CLOSE WINDOW

D3794
བོད་ཡིག

@##/ /rgya gar skad du/ a b+hi sa ma yA lang+kA ra pradz+nyA pA ra mi to pa de sha shAs+t+ra br-it+ti du ra ba bo d+hA lo kanA ma TI kA / bod skad du/ shes rab kyi pha rol tu phyin pa'i man ngag gi bstan bcos mngon par rtogs pa'i rgyan zhes bya ba'i 'grel pa rtogs par dka' ba'i snang ba zhes bya ba'i 'grel bshad/sangs rgyas dang byang chub sems dpa' thams cad la phyag 'tshal lo/ /'phags pa 'jam dpal gzhon nur gyur pa la phyag 'tshal lo/ /dpal ldan byang chub shin tu rnam dag pa/ /mi pham la btud des mdzad tshig le'ur byas/ /seng ge bzang po'i dpal gyi zhal snga'i 'grel//tshig don rtogs dka'i tshogs ni bshad par bya/ /gang phyir rgyal bas mi khom thams cad ni/ /dad pas spong bar 'gyur zhes gsungs pas na/ /de phyir 'di ni yang dag rtsom pa la/ /skye bo dam pa rnams kyis bzod par mdzod/ /gzhung rtsom pa thams cad la rtog pa dang ldan pa phal cher de mthar phyin par bya ba'i phyir dang //thos pa la sogs pa la 'jug pa rnams gegs med par bya ba'i phyir/ rang gi dad pa'i lha la phyag 'tshal ba yin pas/ thog mar rgyal ba'i lha la phyag 'tshal ba ni/ shes rab pha rol phyin pa la//zhes bya ba la sogs pa smos pa yin te/ shes rab ni thos pa la sogs pa'i rang bzhin gyis shes pa'o/ /de'i pha rol tu phyin pa ni rab kyi mthar son pa ste/ gnyis su med pa'i ye shes dang / de'i don gyi lam dang gzhung dag ni dngos dang btags pa'i dbye bas shes rab kyi pha rol tu phyin pa ni rnam pa gsum yin no//de la phyag 'tshal ba ni lus la sogs pa gus pas rab tu 'dud pa'o/ /ci zhig gi don du zhe na/ de rgyan te mngon par mtho ba dang nges par legs pa'i rgyur gyur pa nyid yin pa'i phyir mngon par rtogs pa rnam pa brgyad ni yul de'i rgyan yin no//de'i tshig le 'ur byas pa dag ni de'i ngo bo'i don rtogs pa rdzogs par byed pa'i tshigs su bcad pa'i sdeb sbyor du byas pa yum stong phrag brgya pa la sogs pa'i rgya cher bshad pa rnam par dbye ba ste/ char phye bas nye bar bstan pa'o//ji ltar zhe na/ stong phrag brgya pa la sogs pa'i don bshad pa brgyan pa'i phyir mngon pa'i sde snod la sogs pa kun gyi rgyan du 'gyur ba'o/ /der 'gyur ba ni bsam pa ste / des de bstan pa yin pa'i phyir ro/ /phyir zhes bya ba ni de ltar bdag gis 'phags pa byams pa'i dgongs pa shes par gyur pas so//ci rab tu byed pa'i rnam par bshad pa gzhan dag kyang yod dam zhe na/ yod pa'i phyir 'gro la chags pa zhes bya ba la sogs pa smos pa yin te/ 'phags pa ste nyon mongs pa dang bral ba lta bur chags pa med par sems can gyi don la kun tu chags par mdzad pa gang yin pa des kun tu chags pa'o//don 'di nyid ni/ 'gro la chags pa kun chags mdzad/ /ces smos pa yin te/ 'gro ba la chags pa gang yin pa de ni 'gro ba la chags pa ste/ byang chub sems dpa' rnams so/ /de rnams dang 'dra bar kun tu chags par mdzad pa gang yin pa des so/ /de nyid kyis na skyob pa ste/ rang gis gzigs pa'i lam ston pas sems can rjes su skyong bar mdzad pa'i phyir ro/ /rnam bshad ni khyad par can gyi don ston pa'o//mdzad pa ni rnam par sbyar ba'o/ /gang gis she na/ bstan bcos chen pos zhes bya ba ste/ shes rab kyi pha rol tu phyin pa'i mdo'i don ma lus pa sdud par byed pas bstan bcos chen po ste/ mngon par rtogs pa'i rgyan zhes bya'o/ /ci dpyad pas sam thos pa gcig nas gcig tu brgyud pas mdzad dam zhe na/ma yin de nyid kyis/ mi pham mgon las gsan nas ni/ /zhes smos pa yin te/ lha dang mi rnams kyi dam par gyur pa yin pa'i phyir dang / 'jig rten gyi gtso bor gyur pa nyid kyis na dbang phyug chen po la sogs pas mi thub pa'i phyir mi pham mo zhes bya ba ni bdag nyid kyis gsan nas legs par bsams shing bsgoms pas bstan par byas nas zhes bya bar don gyis shes so//'di ni ting nge 'dzin brnyes pa nyid yin na yang ji ltar lhag par mos pas tshig le'ur byas pas mdzad pa po las mngon sum du gsan pa nyid yin pas sdud pa po dang 'dra bar 'dir tshad ma'i skyes bur gyur pa yin la/'dir gzhan dag thos pa mang ba yang yin zhing dran pa yang shes pa bzhin bsdus pa byas pa nyid ni 'dir ci zhig ltar 'grel pa byed pa la dbang ba yin na/mkhas par rlom pa gzhan dag lta smos kyang ci dgos zhes bya bar dgongs so/ /phyi rol gyi shes bya med pa/ nang gi shes bya la brten cing sems tsam pa'i gzhung la gnas pa nyid yin pa de ni 'gro don rtsa lag ces bya ba la sogs pa smos pa yin te/ 'gro ba la mngon par 'dod pa nges par legs pa'i rgyu kha na ma tho ba med pa'i lam yang dag par ston par mdzad pas na rtsa lag go//don 'di nyid ni 'gro don zhes bya ba smos pa yin te/ 'dod pa'i don sgrub par byed pa yin pa'i phyir ro/ /su zhig ce na dbyig gnyen zhes bya ba'o//rang gi mos pa gtsor byed pas/ /zhes bya ba ni rang gi gzhung lugs la mngon par zhen pas so/ /rnam par bkrol zhes bya ba ni bshad pa ste/ bstan bcos chen po zhes bya bar rjes su snyegs so/ /'phags pa'i khongs su gtogs pa yi/ /zhes bya ba'i ting nge 'dzin thob pa yin pa'i phyir ro//rnam par grol ba zhes bya ba ni khyad par can gyi bdag med pa la lhag par mos pa nyid yin pa'i phyir/ dbu mar gnas pa'i blos zhes bya ba ni yod pa dang med pa la sogs pa'i mtha' spangs pa'i dbu ma'i shes pas bstan bcos chen po rnam par phye ba yin no//sngon chad rnam par phye zin pas 'di ni rigs pa ma yin nam zhe na/ des byas byas pa min mthong nas/ /zhes bya ba smos te/ sngar bshad pa'i slob dpon dag gis byas pa'i 'grel pa rnam par shes pa tsam gyi gzhung rang bzhin dang bcas pa'i 'jug pa yin pa'i phyir ji lta ba nyid ma yin no zhes shes na de'i phyir rnam par grol ba'i sdes bdag med pa la lhag par mos pa'i stobs kyis mu stegs pa ma lus pa'i gzhung mtha' dag bcom nas rang dang rjes su mthun pa'i bla ma'i tshig gi bdag nyid kyi shes pa gsal bar byas pa'i dbang gis bstan bcos chen po rnam par bshad do zhes snga ma dang sbyar ro//'di snyam du sems te/ gal te bcom ldan 'das yum gyi ye shes yod pa'i ngo bo yin na ni yod par 'dzin pas yang dag par grol bar mi 'gyur zhing gzhung yang drang ba'i don du 'gyur ro//sgyu ma lta bu'i gnyis su med pa'i ye shes kyi ngo bo nyid kyi ni sgra ji bzhin pa nyid yin pa'i phyir bshad pa rtogs sla ba dang / yod pa dang med pa la sogs pa'i mtha' la mngon par zhen pa med pa'i phyir yang dag par grol bar 'gyur ro//de yang dbu ma la 'jug pa las/ slob dpon klu sgrub zhal snga'i lam nas ni/ /phyi rol gyur pa'i zhi ba'i thabs ma yin/ /de ni kun rdzob yang dag bden las nyams/ /de las nyams pas thar pa grub yod min/ /zhes bshad pa dang / dbu ma'i de kho na nyid ni de'i rigs kho na la rigs pa yin te/'di nyid las/ so so'i skye bo nyid na 'ang stong nyid thos/ /nang gi dga' ba yang dang yang du thob/ /dga' ba las byung mig ni mchi mas brlan/ /lus kyi spu ldang ba yang skye bar 'gyur/ /zhes gang bshad pa yin no/ / 'phags pa thogs med kyi zhal snga nas kyi dang / 'phags pa byams pa las yang dag par rdzogs pa'i sangs rgyas dang 'dra bar rang gi bsam pa'i dbang gis sems can gyi don du rtogs pa yin pas nyes pa med do/ /yang rang dang rjes mthun tsam du zhes bya ba 'di'i don ni de'i 'og tu rnam grol sde zhes bya ba la sogs pa smos pa yin te/dad pa nyid rten du gyur pas sa yin te/ de la gnas pa yis zhes bya ba yin no / /dad pa dang ldan pa ste/ bcom ldan 'das kyis dad pas mi khom spang bar 'gyur ro zhes gang gsungs pa yin no//bstan bcos mtha' dag ma rnyed par/ /zhes bya ba ni sngar smos pa'i bshad pa'i bstan bcos ma lus pa de mdzad pa po las mngon sum du ma thos pa'am ma mthong ba'o/ /yang chos mngon pa'i sde snod la sogs par bshad pa'i bstan bcos ma rnyed pa'o/ / da ni sngar smos pa'i bshad pa dang rjes su mthun pa nyid yin pa'i phyir/ rang blo'i che ba'i bdag nyid ni/ /de ltar mkhas pa zhes bya ba la sogs pa smos pa yin te/ de ltar zhes bya ba ni tshul de ltar ro/ /mkhas pas snang byas shing zhes bya ba ni 'phags pa thogs med la sogs pas rnam par sbyar ba'i ye shes kyi sgron mas so//kha cig gis ni zhes bya ba ni bdag las gzhan pa'i mkhas pa mnyam par gzhag pa rnams kyis so/ /bstan bcos kun zhes bya ba ni rab tu byed par grags pa'o/ /ma rnyed pa ni ma mthong ba 'am ma thos pa'o/ /'di rnyed pa ni bstan bcos gsal bar byas pa rnyed cing nye bar dmigs pa ste/yang dag pa'i shes pa'i rang bzhin zhes bya ba ni lhag ma'o/ /ma yin na yang bdag nyid kyis bstan bcos sna tshogs bltas pas blo'i kha shin tu phye bar gyur pas snying po mdor bsdus pa'i rab tu byed pa'i don sna tshogs mthong ba'i nus pa yod pa ni ngo mtshar ba yin no//gal te de ltar yin na gzhan rnams kyi rnam par dbye ba don dang bcas pa'i skabs med par 'gyur ro zhe na/ ma yin te/ de ltas shin tu rnyed dka' ba/ /zhes bya ba la sogs pa smos pa yin te/ shin tu rnyed dka' ba zhes bya ba ni bsod nams bsags pa nyid kyis rnyed pa nyid yin pa'i phyir ro//zab mo'i lam can zhes bya ba ni mngon par rtogs pa brgyad ji ltar byams pas thugs su chud pa'i bdag med pas zin pa nyid yin pa'i phyir rigs pa dang mi ldan pa dag gis nges par bzung bar mi nus pa yin pa las ci zhig ltar rnam pa 'ga' zhig gis bltas te/sangs rgyas kyi dbang gis rnyed pa ste/ sangs rgyas kyi byin gyis brlabs kyis thob pa ni mkhas pa rnams kyis dbye ba'i rigs/ bdag kyang 'gro ba'i don 'gro bar dam bcas pa yod pas bdag gi rnam par phye ba dang de rnams kyi rnam par phye ba la 'gal ba ci zhig yod/sngon sangs rgyas pa yod do zhes te/ de ltar mi bya ba ma yin zhing / 'gro la phan phyir sangs rgyas 'grub par shog /ces sems can thams cad la rgyal ba ma lus pa'i bstan pa don med par thal bar 'gyur ro//la lar bshad pa kha cig gis mi 'dul ba yang ma yin te/ sangs rgyas dang 'dra bar de rnams kyi yang dam bcas pa mnyam pa yin no/ /la lar rnam par dbye ba yongs su rdzogs pa med pa na yang shes rab kyi pha rol tu phyin pa la sogs pa'i mdo las tshigs su bcad pa gcig gi don thos pa la sogs pas 'tshang rgya ba nyid du bsngags pa yin no zhes bya bar dgongs so//de ltar phul du byung ba mkhas par gyur pa dang bcas pa yin pa dang / bsam gtan la mnyam par gzhag pa'i blo nyid kyis rnam par dbye ba'i go skabs yod pa nyid yin na yang bdag nyid khengs pa med pa nyid ni rnam pa kun tu zhes bya ba la sogs pa gsungs pa yin te/rgyal ba'i spyod yul yin pa'i phyir rnam pa kun tu thos pa la sogs pa'i rnam pas kyang bdag gi spyod yul ma yin na gang gi phyir de lta yin na yang /rang dang gzhan la phan gdags 'dod nas zhes bya ba bdag dang sems can rnams kyi mngon par mtho ba dang nges par legs pa ma lus pa ster ba/ bdag gir byed par 'dod pas/ bsod nams dag sgrub dang mthun phyir//zhes bya bar rab tu byed pa rnam par bshad pa las/ bsod nams skyed pa la gus pa'i sems bskyed pa ste/ yang dag par spro ba la bdag 'jug pa yin pa ste/ rnam par dbye ba zhes bya ba ni lhag ma'o/ /da ni rang gi gzhung lugs 'chad par mdzad pas bstod pa dang phyag 'tshal ba'i dbye ba'i mchod pa rnam pa gnyis 'chad pa'i rab tu byed pa'i don ci nas gsal bar 'gyur zhes 'jug pa ni 'phags pa byams pa zhes bya ba la sogs pa smos pa yin te/'phags pa byams pa ni sdig pa mi mnga' ba nyid kyis sems can thams cad la bu gcig pa dang 'dra bar byams pas phan 'dogs par mdzad pa'i tshul can no//re zhig thog mar rgyal ba'i yum gyi mngon par rtogs pa'i don bshad par rtsom pa nyid yin na yang dang por de'i yon tan ji lta bar ston pa sngon du 'gro bas thog mar yang dag pa'i yon tan brjod de/phyag 'tshal zhing lus la sogs pas gus pas rab tu 'dud pa ni 'phags pa byams pa bdag nyid ces bya ba la sogs pa smos pa yin te/ bdag nyid yum gyi dbang gis bya ba byas pa rnyed pa nyid yin zhing gdul bya gzhan dag bcom ldan 'das ma yon tan rin po che phul du byung ba'i 'byung gnas la zhes bya ba dbang phyug dang gzugs bzang la sogs pa dang ldan pa'am/nyon mongs pa bag chags dang bcas par bcom pa'i shes rab kyi pha rol tu phyin pa stobs bcu la sogs pa'i yon tan gyi rgya mtsho thams cad las mchog tu gyur pa'i 'byung gnas la don gyis zhes bya bar mthong ba dang /nges par legs pa'i don gyi dbang gis 'jug par bya ba'i phyir te/ dad pa dang shes rab dag las skyabs gzhan med pa'i bsam pas bsgom pa la sogs pa la 'jug par bya ba'i don du rab tu dang ba bskyed pa'i ched ni yid bde ba yang dag par bskyed pa'i don du'o//ci 'dir nye bar brtags pas sbyar ba yin nam/ 'on te des mngon sum du mkhyen pa yin zhe na/ shes rab kyi zhes bya ba la sogs pa smos te/ shes rab kyi pha rol tu phyin pa ni sngar smras zin to//de'i yul ni de'i rten no/ /rab tu dang ba ni mnyam pa la sogs pa'i yid bde ba'o/ /legs pa thams cad de mngon par mtho ba dang nges par legs pa rnams so/ /'thob pa'i rgyu'i gtso bo ni dngos kyi rgyu yin no/ /de la rab tu dang ba la rang bzhin gyi nus pa 'di dag ji ltar yod ce na/bdag nyid dam pa rnams kyi spyod pa dang mthun par rab tu ston pas zhes bya ba smos te/ rab tu dang ba'i bdag nyid de/ rang nyid kyi rang bzhin ni ting nge 'dzin dam pa dang / dge ba bcu la sogs pa'i bya ba la 'jug pa rab tu ston pas so //de la rab tu dang ba'i rang bzhin ni 'di yin te/ gang gi phyir gdul bya'i rgyud la skyes pa tsam gyis rnam par g.yeng ba dang mi dge ba las sems rnam par log nas ting nge 'dzin dang dge ba bcu la 'jug go/ /de'i dbang gis kyang don thams cad phun sum tshogs par 'gyur ro zhes bya bar dgongs te/bcom ldan 'das kyis/ sangs rgyas bcom ldan bsam mi khyab/ /sangs rgyas chos kyang bsam mi khyab/ /bsam mi khyab la dad rnams kyi/ /rnam par smin pa 'ang bsam mi khyab/ / ces gang gsungs pa yin no/ /de ltar zhes bya ba ni de bzhin du so so rang gi rig pa'i ye shes kyis nges par bzung nas zhes bya ba thos pa la sogs pa'i rang bzhin gyi shes pa bsgom pa'i rab kyi mthar thug pa la 'jug pa'i mngon sum gyi shes pas nyams su myong nas de'i rjes las byung ba'i rnam par rtog pas nges par byas nas/shes rab kyi pha rol tu phyin pa nges par mdzad pa'i ting nge 'dzin brnyes pa las byung ba nyid kyi tshig ni slu ba mi srid pas rtog pa dang ldan pa rnams shes rab bam/ dad pas 'jug par 'gyur gyi gzhan ni ma yin no zhes ston to//de nyid kyi phyir mdo las byang chub sems dpa' rnams la lugs kyi bstan bcos la sogs pa brtag cing sbyar ba'i don ni dran pa tsam du bkag pa yin no/ /skabs nyid kyis mtshams sbyar bar bya ste/ blo phul du byung ba mnga' ba'am/ mi slu ba'i ye shes dang ldan pas sangs rgyas te/nyan thos la sogs pa slob ma'i tshogs kyis yongs su bskor ba yin pa'i phyir/ nyan thos byang chub sems dpa'i tshogs dang ldan yum ste/ bskyed par mdzad pa gang yin pa'i yum de la phyag 'tshal ba ni lus la sogs pas gus pas phyag 'tshal ba'o/ / da ni don thams cad kyi gzhir gyur pa nyid kyis na yum gyi che ba'i bdag nyid ni nyan thos zhes bya ba la sogs pa smos pa yin te/ rang gi gdul bya rnams la tshig gam lus kyi chos sgrogs pas na/ nyan thos te/ nyan thos dang rang sangs rgyas rnams so//de zhi ba tshol ba rnams ni mya ngan las 'das par 'dod pa'o/ /kun shes nyid kyis zhes bya ba ni phyi dang nang gi dngos po rnams skye ba med par shes pas so/ /nyer zhir ni lhag ma dang bcas pa dang lhag ma med pa'i mtshan nyid kyis mya ngan las 'das pa'o/ / khrid par mdzad pa ni thob par mdzad pa'o/ /'gro la phan par byed pa rnams ni 'gro ba rnams la ma 'ongs pa na phan pa'i don skyed par mdzad pa'i byang chub sems dpa' rnams so/ /lam shes nyid kyis zhes bya ba ni gdul bya'i dbang gis nyan thos la sogs pa'i lam skye ba med par thugs su chud pa'o //'jig rten don grub mdzad pa ni sems can rnams kyi phan pa'i don rdzogs par mdzad pa'o/ /gang dang yang dag ldan pa ni yum gang dang yang dag par ldan pa'o/ /thub rnams ni bdag nyid kyi dngos po rnams yang dag par bsdams pa ste/ yang dag par rdzogs pa'i sangs rgyas so/ /sna tshogs 'di dag rnam pa kun gsungs pa zhes bya ba ni shes rab kyi pha rol tu phyin pa la sogs pa'i chos kyi 'khor lo sna tshogs pa 'di dag rnam pa thams cad du gsung zhing ston par mdzad pa'o/ /'phags pa byams pa bdag nyid dam pa rnams kyi spyod pa zhes bya ba la sogs pa sngar smos pa nyid bstan cing gsal bar byas pa ni/tshigs su bcad pa 'dis ni zhes bya ba la sogs pa smos pa yin te/ rnam par thar pa cung zad tsam zhig gis lhag pa zhes bya ba ni nyan thos rnams ni bag chags gnyis yod pa yin la rang sangs rgyas ni gzung ba'i bag chags spangs pa yin no//de'i phyir de rnams ni nyan thos rnams las rnam par thar pa cung zad tsam zhig gis lhag pa yin te/ de ni sems kyi khyad par kho na las rnam par gzhag pa yin pa'i phyir ro//dbang phyug chen po la sogs pa las rnal 'byor lhag pa yin pas nyan thos la sogs pa ni/ rnal 'byor gyi dbang phyug go/ /ye shes la sogs pa'i che ba'i bdag nyid kyis yang dag par rdzogs pa'i sangs rgyas ni gtsug tor gyi nor bu yin pas gtso bo'o/ / 'di ltar mdor bsdus na gang zag ni rnam pa gnyis te/ kha cig ni dad pa'i rang bzhin can yin la/ de yang yum 'dzin pa la sogs pa'i 'bras bu bstan pa thob pa nyid na spyod pa med par de'i mod la nges par dad pas nges par 'dzin pa la 'jug pa nyid yin no/ /gang yang rang bzhin gyis dbang po rno ba rnams ni rtag pa dang /bdag la sogs par bshad pa'i tshig dang 'dra bar slu ba yod pa srid pas lung gang la yang bab chol du 'jug par mi byed de/ de rnams kyang gcig dang du ma dang bral ba zhes bya ba la sogs pa'i tshad mas grub pa gzhi dang lam dang rnam pa skye ba med pa'i mtshan nyid kyi yum dang de la brten pa'i ting nge 'dzin rgyal po la sogs pa'i mdo thos pa la sogs pa'i 'bras bu bstan pa las dad pa phul du byung ba ni rigs pa nyid de gnod pa ma mthong bas phan tshun 'gal bar brjod pa mi srid pa'i phyir ro//don la the tshom gyis yang dag pa rnams kyi 'jug pa'i yan lag yin pa'i phyir te/ tshad ma rnam 'grel mdzad pas/ bstan bcos gang zhig rigs pas grub/ /rang gi tshig dang mi 'gal mthong / /ma mthong na yang de bzung ba//de ltar rigs pa mkhas pas shes/ /zhes gang bshad pa dang / yang / yon tan skyon dag ma mthong ba'i/ /skye bo gsog tu skyes pa la/ /grub mtha' log par 'dzin pa dag /kye ma 'di ni gang gis byin/ /zhes kyang bshad pa yin no/ /de nyid kyis na rtag pa la sogs pa dngos po kho nar gang du tshad ma dang 'gal bar 'gyur ba la rtog pa dang ldan pa rnams don dang mi ldan pa'i the tshom gyis khrus la sogs pa de la gang zhig 'jug par byed/'phags pa lha'i zhal snga nas kyis kyang / mu stegs byed pa mang po ni/ / bdag tu lta bar zhugs mthong na/ /chos mthong ba yi skye bo rnams/ /snying rje bar ni su mi 'gyur/ /zhes gang bshad pa yin no/ /gzhan dag gi sgo nas yum gyi mtshan nyid zlos te smras pa dang / mtshang ba nyid dang dgos pa med par rtog pa la/ thams cad mkhyen pa nyid gsum gyis bsdus pas yang dag par rdzogs pa nyid yin pa de lta na zhes bya ba la sogs pa smos pa yin te/de ltar 'og nas bshad pa'i rim gyis mngon par rtogs pa'i rgyan gyi bstan bcos 'og nas bshad pa'i tshig le'ur byas par grags pa ji ltar mdzad cing sbyar ba yin zhe na/gzhi dang zhes bya ba la sogs pa smos pa yin te/ gzhi ni phyi dang nang gi bdag nyid can no/ /gnyen po ni nyan thos la sogs pa'i lam mo/ /rnam pa ni dngos pos stong pa'i rnam pa ste/ de dag las gang yang rung ba zhig bsdus pas zhes bya ba gang yang rung ba zhig nye bar bzung bas so//phyogs dang po ltar na ni 'bad pa don med pa yin te/ mngon par rtogs pa'i rgyan rnam par sbyar ba'i 'bad pa la dgos pa med par 'gyur te/ ci'i phyir zhe na/ shes rab kyi pha rol tu phyin pa 'di las ni zhes bya ba la sogs pa ste/ shes rab kyi pha rol tu phyin pa 'di las zhes bya ba mngon par rtogs pa'i rgyan gyi bstan bcos zhes bya ba las/ mtshan nyid kyi bstan bcos mngon pa'i sde snod la sogs pa bdag las mi smos shing ma bshad pa'i phyi dang nang gi bdag nyid can gyi gzhi gang yin pa de 'byung ba med pas chos mngon pa'i sde snod la sogs pa la smos pa'i gzhi mngon par rtogs pa'i rgyan las zlos te bshad pa'i nyes pa yod do//de bzhin du phyogs gnyis pa ltar na yang 'bad pa don med pa yin te/ ci'i phyir zhe na/ rnam par byang ba'i dngos por bsdus pa'i phyir te/rnam par byang ba ni mya ngan las 'das pa yin la/ de'i rgyur gyur pas 'dir ni lam la bya'o/ /des na don ni 'di yin te nyan thos la sogs pa'i lam bsdus pa'i phyir ro/ /kun nas nyon mongs pa'i dngos po ni gzung ba la sogs pa mi mthun pa'i phyogs so//de ma bsdus pa ni ma smos pa'o/ /pas zhes bya ba ni rgyu'o/ /'di gang gi gnyen po yin pa khong du chud par mi 'gyur ro zhes bya ba ni mi mthun pa dang gnyen po'i phyogs kyi so sor nges par rtogs pa med pas rtogs pa med pa'i nyes pa yod do/ /phyogs gsum pa ltar na yang 'bad pa don med pa yin te/ci'i phyir zhe na/ rnam pa gzhi med pa tsam gyis bsdus pa'i phyir te/ rnam par rtog pa la gnas pa gzhi med pa'i rnam pa nyid smos pa'i phyir ro/ /cung zad kyang ma bshad pas don rtogs pa med pa'i phyir zhes bya ba ni de bsgoms pas gcig nas gcig tu brgyud pas kyang gzhi gang yang thob par mi 'gyur ba'i phyir skyes bu'i don la dgos pa med pas brjod pa med pa'i nyes pa yod do//thams cad mkhyen pa nyid gsum gyis ma bsdus pa'i nyes pa ni phyogs gsum car la yang shes par bya'o//phyir zhes bya ba ni gtan tshigs so/ /don med pa yin no snyam du gzhan dag sems par 'gyur ba ma yin nam zhes bya bas rgol ba pos thams cad mthong ba ma yin no/ /zhes bya ba'i tshul gyis bstan bcos la dgos pa med do snyam du shes par 'gyur ba'o/ / de ni ma yin te zhes bya ba la sogs pa la/ thams cad mkhyen pa nyid gsum gyis zhes bya ba ni nyan thos dang rang sangs rgyas dag ni/ thams cad shes pa nyid do/ /byang chub sems dpa' rnams ni lam shes pa nyid do/ /yang dag par rdzogs pa'i sangs rgyas ni rnam pa thams cad mkhyen pa nyid de/thams cad mkhyen pa nyid gsum po dag gis mngon par rtogs pa mtha' dag bsdus pa ni 'tshang rgya ba nyid mngon sum du byed pa thams cad kyi rgyur smos pa yin la/ des na gzhi dang / gnyen po dang / mi mthun pa'i phyogs dang / gzhi rnam pa'i mtshan nyid gsum car gyis kyang bsdus pa yin pa'i phyir mngon par rtogs pa'i rgyan zhes bya ba'i mtshan nyid kyi bstan bcos su mdor bsdus nas yang dag par bstan pa yin pa'i phyir thams cad mkhyen pa gsum po nyid du yum gtsor mtshon te/ yum gyi don ma lus pa ni de'i khongs su 'dus pa nyid yin pa'i phyir ro//de de ltar mtshan nyid 'dis mtshon pa nyid kyis sngar smras pa'i nyes pa yod pa ma yin te/ ma lus pa nyid dang / yongs su rdzogs par byed pa nyid dang / rab tu byed pa'i go rims rtogs sla ba nyid yin pa'i phyir bstan bcos 'di thun mong ma yin pa dang /yang dag pa'i mtshan nyid ma yin pa gang la yin zhes rab tu byed pa rnam par 'byed pas dgongs so/ /don 'di nyid ni 'di ltar zhes bya ba la sogs pa smos pa yin no/ /don dang gzhung gi mdor bsdus nas gsungs pa'i thams cad mkhyen pa nyid gsum nye bar bstan nas de'i rgyu dang 'bras bu bstan pa ni/de la thams cad shes pa nyid ni zhes bya ba la sogs pa smos pa yin te/ thams cad shes pa nyid ni gzugs la sogs pa ste/ gzugs dang tshor ba la sogs pa'o/ /de'i chos kyi rang bzhin bsgom par bya ba nyid la mi rtag pa dang stong pa nyid la sogs pa'i bsam gtan la brten nas/'bras bu ni bdag tu rmongs pa spangs pa can yin te/ /bdag tu 'dzin pa stong pa nyid ni 'bras bu yin no/ /'dis ni gzugs la sogs pa la mi rtag pa la sogs pa'i rnam pa thams cad shes pa'i stobs kyis bdag tu 'dzin pa las ldog go zhes ston to //theg pa thams cad kyis nges par 'byung ba ni nyan thos la sogs pa'i lam gyi 'bras bu'o/ /de nyid de kho na nyid de/ dmigs su med pa la dmigs pa yin pa'i phyir ro/ /de'i mngon sum du mi byed pa gang yin pa de la brten pa ni de'i rgyus so//'bras bu sems can ma bsdus pa sdud par byed pa can yin pa ni nyan thos la sogs pa'i lam gyi 'bras bu ma thob pa dang / sbyin pa dang rab tu sbyin pa la sogs pa'i bya ba ni 'bras bu yin te/ 'dis ni lam thams cad dmigs pa med par dmigs pa ni lam gyi rnam pa shes pa nyid kyis byang chub sems dpa' 'khor ba ji srid pa'i bar du thos pa la sogs pa las ldog par mi byed do zhes ston to//chos thams cad skye ba med par rten pa zhes bya ba ni don dam par gzugs la sogs pa skye ba med pa nyid kyi rgyu mtshan no//nam mkha'i khams kyi mthas gtugs pa ni mtha' med pa'o/ /sems can gyi don rgyun mi 'chad pa ni byang chub sems dpa'i gnas skabs su sems can gyi don skye ba thog ma med pa nas goms pa yin pas rang dbang med par byed pa gang yin pa dang /gang yang 'khor ba ji srid du kun nas 'jug cing / yang dag pa nyid kyi mtha' rtogs pa ste/ bdag med pas mngon sum du byed do/ /de dag gi bag chags kyis mtshams sbyor ba ni rnam par rtog pa gcig nas gcig tu brgyud pa'o/ /de spangs pa can yin pa ni dor ba'o/ / de nyid ni 'bras bu yin pa gang yin pa de la de skad ces bya'o/ /'di ni chos thams cad skye ba med pa la rten pa'i rnam pa thams cad mkhyen pa nyid kyis rnam par rtog pa ma lus par spangs pa dang / sems can gyi don yang nam mkha' lding bsgrubs pa'i mchod sdong dang 'dra bar bshad pa yin no//de lta bas na zhes bya ba la sogs pa smos pa yin no/ /skye bo blo gros dman pa dag ces bya ba la sogs pas ni bstan bcos kyi dgos pa med pa nyid du rtog pa la/ dam pa 'jug pa'i yan lag brjod par bya ba la sogs pa ston pa yin te/ma pham pa'i rdzogs pa'i sangs rgyas dang 'dra bar rgyal ba gang la mnga' ba de ni ma pham pa rgyal ba'o/ /de don ci zhig ste/ dgos pa ci zhig yod snyam na/ rang gi bstan bcos las tha mi dad pa'i rjod pa dang brjod par bya ba dang / 'brel pa dang / brjod par bya ba'i dgos pa dang /gdul bya rnams kyis bde blag tu khong du chud pa'i dgos pa brjod par bya ba yin pa de ni don la the tshom skye ba zhes bya ba la sogs pa smos pa yin te/ mdo don ni shes rab kyi pha rol tu phyin pa la sogs pa'i mdo'i don brjod par bya ba mngon par rtogs pa rnam pa brgyad do//de'i nye bar mtshon pa'i don ni/ chos spyod bcu yi bdag nyid can/ /zhes bya ba gsungs pa yin te/ byang chub kyi sems dang / rnam par dag pa'i sbyin pa la sogs pa'i pha rol tu phyin pa bcu dran pa la gzhag pa ste/ thos pa dang bsam pa dag gis yang dag par dran nas 'dir yum ston par mdzad pa sems can gyi bsam pa ji lta ba bzhin du rjes su ston par mdzad pas bstan pa gang yin pa'i rnam pa thams cad mkhyen pa nyid lam ste/byang chub tu bde bas 'gro ba nyid yin pas na thams cad mkhyen pa nyid gsum gyi lam mo/ / lam de ni gzhan gyi zhes bya ba byang chub sems dpa' las gzhan rnams kyis myong ba ma yin zhing rtogs pa ma yin te/ blo dang ldan pas rtogs 'gyur te/ /zhes bya ba byang chub sems dpa' rnams kyis sangs rgyas nyid mngon sum du byed de/ de bzhin gshegs pa'i gsang ba'i mdo las 'di'i lus dang spyod lam mtha' yas shing thug pa med do zhes bya ba la sogs pa gsungs pa yin te/rnam par rtog pa ni byang chub sems dpa' rnams kyi nyon mongs pa nyid yin na yang 'tshang rgya ba nyid mngon sum du bya ba'i smon lam gyi dbang gis gdul bya rnams la de las gzhan pa'i sku dang spyod lam so sor snang ba ltar ston pa yin pas nyes pa med do zhes bya ba ni brjod par bya ba'i dgos pa ci zhig yin no//bde blag tu ni rtogs 'gyur ba/ /zhes bya ba ni gdul bya rnams kyis mngon par rtogs pa brgyad bde blag tu khong du chud par 'gyur ro zhes bya ba ni rnam par dbye ba rtsom pa'i dgos pa gnyis pa yin no//de ltar na mtshan nyid kyi bstan bcos mdzad pa'i dgos pa 'di dag kho nas skyes pa'i don 'grub pa thams cad rdzogs par 'gyur ba yin pas na thug pa med pa ma yin no/ /'di ltar stong phrag brgya pa la sogs pa'i mdo la lar bsdus pa dang / bsdus pa rgyas pa dang / rgya che ba dang rtogs par dka' ba yin la/ bstan bcos 'di ni de las go bzlog pa yin no/ /de bas na 'dis ni tshe dang blo dang shes rab chung ngu dang ldan pa dag gis kyang rnam par phye bas mngon par rtogs pa'i don mod la shes pa dang / de bsgoms pas kyang sangs rgyas nyid la sogs pa 'grub par 'gyur ba yin pas sems dang ldan pa su zhig bstan bcos 'di la don med pa nyid du rtogs par byed/bshad ma thag pa'i mdo dang de'i mtshan nyid mdzad pa sangs rgyas dang byams pa dag las go rims bzhin du de gnyis kyi gdul bya shes rab kyis rlom pa dang /cig shos kyang yod pas don med pa ma yin no/ /'dis ni gang la la zhig mngon par rtogs pa nyid kyi rgyan yin gyi mtshan nyid kyi ni ma yin no zhes zer ba de dag kyang bsal ba yin te/ gnyi ga'i yang rgyan yin pa'i phyir ro/ /gang yang mdo las bsdus pa dang rgyas pa nyid la sogs pa'i don bla ma gcig nas gcig tu brgyud pa can ma yin no zhes zer bas de'i gzhung gis ni mtshan nyid mdzad pas don gang yang byas pa ma yin no zhes zer na/mdo sde'i bla ma gcig nas gcig tu brgyud pa nub pas de'i mtshan nyid la yang gdul bya gus par mi 'gyur ba'i phyir gtso bo nyid yin pas dgos pa gnyis gsungs pa yin no//'brel pa la sogs pa ni don gyis shes par 'gyur bas rab tu byed pa las ma smos so/ /'brel pa dang ni rjes mthun thabs/ /skyes bu'i don ni rjod byed pa//yongs brtags dbang du byas pa'i tshig /de las gzhan pa dbang byas min/ /zhes smos pas dam pa rnams ni yongs su brtag pa nyid kyis 'jug par bya'o zhes bya ba 'di ni legs par smras pa yin no/ /cho 'phrul rnam pa gsum gyis zhes bya ba ni rdzu 'phrul dang kun brjod pa dang /rjes su bstan pa'i mtshan nyid can gyis so/ /rang dang gzhan gyi don phun sum tshogs pa ni nges par legs pa la sogs pa gang yin pa ste/ de dag bsgrub par bya ba la/ ci la yang ma rags par chas pa ni phyir mi ldog pa nyid kyi go cha brtan par byas pas so//nyams su myong ba shin tu gsal ba ni mtshan nyid kyi bstan bcos thos pa la sogs pa gsal bar byas pa'i shes pa'o/ /des gzhag pa'i bag chags ni mtshan nyid kyi bstan bcos phul du byung ba'i shes pa gcig nas gcig tu brgyud pa las byung ba'i nus pa'o//de las byung ba'i dran pa'i shes pa gang yin pa de ni dran pa'i shes pa ste/ de la byang chub kyi sems dang sbyin pa la sogs pa sgrub cing nyams su len pa de nyid ni spyod pa yin te/ 'khor ba ci srid par rten pa yin pa'i phyir ro/ /kun tu 'gro ba ni chos kyi dbyings khyab pa'i shes pa'o//de rtogs pa ni mngon sum du byed pa'o/ /de nyid ni mtshan nyid ngo bo nyid de rab tu dga' ba la sogs pa'i sa la sogs pa gang yin pa'o/ /de rnams rtogs pa'i rim pa ni sbyin pa la sogs pa'i pha rol tu phyin pa phul du byung ba'i rim pa des rtogs pa'o/ / 'dis ni shes rab kyi pha rol tu phyin pa nyid kyis rab tu dga' ba la sogs pa'i sa rnams de dang der gnas shing sangs rgyas nyid sgrub pa yin pa'i phyir ro zhes 'di'i dgos pa smras pa yin no/ /mngon par rtogs pa brgyad bde blag tu rtogs pas ni dgos pa mngon sum du byed pa yin la/gal te mtshan nyid kyi bstan bcos kyi mdo la mngon par rtogs pa'i don rtogs par ma gyur na mdo la mngon sum du byed par yang mi 'gyur ro zhes bya bar dgongs so/ /de'i phyir mngon par rtogs pa so so'i shes rab kyi pha rol tu phyin pa'i don ni byams pa mngon par bzhed pa'i stong phrag brgya pa la sogs pa'i mdo'i don tshig re re nas gsungs pa yin no//ma 'dzings pa nyid kyis bstan pa'i phyir shes rab kyi pha rol tu phyin pa rnam par mi rtog pa'i ye shes kyi bdag nyid can gyi lus rnam par gzhag pa ni lam dang gzhung gi bdag nyid can no//'dir/ mdo don smra ba rnams kyis ni/ /dgos pa bsdus pa'i don bcas dang / /tshig don bcas dang mtshams sbyar bcas/ /brgal lan bcas pas bsnyad par bya/ /zhes rnam par bshad pa'i rigs pa las nges par bya ba nyid yin pa'i phyir/ 'phags pa byams pa shes rab kyi pha rol tu phyin pa rnam pa gsum tshig le'ur byas pa'i rgya cher bshad pas 'chad par bzhed pas dgos pa smras zin nas/ re zhig bsdus pa dang rgyas pas bsdus pa'i don gsungs pa yin no zhes blta bar bya'o/ /de la shes rab kyi pha rol tu phyin pa lam gyi bdag nyid can tshig gi don brgyad kyis shes rab kyi pha rol tu phyin pa la sogs pa'i ngag chen por rtogs pa'i tshig tu brjod pa brgyad kyis sam yang na 'og nas bshad pa'i dngos po brgyad kyis yang dag par bshad cing gsungs pa yin no//'dis ni lam dang gzhung gi bdag nyid can gyi yum gyi lus gsungs pa yin la de gsungs pas kyang sgyu ma lta bu'i gnyis su med pa'i shes rab kyi pha rol tu phyin pa yang bshad pa yin te/byang chub sems dpa'i tshul thams cad du kun rdzob dang don dam pas brgyan te/ ston par mdzad pa nyid yin la/gzhan du na gdul bya rnams mtha' gcig tu ltung bar thal bar 'gyur ro/ /da ni dngos po brgyad mdor bsdus pa ni shes rab ces bya ba la sogs pa yin te/ ma skyes pa nyid kyis rnam pa thams cad mkhyen pa nyid ni rnam pa kun mkhyen nyid do/ /de bzhin du lam thams cad shes pa ni lam shes pa nyid do//de bzhin du gzhi thams cad shes pa ni thams cad shes pa nyid do/ /thams cad mkhyen pa nyid gsum po 'di nyid gcig tu byas pa'i bdag nyid thams cad shes pa ni rnam pa kun mngon par rdzogs par rtogs pa'o//de las kyang rab kyi mthar phyin pa ni/ rtse mor phyin pa'o/ /'chol ba dang ma 'chol bar rtogs pa'i don go rims su yod pas na/ mthar gyis pa'o/ /don de dag nyid skad cig ma gcig gis rtogs pas na skad cig mngon rdzogs byang chub bo/ /skad cig ma gnyis par bcos ma ma yin pa'i mtshan nyid 'dzin pa'i ye shes kyi skur mngon par byang chub pas chos nyid kyi bdag nyid can gyi sku ni chos kyi sku'o//rnam pa thams cad mkhyen pa nyid dang / de nas zhes bya ba ni de nas lam shes pa nyid ces bya ba la sogs pa'i rim gyis skabs rnam pa brgyad kyi go rims bstan pa'i phyir/thams cad la sbyar bar bya'o/ /dang zhes bya ba ni rdzogs pa'o/ /de rnam brgyad ces bya ba ni mngon par rtogs pa ni brgyad po de dag gis yongs su rdzogs pa yin te lhag ma med pa dang ma tshang ba med pa 'di dag kho nas 'tshang rgya ba nyid grub pa yin no//yang na de nas chos kyi sku dang zhes bsdu bar bya ste/ de nas de dag gi 'bras bu ni nges par bzung ba yin no zhes bya ba'i tshul gyis mngon par rtogs pa ni brgyad po 'di dag nyid yin no zhes bya ba la sogs pa snga ma bzhin no / /de ltar mngon par rtogs pa brgyad go rims bzhin du mdor bsdus te yang dag par bstan nas/de bzhin du cung zad cig gis rgya cher bstan pa ni/ sems bskyed pa dang zhes bya ba la sogs pa gsungs pa yin te/ gzhan gyi phyir 'tshang rgya ba nyid la sems 'jog pa ni/ sems bskyed pa'o/ /de yang sems bskyed pa ni zhes bya ba la sogs pas ston to//rnam pa bcu la bslab pa ni gdams ngag de yang / sgrub dang bden pa rnams dang ni/ /zhes bya ba la sogs pas ston to/ /nges par 'byed pa ni 'tshang rgya ba nyid mngon sum du byed pa'o/ /de'i yan lag ni rgyu ste drod la sogs pa'i dbye bas rnam pa bzhi'o//de yang dmigs pa dang ni zhes bya ba la sogs pas ston to/ /sgrub pa ni nyams su len pa ste/ de'i rten ni gzhi'o/ /de yang chos kyi dbyings kyi rang bzhin te gnyis su med pa'i ye shes kyi bdag nyid can yin no/ /de yang rtogs pa yi ni zhes bya ba la sogs pas ston to//dmigs pa ni yul yin te/ de yang / dmigs pa chos rnams thams cad de/ /zhes bya ba la sogs pas ston te / gang la dmigs nas 'jug pa de ni ched yin te/ de yang sems can kun mchog ces bya ba la sogs pas ston to//go cha 'jug pa'i bya ba dang / zhes bya ba ni dang po gzhan gyi don las phyir mi ldog pa'i sems ni go cha'o/ /de'i bya ba ni sbyin pa la sogs pa rnam drug la/ zhes bya ba la sogs pas ston to/ /nyams su len pa ni 'jug pa ste/ de'i bya ba ni/ bsam gtan gzugs med sbyin sogs dang //zhes bya ba la sogs pas ston to/ /dang zhes bya ba ni thams cad du sdud pa yin no/ /'di dag gis byang chub thob pa'i sgo nas yang dag par 'dzin pa na tshogs te snying rje la sogs pa'o/ /tshogs de yang / brtse dang sbyin la sogs pa drug /ces bya ba la sogs pas ston to/ /nges par 'byung bcas rnams ni thob pa dang bcas pa'o/ /de ni ched du bya dang zhes bya ba la sogs pas ston to/ /thub pa'i rnam kun mkhyen pa nyid/ /ces bya ba ni yang dag par rdzogs pa'i sangs rgyas kyi'o/ / yang dag par rdzogs pa'i sangs rgyas kyi 'od kyis lha rnams kyi 'od dri ma can du mdzad pa ni mog mog por byed pa'o/ /sogs pa'i sgras ni yul so sor nges pa la sogs pa'o/ /de ni lha rnams rung bar bya ba'i phyir/ zhes bya ba la sogs pas ston to/ /slob ma bse ru'i lam gang dang //zhes bya ba ni rdzogs pa'i sangs rgyas kyis btul ba yin pas na/ slob ma ste nyan thos rnams so/ /gcig tu spyod pas na bse ru ste/ rang sangs rgyas rnams so/ /'di gnyis kyi lam gang yin pa de dag ni 'phags pa'i bden pa bzhi po la sogs pa dang /gzung ba'i rtog pa nyams phyir dang / /zhes bya ba la sogs pas go rims bzhin du ston to/ /'di dang gzhan pa'i yon tan gyis/ /phan yon che ba mthong ba'i lam/ /zhes bya ba ni mthong ba dang ma mthong ba'i yon tan dang ldan pas 'bras bu che ba ni mthong ba'i lam ste/de ni/ bden dang bden la bzod pa dang / /zhes bya ba la sogs pas smos te / bsgom pa'i lam gyi bya ba ni byed pa ste/ kun nas dul dang zhes bya ba la sogs pas ston to/ /lhag par mos pa ni mos pa ste/ de yang / mos pa rang gi don dang ni/ /zhes bya ba la sogs pas ston to/ /de yang chung ngu dang 'bring dang chen po la sogs pas sangs rgyas la sogs pas don ci lta ba bzhin du mngon par dgyes pa ni/ bstod dang bkur dang bsngags pa dang / /zhes bya ba yin te/ de ni/ shes rab pha rol phyin pa la//zhes bya ba la sogs pas ston to/ /dge ba'i rtsa ba rnams 'tshang rgya ba nyid kyi phyir stobs pa ni yongs su bsngo ba'o/ /de bzhin du dge ba rnams la yang dag par dga' ba ni rjes su yi rang ba'o/ /de gnyis kyis yid la byed pa bla na med pa dag ni/ 'khor gsum rnam par dag pa'i phyir bla na med pa'i sems la'o//de dag ni/ yongs su bsngo ba khyad par can/ /zhes bya ba la sogs pa dang / thabs dang mi dmigs pa dag gi /zhes bya ba la sogs pa dag gis go rims bzhin du ston to/ /sangs rgyas nyid la bstod pas na bsgrub pa ste/de yang / de yi ngo bo nyid mchog nyid / /ces bya ba la sogs pas ston to/ /shin tu dag pa zhes bya ba ni mtha' las rnam par dag pa ste/ de yang sangs rgyas rten dang zhes bya ba la sogs pas 'og nas ston to/ /zhes bya ba 'di ni bsgom pa'i lam zhes bya ba ni mos pa dang zhes bya ba la sogs pa lnga pa'o//mkhas rnams kyi zhes bya ba ni kun rdzob dang don dam pa'i bden pa shes pa byang chub sems dpa' rnams kyi gnyis su med pa'i ye shes kyi dgongs pa can yin no / /lam shes pa nyid bshad do//shes pa zhes bya ba dge ba'i bshes gnyen yang dag pa la sogs pa'i stobs kyis shes rab kyi pha rol tu phyin pa la sogs pa thos pa'i shes pas bdag la sogs tshar bcad pas srid pa mi gnas shing zhes bya ba nyes dmigs mthong bas sgyu ma dang 'dra ba'i 'khor ba la rtag pa'i lta ba mngon par zhen pa med do//sems can ma lus pa la dmigs pa'i snying rje zhi la mi gnas te bdag nyid thams cad rgyun chad mar me lta bur mya ngan las 'das pa sems can gyi don gyi thabs ma yin pa la mngon par zhen pa mi byed do/ /bshad pa 'dis ni shes pa dang snying rje dag gi byang chub sems dpa'i shes rab kyi pha rol tu phyin pa rtag pa dang chad pa'i mtha' nang du mi ltung bar gsungs pa yin te/de yang / tshu rol pha rol mtha' la min/ /zhes bya ba la sogs pas ston to/ /dge ba'i bshes gnyen yang dag pa la sogs pa las yum thos pa la sogs pa'i shes pa med pas na/gzugs la sogs pa la nye bar dmigs pa'i shes pa ni thabs ma yin pa ste/ des ni nyan thos la sogs pa'i yum thob pa las ring ba yin la/ 'di las go bzlog pa gzugs la sogs pa la mi dmigs pa'i shes pa ni thabs yin te/des ni byang chub sems dpa' rnams kyis yum thob pa ni ring ba ma yin no/ /don 'di dag ni mtshan bcas dmigs sgo nas/ zhes bya ba la sogs pa dang / 'di ni thabs la zhes bya ba la sogs pas go rims bzhin du bstan to//byang chub sems dpa' rnams kyi ni mi dmigs pa ring ba ma yin pa'i phyir ro / /rab 'byor la sogs pa las thos pa la sogs pas yum gyi rang gi ngo bo shes so/ /rab 'byor la sogs pas de ston pa ni bcom ldan 'das kyi mthu nyid kyis yin te/rtsig pa la sogs pa dang 'dra zhes bya bar dgongs so/ /mthong ba'i lam la sogs pa rnam par gzhom par bya ba yin pa'i ma yang dag pa'i shes pa'i gegs byed pa'i yum ni mi mthun pa ste/ yang dag par na gzung ba la sogs pa'i rnam par rtog pa'am de las byung ba'i 'dod chags la sogs pa'o//blang bar bya ba 'am gzung ba la sogs pa 'joms par byed pa'i phyogs kyi yum ni gnyen po'i phyogs te/ yang dag par na byang chub yin la de'i rgyur gyur pa yin pas 'dir lam la bya'o/ / 'di dag ni/ gzugs sogs phung po stong nyid dang / /zhes bya ba la sogs pa dang / sbyin la sogs la ngar 'dzin med/ /ces bya ba la sogs pas ston to/ /rab tu sbyor bas na sbyor ba ste/ de ni gzugs sogs zhes bya ba la sogs pas ston to/ /de'i mnyam nyid dang zhes bya ba ni sbyor ba nyid kyis mtshungs pa nyid de/de ni/ gzugs la sogs pa rlom pa med/ /ces bya ba la sogs pas ston to/ /mthong ba'i lam ni yang dag pa'i ye shes mthong ba'i lam mo/ /de ni/ sdug bsngal la sogs bden pa la/ /zhes bya ba la sogs pas ston to//nyan thos la sogs pa zhes bya ba ni nyan thos dang rang sangs rgyas dang byang chub sems dpa' rnams kyi sngar bshad pa'i thabs ma yin pa dang thabs dag ni/ de 'dra kun shes nyid du 'dod/ /ces bya ba yin no/ /kun nas dmigs par bya bas na/ rnam pa ste/ thams cad mkhyen pa nyid gsum gyi bdag nyid can no/ /sbyor bar bcas rnams dang zhes bya ba ni sbyor ba dang ldan pa'o/ /de dag kyang / gzhi dang ye shes rnam pa yi/ /zhes bya ba la sogs pa dang / gzugs la sogs la mi gnas phyir/ /zhes bya ba la sogs pas go rims bzhin du ston to//slob par bya ba yin pas na yon tan te/ sbyor ba la sogs pa dang rjes su mthun pa'o/ /de yang / bdud kyi mthu bcom la sogs pa/ /zhes bya bas ston to/ /sun par byed pas na skyon te bar du gcod par byed pa rnams so/ /mtshan nyid bcas pa shes pa la sogs pa mtshan nyid rnam pa bzhi ste de dang ldan pa'o//de'i skyon ni bcu tshan bzhir bcas pa/ /zhes bya ba la sogs pa dang / gang gis mtshon te zhes bya ba la sogs pas go rims bzhin du ston to/ /thar dang zhes bya ba ni nyon mongs pa dang bral ba'o/ /nges 'byed ni khyad par gyi ye shes mngon sum du byed pas te /gong nas gong du shes pa'i rim gyis 'jug pa'i phyir de nyid ni cha ste/ de la phan pa'i phyir thar pa dang nges par 'byed pa'i cha dang mthun pa gnyis so/ /de yang / mtshan med rab tu sbyin la sogs/ /zhes bya ba dang /dro ba rnams kyi dmigs pa 'dir/ /zhes bya ba la sogs pa go rims bzhin du ston to/ /bslab par bya ba yod pa dang byang chub las phyir mi ldog pas na/ slob pa phyir mi ldog pa'i tshogs/ /zhes bya ba ni slob pa byang chub sems dpa'i dge 'dun no/ /de yang nges 'byed yan lag nas bzung ste/zhes bya ba la sogs pas ston to/ /'dir yang dang yang du 'byung bas na srid pa ste 'khor ba'o/ /sdug bsngal thams cad ni nye bar zhi bas na zhi ba ste/ mya ngan las 'das pa'o/ /de dag gi mnyam pa nyid ni mtshungs pa med do/ /de yang chos rnams rmi lam 'dra ba'i phyir/zhes bya ba la sogs pas ston to/ /zhing ni sangs rgyas bzhugs pa'i gnas so/ /de'i dag pa bla na med pa'i mchog ste/ de ni/ sems can 'jig rten de bzhin du/ /zhes bya ba la sogs pas ston to/ /rnam kun mngon rdzogs rtogs pa ste/'di ni zhes bya ba ni thams cad mkhyen pa gsum po 'di dag gi rnam pa thams cad shes pa yin no/ /de yang thabs mkhas bcas pa yin/ /zhes bya ba sems ma zhum pa la sogs pa nyid kyis byang chub sems dpa'i thabs la mkhas pa dang ldan pa'o//mkhas pa de yang 'di'i yul dang sbyor ba ste/ /zhes bya ba la sogs pas ston to/ /rtse mo'i mngon par rtogs pa ni de'i rtags zhes bya ba la sogs pa smos pa yin te/ gang gis mtshon cing shes par byed pa de ni rtags te/ rtse mo'i mngon par rtogs pa de'i'o//de yang / rmi lam na yang chos rnams kun/ /zhes bya ba la sogs pas ston to/ /bsod nams kyi khyad par rnam par 'phel ba ni rnam par 'phel ba ste/ de yang / 'dzam bu'i gling gi skye bo snyed/ /ces bya ba la sogs pas ston to/ /thams cad mkhyen pa nyid gsum rdzogs par byed pa ni bstan pa ste/de ni sems can yongs mi stong / /zhes bya ba la sogs pas ston to/ /sems kyi brtan pa sems kun gnas pa ste/ ting nge 'dzin gyi khyad par ro/ /de ni/ gling bzhi pa dang stong dag dang / / zhes bya ba la sogs pas ston to/ /rnam par rtog pa rnam pa bzhi yi zhes bya ba ni 'jug pa dang ldog pa dang skyes bu rdzas su yod pa dang btags pa la brten pa'i gzung ba gnyis dang 'dzin pa'i gnyis te rnam par rtog pa rnam pa bzhi ni mi mthun pa'i phyogs zhes bya ba yin la/ de'i gnyen po'i phyogs don gyi shugs kyis rnyed pa rnam pa bzhi'o//de yang gang du zhe na/ mthong ba zhes bya ba dang bsgom pa zhes bya ba'i lam la so so la ste re re zhing ngo / /de ni/ 'jug pa dang ni ldog pa la/ /zhes bya ba la sogs pa dang / sems can rdzas dang btags yod par/ / zhes bya ba la sogs pas ston to/ /mthong ba'i lam ni/ sbyin pa la sogs re re la/ /zhes bya ba la sogs pas smos te/ bsgom pa'i lam ni 'gog pa dang bcas pa'i snyoms par 'jug pa dgur zhes bya ba la sogs pas ston to/ /ting nge 'dzin gang gi rjes thogs la byang chub mngon sum du byed pa de ni bar chad med pa'i lam ste/de yang / stong gsum skye bo nyan thos dang / /zhes bya ba la sogs pas ston te / gang zhig bar chad med pa'i ting nge 'dzin gyis log par sgrub pa zil gyis mnan nas byang chub mngon sum du byed pa de rnams dang bcas pa ste/de ni/ dmigs pa 'thad dang de yi ni/ /zhes bya ba la sogs pas bstan pa ni rtse mo'i mngon par rtogs pa yin no/ /sangs rgyas dang chos dang dge 'dun rjes su dran pa rnam pa gnyis kyis na rnam pa gsum mo/ /sbyin pa la sogs pa pha rol tu phyin pa bcu'i rnam pa gnyis kyis na rnam pa bcu go rims kyis yod pa'i mngon par rtogs pa ste/de yang / sbyin pa shes rab bar dag dang / /zhes bya ba la sogs pa 'og nas ston to/ /skad cig ma gcig gis mngon rdzogs byang chub pa zhes bya ba ni gus pa dang rgyun mi 'chad pa dang dus ring por bslabs pas dran pa shin tu gsal ba'i stobs kyis skad cig ma gcig gis sngar rnam par bsgoms pa'i don la dmigs pa'i ye shes so//de ni mtshan nyid de mtshan ma'i dbye bas rnam pa bzhi yin la/ de yang / sbyin pa la sogs re res kyang / / zhes bya ba la sogs pas mtshan nyid bzhi po 'og nas 'chad pa yin no/ /ngo bo nyid ni 'jig rten las 'das pa'i lam gyis thob pa'i bya ba nyid yin pa'i phyir yang dag par rgyu med pa nyid kyi rang bzhin gyi mtshan nyid yin la de yang / thub pa'i ngo bo nyid sku ni/ /zhes bya ba la sogs pas ston to//sku gang gis byang chub sems dpa' rnams dang lhan cig sangs rgyas kyi chos kyis chos la yang dag par longs spyod par ston pa de ni/ longs spyod rdzogs pa'i sku ste/ de yang / mtshan ni sum cu rtsa gnyis dang / /zhes bya ba la sogs pas ston to/ / gang sprul pa dang 'dra bar don gyi bya ba byed pa shAkya thub pa la sogs pa'i sku de ni gzhan ni sprul pa ste/ nyan thos la sogs pa 'gro ba ma lus pa la phan thogs par mdzad pa nyid yin pas na sku thams cad kyi mchog go/ /de bzhin zhes bya ba ni ji ltar ngo bo nyid kyi sku ye shes kyi bdag nyid yin pa de dang 'dra bar ro//de ltar na de las gzhan pa'i sku dag kyang ye shes kyi bdag nyid can yin pa blta bar bya ste/ shes rab kyi pha rol tu phyin pa rdo rje gcod pa las/ 'dren pa rnams ni chos kyi sku/ /sangs rgyas rnams ni chos nyid blta/ /zhes gang gsungs pa dang /gser 'od dam pa las kyang / sku la sha dang khrag med na/ /sku gdung yod par ga la 'gyur/ /zhes gsungs pa yin no/ /sprul pa'i sku yang / gang gi 'khor ba ji srid par/ /zhes bya ba la sogs pas ston to/ /rdzogs pa'i sangs rgyas kyi chos kyi sku ni sgyu ma lta bu la sogs pa'i rang gi mtshan nyid 'dzin pa'i ye shes kyi sku'o//mdzad par bcas pa ni yid bzhin gyi nor bu dang 'dra ba'i gzhan gyi don byed pa ste/ 'di ni ngo bo nyid kyi sku'i khyad par yin no/ /chos kyi sku mdzad pa dang bcas pa ni/byang chub phyogs mthun tshad med dang / /zhes bya ba la sogs pa dang / de bzhin du/ 'gro rnams zhi ba'i las dang ni/ /gang gis srid pa ji srid par / /de bzhin nyid las kyang bsam gyis mi khyab ces bya bas go rims bzhin du 'og nas ston pa yin no//rnam pa bzhir ni yang dag brjod/ /ces bya ba ni skad cig ma gcig la mngon par rdzogs par byang chub pa'i rjes thogs la bcos ma ma yin pa'i ye shes kyi sku ngo bo nyid kyi sku zhes bshad pa gang yin pa de dang bcas par bcom ldan 'das mngon par rdzogs par 'tshang rgya ba yin te/gzhan du na de med na de'i rang bzhin nyid yin pas sku gsum po dag med par thal bar gyur pas rnam pa bzhir bshad pa yin no/ /de nyid kyis na kha cig ni sku gsum po'i bya ba ngo bo nyid kyi sku kho na yin te/ yang dag par na bcom ldan 'das ni chos kyi sku yin no zhes thams cad du bshad do zhes zer ro//yang na mdzad pa dang bcas pas 'gro ba zhi ba la sogs pa la 'jug pas na mdzad par bcas pa ni rtsa ba chos kyi sku ste rnam pa bzhir yang dag par brjod / ji ltar zhe na ngo bo nyid sku zhes bya ba la sogs par sbyar ro/ /phyogs 'di la/de bzhin gzhan ni chos sku dang / /zhes bshad na rtogs sla ba yin no/ /rtsa ba chos kyi sku dang ngo bo nyid kyi sku la sogs pa sku lnga'i bdag nyid can nyid du 'grub cing bshad ma thag pa'i bka' bas sbyar ba nyid kyang lan btab par 'gyur ro/ /gzhan dag ni snga ma bzhin no//la la ni yang dag par na bcom ldan 'das kyi sku bzhi yin no zhes zer ro/ /gzhan dag ni sku gsum yin no/ /zhes zer ro/ /yang gzhan dag ni bcom ldan 'das ni gtso bo chos kyi sku'i bdag nyid can yin no zhes zer mod kyi 'dir de kho na nyid ni shes pa tshad ma yin no//de ltar mngon par rtogs pa brgyad mdor bsdus pa bshad pa yin no/ /slob dpon phyogs kyi glang po'i zhal snga nas kyis kyang / shes rab pha rol phyin la brten/ /mdor bsdus don ni 'di dag yin/ /slar yang don gzhan la brten nas/ /don de nyid ni bzlas pa yin//zhes gang gsungs pa yin no/ /rgya cher ni bcom ldan 'das 'phags pa byams pa dang de'i tshig le'ur byas pa rnam par 'byed pa dag gis gsal bar mdzad pa yin no/ /bdag dang 'dra bar blo dman pa rab tu byed pa 'don pa rnams kyi sems bskyed pa dang /zhes bya ba la sogs pa mdor bsdus pa'i tshig gi don tsam dran pa'i ched du rab tu byed pa gtso bo'i sbyor bar bstan pa yin pas dam pa rnams kyis bzod par mdzad pa'i rigs so/ /rab tu byed pa las nyan thos zhi ba tshol rnams zhes bya ba la sogs pas dang por thams cad shes pa nyid dang /lam shes pa nyid dang tha mar rnam pa thams cad mkhyen pa nyid gsungs na/ de ji ltar don bsdus pa de'i bshad pa la go bzlog pa ma yin nam zhes dogs pa skye ba la/ dgos pa'i don ni de ltar bsdus pa'i don kun bstan nas zhes bya ba la sogs pa smos pa yin te/de ltar bshad pa'i rim pas byang chub sems dpa' gzhan gyi don gyi phyir byang chub ste sangs rgyas nyid thob pa'i bsam pas/ 'bras bu yin pa'i phyir zhes pa/ phyin ci ma log par rtogs pa nyid yin pa'i phyir/ rnam pa thams cad mkhyen pa nyid thob par bya dgos shing mngon sum du bya dgos pas gtan tshigs de'i phyir dang po rnam pa thams cad mkhyen pa nyid de bsdus pa'i tshig le'ur byas pa sems bskyed pa zhes bya ba la sogs pa de bshad pa'i sgo nas de rnam par dbye ba'i skabs yin pas bshad par bzhed de/shes rab kyi pha rol tu phyin pa'i tshig gi don gyi de kho na nyid khyad par gyis nye bar bstan par mngon par bzhed pa yin no // nyan thos zhi ba tshol zhes bya ba la sogs pa yum gyi bstod pa'i tshig le'ur byas pa ni ji ltar rung bas yang dag pa'i don phun sum tshogs par 'gyur ba yin pas de la brgal tu ci zhig yod ces bya bar dgongs so //sems bskyed pa dmigs pa dang / rang gi ngo bo dang bcas pa ni sems can gyi don la dmigs pa'i smon pa dang 'jug pa'i rang bzhin te/ sems bskyed pa ni/ zhes bya ba la sogs pa yin no/ /spro ba che dang rtsom pa che//don che ba dang 'byung ba che/ /byang chub sems dpa'i sems pa ste/ /don gnyis ldan pa'i sems 'byung ba/ /zhes bshad pas/ sems dang sems las byung ba dag /dbye ba yod par smos pa yin/ /de 'dir ji ltar 'dren mar byas pa yin zhes bya ba ni bsam pa dang ldan pas yang dag par rdzogs pa'i byang chub nyid ni zhes bya ba la sogs pa smos pa yin te/dge ba'i chos la 'dun pa ni ma chags pa la sogs pa la 'jug pa nyid yin pa'i phyir dge ba'i bdag nyid can gzhan gyi don gyi phyir byang chub mngon par 'dod pa'o//sems yul khyad par can du 'phags par snang ba ni gzhan gyi don la dmigs par snang ba'o/ /rgyus 'bras bu bstan pa yin no zhes bya ba la rgyu ni dge ba'i chos la 'dun pa'o/ /'bras bu ni sems bskyed pa ste/ chos la mngon par 'dod pa nyid kyis byang chub tu sems bskyed pa'i phyir ro//de bas na 'di gnyis nye bar btags pas gcig tu byas pa la/ nyes pa med do zhes bya bar dgongs so/ /yang na smon lam ni don du gnyer ba ste/ des na 'dir gzhan gyi don gyi phyir sangs rgyas su grub par gyur cig ces gsol ba 'debs pa ni smon lam gyi don yin la sbyin pa la sogs pa nyams su len pa ni 'jug pa'i don yin no zhes skabs kyis smras pa yin no//de dang lhan cig spyod pa ni don du gnyer ba dang lhan cig spyod pa'i sems bskyed pa ni de'i sgrar zhes bya ba yang dag par rdzogs pa'i byang chub 'dod pa'i sgrar bstan pa yin no//'dis ni mtshams sbyar dang brgal lan dang bcas pa yin te/ 'di'i 'og ma rnams la yang brtag par bya'o/ /de ltar na don du gnyer ba dang lhan cig par rtogs pa'i smon lam dang 'brel pa'i byang chub kyi sems yin no//rgyal ba'i yum shes rab kyi pha rol tu phyin pa rnam pa gsum car las zhes bya ba ni stong phrag brgya pa dang / stong phrag nyi shu lnga pa dang / stong phrag brgyad pa zhes bya ba las 'di nyid nan tan du bya'o/ /zhes 'og ma dang sbyar ro/ /sbyin pa la sogs pa zhes bya ba sbyin pa'i pha rol tu phyin pa la/sbyin par bya ba ste dngos po dang / sbyin pa po ste/ bdag nyid dang / len pa po ste slong mo pa mi dmigs pa ste de kho na nyid du na sbyin par bya ba la sogs pa dmigs su med pa'i phyir ro/ /nan tan du bya'o zhes bya ba la sogs pa rab tu ston pa lhur len pa'i tshig gis zhes bya ba la nan tan du bya ba ni bslab pa ste/rnal 'byor du bya'o zhes bya ba la sogs pa'i don gyis bsgrub par bya'o/ /bslab par bya'o/ /rnal 'byor du bya'o zhes bya ba la sogs pa'i sgras so/ /bsdus pa dang rgyas pa'i sgo nas zhes bya ba ni gsum car zhes bya ba la sogs pa ni bsdus pa'o//sbyin pa zhes bya ba la sogs pa ni rgyas pa nyid do/ /mdo'i don dang mi 'gal bas zhes bya ba ni dkon mchog rnam bdun dang sdong po bkod pa la sogs pa mdo'i don dang mi 'gal bas so//yang dag par rdzogs pa'i byang chub bstan pa ni yang dag par rdzogs pa'i byang chub kyi rgyu'i lam bcom ldan 'das gzhan gyi don gyi phyir snod du rung ba'i byang chub sems dpa' rnams la ston pa gang yin pa'o/ /de bzhin du tshul khrims kyi pha rol tu phyin pa la yul gang la legs par spyod pa'i las spyod pa gang yin pa dang /gang zhig kun tu spyod pa dang / /kun tu spyod pa gang yin pa de la mi dmigs pa dang / de bzhin du bzod pa la sogs pa la yang blta bar bya'o/ /sems can thams cad skal ba ji lta ba bzhin du mya ngan las 'das pa ni gdul bya ma lus pa ji ltar 'tsham pa bzhin du nyan thos la sogs pa'i mya ngan las 'das pa la rab tu 'god par 'dod pas zhes bya ba la sogs par sbyar ro//ser sna can la sogs pa zhes bya ba ni gtang ba med pa dang / nyes par spyod pa thams cad sbyin pa dang tshul khrims la sogs pa la 'god par 'dod pas shes rab kyi pha rol tu phyin pa 'di nyid la nan tan du bya'o zhes bya ba la sogs pa snga ma bzhin no//'dir yang sems can thams cad ces bya ba la sogs pas ni bsdus pa yin la/ ser sna can la zhes bya ba la sogs pas ni rgyas pa ste/gzhan gyi don bstan pa yin no/ /dngos su na lam ston pa'i mtshan nyid yin pa'i phyir gzhan gyi don ston te / /rgyal ba'i yum zhes bya ba la sogs pa smos pas mi dmigs pas mngon par rtogs pa brgyad kyis lam byang chub sems dpa' rang nyid rdzogs pa'i byang chub la 'jug par bya ste/de'i rgyu yin pa'i phyir ro/ /gdul bya rnams kyang de dang nyan thos la sogs pa'i mya ngan las 'das pa la bkod pa ni gzhan gyi don yin no/ /de yang bsdus pa dang rgyas pa dag gi mdo bzhin du bstan pa gang yin pa de bsdus pa dang rgyas pa dag gis de bzhin du gsungs pa yin gyi gzhan du ma yin no zhes bya ba'i