CLOSE WINDOW

D3788
བོད་ཡིག

@##/ /rgya gar skad du/ pany+tsa biM sha ta sa ha sri ka Ar+ya pradz+nyA pA ra mi ta u pa de shA a b+hi sa ma ya a laM kA ra shAs+t+ra s+ya kA ri kA brti kA/ bod skad du/ 'phags pa shes rab kyi pha rol tu phyin pa stong phrag nyi shu lnga pa'i man ngag gi bstan bcos mngon par rtogs pa'i rgyan gyi tshig le'ur byas pa'i rnam par 'grel pa/sangs rgyas dang byang chub sems dpa' thams cad la phyag 'tshal lo//nyan thos zhi ba tshol rnams kun shes nyid kyis nyer zhir khrid mdzad gang yin dang / /'gro la phan par byed rnams lam shes nyid kyis 'jig rten don sgrub mdzad pa gang / /gang dang yang dag ldan pas thub rnams rnam pa sna tshogs 'di dag kun mkhyen pa//sangs rgyas nyan thos byang chub sems dpa'i tshogs dang ldan yum de la phyag 'tshal lo/ /don gang zhig yin zhe na/ 'phags pa'i gang zag thams cad kyi dbang du mdzad nas/ thams cad mkhyen pa gsum gyi rang bzhin tha dad med pa'i yon tan gyis 'dir shes rab kyi pha rol tu phyin pa la phyag 'tshal lo zhes brjod nas/mngon par rtogs pa'i rgyan gyi man ngag de bshad par dam bcas nas/ 'di ltar rnam par bshad par byed pas mngon par rtogs pa'i rgyan nye bar bshad par bya'o snyam du dgongs so/ /ci'i don du zhe na/ mdo'i don bsdus nas tshig bsdus pas skye bo blo dman pa rnams kyi rjes su mthun par rgya cher rnam par phye bas shes par bya ba'i ched du smras pa phyag 'tshal ba nye bar dgod pa'i tshigs su bcad pa don yod par bstan pa yin no/ /'di skad kyang brjod par bya ste/ci mngon par rtogs pa'i rgyan bzhi bsdus pa yin nam/ 'on te gnyen pos bsdus sam/ yang na rnam pa bsdus pas rgyan du gyur pa yin/ de las cir 'gyur zhe na/ phyogs dang po ltar yin na/ 'bad pa don med pa yin te/ci'i phyir zhe na/ mdo 'di las mtshan nyid kyi bstan bcos dag las ma smos pa'i gzhi gang yin pa de bshad pa ni med do/ /gnyis pa ltar na rnam par byang ba'i dngos po bsdus pa'i phyir kun nas nyon mongs pa'i dngos po ma bsdus pas/'di gang gi gnyen po yin par rtogs par mi 'gyur ro/ /gsum pa ltar na yang rnam pa bzhi med pa tsam zhig bsdus pa'i phyir don rtogs pa med pas cung zad kyang ma bshad pa yin no zhe na/ phyogs gsum car gyis kyang bsdus pa yin no zhes bstan to//gang bsdus she na/ nyan thos dang / rang sangs rgyas dang / byang chub sems dpa' dang / sangs rgyas rnams kyi dbang du mdzad nas/ thams cad shes pa nyid dang / lam shes pa nyid dang / rnam pa thams cad mkhyen pa nyid kyi rang bzhin gyi bdag nyid yin pa'i phyir shes rab kyi pha rol tu phyin pa yin no//de ltar yang bcom ldan 'das kyis gsung bar 'gyur te/ rab 'byor thams cad shes pa nyid ni nyan thos dang rang sangs rgyas rnams kyi yin no/ /lam shes pa nyid ni byang chub sems dpa' rnams kyi yin no//rnam pa thams cad mkhyen pa nyid ni de bzhin gshegs pa dgra bcom pa yang dag par rdzogs pa'i sangs rgyas rnams kyi yin no/ /rab 'byor gyis gsol pa/ bcom ldan 'das ci'i slad du thams cad 'tshal ba nyid ni nyan thos dang rang sangs rgyas rnams kyi lags/ bcom ldan 'das kyis bka' stsal pa/ rab 'byor thams cad ni phyi dang nang gi chos rnams ji snyed pa 'di tsam yin la/ de dag nyan thos dang rang sangs rgyas rnams kyis shes kyi/ lam thams cad kyang ma yin/ rnam pa thams cad kyang ma yin pa de'i phyir/ nyan thos dang rang sangs rgyas rnams kyi ni thams cad shes pa nyid yin no//gsol pa/ bcom ldan 'das ci'i slad du lam gyi rnam pa 'tshal ba nyid byang chub sems dpa' rnams kyi lags/ bka' stsal pa/ rab 'byor byang chub sems dpa' rnams kyi ni nyan thos kyi lam gang yin pa dang / rang sangs rgyas kyi lam gang yin pa dang / sangs rgyas kyi lam gang yin pa'i lam thams cad bskyed par bya zhing / lam thams cad shes par bya'o/ /de dag kyang yongs su rdzogs par bya zhing de dag gi lam gyi bya ba yang bya ste/ smon lam yongs su rdzogs par ma byas pa dang / sems can rnams yongs su smin par ma byas pa dang / sangs rgyas kyi zhing yongs su ma sbyangs par de dag gi yang dag pa'i mtha' mngon sum du mi bya'o/ /gsol pa/ bcom ldan 'das ci'i slad du rnam pa thams cad mkhyen pa nyid de bzhin gshegs pa dgra bcom pa yang dag par rdzogs pa'i sangs rgyas rnams kyi lags/bka' stsal pa/ rab 'byor rnam pa gang dag dang / rtags gang dag dang / mtshan ma gang dag gis chos rnams rab tu brjod pa'i rnam pa de dag dang / rtags de dag dang / mtshan ma de dag de bzhin gshegs pas thugs su chud de/de'i phyir de bzhin gshegs pa rnams kyi ni rnam pa thams cad mkhyen pa nyid ces bya'o zhes ji skad gsungs pa yin no/ /de lta bas na de ni gzhi dang / gnyen po dang / rnam pa yongs su rdzogs pa bsdus pas mngon par rtogs pa'i rgyan mtha' dag yongs su rdzogs par bstan pa yin pas zhes bya ba 'di ni 'thad pa bstan pa yin no//'di skad ces kyang brjod par bya ste/ shes rab kyi pha rol tu phyin pa de du zhig ce na/ de la thams cad shes pas ni nyon mongs pa'i ma rig pa tsam spangs pa'o/ /lam shes pa nyid kyis ni gnyen po thams cad kun nas bskyed do//rnam pa thams cad mkhyen pa nyid ni nyon mongs pa can ma yin pa'i mi shes pa spangs pa yin no/ /yang thams cad shes pa nyid ni chos 'di dag ji snyed pa la brten pa'i 'bras bu bdag tu rmongs pa spangs pa can yin no/ /lam shes pa nyid ni theg pa ji lta ba bzhin du nges par 'byung ba dang /de kho na nyid mngon sum du mi byed pa rten pa 'bras bu sems can ma bsdus pa sdud pa dang / sems can yongs su ma smin pa smin par byed pa dang / sems can yongs su ma grol ba grol bar byed pa can yin no/ /rnam pa thams cad mkhyen pa nyid ni chos thams cad kyi spyi'i rten can 'bras bu nam mkha'i khams kyi mthas gtugs par sems can gyi don rgyun mi 'chad pa dang /yang dag pa'i mtha' rtogs pa dang / bag chags kyis mtshams sbyor ba spangs pa can no/ /yang rnam pa gang gis na rnam pa thams cad mkhyen pa nyid ces bya zhe na/rab 'byor rnam pa gcig gis rnam pa thams cad mkhyen pa nyid ces bya ste/ 'di lta ste/ zhi ba'i rnam pa nyid kyis so/ /yang bka' stsal pa/ rab 'byor rnam pa thams cad mkhyen pa nyid ni dngos po med pa la dmigs pa/ bdag po'i rkyen ni dran pa yin no/ /rnam pa ni zhi bas mtshan ma med pa zhes bya'o//rab 'byor gnyis ni dngos po gnyis med pa ni dngos po med pa'o zhes bya'o/ /de lta yin na 'gog pa dmigs pa dang ldan pa des 'gog pa thob par 'gyur te/ de ni zhi ba yin pa'i phyir ro/ /des 'gog pa yin par mi bzhed de/rang bzhin gyis zhi ba'i rnam pa yin pa'i phyir ro/ /'gog pa ni ye shes yin te/ de lta bu gang yin pa la ni 'gog par bzhed do/ /yang ci kun mkhyen gsum po 'di dag spangs par gyur pa la khyad par mchis sam/ bka' stsal pa/ cung zad kyang med do/ / de bzhin gshegs pa bag chags kyis mtshams sbyor ba spangs pas khyad par yod do/ /kun rdzob tu de dag la khyad mchis zhes bgyi'am/ rab 'byor bag chags kyis mtshams sbyor ba ni nyon mongs pa'ang ma yin te 'on kyang de dag gis 'dod chags dang / zhe sdang dang / gti mug spangs pa yod do/ /nyan thos rnams la ni lus ngag gi rnam 'gyur so so'i skye bo bzhin du 'jug go zhes gsungs so/ /dper na dge slong mchong rgyug byed pa bzhin no/ /de bzhin gshegs pa la ni mi mnga'o/ /gang shes rab kyi pha rol tu phyin pa'i dbang du byas nas/ sangs rgyas nyan thos byang chub sems dpa'i tshogs dang ldan yum de la phyag 'tshal lo zhes gsungs pa la/ de ji lta bu zhig la shes rab kyi pha rol tu phyin pa zhes bya zhes 'dri ba la/ mngon rtogs bdag nyid bdun yin par/ /shes rab pha rol phyin zhes bya/ /rnam kun mkhyen nyid lam shes nyid//thams cad shes pa nyid dang gsum/ /rnam kun rtse mor bcas pa dang / /mthar gyis bcas dang skad cig bdag /chos sku mdzad par bcas pa ste/ /rnam pa brgyad du bsdus pa yin/ /sems skyed pa dang gdams ngag dang / /nges 'byed yan lag rnam bzhi dang //sgrub pa yi ni rten gyur pa/ /chos kyi dbyings kyi rang bzhin dang / /dmigs pa dag dang ched dang ngo / /go cha 'jug pa'i bya ba dang / /tshogs ni nges par 'byung bcas rnams/ /rnam kun mkhyen pa nyid du 'dod/ /mog mog por byed la sogs dang / /slob ma bse ru'i lam gang dang //'di dang gzhan gyi phan yon gyis/ /phan yon che ba mthong ba'i lam/ /byed pa dang ni mos pa dang / /bstod dang bkur dang bsngags pa dang / /bsngo dang rjes su yi rang dang / /de rnams yid la byed pa gzhan/ /bsgrub dang shin tu dag pa zhes//bya ba 'di ni bsgom pa'i lam/ /byang chub sems dpa' mkhas rnams kyi / /lam shes de 'drar shes par bya/ / shes pas srid la mi gnas shing / /snying rjes zhi la mi gnas dang / /thabs ma yin pas ring ba dang / /thabs kyis ring ba ma yin nyid//mi mthun gnyen po'i phyogs dag dang / /sbyor dang de yi mnyam nyid dang / /mthong ba'i lam zhes bya ba yin/ /de 'dra kun shes nyid du 'dod/ /rnam par sbyor ba bcas rnams dang / /yon tan skyon ni mtshan nyid bcas/ /thar dang nges 'byed cha mthun dang //slob pa phyir mi ldog pa'i tshogs/ /srid dang zhi ba mnyam nyid dang / /zhing dag bla na med pa dang / /de ltar thabs la mkhas pa ni/ /rnam kun mngon rdzogs rtogs pa'o/ /de yi rtags dang rnam 'phel dang / /brtan dang sems ni kun gnas dang //mthong zhes bya dang sgom pa zhes/ /bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dang ni/ /bar chad med pa'i ting nge 'dzin/ /log pa bsgrub pa rtse mor gyur/ /mthar gyis bya ba shes pa ni/ /rnam pa bcu gsum bdag nyid do//gcig gi mngon rdzogs byang chub pa/ /rnam pa bzhi ru yang dag mtshon/ /ngo bo nyid longs rdzogs bcas dang / /sprul pa dang ni de ltar gsum/ /mdzad pa dang bcas bzhi ru brjod/ /ces bya ste/ don ci zhig yin zhe na/ 'di ni tshig le'ur byas pa bco lngas mdor bsdus pa dang rgyas par bstan pas shes rab kyi pha rol tu phyin pa stong phrag nyi shu lnga pa'i don bsdus pa yin par shes par bya'o//ji lta zhe na/ mngon rtogs bdag nyid bdun yin par/ /shes rab pha rol phyin zhes bya/ /zhes bya ba nas brtsams te/ chos sku mdzad par bcas pa ste//rnam pa brgyad du bsdus pa yin/ /zhes bya ba'i bar gyi tshig le'ur byas pa gnyis kyis ni bsdus pa yin no/ /de la 'dir dngos po brgyad kyi dbye bas bsdus pa yin te/ 'di lta ste/ rnam pa thams cad mkhyen pa nyid dang / lam gyi rnam pa shes pa nyid dang /thams cad shes pa nyid dang / rnam pa kun mngon par rdzogs par rtogs pa dang / rtse mo'i mngon par rtogs pa dang / mthar gyis pa'i mngon par rtogs pa dang / skad cig ma gcig gis mngon par rtogs pa dang / de dag gi 'bras bur gyur pa ni chos kyi sku mdzad pa dang bcas pa'i chos kyi sku'o zhes bya ba yin no//sems bskyed pa dang gdams ngag dang / /nges 'byed yan lag rnam bzhi dang / /zhes bya ba nas brtsams te/ tshigs su bcad pa rnam pa bcu gsum gyis ni rgyas par bstan pa'o/ /de ltar rnam pa thams cad mkhyen pa nyid la sogs pa dngos po brgyad kyi rab tu dbye bas bsdus par bstan pas de ltar bsdus pa dang rgyas par rnam par phye ba nyid kyis legs par bshad pa yin no//de bshad zin nas da ni gang zhig mngon par rtogs pa'i don gang la khyad par can gyi rnam pa gang dang / dngos po gang ji snyed bstan pa de dag gi go rims bsdu ba 'ba' zhig brjod par bya'o//de la re zhig /sems bskyed pa ni gzhan don phyir/ /dkar po'i chos rnams don gnyer 'dod/ /ji ltar gzhan gyi ming gzhan gyi yin par 'gyur/ sems ni yul so sor rig pa'i mtshan nyid can yin la/don du gnyer ba zhes bya ba ni sred pa yin pas so zhe na/ bden mod kyi 'on kyang 'dir rgyus 'bras bu bstan pa yin te/ don du gnyer ba dge ba'i chos la 'dun pa'i mtshan nyid don du gnyer ba yod na 'tshang rgya ba nyid kyi don du sems bskyed pa yin no/ /de ltar na 'dun pa'i rtsa ba ni dge ba'i chos rnams thams cad ces bya ba la sogs pa'i rjes su mthun par 'gyur ro//yang na don du gnyer ba ni smon lam yin te/ de dang lhan cig spyod pa nyid kyi phyir sems bskyed pa'i don du gnyer ba nyid la sems bskyed ces bya'o/ /de ltar byas na yang smon lam dang lhan cig spyod pa'i sems bskyed pa zhes bya ba la sogs pa sems bskyed par 'gyur bar 'thad pa yin no zhes gang gtso bo yin par 'dir bstan te/don du gnyer ba can gang yin pa sems bskyed pa'i gtso bo yin par rnam par gzhag pa byas so/ /dkar po'i chos rnams dang gzhan gyi don de yang gang yin zhe na/de rnams de dang de ni mdo bzhin du/ /bsdus dang rgyas pa'i sgo nas brjod/ /de dang zhes bya ba ni dkar po'i chos rnams so/ /de ni zhes bya ba ni gzhan don no/ /de la 'dir mdo ji lta ba bzhin du de dag gis mdor bsdus nas bstan to//shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par 'tshang rgya bar 'dod pas shes rab kyi pha rol tu phyin pa la brtson par bya'o/ /zhes gang gsungs pa yin no/ /chos thams cad rnam pa thams cad du mngon par 'tshang rgya bas dkar po'i chos thams cad nang du 'dus par gyur pa yin no//de la 'dir mdo de dag gis rgyas par bstan pa ni shA ri'i bu 'di la byang chub sems dpa' sems dpa' chen po mi gnas pa'i tshul gyis shes rab kyi pha rol tu phyin pa la gnas te/ mi gnas pa'i sbyor ba sbyin pa po dang /sbyin par bya ba dang / len pa po mi dmigs pas sbyin pa'i pha rol tu phyin pa yongs su rdzogs par bya'o zhes bya ba nas brtsams te/ pha rol tu phyin pa dang / byang chub kyi phyogs la sogs pa rnams ni mngon par rtogs pa bdun dang / chos kyi sku mdzad pa dang bcas pa bsdus pa'i rgyas par bstan pa yin te/ji snyed rdzogs par mthar thug pa'i bar du gsungs so/ /lhag ma sems bskyed pa'i skabs su 'di 'dod pa dang / de dag 'dod pas shes rab kyi pha rol tu phyin pa la brtson par bya'o zhes bya ba'i mdo'i gzhung 'grel pa nyid kyis don rgyas par bstan pas yang 'dir rnam par ma phye'o//da ni gang zhig bsdus pa rnams kyi tshig bshad par bya ste/ mi gtsang ba'i 'du shes dgu bsgom par bya'o zhes gsungs pa la/ rnam par bam pa'i 'du shes dang / 'bu can gyi 'du shes dang / rnam par rnags pa'i 'du shes dang / rnam par dmar ba'i 'du shes dang /rnam par bsngos pa'i 'du shes dang / rnam par zos pa'i 'du shes dang / rnam par 'thor ba'i 'du shes dang / rus pa'i 'du shes dang / rnam par tshig pa'i 'du shes so/ /de la rkyal pa rlung gis bus pa bzhin du srog mthar thug pa'i rjes la rim gyis lus rgyas par gyur te//ma lus par rnam par bam pas na rnam par bam pa ste/ de ni dbyibs la chags pa rnams lus kyi dbyibs de'i rgud pa ston pas 'di bsgom par bya'o/ /gang phyi dang nang dang bar rnam pa du mar 'bus gzhigs pas na 'bu can te/ de ni nang khong stong du gyur par snang bas lus rgyas par gyur pa la chags pa rnams kyi gnyen po'o//gnas tha dad nas 'dzag pas rnam par 'dzag pa ste/ de ni lus kyi nang dang 'brel pa las dri nga bar snang bas phreng ba dang dri la sogs pa'i dbang las byung ba'i dri la sogs pa la chags pa rnams kyi gnyen po'o//phan tshun du rnam par dmar bar 'thor zhing dgyes la 'dzag pas na rnam par dmar ba ste/ de ni rnam par dmar bas gos shing mi mthun pa'i dngos por snang bas rgyan gyis brgyan pas mdzes pa sha la chags pa can gyi gnyen po'o/ /rnam par gsal bar sngo bas na rnam par bsngos pa ste/kha dog tha dad par mtshungs pa'i gnas su zangs kyi mdog dang / rnag 'dzag pa'i gnas su skya ba dang / sngon po'i gnas der phyin zhing sngo ba ras sngon pos g.yogs pa lta bu ste/ 'di ni ro'i lus kyi tshig bla dgas so/ /de ni pags pa la chags pa'i rgud pa ston pas lus kyi kha dog la chags pa rnams kyi gnyen po'o//khyi dang ce spyang la sogs pas phan tshun du rnam pa sna tshogs par zos pa ni rnam par zos pa ste/ de ni sha rgyas pa 'jig par ston pas de ni nu ma la sogs pa'i sha rgyas pa la chags pa rnams kyi gnyen po'o/ /lag pa yang gzhan du/mgo bo yang gzhan du/ rkang pa yang gzhan du sna tshogs par rnam par 'thor bas te / de ni yan lag dang nying lag rnam par 'thor bar snang bas yan lag dang nying lag gi sgeg pa la chags pa rnams kyi gnyen po'o/ /rus pa nyid ni rus gong ste/ rus pa'i gong re sbrel bas tshogs gcig pa'i dbang du byas pa yin te/de ni lus kyi rus pa'i mi mthun pa'i dngos por snang bas so la sogs pa rus pa'i 'byor pa la chags pa rnams kyi gnyen po'o/ /ma lus pa rnam par tshig pas rnam par tshig pa ste/ de ni pags pa'i dbyibs dang mi mthun par 'khums par snang bas kha dog dang dbyibs la 'dod chags pa rnams kyi gnyen por bsgom pa ste/lus 'di yang shi ba'i ro dang 'dra'o zhes dang po'i tshig bzhin no/ /mi sdug pa'i 'du shes bcur gzhan dag 'dod de/ rnam par tshig pa'i 'du shes ma gtogs pa rus pa rnams gtubs pas rnam par 'thor ba'i 'du shes te/tshogs pa'i lus la chags pa'i gnyen por mtshon la sogs pas lus gtubs pas tha dad par rnam par 'gyur ba bstan pa'i phyir ro/ /'bus gzhigs pa'i srin bu'i 'du shes ni yang lus la bdag tu chags par mtshungs par lta ba'i gnyen por srin bu'i rigs du mas lus khyab pa'i rang bzhin can du bstan pa'i phyir ro//de la dang po rnam par 'thor ba'i 'du shes nyid yin no/ /gnyis pa yang gnyen por gyur pa nyid ma yin te/ bdag la chags pa dang / 'jig tshogs la de'i lus su lta ba'i gnyen por mtshungs pa yin pa'i phyir ro//rnam par tshig pa'i 'du shes ni kha dog dang dbyibs la chags pa'i gnyen po yin pa'i phyir 'di ni gdon mi za bar grangs su nye bar brjod par bya'o/ /de nyid kyi phyir mi sdug pa'i 'du shes dgu nyid legs pa yin no//skyes bu chen po'i rnam par rtog pa brgyad ces bya ba ni mdo ji lta ba bzhin no/ /mdo las ji ltar 'byung zhe na/ 'di ni 'dod pa chung ba rnams kyi chos yin gyi 'dod pa che ba rnams kyi ma yin pa dang / 'di ni chog shes pa dang / rab tu rnam par dben pa dang / brtson 'grus rtsom pa dang /dran pa nye bar 'jog pa dang / mnyam par 'jog pa dang / shes rab dang ldan pa rnams kyi yin gyi shes rab 'chal pa rnams kyi ni ma yin no/ /skyes bu chen po'i rnam par rtog pa bdun po 'dis gnas brtan maud gal gyi bu gnas pa yin te/ bcom ldan 'das kyis kyang maud gal gyi bu skyes bu chen po'i rnam par rtog pa brgyad po 'di la rnam par rtogs shig /'di ni spros pa med pa'i chos dang / spros pa med pa'i kun dga' ra ba la ltos pa med pa'i kun dga'i ra ba'i tshul dang ldan pa yin no zhes gsungs so/ /de la 'dod pa chung bas ni chos bzhi spong ste/'di ltar tshul 'chos pa dang / kha gsag dang / gzhogs slong dang / thob kyis 'jal ba'o/ /de la tshul 'chos zhes bya ba ni mdo ji lta ba bzhin du ste/ 'di na 'ga' zhig rnyed par 'dod cing rnyed pa dang / bkur sti dang / tshigs su bcad pa 'dod la sems ltos pa dang bcas pas bcings pas dgon pa par gyur pa'am/phyag dar khrod pa'am/ stan gcig pa nas sbyangs pa'i yon tan gang yang rung ba la nye bar brten te gnas pa na de 'di snyam du sems te/ bdag la gzhan dag gis bsnyen bkur byed/ bla mar byed/ mchod par byed/ rjed par byed na ci ma rung / bdag kyang rnyed pa dang / bkur sti dang / tshigs su bcad pa bsgrub par yang bya'o snyam du sems shing / de rnyed pa dang / bkur sti don du gnyer bas rnyed pa la sogs pa'i bsngags pa brjod cing / tshul de lta bu'i spyod lam la rtog pa 'di ni tshul 'chos pa zhes bya'o//kha gsag ces bya ba ni 'di na gang zhig rnyed pa dang / bkur sti'i ltos pa dang bcas pas gzhan dag la 'di ltar khyed ni bdag gi ma dang 'dra ba dang / pha ji lta ba dang / spun zla ji lta ba dang / nye du gang yang rung ba ji lta ba dang / snag gi gnyen mtshams 'dra ba yin te/khyed de ltar yin pa des na/ kho bos sbyin pa la sogs pa yang khyed cag gi don du yin no/ /kho bo ni khyed cag gi don du thag ring po nas kyang khyed kyi thad du 'ong zhing 'dir gnas pa yang khyed cag nyid kyi don yin no/ /zhes zer na yang de rnams mang du de la bkur sti mi byed pa na rnyed pa don du gnyer zhing rnyed pa la sogs pa 'dod pa'i ltos pa dang bcas pas sems bcings pas gzhan dag la tshul de ltar kha gsag smra zhing yongs su smra bas dgos pa'i don gyi 'bras bu dang 'brel pa'i gcam gsag gi las byed pa 'di ni kha gsag ces bya'o//gzhogs slong zhes bya ba ni 'di na rnyed pa'i phyir dngos po de dang de la mi gsal bar gzhogs kyis rnyed pa'i las byed pa ste/lhung bzed 'di ni mdzes zhe'am / chos gos sam/ snam sbyar ram/ mal stan nam/ lde mig kyog po 'di ni bzang ngo zhe'am/ yo byad 'di bzang ngo //gal te kho bos 'di lta bu zhig rnyed na bcang bar bya ba na sbyin pa po yang rnyed par dka'o/ /gang yang rung ba'i khyim du song nas der 'di skad ces smras te/ khyed kyi 'bras chan 'di ni bzang ngo / /bca' ba 'di ni bzang ngo / /gos 'di ni bzang ngo / /khyed kyi bza' bar bya ba'am/bca' bar bya ba 'di ni bzang ngo / /sngon chad kyang bdag cag la khyed kyis byin par gyur la kho bo cag kyang khyed kyis byin par byas na yang dag par dga' na da ltar ni khyed cag bdag cag la sbyin par bya ba'am/ bya ba byed par mi sems so zhes de gang yang rung ba'i mi gsal ba brjod pas brkams pa las byung ba'i gzhogs slong gi las kyi dngos po de dang de rjod par byed pa 'di ni gzhogs slong zhes bya'o//thob kyis 'jal ba zhes bya ba ni 'di na 'ga' zhig rnyed pa don du gnyer zhing / rnyed pa la sogs pa 'dod pa'i ltos pa dang bcas pas sems bcings pas gzhan la 'di skad ces smras te/khyed kyis ma la yang sbyin par mi bya/ pha la yang ma yin/ sring mo la yang ma yin/ nye du dang / snag gi gnyen mtshams gang yang rung ba gzhan dag la yang sbyin par mi byed na khyed kyis gang zhig la sbyin par byed pa yin/ gang zhig gi khyim du song nas yang de nyid la khyod kyi khyim du song na de nyid kyi khyim du dgra bcom pa bzhugs shing khyed dang 'dra bar mi bya/dgra bcom pa dang lhan cig tu gnas pa dang / lhan cig tu 'dug pa dang 'brel pa'i gtam smras par gyur pa ni khyed rnyed pa chen po rnyed pa yin/ 'byor pa legs par thob pa yin/khyed kyis mir rnyed pa don yod pa yin no/ /de 'di snyam du sems te/ 'di yang 'di snyam du sems su gzhug par yang bya ste/ bdag gi khyim du 'phags pa ma gtogs pa dge slong ngam/ bram ze su yang 'jug par mi byed la/ 'phags pa 'di ni gal te dgra bcom pa yin no snyam du sems par byed do//gang du rnyed pa don du gnyer zhing rnyed pa la ltos pa dang bcas pas sems bcings pa de de lta bu'i tshul du gzhan rnams la nges par sgrogs pa ni thob kyis 'jal ba zhes bya'o/ /chog shes pas ni rnyed pas rnyed pa 'dod pa spong bar byed pa yin no//de la rnyed pas rnyed pa tshol ba zhes bya ba ni 'di na 'ga' zhig rgyal po'am/ rgyal po'i blon po chen po'am/ bram ze'am/ khyim bdag gam/ gzhan gang yang rung bas lhung bzed dam/ chos gos sam/ snam sbyar ram/ lde mig kyog po'am/gding ba'am/ yo byad gang yang rung ba gter ba yod na de yongs su blangs nas gzhan dag la bstod cing 'dems te/ 'di ni bdag la rgyal po che ge mo zhes bya ba'am/ dam par gyur pa gzhan zhig bdag la mchog sbyin no zhes smras pa na/ 'di snyam du ci nas re zhig de lta bu yang 'phags pa 'di la sbyin zhing bya ba byed na/kho bos kyang 'phags pa la sbyin par bya zhing bya ba ci'i phyir mi bya snyam du sems su gzhug pa 'di ni gzhan gyi rnyed pas rnyed pa gzhan tshol ba zhes bya'o/ /byang chub sems dpa'i skyon med par 'jug pa zhes bya ba ni lam zhes pa la mthong ba'i lam de'i dbang du byas nas bstan to//phyir mi ldog pa'i sa la gnas zhes bya ba ni phyir mi ldog pa'i sa la gnas par 'dod pa'i byang chub sems dpa' sems dpa' chen pos shes rab kyi pha rol tu phyin pa la brtson par bya'o zhes gang gsungs pa yin no/ /gang de lta yin na rin chen zla bas zhus pa'i mdo dang /rin chen phreng ba'i mdo'i rjes su 'brangs nas/ bcom ldan dpal bzangs dpal bzangs zhes bya dang ni tsan dpal tsan dpal zhes bya dang / /gzhan yang mtha' yas snang ba bkod dpal zhes bya rdzogs sangs rgyas su grags pa dang //tog dpal tog dpal zhes bya dang ni mya ngan med dpal dang ni rnam kun mya ngan med dpal dang / /rin chen mchod dpal rin chen mchod dpal zhes bya dang ni bde gshegs me tog dpal zhes bya ba dang / /rgyal ba brtson 'grus gsum gyi rol pa brtson 'grus gsum gyi rol pa zhes bya dang //'od dpal 'od dpal zhes bya bcom ldan yon dpal yon dpal mtsho zhes bya ba ni/ /bcom ldan bcom ldan phyogs bcu dag na gang dag bzhugs pa'i bcom ldan gyi/ /de rnams kyi ni mtshan rnams bzung bar byas na phyir mi ldog nyid 'gyur ba lags//zhes gsungs pa dang / de bzhin du sems can ji snyed kyis bcom ldan 'das shAkya thub pa'i mtshan thos pa de dag thams cad phyir mi ldog par 'gyur ro zhes bya ba la sogs pa gsungs pa dang / shes rab kyi pha rol tu phyin pa 'di la brtson pa ni phyir mi ldog pa'i sa la gnas pa'i rgyur gyur pa dang tha dad par snang ba ji ltar yin zhe na/bstan pa 'di ni dgongs pa can yin te/ ji skad du/ de bzhin gshegs pa rnams kyi mtshan thos pa las rigs kyi bu dag phyir mi ldog pa'i sa bon skyed pa gzigs nas sems can phyir mi ldog par lung bstan pa yin gyi/ de rnams kyi mtshan thos pa'i mod la phyir mi ldog par 'gyur ba ni ma yin no/ /rigs kyi bu dper na shing 'ga' zhig nyid kyi sa bon khyad par can du gyur pa'i sa bon rnam par gyur pa de yang sa bon gyi skyon thams cad dang bral bar gyur cing 'di'i rkyen rnams tshogs par gyur pa las myu gu skyed pa'i phyir ro//rigs kyi bu de la sa bon zhes ji ltar brjod par bya/ bcom ldan 'das sa bon gyi nyes pa thams cad spangs pas yongs su rdzogs pa zhes brjod par bgyi'o/ /rigs kyi bu de bzhin du mtshan thos par gyur pa tsam gyis phyir mi ldog pa'i sa bon dang ldan pas na/ sems can thams cad phyir mi ldog par bla na med pa yang dag par rdzogs pa'i byang chub las phyir mi ldog par 'gyur ro zhes gsungs pa yin no//de'i phyir shes rab kyi pha rol tu phyin pa la brtson pa tsam nyid phyir mi ldog pa'i rgyur 'thad pa yin no/ /phyir mi ldog pa'i sa gang / byang chub sems dpa'i sa brgyad pa 'di ltar phyir mi ldog pa ye shes phyir mi ldog pa'i phyir phyir mi ldog pa'i sa zhes brjod do zhes bya ba ni ye shes ldog pa med pa'i phyir ro zhes gsungs pa yin no//sangs rgyas kyi rigs su skyes pas zhes bya ba ni 'di yin te/ gang sangs rgyas kyi rigs su skye bar 'dod pas zhes bya ba la sogs pa gsungs so//'dir kha cig na re bden pa dang / gtong ba dang / shes rab dang / nye bar zhi ba la brten te sangs rgyas kyi rigs yin no zhes zer ro/ /gzhan dag ni 'di ltar sangs rgyas rnams kyis sangs rgyas nyid du skyed pa'i phyir pha rol tu phyin pa drug la bya'o zhes zer ro//gzhan dag ni 'di las sangs rgyas 'di ltar 'khrungs pas shes rab kyi pha rol tu phyin pa ni sangs rgyas rnams kyi yum yin la/ thabs la mkhas pa ni yab yin te/ de gnyis las sangs rgyas 'byung bas na sangs rgyas rnams kyi rigs yin no zhe'o/ /gzhan dag ni sangs rgyas kyis bcas pa'i chos rnams ni bslab pa ste/de'i phyir bslab pa yang dag par blangs pas ni sangs rgyas kyi rigs su skye bar 'gyur ro zhes zer ro/ /gzhan dag ni zhi gnas dang lhag mthong gi dge ba'i chos thams cad kyi gtso bo yin pa'i phyir sangs rgyas kyi rigs yin no zhes zer ro//byang chub sems dpa'i da ltar gyi sangs rgyas la mngon du phyogs pa'i ting nge 'dzin dang snying rje chen po gnyis ni sangs rgyas kyi rigs yin no zhes gzhan dag zer ro/ /gzhon nu'i sa las 'da' bar 'dod pa zhes bya ba ni sa brgyad pa la sangs rgyas rnams kyis de yang dag par bskul nas yang sems can gyi don mngon du byed pa la 'jug pa'i phyir ro//dge ba'i sems bskyed pa gcig kyang mi zad par bya bar 'dod pas zhes gang gsungs pa dang / byang chub chen por yongs su bsngos pa'i dge ba'i rtsa ba chung ngu yang rgya mtsho chen por chu'i thigs pa gcig bor ba'i dpes yang dag par rdzogs pa'i byang chub kyi bar du zad pa med par 'gyur ba'i phyir ro//chos thams cad kyi de bzhin nyid rjes su rtogs par 'dod pas zhes bya ba ni/ chos thams cad kyi de bzhin nyid gang zhe na/ gang mi mthun pa dang gnyen po'i phyogs kyis bsdus pa'i chos rnams kyi chos nyid do//chos kyi dbyings de bzhin nyid rjes su rtogs par 'dod pas zhes bya ba ni khyad par gang gis chos kyi dbyings la rigs zhes bya bar 'chad par 'gyur ba de'i chos nyid gang yin pa'o/ /yang dag pa'i mtha' thams cad kyi de bzhin nyid rjes su rtogs par 'dod pas zhes bya ba ni yang dag pa'i mtha'i ye shes thams cad kyi phyin ci ma log pa'i chos nyid gang yin pa'o//thams cad ces bya ba ni thams cad mkhyen pa nyid gsum gyis bsdus pa'o/ /rjes su rtogs par zhes bya ba rjes su smos pa ni rnam pa thams cad mkhyen pa dang rjes su mthun pa'i rtogs pa shes par bya ba'i phyir ro//ri'i rgyal po ri rab la sogs pa'i ri rnams skra nyag ma gcig gis bcings nas 'jig rten gyi khams gzhal du med par 'phang bar 'dod pas zhes bya ba ni bdud rtsi bsrubs pa byas pa ltar 'di la ma dad par mi bya ste/ byang chub sems dpa'i bsam gtan phul du byung bas 'dod pa bzhin du thob pa'i phyir ting nge 'dzin dang ldan pa la gang yang mi srid pa ma yin te/gdon mi za bar 'di de bzhin du shes par bya'o/ /gzhan du na de bzhin du me 'bar ba dang / chu 'bab pa'i cho 'phrul ya ma zung la yang mi dad par mi bya bar mi rigs so//yang skra nyag ma gcig gis ri rab bcings pa dang 'phangs pa med mod kyi des de 'dra ba'i ting nge 'dzin gyi khyad par la snyoms par zhugs pas gang gdul bya pha rol pos de bzhin du mthong ba zhes bya'o / /'dus byas dang / 'dus ma byas kyi pha rol tu 'gro zhes bya ba ni 'khor ba dang mya ngan las 'das pa mnyam pa nyid du rtogs par byed pa yin no//dus gsum gyi sangs rgyas kyi de bzhin nyid rjes su rtogs pa zhes bya ba ni de rnams kyi chos sku'i mtshan nyid la khyad par med par gzung ba'i phyir ro/ /sangs rgyas rnams kyi nang gi 'khor zhes bya ba ni phra ba la 'jug pa'i ye shes dang /gsang ba la 'jug pa'i ye shes la sogs pa la rjes su zhugs par gyur pa ni sangs rgyas rnams kyi nang gi 'khor zhes bya'o/ /phra ba la 'jug pa'i ye shes ni yang sa bcu las ji skad du/ spyod pa phra ba la 'jug pa'i ye shes dang / 'chi 'pho ba dang /skye ba phra ba la 'jug pa'i ye shes dang / mngon par 'byung ba phra ba la 'jug pa'i ye shes zhes bya ba la sogs pa dang / yang gsang ba la 'jug pa'i ye shes ni ji ltar de nyid las 'di lta ste/ sku'i gsang ba dang / gsung gi gsang ba dang / thugs kyi gsang ba dang / dus dang dus ma yin pa la rnam par spyod pa'i gsang ba dang / byang chub sems dpa' rnams lung bstan pa'i gsang ba dang / sems can rnams bsdu ba dang / tshar bcad pa ni gsang ba'o zhes bya ba la sogs pa gang gsungs pa yin te/ de'i phyir gzhan nyan thos rnams ni phyi'i 'khor zhes bya'o//lha'i sde rnams dang / byang chub sems dpa'i tshogs chen po'i 'khor gyis yongs su bskor zhing mdun du bdar nas byang chub kyi snying por 'gro ba zhes bya ba la/ kun nas bskor ba ni yongs su bskor ba'o/ /cher mchod cing rjed pa sngon du byas pa ni mdun du byas pa ste/phyogs yongs su chad pa ni mdun du byas pa ltar na ni snga phyi 'gal bar 'gyur ba'i phyir ro/ /gang stong gsum gyi stong chen po'i 'jig rten gyi khams na rgyal po chen po bzhi tshogs nas 'og min gyi lha rnams su gyur pa'i bar du de dag 'di snyam du sems te/ sangs rgyas 'jig rten du byung bas ni 'jig rten skyong ba'i 'jig rten rnams mngon par mtho ba dang /nges par legs pa ston pa'i phyir dang / rang gi tshogs yongs su bskang bar 'dod pa dang / yon tan gyi phyogs su zhen pa'i phyir zhes bya ba la sogs pa brjod par bya'o/ /de la rgyal chen bzhi'i ris kyi lhung bzed kyi dbang du mdzad pa yin te/de rnams kham gyi zas mchog tu ro zhim pa'i yon tan dang ldan zhing mang ba yin pa'i phyir te/ gsal rgyal gyis zhus pa dper byed/ sum cu rtsa gsum pa la sogs pa ni rim gro byed pa'i dbang du mdzad pa yin te/ de rnams ni sgyu rtsal ma lus pa la mkhas pas 'dod pa tsam la rag las pa 'jug pa yod pa'i phyir ro//tshangs ris la sogs pa ni gsol ba 'debs pa'i dbang du mdzad pa yin te/ de rnams kyis 'jig rten dang 'jig rten las 'das pa'i 'dod chags dang bral ba'i skal ba mnyam pas gzhan dag 'dod chags dang bral ba la mngon par dga' bar byed pa yin pa'i phyir ro//de la 'jig rten pa'i 'dod chags dang bral ba ni tshangs pa la sogs pa'o/ /'jig rten las 'das pa'i 'dod chags dang bral ba ni gnas gtsang ma pa rnams te/ 'di ni shas cher bstan pa yin gyi tshangs pa la sogs pa na yang 'jig rten las 'das pa'i 'dod chags dang bral ba med pa ni ma yin no//yang rtogs pa sngon du gtong ba su zhig gang 'di lta bu'i dbang du byas pa gsum ston par byed ce na/ gang gis kyang ma yin mod kyi 'on kyang 'di dag ni dge ba'i rtsa ba yongs su smin pa'i chos nyid du rnam par gzhag ste/so sor nye bar gnas pa'i mtshan nyid can yin zhing rten cing 'brel par chos rnams kyi chos nyid tshad mar byas pa yin no/ /de la rgyal chen bzhi po ni de rnams kyi bdag po yin pas na rgyal po chen po bzhi'i rigs so/ / legs par spyod pa lhan cig spyad pa las sum cu rtsa gsum po der mtshungs par skyes pas na sum cu rtsa gsum mo/ /sdug bsngal dang bral bar nye bar song bas na 'thab bral lo/ /dga' bar song zhing nye bar phyin pas na dga' ldan te/ mgu ba dang ldan pa zhes bya ba'i don to/ / rang gis sprul zhing byas pa'i longs spyod rnams kyis dga' zhing rol pas na de ni 'phrul dga'o / /gzhan gyis sprul pa'i longs spyod rnams la dbang byed cing gnas pas na gzhan 'phrul dbang byed do/ /tshangs pa'i 'khor yin pas na tshangs ris so/ /tshangs pa chen po'i 'khor yin pas na tshangs 'khor ro//cig shos de'i mdun na 'don lta bur gnas pas tshangs pa'i mdun na 'don no/ /tshangs pa gzhan rnams las tshe dang kha dog la sogs pa'i khyad par gyis tshangs pa chen po 'phags pa yin pas na tshangs chen no/ /tshangs pa gzhan dag pas 'od chung bas na 'od chung ngo //de dag las tshad med par che ba'i 'od 'byung ba yod pas na tshad med 'od do/ /de dag ni dga' ba dang bcas pa'i bsam gtan las grub cing sprin mthong ba la sogs pa las byung ba'i glog ltar phan tshun 'od gsal ba 'byin pa'i phung po'i rgyun yod pas na 'od gsal lo//yang na de lta bu'i gzugs kyi 'od kyis snang bar byed pas na 'od gsal lo/ /dge ba zhes bya ba ni lus kyi 'od gcig tu 'dug cing mi 'gyur ba la bya bar bshad la/ de ni de'i gong gi 'phags pa rnams las de'i 'od chung ba yin pa'i phyir dge chung ngo / /de dag tshad med par che ba'i phyir tshad gzung bar mi nus pas tshad med dge'o//de dag ni dge ba ste 'od kun du 'byung ba ma lus par rgyas pas na dge rgyas te/ rgyas pa zhes bya ba ni thams cad de dga' ba med pa'i bsam gtan las grub cing bdag nyid kyi dngos po rdzogs par byas te gnas so/ / de rnams ni dper na rin po che'i za ma tog gi nang gi mar me gnas pa rin po che'i 'od dang 'dres pa'i rang gi 'od kyis 'od gcig tu byung bar gyur nas gnas pa dang 'dra bar lus gcig tu 'bar bar snang bar gnas so/ /'du shes las 'dod chags dang bral ba bsgoms pas mngon par grub pa'i gzugs kyi phung po tsam yod kyi de la 'du shes yod pa ma yin pas na 'du shes med pa'o//sprin med pa dang / bsod nams 'phel ni go sla'o/ /de rnams na ni bsam gtan gyi mthu las grub pa'i 'bras bu chen po yin pas 'bras bu che ba'o/ /phung po lnga dang ldan pas so so'i skye bo'i sa'i mtha' nyid du gnas shing gnod pa cung zad kyang med la bdag nyid kyi gnas dus nyung zad cig gis mi 'dor bas mi che ba'o//la la ni 'dod pa med par 'dod de/ de dag gi gzhung ltar na de rnams ni 'og ma la med pas na 'dod pa med pa zhes bya'o/ / su la yang gdung bar mi byed pas na mi gdung ngo / /phongs pa med pa'i bde ba dang ldan par snang zhing shin tu yid 'phrog pa yin pa'i phyir gya nom snang ngo / /gzhan dag ni blta na sdug ces zer ro/ /lta ba yongs su dag pa'i phyir dang / rab tu mthong ba'i phyir shin tu mthong ngo / / phun sum tshogs pa'i mchog yin pa'i phyir dang / de rnams kyi gong na gzhan med pas na 'og min te/ de ni mthar thug pa'i mchog yin no/ /zhes btsun pa zangs kyi lo ma pas bshad do/ /gzhan dag ni sdig mtha' yas zhes zer te/ sdig pa ni sems la gnas par grags pa'i tshul te/de dag shin tu 'joms pa'i mthar thug pa yin pa'i phyir ro/ /yang sems bskyed pa 'di'i rab tu dbye ba'i mtshan nyid ni gzhan 'phags pa blo gros mi zad pa dang / sdong po bkod pa'i mdo la sogs pa'i rjes su 'brangs nas blta zhing sbyar ro/ /bdag gis ni gzhung mangs pa yongs su spang ba'i phyir nye bar ma bkod do//sems bskyed pa zhes bya ba la sems ni rnam par shes pa dang rnam par rig pa'o/ /rnam par shes pa zhes bya ba ji lta zhe na/ yid kyi rnam par shes pa ste/ des dkar po'i chos thams cad la dmigs pa 'byung ba yin pa'i phyir ro//bskyed pa zhes smos pa ni ma bskyed pa bskyed par shes par bya'o/ /sems zhes bya ba ni de rtogs pa'i chos kyi dang po'i mtshams su gyur par shes par bya ba'i phyir ro/ /de lta mod kyi mi sdug pa'i 'du shes dgu po'i de dag dang skyes bu chen po'i rnam par rtog pa brgyad sngar bstan pa de dag dang sems bskyed pa'i rab tu dbye ba ci zhig 'brel zhe na/sems bskyed pa'i yongs su mi nyams pa'i chos nyid shes par bya ba'i don du yin no/ /sems bskyed pa'i yongs su mi nyams pa'i rgyu mtshan ni brgyad de/ 'dod chags de'i gnyen po mi sdug pa'o/ / log pas 'tsho ba de'i 'dod pa chung ba dang chog shes pa'o/ /yang dag par dga' ba dang rgud par lta ba de'i rab tu dben pa'o/ /le lo de'i brtson 'grus rtsom pa'o/ /dran pa nyams pa de'i dran pa nye bar gnas pa'o/ /rnam par g.yeng ba de'i ni ting nge 'dzin to/ /shes rab 'chal pa de'i ni shes rab bo//'jig rten pa'i sna tshogs pa la mngon par dga' ba de'i gnyen po ni spros pa med pa'i kun dga' ra ba'o/ / shes rab kyi pha rol tu phyin pa man ngag gi bstan bcos mngon par rtogs pa'i rgyan las sems bskyed pa'i rnam par 'grel pa'o/ / sems bskyed pa bshad zin to// // da ni gdams ngag brjod par bya ste/ de la don du gnyer bar bya ba thob par byed pa'i man ngag ni gdams ngag go/ /thob pa'i yon tan yongs su bskyang ba'i phyir yongs su mi nyams par byed pa'i thabs ni gdams ngag yin la/ de'i rjes la ma thob pa'i yon tan thob par byed pa'i thabs ni rjes su bstan pa yin te/mjug bsdu bar shes rab kyi pha rol tu phyin pa 'di ni byang chub sems dpa' sems dpa' chen po'i gdams ngag dang rjes su bstan pa yin no zhes bstan to/ /gdams ngag de yang rnam pa bcur 'gyur te/ ji skad du/ gdams par bya ba bsgrub pa dang //bden pa rnams dang bde gshegs sogs/ /ma zhen yongs su mi ngal dang / /lam ni yongs su 'dzin pa dang / /spyan ni lnga ru shes par bya/ /mngon shes yon tan drug dang ni/ /mthong ba'i lam zhes bya ba mchog /bsgom pa'i lam ste gdams ngag bcu //zhes bstan pa yin no/ /de la bsgrub pa la gdams pa ni gang shA ri'i bu 'di byang chub sems dpa' sems dpa' chen po shes rab kyi pha rol tu phyin pa la spyod pa'i tshe byang chub sems dpa' yang dag par rjes su mi mthong ngo zhes bya ba nas brtsams te/ mi dmigs pa'i tshul du bsgrub pa ni bsgrub pa de nyan thos la sogs pa dang thun mong ma yin pa nyid kyis na 'dzam bu'i gling 'di dge slong shA ri'i bu dang /maud gal gyi bu lta bu sha stag gis 'dam bu'i tshal la sogs pa lta bur yongs su gang ba dper bya ba nas brtsams te/ phyogs bcu re re zhing 'jig rten gyi khams gang gA'i klung gi bye ma snyed des yongs su gang ba'i shes rab las byang chub sems dpa' sems dpa' chen po'i shes rab nyin gcig tu bsgoms pa khyad par du 'phags par bstan pa yin no//shA ri'i bu gal te 'dzam bu'i gling 'di dge slong shA ri'i bu dang /maud gal gyi bu 'dra ba sha stag gis 'di lta ste/ dper na 'dam bu'i tshal lam/ 'od ma'i tshal lam/ bu ram shing gi tshal lam/ smyig ma'i tshal lam/ 'bras kyi zhing ngam/ til gyi zhing ltar yongs su gang bar gyur kyang zhes gang gsungs pa'i don ji lta bu yin zhe na/nges par 'byed pa'i cha bzhi dang / mthong ba'i lam dang / bsgom pa'i lam dag go rims bzhin du sbyar te/ 'dam bu ltar las dang nyon mongs pa'i gnod pa chung ngu bzod pas mi nus pa dang / 'od ma dang 'dra bar me dang / mtshon dag dang 'dra ba'i las dang nyon mongs pa drag pos nyen du zin kyang dge ba'i rtsa ba'i rgyun kun tu mi 'chad pa dang /bu ram shing dang 'dra bar skye ba dang 'chi ba'i gnas skabs gzhan thob pa na bde 'gro rnams su skye bar 'gyur zhing / rgyun mi 'chad pa'i sbyor ba chos sgom pa'i mngar ba las mi 'da' ba nyid dang / mda' rgyu dang 'dra bar mngon par 'bigs pa yin pa'i phyir mthong ba'i lam rtogs par byed pa nyid dang /'bras kyi zhing dang 'dra bar 'phags pa'i gang zag rnams kyi rtogs pa'i 'bras bu mchog nyid dang / til gyi zhing 'dra bar me tog la sogs pa'i dngos po dang tha mi dad du zin kyang ji ltar mthong ba mngon du byed pa nas nye bar bzung ste/dus gzhan du bsgoms pas spangs pa'i khyad par gyi dbang du byas nas dpe drug dang 'dra bar shes par bya'o/ /ci'i phyir tshal smos she na/ dro bar rtogs pa la sogs pa'i gang zag gzhan dag gi dbang po la sogs pa'i dbye ba'i rigs kyi khyad par shes par bya ba'i phyir yin te/don mang po brtags na yang dpe gcig gis rtogs par 'gyur ro/ /re zhig snga ma snga ma la'am zhes bya ba'i sgra smos pa ni dpe phyi ma phyi ma drang bar bya ba'i don yin no/ /de lta yin na tha mar ram zhes ci'i phyir smos she na/'phags pa'i gang zag de rnams las mthong ba'i chos la bde bar gnas pa shes par byed pa drang bar bya ba yin no/ /de lta na dpe gzhan dag gis ci'i phyir ma bshad ce na/ mthong ba'i chos la bde bar gnas pa rnams kyi ni rang bzhin sna tshogs pa nyid kyis rigs bsdus pa'i ngo bo shes par bya ba'i don to//gzhan yang re re zhing brjod pa brtags na ni dpe ji snyed cig brjod par bya ste/ nye bar bshad pa la mi mkhas pa nyid thob par 'gyur ro/ /'dir tshig ni 'di yin te/ dge slong shA ri'i bu dang / maud gal gyi bu 'dra ba zhes gang gsungs pa 'dis ni ji skad gsungs pa'i rtogs pa mthun pa rnams kyis so//brgya'i char yang nye bar mi 'gro zhes bya ba la sogs pa rgya cher gsungs pa'i don ci zhig yin zhe na/ 'di ni grangs kyi khyad par dang / mthu'i khyad par dang / rigs kyi khyad par dang / rgyu'i khyad par dang / dpe las 'das pa las byang chub sems dpa' sems dpa' chen po'i shes rab nyin gcig tu bsgoms pa khyad par du 'phags pa yin no//de la brgya'i char yang nye bar mi 'gro zhes bya ba nas/ grangs dang zhes bya ba'i bar ni grangs kyi khyad par gyi khyad par med pa'i grangs bzung ba yin te/ de las gzhan pa'i grangs gsal bar shes par bya'o//brgya la sogs pa smos pa ni khyad par smos pas khyad par med pa'i grangs khong du chud pa'i rgyur byas pa yin te/ khyad par med pa tsam yin no zhes shes par bya ba'i don du brgya la sogs pa smos pas go rims mang po yin par shes pa'i phyir ro//char yang zhes bya ba ni mi mthun pa'i khyad par ro/ /bgrang bar yang zhes bya ba ni rigs kyi khyad par yin te/ byang chub sems dpa'i shes rab kyi rigs de la bgrang du med pa'i phyir ro/ /rgyur yang zhes bya ba ni rgyu'i khyad par te / shes rab de ni 'di'i rgyu tsam du yang mi 'gyur ro//dper yang nye bar mi 'gro zhes bya ba ni dpe las 'das pa'o/ /'dir yang byang chub sems dpa' ci tsam zhig gi dbang du byas nas de lta bu'i shes rab nyin gcig tu bsgom pa yin/ ci dang po sems bskyed pa yin nam/ spyod pa la zhugs pa yin nam/ phyir mi ldog pa yin nam/skye ba gcig gis thogs pa yin nam / sa bcu pa ni de bzhin gshegs pa nyid yin no zhes bstan pa'i don ci zhig yin zhe na/ de bzhin gshegs pa'i mdzad pas nye bar gnas pa'i phyir/ de nyid la de bzhin gshegs pa zhes brjod kyi de bzhin gshegs pa'i thugs su chud pas ni ma yin no//gsum pa yang ma yin te/ brgyad pa la ni mngon par 'dod pa'i mya ngan las 'das pa bkag pas nyan thos thams cad las shes pa khyad par du 'phags pa yin pa'i phyir ro/ /de yang kye rgyal ba'i sras dag khyed la shes par bya/ khyed la khong du chud par bya ste/gal te sangs rgyas bcom ldan 'das kyis byang chub sems dpa' de rnams mngon par bsgrub pa'i sgo la mtshungs par gyur na de nyid du de'i yongs su mya ngan las 'das par gyur pa yin no zhes ji skad gsungs pa lta bu'o/ /yang de'i mya ngan las 'das pa gang zhig yin/ 'on te nyan thos kyi mya ngan las 'das pa yin na de ni re zhig mi rigs te/ nyan thos kyi mya ngan las 'das pa 'dod pa'i yid la byed pa ni sems bskyed pa nas brtsams te ring du yongs su spang bar bya ba'i phyir ro/ /'on te sangs rgyas kyi mya ngan las 'das pa yin no zhes zer na ni bsgoms pas spang bar bya ba ma spangs pa dang de yang mi rigs so//bstan pa 'di la yongs su mya ngan las 'da' bar gzhag pa'i brjod par bya ba ni mang po yod de/ 'dir rtse mo thob pa rnams kyi ni dge ba'i rtsa ba rgyun chad pa las yongs su mya ngan las 'das pa yin no/ /bzod pa thob pa rnams kyi ni ngan 'gro las yongs su mya ngan las 'das pa yin no//bsam gtan thob pa rnams kyi ni de'i yan lag las yongs su mya ngan las 'das pa yin no/ /rgyun du zhugs pa thob pa rnams kyi ni srid pa brgyad pa las yongs su mya ngan las 'das pa yin no/ /lan cig phyir 'ong ba rnams kyi ni 'dir srid pa gnyis pa las yongs su mya ngan las 'das pa yin no//phyir mi 'ong ba ni 'dod pa'i khams las yongs su mya ngan las 'das pa yin no/ /dgra bcom pa ni phung po lhag ma dang bcas pa dang / lhag ma med pa'i mya ngan las 'das pa yin no/ / 'dir yang dam pa'i chos pad+ma dkar po la sogs pa'i mdo tshad mar byas nas/ ji ltar 'phags pa shA ri'i bu la sogs pa'i byang chub sems dpa' chen po rnams nyan thos kyi yongs su mya ngan las 'das par rnam par gzhag pa gsungs pa de bzhin du dgongs pa can gyi mya ngan las 'das pa yin par shes par bya ste/dus de srid du 'gro ba'i don la 'jug pa bshol ba nyid yin pa'i phyir ro/ /de nyid kyi phyir sems can thams cad kyi don gyi bya ba rgyun chad pa 'di ni mya ngan las 'das pa yin no zhes bshad do/ /gnyis pa yang ma yin te/ de yang de rnams las rtogs pa go bzlog pa yin pa'i phyir te/rgyun du zhugs pa dang / rang sangs rgyas kyi shes pa dang / spong ba gang yin pa de ni byang chub sems dpa'i bzod pa yin no zhes ji skad gsungs pa lta bu'o/ /de bas na yongs su mi nyams pa'i chos can gyi brdar btags pa'i sems kyis dang po sems bskyed pa nyid 'dir byang chub sems dpa' yin par mngon no//gang de lta yin pa de bas na rab tu byed pa dang por sems bskyed pa bstan to/ /gal te de lta yin na shA ri'i bu 'di ji snyam du sems/ byang chub sems dpa' shes rab kyi pha rol tu phyin pa la spyod pa'i shes rab nyin gcig bsgoms pa zhes bya ba nas brtsams te/sems can yongs su mya ngan las 'da' ba dang / pha rol tu phyin pa drug yongs su rdzogs nas chos kyi sku thob par bsdus par bstan pa'i sbyor ba rtogs pa las yang dag par 'da' ba yin no zhes bstan pa'ang mi rigs te/ de dag ni bskal pa grangs med pa mang po'i 'bras bu yin pa'i phyir shes rab nyin gcig yongs su bsgoms pa'i 'bras bu ma yin no zhe na /'dir yang mar me'i snying po tshig pa'i dpes sems bskyed pa dang po dang / phyi ma 'bras bu dang bcas par lan btab/ lhag ma ni go sla bas rnam par ma phye'o/ / sgrub pa la gdams pa bshad zin to// // bden pa la gdams pa gang zhe na/ 'phags pa'i bden pa bzhi la gdams pa gang yin pa'o/ /de la sdug bsngal gyi bden pa'i dbang du mdzad nas phung po dang / khams dang / skye mched dang / rten cing 'brel par 'byung ba'i yan lag dang /chos thams cad dang / 'dus byas dang / 'dus ma byas dang / stong pa nyid kyi sbyor bas zhes bstan pa ste/ 'di'i mdo ni shA ri'i bu 'di la byang chub sems dpa' sems dpa' chen po'i gzugs stong pa nyid la brtson na brtson zhes bya'o zhes bya ba la sogs pa gang gsungs pa yin no//kun 'byung gi bden pa'i dbang du mdzad nas gzugs la sogs pa'i phung po rnams skye ba dang / 'gag pa dang / kun nas nyon mongs pa dang / rnam par byang ba dang / chos phan tshun yang dag par 'du ba bkag pa yin te/ 'di'i mdo ni gal te gzugs skye ba'i chos can nam/'gag pa'i chos can du yang dag par rjes su mi mthong ngo / /gzugs kun nas nyon mongs pa'i chos can nam/ rnam par byang ba'i chos can du yang dag par rjes su mi mthong ngo / /gzugs ni tshor ba yang dag par 'du ba yin no zhes bya bar yang dag par rjes su mi mthong ngo zhes bya ba la sogs pa dang /de dag stong pa nyid ni de'i rang bzhin bkag pa yin te/ 'di'i mdo ni don 'di ltar shA ri'i bu gzugs stong pa nyid gang yin pa de ni gzugs ma yin no zhes bya ba la sogs pa dang / de rnams stong pa nyid dang phan tshun ngo bo gcig pa yin te/'di'i mdo ni shA ri'i bu 'di ltar gzugs gzhan ma yin la/ stong pa nyid kyang gzhan ma yin te/ gzugs nyid stong pa nyid stong pa nyid ni gzugs so zhes bya ba la sogs pa gang gsungs pa yin te/ des na 'dis ni sgro 'dogs pa dang / skur pa 'debs pa'i mtha' gnyis spangs pa yin no//'gog pa'i bden pa'i dbang du mdzad nas stong pa nyid la skye ba dang / 'gag pa dang / kun nas nyon mongs pa dang / rnam par byang ba dang / 'grib pa dang / 'phel ba dang / dus gsum bkag pa'i sgo nas de dag la phung po la sogs pa dang /'phags pa'i bden pa la sogs pa 'jug pa dang ldog pa'i phyogs la spyod pa'i sbyor ba rab tu bkag pa bstan pa yin te/ de'i mdo ni shA ri'i bu stong pa nyid gang yin pa de ni mi skye/ mi 'gag /kun nas nyon mongs par 'gyur ba med/ rnam par byang ba med/'grib pa med/ 'phel ba med/ de ni 'das pa ma yin/ ma 'ongs pa ma yin/ da ltar byung ba ma yin no/ /gang yang 'dra ba de la ni gzugs med do/ /tshor ba med do zhes bya ba nas ma rig pa skye ba med do/ /ma rig pa 'gag pa med do zhes bya ba'i bar dang /rgyun du zhugs pa med do/ /rgyun du zhugs pa'i 'bras bu med do zhes bya ba'i bar dang / sangs rgyas med do/ /byang chub med do zhes bya ba'i bar gang gsungs pa yin no/ /lam gyi bden pa'i dbang du mdzad nas pha rol tu phyin pa rnams dang / phung po dang / khams dang / skye mched dang / rten cing 'brel par 'byung ba'i yan lag rnams dang / byang chub kyi phyogs rnams dang / bden pa rnams dang / so so yang dag par rig pa dang / mngon par shes pa rnams dang / stobs rnams dang / mi 'jigs pa rnams dang / sangs rgyas kyi chos ma 'dres pa rnams dang /rnam pa thams cad mkhyen pa nyid la sbyor ba'am/ mi sbyor ba de la rjes su mi dmigs pa'i phyir ro zhes bya ba'i mdo ni ji skad du/ de shes rab kyi pha rol tu phyin pa la spyod kyang sbyin pa'i pha rol tu phyin pa la ldan zhes bya ba'am/ mi ldan zhes bya bar bdag nyid la yang dag par rjes su mi mthong ngo zhes bya ba la sogs pa dang /stong pa nyid dang / mtshan ma med pa dang / smon pa med pa rnams stong pa nyid la sogs pa de dang sbyor bar byed pa bkag pa'i phyir zhes bya ba yin te/ de'i mdo ni de shes rab kyi pha rol tu phyin pa la spyod pa na stong pa nyid la stong pa nyid kyis sbyor bar mi byed do//stong pa nyid kyis 'byed pa ma yin no/ /mtshan ma med pa dang / mtshan ma med par mi sdud mi 'byed do/ /smon pa med pa dang / smon pa med par mi sdud mi 'byed do zhes bya ba la sogs pa gang gsungs pa yin no/ /'dis ni lam gyi bden pa rnam par mi rtog pa nyid yin par gsal bar bstan to//gzugs la sogs pa'i phung po rnams sngon gyi mthar sbyor ba dang 'byed pa rab tu bkag pa yin te/ mdo ni shA ri'i bu byang chub sems dpa' gzugs sngon gyi mthar mi sbyor mi 'byed do/ /'di ltar de sngon gyi mtha' nyid kyang yang dag par rjes su mi mthong ngo zhes bya ba la sogs pa gang gsungs pa yin no//dus rnams gcig la gcig sbyor ba dang bkag pa yin te/ mdo ni de sngon gyi mtha' la phyi ma'i mtha' mi sbyor mi 'byed de/ dus gsum mnyam pa nyid nye bar bzung nas zhes bya ba la sogs pa gang gsungs pa yin no//dus re rer rnam pa thams cad mkhyen pa nyid du sbyor ba bkag pa yin te/ mdo ni rnam pa thams cad mkhyen pa nyid dang / 'das pa mi sbyor mi 'byed de/ de ni 'di ltar 'das pa nyid kyang yang dag par rjes su mi mthong ngo zhes bya ba la sogs pa gang gsungs pa yin no//de ltar lam gyi nges par 'byung ba'i ngo bo nyid gsal bar bstan pa yin no/ /bden pa la gdams pa'o/ /dkon mchog la gdams pa gang zhig yin zhe na/ de ni dkon mchog gsum la gdams pa yin par shes par bya'o/ /sangs rgyas dkon mchog gang yin pa'i dbang du mdzad nas bstan pa ni phung po dang /khams dang / skye mched dang / rten cing 'brel par 'byung ba'i yan lag dang / byang chub kyi phyogs rnams dang / so so yang dag par rig pa dang / mngon par shes pa dang / stobs dang / mi 'jigs pa dang / sangs rgyas kyi chos ma 'dres pa rnams dang /sangs rgyas dang / rnam pa thams cad mkhyen pa nyid du sbyor ba bkag pa yin te/ 'di'i mdo ni de shes rab kyi pha rol tu phyin pa la spyod pa na gzugs rnam pa thams cad mkhyen pa nyid dang sbyor bar mi byed de/ gzugs nyid kyang yang dag par rjes su mi mthong ngo zhes bya ba nas/sangs rgyas dang / rnam pa thams cad mkhyen pa nyid du sbyor bar mi byed do zhes gang gsungs pa yin no/ /rnam pa thams cad mkhyen pa nyid dang sangs rgyas su sbyor ba bkag pa yin te/ mdo ni rnam pa thams cad mkhyen pa nyid dang / sangs rgyas su sbyor bar mi byed de/ sangs rgyas nyid kyang yang dag par rjes su mi mthong ngo zhes gang gsungs pa yin no/ /sangs rgyas dang / rnam pa thams cad mkhyen pa nyid dag dang / byang chub dang / rnam pa thams cad mkhyen pa nyid dag ngo bo gcig par bzhed pa yin te/ mdo ni/ de ci'i phyir zhe na/ sangs rgyas nyid rnam pa thams cad mkhyen pa/ rnam pa thams cad mkhyen pa nyid kyang sangs rgyas yin no/ /byang chub nyid rnam pa thams cad mkhyen pa/ rnam pa thams cad mkhyen pa nyid kyang byang chub bo zhes gang gsungs pa yin no/ /chos dkon mchog gi dbang du mdzad nas bstan pa ni gzugs kyi phung po la sogs pa dngos po med par sbyor ba bkag pa yin te zhes bya ba la sogs pa'o//gang ji skad du/ de shes rab kyi pha rol tu phyin pa la spyod pa'i tshe/ gzugs dngos po yod ces bya bar mi sbyor ro/ /gzugs dngos po med ces bya bar mi sbyor ro zhes bya ba la sogs pa gsungs pa yin no//chos ni 'dod chags dang bral ba yin pa'i phyir thams cad du 'dod chags dang bral bar bstan pa'i don du gsungs pa ni/ byang chub sems dpa' sbyin pa'i pha rol tu phyin pa'i don du shes rab kyi pha rol tu phyin pa la mi spyod do zhes bya ba la sogs pa yin no//'jig rten pa'i nyon mongs pa bsal ba zhes bstan pa yin te/ mdo ni de ltar spyod pa 'dis 'jig rten pa'i nyon mongs pa ji snyed pa bsal bar 'gyur ro zhes gsungs pa yin no/ /de la 'jig rten pa'i nyon mongs pa ni ma rig pa dang lta ba zag pa dang bcas pas bsdus pa'o//byang chub sems dpas ni de dag rtsa ba nas shin tu gzhom pa'i phyir rnal 'byor du byed do/ /'dod pa'i zag pa yongs su shes bzhin du yang sems can yongs su smin par bya ba'i phyir bsams bzhin du 'dod pa'i khams su skye ba len par byed do/ / srid pa'i zag pa yongs su shes bzhin du yang bsams bzhin du srid pa yongs su 'dzin to/ /yang byang chub sems dpa' ni nyon mongs pa dang bcas pa dang / nyon mongs pa med par brjod par mi bya'o/ /de ci'i phyir zhe na/ nyon mongs pa rnams kun tu mi spyod pas nyon mongs pa dang bcas pa zhes brjod par mi bya la/de bzhin gshegs pa'i ye shes mngon par 'dod pa dang / bsam pa yongs su ma rdzogs pa'i phyir nyon mongs pa med pa zhes brjod par mi bya'o/ /dge 'dun dkon mchog gi dbang du mdzad nas bstan pa ni/ shA ri'i bu byang chub sems dpa' des sangs rgyas kyi zhing gzhan dag gam/dga' ldan gyi lha'am/ mi nas shi 'phos te 'dir skyes nas de myur du 'di la rnal 'byor du byed ces bya ba nas brtsams te/ byang chub sems dpa' mngon par shes pa myur ba zhes bya ba la sogs pa yin no/ /dkon mchog la gdams pa bstan nas/ma zhen pa la gdams pa'i dbang du mdzad nas bstan pa ni/ lus de ci zhig lus de gang gi lus las rtsom zhes bya ba nas/ lus la sogs pa mi dmigs so zhes bya ba la sogs pa yin no/ /yongs su mi ngal ba'i dbang du mdzad nas bstan pa ni/phung po dang / khams dang / skye mched rnams dang / byang chub kyi phyogs rnams dang / pha rol tu phyin pa rnams dang / so so yang dag par rig pa dang / stobs dang / mi 'jigs pa dang / sangs rgyas kyi chos ma 'dres pa rnams dang / 'bras bu bzhi dang / rang byang chub dang /yang dag par rdzogs pa'i byang chub la rlom sems med do zhes rlom sems bkag pa yin te/ 'di'i mdo ni/ shes rab kyi pha rol tu phyin pa la spyod pa na gzugs la rlom sems med ces bya ba nas/ bla na med pa yang dag par rdzogs pa'i byang chub la rlom sems med ces bya ba'i bar du gsungs pa yin no//rlom sems med par gyur na yongs su skyo bar 'gyur ba yin pa'i phyir ro/ /lam yongs su 'dzin pa la gdams pa gang zhe na/ phyogs bcu'i 'jig rten gyi khams tha dad pa gang gA'i klung gi bye ma snyed kyi de bzhin gshegs pa dgra bcom pa yang dag par rdzogs pa'i sangs rgyas rnams kyang mthong ngo //de rnams kyis chos bstan pa'ang nyan to/ /de dag gi dge 'dun yang mthong ngo / /de dag gi sangs rgyas kyi zhing yongs su dag pa rnams mthong zhing / pha rol tu phyin pa la sogs pa rnam par byang ba'i phyogs thams cad mi dmigs pa'i rnam par ye shes kyi yul du byed pa yin te/'di'i mdo ni/ byang chub sems dpa' ye shes de lta bu dang ldan pas ni/ shar phyogs kyi 'jig rten gyi khams gang gA'i klung gi bye ma snyed kyi de bzhin gshegs pa dgra bcom pa yang dag par rdzogs pa'i sangs rgyas rnams kyang mthong ngo //de rnams las chos bstan pa'ang nyan to zhes bya ba la sogs pa'o/ /spyan lnga la gdams pa las/ sha'i spyan gyi dbang du mdzad nas bstan pa ni/ dpag tshad brgya'i bar nas brtsams te/ stong gsum gyi stong chen po'i 'jig rten gyi khams mthong ba ni sha'i spyan gyi yul yin te/'di'i mdo ni/ shA ri'i bu byang chub sems dpa' sems dpa' chen po'i sha'i mig gis dpag tshad brgya mthong ba yod do zhes bya ba nas/ gang stong gsum gyi stong chen po'i 'jig rten gyi khams mthong ba yod do zhes bya ba'i bar du yin no//lha'i spyan gyi dbang du mdzad nas bstan pa ni/ rgyal chen bzhi'i ris nas brtsams te/ 'og min gyi bar gyi lha'i mig gi yul gang yin pa de rab tu shes so/ /lha rnams kyi'ang de dag gi de'i yul gyi khyad par mi shes so/ /phyogs bcu'i 'jig rten gyi khams tha dad pa gang gA'i klung gi bye ma snyed kyi sems can thams cad kyi 'chi 'pho ba dang skye ba shes pa'i yul can ni lha'i mig yin te/'di'i mdo ni/ shA ri'i bu rgyal po chen po bzhi'i lha rnams zhes bya ba nas/ 'og min gyi lha rnams kyi lha'i mig gang yin pa de ni byang chub sems dpas rab tu shes so//yang byang chub sems dpa' sems dpa' chen po'i lha'i mig gang yin pa de ni rgyal chen bzhi'i ris kyi lha rnams nas 'og min gyi lha rnams kyis mi shes so/ /de ci'i phyir zhe na/ de'i lha'i mig des phyogs bcu'i 'jig rten gyi khams gang gA'i klung gi bye ma snyed kyi sems can rnams kyi 'chi 'pho ba dang skye ba ji lta ba bzhin du rab tu shes pa'i phyir ro//shes rab kyi spyan gyi dbang du mdzad nas bstan pa ni/ 'dus byas dang / 'dus ma byas dang / dge ba dang / mi dge ba dang / kha na ma tho ba dang bcas pa dang / kha na ma tho ba med pa la sogs pa dang /mthong ba dang thos pa la sogs pa'i chos su rnam par rtog pa dang bral ba ni shes rab kyi spyan zhes bya ste/ 'di'i mdo ni/ byang chub sems dpa'i shes rab kyi spyan gang gis chos gang ji snyed pa 'dus byas sam/ 'dus ma byas sam/ dge ba'am/mi dge ba zhes bya ba la sogs pa yin no/ /chos kyi spyan gyi dbang du mdzad nas bstan pa ni gang zag 'di ni dad pa'i rjes su 'brang ba zhes bya ba nas brtsams nas / byang chub sems dpa' byang chub kyi snying por 'dug ste zhes bya ba nas 'di la ni bdud 'byung bar 'gyur ro/ / 'di la ni bdud 'byung bar mi 'gyur ro zhes bya ba dang / 'phags pa'i gang zag thams cad rtogs pa'i yul can ni chos kyi spyan te/ 'di'i mdo ni/ 'di la shA ri'i bu byang chub sems dpa' sems dpa' chen po'i chos kyi spyan gyis gang zag 'di ni dad pa'i rjes su 'brang ba'o/ /'di ni chos kyi rjes su 'brang ba'o//gang zag 'di ni stong pa nyid kyis gnas pa'o/ /'di ni mtshan ma med pas gnas pa'o/ /'di ni smon pa med pas gnas pa'o/ /gang zag 'di ni 'jig tshogs la lta ba dang / tshul khrims dang / brtul zhugs mchog tu 'dzin pa dang / the tshom spangs pa'i phyir rgyun du zhugs pa'o//bsgom pa'i lam gyi 'dod pa'i 'dod chags dang gnod sems bsrabs pa'i phyir lan cig phyir 'ong ba'o/ /de la rab tu 'dod pa'i 'dod chags dang gnod sems spangs pa'i phyir phyir mi 'ong ba'o/ /de nyid kyis gzugs dang gzugs med pa'i 'dod chags dang nga rgyal rnams spangs pas gang zag 'di ni dgra bcom par brjod do zhes bya ba la sogs pa yin no//sangs rgyas kyi spyan gyi dbang du mdzad nas bstan pa ni/ sems kyi skad cig gcig gis rnam pa thams cad mkhyen pa nyid du mngon par byang chub pa'i lam yul spyan ni sangs rgyas kyi spyan yin te/'di'i mdo ni/ shA ri'i bu byang chub sems dpa' sems dpa' chen pos byang chub tu sems bskyed ma thag tu rdo rje lta bu'i ting nge 'dzin la mnyam par bzhag nas/ rnam pa thams cad mkhyen pa nyid rjes su thob par byed do zhes bya ba la sogs pa yin no//spyan gang gis byang chub sems dpa' ma mthong ba'am/ ma thos pa'am/ ma dran pa'am/ mngon par ma shes pa'am/ rnam pa thams cad mi mkhyen pa nyid ces bya ba cung zad kyang med de/ ji skad du/ shes rab kyi pha rol tu phyin pa rtogs pas na dge ba'i chos thams cad bsdus so zhes bstan pa yin no//ji skad du/ shA ri'i bu shes rab kyi pha rol tu phyin par dge ba'i chos thams cad bsdus so zhes smras pa ni yang dag par smra ba yin te/ de ci'i phyir zhe na/ 'di ltar shes rab kyi pha rol tu phyin pas pha rol tu phyin pa thams cad bskyed do zhes gsungs pa yin no//spyan lnga la gdams pa bstan nas/ mngon par shes pa drug la gdams pa bstan par bya ste/ de la rdzu 'phrul gyi mngon par shes pa'i dbang du mdzad nas bstan pa ni/ sa yang g.yo zhes bya ba la sogs pa ste/ rdzu 'phrul gyis de dang de dag bsgrub pa yin no zhes bya ba ste/'di'i mdo ni/ ji skad du/ gal te rdzu 'phrul du ma rnam pa sna tshogs pa so sor nyams su myong bar byed de/ sa yang g.yo bar byed do/ /gcig tu gyur cing mang por 'gyur ro zhes bya ba la sogs pa gsungs pa yin no/ /de'i dmigs pa'i sems bkag pa yin te/gang 'di ltar de rdzu 'phrul mi dmigs te/ gang gi rlom sems su bya ba dang / gang la'ang rlom sems pa zhes bya ba la sogs pa gang gsungs pa yin no/ /de bzhin du lha'i rna ba dang / pha rol gyi sems shes pa dang / sngon gyi gnas rjes su dran pa'i mngon par shes pa yang dag par bzung ste/yang lha'i mig dang / zag pa zad pa shes pa mngon sum du byas te/ thams cad sgyu ma lta bur gnas pa na der dmigs pa'i sems bkag nas thams cad du yang rnam pa thams cad mkhyen pa nyid dang ldan pa'i yid la byed pa zhes bya ba ni mdo ji lta ba bzhin du mngon par shes par brjod par bya'o//yang rgyu ci'i phyir mngon par shes pa la gdams par mdzad ce na/ mngon par shes pa yongs su dag pas rnam pa thams cad mkhyen pa nyid gtod par byed pa yin no zhes bya ba dang / ji skad du/ mngon par shes pa yongs su dag pas rnam pa thams cad mkhyen pa nyid gtod par byed pa'o zhes gsungs pa yin no//gzhan yang mngon par shes pas gdul bya btul nas sbyin pa la sogs pa drug las gang yang rung ba nyid kyis gnas te/ de dang de'i mi mthun pa'i phyogs spong du bcug nas rnam pa thams cad mkhyen pa nyid kyi lam yongs su sbyong bar byed do zhes bstan te/pha rol tu phyin pa'i gnas skabs re re zhing rnam pa thams cad mkhyen pa nyid kyi lam yongs su sbyong ba yin pas dang / gang ji skad du/ shes rab kyi pha rol tu phyin pa la spyod pa ni sbyin pa'i pha rol tu phyin pa la gnas nas rnam pa thams cad mkhyen pa nyid kyi lam sbyong ba yang yod do//shin tu stong pa nyid kyis 'dzin pa med par nye bar bzung ste/ de bzhin du kha na ma tho ba med par nye bar bzung ba dang / de bzhin du 'khrug pa med pa nyid nye bar bzung ste zhes bya ba la sogs pa gsungs pa yin no//sbyin pa la sogs pa'i gnyen po'i phyogs mi mthun pa'i phyogs nye bar btags pa ste zhes bya ba ni gang yang ji skad du/ sbyin pa rnams la yongs su 'dzin par nye bar gdags shing / tshul khrims la tshul khrims 'chal pa nye bar 'dzin pa la gdags so zhes bya ba la sogs pa gsungs pa yin no//mngon par shes pa lhag ma'i don ni rtogs par sla bas rnam par ma phye'o/ /mngon par shes pa drug la gdams pa bstan nas/ mthong ba'i lam la gdams pa brjod par bya ste/ de ni gnas brtan rab 'byor gyis byin gyis brlabs pas bstan zhes gsungs te/gnas brtan rab 'byor gyi kha nas thabs la mkhas pas rang nyid kyis shes rab kyi pha rol tu phyin pa bstan pa yin pas zhes bya ste/ gang ji skad du/ shA ri'i bu 'di ni de bzhin gshegs pa nyid byang chub sems dpa' sems dpa' chen po rnams la shes rab kyi pha rol tu phyin pa thabs kyis ston pa yin te/'di nyan thos dang rang sangs rgyas thams cad kyi yul ma yin no zhes bya ba la sogs pa gang gsungs pa yin no/ /ci'i phyir gzhan gyi kha nas ston par mdzad ce na/ gzhan dag kyang don de thob par mdzad cing spyod pa nyid kyis na bdag nyid la gzung bar 'os pa ma yin pa nyid kyis nyes pa spang bar bya ba'i don du'o//ci'i phyir nyan thos kyi kha nas ston par mdzad ce na/ byin gyis brlabs pa la mnga' brnyes pa shes par bya ba'i don du'o/ /ci'i phyir gnas brtan rab 'byor gyi kha nyid nas ston par mdzad ce na/ de ni nyon mongs pa med par gnas pa'i mchog tu gyur pa nyid kyis nyon mongs pa dang bral ba'i skal ba mnyam pas lhag pa'i phyir mthong lam dang rjes su mthun pa'i ston pa po yin pa'i phyir ro/ /de ltar byas na tshe dang ldan pa rab 'byor legs so legs so/ /ji ltar nyan thos nyon mongs pa med par gnas pa rnams kyi mchog tu de bzhin gshegs pas gsungs te bstan pa 'di yang de'i tshul dang 'dra'o zhes 'og nas gsungs pa yin no//de la mthong ba'i lam skad cig ma bcu drug las sdug bsngal la chos shes pa'i bzod pa'i dbang du byas nas gsungs pa ni/ shes rab kyi pha rol tu phyin pa dang /byang chub sems dpa'i ming dang / phung po dang / skye mched dang / khams rnams de dag re re yang btags pa tsam yin te zhes bya ba ste/ mdo ni ji skad du/ rab 'byor 'di lta ste/ sems can sems can zhes brjod kyang sems can cung zad kyang mi dmigs so//gang yang ming du btags pa'i chos de ni zhes bya ba la sogs pa gsungs pa yin no/ /sdug bsngal la chos shes pa'i dbang du mdzad nas bstan pa ni/ de dag kyang brtags pa yin pa'i phyir skye ba dang 'gag pa bkag pa yin te/ gang ji skad du/ btags pa'i chos gang yin pa de la ni ming dang brda tsam du tha snyad gdags pa ma gtogs par skye ba'am/'gag pa med do/ /gzhan du na ming du btags pa yin te zhes gang gsungs pa yin no/ /gang sdug bsngal la rjes su shes pa'i bzod pa bstan pa ni/ phung po la sogs pa rnams dang /tshor ba drug shes pa drug po re re nas phye ba yin te/ rtag pa dang / mi rtag pa dang / bde ba dang / sdug bsngal ba dang / bdag dang / bdag med pa dang / zhi ba dang / ma zhi ba dang / stong pa dang / mi stong pa dang / mtshan ma yod pa dang / mtshan ma med pa dang /smon pa yod pa dang / smon pa med pa dang / 'dus byas dang / 'dus ma byas dang / skye ba dang / 'gag pa dang / dben pa dang / mi dben pa dang / dge ba dang / mi dge ba dang / kha na ma tho ba dang bcas pa dang / kha na ma tho ba med pa dang / zag pa dang bcas pa dang /zag pa med pa dang / nyon mongs pa dang bcas pa dang / nyon mongs pa med pa dang / 'jig rten pa dang / 'jig rten las 'das pa dang / kun nas nyon mongs pa dang / rnam par byang ba dang / 'khor ba dang mya ngan las 'das pa rnams mthong ba bkag pa yin te zhes bya ba ni/gang ji skad du/ byang chub sems dpa' sems dpa' chen po shes rab kyi pha rol tu phyin pa la spyod pa na gzugs rtag ces bya ba'am / mi rtag ces bya bar yang dag par rjes su mi mthong ngo / /gzugs bde zhes bya ba'am/ sdug bsngal zhes bya bar yang dag par rjes su mi mthong ngo zhes rgya cher gsungs pa yin no//gang sdug bsngal la rjes su shes pa bstan pa ni/ de ci'i phyir zhe na/ chos thams cad la rnam par mi rtog pa'i rgyus yin pas zhes bya ste/ ji skad du/ rab 'byor 'di ltar byang chub sems dpa' sems dpa' chen po shes rab kyi pha rol tu phyin pa la spyod pa na chos thams cad la mi rtog rnam par mi rtog go zhes bya ba la sogs pa gang gsungs pa yin no//gang kun 'byung la chos shes pa'i bzod pa bstan pa ni/ kun nas nyon mongs pa can dang / rnam par byang ba'i chos rnams kyi mtshan nyid med par bkag pa yin pas zhes bya ba ste/ji skad du/ de shes rab kyi pha rol tu phyin pa la spyod pa na chos kyi mtshan nyid shin tu rtogs pa yin te/ chos rnams kyi mtshan nyid gang yin pa de ni kun nas nyon mongs par mi 'gyur ro / /rnam par byang bar mi 'gyur ro zhes gang gsungs pa yin no//gang kun 'byung la chos shes pa bstan pa ni/ phung po la sogs pa rnams dang / shes pa drug la mngon par zhen pa bkag pa yin pas zhes bya ba ste/ mdo ni gang ji skad du/ des ming dang brdar byas pa'i chos su btags par khong du chud pas gzugs la mngon par zhen par 'gyur ba med do//tshor ba la mngon par zhen par 'gyur ba med do/ /'du shes la mngon par zhen par 'gyur ba med do zhes bya ba la sogs pa gang gsungs pa yin no/ /gang kun 'byung la rjes su shes pa'i bzod pa bstan pa ni/ pha rol tu phyin pa la sogs pa rnams dang / stong pa nyid thams cad dang / sems can yongs su smin par bya ba dang / sangs rgyas kyi zhing rnam par dag pa dang / thabs la mkhas pa dang / chos rnams mi dmigs pa nye bar bzung nas mngon par zhen pa bkag pa yin pas zhes bya ba ste/mdo ni ji skad du/ de sbyin pa'i pha rol tu phyin pa la'ang mngon par zhen par 'gyur ba med do/ /tshul khrims kyi pha rol tu phyin pa la yang zhes bya ba la sogs pa dang / de ci'i phyir zhe na/ de ni 'di ltar gang mngon par zhen par byed pa po'am/ gang gis mngon par zhen par byed pa'am/gang la mngon par zhen par bya ba'i chos de dag yang dag par yod pa ma yin no zhes gang gsungs pa yin no/ /gang kun 'byung la rjes su shes pa bstan pa ni/ de ltar spyod pas pha rol tu phyin pa rnam par 'phel te/ byang chub sems dpa'i skyon med pa la 'jug pa yin pas zhes bya ba ste/mdo ni ji skad du/ mngon par zhen pa med par da ltar spyod pa de sbyin pa'i pha rol tu phyin pa dang / chos thams cad rnam par 'phel te zhes bya ba nas/ byang chub sems dpa'i skyon med pa la 'jug pa'i bar du 'gyur ro zhes gang gsungs pa yin no//gang 'gog pa la chos shes pa'i bzod pa bstan pa ni/ phyir mi ldog pa'i sa gnon pa yin pas zhes bya ba ste/ 'di'i mdo ni phyir mi ldog pa'i sa gnon par 'gyur ro zhes gang gsungs pa yin no/ /de ni mtshan ma med par lhun gyis grub pa la gnas pa'i mtshan nyid byang chub sems dpa'i sa brgyad pa yin par rig par bya'o//de yang 'gog pa'i bzod pa'i dbang du mdzad nas de nyid bstan pa ni/ rigs kyi bu legs so legs so/ /'di ni don dam pa de la bzod pa yin te/ sangs rgyas kyi chos rjes su rtogs par 'gyur ro zhes gang gsungs pa yin no//gang 'gog pa la chos shes pa bstan pa ni/ mngon par shes pa yongs su rdzogs nas sangs rgyas thams cad mchod cing der skyes nas des bstan pa'i chos nyan pa yin te/ 'di'i mdo ni/ de mngon par shes pa yongs su rdzogs nas sangs rgyas kyi zhing nas kyang sangs rgyas kyi zhing du 'gro zhing sangs rgyas bcom ldan 'das rnams la bsnyen bkur byed do zhes bya ba la sogs pa gang gsungs pa yin no //'gog pa la rjes su shes pa'i bzod pa bstan pa ni/ phung po dang / khams dang / skye mched dang /khams drug dang / rten cing 'brel par 'byung ba'i so so'i yan lag kyang byang chub sems dpa' ma yin pa 'dus pa'ang ma yin/ de dag ma yin pa gzhan zhig la'ang ma yin/ byang chub sems dpa' la de dag yod pa ma yin/ de dag la byang chub sems dpa' yod pa ma yin no//de dag gi bdag nyid kyang byang chub sems dpa' ma yin zhes bya ba ni de dag byang chub sems dpa'i ngo bo yin pa bkag nas rnam grangs gzhan gyis dgag par bzhed pa yin te/ 'di'i mdo ni/ rab 'byor de ji snyam du sems/ byang chub sems dpa' zhes gang brjod pa yin te/gzugs byang chub sems dpa' yin snyam mam/ gzugs ma yin pa gzhan zhig byang chub sems dpa' yin snyam mam/ byang chub sems dpa' la gzugs yod snyam mam/ gzugs la byang chub sems dpa' yod snyam mam/ gzugs med pa byang chub sems dpa' yin snyam mam zhes bya ba la sogs pa gang gsungs pa yin no//gang 'gog pa la rjes su shes pa bstan pa ni/ 'di ltar phung po la sogs pa rnams so so yang ma yin/ 'dus pa yang ma yin te/ de dag gi de bzhin nyid byang chub sems dpa' ma yin/de dag ma gtogs pa'ang byang chub sems dpa' ma yin la/ de dag la yang ma yin no/ /de dag gi bdag nyid byang chub sems dpa' ma yin te/ sems can shin tu mi dmigs pa nye bar bzung nas de dag gi de bzhin nyid byang chub sems dpa'i ngo bo yin pa bkag nas rnam grangs gzhan gyis dgag pa yin par dgongs so//'di'i mdo ni/ rab 'byor 'di ji snyam du sems/ gzugs kyi de bzhin nyid gang yin pa de byang chub sems dpa' yin snyam mam/ gzugs kyi de bzhin nyid las gzhan pa zhig byang chub sems dpa' yin snyam mam/gzugs kyi de bzhin nyid la byang chub sems dpa' yod snyam mam/ byang chub sems dpa' la gzugs kyi de bzhin nyid yod snyam mam/ gzugs med pa'i de bzhin nyid byang chub sems dpa' yin snyam mam zhes bya ba la sogs pa gang gsungs pa yin no//gang lam la chos shes pa'i bzod pa bstan pa ni/ gzugs la sogs pa'i phung po rnams so sor rtag pa dang / mi rtag pa dang / bde ba dang / sdug bsngal gyi tshig bla dgas zhes bya ba nas/ ji srid smon pa dang / smon pa med pa'i tshig bla dgas shin tu mi dmigs pa'i phyir byang chub sems dpa'i ngo bo bkag pa yin te/'di'i mdo ni/ rab 'byor de ji snyam du sems/ byang chub sems dpa' zhes bya ba ni/ gzugs rtag pa nyid kyi tshig bla dgas yin snyam mam/ de bzhin du gzugs mi rtag pa nyid dang / gzugs bde ba nyid dang /gzugs sdug bsngal ba nyid dang / gzugs bdag dang bcas pa nyid dang / gzugs bdag med pa nyid dang / gzugs zhi ba nyid dang / gzugs ma zhi ba nyid ces bya ba de dag ni byang chub sems dpa'i tshig bla dgas yin snyam mam zhes bya ba la sogs pa yin no/ /gang lam la chos shes pa bstan pa ni/chos kyi dbyings gcig la gcig mthong ba bkag pa yin te/ 'di'i mdo ni/ rab 'byor chos kyis chos kyi dbyings yang dag par rjes su mi mthong ngo / /chos kyi dbyings kyis kyang chos yang dag par rjes su mi mthong ngo zhes bya ba yin no/ /gang lam la rjes su shes pa'i bzod pa bstan pa ni/'di ltar gzugs kyi dbyings dang / chos kyi dbyings dang / tshor ba'i dbyings dang / chos kyi dbyings dang zhes bya ba nas/ rnam par shes pa'i dbyings dang / chos kyi dbyings dang zhes bya ba nas yid kyi dbyings dang / chos kyi dbyings zhes bya ba'i bar du yin te/'di'i mdo ni/ rab 'byor gzugs kyi dbyings kyis chos kyi dbyings yang dag par rjes su mi mthong ngo / /chos kyi dbyings kyis kyang gzugs kyi dbyings yang dag par rjes su mi mthong ngo zhes bya ba la sogs pa yin no/ /gang lam la rjes su shes pa bstan pa ni/'dus byas kyi dbyings dang / 'dus ma byas kyi dbyings phan tshun mthong ba gcig la gcig bkag pa yin te/ 'di'i mdo ni/ rab 'byor 'dus byas kyi dbyings kyis 'dus ma byas kyi dbyings yang dag par rjes su mi mthong ngo / /'dus ma byas kyi dbyings kyis kyang 'dus byas kyi dbyings yang dag par rjes su mi mthong ngo zhes bya ba 'dis ni dmigs par bya ba dang /dmigs par byed pa mnyam pas mnyam pa nyid kyi ye shes gsal bar bstan to/ /bsgom pa'i lam gyi dbang du mdzad nas bstan pa ni/ 'dus byas dang 'dus ma byas nyid gcig la gcig tha dad par gdags par mi nus te/chos thams cad mi dmigs pas skrag pa med pa yin te/ 'di'i mdo ni/ rab 'byor 'dus byas las tha dad par 'dus ma byas gdags par mi nus so/ /'dus ma byas las kyang tha dad par 'dus byas gdags par mi nus so//de ltar byang chub sems dpa' chos thams cad yang dag par mi dmigs pas mi skrag /kun tu mi skrag ces bya ba la sogs pa gsungs pa yin no/ /de la 'dus byas ni lam mo/ /'dus ma byas ni spangs pa ste/ de gnyis gcig la gcig tha dad par byas shing gdags par mi nus pa'i phyir des na bsgom pa'i lam gyi rnam par gzhag pa ni btags pa yin gyi ji ltar mthong ba'i mngon sum du phyogs par byed pa'i mtshan nyid pa ni ma yin te/dngos po las tha dad pa med pa'i phyir ro zhes ston pa yin no zhes ston par byed do//de ltar byas na shes rab kyi pha rol tu phyin pa bsgrub pa gang yin pa mi dmigs pa'i rnam pa dang / de'i dmigs pa gang yin pa 'phags pa'i bden pa bzhi dang / rten gang yin pa skyabs gsum dang / khyad par du 'gro ba'i rgyu gang yin pa ma chags pa dang / mi ldog par 'gro ba'i rgyu gang yin pa yongs su mi ngal ba dang /theg pa gzhan gyis mi 'gro ba'i rgyu gang yin pa lam yongs su 'dzin pa dang / gzhan gyi dring mi 'jog par 'gro ba nyid kyi rgyu gang yin pa spyan lnga dang / rnam pa thams cad mkhyen pa nyid yongs su rdzogs pa'i rgyu gang yin pa mngon par shes pa drug dang /sgrub pa mthar thug pa'i rgyu gang yin pa mthong ba dang bsgom pa'i lam dag ste/ de dag thams cad gdams ngag gi gnas skabs su bstan par rig par bya'o/ /des na 'di ni byang chub sems dpa' sems dpa' chen po la shes rab kyi pha rol tu phyin par gdams pa ste/'di ni rjes su bstan pa yin no zhes gsungs pa yin no/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan las gdams ngag dang rjes su bstan pa'i rnam par 'grel pa'o// // nges par 'byed pa'i cha dang mthun pa rnams brjod par bya'o//yang 'di dag la brjod par bya ba ci yod ce na/ nyan thos la sogs pa las khyad par rnam pa bzhi brjod par bya ba yin te/ dmigs pa'i khyad par dang / rnam pa'i khyad par dang / rgyu'i khyad par dang / yongs su 'dzin pa'i khyad par ro/ /rnam par rtog pa dang ldan pa'i sbyor ba yang brjod par bya ste/'og nas bshad pa'i mthong ba'i lam gyis spang bar bya ba'i gzung ba dang 'dzin pa'i rnam par rtog pa bzhi po nges par 'byed pa'i cha dang mthun pa 'di la rnam par rtog pa du zhig tu rnam par gzhag par bya zhe na/ 'di la ni re re zhing chung ngu dang /'bring dang / chen po'i dbye ba brjod par bya ba yin pas/ dmigs pa dang ni rnam pa dang / /rgyu dang yongs su 'dzin pa yis/ /byang chub sems dpa' blo ldan gyi/ /drod sogs bdag nyid ci bzhin du/ /rnam rtog bzhi po ldan brten pa/ /chung dang 'bring dang chen po dang //nyan thos bse ru lta bu dang / /bcas pa dag las khyad par 'phags/ /zhes bya ba'i tshig le'ur byas pa gnyis po 'di dag nye bar dgod par mdzad pa yin te/ de dag gis ni sems bskyed pa dang / gdams ngag dang / rjes su bstan pa'i sbyor ba dang ldan pa dang / thos pa dang / bsams pa de dag khyad par du 'gro ba thob pa las thar pa'i cha dang mthun pa'i dge ba'i rtsa ba bsgom pa'i rang bzhin dro ba zhes bya ba'i nges par 'byed pa'i cha dang mthun pa'i dge ba'i rtsa ba skye'o/ /dro ba dang 'dra bas dro ba ste/ rnam par mi rtog pa'i ye shes kyi me 'byung ba'i sngon du 'gro ba'i rgyu yin pa'i phyir ro//de khyad par rnam pa bzhis nyan thos la sogs pa las khyad par du 'phags pa ste/ dmigs pa'i khyad par ni 'phags pa'i bden pa bzhi po mi rtag pa la sogs pa'i rnam pa la dmigs pa'i phyir ro/ /rnam pa'i khyad par ni sdug bsngal dang kun 'byung gi bden pa'i rnam pa la mngon par ma zhen pa la sogs pa'i rnam pa yin pa'i phyir ro//gang gzugs la sogs pa'i phung po tha dad pa rnams sdug bsngal dang / kun 'byung gi rnam pa bsgom pa la mngon par ma zhen pa ste/ rjes su mthun pa'i chos la sred pa ni skyon no//de dag nyid la stong pa nyid dang / smon pa med par mngon par ma zhen pa ni skyon med pa yin no zhes bstan pa yin no/ /'di'i mdo ni/ tshe dang ldan pa shA ri'i bu 'di la byang chub sems dpa' sems dpa' chen po gzugs mi rtag ces bya bar mngon par zhen pa dang / lhag par gnas pa dang /kun shes pa dang / gzugs sdug bsngal zhes bya ba dang / stong zhes bya ba dang / gzugs bdag med ces bya bar mngon par zhen cing lhag par gnas pa dang / kun shes pa dang / de bzhin du gzugs stong zhes bya ba dang / smon pa med ces bya bar mngon par zhen pa dang /lhag par gnas pa dang / kun shes pa zhes bya ba nas tshe dang ldan pa shA ri'i bu 'di la byang chub sems dpa'i rjes su mthun pa'i chos la sred pa ni skyon no zhes bya ba la sogs pa yin no/ /'di ni re zhig sdug bsngal gyi bden par rtogs pa'i dmigs pa dang rnam pa'i khyad par ro//kun 'byung gi bden par rtogs pa'i dmigs pa dang rnam pa'i khyad par ni/ mdo las ji skad du/ de bzhin du gzugs 'di spang bar bya'o zhes mngon par zhen zhes bya ba la sogs pa gang gsungs pa yin no/ /de la sdug bsngal dang /kun 'byung gi bden pa la mi rtag pa la sogs par dmigs shing / mngon par zhen pa med pa la sogs pa rnams kyis rnam par byed do/ /ci zhig brjod par 'gyur zhe na/ nyan thos rnams ni gzugs la sogs pa'i mtshan nyid kyi dngos po de la mngon par zhen par byed de/de mi rtag pa la sogs pa'i rnam par 'gyur te/ bdag tu lta ba'i gnyen po ma yin pa'i phyir ro/ /byang chub sems dpa' rnams ni yang mi rtag pa la sogs pa'i mtshan nyid kyi dngos po la dmigs shing de'i mngon par zhen pa med pa la sogs pa'i rnam par 'gyur te/ chos su lta ba'i gnyen po yin pa'i phyir ro//'dir yang mtshan ma med pa zhes bya ba ma smos pa ni bden pa gnyis ston par bzhed pas 'jug pa'i phyogs kyi dbang du mdzad pa yin te/ mtshan ma med pa la theg pa chen po 'gog pa dang / lam gyi bden pa'i rnam pa yin pa'i phyir ro/ /de ltar byas na gang la mtshan ma med pa dang /gang gi rnam par rtog pa'i mtshan ma sel ba ni/ zhi ba'i rnam pa yin no zhes gang gsungs pa de ni dngos po dang / mtshan ma dang 'brel pa'i nyan thos kyi lam gyi dbang du mdzad pa yin pas de dang 'di la 'gal ba med do/ /mngon par zhen pa med pa la sogs pa gang gsungs pa 'dir dpyad par bya ste/gal te re zhig mngon par zhen pa med pa yin no zhe na/ de ltar na ni med pa yin pa'i phyir gnyen por mi rigs so/ /'on te mngon par zhen pa ma yin pa yin na ni mig la sogs pa yin par thal bar 'gyur ro zhe na/ ji ltar mi mthun pa yin pa de ltar ni mngon par zhen pa yin la/ ji ltar gnyen po yin pa de ltar ni mngon par ma zhen pa yin no/ /yang ji ltar na mi mthun pa yin zhe na/ mi bden pa'i kun tu rtog pas kun nas bslang ba'i yod pa dang med par 'dzin pa'o/ /ji ltar gnyen po yin zhe na/ci nas kyang de dag med pa'o/ /yang ji ltar de dag med pa yin zhe na/ tshe dang ldan pa shA ri'i bu gal te sems ma yin pa de la yod pa'am/ med pa dmigs par 'gyur zhes dris pa la sems gang la sems med pa zhes bya ba yod dam zhes phyir dris pa 'di ni gnas med pa dang /shes pa med do zhes bya bas lan btab pa yin no/ /'gog pa dang lam gyi bden pa'i dmigs pa dang / rnam pa'i khyad par dag gi dbang du byas nas bstan pa ni 'gog pa dang / lam dag mngon du bya ba dang / bsgom par bya bar mngon par zhen pa ni skyon yin no/ / 'di'i mdo ni/ 'gog pa 'di ni mngon du bya'o/ /'dis 'gog pa mngon du bya'o/ /lam 'di bsgom par bya'o/ /'dis ni lam bsgom par bya zhing mngon par zhen pa med par bya'o zhes bya ba la sogs pa gsungs pa la/ de la 'di ltar zhes bya ba ni kun 'byung la sogs pa'i bden pa re re zhing rnam pa bzhi bzhir gsungs pa yin la/'dis zhes bya ba ni rgyur gyur pa'i byang chub kyi phyogs gsungs pa yin no/ /'dis ni 'gog pa dang lam dag ni mtshan ma med pa rnam par thar pa'i sgor bshad pa la mtshan ma yang rnam pa gsum ste/ kun nas nyon mongs pa dang /rnam par byang ba'i chos rnams bsten par bya ba dang / bsten par mi bya ba'i mngon par zhen pa'i mtshan ma dang / spyad par bya ba dang / spyad par bya ba ma yin pa rnams la bslab par gnas pa'i mtshan ma dang / sbyin pa la sogs pa'i pha rol tu phyin pa rnams dang / de'i pha rol tu phyin pa ma yin pa la sogs pa rnams la thabs la mkhas pa dang /thabs la mkhas pa ma yin pa zhes bya ba'i mtshan ma'o/ /de dag las go bzlog pa'i tshul gyis mtshan ma med pa gsal bar bstan to/ /kun nas nyon mongs pa dang / rnam par byang ba'i chos rnams la bsten par bya ba dang /bsten par bya ba ma yin pa dang / spyad par bya ba dang / spyad par bya ba ma yin pa dang / bslab par bya ba dang / bslab par bya ba ma yin pa dang / sbyin pa la sogs pa'i pha rol tu phyin pa rnams dang / de las gzhan pa'i pha rol tu phyin pa ma yin pa rnams la mkhas pa dang /thabs la mkhas pa ma yin pa dang / mngon par zhen pa dang / lhag par gnas pa dang / 'du shes pa ni rjes su mthun pa'i chos la sred pa ste skyon zhes bya'o/ /'di'i mdo ni/ 'di ni kun nas nyon mongs pa'o/ /'di ni rnam par byang ba'o/ /chos 'di dag ni bsten par bya'o//chos 'di dag ni bsten par bya ba ma yin pa'o/ /'di ni spyad par bya ba'o/ /'di ni spyad par bya ba ma yin pa'o zhes bya ba nas mngon par zhen pa med pa zhes bya ba la sogs pa yin no/ /rjes su mthun pa'i rtog pa'i chos 'di la sred pa yin no/ /rjes su mthun pa zhes bya ba ni lugs su 'jug pa'i chos la sred pa'o zhes bya ba ni nyon mongs pa zhes bya ba'i tha tshig go//byang chub sems dpa' 'di'i skyon zhes bya bar rtogs par 'gyur ba gang yin snyam na'ang skyon med pa de las bzlog pa'i mtshan nyid yin pa'i phyir ro/ /nang stong pa nyid la phyi stong pa nyid yang dag par rjes su mi mthong ngo zhes bya ba nas brtsams te/stong pa nyid thams cad kyis so sor gcig la gcig mthong ba dgag pa yin te zhes bstan pa'o/ /'di'i mdo ni/ de nang stong pa nyid la phyi stong pa nyid yang dag par rjes su mi mthong ngo / /phyi stong pa nyid la nang stong pa nyid yang dag par rjes su mi mthong zhes bya ba la sogs pa yin no//rlom pa'i mtshan ma thams cad kun tu bcad pa'i mtshan nyid lam gyi dbang du mdzad nas bstan pa ni/ gzugs la sogs pa'i phung po rnams dang / pha rol tu phyin pa rnams dang / byang chub kyi phyogs dang /so so yang dag par rig pa dang / stobs dang / mi 'jigs pa dang / sangs rgyas kyi chos ma 'dres pa rnams dang / byang chub kyi sems dang de'i ming du yang shes pa'i rlom sems bkag pa yin no / /'di'i mdo ni/ 'di ltar bslab par bya ste/ gzugs shes par bya ste zhes bya ba nas sangs rgyas kyi chos rnams shes par bya ste zhes bya ba'i bar dang /byang chub kyi sems zhes bya ba shes par bya ste des kyang rlom sems su mi bya'o zhes bya ba yin no/ /'dis ni lam gyi bden pa'i dmigs pa khyad par du gsal bar bstan to / /de la byang chub kyi sems kyi ming shes par bya ste zhes bya ba ni 'di dag ni ming tsam ste/'di lta ste/ byang chub kyi sems ni rdzas dang / de yongs su grub pa yod pa ma yin par blta bar bya ste/ ci'i phyir zhe na/ sems ni sems ma yin te/ rang bzhin gyis 'od gsal ba nyid yin pa'i phyir te/ji skad du/ de ci'i phyir zhe na/ 'di ltar sems de ni sems ma yin te/ sems kyi rang bzhin 'od gsal ba yin pa'i phyir ro zhes gsungs pa yin no/ /yang sems rang bzhin gyis 'od gsal ba de gang yin zhe na/ nyon mongs pa dang yang dag par ldan pa dang /yang dag par mi ldan pa ma yin pa ni rang bzhin gyis 'od gsal ba'i mtshan nyid yin te/ ji skad du/ tshe dang ldan pa shA ri'i bu sems gang 'dod chags dang ldan pa ma yin/ bral ba ma yin zhes bya ba nas nyan thos dang / rang sangs rgyas kyi sems dang ldan pa ma yin/bral ba ma yin pa 'di ni zhes bya ba la sogs pa gsungs pa yin no/ /yod pa tsam du rlom sems dang rjes su 'brel pa la brtsams nas smras pa ni yang ci tshe dang ldan pa rab 'byor sems yod pa gang yin pa de sems ma yin nam zhes bya ba yin no/ /de'i phyir bstan pa ni de sems dang sems ma yin pa yod pa dang med pa nyid du dris pa mi rigs so zhes bya ba yin te/'di'i mdo ni/ yang ci tshe dang ldan pa shA ri'i bu sems gang med pa de la yod pa'am/ med pa'am/ yod pa ma yin pa'am/ dmigs pa'am zhes bya ba la sogs pa gsungs pa yin no/ /gang 'di ltar ci'i phyir 'di la sems med pa zhes bya zhe na/rnam par rtog pa med pa/ 'gyur ba med pa/ sems med pa'i mtshan nyid yin te/ ji skad du/ tshe dang ldan pa shA ri'i bu rnam par rtog pa med pa 'gyur ba med pa ni sems med pa zhes bya ba yin no/ /sems ni rnam par rtog pa med cing 'gyur ba med pa des kyang phung po la sogs pa nas yang dag par rdzogs pa'i byang chub kyi bar du 'gyur ba med cing rnam par rtog pa med pa yin no//ji skad du/ tshe dang ldan pa shA ri'i bu ji ltar sems la 'gyur ba med cing rnam par rtog pa med pa de bzhin du phung po la sogs pa nas yang dag par rdzogs pa'i byang chub kyi bar du zhes gsungs pa yin no//sems dang sems ma yin pa nyid ni rang bzhin gyis 'od gsal ba yin no zhes bya ba nas brtsams te/ ji srid 'di'i bar gyis lam gyi bden pa'i dbang du mdzad nas khyad par bstan pa yin par rig par bya'o//rgyu'i khyad par gyi dbang du mdzad nas de ci'i phyir zhe na/ gang 'di ltar thun mong ba'i mtshan nyid can gyi nges par 'byed pa'i cha dang mthun pa ni shes rab kyi pha rol tu phyin pa ni theg pa gsum gyi rgyu yin pa'i phyir ro zhes bstan pa yin te/ ji skad du/ 'di ltar 'dir shes rab kyi pha rol tu phyin pa 'di las gang la byang chub sems dpa' bslab par bya ba'i theg pa gsum rgya cher bstan to zhes gsungs pa yin no//yongs su 'dzin pa'i khyad par ni thabs la mkhas pa dang / dge ba'i bshes gnyen gyi mtshan nyid yin te phyis 'chad par 'gyur ro//'di ni re zhig dro bar gyur pa chung ngu yin no/ /phung po dang / khams dang / skye mched dang / rten cing 'brel par 'byung ba zhes bya ba nas brtsams te/ ji srid nyon mongs pa dang bral ba nas rnam par dben pa'o zhes bya ba'i bar gyis so/ /dngos po 'gags pas na zhi ba'o//rang nyid ma skyes pa nyid kyis na skye ba med pa'o/ /pha rol gyi mu med pa nyid kyis na rtogs par dka' ba'i phyir 'byung ba med pa'o/ /'phags pa'i gang zag thams cad kyi sngon thob pa dang ldan par gyur pa'i rgyu dang bral ba'i phyir kun nas nyon mongs pa med do / /sems can dmigs su med pas na rnam par byang ba med pa'o//'phags pa'i chos rnams kyi rgyur 'gyur bas na chos kyi dbyings so/ /gzhan du 'gyur ba med pas de bzhin nyid do/ /phyin ci log pa'i mthar thug pa nyid kyis na yang dag pa'i mtha'o/ /'phags pa thams cad kyis ma mdzad pas na chos gnas pa nyid do//sangs rgyas thams cad kyis zhes bya ba nas chos thams cad kyi de bzhin nyid do zhes bya ba dang 'du ba dang 'god pa dang mi dmigs shing ma mthong ba nyid kyi phyir dang / ming thams cad yod pa ma yin pa'i phyir gnas pa dang / gnas pa dang bral ba med pa zhes bya ba ni 'bring yin no//de la 'du ba ni skye ba ste/ de mi dmigs pa'o/ /'god pa ni 'gag pa ste/ de yang dag par rjes su mi mthong ngo zhes bya ba ni don gzhan yin te/ mi dmigs shing yang dag par rjes su mi mthong ngo zhes bya ba'i tshig gnyis ni go rims ji lta ba bzhin du mi dmigs pa'i rnam pa sgom pa lhag par mos pa yid la byed pa dang /de kho na nyid mthong ba'i dbang du byas te bstan pa'o/ /rim pa ji lta ba bzhin du mi dmigs/ yang dag par rjes su mi mthong ngo zhes bya ba'i tshig gnyis brjod pas de la gnas pa ni rgyun 'dra ba'o/ /gnas pa dang bral ba ni rgyun mi 'dra ba'o//phung po la sogs pa chos kyi brdar btags pa dang / rmi lam dang / sgra brnyan dang / gzugs brnyan dang / sprul pa bzhin du dge ba la sogs pa gang gis kyang brjod du med pa'i phyir zhes bya ba nas sems par mi 'gyur/ skrag par mi 'gyur ba la sogs pas rnam pa thams cad mkhyen pa nyid du nges par 'byung bar 'gyur ro zhes bya bas ni chen po bstan pa yin no//thar pa'i cha dang mthun pa las 'di khyad ci yod ce na/ dro bar gyur pa zhes bya ba ni chung ngu dang / 'bring dang / chen po'i rigs zhes bya ba'i don nam/ yang dbang po rtul po la sogs pa'i gang zag gi dbye ba la'ang 'di'i dmigs pa'i gnas la sogs pa'i khyad par shes par bya ba'i don no//rtse mo la sogs pa la yang thal bar 'gyur ro zhe na/ nyes pa med de 'dod pa yin no/ /gang dro bar gtogs pa bden pa bzhi'i rnam pa bcu drug tu gang bshad pa dro bar gyur pa ni bden pa bzhi la dmigs pa rnam pa bcu drug dang ldan pa yin la/drod las ni rtse mo yin zhing de dag kyang de 'dra bar gyur pa yin no zhes bya ba la sogs pa de ci ltar yin zhe na/ ci bre dang khang bzangs mtshan nyid 'dra ba'am/ ci 'di ni 'jug pa kho na yin no/ /dro bar gyur pa bshad zin to//de bzhin du chung ngu dang / 'bring dang / chen po la sogs pa'i rim gyis mngon par 'phel ba'i dro bar gyur pa las rtse mo rnams skye ste/ g.yo ba'i dge ba rnams kyi rtse mo yin pa'i phyir rtse mo nyid do/ /de rnams kyi yongs su 'dzin pa dang /rgyu nyid khyad par snga ma bzhin du shes par bya'o/ /rtse mo rnams ji lta ba bzhin du bzod pa dang / 'jig rten pa'i chos kyi mchog rnams la'ang dmigs pa dang rnam pas khyad par brjod par bya ste/ de la rtse mo'i khyad par ni re zhig dmigs pa'i khyad par ni chos thams cad la mi gnas pa yin te/byang chub sems dpa' shes rab kyi pha rol tu phyin pa la spyod pa'i tshe/ gzugs la gnas par mi bya'o zhes bya ba nas brtsams te/ phung po dang / khams dang / skye mched dang / rten cing 'brel par 'byung ba'i yan lag rnams dang / sa'i khams la sogs pa rnams la chags pa'i gnas bkag pa zhes bya ste/de la gnas pa ni dngos po la dmigs pa'i rab tu gnas pa'i sems las byung ba'o/ /'di las bzlog pa ni mi gnas pa yin par shes par bya'o/ /'di ni dpyad par bya ste/ gal te re zhig gnas pa med pa gnas par mi bya ba yin na ni med pa yin pa'i phyir gnyen por mi rigs so//'on te gnas pa ma yin pa yin na thal ches pa yin no zhe na/ mngon par zhen pa med pa la tshul ji ltar bshad pa de ltar 'di la yang blta bar bya'o/ /chos thams cad rang bzhin gyis stong pa nyid rnam pa'i khyad par can yin te/de ci'i phyir zhe na/ de rnams de'i ngo bos stong zhes so/ /mdo ni ji skad du/ gang gi phyir gzugs ni gzugs nyid kyis stong ngo zhes bya ba la sogs pa gsungs pa yin no/ /de 'dis ni rtag par dmigs pa'i gnas spangs pa yin te/ chos rnams dang de'i stong pa nyid rnam pa'i khyad par can dang /gang de ci'i phyir zhe na/ de rnams dang de'i stong pa nyid phan tshun de'i rang bzhin gcig par 'dod pas bstan pa yin no/ /ji skad du mdo las bcom ldan 'das gzugs nyid stong pa nyid stong pa nyid kyang gzugs so zhes bya ba la sogs pa gsungs pa yin no//de'i phyir 'dis ni chad par 'dzin pa'i dmigs pa'i gnas spangs pa yin no/ /sdug bsngal la sogs pa'i bden pa'i rnam pa dag la gnas pa med par dmigs pa'i khyad par ni gang gzugs la sogs pa'i phung po rnams la so so nas sdug bsngal lo zhes bya ba nas zhi ba'o zhes bya bar gnas pa bkag pa'o zhes bstan pa yin no//sdug bsngal la sogs pa'i rnam pa rnams ni stong pa nyid ni rnam pa'i khyad par yin te/ gang de ci'i phyir zhe na/ gzugs la sogs pa'i phung po sdug bsngal la sogs pa de'i rnam pa rnams rang bzhin gyis stong pa nyid yin te/sdug bsngal la sogs pa'i rnam pa rnams dang / de'i stong pa nyid phan tshun de'i bdag nyid gcig pa ni rnam pa'i khyad par yin te/ gang de ci'i phyir zhe na/ sdug bsngal la sogs pa dang / de'i stong pa nyid dag phan tshun rang bzhin gcig par 'dod pa'o zhes gsungs pa yin no//'dir yang sdug bsngal nyid la stong pa nyid kyis khyab pas phan tshun de'i rang bzhin gcig pa yin te/ yang sdug bsngal gyis ni stong pa nyid la ma yin te/ de ni chos thams cad kyi spyi'i mtshan nyid yin pa'i phyir ro/ /'di ni re zhig sdug bsngal dang / kun 'byung gi bden pa'i dbang du byas pa'i dmigs pa dang rnam pa'i khyad par yin par shes par bya'o//'gog pa'i bden pa'i dbang du byas pa ni de bzhin nyid la sogs pa gnas med pa la dmigs pa'i khyad par ni gang 'di ltar de bzhin nyid dang / chos nyid dang / chos kyi dbyings dang / chos skyon med pa nyid dang /yang dag pa'i mtha' dang / gzungs kyi sgo thams cad dang sbyar ro zhes bstan pa yin te/ ji skad du mdo las/ byang chub sems dpa' shes rab kyi pha rol tu phyin pa la spyod pa'i tshe/ de bzhin nyid la gnas par mi bya'o zhes bya ba la sogs pa gsungs pa yin no/ /de bzhin nyid la sogs pa rnams rang bzhin gyis stong pa ni rnam pa'i khyad par yin te/ji skad du/ bcom ldan 'das 'di ltar de bzhin nyid ni rang bzhin gyis stong ngo zhes bya ba la sogs pa gsungs pa yin no/ /de bzhin nyid la sogs pa dang / de'i stong pa nyid phan tshun de'i bdag nyid gcig pa ni rnam pa'i khyad par yin te/ji skad du/ bcom ldan 'das gang de bzhin nyid stong pa nyid de/ de de bzhin nyid las gzhan ma lags/ de de bzhin nyid kyang stong pa nyid la gzhan ma lags te / stong pa nyid kyang de bzhin nyid do/ /de bzhin nyid kyang zhes bya ba la sogs pa gsungs pa yin no//'dir yang gnyis kas gnyis ka la khyab pa yin par rig par bya'o/ /de ltar na don la khyad par med do zhe na/ don gzhan ma yin pa de ni de bzhin nyid yin la/ lta bar gyur pa'i gnyen po ni stong pa nyid yin no/ /'di ltar kun la don la bye brag med pa ni chos nyid yin la/'phags pa'i chos rnams kyi rgyu yin pa'i phyir chos kyi dbyings so/ /gcig tu nges par 'byung ba'i phyir chos skyon med pa'o/ /phyin ci ma log pas na yang dag pa'o/ /rab kyi mthar 'gro bas na mtha' zhes bya'o/ /lam gyi dbang du byas pa ni gnas med pa dang mngon par 'dus ma byas pa la dmigs pas khyad par du 'phags pa yin te/gang gzhan yang thabs mi mkhas pas bdag dang bdag gir 'dzin pa'i sems kyis gzugs la sogs pa'i phung po rnams zhes bya ba nas gzungs kyi sgo rnams dang / rnam pa thams cad mkhyen pa nyid dang rjes su mthun par shes rab kyi pha rol tu phyin pa la sbyor ba dang /'gal bar gnas pa dang / mngon par 'du byed par dmigs pa bkag pa yin te zhes bstan pa yin no/ /'di'i mdo ni/ bcom ldan 'das gal te byang chub sems dpa' shes rab kyi pha rol tu phyin pa la spyod pa na thabs la mi mkhas pas bdag dang bdag gir 'dzin pa'i sems kyis gzugs la gnas shing /[ (]da [,]de [)]yang gzugs mngon par 'du bya ba la spyod na shes rab kyi pha rol tu phyin pa la mi spyod do zhes bya ba nas brtsams te/ mngon du mi byed pa la spyod na shes rab kyi pha rol tu phyin pa yongs su 'dzin pa ma yin/de rnal 'byor du byed pa ma yin te/ yongs su ma rdzogs pas rnam pa thams cad mkhyen pa nyid du nges par mi 'byung ngo zhes bya ba'i bar du gsungs pa yin no/ /gzugs la sogs pa yongs su 'dzin pa nyid stong pa nyid kyi rnam pas khyad par du 'phags pa yin te/gang de rnams nyid la yongs su 'dzin pa'i ngo bo bkag pa yin no zhes bstan to/ /'di'i mdo ni/ bcom ldan 'das gang gzugs yongs su ma bzung ba de ni gzugs ma lags te/ rang bzhin gyis stong pa nyid nye bar bzung ste zhes bya ba la sogs pa gsungs pa yin no//de la spangs pa ni chos kyi dbyings rgya che ba'i phyir ro/ /bdun du ma byas pa ni dmigs pa dang rnam pa dag gis sngar 'jug pa'i phyir ro/ /tshad med pa nyid ni rnam pa thams cad mkhyen pa nyid do/ /nges pa ni rab tu nges pa'i phyir ro/ /nyan thos la sogs pa thams cad dang thun mong ma yin pa ni ji skad du/dmigs pa dang / rnam pa dang / rgyu dang / yongs su 'dzin pas khyad par du 'phags so zhes bstan pa yin no/ /chos thams cad yongs su ma bzung ba ji lta ba rjes thogs su ston to/ /rnam pa thams cad mkhyen pa nyid du chos thams cad stong pa nyid nye bar bzung nas yongs su mi 'dzin pa'i phyir ro zhes bya ba yin te/'di'i mdo ni/ bcom ldan 'das de yang rnam pa thams cad mkhyen pa nyid du yongs su mi 'dzin te/ nang stong pa nyid nas dngos po med pa'i ngo bo nyid stong pa nyid nye bar bzung nas zhes bya ba dang / de mtshan ma med par brjod do zhes bya ba yin no//ting nge 'dzin ni sems rtse gcig pa ste/ de yang dkyil 'khor yin te/ ting nge 'dzin gzhan dang gzhan bsdus pa yin pa'i phyir ro/ /des ni re zhig rtse mor gyur pa chung ngu bstan no/ /ji skad du rnam pa thams cad mkhyen pa nyid ni mtshan ma med par brjod de/ 'di ltar mtshan ma ni nyon mongs pa'o zhes gsungs pa yin no/ /ci'i phyir mtshan ma la nyon mongs pa zhes bya zhe na/ gzugs la sogs pa'i phung po rnams dang / byang chub kyi phyogs la sogs pa rnams dang / gzungs kyi sgo rnams kyi bar gyi mtshan ma nyon mongs pa nyid yin no//'di'i mdo ni/ gzugs ni mtshan ma med pa'o/ /tshor ba ni mtshan ma med pa'o zhes bya ba nas gzungs kyi sgo rnams ni mtshan mar brjod de/ nyon mongs pa yin no/ /de'i mtshan nyid ni yang dag pa ma yin par sgro btags pa'i mtshan nyid yin par rig par bya'o/ /ji ltar mtshan ma 'di dag byang chub sems dpa'i nyon mongs pa yin par nges she na/kun du rgyu sde can gyi mtshan ma nyon mongs pa'i gnyen por rtogs pas zhes gsungs pa dang dpang po yin te/ ji skad du mdo las gal te des mtshan mar bzung bar 'gyur na ni kun du rgyu sde can bstan pa 'di la dad pa thob par mi 'gyur ro zhes gsungs pa yin no//sde can dper byas pa ni de mu stegs pa dang 'brel pa yin yang de langs nas rtogs pa 'ba' zhig gis stobs nyid kyis don de mngon sum du byas pa ni shes par byed pa yin no/ /rtogs pa'i ye shes kyi mtshan mar re zhig gdon mi za bar 'gyur ro zhe na/smras pa/ nang la sogs pa rnams ye shes kyi mthong ba bkag nas bzlog pa gsum pa yin te/ 'di'i mdo ni/ ye shes de nang du yang dag par rjes su mi mthong / phyi rol dang / phyi dang nang la sogs pa las gzhan du ye shes de yang dag par rjes su mi mthong ngo zhes bya ba nas de chos cung zad kyang yongs su mi 'dzin te/mtshan ma med pa yid la byed pa nye bar bzung nas zhes gsungs pa yin no/ /yang ci'i phyir chos thams cad yongs su mi 'dzin pa yin zhe na/ chos thams cad yongs su 'dzin pa med pa ni shes rab kyi pha rol tu phyin pa yin no zhes bstan to//ji skad du/ 'di ni byang chub sems dpa' sems dpa' chen po shes rab kyi pha rol tu phyin pa chos thams cad yongs su mi 'dzin pa nye bar bzung ba yin no zhes gsungs pa yin no/ /des ni 'bring bstan to/ /gang gis/ gang las/ gang gis ni/ 'dri ba'i tshig go/ /chos gang ci yang med cing mi dmigs pa de ni shes rab kyi pha rol tu phyin pa nye bar rtog ste/ go rims bzlog pas pha rol tu phyin pa rnams med cing mi dmigs pa'i phyir ro/ /de bzhin du gzugs la sogs pa'i phung po la sogs pa rnams kun mkhyen gsum dang / stong pa nyid dang /blang bar bya ba med cing mi dmigs pa'i phyir de bzhin du nye bar brtags nas sems mi zhum/ mi skrag ces bya ba la sogs pas mi spong ba ni byang chub sems dpa' sems dpa' chen po shes rab kyi pha rol tu phyin pa nyid du rig par bya'o zhes bya ba de dag gis ni chen po bstan to/ / 'di'i mdo ni/ bcom ldan 'das byang chub sems dpa' sems dpa' chen po shes rab kyi pha rol tu phyin pa la spyod pa na nye bar brtags par mi bgyi ste/ shes rab kyi pha rol tu phyin pa nyid ni gang / shes rab kyi pha rol tu phyin pa nyid ni gang yin/ shes rab kyi pha rol tu phyin pa 'di su'i yin/shes rab kyi pha rol tu phyin pa 'di gang las yin/ shes rab kyi pha rol tu phyin pa 'di gang gi yin zhes bya ba la sogs pa yin no/ /rtse mor rtogs pa bstan nas bzod pa brjod par bya ste/ rtag tu sbyor ba'i rgyu ston pa zhes bya ba nas brtsams te/ gzugs la sogs pa'i phung po rnams re re nas gzugs la sogs pa'i phung po'i rang bzhin dang bral ba'i phyir ro//de bzhin du khams dang / skye mched la sogs pa nas ma 'dres pa rnams kyi bar du ste/ de nyid la sogs pa'i rang bzhin dang bral ba ni/ de bzhin nyid la sogs pa'i rang bzhin yin pa'i phyir ro zhes bya ba yin no//de bas na re zhig bzod pa ni chos thams cad rang bzhin med pa nyid kyis dmigs pa khyad par can du 'phags so zhes bstan te/ ji skad du mdo las/ tshe dang ldan pa shA ri'i bu gzugs ni gzugs kyi rang bzhin dang bral ba ste zhes bya ba la sogs pa gsungs pa yin no//gzugs la sogs pa'i phung po la sogs pa rnams dang /de bzhin nyid la sogs pa rnams re re nas rang bzhin med pa'i phyir ro zhes bya ba 'dis ni chos thams cad rang bzhin med pa nyid kyis rnam pa khyad par 'phags pa yin no zhes bstan te/ ji skad du mdo las/tshe dang ldan pa shA ri'i bu gzugs kyi rang bzhin ni dngos po med pa'o zhes bya ba nas tshe dang ldan pa shA ri'i bu rnam grangs de nyid kyi phyir 'di ltar gzugs ni gzugs kyi rang bzhin dang bral ba'o zhes bya ba la sogs pa gsungs so/ /de rnams re re nas mtshan nyid kyi rang bzhin dang bral ba'o//rang bzhin yang rang bzhin dang bral ba'o/ /'dis ni mtshan nyid kyi rang bzhin dang / rang bzhin gyi mtshan nyid dag phan tshun ngo bo med pa nyid kyis rnam pa dang khyad par du 'phags pa yin te/ ji skad du mdo las/ tshe dang ldan pa shA ri'i bu mtshan nyid kyi rang bzhin yang mtshan nyid dang bral ba'o zhes bya ba la sogs pa gsungs pa yin no//rang bzhin gyi mtshan nyid kyang rang bzhin dang bral ba yin no/ /de ltar slob pa ni rnam pa thams cad mkhyen pa nyid du nges par 'byung ba'i rgyu nyid du bstan pa'i phyir bzod pa chung ngu dang mthun pa thob pa ni bzod pa chung ngu yin no zhes bya'o //'bring bstan pa'i phyir ci'i phyir rnam pa thams cad mkhyen pa nyid du nges par 'byung zhes yongs su dris pa ni tshe dang ldan pa shA ri'i bu de ni 'di ltar chos thams cad ni ma skyes ma byung ba'i phyir ro zhes pa nas brtsams te/ phung po dang / khams dang / skye mched la sogs pa rnams kyang rang bzhin stong pa nyid kyi phyir skye ba dang 'gag pa mi dmigs te/ de dag rim pa bzhin du chos thams cad ma skyes pa nyid kyis dmigs pa khyad par du 'phags pa yin no/ /de'i phyir 'byung ba med pas rnam pa khyad par du 'phags pa yin par rig par bya'o//rjes su mthun pa'i bzod pa thob pa'i byang chub sems dpa' ngan song dang dbye ba rnam pa gsum las 'das pa thob pa yin te/ rnam par smin pa las yang dag par 'das pa ni gang lus la sogs pa yongs su dag pa thob po zhes bstan te/ ji skad du mdo las/ ji lta ji ltar rnam pa thams cad mkhyen pa nyid du nye bar gyur pa de lta de ltar lus yongs su dag pa dang / sems yongs su dag pa dang / mtshan yongs su dag pa thob po zhes gsungs pa yin no/ /ngan 'gro'i rgyu las yang dag par 'das pa ni 'dod chags kyi sems mi skyed do zhes bstan te/ ji skad du 'dod chags dang ldan pa'i sems mi skyed do/ /zhe sdang dang ldan pa'i sems mi skye zhes bya ba la sogs pa gsungs pa yin no/ /yongs su nyams pa las yang dag par 'das pa thob pa ni gang brdzus te skye bar 'gyur te/ sangs rgyas kyi zhing gzhan du 'gro zhing zhing yongs su sbyong bar byed/sems can yongs su smin par byed cing / yang dag par rdzogs pa'i byang chub ma yin pa dang bral ba'i phyir ro zhes bstan te/ ji skad du mdo las/ 'dod chags kyi sems mi skyed ces bya ba nas lta ba dang ldan pa'i sems mi skyed / nam yang ma'i mngal du skye bar mi 'gyur/ de rtag par rgyun du rdzus te skye bar 'gyur zhing / sangs rgyas kyi zhing du 'gro zhing sems can yongs su smin par byed do zhes bya ba la sogs pa gsungs pa yin no/ /de dag gis 'bring bstan nas chen po brjod par bya ba'i phyir/ bcom ldan 'das gal te byang chub sems dpa' thabs mi mkhas pas shes rab kyi pha rol tu phyin pa la spyod pa'i tshe/gzugs la spyod na mtshan ma la spyod kyi shes rab kyi pha rol tu phyin pa la mi spyod do zhes bya ba nas brtsams te/ gzugs la sogs pa'i phung po rnams la spyod na mtshan ma la spyod pas shes rab kyi pha rol tu phyin pa la spyod pa bkag nas/de dag re re nas rtag pa dang / mi rtag pa dang / sdug bsngal ba dang / bde ba dang / bdag dang / bdag med pa dang / zhi ba dang / ma zhi ba zhes bya ba dang / dben pa dang / mi dben pa zhes bya ba dang / de bzhin du khams dang / skye mched la sogs pa rnams zhes bya ba nas mtshan ma la spyod na shes rab kyi pha rol tu phyin pa la mi spyod do zhes bkag nas/bdag la sogs pa la spyod na thabs la mi mkhas pas zhes bya ba de dag gis bzod pa chen po yin te/ chos thams cad mtshan ma med pa nyid ni dmigs pas khyad par du 'phags pa yin no//de ltar byas na gang rgyun tu zhugs pa'i zhes bya ba nas dgra bcom pa'i ye shes dang / spangs pa gang yin pa de ni byang chub sems dpa'i bzod pa yin zhes gsungs so/ /de ltar yang mtshan ma med pa la gnas pa'i bzod pa'i dbang du byas nas sa brgyad pa yin par bstan te/rigs kyi bu legs so legs so/ /don dam pa la bzod pa sangs rgyas kyi chos rnams thob pa zhes bya ba de ni 'di yin no/ /bzod pa ni yang skad cig ma yin par bstan te/ chen po de yang skad cig ces bstan to/ /phung po la sogs pa rnams zhes bya ba nas ma 'dres pa'i bar dang /gnas pa dang / mos pa dang / 'du shes bkag pa zhes bya bas ni chos thams cad gnas pa dang / mos pa dang / 'du shes med pas ni rnam pa khyad par du 'phags pa yin no/ /ji ltar bzod pa de la gnas pa yin zhe na/ thabs la mkhas pas de la mi gnas pa'i dbang du byas nas gzugs la sogs pa nas ma 'dres pa'i bar du bzlog pa la spyod pa bstan te/thabs la mkhas pa dang zhes bya ba nas brtsams te/ gzugs kyi stong pa nyid gzugs ma yin/ stong pa nyid kyang gzugs las gzhan ma yin te/ gzugs la sogs pa dang stong pa nyid gnyis phan tshun ngo bo nyid gcig par bstan te/ 'khor ba dang mya ngan las 'das pa'i mthar lhung ba las nges par grol ba ni thabs la mkhas pa yin par gsal bar bstan to/ /yang ci'i phyir 'khor ba dang mya ngan las 'das par mi ltung zhe na/gal te chos 'ga' zhig la spyod na spyod pa nye bar bkag pa yin te/ chos thams cad rang bzhin med par bstan pa ni bzod pa chen po thob pa yin te/ bzod pa chen po bstan to/ /chos chen po la bzod pas ni bzod pa zhes bya'o/ /bzod pa bstan nas chos kyi mchog bstan pa'i phyir tshe dang ldan pa shA ri'i bu gzhan yang ting nge 'dzin rnams la gnas pa'i byang chub sems dpa' zhes bya ba nas brtsams te/myur du bla na med pa yang dag par rdzogs pa'i byang chub pa'i rgyu ting nge 'dzin brgya las lhag pa la sogs pa dpag tu med pa thob pa yin no zhes bstan te/ji skad du mdo las/ dpa' bar 'gro ba zhes bya ba'i ting nge 'dzin dang / rin chen phyag rgya zhes bya ba'i ting nge 'dzin dang / seng ge rnam par bsgyings pa zhes bya ba la sogs pa gsungs pa yin no/ /des chos kyi mchog gi dmigs pa khyad par du 'phags pa gsal bar bstan to//de la ci'i phyir dpa' bar 'gro ba'i ting nge 'dzin zhes bya zhe na/ ting nge 'dzin thams cad kyi spyod yul nyams su myong bar gyur pa yin no/ /de bas na dpa' bar 'gro ba'i ting nge 'dzin zhes brjod do/ /de la ci'i phyir rin chen phyag rgya'i ting nge 'dzin zhes bya zhe na/ ting nge 'dzin gang gis ting nge 'dzin thams cad la rgyas btab pa yin no/ /yang seng ge rnam par bsgyings pa'i ting nge 'dzin zhes bya zhe na/ ting nge 'dzin gang la gnas nas ting nge 'dzin thams cad la rnam par rol pa yin no/ /ting nge 'dzin gyi byed pa'i bye brag rgya che ba'i phyir chos kyi mchog go/ / ting nge 'dzin gyi byed pa ni rnam pa khyad par du 'phags pa gsal bar bstan to/ /des ni 'jig rten pa'i chos kyi mchog chung ngu bstan to/ /sangs rgyas rnams kyis lung ston pa yin te/ ji skad du mdo las/ tshe dang ldan pa shA ri'i bu byang chub sems dpa' sems dpa' chen po ting nge 'dzin de rnams la gnas pa ni sngon gyi de bzhin gshegs pas kyang lung bstan cing /da ltar phyogs bcu'i 'jig rten gyi khams na sangs rgyas bcom ldan 'das bzhugs pa de dag gis kyang de lung ston par 'gyur ro zhes gsungs pa yin no/ /ting nge 'dzin de la mnyam par gzhag pa la sogs pa'i rnam par rtog pa med cing mi dmigs pa yin te/ji skad du/ ting nge 'dzin de yang yang dag par rjes su mi mthong / bdag snyoms par zhugs par rlom sems med do/ /bdag snyoms par 'jug par 'gyur ro/ /bdag snyoms par 'jug go zhes bya ba la sogs pa gsungs pa yin no//de dag thams cad kyi rnam par rtog pa med cing mi dmigs pa 'di ni chos kyi mchog gi 'bring yin te/ shes rab kyi pha rol tu phyin pa dang / ting nge 'dzin dang / byang chub sems dpa' rnams phan tshun ngo bo gcig par bstan pa yin te/ ji skad du mdo las/tshe dang ldan pa shA ri'i bu shes rab kyi pha rol tu phyin pa'ang gzhan la/ ting nge 'dzin kyang gzhan/ byang chub sems dpa' 'ang gzhan zhes bya ba ni med kyi byang chub sems dpa' nyid kyang ting nge 'dzin/ ting nge 'dzin nyid kyang byang chub sems dpa' zhes bya ba yin no/ /ting nge 'dzin de dag med pa nyid kyi phyir nges par shes pa la sogs pa bkag pa yin te/ji skad du mdo las/ tshe dang ldan pa shA ri'i bu byang chub sems dpa' de ni ting nge 'dzin du 'du shes pa med do/ /smras pa/ ji ltar 'du shes par mi 'gyur/ de ltar rnam par rtog pa med pa'i phyir ro/ /smras pa/ ji ltar na rnam par rtog pa med pa yin/smras pa/ chos thams cad med pa'i phyir zhes bya ba la sogs pa gsungs pa yin no/ /de dag gis chos kyi mchog chen po bstan te/ dmigs pa dang / rnam pa dang / rgyus nges par 'byed pa'i cha dang mthun pa nges pa chung ngu dang / 'bring dang / chen po'i bye brag khyad par du 'phags pa bstan nas/ da ni rnam par rtog pa'i sbyor ba rnams brjod par bya'o/ /mthong ba'i lam gyis spang bar bya ba bzhi po gzung ba dang / 'dzin pa'i rnam par rtog pa'i bye brag las 'dir nges par 'byed pa'i cha gang yin pa'i rnam par rtog pa gang yin pa rnam par gzhag par bya'o//de la rnam par rtog pa de dag ni rnam pa bzhi las gzung ba'i rnam par rtog pa gnyis te/ dngos po'i rten can dang / gnyen po'i rten can no/ /'dzin pa'i rnam par rtog pa yang dbye ba rnam pa gnyis te/ gang zag rdzas su yod pa'i rten can dang /btags pa'i rten can no/ /de la nges par 'byed pa'i cha dang mthun pa dang po dang gnyis pa na rim pa bzhin du gzung ba'i rnam par rtog par gyur pa gnyis dang ngo / /gsum pa dang bzhi pa gang yin pa ni yang 'dzin pa'i rnam par rtog pa gnyis dang yin no/ /gnas brtan rab 'byor nyon mongs pa med par gnas pa'i yon tan brjod pa'i phyir rnam par rtog pa'i mtshan nyid ston pa nyon mongs pa med par gnas pa rnams kyi mchog yin te/des bdag dang gzhan gyi rten can gyi rnam par rtog pa 'gegs pa la mkhas pa ston pa'i dbang du mdzad par shes par bya ba'i phyir ro//de la gzung ba'i rnam par rtog pa'i dbye ba ni rnam pa dgur rig par bya'o/ /rnam par byang ba la dmigs pa'i rnam par rtog pa ni gang shes rab kyi pha rol tu phyin pa zhes bya ba nas sbyin pa'i pha rol tu phyin pa dang / byang chub kyi phyogs rnams zhes bya ba nas ma 'dres pa mi dmigs pa'i rnal 'byor la slob pa ni shes rab kyi pha rol tu phyin pa la slob pa yin par ston pa yin te/ji skad du mdo las/ shA ri'i bu de ltar slob pa'i byang chub sems dpa' sems dpa' chen po'i mi dmigs pa'i rnal 'byor ni shes rab kyi pha rol tu phyin pa la slob pa'o zhes bya ba la sogs pa gsungs pa yin no//sems can la dmigs pa'i rnam par rtog pa ni gang bdag dang / sems can dang / srog la sogs pa rnams dang / phung po dang / khams dang / skye mched dang / rten cing 'brel par 'byung ba rnams dang / gzugs med pa'i snyoms par 'jug pa rnams dang /byang chub kyi phyogs kyi chos rnams dang / stobs rnams dang / mi 'jigs pa rnams dang / sangs rgyas kyi chos ma 'dres pa rnams dang / rgyun du zhugs pa la sogs pa rnams dang / byang chub sems dpa' dang / byang chub dang / sangs rgyas kyi chos shin tu rnam par dag pa nye bar bzung nas dmigs par bstan pa yin te/de'i mdo ni shA ri'i bu bdag mi dmigs/ sems can dang / srog dang / skyes bu dang / gang zag ces bya ba la sogs pa gsungs pa yin no/ /gzugs la sogs pa gang ma skyes pa dang / ma byung ba dang /mi dmigs pa mngon par 'du byed pa med pa ni rnam par dag pa yin par bstan pa yin te/ ji skad du mdo las/ shA ri'i bu ma skyes pa mi dmigs shing mngon par 'du byed pa med pa ni rnam par dag pa zhes brjod do zhes gsungs pa yin no/ /ma rig pa'i rnam par rtog pa ni chos 'ga' zhig la ji lta ba bzhin ma yin par mngon par zhen pa ni ma rig pa yin par bstan pa yin te/ji skad du mdo las/ shA ri'i bu 'di ltar byang chub sems dpa' chos cung zad kyang mi slob ste/ de ci'i phyir zhe na/ shA ri'i bu de ni 'di ltar chos 'di dag byis pa so so'i skye bos ji ltar mngon par zhen par bya ba de lta bu'i rnam pa yod pa ma yin te/ji ltar med pa de ltar yod do/ /de ltar med pas na ma rig pa zhes brjod do zhes gsungs pa yin no/ /phung po la sogs pa dmigs pa'i rnam par rtog pa gang de grub pa'i ched du phung po la sogs pa rnams dang /byang chub kyi phyogs rnams dang / mi 'jigs pa rnams dang / stong pa nyid thams cad nye bar bzung nas yang dag par med par bstan pa yin te/ ji skad du shA ri'i bu gzugs ni yang dag par yod pa ma yin te nang stong pa nyid nye bar bzung nas zhes bya ba la sogs pa gsungs pa yin no//ming dang gzugs la mngon par zhen pa'i rnam par rtog pa dang / mtha' gnyis la chags pa'i rnam par rtog pa yang gnyis po de'i dbang du byas nas ma rig pa dang / sred pa nyid kyis ming dang gzugs la mngon par zhen cing mtha' gnyis la chags pa yin te/de la byis pa rnams ma rig pa dang / sred pas ming dang gzugs su mngon par zhen zhes bya ba nas sangs rgyas kyi chos rnams su mngon par zhen cing mngon par zhen pas mtha' gnyis la chags pas ni yang dag par med pa'i phyir chos su btags pa yin no//kun nas nyon mongs pa dang / rnam par byang ba mi shes pa'i rnam par rtog pa ni gang de dag la yid ches pas gzugs rnams dang / kun nas nyon mongs pa rnams dang / rnam par byang ba mi shes pas 'dod pa'i khams la sogs pa las nges par mi 'byung bar bshad pa yin te/de'i mdo ni/ des gzugs mi shes mi mthong / tshor ba dang / 'du shes zhes bya ba nas byis pa'i grangs su 'gro ba ste/ 'dod pa'i khams zhes bya ba la sogs pa yin no/ /'phags pa'i lam la mi gnas pa'i rnam par rtog pa ni gang gzugs la sogs pa stong pa nyid la mngon par mi dad pa sngon du 'gro bas sbyin pa la sogs pa'i pha rol tu phyin pa rnams zhes bya ba nas ma 'dres pa rnams la mi gnas pa yin te/ji skad du mdo las/ gzugs gzugs kyis stong par mi dad cing zhes bya ba nas byang chub byang chub kyis stong ngo zhes bya bar mi dad de/de shes rab kyi pha rol tu phyin pa la mi gnas so zhes bya ba la sogs pa gsungs pa yin no/ /gzung ba'i rnam par rtog pa dang po'o/ /de thabs mi mkhas pas pha rol tu phyin pa dang / tshad med pa rnams dang / bsam gtan dang / gzugs med pa'i snyoms par 'jug pa zhes bya ba nas ma 'dres pa'i bar dang /rnam pa thams cad mkhyen pa nyid du rtog cing mngon par zhen te zhes bya ba nas brtsams te/ mi dmigs pa'i sbyor bas rnam pa thams cad mkhyen pa nyid du nges par 'byung ngo zhes bya ba'i bar du bstan pa yin no/ /gzung ba'i rnam par rtog pa gnyis pa'o//de'i mdo ni/ shA ri'i bu byang chub sems dpa' thabs mi mkhas pas shes rab kyi pha rol tu phyin par rtog cing mngon par zhen to zhes bya ba la sogs pa gsungs pa yin no/ /dngos po thams cad kyi gzhi can ni dang po yin la/ rnam par byang ba'i dngos po'i gzhi can nyid kyis gnyis pa de lta bu ni gzung ba'i rnam par rtog pa gnyis kyi khyad par yin no//de ltar byas na gzung ba'i rnam par rtog pa dang po gang yin pa de gnyis pa yang de nyid yin no zhes bshad pa snga mas ston par byed pa yin pas re zhig dang po gang yin pa de gnyis pa yin te/ 'di lta ste/ gzhi'i dngos po thams cad pa'i rnam par rtog pa dang po ni gnyis par 'gyur ba nyid yin no/ /gnyis pa ni dang po ma yin te/ 'di lta ste/ rnam par byang ba tsam la brten pa'i gzung ba'i rnam par rtog pa gnyis pa ni dang po ma yin no/ /gang zag rdzas su yod pa'i rten can 'dzin pa'i rnam par rtog pa'i dbang du mdzad nas de yang mi dmigs pa'i sbyor ba zhes bya ba nas brtsams te/phung po rnams zhes bya ba nas rnam pa thams cad mkhyen pa nyid stong pa nyid mi dmigs pa'i rnal 'byor gyis ci sgyu ma'i skyes bu rnam pa thams cad mkhyen pa nyid du nges par 'byung ngam zhes bya ba nas brtsams te phung po rnams kyi bar dang /mi 'jigs pa rnams dang / rnam pa thams cad mkhyen pa nyid dang / sgyu ma phan tshun ngo bo gcig par bstan pas sgyu ma kun nas nyon mongs pa dang / rnam par byang ba dang / skye ba dang / 'gag pa bkag par gyur pas de pha rol tu phyin pa rnams zhes bya ba nas ma 'dres pa'i bar dang /rnam pa thams cad mkhyen pa nyid du nges par 'byung zhing rnam pa thams cad mkhyen pa nyid thob par 'gyur ba yin nam zhes bya bas ni nges par 'byung ba bkag pa gsungs pa yin no/ /'dzin pa'i rnam par rtog pa dang po'o/ /gnyis pa 'dzin pa'i rnam par rtog pa skyes bu btags par yod pa'i rten can gyi dbang du mdzad nas nye bar len pa'i phung po rnams la byang chub sems dpa' btags pa bstan pa yin te/de'i mdo ni rab 'byor de ji snyam du sems/ gang 'di la 'du shes pa dang / kun shes pa dang / btags pa dang / tha snyad du byang chub sems dpa' zhes bya ba gang / 'di lta ste/ nye bar len pa'i phung po lnga rnams yin nam/ gsol pa/ bcom ldan 'das de lta ma lags so zhes bya ba la sogs pa gsungs pa yin no/ /de lta bu gzhan du yang mdo zur gnyis dang yang bstan bcos sbyar bar bya ste/ bdag gis ni gzhung mangs pa'i nyes pa spang ba'i phyir gang du yang mtshon par ma byas so/ /phung po la sogs pa'i btags pa'i skye ba dang 'gag pa'i sgo nas gang yang rung ba zhig rnam pa thams cad mkhyen pa nyid du nges par 'byung ba la dmigs par sbyor bas nges par 'byung ba de'i rjes su 'jug pas sgyu ma'i skyes bu nyid de ltar bslab par bya'o zhes nges par gzung ba shes par bya ba nyid yin no//de bzhin du bcom ldan 'das phung po lnga po de nyid sgyu ma'i skyes bur rig par bgyi'o zhes bya ba dang / gzugs la sogs pa'i phung po rnams rmi lam dang / sgra brnyan dang /mig yor dang / chu zla dang / smig rgyu dang / sprul pa lta bu zhes bya ba'i dpes dngos po med pa'i ngo bo nyid mi dmigs pas dpe don dang 'gal ba can yin te/ de yang bcom ldan 'das gzugs ni sgyu ma lta bu'o zhes bya ba nas brtsams te/ nang stong pa nyid la sogs pas phung po la sogs pa dmigs su med pas dpe don mi 'thad pa'i phyir sems zhum pa med pa nyid dang /skrag pa med pa la sogs pa dang / mi zhum/ mi 'gong / 'gyod par mi 'gyur zhes bya ba'i tshig gsum dang / mi 'jigs/ mi dngang / skrag par mi 'gyur zhes bya ba'i tshig gsum go rims bzhin bstan pa yin par shes par bya'o//de la gnas ma yin pa la 'jigs pa ni 'jigs pa ste/ lam log pa dang 'dra'o/ /de med pas mi zhum pa'o/ /rtag tu skrag pa ni kun tu dngang ba ste/ 'jigs pa skyes pa las ma bzlog pa'o/ /de med pas na mi 'gong ba'o//kun tu dngang ba'i nges par gyur pa ni skrag pa ste/ de med pas na 'gyod par mi 'gyur ba'o/ /'dzin pa'i rnam par rtog pa gnyis pa'o/ /de dang de nas brtsams te 'di dang 'dir sbyar ro/ /'di ltar med pas na ma rig pa zhes brjod do zhes bya bas ma rig pa ste dang po'o//thabs la mi mkhas pas shes rab kyi pha rol tu phyin par rtog cing mngon par zhen pa zhes bya ba ni gnyis pa'o/ /lam shes pas nges par mi 'byung zhing rnam pa thams cad mkhyen pa nyid rjes su mi 'thob ces bya bas ni gzugs brnyan lta bu'i phung po rang bzhin med do zhes bya ba'i bar gyis ni bzhi pa'o//de rnams nges par 'byed pa'i cha dang mthun pa rnam pa bzhi dang / mtshungs par ldan pa yin te/ mthong ba'i lam gyis spang bar bya ba'i rnam par rtog pa gzung ba dang 'dzin pas phye bas rim pa bzhin du bstan to/ /rnam par bshad pa byed pas gzhung gi don gtan la phab pa ji skad bstan pa dang /rab tu byed pas 'brel par sbyar ro/ /yang bsgom pa'i lam gyis spang bar bya ba'i rnam par rtog pa'ang yod do/ /rjes thogs la bsgrub pa dang dgag par nus pa yin te/ mthong ba'i lam du nye bar bkod pa las gzhan pa 'di ltar bsgom pa'i lam gyi yin par nges par gzung ste/gzhan du sa gnyis pa la sogs pa don med pa thob par 'gyur ba'i phyir ro/ /mtshungs par ldan pas khyad par du 'phags pa bstan na/ ji skad du thabs la mkhas pa dang / dge ba'i bshes gnyen gyis yongs su bzung bas khyad par du 'phags so zhes bstan pa de las thabs la mkhas pa'i dbang du byas nas gsungs pa ni sems zhum pa med pa nyid dang /mi skrag pa la sogs pa'i rgyu nas bzung ste/ thabs la mkhas pa'i yongs su bzung ba nas brtsams te/ gzugs kyi phung po rnams re re nas mi rtag pa dang /sdug bsngal ba dang / stong pa nyid dang / bdag med pa dang / zhi ba dang / dben pa dang / stong pa nyid dang / mtshan ma med pa dang / smon pa med pa nyid kyis rnam pa thams cad mkhyen pa nyid dang rab tu ldan pa'i sems kyis so sor phye nas mi dmigs pas/ de rnams nyid mi rtag pa la sogs par chos ston pa na dmigs su med par sbyong ba'i rnam pa thams cad mkhyen pa nyid dang ldan pa yid la byed pa dang rab tu ldan pa'i sbyin pa'i pha rol tu phyin pa nyid dang /mi rtag pa la sogs pa de rnams nyid yid la byed pa'i tshul khrims kyi pha rol tu phyin pa mchog tu 'dzin pa med pa nyid dang /de bzhin du sa la sogs pa'i khams drug po mi rtag pa la sogs par bzod pa dang / smon pa dang / so sor rtog par byed pa'i bzod pa'i pha rol tu phyin pa nyid dang / 'dir yang bu ga nam mkha'i khams zhes bya ba des mi rtag par bya'o/ /phung po la sogs pa la mi rtag pa la sogs par so sor rtog cing mi dmigs pa dang ldan pa'i rnam pa thams cad mkhyen pa nyid dang rab tu ldan pa'i yid la byed pa mi gtong zhing mi 'dor ba'i brtson 'grus kyi pha rol tu phyin pa dang /theg pa dman pa'i sems dang ldan pa'i yid la byed pa'i skabs mi 'byed pa'i bsam gtan gyi pha rol tu phyin pa nyid dang /phung po la sogs pa nas sangs rgyas kyi chos ma 'dres pa'i bar gyis stong pa nyid de stong pa nyid du rtogs shing de rnams dang stong pa nyid kyang gcig la gcig de'i ngo bor rjes su 'brel pa'i shes rab kyi pha rol tu phyin pa nyid kyis phung po la sogs pa nas sangs rgyas kyi chos ma 'dres pa nyid dang ma bral bas zhes bya ba yin te/'di'i mdo ni/ byang chub sems dpa' shes rab kyi pha rol tu phyin pa la spyod pa na 'di ltar so sor rtog ste/ gzugs mi stong pa gzugs nyid ma yin/ gzugs nyid stong pa nyid/ stong pa nyid kyang gzugs so//tshor ba mi stong pa tshor ba nyid ma yin/ tshor ba nyid stong pa nyid ces bya ba la sogs pa gsungs pa yin no/ /thabs la mkhas pa'o/ /dge ba'i bshes gnyen gyis yongs su 'dzin pa bstan pa ni/ phung po la sogs pa rnams zhes bya ba nas ma 'dres pa rnams kyi bar du mi rtag pa la sogs par bstan pa dang /dge ba'i rtsa ba de rnams bla na med pa yang dag par rdzogs pa'i byang chub tu yongs su sngo bar byed pa ni dge ba'i bshes gnyen yin no zhes bstan te/ dge ba'i bshes gnyen yin no zhes yang thabs la mi mkhas pa gang zhe na/ gang ji skad du bstan pa'i thabs la mkhas pa las bzlog pa yin par rtogs par bya ba ste/gang zhe na/ pha rol tu phyin pa zhes bya ba nas ma 'dres pa rnams dang bral bas rnam pa thams cad mkhyen pa nyid dang rab tu ldan pa'i yid la byed pas sgom zhing de dmigs pa'i yid kyis skrag pa la sogs pa thabs la mi mkhas pa yin no zhes bstan pa yin no//mi dge ba'i bshes gnyen gang yin zhe na/ de gang ji skad bshad pa'i mos pa bzlog pa ni sdig pa'i grogs po yin no zhes rtogs par bya ba'i phyir rang bzor byas pa la sogs pas shes rab kyi pha rol tu phyin pa ston par byed cing / sangs rgyas kyi cha lugs kyis 'ongs nas shes rab kyi pha rol tu phyin pa bsgoms pas khyod la ci zhig bya zhes bya ba la sogs pa dang /rang gi las nyan thos kyi theg pa dang rab tu ldan pa'i mdo sde la sogs pa ston cing / khyed la byang chub kyi sems kyis ci zhig bya zhes bya ba la sogs pa slu ba'i tshig ston par byed pa dang /mig la sogs pa'i skye mched rnams nas sangs rgyas kyi chos ma 'dres pa'i bar dag bdag gam bdag gis stong na/ bla na med pa yang dag par rdzogs pa'i byang chub tu mngon par rdzogs par sangs rgyas te khyed la ci zhig bya zhes 'dir slu ba'i chos ston pa'i smra ba po ni bdud yin no//de bzhin du rang sangs rgyas dang / nyan thos dang / mkhan po dang / slob dpon dang / tshangs par spyod pa'i cha lugs kyis smra bar byed pa'i bar du ste/ 'di dag kyang bdud kyi las te/ byang chub sems dpa'i theg pa mi ston pa ni sdig pa'i grogs por rig par bya'o zhes bya ba nas byang chub sems dpas spang bar bya'o zhes bstan to//de ltar mi mthun pa dang / gnyen po rnam par gzhag nas thabs la mkhas pa dang / dge ba'i bshes gnyen gyi mtshan nyid bstan pas ni nges par 'byed pa'i cha dang mthun pa rnams yongs su 'dzin pas khyad par du 'phags par rig par bya'o//de lta bu'i dbang du byas nas ji ltar/ dmigs pa dang ni rnam pa dang / /rgyu dang yongs su bzung ba yis/ /zhes bya ba la sogs pa bstan pa'i tshig le'ur byas pa'i rkang pa don dang ldan par bsdus nas bstan pa'i nges par 'byed pa'i cha zhes bya ba'i don ci zhig yin zhe na/nges par 'byed pa'i rnam par mi rtog pa rtogs par byed pa'i phyir ro/ /rnam pa bzhi po gzung ba dang 'dzin pa'i rnam par rtog pa gnyis kyis gnyen po ni mthong ba'i lam yin no/ /de'i phyogs gcig thob par byed pa'i phan pa nyid kyis na nges par 'byed pa'i cha dang mthun no//shes rab kyi pha rol tu phyin pa mngon par rtogs pa'i rgyan gyi bstan bcos las/ nges par 'byed pa'i cha dang mthun pa'i rnam par 'grel pa'o// // nges par 'byed pa'i cha dang mthun par bshad nas bsgrub pa'i rten brjod par bya'o/ / rigs zhes bya ba'i don to/ /bsgrub chos de ni gnas skabs kyi dbye bas rnam pa bcu bzhir 'gyur ro/ /ji lta zhe na/ rtog pa'i chos drug ste/ de ci zhig ce na/ zhabs su 'jug pa'i rten pa la rigs zhes mthar gsungs pa yin no/ /'di lta ste/ nges par 'byed pa'i cha bzhi dang /mthong ba dang / bsgom pa'i lam dag go/ /gang gi phyir sems bskyed pa nas brtsams te/ nges par 'byed pa'i cha dang mthun pa rnams dang / mthong ba'i lam dang / bsgom pa'i lam du gsungs pa'o/ /de dang des bcom ldan 'das kyis byang chub sems dpa' sems dpa' zhes gsungs so //bcom ldan 'das byang chub sems dpa' zhes bya ba'i tshig gi don gang lags/ rtogs pa'i chos gang yin pa de dang / de'i rten gang yin pa de las zhes bya ba nas brtsams te/ byang chub tu skye ba dang / yod pa bkag pas byang chub sems dpa'i tshig gi don med do zhes bya ba bstan pa yin te/ji skad du mdo las/ rab 'byor byang chub sems dpa'i tshig gi don ni med pa ste/ de ci'i phyir zhe na/ rab 'byor byang chub ni skye ba'am/ yod pa'am/ med pa nye bar mi dmigs so zhes gsungs pa yin no/ /nam mkha' la bya'i rjes med cing mi dmigs pa'i dpe dang /'di ltar rmi lam gyi dngos po dang / sgyu ma dang / smig rgyu dang / sgra brnyan dang / mig yor dang / gzugs brnyan dang / dri za'i grong khyer dang / sprul pa la gnas med cing dmigs su med pa'i dpes nges par 'byed pa'i cha dang mthun pa'i dang po'i rten yin no//dpe yang don gyi khyad par las yin te/ gang nges par 'byed pa'i cha dang mthun pa dang po dang mtshungs par ldan pa rnam par rtog pa dang po dgu'i dbye ba bstan pa yin te/ de'i dbye ba dang / so sor sbyar ba yin pa las/ gzhung mangs kyis dogs nas kho bos rnam par ma phye'o/ / de bzhin du nges par 'byed pa'i cha dang mthun pa las gzhan dag mthong ba dang / bsgom pa'i lam dag kyang rang rang gi rnam par rtog pa dang / dpe rnams don gyi khyad par re re nas sbyar te brjod par bya'o/ /yang dag pa'i mtha' dang / de bzhin nyid dang / ma nor ba de bzhin nyid dang / gzhan ma yin pa de bzhin nyid dang /chos nyid dang / chos kyi dbyings dang / chos gnas pa nyid dang / chos skyon med pa nyid dang / bden pa nyid la gnas med cing dmigs su med pa nyid kyi dpes ni nges par 'byed pa'i cha dang mthun pa gnyis pa'i rten yin no/ /sgyu ma'i skyes bu'i gzugs dang /tshor ba dang / 'du shes dang / 'du byed dang / rnam par shes pa la gnas med cing mi dmigs pa'i dpes de nyid kyi mig la sogs pa'i tshig gi don dang / de nyid kyi gzugs la sogs pa'i tshig gi don dang / de nyid kyi ming dang gzugs la sogs pa'i tshig gi don dang /de nyid kyi rnam par shes pa la sogs pa'i tshig gi don med cing mi dmigs pa de nyid kyi dpes nges par 'byed pa'i cha dang mthun pa gsum pa'i rten bstan to/ /sgyu ma'i nang stong pa nyid la sogs pa nas ma 'dres pa rnams la spyod pa na tshig gi don med cing mi dmigs pa'i dpes nges par 'byed pa'i cha dang mthun pa bzhi pa'i rten bstan pa yin no//de bzhin gshegs pa dgra bcom pa yang dag par rdzogs pa'i sangs rgyas kyi gzugs la sogs pa'i phung po rnams kyi tshig gi don med cing mi dmigs pa'i dpe dang / de nyid kyi mig la sogs pa nas yid kyi bar gyi tshig gi don dang /de nyid kyi nang stong pa nyid la sogs pa stong pa nyid rnams dang / ma 'dres pa rnams kyi tshig gi don med cing mi dmigs pa'i dpe dang / 'dus ma byas kyi khams la 'dus byas kyi tshig gi don dang / 'dus byas kyi khams la 'dus ma byas kyi khams kyi tshig gi don med cing mi dmigs pa'i dpes mthong ba'i lam gyi rten bstan to//'dir yang dpe du ma rnams zlos pa'i skyon ni med de/ mthong ba'i lam gyi mi mthun pa'i phyogs rnam par rtog pa bzhi po de rnams gzugs brnyan dang mtshungs par bstan pa'i phyir ro/ /skye ba med pa dang / 'gag pa med pa dang / mngon par 'du bya ba med pa dang /'byung ba med pa dang / mi dmigs pa dang / kun nas nyon mongs pa med pa dang / rnam par byang ba med cing mi dmigs pa'i dpes bstan nas/ rab 'byor de ci'i phyir zhe na/ gzugs skye ba med pa la gnas med do zhes bya ba nas brtsams te/ sangs rgyas kyi chos ma 'dres pa rnams skye ba med pa la gnas med do//'gag pa med pa dang / kun nas nyon mongs pa med pa dang / rnam par byang ba med pa dang / mngon par 'du bya ba med pa dang / 'byung ba med pa dang / mi dmigs pa la gnas med do zhes bya ba'i dpe dang / yang de rnams nyid rnam par dben pa nyid dang /mtshan ma med pa'i gnas dang / yang byang chub kyi