zhes pa las dngos por bya ba'i 'dri bar 'gyur bas ci zhig phan par byed/yang gzhan dag ni ji ltar bstod pa la sogs pa'i grags pa las 'das pa'i ngo bo sangs rgyas rnams thugs dgyes pa'i ngo bos gnas skabs la bzhag pa ltar/ 'dir yang gzhan 'ga' zhig gis 'doms pa zhes ni mi bya ste/ de ni lam yongs su 'dzin pa'i rang bzhin 'ba' zhig yin pa'i phyir ro//'o na ci zhe na/ rang gi yongs su 'doms pa ni gdams ngag ste zhes bya na nyes pa 'dir mi 'gyur ro zhes zer ro/ /bdag cag gi rje btsun gyi zhal snga nas ni rgyal ba skyed ma las bstan pa'i lam ma lus pa ni thun mong nyid du rje btsun sangs rgyas kyi byin gyi rlabs kyis rim gyis skye bar nges par khas blangs par bya ba ni/'gro rnams zhi ba'i las dang ni/ /zhes bya ba la sogs par 'gyur la/ des na 'dir rang gi nyams su blangs pa'i bya ba la gzhan gyi byed pa sbyar ba la nyes pa med cing /yang na 'doms pa yang de yin la ji ltar gdams pa ltar sgrub pa yang 'dir gtsor gyur pa'i gdams ngag go zhes brjod par bya'o zhes gsungs so/ /gal te de ltar gzhan gyis bstan pa'i gdams ngag mi 'gog pa lta zhig na de ston pa po yongs su 'dzin pa de'i phyir 'dir mi bstan par mdo las sbyor ba'i lam dang 'brel par ston zhe na/de nyid du bstan par mi bya ba ni rang gi mngon par shes pa'i stobs kyis pha rol zil gyis gnon pa'i dge ba'i bshes gnyen bsten pa dang zhes pas drod bskyed pa'i dbang du byas te/ de'i phyir dge ba'i bshes gnyen dang phrad pa yang rab tu rnyed par dka' bas de dang phrad pa la rab tu 'bad par rigs so//dad pa'i sa la sogs pa ni dman pa la brten par shes par bya'o/ /sgrub pa la 'doms pa la sogs pa 'di dag las dang po ni tshogs kyi lam dang sbyor ba'i lam la gdams pa'o//lhag ma bden pa nas brtsams te mngon par shes pa la thug pa'i bar ni nges par 'byed pa'i cha dang mthun pa'i gnas skabs so/ /lhag ma gnyis ni go sla'o/ /dad pas rjes su 'brang ba ni gang mi'i nang nas mi'i nang du mtshams sbyor ba'o/ /chos kyis rjes su 'brang ba ni sangs rgyas kyi zhing rnam par dag pa gzhan nam/dga' ldan nas 'dir skyes pa'o/ /mi'i rigs nas rigs su skye ba ni bsam gtan dang tshad med pa dang / snyoms par 'jug pa thob pa dag thabs mkhas pa'i dbang gis de dag gi 'bras bu mngon du mi byed kyi rgyal rigs shing sA la chen po lta bu la sogs pa'i ngo bor mi'i nang du slar zhing skye'o//lha'i rigs nas rigs su skye ba ni yang gzhung snga ma lta bus 'dod pa'i khams kyi lha dag gi nang kho nar slar skye zhing skye ba yongs su 'dzin pa'o/ /de ltar na rgyun tu zhugs pas bsdus pa rnam pa bzhi'o//dad pas mos pa ni byang chub sems dpa' thabs mi mkhas pa dag 'du shes med pa'i snyoms par 'jug pa mngon du byas te/ der skye ba ldog par mi byed par der mtshams sbyar te ring mo zhig gnas nas shi 'phos te slar 'dir mtshams sbyar na/de ni dbang po rtul ba'i phyir na dad pa tsam yin gyi de la shes rab med ces dgag pa'o/ /de ni de lta na 'du shes med par skye ba'i byang chub sems dpa' de gang zhig yin/ bden pa mthong ba ni ma yin te/ bsam gtan la sogs pa'i yan lag yongs su zad pa dang / zhes ston pa'i phyir ro/ /snang ba thob pa la sogs pa yang ma yin te/ mi khom pa zad pa dang zhes ston pa'i phyir ro/ /dad pa'i sa pa yang ma yin te/ 'dir slob pa phyir mi ldog pa'i dge 'dun 'chad pas de dang 'brel pa med pa'i phyir ro zhe na/ 'di la ni brjod par bya ba mi nus pa ni ma yin te/yul o de sha pa'i mkhas pa chen po dag gi zhal snga nas/ mgrin gcig tu 'dir slob pa phyir mi ldog pa ni phal cher brjod kyi/ gzhan med pa ma yin pas na/ mdo las kyang gang mi'i nang nas shi 'phos te mir skyes pa de dag ni/ shA ri'i bu byang chub sems dpa' phyir mi ldog pa ma gtogs pa dbang po rtul po ste zhes gsungs so zhes zer ro//kong ka Na pa dag gi zhal snga nas ni sems can 'du shes med pa dag ni gnyis yin te/ mi khom par bgrang ba dang / de las gzhan pa'o/ /de la phyi rol pa'i lam la sogs pas khams dang sa 'og ma 'og ma dag rnam par sun phyung nas der skyes pa de dag ni 'chi 'pho ba'i tshe na log par lta ba'i dbang gis sems can dmyal ba chen por ltung bas mi khom par bgrang zhing /byang chub sems dpa' bden pa ma mthong ba dag brgya lam na ci zhig ltar bshes gnyen ngan pa la sogs pas der skyes kyang sangs rgyas kyi mthu'i dbang dang rang gi byang chub kyi sems la sogs pa'i mthus de dag ltar nyams par mi 'gyur bas na/'di lha tshe ring por skyes su zin kyang mi khom par skyes pa ma yin te/ 'di ltar bshad pa las ni mdo gang las byang chub sems dpa' theg pa chen po'i snod du 'gyur ba gcig pu zhig yod pa ni lha tshe ring por skye bar gzigs te zhes pa la sogs pa yang legs par bshad par 'gyur ro zhes gsung ngo //baM g+ha la pa dag gis bshad pa ni drod la sogs pa'i tshe phal cher ngan 'gro la sogs pa spangs pas de skad bshad kyis nges par ni bzod pa thob pa kho na ste/des na ngan 'gro med pas chos chen po la bzod pa'i phyir zhes 'chad pas na 'di ni drod dang rtse mo pa yin no/ /de dag gnas smad pa der yang yun thung ba dang sdug bsngal chung ba la sogs par sbyar ro zhes zer ro//rje btsun gyi zhal snga nas ni dgos pa'i dbang gis bstan par zad pas na bar chad med pa'i lam gyi bar du sbyar ro zhes gsung ngo / /'di lta bu la sogs pa mdo'i gnas de dang der bdag nyid chen po rnams tha dad par 'chad pa rab tu mang po zhig yod pa ni gzhung mangs pas 'jigs pa'i phyir bdag gis 'dir ma bris te/mdo mnyan pa las khong du chud par bya'o/ /mthong bas thob pa'i byang chub sems dpa' ni gzhung de bzhin du sbyar ba la thabs la mkhas pa'i stobs kyis lha tshe ring por mi skye'i/gzhan gang yang rung ba zhig tu skye ba'o/ /'di ni thabs mkhas pa'i dbang gis mi skye ba yin la/ snga ma gnyis po ni 'jigs pa dang bcas pas smon lam la sogs pas de spong ngo / /lan cig phyir 'ong ba ni bsam gtan dang tshad med pa la sogs pa thos pas de dag gi 'bras bu mngon du mi byed par dga' ldan du skyes te/de'i gnas pa mthar phyin nas 'dzam bu'i gling 'dir babs nas byang chub par ston pa'o/ /gzhan bar chad gcig pa ni bsam gtan rnams nas chos ma 'dres pa'i bar gyis yon tan thob kyang da dung sangs rgyas mchod pa la sogs pa'i phyir gnas pa tshe gcig gis thogs pa ste/'jam dpal khyod da dung yang de bzhin gshegs pa la mchod pa'i las kyis ma tshim mam zhes pa lta bu'o/ /dad pa dang mthong bas thob pa 'di dag ni sngon bzhin no//phyir mi 'ong ba ni zhing mtha' yas par 'dod pa las phyir mi 'ong ba dang / yang theg pa bla na med pa can dang / tshe tshad med pa can dag tu 'dod pa las phyir mi 'ong ba ste/ de dag gis sems can gdul ba'i dus nye bar gnas pa yal bar mi 'dor ba ni gang bor ba'i khams gsum de dag tu yang sems can rnams kyi don byed pa yod par bstan pas theg pa dman pa'i phyir mi 'ong ba las bye brag tu byas pa'o//bar ma dor mya ngan las 'da' ba ni tshangs pa'i 'jig rten du skyes nas lus de nyid kyis tshogs bsags te rdzogs par 'tshang rgya bar ro//skyes nas pa ni srid pa tha ma pa dang / gang tshe tshad med par byin gyi rlabs pa'i tshe gcig pu de la 'tshang rgya ba'o/ /mngon par 'du byed pa dang bcas pa ni 'jig rten gyi khams dpag tu med pa dag tu mngon sum pa'i 'bad pas 'gro ba rab tu mang po 'dul zhing der yang bdag nyid rab tu ma smras par don byed pa'i dbang gis lam sbyong ba'o//mngon par 'du byed pa med par yongs su mya ngan las 'das pa ni rang bzhin dang rkyen gyis sems dang po bskyed pa nyid kyis phyir mi ldog pa'i sa thob pas byang chub par 'gyur ba ste/'di ltar dge slong mi 'khrugs pa dang / bram ze rgya mtsho'i rdul dang / 'khor los sgyur ba'i rgyal po nam mkha' la sogs pa bzhin no/ /yang 'khor los sgyur ba'i rgyal por gyur pas sems can rnams sbyin pa nas bzung ste dge ba bcu'i las kyi lam la bkod nas de nyid tshangs ris nas 'og min gyi bar du 'gro ba de ni de'i 'og tu de nyid 'og min gyi mthar thug par 'gro ba ste zhes bya ba la/de yang gsum yin pa las 'phar ba gang yin pa ni/ dang por bsam gtan bzhi rdzogs pa las slar rkyen 'ga' zhig gis nyams pa na slar bsam gtan dang po thob par byas nas/de tshangs ris su skyes te der bsam gtan gong ma rnams thob par byas nas de shi ba na 'og min du skye ba blangs te sangs rgyas kyi zhing sna tshogs rnams su byang chub ston pa'o/ /phyed du 'phar ba ni gzhung snga ma lta bu las tshangs ris nas shi 'phos nas gnas gtsang ma 'og ma zhig tu skyes te/de nas shi 'phos nas 'og min du skye ba'o/ /gnas thams cad du 'chi 'pho ba ni dga' ldan kho nar bsam gtan dang po la snyoms par zhugs te shi 'phos nas der skye zhing rim pa de ltar gzugs kyi khams kyi gnas ris bcu bdun kun tu tshe 'dzin pa dang /'dor bas 'og min du song nas de'i 'og tu 'gro ba du ma zhig smin par byed pa'o/ /yang phyir mi 'ong ba 'ga' zhig gnas gtsang ma ma yin pa gzugs dang gzugs med pa kun gyi bsam gtan gyi bde ba sgyu ma ltar nyams su myong bar byas te/srid pa'i rtse mor skyes nas de nas yang 'gro ba mang po'i don byed pa de ni 'dir de'i 'og tu de nyid srid pa'i rtse mo'i mthar thug par 'gro ba ste zhes bya ste/ de yang rnam pa gnyis yod pa las gzugs kyi 'dod chags dang bral ba ni 'dod pa'i khams 'dir gzugs kyi khams kyi mthong ba dang bsgoms pas spang bar bya ba spangs te gzugs med pa'i skye mched thob par byas te/'di nas shi 'phos nas khams bar ma bor te cig car du der skyes nas de nas yang gdul bya smin par byed pa'o//mthong ba'i chos la zhi ba lus kyi mngon sum du byed pa ni/ tshe gcig pu kho na la rgyal po rin po che sna bdun dang ldan par gnas te de'i tshe tshogs yongs su bsags nas tshe gzhan dang lus gzhan mi len par rdzogs par 'tshang rgya ba ste/ 'di ni byang chub sems dpa'i mchog nyid do//phyir mi 'ong ba ni de ltar rnam pa bcu'o/ /dgra bcom pa'i 'bras bu la zhugs pa ni pha rol tu phyin pa drug la gnas pa'i byang chub sems dpa' sems can rab tu gdul dka' ba log par lta ba rnams 'dul la/ rang gi sems la yang de dang rma mi 'byin par tshogs yongs su rdzogs par byed pa dag ste/'di dka' ba mi bzad pa spyod pa'i byang chub sems dpa' chen po zhes bya'o/ /rang sangs rgyas ni shin tu thabs mkhas pa'i byang chub sems dpa' 'ga' zhig 'jig rten gyi khams gang na dkon mchog gsum gyi sgra mi grag pa'i 'jig rten gyi khams der song nas mngon par byang chub pa ston pas gdul bya mang du 'dul ba ste/de ltar tha mar bstan pa 'di gsum ni rang dang gzhan dang gnyi ga'i don las byang chub sems dpa' mchog tu bstan to/ /'dir rgyun tu zhugs pa pa la sogs par byang chub sems dpa' bstan pa yang sprul pa pa dang /sgra'i gzhi yod pas gnyis te de la sprul pa pa ni/ theg pa rlabs po ches ni skrag 'gyur zhing / /'di ni sems can dman la mos rig nas/ /byang chub sems dpa' 'di dag nyan thos 'gyur/ /rang rgyal byang chub par yang rab tu ston//zhes gsungs so/ /sgra'i gzhi yod pa'i dbang du byas te ni/ spros med rnyog pa med pa ste/ /chags med dbyings ni ston par byed/ /sangs rgyas chos rnams ma lus par/ /rnam par mthong nas ston par byed/ /sangs rgyas rnams kyis gang gsungs pa//chos dang ring bar mi rtog cing / /chos dang nye bar mi rtog ste/ /des na de dag 'dre ba med/ /sgrogs kyang 'dre ba ma yin te/ /sems can dpag tu med la brjod/ /sems can de dag mthong ba med/ /des na de ni nyan thos brjod/ /kun dga' 'di la dgongs nas ni//nga yis nyan thos yongs su bstan/ /gnas med byang chub sems dpa' ni/ /de ltar nyan thos su shes kyis/ /zhes bya ba dang / rkyen rnams 'di dag shes nas ni/ /de ni gang la 'ang mi gnas te/ /rang sangs rgyas zhes bya ba'i sgrar/ / byang chub sems dpa' rab tu ston/ /zhes gsungs la/ yang byang chub sems dpa' 'di dag la rgyun tu zhugs pa la sogs pa'i khyad par gsum gyi sgra'i gzhi yod par yang bstan te/ rgya cher ni 'phags pa phyir mi ldog pa'i 'khor lo'i mdo las drang bar bya'o/ /yang 'dir gang gis nyon mongs pa'i rnam pa las drug gam bdun nam brgyad kyi rnam pa spong ba las ni/de rgyun tu zhugs pa'i 'bras bu la zhugs pa'o zhes bya ba nas/ gang gis srid pa'i rtse mo'i nyon mongs pa brgyad pa spangs pa de ni dgra bcom pa'i 'bras bu la zhugs pa'o zhes bya ba'i bar gyis spangs pas dgag pa ni chos mngon pa las rab tu gsal ba dang /'dir de ltar spangs pa gtsor ma gyur pa'i phyir brjod pas ci zhig bya/ nges par 'byed pa'i cha dang mthun pa zhes bya ba la ni nges pa ma lus par ro/ /'byed pa ni 'joms pa'o//cha ni phyogs gcig go/ /i ya ni phan pa ste rgyu ru rtogs pa zhes bya'o/ /rgyu'i sgo ni theg pa ma lus pa'i 'o/ /'bras bu ni sangs rgyas nyid kyi mngon sum pa'i rgyur gyur pas so/ /ngo bo nyid ni chos kyi dbyings kyi rang bzhin du nges par gnas pa ste/ chos kyi dbyings las ma gtogs pa//'di ltar chos yod ma yin te/ /zhes pa'i tshul las so/ /chos nyid kyi rnam pa'i sgo ni chos kyi dbyings kyi rang bzhin de yang kun rdzob pa'i dmigs pa dang rnam pa la sogs pa'i bye brag du mar rten cing 'brel bar 'byung ba'i mthu'i che bas gnas zhes bya ba'i don to//des na theg pa chen po 'dir ni rang bzhin gcig nyid las sna tshogs par 'gyur ba ni thabs la mkhas pa'i mthu'i che ba yin la/ sna tshogs kyang gcig kho na 'di ltar spros pa med par 'gyur ba ni chos kyi dbyings kyi bdag nyid kyi che ba'o/ /de ltar nges par 'byed pa'i cha dang mthun pa bstan pa rnam par phye nas/da ni sgrub pa'i gzhir gyur pa rigs bstan pa dgrol bar bya ba'i phyir/ sgrub pa dang ldan pa la nges par 'byed pa'i cha dang mthun pa ji skad bshad pa dang mthong ba'i lam la sogs pa gzhan yang 'byung bas sgrub pa'i rten du gyur pa gsungs te zhes bya ba la sogs pa gsungs te/bsgrub pa 'chad par 'gyur ba bzhi po de dag nyams su len pa dang ldan pa'i byang chub sems dpa' sgrub pa po rnams la nges par 'byed pa'i cha dang mthun pa 'das ma thag tu ji skad du bshad pa 'byung ba ste/ de ni go cha'i sgrub pa nyid yin pa'i phyir ro//mthong ba'i lam la sogs pa gzhan yang 'byung bas zhes bya ba la sogs pa smos pas ni bsgom pa'i lam dang khyad par gyi lam bsdus te/ de dag ni 'jug pa dang tshogs dang / nges par 'byung ba'i sgrub pa rnams nyid yin pa'i phyir ro/ /de ltar ma lus pa'i gzhi rigs yin na/de ltar na dang po kho nar cis na de ma bstan zhe na/ sems bskyed pa la sogs pa'i rgyus tshogs kyi lam sbyangs te sbyor ba'i lam thob pa ni rigs la gnas par bgrang ngo zhes rgyu 'bras su shes par bya ba'i phyir ro/ /gzhan dag na re de ltar sbyar ba ni mngon par 'dus byas pa'i rigs la gsungs pa yin pas/rang bzhin gyi rigs la ni dang po nyid du rigs brjod par rigs mod kyi rigs gnyis su shes par bya ba'i phyir 'dir bstan to zhes zer ro/ /de ltar sgrub pa'i rten rigs yin pas de sgrub pa rnams kyi dang por ni bstan na/sgrub pa'i rten du gyur pa'i rigs zhes bya ba 'di'i don ci zhe na/ de'i phyir rigs zhes bya ba 'di ni yod par bsgrub pa dang / de'i rang bzhin dang / rnam par dbye ba dang / rtags dang / yon tan dang / nyes pa dang / nges pa'i tshig dag gis shes par 'gyur te/de la dang po'i dbang du byas te de ni/ khams rnams dang ni mos pa dang / /sgrub pa tha dad dmigs pa dang / /'bras bu tha dad dmigs pa'i phyir/ /rigs yod nyid du nges par brjod/ /ces gsungs so/ /gnyis pa'i dbang du byas te/rigs kyi rang bzhin ni kha cig tu chos kyi dbyings te/ kye rgyal ba'i sras dag byang chub sems dpa'i rigs zhes bya ba 'di ni chos kyi dbyings lhur len pa/ nam mkha' ltar yangs pa/ rang bzhin gyis 'od gsal ba ste/ de la gnas pa'i byang chub sems dpa' rnams ni 'das pa'i sangs rgyas bcom ldan 'das rnams kyi rigs su skyes pa yin/ma 'ongs pa'i sangs rgyas bcom ldan 'das rnams kyi rigs su skyes pa yin/ da ltar byung ba'i sangs rgyas bcom ldan 'das rnams kyi rigs su skyes pa yin zhes gsungs la/ 'di nyid las kyang /chos kyi dbyings las dbyer med phyir/ /rigs ni tha dad rung ma yin/ /zhes rgol ba smra bas so/ /yang 'jam dpal chos kyi dbyings dang yang dag pa'i mtha' gcig yin na snod dang snod med par ji ltar brtag ces kyang gsungs pas so/ /yang kha cig tu ni rigs zhes bya ba 'di nges par skye mched kyi bye brag nyid la 'dod par mthong ste chos mngon pa las kyang /kha cig dang po nas de'i rigs/ /kha cig sbyangs pa las gyur to/ /zhes bshad la/ theg pa chen po'i dbang du byas te yang 'phags pa chos bcu pa'i mdo las/du ba las ni mer shes shing / /chu skyar las ni chur shes ltar/ /byang chub sems dpa' blo ldan pa'i/ /rigs ni rtags kyi sgo nas shes/ /zhes gsungs te/ 'dir rtags ni gang la skye mched khyad par can yod pa'i rang bzhin gyi rtags kyi khyad par 'ga' zhig la bya bar dgongs te/gang la chos kyi dbyings yod pa'i rtags zhes ni mi rigs te de ni spyi la yod pa'i phyir ro/ /de las 'dir ni rje btsun gyi zhal snga nas rigs kyi rang bzhin ni chos kyi dbyings yin par bzhed la/ 'on kyang rigs kyi dbye ba ni med pa ma yin te/ yang dag par rigs gcig pu yin du zin kyang 'ga' zhig rang bzhin nam sbyangs pa las skye mched khyad par du gyur pa'i dbang las tha dad par bzhag pa tsam du yang dgongs par ni dpes ston to//gsum pa rnam par dbye ba ni spyir theg pa chen po dang / rang sangs rgyas dang / 'phags pa nyan thos dang /ma nges pa dang / rigs med pa zhes lngar 'phags pa lang kar gshegs pa las gsungs pa nyid de/ 'on kyang rigs 'chad pa zhes pa 'di ni rnam par grol ba dka' ba'i dbang tsam la dgongs pa ste/ gzhan du na ni 'phags pa shes rab kyi pha rol tu phyin pa mchog dang po las/byang chub sems dpa' kun tu bzang po sems can thams cad ni de bzhin gshegs pa'i snying po can no zhes gsungs pa dang / yang 'phags pa zla ba sgron ma'i mdo las/ 'di na snod min sems can gang yang med/ /'gro ba 'di kun ma lus sangs rgyas 'gyur//zhes gsungs pa dag ji ltar drangs/ /bzhi pa rtags kyi dbang du byas te de ni/ sbyor ba'i sngon du snying rje dang / /mos pa dang ni bzod pa dang / /dge ba yang dag spyod pa ni/ /rigs kyi rtags su shes par bya/ /zhes gsungs so/ /lnga pa dang drug pa'i dbang du byas te de ni/ring mo zhig na ngan song du/ /'gro zhing myur du thar ba dang / /de yang sdug bsngal chung ngu myong / /skyo bcas sems can yongs smin byed/ /ces pa dang / nyon mongs goms dang grogs ngan dang / /phongs dang gzhan gyi dbang nyid de/ /mdor na rigs kyi nyes pa ni/ / rnam pa bzhir ni shes par bya/ /zhes gsungs so/ /bdun pa ni nges pa'i tshig gi dbang du byas te de ni/ phyogs sam sa la skyob pa ni go'i sgra ste/ ri 'od sa dang rdo rje dang / /mtho ris ba lang mchog rnams la/ /mkhas pas go sgra shes par bya/ /zhes brjod pa'i tshul gyis so//yang snying rje'i dbang gis ni sems can dmyal ba la sogs pa'i 'gro ba ngan par thim pas na ku la'o/ /gzhan dag ni yon tan gyi tshogs kyi rten du 'gyur ba'i phyir na ku la zhes skad kyi dbyings bstan pa'i rjes su 'brang ngo / /ming gi don ni yon tan skyed pa'i phyir rigs nyid ces bya ste/'di ni sa bon dang nus pa'i ming gi don yin pa'i phyir ro/ /chos kyi dbyings kyi ngo bo nyid kho na zhes bya ba ni dang po bsdus pa'i don gyi skabs su/ sgrub pa yi ni rten gyur pa/ /chos kyi dbyings kyi rang bzhin dang / /zhes gsungs pa thugs la bzhag nas 'dir 'di skad smos so//ji skad du bshad pa'i chos ni sgrub pa rnam pa bzhi la sogs pa'o/ /gzhir gyur pa ni chos kyi dbyings te rtogs pas de dang 'brel pa'i bdag nyid byang chub sems dpa' rnam pa bcu gsum la rigs zhes bstan to zhes bya ba la/ byang chub sems dpa' ni/bdud rtsi thob byed lam ni 'di min gyis/ /lam ngan spongs la lam la mnos shig ces/ /lta ngan sems can mthong nas go byed de/ /rgyu des byang chub sems dpa' zhes brjod do/ /zhes bya ba'i tshul gyis na/ byang chub la dgod pa'i phyir sems dpa' ni byang chub sems dpa' zhes bya'o//rnam pa bcu gsum la zhes bya ba ni ji skad du bgrang ba'i bcu gsum ste/ de yang dang po ni sbyor ba'i lam gyis bsdus pa bzhi'o/ /lnga pa ni mthong ba'i lam mo/ /drug pa ni bsgom pa'i lam mo/ /bdun pa dang dgu pa ni de dag nyid kyi bral ba dang bral ba'i thob pa gnyis so//brgyad pa ni sa 'od byed pa nas sa drug pa'i bar ro/ /bcu pa ni sa bdun pa'o/ /bcu gcig pa ni sa mi g.yo ba nas chos kyi sprin gyi bar ro/ /bcu gnyis pa ni skye ba gcig gis thogs pa dang srid pa tha ma pa'o/ /bcu gsum pa ni khyad par gyi lam rdo rje lta bu'i ting nge 'dzin to//de la skye ba gcig gis thogs pa'i sa pa ni 'gro ba rnams la sangs rgyas kyi bya bas nye bar gnas pas gdul bya phal mo che bstan pa la dgod par byed pa'i phyir na de'i 'og tu bsam pa ji lta ba bzhin du bzhugs pa la sogs pa ldem por dgongs pa'i sgo nas zhes bya ba la sogs pa gsungs te/de la 'gro ba 'ga' zhig bstan pa 'di la gzhug pa'i phyir dang por de'i skrag pa spang ba'i thabs kyis bdag dang gang zag dang phung po dang khams la sogs pa yod par bstan pa dang / chos thams cad med pa dang /chos thams cad rten cing 'brel bar 'byung ba dang / chos thams cad phyin ci ma log cing rang bzhin gyis 'od gsal lo zhes kun brtags pa dang / gzhan gyi dbang dang yongs su grub pa'i mtshan nyid la brten te gsungs pa dang / chos kyi phung po gcig gsungs par mi mdzad kyi/gdul bya la brten cing chos kyi sgo mo brgyad khri bzhi stong snyed bstan pa dang / byang chub kyi spyod pa rab tu dka' ba bsten te nyon mongs pa la gnas pas ni byang chub de thob po zhes bstan pa dag gzhug pa la ldem por dgongs pa dang / mtshan nyid pa ldem por dgongs pa dang /gnyen po la ldem por dgongs pa dang / sgyur ba la ldem por dgongs pa dag dang / yang / tshogs dang chos kyi sku dag dang / /'gro ba'i don ni spyod pa yis/ /sangs rgyas thams cad mnyam pa ste/ /zhes pa la brten nas 'das pa'i dus kyi sangs rgyas kha cig kyang nga nyid yin no zhes bstan pa dang /sangs rgyas 'ga' zhig gi mtshan thos pas phyir mi ldog par 'gyur zhes dus ring mo zhig na 'gyur ba la brten pa dang / sangs rgyas gang gA'i klung gi bye ma snyed la rim gro bya ba byas na de nas gdod theg pa mchog gi don khong du chud par 'gyur ro zhes ston pa don gzhan la brten pa dang /gang zag 'ga' zhig la dang por sbyin pa'i legs pa brjod de de yang phyi nas sbyin pa smad pa la sogs pa bstan pa gang zag gi bsam pa la brten pa ste/ de ltar na mnyam pa nyid la dgongs pa dang /dus gzhan la dgongs pa dang / don gzhan la dgongs pa dang / gang zag gi bsam pa la dgongs pa ste dgongs pa bzhi'o/ /'di dag ni theg pa chen po la snang ba lta bur gzung bar bya ste/ zhu ba'i 'og tu za ba la/ /mar gyi nying khu sbrang rtsi dang / / kha ra dag ni bdud rtsi bzhin/ /ma zhu zos la dug tu 'gyur/ /de bzhin rab rgyas bdud rtsi yis/ /dgongs pa'i tshig la mi mkhas shing / /byis pa'i blo dang ldan pa la/ /mi bzad pa yi dug tu 'gyur/ /zhes gsungs pas so/ /de ltar dgongs pa brgyad kyis 'gro ba'i don la 'bad pa ni rta 'dul sbyong byed pa ltar nges par dul bar 'gyur bas na de dag nyid theg pa gsum gyi lam la sems can ma lus par 'god pa'i mtshan nyid kyi gzhan gyi don gyi go rims so zhes bya'o//don 'di la dgongs te sa bcu pa'i byang chub sems dpa' ni sangs rgyas su bstan par mdzad do//de'i 'og tu 'khor ba ji srid pa la sogs pa ni skabs bdun par zhib tu rnam par 'byed pas shes par 'gyur bas 'dir mi brjod do/ /gang dag tha mar bstan pa 'di sangs rgyas kyi sa la sbyor bar byed pa ni mi rigs te/ de ltar na sngar smos pa'i byang chub sems dpa' bcu gsum zhes pa ji ltar drangs/lhag ma'i tshig gi don ni go sla bas rnam par ma phye ste/ rnam par bshad pa'i rim pa bzlog pa 'di ni dang por bshad pa'i gzhi byang chub sems dpa'i dbye bar rigs par bsams te de ltar bshad par zad do/ / ji ltar na nyan thos kyi theg pa la sogs pa rtogs pa'i rim gyis dmigs pa de bzhin du zhes bya ba la sogs pa 'dis ni 'di skad du bstan par 'gyur te nyan thos dag ni rnal 'byor spyod pa pa ltar rigs tha dad pa dang de chad pa yod par mi 'dod pas na sems can thams cad ma nges pa'i rigs can du 'dod pas na de ltar 'dod pa khyed nyid kyi lugs kyis rigs kyi ngo bo gcig yin yang rkyen gyis byas pa'i rtogs pa tha dad pa tsam gyis rigs tha dad par 'thad pa ltar kho bo cag kyang rigs kyi rang bzhin chos kyi dbyings gcig pu kho na bzhin du 'dod kyang de rtogs pa'i rim pa las rigs khyad par can bcu gsum du 'dod ces pa 'di ni bstan bcos las grags pa'i dpe'o//slar chos nyid du zhes pa ni bstan par sla ba dang go bar sla ba 'jig rten la grags pa'i dpe'o/ /sgrub pa'i rten du gyur pa ji skad bshad pa'i zhes pa ni 'das ma thag pa byang chub sems dpa' rnam pa bcu gsum po rnams kyi'o//dmigs pa gang yin zhe na snyam du phyogs snga ma rtog pa la dmigs pa gsungs te tshig rnam par sbyar ro/ /de la dmigs pa zhes bya ba 'di gang zhig yin/ 'di ltar chos mngon pa las ni rnam par shes pa'i tshogs lnga dang /yid kyi rnam par shes pa dang / ming la ma byang ba'i yid kyi rnam par shes pa dang / brda la blo ma byang ba dang / lta ba dang / nga rgyal dang / de dag dang mtshungs par ldan pa'i chos rnams bor ba de las gzhan dag dang /gang dag bor ba de dag dang / zag pa med pa dang / skal ba mi 'dra ba'i khams dang / sa kun tu 'gro ba rnams dang / ma 'ongs pa'i dmigs pa bzhi gtan la ma phebs pa rnams dang / gang bor ba rnams dang / rtag pa la sogs par skyes pa'i 'dzin pa rnams dang /de dag las bzlog pa'i rnam par 'byung ba rnams dang / shes bya'i sgrib pa ma bor ba rnams dang / de spang ba rnams kyi dbang du byas te/ yul yongs su chad pa dang / de las bzlog pa dang / yul la bkra bar mi 'dzin pa dang / de las bzlog pa dang / dngos po dang bcas pa dang / de las bzlog pa dang / dngos po dang / kun brtags pa dang / phyin ci log dang / de las bzlog pa dang / thogs pa dang bcas pa dang / thogs pa med pa'i dmigs pa ste rnam pa bcu gnyis su phye ba'i dmigs pa bstan na 'dir de dag las gang dag gzung zhe na/re zhig yul la bkra bar mi 'dzin pa'i dmigs pa rab tu smad pa dang / thogs pa med pa'i dmigs pa mchog dag ni 'dir mi gzung ngo / /lhag ma bcu las kyang byang chub sems dpa' dang po bzhi ni sngar bstan pa ltar rnam par rtog pa'i rigs bzhi ma spangs pas na phyin ci log dang kun brtags pa'i dmigs pa dang yang 'brel zhing dmigs pa lhag ma rnams kyang ci rigs su sbyar ro//byang chub sems dpa' lhag ma dgu ni lhag ma'i dmigs pa brgyad dang 'brel par 'gyur ro/ /yang gzhan dag ni byang chub sems dpa' bcu gsum po ni thogs pa med pa'i dmigs par 'dod do//dge sbyong tshul nyid ces bya ba ni lam gyi bden pa gtsor gyur pa ste ji skad du chos mngon pa las/ dge sbyong tshul ni dri med lam/ /zhes bstan pa lta bu'o/ /lung du ma bstan pa'i lus kyi las zhes bya ba ni phan pa'am gnod pa'i sems dang bral ba'i bzo byed pa'am kha zas za ba la sogs pa'o//rnam pa gnyis pa'i dbye ba bzhi nyid kyis zhes bya ba ni gzhung rtsa ba las zung du sbyar ba phrag bzhi bstan pa rnams so/ /chos can stobs bcu ste zhes bya ba la/ stobs bcu nyid chos can te stobs re re la yang dpag tu med pa'i stobs mnga' mod kyi mdor bsdu na/stobs bcur bstan to zhes mdo las gsungs pas na rang gi yan lag ni 'dir chos su brjod do/ /gzhan dag ni sangs rgyas su byed pa'i chos kyi gtso bo ni stobs bcu yin pas 'dir chos can gyi sgras ni gtso bo bstan la mi 'jigs pa la sogs pa'i yon tan ni chos kyi sgras bstan par 'gyur ro zhes 'dod do//de lta bu la sogs pa la zhes bya ba la de lta bu ni dmigs pa rnam pa bcu gcig rnams so/ /sogs pa smos pa ni grangs rnam pa bcu gcig tu gzhag pa'i dmigs pa ni nye bar mtshon pa ste/rgyas par ni rang dang spyi'i mtshan nyid ma lus pa la dmigs par rigs pas na chos thams cad ces bstan te/ rgyal sras rnams kyis mi bslab pa/ /de ni 'ga' yang yod ma yin/ /zhes bshad pa lta bu'o/ /rtog pa ji lta bus rim gyis dmigs pas na zhes bya ba la rtogs pa'i rim pa mi 'dra ba'i shugs kyis ni sngar dmigs pa bcu gnyis las ci rigs su phye ba yin te/las dang po pa rnams ni mngon par zhen pas dmigs la/ phyi ma phyi ma rnams ni de las bzlog par dmigs pa'i phyir te de ni rtogs pa ji lta ba'i don to//gzhan dag ni byang chub sems dpa' bcu gsum po de dag kun kyang dge ba la dang por dmigs shing / rim gyis tha mar stobs bcu la dmigs pa'i bar du dmigs pa ni rtogs pa'i rim pa'o zhes 'dod do/ / ched du bya ba zhes bya ba la byang chub sems dpa' de dag don ci zhig gi ched du dmigs pa de lta bu la dmigs pa sgrub par byed ce na zhes bya bar sbyar ro/ /de'i lan du ni sems can thams cad rim gyi rim gyis sems can gyi mchog sangs rgyas nyid du bya'o zhes yid la byed pa'i phyir sems dpa' che ba nyid de/de dag la sogs pa'i don chen po gsum gyi rim pas dmigs zhes bya ba'i tha tshig go/ /gal te de ltar sems can thams cad sangs rgyas mi'i mchog tu gyur na sems can thams cad kyi mchog gi sems can thams cad gang zhe na/de ni rang rang gi sangs ma rgyas pa'i gnas skabs la dgongs pas nyes pa med do/ /dmigs pa ni ched du bya ba de dag mthong nas dmigs pas na dang po ni dmigs pa 'byung la de nas ni ched du bya ba de'i mthus 'byung bas na/ 'phags pa rnam par grol ba'i sde'i zhal snga nas mda' ltong du gzhug pa dang 'ben la phog pa'i dpe dang dus nye ba dang ring ba'i dbang gis 'di gnyis bstan pa mdzad do//de'i rang gi ngo bo gang yin zhe na zhes pa la de'i rang gi ngo bo ni sngar sgrub pa zhes bya ba'i ming tsam zhig lan mang du byung bas na/ da ni de'i ngo bo ming can ston cig ces bya ba'i don to//de'i lan du ni thams cad mkhyen pa nyid gsum gyi yul la zhes bya ba la sogs pa gsungs te/ 'dir don ni 'di skad du bstan par 'gyur te/ khyod kyis dris pa'i sgrub pa'i ngo bo de ni mdor na rnam pa gnyis te ji ltar zhe na goms pa'i mthu ma thob pa'i phyir sgo du ma nas spyod pa'i sgrub pa bzhi ni skabs dang po gsum gyi dbang du byas te/de'i ngo bor bzhag la yun ring du 'dris pa'i mthus dge ba sgrub pa ji snyed pa pha rol tu phyin pa drug gi rten dang ldan par bsdus te/ bsgrub par nus pa'i sgrub pa drug ni skabs lhag ma bzhi rnams kyis sgrub pa'o//de la rje btsun gyi zhal snga nas ni go cha'i sgrub pas sgrub pa gnyi ga bstan la/ lhag ma 'jug pa la sogs pa ni sgrub pa dang po'o zhes dgongs pas dus gcig gi tshul gyis ston par mdzad do zhes bya'o/ /yang gzhan dag ni skabs bdun par ni pha rol tu phyin pa gcig gis kyang ma lus par sgrub par nus pas na mngon par rtogs pa rnam pa bzhi la zhes bya ba 'di ni rnam pa gsum la zhes bya bar brjod par rigs so zhes bya bar 'dod do//de la go cha la sogs pa'i sgrub pa dang po rnam pa gsum ni go rims bzhin du 'jug pa dang /zhugs pa khyad par can du gyur pa dang / 'bras bu thob pa mngon du byed pa rnams yin la/ sgrub pa tha ma ni ma lus pa gcig tu dbyer med pas sgrub cing snga phyi'i char yang mi lta bar sgom pa'o zhes bya bar shes par bya ste/ de ni rnam pa thams cad skad cig la mkhyen pa'i dang por sbyor ba yin pa'i phyir ro//go cha'i sgrub pa zhes bya ba ni brtson 'grus rnam pa gsum po go cha dang sbyor ba dang sems can gyi don bya ba dag las 'dir ni go cha'i brtson 'grus kyi ngo bo nyid du shes par bya ste/ go cha yang pha rol tu phyin pa sum cu rtsa drug dag tu sgrub par sems kyis sran btsugs pas de'i mi mthun pa'i phyogs kyis mi phugs pas na go cha dang chos mthun te/de bas na go cha brtan par gyon pa la thams cad 'grub pa'i phyir de dang por bstan te/ dgos pa bsgrub la mkhas rnams sran thub pas//dka' ba rnams kyang dka' ba med par rgal/ /zhes bshad pa lta bu'o/ /yang de ni du zhe na/ drug tshan drug gis ji bzhin bshad/ /ces bya ba'i bka' lung 'dis sum cu rtsa drug mdo dang mthun par bstan to/ /de la slob dpon gyi zhal snga nas ni bstan pa gang dag bsdus pa ni rab tu phye na go ba'i yan lag tu 'gyur te/dper na gzugs zhes bstan pa'i tshe rgyu dang rgyur byas pa dag gis dbye bas bstan pa lta bu'o/ /bstan pa gang rab tu rgyas pa de dag ni bsdus pa go bar byed pa yin te/ dper na gzugs gang ji snyed pa ni phung po lnga pa'o phung po'o zhes pa'am/ji ltar rgyal ba'i yum gyi mdo'i le'u rab tu mang po dag 'phags pa rnam par grol ba'i sde'i zhal snga nas le'u brgyad du gdags pa mdzad pa lta bu'o/ /'dir yang sum cu rtsa drug drug tu bsdus na go sla bar dgongs pas go cha'i sgrub pa rnam pa drug go zhes bya ba gsungs te/'di la rgyu mtshan 'ga' zhig med par ni bsdu bar mi rigs pas na/ sbyin pa la sogs pa drug dang chos mthun pa'i phyir zhes bya ba smos te/ sbyin pa la brten pa'i pha rol tu phyin pa drug car de'i tshe de'i rgyu las byung zhing de'i nyams su len pa las phye bar zad pas na rgyu gcig las 'byung bar 'dra bas na ches mthun pa'o//gzhan dag ni gdul bya chos kyi rnam par dbye ba la mi rmongs par bya ba'i phyir/ bcom ldan 'das kyis de lta de ltar gdags pa mdzad pas ming gi chos mthun pa zhes bya ba'i rang gi ngo bo ni pha rol tu phyin pa drug kho nar zad de/gal te nyan thos la sogs par yongs su bsngos na des pha rol tu phyin par ga la 'gyur zhes 'dod do/ /'jug pa'i sgrub pa zhes pa ni chos kyi dbyings la 'jug pa thob nas sgrub ces pa'i don te de'i 'og tu ni 'dun pa tsam gyi spyod pa'o//don 'di nyid las dgongs te slob dpon dpal sangs rgyas ye shes kyi zhal snga nas smon pa'i byang chub kyi sems ni 'jig rten pa thams cad kyi yin la/ 'jug pa byang chub kyi sems ni sa dang po rab tu dga' ba las brtsams te'o zhes bshad do//mi dmigs pa dang ldan pa dang zhes bya ba ni nang stong pa nyid la sogs par mi dmigs shing rtag pa dang / bde ba dang / bdag dang / zhi ba dang / stong pa nyid dang / mtshan ma dang / smon pa dang / dus dang / khams dang / zag pa dang bcas pa dang / 'dus byas kyi khams dang 'dus ma byas kyi khams rnams gang du yang mi dmigs shing de dag med do zhes kyang mi dmigs pa'o//ched du bya ba dang zhes bya ba ni stong pa nyid dang / byang chub kyi phyogs kyi chos rnams dang / sangs rgyas kyi chos ma 'dres pa la sogs pa