don yin no//'dis ni sems bskyed pa bshad pa'i gnas skabs yin pas mngon par rtogs pa'i rgyan gyi bstan bcos mdo dang mi mthun pa bstsal bar byas pa yin te/mdo sde rnams dang rgyal ba'i yum tshig gcig pa nyid du ston te/ tshul gcig dang 'gal ba'am mdo dang mi mthun pa'i don la rtogs pa dang ldan pa su yang 'jug par mi 'gyur ro/ /sngar sems bskyed pa mdor bsdus te gsungs pa'i khyad par gyi rab tu dbye ba rgya cher bstan pa'i gnas skabs kyi khongs su gtogs pa yin pa'i phyir bar skabs kyi tshigs su bcad pa dag go//'dun pa dang bsam pa dang lhag pa'i bsam pa ni gzhan gyi don mngon par 'dod pa chung ngu dang 'bring dang chen po'o/ /sbyor ba ni sbyin pa la sogs pa la lus la sogs pa'i bya ba'o//sbyin pa ni slong ba rnams la bsam pa ji lta ba bzhin du rab tu ster ba'o/ /tshul khrims ni legs par spyod pa'i las rnams so/ /bzod pa ni gzhan gyi gnod pa shes pa brnag nus pa'o/ /brtson 'grus ni dge ba'i las rnams la spro ba'o//bsam gtan ni sems rtse gcig pa'o/ /shes rab ni thos pa la sogs pa'i shes pa'o/ /thabs mkhas pa ni 'tshang rgya ba nyid kyi thabs la sems ma zhum pa la sogs pa la bya ba nyid do / /smon lam ni snga ma bzhin no/ /stobs ni 'di nyid la bstan pas go bgos pa'o//ye shes kyi pha rol tu phyin pa ni de la blo phul du byung ba'o/ /mngon par shes pa ni kun shes pa ste/ lha'i mig la sogs pa'o/ /bsod nams dang ye shes ni 'og nas bshad pa'i bsod nams dang ye shes rnams so//byang chub kyi phyogs dang mthun pa'i chos ni 'og nas bshad pa'i dran pa nye bar gzhag pa la sogs pa'o/ /snying rje ni sems can gdon par 'dod pa'i rnam pa'o/ /lhag mthong ni shes rab bo/ /gzungs dang spobs pa ni don la sogs pa 'dzin pa'i shes pa'o/ / chos kyi skyed mos tshal ni lung dang rtogs pa'i bdag nyid can gyi chos nye bar 'byin pa'am mdor bsdus nas rab tu ster ba'o/ /bgrod pa gcig pa'i lam ni mi skye ba'i chos la bzod pa thob pas gcig tu 'jug pa yin pa'i phyir ro/ /chos kyi sku ni ye shes kyi sku ste 'di rnams dang ldan zhing de dang 'brel pa'i sems bskyed pa ni sa la sogs pa dang 'dra'o//de ni go rims bzhin du zhes bya ba la sogs pa smos pa yin te/ 'tshang rgya ba nyid la sogs pa'i dge ba'i lam ston pas na dge ba'i bshes gnyen te bla ma'o/ /sems can rnams la bsam pa ci lta ba bzhin du 'bras bu rab tu ster bas/yid bzhin gyi nor bu'o/ /rtag pa dang bdag la sogs par rmongs pa'i skye bos mnyan par bya ba'i don tshar bcad pas mkhas pas mnyan par bya ba'i bdag med pa nyid la sogs pa'i don kho na nyid yang dag par dus ji lta ba bzhin du kun nas ston pa'i bdag nyid can gyi sgra ni chos kyi sgra dbyangs snyan pa ste/bcom ldan 'das kyi bstan pa'o/ /dbang po la sogs pa'i bgegs tshar bcad pas/ bcom ldan 'das mngon par rdzogs par sangs rgyas pa na de la mngon par dad pa'i lha rnams rgyal bar gyur cig /rgyal bar gyur cig ces bya ba la sogs pa'i sgra kun nas sgrogs pa ni sgra snyan pa'o/ /dpe dang dpes brjod pa'i dngos po nges par spyad pas sa la sogs pa'i don gyis bya ba mnyam pa'i 'dun pa la sogs pa ni/ chos dkar po thams cad kyi zhes bya ba la sogs pa smos pa yin te/chos dkar po thams cad ni ma chags pa la sogs pa'o/ /de'i gzhi ni gnas so/ /de'i dngos po ni ma chags pa la sogs pa yod pa'o/ /byang chub kyi bar du mi 'gyur ba ni 'tshang rgya ba nyid kyi bar du gzhan du mi 'gyur ba'o//dge ba'i chos mtha' dag ni ma chags pa la sogs pa'o/ /de'i rnam par 'phel ba ni gong nas gong du 'phel ba'i rim gyis lhag pa'o/ /thams cad mkhyen pa nyid gsum gyis sgrib pa ni de'i mi mthun pa'i phyogs nyon mongs pa rnams so/ /de nyid bud shing yin te de sreg pa'o//sems can thams cad tshim par byed pa ni gdul bya rnams la bsam pa ji lta ba bzhin du chos dang zang zing rab tu sbyin pas tshim par byed pa'o/ /lus la sogs pa dga' ba skyed pa nyid kyis na bslab par bya ba yin pa'i phyir yon tan rin po che ste stobs bcu la sogs pa'o//de rnams kyi rgyu nyid yin pa'i phyir de'i rten gyi dngos po'o/ /mi 'dod pa thams cad mi bzod par dka' ba'i ral gri dang / mda' dang / lcags mdung dang / mdung thung la sogs pa'o/ /de'i thog tu bab pa ni bcom ldan 'das byang chub kyi snying po la bzhugs pa'i thad du bab pa'o//des mi 'khrugs pa ni rdo rje lta bu'i ting nge 'dzin las ma g.yos pa'o/ /sangs rgyas pa nyid kyi rjes thogs la yang dag par nges pa ni yid ches pa ste/ des mi 'jigs pa bzhi brnyes pa na brtan pa ste mi tshugs pa'o//des mi phyed pa ni skul bar byed pa dang bdud rnams kyis dbye bar mi nus pa'o/ /dmigs pa ni 'dod pa'i lhas btang ba'i rang gi bu mo la sogs pa'o/ /gang de rnams kyi rnam par g.yeng ba ni mig zur gyis lta ba la sogs pa'o/ /des mi bskyod pa ni ting nge 'dzin las ma g.yos pa'o//nyon mongs pa dang shes bya'i sgrib pa ni sangs rgyas nyid mthong ba'i nad med pa'i mi mthun pa nyid mthong ba'i phyir rtsig pa la sogs pa dang 'dra bar 'dod chags la sogs pa dang gzugs la sogs pa bzung ba rnams ni sgrib pa yin pas na sgrib pa'o//de nyid ni 'khor ba gcig nas gcig tu brgyud par 'tshe bar byed pa nyid yin pa'i phyir nad do/ /de rnams rab tu zhi ba ni rnam par zhi ba'o/ /gnas skabs thams cad du lha mo sgyu 'phrul la sogs pa'i lhums nas nur nur po la sogs pa med par gzhal yas khang na rdo rje skyil krung gis bzhugs pa la sogs pa'i gnas skabs su der sems can te/dbang po la sogs pa'i don du chos ston pa la sogs pa ste de yongs su mi gtong ba'o/ /ji ltar smon pa'i 'bras bu grub pa ni 'tshang rgya ba la sogs pa'i sbyor ba rdzogs pa'o//gdul bya ste nyan thos la sogs pa'i mya ngan las 'das pa smin par byed pa ni yongs su smin par byed pa'o/ /gdul bya 'dun par byed pa'i chos ston pa ni bsam pa ji lta ba bzhin du chos bstan pas gdul bya rnams shin tu phul du byung ba dang bcas pa la 'jug pa'o/ / mthu thogs pa med pa nyid kyis zhes bya ba la zil gyis mi gnon pa'i nus pa mnga' ba nyid kyis gzhan gyi don nyams su bzhes shing sems can gyi don rtsom pa'i bskal pa du mar spyad pa'i gtong ba dang / shin tu gtong ba dang / gtong ba chen po la sogs pa dang / bzo'i gnas rnam pa sna tshogs pa la bslab pa ni bsod nams dang ye shes yin te/de nyid kyang byang chub kyi rgyu nyid du yang dag par bsags pa yin pas na tshogs so/ /de rnams kyi mdzod lta bu ni rdzas gzhag pa'i khyim mo/ /'phags pa thams cad de/ byang chub sems dpa' la sogs pa gshegs shing rjes su gshegs pa ni yang dang yang du mngon sum du mdzad cing rtogs sla bar mdzad pa'o//'khor ba dang mya ngan las 'das pa dag ste/ srid pa dang zhi ba gang yang rung ba cig tu mi ltung zhing mi 'gro ba'o/ /nyon mongs pa med par byang chub thob par byed pas bde blag tu 'gro'o//thos pa dang ma thos pa'i chos mi zad pa 'dzin pa ni shes rab kyi pha rol tu phyin pa la sogs pa thos pa dang ma thos pa'i chos skye ba thams cad du dga' ba nyid kyis 'dzin par byed pa nyid yin zhing mi zad pa la nyams pa yin pa'i phyir ro//thar pa 'dod pa zhes bya ba la sogs pa byang chub mngon par 'dod pa'i sems can rnams la sbyin pa la sogs pa bshad pa'o/ /gzhan gyi don ces bya ba la sogs pa la mnyam pa nyid kyis thams cad las mchog tu gyur pa'i nges par legs pa dang mngon par mtho ba zhes bya ba byed pa yin pa'i phyir ro//dga' ldan gyi zhes bya ba la sogs pa sprul pa lhun gyis grub pa dga' ldan la sogs pa'i lha rnams la chos sgrogs pa la sogs pa'i don yang dag par ston pa yin pa'i phyir ro/ /de dag dang 'tsham zhing rung ba nyid kyis na 'dun pa la sogs pa ni sa la sogs pa'i don gyi bya ba nus pa nyid kyis grangs bzhin no zhes bya ba yin no//da ni sems bskyed pa nyi shu rtsa gnyis kyis byang chub pa'i bar du khyab pa ni de ltar na zhes bya ba la sogs pa smos pa yin te/ bskal pa grangs med pa gsum du shes pa gang gis dge ba'i bshes gnyen dang /sangs rgyas la bsnyen bkur bya ba la sogs pa'i las kun tu spyod pa'i shes pa de ni las dang po ba'i sa'o/ /des bsdus pa ni chung ngu dang 'bring dang chen po nyid kyis dang po gsum ste/ 'dun pa dang bsam pa dang lhag pa'i bsam par rtogs pa'i sems bskyed pa rnams so/ /'dis ni dus de'i tshe dge ba'i bshes gnyen la sogs pa brtan pas dge ba'i rtsa ba gang ci yod pa de thams cad zhing sa bzang po la btab pa'i sa bon gyi myu gu dang 'dra bar gnas par gyur pa dang /gser bzang po dang 'dra bar zad pa med pa dang / /tshes gcig gi zla ba dang 'dra bar 'phel bar 'gyur ro zhes bshad pa yin no/ /de'i 'og tu gcig ni zhes bya ba ni sbyor ba dang ldan par 'gyur ba'i sems bskyed pa'o/ /sa dang po rab tu dga' ba zhes bya ba de la 'jug pa'i lam gyis bsdus so zhes bya ba sems gang gis 'jug pa des bsdus pa ste//sbyor ba dang ldan pa'i sems 'dis gang gi tshe thams cad mkhyen pa gsum nyid kyi sgrib pa rnams mes shing bsregs pa dang 'dra bar 'gyur ba de'i tshe sa dang po rab tu dga' ba la sogs par 'jug par 'gyur ro zhes bya bar dgongs so//de'i 'og tu sbyin pa la sogs pa dang ldan pa'i sems bskyed pa bcu ni mthong ba dang bsgom pa'i lam gyi spyod yul can yin te/ go rims bzhin du rab tu dga' ba dang / dri ma med pa dang / 'od byed pa dang /'od 'phro ba dang / sbyang dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin zhes bya ba'i sa bcus bsdus pa rnams ni sbyin pa la sogs pa pha rol tu phyin pa bcu'i sems bskyed pa phul du byung bas na/rab tu dga' ba la sogs pa'i sa skye bar 'gyur te/ 'dis ni sbyin pa la sogs pa'i sems phul du byung ba las sa rab tu dga' ba la sogs pa la 'jug par 'gyur ba'i byang chub sems dpa' rnams ni nges par go rims bzhin tu gter chen po dang 'dra bar sems can rnams tshim par byed pa dang /rin po che'i 'byung khung gi gnas dang 'dra bar yon tan rin po che'i rten yin pa dang / rgya mtsho chen po dang 'dra bar mi 'dod pas mi 'khrug pa dang / rdo rje dang 'dra bar gang gis kyang mi shigs pa dang / ri'i rgyal po dang 'dra bar gang gis kyang bskyod par mi nus pa dang /sman chen po dang 'dra bar nyon mongs pa rnams rab tu zhi bar byed pa dang / dge ba'i bshes gnyen dang 'dra bar sems can gyi don mi 'dor ba dang / yid bzhin gyi nor bu dang 'dra bar smon lam gyi 'bras bu 'grub pa dang /nyi ma dang 'dra bar gdul bya yongs su smin par byed pa dang / bcom ldan 'das dang 'dra bar bdag med pa la sogs pa'i chos kun nas ston par byed pa yin no/ /de'i 'og tu gang gis snga ma las khyad par du gyur pa'i shes pas bar chad med pa'i lam la 'jug pa de ni khyad par gyi lam ste/des bsdus pa'o/ /lnga ni zhes bya ba ni mngon par shes pa dang / bsod nams dang / ye shes dang / byang chub kyi phyogs dang mthun pa'i chos dang / snying rje dang / lhag mthong dang / gzungs dang / spobs pa dang ldan pa'i sems bskyed pa rnams so//de dang sbyor ba'i stobs kyis go rims bzhin du rgyal po chen po dang 'dra bar gzhan gyi don la rjes su gnas pa dang / bang mdzod dang 'dra bar bsod nams dang ye shes kyi rten du gyur pa dang / lam po che dang 'dra bar 'phags pa thams cad kyis bgrod sla bar mdzad pa'i lam rab tu thob pa dang /bzhon pa bzang po dang 'dra bar rtag pa dang chad pa'i mthar mi ltung ba dang / bkod ma'i chu dang 'dra bar gdul bya rnams kyis 'bras bu thob par byed pa la zad pa med do/ /des na sangs rgyas kho na'i yul yin pa'i phyir sangs rgyas kyis bcu gcig pa des bsdus pa ni chos kyi skyed mos tshal dang /bgrod pa gcig pa'i lam dang / chos kyi sku dang ldan pa ste/ gsum gyis bsdus pa ni sbyor ba dang / dngos gzhi dang mjug nyid kyis yin te/ sems gang gis dang po las la mngon par sbyor ba de ni sbyor ba'i sems so/ /gang gis las rdzogs par byed pa de ni dngos gzhi'o/ /las rdzogs par byas pa la sems gang gis legs par byas so zhes bya ba la sogs pa smra ba de ni mjug ste/ de yod pa nyid yin pa'i phyir ro//de la yang go rims bzhin du sgra snyan pa dang 'dra ba thos pa dang ma thos pa'i chos rnams snying la 'bab par sgrogs pa dang / chu bo'i rgyun dang 'dra bar sems can gyi don mnyam pa nyid kyis byed pa dang / sprin lta bur dga' ldan la sogs par sprul pas don ston par mdzad pa yin no//yongs su sbyong ba rnam bcu yis/ /sa ni dang po thob 'gyur te/ /zhes bya ba la sogs pas rab tu dga' ba la sogs pa'i sa ni rgyu du ma zhig gis bsgrubs pas 'og nas 'chad pa ma yin nam/ de ji ltar kun la sems bskyed pas khyab pa yin zhe na 'gal ba med de gang gi phyir 'tshang rgya ba nyid du sems bskyed pa kho na'i rgyu'i gtso bo nyid yin par bshad kyi 'bras bu gang la yang rgyu cig yod par ma mthong ste//rgyu gzhan dag kyang bshad pa la nyes pa med do/ /mdo sde rgyan las/ sems bskyed pa ni sa rnams la/mos dang lhag bsam dag pa dang / /rnam par smin pa gzhan du 'dod/ /de bzhin sgrib pa spangs pa'o/ /de yi rtsa ba snying rjer 'dod/ /rtag tu sems can phan par sems/ /zhes bshad pas so so'i skye bo dang / byang chub sems dpa' dang /de bzhin gshegs pa'i sa'i dbye bas rgyu dang 'bras bu'i bdag nyid can gyi rab tu dbye ba bstan pa yin la/ de bzhin du don rtogs pa'i rim pas ji skad bshad pa'i go rims kyis byang chub kyi sems bstan pa yin pa'i phyir/ 'di tsam kho nas byang chub kyi sems kyi rab tu dbye ba ma tshang ba ma yin zhing lhag pa ma yin par go rims bzhin du bstan par bya'o zhes ston to//smon lam sngon du 'gro ba'i nyams su len par 'dod pa ni de'i yul mi shes pa las 'bras bu med pa kho nar 'gyur bas thun mong ma yin pa'i bslab pa'i tshig le'ur byas pas 'chad par bzhed pa de'i dgos pa ni de ltar zhes bya ba la sogs pa smos pa yin te/dus ci lta ba bzhin du zhes bya ba ni 'tsham pa nyid kyi dus las ma 'das pas so/ /don du gnyer bar byed pa ni gdams ngag don du gnyer ba'o/ /byang chub kyi sems bskyed pa ni sngar bshad pa'o//des phongs pa'i chos ni chos dkar po thams cad kyi gzhi'i dngos po la sogs pa rdzogs par bya ba'i phyir ro/ /yon tan thob pa ni dge ba'i bshes gnyen la sogs pa las sems bskyed pas gzhan la skyabs su mi 'gro ba la sogs pa'o//de rnams yongs su bsrung ba'i don gyis zhes bya ba ni yongs su skyong ba'i don du'o/ /mngon par 'phel bar bya ba'i phyir zhes bya ba ni byang chub kyi sems la sogs pa 'di dag nyid gong nas gong du 'phel ba'i rim gyis lhag par bya ba'i phyir sgrub pa dang zhes bya ba la sogs pa'i rab tu byed pa'i don gsungs pa yin te/byang chub kyi sems kyi rab tu dbye ba ji skad bshad pa ni byang chub kyi sems nyi shu rtsa gnyis kyi'o/ /sgrub pa ni nyams su len pa'o/ mi dmigs pa'i tshul gyis zhes bya ba ni chos dang gang zag la bdag med pa'i tshul gyis nyan thos la sogs pa dang thun mong ma yin pa'o//kun rdzob ni ma brtags na nyams dga' ba 'jig rten gyi tha snyad du mi slu ba la sogs pa'i dngos po phung po la sogs pa'o/ /don dam pa ni rdzogs pa'i sangs rgyas kyi yum ste /de dang rjes su mthun pa nyid kyi phung po la sogs pa skye ba med pa'i shes pa'o/ /de nyid ni bden pa ste 'jig rten pa dang rdzogs pa'i sangs rgyas dag la mi slu ba yin pa'i phyir de las mi 'da' ba'o/ /'jug par bya ba ni rab tu 'jug par bya ba'o zhes slob pa sgrub pa la 'doms pa'o//tshad mas 'thad par 'tshang rgya ba nyid kyi rgyu yin pa'i phyir bden pa ni rnam pa bzhi ste/ de la sdug bsngal la zhes bya ba ni sdug bsngal gyi bden pa la'o/ /kun 'byung gi phung po'i 'bras bu nyid yin pas na 'bras bur gyur pa ste gzugs la sogs pa'i phung po tshe pha rol po'i'o //de rnams kyi stong pa nyid gang yin pa ni gcig dang du ma dang bral ba la sogs pa'i tshad mas rnam par dpyad na rang bzhin gyi dngos po med pa nyid yin pa dang / gang yang shes rab kyi pha rol tu phyin pa ste/ gnyis su med pa'i ye shes 'di nyid ni de bzhin nyid kyi ngo bo nyid yin pas don dam par skye ba med pa'i ngo bor rang bzhin gcig pa'i phyir dbyer med do/ /kun 'byung ba la zhes bya ba kun 'byung gi 'dren pa la stong pa nyid gang yin pa dang / gang yang 'di las sdug bsngal gyi phung po kun 'byung bas kun 'byung ba zhes bya ba rgyur gyur pa'i gzugs la sogs pa'i phung po tshe 'di pa ste/'di gnyis ni tha mi dad pa nyid kyis dbyer med par gzugs la sogs pa zhes bya ba rgyur gyur pa'i gzugs la sogs pa'i phung po ni kun 'byung ba dang 'gog pa dang kun nas nyon mongs pa dang /rnam par byang ba'i chos can ma yin no zhes bya ba skye ba dang 'jig pa dang / 'dod chags la sogs pa dang bdag med pa'i ngo bo nyid ma yin no/ /'gog pa la zhes bya ba ni 'gog pa'i bden pa la'o/ /stong pa nyid la sogs pa ni rtog sla'o/ / gzugs med pa ni gzugs kyi phung po med pa dang / nas zhes bya ba 'dis tshor ba la sogs pa'i phung po rnams bsdu'o/ /ma rig pa skye ba yang med pa ni phung po med pas shes pa skye ba med pa la ma rig pa 'gag pa med de / des na mi shes pa 'jig pa yang med do/ / sangs rgyas kyang med pa ni rtogs pa po med pa'o/ /de nyid kyis na rtogs par bya ba med pa'i phyir byang chub kyi bar du yang med de bla na med pa yang dag par rdzogs pa'i byang chub med pa'o/ /lam la zhes bya ba ni lam gyi bden pa la'o/ /sbyin pa la sogs pa'i pha rol tu phyin pa rnams dang bdag nyid de sbyin pa po zhes bya'o//nang stong pa nyid la sogs pa ni phyi stong pa nyid la sogs pa zhes bya ba ni nang stong pa nyid la phyi stong pa nyid kyis zhes bya ba dang / /de bzhin du phyi stong pa nyid la phyi nang stong pa nyid kyis dang / phyi nang stong pa nyid la stong pa nyid stong pa nyid kyis zhes bya ba la sogs pa'i rim gyis so//sngon gyi mtha' dang phyi ma'i mtha' dag ces bya ba srid pa dang mya ngan las 'das pa dag phan tshun gcig la gcig ldan pa dang mi ldan pa yang ma yin pa nyid kyis na sbyor ba nyid kyis ma yin mi sbyor ba nyid kyang ma yin no zhes bya ba sgrub bo//sangs rgyas la zhes bya ba la sogs pa la/ byang chub pa'i bar du bde 'gro'i rgyu yin pa nyid kyis na dga' ba skyed par byed pa nyid yin pa'i phyir sangs rgyas dkon mchog la sogs pa gsum mo/ /de la sangs rgyas la zhes bya ba sangs rgyas dkon mchog la sangs rgyas dang byang chub ces bya ba mtshan nyid gcig pa nyid kyis te de bzhin nyid kyi mtshan nyid yin pa'i phyir ro//sangs rgyas su byed pa ni 'tshang rgya ba nyid rdzogs par byed pa'i sems bskyed pa la sogs pa'o/ /de'i mtshan nyid ni de'i bdag nyid can gyis te/ rnam pa thams cad mkhyen pa nyid do//de ni kho na nyid du ni rang bzhin med pa nyid yin pas mi dmigs pa la gzugs la sogs pa mi sbyor bas te/ gzugs dang tshor ba la sogs pa dang sbyor ba med pa'i phyir ro/ /dmigs par bya ba dang dmigs par byed pa mnyam pa nyid du shes pa zhes bya ba ni rnam pa thams cad mkhyen pa nyid la sogs pa dang /de la dmigs par byed pa'i sems dag ni snang ba med pa tsam nyid du shes pa'o/ /chos la zhes bya ba chos dkon mchog la thams cad mkhyen pa nyid gsum gyis te sngar bshad pa gang yin pa'o//des bsdus pa ni gang gzhi dang gnyen po dang rnam pa mtha' dag ste/ phyi dang nang gi bdag nyid can gyi dngos po dang / rnam par byang ba dang gzugs la sogs pa'i rnam pa des/ bsdus pa'i chos thams cad gzugs la sogs pas bsdus pa rnams ni yang dag par na ngo bo nyid med de stong pa nyid yin no//dge 'dun la zhes bya ba ni dge 'dun dkon mchog la sangs rgyas zhes bya ba la sogs pa ni 'og nas bshad par bya'o/ /ma zhen pa ni mngon par ma chags pa ste/ de ni brtson 'grus brtsams pa nyid kyis zhes bya ba la sogs pa smos pa yin te/bskal pa grangs med gsum dang kun tu 'brel par 'jug pa nyid kyis ji skad du bshad pa'i don la nan tan du bya ba'i phyir zhes bya ba byang chub kyi sems bskyed pa la sogs pa bsgrub pa la'o/ /lus la sogs pa bsod nams nyid kyi zhes bya ba bde ba nyid kyis so//la la ni dbang po rtul po'o/ /yongs su mi ngal ba ni nyon mongs pa med pa ste/ de ni dus ring mo zhes bya ba la sogs pa smos pa yin no/ /dngang ba'i rang bzhin can ni dbang po rtul ba nyid yin pa'i phyir 'jigs pa'i rang bzhin can no//gzugs la sogs pa nas zhes bya ba ni gzugs la sogs pa nas tshor ba la sogs pa'i bar ro/ /rlom pa med pa nyid du zhes bya ba ni yang dag par tshor ba med pa'i phyir ro/ /lam ni sgrub pa'o/ /de yongs su gzung ba ni 'dzin pa ste/ de ni phyogs bcu na zhes bya ba la sogs pa smos pa yin te/ don re re'i phyir zhes bya ba ni brjod par bya ba sna tshogs shes par bya ba'i phyir ro/ /sems zhum par 'gyur bas zhes bya ba ni phyogs sna tshogs par gtogs pa'i sangs rgyas dang dge ba'i bshes gnyen mnyes par bya ba dang /des nye bar bstan pa'i don khong du chud pa so so'i bya ba mang po yod pa nyid la dbang po rtul po nyid yin pa'i phyir ro / /sems le lor gyur pa la chos rnams rang bzhin gyis ma skyes pa nyid du ste/ de kho na nyid du na gzugs la sogs pa rang bzhin gyis skye ba med pa yin pa'i phyir ro//mthong ba'i rgyur gyur pa nyid kyis na spyan te de ni sha'i dang zhes bya ba la sogs pa smos pa yin no/ /kun shes pas na mngon par shes pa yin la de nyid ni mthong ba gdul bya'i skye bo dang rjes su mthun pa nyid yin pa'i phyir bslab par bya ba nyid yin pas na yon tan no//de ni rdzu 'phrul dang zhes bya ba la sogs pa smos pa yin te/ de shes pa gzhan la ltos na 'bad pa chen pos bsgrub par bya ba yin pas na mngon par 'du byed pa las byung ba'i lha'i mig gi shes pa'o/ /zag pa ni nyon mongs pa rnams te/ de rnams med pa ni zag pa zad pa'i shes pa'o//gzod ma nas zhi ba nyid du zhes bya ba ni de kho na nyid du na rang bzhin gyis mya ngan las 'das pa nyid yin pa'i phyir ro/ /ma mthong ba'i yon tan mthong ba'i thabs nyid yin pa'i phyir mthong ba'i lam zhes bya ste/ de ni mthong ba'i lam bden pa bzhis bsdus pa zhes bya ba la sogs pa smos pa yin te/bden pa bzhi ni sdug bsngal la sogs pa'o/ /des bsdus pa skad cig ma bcu drug ni mi rtag pa la sogs pa'o/ /de'i ngo bo nyid kyis mthong ba'i lam ni chos dang rjes su shes pa'i bzod pa dang shes pa'i bdag nyid ces bya ba bden pa re re zhing chos dang rjes su shes pa'i bzod pa gnyis te/shes pa bcu drug tu gyur pa de'i bdag nyid la'o/ /chos thams cad ngo bo nyid med par rtogs pas zhes bya ba la gzugs la sogs pa stong par shes pa'i phyir ro/ /sgyu ma mkhan bzhin du thams cad la mngon par zhen pa med pa'i lus can rang gis ji lta ba bzhin du sprul pa ni log pa nyid yin par shes pas sgyu ma byed pa dag mngon par zhen pa med la/de bzhin du gzugs la sogs pa la mngon par zhen pa med pa'o/ /des spang bar bya ba'i dngos po mthong ba'i lam gyis spang bar bya ba mi mthun pa'i phyogs de'i gnyen po yin pa nyid kyis rnal 'byor pa de kho na nyid sgom par byed do//bsgom pa'i lam ni 'dus byas dang zhes bya ba la sogs pa smos pa yin te/ 'dus byas dang 'dus ma byas dag ni zag pa dang bcas pa dang /zag pa med pa dag phyi'i spyi rgyu nyid kyis na gzugs dang / tshul khrims la sogs pa'i phung po'o/ /de dag ni ngo bo nyid gcig pa nyid kyis te/ stong pa nyid kyis so/ /des na phan tshun te gcig la gcig tha dad par gdags par mi nus pa bzhin du zhes bya ba tha snyad kyi dbye ba ma gtogs pa'i phyir ro//de nyid kyis na don dam pa ba dang rjes su mthun pa nyid yin pa'i phyir ji skad bshad pa'i mthong ba dang bsgom pa'i lam don dam pa pa yin pa ni ji skad bshad pa'i mthong ba'i lam mngon sum du byas pa'i 'phags pa'i bden pa bzhi po de dang tha mi dad pa'i phyir zhes bya bar smos pa yin te/de dang tha mi dad par dmigs pa yin pa'i phyir te/ de dag yul gcig pa nyid yin pa'i phyir/ mthong ba dang bsgom pa'i lam dag tha dad du gyur pa med pas dbye ba med do/ /rgyu des na mtshan nyid pa rnam par gzhag pa ni med kyi 'on kyang bsgom pa'i lam gyi dngos po rnam par gzhag pa ni mthong ba'i lam dang tha snyad 'dra ba yin no//yul gcig pa nyid yin pa'i phyir yang dag par na mthong ba'i lam gyi khongs su bsgom pa'i lam 'dus pa ma yin nam / de bsgom pa ni don med pa nyid yin no zhe na/'on kyang de ni des spang bar bya ba'i zhes bya ba la sogs pa smos pa ste/ des spang bar bya ba'i dngos po bsgom pa'i lam gyis spang ba'i mi mthun pa'i phyogs de'i gnyen po'i phyogs yin pa nyid kyis na rnam par bsgom mo/ /yul gcig pa nyid kyis na nus pa tha dad pa ga la yod ce na/rten cing 'brel bar 'byung ba'i chos nyid du zhes bya ba smos te/ rgyu dang 'bras bu'i dngos po bsam gyis mi khyab pa'i phyir ro/ /sgrub pa'i rnam pa ni gang yin/ dmigs pa ni gang yin rten ni gang yin/ ma zhen pa la sogs pa'i yang dgos pa ni gang yin zhes dogs pa la de bstan pa ni de ltar zhes bya ba la sogs pa smos pa yin te/de ltar byas na zhes bya ba ni spyir gdams pa smra ba la gnas pa la na'o/ /phyir mi ldog par 'gro ba'i rgyu ni dbyer mi phyed par 'gro ba'i rgyu'o/ /theg pa gzhan gyis mi 'gro ba'i rgyu ni rab kyi mthar phyin par mi 'gro ba'i rgyu'o//gzhan gyi dring mi 'jog par 'gro ba nyid kyi rgyu ni bdud la sogs pa'i shes par drang ba'i don nyid du rang nyid kyis shes nas mi 'jug pa'i rgyu'o/ /dge 'dun dkon mchog gi khongs su gtogs pa nyid yin pa'i phyir dge 'dun gyi dbye ba ci snyed yod pa de dag thams cad rtogs pa kho na yin pas rab tu byed pa gnyis po la don med do snyam du sems pa la/bde blag tu rtogs par bya ba'i phyir zhes bya ba smos te/ dge 'dun dkon mchog la byang chub sems dpa' dbang po rtul po la sogs pa'i dbye ba ni/dbang po rtul dang zhes bya ba la sogs pa'i tshig le'ur byas pas bshad pa yin no/ /'chad par 'gyur ba'i zhes bya ba la sogs pa smos pa la mthong ba'i lam la brten nas zhes bya ba ni mthong ba'i lam gyi sems kyi skad cig ma bco lnga la/ dad pa dang chos kyis rjes su 'brang ba'i bye brag gis te/ dad pa dang shes rab kyis rjes su 'brang ba nyid dag gis 'bras bu dang po la zhugs pa ste zhes bya ba rgyun du zhugs pa'i 'bras bu grub pa dang ldan pa dbang po rtul po dang rnon po rnam pa gnyis te/ yun ring pos shes pa dang myur bar shes pa'o//de'i 'og tu de nyid 'dod pa'i 'dod chags dang ma bral ba sems kyi skad cig ma bcu drug la ni rgyun tu zhugs pa'o/ /de'i 'og tu de nyid bsgom pa'i lam la nyon mongs pa rnam pa bzhi rab tu spangs pa las/ lha dang mi'i rigs nas rigs su skye ba nyid kyis gzhan rnam pa gnyis yin te/lha dang mi dag tu skye ba gnyis sam gsum thos pas lha'i rigs nas rigs dang / mi'i rigs nas rigs su skye bas rigs su skye ba'o/ /de'i 'og tu dbang po rtul po dang rnon po dad pa dang mthong bas thob pa ste/ dad pa dang shes rab dang ldan pa 'dod pa na spyod pa'i nyon mongs pa lnga spangs pas 'bras bu gnyis pa la zhugs pa ste lan cig phyir 'ong ba'i 'bras bu bsgrub pa dang ldan pa ni gcig kho na yin no//de'i 'og tu 'dod pa na spyod pa'i nyon mongs pa rnam pa drug spangs pas lan cig phyir 'ong ba'i 'bras bu yin no//de'i 'og tu de nyid lha rnams su skye ba gcig lhag ma lus pa yin pa'i phyir gzhan bar chad gcig pa yin no/ /de'i 'og tu 'dod pa na spyod pa'i nyon mongs pa bdun pa dang brgyad pa spangs pas 'bras bu gsum pa la zhugs pa yin te/phyir mi 'ong ba'i 'bras bu grub pa dang ldan pa'o/ /dad pa dang mthong bas thob pa ni snga ma bzhin du gcig yin te dad pa dang mthong bas thob pa'i 'bras bu gnyis pa dang / gsum pa la zhugs pa dag na dad pa dang mthong bas thob par bshad pa yin no//rgyas par bshad pa ni lung gi dbang gis yin par shes par bya'o/ /de'i 'og tu 'dod pa na spyod pa'i nyon mongs pa dgu pa spangs pas phyir mi 'ong ba'i rnam pa lnga ste der ni bar ma do dang zhes bya ba la sogs pa smos pa yin te/ skye ba'i kun tu sbyor ba ni spangs/ mngon par 'grub pa'i kun tu sbyor ba ni ma spangs pa'i phyir srid pa bar ma mngon par sgrub par byed pa na'am/mngon par sgrub pa na srid pa bar mar lam mngon sum du byas pas sdug bsngal gyi mthar byed pa thob pa ni bar ma dor yongs su mya ngan las 'da' ba'o/ /kun tu sbyor ba gnyi ga ma spangs pa'i phyir gzugs kyi khams su skyes nas sdug bsngal gyi mthar byed pa thob pa ni skyes nas yongs su mya ngan las 'da' ba'o//de bzhin du skyes nas mngon par 'du byed pa dang bcas pas lam mngon du byed pa thob pa'i phyir sdug bsngal gyi mthar byed pa thob pa ni mngon par 'du byed pa dang bcas pas yongs su mya ngan las 'da' ba'o//de las go bzlog pa ni mngon par 'du byed pa med par yongs su mya ngan las 'da' ba zhes bya ba ste rnam pa bzhi dang gong du 'pho ba ni lnga ste/ de yang 'og min gyi mthar thug par 'gro ba dang srid pa'i rtse mo'i mthar thug par 'gro ba ste rnam pa gnyis so//de'i 'og tu gong du 'pho ba de nyid 'og min gyi mthar thug par 'gro ba ni 'phar ba dang phyed du 'phar ba dang gnas skabs thams cad du 'chi 'pho ba nyid kyis 'og min tu 'jug pa ni gong du 'pho ba gzhan rnam pa gsum mo/ /de'i 'og tu gong du 'pho ba de nyid srid pa'i rtse mo'i mthar thug par 'gro ba ste/gzugs kyi 'dod chags dang bral ba la gnyis te mthong ba'i chos la zhi ba dang lus kyis mngon sum du byed pa gzhan rnam pa gnyis yin no/ /de'i 'og tu srid pa'i rtse mo'i nyon mongs pa brgyad pa spangs pas ni dgra bcom pa'i 'bras bu la zhugs pa yin no//de'i 'og tu nyan thos kyi sde snod nyid la dmigs nas rang gi lam mngon sum du byed pas sangs rgyas mi 'byung ba na rang sangs rgyas su 'gyur ba ste de ltar nyi shu'o/ /'dir go sla bas 'bras bu dang po dang gnyis pa dang bzhi pa la zhugs pa'i grangs ma smos so//de ltar phyir mi ldog pa'i 'khor lo'i mdo dang / stong phrag nyi shu lnga pa dang / chos mngon pa las/ de la skad cig bcwa lnga ni/ /ma mthong mthong phyir mthong ba'i lam/ /zhes bya ba la sogs pas gtan tshigs dang grangs dang bcas par gsungs pa yod pas log par khong du chud par mi bya'o//las dang po ba de ltar gdams ngag thob pa la zhes bya ba ni 'dir bsod nams kyi tshogs la sogs pa yang dag par rdzogs pa dang ldan pa la ye shes kyi tshogs grub par bya ba'i phyir bskal pa grangs med pas nges par 'byung ba'i mos pas spyod pa'i sa yongs su sbyang bar bya ba'i don du zhugs pa la zhes bya bar blta bar bya'o//byang chub sems dpa' dam pa skyob pa rnams kyi dro ba la sogs pa rnam par rtog pa bzhi po 'og nas bshad pa de dang ldan pa ste de dang yang dag par sbyor ba'o//bsten pa ste bsten bzhin pa na byang chub sems dpa'i chung ngu dang 'bring dang chen por bshad pa ni nyan thos bse ru lta bur bcas pa dag gi dro ba la sogs pa bshad pa las khyad par du 'phags pa yin te/ de dag gi dmigs pa la sogs pa ni dman pa yin pa'i phyir ro//gang du gang ci zhig ce na/ 'brel pa las byang chub sems dpa' rnams kyi zhes bya ba la sogs pa smos te/ byang chub sems dpa'i mos pas spyod pa'i sa yongs su sbyong ba la zhugs pa rnams kyi thos pa la sogs pa rab kyi mthar phyin pas thob pa'i thar pa'i cha dang mthun pa ste nyon mongs pa la sogs pa dang bral ba la phan pa'i dad pa dang brtson 'grus la sogs pa'i mtshan nyid kyi ma chags pa la sogs pa'i dge ba'i rtsa ba rnams kyi rtsa ba ste/rgyu'i gtso bo gang yin pa de'i 'og tu ste/ rjes thogs la bden pa bzhi po sdug bsngal la de rnams rtogs pa de bzhin nyid shes pa de rjes su mthun pa'i nges par 'byed pa'i cha dang mthun pa nyon mongs pa la sogs pa dang bral ba'i shes pa la mngon sum du phan pa 'jig rten pa'i sems las skyes pa nyid yin pa'i phyir 'jig rten pa yin la/bsgom pa goms pa las byung ba/ dro bar gyur pa dang 'brel pa dge ba'i rtsa ba dang zhes bya ba la sogs pa la chung ngu dang 'bring dang chen po zhes bya ba la chung ngu la sogs pa'i rim gyis skye zhes bya ba ni chung ngu dang 'bring dang chen po'i go rims skye ba'am/byang chub sems dpa' dang 'brel pa ste/ de'i rim can gyi dbang po rtul po la sogs pa'i gang zag chung ngu dang / 'bring dang chen po'i shes pa dang ldan pa'i lus can de'i bye brag dang ldan pa la/ dro ba la sogs pa de'i khyad par gyi chung ngu dang 'bring dang chen po yin no zhes bya bar sbyar ro//dmigs pa yin zhes smos pa ni 'og nas bshad pa'i dmigs pa'i khyad par mi rtag pa la sogs pa ste de'i ngo bo nyid do/ /bden pa bzhi ni sdug bsngal la sogs pa'o/ /de nyid ni dngos po ste shes pa skyed par byed pa nyid yin pa'i phyir ro/ / de'i dmigs pa ni yul rnams so/ /rnam pa yis ni chos su lta ba zhes bya ba la sogs pa yin te/ chos su lta ba ni gzugs la sogs pa yod par 'dzin pa'i phyir ro/ /de'i gnyen po nyid kyis na mngon par zhen pa med pa la sogs pa'i rnam pa ste/ ma chags pa dang mi dmigs pa la sogs pa rnam pa'i bye brag gis zhugs pa ni sgyu ma lta bu la sogs pa'i tshul gyis so//rgyu nyid ni theg pa gsum car zhes bya ba la sogs pa yin te/ gang sangs rgyas la sogs pa'i mya ngan las 'das pa gsum ni theg pa gsum car te mya ngan las 'das pa'o//de rtogs pa ni thob pa'o/ /de'i rgyu'i ngo bo ni dro ba la sogs par zhugs pa'o/ /yongs su 'dzin pa yis zhes bya ba ni dge ba'i bshes gnyen zhes bya ba la sogs pa smos pa yin te/ thabs zhes bya ba 'tshang rgya ba'i rgyu la mkhas pa'i dge ba'i bshes gnyen te bla ma gang yin pa'o//de'i mtshan nyid kyis yongs su bzung ba ni 'tshang rgya ba nyid kyi bar du bdag gir byas pa'am/ yongs su bzung ba dang ldan pa nyid yin pa'i phyir dge ba'i bshes gnyen ni yongs su bzung ba'o/ /de dang ldan pa ni de dang bcas pa'i dro ba la sogs pa'o//rnam rtog bzhi po zhes bya ba la sogs pa smos pa yin te/ mthong ba dang bsgom pa dag gis so sor spang bar bya ba'i gzung ba dang 'dzin pa'i rnam par rtog pa bzhi po 'chad par 'gyur ba ste/ 'og nas 'byung ba gang yin pa de'i tshul dang 'brel pa ste 'dres pa la sogs pa'o//nyan thos la sogs pa'i dro ba la sogs pa'i khyad par med pa nyid yin pa ni de dag gi dro bar gyur pa zhes bya ba la sogs pa smos pa yin te/ nyan thos la sogs pa de dag gi yang dro bar gyur pa la sogs pa'i dge ba'i rtsa ba ni gzugs su rung ba la sogs pa'i mtshan nyid kyi dngos po'i bdag nyid kyis te dngos po gang la yang gzugs su rung ba dang /nyams su myong ba la sogs pa'i mtshan nyid kyi gzugs dang tshor ba la sogs pa'i phung po de'i bdag nyid can gyi bden pa bzhi po sdug bsngal ba la sogs pa de la dmigs pa gang yin pa dang bdag tu lta ba ni bdag tu mthong ba'o//de'i gnyen po nyid yin pas mi rtag pa la sogs pa zhes bya ba mi rtag pa dang sdug bsngal ba la sogs pa'i rnam pas zhugs pa'o/ /rang gi theg pa ni phung po lhag ma dang bcas pa dang lhag ma med pa dang mya ngan las 'das pa'o//de rtogs pa kho na ni de thob pa nyid do/ /yongs su bzung ba ni snga ma bzhin du ste de dang bral ba'o/ /rnam par rtog pa rnam pa bzhi ni 'og nas bshad pa'o/ /de dang mi ldan par 'byung ngo zhes bya ba'i tshul gyis te/de ltar byas na rnam par rtog pa bzhi ni rang gi byang chub kyi gegs su gyur pa ma yin no/ /nyan thos kyi lung las 'dres su zin kyang ma 'dres par skye ba yin no zhes bshad pas rnam par rtog pa rnam pa bzhi dang bral ba yin no/ /yang byang chub sems dpa' rnams kyi rnam pa dang dmigs pa dag yongs su bzung ba'i dbang gis khyad par du 'phags pa de ni byang chub sems dpa' rnams kyi zhes bya ba la sogs pa smos pa yin te/bden pa bzhi po'i dngos po la dmigs pa ni nges par 'byed pa dang zhes bya ba la sogs pa dang sbyar ro//de ni ci rigs par kha cig tu ni zhes bya ba ni kun 'byung ba la'o/ /rgyu'i sgo nas ni kun 'byung ni sdug bsngal gyi phung po'i rgyu nyid yin pas so/ /kha cig tu ni zhes bya ba sdug bsngal la ni 'bras bu'i sgo nas zhes bya ba sdug bsngal gyi 'bras bur gyur pa'i sgo nas te/sdug bsngal ni kun 'byung gi 'bras bu nyid yin pas so/ /kha cig tu ni zhes bya ba 'gog pa la ni ngo bo nyid kyi sgo nas zhes bya ba yang dag par na chos thams cad 'gog pa'i ngo bo nyid yin pa'i phyir ro/ /kha cig tu ni zhes bya ba lam la ni chos nyid kyi rnam pa'i sgo nas zhes bya ba thams cad mkhyen pa nyid gsum gyi chos mi dmigs pa nyid yin pa'i phyir ro//snga ma bzhin du rnam pa gzhan gyis kyang zhes bya ba ni mngon par zhen pa med pa la sogs pas so/ /bsre ba zhes bya ba ni rgya cher bsgom pa ni'o/ /phal cher sde pa rnams bdag cag gi sde snod gsum la khyed kyi theg pa mi snang bas khyed cag gi theg pa ni sangs rgyas kyis gsungs pa ma yin no zhes bya ba la sogs pa'i sun 'byin par smra bas/de bsal bar bya ba'i phyir de bas na zhes bya ba la sogs pa smos pa yin te/ 'di ni lugs gzhan kho na yin pas zhes bya ba ni gang gi phyir theg pa chen po'i gnas skabs khyad par rnam pa lngas khyad par du 'phags pa yin pa de bas na ste/de'i phyogs theg pa chen po las lugs kho na gzhan yin pas de la brten nas zhes bya ba de mthong ba'i tshul gyis theg pa chen po gang du yang sun 'byin par brjod par mi bya zhing sangs rgyas kyi bka' ma yin no//zhes brgal bar mi bya/ bdag cag gi sde snod gsum du khyed kyi theg pa mi snang ba dang saM skr-i ta'i skad kyis ma gsungs pa nyid yin pa'i phyir sangs rgyas kyis gsungs pa ma yin par thal bar 'gyur ba 'di dang /skad gzhan ma mkhyen na thams cad mkhyen pa nyid ma yin pa dang khyed cag kho na gdul bya nyid yin na thams cad gdul bya ma yin pa nyid du thal bar 'gyur na/ yu bu cag gnyi ga de ltar mi 'dod pas 'di ni ci ltar yang mi rung ngo / /de lta bu la sogs pa'i rgol ba ni mdo sde rgyan la sogs pa las sha za'i skad la sogs pa la mngon par zhen pa yang dag pa'i lta ba mi shes pa'i sha za rnams la mnyam par bstan pas rgya cher tshar bcad pa yin par blta bar bya'o zhes bya bar dgongs so//yang 'di'i dgongs pa 'di ma yin pas rtag pa'i lung dang mi rtag pa'i lung bzhin du theg pa gzhan dang gzhan 'gal ba ma yin no zhes kyang brjod par mi bya ste/gzhan gyi chos rnams kyang yod pa zhes bya ba la sogs pa de'i byang chub dang 'gal bar 'og nas bshad pa yin pa'i phyir ro/ / gzhan du na bye brag tu smra ba dang / mdo sde pa dang / rnal 'byor spyod pa dang / dbu ma pa'i sangs rgyas pa rnams gong nas gong gi rim pas khyad par du 'phags par ji ltar 'gyur/ yang na theg pa chen po khyad par du 'phags pa bstan pa na theg pa gzhan khyad par can ma yin par bshad pa ma yin nam/des phongs pa la 'jug pa'i las kyi nyes par ci'i phyir mi 'gyur zhes bya ba'i phyogs snga ma'i lan ni de bas na zhes bya ba la sogs pa smos pa yin te/ 'di ni lugs gzhan kho na yin pas zhes bya ba ni theg pa khyad par can dang khyad par can ma yin pa dag ji lta ba bzhin du rtogs pa brtan par bya'o zhes bya ba'i skabs yin no//gang gi phyir de ltar yin pa de'i phyir gang du yang theg pa gzhan la brten nas sun dbyung ba brjod par mi bya'o zhes bya ba chos kyis phongs par 'gyur ba la 'jug pa'i las kyi nyes pa brjod par mi bya ste/rang rang gi theg pa la gnas pa rnams bdag cag gi bas gzhan gyi theg pa nyams par 'dod pa nyid yin pa'i phyir rang gi theg pa las nyams nas de lhag par mos pa nyid ni ma yin no zhes bya bar dgongs so/ / de nyid kyis na gzhan gyi chos rnams kyang yod la zhes bya ba la sogs pa sun dbyung ba sngar bshad pa'i nyes pa ni nyes pa ma yin te 'dod pa nyid yin pa'i phyir ro/ /bshad pa 'di la rang gi theg pa la gnas pa dag ni rang gi theg pa spong ba des phongs par gyur pa'i las su gzhag pa yin par blta bar bya'o//dmigs pa dang zhes bya ba la sogs pa la gzugs la sogs pa'i skye ba dang 'jig pa ni bsgrub pa dang dgag pa dag go/ /gnas pa ni 'dis gnas shing tha snyad du byed pas na gnas te sgra ma lus pa'o/ /bral ba ni mi gnas pa ste med pa yin pas gnas bral lo//btags dang zhes bya ba ni sangs rgyas la sogs pa'i tha snyad de dang de ni brjod du med pa yin pas/ btags dang brjod du med pa zhes bya'o/ /dro bar gtogs pa'i dge ba'i rtsa ba rnam pa gsum gyi dmigs pa dang rnam pa dag 'grel pa las/ chung ngu'i dmigs pa ni zhes bya ba la sogs pa la smos pa yin te/ de la dro ba chung ngu'i dmigs pa zhes bya ba la sogs pa ni mi rtag pa zhes bya ba la sogs pas bshad do/ /dro ba 'bring gi dmigs pa ni mos pa dang zhes bya ba kun rdzob tu gzugs la sogs pa la yod pa la sogs par mngon par zhen pa'o//de kho na nyid ni don dam pa mthong bas de rnams nyid bdag med pa'o/ /de dag gi yid la byed pa gang yin pa de dag gis grangs bzhin du gzugs la sogs pa zhes bya ba gzugs dang tshor ba zhes bya bar bsgrub pa dang dgag pa dag ni dmigs par mthong ba zhes bya ba sprul pa'i gzugs la sogs pa lta ba dang 'dra bar dngos po snang bzhin pa na dngos po med pa yin la/de yang de kho na nyid du ni ma yin no zhes dmigs pa gnyi ga sgyu ma byed pas sprul pa lta bur bya'o zhes bya bar dgongs so/ /ming thams cad med pa nyid kyis zhes bya ba ni de kho na nyid du med pas so //yang dag par med du zin na yang rgyun dang 'dra bar zhes bya ba rang gi rigs gsal ba ma lus pa la khyab pas na rgyun te spyi'o/ /de mi 'dra ba gang yin pa de ni 'dir gsal bar rang gi mtshan nyid brjod pa'o//rgyun ni snga ma dang 'dra'o/ /'di gnyis kyi mtshan nyid ni rang dang spyi'i mtshan nyid don gyi bya ba nus pa dang mi nus pa'i bdag nyid can du med de/ brjod pa po med pas brjod par bya ba med do/ /zhes bya bar dgongs so/ /rang gi mtshan nyid ni kun rdzob tu yang brjod du med pa ma yin nam sgra rnams ni sel ba'i yul can yin pa'i phyir de ji ltar der dgag ce na bden mod kyi sgra gsal ba nyid la 'jug pa na lan 'ga' zhig de la yang brjod par bya ba nyid yin par mngon par zhen to zhes bya ba'i bar du srid pa dgag pa yin pas nyes pa med do//zhes bya ba ni gnas bral ba'o//dro ba chen po ni gzugs la sogs pa'i chos thams cad kyi btags pa ste tha snyad do/ /de ni chen po'i dmigs pa ste zhes bya ba la sogs pa smos pa yin te/ gzugs nas sangs rgyas zhes bya ba la sogs pa brdar btags pa'i chos tha snyad du bya ba'i dbang gis kun tu tha snyad du byas pa dang 'dra bar sangs rgyas dang 'dod chags dang bral ba la sogs pa gcig yin pa'i bsam pas ming du nges pa'o//de ni gzugs nas zhes bya ba la sogs pa'i tha snyad kyis brjod du med pa'o/ /dro ba zhes bya ba'i don dang ldan pa ni de ltar na zhes bya ba la sogs pa smos pa yin te/'di'i rjes thogs la bar chad med na mthong ba'i lam du 'gyur ba yin pas thar pa'i cha dang mthun pa'i 'og tu dro ba'i khyad par ro/ /rtse mor rtogs pa'i dge ba'i rtsa ba'i dmigs pa dang rnam pa chung ngu dang 'bring dang chen po ni gzugs la sogs zhes bya ba la sogs pa gsungs pa yin te/gzugs sogs mi gnas zhes bya ba ni yod pa nyid du mngon par ma zhen pa'o/ /de ci'i phyir zhe na/ gzugs la sogs pa de dag ni de'i ngo bor zhes bya ba gzugs la sogs pa'i rang bzhin gyis ngo bo nyid med pa nyid yin no//de dag ces bya ba gzugs la sogs pa dang / stong pa nyid 'di dag ni gcig la gcig ste/ phan tshun rang bzhin nam ngo bo nyid gcig yin no/ /de mi rtag sogs par mi gnas//zhes bya ba gzugs la sogs pa la mi rtag pa dang / sdug bsngal la sogs par zhen pa med pa'o/ /de rnams zhes bya ba gzugs la sogs pa'i stong pa nyid ni de'i ngo bos stong zhes bya ba stong pa nyid yin pa'i phyir ngo bos bdag med cing de dag ste/ gzugs la sogs pa dang stong pa nyid dag ni gcig la gcig gis te / phan tshun rang bzhin gcig pa nyid yin no/ /chos rnams mi 'dzin gang yin dang / /zhes bya ba gzugs la sogs pa ni de kho na nyid du med pas bdag gir mi byed pa gang yin pa'o/ /de dag mtshan mar ma mthong phyir//zhes bya ba ni de kho na nyid du na gzugs la sogs pa'i mtshan ma ma mthong ba'i phyir ro/ /shes rab kyis ni zhes bya ba ni gzugs la sogs pa rnam par dpyod pa'i rgyu ste shes pa'i khyad par ro/ /des yongs su rtogs pa ni de kho na nyid du rnam par dbye ba'i yul gzugs la sogs pa'i chos rnams med cing dngos po med pa nyid du shes pa'o//de ni/ thams cad dmigs su med par ni/ /zhes bya ba la sogs pa gsungs pa yin no/ /chung ngu'i dmigs pa ni zhes bya ba la sogs pa ni 'brel pa'o/ / chos yang dag par rab tu rnam par 'byed pa nyid kyis gzugs la sogs pa'i cha skye ba med par rtogs pa nyid du rnam par shes pas spyod cing rnam par brtag pa ste/ shes rab gang gis gzugs la sogs pa skye ba med par mthong ba rnam par 'byed pa'i shes rab de la yang skye ba med par bsam par bya'o zhes bya ba'i tha tshig go//'dis ni rnam pa shes rab kyi pha rol tu phyin pa med cing rang bzhin med pa nyid du chos kyi sgo nas bshad pa yin no/ /dge ba'i rtsa ba g.yo ba ni dad pa la sogs pa dang 'dra bar gong nas gong du khyad par thob cing g.yo ba yin pa'i phyir dge ba'i rtsa ba g.yo ba ste dro ba zhes bya ba'o//de'i mchog yin pa'i phyir rtse mor gyur pa zhes bya ba la sogs pa yin no/ /bzod par gtogs pa'i dge ba'i rtsa ba dmigs pa dang rnam pa gsum ni gzugs sogs zhes bya ba la sogs pa gsungs pa yin la/ rab tu byed pa'i don ni chung ngu'i dmigs pa ni zhes bya ba la sogs pa gsungs pa yin te/bzod par rtogs pa chung ngu'i ni gzugs la sogs pa'i mtshan nyid gzugs su rung ba dang nyams su myong ba la sogs pa'o/ /de'i rang gi ngo bo ni yang sa la sogs pa'i rang bzhin sa ba la sogs pa 'di nyid ni 'di'i mtshan nyid yin no//'di dag ni de kho na nyid du na stong pa nyid yin pas ngo bo nyid med par rang bzhin gcig pa nyid kyis na gzugs la sogs pa ni gzugs la sogs pa'i mtshan nyid dang sa la sogs pa de'i mtshan nyid dang ngo bo nyid med pa nyid yin no//gzugs la sogs pa zhes pa ni bshad zin to/ /skye bo dmigs pa can ni phyi rol gyi don yod pa la lta ba rnams te/ de'i ngor gzugs la sogs pa sngar bshad pa dang dngos po med pa de nyid ngo bo nyid do zhes bshad do/ /bzod par rtogs pa 'bring gi ni rang bzhin gyis ma skyes pa nyid kyis yang dag par na gzugs la sogs pa skye ba yang med ces bya ba la sogs pa yin no//chos thams cad kyi rang gi ngo bo rtogs pas gzugs la sogs pa stong pa nyid du shes pa'i phyir ro/ /lus la sogs pa rnam pa thams cad du zhes bya ba phyi dang nang gi bdag nyid can gyi rnam pas rnam par dag cing dri ma med pa yin te/'dir nges par 'byed pa'i cha dang mthun pa'i gnas skabs su rnam pa thams cad du dag pa ste med pas cung zad tsam gyis dag pa yin par blta bar bya'o/ /de dag skye med ces bya ba la sogs pa ni bshad zin to//bzod par rtogs pa chen po'i rang dang spyi'i mtshan nyid ni sngar bshad zin to/ /de mi 'thad pa ni gzugs la sogs pa yin par mi rung zhing mi rigs pas gzugs la sogs pa'i chos thams cad kyi mtshan nyid med pa ste/de'i mtshan ma med pa la sogs pa ni bshad zin to/ /rang bzhin kho na gzugs la sogs pa'i mtshan ma rnams kyi rten dang bral ba nyid kyis na gzugs la sogs pa'i rten med pa yid la byed pa ste kun rdzob tu gzugs la sogs pa yod par mngon par zhen pa'o //de la mi mos pa ni mngon par ma zhen pa'o/ /gzugs la sogs pa'i rang gi mtshan nyid la sogs pa ni sngar bshad pa ste de'i mtshan ma'o/ /de'i mtshan mar mi rten pa ni mngon par ma zhen pa'o/ /de'i mtshan ma zhes bya ba la sogs pa bshad zin to/ / de kho na nyid yid la byed pa ni chos thams cad stong pa nyid du bsam pa'o/ /de yongs su shes pa med pa ni dmigs su med pa'o/ /yang dag pa'i shes pa dang ldan pa ni 'du shes nyid do/ /de med pas na 'du shes med pa nyid de/ dngos po'i chos la mngon par zhen pa dang / mngon par ma zhen pa de med na de ci ltar yod ces bya bar dgongs so/ /bzod pa zhes bya ba don dang ldan pa nyid ni de ltar na zhes bya ba la sogs pa smos pa yin te/ de ltar na bzod pa'i dmigs pa dang rnam pa dang ldan pa la ni ngan 'gro med pas zhes bya ba ni chos mngon pa las/bzod thob ngan song mi 'gro'o/ /zhes bshad pas bzod pa thob pa'i byang chub sems dpa' ni so so'i skye bo dang 'dra bar dmyal ba la sogs pa'i ngan song gsum med pa'i phyir ro/ /chos chen po la bzod pa'i phyir/ /zhes bya ba ni gzugs la sogs pa med pa la sogs par bzod pas yid du 'ong ba'i bzod par gtogs pa ni rnam pa gsum mo//chos kyi mchog tu gtogs pa'i dge ba'i rtsa ba'i dmigs pa dang rnam pa gsum ni ting nge 'dzin zhes bya ba la sogs pa gsungs pa yin no/ /dmigs pa dang zhes bya ba la sogs pa thams cad du chos can yang bstan par rigs pa ma yin nam/de chos tsam du brtan pa nyid kyis bsgom pa ni mi rigs so zhe na/ dmigs pa mi rtag pa la sogs pa zhes bya ba la sogs pa smos pa yin te ma gtogs pa zhes bya ba der ni chos dang chos can yod pas gzhan dag la sgra'i dbye bas don ston par byed pa yin pa'i phyir/khyad par du byas pa'i chos dang chos can gyi tshig tu rjod par byed pa gang yin pa'i sgra des dmigs pa tshig tu brjod par bya ba yin na zhes bya ba 'dir dmigs pa ni nye bar mtshon pa tsam yin la des na don ni 'di yin te/dmigs pa dang rnam pa brjod pa yang khyad par du byas pa'i tshig gis yin te/ rnam pa mngon zhen la sogs 'gog /ces bya ba la sogs pas rnam pa dang dmigs pa'i chos can kun tu drangs pa lta bur thams cad du bshad pa yin par nges par 'byed pa'i cha dang mthun pa ston pa brjod pa'i rab tu byed pa las ston pa yin no//de lta na yang ci der chos brjod pas chos can rtogs pa yod dam zhe na / khyad par gzhan zhes bya ba la sogs pa smos pa yin te/ khyad par gzhan ni ris mi mthun pa'o//de rnams spong ba dang mi spong ba ni ldog pa dang mi ldog pa ma gtogs pa 'di dag la chos dang chos can gyi khyad par ni yang dag par na 'ga' yang med do zhes lugs las 'byung ba'i phyir ro zhes bya ba bstan bcos kyi rigs pas so/ /gal te de kho na nyid du na chos dang chos can gyi khyad par yod na de'i tshe dngos po spyir yang mi 'gyur te so sor med pa'i phyir ro//de bas na 'di ni shing nyid dang 'dra bar 'dir yang gang du 'phags pa'i bden pa bzhir gtogs pa'i dmigs pa dang rnam pa ma smras pa der yang mi ldog pa'i sgo nas de dag ni der gtogs pa nyid yin par grags pa grub pas/chos dang chos can dag gnyi ga med na mi 'byung ba nyid yin pas rgol ba 'di ni cir yang mi rung ngo / /don gyis kyang 'phags pa'i bden pa bzhi la brten par 'gyur ba ni rnam pa gcig tu na zhes smos pa yin te/ yang na tshig le'ur byas pa sdeb pa'i ngor zhes bya ba tshig le'ur byas pa'i sdeb sbyor dang 'gal pa'i 'jigs pas tha dad par brjod kyang zhes bya ba chos can bden pa las kun tu drangs te/ rnam pa mngon zhen zhes bya ba la sogs pa'i tshig gis dbye ba dmigs pa dang rnam pa'i chos kyi dbye ba smos pa yin na yang sdug bsngal la sogs pa'i bden pa ni chos can yin la der gtogs pa kho na dmigs pa dang rnam pa chos yin no zhes 'chad pa po rnams kyis bshad pa shes par bya'o//ci'i phyir zhe na/ mngon par zhen pa la sogs pa 'gog par byed pa'i bdag la sogs pa ni yang dag par skye ba dang 'jig pa dang bral ba zhes bya ba rim mam cig car dag gis don gyi bya ba byed par mi rigs so zhes bya ba la sogs pa'i tshad mas rang gi ngo bo brtag pa ni ri bong gi rwa dang 'dra bar bsgrub pa dang dgag pas stong pa yin la/mngon par zhen pa la sogs pas ni kun rdzob dang don dam pa dag tu med pa'i phyir bdag la sogs pa rten yin par mi rigs kyi don gyis na bden pa la brten pa nyid yod do/ /kun rdzob kyi bden par yod pa yin no zhes bya bar dgongs so//'og ma dag la yang de bzhin du shes par bya'o zhes bya ba ni gang du chos tsam zhig brten pa der thams cad du sngar bshad pa'i tshul gyis 'phags pa'i bden pa bzhi po kho na chos can yin par shes par bya'o/ /rnam par rtog pa bzhi ni gzhi dang zhes bya ba la sogs pa smos pa yin te/gzung bar rnam par rtog pa ni gnyis te/ gang las she na/ gzhi ste srid pa gcig nas gcig tu brgyud pa'i bya ba byed pa'i phyir te 'dod chags la sogs pa mi mthun pa'i phyogs so/ /de'i gnyen po ni lam ste de bas na rnam pa gnyis la de dag gi dbye bas de mi re re zhing rnam pa dgu yin no//gang las she na/ rmongs dang phung sogs bye brag gis/ /zhes bya ba ma rig pa la sogs pa'i dbye ba dang phung po la sogs pa'i dbye bas so/ /tshig le'ur byas pa'i don ni gzung bar zhes bya ba la sogs pa yin te/kun nas nyon mongs pa'i rten can dang gnyen po'i rten can nyid kyis zhes bya ba 'dod chags la sogs pa kun nas nyon mongs pa la brten pa dang / sems bskyed pa la sogs pa kun brten pas/ /gzhi dang de yi gnyen po yis/ /zhes bya ba yin no/ / gzung bar rtog pa rnam pa gnyis/ /zhes bya ba ni bshad zin to/ /ma rig pa dang rnam par byang ba'i phung po la sogs pa'i rab tu dbye bas zhes bya ba ni ma rig pa la sogs pa'i rab tu dbye ba dang / bla na med pa'i gzugs la sogs pa'i dbye bas so/ /rmongs pa zhes bya ba la sogs pa ni bshad zin to//'dzin pa'i rnam par rtog pa gnyis ni bdag sogs zhes bya ba la sogs pa smos pa yin te/ rdzas dang brtags pa'i rten can gyi/ /zhes bya ba ni gang zag dang skyes bu la gnas pa 'dzin pa rnam pa gnyis su 'dod ces bya bar shes par bya'o//de bzhin zhes bya ba ni de yang re re zhing rnam pa dgu'o/ /gang las she na/ bdag sogs rang dbang ngo bo dang / /zhes bya ba ste/ rang dbang can gyi bdag tu lta ba la sogs pa'i tshul gyis so/ /phung sogs rten ni phung po dang skye mched dang khams la sogs pa la dmigs pa yin pa'i phyir ro//tshig le'ur byas pa'i don ni la la zhig gis btags pa nyid yin pa'i phyir rdzas te gang zag go/ /tha snyad nyid du btags pa nyid kyis na btags pa ste skyes bu'o/ /de la dmigs pa ni de'i yul te zhes bya ba la sogs pas rdzas dang zhes bya ba la sogs pa bshad pa yin no//bdag rang dbang can du phung po la sogs pa la dmigs pa nyid kyis na bdag rang dbang can dang phung po la sogs pa'i dmigs pa ste/ rang dbang zhes bya ba la sogs pa dang / de bzhin zhes bya ba la sogs pa bshad pa yin no//de la mdor bsdus pa'i don ni 'di yin te zhes bya ba ni brjod par bya ba mang du yod na yang mdor bsdus na rnam par rtog pa bzhi'i don bshad par bya'o/ /re zhig gzung ba'i rnam par rtog pa gnyis ni gzung bar zhes bya ba la sogs pa smos pa yin te/de la kun nas nyon mongs pa bzhi'i rten can ni 'dod chags la sogs pa la gnas pa'o/ /ma rig pa ni mi shes pa'o/ /gzugs la sogs pa'i phung po ni gzugs dang tshor ba la sogs pa'o/ /ming ni tshor ba la sogs pa gzugs can ma yin pa'i phung po bzhi'o//gzugs ni gzugs kyi phung po'o/ /'di dag la mngon par zhen pa ni ming dang gzugs la mngon par zhen pa'o/ /mtha' gnyis la chags pa ni rtag pa dang chad pa'i mtha' la zhen pa'o/ /kun nas nyon mongs pa ni 'dod chags la sogs pas so//rnam par byang ba ni mya ngan las 'das pa'o/ /'phags pa'i lam la mi gnas pa ni mthong ba'i lam la sogs pa la mngon par zhen pa'o/ dmigs pa ni gzugs la sogs pa la mngon par zhen pa'o/ /bdag la sogs pa ni 'dod chags dang gzhan du 'du shes pa la sogs pa'o//rnam par dag pa bskyed pa la sogs pa ni 'khor gsum rnam par dag pa ma skyed pa ste/ de yang dag par sbyang ba'i rnam par dag pa gsum mo/ /de la gzung ba'i bdag nyid can gyi rnam par rtog pa gang yin pa de'i gnyen po'i phyogs kyi lam la gnas pa'o//phung po ni phung po rnams so/ /skye ba'i sgo ni mig la sogs pa'i skye mched rnams so/ /rigs ni khams bco brgyad do/ /skye ba ni rten cing 'brel par 'byung ba'o/ /stong pa nyid ni bdag med pa'o//pha rol tu phyin pa'i don ni 'tshang rgya ba nyid do/ /mthong ba dang bsgom pa dang mi slob pa'i lam ni gsum ste/ de la gzung ba'i bdag nyid can gyi rnam par rtog pa gang yin pa ni de dag go/ /kha cig na re de la gzhi thams cad pa kho na dang por gzung ba'i rnam par rtog pa yin la rnam par byang ba'i gzhi kho na ni gnyis pa yin pas 'di dag ni gzung ba'i rnam par rtog pa 'di gnyis khyad par yin no//de ltar byas na gzung ba'i rnam par rtog pa dang po gang yin pa gnyis pa yang de yin no/ /zhes snga ma ston par byas pa yin la re zhig dang po gang yin pa de gnyis pa yang yin te 'di ltar gzhi thams cad pa dang po gzung ba'i rnam par rtog par 'gyur gyi gnyis pa ni dang po ma yin te/'di ltar gzung ba'i rnam par rtog pa gnyis pa ni rnam par byang ba tsam la brten pa yin no zhes zer ro/ /gzhan dag ni 'di gnyis kyi dbye ba ni gzhan rnam par dpyad pa'i don gyis dang po ni kun nas nyon mongs pa'i gzhi la rten pa yin la gnyis pa ni rnam par byang ba tsam la brten pa yin no zhes zer ro//da ni 'dzin pa'i rnam par rtog pa ni 'dzin par zhes bya ba la sogs pa smos pa yin te/gzhan gyis yongs su brtags pa'i gang zag rdzas su yod pa'i rten can de ni gzhan la mi ltos pa nyid dang / cha shas med pa nyid dang / rgyur gyur pa nyid dang lta ba po yin pa nyid kyis na bdag rang dbang can dang gcig dang rgyu dang lta ba po'o/ /'di dag nyid ni bdag go//der rtogs pa nyid kyis na kun nas nyon mongs pa ni 'dod chags la sogs pa'o/ /'dod chags dang bral ba ni yul la phyir phyogs pa'o/ /mthong ba dang bsgom pa ni mthong ba'i lam dag go/ /don byas pa ni bya ba byas pa nyid do/ /'di dag kyang zag pa dang bcas pa dang zag pa med pa'i gzhi la brten pa nyid yin pa'i phyir