phyogs kyi chos rnams bdag dang / sems can dang / srog la sogs pa shin tu rnam par dag pa la mtshan ma'i gnas med cing nye bar mi dmigs pa'i dpes bstan te/ skye ba med pa la sogs pa dang /mtshan ma'i gnas med pa dang / shin tu rnam par dag pa'i rnam pa ste/ rnam pa gsum gyis bsgom pa'i lam gyi rten bstan pa yin no/ /gnyen po dang ni spong ba dag /de ji lta bu zhe na/ rten ni rigs yin par gnas skabs kyis so/ /de ltar yang nyi ma'i dkyil 'khor gyi 'od zer la mun pa'i gnas med cing mi dmigs pa'i dpes gnyen po bskyed pa gsungs pa yin no//bskal pa'i me 'bar ba la 'du byed kyi gnas med cing rjes su mi dmigs pa'i dpes mi mthun pa'i phyogs spangs nas gnyen po bskyed de mi mthun pa'i phyogs spangs pa dang / gnyen po de dag nyid de dag yongs su btags pa ste rten yin no zhes bya bar sbyar ro//de la gnyen po dang mi mthun pa'i phyogs kyis rnam par rtog pa spong ba'i rten ni 'di yin te/ de bzhin gshegs pa dgra bcom pa yang dag par rdzogs pa'i sangs rgyas kyi tshul khrims dang / ting nge 'dzin dang / shes rab dang /rnam par grol ba dang / rnam par grol ba'i ye shes gzigs pa'i phung po rnams la/ de dang de'i mi mthun pa'i phyogs med cing nye bar mi dmigs pa'i dpes shes bya'i sgrib pa spangs pa'i don bstan to/ /shes rab snying brtser bcas pa dang / /zhes bya ba de ci zhig ce na/ rten ni rigs yin no//de ltar yang shes rab dang / snying rjes gsal zhing mdzes pa rnams 'khor ba dang mya ngan las 'das pa la mi gnas so zhes gsungs pa yin no/ /slob ma thun mong min nyid dang ste/ rten yin no zhes bya ba'i rjes su 'jug go/ /de ltar yang gza' dang / skar ma dang / nyan thos la sogs pa'o/ /nor bu rin po che zhes bya ba ni thun mong ma yin pa'i ye shes kyis 'jig rten gyi khams dpag tu med par ye shes kyi snang ba nyid kyis khyab par gsungs pa yin no/ /gzhan gyi don gyi go rims dang zhes bya ba rten yin no zhes bya bar sbyar ro/ /de ltar yang lha'i rigs su rnam par gzhag pa dang 'dra bar 'jig rten pa'i gong nas gong du legs pa'i khyad par du 'gro ba'i rgyu nyid yin par bstan pa yin no//ye shes rtsol bar mi mnga' bar/ /zhes bya ba ji lta bur rtogs par bya zhe na/ 'jug pa'i rten la rigs zhes bya ba yin no/ /de ltar yang lhun gyis grub par sems can gyi don la 'jug pa'i ye shes ni de bzhin gshegs pa dgra bcom pa yang dag par rdzogs pa'i sangs rgyas zhes bya ba'o zhes bstan pa yin no//'di'i mdo ni rab 'byor 'di ltar yang de bzhin gshegs pa dgra bcom pa yang dag par rdzogs pa'i sangs rgyas kyi tshig gi don med cing mi dmigs so zhes bya ba la sogs pa yin no//de la dngos po gnas med cing mi dmigs pa zhes bya ba la sogs pa gsungs pa yin no/ /dngos po rab tu gnas pa med cing mi dmigs zhes bya ba'i bar gyis yod pa dang med pa mi dmigs pa gsal bar bstan to/ /dpe de dang de rnams kyis don bstan pa yin no//thams cad du byang chub sems dpa'i tshig gi don med cing mi dmigs pa yin te/ ji skad du/ rab 'byor de ci'i phyir/ 'di ltar gang byang chub gang yin pa dang / byang chub sems dpa'i tshig gi don gang yin pa'i chos de dag thams cad kyang ldan pa yang ma yin/mi ldan pa yang ma yin te/ gzugs med pa/ bstan du med pa/ thogs pa med pa/ 'di ltar mtshan nyid med cing mtshan nyid gcig pa'o zhes gsungs pa yin no/ /nges par 'byed pa'i cha bzhi nas brtsams te bsgom pa'i zhes bya ba'i bar dang / rkang pa'i bkod pa'i khyad par ma mthong ba mthong ba dang /mthong ba mngon du phyogs pa'i gnas skabs rnams su go rims bzhin du sbyar te/ dngos po'i gnas skabs la ldan pa dang / mi ldan pa dag lta bas mthong ba dang / cig shos dag tu 'brel pa'i sngon med pa skyes pa dag dang / de'i ngo bo gong du 'jug pa med pa'i dngos po dang tha mi dad pa'i dbang du byas pa yin pa ste /'di lta ste/ dngos po med pa nyid yin pa'i phyir ro zhes bya ba 'dis ni chos kyi dbyings nyid 'phags pa'i chos rnams kyi rgyu yin pa'i phyir rigs ni rten yin par gsal bar bstan to/ /rang bzhin gyis gnas pa 'di yang rigs yin gyi rkyen las byung ba ni ma yin no//'ga' zhig rang bzhin gyis gnas pa la rigs zhes bya bar 'dod na 'khor ba thog ma med pa nas gang gA'i klung gi bye ma snyed kyi sangs rgyas yongs su mya ngan las 'das kyang rang bzhin gyis gnas pa'i rigs dang ldan pa'i srog chags rnams da rung yang mya ngan las ma 'das pa ci'i phyir zhe na/de nyes dmigs bzhi dang ldan pa yin te/ gang ji skad du/ nyon mongs pa dang bshes gnyen ngan/ /bar chad gzhan gyi dbang nyid do/ /zhes gsungs pa yin no/ /yang 'dir ni rgyun mi 'chad pa kho nar rang bzhin gyis gnas pa'i rigs su 'dod do//gzhan dag ni skye mched drug gi khyad par ni rigs yin la/ de yang rkyen tshogs pa las byung ba dang / rang bzhin gyis gnas pa rnam pa gnyis su 'dod do/ /rang bzhin gyis gnas pa'i rigs la rang bzhin zhes bya bar brjod na rgyu'i rnam grangs yin no/ /de de ltar na tshogs pa las byung ba dang zhes bya ba dang don la khyad par ci zhig yod/chos nyid kyi rnam grangs la yang nyes pa des gos pa med do/ /yang na de rnams kyi rigs ni btags pa yin la/ de mtshan nyid dang ldan pa yin pa'i phyir de dang 'di 'brel pa med do/ /chos kyi dbyings rigs yin na de ni spyir khyab pa nyid yin pa'i phyir thams cad rigs la gnas par 'gyur ba ma yin nam zhe na/ji ltar dmigs pa na 'phags pa'i chos rnams kyi rgyur gyur pa de ltar rigs zhes bshad pa yin nam/ 'dir shin tu thal ches par ci'i phyir rtog par byed/ de ltar yin yang / chos kyi dbyings la dbyer med phyir/ / rigs ni tha dad rung ma yin/ /zhes bya bas 'di ni nyan thos kyi rigs so/ /'di ni rang sangs rgyas kyi rigs so/ /'di ni sangs rgyas kyi rigs zhes bya ba dang / ji skad du/ 'jam dpal chos kyi dbyings gcig dang / de bzhin nyid gcig dang / yang dag pa'i mtha' gcig yin na/ snod dam/ snod ma yin pa ji ltar brtag par bya zhe na/ de ni bden mod kyi/ brten pa'i chos kyi bye brag gis/ /ngo bo'i dbye ba yongs su brjod/ /ces gsungs pa dang / ji skad du mdo de las/ btsun pa rab 'byor 'di lta ste/ rdza mkhan gcig gis 'jim pa las snod tha dad pa byas te/de dag las kha cig sbrang rtsi dang / sha ka ra'i snod du gyur/ kha cig ni mar khu'i snod du gyur/ kha cig ni dman pa mi gtsang ba'i snod du gyur kyang snod sa nyid du khyad par dang tha dad par byas pa 'ga' yang med do zhes bya ba la sogs pa gsungs pa yin no/ /yang mdo gzhan dag las/gang du sus kyang 'dus ma byas pa de ni 'dus ma byas la/ gang 'dus ma byas pa de ni 'phags pa'i rigs yin zhing / rigs de ni nam mkha' dang mnyam par bye brag med par kun tu khyab pa yin te/ chos kyi dbyings ro gcig pa nyid yin pa'i phyir ro/ /rtag cing chos kyi de kho na nyid yin pa la sogs pas rigs pa de ni rtag pa yin no//nges pa'i tshig tu ni yon tan bskyed pa'i don gyis ni rigs te/ de las yon tan dang de skye zhing 'byung ba yin no zhes bya ba'i tha tshig go/ /de ltar byas na 'phags pa'i gang zag thams cad du ni 'dus ma byas pa las byung ba yin no zhes bshad do//yang gzhan dag na re go zhes bya ba'i sgra ni sa yin la sa ni gnas yin no/ /de la gnas dang lhan cig spyod pa'i srog chags rnams la go'i sgra nye bar 'dogs so/ /de bas na go zhes bya ba sems can du bsdus pa yin la/ tra ni de rnams skyob pa yin pas rigs la go tra zhes bya'o//yang na phyogs la go zhes bya ste/ phyogs rnams na gnas pa'i srog chags rnams la go zhes bya bar nye bar 'dogs so/ /de bas na go skyob pas na go tra zhes bya'o/ /sems bskyed pa dang / thar pa dang / nges par 'byed pa'i cha rnams kyi sngon du de 'gro ba yin pas dang po kho na rigs bshad par bya ba yin pa de ni don gyi go rims yin la/'di ni 'bras bus rgyu bshad pa yin pas bshad pa'i go rims yin la/ de yang rigs dang / nges par 'byed pa'i cha dang mthun pa gzhan du gyur pa dag snang ste/ dper na mtshan nyid las/ slob ma rigs las bzlog gnyis ni//sangs rgyas su 'gyur gzhan gsum yang / /zhes bshad pa yin no/ /mngon par rtogs pa'i rgyan shes rab kyi pha rol tu phyin pa man ngag gi bstan bcos las bsgrub pa'i rten gyi rnam par 'grel pa'o// //rten du gyur pa'i dmigs pa bshad par bya'o//yang dmigs pa rnams chos thams cad de zhes bya ba smos te/ de dag kyang gang zhe na/ 'jig rten dge dang mi dge ba/ /'jig rten rtogs pa zhes bya dang / /gang dag 'jig rten 'das 'dod dang / /zag bcas zag pa med chos dang / /gang dag 'dus byas 'dus ma byas//slob ma thun mong chos rnams dang / /gang dag ston pa'i stobs la sogs/ /zhes bya ba la/ de la 'jig rten pa'i dge ba'i chos ni 'di lta ste/ mar 'dzin pa dang / dge sbyong zhes bya ba la sogs pa yin no/ /'jig rten pa'i mi dge ba'i chos ni srog gcod pa dang /ma byin par len pa dang zhes bya ba la sogs pa yin no/ /lung du ma bstan pa ni de la lus dang / ngag dang / yid kyi las dang / 'byung ba chen po dang / dbang po lnga dang / skye mched drug dang / gzugs med pa rnams dang / phung po dang / khams dang / skye mched dang zhes bya ba rnams yin te/dge ba dang mi dge ba'i rab tu dbye bas gang zhig lung du ma bstan pa'i chos gsum pa'i dbye ba srid pa gdon mi za bar bsdus pas tshig le'ur byas pa 'dir ma smos so/ /de la 'jig rten pa'i rtogs pa'i chos ni phung po dang / dran pa nye bar gzhag pa bzhi la sogs pa'o//zag pa dang bcas pa ni phung po lnga nas gzugs med pa'i snyoms par 'jug pa'i bar du'o/ /zag pa med pa ni dran pa nye bar gzhag pa bzhi nas stobs dang mi 'jigs pa dang / sangs rgyas kyi chos ma 'dres pa rnams kyi bar du'o/ /'dus byas ni 'dod khams la sogs pa dang 'brel pa'i byang chub kyi phyogs la sogs pa yin no//'dus ma byas ni skye ba med pa dang / 'gag pa med par shes pa dang / gzhan ma yin par shes pa 'di lta ste/ 'dod chags zad pa la sogs pa dang / de bzhin nyid dang / phyin ci ma log pa nyid dang zhes bya ba la sogs pa'o//thun mong gi chos ni bsam gtan dang / tshad med pa dang / gzugs med pa'i snyoms par 'jug pa bzhi'o/ /thun mong ma yin pa'i chos ni byang chub kyi phyogs kyi chos sum cu rtsa bdun dang / stobs bcu dang / mi 'jigs pa la sogs pa dang / rnam par grol ba dang / sangs rgyas kyi chos ma 'dres pa rnams yin no/ /'jig rten pa'i dge ba'i chos zhes bstan pa zhes bya ba la sogs pa de dag gis chos thams cad bstan to/ /yang 'ga' zhig gis chos kyi dbyings nyid dmigs pa yin no snyam du sems na/ dmigs su med pa des gong nas gong du rnam par dag pa'i khyad par du 'gro ba ci lta bu yin zhe na/brjod par bya ste/ chu khams gser dang nam mkha' rnams/ /dag pa bzhin du dag par 'dod/ /ces bya ba yin zhe na/ de ltar na mi mthun pa dang / gnyen po'i phyogs kyi rnam par rtog pa spong ba med pas dag pa phyogs gcig par thal bar 'gyur ro//gal te khyed kyi phyogs ltar na yang rab 'byor rnam pa thams cad mkhyen pa nyid kyi dmigs pa ni dmigs pa med pa'o zhes bya ba'i dmigs pa rnam par dag pa'i mthar thug thob par mi 'gyur ro/ /de ci'i phyir zhe na/ chos rnams 'khrul pa tsam nyid yin pa'i phyir ro//'og nas kyang rab 'byor gnyis ni dngos po'o/ /gnyis pa ni dngos po med pa'o zhes bshad pas dngos po yang gzhan ci zhig tu 'gyur te/ gnyis med pa las gzhan pa ni 'khrul pa zhes bya'o zhe na/ mngon par zhen pa ni gnyis kyi mtshan nyid yin gyi 'khrul pa ni ma yin te/ de ni gzung ba dang 'dzin pa'i tshul du brjod du rung ba ma yin pa nyid yin na 'di la khyed 'khrul par zad do//de ltar byas na rang bzhin gtso bo ni rig yin la/ 'gyur ba gtso bor gyur pa ni dmigs pa yin zhing de dag gnyis ka yang gnyis ka yin pa la 'gal ba med do zhes bya ba ni rten dang dmigs pa'i mtshan nyid kyi dbye ba yin pas dmigs pa dag la rtogs pa yang 'thad par 'gyur ba yin no//de nyid kyi phyir rab 'byor byang chub sems dpa' sems dpa' chen po chos thams cad la ma chags pa nyid dang / yang dag pa ma yin pas 'byung ba nyid du bslab par bya'o zhes gsungs pa'i don gang yin zhe na/ rang bzhin dang rjes su 'brel pa'i 'gyur ba ni dmigs pa yin gyi gzhan du 'gyur ba tsam ni ma yin no/ /gnyis su med pa'i sbyor bas kyang chos thams cad khong du chud par byed de/ rtog pa med pa dang / brtag tu med pa nyid yin pa'i phyir ro/ /de la dmigs pa rnam par gzhag pa ni gzung ba dang 'dzin pa rnam pa gnyis so//brjod par bya ba mang du yod mod kyi shin tu spros pas chog go/ /mngon par rtogs pa'i rgyan shes rab kyi pha rol tu phyin pa man ngag gi bstan bcos las bsgrub pa'i dmigs pa bstan pa'i rnam par 'grel pa'o// //bsgrub pa'i dmigs pa bstan nas ched du bya ba brjod par bya ba yin pas/sems can kun mchog nyid sems dang / /spong dang rtogs dang gsum po la/ /chen po gsum gyi rang 'byung gi /ched du bya ba 'di shes bya/ /zhes bya ba de la bsgrub pa'i ched du bya bar gyur pa ni rnam pa gsum ste/ 'di lta ste/ sems bskyed pa chen po nyid dang /spong ba chen po nyid dang / rtogs pa chen po nyid do/ /'di ltar sems bskyed pa chen po nyid kyi dbang du mdzad nas byang chub sems dpa' sems dpa' chen po zhes bya ba'i sgra 'jug pa'i rgyu mtshan nas brtsams te/ sems can gyi phung po chen po nyid dang / sems can gyi tshogs chen po brgyad la sogs pas nges par 'byung ba nas phyir mi 'ong ba'i bar du mchog tu 'gyur ba'i rgyu yin pa'i phyir de la sems can gyi phung po zhes bya ba ni sems can gyi tshogs rnams so//chen po zhes bya ba ni dpag tu med pa'o/ /sems can gyi tshogs zhes bya ba ni sems can du ma yin la/gcig cig kyang 'khor ba thog ma med par 'jug pas na chen po nyid yin pas chen po zhes bya bar 'gyur ro/ /phung po zhes smos pas ni sems can gyi tshogs rgyun tu zhugs pa dang / lam gyi 'bras bu la gnas pa'i sde can gyi dbye bas kyang ngo / /de rnams kyang chos du zhig sems can thams cad kyi mchog nyid du byed par 'gyur bar bstan pa ni dpag tu med pa'i 'khor ba yongs su 'dzin pa zhes smos pa ste/ji skad du mdo las/ rab 'byor 'di la byang chub sems dpa' 'di ltar sems bskyed par bya ste/ dpag tu med pa'i 'khor bar bdag gis go cha bgo'i zhes bya ba la sogs pa dang /bdag gis thams cad la yongs su gtang bar bya'o/ /sems can thams cad la sems mnyam pa nyid kyis de rnams kyang theg pa gsum gyis yongs su mya ngan las 'da' bar byas kyang sems can 'ga' yang mya ngan las 'das pa med do/ /de ci'i phyir zhe na/chos thams cad skye ba dang 'gag pa med par rtogs par bya zhing ma 'dres pa rnam pa thams cad mkhyen pa nyid sems kyis pha rol tu phyin pa drug la spyad par bya'o/ /thams cad du khyab pa'i ye shes rtogs pa yongs su rdzogs par bslab par bya'o zhes gsungs so/ /phung po la sogs pa rnams dang /pha rol tu phyin pa rnams dang / byang chub kyi phyogs la sogs pa rnams dang / sangs rgyas kyi chos ma 'dres pa'i bar dang / chos kyi tshul gcig tu bsgrub par rtogs pa nyid la bslab par bya zhing / sems can ngan 'gror skyes pa thams cad la sems can re re'i don gyi phyir yang de rnams yongs su mya ngan las ma 'das kyi bar du rang nyid kyis sdug bsngal de dag nyams su myong bar bya'o zhes khas blangs pa'i rjes la rang gi tshogs yongs su rdzogs par bya ste/bla na med pa yang dag par rdzogs pa'i byang chub 'dod pa nyid kyis sems dang po bskyed phyin chad 'dod chags la sogs pa dang /nyan thos la sogs pa'i sems mi bskyed pa nyid kyis rnam pa thams cad mkhyen pa nyid dang ldan pa'i yid la byed pa nyid kyi phyir sems gzhan mi bskyed pas sems can thams cad skyob cing yongs su mi gtong ba dag dang / des rlom sems su 'gyur ba med pa dang / phan pa dang bde ba'i sems kyis bya'o//gang sems dbyer med pa ste/ de la 'dod cing mngon par dga' ba gang yin pa 'di ni chos la dga' ba'o/ /de'i bsgom pa'i ming du byed pa gang yin pa 'di ni chos la dga' ba zhes bya ba ste chos la dga' ba nyid dang / chos la dga' ba'i rnal 'byor dang ldan pas nang stong pa nyid nas dngos po med pa'i ngo bo nyid kyi bar dang /byang chub kyi phyogs kyi chos rnams nas sangs rgyas kyi chos ma 'dres pa bco brgyad kyi bar du gnas te/ rdo rje lta bu'i ting nge 'dzin nas nam mkha' ltar chags pa med pas rnam par grol zhing gos pa med pa'i ting nge 'dzin gyi bar la gnas nas thams cad du yang mi dmigs pa'i sbyor ba mchog gis 'byed pa yin te/sems bskyed pa'i che ba'i bdag nyid bstan nas spong ba che ba'i bdag nyid kyi dbang du byas te/ yang gnas brtan shA ri'i bus spobs pa skyes so zhes bya ba nas brtsams te/ bdag dang / sems can dang /skyes bu la sogs par lta ba dang / chad par lta ba dang / rtag par lta ba dang / yod pa dang / med par lta ba dang / phung po la sogs pa rnams su lta ba zhes bya ba nas sangs rgyas kyi chos ma 'dres pa rnams su lta ba zhes bya ba'i bar dang / sems can yongs su smin pa dang / sangs rgyas kyi zhing yongs su sbyong ba dang / byang chub khong du chud pa dang / chos kyi 'khor lo bskor bar lta ba spang bar bya ba'i phyir mi dmigs pa'i tshul gyis chos ston pa nyid de bstan pa yin no/ /thabs la mkhas pa mi dmigs pas dmigs pa la sbyor ba ni/ ji skad du/ lta ba'i tshogs mi skye ba'i rgyu yin par bstan pa nyid kyis bshad ma thag pa'i mi dmigs pa'i thabs la mkhas pas khyad par du byas pa'i don yin no zhes bstan to//spangs pa che ba'i bdag nyid bstan nas rtogs pa che ba'i bdag nyid kyi dbang du byas te/ yang gnas brtan rab 'byor gyis spobs pa skyes so zhes bya ba nas brtsams te/byang chub kyi sems mi mnyam pa dang mnyam pa thun mong ma yin pa'i sems chags pa med pa nyid de/ de ci'i phyir zhe na/ sems de ni sems med pas zag pa med pa khongs su ma gtogs pa/ skye ba la sogs pa las rnam par grol ba/ mi mnyam pa dang mnyam pa/ thun mong ma yin pa'i mtshan nyid du bstan pa yin te/ji skad du mdo las/ tshe dang ldan pa shA ri'i bu byang chub sems dpa' sems dpa' chen po sems dang po bskyed pa nas nye bar bzung ste/ chos gang la yang skye ba'am 'gag pa yang dag par rjes su mi mthong ngo zhes bya ba la sogs pa na 'di ltar byang chub sems dpa'i mi mnyam pa dang mnyam pa'i sems/nyan thos dang rang sangs rgyas thams cad dang thun mong ma yin pa'i sems zhes bya ba la sogs pa gsungs pa yin no/ /de la sems dang po bskyed pa nas nye bar bzung ste/ brdar btags pa'i chos gang yang skye ba'am 'gag par yang dag par rjes su mi mthong zhes bya ba ni drod kyi dus su ste/sngon dang phyi ma'i gnas skabs dag tu skye ba dang 'gag pa dag mi dmigs pa'i tshul gyis so/ /'phel ba med pa dang / 'grib pa med pa zhes bya ba ni rtse mo'i dus te/ sngon dang phyi ma'i gnas skabs dag zad pa dang / khyad par du 'gro ba mi dmigs pa'i tshul gyis so//'ong ba med cing 'gro ba med pa zhes bya ba ni bzod pa'i dus te/ rtogs pa'i chos kyi nye ba dang ring ba dang mi dmigs pa'i tshul gyis so/ /kun nas nyon mongs pa ma yin/ rnam par byang ba ma yin zhes bya ba ni 'jig rten pa'i chos kyi mchog gi dus te/mi mthun pa dang / gnyen po'i phyogs ma lus pa la dmigs pa'i tshul gyis so/ /gang du kun nas nyon mongs pa dang / rnam par byang ba yang dag par rjes su mi mthong ba ni mthong ba'i lam yin no/ /lugs las bzlog pa'i go rims kyis ni mthong ba'i lam gsal bar ston pa yin te/ci mthong ba mngon du byed pa'i phyir ro/ /de la nyan thos kyi sems med do/ /rang sangs rgyas kyi sems med do zhes bya ba ni sems bskyed pa mi mnyam pa dang mnyam pa gsal bar ston to/ /smras pa/ tshe dang ldan pa rab 'byor gzugs la yang dag par chags pa med do zhes bya ba nas brtsams te/rang bzhin gyis stong pa nyid nye bar bzung nas chos thams cad la chags pa med pa nyid du khas blangs pas ni rtogs pa'i yul shes par bya ba'i ched yin no/ /tshe dang ldan pa rab 'byor gzugs med pa yang gzugs la chags pa med do zhes bya ba nas brtsams te/ sangs rgyas kyi chos ma 'dres pa rnams kyi bar du med pa yang sangs rgyas kyi chos ma 'dres pa rnams la chags pa med pa nyid khas blangs pa dang /sems de la mngon par zhen pa'i rlom sems su 'gyur ba bkag pas ni mi dmigs pa'i rnal 'byor gyis rtogs pa la chags pa bkag pa'i phyir ro/ / rtogs pa chen po nyid yin pa de bas spangs pa dang / rtogs pa chen po khyad par du 'phags pa'i phyir sems can gyi tshogs chen po nyid de/ sems can gyi sde chen po'i mchog tu gyur par byed pa'i mtshan nyid ni ma rgyal ba las rgyal bar bya ba'i ched dang / mthun par bsgrub pa'i ched du bya ba bstan pas byang chub sems dpa' khyad par du 'phags par shes par bya'o//dmigs pa dang / ched du bya ba'i khyad par ci yod ce na/ dmigs pa ni de'i tshe 'phral du byung ba yin la sems can gyi ched du bya ba phyis 'byung ba yin te/ stong pa bsgrub pa'i chos ni dmigs pa'o//phyis yun ring ba ni ched du bya ba ste/ dmigs pa dang / ched du bya ba dag ni mda' ltong sbyar ba dang / 'ben la sogs pa dang chos dang mthun pa yin no/ /mngon par rtogs pa'i rgyan shes rab kyi pha rol tu phyin pa'i man ngag gi bstan bcos las ched du bya ba'i rnam par 'grel pa'o// //bsgrub pa'i rten sa dang / dmigs pa dang / ched du bya ba bstan nas/ da ni bsgrub pa brjod par bya'o/ /de la dkar po'i rten can gyi bya ba ni bsgrub pa yin te/ rnam pa thams cad mkhyen pa nyid la sogs pa mngon par rtogs pa bdun gyi dbye ba mngon par rtogs pa re re zhing 'dor ba dang /'gro ba dang / rtogs pa ni bsgrub pa yin no zhes bya ba'i don to/ /de yang dbye ba rnam pa bzhi ste/ go cha'i bsgrub pa dang / 'jug pa'i bsgrub pa dang / tshogs kyi bsgrub pa dang / nges par 'byung ba'i bsgrub pa'o/ /rnam pa drug nyid kyi dbang du byas nas/sbyin la sogs pa rnam drug la/ de dag so sor bsdus pa yis/ /go cha'i bsgrub pa gang yin te / /drug tshan drug gis ji bzhin bshad/ /ces bstan pa yin te/ ji ltar na drug la drug yod ce na/ yang gnas brtan gang po spobs pa skyes pas go cha chen po bgos te/ sems can thams cad ces bya ba nas brtsams te/ 'di snyed do zhes yongs su chad pa med pa'i sems can gyi khams kyi don du sbyin pa la sogs pa'i pha rol tu phyin pa rnams legs par spyod pa'i go cha nyid kyis de dag nyid yongs su mya ngan las 'das pa thob pa dang / de dag nyid yang dag par rdzogs pa'i byang chub la rab tu 'jog cing bdag dang gzhan pha rol tu phyin pa rnams zhes bya ba nas ma 'dres pa rnams la rab tu 'jog go zhes bya ba'i bar gyis ni bsgrub pa'i rten chen po nyid kyis khyad par du 'phags pa yin no//byang chub sems dpa' sems dpa' chen po zhes bya ba'i sgra 'jug pa'i rgyu mtshan gsal bar bstan pa yin no//shes rab kyi pha rol tu phyin pa la spyod cing rnam pa thams cad mkhyen pa nyid dang ldan pa'i yid la byed pas sbyin pa gtong zhing sbyin pa'i pha rol tu phyin pa'i go cha bgos pa nyid dang / de nyid nyan thos la sogs pa'i yid la byed pa dang bral bas tshul khrims kyi pha rol tu phyin pa la spyod pa'i go cha bgos pa nyid dang /chos de dag la bzod pa dang / mos pa dang nye bar rtogs pas/ bzod pa'i pha rol tu phyin pa'i go cha bgos pa nyid dang / de nyid kyi dge ba'i rtsa ba de bla na med pa yang dag par rdzogs pa'i byang chub tu yongs su bsngo ba'i brtson 'grus kyis brtson 'grus kyi pha rol tu phyin pa'i go cha bgos pa nyid dang /de nyid kyi theg pa gzhan dang ma 'dres pa'i sems rtse gcig pa nyid kyis dge ba'i rtsa ba bla na med pa yang dag par rdzogs pa'i byang chub tu yongs su bsngo bas bsam gtan gyi pha rol tu phyin pa'i go cha bgos pa nyid dang / de nyid kyi sgyu mar byas pa'i 'du shes la nye bar gnas te sbyin pa dang /gtong ba po dang len pa po mi dmigs pa'i shes rab kyi pha rol tu phyin pa'i go cha bgos pa yin no/ /de dag ni go cha'i bsgrub pa dang po yin pa las sbyin pa'i pha rol tu phyin pa'i go cha la drug /de bzhin du de nyid kyi tshul khrims kyi pha rol tu phyin pa la spyod pa ni gnyis pa'o//bzod pa'i pha rol tu phyin pa la spyod pa ni gsum pa'o/ /brtson 'grus kyi pha rol tu phyin pa la spyod pa ni bzhi pa'o/ /bsam gtan gyi pha rol tu phyin pa la spyod pa ni lnga pa'o/ /de nyid kyi shes rab kyi pha rol tu phyin pa la spyod pa ni drug pa'o/ /de ltar drug po de dag drug drug tu 'gyur mod kyi go cha rnams sbyin pa la sogs pa chos drug dang chos mthun pas go cha'i bsgrub pa drug tu bshad pa yin no//rnam pa thams cad mkhyen pa nyid dang ldan pa'i sems kyis pha rol tu phyin pa rnams la mtshan ma med pa dang / dmigs su med pa'i go cha chen po bgos pa nyid kyis go cha'i bsgrub pa rang gi ngo bo chen po shes par bya ba'i ched du de bsam gtan la sogs pa la yang snyoms par 'jug par byed cing de rnams kyi ro myong bar byed pa yang ma yin la/de la chags par byed pa yang ma yin/ de rnams kyi dbang gis skye ba len par byed pa'ang ma yin/ bsam gtan la sogs pa la stong pa nyid dang / mtshan ma med pa dang / smon pa med pa la lta bas gnas kyang yang dag pa'i mtha' sngon du byed pa ni ma yin te/ thabs la mkhas pa dang bcas pa'i shes rab kyi pha rol tu phyin pa'i go cha bgos pa'i phyir ro/ /go cha'i bsgrub pa thabs la mkhas pas yongs su bzung ba'i che ba nyid shes par bya ba'i ched yin no//phyogs bcu'i 'jig rten gyi khams kyi sangs rgyas bsngags pa la sogs pa gsungs pa ni go cha'i bsgrub pa la dge ba'i bshes gnyen gyis yongs su bzung ba'i che ba nyid shes par bya ba'i ched du yin no//mngon par rtogs pa'i rgyan shes rab kyi pha rol tu phyin pa'i man ngag gi bstan bcos las go cha'i bsgrub pa'i rnam par 'grel pa'o// //go cha'i bsgrub pa bstan nas 'jug pa'i bsgrub pa brjod par bya'o/ /de ni rnam pa gnyis te/ 'di lta ste/ theg pa chen po la zhugs pa dang /de la zhon pa'o/ /de ltar byas na mdo ni tshe dang ldan pa gang po bzang po ji tsam gyis na byang chub sems dpa' theg pa chen po la zhugs pa dang / theg pa chen po zhon par gyur pa zhes bya zhe na zhes gsungs pa yin no/ /de yang theg pa chen po la 'jug pas theg pa la zhon pa yin la/zhon pa la yang theg pa la 'jug pa zhes bya ste/ don gcig pa nyid kyis ming gcig tu rnam par gzhag kyang dbye ba rnam pa dgur 'gyur te/ bsam gtan gzugs med sbyin sogs dang / /lam dang byams pa la sogs dang / /dmigs pa med dang ldan rnams dang / / 'khor gsum rnam par dag rnams dang / /ched du bya dang mngon shes rnams/ /rnam kun mkhyen pa'i tshul la ni/ /'jug pa'i bsgrub pa theg chen la/ /zhon pa yin par shes par bya/ /zhes bstan pa yin no/ /de la de'i dbye ba dgu ni 'di lta ste/ bsam gtan dang / gzugs med pa'i snyoms par 'jug pa las ldan pa'i 'jug pa dang /pha rol tu phyin pa drug gi 'jug pa dang / tshad med pa'i 'jug pa dang / mi dmigs pa dang ldan pa'i 'jug pa dang / 'khor gsum rnam par dag pa'i 'jug pa dang / ched du bya ba'i 'jug pa dang / mngon par shes pa'i 'jug pa dang /rnam pa thams cad mkhyen pa nyid kyi 'jug pa'o/ /de la bsam gtan dang / gzugs med pa'i snyoms par 'jug pa las ldang ba'i bsgrub pa ni gang sbyin pa'i pha rol tu phyin pa zhes bya ba nas shes rab kyi pha rol tu phyin pa la spyod pa na nam mkha'i rnam pa dang / rtags dang / mtshan mas bsam gtan dang / gzugs med pa'i snyoms par 'jug pa la 'jug cing ldang bar gyur pa na dge ba'i rtsa ba de bla na med pa yang dag par rdzogs pa'i byang chub tu bsngo ba ni theg pa chen po yin no zhes bstan to / /de la nam mkha'i rnam pa dang / rtags dang / mtshan ma zhes bya ba'i bar dang /de la rnam pas dben pa ni 'dod pas dben/ sdig pa mi dge ba'i chos zhes bya ba nas rtags ni rtog pa dang bcas/ dpyod pa dang bcas zhes bya ba la sogs pa dang / mtshan ma ni dben pa las skyes pa'i dga' ba dang zhes bya ba la sogs pas bstan pa yin no//yang sa 'og ma dang / gong ma'i dbye bas rags pa dang / zhi ba'i rnam pa'o/ /sa gang la tshor ba gang zhig yod pa de rtags so/ /mtshan ma ni snyoms par 'jug pa'i ro myang ba'o/ /pha rol tu phyin pa drug gi 'jug pa ni gang rnam pa thams cad mkhyen pa nyid dang ldan pa'i yid la byed pas/sems can rnams kyi nyon mongs pa rab tu spang ba'i phyir chos bstan pa ni sbyin pa'i pha rol tu phyin pa'i theg pa chen po nyid do/ /de nyid theg pa dman pa'i sems kyi go skabs mi 'byed pa ni tshul khrims kyi pha rol tu phyin pa'i theg pa'o/ /de nyid kyi bzod pa'i pha rol tu phyin pa'i theg pa chen po nyid kyis sems can rnams kyi nyon mongs pa zad par bya ba'i phyir chos ston pa'i yid la byed pa de dag la bzod pa dang /mos pa dang / rtogs pa dang / khong du chud par byed pa dang / sems pa de ni bzod pa'i pha rol tu phyin pa'i theg pa chen po nyid do/ /dang ba tsam nyid la mi mthun pa med pa ni mos pa'o//gnyis pa la sogs pa'i skad cig ma rgyun rjes su 'brel pa dang ldan pa ni bzod pa'o/ /gzhung sna tshogs pa gzhan la rigs pa rtog pa ni nye bar rtog pa'o/ /yongs su brtags pa'i don bskyang bar bya ba'i phyir dang / de nyams par byed pa'i rkyen shes pa kho na khong du chud par byed pa'o//don de la yid ches par bya ba'i phyir blo ma lus pas gnod par byed pa ni sems pa'o/ /de nyid brtson 'grus nyams par mi byed pa'i yid la mi byed pa ni brtson 'grus kyi pha rol tu phyin pa'i theg pa chen po nyid do/ /de nyid kyi bsam gtan dang po'i la sogs pa dang /gzugs med pa'i snyoms par 'jug pa ni bsam gtan gyi pha rol tu phyin pa'i theg pa chen po nyid do/ /de nyid kyi rnam pa thams cad mkhyen pa nyid kyi yid la byed pa dang ldan pa'i bsam gtan dang po'i yan lag rnams la mi rtag pa dang / sdug bsngal ba dang /bdag med pa dang / zhi ba dang / stong pa dang / mtshan ma med pa dang / smon pa med pa'i rnam par rab tu rtogs pa ni shes rab kyi pha rol tu phyin pa'i theg pa chen po nyid do zhes bstan to/ /'phags pa'i lam gyi 'jug pa ni gang byang chub kyi phyogs rnams dang / rnam par thar pa'i sgo rnams dang zhes bya ba nas ma 'dres pa rnams dang /rnam pa thams cad mkhyen pa nyid bsgom pa ni theg pa chen po nyid do zhes bstan pa yin no/ /de'i mdo ni ji skad du/ byang chub sems dpa'i theg pa ni rnam pa thams cad du byang chub kyi phyogs kyi chos sum cu rtsa bdun bsgom pa zhes bya ba la sogs pa gsungs pa yin no//tshad med pa'i 'jug pa ni gang tshad med pa bzhi la spyod cing rnam pa thams cad mkhyen pa nyid kyi bzod pa nyid kyis bzod pa'i pha rol tu phyin pa nyid dang / brtson 'grus kyi pha rol tu phyin pa'i theg pa chen po nyid kyis theg pa dman pa'i sems dang / ma 'dres pa nyid dang /shes rab kyi pha rol tu phyin pa'i theg pa chen po nyid kyis bsam gtan gyi ro myang ba med pa nyid dang / bsam gtan gyi pha rol tu phyin pa'i theg pa chen po nyid kyis tshad med pa bzhi la snyoms par 'jug pa dang / sbyin pa'i pha rol tu phyin pa'i theg pa chen po nyid kyis sems can rnams zag pa zad par nges par 'dren pa dang /tshul khrims kyi pha rol tu phyin pa'i theg pa chen po nyid kyis bsam gtan dang / tshad med pa rnams dang / rtags dang / mtshan ma rnams rnam pa thams cad mkhyen pa nyid du yongs su bsngo ba yin par bstan to/ /pha rol tu phyin pa'i go rims 'di ni tshad med pa bzhi la gnas pa'i gang zag gi bya ba'i dbang du byas pa yin te/de nyid la de lta bu srid pa shes par bya'o/ /yang tshad med pa ni bzhi ste/ 'di lta ste/ byams pa dang / snying rje dang / dga' ba dang / btang snyoms la yang de dag re re zhing rnam pa gsum ste/ sems can la dmigs pa dang /chos la dmigs pa dang / dmigs pa med pa'o/ /de la sems can la dmigs pa ni rgyu rnam pa bzhis rnam par gzhag ste/ nye bar bsdus pa nyid dang / mi mthun pa'i gnyen po'i phyogs nyid dang / rnam par dag pa nyid dang / 'bras bu yongs su 'dzin pa nyid do//ji ltar nye bar bsdu ba yin zhe na/ bde ba gsum gyis nye bar bsdus pa'i phyir te/ de byams pa dang ldan pa'i sems zhes bya ba ni phan pa dang bde bas nye bar bsdus pa'i don du nye bar gnas so/ /rgya chen po zhes bya ba ni 'dod pa na spyod pa'i bde bas bsdus pa'i phyir ro/ /chen por gyur pa zhes bya ba ni dga' ba dang bcas pa'i bsam gtan dang po dang /gnyis pa'i sa yin zhes bya ba'i don to / /de gnyis na dga' ba yod pa'i phyir ro/ /mi gnyis pa zhes bya ba ni dga' ba med pa'i bsam gtan gsum pa'i sa zhes bya ba'i tha tshig go/ /de ni sdug bsngal dang bral ba nyid yin pa'i phyir gnyis su med pa'o//tshad med pa zhes bya ba ni 'bras bu tshad med pas na chu bo chen po bzhi'i chu 'dus pa dang 'dra bar de nyid tshad med par shes par bya ste/ de ltar yang bde ba la sogs pa dang ldan pa'i phyir ro zhes bshad pa yin no/ /de ltar na re zhig nye bar bsdus pa nyid yin no/ / ji ltar na mi mthun pa'i gnyen po'i phyogs nyid yin zhe na/ gcugs med pa zhes bya ste/ mi sdug pas nye bar bsdus pa dang / sdug pas nye bar bsdus pa'i 'gal bar gyur pa gnod sems kyi gnyen po yin pas so/ /ji ltar na rnam par dag pa yin zhe na/ gnod pa med pa/ sgrib pa med pa zhes bya ba ste/gnyid dang / rmugs pa dang / rgod pa dang / 'gyod pa'i sgrib pa rnams go rims ji lta ba bzhin du spangs nas de kho na nyid la 'jug pa'i phyir ro/ /'bras bu yongs su 'dzin pa ni 'tshe ba med pa zhes bya'o/ /'dod pa dang gzugs kyi khams kyi rnam par smin pa dang / rgyu mthun pa gnod pa med pa nyid kyis ci rigs par 'bras bu yongs su 'dzin pa yin no/ /de ltar na re zhig sems can la dmigs pa ni rgyu rnam pa bzhis rnam par gzhag pa yin no/ /chos la dmigs pa zhes bya ba ni gcig thams cad kyi rjes su 'gro ba yin te/ thams cad kyi rjes su 'gro ba nyid ni 'dod pa dang / gzugs dang / gzugs med pa na spyod pa'i so so'i skye bo dang / slob pa ji snyed pa'o/ /chos gang yin pa ste/ gang dag la sems can du btags par byas pa'o/ /de la dmigs pa nyid ni shin tu bsgoms pa zhes bya ste/ legs par goms par bya ba'i phyir ro //dmigs pa med pa yang rgyu rnam pa gnyis te/ chos kyi dbyings mchog 'jig rten zhes bya ba'i mtshan nyid la dmigs pa yin te/ 'jig rten pa'i chos las bdag med pa gtso bor gyur pa yin pa'i phyir ro/ /nam mkha'i khams kyi mthas gtugs pa zhes bya ba ni mtha' med pa dang /yongs su chad pa med pa ste/ de ltar na dmigs pa med pa yin no/ /byams pa dang ldan pa'i sems des ci zhig byed ce na/ de'i phyir thams cad dang ldan pa'i phyogs bcu rgyas par bkang nas rdzogs par byas te gnas so zhes gsungs te/ 'jig rten gyi khams thams cad du lhag pa'i bsam pas lhag par mos pas spros pa nyid kyis khyab ces bya ba'i tha tshig go//ldan pa ni du mar shes par byas te / ma tra la sogs pa mtha' yas pas pad+ma can bzhin du ring po nyid yin no/ /nye bar rdzogs par byas te zhes bya ba ni blos de dang der nye bar yang dag par song ste de'i nye bar 'tshe ba bsal zhes bya ba'i don to//tshig gi phrad dang / skad kyi dbyings kyi don ni de yin pa'i phyir ro/ /snying rje la sogs pa la yang de bzhin du brjod par bya'o/ /mi dmigs pa dang ldan pa'i 'jug pa ni gang nang stong pa nyid la sogs pa mi dmigs pa dang ldan par shes pa nyid kyis chos thams cad g.yeng ba med pas mnyam par gzhag par shes pa dang /rtag pa dang / bde ba dang / bdag dang / ma zhi ba dang / stong pa ma yin pa dang / mtshan ma med pa dang / smon pa med pa rnams la de dang mthun pa'i shes pa 'jug pa dang / dus gsum mi dmigs pa'i ye shes dang / khams gsum mi dmigs pa'i ye shes dang /yang 'jig rten pa zag pa dang bcas pa dang / 'dus byas dang / de dang mi mthun pa rnams yang sbyin pa la sogs pa la mi dmigs pa'i rnal 'byor pa'i shes pa ni theg pa chen po de la zhon pa yin zhes bstan te/ de'i mdo ni 'di yin te/ tshe dang ldan pa shA ri'i bu byang chub sems dpa' sems dpa' chen po ni gang stong pa nyid shes kyang mi dmigs pa'i rnal 'byor zhes bya ba la sogs pa gsungs pa yin no//'khor gsum rnam par dag pa'i 'jug pa ni/ gang yang sbyin pa la sogs pa'i pha rol tu phyin pa rnams la 'khor gsum rnam par dag pas mi dmigs pa'i rnal 'byor gyis zhon pa'o zhes bstan pa yin no//de'i mdo ni byang chub sems dpa' shes rab kyi pha rol tu phyin pa la spyod na sbyin pa la sogs pa'i pha rol tu phyin pa rnams la zhon nas byang chub sems dpa' de sbyin pa'i pha rol tu phyin pa mi dmigs pa rab tu 'dzin te zhes bya ba la sogs pa gsungs pa yin no//yang byang chub sems dpa' sems can mi dmigs pa nye bar bzung nas gzugs la sogs pa'i phung po rnams dang / khams la sogs pa rnams nas ma 'dres pa rnams kyi bar dang / stong pa nyid thams cad dang / de bzhin nyid la sogs pa rnams dang / byang chub dang / sangs rgyas gang yin pa de dag mi dmigs pa nyid nye bar bzung nas ming tsam nyid du shes pa'i phyir theg pa chen po de la de zhon pa yin no zhes bstan to/ /de'i mdo ni de rnam pa thams cad mkhyen pa nyid dang ldan pa'i yid la byed pa'i ma 'dres pa'i sems kyis byang chub kyi phyogs kyi chos sum cu rtsa bdun sgom par byed cing bsgom pa dang rnam par bsgom pa'i ched du mi dmigs pa'i rnal 'byor gyis zhes bya ba la sogs pa gsungs pa yin no//mngon par shes pa'i 'jug pa ni gang gzhan yang mngon par shes pa rnams thob nas sems can yongs su smin par byed/ sangs rgyas kyi zhing yongs su sbyong /sangs rgyas bcom ldan 'das rnams la mchod pa dang / chos nyan zhing gnyis su med pa'i sa la gnas te theg pa chen po dang nam du yang mi 'bral te/ rang gi ngo bo yongs su 'dzin pa yin no zhes bstan to/ /de'i mdo ni sems dang po bskyed pa nas nye bar bzung ste byang chub kyi snying po la 'dug gi bar du mngon par shes pa rdzogs pa nyid kyis sems can yongs su smin par byed cing sangs rgyas kyi zhing nas sangs rgyas kyi zhing du 'gro'o zhes bya ba la sogs pa gsungs pa yin no//rnam pa thams cad mkhyen pa nyid kyi 'jug pa ni gang des rnam pa thams cad mkhyen pa nyid kyi ye shes thob nas kyang /chos kyi 'khor lo rab tu bskor ba dang / phyogs bcu'i 'jig rten gyi khams kyi sangs rgyas gang yin pa rnams kyis 'jig rten gyi khams de'i ming smos par mdzad cing de rnam pa thams cad mkhyen pa nyid thob nas kyang chos kyi 'khor lo rab tu skor bar byed do zhes grags pa sgrogs shing dbyangs brjod par mdzad pas theg pa chen po la zhon pa yin no zhes bya ba la sogs pa gsungs pa yin no//mngon par rtogs pa'i rgyan shes rab kyi pha rol tu phyin pa'i man ngag gi bstan bcos las 'jug pa'i bsgrub pa'i rnam par 'grel pa'o// //'jug pa'i bsgrub pa bshad nas tshogs kyi bsgrub pa bshad par bya ste/ de ni snying rje chen po la sogs pa'i dbye bas rnam pa bcu drug tu gyur pa ni/ brtse dang sbyin la sogs pa drug /zhi gnas lhag mthong bcas pa dang / /zung du 'brel pa'i lam gang dang / /thabs la mkhas pa gang yin dang //ye shes dang ni bsod nams dang / /lam dang sa bcu gang yin dang / /gnyen po tshogs kyi bsgrub pa yi/ /rim pa yin par shes par bya/ /zhes gsungs pa yin no/ /de la tshogs kyi bsgrub pa rnam pa bcu drug ni 'di lta ste/ snying rje chen po'i tshogs dang / sbyin pa'i tshogs dang / tshul khrims kyi tshogs dang / bzod pa'i tshogs dang / brtson 'grus kyi tshogs dang / bsam gtan gyi tshogs dang / shes rab kyi tshogs dang / zhi gnas kyi tshogs dang / lhag mthong gi tshogs dang / zung du 'brel pa'i lam gyi tshogs dang / thabs la mkhas pa'i tshogs dang /ye shes kyi tshogs dang / bsod nams kyi tshogs dang / lam gyi tshogs dang / sa'i tshogs dang / gnyen po'i tshogs zhes bya ba yin no/ /de la snying rje chen po'i tshogs ni gang go cha chen po bgos pa zhes bya ba'i sgra 'jug pa'i rgyu mtshan bstan pa'i sgo nas tshogs kyi bsgrub pa'i dbang du mdzad nas phyogs bcu re re zhing 'jig rten gyi khams gang gA'i klung gi bye ma snyed kyi sems can dmyal ba dang /byol song gi skye gnas dang / gshin rje'i 'jig rten gyi sems can rnams rang gi lus kyi 'od kyis snang bar byas nas sdug bsngal de dang de nye bar zhi bar bya ba'i phyir sangs rgyas la sogs pa la phyag 'tshal ba thos nas/dge ba des de rnams ngan song de rnams las thar nas byang chub pa'i bar du sangs rgyas mnyes pa dang rjes su mthun pa'i rigs yang dag par 'dzin pas sdug bsngal dang bral ba'i thugs rjes byas pa yin par bstan to/ /sbyin pa'i tshogs ni gang sbyin pa'i tshogs kyis sems can de snyed cig zas la sogs pa'i yo byad de dang de 'dod pa rnams la zas la sogs pa'i yo byad de dang de sbyin pa nyid dang /chos bstan pa des byang chub pa'i bar du pha rol tu phyin pa drug gi chos ston pa dang nam yang 'bral bar mi 'gyur ro zhes bstan to/ / tshul khrims kyi tshogs ni gang sems can de snyed dge ba bcu'i las kyi lam dang / bsam gtan la sogs pa nas sangs rgyas kyi chos ma 'dres pa'i bar la byang chub kyi bar du chos bstan pa des bkod pa yin no zhes bstan to/ /bzod pa'i tshogs ni gang sems can thams cad de snyed cig bdag la dbyug pa dang /bong ba dang / khu tshur gyis brdeg kyang de la bdag gis 'khrug pa'i sems 'ga' tsam yang bskyed par mi bya'o/ /rang gi bzod pa de dang 'dra ba la gzhan dag rab tu dgod pa yin no zhes bstan pa yin no/ /brtson 'grus kyi tshogs ni gang sems can de snyed cig ni rnam pa thams cad mkhyen pa nyid dang ldan pa'i yid la byed pa dang ldan pas lus dang sems kyi brtson 'grus la rab tu 'jog go//'god pa dang / yang dag par sbyor ba dang / rab tu 'jog pa dang mi 'bral bar byed pa'i tshig gi don yin no zhes bstan pa yin no/ /bsam gtan gyi tshogs ni gang sems can de snyed cig rang nyid chos thams cad kyi chos nyid mnyam pa nyid la gnas shing chos gang la yang 'khrul pa'am/'khrul pa med par rjes su mi mthong ba bzhin du byang chub kyi bar du de nyid la yang dag par bskul zhing 'jog pa yin no zhes bstan pa yin no/ /shes rab kyi tshogs ni gang 'di ltar chos gang la yang tshu rol lam/pha rol mi dmigs pa de bzhin du de rnams kyang de la yang dag par bskul zhing 'jog pa yin no/ /de la tshu rol ni 'khor ba ste/ byis pa rnams kyis re zhig myangs pa tsam yin pa'i phyir ro/ /pha rol ni mya ngan las 'das pa ste/ rang gi don la mchog tu gzhol ba rnams brtson 'grus la rab tu sbyor bas pha rol tu sems dga' ba nyid kyi phyir ro zhes bstan pa yin no//zhi gnas kyi tshogs ni gang yang bdag nyid pha rol tu phyin pa drug la gnas pa bzhin du sems can gyi khams ji snyed cig 'khod pa de dag thams cad kyang pha rol tu phyin pa drug dang /byang chub kyi phyogs kyi chos rnams dang / rgyun du zhugs pa'i 'bras bu la sogs pa nas ma 'dres pa rnams kyi bar la 'di snyed ces bya bar yongs su chad pa med pa'i sems can gyi khams la dmigs pas yang dag par bskul zhing bzhag ste/ sbyin pa'i pha rol tu phyin pas tshe 'di nyid la bde bas bsdus pa dang /tshul khrims kyi pha rol tu phyin pas tshe phyi ma'i bde bas bsdus pa dang / bzod pa dang / brtson 'grus dang / bsam gtan gyi pha rol tu phyin pas gcig tu bde bas bsdus pa yin te/ bzod pa dang / spro ba dang / rtse gcig pas gcig tu bde ba dang ldan pa'i 'bras bu 'thob par byed pa'i phyir ro//shes rab kyi pha rol tu phyin pas ni shin tu phul du byung ba'i bde bas nye bar bsdus pa'o zhes bstan pa yin no/ /lhag mthong gi tshogs ni gang sgyu ma'i mkhan po'am/ sgyu ma'i mkhan po'i mchan bu mkhas pa zhig gis zhes bya ba'i tshig gnyis pas ni 'ga' yang med kyi rang nyid dri za'i grong khyer la sogs pa bzhin no//ci zhig tu 'gyur ram zhes bya ba'i tshig gis ji ltar bstan par 'gyur zhe na/ gzhan gyi rkyen gyis mi 'gro ba ci yang rung ba'i rang bzhin du yod pa ni mi rigs te/ de ni brjod pa tsam nyid yin pa'i phyir ro/ /de nyid kyi phyir/de ci'i phyir zhe na/ rab 'byor sgyu ma'i chos nyid nye bar bzung ba'i chos rnams kyi chos nyid de bzhin yin pa'i phyir te zhes gsungs pa yin no/ /rtog ges yongs su ma bskyod cing sun ma phyung ba'i 'jig rten thams cad la ni snang ba tsam du gyur pa kho na yin pa'i phyir ro zhes bya ba'i bar du'o//de nyid kyi phyir bcom ldan 'das bdag gis bcom ldan 'das kyis gsungs pa'i don 'tshal ba ltar na sgyu ma'i chos nyid nye bar bzung nas de'i don 'tshal ba lags te/ byang chub sems dpa' sems dpa' chen po go cha ma 'tshal ba [(]lags [,]legs [)]par rig par bgyi ste/ rang gi mtshan nyid stong pa nyid sgyu ma'i chos nyid nye bar bzung ba lags pa'i phyir ro zhes bya ba dang /gnas brtan rab 'byor gyi shes pa gsal bar byas pa nas brtsams te/ de ci'i slad du zhe na/ gzugs la sogs pa'i phung po la sogs pa rnams dang / pha rol tu phyin pa rnams dang / stong pa nyid thams cad dang / byang chub kyi phyogs rnams nas ma 'dres pa'i bar dang / byang chub sems dpa' dang / theg pa chen po'i go cha dang / gzugs la sogs pa nas theg pa chen po'i go cha'i bar du rnam grangs stong pa nyid kyis go cha med pa'i go cha bgos pa yin par rjes su bstan pa'i phyir ro//de ci'i phyir zhe na/ byed pa po nye bar mi dmigs pa nyid yin pa'i phyir ro/ /rnam pa thams cad mkhyen pa nyid nas sems can du bstan cing brjod pa'i bar du ma byas/ rnam par ma byas/ mngon par ma byas pa nyid kyis na phung po la sogs pa rnams dang / bdag dang / sems can la sogs pa rnams dang / rmi lam dang / sgra brnyan dang / mig yor dang / gzugs brnyan dang / smig rgyu dang / sprul pa rnams yin te/ ma 'dres pa'i bar du de bzhin nyid dang / phyin ci ma log pa de bzhin nyid dang / chos nyid dang / chos kyi dbyings nyid dang / chos kyi gnas nyid dang / chos nyid nges pa nyid dang / yang dag pa'i mtha' rnams su byang chub dang / rnam pa thams cad mkhyen pa nyid kyi bar du shin tu mi dmigs pa'i phyir/ de nyid nye bar bzung nas byas pa dang / rnam par byas pa dang / mngon par 'dus byas pa bkag pas zhes bstan pa yin no//de la go cha dang / 'jug pa dang / tshogs kyi bsgrub pa rnams ma skyes pa bskyed pa dang / de khyad par du 'gro ba dang / 'bras bu thob pa mngon du byed pa'i dbang du mdzad nas tshig gcig dang / gcig dang / gcig go rims bzhin du sbyar bar rig par bya'o zhes bstan pa yin no//zung du 'brel pa'i lam gyi tshogs ni gang ji ltar bcom ldan 'das kyis shin tu mi dmigs pa nye bar bzung nas mi byed/ rnam par mi byed/ mngon par mi byed do zhes gsungs pa'i don bdag gis 'tshal ba ltar na zhes bya ba nas brtsams te/ med pa dang / dben pa dang / ma skyes pa dang / zhi ba dang / stong pa dang / mtshan ma med pa dang / smon pa med pa dang / mngon par 'du ma byas pa dang / ma skyes pa nyid kyis na shin tu mi dmigs pa'i rnam pas phung po la sogs pa rnams nas byang chub kyi phyogs rnams dang / ma 'dres pa rnams kyi bar dang / byang chub dang / rnam pa thams cad mkhyen pa nyid ma bcings ma grol ba nyid kyis sangs rgyas kyi zhing sbyong zhing / sangs rgyas rnams la bsnyen bkur byed cing / sangs rgyas de dag las chos nyan zhing / mngon par shes pa dang / spyan lnga dang / gzungs dang /ting nge 'dzin rnams la spyod cing gnas nas lam gyi rnam pa shes pa nyid bstan pas rnam pa thams cad mkhyen pa nyid du mngon par byang chub nas chos kyi 'khor lo bskor bas sems can rnams theg pa gsum gyis mya ngan las 'das kyang byang chub sems dpa' dang / sangs rgyas rnams ma bcings ma grol ba yin no zhes bstan to//de la shes rab kyis yongs su bzung bas ni ma bcings pa yin la/ snying rjes yongs su bzung bas ni ma grol bar rig par bya'o/ /de ltar rigs pas byang chub sems dpa'i snying rje ni srid par gnas pa'i rgyu yin la/ shes pas de ru gnas byas kyang //'khor bar chags par mi byed do/ /dran pa yis ni bsdams pa'i sems/ /phyi rol du ni 'jug mi 'gyur/ /so sor rtog pa'i lcag brdabs pas/ /phun tshogs gnas su 'dren par byed/ /skye ba'i sems la brten pa dag /'ga' zhig mya ngan 'da' bar 'dod/ /'jig rten legs pa la brten la//'ga' zhig 'khor bar 'khor bar 'dod/ /ces gsungs pa yin no/ /shes rab dang snying rje'i sbyor ba dang / de dag phan tshun tha mi dad pa dang / mi mthun pa'i phyogs las 'das pa dang / sbyor ba la shin tu sbyangs pa dang / rtogs pa po'i dbang du mdzad nas sbyor ba ni gang gis/gang las/ gang du/ gang zhig nges par 'byung zhes gang gis ston pa'i zhus pa lnga yin te/ byang chub sems dpa' sems dpa' chen po'i theg pa chen po ni gang lags/ gang de la ji ltar na zhugs par rig par bgyi/ gang las nges par 'byung ba lags/ gang du gnas par 'gyur ba lags/ gang zhig 'dis nges par 'byung bar 'gyur zhes bstan pa yin no/ /de la dang po zhus pa nas brtsams te/ thabs la mkhas pa'i tshogs ni gang rnam pa thams cad mkhyen pa nyid dang ldan pa'i yid la bya bas pha rol tu phyin pa rnams re re zhing mi dmigs pa'i rnal 'byor gyis bdag nyid gnas shing gzhan dag kyang yang dag par bskul ba ni theg pa chen po zhes bstan pa yin no//yang ye shes kyi tshogs ni nyi shur gcig gis ma tshang ba'i stong pa nyid ni ye shes kyi tshogs nyid yin par rig par bya'o/ /de la 'dir nyi shur gcig gis ma tshang ba'i stong pa nyid ni nang gi mig la sogs pa lnga rtag pa ma yin te /'jig pa ma yin pa de bzhin nyid de/ de'i rang bzhin de yin pa nye bar bzung ba'i phyir nang stong pa nyid do/ /phyi rol gyi gzugs la sogs pa rtag pa ma yin/ 'jig pa ma yin pa nyid de'i rang bzhin de yin par nye bar bzung ba'i phyir phyi stong pa nyid do//de bzhin du phyi dang nang gi skye mched rnams de'i rang bzhin de yin par nye bar bzung ba'i phyir phyi nang stong pa nyid do/ /chos thams cad kyi stong pa nyid kyang stong pa yin pas stong pa nyid stong pa nyid do/ /phyogs bcu po ni phyogs kyis stong pa nyid kyi phyir chen po stong pa nyid do//don dam pa ni mya ngan las 'das pa ste/ mya ngan las 'das pa'i don gyi tshul gyis stong pas na don dam pa stong pa nyid do/ /'dus byas stong pa nyid ni khams gsum po/ khams gsum po nyid kyis stong pas na 'dus byas stong pa nyid do/ /'dus ma byas ni skye ba med pa dang /'gag pa med pa dang / gnas pa las gzhan du 'gyur ba med pa ni de nyid kyis stong pa'i phyir 'dus ma byas stong pa nyid do/ /mtha' ni mtha' stong pa nyid kyis na mtha' las 'das pa stong pa nyid do/ /thog ma dang / dbus dang / tha mar gyur pa rnams des stong pa nyid ni thog ma dang tha ma med pa stong pa nyid do//dor ba ni spangs pa ste/ yongs su spangs pa'i mtshan nyid can gyi dor ba las go bzlog pa nyid kyis na dor ba med pa ste/ de ni des stong pa nyid kyi phyir dor ba med pa stong pa nyid do/ /'phags pa thams cad kyis ma byas pa'i rang bzhin te/de ni des stong pa nyid kyi phyir rang bzhin stong pa nyid do/ /chos rnams ni chos rnams kyis stong pa yin pa'i phyir chos thams cad stong pa nyid do/ /gzugs la sogs pa'i mtshan nyid gzugs su rung ba la sogs pa'i mtshan nyid kyis stong pa'i phyir rang gi mtshan nyid stong pa nyid do//gang la dus gsum mi dmigs pa ni de nyid kyis stong pa'i phyir mi dmigs pa stong pa nyid do/ /'dus pa'i chos rnams ni ngo bo nyid kyis yod pa ma yin te/ rten cing 'brel par 'byung ba'i rang bzhin yin pa'i phyir dang / de ni 'dus pas stong pa nyid yin pa'i phyir dngos po med pa'i ngo bo nyid stong pa nyid do//dngos po med pa ni nye bar len pa'i phung po'i mtshan nyid ni des stong pa nyid yin pa'i phyir dngos po stong pa nyid do/ /dngos po med cing 'dus ma byas pa ni de rnams kyis stong pa nyid kyi phyir dngos po med pa stong pa nyid do/ /rang bzhin stong pa zhes bya ba ni 'phags pa rnams kyis shes pa dang /mthong bas ma byas pa nyid kyi phyir de bzhin gshegs pa rnams byung yang rung / ma byung yang rung / chos rnams kyi chos nyid 'di ni gnas pa'o zhes bya ba ni gzhan gyi byed pa stong pas na gzhan gyi dngos po stong pa nyid do zhes bya ba yin no/ / phyogs 'dis ni rab tu byed pa'i go rims ma tshang ba'i rab tu byed pa'i don ston pa yin par yang brjod par bya'o/ /de dag ni gzhan dgag pa'i sgo nas stong pa nyid 'ba' zhig ston pa yin pas de dag la ni mngon par rtogs pa'i go rims 'ga' yang yod pa ma yin zhing / de rnams ni rab tu byed pa'i don kho na rjod par byed kyi bstan bcos don gtso bor byed pa ni ma yin no zhes bya ba 'dis ni stong pa nyid kyi rab tu byed pa'i song ba dang /'ong ba'i bya ba'i rim pa med pas ched du bya ba las nyams pa srid par bstan pa yin no/ /'dir yang ci rnam par mi rtog pa'i ye shes kyi dmigs pa ci zhig yin zhe na/chos thams cad ngo bo nyid kyis stong pa'o zhes bstan to/ /'di ltar gang mi dmigs pa de ni yod pa ma yin te/ dper na mo gsham gyi bu bzhin no/ /stong pa nyid 'di yang rnam par mi rtog pa'i sems kyis ma dmigs pa yin pa'i phyir ro/ /de ltar na stong pa nyid med pas chos thams cad yod pa nyid du 'gyur ba ma yin nam zhe na/de ni 'dir dpyad par bya ste/ 'di ni chos thams cad la dmigs pa dang bral bas stong pa nyid ces bya ba ni gang zhig kyang yod pa ma yin te/ rnam par mi rtog pa'i ye shes tsam nyid yin no zhes bya bar 'dod do/ / kha cig ni gzung ba dang 'dzin pa'i ngo bo cha gnyis pa nyid kyis na cha gcig la gnas pa ni ma yin no zhes bya bar 'dod do/ /la la na re de ni chos thams cad ngo bo nyid kyis stong pa nyid dmigs pa yin no zhes zer ro/ /de ni rigs pa ma yin te/ gang chos thams cad ngo bo nyid stong pa nyid la dmigs par 'gyur ba de ni rmi lam gyi rta la sogs pa rang bzhin gyis stong pa la dmigs pa can gyi shes pa bzhin no//snga ma'i phyogs gnyis po de dag kyang ye shes kyi dngos po med pa yul du 'gyur la/ stong pa nyid 'dus byas su thal bar 'gyur ro/ /phyogs gsum pa la nyes pa yod par mi brjod dam zhe na/nyes pa yod pa ma yin te/ gang gi phyir lha sbyin bsad nas yang 'byung bar 'gyur ba ni ma yin no/ /me long lta bu'i ye shes la sogs pa'i dbye ba ni brjod par bya ba mang du yod mod kyi ye shes kyi tshogs bzhag pa 'di ni phyogs tsam mo/ /bsod nams kyi tshogs ni gang de la dpa' bar 'gro ba'i ting nge 'dzin gang zhe na/zhes bya ba nas brtsams nas gang gsungs zhes bya ba'i bar du'o/ /nam mkha' ltar chags pa med pa rnam par grol zhing gos pa med pa zhes bya ba'i ting nge 'dzin nas ting nge 'dzin brgya rtsa gcig bstan pa ni/ ji skad du/nges par 'byung ba dang mi 'bral bar 'gyur ba dang / nye bar 'gyur ba dang / myur du bla na med pa yang dag par rdzogs pa'i byang chub tu mngon par 'tshang rgya'o zhes gsungs pa yin no/ /go cha dang / 'jug pa dang / tshogs kyi bsgrub pa nas brtsams te/ ting nge 'dzin bsgom pa yin zhes song zin pa dang sbyor bar blta bar bya'o//lam gyi tshogs ni gang dran pa nye bar gzhag pa zhes bya ba nas brtsams te bslab pa las 'das pa dang / rnam par g.yeng ba'i gnyen por gnas pa dang / 'dug pa la sogs pa'i spyod lam rnams dang / 'gro ba dang /'ong ba dang / lta ba dang rnam par lta ba'i bya ba rnams dang / dbugs 'byung ba dang / rngub pa rnams la rdza mkhan gyi dpes ring ba dang / thung bar rab tu shes pa dang / lus kyi gnyen po'i 'du shes ba lang gi shan pa'i dpes bstan pa dang / khams rnams la so sor brtags nas gtsang bar phyin ci log pa'i gnyen por chud pa'i snod kyi dpes mi gtsang bar so sor brtags pa dang /mi dmigs pa'i tshul gyis nang dang / de bzhin du phyi rol dang / phyi dang nang gi lus la lus kyi rjes su lta bas/ dran pa nye bar gzhag pa na lus de yang 'di lta bu'i chos can no//skye ba 'di'i'o/ /'di lta bu'i rang bzhin te zhes bya ba la gsungs te/ khu ba dang / khrag gi gnas skabs dang / gnas skabs de nyid 'phel bar gyur pa las 'chi ba la thug pa'i mi rtag pa nyid kyis chos nyid bsgrub pa de la sbyor ba yin te/ tshig gnyis po 'dis shes par bya'o//gang yang me la sogs pas mthar thug par byas pa de la yang chos nyid 'di las ma 'das so zhes bya ba'i tshig gsum yin no/ /gdung can zhes bya ba la stobs zad pa dang / zas gcod pa dang / sdug bsngal ba dang / shin tu ldan pa'i don te/ gang de yod pa de ni myur ba'i 'bad pa can no//shes bzhin dang ldan pa zhes bya ba ni yang dag par shin tu rig pa'o/ /dran pa dang ldan pa zhes bya ba ni dmigs pa ma brjed pa'o/ /rnam par bsal ba zhes bya ba ni phyir bzlog pa'o/ /ci zhig las she na/ 'jig rten gyi chags sems dang /yid mi bde ba dag las so/ /de la nga dang nga'i zhes bya ba mngon du byas nas lus la sems pa ni chags pas so/ /tshor ba mi sdug pa dang / rab tu ldan pa'i sems zhum pa nyid ni yid mi bde ba'o/ /de bzhin du bde bar phyin ci log pa'i gnyen po tshor ba dran pa nye bar gzhag pa dang /rtag par phyin ci log pa'i gnyen po sems dran pa nye bar gzhag pa dang / bdag tu phyin ci log pa'i gnyan po chos dran pa nye bar gzhag pa'o/ /sdig pa mi dge ba'i chos ma skyes pa rnams mi skyed pa dang / skyes pa rnams spang ba'i phyir dang / dge ba'i chos ma skyes pa rnams skyed pa'i phyir dang /skyes pa rnams gnas pa dang phyir zhing bsgom pa la sogs pa'i phyir 'dun pa bskyed kyang gnas te/ brtson 'grus rtsom mo/ /sems rab tu 'dzin to/ /yang dag par 'jog cing tshul bzhin du yid la byed pa dang / de mi spong ba dang / tshul bzhin du so sor rtog pa'i dbang du mdzad nas tshig gcig dang /gnyis dang / gnyis kyis gsungs par shes par bya'o/ /mos pa dang / brtson 'grus dang / sems dang / dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa bzhi ni rdzu 'phrul gyi rkang pa'o//de la mos pa ni byed 'dod pa'o/ /ting nge 'dzin ni sems rtse gcig pa ste/ des nyon mongs pa spang bar bya ba'i phyir mngon par 'du byed pas na de ni 'du byed do/ /de yod pas na de dang ldan pa'o/ /gang des yon tan sna tshogs bsgrubs pas na rkang pa'o/ /de'i yan lag yin zhes bya ba'i don to//sgom mo zhes bya ba'i sgom pa ni goms par byed pa ste/ sbyor ba rgyas pa'o/ /de yang sbyor ba las su rung ba nyid dam / sbyor ba brtan par gyur pa'am/ mi dge ba'i tshogs dang ma 'dres pa'o/ /sgom pa yang chos mngon pa bdag rnam pa gnyis su 'dod do/ / chung ngu dang / 'bring dang / chen po rnam pa gsum dang / bcos ma dang bral ba'i 'bras bu dang / rgyu mthun pa'i 'bras bu dang / mthong ba'i chos de nyid la bde bar gnas pa'i 'bras bu'o/ /gzhan dag ni bzhir 'dod de sgom pa rnam par bsgom pa ni lus kyi'o/ /yongs su sbyangs pa bsgom pa ni tshul khrims kyi'o//gnod pa med pa ni sems kyi'o/ /ma lus par brten pa bsgom pa ni shes rab kyi'o zhes bstan to/ /dben pa la gnas pa bsam gtan dang po dang ldan par gyur pas des 'dod pa la sogs pa las rnam par dben pa nyid yin pa'i phyir ro/ /'dod chags dang bral ba la gnas pa zhes bya ba ni bsam gtan gnyis pa dang ldan par gyur pas des rnam par rtog pa la sogs pa dang /'dod chags dang bral ba'i phyir ro/ /'gog pa la gnas pa zhes bya ba ni bsam gtan gsum pa dang ldan par gyur pa ste/ dga' ba'i 'dod chags dang bral ba ni de 'gag pa yin pa'i phyir ro//rnam par spong ba yongs su grub pa zhes bya ba ni bsam gtan bzhi pa dang / gzugs med pa dang ci rigs par ldan par shes pa sngon du 'gro bas dor bya bsal bas na rnam par spong ba zhes bya'o/ /yang bag la nyal ba yang dag par bcom pa ni dben pa'o//kun nas ldang ba'i 'dod chags dang bral ba ni 'dod chags dang bral ba'o/ /kun tu sbyor ba yang dag par gcod pa ni 'gog pa'o/ /nye bar len pa thams cad yongs su spangs pa ni rnam par spangs pa'o/ /yang chos mngon pa pa rnams ni dben pas na khams las dben pa'o//'dod chags las bral bas na nyon mongs pa'i 'dod chags dang bral ba'o/ /'gog pas na las 'dod pa'o/ /rnam par spong bas na dngos po rnam par spong ba ste/ tshig thams cad kyis mya ngan las 'das pa nyid ston pa yin no zhes chos mngon pa pa rnams 'chad do//dmigs pa la brten pa'i stobs kyis snga ma'i rten gtong ba ni rnam par spong ba zhes bya'o zhes gnas brtan sangs rgyas bshes gnyen gyis byang chub kyi phyogs kyi rab tu byed par bshad do/ /'dir yang bdag gis ni rnam par rtog pa bzhi'i gnyen po rnam pa bzhi ni mthong ba'i lam yin no//de la rtog pa de rnams dang / dben pa la gnas zhes bya ba la sogs pa rim pa ji lta ba bzhin du sbyar bar bya ba yin par rig par bya ste/ byang chub kyi phyogs rnams mthong ba'i lam gyis yang dag par bsdus pa'i phyir ro/ /de la gzung ba'i rnam par rtog pa dang po'i gnyen po ni dben pa ste/des rnam par byang ba'i phyogs kyi kun nas nyon mongs pa'i phyogs spang bya rnam par dbye ba'i phyir ro/ /gzung ba'i rnam par rtog pa gnyis pa'i gnyen po ni 'dod chags dang bral ba ste/ des dge ba'i chos la 'dun pa ni 'dod chags dang bral ba nyid yin pa'i phyir ro/ /'dzin pa'i rnam par rtog pa dang po'i gnyen po ni 'gog pa ste/des bdag rang dbang can la sogs pa'i 'dzin pa ma lus par 'gog cing spong ba'i phyir ro zhes bya ba'i don to/ /'dzin pa'i rnam par rtog pa gnyis pa'i gnyen po ni rnam par spong ba ste/ des bdag tu btags pa'i mtshan ma sna tshogs dang /phung po la sogs pa ji lta ba nyid yongs su shes pas spong ba'i phyir ro/ /de bzhin du dad pa la sogs pa lnga po dbang byed pa'i don gyis na dbang po yin no/ /lnga po de dag nyid mi thub pa'i don gyis na stobs so/ /dran pa dang / chos rnam par 'byed pa dang / brtson 'grus dang / shin tu sbyangs pa dang / ting nge 'dzin dang / btang snyoms yang dag byang chub kyi yan lag rnams kyis mthong ba'i lam gyi yan lag tu gyur pa yin pa'i phyir ro/ /yang dag pa'i lta ba dang / rtog pa dang / ngag dang / las kyi mtha' dang / 'tsho ba dang / rtsol ba dang / dran pa dang / yang dag pa'i ting nge 'dzin te / 'phags pa'i lam yan lag brgyad kyis mya ngan las 'das pa'i grong khyer du phyin pa'i don gyis na lam mo/ /sgra ji bzhin shes pa dang bcas pa'i shes pa bcu gcig dang / mi shes pa kun shes pa la sogs pa'i dbang po dang / rtog pa dang bcas/ dpyod pa dang bcas pa la sogs pa rnams dang / ting nge 'dzin rnams dang / skye ba dang / 'chi ba dang / lus su gyur pa'i bza' ba dang / btung ba dran pa rnams dang bcas pa dang / rjes su dran pa bcu po rnams dang / bsam gtan dang / gzugs med pa'i snyoms par 'jug pa rnams dang /de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / sangs rgyas kyi chos ma 'dres pa bcwa brgyad dang / gzungs kyi sgo rnams dang / thams cad mi dmigs pa'i rnam pa dang / gzhung gi tshogs brtsams pa dang /bstan pa de dag ni lam gyi tshogs yin par rig par bya'o/ /chos de dang de dag thams cad mthong ba dang / bsgom pa'i lam gyis bsdus pa'i phyir ro/ /sa'i tshogs ni byang chub sems dpa'i sa yongs su sbyong ba'i dbye bas rnam pa bcur 'gyur bar rig par bya'o/ /gang yang rab 'byor khyod ji skad du/ji ltar na byang chub sems dpa' sems dpa' chen po'i theg pa chen po la yang dag par zhugs pa ni zhes bya ba nas brtsams te/ pha rol tu phyin pa la spyod cing sa nas sar 'phar ba yin zhe na/ de ci'i phyir zhe na/ chos thams cad kyi 'gro ba dang /'ong ba bkag pa yin no zhes gsungs pa yin no/ /yang sa gang la chos du zhig yongs su sbyong bar 'gyur zhe na/ rnam pa bcus sa dang po yongs su sbyong ba yin te/ yongs su sbyong ba rnam bcu yis/ /sa ni dang po thob 'gyur te/ /bsam dang phan pa'i dngos nyid dang / /sems can rnams la sems mnyam nyid//gtong dang bshes gnyen bsten pa dang / /dam chos dmigs pa tshol ba dang / /rtag tu nges 'byung sems nyid dang / /sangs rgyas bkur 'dod dga' ba dang / /chos ston pa dang bden pa yi/ /tshig ni bcu po yin par 'dod/ /'di dag rang bzhin mi dmigs pas//yongs su sbyong bar shes par bya/ /zhes gsungs pa yin no/ /mdo las ji skad du lhag pa'i bsam pa yongs su sbyong ba mi dmigs pa'i rnal 'byor dang / phan pa'i dngos po yongs su sbyong ba mtshan ma mi dmigs pa nye bar gzung ste zhes bya ba la sogs pa gsungs pa yin no//rnam pa brgyad kyis ni sa gnyis pa yongs su sbyong ba yin te/ tshul khrims byas pa gzo dang bzod/ /rab tu dga' dang snying rje che/ /bkur sti gus par nyan pa dang / /brgyad pa sbyin la sogs par brtson/ /zhes bya ba la sogs pa gsungs pa yin no/ /de la byas pa gzo ba ni chung ngu byas pa las lhag par byed pa ste/chud mi gson pa yin pa'i phyir ro/ /rnam pa lngas ni sa gsum pa yongs su sbyong ba yin te/ thos pas mi ngoms nyid dang ni/ /zang zing med par chos sbyin dang / /sangs rgyas zhing kun sbyong ba dang / /'khor bas yongs su mi skyo dang //ngo tsha khrel yod ces bya ba/ /rlom med bdag nyid de rnam lnga/ /zhes gsungs pa yin no/ /rnam pa bcus sa bzhi pa yongs su sbyong ba yin te/ nags gnas 'dod chung chog shes dang / /sbyangs pa yang dag sdom bsten dang / /bslab pa yongs su mi gtong dang //'dod pa rnams la smod pa dang / /mya ngan 'das dang bdog kun gtong / /mi zhum pa dang lta ba med/ /ji skad du mdo las/ dgon pa la gnas pa dang / 'dod pa chung ba la dga' ba zhes bya ba la sogs pa gsungs pa yin no/ /de la 'dod pa chung ba ni gang ma rnyed pa de rnyed par mi 'dod pa'o//chog shes pa ni ji ltar rnyed pa las lhag par mi 'dod pa gang yin pa'o/ /rnam pa bcus ni sa lnga pa yongs su sbyong ba yin te/ 'dris dang khyim la 'khren pa dang / /'du 'dzir gyur pa'i gnas dang ni/ /bdag bstod gzhan la brnyas pa dang / /mi dge las kyi lam bcu dang //rlom pas khengs dang phyin ci log /yid gnyis dang ni nyon mongs bzod/ /bcu po 'di ni rnam spangs nas / /sa ni lnga pa yang dag 'thob / /ces gsungs pa yin no/ /rlom pa nyid ni khengs pa ste/ mtho ba la sogs pa'i rnam pa'o/ /rnam pa drug gis ni sa drug pa yongs su sbyong ba yin te/sbyin dang tshul khrims bzod brtson 'grus/ /bsam gtan shes rab rab rdzogs pa/ /zhes bya ba'i mdo ni ji skad du/ pha rol tu phyin pa drug yongs su rdzogs par bya'o zhes gsungs pa yin no/ /slob ma dang ni bse ru la/ /dga' dang skrag pa'i sems spangs pa//slong na mi zhum bdog pa kun/ /btang yang mi dga' med pa dang / /dbul yang slong ba mi spong bas/ /sa ni drug pa yang dag thob/ /ces gsungs pa yin no/ /ji skad du mdo las/ nyan thos 'dod pa'i sems yongs su spang bar bya'o/ /rang sangs rgyas 'dod pa'i sems yongs su spang bar bya'o//'khor ba la skrag pa'i sems yongs su spang bar bya'o zhes bya ba la sogs pa gsungs pa yin no/ /dbye ba nyi shus sa bdun pa yongs su sbyong ba yin no/ /bdag dang sems can 'dzin pa dang / /srog dang gang zag chad rtag dang / /mtshan ma rgyu dang phung po dang //khams dang skye mched dag dang ni/ /khams gsum pa la chags gnas dang / /sems ni kun tu zhum pa dang / /dkon mchog gsum dang tshul khrims dang / /der lta ba la mngon zhen dang / /stong pa nyid la rtsod pa dang / /de dang 'gal ba'i nyes pa ni/ /nyi shu gang la rnam chad pa//de yis sa ni bdun pa thob/ /ces gsungs pa yin no/ /gang gis dri ma nyi shu rnam par spangs pas sa bdun pa gnon pa yin no/ /yang de nyid la rnam pa nyi shus yin te/ rnam thar sgo gsum shes pa dang / /'khor gsum rnam par dag nyid dang //snying rjes rlom pa med pa dang / /chos mnyam nyid dang tshul gcig shes/ /mi skye ba la bzod pa dang / /chos rnams rnam pa gcig ston pa/ /rtog pa kun tu 'joms pa dang / /'du shes lta dang nyon mongs spong / /zhi gnas nges par sems pa dang / /lhag mthong la ni mkhas pa dang //sems dul ba dang thams cad la/ /thogs pa med pa'i ye shes dang / /chags pa'i sa min gar 'dod par/ /zhing gzhan du ni mnyam 'gro dang / /kun tu bdag gi