ste/ mi slob pa'i chos rnams kyi ched du sngar yun ring du 'dris par bya ba rnams bsgom pa'o/ /rnam pa thams cad mkhyen pa ni 'bras bu la dmigs te 'jug pa'i don to/ /de ltar 'jug pa byas pa la zhes bya ba ni mthong ba'i lam bskyed pa la'o/ /tshogs kyi lam skye bas zhes pa ni bsgom pa'i lam 'byung ba ste/'dir sangs rgyas kyi rgyu'i tshogs rdzogs par byed pas na tshogs te/ dngos su na chos du ma'i don to/ /des na las dang po pa'i sa nas khyad par gyi lam gyi bar du tshogs yin mod kyi/ bsgom pa'i lam 'dir nus pa mthu can gyis chos rgyas pa la dmigs pas na 'di la tshogs kyi gtso bor gyur pas tshogs zhes gsungs so//ye shes kyi tshogs la stong pa nyid nyi shur gsungs pa la/ kha cig ni 'dir ni lam gyi skabs kyi ye shes gtsor ston pa ni 'bras bu'i ye shes me long lta bu la sogs pa gtsor ma bstan to zhes zer ro//'phags pa rnam par grol ba'i sde'i zhal snga nas ni de dag kyang 'dir drangs te brjod par rigs te/ stong pa nyid nyi shu po 'di dag ni mnyam pa nyid kyi ye shes me long lta bu dang bcas pa'i bye brag go zhes gsungs so/ /sa'i tshogs zhes bya ba la 'dir sa'i tshogs de ni rgyas par khong du chud par bya na sa'i nges pa'i tshig dang /sa'i dbye ba dang / rang bzhin dang / shas che chung gi chos dang / yongs su sbyong ba dang / sa de dag thob pa'i lus yongs su 'dzin pa dang / kun rdzob kyi ye shes dang / mi mthun pa'i phyogs dang /sa de dag gi rtags dang / 'bras bu rnams brjod par bya bar rigs so/ /de la nges pa'i tshig ni spyi dang so so bas gnyis te/ re zhig spyi'i dbang du mdzad nas ni/ /dge ba bsgrub pa sna tshogs la/ /dga' bas rtag par thams cad du/ /gnas phyir byang chub sems dpa' yi//sa rnams gnas pa yin par 'dod/ /'byung po dpag med 'jigs med phyir/ /dpag tu med pa de dag la/ /phyi phyir gong du 'gro ldan phyir/ /de dag nyid ni sar 'dod do/ /zhes gsungs so/ /de bzhin du so so ba'i dbang du byas te rim pa bzhin du/byang chub la ni nye ba dang / /sems can don sgrub mthong ba la/ /rab tu dga' ba skye 'gyur te/ /de phyir dga' ba zhes brjod do/ /'chal tshul rtsol ba'i dri bral phyir/ /dri ma med pa'i sa zhes bya/ /chos kyi snang ba chen po ni/ /byed pa'i phyir na 'od byed pa'o//'di ltar byang chub phyogs mthun chos/ /rab tu shes sreg me lta bu/ /de dang ldan phyir sa de ni/ /gnyis po sreg pas 'od 'phro can/ /sems can yongs su smin byed cing / /rang gi sems kyang bsrung ba'i phyir/ /blo ldan rnams kyis bsrung dka' ba/ /de phyir sbyang bar dka' zhes bya//shes rab pha rol phyin bstan nas/ /'khor ba dang ni mya ngan 'das/ /gnyis 'dir mngon du gyur pa'i phyir/ /mngon du gyur pa zhes bshad do/ /bgrod gcig lam dang 'brel pa'i phyir/ /ring du song ba'i sar 'dod do/ /'du shes gnyis kyis mi g.yo'i phyir//mi g.yo ba zhes nges par brjod/ /so so yang dag rig blo bzang / /sa de legs pa'i blo gros yin/ /sprin bzhin gnyis kyis nam mkha'i chos/ /khyab pa'i phyir na chos kyi sprin/ /zhes bya ba la sogs pa gzhung gang dag tu ji ltar bstan pa rnams so/ /de la sa'i dbye ba ni 'jig rten las 'das pa'i sa slob pas bsdus pa ni theg pa chen po 'dir nges pa'i tshig gis bstan pa'i bcu po rnams so//gzhan du dad pa'i sa la sogs pa mang zhig 'byung ba ni 'dir skabs ma yin pa'i phyir mi dbye'o/ /sa rnams kyi rang bzhin ni ye shes 'jig rten las 'das pa'i ngo bo nyid do//sa gang zhig la chos gang zhig shas che zhe na/ kha cig na re pha rol tu phyin pa bcu dngos por mi dmigs pas ni sa so sor sbyong bar byed de/ bsam dang phan pa'i dngos nyid dang / /zhes pa la sogs pa 'chad par 'gyur ba rnams ni sa de dang de la shas cher rgyas par spyod pa'i chos te/de ltar byas na mdo dang mthun par 'gyur ro zhes zer la/ gzhan dag na re de ni rigs pa ma yin te/ gal te ji skad du 'chad par byed pa'i sa'i tshogs 'di dag ma thob pa thob par byed pa ma yin gyi/thob pa la shas che ba zhig yin na de'i tshe sa dgu pa'i tshogs bstan par/ nges 'byung byang chub shing rnams kyi/ /yon tan zhes bya ba la sogs pa smos pa 'di mi 'thad par 'gyur te/ de dag ni sa bcu pa'i byang chub sems dpa' rnams kyi yon tan yin te/des na slob dpon gyis kyang de dag ni sa de thob par byed pa'i rgyur gsal por bstan to zhes 'dod do/ /de las sa gang la chos gang zhig gis shas che ba ni pha rol tu phyin pa bcu rim pa bzhin dang / chos gang gis sa de thob par bya ba'i chos de nyid la yang shas cher slob cing /gzhan yang 'phags pa sa bcu pa'i le'u las/ de la bsdu ba'i dngos po sbyin pa dang ngag snyan pa gnyis kyi shas che bas sems can yongs su smin par byed de zhes bya ba la sogs pa gsungs pa dang sbyar ro/ /yongs su sbyong ba ni zhar la brjod zin to//lus yongs su 'dzin pa'i dbang du byas te/ 'dzam bu'i gling gi rgyal po dang / 'khor los sgyur ba'i rgyal po nyid dang / lha'i dbang po brgya byin nyid dang / 'thab bral dang / dga' ldan dang / 'phrul dga' dang / gzhan 'phrul dbang byed kyi bdag po rnams dang /stong gi bdag po tshangs pa dang / stong gsum gyi stong chen po'i bdag po tshangs pa chen po dang lha'i bu dbang phyug chen po rnams su phal cher 'gyur bas ser sna dang / 'chal ba'i tshul khrims dang / 'dod pa'i 'dod chags dang / 'jig tshogs la lta ba dang / mu stegs byed kyi gnas dang /nga rgyal rnam par 'joms shing sems can rnams la rnam pa thams cad mkhyen pa'i ye shes sgrub par byed pa'o/ /kun rdzob kyi ye shes kyi dbang du byas te/ sa dang po la ni sangs rgyas brgya'i zhal mthong ba dang / ting nge 'dzin brgya la snyoms par 'jug pa dang /sangs rgyas kyi zhing brgya bskyod pa la sogs pa skad cig gcig la'o/ /de bzhin du sbyar te grangs bsgyur ba stong dang / brgya stong dang / khrag khrig dang / khrag khrig phrag brgya dang / khrag khrig phrag brgya stong dang / bye ba khrag khrig phrag brgya stong dang /stong gsum brgya stong phrag bcu'i rdul shin tu phra ba snyed dang / sangs rgyas kyi zhing grangs med pa brgya stong phrag bcu tshang ba'i rdul shin tu phra ba snyed dang / sangs rgyas kyi zhing brjod du med pa bye ba khrag khrig brgya stong phrag bcu'i rdul shin tu phra ba snyed ces bsgyur te/sa 'di dag gi yon tan de lta bu la sogs pa phal cher ni 'phags pa sa bcu'i le'ur blta bar rigs so/ /de la mi mthun pa'i phyogs ni thun mong nyid du gzung ba dang / 'dzin pa'i rnam par rtog pa rigs bzhi brgya rtsa brgyad du gyur pa rnams so/ /bye brag tu ni ji skad du de la sa dang po la ni gang zag dang chos la mngon par zhen pa'i shin tu rmongs pa dang /ngan song ba'i nyon mongs pa'i shin tu rmongs pa dang / de'i gnas ngan len mi mthun pa'i phyogs so/ /gnyis pa la ni ltung ba phra mo'i 'khrul pa'i shin tu rmongs pa dang / las kyi 'gro ba sna tshogs la shin tu rmongs pa dang /de'i gnas ngan len mi mthun pa'i phyogs so/ /gsum pa la ni 'dod pa'i 'dod chags kyi shin tu rmongs pa dang / thos pa'i gzungs yongs su rdzogs pa'i shin tu rmongs pa dang / de'i gnas ngan len mi mthun pa'i phyogs so//bzhi pa la ni snyoms par 'jug pa la sred pa'i shin tu rmongs pa dang / chos la sred pa'i shin tu rmongs pa dang / de'i gnas ngan len mi mthun pa'i phyogs so/ /lnga pa la ni 'khor ba la shin tu phyir phyogs pa dang mngon du phyogs pa yid la byed pa'i shin tu rmongs pa dang /mya ngan las 'das pa la phyir phyogs pa dang mngon du phyogs pa yid la byed pa'i shin tu rmongs pa dang / de'i gnas ngan len mi mthun pa'i phyogs so/ /drug pa la ni 'du byed 'byung ba mngon sum du 'gyur ba'i shin tu rmongs pa dang / mtshan ma mang du 'byung ba'i shin tu rmongs pa dang /de'i gnas ngan len mi mthun pa'i phyogs so/ /bdun pa la ni mtshan ma phra mo 'byung ba'i shin tu rmongs pa dang / rab tu mtshan ma med pa yid la byed pa'i shin tu rmongs pa dang / de'i gnas ngan len mi mthun pa'i phyogs so/ /brgyad pa la ni mtshan ma med pa'i sgrib pa'i shin tu rmongs pa dang /mtshan ma dag la dbang ba'i shin tu rmongs pa dang / de'i gnas ngan len mi mthun pa'i phyogs so/ /dgu pa la ni chos ston pa tshad med pa dang / chos kyi tshig dang yi ge tshad med pa dang / gong nas gong du shes rab dang /spobs pa dang / gzungs kyi dbang gis shin tu rmongs pa dang / spobs pa la dbang ba'i shin tu rmongs pa dang / de'i gnas ngan len mi mthun pa'i phyogs so/ /sa bcu pa la ni mngon par shes pa chen po'i shin tu rmongs pa dang / gsang ba phra mo la 'jug pa'i shin tu rmongs pa dang /de'i gnas ngan len mi mthun pa'i phyogs so zhes gsungs pa rnams dang / yang sangs rgyas kyi sa la ni shes bya thams cad la rab tu phra ba'i chags pa'i shin tu rmongs pa dang / thogs pa'i shin tu rmongs pa dang / de'i gnas ngan len du gyur pa mi mthun pa'i phyogs so zhes gsungs pa rnams te/tha ma sangs rgyas kyi sa'i sgrib pa 'di yang sa bcu pa nyid la ldan pa'i phyir spong ba ma yin yang der bsdu bar bya'o/ /sangs rgyas kyi sa'i sgrib pa sa bcu pa nyid la rnam par gzhag par ni nyon mongs pa can ma yin pa'i mi shes pa rab tu phra ba'i gnas skabs dang /nyon mongs pa'i bag chags ni sangs rgyas kyi sa'i sgrib pa'o zhes sngon gyi slob dpon kha cig gis bstan pa las kyang don gyis na 'dir 'gyur ro/ /sa rnams kyi mi mthun pa'i phyogs bye brag can 'di ni bdag gi sa la 'jug pa las/yan lag bcu gcig rdzogs gyur pas/ /rab tu dga' sogs sa bcu gcig /rmongs gnyis gnas ngan len gcig ste/ /mi mthun phyogs de tha dad do/ /zhes bshad pa'i lugs kyis 'phags pa dgongs pa nges par 'grel pa zhes bya ba theg pa chen po'i lung gis bshad pa'o//sa de dag thob pa'i rtags ni rmi lam gyi rnam pa las shes par bya'o/ /de ltar na rmi lam dro bar gyur pa'i tshe na med de der gnyid la sogs pa'i sgrib pa lnga zad pa'i phyir ro/ /de ltar na ji ltar de dag gi rtags rmi lam du nges par 'gyur zhe na/de ni bden mod kyi 'on kyang gnyid de ni rnam pa gnyis te/ rang dbang med pa nyon mongs pa'i bdag nyid dang / de las bzlog pa nyid do/ /sbyor ba'i lam nyid du dang po bcom yang ched du byin gyis brlabs pas lus rgyas par byed pa dge bar bgrang ba'i gnyid ni sa de dang de dag la yang nges par yod pas na 'di la nyes pa med do//gzhan dag ni glo bur ba'i shes pa'i snang ba rmi lam lta bur byung ba ni sa de dang de dag la chos thams cad rmi lam ltar rtogs pa'i phyir rmi lam gyi ming gis bstan to zhes zer te/ 'dir lung dang 'gal bar bsgrubs pas ci zhig bya/lung gi tshig 'di dgos pa med par sgra gzhan gyis ston par mi mdzad do/ /de la mtshan ma rnams ni sa dang po la stong gsum gyi stong chen po'i 'jig rten gyi khams gter bye ba khrag khrig brgya stong gis yongs su gang bar mthong ba'o/ /sa gnyis pa la ni stong gsum gyi stong chen po'i 'jig rten gyi khams gang yin pa lag mthil lta bur gyur pa la rin po che bye ba khrag khrig brgya stong du mas legs par brgyan par mthong ba'o//sa gsum pa la ni bdag nyid dpa' zhing lag cha dang go cha sra ba thogs nas phas kyi rgol ba thams cad 'dul bar mthong ba'o//sa bzhi pa la ni phyogs bzhi nas rlung gi dkyil 'khor bzhis thams cad dang ldan pa'i dkyil 'khor chen po la me tog sna tshogs kyis mngon par 'thor bar mthong ba'o/ /sa lnga pa la ni rgyan thams cad kyis brgyan pa'i bud med kyi mgo la me tog tsam pa ka'i phreng ba 'dogs par mthong ba'o//sa drug pa la ni them skas bzhi dang ldan pa'i rdzing gser gyi bye ma bdal ba dngas shing rnyog pa med pa la chu yan lag brgyad dang ldan pas yongs su gang ba me tog ut+pal dang / ku mu da dang / pad ma dkar pos brgyan pa'i chu mthong nas de la bdag nyid rtse dga' yongs su longs spyod par mthong ngo //sa bdun pa la ni ngos g.yas g.yon gnyis na sems can dmyal ba'i g.yang sa mthong ste/ bdag nyid ma smas ma nyams par de nas slar ldog par mthong ba'o/ /sa brgyad pa la ni phrag pa gnyis na ri dwags kyi rgyal po seng ge ral pa can cod pan thogs pa gcan gzan phra mo thams cad skrag par byed cing gnas par mthong ba'o//sa dgu pa la ni 'khor los sgyur ba'i rgyal por mthong ste skye bo bye ba khrag khrig brgya stong du mas yongs su bskor cing mdun gyis bltas te mgo bo'i steng na rin po che rnam pa sna tshogs pas spras pa'i gdugs dkar po 'dzin pa mthong ba'o//sa bcu pa la ni de bzhin gshegs pa'i sku mthong ste/ sku mdog gser lta bu 'od 'dom gang ba tshangs pa bye ba khrag khrig brgya stong du mas yongs su bskor cing mdun gyis bltas nas chos ston par mthong ngo zhes bya ba ste/'di ni bdag gis 'phags pa blo gros mi zad pas zhus pa theg pa chen po'i mdo las gsungs pa rnams bsdus te bkod pa'o/ /gang gis gnas skabs ma yin par mtshan ma 'di dag mthong bar gyur pa ni sngags kyi mthu 'am/ bdud kyi byin gyi rlabs yin par shes par bya'o//sa 'di dag gi 'bras bu ni sangs rgyas kyis 'od byed pa nyid yin la/ de la gzhan du yang sa phyi ma phyi ma rnams ni de las snga ma snga mar gyur pa rnams kyi 'bras bur rig par bya'o/ /nyi ma la sogs pa las skyes pa dang zhes pa ni ji ltar mngon par 'byung ba'i mdo las nyi ma las skyes pa dang bu ram shing pa'i sngon byung ba 'phags pa maud gal gyi bus shAkya rnams la bshad pa lta bu ste/ma'i mngal du ma btsas pas na dang po'i rigs btsun par grags pa'o/ /gzhan dag ni nyi ma dang gser dang nor bu la sogs pa'i 'od lta bu'i sku mdog can du skyes pa zhes 'dod cing de ltar byas nas/khyod sku gser mdog 'od gsal ba'i/ /tshad ni dmigs su ma mchis te/ /skad cig mdog gser btsod ka dang / /myur bar shel 'od 'dra bar gda'/ /zhes gsungs pa la sogs pa'i mdo'i tshig rnams kyang legs par drangs par 'gyur ro zhes zer ro//smon lam shes pas gnas pa zhes bya ba ni/ da dung ngo bo nyid kyi byang chub chen po ma thob tu zin kyang smon lam gyi mthus ni dga' ldan gyi gnas nas babs pa la sogs pa'i mdzad pa bcu gnyis kyis mngon par rdzogs par 'tshang rgya ba'i sbyor ba shes pas gnas pa'o//de lta na 'phags pa sa bcu pa'i le'u las/ smon lam gyi mthus ni sa rab tu dga' ba la yang mngon par rdzogs par 'tshang rgya bar gsungs pas de dag kyang ji ltar na sangs rgyas kyi sar mi bgrang zhe na/ de ni bden mod kyi 'on kyang sa de dang de'i mngon par rdzogs par 'tshang rgya ba ni rab tu nyung ba sngar bstan pa'i tshul gyis brgya la sogs pas dman pa'i phyir 'di dang ga la zhig mnyam/gnyen po'i tshogs zhes bya ba ni 'ga' zhig logs na yod par rtog pa srid pa dgag pa'i phyir gzung 'dzin gyi rnam par rtog pa mi mthun pa'i phyogs kyi gnyen po ni mthong ba dang bsgom pa'i lam gnyis kho na gnyen po zhes bya ba 'di las gzhan ni 'dir mi btsal lo zhes bstan pa'i phyir bar skabs kyi tshigs su bcad pa gcig gis de bstan to//de ltar sngar tshogs kyi sgrub pa ni bsgom pa'i lam du bstan pa yin na/mthong ba'i lam 'dir ci zhig 'brel zhe na/ de ltar sgrub pa bzhi lam bzhir bstan pa ni re zhig shas che ba'i dbang du byas kyi/ de dag re re yang thams cad du mi 'gro ba ni ma yin pas na nyes pa med do/ /gzhan dag ni 'dir gnyen por bgrang ba ni bsgom pa'i lam yin mod kyi/mthong ba'i lam yang spyir gnyen po yin par zhar la bstan to zhes zer ro/ /gnas skabs kyi khyad par zhes bya ba ni lam de dag la yang mnyam par gzhag pa'i gnas skabs na gnyen po'i ming thob kyi/ mthong ba'i lam gyi skad cig ma brgyad pa lta bu ni kun rdzob kyi bden pa la dmigs pa brgyad pas gzung ba dang 'dzin pa'i rnam par rtog pa'i gnyen por mi 'gyur te/de ltar na 'phags pa rnam par grol ba'i sde'i zhal snga nas mthong ba'i lam gyi skad cig ma brgyad pa la byang chub sems dpa'i dgongs pa mtha' yas mdzad pa yin te/gzhan du na skad cig ma dgu pa la sems can gyi khams la ltos pa med pa'i 'gog par ltung bar 'gyur ro zhes gsungs so/ /de bzhin du bsgom pa'i lam yang zag pa med pa mngon par bsgrub pa'i mtshan nyid kyi gnas skabs kho na gnyen por gzhag go/ / ji skad du bshad pa'i rnam pa thams cad mkhyen pa nyid dang zhes bya ba la/ ji skad bshad pa ni gnyen po'i tshogs kyi mthar thug pa'i gnas skabs dang po 'dir ji skad bshad pa rnams so/ /rnam pa thams cad mkhyen pa nyid ni bdun pa la sogs pa dang nges par 'byed pa'i cha dang mthun pa la sogs pa ni 'di'i rgyu yin pas de skad ces bya zhing /kha cig ni 'di nyid kyi dngos po ste sems bskyed pa bcu dgu pa la sogs pa'o/ /de ltar de dag ma lus pa sngar sbyangs pa dang phyis 'thob pa la dmigs nas skad cig ma gcig gis 'byung bas na nges par 'byung ba ste tshul 'di ni rnam pa brgyad car la sbyar ro//gzhan dag ni tshe dang ldan pa shA ri'i bu sbyin pa'i pha rol tu phyin pa ni 'jig rten pa yang yod/ 'jig rten las 'das pa yang yod ces bya ba la sogs pa'i mdo'i tshig gis ji skad bshad pa khungs su byas te/ rnam pa de la rnam pa thams cad mkhyen pa zhes bya ba 'di ci zhe na/kha cig ni bden pa rnam pa bzhi la dmigs pa'i ye shes skad cig ma bcu drug gis bsdus par 'dod do/ /gzhan dag ni chos thams cad ngo bo nyid med pa dang / ma skyes pa dang / ma 'gags pa dang / gzod ma nas zhi ba dang /rang bzhin gyis mya ngan las 'das pa'i rnam pa thams cad mkhyen pas bsdus par 'dod do/ /kha cig ni sangs rgyas kyi sa 'dir ni gnyen po dang mi mthun pa'i phyogs gnyis kyi char dbye ba med pas na mkhyen pa dang mi mkhyen pa dang / dag pa dang / bzang ba dang /ngan cing mi gtsang ba la sogs pa'i mkhyen pa kun rdzob pa mi mngar zin kyang / yid bzhin gyi nor bu la sogs pa ltar mi rtog bzhin du 'gro ba rnams kyis mngon par 'dod pa 'grub pas na gzhan gyi shes pa'i snang ba'i dbang tsam las de rnam pa thams cad mkhyen par brjod do zhes zer te/mkha' lding grub pa ji lta bur/ /mchod sdong bsgrubs nas 'das gyur nas/ /de 'das yun ring lon na yang / /dug la sogs pa sel ba ltar/ /zhes bya ba la sogs pa smra bar byed do/ /yang gzhan dag ni nyon mongs pa dang / shes bya dang bag chags kyi sgrib pa ma lus pa spangs pas na/mi shes pa dang bral ba'i thob pa'i 'bras bu lag mthil gyi shing tog ltar ma lus pa sgyu ma ltar bkra ba'i ye shes rnam pa thams cad mkhyen pa ni sgra ji bzhin par nges par khas blang ngo zhes zer ro/ /yang gzhan dag ni shes bya'i mchog ni kun gzhi rnam par shes pa nyid yin te de'i dbang du byas te/shes bya'i gnas dang mtshan nyid la sogs pa bcu mkhyen pas na thams cad mkhyen pa'o zhes gsungs par 'dod do/ /'dir yang yang dag par rdzogs pa'i sangs rgyas la snang ba dang bcas pa'i ye shes de mnga' 'am ci ste ma yin zhes pa las gyur par shes par bya ste/kha cig ni snang ba dang bcas pa'i ye shes de mnga' bar gyur pa'i tshe gzung ba dang 'dzin pa'i nyes par 'gyur bas na/ ye shes rnam pa med pa kun rdzob pa tsam zhig ni rang rig par 'gyur ba ste 'di tsam zhig go zhes sngar bstan pa'i phyogs gsum pa 'dod do//gzhan dag ni bskal pa du mar gzung ba dang 'dzin pa brdzun pa'i ngo bo nyid du goms par gyur pa de la snang ba rnams gzung ba dang 'dzin par ji ltar 'gyur te ji skad du/ /'di ltar mthong dang thos pa kun/ 'di la dgag par bya med kyi//gang phyir sdug bsngal rgyur 'gyur ba/ /bden pa nyid du rtog pa bzlog /ces bshad pas na/ nges par snang ba dang bcas pa'i ye shes med na ji ltar rnam pa thams cad mkhyen par brjod ces zer ro/ /la la ni rang bzhin gyis 'od gsal ba tsam la dmigs nas brjod du med pa'i rang bzhin du yod ces 'dod pas phyogs gzhan dag tu gyur pa'o//ha cang spros pas ci zhig bya ste 'di ni nye bar gzhag pa'o/ /nges par 'byung ba'i sgrub pa lhur blang bar bya ste dang po ni sems bskyed pa las mngon par shes pa la sogs pa lnga bstan te/ de nas ni 'dir bsgrub pa rnam pa brgyad do//de nas ni skabs bzhi par rnam pa dag gi nang du spong ba'i lam ste ma lus par spong zhes bya ba'i don bsdu'o/ /de nas ni skabs lnga par dmigs pa dang dbang dang rnam pa dang log par rtog pa rnams kyis lhur blangs te bstan to/ /de nas ni skabs bdun par mtshan nyid rnam pa bzhir phye ste brjod do//de nas ni yang skabs brgyad par chos kyi sku'i phrin las nyi shu rtsa bdun las/ byang chub yan lag las rnams ni/ /chud mi za dang bden mthong dang / /phyin ci log ni spong ba dang / /de gzhi med pa'i tshul dang ni/ / rnam par byang dang tshogs dang ni/ /'dus byas 'dus ma byas pa la/ /tha dad yongs su mi shes dang / /zhes rnam pa brgyad kyis bstan te/ 'di dag so so dang bsdus pas khong du chud par bya ba ni 'dir man ngag go/ /thams cad mi dmigs pa nyid las khyad par du 'phags pa'i chos gzhan med pa'i phyir mi dmigs pa'i rang bzhin kho nas yongs su sbyong bar byed ces sam/de ltar byos shig ces tshig zur gyis na gdams pa ste/ tshig 'di ni byung ba dang 'byung bar 'gyur ba ril la sbyar bar shes par bya'o/ /shes rab kyi pha rol tu phyin pa ni sngar bstan to//man ngag gi bstan bcos zhes bya ba ni shes par byed pa'i yul myur du khong du chud par byed pa'i gzhung lugs so/ /a b+hi ni mngon du phyogs pas so/ /saM zhes bya ba ni yang dag par nges pa nyid du brjod pa'o/ /i ya ni 'gro ba'i don to/ / des na mngon du phyogs pas yang dag pa ji lta bar nges par 'gro bas ye shes rtogs pa'i lam 'di ni mngon par rtogs pa'o/ /gzhan dag ni mngon du phyogs par gyur na dus ji lta ba bzhin du de las mi 'da' bar 'bras bu 'byin pas na mngon du phyogs pa'i dus can zhes 'chad par byed do//rgyan gyi don ni bshad zin to/ /skabs ni le'u zhes bya ba'i don to/ /dang po ni gnyis pa la ltos pa'am/ yang na mchog gi don te/ rnam pa thams cad mkhyen pa ni skabs ma lus pa'i lus yin pa'i phyir ro/ /'grel pa zhes bya ba ni don tsam gyi'o//skabs dang po'i 'grel bshad rdzogs so// //de ltar skabs dang po'i tshig le'ur byas pa rnams rnam par bkrol nas/ da ni skabs gnyis pa dgrol ba'i phyir/ rnam pa thams cad mkhyen pa nyid rtogs pa ni lam shes pa nyid med na med pas lam shes pa nyid gsungs te zhes bya ba la sogs pa gsungs te/lam shes pa nyid ni de'i rgyu yin pa'i phyir zhes bya bar dgongs so/ /nga rgyal bcom pa'i rgyud kho na la skye'o zhes shes par bya ba'i phyir zhes bya ba la/ 'dir nga rgyal dang zhum pa gnyi ga bsal ba la lam skye'i gang yang rung ba cig dang ldan pa la ma yin pa ni mngon par 'byung ba'i mdo las rgyal po zas gtsang ma'i lam ji ltar bskyed pa'i dbang du byas pa lta bu'o//'dir lha rnams zhum pa med cing nga rgyal dang ldan pas de spang bar mdzad pa'o/ /tshig zur gyis rten brjod pa yin no zhes bya ba ni mdo las zhes bya ba'i don te/tshig le'ur byas pa las ni/ lha rnams rung bar bya ba'i phyir/ /zhes smos pas dngos kho nar bstan to/ /mdo las ni dngos su bcom ldan 'das kyis mthu che ba bsam gyis mi khyab pa bcu las 'od bsam gyis mi khyab pa bstan cing zur gyis rten bstan pa'o zhes bya bar gnas so//'dod chags dang bral ba 'phags pa nyan thos dang rang sangs rgyas rnams kyis ni zhi ba'i dbyings nas langs te'o/ /cig shos byang chub sems dpa' rnams kyis ni da lta nyid nas so/ /nyon mongs pa rnam pa thams cad du spangs pa ma yin pas zhes bya ba ni byang chub sems dpa' rnams kyis ni dngos su'o//sangs rgyas byang chub tu thugs bskyed pa las 'khrungs pa rnams kyang shAkya'i bu mo sa 'tsho ma bdag gir mdzad pa la sogs pa'i thabs la mkhas pas 'gro ba'i don du nyon mongs pa ma spangs pa lta bur ston pas na 'di 'thad par 'gyur ro//byang chub sems dpa' de ltar yongs su shes par bya'o zhes bya ba ni ched du 'am 'di logs su bsgom pa'i 'thad pa ni mi dgos kyi/ rang gi lam la de dag gi yon tan rdzogs par shes par bya ba'i don te/ shA ri'i bu nyan thos dang rang sangs rgyas kyi shes pa dang spong ba gang yin pa de ni byang chub sems dpa' chen po mi skye ba'i chos la bzod pa thob pa'o zhes gsungs pas so//de la mi skye ba'i chos la bzod pa thob pa yang gnyis te/ chog par 'dzin pa'i rnam par mi rtog pa dang sa mi g.yo ba'o/ / tshad mar gyur pa'i skyes bus ma gzigs pa'i rgyu 'thad pa dag gis zhes bya ba 'dis ni lung gi tshad ma ston te/ nga byang chub kyi snying po la 'dug pas ni chos gang yang skye ba'am 'gag pa ma mthong ngo zhes bya ba la sogs pa'i gzhung gis so/ /bden pa'i dmigs pa la nges par 'byed pa'i cha dang mthun pa skye'o zhes bya ba yin no zhes bya ba ni ji ltar skyes bu la bsnun pa'i mtshon cha ni dang por go cha phugs nas de'i 'og tu 'dod pa'i skyes bu la phigs pa'i dpes so//lung las nyan thos rnams ni gzhan gyis bstan pa la ltos nas rang gi byang chub rtogs par 'gyur la zhes bya ba ni/ji skad du 'phags pa byang chub sems dpa'i sde snod las/ nyan thos rnams kyi rnam grol sgra phyir 'gro/ /zhes gsungs pa lta bu ste/ don 'di nyid kyi dbang gis slob ma zhes 'di dag brjod de nges par slob dpon dgos pas so/ /gzhan dag kyang brjod pa dang bcas pa'i chos bstan pas dge ba la 'jug par byed do zhes 'byung ngo zhes bya ba ni 'di dag thos pa sgrogs par byed pas na thos sgrogs so zhes bya ba lta bu'o//sngon zhes bya ba ni bskal pa brgya'i bar du ste/ /bse ru bskal pa brgya yi rgyus/ /zhes bshad pas so/ / rang gis byang chub rtogs par 'gyur te zhes bya ba ni rkyen gyi mthus te rang rgyal ba rnams ni rkyen gyi 'du shes can zhes gsungs pas so/ /spangs pa ni gzung ba'i rnam par gyur pa phyi rol gyi yul rnams rang bzhin med par shes pa ni me dang chu la sogs pa yang dang yang du 'jig pas rtogs par sla ba'i phyir ro//'di tsam las ni chos kyi phyogs gcig la bdag med par rtogs par bstan to/ /btags pa'i chos nyid mi 'gal bar rab tu ston pa zhes bya ba ni ji ltar btags pa yang chos kyi dbyings las rab tu ma 'das pa'i phyir ro/ /tshig le'ur byas pa'i don nye bar mtshon pa lhur len pa'i gzhung gis zhes bya ba ni de las de dag rnam pa'o zhes ma smos kyi/lam shes nyid kyis skad cig ma/ /zhes smos pas na/ mthong ba'i lam de la rnam pa ji snyed yod pa'i don ni ma bshad kyi/ mthong ba'i lam gyi skad cig ma bcu drug tshig le'ur byas par nye bar mtshon pa nyi tsher mdzad par zad de/rnam pa'i dbye ba ni rnam pa kun mngon par rdzogs pa'i skabs su ston pa'i phyir ro snyam du sems te/ bshad pa ni sngar/ dmigs pa dang ni rnam pa dang / /zhes bya ba la sogs pa'o/ /ma bshad pa ni 'og nyid nas/ /gzugs rtag ma yin mi rtag min//zhes bya ba la sogs pa'i 'chad pa rnams so/ /de bzhin du blta bar bya'o zhes pa ni skad cig ma'i don tsam du shes par bya'o zhes so/ /bsgom pa'i go rims la sogs pa ma bstan pa'i phyir zhes bya ba ni/ gal te de dag zer ba ltar skad cig ma'i khyad par tsam du zad na de'i tshe mthong ba'i lam rim gyis bsgom pa'i rim pa ye ma bstan par 'gyur ba la sogs pa zhes bya ba'i sgras bsdus pa mnyam par ma bzhag pa'i dus na yid la bya ba'i rim pa yang ma bstan par 'gyur ro zhes bya ba'i don to//skyon gzhan yang / dmigs pa dang ni rnam pa dang / / zhes bya ba la sogs pa smos pa ni dngos su yang khyed kyi de lung dang 'gal lo zhes bya ba'i don to/ /de ltar na 'di ni rnam par rig pa bcu drug dang che 'bring yin gyi skad cig gi chos ni ma yin no/ /gdul bya brjod par bya ba nyung ba nyid dang zhes bya ba ni bsgom pa'i lam 'di 'byed pa'i rgyu gang yin zhes rtsod pas mang du smra ba dgag pa'am/gdul bya gang dag lam 'di'i byed rgyu la gnas par brjod du rung ba de dag ni ches nyung ste rab tu dkon no zhes bstan pas lam 'di rnyed dka' bar bstan pa'o/ /yang gdul bya rnams 'bras bu la gzhol bar zhugs par bya ba'i phyir zhes bya ba ni 'bras bu ste bsgom pa'i lam gang yin pa la mos pa yid la byed pa la sogs pas der gzhol ba nyid du zhugs par bya ba'i phyir ni dang por byed pa drug po 'di dag der gzhol zhing 'jug par bya'o zhes lam du skye ba'i rgyu bstan pas de dag la gdams pa'o//zag pa dang bcas pa dang zag pa med pa'i bye brag ni rnam par rtog pa dang bcas pa dang de dang bral ba gtsor gyur pa'o//'dir bsdus pa'i don ni mos pa dang bsngo ba dang / rjes su yi rang ba yid la byed pa dag ni dag pa 'jig rten pa'i gnas skabs rjes kyi ye shes kyis sbyor ba yin la/ mngon par bsgrub pa ni mnyam par gzhag pa'i ye shes so//de dag kyang nyan thos la sogs pa la yang ci rigs su ldan pas khyad par can du bsgrub pa ni rnam par dag pa'o/ /gzhan dag gis ni sa dri ma med pa nas ji srid sa bdun pa'i bar du ni bsgom pa'i lam zag pa dang bcas pa rnams yin la/ sa brgyad pa la sogs par ni mngon par bsgrub pa'i bsgom pa'i lam yin te/mi mthun pa'i phyogs kyi gnyen po bsgom pa'i lam thams cad pa dkyus ma gang yin pa ni 'chad par 'gyur ba las/ de ni rgyun chags yin pa'i phyir/ /chung dang 'bring dang chen po dang / /chung ngu'i chung sogs dbye ba yis//de ni rnam pa dgur bzhed do/ /zhes bstan pa yin no/ /rnam par dag pa ni dngos su na bsgom pa'i lam gyi 'bras bu dang rgyu'i dus mngon sum pa dang ring bdag gi bye brag bshad par zad do/ /de ltar ni bsgom pa'i lam gyi yan lag tu gtogs pa bstan cing rnam pa la sogs pa ni gzhan du bstan to zhes zer ro//de dag ji ltar yang rung ste sa re re la yang rnam pa dgu dgur ni brjod do/ /mos pa rnam pa nyi shu rtsa bdun no zhes bya ba la 'dir mos pa'i rgyu ni lung rnam par dag pa dang rigs pa ni lta ba'o/ /'di'i ngo bo nyid ni nges par byas pa'i dngos po la de kho na ltar 'dzin pa'o//'di las the tshom zlog pa ste mos pa dang ldan pa ni rang gi grub pa'i mtha' las gzhan gyis 'phrog par mi nus pas so/ /rnam par dbye ba ji lta bu zhe na/ rang nyid kyi don du yum la mos pa dang / gzhan gyi don du dang / gnyi ga'i don du yum 'di la rab tu mos pa ste/dang po ni 'di ltar 'gro ba ni bdag bde ba 'dod ces gsungs pa'i tshul gyis na/ rang gi ched du 'bad pa med par 'byung ste/ 'khor ba thog ma med pa nas rab tu go mas pas so/ /byang chub sems dpa' rnams ni dang por sems de byung ba na rang dang gzhan mnyam pa'am/ rang dang gzhan du brje ba'i tshul gyis gnyen po sems can mgu bar bya ba'i rim pa dran pa la sogs pas rang gi don du dmigs pa bzlog ste/ de nyid gzhan gyi phyir sbyor bar byed la de'i yang phyi ma'i sems la ni dngos po'i stobs kyis mgul nas sbrel ba ltar rang dang gzhan gnyi ga'i don 'grub par shes pa nges pa can skye'i snga ma ltar re re zhig la zhen pa ni med pas so//kha cig ni 'dir rang gi don dus ring du song ba'i bar du'o/ /sa mi g.yo ba nas brtsams te ni gzhan gyi don te sa de la rang gi don du rab tu zhi ba la gnas pa las gzhan gyi don kho nar slar rdzogs pa'i sangs rgyas rnams kyis bslang ba'i phyir ro//sa bcu pa la ni rang dang gzhan gnyi ga'i don te sa 'di la gnas pa ni rgyu mtshan 'dis na sangs rgyas zhes bstan pa'i phyir ro zhes zer ro/ /grangs nyi shu rtsa bdun du brtsi ba'i phyir ni dang po rang gi don du mos pa chung ngu'i chung ngu'i dbang du byas te ni rgyal ba'i yum 'di glegs bam ji skad du gsungs pa ltar bris te bcangs pa tsam gyis sangs rgyas kyi sku gdung pha rol tu phyin pa drug gi rgyu las byung ba rnams rin po che sna bdun gyi mchod rten du bcug ste mchod pa byas pa bas ches bsod nams mang du 'dzin zhes bya'o//chung ngu'i 'bring ni shes rab kyi pha rol tu phyin pa dang bral na/ byang chub sems dpa' byang chub tu sems bskyed pa la sogs pa'i mthus rdzogs pa'i sangs rgyas su mi 'gyur te/ slar ldog pa'i phyir 'di'i mthu che ba phul du byung ba bstan pa ste/ ji ltar rgyal po gser mdog gi mdo las/bskal pa brgyar spyod pa'i byang chub sems dpa' slar ldog par bstan pa bzhin no/ /chung ngu'i chen po ni gang mya ngan las 'das pa thob par 'dod na 'di la bslabs te/ sangs rgyas rje btsun bzhugs sam grongs kyang rung 'di nyid ston pa'i mdzad pas nye bar gnas pa'i phyir ro zhes 'di'i mthu la mos pa'o//'bring gi chung ngu ni rin po che sna bdun gyi mchod rten gyi dpe nye bar bzung ste'o/ /'bring gi 'bring ni de lta bus 'dzam bu'i gling byur bur bkang ba'i dpes so/ /'bring gi chen po ni de lta bus gling bzhi pa'i 'jig rten gyi khams bkang ba'i dpes so//chen po'i chung ngu ni de nyid kyis stong spyi phud kyi 'jig rten gyi khams dper bzung bas so/ /chen po'i 'bring ni stong gnyis pa bar ma'i 'jig rten gyi khams dper sbyar bas so/ /chen po'i chen po ni stong gsum gyi stong chen po'i 'jig rten gyi khams dper bzung bas so//rang dang gzhan gyi don du mos pa chung ngu'i chung ngu'i dbang du byas te/ stong gsum gyi stong chen po'i 'jig rten gyi khams na sems can ji snyed cig yod pa de dag las sems can re res rin po che sna bdun las byas pa'i mchod rten byas te mchod pa'i dpes bstan to//chung ngu'i 'bring ni lha ma yin gyi g.yul bzlog pa la sogs pa'i mthong ba'i chos kyi yon tan mang pos so/ /chung ngu'i chen po ni shes rab kyi pha rol tu phyin pas ma zin pa'i 'jug pa gang yang pha rol tu phyin pa ma yin par bstan pas so/ /'bring gi chung ngu ni rgyal ba skyed ma 'di 'dzin pa dang 'chang ba la sogs pa dang ldan pa ni nyi tshe ba'i theg pa dang thun mong ma yin pa'i tshul khrims kyi phung po la sogs pa tshad med pa bskyed par bstan pas so//'bring gi 'bring ni shes rab kyi pha rol tu phyin pa dang ldan pa'i chos 'chad pa de la lha'i bu rnams spobs pa nye bar sgrub pa la sogs par bstan pas so//'bring gi chen po ni de la pha ma dang 'phags pa'i skye bo rnams kyis kyang dben zhing yid du 'ong bar bya ba la sogs par gang bstan pa'o/ /chen po'i chung ngu ni spobs pa mi 'phrogs pa nas rnam pa thams cad mkhyen pa nyid kyi sems mi 'phrogs pa'i bar du gang gsungs pas so//chen po'i 'bring ni phyogs bcu'i 'jig rten gyi khams na gang gnas pa'i lha'i bu rnams gnas der dong zhing glegs bam du byas pa 'di bklags pa dang / gzung ba dang / bcang ba dang / kun chub par bya ba'i phyir gnas pas de dag la chos kyi sbyin pa 'di gnas par gyur cig ces sems bskyed par bya'o zhes pa la sogs pa gang gsungs pas so//chen po'i chen po ni der lha'i tshogs thams cad 'ongs pas mos pa rgya chen po dang ldan par 'gyur ba dang / lus las su rung ba thob pa la sogs pa ste mngon par zhen pa rnams bkag pa bstan pas so//gzhan gyi don la mos pa la yang chung ngu'i chung ngu'i dbang du byas te ni glegs bam gzung ba byas pa dang mchod pa tsam gyis mthu bstan pas