rten gyi bdag nyid yin pa'o//rnam par rtog pa rtsi ba na bdag rang dbang can la sogs pa'i rim gyis gzhi'o / /kun nas nyon mongs pa rten gyi bdag nyid can gyi rnam par rtog pa zhes bya ba la sogs pa'i rim gyis lnga ste/'dzin pa'i rnam par rtog pa dgu po 'di dag gang yin pa des bsdus pa yin no/ /rtag par 'dzin pa'i rnam par rtog pa skyes bu btags par yod pa'i rten can phung po ni gzugs la sogs pa'o/ /skye mched ni phyi dang nang gi bdag nyid can mig dang gzugs la sogs pa bcu gnyis so//khams ni mig dang gzugs dang mig gi rnam par shes pa'i khams la sogs pa'i dbye bas rnam pa bco brgyad do/ /rten cing 'brel bar 'byung ba ni grags par zad do/ /rnam par byang ba ni mya ngan las 'das pa'o//mthong ba dang bsgom pa dang khyad par dang mi slob pa'i lam ste bzhi'o/ /de rnams dang 'dzin pa'i bdag nyid can gyi rnam par rtog pa gang yin pa 'di rnams ni byang chub sems dpa' nges par 'byed pa'i cha dang mthun pa gzhi'i dro ba la sogs pa bzhi dang grangs ji lta ba bzhin du ldan pa yin no//de lta bu'i rnam par rtog pa bzhi dang ldan pa zhes bya ba ni bshad zin to/ /rnam par rtog pa mtha' yas pa yin na yang mi mthun pa'i phyogs yin pa'i phyir lam du gtogs pa kho na'i rnam par rtog pa bstan gyi de las gzhan pa ni ci yang mi byed pa nyid kyis na spang bar bya ba ma yin zhing blang bar bya ba ma yin pas nyes pa med do//tshigs su bcad pa sbyar ba dang mthun par zhes bya ba ni/ /dmigs pa dang ni rnam pa dang / /zhes bya ba la sogs pa'i rim gyis yongs su 'dzin pa sngar gsungs nas yang mjug thogs su bar skabs kyi tshigs su bcad pa gsungs so zhes bya bar sbyar ba'o//yang na de'i stobs kyi ji skad du bshad pa'i khyad par du 'gyur ro zhes bya bar sbyar ro/ /yongs su 'dzin pa'i dbang gis rnam par rtog pa bzhi po nyan thos la sogs pa dang thun mong ma yin pa bstan par bya ba'i phyir sems mi 'gong zhes bya ba la sogs pa gsungs pa yin te/nyan thos rnams kyi ston pa po ni phyi dang nang du lta ba yod pas de lta bu ma yin no zhes bya bar dgongs so/ /bcom ldan 'das nyid lam de ston par mdzad pa yin no zhes thos pa ma yin nam zhe na/gal te de rnams kyang byang chub sems dpa' dang 'dra bar mi dmigs pa la dmigs par 'gyur na bden mod kyi 'di yod pa ma yin no/ /yang na bcom ldan 'das rnam par rtog pa mi mnga' ba de'i dbang gis dngos po mi rtag pa la sogs pa'i lam rang gi bsam pa'i dbang gis zhugs pa yin du zin na yang 'on kyang yang dag par 'dzin pa yod pa ma yin te/yang dag par ston par mdzad na yang de'i bsam pa'i dbang gis gzhan du 'gyur ba'i phyir ro/ /'dir bcom ldan 'das kyi nyes pa ma yin te/ sems can gyi bsam pa'i dbang gi skabs dang 'dra bar theg pa chen po la 'dzeg par bya ba'i phyir yang dag par ston par mdzad pa yin na yang de ltar smon lam btab pa'i phyir ro//nyan thos nyid yang dag pa ma yin pa'i lta ba skyes pa yin te gang gi phyir rang gi mngon pa'i nga rgyal gyi dbang gis srid pa thog ma med pa nas rnam par bsgos pa'i bag chags kyis bcom ldan 'das don dam par dngos po yod par zhal gyis bzhes pa dang de bzhin du mi rtag pa la sogs pa'i lam gyis shes bya'i sgrib pa spong ba la zhugs par rtogs pa yin no//de lta na ni so so'i skye bo rnams kyang de ltar thal bar 'gyur ro//de nyid kyi phyir 'di nyid las gzhan gyi chos rnams kyang yod la zhes bya ba la sogs pa 'og nas bshad pa yin no/ /bsgrub pa dang ldan pa la zhes bya ba la sogs pa la/ rtogs pa yi ni chos drug ste/ /zhes bya ba ni rtogs par bya ba'i chos rnam pa drug gi rten zhes bya ba gzhi la ni byang chub sems dpa' rgyud kyi rigs yin no zhes bshad par bya'o//gal te byang chub sems dpa' rten pa'i rtogs par bya ba'i chos gang zhig yin zhes rtogs pa la/ der de bskyed pa'i rim gyis chos de bstan par bya ba'i phyir gnyen po dang ni zhes bya ba la sogs pa gsungs te/gnyen po dang ni spong ba dang / /zhes bya ba ni bsgom pa'i rab kyi mthar thug pa la gnas pa'i sems kyi khyad par dang des spang bar bya ba mi mthun pa'i phyogs dag go/ /gnyen po dang mi mthun pa de dag spangs pa ste/de dag yongs su gtugs pa ni de'i rnam par rtog pa zad pa'o/ /shes rab dang snying brtser bcas pa ni shes rab dang snying rje dag go/ /slob ma thun mong min nyid dang / /zhes bya ba ni nyan thos la sogs pa dang thun mong ma yin pa'i chos so/ /gzhan gyi don gyi go rims dang //zhes bya ba ni de'i bsam pa ji lta ba bzhin du theg pa gsum ston pa'i rim pa'o/ /ye shes rtsol ba mi mnga' bar/ /zhes bya ba ni gzhan gyi don gyi ye shes rang gi ngang gis skye ba yin pa'i phyir ro/ /gang sngar gyi rten bshad pa dang bcas par 'grel pa las bstan pa ni re zhig dang por zhes bya ba la sogs pa yin te/re zhig dang por 'jig rten pa'i nges par 'byed pa'i cha dang mthun pa dro ba la sogs pa skye ba yin pa'i phyir ro/ /de'i 'og tu 'jig rten las 'das pa'i mthong ba'i lam dang bsgom pa'i lam skye ba yin pa'i phyir ro//de'i 'og tu de dag skyes pa'i stobs kyis zhes bya ba dro ba la sogs pa dang mthong ba la sogs pa'i lam skye ba'i mthus rkun po phyung ba dang sgo 'phar bcad pa lta bur zhes bya ba skad cig ma gang kho na ji ltar rkun ma gcig bton nas skad cig ma de nyid kho na la gzhan gang yin pa de mi 'jug par bya ba'i phyir sgo 'phar bcad pa ste/de 'jug pa'i sgo gcod pa dang 'dra bar dus mnyam du gnyen po'i phyogs ma lus par yongs su dag pa'i sems kyi khyad par rnams dang mi mthun pa'i phyogs spang bar bya bas nyon mongs pa'i sems kyis khyad par de dag go rims bzhin du skye ba dang 'gag pa 'byung ba yin pa'i phyir te/gnyen po dang ni spong ba dang / /zhes bya ba bshad pa yin no/ /de'i 'og tu de dag mi dmigs pas zhes bya ba dmigs par bya ba'i bdag nyid yang dag par na stong pa nyid yin pas gnyen po dang mi mthun pa'i phyogs skye ba dang 'gog pa dang nye bar dmigs pas skye ba dang 'gog pa dang gnyen po skye ba mi mthun pa'i phyogs 'jig pa de dag dang ldan pa'i rnam par rtog pa ste/nyon mongs pa'i bsam pa spangs pas bdag la yang dag pa'i bsam pa skyes so zhes kun du rtog pa de spangs pa skye ba yin pa'i phyir/de dag yongs su gtugs pa dang / /zhes bshad pa yin no/ /de'i 'og tu sangs rgyas su gyur nas gzhan gyi don bya'o zhes sngon gyi smon lam dang de la sbyin pa la sogs pa thabs la mkhas pa gang yin pa ste/sems mi 'gong ba nyid la sogs pa de'i stobs kyis 'khor ba dang mya ngan las 'das pa la mi gnas shing srid pa dang zhi ba la mi gnas pa de'i mtshan nyid ste de'i bdag nyid can gyi shes rab dang snying rje dag gis shes rab dang thabs kyi ye shes skye ba'i phyir//shes rab snying brtser bcas pa dang / /zhes bshad pa yin no/ /de'i 'og tu de dag skyes pas zhes bya ba shes rab dang thabs kyi ye shes gnyis skyes pas nyan thos la sogs pa dang thun mong ma yin pa ste/ chos gang nyan thos dang rang sangs rgyas dang mnyam pa ma yin pa stobs bcu la sogs pa de skye ba'i phyir//slob ma thun mong min nyid dang / /zhes bshad pa yin no/ /de'i 'og tu bsam pa ji lta ba bzhin du gdul bya rnams kyi spyod pa las ma 'das pas bzhugs pa la sogs pa la ldem por dgongs pa'i sgo nas zhes bya ba gal te dang por chos dang gang zag la bdag med pa thos pas skrag nas mu stegs pa'i lta ba nyid la gnas par 'gyur bas snying rjes bu gcig pa dang 'dra bar mchod sbyin la sogs pa la srog gcod pa la sogs pa dang thog ma med pa'i dus nas goms pa'i rtag pa dang tshangs pa la sogs pa'i lta ba las bzlog nas theg pa gnyis las gsungs pa'i dge ba bcu'i gzhi dang mi rtag pa la sogs pa'i lta ba la bcug cing ngal so ba sngon du 'gro bas theg pa chen po la gzhag pa'i bsam pa'i thabs kyis de ltar theg pa gsum gyi lam la bkod pa gang yin pa de'i mtshan nyid kyis gzhan gyi don gyi go rims bzhin du de las 'byung ba'i phyir/gzhan gyi don gyi go rims dang / /zhes bshad pa yin no/ /de'i 'og tu 'khor ba ji srid kyi bar du phyi'i mtshan ma dang 'bad pa dag stong pa nyid yin pa'i phyir mtshan ma med cing lhun gyis grub par gzhan gyi don gyi ye shes 'byung ba'i phyir/ye shes rtsol ba mi mnga' bar/ /zhes bya bar bshad pa yin no/ /'di ni zhes bya ba la sogs pa ni go sla'o/ /byang chub sems dpa' ni sgyu ma'i skyes bu ltar chos thams cad la zhen pa med pa nyid du slob pa ma yin nam/ ji ltar yang dag par na rten yod pa yin te /de ni mi rigs so zhes rtog pa la kun rdzob tu gtan la dbab pa ni bsgrub pa'i chos zhes bya ba la sogs pa smos pa yin te/ bsgrub pa'i chos ni sems bskyed pa la sogs pa'o/ /de'i gnas skabs kyi dbye ba ni gdul bya'i bye brag las rang bzhin phye ba'o//dbye ba des yang dag par na de las gzhan pa'i rang bzhin mi rigs pas chos kyi dbyings kyi ngo bo nyid kho na ji skad du bshad pa'i chos kyi gzhir gyur pa yin te/ gnyen po dang ni spong ba dang / /zhes bya ba la sogs pa la chos drug gi rten yin no//byang chub sems dpa' rnam pa bcu gsum la rigs zhes bstan to/ /zhes bya ba ni nges pa'i tshig tu na yon tan bskyed pa'i don gyis na kun rdzob tu rigs zhes bya'o zhes yum las bshad do/ /chos kyi dbyings la zhes bya ba la sogs pa'i 'og nas bshad pa'i tshigs su bcad pa phyed snga mas ni phyogs snga ma ston pa'i zur gyis rnam par 'byed pa ni gal te zhes bya ba la sogs pa smos pa yin te/yang dag par na de las gzhan pa'i rgyu yod par mi 'thad pas chos kyi dbyings kho na ste/ gnyis su med pa'i ye shes nyid 'phags pa'i chos rtogs par 'gyur ba zhes bya ba stobs bcu la sogs pa'i yon tan thob pa'i rgyu yin pa'i phyir ro//gal te de'i bdag nyid can gyi/ /zhes bya ba chos kyi dbyings kyi bdag nyid can no/ /bla na med pa'i sangs rgyas kyi chos rnams ni stobs bcu la sogs pa'o//byang chub sems dpa' rang bzhin du gnas pa zhes bya ba ni phung po la sogs pa med pas shes pa tsam gyi tshul lo/ /rigs ni chos nyid du brtags pa'o/ /ci la yod pa yin pa'i phyir/ /zhes bya ba ni de'i tshe chos kyi dbyings la dbye ba med pa las cir 'gyur zhe na/'di ni rang bzhin gyis gnas pa yin te/ thog ma med pa'i dus nas brgyud pa'i chos nyid las thob pa yin la/ 'di ni tshogs pa las byung ba yin te/ sngon gyi dge ba'i rtsa ba goms pa las thob pa yin no/ /'di ni nyan thos dang rang sangs rgyas dang de bzhin gshegs pa'i rigs su nges pa yin te/rkyen chen pos kyang bzlog par mi nus pa'i phyir ro/ /'di ni nyan thos la sogs pa'i rigs ma nges pa yin te/ rkyen gyis bzlog tu 'dod pa yin pa'i phyir rigs tha dad pa zhes bya bar rigs pa ma yin no/ /de ltar na byang chub sems dpa' kho na ma yin no zhes bya ba byang chub sems 'ba' zhig rigs yin no zhes bya ba mi rigs te/nyan thos la sogs pa'i rigs kyang rigs nyid du 'dir 'dod pa yin pa'i phyir ro zhes bya ba'i rgol ba po gzhan gyi bsam pa yin no snyam pa zhes bya ba de ltar skye bo blo dman pa lung mngon par mi shes pa de rnams kyi ngor zhes bya ba la brtse ba'i dbang gis de mi shes pa bsal bar bya ba'i phyir dogs pa bsu ba sngar gsungs shing rgol ba bslangs nas bar skabs kyi tshigs su bcad pa gsungs so zhes bya bar sbyar ro//de la rgol ba'i don phyed snga ma'i lan ni ji ltar zhes bya ba la sogs pa smos pa yin te/ nyan thos kyi theg pa la sogs pa ni nyan thos dang rang sangs rgyas kyi lam ste de rtogs pa'i rim gyis zhes bya ba ni gong nas gong du shes pa'i go rims kyis ji ltar te ji lta bar dmigs pa bzhin du byang chub sems dpas chos kyi dbyings la zhes bya ba ni lhag ma'o//de bzhin du de dang 'dra bar 'phags pa'i chos rtogs par bya ba'i phyir dmigs par bya'o zhes bya ba la sogs par sbyar ro/ /des cir 'gyur zhe na/ rigs nyid du tha snyad 'dogs so zhes bya ba byang chub sems dpa' kho na nyan thos la sogs pa'i rigs su tha snyad du byed do//ci'i phyir zhe na/ chos kyi dbyings kho na rgyur gyur par rnam par gzhag pa yin pa'i phyir te/ yang dag par na de las gzhan pa'i rgyu yod par mi 'thad pas theg pa gsum gyis rigs kyi rgyu nyid byang chub sems dpa'i chos kyi dbyings kyi bdag nyid kho na yin par mdo sde las bstan pa'i phyir lung las chos kyi dbyings kyi rang bzhin byang chub sems dpa'i rgyur byas nas spyir theg pa gsum 'bras bu yin pa la brten te/ji ltar nyan thos dang rang sangs rgyas kyi rigs rnam par gzhag pa de bzhin du byang chub sems dpa'i gnas skabs su de bzhin gshegs pa'i rigs shes par 'gyur ro/ /zhes bya ba ni spyi'i don yin no/ /theg pa gsum dbyer med pa'i phyogs ltar na yang nyan thos dang rang sangs rgyas kyi theg pa gnyis khas blangs pa de rigs pa'i dpes byang chub sems dpa' rigs su rnam par gzhag pa gang yin pa de'i phyir dpe ma grub pa'i dogs pa mi bya'o//lan cig kyang zhes bya ba la sogs pa la lan gzhan du gsungs te zhes bya ba ni yang dag par na rten dang brten pa po'i dngos po yod pa ma yin na yang chos kyi dbyings thun mong ma yin pa nyid kyi phyir theg pa gsum po mngon sum du bya ba'i phyir 'dod chags dang bral ba nyid la sogs pa'i yon tan brten pa po nyid du yongs su brtags nas/byang chub sems dpa'i rigs yin par rnam par gzhag pa'i skabs su theg pa gsum gyi rigs su rnam par gzhag pa tshigs su bcad pa phyed 'og mas lan btab pa ni brten pa'i chos kyi zhes bya ba la sogs pa gsungs pa yin no/ /lung las 'phags pa'i gang zag thams cad ni 'dus ma byas kyis rab tu phye ba'o//zhes gsungs pa'i phyir dang po kho nar rigs brjod par bya ba yin te sems bskyed pa dang / thar pa dang nges par 'byed pa'i cha dang mthun pa rnams ni de sngon du 'gro ba ma yin nam ji ltar na de ltar bshad/bden mod kyi 'di ni don gyi go rims yin la 'di yang bstan pa'i go rims yin te/ 'bras bu gang yin pa bstan nas de'i 'og tu rgyu bstan pa yin pas nyes pa med do/ /ji skad du bshad pa'i bsgrub pa ste sems bskyed pa la sogs par mi dmigs pa'i mtshan nyid du sngar bshad pa'o//de'i rten du gyur pa zhes bya ba la sogs pa la dmigs pa zhes bya ba la sogs pa'i tshig le'ur byas pa'i don ni re zhig dang por zhes bya ba la sogs pa smos pa yin te/ dang por sbyor ba zhes bya ba ni thog mar nyan thos la sogs pa dang thun mong du bshad pa dge ba dang mi dge ba dang lung du ma bstan pa ste blang bar bya ba dang dor bar bya ba dang btang snyoms su bya ba'i gnas rnams so//gang yin zhe na/ go rims bzhin du dge sbyong gi tshul nyid dang srog gcod pa nyid dang / lung du ma bstan pa'i lus kyi las la sogs pa zhes bya ba la/dge sbyong gi tshul ni dri ma med pa'i lam dang / bsam bzhin du 'khrul pa med par gzhan gyi srog gcod pa dang shes bzhin ma yin pa'i lus kyi nyes par spyod pa'i las rnams so/ /sogs pa'i sgra ni re re zhing sbyar te/ tshul khrims dang / ma byin par len pa dang /ngag gi nyes par spyod pa'i las la sogs pa ste/ chos gsum po de dag go/ /de'i 'og tu de dag nyid ces bya ba sngar bshad pa rnams so/ /lhag ma rnams zhes bya ba sa bon rul ba dang 'dra ba nyid kyis na lung du ma bstan pa dor la gang dge ba dang mi dge ba'i chos gang yin pa de dag ni 'jig rten pa la sogs pa rnam pa gnyis su dbye ba bzhi nyid kyis zhes bya ba de rnams nyid re re zhing 'jig rten dang 'jig rten las 'das pa dang zag pa dang bcas pa dang zag pa med pa'i dbye bas phung po rnam pa bzhi nyid do//de ni grangs bzhin du zhes bya ba 'jig rten pa'i lam gyis bsdus pa yin pa'i phyir 'jig rten pa rnams te/byis pa'i skye bo zhes bya ba la sogs pa'o/ /yang dag pa'i 'phags pa'i lam gyis bsdus pa'i phyir 'jig rten las 'das pa ste/ 'phags pa'i skye bo zhes bya ba la sogs pa'o/ / bdag tu lta ba'i gnyen po ma yin pa nyid kyis na 'jig rten pa nyid yin pa'i phyir zag pa dang bcas pa ste/ bdag tu lta ba zhes bya ba la sogs pa'o/ /bdag tu lta ba'i gnyen po nyid yin pas na der lta ba zhes bya ba la sogs pa ste / 'jig rten pa dang 'jig rten las 'das pa dang zag pa dang bcas pa dang zag pa med pa ste bzhi'o//rgyu'i lhan cig byed pa las skyes pa'i phyir rgyu dang zhes bya ba la sogs pa yin no/ /nyon mongs pa la sogs pa bsam pas rang nyid skye ba'i phyir rgyu la mi ltos pa zhes bya ba la sogs pa yin te 'dus byas dang 'dus ma byas gnyis so//'phags pa'i skye bo dang zhes bya ba smos pa la yang dag par rdzogs pa'i sangs rgyas kyi thugs kyi rgyud las byung ba nyid yin pa'i phyir/ thun mong ma yin pa'i bdag nyid can ni yang dag par rdzogs pa'i sangs rgyas kyi rgyud las byung ba'i chos can no//stobs bcu ni gnas dang gnas ma yin pa mkhyen pa'i stobs te de ltar gcig yin no/ /de lta bu la sogs pa zhes bya ba'i sogs pa'i sgra ni phung po la sogs pa re re zhing sbyar bar bya ste/ skye mched dang gzugs med pa'i skye mched rnams dang /yang dag par spong ba dang / gzugs la sogs pa'i khams dang / stong pa nyid dang / gzugs med pa dang / mi 'jigs pa la sogs pa'o/ /yang dag par rdzogs pa la sogs pa ni bshad zin to/ /'phags pa rnam par grol ba'i sdes rten dang dmigs pa dag gi mtshan nyid kyi dbye ba ni rang bzhin gtso bor gyur pa ni rigs yin la/'gyur ba gtso bor gyur pa ni dmigs pa yin no zhes bshad do/ /dang po yul gyi shes pa rtogs nas de'i 'og tu de bstan pas sems can thams cad kyi mchog tu 'gyur bar bskyed par bya'o zhes bya ba'i sems chen po dang ldan pas sems can kun mchog nyid de sems chen po nyid do//gdul bya rnams kyi sems can la sogs par lta ba bag chags dang bcas pa spang bar bya ba'i phyir chos ston pas spong ba chen po nyid do/ /'dod chags la sogs pa ma lus pa spangs nas kyang byang chub rtogs par byed pas rtogs pa chen po nyid do//gsum po de dag ste chen po nyid gsum gang yin pa'i bdag nyid chen po gang yin pa rnams ched du byas shing thob par bya ba'i sgrub pa la 'jug par 'gyur ba des rang 'byung gi ye shes tsam gong nas gong du skyes pa rdzogs pa'i sangs rgyas la sogs pa'i ched du bya ba rnam pa gsum du shes par bya'o//rnam pa thams cad du zhes bya ba la sogs pa la thams cad du 'gro ba mi dmigs par rtogs pa'i sems dang nyon mongs pa bag chags dang bcas par spangs pa dang /yul dang dus kyis chod pa dang dngos po pra ba yang shes pa mi srid pas nyan thos la sogs pa la bdag nyid che ba gsum po 'di dag yod pa ma yin no zhes bya bar dgongs te/ 'dod pa tsam gyi nyon mongs pa spong ba ma yin pa'i phyir ro/ / sangs rgyas las byang chub sems dpa' rnams khyad par yang dag par na yod pa ma yin te/ sangs rgyas kyi yon tan thob pa'i skal ba yod pa'i phyir ro/ /zhes bya ba'i dgongs pa dang ldan pas sangs rgyas dang byang chub sems dpa' rnams rang 'byung ba yin no zhes bshad pa nyes pa med do//dmigs pa las ched du bya ba khyad par ci zhig yod ce na/ da ltar gyi ni dmigs pa ste nye ba na gnas pa'o/ /ma 'ongs pa ni ched du bya ba ste rgyang ring ba yin pa ni 'phags pa rnam par grol ba'i sdes mda' ltong sbyor ba dang 'ben la phog pa dang chos mthun pa yin no zhes bshad do//sgrub pa'i rten du gyur pa la sogs pa rten dang dmigs pa dang ched du bya ba brjod nas sgrub pa de'i rang gi ngo bo gang yin zhe na/ zhes 'dri ba la/ thams cad mkhyen pa nyid gsum gyi yul la zhes bya ba ni 'phags pa'i bden pa bzhi la sogs pa'o/ /spyir te thams cad la mngon par khyab pa dge ba'i chos kyi rten can te chos kyi dbyings la gnas pa'o//rnam pa kun mngon par rtogs pa la sogs pa mngon par rtogs pa rnam pa bzhi la mngon par rtogs pa re re zhing zhes bya ba re re'i bsgom par bya ba'i rtogs pa la sogs pa'o/ /pha rol tu phyin pa drug gi rten can zhes bya ba ni sbyin pa la sogs pa la brten pa'i bya ba nyams su len pa ni sgrub pa yin no//chos kyi sku'i mngon par rtogs pa ni rang bzhin gyis dkar po nyid yin zhing gnas med pa nyid yin pa'i phyir ma bshad do/ /de ltar bsgrub pa rnam par gzhag nas so so'i mtshan nyid brjod par bya ba yin pas ji lta ba bzhin du zhes bya ba 'og nas bshad pa'i rim pas sbyor ba dang mthong ba dang /bsgom pa dang khyad par gyi lam ste/ bzhi po de'i ngo bo nyid kyis bsgrub pa'i mtshan nyid go cha la sogs pa 'og nas bshad pa de rnams kyi nang nas brtson 'grus kyi ngo bo nyid yin zhing dge ba'i las la spro ba'i bdag nyid can yin pa de nyid kyis na dang po go cha'i bsgrub pa gsungs pa yin no//sbyin pa la sogs pa ste sbyin pa dang tshul khrims la sogs pa'o/ /rnam pa drug la/ de dag so sor bsdus pa yis//zhes bya ba ni sbyin pa la sogs pa de rnams nyid so so'i khongs su gtogs pa'i phyir ro/ /go cha'i bsgrub pa gang yin pa ni thog ma kho nar byang chub pa'i bar du don gyi bya ba dam bcas pa nyams su len pa'o/ /de ni ji skad du bshad pa'i 'khor gsum rnam par dag pa la sogs pas yum gsum car las drug tshan drug gis te/rnam pa sum cu rtsa drug ji lta ba bzhin du gsungs par shes par bya'o/ /tshig le'ur byas pa'i don ni chos kyi sbyin pa zhes bya ba la sogs pa smos pa yin te/ longs spyod la ltos pa med pas tshul khrims yang dag par len par byed do//tshul khrims rjes su bsrung bas ni bzod pa dang ldan par 'gyur ro/ /skyo ba brnag par nus na brtson 'grus rtsom mo/ /le lo dang bral na bsam gtan rdzogs par byed do/ /bsam gtan phun sum tshogs pa ni 'jig rten las 'das pa'i shes rab thob par bya ba yin pas de ltar sbyin pa la sogs par rtogs pa'i go rims kyis bstan to//de la byang chub sems dpa'i chos kyi sbyin pa la sogs pa la chos dang zang zing gi sbyin pa rab tu sbyin par byed pa dang / bdag nyid gcig pu dul bar bya'o zhes bya ba la sogs pa'i sems ni nyan thos kyi yid la byed pa'o/ /sogs pa'i sgras ni dngos po mi rtag pa la sogs pa'i yid la byed pa ste/ de spang ba ni tshul khrims so/ /skye bo thams cad kyis mi snyan par smra ba ni gshe ba la sogs pa brjod pa'o//de bzod pa ni bzod pa'o/ /'dun pa ni dge ba mngon par 'dod pa'o/ /des bskyed pa ni brtson 'grus so/ /theg pa gzhan dang ma 'dres pa'i sems rtse gcig pa nyid ni nyan thos la sogs pa'i lam dang tha dad par chos thams cad mi dmigs pa la dmigs pa ni bsam gtan no//bla na med pa yang dag par rdzogs pa'i byang chub tu sngo bar byed pa ni sbyin pa la sogs pa'i bsod nams sems can thams cad 'tshang rgya ba nyid du yongs su bsngo zhing stobs pa ni shes rab bo/ /'di rnams la sbyin par byed pa la sogs pa zhes bya ba sbyin par bya ba dang /sbyin pa po la sogs pa der gang mi dmigs pa ste/ der go cha bgos pa nyid kyis byang chub pa'i bar du brtson 'grus brtsams pas so / /sbyin pa'i phyogs la nyan thos kyi yid la byed pa spangs pas 'dir gzhan gyi don la dam 'cha' ba ni tshul khrims so//de med na mi 'byung ba'i sbyin pa dang / bzod pa la sogs pa yod pa ni sbyin pa la sogs pa med par gzhan gyi don bya bar mi 'thad pa'i phyir ro/ /de bzhin du bzod pa dang ldan na sems can dbang du 'gyur ro/ / 'dir yang de bzhin du sbyin pa dang tshul khrims dang brtson 'grus la sogs pa yod pa yin no/ /khon med na dgra bo zhi bar 'gyur bas sems can rnams dang rjes su mthun pa yin pa'i phyir sbyin pa la sogs pa 'byung ba'i phyir ro/ /de bzhin du brtson 'grus ni dge ba'i las la spro ba nyid kyis de dang ldan pa la sbyin pa la sogs pa dang bsam gtan dang shes rab yod pa yin te/brtson 'grus dang bral ba la sbyin pa la sogs pa mi 'byung ba'i phyir ro/ /de bzhin du bsam gtan dang ldan pa ni 'khor gsum rnam par dag pa'i sbyin pa la sogs pa dang shes rab ni yod la rnam par g.yengs pa la de mi srid pa'i phyir ro//de ltar shes rab dang ldan pa la de bzhin du sbyin pa la sogs pa yod de/ sbyin pa la sogs pa med par sems can rnams byang chub par yongs su bsngo ba'i dge ba mi srid pa'i phyir ro/ / de ltar na sbyin pa la sogs pa re re zhing tshul khrims la sogs pa khong du chud pa yin pa'i phyir/ sbyin pa la sogs pa smos pa ni rnam pa drug nyid yin no/ /de ltar sbyin pa la ji lta ba bzhin du tshul khrims la sogs pa la mi dmigs pa la sogs pa'i go cha nyid kyi zhes bya ba la sogs pa la yang sbyar bar bya'o//de ni de ltar tshul khrims bsrung / /zhes bya ba la sogs pa smos pa yin no/ /bsam gtan zhes bya ba la sogs pa'i tshig le'ur byas pa'i don ni bsam gtan zhes bya ba la sogs pa gsungs pa yin te/ dang po la sogs pa bzhi ni bsam gtan no//nam mkha' mtha' yas skye mched la sogs pa ni gzugs med pa'i snyoms par 'jug pa'o/ /sbyin sogs zhes bya ba la sogs pa ni go sla'o/ /khams gsum pa'i sems can la khyab par dmigs pa'i byams pa dang / snying rje la sogs pa'i tshad med pa rnams so//dmigs pa med pa dang zhes bya ba la sogs pa ni go sla'o/ /yang dag par gnas pa ni smon pa'i sems dang nyams su len pa'i sems kyi mthar thug pa'i sems so/ /de'i mtshan nyid ni de'i ngo bo nyid do/ /de nyid kyis na theg pa chen po'i chos mtha' dag ces bya ba sems bskyed pa la sogs pa'o//de gnon pa ni rim gyis mi ldog pa'i sems kyis bgrod pa ste/ de'i ngo bo nyid yin pas so/ /'jug pa'i sgrub pa theg chen la 'dzeg pa zhes bya ba ni bshad zin to/ /'dir yang rtogs pa'i rim pas bsam gtan la sogs pa'i rim pa yin no//de ni rnam pa dgu'o zhes bya ba gsungs pa yin no/ /snying rje chen po zhes bya ba la sogs pas brtse ba dang zhes bya ba la sogs pa'i tshig le'ur byas pa'i don bshad pa yin te/ zung du 'brel ba'i lam zhes bya ba ni shes rab dang thabs dag ni mtha' gnyis su mi ltung ba dang 'brel pa yin pa'i phyir te/thabs dang shes rab kyi ting nge 'dzin to/ /thabs la mkhas pa ni sems ma zhum pa la sogs pa'o/ /sa dang gnyen po rnams ni 'og nas ston to//tshogs zhes bya ba'i ming don dang ldan pa ni kun rdzob kyi zhes bya ba la sogs pa smos pa yin te/ kun rdzob kyi bden pa las mi 'da' bar zhes bya ba ni don dam pa dang mi 'byor pas kun rdzob tu bsgom par bya ba la sogs pa yongs su brtags pa'o/ /theg pa chen po'i don mtha' dag ces bya ba sems bskyed pa la sogs pa'o//de bsgrub pa ni nyams su blangs pas so/ /'di dag gis yang dag par 'jug pa'i ngo bor thob pa'i sgo nas legs par brtags shing 'dzin pas byang chub chen po ste/ khyab pa'i sangs rgyas nyid du 'gyur ba'i phyir ro//snying rje la sogs pa'i don bshad zin pa'i phyir bor nas ye shes kyi tshogs ni de la zhes bya ba la sogs pa smos pa yin te/ nang dang zhes bya ba la sogs pa nang dang phyi rol zhes bya ba la sogs par sbyar nas bde blag tu rtogs par bya ba'i phyir brjod par bya ste/nang gi bdag nyid can gyi mig la sogs pa ni de kho na nyid du na med pa yin pa'i phyir nang stong pa nyid do/ /de bzhin du phyi'i gzugs la sogs pa ni phyi stong pa nyid do/ /des bskyed pa yin pa'i phyir dbang pos bsdus pa yin pa'i phyir gnyi ga ste/ phyi dang nang gnyis ni phyi nang stong pa nyid do//gang zag la sogs par brtags pa'i dngos po'i chos thams cad stong pa nyid yin zhing stong pa nyid kyis nang gi bdag nyid la sogs pa stong pa nyid du dmigs pa'i shes pa'i bdag nyid can ni stong pa nyid stong pa nyid do/ /phyogs ni phyogs rnams dang sa la sogs pa'i snod dang 'gro ba rnams kyi stong pa nyid ni chen po stong pa nyid do//mya ngan las 'das pa'i lam ni mya ngan las 'das pa dang de'i lam ni don dam pa stong pa nyid do/ /rkyen las skyes dang cig shos dang / /zhes bya ba khams gsum pa ni 'dus byas stong pa nyid do//ma skyes pa la sogs pa ni 'dus ma byas stong pa nyid do/ /mtha' la sogs pa dor med dang / /zhes bya ba la rtag pa dang chad pa dang bral ba ni mtha' las 'das pa stong pa nyid do/ /thog ma dang tha ma dang dbus dang bral ba ni thog ma dang tha ma med pa stong pa nyid do//dor ba med pa ni gang du yang g.yeng ba med pa nyid kyi phyir gnas med par bsgom pa'i lam ni / dor ba med pa stong pa nyid do/ /chos kyi dbyings kyi rang bzhin ni rang bzhin stong pa nyid do/ /dngos po thams cad kyi stong pa nyid ni chos thams cad stong pa nyid do//chos skye la sogs 'das sogs dang / /zhes bya ba ni gzugs la sogs pa skye ba dang 'gag pa la sogs pa ni mtshan nyid stong pa nyid do/ /'das pa la sogs pa'i chos rnams mi dmigs pa ni mi dmigs pa stong pa nyid do/ /ldan dang cig shos ngo bo dang / / zhes bya ba ldan pa'i chos rnams ni dngos po med pa'i ngo bo nyid stong pa nyid do/ /nye bar len pa'i phung po lnga ni dngos po'i stong pa nyid do/ /nam mkha' stong zhes bya ba dang / /zhes bya ba ni 'dus ma byas nam mkha' la sogs pa ni dngos po med pa'i stong pa nyid do//rang bzhin stong pa nyid ces bya ba ni rang gi ngo bo nyid stong pa nyid do/ /chos gzhan dngos po med pa nyid/ /ces bya ba ni gzhan gyi ngo bo'i byed pa po stong pa nyid yin pa'i phyir gzhan gyi ngo bo nyid stong pa nyid do/ /stong pa nyid kyi bye brag gis/ /zhes bya ba ni de ltar na stong pa rnams kyi khyad par rnam pa nyi shu ni stong pa nyid kyi rnam pa yin no//stong pa nyid dang rnam pa nyi shu yin pa'i rgyu ni rang rang ngo bos stong pa'i phyir/ zhes smos pa yin te/ mig la sogs pa'i ngo bo nyid ji srid gzhan rnams kyis brtags pa de rnams ni rang gi ngo bo nyid stong pa yin pa'i phyir dang /de dang der kun rdzob dang don dam pa dang gnyi ga dag gis ci rigs par rnam par dpyad cing brtag pa mi bzod pa nyid kyis na stong pa nyid yin no zhes bya ba ni ye shes kyi tshogs so/ /sa'i zhes bya ba la sogs pa ni sa'i tshogs yin te/ yongs su sbyong ba ni 'dus byas pa'i khyad par rnams so//de dag kyang bsam pa la sogs pa bcu po 'di dag rang bzhin mi dmigs pa yin par shes par bya'o/ /'di dag rang bzhin zhes bya ba la sogs pa ni bshad zin to/ /don 'di nyid ni de lta bu'i mtshan nyid kyi chos bcus zhes bya ba la sogs pa smos pa yin te/rnam pa thams cad du zhes bya ba ni rnam pa kun gyis so/ /bskyed pa'i bya ba yin pa'i phyir/ /zhes bya ba ni sa rab tu dga' ba bskyed par bya ba yin pa'i phyir ro/ /yongs su ni kun nas te sa rab tu dga' ba yongs su sbyong ba'i rgyu nyid yin pa'i phyir yongs su sbyong ba'i rgyu'i khyad par bcu po 'di dag gis so//yang ji lta bu zhe na/ ngo bo nyid mi dmigs pas zhes bya ba gang la la zhig gis 'byung ba chen po la sogs pa'i rang bzhin gzhan gyis brtags pa de yang dag pa nyid du na stong pa nyid yin pas ma mthong ba'i phyir ro//des khyad par du byas pa'i mtshan nyid mi dmigs pas gang la yongs su sbyang ba ste/ 'dus byas pa'i khyad par kho nas bya'i / de las go bzlog pa gya gyu'i bsam pa la sogs pa nyes pa gzhan gyis ni ma yin no/ /rab tu dga' ba'i sa la bshad pa'i las bcus byas pa yin te/chos de rnams kyang stong pa nyid du dmigs pa na byed pa po yin gyi gzhan du mi 'gyur ro zhes bya bar dgongs so/ /de lta bu'i yongs su sbyong ba rnam pa brgyad po sa dri ma med pa'i rgyur gyur pa'i tshul khrims la sogs pa yongs su sbyong ba byas pa'i rgyu'i khyad par snga ma bzhin du ngo bo nyid mi dmigs pas khyad par du byas pa'i 'dus byas pa yin te zhes 'og nas 'byung ba'i tshig le'ur byas pa rnams la yang de bzhin du bshad par bya'o//nyon mongs pa rnams srab mor byed pas na sbyangs pa'o/ /de nyid ni yang dag par sdom pa ste/ de rnams rten pa'o//bdag dang sems can zhes bya ba la sogs pa dang / /rnam thar sgo gsum zhes bya ba la sogs pa bde blag tu rtogs par bya ba'i phyir sbyar bar bya ste/ bdag las go bzlog pa ni rnam par thar pa'i sgo gsum shes pa yin no/ /de bzhin du sems can gyi 'khor gsum rnam par dag pa nyid do//gang zag gi ni snying rje'o/ /chad pa'i ni rlom pa med pa'o/ /rtag pa'i ni chos mnyam pa nyid do/ /mtshan ma'i ni tshul gcig shes pa nyid do/ /rgyu dang phung po'i ni mi skye ba shes pa'o/ /khams kyi ni zag pa shes pa'o/ /skye mched kyi ni chos rnams rnam pa gcig tu ston pa'o//khams gsum pa la gnas pa'i ni rtog pa kun tu 'jam pa'o/ /chags pa dang sems kun tu zhum pa'i ni 'du shes su lta ba'o/ /sangs rgyas dang chos dang dge 'dun gyi bdag nyid can ni dkon mchog gsum dang de'i tshul khrims kyi ni nyon mongs pa spong ba'o//lta ba la mngon par zhen pa'i ni zhi gnas nges par sems pa dang / lhag mthong la ni mkhas pa dang / sems dul ba nyid dang / thams cad la thogs pa med pa'i ye shes so/ /stong pa nyid la rtsod pa'i ni chags pa'i sa ma yin pa'o//de dang 'gal bar brjod pa'i ni gang du 'dod par zhing gzhan du mnyam par 'gro ba'o/ /thams cad du bdag nyid kyi ngo bor ston pa zhes bya ba dang nyi shu'o/ /bdag la sogs pa'i lta ba med pa dang / rnam par thar pa'i sgo shes pa la sogs pa skyes pa'i tshogs bsam gyis mi khyab pa nyid kyis sa ring du song ba 'thob par 'gyur ro zhes bya bar dgongs so//nyan thos la sogs pa'i rigs dang zhes bya ba la sogs pa bde blag tu rtogs par bya ba'i phyir rigs dang brgyad pa dang zhes bya ba la sogs pa dang sbyar bar bya ste/nyan thos la sogs pa'i rigs ni rigs kyi sa'o / /'bras bu dang po la zhugs pa rgyun du zhugs pa'i 'bras bu la zhugs pa gang yin pa de ni brgyad pa'i sa'o/ /rgyun du zhugs pa ni mthong ba'i sa'o/ /lan cig phyir 'ong ba ni bsrabs pa'i sa'o/ /phyir mi 'ong ba ni 'dod chags dang bral ba'i sa'o//dgra bcom pa ni byas pa rtogs pa'i sa'o/ /zhugs pa gsum ni nyan thos kyi sa'o/ /rang sangs rgyas rnams ni rang sangs rgyas kyi sa zhes bya ste/ de ltar sa brgyad de / nyan thos kyi rigs la sogs pa'i shes pa'i khyad par rnams so//'dir rigs kyi sa la sogs pa ni byang chub sems dpa' rnams kyis rtogs par bya ba ma yin pas ming tsam zhig brjod pa yin la de bas na rgyu dang mtshan nyid ma brjod do zhes brtsad par mi bya'o/ /byang chub sems dpa'i sa dgu ni gcig yin pas sa dgu 'das nas zhes bshad par bya'o //theg pa gsum gyi don thob pa ni nges par 'byung ba yin te/ de ni/ thob pa'i mtshan nyid nges 'byung dang / /zhes gsungs pa yin no/ /gzhan dag ni tshul shes pa rnams kyis go sla'o/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan las/seng ge bzang po'i zhal snga nas kyi gzhung chos kyi grags pas dka' 'grel du byas pa las skabs dang po'i 'grel pa bshad pa'o// //rnam pa thams cad mkhyen pa nyid rtogs pa ni zhes bya ba la sogs pas lam shes pa nyid gsungs pa yin te/rang bzhin gyis 'od ni ye shes las byung ba'o/ /rnam par smin pa'i 'od ni las las skyes pa'o/ /lam shes pa nyid kyi ni zhes bya ba la sogs pa'i tshigs su bcad pa'i don ni/ de la zhes bya ba la sogs pa smos pa yin te/de la zhes bya ba ni 'phags pa'i bden pa rnam pa bzhi'i nang nas so/ /sdug bsngal gyi rnam pa bden pa'i zhes bya ba ni mi rtag pa dang sdug bsngal ba dang stong pa dang bdag med pa zhi ba'i rnam pa bzhi dang go rims bzhin du brjod par bya'o zhes bya ba ni lhag ma'o/ / de ni skye ba dang 'jig pa'i chos can nyid dang mi mthun pa nyid kyis na mi rtag pa dang sdug bsngal ba dag tu bshad la/ sdug bsngal ba nyid mi rtag pa yin par mtshungs su zin na yang zag pa dang bcas pa nyid ni mi mthun pa nyid yin gyi 'phags pa'i lam gyi ni ma yin te/ zag pa med pa nyid kyis na 'phags pa rnams dang rjes su mthun pa nyid yin par blta'o/ /gzhan gyis brtags pa'i bdag gi stong pa nyid yin pa'i phyir stong pa'i mtshan nyid kyi bdag med pa'o/ /rang nyid bdag med pa nyid kyis na de'i mtshan nyid ni zhi ba ste/ /rnam pa 'di dag gi rang bzhin mi dmigs pa nyid du zhes bya ba la sogs par sbyar ro//'dis ni 'di lta ste mi rtag pa nyid dang / sdug bsngal ba nyid dang / bdag med pa nyid dang / zhi ba nyid de rnam pa bzhi dag go/ /kun 'byung gi bden pa'i zhes bya ba la sogs pa la rgyu ni sdug bsngal gyi rtsa ba'i rgyu yin pas so//kun 'byung ba ni 'phral gyi sdug bsngal gyi'o/ /rab tu skye ba ni 'phral du shin tu sdug bsngal ba'o/ /rkyen ni sdug bsngal gcig nas gcig tu brgyud pa'i'o/ /de rnams kyi ngo bo nyid ni nad de/ ma zhu ba la sogs pa dang / 'bras dang zug rngu ni grags par zad do//sdig pa ni 'joms pa ste/ rnam pa 'di rnams kyi ngo bo nyid mi dmigs pa la sogs pa ni snga ma bzhin no/ /'dis ni rgyud la sogs pa'i bdag nyid kyi rnam pa bzhi yin te/ 'di lta ste nad nyid dang / 'bras nyid dang / zug rngu nyid dang / sdig pa nyid do/ /sngar bshad pa'i bden pa dag gi rnam pa gzhan dag ni yid 'byung ba dang zhes bya ba la sogs pa gsungs pa yin te/ yid 'byung ba ni skyo ba'o/ /'dod chags dang bral bar bya ba ni yul la rgyab kyis phyogs pa'o/ / 'gog pa ni sems dang sems las byung ba mi rgyu ba'am sems phra bar 'jug pa'i gnas skabs so/ /de'i don gyi phyir zhugs pa ni nyams su len pa dang ldan par 'gyur ba'o zhes 'byung ba'i phyir zhes bya ba ni nyan thos kyi lung las gsungs pa ste/ sdug bsngal ba dang zhes bya ba la sogs par rjes su sbyar bar bya'o//yid 'byung ba'i mtshan nyid dag gi zhes bya ba ni yid 'byung ba nyid kyis so/ /pha rol dang 'jig pa'i chos can gyi rnam pa dag dang zhes bya ba ni phyir rgol bar gyur pa nyid kyis na pha rol lo/ /phyir rgol bar gyur pa ni 'jig pa'i chos can nyid yin pa'i phyir 'jig pa'i chos can nyid de 'di dag ni yid 'byung ba'i rnam pa'o//'dod chags dang bral ba'i rnam pa dag ni g.yo ba dang rab tu 'jig pa'i rnam pa dag ces bya ba yin te/ rang gi ngo bor mi gnas pa nyid kyis na g.yo ba'o/ /rgyu la mi ltos par rang bzhin gyis 'jig pa nyid yin pas na rab tu 'jig pa'o//'di dag ni 'dod chags dang bral ba'i rnam pa'o/ /'gog pa'i zhes bya ba la sogs pas ni rnam pa gzhan dag gsungs pa yin te/ 'di dang phyi ma'i 'jig pa'i gnas su gyur pa nyid kyis na 'jig pa nyid dang /srin po la sogs pa'i nye bar 'tshe ba'i yul du gyur pa nyid kyis na nad 'go ba nyid dang 'byung ba chen po 'khrugs pa dang / /glo bur ba'i gnas su gyur pa nyid kyis na 'tshe ba nyid de/ de dag nyid la so sor 'gog pa'i rnam pa gsum yin no/ / 'di rnams kyi ngo bo nyid mi dmigs pa ni snga ma bzhin no/ /yid 'byung ba la sogs pa rnam pa bden pa gnyis su gtogs pa nyid kyis na re re zhing gnyis gnyis su blta bar bya'o/ /des na yid 'byung ba la pha rol dang 'jig pa'i chos can dang / 'dod chags dang bral ba la g.yo ba dang /rab tu 'jigs pa'i rnam pa brgyad dang / 'gog pa la 'jigs pa dang / nad 'go ba dang 'tshe ba'i rnam pa drug ste/ spyir na bcu bzhi yin no/ /'gog pa'i zhes bya ba la sogs pa la nyon mongs pa dang bral ba nyid kyis na bdag med pa nyid dang / sdug bsngal ba rab tu zhi ba nyid kyis na zhi ba nyid dang /gya nom pa'i rnam pa dang bdag gis dben pa zhes bya ba bde ba dang gtsang ba dang bral ba nyid kyis na dben pa nyid de rnam pa gsum mo/ /nges par 'byung ba gang yin pa de ni mya ngan las 'das pa ste/ de'i mtshan nyid ni rtag pa dang phan pa'i dngos po nyid kyis na/stong pa nyid la sogs pa ni rnam pa gcig yin no/ /'di rnams kyi ngo bo nyid ces bya ba ni snga ma bzhin no/ /lam gyi bden pa zhes bya ba la sogs pa yongs su phyin pa'i don gyis na lam nyid do/ /nyon mongs pa med pa dang nyon mongs pa'i gnyen po'i tshogs su gyur pa na rig pa nyid do//sems phyin ci ma log par rtogs par byed pa nyid kyis na sgrub pa nyid do/ /mngon par zhen pa med pa'i rtag pa'i gnas su 'gro ba nyid kyis na nges par 'byin pa nyid do/ /rnam pa 'di rnams kyi ngo bo nyid mi dmigs pa la sogs pa ni snga ma bzhin no//rim pa 'di nyid kyis na theg pa chen por rnam pa kha cig ni rnam grangs nyid du/ kha cig ni rang gi ngo bo nyid du ston pa yin pas nyan thos kyi lam ma yin pa nyid du thal bar mi 'gyur ro/ /'di ltar zhes bya ba la sogs pas ni nges par 'byed pa'i zhes bya ba tshig le'ur byas pa'i don ston pa yin te/gzugs la sogs pa'i phung po rnams rang rang gi ngo bo dbang po dang / don lnga dang rnam par rig byed ma yin pa dang nyams su myong ba la sogs pa ni des stong pa nyid yin pa'i phyir de rnams kyi stong pa nyid ni gzugs la sogs pa'i stong pa nyid sna tshogs pa phan tshun tha dad pa med pa ni gcig yin no//gzugs la sogs pa zhes bya ba ni bshad zin to/ /de bzhin du gzugs la sogs pa la zhes bya ba la sogs pa ni go sla'o/ /gang gi phyir zhes bya ba la sogs pa la chos kyi mchog gi don du dgos pa ni 'di yin te/bdag cag gi thams cad mkhyen pas bag chags dang bcas pa'i nyon mongs pa ma lus par spangs pa'i phyir dngos po dang dngos po med pa sgyu ma lta bu'i rang bzhin du dmigs shing mkhyen gyi/ de las gzhan pa'i bdag la sogs pa gtso bo'i don ni rigs pa ma yin pas de bzhin gshegs pa las gzhan pa'i tshad mar gyur pa su zhig yod/nyan thos kyi lam zhes bya ba la sogs pas ni rang sangs rgyas kyi ye shes zab par gsungs pa yin te/ gang sgrar brjod pa ni chos bstan pa'i sgo nas chos 'phags la sogs pas shes rab kyi pha rol tu phyin pa la sogs pa ston par mdzad pa na des nyan pa po rtag tu ngu la sogs pa rnams kyis 'chad pa po'i shes pa'i rtsal rtogs par byed pa ni chos 'phags la sogs pa ston pa po'i shes pa'i nus pa khong du chud par byed cing shes rab kyi pha rol tu phyin pa la sogs pa'i ye shes bdag nyid las skye bar 'gyur ro zhes bya ba ni tha snyad du bya ba'i ston pa'i rnam pa yin la/de dag ni zhes bya bar rang sangs rgyas ni sgra med pa'i chos bstan pas zhes bya ba ngag gis ston pa med par rang gi thos pa'i ye shes la sogs pa ste/ bzung ba'i don gyi bag chags spangs pa'i ye shes dang smon lam de'i mthus gzhan dag ste/des 'dul ba'i sems can rnams dge ba bcu la sogs pa zhes bya ba srog gcod pa las ldog pa la sogs pa la 'jug par byed do/ /de'i phyir rang sangs rgyas de dag gi ye shes mi rtog pa nyid de/ ye shes kyi rtsal ni mtshan mas rtag tu med pa la sogs pa yin no//chos ston pa ni chos nye bar ston pa ma yin nam/ de med kyang ji ltar de rnam par gzhag ces rtog pa la skad kyi dbyings gzhan pa nyid du byas nas nang gi tshe brjod pa med par ston pa de yang ston pa'i don yin pa la 'gal ba med pas chos ston pa zhes bya ba la sogs pas ston pa yin te/gang gi phyir gang las shes rab kyi pha rol tu phyin pa la sogs pa'i brjod par bya ba'i chos tshig tu ston pa'i phyogs tshig tu brjod par 'dod pa la sogs pa nye bar bstan pa'i don yin na yang byin rlab kyi nyan pa po'i rgyud la da ltar khyad par dang bcas pa'i shes pa nges par skye bar 'gyur bas ston pa ni bskrun pa'i don la yang rigs pa yin pas 'gal ba med de skad kyi dbyings kyi don ni don du ma yin no zhes bya bar dgongs so//de ltar khyad zhugs pa brjod nas zhes bya ba la sogs pa ni go sla'o/ / gzung ba'i rtog pa zhes bya ba la sogs pa'i tshig le'ur byas pa'i don ni gzung ba dang zhes bya ba la sogs pa smos pa yin te/ gzung ba dang 'dzin pa nyid ni don yin te/ yul yin pa de la gang rnam par rtog pa ste/ de dag gi go rims bzhin du spangs pa dang ma spangs pa zhes bya ba gzung ba'i yul gyi rnam par rtog pa ni spangs pa dang /'dzin pa'i yul gyi rnam par rtog pa ni ma spangs pa ste/ gzung ba la sogs pa ni bshad zin to/ /rang sangs rgyas kyi theg pas zhes bya ba lam gyis bsdus pa rten pa'i chos rang nyid rtogs pa po la sogs pa gang yin pa de'i gzhi'i khyad par gyis rang nyid rtogs pa la sogs pa'i rten nyid kyis phye bas so//ji skad du bshad pa'i zhes bya ba la sogs pa la gzhi ji lta ba bzhin du rten cing 'brel par 'byung ba rnam par bsgoms pa nyid kyis zhes bya ba gzugs la sogs pa'i dngos po rnams rtogs pa las ma 'das pas sgyu ma byed pas sprul pa lta bur sgyu la sogs pa las skyes pa nyid yin pas yang dag par gzugs la sogs pa ni rigs pa ma yin pa dang /skye ba med par bsgoms pas chos khyad par du 'phags pa rtogs shing rang gi khong du chud pa la sogs pa yin par yongs su shes par bya ba yin gyi rnam pa thams cad mkhyen pa nyid ni ma yin no zhes bya ba mngon sum du ni mi bya'o//brtags pa'i chos nyid ces bya ba la sogs pa tshig le'ur byas pa'i don ni gzugs la sogs pa zhes bya ba la sogs pa smos pa yin te/ gzugs la sogs pa'i chos brda las byung ba ni sangs rgyas la sogs pas ngo bo nyid dang rgyu las nges par byas pa ni brtags pa ste ming ngo //de'i chos nyid dang mi 'gal bar ni ji ltar rgyal ba dang 'gro ba la grags pas ston pa'o/ /brtags pa'i zhes bya ba la sogs pa dang / ston pa'i rnam pa drir gyur pa//zhes bya ba la sogs pa'i bshad pa yin no/ /gzugs la sogs pa la zhes bya ba la sogs pas ni rtse mor gyur pa zhes bya ba la sogs pa'i bshad pa yin no/ /ngo bo nyid kyis stong pa nyid kyi phyir zhes bya ba la sogs pas ni nang stong pa nyid ces bya ba la sogs pa'i bshad pa yin no//gzugs la sogs pa la skye ba dang zhes bya ba la sogs pa ni gzugs la sogs pa skye ba med ces bya ba la sogs pa'i bshad pa yin no/ /rang sangs rgyas kyi zhes bya ba la sogs pa la bzod pa nyid sngon du 'gro ba can nyid 'phags pa'i bden pa bzhi po so so'i ma skyes pa la sogs pa yod pa la shes pa gnyis skye bas bzod pa dag dang shes pa dag ste/bzod pa dang shes pa bzhi yin la/ de nyid ni skad cig ma yin te/ bzod pa dang shes pa'i skad cig ma de rnams so/ /bden dang bden la zhes bya ba so sor bden pa bzhi dang 'brel pa rnam pa bzhis lam shes pa nyid la mthong ba'i lam gyi phan yon dang bcas pa ste/'bras bu dang bcas par bshad do/ /tshig le'ur byas pa'i don ni sdug bsngal la sogs pa'i bden pa'i chos mi rtag pa dang / sdug bsngal ba dang stong pa la sogs pa'i chos gang yin pa de'i shes pa ni mi dmigs par shes pa'o //de la bzod pa ni 'dod pa ste chos shes pa'i bzod pa'o/ /bzod pa sngon du 'gro ba'i chos de la de bzhin du shes pa ni chos shes pa'o/ /de bzhin du sdug bsngal la sogs pa la ma skyes pa la sogs pa yod pa la snga ma bzhin du chos gang yin pa de'i shes pa mi dmigs pa gang yin pa de ni rjes su chos shes pa'i bzod pa yin no//rjes su shes pa yang de bzhin no/ /de ltar na bzod pa dang / shes pa'i mtshan nyid bzhi po de rnams la sogs pas/'di dang gzhan pa'i yon tan dang / /zhes bya ba phyir mi ldog pa la sogs pa 'di dang skye ba dran pa la sogs pa gzhan pa'i yon tan chos dang rjes su mthun pa dag dang ldan pa'o/ /de nyid kyis na phan yon chen po ste/ /de la sogs pa'i 'bras bu thams cad la mchog tu gyur pa ster ba yin pa'i phyir ro//rnam pa ji lta bur zhes bya ba la sogs pas ni rnam pa bcu drug gsungs pa yin no/ /de bzhin nyid dang zhes bya ba la sogs pas ni 'di skad ston te/ de bzhin nyid dang sangs rgyas dag /rten dang brten pa po'i rnam grangs su khas mi len pa ni sdug bsngal la chos shes pa'i bzod pa'i rnam pa yin no//chen po nyid ni sdug bsngal la chos shes pa'i rnam pa yin no / /tshad med pa nyid ni rjes su shes pa'i bzod pa'i rnam pa yin no/ /dpag tu med pa ni rjes su chos shes pa'i rnam pa yin no//mtha' nyid la sogs pa med pa ni kun 'byung la shes pa'i bzod pa'i rnam pa yin no/ /sangs rgyas nyid du nges par 'dzin pa ni kun 'byung la chos shes pa'i rnam pa'o/ /blang ba med pa dang dor ba med pa ni rjes su chos shes pa'i bzod pa'i rnam pa yin no/ / byams pa la sogs pa bsgoms pa ni rjes su chos shes pa'i rnam pa yin no/ /stong pa nyid ni 'gog pa la chos shes pa'i bzod pa'i rnam pa'o/ /sangs rgyas nyid thob pa ni 'gog pa la chos shes pa'i rnam pa'o/ /rnam par byang ba thams cad ni rjes su chos shes pa'i bzod pa'i rnam pa'o//nyam nga ba dang nad kun sel ba ni rjes su chos shes pa'i rnam pa'o/ /mya ngan las 'das pa las 'dzin pa bzhi nyid ni lam la chos shes pa'i bzod pa'i rnam pa'o/ /sangs rgyas rnams kyis bsrung ba la sogs pa ni lam la chos shes pa'i rnam pa'o//dge ba bcu la sems can rnams dgod pa ni rjes su chos shes pa'i bzod pa'i rnam pa'o/ /sbyin pa la sogs pa'i dge ba sangs rgyas nyid du yongs su bsngo ba ni lam la rjes su chos shes pa'i rnam pa yin no/ /gzhan dag na re/ shes pa dang rnam par sbyar ba ni shes pa'i rnam pa gzhan du mi 'thad pas rnam pa 'di dag nyid kyang bden pa rnams kho na'i yin par blta bar bya'o zhes zer ro//mthong ba'i lam 'di'i yang nges par 'byed pa'i cha dang mthun pa ni rnam pa thams cad mkhyen pa nyid du gsungs pa gzung bar bya'o/ /gal te de lta yin na der yang rab tu dga' ba'i sa la sogs pa brjod pa yod pas byang chub sems dpa' rnams kyi mthong ba'i lam bstan pa yin pa'i phyir yang ci'i phyir smos she na brjod par bya ste/de bzhin gshegs pa rnams kyi ni rnam pa thams cad mkhyen pa nyid yin no zhes brjod pas/rgyu dang 'bras bu ma lus pa rtogs pa la ltos pa yin pas rgyal ba'i sras rnams kyi ni de las gsungs pa'i lam du mi 'gyur bar dogs pa bzlog pa'i don du de nyid las rgyu tsam zhig bgrangs nas rgyal ba'i sras rnams kyi mthong ba la sogs pa'i lam gyi bdag nyid can lam shes pa nyid du logs shig tu bzhag pa yin no//de ltar 'phags pa rnam par grol sde'i bshad pa'i rjes su 'brangs pa yin pa'i phyir bzod pa zhes bya ba la sogs pa bshad ma thag pa'i mthong ba'i lam gyi rnam pa yin par bzang po'i zhal snga nas kyis sbyar ba yin no//gzhan dag ni mthong ba'i lam gyi gzhung dang don ma lus pa rnam pa dang sbyar ba ma yin pas kha cig ni zhes bya ba la sogs pa smos pa yin te/ kha cig ces bya ba ni yang slob dpon la la gzhan du 'chad de de ni/ bden dang bden la bzod pa dang //zhes bya ba la sogs pa'i tshig le'ur byas pa'i don gang yin pa ni shes pa'i skad cig ma bcu drug gi bdag nyid can yin la/ de'i nye bar mtshon pa lhur len pa'i gzhung gis rnam pa'i don bstan pas / de bzhin nyid dang sangs rgyas dag /ces bya ba la sogs pa'i tshig le'ur byas pas rnam pa'i don ma bshad par zhes bya ba gzugs la sogs pa'i de bzhin nyid dang sangs rgyas dag rten dang brten pa po'i rim par mi gnas pa ni sdug bsngal la chos shes pa'i bzod pa'i rnam pa yin no zhes bya ba la sogs pa'i nges pas rnam pa'i rang gi ngo bo ma brjod par/nyan thos la sogs pa'i mthong ba'i lam ji snyed bshad pa de la skad cig ma bcu drug gang yin pa ni sdug bsngal la chos shes pa la sogs pa'i bzod pa'o/ /de'i nye bar mtshon pa nyi tsher mdzad cing sbyar bar zad pas 'dir yang byang chub sems dpa'i mthong ba'i lam gyi rnam pa 'ba' zhig smos pa ni ma yin no zhes sbyar bar mi bya'o zhes bya ba ni 'di'i dgongs pa yin no//des cir 'gyur zhe na/ bshad pa dang ma bshad pa'i rab tu byed pa ma lus pa ni mthong ba'i lam ston par byed pa yin la/ de yang / de bzhin nyid dang sangs rgyas dag /ces bya ba la sogs pa'i tshig le'ur byas pa rnams dang sbyar bar blta'o/ /phyogs 'di la bzang po'i zhal snga nas kyi nyes pa brjod pa ni de dag gis ni zhes bya ba la sogs pa smos pa yin te/ slob dpon de dag gis ni bsgom pa'i go rims la sogs pa ma bstan pa'i phyir zhes bya ba mngon par rtogs pa las gsungs pa'i rim gyis bsgom zhing bslab pa'i go rims so//sogs pa'i sgra ni bsgom pa rab kyi mthar phyin pa ste/ de las kyang sangs rgyas nyid bsgrub pa yin la 'dis ni mngon par rtogs pa'i rim pa cung zad kyang ma bstan to zhes bya ba sngar bshad pa'i sems bskyed pa la sogs pa'i lam de'i rab kyi mtha' sangs rgyas nyid bsgrub pa'i go rims cung zad kyang ma bshad la thams cad du 'brel pa'i dbang du byas pa'i go rims med pas/stong phrag brgya pa la sogs pa ltar 'chol bar 'gyur ro zhes bya bar dgongs so//nyes pa gzhan yang zhes bya ba la sogs pa smos pa yin te/ dmigs pa dang ni zhes bya ba la sogs pa smos pa'i don dro ba la sogs pa'i dmigs pa dang rnam pa'i khyad par nyan thos rnams las gang yang shin tu khyad zhugs par bstan pa de yang med par 'gyur te//phyogs 'di la ni thun mong yin pa'i phyir ro/ /de ltar na phyogs 'di ni legs pa ma yin pa snyam sems so/ /'dod chags la sogs pa'i nyon mongs pa'i tshogs kyi rtsa ba ni dngos po la mngon par zhen pa yin la de dang mi mthun pa ni bdag med pa la goms pa dang /sdug bsngal gyi phung po la sogs pa dngos po la dmigs pa dag ni phan tshun 'gal ba yin pa'i phyir bdag med pa goms pa 'grub par mi 'gyur ba ma yin nam/ ji ltar na de'i rgyu can sdug bsngal gyi phung po la sogs pa'i yul rnam pa bcu drug la dmigs pas 'dir sdug bsngal la chos shes pa'i bzod pa la sogs par 'gyur zhe na/ma yin te gang gi phyir/ de bzhin nyid dang sangs rgyas dag /ces bya ba la sogs pa'i tshig le'ur byas pa rnams kyis sdug bsngal la sogs pa rnam pa bcu drug gi rten cing 'brel par 'byung ba nyid yin par bstan pas dngos po med pa nyid du ji skad gsungs pa de bzhin du bslabs pa na /chos nyid kyis de skyed par byed par 'gyur bas don dam par don gyi bya ba mi 'thad pa'i phyir zhes thams cad du shes par bya'o//mthong ba'i lam gyi zhes bya ba la sogs pa ni go sla'o/ /mos pa rang gi don dang ni/ /zhes bya ba la sogs pa'i tshig le'ur byas pa'i don ni rang dang gzhan dang zhes bya ba la sogs pa yin te/ /rang dang gzhan dang gnyi ga'i don la dmigs pa nyid ces bya ba la rang gi don la dmigs pa ni rang nyid snod du rung ba nyid kyi phyir ro//gzhan gyi don la dmigs pa ni gdul bya snod du rung ba'i don nyid yin pa'i phyir ro/ /rang dang gzhan gyi don la dmigs pa ni rang dang gzhan snod du rung ba'i don nyid kyi phyir ro/ / ji ltar mos pa bzhin du zhes bya ba ni bdag med pa las ma 'das pas so/ /mthong ba ni bcom ldan 'das kyis byang chub kyi lam nyid du thugs su chud pa'o/ /dge ba'i chos gang yin pa ni ma chags pa la sogs pa'i ngo bo nyid yin pa'i phyir sems bskyed pa la sogs pa'o//de'i rten yin na yang zhes bya ba ni de'i gzhi yin na yang ngo / /dang por ni thog mar ro/ /mngon du mi byed pa'i ngo bo ni rang dang gzhan dang gnyi ga'i phyir sems bskyed pa la sogs pa la dmigs pa ni 'dir mngon par ma zhen pa'i rnam pa nyid yin pa'i phyir ro/ /gang las she na bsgom pa'i lam gyi dbang du byas pa las zhes bya ba smos te/goms pa'i gnas skabs las te/ rab kyi mthar thug pa med par slob pa'i dus su mngon sum du bya ba ni su la yang yod pa ma yin no zhes bya bar dgongs so/ /rang gi don la mos pa nyid ni 'di ltar rnam pa dgu nyid yin te/'di lta ste chung ngu'i chung ngu dang / chung ngu'i 'bring dang / chung ngu'i chen po dang / 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring dang / chen po'i chen po'o/ /de bzhin du gzhan gyi don la mos pa dang gnyi ga'i don la mos pa la re re zhing dgu dgu ste/mos pa rnam pa nyi shu rtsa bdun no/ /sngon gyi slob dpon rnams kyis chung ngu dang 'bring la sogs pa'i bdag nyid can 'di ni gnyen po nyid yin pas mi mthun pa'i phyogs chen po'i chen po la sogs pa rnam pa nyi shu rtsa bdun yang don gyis shes par bya'o zhes 'chad do//lung las bcom ldan 'das byang chub sems dpa' sems dpa' chen po thams cad kyang / sangs rgyas thams cad kyis bstod cing bkur la bsngags pa dang / thabs gcig tu bzhugs so zhes gsungs pas/byang chub sems dpa'i lhag par mos pa'i ston pa ni/ de bsgom pa'i byang chub sems dpa' zhes bya ba la sogs pa smos pa yin te/ bsngo ba khyad par can ni bdag med pa la lhag par mos pa dang / sems can thams cad kyi don dag gi nyan thos la sogs pa las khyad par du 'phags pa yin pa'i phyir ro//yang de'i byed pa mchog ni rang dang gzhan dag gi byang chub sgrub pa'o/ /dmigs med rnam pa zhes bya ba la sogs pa ni rang dang gzhan dang gnyi ga'i sems bskyed pa la sogs par byed pa'i yid la byed pa ni lhag par mos pa'i yid la byed pa zhes bshad do//mos pa dang bsngo ba yid la byed pa dag sngon dang phyi mar gnas pa dag gi yul ni sems bskyed pa la sogs pa yin pa'i phyir yul gyi khyad par med do zhes bya ba'i dgongs pa dang ldan pas ji skad bshad pa'i mi dmigs pa zhes bya ba la sogs pa smos te//ji skad du bshad pa'i mos pa'i khyad par mi dmigs pa gang zhig yin zhe na/ mi dmigs pa ste/ de ni dmigs med rnam pa can/ /zhes bya ba yang 'di ni yongs su bsngo ba'i yid la byed pa dmigs pa med pa zhes bya ba yin no/ /bdag tu lta ba la sogs pa'i lta ba phyin ci log med pas phyin ci ma log pa ste/phyin ci ma log mtshan nyid do/ /zhes bya ba'o/ /gzung ba la sogs pa med pas dben pa'o/ /de bzhin gshegs pa'i zhes bya ba la sogs pas sangs rgyas zhes bya ba la sogs pa'i don ston pa yin no/ / sems ma zhum pa la sogs pa dang ldan pas thabs la mkhas pa dang bcas pa'o/ /sbyin par bya ba la sogs pa mi dmigs pas mtshan ma med pa'o/ /sangs rgyas dgyes pa yin pas sangs rgyas kyis gnang ba'o/ /'dod pa la sogs pa'i khams la mngon par zhen pa med pa yin pa'i phyir khams gsum par ma gtogs pa ste/thabs bcas zhes bya ba la sogs pa bshad pa yin no/ /chung dang 'bring dang chen po yi/ /bsngo ba gzhan ni rnam gsum dang / /zhes bya ba ni bshad zin to/ /thams cad las mchog tu gyur pa'i bsod nams kyi bdag nyid skyed pa yin pa'i phyir /bsod nams che 'byung bdag nyid do/ /zhes bya ba ste/ bsod nams chen po zhes bya ba la sogs pa ni bshad zin to/ /de ltar ming du btags pa'i yid la byed pas dmigs pa med pa la sogs pa'i ming can gyi yongs su bsngo ba'i yid la byed pa bcu gnyis mi dmigs pa la dmigs pas theg pa gsum gyis gdul bar bya ba'i sems can la de rnams kyi lam nye bar ston pa'i rgyu'i ngo bo'i byed pa dang ldan pa gang yin pa de dang ldan pa rnams kyis sems can