ngo bo ni/ /ston pa nyid dang nyi shu'o/ /zhes bya ba bstan pa yin no/ /ji skad du mdo las/stong pa nyid kyi rab tu dbye ba dang / mtshan ma med pa mngon sum du byas pa dang / smon pa med pa'i ye shes dang / brtse ba ni snying rje ba'o/ /de dag dang rlom pa med pa la zhes bya ba la sogs pa gsungs pa yin no/ /de la snying rje ni skal ba dman pa rnams la'o/ /phan gdags pa'i dus la rtog pa'i bsam pas snying rje bya ba dang ldan pa'i skal ba dang ldan pa rnams la phan gdags pas bsdu bar sbyor ba yin no//dbye ba rnam pa bzhis sa brgyad pa yongs su sbyong ngo / /yang rnam pa bzhi ni 'di dag yin te/ sems can kun yid shes pa dang / /mngon par shes pas rtse ba dang //sangs rgyas zhing bzangs bsgrub pa dang / /sangs rgyas bsten dang dbang po shes/ /zhing gi sbyong ba sgyu ma yi/ /ting nge 'dzin ni thob pa dang / /bsams bzhin srid pa len pa dang / /las ni rnam pa brgyad du 'dod/ /ces bstan pa yin no/ /zhing sbyong zhes bya ba ni sems can gyi 'jig rten ni sems can gyi ste/byang chub sems dpa' 'jam dpal gyi sangs rgyas kyi zhing lta bu'o/ /chos rnam pa bcu gnyis bsgrubs pas sa dgu pa yongs su sbyong ba yin te/ smon lam dag ni mtha' yas dang / /lha la sogs pa'i skad shes dang / /spobs pa chu bo lta bu dang //mngal du 'jug pa'i mchog dang ni/ /rigs dang rus dang cho 'brang dang / /'khor dang skye gnas dag dang ni/ /nges 'byung byang chub shing rnams kyis/ /yon tan phun tshogs rdzogs pa yin/ /zhes bstan pa yin no/ /sa bcu pa nyid ni de bzhin gshegs pa nyid du brjod do zhes bya ba ni sems can rnams la de bzhin gshegs pa'i mdzad pa nye bar gnas pas de la de bzhin gshegs par brjod kyi de bzhin gshegs pa'i thugs su chud pa las dgongs pa ma yin no//sa dang po la sogs pa de dag gi yang yongs su sbyong ba'i chos bstan te / de la bshad pa gang zhe na/byang chub sems dpa' sems dpa' chen po lhag pa'i bsam pa yongs su sbyong ba zhes bya ba nas brtsams te/ byang chub sems dpa' sa bcu zhes bya ba'i bar du ste/ rang gi mtshan nyid re re nas mi dmigs pa'i rnam par bstan to/ /byang chub sems dpa'i sa bcu pa ji lta bu zhe na/sa dgu las shin tu 'das nas sangs rgyas kyi sa la 'jug pa yin te/ sa dgu 'das nas ye shes ni/ /gang gis sangs rgyas sar gnas pa/ /de ni byang chub sems dpa'i sa/ /bcu pa yin par shes par bya/ /zhes bstan pa yin no/ /de la sa dgu ni 'di lta ste/ dkar po rnam par mthong ba'i sa ni dad pa dang / chos kyi rjes su 'brang ba dang / mos pas spyod pa'i sa yin no/ /de la rigs kyi sa ni nyan thos la sogs pa'i rigs kyi mtshan nyid yin no/ /de la yang brgyad pa'i sa ni rgyun du zhugs pa'i 'bras bu dang po yin no/ /de la yang mthong ba'i sa ni rgyun du zhugs pa'i sa yin no//de la yang bsrabs pa'i sa ni lan cig phyir 'ong ba'i sa yin no/ /'dod chags dang bral ba'i sa ni de yang phyir mi 'ong ba'i sa yin no/ /byas pa rtogs pa'i sa ni de yang dgra bcom pa'i sa yin no/ /rang sangs rgyas kyi sa dang / byang chub sems dpa'i sa dang rnam pa dgu yin no//sa'i tshogs bstan nas gnyen po'i tshogs brjod par bya ste/ mthong dang goms pa'i sa dag la/ /gzung dang 'dzin pa'i dbye ba rnams/ /nye bar zhi bar bya ba'i phyir/ /gnyen po rnam pa brgyad ces bya/ /zhes bstan pa yin no/ /de la yang rnam par rtog pa brgyad do/ / 'di dag ni re zhig mthong ba'i lam gyi mi mthun pa'i phyogs rnam par rtog pa bzhi yin no/ /de la gzung ba'i rnam par rtog pa ni rnam pa gnyis te/ dngos po'i rten can dang / gnyen po'i rten can no/ /'dzin pa'i rnam par rtog pa yang rnam pa gnyis te/ gang zag rdzas su yod pa'i rten can dang /skyes bu btags par yod pa'i rten can no/ /bsgom pa'i lam gyi mi mthun pa'i phyogs kyang bzhi po kho na yin no/ /dngos po'i rnam pa tsam gyi rten can dang / gnyen po'i rnam pa'i rten can te/ rnam pa gnyis so/ /'dzin pa'i rnam par rtog pa yang 'phags pa'i gang zag thams cad btags pa'i rten can dang /btags pa de'i mtshan ma'i rten can te/ rnam pa gnyis so/ /rnam par rtog pa de dag ni khams gsum ka'i yin no zhes bstan pa yin no/ /rab 'byor khyod kyis gang 'di skad du de gang las nges par 'byung bar 'gyur zhes smras pa ni khams gsum las nges par 'byung bar 'gyur ro//gang gi rnam pa thams cad mkhyen pa nyid du gnas par 'gyur ba ni gnyis su med pa'i rnal 'byor ro/ /ji ltar gnas par 'gyur ba de'i mi mthun pa'i phyogs su gyur pa gnyis mthong ba dang / sgom pa gnyis kyi mi dmigs pa'i rnal 'byor gyis rnam par mi rtog pa la sbyor zhes bya ba'i don to//de ci'i phyir zhe na/ theg pa chen po gang yin pa dang / rnam pa thams cad mkhyen pa nyid gang yin pa'i chos de gnyi ga yang ldan pa yang ma yin/ mi ldan pa yang ma yin pa'i phyir ro/ /gzugs med pa zhes bya ba la sogs pas ni de la mthong ba'i lam gyi rnam par rtog pa dang po'i gnyen po'i dbang du mdzad nas chos kyi dbyings dang /de bzhin nyid dang / yang dag pa'i mtha' dang / bsam gyis mi khyab pa'i dbyings dang / nam mkha' dang / spangs pa dang / 'dod chags dang bral ba'i dbyings rnams dang / skye ba med pa dang / 'gog pa dang / phung po dang / skye mched dang / khams la sogs pa nges par 'byung ba mi 'thad pa nyid kyi phyir mtshan nyid med pa'i chos rnams 'byung bar 'dod pa yin no/ /de bzhin du phung po dang / khams dang / skye mched rnams la sogs pa nges par 'byung ba mi 'thad pas mtshan ma med pa'i chos rnams 'byung bar 'dod pa bkag pa yin no//de ci'i phyir zhe na/ gzugs la sogs pa'i phung po la sogs pa rnams ni gzugs la sogs pas stong pa'i phyir ro/ /de ci'i phyir zhe na/ de rnams kyi stong pa nyid dang / khams gsum las nges par 'byung ba gang yin pa dang /rnam pa thams cad mkhyen pa nyid la gnas pa bkag pas rmi lam dang / smig rgyu dang / sgyu ma dang / sgra brnyan dang / mig yor dang / gzugs brnyan dang / sprul pa rnams nges par 'byung ba mi 'thad pas mtshan nyid med pa'i chos rnams 'byung bar 'dod pa bkag pa yin no//de ci'i phyir zhe na/ de rnams kyi rang bzhin khams gsum las nges par 'byung ba bkag pas rnam pa thams cad mkhyen pa nyid du gnas pa yin pa bkag pa'i phyir ro/ /de ci'i phyir zhe na/ de rnams kyi rang bzhin de dag stong pa nyid kyi phyir ro zhes gsungs pa yin no//mthong ba'i lam gyi gzung ba'i rnam par rtog pa gnyis pa'i gnyen po'i dbang du mdzad nas pha rol tu phyin pa rnams nges par 'byung ba mi 'thad pas mtshan nyid med pa'i chos rnams nges par 'byung bar gnas pa bkag pa yin no/ /de ci'i phyir zhe na/ de rnams kyi ngo bo dang / khams gsum las nges par 'byung ba dang / rnam pa thams cad mkhyen pa nyid bkag pa nyid yin no/ /de ci'i phyir zhe na/ de rnams kyi rang gi ngo bo de dag stong pa nyid yin pa'i phyir ro zhes gsungs pa yin no/ /mthong ba'i lam gyi 'dzin pa'i dbang du mdzad nas dgra bcom pa dang /rang sangs rgyas dang / byang chub sems dpa' dang / yang dag par rdzogs pa'i sangs rgyas rnams nges par 'byung bar mi 'thad pas mtshan nyid med pa'i chos rnams nges par 'byung ba la gnas pa bkag pa yin no/ /de ci'i phyir zhe na/ de rnams de dag gis stong pa'i phyir ro//de ci'i phyir zhe na/ de rnams kyi stong pa nyid dang / khams gsum las nges par 'byung ba dang / rnam pa thams cad mkhyen pa nyid du nges par 'byung ba bkag pa yin no/ /de ci'i phyir zhe na/ de rnams kyi rang gi ngo bo de dag gis stong pa'i phyir ro/ /de bzhin du rgyun du zhugs pa'i 'bras bu dang /rang byang chub dang / rnam pa thams cad mkhyen pa nyid kyi rang gi ngo bo de dag stong pa nyid yin pa'i phyir ro zhes ston pa yin no/ /mthong ba'i lam gyi 'dzin pa'i rnam par rtog pa gnyis pa'i gnyen po'i dbang du mdzad nas ming dang / mtshan ma dang / brda dang /tha snyad dang / gdags pa rnams nges par 'byung ba mi 'thad pas mtshan nyid med pa'i chos rnams nges par 'byung ba la gnas pa bkag pa yin no/ /de ci'i phyir zhe na/ de rnams ni de rnams kyis stong pa'i phyir ro/ /de ci'i phyir zhe na/ de rnams kyi stong pa nyid dang / khams gsum las nges par 'byung ba dang /rnam pa thams cad mkhyen pa nyid du gnas pa bkag pa yin no/ /de ci'i phyir zhe na/ de rnams kyi rang gi ngo bo de dag stong pa nyid yin pa'i phyir ro/ /de la ming du btags pa ni 'du shes dang / gzugs dang / tshor ba dang zhes bya ba la sogs pa'o/ / mtshan mar btags pa ni dngos po 'di ni gzugs su rung ba'i mtshan nyid yin pas gzugs so zhes bya ba la sogs pa'o/ /tshor ba ni nyams su myong ba'o zhes bya ba la sogs pa yin no/ /brdar btags pa ni khams dang / 'gro ba dang / skye gnas las skyes pa'i dbye bas sems can rnams rang gi skad dang brdar ji ltar grags pa'o//'di dag thams cad kyi dbye ba yang rnam pa gsum ste/ tha snyad dang / btags pa dang / tha snyad ji lta ji lta ba'i rjes su 'jug pa tsam nyid yin gyi don dam pa stong pa nyid yin no/ /de bzhin du skye ba med pa dang / 'gag pa med pa dang /kun nas nyon mongs pa dang / rnam par byang ba dang / mngon par 'dus ma byas pa rnams rang bzhin gyis stong pa nyid yin pa'i phyir ro zhes bstan pa yin no/ /bsgom pa'i lam gyi gzung ba'i rnam par rtog pa'i gnyen po'i dbang du mdzad nas rab 'byor khyod kyis gang 'di skad du de gang du gnas par 'gyur zhes smras pa ni theg pa de gang du yang gnas par 'gyur ba med de/rab 'byor 'di ltar chos thams cad mi gnas pa ste/ yang rab 'byor 'di ltar chos thams cad mi gnas par gnas pa'i rnal 'byor gyis gnas pa zhes bya ba nas brtsams te/ chos kyi dbyings dang / skye ba med pa dang /'gag pa med pa dang / kun nas nyon mongs pa med pa dang / rnam par byang ba med pa dang / mngon par 'du bya ba med pa nyid theg pa chen po la gnas pa dang / mi gnas pa bkag pa yin no/ /de ci'i phyir zhe na/ de rnams de dag gis stong pa'i phyir ro/ /de ci'i phyir zhe na/stong pa nyid la gnas pa dang / mi gnas pa la bkag pa yin no/ /de ci'i phyir zhe na/ de rnams kyi rang gi ngo bo de dag stong pa nyid yin pa'i phyir ro zhes bstan pa yin no/ /bsgom pa'i lam gyi gzung ba'i rnam par rtog pa gnyis pa'i gnyen po'i dbang du mdzad nas rab 'byor gang yang khyod kyis 'di skad du theg pa des gang zhig nges par 'byung bar 'gyur zhes smras pa ni theg pa des gang yang nges par 'byung ba med do//de ci'i phyir zhe na/ rab 'byor de ni 'di ltar theg pa de gang yin pa dang / gang nges par 'byung bar 'gyur ba'i chos de dag thams cad med cing mi dmigs na chos rnams las chos gang gis nges par 'byung bar 'gyur zhes bya ba nas brtsams te/de ci'i phyir zhe na/ bdag dang / sems can dang / srog la sogs pa rnams shin tu rnam par dag pa nye bar bzung ba'i phyir dmigs su med do/ /chos kyi dbyings la sogs pa rnams dang /phung po rnams nas ma 'dres pa'i bar rnams kyang / shin tu rnam par dag pa nye bar bzung ba'i phyir mi dmigs te/ so sor rang gi ngo bor dmigs pa nye bar mi dmigs so/ /de ci'i phyir zhe na/ rab 'byor chos kyi dbyings dmigs su med do zhes bya ba nas ma 'dres pa rnams kyi bar du dmigs pa mi dmigs so zhes bya ba bstan pa yin no//'dir shin tu rnam par dag pa smos pa ni bsgom pa'i lam gyi shin tu rnam par dag pa'i rgyu mtshan shes pa yin pa'i phyir ro/ /bsgom pa'i lam gyi 'dzin pa'i rnam par rtog pa'i gnyen po'i dbang du mdzad nas rgyun tu zhugs pa la sogs pa rnams nas yang dag par rdzogs pa'i sangs rgyas kyi bar du shin tu rnam par dag pa nye bar bzung ba'i phyir dmigs su med do//gang dag dmigs su med ce na/ rang gi ngo bo dmigs su med do/ /de ci'i phyir zhe na/ rab 'byor rgyun tu zhugs pa dmigs su med do zhes bya ba nas yang dag par rdzogs pa'i sangs rgyas kyi bar du thams cad dmigs su med pa'i phyir mi dmigs so zhes bstan pa yin no/sgom pa'i lam gyi 'dzin pa'i rnam par rtog pa gnyis pa'i gnyen po'i dbang du mdzad nas rgyun tu zhugs pa la sogs pa'i 'bras bu rnams dang /rab tu dga' ba la sogs pa'i sa bcu rnams dang / dkar po rnam par mthong ba'i sa dang / rigs kyi sa dang / brgyad pa'i sa dang / mthong ba'i sa dang / bsrabs pa'i sa dang / 'dod chags dang bral ba'i sa dang / byas pa rtogs pa'i sa dang / rang sangs rgyas kyi sa dang / sangs rgyas kyi sa rnams lam gyi 'bras bur gyur pa 'phags pa'i gang zag thams cad gdags pa'i rgyu mtshan mi dmigs so zhes bstan pa yin no/ /yang gang rnam par rtog pa bzhi po sngar bstan pa nges par 'byed pa'i cha dang mthun pa dang 'brel pa yin no/ / de ltar 'dir ni yang gnyen po'i dbang du mdzad pa'i rnam par rtog pa brgyad bstan pa yin no/ /snying rje la sogs pa 'di dag ni byang chub kyi rgyu'i ngo bo yin pa'i phyir tshogs zhes bya'o/ /mngon par rtogs pa'i rgyan shes rab kyi pha rol tu phyin pa'i man ngag gi bstan bcos las tshogs kyi bsgrub pa'i rnam par 'grel pa'o// //tshogs kyi bsgrub pa bshad nas nges par 'byung ba'i bsgrub pa bshad par bya ste/ ched du bya dang mnyam nyid dang / /sems can don la 'bad med dang / /shin tu nges par 'byung ba dang / /thob pa'i nges par 'byung nyid dang / /rnam pa thams cad mkhyen nyid du//nges par 'byung ba'i lam nyid dang / /rnam pa brgyad kyi bdag nyid ni/ /nges 'byung bsgrub pa yin zhes bya/ /zhes bstan pa yin no/ /de la nges par 'byung ba'i bsgrub pa ni rnam pa brgyad du 'gyur te/ 'di lta ste/ ched du bya ba'i nges par 'byung ba dang / mnyam pa nyid kyi nges par 'byung ba dang /sems can gyi don gyi nges par 'byung ba dang / lhun gyis grub pa'i nges par 'byung ba dang / shin tu nges par 'byung ba dang / thob pa'i nges par 'byung ba dang / rnam pa thams cad mkhyen pa nyid du nges par 'byung ba dang / lam gyi nges par 'byung ba'o/ /de la ched du bya ba'i nges par 'byung ba ni rnam pa gsum ste /mchog tu nges par 'byung ba dang / spangs pa'i nges par 'byung ba dang / rtogs pa'i nges par 'byung ba'o/ /gang du mchog nyid nges par 'byung ba'i dbang du mdzad nas/ ji ltar 'di ltar de dang de/ /zhes bya ba nas brtsams te/ go cha chen po bgos pa ni byang chub sems dpa' zhes bya ba'i go cha'i bsgrub pa chen po nyid dang /theg pa chen po la yang zhon pa zhes bya ba 'jug pa'i che ba nyid dang / ci'i phyir go cha chen po bgos pa zhes bya ba'i tshogs kyi bsgrub pa'i che ba nyid kyis 'di'i chen po rnam pa gsum po nges par 'byung ba'i bsgrub pa nas brtsams te/de ni 'chad par 'gyur ba yin no/ /bcom ldan 'das theg pa chen po zhes bgyi ba 'di ni lha dang mi dang lha ma yin du bcas pa'i 'jig rten zil gyis mnan te 'byung bar 'gyur bas zhes gnas brtan rab 'byor gyis nges par 'byung ba'i bsgrub pa bstan nas/ de nyid bstan pa ni rab 'byor 'di dag ni byang chub sems dpa' sems dpa' chen po'i theg pa chen po ste/pha rol tu phyin pa drug dang / gzungs kyi sgo thams cad dang / ting nge 'dzin gyi sgo thams cad dang / stong pa nyid thams cad dang / byang chub kyi phyogs kyi chos rnams dang / ma 'dres pa'i bar du ji skad bstan pa rnams theg pa chen po'i nges par 'byung ba nas brtsams te/rab 'byor gang yang khyod kyis 'di skad du theg pa chen po de ni lha dang mi dang lha ma yin du bcas pa'i 'jig rten zil gyis mnan te 'byung bar 'gyur ro zhes smras pa ni rab 'byor gal te 'dod pa'i khams de bzhin/ma nor ba de bzhin/ gzhan ma yin pa de bzhin te/ phyin ci ma log pa yin te/ de kho na bden pa yang dag pa ste/ ji lta ba bzhin du rtag cing brtan la ther zug mi 'gyur ba'i chos can gyi dngos po zhig yin na theg pa chen po 'dis kyang lha dang mi dang lha ma yin du bcas pa'i 'jig rten zil gyis mnan cing 'byung bar mi 'gyur ro//gang gi phyir rab 'byor 'dod pa'i khams de rnam par rtag pa zhes bya ba ni yang dag pa ma yin par yongs su brtag pa'i ma rig pas rnam par gzhag cing de ni rkyen gyi 'du byed kyis rnam par bsgrubs pa sred pa dang / len pa dang / srid pa yongs su 'gyur ba'i chos can yin no/ /de bas na theg pa chen po 'dis lha dang mi dang lha ma yin du bcas pa'i 'jig rten zil gyis mnan nas nges par 'byung bar 'gyur ro/ /de ci'i phyir zhe na/ 'jig rten na grags pa tsam gyi don ji lta ba nyid ma yin pas mngon par rtogs pa'i 'bras bu'i theg pa chen po ni de la mngon par zhen pa'i bcings pa nyid yin zhes bstan pa'i phyir ro//gzhan du na theg pa chen po gnyen po nyid ni don med do zhes bya ba yin no/ /de la dmigs pa dang / dmigs pa po dang / gnyi ga'i dbang du mdzad nas tshig dang po dang /bzhi pa dang / bdun pa'o/ /gnyis pa gnyis ni snga ma dag gis bshad pa dag gi tshig yin la/ de nas de la gzhan gsum gyi dbang du byas nas ni tshig gsum yin no/ /de bzhin du dmigs pa la sogs pa de rnams kyis mnyam pa'i nges par 'byung bar 'gyur bas gzhan du 'gyur ba'i chos can ni tshig bcu gcig yin par shes par bya'o//de bzhin du gzugs dang / gzugs med pa'i khams dang / phung po la sogs pa dang / chos kyi dbyings dang / yang dag pa'i mtha' dang / pha rol tu phyin pa la sogs pa nas ma 'dres pa'i bar du dngos po dang dngos po med pa bkag par gsungs pa ni theg pa chen po'i nges par 'byung ba yin par 'dod pa'i 'og ma rnams la yang khas blang bar bya'o zhes bstan pa yin no//spangs pa'i nges par 'byung ba'i dbang du mdzad nas rigs kyi sa'i chos dang / brgyad pa'i sa'i chos dang / rgyun tu zhugs pa la sogs pa'i chos rnams dang /rigs kyi sa'i gang zag nas yang dag par rdzogs pa'i sangs rgyas kyi bar dang / lha dang mi dang / lha ma yin du bcas pa'i 'jig rten dngos po yod pa dang dngos po med pa ma yin na ni theg pa chen po 'dis kyang lha dang mi dang lha ma yin du bcas pa'i 'jig rten dngos po dang /dngos po med pa bkag pas theg pa chen pos nges par 'byung ba bstan pa yin no/ /rtogs pa'i nges par 'byung ba'i dbang du mdzad nas sems dang po bskyed pa nas nye bar bzung ste/ byang chub kyi snying po la 'dug gi bar du sems bskyed pa rnams dngos po dang / dngos po med pa bkag pas theg pa chen pos nges par 'byung ba bstan pa yin no//rdo rje lta bu'i ye shes dngos po dang dngos po med pa bkag pas bstan pa yin no/ /byang chub sems dpa'i bag chags kyis mtshams sbyor ba'i nyon mongs pa thams cad spong ba dang / rnam pa thams cad mkhyen pa nyid thob pa dang /theg pa chen pos nges par 'byung ba dang / skyes bu chen po'i mtshan sum cu rtsa gnyis dngos po dang dngos po med pa bkag pas bstan to/ /sangs rgyas kyis lha dang mi dang lha ma yin du bcas pa'i 'jig rten gzi brjid dang dpal gyis mnan cing / de bzhin gshegs pa dgra bcom pa yang dag par rdzogs pa'i sangs rgyas kyang dngos po dang dngos po med pa bkag pa bstan to//sangs rgyas kyis 'jig rten gyi khams gang gA'i klung gi bye ma snyed rang gi sku'i 'od kyis rgyas par 'gengs par mdzad pa dang / gsung dbyangs yan lag drug cu dang ldan pa dngos po dang dngos po med pa bkag pa bstan to//sangs rgyas kyis phyogs bcu'i 'jig rten gyi khams re re zhing tshad med cing grangs med pa'i 'jig rten gyi khams gsung gis go bar mdzad pa snga ma bzhin no/ /de la gsung dbyangs yan lag drug cu las de las kyang mnyen pa gang zhe na/ 'di ltar sangs rgyas kyis dge ba'i rtsa ba nye bar ston par mdzad pa'i phyir mnyen pa'o/ /mthong ba'i chos nyid la bde bar nges par mdzad pa'i phyir 'jam pa'o/ /don bzang ba'i phyir yid du 'ong ba'o/ /yi ge bzang ba'i phyir yid du 'thad pa'o/ /'jig rten las 'das pa bla na med pa'i rjes la thob pa'i phyir dag pa'o//nyon mongs pa'i bag la nyal gyi bag chags thams cad dang bral ba'i phyir dri ma med pa'o/ /tshig dang yi ge rab tu grags pa'i phyir rab tu gsal ba'o/ /mu stegs can blo gros ngan pa thams cad kyi lta ba rnam par 'joms pa'i stobs kyi yon tan dang ldan pa'i phyir snyan cing 'jebs pa'o//bsgrubs pa nges par 'byung ba dang ldan pa'i phyir mnyan par 'os pa'o/ /pha rol gyi rgol ba thams cad kyis mi rtsol ba'i phyir mi tshugs pa'o/ /thams cad dga' bar byed pa'i phyir snyan pa'o/ /'dod chags la sogs pa'i gnyen por gyur pa'i phyir dul ba'o/ / bslab pa bcas pa'i thabs bde ba mnga' ba'i phyir mi rtsub pa'o/ /de las 'das na nges par 'byung ba'i thabs yang dag par ston par mdzad pa'i phyir mi brlang ba'o/ /theg pa gsum gyis 'dul ba ston pa'i phyir rab tu dul ba'o/ /rnam par g.yeng ba'i gnyen po yin pa'i phyir rnar snyan pa'o//ting nge 'dzin bskyed pa'i phyir lus sim par byed pa'o/ /lhag mthong gis rab tu dga' ba skyed par mdzad pa'i phyir sems tshim par byed pa'o/ /the tshom gcod par mdzad pa'i phyir snying dga' bar byed pa'o/ /log par nges pa dang ma nges pa sel bas na dga' ba dang bde ba skyed pa'o//bsgrub pa la 'gyod pa med pa'i phyir yongs su gdung ba med pa'o/ /thos pa las byung ba'i shes pa phun sum tshogs pa'i rten yin pa'i phyir kun shes par bya ba'o / /bsams pa las byung ba'i shes pa phun sum tshogs pa'i rten yin pa'i phyir rnam par rig par bya ba'o//slob dpon gyi dpe mkhyud mi mnga' bar chos ston par mdzad pa'i phyir rnam par gsal ba'o/ /rang gi don rjes su thob pa rnams dga' bar byed pa'i phyir dga' bar byed pa'o/ /rang gi don thob pa rnams kyis dga' bar bya ba yin pa'i phyir mngon par dga' bar byed pa'o/ / bsam gyis mi khyab pa'i chos yang dag par ston par mdzad pa'i phyir kun shes par byed pa'o/ /bsam du rung ba'i chos rnams yang dag par ston par mdzad pa'i phyir rnam par rig par byed pa'o/ /tshad ma dang mi 'gal ba'i phyir rigs pa'o/ /gdul bya rnams la ji ltar rigs par ston par mdzad pa'i phyir 'brel pa'o//don med pa mi gsung ba'i phyir zlos pa'i skyon med pa'o/ /mu stegs byed kyi tshogs thams cad skrag par mdzad pa'i phyir seng ge'i shugs so/ /gsung rgya che ba'i phyir glang po che'i sgra skad do/ /zab pa'i phyir 'brug gi sgra dbyangs so/ /gzung bar 'os pa'i phyir klu'i dbang po'i sgra'o//snyan pa'i phyir dri za'i glu dbyangs so/ /rno ba dang 'jigs pa'i phyir ka la piM ka'i sgra dbyangs so/ /thag ring por grag pa'i phyir tshangs pa'i sgra dbyangs su bsgrags pa'o/ / grub pa thams cad kyi sngon du 'gro bar shes pa yin pa'i phyir shang shang te'u'i sgra dbyangs su grag pa'o//de la sgra smos pas ni don ston pa'i mtshan nyid sgra yin par go bar bya ba'i don to/ /dbyangs smos pa ni de'i brda go bar byed pa'i don to/ /grag pa smos pas ni brda de dang rjes su sgrogs pa go bar byed pa'i don yin no/ /'da' bar bya ba ma yin pa'i phyir lha'i dbang po'i dbyangs ltar snyan pa'o//bdud dang phyir rgol ba thams cad las rnam par rgyal ba'i sngon du 'gro ba'i phyir rnga'i sgra'o/ /bstod pas kun nas nyon mongs pa mi mnga' ba'i phyir ma khengs pa'o/ /smad pas zhum pa mi mnga' ba'i phyir mi dma' ba'o/ /sgra'i bstan bcos thams cad la rnam pa thams cad kyi mtshan nyid rjes su zhugs pa nyid yin pa'i phyir sgra thams cad kyi rjes su zhugs pa'o//bsnyel te gsung ba mi mnga' ba'i phyir tshig zur chag pa med pa'o/ /gdul bya rnams kyi bya ba la dus thams cad du nye bar gnas par mdzad pa'i phyir ma tshang ba med pa'o/ /rnyed pa dang bkur sti la mi rton pa'i phyir ma zhum pa'o//bsnyengs pa dang bral ba'i phyir mi zhan pa'o/ /skyo ba med pa la mnga' brnyes pa'i phyir rab tu dga' ba'o/ /rig pa'i gnas thams cad la mkhas pa dang ldan pa'i phyir khyab pa'o/ /sems can gyi don de dag thams cad rdzogs par mdzad pa'i phyir chub pa'o//rgyun chad pa med pa'i phyir rgyun chags pa'o/ /rnam pa sna tshogs pa'i rnam par rab tu gnas pa'i phyir 'brel pa'o/ /gsung gcig las sgra'i rnam pa du mar gnas pa'i phyir sgra thams cad rdzogs par byed pa'o/ /gcig las don du ma'i rnam par rig par nye bar gnas pa'i phyir dbang po thams cad tshim par byed pa'o//ji ltar bcas pa bzhin mdzad pa'i phyir ma smad pa'o/ /phyis dus la bab par rab tu sbyor ba'i phyir mi 'gyur ba'o/ /rtab rtab por mi gsung ba'i phyir ma rtabs pa'o/ /'khor thag ring ba dang nye bar mtshungs par thos pa'i phyir kun tu grag pa'o//'jig rten pa thams cad kyi don dang / 'jig rten las 'das pa'i don thams cad dpe chos su bsgyur ba'i phyir rnam pa thams cad kyi mchog dang ldan pa'o zhes 'phags pa thogs med kyis gsungs so/ /chos kyi 'khor lo lan gsum bskor ba rnam pa bcu gnyis kyi chos kyi 'khor lo dngos po dang dngos po med pas bstan pa yin no//sngar ma bskor ba'i chos kyi 'khor lo lan gsum bskor ba 'di yin te/ sdug bsngal 'phags pa'i bden pa yongs su shes par bya'o/ /yongs su shes so zhes bya ba la sogs pa 'di la re re zhing mig dang /shes pa dang / rig pa dang / blo skyes pa'i phyir 'di ltar rnam pa bcu gnyis so/ /de bzhin du bden pa re re zhing yang gsum dang / bcu gnyis su chos mthun pas lan gsum rnam pa bcu gnyis su bskor ba zhes gsungs pa yin no/ /sems can gang dag la bskor ba de rnams kyi dngos po dang dngos po med pa bkag par bstan pas dus gsum pa'i sems can de dag phung po ma lus pa'i mya ngan las 'das pa'i dbyings su yongs su mya ngan las 'da' ba'i phyir ro//gsol pa/ bcom ldan 'das dngos po ni gang zhig lags/ dngos po med pa ni gang zhig lags/bka' stsal pa/ rab 'byor gnyis ni dngos po'o/ /gnyis su med pa ni dngos po med pa'o zhes gsungs pa yin no/ /nges par 'byung ba gsum ni ched du bya ba'i nges par 'byung ba yin par rig par bya'o/ /mnyam pa nyid kyi nges par 'byung ba'i dbang du mdzad nas rab 'byor khyod kyis gang yang 'di skad du theg pa de ni nam mkha' dang mnyam pa'o zhes bya ba la sogs pa dang /nam mkha' dper byas pas ni theg pa chen po la phyogs yod par shes par bkag pa yin pas ring po dang / thung ngu dang / sngon po dang ser po la sogs pa dang / dbyibs dang / kha dog gi gzugs bkag pa dang / dus gsum bkag pas kun nas nyon mongs pa dang / rnam par byang ba dang / skye ba dang / 'gag pa dang / gnas pa dang / mthar thug pa dang / gnas pa las gzhan du 'gyur ba med pa'i phyir ro/ /de la med pa la 'byung ba ni skye ba'o//yod pa las log pa ni bkag pa'o/ /rgyun 'dra ba ni gnas pa'o/ /rgyun rnam par 'gyur ba ni mthar thug pa'o/ /nye bar zhig cing rgyun gzhan du 'gyur ba ni gnas pa las gzhan du 'gyur ba'o/ /dge ba dang / mi dge ba dang / lung du ma bstan pa ma yin pa rnams dang / mthong ba dang /thos pa dang / rtogs pa dang / rnam par shes pa rnams dang / shes par bya ba dang / rnam par shes par bya ba dang / yongs su shes par bya ba dang / mngon du bya ba dang / spang bar bya ba dang / bsgom par bya ba'o / /de la shes par bya ba ni thams cad shes pa nyid de/ nyan thos dang / rang sangs rgyas kyis mthong zhing / ye shes kyis bltas nas byang chub sems dpa' 'da' bar bya'o zhes gsungs pa'i phyir ro/ /kun shes pa nyid ni lam shes pa nyid de/ des sangs rgyas nyid kyi bar du shes par bya ba nyid yin pa'i phyir ro/ /rnam par shes par bya ba ni rnam pa thams cad mkhyen pa nyid de/des ni ma lus pa yul du mdzad pa'i phyir ro/ /rnam par smin pa dang / de dang 'brel pa'i chos dang / 'dod pa'i khams la sogs par gtogs pa nyid bkag pas nam mkha' dang / theg pa chen po mtshungs pas sems bskyed pa dang po nas nye bar bzung ste/de bzhin du sa bcu pa dang / dkar po rnam par mthong ba'i sa la sogs pa rnams dang / byas pa rtogs pa'i sa nas rgyun du zhugs pa la sogs pa'i 'bras bu rnams dang / nyan thos dang / rang sangs rgyas dang / sangs rgyas kyis bkag pas theg pa chen po ni gzugs dang / bstan du yod pa dang / thogs pa dang bcas pa dang / mtshungs par ldan pa rnams las go bzlog pa rnams bkag pa dang / de bzhin du bde ba dang / rtag pa dang / zhi ba rnams las go bzlog pa dang / mi stong pa dang / mtshan ma dang / smon pa yod pa de rnams go bzlog pa dang / dben pa dang / snang ba las go bzlog pa rnams dang / thob pa dang / nye bar thob pa dang / brjod du yod pa dang / rab tu brjod du yod pa gnyis bkag pas ni theg pa chen po ni nam mkha' dang mnyam pa nyid du bstan pa yin no/ /sems can gyi don gyi nges par 'byung ba'i dbang du mdzad nas rab 'byor gang khyod kyis 'di skad du ji ltar nam mkha' sems can tshad med grangs med pa'i go 'byed pa de bzhin du theg pa chen po de yang de bzhin no//sems can dang / nam mkha' dang / theg pa chen po de yang med pa'i phyir theg pa chen po ni sems can tshad med grangs med pa'i go 'byed pa yin no//de ci'i phyir zhe na/ sems can dang / nam mkha' dang / theg pa chen po mi dmigs pa'i phyir ro/ /yang sems can dang / nam mkha' dang / theg pa chen po tshad med pa'i phyir sngar bstan pa ltar theg pa chen po sems can gyi go 'byed pa yin no/ / de ci'i phyir zhe na/ sems can la sogs pa dmigs su med pa'i phyir ro/ /yang sems can dang / nam mkha' dang / theg pa chen po grangs med pa'i phyir de nyid kyis sems can grangs med pa'i go 'byed pa yin no/ /de ci'i phyir zhe na/ de rnams thams cad dmigs su med pa'i phyir ro//yang sems can gyi khams dang / chos kyi dbyings dang / nam mkha' dang / theg pa chen po rnams tshad med pa dang / grangs med pa nyid kyi phyir de lta bas na sngar bshad pa ltar sems can gyi go 'byed pa yin no/ /de ci'i phyir zhe na/ de rnams thams cad dmigs su med pa'i phyir ro//yang sems can dang / de bzhin gshegs pa dang / nam mkha' dang / theg pa chen po dang / 'dus ma byas dang / mi 'jal ba dang / mi 'grangs pa dang / mi dpogs pa med pa nyid kyi phyir chos thams cad med pa de nyid kyis sngar bstan pa de ltar sems can gyi go 'byed pa yin no//de ci'i phyir zhe na/ de rnams mi dmigs pa'i phyir ro/ /gzhan yang bdag dang / sems can dang / srog la sogs pa dang / yang dag pa'i mtha' dang / grangs med pa rnams dang / chos thams cad med pa nyid kyi phyir de nyid kyis sems can gyi go 'byed pa yin no/ /de ci'i phyir zhe na/de ltar dmigs su med pa'i phyir ro/ /yang bdag la sogs pa dang / bsam gyis mi khyab pa'i dbyings dang / gzugs la sogs pa'i phung po la sogs pa rnams dang / khams dang / theg pa chen po dang / mi 'jal ba dang / mi 'grangs pa dang / mi dpogs pa med pa nyid kyi phyir de nyid kyis sems can gyi go 'byed pa yin no//de ci'i phyir zhe na/ de rnams dmigs su med pa'i phyir ro/ /yang bdag la sogs pa dang / mig la sogs pa dang / nam mkha' dang / theg pa chen po dang / mi 'jal ba dang / mi 'grangs pa dang / mi dpogs pa med pa nyid kyi phyir de nyid kyis sems can gyi go 'byed pa yin no//de ci'i phyir zhe na/ de rnams dmigs su med pa nyid kyi phyir ro/ /yang bdag la sogs pa dang / sbyin pa la sogs pa'i pha rol tu phyin pa rnams dang / nam mkha' dang / theg pa chen po dang / tshad med pa dang / grangs med pa dang / dpag tu med pa nyid dang / chos thams cad med pa nyid kyi phyir de nyid kyis sems can rnams kyi go 'byed pa yin no/ /de ci'i phyir zhe na/ de rnams dmigs su med pa nyid kyi phyir ro/ /yang bdag la sogs pa dang / sems can stong pa nyid dang / de bzhin du byang chub kyi phyogs la sogs pa rnams nas ma 'dres pa dang /rigs kyi sa dang / rgyun du zhugs pa la sogs pa rnams dang / nyan thos dang / rang sangs rgyas kyi theg pa gang yin pa dang / de bzhin gshegs pa rnam pa thams cad mkhyen pa nyid dang / nam mkha' dang / theg pa chen po dang / chos thams cad med pa nyid kyi phyir de nyid kyis na sems can rnams kyi go 'byed pa yin no//de ci'i phyir zhe na/ de rnams dmigs su med pa nyid kyi phyir ro / /mya ngan las 'das pa dang / nam mkha' dang / dper brjod pa dang / theg pa chen po sngar bstan pa ltar sems can rnams kyi go 'byed pa yin no//ji skad du mdo las/ rab 'byor yang 'di lta ste/ mya ngan las 'das pa'i dbyings dang / tshad med pa dang / grangs med pa dang / dpag tu med pa'i sems can gyi go 'byed pa'o/ /de lta yin na theg pa chen po 'dis zhes bya ba la sogs pa la rnam pa mang du dpe gzhan brgyud pa zlos pa'i nyes pa'i skabs med do//de dang de rtogs pa'i bye brag gi gnas skabs kyis gong nas gong du sems can gyi don mang bas rim gyis 'jug pa shes pa'i don du de bzhin du bstan pa yin te/ ji skad du mdo gzhan dag las/ zhi ba'i blo gros rnam grangs 'di ltar rig par bya ste/ ji lta ji ltar bla na med pa yang dag par rdzogs pa'i byang chub dang nye bar 'gyur ba de lta de ltar sems can tshad med pa dang /grangs med pa dang / dpag tu med pa yongs su smin par byed do zhes bya ba la sogs pa gsungs pa yin no/ /lhun gyis grub pa'i nges par 'byung ba'i dbang du mdzad nas rab 'byor gang yang khyod kyis 'di skad du/nam mkha' dang / theg pa chen po de la 'ong ba'am/ 'gro ba zhes bya ba mthong ba yang med/ gnas pa yang med/ 'gro ba dang / 'ong ba dang / gnas pa med pa ni lhun gyis grub pa'i nges par 'byung ba yin par bstan te/ de ci'i phyir zhe na/ chos thams cad g.yo ba med pa'i phyir ro/ /de ci'i phyir zhe na/ gzugs la sogs pa'i phung po rnams dang / mig la sogs pa rnams dang / sa la sogs pa'i khams drug dang / chos kyi dbyings dang / de bzhin nyid dang / yang dag pa'i mtha' dang / bsam gyis mi khyab pa'i dbyings dang /pha rol tu phyin pa rnams dang / byang chub kyi phyogs rnams dang / stobs la sogs pa nas sangs rgyas kyi chos ma 'dres pa'i bar dang / yang dag par rdzogs pa'i byang chub dang / 'dus byas dang / rang bzhin dang / ngo bo nyid kyi mtshan nyid rnam par 'ong ba dang / 'gro ba dang / gnas pa bkag pa ni lhun gyis grub pa'i nges par 'byung ba shes par byed pa'i ched yin no//mtha' las 'das pa'i nges par 'byung ba'i dbang du mdzad nas rab 'byor gang yang khyod kyis 'di skad du theg pa chen po de la sngon gyi mtha' yang mi dmigs so/ /phyi ma dang / dbus kyang mi dmigs te/ dus gsum mnyam pa nyid ces bya ba'i theg pa chen po ste/ de'i phyir theg pa chen po zhes bya'o zhes bya ba yin te/ dus gsum mnyam pa nyid ni mtha' las 'das pa'i nges par 'byung ba yin par bstan to/ /de ci'i phyir zhe na/ dus gsum ni de'i mnyam pa nyid yin pa dang / theg pa chen po dang /byang chub sems dpa' ni de dang de'i bdag nyid kyis stong pa nyid yin pa'i phyir stong pa nyid kyis ni gcig nas bcu'i bar gyi grangs bkag pas theg pa chen po la mnyam pa dang / mi mnyam pa dang / 'dod chags dang / 'dod chags dang bral ba dang / zhe sdang dang / zhe sdang dang bral ba dang / gti mug dang / gti mug dang bral ba dang / ming dang / ming med pa nas/ mi dge ba dang / dge ba dag dang / zag pa dang bcas pa dang / zag pa med pa dang / kha na ma tho ba dang bcas pa dang / kha na ma tho ba med pa dang / nyon mongs pa dang bcas pa dang / nyon mongs pa zad pa dang / 'jig rten pa dang / 'jig rten las 'das pa dang / kun nas nyon mongs pa dang / rnam par byang ba dang / 'khor ba dang / mya ngan las 'das pa dang / rtag pa dang / bde ba dang / bdag dang / zhi ba dang / de dag las go bzlog pa dang / 'dod pa la sogs pa'i khams rnams dang / de las 'das pa yang mi dmigs pa'i phyir ro//de ci'i phyir zhe na/ de dag thams cad ni ngo bo nyid kyis mi dmigs pa'i phyir ro/ /'das pa la sogs pa'i gzugs la sogs pa stong pa nyid yin pa'i phyir ro/ /de ci'i phyir zhe na/ stong pa nyid ni stong pa nyid kyis dmigs su med pa nyid yin pa'i phyir ro/ /'das pa la sogs pa'i gzugs la sogs pa dmigs su med pa'i phyir dus gsum mnyam pa nyid kyis na sngon gyi mtha' la sogs pa dang /pha rol tu phyin pa dmigs su med pa'i phyir ro/ /de ci'i phyir zhe na/ mnyam pa nyid la mnyam pa nyid mi dmigs pa'i phyir ro/ /'das pa la sogs pa dang / pha rol tu phyin pa dmigs pa mi srid pa nyid kyi phyir dran pa nye bar gzhag pa nas sangs rgyas kyi chos ma 'dres pa bcwa brgyad kyi bar du yang de bzhin du brjod par bya'o//de bzhin du sngon gyi mtha' la sogs pa dang / so so'i skye bo nas de bzhin gshegs pa'i bar du mi dmigs pa'i phyir ro/ /de ci'i phyir zhe na/sems can dmigs su med pa'i phyir ro/ /rab 'byor de ltar na byang chub sems dpa' sems dpa' chen po'i theg pa ni dus gsum mnyam pa nyid ces bya ste / de la gnas shing byang chub sems dpa' sems dpa' chen po lha dang / mi dang / lha ma yin du bcas pa'i 'jig rten zil gyis mnan te rnam pa thams cad mkhyen pa nyid du nges par 'byung ngo zhes bstan pa yin no//thob pa'i mtshan nyid nges par 'byung ba'i dbang du mdzad nas/ bcom ldan 'das theg pa chen po 'di la bslabs shing 'das pa dang / ma 'ongs pa dang / da ltar byung ba'i byang chub sems dpa' sems dpa' chen po rnams kyis rnam pa thams cad mkhyen pa nyid thob par gyur to//thob po 'thob par 'gyur ro zhes bya ba yin te/ nges par 'byung ba thob pa'i nye bar dgod pas shes rab kyi pha rol tu phyin pa ni 'phags pa'i gang zag thams cad kyi rtogs pa thob pa'i rgyu nyid dang rjes su mthun pa yin zhing / theg pa chen po bstan pa thob pas khyad par shes par bya ba'i don yin pa'i phyir dang /shes rab kyi pha rol tu phyin pa ni chos thams cad bsdus pa dang / mnyam par 'jug pa thob pa bstan pas ma lus pa thob pa yin par shes par bya ba'i don yin pa'i phyir ro/ /de ci'i phyir zhe na/ theg pa chen po ni pha rol tu phyin pa la sogs pa dang / gzugs la sogs pa dang / byang chub kyi phyogs kyi chos rnams nas sangs rgyas kyi chos ma 'dres pa'i bar dang / mya ngan las 'das pa'i dbyings zhes gsungs pa'i bar gyi chos de dag thams cad ni ldan pa yang ma yin/ mi ldan pa yang ma yin te/gzugs med pa/ bstan du med pa/ thogs pa med pa/ 'di ltar mtshan nyid med par mtshan nyid gcig pa sha stag ste zhes bya ba ni rtog pa thob cing / nges par 'byung ba'i rnam grangs kyis ji skad du bshad pas ni shes rab kyi pha rol tu phyin pa ni theg pa chen po bstan pa dang rjes su mthun no//de ci'i phyir zhe na/ theg pa chen por shes rab kyi pha rol tu phyin pa la sogs pa nas chos thams cad gnyis su med cing gnyis su byar med pa thob pa'i rnam grangs kyis theg pa chen po dang rjes su mthun par bstan pa yin no/ /de la thob pa ni nges par 'byung ba'i don rnam pa gsum bkag pa'i mtshan nyid can yin par shes par bya'o//yang dgag pa rnam pa gsum ni 'di ltar thob par bya ba dgag pa dang / thob pa po dgag pa dang / de gnyis kyi 'brel pa dgag pa'o/ /tshe dang ldan pa rab 'byor ci'i phyir byang chub sems dpa' sems dpa' chen pos sngon gyi mtha' dmigs su med pa yin zhes bya ba dang /ci'i phyir na gzugs kun tu mtha' yas pa'i phyir/ byang chub sems dpa' mtha' yas par rig par bya ba yin/ byang chub sems dpa' zhes bya ba de lta bu yang med cing mi dmigs pa yin te / de skad du de ltar byang chub sems dpa' sems dpa' chen po thams cad du thams cad rnam pa thams cad kyi thams cad du yang dag par rjes su ma mthong na byang chub sems dpa' gang zhig shes rab kyi pha rol tu phyin pa gang la gdams shing rjes su bstan par bgyi zhes smras zhes bya ba dang /byang chub sems dpa' zhes bya ba 'di ni ming tsam du bas so zhes bya ba dang /byang chub sems dpa' gzugs mngon par grub pa lta gang zhig mchis/ gang mngon par ma grub pa de ni gzugs ma lags so/ /mngon par ma grub pa'i shes rab kyi pha rol tu phyin pa la gdams shing rjes su bstan par bgyi'am zhes smra/ de skad du mngon par ma grub pa las gud na yang byang chub sems dpa' zhes bgyi ba dmigs su ma mchis so zhes smra/gal te de ltar bstan pa de'i tshe zhes bya ba la sogs pa bstan pa yin no/ /de la dris pa dang po bstan pa nas brtsams te/ thob par bya ba dgag pa'i dbang du mdzad nas sems can med pa'i phyir dang /stong pa dang / dben pa dang / rang bzhin med pa dang / sngon dang / phyi ma dang / dbus kyi mtha' rnams su byang chub sems dpa' khas blangs pa'i thob pa bkag pas dus gsum du thob par bya ba'i don med par shes par bya ba'i ched yin pa'i phyir ro/ /de bzhin du phung po la sogs pa dang /pha rol tu phyin pa rnams dang / byang chub kyi phyogs kyi chos rnams nas sangs rgyas kyi chos ma 'dres pa bcwa brgyad kyi bar du med pa'i phyir dang / stong pa nyid dang / dben pa dang / rang bzhin med pa rnams kyis sngon gyi mtha' la sogs par byang chub sems dpa' khas blangs pa'i thob pa bkag pa yin pa'i phyir ro//de ci'i phyir zhe na/ med pa nyid la sogs par sngon gyi mtha' la sogs pa mi dmigs pa nyid kyis na med pa nyid la sogs pa'i pha rol tu phyin pa la sogs pa rnam grangs gzhan du gsungs pas/ mdo las stong pa nyid gzhan ma yin/ sbyin pa'i pha rol tu phyin pa gzhan ma yin zhes bya ba la sogs pa dang /de bzhin du ting nge 'dzin dang / gzungs kyi sgo rnams dang / chos kyi dbyings dang / de bzhin nyid dang / yang dag pa'i mtha' rnams la yang brjod par bya'o/ /nyan thos la sogs pa 'phags pa'i gang zag rnams med pa la sogs pas sngon gyi mtha' la sogs par byang chub sems dpar khas blangs pa'i thob pa bkag pa yin pa'i phyir ro//de ci'i phyir zhe na/ med pa nyid las brtsams te/ sangs rgyas zhes bya ba'i bar du de dag thams cad kyang gnyis su med de gnyis su byar med do zhes bya ba bstan pa yin no/ /thob pa po dgag pa'i dbang du mdzad nas gzugs kun tu mtha' yas pa'i phyir zhes bya ba nas brtsams te/gzugs la sogs pa'i phung po la sogs pa nas sangs rgyas kyi chos ma 'dres pa'i bar la sngon gyi mtha' la sogs pa mi dmigs pa nyid yin pa'i phyir ro/ /de ci'i phyir zhe na/ stong pa nyid kyi phyir gzugs byang chub sems dpa' zhes bya ba med cing mi dmigs so zhes bya ba nas brtsams te/de ci'i phyir zhe na/ gzugs la sogs pa'i phung po la sogs pa nas de bzhin gshegs pa'i bar de dag gis stong pa nyid de yin pa'i phyir ro/ /byang chub sems dpa' chen po thams cad du thams cad rnam pa thams cad kyi thams cad du mi dmigs pa ni zhes bya ba nas brtsams te/gzugs la sogs pa'i phung po la sogs pa nas sangs rgyas kyi chos ma 'dres pa'i bar dang / sangs rgyas sangs rgyas nyid du mi dmigs pa nyid yin pa'i bar du'o/ /de la thams cad du zhes bya ba ni phung po la sogs pa'i dngos po'i mtshan nyid thams cad du'o//thams cad ces bya ba ni byang chub sems dpa'i phung po la sogs pa'i rang bzhin mtha' dag dang bsdus pa rnams so/ /rnam pa thams cad ni nang stong pa nyid la sogs pa'i rnam pa'i khyad par ro/ /yang thams cad ces bya ba ni rnam pa mdor bsdus pa dang rgyas pa'i mtshan nyid do//thams cad gnyis smos pa ni dngos po thams cad nyid dang / rnam pa thams cad nyid do/ /thob par bya ba dang / 'thob par byed pa dang / thob pa po 'brel pa bkag pa'i dbang du mdzad nas gang yang byang chub sems dpa' zhes bya ba 'di ni glo bur du ming du btags pa ste/ chos thams cad ming tsam yin pa nyid kyis na med cing mi dmigs pa yin pa'i phyir mngon par grub pa bkag cing tha snyad tsam du gsungs pa dang /shin tu mngon par ma grub pa dag gis bkag pa yin no/ /de la ngo bo nyid ma yin pa'i don ni glo bur du zhes bya ba'i don to/ /sgro btags pa'i don ni ming du btags pa ste/ bdag bdag ces bya ba ste/ bdag shin tu ma grub pa'o/ /bdag ji lta ba bzhin du chos thams cad kyang de bzhin no zhes ji skad gsungs pa dang / yang chos thams cad kyi 'dus pa'i ngo bo nyid bkag pas chos thams cad ni dngos po med pa'i ngo bo nyid yin pa'i phyir mi rtag pa nyid de gang dang yang bral bas ma yin no//de bzhin du de rnams nyid gang dang yang bral bas ma yin pas dge ba dang / kha na ma tho ba med pa nyid nas dngos po med pa'i bar nyid yin pa'i phyir dang / rtag pa ma yin pa dang / 'jig pa ma yin pa nyid yin pa'i phyir ro/ /de ci'i phyir zhe na/ de'i rang bzhin de yin no/ / yang chos thams cad mngon par 'dus ma byas pa nyid kyis mngon par grub pa bkag pa'i phyir ro/ /de ci'i phyir zhe na/ mngon par 'du byed pa dmigs su med pa nyid kyis chos thams cad rang bzhin gyis stong pa nyid yin pa'i phyir ro/ /skye ba dang / 'gag pa dang / gnas pa las gzhan du 'gyur ba bkag pas mngon par ma grub pa nyid kyis shes rab kyi pha rol tu phyin pa de ni mngon par ma grub pa ste/de mngon par ma grub pa dang / shes rab kyi pha rol tu phyin pa zhes bya ba'i chos de gnyis ni gnyis su med de gnyis su byar med do/ /chos thams cad byed pa med pa dang / sgyu ma la sogs pa dang 'dra bar mthong bas byang chub sems dpa'i sems mi 'jigs/mi dngang / skrag par mi 'gyur ro/ /chos de dag la 'di ltar yongs su rtogs pa de'i tshe nye bar mi len/ mi gnas/ mngon par zhen par mi byed/ tha snyad du 'dogs pa bkag pa yin no/ /de ci'i phyir zhe na/ chos thams cad ma skyes pa dang /chos thams cad kyi ngo bo nyid med pa nyid kyis na dmigs su med pa yin pa'i phyir ro/ /de ci'i phyir zhe na/ chos rnams dang / de'i stong pa nyid la sogs pa ni gnyis su med cing gnyis su byar med do/ /de bzhin du chos rnams kyi 'grib pa de yang chos ma lags so/ /de ci'i phyir zhe na/ chos rnams dang 'grib pa ni gnyis su ma mchis shing gnyis su bgyir ma mchis pa'i slad du'o//gang yang gzugs nas rnam pa thams cad mkhyen pa nyid kyi bar 'di ni gnyis su ma mchis shing / nyams pa ma mchis pa'i chos kyi rnam grangs su bgyis pa'o zhes bya ba ni thob par bya ba dang / thob pa po gnyis ka bkag pa yin pa'i phyir ro zhes bstan pa yin no//gsum pa rnams bkag pa ni thob pa'i nges par 'byung ba yin par rig par bya'o/ /rnam pa thams cad mkhyen pa nyid du nges par 'byung ba'i dbang du mdzad nas/ byang chub des kyang chos thams cad kyi rnam pa shes te/ gzugs la sogs pa'i phung po la sogs pa rnams dang zhes bya ba nas ma 'dres pa rnams kyi bar du rnam pa shes te /mngon par zhen pa bkag pa'i phyir chos thams cad kyi rnam pa dang / rtags dang / mtshan ma'i rnam pa nyid ni chos thams cad kyi rnam pa zhes bya'o/ /shes rab kyi pha rol tu phyin pa nyid mchog tu song bas na mchog tu phyin pa zhes bya ste/rnam pa thams cad mkhyen pa nyid kyi sgyu ma nyid du shes par bya ba'i phyir yin no/ /gzugs nas chos thams cad kyi bar du re re zhig ces bya ba dang / rtag pa dang / mi rtag ces bya ba nas/ zhi zhes bya ba dang / ma zhi zhes bya ba dang / dben zhes bya ba dang / mi dben zhes bya ba'i bar du chos yongs su brtags pa nyid kyis rnam pa thams cad du bsdus par shes par bya ba'i phyir chos thams cad stong pa nyid ni ma skyes pa nyid nas rnam pa thams cad mkhyen pa nyid kyi bar de'i ngo bo nyid yod pa bkag pa'i phyir ro//de ltar 'grib pa gang yin pa dang / gnyis su byar med pa'i chos de dag thams cad kyang ldan pa yang ma yin/mi ldan pa yang ma yin/ gzugs med pa / bltar med pa/ thogs pa med pa ste/ 'di ltar mtshan nyid med par mtshan nyid gcig pa'o zhes bya ba'i mngon par rtogs pas chos skye ba med pa dang / chos rnams ni gcig la gcig tha mi dad pa'i rnam grangs su byas pas chos thams cad nas sangs rgyas kyi bar du rnam par dag pa'i slad du ma skyes pa mthong ba ni shes rab kyi pha rol tu phyin pa la nye bar btags pa yin no//de ltar na byang chub sems dpa' dang / 'gro ba lnga rnams kyang tha mi dad par 'gyur la/ rgyun du zhugs pa la sogs pa dang /byang chub thob pa'i lam de bsgom pa med pas dka' ba spyod pa yang mi 'thad la/ de bzhin gshegs pa'i bla na med pa yang dag par rdzogs pa'i byang chub tu mngon par rdzogs par sangs rgyas nas chos kyi 'khor lo bskor ba yang med par 'gyur ro/ /rab 'byor gyis smras pa/ tshe dang ldan pa shA ri'i bu bdag ni chos ma skyes pa la thob pa yod pa dang / khong du chud pa yod par mi 'dod do/ /ma skyes pa la rgyun du zhugs pa yod par mi 'dod do/ /rgyun du zhugs pa'i 'bras bu yod par mi 'dod do zhes bya ba nas brtsams te/ chos thams cad khas len pa mi 'thad par bstan pa dang /ma skyes pa dang / skyes pa'i chos de dag la skyes pa dang / ma skyes pa thob pa'am/ thob par bya ba med par dris pas de gnyi ga yang dngos por mi 'dod par ston pa'i phyir ma skyes pa dang / skyes pa'i chos dag thob pa'i dri bas de gnyi ga dngos por 'dod pa bkag pa yin no/ /thob par bya ba dang /mngon par rtogs pa med par dris pas na de gnyi ga yang bden pa gnyis su gsungs pas mngon par rtogs par brjod pa bzhin du de gnyi ga yang 'jig rten gyi tha snyad du yod par gsungs pa yin no/ /de nyid kyis na ma skyes pa'i skye ba bkag pa'i phyir/ ma skyes pa rnams kyi skye ba yang bdag gis brjod par spobs pa med do//de ci'i phyir zhe na/ skye ba med pa dang / spobs pa dang / brjod pa gang yin pa ni mtshan nyid med pa'i phyir skye ba'i mngon par rtogs pa dang ldan pa ma yin no/ /de ci'i phyir zhe na/ chos thams cad skye ba med pa nyid yin pa'i phyir ro/ /de la spobs pa brjod pa'i tshig go//brjod pa ni brjod par bya ba yin pas na brjod pa ste/ don no/ /thob pa dang mngon par rtogs pa 'jig rten gyi tha snyad du yod pa de bzhin du 'gro ba lnga'i dbye ba yang de dang 'dra'o/ /de ci'i phyir zhe na/ don dam par ni las dang / rnam par smin pa dang / skye ba dang / 'gag pa dang / kun nas nyon mongs pa dang /rnam par byang ba'i mtshan nyid dang bral ba nyid yin pa'i phyir ro/ /ma skyes pa'i chos skye bar 'gyur ram/ 'on te skyes pa'i chos skye bar 'gyur zhes dris pas ni/ de gnyi ga skye bar 'dod pa bkag pa yin te/ yod pa zhes bya ba de zhes bya bar dgongs so/ /ma skyes pa'i chos skye bar mi 'dod pa gang yin zhes dris pa ni gzugs nas brtsams te/chos thams cad kyi bar du ma skyes pa yang mi skye ba dang / ma skyes pa'i chos zhes brjod pas dris pa thams cad kyi lan la thogs pa med pas gnas brtan rab 'byor ni chos ston pa'i nang na mchog tu bya bar 'os pa yin te/ chos thams cad la mi gnas pas mchog tu gyur pa'i phyir shes rab kyi pha rol tu phyin pa ston pa'i 'os yin pas dbang bar shes par bya ba'i phyir ro//gzugs la sogs pa'i phung po rnams nas chos thams cad kyi bar du rang bzhin stong pa nyid nye bar bzung nas nang la sogs pa la mi gnas pa'i phyir mi dmigs pa ston pa la gnas par dbang bar shes par bya'o//'di'i mdo ni tshe dang ldan pa shA ri'i bu gzugs ni gzugs kyi rang bzhin gyis stong na de nyid kyi phyir nang na yang mi gnas/ phyi rol na yang mi gnas zhes bya ba la sogs pa gsungs pa yin no/ /lam gyi nges par 'byung ba'i dbang du mdzad nas tshe dang ldan pa shA ri'i bu sbyin pa'i pha rol tu phyin pa 'jig rten pa yang yod do //'jig rten las 'das pa yang yod ces bya ba la/ rnam pa thams cad mkhyen pa nyid thob par byed pa'i lam ston pa na sbyin par bya ba dang / sbyin pa po dang / len pa po dmigs pas 'jig rten las mi g.yo/ /mi 'phags / mi 'da' bas na de'i phyir 'jig rten pa'i sbyin pa'i pha rol tu phyin pa zhes bya'o//'khor gsum yongs su dag pa'i sbyin pa yang dag par rdzogs pa'i byang chub tu bsngos pa des ni 'di ltar 'jig rten las g.yo zhing 'phags la 'da' bas de'i phyir 'jig rten las 'das pa'i sbyin pa'i pha rol tu phyin pa zhes bya'o/ /de bzhin du shes rab kyi pha rol tu phyin pa la yang brjod par bya'o//de la 'jig rten las 'das pa'i lam gyi nges pa brnyes pas na 'jig rten las g.yo ba'o/ /de'i thabs nye bar mtshon pas na 'phags pa'o/ /de'i bar chad kyi chos yongs su spangs pa na 'da' ba'o/ /yang na g.yo ba ni sems bskyed pa'i dus su'o/ /'phags pa ni nges par 'byed pa'i cha'i dus su'o//'da' ba ni sdug bsngal la chos shes pa'i dus su'o zhes bya ba ni rnam grangs gzhan no/ /'di la go bzlog pa mi g.yo/ /mi 'phags / mi 'da' ba yin par shes par bya'o/ /gang gis 'jig rten mngon par grub pa'am/ gang zhig 'jig rten dang mnyam pa'am/ 'jig rten gyi phyir gang zhig sbyin par byed pa'am/ gang gis 'jig rten mi 'byung ba'am/ gang zhig 'jig rten la srid pa'am/ 'jig rten du skye bar byed pas de ni 'jig rten pa'i pha rol tu phyin pa nyid yin no/ /gang gis 'jig rten 'da' ba'am/ gang gis 'jig rten sgrol ba'am/ gang gis 'jig rten la brgal ba'am/ gang gis 'jig rten na mi srid pa'am/ gang gis 'jig rten las nges par 'byung ba'am/gang zhig 'jig rten pa rnams 'don pa'i phyir yin pa'am/ gang 'jig rten gyis bla mar gyur pa de 'jig rten las 'das pa'i pha rol tu phyin pa zhes bya'o/ /byang chub kyi phyogs kyi chos sum cu rtsa bdun ni byang chub kyi lam nyid yin pa'i phyir dang / 'das pa la sogs pa'i 'phags pa'i gang zag thams cad rtogs pa'i rgyu nyid yin pa'i phyir dang /shes rab kyi pha rol tu phyin pa ni skyed pa nyid yin pa'i phyir dang / 'phags pa rnams kyi 'jig rten las 'das pa'i lam gyi nges par 'byung ba nyid du shes par bya ba'i phyir dang / sems zhum pa nyid kyis mi skrag pa la sogs pa dang ma bral ba'i yid la byed pa nyid kyi phyir te/de ltar na shin tu spros nas bkod pa'i yang dag pa'i tshig de rnams kyis brjod pa nyid yin pa'i phyir ro/ /de ci'i phyir zhe na/ sems can med pa nyid dang / rang bzhin med pa nyid dang / stong pa nyid dang / dben pa dang / mngon par rdzogs par 'tshang mi rgya ba nyid kyi phyir yid la byed pa mngon par rdzogs par 'tshang mi rgya ba nyid du rig par bya'o//de bzhin du gzugs la sogs pa'i chos thams cad nas rnam pa thams cad mkhyen pa nyid kyi bar du de bzhin du byang chub sems dpa'i yid la byed pa dang ma bral ba nyid du brjod par bya'o/ /de ltar nges par 'byung ba brgyad po 'di dag nges par 'byung ba'i bsgrub pa yin par shes par bya'o//go cha'i bsgrub pa la sogs pa 'di dag kyang rigs pa'i tshul nyid yin te/ go cha bgos nas 'jug pa yin la zhugs pa ni dpung gi tshogs sogs pa yin no/ /dpung gi tshogs bsags pa ni pham pa med par rgyal ba thob pa ni nges par 'byung ba yin pa'i phyir ro/ /de lta bas na/ sems bskyed pa dang gdams ngag dang //nges 'byed yan lag rnam bzhi dang / /bsgrub pa yi ni rten gyur pa/ /chos kyi dbyings kyi rang bzhin dang / /dmigs pa dag dang ched dang ni/ /go cha'i 'jug pa'i bya ba dang / /tshogs ni nges par 'byung bcas rnams/ /thub pa'i rnam kun mkhyen pa nyid/ /ces bstan pa yin no/ /de ni rim gyis 'byung ba'i go rims kyis 'brel pa yin par blta bar bya'o//'dis ni sems bskyed pa la sogs pa'i tshig gi don gyi go rims kyang rigs pa'i tshul yin te/ byang chub tu sems bskyed pas ni gdams ngag tshol ba don du gnyer ba yin no/ /gdams ngag phyin ci ma log pa la gnas pa la ni nges par 'byed pa'i cha skye'o//de nas ni bsgrub pa'i rten te/ rten gyi chos gang dang gang la dmigs pa dang / gang gi ched du bya ba dang / sgrub pa rnam pa bzhi gang yin pa'o/ /mngon par rtogs pa'i rgyan shes rab kyi pha rol tu phyin pa'i man ngag gi bstan bcos las rnam pa thams cad mkhyen pa'i mngon par rtogs pa'i rnam par 'grel pa'o// // rnam pa thams cad mkhyen pa nyid bstan nas lam shes pa nyid brjod par bya'o/ /de la re zhig /lha rnams rung bar bya ba'i phyir/ /'od kyis mog mog por mdzad dang / /yul nges pa dang khyab pa dang / /rang bzhin dang ni de yi las / / zhes brjod par bya'o zhes bya ba'i tshig gi lhag ma'o/ /de la 'od kyis mog mog por byas pa ni gang lha'i tshogs thams cad kyi 'od de bzhin gshegs pa'i rang bzhin gyi 'od kyis mog mog por mdzad nas 'jig rten skyong ba la sogs pa rnams kyi bsam gtan la sogs pa mngon pa'i nga rgyal bsal bar bya ba'i don du'o zhes bya ba bstan pa yin no//bsal ba ni de rnams snod du rung bar bya ba'i mdzad pa ste/ de rnams nyid la byang chub sems dpa' chen pos shes rab kyi pha rol tu phyin pa la ji ltar gnas par bya zhes gang gsungs pa yin te/de la lam shes pa nyid kyi dbang du mdzad nas shes rab kyi pha rol tu phyin pa la gang gnas par bya zhes gnas brtan rab 'byor gyis bstan pa nyan par 'dod pa'i don gyi phyir ro/ /de la rang bzhin gyi 'od ni rnam par smin pa las byung ba'i 'od do/ /yul so sor nges pa ni gang byang chub tu sems ma bskyed pa dag ni shes rab kyi pha rol tu phyin pa la gnas pa de bstan pa'i skal ba med pa nyid kyis na byang chub sems dpa'i lam shes pa nyid ni nyan thos la sogs pa dang thun mong ma yin no zhes bstan te yul so sor nges pa'i don gyi phyir ro//de'i mdo ni 'di yin te/kau shi ka lha'i bu gang bla na med pa yang dag par rdzogs pa'i byang chub tu sems ma bskyed pa de dag gis kyang bskyed par bya'o/ /gang yang nges par zhugs pa 'khor ba'i rgyun gyi mtshams bcad pa de dag skal ba med mod kyi zhes gsungs pa yin no/ / khyab pa ni gang sems bskyed pa nas brtsams te/ lam shes pa nyid kyi dbang du mdzad nas shes rab kyi pha rol tu phyin pa ni phyogs gcig pa ma yin no zhes khyab pa'i don dang / gang zag mthar gyis pa'i khyad par gyi don gyis te/ /de ltar byas nas 'dod chags dang bral ba sngon du 'gro ba'i dbang du mdzad na 'di 'thad par gyur pa yin te/'on kyang gal te de dag bla na med pa yang dag par rdzogs pa'i byang chub tu sems bskyed na de dag la yang rjes su yi rang ngo / /khyad par du 'phags pa ni chos las ches khyad par du 'phags pa'i chos la dmigs par byed pas de dag gi dge ba'i phyogs gang la yang kho bo bar chad mi byed do//des ni theg pa gsum du rnam par gzhag pa ni dgongs pa can yin gyi mtshan nyid pa ni ma yin no zhes bstan pa yin no/ /rang bzhin ni gang ji ltar nyan thos la sogs pa'i lam so sor nges pa'i lam yin zhing rtogs pas ni 'bras bu'i lam yin pa de ltar ni lam shes pa'i byang chub sems dpa' rnams kyi ni ma yin te/nyon mongs pa rnam pa thams cad du spong ba ma yin pas rang gi ngo bo khyad par du 'phags pa'i don gyis ji skad du bstan pa yin no/ /byed pa ni gang ji ltar nyan thos la sogs pa'i lam yang dag pa'i mtha' mngon sum du bya ba'i phyir spong ba sgom par byed pa yin la/byang chub sems dpa'i rtogs pa ni de lta ma yin te/ gzhan du na 'di'i lam shes pa nyid ni sems can yongs su smin pa la sogs pa'i byed pa sgom pa yin te/ de'i byed pa'i 'bras bu nyid khyad par du 'phags pa'i don gyis so zhes bstan pa yin no//lam shes pa nyid kyi rung bar byed pa'i yul so sor nges pa dang / khyab pa dang / rang gi ngo bo dang byed pa rnams bstan nas/ da ni nyan thos kyi lam brjod par bya ba yin pas de'i phyir/ lam shes nyid kyi tshul la ni//'phags pa'i bden pa bzhi dag gi /rnam pa mi dmigs sgo nas ni/ /nyan thos lam 'di shes par bya/ /zhes bstan pa yin no/ /ji ltar zhe na/ gzugs la sogs pa'i phung po rnams kyis sa la sogs pa'i khams drug /bu ga nam mkha'i khams zhes bshad pa'i phyir ro//rten cing 'brel par 'byung ba'i yan lag rnams rnam pa thams cad mkhyen pa nyid dang ldan pa'i yid la byed pas nyan thos la sogs pa'i theg pa 'dod pa dang / ma 'dres pa'i don gyi phyir ro/ /mi rtag pa dang / sdug bsngal ba dang / bdag med pa dang /zhi ba dang / nad dang / shu ba dang / zug rngu dang / sdig pa dang / pha rol nyid dang / 'jig pa'i chos can dang / g.yo ba dang / rab tu 'jig pa dang / 'jigs pa dang / 'go ba'i nad dang / 'tshe ba rnams ni nyan thos kyi lam rnam pa rnams yid la byed pa mi dmigs pa'i phyir sbyor bas so zhes bstan pa yin no//de la mi rtag pa zhes bya ba nas zhi ba zhes bya ba'i bar du ni sdug bsngal gyi bden pa'i rnam pa yin no/ /nad ces bya ba nas sdig pa zhes bya ba'i bar du ni kun 'byung gi bden pa'i rnam pa'o/ /pha rol dang /'jig pa'i chos can zhes bya ba ni de dag re re la yid 'byung ba'i rnam pa'o/ /g.yo ba dang / rab tu 'jig pa zhes bya ba ni de dag re re nyid la 'dod chags dang bral ba'i rnam pa'o/ /'jigs pa dang / 'go ba'i nad dang / 'tshe ba zhes bya ba ni de dag re re la 'gog pa'i rnam pa'o//de ltar byas na 'phags pa nyan thos rnams yid 'byung ba dang / 'dod chags dang bral bar bya ba'i phyir dang / 'gog pa'i snyoms par 'jug par 'gyur ro zhes bya ba'i lung yin no/ /de la mi rtag pa zhes bya ba ni skye ba dang / 'jig pa'i chos can nyid yin pa'i phyir ro//sdug bsngal zhes bya ba ni zag pa dang bcas pa'i dngos po rnams te/ rjes su mthun pa nyid yin pa'i phyir ro/ /de ltar byas na mi rtag pa yang 'phags pa'i lam yin te/ zag pa med pa nyid kyi phyir 'phags pa rnams dang mi mthun pa ma yin pas 'di sdug bsngal ba nyid du thal bar mi 'gyur ro//bdag med pa zhes bya ba ni gzhan gyis btags pa'i bdag gis stong pa nyid yin pa'i phyir ro/ /zhi ba zhes bya ba ni rang nyid bdag med pa nyid yin pa'i phyir ro/ /nad ces bya ba ni 'bras bu'i sa bon dang 'dra bar rgyu'i rtsa bar gyur pa nyid yin pa'i phyir ro//shu ba zhes bya ba ni sdug bsngal kun 'byung ba nyid yin pa'i phyir ro/ /zug rngu zhes bya ba ni sdug bsngal gyi rkyen nyid yin pa'i phyir ro/ /sdig pa zhes bya ba ni sdug bsngal gcig nas gcig tu brgyud de/ rab tu 'byung ba nyid kyis shin tu 'joms pa nyid yin pa'i phyir ro//pha rol zhes bya ba ni phyir rgol bar gyur pa nyid yin pa'i phyir ro/ /'jig pa'i chos can zhes bya ba ni phyir rgol ba'i dngos pos 'jig pa'i chos can nyid yin pa'i phyir te/ yid 'byung ba'i dmigs par yang 'gyur ro zhes bya ba'i don to/ /g.yo ba zhes bya ba ni rang gi ngo bor gnas pa med pa nyid kyi phyir ro//rab tu 'jig pa zhes bya ba ni rgyu nyid la ltos pa med par rang bzhin gyis 'jig pa nyid yin pa'i phyir te/ 'dod chags dang bral ba'i dmigs par yang 'gyur ro/ /'jigs pa zhes bya ba ni 'di dang gzhan gyi gnod pa'i gnas su gyur pa nyid yin pa'i phyir ro//'go ba'i nad ces bya ba ni srin po la sogs pa rtsol ba las byung ba nyid yin pa'i phyir ro/ /'tshe ba zhes bya ba ni 'byung ba chen po 'khrugs pa dang / thog 'bab pa la sogs pa 'byung ba'i gnas su gyur pa nyid yin pa'i phyir te/ 'gog pa'i dmigs par 'gyur ro zhes 'thad pa yin no//yid la byed pa de nyid kyis ma rig pa 'gog pa ni bdag med pa dang / zhi ba dang / dben pa zhes bya ba gsum ni 'gog pa'i bden pa'i rnam pa'o/ /nges par 'byung ba rnam pa bzhi ni gang stong pa nyid dang / mtshan ma med pa nyid dang / smon pa med pa nyid dang / mngon par 'du byed pa med pa nyid kyi yid la byed pa mi dmigs pa'i tshul gyis shes par bstan pa yin te/ rnam par thar pa'i sgo gsum la sogs pas ji ltar nges par 'byung ba dang / gang nges par 'byung ba dang / mngon par 'du byed pa med pa'o/ / byang chub kyi phyogs rnams kyi ngo bo mi dmigs pa'i rnal 'byor ni lam gyi rnam pa ste/ de rnams kyis mya ngan las 'das pa'i grong khyer thob par byed pa'i don gyis na lam gyi rnam pa'o/ /de nyid kyis sbyin pa la sogs pa'i pha rol tu phyin pa'i spyod pa mi dmigs pa'i sbyor ba zhes bya bas ni rtogs pa ma lus pa'i rigs pa yin pa'i phyir rigs pa'i rnam pa'o//yang shes rab kyi pha rol tu phyin pa la spyod na bdag dang / bdag gi dang 'brel ba'i chos la so sor rtogs pas na bdag med pa'o/ /de ci'i phyir zhe na/ dge ba'i rtsa ba'i sems dang /byang chub kyi sems 'grogs pa ma yin pa nyid kyis na yongs su bsngo ba'i sems kyang byang chub kyi sems dang / dge ba'i rtsa ba gnyis ni 'grogs pa ma yin pas byang chub kyi sems dang / yongs su bsngo ba'i sems 'grogs pa ma yin pa nyid yin pa'i phyir ro//de ci'i phyir zhe na/ byang chub kyi sems dang yongs su bsngo ba'i sems gnyis ni gcig la gcig yod pa ma yin zhing mi dmigs pa'i phyir ro zhes bya ba ni bsgrub pa'i rnam pa ste/ rtogs pa'i phyir bsgrub pa yin pas na bsgrub pa'o/ / de ci'i phyir zhe na/ byang chub kyi sems dang / yongs su bsngo ba'i sems dag ni sems ma yin pa nyid kyis na sems ma yin pas sems ma yin pa yongs su bsngo ba ni mi 'thad pa yin pa'i phyir sems ma yin pa gang yin pa de ni bsam gyis mi khyab pa'o/ /bsam gyis mi khyab pa gang yin pa de ni sems ma yin pa ste/de ltar chos so sor brtags pa la mngon par zhen pa ni shes rab kyi pha rol tu phyin pa nyid yin pas nges par 'byung ba'i rnam pa ste/ mngon par zhen pa med par 'gro ba ni nges par 'byung ba yin pa'i phyir ro/ /nyan thos kyi lam la 'phags pa'i bden pa bzhi la dmigs pa rnam pa bcu drug tu bzhag pa bshad zin nas/nges par 'byed pa'i cha dang mthun pa brjod par bya ste/ 'phags pa nyan thos lam la ni/ /gzugs la sogs pa stong pa'i phyir/ /stong pa nyid rnams dbyer med pas/ /dro ba zhes bstan pa yin no//ji skad du mdo las/ kau shi ka gzugs ni gzugs kyis stong ngo / /de bzhin du tshor ba la sogs pa dang / gzugs kyi stong pa nyid gang yin pa dang tshor ba la sogs pa gnyis su med cing gnyis su byar med do zhes bya ba la sogs pa gsungs pa yin no//de dag mi dmigs pas/ rtse mor gyur pa dag tu 'dod/ /ces bstan pa'i mdo ni ji skad du/ kau shi ka 'di la byang chub sems dpa' sems dpa' chen pos mi dmigs pa'i tshul gyis gzugs la gnas par mi bya'o/ /de bzhin du tshor ba la sogs pa la gnas par mi bya'o zhes gsungs pa yin no//de la rtag la sogs tshul gyis/ /gnas pa bkag pas bzod pa rnams/ /zhes bstan te/ ji skad du mdo las/ gzugs rtag ces bya ba'am/ mi rtag ces bya bar gnas par mi bya'o/ /bde zhes bya ba dang / sdug bsngal zhes bya ba dang / bdag yod ces bya ba dang / bdag med ces bya ba dang / zhi zhes bya ba dang / ma zhi zhes bya ba dang / stong zhes bya ba dang / mi stong zhes bya ba dang / mtshan ma yod ces bya ba dang / mtshan ma med ces bya ba dang / smon pa yod ces bya ba dang /smon pa med ces bya bar mi dmigs pa'i tshul gyis gnas par mi bya'o zhes bya ba la sogs pa gsungs pa yin no/ /sa bcu dag las brtsams nas ni/ /mi gnas rgyas par bstan pa yis/ /chos kyi mchog tu 'gyur bshad de/ /zhes bstan pa ni 'phags pa nyan thos kyi lam yin te/ji skad du mdo las/ byang chub sems dpa' chen pos sa dang po la dmigs pa'i tshul gyis gnas par mi bya'o zhes bya ba nas bdag gi sangs rgyas kyi zhing der sangs rgyas kyi sgra yang yod par ma gyur cig ces bya ba'i bar du dmigs pa'i tshul gyis gnas par mi bya'o zhes rgya cher gsungs pa yin no// ci'i phyir zhe na sangs rgyas kyis/ /mkhyen nas chos rnams ma gzigs phyir/ /zhes bstan pa'i mdo ni ji skad du/ 'di ltar de bzhin gshegs pa dgra bcom pa yang dag par rdzogs pa'i sangs rgyas kyis bla na med pa yang dag par rdzogs pa'i byang chub tu mngon par rdzogs par sangs rgyas kyang chos thams cad mi dmigs pa'i phyir zhes bya ba la sogs pa de dag nas brtsams te/'di zhes bya ba rab tu byed pa dang 'brel par byas pas nyan thos kyi lam yin no/ /byang chub sems dpa' ni thams cad du mi dmigs pa'i tshul yin no//lam shes pa'i dbang du mdzad nas/ shes bya nyan thos kyi lam gyi rnam par 'grel pa'o/ /nyan thos kyi lam bshad nas/ rang sangs rgyas kyi lam brjod par bya'o/ /de la re zhig /rang 'byung bdag nyid rtogs pa'i phyir/ /gzhan gyis bstan kyang mi dgos la//bse ru lta bu'i ye shes ni/ /zab pa nyid du mngon par brjod/ /ces bya ba ni rang sangs rgyas kyi yin no zhes bya ba'i don to/ /gzhan gyis bstan kyang mi dgos pa'i don ni gang rang sangs rgyas kyi lam gyi dbang du mdzad nas gang gnod sbyin gyi skad la sogs pa ni shes par rung gi /gnas brtan rab 'byor gyis bshad pa ni don shes par mi rung zhes bstan te/ de la gnod sbyin rnams rang gi brda go bar byed de/ gnod sbyin gyi sgra'o/ /spyi ni tshig ste ji snyed kyis brjod par 'dod pa'i don rdzogs pa ni skad de/ngag ces bya ba'i don to/ /gang dang gang gi gtam gyi sgo gzhan gyis dris pa de dang de'i lan smra ba ni brjod pa'o/ /de lta bu ni shes par rung gi 'phags pa gnas brtan rab 'byor shes rab kyi pha rol tu phyin pa 'chad pa dang / brjod pa dang / ston pa dang / rnam par 'byed pa dang / gsal bar byed pa dang / gtan la phab