so/ /chung ngu'i 'bring ni 'dzam bu'i gling de bzhin gshegs pa'i sku gdung gis byur bur bkang ba'i dpes bstan pas so//chung ngu'i chen po ni nam bla na med pa yang dag par rdzogs pa'i byang chub thob pa'i bar du nyan thos la sogs pa'i sa'i 'jigs pa med pa bstan pas so/ /de ltar na sa brgyad pa 'di dag gis 'jigs pa dang bcas par bstan pa ci zhe na/ mos pa rnam pa gsum gyis mtshams brjod pa kho nar zad do//'bring gi chung ngu ni stong gsum gyi stong chen po'i 'jig rten gyi khams de bzhin gshegs pa'i sku gdung gis byur bur bkang ba'i dpes bstan to/ /'bring gi 'bring ni phyogs bcu'i 'jig rten gyi khams na sangs rgyas rnams mdo sde la sogs pa'i chos gsungs pa dang /yang nyan thos la sogs pa gang dag chos 'chad pa de dag ni rgyal ba'i yum 'di las byung bar bstan pas so/ /'bring gi chen po ni yum 'di la brten pa ni rgyal po'i skyes bu'i dpe nye bar bzung bas so/ /chen po'i chung ngu ni phyogs bcu'i 'jig rten gyi khams kyi gang gA'i klung gi bye ma snyed cig de bzhin gshegs pa'i sku gdung gis byur bur bkang ba'i dpes bstan to//chen po'i 'bring ni phyogs bcu'i 'phags pa rnams kyi rtogs pa'i rgyu nyid du 'di bstan pas so/ /chen po'i chen po ni shing rnams lo ma dang dbyibs dang kha dog la sogs pa tha dad kyang grib ma la bye brag med par bstan pa'i dpes brjod do//mos pa rnam pa nyi shu rtsa bdun po chung ngu nas brtsams pa'i rim pa 'dis mi mthun pa'i phyogs ni de las bzlog ste chen po nas bgrang bar shes par bya'o/ /ci 'dir rang kho na'i phyir mos pa la sogs pa brjod dam/yang na rang gi phyir rgyal ba skyed ma kho na la mos pa brjod ce na/ phyogs gnyi ga ltar mi bsam gyi rang la sogs pa'i phyir yum kho na la mos zhes brjod do/ /rang gi don du mos pa na yang gzhan gyi ni med pa yang ma yin la/ lhag ma gzhan gyi don du mos pa na yang rang gi don gyis ga la zhig dben//nyi ga'i phyir mos pa na yang re re la khyab pa ni mi 'dor te/ spyi ni bye brag la khyab pa'i phyir ro/ /bstod pa dang bkur ba dang bsngags pa zhes bya ba la/ 'di dag ni ngag snyan pa ngo bstod kyi rang bzhin ni ma yin gyi/ legs par zhugs pa'i byang chub sems dpa' de la thugs dgyes pas gnas pa kho na bstod pa la sogs pa yin te/'di yang tshogs kyi lam yang dag par sbyong ba'i dus na gnas skabs thams cad du yang 'byung ba ni/ las dang po pa'i sa nyid la byang chub sems dpa'i sdom pa yang dag par len pa grub pa'i dbang du byas te de'i tshe de la dge ba'i phyir/rgyal ba sras dang bcas rnams kyis/ /dge ba'i thugs kyis rtag par yang / /bu sdug 'dra bar dgongs pa yin/ /zhes bshad de/ de rgyas par ni byang chub sems dpa'i sa'i tshul khrims kyi le'ur blta'o/ /tshul 'dis na thams cad du ldan yang bsgom pa'i lam gyi dbang du byas pa ni 'dir yon tan yongs su bstan pa'i phyir te/yams nad 'di rnams zad nas ni/ /zhes bya ba la sogs par bstan pas so/ /de ltar bstan pa'i tshul gyis na rig byed las/ yi ge oM ldan phyed dang bzhi/ /tshad du byas pas snyan pa brjod//'di ni bstod pa smra ba dang / /sgra yi tshangs pa'ang 'di nyid de/ /bkur ba'ang de ltar brjod par bya/ /yi ge dang ldan tshad sngon bzhin/ /snyan smra snyan tshig rig byed de/ /de ni bsngags par 'dod pa'o/ /zhes bya ba smras pa bsal te dgu tshan gsum zhes bya ba ni bstod pa'i dgu tshan dang /bkur ba'i dgu tshan dang / bsngags pa'i dgu tshan te/ de dag kyang rang gi don du mos pa la ni bstod pa'o/ /rang dang gzhan gyi don du mos pa la ni bkur ba'o/ /gzhan gyi don du mos pa ni bsngags pa'o zhes sbyar ro/ /de la dgu tshan dang po'i dang po ni 'jig rten gyi khams gang gA'i klung gi bye ma snyed cig de bzhin gshegs pa'i sku gdung gis bkang ba'i dpes bstan to//gnyis pa ni yum 'di gzhan gyi thad du song ste bstan pa'i che ba brjod pas so/ /gsum pa ni sems can gcig 'bras bu dang po la bzhag pa dang / 'dzam bu'i gling gi sems can de dag gi dge ba bcu'i las kyi lam la bkod pa'i dpes bstan to//bzhi pa ni sems can gcig cig 'bras bu gnyis pa la bkod pa bstan pas so/ /lnga pa ni 'bras bu gsum pa la bkod pas so/ /drug pa ni 'bras bu bzhi pa la bkod pas so/ /bdun pa ni rang byang chub la bkod pas so//brgyad pa ni 'dzam bu'i gling gi sems can ma lus pa 'bras bu dang po la bkod pa bas/ sems can gcig cig yang dag par rdzogs pa'i byang chub la bzhag pa mchog tu bstan pas so/ /dgu pa ni 'dzam bu'i gling gi sems can thams cad 'bras bu gnyis pa la bkod pas zhes bstan pas so//bkur ba'i dgu tshan gyi dang po ni 'dzam bu'i gling gi sems can thams cad 'bras bu gsum pa la bkod pa'i dpes so/ /gnyis pa ni 'bras bu bzhi pa la bkod pas so/ /gsum pa ni rang byang chub la bkod pas so/ /bzhi pa ni 'dzam bu'i gling gi sems can thams cad dge ba bcu'i las kyi lam la bkod pa bas glegs bam du gyur pa zhig gzhan la byin nam/tshul bzhin du yid la byed na bsod nams che bar bstan to/ /lnga pa ni gnyis su med pa'i don ji lta bar bstan pa'i che ba bstan pas so/ /drug pa ni yum 'di ni don dang ldan yi ge dang ldan par bstan pa la yongs su rdzogs par byed pa ni bsod nams mang po dang ldan par bstan pas so//bdun pa ni phyogs bcu'i 'jig rten gyi khams kyi sangs rgyas rnams la ji srid 'tsho'i bar du bde ba'i yo byad thams cad kyis rim gro byas pa bas rgyal ba'i yum 'di yi ge dang don ma nor bar gzhan la bstan pa bsod nams ches mang bar bstan pas so//brgyad pa ni byang chub sems dpa' ltar snang bas bskal pa tshad med grangs med par sbyin pa la sogs pa la spyad pa bas rgyal ba skyed ma phyin ci ma log par gzhan la bstan pa ches bsod nams mang du 'phel bar bstan pas so//dgu pa ni 'dzam bu'i gling la sogs pa phyogs bcu'i phyogs re re zhing gang gA'i klung gi bye ma snyed kyi 'jig rten gyi khams kyi sems can ji snyed yod pa rgyun tu zhugs pa'i 'bras bu la bkod pa bas/ sems can gcig cig phyir mi ldog pa dam pa la bzhag na 'di nyid bsod nams ches mang du 'phel bar gsungs pas so//bsngags pa'i dgu tshan las dang po ni phyir 'ong ba'i dpes so/ /gnyis pa ni phyir mi 'ong ba'i dpes so/ /gsum pa ni dgra bcom pa'i dpes so/ /bzhi pa ni rang byang chub kyi dpes so/ /lnga pa ni 'dzam bu'i gling gi sems can ji snyed cig bla na med pa yang dag par rdzogs pa'i byang chub la bskul ba bas/sems can gcig cig phyir mi ldog pa'i sa la bkod pa bsod nams ches mang ba'i dpes so/ /drug pa ni gling bzhi pa'i sems can dpe de ltar nye bar bzung bas so//bdun pa ni stong spyi phud kyi sems can dpe de ltar nye bar brjod pas so/ /brgyad pa ni stong gnyis pa bar ma dang stong gsum gyi stong chen po'i 'jig rten gyi khams dang phyogs bcu'i 'jig rten gyi khams kyi sems can rnams dpe snga ma dang sbyar bas so/ /dgu pa ni 'dzam bu'i gling nas brtsams te phyogs bcu'i phyogs re re zhing gang gA'i klung gi bye ma snyed kyi 'jig rten gyi khams kyi sems can 'di dag ma lus pa phyir mi ldog pa'i sa la bkod pa bas ni phyir mi ldog pa gang zhig myur du mngon par rdzogs par byang chub par bya ba'i phyir rgyal ba'i yum 'di ston par byed na ches de nyid bsod nams mang bar bstan pas so//bsngo ba yid la byed pa zhes bya ba ni dge ba 'di dag 'di lta bur gyur cig ces yul rnam pa bcu gnyis su sbyar ba dang / tshogs rnam pa bcu gnyis po 'di dag gis bdag chos kyi rgyal por gyur cig ces bsngo bar bya ba bcu gnyis su yang sbyar ro//lhag ma rnams ni go sla'o/ /skabs gnyis pa'i 'grel bshad rdzogs so// //de ltar skabs gnyis pa rnam par bshad par byas nas/ da ni yang skabs gsum pa dgrol ba'i phyir/ gzhi thams cad yongs su shes pa med par lam legs par yongs su shes pa med pas rnam pa thams cad shes pa nyid gsungs te zhes bya ba la sogs pa smos te/'dir gzhi thams cad yongs su shes pa ni mi mthun pa'i phyogs yin te/ de med par lam legs par yongs su shes pa med pas zhes bya ba ni gnyen po mi mthun pa'i phyogs la ltos te/'jog pa nyid du byed na/ gang gi tshe mi mthun pa'i phyogs khong du chud pa med na 'di gang gi gnyen por gyur pa ga la zhig shes par 'gyur zhes dgongs pa ste/ de bas na slob dpon dpal sangs rgyas ye shes kyi zhal snga nas kyang / 'di man chad ni thams cad shes pa nyid kyi mtshan nyid de/byang chub gzhan shes par byas nas spang bar bya dgos pa'i phyir ro zhes bstan to/ /de ltar byas na lnga pa 'di yang rgyu mtshan nyid du bstan to/ /lugs las zhes pa ni 'phags pa klu sgrub kyi bzhed pa las te/ de ni thams cad kyi 'dod par bya ba ba'i phyir lugs so//rten cing 'brel par 'byung ba gang / /zhes pa ni kun rdzob pa rnams so/ /de nyid shes pa ni de'i rang bzhin no/ /khyod ni zhes pa ni rje btsun sangs rgyas so/ /stong par bzhed ces bya ba la/ 'di gang gis stong zhe na/ kun rdzob 'di dag kun rdzob kyis stong pa ste de ltar kun rdzob pa'i rang bzhin ni rtag tu kun rdzob kyis stong pa yin pas cir yang brjod du med pa yin pa'i phyogs 'di las ni 'phags pa nam mkha' mdzod kyi mdo las/spangs pa med pa'i rang bzhin stong pa nyid du bstan pa yang legs par drangs par 'gyur ro/ /de ltar na theg pa chen po 'dir stong pa nyid ni gsum ste/kun brtags pas stong pa nyid dang / gzhan gyi dbang gis stong pa nyid dang / thams cad kyis stong pa nyid ces bya'o/ /ji ltar zhe na/ bdag la sogs pa'i rnam par rtog pa dag rnam par rtog pa ngan pa snying por gyur pa kho na yin gyi de dag ni nam yang mi dmigs pa'i phyir ro//de ltar ngan par rtog pa des stong pa nyid 'di ni 'phags pa nyan thos la sogs pa'i ye shes kyi bye brag 'phags par byed pa rnams so/ /'di ni ma dag par gyur pa'i sems dang sems las byung ba ji snyed pa ni gzhan gyi dbang zhes rnal 'byor spyod pa pa la sogs pas bstan te/des gang zhig stong pa ni dngos po kun rdzob pa rnams te/ ma brtags gcig pu nyams dga' zhing / /skye dang 'jig pa'i chos can yang / /don byed pa dag nus rnams kyi/ /rang bzhin kun rdzob pa yin rtogs/ /zhes bstan pa rnams so/ /de ltar na kye rgyal ba'i sras dag khams gsum pa 'di dag ni sems tsam mo zhes gsungs pa 'di ji ltar drang zhe na/'di ni rigs par 'gyur te tshu rol mthong ba rnams kyis ni kun rdzob pa ga la zhig shes te/ kun rdzob tsam gyis nga dang nga yir 'dzin pa nyi tshes spyod la/ de yang sems tsam kho na yin pa'i phyir ro//de bas na der ni gzhan gyi dbang gis rjes su 'brang bas de skad gsungs so/ /de ltar na 'jig rten gyi khams chags pa'i rgyu bcu brjod pa'i tshe kha cig ni kun rdzob tu bstan to/ /de nyi tsher ma zad pa ni kun rdzob par bstan to/ /de ltar na gzhan gyi dbang gis stong pa nyid 'di ni rang gi mtshan nyid de/byang chub kyi sems dang po rtogs pa nas brtsams te snang ba dang bcas pa'i ye shes kyis 'dzin par byed do/ /sangs rgyas kyi sa kun tu bzang po de la snang ba dang bcas pa'i ye shes mngon par brjod pa la rtog pa ngan pa'i gnas med do/ / zhes bstan pa yang rgyu mtshan 'di nyid du zad de/ gzhan du na phyi rol gyi don ston pa ltar snang na ji ltar gzung ba dang 'dzin pa'i nyes par mi 'gyur/ nang gi shes pa'i bdag nyid ni phyi rol ltar snang zhes bya ba la sogs pa'i phyogs la yang bdag nyid la bdag nyid byed pa la sogs pa'i nyes par 'gyur la sangs rgyas kyi sa kun tu bzang po la yang snang ba'i tshogs rnams bdag nyid kyi ye shes so zhes bya ba la sogs pa don med par rtogs par ji ltar mi 'gyur/de bas na slob dpon skal ldan la sogs pas kun rdzob pa gtsor brjod pa yin la/ gzhan dag gis ni kun rdzob tu brjod pas phyogs re rer 'dzin pa bkag pa kho nar zad pas stong pa nyid gnyis po dbu ma chen po las bstan pa ni re rer yang 'gog par ga la mdzad ces bya bar gnas so//stong pa nyid gsum pa ni gnas skabs gzhan du bstan to/ /thams cad la yod pa ma yin nam zhes bya ba la 'dis dngos po rnams kyi rang bzhin ji lta ba yid la byas te/'jug pa rnams kyi bsam pa bor nas dris par zad ces shes par bya'o/ /lhag ma rnams kyi don ni go bar sla bas bdag gis rnam par ma phye'o/ /skabs gsum pa'i 'grel bshad rdzogs so// //de ltar skabs gsum pa rnam par phye nas/da ni skabs bzhi pa'i tshig le'ur byas pa'i don dgrol bar bya ba'i phyir/ thams cad mkhyen pa nyid gsum yongs su shes pa ni zhes bya ba la sogs pa smos te/ 'dir yongs su shes pa zhes bya ba ni skabs brgyad car bsdus pa'i skabs gsum po 'di dag thos pa dang bsam pa'i rang bzhin gyi shes rab kyis bsdus pa dang rgyas par yongs su shes par byed pas so//ni zhes bya ba ni nges par zhes bya ba'i don to/ /dbang du bya ba'i phyir zhes bya ba ni bsgoms pas rang gi rgyud la bskyed pas rang dbang thob pa'i phyir te/ thos pa dang bsam pa'i shes rab dag ni mi brtan pas na yon tan rang dbang ma yin la/ bsgom pa las ni rang dbang du 'gyur bas so/ /de ltar shes rab gsum car 'brel par bya bar rigs so zhes thugs la bzhag nas ni 'phags pa mi pham pa'i zhal snga nas/ gal te thos pa tsam gyis don//mthong 'gyur bsgom pa don med 'gyur/ /gal te bsgoms pas don mthong 'gyur/ /de tshe thos pa don med 'gyur/ /zhes bya ba la sogs pa gsungs la/ yang gzhan las kyang / thog ma nyan 'dod bla ma bsnyen bkur bzod dang des byas shing / /rang bzhin med pa'i chos la rab rtog bsam gtan bsnyen byed pa//bde gshegs nyid ni rtogs 'gyur 'gro ba rnams bsgom sems tshim byed/ /chos nyid 'di 'dra'i spyod pas myur du bde gshegs thob par 'gyur/ /zhes gsungs so/ /de ltar bsgoms pas 'dris par bya dgos pa'i phyir na thams cad mkhyen pa nyid gsum sgom par byed pas de bstan zhes sbyar ro//de ltar na 'di bstan pas ci zhig bya/ sngar ji ltar thos pa la sogs pa byas pa'i skabs gsum nyid goms par byas pas ci zhig mi nus she na/ de'i phyir yang rnam pa thams cad mkhyen pa nyid dang / lam dang /gzhi zhes pa bsdus pa'i sgo nas sgom par byed ces sbyar te/ 'di skad du bstan par 'gyur te/ thos pa'i shes rab ni ming 'ba' zhig la dmigs pas rab tu spros pa'i bdag nyid can rgyud 'khrug par byed pa'o/ /bsam pa'i shes rab ni ming don dang 'brel cing rnam par rtog pa cung zad bsdus pa'o//bsgom pa'i shes rab ni don 'ba' zhig la dmigs pas shin tu zhi zhing spros pa bsdus pa'i ngo bo nyid yin pas na skabs snga ma dag gcig tu bsdus pa skabs 'di yin pa'i tshul gyis rim pa gzhan du bstan pa yin la/ rtse mo'i mngon par rtogs pa la sogs pa gsum yang bsgom pa gong nas gong du khyad par zhugs pa'i dbang gis rim gyis bsdus te bstan par khong du chud par bya'o//rnam pa kun mngon par rdzogs par rtogs pa zhes bya ba la rnam pa ni bye brag ste/ sangs rgyas kyi sa la sogs pa la chos kyi bye brag ji snyed cig yod par ston pa'o//kun zhes bya ba ni thams cad mkhyen pa nyid gsum car gyi'o/ /gzhan dag thams cad mkhyen pa nyid gsum gyi re re yang rnam pa kun zhes zer ba ni mi 'thad de de ni dngos su ma bstan pas so/ /mngon par zhen pa ni mngon du phyogs te'o/ /sam ni rdzogs par ram/ yang na yang dag par ro//rtogs pas ni bsgoms pas khong du chud pa'o/ /da ni rnam pa zhes bya ba ni du zhig yod/ rnam pa'i rang bzhin ci zhig yin/ rnam pa de dag gang gis gzhag /ces rtog pa la/ gzhi dang ye shes rnam pa ni zhes bya ba la sogs pa bstan pa dgrol ba'i phyir/ rtag pa la sogs par 'dzin pa zhes bya ba la sogs pa smos te/sogs pa smos pa ni bde ba dang / gtsang ba dang / bdag la sogs pa bsdu'o/ /de ltar 'dzin pa nyid mi mthun pa'i phyogs te byis pa rnams srid par 'khyams pa'i rgyu'i gtso bo yang 'di nyid yin pas na 'di ni 'khor ba'i gzhi'am rgyu'o//da ni gzhi de ji ltar gzung ba ltar med par shes pa'i sgo nas gzhi shes par bstan pa ni/ gnyen po'i chos nyid kyi ngo bo nyid mi rtag pa la sogs par dmigs pa dang zhes smos te/ de'i dbang du byas pa'i rnam pa zhes bya ba dang sbyar ro/ /ye shes dang zhes bya ba la/ byang chub sems dpa' rnams kyi lam dang 'bras bu ma lus pa ni ye shes rtogs pa'i gnas skabs la brjod pa tsam du zad pas na ye shes zhes bya ste/ de'i rnam pa zhes bya ba dang zhes kyang sbyar ro/ /rnam pa zhes bya ba la/ de bzhin gshegs pa rnams kyi ye shes ni yon tan smos pa'i sgo nas rnam pa thams cad mkhyen pa zhes bya ba nas 'dir yang rnam pa zhes smos te/rnam pa zhes bya ba ni drug pa mang po'i tshig can nyid do/ /de ltar rnam pa ni gsum zhes bstan nas/ da ni rnam pa'i rang bzhin ci zhig la bya ba de ston pas/ rnam pa nyid du gzhag pa ni mtshan nyid de zhes smos te/dang por re zhig sngar bstan pa ltar rnam pa zhes bya ba ni bye brag du ma la bya'o zhes bstan cing / de'i 'og tu bye brag de dag tha dad par rtogs pa srid pas de dgag par ni/ chos can mtshan gzhi gcig gcig gi mtshan nyid do zhes tha dad pa spong bar byed pa'o//de la thams cad shes pa'i rnam pa nyi shu rtsa bdun ni nyan thos dang rang sangs rgyas rnams kyis gang zag la bdag med par rtogs pa'i ye shes mtshan gzhi de'i mtshan nyid do/ /lam shes pa'i rnam pa sum cu rtsa drug ni byang chub sems dpa' rnams kyi bdag med pa rnam pa gnyi ga rtogs pa'i ye shes chen po'i mtshan gzhir gyur pa de'i mtshan nyid do//rnam pa thams cad mkhyen pa'i rnam pa brgya rtsa bcu po rnams ni sangs rgyas bcom ldan 'das rnams kyi ye shes shes bya'i dkyil 'khor ma lus pa la skad cig gis mkhyen pa'i mtshan gzhi de la brten pa'i mtshan nyid do//sangs rgyas kyi rgyud la ni 'phags pa'i skye bo ma lus pa'i yon tan lhun gyis grub cing 'jug pa zhi bas brten pa'i phyir ro/ /gzhan dag ni rnam pa thams cad mkhyen pa'i rnam pa las thams cad shes pa dang lam shes pas bsdus pa'i rnam pa sum cu rtsa bdun dang /rnam pa sum cu rtsa bzhi po rnams ni theg pa thams cad ni sangs rgyas nyid kyi rgyu yin pa'i phyir rnam pa thams cad mkhyen pa'i rgyu'i rnam par gzhag gi dngos su na thams cad shes pa dang lam shes pa'i rnam par gong du drangs te brtsi'o zhes zer te/ 'dir ni spyir mtshan gzhi dang mtshan nyid sbyar ba'o/ /thams cad shes pa'i skabs su nyan thos rnams kyi rnam pa bcu drug smos pa ni de dag gi mthong ba dang bsgom pa'i lam gyi mtshan nyid do/ /rang sangs rgyas rnams kyi rnam pa bco lnga smos pa ni de dag gi bsgom pa'i lam gyi mtshan nyid do//lam shes pa'i rnam pa sum cu rtsa drug smos pa ni mthong ba dang bsgom pa'i lam gyi mtshan nyid do/ /rnam pa thams cad mkhyen pa'i rnam pa brgya rtsa bcu ni rnam par mi rtog pa'i ye shes chen po gcig pu de'i mtshan nyid do/ /yang skabs der bstan pa'i thams cad shes pa'i rnam pa sum cu rtsa bdun ni tshogs kyi lam dang sbyor ba'i lam dang mthong ba'i lam gyi mtshan gzhi rnams kyi mtshan nyid do//lam shes pa'i rnam pa sum cu rtsa bzhi ni rnam par thar pa brgyad dang / mthar gyis gnas pa'i snyoms par 'jug pa dgu ni mthong ba'i lam dang bsgom pa'i lam gyi mtshan nyid do//byang chub sems dpa' dag ni bden pa mthong nas bsam gtan la sogs pa'i yan lag zad nas de dag la snyoms par 'jug pa'i rigs pas so/ /spong ba'i lam gyi rnam pa ni bar chad med pa'i ting nge 'dzin gyi mtshan nyid do/ /sangs rgyas nyid kyi lam ni 'bras bu'i mtshan nyid do//lhag ma rnams ni sngon bzhin te/ 'di ni mtshan nyid dang mtshan gzhi'i sgo nas rnam pa'i rang bzhin ni mtshan nyid du bstan pa'o/ /gal te rnam pa'i rang bzhin mtshan nyid yin na 'di dag bstan pa'i dgos pa ni ci zhig yin/ 'og nas mtshan nyid dgu bcu rtsa gcig tu ston pa'i mtshan nyid rnams dang 'di la khyad par ci yod ce na/'di bstan pa'i dgos pa ni dang por re zhig byang chub sems dpa' thos pa dang bsam pa'i shes rab dag la goms pa phul du phyin pas rgyal ba'i yum bsgom pa la sogs pa la yon tan bcu bzhi yod par shes par byas pas yid spro bar byas la/ji skad du bstan pa'i yon tan thob par 'dod pas skyon ji skad gsungs pa rnams ji ltar rigs par spangs te/ de nas thams cad mkhyen pa nyid gsum gyi mtshan nyid rnams shes par byas pas de dag las spang ba dang blang ba dang thob par 'gyur bar yid la byas la/thar pa'i cha dang mthun pa'i dge ba'i rtsa ba bskyed de sbyor ba rnam pa nyi shus bstan pa dang bcas pa'i drod la sogs pa rgyud la bskyed la/ de nas rnam pa brgya bdun cu rtsa gsum bsgom par bya'o zhes bya ba'i rim pa 'dis ni rnam pa bstan pas ni mthong ba dang bsgom pa'i lam dag ji ltar bsgom pa gtsor bstan te 'di ni dgos pa'o//de nyid kyis na rnam pa ni bsgom pa'i rim pa yin la/ 'og nas 'chad pa'i mtshan nyid ni rnam pa thams cad mkhyen pa nyid gsum gyi mtshan nyid ji lta bu yin pa tsam zhig ston gyi bsgom pa'i rim pa ni gtsor ma gyur pas khyad par ni yod la/yang bdag gis go sla bar bya ba'i phyir 'dir rnam pa rnams mtshan nyid dang mtshan gzhir phye ste bstan kyang / dang por rim pa ni 'dir rnam pa ji snyed yod pa bstan la/ 'og nas ni mtshan gzhi dang mtshan nyid du ston pas na bstan pa'i lugs tha dad pa'i khyad par yod ces kyang shes par bya'o//de ltar rang bzhin bstan nas da ni rnam pa de dag gang gis bzhag snyam pa la/ ji ltar phye ba des gzhag gi 'di la rgyu mtshan gzhan ni med ces bstan pa'i phyir/ de dag kyang thams cad mkhyen pa nyid gsum gyi bye brag gis zhes bya ba smos te/gsum pa 'di ni rgyu mtshan ston par bya'o/ /de'i phyir rgyu mtshan des na rnam pa gsum kho nar bzhed do zhes bya ba smos te/ 'dis ni grangs nges pa'i rgyu mtshan yang bstan par dgongs pa'o/ /med pa ni rtag pa'i rang bzhin med pas so//mi skye ba ni skad cig gcig las lhag par skye ba med pa ste/ gang skye bas 'phel ba med pa ni byung ma thag tu 'jig pas na chu'i chu bur lta bu'o zhes bstan pa lta bu'o/ /des na med pa ni rtag pa med pas rgyun chad par 'gyur ba'i sdug bsngal nyid do/ /mi skye ba ni 'du byed kyi sdug bsngal skad cig re re 'jig pa'o//dben pa ni byed pa po dang gtsang ba la sogs pas so/ /mi brdzi ba ni bdag med pa'i phyir bdag gi med par rtogs pas mi brdzi ba ste/ de bzhin du gzhan la yang ci rigs su shes par bya ste/ tshig gi don rnams ni go sla bas rnam par ma phye'o//sangs rgyas thams cad kyis bshad pa'i de bzhin nyid ces bya ba ni sangs rgyas byung ba gang yang de bzhin nyid mi ston pa ni 'ga' yang mi srid mod kyi/ 'on kyang sangs rgyas kha cig ni theg pa gcig gis ston to/ /kha cig ni gdul bya dman pa dag rjes su gzung ba'i phyir theg pa gsum gyis ston to//yang kha cig ni theg pa lngas ston pa ni gdul bya skrag pa spang ba'i phyir te/ ji skad du 'phags pa sa'i snying po 'khor lo bcu pa zhes bya ba theg pa chen po'i mdo las kyang / bad kan nad la 'o ma 'thung bcug bzhin/ /de phyir dug tu 'gyur gyi nad mi sel//de bzhin snod min nyan thos theg pa dag /theg chen bshad pa thos na rmongs 'gyur zhing / /chad par lta la ngan song lhung 'gyur bas/ /des ni dbang po brtags te chos bstan to/ /zhes gsungs te rgya cher ni theg pa gcig tu ston pa 'phags pa dam pa'i chos pad ma dkar po'i mdo las shes par bya'o//de ltar sangs rgyas thams cad kyis bshad pa'i de bzhin nyid de ni mya ngan las 'das pa yin te/ mya ngan las 'das pa de gang zhe na/ de bzhin nyid rnam par dag pa'o zhes bstan pa ste/ de'i phyir sangs rgyas kyi chos su bstan to//chos thams cad ni 'dus byas dang / 'dus ma byas rnams so/ /de dag la mnga' sgyur ba ni spang ba dang / mngon du bya ba dang / bstan pa dang bcas pa dang / skyed pa dang / dgag pa dang / bskal pa skad cig tu bya ba dang / skad cig bskal pa tsam du byin gyis brlabs pa la sogs pa'o//de ltar chos thams cad la mnga' sgyur ba de ni rang byung gi mthu'o/ /de la rang byung gang zhe na/ rang byung gi ye shes so/ /de yang gnyis te chos kyi dbyings dang / srid pa tha ma pas thob pa'i rnam pa thams cad mkhyen pa'i ye shes so/ / de la chos kyi dbyings kyi dbang du byas te/ ji skad du 'phags pa sdong po bkod pa las/ 'jig rten khams rnams la la dag /bsam gyis mi khyab tshig gyur kyang / /nam mkha' 'jig par 'gyur ba med/ /rang byung ye shes de bzhin no/ /zhes gsungs so/ /de ji ltar rang byung gi ye shes yin zhe na/rgyu dang rkyen gyi rnam pas ma byas pa'i phyir dang / rnam par mi rtog pa'i ye shes kyi rgyur gyur pa'i phyir ro/ /gzhan dag ni rgyal ba'i yum las/ ye shes kyi yul ni gang yang ma yin no/ /ye shes kyang gang gi yul yang ma yin no/ /ye shes ni yul med pa'o//gal te ye shes la yul yod na mi shes par 'gyur ro/ /zhes gsungs pas/ chos kyi dbyings rnam par dag pa de nyid ye shes su 'dod de/ de ltar byas na shin tu 'dus chos lngas sangs rgyas kyi sa bsdus te zhes gsungs pa la sogs pa dang 'gal bar 'gyur ro//srid pa tha ma pas thams cad mkhyen pa'i ye shes thob pa'i dbang du byas te ni byang chub sems dpa' dus ring du dge ba'i bshes gnyen rab tu mnyes par byas pa'i gdams ngag rab tu bstan pa thos pas tshe de la slob dpon med pa'i ye shes brnyes pas na gzhan la rag ma lus pa'i phyir rang byung ste/ji skad du/ nyer 'gro nga ni sangs rgyas te/ /nga la slob dpon su yang med/ /ces bya ba la sogs pa gsungs pa lta bu'o/ /de la rang byung dang po ni sngar bstan pa'i de bzhin nyid sangs rgyas thams cad kyis gsungs pa'o/ / 'di ni rang byung gnyis pa bzung ste/ bskal pa mang por goms pa'i mthu las rang 'byung yang 'thob la de bzhin du goms pa'i mthu las chos thams cad la dbang sgyur ba ni/ goms te sla bar ma gyur pa'i/ /dngos de gang yang yod ma yin/ /zhes ji skad bshad pa lta bu'o/ / yun de srid du bsod nams bsags pa'i mthu las kyang dbang sgyur bar 'gyur ba ni/ bsod nams ldan pa'i mi yi bsam pa rnams kyang 'grub/ /ces gsungs la/ rgyas par ni gzhon nu bsod nams stobs kyi rtogs pa brjod pa'i mdo las shes par bya'o/ /gzhan yang chos thams cad la mnga' sgyur ba'i gtso bo ni/chos kyi dbyings las ma gtogs pa'i/ /'di ltar chos yod ma yin te/ /zhes bya ba dang / dngos gcig dngos po kun gyi ngo bo nyid/ /dngos kun dngos po gcig gi ngo bo nyid/ /gang gis dngos gcig de bzhin nyid du rtogs/ / de yis dngos kun de bzhin nyid du rtogs/ /zhes bya ba'i rigs pas gang gis chos kyi dbyings shes na de'i mthus ji ltar 'dod pa tsam la rag las pa 'di nyid yin par khong du chud par bya'o/ /de ltar de bzhin nyid la dmigs te rnam pa thams cad mkhyen pa'i ye shes thob pas na dngos po rnams la dbang sgyur ba'i mthu'i sgo nas ni rang byung du bzhag la de nyid sna tshogs ma 'dres par mkhyen pa'i sgo nas ni rnam pa thams cad mngon par rdzogs par byang chub pa'i sangs rgyas nyid kyi rnam pa zhes bya ste khyad par ni 'di tsam du zad do//kha cig ni rang byung gi rgyu dang chos can yin la rnam pa thams cad mngon par rdzogs par byang chub pa ni 'bras bu dang chos can de'i chos nyid do zhes zer zhing de'i lung ni/rigs kyi bu sangs rgyas bcom ldan 'das rnams mngon par rdzogs par sangs rgyas nas ting nge 'dzin sangs rgyas shin tu rnam par sangs rgyas pa zhes bya ba la snyoms par zhugs te/ting nge 'dzin de la snyoms par zhugs ma thag tu sems can rnams ji snyed pa de snyed kyi sku kun tu gnas pa'o/ /sku ji snyed pa de nyid kyi gsung dang thugs kun tu gnas so zhes gsungs pa'o zhes 'dod do/ /nyan thos dang byang chub sems dpa' bye brag gis zhes bya ba la sogs pa la byang chub sems dpa' rnams kyis ni lam thams cad bsgom par bya ba yin zhes sngar bstan pas na/thams cad shes pa nyid byang chub sems dpas 'dris par bya ba'i phyir bsgom pa na zag pa dang bcas pa ste/ de dag ni ched du nyon mongs pa mi spong gi zil gyis gnon pa tsam zhig byed pa'i phyir ro//de nyan thos dang rang sangs rgyas rnams kyis bsgom pa'i tshe ni zag pa med pa ste/ de dag ni nyon mongs pa rnams mda' dug can dang 'dra bar spong ba'i phyir ro/ /de ni go rims bzhin du zhes bya ba ni don bstan pa'o//nyon mongs pa shin tu ma spangs pa'i phyir zhes bya ba ni 'od srungs grong khyer chen po'i phyag dar dang ljan ljin dang mi gtsang ba rnams ni bu ram shing gi zhing dang / 'bras kyi zhing dang / til gyi zhing dag la phan par byed do/ /'od srungs de bzhin du byang chub sems dpa' rnams kyi nyon mongs pa yang byang chub la phan par byed do zhes gsungs pa'i dgongs pa mthong nas mi spong ba ste/gzhan yang / thabs chen dag dang ldan pa la/ /nyon mongs byang chub yan lag 'gyur/ /zhes bstan te/ yan lag gi don ni rgyu'i don to/ /zag pa ni nyon mongs pa'i ming gi bye brag ste 'di dag gis khams de dang der zag cing ltung bar byed pas na zag pa ste zag pa ni ltung ba'i ming gi khyad par ro//de bzhin du kun tu sbyor ba dang / 'ching ba dang / bag la nyal ba dang / nye ba'i nyon mongs pa dang / kun nas dkris pa dang /chu bo dang / sbyor ba dang / nye bar len pa dang / mdud pa dang / sgrib pa dang / tha ba dang / dri ma dang / zug rngu dang / lci yang dang / nyes par spyod pa dang / phongs pa dang / yongs su gdung ba dang / 'khrug pa dang / 'thab pa dang / rims nad dang / nags sbyor dang /gags zhes bya ba rnams kyis kyang brjod par bya ba rnams so/ /sbyor ba khyad par can dag gis zhes bya ba la sbyor ba ni nges par 'byed pa'i cha dang mthun pa bzhi'o/ /khyad par can ni nyan thos la sogs pa las khyad par du gyur pa rgyu dang yongs su 'dzin pa la sogs pas khyad par du 'gyur ba'am/yang na sngar thams cad mkhyen pa nyid gsum gyi skabs su sbyor ba bstan pa rnams ni thos pa dang bsam pa'i yul du gyur pas na mchog ma yin la/ 'dir ni bsgom pa'i bya ba byas pas na mchog ces bya bar gdags so/ /'dir yang sbyor ba ni nyi shu zhes bsdus te/bstan pa ni nges par 'byed pa'i cha dang mthun pa bzhi char gyi thun mong du sbyar bar bya ba yin pa'i phyir zhes shes par bya'o/ /tshig gi don ni go sla'o/ /yon tan zhes bya ba la yon tan 'di dag ni las dang po pa'i sa nas brtsams te ldan mod kyi legs par 'byor pa ni drod thob pa yan chad la sbyar bar bya ste/tshig gi don ni go sla bas ma bye'o/ /bar chad byed pa skyon zhes bya ba ni las dang po pa'i sa nas bsgom pa'i lam phal pa'i bar du ldan par gzhag mod kyi/ 'on kyang skyon 'di dag ni phal cher las dang po pa'i sa dang sbyor ba'i lam la rnam par gzhag ste/de ltar na yon tan rim gyis lam gong ma gong ma la ldan la/ skyon ni lam 'og ma 'og ma la ldan par rig par bya'o/ /da ni 'di brjod par bya ste/ 'phags pa nam mkha'i mdzod kyis zhus pa'i mdo las/ bdud kyi las rab tu rig pa ni shes rab kyi pha rol tu phyin pa dang /dge ba'i bshes gnyen gyi man ngag gis bsdus so zhes gsungs pa la shes rab kyi pha rol tu phyin pa'i dbang du byas te ni yongs su 'dzin pa'i skabs dang / skabs 'dir mdo las rgyas par bstan pa khong du chud par bya'o/ /gang lung gzhan las legs par bsdus pa de ni dge ba'i bshes gnyen gyi gdams ngag ste/de ni ji skad du 'phags pa 'jig rten las 'das pa'i le'u las/ kye rgyal ba'i sras bcu po 'di dag ni byang chub sems dpa' rnams kyi bdud de/ bcu gang zhe na/ 'di ltar mngon par chags pa'i phyir phung po'i bdud dang / glags su 'gyur ba'i phyir nyon mongs pa'i bdud dang / sgrib pa'i phyir las kyi bdud dang / slong ba'i phyir sems kyi bdud dang / skyes pa dang bral bar byed pas the tshom gyi bdud dang / g.yo ba dang rlom par 'gyur ba dang bag med par spyod pas lha'i bu'i bdud dang / de la zhen pa'i phyir dge ba'i rtsa ba'i bdud dang /ro myong bar byed pa'i phyir ting nge 'dzin gyi bdud dang / gzugs brnyan gyi phyir dge ba'i bshes gnyen gyi bdud dang / smon lam mngon par mi bsgrub pas/ chos kyi ye shes khong du chud pa'i bdud do/ /kye rgyal ba'i sras bcu po de dag ni byang chub sems dpa' rnams kyi bdud de dag yongs su spang ba'i phyir byang chub sems dpa' brtson par bya ba dag go zhes gsungs pa la/yang de nyid las/ kye rgyal ba'i sras bcu po 'di dag ni byang chub sems dpa' rnams kyi bdud kyi las te/ bcu gang zhe na/ 'di ltar byang chub kyi sems nyams par byed pa'i dge ba'i rtsa ba brtsams pa thams cad ni bdud kyi las so//sems mi mnyam pa'i sbyin pa yongs su gtong ba dang / tshul khrims 'chal ba la yongs su 'khrugs pa dang / ngan sems dang ldan pa yongs su spong ba dang / le lo can yongs su gtong ba dang /sems 'khrugs pa la brnyas pa dang / shes rab 'chal pa can smod pa ni bdud kyi las so/ /chos la slob dpon gyi dpe mkhyud byed pa dang / bcab pa dang / chos kyi snod la khyad du gsod pa dang / zang zing dang 'brel par chos ston pa ni bdud kyi las so//snod ma yin pa la chos rgya chen po ston pa ni bdud kyi las so/ /pha rol tu phyin pa rnams mi thos pa dang thos nas log par 'jug pa dang / log par zhugs nas le lo byed pa dang / le lo byas nas sems zhum par byed pa dang / sems zhum par gyur nas byang chub kyi lam yangs pa dang ldan pa'i sems dang sems las byung ba'i chos mi 'byung ba ni bdud kyi las so//sdig pa'i grogs po la brten pa dang / dge ba'i bshes gnyen yongs su spong ba dang / nyan thos dang rang sangs rgyas kyi theg pa 'dod pa dang /skye ba'i skye mched la mngon par mi dga' ba dang / mya ngan las 'das pa dang / 'dod chags dang bral ba dang / sems nye bar zhi ba ni bdud kyi las so/ /byang chub sems dpa' la zhe sdang ba'i bsam pa dang / mi snyan pa brjod pa dang / thob pa'i gegs byed pa dang /'khrul pa'i skyon tshol ba dang / mi bde ba'i mig gis lta ba ni bdud kyi las so/ /dam pa'i chos spong ba dang / ma thos pa'i mdo sde thos nas smod pa dang / chos smra ba gzhan gyis bshad pa nyan par mi dga' zhing brnyas te/ khyad du gsod pa dang / bdag bstod pa dang gzhan smod pa ni bdud kyi las so//'jig rten rgyang pan pa tshol zhing yi ge sna tshogs dang / 'bru sna tshogs su rang bzor byas pa'i rang bzo la dga' ba dang / nyan thos dang rang sangs rgyas kyi gtam rjes su dran pa dang / zab mo'i gtam 'chab cing sbed pa dang / gtam sna tshogs rnam par brjod pa dang /snod ma yin pa la zab mo'i chos ston pa dang / byang chub kyi lam mi tshol ba dang / lam ngan pa'i rgyud la gnas pa ni bdud kyi las so/ /grol ba dang / rgal ba dang / dbugs phyin pa la brten cing bsnyen pa dang bkur ba dang / rim gro byed kyi ma grol ba dang /ma brgal ba dang / dbugs ma phyin pa la ni mi brten mi bsnyen bkur bar mi byed/ rim gror mi byed yongs su smin par mi byed pa dang / mngon pa'i nga rgyal du lhung ste/ su la'ang mi 'dud