thams cad kyi don mi zad par bya ba'i phyir zhes bya ba byang chub kyi bar du 'phel bar bya ba'i don du bsngo ba rnam pa bcu gnyis kyis sngo bar byed do//gang zhig mi dmigs pa la dmigs pa'i bsngo ba'i yid la byed pa de ni go rims bzhin du zhes bya ba la sogs pa smos pa yin te/ bla na med pa'i byang chub ni 'tshang rgya ba nyid do/ /tshul khrims la sogs pa'i phung po ni zag pa med pa'i tshul khrims dang /ting nge 'dzin la sogs pa'o/ /sems gang gis sngo bar byed pa de dang de'i bdag la sogs pa dang ldan pa'i gzhi can ni bdag dang gzhan gyi rnam par rtog pa'i nyon mongs pa'i phung po'o/ /dus gsum gyi sangs rgyas kyi dge ba ni byung ba dang 'byung bar 'gyur ba dang /da ltar byung ba'i sangs rgyas rnams kyi bsod nams so/ /sbyin pa la sogs pa dang mtshan ma ni sbyin par bya ba la sogs pa 'tshang rgya ba'i rgyu nyid do/ /lam thams cad ni theg pa gsum mo/ /'dod pa la sogs pa'i khams ni 'dod pa dang gzugs dang gzugs med pa'i khams so//dge ba bcu la sogs pa'i las kyi lam ni srog gcod pa las ldog pa la sogs pa'o/ /rgyun tu zhugs pa la sogs pa ni rgyun tu zhugs pa dang lan cig phyir 'ong ba la sogs pa'o/ /bla na med pa yang dag par rdzogs pa'i byang chub la gnas pa rnams zhes bya ba ni byang chub sems dpa' rnams kyis yongs su bsngo ba khyad par can zhes bya ba la sogs pa bshad pa yin no//'dis ni sems bskyed pa la sogs pa snga ma bzhin du mos nas bla na med pa yang dag par rdzogs pa'i byang chub mi dmigs pa la sogs pa'i bsam pas sems can rnams theg pa gsum gyi rim gyis yang dag par rdzogs pa'i byang chub thob par bya ba'i phyir dge ba'i rtsa ba de bsngo bar bya'o zhes bya bar dgongs so//bsgom pa'i lam gyi rjes su yi rang ba bsgom pa zhes bya ba'i tshig le'ur byas pa dang 'grel pa ni go sla'o/ /chos kyis phongs pa'i rgyu ni rang gi chos mnyan pa la sogs pa ma thob pa'i rgyu rnams so//shin tu rnam par dag pa'i skabs yin pas rnam par dag pa spyir yin te/ kun rdzob de bzhin nyid gang yin/ /de ni don dam pa yir 'dod/ /ces bya ba'i tshul gyis de ltar thob pa dang zhes bya ba la sogs pa smos pa yin te/'bras bu dag pa zhes bya ba la sogs pa'i tshig le'ur byas pa'i don ni 'phags pa'i gang zag ces bya ba la sogs pa yin te/ 'phags pa'i gang zag ni nyan thos la sogs pa'o/ /de'i dge sbyong gi tshul gyi 'bras bu gang yin pa ni rgyun tu zhugs pa la sogs pa'o/ /de'i mi mthun pa'i phyogs gang yin pa thams cad de/de dang bral ba nyid kyis rnam par dag pa ste dri ma med pa'o/ /de gang yin zhe na/ gang gzugs la sogs pa'i rnam par dag pa ste/ gzung ba la sogs pa med pas gzugs la sogs pa'i stong pa nyid do/ /'bras bu la sogs pa ni bshad zin to//ci'i phyir zhe na/ 'bras bu ste/ rgyun tu zhugs pa la sogs pa'i snga ma bzhin du rnam par dag pa gang yin pa dang / gzugs la sogs pa la bdag tu mngon par zhen pa ste/ don dam par yod par zhen pa gang yin pa de dag dang bral bas rab tu phye ba nyid kyis na de bzhin nyid dang gzugs ni gcig pa nyid do//don 'di nyid ni gang gi phyir zhes bya ba la sogs pa smos pa yin te/ de dag gi rnam par dag pa zhes bya ba gang gi phyir 'tshang rgya ba nyid dang / gzugs la sogs pa'i dag pa dag ni tha mi dad cing bcad du med pa nyid do/ /don mtshungs pa yin na yang khyad par gyi sgo nas tha dad pa'i sgrar brjod pa'i rgyu ni rang dang spyi'i zhes bya ba la sogs pa smos pa yin te/rang dang spyi'i mtshan nyid tha dad pa nyid ma yin pas de'i phyir zhes bya ba ni 'bras bu dang gzugs la sogs pa'i rang dang spyi ji ltar grags pa'o/ /yang na gnyis su med pa'i ye shes kho na skad cig ma gcig pa nyid du gyur pa nyid kyi phyir dang /gong nas gong du rim gyis rgyud la gnas pa yin pa'i phyir rang dang spyi'o / /de dag gi mtshan nyid de/ don dam par ni sgyu ma lta bu'i ngo bo nyid de de dang 'dra bar tha dad pa nyid ma yin pa'i ngo bo nyid yin no//de ltar na rang dang spyi'i mtshan nyid tha dad pa dang bral bas go rims bzhin du de dag gi rnam par dag pa ni tha mi dad cing bcad du med pa nyid yin no/ /yang na 'dir 'di dag ni yang dag pa nyid du sna tshogs pa'i mtshan nyid kyi dbye ba med pas tha mi dad pa yin la/ rab tu dbye ba'i mtshan nyid kyi bcad pa med pas bcad du med pa nyid yin no//gang gi phyir de ltar yin pa'i phyir rnam par dag pa yin te/ gzugs la sogs pa'i rnam par dag pa gang yin pa de nyid 'bras bu'i rnam par dag pa yin no zhes bshad do/ /de gnyis zhes bya ba la sogs pa ni bshad zin to//rnam par dag pa'i khyad par ni rnam par dag pa spyir brjod nas zhes bya ba la sogs pa smos pa yin no/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan las seng ge bzang po'i zhal snga nas kyi gzhung chos kyi grags pas dka' 'grel tu byas pa las skabs gnyis pa'i 'grel pa'i bshad pa'o// //gzhi thams cad ces bya ba la sogs pas rab tu byed pa'i 'grel pa brjod nas thams cad shes pa nyid bshad pa yin no/ /tshu rol zhes bya ba la sogs pa'i tshig le'ur byas pa rnam par 'grel pa ni dus gsum pa'i zhes bya ba la sogs pa yin te/dus gsum pa'i chos rnams ni dus gsum du gnas pa'i gzugs la sogs pa'o/ /skye ba med pa'i rnam par te/ /rten cing 'brel par 'byung ba nyid kyi ma skyes pa nyid yin par mnyam pa nyid du rtogs pas zhes bya bar gcig pa nyid du shes pa'o//sangs rgyas dang byang chub sems dpa' rnams la nye bar gyur pa'i shes rab kyi pha rol tu phyin par 'dod pa rang gi sems la gnas pa'i gnyis su med pa'i ye shes gang yin pa'i ngo bo de ni nyan thos la sogs pa gzhan dag gi ma yin te/ de rnams la gzung ba la sogs pa'i bag chags yod pas thams cad du 'gro ba'i skye ba med pa'i ye shes med pa'i phyir ro//dus rnams zhes bya ba la sogs pa ni bshad zin to/ /de gang la yang mi gnas pa ni tshu rol zhes bya ba la sogs pa yin te/ rgyal ba'i sras rnams kyi shes rab kyi pha rol tu phyin pa ni tshu rol gyi mtha' ni 'khor ba ste/so so'i skye bo la sogs pas bgrod cing mthong ba nyid kyis nye bar gyur pa'i phyir srid pa'i mthar mi gnas shing mngon par zhugs pa yin no/ /ci'i phyir zhe na/ shes rab kyis zhes bya ba ste/ shes rab kyi pha rol tu phyin pa la sogs pa'i tshul phyin ci ma log par thos pa la sogs pas shes pa'i phyir ro//pha rol gyi mtha' ni mya ngan las 'das pa ste/ so so'i skye bo rnams kyis bgrod par bya ba ma yin zhing ma mthong ba nyid kyis mtha' ring ba'i mya ngan las 'das pa la mi gnas so/ /ci'i phyir zhe na snying rjes zhes bya ba ste/sems can ma lus pa la dmigs pa'i snying rjes so/ /srid pa dang zhi ba 'di dag rnam grangs gzhan gyis bsal bar bya ba ni go rims bzhin du bdag la sogs par lta ba dang mi lta bar gyur pa nyid kyis srid pa dang mya ngan las 'das pa ni rtag pa dang chad pa'i mtshan nyid yin la/de dag gi bar na mi gnas pa ni yang dag par na srid pa dang zhi ba dag med pas de'i bar yang yod pa ma yin pa'i phyir ro/ /de ltar na shes rab kyi pha rol tu phyin pa gang yin zhe na/ tshul de ltar na srid pa dang mya ngan las 'das pa mtha' dang bar na gnas pa med pas srid pa dang zhi ba la mi gnas pa yin te/srid pa dang mya ngan las 'das pa la mngon par zhen pa med pa ni shes rab kyi pha rol tu phyin pa yin par bshad do/ /'dis ni shes rab kyi zhes bya ba la sogs pa bshad pa yin no/ /byang chub sems dpa' rnams kyi yum rjes su 'gro ba'i sgo nas bshad nas ldog pa'i sgo nas nyan thos la sogs pa rnams la de med pa ni kun shes pa zhes bya ba la sogs pa yin te/kun shes pa nyid kyi gnas skabs su zhes bya ba ni thams cad shes pa'i dbang du byas par bzlog ste bstan pas zhes bya ba byang chub sems dpa' las go bzlog pa'i sgo nas bshad pa yin pa'i phyir ro //nyan thos la sogs pa la dus gsum mnyam pa nyid du shes pa med pa'i phyir zhes bya ba dus gsum du gnas pa'i dngos po skye ba med par shes pa med pas so/ /yang dag pa'i shes rab kyi pha rol tu phyin pa dang ring bar gyur pas zhes bya ba ni thams cad du mngon par zhen pa med pa'i shes pa ring du spangs pa yin te/de ni dus gsum gyi dngos po skye ba med par shes pa'i bdag nyid can yin pa'i phyir ro/ /de ltar gyur pa rang gis rtogs pa tsam ste/ rang gi rig pa'i ngo bo'i shes rab kyi pha rol tu phyin pa'i snying brtse ba dang shes rab dang bral ba'i phyir/mya ngan las 'das pa la dngos po mthong bas skrag pa'i phyir/ mya ngan las 'das pa'i chad pa'i bdag nyid can dang / 'khor ba'ang 'khrul pa gcig nas gcig tu brgyud pa cha 'dra bas rtag par lta ba skyed pa yin par gnas shing mngon par zhugs pa yin no/ /de ci'i phyir zhe na/ dngos po dang dngos po med par dmigs pa nyid kyis zhes bya ba ste/ de'i gzhung gis rtag pa yin pa'i phyir don dam par yod pa'i dngos po ni mya ngan las 'das pa'o/ /mi rtag pa la sogs pa'i tshul gyis na de rnams kyi spang bar bya ba nyid yin pa'i phyir srid pa ni dngos po med pa'o/ /de dag dmigs pa nyid kyis shes pa'o//yang na yang dag pa nyid du phyin ci log nyid yin pas gzugs la sogs pa'i dngos po rnams don dam par dngos po yod pa nyid dang / /yang dag par na de med pas de'i mi rtag pa nyid la sogs pa la dngos po med par mngon par zhen pa yin no zhes shes par bya'o/ / gnyi ga ltar na yang nyan thos la sogs pa dmigs pa can rnams ni nges par dngos po 'ga' zhig la kun tu chags pas shes rab kyi pha rol tu phyin pa yod du zin na yang nyams pa la sogs pa yin no zhes bya bar dgongs so/ /lugs las zhes bya ba la sogs pa dang / de'i mtshan bcas zhes bya ba la sogs pa'i lan gyis tshig le'ur byas pa'i 'grel pa ni go sla'o//dngos po mtshan ma dang ldan par rtogs nas zhes bya ba ni dngos po la mngon par zhen pa'i 'khrul ba'i mtshan ma rags pa la sogs pa dang ldan par cha 'dra ba gcig nas gcig tu brgyud pa'i gzugs la sogs pa'i dngos po la rtog pas so//yang na tshogs pa las byung ba yin pa'i phyir dngos po la mngon par zhen pa'i 'khrul ba'i mtshan ma'i rgyu dang ldan par gzugs la sogs pa rtog pas so/ /dngos po'i ngo bo mi shes pa rnams la zhes bya ba ni gzugs la sogs pa'i rang bzhin log pa rnams mi shes pa'o//de'i mnyam pa nyid kyi ye shes ni gzugs la sogs pa skye ba med pa'i ye shes so/ /thabs ma yin pas ni zhes bya ba la sogs pa'i bshad pas ni/ thabs ma yin pas ring ba ste/ /zhes bya ba bshad pa yin no/ /byang chub sems dpa' dus ring mo zhig nas zhes bya ba la sogs pa'i bshad pas ni /de ni thabs la mkhas pa yis/ /zhes bya ba la sogs pa'i bshad pa yin no/ /nyan thos la sogs pa'i gnyen po byang chub sems dpa' rnams kyi mi mthun pa'i phyogs nyid yin pa ni de ltar nyan thos la sogs pa'i zhes bya ba la sogs pa smos pa yin te/de ltar na nyan thos la sogs pas 'og nas bshad pa'i rim gyis yum shes rab kyi pha rol tu phyin pa ring bar 'gyur ba sgrub pa yin zhing mi 'thob pa yin pa'i phyir log par goms pa yin pas de rnams kyi gnyen po ni byang chub sems dpa' rnams kyis spang bar bya ba nyid yin pa'i phyir mi mthun pa'i phyogs yin no zhes 'phags pa byams pas mi mthun pa'i phyogs yin par gsungs so//gzugs sogs zhes bya ba la sogs pa'i tshig le 'ur byas pa'i don ni gzugs la sogs pa zhes bya ba la sogs smos pa yin te/so so'i skye bo rnams kyi zag pa dang bcas pa dang / 'phags pa rnams kyi zag pa med pa dang gnyi ga'i ngo bo ste/ nyon mongs pa'i phyogs gcig spangs pa'i so so'i skye bo 'dod chags dang bral ba'i tshogs so/ /gzugs la sogs pa dus gsum pa'i chos gang yin pa de thams cad la de'i gzhung gis dngos por ma gyur pa la dngos por dmigs pa nyid kyis don dam par yod par mngon par zhen pas gzugs la sogs pa gang yin par shes la/de bas na gzugs la sogs pa'i phung po de rnams nyid la gzhan gyis kun brtags pa'i bdag la sogs pa stong pa nyid du blta'o //sbyin pa la sogs pa ste / sbyin pa dang tshul khrims la sogs pa dang / byang chub kyi phyogs rnams dang / bsam gtan bzhi rnams te/ 'di rnams la sgrub pa'i 'du shes zhes bya ba bdag med do zhes mngon par zhen pa ni nyan thos la sogs pa de rnams kyi gnyen po ste lam yin no//ci'i phyir zhe na/ phyin ci log 'byung ba nyid kyis bdag la sogs pa la mngon par zhugs pa'i so so'i skye bo rnams las go bzlog par zhugs pa nyid yin pa'i phyir ro/ /de ltar na bshad ma thag pa'i nyan thos la sogs pa'i gnyen po'i phyogs nyid byang chub sems dpa' rnams kyi mi mthun pa'i phyogs yin no//ci'i phyir zhe na/ phyin ci log pa 'byung ba nyid kyis spang bar bya ba nyid yin pa'i phyir zhes bya ba'am/ gzugs la sogs pa de kho na nyid du med pas stong pa nyid du lta ba la sogs pa yang byang chub sems dpa' rnams kyis spang bar bya ba yin pa'i phyir ro zhes bshad par bya'o//byang chub sems dpa' rnams kyis bzlog ste zhes bya ba la sogs pa go sla'o/ /mthong ba la sogs bkag pa yis/ /zhes bya ba ni mig gi rnam par shes pa la sogs pa'i rtogs par bya ba nyid yin par mdo las bkag pa'i phyir ro/ /de nyid kyis na rang bzhin te rtogs par dka' ba nyid yin te/'jig rten pa'i tshad mas rtogs pa'i yul ma yin pa'i phyir chos thams cad skye ba med par shes pas spang bar bya ba dang / blang bar bya ba ma lus pa la chags pa ni byang chub sems dpa' rnams kyi mi mthun pa'i phyogs yin pas spang bar bya ba yin no zhes bya bar dgongs so/ /de ltar mi mthun pa'i phyogs zhes bya ba la sogs pas ni sbyor ba gsungs pa yin te/gzugs la sogs pa'i chos thams cad dang zhes bya ba la sogs pas tshig le'ur byas pa'i don ston pa yin te/ sgrub pa ni gzugs la sogs pa bdag med par slob pa la rtsom pa'o/ /de'i yongs su shes pa ni nye bar dmigs pa'o/ / de bsal ba'i sgo nas zhes bya ba ni gzugs su ma yin zhes bya ba la sogs pas de kho na nyid du bkag pa'i phyir ro/ /byang chub sems dpa' rnams kyi de dang de la sbyor ba ni gzugs la sogs pa la mngon par ma zhen pas bdag med pa la goms pa'i mtshan nyid phul du byung ba'i sbyor ba ni rnam pa bcu ste/ gzugs la sogs pa la yul gyi dbye ba rnam pa bcu yin pa rjes su 'gro ba'i sgo nas bstan la rab tu byed pa las zhes bya ba ni lhag ma ste/sbyor ba dgag pa zhes bya ba'i 'grel pa yin no/ /gzugs la sogs pa zhes bya ba bshad par bya ste/ gzugs la sogs pa'i chos thams cad la zhes bya ba ni gzugs kyi phung po la sogs pa'o//de nyid mi rtag pa dang stong pa nyid la sogs pa ni go sla'o/ /mtshan nyid kyis stong pa nyid du brtags pa'i phyir dang / yon tan gyi tshogs dang ldan pa nyid dang chos kyi ngo bo nyid yin pas so sor ma rdzogs pa dang rdzogs pa nyid de/ gzugs la sogs pa tshang ba nyid dang ma tshang ba nyid do/ /chags pa med pa ni gzugs la sogs pa la ma zhen pa ste/gzugs la sogs pa zhes bya ba la sogs pa'i tshig bzhi'i bshad pa yin no/ /gzhan du mi 'gyur ba ni ye shes kyi bdag nyid can gyi yum gyi 'gyur ba med pa nyid yin pa'i phyir ro/ /gzugs la sogs pa'i ngo bo nyid kyis na byed pa po med pa nyid yin te/ mi 'gyur byed po med nyid dang / / zhes bya ba'i bshad pa yin no/ /go rims bzhin du thams cad mkhyen pa nyid gsum ni sngar bshad pa ste/ de'i bdag nyid can gyi ched du bya ba dang sbyor ba dang phyed pa gang yin pa ni sngar bshad pa ste/ de rnams kyi dka' ba nyid ni rnam pa thams cad dang lam dang gzhi rnams de kho na nyid du med na yang byang chub sems dpa' rnams rnam pa thams cad mkhyen pa la sogs pa la 'bad pas de'i bdag nyid can gyi ched du bya ba la sogs pas ni bsgrub par dka' ba nyid yin pas/sbyor ba dka' ba rnam gsum dang / /zhes bshad pa yin no/ /skal ba ci lta ba bzhin du 'bras bu 'thob pas mi stong pa nyid de/skal ba dang 'tsham pa las mi 'da' bar rnam pa thams cad mkhyen pa nyid la sogs pa'i 'bras bu 'thob pa don yod pa nyid kyis na/ skal ba ji bzhin zhes bya ba la sogs pa gsungs pa yin no/ /gzhan gyi rkyen gyis mi 'gro nyid/ /ces bya ba ni thams cad kyi dam par 'gyur bas mchog gzhan med pa'am/yang dag par na de las gzhan pa med pa'i phyir bdag med pa bsgom pa'i bdag nyid do/ /de ni bdag nyid srung ba la sogs pa'i don gyi rgyur gyur pa yin pas na rkyen to/ /yang na gzhan gyi rkyen gyi bdag nyid kyi srung ba la sogs pa'i phyir dngos po rnams dngos po med par so sor rtog pa'i ye shes zhes so//der 'gro ba ni der thob pa ste/ rang las gzhan pa'i nus pas sam/ /phyi rol du lta ba'i srung ba la sogs pa gang ji snyed pa de thams cad ni legs pa ma yin te/ sems kyi gegs sel ba ma yin no zhes bya bar dgongs so/ /de yang gang 'di rgyu ba dang ni mi rgyu ba/ sgyu ma nam mkha'i ngo bor yongs rtogs pa//don dam mthong ba'i srung ba de nyid yin/ /srung ba'i go cha gzhan dag 'dir ci dgos/ /zhes gang bshad pa yin no/ /rnam par shes pa yongs su gyur pa nyid yin pas na yongs su 'gyur ba'o/ /sngags dang sman gyi tshogs pa nyid yin pas na mnyam par sbyor ba'o/ /med pa nyid kyis na 'gal ba'o//sgra ni rkyen la rag las pas na rkyen to/ /shes bya'i tshul las mi 'da' bas na mi 'da' ba'o/ /gzhi med pas na rten med pa'o/ /rgyu dang bral bas na byed pa po med pa'o/ /'di rnams su snang ba zhes bya ba gang yin pa ni yang dag par na rnam par shes pa la sogs pa yin par mi 'dod pas de yongs su gyur pa la sogs pa ni log par snang ba yin no zhes bya ba'i bar du'o//gang de'i gnyen po'i shes pa yin pa nyid kyis na rmi lam dang / /sgyu ma dang / smig rgyu dang / brag ca dang / mig yor dang / dri za'i grong khyer dang / sprul pa lta bu nyid kyis na go rims bzhin du dngos po rnams shes pa rnam pa bdun po de la shes byed rnam pa bdun zhes bya ste/bshad ma thag par grags pa'i rmi lam la sogs pa'i shes pa zhes bya ba'i tha tshig go/ /de la don ni 'di yin te/ de la rnam par shes pa yongs su gyur pa nyid kyis na yongs su gyur pa zhes bya ste/ dngos po rnams ni rmi lam lta bur shes pa nyid du 'gyur ro zhes bya ba la sogs pa dka' 'grel nyid las gsal ba yin no//nyan thos la sogs pa de las go bzlog pa'i sbyor ba rnam pa bcu ni shugs kyis na zhes bya ba la sogs pa smos pa yin te / sbyor ba'i mnyam pa nyid kyis zhes bya ba la sogs pa yin la/ gzugs la sogs pa la zhes bya ba la sogs pa tshig le'ur byas pa'i don ni gzugs la sogs pa smos pa yin te/gzugs dang tshor ba la sogs pa la mngon par zhen pa ni mngon par chags pa'o/ /gzugs la sogs pa'i tha snyad du bya ba'i rgyu mtshan yin pa'i phyir/ sngon po la sogs pa'i mtshan ma'o/ /gzugs rnam gnyis dang nyi shu'o/ /zhes bya ba la sogs pa ni spros pa'o/ /drod la sogs pa'i shes pa ni rtogs pa'o//'di rnams kyi rlom pa rnams ni mngon par zhen pa la sogs pa yul bzhi'i dbye ba shes pa rnam pa bzhi yin no/ /de rnams rnam pa thams cad du mi dmigs pa ni ma mthong ba'o/ /sbyor ba'i mnyam pa nyid ni sbyor ba'i mtshungs pa nyid do/ /sbyor ba'i mnyam pa nyid so sor rtogs nas zhes bya ba la sogs pa ni sdug bsngal la sogs pa zhes bya ba la sogs pa'i tshig le'ur byas pa la 'jug pa yin te/chos shes rjes su shes bzod dang / /shes pa zhes bya ba ni chos shes pa dang / rjes su shes pa'i bzod pa dang shes pa dag ste/ bzhi po de dag nyid ni skad cig ma 'byung ba nyid yin pas skad cig ste/ de'i bdag nyid can ni sdug bsngal zhes bya ba la sogs pa yin te /gzugs rtag ma yin zhes bya ba la sogs pa'i bden pa'i rnam pa'i tshig le'ur byas pa'i don ni ngo bo nyid med pa'i phyir zhes bya ba la sogs pa smos pa yin te/ ngo bo nyid med pa'i phyir zhes bya ba ni de kho na nyid du na gzung ba la sogs pa'i stong pa nyid yin pas so/ gzugs la sogs pa ni gzugs dang tshor ba la sogs pa ste/rtag pa dang mi rtag pa zhes bya ba brtan zhing gcig pa dang 'jig pa'i bdag nyid dag ni dngos po'i chos yin la de dag bral zhing med pas na rtag pa yang ma yin mi rtag pa yang ma yin te/ brtan pa dang 'jig pa yang ma yin pa'o/ /de bzhin du sdug bsngal ni tshor ba yid du mi 'ong ba'o//de med pa ni sdug bsngal ma yin pa'o/ /de dag dang bral ba nyid kyis na 'ching ba dang thar pa'i rtag pa dang chad pa'i mtha' dang bral ba'o/ /gzhan gyi bdag gi dngos po med pas stong pa dang de med pa mi stong pa ste/ de dang bral ba'i phyir rnam par dag pa'o//rang nyid bdag gi ngo bo nyid kyis na bdag yin la de med pa ni bdag med pa ste/ de dag nyid kho na'i ngo bo ni de ltar brtags pa nyid yin pa'i phyir ro/ /des ma skyes pa'i phan tshun 'gal ba'i tshul gnyis kyis skye ba mi rigs pa'i phyir dang / de ltar skye ba med pas ma 'gags shing / 'jig pa med pa dang /'dod chags la sogs pas kun nas nyon mongs pa ma yin pa dang / de med pas rnam par byang ba ma yin pa'o/ /sogs pa'i sgras ni nyams pa dang 'phel bar rigs pa ma yin no/ /sdug bsngal gyi byed rgyu ni rgyu yin la de med pas rgyu ma yin pa'o/ /de dag ni gsog nyid yin pa'i phyir nam mkha' dang 'dra ba'o//tshe 'di'i sdug bsngal gyi rgyu ni kun 'byung ba yin la de med pa ni kun 'byung ba med pa ste/ de dang mi ldan pa'i phyir nyon mongs pa ni 'dod chags la sogs pa'o/ /nye ba'i nyon mongs pa thams cad ni khro ba dang khon du 'dzin pa la sogs pa ste de dag spangs pa'o/ /tshe 'di dang yun ring po'i sdug bsngal gyi rgyu ni rab tu skye ba yin la de med pa ni rab tu skye ba med pas kun nas nyon mongs pa med pa'i phyir yongs su 'dzin pa las grol ba ste/kun tu chags pas stong pa'o/ /sdug bsngal gcig nas gcig tu brgyud pa'i rgyu ni rkyen yin la de med pa ni rkyen ma yin pa'o/ /de dag las rnam par grol ba yin pa'i phyir rang gi ngo bo shes pas ngo bos brjod du med pa zhes bya ste/ye shes kyi rang gi mtshan nyid ni brjod du med pa yin pa'i phyir ro/ /nyon mongs pa dang bral ba nyid kyis na 'gog pa yin la de med pa ni 'gog pa med pa'o/ /gang gi phyir yang dag par na de dag dang ma bral ba de'i phyir 'gog pa'i bden pa'i don nyon mongs pa dang bral ba'i mtshan nyid gang yin pa de ni tshig tu brjod pas zhes bya ba'i tshig gis bstan pas rgyu gzhan dag la sbyin du med pa yin te/stong pa yin pa'i phyir sbyin par nus pa ma yin pa'i phyir ro/ /sdug bsngal mi 'byung ba nyid kyis na zhi ba yin la de med pa ni ma zhi ba'o/ /'di dag ni yang dag par na med pa yin pa'i phyir dmigs pa med par byed pa ste/mi dmigs par shes pa'o/ /bde ba dang gtsang bas dben pa nyid kyis na gya nom pa yin la de med pas gya nom pa ma yin pa'o/ /de dag dang bral ba'i phyir mtha' gnyis las 'das pas rnam par dag pa zhes bya ste/ chad pa dang rtag pa'i mtha' med pa'i phyir dri ma med pa'o //mya ngan las 'das pa ni nges par 'byung ba yin la de med pa ni nges par 'byung ba med pa'o/ /de dag med pa'i phyir nad thams cad mi skye ba zhes bya ste/ phyi dang nang gi mu stegs pa'i lta ba 'jig pa ste gnas med pa yin pa'i phyir ro/ /thar pa'i grong khyer du phyin par byed pa'i don gyis na lam yin la de med pas lam ma yin pa'o//de dag dang bral ba yin pa'i phyir ngan song chad pa'o/ /nyon mongs pa ma lus pa'i gnyen po'i phyogs su gyur pas na rigs pa yin la de med pa ni rigs pa ma yin pa ste/ de dag dang ma 'dres pa'i phyir ro/ / 'bras bu ni 'tshang rgya ba nyid yin la de mngon sum du bya ba ni mngon sum du bya ba'o/ /de'i don gyi thabs gang yin zhe na/ rnam par mi rtog pa nyid de/ thams cad du mngon par zhen pa med pa'o/ /sems phyin ci ma log pa ston pa'i don gyis na bsgrub pa yin la de med pa ni sgrub pa ma yin pa'o/ /de dag las rnam par grol ba nyid kyis gzugs la sogs pa'i chos thams cad mtshan ma sngon po la sogs pas tha snyad du bya ba'i rgyu dang ma 'brel cing ma 'dres pa'i chos nyid kyi gnas skabs so zhes bya ba'i bar du'o//mngon par zhen pa med pa'i rtag pa'i gnas su 'gro bas na nges par 'byin pa yin la de med pa ni nges par 'byin pa ma yin pa ste /de dag med pa nyid kyis na stong pa nyid yin pa'i phyir brjod par bya ba dang rjod par byed pa'i ngo bo'i mtshan nyid shes bya dang sgra gnyis la shes pa skye ba med pa zhes bya ba ni yang dag par na brjod par bya ba dang rjod par byed pa dag med pas de dag gi shes pa'i yul ma yin pa nyid de chos kyi dbyings nyid kyi gnas so zhes bya ba'i bar du'o//'dis ni sdug bsngal la sogs pa'i bden pa bzhi rnams kyi rnam pa bcu drug sngar bshad pa de rnams kyi nang nas bden pa re re zhing rnam pa gnyis gnyis kyi chos gang yin pa dang / rjes su shes pa gang yin pa kun rdzob kyi bden par brjod pa yin la de ni shes pa gnyis gnyis su blta bar bya'o//de la rtag pa dang mi rtag pa dang sdug bsngal ba dang sdug bsngal ba ma yin pa dag mi dmigs pa'i chos gang yin pa de dag la shes pa gang yin pa de ni sdug bsngal la chos shes pa'i bzod pa dang sdug bsngal la chos shes pa'o/ /de bzhin du bdag dang /bdag med pa dang / stong pa dang mi stong pa mi dmigs pa dag gi rjes su shes pa gang yin pa de dag ni rjes su chos shes pa'i bzod pa dang rjes su chos shes pa yin no/ de bzhin du kun 'byung ba la sogs pa re re zhing yang shes pa bzhi bzhi dang sbyar bas shes pa bcu drug yin no/ /gzhan dag na re shes pa 'di rnams kyang rtag pa dang mi rtag pa la sogs pa mi dmigs pa'i rnam pa bden pa bzhi'i yul la skye ba'i shugs kyis rtag pa dang mi rtag pa la sogs pa'i rnam pa yin par khong du chud par bya'o zhes 'dod do//nyan thos la sogs pa'i phyogs ltar na mi rtag pa dang sdug bsngal ba dag gi chos gang yin pa dang /de dag gi shes pa gang yin pa de ni sdug bsngal la chos shes pa'i bzod pa dang / sdug bsngal la chos shes pa yin la/ stong pa dang bdag med pa'i rjes gang dag yin pa de dag gi shes pa gang dag yin pa de dag ni rjes su chos shes pa'i bzod pa dang / rjes su chos shes pa yin no/ /de bzhin du kun 'byung ba la sogs pa re re la yang shes pa bzhir sbyar bas shes pa bcu drug yin no//gzhan dag na re 'dir yang mi rtag pa la sogs pa'i rnam pa bden pa bzhi'i yul la skye ba'i don gyi shugs kyis shes pa rnams kyang bden pa bzhi'i rnam par shes par bya'o zhes zer ro//de ni de lta bu'i rnam pa can gyi zhes bya ba la sogs pa smos pa yin no/ /'phags pa byams pa dang seng ge bzang po'i zhal snga nas bdag gi yul gsum car la shes pa dang rnam pa ma bstan na yang bdag gis ma bstan pa ni de'i shugs kyis 'ongs pa yang don yin no zhes bya ba'i tshul gyis so//shes pa yang yul gyi rnam pa can nyid yin pa'i phyi'i yul yod pa dang shes par smra ba rnams kyi tshad ma yin pas nyes pa med do/ /lam shes pa nyid la ji lta ba de bzhin du thams cad shes pa nyid la nyan thos dang byang chub sems dpa' dag gi bsgom pa'i lam so sor med ce na/ kun shes pa nyid la zhes bya ba la sogs pa smos pa yin no//don ni 'di yin te/ nyan thos dang rang sangs rgyas kyi phun sum tshogs pa ni byang chub sems dpa'i shes pas mthong nas 'da' bar bya'o zhes gsungs pas mngon sum du bya ba ma yin pa'i phyir byang chub sems dpa' rnams la bsgom pa'i lam bstan la/nyan thos la sogs pa ni ji ltar yongs su mthong ba'i don nyid yang dang yang du mngon du bya ba ni bsgom pa'i lam yin pas rtogs sla ba'i phyir bstan pa ma yin no/ /byang chub sems dpa' rnams kyi nges par 'byed pa'i cha dang mthun pa rnams kyang sngar bshad pa nyid yin par shes par bya'o/ / nyan thos la sogs pa ni mi rtag pa la sogs pa'i rnam pas bden pa bzhi la dmigs pa na zag pa dang bcas pa'i bsgom pa'i rang bzhin gyi dro ba la sogs pa ni gsal ba nyid yin pa'i phyir ma bstan par khong du chud par bya'o/ /de ltar rgyas par bstan nas zhes bya ba la sogs pas ni mngon par rtogs pa brgyad kyi mtshan nyid kyi don gang yin pa de mtha' dag sdud par byed pa yin pas gtso bo yin pa nyid kyis na//thams cad mkhyen pa nyid gsum mjug bsdu bar gsungs pa yin te zhes bya ba rgyal ba'i yum las bshad do zhes bya ba'o/ /lam shes pa nyid du nyan thos la sogs pa'i lam brjod pas thams cad shes pa nyid bshad pa ma yin nam/ci'i phyir yang thams cad shes pa nyid logs shig tu bstan ce na/ brjod par bya ste de ni/ lam shes nyid kyi tshul la ni/ /'phags pa'i bden pa bzhi dag gi / rnam pa mi dmigs sgo nas ni/ /nyan thos lam 'di shes par bya//zhes bya bas mi dmigs par bsgom pa la sogs pa'i rim gyis nyan thos la sogs pa'i lam byang chub sems dpas bsgom par bya'o zhes gsungs pa yin no/ de bas na mi rtag pa la sogs pa'i rnam pa bzlog pa'i sgo nas 'phangs pa'i gzhi ma lus pa yongs su shes par bya ba'i don du thams cad shes pa nyid logs shig tu smos pa yin no// shes rab kyi pha rol tu phyin pa'i man ngag gi bstan bcos mngon par rtogs pa'i rgyan las seng ge bzang po'i zhal snga nas kyi gzhung rtogs dka' ba'i snang ba'i dka' 'grel d+harma kIrtis byas pa las skabs gsum pa'i bshad pa'o// // thams cad mkhyen pa nyid gsum zhes bya ba la sogs pas 'grel pa brjod nas rnam pa kun mngon par rdzogs par rtogs pa'i dbang du mdzad nas gzhi dang zhes bya ba la sogs pa gsungs pa de skad gsum du gsungs pa'i gnyen po ma lus pa ni gzhi ste/ de rnams kyi ye shes kyi rnam pa ni de la dmigs par byed pa'i sems kyi khyad par ro//de rnams kyi rnam pa gang yin pa ni snang ba'o/ /kun mkhyen pa nyid ni rnam pa thams cad dang lam dang gzhi skye ba med par mkhyen pas ye shes ni rnam gsum phyir/ zhes bya ba dbye na rnam pa gsum yod pas de ni rnam pa gsum po nyid yin la/de ltar ci rigs pa'i mtshan nyid ni rnam pa kun mngon par rdzogs par rtogs pa'i spyi'i mtshan nyid yin par 'dod par shes par bya'o/ /tshig le'ur byas pa'i don ni rtag pa zhes bya ba la sogs pa smos pa yin te/ rtag pa la sogs par 'dzin pa ni rtag pa dang sdug bsngal ma yin pa la sogs par mngon par zhen pa'o//de nyid ni spang bar bya ba yin pas na mi mthun pa'i phyogs so/ /de'i gnyen po ni mi rtag pa la sogs pa'o/ /de'i chos nyid kyi ngo bo nyid ni shes par snang ba ste de rnams kyi'o/ /de ni mi rtag pa la sogs pa la dmigs pa'i ye shes kyi rnam pa rnams zhes bya ba smos pa yin te/mi rtag pa la sogs pa la dmigs pa'i ye shes kyi khyad par la rnam pa nyid du rnam par gzhag pa ni rnam pa yin no zhes nges par byas pa'o/ mtshan nyid ni spyir na rnam pa kun mngon par rdzogs par rtogs pas dmigs pa'i mtshan ma'o/ / de dag kyang zhes bya ba la sogs pa 'dis thams cad mkhyen pa nyid gsum gyi gzhi'i yul can yin pa nyid kyis na sngar smras pa'i rnam pa rnams gzhi med pa'i rnam pa yin par nges pa gsal ba yin no/ /spyir zhes bya bas rnam pa rnams la dbye ba ma brjod par rnam pa gsum bstan nas da ni khyad par te/'phags pa'i bden pa bzhi la brten pa'i dbye bas med pa'i rnam pa zhes bya ba la sogs pa gsungs pa yin te/ med pa'i rnam pa nas gzung ste zhes bya ba ni med pa dang mi skye ba'i rnam pa nas gzung ste/ mi g.yo ba'i rnam pa'i mthar thug pa'i bar gyis so/ / brtsi ba ni bden pa so so zhes bya ba la sogs pa gsungs pa yin te/ bden pa so so la bzhi dang zhes bya ba ni sdug bsngal la sogs pa'i bden pa gsum la bzhi bzhi ste bcu gnyis so/ /lam gyi bden pa la ni bco lngar zhes bya ba de dag ni rnam pa zhes bya ba yin par bshad do/ /de la zhes bya ba la sogs pas ni tshig le'ur byas pa'i don smos pa yin te/de la thams cad shes pa nyid kyis dbang du byas nas zhes bya ba ni thams cad mkhyen pa nyid gsum gyi nang nas 'dir so sor bsgom par 'dod pas thams cad shes pa nyid kyi gnas skabs yin pa'i phyir ro/ /med pa ni nam mkha' dang mnyam pa'i rtag pa'i tshul gyis med pa'o//mi skye ba ni yang dag par skye ba med pa'o/ /dben pa ni yon tan skyed par byed pa nyid kyis na bdag stong pa nyid do/ /mi brdzi ba ni bdag med pa nyid kyis mu stegs pa rnams kyis 'khrugs par mi nus pa ste/ sdug bsngal mi rtag pa dang / sdug bsngal ba dang / stong pa dang / bdag med pa'i mtshan nyid do/ /yang dag par na ming dang gzugs kyi phung po skyed par byed pa med pa'i don gyis na gnas med pa'o/ /nam mkha' ni dngos po med pa'o/ /yang dag par na tshig tu brjod du med pa na brjod du med pa'o//gzugs can ma yin pa'i phung po med pa ni ming med pa ste/ kun 'byung gi rgyu dang / kun 'byung ba dang / rab tu skye ba dang / rkyen gyi mtshan nyid do/ /'gro ba med pa ni yang dag pa nyid du na 'gro ba med pa'o/ /mi 'phrogs pa ni gzod ma nas zhi ba nyid kyis na yul med pa'o//mi zad pa ni zad pa med pa'o/ /skye ba med pa ni ma skyes pa ste 'gog pa'i 'gog pa dang / zhi ba dang gya nom pa dang / nges par 'byung ba'i mtshan nyid do/ /de ltar na med pa la sogs pa rnam pa bcu gnyis po 'di dag ni go rims bzhin du sdug bsngal la sogs pa'i bden pa gsum gyis mi rtag pa la sogs pa'i mtshan nyid dag yin par bshad par bya'o//da ni lam gyi bden pa rnam pa gsum nyon mongs pa'i zhes bya ba la sogs pa smos pa yin te/ nyon mongs pa nyid ni rtsig pa la sogs pa dang 'dra bar sgrib pa yin te/ yang dag pa'i ye shes kyi gegs byed pa nyid yin pa'i phyir ro//de'i gnyen po nyid du zhes bya ba la sogs pa la de la dang po nyan thos rnams kyi zag pa med pa'i lam la yang dag pa nyid du na byed pa po dmigs su med pas na byed pa po med pa'o/ /bdag nyid med pas na shes pa po med pa'o/ /yang dag par na 'pho ba med pas na 'pho ba med pa'o//nyon mongs pa 'dul ba med pas na 'dul ba med pa'o/ /de ltar na rnam pa dang zhes bya ba la sogs pas ni lam la sogs pa'i mtshan nyid yin te/ lam dang rig pa dang sgrub pa dang nges par 'byin pa'i bdag nyid do/ /gnyis pa ni rang sangs rgyas rnams kyi lam zag pa dang bcas pa ste/rab tu gnyid kyis log pa'i gnas skabs kyi shes pa ni rmi lam mo/ /brag cha ni sgra brnyan no/ /zla ba gnyis pa la sogs pa'i snang ba ni mig yor ro/ /smig rgyu ni mya ngan gyi smig rgyu'o/ /mig 'phrul ni sgyu ma'o/ /de ltar na rnam pa de lnga ste zhes bya ba la sogs pa ni yang dag pa nyid du na skye bar mi rigs pa nyid do//zhes blta bar bya'o/ /spyir shes bya'i sgrib pa'i gnyen por gyur pa dag yin no/ /zhes bya ba ni shes bya'i sgrib pa thams cad 'joms par byed pa'o/ /gsum pa ni rang sangs rgyas rnams ni lam la 'dod chags la sogs pa med pas na kun nas nyon mongs pa med pa'o//rnam par byang ba ni mya ngan las 'das pa ste/ de med pa ni rnam par byang ba med pa'o/ /nyon mongs pa dang nye ba'i nyon mongs pa thams cad kyis ma gos pa na gos pa med pa'o/ /gzugs la sogs pa'i spros pa med pa ni spros pa med pa'o//mngon par zhen pa med pa ni rlom pa med pa'o/ /chos kyi dbyings ltar brtan pas na mi g.yo ba ste/ /'di dag rnam pa rnams yin no/ /kun nas nyon mongs pa ni 'dod chags la sogs pa'o/ /rnam par byang ba ma yin pa ni mya ngan las 'das pa ma yin pa'o//nyon mongs pa'i bag chags ni 'dod chags la sogs pa'i rgyun nam med pa'i rnam pa nye bar mthong bar nus pa'i nyon mongs pa'i bag chags rnams so/ /gzugs la sogs pa'i spros pa ni gzugs dang tshor ba la sogs pa'i bar du dbye ba'o/ / rang gi rtog pa ni 'dzin pa'i shes pa la nye bar dmigs pa'o/ /yongs su nyams pa ni nyon mongs pa 'joms pa [(]sta[,]ste[)]/ mi mthun pa'i phyogs kyi bdag nyid can gyi rnam par rtog pa 'di rnams kyi so sor nges pa'i gnyen por gyur pa dag yin no zhes smos te/ kun nas nyon mongs pa la sogs pa shes bya'i sgrib pa gang yin pa de rnams kyi drug po dag nyid yin no//rgyu dang zhes bya ba la sogs pa'i tshig le'ur byas pa bshad par 'dod nas/ gnas skabs pa la bden pa rnams kyi so sor smos pa'i rgyu mtshan ni kun nas nyon mongs pa zhes bya ba la sogs pa yin te / kun nas nyon mongs pa dang cig shos kyi phyogs la brten nas zhes bya ba ni kun nas nyon mongs pa dang rnam par byang ba'i yul gyi dbye bas so/ /grangs bzhin du rnam pa brgyad dang zhes bya ba la sogs par khong du chud par bya'o zhes bya ba ni kun 'byung dang lam dag la rnam pa brgyad dang bdun rnams so//sdug bsngal dang 'gog pa la rnam pa lnga dang bcu drug tu shes par bya'o/ /de la kun 'byung gi bden par rtog pa rnam pa brgyad ni 'dod chags dang bral ba dang zhes bya ba la sogs pa smos pa yin te/ yul la rgyab kyis phyogs pa ni 'dod chags dang bral ba'o//mngon par zhen pa med pa ni mi gnas pa'o/ /nyes pa nye bar zhi ba ni zhi ba'o/ /'dod chags dang bral ba ni 'dod chags med pa'o/ /zhe sdang med pa ni zhe sdang dang bral ba'o / /yang dag pa'i ye shes ni gti mug med pa'o/ /nyon mongs pa dang bral ba ni nyon mongs pa med pa'o//sems can med pa ni sems can med pa ste/ rnam pa 'di dag ni go rims bzhin du 'di rnams gang dag gi gnyen po yin zhe na/ mi mthun pa'i phyogs ni kun 'byung gi bden pa'i rgyu dang / kun 'byung ba dang rab tu skye ba dang rkyen te rnam pa bzhi smos pa yin la/de la rgyu gang yin pa de ni sngon dang phyi ma'i rgyu dang 'bras bu dang sred pa'i dbye bas rnam pa gsum yin la/ de ni 'dun pa dang zhes bya ba la sogs pa smos pa yin te/ 'dun pa ni yul thams cad mngon par 'dod pa'o/ /de mngon du 'gro ba'i mngon par zhen pa ni 'dod chags te/'dod chags la ni dga' ba ste/ lhar 'gyur ba'am mir 'gyur ba'o zhes srid pa la mngon par dga' bar byed pa'o/ /mi mthun pa'i phyogs 'di rnams kyi gnyen po ni 'dod chags dang bral ba dang / mi gnas pa dang zhi ba'i rnam pa ste gsum yin no//kun 'byung ba gang yin pa de yang gsum ste/ 'dod chags dang / zhe sdang dang / gti mug go/ /'dod chags la sogs pa mi mthun pa'i phyogs 'di rnams kyi gnyen po ni 'dod chags med pa dang zhe sdang med pa dang gti mug med pa'o/ /rab tu skye ba gang yin pa de ni kun tu rtog pa ste/mi mthun pa'i phyogs ma lus pa'i rnam pa nyid yin pa'i phyir ro/ /de'i gnyen po ni nyon mongs pa med pa ste/ nyon mongs pa ldog pa las rnam par rtog pa thams cad ldog pa yin pa'i phyir ro/ /rkyen gang yin pa de ni sems can du mngon par zhen pa ste/de'i rnam pa can nyid yin pa'i phyir ro/ /de'i gnyen po ni sems can med pa ste/ sems can med par shes pa las de'i mngon par zhen pa ldog pa yin pa'i phyir ro/ /de ltar na de rnams kyi gnyen por gyur pa ste/ 'dun pa dang 'dod chags la sogs pa mi mthun par gyur pa'i ngo bo gsum dang gsum zhes bya ba ni 'dod chags dang bral ba la sogs pa dang /'dod chags med pa la sogs pa dang gcig dang gcig ste zhes bya ba nyon mongs pa med pa dang sems can med pa ste/ brgyad dang zhes bya ba la sogs pa la rgyu rnam pa brgyad yin no zhes bya bar bsgrags so//lam gyi rnam pa bdun ni tshad med pa dang zhes bya ba la sogs pa smos pa yin te/ rtog pa'i spyod yul ma yin pa nyid kyis na tshad med pa'o/ /'khor ba dang mya ngan las 'das pa gnyis spangs pas na mtha' gnyis dang ma 'brel ba ste ma dmigs so//chos kyi dbyings dang 'dra ba dbyer med pa nyid yin pas na tha mi dad pa'o/ /nyan thos la sogs pa'i rnam par rtog pa dang ma 'dres pas mchog tu 'dzin pa med pa'o/ /rnam par rtog pa thams cad ni stong pa nyid yin par mtshungs pa yin pa'i phyir rnam par mi rtog pa'o//shes par bya ba med pas na dpag tu med pa'o/ /chos thams cad la zhen pa med pa'i phyir chags pa med pa ste/ rnam par rig pa 'di dag ni zhes bya ba la sogs pa gang sems can thams cad la go skabs 'byed pa ni sems can thams cad la go skabs 'byed pa'i lam ni thar pa'i grong khyer thob par byed pa'o//ji ltar sems can thams cad la go skabs 'byed pa ji ltar smos pa la sogs pas so/ /rig pa gang yin pa dang ji ltar rig par yin pa ni yang dag pa'i ye shes mngon sum du byed pa dang nyon mongs pa'i gnyen po nyid yin pa'i phyir ro/ /sgrub pa gang yin pa dang ji ltar bsgrub pa yin pa ni sems bskyed pa la sogs pa'i gnyen po bsgom pa rab kyi mthar phyin pa nyid dang /sems phyin ci ma log par sgrub pa'o/ /nges par 'byung ba gang yin pa ni mya ngan las 'das pa'o/ /de dag ni de rnams kyi ngo bo nyid ces bya ba la sogs pa yin no/ / sdug bsngal gyi bden pa rnam pa ni mi rtag pa zhes bya ba la sogs pa yin te/ med pa'i don ni mi rtag pa'i don yin no zhes gsungs pa'i phyir med pas na mi rtag pa'o/ /'du byed nyid yin pas na sdug bsngal ba'o/ /gzhan gyis yongs su brtags pa'i bdag la sogs pas stong pas na stong pa'o//gang zag la sogs pa med pas na bdag med pa'o/ /mtshan nyid med pa'i rnam pa ni lnga yin te/ de yang gang zhe na ngo bo nyid ces bya ba ma skyes pa ste/ thams cad ngo bo nyid kyis skye ba med pa'i phyir ro zhes bya ba'i tha tshig go/ /btags pa'i bdag nyid la sogs pa chos brgyad po de dag la mngon par zhen pa bkag pas yang dag pa nyid du med pa nyid kyis na go rims bzhin du stong pa zhes bya ba stong pa nyid dang /chen po zhes bya ba chen po stong pa nyid dang / don dam pa zhes bya ba don dam pa stong pa nyid dang / 'dus byas zhes bya ba 'dus byas stong pa nyid dang /'dus ma byas zhes bya ba 'dus ma byas stong pa nyid dang / mtha' las 'das pa zhes bya ba mtha' las 'das pa stong pa nyid dang / thog ma dang tha ma med pa zhes bya ba thog ma dang tha ma med pa stong pa nyid dang / dor ba med pa zhes bya ba dor ba med pa stong pa zhes bya ba ste rnam pa de dag yin no//gya nom pa'i rnam pa gang zhig yin zhe na/ gzhan gyis zhes bya ba bye brag tu smra ba la sogs pa rnams kyis kun brtags pa'i byed pa po gang yin pa de bkag pas rang bzhin stong pa nyid kyi rnam pa ste/ yang dag par na bya ba med pas na lha sbyin la sogs pas las byed pa po nang na mi dmigs pa'i phyir dang /ma mthong bar brtags pa ni ha cang thal ches pa yin pa'i phyir ro/ /nges par 'byung ba'i rnam pa bshad do zhes bya ba ni lhag ma'o/ /yul du 'khrul pa yang dag pa nyid du shes pa'i rnam pa yin na yang phyi rol gyi gzugs la sogs pa 'khrul pa ste/de'i bdag nyid rnams ni btags pa ste/ gzugs la sogs pa'i tha snyad do/ /mtshan nyid ni gzugs su rung ba la sogs pa'o/ /dus ni dpyid la sogs pa'o/ /'di rnams su 'khrul pa rnams ni gang de kho na nyid du ni yang dag pa ma yin na yang yang dag par rnam par 'khrul pa'o//de rnams kyi 'gag par chos thams cad stong pa nyid dang / rang gi mtshan nyid ces bya ba rang gi mtshan nyid stong pa nyid dang / gzhan gyis yongs su brtags pa'i dus ni kun rdzob tu yang ma dmigs pa'i phyir dang / yang dag par na shes pa'i snang ba las gzhan pa'i dus kyang mi 'thad pa'i phyir mi dmigs pa zhes bya ba mi dmigs pa stong pa nyid de/ rnam pa gsum po de dag go/ /nges par 'byung ba'i rnam pa kho na zhes bya ba mya ngan las 'das pa'i rnam pa nyid yin la ngo bo nyid med pa'i phyir/ dngos po med pa'i ngo bo nyid stong pa nyid kyi rnam pa gcig ste/de ltar na zhes bya ba la sogs pa'i rnam pa ni bcu drug tu bsgrags so/ /kun mkhyen zhes bya ba la sogs pa'i rnam pa thams cad mkhyen pa'i tshig le'ur byas pa'i don ni rnam pa thams cad ces bya ba la sogs pa smos pa yin te/rnam pa thams cad mkhyen pa nyid kyis zhes bya ba ni sngar bshad pas so/ /'phags pa'i gang zag thams cad bsdus pa'i phyir zhes bya ba ni nyan thos dang rang sangs rgyas dang byang chub sems dpa' dang yang dag par rdzogs pa'i sangs rgyas bsdus pa'i phyir te/ grangs bzhin du nyan thos la sogs pa'i zhes bya ba 'og ma dang sbyar bar bya'o/ /dran pa nyer bzhag nas bzung ste zhes bya ba ni lus dran pa nye bar gzhag pa dang por byas nas so/ /tha ma sangs rgyas nyid rnam par zhes bya ba ni gnas dang gnas ma yin pa mkhyen pa'i stobs la sogs pa rnam pa sum cu rtsa dgu'i bar ni rnam pa yin par shes par bya'o zhes bya ba'i tha tshig go//ci'i phyir rnam pa thams cad mkhyen pa nyid kyis 'phags pa'i gang zag thams cad bsdus pa yin zhe na/ thams cad mkhyen pa zhes bya ba la sogs pa smos te/ thams cad mkhyen pa nyid gsum du grags pa des bsdus pa'i lam gang la thams cad mkhyen pa nyid la sogs pa'i lam gyi bden pa rnam pa gsum po de'i sgo nas zhes bya ba de'i thabs kyis so//'dis ni kun mkhyen nyid gsum bye brag gis zhes bya ba la sogs pa bshad pa yin no/ /'dir dran pa nye bar gzhag pa la sogs pa rnam pa brgya bdun cu rtsa gsum yang dag par na rnam pa thams cad mkhyen pa'i yin par bshad la/de yang nyan thos la sogs pa lam gsum gyi bye brag gis gsum nyid yin no zhes bya bar dgongs so/ /de ni de la zhes bya ba la sogs pa smos pa yin te/ de la zhes bya ba ni rnam pa thams cad mkhyen pa nyid kyis bsdus pa'i thams cad mkhyen pa nyid gsum gyi nang nas so//thams cad ces bya ba la sogs pa la dngos po yongs su rtogs pa'i lam la zhes bya ba ni lus la sogs pa rnam par dpyad pa'i thabs la'o/ /bden pa bzhi la 'jug par bya ba'i phyir zhes bya ba ni sdug bsngal la sogs pa'i bsgom pa'i lam la 'jug par bya ba'i phyir //rnam par dpyad pa ni lus dang zhes bya ba la sogs pa yin te/ lus la sogs pa'i rang dang spyi'i mtshan nyid dag gi don gyi bya ba nus pa dang mi nus pa dag gis yongs su brtag cing skye ba med pa nyid du shes par byed pa gang yin pa de rnam pa yin no//brtson 'grus bskyed pa'i phyir rtsol ba'i lam ste/ yang dag par spong ba'i thabs la mi dge ba nges par skyes pa dang / ma skyes pa dag yang dag par spong bar bya ba'i phyir dang / mi bskyed par bya ba'i phyir dang / dge ba yang dag par skyes pa dang ma skyes pa dag la 'phel bar bya ba dang bskyed par bya ba'i rgyu ni brtson 'grus so/ /sems las su rung ba nyid du byed pa ni sems rtse gcig par gyur pa yin pas/ ting nge 'dzin yongs su sbyong ba'i lam ste/ bsam gtan 'du byed pa'i thabs rdzu 'phrul gyi rkang pa'i rnam pa la'o//ting nge 'dzin gyis spong ba ni 'dod chags la sogs pa rtsol ba'o/ /de'i don du 'du byed pa ni 'bad pa'o/ /de dang ldan zhing bcas pa'i rdzu 'phrul gyi rkang pa ste/ rdzu 'phrul gyi rten yin pa ni 'di dag gi stobs kyis rdzu 'phrul byed pa yin pa'i phyir te/'dun pa la sogs pa'i sgo nas las su rung bar 'gyur ba nyid yin pa'i phyir ro/ /sems yongs su sbyang ba byas shing ting nge 'dzin dang ldan pa'i mngon par rtogs pa'i sbyor ba'i lam ste/ sbyor ba'i nus pa las byung ba'i dad pa la sogs pa'i thabs la'o/ /dad pa la sogs pa'i dbang pos 'phags pa'i lam yang dag par bsgrub par bya ba'i phyir dro ba dang rtse mo'i sbyor ba rtogs par gyur pa yin pa'i phyir ro//dro ba la sogs pa thob cing dro ba dang rtse mo rtogs pa ni bzod pa la sogs pa mngon par rtogs pa dang 'brel cing gcig tu gyur pa'i lam dad pa'i stobs la sogs pa gang yin pa de la 'dod pa la sogs pa'i stobs kyi rjes thogs la bden pa'i rtogs pa'i don du dad pa med pa la sogs pa'i mi mthun pa'i phyogs zil gyis gnon pa'i bzod pa dang chos kyi mchog gi sbyor ba yin pa'i phyir ro//dro ba la sogs pa bzhi rtogs pa la ni/ bden pa bzhi mthong ba'i lam ste/bden pa bzhi shes pa'i thabs la ni mngon par rtogs pa'i lam shes bya ste/ dran pa la sogs pa'i thabs des thog ma kho nar de kho na nyid du mngon par rtogs par rig pa yongs su shes pa yin pa'i phyir ro/ /bden pa mthong ba zhes bya ba la sogs pa la yang dag pa'i lta ba la sogs pa ni yang dag par nges par 'byin pa'i lam yin te /mthong ba'i lam yan chad 'dis bsgom pas spang bar bya ba'i nyon mongs pa rnam par dag par nges par 'byin pa yin pa'i phyir ro/ /der 'di ltar byang chub kyi phyogs kyi chos 'di rnams go rims bzhin du 'byung bas go rims bzhin du shes par bya'o//de ltar na dngos po yongs su rtogs pa'i lam la sogs pa lam rnam pa bdun gyi dbang du byas nas slob ma rnams la kun shes pa nyid kyi lam gyi rten can te/ de la gnas pa yin no/ /da ni byang chub sems dpa' rnams kyi lam shes pa nyid kyi rnam pa sum cu rtsa bzhi ni lam shes pa zhes bya ba la sogs pa smos pa yin te/lta ba ni gzung ba la sogs pa'i mi mthun pa'i phyogs kyi shes pa'o/ /de rnams kyi gnyen po'i lam ni rnam par sel ba'i thabs rnam pa gsum mo/ /de ni lta bas byas pa zhes smos te/ lta ba las gyur pa'i mi mthun pa'i phyogs kyi gnyen po'o//de'i rgyu mtshan ni lta ba'i rgyu'i rnam par rtog pa ste/ rtog pa gang yin pa de rnams kyi gnyen po'o/ /khams gsum pa la smon pa ni sems can du lta ba la zhugs pa gang yin pa ste/ de ni gnyen po'i zhes bya ba la sogs pa ni go sla'o/ /zhi ba'i rnam pas mtshan ma med ces bya ba 'di dang 'gal lo zhe na/'di ni dngos po'i rgyu'i rgyu mtshan dang rjes su 'brel pa'i nyan thos kyi lam gyi dbang du byas nas/ de skad brjod pa yin pa'i phyir ro/ /sprul pa'i lam ni sprul pa'i thabs kyi bya ba rnam pa gsum mo/ /nang gi bdag nyid kyi gzugs kyi 'du shes rnam par ma bshig pa'i phyir zhes bya ba la sogs pa la phyi rol gyi gzugs rnams la zhes bya ba kha dog bzang ba dang kha dog ngan pa'o//blta'o zhes bya ba ni bdag nyid bsam gtan nam gzugs med pa'i snyoms par 'jug pa la brten te zhes bya bar shes par bya'o/ /sprul pa'i sgrib pa ni de'i mi mthun pa'i phyogs te/de'i gnyen po rnam pa gnyis so/ /rnam par thar pa gsum pa ni gzugs zhes bya ba la sogs pa smos pa yin te/ gdul bya rnams kyi bsod nams dang bsod nams ma yin pa'i rgyu las gyur pas gzugs sdug pa dang mi sdug pa ste/ 'phags pa dang cig shos kyi rnam pa dag ste/de dag gi sprul pa'o/ /dga' ba ni 'bad pa'o/ /mi dga' ba ni rgyab kyis phyogs pa'o/ /gnyis po de dag ni kun tu chags pa'i rgyu nyid yin pa'i phyir kun nas nyon mongs pa ste/ mi mthun pa yin la de dag gi gnyen po ni rgyur gdul bya rnams kyi sdug pa ste/bsod nams kyi rgyu'i rnam par thar pa'i sgo ste/ rdzogs pa'i byang chub kyi thabs so/ /lus kyis mngon sum du byas nas zhes bya ba ji ltar gdul bar lus kyi 'phags pa'i rnam par gyur pa'o/ /rdzogs par byas te zhes bya ba ni bstan par dmigs pa'o/ /gnas so zhes bya ba ni bya ba thams cad kun tu spyod pa'o//'dir yang bdag nyid gzugs sdug pa dang mi sdug pa la phan tshun ltos pa'i 'du shes dang / phan tshun rjes su 'gro ba'i 'du shes la brten te/ phan tshun gyi 'du shes ro gcig pa thob pas gzugs ji ltar 'dod pa'i rnam par thar pa la dbang thob pa yin no zhes blta bar bya ste/rdzogs pa'i byang chub kyi bdag nyid thar pa khyad par can gyi rgyur gyur pas na rnam par thar pa'o/ /mthong ba'i chos ni bcom ldan 'das kyis mngon sum du mdzad pa'i ye shes so/ /de'i bdag nyid can gyi bde bar gnas pa gang yin pa ni ji ltar bde bar gnas pa'o//de'i lam ni thabs rnam pa lnga'o/ /thabs kyi rang bzhin yang rnam pa gnyis bshad pa ni de mthong bas gzhan rnams kyi yang de bstan pas thar pa dang mthun par gnas pa'i rgyur gyur pas thar pa dang mthun par gnas pa'i lam gyi rang bzhin la gzugs med pa'i snyoms par 'jug pa rnam pa bzhi ste/nam mkha' mtha' yas skye mched la sogs pa rnam pa bzhi'o/ /zhi bar gnas pa'i lam gyi rang bzhin ni 'dod chags la sogs pa'i nyes pa med pa'i phyir ro/ /'du shes zhes bya ba la sogs pas ni 'gog pa'i snyoms par 'jug pa ste/gcig yin no/ /'jig rten las 'das pa'i lam thabs rnam pa dgu la'o/ /spong ba'i lam ste nyon mongs pa sel ba'i thabs la'o/ /bar chad med pa zhes bya ba la sogs pa la lam gcig yin na yang bden pa bzhi'i bye brag gis nyon mongs pa dang mi ldan pa'i mtshan nyid kyang gzhi yin no//sangs rgyas nyid kyi lam ni sbyin pa la sogs pa ste/ de ni sbyin pa zhes bya ba la sogs pa smos pa yin no/ /de ltar na lam rnam pa drug gi dbang du mdzad nas byang chub sems dpa' zhes bya ba la sogs pa smos pa yin no/ /da ni yang dag par rdzogs pa'i sangs rgyas rnams kyi rnam pa thams cad mkhyen pa nyid kyi rnam pa sum cu rtsa dgu ni rnam pa thams cad mkhyen pa zhes bya ba la sogs pa smos pa yin te/shin tu phul du byung ba'i phyir zhes bya ba ni thams cad kyi mchog yin pa nyid kyi phyir ro/ /thun mong ma yin pa zhes bya ba la sogs pa lam gcig pu kho na yin na yang stobs dang mi 'jigs pa la sogs pa'i bye brag gis phye ba yin no zhes bya bar dgongs so//da ni de la ni gnas dang gnas ma yin pa zhes bya ba la sogs pa smos pa yin no/ /sangs rgyas rnams kyi rnam pa ni sum cu rtsa dgu'o zhes bya ba ni stobs la sogs pa rnam pa sum cu rtsa drug dang 'di rnams kyi ngo bo nyid de bzhin nyid gang yin pa dang // gang zhig de chos thams cad la mnga' bsgyur ba'i rang byung dang / gang gi don du rnam pa thams cad mngon par rdzogs par byang chub pa'i sangs rgyas nyid ces bya ba gsum mo/ / rnam pa thams cad bsdus te rang bzhin dang grangs ni de la thams cad shes pa nyid kyi rnam pa ni zhes bya ba la sogs pa smos pa yin te/ dri ma med pa'i rnam pa bcu drug las gzhan med do zhes gang gsungs pa de ni nyon mongs pa'i sgrib pa'i gnyen po las dgongs pa yin pas de dang 'di la 'gal ba med do//sbyor ba khyad par zhes bya ba la sogs pas rnam pa dang bcas pa'i sbyor ba'i bdag nyid kyi yum sgom par byed pa'i byang chub sems dpa'i don gyi shugs kyis 'phangs pa bshad pa yin no/ /de dag kyang sbyor ba po med par brjod par mi nus pas zhes bya ba ni dgos pa med pa'i phyir smra bar mi rigs so//sangs rgyas rnams la bkur sti byas pa ni sangs rgyas la dmigs te gtsug lag khang la sogs pa byed pa dang / sangs rgyas rnams la bsod snyoms la sogs phul bas so/ /de la dge ba'i rtsa ba bskrun pa ni sangs rgyas la bsnyen bkur byas pa la sogs pas so//dge ba'i bshes gnyen gyi mgon dang bcas shing dge ba'i bshes gnyen rnams kyi mgon dang ldan pa ni rnam pa dang bcas pa'i sbyor ba'i bdag nyid kyi yum 'di mnyan pa'i snod yin zhing 'dzin pa dang 'chang ba la sogs pa ni snod nyid yin par dam pa rnams bzhed pa ste/der bsngags pa yin pa'i phyir sangs rgyas kyis gnang ba yin no/ /tshig le'ur byas pa'i don ni 'das pa dang zhes bya ba la sogs pa smos pa yin te/ gzhan dag mnyam pa la sogs pa 'thob par mi 'gyur bas 'das pa dang da ltar byung ba'i sangs rgyas rnams la dge ba'i rtsa ba bskrun cing sbyangs pa ste/sangs rgyas thams cad la dmigs te gtsug lag khang la sogs pa byed pa de rnams la bsod snyoms la sogs pa phul bas dang po thar pa'i cha dang mthun pa'i sa bon thob pa'o/ /spyir zhes bya ba ni gzhan rnams la med pas de bzhin gshegs pa rnams la spyir sangs rgyas de dag nyid la bkur sti byas pa dang /dge ba'i rtsa ba bskrun cing sbyangs pa'i sbyor ba po thams cad kyi lha'i rigs / lus la sogs pa zhes bya ba lus dang ngag dang sems kyis bskor ba bya ba dang / don ci lta ba bzhin bstod pa dang thos pa dang bsam pa la sogs pas bsnyen bkur byas shing bsten par byas pa dang /ras ris la sogs par gtogs pa'i de bzhin gshegs pa rnams la mnyes par byas shing mchod pa ni lus la sogs pa'i bsnyen bkur gyis mnyes par bya ba'o/ /the tshom gyi don yongs su 'dri ba ni yid gnyis su gyur pa'i don dge ba'i bshes gnyen la zhu ba'o//sbyin pa la sogs pa'i pha rol tu phyin pa bcu sgrub pa ni nyams su len pa'o/ /de dang ldan pa'i dge ba'i bshes gnyen dag gis byin gyis brlabs pa 'di nyid ni rnam pa'i mtshan nyid can gyi yum zhes bya ba rnam pa'i sbyor ba'i bdag nyid can gyi shes rab kyi pha rol tu phyin pa 'di go rims ji lta ba bzhin zhes bya ba bkur sti byas shing dge ba'i rtsa ba bskrun cing sbyangs pa dang // sangs rgyas la bsnyen bkur byas pa dang // the tshom gyi don yongs su dri ba dang // sbyin pa la sogs pa bsgrub pa dang ldan pa ste/ dge ba'i bshes gnyen dang ldan pa bzhi po ni mnyan pa la sogs pa bzhi'i snod nyid du gyur pa yin no zhes bya bar sbyar ro//tshig ces bya ba la sogs pas ni len pa dang zhes bya ba la sogs pa bshad pa yin no/ /tshul bzhin yid la byed pa ni lam bsgom pa'o/ /gang gis sngon sangs rgyas mngon sum du mthong zhing de rnams la des bkur sti byas pa'i bsod nams nye bar bsags na des de rnams nyid las ci'i phyir yum mnyan pa la sogs pa ma bsgrubs zhes brjod par mi bya ste/de rnams ni de'i tshe des mngon sum du 'dul bar 'gyur ba ma yin la da ltar ni tshul de'am rgyud de las dge ba'i bshes gnyen des 'dul ba nyid kyis na yum mnyan pa la sogs pa 'byung bar 'gyur ba'o//za ma tog bkod pa las de bzhin gshegs pa'i bkas sgrib pa thams cad rnam par sel bas bA rA Na sI na gnas pa'i dge ba'i bshes gnyen la bsnyen bkur byas pa dang 'dra ba yin pas na nyes pa med do//gzugs la sogs pa zhes bya bas ni sbyor ba'i rab tu byed pa'i don bshad pa yin te/ yang dag par na gzugs la sogs pa ngo bo nyid med pa nyid kyis mi gnas pa ni mngon par ma zhen pa'o/ /gzugs la sogs pa de dag la mi sbyor ba nyid sbyor ba yin pa ni bsgom par bya ba la sogs pa gsum po nye bar ma dmigs pa'o//gzugs la sogs pa de dag nyid de bzhin nyid ngo bo nyid kyis stong pa nyid yin pas zab pa dang gting dpag dka' ba dang tshad med pa nyid mi gnas pa dang mi dmigs pa dang rang bzhin dang rnyog pa med pa dang /mtha' med pa nye bar ma dmigs pa nyid de/ de ltar rtogs shing shes pa dang ldan pa rnams la grangs bzhin du zhes bya ba la sogs pa'i sbyor ba lnga ni gzugs la sogs pa la mi gnas pa'i phyir zhes bya ba la sogs pa'i don bshad pa yin no/ / shes rab kyi pha rol tu phyin pa de la tshegs chen po dang yun ring po dag gis sdug bsngal ba dang /bskal pa grangs med pa gsum gyis mngon par rdzogs par byang chub pa de la skrag pa'o/ /sangs rgyas rnams las 'tshang rgya ba nyid kyis dus dang ming dang nges pa la