par ston pa de ni shes par mi rung ngo / /de la gsol ba btab nas ston pa de ni 'chad pa'o/ /dris na lan smra ba ni brjod pa'o/ /de gnyis gdul bya rmongs pa'i dbang du mdzad nas 'chad pa ni ston pa'o/ /bag med pa rnams kyi dbang du mdzad nas ched du ston pa mdzad pa ni rnam par 'byed pa zhes bya ste/de yang lha'i bu dag yi ge gcig kyang brjod pa med do zhes bya ba nas brtsams te/ ston pa dang / nyan pa bkag pas shes rab kyi pha rol tu phyin pa dang / yang dag par rdzogs pa'i byang chub ni yi ge med pa yin te/sprul pa dang / rmi lam dang / sgra brnyan dang / sgyu ma lta bu'i dpes yi ge med par ston pa dang / nyan pa dang / shes par byed pa med pa nyid yin pa'i phyir ro/ /chos ston pa dang / tshig tu brjod pa ji ltar med pa yin zhe na/ chos ston pa'i 'bras bu thob pa'i rgyu nyid yin pa'i phyir dang /chos ston pa'i tshig tu smra bas kyang rnam par g.yeng ba chen por 'gyur ba yin la/ rnam par g.yeng bas kyang rgyud shas cher 'khrugs pa skyed par byed pa yin par dgongs pas na sangs rgyas bcom ldan 'das sngon byang chub sems dpar gyur pa na 'di ltar bdag gis sangs rgyas nyid thob nas yid bzhin gyi nor bu ltar tshig tu smra ba med par yang chos ston cing sems can gyi don gyi bya ba rdzogs par byed par nus par gyur cig ces smon lam btab pa yin no//tshig tu smra ba med par yang don ston pa rung ba nyid yin no zhes bstan pa'i phyir /gang dang gang don gang gang la / /ji lta ji ltar de la nyan/ /de la sgra med kyang don te/ /de ni de lta de ltar snang / /zhes bstan pa yin no/ /de la ye shes zab mo 'di yin te/ de skad du mdo las/ kye ma gnas brtan rab 'byor 'di ni gsal bar byed pa ste/zab pa bas kyang shin tu zab pa ston pa la/ phra ba bas kyang shin tu phra bar 'jug go zhes gsungs pa yin no/ /de la gnas brtan rab 'byor gyis nye bar bstan pa'i don shes par mi nus shing zab pa yin la/ yi ge gcig tsam yang ma brjod par thob pas shin tu zab pa yin no//de nyid mdo sde gzhan dag las kyang dge ba bcu'i las kyi lam rang nyid kyis mngon par rtogs pa dang / rkyen zab mo khong du chud pas rang sangs rgyas kyi theg pa rdzogs par byed pa yin no zhes gsungs pa yin no/ /bdag nyid gcig pu'i don du dmigs nas rang nyid sangs rgyas pas na rang sangs rgyas so//nyan thos su thal bar 'gyur ba yang ma yin te/ de ni gzhan gyi lung la ltos pa ma yin pa'i phyir ro/ /yang dag par rdzogs pa'i sangs rgyas su 'gyur ro zhe na ma yin te/ de ni rnam pa thams cad mkhyen pa nyid kyis sems can gyi don mdzad pas de rnams las khyad par du 'phags pa nyid yin pa'i phyir ro//rang sangs rgyas rnams ni gang gis ji tsam zhig rtogs pa tsam de la rang nyid mngon du sangs rgyas pa yin no/ /yang de rnams kyis rtogs pa ni gang ji tsam zhig rtogs she na/gzung bar rtogs pa nyams phyir dang / /'dzin pa ma spangs phyir dang ni/ /rten gyi bse ru lta bu'i lam/ /yang dag bsdus pa shes par bya/ /zhes ston pa yin te/ gang gi phyir de rnams kyis gzung ba'i rnam par rtog pa'i dbang du mdzad nas phung po dang / khams dang / skye mched rnams zhes bya ba nas rnam pa thams cad mkhyen pa nyid kyi bar du rgya cher rang bzhin zab pa dang / phra ba bkag pa'i phyir sangs rgyas kyis shes bya'i sgrib pa'i phyogs gcig spangs pa yin par bstan pas ni de rnams nyan thos rnams las khyad par du 'phags pa shugs kyis bstan pa yin no//'di ni ngag gi chos bstan pa ma yin no zhes rang sangs rgyas kyi dbang du mdzad nas byang chub tu btags pa med do zhes bya ba'i bar du bstan pa yin te/ de rnams kyis gzung ba'i rnam par rtog pa spangs pa'i phyir ro/ /yi ger btags pa med do zhes bya ba ni de rnams kyi rang gi mngon par rtogs pa yin pa'i phyir ro//la la zhig rgyun tu zhugs pa'i 'bras bu la gnas par 'dod cing zhes bya ba nas/ la la zhig rang byang chub thob par 'dod na yang bzod pa 'di la ma brten par mi 'grub po zhes bya ba'i bar ni lam shes pa nyid la lam thams cad yul du bya dgos nas gsungs pa yin no//rang sangs rgyas kyi lam la de rnams kyis gzung ba'i rnam par rtog pa ni spangs pa yin la/ 'dzin pa'i rnam par rtog pa ma spangs pa'i dbang du mdzad nas gsungs pa ni sems can de dag ni sgyu ma lta bu ste/ chos bstan pa de dag kyang sgyu ma lta bu'o zhes bya ba yin te/rang sangs rgyas rnams ni 'dzin pa'i dngos po med par rtogs pa ma yin pa'i phyir ro/ /sngar rnam pa thams cad mkhyen pa nyid kyi dbang du mdzad nas sgyu ma'i skyes bu ltar bslab par bya'o zhes gsungs pa de dang 'di la 'gal ba yod pa ma yin par bstan pa las brtsams te/phung po la sogs pa nas mya ngan las 'das pa'i bar du yang rmi lam lta bu dang / sgyu ma lta bur bshad pa yin no/ /de ci'i phyir zhe na/ sgyu ma dang / mya ngan las 'das pa la sogs pa de las gnyis su med cing gnyis su byar med do/ / rang sangs rgyas kyi lam la 'dzin pa'i rnam pa ma spangs pa yin no / /rtogs pa'i rten rigs kyi dbang du mdzad nas gsungs pa ni phyir mi ldog pa'i byang chub sems dpa' sems dpa' chen po la sogs pa shes rab kyi pha rol tu phyin pa tshol ba bstan nas rang sangs rgyas dgag pa'i don te/de rnams nyid gzugs la sogs pa dang / de'i stong pa nyid la sogs pa gnyis phan tshun rtog pa bkag ste/ de ci'i phyir zhe na/ de ni 'di ltar 'di la chos gang yang ma brjod ma bshad de/ de bzhin du 'di la sems can gang yang yid ches par byed pa med do zhes bya ba'i bar gyis gang gsungs pas rang sangs rgyas kyi dbang du mdzad nas sems can gang yang yid ches par byed pa med do//zhes bya ba dang / rten gyi sbyor ba'i gnas su byang chub sems dpa' zhes bya ba'i tshig don med cing mi dmigs so zhes bya bas ni de gsal bar byas pa yin no//tshe dang ldan pa rab 'byor 'o na shes rab kyi pha rol tu phyin pa 'di las theg pa gsum po rgyas par bstan zhes bya ba nas brtsams te/ rnam pa mang po zhig gi mtha' rdzogs par byas nas/ tshe dang ldan pa shA ri'i bu de de bzhin no zhes bya ba nas brtsams te/ byang chub sems dpa' chen po 'jig rten thams cad las mngon par 'phags shing khyad par du zhugs pa'i spobs pa dang ldan pa'i bar du yang 'gyur zhes bya ba'o //de yang mi dmigs pa'i tshul zhes bya ba'i bar gyis mngon par 'dod pa'i don yang dag par grub pas dngos por gyur pa'i rten med par yang rtogs pa'i chos thob par bstan pa'i ched du sprul pa'i me tog gtor ba yin la/me tog de dag kyang ma skyes pa'i me tog yin pa dang 'dra bar gzugs nas brtsams te/ chos thams cad kyi bar dang / yang dag par rdzogs pa'i sangs rgyas kyi bar du ma byung ba nyid kyis de nas brtsams te/'di zhes bya ba'i bar du byed pa dang 'brel par bsgrubs pas rang sangs rgyas kyi lam rtogs pa'i rten bstan pa yin no/ /rang sangs rgyas de dag gis gzung ba'i rnam par rtog pa spangs pas rang sangs rgyas kyi rtogs pa nyan thos rnams las khyad par du 'phags pa yin la/'dzin pa'i rnam par rtog pa ma spangs pas ni rang sangs rgyas rnams las sangs rgyas kyi rtogs pa khyad par du 'phags pa yin no / /rigs kyis ni rtogs pa'i rgyu khyad zhugs par bstan pa ni rang sangs rgyas kyi lam yin no/ /de ni sangs rgyas kyi lam gyi nges par 'byed pa'i cha dang mthun pa'i dbang du mdzad nas/btags pa'i chos nyid mi 'gal bar/ /ston pa'i rnam pa dror gyur pa/ /zhes bstan pa yin no/ /ji skad du/ kye ma gnas brtan rab 'byor 'di ni de ltar btags pa dang mi 'gal la/chos nyid kyang ston pa ni shes rab zab po zhes bya ba dang / gzugs ni btags pa tsam mo/ /de yang chos nyid de/ gnas brtan rab 'byor gyis mi 'gal bar ston to zhes bya ba la sogs pa bstan pa yin no/ /rtse mor gyur pa gzugs la sogs//'grib pa med la sogs pas phye/ /zhes bstan te/ gang gzugs nas rnam pa thams cad mkhyen pa nyid kyi bar du 'phel bar bya ba dang / 'grib par bya ba'i phyir mi slob po/ /yongs su gzung bar bya ba dang / med par bya ba'i phyir mi slob po zhes bya ba la sogs pa bstan pa yin no//bzod pa ni/ nang stong nyid la sogs pa yis / /gzugs sogs mi 'dzin phyir bzod pa/ /zhes bstan pa yin te/ gang gzugs nas rnam pa thams cad mkhyen pa nyid kyi bar du nang stong pa nyid nas dngos po med pa'i ngo bo nyid stong pa nyid kyi phyir yongs su gzung ba med pa nyid do zhes bstan pa yin no//gzugs sogs skye ba med sogs kyi/ /rnam pa can ni chos kyi mchog /ces bstan pa yin no/ /ji skad du gzugs kyi skye ba mi mthong / 'gag pa dang / blang ba dang / dor ba dang / kun nas nyon mongs pa dang / rnam par byang ba dang / sogs pa dang / 'bri ba dang / 'grib pa dang / 'phel ba mi mthong ste zhes bya ba la sogs pa bstan pa yin no/ /rang sangs rgyas kyi lam bshad nas mthong ba'i lam phan yon dang bcas pa'i dbang du mdzad nas/bden dang bden la bzod pa dang / /shes pa'i skad cig rnam bzhi yis/ /lam shes nyid la mthong ba'i lam/ /phan yon bcas pa 'di bshad do/ /zhes bstan pa yin no/ /de la sdug bsngal la chos shes pa'i bzod pa ni de bzhin gshegs pa dag ni gcig las gcig gud na med par dgag pa'i rnam grangs gzhan gyis ston te/ji skad du mdo las/ kau shi ka gzugs kyi de bzhin nyid la yang de bzhin gshegs pa mi dmigs so/ /de bzhin gshegs pa las gzhan du yang de bzhin gshegs pa mi dmigs so zhes bya ba la sogs pa gsungs pa yin no//sdug bsngal la chos shes pa ni kau shi ka gzugs rgya che ba'i phyir byang chub sems dpa' rnams kyi pha rol tu phyin pa 'di rgya che ba yin te/ ci'i phyir zhe na/ kau shi ka de ni 'di ltar gzugs la sngon gyi mtha' mi dmigs/ phyi ma'i mtha' mi dmigs/ dbus mi dmigs so zhes bya ba la sogs pa gsungs pa yin no//sdug bsngal la rjes su shes pa'i bzod pa ni gang kau shi ka gzugs gzhal du med pa'i phyir/ byang chub sems dpa' rnams kyi pha rol tu phyin pa 'di gzhal du med pa yin te/ de ci'i phyir zhe na/ kau shi ka de ni 'di ltar gzugs gzhal du med pa'i phyir dmigs su med do zhes bya ba la sogs pa bshad pa yin no//gzhal du med pa zhes bya ba ni gang gi gzugs 'gyur ba'i mtshan nyid du gzhal du med pa'o/ /sdug bsngal la rjes su shes pa ni gang kau shi ka gzugs tshad med pa'i phyir pha rol tu phyin pa 'di tshad med do//kau shi ka 'di lta ste dper na/ nam mkha'i tshad ni dmigs su med do zhes bya ba la sogs pa bstan pa yin no/ /tshad ces bya ba ni dbyings rnams phra rab kyi bar du gzhig tu rung bar bshad pa yin pas tshad rnams ni gzugs can ma yin pa'i mtshan nyid do//kun 'byung la chos shes pa'i bzod pa ni gang kau shi ka gzugs mtha' yas pa'i phyir byang chub sems dpa' rnams kyi pha rol tu phyin pa 'di mtha' yas pa yin te/ de ci'i phyir zhe na/ kau shi ka de ni 'di ltar gzugs kyi mtha' dang dbus mi dmigs so zhes bya ba la sogs pa bstan pa yin no//de ni rgyu bkag pa yin no/ /rnam pa thams cad mkhyen pa nyid dmigs pa mtha' yas pa'i phyir pha rol tu phyin pa mtha' yas pa nyid kyis na kun 'byung bkag pa yin no/ /chos kyi dbyings mtha' yas pa'i phyir pha rol tu phyin pa mtha' yas pa nyid kyis ni rab tu skye ba bkag pa yin no//de bzhin nyid mtha' yas pa'i phyir pha rol tu phyin pa mtha' yas pa nyid kyis ni skye ba bkag pa yin no/ /sems can mtha' yas pa'i phyir/ pha rol tu phyin pa mtha' yas pa nyid kyis ni kun 'byung la chos shes pa'i bzod pa sems can gyi khams la dmigs par byed par bstan pa yin no//kun 'byung la chos shes pa ni gang shes rab kyi pha rol tu phyin pa yid la byed pa dang ma bral ba 'di ni de bzhin gshegs pa nyid du gzung bar bgyi'o zhes bstan pa yin no/ /de'i mdo ni lha'i bu byang chub sems dpa' gang shes rab kyi pha rol tu phyin pa'i mi dmigs pa'i rnal 'byor dang ma bral bar gyur na de bzhin gshegs pa nyid du gzung bar bya ste/de ci'i phyir zhe na/ shes rab kyi pha rol tu phyin pa 'di las theg pa gsum rgya cher bstan pa'i phyir ro zhes gsungs pa yin no//kun 'byung la rjes su shes pa'i bzod pa ni gang bcom ldan 'das byang chub sems dpa' sems dpa' chen po rnams kyi shes rab kyi pha rol tu phyin pa 'di rnam pa thams cad mkhyen pa nyid kyi bar du mi 'dor ba'i tshul gyis zhes bya ba ni rnam pa thams cad mkhyen pa nyid dang mthun pa yongs su 'dzin pa ni ngo mtshar che'o zhes bya ba'i bar du bstan pa yin no//bar chad byed pa thams cad kyis glags rnyed par mi 'gyur bar yongs su gzung ba'i don gyi shes rab kyi pha rol tu phyin pa 'di 'dzin pa dang / 'chang ba dang / klog pa dang / kun chub par byed pa dang /sgom pa dang / gzhan dag la rgya cher 'chad pa dang / tshul bzhin yid la byed pa dang / rnam pa thams cad mkhyen pa nyid kyi sems dang yang mi 'bral ba de dag ni bdud sdig can la sogs pa thams cad kyis glags rnyed par mi 'gyur ro zhes bya ba ni phan yon bstan pa yin no//de ci'i phyir zhe na/ gzugs stong pa nyid nas brtsams te/ rnam pa thams cad mkhyen pa nyid kyi bar du stong pa nyid de/ de ltar de rnams kyis shin tu byin gyis brlabs pa'i phyir ro/ /de ci'i phyir zhe na/ de ni 'di ltar stong pa nyid kyis stong pa nyid la glags mi rnyed de/mtshan ma med pa dang / smon pa med pa yang de bzhin no/ /de ci'i phyir zhe na/ de ni 'di ltar gang gis gang du glags rnyed par 'gyur ba de dag nyid med do/ /kun 'byung la rjes su shes pa'i bzod pa ni gang sems can thams cad la mi dmigs pa'i tshul gyis byams pa dang /snying rje dang / dga' ba dang / btang snyoms kyi mtshan nyid shin tu bsgom pa'i phyir de rnams la mi dang mi ma yin pa la sogs pa rnams kyis glags rnyed par mi 'gyur te / mthong ba'i lam gyi skad cig ma brgyad pa la byang chub sems dpa'i dgongs pa mtha' yas pa mdzad pa yin gyi/gzhan du na skad cig ma dgu pa la sems can gyi khams la ltos pa med par 'gog par ltung bar 'gyur ro/ /de yang sbyin pa'i pha rol tu phyin pas sems can rnams la yang dag pa'i spyod pas rim gro dang / bsnyen bkur byas pa'i phyir de rnams ya nga ba ma spangs pas 'chi ba'i dus byed par mi 'gyur ro zhes bstan pa yin no//'gog pa la chos shes pa'i bzod pa ni gang yang stong pa nyid thams cad shin tu bsgoms pa nyid yin pa'i phyir 'jigs pa 'am/ dngangs par mi 'gyur ro zhes bya ba la sogs pa bstan pa yin no/ /'gog pa la chos shes pa ni gang bcom ldan 'das de ltar byang chub sems dpa' chen po shes rab kyi pha rol tu phyin pa 'di 'dzin pa dang zhes bya ba nas brtsams te/theg pa gsum la 'dul ba ni ngo mtshar che'o zhes bstan pa yin no/ /shes rab kyi pha rol tu phyin pa 'dzin pa la sogs pas ni 'tshang rgya ba nyid kyi 'bras bu nyid yin pa'i phyir ro//'gog pa la rjes su shes pa'i bzod pa ni gang bcom ldan 'das de ltar shes rab kyi pha rol tu phyin pa 'di yongs su bzung ba ni ngo mtshar che'o zhes bya ba nas brtsams te/ rnam pa thams cad mkhyen pa nyid kyi bar du yongs su bzung bar gyur pa yin te/shes rab kyi pha rol tu phyin pas rnam par byang ba'i phyogs thams cad bsdus pa yin te zhes bya ba la sogs pa bstan pa yin no/ /'gog pa la rjes su shes pa ni gang yang rtsi ma gi'i dpes bstan pas shes rab kyi pha rol tu phyin pa ni nye bar 'tshe ba thams cad zhi ba'i mdangs dang stobs yod pa nyid du bstan pa yin no//lam la chos shes pa'i bzod pa ni gang / de ci'i phyir zhe na/ shes rab kyi pha rol tu phyin pa ni gang 'di lta ste/ 'dod chags dang / zhe sdang dang / gti mug la sogs pa'i nges pa nas/mya ngan las 'das par 'dzin pa'i bar du nye bar byed de/ rnam par 'phel bar byed pa ma yin no zhes bstan pa yin no/ /lam la chos shes pa ni gang phyogs bcu'i 'jig rten gyi khams kyi sangs rgyas de dag gis lha rnams kyis byas pa dang / 'byung ba las gyur pa dang /nang gi bar chad kyi dbang du mdzad nas go rims bzhin du bsrung ba dang / bskyab pa dang / bskyang bar mdzad pa dang / 'di ltar mi dmigs pa'i tshul gyis sbyin pa'i pha rol tu phyin pa la sogs pa nas rnam pa thams cad mkhyen pa nyid kyi bar gyi dge ba'i chos rnams rnam par 'phel bar 'gyur ro zhes bya ba la sogs pa bstan pa yin no//lam la rjes su shes pa'i bzod pa ni gang srog gcod pa yod par 'gyur te zhes bya ba nas brtsams te/ bdag kyang rnam pa thams cad mkhyen pa nyid thob par 'gyur/ gzhan yang de la 'jog pa dang /de nyid kyi legs pa brjod par 'gyur ba la sogs pa rjes su gnang ba nyid du bstan pa yin no/ /lam la rjes su shes pa ni gang de pha rol tu phyin pa drug la spyod pa'i tshe/ sbyin pa'i pha rol tu phyin pa sems can thams cad dang thun mong du byas shing mi dmigs pa'i tshul gyis bla na med pa yang dag par rdzogs pa'i byang chub tu yongs su bsngo bar 'gyur ro zhes bya ba la sogs pa bstan pa yin no//de'i mdor gtogs par gyur pa'i tshigs su bcad pa ni 'di yin te/ de bzhin nyid dang sangs rgyas dag /phan tshun rten pa med pa'i phyir/ /rnam grangs khas mi len pa dang //chen po tshad med nyid bcas dang / /dpag med mtha' nyid med pa dang / /der gnas gzugs la sogs pa la/ /sangs rgyas nyid du nges 'dzin dang / /blang med dor ba med sogs dang / /byams la sogs pa stong nyid dang / /sangs rgyas nyid ni thob pa dang //rnam par byang kun yongs bsdus dang / /nyam nga ba dang nad kun sel/ /mya ngan 'das 'dzin zhi nyid dang / /sangs rgyas rnams kyis gsungs la sogs/ / rnam kun mkhyen pa'i tshul la ni/ /bdag nyid gnas te sems can dag /'god dang sbyin pa la sogs pa//rdzogs pa'i byang chub la bsngo ba/ /lam shes nyid kyi skad cig ma/ /zhes bstan pa yin te/ lam shes pa nyid la mthong ba'i lam gyi rnam par 'grel pa'o// //mthong ba'i lam bshad nas/ da ni bsgom pa'i lam brjod par bya ste/ de la re zhig 'di'i byed pa brjod par bya ba yin la phyis ni de ston par 'gyur ro//'di'i byed pa de yang rnam pa drug tu shes par bya ste/ gang zhe na/ kun nas dul dang thams cad nas/ /bdud dang nyon mongs las rgyal dang / /gnod pas brdzi ba med nyid dang / /byang chub dang ni rten mchod nyid//ces bya ba bstan te/ rnam pa thams cad du dul ba'i dbang du mdzad nas bcom ldan 'das shes rab kyi pha rol tu phyin pa 'di ni de ltar byang chub sems dpa' chen po rnams nyon mongs pa thams cad spong ba dang / rnam pa thams cad du dul ba don du gnyer ba dang / yongs su dul bar bgyid pa nye bar gnas pa ni ngo mtshar che'o zhes bstan pa yin no//rnam pa thams cad du 'dud pa'i byed pa ni gang rnam pa thams cad kyang rtogs pas ngar 'dzin pa med par thams cad la 'dud pa'i don gyis na yongs su 'dud pa'i slad du nye bar gnas so zhes bya ba la sogs pa bstan pa yin no//nyon mongs pa las nges par rgyal ba'i byed pa ni gang g.yul gyi nang du zhugs pa'i skyes bu'i dpes 'dod chags la sogs pa'i tshogs ma lus pa las rgyal zhing brdzi ba med pa nyid kyis nyon mongs pa thams cad kyi bar las nges par rgyal ba'i bsgom pa'i lam yang nas yang du bya ba nyid du shes par byed pa yin no zhes bstan to//yul gyi gnod pas zil gyis mi non pa'i byed pa ni gang de la la zhig gis me mdag gis gtor tam / byad byas sam/ mtshon dang / chu dang / dug la sogs pa'i gnod pas de la gnod par mi 'gyur ro zhes bya ba la sogs pa bstan pa yin no//byang ni byang phyogs kyi mi ma yin pa'i rigs so/ /yang dag par rdzogs pa'i byang chub kyi byed pa ni gang chos thams cad mi dmigs pas bla na med pa yang dag par rdzogs pa'i byang chub thob cing sems can thams cad kyi sems la rnam par blta bar 'gyur ro zhes bya ba la sogs pa bstan pa yin no//shes rab kyi pha rol tu phyin pa'i rten gyi yul mchod pa nyid kyi byed pa ni gang yang snying po byang chub kyi dpes shes rab kyi pha rol tu phyin pa'i rnal 'byor gyi rten gyi yul bar chad med pa nyid yin no//de ci'i phyir zhe na/ lha'i rigs thams cad kyis srung ba dang / skyob pa la sogs pa yin par bstan pa yin no/ /byed pa bshad nas yang bsgom pa'i lam ni rnam pa gnyis te/ zag pa dang bcas pa dang / zag pa med pa'o/ /de la zag pa dang bcas pa ni mos pa dang /bsngo ba dang / rjes su yi rang ba'i byed pa zhes bya'o/ /zag pa med pa yang mngon par bsgrub pa'i mtshan nyid dang / shin tu rnam par dag pa'i mtshan nyid do/ /gang gi phyir mos pa yid la byed pa'i dbang du mdzad nas/ mos pa rang gi don dang ni//rang gzhan don dang gzhan don dang / /rnam pa gsum du shes par bya/ /zhes bstan pa yin te/ gang zhig gis rang gi don du mos pa'i rang gi don nyid rdzogs par 'gyur la/ bsngo ba'i tshul gyis ni gzhan gyi don du yang 'gyur ro/ /rang dang gzhan gyi don du bya ba gang yin pas ni gnyi ga'i don rdzogs par byed do//gang zhig gang gis gzhan gyi don du bya ba ni gzhan gyi don du 'gyur mod kyi rang gi don yang dag par rdzogs par byed de/ 'di la rang gi don dgag pa med pa'i phyir te/ gzhan gyi don dang mi 'gal ba nyid kyis de rdzogs pa yin no//de dag re re yang / chung dang 'bring dang chen po ste/ /so sor rnam pa gsum du 'dod/ /ces bstan te/ rang gi don gyi mos pa ni chung ngu dang / 'bring dang / chen po ste/ rnam pa gsum ste/ de bzhin du gzhan la yang brjod par bya'o/ /de la rang gi don la mos pa chung ngu dang /'bring po dang / chen po ni gang yin pa de bzhin du gzhan gyi don la mos pa'i bar gang yang gang zhig yin zhe na/ chung ngu'i chung sogs dbye ba yis/ /de yang rnam gsum de ltar na/ /rnam pa nyi shu bdun du 'dod/ /ces bstan te/ so sor zhes bya ba ni rang bzhin yin par sbyor ba'o/ /rang gi don la sogs pa la mos pa chung ngu la sogs pa rnam pa gsum du shes par bya'o zhes bya ba'i don to/ /de ltar rang gi don la mos pa 'di ni rnam pa dgur 'gyur te/ 'di ltar chung ngu'i chung ngu dang / chung ngu'i 'bring dang /chung ngu'i chen po dang / 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring dang / chen po'i chen po'o/ /de bzhin du rang dang gzhan gyi don la mos pa dang / gzhan gyi don la mos pa'i rnam pa'i dbye ba la yang brjod par bya'o//de bas na/ de ltar na/ rnam pa nyi shu bdun du 'dod do zhes bstan te/ mos pa zhes bya ba ni dkyus ma nyid yin no/ /de la rang gi don la mos pa chung ngu'i chung ngu'i rnam pa ni shes rab kyi pha rol tu phyin pa 'di bris shing glegs bam du bgyis pa bcangs la mchod pa bgyis pa dang /sangs rgyas yongs su mya ngan las 'das pa'i de bzhin gshegs pa'i sku gdung rnams rin po che sna bdun gyi mchod rten du bcug ste mchod par byas pa bas shes rab kyi pha rol tu phyin pa ni rnam pa thams cad mkhyen pa nyid kyi rgyur gyur pa yin pa'i phyir dang /de la brten par gyur pas sangs rgyas kyi skur gyur pa'i phyir/ mchod pa brnyes pas na/ dang po'i mchod pa'i las 'di nyid de bas bsod nams mang du 'phel lo zhes bya ba la sogs pa bstan pa yin no/ /chung ngu'i 'bring ni kau shi ka de ji snyam du sems/ 'dzam bu'i gling gi mi de dag las gang sangs rgyas la mos pa mi byed pa dang /de bzhin du chos dang / dge 'dun la shin tu brten pa de lta bu ni nyung ngu zhes bya ba nas brtsams te/ tshig re re zhing phra ba rgya cher bstan pa nas/ kau shi ka 'di nas sangs rgyas kyi spyan sgrib pa med pas phyogs bcu'i 'jig rten gyi khams gang gA'i klung gi bye ma snyed kyi sems can tshad med grangs med pa yang dag par rdzogs pa'i byang chub tu sems bskyed de/byang chub tu spyod kyang shes rab kyi pha rol tu phyin pa'i thabs mkhas pa dang mi ldan pas/ de la gcig gam gnyis shig phyir mi ldog pa'i sa la gnas par 'gyur ro//de ci'i phyir zhe na/ le lo can la sogs pas mngon par rdzogs par byang chub par bsgrub pa ni dka' ba nyid yin pa'i phyir ro zhes gang bstan pa yin no/ /gang chung ngu'i chen po ni de bzhin du myur zhing bde bar bla na med pa yang dag par rdzogs pa'i byang chub tu mngon par rdzogs par 'tshang rgya bar 'dod na zhes bya ba nas brtsams te/de bzhin gshegs pa bzhugs kyang rung / mya ngan las 'das kyang rung ste/ shes rab kyi pha rol tu phyin pa 'di ni bdag gi ston pa'o zhes bstan pa yin no/ / sangs rgyas kyi yon tan thams cad thob pa'i rgyur gyur pa'i phyir dang / mos pa gsum pa'i rnam pa yongs su gsal bar byas pa'i don gyis so/ /'bring gi chung ngu ni de bzhin du gang rin po che sna bdun gyi mchod rten byas te/ de la mchod pa'i bsod nams pas shes rab kyi pha rol tu phyin pa la mchod pa bsod nams ches mang du 'phel lo zhes bstan pa yin no//'bring gi 'bring ni de bzhin du gang 'dzam bu'i gling rin po che sna bdun las byas pa'i dpes bstan pa yin no/ /'bring gi chen po ni de bzhin du gang gling bzhi pa'i 'jig rten gyi khams 'di rin po che sna bdun las byas pa'i mchod rten zhes bya ba la sogs pa bstan pa yin no//chen po'i chung ngu ni de bzhin du gang stong gi 'jig rten gyi khams zhes bya ba la sogs pa bstan pa yin no/ /chen po'i 'bring ni de bzhin du gang stong gnyis pa bar ma'i 'jig rten gyi khams 'di zhes bya ba la sogs pa bstan pa yin no//chen po'i chen po ni de bzhin du gang stong gsum gyi stong chen po'i 'jig rten gyi khams 'di zhes bya ba la sogs pa bstan pa yin no/ /rang gi don la mos pa rnam pa dgu bstan nas/ rang dang gzhan gyi don la mos pa rnam pa dgu brjod par bya'o/ /de la re zhig chung ngu'i chung ngu'i rnam pa ni gang stong gsum gyi stong chen po'i 'jig rten gyi khams na sems can ji snyed yod pa de dag las sems can re res rin po che sna bdun las byas pa'i mchod rten byas te/mchod pa'i bsod nams pas shes rab kyi pha rol tu phyin pa 'di la brtson pa bsod nams ches shin tu mang du bskyed pa nyid la sogs pa bstan pa yin no//chung ngu'i 'bring ni gang kau shi ka khyod kyis shes rab kyi pha rol tu phyin pa zung shig ces bya ba nas brtsams te/ mthong ba'i chos kyi phan yon la sogs pa rgya cher bstan pa yin no/ / chung ngu'i chen po ni gang kun dga' bo 'di ji snyam du sems/ rnam pa thams cad mkhyen pa nyid du yongs su ma bsngos pa'i sbyin pa sbyin pa'i pha rol tu phyin pa yin nam/ zhes bya ba nas brtsams te/ chos thams cad de rnams kyi stong pa nyid yin pa'i phyir/ gnyis su med pa nyid yin pas gnyis su med par yongs su bsngo ba'i tshul gyis pha rol tu phyin pa thams cad kyi sngon du shes rab kyi pha rol tu phyin pa 'gro ba nyid kyi shes rab kyi pha rol tu phyin pa la sogs pa ni rnam par byang ba'i phyogs thams cad rab tu shes pa'i rgyu yin pa'i phyir dang /rang gzhan gyi don gyi mos pa rnam pa gsum yongs su gsal bar bya ba'i phyir ro//zhes bstan pa yin no/ /'bring gi chung ngu ni gang shes rab kyi pha rol tu phyin pa 'dzin pa la sogs pa dang rab tu ldan pa nyan thos dang / rang sangs rgyas kyi tshul khrims la sogs pa'i phung po rnams las tshul khrims la sogs pa'i phung po tshad med pa dang ldan pa nyid yin no zhes bstan to//'bring gi 'bring ni gang shes rab kyi pha rol tu phyin pa dang ldan pa'i chos ston pa de la ni lha'i bu dag spobs pa nye bar bsgrub par sems so zhes bya ba la sogs pa bstan pa yin no/ /'bring gi chen po ni gang yang pha dang ma la sogs pa nas mi slob pa'i bar thams cad kyis kyang dben zhing yid du 'ong bar bya ba yin zhes bya ba la sogs pa bstan pa yin no/chen po'i chung ngu ni gang stobs pa mi 'phrogs par 'gyur ba nas brtsams te/ rnam pa thams cad mkhyen pa nyid kyi sems mi 'phrogs par 'gyur ba dang ma bral bar byed pa nyid kyis rnam pa bdun pa'i skabs su bsgom pa'i lam gyi mi 'phrogs par 'gyur ba dngos po med par shes par bya ba'i don gyis yin no zhes bstan no//chen po'i 'bring ni gang phyogs bcu'i 'jig rten gyi khams kyi lha'i ris thams cad kyang der dong zhing glegs bam du chud pa 'di klog pa dang /gzung ba dang / 'chang ba dang / kun chub par bya ba la sogs pa dang / de dag la chos kyi sbyin pa 'di byin par gyur cig ces sems bskyed par bya ste/ zhes bya ba la sogs pa bstan pa yin no//chen po'i chen po ni gang lha'i tshogs 'ongs pas mos pa rgya chen po dang ldan par gyur pa dang / lus dang / sems las su rung ba thob nas chos gos la sogs pa la shas cher chags pa bkag pa dang / mos pa rnam pa dgu'i don gsal bar bya ba'i phyir bstan pa yin no//rang dang gzhan gyi don la mos pa rnam pa dgu bstan nas gzhan gyi don la mos pa rnam pa dgu brjod par bya'o/ /de la re zhig chung ngu'i chung ngu ni gang yang glegs bam du bris pa 'di gzung ba dang / mchod pa 'ba' zhig tsam byed kyi ma bzung ba nas gzhan dag la rgya cher mi ston na ma tshang ba'i byed pas/las yongs su rdzogs par byed pa ni bsod nams ches mang du skyed par bstan pa yin no/ /chung ngu'i 'bring ni gang yang kau shi ka khyod kyis 'dzam bu'i gling de bzhin gshegs pa'i sku gdung gis byur bur bkang ba zhig kyang rnyed ces bya ba nas brtsams te/cha gnyis las shes rab kyi pha rol tu phyin pa blang bar bgyi ba nyid la sogs pa bstan pa yin no/ /chung ngu'i chen po ni gang sbyor ba 'di dang ldan pa de ni nam bla na med pa yang dag par rdzogs pa'i byang chub tu mngon par rdzogs par sangs rgyas kyi bar du nyan thos la sogs pa'i sa'i dogs pa med pa nyid kyis gzhan gyi don la mos pa rnam pa gsum gsal bar bya ba'i phyir bstan pa yin no//'bring gi chung ngu ni gang yang stong gsum gyi stong chen po'i 'jig rten gyi khams 'di de bzhin gshegs pa'i sku gdung gis byur bur gtams pa zhig dang /shes rab kyi pha rol tu phyin pa 'di gnyis las gang yang rung ba zhig 'dom du stsal na / 'di nyid mchog yin pa nyid la sogs pa bstan pa yin no/ /'bring gi 'bring ni gang phyogs bcu'i 'jig rten gyi khams kyi sangs rgyas rnams mdo la sogs pa gsung rab yan lag bcu gnyis kyi chos ston par mdzad pa dang /chos smra ba shes rab kyi pha rol tu phyin pa ston pa ni 'di las byung ba yin pa'i phyir de gnyis kyang mi 'dra ba ma mchis so zhes bya ba la sogs pa bstan pa yin no/ /'bring gi chen po ni gang mthu dang rab tu ldan pa'i rgyal po la brten pa'i skyes bu dang 'dra ba'i dpes gang gis kyang 'jigs par mi 'gyur ba dang /mchod pa la rnyed pa la sogs pas bstan pa yin no/ /chen po'i chung ngu ni gang phyogs bcu'i 'jig rten gyi khams gang gA'i klung gi bye ma snyed cig de bzhin gshegs pa'i sku gdung gis byur bur gtams pa dang /shes rab kyi pha rol tu phyin pa cha gnyis su byas te/ gcig 'dom du bcug na 'di nyid len pa mchog yin pa la sogs pa bstan pa yin no/ /chen po'i 'bring ni gang phyogs bcu'i 'jig rten gyi khams kyi 'phags pa'i gang zag thams cad kyi thugs su chud pa'i rgyu ni shes rab kyi pha rol tu phyin pa nyid yin no zhes bya ba la sogs pa bstan pa yin no//theg pa chen po ni gang shes rab kyi pha rol tu phyin pa chen po 'di ni shes rab kyi pha rol tu phyin pa chen po ste zhes bya ba nas brtsams te/ shing rnams lo ma dang / me tog dang /'bras bu dang / dbyibs sna tshogs kyang grib ma la khyad par dang / bye brag mi dmigs pa'i dpes pha rol tu phyin pa thams cad mi dmigs shing shes rab kyi pha rol tu phyin par ro gcig pa nyid dang / gzhan gyi don gyi mos pa rnam pa dgu gsal bar bya ba'i phyir bstan pa yin no //mos pa'i rnam pa thams cad la yang chung ngu'i chung ngu la sogs pa nas dpe gzhan dang / gzhan gyis chos gang dang gang bstan pa de'i rjes su 'brangs nas chen po'i chen po la sogs pa las go bzlog pas mi mthun pa'i phyogs shes par bya'o/ /de la rang gi don la mos pa ni gzhan gyi don la mos par 'gyur la/gnyis pa ni bar chad dang bcas pa'i sbyor ba'o/ /gsum pa la ni bar chad med pa'i sbyor ba yin no/ /mos pa yid la byed pa bshad nas da ni bstod pa la sogs pa brjod dgos pas de'i phyir/ shes rab pha rol phyin pa la/ /mos pa'i gnas skabs rnams la ni/ /dgu tshan gsum gyis bstod pa dang / /bkur ba dang ni bsngags par 'dod/ /ces bstan pa yin no/ /de la dang po 'di ni bstod pa tsam yin te/ gang yang sngar bstan pa las/ la la zhig bris te/glegs bam du bgyis nas gzhan la gsal ba zhes bya ba nas brtsams te/ sbyin pa'i bsod nams mang du 'phel ba nyid du bstan pa yin no/ /gnyis pa ni gzhan gyi drung du song ste bshad cing bstan na snga ma dag pas bsod nams shas cher 'phel te/ de ni bstod pa yin par bsam mo zhes bya ba la sogs pa bstan pa yin no//gsum pa ni gang sems can gcig rgyun du zhugs pa'i 'bras bu la gzhag pa dang / 'dzam bu gling gi sems can de dag dge ba bcu'i las kyi lam la bkod par gyur pa ni bsod nams mang du 'phel bar 'gyur ba nas brtsams te/de nyid gzhan la byin na bsod nams mang du 'phel bar bstan pa yin no/ /bzhi pa ni gang sems can gcig lan cig phyir 'ong ba'i 'bras bu la zhes bstan pa yin no/ /lnga pa ni de bzhin du sems can gcig lan cig phyir mi 'ong ba'i 'bras bu dang zhes bstan pa yin no//drug pa ni gang de bzhin du sems can gcig cig dgra bcom pa nyid la bkod pa zhes bstan pa yin no/ /bdun pa ni gang de bzhin du sems can gcig cig rang byang chub la bzhag na zhes bstan pa yin no/ /brgyad pa ni gang 'dzam bu'i gling gi sems can thams cad rgyun du zhugs pa'i 'bras bu la bkod pa bas sems can gcig cig bla na med pa yang dag par rdzogs pa'i byang chub la bzhag na de'i bsod nams ches mang du 'phel lo//de ci'i phyir zhe na/ de ni sangs rgyas kyi tshul rgyun mi 'chad pa'i don du bzhugs pa yin no zhes bya ba bstan pa yin no//de la sangs rgyas kyi tshul ni sangs rgyas kyi rigs so/ /bstod pa'i cha dgu pa ni de bzhin du 'dzam bu'i gling gi sems can thams cad lan cig phyir 'ong ba'i 'bras bu la gzhag pa ni zhes bstan pa yin no/ /bkur ba yang cha dgur shes par bya'o//de la bkur ba dang po ni 'di yin te/ 'dzam bu'i gling gi sems can thams cad phyir mi 'ong ba'i 'bras bu la gzhag pa bas zhes bstan pa yin no/ /gnyis pa ni gang de bzhin du dgra bcom pa nyid la gzhag pa bas zhes bstan pa yin no/ /gsum pa ni gang de bzhin du rang byang chub la gzhag pa bas zhes bstan pa yin no//bzhi pa ni gang de bzhin du yang 'dzam bu'i gling gi sems can thams cad dge ba bcu'i las kyi lam la bkod par gyur pa'i bsod nams pas glegs bam la bris nas gzhan la byin pa dang / tshul bzhin du yid la byed na bsod nams mang du 'phel ba nyid du bstan pa yin no//tshul bzhin yid la byed pa ni 'di yin te/ byang chub la gnyis su med par spyod pa'i blos shes rab kyi pha rol tu phyin pa 'dzin pa la sogs pa zhes bstan pa yin no/ /lnga pa ni gang yang gnyis su med pa'i don de bstan pas bsod nams mang du 'phel ba nyid du bstan pa yin no//drug pa ni gang yang don dang / yi ge dang ldan par bstan pa las yongs su rdzogs par byed pa ni bsod nams mang du 'phel bar bstan pa yin no/ /bdun pa ni gang phyogs bcu'i 'jig rten gyi khams kyi sangs rgyas rnams la nam 'tsho'i bar du bde ba'i yo byad thams cad kyis rim gror byas pa bas 'di nyid don dang yi ge ma nor bar bshad cing bstan pa byas na bsod nams de ni ches mang du 'phel ba nyid yin no//de ci'i phyir zhe na/ sangs rgyas rnams ni 'di las nges par 'khrungs pa nyid du bstan pa yin no//brgyad pa ni gang yang bskal pa tshad med grangs med par sbyin pa la sogs pa'i spyod pa byang chub sems dpa' bcos ma las go bzlog pa'i tshul gyis shes rab kyi pha rol tu phyin pa mi dmigs pas phyin ci ma log par ston par byed pa ni bsod nams mang du skyed par 'gyur ro zhes bya ba la sogs pa bstan pa yin no//bkur ba'i cha dgu pa ni gang yang 'dzam bu'i gling gi sems can zhes bya ba nas brtsams te/ phyogs bcu'i phyogs re re zhing gang gA'i klung gi bye ma snyed kyi 'jig rten gyi khams kyi sems can ji snyed yod pa rgyun du zhugs pa'i 'bras bu la bkod pa bas sems can gcig cig bla na med pa yang dag par rdzogs pa'i byang chub 'dzin du bcug cing phyir mi ldog pa'i sa la bzhag pa ni bsod nams ches mang du 'phel ba nyid du bstan pa yin no//bkur ba'i cha rnam pa dgu bstan nas/ da ni bsngags pa'i cha rnam pa dgu brjod par bya ste/de la bsngags pa'i cha dang po ni 'dir gang de bzhin du sems can ji snyed cig kho na dgra bcom pa nyid du zhes bstan pa yin no/ /gnyis pa ni gang yang de ltar sems can de snyed cig phyir mi 'ong ba'i 'bras bu la bkod pa bas zhes bya ba'o//gsum pa ni gang de bzhin du de ltar re zhig sems can de snyed cig dgra bcom pa nyid la bkod pa bas zhes bstan pa yin no/ /bzhi pa ni gang de bzhin du sems can de snyed kho na rang byang chub la bkod na zhes bstan pa yin no/ /lnga pa ni gang 'dzam bu'i gling gi sems can bla na med pa yang dag par rdzogs pa'i byang chub tu yang dag par bskul ba byas pa bas sems can gcig cig phyir mi 'ong ba'i sa la bkod pa'i bsod nams ches cher mang du 'phel ba nyid du bstan pa yin no//drug pa ni gang de bzhin du gling bzhi pa'i sems can de nyid du bkod pa bas zhes bstan pa yin no//bdun pa ni gang de bzhin du stong gi 'jig rten gyi khams kyi sems can de nyid du bkod pa bas zhes bstan pa yin no/ /brgyad pa ni gang de bzhin du stong gnyis pa dang / gsum pa dang / phyogs bcu'i 'jig rten gyi khams kyi sems can rnams de nyid du yang dag par bkod pa na zhes bstan pa yin no//bsngags pa'i cha dgu pa ni gang yang 'dzam bu'i gling nas brtsams te/ phyogs bcu'i phyogs re re zhing gang gA'i klung gi bye ma snyed kyi 'jig rten gyi khams kyi sems can thams cad phyir mi ldog pa'i sa la bkod nas phyir mi ldog pa de rnams las byang chub sems dpa' sems dpa' chen po gzhan gang yang rung ba zhig myur du bla na med pa yang dag par rdzogs pa'i byang chub tu mngon par rdzogs par 'tshang rgya bar mngon par shes nas/shes rab kyi pha rol tu phyin pa phyin ci ma log par ston pa'i bsod nams ni ches mang du 'phel lo zhes bya ba la sogs pa bstan pa yin no//byang chub sems dpa' la spro ba skyed pa rnams la legs so legs so zhes bsngags pa brjod pas bsngags pa'i tshig gis don yongs su gsal bar byas pa yin no//de la bstod pa ni rang gi don la mos pa'i yul la yin no/ /bkur ba ni rang dang gzhan gyi don la mos pa yin no/ /bsngags pa ni gzhan gyi don du mos pa la yin no/ /de ltar bstod pa la sogs pa 'di dag ni tshig gi don yang dag pa ji lta ba bzhin du rtogs pa'i cha'i mtshan nyid yin gyi rig byed smra ba rnams kyi don smra ba'i bstod pa ltar don dang 'gal ba'i gcam gsag tu smra ba ni ma yin no//gang yang tshad phyed dang bzhi am ni bkur ba nyid de zhes smras te/ de rnams kyi ni sgra'i tshangs pa ni mchog yin par bkur ba'o zhes kha cig zer mod kyi 'dir ni yang ji skad bshad pa rtogs pa'i cha'i mtshan nyid yin no//gang yang bsngags pa'i dbang du byas nas sreg rdzas kyi bsngags pa bdag gis shes so zhes smras la/ lan dang ldan pa'i tshig phyi nas brjod nas de ni 'di dag gi bsngags pa brjod pa yin no zhes smra mod kyi de yang sgrar gtogs pa nyid yin no//'dir ni yang cha dgu pa'i rtogs pa'i mtshan nyid ni bsngags pa yin no / /tshad dang / cha dang / char bgo ba zhes bya ba'i don to/ /de ltar byas na mdo gzhan de dang de'i gleng gzhi las/ de nas bcom ldan 'das byang chub sems dpa' sems dpa' chen po thams cad dang /sangs rgyas thams cad kyis bstod cing bkur la bsngags pa dang lhan cig bzhugs so zhes gsungs pa de 'thad par gyur pa nyid yin no/ /mos pa yid la byed pa'i rnam par 'grel pa'o// //mos pa yid la byed pa dang /bstod pa dang / bkur ba dang / bsngags pa bshad zin nas da ni yongs su bsngo ba yid la byed pa zhes bya ba brjod par bya ba yin pas na/ yongs su bsngo ba khyad par can/ /de yi byed pa nyid dang ni/ /de ni dmigs med rnam pa can/ / phyin ci log gi med nyid dang / /dben dang sangs rgyas bsod nams tshogs/ /rang bzhin dran pa'i mtshan nyid can/ /thabs bcas mtshan ma med pa dang / /sangs rgyas kyis ni rjes gnang dang / /khams gsum gtogs pa ma yin dang / /chung dang 'bring dang chen po dang //bsngo ba gzhan ni rnam pa gsum/ /bsod nams ches 'byung bdag nyid do/ /zhes bstan pa la/ de la yongs su bsngo ba khyad par can ni 'di yin te/ nyan thos dang / rang sangs rgyas thams cad kyi sbyin pa la sogs pa'i bsod nams bya ba'i dngos po rnams las byang chub sems dpa' chen pos bla na med pa yang dag par rdzogs pa'i byang chub tu mi dmigs pa'i tshul gyis yongs su bsngo ba 'di nyid rab ces bya'o//dam pa zhes bya'o/ /gtso bo zhes bya'o zhes bya ba la sogs pa bstan pa yin no/ /de la rab ces bya ba ni rab rnam pa gnyis te/dam par gyur pa'i rab nyid dang / /brtson 'grus 'bar bas gtso bor gyur pa gnyis pa med pa nyid kyis so/ /de la dam par gyur pa'i rab nyid kyang rnam pa gnyis te/ mchog nyid ni thabs la mkhas pas so/ /phul zhes bya ba ni shes rab kyi pha rol tu phyin pas so//gtso bor gyur pa'ang rnam pa gnyis te/ mnyam pa med pas gtso bo nyid yin pa dang / mi mnyam pa dang mnyam pas gtso bor gyur pa ste/ tshig bdun gyis de'i khyad par gyi mtshan nyid bstan pa yin pa'i phyir ro/ /yongs su bsngo ba'i byed pa ni gang yang sems can rnams kyi theg pa gsum gyi nges par 'byung ba'i lam ston pa'i rgyur gyur pas na mnyam pa med pa zhes bya'o//mi mnyam pa'i sangs rgyas dang / mnyam pa thob pa'i rgyur gyur pas ni mi mnyam pa dang mnyam pa zhes bya'o/ /de ci'i phyir zhe na/ nyan thos la sogs pa dang /byang chub sems dpa' rang dang gzhan gyi don gyi dbang du byas pa'i khyad par gyis zhes bstan pa yin no/ /mi dmigs pa'i rnam par bsngo ba ni gang phyogs bcu'i sangs rgyas thams cad kyi thugs dang po bskyed pa nas brtsams te/ dam pa'i chos gnas pa'i bar gyi tshul khrims la sogs pa'i phung po rnams dang /des yongs su bsdus pa dang / theg pa gsum gyis yongs su smin pa dang / rnam par grol ba'i sems can rnams kyi dge ba'i rtsa ba thams cad gcig tu bsdus te rjes su yi rang ba dang / yongs su bsngo ba'i dngos po ni gang yin zhes bya ba nas brtsams te/dngos po dang / dmigs pa dang / byang chub dang / sems dang / dge ba'i rtsa ba dang / rjes su yi rang ba dang ldan pa'i bsod nams bya ba'i dngos po ni gang zhig yin zhes bya ba dang / sems de ni zad cing 'gags la med par gyur pa nyid nas chos thams cad dngos po med pa'i rjes su 'gro ba mi dmigs pa'i rnam par bsngos pa legs pa nyid kyis zhes bya ba la sogs pa bstan pa yin no//de la dngos po ni rigs so/ /dmigs pa ni chos thams cad do/ /byang chub ni ched du bya ba'o/ /sems ni gzung ba'i rnam par rtog pa'o//dge ba'i rtsa ba ni ma chags pa la sogs pa'o/ /bsod nams bya ba'i dngos po ni sems las byung ba'o/ /de dag zad pa ni bstsags pa rnam par 'jig pas so/ /'gags pa ni rgyun gyis 'jigs pas so / /med pa ni rang bzhin gyis 'jig pas so//rnam par gyur pa ni rnam par 'gyur ba'i 'jig pas so/ /phyin ci ma log pa'i mtshan nyid kyi bsngo ba ni gang yang sems gang gis yongs su bsngo ba'i sems kyang de yin no/ /de ci'i phyir zhe na/ de ni 'di ltar chos thams cad rang bzhin gyis stong ngo zhes bstan pa yin no//dben pa'i yongs su bsngo ba ni gang gal te byang chub sems dpa' chen pos bsod nams bya ba'i dngos po mngon par 'du bya ba de phung po la sogs pas dben par shes zhes bya ba nas brtsams te/ sangs rgyas kyi chos thams cad de nyid kyi ngo bo nyid kyis dben par shes te zhes bya ba'i bar du bstan pa yin no//sangs rgyas rnams kyi dge ba'i rtsa ba'i rigs su gtogs pa'i rang bzhin dran pa'i yongs su bsngos pa ni yang sangs rgyas rnams kyi dge ba'i rtsa ba'i rigs su gtogs pa gang yin pa dang / ngo bo nyid gang yin pa dang / de bzhin du bsod nams bya ba'i dngos po yongs su bsngo ba yin te zhes bstan pa yin no/ /thabs la mkhas pa'i yongs su bsngo ba ni gang yang 'dir byang chub sems dpa' chen pos thabs la mkhas pas de dag la bslab par bya ste zhes bya ba la sogs pa bstan pa yin no//mtshan ma med pa'i yongs su bsngo ba ni gang kha zas dug dang bcas pa'i dpes mtshan ma'i 'du shes can gyi yongs su bsngo ba ni dug can zug rngu can te/ zhes bya ba la sogs pa bstan pa yin no/ /sangs rgyas kyis rjes su gnang ba'i yongs su bsngo ba ni gang ji ltar de bzhin gshegs pa dgra bcom pa yang dag par rdzogs pa'i sangs rgyas de dag gis sangs rgyas kyi ye shes bla na med pa thugs su chud pa de bzhin du bdag gis bla na med pa yang dag par rdzogs pa'i byang chub tu yongs su bsngo ba'o zhes bya ba la sogs pa bstan pa yin no// khams gsum du gtogs pa ma yin pa'i yongs su bsngo ba ni gzhan yang dge ba'i rtsa ba de dag 'di ltar yongs su bsngo bar bya ste/ ji ltar 'dod pa'i khams dang / gzugs kyi khams dang / gzugs med pa'i khams su gtogs pa zhes bya ba bstan pa yin no / /bsod nams chen po 'byung ba'i yongs su bsngo ba yang chung ngu dang /'bring dang / chen po'i dbye bas rnam pa gsum mo/ /de la chung ngu ni gang dge ba bcu'i las kyi lam nas brtsams te/ mngon par shes pa lnga zhes bya ba'i bar dang / 'jig rten pa'i rtogs pa'i gnas stong gsum gyi stong chen po'i 'jig rten gyi khams kyi sems can thams cad kyi dpes 'di ltar yongs su bsngo ba ni bsod nams mang du 'phel lo zhes bya ba'i bar du bstan pa yin no//'bring ni gang yang de snyed cig kho na rgyun tu zhugs pa nas dgra bcom par gyur pa la bkur sti dang mchod pa la sogs pa byas pa'i bsod nams kyi dpes 'di ni bsod nams ches mang du 'phel lo zhes bya ba'i bar du bstan pa yin no//chen po ni gang sems can de snyed kho nar yang dag par rdzogs pa'i sangs rgyas kyi byang chub la gnas pa la phyogs bcu'i 'jig rten gyi khams kyi sems can rnams kyis re re nas mchod pa'i bsod nams kyi dpes mi dmigs par yongs su bsngo ba'i bsod nams ni snga ma bzhin no//de ci'i phyir zhe na/ de dag thams cad ni dmigs su med pa can no zhes bya ba la sogs pa bstan pa yin no/ /yongs su bsngo ba'i 'grel pa'o// //yongs su bsngo ba yid la byed pa bshad zin nas/rjes su yi rang ba'i dbang du mdzad nas/ thabs dang mi dmigs pa dag gis/ /dge ba'i rtsa la yi rang ba/ /rjes su yi rang yid byed pa/ /bsgom pa yin par 'dir brjod pa'o/ /zhes bstan pa yin te/ rjes su yi rang ba'i yid la byed par gyur par ston te /gang bcom ldan 'das ji tsam gyis na rjes su yi rang ba'i dam par 'gyur zhe na/ zhes bya ba nas brtsams te/ shes rab kyi pha rol tu phyin pa la mi dmigs pa'i tshul gyis spyod pa'i tshe/ thabs la mkhas pas dge ba'i rtsa ba de dag bla na med pa yang dag par rdzogs pa'i byang chub tu bsngo bar bya'o zhes bya ba'i bar du bstan pa yin no//de la mos pa yid la byed pas ni 'byung khungs dag nas gser gyi gar bu bzhin du bsod nams mngon par 'du byed do/ /yongs su bsngo ba yid la byed pas ni mgar bas gser gyi rgyan bzhin du yang dag par rdzogs pa'i byang chub kyi yan lag tu byed do//rjes su yi rang ba yid la byed pas ni rang gi gzhan gyis byas pa'i bsod nams dang mnyam pa nyid du thob bo/ /rjes su yi rang ba yid la byed pa'i rnam par 'grel pa'o// //rjes su yi rang ba yid la byed pa bstan nas/ bsgrub pa brjod par bya ste//ngo bo nyid ni mchog nyid dang / /kun la mngon du mi byed dang / /chos rnams dmigs su med par ni/ /gtod par byed pa don chen nyid/ /ces bstan pa yin no/ /'di ltar ngo bo nyid kyi dbang du mdzad nas/ bcom ldan 'das shes rab kyi pha rol tu phyin pa snang bar bgyid pa'o zhes bya ba nas brtsams te/chos thams cad kyi ngo bo nyid ston pa'o zhes bya ba gsungs pa yin te/ mchog nyid ni gang dmus long ngam lam du zhugs nas grong khyer chen por phyin par mi nus pa'i dpes shes rab kyi pha rol tu phyin pa med par pha rol tu phyin pa lngas lam shes pa nyid du zhugs nas rnam pa thams cad mkhyen pa nyid kyi grong khyer chen por phyin pa'i nus pa bkag pa yin no zhes bstan to//chos thams cad la mngon par 'du mi byed pa ni gzugs mngon par bsgrub pa med pa'i phyir zhes bya ba nas brtsams te/ chos thams cad mngon par 'du byed pa med pas shes rab kyi pha rol tu phyin pa mngon par bsgrub par bya zhes bya ba'i bar du bstan pa yin no//chos thams cad dmigs pa med par gtogs pa la gtod par byed pa ni gang mi dge ba'i chos rnams thob par mi byed do zhes bya ba nas brtsams te/ shes rab kyi pha rol tu phyin pa'i grangs su 'gro bas mya ngan las 'das pa'i bar du gang la yang gtod par mi byed do/ /de ci'i phyir zhe na/ de'i chos thams cad dmigs su med pa'i rnam par rab tu gnas pa nyid kyi ming ji lta ba dang / mtshan ma ji lta ba de ltar gtod par mi byed cing mi dmigs pa'i rnam pa de chos thams cad la gtod par byed pa nyid yin pa'i phyir ro//de la ming ni btags pa'o/ /mtshan ma ni 'jug par byed pa'i rgyu'o/ /gtod pa ni gtod pa med pa nyid kyis gnyis kyi 'du shes de las ring du byed pa nyid yin pa'i phyir gzugs nas rnam pa thams cad mkhyen pa nyid kyi bar du dmigs par mi byed de/de ni yid ches pa nyid du bstan pa yin no/ /don chen po nyid ni gang gzugs nas rnam pa thams cad mkhyen pa nyid kyi bar du che ba dang / chung bar byed pa bkag pa nas brtsams te/ sangs rgyas kyi chos rnams kyi bar gyi stobs yongs su grub pa ma mchis pa'i slad du shes rab kyi pha rol tu phyin pa'i stobs yongs su grub pa ma mchis par blta'o zhes bya ba dang /sangs rgyas kyi don chen po sangs rgyas nyid du sgrub par byed pas na pha rol tu phyin pa chen mo'o zhes bstan pa yin no/ / mngon par bsgrub pa'i 'grel pa'o// //mngon par bsgrub pa bshad zin nas/ shin tu rnam par dag pa brjod par bya ste/ sangs rgyas bsten dang sbyin sogs dang / /thabs la mkhas pa gang yin dang / /'di la mos pa'i rgyu dag yin/ /chos kyis phongs pa'i rgyu dag ni//bdud kyis thibs kyis non pa dang / /zab mo'i chos la ma mos dang / /phung po sogs la mngon zhen dang / /sdig pa'i grogs pos zin pa'o/ /'bras bu dag pa gzugs la sogs/ /dag pa nyid de gang gi phyir/ /de gnyis tha dad ma yin zhing / / gcad du med pas dag par brjod/ ces bstan te/ de la sangs rgyas la brten pa ni 'di yin te/ gang shA ri'i bu byang chub sems dpa' chen po phyogs bcu'i 'jig rten gyi khams kyi de bzhin gshegs pa dgra bcom pa yang dag par rdzogs pa'i sangs rgyas tshad med grangs med pa bsnyen bkur byas nas 'dir 'ongs te zhes bya ba nas brtsams te/sangs rgyas du ma bsten par bya'o zhes bstan pa yin no/ /sbyin pa la sogs pa'i pha rol tu phyin pa yang dag par sgrub par byed pa ni gang bskal pa mang por sbyin pa'i pha rol tu phyin pa la spyad do zhes bya ba la sogs pa bstan pa yin no//thabs la mkhas pa ni gang rab 'byor de ni rnam par phye zhing bshad dgos te zhes bya ba nas brtsams te/ de lta bu dag ni shes rab kyi pha rol tu phyin pa zab mo 'di la brtson par byed do zhes bya ba'i bar du bstan pa yin no/ /chos kyis phongs pa la 'jug par gyur pa'i las ni gang rab 'byor gzhan yang byang chub sems dpa'i theg pa pa'i rigs kyi bu 'am zhes bya ba nas dmigs pa'i tshul gyis shes rab bsgom pa yod de zhes bya ba nas brtsams te/drag pa dang / rgyun mi 'chad pa dang / dus ring por bdag nyid kyi lus chen po la rnam par smin pa sdug bsngal ba'i las kyi sgrib pa nye bar bstan pas zhes bstan pa yin no//sems can rnams mi dge ba'i las de las ldog par bya ba'i phyir de bstan pa yin no/ /yang las kyi sgrib pa 'di'i rgyu bzhi'i dbang du mdzad nas bdud kyis byin gyis brlabs pa dang / chos zab mo la ma mos pa dang /phung po la sogs pa la mngon par zhen pa dang / sdig pa'i grogs pos zin pa ste/ chos bzhi po de dag ni chos spong ba'i rgyu yin no zhes bstan to/ /'bras bu rnam par dag pa ni gang rab 'byor gzugs rnam par dag pa gang yin pa de ni 'bras bu rnam par dag pa 'di la gnyis su med de gnyis su byar med do//rang gi ngo bo tha dad pa dang / cha gnyis su bcad pa'i dgag pa'i dbang du mdzad nas/ so so ma yin tha mi dad pa nye bar bzung nas zhes bya ba nas brtsams te/ 'das pa dang / ma 'ongs pa dang / da ltar byung ba rnam par dag pa 'di la gnyis su byar med do zhes bya ba'i bar du bstan pa yin no/ /gzugs sogs dus gsum du med pa/ /shin tu dag pa'i mtha' med pa/ /'di dag mtha' ni mi mkhyen pa/ /thub pa'i chos mngon rtogs pa yin/ /zhes bya ba bstan te/ gang bcom ldan 'das rnam par dag pa 'di ni zab lags so//shA ri'i bu shin tu rnam par dag pa'i phyir/ gzugs dang tshor ba zhes bya ba nas brtsams te/ gang de ltar rtogs pa ni byang chub sems dpa' sems dpa' chen po'i shes rab kyi pha rol tu phyin pa'o/ /lam shes pa shin tu rnam par dag pa bstan to//lam gyi rnam pa shes pa nye bar bzung nas rab 'byor 'di ltar byang chub sems dpa' sems dpa' chen po'i shes rab kyi pha rol tu phyin pa'i dbang du byas pa rdzogs par bstan to/ /de ltar bstan pa nyid ni ji skad du/ mog mog por byed la sogs dang //slob ma bse ru'i lam gang dang / /'di dang gzhan pa'i yon tan gyi / /phan yon che ba mthong ba'i lam/ /byed pa dang ni mos pa dang / /bstod dang bkur dang bsngags pa dang / /bsngo dang rjes su yi rang dang / /yid la byed pa dang ni gzhan/ / sgrub dang shin tu dag pa zhes/ /bya ba 'di ni bsgom pa'i lam/ /lam shes de 'drar shes par bya/ /zhes bstan pa yin no/ /'brel pa ni de'i rjes su 'jug pa yin par blta bar bya'o/ /shes rab kyi pha rol tu phyin pa man ngag gi bstan bcos las lam shes pa nyid kyi mngon par rtogs pa'i 'grel pa'o// // lam shes pa nyid bshad nas da ni thams cad shes pa nyid brjod par bya ste/ de la re zhig 'khor ba dang / mya ngan las 'das pa la mi gnas pa'i dbang du mdzad nas/ tshu rol pha rol mtha' la min/ /de dag bar la mi gnas pa//zhes bya ba bstan pa la/ ji skad du/ byang chub sems dpa' sems dpa' chen po shes rab kyi pha rol tu phyin pa la spyod na tshu rol gyi 'gram mam/ pha rol gyi 'gram mam/ gnyis ka'i dbus na mi dmigs te/ shin tu rnam par dag pa'i phyir ro/ /'khor ba dang mya ngan las 'das pa'i 'du shes su nye bar dmigs pa bkag pa yin no//yang de gnyis ji ltar mi dmigs pa yin zhe na/ dus gsum mnyam pa nyid shes phyir/ /shes rab pha rol phyin du 'dod/ /ces bya ba smos te/ ji skad du/ de mi dmigs pas rab 'byor dus gsum mnyam pa nyid yin no//de nye bar gzung ba gsungs pa ni 'thad pa yin no/ /thabs ma yin pas ring ba ste/ /zhes bya ba smos so/ /thabs ma yin pa gang zhe na/ de ni mtshan mar dmigs sgo nas/ /zhes bya ba smos te/ gang ming nyid kyis ni shes rab kyi pha rol tu phyin pa ring du byed do zhes bstan to//de nyid las bzlog pa ni thabs la mkhas pa ste/ de dang nye ba nyid yin par blta bar bya'o/ /gang nyan thos la sogs pa'i rtogs pa las bzlog pa'i sbyor bas ni de dag rtogs pa phyogs gcig pa yin no/ /zhes gsungs pas de dag ni ma lus pa mthar thug par 'gro ba ma yin zhing /nye bar bzung nas de'i lam legs par bshad cing legs par mthar thug par bstan to/ /mi mthun pa'i phyogs kyi dbang du mdzad nas/ gzugs sogs phung po stong nyid dang / /dus gsum gtogs pa'i chos rnams dang / / zag bcas zag pa med chos dang / /sbyin sogs byang chub phyogs rnams la/ /spyod pa'i 'du shes mi mthun phyogs/ /zhes smos pa la/ gang thabs la mi mkhas pas gzugs stong pa zhes bya bar 'du shes shing des 'das pa la sogs pa'i chos su 'du shes la/ de bzhin du sems dang po bskyed pa nas nye bar bzung ste/gang sbyin pa'i pha rol tu phyin par 'du shes shing / de bzhin du byang chub kyi phyogs la sogs pa nas rnam pa thams cad mkhyen pa nyid kyi bar du 'du shes pa ni chags pa'o zhes bstan to/ /gnyen po gang zhig yin zhe na/ sbyin la sogs pa ngar 'dzin med/ /ces bya ba smos te/ ji skad du/ gzhan yang tshe dang ldan pa shA ri'i bu byang chub sems dpa' sems dpa' chen po shes rab kyi pha rol tu phyin pa la spyod pa ni thabs la mkhas par gyur pas gzugs la gzugs su 'du shes pa med do zhes bya ba nas brtsams te/bdag gi rnam pa thams cad mkhyen pa nyid rjes su thob par bya'o snyam du mi sems te zhes bya ba'i bar du'o/ /mi mthun pa'i phyogs bstan pa las bzlog pa rnam par rtog pa thams cad bkag pa yin no/ /de ci'i phyir zhe na/ stong pa nyid thams cad gzung ba ni 'thad pa yin te/thabs la mkhas pas chags pa med do zhes so / /yang mi mthun pa'i phyogs ni gang kau shi ka 'di la byang chub sems dpa' sems su 'du shes pa zhes bya ba nas brtsams te/ chags pa gang gis chags pa med par mi nus na chags pa med pa'i shes rab kyi pha rol tu phyin pa la spyod pa ma yin no zhes bya ba'i bar du bstan pa yin no//chags pa'i mtshan nyid bstan pa ni/ de ci'i phyir zhe na/ gzugs nas rnam pa thams cad mkhyen pa nyid kyi bar ngar 'dzin pa'i rnam par rtog pa med pa bkag pa yin no/ /gnyen po'i phyogs ni / gzhan yang de la sbyor byed cing //de ni chags pa'i mtha' 'gog pa/ /zhes bstan pa yin te/ ji skad du/ gzhan dag de nyid du ngar 'dzin pa bkag pa yang dag par bstan par bya ba dang / yang dag par bskul bar bya ba dang / yang dag par spro ba bskyed par bya ba rnams chags pa'i mtha' thams cad spong ba yin te/de la kun nas nyon mongs pa dang / bag med pa kun du zhum pa dang / yang dag par zhum par zhugs pa rnams yang dag par bstan pa dang / yang dag par bskul ba dang / yang dag par spro ba bskyed pa dang / yang dag par dga' ba bskyed pa rnams go rims bzhin du sbyar bar bya ba yin par rig par bya'o zhes bstan pa yin no//yang / rgyal la sogs la chags pa phra/ /zhes bstan pa ni gang de bzhin gshegs pa de dag gi dge ba'i rtsa ba la rjes su yi rang bas yongs su bsngo zhing yang mtshan mar byed pa ni chags pa phra mo zhes bstan to//yang ci'i phyir rnam pa de la chags pa zhes bya zhe na/ gang gi phyir/ chos kyi lam ni rang bzhin gyis/ /dben pa'i phyir na de zab nyid/ /ces bya ba smos te/ gang chos thams cad rang bzhin gyis dben pa'i phyir/ shes rab kyi pha rol tu phyin pa zab po zhes bstan pa yin no/ / yang chags pa thams cad ji lta bus spong zhe na/ chos rnams rang bzhin gcig par ni/ /shes pas chags pa spong ba yin/ /zhes bstan pa la/ gang chos rnams kyi rang bzhin gcig par shes pa ni shes pa dang / shes bya mnyam pa nyid du thob pa yin pa'i phyir chags pa'i mtha' can yongs su spong ba yin no zhes bstan to//yang ci'i phyir rgyus shes rab kyi pha rol tu phyin pa 'di zab mo yin zhe na/ gang gi phyir/ mthong ba la sogs bkag pa yis/ /de ni rtogs par dka' bar bshad/ /ces bya ba smos te/ gang mthong ba dang / thos pa dang / rtogs pa dang / rnam par shes par bya ba rnams bkag pa nyid kyis rtogs par dka' ba'i phyir shes bya mnyam pa nyid du zur gyis bstan pa yin no/ /yang ci'i rgyus/ shes rab kyi pha rol tu phyin pa 'di rtogs par dka' zhe na/ gang gi phyir/ gzugs la sogs pa mi shes phyir//de ni bsam gyis mi khyab 'dod/ /ces smos te/ gang gzugs nas sangs rgyas kyi chos ma 'dres pa'i bar du mi shes pa'i phyir te/ des bsam gyis mi khyab pa'i phyir shes pa mnyam pa nyid du zur gyis bstan te/ de ltar byas nas ji skad du/ /de ltar kun shes nyid lugs la//mi mthun phyogs dang gnyen po dag /rnam dbye ma lus 'dis shes bya/ /zhes bstan pa yin no/ /mi mthun pa'i phyogs dang gnyen po'i rnam par 'grel pa'o// //da ni sbyor ba brjod par bya ste/ gzugs de mi rtag la sogs pa/ /de ma rdzogs dang rab rdzogs dang //sbyor ba bkag pas spyod pa ni/ /de la chags pa med nyid dang / /mi 'gyur byed po med nyid dang / /sbyor ba bkag pa rnam gsum dang / /skal ba ji bzhin 'bras 'thob pas/ /de yi 'bras bu yid 'dod dang / /gzhan la rag las mi gang dang //shes byed rnam bdun snang ba las/ /zhes bstan pa yin no/ /sbyor ba de ni rnam pa bcur 'gyur te/ /de la gzugs la sogs pa'i sbyor ba ni/ gang gal te gzugs la mi spyod na shes rab kyi pha rol tu phyin pa la spyod do/ /zhes bya ba nas rnam pa thams cad mkhyen pa nyid kyi bar du spyod pa bkag nas/de ltar spyod pa ni rjes su gnang ba yin par bstan to/ /gzugs mi rtag pa'i rnam pa'i sbyor ba ni/ gang phung po la sogs pa nas rnam pa thams cad mkhyen pa nyid kyi bar du rtag pa dang / mi rtag pa dang / bde ba dang / sdug bsngal ba dang / bdag dang / bdag med pa dang / zhi ba dang / ma zhi ba'i rnam pa la spyod pa bkag pa ni/ de ltar spyod pa yang rjes su gnang ba yin te/ de ci'i phyir zhe na/ gzugs nas rnam pa thams cad mkhyen pa nyid kyi bar du de bzhin du med pa nyid du bstan to/ / gzugs la sogs pa rdzogs pa dang ma rdzogs pa'i sbyor ba ni gang gzhan yang gzugs la sogs pa yongs su rdzogs pa dang / ma rdzogs pa'i rnam pa la spyod pa bkag nas/ de ltar spyod pa yang rjes su gnang ba yin te/ de ci'i phyir zhe na/ de dag gi ngo bo yongs su rdzogs pa dang ma rdzogs pa bkag pa yin par bstan to//gzugs la sogs pa la chags pa med pa'i sbyor ba ni gang / de dag nyid la chags pa med par spyod pa nyid bkag pas yang de ltar spyod pa ni rjes su gnang ba yin no zhes bstan to/ /gzhan du mi 'gyur ba'i sbyor ba ni gang sbyor ba de mi 'gyur ba'i chos nyid bzung nas nam mkha'i dpes bstan pa yin no//de'i mdo ni rab 'byor 'di lta ste dper na/ nam mkha' ni bsngags pa brjod kyang 'phel ba med la/ ma brjod kyang 'grib pa med do/ /rab 'byor de bzhin du shes rab kyi pha rol tu phyin pa bstan kyang 'phel ba med la/ma bstan kyang 'grib pa med do/ /zhes gsungs pa yin no/ /byed pa po med pa'i sbyor ba ni gang sbyor ba de la ni byed pa por snang ba nyid nye bar bzung nas sgyu ma'i skyes bu'i bsngags pa brjod pa'am/ ma brjod pa gnyis kyis rjes su chags pa dang /khro ba med pa'i dpes de bzhin du 'phel ba dang / 'grib pa med do/ /dka' ba'i spyod pa ni rnam pa gsum ste/ gang de nyid kyi phyir/ byang chub sems dpa'i dka' ba nyid ni rnam pa gsum ste/ de la ched du bya ba'i dka' ba nyid ni rnam pa thams cad mkhyen pa nyid yin no/ / sbyor ba dka' ba nyid ni lam gyi rnam pa shes pa nyid yin no/ /bya ba rnams dka' ba nyid ni thams cad shes pa nyid yin te/ rim pa ji lta ba bzhin du sbyor bar 'dod pa dang / rtsol bar 'dod pa dang / bya bar 'dod pa zhes bya ba tshig rnam pa gsum dang ngo / /dka' ba'i tshig gsum gsal bar byed de//de la rnam pa thams cad mkhyen pa nyid kyis gang zhig sems can thams cad kyi don la sbyor bar 'dod pa'o/ /nam mkha' yongs su sgrol bar 'dod pa lam shes pa nyid kyis de la rtsol bar 'dod pa'o/ /nam mkha' bar snang la 'phang bar 'dod pa ni gang zhig thams cad shes pa nyid kyis de la bya bar 'dod pa'o//rnam pa gsum po des brtson 'grus kyi pha rol tu phyin pa thob par bstan to/ /de ci'i phyir zhe na/ phyogs bcu'i 'jig rten gyi khams kyi de bzhin gshegs pa thams cad kyis sems can tshad med pa yongs su mya ngan las 'da' bar mdzad kyang sems can gyi khams la 'bri ba'am /gang ba med pa ni nam mkha' go bgos pa'i dpes 'thad pa yin no/ /zhes bstan to/ /don yod pa'i sbyor ba nyid ni gang / de nas dge slong zhig gis zhes bya ba'i ming du ma bstan pa'i skyes bu'i rjes su mthun pa'i rtogs pa nye bar bkod nas 'khor gzhan dag gis kyang skal ba ji lta ba bzhin du rtogs pa thob par bstan pa yin no//gzhan gyi rkyen gyis mi 'gro ba'i sbyor ba ni brgya byin gyis bsrung ba dang / bskyang ba dang / bskyab par khas blangs pa ni sgyu ma dang / smig rgyu dang / rmi lam dang / sgra brnyan dang /mig yor dang / de bzhin gshegs pa'i sprul pa dang / yang dag pa'i mtha' dang / de bzhin nyid dang / bsam gyis mi khyab pa'i dbyings la bsrung ba la sogs par mi nus pa nyid kyi dpes shes rab kyi pha rol tu phyin pa la spyod pa'i byang chub sems dpa' rigs kyi bu'am/rigs kyi bu mo la yang dag par bsrung ba ni rnam par nyams shing dub pa'i skal ba can nyid du 'gyur te/ phyin ci ma log pa la gnas pa de nyid bsrung ba yin te/ phyin ci ma log par mi gnas na ni/ mi dang / mi ma yin pa de dag gis glags rnyed par 'gyur bas bsrung bar nus pa ma yin no//gzhan gyi lha rkyen gyis mi 'gro ba yin par gsal bar bstan to/ /shes byed rnam bdun bstan pa'i sbyor ba ni/ gang btsun pa rab 'byor ji tsam gyis byang chub sems dpa' la yongs su 'gyur bas chos thams cad rmi lam lta bur snang ba yin la/'dus pa'i sbyor bas sgyu ma lta bur snang ba yin/ 'gal bas smig rgyu lta bur snang ba yin/ rkyen gyis brag ca lta bur snang ba yin/ mi 'da' bas gzugs brnyan lta bur snang ba yin/ rten pa med pas dri za'i grong khyer lta bur snang ba yin/ byed pa po med pas thams cad sprul pa lta bur snang ba yin par yongs su shes par 'gyur/zhes bya ba nas brtsams te/ thams cad shes pa nyid nyan thos la sogs pa'i dbang du byas nas dpes don 'thad pa yin no/ /sbyor ba rnams bstan nas/ da ni mnyam pa nyid bstan pa'i phyir/ gzugs la sogs pa rlom med pa//rnam bzhi de yi mnyam pa nyid/ /ces bya ba smos pa sbyor ba'i don yin te/ de la 'di ltar rnam pa bzhir 'gyur te/ gzugs rlom sems su mi byed/ gzugs kyi rlom sems su mi byed/ gzugs la bdag gi rlom sems su mi byed/ gzugs la rlom sems su mi byed/ces bya ba dang / de bzhin du rnam pa thams cad mkhyen pa'i bar la yang brjod par bya'o/ /rlom sems rnam pa bzhi'i rnam par mi rtog pa'i shes pa bkag pa yin no/ /mnyam pa nyid kyi sbyor ba'i rnam par 'grel pa'o// //da ni mthong ba'i lam brjod par bya ste/de'i phyir sangs rgyas kyi mthus lha'i rigs thams cad kyi phyogs bcu'i phyogs re re zhing sangs rgyas stong dang / 'phags pa byams pa la sogs pa bskal pa bzang po'i sangs rgyas rnams shes rab kyi pha rol tu phyin pa zab mo 'di nyid lhag chad med par ston par mdzad par sems so//mthong ba'i lam gyis skad cig ma bcu drug las ma gtogs par skad cig ma gzhan med par shes par bya ba dang / dbang por gyur pa dgos pa'i phyir yin no/ /de la 'das pa'i sangs rgyas dper ma byas pa ni/ de'i bstan pa mthar thug pa'i sbyor ba shes par bya ba'i ched yin no//ma 'ongs pa smos pa ni ma 'ongs pa'i sems can rnams kyi don du de gos pa ston pa'i ched yin no/ /grangs stong du nges pas ni 'jig rten gyi khams mi mjed du bskal pa bzang po pa stong du gyur pa nyid kyi phyir thabs mkhas pas gzhan dag kyang bsgrub pa dang /dgag pa med par shes par bya ba'i don yin no/ /mthong ba'i lam gyi skad cig ma gang zhe na/ de'i phyir/ sdug bsngal la sogs dben pa la/ /chos shes rjes su shes bzod dang / /shes pa'i skad cig bdag nyid 'di/ /kun shes tshul la mthong ba'i lam//zhes bya ba smos pa ste/ de la sdug bsngal la chos shes pa'i bzod pa ni 'di yin te/ gang gzugs rtag ces bya ba'am/ mi rtag ces bya bar chos ston par 'gyur ro zhes bya ba nas brtsams te/ rnam pa thams cad mkhyen pa nyid 'das pa zhes bya ba'am/ ma 'ongs pa zhes bya ba'am/da ltar byung ba zhes bya bar chos ston par mi 'gyur ro zhes bya ba'i bar du bstan pa yin no/ /gnyen po dang mi mthun pa'i phyogs kyi rnam par rtog pa la phyin ci log tu zhen pa bkag pa'i phyir ro/ /sdug bsngal la chos shes pa ni gang gzugs rnam par dag go zhes rnam par dag pa'i chos ston par 'gyur ro zhes bya ba nas brtsams te/rnam pa thams cad mkhyen pa nyid kyi bar du rnam par dag go zhes bstan pa yin no/ /ji skad du bshad pa'i rnam par rtog pa gnyis po med cing / phyin ci ma log par rnam par dag pa'i chos ston par rjes su gnang ba yin pa'i phyir ro//sdug bsngal la rjes su shes pa'i bzod pa ni gang rab 'byor gzugs la sogs pa nas rnam pa thams cad mkhyen pa nyid kyi bar du yongs su dag pa'i phyir/ shes rab kyi pha rol tu phyin pa yongs su dag pa nyid do zhes bstan pa yin no//sdug bsngal la rjes su shes pa ni gang gzugs la sogs pa skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa yongs su dag pa'i phyir