cing nga rgyal yongs su 'phel bar byed pa dang / sems can la khong khro ba dang /chos kyi ye shes mi tshol ba dang / ye shes kyi gter mi bsrung ba dang / sems rtag tu bslang ba dang / mgu dka' zhing gsol ba gdab par dka' ba ni bdud kyi las so/ /kye rgyal ba'i sras bcu po 'di dag ni byang chub sems dpa' rnams kyi bdud kyi las te/de dag yongs su spangs shing byang chub sems dpa' rnams sangs rgyas kyi chos tshol bar 'gyur ba dag go zhes gsungs so/ /yang de nyid las/ kye rgyal ba'i sras bcu po 'di dag ni byang chub sems dpa'i bdud kyi byin gyi rlabs te/ bcu gang zhe na/ 'di ltar sems zhum par gyur pa ni bdud kyi byin gyi rlabs so//bsam pa 'khrugs pa ni bdud kyi byin gyi rlabs so/ /rgya chung ngus mgu ba ni bdud kyi byin gyi rlabs so/ /gcig la mi bzod pa ni bdud kyi byin gyi rlabs so/ /smon lam las lhag par mi dmigs pa ni bdud kyi byin gyi rlabs so//nyon mongs pa rnam par bzlog pa dang zhi ba 'dod pa ni bdud kyi byin gyi rlabs so/ /'khor ba'i rgyun gcod pa ni bdud kyi byin gyi rlabs so/ /spyod pa las phyir bzlog pa ni bdud kyi byin gyi rlabs so/ /sems can yongs su smin par mi byed pa ni bdud kyi byin gyi rlabs so//chos la the tshom za zhing dam pa'i chos spong ba ni bdud kyi byin gyi rlabs so/ /kye rgyal ba'i sras bcu po de dag ni bdud kyi byin gyi rlabs te/ de dag yongs su spangs shing byang chub sems dpa' rnams kyi byin gyi rlabs bla na med pa thob par 'gyur ba dag go zhes gsungs so//yang 'phags pa 'jam dpal rnam par 'phrul pa'i mdo las kyang / lha'i bu nyi shu po 'di dag ni byang chub sems dpa' rnams kyi bdud kyi las yang dag phul nyi shu yin no/ /nyi shu gang zhe na/ 'di lta ste/ rnal 'byor spyod pa pa rnam par grol ba 'dod cing 'khor bas skrag pa rnams la bsnyen pa dang brten pa dang bsnyen bkur byed pa ni bdud kyi las so//stong pa nyid la so sor rtog cing sems can yal bar 'dor ba yang bdud kyi las so/ /'dus ma byas la so sor rtog cing 'dus byas kyi dge ba'i rtsa bas yongs su skyo ba yang bdud kyi las so/ / bsam gtan bskyed cing bsam gtan las rnam par ldog pa tshol ba yang bdud kyi las so/ /chos ston kyang chos nyan pa rnams la snying rje chen po mi bskyed pa yang bdud kyi las so/ /yon tan dang ldan pa dang sbyin gnas tshol zhing tshul khrims 'chal pa rnams la khong khro ba yang bdud kyi las so//nyan thos dang rang sangs rgyas kyi gtam ston cing theg pa chen po'i gtam 'chab pa yang bdud kyi las so/ /zab mo'i gtam 'chab cing gtam sna tshogs su ston pa yang bdud kyi las so/ /byang chub sems dpa' lam shes kyang shes rab kyi pha rol tu phyin pa'i lam yongs su mi tshol ba yang bdud kyi las so//rab tu brtson pa'i bsngags pa brjod kyang sems can mi brtson pa rnams mngon par mi sbyor ba yang bdud kyi las so/ /dge ba'i rtsa ba sogs kyang byang chub kyi sems mngon du mi byed pa yang bdud kyi las so//lhag mthong gi rnal 'byor dang ldan par gnas kyang sems can rnams lhag mthong yang dag par 'dzin du mi 'jug pa yang bdud kyi las so/ /nyon mongs pa ma lus pa zad pa tshol zhing 'khor ba'i rgyun gyi nyon mongs pa rnams la smod pa yang bdud kyi las so//shes rab kyis rnam par dpyod cing snying rje chen po la dmigs pa mi 'dzin pa yang bdud kyi las so/ /thabs dang mi ldan par dge ba spyod pa thams cad kyang bdud kyi las so/ /byang chub sems dpa'i sde snod mi tshol gyi 'jig rten rgyang pan pa'i gsang tshig 'dzin pa yang bdud kyi las so//mang du thos kyang gzhan gyis shes kyi dogs te chos la slob dpon gyis dpe mkhyud byed pa yang bdud kyi las so/ /'jig rten pa'i dgos pa zhal ta byed cing mang du thos pa mi tshol ba yang bdud kyi las so/ /byang chub sems dpa' chos smra bar theg pa chen po la yang dag par zhugs pa skal ba mnyam pa rnams mi bsnyen bsnyen bkur mi byed pa de ni nyan thos dang rang sangs rgyas kyi theg pa la yang dag par zhugs pa skal ba mi mnyam pa la dga' ba'ang bdud kyi las so//gang gi tshe brgya byin nam/ tshangs pa'am/ 'jig rten skyong ba 'am/ rgyal po'am/ tshong dpon nam/ khyim bdag gi longs spyod dang / nor dang / rin po che dang / dbang phyug gi che ba nyid du gyur pa de'i tshe chos kyi che ba nyid dang ldan pa rnams la mi bsnyen bsnyen bkur mi byed pa 'di dag ni lha'i bu byang chub sems dpa' rnams kyi bdud kyi las yang dag phul nyi shu'o zhes gsungs so//yang 'phags pa klu'i rgyal po ma dros pas zhus pa zhes bya ba theg pa chen po'i mdo las kyang bla ma rnams la mi gus pa ni bdud kyi las so/ /bdag brjod pas mngon pa'i nga rgyal byed pa yang bdud kyi las so/ /byang chub sems dpa'i sde snod pha rol tu phyin pa'i lam 'dor ba yang bdud kyi las so//'jig rten pa dang 'jig rten rgyang pan pa'i gsang tshig dang nyan thos dang rang sangs rgyas kyi theg pa dang ldan pa'i mdo kun tu 'dzin pa ni bdud kyi las so/ /thabs dang bral ba'i shes rab dang / shes rab dang bral ba'i thabs dang /thos pa nyung bas bsam gtan rnyed pa dang / mang du thos kyang bdag bstod pa ni bdud kyi las so/ /dge ba'i rtsa ba dang bral bas skye ba yongs su 'dzin pa dang / dge ba'i rtsa ba bsags kyang theg pa chung ngu 'dod pa ni bdud kyi las so/ /dam pa'i chos mi bsrung ba dang /sems can yongs su smin par mi byed pa ni bdud kyi las so/ /byang chub sems dpa' la zhe sdang ba dang / chos smra ba'i bsngags pa mi brjod pa yang bdud kyi las so/ /dge ba'i rtsa ba yang dag par blangs pa 'dor ba dang / mi dge ba'i sems dang du len pa yang bdud kyi las so//dgon pa la gnas kyang 'dod pa dang / gnod sems dang 'tshe ba'i rnam par rtog pa dang / 'khor gyi tshogs kyi nang du zhugs kyang rnyed pa dang bkur stis bskor ba ni bdud kyi las so/ /snod ma yin pa la chos ston pa dang snod du gyur pa khyad du gsod pa yang bdud kyi las so//bdud kyi las 'di lta bu 'di dag khong du ma chud pa dang / thams cad mkhyen pa'i sems la g.yeng ba yang bdud kyi las so zhes bya ba la sogs pa gsungs so/ /mdor bsdus na 'phags pa 'jam dpal rnam par 'phrul pa'i mdo las/ mdor na ji tsam du g.yo ba dang rlom pa dang spros pa dang gnyis su rtog pa de tsam du bdud kyi las so zhes gsungs pa'i don gyi dbang du shes par bya'o//gzhan yang de nyid las lha'i bu byang chub sems dpa'i bdud kyi las ni brtson 'grus las byung bar rig par bya'o zhes gsungs pas rab tu sbyor ba'i dus na bdud kyi las rnams 'byung bar rig par bya'o//de dag rig par gyur nas bzlog par bya ba ni ji skad du 'phags pa 'jig rten las 'das pa'i le'u las/ kye rgyal ba'i sras bcu po 'di dag ni byang chub sems dpa' rnams kyi bdud kyi las bzlog pa ste/bcu gang zhe na/ 'di ltar dge ba'i bshes gnyen bsnyen bkur ba'i phyir nga rgyal thams cad yongs su spong ba ni bdud kyi las bzlog pa'o/ /bdag la mi bstod mi bsngags pa ni bdud kyi las bzlog pa'o/ /sangs rgyas kyi chos zab mo la mos shing mi spong ba ni bdud kyi las bzlog pa'o//thams cad mkhyen pa'i sems yongs su nyams par mi byed pa ni bdud kyi las bzlog pa'o/ /chos zab mo'i tshul la brtson zhing bag yod par gnas pa ni bdud kyi las bzlog pa'o/ /byang chub sems dpa'i sde snod la gnas shing chos thams cad yongs su tshol ba ni bdud kyi las bzlog pa'o//yang dang yang nyan cing yang dag pa'i gtam gyis yongs su mi skyo ba ni bdud kyi las bzlog pa'o/ /'jig rten gyi khams thams cad na bzhugs pa'i de bzhin gshegs pa thams cad la skyabs dang dpung gnyen tshol ba'i 'du shes ni bdud kyi las bzlog pa'o//sgrub pa la sangs rgyas thams cad kyi byin gyi rlabs rjes su dran zhing mos pa yang dag par len pa ni bdud kyi las bzlog pa'o/ /byang chub sems dpa'i grogs thams cad kyi dge ba'i rtsa ba dang mi gnyis par mngon par bsgrub pa ni bdud kyi las bzlog pa'o//kye rgyal ba'i sras bcu po 'di dag ni byang chub sems dpa' rnams kyi bdud kyi las bzlog pa ste/ de dag gis byang chub sems dpa' bdud kyi las thams cad las 'da' bar 'gyur ba dag go zhes gsungs so/ /rang gi gzhung gi tshig gi don ni go sla bas rnam par ma phye'o//da ni byang chub sems dpa' legs par zhugs pa thams cad mkhyen pa nyid gsum gyi bdag nyid las brtsams te/ rgyal ba'i yum 'di'i mtshan nyid ji snyed pa ston par byed pa'i tshig le'ur byas pa rnams dgrol ba'i phyir skyon gyi 'og tu de dag gi mtshan nyid gsungs te zhes sbyar ro//de la de dag gi zhes bya ba ni byang chub sems dpa' sbyor ba po'am/ thams cad mkhyen pa nyid gsum po de dag gis zhes bya'o/ /mtshan nyid ces bya ba ni rang gi mtshan nyid dang rnam par dbye ba'i mtshan nyid do/ /rnam par dbye ba'i mtshan nyid ni bum pa la sogs pa dag dung la sogs pa ma yin pa zhes bya ba la sogs pa dngos po gcig pu yang dpag tu med par ldog pa'i dbang gis brjod pa ste/ji skad du tshad ma rnam 'grel las/ gang phyir dngos kun rang bzhin gyis/ /rang rang ngo bo la gnas phyir/ /mthun dngos gzhan gyi dngos dag las//ldog pa la ni brten pa can/ /zhes bstan cing / chos tshul zab mo rgya mtsho lta bu'i pha rol gzigs/ /zhes bstod pa brjod pa lta bu'o/ /de la slob dpon zla ba grags kyi zhal snga nas ni/ 'di dag ni dgos pa nye bar gyur pa'i dbang dang rnam par rtog pa'i dbang tsam gyis phye bar zad pas na dngos po la mi ldan pas mtshan nyid du mi 'grang ngo zhes 'chad cing /slob dpon gyi zhal snga nas kyang / sngar don gcig tu rab tu sbyor ba la ldog pa la ltos pas nye bar bskyed pa'i tha dad pa'i ngo bor dbyer bzod pa ni ma yin no zhes bstan pa'o/ / gzhan dag ni gal te rigs pa'i lam du 'jug pa zhig na de'i tshe dngos po thams cad kyang sgra'i spyi'i rnam pa ming tsam du zad cing brtags pa tsam zhig snying por gyur pa kho na'o/ /mngon par zhen pa stug po phyi rol gyi don yod pa ltar gnas pa'i dbang du byas pa'i tshe ni yang dag pa'i kun rdzob rnams ni ji snyed du btags pa de snyed kyi nus pa'i mtshan nyid dngos po re re la yang ldan zhes zer ro//rang gi mtshan nyid ni rang gi thun mong ma yin pa'i yan lag me la sogs pa'i tsha ba la sogs pa 'jig rten rnams na rigs pas ma bcom pa'i tshe/ gzhan la mi ltos par don byed par snang ba'i dngos po rags pa rnams so//'dir ni rang bzhin gyi mtshan nyid bzung ngo / /de yang mtshon par byed pa'i mtshan nyid ni shes pa dang / khyad par dang byed pa rnams te/ de la shes pa'i mtshan nyid ni thams cad mkhyen pa nyid gsum gyi tha dad pa gsum char yang rgyal ba'i yum 'di ni de bzhin gshegs pa bskyed pa'o zhes bya ba la sogs pas shes par bya'o//gal te de ltar thams cad mkhyen pa nyid gsum char gyi rgyal ba'i yum gyi bdag nyid kyi che ba shes par byed par gyur na/de'i tshe gzhi thams cad shes par gyur pa kho nas chog pas lam thams cad shes pas ci zhig bya snyam pa la/ shes par byed par mtshungs su zin kyang de dag gi khyad par ni 'di dang 'di lta bu'o zhes ston par byed pa ni khyad par gyi mtshan nyid do/ /khyad par gyi mtshan nyid des don ci zhig byed snyam pa la ni byed pa'i mtshan nyid bstan to//ngo bo nyid mtshon par bya ba'i mtshan nyid ni thams cad mkhyen pa nyid de gsum gyi rang bzhin gzhan khong du chud par bya ba la gtso bor ma gyur pa'i rang bzhin du zad do/ /bsdus pa'i don ni 'di tsam zhig tu zad cing gang dag bdag gis re re nas ma phye ba'i don rnams ni 'phags pa rnam par grol ba'i sde'i zhal snga nas rnam par sbyar ba tshig le'ur byas pa mdo bar ma'i dbang du mdzad pa las rgyas par bstan pa las shes par gyis shig /thar pa'i cha dang mthun pa zhes bya ba la thar pa ni las dang nyon mongs pa ches rags pa mi khom pa brgyad du 'phen par byed pa la sogs pa dang bral ba'i phyir/de las thar pas na drod la sogs pa sbyor ba'i lam yin te/ don 'di ni 'phags pa rnam par grol ba'i zhal snga nas/ de la 'dir thar pa ni bral ba'i khyad par yin la de'i cha la phan pas ni thar pa'i cha dang mthun pa zhes bya'o zhes bstan to//de'i phyir chos mngon pa las/ thar pa bla na med pa yin/ /zhes brjod pa ni 'dir mi sbyar ro/ /de'i cha zhes smos pa ni phyogs gcig tsam gyis phan 'dogs kyi/ dngos su ni thar pa'i cha dang mthun pa thob nas dmigs pa dang rnam pa la sogs pa ji skad du bstan pa'i khyad par can la slob pas drod la sogs pa thob ste/de'i phyir lam spyi dang khyad par dag gi mtshams su rang gi lam ma thob kyang / de'i khongs su bslan pas bstan pa lam 'og ma dag las khyad du zhugs pa'i mtshams sbyor gyi ngo bo dag yod do zhes bshad pa'o//i ya zhes bya ba ni sngar bstan pa bzhin no/ /'di'i dbye ba ni 'phags pa rnam par grol ba'i zhal snga nas chen po dang 'bring dang chung ngu zhes gsungs la lam 'di mtshon par 'gyur ba'i rtags kyang sems mi 'jug pa dang / mi 'gong ba dang yid la 'gyod par 'gyur ba med pa zhes gsungs so/ /gzhan yang lam 'di thos pa dang bsam pa'i rang bzhin yin no zhes kha cig 'chad do/ /gzhan dag ni 'di dag ni thos pa dang bsam pa'i shes rab phal che ba yin gyi bsgom pa'i shes rab kyang med ces nges par mi dgag go zhes 'chad do//'phags pa rnam par grol ba'i zhal snga nas ni thar pa'i cha dang mthun pa'i dge ba'i rtsa ba ni thos pa dang bsam pa'i rang bzhin du bzhed pa'i phyir/ 'di rnams thams cad kyang thos pa dang bsam pa'i rang bzhin can yin par shes par bya ste/ de thog ma kho nar bstan pa la 'jug pa'i rgyu nyid yin pa'i phyir ro zhes brjod cing sbyor ba'i lam du ni de ltar nges par gdags pa mdzad pas so/ /thar pa'i cha dang mthun pa 'di yang phyir mi ldog par rnam par gzhag gam ci ma yin zhe na/ re zhig phyir mi ldog pa ni byang chub las phyir mi ldog pa dang /byang chub khyad par can las phyir mi ldog pa dang / 'jig rten las 'das pa'i sa las phyir mi ldog pa dang / rtsol ba med pa las phyir mi ldog pa dag go/ /de la dang po ni 'phags pa nyan thos rnams dang thun mong du byas pa thar pa'i cha dang mthun pa nas bzod pa'i bar ro//gnyis pa ni theg pa chen po'i drod nas brtsams pa'o/ /gsum pa ni sa dang po'i ngo bo nyid do/ /bzhi pa ni sa mi g.yo ba la'o/ /de ltar na thar pa'i cha dang mthun pa ni theg pa khyad par can gyi byang chub las mi ldog par nges pa ma yin pas na phyir mi ldog pa zhes mi brjod do//theg pa chen po 'dir ni dro bar gyur pa'i dge ba'i rtsa ba rgyud la skyes par gyur pa'i tshe phan chad du byang chub chen po las phyir mi ldog pa ni rtse mo'i mngon par rtogs pa las nyan thos dang rang sangs rgyas kyi sa la rmi lam na yang mi 'dod par ston par 'gyur ro/ / 'o na 'phags pa nyan thos rnams kyi dbang du byas te/ chos mngon pa la sogs par thar pa'i cha dang mthun pa 'di de dag gi phyir mi ldog par gzhag gam ci ste ma yin zhe na/ kha cig na re de dag ni shes rab dang snying rje chung ba dang / sbyangs pa yun thung ba'i dbang gis na thar pa'i cha dang mthun pa'i dge ba'i rtsa ba skyes su zin kyang nges par phyir mi ldog par nges pa med do zhes zer ro//gzhan dag ni de dag gi dbang du byas te/ yang rang gi mngon par 'dod pa'i ched du bsgrub pa'i byang chub las ni slar ldog par mi 'gyur gyi/ dus ring zhig gis de thob pas na ring du thogs pa'i dbang tsam las phyir mi ldog par mi bzhag go zhes zer te/'dir ni phyir ldog pa dang mi ldog pa la brtsams te/ glengs par zad na dus nye ba dang ring ba'i rtsod pa su zhig byed/ de ltar na drod bskyed pa'i byang chub sems dpa' dang nyan thos dbang po rtul zhing nyon mongs pa mang ba la sogs pa mngon par shes pa bul la dka' ba la sogs pa yang phyir mi ldog par 'gyur ba ma yin no//'o na ci zhe na/ rang gi rgyud nges pa'i rgyu mtshan gtso bor mdzad pa zhig na thar pa'i cha dang mthun pa'i dge ba'i rtsa ba 'di yang phyir mi ldog par brjod mod kyi/ rang gi rtogs pa dang 'tsham par gzhan yid ches par byed pa'i yon tan rnams 'di la med pas na de'i phyir dang / rang yang dngos por nges kyang rang nges par byed pa'i rtags bzung sla ba yang med pa'i phyir tha snyad gdags pa'i gzhir ma gyur pas na 'di phyir mi ldog pa'o zhes gang du yang ma gsungs te/'phags pa 'dod chags dang bral bar gyur pa de dag la yang drod la sogs pa'i rtags ci rigs su rang dang gzhan nges par 'byed pa dag 'byung bar shes par bya'o/ /rang gi rgyud la bskyed par mkhas pa zhes bya ba ni gzhan gyi don la dmigs pa rab tu srab pa ste/drod ma rnyed pa'i byang chub sems dpa' rnams ni sems can la dmigs par byed mod kyi/ da dung bdag dang gzhan mnyam pa dang bdag dang gzhan brje bar nus pa ma yin pa'i phyir te/ de'i phyir yang 'di phyir mi ldog pa ga la yin/ rang bzhin gyi dbang du byas pa'i tshe ni rigs dang rkyen gnyi gas byang chub sems dpa' kha cig tshogs kyi lam phal pa'i dus nyid na phyir mi ldog par gyur pas na rang gi rgyud las lung bstan pa gsungs te/'on kyang phyir mi ldog par brjod pas su zhig yid ches byed par nus/ ni zhes bya ba ni nges par bzung ba'o//dbang po'i ngo bo nyid ma yin pa zhes bya ba la/ dbang byed pa'i don gyis dbang por brjod pa yin na/ lam 'dir ni mi mthun pa'i phyogs ma dad pa dang / le lo la sogs pa gzhom par nges par dbang byed par nus pa ma yin te/ res 'ga' mi mthun pa'i phyogs mthu che bar gyur pa'i phyir ro//thams cad kyis bla na med pa'i byang chub 'thob pa ma yin te zhes bya ba la bar chad med par 'thob pa ma yin gyi zhes dgag gi rim gyis ni 'phags pa'i skye bo thams cad sangs rgyas nyid du 'gyur bar sngar bstan pa'i phyir ro/ /de dag nyid dbang po rtul pos rtogs par dka' ba'o zhes bya ba ni/theg pa chen po dbu ma pa dag gis rtogs par dka' bar brjod pa 'di nyid la rnal 'byor spyod pa ba dag ni rigs chad pas sa bon tshig pa lta bu zhes de bzhin gshegs pa'i snying po la skur pa smra bar byed do/ /chos nyid yin pas zhes bya ba ni byed pa po med bzhin du dngos po sgyu ma lta bu rnams kyi nus pa sgyu ma tsam zhig rigs pa'i khur mi theg par de ltar grub par zad de/'di ci'i phyir zhes sus kyang dpyad du ni med ces bya ba'i don to/ /'dis ni 'thad pa bsgrub pa'i rigs pa rtog ge bkag pa'o/ /nges par 'byed pa'i cha dang mthun par 'byung ba zhes bya ba la/'dir nges par 'byed pa'i cha dang mthun pa 'di dag re re la yang chung ngu dang 'bring dang chen po gsum gsum du dbye bar bya ste/ re zhig drod kyi dbang du byas te mnyam pa ni chung ngu'o/ /byams pa dang phan pa dang / khong khro ba med pa dang / rnam par 'tshe ba'i sems med pa'i rnam pa lnga ni 'bring ngo //pha dang ma'i sems dang / spun dang sring mo'i sems dang / bu dang bu mo'i sems dang / bshes dang grogs kyi sems dang / gnyen dang snag gi gnyen mtshams kyi sems rnams ni chen po'o/ /rtse mo'i dbang du byas te ni mi dge ba dang dge ba la grangs bzhin du nyams pa dang /len pa'i sgo nas ldog pa dang zhugs pa'i bdag nyid can de'i sgo nas rnam pa gzhan rnams sdig pa las ldog pa dang / dge ba la gnas pa dag la sbyor ba'i rnam pa gnyis dang zhes bya ba ni rim pa bzhin du chung ngu dang 'bring ngo //gzhan dag nyid de ltar zhugs pa rnams la bsngags pa brjod pa dang mthun par byed pa zhes bya ba ni chen po'o/ /bzod pa'i dbang du byas te ni sbyor ba dang bsngags pa brjod pa dang mthun par byed pa zhes bya ba rnams rim pa bzhin du chung ngu dang 'bring dang chen por sbyar ro/ /'jig rten chos kyi mchog gi dbang du byas te ni smin par byed pa dang /grol bar byed pa'i lam thams cad mkhyen pa nyid gsum gyi dbang du byas pa de dag rim pa bzhin du chung ngu dang 'bring dang chen por sbyar bar bya'o/ /de ltar na 'dir zhes bya bas sngar thams cad mkhyen pa la sogs pa'i dbang du byas te/rim gyis rgyud la lam bskyed pa'am/ thos pa dang bsam pa'i shes pa'i shes rab gtso bor byas pa'i tshe ni nges par 'byed pa'i cha dang mthun pa de dag de yang rjes su mthun pa dang / khyad par can dang / rab tu rtogs pa dang / gzhan du yongs su bsgyur ba dang /tshe gcig pa dang / stan gcig pa ste/ rnam pa drug ces brjod par bya la/ 'dir ni dbye'o zhes dgongs pa'i phyir 'dir zhes bya ba'i sgra smos pa yin no/ /lhag ma rnams ni go sla bas rnam par ma phye'o/ /gzung ba dang 'dzin par mngon par ma zhen pa'i rnam pa can zhes bya ba ni rang bzhin gyi rnam par rtog pa rab tu srab cing rjes su dran pa'i rnam par rtog pa med do//rang dang mthun pa'i 'bras bu zhes bya ba la rang ni mnyam par gzhag pa'i ye shes te de dang mthun pa'i 'bras bu ni ji ltar mnyam par gzhag pa'i tshe na dngos po gnyis su mi 'dzin pas na gzung ba dang 'dzin par snang ba nyid med pa ltar de las langs pa na yang gzung ba dang 'dzin par snang ba tsam zhig yod du zin kyang gnyis su zhen pa med pa'i phyir na de rang gi rgyud dang mthun pa'i 'bras bur brjod do//rnal 'byor pa rnams kyi zhes bya ba ni bden pa mthong ba rnams kyi'o/ /tha snyad rnams ni bya ba la 'jug pa'i bdag nyid rnams te de rnams ni dus dang yul thams cad du rang gis mnyam par gzhag pa'i dus na chos kyi dbyings kun tu 'gro ba'i rang bzhin rtogs pa dang mthun pa kho na yin te/'di ni bzang ngo / /'di ni ngan pa'o/ /bdag gis chos 'di'i phyir chos smra ba 'di la lus 'di 'bul zhing srog ni btang ngo zhes bya ba la sogs pa'i rnam par rtog pa med de/brda la blo byang ba dag gis me long la sogs par gzugs brnyan mthong ba na snang ba tsam zhig yod kyang de la ji ltar yang mi rtsol bar gnas pa bzhin no/ /de ltar na 'o na byang chub sems dpa' sa rab tu dga' ba thob pa ni skad cig la sangs rgyas kyi zhing brgya yongs su sbyong ngo zhes bya ba la sogs pa ji ltar 'grub par 'gyur zhe na/de'i phyir sems can gdul ba'i dgos pa'i dbang ma gtogs par ni de ltar nges pa'o zhes tshig tha ma khong nas dbyung ste des na sems can thams cad gdul ba'i dgos pa'i dbang nye bar gnas pa na sngon gyi smon lam gyi mthus sgyu ma tsam du 'di la chos nyid 'di lta bu zhig bdag gis bstan to snyam pa la sogs pa 'byung bar 'gyur te/dgos pa'i dbang du rgyal ba rnams/ /nga dang nga yi gsungs pa ltar/ /zhes bstan pa lta bu'o//'gro ba 'ga' zhig 'dul ba'i phrin las mi mdzad pa'i tshe na ni sngar bstan pa ltar rang dang mthun pa'i 'bras bu tsam zhig la gnas kyi don mdzad pa'i rnam par rtog pa la sogs pa ci yang mi mnga' bas de dag kyang nye bar brtags nas bshad de/ btags pa ni 'dir don mdzad pa'i gnas skabs de mi mdzad pa'i dus la yang 'bras bus rgyu la btags te brjod do//btags pa'i dgos pa ni byang chub sems dpa' rnams la ni rnam par rtog pa med pas chos nyid rtogs pa kho na dang mthun pa yin no zhes shes par bya ba'i phyir ro/ /gzhan dag ni don mdzad pa dang mi mdzad pa'i gnas skabs gnyis su ni mi dbye'i don mdzad par snang ba'i tshe na yang rtogs pa dang mthun pa las ma nyams mod kyi/don gang dang gang zhig mdzad pa'i ting nge 'dzin rnams su lhun gyis grub pa'i tshul gyis 'jug pa yin te/ ji skad du 'jam dpal sgra skad thams cad kyi brda zhes bya ba'i ting nge 'dzin yod de/ ting nge 'dzin de thob na byang chub sems dpa' sgra skad dang / brjod pa dang brda thams cad rtogs shing yi ge thams cad kyi yi ge gcig ston pa dang / yi ge gcig gis yi ge thams cad ston par byed do//'jam dpal las kyi rnam par smin pa las byung ba bsod nams dang dge ba'i rtsa ba thams cad sogs shing ston par byed pa zhes bya ba'i ting nge 'dzin yod de/ de ting nge 'dzin de thob nas byang chub sems dpa' cang mi smra bar snyoms par zhugs te/ yi ge gcig tsam yang mi brjod par sems can thams cad kyis sangs rgyas kyi sgra dang /chos kyi sgra dang / dge 'dun gyi sgra dang / nyan thos kyi sgra dang / rang sangs rgyas kyi sgra dang / byang chub sems dpa'i sgra dang / pha rol tu phyin pa'i sgra thos par byed do zhes bya ba la sogs pa gsungs pa'i phyir ro zhes zer ro/ /de ltar gang yang rung ste phyogs gnyi ga la btags par bstan pa yod pas btags pa'i dgos pa bstan pa ni de lta ma yin na rnal 'byor pa'i rgyud la so so rang gis rig pas skad cig ma rnams ji ltar gzhan yid ches par byed pa'i mtshan nyid dag yin zhes bya ba gsungs te/btags pa tsam gyis kyang de'i yon tan ma bstan na su zhig mthong ba'i lam la yid ches nas thob par bya ba'i phyir 'jug ces bya ba'i don to//bsgom pa'i lam zab pa yin no zhes bya ba ni mthong ba'i lam ni zab pa dang / rgya che ba yin la bsgom pa'i lam ni phal cher shes bya'i sgrib pa'i gnyen por stong pa nyid du goms par byed pas na zab pa ste/de ltar na zab pa la rab tu goms par byas pa'i dbang gis na sa brgyad pa la sangs rgyas kyis bskul ba'i mthar thug pa yin no/ /de ltar rab tu zab pa'i stong pa nyid chen po mngon du byed pas na sngar stong pa nyid la sogs pa la yang gzugs med la/stong pa nyid la sogs pa gzugs las gzhan pa yang ma yin pas zhes bya ba la sogs pas don dam pa'i bden pa bstan te/ gnyen po'i stobs kyi blo chos kyi dbyings ji lta bar 'gyur zhes bya ba'i tha tshig go/ /pa ri ni gong du'o/ /mthong ba'i don ni ye shes kyis rim gyis nyams su myong ba'i don de la'o//sems pa ni thos pa'i shes rab kyis sam sbyor ba'i dus na'o/ /'jam pa ni bsam pa'i shes rab kyis sam dngos kyis so/ /nges par rtogs pa ni bsgom pa'i shes rab kyis sam rjes las byung bas so/ /de rnam pa du zhig ce na zhes bya ba la sogs pas ni dang po lam shes pa'i skabs su phye ba'i bsgom pa'i lam de dag re re la yang rnam par dag pa dgu dgur bstan cing de las mang ba ni rgyal ba'i yum de dang de las zhes bya ba la sogs pas 'gegs par bya'o//ji ltar de bzhin nyid rab kyi mthar phyin pa'i mtshan nyid kyi zhes bya ba la sogs pas ni gzhan gyi don mngon sum du grub par snang ba ltar rang gi don yang don dam par rang bzhin med bzhin du kun rdzob tu 'grub par cis na mi 'gyur zhes bstan pa'o//rgyu med par 'jig pa yin la zhes bya ba ni sems can pha rol la sogs pas gnod pa ma byas kyang rung ste/'jig pa'i byed pa po med par rang gi ngang gis 'jig pa yin te/ 'dus byas thams cad skad cig ma/ /mi gnas bya ba ga la yod/ /bya ba byung ba nyid yin pas/ /byed pa zhes su de la bya/ /zhes gsungs pa lta bu'o/ /skad cig ma nyid kyis zhes bya ba 'di ni de'i rgyu mtshan du sbyar ro//des na gsum pa 'di ni rgyu mtshan du blta bar bya'o/ /'dir slob dpon zla ba grags pa'i zhal snga nas ni dngos po rnams la ni skad cig ma'i mi rtag pa med mod kyi/ gdul bya'i yid 'byung bar bya ba'i phyir de ltar bstan te mi rtag pa ni rgyun chad pa'i mi rtag pa 'ba' zhig go zhes gsungs so//mdo sde rgyan la sogs pa'i lugs kyis ni dngos po rnams la de ldan par bstan te/ rang rang gi rnam par rtog pa'i dbang tsam las de dngos po zhes bya ba rang grub pa med ces brjod pas de dag 'thad par 'gyur ro/ /phyogs 'dis kyang rgol ba de ni mi gnod ces lan dang por brjod pa'o//grub pa'i mtha' las kyang zhes bya ba la sogs pas kyang lan gnyis pa ston te dngos por mngon par zhen pa rab tu ma spangs pa khyed rang gi grub pa'i mtha' ste/ rigs pa dang lung gis rab tu bstan par rang gi 'dod pa grub pa ni de nas phar yang 'gror med pas na mtha'o//de tsam du khyed kyis gtan la phab pa'i 'dod pa ston pa'i gzhung las ni/ 'jig rten sna tshogs las las skyes/ /zhes 'byung ba'i phyir na rang gi las kyis rang shi na de la gsod pa po la sdig par ji ltar 'gyur zhes 'dri ba 'di khyed la kho bo cag gi zla'i shugs kyis dris pa na khyed la yang kho bo cag dang mtshungs par gnod par 'gyur te/de'i phyir slob dpon dul ba lha'i zhal snga nas nyes pa mtshungs pa kho nas pha rol po choms par 'gyur bas de la nyes pa gzhan ni mi brjod do zhes bstan te 'di yang chos nyid kyi rigs pa yin te/chos kha cig 'gro ba rnams la mngon sum la sogs pas gnod pa lta bur snang yang chos rnams kyi chos nyid kyis de khas blang bar bya ba yod de/ tsha bas tshig pa la slar tsha bas gdung ba la sogs pa lta bu'o/ /don dam par zhes bya ba ni khyed kyi don dam pa nges par yod cing don byed pa'i dbang du byas su zin kyang rang gi las kyi 'bras bu la dpyad par zad pas na gang zag gzhan du bgrang bar sus kyang su yang bsad pa yang med ces bya ba la sogs pa'i klan ka khyed la yang 'byung zhes sbyar ro//de dang de la phyogs gzhan nas zhes bya ba ni dbu ma'i bstan bcos dag tu gang don dam par med pa de dag ni kun rdzob tu yang med de zhes rtsod pa smra ba'i lan btab pa'i gnas skabs de dang de dag tu zhib tu bstan gyis der ltos shig ces bya'o//phyogs gzhan nas zhes bya ba ni rigs pa gzhan yang de dag bstan zhes bya'o//dpe ma grub pa zhes bya ba ni rang bzhin med pa ni don dam par 'dod pa yin la rmi lam gyi gnas skabs la sogs pa ni kun rdzob tu yang rmi lam la sogs pa 'dra zhes 'dod pas dpe ma grub la/ gal te kun rdzob pa nyid du zhes zer na yang gnyid log pa'i tshe sems gnyid kyis mthu nyams pa dang /gnyid ma log pa'i tshe ma nyams pa ni nus pa ga la mnyam pas na dpe ma grub pa'o/ /sangs rgyas kyi mdzad pa bya dgos pas thabs la mkhas pas gsungs te zhes bya ba la thabs mkhas pa bcu po 'di sangs rgyas kun tu bzang po'i chos su bstan tam 'on te ma yin/gal te phyogs dang po ltar na ni phyir mi ldog pa'i rtags zhes bya ba la 'di ji ltar rung bar 'gyur/ gal te phyogs gnyis pa ltar na yang sangs rgyas kyi mdzad pa zhes smos par mi rigs kyi byang chub sems dpa'i bya ba bya dgos pas zhes smos par rigs so zhe na/'di ni sngar sa bcu pa la ni byang chub sems dpa' la sangs rgyas zhes bya bar brjod kyi zhes bya ba la sogs pa'i tshul gyis na/ sa bcu pa'i byang chub sems dpa' dbang bskur ba'i sa la gnas pa dang / skye ba gcig gis thogs pa'i rnam par 'phrul pa sangs rgyas su snang ba'i dbang du byas pa'i mdzad pa yin par shes par bya'o//shes rab kyi pha rol tu phyin pa rnam pa bcu ni thabs la mkhas pa rnam pa bcu ste/ de dag byang chub sems dpa'i mchog de dag gis dmigs par bya ba yin pas na yul te/ mngon sum du bya ba ni dka' thub spyod pa la sogs pa lus dang ngag dang sems kyis ci rigs su nyams su blang ba'o//dus dang dus ma yin pa shes pa'i sbyor ba ni zhes bya ba ni sems can 'dul bar 'gyur ba ni mngon sum du bya ba'i dus yin la/ gal te de dag mi 'dul na don med pas mngon du bya ba'i dus ma yin no//de ltar shes pa'i sbyor ba ste shes nas mngon sum du bya ba'am mi bya ba la sbyor ba ni thabs mkhas pa yin no/ /des na ni zhes bya ba ni nges par bzung ba'o/ /skabs bzhi pa'i 'grel bshad rdzogs so// //de ltar skabs bzhi pa rnam par phye nas da ni skabs lnga pa bstan pa dbye ba'i phyir rnam pa thams cad mngon par rdzogs par rtogs pa las zhes bya ba la sogs pa gsungs te/rab kyis mthar phyin pa'i rtogs pa 'byung ngo zhes go sla bar bya ba'i phyir rtags la sogs pa bsnyad pa sngon du 'gro ba'i rtse mo'i mngon par rtogs pa zhes bya ba la/rab kyis mthar phyin pa ni 'og nas 'chad pa'i tshul gyis sa mi g.yo ba thob par gyur phyin cad do/ /de nas brtsams te sngar ji ltar nyams su myong ba'i drod la sogs pa yang 'dris par byed pa'i tshe rtags rnam pa bcu gnyis dang ldan pa la sogs pa'i rtogs pa 'byung ngo zhes skabs tha dad pa gcig tu bstan pa ni bslab pa'i tshe sa mtshams gang du 'di dag sbyar ba go sla bar bya ba'i phyir te/dgos pa de gzigs nas sngar bstan zin pa'i drod la sogs pa yang rtags la sogs par bsnyad pa ste/ ming gzhan du btags pas de dag sngon du 'gro ba'i rtse mo'i mngon par rtogs pa gsungs so//de'i phyir na 'dir rtse mo zhes bya ba ni dang po rim gyis skye ba'i dus dang / sa gnyis pa la sogs pa sngar ji ltar bskyed pa goms par byas pa'i chos dag pas mchog tu gyur pa'i phyir skabs 'dis bsdus pa'i don kun rtse mor gzhag go//yang na rtse mo ni skabs 'dir bstan pa'i drod la bya ste 'dir bstan pa'i drod ni sngar bstan pa'i mthong ba'i lam la sogs pa mchog tu gyur pa'i phyir na rtse mo'o/ /de ltar na rtse mo la sogs pa'i mngon par rtogs pa ni rtse mo'i mngon par rtogs pa'o//de la rtags ni phyi dang nang gi rtags bcu gnyis bstan pa dang ldan pas rtags te/ des bstan pa'i don gyis rtags can la rtags su bstan pa'o/ /rnam par 'phel ba ni ji skad smos pa'i bsod nams bcu drug gis 'phel ba'i phyir ro/ /nges pa zhes bya ba ni sngar nyams su myong ba mi gsal ba rnams 'dir rab tu gsal bar mthong bas na mthong ba phyin ci ma log pa ni nges pa ste/de'i phyir na bstan pa zhes kyang bstan to/ /sems kun tu gnas pa ni 'ga' zhig nges par gtan la phebs pas mthong ba'i don la the tshom med pa de ni de nyid la sems rtse gcig pa'i tshul gyis kun nas gnas kyi dmigs pa gzhan mi tshol bas na sems kun tu gnas pa'o//tshig gi don ni go sla'o/ /da ni nges par 'byed pa'i cha dang mthun pa rnams re re yang rnam par rtog pa bzhi bzhi dang ldan par bstan pa dang / gnyen po'i tshogs kyang rnam par rtog pa'i rigs bzhi po gnyis su bsdus pa khams kyis phye na khams re re na sum cu rtsa drug drug tu yod pas spyir khams gsum char gyi dbang du byas pa'i tshe rnam par rtog pa brgya rtsa brgyad du bgrang ba de dag 'dir spong bas de bstan pa'i phyir mi mthun pa'i phyogs zhes bya ba la sogs pa smos te/sngar byang chub sems dpa' rnams kyi nyon mongs pa ni rnam par rtog pa'o zhes bstan pa'i tshul gyis mi mthun pa'i phyogs ni rnam par rtog pa'i rigs gnyis so//de la rnam par rtog pa yang rnam pa bzhi ste/ rang bzhin gyi rnam par rtog pa 'dod chags la sogs pa dang gnyen po'i rnam par rtog pa pha rol tu phyin pa la sogs pa ngan 'gro'i gnyen por gyur pa dang /de kho na'i rnam par rtog pa rnam par thar pa'i sgo stong pa nyid la sogs pa dang / 'thob pa'i rnam par rtog pa sku gsum gyis bsdus pa rnams te/ 'di dag ni 'phags pa rnam par mi rtog pa la 'jug pa zhes bya ba'i gzungs las khong du chud par bya'o//de dag la 'dir dang po mthong ba'i lam gyi dbang du byas pa'i gzung ba'i rnam par rtog pa gnyi ga yang gnyen po la rnam par rtog pa dang / de kho na'i rnam par rtog pa dang / 'thob pa'i rnam par rtog pa rnams su ci rigs su sbyar ro//de nyid la 'dzin pa'i rnam par rtog pa gnyis kyang de dang 'dra ba nyid las 'dzin pa'i rnam par rtog pa tha ma ni rang bzhin gyi rnam par rtog pa'i rgyu las byung ba'i gnyen po'i rnam par rtog pa ste/ rang bzhin gyi rnam par rtog pa 'dod chags la sogs