sogs pa thob pa gang yin pa de ni lung bstan pa thob pa ste/de la mi skrag pas ni tshegs chen yun ring rtogs pa'i phyir lung bstan ces bya ba bshad pa yin no/ /phyir mi ldog pa nyid du yang dag par 'dzin pa ni shes rab kyi pha rol tu phyin pa la sogs pa'i don phyin ci ma log pa nyid kyis bzung ba'o/ / nges par 'byung ba ni bla na med pa'i ye shes thob pa la bar chad kyi chos 'og nas smos pa'i nyes pa gang yin pa de rnams spong ba ni dge ba'i bshes gnyen la sogs pa'i stobs kyis 'dor ba'o/ /bar chad med cing rgyun mi chad pa'i rtag tu chos bsgom pa'i yid nyid kyis gus pa dang bcas pa la sogs pas bsgom pa'o//rang gi tshul las ltos nas yang dag par mngon par rdzogs par byang chub dang nye ba yin zhing zag pa med pa'i chos gser gyi rten nyid yin pa ni sangs rgyas pa kho nar gyur na nye bar dmigs pa'i gnas skabs su rtogs pa'i chos mthong ba dang bral ba'i phyir nyid sngon du ma byung ba ni nyon mongs pa can ma yin pa'i ye shes kyi rang gi mtshan nyid 'dzin pa'i stobs bcu la sogs pa'i rten nyid yin pa'o//myur du mngon par rdzogs par byang chub cing 'bras bu chos kyi sku mngon par grub pa ni pha rol gyi stobs bcu la sogs pa'i rten gyi chos kyi sku rdzogs par byed pa ste/de ltar smon pa yin pa'i phyir te/ byang chub nye dang myur ba dang / /zhes bya ba byang chub rnam pa gnyis bshad pa yin no/ /gzhan gyi don du chos kyi 'khor lo rab tu bskor ba ni kun nas chos ston par mdzad pa'o/ /'phel ba med pa dang 'grib pa med cing gzugs la sogs pa'i 'phel ba dang 'grib pa mi mthong ba ni ma dmigs pa'o//chos ni gzugs la sogs pa'o/ /chos min ni nam mkha' la sogs pa'o/ /sogs pa'i sgras ni gang zag la sogs pa ste/ de rnams yang dag par mi mthong ba ni chos dang chos ma yin pa la sogs pa nye bar mi dmigs pa ste/de la 'dod pa'i khams su mi dmigs pa'o/ /gzugs la sogs pa bsam gyis mi khyab pa'i rnam pa'i stong pa nyid kyis 'gog cing mi dmigs pa gang yin pa de la gzugs la sogs pa bsam gyis mi khyab pa'i rnam par rlom pa med pa ni gzugs la sogs pa'i stong pa nyid la mngon par zhen pa med pa'o//gzugs la sogs pa'i dngos po la mi rtog pa ni gzugs dang de'i mtshan ma dang // de'i ngo bo nyid du rnam par mi rtog pa ste/ gzugs kyi phung po dang sngon po la sogs pa 'byung ba chen po la sogs par rtog pa med pa'o//'bras bu rin chen sbyin byed pa ni rgyun tu zhugs pa la sogs pa nas bla na med pa yang dag par rdzogs pa'i byang chub kyi 'bras bu rin po che sbyin pa la 'bras bu dang po mthong ba ni rgyun tu zhugs pa la sogs pa'i 'bras bu shes pa'o/ / dag pa ni de bzhin nyid kyi dri ma med pa ni gzugs rnam par dag pa ste/ gzugs kyi phung po la sogs pa dri ma med pa'o/ /mtshan ni dri ba'i dus la sogs pa'i nges pas lo skor du mngon par brtson pa mi 'dor ba zhes bya ba la sogs pa'i sgrub pa dang ldan pa rnams go rims bzhin du zhes bya ba la sogs pa sbyor ba rnam pa bco lnga'o//sbyor ba rnam pa nyi shu yin no zhes bya ba ni sngar bshad pa'i sbyor ba lnga dang bcas pa ste/ gzhan don 'phel med ces bya ba la sogs pa'i bshad pa yin no/ /sbyor ba nyi shu po de dag gi go rims 'di ni rigs pa kho na yin te/ de yang gzugs la sogs pa'i chos thams cad la mngon par zhen pa med pas gnas pa dang /de la mi sbyor ba'i sbyor ba la mngon par brtson pa de dag gis gzugs la sogs pa la zag pa nyid dang / gting dpag dka' ba nyid dang / tshad med pa nyid rtogs par 'gyur ro/ /de nas 'di yang dag pa'i sbyor ba mi byed pa nyid kyis ni las dang po pa nyid kyi ni tshegs chen pos 'thob po//de las gzhan pa ni lung bstan pa dang / phyir mi ldog pa'i sa bde blag tu thob nas nges par 'byung ba dang mi 'bral bar 'gyur zhing bar chad med par 'gyur ba dang / mngon par rdzogs par byang chub pa la nye bar 'gyur ba dang /myur du mngon par rdzogs par byang chub par 'gyur ro/ /de las gzhan gyi don byed cing 'phel ba med pa dang 'grib pa med par 'gyur ro/ /des na chos dang chos ma yin pa la sogs pa la ming dang gzugs dang bsam gyis mi khyab pa la khyad par gyi 'du shes thams cad dang bral bas rnam par mi rtog pa dang /'bras bu rin po che sbyin pas mchog tu rnam par dag pa'i mthar thug pa thob par 'gyur te/ snga ma bzhin du lo gcig gi bar du mngon par brtson pas sems kyi rgyud yongs su sbyangs pa yin pas 'di ni mngon par rtogs pas rab tu phye ba yin no//bdud kyi zhes bya ba la sogs pa'i tshig le'ur byas pa'i don ni bdud kyi mthu bcom pa dang zhes bya ba la sogs pa yin te/ bdud kyi mthu bcom pa ni dbang po la sogs pa'i bgegs kyi nus pa bsal ba'o/ / sangs rgyas kyis dgongs shing mkhyen pa nyid ni sbyor ba dang dngos gzhi dang mjug gi gnas skabs su sangs rgyas kyi spyan ras kyis btsas pa'o/ /sangs rgyas kyi mngon sum du mdzad pa ni sangs rgyas kyi yul du mdzad pa'o/ /yang dag par rdzogs pa'i byang chub dang nye bar gyur pa ni byang chub dang nye bar gyur pa nyid do//don yang yin la chen po yang yin pas na don chen po ste/ rang gi don gtso bo ma yin na yang gzhan gyi don gtso che ba'i rgyur gyur pa'i phyir ro/ /de'i dngos po ni don chen po nyid do/ /gzhung gi bdag nyid kyi yum 'chang ba dang klog pa nyid kyis rdzogs pa'i sangs rgyas dang /bde 'gro dag dang yang dag par 'tshang rgya ba nyid dang mi 'bral ba nyid yin pa la sogs pa'i sgras ni de phan chad kyang yid bzhin gyi nor bu dang 'dra ba rnam pa thams cad du gzhan gyi don rgyun mi 'chad pa'o/ /yul dpyad pa ni yum bshad pa'i phyir 'chad pa po'i byang phyogs la sogs pa'i yul rnam par bstan pa'o//zag pa med pa'i yon tan thams cad rdzogs pa ni sangs rgyas kyi yon tan bskyed pa'o/ /smra ba'i skyes bu nyid ni chos thams cad skye ba med par ston pa po mi phyed pa nyid do/ /mi phyed pa nyid ni byang chub las mi bskyod pa nyid do//dge ba'i rtsa ba thun mong ma yin pa skye ba ni 'khor gsum yongs su dag pa'i sbyin pa la sogs pa'i bsod nams bskyed pa'o/ /dam bcas pa'i don ji lta ba bzhin du bsgrubs pa ni sngon gyi smon lam rnam pa thams cad du rdzogs pa'o/ /'bras bu rgya chen po yongs su 'dzin pa ni 'tshang rgya ba nyid 'dzin pa'o//sems can gyi don sgrub pa ni chos ston pa la sogs pa la gzhan gyi don len pa'o/ /nges par 'thob pa ni shes rab kyi pha rol tu phyin pa ma tshang ba med par thob pa'o zhes bya ba'i yon tan rnams ni 'bras bur 'gyur ba'o/ /don gyis 'phangs pa'i rgyur gyur pa'i yon tan ni grangs bzhin du zhes bya ba la sogs pa smos pa yin te/byin gyis brlabs pa ni nus pa bskyed pa'o/ /dgongs pa ni gzigs pa'o/ /ye shes kyi gzigs pa ni lha dang shes rab dang chos dang sangs rgyas kyi spyan ni ye shes so/ /nye bar gyur pa ni nye ba nyid do//phan yon chen po ni bstod dang bkur dang zhes bya ba la sogs pa'o/ /bya ba byed pa ni sems can yongs su smin par bya ba la sogs pa'o/ /gnyen po'i chos yongs su rdzogs pa ni lam shes pa yongs su rdzogs pa'o/ /rnam pa thams cad mkhyen pa nyid kyi gtam brjod pa ni yum ston pa'o//grogs mdzad pa ni mgon dang bcas pa'i bya bas mnyam pa nyid du bskyed pa'o/ /dga' ba rgya chen po bskyed pa ni 'jig rten las 'das pa'i chos kyi dga' ba bskyed pa'o/ /de'i dam bcas pa'i tshig la rjes su yi rang ba ni sbyor ba dang ldan pa'i smon pa'i tshig le'u la dga' ba'o//chos zab mo mngon par 'dod pa ni shes rab kyi pha rol tu phyin pa nyen par 'dod pa la sogs pa mngon par mos pa'o/ /sems can gyi don byed pa ni snga ma bzhin no/ /shes rab kyi pha rol tu phyin pa tshang bar rnyed pa ni lam yang dag par rdzogs par rnyed pa'o//de ltar na sangs rgyas kyi byin gyis brlabs pa la sogs pa rgyur gyur pa'i yon tan bcu bzhi po de dag phyin ci ma log pa'i sbyor ba la mngon par dga' ba'i sngon bshad pa'i sgom pa po la 'bras bur gyur pa'i yon tan 'byung bar 'gyur zhing mngon sum du 'gyur la rjes su mthun par bslab par bya ba nyid yin pas yon tan bcu bzhi yin no//de'i 'og tu yang gang zhig ces bya ba la sogs pa ni tshig le'ur byas pa'i don yin la sbyor ba po'i bar chad ces bya ba la sogs pas ni nyes pa bshad pa yin no/ /tshigs chen pos 'thob pa ni yum shes par ring zhig na thob pa'o//spobs pa ha cang myur ba ni sngon dang phyi ma ma dpyad par yum shin tu myur bar shes pa'o/ /lus kyi gnas ngan len dang sems kyi gnas ngan len ni lus dang sems dag gi rnam par g.yeng ba'o/ /rig pa dang ma yin pa zhes bya ba la sogs pas ni gcig la gcig rgod pa la sogs pas dri ba la sogs pa byed pa'i phyir ro//phyir phyogs pa'i rgyu mtshan zhes bya la sogs pa ni yum mnyan pa la sogs pa la dad pa med pas so/ /rgyu la mngon par zhen pa nyams pa la sogs pa ni theg pa chen po spangs nas theg pa gzhan byang chub kyi rgyu nyid yin pa dang /gya nom pa nyid dang / rnam pa thams cad du theg pa'i mchog nyid dang / rtag tu ched du bya ba nyid dang / rgyu dang 'bras bu 'brel pa nyid dang / gong na med pa nyid du mngon par zhen pas rgyu la mngon par zhen pa la sogs pa drug po la nyams pa zhes smos pa ni theg pa chen po las nyams pa'i rgyu nyid yin pa'i phyir ro//yul rnam pa mang po la zhes bya ba la sogs pa ni bud med la sogs yul rnam pa mang po'i rnam par rtog pa'i shes pa skye ba'i phyir ro/ /yi ger 'dri ba la mngon par zhen pa la sogs pa yang theg pa chen po las g.yengs pa'i rgyu rnams yin no//'dir bcu tshan snga ma ni nyan pa po yin la bcu tshan phyi ma ni 'chad pa po yin te/ de ni grangs bzhin du zhes bya ba la sogs pa smos pa yin te/ grangs bzhin du nyan pa po dang 'chad pa po dag ces bya ba nyan pa dang 'chad par byed pa de dag gang yang rung ba ni gcig cig go//de ni snga ma dang phyi ma dang mngon par 'brel pas zhes smos pa yin no/ /bcu tshan snga ma'i sbyor ba ni snga ma nyan pa po yin la bcu tshan phyi ma'i sbyor ba la ni phyis smos pa 'chad pa po yin par sbyor ro zhes bya ba'i tha tshig go/ / 'dun pa dang snyom las ni mngon par 'dod na yang le lo byed pa'o/ /'dun pa'i yul tha dad pa ni nyan pa po'i 'dun pa'i yul las 'chad pa po'i 'dun pa tha dad pa nyid do/ /'dod rtsen chung ba dang 'dod rtsen chung ba ma yin pa nyid ni nyan pa po dang 'chad pa po dag yum bsgom pa med pa'i rgyu nyid yin pas 'di dag la nyams pa zhes brjod do//sbyangs pa'i yon tan dang ldan pa dang / mi ldan pa dag ni nyan pa po dang 'chad pa po dag 'dod rtsen chung ba dang / 'dod rtsen chung ba ma yin pa dag gis zhes bshad par bya'o/ /dge ba dang dge ba ma yin pa'i chos nyid dang gtong ba dang ser sna byed pa ni dad pa'i chos nyid kyis na nyan pa po'i nor gtong ba dang dad pa ma yin pa'i chos nyid kyis na 'chad pa po la ser sna byed pa'o//sbyin pa dang mi len pa ni nyan pa po dang 'chad pa po dag ster ba dang mi len pa'o/ /mgo smos pas go ba dang rnam par spros pa nyid ni nyan pa po dang 'chad pa po dag go//mdo sde la sogs pa'i chos mngon par shes pa dang / mngon par mi shes pa nyid ni 'chad pa po dang nyan pa po dag go/ /de nyid kyis na 'di dag pha rol tu phyin pa drug dang ldan pa dang mi ldan pa zhes bya ba la sogs pa ci rigs par sbyar bar bya'o/ /grangs bzhin du gcig pu dang zhes bya ba la sogs pa'i tshig snga ma snga ma dag ni 'chad pa po yin la/phyi ma phyi ma dag ni nyan pa po yin par sbyar bar bya'o/ /de ni 'chad pa po dang zhes bya ba la sogs pa smos pa yin te/ 'khor la mngon par dga' ba nyid ni bdag nyid ni 'khor dang bcas par 'gyur bar bya'o zhes mngon par 'dod pa'o//go skabs mi 'byed pa nyid dang 'dod pa nyid kyi rjes su ma 'brel ba nyid ni bdag nyid kho na sbyin pa po nyid du 'dod pa'o/ /zang zing cung zad tsam 'dod pa dang de sbyin par mi 'dod pa nyid ni nor rnams la sbyin par mi 'dod pa'o/ / srog gi bar chad du zhes bya ba la sogs pa la bcu tshan bzhi pa ni sngar bshad pa bzhi'o/ /'og nas bshad pa'i nyes pa drug po de ni de bzhin du mu ge zhes bya ba la sogs pa smos pa yin te/ de ltar na nyes pa bzhi bcu rtsa drug gis ni yum shes pa la sogs par rung ba'i sems sun 'byin par byed pa yin pa'i phyir skyon yin no//go rims bzhin du zhes bya ba la sogs pas ni mtshan nyid rnam pa bzhi po re re zhing thams cad mkhyen pa nyid gsum gyi khyad par yod pa rnams kyi nang nas so / /de bzhin gshegs pa zhes bya ba la sogs pa ni tshig le'ur byas pa'i don bshad pa yin te/de bzhin gshegs pa 'byung ba ni yum gyi dbang gis sangs rgyas su 'grub pa'o/ /'jig rten 'jigs pa med pa ni skad cig ma nyid dang rgyun mi 'dra ba'i rgud pa'i 'jigs pas yang dag par na mi 'jigs pa'o/ /sems can gyi sems kyi spyod pa ni sems can gyi bsam pa stong phrag brgyad cu rtsa bzhi'am grangs med pa'o//sems bsdus pa ni yang dag pa'i sems so/ /sems rnam par g.yengs pa ni de las go bzlog pa'o/ /sems mi zad pa'i rnam pa ni gzhal bya mi zad pa nyid kyis na snying rje chen pos byin gyis brlabs pa'i sems so//sems 'dod chags dang bcas pa la sogs pa'i nyon mongs pa dang bcas pa dang / nyon mongs pa med pa'i sems so/ /sems rgya chen po la sogs pa ni rgya che ba nyid kyi phyir dang khyab pa'i phyir dang grangs dang tshad dag gis gzhal bar mi nus pa nyid kyi phyir dang /dpe med pa'i phyir dang dbang po la sogs pa'i spyod yul ma yin pa'i phyir ro/ /sems g.yo ba la sogs pa zhes bya ba g.yo ba dang mi g.yo ba ni rang gi yul la sgrub pa dang dgag pa'i sgo nas 'jug pa'o/ /de las skyes pa'i sems ni g.yo ba'o//sogs pa'i sgras ni sems mi g.yo ba zhes bya ba bshad pa yin no/ /g.yo ba la sogs pa'i de bzhin nyid kyi rnam pa can ni sngar bshad pa'i g.yo ba dang mi g.yo ba dag stong pa'i bdag nyid do/ /de bzhin gshegs pa'i de bzhin nyid rtogs pa ni yang dag par rdzogs pa'i sangs rgyas kyis stong pa nyid shes pa'o//de gzhan la bstan cing btags pa ni gdul bya rnams la de kho na nyid ston pa dang / chos thams cad kyi rjes su 'gro ba nyid kyis de rnam par 'jog pa'o/ /de ltar na de bzhin gshegs pa 'byung ba zhes bya ba la sogs pa 'di rnams ji lta ba bzhin du rjes su mi dmigs pa'i shes pa'i bar gyi rnam pas de la mi dmigs pa'i shes pa'i khyad par ro//rnam pa bcu drug gi tshul bzhin du zhes bya ba tha dad pa nyid du'o/ /thams cad shes pa nyid kyi sbyor ba rnams ni sngar bshad pa rnams mtshon cing shes pas na shes pa'i bdag nyid can gyi mtshan nyid ni shes pa'i mtshan nyid ces bya ba la sogs pa yin no//ngo bo nyid dang rten med pa dang nam mkha'i mtshan nyid de gsum ni mya ngan las 'das pa dang / chos kyi dbyings dang / de bzhin nyid kyi ye shes rnams yin no//chos nyid rnam par 'khrugs pa med pa ni gzugs la sogs pa'i ngo bo nyid kyis stong pa'i gzugs la sogs pa la bdag la sogs par sgro mi 'dogs pas stong pa nyid las ma nyams pa'o/ /'du mi byed pa ni yang dag par na phung po la sogs pa med pa'o/ / rnam par mi rtog pa ni rnam par rtog pa med pa'o/ /rab tu dbye ba ni sna tshogs pa nyid do/ /mtshan nyid med pa zhes bya ba la sogs pa ni chags pa med pa'o/ /de ni nyid kyi chos bstan nas zhes bya ba la sogs par rnam pa thams cad mkhyen pa'i ye shes kyi tshig le'ur byas pa'i don ni de bzhin gshegs pa zhes bya ba la sogs pa smos pa yin te/de bzhin gshegs pa de nyid kyi zhes bya ba ni thams cad la sbyar bar bya'o/ /nyid kyi chos la brten nas gnas pa ni gnyis su med pa'i ye shes la gnas pa'i spyod lam bzhi'i rnam pa'o/ /gus par bya zhes bya ba la sogs pa ni mchod pa zhes bya bar don gcig go//byed pa med pa nyid ni byed pa po med pas 'bras bu med pa nyid do/ /thams cad du 'gro ba ni gdul bya'i dbang gis so/ /ma mthong ba'i don ston pa ni de kho na nyid du gzugs la sogs pa ma mthong ba ston pa'o//'jig rten stong pa nyid kyi zhes bya ba la sogs pa ni 'jig rten stong pa nyid yin pa'i phyir dang / de bzhin du brjod pa'i phyir dang / shes par mdzad pa'i phyir dang / ston par mdzad pa yin pa'i phyir ro/ /bsam gyis mi khyab pa zhes bya ba la sogs pa ni bsam gyis mi khyab pa nyid yin pa'i phyir dang /zhi ba nyid yin pa'i phyir dang / 'gog pa nyid yin pa'i phyir dang / 'du shes med pa nyid yin pa'i phyir ro/ /khyad par gyi mtshan nyid kyi tshig le'ur byas pa dang 'grel pa ni go sla'o/ /bsam gyis mi khyab pa dang zhes bya ba la sogs pa'i khyad par gyi lam gyi tshig le'ur byas pa'i rnam par 'grel pa ni yang dag par rdzogs pa'i sangs rgyas zhes bya ba la sogs pa yin te/yang dag par rdzogs pa'i sangs rgyas la sogs pas legs par yongs su bzung ba'i shes rab kyi stobs kyis bsam gyis mi khyab pa dang mi mnyam pa dang gzhal du med pa dang /bgrang du med pa nyid yin pas bsam gyis mi khyab pa nyid dang zhes bya ba la sogs pa smos pa yin no/ /'phags pa'i gang zag ces bya ba la sogs pas yum ni rnam pa thams cad mkhyen pa nyid kyi ngo bo nyid yin pa dang /de 'phags pa rnams dang rjes su 'brel pa nyid yin pa'i phyir shes rab kyi pha rol tu phyin pa yin par bshad do/ /skyes bu mkhas pa zhes bya ba la sogs pa ni tshad ma la mkhas pas rtogs par bya ba yin pa'am/ rnal 'byor pa'i rang rig pa nyid yin pa'i phyir ro//nyan thos la sogs pa'i zhes bya ba la sogs pas ni yul dang dus kyis chod pa'i dngos po phra mo shes pa nyid yin pa'i phyir ro/ /rang gi lugs las zhes bya ba la sogs pa ni yang dag par rdzogs pa'i sangs rgyas kyi ye shes bskal pa grangs med pa gsum mam/de'i phyed dam de dag kyang nyung bas myur bar yang dag par ye shes thob par gsungs pa yin pa'i phyir ro/ /kun rdzob dang zhes bya ba la sogs pa smos pa ni kun rdzob tu gzugs la sogs pa'i bri ba med pa nyid dang gang ba med pa nyid yin te/kun rdzob kyi dbang gis bsags pa nye bar dmigs pa'i phyir ro/ /don dam par bri ba med pa dang gang ba med pa ni dngos po med pa nyid kyis tha snyad du byas pa'i gzugs la sogs pa ma mthong ba'i phyir ro/ /'khor gsum zhes bya ba la sogs pa ni yang dag par na sbyin pa la sogs pa la sbyin par bya ba la sogs par mi dmigs pa dag tu bsgrub pa yin pa'i phyir ro//yang dag pa'i zhes bya ba la sogs pa ni 'khor gsum yongs su dag pas bsod nams dang ye shes bskal pa grangs med pa gsum du bsags pa thob pa yin pa'i phyir ro//chos thams cad la zhes bya ba la sogs pa la phyi dang nang gi dngos po rnams la dag pa nyid du dmigs pa yin pa'i phyir ro/ /chos kyi dbyings kyi zhes bya ba la sogs pa ni byang chub sems dpa' las gzhan pa dag ni yum shes pa la gnas pa yin par mi 'thad pa'i phyir ro/smon lam zhes bya ba la sogs pa dang / dge ba'i bshes gnyen zhes bya ba la sogs pa ni rgyu ma tshang ba med pa tsam dang rjes su 'brel pa dang 'tsham pa nyid du rjes su dpag pa yin pa'i phyir ro/ /mngon par zhen pa'i ro myang ba med pa ni chags pa med pa la yang ma zhen pa ste/'tshang rgya ba nyid kyi gnas skabs su ni de yang spang bar bya ba nyid yin pa'i phyir ro/ /bcu drug gi bdag nyid ces bya ba ni khyad par gyi bdag nyid bcu drug go/ /'dis ci zhig ni mtshon 'di'i khyad par ni ji lta bu zhig yin pa dang ji ltar na khyad par gyi lam du bstan pa la brten pa yin zhe na/de'i phyir go rims bzhin du zhes bya ba la sogs pa smos pa yin te/ de ltar bcu drug po'i go rims bzhin du sdug bsngal la sogs pa bden pa skad cig ma rnams kyi re re zhing sdug bsngal gyi bden pa la sogs pa la mtshan nyid bzhi bzhi yin la lam shes pa la sogs pa gnyis ni zhes bya ba lam shes pa nyid dang /rnam pa thams cad mkhyen pa nyid la byang chub sems dpa' la sogs pa ste/ byang chub sems dpa' dang sangs rgyas dag nyan thos la sogs pa'i lam sngar gsungs pa rnams las khyad par ni bsam gyis mi khyab pa la sogs pa'i khyad par gyi dbye ba bstan pa gang yin pas khyad par zhugs shing rdzogs pa'i byang chub kyi thabs nyid yin pa'i phyir khyad par gyi lam yin te/sngar bshad pa'i bsam gyis mi khyab pa la sogs pa'i khyad par du 'phags pa'i bden pa bzhi'i mtshan nyid do//'dir nyan thos la sogs pa'i lam brjod par yang rigs pa ma yin nam gzhan du na khyad par du khong du chud par mi 'gyur ro zhe na/ de'i phyir zhes bya ba la sogs pa smos te/ de'i phyir byang chub sems dpa'i lam sngar bshad pa la sa nyan thos la sogs pa de dag gi ni ji skad du bshad pa'i khyad par dang bral ba ste/bsam gyis mi khyab pa la sogs pas stong pa'i 'phags pa'i bden pa bzhi'i lam yin no/ /de ltar na yang ci'i phyir ma bshad ce na/mngon par shes pa la sogs pa'i skye ba'i mtshan nyid kyis zhes bya ba mnyam par gzhag pa las mig la sogs pa'i mngon par shes pa'i phyogs gcig pa'i shes pa'i mtshan nyid yin zhing sogs pa'i sgras 'dod pa'i 'dod chags dang bral ba nyid la sogs pa skyed pa nyid kyis na/go sla ba'i phyir dang lung dang byang chub sems dpa'i tshul las grags pa'i phyir ma bshad do/ /de ltar khyad par gyi mtshan nyid kyis de sngar ma bshad pas so/ /mtshams bcad pa ni nyan thos la sogs pa'i lam rnams las tha dad par byas pa'i bden pa bzhi'o //byed pa zhes bya ba gang zhig yin zhe na/ byed pa po'i mtshan nyid ni phan dang zhes bya ba la sogs pa gsungs pa yin te/ tshig le'ur byas pa rnam par 'grel ba ni ma 'ongs pa'i phan pa dang tshe 'di'i bde ba ni 'jig rten pha rol po'i dang / 'jig rten 'di pa'i lus dang sems kyi bde ba dang yid bde ba'o//sdug bsngal med pa'i rnam par smin pa ni btang snyoms te lung du ma bstan pa'i sems yin la/ de nyid ni rnam par smin pa ma yin pa ste/ bde 'gro dang ngan 'gro'i 'bras bu 'byin pa ma yin pa'i phyir ro//'di rnams kyi chos nyid ni rjes su mthun pa la sogs pa'i rang bzhin no/ /de'i nye bar bsgrub pa ni bsam gyis mi khyab pa la sogs pa'i khyad par gyis khyad zhugs pa'i 'phags pa'i bden pa bzhi sgom pa po la ster ba'o/ /rgyu des na phan pa zhes bya ba la sogs pa yin no//gtan du zhes bya ba la sogs pa ni sdug bsngal lam/ sdug bsngal gyi rgyu las zlog par byed pa ma 'ongs pa na phan pa'i mya ngan las 'das pa'i bde ba'o/ /'khor ba zhes bya ba la sogs pa ni 'khor ba dang zhi ba mnyam pa nyid du shes pa'o//rang dang zhes bya ba la sogs pa ni bdag dang gzhan gyi nges par legs pa dang mngon par mtho ba'i rgyu nyid do/ /gzhan gyi zhes bya ba la sogs pa ni gnas skabs thams cad du sems can gyi don bsgrub pa'o/ /sems can gyi don zhes bya ba la sogs pa ni gzhan gyi don la shin tu bslabs pas pha rol gyi don la 'bad pa med par 'jug pa'o//theg pa zhes bya ba la sogs pa ni byang chub sems dpa' rnams kyi nyon mongs pa ni rnam par rtog pa yin pa'i phyir ro / /thams cad mkhyen pa nyid gsum gyi 'bras bu mngon sum du mi byed pa'i phyir ro//de ltar bdun po 'di rnams dus ji lta ba bzhin du bsam gyis mi khyab pa la sogs pas khyad par zhugs pa'i 'phags pa'i bden pa bzhi bsgom pa rab kyi mthar phyin pa'i dus las mi 'da' ba'i rim gyis thogs pa med par gzhan gyi don ji lta ba bzhin du yang dag par nye bar bsgrub pa'i phyir ro//rnam pa thams cad ces bya ba la sogs pa ni rnam pa thams cad mkhyen pa nyid kyi gang gi chos thams cad ni sems bskyed pa la sogs pa'o/ /de ston pa nye bar sgrub pa'i don gyis na rten gyi mdzad pa ste/ gdul bya rnams kyi rten nyid ni gcig ste zhes bya ba la sogs pa yin no/ /nyon mongs pa zhes bya ba la sogs pa ngo bo nyid kyi mtshan nyid kyi tshig le'ur byas pa rnam par 'grel pa ni 'dod chags zhes bya ba la sogs pa yin te/ 'dod chags la sogs pa'i nyon mongs pa de'i 'bras bu'i rtags gnas ngan len gyi mtshan ma ni lus la sogs pa'i nyes pa gang yin pa dang /de'i mtshan ma tshul bzhin ma yin pa'i yid la byed pa ste/ 'dod chags la sogs pa'i rgyu mtshan gyi tshul bzhin ma yin pa'i yid la byed pa'o/ / sogs pa'i sgras ni ngag 'khyal pa la sogs pa ste de'i rnam par rtog pa'i'o/ /'dod chags dang 'dod chags med pa la sogs pa mi mthun pa'i phyogs dang gnyen po ste/ nyon mongs pa dang lam dag gis bsdus pa dag ni stong pa nyid kyis na 'di rnams med pa yin pa'i phyir dben pa'i ngo bo nyid de/nyon mongs pa dang rtags dang tshul bzhin ma yin pa'i yid la byed pa dang mi mthun pa'i phyogs dang gnyen po dag ni dben pa'i bdag nyid yin no/ /don dam par med pa'i zhes bya ba la sogs pa ni yang dag par med pa la mya ngan las 'da' ba mi rigs pa'i phyir ro//theg pa gzhan du zhes bya ba la sogs pa ni sa brgyad par gtogs pa'i theg pa chen po la gnas pa ni nges par nyan thos la sogs pa'i lam du mi ltung ba yin pa'i phyir ro/ /yun ring po nas zhes bya ba la sogs pa ni bskal pa grangs med pa gsum las nges par 'byung ba'i 'tshang rgya ba nyid kyi mchog dang rab dang thu bo dang /rab mchog la sogs pa shes rab kyi pha rol tu phyin pa'i gzhung gi sgo nas ngoms pa med pa nyid slob pa yin pa'i phyir ro/ / bsgom par bya ba zhes bya ba la sogs pa ni yang dag par na bsgom par bya ba la sogs pa yod pa mi 'thad pa'i phyir ro/ /dngos por zhes bya ba ni gzugs la sogs pa la mngon par zhen pa med pa'i phyir ro/ /thams cad shes pa nyid dang lam shes pa nyid ni sngar bshad pa ste/des yang dag par bsdus pa'i dngos po'i khyad par phyi dang nang gi bdag nyid can gyi lam gyi bdag nyid de la dmigs pa'o/ /'jig rten ni phyi rol gyi bstan bcos la mngon par dga' ba'o/ /de rnams kyi sgrub pa gang yin pa'i sgra ni tshangs pa rtag pa la sogs par brjod pa'i rang gi bstan bcos 'dzin pa la sogs pa de rnams las 'dzin pa la sogs pa las bzlog pa ste/de'i bstan bcos dang 'gal ba'i chos dang gang zag la bdag med pa ston pa'i yum nyan pa dang / gzhung 'dzin pa dang mi brjed pa dang tshul bzhin yid la byed pa ston pa yin la de nyid ni mi mthun pa yin te/'jig rten dang 'gal ba'i shes pa gzugs la sogs pa bdag med pa'i shes pa ni tshad ma dang 'gal bar 'dzin pa'i phyir ro/ /gzugs la sogs pa thogs pa med par shes pa ni gzugs la sogs pa tshad ma dang mi 'gal ba'i kun rdzob kyi shes pa'o zhes bya ba'i tha tshig go//shes bya dang shes pa mi dmigs pas zhes bya ba ni gzung ba dang 'dzin pa med pas gzhi med pa ste/ rten med pa'o/ de bzhin nyid kyis 'gro ba med pa ni de bzhin nyid kyis 'gro ba mi rigs pa yin pa'i phyir ro//gzugs la sogs pa zhes bya ba ni stong pa nyid yin pas gzugs la sogs pa skye ba mi 'thad pa yin pa'i phyir ro/ /dngos po dang dngos po med pa la sogs pa zhes bya ba ni de bzhin nyid du gcig pa nyid kyis na tshul gsum gyi ngo bor mi 'thad pa'i phyir ro//de ltar zhes bya ba la sogs pa ni sbyor ba las tha dad par bshad pa'i mtshan nyid rtogs pa med pas sbyor ba ni mtshan nyid kho nar mi 'thad pas sbyor ba dag mtshan nyid dang ldan pa bzhin du zhes smos pa yin no/ /thar pa'i cha dang mthun pa'i tshig le'ur byas pa ni mtshan ma med ces bya ba la sogs pa yin te/mtshan ma med pa ni bdag med pa'o/ /des sbyin pa la sogs pa gang yin pa de la yang dag par sgrub pa ni nyams su len pa thob pa gang yin pa'o/ /de la mkhas pa ni dad pa la sogs pa'o/ / mtshan ma med par zhes bya ba la sogs pas tshig le'ur byas pa rnam par 'grel pa yin te/ mtshan ma med par dmigs pa'i shes pa'i rnam pas zhes bya ba ni stong pa nyid la dmigs pa'i sems so/ /sbyin pa la sogs pa'i pha rol tu phyin pa rnam pa thams cad mkhyen pa nyid la thug pa ni thams cad mkhyen pa nyid gsum gyi mthar thug pa rnams so//rang gi rgyud la bskyed pa ni nyams su len pa nyid kyis rnal 'byor pa'i sems la nges par bskyed pa ste de la mkhas pa'o/ /dad pa la sogs pa ni rnam pa thams cad mngon par rdzogs pa rtogs pa 'di la ste/de'i sbyor ba shes pa'i skabs su thar pa'i cha dang mthun pa ste/ nyon mongs pa dang bral ba'i khyad par dang rjes su mthun pa yin par rgyal ba rnams 'dod cing bshad de/ dge ba'i rtsa ba nyid yin pa'i phyir blang bar bya ba nyid du mngon par bzhed do//gzhan du na 'jig rten pa'i bsgom pa rang bzhin gyi dad pa la sogs pa tsam ni gdul bya'i rgyu la lam bskyed par nges pa med pa yin la/ 'dir nges pa ni thar pa'i cha dang mthun pa yin par bshad do zhes bya bar dgongs so/ /sangs rgyas sogs zhes bya ba la sogs pa'i mkhas pa'i tshig le 'ur byas pa rnam par 'grel pa ni dad pa dang zhes bya ba la sogs pa yin te/dad pa la sogs pa ni dkon mchog gsum la mngon par yid ches pa la sogs pa'i rnam pa'o/ /khyad par can dbang po'i ngo bo nyid ma yin pa ni dbang po'i don med pa'i phyir gzhan pa dad pa la sogs pa'o//grangs bzhin du sangs rgyas ni rdzogs pa'i sangs rgyas so/ /sbyin pa ni gtong ba'o/ /bsam pa phun sum tshogs pa ni dge ba 'dod pa nyid la sogs pa'o/ /rnam par mi rtog pa ni las dang byed pa po dang bya ba ma dmigs pa la'o //chos thams cad ni gzugs la sogs pa'o/ /rnam pa thams cad ni rang dang spyi'i tshul gyis so/ /rnam pa thams cad ni rang dang spyi'i tshul gyis yongs su shes pa ste/ de la sogs pa'i yul ni sangs rgyas dang byang chub sems dpa' sbyin pa dang tshul khrims la sogs pa'i spyod yul gyi thabs rnam pa lnga la mkhas pa'o//ci thabs mkhas pa yod pa kho nas byang chub 'thob pa'am 'on te ma yin zhe na de lta mod kyi zhes bya ba la sogs pa yin te/ yod pa tsam gyi zhes bya ba dad pa la sogs pa yod pa tsam gyis bla na med pa'i byang chub thob pa ma yin zhing kun rdzob tu bskyed pa ma yin no//ci'i phyir zhe na/ 'di ni chos nyid yin te/ byang chub kyi lam 'di ni bsam gyis mi khyab pa yin pas dad pa la sogs pa rno zhing gsal ba chen pos ni bskal pa grangs med pa gsum du gong nas gong du bslabs pa mchog tu gyur pas ni yang dag par rdzogs pa'i byang chub rtogs par sla bar shes par bya la de dag nyid rtul pos ni zhes bya ba de mngon sum du byed par mi nus pa'i dad pa la sogs pa chung ngus ni rtogs par dka' zhing shes par dka' ba yin no//'dir dad pa la sogs pa yod pa tsam gyis zhes bya ba dang de dag nyid las smos pas yang dag par na byang chub kyi thabs rnam pa gnyis yod pas de ni shugs kyis zhes bya ba la sogs pa smos pa yin te/'dir ye shes chen po dang 'bring dang chung ngu'i bye brag gis byang chub gsum gyi dbye ba ston pa yin la/ de bas na chen po'i chen pos ni rdzogs pa'i byang chub mngon sum du bya bar ston pas/ de las gzhan pa'i dad pa la sogs pa ma smos su zin kyang de'i shes pa'i dbang gis 'bring dang chung ngu nyid thob pa rnams kyi rang sangs rgyas dang nyan thos kyi byang chub kyi bya ba ni gzhan du bya bar mi nus pas theg pa chen po thams cad du byang chub gnyis po ni rdzogs pa'i byang chub las go bzlog par bstan par shes par bya'o//zhes bya ba ni shugs kyis 'phangs pa yin no//dro ba rnams kyi zhes bya ba la sogs pa'i nges par 'byed pa'i cha dang mthun pa'i tshig le'ur byas pa ni rnam pa thams cad ces bya ba la sogs pas rnam par 'grel pa yin te/ tshul ngan pa med pa dang / da ltar dang ma 'ongs pa'i don bsam pa nyid dag dang /nga rgyal bcom pa nyid dang mngon par 'tshe ba med pa nyid yin pa'i phyir go rims bzhin du mnyam pa dang zhes bya ba la sogs pa'i sems lnga yin no/ /de rnams kyi pha dang ma'i sems dang zhes bya ba la sogs pa smos pa yin no/ /rtse mor rtogs pa ni mdor zhes bya ba la sogs pa smos pa yin no//mdor zhes bya ba ni dbye ba la ltos pa med pa'o/ /mi dge ba ni chags pa la sogs pa'o/ /dge ba ni de las go bzlog pa la nyams pa dang / /len pa'i sgo nas zhes bya ba ni spang ba dang blang ba'i dbang gis gzhan rnams sdig pa las ldog pa dang /dge ba la gnas pa dag la sbyor ba ni yang dag par 'dzin du 'jug pa'o/ /dge ba dang mi dge ba dag ni gnyis yin pa'i phyir rnam pa gnyis so/ /de bzhin du zhugs pa rnams la rang dang gzhan sdig pa las ldog pa dang dge ba la sbyor ba ni gzhan dag la bsngags pa brjod pa dang mthun par byed pa'o//bsngags pa smra ba dang mthun par byed pa gnyis yin pas rnam pa gnyis yin no/ /sbyar bar bya ba dang sbyor ba po dang / de'i yul mtha' yas pa'i phyir rnam pa rnams ni yang dag par na mtha' yas pa yin pas de'i chos kyi rab tu dbye ba zhes bya ba la sogs pa smos pa yin te/de ltar de rnams kyi sems can la dmigs shing yul du byas pa ni rtse mor gyur pa yin no/ /bdag nyid kyi bya ba la sogs pa ni bshad zin to/ /rtse mor gyur pa la zhes bya ba la sogs pas ni rang gzhan zhes bya ba la sogs pa'i bshad pa yin no//snga ma bzhin du zhes bya ba la sogs pas ni chos mchog de bzhin zhes bya ba la sogs pa bshad pa yin no/ /yang nges par 'byed pa'i cha dang mthun pa 'di rnams ni chung ngu dang 'bring dang chen po'i dbye bas re re zhing rnam pa gsum du 'gyur ro//de la dro bar rtogs pa chung ngu'i ni mnyam pa dang byams pa'i sems dag yin te/ de nyid kyi tshe gzhan la 'tshe ba med pa nyid yin pa'i phyir ro/ /'bring gis ni phan pa la sogs pa'i sems gsum gyis ma 'ongs pa'i gzhan la phan pa'i bsam pa nyid yin pa'i phyir ro//chen po'i ni pha la sogs pa'i sems bskyed pas de'i tshe 'di dang phyi ma dag tu gzhan rnams kyi 'dod pa nye bar sgrub pa 'dod pa nyid yin pa'i phyir bstan pa yin no/ /rtse mor gtogs pa chung ngu'i ni bdag dang gzhan sdig pa las ldog pa la sbyor ba dang /gzhan rnams kyi sdug bsngal gyi rgyud las ldog par 'dod pa nyid yin pa'i phyir ro/ /'bring gis ni sbyin pa la sogs pa la rang dang gzhan gnas pas gzhan rnams kyi dge ba'i rgyu la sbyor bar mngon par 'dod pa yin pa'i phyir ro/ /chen po'i ni rten cing 'brel par 'byung ba rnam gnyis bsgoms pa las bdag dang gzhan zhugs pas gzhan rnams kyi bde ba dang sdug bsngal la phyin ci log pa spang ba'i bsam pa nyid yin pa'i phyir ro//bzod pa ni chung ngu dang 'bring dang chen por bshad de/ go rims bzhin du sems can rnams la byang chub sems dpa'i skyon med pa la zhugs pa'i bar gyis de ltar gzhan rnams 'phags pa'i lam gyi 'bras bu dang po la sogs pa dang /'tshang rgya ba nyid la sbyor bar 'dod pa nyid yin pa'i phyir bshad mod kyi/ 'on kyang bzod pa chen po ni skad cig ma du mar gzung bar bya'o//chos kyi mchog chung ngu dang 'bring dang chen po ni go rims bzhin du gzhan rnams khyad par med par theg pa chen po la smin par bya ba'i phyir dang / khyad par du byang chub sems dpa'i lam la sbyar bar bya ba'i phyir dang / phun sum tshogs pa thams cad kyi rab kyi mthar thug par 'dod pa nyid yin pa'i phyir sems can yongs su smin par sgrib pa med pa'i ngo bo dam bcas pa'i tshig gsungs pa yin no//chos mngon pa las ji ltar bzod pa chen po skad cig ma gcig yin pa ltar chos kyi mchog kyang de bzhin no zhes gang gsungs pa de ni rang gi don gyi dbang du mdzad pa yin la//'dir ni rang gzhan gyi don la brten pa rnams kyi chung ngu dang 'bring dang chen po'i bye brag gis bshad pa yin te/ gzhan gyi don la brtson pa'i rab dang mchog gi gnas skabs dag srid pas 'di dang de la 'gal ba med do/ / mngon par rtogs pa drug tu nges par 'byed pa'i cha dang mthun pa la sogs pa ci'i phyir bstan ce na/ rnam pa dang zhes bya ba la sogs pa smos te/ rnam pa dang lam dang gzhi thams cad ni sngar bshad pa'o/ /de rnams rnam par bsgom pa ni bye brag gis bsam gtan gyi khyad par gyi mngon par rtogs pa drug po rnams su nges par 'byed pa'i cha dang mthun pa la bshad pa yin par blta bar bya'o//de ni thams cad mkhyen pa nyid gsum gyi mngon par rtogs pa bshad pa na rnam pa thams cad mkhyen pa nyid dang / lam shes pa nyid dang / thams cad shes pa nyid de/gsum la nges par 'byed pa'i cha dang mthun pa la sogs pa bstan pa yin te/ sngar bshad pa'i nges par 'byed pa'i cha dang thar pa'i cha dang mthun pa la sogs pa bstan pa gsungs pa yin par shes par bya'o zhes 'og ma dang sbyar bar bya'o/ /'dir brjod pa'i rgyu ni 'jig rten pa'i zhes bya ba la sogs pa smos pa yin te/'jig rten pa'i nges par 'byed pa'i cha dang mthun pa ni nyan thos la sogs pa dang thun mong gi dro ba la sogs pa'o/ /de rtogs pa ni shes pa'o/ /de sngon du 'gro ba ni de'i rgyu can no/ /gang gi phyir 'jig rten las 'das pa ni nyan thos la sogs pa ma rtogs pa'i mthong ba'i lam dang bsgom pa'i lam gang yin pa de dag rtogs pa ni shes pa yin no //de bas na zhes bya bar shes par bya'o/ / rnam pa kun mngon par rdzogs par rtogs pa la sogs pa mngon par rtogs pa gsum la ni zhes bya ba ni rnam pa kun mngon par rdzogs par rtogs pa dang /rtse mo thob pa dang / mthar gyis pa'i sbyor ba la nges par 'byed pa'i cha dang mthun pa la sogs pa snga ma bzhin du sbyar bar bya'o/ /'dir brjod pa'i rgyu ni bsgom pa zhes bya ba la sogs pa yin te/bsgom pa ni goms pa'o/ /de gong nas gong gi gnas skabs kyi khyad par gyis zhes bya ba ni go rims las gyur pa'i rab kyi mtha' ste/ rgyu des na rnam pa thams cad de/ rnam pa kun du'o/ /khyad par gyi lam ni sngar bshad pa'o/ /des bsdus pa'i ye shes zab pa med pa ni 'dod chags la sogs pas stong pa'o//chung ngu dang 'bring dang chen po'i rim gyis skye zhing 'byung ba yin pas de ltar na cig car skye ba dgag par bya ba'i phyir te/ shes pa gcig la skye ba gsal bar bya ba'i phyir thams cad mkhyen pa nyid gsum por mthong ba la sogs pa'i lam shes par byed pa'i rgyu nyid yin pas na rnam pa kun mngon par rdzogs par rtogs pa la sogs pa yang khyad par gyi lam shes pa'i rgyu nyid yin pas nges par 'byed pa'i cha dang mthun pa la sogs pa brjod pa yin la/mngon par rtogs pa gnyis la ni de med pas ma yin no zhes bya bar dgongs so//phyir mi ldog pa zhes bya ba la sogs pa dang / nges 'byed yan lag ces bya ba la sogs pa'i tshig le'ur byas pas ni nges par 'byed pa'i cha dang mthun pa'i sbyor ba'i lam la gnas pa dang / de bzhin du bzod pa dang shes pas bsdus pa mthong ba'i lam la gnas pa dang /rgyun dang ldan pa'i bsgom pa'i lam la gnas pa'i phyir mi ldog pa'i byang chub sems dpa'i dge 'dun bshad pa yin no/ /de rnams kyi mtshan nyid ces bya ba la sogs pa la de la nges par 'byed pa'i yan lag la gnas pa'i gzugs la sogs pa zhes bya ba la sogs pa'i mtshan nyid kyi tshig le'ur byas pa'i 'grel pa ni go sla'o//yang ldog pa zhes bya ba la sogs pa la gzugs la sogs pas zhes bya ba la sogs pas mtshan nyid rnam pa nyi shu'i tshig le'ur byas pa'i don ni ngo bo nyid med pa nyid kyis zhes bya ba la sogs pa smos pa yin no//mthong ba'i lam la gnas pa yi ni nges par 'byed pa'i zhes bya ba la sogs pa yin no/ /mthong ba'i lam la zhes bya ba la sogs pa'i tshig le'ur byas pa'i don ni sdug bsngal zhes bya ba la sogs pa yin no/ /skad cig ma'i rnam pa ni mtshan nyid kyi zhes bya ba la sogs pa smos pa yin no//rnam pa'i tshig le'ur byas pa'i don ni rang gi mtshan nyid ces bya ba la sogs pa smos pa yin te/ yang dag par na don gyi bya ba nus pa'i ngo bo med pas yul med pa nyid yin pa'i phyir gzugs la sogs pa'i mngon sum gyi shes pa ldog pa yin no//sangs rgyas zhes bya ba la sogs pa ni mi dge ba zad cing thar pa'i cha dang mthun pa'i dge ba 'phel bas sangs rgyas la sogs pas byang chub pa'i bar du byang chub kyi sems bstan par byed pa yin pa'i phyir ro/ /theg pa chen po zhes bya ba la sogs pa ni sems bskyed pa la sogs pa gzung ba nyams su len pa yin pa'i phyir ro//chos rab tu zhes bya ba la sogs pas ni chos rab tu rnam par 'byed pa'i mthus gzugs la sogs pa'i chos rnams skye ba med par shes pa'i phyir ro/ /sogs pa'i sgras ni 'gog pa'i snyoms par 'jug pa'o//'di dag nyid rdzogs pa'i byang chub kyi rgyu nyid yin pa'i phyir de bskyed pa'i yan lag yang dag pa ste yang dag pa'i rgyu'o/ /de rnams yongs su zad pa 'di ma chags pa'o/ /mi dge ba dang bral ba zhes bya ba la sogs pa ni mi dge ba dang ldan pa kho na'i lus la sogs pa las su mi rung ba ni lci ba nyid yin pa'i phyir ro//sems can 'dul ba zhes bya ba la sogs pa ni bsam pa ji lta ba gzhan gyi don gyi smon lam med pas 'dul bar mi nus pa nyid ni gzugs la sogs pa la nye bar longs spyod pa la mngon par chags pa yin pa'i phyir ro//yul gyi zhes bya ba la sogs pa ni kun tu sbyor ba la mngon par zhen pa nyid yul gyi nyes dmigs ma mthong ba nyid yin pa'i phyir ro/ /skyes bu dam pa zhes bya ba la sogs pa ni sme sha can la sogs pa skyes bu dam pa ma yin pa rnams ni sdig pa'i rgyu nya la sogs pa gsod cing 'chi ba'i rgyur byed pa nyid yin pa'i phyir ro//stong pa nyid la gnas pa nyid kyis na bdag med pa'i bsam pa yod pas phung po dang khams dang skye mched lngar bshad pa de rnams la sbyor ba dang rjes su sbyor ba dag la mngon par zhen pa dang shin tu mngon par zhen pa dag tu mi bya bar te/de ltar sbyor ba dang rjes su sbyor ba dag gi gnas pa ste/ spyod pa'i khyad par gang yin pa de so sor bkag pa'o/ /chos thams cad skye ba med pa'i bsam gtan dang ldan pa ni rten med pa nyid kyis thams cad du mngon par zhen pa dang bral ba'i phyir mi mthun pa'i phyogs gsal ba nyid kyis na gzung ba la sogs pa'i mi mthun pa'i phyogs spangs pa nyid kyis gang zhig rtogs pa ste/thams cad mkhyen pa nyid gsum shes pa yin la/ de rnams kyi bar chad byed pa'i chos ni sngar bshad pa'i nyes pa rnams te/ de la snga ma bzhin du zhes bya ba stong pa nyid la gnas pa nyid kyi sbyor ba dang rjes su sbyor ba la gnas par mi bya'o zhes 'di'i phyi ma rnams la yang sgra'i don ni snga ma bzhin no/ /rnam par rtog pa'i zhes bya ba la sogs pa ni bdud la sogs pa'i nyes pa ni de las 'byung ba nyid yin pa'i phyir yang dag par na rnam par rtog pa nyid nyes pa yin no zhes yongs su shes pa nyid kyi byang chub kyi rgyu'i tshogs sbyin pa la sogs pa la yang mngon par zhen pa med pa'i phyir ro//gzung ba dang zhes bya ba la sogs pa ni gnyis su mngon par zhen pa'i rgyu nyid kyis na/ bdud dang bdud kyi 'khor rnams kyi ral gri dang mda' la sogs pa rnams lus kyi dbang po la sogs pa'i bya ba yin pas rnal 'byor pa rnams la g.yul 'gyed pa med pa yin pa'i phyir te/ byams pas sam chos thams cad nye bar ma dmigs pas bgegs nye bar zhi ba yin no zhes bya bar dgongs so//sbyin pa zhes bya ba la sogs pa rang gi rgyud la sbyin pa la sogs pas byas pa'i ser sna la sogs pa las ldog pa'i khyad par shes pa yin pa'i phyir ro/ /chos thams cad ces bya ba la sogs pa ni gzugs la sogs pa la phra rab la sogs pa'i ngo bo dang dbang phyug la sogs pa'i rgyu dang gya nom pa dang gya nom pa ma yin pa dang bral ba yin pa'i phyir ro//rtogs pa'i chos ni 'dir byang chub yin no/ /mngon par yid ches pa la sogs pa ni mngon par shes pa drug gi stobs kyis mngon par yid ches pa thob pas yang dag pa'i ye shes nges par thob pa ni/thams cad mkhyen pa nyid gsum gyi bdag nyid kyi rang gi sa gsum la rang gi sa yin pa nyid kyis na nges pa nyid kyi ste / sa brgyad pa la sogs pa la ji lta ba bzhin gnas pa ni the tshom med par dmigs su med pa'i ye shes su nges pa nyid yin pa'i phyir ro//gcig tu gzhol ba zhes bya ba la sogs pa ni gcig tu gzhol ba nyid kyi phul du byung ba dang bcas pa'i sems bskyed pa la sogs pa'i chos mngon du gyur pas rnam pa thams cad mkhyen pa nyid la sogs pa'i chos kyi don du srog gtong ba yin te/rtag tu ngu ba la sogs pa dang 'dra bar srog gi bar chad du 'gyur ba'i yul gzhan du 'gro ba'am lus btsong ba la sogs pa'o/ /shes pa'i mtshan nyid ji skad du bshad pa'i rnam pa'i thabs kyi byang chub sems dpa' rnams kyi mngon sum du byas pa yin la/de nyid kyis na gzhan gyi mi rtogs pa ma yin nam/ ji ltar na gzhan rnams kyi rtogs pa'i mtshan nyid yin zhes rtogs pa la/ shes pa'i mtshan nyid rnams ni 'du shes las ldog pa la sogs pa'i 'bras bu'i rgyu yin pa'i phyir te/ rgyu tshogs pa las 'bras skye bar/ /rjes su dpog pa gang yin pa/ /don gzhan la ni mi ltos phyir/ /de ni rang bzhin yin par brjod/ /ces bya ba'i rigs pas 'tsham pa nyid kyis rjes su dpag pas mtshan nyid kho na yin par bstan pa ni de ltar na zhes bya ba la sogs pa smos pa yin te/de ltar na bzod pa dang shes pa'i skad cig ma rnam pa bcu drug gis bsdus pa 'di rnams ni 'bras bu nyid yin pas bden pa bzhi'i rnam pa dang 'brel pa'i bzod pa dang shes pa'i skad cig ma bcu drug yin te/ sdug bsngal la chos shes pa'i bzod pa zhes bya ba la sogs pa rnam pa bcu drug yang dag par thob pa rnam par mi rtog pa nyid kyis goms par byas par gyur pa ni nyon mongs pa med pas dag pa 'jig rten pa'i tha snyad kyi rgyu yin pa'i phyir/'jig rten pa yin pa gang gzung ba dang 'dzin par mngon par ma zhen pa'i rnam pa can nyid kyi bzod pa dang /shes pa'i skad cig ma rnam par mi rtog pa rnams las phyis 'byung ba yin pa'i phyir rjes kyi sems rnam par rtog pa dang bcas pa des bsdus pa gang yin pa'i rang dang mthun pa'i 'bras bu ste/ rnam par rtog pa rnam par dag pa'i bdag nyid can gyi 'bras bu gzugs la sogs pa'i 'du shes las ldog pa la sogs pa sngar bshad pa de rnams kyi rgyu yin pas so//skyed pa'i phyir zhes bya ba la sogs pa ni shes pa'i skad cig ma'i mtshan nyid ni ngo bo nyid ma yin mod kyi 'on kyang de bskyed pa'i rgyu yin pa'i phyir ro zhes bya bar dgongs so//nye bar btags pa'i dgongs pa ni rnal 'byor pa zhes bya ba la sogs pa smos pa yin te/ thams cad du nyan thos la sogs pa'i lta ba la yang rtogs pa dang mthun pa kho na yin pa ni thos pa'i shes pa dang rjes su mthun pa nyid do//rnal 'byor pa rnams ni lam de'i bsam gtan rab kyi mthar phyin pa dang ldan pa'o/ /tha snyad ni rnal 'byor la sogs pa'i rang bzhin gyi rdzu 'phrul la sogs pa'i 'jig rten dang mthun par spyod pa ni nges pa yin la bcos ma ni nges pa med pa'o/ /de ni sems can 'dul ba'i dgos pa'i dbang ma rtogs par zhes bya ba smos pa yin te/gdul bya'i don du yang rtogs pa'i don dang mthun pa ma yin na yang tha snyad du rnam par mi rtog pa mi mnga' ba'i bcom ldan 'das dang 'dra ba yin pas nye bar btags nas shes pa'i skad cig ma'i mtshan nyid kyis bshad cing bstan to//de lta ma yin na zhes bya ba la nye bar btags pa ma yin no/ /rnal 'byor pa'i rgyud las so so rang gi rig pa ni sgom pa po'i rang rig pa'i skad cig ma rnams te/ shes pa'i skad cig ma rnams ji ltar gzhan yid ches par byed pa zhes bya ba sgom pa po las gzhan pa dag gis shes pa'i mtshan nyid yin par mi 'thad de/rang gi rig pa ni gzhan gyi rig pa ma yin te/ rang gi rig pa nyid du mi 'thad pa'i phyir ro zhes bya bar dgongs so/ /bsgom pa'i lam la brjod par bya ba mang du yod na yang dang po khyad par brjod pa'i rgyu ni de'i 'og tu zhes bya ba la sogs pa yin te/bsgom pa'i lam ni zab pa dang ldan pa'i phyir zab mo yin no/ zab mo de gang yin zhe na stong pa nyid la sogs pa'o/ /stong pa nyid la sogs pa'i zab pa nyid gang yin zhe na/ sgro 'dogs pa dang skur pa 'debs pa'i mtha' las grol ba nyid do//tshig le'ur byas pa rnam par 'grel pa ni stong pa nyid la sogs pa stong pa zhes bya ba smos pa yin te/ stong pa nyid dang de bzhin nyid la sogs pa'o/ /gzugs med pa la zhes bya ba ni gzugs su sgro 'dogs pa bkag pa'o//stong pa dang stong pa ma yin pa dag la stong pa nyid la sogs pa dang gzugs la sogs pa gcig par 'gal ba'i phyir ro/ /de bzhin du stong pa nyid la sogs pa la tshor ba la sogs pa med do zhes blta bar bya'o/ /gzugs stong pa nyid la sogs pa tha dad pa nyid kyis na gzugs dang stong pa nyid la sogs pa skur pa btab pa dang 'gal ba yin te/gzugs kyi stong pa nyid la sogs pa med pas rang gi ngo bo dang bcas par thal bar 'gyur bas stong pa nyid la sogs pa gzugs la sogs pa las gzhan pa yang ma yin pas zhes bya bas ni skur pa 'debs pa dgag pa yin no//de bzhin du stong pa nyid la sogs pa ni tshor ba la sogs pa las gzhan ma yin no zhes bya ba la sogs par blta bar bya'o/ de bzhin du go rims bzhin du stong pa nyid dang gzugs la sogs pa sgro 'dogs pa dang skur pa'i mtha' can yin te/'di ltar 'di dag ni 'jig pa'i mthar thug pa yin pa'i phyir ro/ /de dag las grol zhing bral ba'i stong pa nyid la sogs pa gang yin pa de ni zab mo ste stong pa nyid la sogs pa yin pa stong pa nyid la sogs pa la gzugs la sogs pa med pa dang gzugs la sogs pa la yang stong pa nyid la sogs pa med pa gang yin pa de dag ni rnal 'byor pa'i mngon sum gyis rtogs par bya ba nyid yin pas/zab mo nyid dang ldan pa'i phyir 'og nas bshad pa'i bsgom pa'i lam ni zab cing gting dpag dka' ba yin no//thos pa zhes bya ba la sogs pa yin / nges 'byed ces bya ba la sogs pa rnam par 'grel pa yin te/ gang gi tshe rnam pa kun mngon par rdzogs par rtogs par shes rab kyi pha rol tu phyin pa'i ming dang / tshig dang ngag dang yi ge dang dbyangs kyi yi ge'i bdag nyid can bsgom pa de'i tshe/nges par 'byed pa'i yan lag la sogs pa gsum la nges par mthong ba'i don zhes bya ba rnam pa thams cad mkhyen pa la sogs pa skabs gsum du gsungs pa'i dro ba la sogs pa dang mthong ba dang bsgom pa'i don la dmigs pa'i rnam pa'i rab tu dbye ba rnams go rims bzhin du thos pa dang bsams pa dang bsgoms pa las byung ba'i shes rab dag yang dang yang du sems pa dang 'jal ba dang nges par rtogs pa zhes tshig gsum bshad par bya'o//gang gi tshe lam gyi bdag nyid can gyi shes rab kyi pha rol tu phyin pa bsgom pa de'i tshe ting nge 'dzin gyi zhes bya ba lam bsgom pa la sbyor ba dang dngos gzhi dang mjug rnams su sngar bshad pa de'i bsgom pa'i shes rab kyis bzung ba la sogs pa med pa la dmigs pa rab tu gyur pa'i sems kyi nges par 'byed pa'i yan lag dang mthong ba dang bsgom pa'i lam gyi dmigs pa'i rnam pa la yang dang yang du sems pa dang /'jal ba dang nges par rtogs pa zhes bya ba ni tshig gsum yin te/ de ltar bsgom pa'i lam rgyun chags pa yin no/ /nges par 'byed pa'i yan lag la sogs pa dmigs pa'i rnam pa gsum gyi dbye ba la dmigs pas na yang dang yang du de rnams nyid la dmigs pas dmigs par byed pa'i sems ni grangs med pa'i phyir bsgom pa'i lam la de'i rang bzhin yin pas mtha' yas par 'gyur ro zhes bya ba'i nges pa ni de rnam pa zhes bya ba la sogs pa dang /de'i rgyun chags zhes bya ba la sogs pa smos pa yin te/ de ltar bshad ma thag pa'i rim pas don dam par zhes bya ba de kho na nyid mthong bas stong pa nyid kyi mtshan nyid kyi rnam pa'i sgom pa zhes bya ba ni dngos po med pa la dmigs pa'i sems kyi khyad par gyis so//rnam par rtog pa dgu'i gnyen po'i dbye ba las zhes bya ba ni chung ngu la sogs pa'i bye brag gis tha dad pa'i gzung ba la sogs pa'i rnam par rtog pa dgu'i gnyen po nyid yin pas rnam pa dgu yin pa'i phyir ro/ /grangs bzhin du 'dod pa'i khams la sogs pas dgu dag tu zhes bya ba ni 'dod pa'i khams dang bsam gtan dang gzugs med pa'i snyoms par 'jug pa bzhi ste/dgu la bsgom pa'i lam dgu ni rgyun chags yin no/ /ci'i phyir zhe na rgyun chags su 'byung ba'i phyir zhes bya ba ste/ nges par 'byed pa'i yan lag la sogs pa'i don mang po la dmigs pa las byung ba'i phyir ram bar chad med pa'i lam du rgyun du zhugs pa yin pa'i phyir ro//bsgom pa'i lam rnam pa dgu nyid yin par de kho na nyid du mi 'thad do zhes dogs pa la kun rdzob yin pa'i lan btab pa ni rgyal ba'i yum zhes bya ba la sogs pa smos pa yin te/rgyal ba'i yum de dang de las zhes bya ba ni shes rab kyi pha rol tu phyin pa stong phrag brgya pa la sogs pa las so/ /rnam pa re re'i dbang du mdzad de zhes bya ba ni bshad ma thag pa'i bsgom pa'i lam gyis dro ba la sogs pa re re nas nye bar gzung ste/grangs dang tshad dang mngon sum la sogs pa'i tshad mas kyang rtogs par mi rung ba'i phyir ro/ /ma chags pa'i dge ba'i rtsa ba la sogs pa'i bsod nams grangs med pa dpag tu med pa tshad med pa gang yin pa de rnams skye bar gsungs pa'i phyir zhes bya ba skye bar brjod pas bye brag mang ba ste/bsgom pa'i lam gyis dro ba la sogs pa'i grangs med pa la sogs pa'i bsod nams kyi 'bras bu nyid yin pas na grangs med pa la sogs pa nyid du 'gyur na ji ltar rnam pa dgu nyid yin te mi 'thad do zhe na grangs med pa la sogs pa zhes bya ba la sogs pas ni phyed snga ma rnam par 'grel te/grangs med pa la sogs pa ni bshad zin to/ /sogs pa'i sgras ni brjod du med pa la sogs pa'o/ /de rnams bstan pa rnams te de dang der smos pa rnams so/ /de yang yang dag pa'i don ma yin pa de ni dam pa'i don du zhes bya ba la sogs pa yin te/tshig tu brjod pa'i ngo bo rnams ni don dam par mi 'thad pa nyid kyis zhes bya ba yang dag par na ji ltar grags pa'i don du mi rung ba yin pa'i phyir te/ snyan dngags sbyar ba dang 'dra bar sgra dgod pa tsam du sbyar ba'i khyad par gyi bdag nyid can gyi brjod par bya ba'i sgra ni brdzun yin no zhes bya ba'i bar du'o//de bas na bsgom pa'i lam bcom ldan 'das kyi bka' las ji skad bshad pa'i mtshan nyid can te/ zab mo la sogs pa'i bdag nyid can gyi bsgom pa'i lam ni bye brag tu dbye ba byed par bzod pa ma yin te/grangs med pa la sogs pa nyid du bya bar mi nus so/ /ji ltar zhe na don gcig tu ste don gyi dbye ba gzhan la ltos pa med pas nges par 'byed pa'i yan lag la sogs pa'i yul gcig pa ni don gcig pa yin la/de la rab tu sbyar zhing nges par ldan pa'i ldog pa'i dbye ba gang yin pa de la ltos pas rgyu de las nye bar skyed pa'i tha dad pa nyid kyi ngo bo ste/ grangs med pa la sogs pa gang yin pa des nges par 'byed pa'i yan lag la sogs pa'i yul gcig pa nyid la sogs pa yin par gcig tu zhugs pa yin no//de bas na bye brag tu snang ba nyid yin na yang dbye ba yod pa ma yin no zhes bya ba'i tha tshig go/ /dbye ba gzhan la ltos nas yang nges par 'byed pa'i yan lag la sogs pa don sna tshogs pa dang rab tu sbyar ba'i ldog pa la ltos pa'i las nye bar skyed pa'i tha dad pa nyid kyi ngo bo bye brag tu dbye ba nyid yin no//kun rdzob ces bya ba la sogs pa phyed 'og ma bshad pa kun rdzob tu ni zhes bya ba la sogs pa yin te/ kun rdzob tu ni sangs rgyas la sogs pa'i tha snyad kyis dmigs pa med pa'i thugs rje chen po zhes bya ba rnam par mi rtog pas khyab pa'i thugs rje de'i rang bzhin gyi chos kyi dbyings te/stobs bcu la sogs pa'i rgyu gnyis su med pa'i ye shes so/ /de'i rgyu mthun par gyur pa yin pa ni cha 'dra ba'i ngo bo'o/ /de ni bshad pa'i chos kyi ngo bo nyid de/yang dag pa'i gnyis su med pa'i ye shes ston pa'i chos kyi bdag nyid de/ rnam pa thams cad du gnyis su med pa'i ye shes de nyid ston pa yin pa'i phyir ro/ /ji skad bshad cing bstan pa ni grangs med pa la sogs pa'i sgra rnams so/ / byis pa'i skye bo rnams ni ma rig pas khyab pa rnams gzhug par bya ba'i phyir zhes bya ba ni lhag ma'o/ /'bras bu chen po bskyed par rab tu ston pa nyid kyis zhes bya ba ni rnam pa thams cad mkhyen pa'i 'bras bu skyed par brjod pa yin pas so/ /de bzhin gshegs pas bzhed pas zhes bya ba ni phyin ci ma log par sems can bzhugs pa'i tshul mkhyen pa'i de bzhin gshegs pa rnams dgongs so//rgyu de bas na mang po nyid du thal bar mi 'gyur ro zhes bya ba bsgom pa'i lam grangs med pa la sogs par thal bar mi 'gyur ro//chos kyi dbyings grangs med pa la sogs pa yin pa'i phyir rnal 'byor pa rnams kyi bsod nams grangs med pa la sogs pa nyid yin pa ni kun rdzob tu yin gyi yang dag par ni ma yin te/ bsod nams kyi rgyu nyid nges par 'byed pa'i yan lag la sogs pa dang sbyin pa la sogs pa grangs med la sogs pa nyid yod na ji ltar na de'i 'bras bu grangs med pa la sogs pa nyid yin te/de'i 'bras bu ma yin par thal bar 'gyur na de ltar na yang bcom ldan 'das ni brdzun du gsungs pa nyid ma yin te/ sems can rnams gzhug pa'i tshul phyin ci ma log par mkhyen pa nyid kyis na gang zag la sogs pa dang 'dra bar na de ltar ston par mdzad pa yin no zhes bya bar dgongs so//de yang / nye bar gnod phyir yang dag par / /gang zhig smras gyur de nyid brdzun/ / bden dang bden min don ci yin/ /gzhan don byed gang de bden yin/ /zhes bshad pa yin no/ /gal te nyon mongs pa rnams rang bzhin gyis stong pa nyid kyi bdag nyid yin na de med pa yin pa'i phyir bsgom pas ci zhig bya/ 'on te yang dag par rang bzhin yod na de lta na yang bsgom pas ci zhig bya ste /rang bzhin la ni gzhan du bya bar mi nus pa'i phyir gnyi ga ltar na yang nges par 'byed pa'i yan lag la sogs pa'i bsgom pa'i lam ni stong pa nyid kyi zhes bya ba la sogs pas don med par rtog pa la stong pa nyid kyi mtshan nyid kyis zhes bya ba ni bzung ba la sogs pa'i mi mthun pa'i phyogs dang /nges par 'byed pa'i yan lag la sogs pa'i lam dang / de bsgom pa'i sems ni dngos po med pa yin pa'i phyir te/ gcig dang du ma dang bral ba la sogs pa'i tshad ma ni kun tu 'gro ba yin pa'i phyir ro zhes bya ba ni rgol ba po'i bsam pa yin no//goms pa phul du phyin pa byar med pa'i phyir zhes bya ba ni/ gus pa dang bcas pa dang rgyun mi 'chad pa dang dus ring mor bslabs su zin na yang rab tu sbyor bar mi rigs te/ med pa la med par goms pa ni mi'i rwa ni ri bong gi rwa nyid du phul du byung ba byar mi 'thad do//de'i phyir cung zad kyang mi byed pa kho na'o zhes bya ba bsgom pa'i lam ni ci yang byed mi nus te/ gang du khyad par du byar med pa dang rnam pa gang gis kyang med pa ni byed pa po nyid du mi rigs