ro zhes bstan pa yin no/ /kun 'byung la rjes su shes pa'i bzod pa ni gang rnam pa de dag nam mkha' yongs su dag pa'i dpes de dag gi rnam pa yongs su dag go zhes bstan pa yin no//kun 'byung la chos shes pa ni gang de ltar de dag gi rnam pas gos pa med pa'i phyir ro zhes bstan pa yin no/ /kun 'byung la rjes su shes pa'i bzod pa ni gang /de ltar de dag gi rnam pas gzung du med pa'i phyir ro/ /kun 'byung la rjes su shes pa ni gang sgra brnyan gyi dpes de dag gi tha snyad kyi rnam pa med pas 'dir tha snyad kyi rnam pa don gyis bkag pa yin no zhes bstan to/ /'gog pa la chos shes pa'i bzod pa ni gang nam mkha' brjod du med pa'i phyir rnam pa brjod du med do//'dir yang gzhan gyi brgyud pa brjod pas de'i don gzhan gyi rtogs pa bkag pa yin no/ /'gog pa la chos shes pa ni de ltar rnam pa mi dmigs par bstan to/ /'gog pa la rjes su shes pa'i bzod pa ni gang chos thams cad shin tu rnam par dge bas mi dmigs pa'i skye ba med pa dang /'gag pa med pa dang / kun nas nyon mongs pa med pa dang / rnam par byang ba med pa'i rnam pa ni shes rab kyi pha rol tu phyin pa rnam par dag pa yin no zhes bya ba bstan to/ /'gog pa la rjes su shes pa ni gang de 'dzin pa dang /'chang ba dang / klog pa dang / tshul bzhin du yid la byed pa de la ni nad la sogs pa 'byung bar mi 'gyur ba dang / lha rnams kyang de'i phyi bzhin 'brang bar 'gyur ba dang / de ston pa der yang zhag gsum du lha'i tshogs chen po 'du bar 'gyur ba dang /chos ston pa bsod nams mang du 'phel ba nyid kyis chos gsum smos te/ de la lha rnams mchod par byed pa dang / blta ba dang / 'du bas ni shes par byed pa'i don yin no zhes bstan to/ /lam la chos shes pa'i bzod pa ni gang / shes rab kyi pha rol tu phyin pa'i rin po che thams cad shes pa'i dbang gis sdig pa thams cad zhi ba dang /rnam par byang ba'i phyogs shes pa'i rgyu mtshan yin pa'i phyir/ dga' bar byed pas ni rin po che zhes bya'o zhes bstan to/ /lam la chos shes pa ni gang / yang lam shes pa'i dbang gis chos 'ga' yang skye ba 'am/'gag pa med do zhes bya ba nas brtsams te/ 'dus byas dang / 'dus ma byas zhes bya ba'i bar du yang dag pa'i mtha' mngon sum du byas pas rnam par mi rtog pa'i phyir/ rtog pa med pa'i dge ba'i rang bzhin la ni rin po che zhes bstan to/ /lam la rjes su shes pa'i bzod pa ni gang yang rnam pa thams cad mkhyen pa nyid kyi dbang gis chos de dang de dag gi rnam pa dang /rtags dang mtshan ma rnams rtogs pa'i phyir chos la sogs pa'i rtog pa dang mi ldan pas gos pa med pa'i rin po che yin no zhes bstan to/ /lam la rjes su shes pa ni gang yang ji skad du/dkon mchog gsum gyi don rnam par mi shes pa dngos po'i yul shes pas rnam par rtog par yang mi byed/ de dag gi mtshan ma'i rnam par rtog pa mi dmigs pas gnyis su dmigs pa med pa'i phyir/ mngon par 'dod pa'i don yongs su rdzogs pa zhes bstan pa yin no/ /de'i mdor bsdus pa ni/gzugs rtag ma yin mi rtag min/ /mtha' las 'das dang rnam dag dang / /ma skyes ma 'gags la sogs dang / /mkha' 'dra chags pa spangs pa dang / /yongs su 'dzin las grol ba dang / /ngo bo nyid kyi brjod med dang / /gang phyir 'di yi don brjod pas//gzhan la sbyin du med pa dang / /dmigs pa med pa nyid dang ni/ /shin tu rnam dag nad mi 'byung / /ngan song chad dang 'bras bu ni/ /mngon du bya la mi rtog nyid/ /mtshan ma dag dang ma 'brel dang / /dngos dang ming dang gnyis po la/ / shes pa skye ba med pa ni/ /kun shes nyid kyi skad cig ma/ /zhes bstan pa yin no/ /de nyid ni rab 'byor shes rab kyi pha rol tu phyin pa ni chos gang yang thob par mi byed/ mthong bar mi byed/ thams cad shes pa nyid kyi dbang du byas te rdzogs par gsal bar bstan pa 'di dang /rab 'byor de ltar shes rab kyi pha rol tu phyin pa ni 'dod pa'i khams las shin tu 'da' ba ma yin te/ bzlog pa'i rim pas de ma thag tu lam shes pa'i dbang du byas pa rdzogs par bstan pa 'di dang / rab 'byor gzhan yang de ltar shes rab kyi pha rol tu phyin pa ni sangs rgyas kyi chos rnams sbyin par mi byed/'dus byas 'dor bar mi byed/ 'dus ma byas 'thob par mi byed de / rnam pa thams cad mkhyen pa nyid kyi dbang du byas pa rdzogs par gsal bar bstan pa yin no/ /de ltar 'di dang yang 'di zhes bya ba ni tshig phrad kyis shin tu khyad par byas nas gsum gyi dbang du byas pa khyad par du bstan to//de la dad pas ba spu langs pa'i sgra ni ca co'i sgra yin no/ /lhag ma'i tshig gi don ni 'grel pas bshad do/ /yang ci'i phyir lam shes pa nyid bzhin du thams cad shes pa la bsgom pa'i lam logs shig na med ce na/nyan thos dang / rang sangs rgyas kyi phun sum tshogs pa ni byang chub sems dpa'i shes pa dang / mthong bas bltas nas 'da' bar bya'o zhes gsungs pas 'di ni gzhan gtso bor byed pa yin no zhes bya bar dgongs so/ /gang gzhan yang rgyun tu zhugs pa nas rang sangs rgyas kyi bar gyi shes pa dang /spong ba gang yin pa de ni mi skye ba'i chos la bzod pa'i byang chub sems dpa'i bzod pa yin no zhes gsungs so/ /de ltar na gang / ji skad du/ shes pas srid la mi gnas shing / /snying rjes zhi la mi gnas dang / /thabs ma yin pas ring ba dang //thabs kyis ring ba ma yin nyid/ /mi mthun gnyen po'i phyogs dag dang / /sbyor dang de yi mnyam nyid dang / /mthong ba'i lam zhes bya ba yin/ /de 'drar kun shes nyid du 'dod/ /ces bstan pa yin no/ /de 'dir rjes su 'brel pa yin par blta bar bya'o//slob dpon rnam par grol ba'i sdes mdzad pa'i mngon par rtogs pa'i rgyan shes rab kyi pha rol tu phyin pa'i man ngag gi bstan bcos las thams cad shes pa'i rnam par 'grel pa'o// // thams cad shes pa nyid bstan nas/ da ni rnam pa kun mngon par rdzogs par rtogs pa'i phyir rnam pa kun mngon par byang chub pa ni yang kun mkhyen gsum po'i rnam pa bstan pa yin no//de la re zhig /dmigs pa'i khyad par bzung ba la/ /rnam pa zhes ni bya bar brjod/ /dmigs pa ni dmigs pa rnams so/ /rnam pa ni mi mthun pa'i phyogs gang gis gang zhig gnyen po'i phyogs ni chos yin te/dper na rtag par 'dzin pa'i mi rtag pa la sogs pa lta bu'o/ /gnyen po'i phyogs kyang kun mkhyen gsum gyis bsdus par bstan pa'i phyir/ kun mkhyen nyid ni rnam gsum phyir/ /de ni rnam pa gsum du 'dod/ / ces bstan pa yin no / /rnam pa zhes bya ba'i don to/ /de la 'phags pa'i bden pa bzhi'i rten can du byas pa kun mkhyen gsum gyi dbang du byas nas bden pa gang la rnam pa ji snyed yod pa de bstan pa'i phyir/ med pa'i rnam pa nas bzung ste/ /mi g.yo ba yi rnam pa'i bar/ /bden pa so so la bzhi dang //lam de la ni bco lngar bshad/ /ces bstan pa yin no/ /de la sdug bsngal gyi bden pa rnam pa bzhi'i dbang du mdzad nas/ /re zhig bcom ldan 'das 'di lta ste/ shes rab kyi pha rol tu phyin pa 'di ma mchis pa'i pha rol tu phyin pa'o/ /rab 'byor nam mkha' med pa nye bar bzung ba'i phyir ro zhes gsungs pa yin no//nyan thos la sogs pa'i rnam pa ni thams cad shes pa'i mi rtag pa'i rnam pa'i shes rab kyi pha rol tu phyin pa nam mkha' med pa'i dpes med pa'i don ni rnam pa yin no/ /de bzhin du tshig so so la yang bya bar don bshad pa dang 'brel to//mnyam pa nyid ces bya ba'i rnam pa ni de la 'di'i don bshad pa dang / mtshams sbyar ba ni/ ji skad du mdo las/ bcom ldan 'das 'di ni mnyam pa nyid kyi pha rol tu phyin pa lags so/ /rab 'byor chos thams cad mi dmigs pa nye bar bzung ba'i phyir ro zhes bya ba yin no//bde ba dang / sdug bsngal mi dmigs pa mnyam pa nyid kyi dbang du byas pa'i phyir ro/ / dben pa'i rnam pa ni ji skad du/ 'di ni dben pa'i pha rol tu phyin pa lags so/ /shin tu stong pa nyid nye bar bzung ba'i phyir ro zhes gsungs pa yin no//shin tu stong pa nyid ni bdag rang dbang gi rdzas kyis stong pa'i phyir ro/ /mi brdzi ba zhes bya ba'i rnam pa ni/ ji skad du/ 'di ni brdzi ba ma mchis pa'i pha rol tu phyin pa'o/ /chos thams cad dmigs su med par nye bar bzung ba'i phyir ro/ /bdag med pa'i rnam pas mi brdzi ba ni mu stegs can thams cad dang thun mong ma yin pa'i phyir ro//de ltar de dag rim pa ji lta ba bzhin du mi rtag pa dang / sdug bsngal ba dang / stong pa dang / bdag med pa'i rnam pa rnams sdug bsngal gyi bden pa'i rnam pa can yin par rig par bya'o//kun 'byung gi bden pa'i rnam pa'i dbye ba bzhi'i dbang du byas nas mi gnas pa zhes bya ba'i rnam pa ni/ ji skad du/ 'di ni gnas pa ma mchis pa'i pha rol tu phyin pa'o/ /ming dang lus med pa nye bar bzung ba'i phyir ro/ /rgyu ni bskyed pa'i rten yin pa'i phyir gnas zhes bya bar brjod do//de la ming ni gzugs med pa'i phung po bzhi'o/ /de ltar byas na de gnyi ga'i rgyu yin pa'i phyir ro/ /nam mkha'i rnam pa zhes bya ba ni dbugs dbyung ba dang / 'jug pa mi dmigs pa nye bar bzung ba'i phyir ro/ /sgrib pa med pa nye bar bzung ba'i phyir ro//brjod par mi rigs te/ nam mkha' mi sgrib pa'i mtshan nyid yin pa'i phyir ro/ /de lta yin pa bden mod kyi/ 'on kyang nang gi bdag nyid rtogs par bya ba'i phyir bstan pa yin te/ dbugs dbyung ba dang rngub pa gnyis ni de'i nang gi rtags su de dag de ltar bstan to//brjod du med pa'i rnam pa zhes bya ba ni dpyod pa mi dmigs pa nye bar bzung ba'i phyir ro zhes bya ba yin pa'i phyir ro/ /rtog cing dpyod nas brjod pa med pa'i phyir ro/ /ming med pa zhes bya ba'i rnam pa zhes bya ba ni tshor ba la sogs pa'i phung po mi dmigs pa nye bar bzung ba'i phyir ro zhes bya ba yin te/tshor ba la sogs pa'i phung po bzhi ni ming du byas pa'o/ /de ltar de dag rim pa bzhin du/ rgyu dang kun 'byung ba dang / rab tu skye ba dang / rkyen gyi rnam pa yin te/ kun 'byung gi bden pa'i rten can yin par rig par bya'o/ /'gog pa'i bden pa'i rnam pa dbye ba bzhi'i dbang du byas nas bstan pa 'gro ba med pa'i rnam pa zhes bya ba ni/ji skad du/ chos thams cad 'gro ba med pa nye bar bzung ba'i phyir ro zhes gsungs pa yin te/ 'gog pa lus kyi mngon sum byas pa ni 'gro ba thob par byas pa med pa nyid kyi phyir/ mi 'phrogs pa zhes bya ba'i rnam pa ni chos thams cad gzung du med pa nye bar bzung ba'i phyir ro zhes bya ba yin te/bzung ba thob pa'i yul nyid kyi ngo bo mi 'phrogs par byas pa'i phyir ro/ /mi zad pa bya ba'i rnam pa ni chos thams cad zad cing bya ba nye bar bzung ba'i phyir ro zhes bya ba yin no/ /skye ba med pa zhes bya ba'i rnam pa ni/ji skad du/ chos thams cad skye ba med pa dang / 'gag pa med pa nye bar bzung ba'i phyir ro zhes bya ba yin te/ de ltar de dag rim pa ji lta ba bzhin du 'gog pa dang / zhi ba dang / gya nom pa dang / nges par 'byung ba'i rnam pa yin te/ 'gog pa'i bden pa'i rten can yin par rig par bya'o/ /lam gyi bden pa'i rnam pa ni bco lnga ste/ bzhi ni nyon mongs pa'i gnyen por gyur pa yin no/ /lhag ma ni shes bya'i sgrib pa'i gnyen po yin no/ /de nyid snga ma'i dbang du byas nas gsungs pa la byed pa po med pa'i zhes bya ba'i rnam pa la/ji skad du/ byed pa po mi dmigs pa nye bar bzung ba'i phyir ro zhes bya ba gsungs pa yin no/ /shes pa po la sogs pa med pa zhes bya ba'i rnam pa ni shes pa po la sogs pa mi dmigs pa nye bar bzung ba'i phyir ro zhes bya ba yin no/ /'pho ba med pa zhes bya ba'i rnam pa ni 'chi 'pho ba dang /skye ba mi dmigs pa nye bar bzung ba'i phyir ro zhes bya ba yin no/ /dul ba med pa zhes bya ba'i rnam pa ni ji skad du/ chos thams cad rang bzhin gyis dul ba nye bar bzung ba'i phyir ro zhes gsungs pa yin no/ /de ltar de dag rim pa ji lta ba bzhin du lam dang /rigs pa dang / sgrub pa dang / nges par 'byin pa'i rnam pa yin te/ nyon mongs pa'i gnyen po lam gyi bden pa'i rten can yin par rig par bya'o/ /shes bya'i sgrib pa'i gnyen po'i phyogs kyi lam ni rnam pa gnyis te/bsgom pa'i lam zag pa dang bcas pa dang / mthong ba'i lam zag pa med pa'o/ /de la bsgom pa'i lam gyi rnam pa'i dbang du mdzad nas bstan pa ni rmi lam zhes bya ba'i rnam pa ni ji skad du/ rmi lam mthong ba dmigs su med pa nye bar bzung ba'i phyir ro zhes gsungs pa yin no//sgra brnyan zhes bya ba'i rnam pa ni sgra brjod pa dmigs su med pa nye bar bzung ba'i phyir ro zhes bya ba yin no/ /mig yor zhes bya ba'i rnam pa ni gzugs brnyan dmigs su med pa nye bar bzung ba'i phyir ro zhes bya ba yin no/ /smig rgyu zhes bya ba'i rnam pa ni chu'i phung po dmigs su med pa nye bar bzung ba'i phyir ro zhes bya ba yin no//sgyu ma zhes bya ba'i rnam pa ni mtshan ma dmigs su med pa nye bar bzung ba'i phyir ro zhes bya ba yin no/ /de ltar de dag rmi lam la sogs pa'i rnam pa lnga po rim pa ji lta ba bzhin du chos thams cad rang bzhin med pa dang /skye ba med pa dang / 'gag pa med pa dang / gdod ma nas zhi ba dang / rang bzhin gyis yongs su mya ngan las 'das pa zhes bya ba yin te/ lngas bsgom pa'i lam gyi rnam par gyur pa bstan to/ /shes bya'i sgrib pa'i gnyen po mthong ba'i lam rnam pa drug ni rnam par rtog pa spong ba yin par rnam par gzhag go//drug gang zhe na/ kun nas nyon mongs pa'i rtog pa spong ba gsungs pa la/ kun nas nyon mongs pa med pa zhes bya ba'i rnam pa ni ji skad du/ kun nas nyon mongs pa dmigs su med pa'i phyir ro zhes gsungs pa yin no/ / rnam par byang ba'i rnam par rtog pa spong ba ni gang rnam par byang ba'i rnam pa med do zhes bstan pa yin no/ /nyon mongs pa'i sems dmigs su med pa nye bar bzung ba'i phyir ro zhes bya ba yin no/ /bag chags kyi rnam par rtog pa spong ba ni gang rnam pa dmigs su med pa'i phyir ro zhes bstan pa yin te/nam mkha' dmigs su med pa nye bar bzung ba'i phyir ro zhes bya ba yin no/ /spros pa spang ba ni gang spros pa zhes bya ba'i rnam pa ni zhes bstan pa yin no/ /spros pa thams cad bcom pa nye bar bzung ba'i phyir ro zhes bya ba yin no/ /spros pa zhes bya ba ni gang gzugs la sogs pa chos su 'du shes pa yin par rig par bya'o//rang gi rtog pa spong ba ni gang rlom sems kyi rnam pa med do zhes bstan pa yin no/ /rlom sems thams cad yang dag par bcom pa nye bar bzung ba'i phyir ro zhes bya ba yin no/ /yongs su nyams pa'i rnam par rtog pa spong ba ni gang mi g.yo ba'i rnam pa yin no zhes bstan pa yin no//ji skad du mdo las/ bcom ldan 'das 'di ni mi g.yo ba'i pha rol tu phyin pa'o/ /rab 'byor chos kyi dbyings gnas pa nyid nye bar bzung ba'i phyir ro/ /de ltar de dag nyon mongs pa dang / shes bya'i sgrib pa'i gnyen po'i bye brag gis lam gyi bden pa'i rten can gyi rnam pa ni bco lngar gyur pa yin no//thams cad shes pa nyid bstan nas lam shes pa nyid brjod par bya ste / de la bden pa rnams kyi don gyi go rims ji lta ba bzhin du blta bar bya'o/ /don ji lta bu yin zhe na/kun nas nyon mongs pa dang / rnam par byang ba'i phyogs kyi dbang du byas nas kun 'byung dang / lam gyi bden pa gnyis ni rgyu yin no/ /sdug bsngal dang / 'gog pa gnyis ni 'bras bu yin pas na/ 'di ltar/ rgyu dang lam dang sdug bsngal dang / / 'gog pa dang bcas go rims bzhin/ /de dag brgyad dang bdun dang ni/ /lnga dang bco lnga zhes sgrogs so/ / zhes bstan to/ /skabs kyi rnam pa zhes bya ba yin no/ /de la rgyu ni 'dun pa dang / 'dod chags dang / dga' ba yin te/ yang srid pa 'byung ba'i phyir ro//'di ltar 'dun pa'i gnyen po ni 'dod chags dang bral ba'i rnam pa yin par bstan to/ /'dod chags de dmigs su med pa nye bar bzung ba'i phyir ro zhes bya ba yin no/ /byed 'dod pa'i dngos po'i dbang du byas nas 'dod chags kyi gnyen po ni mi gnas pa'i rnam pa yin par bstan to//chos thams cad rnam par rtog pa med pa nye bar bzung ba'i phyir ro zhes bya ba yin te/ de dag la chags pa med pa'i dbang du byas nas srid pa'i gnyen po ni zhi ba'i rnam pa yin par bstan to/ /chos thams cad ma nor ba de bzhin nyid kyis mngon par byang chub pa nye bar bzung ba'i phyir ro zhes bya ba yin no//sred pa ni ma zhi ba gtso che ba yin pas de ltar byas pa yin no/ /kun 'byung gi dbye ba ni gsum ste/ 'dod chags kun 'byung ba dang / zhe sdang kun 'byung ba dang / gti mug kun 'byung ba'o/ /de dag gi gnyen po ni 'dod chags med pa'i rnam pa yin par bstan to//'dod chags dmigs su med pa nye bar bzung ba'i phyir ro zhes bya ba yin no/ /'dod chags kyi rang bzhin gyi dbang du byas pa de bzhin du zhe sdang med pa'i rnam pa yang yin no/ /zhe sdang dmigs su med pa nye bar bzung ba'i phyir ro zhes bya ba yin no//gti mug med pa'i rnam pa yin te/ gti mug gi mun pa dmigs su med pa nye bar bzung ba'i phyir ro zhes bya ba yin no/ /rab tu skye ba ni kun du rtog pa ste/ de la 'dod chags la sogs pa skye ba de'i gnyen po ni nyon mongs pa med pa'i gnyen po yin par bstan to//kun du rtog pa med pa nye bar bzung ba'i phyir ro zhes bya ba yin no/ /rkyen ni sems can du zhen pa dang / 'jig tshogs la lta ba yin te/ dngos po thams cad kyi rkyen yin pa'i phyir ro/ /gnyen po ni sems can med pa'i rnam pa yin no zhes bstan to/ /sems can dmigs su med pa nye bar bzung ba'i phyir ro zhes bya ba yin no//de ltar byas pa dang / rgyu ni gang 'dod chags dang / dga' ba'o/ /kun 'byung ba ni gang 'dod chags dang / zhe sdang dang / gti mug go/ rab tu skye ba ni gang kun du rtog pa yin no/ /rkyen ni gang sems can du mngon par zhen pa zhes bya ba yin te/kun 'byung gi bden pa'i rten can gyi rnam pa ni brgyad du gyur pa yin no/ /de la lam gyi bden pa'i dbang du byas nas gsungs pa la tshad med pa'i rnam pa yin no/ /chos thams cad kun nas ldang ba med pa nye bar bzung ba'i phyir ro zhes bya ba yin no/ / sems can tshad med pa'i go skabs 'byed pa nyid du dgongs pa yin no/ /yang ji ltar na/ lam sems can dpag tu med pa'i go 'byed pa yin zhe na/ mtha' gnyis su rtog pa med pa'i rnam pa yin no zhes bstan to/ /mtha' gnyis dmigs su med pa nye bar bzung ba'i phyir ro zhes bya ba yin no//'khor ba dang mya ngan las 'das pa mnyam pa nyid du rtogs pa'i phyir ro zhes dgongs pa yin no/ /de la rigs pa gang tha dad pa med pa'i rnam pa yin no zhes bstan to/ /chos thams cad tha dad pa med pa nye bar bzung ba'i phyir ro zhes bya ba yin no/ / tha dad pa med pa'i chos nyid kyis lam ma lus pa theg pa gcig pa yin te/ de la rigs pa zhes bya na/ ci'i phyir ma lus pa yin zhe na/ mchog tu 'dzin pa med pa'i rnam pa yin no zhes bstan te/ nyan thos dang / rang sangs rgyas kyi byang chub las 'das pa nye bar bzung ba'i phyir ro zhes bstan pa yin no//theg pa dman pa 'dod pa med pa'i dbang du byas nas de la bsgrub pa ni gang rtogs pa med pa'i rnam pa yin no zhes bstan to/ /rnam par rtog pa dmigs su med pa nye bar bzung ba'i phyir ro zhes bya ba yin no/ /bya ba'i rnam par rtog pa med pa'i dbang du byas nas so sor yul rtogs pa med pa'i gnas ni bsgrub pa zhes bya ba yin pa'i phyir ro//yang ji ltar na de la bya ba'i rnam par rtog pa med ce na/ dpag tu med pa rnam pa yin no zhes bstan to/ /chos thams cad kyi tshad dmigs su med pa nye bar bzung ba'i phyir ro zhes bya ba yin no//thob pa yongs su spangs pa dang / ma thob pa'i thob pa dman pa dang / mchog tu gyur pa'i rtog pa med pa sngon du 'gro bas de la nges par 'byung ba ni gang chags pa med pa'i rnam pa yin no zhes bstan to/ /chos thams cad nam mkha'i rang bzhin nye bar bzung ba'i phyir ro zhes bya ba yin no//de dang de'i chos rtogs pa'i nges par 'byung ba'i dbang du byas nas/ de ltar byas kyang ji ltar sems can thams cad la lam go 'byed pa gang yin pa dang / ji ltar sems can thams cad go 'byed pa dang / rigs pa gang yin pa dang /ji ltar rigs pa gang yin pa dang / sgrub pa gang yin pa dang / ji ltar sgrub pa gang yin pa dang / gang yang nges par 'byung ba yin pa ste/ lam gyi bden pa'i rten can gyi rnam pa ni bdun du 'gyur ro/ /sdug bsngal gyi bden pa'i dbang du byas nas gsungs pa la mi rtag pa rnam pa yin no zhes bstan to//chos thams cad 'jig pa med pa nye bar bzung ba'i phyir ro zhes bya ba yin no/ /'jig pa med pa las don gzhan ma yin pa'i dbang du byas nas sdug bsngal ni rnam pa yin no zhes bstan to/ /chos thams cad gdod ma nas nye bar bzung ba'i phyir ro zhes bya ba yin no//de dag ni bde bar phyin ci log tu mngon par zhen pa stong pa yin pa'i phyir ro zhes bya ba yin no/ /chos thams cad dmigs su med pa nye bar bzung ba'i phyir ro zhes bya ba yin no/ /bdag gi rdzas mi dmigs pa'i phyir ro zhes bya ba'i don to//bdag med pa ni rnam pa yin no zhes bstan to/ /chos thams cad mngon par zhen pa med pa nye bar bzung ba'i phyir ro zhes bya ba yin no/ /gang rang bzhin du mngon par zhen pa med pa'i phyir ro zhes bya ba'i don to/ /yang ji ltar byas nas gang du brtags pa'i mtshan ma rnams kyi yang chos rnams la mngon par zhen pa med pa yin zhe na/mtshan ma med pa'i rnam pas yin no zhes bstan to/ /chos thams cad mtshan ma med pa nye bar bzung ba'i phyir ro zhes bya ba yin no/ /de rnams 'gog pa'i mtshan nyid sngon du 'gro ba'i phyir ro//de ltar mngon du byas pas bzhi po mi rtag pa la sogs pa'i rnam pa gang yin pa dang / yang rang bzhin gang yin pa sdug bsngal gyi bden pa'i rten can rnam par gyur pa ni lnga yin no/ /de 'gog pa'i rnam pa lnga ni dngos po 'gog pa nang gi mtshan nyid can la sogs pa dngos po'i dbye bas rnam pa gsum te /gang nang gi chos rnams kyi stong pa ni rnam pa yin no zhes bstan to/ /nang gi bdag nyid can gyi chos rnams dmigs su med pa nye bar bzung ba'i phyir ro zhes bya ba yin no/ /phyi'i bdag nyid kyis stong pa ni rnam pa yin te/phyi'i chos rnams dmigs su med pa nye bar bzung ba'i phyir ro zhes bya ba yin no/ /phyi dang nang gi stong pa ni rnam pa yin te/ phyi dang nang gi chos rnams dmigs su med pa nye bar bzung ba'i phyir ro zhes bya ba yin no/ /btags pa'i 'gog pa rnam pa brgyad ni mngon par zhen pa'i dbye bas gnyen po rnam pa brgyad yin no//stong pa nyid la mngon par zhen pa'i 'gog pa ni gang stong pa nyid ni rnam pa yin no zhes bstan to/ /stong pa nyid stong pa nyid dmigs su med pa nye bar bzung ba'i phyir ro zhes bya ba yin no/ /'od srungs gang zag tu lta ba ri rab tsam mchog yin gyi mngon par nga rgyal ba ni de lta ma yin no//stong pa nyid du lta ba yin par bstan to/ /snod kyi 'jig rten gyi dbyibs la zhen pa'i 'gog pa ni gang chen po stong pa nyid kyi rnam pa yin no zhes bstan to/ /chen po stong pa nyid nye bar bzung ba'i phyir ro zhes bya ba yin no//phyogs dang / mtshams stong pa nyid kyi dbang du byas pa nyid yin no/ /don dam par mngon par zhen pa'i 'gog pa ni gang don dam pa stong pa nyid kyi rnam pa yin no zhes bstan pa yin no/ /don dam pa stong pa nyid dmigs su med pa nye bar bzung ba'i phyir ro zhes bya ba yin no//de la stong pa nyid du lta bas byas pa'i gnyen po yin no/ /don dam pa ni gnyen po ma yin te/ yongs su grub pa tsam yin te de ni stong pa nyid dang / /don dam par mngon par zhen pa'i khyad par yin no/ /'dus byas su mngon par zhen pa'i 'gog pa ni gang 'dus byas stong pa nyid rnam pa yin no zhes bstan to//'dus byas stong pa nyid dmigs su med pa nye bar bzung ba'i phyir ro zhes bya ba yin no/ /'dus ma byas su mngon par zhen pa'i 'gog pa ni gang 'dus ma byas stong pa nyid dmigs su med pa nye bar bzung ba'i phyir ro zhes bya ba yin no/ / rtag pa dang / chad pa'i mngon par zhen pa'i 'gog pa ni gang shin tu stong pa nyid dmigs su med pa nye bar bzung ba'i phyir ro zhes bya ba yin no/ /mtha' ni mtha' las 'das pa nyid du mngon par 'dod pa dang / thog ma dang tha ma 'khor bar mngon par zhen pa 'gog pa ni gang thog ma dang tha ma med pa stong pa nyid rnam pa yin no zhes bstan to//thog ma dang tha ma med pa stong pa nyid dmigs su med pa nye bar bzung ba'i phyir ro zhes bya ba yin no/ /mang du rtogs par byed pa byang chub kyi phyogs kyi chos rnams dor ba med pa'i mtshan nyid rnam pa la mngon par zhen pa'i 'gog pa ni gang dor ba med pa stong pa nyid rnam pa yin no zhes bstan to//dor ba med pa stong pa nyid dmigs su med pa nye bar bzung ba'i phyir ro zhes bya ba yin no/ /de dag ni btags pa'i 'gog pa'i dbye bas rnam pa brgyad ni zhi ba'i rnam pas bsdus pa yin par rig par bya'o//'phags pa thams cad kyi mdzad pa'i rang bzhin zhes bya ba des ni byed pa po 'gog pa yin te/ rnam pa yin par rig par bya'o/ /yul la 'khrul pa'i 'gog pa ni rnam pa gnyis te/ btags pa la 'khrul pa'i 'gog pa'i rnam pa ni gang chos thams cad stong pa nyid rnam pa yin no zhes bstan to//chos thams cad dmigs su med pa nye bar bzung ba'i phyir ro zhes bya ba yin no/ /chos thams cad btags pa tsam du byas pa nyid la 'khrul pa'i 'gog pa ni gang rang gi mtshan nyid stong pa nyid dmigs su med pa nye bar bzung ba'i phyir ro zhes bya ba yin no//gzugs la sogs pa rnams gzugs la sogs pa rnams kyi rang gi mtshan nyid kyis dben pa'i dbang du byas pa'i rang bzhin 'gog pa ni gang dngos po med pa'i ngo bo nyid rnam pa yin no zhes bstan to/ /dngos po med pa'i ngo bo nyid stong pa nyid dmigs su med pa nye bar bzung ba'i phyir ro zhes bya ba yin no//yul la 'khrul pa'i 'gog pa dang / rang bzhin gyis 'gog pa 'di gnyis ni nges par 'byung ba'i rnam pa yin par rig par bya'o/ /de ltar byas na nang gi bdag nyid can gyi dngos po ni 'gog pa gang yin pa dang / ji ltar yang zhi ba yin zhe na/ mngon par zhen pa brgyad log pa'i phyir ro/ /ji ltar gya nom pa yin zhe na/ rang nyid yin pa'i phyir ro/ /yang ji ltar nges par 'byung ba yin zhe na/ gnyis su 'khrul pa bkag pa'i phyir ro/ /gang yang nges par 'byung zhe na/ dngos po med pa'i ngo bo nyid do//de ltar na de dag dngos po'i 'gog pa dang / byed pa po 'gog pa dang / yul la 'khrul pa 'gog pa dang / dngos po gzhan 'gog pa'i dbang du byas te/ rim pa ji lta ba bzhin du gsum dang / brgyad dang / gcig dang / gnyis dang / gcig ni 'gog pa'i bden pa'i rten can gyi rnam par gyur pa ni bco lnga'o/ /lam shes pa nyid bstan nas rnam pa thams cad mkhyen pa'i rnam pa brjod par bya'o/ /de la 'phags pa'i gang zag thams cad kyi dbang du mdzad nas kun mkhyen rnam pa gsum gyis bsdus par 'gyur ba yin pa de bas na/dran pa nyer gzhag nas bzung ste/ /tha ma sangs rgyas nyid rnam pa/ /slob ma byang chub sems dpa' dang / /sangs rgyas rnams la rim bzhin te/ /sum cu bdun dang sum cu bzhi/ /sum cu rtsa dgu dag tu bzhed/ /ces bstan pa yin no/ /ji lta bu zhig ce na/kun mkhyen gsum gyi bye brag gis/ /lam gyi bden pa dang mthun par/ /zhes smos so/ /de dang rjes su mthun pa'i lam gyi bden pa ni lam 'di gsum yin te/ thams cad shes pa nyid kyi lam dang / rnam pa thams cad mkhyen pa nyid de/ de la thams cad shes pa nyid kyi lam rnam pa sum cu rtsa bdun las gzhi yongs su shes pa'i lam ni dran pa nye bar gzhag pa ste/gang dran pa nye bar gzhag pa ni rnam pa yin te zhes bstan pa yin no/ /lus dang / tshor ba dang / sems dang / chos dmigs su med pa nye bar bzung ba'i phyir ro zhes bya ba yin no//rnam pa bzhi po de dag ni gzhi yongs su rtog pa yin no/ /rtsol ba'i lam yang dag par spong ba ni gang yang dag par spong ba ni rnam pa yin te zhes bstan pa yin no/ /dge ba dang / mi dge ba'i chos rnams dmigs su med pa nye bar bzung ba'i phyir ro zhes bya ba yin no//de bzhin du dngos po la yongs su brtags nas sgrib pa med pa'i spong ba'i brtson 'grus rtsom mo/ /ting nge 'dzin yongs su sbyong ba'i lam ni rdzu 'phrul gyi rkang pa rnams ni rnam pa yin te zhes bstan pa yin no/ /'dun pa dang / brtson 'grus dang / sems dang / dpyod pa rnams dmigs su med pa nye bar bzung ba'i phyir ro zhes bstan pa yin no/ /de bzhin du sgrib pa yongs su sbyong bas ni 'dun pa la sogs pa'i sgo nas de dag gi gnas pa las su rung bar byed pa'i phyir ro/ /mngon par rtogs pa dang 'brel pa'i lam dbang po rnams ni gang dbang po'i rnam pa yin te zhes bstan pa yin no//dad pa la sogs pa dmigs su med pa nye bar bzung ba'i phyir ro zhes bya ba yin no/ /de ltar byas na ting nge 'dzin yongs su sbyong ba'i lam gyis de ni 'phags pa'i yang dag par skyed pa la dbang du gyur pa dro ba sngon du 'gro ba'i sbyor bas rtse mo'i mngon par rtogs pa dang 'brel pa'i lam ni stobs rnams te/gang stobs rnams ni rnam pa yin te zhes bstan pa yin no/ /stobs rnams dmigs su med pa nye bar bzung ba'i phyir ro zhes bya ba yin no/ /de ltar dbang thob nas des mjug thogs su bden pa rtogs na ma dad pa la sogs pa mi mthun pa'i phyogs zil gyis mnan nas bzod pa dang /chos kyi mchog gi sbyor bar gyur pa'i phyir mngon par rtogs pa'i lam byang chub kyi yan lag rnams yin te/ gang byang chub kyi yan lag gi rnam pa ni rnam pa yin no zhes bstan to//byang chub kyi yan lag rnams dmigs su med pa nye bar bzung ba'i phyir ro zhes bya ba yin no/ /de la dngos po so sor rang gis rig pa'i de kho na nyid mngon par rtogs pa'i phyir rnam par dag par nges par 'byin pa'i lam 'phags pa'i lam yan lag brgyad pa'i lam ste/gang 'phags pa'i lam ni rnam pa yin no zhes bstan pa yin no/ /'phags pa'i lam yan lag brgyad pa dmigs su med pa nye bar bzung ba'i phyir ro zhes bya ba yin no/ /de'i 'og tu bsgoms pas spang bar bya ba'i nyon mongs pa rnam par dag par bya ba'i phyir nges par 'byung ba yin te/de bas na byang chub kyi phyogs de rnams kyi go rims ni 'di yin te/ de ltar byas na dngos po yongs su rtog pa'i lam dang / rtsol ba'i lam dang / ting nge 'dzin yongs su sbyong ba'i las kyi lam dang / mngon par rtogs pa la sbyor ba'i lam dang / mngon par rtogs pa dang 'brel pa'i lam dang /mngon par rtogs pa'i lam dang / nges par 'byed pa'i lam gyi dbang du mdzad nas go rims ji lta ba bzhin du bzhi dang / bzhi dang / bzhi dang / lnga dang / lnga dang / bdun dang brgyad kyi dbye ba rnams thams cad shes pa'i lam gyi rten can gyi rnam pa ni sum cu rtsa bdun du bstan to//de la lam shes pa nyid kyi lam rnam pa drug las gnyen po'i lam ni rnam pa gsum yin te/ lta bas byas pa'i gnyen po ni stong pa nyid yin no/ /mtshan ma dang rtog pa'i gnyen po ni mtshan ma med pa'o/ /khams gsum du smon pa'i gnyen po ni smon pa med pa yin te/rnam par thar pa gsum ni rnam pa yin te zhes bstan pa yin te/ lta ba dang / rnam par rtog pa dang / smon pa dmigs su med pa nye bar bzung ba'i phyir ro zhes bya ba yin no/ /de la stong pa nyid dang / bdag med pa dag ni rnam par thar pa'i sgo dang po'o// mi rtag pa dang / sdug bsngal ba dang / rgyu dang / kun 'byung ba dang / rab tu skye ba dang / rkyen gyi rnam pa ni smon pa med pa'o/ /'gog pa dang / lam gyi rnam pa ni mtshan ma med pa yin par rig par bya'o/ /lam gyi rtog pa med pa ni mtshan ma med pa'o zhes bya'o//ji skad du/ mtshan ma med pa ni zhi ba'i rnam pa yin no zhes bya ba de dang 'di 'gal ba med do/ /mtshan ma med pa gang yin pa de ni 'gog pa ste/ gang gi phyir lam gyis mtshan ma med par byas pa'i phyir ro/ /sems can gyi don byed pa lam shes pa'i 'bras bu yin gyi spangs pa ni 'bras bu ma yin no//sems can gyi don yang sprul pa med par ma yin pas sprul pa'i lam ni rnam pa gnyis te/ gzugs kyi 'du shes rnam par ma zhig pa ni bdag nyid bsam gtan nam/ gzugs med pa'i snyoms par 'jug pa la brten nas gzugs kyi 'du shes mngon sum du byed pa ste//gang gzugs can gzugs kyi kha dog bzang po dang / ngan pa rnams la lta ba'o/ /gzugs kyi 'du shes rnam par zhig pa ni bdag nyid kyi de bzhin du phyi rol gyi gzugs kyi 'du shes mngon du byed pa ste/ gang gis nang gzugs med par 'du shes shing phyi rol gyi gzugs rnams la lta ba'o zhes gsungs pa yin te/gnyis po 'di dag ni sprul pa'i sgrib pa'i gnyen po yin pas rnam par thar pa'i sgo gnyis pa yin par shes par bya'o/ /sprul pa'i kun nas nyon mongs pa ni rnam pa gnyis te/sdug pa'i gzugs la dga' ba dang / mi sdug pa'i gzugs su sprul pa la mi dga' ba'o/ /de'i gnyen por sdug pa'i rnam par thar pa'i lus kyis mngon sum du rdzogs par byas te gnas so zhes gsungs pa yin te/ bdag nyid kyi sdug pa dang / mi sdug pa'i gzugs rnams la phan tshun ltos pa'i 'du shes dang / /gcig la gcig rjes su 'brel pa'i shes pa la brten nas phan tshun ro gcig pa'i 'du shes thob pas ci 'dod pa'i gzugs la lhag par mos pa la dbang thob pa yin pa'i phyir ro/ /mthong ba'i chos la bde bar gnas pa'i lam rnam pa gnyis las thar pa'i cha dang mthun par gnas pa'i lam ni gzugs med pa'i snyoms par 'jug pa rnam pa bzhi'o//zhi bar gnas pa'i rnam par thar pa'i sgrib pa chags pa med pa'i phyir ni 'du shes dang / tshor ba 'gog pa zhes bya ba yin no/ /gzhan gyi sprul pa'i dbang du byas pa gsum dang /bdag gi don mthong ba'i chos la bde bar gnas pa gzhan gyi ched du byas pa'i dbang du bya ba'i lam lnga ste/ rnam par thar pa brgyad du 'gyur ro/ /de bas na rnam par thar pa brgyad ni rnam pa yin no zhes bstan to/ /rnam par thar pa brgyad dmigs su med pa nye bar bzung ba'i phyir ro zhes bya ba yin no//'jig rten las 'das pa'i lam mthar gyis gnas pa'i snyoms par 'jug pa dgu ni 'gog pa'i snyoms par 'jug pas 'jig rten las 'das pa'i lam 'thob pa'i phyir ro/ /gang mthar gyis gnas pa'i snyoms par 'jug pa dgu ni rnam pa yin te zhes bstan pa yin no//mthar gyis gnas pa'i snyoms par 'jug pa dgu dmigs su med pa nye bar bzung ba'i phyir ro zhes bya ba yin no/ /spong ba'i lam bden pa bzhi'i rten can de ma thag pa'i lam yin te/ gang bden pa bzhi ni rnam pa yin te zhes bstan pa yin no//kun 'byung ba dang / 'gog pa dmigs su med pa nye bar bzung ba'i phyir ro zhes bya ba yin no/ /sangs rgyas nyid kyi lam ni gang pha rol tu phyin pa bcu ste/ gang pha rol tu phyin pa bcu ni rnam pa yin te zhes bstan to/ /pha rol tu phyin pa bcu dmigs su med pa nye bar bzung ba'i phyir ro zhes bya ba yin no//de ltar na gnyen po'i lam dang / sprul pa'i lam dang / mthong ba'i chos la bde bar gnas pa'i lam dang / 'jig rten las 'das pa'i lam dang / spong ba'i lam dang / sangs rgyas kyi lam ste/de dag gi dbang du mdzad nas rim pa ji lta ba bzhin du gsum dang / gsum dang / lnga dang / dgu dang / bzhi dang / bcu ste/ lam shes pa'i rten can gyi rnam pa ni sum cu rtsa bzhir 'gyur ro/ /de la rnam pa thams cad mkhyen pa nyid kyi lam ni shin tu phul du byung ba'i phyir gcig nyid yin mod kyi/stobs dang mi 'jigs pa la sogs pa'i dbye bas rnam pa'i dbye ba thun mong ma yin pa brjod par bya'o/ /'dir stobs bcu ni rnam pa yin no zhes bstan to/ /chos thams cad dmigs su med pa nye bar bzung ba'i phyir ro zhes bya ba yin no/ /chos rnams kyi rnam pa chos nyid thob pa yin pa'i phyir ro zhes bstan to//lam gyi rnam pa shes pa nyid dmigs su med pa nye bar bzung ba'i phyir ro zhes bya ba yin no/ /lam thams cad mngon par shes pa'i dbang du byas nas so sor rig pa ni rnam pa yin no zhes bstan to/ /rnam pa thams cad mkhyen pa nyid chags pa med pa dang /thogs pa med pa nye bar bzung ba'i phyir ro zhes bya ba yin no/ /thams cad kyi grangs dang / chos kyi mtshan nyid dang / yul gyi skad rnams dang / chos rab tu dbye ba'i yul la go rims bzhin du so so yang dag par rig pa ye shes kyi rtogs pa nyams su myong ba chags pa med pa'i phyir dang /shes bya'i sgrib pa spangs pas thogs pa med pa'i phyir ro zhes bya ba'i don to/ /sangs rgyas kyi chos ma 'dres pa rnams ni rnam pa yin te/ zhes bstan pa ma yin no/ /chos thams cad las 'das pa nye bar bzung ba'i phyir ro zhes bya ba yin no//ma 'dres pa de dang der mi mthun pa'i phyogs kyi chos gang dang gang yin pa de de dang de las yang dag par 'das pa'i dbang du mdzad nas/ mdo las/ dge slong dgra bcom pa zag pa zad pa lan 'ga' grong du bsod snyoms la rgyu ba na glang po che gtum po'am/rta mi bgrungs pa'am/ ba lang brdung pa'am/ khyi za le ba dang bcas par 'gro ba dang / tshang tshing ngam/ tsher ma'i nags su 'gro ba dang / sbrul nag po la rkang pas brdzi ba dang / de lta bu'i tshul gyis khyim du zhugs pa dang / gang na bud med kyi yul mi rigs par smra bas mgron du bos pa'am/dgon pa'am/ yang na lam gol bar 'gro zhing / lam bor ba dang / rkun po dang / dgra dang bcas par 'gro ba dang / seng ge dang / stag dang / gzhan gyi chung ma dag gis de de ltar bsten pa na dgra bcom pa ni 'khrul par 'gyur gyi de bzhin gshegs pa la rnam pa thams cad kyi thams cad du mi mnga'o zhes gsungs pa dang /gzhan yang 'ga' zhig tu dgra bcom pa dgon pa nags khrod stug por 'gro ba na lam nor ba dang / khang pa stong par sgra sgrogs pa dang / ku co 'don par byed pa dang / snying rje rje ltar 'o dod 'bod pa dang / bag chags kyi nyes pa kun du bskyod pas nyon mongs pa dang / rta gad chen pos dgod cing so ston pa dang / steg tshul du 'dzum yang nye bar ston to/ /de lta bu'i cha dang ldan pa'i ca co de dag ni de bzhin gshegs pa la rnam pa thams cad kyi thams cad du mi mnga'o//de bzhin gshegs pa la dran pa nyams pa mi mnga' ste/ nyon mongs pa'i sems kyis byas pa'i ngag gi rjes su 'gro ba mi mnga' ba'i phyir ro/ /gzhan yang dgra bcom pa ni phung po la gcig tu mi mthun pa'i 'du shes bskyed cing phung po lhag ma med pa'i mya ngan las 'das pa la zhi ba'i 'du shes can yin la/de bzhin gshegs pa la phung po dang / mya ngan las 'das pa sna tshogs pa'i 'du shes mi mnga' ste/ btang snyoms mchog gis bzhugs pa'i phyir ro/ /gzhan yang dgra bcom pa ni snyoms par zhugs nas mnyam par gzhag pa yin gyi ldang ba na mnyam par gzhag pa ma yin no//de bzhin gshegs pa ni gnas skabs thams cad du thugs mnyam par ma gzhag pa mi mnga'o/ /gzhan yang dgra bcom pa ni so sor brtags nas sems can gyi don byed pa la btang snyoms su byed kyi/ de bzhin gshegs pa ni 'di ni 'di lta bu'i tshul can zhes so sor ma brtags pa'i btang snyoms mi mnga'o//gzhan yang dgra bcom pa ni shes bya'i sgrib pa rnam par dag pa nas brtsams te/ ma thob pas yongs su nyams pas 'dun pa dang / brtson 'grus dang / dran pa dang / ting nge 'dzin dang / shes rab dang / rnam par grol ba las yongs su nyams pa yin te/nyams pa drug po de dag de bzhin gshegs pa la mi mnga'o/ /gzhan yang dgra bcom pa ni res 'ga' lus kyi dge ba'i las la 'jug /res 'ga' ni lung du ma bstan pa'o/ /ngag dang yid kyi las la yang de bzhin no/ /de bzhin gshegs pa ni las gsum char yang ye shes sngon du 'gro zhing ye shes kyi rjes su 'brang ba nyid kyis lung du ma bstan pa mi mnga'o//de la ye shes kyis kun nas bslang ba yin pa'i phyir ye shes sngon du 'gro ba yin no/ /ye shes dang lhan cig spyod pa'i phyir ye shes kyi rjes su 'brang ba yin no//gzhan yang dgra bcom pa ni dus gsum gyi dngos po 'bad pa med par shes par mi 'gyur te/ gang gis 'di dag la chags pa dang / thogs pa'i ye shes mthong bar 'gyur ba yin gyi gang gis 'di dag la chags pa dang / chags pa med pa'i ye shes kyi mthong ba 'jug pa ni ma yin no//de bzhin gshegs pa ni 'bad pa med par yang dus gsum gyi shes bya'i dngos po thams cad thugs su chud pa yin no/ /de bas na bco brgyad po de dag la sangs rgyas kyi chos ma 'dres pa zhes bshad do/ /med pa'i rnam pa ni gang de bzhin nyid ni rnam pa yin te zhes bstan pa yin no//sangs rgyas thams cad kyis gsungs pa de bzhin nyid du nye bar bzung ba'i phyir ro zhes bya ba yin no/ /gzhan gyi rkyen gyis mi 'gro ba'i rnam pa ni rang byung gi rnam pa'o zhes bstan pa yin no/ /chos thams cad la dbang sgyur ba dmigs su med pa nye bar bzung ba'i phyir ro zhes bya ba yin no//sangs rgyas nyid kyi rnam pa ni bcom ldan 'das shes rab kyi pha rol tu phyin pa 'di ni/ 'di lta ste/ sangs rgyas kyi pha rol tu phyin pa'o/ /rab 'byor chos thams cad kyi rnam pa mngon par byang chub pa nye bar bzung ba'i phyir ro zhes bya ba yin no//de dag de ltar byas na ji ltar stobs la sogs pa'i rnam pa rnams kyi rab tu dbye ba dang rang bzhin gang yin pa de rnams ni de bzhin nyid dang / gang gis chos thams cad la dbang sgyur ba'i rang byung dang / gang gi ched du chos thams cad mngon par rdzogs par sangs rgyas pa zhes bya ba rnams go rims bzhin du bcu dang /bzhi dang / bzhi dang / bco brgyad dang / gcig dang / gcig dang / gcig ste/ rnam pa thams cad mkhyen pa nyid kyi lam gyi rten can gyi rnam pa ni bzhi bcur gcig gis ma tshang bar 'gyur ro/ /de dag bsdus na rnam pa brgya bdun cu rtsa gnyis su 'gyur ro//rnam pa zhes bya ba'i chos 'di dag gang la bya zhe na/ dang po rtsom pa nyid kyi tshe/ /dmigs pa'i khyad par 'dzin pa la/ /rnam pa zhes ni bya bar brjod/ /ces bstan pa yin no/ /de'i mtshan nyid bstan pa la ma yin nam/ /dmigs par bzhag pas yang dmigs pa ste/'jig rten pa'i dge ba'i chos thams cad dang / dge ba la sogs pa yin par bstan pa'i phyir 'dir dngos po med par rnam par thar pa'i gnyen po'i phyogs su mi 'gyur ro/ /de la thams cad shes pa nyid kyi rnam pa ni nyan thos dang / byang chub sems dpa'i rnam par dbye bas zag pa med pa dang /zag pa dang bcas pa yin no/ /lam shes pa nyid kyi rnam pa ni byang chub sems dpa' rnams kyis nyon mongs pa shin tu ma spangs pa'i phyir rnam grangs kyi zag pa dang bcas pa de kho na yin no/ /rnam pa thams cad mkhyen pa nyid kyi rnam pa ni chos thams cad kyi rnam pa thugs su chud pas sangs rgyas pa'i phyir zag pa med pa kho na yin no//gang dri ma med pa'i rnam pa bcu drug las gzhan med do zhes bstan pa ni/ nyon mongs pa'i sgrib pa tsam gyi gnyen po'i phyogs la dgongs pa yin gyi de dang 'di la 'gal ba med do/ /rnam pa'i rnam par 'grel pa'o// // rnam pa rnams bstan nas/ da ni sbyor ba'i rnam pa brjod par bya ste/ de la re zhig sbyor ba'i rten sbyor ba po yin pas de brjod par bya ba yin pas brjod par bya'o/ /de la sbyor ba po rnam pa bzhi ste/ gang zhe na/ sangs rgyas rnams la bkur sti byas/ / de la dge ba'i rtsa ba bskrun/ /dge ba'i bshes kyis mgon bcas pa/ /'di nyan pa yi snod yin no/ /zhes bstan pa yin no/ /de ltar yang rnam pa thams cad mngon par byang chub pa'i sbyor ba'i rten gyi dbang du byas nas sngon gyi rgyal ba rnams la lhag par bya ba byas pa / 'das pas bstan pa'i gsung rab dang /de bzhin gshegs pa las sngon dge ba'i rtsa ba bskyed pa dang / dge ba'i bshes gnyen gyis yongs su bzung ba ni shes rab kyi pha rol tu phyin pa nyan pa'i snod yin no zhes bstan pa yin no/ /'di nyan pa'i sbyor ba'i rten ni rnam pa gsum yin no/ / yang 'dzin pa dang / 'chang ba dang / klog pa dang / kun chub par byed pa dang / tshul bzhin du yid la byed pa dang / de la rjes su mi skrag pa la sogs pa'i sbyor ba'i rten gyi dbang du mdzad nas/ sangs rgyas bsten dang kun 'dri dang / /sbyin dang tshul khrims sogs spyod pa/ /len dang 'dzin la sogs pa yi//snod du dam pa rnams bzhed do/ /zhes bstan pa yin no/ /gang sangs rgyas mang po la bsnyen bkur byas pa dang / yongs su zhu ba byas pa dang / pha rol tu phyin pa drug gi spyod pa dang ldan pa 'di 'dzin par byed pa'i snod yin par bstan pa yin no/ / gang gi phyir ji skad du bstan pa'i rgyu med pa ni de la mi mos pa dang / mchog tu spong bar byed do zhes bstan pa yin no/ /ji skad du bstan pa las bzlog pa ni mi mos pa dang / spong bar byed pa'i rgyu yin te/ mos pa med pa'i rgyus shes rab kyi pha rol tu phyin pa zab mo de spong ba'i rgyu ni gzhan ma yin te/sems can rnams kyi rang bzhin zhes bya ba yin te/ btsun pa sha ra dwa ti'i bu shes rab kyi pha rol tu phyin pa 'di ni shin tu zab pa'i phyir ro zhes gsungs pa yin no/ /de zab pa ni mos pa med pa tsam gyi rgyu yin pa'i phyir de spong ba'i sems can gyi nyes pa'i rgyu nyid yin par shes par bya ba'i phyir ro//de ci'i phyir zhe na/ lam gyi rnam pa shes pa nyid la gnas par 'dod pa dang / rnam pa thams cad mkhyen pa nyid bskyed par 'dod pas rnam pa thams cad du de la brtson par bya'o zhes bstan pa na sbyor ba bstan pa'i nye bar 'god pa'i don yin no//rnam pa thams cad mkhyen pa nyid dang / shes rab kyi pha rol tu phyin pa ni phan tshun de las 'khrungs pa dang / de'i mthus gsal ba nyid yin no/ /ji lta bu'i don gyis yin zhe na/ shes rab kyi pha rol tu phyin pa las rnam pa thams cad mkhyen pa nyid 'khrungs pa ni mngon par bskrun pa yin no//rnam pa thams cad mkhyen pa nyid kyi mthus shes rab kyi pha rol tu phyin pa de yang gsal bar rtogs pa la sogs par 'gyur ba'i phyir de bas na rim pa ji lta ba bzhin du rang las 'khrungs pa dang / mthus gsal bar smos pa yin no/ /bstan pa'i snod kyi nyes pa spang ba'i phyir/legs par nyon la yid la legs par zung shig ces gsungs te/ snod kha sbub dang / mi gtsang ba dang / rdol ba rnams nyan pa'i snod ngan pa spangs pa bstan pa'i snod yin par bstan to/ /des ni bstan pa'i snod kyi nyes pa gsum spangs pa yin no/ / shes rab 'chal pa ni legs par zhes gsungs pas so/ /rnam par g.yeng ba'i nyes pa ni nyon cig ces gsungs pas so/ /'dun pa dman pa'i nyes pa ni yid la legs par zung shig ces gsungs pas so/ /sbyor ba'i rten bstan nas sbyor ba rnams brjod par bya'o/ /de ni rnam pa nyi shur blta bar bya ste /gzugs la sogs la mi gnas phyir/ /de la gnas pa bkag pa'i phyir/ /de yi de bzhin nyid zab phyir/ /de rnams gting dpag dka' ba'i phyir/ /de dag tshad ni med phyir dang / /tshegs chen yun ring rtog phyir dang / /lung bstan phyir mi ldog phyir dang //nges 'byung bar chad med nyid dang / /byang chub nye dang myur ba dang / /gzhan don 'phel med 'grib med dang / /chos dang chos min sogs ming mthong / /gzugs sogs bsam mi khyab mi mthong / /gzugs sogs de yi mtshan ma dang / /de yi ngo bor rnam mi rtog /'bras bu rin chen sbyin byed dang / /de ni dag pa mtshams dang bcas/ /zhes bstan pa yin no/ /de la gzugs la sogs pa mi dmigs pa'i sbyor ba ni gang gzugs zhes bya ba nas de gzugs la brtson par mi byed do zhes bya ba nas brtsams te/ ma 'dres pa'i bar la gnas pa bkag pa de la brtson par byed pa rjes su gnang ba yin no//de ci'i phyir zhe na/ gzugs la sogs pa mi dmigs pa'i phyir ro zhes bstan pa yin no/ /sbyor ba dang rab tu sbyor ba ni gang gzugs la mi sbyor/ /gzugs la sbyor bar mi byed do/ /de bzhin du gzugs la brtson par mi byed do zhes bya ba nas/rnam pa thams cad mkhyen pa nyid kyi bar du sbyor ba yin te/ rjes su gnang ba yin zhes bstan pa yin no/ /de ci'i phyir zhe na/ gang gzugs la sogs pa sngon dang / phyi ma dang / dbus su mi dmigs so zhes bstan to/ /zab pa'i sbyor ba ni gang gzugs la sogs pa'i de bzhin nyid zab pa'i phyir rab tu gnas pa mi dmigs pa'i don gyis thams cad shes pa'i dbang du mdzad nas/shes rab kyi pha rol tu phyin pa zab par bstan pa yin no/ /gzugs la sogs pa'i gting dpag dka' ba ni gang gzugs la sogs pa gting dpag dka' ba'i phyir rang bzhin gyi dri ma med pa'i don gyis lam shes pa'i dbang du mdzad nas/de dag gis gting dpag dka' ba nyid du bstan pa yin no/ /tshad med pa'i sbyor ba ni gang gzugs la sogs pa tshad med pa'i phyir mtha' mi dmigs pa nyid kyis rnam pa thams cad mkhyen pa'i dbang du mdzad nas/de'i tshad med pa'i phyir ro zhes bstan pa yin no/ /sbyor ba rnam pa gsum po de dag nyid kyis bshad pa'i rnam grangs gzhan bstan pa ni gang zab mo mngon par byang chub pa dang / thun mong ma yin par mngon par byang chub pa dang / bla na med par byang chub pa'i dbang du mdzad nas/ rnam pa gsum du gsungs so zhes bstan pa yin no/ /de yang rnam pa gsum ste/ sbyor ba chung ngu dang / 'bring dang / chen po go rims ji lta ba bzhin du rig par bya ste/ gang yang gal te gzugs zab ces bya ba dang / gzugs gting dpag dka' zhes bya ba dang / gzugs tshad med do zhes bya bar mi sbyor na shes rab kyi pha rol tu phyin pa la spyod do zhes bya ba nas brtsams te/ ma 'dres pa'i bar du dbye ba rnam pa gsum la dpyod pa bkag pa'i phyir de ltar spyod pa ni rjes su gnang ba ma yin no//de ci'i phyir zhe na/ gang gzugs zab ces bya ba dang / gting dpag dka' ba dang / tshad med pa gang yin pa de ni gzugs ma yin zhes bya ba nas ma 'dres pa'i bar du'o/ /gzugs la sogs pa'i rnam pa'i bdag nyid can ma yin pa'i phyir ro zhes bstan pa yin no//las dang po pa spangs nas tshegs chen pos yun ring po nas mngon par byang chub pa la spyod pa yin te/ las dang po pa rnams zab mos skrag ste / dang po skrag pa skye ba'i phyir ro/ /gting dpag dka' ba nyid kyis na spang bar 'gyur te/ mi dge ba'i bag chags kyis bsgos pa'i phyir ro//tshad med pa nyid kyis na kun du skrag pa skye bas shes rab kyi pha rol tu phyin pa'i spyod ma yin pa thob pas gsum gyi rgyus las dang po pa'i mdun du ma yin gyi phyir mi ldog pa'i mdun du brjod par rjes su gnang ba yin no/ /de ci'i phyir zhe na/ las dang po pa rnams skrag pa la sogs pa'i rkyen gyis ngan song du 'gro ba'i las bsags pas tshegs chen pos yun ring po nas bla na med pa yang dag par rdzogs pa'i byang chub tu mngon par rdzogs par 'tshang rgya ba'i phyir ro zhes bstan pa yin no//lung bstan pa thob pa'i sbyor ba ni gang 'dod cing mi 'jigs pa dang /rmi lam gyi nang du yang pha rol tu phyin pa drug yid la byed pa ni lung bstan pa nye ba yin te/ de bzhin gshegs pa gcig gam gnyis las mi 'da' bar lung bstan pa thob par 'gyur ro/ /phyir mi ldog pa'i sbyor ba ni gang rmi lam gyi nang du 'thad pa'i rigs pas 'dzin pa la sogs pa byed pa dag ni phyir mi ldog par rig par bgyi ba dag go zhes bstan pa yin no//nges par 'byung ba'i sbyor ba ni gang skyes bu 'brog dgon pa dpag tshad brgya pa zhig nas 'byung ba'i dpes bar chad byed pa'i chos las 'das par don gyis yang dag par bstan to zhes bstan pa yin no//bar chad med pa'i sbyor ba ni gang skyes bu rgya mtsho chen po'i dpes nye bar bstan pa na ldum bu la sogs pa'i mtshan ma mthong bar bstan pa'i don zhes bstan pa yin no/ /rdzogs pa'i byang chub la nye bar sbyor ba ni gang shing gi lo ma dang / 'dab ma lhags pa'i dpes zag pa med pa'i chos gsar gyi rten can cig la gnas par don gyis bstan pa yin te zhes bstan to//myur du mngon par rdzogs par byang chub pa'i sbyor ba ni gang bud med sbrum ma btsar nye ba'i dpes rten gyi sgrub pa'i chos ni 'bras bu'i chos kyi sku myur du mngon par grub par don gyis bstan pa yin te zhes bstan pa yin no//de bzhin du gnas brtan shA ri'i bu'i spobs pas gsal bar dpe bzhis byas te/ nges par 'byung ba'i sbyor ba nas brtsams te/ myur du mngon par byang chub pa'i bar gyi rnam pa thams cad mngon par byang chub pa'i dbang du mdzad nas rim pa ji lta ba bzhin du nges par 'byung bar 'gyur ro//bar chad med par 'gyur ro/ /nye bar 'gyur ro/ /myur du bla na med pa yang dag par rdzogs pa'i byang chub tu mngon par rdzogs par 'tshang rgya'o zhes rab tu bstan pa yin no/ /gzhan gyi don gyi sbyor ba ni gang rab 'byor 'di ltar byang chub sems dpa' sems dpa' chen po de dag ni skye bo mang po la phan pa dang /skye bo mang po la bde ba dang zhes bya ba nas brtsams te/ bdag nyid kyang chos kyi 'khor lo bskor la/ gzhan dag kyang chos kyi 'khor lo bskor ba la yang dag par bskul lo zhes bya ba'i bar du gsungs so zhes bstan pa yin no//de rnams ni gnyi ga'i don byed pa nyid kyis na de bzhin gshegs pa'i bsgrub pa la shin tu gtod pa nyid yin te / 'phel ba dang / 'grib pa med pa'i sbyor ba ni gang shes rab kyi pha rol tu phyin pa'i bsgom pa yongs su rdzogs par 'gyur ba lags zhes bya ba nas brtsams te/gzugs nas rnam pa thams cad mkhyen pa nyid kyi bar du 'phel ba dang / 'grib pa mthong ba bkag pas de bsgom pa yongs su rdzogs par 'gyur bar rjes su gnang ba yin no zhes bstan pa yin no/ /chos dang chos ma yin pa mi dmigs pa'i sbyor ba ni gang yang chos dang / chos ma yin pa dang / 'das pa dang / ma 'ongs pa dang / da ltar byung ba dang / dge ba dang / mi dge ba dang / 'dus byas dang / 'dus ma byas dang / 'dod pa la sogs pa'i khams rnams dang / pha rol tu phyin pa rnams nas rnam pa thams cad mkhyen pa nyid kyi bar du bkag pa snga ma bzhin no//de bsgom pa yongs su rdzogs pa ni gnang ba ma yin no/ /de ci'i phyir zhe na/ chos rnams kyi mtshan nyid ni phyir ldog pa med pa de'i phyir ro/ /phyin ci log gi mtshan nyid zlog par byed kyi rang bzhin gyi mtshan nyid ni ma yin no zhes bstan pa yin no//bsam gyis mi khyab pa'i rnam pa'i 'du shes 'gog pa'i sbyor ba ni gang gzugs nas rnam pa thams cad mkhyen pa nyid kyi mthar thug pa'i bar du bsam gyis mi khyab pa'i rnam pa'i 'du shes pa bkag pas de bsgom pa yongs su rdzogs par gnang ba yin no zhes bstan pa yin no//rnam par mi rtog pa'i sbyor ba ni gang gzugs dang / de'i mtshan ma dang / rang bzhin du rnam par mi rtog pa nas rnam pa thams cad mkhyen pa nyid kyi bar du de'i mtshan ma dang / de'i rang bzhin du rnam par mi rtog pas na rnam par mi rtog pa'o/ /de ci'i phyir zhe na/ gzugs la sogs pa bsam gyis mi khyab pa'i phyir rnam par mi rtog pa'i rjes su 'thad pa yin no zhes bstan pa yin no//'bras bu rin po che sbyin pa'i sbyor ba ni gang rgyun du zhugs pa la sogs pa nas bla na med pa yang dag par rdzogs pa'i byang chub kyi bar gyi rin po che ster ba yin pa'i phyir shes rab kyi pha rol tu phyin pa ni rin po che'i phung po ste chos rin po che'i phung po rnams bsgrub pa'o zhes bstan pa yin no//rnam par dag pa'i sbyor ba ni gang gzugs la sogs pa rnam par dag pa'i slad du shes rab kyi pha rol tu phyin pa ni dag pa'i phung po'i zhes bstan pa yin no/ /sa mtshams kyi sbyor ba ni gang rin po che dang 'dra bar bar chad mang ba nyid kyi phyir lo'i bar gyi bri ba la sogs pa la mngon par brtson pa gtang bar mi bya zhes bya bar bstan pa yin no//lo smos pa de tsam gyi dus tshigs la sogs pas rkyen tshogs pa'i phyir ro/ /spag nya pa la ka'i gzhung dang mthun par lo'i bar du spyod do //lo 'das nas 'dod pa med do zhes bya ba dang / de bzhin gang gis lo skor du mthong ba des zhes bya ba la sogs pa smras pa yin no/ /sbyor ba nyi shu po de dag gi go rims 'di ni rigs pa'i tshul nyid yin te/ chos thams cad la mngon par zhen pa med par gnas pa dang /de la mi sbyor ba de dag ni zab pa dang / gting dpag dka' ba dang / tshad med par rtogs par 'gyur ro/ /sbyor ba ma yin pa byed pa nyid kyis ni las dang po pa ni tshegs chen pos 'thob bo/ /de las gzhan pa ni bde blag tu lung bstan pa dang / phyir mi ldog pa'i sa thob nas nges par 'byung ba dang /bar chad med par 'gyur ba dang / mngon par rdzogs par byang chub pa nye bar 'gyur ba dang / myur du mngon par rdzogs par byang chub par 'gyur ro/ /des ni gzhan gyi don byed cing 'phel ba med pa dang / 'grib pa med pa dang / chos sam chos ma yin pa la sogs pa'i 'du shes thams cad dang bral bas rnam par mi rtog pa dang /'bras bur rin po che 'byin pas mchog tu rnam par dag pa'i mthar thug pa thob pa ste/ snga ma bzhin du lo'i bar du brtson pas sems can gyi rgyud yongs su sbyang ba yin no/ /de dag de ltar byas nas sngon gyi rgyal ba la bya ba byas pa'i dbang du mdzad nas de bzhin gshegs pa rnams la dge ba'i rtsa ba bskrun pa dang zhes bya ba nas brtsams te/gal te zhes bya ba'i bar du lo skor gyis bris pa zhes bya ba'i gzhung gang yin pa des ni sbyor ba'i rten rnam pa bzhi dang / sbyor ba gang yin pa rnam pa nyi shur 'gyur ro zhes des bshad do//sbyor ba'i rnam par 'grel pa'o// //sbyor ba brtan nas de'i phan yon brjod par bya ste/ bdud kyi mthu bcom pa la sogs/ /yon tan rnam pa bcu bzhi'o/ /zhes bstan pa yin no/ /de la bdud bcom pa'i yon tan ni gang bdud bar chad byed pa brtson par zhugs su zin yang phyogs bcu'i 'jig rten gyi khams kyi sangs rgyas kyis dgongs shing yongs su bzung ba'i mthus bcom pa'i rgyu yin no//de ci'i phyir zhe na/ shA ri'i bu chos nyid kyis dgongs par mdzad pa de ni rig pa yin no/ /zhes bstan to/sangs rgyas kyis dgongs shing mkhyen pa'i yon tan ni gang rig par bya'o zhes bya ba nas chos smra ba de la sangs rgyas kyi dgongs par shes pas lhag par mos pa brtan po skye zhing spro bar 'gyur te/ che ge mo la bdud kyis bar bcad pa'i go skabs kyis glags rnyed par mi 'gyur bar shes par byed pa'i ched du'o zhes bstan pa yin no//sangs rgyas kyis mngon sum du mdzad pa'i yon tan ni gang ye shes kyis mkhyen cing de la spyan gyis gzigs par mdzad do zhes bstan pa yin no/ /don rjes su dpag pa dang / log pa'i shes pa bsal ba'i ched du gnyis ka smos par mdzad do//yang dag par rdzogs pa'i byang chub dang nye ba'i yon tan ni gang de dag theg pa chen po dang ldan pas bla na med pa yang dag par rdzogs pa'i byang chub dang nye bar 'gyur bar rig par bya'o zhes bstan pa yin no/ /don chen po nyid la sogs pa'i yon tan ni gang yi ger bris nas glegs bam bcangs pa tsam gyi don chen po dang /phan yon chen po dang / 'bras bu chen po dang / rnam par smin pa chen por 'gyur ro zhes bstan pa yin no/ /de la sangs rgyas dang mi 'bral ba nyid dang / bde 'gror gzhol ba nyid dang / yang dag par rdzogs pa'i byang chub tu 'tshang rgya ba nyid dang /mya ngan las 'das pa'i rjes la yang gzhan gyi don la 'jug pa'i dbang du mdzad nas go rims bzhin du tshig bzhi bshad pa yin no/ /yun ring po nas smin pas rnam par smin pa yin par blta bar bya'o/ /yul dpyad pa'i yon tan ni gang lho phyogs kyi rgyud nas bar ta ni dang /byang phyogs kyi rgyud du spyod par 'gyur ro zhes bya ba la sogs pa gsungs te/ yul la sogs pa dpyad pas chos smra ba la sangs rgyas rnams dgongs par 'gyur ba la som nyi za ba bsal ba'i phyir ro/ /phyi ma'i dus zhes bya ba ni ma 'ongs pa ste/phyi ma'i dus na rkyen tshogs pa'i phyir ro/ /zag pa med pa'i chos thams cad yongs su rdzogs pa'i yon tan ni gang skrag pa la sogs par mi 'gyur ba dang / pha rol tu phyin pa drug la sogs pa dkar po'i chos thams cad yongs su rdzogs pa nyid du bstan pa yin no/ /smra ba'i skyes bu'i yon tan ni gang yang ba dang /sangs rgyas thams cad kyis kyang rigs kyi bu dang / rigs kyi bu mo de rnams la rnam pa thams cad mkhyen pa nyid dang ldan pa'i gtam brjod do zhes bstan pa yin no/ /mi phyed pa'i yon tan ni yang brtan par 'gyur ba'i phyir ro/ /bdud dang bdud kyi rigs kyi lha rnams kyis kyang byang chub las bzlog par mi nus par bstan pa yin no//dge ba thun mong ma yin pa'i yon tan skye ba'i yon tan ni gang yang dga' ba dang / dang ba dang / mgu ba rgya chen po skye bar 'gyur zhing skye bo mang po yang dge ba'i chos la 'god par 'gyur ba'i phyir ro zhes bstan pa yin no//de yang dga' ba ni 'jig rten las 'das pa'i chos tshol ba'o/ /dang ba ni sangs rgyas dang / chos dang / dge 'dun la brten pa yin no/ /mgu ba ni dge ba la sems rangs pa gang yin pa'o/ /dam bcas pa'i yon tan ni ji lta ba bzhin du bsgrub pa'i yon tan ni gang sangs rgyas thams cad kyi spyan sngar bdag gis srog chags brgya stong phrag mang po byang chub la rab tu dgod par bgyi'o zhes sangs rgyas rnams rjes su dgyes pa'i tshig smras pa gang yin pa de ni dam bcas pa ji lta ba bzhin du rdzogs par byed pa'i shes par byed pa bstan pa yin no//'bras bu rgya chen po 'dzin pa'i yon tan ni gang de dag mos pa rgya che ba nyid kyi las dang / rnam par smin pa yongs su 'dzin par 'gyur ba bstan pa yin no/ /sems can gyi don bsgrub pa'i yon tan ni gang des 'bras bu phyi dang / nang gi sems can de dag nyid la yongs su gtong ba dang /sangs rgyas mngon sum du 'gyur zhing / gzhan dang gzhan du brten par 'gyur bas sems can gyi don gong nas gong du bsgrub cing nyams su len par bstan pa yin no/ /shes rab kyi pha rol tu phyin pa ma rnyed pa dang / ma tshang ba rnyed pa las go bzlog pas tshang ba rnyed pa'i yon tan ni gang 'di dag tshol ba dang /yongs su tshol ba'i tshe la las ni thob par 'gyur ba dang / thob par mi 'gyur ba dang / nges par 'byung ba'i ma tshang ba thob pas brtson 'grus mi gtong ba de dag ni skye ba rjes su zin kyang shA ri'i bu de dag 'grub par 'gyur ro zhes bstan pa yin no//de chos nyid kyi rigs pa yin te/ nges par thob par 'gyur bas bla na med pa yang dag par rdzogs pa'i byang chub kyi bar du thob par 'gyur ro zhes bstan pa yin no/ /phan yon gyi rnam par 'grel pa'o// // phan yon bshad nas de'i bar chad brjod par bya'o/ /skyon ni bcu tshan bzhir bcas pa/ /drug tu nges par rtogs par bya/ /zhes bya ba smos te/ bzhi bcu rtsa drug ces bya ba'i don to/ /de dag kyang tshegs chen pos thob pa ni gang pha rol tu phyin pa dka' bar yongs su rdzogs par byed pa ni des shin tu phyis te spobs pa skye bar 'gyur ro zhes bya ba bstan pa yin no//spobs pa myur zhes pa ni gang dang po pha rol tu phyin pa la spyod pa'i gnas su ha cang myur bar spobs pa skye ba na'ang bdud kyi las su rig par bya'o zhes bstan pa yin no/ /lus kyi gnas ngan len du 'gyur ba rnam pa gsum ni gang yang glal ba dang /dgod pa dang / phan tshun steg cing 'dri na lus kyi rnam par 'gyur ba'i bar chad yin par bstan pa nyid yin par bstan to/ /steg pa ni rang gi yo byad kyis gzhan gyi yan lag bzhi bkod pa'o/ /sems kyi gnas ngan len ni gsum ste/sems g.yeng ba dang / phan tshun yi ge gzhan la chags shing 'dri zhing nyan pa dang / bdag gis 'di'i gting mi rnyed do zhes bya ba zhes smra zhing / sems bskyed nas langs te 'gro ba ni sems kyi bar chad byed pa yin par bstan pa yin no/ /gzhan la chags pa ni gang log par rtog cing dmigs pas dngos po la chags pa ste/phan tshun smra ba'o zhes bstan pa yin no/ /rigs pa ma yin pas bskyed pa'i kha ton la sogs pa byed pa ni gang yang lus kyi rnam par 'gyur ba de nyid kyis mgo bo dang / yang sems kyi rnam par 'gyur ba de nyid kyis 'dzin pa la sogs pa byed pa ni bar du gcod pa yin par bstan pa yin no//phyir phyogs pa'i rgyu mtshan ni gang yang 'dir ni bdag lung ma bstan te/ bdag gi ming yang ma brjod do zhes ma dad par gyur nas zhes bstan pa yin no/ /yul la sogs par brtag pa med pa'i rigs pas so//rgyu la mngon par zhen pa'i nyams pa ni gang shing gi rtsa ba spangs te 'dab ma dang / yal ga la 'ju bar byed pa'i dpes ni rgyu yongs su nyams par byed pa'i phyir ro/ /de ci'i phyir zhe na/ shes rab kyi pha rol tu phyin pa las byung ba ni 'jig rten dang / 'jig rten las 'das pa'i chos rdzogs pa 'byung bar 'gyur ro zhes bstan pa yin no//gya nom pa'i ro myang ba las nyams par gsungs pa ni khyi'i dpes gya nom pa'i myang ba las nyams pa ni don gyis bstan pa yin no/ /theg pa'i mchog 'dzin pa las nyams pa ni gang glang po 'dod pas glang po rnyed nas glang po'i rjes tshol ba'i dpes theg pa mchog las nyams par don gyis bstan pa yin no//ched du bya ba las nyams pa ni gang rgya mtsho chen po dang / ba lang gi rjes su 'gran pas dpes ched du bya ba las nyams par don gyis bstan pa yin no/ /rgyu dang 'bras bu'i 'brel pa las nyams pa ni gang phya mkhan gyi rnam par rgyal ba'i gzhal med khang nyi ma dang /zla ba'i tshad kyis gzhal yas khang byed par 'dod pa'i dpes rgyu dang 'bras bur 'joms pa las go bzlog pa ston pas de dang rjes su mthun par 'brel pa las nyams par don gyis bstan pa yin no/ / bla na med pa'i gnas las nyams pa ni 'khor los sgyur ba'i rgyal po dang /khams kyi rgyal phran bskrun par byed pa'i dpes chos kyi sku'i go 'phang las nyams par don gyis yang bar du gcod pa'i bdud kyi las nyid bstan pa yin no/ /yul rnam pa mang po la rnam par rtog pa'i spobs pa 'byung ba ni gang chos de dag ni shes rab kyi pha rol tu phyin pa zab mo 'di la med cing mi dmigs so zhes bstan pa yin no//chos kyi yul de la sogs pa mang po 'byung bas yi ge 'dri ba la mngon par zhen pa dang / dngos po med pa la mngon par zhen pa dang / shes rab kyi pha rol tu phyin pa bris pa'i yi ge la mngon par zhen pa dang /'di'i yi ge med pa la mngon par zhen pa dang / yul la sogs pa yid la byed pa dang / rnyed pa dang / bkur sti dang / tshigs su bcad pa'i ro myang ba dang / lam ma yin pas thabs la mkhas pa tshol ba zhes bya ba ste/ bar du gcod pa bdun ni chos thams cad kyi ngo bo yod pa ma yin pas dngos po med pas dngos po med pa 'dri bar mi nus pa'i phyir dngos po med pa la mngon par zhen pa dang / bris pa'i yi ge la de yin par zhen pa dang / rnyed pa dang / bkur sti dang / tshigs su bcad pa'i ro myong bar byed pa dang /shes rab kyi pha rol tu phyin pa bor ste / bdud kyis nye bar bsdus pa'i mdo sde rnams las thabs la mkhas pa tshol ba ni bdud kyi las nyid du bstan pa yin no/ /'dun pa dang / snyom las kyi nyams pa ni gang yang chos smra ba dang / nyan pa dang /phan tshun du mngon par 'brel pa ni gang gcig la gcig 'dun pa dang / snyom las kyi nyams pa nyid du bstan pa yin no/ /'dun pa'i yul tha dad pas nyams pa ni gang yang de dag nyid gcig la gcig 'dun pa dang ldan pa yul gzhan du 'gro bar 'dod pa nyid du bstan pa yin no//rnyed pa dang / bkur sti dang / 'dod zhen chung ba nyid kyis nyams pa ni gang yang de dag gcig la gcig rnyed pa la sogs pa lhur len pa dang / chos nyan pa 'dod pa chung ba la sogs pa'i tshul gyis bstan pa yin no/ /de bzhin du sbyangs pa'i yon tan dang ldan pa dang /mi ldan pa dag dang / dge ba dang / mi dge ba'i chos nyid dang / gtong ba la ser sna byed pa dang / sbyin pa la kun du 'dzin pa dang / mgo smos pas go ba dang / rnam par spros pas go ba nyid dang / mdo la sogs pa'i chos mngon par shes pa dang /mngon par mi shes pa nyid dang / pha rol tu phyin pa drug dang ldan pa dang / mi ldan pa dang / thabs dang / thabs ma yin pa la mkhas pa dang / gzungs thob pa dang / ma thob pa dang / yi ge 'dri bar 'dod pa dang / 'dri bar mi 'dod pa dang / 'dod pa la sogs pa'i 'dun pa dang bral ba dang ma bral ba nyid ces bya ba go rims bzhin du 'chad pa po dang /nyan pa po dang / snga ma dang / phyi ma 'brel pa dang / tshogs pa dang mi ldan pa rnam pa bcu gcig ni bar chad bcu gcig tu bstan pa yin te/ gang gzhan yang de dag sbyangs pa'i yon tan dang ldan pa dang mi ldan pa nas brtsams te/yang de dag nyid phan tshun 'dod pa la sogs pa'i 'dun pa dang bral ba nyid kyis tshogs pa dang mi ldan pa'i phyir bdud kyi las su rig par bya'o zhes bya ba'i bar bstan pa yin no/ /ngan 'gro las phyir phyogs pa ni gang gzhan yang la la zhig der 'ongs te/dmyal ba la sogs pa'i mi bsngags pa brjod ces bya ba la sogs pa bstan pa yin no/ /bde 'gror 'gro ba la yid bde ba ni gang de bzhin du rgyal chen bzhi pa'i lha rnams legs par brjod ces bya ba la sogs pa bstan pa yin no/ /'di ni dang por nyan pa po dang /phyis chos smra ba nges par bya ba'i tshogs pa dang mi ldan pa nges par byas pa yin la/ da ni dang por 'chad pa po dang / phyis nyan pa po'i nges par byas pa'i tshogs dang mi ldan pa rnam pa bdun du brjod par bya'o/ /de ci'i phyir zhe na/ 'dir 'chad pa dang / nyan pa dag dang /nyan pa po dang / 'chad pa po dang / sngon dang / phyi mar gzhag pas bar chad rnams la 'jug par 'gyur/ nyan pa po dang / 'chad pa po gnyi ga sngon dang / phyi ma gnyi ga la brten pa nyid du shes par bya ba