pa ni lam drug tu bskal pa du ma zhig tu zil gyis mnan te/de'i phyir mthong ba'i lam la sogs par de dag rab tu bsrab pa'i phyir gcig tu 'bad par bya ba ma yin pas na de dag la ma smos so/ /yang bsgom pa'i lam gyi dbang du byas pa'i rnam par rtog pa'i rigs bzhi yang gnyen po dang de kho na dang thob pa'i rnam par rtog pa'i dbang du byas par ci rigs su sbyar te/rang bzhin gyi rnam par rtog pa ma yin pa'i rgyu mtshan snga ma bzhin no/ /de la gzung ba'i rnam par rtog pa rnams lam gnyi ga'i sbyor ba'i gnas skabs nyer bsdogs kyis spong bar byed pa ni de dag rags pas shes par sla ba'i phyir ro//'dzin pa'i rnam par rtog pa rnams lam gnyi gas 'jug pa'i gnas skabs kyi sems dang sems las byung ba rnams kyis spong ba ni de dag phra ba'i phyir nyer bsdogs kyis spong bar mi nus pa'i phyir te/ sbyor ba'i gnas skabs ni mos pa yid la byed pa lta bu yin la 'jug pa'i gnas skabs ni de kho na yid la byed pa lta bu'i phyir ro//de la de dag kyang gnas skabs gnyis po de der gcig nas phye ste spong ngam 'on te bsdoms te spong zhe na/ sbyor ba'i gnas skabs su ni gcig nas phye ste spong la 'jug pa'i gnas skabs su ni bsdoms te spong bar byed do//'dir spang bar bya ba'i rnam par rtog pa'i rigs de dag sngar mnyam par ma bzhag pa ni mngon par rtogs pa'i don bsgom pa'i rim pas legs par yid la byas la/ de nas snying po'i don bsgom pa ni de dag re re yang gcig dang du ma la sogs pas dben zhing /ji skad bstan pa'i bdag dang phung po nas brtsams te yang dag pa'i ye shes kyi bar du yang dag par ma grub par bsgoms pas rim gyis spong ba dang / ji ltar yid la byas pa'i rnam par rtog pa rnams lcug ma bkram pa gtubs pa'i dpes dus gcig tu bsgoms pas gzhom par bya'o//de bzhin du khams re re na rnam par rtog pa sum cu rtsa drug drug yod pa ni de dag tu skyes pa'i byang chub sems dpa' bden pa ma mthong ba rnams dang / bden pa mthong ba'i yang snyoms par 'jug pa rgyu'i sgo nas de dag la de ltar ldan par bstan pas tshul snga mas khams de dang der de dag rang rang gis khams kyi rnam par rtog pa spong ba'i phyir dang /khams gcig po gang yang rung ba dag tu lam bsgoms pas kyang rim gyis sam sdom pa'i tshul gyis snying po'i don bsgom pa kho nas de dag spong bar byed par shes par bya'o//de'i phyir na mngon par rtogs pa'i don yid la byed pa'i dus su ni rgyal po'i lta ba pos nyes pa byed pa rnams nges par bzung ba lta bu yin no/ /snying po'i don gyi nyer bsdogs kyi dus su ni nyes pa byas pa'i mi rnams gshed ma'i lag tu khrid pa lta bu yin no/ /de'i 'jug pa la sogs pa'i gnas skabs na ni de dag la yan lag bcad pa dang /mig dgag pa la sogs pa lta bu yin no/ /snying po'i bsgom pa'i rab kyi mtha' bar chad med pa'i lam la ni de dag mgo bcad pa lta bu yin no/ /sangs rgyas kyi sa kun tu bzang po la slar mi skye ba'i chos can du gyur pa lta bu'o//'di ni gzung ba dang 'dzin pa'i rnam par rtog pa rnams kyi bsdus pa'i don cig car bstan pa'o/ /nges par 'byed pa'i cha dang mthun pa'i 'og tu mthong ba'i lam yin te zhes bya ba ni drod la sogs pa bzhi char du phyi rol gyi don spong ba la rab tu goms par byas nas de'i 'og tu 'jig rten gyi chos kyi mchog gi lam du dus ci rigs par dbang po la sogs pa dang rjes su mthun par 'dzin pa rang bzhin med par goms par byas te/de ltar gzung ba dang 'dzin pa'i rnam par rtog pa rab tu nyams smad pas skyes bu lus bkru sman gyis sbyangs pa ltar byas nas mthong ba'i ye shes rnam par dag pa sman bcud kyis len lta bu rgyud la skyed ces bya ba'i don to//de la zhes bya ba ni mthong ba'i lam de la'o/ /'dir kha cig na re mthong ba'i lam ni skad cig ma gcig kho na'i bdag nyid yin pas na gcig gi tshig can du mdzad do zhes zer te/gal te skad cig ma gcig yin na ji ltar gnyen po rnam pa bzhi yod ce na/ mi mthun pa'i phyogs rnam pa bzhi yod pa la brten par zad de gang dag rnam par rtog pa med pa de dag ni skad cig mar nges te mngon sum gyi tshad ma bzhin no/ /gal te skad cig ma gnyis pa la sogs par gyur pa na ni/nges par rtog pa dang bcas par 'gyur ro zhes zer ro/ /'dis ni phyin ci log tu smras pa ste/ chos kyi dbyings rtogs pa'i rgyu las ni bskal pa du ma zhig tu yang rnam par rtog pa mi 'byung ba'i phyir dang / mthong ba'i lam de yang thob par byed pa des bsdus pa'i nyer bsdogs dang dngos dang de'i rjes las thob pa rnam par rtog pa dang bcas pas cig car du zhing brgya sbyong zhing /ting nge 'dzin brgya la snyoms par 'jug pa la sogs pas mang du yod pas na skad cig ma gcig tu ga la zhig tu 'gyur de nyid kyi phyir kha cig gis rnam par rtog pa brgya rtsa brgyad spang ba'i phyir mthong ba'i lam yum 'di'i snying po la lan brgya rtsa brgyad du yang snyoms par 'jug pa'o zhes kyang bstan to//brda sprod pa'i rigs pa rnams ni don gyi shugs kyis kha cig tu ma nges par 'gyur te/ drug pa 'di ni bzhi par sbyar ro zhes bya ba la sogs pa brjod pa lta bu'o//de ltar na mthong ba'i lam de la dus ji snyed cig thogs she na/ 'di ni byang chub sems dpa' shes rab dang brtson 'grus dang dad pa'i rjes su 'brang bas ni gcig tu 'chad pa ci yang med de/ de bzhin du spyi'i dus bskal pa grangs med pa gsum zhes bya ba la sogs pa'i dus kyang nges par ni nam yang mi 'gyur ro//gnyen po rnam pa bzhi ni de dang de spong ba'i gnyen po zhes bzlog pas gdags so/ /gzung ba'i rnam par rtog pa zhes bya ba'i sgra ni yul 'dogs par srid pa dgag par gzung bar bya'o zhes gzung bar rnam par rtog pa zhes 'chad do//nyon mongs pa'i phyir zhes bya ba ni rnam par rtog pa'i phyir zhes bya ba'i don to/ /rnam par rtog par gcig mod ji ltar dgu yin snyam pa la/ yul gyi dbye bas zhes bya ba smos te/ lnga pa 'di ni rgyu mtshan du sbyar ba'o/ /dngos po dang ma 'brel bar 'jug pa nyid kyis zhes bya ba la/dngos po ni ming can te ji ltar rtogs par byed pa'i yul lo/ /ma 'brel pa ni gal te dngos po de dag brtags pa ltar yod na de'i tshe 'brel par yang 'gyur ba lta zhig na/ de dag med pa'i phyir ma 'brel te des ni ma 'brel zhes bya ba 'dis ni rnam par rtog pa bzhi med pa tsam zhig tu zad ces ston pa'o//'jug pa nyid kyis zhes bya ba ni skyes bu 'ga' zhig d+ha du ra zos pa'i rgyus nam mkha' la gser gyi khab len pa'i phyir 'jug pa lta bur gzhi med par 'jug pa ste/ de'i phyir bar chad med pa'i lam gyi dbang du byas te phyin ci log gzhi med pa spang ba'i ye shes zhes bstan to//so so'i skye bo yul du byas te de skyes bu rdzas su yod par 'dzin pa dang / 'phags pa'i gang zag yul du byas te de la btags par yod par 'dzin pa zhes gzung ba dang 'dzin par sbyar ro/ /de la so so'i skye bo de dag ni skyes bu zhes bya ste 'jig rten la grags pa'i rjes su 'brang ba'o//de dag rdzas su yod pa ni yang dag pa'i kun rdzob don bya ba la mthu dang ldan pa zla ba gnyis pa la sogs pa lta bu ma yin no/ /'dzin pa ni 'di ni bden te mngon sum du gyur pa'i phyir dang / lung las kyang 'gro ba'i las kyang rang bzhin dang dbye ba gsungs pa'i phyir ro snyam pa'o//'phags pa'i gang zag ni mya ngan las 'das pa yin la/ mya ngan las 'das pa ni btags pa tsam ste/ ji skad du dge slong dag chos lnga po 'di dag ni btags pa tsam ste lnga gang zhe na/ 'das pa dang / ma 'ongs pa dang / mya ngan las 'das pa dang / so sor ma brtags pa'i 'gog pa dang / gang zag rnams te/ 'di dag ni ming tsam mo zhes gsungs pa rnams so/ /de ltar 'dzin pa ni 'di ni bden te 'di ni ming tsam du yod par grags pas grub cing ming tsam po de med na su zhig lam la nan tan byed ces ming tsam gyi zhen pas 'phags pa'i gang zag rnams yod par rjes su dpog par yang byed pa'o//de dag ji ltar na mi mthun pa'i phyogs yin par 'gyur snyam du kha cig rtogs par srid pa la/ gang gi tshe de dag gi yul gyi dngos por gyur pa gzung ba'i don so so'i skye bo dang 'phags pa'i gang zag de dag blos btags pa de bzhin du gzung bar bya ste/yul gyi ngo bor yod pa ma yin pa'i phyir zhes gtan tshigs su sbyar te/ dang po phyag 'tshal ba'i don dgrol ba'i skabs su gcig dang du ma la sogs pa'i tshad mas dngos po rnams ma grub par bstan pa'i tshul gyis snying po'i don bsgoms pas 'khor ba dang mya ngan las 'das pa gnyi ga sgyu ma tsam du yang ma grub pas na de dag la 'dzin pa'i rnam par rtog pa yul can rnams lta ga la zhig 'grub ces dgongs pa'o//kha cig 'dir/ gal te gzung don rang bzhin med/ /de dag gang gis 'dzin par 'dod/ /de ltar de dag 'dzin pa yi//ngo bos stong pa'i mtshan nyid do/ /zhes bya ba'i tshig 'dis gzung ba'i rnam par rtog pa bcwa brgyad ni yul yin la 'dzin pa'i rnam par rtog pa bcwa brgyad ni yul can no zhes rnam par rtog pa'i rigs gnyis yul dang yul can du sbyor ba de dag gis ni cung zad kyang khong du ma chud de/ de dgag pa'i phyir slob dpon gyi zhal snga nas gzung bar bya'o zhes gzung bar rnam par rtog pa zhes sngar smos pa mdzad pa'o/ /gal te 'phags pa'i gang zag btags par yod pa tsam du rtog pa yang skyon yin na/ mya ngan las 'das pa yang sgyu ma lta bu rmi lam lta bu'o//gang mya ngan las 'das pa las ches mchog tu gyur pa'i chos 'ga' zhig yod na de yang sgyu ma lta bu rmi lam lta bu'o zhes gsungs pa ji lta bu zhe na/ de ni mnyam par ma bzhag pa'i shes pa mngon par zhen pa rab tu srab pa'i dbang du byas pa ste/ mnyam par gzhag pa'i tshe ni sgyu ma tsam du yang rtog pa dgag par bya ba'i phyir te/gang la sems kyi rgyu ba yang med na yi ge rnams lta smos kyang ci dgos zhes bya ba la sogs pa gsungs pas so/ /ji ltar rnam pa dgu yin zhe na zhes bya ba la sogs pas ni sngar bstan pa'i dbang ltar gzhi re re la brten pa'i rnam par rtog pa rnam par 'byung ba bstan te go sla'o//rgyu gang yin pa de dag zhes bya ba la rgyu dang po ni 'gro ba rnams byang chub thob par bya ba'i phyir mthong ba'i lam la sogs pa la sbyor ba'o/ /gnyis pa ni mthong ba'i lam skyes pa de dag bsgom pa'i lam gyis 'phel bar bya ba'i phyir shes rab kyi pha rol tu phyin pa ston pa'o//gsum pa ni nges par byang chub par 'gyur zhing de nas 'gro ba rab tu mang po gang yang byang chub par byed pa'i rgyur rgyal ba'i yum gyi don bsgom pa'o/ /bar chad med pa'i rgyu ni sangs rgyas nyid kyi dngos kyi rgyu ste de yid la byas pas bdag gcig pu byang chub thob par ma zad kyi/rang bas ches mang ba'i sems can thams cad kyang byang chub thob par byed par 'gyur zhes sbyar ro/ /mthong ba'i lam 'di byang chub chen po'i rgyu mtshan du bstan pa ni rgyu'i gtso bo ste/ bsgom pa'i lam yang des nges par byas la/ drod la sogs pa yang de'i ched tsam du gyur pas so//rgyu dang 'bras bu dag don dam par yod par 'thad pa'i dngos po med de/ tshad ma la sogs pas ma grub pa'i phyir zhes sbyar te/ sogs pa zhes pas ni nges pa'i don dang ldan pa'i lung bsdu bar bya'o/ /gzhan dag ni tshad ma zhes bya ba ni 'thad pa sgrub pa'i rigs pa yin la sogs pa zhes pas ni/rigs pa lhag ma gsum dang lung bzung ngo zhes 'dod do/ /chos kyi sku la sogs pa zhes bya bas ni sku bzhi char bzung ste/ de dag ni ma lus par yang 'khrul pa'i dri ma dang bral ba'i phyir ji lta ba bzhin gyi bdag nyid do/ /ni zhes bya ba ni gang gi phyir zhes bya ba 'am de kho na zhes bya ba'i tshig tu ston pa'o//gang gi phyir de ltar yin pa de'i phyir zhes bya ba 'di ni sngar chos kyi dbyings kyi ngo bo nyid de rnams nam mkha' bzhin du skye ba dang 'gag pa med pa'i phyir ram zhes bya ba la chos nyid kyi rigs pa 'di kho na'i dbang gis zhes ston pa ste/chos kyi dbyings la zad pa dang mi skye ba med pa'i phyir khyed kyi lta ba 'di mi 'thad do zhes ston pa'o/ /gcig dang du ma'i ngo bo nyid ces bya ba la sogs pa 'thad pa sgrub pa'i rigs pa de lta yin pa gang yin pa de'i phyir zhes brjod pa'i tshe ni rigs pa 'dis khyed la gnod par 'gyur ba de'i phyir zhes bya ba ste/kha cig ni rgyu dang 'bras bu zhes bya ba rten cing 'brel bar 'byung ba'i tshad mas yin la/ sogs pas zhes bya ba ni rdo rje gzegs ma lta bu dang / mtha' bzhi las skye ba dgag pa dag bsdu'o zhes 'dod do/ /gang dag ces bya ba ni 'gags pa nyan thos rnams dang /rnam par rig pa tsam du smra ba rnams te de dag ni chos kyi dbyings kyi rang bzhin du ma gtogs pas na zad pa la zad do snyam pa la sogs pa'i shes pa nges par 'byung bas so/ /rnal 'byor spyod pa rnams ni/ /chu khams gser dang nam mkha' rnams//dag pa bzhin du dag par 'dod/ /ces bya bas dag pa'i gzhi yongs su grub pa don dam pa'i dngos por khas len pa'i phyir ro/ /kho bo cag dbu ma pa la ni don dam par dngos po yod pa ni skra'i rtse mos bstan par bya ba tsam yang ma mthong bas na/ yang dag par zad pa dang mi skye ba ni 'di la rung ngo zhes bya ba'i don to//go rims bzhin du zhes bya bas ni skyes pa rnams ni zad pas de 'gog pa'i ngo bo yin la ma skyes pa rnams ni slar skye ba'i gegs byed pa'i dbang gis 'gog pa yin te/ de ltar skyes pa dang ma skyes pa'i mtshan nyid la gnod pa'i 'gog pa de dag dang bral te rnam par rtog pa de dag mi rgyu ba ni kho bo cag dbu ma pa'i don dam par bzhag pa de bzhin nyid kyi ngo bo'i rang bzhin yin na/khyed ni rnam par rtog pa de dag dang ma bral ba'i phyir khyed la don dam pa'i bden pa rtogs pa'i lta ba med cing de med pa'i rgyus na khyed kyi mthong ba'i lam kun rdzob kyi bden pa la don dam pa'i ldan pa'i dngos por log par mngon par zhen pa de'i stobs kyis ci zhig zad cing ci zhig skye zhes sbyar ro//de'i dbang las/ gzhan gyi mar 'dod gang yin pa/ /de nyid gzhan gyi chung ma ste/ /khyed kyi don dam gang yin pa/ /de ni kho bos kun rdzob 'dod//ces bstan to/ /de la skye ba dang 'jig pas stong pa'i phyir zhes bya ba la sogs pas snying po'i don bsgom pa'i rigs pa yid la bya ba 'di ni dbu ma'i bstan bcos las gsal bas bdag gis 'dir mi bsam mo/ /nor bu dang dngul zhes smos pa ni ye shes de'i dmigs pa dag cing yid du 'ong bar ston pa'i dpe'o//sogs pa zhes dpe du ma smos pa ni nor bu la sogs pa'i dngos po dag pa du ma zhig skyes bu mig dag pas dus gcig kho nar mthong la/ de dag blangs pas phan pa byed pa ltar mthong ba'i lam skyes pa'i byang chub sems dpa' de'i dmigs pa'i yul du ni kun rdzob kyi dngos po ma lus pa lag mthil gyi shing thog ltar gsal bar 'gyur te/de dag gis gnod pa yang mi byed cing sangs rgyas kyi byang chub la yang phan 'dogs par byed ces bstan pa'i phyir ro/ /de nyid kyi phyir slob dpon rgan po kha cig gi zhal snga nas/kun rdzob kyi bden pa gang zhe na/ gang sa rab tu dga' ba ma thob pa rnams kyi gzung ba dang 'dzin pas bsdus pa rnams so/ /don dam pa'i bden pa gang zhe na/ sa rab tu dga' ba la sogs pa la gnas pa'i byang chub sems dpa' rnams kyi ye shes rnam pa gnyis yul dang bcas pa dag go zhes bstan to//'khrul pa'i mtshan ma mtha' dag spangs pa zhes bya ba la 'khrul pa ni sgro 'dogs pa dang / skur pa 'debs pa ste/ de'i mtshan ma ni bden par 'dzin pa brjod du med par ma shes pa 'khrul pa'i rgyur gyur pa rnams te mtha' dag ni rigs thams cad do//spangs pa zhes bya ba ni rags pa rnams te/ phra ba mtha' dag spangs pa ni sangs rgyas kyi sa kun tu 'od gang yin pa'o/ /da ni dpe'i sgo nas bstan pa'i phyir/ sgyu ma lta bu'i bdag nyid du snang ba'i blo rnam par mi rtog pa zhes bya ba la sogs pa gsungs te/gang zhig rgyu dang rkyen tshogs pa'i mthu'i dbang gis rab tu gsal bar ni snang la/ 'on kyang de la rta dang glang po che dang gru dang khyim la sogs pa'i dngos po rnam par smin pa las byung ba med pa de dag ni sgyu ma'o/ /de lta bu'i bdag nyid du snang ba'i blo ni byang chub sems dpa' gang gi ye shes kyi dngos po kun rdzob pa ri mor bris pa lta bu 'di dag pad+ma'i 'dab ma ltar yang ma 'dres par mthong la/des de ltar mthong ba'i tshe nyid ni yod pa'o zhes bya ba dang / med pa'o zhes bya ba la sogs par gang du yang mi 'dzin cing rten cing 'brel bar 'byung ba'i chos nyid sgro 'dogs pa dang skur pa 'debs pa'i mtha' dang bral ba rab tu zab pa rnam par mi rtog pa skye la/de yang don dam par ni rang bzhin med pa nyid do/ /de bzhin nyid la brjod par mi nus pas na so so rang gis rig par mi nus so/ /med pa yang ma yin la gzhan la brjod par yang mi nus pa'i phyir tha snyad gdags par dka' bas na/ci zhig ltar yang dag par skyes na zhes gsungs te/ de'i phyir skyes bu mig btsums pas gzugs rnams mi mthong ba ltar ci yang mthong ba med pa ni mthong ba'i lam ma yin gyi sna tshogs mthong yang sgro 'dogs pa dang /skur pa 'debs pa med pa ni mthong ba'i lam ste/ 'di ni byang chub kyi sems dang po zhes bya ba bar chad med pa'i lam dang sangs rgyas kyi sa dang rab tu mthun par skyes pa ste/ de'i phyir mthong ba'i lam 'di gcig pu yang byang chub chen po'i rgyur gyur pa bsngags pa mdzad do//de nas de'i 'og tu ni mthong ba'i lam gyi rgyun dang / bsgom pa'i lam la res 'ga'i tshe ni snying po'i don bsgom pa na blo don dam pa'i bden pa kho na dang mthun par skye bas sna tshogs 'di dag rdul phra rab tsam yang mi snang la/ med pa la sogs pa yang de'i tshe mi rtog par 'gyur te/ sa brgyad pa'i byang chub sems dpa' bskul ba las ston pa lta bu'o/ /res 'ga' yang de'i ye shes rjes su dran pa'i rnam par rtog pa rang bzhin gyi rnam par rtog pas bsdus pa med kyang rang gi ngo bo'i rnam par rtog pa stug po ldan zhing gnyen po'i rnam par rtog pa la sogs pa mang pos glags pa 'byung ba ni res kyi tshul gyis so//de nas sa brgyad pa la ni snang ba med pa'o/ /de nas gzhan gnyis la ni snang ba dang bcas pa'o/ /de nas bar chad med pa'i lam las brtsams te dang po'i sems kyi rgyu mthun pa'i 'bras bu skabs bdun pa nas bstan pa'i ngo bo skye ba dang de la gnas par 'gyur ro//de ltar na mdo las ci yang mthong ba med pa ni don dam pa mthong ba'o zhes gsungs pa 'di ji ltar drang zhe na/ 'di ni byang chub kyi sems dang po dang bar chad med pa'i lam la sogs pa'i dbang du byas te ni sgro 'dogs pa dang skur pa 'debs pa dang ldan pa cir yang mi mthong ba ni don dam pa mthong ba'o zhes bya bas ma yin par dgag pa bzung ste/bram ze ma mthong zhes bya bas rgyal po la sogs pa mthong ba ni mi 'gegs pa bzhin no/ /'on kyang 'di ni don dam pa'i de'i bdag nyid mthong ba zhes bya'o/ /sa mi g.yo ba la sogs pa'i dbang du byas te ni med par dgag pa kho na ste/sgra ji lta ba bzhin du de ni mthong ba skra'i rtse mos gzung bar bya ba tsam yang med pa'i phyir ro/ /rnal 'byor pas shes bya'i sgrib pa yang dag par spong ngo zhes bya ba ni ye shes 'di gnyis kas so/ /de dag la chung zad kyang mi byed do zhes bya ba ni 'brel pa med pa'i phyir te/shes pa dang shes bya don dam par rang grub pas ri man+da ra ba skyod cing bcom pas ri 'bigs byed la ci zhig tu 'gyur/ kho bo cag ni don dam par thams cad chos kyi dbyings su bsdus par 'dod pas de rtogs pa'i tshe na gcig gis thams cad g.yo ba la sogs par 'dod la/de ma rtogs pa'i bar du ni ji tsam grags pa tsam zhig khas len pa'i phyir ro/ /gzugs la sogs pa rten cing 'brel bar 'byung ba kun rdzob tu yang dag pa'i ngo bo nyid la zhes bya bas ni snang ba mi gsal zhes ston te/ ji skad du/ de phyir rang bzhin med smra yi//snang ba bsal phyir ma yin no/ /zhes bshad pa lta bu'o/ /'o na sna tshogs 'di ji lta bur dngos por lhung bar mi 'gyur ram snyam pa la/ 'di nyid la rang bzhin med pa la sogs pa'i ngo bor brtag par bya ste zhes gsungs te/ 'di ni mdo las pi wang gi sgra tshol ba'i dpes bstan te/gal te pi wang rgyud sbreng ba la sogs pa'i 'bad pa med par yang sgra mi 'byung la pi wang gi sbubs la sogs pa bshig pa las kyang sgra'i dngos po mi rnyed kyi slar rgyun chad par 'gyur ro/ /de bzhin du srid pa dang zhi ba gang du yang mi lhung ba de bzhin gshegs pa'i snying po rab tu zab pa de ni gzugs la sogs pa 'di kho na yang ma yin la/'di dag spangs te snang ba med par 'gyur ba yang zhi ba'i dbyings tsam zhig yin pas rab tu spangs pas de'i phyir 'di dag gi rang bzhin 'di dag dang / gzhan nyid dang 'di nyid du brjod par bya ba ma yin pa tsam zhig khong du chud par bya'o zhes bya bar gnas so//de ltar na sgyu ma'i glang pos sgyu ma'i glang po gzhan zhig pham par byas pa lta bur phyin ci ma log pas de kho na nyid mthong na rnam par grol bar 'gyur ro zhes smos te/ don 'di ni bcom ldan 'das byams pa'i zhal snga nas kyang mdo sde rgyan las/sgyu ma'i rgyal pos sgyu ma yi/ /rgyal po gzhan zhig pham pa ltar/ /gang dag gis ni chos mthong ba/ /rgyal sras de dag nga rgyal med/ /ces gsungs so/ /sdug bsngal la chos shes pa'i bzod pa zhes bya ba ni mthong ba'i lam nges par bzung ba ste/skad cig ma de shas cher gyur pa zhes bya'o/ /rnam pa sum cu rtsa drug can ni rtog pa de snyed cig gi gnyen por gyur pas so/ /skyes pa ni blo de ltar byung ba'i bdag nyid do/ /rtse mo'i mngon par rtogs pa 'dir zhes bya ba ni skabs dang po rnams kyi mthong ba'i lam gyis ni 'di ltar rnam par rtog pa de snyed bde blag tu spong bar nus pa ma yin la/skabs 'og ma dag tu ni de dag spang ba la gcig tu 'bad par bya mi dgos pas na 'dir de dag spong bar byed do/ /bag chags kyi nyon mongs pa zhes bya ba ni rnam par rtog pa de dag gi rgyu ste/ /kha cig tu ni sngon du rgyu bcom pas bag la nyal bcom par 'gyur te/dper na shing ta la'i rtse mo bcad pa'i mthus rtsa ba'i cha myur du skam pa lta bu'o/ /'dir yang rnam par rtog pa tsam yin gyi dngos po dang ma 'brel ba'i mthu yin te/ gang du bud med la sogs pa dang 'brel pa rang bzhin gyis rnam par rtog pa dag ni phal cher bag la nyal ba ma bcom na mngon du rgyu 'byung ba ni rgya mtsho'i bya gnam la 'phur ba'i grib ma rjes su 'brang ba'i tshul dang /shing n+ya gro d+ha'i rtsa ba las cher 'phel ba lta bu'o/ /rten cing 'brel bar 'byung ba ni gzugs la sogs pa sgyu ma tsam du gyur pa rnams te/de dag gi chos nyid ni spros pa dang bral ba'o/ /de la dmigs pas na zhes bya ba ni de la goms par byas pa'i phyir ro/ /ting nge 'dzin seng ge rnam par bsgyings pa zhes bya ba ni byang chub kyi sems dang po'i mtshan nyid sngar ji skad bstan pa de la yang snyoms par zhugs nas de'i 'og tu dus phyis te rgyun gyis bsdus pa'i mthong ba'i lam mnyam par ma bzhag pa'i dus na'o//de ltar na snang ba dang bcas pa'i ye shes dang snang ba med pa dang / rnam par rtog pa dang bcas pa'i ye shes gsum po de dag ni mthong ba'i lam ste/ dang po ni sangs rgyas kyi sa'i rgyu mthun pa'o//gnyis pa ni rnam par rtog pa brgya rtsa brgyad spangs pa'o/ /yang snang ba dang bcas pas ni zhi ba'i dbyings su mi ltung bar byed pa'o/ /rnam par rtog pa dang bcas pa ni dngos po kun rdzob pa'i rang bzhin kun rdzob pa la goms par byed pa'o/ /de ltar mthong ba'i lam rnam par rtog pa dang bcas mod kyi dus ring zhig tu dngos po rnams rang bzhin med par mos par byas pa'i dbang gis na brda la blo byang ba'i skyes bus me long la sogs pa'i nang du gzugs brnyan mthong ba ltar mngon par zhen pa shin tu srab pas kha cig gis ni don dam pa'i bden par bzhag cing sa de dag tu nyon mongs pa yang mi rgyu ba nyid do//rten bsgom pa'i lam zhes bya ba la/ 'di rten yang yin la bsgom pa'i lam yang yin pas na rten bsgom pa'i lam ste gzhi mthun pa'i bsdu ba'o/ /de la de gang gi rten yin zhe na/ yon tan ma lus pa rang las tha mi dad pa rnams kyi rten te 'chad par 'gyur ba las/yams nad 'di rnams zad nas ni/ /yun ring lon nas dbugs phyin ltar/ /rnam pa kun tu 'gro ba yi/ /bde bsgrub yon tan phun tshogs kun/ /rgya mtsho che la chu bo bzhin/ /'bras bu mchog gis spab yi/ / sems dpa' chen po de la ni/ /rnam pa kun tu sten par byed/ /ces ston par byed do/ /gzhan yang rnam par rtog pa brgya rtsa brgyad spong bar byed pa ni sngar lam thams cad mkhyen pa'i skabs su bsdom pa'i lam rnam pa gnyis bsnyad pa la/ zag pa med pa'i bsgom pa'i lam dang dang por mngon par bsgrub pa'i mtshan nyid kyi byed pa yin la de yang snang ba med pa'i ye shes yin no//de'i rten ni rnam par rtog pa dang bcas pa'i bsgom pa'i lam thod rgal gyi snyoms par 'jug pa 'di yin pas na rten sgrub pa sngon du 'gro ba yin pa go sla bas zhes smos pa yin no/ /byang chub sems dpa' rnams zhes bya ba ni bsgom pa'i lam la gnas pa rnams so//ni zhes bya ba ni dmigs kyis bzung ba ste/ de'i phyir nyan thos rnams la ni thod rgal gyi snyoms par 'jug pa yod kyang thabs dang shes rab chen pos byin gyis ma brlabs pas na rnam par rtog pa brgya rtsa brgyad spong ba la sogs pa'i yon tan chen po nyid med do zhes ston pa'o//'dod pa na spyod pa'i rnam par shes pa zhes bya ba'i rags pa dang tha ba ngan pa dang rtsig pa stug po la sogs pa'i rnam par sgyu ma tsam du lta ba 'am yang na sems can dmyal ba la sogs pa ji ltar gnas pa rnams sgyu ma tsam du dran pa'o//byung ba la ni 'das pa ste rnam pa thams cad mkhyen pa'i skabs su dmigs pa dang rnam pa bstan pa'i lugs so/ /yang dag par skye ba'i rgyu ni/ /byang chub la gzhan ston pa dang / /de yi rgyu ni yongs gtod dang / /de 'thob bar chad med pa'i rgyu/ /bsod nams mang po'i mtshan nyid do//zhes bstan pa rnams so/ /ma 'ongs pa ni nye bar gyur pa bar chad med pa'i ting nge 'dzin te/ de med pa ni de skyed par nus pa'i bsgom pa'i lam med pa'o/ /nyan thos kyi rigs can nyid kyi phyir de'i theg pa yid la byed pa dang zhes bya ba la nyan thos kyi rigs can zhes bya ba ni rkyen 'ga' zhig gis de la dga' bas de'i lam du zhugs pa yin gyi/rnal 'byor spyod pa pa rnams smra ba ltar dang po nas de dag gi rigs can yin zhes ni mi brjod kyi/ sems can thams cad de bzhin gshegs pa'i snying po can yin te/ ji skad du 'phags pa shes rab kyi pha rol tu phyin pa dpal mchog dang po las/byang chub sems dpa' kun tu bzang po sems can thams cad ni de bzhin gshegs pa'i snying po can no zhes gsungs la/ 'phags pa zla ba sgron me'i mdo las kyang / 'di na snod min sems can 'ga' yang med/ /'gro ba 'di rnams ma lus sangs rgyas 'gyur//zhes gsungs so/ /'on kyang 'ga' zhig lam der zhugs na/ dman pa la goms pa ni sgrub par sla ba'i phyir phyis dus ring du yang de la 'dun pa 'byung ste/ don 'di las dgongs nas/ byang chub sems dpa' sems dpa' chen po byams pa'i zhal snga nas/nyan thos ma nges rnam gnyis te/ /theg don mthong dang ma mthong ba'o/ /don mthong 'dod chags bral ba dang / /'dod chags bral min 'di dman pa'o/ /'di gnyis 'phags pa'i lam thob pa/ /sred pa dag tu 'byung ba'i phyir/ /bsam gyis mi khyab sgyur ba yi//skye ba dang ni yang dag ldan/ /gcig ni smon lam dbang gis ni/ /skye ba rab tu sgyur bar byed/ /cig shos phyir mi 'ong ba dang / /ldan phyir sprul pa rab tu bsgrub/ /de gnyis yang dang yang du ni/ /rang sems kun tu 'byung ldan pas/ /mya ngan 'das la mngon dga'i phyir//rtogs pa bul ba yin par 'dod/ /don byas ma yin de sangs rgyas/ /med par skyes nas sprul don gnyer/ /bsam gtan don brtsan der brten nas/ /byang chub dam pa thob par 'gyur/ /zhes gsungs te/ 'dir rtogs pa bul ba zhes bya ba khungs nyid du 'dod par bya'i ma lus pa ni ma yin te/de ni rnal 'byor spyod pa pa dag gi ngor gsungs pa'i phyir ro/ /de bzhin du chos mngon pa las/ gnyis slob rigs las bzlog nas ni/ /sangs rgyas su 'gyur gzhan gsum yang / /ston dang bse ru byang chub par/ /bsam gtan mtha' rten gcig la kun//zhes pa yang mi 'dod do/ /'dir ni 'phags pa klu sgrub kyi zhal snga nas/ theg pa gnyis po dag kyang ni/ /theg pa chen por 'byung bas na/ /srid pa'i lam gyis dub pa rnams/ /ngal so'i don te de nyid min/ /nyan thos de dag ji srid du/ /sangs rgyas rnams kyis ma bskul ba//de srid ye shes lus gcig gis/ /ting 'dzin dregs pas myos te gnas/ /bskul nas sna tshogs gzugs kyis ni/ sems can don la dga' byed cing / /bsod nams ye shes nyer 'phel nas/ /sangs rgyas byang chub thob par 'gyur/ /zhes gsungs pa'i rjes su 'brang zhing byang chub sems dpa'i bslab pa rab tu dbye ba'i le'u las kyang /bye brag med pa kho nar nyan thos rnams bsam gyis mi khyab pa'i skye ba bsgyur bar bstan to/ /lhag ma rnams ni go sla bas rnam par ma phye'o/ /bar chad med pa'i ting nge 'dzin zhes bya ba ni skad cig ma gcig pa'i mngon par rdzogs pa'i byang chub pa ste/'di yang byang chub kyi sems bskyed pa'i dbang du byas te mngon par shes pa la sogs pa lngas bstan no/ /rigs kyi dbang du byas te shes rab dang thabs dang / slob ma rnams dang thun mong ma yin pa'i chos dang / gzhan gyi don gyi go rims dag gis bstan to//theg pa gzhan gyis nges par 'byung ba bas mchog tu gyur pa'i dbang du byas te nges par 'byung ba'i sgrub pa brgyad kyis bstan to/ /bsgom pa'i lam gyi dbang du byas te ni rnam par dag pas bstan to/ /rnam pa'i dbang du byas te ni spong ba'i lam du btags pa bden pa bzhis bsdus pa nyon mongs pa dang mi ldan pa'i mtshan nyid bzhir bstan to//bsod nams kyi tshogs chen po'i dbang du byas te ni 'dir bstan te/ /dmigs pa dang bdag po dang / rnam pa'i dbang du byas pa dang / log par rtog pa rnams kyang 'dir bstan to/ /sa mtshams dang mtshan nyid kyi dbang du byas te ni skabs bdun par ston par 'gyur ro//thub pa chen po'i phrin las kyi dbang du byas te ni chos kyi sku'i phrin las las/ byang chub kyi yan lag dang / las chud mi za ba la sogs pa'i rnam pa brgyad kyis ston par 'gyur te/ 'di dag dang gzhan yang yon tan la sogs pa mtha' dag gis 'dir gtan la dbab par bya'o//stong gsum gyi stong chen po'i 'jig rten gyi khams zhes bya ba lan mang zhig smos pa 'di'i tshad ni/ gling bzhi pa dang nyi zla dang / /ri rab dang ni 'dod lha dang / /tshangs pa'i 'jig rten stong la ni/ /stong ni spyi phud yin par 'dod//de stong la ni stong gnyis pa/ /bar ma'i 'jig rten khams yin no/ /de stong la ni stong gsum mo/ /mnyam du 'jig cing 'byung ba yin/ /zhes ji skad bstan pa'o/ /yang sangs rgyas kyi zhing rgya chen po shes par 'dod pa dag gis ni gling bzhi pa bye ba phrag brgya la ni stong gsum mo//stong gsum bye ba phrag brgya la ni rab 'byam gyi mtshams sbyor ba'o/ /de bye ba phrag brgya la ni rab 'byam gyi rgyud gcig go/ /de bye ba phrag brgya la ni rab 'byam gyi rgyud bar ma gcig go/ /de bye ba phrag brgya la ni me tog gi gzhi'i snying po'i rgyan bkod pa gcig ste/ 'di ni bcom ldan 'das rnam par snang mdzad de'i rnam par smin pa'i sangs rgyas kyi zhing ngo zhes shes par bya zhing / de yang sangs rgyas bcom ldan 'das rnam par snang mdzad gangs chen mtsho'i phyag gi mthil gyi rdul phra rab gcig la gnas te/ 'di lta bu'i bcom ldan 'das rnam par snang mdzad de ni longs spyod rdzogs pa'i sku'o zhes shes par bya'o//dmigs pa'i rkyen ni chos thams cad dngos po med par dmigs pa yin no zhes bya ba ni rang bzhin gyis 'od gsal ba'i ngo bo nyid de la dmigs pas rnam par mi rtog pa'i ye shes de skye ba zhes bya ba'i don te/ gal te chos thams cad ngo bo nyid med pa de ri bong gi rwa la sogs pa ltar ming tsam zhig yin pa'i phyir shin tu med par gyur na ni de'i phyir de dmigs pa'i rkyen du yang ji ltar zhig 'gyur/shin tu med pa gang yin pa ni nus pa ma lus pa dang bral ba'i phyir dmigs par ga la zhig gzhag /gal te 'o na rang bzhin gyis 'od gsal bar gyur pa zhig 'di'i dmigs par rnam par gzhag na 'o na de nyid dngos por 'gyur ba ma yin nam/de'i tshe ji ltar na chos thams cad dngos po med par dmigs pa yin zhe na/ byis pa rnams la tha snyad tsam zhig tu rang bzhin gyis 'od gsal ba zhes brjod kyi/ rang gi rang bzhin brjod par ni de sus kyang nam yang mi nus shing yod pa dang med pa la sogs pa'i dngos po gang du yang ma grub pas na 'phags pa so so rang gi rig pa'i spyod yul zhes bsgrags pa'o//bdag po'i rkyen ni dran pa yin no zhes bya ba la/ sa dang po rab tu dga' ba la byang chub kyi sems dang po bden pa rnam pa gnyis dbyer med pa'i rang bzhin gyi ye shes de yang nas yang du 'dris par byas pa'i dngos po de ma brjed pa ni 'di skyed par byed pas bdag po'i rkyen te/bdag po'i sgra ni gtso bo'i don ston pa'o/ /rnam pa ni rang bzhin gyis zhi ba nyin yin no zhes bya ba la/ rnam pa ni kha cig tu rang bzhin gcig tha dad par snang ba la bya bar mthong ste/me'i rnam pa gang zhe na/ zlum po dang gru bzhi dang 'phro ba dang / 'khyil ba la sogs pa'o zhes bya ba lta bu'o/ /kha cig tu ni rang gi rang bzhin la rnam pa zhes zer te/ rnam pa dman pa zhes bya ba la sogs pa'o/ /de dag las 'dir ni rang gi rang bzhin la rnam pa zhes 'dod de/'di'i rang bzhin ni rang gi ngo bo'i rnam par rtog pa dang / rjes su dran pa'i rnam par rtog pa la sogs pa zhi ba nyid yin no zhes bya ba'o/ /gal te de ltar rnam par rtog pa thams cad zhi na snang ba med pa'i ye shes tsam du 'gyur zhing de ltar ni rnam pa thams cad mkhyen par mi 'gyur ro//gal te zhi ba'i rnam pa ma yin na yang dngos por 'dzin pa dang bral bar ma gyur pa 'dis sangs rgyas nyid de ma thag tu ga la zhig skyed ces bden pa gnyis 'gal bar 'gyur bas na/ gnas 'di la ni gting dpag dka' ba'i phyir zhes bya ba la sogs pa smos so//zab pa nyid ces bya ba ni byis pa gang dag bden pa gnyis dbyer med par mi shes pa dag 'jigs pa'i gnas su gyur pa dang / gting rtogs par dka' ba'i phyir ro/ /blo'i nor can rnams kyis zhes bya ba ni bden pa gnyis dbyer med pa khong du chud pa rnams kyis zhes bya ba'i don to//log par rtog pa zhes bya ba ni mdor bsdu na/ ji srid du don dam pa'i bden pa 'ba' zhig 'dod pas kun rdzob pa'i rang bzhin spong ba dang / gang dag kun rdzob pa 'dod pas rang bzhin med par sun 'byin zhing bden pa gnyis dbyer med pa'i don 'di mi spyod pa thams cad log par rtog pa ste/de las phye bas ni rnam pa bcu drug tu 'gyur ba'o/ /'dus byas dang 'dus ma byas kyi khams dag tha dad pa'i dngos po med pa nyid kyis bden pa gnyis cig car dmigs pa 'thad pa dang zhes bya ba tshig rnam par sbyar te/ de la sogs pas ni bden pa re re zhig bzung bas 'gal bar 'dod pa rnams sel te go sla'o//de bas na kun rdzob dang don dam pa'i sgo can gyi klan ka la zhes bya ba la sogs pa ni gang dag bden pa re re zhig