so zhes skye bo blo dman pa dag gi ngor nges par 'byed pa'i yan lag la sogs pa'i lam kun rdzob tu yod pa yin zhing rgyu dang 'bras bu'i dngos por 'thad pa'i rab kyi mtha' mi shes pa'i skye bo rnams kyi ngor dogs pa bsu ba ni dngos po zhes bya ba la sogs pa smos pa yin no//tshig le'ur byas pa'i don rnam par 'grel pa ni chos nyid kyi zhes bya ba la sogs pa yin te/ngo bo nyid med pa nyid kyis yang dag par na de nyid dang / gzhan nyid dang / gnyi ga dang / gnyi ga ma yin pa nyid kyis bye brag dang / bye brag med pa dang / gnyi ga dang / gnyi ga ma yin par brjod du med pa la thos pa la sogs pa mi nus pa ni ci/kun rdzob tu yin nam 'on te ma yin zhe na/ chos nyid kyi rang gi ngo bor zhes bya ba smos te/ yang dag par na gnyis su med pa'i ye shes kyi bdag nyid can no/ /rgyu'i khyad par de dag gis na gang gi phyir gnyis su med pa'i ye shes kyi bdag nyid yin pa de'i phyir brjod du med pa ni mngon par 'dod pa'i lam gyi ngo bo yin te/sngar bshad pa'i bsgom pa'i lam ni brjod du med pa nyid kyis na gang zag la sogs pa dang 'dra bar dngos por yod pa ma yin no/ /de bas na bsgom pa zhes bya ba'i lam gyis te/rgyus mi mthun pa'i phyogs dang gnyen po dag sngar bshad pa dag las go rims bzhin du 'bral ba dang skye bar mi rung ngo zhes bya bar bsgom pa phul du phyin pa byar med pa'i phyir zhes bya ba yang dag par na bsgom pa'i lam med pa nyid kyis na bsgom pa phul du gyur par byar med pa'i phyir de bas na zhes bya ba la sogs pa smos pa yin no//kun rdzob tu bsgom pa'i lam du bshad pa la ni/ thos pa la sogs par nus pa nyid yin zhing / don dam par ni de ltar ma yin te zhes bya ba la sogs pa smos pa yin te/bsgom par bya ba la sogs pa med pa la yang yang dag par na bsgom pa dang / de'i don gyi bya bas kyang / nyon mongs pa bstsal ba dang / byang chub skyed pa'i mtshan nyid med pa nyid yin pa bden mod kyi/ de lta na yang rnal 'byor pa'i kun rdzob tu dngos po la sogs pa yod pas bsgom pa yod pa yin no//de lta bas na byang chub ji lta ba bzhin du bsgom pa'i lam phul du phyin pa las nyon mongs pa rnams glo bur pa yin pas na sngar bshad pa'i nyes pa med pa'i phyir/ de gsal bas gnyen po zhes bya ba skye ba la yang 'gag pa med do zhes bya bar dgongs so/ /rnam 'grel mdzad pas kyang / de bas yang dag yang dag min/ /shin tu bsgom zhing gang gang yin/ /bsgom pa'i stobs ni rdzogs pa na/ /de gsal mi rtog blo'i 'bras bu//zhes gang bshad pa yin no/ /de nyid kyi phyir shes rab kyi pha rol tu phyin pa thos pa dang bsgom pa dag ni don dang bcas pa nyid yin te/ mdo sde'i rgyan las/ gal te thos pa tsam gyis don mthong 'gyur na bsgom pa don med 'gyur/ /gal te ma thos par yang sgom 'jug 'gyur na bsten pa don med 'gyur//zhes bshad pas rtog pa dang ldan pas thos pa dang bsam pa dang bsgom pa rnams la 'bad par bya'o/ /ma grub pas ci yang sgrub par mi byed do zhes bya ba'i tshul gyis bsgom pa ma grub na byang chub mi 'grub pa ma yin nam/ ji ltar na des don gyi bya ba de sgrub par byed ces bya ba'i bsam pa dang ldan pas yang snga ma'i phyed kyi byang chub med par dogs pa bsu ba ni de lta yin na yang zhes bya ba la sogs pa smos pa yin te/'di ltar dpyad par bya ste re zhig byang chub ni sngon dang phyi mar gyur pa'i sems las byung ba yin la/de la snga phyir gyur pa'i sems re re 'am/ mang po cig car 'dus pa'am/ rim gyis 'byung ba'i sems byang chub kyi rgyu yin zhes brtag pa rnam pa gsum yin no/ /phyogs dang po ni re res byang chub pa ni rigs pa ma yin no zhes bya ba smos te/ ci'i phyir zhe na snga phyir gyur pa'i sems re re la sangs rgyas kyi byang chub rnam par mi rtog pa'i ye shes de sgrub par byed pa rnam pa thams cad mkhyen pa nyid la sogs pa'i don mtha' dag ces bya ba sngar bshad pa gang yin pa de mi snang ba'i phyir te/sems gcig la yul du ma nyid med pa'i phyir ro zhes bya bar dgongs so//phyogs gnyis pa gsal ba ni mang po nyid kyis kyang byang chub par ni rigs pa ma yin no zhes snga ma dang sbyar ro/ /ji lta bu zhe na/ 'dod pa'i don sgrub par byed par snang ba'i sems cig car 'byung ba zhes bya ba ste/ 'dod pa'i don ni byang chub po//gang du de sgrub par byed par snang ba sems cig car 'byung ba mang po de rnams kyis byang chub par rigs pa ma yin no zhes bya ba'i tha tshig go/ /ci'i phyir zhe na mi srid pa'i phyir ro zhes bya ba smos te dus gcig gi tshe rtog pa du ma mi skye bas so/ / nyams su myong ba grub pa yin na yang 'di ni rtog pa nye bar bsgrubs pa yin no zhes 'ga' zhig phyin ci ma log pa bsal bar bya ba'i phyir/ lung ni sems can rnams kyi rnam par shes pa'i rgyu re re ba'o zhes 'byung bas smos pa yin te/ rnam par rtog pa mang po cig car 'byung ba mi srid pa'i phyir ro zhes bya ba 'di bshad pa yin no//des na sems can rnams kyi snying ni rnam par rtog pa gcig yin no zhes bya ba'i tha tshig go/ /de nyid kyi phyir rnam 'grel mdzad pas kyang rnam par rtog pa gnyis po dus gcig min/ /zhes bshad pa yin no//brtag pa gsum la gsal ba ni rim gyis 'byung ba yang ma yin te zhes smos pa yin te/ sngar bshad pa'i snga phyir gyur pa'i sems gang yin pa de mang po nyid yin na yang byang chub par ni rigs pa ma yin zhes snga ma dang sbyar ro/ /ji lta bu zhe na bla na med pa'i sangs rgyas kyi byang chub sgrub par byed pa dran pa nye bar gzhag pa la sogs pa dang /sangs rgyas kyi chos ma 'dres pa bco brgyad kyi bar rtogs shing shes pa'i rang gi ngo bo sgyu ma lta bur shes pa'i tshul gang yin pa des so/ /ci'i phyir byang chub par rigs pa ma yin zhe na/ de zhes bya ba la sogs pa smos te/ji skad bshad pa'i sems de rang gi ngang gis byung ma thag gi rjes thogs la 'jig cing nyams pa gang yin pa de ni rjes su 'gro ba med pa ste/ rgyu med pa yin la de'i dngos po de nyid kyis te/ des na phan tshun 'brel pa med pa'i phyir ro zhes bya ba gcig la gcig 'brel pa med pa'i phyir ro//rgyu de bas na khyad par can te/ dran pa nye bar gzhag pa la sogs pa'i mtshan nyid gang yin pa der snang ba'i sems bskyed pa'i sgo nas/ ji ltar don gyi bya ba byang chub sgrub pa'i mtshan nyid can yin te/ mi rigs so zhes bya ba ni gzhan gyi don yin te/de ltar na snga phyir gyur pa'i sems 'dus pa dag gis byang chub sgrub par byed pa yin na 'dus pa yang med de/ 'di ni byung ma thag tu 'jig pa'i phyir ro snyam du sems so/ /de ni yang dag pa ma yin pas zhes bya ba ni brtag pa gsum po gang yin pa de dag ni legs pa ma yin no zhes grub pa'i mtha' smra bas smras pa yin no//mar me zhes bya ba la sogs pa'i tshig le'ur byas pa rnam par 'grel pa ni ji ltar zhes bya ba la sogs pa smos pa yin te/ 'dir yang me lce dang snying po ci re re nas skad cig ma snga phyis sam 'on te phrad nas snying po tshig pa yin zhes brtag pa gnyis yin no//de la dang po bsal bar bya ba'i phyir ji ltar zhes bya ba la sogs pa smos te/ me lce ni mar me'i me lce'o/ /snying po ni grags par zad do/ /'di dag phrad pa'i skad cig ni 'dus pa'i mtshan nyid de dang po sreg par nus pa ni skad cig ma gnyis pa med par zhes bya ba ni sreg par nus pa'i skad cig ma gnyis pa med par me lce ni sreg par byed pa yin pa'i phyir rgyu yin la snying po ni bsreg par bya ba'i phyir 'bras bu yin par ci rigs pa 'di ni mtshan nyid kyi rang bzhin yin te/gang sreg par byed pa dang bsreg par bya ba me lce dang snying po dag ni sreg par byed pa dang bsreg par bya ba nyid yin par ji lta ba bzhin du mi rung ngo zhes bya ba ni lhag ma'o/ /ci'i phyir zhe na/ me lce dang snying po dag gi rang gi rgyus zhes bya ba nye bar len pa'i mtshan nyid dang phan tshun lhan cig byed pa'i skad cig mas de dag phan tshun gyi sgo nas rgyun gyis 'jug pa'i dbang gis dus mnyam du ste/dus mtshungs par gyur pa'i phrad pa'i bskyed pas zhes bya ba me lce dang snying po phrad pa bskyed pa yod pa gang yin pa de ni khyad par can du ma byas pa'i phyir te/thun mong yin pa nyid kyis rang rang gi nye bar len pa dang lhan cig byed pa'i rgyur byas pa dus mnyam par gyur pa nyid kyis na dus mtshungs par 'byung ba'i ba lang gi rwa dang 'dra bas ji ltar rgyu dang 'bras bu'i mtshan nyid me lce dang snying po sreg par byed pa dang bsreg par bya ba'i gnas skabs su gnas zhes bya bar dgongs so//de bzhin du nus pa yin phyir te gang me lce dang snying po de dag skye ba skad cig ma gnyis pa'am yang zhes bya ba skad cig ma dang po ma yin par snga ma bzhin du rgyu dang 'bras bu'i mtshan nyid me lce dang snying po sreg par byed pa dang bsreg par bya ba'i ngo bor mi rung ngo zhes bya ba ni lhag ma'o//rtag tu yod par la sogs par thal bar 'gyur bas zhes bya ba ni skad cig ma gnyis pa skad cig ma dang po med par 'byung bar khas len pa na rgyu med pa nyid yin pa'i phyir te/ rgyu med gzhan la mi ltos phyir//rtag tu yod pa 'am med par 'gyur/ /dngos po rnams ni res 'ga' zhig /'byung ba ltos pa las yin no/ /zhes bya ba'i rigs pas rtag tu yod pa 'am med par thal bar 'gyur ro/ /de ltar na kun rdzob tu yang 'byung ba med de gang gi phyir skad cig ma dang po med par skad cig ma gnyis pa 'byung bar khas len na thams cad 'bras bu yin par khyad par med pa'i phyir kun rdzob tu yang skye ba med pa yin la de'i rgyu dang 'bras bu zhes bya ba la sogs pa med do zhes bya bar sbyar ro//yang na skad cig ma dang po la ma ltos par skad cig ma gnyis pa skye na rtag tu yod pas na rgyu'i skad cig ma ma zhig pas so//med pa yang nus pa med pa yin pa'i phyir snying po tshig pa kun rdzob tu yang med par 'gyur ro/ /de bas na me lce dang snying po ni rgyu la sogs pa ma yin no zhes bya bar sbyar ro / /skad cig ma dang po dang skad cig ma gnyis pa phrad pa kho nas kun rdzob tu snying po tshig pa ni gang gi phyir zhes bya ba la sogs pa smos pa yin te/gang gi phyir de ltar skad cig ma snga ma dang phyi ma re res yin par mi rung ba de'i phyir rgyu 'di dang rkyen 'di las skye bas 'di'i rkyen nyid 'di pa tsam yin pa de'i bdag nyid can gyi rten cing 'brel par 'byung ba'i chos nyid kyi zhes bya ba rgyu dang rkyen la rag las pa las skyes pa'i rang bzhin gang yin pa des me lce dang snying po ni sreg par byed pa dang bsreg par bya ba'i gnas skabs su gzhag go zhes bya ba ni lhag ma'o// ci'i phyir zhe na/ gang gi tshe gnyi ga phrad cing 'dus pa'i gnyis pa la sogs pa phrad pa'i skad cig ma skyed par rung ba me lce dang snying po gnyis ka phrad du rung ba'i skad cig ma de la ltos shing rgyur byas nas ma brtags na gcig tu nyams dga' ba zhes bya ba kun rdzob tu rgyu dang 'bras bur 'brel pa gang yin pa de'i stobs kyis te/de'i rgyus skad cig ma dang po des drangs shing sgro btags pa'i mthu khyad par can sreg tu rung ba nyid kyi mtshan nyid gang yin pa de nyid yin gyi ris mi mthun pa gzhan dag yang ma yin te/ khyad par du snying po bsreg pa bskyed par rung ba'i skad cig ma gnyis pa la sogs pa ste/ skad cig ma gnyis pa dang gsum pa la sogs pa yod na de'i tshe rgyu med pa zhig kyang zhes bya ba'i rgyu'i skad cig ma rang gi ngang gis 'jig na yang rgyu dang 'bras bu dag ces bya ba me lce dang snying po'i mtshan nyid dag go rims bzhin du gang dus mnyam du srang mda'i mtho dman dang 'dra ba skye ba dang 'jig pa ste/skye ba dang 'gag pa gang yin pa de dag nye bar dmigs pa yin pa'i phyir te/ me yi 'bras bu du ba ste/ /'bras bu'i chos kyi rjes 'jug phyir/ /de med par yang de yod na//rgyu dang ldan pa las 'das 'gyur/ /zhes bya ba'i rigs pas mngon sum dang mi dmigs pa rnam pa lnga dag gis me lce dang snying po dag 'jug pa dang ldog pa'i bdag nyid can gyi rgyu dang 'bras bu dmigs pa'i phyir ro/ /yang gang gi phyogs la yang dag par na rgyu dang 'bras bu'i dngos por mi rung ba de la yid brtan du rung ba med de de'i phyogs la yang rjes su 'gro ba dang ldog pa de rjes su sbyar bar 'dod par bya'o zhes bya bar dgongs so//gzhan du na de'i phyogs la sna tshogs rgyu med pa 'am rgyu ma nges par 'gyur te nges pa med pa'i phyir ro//rnam 'grel mdzad pas/ thams cad nus pa med ce na/ /sa bon sogs ni myug sogs la/ /nus mthong gal te de kun rdzob/ /'dod na ji lta de ltar zad/ /ces gang bshad pa dang / dbu ma'i rgyan las / dngos po kun gyi rang bzhin ni/ /rig pa'i lam gyi rjes 'brang bar//gzhan dag 'dod pa sel bar byed/ /de'i phyir rgol ngan gnas med do/ /zhes bya ba la sogs pa smos pa yin no/ /pas zhes bya ba la sogs pas dpes bstan pa'i byang chub dang mar me'i dpe'i tshul gyis zhes bya ba la sogs pa smos te/skad cig ma snga phyir gyur pa gnyis kyis gang yul gcig la zhes bya ba mar mer gtogs pa sreg pa la'o/ /de la nye bar sbyor ba ni de'i rgyu nyid du shes par byed pa ni ston pa'o/ /de lhur len pa ni de gtso bor gyur pas mar me'i dpe'i tshul du rig pas so/ /byang chub sgrub par byed pa dngos po tshad yod pa ni mngon par rtogs pa brgyad kyi mtshan nyid dam dran pa nye bar gzhag pa la sogs pa'i mtshan nyid do//der snang ba'i rnam par shes pa ni mngon par rtogs pa brgyad la sogs par rnam par rtog pa'i sems rgyur byas pa nyid yin pa'i phyir ro//snga ma la brten nas zhes bya ba ni 'di ni rkyen tsam nyid kyi bdag nyid can gyi rten cing 'brel par 'byung ba'i chos nyid kun rdzob tu rgyur byas nas so/ /snang ba'i don ni mig gi rnam par shes pa la sogs pa'i yul gzung ba la sogs pa mi mthun pa'i phyogs kyi mtshan nyid du nges pa'i yul lo//des na dben pa ni lhag par khyad par du 'phags pa ste/ khams gsum pa khyad par du byas pa'i snang ba nyid kyis na lhag pa'i sems kyi khyad par te/ de'i gnyen po'i mtshan nyid de'i gnyen por snang ba'i rnam par shes pa phyi ma zhes bya ba phyis 'byung ba'i byang chub la rtogs pa'i sems skye bar gyur pa na byang chub thob par gyur pa ste/nyon mongs pa bag chags dang bcas pa spangs par rigs pa yin te/ dbu ma'i rgyan las/ chos la bdag med mkhas pa ni/ /rang bzhin med pa goms byas pas/ /phyin ci log las byung ba yi //nyon mongs sgrib pa med par spong / /zhes ji skad bshad pa dang / yang de nyid las/ rgyu dang 'bras bu'i dngos po ni/ /kun rdzob tu na ma bzlog pas/ /kun nas nyon mongs rnam byang sogs/ /rnam par gzhag pa 'khrug pa med/ / ces gang bshad pa dang / dbus dang mtha' rnam par 'byed pa las kyang / nyon mongs pa yi sgrib pa dang / /shes bya'i sgrib pa nyid du bstan/ /der ni sgrib pa thams cad de/ /de zad nas ni grol bar 'dod/ /ces smos pa yin no/ /de ltar mar me'i dpes yang dag par na rgyu dang 'bras bu nyid du mi rung bas byang chub kun rdzob tu nye bar bstan pa yin la/gzhan dag tu yang bcom ldan 'das kyis rtogs par dka' ba'i don rnam pa brgyad gsungs pa dam pa rnams kyis bsgrub par bya'o/ /zhes bstan par bya ba'i phyir ji skad smos pa'i zhes bya ba la sogs pa smos pa yin no//skye ba dang ni zhes bya ba la sogs pa bsgom pa'i lam la gnas pa'i phyir mi ldog pa'i mtshan nyid kyi tshig le'ur byas pa rnam par 'grel pa ni skad cig ma zhes bya ba la sogs pa yin te/ bsgoms pas rtogs par bya ba ni thob par bya ba'o//don khyad par du 'phags pa ni nyan thos la sogs pa dang thun mong ma yin pa'i byang chub gang yin pa'o/ /de skyed pa ni goms par byed pa'o/ /skad cig ma snga ma dang phyi ma dag gis kyang snga ma bzhin du mi 'thad la ngo bo nyid med pa nyid kyis kyang snga ma bzhin du mi 'thad do zhes bya ba ni rgyu gnyis pa yin no//de ltar na rten cing 'brel par 'byung ba sngar nye bar bstan pa dang bsam gyis mi khyab pa'i zhes bya ba la sogs pa sgrub pa po'i shes pa zab pa nyid ni 'og nas bshad pa'i don bdun car la yang sbyar bar bya'o//rang bzhin gyis dngos po med par byung ba nyid kyis na yang dag par na 'gag par mi 'thad pas 'gag pa de ni dngos po thams cad ces bya ba la sogs pa smos pa yin no/ /yang dag pa dang yang dag pa ma yin pa'i don dag la goms pas mngon sum du bya ba dang ldan pa nyid kyis de bzhin nyid mngon sum du mi byed pa yin te/de ni gnas skabs thams cad du zhes bya ba la sogs pa smos pa yin no/ /sbyin par bya ba la sogs pa rang bzhin med pas sbyin par bya ba la sogs par rtog pa'i sbyin pa la sogs pa sgrub pa mi 'thad pa'i phyir zhes bya ste sbyin par bya ba la sogs pa'i gzung ba'o//de ni de bzhin nyid kyi zhes bya ba la sogs pa smos pa yin no/ /ngo bo nyid med pa nyid kyis gzung bar bya ba'i gzugs la sogs pa'i chos rnams med pas de'i shes pa mig gi rnam par shes pa la sogs pa'i shes pa ste/de ni de bzhin nyid kyi zhes bya ba la sogs pa smos pa yin no/ /stong pa nyid yin pas na sems bskyed pa la sogs pa dang gzhan dag nyams su len pa med pa'i phyir spyod pa ni sems bskyed pa la sogs pa nyams su len pa yin te/ de ni chos nyid kyis zhes bya ba la sogs pa smos pa yin no//gzugs la sogs pa'i tshul rnam pa gnyis su snang bas gnyis su med par shes pa min par mi 'thad pa'i phyir gzung ba la sogs pa med pa ni gnyis su med pa ste/ de ni gnyis su med pa'i zhes bya ba la sogs pa smos pa yin no//snying rje la sogs pa'i tshogs yongs su rdzogs pa nyid kyis na sangs rgyas la sogs pa nyid/ 'thob pa mi 'jigs pas thabs la mkhas pa ste/ sems ma zhum pa la sogs pa'o / /de ni tshogs thams cad ces bya ba la sogs pa smos pa yin no//rten cing 'brel par 'byung ba la sogs pa phan tshun 'gal ba'i don ni yang dag par sgrub par byed pa'i byang chub sems dpa'i lam rtogs par dka' ba'i shes pa nyid yin pas shes pa zab pa ni bsam gyis mi khyab pa'i ye shes zhes bya ba la sogs pa smos pa yin te/'di ni ting nge 'dzin thob pa kho na'i yul yin gyi gzhan dag ni ma yin no zhes bya ba'i bcom ldan 'das kyi dgongs pas tshu rol mthong bas ni 'dir dad pa kho na legs so zhes bya bar dgongs so/ /gang gis 'dren pa'i nges 'byung ba'i/ /dad pa gzhon pa mchog yin no//de bas dad pa'i rjes 'brang nyid/ /blo ldan mi yis brten par gyis/ /dad pa med pa'i mi rnams la/ /dkar po'i chos rnams mi skye ste/ /sa bon me yis tshig pa la/ /myu gu sngon po ji bzhin no/ /zhes gang gsungs pa yin no/ /chos rnams zhes bya ba la sogs pa'i lam gyi don gyi 'khor ba dang zhes bya ba la sogs pa smos pa yin te/'khor ba dang rnam par byang ba ni srid pa dang mya ngan las 'das par gyur pa'i mi mthun pa dang gnyen po ni gzung ba la sogs pa dang lam gyi 'bras bur brjod pa gang yin pa de rnams ni snang brnyan tsam gyi ngo bo nyid de sems tsam nyid gang yin pas rmi lam dang 'dra ba nyid du rtogs shing khong du chud pa de'i phyir 'khor ba dang mya ngan las 'das pa dag la tha dad pa nyid du rnam par mi rtog pas na mnyam pa nyid du lhag par mos pa ni mnyam pa nyid yin te/slob dpon nA ga rdzu na'i zhal snga nas kyis/ mya ngan 'das mtha' gang yin pa/ /de ni 'khor ba'i mtha' yin te/ /de gnyis khyad par cung zad ni/ /shin tu phra ba'ang yod ma yin/ /zhes gang gsungs pa yin no/ /rmi lam dang 'dra ba nyid yin na zhes bya ba la sogs pa ni klan ka yin la//lan ni ji skad bshad par zad/ /ces bya ba'i bshad pa ni ji ltar phyi rol zhes bya ba la sogs pa smos pa yin te/ ji ltar phyi rol gyi don du smra ba'i lugs la zhes bya ba ni bye brag tu smra ba dang mdo sde'i gzhung lugs la'o/ /skad cig ma nyid kyis rgyu med par 'jig pa yin la zhes bya ba ni ral gris bsnun pa la sogs pa mthong du zin na yang de la ma ltos par srog chags la sogs pa rang gi ngang gis 'jig pa yin la/grub pa'i mtha' las kyang / 'jig rten sna tshogs las las skyes/ /zhes 'byung ba'i phyir rang gi las kyi stobs kyis srog gcod pa la sogs pa yin no zhes bya ba ni de'i lung yin pas don dam par de'i tha snyad kyi dbang gis srog chags la sogs pa ni skad cig ma nyid kyis 'jig pa'i phyir dang /de gsod pa po la sogs pa yang rang gi las kyis sprul pa yin pa'i phyir srog bcad pa la sogs pa mi srid pas na sus kyang zhes bya ba la sogs pa smos pa yin te/ma blangs pa yang ma yin zhes bya ba yul med pas de dgag pa yang rigs pa ma yin pa'i phyir ro/ /sogs pa'i sgras ni su'i yang bud med gang gis kyang blangs pa med do zhes bya ba la sogs pa'i nyes pa'i phyogs kyi rgyun la 'jug pa na srog chags la sogs pa la dga' ba'i dngos po lus la sogs pa g.yo ba med pa'i mtshan nyid gang yin pa de ral gri la sogs pas skyed pa la gsod pa la sogs par rtogs pa ni bdag gis bsad do//'di'i rdzas sam bud med bdag gis blangs so zhes bya ba la sogs par mngon par zhen pa de rtogs pa'i sgo nas te/ de'i dbang gis srog gcod pa la sogs par rnam par 'jog pa yin no/ /ji lta bur zhe na tshul bzhin ma yin pa'i yid la byed pa la sogs pa dang ldan pa la mi dge ba la sogs pa dang 'dra bar zhes bya ba ji srid 'tsho'i bar du tshangs par spyod pa nyid du dam bcas pa dang ldan pa'i dge slong la la zhig la lan 'ga' zhig tu bud med 'ga' zhig mthong bas nu ma sra zhing mkhrang la rgyas pa mnye ba la sogs pa'i bsam pa sngon du 'gro bas phrad pa na 'khyud pa la sogs pas nyams pas rtsa ba'i ltung ba'i mtshan nyid can gyi mi dge bar 'gyur ba yin la/sogs pa'i sgras ni de'i mod la dge 'dun la 'chab pa med pas de la mthol ba sngon du 'gro bas dge slong nyid 'thob pa'i phyir dge ba yin la de nyid gnyid kyis log pa ni lung du ma bstan pa rnam par gzhag pa dang 'dra'o//ci'i phyir don dam par yod par smra ba'i gzhung gi phyogs ltar na ji ltar skad cig ma nyid kyis na mi dge ba la sogs pa'i skad cig ma 'jig pa'i phyir dang / las las skyes pa nyid yin pa'i phyir de byed pa mi dge ba la sogs pa med do//yang na dge ba la sogs pa dang 'gal ba mi dge ba la sogs pa rtog pa dge slong de'i gnas skabs su 'jog pa de dang 'dra'o zhes bya ba'i tha tshig go/ /de bzhin du dngos po rmi lam dang 'dra ba la yang zhes bya ba chos thams cad dngos po med pa la de dang mthun pa ste/rang bzhin gyis stong pa'i don gyi srog chags la sogs pa'i mtshan nyid gang yin pa de la gang dngos por mngon par zhen cing dngos po la mngon par chags pa'o/ /sogs pa'i sgras ni bdag gis ral gri la sogs pas bsad do zhes bya ba la sogs pa mngon par zhen pa gang yin pa de'i dbang gis phyin ci log gi 'ching ba mtha' dag ma nyams pa rnams la bdag med pa la lhag par ma mos pa rnams la srog gcod pa la sogs pa rnam par 'jog go zhes bya ba la sogs pa'i lan yin la de dang de phyogs gzhan las gsungs pa ni mdo sde las gsungs so zhes bya bar khong du chud par bya'o//'dir dngos po la sogs pa la mngon par zhen pas thams cad du srog gcod pa la sogs pa rnam par 'jog ste/ so sor rtogs pa dang ldan pa rnams kyi ji srid de yod pa de srid byang chub pa'i bar du mi dge ba spangs la nges par dge bar bya'o zhes bya bar dgongs so//stong nyid don ni mi shes par/ /thos pa rnams la 'jug byed cing / /gang dag bsod nams mi byed pa/ /skyes bu tha shal de dag brlag /ces bya ba la sogs pa gang dag bshad pa ni lan yin no/ /sogs pa'i sgras bsdus pa'i lan ni gzhan yang zhes bya ba la sogs pa gsungs pa yin te/gzhan yang zhes bya ba ni lan gzhan bsdus pa yin no/ /rmi lam sems ni gnyid kyis nyams/ /zhes bya ba gang gi phyir gnyid ces bya ba'i le lo'i khyad par gyis sgrib par bshad pas nyams shing mi gsal bar gyur pa'i sems ni rgyu des rmi lam ste gnyid kyis log pa'i gnas skabs su srog gcod pa la sogs pa'i shes pa dang 'bras bu 'dra ba ma yin te/gnyid ma log pa'i gnas skabs dang mtshungs pa mi dge ba la sogs pa'i 'bras bu rnam par gzhag pa ma yin no zhes bya ba ni lhag ma'o//gal te rmi lam na yang sems gsal bar gyur na de'i tshe gnyid ma log pa'i gnas skabs dang 'dra bar srog gcod pa la sogs pa khu ba byung ba dang 'dra bar de yang rnam par gzhag pa nyid yin te/ dngos po la sogs pa la mngon par zhen par mnyam pa yin pa'i phyir ro zhes bya bar dgongs so//de ltar na dpe ma grub po zhes bya ba rmi lam gyi dpe ni gnyid ma log pa'i gnas skabs su mi dge ba la sogs pa med par sgrub pa ma yin no/ /lan gyi rnam pa gzhan ni de bzhin du zhes bya ba la sogs pa smos pa yin te/de bzhin du zhes bya ba ni gnyid ma log pa'i gnas skabs de dang 'dra bar rmi lam na dge ba dang mi dge ba'i spyad pa ni zhes bya ba rmi lam du dge ba la sogs pa byas pa sad pa'i gnas skabs na ldang ba'i gnas skabs so/ /thol le byas so legs pa byas so zhes bya ba ni rjes su yi rang bas dge ba la sogs pa la dga' ba yin pa'i phyir ro//rjes kyi gnas skabs kyi sems ni de'i phyi mar gyur pa'i sems kyis mngon par zhen pa'i gsos ni 'phel ba gang yin pa ste/ /de yongs su gsos pa ni dge ba la sogs pa 'phel bar rnam par gzhag go zhes bya ba ni lhag ma'o//de'i phyir yang dpe ma grub pas zhes bya ba ni rmi lam gyi dpe gnyid ma log pa'i gnas skabs su mi dge ba la sogs pa med pa grub pa ma yin no/ /sems can zhes bya ba la sogs pa sangs rgyas kyi zhing rnam par dag pa'i 'grel pa ni go sla'o//de'i yul dang zhes bya ba la sogs pa'i tshig le'ur byas pa ni bar chad kyi chos las zhes bya ba la sogs pas rnam par 'grel pa yin te/ bar chad kyi zhes bya ba la sogs pa ni gzugs la sogs pa bzung ba'i chos rnams yod par lta ba las ni bdud la sogs pa 'byung la de med pa yin pa'i phyir ro//chos thams cad ces bya ba la sogs pa ni rten cing 'brel par 'byung ba la sogs pas bdag med par bsgom pa goms par byas pa ni thams cad mnyam pa nyid yin pas gang du yang mngon par zhen pa med pa ma yin pa'i phyir ro//smon lam las grub pas zhes bya ba la sogs pa ni rnam pa thams cad du gzhan gyi don la go cha bgos pa yin pa'i phyir ro/ /dka' ba spyad pa thams cad ni zhes bya ba la sogs pa ni gtong ba dang gtong ba chen po dang shin tu gtong ba la goms pa yin pa'i phyir ro//chos dkar po zhes bya ba la sogs pa ni bdag med pas thams cad du bsam pa rnam par dag pa nyid yin pa'i phyir ro/ /rnam par thar pa'i zhes bya ba la sogs par ni stong pa nyid dang mtshan ma med pa dang smon pa med pa'i thabs la goms pa yin pa'i phyir ro//'dri ba sngon du btang ba zhes bya ba la sogs pa ni dris pa'i rjes thogs la chos ston pa'i phyir ro/ /yul thams cad shes pa nyid dang byams pa la sogs pa tshad med pa la mkhas pa'i phyir te/sgra rnams las ni zhes bya ba la sogs pa bshad pa yin no/ /de'i yul zhes bya ba la sogs pa bshad par bya ste/ de ltar shes rab kyi pha rol tu phyin pa ste/ rnam par mi rtog pa'i bdag nyid can ni rnam pa bcu ste rnam grangs bcu yin pa / de'i yul ni spyod yul mngon sum du bya ba ni gang bdag nyid kyi mngon sum du bya ba ste/de'i dus dang dus ma yin pa shes pa ni rigs pa dang mi rigs pa'i dus shes pa'i sbyor ba ni bsam pa'i khyad par ro/ /thabs la mkhas pa yin no zhes bya ba ni de ltar lam rnam pa bcu la byang ba'o/ /'di'i zhes bya ba ni bsgom pa'i lam la gnas pa'i don gyis shes par bya'o//yang thams cad mkhyen pa gsum dang / rnam pa thams cad mngon par rdzogs par rtogs pa'i khyad par ci zhig yin zhe na/ kha cig na re thams cad mkhyen pa nyid gsum ni ji skad du bshad pa'i rnam pas rnam pa'i yul so sor nges pa yin la rnam pa thams cad mngon par rdzogs par rtogs pa 'di rnam pa ma lus pa'i yul yin no zhes 'dod do gzhan dag ni thams cad mkhyen pa nyid gsum ni mtshan nyid can du rnam par bzhag la rnam pa thams cad mngon par rdzogs par rtogs pa ni sbyor ba can yin no zhes zer ro//la la ni rnam pa thams cad mngon par rdzogs par rtogs pa ni mi mthun pa'i phyogs kyi gnyen po rnam par gzhag pas rab tu phye ba yin la thams cad mkhyen pa nyid gsum ni rang bzhin gyis zhi ba'i rnam pa nyid yin pa'i phyir de lta bu ma yin no zhes 'chad do// shes rab kyi pha rol tu phyin pa'i man ngag gi bstan bcos mngon par rtogs pa'i rgyan las seng ge bzang po'i zhal snga nas kyi gzhung rtogs par dka' ba'i snang ba mdor bshad pa chos kyi grags pas byas pa las skabs bzhi pa'i 'grel pa'i bshad pa'o// //gang du 'bad pa med par dran pa med pa der ni 'bad pas bsam par bya'i gzhan dag tu ni ma yin te/ de ni lhun gyis grub par gnas pa yin pa'i phyir te/ pha rol tu phyin pa'i tshul la gcig nas gcig tu brgyud pa'i sems bskyed pa la sogs pa bsgom pa'i rim gyis gang du rtsol ba med pa der ni rtsol ba dor bar bya la/gang du de med pa der ni rtsol ba bya'o/ /de ltar skabs rnam pa bzhi'i don bsgoms pas rnam pa thams cad dang lam dang gzhi'i skye ba med par shes pa dang ldan par bshad pa'i rim gyis bsgom par bya ba'i don du yang de las rab kyi mthar phyin pa'i lam rtogs par bya'o zhes bstan par bya ba'i phyir/rnam pa kun du mngon par rdzogs par rtogs pa las zhes bya ba smos te/ rnam pa thams cad dang lam dang gzhi skye ba med par shes pa dang ldan pa las cir 'gyur zhe na/rab kyi mthar phyin par rtogs pa 'byung ngo zhes bya ba yin te/ 'di la rab kyi mthar phyin par rtogs pa yod pa ste/ rtsol ba dang mi rtsol ba dag gi rtse mo'i mngon par rtogs pa bsgoms pas lhun gyis grub pa'i ye shes skye bar 'gyur ro/ /zhes bya ba ni lhag ma'o//rtse mo'i mngon par rtogs pa las dang por rtags la sogs pa bshad pa'i rgyu go sla ba'i phyir zhes bya ba la sogs pa smos pa yin te/ rmi lam na yang zhes bya la sogs pa'i rtags kyi tshig le'ur byas pa'i rnam par 'grel pa shin tu goms pa'i phyir zhes bya ba la sogs pa ni gus pa dang bcas pa la sogs pas bdag med pa'i lam bsgoms pa na nyung zad tsam gyi rab kyi mthus gnyid ma log pa'i gnas skabs su mthong ba nyid kyis na gzugs la sogs pa'i chos rnams rmi lam dang sgyu ma la sogs par mthong bar ma zad kyi gzhan du na gnyid kyis nyams pa'i gnas skabs su yang mthong ba'i phyir ro//de'i rjes la nyan thos zhes bya ba la sogs pa ni de bzhin du blo rab mchog yod pas lam gzhan snying po med pa nyid du mthong ba'i phyir ro/ /de bzhin gshegs pa zhes bya ba la sogs pa ni de bzhin du rang gi sems las sangs rgyas dang byang chub sems dpa' la sogs pa tha mi dad par mthong ba'i phyir ro//sangs rgyas kyi zhes bya ba la sogs pa ni de bzhin du lus la sogs pa yang bas rang dang gzhan gyi sgrub pa dang 'tsham pa'i nam mkha' la 'gro ba la sogs pa mthong ba'i phyir ro//chos ston pa zhes bya ba la sogs pa ni de bzhin du dman pa nyid kyis na smad de/ spong ba med pa nyid yin pa'i phyir ro/ /dmyal ba pa zhes bya ba la sogs pa ni de bzhin du rang gi sems dag pas rang gi sangs rgyas kyi zhing dag pa yin la/de dran pas dmyal ba la sogs pa dag pa yin te/ rang gi sems las tha dad pa ma yin pa nyid yin pa'i phyir ro/ /grong khyer zhes bya ba la sogs pa ni thabs mkhas pa bsam gyis mi khyab pa la bslabs pas nus pa bsam gyis mi khyab pa rdzogs pa yin pa'i phyir ro//gnod sbyin zhes bya ba la sogs pa ni de bzhin du gzung ba la sogs pa yongs su spangs pa'i phyir ro/ /rang gi zhes bya ba la sogs pa ni de bzhin du mngon par shes pa'i ye shes kyis khyad par du 'phags pa la brtson pa nyid bdud kyis bgrod par bya ba ma yin pa nyid kyis yang dag pa'i dge ba'i bshes gnyen brten pa yin pa'i phyir ro//rnam pa thams cad du zhes bya ba la sogs pas ni de bzhin du rtag pa dang bdag la sogs pa dag snying po med pa nyid kyis na phyi dang nang gi mu stegs pa'i skye bo tshar bcad pas phul du byung ba'i don dang gzhung gi khyad par du 'phags pa stong phrag brgya pa la sogs pa'i mdo sde'i don la slob pa yin pa'i phyir ro//thams cad la zhes bya ba la sogs pa ni de bzhin du gzung ba la sogs pa'i bsam pa med pa'i phyir ro//sangs rgyas kyi zhes bya ba la sogs pa ni de bzhin du bsam pa dri ma med pa nyid yin pa'i phyir ro/ /rtse mo'i mngon par rtogs pa thob pa'i gnas skabs kyi khyad par gyi zhes bya ba ni rtse mo'i mngon par rtogs pa lhun gyis grub pa'i ye shes kyi'o/ /rtags yin no zhes bya ba ni rtse mo'i mngon par rtogs pa'i rnal 'byor pas mtshan ma la sogs pa ste/'dir zhum pa'i sems ni gzung bar bya/ /rgod pa yang ni zhi bar bya/ /zhes smos pas bsgom pa thams cad la zhum pa'i sems ni snang ba yid la byed pas so/ /'dod chags dang rnam par rtog pa dag gis rgod pa la ni go rims bzhin du mi sdug pa dang /dbugs bgrang ba dran pa'i bsam gtan dag gis bzlog par bya bar shes par bya'o/ /'dzam bu'i gling gi zhes bya ba la sogs pa'i tshig le'ur byas pa'i don ni 'dzam bu'i gling la sogs par skyes pa'i skye bo rnams ni 'dzam bu'i gling gi skye bo ste/de rnams ji snyed yod pa grangs de snyed kyi sangs rgyas gang yin pa de rnams la mchod pa ni yid dga' ba skyed par byed pa'o/ /dge ba la sogs pa ni bsod nams kyi mchog go/ dper mdzad nas ni rnam mang du/ /zhes bya ba ni me tog dang spos la sogs pa rnam pa mang po nyid kyis yang dang yang du ste/de nyid snga ma snga ma la phyi ma phyi mas phan tshun dper mdzad nas gong nas gong du rnam par 'phel ba'i rim gyis bsod nams 'phel ba'i bdag nyid can bcu drug yin no/ /gling bzhi pa dang nyi zla dang //ri rab dang ni 'dod lha dang / /tshangs pa'i 'jig rten stong la ni/ /stong ni spyi phud yin par 'dod/ /de stong la ni stong gnyis pa/ /bar ma'i 'jig rten khams yin no/ /de stong la ni stong gsum ste/ /mnyam du 'dzin cing 'byung ba yin/ / zhes 'byung bas de'i don ni 'di yin te/ tshig le'ur byas pa las 'dzam bu'i gling smos pa ni nye bar mtshon pa nyid yin pa'i phyir 'dzam bu'i gling la sogs pas 'dzam bu'i gling dang / shar gyi lus 'phags po dang / nub kyi ba lang spyod dang / byang gi sgra mi snyan dang / zla ba la sogs pa dang bcas pa'i stong gsum gyi stong chen po'i 'jig rten gyi khams gang yin pa de na sems can gang yin pa de nyid kyi grangs dang ldan pa'i de bzhin gshegs pa gang yin pa de rnams la mchod pa ni rnam par 'phel ba dang po yin no/ /khyad par du zhes bya ba la sogs pa ni rnam par 'phel ba rnam pa bdun du bshad pa yin te/shes rab kyi pha rol tu phyin pa ni rnam pa gsum mo/ /de yid la byed pa ni bsgom pa la sogs pa rten pa'o/ /mi skye ba ni chos rnams kyi skye ba med pa ste/ de la bzod pa ni sred pa ste de thob pa'o/ /byang chub par bya ba dang byang chub par byed pa'i chos mi dmigs pa ni shes bya la sogs pa mi dmigs pa'o/ /khyad par can ni nyan thos la sogs pa dang thun mong ma yin pa'i dge ba bcu la sogs pa dang / /gzugs med pa'i snyoms par 'jug pa bcu ste/de dag thob pa'o/ /lha'i ris thams cad du nye bar 'gro ba ni lha la sogs pa bsdus par rtogs par gzhan gyi don gyi phyir 'gro'o / /bdud thams cad ni dbang po la sogs pa'o/ /de rnams zil gyis gnon pa ni mngon par shes pas nus pa med par byas pas so//ston pa dang 'dra ba'i skye ba ni byang chub sems dpa' rnams so/ /de dang mtshungs par gnas pa ni bya ba de nyid nyams su len pa'o/ /yang bsod nams ni rnam pa brgyad de zhes 'og ma dang sbyar ro/ /de ni rnam pa thams cad du zhes bya ba la sogs pa smos pa yin te/rnam pa thams cad du thabs la mkhas pa ni dad pa la sogs pas so/ /bslab pa yongs su dag pa ni bdag med pas zin pa'i sbyin pa la sogs pa'o sangs rgyas kyi rigs can du 'gyur ba ni nyan thos la sogs pa'i rigs 'joms pa'o/ / 'bras bu sangs rgyas nyid thob pa'i rgyu mtshan ni sems skyed pa la sogs pa'o/ /pha rol tu phyin pa ni sbyin pa la sogs pa'o/ /de dang mi mthun pa'i phyogs ni ser sna la sogs pa ste de'i sems mi skyed pa'o / /gzugs la sogs pa dang ldan par rtog pa ni mig gi rnam par shes pa la sogs pa la'o//de rab tu mi skyed pa ni shes bya rang gi sems kyi rnam pa nyid yin par mthong ba'i phyir ro/ /pha rol tu phyin pa ni sbyin pa la sogs pa ste/ de'i kun bsdus pa ni sbyin pa la sogs pa re re la sbyin pa la sogs pa thams cad khongs su 'dus pa'o//de'i shes pa ni rtogs pa'o phun sum tshogs pa thams cad ni mngon par mtho ba dang nges par legs pa dag go/ /de thos pa ni rab tu rnyed pa'o/ /yang dag par rdzogs pa'i byang chub ni gnyis su med pa'i ye shes so/ /de dang nye bar gyur pa gzung ba la sogs pa'i lta ba dang bral bas thag nye ba'o//'dzam bu'i gling gi zhes bya ba la sogs pas de ltar rnam par 'phel bas rnam par spel ba'o / /bshad ma thag pa'i bsod nams rnam par 'phel ba rnam pa bcu drug mthar phyin pa'i dbang du gyur pa ni mngon sum du gyur pas rtogs pa yin la de nyid ni mthar phyin pa gang yin pa de ni rnam par mi rtog pa'i ye shes yin la/de'i mtshan nyid rnams ni de'i rang bzhin yin pa'i phyir ro/ /nges pa ni thams cad mkhyen pa nyid gsum po thams cad kyi mthar thug pa rdzogs pa ni sems can zhes bya ba la sogs pa gsungs pa yin te/tshig le'ur byas pa rnam par 'grel pa ni/ da ltar zhes bya ba la sogs pa yin te/ yang dag pa'i thabs la mkhas pa'i stobs kyis zhes bya ba ni dad pa la sogs pa'i nus pas so/ /de ltar zhes bya ba ni sngar bshad pa'i bsod nams kyi rim pas rnam par mi rtog pa rtogs pa'i gnas skabs na 'tshang rgya ba nyid ni thams cad du rgyun mi 'chad par gzhan gyi don gyi snying rje dang byams pa la sogs pa ste/de rnams mngon sum du byed pa'i ngo bo de'i dbang du gyur pa ste/ des na de'i dbang gis sems can gyi don yongs su mi gtong ba'i mtshan nyid ni rnam pa thams cad du rgyun mi 'chad par gzhan gyi don gyi rgyu yin no//ji skad bshad pa zhes bya ba la sogs pa la bya ba med pa nyid yin na yang bsod nams kyi dbang gis gzhan gyi don las mi ldog pas bdag med pa bsgom pa dang ldan pa rnams kyis byang chub thob na yang bsod nams kyi bya ba la 'bras bu dang bcas pa yin no//zhes bya bar dgongs so/ /de ltar nges pas gtan la phab pa'i zhes bya ba thams cad mkhyen pa nyid gsum bsgrub pas rdzogs par gyur pa ni bstan par 'gyur ba ste/ de nyid du brtan por 'gyur ba de'i mtshan nyid can gyi sems kun tu gnas pa ni sngar bshad pa'i rnam par mi rtog pa'i sems yongs su mi 'dor ba'o//sems kun tu gnas pa ni gling bzhi zhes bya ba la sogs pa gsungs pa yin te/ gling bzhi pa ni gling bzhi pa dang zla ba la sogs pa ste/de dang ldan pa'i stong dang stong gnyis pa dang / stong gsum ni sngar bshad pa'o/ /de dag dper mdzad nas ting nge 'dzin gyi bsod nams dang ye shes zhes bya ba ni lhag ma'o/ /de bsod nams mang ba nyid kyis na ting nge 'dzin gang yin pa de ni sems kun tu gnas pa yin no zhes yongs su bsgrags so//tshig le'ur byas pa rnam par 'grel pa ni/ lugs las zhes bya ba la sogs pa smos pa yin te/ srid pa bzung na zhes bya ba ni tshad yod pa srid na dngos po srang tshad kyis gzhal bar nus kyi zhes bya ba'i tshul gyis tshu rol mthong ba rnams kyi tshad mas gzhal bar mi nus kyi/'on kyang thams cad mkhyen pa tshad mar byas nas gzhal zhing yongs su brtags pa yin pa'i phyir sems kun tu gnas pa rnam par gzhag pa'i don yin no zhes 'dir yang shes par bya'o/ /de ni gling bzhi pa zhes bya ba la sogs pa smos pa yin te/gling bzhi pa la sogs pa dang ldan pa'i stong gsum pa ste/ stong dang stong gnyis pa dang stong gsum pa'i 'jig rten gyi khams rnams so/ /de pha rol tu phyin pa la sogs pa thams cad kyi zhes bya ba sbyin pa la sogs pa rnams so /sogs pa'i sgras ni snying rje la sogs pa'i tshogs rnams so/ /de'i ngo bo nyid kyi ting nge 'dzin mtha' yas pa gang yin pa de rnams kyi bsod nams dang ye shes gang yin pa de so sor re re nas dpe ste cha 'dra bar mdzad nas de dag las khyad par du 'phags shing tshad las 'das pa'i bsod nams mang po nyid kyis grangs med pa'i bsod nams gang yin pa de'i rgyus ting nge 'dzin te/thams cad mkhyen pa'i ye shes kyis rtogs par bya ba snying rje la sogs pa'i stobs las gyur pa'i ting nge 'dzin las skyes pa'i bsod nams dang ye shes tshad med pa las yang dag par skyes pa rnam par rtog pa thams cad dang bral ba'i ye shes brtan pa'i rgyu can sems rtse gcig pa nyid de/de'i mtshan nyid ces bya ba de'i ngo bo nyid ni sems kun du gnas pas zhes bya bar bshad do / /bshad ma thag pa'i rnam par mi rtog pa'i sems rgyun gyis 'khor ba ji srid par gnas pa yin la/gzhan dag tu ni 'dul ba'i dbang gis 'tshe ba med pa nyid dang / yang dag pa'i don yin pa nyid dang / de'i phyogs su ltung bar bshad pa nyid do / /gzhan du na smon lam gyi dbang du byas pa'i sems ni nyon mongs pa la sogs pas ldog par mi 'gyur ro zhes bya bar dgongs so//de yang tshad ma rnam 'grel mdzad pas/ 'tshe ba med dang yang dag don/ /ngo bo nyid la phyin log gis/ /'bad du zin kyang mi zlog ste / /blo ni de'i phyogs 'dzin phyir ro/ /zhes bshad pa yin no/ /rtags dang rnam par 'phel ba dang /nges pa dang sems kun du gnas pa ni 'dir dro ba la sogs pa'i rang bzhin nges par 'byed pa'i cha dang mthun pa yin par bshad la/ de ni rtags la sogs par zhes bya ba la sogs pa smos pa yin no/ /'jug pa dang ni zhes bya ba la sogs pa'i tshig le'ur byas pa'i don ni 'jug pa dang ni zhes bya ba la sogs pas rnam par 'grel pa yin te/go rims bzhin du mi dmigs pa'i ngo bo nyid kyi 'jug pa ni byang chub sems dpa'i chos yin te ngo bo nyid la sogs pa'o/ /dmigs pa'i ngo bo nyid ldog pa ni nyan thos la sogs pa'i chos yin te/srid pa dang zhi bar ltung ba yin pa'i phyir ro/ /de ni len pa dang dor ba'i sgo nas bzung ba ste/ dmigs par bya ba dag go/ /de ltar na gzung ba'i rnam par rtog pa kho na bzung ba yin no zhes bya ba'i tha tshig go/ de ni dngos po dang ma 'brel bar 'jug pa nyid kyis zhes smos pa yin te/spyi'i yul yin pa nyid kyis mdo sde pa la sogs pas sbyar ba'i sha za snyam pa la sogs pa phyi'i yul dang 'brel ba nyid ni mi 'thad pa yin pas so/ /de nyid kyis na phyin ci log tu snang ba'i phyir te/ /phyi'i tshul gyis spyi'i ngo bo la sogs pa'i rang bzhin gyi rang gi rnam par 'dzin pa yin pa'i phyir brdzun par shes pa yin pas yul ji lta ba bzhin ma yin pa'i rang gi ngo bo dag ste/brdzun pa'i yul gyi bdag nyid can dag gi yul gyi dbye bas rnam par brtags pa'i rang bzhin la sogs pa ni yul sna tshogs pa nyid la sogs pa'o//nyon mongs pa'i phyir zhes bya ba ni srid pa gcig nas gcig tu brgyud par nyon mongs par byed pa yin pa'i phyir ro/ /sems can rdzas dang zhes bya ba la sogs pa'i 'dzin pa'i tshig le'ur byas pa ni so so'i skye bo dang zhes bya ba la sogs pas rnam par 'grel te/go rims bzhin du so so'i skye bo dang nyan thos la sogs pa'i skyes bu rdzas dang btags par yod pa de dag ni yang dag pa dang tha snyad nyid du btags pa yin la/ de'i rten can ni de la gnas pa'i 'dzin pa dag ste/ de ltar na 'dzin pa'i rnam par rtog pa dag ni rnam par rtog pa nyid 'dzin pa yin no zhes bya ba'i tha tshig go//de ni gang gi tshe de dag gi zhes bya ba la sogs pa smos pa yin te/ skyes bu de dag gi yul gyi dngos por gyur cing dmigs par gtogs pa'i gzung ba'i don dag ste/ 'og nas bshad pa'i yul dag ji ltar de dag gis yongs su btags pa de bzhin du gang gi tshe gzung ba'i ngo bor yod pa ma yin te/gang gi phyir phyi'i gzung ba nyid 'dzin pa'i rgyu nyid kyis na de dag 'dzin pa nyid du mi 'thad do zhes bya ba'i rgyu des na de'i tshe gang gi 'dzin par 'dod ces snga ma dang sbyar ro/ /de ltar phyi'i gzung ba'i 'bras bu nyid kyi mtshan nyid 'dzin pa nyid mi 'thad pas 'dzin pa'i ngo bos skyes bu rdzas su yod pa dang btags par yod pa dag gis dben zhing med pa'i ngo bo yin pas phyin ci log tu zhes bya ba la sogs pa smos pa yin te/snga ma bzhin du yul gyi dbye bas zhes bya ba dmigs pa sna tshogs pa nyid kyis na ji ltar gzhan gyis yongs su btags pa'i srid pa dang zhi bar ltung ba nyid yin pa'i phyir ro//gegs byed pa yin pas ni yang dag pa'i ye shes kyi sgrib pa nyid yin pa'i phyir te/ re zhig gnyis su med pa'i tshul la lta smos kyang ci dgos/phyi rol smra ba'i tshul la yang / /tha dad dus su bzung ba na/ /ji ltar yin snyam rigs shes pas/ /shes pa'i rnam pa gtong nus pa'i/ /rgyu nyid yin par shes par bya/ /zhes smos pa'i phyir gzung ba dang 'dzin pa nyid du mi 'thad pas/ bshad ma thag pa'i gzung ba dang 'dzin pa dag ni btags pa yin pa'i phyir med pa yin no zhes bya bar dgongs so//ngo bo nyid dang zhes bya ba la sogs pa gzung ba'i rnam par rtog pa dang po'i tshig le'ur byas pa rnam par 'grel pa ni dben pas zhes bya ba la sogs pa smos pa yin te/ dben pa zhes bya ba gzung ba nyid la sogs pas stong par gzugs la sogs pa ma rtogs pa'i ngo bo nyid kyi mig gi rnam par shes pa la sogs pa'i yul ma yin pa'i bdag nyid can no//ci'i phyir zhe na dben pas zhes bya ba gzung ba la sogs pa stong pa'i tshul gyis na/ de la skyon med pa nyid kyis te/rdzogs pa'i byang chub kyi lam yin pa nyid kyis na nyon mongs pa med pa nyid yin pas de nyid kyi phyir gzung bar bya ba nyid yin zhing blang bar bya ba'i dmigs pa nyid kyis 'jug par bya'o zhes 'og ma dang sbyar ro/ /sa mi g.yo ba zhes bya ba la sogs pa ni de bzhin du mi g.yo ba la sogs pa la 'jug pas sangs rgyas kyi rigs su nges pa nyid yin no zhes bya bar sbyar te/sa bdun pa'i bar du rigs pa ma nges pa nyid yin pa'i phyir ro/ /sgyu ma lta bur zhes bya ba la sogs pa ni 'dir dmigs pa dang bcas pa nyid kyis mthong ba la sogs pa'i lam thob pa med pa'i phyir ro//snang brnyan tsam du zad pas zhes bya ba rnam par rig pa tsam du zad pas 'khrul pa med pa'i shes pa ni gnyis su med pa'i shes pa dmigs par bya ba la sogs pa ni dmigs pa de la dmigs pa'o/ /yon tan dang skyon ni srid pa gcig nas gcig tu brgyud pa las ldog pa dang 'jug pa'i mtshan nyid do//de mthong ba sngon du 'gro ba'i gang blang bar bya ba dang dor bar bya ba nyid kyis gnyen po dang mi mthun pa'i phyogs so/ /dri ma thams cad ni rnam pa thams cad mkhyen pa nyid gsum gyi lam gyi gzung ba la sogs pa'i rnam par rtog pa rnams ni nyes pa thams cad de/nyon mongs pa la sogs pa'i nyes pa rnams so/ /de dang bral ba nyid kyis rang gi rtogs pa rdzogs pa'i byang chub thob pa'o/ /sngar bshad pa'i dmigs pa la sogs pa ni dman pa nyid yin pa dang dmigs pa dang bcas pa nyid yin pa'i phyir dman zhing gya nom pa ma yin pa nyid yin la des nyan thos la sogs pa'i sa ni sngar bshad pa'i sa brgyad yin la de rnams thag bsring bar byed pa ni spang ba'i phyir ro//bsam pa ji lta ba dang mthun par sprul pa ni gdul bya'i dbang gis nyan thos la sogs pa'i tshul du ston pa ste/des sems can gyi don gyi las te/ gdul bya rnams kyi nges par legs pa dang mngon par mtho ba bsgrub pa'i las rnams so/ /dang zhes bya ba ni bsdu ba yin no/ /yang dag pa'i thabs la mkhas pa'i stobs kyis zhes bya ba ni sangs rgyas la sogs pa la dmigs pa'i dad pa la sogs pas skye bo thams cad sngar bshad pa'i mya ngan las 'das pa de la dgod pa'i bya ba nyid 'bras bu yin te de la'o//ngo bo nyid la sogs pa ni skyon med pa nyid kyis de bshad pa nyid ni gsal ba yin pas logs shig tu ma bshad do/ / 'jug pa'i phyogs kyi rten can ni 'jug pa'i yul la gnas pa'o/ /mthong ba'i lam gyi sbyor ba'i gnas skabs ni mthong ba'i lam gyi bsam gtan gyi khyad par gang yin pa ste/ des spang bar bya bar zhes bya ba la sogs pa'o/ /srid dang zhes bya ba la sogs pa gzung ba'i rnam par rtog pa ldog pa'i tshig le'ur byas pa'i rnam par 'grel pa ni/'khor ba zhes bya ba la sogs pa yin te/ 'khor ba dang mya ngan las 'das pa dag gi nang nas gang yang rung ba gcig tu lhung ba nyid kyis ltung ba de ni nyes pa dang bcas pa nyid kyis dmigs pa dang bcas pa nyid yin zhing rtag pa dang chad par lta ba'i nyes pa nyid kyis gzung bar bya ba ma yin zhing spang bar bya ba la dmigs pa nyid kyis na ldog par bya'o zhes 'og ma dang sbyar ro//de ltar na rtogs pa dman pa nyid yin no zhes bya ba la sogs par sbyar bar bya ste/ kun tu 'gro ba'i bdag nyid med pas stong pa'i phyir dman pa ste/yongs su ma rdzogs pa nyid kyis rtogs pa'i rgyun du zhugs pa la sogs pa'i 'bras bu la sogs pa gang yin pa de la'o/ /dge ba'i bshes gnyen gyi rgyus thabs la mkhas pa ste/ sems mi 'gong ba la sogs pa'i shes pa gang yin pa ste de dang bral ba nyid kyis yongs su 'dzin pa med pa ste/dge ba'i bshes gnyen yang dag pas bdag gis byas pa med pa'o/ /shes bya'i sgrib pa mtha' dag ni yul la sogs pas chod pa'i gzung ba la sogs pa'o/ /de rnams kyi gnyen po ma yin pa nyid kyis 'joms par mi nus pa nyid yin zhing /sgrub pa'i lam ma tshang ba ste/ ye shes kyi thabs kyis spong ba nyid do/ /de bzhin gshegs pa la sogs pa'i gdams ngag la ltos pa dang bcas pa nyid kyis zhes bya ba rang nyid rtogs pa med pa'i phyir sangs rgyas dang byang chub sems dpa' dang nyan thos gcig la gcig gi gdams ngag las skyes pa'i ye shes yod pa nyid kyis na gzhan gyi rkyen gyis 'gro ba nyid de/sangs rgyas la sogs pa'i mkhyen pas khrid pa nyid do/ /sems can thams cad kyi mchog nyid kyi chen po nyid la sogs pa ni sngar bshad pa ste/ de la mi 'jug pa nyid kyis na de med pa yin pas ched du bya ba las log pa yin te/ched du bya ba rnam pa gsum med pa'o/ /gzung ba la sogs pa'i bag chags yod pas nyon mongs pa'i sgrib pa 'ba' zhig gi gnyen por gyur pa nyid kyis na nyi tshe ba zhes bya ba phyogs gcig pa'i lam gyi byed pa ste/bden pa bzhi'i rnam pa'i byed pa gang yin pa de la'o/ /de la dmigs pa dang bcas pa nyid kyis zhes bya ba gzung ba la sogs pa'i dmigs pa yod pas/ 'bras bu dang po la sogs pa rtogs pa ste/ rgyun du zhugs pa'i 'bras bu la sogs pa thob pa de ni tha dad nyid kyis dbye ba la sogs pa'o//ma rig pa'i bag la nyal thams cad ni rnam par rtog pa thams cad kyi bag chags te/ de rnams ma spangs pa nyid kyis na gnas pa dang 'gro ba mi shes pa ste/ gdul bya'i yul du 'gro ba mi shes pa'o/ /theg pa chen po thams cad sdud par byed pa nyid kyi rgyu yin pas rnam pa thams cad mkhyen pa nyid de/thams cad mkhyen pa gsum pa nyid kyis sangs rgyas la sogs pa'i mya ngan las 'das pa thams cad kyi mya ngan las 'das pa gang yin pa de'i 'og tu gang 'jug tu 'gro zhing rjes su 'brang ba de la drang ba'i lam med pas yon po'i lam gyis 'gro ba ni 'dir nyes pa yin no//'di dag la yang dang ni bsdu ba yin no/ /byang chub sems dpa' ni nyan thos la sogs pa las ldog pa dang 'jug pa'i gnas skabs go bzlog pa ni gzung ba'i rnam par rtog pa zhes bya ba la sogs pa smos pa yin te/mthong ba'i lam gyi sems dang sems las byung ba ni rnam par shes pa dang tshor ba la sogs pa gang yin pa ste/ de rnams kyi 'jug pa'i gnas skabs ni gzung ba la sogs pa mi mthun pa'i phyogs nyid yin pas rgyun gyis 'byung ba'i khyad par des spang bar bya'o//'dzin pa dang zhes bya ba la sogs pa skyes bu rdzas su yod pa'i tshig le'ur byas pa rnam par 'grel pa ni/ kun rdzob tu zhes bya ba la sogs pa smos pa yin te/ sgyu ma bzhin du ste/ sgyu ma dang 'dra bar kun rdzob tu dbye ba'i tha snyad kyis/ 'dzin pa dang thar pa ste gzugs la sogs pa len pa dang 'dor ba'o/ /yang dag pa nyid du dbye ba med pa'i blos yid la mi byed pa ste/ yul med pa'i phyir gnyis su med pa 'jog pa'i sems kyis yid la byed pa'o/ /chos nyid kyi zhes bya ba ni gzugs la sogs pa dmigs pa'i sems chos nyid kyis te/gnyis su med pas khams gsum car dang nye bar 'brel pa zhes bya ba rnal 'byor pa'i lta bas 'dod pa dang gzugs dang gzugs med pa'i khams rnams gcig tu dmigs pa'o/ /stong pa nyid du dmigs pa ni gnas la mngon par zhen pa med pa'o//des gnas pa ni gzugs la sogs pa la gnas pa'o/ /dngos po la mngon par zhen pa ni gzugs la sogs pa la ma chags pas so/ /thams cad la mngon par zhen pa ni gzugs la sogs pa la kun tu chags pa la'o / /rdzas su yod pa med pas zhes bya ba ni don dam par yod pa ma yin pa'i phyir ro//chos thams cad btags pa ni kun rdzob tu gzugs la sogs pa'i tha snyad du'o/ /de kho na nyid shes pa'i chags pas zhes bya ba ni sgyu ma lta bu gnyis su med pa'i ye shes la mngon par ma chags pa yin pa'i phyir ro//mngon par zhen pa sngon du 'gro ba'i chags pa ni mngon par zhen pa med pas gzugs la sogs pa la chags pa'o/ /mnyam pa nyid du bsgom pa ni de kho na nyid du na gzugs la sogs pa rnam pa gcig par bsgom pa'o/ /de nyid ni gzung ba la sogs pa bye brag gi blo 'joms par byed pa nyid yin pa'i phyir gnyen po ste/des na thams cad mkhyen pa gsum gyi lam ni gnyen po yin no/ /shes rab kyi pha rol tu phyin pa yang dag par mi shes pa nyid kyis ji ltar 'dod pa bzhin du 'gro ba thogs pa la zhes bya ba ni gang gi tshe shes rab kyi pha rol tu phyin pa lam gyi bdag nyid can yin pa de'i tshe dngos po la sogs par mi dmigs par gnyis su med pa'i ye shes kyi ngo bo yin par ma rtogs pa'i phyir ji ltar 'dod pa bzhin du gzugs la sogs pa mi dmigs pa'i shes pa ni mi 'jug pa yin la/yang gang gi tshe 'bras bu'i bdag nyid can yin pa de'i tshe gnyis su med pa'i ye shes mngon sum du byas pa yin pas ji ltar 'dod pa bzhin du thams cad du 'gro ba la thogs pa med pa yin no//dang zhes bya ba rnams ni bsdu ba yin no/ /bshad ma thag pa'i 'dzin pa'i rnam par rtog pa gang yin pa de snga ma bzhin du mthong ba'i lam gyi bsam gtan gyi khyad par gyis spang bar bya ba yin no zhes bya ba ni don dam pa'i zhes bya ba la sogs pa smos pa yin no //don dam pa'i dngos po ni skyes bu rdzas su yod pa ste/ de la mngon par zhen pa zhes bya ba la sogs pa yin no//ched bzhin zhes bya ba la sogs pa 'dzin pa'i rnam par rtog pa skyes bu btags par yod pa'i tshig le'ur byas pa'i rnam par 'grel pa ni/ nyan thos zhes bya ba la sogs pa yin te/ nyan thos la sogs pa'i nges par 'byung ba nyid kyis zhes bya ba ni gdul bya'i dbang gis nyan thos la sogs pa'i lam nyid yin pa'i phyir ched du bya ba ji lta ba bzhin du ste/ched du bya ba 'byung ba las ma 'das pas so/ /nges par mi 'byung ba ni chen po nyid gsum ma thob pa'o/ /lam thams cad las yongs su rgyal bar bya ba'i phyir/ thams cad mkhyen pa nyid gsum bdag gir byas pa las rang gi mngon par 'dod pa'i lam med pas/ zhes bya ba bdag nyid kyis nges pa'i lam med pas lam gzhan la lam ma yin par nges par 'dzin pa ste/ mi dmigs pa la dmigs pa'i thams cad mkhyen pa gsum las tha dad pa'i lam la lam ma yin pa kho na'o zhes bya bar nges par 'dzin pa'o//rgyu dang 'bras bu kun rdzob kyi ngo bos zhes bya ba kun rdzob tu rgyu dang 'bras bu yod pas skye ba dang 'gag pa ste/ skye ba dang 'jig pa'o/ /bar chad med pa dang cig shos su snang ba nyid kyis zhes bya ba don dam pa nyid dang kun rdzob tu dbye ba med par rtogs pas dngos po mtha' dag ste/gzugs la sogs pa rnams la ldan pa ste/ dbye ba med par rtogs pa dang mi ldan pa ste/ dbye ba gang yin pa de la tha dad pa med par shes pa sngon du 'gro bas dbye ba shes pa'o zhes bya ba'i tha tshig go//nam mkha' la gnas pa'i bya dang 'dra ba nyid kyis na rten med pa nyid kyis gzugs la sogs pa'i gnas la gzugs la sogs pa gnas med par gnas pa'o/ /byang chub kyi sems bskyed pa la sogs pa'i sgo nas zhes bya ba sangs rgyas la sogs pa las byang chub tu sems bskyed pa dang gdams ngag la sogs pa yongs su bzung ba'i dbang gis nyan thos la sogs pa'i rigs 'jig pa yin te/sangs rgyas kyi rigs nyid yin pa'i phyir ro/ /de bzhin nyid las khyad par du 'phags pa'i chos med pas zhes bya ba ni stong pa nyid las khyad par du 'phags pa'i gzugs la sogs pa med pa'i phyir 'dod pa med de/'dod pa'i yul mi dmigs pas 'dod pas 'dod pa med pa'o/ /don dam pa'i bden pa la brten nas/ de kho na nyid mthong bas rgyu med pa ste/ yang dag pa'i nye bar len pa dang lhan cig byed pa'i rgyu med pa'o//ser sna shin tu goms par byas pa'i chos nyid kyis zhes bya ba ni gtong ba med pa la goms pa'i phyir ro/ /bdud la sogs pa'i phyir rgol ba'i dngos po dmigs pa ni rdzas gcig la mngon par 'dod pa'i mi dang bdud dang dgra bo la sogs pa'i yul du 'dzin pa'i shes pa yod pa'o//dang gi sgra ni snga ma bzhin no/ /btags pa'i dngos po skyes bu yod par btags pa'o/ /de la mngon par zhen pa nyid kyis de la mngon par chags pa'i phyir zhes bya ba la sogs pa smos so/ /gnyen po ma bstan du zin kyang 'dir mi mthun pa'i phyogs smos pas shugs kyis 'phangs par lta'o zhes bya ba ni de ltar na zhes bya ba la sogs pa smos pa yin te/rnam rtog 'di dag rang nyid ni/ /ma rig ngo bo nyid du rtogs/ /gang phyir rang gi rnam pa ni/ /phyi'i ngo bor sgro btags 'jug /ces smos pas ma rig pa dang bral ba'i byang chub pa'i gnas skabs su rnam par rtog pa thams cad ni ma rig pa yin pa'i phyir spang bar bya'o zhes spang bar bya ba nyid du sngar bshad pa yin no//'dir gzung ba'i rnam par rtog pa yin la 'dzin pa'i rnam par rtog pa ma yin pa ni mu bzhi ste/ de la mu dang po ni gang gzung ba'i rnam pa'i yul rtog pa'i rnam par shes pa'o//gnyis pa ni skad cig ma gcig pa 'dzin pa'i rnam pa'o/ /gsum pa ni de nyid kyis skad cig ma gzhan no/ /bzhi pa ni rnam pa de dang bral ba'i shes rab kyi pha rol tu phyin pa'o/ /rigs nyid yin la rigs kyi rnam par rtog par gyur pa ma yin par zhes bya ba phyi ma stong par byed pa ni re zhig rigs kyi rnam par rtog pa gang yin pas rigs kyang de