yin no/ /de la 'chad pa po dang / nyan pa po dag gis mngon par 'brel pa'i tshogs pa dang mi ldan pa ni 'di yin te/gang 'di ltar gcig pu nyid dang / 'khor la dga' ba nyid dang / 'dod pa nyid ni rjes su 'brel pa dang / go skabs mi 'byed pa nyid dang / zang zing cung zad 'dod pa dang / de sbyin par mi 'dod pa dang / srog gi bar chad du 'gyur ba dang /bar chad du mi 'gyur ba'i phyogs su 'gro ba dang / mi 'gro ba dang / de bzhin du lo legs pa dang / mu ge byung ba la sogs pa'i phyogs su 'gro ba dang / mi 'gro ba dang / chom rkun la sogs pa'i rgyus dkrugs pa'i phyogs su 'gro ba dang / mi 'gro ba dang //khyim la lta bas nyan pa po 'dor bar byed pa ni rab 'byor chos smra ba ni gcig pu ste/ zla med cing bdag gir byed pa yin la/ chos nyan pa ni 'khor gyi nang nas zhes bya ba nas brtsams te/ dge slong chos smra ba ni bsod snyoms ster ba'i grong du 'gro dgos so zhes bya ba nas des nyan pa de dag phyir ldog pas phyir dong nas zhes bya ba'i bar bstan pa yin no//bdud sdig can gyis dbye ba'i sbyor ba ni gang gzhan yang bdud sdig to can 'di skad du/ nged kyi khong du ji ltar chud pa 'di yin gyi khyod klog pa de ni shes rab kyi pha rol tu phyin pa ma yin no zhes dbyen byed kyi/yang shes rab kyi pha rol tu phyin pa la sbyor ba gang yin pa de ni yang dag pa'i mtha' sngon du byed par 'gyur te zhes bya ba la sogs pa tshogs pa dang mi ldan pa'i sbyor bas zhes bstan pa yin no/ /bcos ma nye bar bsgrub pa ni gang shes rab kyi pha rol tu phyin pa'i gzugs brnyan ni bdud kyi las te/de yongs su shes nas rnam par spang bar bya'o zhes bstan pa yin no/ /yul ji lta ba bzhin ma yin pa la dga' ba bskyed pa ni gzhan yang bdud sdig can dag sangs rgyas kyi cha byad du 'ongs pa mthong ste/ 'dod pa bskyed pa dang /bdud kyis sprul pa'i byang chub sems dpa' mthong nas thams cad mkhyen pa nyid bor ste/ des de la 'dod pa bskyed pa'o/ /de ci'i phyir zhe na/ shes rab kyi pha rol tu phyin pa la chos thams cad yod pa ma yin no/ /de ci'i phyir zhe na/ chos rnams kyi ngo bo nyid yin pa'i phyir ro zhes bstan pa yin no//skyon bzhi bcu rtsa drug ni bar chad du gyur pa yin no/ /'dzam bu'i gling gi rin po che chen po'i dpes ni de ltar bar chad mang pos yongs su zin yang bar chad kyang rnam grangs bstan pas skyes bu rmongs pa bdud kyis byin gyis brlabs pa/ blo chung ba/ blo dman pa de dag la zhes bya ba ni bar chad byed pa nges pa las bzlog pa bstan pa yin no/ /bar chad mang po yod kyang de la yang sangs rgyas nyid 'thob pa ni sangs rgyas kyis byin gyis brlabs pa'i rgyus yin no zhes bstan to/ /bar chad kyi chos skyes pa rnams bsal ba yin no/ /dkar po'i phyogs ma lus pa rdzogs pa ni sangs rgyas kyi mthu'i rgyu nyid yin no//de ci'i phyir zhe na/ bu mang po yod pa'i dpes de la phyogs bcu'i sangs rgyas 'jig rten gyi khams kyi sangs rgyas dang byang chub sems dpa' la sogs pa'i 'phags pa'i gang zag thams cad de la dgongs shing de la brtson pa rnams la de rnams kyis srung ba la sogs pa mdzad pa nyid yin no//de ci'i phyir zhe na/ shes rab kyi pha rol tu phyin pa de ni sangs rgyas rnams bskyed pa dang / 'jig rten ston par byed pa yin pa'i phyir ro zhes bstan pa yin no/ /bar chad kyi chos rnams kyi rnam par 'grel pa'o// //sbyor ba rnams bstan nas de'i mtshan nyid brjod par bya dgos pas de'i phyir/ gang gis mtshon te mtshan nyid du/ /shes bya de yang shes pa dang / /khyad par byed dang rnam gsum ste/ /mtshon bya'i ngo bo nyid gang yang / /zhes bya ba smos te/ de ltar mtshan nyid bzhir 'gyur bar rig par bya'o //de la shes pa'i mtshan nyid thams cad shes pa'i dbang du mdzad nas re zhig rnam pa bcu drug tu 'gyur ro/ /gang dag yin zhe na/ de bzhin gshegs pa 'byung ba dang / /'jig rten 'jig med bdag nyid dang / /sems can sems kyi spyod pa dang //de bsdus pa dang phyir bltas dang / /mi bzad pa yi rnam pa dang / /chags bcas sogs dang rgya chen dang / /chen por gyur dang tshad med dang / /rnam shes bstan du med pa dang / /sems bltar med dang shes pa de/ /g.yo ba la sogs shes bya dang / /de la gzhan yang de dag ni//de bzhin nyid kyi rnam par shes/ /thub pa de bzhin nyid rtogs dang / /gzhan bstan pa zhes bya ba dag /thams cad shes pa nyid skabs kyi/ /shes pa'i mtshan nyid bsdus pa yin/ /zhes bstan pa yin no/ /de la de bzhin gshegs pa 'byung ba'i shes pa ni gang rnam pa thams cad mngon par byang chub pa'i dbang du mdzad nas shes pa'i mtshan nyid ston pa zhes bya ba nas brtsams te/stobs la sogs pa'i bar du'o zhes bstan pa yin no/ /rnam pa thams cad mkhyen pa nyid kyi mthar thug pa nas sangs rgyas su byed pa'i chos de dag bskyed pa'i phyir/shes rab kyi pha rol tu phyin pa ni de bzhin gshegs pa rnams kyi yum yin no zhes bstan pa yin no/ /'jig rten 'jig pa med par shes pa ni stong pa nyid la sogs pa ni 'jig pa ma yin/ rab tu 'jig pa ma yin pa'i don gyis na / phung po la sogs pa 'jig pa ma yin/rab tu 'jig pa ma yin pa la sogs pa'i chos nyid nges par ston par byed pa nyid kyi phyir 'jig rten ston par byed pa nyid do zhes bstan pa yin no/ /sems can thams cad kyi sems kyi spyod pa shes pa ni gang zhe na/ sems can thams cad kyi spyod pa mkhyen pa ni shes rab kyi pha rol tu phyin pa la rag las pa'i phyir de yang sems can du btags pa'i rgyu phung po la sogs pa nas rnam pa thams cad mkhyen pa nyid kyi bar dmigs su med pa nyid kyis 'jig rten ston pa nyid kyi phyir ro//de ci'i phyir zhe na/ re zhig shes rab kyi pha rol tu phyin pa nyid kyang dmigs su med pa yin no//yang ji lta bu zhig ce na/ rnam pa thams cad mkhyen pa nyid kyi bar du yod pa'am/ dmigs par ga la 'gyur zhes bya ba nas 'thad pa bstan pa yin te zhes bstan pa yin no/ /sems bsdus pa dang / de rnam par g.yeng ba zhes bya ba ni chos nyid 'di la chos nyid de mi dmigs te/ de nyid sems can thams cad kyi sems bsdus pa dang / g.yengs pa yang dag par ci lta ba bzhin du shes so zhes bstan pa yin no/ /sems mi bzad pa'i rnam par shes pa ni gang yang de rnams nyid kyis 'dod pa dang bral ba dang /'gog pa dang / spong ba'i rnam pa mi bzad pa'i rnam pa rab tu mkhyen par bstan pa yin no/ /sems 'dod chags bcas par shes pa ni gang 'dod chags dang bcas pa'i sems gang yin pa de ni sems yang dag pa ji lta ba nyid ma yin no/ /de ci'i phyir zhe na/rab 'byor sems ni yang dag pa ji lta ba bzhin du dmigs su med do/ /sems las byung ba'i chos rnams kyang dmigs su med na/ 'dod chags dang bcas pa'i sems la sogs pa yang dag pa ji lta ba bzhin du shes pa lta ci smos zhes bstan pa yin no/ /sems rgya chen po shes pa ni gang sems kyi ngo bo nyid dmigs su med pas rgya che bar byed pa'i sems rgya che ba yang dag pa ji lta ba bzhin du rab tu mkhyen to zhes bstan pa yin no//sems chen por gyur pa shes pa ni gang de bzhin du sems chen por gyur pa yang dag pa ji lta ba bzhin du rab tu mkhyen to zhes bstan pa yin no//sems tshad med pa ni sems kyi rgyu ni rten med cing tshad med pa ni sems de dag la gang gnas par bya ba'i rten med pa'i phyir ro zhes bya ba la sogs pa snga ma bzhin du'o zhes bstan pa yin no/ /sems bstan du med pa zhes pa ni gang sems la rang gi mtshan nyid stong pa nyid kyi phyir mtshan nyid med pa'i sems zhes bya ba la sogs pa snga ma bzhin no zhes bstan pa yin no//sems bltar med pa shes pa ni gang de bzhin gshegs pa'i spyan lnga la snang bar ma gyur to zhes snga ma bzhin du bstan pa yin no/ /sems g.yo ba la sogs pa shes pa ni gang sems 'phro ba dang /'du ba la sogs pa'i phung po lnga la brten pas skye zhing 'byung bar 'gyur ba nyid du snga ma bzhin no zhes bstan pa yin no/ /de yang bdag dang 'jig rten rtag ces bya ba ni bden gyi gzhan ni gti mug go zhes bya ba nas brtsams te/ srog gang yin pa de ni lus so//lus kyang gzhan srog kyang gzhan zhes bya ba ni rnam par shes pa la brten pa'o zhes bstan pa yin no/ /de bzhin nyid kyi rnam par shes pa ni gang yang de bzhin nyid gang yin pa de ni phung po lnga'i de bzhin du mkhyen pas bcum pa la sogs pa yongs su mkhyen pa nyid do zhes bstan pa yin no//yang dag par rdzogs pa'i sangs rgyas kyis de bzhin nyid thugs su chud pa gzhan dag la yang dag par bstan cing brtag par zhes bya bar shes pa ni gang rab 'byor de ltar sems 'phro ba la sogs pa de bzhin nyid ces bya ba nas brtsams te/ chos thams cad de bzhin nyid kyis shes rab kyi pha rol tu phyin pa rtogs pas de bzhin gshegs pa mngon par rdzogs par sangs rgyas so zhes bshad do//de bas na des de bzhin gshegs pa'i yum yin pa'i phyir 'di ltar 'jig rten ston par byed do zhes bstan pa yin no/ /'di skad du thams cad shes pa nyid kyi sgo nas shes rab kyi pha rol tu phyin pas de bzhin gshegs pa bskyed pa'i phyir 'jig rten ston to zhes bstan to//da ni lam gyi rnam pa shes pa nyid bskyed pas 'jig rten ston par byed pa rnam pa bcu gsum gyi dbang du mdzad nas/ stong nyid mtshan ma med bcas dang //smon pa rnam par spangs pa dang / /skye med 'gag pa med sogs dang / /'khrug pa med pa nyid dag dang / /'du mi byed dang rnam mi rtog /rab dbye mtshan nyid med phyir ro / /lam shes nyid kyi skabs kyis ni/ /shes pa'i mtshan nyid yin par bzhed//ces smos te/ de la stong pa nyid shes pa ni gang de'i mtshan nyid kyi phyir ro zhes bstan pa yin no/ /mtshan ma med pa shes pa ni gang de'i mtshan ma med pa'i mtshan nyid yin pa'i phyir ro zhes bstan pa yin no/ /smon pa med pa shes pa ni gang de'i mtshan nyid smon pa med pa nyid do zhes bstan pa yin no//skye ba med pa nyid / 'gag pa med pa shes pa ni gang de'i mtshan nyid skye ba med pa dang / 'gag pa med pa'i phyir ro zhes bstan pa yin no/ /sogs pa smos pa ni kun nas nyon mongs pa dang / rnam par byang ba dang / dngos po med pa'i ngo bo nyid dang /rang bzhin shes pa nyid dang / rten med pa'i shes pa dang / nam mkha'i mtshan nyid du shes pa bsdu bar rig par bya'o zhes gang bstan pa yin no/ /gang kun nas nyon mongs pa dang / dngos po med pa'i ngo bo nyid dang / rten med pa'i mtshan nyid med pa'i phyir dang /nam mkha'i mtshan nyid ces bstan pa yin no/ /chos nyid 'khrug pa med pa shes pa ni gang lha dang mi dang lha ma yin du bcas pa'i 'jig rten yang mtshan nyid der zad pas mtshan nyid de ni rnam par 'khrug par mi nus so zhes bstan pa yin no/ /mngon par 'du byed pa med par shes pa ni gang gzugs nas rnam pa thams cad mkhyen pa nyid kyi bar du mtshan nyid de dag mngon par 'dus ma byas pa nyid do zhes bstan pa yin no //rnam par mi rtog pa'i shes pa ni gang de mtshan nyid de dag rnams zag pa dang bcas pa dang / zag pa med pa dang / 'jig rten pa dang / 'jig rten las 'das pa dang / 'dus byas pa'i dngos po bkag pas nam mkha'i dpes lam shes pa'i dbang du mdzad nas yang dag par bstan to zhes bstan pa yin no/ /rab tu dbye ba shes pa ni gang yang de bzhin gshegs pa byung yang rung / ma byung yang rung zhes bya ba nas brtsams te/de la spyad pas de bzhin gshegs pa mngon par rdzogs par sangs rgyas te/ mtshan ma thams cad kyi rab tu dbye ba mdzad pa ni ngo mtshar che'o zhes bya ba'i bar gyis lam shes pa'i dbang du mdzad nas bstan pas 'bras bu sems can gyi don byed pa yin par gsal bar bya ba'i ched du zhes bstan pa yin no//mtshan ma med pa'i shes pa ni gang gzugs la sogs pa'i mtshan nyid rnams dang / yongs su gtong ba'i mtshan nyid la sogs pa ni pha rol tu phyin pa rnams so/ /bsam gtan dang / tshad med pa dang / gzugs med pa'i snyoms par 'jug pa rnams ni mi 'khrug pa'i mtshan nyid do//byang chub kyi phyogs ni nges par 'byung ba'i mtshan nyid do/ /rnam pa thams cad mkhyen pa nyid ni mngon sum du mdzad pa'i mtshan nyid do zhes bya ba nas de ni de bzhin gshegs pas mtshan nyid med par mngon par rdzogs par sangs rgyas so zhes bya ba'i bar du'o zhes bstan pa yin no//de bzhin du lam shes pa nyid kyi sgo nas de bzhin gshegs pa'i shes rab kyi pha rol tu phyin pa skyed par byed pa yin pa'i phyir ro/ /de las gzhan ji lta ba bzhin rnam pa thams cad mkhyen pa nyid ston pa shes pa'i dbye ba bcu bzhi las brtsams nas/de bzhin nyid kyi chos brten nas/ /gnas dang gus par bya ba dang / /bla ma nyid dang mnyes pa dang / /mchod dang byed pa med nyid dang / /kun 'jug mkhyen pa gang yin dang / /ma mthong ston par mdzad pa dang / /'jig rten stong nyid [(]zhes [,]ces [)]bya dang / / brjod dang shes mdzad mngon sum dang / /bsam mi khyab dang zhi nyid ston/ /'jig rten 'du shes 'gog pa ni/ /rnam kun mkhyen pa'i tshul la ni/ /shes pa'i mtshan nyid ces bshad do/ /zhes bya ba ston te/ de la de bzhin gshegs pa nyid kyi chos la brten nas bzhugs pa shes pa ni gang gis bskyed pa dang /ston pa nyid yin na/ ji skad du/ rab 'byor rgyu des de bzhin gshegs pa nyid kyi chos la brten nas bzhugs so zhes bstan pa yin no/ /de la gus par bya ba dang / bla mar bya ba dang / mnyes par bya ba dang / mchod par bya ba shes pa ni gang de ltar chos la rim gro mdzad pa dang /bkur sti mdzad pa dang / mchod par mdzad pas rnam pa thams cad mkhyen pa nyid du mngon par rdzogs par byang chub po zhes bya bar 'brel to/ /slar mdzad pa med pa nye bar bzung nas byas pa gzo ba'i phyir ro zhes bstan pa yin no/ /byed pa med pa shes pa ni gang byed pa po nye bar bzung nas chos thams cad byed pa med par rdzogs par sangs rgyas so zhes bstan pa yin no//thams cad du 'gro ba shes pa ni gang yang chos thams cad byed pa med pa la ye shes 'jug pa'i phyir ro zhes bstan pa yin no/ /ma mthong ba'i don bstan pa ni gang gzugs mthong ba med pa nas rnam pa thams cad mkhyen pa'i bar la mthong ba med pa'i phyir rnam par shes pa mi 'byung ba'i don gyis na mthong ba med pa'i gzugs la sogs pa mthong ba de ni 'jig rten ston pa nyid yin no zhes bstan pa nyid yin no//stong pa nyid kyi rnam par brjod pa shes pa ni gdul bya rnams yang dag par sdud pa ste/gang yang 'jig rten 'di ston pa'o zhes brjod pa la sogs pas stong pa'o zhes bstan pa yin no/ /thams cad mkhyen pa gsum la dgongs nas 'phags pa'i gang zag gsum gyi dbang du mdzad de/ go rims bzhin du phyogs gcig tu 'jug pa dang / ched du bya ba'i 'jug pa dang /mngon sum du bya ba'i 'jug pa'i dbang du mdzad nas ston pa dang / shes pa dang / mthong ba yin par shes par bya'o/ /bsam gyis mi khyab pa shes pa ni gang gzhan yang bsam gyis mi khyab pa ston pa'o zhes bstan pa yin no/ /zhi ba'i shes pa ni gang 'di ni zhi ba'o//ston pa'o zhes bstan pa yin no/ /'du shes 'gog pa'i shes pa ni gang yang chos rnams med pa nyid kyi ji nas 'jig rten 'di'i 'du shes dang / 'jig rten pha rol gyi 'du shes su mi 'gyur ba de ltar gzigs pa ni shes rab kyi pha rol tu phyin pas de bzhin gshegs pa bskyed pas 'jig rten gzigs par mdzad pa'i phyir ro zhes bstan pa yin no//shes pa'i mtshan nyid kyi rnam par 'grel pa'o// //shes pa'i mtshan nyid bstan nas khyad par gyi mtshan nyid brjod par bya ba'i phyir/ bsam mi khyab sogs khyad par gyis/ /bden pa la brten khyad par can//drug rnams dang ni bcu yis ni/ /khyad par mtshan nyid shes par bya/ /zhes bstan pa la bden pa'i rten can zhes bya ste/ 'phags pa'i bden pa bzhi'i spyod yul can no/ /khyad par zhes bya ba ni nyan thos la sogs pa'o/ /du zhig ce na/ drug dang bcu zhes bya ba smos te/bsam gyis mi khyab pa'i khyad par sdug bsngal la chos shes pa'i bzod pas bsdus pa ni khyad par gyi mtshan nyid bsam gyis mi khyab pa de bzhin gshegs pa'i chos zhes bya ste/ bsam pa las 'das pa'i phyir ro/ /rab 'byor gzugs bsam gyis mi khyab po/ /tshor ba la sogs pa dang /de bzhin du rgyun du zhugs pa nas dgra bcom pa'i ye shes dang / spangs pa ni byang chub sems dpa'i bzod pa yin par brjod do/ /mi mnyam pa nyid kyi khyad par sdug bsngal la chos shes pas bsdus pa ni gang mi mnyam pa zhes bya ba ni mnyam pa las 'das pa'i phyir ro/ / rab 'byor gzugs mi mnyam pa zhes bya ba la sogs pa gsungs so zhes bstan pa yin no/ /tshad med pa'i khyad par sdug bsngal la chos shes pa'i bzod pas bsdus pa ni gang tshad med pa zhes bya bas ni tshad las yang dag par 'das pa'i phyir ro/ /rab 'byor gzugs kyang tshad med do zhes bya ba la sogs pa gsungs so zhes bstan pa yin no//grangs med pa'i khyad par sdug bsngal la rjes su shes pas bsdus pa ni grangs med pa zhes bya ba ni bgrang ba las 'das pa'i phyir ro/ /rab 'byor gzugs kyang grangs med pa zhes bya ba la sogs pa gsungs so zhes bstan pa yin no/ / mi mnyam pa dang mnyam pa'i khyad par ni bstan par gyur pa'i phyir rgyu'i khyad par gyi sgo nas thams cad la nye bar dgongs par shes par bya'o/ /yang na sdug bsngal la chos shes pa dang / rjes su shes pa 'di gnyis khyad par du 'phags pa'i mthar phyin pas mi mnyam pa'i sangs rgyas dang mnyam par gyur pa la mi mnyam pa dang mnyam pa zhes bya'o zhes bstan pa yin no//mnyam pa dang mi mnyam pa las yang dag par 'das pa'i phyir sems can thams cad kyi gnas dang / skyob pa yin pa'i phyir/ de bzhin gshegs pa shes rab kyi pha rol tu phyin pas mdzad pa chen pos nye bar zhugs pa yin pa'i phyir ro//nyan thos la sogs pa la yang chos shes pa'i bzod pa'i mtshan nyid yod par mtshungs pa ma yin nam/ yang ci'i phyir de bzhin gshegs pa de ltar bsam gyis mi khyab pa la sogs pa'i chos kyi [(]byad [,]khyad [)]par du 'phags pa bstan te/rab 'byor gzugs kyang bsam gyis mi khyab po zhes bya ba nas brtsams te/ rnam pa thams cad mkhyen pa nyid kyi bar du dngos po rnams rang bzhin med pa'i phyir bsam gyis mi khyab pa nyid dang / mi dmigs pa nyid thugs su chud pa'i phyir de bzhin gshegs pa la bsam gyis mi khyab pa la sogs pa brjod par rigs pa yin no//gzhan yang nam mkha'i dpes bsam gyis mi khyab pa la sogs pa'i chos bstan pa de bzhin gshegs pas mkhyen pa gsal bar thun mong ma yin pa'i phyir ro/ /zag pa med pa'i chos bstan pa rgyu phun sum tshogs pas 'bras bu med pa ma yin no zhes bstan pa ni du ma zag pa ma lus pa las sems grol ba la sogs pa yang dag par 'dzin te/de bstan pa'i tshe 'bras bu thob po zhes bstan to/ /'phags pa'i gang zag thams cad sdud par byed pa'i khyad par kun 'byung la chos shes pa'i bzod pas bsdus pa ni gang yang blon po'i dpes nyan thos dang /rang sangs rgyas dang / byang chub sems dpa' dang / sangs rgyas kyi chos thams cad shes rab kyi pha rol tu phyin pa dang yang dag par ldan pa nyid kyis mdzad pa chen po la sogs pas nye bar gnas pa nyid yin te/ de ci'i phyir zhe na/ gzugs yongs su 'dzin pa dang / mngon par chags pa med do zhes gsungs pas bstan pa yin no/ /de bas na thugs su chud pa thun mong ma yin pa'i 'thad pa yin no/ /skyes bu'i khyad par gyis rig par bya ba'i khyad par kun 'byung la chos shes pas bsdus pa ni gang 'di'i cha phra ba dang / mkhas pa/ gsal ba/ yid gzhungs pas shes par bya ba yin par bstan pa yin no//de la phra ba ni de kho na nyid kyi don la 'jug pa'i phyir phra ba'o/ /ma lus pa'i don la 'jug pa'i phyir mkhas pa ste/ ji lta ba dang / ji snyed pa'i ngo bor rtogs pa'i phyir ro/ /de dag kyang rnam pa gnyis ste / mkhas pa zhes bya ba ni sngon blo yongs su sbyangs pa dang /so so'i skye bos skye bas thob pas don de gnyi ga la 'jug nus pa ni shes rab dang yang dag par ldan pa'o/ /yid gsal ba ni de bden pa mthong bas don de gnyis ka la 'jug pa'i shes pa yod pas yid gsal ba'o/ /thun mong ma yin pa'i khyad par kun 'byung la rjes su shes pa'i bzod pas bsdus pa ni gang stong gsum gyi stong chen po'i 'jig rten gyi khams kyi sems can gyi grangs snyed 'das pas rjes su 'brang ba nas rang sangs rgyas kyi bar du gyur pa'i shes pa dang /spangs pa las 'di nyid la mos pa la sogs pa mchog tu 'gyur ro zhes bstan pa yin no//myur du shes pa'i khyad par kun 'byung la rjes su shes pas bsdus pa ni gang 'di ni phul du byung ba'i chos yin par rgya cher bshad pas/ nyan thos kyi theg pa la ltos nas 'di nyid la mngon par brtson pa rnams myur du mya ngan las 'da'o zhes bstan pa yin no/ /nyung ba dang / mang ba med pa'i khyad par 'gog pa la chos shes pa'i bzod pas bsdus pa ni gang sems can thams cad bla na med pa yang dag par rdzogs pa'i byang chub tu yongs su mya ngan las 'das su zin kyang 'di la 'phel ba'am/'grib pa med pa ni pha rol tu phyin pa che ba nyid kyi phyir ro zhes bstan pa yin no//drag tu bsgrub pa'i khyad par 'gog pa la chos shes pas bsdus pa ni gang ba drus ma be'u mi 'dor ba'i dpes thos pa dang bcas pa'i mos pa la sogs pa dang ldan pa sngon gyi thos pa la sogs pa'i rgyu yin pa'i phyir ro zhes bstan pa yin no/ /yang dag sbyor ba'i khyad par 'gog pa la rjes su shes pa'i bzod pas bsdus pas ni gang yang de nyid sangs rgyas mang po la brten pas dga' ldan nas shi 'phos nas 'dir skyes pa nyid skye ba snga mar yongs su dri ba ma byas pa dang ldan pa ni 'di la yid gnyis ldan pas de bzhin du nang stong pa nyid ma thos/yongs su dri ba ma byas zhes bya ba nas brtsams te/de dag ni sa gnyis su ltung zhing 'dod pa yin te/ sngon gyi rgyu'i bag chags kyis rgyun chad cing spyad pa yin te zhes bstan pa yin no/ /dmigs pa'i khyad par 'gog pa la rjes su shes pas bsdus pa ni gang yang rgya mtshor gru zhig pa'i dpes bar chad dang bcas pa dang /bar chad med pa dag ni rnam pa thams cad mkhyen pa nyid thob pa'i mtshan mar dmigs pa dang / dmigs pa med pa'i dbang du mdzad nas 'khor ba'i rgya mtsho las brgal ba'i don no zhes bstan pa yin no/ /rten gyi khyad par lam la chos shes pa'i bzod pas bsdus pa ni gang yang bum pa so btang ba dang /ma btang ba'i dpes bsgrub pa'i chos gzhi med pa dang / gzhi yod par bstan pa'i don gyis so zhes bstan pa yin no/ /rgyu tshogs pa'i khyad par las chos shes pas bsdus pa ni gang yang rgya mtshor gru zag lhan byas pa dang / ma byas pa'i dpes sgrub pa tshang ba dang /ma tshang ba'i don gyis bstan to zhes bstan pa yin no/ /yongs su bzung ba'i khyad par lam la rjes su shes pa'i bzod pas bsdus pa ni gang yang skyes bu rgas shing nyam chung ba'i dpes lhan cig byed pa'i rgyu shes rab kyi pha rol tu phyin pa dang / thabs la mkhas pas yongs su bzung ba dang /yongs su ma bzung bar ldan pas 'khor ba dang / mya ngan las 'das par lhung ba dang mi lhung bar bstan pa'i don la sogs pa'o zhes bstan pa yin no/ /yang thabs la mi mkhas pa dang / thabs la mkhas pa ji lta bu zhe na/ ngar 'dzin pa dang / nga yir 'dzin pas pha rol tu phyin pa drug la spyod pa ni thabs la mi mkhas pas sa gnyis su ltung ngo //de las bzlog pa ni thabs la mkhas pa yin te/ rnam pa thams cad mkhyen pa nyid du nges par 'byung ngo zhes bstan pa yin no/ /ro myang ba med pa'i khyad par bcu drug pa lam la rjes su shes pas yang dag par bsdus pa ni gang rang bzhin med pa'i phyir chos thams cad kun du rtog pa dang /re ba med pa'i phyir bla na med pa yang dag par rdzogs pa'i byang chub tu dge ba'i rtsa ba rnams sngo bar byed cing bsten pa nyid la sogs pa'o zhes bstan pa yin no/ /bshad ma thag pa'i lhug pas bstan pa'i don gang yin pa de tshigs su bcad pas phyis bsdus pa ni 'di yin te/bsam mi khyab dang mi mnyam dang / /gzhal dang grangs las yang dag 'das/ /'phags pa kun sdud mkhas pa yis/ /rig bya thun mong min zhes nyid/ /shes myur bri dang gang ba med/ /sgrub dang yang dag 'grub pa dang / dmigs pa rten dang bcas pa dang /yang dag pa dang yongs 'dzin dang / /ro myang med dang khyad par ni/ /bcu drug bdag nyid ces bya ste/ gang gi lam ni gzhan dag las/ /khyad du 'phags pa khyad par ro / /khyad par gyi mtshan nyid kyi rnam par 'grel pa'o// //khyad par gyi mtshan nyid bstan nas byed pa'i mtshan nyid brjod par bya ba'i phyir//phan dang bde ba skyob pa dang / /mi rnams kyi ni skyabs dag dang / /gnas dang dpung gnyen gling dang ni/ /yongs su 'dren pa nyid dang ni/ /lhun gyis grub dang theg gsum gyis/ /'bras bu mngon sum mi byed bdag /tha ma rten gyi mdzad pa ste//'di ni byed pa'i mtshan nyid yin/ /zhes smras pa la/ de la phan pa'i byed pa ni gang rang gi mtshan nyid stong pa nyid du shes pas byang chub sems dpa' rnams 'jig rten la phan pa dang / 'jig rten la bde ba'i phyir rdzogs pa'i byang chub tu zhugs nas/ dka' ba spyod pas 'gro ba rgyud lnga rnam par grol ba'i mya ngan las 'das pa la dgod pa'i phyir phan pas bsdus pa'i don no zhes bstan pa yin no//bde ba byed pa ni gang sdug bsngal ba dang / yid mi bde ba dang / 'khrug pa rnams nas mya ngan las 'das pa la rab tu 'god pa'i phyir dang / 'jig rten la bde ba'i phyir yang dag par zhugs pa yin te/tshe 'di'i bde bas bsdus pa'i don no zhes bstan pa yin no/ /skyob pa'i byed pa ni gang byang chub sems dpa' rnams 'khor ba na yod pa'i sdug bsngal gang ci yang rung ba las skyob cing / yang mi skye ba'i chos bstan pas 'jig rten skyob pa nyid kyi phyir rnam par smin pa med pa'i chos la bkod pa'i don no zhes bstan pa yin no//skyabs kyi byed pa ni gang sems can skye ba'i chos can rnams phung po lhag ma med pa'i mya ngan las 'das pa'i dbyings su rab tu dgongs pa'i phyir 'jig rten gyi skyabs su gyur pa nyid kyis gtan du phan pa la zhugs pa'i don no zhes bstan pa yin no//gnas kyi byed pa ni gang chos thams cad 'dre ba med pa dang / 'brel ba med pa dang / skye ba med pa dang / 'gag pa med par chos ston pa nyid kyi gnas su gyur pa'i phyir sdug bsngal rgyu las bzlog pa'i don gyis so zhes bstan pa yin no/ /dpung gnyen gyi byed pa ni gang zhig gang chos thams cad kyi pha rol gang yin pa de ni chos thams cad ma yin no//de ci'i phyir zhe na/ gzugs la sogs pa'i pha rol tu phyin pa gzugs la sogs pa'i rnam par rtog pa gang med par chos ston pa'i dpung gnyen du gyur pa nyid kyi phyir 'khor ba dang / mya ngan las 'das par mnyam pa nyid du rtogs pa la zhugs pa'i don no zhes bstan pa yin no/ /gling gi byed pa ni gang gzugs sngon gyi mtha' dang phyi ma'i mtha' yongs su chad pas chus yongs su bskor ba dang / chos mthun par sred pa zad pa dang / 'dod chags dang bral ba dang / 'gog pa dang / mya ngan las 'das pa'i phyir gling du gyur pa nyid kyis rang dang / gzhan gyi don rtogs pa'i rten gyi ngo bor gyur pa'i zhugs pa'i don no zhes bstan pa yin no/ /yongs su 'dren pa'i byed pa ni gang gzugs la sogs pa'i chos thams cad skye ba med pa dang / 'gag pa med pa dang /kun nas nyon mongs pa med pa dang / rnam par byang ba med pa'i chos yang dag par ston pa'i phyir yongs su 'dren par gyur pa nyid kyis gzhan gyi don bsgrub pa la 'jug pa'i don gyis so zhes bstan pa yin no/ /lhun gyis grub pa'i byed pa ni gang / rab 'byor gzugs ni nam mkha'i ngang tshul can zhes bya ba la sogs pa dang /gzugs stong pa nyid ni 'gro ba med pa ste/ de ni mi 'gro mi 'ong zhes bya ba nas brtsams te/ rab 'byor chos thams cad ni mngon par 'du byed pa med pa'i ngang tshul can te/ de dag ni ngang tshul de las mi 'da'o zhes bya ba'i bar gyis chos thams cad shes pa'i dbang du mdzad nas chos ston par mdzad pa nyid kyi phyir sems can gyi don la lhun gyis grub par 'jug cing zhugs pa'i don gyis so zhes bstan pa yin no//thams cad shes pa'i dbang du mdzad nas mya ngan las 'das pa ston pa'i don gyis so zhes bstan pa yin par shes par bya'o//theg pa gsum gyis nges par 'byung ba'i don gyis 'bras bu mngon sum du mi byed pa'i byed pa ni gang rab 'byor chos thams cad mi skye mi 'gag pa dang / kun nas nyon mongs pa med pa dang / rnam par byang ba'i ngang tshul can zhes bya ba nas brtsams te/ chos thams cad ni mi g.yo ba'i ngang tshul can te zhes bya ba'i bar gyis lam shes pa'i dbang du mdzad nas chos bstan pa nyid kyis theg pa ji lta bas nges par 'byung ba dang /de mngon sum du mi byed pa la zhugs pa'i don no zhes bstan pa yin no/ /rten gyi byed pa ni gang rab 'byor chos thams cad ni gzugs kyi ngang tshul can te zhes bya ba nas brtsams te/rab 'byor chos thams cad ni bla na med pa yang dag par rdzogs pa'i ngang tshul can te zhes bya bas rnam pa thams cad kyi chos thams cad mkhyen pa nas chos ston pa nyid kyi phyir/ byang chub sems dpa' rnams ni 'jig rten du gyur pa'i don gyis so zhes bstan pa yin no//byed pa'i mtshan nyid bstan nas rang bzhin gyi mtshan nyid bstan pa'i phyir/ nyon mongs rtags dang mtshan ma dang / /mi mthun phyogs dang gnyen po dang / /dben dang dka' dang nges pa dang / /ched du bya dang mi dmigs dang / /mngon par zhen pa bkag pa dang / / dmigs pa zhes bya gang yin dang / /mi mthun thogs pa med dang ni/ /gzhi med 'gro med skye med dang / /de bzhin nyid ni mi dmigs dang / /ngo bo nyid bcu drug bdag nyid/ /mtshan bzhi lta bur mtshon pa nas / /mtshan nyid bzhi par bzhed pa yin/ /zhes bstan pa yin no/ /ji ltar bcu drug gi bdag nyid yin zhe na/nyon mongs pa las dben pa'i rang bzhin ni gang 'dod chags dang / zhe sdang dang / gti mug rnam par bsal ba'i phyir dben pa'i rang bzhin du gyur pa nyid do zhes bstan pa yin no/ /de'i rtags dben pa'i rang bzhin ni gang 'dod chags dang / zhe sdang dang / gti mug rnams kyi rtags kyis dben pa'i rang bzhin du gyur pa nyid do zhes bstan pa yin no/ /de'i mtshan mas dben pa'i rang bzhin no zhes bstan pa yin no/ /de la rtags ni lus la sogs pa'i gnas ngan len no/ /mtshan ma ni tshul bzhin ma yin pa yid la byed pa'o/ /mi mthun pa dang gnyen po'i phyogs dag gis dben pa'i rang bzhin ni gang de bzhin du 'dod chags dang /'dod chags med pa dang / zhe sdang dang / zhe sdang med pa dang / gti mug dang / gti mug med pa dang / dben pa'i ngo bo nyid kyis rnam pa thams cad mkhyen pa nyid kyi ngang tshul can du 'gyur ba dang /lhag par mos par byed pa rnams la bsgom pa'i lam nye bar bkod pas zhes bstan pa yin no/ /dka' ba nyid kyi rang bzhin ni gang chos thams cad shin tu med pa yin pas de dang 'brel ba med pa'i phyir/ sems can thams cad yongs su mya ngan las 'da' bar bya'o zhes go cha bgos pa ni dka' ba byed pa nyid kyi phyir/shes rab kyi pha rol tu phyin pa bsgom pa ni don dka' ba yin par bstan pa nyid kyis so/ /gcig tu nges pa'i ngo bo ni gang de la go bgos pa ni nyan thos la sogs pa'i sar lhung ba'i gnas med pa nyid kyi phyir ro/ /nges par bsgom pa bstan pa nyid kyi don gyis so zhes bstan pa yin no//ched du bya ba'i rang bzhin ni gang byang chub sems dpa' chen pos sems can thams cad rnam pa thams cad mkhyen pa nyid kyi ye shes thob par bya ba'i don du go cha bgos pa'i ched du bya ba las gzhan du mi 'khrul par shes par bya ba'i don du'o zhes bstan pa yin no//mi dmigs pa'i rang bzhin ni gang bcom ldan 'das shes rab kyi pha rol tu phyin pa 'di ni shin tu zab ste/ de ni sus kyang bsgom par mi bgyi bas bsgom par bya ba dang / sgom pa po dang / sgom pa'i dmigs pa rnam par bsgom pa zhes bya ba nas brtsams te rnam pa thams cad mkhyen pa nyid kyi bar du bsgom pa rnam par bsgom pa mi dmigs pa de bas na/bcom ldan 'das 'di lta ste/ shes rab kyi pha rol tu phyin pa zab mo bsgom pa ni rnam pa thams cad mkhyen pa nyid bsgoms pa lags so zhes bstan pa yin no/ /mngon par zhen pa bkag pa'i rang bzhin ni gang rab 'byor shes rab kyi pha rol tu phyin pa zab mo 'di la phyir mi ldog pa'i byang chub sems dpa' chen pos yongs su brtag par bya'o zhes bya ba nas shes rab kyi pha rol tu phyin pa mngon par zhen pa med par yongs su brtag par bya'o zhes bya ba nas brtsams te/'di bstan pa'i tshe mi 'jigs / mi skrag pa la sogs pas lam shes pa'i rnam par bsgom pa nyid do zhes bstan pa yin no//dmigs pa'i rang bzhin ni gang bcom ldan 'das ji ltar na rnam pa thams cad mkhyen pa nyid du gzhol ba'i bsam pas byang chub sems dpa' sems dpa' chen po shes rab kyi pha rol tu phyin pa la yongs su rtog pa lags zhes bya ba nas brtsams te/rab 'byor rmi lam dang / sprul pa la gzhol ba'i bsam pas byang chub sems dpa' chen pos shes rab kyi pha rol tu phyin pa zab mo 'di la yongs su rtog pa yin zhes bya ba'i bar gyis ni rnam pa thams cad mkhyen pa nyid rnam par bsgom pa nyid bstan pas zhes gsungs pa yin te/de ci'i phyir zhe na/ gzugs nas rnam pa thams cad mkhyen pa nyid kyi bar la yang yongs su rtog pa yin no zhes bya ba nas thams cad shes pa nyid dang / lam gyi rnam pa shes pa nyid kyi dbang du byas nas gsungs pa nyid las/ dmigs pa'i bsgom pa'i khyad par rab tu bskyed pas rnam pa thams cad mkhyen pa nyid kyi dmigs pa'i khyad par ngo bo ston pa'i don gyis zhus pa la/ rab 'byor byang chub sems dpa' chen po ni gzugs nas rnam pa thams cad mkhyen pa nyid kyi bar la rtog pa ma yin no//zhes bya ba nas brtsams te/ rnam pa thams cad mkhyen pa nyid kyi de bzhin gang yin pa de ni sangs rgyas rnams kyi de bzhin nyid do zhes bya ba nas rnam pa thams cad mkhyen pa nyid kyi de bzhin nyid la dmigs pa'i khyad par shes pa'i don gyi lan so sor bstan pas so zhes bstan pa yin no//gal te de de ltar yin na/ sdig pa'i chos rnams thams cad de/ /mi dge ba la sogs pa de ji ltar yin zhes bya ba la sogs pa de ji ltar yin zhe na/ gzugs nyid rnam pa thams cad mkhyen pa nyid do/ /rnam pa thams cad mkhyen pa nyid gzugs so zhes bya ba gsungs pa de nyid kyi phyir gcig la gcig ngo bo zab pa yin no//de ci'i phyir zhe na/ de dag gi de bzhin nyid ni gnyis su med cing gnyis su byar med pa nyid yin pa'i phyir ro/ /de ltar chos kyi 'khor lo bskor ba ji ltar 'thad pa yin zhe na/ sangs rgyas dang thams cad mkhyen pa nyid kyi de bzhin nyid dag ni gnyis su med cing gnyis su byar med pa nyid kyis chos kyi 'khor lo bskor ba'i don du thugs las chung ba nyid kyi rgyu ni dmigs par bya ba dang /dmigs par byed pa'i dbye ba med pa nyid kyi phyir ro zhes bya ba'i don to/ /'jig rten thams cad dang mi mthun pa'i rang bzhin ni gang lha'i bu dag nam mkha' zab pa'i phyir chos 'di zab po zhes bya ba nas brtsams te/rnam pa thams cad mkhyen pa nyid kyi bar du bzung ba'i slad du bstan pa ma lags/ mi gzung ba'i slad du bstan pa yang ma legs so/ / bcom ldan 'das 'jig rten ni mtshan ma la spyod do zhes bya ba 'jig rten thams cad dang mi mthun pa nyid kyis ni 'dzin pa la spyod pa ni shes rab kyi pha rol tu phyin pa'i snod ma yin pa nyid do zhes bstan pa yin no/ /thogs pa med pa'i rang bzhin ni gang de ltar thams cad mkhyen pa rnam pa gsum yongs su rdzogs pa'i mngon par rtogs pa dang mthun pa nyid kyi phyir gzugs la sogs pa'i chos thams cad la ye shes thogs pa med pa nyid do zhes bstan pa yin no//gzhi med pa'i rang bzhin ni gang gzugs la sogs pa'i rten mi dmigs pa nas brtsams te/shes pa dang / shes bya mnyam pa nyid kyi don nyid do zhes bstan pa yin no/ /'gro ba med pa'i rang bzhin ni gang 'di ni thams cad mkhyen pa gsum po kun bskyed pa'i dbang du mdzad nas shes rab kyi pha rol tu phyin pa bsgom pa la/ gnas brtan rab 'byor dper byas nas/ji ltar de bzhin gshegs pa'i de bzhin nyid gang yin pa de ni ma 'ongs ma song ba de bzhin du/ gnas brtan rab 'byor gyi de bzhin nyid kyang ma 'ongs ma song ba nas/ gnas brtan rab 'byor ni de bzhin gshegs pa'i rjes su skyes so/ / de bzhin du chos rnams kyi de bzhin nyid ces bya ba ni chos su mngon par 'dod pa yin te/ gzugs la sogs pa rnams kyi spyi yin no/ /chos nyid gnas pa ni de bzhin nyid ces bya ste/ chos nyid kyi rgyun 'gyur ba med cing rnam par rtog pa med pa ni de bzhin nyid ces bya'o//bsgrub pa'i chos kyi khyad par du 'gro ba ni de'i rnam par rtog pa med pa ni chos nyid yin no/ /mi byed pa'i de bzhin nyid ces bya ba ni theg pa gsum gyi dbye ba dmigs su med pa'i chos nyid yin no/ /gzhan ma yin pa de bzhin nyid ces bya ba ni theg pa gsum gzhan du tshol ba med pa ni chos nyid yin no//dus gsum mnyam pa nyid kyi de bzhin nyid ni rang bzhin gyis mya ngan las 'das pa'o/ /de bzhin du phung po rnams kyi de bzhin nyid dang / khams dang / skye mched rnams dang / rten cing 'brel par 'byung ba la sogs pa'i de bzhin nyid dang /sbyin pa'i pha rol tu phyin pa la sogs pa'i de bzhin nyid nas rnam pa thams cad mkhyen pa nyid kyi bar gyi de bzhin nyid dang / de bzhin gshegs pa'i de bzhin nyid de la gnyis su med de gnyis su byar med pa nyid du rtogs pas de bzhin gshegs pa zhes bya ba'i ming thob par gyur pa'i phyir ming de'i mtshan ma dpang por gyur pas/stong gsum gyi stong chen po'i 'jig rten gyi khams su rtogs pa mtho ba dang dma' bar gyur pa yin pa'i phyir/ 'di lta ste/ mdo las de'i tshe stong gsum gyi stong chen po'i 'jig rten gyi khams rnam pa drug tu g.yos pa'i mtshan ma chen po bco brgyad du gyur pa ni g.yos pa dang /rab tu g.yos pa dang / kun tu rab tu g.yos pa'o/ /'gul/ rab tu 'gul/ kun tu rab tu 'gul lo/ /ldeg /rab tu ldeg /kun tu rab tu ldeg go//chem/ rab tu chem/ kun tu rab tu chem mo/ /'ur 'ur/ rab tu 'ur 'ur/ kun tu rab tu 'ur 'ur ro/ /shig /rab tu shig /kun tu rab tu shig shig ces bstan pa yin no/ /de la rnam pa drug ni g.yo ba dang / mtho ba dang / dma' ba dang / steng du 'gro ba dang /'og tu 'gro ba dang / sgra rjes su sgogs pa'o/ /ltas chen po bco brgyad ni g.yo ba la sogs pa'i 'gyur ba rnam pa drug po de dag nyid go rims bzhin du chung ngu dang / 'bring dang / chen po nyid kyis shes par bya ste/ snod kyi 'jig rten sbyang bar byas pa dang / ma byas pa'i dbang du byas pa gnyis dang / sems can gyi 'jig rten gyi dbang du byas pa ni rnam pa bzhi ste/ sems can gyi tshogs mi dge ba la spyod pa dang / sna tshogs la mos pa dang / nga rgyal dang / rigs pa dang ldan pa'i bya ba chung ngu dang / 'bring dang / chen po'i dbye bas g.yos so zhes bya ba nas kun du rab tu shig shig ces bya ba'i bar du tshig bco brgyad kyis don bstan pa yin par shes par bya'o zhes gnas brtan dbyig gnyen gyis bshad do//de ltar thams cad shes pa'i rnam par rjes su skyes pa nyid kyis so zhes bstan pa yin no//skye ba med pa'i rang bzhin ni gang lha'i bu dag gnas brtan rab 'byor ni gzugs kyi rjes su ma skyes/ gzugs kyi de bzhin nyid kyi zhes bya ba nas brtsams te/ de ci'i phyir zhe na/ de ni 'di ltar chos 'di dag med cing mi dmigs so/ / gang skye ba med cing / gang skye ba'ang med do/ /de bzhin du lam gyi rnam par shes pa yang rjes su skye ba med pa'i phyir ro zhes bstan pa yin no/ /de bzhin nyid mi dmigs pa'i rang bzhin bcu drug ni gang bcom ldan 'das de bzhin nyid 'di ni zab ste/ rtag tu de bzhin nyid du gnas pa'i phyir ro zhes bstan pa yin no//ma nor ba'i de bzhin nyid ces bya ba ni phyin ci ma log pa'i don gyis so/ /gzhan ma yin pa'i de bzhin nyid ni/ chos nyid las chos nyid brtsal ba'i don gyis so/ /chos nyid ces bya ba ni chos rnams kyi dbye ba med pa'i mtshan nyid yin pa'i phyir ro//chos kyi dbyings zhes bya ba ni 'phags pa'i chos thams cad thob pa'i rgyu'i don gyis so/ /chos gnas pa nyid ces bya ba ni sangs rgyas thams cad kyis mdzad pa'i phyir ro/ /chos skyon med pa nyid ces bya ba ni rgyu dang rkyen mi 'khrul pa'i phyir ro/ /yang dag pa'i mtha' zhes bya ba ni phyin ci ma log pa de la dmigs pa'i phyir ro//yang dag pa ni phyin ci ma log pa nyid do/ /de'i mtha' ni mthar thug pa ste/ bdag med pa las gzhan du de kho na brtsal du med pa'i phyir ro/ /rnam pa thams cad mkhyen pa nyid kyi bar du dmigs su med pa'i phyir ro//yang ci'i phyir de bzhin nyid dmigs su med ce na/ rnam pa thams cad mkhyen pa nyid ma skyes pa nyid yang dag par mthong ba'i phyir ro/ /de'i tshe du ma rnams la bstan pas rtogs pa thob pa gsal ba nyid yin no/ /shes rab kyi pha rol tu phyin pas yongs su ma bzung zhing /thabs la mkhas pa dang bral ba ni nyan thos la sogs pa'i sar ltung bar 'gyur te/ gzhan de rnams kyis de ltar shes nas shes rab kyi pha rol tu phyin pa dang thabs la mkhas pa la sbyar zhing spro ba bskyed pa'i don du bya lus chen por gyur pa'i dpes sbyin pa la sogs pas rab tu zin kyang gnyis po dang bral na nyan thos la sogs pa'i sar ltung ste/de ltar bstan pas gnyis po ni nges par 'byung ba la gtso bo yin par bstan to/ /de la gshog pa dang ldan pa la ni 'dab chags zhes bya'o/ /des dbye ba ni bya nyid yin no/ / zhes shes par bya ba'i phyir bya zhes bya ba smos so/ /de ltar bdag nyid lus che la gshog pa dang bral ba'i phyir zhig ces gsungs pa yin no/ /rang bzhin gyi mtshan nyid kyi rnam par 'grel pa'o// //ci nas kyang 'dir sbyor ba la brtson pa thams cad 'bras bu dang bcas par 'gyur ba ma yin no //'dir med par ni mi 'gyur ro/ /de lta mod kyi ji lta bu zhig la zhe na/ thar pa'i cha dang mthun pa'i dge ba'i rtsa ba dang ldan pa rnams la'o/ /thar pa'i cha dang mthun pa yang ji lta bu zhig ce na/ /mtshan med rab tu sbyin la sogs/ / yang dag bsgrub la mkhas pa ni/ /rnam pa thams cad rtogs 'di ru/ thar pa'i cha dang mthun par 'dod/ /ces bstan to/ /gang rnam pa kun mngon par rdzogs par rtogs pa 'di thar pa'i cha dang mthun pa'i dge ba'i rtsa ba'i dbang du byas nas dang po sems bskyed pa nas nye bar bzung ste/rnam pa thams cad mkhyen pa nyid kyi bar du thabs la mkhas pas mtshan ma med par byas nas sbyin pa la sogs pa sbyin par byed pa ni spyod par rjes su gnang ba yin no zhes bstan pa yin no/ /de yang dad pa dang / brtson 'grus dang / dran pa dang /ting nge 'dzin dang / shes rab kyi mtshan nyid du rig par bya'o/ /yang ci'i phyir 'dir sbyin pa la sogs pa'i mtshan ma'i 'du shes rnams bkag ce na/ shin tu rnam par dag pa'i phyir chos rnams gang cung zad kyang chos kyi ngo bor med cing mi dmigs pa'i phyir ro/ / mtshan ma'i 'du shes kyis bla na med pa yang dag par rdzogs pa'i byang chub par dka' ba'i phyir ro/ /mtshan ma med pa'i 'du shes kyis chos thams cad stong pa nyid kyi rnam par goms par byas pas des sla bar mngon par rdzogs par byang chub par 'gyur ba'i phyir ro//mtshan ma med pa'i 'du shes las bzlog pa ni 'khrul pa zhes bya ste/ gang gA'i klung gi bye ma snyed kyi byang chub sems dpa' bzlog pa mthong bas bla na med pa yang dag par rdzogs pa'i byang chub dka' ba nyid kyi phyir ro zhes gsungs so/ /mtshan ma'i 'du shes ni rnam pa bzhi ste/gzugs la sogs pa'i 'du shes dang / de las gzhan pa skyes bu'i 'du shes dang / de bzhin nyid kyi 'du shes dang / chos kyi 'du shes so/ /gang la de dag gi med pa ni 'du shes med pa zhes bya ste/ des ni yang mngon par byang chub par sla ba yin no//gzugs la sogs pa rnams dang / de las gzhan pa dang / de bzhin nyid dang / de las bzlog pa'i chos gzhan mi dmigs pa'i phyir ro/ /'di ltar de bzhin nyid dang / chos kyi dbyings dang / chos kyi gnas nyid dang / chos nges pa nyid dang / yang dag pa'i mtha' dang /bsam gyis mi khyab pa'i dbyings las gzhan pa'i ldog pa byang chub sems dpa' mi dmigs pas ni yang mngon par rdzogs par byang chub par sla ba ni 'thad pa yin pa'i phyir ro/ /de lta mod kyi nyan thos kyi theg pa la sogs pa'i byang chub sems dpa' rnam pa gsum med pa'i phyir/byang chub sems dpa' gcig tu yang 'dod par bya ba ma yin par thal bar 'gyur ro/ /de lta bu'i nyes par 'gyur te/ de ci'i phyir zhe na/ khyed byang chub sems dpa' gcig tu yang 'dod dam zhes bya ba nas brtsams te/ bden pa la gnas pas des chos rnams mi dmigs na de ltar ga la 'gyur/byang chub sems dpa' gcig dang du mar khas mi len pa'i 'thad pa yin no zhes bstan pa yin no/ /bden pa ni don dam pa'i bden pa nyid do/ /gnas pa zhes bya ba ni tha snyad du btags pa zhes bya ba'i don to/ / thar pa'i cha dang mthun pa'i rang gi ngo bo bstan nas/ da ni rtags brjod par bya ste/ gang gi rtags su shes she na/ de la rtags ni rnam pa gsum ste/ gnas ma yin pa la skrag pa'i phyir ro/ /kun du zhum pa ni rgyun du skrag pa'i phyir ro/ /rgyab kyis phyogs pa ni kun du skrag pa mthar thug pa'o//de dag gi snod ma yin pa thob pa'i phyir/ gang zhig de las bzlog pa gang yin pa ni chos thams cad kyi de bzhin nyid yin te/ rnam pa thams cad mkhyen pa nyid la rab tu brtags nas byang chub sems dpa' sems dpa' chen po dang / byang chub sems dpa' la khyad par med do zhes bstan to//byang chub sems dpa' rnam pa gsum du brtags pa mi dmigs pa sems ma zhum pa dang / mi skrag pa la sogs pa ni bla na med pa yang dag par rdzogs pa'i byang chub tu nges par 'byung ngo zhes gsungs pa'i phyir ro/ / 'di ltar thar pa'i cha dang mthun pa'i dge ba'i rtsa ba chung ngu dang / 'bring dang / chen po rnams las de la chung ngu ni gang mtshan ma med par bya ste/ sbyin pa la sogs pa gtong ba dang / thabs la mkhas pa la sogs pa yin no zhes bstan pa yin no/ /'bring ni gang chos thams cad stong pa nyid kyi rnam par goms par byas pa la sogs pa'o zhes bstan pa yin no//chen po ni gang gzugs la sogs pa de rnams las de bzhin nyid de gzhan pa dang / de las gzhan pa'i ldog pa'i chos mi dmigs pa la sogs pa'o zhes bstan pa yin no//de dag thams cad kyang thos pa dang / bsams pa'i shes rab kyi rang bzhin yin par rig par bya ste/ dang por bstan pa la 'jug pa'i rgyu yin no zhes bstan pa yin no/ /sbyor ba la thar pa'i cha dang mthun pa'i rnam par 'grel pa'o// // thar pa'i cha dang mthun pa bstan nas da ni sbyor ba'i lam nges par 'byed pa'i cha dang mthun par brjod par bya'o/ / dmigs pa dang ni rnam pa dang / /rgyu dang yongs su bzung ba yis/ /zhes sngar bstan pa ma yin nam/ sbyor ba la nges par 'byed pa'i cha dang mthun pa yang ci'i phyir bshad ce na/khyad par gyi mtshan nyid bstan nas da ni sems can thams cad kyi rten can sbyor ba'i lam gyis bsdus pa bstan pa'i phyir/ /dro ba rnams kyis dmigs pa 'dir/ /sems can thams cad yin par bsngags/ /de dag nyid la sems mnyam sogs//rnam pa dgu ru rig par bya/ /zhes bstan pa las 'dir sems can thams cad la dmigs pa'i sems mnyam pa nyid la sogs pa'i rnam par sbyor ba'i lam nges par 'byed pa dro bar gyur pa ji ltar brjod ce na/ de la smras pa/ sems can thams cad la sems mnyam pa nyid bskyed nas des dmigs nas gnas pa dang /de bzhin du byams pa'i sems bskyed nas des dmigs pa nyid dang / nga rgyal med pa'i sems bskyed nas 'tshe ba med pa des dmigs par byed pa nyid dang / khong khro med pa'i sems bskyed nas des dmigs par byed pa nyid dang /de bzhin du ma dang / pha dang / spun zla dang / sring mo dang / grogs po dang / gnyen dang / snag gi gnyen mtshams kyi bar du sems bskyed nas des dmigs par byed pa nyid dang / yang rnam pa thams cad du mi zad pa med pa'i sems bskyed par bya'o zhes bya ba la sogs pa bstan pas ni gnyis su mi 'byed par shes par bya ba'i ched yin no//pha dang ma la sogs pa gnyis gnyis gcig tu byas nas rnam pa dgur 'gyur ba yin no/ /'dir re zhig sbyor ba'i lam la dro bar gyur pa de lta bu yin na/rtse mor gyur pa ji lta bu zhig ce na/ bdag nyid sdig pa las ldog cing / /sbyin la sogs pa gnas pa gzhan/ /de dag la ni 'god pa dang / /bsngags pa brjod dang rjes mthun nyid/ /rtse mor gyur ces bya ba la/ bdag nyid sdig pa las ldog cing sbyin pa la sogs pa la 'jug pa ni gang bdag nyid kyang srog gcod pa spong bar byed/gzhan dag kyang de la sbyor bar byed ces bya ba nas brtsams te/ bdag kyang rten cing 'brel par 'byung ba lugs dang mthun pa dang / lugs dang mthun pa las bzlog pa la mnyam par 'jog par byed cing de la gzhan dag yang dag par sbyor ba dang /de'i bsngags pa brjod pa dang / de snyoms par 'jug pa gzhan dag la yang mthun pas dga' bar byed cing / 'dir yang sems can thams cad la dmigs nas sdig pa las ldog pa dang / dge ba la sogs pa la 'jug pa la yang dag par sbyor zhing /bsngags pa brjod pa la sogs pas mthun par dga' bar byed pa ni 'dir sbyor ba'i lam rtse mor gyur pa yin no zhes bstan pa yin no/ /bzod par gyur pa ji lta bu zhig ce na/ de bzhin bzod pa ni/ bdag gzhan rten can bden zhes pa/ /zhes bstan pa la/de bzhin zhes bya ba ni ji ltar sngar gzhan gyi rten can gyi dbye ba ltar/ dmigs pa'i dbye bas phye ba ni gang bdag gis kyang sdug bsngal yongs su shes par bya/ kun 'byung spang bar bya/ 'gog pa mngon du bya/ lam bsgom par bya zhes bya ba nas brtsams te/ bdag kyang byang chub sems dpa'i skyon med par gnon cing /de la gzhan dag sbyor zhing bsngags pa brjod pa la sogs pas de gnon pa la mthun pas dga' bar byed pa yin te/ dmigs pa'i rnam pa'i bye brag brjod pa snga ma bzhin no/ /'dir sbyor ba'i lam nges par 'byed pa'i bzod par gyur pa yin no zhes bstan pa yin no//'jig rten pa'i chos ji lta bu zhig ce na/ chos mchog de bzhin sems can rnams/ /zhes bya ba smos te/ ji ltar bshad pa de bzhin du bzod pa bstan no/ /bdag gzhan rten can nyid kyang 'dir rjes su sbyar ro/ /dmigs pa dang rnam pa'i [(]bre [,]bye [)]brag rnams ji lta bu zhig ce na/sems can rnams smin byed sogs kyis/ zhes bya ba la gang bdag nyid kyang sems can rnams yongs su smin par byed cing zhes bya ba nas brtsams te/ de de ltar slob cing 'dod pa de nyid kyis bsgribs pa med pa'i gzugs su 'gyur ba yin te/ dam pa'i chos gnas pa nyid sgrib pa med par 'gyur ba yin pa'i phyir ro//de ci'i phyir zhe na/ 'di ltar de ni byang chub sems dpa' sems dpa' chen pos snga ma bzhin du gzugs nas rnam pa thams cad mkhyen pa nyid kyi bar du yongs su ma bzung ba'i phyir ro/ /de ci'i phyir zhe na/ 'di ltar gzugs yongs su gzung ba med pa nas rnam pa thams cad mkhyen pa nyid kyi bar du yongs su gzung ba med pa ni rnam pa thams cad mkhyen pa nyid ma yin no//zhes bya ba ni 'thad pa yin no/ /sbyor ba'i lam 'jig rten pa'i chos kyi mchog de yang de'i nges par 'byed pa'i cha dang mthun pa chung ngu dang /'bring dang / chen po'i rigs kyi dbye bas re re zhing rnam pa gsum gsum du 'gyur ro/ /de la dro bar gyur pa chung ngu ni ji skad du/ sems can thams cad la sems mnyam pa nyid bskyed nas des dmigs pas gnas par bya'o zhes bya ba la sogs pa gsungs pa yin no//tshe 'di yin te/ gzhan la mi 'tshe ba nyid nye bar gzung ba yin no/ /'bring ni ji skad du/ phan pa'i sems bskyed nas des dmigs pa nyid du bya'o/ /zhes bya ba la sogs pa gsungs pa yin no/ /phyi ma gzhan la phan par dgongs pa nye bar gzung ba yin no//chen po ni ji skad du/ pha dang ma dang / spun zla dang / sring mo la sogs pa'i sems bskyed nas des dmigs pa nyid du bya'o zhes gsungs pa yin no/ /'phral dang yun ring por yid du 'ong bas bsdus pa la 'jug par 'dod pa nyid kyi phyir 'di dang / phyi ma gnyi ga yin no zhes nye bar gzung ba yin no//rtse mor [(]gyung [,]gyur [)]pa chung ngu ni ji skad du/ bdag nyid kyang srog gcod pa spong bar byed ces bya ba la sogs pa gsungs pa yin no/ /gzhan sdug bsngal gyi rgyu la 'jug pa las bzlog par bzhes pa nye bar gzung ba'i phyir ro/ /rtse mor gyur pa 'bring ni ji skad du/bdag nyid kyis kyang sbyin pa'i pha rol tu phyin pa yongs su rdzogs par byed ces bya ba la sogs pa gsungs pa yin no/ /gzhan bde ba'i rgyu la yang dag par sbyor bar bzhed pa nye bar bzung ba yin pa'i phyir ro/ /rtse mor gyur pa chen po ni ji skad du/ bdag nyid kyang nang stong pa nyid la mnyam par gzhag par bya'o zhes bya ba la sogs pa gsungs pa yin no//gzhan dag sdug bsngal la bde bar phyin ci log tu 'dzin pa spangs par bzhed pa nye bar gzung ba'i phyir ro/ /bzod pa chung ngu ni ji skad du/ bdag nyid kyang sdug bsngal yongs su shes par bya zhes bya ba la sogs pa gsungs pa yin no//gzhan dag 'phags pa'i lam la nges par sbyor bar bzhed pa nye bar gzung ba'i phyir ro/ /bzod pa 'bring ni ji skad du/ bdag nyid kyang rgyun du zhugs pa'i 'bras bu mngon du bya ba'i shes pa bskyed par bya ste/ yang dag pa'i mtha' mngon sum du mi bya'o zhes bya ba la sogs pa gsungs pa yin no//gzhan dag 'bras bu la yang dag par sbyor bar bzhed pa nye bar gzung ba'i phyir ro/ /bzod pa chen po ni ji skad du/ bdag nyid kyang byang chub sems dpa'i skyon med pa nyid la 'jug par bya zhes bya ba la sogs pa gsungs pa yin no/ /gzhan dag sangs rgyas nyid la yang dag par sbyor bar bzhed pa nye bar gzung ba yin pa'i phyir ro//bzod pa de yang skad cig ma gcig yin par shes par bya'o/ /chos kyi mchog chung ngu ni bdag gis kyang sems can yongs su smin par bya zhes bya ba la sogs pa gsungs pa yin no/ /khyad par med pa'i theg pa gsum gyis yongs su smin par bzhed pa nye bar gzung ba yin pa'i phyir ro//chos kyi mchog 'bring ni ji skad du/ bdag nyid kyang byang chub sems dpa'i mngon par shes pa bskyed par bya zhes bya ba la sogs pa gsungs pa yin no/ /sems can rnams khyad par gyi lam la byang chub sems dpa'i mngon par shes pa la yang dag par sbyor bar bzhed pa nye bar gzung ba yin no//chos kyi mchog chen po ni ji skad du/ bdag nyid kyang rnam pa thams cad mkhyen pa nyid bskyed par bya zhes bya ba la sogs pa gsungs pa yin no/ /gzhan phun sum tshogs pa thams cad mthar thug pa la 'jog pa bzhed pa nye bar gzung ba yin pa'i phyir ro//gang 'di ltar bzod pa'i chen po skad cig ma gcig yin par bstan pa de bzhin du chos kyi mchog kyang yin no/ /zhes bya ba de ni rang gi don gyi dbang du byas pa yin la/ 'dir ni gzhan gyi rten can chung ngu dang / 'bring dang / chen po'i bye brag bshad pa'i phyir / gzhan gyi don la gong nas gong du 'gro ba'i gnas skabs yod pa'i phyir de dang 'di la 'gal ba med do/ /sbyor ba'i lam nges par byed pa'i rnam par 'grel pa'o// // 'on te 'di skad du/ nyan thos kyi dge 'dun nam/ byang chub sems dpa'i dge 'dun yin zhes zer na/ de dag ni nyan thos kyi dge 'dun yin par shes par bya ste/ lam gyi 'bras bu dang / 'bras bu'i lam gyi dbye bas skyes bu zung bzhi yin par shes par bya'o//byang chub sems dpa'i dge 'dun yin par bstan pa'i phyir rnam pa kun mngon par rdzogs par rtogs pa'i dbang du byas nas/ phyir mi ldog pa'i mtshan nyid las brtsams nas so so'i bdag nyid kyi mtshan nyid bstan pa'i phyir dri ba tha dad pa yin no zhes bstan to//ji skad du/ bcom ldan 'das bdag gis ji ltar phyir mi ldog pa dang / phyir mi ldog pa'i mtshan nyid du 'tshal bar bgyi zhes bya bas ni bdag dang / gzhan rtogs pa'i rgyu mtshan ni yongs su zhus pa yin no/ /rab 'byor gang yang so so'i skye bo'i sa zhes bya ba nas brtsams te/gzhan gyis byas pa dang / ma byas pa la blta bar mi bya'o zhes bya ba'i bar gyis ni de'i mtshan nyid gsungs pa yin no/ /gzhan rtogs pa'i rgyu mtshan du phyir mi ldog pa'i dbang du mdzad nas yang byang chub sems dpa'i dge 'dun rnam pa gsum du 'gyur bar rig par bya'o//nges par 'byed pa'i chas bsdus pa sbyor ba'i lam gyi gnas skabs dang / bzod pa dang shes rab bsdus pa mthong ba'i lam gyi gnas skabs dang / rgyun dang ldan pa'i bsgom pa'i lam gyi gnas skabs so//de yang gang / nges 'byed yan lag nas bzung ste/ /mthong dang goms pa'i sa dag la/ /byang chub sems dpa' gang dag gnas/ /de 'dir phyir mi ldog pa'i tshogs/ /shes bstan pa ni dge 'dun yin/ /zhes bya ba'i don to/ / gzugs la sogs pa las ldog pa'i rtags rnam pa nyi shu ni nges par 'byed pa'i yan lag la gnas pa 'di'i mtshan nyid yin te/ gang bcom ldan 'das rnam pa zhes bgyi ba 'di ji lta bu lags zhes bya ba ni rtogs pas bsdus pa ni rtags zhes bya'o/ /rang gi rten mtshon pa ni mtshan ma zhes bya'o //des yongs su longs spyod pa ni rnam pa'o/ /de lta bu ni byang chub sems dpa' sems dpa' chen po phyir mi ldog par rig par bya ste/ de ni gzhan dag rtogs par bya ba'i phyir zhugs pa yin no/ /rtags nyi shu gang dag yin zhe na/ gzugs la sogs pa las ldog pas te /gang rab 'byor chos thams cad ni rnam pa med pa/ rtags med pa/ mtshan ma med pa'o zhes bstan pa yin no/ /tshor bar bya ba dang / tshor ba po'i 'brel pa bkag pas gzugs la sogs pa nas yang dag par rdzogs pa'i byang chub las phyir ldog pa ni phyir mi ldog pa nyid yin no//de ci'i phyir zhe na/ gzugs la sogs pa rnams rang gi ngo bo gnas pa med pa'i phyir ro/ /gzhan yang yid gnyis med pa nyid kyis lha gzhan dag la phyag mi 'tshal zhing / me tog la sogs pas mchod par mi sems pa dang / gzhan yang mi khom pa brgyad dang /bud med kyi dngos po yongs su 'dzin par mi 'gyur ba dang / yang bdag nyid kyang dge ba bcu'i las kyi lam la yang dag par gnas pa yin te / de nyid gzhan dag yang dag par 'dzin du 'jug pa yin te / de'i bsngags pa brjod pa yin/ /mthun pas dga' bar byed pa yin//sems can thams cad la pha rol tu phyin pa drug ston cing bsgom pa la mdo sde la sogs pa'i chos kyi sbyin pa gtong zhing / de sems can thams cad kyis mngon par 'dod pa yongs su rdzogs par bya ba'i phyir bla na med pa yang dag par rdzogs pa'i byang chub tu bsngo ba dang /chos thams cad mi mthong bas chos zab mo la nem nur dang / the tshom dang / yid gnyis med pa dang / de las lam gzhan 'dod cing mthar thug pa'i nus pa med pa'i phyir nem nur ro/ /lam dang 'dra ba las bzlog pa ni yid gnyis so/ /rigs kyi chos dge ba rnam pa sna tshogs 'phel ba med par 'gro bas na/the tshom za ba'i phyir the tshom mo/ /byams pa'i lus dang / ngag dang / yid kyi las dang ldan pa dang / sgrib pa lnga dang / lhan cig mi gnas pa dang / bag la nyal thams cad dus thams cad du med pa ni ma rig pa dang /lta bas bsdus pa'i bag la nyal ba yin gyi/ byang chub sems dpa' ni bsams bzhin du srid pa len pa'i phyir 'dod pa dang / srid pa'i zag pas bsdus pa ma yin no/ /'gro ba dang / 'ong ba la sogs pa'i spyod lam la sogs pa'i dran pa nye bar 'jog pa nyid dang /gtsang sbra'i kun tu spyod pa dang ldan zhing nad nyung ba nyid yin la/ chos gos dang longs spyod smad du med pa nyid kyis drod du gtogs pa'i gnas skabs yin no/ /dge ba'i rtsa ba 'jig rten thams cad las mngon par 'phags pa nyid yin pas lus la srin bu'i rigs stong phrag brgyad cu med pa nyid dang /dge ba'i rtsa ba rnam par dag pa'i phyir sems kyi gya gyu dang bral bas nyan thos la sogs pa'i sa las 'das nas/ gong nas gong du lus dang sems yongs su dag pa 'dzin cing rgyu nyid du gyur pa dang / rnyed pa dang / bkur sti la sogs pa lhur len pa ma yin pa dang / sbyangs pa'i yon tan bcu gnyis yang dag par blangs te spyod pa dang / pha rol tu phyin pa'i mi mthun pa'i phyogs ser sna la sogs pa'i sems mi bskyed pa dang / blo brten zhing zab pas gzhan las chos nyan pa na chos nyid sbyor ba yin pa'i phyir shes rab kyi pha rol tu phyin pa'i rnal 'byor yang dag par bsgrub pa dang /yang bdud sdig can gyis sems can dmyal ba chen po brgyad sprul te/ ngan song du lhung zhing sdug bsngal mi bzad pas rgyun du sdug bsngal ba'i tshor ba'i dbang du byas pa 'di ni byang chub sems dpa'i phyir mi ldog par lung bstan pa yin no//zhes bstan cing 'byed pa na sems mi 'khrugs par 'gro ba yongs su skyob cing / bla na med pa yang dag par rdzogs pa'i byang chub las sems phyir mi ldog pa nyid kyis rtse mor gtogs pa'i gnas skabs yin no/ / yang byang chub sems dpa'i drung du bdud sdig can dge sbyong gi cha byad du 'ongs te 'di skad du zhes bya ba nas brtsams te/ lam gzhan bstan du zin kyang dge slong dgra bcom pa'i dpes gzhan la yid ches par mi 'gro ba nyid yin no/ /de ci'i phyir zhe na/ 'di ltar des gang la yid ches pas 'gro ba'i chos gang yang yang dag par rjes su mi mthong ba la sogs pa ni 'thad pa yin no//gzhan yang bdud sdig can 'jig rten pa'i rnam pas rus gong gi 'du shes la sogs pa lam gyi gzugs brnyan ston pa na/ 'di ni bdud sdig can yin no zhes khong du chud pas sems can thams cad yongs su gtong ba'i sems mi bskyed pa'i phyir bzod par gtogs pa'i gnas skabs yin no//shes rab kyi pha rol tu phyin pa yid la byed pa dang ma bral bas de bzhin gshegs pas yang dag par gsungs pa'i spyod pa dang rjes su mthun pas gnas shing /sbyin pa'i pha rol tu phyin pa la sogs pa nas rnam pa thams cad mkhyen pa nyid kyi bar las yongs su mi nyams pa'i bsam pas zhes bya ste/ chos kyi mchog gi gnas skabs so/ /mdo 'di'i don tshig lhug pas rgya cher bstan pa'i don rjes su dran par bya ba'i phyir/nye bar 'brel pa sdud pa'i tshig le 'ur byas pa ni drug yin te/ gzugs la sogs pa ldog sogs rtags/ /rnam pa nyi shu bskyed pa yis/ /nges 'byed yan lag la gnas pa'i/ /phyir mi ldog pa'i mtshan nyid 'di/ /gzugs la sogs pas ldog pa dang //the tshom mi khom zad pa dang / /bdag nyid dge ba la gnas shing / /gzhan dag de la dgod pa dang / /gzhan gyi rten can sbyin sogs dang / /zab mo'i don la som nyi med/ /byams lus sogs dang sgrib pa ni/ /rnam pa lnga dang mi 'grogs dang //bag la nyal kun 'joms pa dang / /dran pa dang ni shes bzhin dang / /gos la sogs pa gtsang ba dang / /lus la srin bu rnams mi 'byung / /gya gyu med sems sbyangs pa ni/ /len dang ser sna med sogs dang / /chos nyid ldan pa 'gro nyid dang / /sems can don du dmyal 'tshol dang //gzhan gyis bkri bar mi btub dang / /lam gzhan nye bar ston bdud la/ /bdud ces bya bar rtogs pa dang / /sangs rgyas dgyes pa'i spyod pa ste/ /rtags ni nyi shu de dag gis/ /drod dang rtse mo bzod dang bcas/ /chos mchog rnams la gnas pa ni//rdzogs pa'i byang chub las mi ldog /nges par 'byed pa'i cha dang mthun pa la gnas pa'i phyir mi ldog pa'i byang chub sems dpa'i mtshan nyid kyi rnam par 'grel pa'o// //nges par 'byed pa'i cha dang mthun pa'i gnas skabs kyis phyir mi ldog pa'i byang chub sems dpa'i mtshan nyid bstan nas da ni mthong ba'i lam gyi gnas skabs bstan par bya ba'i phyir/mthong ba'i lam la bzod pa dang / /shes pa'i skad cig bcu drug gis / /byang chub sems dpa' mi ldog pa'i/ /mtshan nyid yin par shes par bya//zhes bstan pa la/ bcu drug gang zhe na/ 'di lta ste/ sdug bsngal la chos shes pa'i bzod pa ni gang mthong ba'i lam gyi gnas skabs kyi phyir mi ldog pa'i mtshan nyid kyi dbang du byas nas/ gzugs la sogs pa'i 'du shes las phyir mi ldog pa'i mtshan nyid kyis phyir mi ldog pa nyid yin no//de ci'i phyir zhe na/ de ni 'di ltar phyir mi ldog pa'i byang chub sems dpa' sems dpa' chen po ni chos thams cad rang gi mtshan nyid stong pa nyid kyi phyir byang chub sems dpa'i skyon med par 'jug ste/ des chos de yang dmigs la des na mngon par 'du mi byed do//des na skye bo de ni phyir mi ldog pa'i byang chub sems dpa' sems dpa' chen po mi skye ba la bzod pa zhes bya'o zhes bstan pa yin no/ /'du shes dang / mngon par 'du byed pa las ldog pa ni phyir mi ldog pa'i mtshan nyid yin pa'i phyir zhes bya ba ni 'thad pa yin no//sdug bsngal la chos shes pa ni gang yang bdud sdig can nye bar 'ongs te mos pa zlog par byed cing / rnam pa thams cad mkhyen pa nyid ni nam mkha' dang mtshungs pa dngos po med pa'i ngo bo nyid de/ rang gi mtshan nyid kyis stong pa'o zhes bya ba nas brtsams te/rtogs pa po dang / rtogs pa dang / rtogs par bya ba mi dmigs pas chos kyi rjes su mthun pa ldog pa na/ de khong du chud cing sems brtan pa dang / mi g.yo ba dang / mi 'phrogs pa nyid kyis dam bcas pa'i sbyor bas ched du bya ba las mi nyams pa'i don gyis so//zhes bstan to/ /de la sems brtan pa ni rgyun du gces par byed pas so/ /mi g.yo ba ni mngon sum du byed pas so/ /mi 'phrogs pa ni gzhan rnams kyi yul ma yin pa nyid kyis so/ /sdug bsngal la rjes su shes pa'i bzod pa ni gang nyan thos dang /rang sangs rgyas kyi sa dag dang / rnam pa thams cad mkhyen pa nyid gang yin pa'i bar la ldog pa dang / 'jug pa nyid kyi phyir ldog pa dang / phyir mi ldog pa gnyis ka la mi brten pa'i byang chub sems dpa' bstan pas so zhes bstan pa yin no/ / bden pa la zhugs pa las ldog pa yod pa gang yin pa dang / bden pa la ma zhugs pa las 'jug pa yod pa gang yin pa de dag ni/ 'dir ldog pa dang / mi ldog par sbyar gyi/ ldog pa tsam mam / 'jug pa tsam ni ma yin no/ /skad cig ma gsum la ni rjes su shes pa dang 'brel pas nyan thos la sogs pa'i sar lhung bar 'gyur ba mi srid de/de ni khams gsum pa'i gnyen po thob pa nyid yin pa'i phyir ro/ /sdug bsngal la rjes su shes pa ni gang yan lag zad par byed pa spang ba la gnas pa'i byang chub sems dpa'i dbang du mdzad nas mthar gyis gnas pa'i snyoms par 'jug pa dgu dang /byang chub kyi phyogs kyi chos sum cu rtsa bdun dang / rnam par thar pa'i sgo gsum gyi ting nge 'dzin la snyoms par 'jug la/ de'i 'bras bu thob par mi byed pas yan lag zad par bya ba'i phyir sems can rnams dang rjes su mthun pa'i bdag nyid kyi dngos po yongs su 'dzin par byed pa'i phyir yan lag zad par byed pa zhes bya ba ste/bsam gtan nam snyoms par 'jug pa gang la yan lag gang yod pa de spong ba la gnas pa zhes bya ba'i don no/ /dper na bsam gtan dang po la yan lag lnga ste zhes bya ba la sogs pa'i yan lag zad par byed pa zhes smos pa'i rjes su shes pas ni gzugs dang /gzugs med pa'i gnyen po nyid yin par rtogs par bya ba'i phyir yin no/ /rjes su mthun pa'i bdag nyid kyi dngos po yongs su 'dzin pas zhes bya ba ni sdug bsngal la rjes su shes pa'i gnas skabs su byang chub sems dpa'i 'dod chags dang bral ba 'dor bar byed pa yin no//kun 'byung la chos shes pa'i bzod pa ni gang yang byang chub sems dpa' chen po byang chub yid la byed pa dang ldan te/ byang chub kyi sems dang mi 'bral ba ni mthong bas spang bar bya ba'i rnam par rtog pa bsal ba nyid kyis lus dang sems yang ba nyid kyis gzugs lhur len pa ma yin pa zhes bya ba nas sangs rgyas blta ba dang /dge ba'i rtsa ba bskyed pa lhur len pa nyid kyi bar du rgya cher bkag pa yin no/ /de ci'i phyir zhe na/ de ni 'di ltar de'i chos thams cad nam mkha' dang mnyam zhing dngos po med pa'i ngo bo nyid rang gi mtshan nyid stong pa nyid kyi phyir ro zhes bya ba ni 'thad pa yin no//de ltar yid la byed pa na / 'o na spyod lam thams cad du 'khrul pa med pa'i sems kyis byed pa nyid do zhes bstan pa yin no//kun 'byung la chos shes pa ni gang yang khyim na gnas pa thabs la mkhas pas 'dod pa'i yon tan lnga len pa dang / zas la sogs pa'i yo byad mang zhing sna tshogs pas sbyin pa'i pha rol tu phyin pa la bdag nyid gnas pa dang / gzhan dag yang dag par dgod pa dang /de'i bsngags pa brjod cing mthun pas dga' bar byed pa nyid do zhes bstan pa yin no/ /kun 'byung la rjes su shes pa'i bzod pa ni gang rtag tu rgyun mi 'chad par tshangs par spyod pa dang / gzhan mi dga' bar 'gyur ba'i gnod pa mi byed ces bya ba ni rtag tu tshangs par spyod pa nyid kyi phyir/'khrug pa'i 'dod chags spang ba yin no/ /gzhan la gnod pa mi byed pa nyid kyi phyir 'di zhi gnas kyis rgyud mnyen pa nyid du ston pa dang / 'dzam bu'i gling nas brtsams te/ stong gsum gyi stong chen po'i 'jig rten gyi khams kyi bar du rin po che sna bdun gyis yongs su bkang ba sbyin pa gtong ba dang /lag na rdo rje'i rigs lnga rjes su 'brang bas de la bdud la sogs pas mi brdzi ba nyid du bstan pa yin no/ /kun 'byung la rjes su shes