tshad mar byas nas cig shos sun phyung nas/ yang de'i phyir rnam pa thams cad mkhyen pa nyid ma yin par 'gyur te zhes bya ba la sogs pa klan ka tshol ba rnams so//bden pa gnyi ga la la brten pa'i thabs mkhas pas zhes bya ba ni bden pa gcig cig 'di'i yul yin zhes mi smra ba'i thabs kyis so/ /rnam pa stong du zhes bya ba ni thabs de la brten pa las ni lan mi zad pa'i don te/ stong ni mi zad pa mtshon pa gzhan gyi don to/ /nges par rnam pa thams cad yang dag par bskyed pa ni rang dang gzhan gnyi ga la'o/ /bar chad med pa'i ting nge 'dzin bskyed par bya'o zhes bya ba ni bden pa gnyis su dbyer med pa la mos pa yid la byed pa dang / de kho na yid la bya ba'i sgo nas so//skabs lnga pa'i 'grel bshad rdzogs so// //de ltar skabs lnga pa'i don rnam par phye nas/ da ni skabs drug pa ston par mdzad pa/ rtse mo'i mngon par rtogs pa thob pa zhes bya ba la sogs pa gsungs te/ da ni sa bcu pa'i bar gyis thob par gzhag go/ /de la sa bcu pa ni gnas skabs gsum du dbye bar bya ste/rtse mo'i mngon par rtogs pa la sogs pa yongs su spyod cing rnam pa kun mngon par rdzogs par rtogs pa'i skabs su gsungs pa'i sangs rgyas kyi zhing yongs su sbyang ba la sogs pa byed pa/ 'og min du rnam par smin pa'i lus skyes pa/ dbang bskur ba'i sa la gnas pa ni gnas skabs gcig ste/'di'i che ba'i bdag nyid ni chos kyi dbyings las bstod pa las 'phags pa klu sgrub kyi zhal snga nas ji skad du gsungs pa lta bu'o/ /de nas skye ba gcig gis thogs pa'i ngo bo dga' ldan du skyes pa ni gnas skabs gnyis pa ste/ gnas skabs 'di dang srid pa tha ma pa'i byang chub kyi snying por bdud btul ba'i bar du ni mthar gyis pa'i mngon par rtogs pa'i skabs la spyod par byed pa'o//de nas snying po byang chub der skad cig gcig dang ldan pa'i shes rab kyis rnam pa thams cad mkhyen pa'i ye shes bskyed pa ni gnas skabs gsum pa ste/ der ni skabs bdun pa bstan pa'i don rdzogs par mdzad pa'o/ /'di ni sprul pa'i sku'i dbang du byas pa'o/ /ngo bo nyid kyi mngon par byang chub pa'i dbang du byas te ni/ 'og min de nyid du skabs snga ma gnyis kyi don khong du chud nas mngon par rdzogs par 'tshang rgya bar 'gyur ro/ /so so dang bsdus pa nyid du rtogs pa'i don rnams zhes bya ba la/so so'i don rnams ni skabs re res ji ltar bstan pa dang / tshogs kyi lam la sogs pa'i gnas skabs re re la yang rang bzhin ji snyed yod ces mngon par rtogs pa'i don te/ de'i rjes kyi ngo bor thob pa'i ye shes kyis rtogs pa'o/ /bsdus pa nyid kyi don ni snying po'i don chos kyi dbyings rnam par mi rtog pa'i ye shes kyi rang bzhin te/don de ni mnyam par gzhag pa'i ye shes kyis rtogs par mdzad nas so/ /de ltar na go rims bzhin du bklags nas zhes bya ba ni yid kyis bklags nas zhes bya ba'i don te/ bskal pa grangs med pa dang po ni 'jig rten chos kyi mchog gi bar du'o/gnyis pa ni sa mi g.yo ba'i bar du'o/ /gsum pa ni sa bcu pa'i bar du de srid du goms par bya ba ni go rims bzhin du bklags pa'o/ /'on kyang da dung de la goms par bya bar ma zad par bstan pa'i phyir/ brtan por bya ba'i phyir rnam par sgom par byed pas zhes bya ba smos te/brtan par bya ba'i phyir zhes bya ba ni lhun gyis grub par 'jug pas ched du 'bad pa mi dgos par bya ba'i phyir ro/ /rnam par zhes bya ba ni khyad par can du ste sngon bsgoms pa dag pas ches phul du byung ba'i phyir ro/ /sgom par byed pa zhes bya ba'i yid de'i skal ba can du byed pa'am/de'i dngos por byed pa'o/ /mthar gyis pa'i mngon par rtogs pa zhes bya ba la/ dang po'i tshogs kyi lam phal pa nas bzung ste sa bcu pa dbang bskur ba'i sa la gnas pa'i bar du rang dang gzhan gyi don ji snyed cig brtsams pa de dag la rab tu 'dris pas slar yang yid la byed pas na 'di mthar gyis pa ste/don 'di ni 'phags pa sdong po bkod pa las 'phags pa mi pham pa'i zhal snga nas/ tshong dpon gyi bu nor bzangs la rang gi mthar gyis pa'i mngon par rtogs pa ji lta ba khang bzangs rnam par snang mdzad la gzugs brnyan gyi tshul du bstan pa'i rim pa ltar de shes par bya'o//de ltar rnam par bsgom pa de nyid ni mngon par rtogs pa zhes bya ste/ dus ji lta ba'i rim gyis rtogs pa la mngon du phyogs pa'i phyir ro/ /gzhung yang de brjod pas de'i ming btags pa ste 'bras bu ni de las byung ba'i phyir de skad ces gdags so//pha rol tu phyin pa bzhi ni shes rab kyi pha rol tu phyin pa'i nang du 'dus pa'i phyir zhes bya ba la/ 'di ji lta zhe na/ thabs dang / stobs dang / smon lam dang / ye shes kyi pha rol tu phyin pa ste pha rol tu phyin pa bzhi po 'di rnams ni shes rab kyi pha rol tu phyin pa'i nang du 'dus par 'gyur ba ni sbyin pa la sogs pa rnams byang chub chen por bsngos pa'i mthus chung ngu tsam yang 'khor ba ji srid du mi zad par byed pa'i thabs ni thabs kyi pha rol tu phyin pa ste/de ni shes rab kyi khyad par ro/ /yang sbyin pa la sogs pa dngos po ngan pa'am nyung ngu zhig na yang 'phags pa nam mkha'i mdzod kyi mdo la sogs pa'i rjes su 'brangs te/mang zhing khyad par can du sprul te/ phan 'dogs pas 'di ni stobs kyi pha rol tu phyin pa ste/ ji ltar byang chub sems dpa' rtag par rab tu ngu ba la sogs pa'i khrag rnams brgya byin gyis tsan+dan gyi chur byin gyis brlabs pa lta bu'o//'di yang shes rab kyi pha rol tu phyin pa'i bye brag go/ /gang byang chub sems dpa' legs par spyad pa rnams blos gcig tu bsdus te/ dngos po dman pa rnams kyang khyad du mi gsod par bdag dge ba'i las 'dis sangs rgyas nas 'jig rten gyi 'dren par gyur cig /de ma thob kyi bar du yang rigs dang longs spyod la sogs pa 'di dang 'di lta bur gyur cig ces smon lam 'debs pas de'i ji ltar smon pa ltar 'grub ste/ chos rnams thams cad rkyen bzhin te/ /'dus pa'i rtsa la rab tu gnas/ /bdag gis smon lam 'di btab pas/ /de dang 'dra ba'i 'bras bu 'thob//ces ji skad gsungs pa lta bu'o/ /'di yang shes rab kyi pha rol tu phyin pa'i khyad par ro/ /de de ltar smon lam gyi 'bras bu grub pa spyod pa na yang tshe gzhan dang gzhan de dag tu de lta bu'i go 'phang las mi nyams pa'i ye shes kyi spyod pa dang / ji ltar 'thob pa'i bden pa rnams legs par spyod pa'i 'bras bur 'dod kyi rgyu med pa dang mi mthun pa'i rgyur smra ba la sogs par mi 'dod pa 'di ni ye shes kyi pha rol tu phyin pa ste/de yang shes rab kyi pha rol tu phyin pa'i bye brag go/ /'dir nye bar bsdu ba'i dbang du gsungs kyi mdor na legs pa'i las ji snyed pa ni shes rab la brten par shes par bya'o//gzhan yang 'phags pa dgongs pa nges par 'grel pa'i mdo la sogs pa las pha rol tu phyin pa drug gi nang du bsdu ba'i tshul rnams kyang shes par bya ste 'dir sbyar ba la nyes pa med do/ /lnga pa 'di ni gtan tshigs su blta bar bya'o/ /sbyin pa'i pha rol tu phyin pa la sogs pa 'khor gsum rnam par dag pas rab tu phye ba drug ces bya ba la/'dir sbyin pa la sogs pa drug 'khor gsum rnam par dag pas pha rol tu phyin pa rab tu phye ba zhes sbyar te/ de la 'khor gsum ni sbyin pa dang len pa dang rdzas zhes bya ba la sogs pa rnams te/ 'di dag ni gtso bos yongs su dag par ma byas na srid pa'i bde ba tsam las bgrod par mi nus pa'i phyir rgyal po'i phyag rgya dang bral ba'i dmag gi dpung lta bu'o//de dag gi gtso bo ni gang gis de dag pha rol tu phyin pa pha rol tu phyin pa zhes bya ba'i grangs su gtogs par byed pa yum shes rab kyi pha rol tu phyin pa ste 'di ni rgyal po lta bu'o//de'i phyir ji skad du gsungs pa/ dmus long dmigs bu med pa bye ba khrag khrig rnams/ /lam yang mi shes grong khyer 'jug par ga la 'gyur/ /de bzhin mig med pha rol phyin lnga 'di dag kyang / /dmigs bu med pas byang chub reg par nus ma yin/ /zhes so/ / rnam pa thams cad yongs su rdzogs pas sa bcu yang dag par sgrub par byed pa dang zhes bya ba la/ 'di dag la 'ga' zhig ma tshang yang sa bcu pa'i dbang phyug tu mi 'gyur bas na rnam pa thams cad yongs su rdzogs pas zhes smos te/ gsum pa ni rgyu mtshan du blta bar bya'o/ /de yang sa re re la pha rol tu phyin pa re re zhig shas che bar zad kyi dngos kyi tshul spyad pa'i tshe ni sa re re la yang pha rol tu phyin pa drug car sbyar bar bya'o//'dis ni gang dag shes rab kyi pha rol tu phyin pa'i mthu 'ba' zhig gis mngon par rdzogs par 'tshang rgya'o zhes smra ba de dag kyang bsal ba yin te/ji skad du/ smra ba'i mchog ni gang yang rung / /chos gcig gis ni 'byung ba med/ /gang yang 'byung ba yod min te/ /'byung bar yang dag mi 'gyur ro/ /zhes gsungs pa lta bu'o/ /dran pa nye bar gzhag pa la sogs pa dang zhes bya ba ni dran pa nye bar gzhag pa bzhi dang / yang dag par spong ba bzhi dang /rdzu 'phrul gyi rkang pa bzhi rnams te/ de dag ni nges par 'byed pa'i cha dang mthun pa dang zhes bstan pa dang sbyar te/ de dag tshogs kyi lam la ni slob pa yin pa'i phyir grub pa ni/ phyir mi ldog pa'i sa la gzhag par dgongs pas na sngon las gzhan du bstan to//byang chub kyi yan lag gi rnam pa dang zhes bya ba ni/ dran pa yang dag byang chub kyi yan lag la sogs pa ste/ de dag ni mthong ba'i lam zhes bya ba dang sbyar ro/ /'phags pa'i lam yan lag brgyad pa zhes bya ba ni yang dag pa'i lta ba la sogs pa ste de dag ni bsgom pa'i lam zhes smos pa dang rab tu sbyar ro//de ltar na ji ltar sbyar ba de dag ni go rims bzhin du tshig gzhan du bstan pas rang gi don ming gi rnam grangs kyis rjod par byed pa ste/ de ltar sangs rgyas kyi mtshan nyid rjes su dran pa lam rnam pa gsum po 'di dag gis dran par bya'o/ /nges par 'byed pa'i cha dang mthun pa la sogs pa ni lam gyi bdag nyid ma yin nam/sangs rgyas ni 'bras bu'i bdag nyid yin na ji ltar lam dran pas de rjes su dran par 'gyur zhe na/ 'di ni nyes pa med de 'og nas lam thams cad ni chos kyi sku'i phrin las su 'chad pas las kyi byed pa po rjes su dran par bya ba'i phyir dang /sangs rgyas de dang po lam ji lta bu brnyes pas byang chub pas byang chub par gyur pa lam dang bcas par dran pa ni gcig tu rab tu dang bar 'gyur ba'i rgyu yin pa'i phyir ro/ /gal te dngos por 'dzin pas de rjes su dran par byed pa srid pas de dgag par bya ba'i phyir don dam par dran pa med pa'i mtshan nyid du rjes su dran par bya'o zhes sbyar te/gang gis nga la sgrar shes shing / /gang gis nga la gzugs su mthong / /log par spong bar zhugs pa ste/ /skye bo de yis nga mi mthong / /sangs rgyas rnams ni chos kyi sku/ /chos nyid du ni sangs rgyas blta/ /chos nyid shes par bya min pas/ / de ni rnam par shes mi nus/ /zhes gsungs pa dang yang mi 'gal la/ dran pa nye bar gzhag pa la sogs pa ji skad bstan pa rnams dang / bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa sangs rgyas bcom ldan 'das shin tu rnam par dag pa'i blo mnga' ba zhes bya ba la sogs pa 'phags pa zla ba sgron me'i mdo las gsungs pa ltar yang dran par byed pa ste/ 'di ni las dang po pa'i byang chub sems dpa' rnams myur du sangs rgyas dang phrad par 'gyur ba'i rgyur yang rig par bya'o//de bzhin du rjes su dran pa dang zhes bya bar sbyar te/ de bzhin du zhes bya ba ni don dam par dran pa med pa'i mtshan nyid du zhes bya ba la sbyor ba'i don to/ /dge ba dang mi dge ba dang lung du ma bstan pa'i chos zhes bya ba la dge ba rnams ni bcom ldan 'das kyi chos ni legs par gsungs pa/'di mthong ba la don yod pa/ mkhas pa rnams kyi rang gis rig par bya ba zhes bya ba la sogs pa dran par bya'o/ /mi dge ba rnams ni mi dge ba rang gi rang bzhin gyis grub pa med pa dang /de'i rang bzhin ma shes pa'i dbang du byas te ni spang bar dran par bya'o/ /lung du ma bstan pa rnams ni de dag la mi 'jug cing dge bar gyur pa rnams la 'jug par dran par bya'o/ /yang na chos rnam pa gsum du phye ba ni rang gi blo'i 'jug pa'i dbang tsam la rag las pa yin gyi/ chos rnams la de ltar rang grub pa ni med pas sems rnam par rig pa'i mtha' las ni lung du ma bstan pa rnams kyang dge bar 'gyur te/ji skad du rigs pa dang bzo la sogs pa gus par byas te byin pas byin pa ri dwags e ne ya'i lta bu nyid dang zhes gsungs te e ne ya ni bse kha sgo'o/ /yang sdig pa srab pa'i dbang du byas te stobs bskyed pa rnyed pa rnams la bde ba nye bar ston pa'i slad du dbul lo zhes gsungs te/de'i phyir dngos po rnams ni rang bzhin gyis 'od gsal ba tsam zhig tu bden gyi lhag ma'i snang ba rnams ni ma nges par khong du chud par bya'o/ / chos zhes bya ba ni rtogs pa dang ldan pa rnams la ji skad bshad pa'i tshul gyis thams cad la phan 'dogs pas na ngan song la sogs par lhung ba las 'dzin pa'i phyir ram/ yang na rang gi mtshan nyid 'dzin pa'i phyir nges pa'i tshig gi tshul gyis chos so/ /snga ma bzhin du rjes su dran par bya'o zhes sbyar te/de la snga ma bzhin du zhes bya ba 'dis ni don gnyis ston par byed de/ sngar rnam pa thams cad mkhyen pa'i skabs su gdams ngag bstan pa las/ dbang po rtul dang rnon po dag /ces bya ba la yang snyegs te/ de'i phyir byang chub sems dpa' phyir mi ldog pa'i dge 'dun zhes bya ba smos so//de las gzhan pa ni don dam par dran pa med pa'i mtshan nyid du zhes bya ba la yang snyegs par byed do/ /de la rjes su dran par bya ba ni thun mong du dran par bya ba bcom ldan 'das kyi nyan thos kyi dge 'dun ni legs par zhugs pa/ mthun par zhugs pa/ drang por zhugs pa phyag 'tshal ba'i 'os su gyur pa zhes bya ba la sogs pa'i lung gis so/ /thun mong ma yin pa'i yon tan rjes su dran pa ni phyir mi ldog pa'i sa rab tu brnyes pa/ chos kyi rgyal po'i sras bzhin 'dzum zhing gsong por smra ba/ sems can thams cad kyi bya ba ci yod ces sems pa zhes bya ba la sogs pa shin tu rgyas pa'i sder gtogs pa'i mdo sde dang //de las ji skad du gsungs pa ltar rjes su dran par bya'o/ /de bzhin du rjes su dran par bya'o zhes bya ba ni snga ma bzhin no/ /tshul khrims kyi sdom pa dang / dge ba'i chos sdud pa dang / sems can gyi don byed pa'i tshul khrims rnams te/de dag rjes su dran par bya ba ni 'di lta ste/ tshul khrims ni 'gyod pa med pas rgyud bsil bar byed pa'o/ /mtho ris kyi lam du gyur pa'o/ /ji ltar smon pa'i 'bras bu sgrub pa'o/ /'gyod pa med pas ting nge 'dzin bskyed pa'o/ /lha dang mi'i sbyin pa yongs su sbyong ba'o zhes bya ba la sogs pa'i rim pas so//gtong ba ni ser sna spangs pas sems la kun tu 'dzin pa med cing rang gi lus dang srog la sogs pa rnam par 'gyed pa ste/ de'i yon tan rjes su dran par bya ba ni/ sbyin pa ni mdza' bshes 'phel bar byed pa'o/ /tshe rabs su rab tu bde ba'i rgyur gyur pa'o//pha ma dang bla ma la mchod pa'i yan lag tu gyur pa'o/ /gzhan la rag ma las pa'i gtso bo zhes bya ba la sogs pa'i rim pa ste/ rgya cher ni 'phags pa sbyin pa'i pha rol tu phyin pa'i mdo la sogs pa las shes par bya'o/ /lha ni rgyal chen rigs bzhi la sogs pa ste/de dag rjes su dran par bya ba ni de dag ni yid du 'ong ba'i las khyad par can las grub pa ste/ rnam rtog dge las byung ba yi/ /las dge 'bras bu lha rnams te/ /rab tu dang ba'i yid kyis ni/ /mdzes pa'i lha rnams mngon par grub/ /ces gsungs pas so/ /de'i phyir bdag gis kyang sems can rnams yid rab tu dang bar byas te/lhar skye bar bya ba la dgod cing rim gyis theg pa gsum gyis yongs su mya ngan las 'das pa'i dbyings su dgod par bya'o zhes rjes su dran pa dang / gzhan yang 'phags pa 'jig rten dbang phyug dang / rje btsun lha mo skul byed ma dang /rje btsun sgrol ma la sogs te/ mdo gang dang gang dag las mchog tu thugs brtse ba dang ldan pa rnams lhag pa'i lha de'i yon tan ji skad bstan pa rnams rjes su dran par bya ba ni 'phags pa sdong po bkod pa las/ de nas kho mo sngon yongs su bsten pa'i lha mo zhig gis bskul te zhes bya ba la sogs pa'i yon tan 'thob pa'o//gzugs la sogs pa'i chos thams cad ces bya ba ni kun nas nyon mongs pa dang rnam par byang bas bsdus pa rnams so/ /dngos po med pa'i ngo bo nyid du zhes bya ba ni chos kyi dbyings kyi rang bzhin du'o/ /khong du chud pas zhes bya ba ni mos pa yid la byed pas so//rtogs pas zhes bya ba ni de kho na nyid yid la byed pas so/ /yang na de dag mngon par rtogs pa'i don dang snying po'i don la sbyar ro/ /yang na rnam grangs kyis bstan pa'o/ /gang yin pa de ni mthar gyis pa'i bya bar bzhed pa yin no zhes bya ba la skabs 'dir pha rol tu phyin pa drug dang /rjes su dran pa drug dang / chos thams cad dngos po med par rtogs pa zhes bya ba rnam pa bcu gsum zhig bstan pa ni sngar rnam par g.yeng ba spang ba'i phyir/ ngag re res kyang mngon par rtogs pa'i don ma lus pa ston par byed pa'o zhes bshad pa'i tshul gyis na byang chub sems dpa' skye ba gcig gis thogs pa dang /srid pa tha ma pa de ni rnam pa bcu gsum po 'di dag la brten nas bshad pa dang / 'chad par 'gyur ba'i rim pa thams cad yid la rab tu goms par byed de/ kha cig na re mthar gyis pa'i bya ba 'di ni dbang bskur ba'i sa dang sa dgu pa la sogs pa yang yid la byed do zhes zer ba ni mi 'thad do//'di ni skabs 'og ma bar chad med pa'i lam dang cis kyang bar du ma chod par bstan pa'i phyir ro/ /skabs drug pa'i 'grel bshad rdzogs so// //da ni skye ba gcig gis thogs pa dang / srid pa'i tha mar yang shin tu goms par byas pa dbang bskur ba'i sa la sogs par yang ci rigs kyis goms par byas pas/ lhun gyis grub par 'jug pa la rab tu las su rung bar gyur pa'i byang chub sems dpa' sems dpa' chen po byang chub kyi snying po'i mchog dam pa la 'dug par gyur pa ste/skad cig gcig dang ldan pa'i shes rab kyis rnam pa thams cad mkhyen pa'i ye shes skyed par byed pa de bstan pa'i phyir mthar gyis pa'i mngon par rtogs pa rnam par bsgom pa ni sngar ji ltar bslabs pa'i don de dag nyid shin tu goms par bya ba'i phyir skad cig ma gcig gis bsgoms pas/skad cig ma gcig pa'i mngon par rdzogs par byang chub pa yin te zhes bya ba la sogs pa gsungs te/ 'dir skad cig ma zhes bya ba'i don 'di ji ltar blta bar bya/ kha cig tu ni 'dus byas kyi chos rnams myur du 'gro ba'i skad cig ma se gol gtogs pa gcig la yang de dpag tu med pa zhig 'gag ces grub pa'i mtha' las bstan te/de'i yun la yang 'phags pa nyan thos rnams kyis ni de sum brgya dang drug cu rtsa brgyad 'gro bar 'dod de/ skad cig ma 'di'i ngo bor bya ba'am/ yang na gdags pa'i bstan bcos la sogs pa las dus rnams kyi mthar rnam par gzhag pa'i skad cig ma ji skad bstan pa'i dbang du 'di bya'am/gal te zhig na skyes bu'i mngon par 'dod pa'i don grub pa'i dus skad cig ma de la bdag gi bya ba rdzogs so zhes brjod pa'i skad cig ma 'di bzung ngo / /de la dang po dang bar ma'i dbang du byas so zhe na/ ni ha cang yang dus yun thung bas ji ltar de rdzogs par nus/ tha ma ltar byas na ni ting nge 'dzin 'di'i dus nges pa med de snying po byang chub der yang yun ji srid cig bzhugs par 'gyur zhe na/ 'dir sngar nyid bdag gis dus rnams ni ring thung du gyur pa bsam pa'i dbang las rang grub pa med ces bstan zin pas 'di lta bu'i rnam par rtog pa bskyed pa'i mi cha'o//'on kyang phyogs gsum pa la brten par bya ste/ bar chad med pa'i ting nge 'dzin de ni nges par snying po byang chub der skyed par byed kyi/ byang chub sems dpa' 'ga' zhig snying po byang chub der zhugs pa las ting nge 'dzin de ma bskyed par slar ldang ba ni mi srid ces gsungs la/snying po byang chub der yang dus ji srid cig gis ting nge 'dzin de bskyed pa ni rang bzhin brtsan par byas pa'i tshe ni bzhed pa la rag las pa'i phyir dang / dus la mnga' brnyes pas skad cig ma phyogs dang po'i yun gyis kyang de brnyes pa la gnod pa med mod kyi/gdul bar bya ba'i dbang gis gcig kho nar nges pa med pa ste/ de'i phyir 'phags pa dam pa'i chos pad+ma dkar po zhes bya ba'i mdo las/ bcom ldan 'das de bzhin gshegs pa mngon par shes pa'i ye shes chen po zhes bya ba de btsun mo'i 'khor nas mngon par byung ste/sras bcu drug spangs nas snying po byang chub la bzhugs te/ bdud bcom nas de'i 'og tu rnam pa thams cad mkhyen pa'i ye shes mngon du bya ba'i phyir/ bar gyi bskal pa lnga bcur skyil mo krung ma bshig par bzhugs pa las/ de nas gdod mngon par rdzogs par sangs rgyas so zhes gsungs la/bdag cag gi rje btsun shAkya thub pa'i zhal snga nas ni snying po byang chub la bzhugs pa'i zhag de nyid kyi tho rangs bar chad med pa'i ting nge 'dzin brnyes pas mngon par rdzogs par sangs rgyas par bstan to/ /de bzhin du/ khyod kyi dang por lha'i bu yi/ / bdud kyi me tog rgyal mtshan bsnyal/ /de nas nyon mongs bdud kyi ni/ /nga rgyal rgyal mtshan mthon po gtib/ /khyod kyis byang chub ma brnyes par/ /'dod khams dbang phyug las rgyal te/ /byang chub bar chad med lam la/ /khams gsum dbang phyug las rgyal lo/ / zhes bya ba la sogs pa'i tshul yang gdul bar bya ba'i snang ba dang 'tsham par brjod kyi/ rang gi rang bzhin ni ci khyod byang chub pa dang dus gcig kho nar bdud thams cad nges par bcom pa lags sam zhes bya ba la sogs pa'i rjes su 'brang bar bya'o/ /de yang mtshan nyid kyis rnam pa bzhi yod pas dang po zhes bya ba la sogs pa la/rnam pa bzhi po 'di dag skad cig la rtogs par byed dam/ 'on te rim gyis byed/ phyogs dang po ltar na gnyis pa la sogs pa'i don ji ltar drang bar bya/ phyogs gnyis pa ltar na yang skad cig ma gcig pa'i ming ji ltar rung ste/ skad cig ma bzhi pa'i mngon par rdzogs par byang chub par ji ltar mi 'gyur zhe na/ de ni nyes pa med de/ phyogs dang po ltar na yang dang po dang gnyis pa la sogs pa ni grangs ji ltar bstan pa'i rim pa smos par zad kyi/ don gyi dbang du byas pa'i tshe ni dang po la sogs par mi rjod pa'i phyir ro//phyogs gnyis pa ltar na yang nyes pa med de/ byis pa rnams kyis skad cig gcig kho na la dus la dbang thob pa de rnams kyi skad cig ma bzhi'i skabs su 'gyur ba'i phyir na/ de 'dod na skad cig kyang bskal pa tsam du byin gyis rlob par byed do zhes ji skad gsungs pa'i tshul gyis so//gal te de ltar skad cig ma bzhi'i rim pas yid la byed pa la skyon med cing bcom ldan 'das mngon par shes pa'i ye shes chen po'i zhal snga nas kyang skad cig ma gcig pa'i mngon par rdzogs par byang chub pa 'di bar gyi bskal pa lnga bcur bsgom pa zhig na/ de'i tshe 'di yang ji ltar mthar gyis pa'i mngon par rtogs par mi 'gyur zhe na/rnam pa thams cad mkhyen pa la sogs pa skabs dang po lngar ni tshogs kyi lam la sogs pa sngar ma mthong ba dang / mthong ba'i don rnams la re re la yang dus ring zhig tu sgom par byed pa na rang rang gi gnas skabs pa yin gyi/mthar gyis pa'i mngon par rtogs pa ma yin la/ mthar gyis pa'i mngon par rtogs pa'i skabs su ni pad+ma 'dab ma brgya 'bigs pa'i rab tu myur ba'i shugs kyis sngar ji ltar mthong ba'i lam 'bras bu dang bcas pa rnams rim gyis 'jug pa'i tshul las rim pa snga ma la sogs pa spangs te/de ma thag pa'i 'jug pas rim pa 'og ma yang dran pa'i sbyor bas yid la byed kyi/ rim pa re re la yun ring du mi gnas pas na mthar gyis pa ste/ rab tu myur ba'i rim gyis rtogs pa ni mthar gyis pa'o/ /skabs bdun pa'i dbang du byas te ni skyes bu rtsig pa la mchong ba'i dpes ni de ltar rim gyis yid la byed pa ni gnyi ga ltar ma yin gyi/sngar ji ltar yid la byas pa'i don rnams gcig tu bsdus te/ de dag gi spyi'i mtshan nyid gcig tu bar ma chad pas bzhi char dus gcig la rtogs par byed cing dus ring zhig thogs pa lta zhig na yang yid la byed pa gcig nyid la yang nas yang du gtod kyi sngon bzhin du rim gyis ma yin pa'i phyir 'di ni mthar gyis pa'i mngon par rtogs pa las mtshan nyid gzhan du grub bo//rnam par smin pa ma yin pa'i zag pa med par zhes bya ba la rnam par smin pa ni rnam pa gsum ste/ sa dang po la 'jig rten las 'das pa rnam par smin pa dang /sa brgyad pa la mtshan ma med par rnam par smin pa dang / sangs rgyas kyi sa la bsam gyis mi khyab cing lhun gyis grub par rnam par smin pa ste/ de dag tu chos thams cad gnas skabs snga ma las mi 'dra bar smin pas na rnam par smin pa'o/ / de ltar rnam par smin pa ma yin pa zhes bya ba ni gang dag mthong ba'i lam rgyud la ma bskyed pa de dag gi gzung ba dang 'dzin pas bsdus pa'i chos ji snyed snang ba de thams cad ni rnam par smin pa ma yin pa zhes bya'o/ /zag pa med pa zhes bya ba la de dag gi 'jug pa'i dbang du byas te/ rnam par smin pa ma yin du zin kyang /chos de dag gi rang bzhin ni zag pa med pa yin te/ byis pas byang chub mi shes kyang / /de dag de la rnam par gnas/ /zhes gsungs pa'i tshul gyis so/ /'dir zag pa ni rtog pa dang nyon mongs pa gnyis ka la sbyar ro/ /gnyis pa rnam par smin pa'i chos nyid kyi gnas skabs kyi zag pa med par zhes bya ba ni sngar ji skad bshad pa'i rnam par smin pa gsum gyis bsdus pa 'phags pa'i skye bo rnams kyi rgyud la yod pa'i chos ji snyed pa gnas par gyur pa'i phyir rnam par smin pa zhes brjod pa de dag gi rang bzhin chos nyid kyi gnas skabs zag pa med pa kho nar gnas pa'o//rnam par smin pa ni gnas yongs su gyur pa'o zhes brjod na gnas gyur pa ci zhe na/ chos kyi dbyings kyi snang ba rnam par dag pa ltar gyur pa yin gyi/ gang dag gis/ 'gog dang 'du shes med snyoms 'jug /'du shes med pa pa las 'byung //mig la ltos bzhin rgyu rkyen ltos/ /chad nas yang 'byung 'khor 'jug ldog /ces bya ba dang / len dang bzod dang gsal ba dang / /sa bon dang ni las rnams dang / /lus kyis myong dang sems med pa'i/ /snyoms 'jug de bzhin 'chi mi 'thad/ /ces bya ba'i rigs pas kun gzhi'i rnam par shes pa zhes bya ba yod par 'dod cing de gnas yongs su gyur pa dang /ma gyur pa las rnam par smin pa dang / rnam par smin pa ma yin par brjod pa ni rigs pa ma yin te/ rnam par shes pa de ni yul gang zhig 'dzin par byed pa mig gi rnam par shes pa la sogs pa dang lhan cig tu yang ma mthong la/brgyal ba la sogs pa'i tshe de dag rgyun chad pa na yang ma yin te/ de'i phyir rtag pa dang chad pa la sogs pa'i lta ba las bzlog u0f37pa'i phyir/ bdag dang kun gzhi la sogs pa ni/ chos kyi dbyings dgongs pa'i gzhir b zhag nas de nyid la de ltar bstan cing brtags pa ste/ji skad du gsang ba'i bdag po de la 'khor ba thog ma med pa nas/ byis pa'i skye bo rnams ngar 'dzin pa dang nga yir 'dzin par mngon par zhen pas bdag gi khyad par grangs med pa rab tu brtags te/ gsang ba pa'i bdag po de dag bdag gi ngo bo nyid la ma dpyad par bdag go zhes ngar 'dzin pa kun nas slong ngo //gzhan dag ni dus las byung ba dang 'dzin pa pos sprul pa dang nges par 'byung ba dang 'di lta ste/ dbang phyug dang / 'byin pa po dang / dus dang / gtso bo dang / byed pa po dang / byed pa po ma yin pa dang /rnal 'byor dang / tshad ma dang / dag pa dang / ma dag pa dang / nang gi bdag dang / skyes bu dang / khyab bdag dang / srog dang / gang zag dang / rnam par shes pa dang / kun gzhi dang / shes pa po dang / mthong ba po dang / gzung ba dang / 'dzin pa dang / shes pa dang / shes bya dang / shes par bya ba dang / shed las skyes dang / shed bu dang / brjod par bya ba dang / rjod par byed pa dang / brjod par bya ba ma yin par rtog ste/ gsang ba'i bdag po bdag gi khyad par de lta bu la sogs pa rnal 'byor pa dag gis thar pa 'dod pas sngon brtags pa yin no zhes gsungs pa lta bu'o//de ni 'jig rten dang 'jig rten las 'das pa'i chos de dag gnyi ga yang bye brag med par mtshan nyid med par rtogs par byed pa'i phyir/ gsum pa mtshan nyid med par zhes bya ba smos te mtshan nyid ni chos rnams kyi rang gi thun mong ma yin pa'i rang bzhin sra ba dang / grang ba dang / rig pa dang /be+ems po la sogs pa so so rang gi mtshan nyid ma lus pa'o/ /de med par don dam par rigs pa'i mthu mi theg pas na med ces brjod kyi/ ri bong gi rwa lta bu ni ma yin te/ ma brtags na nyams dga' ba'i ngo bo sgyu ma tsam du de dag rang rang gi mtshan nyid du yod pa ni mngon sum du gyur pa'i phyir ro//de ltar mtshan nyid med pa de dag kyang mtshan gzhi tha dad pa sra ba dang / tsha ba la sogs pa tha dad pa ltar/ rang rang gi yod pa'i mtshan nyid las log pa tsam du gnas so snyam du rtogs la/ don dam pa ni chos rnams kyi spyi'i mtshan nyid yin pa'i phyir/ de ltar ni mi bsam par ston pa bzhi pa gnyis su med pa'i mtshan nyid du zhes bya ba smos te/gzugs kyi stong pa nyid dang tshor ba la sogs pa'i stong pa nyid gang dag yin pa de dag ni gnyis su med cing gnyis su byar med de so so ma yin tha mi dad par rtogs par byed ces bya ba'i don to/ /rtogs pa zhes bzhi char gyi mthar chos thams cad ces bya ba bstan pa ni rtogs pa de dag re re yang kun nas nyon mongs pa dang /rnam par byang ba'i dngos po ma lus par bsdus pa'i phyir ro/ /de bzhin du skad cig ma gcig pa'i mtshan nyid ces bya ba smos pa yang rtogs pa de dag bzhi char yang khyad par can gyi ye shes kyi skad cig ma gcig la mngon sum du byed par ston pa'o//de bzhin du mngon par rdzogs par byang chub pa zhes bya ba la/ sam ni rdzogs pa'i don ston pa ste chos thams cad ces smos pas so/ /de nas ni mngon du byang chub pa ste mngon du rtogs par byed ces bya ba'i don to//'di skad du byang chub sems dpa' bskal pa mang po zhig tu kun rdzob kyi dngos po rnams kyang ma lus par pad+ma'i 'dab ma ltar ma 'dres par rang gi mtshan nyid dang / las sam rgyu la sogs par shes pa la goms par byas la/ de dag gi rang bzhin spros pa dang bral ba'i chos nyid la yang yun ring du goms par byas pa la goms pa'i mthu mthar thug pa'i rtogs pa 'di skye ba na kun rdzob kyi bden pa dang /don dam pa'i bden pa gnyis cig car nyid du ye shes kyis yul du byas nas phan tshun 'gal bar snang ba dag mi 'gal bar yul du byed pa ni yul gyi rang bzhin de nyid de ltar gnas pa'i phyir yang ste ji skad du/'o na de ni rtogs gyur pas/ /de yi rang bzhin mngon sum phyir/ /mi mkhas rnams kyang dngos rnams kyi/ /dngos po 'di 'dra ci mi rtogs/ /ma yin thog med rgyud lci bar/ /dngos por sgro btags dbang byas pas//de phyir srog chags thams cad kyis/ /mngon sum rtogs par mi 'gyur ro/ /de la sgro btags gcod byed pa/ /shes rab byed pa'i gtan tshigs kyis/ /rjes su dpogs na shes par byed/ /rnal 'byor dbang rnams mngon sum gsal/ /zhes bya ba las glengs te/ thog ma med pa'i srid par skyes pa dngos po la mngon par zhen pa'i dug gis dkrugs pa'i blo can dag gis mngon sum tsam du rtogs pas rnam pa rnams khong du chud par mi nus te/ 'dra ba gcig nas gcig tu brgyud pa dmigs pas blo snang ba dag gis skad cig ma mi rtogs pa bzhin no zhes bshad cing de las kyang brtsams te/'dis ni dngos po rnams kyi sgro btags pa'i rnam pa dben pa ni stong pa nyid ces bya na/ stong pa nyid sgro btags pa'i rnam pas bsgribs pa'i ngo bo yin pa'i phyir dngos po'i rang bzhin bzung bzhin du byis pa rnams kyis nges par mi 'gyur te/de'i phyir gzung mod kyi tha snyad gdags su mi rung ba'i phyir ma bzung ba dang 'dra ba nyid yin pas 'di ni dmigs pa'i rig byar gyur pa ma yin no zhes bstan to/ /de'i phyir blo'i 'jug pa'i dbang du byas te/ don dam pa'i bden pa ni kun rdzob kyi bden pa las rnam par dben pa yin te/sa rab tu dga' ba la sogs pa'i mnyam par gzhag pa'i ye shes la kun rdzob rnams mi snang ba'i phyir ro/ /kun rdzob kyi bden pa de yang don dam pa'i bden pa las so rnam par dben pa ste byis pa rnams kyi shes pa la ni kun rdzob 'ba' zhig snang ba'i phyir ro/ /shes rab dang thabs gnyi ga la goms pa phul du byung ba'i byang chub sems dpa' chen po snying po byang chub la bzhugs pa dang /thub pa'i dbang po rnams kyi ye shes kyi snang ba rab 'byam gyis ni gnyi ga ltar snang ba rnam par btang ste/ bden pa gnyis su dbyer med par snang ba'i dbang gis srid pa dang /zhi ba gnyi gar mi gnas pa'i mya ngan las 'das pa grub ste/ don 'di la sbyar ba'i phyir ni 'phags pa sa bcu pa'i le'u las/ sa mi g.yo ba la gnas pa'i byang chub sems dpa' yang dag par bskul ba'i dbang du byas te/ de dag sa bdun shes rab thabs kyis rab sbyangs shing //shin tu tshogs bsags smon lam chen po rab tu btab/ /mi yi dam pas byin rlabs dge ba'i rtsal ldan zhing / /ye shes mngon 'dod mkhas pa brgyad pa yongs su gnon/ /bsod nams ye shes nyer bsags snying rje byams ldan zhing / / tshad med sems kyi rjes song mkha' dang 'dra ba'i blo/ /drang srong chen po chos thos rtogs pa'i stobs ldan pa/ /mi skye ba yi bzod pa phra zhing zhi ba rab tu thob/ /snga nas ma skyes mi skye mtshan nyid med pa dang / /ma byung 'jig pa med cing rgyu ba med pa dang / /dngos po skye 'jig med cing de nyid rtog med pa//yid dang sems kyi rgyu ba med cing nam mkha' 'dra/ /de dang 'di 'dra'i bzod ldan spros pa med gyur pa'i/ /mkhas pa'i zab spyod zhi ba'i gnas rab thob pa yin/ /dgra bcom rang rgyal 'gro ba kun gyis shes par dka'/ /mtshan ma sna tshogs 'dzin pa'i 'du shes rnam par bsal//de ltar gnas pa'i yid dang sems ni rtog pa med/ /dge slong 'gog dang ldan ltar rnam par rtog mi 'thob/ /rmi lam chus khyer gnyid sad bzhin du rtsol dang bral/ /tshangs pa'i gnas kyi 'dod pa ji bzhin nyid kyang med/ /sngon gyi byin gyis brlabs kyis bde gshegs bskul ba mdzad//'di ni bde gshegs dbang bskur bzod pa dam pa ste/ /nged kyi ye shes stobs spangs sangs rgyas chos kyi rnams/ /de dag khyod la med kyis de la brtson 'grus rtsoms/ /ci phan khyod kyi nyon mongs 'bar ba kun zhi yang / / 'jig rten nyon mongs mes tshig de dag mi lta 'am/ /sems can phyir spyad pa yi sngon gyi smon lam soms/ /'gro ba mthar gyur ye shes don zhugs shes rab kyis/ /chos nyid de bzhin nyid 'di mi rtog rtag tu 'dug /sa 'di rgyal ba nyan thos rang rgyal kun gyis te/ /'dis ni 'jig rten dag tu stobs bcu mi brjod do//gzhan du ye shes yangs pa dus gsum tshad kyis brjod/ /de ltar de la mtshungs med lha dang mis mchod pa/ /ye shes sgo mo rnam mang nye bar bsgrub par mdzad/ /rgyal ba'i chos sgrub pha rol mtha' yas zhugs mdzad pa/ /de la sngon gyi byang chub spyod pa char mi 'gro//khyu mchog 'di dag ye shes sa mchog 'di thob nas/ /phyogs rnams kun tu skad cig gcig gis rgyas 'gengs pa/ /ye shes shugs dang ldan zhing mngon shes