nyid yin pa ni 'di lta ste/gnyen po yang dag par sgrub pa'i dus kyi rigs so/ /rigs nyid yin la rigs kyi rnam par rtog pas gyur pa ma yin pa ni/ 'di lta ste yang dag par sgrub par gyur pa'i rigs so//yang dag par sgrub pa'i rnam par rtog pa yin la dmigs pa'i rnam par rtog par gyur pa ma yin pa zhes bya ba ni snga ma ston par byed pa ni re zhig yang dag par sgrub pa'i rnam par rtog pa gang yin pa de nyid dmigs pa'i rnam par rtog pa yang yin pa ni 'di lta ste/ yang dag par sgrub par gyur pa'i yang dag pa'i dmigs pa la rab tu sbyor ba'o/ /dmigs pa'i rnam par rtog pa nyid yang dag par sgrub pa'i rnam par rtog pa ma yin par gyur pa ni 'di lta ste dmigs pa yongs su ma rdzogs pa'o/ /phyogs 'dis lhag ma rnams dpag par bya'o//'bras bu 'dod pa'i skye bo ni dang por rgyu tshol bar 'gyur ba yin pas byang chub kyi rgyu mthong ba'i lam gyi lhan cig byed pa'i rgyu rnam pa gsum 'chad par byed pa'i phyogs snga ma bkod pas tshig le'ur byas pa la 'jug pa ni de ltar mthong ba'i lam zhes bya ba la sogs pa yin la tshig le'ur byas pa'i don ni 'chad par 'gyur ba'i zhes bya ba la sogs pa smos pa yin te/'chad par 'gyur ba'i mtshan nyid can gyi byang chub ni 'tshang rgya ba nyid do/ /gzhan dag la ni gdul bya rnams la'o/ /mthong ba'i lam la sogs pa ston pa zhes bya ba ni bdag nyid kyis mthong ba dang bsgom pa'i lam thob pas so//rab tu 'god pa ni gdul bya rnams la byang chub kyi sems la sogs pa sbyin pa ni rgyu gcig yin no/ /zhes 'og ma dang sbyar ro/ /byang chub kyi rgyu mtshan kho nar zhes bya ba ni bdag nyid kyi byang chub kyi rgyur ro//de dag la ni gdul bya rnams la'o/ /yang dag pa'i tshig dang don ni bcos ma'i don gyis stong pa'i shes rab kyi pha rol tu phyin pa ston pa'o/ /sogs pa'i sgras ni lam de dang sgo de dang man ngag de las shes rab kyi pha rol tu phyin pa yang dag pa so sor gtod cing ye shes kyi bdag nyid can gyi yul rab tu sbyin pa ni rgyu gnyis pa yin no//byang chub thob par byed pa'i phyir bdag nyid la bar chad med pa'i phyir rgyu gsum pa yin no/ /de ni rang las zhes bya ba la sogs pa smos pa yin no / /rang las te bdag nyid las ches mang po'i gus pa la sogs pa'am mang ba'i shes rab kyi pha rol tu phyin pa bsgoms pa la sogs pa ste/thos pa dang bsam pa la sogs pa gang yin pa des bsod nams te/ sems kyi dag byed de nyid mtshan nyid de/ de ltar na rgyu rnam pa gsum bstan pa yin no//gang gi don du zhes bya ba la sogs pa la dri ma ste nyon mongs pa gang yin pa zad pa dang / mi skye ba de dag gi ye shes ni rnam par mi rtog pa'i mtshan nyid can du gang gi tshe gyur pa de'i tshe byang chub ces brjod/ /de rnam par rtog pa thams cad bral ba'i 'tshang rgya ba nyid ni sngar kun rdzob yin par bshad do//ci nang gi mu stegs pa dang 'dra ba yin nam zhe na/ zag med skye med phyir de dag /go rims bzhin du shes par bya/ /zhes gsungs pa yin te/ gang gi tshe yang dag par na nyon mongs pa la sogs pa'i skyes pa med pa nyid kyis na zad pa med do/ /zhes mkhyen pa de'i tshe nyon mongs pa la sogs pa zad pa'i ye shes yin la/yang gang gi tshe nyon mongs pa la sogs pa mi skye ba med pa nyid kyis skye ba med do/ /zhes mkhyen pa de'i tshe ni nyon mongs pa la sogs pa skye ba med pa'i ye shes 'dir shes par bya ba'o zhes bya ba ni spyi'i don yin no/ /tshig le'ur byas pa'i don ni nyon mongs pa zhes bya ba la sogs pa yin te/nyon mongs pa ni 'dod chags la sogs pa'o/ /shes bya ni gzung ba ma lus pa ste/ de dag nyid yang dag pa'i ye shes kyi gegs byed pa yin pa'i phyir sgrib pa ste/ de nyid glo bur ba yin pa'i phyir dang /mi shes pa'i dri ma'i rgyu yin pa'i phyir dri ma yin no/ /de nas skyes pa dang ma skyes pa nyid du brtags pa ni/ nang gi mu stegs pa dag gis yang dag par na skyes pa dang ma skyes pa nyid du mngon par 'dod pa'o/ /chos kyi dbyings ni gnyis su med pa'i ye shes so/ /de la ma gtogs par ni de dang bral ba ste/gang gi phyir chos te/ gzugs la sogs pa yod pa ma yin te zhes bya ba pha rol tu phyin pa'i tshul las bshad pas/ chos kyi khongs su 'dus pa nyid kyis na/ chos kyi dbyings kyi ngo bo'i gnyis su med pa'i ye shes kyi bdag nyid can yin la nam mkha' bzhin du zhes bya ba rten med pa nyid kyis so//'gag pa dang skye ba med pa'i phyir zhes bya ba ni nyon mongs pa la sogs pa skyes pa rnams yang dag par na zad pa med pa'i mtshan nyid 'gog pa mkhyen pa'o/ /skye ba med pa'i phyir zhes bya ba ni zag pa med pa la zad pa mkhyen pa'i bshad pa yin no//gcig dang du ma'i ngo bo nyid ni cha shas can dang rdul phra rab bsags pa'i bdag nyid do/ /rgyu dang 'bras bu ni grags par zad do/ /dngos po'i chos 'di dag rnam par 'byed pa ni tshad ma ste gcig dang du ma'i ngo bo dang bral ba dang yod pa dang med pa la sogs pa'i rgyu dang 'bras bu med pa'o//sogs pa'i sgras thog ma la sogs pa'i shes pa'i bye brag dang phyogs gcig la sogs pa thams cad sgrib pa la sogs par thal ba dang ldan pa dang mi ldan pa nyid la sogs pa'o/ /des 'thad pa'i dngos po'i de kho na nyid kyi bdag nyid de/med pas zhes bya ba ni mi ldan pa nyid kyis na med pa'i phyir ro/ /nam mkha'i pad+ma bzhin du 'gag pa dang skye ba med pas zhes bya ba ni dngos po nyid du med pa'i phyir nyon mongs pa la sogs pa ma skyes pa rnams ni yang dag par skye ba'i mtshan nyid 'gog pa'i ye shes kyis skye ba med pa'i phyir skye ba med pa mkhyen pa bshad pa yin no//de ni de ltar go rims bzhin du zhes bya ba la sogs pa smos pa yin te/ go rims bzhin du sngar bshad pa'i dri ma rnams ni zad pa dang mi skye ba shes pa ni chos kyi dbyings kyi bdag nyid can yin pas snga ma bzhin du zad pa shes pa dang gcig dang du ma dang bral ba'i phyir zhes bya ba la sogs pa'i tshad mas gang gi tshe mir skye ba shes pa de'i tshe chos thams cad ces bya ba la sogs pa de rnams phyin ci ma log par rtogs pa ste/yang dag par na skye ba med par shes pa'o/ / de'i mtshan nyid ni ngo bo chos kyi sku la sogs pa'i bdag nyid ni ye shes las sku gzhan gyi yin par mi 'thad do/ /ji lta ba bzhin du zhes bya ba ni tshad mas 'thad pa nyid yin pa'i phyir ro/ /byang chub chen po ni khyab pa'i ye shes so/ /nang gi mu stegs pa rnams kyi byang chub mi 'thad pa'i tshig le'ur byas pa la 'jug pa ni/gang gi phyir zhes bya ba la sogs pa smos pa yin te/ gang gi phyir theg pa chen po'i tshul la byang chub de lta bu yin pa de'i phyir/ nang gi mu stegs pa gang dag gis dngos po 'jig pa'i bsam pas dngos po can gyi nyon mongs pa la sogs pa skyes pa rnams 'gag pa la bsams nas zad cing 'gag pa la zad cing 'gags so zhes bya ba'i shes pa ste rnam par rtog pa ni zad par shes pa'o//dngos po mi skye ba'i bsam pas dngos po can gyi nyon mongs pa la sogs pa skye ba rnams la skye ba med par bsams nas ma skyes pa yin zhing skye ba'i gegs byed pa'i 'gog pa la mi skye ba la mi skye'o snyam pa'i shes pa ma skyes pa nyid kyis na nyon mongs pa skye bar mi 'gyur ro zhes bya ba'i rnam par rtog pa ni mi skye ba'i shes pa yin par brjod cing rang gi tshul rnam par 'jog na/de rnams kyi zad pa dang mi skye ba med pa kho nas shes pa de rung ba ma yin no zhes bya ba yang dag par yod pa ma yin pa nyid kyis na nyon mongs pa la sogs pa med par /zad pa dang mi skye ba dag med pa kho na yin pas nang gi mu stegs pa rnams kyi shes pa de rung ba ma yin no zhes de rnams la bar skabs kyi tshig su bcad pa gsungs pa yin te/gcig dang du ma dang bral ba zhes bya ba la sogs pa'i mtshan mas 'thad pa'i rang gi lung ston pas rtag pa'i lung la mi rtag pa'i lung lta bu 'am/ smig rgyu'i chu la yang dag pa'i chur shes pa dang 'dra bar de'i lung mi 'thad par/'phags pa byams pas so so rang gis rig pa'i ye shes kyis gzigs nas de rnams kyi thog ma med pa'i srid par dngos po dang dngos po med pas mngon par zhen pa bsal bar bya ba'i phyir thugs rjes rigs pa bdag gir mdzad pa yin te/ mthong zhes bya ba'i lam gyis ni/ / zhes bya ba ni nang gi mu stegs pa rnams kyis bdag gi nyon mongs pa zad cing slar yang mi skye bar 'gyur ro zhes bya ba'i zad pa dang mi skye ba shes pa dag ni nyon mongs pa la sogs pa'i de bzhin nyid kyi ngo bo nyid yin pas zad pa dang mi skye ba med pa ni/ 'gog pa med pa de'i rang bzhin yin zhing ldog tu med pa yin pa la dngos po la mngon par zhen pas rang gi ngo bo yongs su mi shes pa las gyur pa yin par shes par bya'o//de las nyes pa cir 'gyur zhe na/ rnam par rtog ces bya ba la sogs pa yin te/ rnam par rtog pa'i rigs ni rnam par rtog pa'i ngo bo'o//ci zhig zad pa ni 'gog pa'o/ /yang na rnam par rtog pa'i ngo bo skye med rnam pa ci zhig 'thob/ ces bya ba ste/ skye ba med pa'i chos ci zhig skyed de ci yang ma yin te/ nyon mongs pa log na de las byung ba'i rnam par rtog pa ldog par yin na de yang bshad ma thag pa'i tshad mas 'thad pa'i de bzhin nyid kyi ngo bos drangs pa'i nyon mongs pa la sogs pa'i ngo bo dang zad pa dang mi skye ba shes pa'i rang bzhin ni dngos po la mngon par zhen pas rang gi ngo bo ma shes pas nang gi mu stegs pa rnams kyis mi shes pa yin la/de bas na nyon mongs pa'i rang gi ngo bo mi shes pas ji ltar na de rnams mthong ba'i lam gyis nyon mongs pa la sogs pa rnam par ldog par bya bar nus/ de ldog pas kyang de las byung ba'i rnam par rtog pa gcig nas gcig tu brgyud pa ji ltar ldog ste/ rgyu yod na 'bras bu ldog pa ni gang na yang yod pa ma yin no zhes bya ba'i bsam pa dang ldan pas/'phags pa byams pa'i dgongs pa bshad pas tshig le'ur byas pa'i don ni skyes pa dang zhes bya ba la sogs pa yin te/ skyes pa dang ma skyes pa dag go rims bzhin du zhes bya ba ni nyon mongs pa la sogs pa skyes pa rnams rnam par 'jig pa ni zad pa yin la/nyon mongs pa la sogs pa ma skyes pa skye ba'i gegs byed pa ste/ nye bar len pa'i rgyu med pas ma skyes pa yin la 'di dag gi mtshan nyid kyi 'gog pa gang yin pa de ni mthong ba'i lam gyi 'bras bu nyid yin pa de rnams 'dod la/de dang bral ba de ni don dam par zhes bya ba la sogs pa smos pa yin te/ don dam pa ni yang dag pa nyid de rnam par dpyad cing brtag bzod pa nyid kyis na de bzhin nyid kyi ngo bo ni rang bzhin yin zhing chos kyi dbyings kyi ngo bo'i rang bzhin yin la/ dngos po la log par mngon par zhen pa khyed kyis zhes bya ba dngos po rnam pa la log par mngon par zhen pa khyed rnams kyi'o//mthong ba'i lam gyi stobs kyis zhes bya ba ni sngar bshad pas so/ /rnam par rtog pa la sogs pa'i ngo bos skyes pa ni ci zhig zad ces bya ba ni nyon mongs pa la sogs pa'i rnam par rtog pa ci zhig bag chags gang las 'byung ba ni 'gags/mi skye ba'i chos can ma skyes pa ni ci zhig skyes te/ skye ba med pas cung zad kyang med pa kho na yin pas de'i phyir med pa la mngon par zhen pa khyed kyis mthong ba'i lam ni lam ma yin pa nyid yin pa'i phyir ro//rgyu 'dis na kho bo cag gi gzhung lugs kho na khas blang par bya'o zhes bya ba kun tu 'gro ba'i bdag med pa'i mtshan nyid can kho na byang chub kyi lam yin par rigs pa nyid yin pa'i phyir rten par gyis shig snyam du dgongs pa yin no zhes bya ba/ 'phags pa byams pa'i dgongs pa yin no//dngos po rnams yang dag par khas blangs nas sngar bshad pa bzhin du byang chub med pa'i nyes pa bsal bar bya ba ni de lta ma yin te zhes bya ba la sogs pa smos te/ de lta ma yin zhes bya ba ni kho bo cag gi gzhung bor te/ chos yang dag par yod par khas len na zhes bya ba gzugs la sogs pa don dam par yod par bdag gir byed na bcom ldan 'das te/rdzogs pa'i sangs rgyas kyi nyon mongs pa dang shes bya'i rnam par rtog pa ni sngar bshad pa'o/ /de nyid ni snga ma bzhin du sgrib pa yin la de rnams spangs pas 'gog pa ni rnam pa thams cad du ngo mtshar gyi gnas yin pa ni ngo mtshar byed pa yin pa 'di ltar mi srid do zhes bya ba'i bar skabs kyi tshigs su bcad pa ni chos rnams kyang zhes bya ba la sogs pa gsungs pa yin te/chos rnams te gzugs la sogs pa rnams kyang yod ces bya ba dang zhes bya ba yang dag par khas len na shes bya la yang zhes bya ba gzung ba la yang sgrib pa ste/rnam par rtog pa la sogs pa zad cing 'gog par ston pa gzhan gyis brjod pa gang yin pa de ni 'dir phan tshun 'gal ba yin pa'i phyir kho bos mtshar du rtsis te/'di ni mi srid do zhes 'phags pa byams pas dgongs so/ /nang gi mu stegs pa rnams kyis byang chub pa'i thabs ma yin pa nyid du bstan pa'i skabs su thams cad du 'gro ba'i bdag med pa bstan pa ni/ byang chub ji lta ba de lta bu yin pa bla ma'i man ngag mdor bsdus te/bstan pas 'jug pa'i sgo nas tshig le'ur byas pa las ma smos pa'i don gyi shugs kyis 'phangs pa bstan par bya ba'i phyir/ de la skye ba dang zhes bya ba la sogs pa smos pa yin te/ de la zhes bya ba ni phyi rol yod par lta ba'i byang chub mi 'thad par gnas pa ni rnal 'byor pas thams cad du 'gro ba'i bdag med pa'i sbyor ba dang ldan pas shes bya'i sgrib pa yang dag par spong ngo zhes bya ba rnam par rtog pa'i dra ba yang dag par slar yang mi ldog pa nyid du spong ngo zhes 'og ma dang sbyar bar bya'o//ci'i phyir zhe na/ ci'i phyir ji lta bur zhes rtog pa la/skye ba dang zhes bya ba la sogs pa smos pa yin te/ phyi rol pa'i mu stegs pa kha cig rtag pa dang bdag dang rtogs pa'i ngo bo dang ma rtogs pa'i ngo bor smra la/ de rnams ni rang nyid mar me'i me lce dang 'dra bar rtag pa nyid du mi 'thad pas skye ba dang 'jig pa de ni khas mi len gyi nang gi mu stegs pa kha cig rtag pa dang chad pa nyid las rnam par grol ba gso ba dang skyes bu la sogs pa'i bdag nyid du smra ste/de rnams kyang rtag pa dang mi rtag pa'i ngo bo dag gcig par mi srid cing dngos po ma yin pa nyid kyis na de skye ba dang 'jig pa khas blang bar mi bya ste/gang yang skye ba dang 'jig pas stong pa ni/ kun rdzob tu yang ri bong gi rwa dang 'dra bar rtag pa dang bdag med pa nyid du khas blangs pa nyid kyis grub pa la rtag pa dang dbang phyug la sogs pa gzhan dag kyang de bzhin no zhes bya ba'i bsam pa dang ldan pas mngon par 'du byed pa'i 'jig tshogs la lta ba ni bdag gi rten yin pas yod par lta ba la rten pa thams cad kyi rtse mo nyid yin pa'i phyir des sel bar byed pa'i rdo rje'i skyil mo krung la sogs pas bsgom pa rtsom pa yin te/de ni bdag ni med kyi phung po tsam nyid yin no zhes phyi rol pa'i sangs rgyas pa'i grub pa'i mtha' las skye ba dang 'jig pa'i stong pa'i phyir bdag med do snyam du bsgom zhing mngon par 'dus byas pa'i bdag tu mngon par zhen pa yongs su bor la/des dben pa'i bdag gis stong pa'i phung po la sogs pa ste/phung po dang khams dang skye mched tsam ma rig pa la sogs pa yan lag bcu gnyis las 'byung ba yin pa'i phyir rten cing 'brel par 'byung ba skye ba dang 'jig pa'i chos can la yang dag par dmigs te/ zhes bya ba kun rdzob tu skye ba dang 'jig pa'i chos can la yang dag par dmigs te zhes bya ba kun rdzob tu skye ba dang 'jig pa'i chos kyang yin par 'jig rten du grags pa yin pa'i phyir lhan cig skyes pa'i 'jig tshogs la lta ba'i rten la dmigs te/de'i rjes la de bsal bar bya ba'i don du sngon po dang de'i blo dag lhan cig dmigs par nges pa'i phyir zhes bya ba shes bya nang gi yin pa'i grub pa'i mtha' las sngon po dang de'i blo dag ces bya ba sngon po dang cig shos dag kyang sha za yin snyam pa'am ka ba la sogs pa ltar sngon po dang blo dag ni de 'dzin par byed pa nyid kyis na brtags pa yin pas rnam pa dang bcas pa 'am rnam pa med par dmigs pa dang lhan cig par nges pa yin pa nyid kyis na zla ba gnyis pa dang 'dra bar rtogs pa'i phyir 'di ni sems tsam kho na yin gyi phyi rol gyi don ni med do zhes bya ba ni yang yul la sogs pa nges par grub ste/mi 'dra'o zhes bya ba'i grub pa'i mthas de'i sgrub pa'i yul la sogs pa'i nges pa ni med du zin kyang rmi lam du srid pas ma nges pa nyid kyis na sgrub pa ma yin pa nyid du sems shing sha za'am ka ba la sogs pa gzhan dag yod pa ma yin te/phyi'i don ni bems po yin te snang bar mi rung bas de med do zhes yid la byed cing dmigs pa na 'dzin pa'i rnam pa can gyi sems la mngon par zhen pa yongs su ma bor bas zhes bya ba'i phyi rol med pa na/de 'dzin par byed pa de nyid du mi 'thad pa yin na yang skye ba thog ma med pa nas gcig nas gcig tu brgyud pa'i goms pa dang de'i bag chags yod pas rang gi sems gnyis su med pa'i rnam pa la 'dzin pa'i rnam pa nyid mngon par zhen pa yin no//phyi rol gyi don du mngon par zhen pa spangs te zhes bya ba ni snga ma bzhin du phyi'i yul du dmigs pa mi 'thad pas de la chags pa rnam par bsal te/ rgyu dang 'bras bu nyid kyis gzung ba dang 'dzin pa dag phan tshun ltos pa nyid kyis yod par rigs la/de'i 'og tu de yang rnam pa med pa'i shes pa ni yul la 'dzin par mi rigs so/ /rnam pa tshad ma med phyir dang / /mi rigs phyir na cig shos min/ /zhes bya bas bsal bas gzung ba med na 'dzin pa med do zhes nges par bsam mo/ /de'i 'og tu/ 'di dag rnam rig tsam nyid ces/ /de snyom du ni bsams nas su/ /ci yang rung ste mdun 'jog na/ /de nyid tsam la mi gnas so/ /zhes smos pas gzung ba'i rnam pa'i mtshan nyid kyang sems tsam nyid yin pas mdun du rnam pa brtag pa yang sems tsam nyid kyis rigs pa ma yin pas de yang 'dzin pa'i rnam pa'i mtshan nyid kyi rnam par rig pa tsam de yang rnam par bsal zhing dor te/blo las nyams myong gzhan med cing / /de nyams myong ba gzhan med de/ /gzung dang 'dzin pa dang bral bas/ /de ni rang nyid snang ba yin/ /zhes bshad pas gnyis su med pa'i ye shes 'ba' zhig ste/gzung ba la sogs pa stong pa nges par 'byed pa'i cha'i rnam par shes pa tsam 'ba' zhig bdag la sogs pa'i 'dzin pa dang bral ba 'am/ yang dag pa'i rig pa'i bya bas stong pa yang dag pa ste/ de kho na nyid du na yod pa'i ngo bo ste gnyis su med pa'i ngo bo nyid kyis rang rig par 'gyur ba nyid kyis yod cing gnas pa yin no snyam du de ltar nges par byas nas de'i 'og tu/de dang de rten gang byung ba/ /rang gi ngo bor de ma skyes/ /rang gi ngo bor gang ma skyes/ /de la skyes zhes ci zhig brjod/ /ces bya ba'i grub pa'i mthas de yang ste/rnam par shes pa tsam yang rten cing 'brel bar 'byung ba yin pa'i phyir zhes bya ba snga ma bzhin du sems dang sems las byung ba'i tshogs pa'i dbang las skyes pa yin pa'i phyir sgyu ma bzhin du ngo bo nyid med pa ste/ rang rig pa nyid yin pa nyid kyis na bsnyon par mi nus pa yin na yang rgyu dang 'bras bu'i ngo bor mi 'thad pas rang nyid kyis stong pa yin zhing yang dag par te/de bzhin nyid ngo bo nyid kyis na gcig tu ste/ shin tu dngos po dang dngos po med pa la sogs par brtags pa'i ngo bo dang bral ba zhes bya ba dngos po dang dngos po med pa dang gnyi ga dang gnyi ga ma yin pa'i rnam par rtog pa'i ngo bo med cing spangs pa yin no snyom du bsgoms te /gang phyir yang dag yang dag min/ /shin du bsgom pa gang gang yin/ /bsgom pa'i stobs ni rdzogs pas na/ /de gsal mi rtog blo'i 'bras bu/ /zhes smos pas/ bsgom pa'i stobs grub nas zhes bya ba bsgom pa'i rab kyi mthar phyin pa'i gnas skabs su/ kha cig la nor bu dang dngul la sogs pa'i shes pa bzhin du zhes bya ba ji ltar so so'i skye bo rnams kyi nor bu dang dngul dang me long la sogs pa la gzugs brnyan gyi shes pa gcig dang du ma la sogs pa nyid kyis stong pa gsal bar snang ba de bzhin du 'khrul ba'i mtshan ma mtha' dag spangs pa zhes bya ba gzung ba la sogs pa ma lus pa dang bral ba'o//sgyu ma lta bu'i bdag nyid du snang ba'i blo zhes bya ba rgyu dang 'bras bu'i dngos por mi 'thad pas so//rnam par mi rtog pa zhes bya ba ni 'dod chags la sogs pa'i rnam par rtog pas stong pa nyid kyis na ma rig pa dang bral ba'o/ /so sor rang gis rig par bya ba ni mi slu bar so so rang gis rig pa'o/ ci zhig ltar 'ga' zhig gis kyang ste/ yang dag par skyes na spong ngo zhes 'og ma dang sbyar ro//da ni ldog pa'i sgo nas tshig le'ur byas pa las ma smos pa'i don gyis 'phags pa ni de lta ma yin te zhes bya ba la sogs pa smos pa yin te/ de lta ma yin te zhes bya ba ni ngo bo nyid stong pas nyon mongs pa la sogs pa ldog par khas mi len par gzhan dag gis gnyen po'i lam bsgoms pas chos de rnam pa cung zad kyang mi byed de nyon mongs pa la sogs pa spang ba'i khyad par ci yang skye bar mi 'gyur ro//ji lta bu zhe na nam mkha' bzhin du ste/ ji ltar nam mkha' la rdzas med pa tsam gyis ngo bo la khyad par gang gis kyang 'phel ba dang 'bri ba'i bdag nyid can gyi khyad par bya bar mi nus te/rtag pa nyid kyis don dam par ngo bo nyid de lta bur yod pa nyid yin pa'i phyir ro/ /de bzhin du phyi dang nang gi mu stegs pa la grags pa'i dpe yin pa de smras pa ni/ de la nam mkha' bsgribs pa med pa zhes bya ba nang gi mu stegs pa'i grub pa'i mtha' las dus thams cad du ste/rnam pa thams cad du nam mkha'i zhes bya ba ni ri bong gi rwa dang 'dra bar gsog yin pa nyid la de rnams kyi 'thad pa dang rdzas su btags pa yin te/ de ni rdzas med pa tsam gyi ngo bo 'dzin pa bzhin du zhes smos pa yin no//phyi rol gyi mu stegs kyi phyogs ni rdzas dang yon tan la sogs pa med pa tsam gyi ngo bo yin la nang gi mu stegs pa'i phyogs ltar na yang gzugs la sogs pa spyi dang khyad par med pa tsam gyi ngo bo khyad par med pa nam mkha' ji ltar 'dzin pa de bzhin du skyed du med pa ste/gzhal du med pa dang / spang du med pa dang bsal du med par rang gi ngo bo ste/ rang bzhin gang yin pa de 'dzin cing bdag nyid kyi ngo bor bdag gir byed pas chos rnams kyi 'dzin pa nyid de/ yang dag pa nyid med pa'i phyir gzung ba dang 'dzin pa'i skad cig ma skye ba tsam du gnas pa yin la/de ni shes pa tsam gyi ngo bor zhes smos pa yin te/ 'dzin pa'i shes pa'i bdag nyid la sogs pa'i ngo bos stong pa rnams dang shes bya'i mtshan nyid rnams te/ de'i rgyu gzugs la sogs pa gzung ba'i bdag nyid rnams gal te don dam par bcos ma ma yin pa'i don gyis yod pa nyid du gyur na de'i tshe cung zad kyang mi byed do zhes bya bar sbyar te/da ltar gyi gzugs la sogs pa nyon mongs pa can gyi phung po'i mtshan nyid la gnyen po lam gyi mtshan nyid 'das pa dang ma 'ongs pa med pas de skye ba'i skad cig ma yang da ltar gyi skad cig ma ni med pa nyid yin pa'i phyir cung zad kyang mi byed do zhes bya ba nam mkha' rtag pa dang 'dra bar chos rnams skad cig ma nyid yin na yang /phul du byung ba'i byed pa med pa na khyad par ci zhig yod de/ ci yang med pas khyed cag gi phyogs ltar bsgom pa ni 'bras bu med pa dang / chos kyi rang gi ngo bo ma shes par gyur pa gang gis bzlog ces bya bar dgongs so//de yang / ji ltar ri mo mkhan gyis ni/ /gnod sbyin 'jigs su rung ba'i gzugs/ /bris nas bdag nyid skrag pa ltar/ /'khor bar mi mkhas de bzhin no/ /zhes gang bshad pa yin no zhes bya ba'i lan gyi zur gyis yang /tshig le'ur byas pa las smos pa'i don ni de'i phyir zhes bya ba la sogs pa smos pa yin te/ gang gi phyir de ltar yin pa de'i phyir dngos po ste/ gzugs la sogs pa de la mngon par zhen pa ste/ yang dag pa'i blor gyur pa de nyid phyin ci log yin zhing mi 'thad pa nyid kyis na de mi ldog pas/bcom ldan 'das kyi gnas skabs su yang gnas pa yin la des na gang bcom ldan 'das te rdzogs pa'i sangs rgyas kyi shes bya'i sgrib pa bag chags dang bcas pa rnam pa thams cad du spangs shing gzung ba la sogs pa 'gog pa dang / chos rnams te gzugs la sogs pa rnams kyang yod par khas len cing don dam par yod par 'dod pa gang yin pa de ni phan tshun 'gal ba'i don khas len pa ni/kho bos ting nge 'dzin mngon sum du byas pas ya mtshan du rtsis te/ log pa'i dngos po la mngon par zhen pa yang gal te nyon mongs pa ldog par gyur na de'i tshe so so'i skye bo rnams dang ci'i phyir ma gyur ces/'phags pa byams pas dgongs so/ /rgyu mchog nyid las 'bras bu mchog tu 'gyur gyi/ ko tra pa'i sa bon las sA lu'i myu gu dang 'dra bar gzhan las ma yin no zhes thams cad kyis khas blang bar bya ba yin pas nyon mongs pa spangs pa'i 'bras bu mchog tu gyur pa 'di ni mchog ma yin pa'i dngos po la lta bas dri ma can du byas pa'i mthong ba'i lam las rung ba ma yin no zhes bya bar shes par bya'o//dbu ma'i rgyan las/ rnam par dag pa'i rgyu las ni//'bras bu rnam par dag pa 'byung / /yang dag ltas byung tshul khrims kyi/ /yan lag la sogs rnam dag bzhin/ /zhes bya ba dang / rnam 'grel las/ /lan 'ga' thabs ni rnam pa zhig /dus kyang mang du 'di yis ni/ /bslabs pas de la yon tan dang //nyes pa bsal bar gyur pa yin/ /zhes gang bshad pa yin no/ /de ltar yod pa'i phyogs bsal bas zhes bya ba ni gzung ba la sogs pa'i grub pa'i mtha' mi bden pa'i grub pa'i mtha' nyid du bstan nas/ ngo bo nyid med pa'i phyogs thams cad du 'gro ba'i bdag med pa'i grub pa'i mtha' brtan por mdzad cing nges par byas nas/thar pa 'dod pa rnams kyis 'di kho na khas blang bar bya'o zhes bya ba rdzogs pa'i byang chub 'dod pa rnams kyis dngos po thams cad bdag med pa'i phyogs 'di kho na rigs pa dang ldan pa nyid yin pa'i phyir khas blang bar bya'o zhes gnas pa'i phyogs te/nges pa grub pa'i mtha' bar skabs kyi tshigs su bcad pas gsungs pa ni/ 'di la zhes bya ba la sogs pa yin te/ 'di la bsal bya ci yang med/ /ces bya ba gang gi phyir grol ba mi 'thad pa'i rgyu des na nang gi mu stegs pa rnams kyis don dam par yod pa la sogs par sgro btags pa'i de kho na nyid kyi lta ba gang yin pa de bsal bar bya ba dang /bsnan par bya ba cung zad med ces bya bas ni phyi rol pa'i mu stegs pa rnams kyis bdag la sogs pa sgro btags pa gang yin pa des bstan par mi bya ste/kun rdzob dang don dam pa'i lta ba'i tshul la sogs pa la zhes bya ba ni lhag ma'o/ /med par lta ba bsal ba ni yang dag ces bya ba la sogs pa smos pa yin te/ yang dag pa nyid du zhes bya ba ni rten cing 'brel par 'byung ba nyid kyis yang dag pa ste/ ji lta ba bzhin du grags pa'i gzugs la sogs pa blta bar bya zhing shes par bya'o/ /des cir 'gyur zhe na/ yang dag mthong na rnam par grol/ /zhes bya ba yin te/ rang gi ngo bo nyid sgom par byed pa ni nyon mongs pa bag chags dang bcas par spangs pas sangs rgyas su 'gyur ro//tshig le'ur byas pa 'di nyid kyi don ni/ gang gi phyir zhes bya ba la sogs pa smos pa yin te/ gang gi phyir bshad ma thag pa'i dngos po la mngon par zhen pa las grol bar mi 'thad cing byang chub pa mi rung ba rgyu de'i phyir skur pa 'debs pa ste/ bdag med pa la gnod pa byed pa'i don dam par yod pa la sogs pa sgro 'dogs pa'i ngo bo ste/ngo bo nyid yod par dogs pa bsal na gcig dang du ma'i rang bzhin la sogs pa'i tshad mas de kho na nyid mthong bas bsal cing chos gang la yang bdag la sogs pas gnod pa kun rdzob dang don dam par ma byas par 'di nyid shes par gyur pa na ma rig pa la sogs pa yan lag bcu gnyis las kun tu 'byung ba yin pa'i phyir gzugs kyi phung po la sogs pa ste/gzugs kyi phung po la sogs pa rten cing 'brel par 'byung ba yin zhing kun rdzob tu yang dag pa'i ngo bo nyid de tha snyad du dben pa rang bzhin med pa ste/sgyu ma dang mtshungs pa'i ngo bor brtag par bya zhing bsgom par bya'o/ /'dis cir 'gyur zhe na/ de ltar zhes bya ba la sogs pa smos pa yin te/ sgyu ma'i glang pos sgyu ma'i glang po gzhan zhig pham par byas pa bzhin du zhes bya ba ni ji ltar brdzun gyis glang po dang 'thab pa ni zil gyis mnan pa de bzhin du phyin ci log pas zhes brdzun gyi lam gyis brdzun gyi bdag tu lta ba las skyes pa'i nyon mongs pa las skyes pa'i phyin ci log spong ba'i rgyus na de kho na nyid mthong ba na ste/thams cad du 'gro ba'i bdag med pa mthong zhing mos pa ni rnam par grol bar 'gyur te/yang dag pa'i ye shes thob par 'gyur ro/ /bdag cag gi phyogs ltar na chos thams cad sgyu ma lta bu yin la de bas na nyon mongs pa la sogs pa'i sgyu ma lam gyi sgyu mas ldog pa yin pas dngos po de kho na nyid la re bar mi mthun pa'i phyogs dang gnyen por gyur pa med do//de'i phyir kho bo cag la sngar smras pa'i thar pa mi 'thad pa'i nyes pa yod pa ma yin no zhes bya bar dgongs so/ /mya ngan 'das min mya ngan 'das/ /'jig rten mgon gyis bstan pa ni/ /nam mkhas byas pa'i mdud pa 'di / / nam mkha' nyid kyis bkrol ba yin/ zhes bya ba la sogs pa gang gsungs pa yin no/ /de ltar zhes bya ba la sogs pa la pha rol tu phyin pa drug po de dag phan tshun te/ gcig la gcig bsdus pa gang yin pa ste/ snga ma bzhin du khongs su gtogs pa'i sbyin pa la sogs pa de re re la zhes bya ba so so re re zhing skad cig ma gcig pa ste/skad cig ma gcig tu byung ba'i bzod pa ste/ sdug bsngal la chos shes pa'i bzod pa gang yin pa des bsdus shing de dang 'brel ba'i sems kyi khyad par gang yin pa de ni rtse mo'i mngon par rtogs pa 'dir mthong ba'i lam yin te/nyon mongs pa la sogs pa bag chags dang bcas pa spong bar mthong ba'i thabs su rnam par gzhag go zhes bya ba ni lhag ma'o/ /sbyin pa la sogs pa zhes bya ba la sogs pa ni rnam par 'grel pa yin te/ lan cig rnam par rtog pa du ma 'byung ba ni 'gal ba nyid yin gyi yul du ma la rnam par rtog pa gcig 'byung ba ni de lta ma yin te/shin tu mang bas ma bslabs pas de ltar srid pa'i phyir yang dag par rnam pa sum cu rtsa drug nyid yin na yang sbyin pa la sogs pa tshogs pa'i yul gyi skad cig ma gcig la bzod pa gcig ni/sems gcig gi bdag nyid can gyis mthong ba'i lam yang skad cig ma gcig la mngon par rdzogs par byang chub pa'i rgyu yin pa la 'gal ba med do zhes bya bar dgongs so/ /da ni mthong ba'i lam skyes par ma gtogs pa'i dgongs pa brjod nas spong ba'i 'bras bu nyid kyis mthong ba'i lam las bsgom pa'i lam tha dad pa nyid yin na yang bshad ma thag pa'i spang ba la dbang du byas pa'i bsgom pa'i lam brjod par rigs pa yin no yang gang gis de don dang bcas pas re zhig de bstan pas ni de skyes pa na zhes bya ba la sogs pa smos pa yin te/ma rig pa dang 'du byed dang rnam par shes pa dang ming dang gzugs dang / skyed mched drug dang / reg pa dang / tshor ba dang / sred pa dang / len pa dang / srid pa dang / skye ba dang / rga shi ste/ srid pa'i yan lag bcu gnyis ni/ rten cing 'brel par 'byung ba zhes bya ba nyid go rims kyis bdag med pa bsgom pa ni lugs su 'byung bar bsgom pa'o//de bzhin du tha ma nas brtsams te/ go bzlog nas bsgom pa ni lugs dang mi mthun pa bsgom pa yin par shes par bya'o/ /de yang mthong ba zhes bya ba la sogs pas seng ge rnam par bsgyings pa zhes bya ba la sogs pa'i rab tu byed pa'i rnam par 'grel pa ni bsal te/nyon mongs pa rnams kyis zil gyis mi gnon pa nyid kyis na/ seng ge rnam par bsgyings pa zhes bya ba'i ting nge 'dzin yin par shes par bya'o/ /ma rig pa la sogs pa'i go rims ni don gyi dbang las shes par bya ste/chos mngon pa las/ ma rig nyon mongs sngon gnas skabs/ /'du byed dag ni sngon las kyi/ /rnam shes mtshams sbyor phung po yin/ /ming dang gzugs ni de phan chad/ /skye mched drug dod tshun chad do/ /de ni gsum 'dus tshun chad do//reg pa bde sdug la sogs kyi/ /rgyu shes nus pa tshun chad do/ /tshor 'khrig tshun chad sred pa ni/ /longs spyod 'khrig pa'i chags can gyi/ /nye bar len pa longs spyod rnams/ /thob par bya phyir yongs rgyug pa'i/ /de yi 'bras bu 'byung 'gyur ba'i//las byed de ni srid pa yin/ /nying mtshams sbyor ba skye ba yin/ /tshor ba'i bar ni rga shi yin/ /zhes gang bshad pa yin no/ /bsgom pa'i lam ni de ltar zhes bya ba la sogs pa smos pa yin te/ mi mthun pa'i phyogs spong ba ni nyon mongs pa la sogs pa'i shin tu 'gog pa'o//sogs pa'i sgras ni ma skyes pa'i nyon mongs pa la sogs pa shin tu mi skyed pa'o/ /rten sgrub pa mngon du 'gro ba zhes bya ba ni gzhi med pa la spong ba la sogs pa mi 'thad pas de la brten pa'i shes pa sngon du 'gro ba yin no/ /go sla ba ni rtogs sla ba'o/ /zhes bya ba'i rgyus rten te spong ba la sogs pa'i gzhi /bsgom pa'i lam ni 'gog dang zhes bya ba la sogs pa gsungs pa yin te/ dmyal ba dang / yi dags dang / byol song dang / mi dang / 'dod pa'i lha drug ni 'dod pa'i khams so/ /'dod pa der gtogs pa ni skye bas thob pa'o/ / rnam par shes pa mnyam par ma bzhag pa ni rnam par rtog pa'i shes pa'o/ /mtshams bzung ste zhes bya ba ni 'dod pa'i khams pa'i skye bo rnams las 'tshang rgya ba nyid yin pa'i phyir nye bar bzung zhing rnam par gzhag pas 'gog pa dang bcas pa'i snyoms 'jug dgu zhes gong ma dang sbyar ro//des na don ni 'di yin te 'gog pa dang bcas pa'i bsam gtan bzhi dang / gzugs med pa'i snyoms par 'jug pa bzhi ste/ dgu'i nang nas bsam gtan dang po nas brtsams te/ rim pa bzhin du bsgoms pas 'gog pa'i bar du song la 'ongs nas zhes bya ba 'gog pa dang bcas pa'i snyoms 'jug dgur song nas zhes 'dir rjes su sbyar bar bya'o //des na don ni 'di yin te tha ma 'gog pa nas brtsams te lugs las bzlog pa bsam gtan dang po'i bar du 'ongs nas yang snyoms par 'jug pa dgu pho de dag nyid kyi nang nas rnam pa gnyis su ste/snyoms par 'jug pa gcig dang gnyis dang gsum dang bzhi dang lnga dang drug dang bdun dang brgyad gang yin pa de brgal cing 'das nas de las gang thod rgal du ni snyoms 'jug pa zhes bya ba nyon mongs pa bag chag dang bcas pa nyams smod pa'i bsam gtan gyi khyad par ro//'gog pa'i bar du mi 'dra bar 'gro/ zhes bya ba ni de bzhin du lugs dang mthun pa dang lugs dang mi mthun pa'i rim pa dag gis 'gog pa mngon par khyab par byas pa go rims ma yin par 'gro ba de ni 'dir bsgom pa'i lam nyid yin par bshad do zhes bya bar shes par bya'o//tshig le'ur byas pa'i don ni byang chub sems dpa' zhes bya ba la sogs pa smos pa yin te/ bsam gtan dang po nas bzung ste 'gog pa'i bar du song nas zhes bya ba nas 'dod pa mi dge ba'o zhes smos pas 'dod khams pa'i rnam par rtog pas rnam par g.yeng ba'i sems nas nye bar gzung ba byas nas gzugs khams su gtogs pa'i sems kyis bsam gtan dang po mngon sum du byas pa 'gog pa'i bar du song nas zhes bya ba de bzhin du/bsam gtan gnyis pa dang gsum pa dang bzhi pa dang de bzhin du/gzugs med khams la gnas med de/ /skye ba las ni rnam pa bzhi/ /zhes smos pa gzugs med pa'i khams su gtogs pa'i sems nam mkha' dang / rnam par shes pa dang / ci yang med pa dang / 'du shes med 'du shes med min skye mched do/ /de'i 'og tu ni 'gog pa'o//de bzhin du rim gyis song nas zhes bya ba la sogs pa bshad pa ni de'i 'og tu 'gog pa nas bzung ste bsam gtan dang po'i bar du 'ongs te zhes bya ba rgyun du lugs dang mi mthun par bsgoms pas bsam gtan dang po'i bar du 'ongs pa ni 'gog pa dang bcas pa'i snyoms 'jug dgur 'ongs nas zhes bya ba la sogs pa bshad pa yin no//de ltar bshad pa'i rim gyis lugs dang mthun pa dang lugs dang mi mthun pa'i rim pa rnam pa gnyis kyis bsam gtan bzhi dang / gzugs med pa bzhi dang / 'gog pa'i mtshan nyid kyi snyoms par 'jug pa dgu la song zhing zhes bya ba bsam gtan dang po nas brtsams te/'gog pa'i bar du ni lugs dang mthun pa yin la 'gog pa nas brtsams te/ bsam gtan dang po'i bar du lugs dang mi mthun par 'ongs te zhes bya ba'i tha tshig go/ /yang de bzhin du rnam pa gnyis la sogs pa dor ba ni 'ongs nas zhes bya ba la sogs pa smos pa yin te/'ongs nas zhes bya ba ni de ltar dang por song ba las so/ /yang zhes bya ba la sogs pa ni de ltar bshad pa'i rim pas gcig la sogs pa bor nas zhes bya ba gcig dang gnyis dang gsum la sogs pa bor bas so/ /'gog pa'i snyoms par 'jug pa la thub pa'i bar du mi 'dra ba'i sgo nas 'gro ba ni bsgom pa'i rim gyis rab tu 'gro ba'i rgyus mi 'dra bar 'gro ba thod rgal gyi snyoms par 'jug pa ni nyon mongs pa bag chags dang bcas pa nyams smad par byed pa'i bsam gtan gyi khyad par ro//dbang po nyid kyi mtshan nyid ni sems dbang du byed pa nyid kyi bdag nyid can byang chub sems dpa' 'gro ba'i don gyi phyir go cha bgos pas mngon sum du byed pa yin pas na bsgom pa'i lam yin no//snyoms par 'jug pa thams cad du sems la dbang ba nyid kyis na rgyal po chen po dang 'dra bar 'dod pas 'jug pa yin pa'i phyir mi 'dra bar 'gro ba ni seng ge rnam par bsgyings pa'i snyoms par 'jug pa yin par shes par bya la khyad par can rnams ni khyad par gyi lam kho na yin pas thod rgal gyi ting nge 'dzin 'di ni byang chub sems dpa' rnams la rigs kyi gzhan dag la ni ma yin no//sa brgyad rnam pa gnyis 'brel dang / /gcig brgal song zhing 'ongs nas ni/ /ris mi mthun par gsum par 'gro/ /thod rgal gyi ni snyoms 'jug yin/ /zhes bya ba 'dis bshad pa'i thod rgal gyi ting nge 'dzin ni 'dir skabs ma yin no//de ltar bsgom pa'i lam brjod nas de la spong ba'i zhes bya ba gang gi phyir bsgom pa'i lam gyis spang ba yin pa de'i rgyus 'og nas bshad pa'i rnam par rtog pa rnam pa bzhi bsgom pa'i lam der khongs su chud par bya'o/ /dang po zhes bya ba ni bzhi po de las spang bar bya ba'i gzung ba'i rnam par rtog pa dang po ni re zhig mdor bsdus zhes bya ba la sogs pa gsungs pa yin no//tshig le'ur byas pa'i don mdor bsdus pa zhes bya ba la sogs pa smos pa yin te/ mdor bsdus pa dang rgyas pa la dga' ba'i gdul bya dag ste/ mgo smos pa dang rnam par spros pas shes pa kha sbub la sogs pa'i nyes pa dang bral ba dag la lung nye bar ston pas mdor bsdus zhes bya ba la sogs pa'i rnam par rtog pa gnyis yin no/ /ji skad du bshad pa'i don ni sbyin pa la sogs pa ste/ de rnams nan tan du mi byed pa ni sgrub par mi byed sangs rgyas rnams kyis bstangs pa ni mgon du bya ba gang yin pa ste/des yongs su ma bzung zhing bdag gir ma mdzad pa ni de'i rnam par rtog pa gzhan yin no/ /byung ba dang 'gag pa nyid kyis zhes bya ba ni nyon mongs pa kun tu byung ba rnams rang gi ngang gis 'jig pas sbyor ba'i lam gyi yon tan gang yin pa de dang bral ba'i mtshan nyid ni med pa ste/phan tshun 'gal ba nyid kyis ni gcig la byung ba dang 'byung bar 'gyur ba'i ngo bo gnyis mi 'thad pas med pa 'am ngo bo nyid gnyis las 'das pa'i ngo bo ni rang gi ngang gis 'jig pa yin pa'i phyir dang ma 'ongs pa ni rang gi ngo bor med pa yin pa'i phyir ro//yang dag par skye ba'i rgyu dang mi ldan pas zhes bya ba ni nyon mongs pa rnams ni yang dag pa'i skye ba med pa'i phyir ro/ /mthong ba'i zhes bya ba la sogs pa ni phyis 'byung ba'i nyon mongs pa rnams ni rang gi ngo bo nyid du med pa'i phyir ro//ma 'ongs pa zhes bya ba la sogs pa ni nyon mongs pa rnam pa gsum 'gog par bya ba'i phyir lam gsum la 'jug pa dang / /nyon mongs pa rnams yang dag par na yod pa ma yin pas yul med pa nyid kyis na lam gsum pa 'jug pa dus gsum gyi yon tan du ji ltar 'gyur zhes bya ba rnam par rtog pa gsum yin no zhes bya ba ni spyi'i don yin te/dus gsum yon tan med pa dang zhes bya ba bshad pa yin no/ /bdag tu lta ba la sogs pa yod na mya ngan las 'das pa la sogs pa'i lam la sogs pa yod pa yin la/ /de med pas sel ba'i lam med pa de ni phyin ci log ces bya ba la sogs pa yin te/phyin ci log zhi ba nyid la sogs pas bdag tu lta ba dag mya ngan las 'das pa'i don du sbyor ba'i lam gang yin pa'o/ /de la stong pa nyid du mngon par bsgrub pa nyid kyis bdag med pa'i ye shes thob pas mthong ba'i lam mo//rang bzhin med pa'i ngo bo nyid kyis zhes bya ba ni rang bzhin med pas bsgom par bya ba la sogs pa med pa'i phyir/ bsgom pa'i lam ste/ rnam par rtog pa gsum gyis ni/ /legs pa'i lam ni rnam gsum la/ /zhes bya ba bshad pa yin te/ legs pa'i lam rnam pa gsum mo zhes bya ba'i tha tshig go/ /dang zhes bya ba ni bsdu ba'o/ /gnas skabs 'dir zhes bya ba ni spang bar bya ba nyid kyis dbang du bya ba'i gnas skabs su shin tu spang bar bya ba nyid kyis na/ bsgom pa'i lam sngar bshad pa'i sbyor ba'i gnas skabs gang bsgom pa'i lam gyi sems dang sems las byung ba rgyun mi 'chad par 'jug pa'i dmigs pa'i khyad par dang po ste/de'i yul can gzung ba rnam pa dgu ni chos bsdus pa la sogs pa ci rigs par blang ba dang dor ba'i rnam par rtog pa'o/ /rnam par rtog pa ma lus pa ni spang bar bya ba nyid yin pas de ltar dang po'i zhes bya ba la sogs pa smos pa yin no//tshig le'ur byas pa'i don ni dge ba'i bshes gnyen zhes bya ba la sogs pa smos pa yin te/ dge ba'i bshes gnyen la sogs pa dang bral bas yang dag pa'i man ngag ston pa dang dad pa la sogs pa med pa'i phyir byang chub kyi sems mi skye ba'o//'khor gsum yongs su dag pa nyid kyis khyad par du 'phags pa'i sangs rgyas la dmigs pa'i bsod nams gang yin pa de dmigs pas byang chub nyid ces bya ba yin pa'i phyir snying po yin pa'am/ de mngon sum du byed pa'i gnas skabs de yid la mi byed pa ni mi dmigs pa'o//nyan thos zhes bya ba la sogs pa ni/ nyan thos dang rang sangs rgyas kyi rigs can nyid yin pa'i phyir lam gyi 'bras bu mngon du byed pa re ba yod pa'i phyir ro/ /shes rab kyi pha rol tu phyin pa ni sngar bshad pa'o//de sgrub pa med pa ni nyams su lan pa dang bral bas yang dag pa'i byang chub yid la mi byed pa ni rdzogs pa'i sangs rgyas la dmigs par mi byed pa'o/ /dmigs pa dang bcas pa nyid kyis gzung ba la sogs pa la dmigs pas bsgom pa'i gzugs la sogs pa la dmigs pa'o//dmigs pa med pa nyid kyis zhes bya ba la gzung ba la sogs pa ma dmigs pas bsgom pa med pa ni gzugs la sogs pa la mi dmigs pa'o/ /dmigs pa yang med mi dmigs pa yang med pas zhes bya ba ni mi dmigs pa dang dmigs pa dag bsgom pa yang med sgom pa med pa yang ma yin pa ste/gzugs la sogs pa la mi dmigs pa dang dmigs pa'o/ /phyin ci log la mngon par zhen pas zhes bya ba ni gzung ba la sogs pa la mngon par zhen pas so/ /don ji lta ba bzhin ma yin pa nyid la zhes bya ba ni log pa nyid yin pas so//gnas skabs de ni spang bar bya ba nyid kyis zhes bya ba ni dbang du byed pa'i gnas skabs su shin tu spang bar bya ba nyid yin pas so/ /bsgom pa'i lam gyi sngar bshad pa'i sems dang sems las byung ba ni khyad par can gyi shes pa'i tshor ba la sogs pa'o//de rnams kyi 'jug pa'i gnas skabs ni rgyun gyis skye ba'i khyad par gang yin pa ste/ de'i yul can ni de'i gzung bar bya ba zhes bya ba la sogs pa'o/ /'dzin pa'i zhes bya ba la sogs pa la tshig le'ur byas pa'i don ni rdzas su yod par zhes bya ba la sogs pa smos pa yin te/rdzas su yod par mi skye bas zhes bya ba ni don dam par yod par skye bar mi rigs pa'i phyir ro/ /sems can du btags pa ni gang zag la sogs pa'i tha snyad do/ /snang ba tsam du zad pa'i phyir zhes bya ba ni phyi'i don yod par mi rung bas sems can nyid yin pa'i phyir chos su btags pa ni gzugs la sogs pa'i tha snyad do//thams cad du 'gro ba'i phyir zhes bya ba ni gang du yang mi gnas pas yod par mi rigs pa'i phyir rnam pa thams cad mkhyen pa nyid la sogs pa gsum po'i chos sems skyed pa la sogs pa gang yin pa de rnams kyi stong pa nyid ma yin pa nyid du yod pa'o//rnam pa thams cad du mngon par zhen pa ma spangs pas zhes bya ba rnam pa thams cad du gzung ba la sogs pa la mngon par chags pa mi 'gog pas/ chos la chags pa ste gzugs la sogs pa la mngon par zhen pa'o//ngo bo nyid med par rtogs pas zhes bya ba gzugs la sogs pa med par shes pas chos rab tu rnam par 'byed pa gzugs la sogs pa'i char dbye ba shes par bya'o/ /ched du bya ba mi byed pas zhes bya ba sngar bshad pa'i ched du bya ba rnam pa gsum la mi dmigs pas dngos po'i ched du bya ba byed pa ste/phyi dang nang gi bdag nyid can gyi don ston pa la dmigs pa'o/ /gzugs la sogs pa la mi dmigs pa'i phyir zhes bya ba gzung ba la sogs pa med par gzugs la sogs pa mi shes pas theg pa gsum gyis nges par 'byung ba ste/rnam pa thams cad mkhyen pa nyid kyi 'bras bu mngon sum du byed pa'o/ /yang dag par rab tu ma zhugs pa nyid kyis zhes bya ba gzung ba la sogs pa med par mngon sum du ma shes pas yon ma dag pa ste/slob ma la sogs pas byin pa'i rdzas la sogs pa rnam par mi sbyong ba'o/ /sbyin pa la sogs par dmigs te sgrub pas zhes bya ba bsam gtan dang bsam bya dang gnyi ga la sogs pa'i dngos po la dmigs pa'i shes pas spyod pa rnam par 'khrugs pa ste/ sbyin pa la sogs pa'i bya ba la mngon par zhen pa'o/ /snga ma bzhin du zhes bya ba ni phyin ci log tu mngon par zhen pas don ji lta ba bzhin du ma yin pa nyid kyis na gnas skabs 'dir spang bar bya ba nyid yin pa'i phyir 'dzin par zhes bya ba la sogs pa smos pa yin no/ / sems can zhes bya ba la sogs pa 'dzin pa'i tshig le'ur byas pa ni sems can btags pa dang zhes bya ba la sogs pa smos pa yin te/ sems can btags pa ni gzugs la sogs pa yod pa'i tha snyad do/ /de'i rgyu ni tshul 'di la spyi'i don med pas shes pa tsam gang yin par de rnam par gzhag pa'i rgyu mtshan yin no//de'i yul ni de'i gzung ba bsgom pa'i lam dang 'brel pa'i mi mthun pa'i phyogs gzhan rnam pa dgu spang bar bya'o/ /ci'i phyir zhe na de la gnod pa byed pa yis zhes bya ba ste/ bsgom pa'i lam gyis te 'gog pa yin pa'i phyir ro//don 'di nyid ni mi mthun pa zhes bya ba la sogs pa smos pa yin te/ sems can du btags pa ni gzugs la sogs pa yod pa'i tha snyad do/ /de rnam par gzhag par bya ba'i phyir gang snang ba tsam ni phyi'i don yod par mi rung bas sems tsam mo//de nyid ni rgyu rnam par gzhag pa'i rgyu mtshan yin te rnam par rtog pa'i rnam pa kho na tha snyad ma lus pa la 'jug pa yin pa'i phyir ro/ /de'i yul can zhes bya ba la sogs pa yin no/ /thams cad mkhyen pa nyid gsum dag gi zhes bya ba la sogs pa'i tshig le'ur byas pa'i don ni rnam pa thams cad ces bya ba la sogs pa smos pa yin te/rnam pa thams cad yongs su ma shes pas zhes bya ba ni phyi dang nang gi dngos po rnams kyi rnam pa yongs su ma shes pas rnam pa thams cad mkhyen pa nyid kyi sgrib pa gang yin pa mi mthun pa'i phyogs de la kun tu rmongs shing mi shes pa yin no//lam thams cad yongs su mi shes pa zhes bya ba rnam pa thams cad mkhyen pa nyid la sogs pa'i lam gsum po ma shes pas lam shes pa nyid kyi sgrib pa gang yin pa de mi mthun pa'i phyogs de la kun du rmongs pa'o//gzhi thams cad yongs su ma shes pas zhes bya ba phyi nang gi bdag nyid can gyi dngos po tsam yongs su ma shes pas thams cad shes pa nyid kyi sgrib pa gang yin pa de la kun tu rmongs pa'o/ /shes rab kyi pha rol tu phyin pa ni snga ma bzhin no/ /de yongs su ma shes pas thams cad zhi ba'i lam la kun du rmongs pa ste/nyan thos dang rang sangs rgyas dang byang chub sems dpa' dang rdzogs pa'i sangs rgyas kyi lam mi shes pa'o/ /gzugs la sogs pa'i shes bya dang de bzhin nyid dag tu yongs su ma shes pas zhes bya ba gzugs la sogs pa dang stong pa nyid dag nye bar dmigs pa'i phyir de bzhin nyid la sogs pa dang mtshungs par ldan pa dang mi ldan pa la kun du rmongs pa ste/de bzhin nyid dang gzugs la sogs pa dag la phrad pa dang 'bral ba mi shes pa'o/ /bdud la sogs par rang gi ngo bo yongs su ma shes pas zhes bya ba bdud dang phyir rgol ba dang dgra bo rnams dngos po med par ma shes pas mi mnyam pa nyid la kun du rmongs pa ste/bdag nyid kyi thun mong ma yin pa nyid du mi shes pa la'o/ /don la sgra ji bzhin du 'dzin pa nyid kyis shes rab kyi pha rol tu phyin pa las/ la lar byang chub sems dpa' zhes bya ba la sogs pa smos pas gzugs la sogs pa'i phung po don dam pa nyid du 'dzin pas sdug bsngal ba la sogs pa'i bden pa la kun du rmongs pa ste/'phags pa'i bden pa bzhi mi shes pa'o/ /'dod chags la sogs pa'i ngo bo nyid yongs su ma shes pas 'dod chags zhes bya ba la sogs pa rnams ni mi bden pa'i phyin ci log gi kun nas blangs pa nyid du mi shes pa'i phyir nyon mongs pa'i rang bzhin la kun du rmongs pa ste/'dod chags la sogs pa rnams dngos po med pa'i ngo bo nyid du ma shes pa'o//gzung ba dang 'dzin pa'i mtshan nyid yongs su ma shes pas zhes bya ba gnyis dang bral bar mi shes pa'i phyir gnyis su med pa la kun du rmongs pa ste/ gnyis su med pa ma shes pa'o/ /snga ma bzhin du zhes bya ba ni 'dzin pa'i rnam par rtog pa la sogs pa'o//mi mthun pa'i phyogs brjod pa'i shugs kyis 'phangs pa gnyen po'i phyogs kyang rnam pa bzhi yin la re re zhing snga ma bzhin du mi mthun pa'i phyogs dgu las go bzlog par bshad pa'i don las shes par bya'o/ /de ni bsgom pa'i lam gyi zhes bya ba la sogs pa smos pa yin no//bsgom pa'i lam gyi dgongs pa ni snga ma bzhin du zhes bya ba la sogs pa smos pa yin te/ snga ma bzhin du zhes bya ba ni mthong ba'i lam dang 'dra bar 'dir yang rnam par rtog pa bzhi po re re zhing chung ngu'i chung ngu la sogs pa dgu car yang 'khor gsum yongs su dag pa nyid kyis rnam pa dgu yin pa'i phyir rnam par rtog pa brgya rtsa brgyad ces bya ba la sogs pa yin no//yams nad ces bya ba la sogs pa tshig le'ur byas pa dang 'grel pa ni go sla'o/ /yun ring lon nas dbugs phyin ltar/ /zhes bya ba bshad par bya ste/gegs byed pa med pas zhes bya ba ni mi mthun pa'i phyogs med pas so/ /dga' bas dbugs 'byin pa thob pa bzhin du zhes bya ba ni yun ring po ste/ 'tshang rgya ba nyid la gnas pa'i bar du rab tu dga' bas brgal ba lta bur 'gyur ba'o / /bsgom pa'i lam gyi zhes bya ba la sogs pa yang /stong gsum pa'i zhes bya ba la sogs pa ni bar chad byed pa'i tshig le'ur byas pa yin te/ nyan thos dang bse ru dag gi rtogs pa phun sum tshogs pa ni shes pa phun sum tshogs pa'o/ /byang chub sems dpa'i skyon med pa ni sngar bshad pa'i mthong ba'i lam la ste/ stong gsum pa'i skye bo bkod pa ni thob par byed pa ste/ de byed pas bsod nams gang skye bar 'gyur ba'i dge ba rnams dper mdzad nas zhes bya ba dge ba de dpe nyid du byas nas bsod nams mang po nyid kyis ni zhes bya ba de'i bsod nams kyi grangs nyid kyis grangs med pa'i bsod nams kyis gang sangs rgyas nyid thob pa la bar chad med par 'tshang rgya ba nyid du bar chad med pa de ni 'dir bar chad med pa'i ting nge 'dzin te/bsam gtan gyi khyad par yin no/ /de ni rnam pa kun mkhyen nyid/ /ces bya ba rdzogs pa'i sangs rgyas nye bar len pa nyid kyis ni nye bar gdags pas sangs rgyas nyid ces kyang de la bya'o zhes bya ba ni lhag ma'o//'ga' zhig ces bya ba la sogs pa'i 'grel pa dang 'di'i dmigs pa zhes bya ba la sogs pa'i tshig le'ur byas pa dang 'grel pa ni go sla'o/ /gnas 'di la zhes bya ba bar chad med pa'i ting nge 'dzin gyis dmigs pa la sogs pa'i gnas skabs ni gting dpag dka' ba nyid yin pa'i phyir tshad ma'i yul ma yin pa nyid kyis na rab tu smra ba rnams brgyud mar rgol lo zhes bya ba'i tha tshig ste/klan ka'i rgol ba brgyud mar 'byung ba ni rgol ba smra ba mang po'o/ /gang zhig yin zhe na thabs la mkhas pa ma rtogs pa ste/ kun rdzob dang don dam pa'i bden pa la brten pa'i thabs la mkhas pa mngon par ma shes pa rnams la 'phags pa byams pa 'jig rten sgrol ba la mkhas pa'i thabs la mkhas pas de dag gsal bar bya ba'i thabs la mkhas pas kun rdzob dang don dam pa dag gi rgol ba rnams kun rdzob dang don dam pa dag gis bstan pa yin no//'dis ni ting nge 'dzin 'di zab pa nyid du bsnyad de/ tshad mas mi rtogs pa nyid du ston to/ /blo'i nor can zhes bya ba la sogs pa dang dmigs pa zhes bya ba la sogs pa'i tshigs su bcad pa'i don ni 'dus byas dang 'dus ma byas kyi khams dag ces bya ba rgyu dang rkyen la rag las pa'i lam dang /gzugs la sogs pa dang nam mkha' la sogs pa ni dngos po med pa nyid kyis dmigs par 'thad pa ste/ gzugs la sogs pa'i yul du rigs pa nyid du log par rtog pa yin no/ /zhes thams cad la sbyar bar bya'o//gal te yang dag par yul du gyur na 'dus byas dang 'dus ma byas kho na yul yin gyi de med na yul gang zhig yin zhes rgol ba po'i bsam pa yin no/ /rnam pa thams cad du rang bzhin med pa'i phyir gzugs la sogs pa rnams kyi cha shas can la sogs pa'i ngo bo med pas/dmigs pa'i ngo bo nyid nges par gzung zhing yul gyi rnam pa nges par bya ste/ yang dag par na cha shas can la sogs pa'i ngo bo yod na mig gi rnam par shes pa la sogs pa'i yul gzugs la sogs pa yod par nges pa yin gyi de med na ji ltar yod ces bya ba snyam mo//dngos po dang dngos po med pa dag ni gzung ba la sogs pa'o/ /de med pa ni mi dmigs pa ste / mi rtog pas rnam pa thams cad mkhyen pa nyid du 'tshang rgya ba na dngos po dang dngos po med pa la sogs pa'i yul mkhyen pa'i ye shes gang yin pa de la gzung ba la sogs pa rnam pa thams cad yang dag par yod na ni/de mkhyen pa yin gyi de med par de ji ltar yod/ yul med par yul can skye bar rigs pa ma yin no/ /de bzhin nyid kyis dbye ba ni 'thad pas kun rdzob dang don dam pa'i bden pa gnyis dang zhes bya ba ni 'di ni khyad par ram khyad par gyi rgyu yin te/'di lta ste 'gal ba'i chos la gnas pa dang / rgyu'i bye brag gis zhes bya ba'i rigs pas dbye ba thams cad la yin la khyed kyi phyogs ltar na rgyu'i dbye bas mi rigs te/ dngos po med pa'i rgyu dang rkyen kho na las de gnyis skye ba'i phyir dang /de bzhin nyid kyi rang bzhin nyid kyis na kun rdzob dang don dam pa dag 'gal ba'i chos gnas pa med pa ste ji ltar de dag tha dad par yod ces bya ba snyam mo/ /sbyin pa la sogs pa mi dmigs pas zhes bya ba sbyin par bya ba la sogs pa med de ma shes pa'i phyir zhes bya ba sbyin pa la sogs pa nyams su len pa yod pa kho nas sbyin pa la sogs pa yin la de na de med na ji ltar yod snyam mo//rtogs par bya ba med pas zhes bya ba ni shes bya med pas so/ /blo'i khyad par dang ldan pa gang yin pa ni sangs rgyas yin la de nyid gdul bya'i skye bo'i rgyud la dga' ba skyed par byed pa nyid kyis na/dkon mchog yin na de la rtogs par byed pas ji ltar sangs rgyas shes bya snyam mo/ /ming du btags pa tsam du zad pas zhes bya ba gzugs dang 'du byed kyi phung po dag gam gnyis dang gnyis med pa'i shes pa dag ni ming du btags pa tsam nyid yin pa'i phyir ji ltar yongs su brtags pa'i rang bzhin ni gcig dang du ma dang bral ba'i phyir zhes bya ba la sogs pa'i tshad mas de med pas ming du btags pa tsam du zad pa'i phyir chos dkon mchog ste lung dang rtogs pa'o//gzugs la sogs par dmigs pa bkag pas zhes bya ba phyi'i don yod par mi 'thad pas gzugs kyi phung po la sogs pa yul bkag pa'i phyir dge 'dun te gzugs dang gzugs med pa nyan thos la sogs pa'i dge 'dun ni gzugs la sogs pa'i dngos po yod na dkon mchog gsum grub kyi de med na de ji ltar yod snyam mo//sbyin pa la sogs pa dmigs pas sbyin par bya ba la sogs pa mthong ba'i phyir thabs la mkhas pa ste/ sems mi 'gong ba la sogs pa la sbyin par bya ba la sogs pa mthong bas dmigs pa dang bcas pa nyid yin pa'i phyir skrag pa la sogs pa 'byung bas sems ma zhum pa la sogs pa nyid du ji ltar 'gyur snyam mo//dngos po dang dngos po med pa dang gnyi ga'i ngo bor rtogs pa ni shes pa ste/ de bkag pas de bzhin gshegs pa'i mngon par rtogs pa ste/ 'tshang rgya ba nyid mngon sum du bya ba la dngos po la sogs pa med na dngos po la sogs pa ji lta ba de ltar mkhyen pa gang la yod snyam mo//spros pa rnam par gzhag pa'i mi rtag pa la sogs pa nyid kyis zhes bya ba gdul bya'i dbang gis rnam pa sna tshogs pa nyid du ston pa'i nges pa nyid kyis na mi rtag pa la sogs pa nyid yin pa'i phyir/ rtag pa la sogs par phyin ci log pa ste/rtag pa la sogs pa go bzlog pas mi rtag pa la sogs pa dang / rtag pa la sogs pa yang dag pa ma yin pa nyid du mnyam pa'i phyir gnod par bya ba dang / gnod pa byed par ji ltar 'gyur snyam mo/ /lam rnam par bsgoms pa'i 'bras bu gang yin pa de mngon sum du mi phyed pa'i phyir lam ste/lam bsgoms pas 'bras bu mngon sum du byed pa 'byung ba yin na de ji ltar mngon sum du mi byed pa yin snyam mo/ /blang ba dang dor ba med pas zhes bya ba spang bar bya ba dang / blang bar bya ba med pa'i phyir mi mthun pa'i phyogs dang gnyen po ste/dgag par bya ba dang / 'gog par byed pa'i dngos po yod na dor ba dang blang bar bya ba mi mthun pa'i phyogs dang gnyen po yod par rigs na/ de med pas de ji ltar yod pa yin snyam mo/ /chos can med pas zhes bya ba gzugs la sogs pa med pas chos kyi mtshan nyid de/gzugs la sogs pa rang dang spyi'i mtshan nyid de/ mtshan gzhi yod na mtshan nyid yod par rigs na/ de med par de ji srid yod pa yin snyam mo/ /rang dang spyi'i mtshan nyid mi 'thad pas zhes bya ba nus pa dang /mi nus pa'i mtshan nyid mi 'thad pa'i phyir sgom pa la ste/ lam bsam pa ni rnam pa thams cad mkhyen pa nyid thob pa'i don gyi bsgom pa'i mtshan nyid mi 'thad pas kyang thams cad med pa yin la de bas na de'i don med par 'gyur ro snyam mo//dang zhes bya ba ni bsdu ba ste/ log par rtogs pa rnams kun rdzob yin pa'o/ /phan tshun 'gal ba ltar snang ba'i don gang yin pa de ni phan tshun 'gal bar snang ba'i don te/ de bsgrubs pas byang chub sems dpa' rnams kyi bya ba phan tshun 'gal ba dang 'dra bas/ mi 