mchog thob pas/ /rgya mtsho cher phyin gru chen rlung gis khyer ba bzhin/ /ched du bskyod sems bral zhing ye shes las la gnas//zhing rnams 'byung zhing gnas pa rnam par spyod par byed/ /khams rnams bzhi po kha dog tha dad yangs pa dang / /phra zhing che dang rnam par che la yang dag 'jug /stong gsum shin tu rdul phra kun la 'jug byed de/ /zhes bya ba la sogs pa gsungs te/ de'i phyir gang dag sangs rgyas kyi sa kun tu bzang po la snang ba dang bcas pa'i ye shes mi 'dod cing /rnam par mi rtog pa'i ye shes tsam zhig 'dod pa yang ji ltar rnal 'byor spyod pa pa rnam pa med par smra ba rnams kyis/ mi rtog ye shes rgyu ba la/ /don kun snang ba med phyir yang / /don med khong du chud par bya//de med pas na rnam rig med/ /ces bya ba dang / don ni don du grub gyur na/ /mi rtog ye shes med par 'gyur/ /de med pas na sangs rgyas nyid/ /thob par rigs pa ma yin no/ /zhes bstan pa dang khyad par med par 'gyur ro/ /de'i phyir de bzhin gshegs pa rnams ni don dam pa'i bden pa rab tu zhi ba de thugs rje chen pos ched du mngon sum du mi mdzad kyi/bden pa gnyis su dbyer med cing pha rol gyi don dang rnam par shes pa gnyis gang du yang rtag tu med mod kyi/ chos kyi dbyings kyi mthu rlabs sna tshogs su snang ba'i rnam par ri mor bris pa lta bu rnam pa ma lus pa gsal bar gyur pas bzhugs par nges so//gang yang / sa la gzugs rnams yod pa dang / /lha yul gnas pa'i khyim rnams ni/ /rnam pa sna tshogs gang snang ba/ /de dag kun gzhi snang ba yin/ /kun gzhi kun du lag pa ste/ /kun du kha mig mgo bo yang / / cig car ram ni rim gyis ni/ /sa rnams khyab par rab tu gnas/ /byis pa rnam par myos byed de/ /rang gi snying la gang gnas pa/ /de ni de la gnyis tshul du/ /lus kun bkang ste rab tu gnas/ /zhes bstan te/ de nas yang kun gzhi zhes brdar btags pa gang yin pa de ni byis pa rnams la chos kyi dbyings de nyid de skad ces bya ba'i ming du btags te bstan to zhes ston par mdzad pa ni/stong min dngos po gang yang med/ /tho bas rdza ma ji bzhin du/ /dngos po gang la gzhom bya ba'i/ /dngos po dngos su yod ma yin/ /de ste stong pa'i dngos yod na//'jig byed ma yin gzhig par 'gyur/ /gzhig bya gzhig par byed pa dag /de ni rnam par rtog pas brtags/ /zhes gsungs la/ 'phags pa klu sgrub kyi zhal snga nas kyang / dang po bdag tu smra ba dang phyi rol gyi don du smra ba sun phyung ste/ shes bya nang gi yin pa nyid du bsgrub par mdzad nas/de nas yang slar/ de ni ji bzhin der ni snang / /ji ltar snang ste de bzhin min/ /rnam shes bdag min tshul yin pas/ /rnam shes min pa'i gzhi gzhan snang / /dper na khab len mthong ba na/ /lcags ni myur du yongs su 'gul/ /'di la sems pa yod min na/ / sems dang bcas pa bzhin du snang / /de bzhin kun gzhi rnam par shes/ /sems med sems dang bcas pa bzhin/ /'gro dang 'ong bas rnam g.yo zhing / /rtag tu srid pa gsum po len/ /dper na rgya mtsho'i tha ma las/ /nges par rlabs ni rnam par g.yo/ /de bzhin kun gzhi rnam par shes//lus la brten te g.yo bar byed/ /ces bstan cing / dper na bu ram mngar ba dang / /me ni tsha ba'i rang bzhin te/ /de bzhin chos rnams thams cad ni/ /stong pa'i rang bzhin gcig tu 'dod/ /ces gsungs pas/ sna tshogs chos kyi dbyings de nyid snang ba dang bden pa gnyis dbyer med par bstan to//sa rab tu dga' ba la sogs par ni de dag gcig mngon du byas pa na gcig mi snang bas na phan tshun bzlog pa'i ngo bor gnas shing / rjes las thob pa'i ye shes kyis de dag dbyer med par mos pa tsam zhig byed pa ni sngar/ der snang gzugs la sogs pa la//sangs rgyas nyid du nges 'dzin dang / /zhes gsungs par gsal por bstan pa ste/ slob dpon gyi zhal snga nas shes rab kyi pha rol tu phyin pa la gnas pa ni chos kyi dbyings kyi ngo bo nyid kyi gzugs la sogs pa la de bzhin gshegs pa nyid du nges par 'dzin pa dang zhes bstan pas so//lugs las chos kyi dbyings kyi rang gi ngo bo zhes bya ba la sogs pa'i ngag gcig po 'di ni mtshan nyid rnam pa bzhi char la yang sbyar bar bya'o/ /sbyin pa la sogs pa'i ye shes zhes bya ba ni mthar gyis pa'i mngon par rtogs pa rab tu bsdu ba mngon par rtogs pa'i rim pa smos pa yin mod kyi/de'i nang nas kyang sbyin pa la sogs pa rnam pa bcu gsum las gang yang rung ba cig skad cig la dmigs pas bshad pa dang 'chad par 'gyur ba'i don ma lus pa skad cig ma gcig la dmigs par nus te/ de'i rgyu mtshan bstan pa'i phyir/ dngos po so sor nges par 'dzin pa dang bral ba zhes bya ba smos te/ rang bzhin gcig tu goms pas so/ /de'i phyir so sor 'dzin pa las go bzlog pa'i ngo bos ni mang po gcig tu bsdus pa 'ba' zhig tu ma zad kyi zo ba'i dum bu'i dpes gcig gis kyang mang po sdud nus pas na/ sbyin pa la sogs pa re res kyang sbyin pa la sogs pa nas dpe byad bzang po brgyad cu'i bar gyi mtshan nyid kyi chos rnams bsdus pa'i phyir zhes tshig rnam par sbyar ro//sngon gyi smon lam gyis 'phen pa dang zhes bya ba ni/ skad cig gcig dang ldan pa'i shes rab kyis chos thams cad rtogs par gyur cig ces bya ba dang /'phags pa bzang po spyod pa'i smon lam la sogs pa rgyun du bton pa'i dbang gis te/ de bas na 'phags pa klu sgrub kyi zhal snga nas/ byang chub sems dpa'i sdom pa dang / /bzang po spyod lam ji lta ba/ /byang chub sems la gzhol ba yis/ /blo gros g.yo ba med par bya//zhes gsungs so/ /chos kyi dbyings kyi mthu ni thams cad de'i rang bzhin yin pas gcig pa dang tha dad pa nyid med pas yang dag par na gcig gis du ma bsdus pa nyid kyang ma yin pas ngo mtshar ci zhig che zhes bya'o/ /tshig lhag ma rnams ni go sla bas rnam par ma phye'o//skabs bdun pa'i 'grel bshad rdzogs so// //de ltar skabs bdun po de dag gi rgyu'i gnas skabs yongs su rdzogs par byas nas/ da ni skabs brgyad pa 'bras bu'i bdag nyid bstan par bya ba'i phyir skad cig ma gcig pa'i mngon par rdzogs par byang chub pa rnam par bsgom pa'i skad cig ma gnyis pa la zhes bya ba la sogs pa gsungs so//rnam pa bzhi yin pas zhes bya ba ni ngo bo nyid dang / chos dang / longs spyod rdzogs pa dang / sprul pa rnams so/ /kha cig na re slob dpon gyi zhal snga nas ni gzhung gzhan du sku gsum du bstan pas de ltar bzhed mod kyi/'di ni mkhan po yang dag rnam par snang mdzad kyi/ /gdams ngag gtso bor mdzad pas na/ /de yi bzhed pa bkod pa'o/ /zhes zer te/ 'og nas sku'i grangs nges par tha dad pa bstan pa'i lugs gang yang sun ma phyung bas na/de ltar nges pa ni ci yang med de/ slob dpon gyi zhal snga nas ni sku dur bzhag kyang / nyes pa med par bzhed par gsal lo/ /dang po zhes bya ba ni grangs kyi dang po'am/ yang na mchog gi don gyi dngos po ste/ sngar rang bzhin gyis shes rab kyi pha rol tu phyin pa'i che ba'i bdag nyid bstan pa'i skabs su bstan pa'i tshul gyis so//ngo bo nyid kyi sku zhes bya ba ni 'di ni ngo bo nyid kyang yin la sku yang yin pas na ngo bo nyid kyi sku zhes gzhi mthun pa'i bsdu ba'o/ /de la ngo bo nyid ni chos can khyad par can rnams kyi chos nyid khyad par can gang yin pa de 'dir ngo bo nyid ces bya'o//chos can khyad par can rnams ni sangs rgyas kyi sa kun tu bzang po'i dran pa nye bar gzhag pa la sogs pa'o/ /de dag gi chos nyid khyad par can gang yin pa ni don dam pa'i bden pa gang la sems kyi rgyu ba yang med na yi ge rnams lta smos kyang ci dgos zhes bya ba ste/de'i phyir de bzhin nyid rnam par dag pa dang rnam par dag pa ma yin pa zhes bya ba ni chos can gyi dbang gis rnam par gzhag pa ma yin pa gzhan gyis ni cung zad kyang rnam par gzhag pa nus pa ma yin la/ chos can dang / de'i chos nyid kyang de nyid dang gzhan nyid du brjod du med pa'o zhes sngar bstan to//de dag gi rang bzhin zhes bya ba'i rnam par 'grel pa ni de dag gi rang bzhin ni ngo bo nyid de zhes bya ba'o/ /mtshan nyid can zhes bya ba'i rnam par 'grel pa ni skye ba med pa'i ngo bo nyid 'di yin te zhes bya ste/ mtshan nyid ces bya ba ni rang bzhin de'i tha dad pa ma yin pa'i chos kyi khyad par 'ga' zhig la blos tha dad par gzung ba'i ngo bo nyid la bya ba'i phyir la 'dir ni tha dad pa ma yin pa'i chos kyi mtshan nyid de yang skye ba med pa nyid la 'dod de/des na rang bzhin dang de'i mtshan nyid skye ba med pa ste/ de las gzhan ma yin pa blos mtshon par bya ba dang /mtshon par byed pa tsam du btags pa'o/ /bcos ma ma yin pa'i don gyis zhes bya ba la/ ngo bo nyid dang lhan cig skyes pa dang / ma bcos pa zhes bya ba ni ming gi rnam grangs te/ de nyid kyi phyir chos rnams kyi chos nyid kyis de ltar yin gyi sus kyang byas pa ma yin pas zhes bstan te/gsum pa 'di ni gtan tshigs su blta bar bya'o/ /'jig rten las 'das pa'i lam gyis 'thob kyi zhes bya ba ni sa rab tu dga' ba la sogs pa'i mnyam par gzhag pa'i shes pa sems rgyu ba med pa ni de thob pa ste de dang dbyer med par 'gyur ba'i phyir ro//de'i rjes las thob pa yang de'i 'phen pa dang ma bral bas na thob pa zhes bya'o/ /'jig rten las 'das pa'i lam gyis thob pa nyid bstan pa ni rnam par shes pa sgyu ma lta bus chos thams cad rtogs pas thob pa yin no zhes smos te/ rnam par shes pa ni thos pa dang bsam pa dang bsgom pa'i shes rab rnams so//de nyid don dam par med du zin kyang kun rdzob tsam du don byed pa mi 'dor bas na sgyu ma lta bus zhes bya ba smos so/ /chos thams cad ni chos kyi dbyings te/ chos kyi dbyings las ma gtogs pa'i/ /'di ltar chos yod ma yin te//zhes gsungs pas so/ /thob pa ni snga ma bzhin no/ /gzhan yang ngo bo nyid kyi sku thob pa ni/ chu khams gser dang nam mkha' rnams/ /dag pa bzhin du dag par 'dod/ /ces gsungs pas bral ba'i sgo nas thob pa rnam par nges par bzhag ste/ nad med pa thob pa lta bu'i dpes so//chos can rnam par mi rtog pa'i ye shes ni rjes las thob pa'i ye shes kyis thob par rnam par gzhag pa ste/ 'di ni de tsam gyi nges par gzhag par bya ba las rnam pa gzhan du mi nus pas so/ /'di rnal 'byor gyi mngon sum du bsgrub pa'i tshul yang de nyid yin par zad do//chos can kun rdzob mkhyen pa rnams ni rang rig pa'i mngon sum gyis rnam par gzhag go/ /de nyid kyang rjes su dpag pa dang da ltar bas rnam par gzhag cing de yang da ltar ba'i mngon sum las 'brel pa thob pa'o/ /de dag gi rim par 'brel pa ni rgyu rnams bya ba byed pa'i rigs pa nyid yin pa'i phyir dang /'bras bu rnams ltos pa'i rigs pa yin pa'i phyir ro/ /de dag gi ngo bo nyid la the tshom za ba ni chos nyid kyi rigs pas sel bar byed de/ des na sangs rgyas kyi sa la nges par 'byed pa'i tshul ni rigs pa bzhi char gyis bsgrub par bya'o zhes bya bar gnas so//gzhan dag ni 'di ni lung gis bsgrub pa yin gyi rigs pa'i lam gyis bsgrub par mi bya'o zhes zer te de dag gis kyang legs par smras so/ /kha cig ni de mi 'dod de/ lung ni rjes su dpag pa'i tshad mar 'dus pa'i phyir lung 'ba' zhig gis ji ltar tshegs med par 'jug par bya zhes zer ro//yang dag pa'i kun rdzob ces bya ba ni 'jig rten las 'das pa'i ye shes de'i rjes las thob pa'i snang ba nyid yin gyi gtsug lag kha cig la byis pa rnams kyi thun mong gi tha snyad la bstan pa ni 'dir mi bzung ngo / /snang ba zhes bya ba ni snang ba tsam yin gyi de dag dngos por grub pa'i mthu can ni ma yin no zhes bya'o//de ci'i phyir zhe na/ don dam par chos nyid kyi ngo bo'i zhes smos te/ kun rdzob ni dngos po nyid du gzhag pa med do zhes sngar bstan pa'i tshul gyis te/ dngos po zhes bya ba yang rigs pa dang ldan par don byed par nus pa'i rang bzhin yin na/gang dag kun rdzob pa de dag ni rigs pa'i sbungs mi bzod pas na de ltar ga la zhig 'gyur/ de'i phyir sangs rgyas kyi sa kun tu bzang po 'khrul pa'i dri ma mtha' dag ma lus par spangs pa las lus dang ngag gi bkod pa sems can dang sems can ma yin pas bsdus pa ji snyed cig snang ba de dag ni don dam par chos nyid kyi ngo bo de nyid gdul bya rnams la rang rang gi ji ltar mos pas rab tu phye ba nyid du snang ba'o//gdul bya de dag kyang gang zhe na/ sangs rgyas rnams ni dang po ste de dag la ni chos kyi sku gnyis pa phan tshun du snang ngo //don dam pa'i sku dang po 'di de bzhin gshegs pa rnams kyi rnam pa thams cad mkhyen pa'i ye shes kyi yang yul ma yin te/ de ni yul gyi rang bzhin gang du yang ma gyur pas so/ /chos kyi sku ste gnyis pa ni de dag gi ye shes kyi snang ba rab 'byam dag la lhun gyis grub par snang ste/de la yang tha dad pa'i rtog pa mi 'byung ba'o/ /gdul bya gnyis pa ni byang chub sems dpa' rnams te de dag la ni longs spyod rdzogs pa'i sku snang ste/ byang chub sems dpa' sa bcu pa rnams 'ba' zhig la der snang ngo / /gzhan dag ni sa brgyad pa nas bzung ste/de snang bar smra la/ yang gzhan dag ni smon lam dang bsod nams cher bsags pa'i mthu las thams cad la yang snang mod kyi/ nyan thos dang rang sangs rgyas cha lugs la mngon par zhen pa'i rigs can de dag 'ba' zhig la snang bar mi 'gyur te/ de'i phyir 'phags pa theg pa chen po la dad pa rab tu bsgom pa'i mdo las/de'i 'khor du lha dang klu dang gnod sbyin dang mi 'am ci la sogs pa bstan pa mdzad do zhes zer ro/ /de ni mi rigs te de dag gis ni sprul pa'i sku nyid la longs spyod rdzogs pa'o zhes mthong ba brtsan par byas pa'o/ /gdul bya dman pa ni nyan thos la sogs pa ste/de dag gi yul du ni sprul pa'i sku 'ba' zhig snang ngo / /sogs pa zhes bya ba ni ma nges pa 'bras bu gang la yang ma zhugs pa dag la'o/ /de yang dro bar gyur pa thob pa na ni sprul pa'i sku rtag par mthong ba ste/ sangs rgyas la sogs pa mthong ba dang zhes bstan pas so//drod la sogs pa ma thob kyang de lan 'ga' zhig mthong ba ni mi dgag go/ /sa rab tu dga' ba la sogs par ni chos can thams cad mthong ba las ngo bo nyid kyi sku mthong bar mos par byed de/ der snang gzugs la sogs pa la/ /sangs rgyas nyid du nges 'dzin dang //zhes bstan pas so/ /tha mi dad kyang zhes bya ba ni rang gi rang bzhin gyi dbang du byas te'o/ /tha dad par rnam par gzhag go zhes bya ba ni de'i mthu'i bye brag gis tha dad pa ltar snang ba'i dbang gis so/ /de'i phyir byis pa rnams la 'gal bar snang ba ji snyed cig 'gal ba lta bur gnas kyang 'gal ba med pa ni chos kyi dbyings bsam gyis mi khyab pa'i phyir sun dbyung bar nus pa ma yin pas/gang du yang bden pa gnyis phan tshun 'gal bas gcig gis gcig sun dbyung bar ni mi bya'o/ /rang gi rtog pas gnyi ga las 'gal bar mi bya'o//de'i phyir 'dir byis pa'i gnas skabs na ni yongs su ma dag pa'i chos kyi dbyings de sna tshogs su rnam par rtog pa la med bzhin du snang la/ sangs rgyas kyi sa kun tu bzang po la ni yongs su dag pa'i de bzhin nyid de nyid sna tshogs su snang ba'o/ / de ltar ngo bo nyid kyi sku de nyid kyi dbang du byas te/ 'phags pa klu sgrub kyi zhal snga nas/ gcig min du ma ma yin bdag dang gzhan la phan pa phun sum tshogs chen gzhir gyur pa/ /dngos med dngos po yod pa ma yin mkha' ltar ro gcig rtogs par dka' ba'i rang bzhin can/ / spros pa med cing mi 'gyur zhi la mi mnyam mnyam pa'i khyab pa can de spros med pa/ /so so rang rig rgyal ba rnams kyi chos sku dpe med gang yin de la bdag phyag 'tshal/ /zhes bstod pa mdzad de/ gzhan las kyang 'di'i mtshan nyid bstan pa/ gsang ba pa'i bdag po chos kyi dbyings rnam par mi rtog pa ji ltar dgos pa thams cad mngon par bsgrub ce na/gsang ba pa'i bdag po 'di lta ste/ dper na nam mkha'i khams ni sems can yang ma yin/ srog kyang ma yin/ shed las skyes pa yang ma yin/ byed pa po yang ma yin/ tshor ba po yang ma yin/ gzung ba yang ma yin/ 'dzin pa yang ma yin zhing / rtog pa dang rnam par rtog pa thams cad dang bral mod kyi/ 'on kyang sems can gyi khams ma lus pa rnams 'gro ba dang 'ong ba la sogs pa thams cad byed de 'di la ni dogs pa med do/ /de bzhin rnam par mi rtog pa'i/ /thams cad mkhyen pa gnas med 'di//'gro ba rnams kyi phyi dang nang / /thams cad nges pa nyid du sgrub/ /ces gsungs so/ /chos kyi sku zhes bya ba ni sku bzhir gzhag pa'i tshe na/ chos can gyi sku ni chos kyi sku zhes bya ste/ sngar ji skad du bstan pa'i ngo bo nyid kyi chos can ni 'di min pa'i phyir ro/ /gang gi tshe sku gsum du bstan pa de'i tshe ni chos nyid kyi sku zhes bsdus pa la btags pa ste/chos nyid ni chos can las tha dad par bzhag par mi nus pas so/ /spros pa med pa'i ye shes kyi bdag nyid ni sngar bstan pa nyid do/ /de ni spros pa med pa yang rnam pa du mar gnas par bstan pa'i phyir/dran pa nye bar gzhag pa la sogs pa'i ngo bo zhes bya ba smos te/ sogs pa zhes bya ba ni tshad med pa la sogs pa sangs rgyas kyi chos brgya bzhi bcu rtsa bzhi po rnams so/ /gal te de ltar rnam pa de snyed cig yod na ji ltar na spros pa med pa'i ye shes zhes bya zhe na/ zag pa med pa zhes bya ba smos te/zag pa zhes bya ba yang kha cig tu ni nyon mongs pa la bya bar yang mthong ste/ zag pa zad pa zhes bya ba lta bu'o/ /de yang 'dir bzung ste/ nyon mongs pa ched du ma spangs pa bag la nyal ba'i tshul lta bur sa bcu pa'i byang chub sems dpa' rnams kyi rgyud la yod pa cung zad pa de sangs rgyas kyi sa la zad par byas pas so//kha cig tu ni zag pa zhes bya ba rnam par rtog pa la bya bar mthong ste/ zag pa'i dbang gis de'i nyon mongs pa rnams skye ba ni zhes bstan pa lta bu'o/ /'dir ni phyogs phyi ma 'di gtso bor bzung ste/ rnam pa de snyed du zin kyang de la rtog pa med cing lhun gyis grub par 'jug pas na zag pa med pa'o//yang na bskal pa grangs med pa du ma zhig gi bar du dngos po rnams la don dam par 'dzin pas bden par 'dzin pa spang ba la rab tu goms par mdzad pas snang ba rnams sgyu ma tsam du yongs su mkhyen pa'i phyir sgyu ma lta bu'i rnam par rtog pa mnga' yang 'di la nyes pa med de/don 'di nyid thugs la bzhag nas/ sems can gyi ni don mdzad thabs/ /rnam rtog ye shes mnga' ba na/ /de yis kun mkhyen rtsom pa ni/ /de don yin phyir nyes pa med/ /ces bstan cing yang / bden par 'dzin pa'i dbang gis skyon//chags dang zhe sdang la sogs pa/ /dgra rnams rang byung de log na/ /de rnams 'byung bar ga la 'gyur/ /zhes gsungs so/ /de'i phyir rang gi rnam par rtog pa bden par 'dzin pa nyid bcom pa la gcig tu 'bad par bya'i/ sgyu ma la sogs pa ltar gnas pa'i tha snyad rnams kyis ni shin tu 'jigs par mi bya ste/don 'di las dgongs nas 'phags pa lang kar gshegs pa las/ 'ching ba'i rgyu ni yul ma yin/ /zhes gsungs so/ /dran pa nye bar gzhag pa rnams kyis ni rim pa bzhin du sku ring bsrel du bshig pa na mi dgyes pa mi mnga' ba dang /tshor ba thams cad kyis mi 'phrogs pa dang / thugs yul rnams la mi rgyu ba dang / chos thams cad mnyam pa nyid kyi ngo bo nyid las mi 'da' ba'i phrin las rnams mdzad do/ /yang dag par spong ba rnams kyis ni dge ba'i chos rnams las mi nyams pa dang / de'i mi mthun pa'i phyogs dag gis nyid kyi rgyud la yongs su mi gos pa'i phrin las mdzad do/ /rdzu 'phrul gyi rkang pa rnams kyis ni mu stegs kyi gtso bo rnams gdul ba la sogs pa'i rgol ba tshar gcad pa dang gzhan 'dun par mdzad do/ /dbang po rnams kyis ni dge ba rnams la bzhed pa bzhin sbyor ba la thogs pa med par mdzad do//stobs rnams kyis ni dge ba rnams la sbyor ba dang / nang du yang dag par 'jog pa la sogs pa dag la bar chad kyi chos gang gis kyang brdzi bar mi nus par mdzad do/ /byang chub kyi yan lag rnams kyis ni mngon par byang chub pa mdzad pa la nyid kyi rgyud gzhan du thabs kyis grogs btsal ba la rag lus pa med cing rang byung gi ye shes brnyes par mdzad do//'phags pa'i lam yan lag brgyad pa rnams kyis ni ma 'dres pa'i lam la brten pas sgyu rtsal shes kyi bu ring du 'phur la sogs pa'i slob ma'i rim pas byang chub par gyur pa ma yin gyi rang gi lugs kyi lam bzang po la brten dgos pa'i phrin las mdzad do//'di dag ni mdor bsdus na byang chub kyi phyogs kyi chos rnams kyi las brjod pa ste/ rgyas par so so'i las re rer ci rigs su sbyar te/rgyas par ni 'phags pa rgya cher rol pa'i mdo las shes par bya'o/ /tshad med pa rnams kyis ni 'gro ba la thugs brtse ba la zhugs pas bsod nams kyi tshogs yongs su rdzogs par mdzad do/ /mi mthun pa'i phyogs kyang spong ngo / /'gro ba rnams yongs su smin par mdzad pa la yongs su mi skyo ba'o//rnam par thar pa rnams las dang po gnyis kyis ni sprul pa'i las mngon par grub par byed cing / gsum pas ni sdug par sprul nas kun nas nyon mongs par mi 'gyur bar byed de/ lhag ma bzhis ni zhi ba'i rnam par thar pa rnams la mi chags so/ /tha mas ni mos pa'i dbang gis 'phags pa'i gnas pa dam pa shin tu zhi bar gnas pas gnas so//mthar gyis gnas pa'i snyoms par 'jug pa rnams kyis ni dang po bzhis ni 'dod pa'i khams kyi bde ba rnams la ma chags pas shing 'dzam bu'i grib ma la brten pas lha rnams 'dul ba dang /btsun mo'i 'khor bsten kyang 'dod pa'i bde bas ma gos par ston cing 'bras sA lu'i chan dang sman mar dge ba chen po la sogs pa gsol yang / kham gyi zas la chags pa med par mdzad do/ /lhag ma bzhis ni gzugs med par skyes pa'i lha'i bu rnams skal ba mnyam zhing ris mthun pa'i tshul gyis 'dul te/de nas gzugs med pa'i lha'i bu de dag me tog sna tshogs lag na thogs te zhes bya ba la sogs pa shin tu rgyas pa'i mdo de dang de las bstan pa lta bu'o/ /tha mas ni 'phags pa nyan thos rnams kyis 'gog pa'i snyoms par 'jug pa las khyad par du ston te/de dag ni zhag bdun du yang gnas pa'i mthu med la/ bcom ldan 'das ni bzhed na bskal pa'i bar du 'ang de la gnas pas so/ /zad par gyi skye mched rnams kyis ni zad pa rgyas par mdzad pa'i ched du rnam par thar pa'i dmigs pa yongs su bsgrub par mdzad do//zil gyis gnon pa'i skye mched rnams kyis ni dmigs pa tha dad par rtogs pa zil gyis gnon pa'i phyir rnam par thar pa gsum po rnams dmigs pa la dbang sgyur bar mdzad do/ /nyon mongs pa med pas ni bka' lung gzung bar bya bar mdzad do/ / smon gnas mkhyen pas ni 'das pa dang ma 'ongs pa dang da ltar byung ba'i dngos po rnams lung ston pas gzhan la phan 'dogs pa dang / rgyu mtshan des 'jig rten na mang pos bkur bar bya bar 'gyur ro/ /mngon par shes pa rnams kyis ni bdag dang gzhan gyi rgyud kyis bsdus pa'i shes bya mkhyen par bya ba la thogs pa med cing de yang lus kyi las kyis bstan pa la 'dun par mdzad do//ngag gi las kyis kyang 'dun par mdzad do/ /sems kyis kun tu brjod pas kyang 'dun par mdzad do/ /bstan pas sems can rnams tshim par mdzad do/ /sems can rnams kyi spyod pa dang 'ong ba dang 'gro ba mkhyen nas sems can rnams nges par 'byung ba la ji lta bar 'doms pa ste/des kyang gdul bya myur du grol bar mdzad do/ /so so yang dag par rig pa rnams kyis ni chos bstan pa thogs pa med pa rnam pa sna tshogs pas gdul bya rnams kyi sems tshim par mdzad de/chos kyi tshig kun mngon par mkhyen/ /don rnams kun gyi tshul la mkhas/ /skad kun rnam par 'byed pa mkhyen/ /phyogs rnams kun tu yongs dag ldan/ /zhes gsungs pas so/ /yongs su dag pa rnams kyis ni srid pa rnams su skye ba bsams bzhin du 'dzin cing bzhed par gyur na bskal pa mang por bzhugs te/ji skad du 'phags pa snying rje chen po pad+ma dkar po'i mdo las ji skad gsungs pa lta bu'o/ /yang bzhed na de tshe'i 'du byed gtong ngo / /yang chos la mnga' bsgyur zhing ting nge 'dzin la mnga' bsgyur te dam pa'i chos kyang rab tu 'dzin to//dbang rnams kyis ni pha rol tu phyin pa rnams yongs su rdzogs par ston pa'i 'bras bu'i che ba gzhan las so sor rig par mdzad do/ /dbang po gsum ni sbyin pa'i 'bras bu'o/ /de'i 'og ma gnyis ni tshul khrims kyi 'bras bu'o/ /de'i 'og ma ni bzod pa'i 'bras bu'o//de'i 'og ma ni brtson 'grus kyi 'bras bu'o/ /de'i 'og ma ni bsam gtan gyi 'bras bu'o/ /de'i 'og ma gnyis ni shes rab kyi 'bras bu yin pa'i phyir ro/ /stobs rnams kyis ni rgyu med par smra ba dang / mi mthun pa'i rgyur smra ba dang / rang gis byas pa ma yin pa dang /chad par smra ba bsal nas yang dag par mngon par mtho ba'i lam ston to/ /sems can rnams kyi sems kyi spyod pa dang / bstan pa bzhag pa'i snod dang / bsam pa dang / bag la nyal dang / dmigs pa dang / tshogs dang / 'os su 'gyur ba dang / nges par 'byung ba yang dag par rjes su rtogs nas nges par legs pa'i lam ji lta ba bzhin du ston te/bdud thams cad kyang tshar gcod do/ /thams cad du zhu ba zhus pa yang lung ston to/ /mi 'jigs pa rnams kyis ni 'khor gyi nang du bdag yang dag pa'i ston pa yin par rab tu 'jog pa dang / mu stegs can gzhan rgol ba rnams tshar gcod par mdzad do//bsrung ba med pa rnams kyis ni slob ma'i tshogs la rtag tu gdams par mdzad do/ /yang dag par rjes su yang ston to/ /dran pa nye bar gzhag pa rnams kyis ni kun nas nyon mongs pa mi mnga' bar tshogs yongs su sdud do/ /bsnyel ba mi mnga' ba'i chos nyid kyis ni sangs rgyas kyi mdzad pa yal bar mi 'dor te/rgya mtsho chu srin chen po'i gnas/ /dus rlabs yol bar 'gyur srid kyi/ /gdul bar bya ba'i sras rnams la/ /sangs rgyas dus la yol mi mnga'/ /zhes bstan pa'i tshul gyis so/ /bag chags yang dag par bcom pas ni nyon mongs pa mi mnga' bas na nyon mongs pa lta bu'i spyod pa mi ston to//thugs rje chen pos ni lhun gyis grub pas rtag tu ye shes kyi snang bas 'jig rten la gzigs te/ skad cig tsam yang mi gzigs par mi 'gyur ro/ /gzhan dag ni 'di ni bsnyel ba mi mnga' ba'i chos nyid yin te nyin lan gsum mtshan lan gsum du rtag tu gzigs pa ni thugs rje chen po ste/de ltar bshad na mdo'i don dang yang mthun la/ mdo sde'i rgyan gyi tshig le'ur byas pa yang legs par drangs par 'gyur ro zhes zer ro/ /sangs rgyas kyi chos ma 'dres pa rnams kyis ni sku dang gsung dang thugs kyi phrin las yongs su dag pa dang /rnyed pa dang / gshegs pa dang / bzhugs pas kyang nyan thos dang rang sangs rgyas thams cad zil gyis gnon to/ /rnam pa thams cad mkhyen pa nyid kyis ni sems can thams cad kyi the tshom gcod cing chos kyi tshul yang yun ring du 'jog ste/des sems can yongs su ma smin pa rnams ni yongs su smin par mdzad do/ /yongs su smin pa rnams ni rnam par grol bar mdzad do/ /lam shes pa nyid la sogs pa sngar bshad pa dag kyang yin no zhes bya ba ni/ sngar nyan thos kyi mthong ba'i lam gyi yon tan dang /rang sangs rgyas rnams kyi sgra med par chos ston pa la sogs pa yon tan de dag kyang sangs rgyas kyi rgyud la mnga' ste/ sngar dge slong dag nga lan stong du nyan thos kyi mya ngan las 'da' bas yongs su mya ngan las 'das so zhes bya ba la sogs pa'i tshul bstan pas so//de dag kyang sangs rgyas kyi rgyud kyis bsdus pa na chos kyi sku ye shes kyi rnam par brjod par bya'o zhes bya ba'i don te/ de dag gi las kyang sangs rgyas mi 'byung ba'i dus su gdul bya smin par mdzad pa dang / theg pa dman pa la dad pa dag nyan thos su lung ston pa la sogs pas theg pa chen po la 'jug par mdzad do zhes bya ba la sogs pa ci rigs par sbyar ro//de dag ni chos de dag gi phrin las so so ba'o/ /chos de dag gi rang gi ngo bo rnams ni mdo'i tshig gis go bar nus te/ chung zad du rnam par thar pa rnams kyis ni dang po sems yongs su sbyong bar rtsom par byed cing /de nas zil gyis gnon pa'i skye mched rnams kyis ni legs par sbyong bar byed la/ de'i rjes la zad par gyi skye mched rnams kyis ni de yongs su grub par shes par bya ste/ de nyid kyis na sngar rnam pa'i skabs su byang chub sems dpa'i lam la gtso bo rnam par thar pa brgyad smos pas lhag ma rnams bsdus par shes par bya'o//dbang rnam pa bcu'i dbang du byas te/ bskal pa brjod du med par tshe'i tshad byin gyis brlabs pas tshe la dbang ba dang / ting nge 'dzin grangs med pa la nges par rtog par 'jog cing ye shes kyi 'jug pa'i tshul gyis sems la dbang ba dang /'jig rten gyi khams thams cad du rgyan rnam par dbye ba du mas brgyan par byin gyi rlabs pa ston pa'i tshul gyis yo byad la dbang ba dang / dus ji lta ba bzhin du las kyi rnam par smin par byin gyis brlabs pas las la dbang ba dang / 'jig rten gyi khams thams cad du skye ba ston pas skye ba la dbang ba dang /'jig rten gyi khams thams cad sangs rgyas kyis gang bar blta bas mos pa la dbang ba dang / dus dang zhing gang du 'dod par mngon par 'tshang rgya bas smon lam la dbang ba dang / rdzu 'phrul gyi rnam par 'phrul pa thams cad yongs su ston pas rdzu 'phrul la dbang ba dang /chos kyi sgo snang ba mtha' dang dbung med par yang dag par ston pas chos la dbang ba dang / de bzhin gshegs pa'i stobs bcu dang mi bsnyengs pa skad cig skad cig tu go bar yongs su ston pas ye shes la dbang ba'o zhes 'phags pa sdong po bkod pa las gsungs pa rnams 'dir bkod pa'o//chos kyi sku mngon par brjod do zhes zer ro zhes bya ba'i mngon par 'dod pa dang po 'di ni ngo bo nyid kyi sku dang chos kyi sku gnyis gcig tu 'dod pas gnyis su mi dbye'o zhes ston par byed pa slob dpon ye shes zla ba la sogs pa'i grub pa'i mtha'o//gzhan dag ni tshig le'ur byas pa la 'jug par byed do zhes bya ba 'di ni sngar slob dpon nyid kyis ji ltar bshad pa kho na yang bsdus nas bzlas pa ste/ mkhan po yang dag rnam par snang mdzad kyi bzhed pa'o/ /gzhan dag na re de dag gi ltar na zhes bya ba la sogs pa'i bstan pa gsum pa 'di ni 'di snyam du gal te de ltar ngo bo nyid kyi sku dang chos kyi sku ni chos dang chos can yin la/de dag kyang dbyer med na rnam pa thams cad du spros pa dang bral ba'i ngo bor gyur pas sems dang / sems las byung ba rnams gnas yongs su gyur pa'i ye shes gzung ba dang 'dzin pa gnyis su med pa sgyu ma tsam du snang ba'i ngo bos 'gro ba'i don mdzad pa rnams med par 'gyur te/de dag yod na ni yang ngo bo nyid kyi sku med par 'gyur bas de'i phyir ngo bo nyid kyi sku ni mi brjod do zhes bsams nas ye shes kyi sku dang longs spyod rdzogs pa'i sku dang / sprul pa'i sku gsum du 'jog cing de dag thams cad kyang don dam par ma skyes par brjod kyi/ma skyes pa de sku gcig tu ga la zhig gzhag ces 'dod pa'o/ /kha cig na re sku gsum kho na'o zhes zer ro zhes bya ba mngon par 'dod pa bzhi pa 'di ni sku ni gsum kho na zhig yin la/ de yang ngo bo nyid kyi sku dang /longs spyod rdzogs pa dang / sprul pa'i sku dag tu 'dod pas/ chos kyi sku ni ngo bo nyid kyi sku'i ming gi rnam grangs su 'dod pa ste/ de'i phyir sangs rgyas kyis kun tu bzang po de la ni chos kyi dbyings ltar ye shes rang bzhin gyis 'od gsal ba de tsam zhig la sngon gyi smon lam gyi mthus gdul bya rnams la/byang chub phyogs mthun tshad med dang / /zhes bya ba la sogs pa'i yon tan rnams dang ldan par snang ba skyes pa yin gyi/ rang bzhin ni de lta bu ma yin te/ de'i phyir na de'i snang ba longs spyod rdzogs pa dang / skul pa yang de nyid kyi sngon gyi smon lam gyi mthu'i shugs kyis snang bas na/dngos su ni thub pa chen po la ni sku gcig tu zad pas na/ 'phags pa 'jig rten las 'das pa'i le'u las/ rgyal bas chos nyid lus med rab zhi ba/ /gnyis med rang bzhin med pa thugs chud nas/ /gzugs sku bzang po mtshan gyis brgyan pa yis//'gro ba ma lus bkang zhing ston par mdzad/ /ces gsungs so zhes brjod cing / tshul de lta bus byis pa rnams kyi dbang du sku gcig po de nyid sku gsum du bstan to zhes 'dod pa'o/ /tshig le'ur byas pa las ngo bo nyid ces bya ba'i sgra'i mjug thogs su chos kyi sku zhes bya ba'i sgra mi 'byung bas zhes bya ba'i tshig 'di ni de'i rigs pa ston pa ste/gal te sku bzhi pa yin na de'i tshe tshig le'ur byas pa'i nang du ngo bo nyid kyi sku'i 'og nyid du 'brel par chos kyi sku smos par rigs so zhes so/ /de dag gis ni/ rnam pa bzhir ni yang dag brjod//ces bya ba la bzhi ni phrin las dang bzhi zhes 'dod par byed do/ /gzhan dag na re zhes bya ba mngon par 'dod pa bzhi pa 'di ni sngar sku bzhir 'dod par smra ba rnams kyi lan btab pa ste/ ngo bo nyid ces bya ba'i sgra'i mjug thogs su chos kyi sku zhes bya ba'i sgra smos pa ni/ tshig le'ur byas pa sbyar ba'i ngor ni ye shes kho na dang mdzad par sbyar ba'i phyir dgos pa nye bar bstan pa'i shugs kyis de skad gsungs pa yin te/ de'i phyir de ni sku gsum du bzhag pa'i rgyu mtshan du mi rung ngo zhes bya ba ni bsdus pa'i don no/ /de ltar mdzad pa rnams ni chos kyi sku'i phrin las zhes btags kyang /bskal pa'i bar du sku thams cad kyis brgyud pa dang dngos su mdzad pas na/ sku thams cad kyi mjug tu bstan par rigs pas de ltar bstan la/ mdzad pa nyi shu rtsa bdun po de dag sprul pa'i sku'i rjes kho nar 'byung bas de dag gis ni sprul pa'i sku'i phrin las yin pa lta zhig ces kha cig sems pa la/sngar chos kyi sku'i gdags pa ni ma mdzad la/ sku de ni grub pa'i mtha' thams cad las grags pas 'dir yang ston par rigs pas de ltar na 'di ni de'i las yin te/ des na las kyi byed pa po bstan te las dang byed pa po ni tha mi dad pa'i phyir ro zhes rtogs par bya ba'i phyir tshig le'ur byas pa'i ngo bo nyid kyi sku'i mjug thogs su chos kyi sku zhes ma btags so//de ltar de ni dgos pa nye bar ston pa'i shugs zhes bya'o/ /ye shes kho na zhes bya ba ni/ byang chub phyogs mthun tshad med dang / /zhes bya ba la sogs pa ji skad bshad pa rnams te/de dang mdzad pa chos kyi sku'i phrin las nyi shu rtsa bdun du sbyar ba ni byed pa po dang de'i las su sbyar ro/ /'o na ye shes rnams sprul pa'i sku'i rjes su ci'i phyir mi bstan zhe na/ de ni sku rnams gtso bo'i rim gyis bstan par rigs pa'i phyir dang / ngo bo nyid dang ye shes rnams chos nyid dang chos can du bstan pa'i 'brel pa bsgrub pa'i phyir ro//yang kha cig ni longs spyod rdzogs pa'i sku la mngon par byang chub pa sa bcu pa'i byang chub sems dpa' rnams 'ba' zhig gi snang ba'i lam du gyur pa longs spyod rdzogs pa chen po'i sku ji skad bshad pa'i ye shes rnams kyi gzhir gyur pa dang /sa rab tu dga' ba la sogs pa la gnas pa'i snang ba'i lam du gyur pa sprul pa'i sku la longs spyod rdzogs par btags pa dang / sprul pa'i sku ste sku lngar 'dod do/ /gzhan dag ni sprul pa'i sku la rnam par smin pa dang rnam par smin pa ma yin pa'i dbye bas sku lngar ston par byed do//lhag ma rnams ni go sla bas rnam par ma phye'o/ /mtshan