'thad pa nyid kyis zhes bya ba mi rigs pa nyid kyis na gang rgol ba nyid kyis the tshom gyi ngo bo ste/log pa nyid yin par yid gnyis su gyur pa na ji skad bshad pa'i yul can nyid kyis zhes bya ba bar chad med pa'i lam gyi yul can yin pa nyid kyis/ rnam pa thams cad mkhyen pa nyid kyi rten can zhes bya ba 'tshang rgya ba nyid la brten pa'o//log par rtogs pa rnam pa bcu drug go zhes bya ba dmigs pa/ 'thad pa la sogs pa'i mtshan nyid can rnams so/ /log par rtogs pa de dag gang gi yin zhe na/ skye bo byang chub sems dpa'i thabs la mkhas pa mi shes pa'i rab tu smra ba nyid ces bya ba smos te/skye bo mngon par rtogs pa brgyad mi shes shing / sems mi 'gong ba nyid la sogs pa'i thabs mi shes pa'i rab tu smra ba ste/ bstan bcos shes pa dang / de las gzhan pa'i rgol ba byed par 'dod pa'i mkhas pa chen po rnams dang / thams cad kyi zhes bya ba de rnams nyid dang / lha chen po dang khyab 'jug la sogs pa dang / de las gzhan pa'o/ /de bas na zhes bya ba ni bshad pa'i rim pas so/ /kun rdzob dang don dam pa'i sgo can gyi zhes bya ba ni kun rdzob dang don dam pa nyid du rgol ba mi rigs pa nyid du rtogs pa la'o//go rims bzhin du don dam pa dang kun rdzob kyi sgo nas lan btab dgos pas zhes bya ba ni kun rdzob tu rgol ba la ni don dam pa'i thabs kyis/ don dam par rgol ba la ni kun rdzob kyi thabs kyis lan gdab pa'o/ /de bzhin du rgol ba kha cig la ni don dam pa dang kun rdzob dag dang /la lar ni yang dag pa dang / yang dag pa ma yin pa'i kun rdzob dag gis lan gdab par bya bar shes par bya'o/ /de ltar na gnyi ga la brten pa'i thabs la mkhas pas zhes bya ba/ 'jig rten pa dang 'jig rten las 'das pa'i tha snyad la brten pa'i thabs la mkhas pa la bya bas so//de la kun rdzob tu gzugs la sogs pa la yod pas na dmigs pa yin la de'i ngo bo nyid nges par bzung ba ni rnam pa thams cad mkhyen pa'i ye shes yin no/ /dkon mchog gsum zhes bya ba ni kun rdzob kyis lan btab pa'o/ / kun rdzob tu sbyin pa la sogs pa mthong na yang de kho na nyid du ma mthong ba ni thabs la mkhas pa zhes bya'o/ /kun rdzob dang don dam pa dag gis so/ /de bzhin du kun rdzob dang dngos po la sogs pa srid pas de bzhin gshegs pa'i mngon par rtogs pa yin no/ /yang dag pa'i kun rdzob ni mi rtag pa la sogs pa'o//log pa'i kun rdzob ni rtag pa la sogs pa yin pas mi rtag pa la sogs pa la rtag pa la sogs par phyin ci log pa ni yang dag pa dang log pa'i kun rdzob dag gis 'grub ste tshul khrims dang ldan pa'i smon lam 'grub po zhes smos pa'i phyir ro//lam rnam par bsgoms pas kyang 'bras bu mngon sum du mi byed ces bya ba ni kun rdzob kyis te/ de bzhin du kun rdzob tu nyon mongs pa la sogs pa dang / lam yod pas mi mthun pa'i phyogs dang gnyen po nyid yod do/ /de bzhin du gzugs la sogs pa yod pas de'i mtshan nyid yod pa dang /yang de bzhin du gzugs la sogs pa'i rnam pa thams cad la bsgom pa yang rnam pa thams cad mkhyen pa nyid kyi rgyu nyid yin pa'i phyir legs pa yin no zhes ci rigs par de ltar kun rdzob dang don dam pa'i sgo nas lan gdab par bya ste/de dag la sogs pa rnam pa stong du bsal ba sngon du 'gro bas lha chen po dang khyab 'jug la sogs pa'i rgol ba du ma tshar gcod pa'i nges pa rnam pa thams cad du ste/ ting nge 'dzin dang ye shes kyi tshad ma du ma dag gis yang dag cing phyin ci ma log pa'i nges pa ste/'di kho na yang dag pa yin gyi gzhan dag ni rmongs pa yin no zhes bya ba'i shes pa brtan por bskyed nas dge ba 'dod pa rnams kyis te/ sems can thams cad kyi don kun nas byed cing 'tshang rgya ba nyid 'dod pa'i byang chub sems dpa' rnams kyis bar chad med pa'i ting nge 'dzin bskyed par bya'o zhes bya ba dbang du bya'o//yul gyi dbye bas log par rtog pa rnams kyi dbye ba mtha' yas pa yin na yang nye ba na 'dug pa'i gdul bya'i skye bo las ltos te/ bcu drug nyid du bshad pa yin la de bas na rnam pa stong du zhes bya ba dang mi 'gal lo//shes rab kyi pha rol tu phyin pa'i man ngag gi bstan bcos mngon par rtogs pa'i rgyan las seng ge bzang po'i zhal snga nas ni gzhung rtogs dka' ba'i snang ba mdor mdzad pa chos kyi grags pas byas pa las skabs lnga pa'i 'grel pa'i bshad pa'o// //rab tu byed pa'i phan tshun gyi 'brel pa brjod pa ni/ rtse mo'i zhes bya ba la sogs pa smos pa yin te/ rtse mo'i mngon par rtogs pa thob pa zhes bya ba ni sngar bshad pa'i rtse mo'i sbyor ba la lhun gyis grub pa thob pa'o/ /so so dang bsdus pa nyid du zhes bya ba'i lugs las bzlog pa dang lugs su 'byung ba dag gis so//rtogs pa'i don rnams ni bsgoms pas yul du byas pa'i yul lo/ /go rims su bklags pa ni rim gyis dran pa la yang dag par bzhag pa'o/ /bstan par bya ba'i phyir zhes bya ba ni lhun gyis grub pa dran pa la 'jug par bya ba'i phyir ro//rnam par sgom par byed pas zhes bya ba ni sems phyi rol las yang dag par bsdus te/ nang du nges par dmigs par byed pas so/ /mthar gyis pa'i mngon par rtogs pa'i sbyor ba ni/ sbyin pa zhes bya ba la sogs pa smos pa yin te/sbyin pa dang bcas pa'i shes rab ste/ pha rol tu phyin pas so/ /bar dag ces bya ba ni dran pa nye bar gzhag pa dang / yang dag pa'i spong ba la sogs pa dang / byang chub kyi yan lag bdun dang / 'phags pa'i lam yan lag brgyad pa dag go//sangs rgyas la sogs dran dang ni/ /zhes bya ba ni dkon mchog gsum rjes su dran pas dran pa dang / dge ba la sogs pa rjes su dran pa'i sgom pa gang yin pa'i chos dngos med ngo bo nyid kyis gzugs la sogs pa la mi dmigs pa ste mthar gyis pa'i bya bar bzhed/ces bya ba de ni go rims kyi sbyin pa grub pa yin par shes par bya'o/ /don 'di nyid ni pha rol tu phyin pa zhes bya ba la sogs pa smos pa yin no/ /'khor gsum rnam par dag pas rab tu phye ba ni sbyin par bya ba la sogs pa gsum po nye bar mi dmigs pa las byung ba'i sbyin pa la sogs pa'i pha rol tu phyin pa drug po gang yin pa de rnam pa thams cad du ste/gtong ba dang gtong ba chen po dang / shin tu gtong ba la sogs pa'i mtshan nyid gang yin pa ste yongs su rdzogs shing bsgrub pa'o/ /drug ces bya ba smos na yang / /'di dag gi las shes pa yin zhe na/pha rol tu phyin pa bzhi ni zhes bya ba la sogs pa smos pa yin te/ gang du pha rol tu phyin pa smos pa der pha rol tu phyin pa bcu shes par bya ste/ 'bras bu sa bcu bstan pa'i phyir ro/ /ci zhig rdzogs par byed pas she na/ de ni sa bcu yang dag par byed pa zhes bya ba smos pa yin no/bar dag ces bya ba'i sgras bsdus pa'i don ni dran pa zhes bya ba la sogs pa smos pa yin te/ lung dang rtogs pa'i bdag nyid dag ni chos zhes bya ba yin pas phyogs gnyi ga la yang go rims bzhin du lung du gsungs pa nyid yin pa dang /gnyis su med pa'i ye shes kyi mtshan nyid yin pa'i phyir chos dkon mchog kho na la dkon mchog gsum zhes brjod do/ /de ni don dam par na lung dang rtogs pa ma gtogs par gzhan du dkon mchog gsum du mi 'thad pas/ gang 'di sangs rgyas bcom ldan 'das kyi yon tan mtha' yas shing mthar thug pa med pa 'di dag ni chos las skyes pa chos kyi bgo skal la spyod pa/chos kyi rgyu can chos kyi dbang du byas pas chos las byung ba chos kyi spyod yul can chos kyi rjes su 'brang ba chos las grub pa zhes bya ba la sogs pa gsungs pa'i rnam pas chos dran pa gang yin pa de'i mtshan nyid dang de'i bdag nyid can gyis shes rab kyi pha rol tu phyin pa dang chos yang dag par bsdus pa la sogs pa'i mdo sde thos pa dang bsam pa'i sgo nas phyis yid la byed pas sangs rgyas la sogs pa rjes su dran pa rnam pa gsum gang yin pa des na/chos kyi mtshan nyid kyis chos med pa yin pa'i phyir 'dir rjes su dran pa rnam pa gnyis kho na yin no zhes kyang 'dogs par mi 'gyur te/ ngo bo nyid med pa'i phyir dkon mchog gsum du yang yongs su brtags pa nyid yin pa'i phyir ro/ / gzhan du na chos dkon mchog tu brtags pa yang ji ltar 'gyur/ yang na chos kyi bdag nyid med pa na dkon mchog gnyis su brtags par yang mi 'gyur te/ ngo bo nyid med pa'i phyir dkon mchog gsum du brtags par mi rigs pa ma yin no/ /yang na 'dir gnyis su med pa'i stong pa'i ye shes kho na la nyon mongs pa bag chags dang bcas pa med pas gtsor dga' ba bskyed pa nyid kyis na chos dkon mchog yin pa'i phyogs 'di la ni dkon mchog gsum du gtogs pa'i chos kyi sgras lung yin par shes par bya'i gnyis su med pa'i ye shes ni ma yin te/des gang du yang bye brag tu 'byed par mi byed do/ /de ni don dam par zhes smos pa yin te/ gnyis su med pa'i ye shes ni dngos kyis phye ba yin no zhes bya ba'i tha tshig go/ /phyogs 'di la chos kyi sgras lung dang rtogs pa yin par bshad de rnam grangs yin pas so//ston pa'i dam chos rnam gnyis te/ /lung dang rtogs pa'i bdag nyid can/ /'dzin dang de ni ston pa dang / /sgrub par byed pa nyid dag go/ /zhes bya bas 'gal ba med de/ /ngan 'gro thams cad 'jig par byed pa nyid kyis na dga' ba skyed par byed pa gang ci yang rung ba de thams cad 'di nyid kyi khongs su gtogs pa yin no//de bas na dkon mchog 'di las gzhan med pas dkon mchog gsum las lhag par thal bar mi 'gyur ro/ /de kho na nyid du ni yang dkon mchog gsum po mtha' yas par 'dod pa nyid chos las ma gtogs par gzhan yin par mi rung ba'i phyir ro//de nyid kyi phyir na phag mo'i rtogs pa brjod pa las/ gang zhig sangs rgyas skyabs 'gro ba/ /de ni ngan 'gror mi 'gro ste/ /mi yi lus ni rnam spangs nas/ /de yis lha yi lus 'thob bo/ /zhes bya ba dang / de bzhin du gang zhig chos dang dge 'dun la skyabs su 'gro ba la sogs pa snga ma bzhin du smos so//dkon mchog gsum po 'di dag ni nges par 'byed pa'i cha dang mthun pa la sogs pa lam rnam pa gsum gyi ngo bo nyid yin te/ de ni go rims bzhin du zhes bya ba la sogs pa smos pa yin te/ dkon mchog gsum rjes su dran pa 'dis kyang lam gsum la skyes pa'i bar chad med pa'i lam thob bo zhes ston to/ /sangs rgyas la sogs pa zhes bya ba'i sogs pa'i sgras bsdus pa'i rjes su dran pa gzhan dag kyang de bzhin du zhes bya ba la sogs pa yin no/ /sbyin pa la sogs pa phyi dang nang gi mu stegs pa'i skye bo dang thun mong ma yin pa nyid ni gzugs la sogs pa zhes bya ba la sogs pa smos pa yin te/gzugs la sogs pa'i chos thams cad gang yin pa de rnams kyi dngos po med pa'i ngo bo nyid ni sngar bshad pa'i sbyin pa la sogs pa dran pa'i khyad par tshad ma dang /lung gis grub pa gang yin pa des khong du chud pas sbyin pa la sogs pa dran pa'i shes pas rtogs pa'i khyad par gang yin pa de ni mthar gyis pa'i khyad par bzhed pa yin no/ / shes rab kyi pha rol tu phyin pa'i man ngag gi bstan bcos mngon par rtogs pa'i rgyan las seng ge bzang po'i zhal snga nas kyi gzhung rtogs par dka' ba'i snang ba mdor bshad pa chos kyi grags pas mdzad pa las skabs drug pa'i 'grel pa'i bshad pa'o// //rab tu byed pa'i 'brel pa brjod pa ni mthar gyis pa'i zhes bya ba la sogs pa smos pa yin te/mthar gyis pa'i mngon par rtogs pa'i sbyin pa la sogs pa'i mtshan nyid do/ /rnam par bsgom pa ni bslab pa ste gang gis de shin tu goms par byas pa'i phyir te/ lhun gyis grub pa dran pa'i phyir ro/ /de dag nyid ces bya ba ni bshad ma thag pa'i sbyin pa la sogs pa'o//skad cig ma gcig gis bsgom pa ni/ skad cig ma dpag tu med pas rnam par bsgoms pa rnams shin tu mang du goms pa'i phyir/ skad cig ma gcig la nges par dmigs pa ni skad cig ma gcig pa'i mngon par rdzogs par byang chub pa yin te/skad cig ma gcig par gyur pa'i sbyor ba'i ye shes kyi khyad par ro/ /de yang mtshan nyid kyis te/ rang gi ngo bo nyid rnam pa bzhi yod pa las dang po ste/ thog ma ni rnam par smin pa ma yin pa ste/ phyi rol gyi rgyu dang rkyen gyis mngon par 'dus ma byas pa zag pa med pa zhes bya ba nyon mongs pa med pa'i chos thams cad do//chos mngon pa las/ zag med lam gyi bden pa dang / /zhes smos pas 'dir lam gyi bdag nyid can gyi sbyin pa la sogs pa gang yin pa de rnams kyi skad cig ma gcig pa'i mtshan nyid ni skad cig ma gcig gi bdag nyid can no//skad cig ma gcig pa'i mngon par rdzogs pa'i byang chub pa ni skad cig ma gcig pa'i ye shes kyi bdag nyid can no/ /lam ni sbyin pa la sogs pa zhes bya ba la sogs pa gsungs pa yin te/ tshig le'ur byas pa dang 'grel pa ni go sla'o/ /dngos po so sor nges par 'dzin pa ni shes pa gang la sbyin par bya ba la sogs pa'i yul la dmigs pa'o/ /de dang bral ba ni de las 'das pa'o/ /de nyid kyis na go bzlog pa'i ngo bo ste/ sbyin pa la sogs pa'i yul gcig shes pa las go bzlog pas so//go bzlog pa'i rgyu ni sbyin pa zhes bya ba la sogs pa smos pa yin te/ zag pa med pa'i sbyin pa la sogs pa dang / dpe byad bzang po brgyad cu'i bar gyi mtshan nyid kyi chos rnams gang yin pa de bsdus pa'i phyir zhes bya ba sbyin pa la sogs pa gcig la chos kyi dbyings nyid kyi khongs su 'dus pa'i rgyus na thub pa zhes bya ba mnyam par gzhag pa'i byang chub sems dpa'i rtogs pa yin par shes par bya ste/zag pa med pa'i yul dpag tu med pa shes pa gcig yin par shes par bya'o zhes bya ba ni skad cig ma gcig pa'i mngon par rdzogs par byang chub pa'i zhes bya ba ste/skad cig ma gcig par gyur pa'i ye shes so/ /yul dpag tu med pa la ye shes gcig gi bya ba ji ltar yin zhes bya ba gtan tshigs nyid kyis dpe bstan pa / ji ltar skyes bus zhes bya ba la sogs pa smos te/rab tu byed pa dang 'grel pa ni go sla'o/ /skad cig ma gcig pa'i mngon par rdzogs par byang chub pa gnyis pa ni de ltar dang po zhes bya ba la sogs pa smos pa yin te/ rnam par smin pa'i chos nyid ni 'tshang rgya ba nyid kyi 'bras bu ster ba la mngon par phyogs pa de dang ldan pa'i zag pa med par chos thams cad dmigs pa rab mchog tu gyur pa'i sbyin pa la sogs pa gang yin pa de rnams kyi skad cig ma gcig pa'i mtshan nyid kyi shes rab kyi pha rol tu phyin pa zhes bya ba la sogs pa ni rnam par smin pa'i chos nyid kyi gnas skabs su 'tshang rgya ba nyid kyi 'bras bu 'byin pa la mngon par phyogs pa'i rnam pa'i khyad par ni/gang gi chos dkar po thams cad kyang rang bzhin du skyes pa yin zhing nyon mongs pa'i chos kyi dbyings su yang dag par byung ba ni/ sngar bshad pa'i sbyin pa la sogs pa yin no zhes bya ba ni lhag ma'o//de'i tshe skad cig gcig ye shes/ /zhes bya ba de'i tshe sbyin pa la sogs pa skad cig ma gcig par gyur pa'i ye shes ni shes rab kyi pha rol tu phyin pa yin no zhes bya bar sbyar ro/ /tshig le'ur byas pa 'di nyid kyi don ni/ gang gi tshe zhes bya ba la sogs pa smos pa yin te/ gang gi tshe byang chub sems dpa'i gnyen po bsgoms pas zhes bya ba sngar bshad pa'i thams cad mkhyen pa gsum pa la sogs pa'i bsam gtan gyi mi mthun pa'i phyogs thams cad med de zhes bya ba gzung ba la sogs pa'i rnam par rtog pa dang bral bas rnam par byang ba'i chos thams cad de/thams cad mkhyen pa nyid gsum la sogs pa'i rnam par smin pa'i chos nyid kyi gnas skabs gang yin pa ste/ 'tshang rgya ba nyid kyi 'bras bu rab tu ster ba'i rgyu nyid yin pa de ni dri ma thams cad dang bral bas zhes bya ba gzung ba la sogs pa'i lta ba spangs pas ston ka'i zla ba'i 'od bzhin du dkar po'i chos skyes pa zhes bya ba dri ma med par gyur pa de'i tshe skad cig ma gcig kho na la rnam par smin pa'i gnas skabs su gyur pa thob pa ni 'tshang rgya ba nyid kyi rgyu nyid du gyur pa na zag pa med pa ste/nyon mongs pa dang bral ba'i chos thams cad mkhyen pa nyid gsum la sogs pa rtogs shing lhun gyis grub pa'i dran pa'i ye shes ni zhes bya ba rtogs pa'i ye shes gang yin pa de ni shes rab kyi pha rol tu phyin pa yin te//de'i rgyur gyur pa nyid kyis na rab kyi mthar thug pa la 'jug pa'i ye shes ni skad cig ma zhes bya ba la sogs pa yin no//skad cig ma gcig pa'i mngon par rdzogs par byang chub pa gsum pa ni de ltar gnyis pa zhes bya ba la sogs pa smos pa yin te/ phyi'i mtshan nyid med pas na mtshan nyid med pa'o/ /chos thams cad ni sngar bshad pa gang yin pa ste/ de rnams skad cig ma gcig pa'i mtshan nyid ces bya ba skad cig ma gcig pa'i ngo bo nyid ces bya ba la sogs pa'o//sbyin pa zhes bya ba la sogs pa mngon par rdzogs par byang chub pa gsum pa'i tshig le'ur byas pa'i don ni sngon zhes bya ba la sogs pa smos pa yin te/ sngon chos thams cad rmi lam lta bur goms pas zhes bya ba zag pa dang bcas pa dang zag pa med pa'i chos thams cad ni rmi lam lta bu la sogs pa dang mnyam mo//zhes sngar bsgoms pas tshogs gnyis nyams su myong bar byas nas zhes bya ba bsod nams dang ye shes kyi tshogs nye bar bsags nas rtogs pa'i gnas skabs na zhes bya ba yang dag pa'i ye shes thob tu rung ba'i gnas skabs su rmi lam gyi ngo bo nyid ces bya ba dngos po med pa'i chos thams cad de zag pa dang bcas pa dang zag pa med pa'i chos gang yin pa de rnams la'o//de ni nye bar len pa'i phung po la gnas te zhes bya ba smos pa yin te/zag pa dang bcas pa dang / kun 'byung gi phung po dang / zag pa med pa'i tshul khrims la sogs pa'i phung po la dmigs te/ sbyin pa la sogs pa'i pha rol tu phyin pa drug sgrub pa zhes bya ba sbyin pa la sogs pa nyams su len pas sbyin pa la sogs pa'i ngo bo nyid sbyin par bya ba la sogs pa gang yin pa de la bdag med par nges par rtogs pa ni nges par brtags pa ste/de'i rnam pa can gyis chos thams cad ni mtshan nyid med pa'o/ /zhes bya ba gzugs la sogs pa phyi'i mtshan nyid kyi stong pa nyid kyis na ngo bo nyid med pa'o//zhes de ltar kun nas nyon mongs pa dang rnam par byang ba'i ngo bo sngar bshad pa'i mi mthun pa'i phyogs dang gnyen po'i bdag nyid can gyi chos rnams te gzung ba la sogs pa dang thams cad mkhyen pa nyid gsum la sogs pa ni mtshan nyid med pa nyid du zhes bya ba la sogs pa smos pa yin no//gnyis su med pa'i ye shes kyi rgyu nyid du gyur pas na de'i mtshan nyid skad cig ma gcig la mngon par rdzogs par byang chub pa bzhi pa ni de ltar gsum pa zhes bya ba la sogs pa smos pa yin te/ rmi lam na ni zhes bya ba la sogs pa'i tshig le'ur byas pa dang 'grel pa ni go sla'o//mngon par rtogs pa rnam pa bzhi ni gdul bya'i skye bo'i drung na gnas pa las ltos nas ldog pa'i dbye bas gsungs pa yin no/ /de bas na kha cig na re rnal 'byor pas gang yang rung ba cig rtogs par bya'o zhes 'dod/ gzhan dag ni bzhi car yang rtogs par bya'o zhes 'dod do//shes rab kyi pha rol tu phyin pa'i man ngag gi bstan bcos mngon par rtogs pa'i rgyan las seng ge bzang po'i zhal snga nas kyi gzhung rtogs par dka' ba'i snang ba mdor bshad pa chos kyi grags pas mdzad pa las skabs bdun pa'i 'grel pa'i bshad pa'o// //de ltar skad cig ma gcig pa'i mngon par rdzogs par rtogs pa brjod nas/ chos kyi sku'i mngon par rtogs pa ni skad cig ma gcig pa'i zhes bya ba la sogs pa smos pa yin te/ chos ni dran pa nye bar gzhag pa la sogs pa'o//de'i bdag nyid can gyi sku gang yin pa ni ye shes kyi phra rab bsags pa'o/ /de mngon par rdzogs par byang chub pa ni ye shes so/ /de yang ngo bo nyid kyi sku la sogs pa'i dbye bas rnam pa bzhi yin pas zhes bya ba yang dag par na gcig yin du zin kyang ngo bo nyid kyi sku la sogs pa'i bye brag gi rgyu yod pas rnam pa bzhi yin no//thub pa'i ngo bo zhes bya ba la sogs pa'i tshig le'ur byas pa'i don ni/ thub pa zhes bya ba la sogs pa smos pa yin te/ dran pa nye bar gzhag pa la sogs pa ni dran pa nye bar gzhag pa dang /yang dag par spang ba la sogs pa la'o / /ye shes kyi bdag nyid 'jig rten las 'das pa ni phyi'i 'jig rten pa'i ngo bo nyid med pa'i phyir ro/ /chos kyi dbyings kyi ngo bo nyid kyis zhes bya ba ni gnyis su med pa'i ye shes kyi bdag nyid can yin pa'i phyir ro/ /zag pa med pa ni nyon mongs pa med pa'o//ji lta bu zhe na/ dri ma rnams zhes bya ba la sogs pa smos te/ dri ma rnams glo bur ba yin pa nyid kyis zhes bya ba nyon mongs pa rnams bcos ma yin pa'i phyir ro/ /rnam pa thams cad du rnam par dag pa ni phyi dang nang dri ma med pa'o/ /rang bzhin gyis dben pa'i mtshan nyid du gyur pa ni ngo bo nyid kyis gzung ba la sogs pa med pa'i bdag nyid can thob pa ste/sgyu ma lta bu'i gnyis su med pa'i ye shes kyi ngo bo nyid du gyur pa'i dran pa nye bar gzhag pa la sogs pa gang dag yin pa de dag gi rang bzhin ngo bo nyid gang zhig yin zhe na/skye ba med pa'i ngo bo nyid de/ sgyu ma lta bu gnyis su med pa'i ye shes kyi bdag nyid 'di ni thub pa sangs rgyas bcom ldan 'das kyi sku yin no zhes bya ba gong ma dang sbyar ro/ /ngo bo nyid du gyur pa'i rgyu ni bcos ma ma yin pa zhes bya ba la sogs pa smos pa yin te/'jig rten las 'das pa'i lam gyi zhes bya ba rdzogs pa'i sangs rgyas la sogs pa'i spyod yul mngon par rtogs pa brgyad kyi thabs kyis thob pa ste/ 'dir thos pa med pas kun rdzob kyi yul du byas pa yin zhes bya ba'i tha tshig go/ /byas pa ni ma yin pas zhes bya ba ni nang gi mu stegs pa rnams kyis mya ngan las 'das pa dang 'dra bar lam gyis bskyed nas thob par bya ba thob pa ma yin pa'o//rgyu des na bcos ma ma yin pa'i don gyis na skye ba med pa nyid yin pa'i phyir ngo bo nyid kyi sku yin no/ /de lta yin na khyed cag gi phyogs la yang sku dang lam dag yul dang yul can nyid du yod pa de gnyi ga la yang rgyu dang 'bras bu'i dngos po med pa ni ma yin no//de bas na lam gyi 'bras bu yin pa'i phyir ngo bo nyid kyi sku ji ltar 'grub ce na/ rnam par shes pa zhes bya ba la sogs pa smos te/ rnam par shes pa sgyu ma lta bus dmigs par bya ba la sogs pa rang bzhin gyis stong pa'i sems kyi chos thams cad ces bya ba dran pa nye bar gzhag pa la sogs pa rtogs shing mthong ba gang yin pa des thob pa ni shes pa yin no //phyi rol lta ba rnams kyis ni gnyi ga yod pas yul dang yul can nyid dang / rgyu dang 'bras bu'i dngos po'i mtshan nyid du 'thad pa yin gyi/'dir ni sgyu ma'i skyes bu ltar spyad par bya'o/ /zhes smos pas yang dag par na yul dang yul can med pa'i phyir lam gyi yul nyid ma yin no/ /de bas na kun rdzob tu de'i yul yin na yang ngo bo nyid kyi sku 'bras bu nyid ma yin pas bcos ma ma yin par ji ltar 'gyur zhes bya bar dgongs so//ci sku gsum po ngo bo nyid kyi sku las gzhan yin nam zhe na/ sku lhag ma zhes bya ba la sogs pa smos te/ sku lhag ma ni ngo bo nyid kyi sku las gzhan pa'o/ /sku gsum po ni chos dang longs spyod rdzogs pa dang sprul pa zhes bya'o//yang dag pa'i kun rdzob tu snang ba ni ting nge 'dzin gyi shes pa'i yul lo/ /don dam par chos nyid kyi ngo bo ni yang dag par na yul dang yul can nyid med pas gzung ba la sogs pa med pa'i phyir gnyis su med pa'i bdag nyid can no/ /ji ltar mos pas rab tu phye ba zhes bya ba ni nyams su len pa'i mngon par zhen pa las ma 'das par 'byung ba de ni ngo bo nyid kyi sku'i yul du rnam par gzhag pa'am/de'i 'bras bu'i tha snyad yin gyi yang dag par ni tha dad pa ma yin no zhes bya ba'i tha tshig go/ ye shes gcig gi bdag nyid ngo bo nyid kyi sku la 'bras bu 'am/de'i ngo bo nyid rnam pa gsum yin pa 'di ga las shes zhes brtags pa la/ ji ltar mos pas rab tu phye ba ni zhes bya ba'o/ /'di nyid kyi don la rab tu gsal bar bya ba ni/ /sangs rgyas dang zhes bya ba la sogs pa yin te/ sangs rgyas dang byang chub sems dpa' dang nyan thos la sogs pa'i spyod yul nyid yin no zhes bstan pa'i phyir te/longs spyod rdzogs pa'i sku la sogs pa rnam pa gsum bstan pa'i don du de dang tha mi dad kyang zhes bya ba ngo bo nyid kyi sku dang bye brag med na yang tha dad par rnam par gzhag go zhes sku gsum du dbye bas brjod pa ni sku gsum gyi bye brag yin no//ci de las tha dad pa 'am tha mi dad pa yin/ tha mi dad na bye brag yod pa ma yin no zhe na/ bye brag med pa ni lugs las zhes bya ba la sogs pa smos pa yin te/ lugs las zhes bya ba ni rigs par smra ba rnams kyis shes pa yin pas na rigs pa ste /rigs pa'i bstan bcos las so/ /gang gi phyir zhes bya ba ni gang gis na'o/ /dben pa can las ni dben pa tha dad pa nyid du mi 'dod ces bya ba tha dad pa can las tha dad par mi 'dod pa ni dbyer med pa nyid do/ /gang zhig ce na dben pa ste ldog pa'o//ldog pa ni dngos po med pa nyid yin la kun rdzob tu ni dngos po dang bye brag yod pas bye brag can zhes bya ba de nyid ni sangs rgyas pa rnams 'dod kyi gzhan dag ni ma yin pas 'dir yang de nyid kyis sku gsum po bum pa dang snam bu dag bzhin du tha dad pa yin no zhes bya bar dgongs so//de ltar zhes bya ba la sogs pa la byang chub phyogs mthun zhes bya ba la sogs pa chos kyi sku'i tshig le'ur byas pa dang 'grel pa ni go sla'o/ /nang gzugs dang zhes bya ba la sogs pa chung ngu dang chen po'i rnam pa dag ni chung ngu dang rgya chen po dag gis lta ba rnam pa gnyis dang / zil gyis mnan pa'i shes pa rnam pa gnyis te bzhi dang / de bzhin bzhi pa gnyis pa ste/ zil gyis gnon pa'i skye mched rnam pa brgyad do/ /nyan thos la sogs pa dang thun mong ma yin pa'i sangs rgyas kyi smon gnas mkhyen pa ni mtshan ma zhes bya ba la sogs pa smos pa yin te/yang dag par zhes bya ba phyir mi ldog par ro/ /mtshan ma thams cad dang zhes bya ba rgyu dang bral zhing spangs pa dang / chags pa bcom pa ste/ mngon par chags pa dang / nyon mongs pa'i bag chags dang bcas pa la sogs pa dang bral ba gang yin pa de dang / the tshom sel bar mdzad pa ste/'dri ba'i lan ldon par byed pa'i 'og nas bshad pa'i smon lam gang yin pa de grub cing rdzogs pas 'khor ba ji srid par zhes bya ba sems can gyi srid pa ci snyed pa dang / rnam par grol ba ci srid pa'i gnas skabs su zhes bya ba 'tshang rgya ba nyid kyi bar du 'jug cing rgyun mi 'chad par rab tu 'jug pas na smon gnas mkhyen pa ste/de bzhin gshegs pa gzhan gyi don la nges pa'i ye shes so/ /de bzhin gshegs pa'i ste/ phyin ci ma log pa'i ye shes dang ldan pa'i sku dang gsung dang thugs kyi spyod pa yongs su dag pa gang du byung ba de ni 'di'i bsrung ba med pa rnam pa gsum yin no zhes 'og ma dang sbyar ro//sku la sogs pa gsum rnam par dag pas log par kun tu spyod pa nyid ga la yod de/ gang lus la sogs pa ma dag par gyur na rgol ba po gzhan gyis yongs su shes pa ste/ gzhan gyis yongs su shes shing kun nas mkhas pa de las bsnyengs shing 'jig pa ni yongs su shes pa'i skrag pas bcab par bya'o snyom pa'i zhes bya ba so so'i skye bo dang 'dra bar bdag nyid kyis mi shes pa sbed cing 'chab pa zhes bya ba nges par 'byed pa yin pa las mi mnga'o zhes bya ba brnyes pa 'di de bzhin gshegs pa la mi mnga' ste/thams cad mkhyen pa nyid yin pa'i phyir ro zhes bya bar dgongs so/ /chos kyi sku'i gnas skabs su slob dpon rnams kyis log par rtogs pa mang du yod do zhes bstan pa ni/ kha cig na re zhes bya ba la sogs pa smos pa yin te/dran pa nye bar gzhag pa la sogs pa'i byang chub kyi phyogs la sogs pa thams cad kyang gnas yongs su gyur pas zhes bya ba zag pa dang bcas pa'i phung po'i rten du gyur pas zhes bya ba gnyis su med pa'i ye shes su grub pa'o/ /de'i spros pa med pa'i ye shes kyi bdag nyid chos kyi skur mngon par brjod do zhes kha cig zer zhing khas len pa ni gcig yin no//gzhan dag ni gzhan du 'dod de/ /de ni thub pa'i zhes bya ba smos te/ de'i phyogs ltar na/ thub pa'i ngo bo nyid sku ni/ /zhes bya ba la sogs pa'i tshig le'ur byas pa dang / byang chub phyogs mthun tshad med dang / /zhes bya ba la sogs pa'i tshig le'ur byas pa don gcig ste/ngo bo nyid kyi sku kho na chos kyi sku nyid du 'chad do snyam mo/ /'dir kha cig nyes pa yod par smra ste de ni gzhan dag na re zhes bya ba la sogs pa yin te/ de dag gi ltar na ngo bo nyid kyi sku la chos kyi sku dbye ba nyid yin na/ rnal 'byor pa'i kun rdzob tu rdzogs pa'i sangs rgyas la sogs pa'i tha snyad kyi dbang gis don khyad par can snang ba skyed pa zhes bya ba gdul bya rnams kyi bsam pa ji lta ba bzhin du nges par legs pa dang /mngon par mtho ba'i shes pa 'thob pa de'i sgo nas te/ de'i dbang gis gnas yongs su gyur pa zhes bya ba zag pa dang bcas pa'i phung po'i gnas ldog cing yongs su gyur pa zag pa med pa nyid kyis gzhan gyi don nus pa nyid du yang 'khrungs te/chos ston pa la sogs pa'i don gyi bya ba mdzad pa gnyis su med pa'i sems dang sems las byung ba gdon mi za bar khas blang dgos pa rnams gzhan gyi don 'dod pa rnams kyis nges par 'dod par bya'o//gzhan du na rten med pa nyid kyis na gzhan gyi don med par thal bar 'gyur ro/ /des na ji ltar bsdu bar bya ste/ /ma yin pa kho na'o zhes bya ba ni gzhan dag gi yin te/ ngo bo nyid kyi sku dang chos kyi sku dag ye shes kyi bdag nyid can nyid dang /sangs rgyas kyi spyod yul nyid yin par mtshungs na yang 'gro ba'i don mdzad pa'i sems dang sems las byung ba'i bdag nyid kyi chos kyi sku dang / ngo bo nyid kyi sku ni de las tha dad pa yin pas de gnyis bye brag med na 'gro ba'i don mdzad pa'i sems dang sems las byung ba tha mi dad do zhes bya ba ni nyes pa rjod par byed pa'i bsam pa yin no//yang gzhan dag ni gzhan du 'dod de/ de ni kha cig na re zhes bya ba la sogs pa smos pa yin te/ sku bzhi bshad pa las sngar mdor bsdus pa bstan pa las/ ngo bo nyid longs rdzogs bcas dang / /zhes bya ba la sogs pa'i tshig le'ur byas pa las ngo bo nyid kyi sgra'i rjes thogs la chos kyi sku'i sgra mi 'byung zhing mi smos pas sku gsum po kho na'o zhes bya ba'i ngo bo nyid dang /longs spyod rdzogs pa dang sprul pa'i sku ste gsum yin gyi chos kyi sku ni ma yin no zhes zer te sangs rgyas kyi yul yin pa nyid kyis na ngo bo nyid kyi sku dang chos kyi sku de dag ni gcig tu smos par rigs kyi ngo bo nyid la sogs pa'i sku las chos kyi sku logs shig tu yod pa ma yin no zhes bya bar dgongs so//gzhan dag ni 'dir sku gsum po yang ji ltar yod/ mdzad pa'i dbang gis yin no zhe na / bzhi pa yang byang chub phyogs mthun zhes bya ba la sogs pa de ltar rnam par gzhag pa la gegs byed pa su zhig yod rigs su zin na yang bsdus pa'i don las grangs bzhi smos pa don med par thal bar 'gyur ba dang /sku bzhi pa dgag pa'i lung yang med de/ bsgrub pa nyid snang ba'i phyir ro/ /gang yang ngo bo nyid ces bya ba'i sgra'i mjug thogs su chos kyi sku zhes bya ba'i sgra mi 'byung bas zhes gang smra ba de yang rigs pa ma yin te/gang zhig gang dang 'brel pa ni/ /ring na 'dug kyang de dang der/ /zhes bya ba'i tshul gyis ring po na 'dug pa nyid yin na yang ngo bo nyid dang chos kyi sku zhes 'brel par bya bar nus pa'i phyir ro/ /gzhan dag ni rgyu gsum gyi sku rnam pa bzhi yin par 'dod de/ de ni gzhan dag na re zhes bya ba la sogs pa smos pa yin te/ dgos pa nye bar bstan pa'i shugs kyis zhes bya ba ni sngar bshad pa'i sku bzhi po dgos pa gzhan du mi 'thad pas so/ /tshig le'ur byas pa sbyar ba'i ngor zhes bya ba/ ngo bo nyid longs rdzogs bcas dang / /zhes bya ba la sogs pa'i go rims kyis tshig le'ur byas pa'i ngor ye shes nyid kyis mdzad pa yin pa'i 'brel pa'i don gyis ngo bo nyid kyi ye shes kyi sku'i mdzad pas sku gsum dang 'brel par bya ba'i don du dang zhes dang gi don blta bar bya'o//de skad du gsungs pa yin te zhes bya ba ni gang 'brel pa dang / gang dang 'brel pa de thams cad gcig tu byas nas sku bzhir bshad do//de'i phyir te rgyu des na sngon dang phyi ma 'gal ba'i nyes pa yod pa ma yin zhing phyogs gzhan nas smos pa'i lung dang lung ma yin pa dag las sku bzhir gsungs pa thams cad mi 'gal ba yin no zhes gzhan dag khas len pa yin te/ bshad ma thag pa'i bshad pa'i rigs 'di nyid kyi phyogs legs pa yin no zhes bya ba ni smra ba po'i bsam pa yin no//nyan thos la sogs pa'i zhes bya ba la sogs pa la/ nyan thos nyon mongs med pa'i lta/ /zhes bya ba la sogs pa'i ting nge 'dzin dang / sangs rgyas smon gnas mkhyen pa ni/ /zhes bya ba la sogs pa smon gnas mkhyen pa'i tshig le'ur byas pa dang 'grel pa ni go sla'o//de bzhin du yang lhun gyis grub pa la sogs pa'i mtshan nyid can gyi smon lam gyi stobs kyis mdzad pa mi mnga' na yang yid bzhin gyi nor bu dang 'dra bar bcom ldan 'das kyi thad nas don gyi bya ba thams cad snang du rung ba nyid yin pas na ci'i phyir gang gi tshe gang du 'jug par 'gyur zhes rtogs pa la rtag tu thams cad la khyab pa dang rnam par mi rtog pa'i thugs rje gang yin pa de ni thugs rje chen po'o//de'i ngo bo nyid kyi chos kyi sku ni ye shes kyi sku gang yin pa ste/ de la bzhugs pa ni de la bcom ldan 'das bzhugs par gyur pa na ji ltar te rnam pa gang gis/rtag tu ji ltar don mi mdzad/ /de bzhin du/ /rgyu ni ma tshang med pa na/ /de la 'bras bu gang gis dgag /ces bya ba ni tshul gyis don gyi bya ba mdzad pa'i bcom ldan 'das dang don du gnyer ba dag yod pas rtag tu sems can rnams kyi mngon par 'dod pa'i don rdzogs par mdzad par rung ba nyid yin no zhes bya ba 'di la lan gdab pa'i phyir/bcom ldan 'das thams cad du khyab pa yin na yang phyogs gcig pa'i skye bo ltar don gyi bya ba mdzad pa nyid du bstan par bya ba'i phyir bar skabs kyi tshigs su bcad pa'i rgyu ni zhes bya ba la sogs pa gsungs pa yin te/ rgyu yongs su smin pa ni sangs rgyas la dmigs pa la sogs pa 'tshang rgya ba nyid kyi rgyu gus pa dang bcas pa la sogs pa'i rim gyis goms pa mthar thug par gyur pas sbyin pa la mngon par phyogs pa brnyes par gyur nas gdul bya gang dag gang la gang dang gang tshe phan par gyur pa ste/ ma 'ongs pa na phan pa'i chos ston pa la sogs pa de dang de la ste/ gdul bya de dang de la bcom ldan 'das de snang ngo zhes bya ba snang ba dang rjes su mthun pa'i tshul gyis de bzhin du kun nas don mdzad par 'gyur ba yin no/ /don 'di nyid ni dge ba'i bshes gnyen zhes bya ba la sogs pa smos pa yin te/dge ba'i bshes gnyen zhes bya ba bla ma dang mkhan po la sogs pa dang phrad pas des bstan pa las sangs rgyas la sogs pa la dmigs pa ni rdo rje skyil mo krung la sogs pas mdun du sangs rgyas dang byang chub sems dpa' la sogs pa yul tu byas pas rgyu ste/ lam la sogs pa bslabs pas yongs su brtas par gyur nas 'tshang rgya ba'i 'bras bu sbyin pa la mngon par phyogs pa'i rgyu brnyes pa'o//lam la sogs pa brnyes pa nyid kyang ga las yin zhe na/ sngon bskyed pa'i dge ba'i rtsa ba'i sa bon yod pa las zhes bya ba smos te/ sngon bskyed pa ni byas pa ste ci zhig ltar sangs rgyas la sogs pa la me tog gcig 'bul ba la sogs pas dge ba ste/nyon mongs pa ngan pa tshar gcod pa'i rgyu'i bsod nams gang yin pa de nyid ni rtsa ba'i sa bon te/ dang por sangs rgyas la sogs pa la mngon par dad pa nyid kyi rgyu yin la/ de mnga' zhing yod pas sems can gang la ste/ rnam pa thams cad mkhyen pa nyid la sogs pa'i gdul bya rnams la gang gi dus su zhes bya ba skal ba dang rjes su mthun pa'i dus na chos bstan pa la sogs pa mdzad pas na zhes bya ba thams cad mkhyen pa nyid la sogs pa gsungs pas mngon par mtho ba dang nges par legs pa la gzhag pa skyed pa na yul du 'phrod par 'gyur ba ste/skye ba thams cad du phan par 'gyur ba de'i tshe rnam pa thams cad mkhyen pa nyid la sogs pa'i gdul bya la sogs pa de'i don bya ba'i phyir zhes bya ba bshad ma thag pa'i mngon par mtho ba dang nges par legs pa bsgrub par bya ba'i phyir sngon gyi smon lam grub cing rdzogs pas bcom ldan 'das de dang der snang ba dang 'tsham par don gyi bya ba mdzad pa yin no zhes tshig le'ur byas pa bshad cing 'phags pa byams pa'i dgongs pa brjod pas bshad ma thag pa'i don nyid gsal bar bya ba ni dus thams cad du zhes bya ba la sogs pa smos pa yin te/dus thams cad du ni rnam pa thams cad du'o//yid bzhin gyi nor bu ltar zhes bya ba ni bdag nyid chen po 'ga' zhig mya ngan las 'das su zin kyang sems can rnams kyi don bya ba'i phyir yid bzhin gyi nor bu sprul pa des bka' stsal pa'i don rdzogs par bya ba'i phyir ji ltar thams cad du khyab pa yin na yang sems can rnams kyis log par spyad pa'i nyes pas de ltar don mi byed do//de bzhin du nye bar gnas kyang zhes bya ba bcom ldan 'das thugs rjes sems can rnams kyi mngon par 'dod pa'i don rdzogs par bya ba'i phyir mdun na bzhugs kyang 'bras bu ster bar mdzad par mi mngon no/ /ci'i phyir zhe na/ rang gi las kyi nyes pas zhes bya ba sems can rnams kyis nyes par spyad pa'i las kyi nyes pas bskyed pa gang yin pa la rgyu ma tshang bas zhes bya ba bcom ldan 'das kyi thad nas mngon par 'dod pa'i don len du rung ba'i sems dang bral zhing med la de bas na bcom ldan 'das thams cad du don gyi bya ba mdzad pa yin na yang sems can rnams kyi skal ba'i nyes pas don gyi mdzad pa mi mdzad pas yid bzhin gyi nor bu ltar med pa ma yin zhing /don gyi bya ba mi mdzad pa yang ma yin la mi snang ba yang tshad ma ma yin te/ skal ba dang 'tsham pa nyid kyi rim gyis de yod pa ma yin no zhes 'phags pa byams pa'i dgongs pa nye bar bstan pa yin no zhes bya bar dgongs te/'di na snod min sems can gang yang med/ /'gro ba 'di dag thams cad sangs rgyas 'gyur/ /zhes gsungs pa yin no/ /'di dag kho na brgya byin gyis dpes gsal bar bya ba ni ji lta bu zhes bya ba la sogs pa smos pa yin te/ lha'i rgyal pos zhes bya ba la sogs pa'i tshig le'ur byas pa dang 'grel pa ni go sla'o//bcom ldan 'das 'og min la sogs par rtogs pa'i rgyud la gnas pa ni gcig tu rnam par gnas shing rtag pa ni rim dang cig car dag gis don gyi bya ba mdzad par mi 'thad pas mi rtag pa nyid yin na yang khyab pa dang rtag par brjod pa mi 'gal lo zhes bstan pa ni ye shes kyi zhes bya ba la sogs pa smos pa yin te/de ltar mdzad pa zhes bya ba la sogs pa'i tshig le'ur byas pa dang 'grel pa ni go sla'o/ /gsum la longs spyod rdzogs pa'i sku ni de ltar sku gnyis zhes bya ba la sogs pa smos pa yin te/ mtshan ni zhes bya ba la sogs pa mtshan rnams kyi tshig le'ur byas pa dang 'grel pa ni go sla'o/ /las gang zhig byas pas mtshan 'grub pa'i las de'i rgyu mtshan nyid ni rgyu grub pas zhes bya ba la sogs pa smos pa yin te/ 'di la mtshan ni zhes bya ba la sogs pa'i tshig le'ur byas pa dang 'grel pa ni go sla'o//bzhi pa sprul pa'i sku ni de ltar sku gsum zhes bya ba la sogs pa smos pa yin te/ gang gis zhes bya ba la sogs pa'i tshig le'ur byas pa dang 'grel pa ni go sla'o/ /de ltar khyad par gyi bya ba brjod nas da ni ngo bo nyid la sogs pa'i sku bzhi'i thun mong gi mdzad pa ni de ltar ngo bo nyid kyi zhes bya ba la sogs pa smos pa yin te/ye shes la sogs pa la ltos nas rab tu brtags pa'i zhes bya ba ni gdul bya dang rjes su mthun pa'i snang ba'i don thob pa'i dbang gis nges pa'o/ /de nas ci zhig bya zhe na/ de'i dbang la zhes bya ba la sogs pa smos pa yin te/ gdul bya'i skye bo so so'i snod la snang ba la brten pa'am zhes bya ba bcom ldan 'das kyi skur gtogs pa thams cad rnam par mi rtog pa nyid yin pas mdzad pa mi mnga' ba'i phyir phrin las de dang 'tsham pa'i gdul bya'i skye bo rnams kyi snang ba la gnas pa'i phrin las sngar bshad pa dang 'og nas bshad pa gang yin pa de'i dbang la brten nas byung ba ste/smon lam gyi dbang gis rnam par mi rtog pa'i ye shes yongs su rdzogs pa yin par gsungs te zhes 'og ma dang sbyar ro/ /gal te phrin las 'di dag sku bzhi'i ma yin nam de lta na ci ltar chos kyi sku zhes 'phags pa byams pa'i zhal snga nas kyis gsungs she na/ kun rdzob tu zhes bya la sogs pa smos pa yin te/kun rdzob tu sangs rgyas la sogs pa'i tha snyad kyi dbang gis ye shes kho na zhes bya ba gnyis su med pa'i ye shes nyid don gyi bya ba mdzad pa yin te/ yang dag par na gzhan dag yin par mi 'thad pa'i phyir ro/ /mi 'thad pa nyid yin na yang ye shes ni bsnyon mi nus par yod pa nyid kyi de nyid sems can rnams kyi mngon par 'dod pa'i don rdzogs par byed pa yin la rgyu des na chos kyi sku yin no zhes smos pa yin te/chos kyi sku ni ye shes kyi sku'i yin la de ni yang dag par na don gyi bya ba ma lus par mdzad pa yin no zhes 'phags pa byams pas gsungs pa yin no/ /mdzad pa med pa'i ye shes kyi don bya ba mdzad pa nyid du ga la rung zhe na/longs spyod rdzogs pa'i sku la sogs pa'i snang ba bskyed pa'i sgo nas zhes smos pa yin te/ sngon gyi smon lam gyi 'phen pa'i shugs kyis byang chub sems dpa' la sogs pa rnams la longs spyod rdzogs pa dang / chos dang sprul pa'i skur snang ba bskyed par mdzad pa yin pa'i phyir ro//de nyid kyis na/ de'i dbang la brten nas byung ba zhes smos pa yin te/ gzhan du na ji skad smos pa'i phrin las rnams yang dag par na chos kyi sku'i 'bras bu nyid du mi 'gyur ro zhes bya bar dgongs so/ /gal te gzhan dag /tshogs dang chos kyi sku dag dang / /'gro ba'i don ni mdzad pa yis/ / sangs rgyas thams cad mnyam pa ste/ /sku tshe rigs dang tshad kyis min/ /zhes bya ba la sogs pa smos pas sku bzhi char tshogs la sogs pa mnyam pa yin na yang longs spyod rdzogs pa dang / sprul pa'i sku dag ni rtogs pa po'i dbye bas de'i khyad par du 'gyur na/ ngo bo nyid kyi sku dang chos dang chos kyi sku dag ni rnam par mi rtog pa'i ye shes kyi bdag nyid yin pa'i phyir dang /sangs rgyas kyi yul nyid yin pa nyid du mnyam pas rgyu dang 'bras bu nyid du bdag cag la sogs pas shes par mi nus pa nyid yin pa'i phyir/ sangs rgyas rnams kho na'i yul yin no/ /kha cig na re ngo bo nyid kyi sku gang yin pa de ni sangs rgyas kyi yul ma yin no zhes zer ro//de ni mi rigs te/ de mkhyen pa med par de dang 'brel pa'i sku gsum du sangs rgyas kyi rnam par gzhag pa mi 'thad pa'i phyir dang / sangs rgyas kyis ma gzigs pa nyid kyis na ngo bo nyid kyi sku med pas sku gang yang yod par mi 'gyur te/ sku cig shos rnams ni de dang 'brel ba yin pa'i phyir ro//sangs rgyas rnams kyi ngo bo nyid kyi sku yod kyang ma mkhyen par gyur na/ sangs rgyas rnams la mi mkhyen pa'am ma gzigs pa 'am ci yang mi mnga'o zhes bya ba dang yang 'gal bar 'gyur ro/ /mtshan yang dag par brjod pa las/ /sangs rgyas sku lnga'i bdag nyid can/ /zhes smos pa de yang 'thad pa kho na yin te/sprul pa'i sku'i dbye ba rnam par smin pa'i sku yod pa yin pa'i phyir ro/ /yang na rnal 'byor pa'i rgyud la so sor nges par yod pas rtag pa dang khyab pa gang yin pa 'di ni rdzogs pa'i sangs rgyas kyi chos kyi sku ste/ dngos gzhi yin la de'i ngo bo nyid dang longs spyod rdzogs pa dang sprul pa dang chos kyi sku'i dbye bas//sangs rgyas sku lnga'i bdag nyid can/ /zhes bya ba dang mi 'gal lo/ /'di'i don dang / /ngo bo nyid longs rdzogs bcas dang / /zhes bya ba la sogs pa'i tshig le'ur byas pa nyid las shes so/ /de bzhin du mdzad pa dang bcas pas 'gro ba rnams zhi ba la sogs pa la 'jug par mdzad pas na mdzad par bcas pas te/dngos gzhi'i chos kyi sku gang yin pa 'di ni/ chos kyi sku dang de rnam brgyad/ /ces bya ba 'dir/ chos kyi sku zhes bya ba de/ /rnam pa bzhir ni yang dag brjod/ /ces bya ba 'di ji lta yin zhe na/ de nas/ ngo bo nyid longs rdzogs bcas dang / /zhes bya ba la sogs pa dang sbyar ro/ /gang de bzhin gzhan zhes smos su zin kyang de bzhin du chos kyi sku zhes de yang ston par 'gyur te/'dir dngos gzhi las gzhan pa ni chos kyi skur bshad pa nyid yin pa'i phyir ro/ /gang yang / chos kyi sku yi phrin las 'di/ /zhes smos pa de yang 'thad pa yin te/ de la yang dngos gzhi nyid chos kyi skur bshad pa nyid kyis dngos gzhi ni gang du yang 'bras bu nyid du mi bgrang ste/des de nyid bye brag tu byas pa ni ma yin pas de'i phyir de ni tha dad pa nyid yin la/ de nas ngo bo nyid la sogs pa'i sku bzhi po 'bras bur gyur pa dang bcas pa nyid kyis na rgyur gyur pa chos kyi sku yang 'grub pa yin no zhes bya ba 'gal ba ci zhig yod gang yang sangs rgyas la sogs pa'i yul chos dang longs spyod rdzogs pa dang sprul pa'i sku gsum ni ngo bo nyid kyi sku'i bdag nyid can nyid yin par ngo bo nyid kyi sku'i bdag nyid can zhes bya ba la sogs pas seng ge bzang po'i zhal snga nas kyi bstan pa de dang 'gal ba med do//dngos gzhi'i chos kyi sku las ngo bo nyid kyi sku ni 'ga' zhig gis kyang dbye ba med par de brjod pa yin pa'i phyir ro//gzhan du na chos kyi sku'i don gyi mdzad pa ngo bo nyid kyi sku'i dbang las byung bar ji ltar 'gyur/ sku gsum po yang ngo bo nyid kyi sku'i bdag nyid can yin du chug na dngos gzhi'i chos kyi sku las rang bzhin gang gi ngo bo nyid gzhan yin zhing gang las byung ba nyid kyis na ngo bo nyid kyi sku zhes bshad pa yin pa yang rtogs par gyis shig /longs spyod rdzogs pa'i sku dang sprul pa'i sku dag ni byang chub sems dpa' dang nyan thos kyi spyod yul yin par dbye ba yod du chug na dngos gzhi'i chos kyi sku las chos kyi sku gzhan gyi dbye ba ci ltar yod/ de'i yul yin pa'i phyir sangs rgyas rnams kho na'i thugs su chud par bya ba yin te/gzhan du na ngo bo nyid kyi sku dang chos kyi sku dag gis dbye ba mi 'grub par 'gyur ro/ /'dir yang don ni skad cig ma gcig la mngon par rdzogs par byang chub pa'i rjes thogs la chos kyi sku'i mngon par byang chub pa yin la/ de yang ngo bo nyid kyi sku la sogs pa'i dbye bas rnam pa bzhi yin no zhes bzang po'i zhal snga nas kyis bshad pas log par rtogs par mi bya'o//sku lnga yin pa kho nar sngon gyi slob dpon gyis bshad pas bla ma la gus par bya ba'i phyir bzang po'i zhal snga nas kyis gsal por ma mdzad mod kyi gtso cher theg pa chen po ni tshul gnyis la brten pa nyid yin pa'i phyir/ mtshan yang dag par brjod pa ni phyi'i tshul ltar 'gal bar btang snyoms su bya bar rigs pa ma yin no//bdag gi 'bad pa ni skabs la ma bab pa ma yin zhing dam pa'i chos nub pa'i dus su bdag cag bcom ldan 'das la mchod par mngon par dga' ba rnams btang snyoms su byed par rigs pa ma yin te/ ting nge 'dzin gyi rgyal po las/skyes bu khyu mchog gis ni dam pa'i chos/ /'jig par gyur tshe gang dag btang snyoms bsgom/ /de yis rgyal bar bkur sti byas ma yin/ /'dren pa dag la ri mor des ma byas/ /zhes gang bshad pa yin no/ /zhar la 'ongs pas chog go/ /de bzhin las kyang zhes bya ba la sogs pa'i tshig le'ur byas pa dang 'grel pa ni go sla'o//dang por 'gro ba bzang po dang bzang po ma yin pa zhes bya ba ni bram ze dang / rgyal rigs kyi 'gro ba dang rje'u rigs la sogs pa'i 'gro ba ste/ de la mngon par zhen pa ni bzang po dang bzang po ma yin pa nyid du mngon par chags pa'o/ /de la gnas pa med pa ni mi dmigs pa gang yin pa ste/ de'i mtshan nyid du 'gro ba rab tu zhi ba'i phrin las mdzad nas zhes bya ba ni/sdug bsngal phyin ci log blo dang / /srid pa kun nas 'ching ba'i rgyu/ /'gro ba gang la de med na/ /de ni skye bar 'gyur ma yin/ /zhes bya ba lung gang gi don gyi rjes su 'brangs nas nyon mongs pa la sogs pa'i dbang gis skye ba gang yin pa de med par mdzad pa ste/ chos yang dag par sdud pa'i mdo las gdul bya'i lus ni chos kyi sku'i spyod yul lo zhes smos pas sangs rgyas rnams kyi chos kyi sku nyid yin na yang skye ba bzlog par mdzad do zhes bya bar dgongs so//de lta na ni smon lam dang 'gro ba'i don la sangs rgyas rnams dang byang chub sems dpa' khyad par ci zhig yod ce na/ rnam par rtog pa dang bcas pa dang rnam par rtog pa med pa nyid dang /gdul bya'i khyad par las yin gyi gzhan 'ga' yang med do/ /de nyid kyis na de bzhin gshegs pa'i gsang ba bstan pa la sogs pa'i mdo las/ de rnams kyang sangs rgyas dang 'dra bar lus dang spyod lam mtha' yas shing dpag tu med par bshad pa yin no/ /rdzogs pa'i sangs rgyas kyi ye shes rtog pa dang bcas pa nyid du med pa ma yin nam/ji ltar na de dang lhan cig de rnams 'gro ba'i don gyi phyir mnyam pa yin zhe na/ 'dir smon lam kho na tshad ma yin te/ bcom ldan 'das kyis byang chub sems dpa' rnams ni smon lam gyi stobs can yin no zhes gang gsungs pa yin no/ /de lta na ni rnam pa thams cad du mnyam pa kho nar 'gyur ro//smon lam ni gzhan du mi 'thad pas nyes pa ci zhig yod/ rdzogs pa'i sangs rgyas rnams ni rnam par mi rtog pa nyid yin pas byang chub sems dpa' rnams kyi rnam par rtog pa nyon mongs pa nyid du mi 'gyur ba ma yin nam/ med pa kho na ste gang gi tshe des gdul bya de'i don du rdzogs pa'i sangs rgyas su 'gyur na phyis rnam par rtog pa'i nyon mongs pa ga las 'byung /smon lam las so/ /de lta na ni rdzogs pa'i sangs rgyas nyid brdzun pa yin no zhe na/ ma yin te/ des 'dul ba rnams kyis de ltar mthong ba'i phyir ro/ /de bzhin du nyan thos la sogs pa'i rnam pa 'dzin par mdzad pa yang brdzun pa ma yin no zhes blta bar bya'o//ji ltar na gcig pu du ma nyid du 'gyur zhe na/ rdzogs pa'i sangs rgyas rnams kyi smon lam ji lta ba las so/ /gzhan yang gzhan du na sangs rgyas rnams kyi smon lam gyis rnam par mi rtog pa nyid du kun nas don gyi bya ba mdzad pa'i rgyur snang ba yin la/ de bzhin du gal te rnam par rtog pa dang bcas pa nyid yin par gyur na yang 'dir 'gal ba ci zhig yod de/gnyi ga smon lam kho nas don gyi bya ba mdzad pa yin par bsngags pa'i phyir ro/ /gal te pha rol 'dod pa ltar la la ni 'tshang rgya ba nyid bsgrubs nas sems can gyi don mdzad la kha cig ni ma yin no zhes bya ba 'di la brtsad par rigs pa ma yin te /sems can rnams ma yin pa'i phyir ro/ /rdzogs pa'i sangs rgyas nyid yin pa'i phyir 'dir rnam par rtog pa nyon mongs pa nyid yin pa'i phyir byang chub sems dpa' rnams kyi grol ba ci zhig yin/ 'gro ba'i don la ma gtogs pa/ /gzhan ci'ang yod pa ma yin te/ /sems can rnams kyi grol ba las/ /dga' ba'i rgya mtsho gang yin te//de nyid mthar thug ma yin nam/ /ro bral grol bas ci zhig bya/ /zhes gang bshad pa yin no/ /mnyam par ma bzhag pa nyid kyang ma yin te/ las dang po pa ma gtogs par de bzhin gshegs pa'i gsang ba bstan pa las rtag tu mnyam par gzhag pa gsungs pa yin no/ /yang na byang chub sems dpa'i gnas skabs ma gtogs par rdzogs pa'i sangs rgyas kyi gnas skabs na yang rnam par rtog pa'i nyon mongs pa nyid ni rnam pa thams cad mkhyen pa nyid dang 'dra bar yod pa nyid de'i 'bras bu mi skyed pas don mi mdzad pa yin te/shAn+ta de ba'i zhal snga nas/ /mkha' lding grub pas ji lta bur/ /mchod sdong bsgrubs pas 'das gyur na//de 'das yun rings lon yang de/ /dug la sogs pa zhi bar byed/ /byang chub spyod dang rjes mthun pas/ /rgyal ba'i mchod sdong bsgrubs pa yang / /byang chub sems dpa' 'das gyur kyang / /don rnams thams cad mdzad par 'gyur/ /zhes gang bshad pa yin no/ /de ltar na 'gro ba'i don du smon lam ji snyed btab pa dang /'tshang rgya ba nyid la 'jug pa'i rnam par rtog pa de rnams thams cad nyon mongs par 'gyur ba ma yin nam nyes pa ci zhig yod/ rdzogs pa'i sangs rgyas kyi rigs med par 'gyur ro/ /byang chub sems dpa' nyid rim gyis sangs rgyas kyi rigs su 'gyur gyi gzhan dag ni ma yin te/ 'gro la phan phyir sangs rgyas 'grub par shog / ces bya ba la sogs par smon lam btab nas/ de rnams nyid du 'jug pa yin pa'i phyir ro/ /de bas na nyan thos la sogs pa'i rigs kyang gzhan ma yin te/ 'gro ba'i don du smon lam btab pa las gzhan du mi 'thad pa'i phyir ro/ /'dir theg pa ni gcig kho na ste/ 'di lta ste theg pa chen po'o zhes gang gsungs pa dang / mdo sde rgyan las kyang /kha cig dag ni drang phyir dang / /gzhan dag nges par gzung ba'i phyir/ /rdzogs pa'i sangs rgyas rnams kyis ni/ /ma nges rnams la theg gcig bstan/ /zhes bshad pa 'di yang brgya phrag du mar nyan thos kyi theg par yongs su mya ngan las 'das so zhes mdo las gang gsungs pa yin no/ /de bas na rnam par rtog pa nyon mongs pa nyid yin pas byang chub sems dpa' kho na des 'dul ba rnams la rdzogs pa'i sangs rgyas dang /rang sangs rgyas dang brgya byin la sogs pas 'dul ba rnams la brgya byin la sogs pa'i gzugs su gdul bya rnams kyis mthong ba yin pas/ gang du yang mi gnas pa nyid kyis na/ mi gnas pa'i mya ngan las 'das pa la zhugs so zhes thams cad du bshad do//byang chub sems dpa' rnams kyi rnam par rtog pa ni nyon mongs pa nyid yin no zhes zhar las 'ongs pa bshad nas skabs la bab pa dang sbyar bar bya ste/ de ltar na zhes bya ba bshad pa'i rim pas so/ /chos kyi sku bzhin du zhes bya ba ni khyab pa'i ye shes kyi bdag nyid can no/ /'di ni chos kyi sku'i phrin las nyi shu rtsa bdun yang zhes bya ba ni phrin las ni chos kyi sku'i mdzad pa'o//'khor ba ji srid bar bzhed pas zhes bya ba ni sems can rnams kyi srid pa ji srid bar ro/ /'phags pa byams pa'i zhal snga nas kyi ting nge 'dzin rnams las skyes pa'i ye shes kyi stobs dang / lung las sems bskyed pa la sogs pa'i rim gyis de'i bya ba nyid kyis 'gro ba rnams zhi bar mdzad pa la sogs pa'i phrin las bstan par mdzad pas tshig le'ur byas par rim pa bstan par 'gyur ba ma yin nam/khyed cag gis gzhan gyi don dang rang gi don la sogs pa'i tshig bstan pa rnams kyi go rims ji lta bu yin zhe na/ sems bskyed pa zhes bya ba la sogs pa smos pa ste/dang po dang tha mar sems bskyed pa dang / rnam pa nyi shu rtsa bdun gang yin pa de las gang bstan pa'i go rims rab tu byed pa las bsnan pa'i 'grel pa las bshad pa'i rim pa gang yin pa des de'i dbang gi lhag ma bar gyi tshig gi don rnams te/ gzhan gyi don dang rang gi don gang yin pa de rnams kyi go rims kyang khong du chud par bya ste zhes bya ba byams pa'i zhal snga nas kyi tshig le'ur byas pa las ma bstan na yang shes par bya'o//khyed cag rnams ni 'phags pa byams pa dang 'dra bar ting nge 'dzin thob pa nyid yin nam/ de'i phyir khyed cag sngar bshad pa'i tshig gi don rnams kyi go rims ji ltar shes she na / lung las so/ /bris shig ces na tshig mangs su dogs pas bdag gis ma bris so zhes bya ba smos te/lung yod du zin na yang gzhung rgya ches pa'i 'jigs pas de'i sgo nas gzhan gyi don la sogs pa'i go rims ma bstan mod kyi 'on kyang de'i don gyi rjes su 'brangs nas 'phags pa byams pa dang 'dra bar gzhan gyi don la sogs pa'i phrin las kyi rjes su 'brangs nas rim pa tsam zhig bstan pa yin no zhes bya bar dgongs so//shes rab kyi pha rol tu phyin pa'i man ngag gi bstan bcos mngon par rtogs pa'i rgyan las seng ge bzang po'i zhal snga nas kyi gzhung rtogs par dka' ba'i snang ba mdor bshad pa chos kyi grags pas bshad pa las skabs brgyad pa'i 'grel pa'i bshad pa'o// //rgyas pa la dad pa'i zhes bya ba la sogs pas ni bar ma la dga' ba'i sems can la phan gdags par bya ba'i phyir mngon par rtogs pa drug ni mtshan nyid ces bya ba la sogs pa gsungs pa yin te/ tshig le'ur byas pa'i don ni dang por zhes bya ba la sogs pa gsungs pa yin te/ dang por te thog mar rnam pa thams cad mkhyen pa nyid la sogs pa thams cad mkhyen pa nyid gsum ni sngar gsungs pa gang yin pa de rnams kyi mngon par mtshon pa'i gnas yin pa nyid kyis na/de rnams kyi gzugs la sogs pa'i yul thams cad kun nas bsdus pas gzugs la sogs pa'i yul nye bar mtshon pa nyid yin pas mtshan nyid de/thams cad mkhyen pa nyid gsum mo/ /de nas dbang du bya ba'i phyir/ /zhes bya ba la sogs pa ni go sla'o/ /bar ma la dga' ba zhes bya ba la sogs pas mdor bsdus pa la dga' ba'i sems can la phan gdags par bya ba'i phyir mngon par rtogs pa gsum gsungs pa'i yul gyi rgyun ni zhes bya ba la sogs pa'i tshig le'ur byas pa dang 'grel pa ni go sla'o//tshig le'ur byas pa gnyis ni sngar bshad pa'i skabs brgyad kyi khongs su 'dus pa'i don yin pa'i phyir skabs nyid du ma bgrangs so zhes blta bar bya'o/ /dgongs pa la sogs pa dngos su brjod pas mdo dang rnam par 'grel pa'i mtshan nyid du med de tshig le'ur byas pa'i mdo dang rnam par 'grel par mi brjod kyi/'on kyang rgya cher bshad pa nyid du brjod de shes rab kyi pha rol tu phyin pa gsum car tshig re re nas bshad pa yin pa'i phyir ro/ /de lta na yang tshad ma rnam 'grel rgya cher bshad pa dang 'dra bar seng ge bzang po'i zhal snga nas kyis kyang 'phags pa byams pa'i tshig le'ur byas pa rgya cher bshad pa yin na yang rtogs par dka' ba'i phyir 'grel pa mdzad pa la 'gal ba med do//de ltar zhar la 'ongs pas chog go/ /la la zhes bya ba la sogs pa bzang po'i zhal snga nas kyi tshig gi don ni go bar zad do/ /tshig don rtogs par dka' ba yi//de nyid snang ba zhes bya ba/ /bdag gis sbyar 'di byas gyur pas/ /ma 'tshal dam pas bzod par mdzod/ /bsod nams 'di yis 'gro ba kun/ /shes rab pha rol phyin dngos shog /bdag kyang nam mkha'i dbyings 'dra bar/ /sems can don ni byed gyur cig /dpal ldan rnam rgyal nyams dga'i gnas/ /rgyal po dpal ldan gtsug nor bu/ /go chas chos kyi grags dpal la/ /gsol ba btab pas snang bar byas/ /gser gling gi dpal rnam par rgyal ba'i grong du lha dpal gtsug gi nor bu'i go cha'i rgyal po'i ring lo tshigs bcos pa las dpyid zla ra ba'i tshes bcu gcig la mdzad pa rtogs par dka' ba'i snang ba zhes bya ba rdzogs so// //rgya gar gyi mkhan po dI paM ka ra shrI dz+nyA na dang / sgra bsgyur gyi lo tsA ba chen po dge slong rin chen bzang pos bsgyur cing zhus te gtan la phab pa'o// //