dang dpe byad bzang po 'bar ba zhes bya ba la 'di dag gis skyes bu chen por mtshon par byed pas na mtshan de 'og nas 'chad pa'i sum cu rtsa gnyis so/ /'di dag gis gzhan gyi rgyud la rnam par sgo bar byed pas na dpe byad bzang po ste/'dir a nu byany+dza na'i sgra'i don ni pha rol po'i rgyud la thub pa chen po'i sku'i mdzes pa nyid kyi rnam par bsgo zhing zhen par byed pa'i don te/ de bas na mtshan dang dpe byad rnams kyi phrin las ni skyes bu chen por byed pa dang / gdul bya rab tu 'dun par byed pa'o//de la mtshan rnams ni gtso bor gyur pas re re yang pha rol tu phyin pa drug drug gi rgyu las byung bar bstan te/ ji skad du smin mtshams kyi mdzod spu ba mo dang dung dang me tog kun da ltar dkar ba ni sbyin pa'i 'bras bu'o/ /g.yas su 'khyil ba ni tshul khrims kyi 'bras bu'o//dpa' zhing zil gyis mi gnon pa ni bzod pa'i 'bras bu'o/ /ring bar gnas pa ni brtson 'grus kyi 'bras bu'o/ /shin tu 'khyil zhing legs par gnas pa ni bsam gtan gyi 'bras bu'o/ /'od mtha' yas pas khyab pa ni shes rab kyi 'bras bu'o zhes bya ba la sogs pa ste rgyas par ni 'phags pa bskal pa bzang po zhes bya ba theg pa chen po'i mdo las shes par bya'o//dpe byad rnams ni 'khor du gyur pas na de ltar bstan pa med de gtso bos bsdus pa'i phyir ro/ /ji ltar na gtso bo dang 'khor du bstan zhe na/ sen mo zangs kyi mdog lta bu dang / sen mo'i mdog snum pa dang /sen mo mtho ba dang / sor mo rnams zlum pa dang / sor mo rnams rgyas pa dang / sor mo rnams byin gyis phra ba ste/ dpe byad bzang po 'di drug ni mtshan phyag gi sor mo ring ba'i 'khor du gyur pa'o/ /dbu gdugs lta bur rgyas pa dang /dbu skra bung ba ltar gnag pa dang / dbu skra stug pa dang / dbu skra 'jam pa dang / dbu skra ma 'dzings pa dang / dbu skra mi bshor ba dang / dbu skra dri zhim pa ste/ 'di dag ni dbu gtsug tor dang ldan pa dang / spu re re nas g.yas phyogs su 'khyil ba'i 'khor du gyur pa'o/ / dpral ba legs par 'byes pa dang / dpral ba'i dbyes che ba dang / smin tshugs ring ba dang / smin ma 'jam pa dang / smin ma snum pa dang / smin ma'i spu mnyam pa dang / shangs mtho ba dang / shangs gtsang ba ste/ 'di dag ni mdzod spu'i 'khor du gyur pa'o/ /spyan dag pa dang / spyan mdzes par 'dzum pa lta bu dang / spyan yangs pa dang / rdzi ma stug pa dang / spyan pad+ma'i 'dab ma 'dra ba ste/ 'di rnams ni spyan mthon mthing dang / spyan gyi rdzi ma ba'i rdzi ma lta bu'i 'khor du gyur pa'o/ /snyan mnyam pa dang / snyan ma nyams pa ste/ 'di dag ni 'gram pa seng ge lta bu'i 'khor du gyur pa'o//zhal ha cang mi ring ba dang / sgros shing thog bim pa ltar dmar ba dang / ljags mnyen pa dang / ljags srab pa dang / ljags dmar ba dang / 'brug gi sgra nyid dang / gsung mnyen pa dang / gsung 'jam pa dang / mche ba zlum pa dang / mche ba rno ba dang / mche ba dkar ba dang / mche ba mnyam pa dang / mche ba byin gyis phra ba ste/ 'di rnams ni ljags yangs pa dang / tshangs pa'i dbyangs dang / tshems dkar ba dang / tshems thags bzang ba dang / tshems bzhi bcu mnga' ba dang / tshems mnyam pa dang / ro bro ba'i mchog brnyes pa rnams kyi 'khor du gyur pa ste/ci rigs su sbyar ro/ /rtsa mi mngon pa dang / rtsa mdud pa med pa dang / long bu mi mngon pa dag dang / sku gzhon mdog can dang / phyag shing bal ltar 'jam pa dang / phyag gi ri mo mdangs yod pa dang / phyag gi ri mo zab pa dang / phyag gi ri mo ring ba rnams ni phyag dang zhabs 'jam zhing gzhon sha chags pa dang /zhabs long bu mi mngon pa'i 'khor du gyur pa ste/ dpe byad kyi long bu mi mngon pa ni long bu chung ngur bzung la/ mtshan bzang po'i ni de chen po bzung ngo / /kha cig ni mtshan gyi phyi'i long bu ste dpe byad kyi nang gi long bu zhes 'dod do//zhabs mnyam pa ni/ zhabs rus sbal ltar gnas pa'i 'khor du gyur pa'o/ /seng ge dang / glang po che dang / ngang pa dang / khyu mchog dang / g.yas phyogs su dang / mdzes par dang / drang por gshegs pa dang / gom pa snyoms pa rnams ni/ phyag dang zhabs kyi sor mo dra bas 'brel pa dang / rting pa yangs pa rnams kyi 'khor du gyur pa'o/ /sku 'khril bag chags pa dang / sku byi dor byas pa dang 'dra ba dang / sku rim par 'tsham pa dang / sku gtsang ba dang / sku 'jam pa dang / sku dag pa dang / sku kho lag yangs shing bzang ba dang /sku ma zhum pa dang / sku rgyas pa dang / sku shin tu grims pa dang / yan lag rnam par mdzes pa dang / dku zlum pa dang / dku skabs phyin pa dang / dku ma rnyongs pa dang / sku kun nas blta na sdug pa dang / kun tu spyod pa gtsang ba dang / sku la sme ba gnag bag med pa dag ni sku che zhing drang ba dang /sku'i bdun mtho ba dang / pags pa gser gyi mdog 'dra ba dang / pags pa srab pa dang / dpung mgo zlum pa dang / thal gong rgyas pa dang / ro stod seng ge'i 'dra ba dang / shing n+ya gro d+ha ltar chu zhing gab pa'i 'khor du gyur pa'o//phyal phyang nge ba dang / phyal ma rnyongs pa dang / lte ba zab pa dang / lte ba g.yas phyogs su 'khyil ba rnams ni mdoms kyi gsang ba sbubs su nub pa'i 'khor du gyur pa'o/ /dpal gyi be'u dang / bkra shis dang / nya dang / g.yung drung 'khyil ba la sogs pa rnams ni/mtshan bzang po phyag dang zhabs 'khor lo'i mtshan dang ldan pa dang / phyag dang zhabs dra bas 'brel pa'i 'khor du gyur pa'o/ /byang chub sems dpa' chen po sa bcu pa la bzhugs pa rnams dang thabs cig tu theg pa chen po'i chos kyi longs spyod kyi dga' ba dang / bde ba kha na ma tho ba med pa nye bar spyod pa'i phyir zhes bya ba 'dis ni mtshan gyi don bstan te/ theg pa chen po'i chos ni rtogs pa'i chos so/ /kha cig na re lung gi chos thun mong ma yin pa yang bstan to zhes zer ro/ /sku 'di'i mtshan nyid kyang 'phags pa klu sgrub kyi zhal snga nas/rang gi 'byor pa 'jig rten las 'das bsam gyis mi khyab legs mdzad brgya yi 'bras bu ni/ /blo can rnams kyi dga' ba skyed phyir 'khor gyi nang du sna tshogs rgyas par ston mdzad pa/ /rtag tu dam pa'i chos kyi sgra skad rgya chen 'jig rten kun tu 'phro bar mdzad pa po//sangs rgyas longs spyod rdzogs sku chos kyi rgyal srid gnas pa gang yin de la phyag 'tshal lo/ /zhes gsungs so/ /de lta bu'i sku 'di ci rtag pa yongs su mya ngan las mi 'da' ba zhig gam/ de yang yongs su mya ngan las 'da' bar 'gyur zhe na/ kha cig na re gdul bya gang dag sangs rgyas dkon mchog mi rtag pa'i phyir rtsom pa don med par rtog pa de dag gi phyir ni 'di rtag pa yongs su mi 'jig pa'i skur brjod cing /rang gi rang bzhin kyi dbang du byas te ni/ 'di yang yongs su mya ngan las 'da' bar 'gyur mod kyi/ 'on kyang lha'i dbang po brgya byin rnams ni 'chi 'pho ba dang der skye ba de dag nyid dang /de bas ches che ba'i lha rnams kyis shes kyi lha'i bu phal pa rnams kyis ni bdag cag gi gnas 'dir lha'i dbang po cig shi 'phos te/ gzhan zhig lha'i rgyal por gyur zhes bya ba ni rab tu mi shes te/ las kyi me long la sogs pa la lta bas nges par gzhan gyis mi shes par de nyid dam/gzhan zhig mtshams sbyor ba ni brgya byin du gyur pa rnams kyi chos nyid du nges pa'o/ /de bzhin du sku 'di yongs su mya ngan las 'da' ba yang de bzhin gshegs pa rnams 'ba' zhig gi yul du 'gyur gyi/ sa bcu pa'i byang chub sems dpa' rnams kyi yang yul du mi 'gyur ba'i phyir/ sku gdung rnam par dbye ba la sogs pa yang med do zhes 'dod do/ /sku 'di mya ngan las 'da' ba'i rgyu yang kye rgyal ba'i sras sangs rgyas bcom ldan 'das rnams kyi chos nyid kyis kyang de bzhin te/ sangs rgyas kyi phrin las thams cad yongs su rdzogs par mdzad de dgongs pa thams cad yongs su rdzogs nas chos kyi 'khor lo shin tu bskor te/gdul bya thams cad shin tu btul nas byang chub sems dpa' thams cad shin tu lung bstan par gyur te/ mnyam pa med pa'i go 'phang yongs su mya ngan las 'da' ba chen pos yongs su mya ngan las 'da'o zhes gsungs so zhes zer ro//de dag gis ni legs par ma smras te/ gzhan gang dag las longs spyod rdzogs pa'i sku yongs su mya ngan las 'da' bar bshad pa de dag ni sngar bstan pa ltar/ sprul pa'i sku la longs spyod rdzogs par btags pa'i dbang du byas pa yin gyi/longs spyod rdzogs pa'i sku ye shes rnam par dag pa'i gzhir gyur pa ni nam yang mya ngan las mi 'da'i/ skad cig ma'i rgyun can nyid du ni gnas so/ /sku 'di yang smon lam mam/ tshogs kyis 'phen pa'am/ bzhed pa tsam gyis phye ba'i 'og min gyi gnas gcig kho nar mngon par rdzogs par 'tshang rgya ba'i phyir rnam pa rab tu mang po'i longs spyod rdzogs pa'i sku 'og min rnams na gnas pa ni sprul pa'i sku 'ba' zhig rgya chen por snang bar zad do//kha cig ni byang chub sems dpa' ji snyed mngon par rdzogs par sangs rgyas pa rnams la longs spyod rdzogs pa'i sku gcig pu zhig gi rang bzhin du zad cing chos kyi sku dang /sprul pa'i sku dang / ngo bo nyid kyi sku yang de ltar gcig tu zad pas sems can rnams ni rnam par shes pa'i rgyud tha dad pa'o zhes bya ba'i sgrub pa 'di sangs rgyas kyi ye shes la ni mtshungs pa ma yin te/'on kyang smon lam gyi dbang gis bdag sems can 'di'i bur gyur te sprul pa'i sku byang chub rnyed par gyur pas de dag yongs su smin par byed par gyur cig ces bya ba la sogs pas don mdzad pa ni mi 'dra bar gyur to zhes zer te/ 'di lta bu dag ni bdag cag gi spyod yul du ma gyur pas dpyad pa'i rnam par rtog pa ngan pas ci zhig bya ste/ji ltar bstan pa yang bzod par mdzod cig /lhag ma rnams ni go sla'o/ /shAkya thub pa la sogs pa'i gzugs gang gis zhes bya ba la/ dga' ldan nas babs pa la sogs pa don mdzad pa rnam pa bcu gnyis kyis gdul bya yongs su smin par mdzad pa ni rnam par smin pa'i sprul pa'i sku ste/de la don gyi mdzad pa bcu gnyis ni 'phags pa dad pa'i stobs bskyed pa la 'jug pa'i phyag rgya'i mdo las/ ji skad du dus gcig tu phyogs bcu'i 'jig rten gyi khams rab 'byam thams cad du dga' ldan gyi gnas mchog na bzhugs pa dang /'chi 'pho ba dang / skye ba dang / mngon par 'byung ba dang / dka' ba spyod pa'i sbyor ba dang / byang chub kyi snying por gshegs pa dang / bdud bcom pa dang / mngon par rdzogs par byang chub pa dang /chos kyi 'khor lo rab tu bskor ba dang / yongs su mya ngan las 'da' ba dang / chos nub par ston pa la mkhas pa zhes gsungs pa rnams te/ 'dir chos nub par ston pa yang / gdul bya rab tu ma gus pa dag gis chos dang chos smra ba la brten pa'i sdig pa mi 'byung bar bya ba'i phyir sangs rgyas kyi mdzad pa chen po ste/de'i phyir 'phags pa gser 'od dam pa zhes bya ba theg pa chen po'i mdo las/ sangs rgyas mya ngan mi 'da' zhing / /chos kyang nub par mi 'gyur te/ /sems can rnams ni gdul ba'i phyir/ /mya ngan 'da' la sogs par ston//zhes gsungs so/ /mtshan nyid 'di las gzhan pa khye'u dang bu mo la sogs pa'i gzugs su snang bas gdul bya yongs su smin par byed pa dang / yang dpag bsam gyi shing dang nor bu rin po che la sogs pa snod kyi 'jig rten du bsdus par sprul pa yang srid de/'phags pa dkon mchog sgron ma'i mdo las ji skad du/ de dag dgon par ljon shing chen por gyur/ /sman dang rin chen mi zad gter rnams dang / /yid bzhin nor bu 'dod 'byin snying po dang / /lam gol dong ba rnams la lam ston 'gyur/ /zhes gsungs pas so/ / de lta bu de dag ni rnam par smin pa ma yin pa'i sprul pa'i sku ste/ 'dir rnam par smin pa'i sgra ni rab tu rgyas pas mi 'dra bar smin pa'i don du brjod par bya ba yin la/ khye'u dang bu mo la sogs pa de dag ni dman par snang ba'i phyir slob pa'i lam gyi gnas skabs dang mi 'dra ba'i shas chung ba'i phyir de dag la de skad ces bya'o//sku 'di'i mtshan nyid kyang 'phags pa klu sgrub kyi zhal snga nas/ sems can rnams ni smin par mdzad phyir la la dag tu me 'bar bzhin du gang snang zhing / /la lar yang ni rdzogs par byang chub chos kyi 'khor lo rab tu zhi bar gang snang la/ / sna tshogs thabs tshul rnams kyis rnam pa du mar 'jug cing srid pa gsum gyi 'jig sel ba/ /phyogs bcur chub mdzad thub pa rnams kyi sprul sku don chen gang yin de la bdag phyag 'tshal/ /zhes bstan to/ /dang por 'gro ba bzang po dang bzang po ma yin pa la mngon par zhen pa'i mtshan nyid ces bya ba la sogs pa rnams la/dang po bzhi ni tshogs kyi lam phal pa'i rang bzhin no/ /de'i 'og ma lnga pa ni thar pa'i cha dang mthun pa'i dge ba'i rtsa ba la sbyar ro/ /de nas gnyis pa ni sbyor ba'i lam la sbyar ro/ /lhag ma rnams ni gsal lo/ /kha cig na re dang po ni tshogs kyi lam mo//de nas lnga ni sbyor ba'i lam gyi rang bzhin no/ /de nas gcig ni bar chad med pa'i ting nge 'dzin 'ba' zhig ste/ der 'dzin pa spong ba'i sbyor ba yin la/ 'og ma rnams ni gzung ba'i rnam par rtog pa spong ba'i phyir ro zhes zer te/ gzung ba dang 'dzin pa'i don yang phyi rol gyi don dang /rnam par shes pa nang gi bdag nyid du blta bar bya'o/ /sngar ji ltar bstan pa'i gzung ba dang 'dzin pa'i rnam par rtog pa rnams ni ma yin te de dag ni sa de dang der 'brel pa yin gyi des spong bar ni mi nus te/ de ni 'jig rten las 'das pa'i lam gyis spang bar bya ba yin pa'i phyir ro//de la 'gro ba rab tu zhi ba'i phrin las mdzad nas zhes bya ba la/ 'gro ba ni mi la sogs pa ste/ de dag rab tu zhi ba ni 'dod chags 'bar ba mdzes dga' bo dang / zhe sdang 'bar ba sor mo'i phreng ba dang / gti mug 'bar ba lteng rgyas 'od srungs la sogs te/de dag kyang rab tu zhi bar bya ba'o/ /gzhan yang 'phags pa'i gang zag ma yin pa thams cad la thun mong du rab tu spang dka' ba ni 'khrig pa'i 'dod chags yin la/ de yang bud med gzhon nu rnams ni rab tu shas che ba yin mod kyi/ sangs rgyas rnams kyis ni de yang bde bar yongs su spong du 'jug par spyod pa'i phyir na/'phags pa klu sgrub kyi zhal snga nas/ shes rab tshul khrims gtong 'byung grags chen dri ma med/ /lha yul nam mkha' dang ni sa stengs rgyas mdzad nas/ /sa la mi dang mtho ris na chung mchog bde ba'i//dga' la dga' rnams bzhed dgur rab tu dga' mdzad nas/ /nyon mongs nyam thag sems can tshogs kyi 'jigs skye dang / /skye ba zhi mdzad rgyal ba'i dbang po nyid rnyed nas/ /'jig rten las 'das ming tsam zhi la mi g.yo ba/ /mi bsnyengs nongs mi mnga' ba'i go 'phang brnyes par mdzod//ces gsungs so/ /de ltar 'gro ba'i nyon mongs pa zhi bar gyur pas phrin las dang po mdzad nas 'khor gyi don bya ba'i ngo bo de dag ji ltar dga' ba'i mu tig gi do shal dang / bza' ba dang bca' ba'i sbyin pas sdud de/ de yang grol bar byed pa'i chos bstan pa dang /de spyod pa dang / rjes su mthun par bya ba dang / bdag kyang sgrub pa snying por byed pas smra ba lhur mi len pa dag ni phrin las gnyis pa sbyin pa la sogs pa bsdu ba'i dngos po bzhi la bkod pa ste/ ji skad du/ 'di dag gi ni yon tan dang / /'khor sdud pa dang ldan pa rnams//tshul 'di la ni yang dag rten/ /kun gyi don kun sgrub byed pas/ /thabs bzang yon tan ldan pa yin/ /zhes gsungs so/ /rtogs par mdzad nas zhes bya ba ni snyan par smra ba yun ring du bsten cing de bzhin du bsam pa la sogs pa ni nges par blang ba dang dor bar khong du chud par nus pa ste phrin las gsum pa'o//gzhan dag gi don byams pa la sogs pa'i mtshan nyid ces bya ba ni ji ltar bsam pa ltar sgrub par rtogs pas na sgyu ma mkhan bzhin du rjes su chags pa la sogs pas rnam par dben pa nyid kyis sems can gyi don zhes bstan to//sems can rnams bde bar gyur zhes bsam pa 'ba' zhig gis chog par 'dzin pa dgag pa'o/ /de ni blang ba dang dor ba rtogs nas yang rtogs pa dang mthun par dngos su sgrub pa'i don te phrin las bzhi pa'o/ /rang gi don zhes bya ba ni rang gi don la mngon par zhen pa dang ma bral ba'i phyir ro//'khor gsum rnam par dag pas rab tu phye ba zhes bya ba ni sngar/ mtshan med rab tu sbyin la sogs/ /yang dag sgrub la mkhas pa 'di/ /rnam pa thams cad rtogs 'di la/ /thar pa'i cha dang mthun par 'dod/ /ces bstan pa rnams so//rang dang gzhan gyi don gyi mtshan nyid ces bya ba ni srog gcod pa spong ba dang / ma byin par len pa spong ba dang / 'dod pas log par g.yem pa spong ba dang / /brdzun du smra ba spong ba dang / tshig rtsub po spong ba dang / phra ma spong ba dang / gnod sems spong ba rnams ni gzhan la gnod pa spong bas gzhan gyi don du bsdus la/ngag 'khyal pa dang / brnab sems dang / log par lta ba rnams spong ba ni rang la gnod pa spong bas rang gi don bsdus pa'am/ yang na rang dang gzhan gyi don zhes bya ba ni sangs rgyas nyid du ma bsngos pas nyan thos rnams ltar na rang 'ba' zhig gi don ni ma yin gyi gnyi ga'i don du'o zhes bya ba'o//sangs rgyas nyid kyi lam zhes bya ba ni sangs rgyas thob par bya ba la lam dang lam gyi yan lag ji snyed du bstan kyang de dag las gtso bo ni dge ba bcu po 'di dag yin pa'i phyir de skad ces bya'o//dge ba bcu'i las kyi lam la'o zhes bya ba la/ 'di dag ni rnam par smin pa sdug cing yid du 'ong ba can yin pas na dge ba'o/ /lus kyi gsum dang ngag gi bzhi dang yid kyi gsum rnams ni bcu'o/ /las kyi lam zhes bya ba ni/ skad cig gzhan du mi gnas shing //byed med yid kyang gang gis ni/ /byed dang bcas ltar snang byed pa/ /sems pa de ni yid kyi las/ /zhes bya ba'i tshul gyis na las ni sems pa ste/ sems pa de yang brnab sems spong ba dang / gnod sems spong ba dang / log par lta ba spong ba rnams kyi dbang du 'gro zhing de dag gi lam du 'jug pas na las de'i lam ni de dag go//lhag ma srog gcod pa la sogs pa bdun ni las kyang yin la sems pa yang dang por 'di dag slong zhing bskyed la/ de nas kyang 'di dag la rten cing 'jug pas las kyi lam yang yin te/de skad du dbyig gnyen gyi zhal snga nas/ chos mngon pa mdzod kyi tshig le'ur byas pa las/ gsum mam bdun ni las kyang yin/ /zhes bshad la/ las kyi mtshan nyid kyang / de ni sems pa dang des byas/ /sems pa yid kyi las yin no/ / de bskyed lus dang ngag gi las/ /zhes so/ /de nas chos thams cad rang bzhin gyis stong pa nyid du goms pa la'o zhes bya ba ni mos pa yid la byed pa'i dbang gis goms par byed pa tsam zhig tu gzhag gi dngos gzhi ni ma yin te/ de ni sa rab tu dga' ba la sogs par de kho na nyid yid la byed par bzhag pa'i phyir ro//de'i rjes la sbyin pa'i pha rol tu phyin pa la brten nas zhes bya ba ni sbyin pa ni bsod nams kyi las kyi mchog yin la/ bsod nams shin tu cher bsags pa'i sems la ji ltar smon pa 'grub pa'i phyir na sbyin pa ni sa dang po der chos kyi dbyings kun tu 'gro ba rtog pa'i mtshan nyid gnyis su med pa'i chos kyi rgyus te de la sbyor ro zhes bya ba'i don to//tshogs ni sa dang po bsod nams dang ye shes gnyis so/ /de yongs su rdzogs pa'i rgyur gyur pas zhes bya ba ni sa rab tu dga' ba la tshogs khyad par can la gnas kyang da dung yongs su rdzogs pa ni ma yin pas de dag yongs su rdzogs par bya ba'i phyir sa gnyis pa la sogs pa la tshul khrims la sogs pa'i pha rol tu phyin pa'i chos thams cad yongs su rdzogs par byed cing /de'i tshe yang de dag gi brdar btags par shes pas dpyod kyi dngos por 'dzin pa'i tshul gyis ni ma yin pa la 'god do//de bzhin du zhes bya ba ni brdar btags pa tsam la ltos pa'o/ /shes pa dang shes bya'i dngos por mngon par ma zhen pa'i mtshan nyid chos thams cad dmigs su med pa'i zhes bya ba ni/ gzung ba dang 'dzin pa'i blo rab tu log pas 'di dag ni dbyer med par chos kyi dbyings sna tshogs su snang ba'o zhes bya ba la nges par gyur pa'o//de ltar na shes pa'i phyir rang dang gzhan du 'byed pa med pas rang gi don du mthong bas sems can yongs su smin par byed cing sems can du mngon par zhen pa med pa'i phyir ye shes phrin las dang bcas pa de nyid thabs kyi pha rol tu phyin pa'i stobs so//de la sems can yongs su smin pa ni drod la sogs pa thob pa ste/ shing tog smin pa dang / ma smin pa bzhin du las su rung ba'o zhes bdag gi bla mas lung phog pa'o/ /de ltar na mdo sde rgyan las kyang bstan to//nyan thos dang thun mong ma yin pa'i byang chub sems dpa'i lam ni shin tu mtshan ma med pa'i dbyings su yang zhugs la/ 'on kyang de bzhin gshegs pa rnams kyis bskul ba'i mthus yang dag pa'i mtha' mngon sum du ni mi byed pas so/ /chos thams cad la mngon par zhen pa spangs pa zhes bya ba ni sngar/rgyal la sogs la chags pa phra/ /zhes bstan pa'i chags pa phra mo yang sa 'di las brtsams nas ni bral te/ 'on kyang bsod nams kyi tshogs yongs su ma rdzogs pa'o/ /gzhan dag ni sa 'og ma la ltos nas mngon par zhen pa spangs par 'dod kyi chags pa phra mo ni sa bcu pa'i bar du ldan par 'dod do//smon lam gyi pha rol tu phyin pa'i mthus byang chub thob pa la'o zhes bya ba la/ 'dir byang chub ni gzugs kyi skur mngon par rdzogs par 'tshang rgya ba'o/ /de thob pa ni tshogs ma rdzogs pas chos kyi skur mngon par rdzogs par byang chub par mi nus kyi/gdul bya'i dbang gis gzugs kyi skur mngon par rdzogs par 'tshang rgya ba ni smon lam gyi mthus nus par gyur te/ 'di skad du rgyal ba'i yum bar ma las/ shA ri'i bu 'di ltar yang byang chub sems dpa' sems dpa' chen po pha rol tu phyin pa drug la gnas shing sangs rgyas kyi sku ci 'dra ba de 'dra ba'i lus su mngon par sprul nas shar phyogs kyi sangs rgyas kyi zhing gang gA'i klung gi bye ma snyed dag tu 'dong zhing sems can rnams la chos ston pa dang zhes bya ba la sogs pa gsungs so//'o na 'phags pa sa bcu pa'i mdo las/ sa bcu pa nas brtsams te smon lam gyi mthus ni dga' ldan nas babs pa la sogs pa'i rim pas mngon par rdzogs par sangs rgyas par gsungs pa 'di ji ltar drang zhe na/ de'i tshe ni sa dgu pa la 'jig rten gyi khams rab tu mang por 'tshang rgya ba'i sbyor ba ston pas sa 'og ma dag las khyad par du bstan to//sangs rgyas kyi zhing sna tshogs rnam par dag pa la bkod nas zhes bya ba la zhing rnams ni yang dag pa'i don du na ye shes kyi snang ba ste/ de'i phyir 'phags pa dri ma med par grags pas bstan pa'i mdo las kyang /sangs rgyas kyi zhing yongs su sbyong bar 'dod pas ni rang gi sems yongs su sbyang bar bya'o zhes gsungs la 'dir yang ye shes kyi pha rol tu phyin pa'i stobs kyis zhes gsungs so/ /de lta bu'i sa bcu'i bdag nyid kyi mtha'i bya ba ni skye ba gcig gis thogs pa la sogs pa gsungs te go sla'o//de nas bsgom pa'i lam khyad par can gyi dbang du byas te/ byang chub mtha' dag 'dren par byed pa'i chos kyi mtshan nyid byang chub kyi yan lag dang zhes bya ba la sogs pa gsungs te/ byang chub mtha' dag ni nyan thos dang rang sangs rgyas dang theg pa chen po pa'i byang chub thams cad do//de dag 'dren par byed pa'i chos kyi mtshan nyid ni 'di ltar byang chub kyi yan lag rin po che sna bdun te/ sngar rnam pa'i skabs su bshad pa rnams so/ /de yang de dag ni mthong ba'i lam yin la/mthong ba'i lam ni sngar byang chub chen po grub par byed pa mthong ba'i lam zhes bstan pas na de dag la byang chub mtha' dag 'dren par bzhag go/ /las dang 'bras bur 'brel pa ni kun rdzob kyi bden pa yin la/ de chud mi za ba ni skad cig ma gcig pa'i mngon par rdzogs par byang chub pa des ni ye shes rnam par dag pa bskyed kyi/bskal pa mang po zhig tu dka' ba byas nas rang gi ye shes rgyun gcod pa ni ma yin pa'i phyir ro/ /de'i phyir gang dag sangs rgyas kyi sa'i ye shes kun rdzob tu yang med par smra ba de dag gi lta ba dgag par 'di gsungs pa'o//dngos po thams cad ces bya ba ni kun rdzob kyi bden pa rnams so/ /yang dag pa ji lta ba bzhin du rtogs pa zhes bya ba ni don dam pa'i bden pa las de dag tha dad par mi 'dzin pa'i ngo bo ste/ ji skad du 'phags pa khye'u snang ba bsam gyis mi khyab pas bden pa gnyis su dbyer med par bstan pa lta bu'o//phyin ci log thams cad ces bya ba ni mdor na bden pa gnyis log par rtogs pa ste de dag spang ba ni ji skad du bstan pa'i bden pa gnyis su mi 'dzin pa'i mthu ste/ des na snga ma'i 'bras bur 'di bstan pa'o/ /de ltar phyin ci log spang ba de yang gang zhig yod pa bor ba ni ma yin pas na phyin ci log spang ba gzhi med pa'i ye shes zhes smos te/gzod ma nas dngos po rnams la phyin ci log phra ba yang med pas na dngos po rnams kyi rang bzhin ji ltar gnas pa zhig des shes par zad de/ de lta bas na sngar/'di la bsal ba ci yang med/ /bsnan par bya ba cung zad med/ /yang dag nyid la yang dag lta/ /yang dag mthong na rnam par grol/ /zhes gsungs la/ 'phags pa las kyi sgrib pa rnam par dag pa zhes bya ba theg pa chen po'i mdo las kyang / yul 'di dag ni dug med stong pa ste//dngos por dmigs pa thams cad gzung du med/ /ces bya ba la sogs pa gsungs te/ don 'di ni rgya cher 'phags pa 'jam dpal gyi man ngag ces bya ba theg pa chen po'i mdo las shes par bya'o/ /de ltar bstan pa'i tshul gyis rang bzhin gyis yongs su dag pa'i mtshan nyid kyi byang chub sems dpa'i rnam par byang ba zhes gsungs te/rgyal ba'i sras de'i yon tan de dag rab tu dag cing 'od gsal ba'i rgyu mtshan ni snga ma nyid do/ /de ltar rnam par dag pa'i yon tan gyi tshogs de dag kyang sangs rgyas kyi sa'i rgyur gnas pa'i phyir dri ma thams cad dang bral ba'i rnam par byang ba'i rgyu'i tshogs zhes smos so//yang lam de la gnas pa ni bdag gi slob pa'i sa 'di yongs su spangs te/ chos kyi sku 'dus ma byas thob par bya'o zhes mi rtog par ston na ni stong pa nyid kyi ngo bo nyid kyi 'dus byas dang 'dus ma byas tha mi dad par yongs su shes pa la bkod nas zhes bya ba smos te/de ltar na 'gro ba rab tu zhi bar mdzad pa nas bzung ste ye shes kyi pha rol tu phyin pa'i bar du ni gnas skabs gong ma gong ma las 'og ma rnams tha dad la/ skye ba gcig gis thogs pa'i khyad par gsum dang khyad par gyi lam gyi yon tan rnam pa brgyad ni rang rang gi chos can gcig gi yon tan gyi khyad par lnga'o//de bzhin gshegs pa'i sa ni kun tu 'od de/ de ni mi gnas pa'i mya ngan las 'das pa'o/ /de la 'god par mdzad pas na phrin las yongs su rdzogs pas thugs la mi mnga' bar gyur pa'i phyir las gzhan de nas ma smos so//'khor ba ji srid bar zhes bya ba ni sngar de nyid zad pa med pa'i phyir/ rtag pa zhes kyang nges par brjod/ /ces bstan pa'i tshul gyis so/ /gal te de ltar bcom ldan 'das thugs rje chen pos phrin las mdzad pa mngon par brtson pa'i phyir/sangs rgyas brgyud pa thog ma med pa dag gis sems can dpag tu med pa phung po lhag ma med pa'i mya ngan las 'das pa'i dbyings su snga ma nyid du bkod cing / da ltar dang ma 'ongs pa'i dus su yang de ltar 'god par mdzad na ci'i phyir 'khor ba thog ma med ce na/dge slong dag khyed kyis lha'i mig dag pas stong gsum gyi stong chen po'i 'jig rten gyi khams 'di na sems can ji snyed cig gnas pa mthong ba ni ches nyung gi/ ngas shing rta'i 'phang lo tsam gyi phyogs na sems can gnas pa rnams mthong ba ni ches mang ngo zhes gsungs pa'i tshul gyis sems can gyi phung po ni rab tu mang la sangs rgyas rnams ni brgya lam na lan 'ga' kho na u dum wA ra'i me tog bzhin du 'byung ba'i phyir/'di dag zad par bya dka' ba'i phyir te/ rdul phra rab re re la yang sangs rgyas dpag tu med par bzhugs pa gang dang gang las bstan pa ni sprul pa'i sku'i dbang dang /byang chub sems dpa' dbang thob pa'i yul du byas pa'i phyir ro/ /gzhan yang gang gi tshe sems can thams cad mngon par rdzogs par sangs rgyas par gyur pa de lta bu'i dus nye bar gnas su chug na yang de dag gi ye shes skad cig ma bde ba chen po rgyun du 'byung ba nyid la 'khor ba zhes bya ba'i phyir yang nyes pa med do//bzhed pas mdzad pa yin no zhes bya ba ni lhun gyis grub par 'byung ba ste/ khyod kyi phrin las ji snyed pa/ /bzhed pa tsam la rag las te//sbyor 'byung yon tan gcig ma mchis/ /zhes bstod pa lta bu'o/ /sems bskyed pa dang po ni/ de yang sa gser zla ba me/ /zhes bya ba la sogs pa'o/ /tha ma ni/ 'gro rnams zhi ba'i las dang ni/ /zhes bya ba la sogs pa'o/ /de dag gi las de ltar bstan pas zhes bya ba ni rang rang gi gnas skabs kyi bya ba dang yon tan dang rang bzhin bstan pa'o//go rims bstan pa'i rim pa zhes bya ba ni las dang po pa'i sa nas sangs rgyas kyi sa'i bar du rim pa ma 'khrugs par bstan pas so/ /lhag ma bar gyi tshig gi don rnams kyi go rims kyang las dang po pa'i sa nas sangs rgyas kyi sa'i bar du ston pa'i dbang du byas pa de dag gi rjes su 'brangs te/de dag kho na ltar khong du chud par byas te/ de'i dgos pa ni sngar bstan to/ /de ltar na slob dpon gyi zhal snga nas ci'i phyir 'grel par de ltar mi ston snyam pa la tshig mang du dogs pas bdag gis ma bris so zhes bya ba gsungs te/des na tshegs la lta ba'am/ dgod par mi mkhyen pa ni ma yin gyi dang po nas kyang yum 'di zlos bu lta bur rab tu mang po byung bas don khong du chud par dka' bar gyur na/ gal te ngag re re la skabs kyi don mtha' dag bkod na/de'i tshe yum 'dis gdul bya phal cher khams rab tu 'khrug par byed pa nyi tshe ba zhig gi yan lag tu 'gyur ba'i phyir ma bkod do zhes bya ba'i don to/ /de'i phyir bdag gis kyang 'dir dpyad pa ma byas so/ /skabs brgyad pa'i 'grel bshad rdzogs so// // skabs bsdus pa gnyis kyi don ni dang por bshad zin te/ tshig gi don yang go bar sla'o/ /chung zad du na snga ma kho na bzhin du bshad par bya ba yin no zhes bya ba ni skabs bsdus pa rnam par dbye ba bsdus pa yin du zin kyang / don la ni khyad par du bya ba med do/ /tshegs chung zad cig bri bar bya'o zhes bya ba'i tha tshig go//da ni gzhung nye bar bsdu ba ston te/ 'phags pa rnam par grol sde yis/ /mthu yi don mthong sgo nas ni/ /tshig le'ur byas pa'i 'grel gsal ba/ /'di ni seng ge bzang pos byas/ /zhes bya bar sbyar te ji ltar byas she na/ tshig dang ni/ ngag sogs sbyar ba ma byas par//zhes bya bar sbyar te/ de la tshig ni chos rnams kyi khyad par ston par byed pa'o/ /ngag ni tshig ji snyed pas brjod par bya ba gcig ston par byed pa ste/ ka ba ni byas pa'i phyir mi rtag la de'i phyir de la rang bzhin med do zhes bya ba lta bu'o//sogs pa zhes bya ba ni sdeb sbyor gyi bstan bcos lhur blangs te don ston par mtshungs kyang / tshig yid du 'ong bar byed pa'i snyan dngags dag kyang ma sbyar zhes bsdu ba'o/ /de ltar ngag dang tshig dang snyan dngags rnams 'dir ci'i phyir sbyor ba ma mdzad ce na/ go bar sla bar bya ba'i phyir te/ don rgya chen po khong du chud par bya ba'i dus na tshig gi tshogs rab tu mang po bstan pa ni don de khong du chud pa'i bar chad du 'gyur bar snang ste/ de'i phyir 'di gzu bor bstan pas slob ma la bshad pa'i phyogs ltar bstan pas khong du chud par sla ba'i yan lag tu byas pa'o//ci 'di gzhan gyis rjes su ma gnang bar byas sam zhe na/ ma yin te/ mkhan po yang dag rnam snang mdzad/ /bla ma bzang la phyag 'tshal nas/ /de dag las gnang ba mnos shing man ngag gi cha gnang nas 'di byas zhes bya ba'i don to/ /kha cig ni 'di ltar mkhan po yang dag rnam snang mdzad//ces bya ba ni rje btsun rnam par snang mdzad las gnang ba thob par ston pa yin te/ slob dpon 'di ni de'i mngon sum pa yin pa'i phyir ro/ /bla ma bzang po ni 'phags pa rnam par grol ba'i sde ste/ de dag la phyag 'tshal nas gnang ba mnos te 'di tsam zhes 'chad par byed do//bde gshegs shes rab ni chos kyi sku'o/ /mi gsal zhing zhes bya ba ni rjes su dpag pa las mjug gi mngon sum du yum 'di'i don ma gyur par ston pa ste/ ji skad du/ de la sgro btags gcod byed pa'i/ /rjes su dpag rnams shes par byed//rnal 'byor dbang rnams mngon sum gsal/ /zhes bstan pa lta bu'o/ /de ltar des ni rtogs pa'i chos khong du ma chud par bstan te/ da ni lung gi chos kyang ma rtogs par ston par byed pa ni/ bstan bcos kun las thag ring la/ /zhes smos pa'o/ / de dag kyang gang gi nub mo la dgra bcom pa des pa dang / sde snod gsum pa slob ma can gnyis mya ngan las 'das pa dang / tshe'i dus byas pa de'i nub mo nub pas/ de phyin chad ni chos kyi gzugs brnyan la spyod pa'i phyir ro/ /'o na de dag sus shes she na/ bstan bcos rnams kyi don ji lta bu zhig yin pa ni bskal pa mang por bsod nams kyi tshogs bsags pas bdag nyid che ba'i blo can rnams dang /yun ring du dge ba'i bshes gnyen sangs rgyas dang / byang chub sems dpa' rnams kyi man ngag yongs su bzung ba rnams dang / 'phags pa'i skye bo 'phags pa rnam par grol ba la sogs pa de dag gi spyod yul yin no//skye bo mkhas pa rnams ni blo dang ldan pa rnams so/ /bzod pa mdzod ces bya ba ni/ bdag la smad pas khyed rnams nyams par ma gyur cig /ces dgongs pa'am/ yang na gzhan gyi 'jigs pas nga rgyal med par ston pa ste/'gro ba kun la bran gyur bzhin du gnas par bya/ /zhes gsungs pa'i tshul gyis so/ /shin tu rgya che'i pha rol ma mthong rgya mtsho'i bya 'dra bdag gis ni/ /gzhung mchog tshig gi chu gter 'di la 'bad pas rgal bar bsams pa dang / /gang gis gting ni rab tu rnyed par dka' bas rab zab ces brjod pa//de yi gting yang bdag gis dman pa'i blo yis btsal bas 'bad pa yin/ /de yi dge ba dri med zla zer 'dri ba bdag la gang skyes des/ /sangs rgyas ye shes 'gro ba'i bshes gnyen dam pa'i dpal du bdag gyur cig / 'gro ba rnams kyang 'jig rten rgyang pan la sogs gsang tshig 'don pa las/ /rnam log nyin dang mtshan du rgyal ba'i yum la gus 'bad gnas gyur cig /ci phyir zhe na gzhung gang 'dod chags bral dang mi mthun de rab 'phel/ /rtsod dang sdang ba'i rtsa ba gcig pu 'gro ba rnams la rab 'tshe'i rgyu//de rten gyur pas ji ltar go 'phang bla med 'gro ba'i gnyen gcig 'gyur/ /de mthong phyir na bdag ni yum 'dir gzhol phyir smon lam brtson par byed/ /dper na rin chen mang pos gang ba'i gling du song ba'i blo nyams pa'i/ /tshong pas nor bu rin thang med pa bor te mching bu'i nor bu len//de bzhin rgyal ba skyed ma rin thang med pa'i nor bu bor nas ni/ /gcer bu'i gsang tshig dag dang nyi tshe'i theg pa dag la brtson byed smad/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa'i 'grel bshad tshig rab tu gsal ba zhes bya ba/yul chen po bai da lar skyes pa'i slob dpon mkhas pa chen po grub pa'i mtha' rab 'byam la mkhyen pa'i snang bas khyab pa/ theg pa chen po dbu ma'i slob dpon dpal chos kyi bshes gnyen zhes bya ba'i zhal snga nas mdzad pa rdzogs so/