pa ni gang sems mi g.yeng ba thob pas dad pa la sogs pa'i dbang po ma tshang ba med pa dang /byang chub kyi sems mi brjed pa la dbang thob pa nyid kyi phyir/ skyes bu dam par gyur pa nyid dang / bud med dbang du 'gyur ba'i sngags dang / rig pa dang / sman dang / rtsi la sogs pa dang / bud med dang / skyes pa la sogs pa ze slong ba'i sbyor ba mi byed pa yin no//de ci'i phyir zhe na/ rab 'byor 'di ltar byang chub sems dpa' sems dpa' chen pos rang gi mtshan nyid stong pa nyid kyi phyir chos thams cad la mtshan mar mi mthong ba dang / 'tsho ba yongs su dag pas gnas pa nyid do zhes bstan pa yin no/ / de la yan lag tshogs par byed pa'i mtshan nyid ni sman no/ /yan lag gcig pa ni rtsi'o/ /yang na nad skyes pa gso bar byed pa ni sman no/ /phyis mi skye bar byed pa 'gegs pa ni rtsi'o/ /yang na lus la bgos pa'i gnas skabs thob par byed pa ni sman no/ /mi rgas pa'i khyad par thob par byed pa ni rtsi zhes bya ste rnam grangs gzhan no//'gog pa la chos shes pa'i bzod pa ni gang rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa na byang chub yid la byed pa dang mi 'bral zhes bya ba nas brtsams te/phung po dang / khams dang / skye mched rnams la sbyor ba dang / rjes su sbyor ba bkag pas nyan thos la sogs pa'i phyin ci log yin par shes par bya ba'i phyir ro/ /sbyor ba dang / rjes su sbyor ba smos pa ni sdug bsngal dang / kun 'byung gi bden pa gnyis dang /'gog pa dang / lam gyi bden pa gnyis go rims ji lta ba bzhin du sbyor ba dang / rjes su sbyor ba snga ma dang / phyi mar shes par bya ba'i phyir ro/ /de ci'i phyir zhe na/ de ni 'di ltar de'i rang bzhin stong pa nyid la gnas pas chos gang yang bzang po'am/ngan par yang dag par rjes su mi mthong ngo zhes bstan pa yin no/ /phyin ci ma ldog pa'i shes pa yin pa'i phyir ni 'thad pa yin no/ /'gog pa la chos shes pa ni gang rtogs pa'i rgyur gyur pa'i dge ba'i phyogs 'phrog pa'i bar chad kyi chos kyi gtam la sbyor ba dang /rjes su sbyor bar gnas pa bkag pas de dag shin tu mi snang bar gyur pa'i don bstan pa nyid de/ de ci'i phyir zhe na/ 'di ltar rang gi mtshan nyid kyis stong pa'i chos rnams la chos gang yang 'phrog pa'am/ sbyin par rjes su mi mthong ba'i phyir zhes bya ba'i 'thad pas so/ /gtam smos pa ni dngos po'i rnam par rtog pa ni sdug bsngal dang / kun 'byung shes pa'i dus su 'gag pa'i phyir ro/ /'gog pa shes pa ni gtam gyi sbyor ba tsam gyis rnam par rtog pa'i gnyen po shes par bya ba'i phyir ro zhes bstan pa yin no//de lta bu'i gnas skabs kyi dbang du mdzad nas/ ji skad du/ 'di dag thams cad ming tsam ste/ 'du shes tsam du rab tu gnas/ /brjod pa las ni gzhan gyur pa/ /brjod par bya ba yod ma yin//zhes gsungs so/ /'gog pa la rjes su shes pa'i bzod pa ni byang chub kyi tshogs su gyur pa'i sbyin pa la sogs pa'i gtam mang po rnam pa sna tshogs pa chos kyi gtam gyi sbyor ba ni snga ma bzhin no/ /'gog pa shes pa ni gnas skabs su yang dag par bsgrub pa mang po dang nye bar ldan pa'i don ston pa yin no//de ci'i phyir zhe na/ de ni 'di ltar de'i rang bzhin gyis stong pa nyid la gnas pas chos gang yang nyung ngu'am/ mang por yang dag par rjes su mi mthong ngo zhes gsungs pa'i 'thad pas so zhes bstan pa yin no//'gog pa la rjes su shes pa ni gang gnyen po dang mi mthun pa'i phyogs dag gsod pa po dang / gsad par bya ba'i g.yul gyi gtam ni snga ma bzhin no/ /de ci'i phyir zhe na/ lam gyi de bzhin nyid la gnas pas chos gang yang chags pa'am/ khong khro ba yang dag par rjes su mi mthong ba nyid do zhes bstan pa yin no/ /gang de lta bu'i gnas su rang nyid kyis rnam par smin pa'i 'gog pa rnam pa bzhi las gang gis 'dir dbang po'i grong 'gog pa dang / de nas gzhan yang rnam par smin pa ma lus pa'i dbang po'i grong gi gtam ni snga ma bzhin no//de ci'i phyir zhe na/ 'di ltar de chos thams cad stong pa nyid la gnas pas chos gang yang tshogs sam/ tshogs ma yin par yang dag par rjes su mi mthong ba nyid kyis so zhes bstan pa yin no/ /dbang po'i rten 'byung ba chen po la sogs pa'i grong khyer 'gog pa ni gang /de nas dbang po'i rten du gyur pa 'byung ba dang / 'byung bar 'gyur ba'i grong khyer gyi gtam gyi sbyor ba ni snga ma bzhin no/ /de ci'i phyir zhe na/ nam mkha' stong pa nyid la gnas pas chos gang la yang gzung ba'am/ mi gzung bar yang dag par rjes su mi mthong ba nyid kyis so zhes bstan pa yin no//dbang po'i yul gyi grong rdal la 'gog pa ni gang / de nas gzugs la sogs pa'i yul gyi grong rdal gyi gtam gyi sbyor ba ni snga ma bzhin no/ /de ci'i phyir zhe na/ de yang dag pa'i mtha' la gnas pas chos gang yang 'phel ba'am/'grib par yang dag par rjes su mi mthong ba nyid kyis so zhes bstan pa yin no/ /bdag tu mngon par zhen pa 'gog pa ni gang de nas rnam pa thams cad du rnam par dag pa'i chos kyi dbyings bsgoms pas de'i bdag nyid can nyid kyis gnas yongs su gyur pa yin pa'i phyir gtam gyi sbyor ba la mi gnas pa snga ma bzhin no//de ci'i phyir zhe na/ rnam pa thams cad mkhyen pa nyid dang ldan pa'i yid la byed pas shes rab kyi pha rol tu phyin pa'i gtam gyi sbyor ba dang / rjes su sbyor ba la gnas par gsungs pa ni 'thad pa'o zhes bstan pa yin no//rnam par smin pa'i 'gog pa rnam pa bzhi po 'di yang khams gsum po re re na yang yod par shes par bya'o/ /ji lta zhe na/ re zhig dbang po la 'gog pa ni bsam gtan dang / gzugs med pa gang na dbang po gang zhig yod pa ste/ ji ltar yid bde ba dang /btang snyoms dang / btang snyoms kyi yid bde ba dang / btang snyoms la ni btang snyoms dang / /tshor ba'i bye brag bsam gtan skyes/ /zhes bshad pa dang / gzugs med na ni btang snyoms dang / /srog dang yid kyi dbang po yod/ /ces bstan to//ji ltar de dbang po'i rten 'gog pa yin zhe na/ rigs mthun pa dang srog la 'dir/ /sems kyi rgyud ni rtogs pa yin/ /zhes bstan pa yin no/ dbang po'i yul gyi grong rdal ni de na yod pa yid kyi yul chos rnams kyang 'gog pa yin no //bdag tu mngon par zhen pa ni thams cad na yod pa'i phyir de thams cad du'ang 'gog pa kho na yin no/ /lam la chos shes pa'i bzod pa ni gang pha rol tu phyin pa drug la spyod cing / ser sna la sogs pa'i rjes su sbyor ba la brtson pa bkag pa'i phyir dang / bzod pa bar chad med pa'i lam yin pa nyid kyi phyir nyon mongs pa dang bral ba'i rgyu nyid yin par shes par bya ba'i phyir dang /chos thams cad stong pa nyid la gnas shing chos 'dod pa 'di nyid kyis dge ba'i chos la 'dun pa'i rjes su 'jug pa shes par bya ba'i phyir dang / chos kyi dbyings la spyod cing chos tha mi dad pa'i bsngags pa brjod pa nyid kyis bsgrub pa dang /'bras bu'i chos dag 'dus byas pa dang / 'dus ma byas pa nyid kyis go rims bzhin du dor ba dang / blang bar shes pa'i phyir dang / sangs rgyas dang byang chub sems dpa'i bshes gnyen mngon du bya bar 'dod pas mnyes par byed pa nyid kyis shin tu khyad par can gyi gnas skabs thob pa'i rgyu shes par bya ba'i phyir dang /nyan thos la sogs pa'i theg pas 'gro ba rnams bla na med pa yang dag par rdzogs pa'i byang chub la bskul ba dang / gzhug pa dang / rab tu 'jog pas khyad par rtogs pas thob pa'i tshogs 'dod pas sangs rgyas mngon du gyur par skye zhing / skye ba la dbang ba shes par bya ba'i phyir ro zhes bstan pa yin no/ /lam la chos shes pa ni gang rgyun tu zhugs pa la sogs pa'i dpes chos cung zad dngos su ma dmigs pas/nang stong pa nyid nas rnam par thar pa'i sgo smon pa med pa la gnas pa'i bar gyi rang gi sa la dogs pa med pa nyid kyis rnam par grol ba'i lam nyid du shes pa'i bral ba thob pa'i rgyu shes par bya ba'i phyir/ phyir mi ldog pa'i sa la gnas pa ni/sangs rgyas kyi zhing yongs su sbyangs pa dang / sems can rnams yongs su smin pa dang / bdud kyi las shes pa dang / rnam par 'joms pa dang / srab mor byed pa dang / bral ba thob par byed pa shes par byed pa'i phyir/ mtshams med pa byed pa'i skyes bu'i dpes yang dag pa la gnas shing /rnam par mi rtog pa'i phyir phyir mi ldog pa'i sems ni lha dang bcas pa'i 'jig rten gyis bzlog par mi nus so/ /de ci'i phyir zhe na/ lha dang bcas pa'i 'jig rten las 'das te/ yang dag pa'i skyon med par zhugs pa nyid kyi lam la chos shes pa ni khams gsum gyi gnyen po yin par shes par bya ba'i phyir dang /mngon par shes pa thob nas sangs rgyas kyi zhing nas sangs rgyas kyi zhing du sangs rgyas rnams la blta ba la sogs pa'i phyir/ sangs rgyas kyi zhing nas sangs rgyas kyi zhing du 'gro zhing /khyad par can gyi yon tan gyi yon tan rnams mngon par sgrub pa la shin tu sbyangs pa shes par bya ba'i phyir dang / bdud kyi las rnams la thabs la mkhas pas yang dag pa'i mtha' la sbyor bar byed pa'i phyir/ rang gi sa la nem nur med pa nyid kyis sbyor ba 'dren ma ma yin pa rnam par dag pa shes par byed pa'i phyir ro//de ci'i phyir zhe na/ de ni 'di ltar yang dag pa'i mtha' la nem nur med pa'i phyir gcig gam/ gnyis su yang dag par rjes su mi mthong ba'i phyir/ tshe 'phos su zin kyang nyan thos la sogs pa'i sems mi skyed pa'i phyir/sbyor ba theg pa gzhan du nges par 'byung ba med pas gcig tu nges pa nyid shes par bya ba'i phyir ro/ /de ci'i phyir zhe na/ chos thams cad rang gi mtshan nyid kyis stong pa'i phyir/ skye ba'am/ 'gag pa lam chen po'i chen por rtog pa chung ngu'i chung ngu'i bar du spong ba yin no//dang po nyid lam chen po skye ba'i phyir dang / lam chen po skyes pa na nyon mongs pa chen po yod pa mi srid pa'i phyir te/ dang por gos kyi dri ma chen po bsal nas phyis chung ba dag par byed pa dang / mun pa chen po ni snang ba chung ngus sel la/chung ngu ni chen pos sel ba'i dpes chung ngus chen po sel ba'i dpe de rigs pa yin no/ /dkar po'i chos ni stobs dang ldan pa yin la/ nag po ni nyam chung ba yin pas 'phags pa'i lam gyi skad cig ma gcig la chung ngus kyang 'khor ba thog ma med pa nas gcig nas gcig tu brgyud pa'i nyon mongs pa chen po brtan pa rtsa ba nas 'byin pa'i phyir ro//slob dpon dbyig gnyen gyis kyang dus mang por bsags pa'i nad rnams dur byid kyi khu ba btang bas nad rnams sel ba dang mtshungs pa dang / skad cig ma gcig la sgron me chung ngun gyis mun pa chen po 'joms pa dang 'dra'o zhes bshad do//de la rnam par rtog pa'i rnam pa chen po'i chen po ni gang shes rab kyi pha rol tu phyin pa dang bral bas bskal pa gang gA'i klung gi bye ma snyed du dkon mchog gsum la zang zing gi sbyin pa sbyin pas zhes bya ba la sogs pas so zhes bstan pa yin no//de'i gnyen po lam gyi rnam pa chung ngu'i chung ngu ni gang shes rab kyi pha rol tu phyin pa nyan pa la sogs pa la brtson par byed na/ de'i bsod nams mang du 'phel lo/ /de ci'i phyir zhe na/ gang gis bla na med pa yang dag par rdzogs pa'i byang chub tu mngon par rdzogs pa'i byang chub sems dpa' chen po rnams kyi lam ni 'di yin no zhes 'bad pas bstan pa 'di yin no//rnam par rtog pa chen po'i 'bring ni gang de nyid bskal pa de srid du/ rgyun tu zhugs pa nas de bzhin gshegs pa dgra bcom pa yang dag par rdzogs pa'i sangs rgyas rnams la zang zing gi yon phul bas so zhes bstan pa yin no//de nyid ces bya ba ni shes rab kyi pha rol tu phyin pa dang bral ba ste / de bzhin du 'og ma rnams la yang sbyar ro/ /'di'i gnyen po'i lam chung ngu'i 'bring ni gang shes rab kyi pha rol tu phyin pa la brtson par byed na bsod nams mang du 'phel lo//de ci'i phyir zhe na/ nyan thos la sogs pa'i sa las 'das nas/ bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes bya ba'i 'thad pa bstan pa yin no//rnam par rtog pa chen po'i chung ngu ni gang yang de nyid bskal pa de snyed du gnas shing sbyin pa dang / tshul khrims dang / bzod pa dang / brtson 'grus dang / bsam gtan dang / shes rab bsgoms pas so zhes bya bas bstan pa yin no/ / 'di'i gnyen po'i lam chung ngu'i chen po ni gang cig shos nyin zhag gcig la sbyin pa la sogs pa dang ldan pa de'i bsod nams mang du 'phel lo/ /de ci'i phyir zhe na/ 'di la gnas na chos thams cad yongs su rdzogs par byed pas shes rab kyi pha rol tu phyin pa ni byang chub sems dpa' chen po rnams bskyed pa'o zhes bya ba ni 'thad pa'o zhes bstan pa yin no//cig shos zhes bya ba ni shes rab kyi pha rol tu phyin pa la brtson pa dang ldan pa ste/ de bzhin du 'og ma rnams la yang sbyar ro/ /rnam par rtog pa 'bring gi chen po ni gang yang de nyid bskal pa de snyed du sems can rnams la chos kyi sbyin pas zhes bya ba bstan pa yin no//de'i gnyen po'i lam 'bring gi chung ngu ni gang cig shos kyis nyin zhag gcig chos kyi sbyin pa byin pas de'i bsod nams mang du 'phel lo/ /de ci'i phyir zhe na/ gang shes rab kyi pha rol tu phyin pa dang ma bral bar yongs su bsngo ba de ni rnam pa thams cad mkhyen pa nyid dang ma bral bar gnas pa nyid 'thad pa'o zhes bstan pa yin no//rnam par rtog pa 'bring gi 'bring ni gang yang de nyid bskal pa de snyed du bsam gtan bzhi dang / dran pa nye bar gzhag pa rnams nas sangs rgyas kyi chos ma 'dres pa bco brgyad la brtson par byas pa bas zhes bya ba bstan pa yin no//'di'i gnyen po lam 'bring gi 'bring ni cig shos kyis de rnams la nyin zhag gcig mngon par brtson par byas na de'i bsod nams mang du 'phel lo/ /de ci'i phyir zhe na/ shes rab kyi pha rol tu phyin pa dang ma bral bar gnas pa de ni rnam pa thams cad mkhyen pa nyid las phyir ldog pa'i gnas skabs med cing /gnas ma yin pa nyid du'o zhes bstan pa yin no/ /mtha' gcig tu nges par 'byung ba'i phyir ni 'thad pa yin no/ /rnam par rtog pa 'bring gi chung ngu ni gang yang de'i bskal pa de snyed zang zing gi sbyin pa dang /nang du yang dag 'jog pa dang ldan pa yid la byed pa de dag bla na med pa yang dag par rdzogs pa'i byang chub tu bsngo bas zhes smos pas bstan pa yin no/ /'di'i gnyen po lam 'bring gi chen po ni gang cig shos kyis nyi ma gcig zang zing gi sbyin pa de'i bsod nams mang du 'phel lo//de ci'i phyir zhe na/ shes rab kyi pha rol tu phyin pa'i yongs su bsngo ba ni mtshan nyid do zhes bya bas 'thad pa yin no/ /rnam par rtog pa chung ngu'i chen po ni gang yang de nyid bskal pa de snyed du 'das pa dang / ma byon pa dang / da ltar byung ba'i sangs rgyas bcom ldan 'das rnams nyan thos kyi dge 'dun dang bcas pa rnams kyi dge ba'i rtsa ba gang ci yod pa de dag thams cad la rjes su yi rang nas bla na med pa yang dag par rdzogs pa'i byang chub tu yongs su bsngo bas zhes bya ba bstan pa yin no/ /'di'i gnyen po'i lam chen po'i chung ngu ni gang cig shos kyis nyi ma gcig rjes su yi rang ba'i dge ba'i rtsa ba de bla na med pa yang dag par rdzogs pa'i byang chub tu bsngos na bsod nams ches mang du 'phel lo//de ci'i phyir zhe na/ shes rab kyi pha rol tu phyin pa'i rjes su yi rang ba'i bsngo ba ni mchog nyid yin no zhes 'thad pa bstan pa yin no//rnam par rtog pa chung ngu'i 'bring ni gang mngon par 'du byas pa ni yongs su btags pa nyid kyis bsod nams mang du skye ba na/ mngon par 'du byas pas yang dag par lta ba bskyed pa'am/ skyon med par 'jug pa'i bla na med pa yang dag par rdzogs pa'i byang chub tu mngon par rdzogs par 'tshang rgya ba mi nus pas mi 'dod pa bskyed pa nyid do zhes bstan pa yin no//de'i gnyen po'i lam chen po'i 'bring ni gang rab 'byor mngon du byas pa de yang stong pa nyid du snang ngo / /gsob nyid dang / gsog nyid dang /snying po med pa nyid du snang ngo zhes bya bas bstan pa yin no/ /bsgom pa'i lam rnam pa dgu pa'i gnas skabs su snga ma la ni ma yin no zhes dgongs pa'i phyir ro/ /lan rjod par byed pa ste/ de la nang stong pa nyid dang / phyi stong pa nyid dang / phyi nang stong pa nyid kyis ni mngon par 'du bya ba stong pa nyid du snang bar bshad do//stong pa nyid stong pa nyid dang / chen po stong pa nyid dang / don dam pa stong pa nyid kyis ni mngon par 'dus byas pa gsog nyid du snang bar bshad do/ /'dus byas stong pa nyid dang / thog ma dang tha ma med pa stong pa nyid dang /dor ba med pa stong pa nyid kyis ni de dag gsob nyid du snang bar bshad do/ /rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / dngos po med pa'i ngo bo nyid stong pa nyid ni snying po med pa nyid du snang bar bshad do//de nyid kyi phyir smras pa/ de ci'i phyir zhe na/ 'di ltar nang stong pa nyid nas dngos po med pa'i ngo bo nyid stong pa nyid kyi bar du shin tu bslabs pa'i phyir ro zhes bya ba ni 'thad pa'o zhes bstan pa yin no/ /yang mngon par 'du byas pa ni go cha dang /'jug pa dang / tshogs dang / nges par 'byung ba'i bsgrub pa'i dbang du mdzad nas stong pa nyid du snang ba la sogs pa rnam pa bzhir brjod pa yin no/ /de yang de rnams la bcom ldan 'das kyis bka' stsal pa'i don bdag gis 'tshal ba ltar na byang chub sems dpa' sems dpa' chen po de dag ni go cha chen po bgos pa lags par rig par bgyi ste/ji ltar rang gi mtshan nyid stong pa nyid ni mi skye ba'i chos nyid lags pa'i slad du'o zhes bshad pa yin no/ /rnam par rtog pa chung ngu'i chung ngu la sogs pa rjes su mi mthong bas nyan thos la sogs pa'i sa la go bzlog par shes par bya ba'i phyir ro zhes bya ba'i 'thad pas so zhes bstan pa yin no//lam la rjes su shes pa'i bzod pa ni gang bdag gi bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro snyam pa'i nges par mngon par byang chub pa dang mi 'bral ba'i sbyor ba shes pa'i phyir ro//de ci'i phyir zhe na/ bla na med pa yang dag par rdzogs pa'i byang chub ni rang gi mtshan nyid kyis stong pa nyid yin pa'i phyir/ de ltar gnas pa ni rang gi sa la gnas pa ni thams cad shes pa nyid do/ / gzhan gyi lam la rag ma lus pa ni lam gyi rnam pa shes pa nyid do/ /gzhan gyis gzhol bar mi nus pa ni rang gis zhes bya ste/ rnam pa thams cad mkhyen pa nyid do/ /yang bral ba thob pa de ni bdud kyi las yin par rtogs pa'i dbang du byas nas/ de ci'i phyir zhe na/ de ltar gnas pa ni mi 'phrogs pa'i ye shes dang ldan pa nyid kyis na 'di nyid du dgra bcom pa thob par gyis shig /khyod ni bla na med pa yang dag par rdzogs pa'i byang chub tu lung ma bstan to/ /gang gis khyod lung bstan par 'gyur ba mi skye ba'i chos la bzod pa khyod kyis ma thob bo//gang gis khyod de bzhin gshegs pas lung bstan pa zhes bya ba la sogs pa bdud kyis 'dun pa bzlog pa'i tshig thos nas byang chub sems dpa' chen po sems ma zhum / mi 'gong ba la sogs pa dang ldan na lung bstan par nges pa yin no/ /'di la gnas pa ni rtogs pa'i chos kyi skad cig ma gcig lus yin pa'i phyir ltung ba'am khyad par du 'gro bar 'gyur ro//de ci'i phyir zhe na/ de lung bstan par 'gyur ba'i rgyu'i chos yod pa nyid do zhes bstan pa yin no/ /de ltar byas na skyon med par zhugs pa ni lung bstan pa'i rgyu yin pa'i phyir ro//lam la rjes su shes pa ni gang bdud kyis khyod la bla na med pa yang dag par rdzogs pa'i byang chub kyis ci zhig bya/ gang la spyod pa 'di dag ni bdud kyis bshad pa yin no/ /zhes zer zhing rnam par 'byed par byed na/ kye ma bdag bla na med pa yang dag par rdzogs pa'i byang chub dang bral bar byed pa ni bdud sdig can yin no snyam du rig par byed pa ni phyir mi ldog pa yin par shes par bya'o//mngon par byang chub pa dang mi 'bral ba thob par bya ba rnyed par shes par bya ba'i phyir dang / chos thams cad stong pa'o zhes yang dag par rdzogs pa'i sangs rgyas kyis bstan pa'i dam pa'i chos yongs su gzung ba'i phyir bdag kyang srog yongs su gtong bas zhes gnyi ga smos pas ni bdag nyid du rtogs pa'i phyogs gcig dang /ma lus pa'i bdag yongs su gtong ba shes par bya ba'i don dang / sangs rgyas thams cad dang /bdag nyid kyang chos 'di nyid yin no zhes don gyi dbang gis mthong nas/ srog dang bral yang dam pa'i chos yongs su 'dzin pa dang / skal ba mnyam par shes par bya ba'i phyir dang / yang gzhung 'dzin pa'i gzungs thob nas sangs rgyas kyis gsungs pa chud mi zos pa'i phyir/des yon tan gyi khyad par mngon par bsgrub pa shes par bya ba'i phyir dang / yang gzungs thob pa'i rgyu nyid kyis nyen pa po'i lha la sogs pa'i skad dang brda la sogs pa la nges par rnyed pa nyid kyis de ni phyir mi ldog pa'i mtshan nyid 'gog pa thob pas sems can smin par bya ba'i thabs kyis byed pa shes par bya ba nyid kyi phyir ro zhes bstan pa yin no//yon tan chen po dang ldan pa'o zhes bya ba ni ji skad bstan pa'i bzod pa thob pa de ni yon tan chen po dang ldan pa yin te/ gang 'di ltar mthong bas spang bar bya ba'i nyon mongs pa dang 'bral bar byed pa yin pa'i phyir ro//yon tan tshad med pa dang ldan pa'o zhes bya ba ni ji skad bstan pa'i shes pa thob pa ni yon tan tshad med pa dang ldan pa yin te/ dus gsum rnams tshad med pa'i phyir dang / gang 'di ltar mthong bas spang bar bya ba'i nyon mongs pa yang mi skye bar byed pa yin pa'i phyir ro//yon tan dpag tu med pa dang ldan pa'o zhes bya ba ni des phyis rnam pa thams cad mkhyen pa nyid mngon par 'grub pa ni de'i yon tan dpag tu med pa dang ldan pa yin te/ gang 'di ltar tshad bya bar mi nus pa'i phyir rnam pa thams cad mkhyen pa nyid yin pa'i phyir ro//de ltar ji skad du/ rab 'byor de ci'i phyir zhe na/ 'di ltar de nyid kyi phyir 'dis ni mtha' las 'das pa mthar thug pa med pa'i ye shes thob pa dang / rtogs par mi nus pa'i ye shes rab tu thob pa dang / nyan thos dang / rang sangs rgyas rnams kyis mi 'phrogs pa yin no//bcom ldan 'das kyis de mngon sum du mdzad pa nyid kyis rjes su bzlas nas gsungs so/ /de la mtha' yas pa ni rnam pa mtha' yas pa'i phyir ro/ /mthar thug pa med pa ni thams cad du yul ma yin pa'i phyir ro/ /de bas na 'di skad du so so yang dag par rig pa mngon par bsgrubs pas lha dang bcas pa'i 'jig rten gyi mthar gtugs par mi nus pa'i phyir ro//bcom ldan 'das kyis mkhyen pa'i stobs kyis phyir mi ldog pa 'di'i rnam pa la sogs par bstan par bcom ldan 'das kyis spyod mod kyi/shin tu thal ches pa'i lan du 'gyur bas bsgom pa'i lam gyi dbang du mdzad par bzhed pa'i phyir ro zhes bstan pa yin no/ /mdo 'di ni don rgyas par bstan pa 'di'i tshig le'ur byas pa lngas bsdus par gyur pa yin te/ gzugs sogs 'du shes ldog pa dang //sems brtan theg pa dman dag las/ /rnam log bsam gtan la sogs pa'i/ /yan lag yongs su zad pa dang / /lus sems yang ba nyid dang ni/ /'dod la spyod la thabs mkhas dang / /rtag tu tshangs par spyod nyid dang / / 'tsho ba rnam par dag nyid dang / /phun tshogs bar chad med rnams dang / /tshogs dang dbang tshogs bcas pa yi/ /g.yul 'gyed ser sna la sogs la/ /sbyor dang rjes su sbyor ba yi/ /gnas pa so sor bkag pa dang / /chos ni rdul tsam mi dmigs nyid/ /rang gi sa la nges pa nyid//sa gsum la ni gnas pa dang / /chos kyi don du srog gtong dang / /de 'dra'i skad cig bcu drug ni/ /blo ldan mthong ba'i lam gnas kyi/ /phyir mi ldog pa'i rtags dag yin/ /phyir mi ldog pa'i byang chub sems dpa'i mtshan nyid kyi rnam par 'grel pa'o// //mthong ba'i lam gyi gnas skabs kyi byang chub sems dpa' phyir mi ldog pa'i mtshan nyid bstan nas da ni bsgom pa'i lam la gnas pa'i phyir mi ldog pa'i mtshan nyid brjod par bya'o/ /bsgom pa'i lam ni zab pa ste/ /zhes bya ba ni/gang bcom ldan 'das gnas zab mo legs par bstan du gsol zhes bya ba ni yang dang yang du goms par bya ba ni bsgom pa shes par bya ba'i phyir zlos pa'i sbyor bas gsungs so/ /gang la gnas pa la byang chub sems dpa' chen po zhes bya zhe na/ rgyun nyid yin pa'i bsgom pa'i lam la gnas pa zhes bstan to//dran pa nye bar gzhag pa bzhi nas sangs rgyas kyi chos ma 'dres pa bco brgyad kyi bar du yongs su rdzogs par bgyid pa lags zhes bya ba ni bsgom pa'i lam de sangs rgyas kyi chos yongs su rdzogs pa'i rgyu yin par shes par bya ba'i phyir bstan pa yin no//yang ji ltar bsgom pa'i lam zab pa yin zhe na/ zab mo stong pa nyid la sogs/ /zhes bya ba ni gang de ni stong pa nyid dang / mtshan ma med pa dang / smon pa med pa dang / mngon par 'du bya ba med pa dang / skye ba med pa dang / 'dod chags dang bral ba dang /'gog pa dang / mya ngan las 'das pa dang / zhi ba dang / de bzhin nyid dang / yang dag pa'i mtha' rnams ni zab mo'i gnas nyid yin par bstan pa yin no/ /yang ci'i phyir stong pa nyid la sogs pa la zab mo zhes bya zhe na/ zab mo de ni sgro 'dogs dang / /skur ba'i lam las grol ba nyid//ces bya ba ni/ gang gzugs kyi de bzhin nyid gang yin pa yang gzugs ma yin/ gzugs kyi de bzhin nyid las gud na yang gzugs med ces bya ba la sogs pa rnams kyis ni zab pa nyid yin pa'i phyir/ chos thams cad zab pa nyid do zhes bstan pa yin no/ / ji ltar sgro btags pa spang zhe na/ gang gzugs las kyang ma yin/ de bzhin nyid la yang gzugs med do zhes bstan pa yin no/ /ji ltar skur pa 'debs pa spang zhe na/ gang mya ngan las 'das pa bstan to/ /gzugs las gzhan na yang de bzhin nyid med pa'i phyir ro/ /chos thams cad bsal nas mya ngan las 'das pa yin no zhes bstan pa yin no//yang bsgom pa'i lam ji lta bu zhig ce na/ yang dang yang du sems pa dang / /'jal dang nges rtog bsgom pa'i lam/ /zhes bstan pa ni gang / gang gi tshe gnas zab mo 'di dag dang ldan pa zhes zlos pa'i sbyor ba bstan pa'i don gyis ni sems shing zhes bya ba ni thos pa'i shes rab kyis so//'jal ba ni bsams pa'i rang bzhin gyis so/ /rtogs par byed pa ni bsgoms pa'i rang bzhin gyi shes rab bo/ /yang bsgom pa'i lam gyi yul ji lta bu yin zhe na/ nges 'byed yan lag dang mthong ba'i/ / lam dang bsgom pa'i lam nyid la/ /zhes bstan pa ni gang bdag gis ji ltar gnas par bgyi zhes bya ba ni nges par 'byed pa'i cha ji lta ba'i dbang du mdzad nas shes rab kyi pha rol tu phyin pa bstan pa'o/ /ji ltar bdag gis bslab par bgyi zhes bya ba ni mthong ba'i lam ji lta ba'i dbang du mdzad nas shes rab kyi pha rol tu phyin pa bstan pa'o//ji ltar bdag gis bsgrub par bgyi zhes bya ba ni bsgom pa'i lam ji lta ba'i dbang du mdzad nas shes rab kyi pha rol tu phyin pa bshad pa yin no/ /de nyid kyi phyir nges par 'byed pa'i cha dang mthun pa bzhi dang / mthong ba'i lam dang / bsgom pa'i lam gyi dbang du mdzad nas/ de bzhin du bsgrub pa dang / de bzhin du sems pa dang / de bzhin du yongs su rtog pa dang / de bzhin du yang brtson pa dang / de bzhin du 'bad pa zhes bya ba tshig drug gsungs so/ /ji ltar bsgom pa'i lam gyi yul de nyid ci yin zhe na/de ni rgyun chags yin pa'i phyir/ /zhes bya ba smos te/ phyi ma phyi ma'i yul snga ma snga ma yin pas nyes pa med do/ bsgom pa'i lam gyi phan yon rnam pa gsum ni gang tshad med pa'i dge ba'i rtsa ba tshad med pa yongs su 'dzin pas/ gzhan gyi bud med dang dus btab nas brda byas pa'i skyes bu'i rtogs pa mang po'i dpes bsod nams tshad med pa skye bas bskal pa dpag tu med par 'khor ba spong zhing rgyab kyis phyogs par 'gyur te/las zad pa dang / bsal ba dang / sngar ma skyes pa'i tshig gis ni bsgom pa'i lam gyi byed pa yin par shes par bya ba'i phyir ro zhes bstan pa yin no//rnam pa du zhig yin zhe na/ /de ni rgyun chags pa yi phyir/ /chung dang 'bring dang chen po rnams/ /chung ngu'i chung sogs dbye ba yi/ /rnam pas rnam pa dgur 'dod do/ /zhes bstan pa la/ mi mthun pa dang gnyen po'i phyogs zhes bya bar sbyar ro/'dir rtsa ba'i rnam par dbye ba ni chung ngu dang / 'bring dang / chen po gsum yin la/ de rnams re re yang chung ngu dang / 'bring dang / chen po'i dbye ba byas pas rnam pa dgur 'gyur te/ 'di ltar chung ngu'i chung ngu dang / chung ngu'i 'bring dang / chung ngu'i chen po'o/ /'bring gi chung ngu dang / 'bring gi 'bring dang / 'bring gi chen po'o/ /chen po'i chung ngu dang / chen po'i 'bring dang / chen po'i chen pos dgur 'dod do/ /gnyen po'i phyogs ji lta ba bzhin du mi mthun pa'i phyogs kyang de bzhin du shes par bya'o/ / de la lam chung ngu'i chung ngus ni rnam par rtog pa chen po'i chen po spong ba nas/ lam chen po'i chen pos ni rnam par rtog pa chung ngu'i chung ngu spong ba'i bar du ni grangs yod pa dang / dpag tu yod pa dang / tshad yod pa'i rtog pas bsdus pa bsgom pa'i lam gyi dbang du byas nas dgu pa'i gnyen po ni lam gyi rnam pa chen po'i chen po ni gang stong pa nyid la gnas pa'i zhes bya ba bsgom pa'i lam rnam pa dgus bsdus pa/shes rab kyi pha rol tu phyin pa dang ma bral ba la bsod nams grangs med pa dang / dpag tu med pa dang / tshad med pas bsdus pas nye bar bsdus pa rnam pa gsum char dgag pa med par shes par bya ba'i phyir ro zhes bstan pa yin no//grangs med pa la sogs pa la khyad par ci zhig yod/ tha dad du bya ba ci zhig yod ce na/ rang gi mtshan nyid dang nye bar mtshon pa'i ched du yongs su dris pa yin la/ grangs yod pa dang /grangs med pa'i khams ni 'khor ba dang / mya ngan las 'das pa'i mtshan nyid dag yod pa ma yin pa'i phyir/ grangs med pa nyid kyis de mnyam pa nyid rtogs pa shes par bya ba'i phyir yin no/ /dus rnams la tshad mi dmigs pa'i phyir dpag tu med pa nyid kyis de'i rtogs pa 'dus ma byas pa nyid du shes par bya ba'i phyir yin no//gzhal bar mi nus pa'i phyir tshad med pa nyid kyis rnam pa thams cad mkhyen pa nyid kyi yul bsam gyis mi khyab pa nyid du shes par bya ba'i phyir yin no/ /de ni grangs med pa la sogs pa'i nye bar mtshon pa yin no//rang gi ngo bos mtshan nyid kyi dbang du mdzad nas/ chos thams cad stong pa nyid yin pa'i phyir grangs med/ dpag tu med/ tshad med pa stong pa nyid yin no/ /gal te de lta yin na/ grangs med la sogs bstan pa rnams/ /dam pa'i don du bzod ma yin/ /stong pa nyid kyi mtshan nyid tha dad pa ma yin pa'i phyir/rjod par byed pa'i dbye ba dang / don gyi dbye ba med par dgongs so/ /kun rdzob de dag thugs brtse ba'i/ /rgyu mthun gyur pa thub pa bzhed/ /ces bya ba ni/ gang don yin par yi ge tha dad du bya ba mi dmigs mod kyi/grangs med pa zhes bya ba nas mya ngan las 'das pa zhes bya ba'i bar du 'di ni brjod du med pa las de bzhin gshegs pas thugs rje'i rgyu mthun par gyur pas bstan pa mdzad pa yin no/ /de bzhin gshegs pa'i thugs rje'i rgyu mthun pa'i dbang gis 'di dag thams cad kyi yul du gyur pa zhig na/bcom ldan 'das kyis gsungs pa'i don bdag gis 'tshal ba ltar na/ chos thams cad rnam pa thams cad du mngon par byang chub pa'i rnam pas de bzhin gshegs pa'i chos thams cad ni brjod du ma mchis pa'o zhes bstan pa yin no/ /ji lta zhe na/ gang de rnams kyi stong pa nyid ni brjod par mi nus so zhes bstan pa yin no//dngos po brjod du med pa la/ /nyams pa dang ni 'phel mi rung / /bsgom zhes bya ba'i lam gyis ni/ /ci zhig nyams shing ci zhig thob/ /ces bya ba ni ji skad du/ rnam par rtog pa'i rigs chen po'i chen po la sogs pa rnam pa dgu ni ci zhig nyams zhes bstan pa yin no//ji skad du/ lam chung ngu'i chung ngu la sogs pa rnam pa dgu ni ci zhig thob ces brgal ba ni gang brjod du med pa'i don la 'phel ba dang / yongs su 'grib pa bkag pas/ pha rol tu phyin pa la sogs pa nas sangs rgyas kyi chos ma 'dres pa bco brgyad kyi bar gyi 'phel ba dang /yongs su 'grib pa bkag pas rnam pa thams cad mkhyen pa nyid kyis yang dag par rdzogs pa'i byang chub thob pa'i skal ba med pa nyid do zhes bya bas bstan pa yin no/ /'di la lan du brjod pa ni/ /byang chub ji lta de bzhin du//de yi 'dod pa don sgrub byed/ /ces bstan te/ bsgom pa'i lam zhes bya ba'i tha tshig go/ /gang thams cad du rtogs pa'i nga rgyal bkag pas bla na med pa yang dag par rdzogs pa'i byang chub ji lta ba bzhin du yid la byed pa la sogs pas yongs su bsngo ba dang ldan pa de snod du 'gyur ba nyid do zhes bstan pa yin no//byang chub kyang ji lta bu zhig ce na/ byang chub de bzhin nyid mtshan nyid/ /de yang de yi mtshan nyid bzhed/ /ces bya ba ni gang / gzugs nas mya ngan las 'das pa'i bar gyi de bzhin nyid gang yin pa de bla na med pa yang dag par rdzogs pa'i byang chub yin pa'i phyir/de ltar shes rab kyi pha rol tu phyin pa 'phel ba dang / yongs su 'grib pa bkag pa'i sbyor ba rjes su gnang ba nyid kyis so zhes bstan pa yin no/ / de ltar na rgyu dang 'bras bu dag gam/ 'bras bu dang rgyu dag gcig la gcig rang bzhin gyis rjes su brgyud pas/rgyu dang 'bras bu'i 'brel pa phyin ci ma log par 'byung bar gyur pa yin par bshad pa yin no/ /yang de ltar byas nas gang / sems ni snga mas byang chub par/ /rigs min phyi mas kyang ma yin/ /zhes bya ba la/ sems dang po bskyed pa dang //phyis skyed pa dag ni gcig la gcig phrad pa med pas/ bskal pa grangs med pa gsum du yang dag par bsgrub pa'i dge ba'i rtsa ba'i tshogs su 'gyur ba med pas sems can gang / bla na med pa yang dag par rdzogs pa'i byang chub tu 'tshang rgya bar 'gyur zhes zhus pas bstan pa yin no//da ni ji ltar byang chub 'byung bar 'gyur zhe na/ 'jig rten du grags pa'i mar me'i dpe tshul gyis ni zhes bya ba ni gang snying po'i dpes sems bskyed pa gnyi ga 'bras bu dang bcas par shes par bya ba'i phyir ro/ /sems bskyed pa de'i yul du 'gyur bas sa bcu la bslabs pas/bla na med pa yang dag par rdzogs pa'i byang chub thob par shes pa ni sems bskyed pa dang po dang / phyi ma dag bsgom pa la ma brten par mngon par byang chub pa rtogs pa ma yin no zhes bstan pa yin no/ /'dir ci zhig shes par bya zhe na/ zab mo'i chos nyid rnam pa brgyad/ /ces bya ba bstan pa'i skabs 'dir rjes su 'brang bar bya'o zhes bya bar sbyar ro/ /ji ltar na rnam pa brgyad yin zhe na/ zab mo rnam pa brgyad do/ /gang yin zhe na/ skye ba dang ni 'gag pa dang / /de bzhin nyid dang shes bya dang / /shes dang spyod dang gnyis med dang //thabs la mkhas pa zab pa nyid/ /ces bya bas bstan pa yin no/ /de la skye ba zab pa ni de dag ma yin la/ de las gzhan pa las kyang ma yin pas mngon par rdzogs par 'tshang ba de ni/ rten cing 'brel par 'byung ba zab pa nyid kyis 'gags pa'i sems skye ba 'gags pa nyid do zhes bstan pa yin no//ji skad du mdo las/ rab 'byor de ji snyam du sems/ sems gang 'gags pa de phyis skye bar 'gyur ram/ bcom ldan 'das de ni ma lags so zhes gsungs pa yin no/ /'gag pa zab pa ni gang sems skyes pa ni 'gags pa'i chos nyid yin pa'i phyir/chos can de 'gag pa bkag pa nyid do zhes bstan pa yin no/ /ji skad du mdo las/ rab 'byor de ji snyam du sems/ gang skyes pa de 'gag par 'gyur ba'i chos can yin nam/ bcom ldan 'das 'gag pa'i chos can lags so//rab 'byor de ji snyam du sems/ gang 'gag pa'i chos can ni yang 'gag par 'gyur ram/ gsol pa/ bcom ldan 'das de ni ma lags so zhes gsungs pa yin no/ /don ci zhig yin zhe na/ skyes pa tsam nyid na de 'gag pa la mngon du phyogs pa yin pa'i phyir ro//yang ci zhig 'gag par 'gyur ba de bzhin nyid zab pa ni gang de bzhin nyid ji lta ba de bzhin du de la gnas pa'i phyir rnam par mi rtog pa'i yul yin par dgongs pas/ yang dag pa'i mtha'i ngo bo nyid du thal bar 'gyur ba nyid kyis so//de bzhin nyid zab po zhes bstan pa yin no/ /ji skad du mdo las/ de bzhin nyid ji lta ba bzhin du de bzhin nyid gnas so zhes bya ba la sogs pa gsungs pa yin no/ /shes bya gang de zab pa ni gang sems de bzhin nyid las gzhan ma yin pa nyid kyi phyir ro zhes bstan pa yin no/ji skad du mdo las/ de bzhin nyid gang yin pa de ni bsam gyis mi khyab pa las gzhan ma yin pa'i phyir ro zhes gsungs pa yin no/ /shes pa zab pa ni gang de bzhin nyid kyis de bzhin nyid mi mthong ba'o zhes bstan pa yin no/ /ji skad du mdo las/yang de bzhin nyid kyis de bzhin nyid mi mthong ngo zhes gsungs pa yin no/ /spyod pa zab pa ni gang de ltar spyod pa de ni ci la yang mi spyod pa yin pa'i phyir/ shes rab kyi pha rol tu phyin pa la spyod pa zab pa nyid do zhes bstan pa yin no/ /ji skad du mdo las/ de ci'i phyir zhe na/de bzhin nyid la gnas pa la lung bstan pa la sogs pa'i yongs su rgyu ba mi 'byung ba'i phyir ro zhes gsungs pa yin no/ /gnyis su med pa zab pa ni gang don dam pa la spyod pa la gnyis su kun du spyod pa med pa'i phyir/ byang chub sems dpa'i mtshan ma dang / mtshan ma med pa'i 'du shes kyi sbyor ba med pa nyid kyi phyir ro zhes bstan pa yin no/ /thabs la mkhas pa zab pa ni gang stobs bcu la sogs pa nas sangs rgyas kyi chos ma 'dres pa rnams kyi bar du yongs su rdzogs par ma bgyis par/ bla na med pa yang dag par rdzogs pa'i byang chub tu 'tshang rgya ba bkag pa'i thabs la mkhas pa nyid kyis chos gang yang dngos po dang /dngos po med pa bkag pa yin no/ /de ci'i phyir zhe na/ chos thams cad kyi rang gi mtshan nyid stong pa nyid du shes pa la gnas pa ni mi mthun pa'i phyogs de dang de la spyod pa'i sems can rnams/gnyen po'i phyogs de dang de la rab tu 'god kyang sems can yongs su smin pa la mkhas pa nyid do zhes bstan pa yin no/ /bsgom pa'i lam la gnas pa byang chub sems dpa' slob pa phyir mi ldog pa'i dge 'dun gyi mtshan nyid kyi rnam par 'grel pa'o// // slob pa phyir mi ldog pa'i byang chub sems dpa'i dge 'dun bstan nas/ 'khor ba dang mya ngan las 'das pa mnyam pa nyid du brjod par bya'o/ /mi slob pa'i dge 'dun bstan pa'i don ci dgos she na/ 'di nyid kho na bslab par bya ba yin te/ gang 'di ltar kun nas nyon mongs pa'i rtog pa spang bar bya ba dang /rnam par byang ba'i rtog pa spang bar bya ba'i phyir/ de gnyis mnyam pa nyid du rdzogs pas mi slob par 'gyur ba yin te/ de phan chad bslab par bya ba med pa'i phyir ro/ /yang ji ltar 'khor ba dang mya ngan las 'das pa mnyam pa nyid yin zhe na/chos rnams rmi lam 'dra ba'i phyir/ /srid dang zhi bar mi rtog pa/ /zhes bstan pa ni gang de nas mi mthun pa dang / gnyen po'i phyogs kyi rnam par rtog pa'i gnas skabs dang bral ba'i sbyor ba'i dbang du mdzad nas gnyi ga mnyam par rtogs pas 'khor ba rmi lam dang 'dra bar rtogs nas/rnam par mi rtog pa'i ye shes la/ nyin mo bsgoms pas rnam par 'phel ba bkag pa'i phyir/ rmi lam gyi nang du bsgoms pas rnam par 'phel ba bkag pa yin no/ /de ci'i phyir zhe na/ tshe dang ldan pa shA ri'i bu/ rmi lam dang / nyin par du rnam par rtog pa med do zhes bstan pa yin no/ /mi mthun pa dang / gnyen po'i phyogs kyi rnam par rtog pa med pa'i phyir zhes bya ba ni 'thad pa yin no/ /las med la sogs klan ka yi/ /lan ni ji ltar bshad par zad/ /ces bya ba la/ de la las med pa'i klan ka ni gang rmi lam dang 'dra ba'i chos nyid la rmi lam lta bu'i sbyor ba dang /dngos dang mjug gis bsdus pa'i las de la sogs pa dang / 'bri ba med par bstan pa nyid kyis bstan pa yin no/ /de'i lan ni gal te sad nas/ bla na med par yongs su shes pas rnam par rtog pa ni de la sogs pa'am/'bri bar yang 'gyur gyi/ mi rtog pa ni ma yin no/ /las dang 'bras bu 'brel pa ni brda tsam du bshad pas/ gang yang nyin par srog gcod par byas pa dang / rmi lam nang du srog gcod pa zhes bya ba ni nyin mo dang / mtshan mo zhes bya bar grags pa yin no/ /nang du smos pa ni 'khor ba'i rmi lam khyad par bya ba'i phyir ro/ /tshe dang ldan pa shA ri'i bu las de la khyod ci zer zhes bya ba ni bden pa dang / bden pa ma yin pa dris pa yin te/ gnyen po'i phyogs rtogs su zin kyang rnam par rtog pa rjes su 'jug pa skye ba'i phyir/de ni don dam pa bstan pa'i phyir rgol ba yin no/ /'di'i lan ni gang dmigs pa las las skye bar bshad pa dang / dmigs pa med pa las las skye ba 'gag pa bstan pa yin no/ /de yang brda dang bcas pa yin pa'i phyir/ dmigs pa'i dngos po med pa yin no zhes brgal ba la/'di'i lan ni ji skad du/ tshe dang ldan pa shA ri'i bu mtshan mar byas nas zhes gsungs pa yin no/ /yongs su brtag pa'i dngos po dmigs par brten pa'i phyir ro/ /rmi lam gyi nang gi sbyin pa la sogs pa'i dge ba'i rtsa ba bla na med pa yang dag par rdzogs pa'i byang chub tu yongs su bsngos na yang dag pa'am/yang dag pa ma yin par bsngos pa yin zhes dris pa la/ 'di'i lan ni ji skad du/ byang chub sems dpa' byams pa 'di ni thams cad mkhyen pa gsum gyi mngon par rtogs pa mngon sum du gyur pa/skye ba gcig gis thogs pa yin pas don 'di lan ldon par 'gyur ro zhes gsungs pa yin no/ /don ci zhig yin zhe na/ dris pa de'i lan ldon pa'i dbang du mdzad pas ma 'ongs pa'i sangs rgyas gcig nas gcig tu 'byung ngo zhes bya ba'i dri ba de ni yongs su ma rdzogs pa yin no//de rdzogs par gyur na ni ma 'ongs pa na sangs rgyas 'byung ba don med par thal bar 'gyur ro/ /ji ltar yongs su ma rdzogs pa bstan pa yin zhe na/ ming nas brtsams te/ chos thams cad lan ldon par byed pa'i dngos po dmigs su med pa yin no/ /de ltar 'di dag rang nyid kyis mngon sum du byas par dam 'cha' zhing don mngon sum du byas na/dris pa'i lan yongs su rdzogs pa'i nyes par spang bar bya ba'i phyir ma 'ongs pa'i sangs rgyas kyi tshul rgyun chad med par 'dod pa nyid yin no/ /de nyid kyi phyir byang chub sems dpa' chen po byams pa 'di ni pha rol tu phyin pa drug la mi dmigs par spyod pa'i phyir/shes rab zab mo dang ldan pa nyid yin pas ma 'ongs pa'i 'khor ba dang / mya ngan las 'das pa'i dbye ba bstan pa'i mtshan ma med pa rtogs pa nyid du bstan pa'i phyir ro zhes bstan pa yin no/ /'khor ba dang mya ngan las 'das pa mnyam pa nyid du bstan pa ni dus de nyid kyi dgongs pa'i dbang du mdzad nas dmigs pa med par spyod pa yin pa'i phyir mi 'jigs pa la sogs pa mngon par byang chub pa nyid du nges pa'i phyir ro zhes bstan pa yin no//'khor ba dang mya ngan las 'das pa mnyam pa nyid kyi rnam par 'grel pa'o// //'khor ba dang mya ngan las 'das pa mnyam pa nyid du bstan nas/ da ni sangs rgyas kyi zhing rnam par dag pa brjod par bya'o/ /de yang rnam pa gnyis su bstan te/ sems can gyi 'jig rten dang /snod kyi 'jig rten gyi bye brag gis yin te/ sems can 'jig rten de bzhin du/ /snod kyi 'jig rten ma dag pa/ /de la dag pa sgrub pa yis/ /sangs rgyas zhing ni dag pa nyid/ /ces bstan pa yin no/ /sems can gyi 'jig rten bkres pa la sogs pa ni lus kyi ma dag pa'o//de'i gnyen po ni lha'i longs spyod la sogs pa dag pas nye bar bsdus pa'o/ /snod kyi 'jig rten ni sa chen po 'di la sdong dum dang / tsher ma la sogs pa ni ma dag pa'o/ /de'i gnyen po ni lag mthil ltar mnyam pa la sogs pa dag pas bsdus pa ste/ 'di ni sangs rgyas kyi zhing yongs su dag pa mdor bsdus pa yin no/ /rgyas par ni mdo las gang sangs rgyas kyi zhing yongs su dag pa'i dbang du mdzad nas/ sems can bkres pa la sogs pa mthong nas/ rang gi sangs rgyas kyi zhing lha'i ris dag gi longs spyod la sogs pa dang 'dra bar 'gyur ba de ltar pha rol tu phyin pa la spyod de/sbyin pa'i pha rol tu phyin pa yongs su rdzogs par byed do/ /de la nye bar longs spyod pa ni zas la sogs pa'o/ /yongs su longs spyod pa ni nor bu dang / mu tig gi rgyan la sogs pa'o/ /de bzhin du srog gcod pa la sogs pa dang /de'i 'bras bu las bzlog pas bsdus pa ni tshul khrims kyi pha rol tu phyin pa yongs su rdzogs pa yin no/ /gnod sems las bzlog pas bsdus pa ni bzod pa'i pha rol tu phyin pa yongs su rdzogs pa yin no/ /le lo las bzlog pas bsdus pa ni brtson 'grus kyi pha rol tu phyin pa yongs su rdzogs pa yin no//sgrib pa lnga dang / bsam gtan dang po la sogs pa ma gtogs pa las bzlog pas bsdus pa ni bsam gtan gyi pha rol tu phyin pa yongs su rdzogs pa yin no/ /de la sgrib pa lnga ni 'dod pa la 'dun pa dang / gnod sems dang / gnyid dang / rmugs pa dang / rgod pa dang / 'gyod pa dang / the tshom rnams yin no/ /shes rab 'chal pa las bzlog pas bsdus pa ni/ shes rab kyi pha rol tu phyin pa yongs su rdzogs pa yin no/ /thams cad du rnam pa thams cad mkhyen pa nyid la nye bar gyur pa dang /yang rang gi sangs rgyas kyi zhing du sems can log par nges pa dang / ma nges pa'i phung po gsum du shes pa med pa dang / ngan song gsum gyi sgra yang shes pa med pa dang / yang sdong dum dang / tsher ma la sogs pa dang bcas pa dang /sa chen po 'di sa'i rgyu las grub pa las bzlog pas bsdus pa dang /de bzhin du bdag tu yongs su 'dzin pa las bzlog pa dang / rigs bzhir yongs su 'dzin pa las bzlog pas nye bar bsdus pa yin no/ /de dag las bzlog pa ni 'di yin te/ gang ci nas bdag gi sangs rgyas kyi zhing de na chung ngu na rigs bzhi'i ming yang mi srid pa dang /zhes bstan pa yin no/ /des ni rigs kyi tshul gyi don med de/ 'di ni bram ze zhes bya ba dang / 'di ni dmangs rigs zhes bya ba la sogs pa gsungs pas bstan pa yin no/ /sems can rab dang / 'bring dang / tha ma dang / kha dog bzang ba dang /kha dog ngan pa dang / chos gnyis po ma gtogs pa gzhan gyi dbang du byas pa dang / dran pa nye bar gzhag pa la sogs pa nyid ma gtogs pa dang / 'gro bas phye ba'i rdzus te skye ba ma gtogs pa skye gnas gsum po dang / mngon par shes pa dang bral ba dang /bshang gci la sogs pa 'dzag pa dang / 'od dang mi ldan pa dang / nyin mo dang / mtshan mo dang / nyi ma dang / zla ba la sogs pa dang / tshe thung ba dang / skyes bu chen po'i mtshan dang bral ba dang / sangs rgyas la bsnyen bkur byed par nus pa'i dge ba'i rtsa ba dang / mi ldan pa dang / khams mi mnyam pas kun nas ldang ba'i nad rnams las bzlog pas nye bar bsdus pa de dag las bzlog pa ni 'di yin te/ rlung dang / mkhris pa dang / bad kan dang / 'dus pas kun nas dkris pa'i nad rnams skyes pa dang / ma skyes pa dag go rims bzhin du bsal ba dang /mi skye ba dang / rjes su mthun pa'i gso bas nye bar bsdus pa dang / 'dod chags la sogs pa dang / nyan thos la sogs pa'i theg pa la mos pa dang / nga rgyal can las bzlog pas ci rigs par rang gi sangs rgyas kyi zhing du phun sum tshogs pa'i rnam pa de dang de rnams kyis bsdus pa la zhugs pa ni pha rol tu phyin pa drug la spyod cing rnam pa thams cad mkhyen pa nyid dang yang nye bar 'gyur ba dang /tshe dang / 'od dang / dge slong gi dge 'dun la tshad yod pa las go bzlog pas de dag tshad med par 'gyur ba nyid mngon par 'tshang rgya bar sems bskyed pa dang /gang gA'i klung gi bye ma snyed kyi sangs rgyas kyi zhing ji snyed yod pa de snyed kyi 'jig rten gyi khams thams cad kyi sangs rgyas kyi zhing gcig tu gyur par bla na med pa yang dag par rdzogs pa'i byang chub tu mngon par rdzogs par 'tshang rgya ba'i bsam pa nyid dang /nam mkha' ltar mu med pa'i sems can gyi khams la 'khor ba dang / mya ngan las 'das pa gang yang med par yongs su spyod pa'i yid la byed pas/ pha rol tu phyin pa drug yongs su rdzogs pa dang / rnam pa thams cad mkhyen pa nyid dang nye bar gyur pa yin no//sring mo gang gA'i lha mos de lta bur sangs rgyas kyi zhing yongs su sbyong bar khas blangs pa'i dge ba'i rtsa ba'i rgyus bla na med pa yang dag par rdzogs pa'i byang chub tu lung bstan pas 'khor rnams ji skad du bshad pa'i sangs rgyas kyi zhing yongs su sbyang ba thob par yid ches pas dbang po'i don gyis dbang por gyur pa yin te zhes bshad pa yin no//sangs rgyas kyi zhing rnam par dag pa'i rnam par 'grel pa'o// //sangs rgyas kyi zhing yongs su dag pa bstan nas thabs la mkhas pa brjod par bya'o//de la re zhig de'i yul dang sbyor ba ste/ ci zhig brjod par bya zhes sbyar bar bya'o/ /de la thabs la mkhas pa'i yul ni gang ji skad du/ de dang der thabs la mkhas pas gsungs pa de ltar rang gi yul gyi sbyor ba tha dad pa bstan pa nas brtsams te/ stong pa nyid la sogs pa rnams nas/byang chub kyi phyogs rnams la goms pa snyoms par 'jug pa bsgom pa yongs su 'dris pas ni thabs la mkhas pa'i yul don gyis bstan to zhes bstan to/ /ji skad du mdo las/ bcom ldan 'das shes rab kyi pha rol tu phyin pa la spyod pa'i byang chub sems dpa' sems dpa' chen pos ji ltar stong pa nyid la ji ltar 'dris par bgyi zhes bya ba nas brtsams te/ji ltar stong pa nyid la yongs su 'dris pas snyoms par 'jug par bgyi zhes bya ba la sogs pas gsungs pa yin no/ /thabs la mkhas pa'i sbyor ba ni gang gzugs stong pa'o zhes so sor rtog par byed cing thabs la mkhas pa la nye bar 'god pa'o zhes bstan pa yin no//ji skad du mdo las/ rab 'byor byang chub sems dpa' sems dpa' chen po rnam pa thams cad kyi mchog dang ldan pa'i stong pa nyid la so sor rtog cing zhes bya ba nas brtsams te/goms par bsgom zhing mngon sum du bya ba'i dus ni ma yin par shes so zhes gsungs pa yin no/ /de la rnam pa thams cad kyi mchog dang ldan pa'i stong pa nyid ni sbyin pa dang bral ba ma yin/ tshul khrims dang bral ba ma yin/ bzod pa dang bral ba ma yin zhes bya ba la sogs pa gtsug na rin po che'i mdo blang ngo / /thabs ni rnam pa bcur 'gyur bas/ /de'i phyir/ mtshon bya rnams las 'das pa dang / /mi gnas de bzhin shugs dang ni/ /thun mong ma yin nyid dang ni / /ma chags pa dang mi dmigs dang //mtshan ma smon lam zad pa dang / /de yi rtags dang tshad med dang / /thabs la mkhas pa rnam pa bcu/ /zhes bstan pa yin no/ /de la bar chad kyi chos la yang dag pa'i 'da' ba'i thabs la mkhas pa ni gang skyes bu sgyu rtsal la byang ba zhig /'brog dgon par chas pa'i dpes bdag gir byas pa'i sems can gyi khams phyir rgol ba'i chos las yang dag par 'da' ba shes pa ni thabs la mkhas pa yin par don gyis bstan to zhes bshad do//mi gnas pa'i thabs la mkhas pa ni/ gang yang bya bar snang la rgyu ba sa la mi lhung ba'i dpes mi gnas pa rtogs pa ni/mi gnas pa'i thabs la mkhas pa yin par don gyis bstan pa yin no/ /phyogs kyi zhes bya ba ni bsgrub par bya ba'i mtshan nyid dang / grogs dang bcas pa'i mtshan nyid dang / phyogs zhes bya ba ni yang 'jug pas bya ba smos pa yin no//sngon gyi shugs kyis 'phags pa'i thabs la mkhas pa ni gang skyes bu mthu dang ldan pa 'phong gi slob dpon du gyur pas/ mda' nam mkhar 'phangs pa gcig la gcig long btags pa'i dpes smon lam btab pa'i shugs kyis thabs la rjes su 'jug pa shes pa yin par don gyis so zhes bstan pa yin no//thun mong ma yin pa'i thabs la mkhas pa ni/ gang sems can yongs su mi gtang ba'i bsam pas de ltar dga' ba'i gnas la sbyor ba shes pa ni/ thun mong ma yin pa'i thabs la mkhas pa yin par don gyis bstan pa yin no//ma chags pa'i thabs la mkhas pa ni/ gang rgyun du zhugs pa la sogs pa'i 'bras bu ma thob par bsam gtan la sogs pa'i dge ba'i chos thams cad las yongs su ma nyams shing / mngon par 'brel par brjod par shes pa ni ro myang ba med par thabs la mkhas pa yin par don gyis bstan pa yin no//mi dmigs pa'i thabs la mkhas pa ni/ gang yang stong pa nyid kyi ting nge 'dzin rnam par thar pa'i sgo sgom pa yongs su rdzogs par rtogs pas mi dmigs pa'i thabs shes pa yin par don gyis bstan pa yin no//mtshan ma med pa'i thabs la mkhas pa ni/ gang yang mtshan ma med pa rnam par thar pa'i sgo yongs su rdzogs par rtogs pas mtshan ma med pa'i thabs la mkhas pa shes pa yin par don gyis bstan pa yin no/ /smon pa med pa'i thabs la mkhas pa ni / gang yang smon pa med pa'i rnam par thar pa'i sgo sgom pa yongs su rdzogs par rtogs pas smon pa med pa'i thabs la mkhas pa shes pa yin par don gyis bstan pa yin no//stong pa nyid la sogs pa ni/ nyan thos pa la sogs pa dang / thun mong yin du zin kyang de thabs kyi khyad par yod pa'i don ni de ltar spyod na mngon par 'du bya ba med par ltung ba khams gsum pa dang lhan cig gnas pa ni gnas med do zhes bstan pa yin no//phyir mi ldog pa'i rtags kyi thabs la mkhas pa ni gang gzhan gyis dris pa'i phyir mi ldog pa'i rtags dang rjes su mthun pa'i lung bstan pa la lung mi ston pas phyir mi ldog pa dang /phyir ldog pa nges par gzung ba'i thabs la mkhas pa de'i rtags shes pa yin par don gyis bstan pa yin no/ /yul tshad med pa'i thabs la mkhas pa ni gang yang gang rnam pa de ltar lan ldon pa de dag mi 'phrogs pa nyid kyis thabs la mkhas pa'i yul tshad med pa nyid shes pa yin par don gyis bstan to zhes don gyis bstan pa yin no//thabs la mkhas pa'i rnam par 'grel pa'o// //de dag de ltar byas na rnam pa dang bcas pa dang / sbyor ba dang bcas pa dang / phan yon dang bcas pa dang / bar chad dang bcas pa dang /yul dang bcas pa dang / khyad par dang bcas pa dang / byed pa dang bcas pa dang / ngo bo nyid dang bcas pa dang / 'jug pa dang bcas pa dang / yongs su smin pa dang bcas pa dang / rten dang bcas pa dang / yan lag dang bcas pa dang /nye ba'i yan lag dang bcas pa dang / yongs su gzung ba dang bcas pa ni/ rnam pa thams cad mngon par rdzogs par rtogs par gyur par bstan pa yin no/ /de la yul ni shes pa'i mtshan nyid kyi yul gang yin par shes par bya'o/ /'jug pa ni thar pa'i cha dang mthun pa rnams yin te/de rnams kyi bstan pa la 'jug pa'i phyir ro/ /yongs su smin pa ni nges par 'byed pa'i cha dang mthun pa rnams te/ de rnams kyi rgyud yongs su smin par 'gyur ba'i phyir ro/ /rten ni phyir mi ldog pa'i byang chub sems dpa'i dge 'dun no/ / yan lag ni 'khor ba dang mya ngan las 'das pa mnyam pa nyid do/ /nye ba'i yan lag ni sangs rgyas kyi zhing yongs su dag pa'o/ /lhag ma ni go sla bas rnam par ma phye'o/ /yang rnam pa thams cad mkhyen pa nyid dang / rnam pa thams cad mngon par rdzogs par rtogs pa la khyad par ci zhig yod ce na/kun mkhyen gsum ni ji skad bshad pa'i rnam pa rnams so sor nges pa yin pas rnam pa'i yul re rer nges pa yin la/ rnam pa thams cad mngon par rdzogs par rtogs pa ni rnam pa ma lus pa yul du byed pa yin te/de ni khyad par yin no/ /yang na kun mkhyen gsum du bzhag pa ni mtshan nyid dang ldan pa yin la/ rnam pa kun mngon par rdzogs par rtogs pa ni sbyor ba dang ldan pa yin no/ /khyad par gzhan yang rnam pa kun mngon par rdzogs par rtogs pa ni mi mthun pa dang /gnyen po'i gnas skabs kyis rab tu phye ba yin gyi/ rnam pa thams cad mkhyen pa nyid ni de lta bu ma yin te/ rnam pa ni zhi ba nyid yin pa'i phyir ro/ /de ni de ltar byas na/ rnam pa sbyor bar bcas rnams dang / /yon tan skyon ni mtshan nyid bcas/ /thar dang nges 'byed cha mthun dang //slob pa phyir mi ldog pa'i tshogs/ /srid dang zhi ba mnyam nyid dang / /zhing dag bla na med pa ste/ /de ltar thabs la mkhas pa ni/ /rnam kun mngon rtogs rdzogs pa'o/ /zhes bya ba ni rim gyis 'byung ba'i 'brel pa yin par blta bar bya'o/ / mngon par rtogs pa'i rgyan shes rab kyi pha rol tu phyin pa'i man ngag gi bstan bcos las rnam pa kun mngon par rdzogs par rtogs pa'i rnam par 'grel pa'o// //rnam pa kun mngon par rdzogs par rtogs pa bstan nas da ni rtse mo'i mngon par rtogs pa brjod par bya'o/ / de la re zhig gang gis de mtshon par 'gyur ba'i rtags brjod par bya ste/ de'i rtags gang yin pa de yang ji lta bu zhig ce na/ rmi lam na yang chos rnams kun/ /rmi lam lta bu lta la sogs/ /rtse mor phyin pa'i sbyor ba'i rtags/ /rnam pa bcu gnyis dag tu bzhed/ /ces bstan pa yin no//de la rtags dang po ni/ gang rmi lam gyi nang du yang chos rnams ni rmi lam lta bur blta'o zhes bstan pa yin no/ /de'i mdo ni/ rab 'byor gal te byang chub sems dpa' sems dpa' chen po rmi lam gyi nang du yang chos rnams rmi lam lta bur blta zhing / de bzhin du sgra brnyan dang /smig rgyu dang / sprul pa dang / sgyu ma dang / dri za'i grong khyer dang 'dra bar chos thams cad la blta zhing mngon du mi byed na de ni rtse mo las phyir mi ldog pa'i mtshan nyid du rig par bya'o zhes gsungs pa yin no/ /don ci zhig yin zhe na/ gang de ltar thabs dang shes rab kyis yongs su zin pa'i byang chub sems dpa'i rnal 'byor gyi chos bsgoms pas rtse mo thob pa ni rmi lam gyi nang du yang rnal 'byor 'di nges par mthong ba'i yid la byed pa gang yin pas sems can gyi khams la ltos pa dang bcas pa nyid du gnas pa yin no//de bzhin du mdo gzhan las bstan pa yin no//gnyis pa ni gang de nyid nyan thos la sogs pa'i sa dang / khams gsum po 'dor ba'i sems dang / dga' ba'i sems mi skyed pa'i phyir ro zhes bstan pa yin no/ /gsum pa ni gang de nyid de bzhin gshegs pa 'khor chen pos bskor ba mthong zhing /de dam pa'i chos ston pa'i chos kyi rjes su sgrub pa nyid kyi phyir ro zhes bstan pa yin no/ /bzhi pa ni gang yang de nyid sangs rgyas kyi rdzu 'phrul gyi rnam par 'phrul ba mthong ba nyid kyi phyir ro zhes bstan pa yin no/ /lnga pa ni gang yang de nyid 'jigs pa'i gnas thams cad la khams gsum pa rmi lam lta bur chos ston pas nye bar bsdus pa'i sems bskyed pa nyid kyi phyir ro zhes bstan pa yin no//drug pa ni gang yang sems can dmyal ba la sogs pa mthong nas/ rang gi sangs rgyas kyi zhing du ngan song spang bar bya ba rjes su dran pa thob pa yin no//de ci'i phyir zhe na/ rtse mo'i mngon par rtogs pa ni/ 'khor ba rmi lam dang / rmi lam gang yin pa gnyis su med cing gnyis su byar med pa'o/ /bsam pas rnam pa gnyis su dbyer mi nus pa nyid kyi phyir ro zhes bstan pa yin no/ /bdun pa ni gang rmi lam sad pa'i gnas skabs su grong khyer la sogs pa mes tshig par gyur pa bden pa'i byin gyi rlabs kyis rab tu zhi bar nus pas phyir mi ldog pa nyid yin pa dang /de'i phyogs gcig zhi bar mi nus pa ni chos spong ba'i las byas pa nyid dang / khyim la la ni tshig khyim la la ni ma tshig pa las/sems can de dag gi las tshe 'di la rnam par smin pa nyid do zhes bstan pa nyid do/ /brgyad pa ni gang yang mi ma yin pas byin gyis brlabs pa la/ de bsal ba'i phyir/ phyir mi ldog pa'i bden pa'i byin gyis brlabs pa la 'byor pa dang /bdud kyis byin gyis brlabs nas bsal ba de la rang nyid nga rgyal skye ba dang / byang chub sems dpa' gzhan la brnyas pa'i mtshan nyid yin te/ de ci'i phyir zhe na/ thabs la mkhas pas yongs su ma bzung ba'i phyir dang / bdud kyis de'i ming dang rus la sogs pa gtan la phebs par smra bas slu ba rtogs pa'i ngag ma rtogs pa dang /yang bdud rang gis brtags pa'i slu tshig gtan pa bdag gir byed pa dang / phas pham pa bzhi dang / mtshams med pa lnga bas kyang ming bstan pa'i rlom sems de shin tu lci ba'i las nyid dang yang bdud kyis dben pa'i yon tan bstan pas/bcom ldan 'das kyis nyan thos la sogs pa'i sems kyi dben pa rjes su gnang ba'i phyir ro zhes bstan pa yin no/ /dgu pa ni gang mngon pa'i nga rgyal can gyi gang zag spangs pa dang / rang gi don la sogs pa'i sbyor ba la rjes su brtson pa'i rang gi mngon par shes pas pha rol gnon pa nyid dang /dge ba'i bshes gnyen chos thams cad thob pa'i rgyu yin par shes par bya ba nyid dang / pha rol tu phyin pa rnams dang / byang chub kyi phyogs dge ba'i bshes gnyen du gyur pa nyid dang /de rnams dge ba'i chos thob pa'i lam shes par bya ba'i don gyis so zhes bstan pa yin no/ /bcu pa ni gang mngon par 'dod pa thams cad yongs su rdzogs par 'dod na/ shes rab kyi pha rol tu phyin pa 'di nyid la bslab par bya ste/ 'di ltar chos thams cad rgya cher bstan to zhes bstan pa yin no//bcu gcig pa ni gang shes rab kyi pha rol tu phyin pa ni nam mkha' ltar chags pa med pa'i mtshan nyid yin pas gzung ba dang / 'dzin pa'i rnam par rtog pa'i bag chags med pa shes par bya ba'i don dang / dben pa dang / stong pa nyid kyi mtshan nyid yin pa'i phyir go rims bzhin du bar chad med pa'i lam dang /rnam par grol ba'i lam dag gi chos thams cad ni shes rab kyi pha rol tu phyin pa'i mtshan nyid du yod pa nyid yin no/ /de lta na ni kun nas nyon mongs pa dang / rnam par byang ba med par 'gyur bas na/rab 'byor 'di ji snyam du sems/ sems can rnams yun ring po nas bdag dang bdag gir bya ba la spyod dam zhes bya ba la sogs pa de grub po zhes bstan pa yin no/ /bcu gnyis pa ni gang de ltar spyod pa ni zil gyis gnon par mi nus pa'i phyir/ rnam pa thams cad mkhyen pa nyid dang nye bar gyur pa nyid kyi phyir ro zhes bstan pa yin no//rtags kyi rnam par 'grel pa'o// //rtse mo'i mngon par rtogs pa gang gis mtshon par 'gyur ba'i rtags rnams bstan nas/ da ni de'i rnam par 'phel ba gang zhig yin zhe na/'dzam bu'i gling gi grangs snyed kyi/ /sangs rgyas mchod pa'i dge la sogs/ /dper mdzad nas ni rnam mang du/ /rnam 'phel bcu drug bdag nyid do/ /de la rnam par 'phel ba dang po ni/ gang 'dzam bu'i gling gi sems can ji snyed pa de dag thams cad kyi grangs snyed kyi de bzhin gshegs pa la/rim gro la sogs pas mchod pa'i dge ba'i rtsa ba de yang bla na med pa yang dag par rdzogs pa'i byang chub tu bsngos pa bas shes rab kyi pha rol tu phyin pa 'di gzhan la ston pa dang / shes rab kyi pha rol tu phyin pa dang ldan pa'i yid la byed pa dang /ma bral ba na de'i bsod nams mang du 'phel ba dang / de bzhin du stong gsum gyi stong chen po'i 'jig rten gyi khams kyi sems can ji snyed yod pa de dag thams cad bla na med pa yang dag par rdzogs pa'i byang chub la rab tu bzhag nas/ dge ba'i rtsa ba de yang bla na med pa yang dag par rdzogs pa'i byang chub tu bsngos pa bas cig shos kyis bsod nams ches mang du 'phel ba nyid yin no//de ci'i phyir zhe na/ de'i de bzhin gshegs pa las gzhan pa'i byams pa dang / snying rje dang / dga' ba dang / btang snyoms la gnas par bya ba med do zhes bya ba la sogs pa bstan pa yin no/de'i mdo ni rab 'byor de ji snyam du sems/ 'dzam bu'i gling gi sems can de dag thams cad mi'i bdag nyid thob nas bla na med pa yang dag par rdzogs pa'i byang chub tu mngon par rdzogs par sangs rgyas par gyur la/de la rigs kyi bu'am/ rigs kyi bu mo 'ga' zhig gis ji srid 'tsho'i bar du bsnyen bkur la sogs pa byas zhes bya ba la sogs pas so/ /de bzhin du mdo gzhan las kyang gsungs so/ /gnyis pa ni gang skyes bu 'ga' zhig gis nor bu rin po che rnyed ma myong ba zhig rnyed pa las yang stor ba'i dpes/shes rab kyi pha rol tu phyin pa la gcig tu gtod pa'i yid la byed pa'i phyir/ yid la bya ba thams cad rang bzhin gyis stong pa yin pa'i phyir/ shes rab kyi pha rol tu phyin pa dang ma bral ba nyid kyi dngos po bskyed pas/'di ltar chos thams cad rang bzhin dang bral ba ste/ shes rab kyi pha rol tu phyin pa de la 'phel ba dang / 'grib pa bkag pas mi 'bral ba nyid du rab tu bsgrubs pa'i phyir ro zhes bstan pa yin no/ /gsum pa ni gang rab 'byor byang chub sems dpa' sems dpa' chen po ni shes rab kyi pha rol tu phyin pa la spyod pa na 'phel ba dang 'grib pa med do zhes bya ba nas brtsams te/rab 'byor de ni byang chub sems dpa' sems dpa' chen po mi skye ba'i chos la bzod pa thob pa ste/ rab 'byor bzod pa de lta bu dang ldan pa'i byang chub sems dpa' sems dpa' chen po ni bla na med pa yang dag par rdzogs pa'i sangs rgyas kyi ye shes chen po rnam pa thams cad mkhyen pa'i ye shes thob par mi 'gyur zhes bya ba'i gnas med do//de ci'i phyir zhe na/ de ni 'di ltar de de la gzhol bar 'gyur zhing / bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes bya ba'i bar du bstan pa yin no/ bzhi pa ni/ gang bcom ldan 'das ji ltar lags/ chos thams cad mi skye ba nyid gang lags pa de las/ byang chub sems dpa' sems dpa' chen po bla na med pa yang dag par rdzogs pa'i byang chub tu lung bstan par 'gyur ram/rab 'byor de ni ma yin no zhes bya ba nas brtsams te/ rtogs par bya ba dang / rtogs par byed pa'i chos nye bar mi dmigs pa'i phyir ro/ /de ci'i phyir zhe na/ 'di la spyod pa'i byang chub sems dpa' la rnam par rtog pa de lta bu thams cad med pa'i phyir te/de ci'i phyir zhe na/ rtse mo'i mngon par rtogs pa la/ shes rab kyi pha rol tu phyin pa ni rnam par mi rtog pa'o zhes bstan pa yin no/ /lnga pa ni gang shes rab kyi pha rol tu phyin pa la mngon par brtson pa las/dge ba'i rtsa ba mi brtan pa dang ldan pa bkag pas/ de la slob pa bsod nams mang bar bshad pa'i phyir/ 'dzam bu'i gling gi sems can rnams dge ba bcu'i las kyi lam dang / bsam gtan dang / gzugs med pa'i snyoms par 'jug pa thob pas/ chos 'di la mngon par brtson pa dang ldan pa bsod nams mang du 'phel ba'i phyir te/de ci'i phyir zhe na/ 'jig rten pa thams cad dang / nyan thos la sogs pa dang / byang chub sems dpa' thabs la mi mkhas pa thams cad zil gyis mnan te/ nges par 'byung ba'i phyir ro zhes bstan pa yin no//drug pa ni gang de ltar spyod pa la lha'i tshogs thams cad nye bar 'dong ba dang / sems par 'gyur ba dang / gzhan gyis gnod pa byas pa rnams la yang khams mi mnyam pas/ kun nas bslangs pa'i nad la sogs pa bkag pa nyid kyi phyir ro zhes bstan pa yin no//bdun pa ni gang byang chub sems dpa' slob pa'i dus su nyan thos la sogs pa slob pa'i sar ltung ba byas pa dang / bla na med pa yang dag par rdzogs pa'i byang chub tu mngon par rdzogs par 'tshang rgya ba las gzhan du 'gro bar bya ba'i phyir stong gsum gyi stong chen po'i 'jig rten gyi khams kyi bdud rnams dogs pa skye bar byed pa dang /de mya ngan gyi zug rngu zug par 'gyur ba dang / yang de rnams skar mda' ltung ba gtong ba la sogs pa dang / kun dga' bo byang chub sems dpa' thams cad kyi mdun du bdud sdig can 'tshe ba'i bsam pas 'ong ba ma yin no zhes bya ba nas brtsams te/sngon gyi tshe rabs su chos 'di la lhag par mos pa dang / the tshom za bar gyur pa dang / dge ba'i bshes gnyen dang bral ba dang / 'jig rten rgyang pan la sogs pa'i chos ma yin pa 'dzin par byed pa dang /de'i bsngags pa brjod pa la khyod kyis shes rab kyi pha rol tu phyin pa 'di thos pas ci zhig bya zhes zer zhing rnam par 'byed pa dang / byang chub sems dpa' gzhan la brnyas pa dang / nyan thos dang / byang chub sems dpa'i gang zag rnams dang lhan cig 'thab cing rtsod pa la sogs pa dang /lung ma bstan pa dang / lung bstan pa gzhan dag la gnod sems dang ldan pa la ni bdud kyis glags rnyed par 'gyur bas/ de rnam pa thams cad mkhyen pa nyid yongs su gtang ba dang ldan pa ni/de srid kyi dus su dmyal bar gnas par go cha bgo bar khas blangs pa nyid dang / 'chags shing sdom par brtson gyi sdom pa la gnas pas las kyi sgrib pa de las ldang ba nyid kyi phyir ro zhes bstan pa'i phyir yin no/ /brgyad pa ni gang ston pa la ji ltar gnas pa de bzhin du byang chub sems dpa'i theg pa dang gnas par bya ba dang /bslab pa mtshungs pa nyid kyis nang stong pa nyid nas dngos po med pa'i ngo bo nyid stong pa nyid kyi bar dang / gzugs ni gzugs kyis stong zhes bya ba nas/ byang chub kyis stong zhes bya ba'i bar du bslab pa mnyam pa nyid kyis yul nye bar dgod pa'i phyir ro zhes bstan pa yin no//dgu pa ni gang bcom ldan 'das ji ltar lags/ byang chub sems dpa' sems dpa' chen po gzugs bas par bgyi ba'i slad du slob na rnam pa thams cad mkhyen pa nyid la slob pa lags sam zhes bya ba nas brtsams te/de ci'i phyir zhe na/ thabs mkhas pa dang ldan pa gang gis bsam gtan la sogs pa la yang snyoms par 'jug ste/ de rnams kyi dbang gis kyang mi skye'o zhes bya ba'i bar dang / yongs su dag pa'i bslab pa brjod pa nas bslab pa rnam par 'phel ba shes par bya ba'i phyir dang /chos thams cad rang bzhin gyis yongs su dag pa'i phyir/ byis pa so so'i skye bo thams cad kyis de mi shes pa'i 'thad pa dang / byang chub sems dpa' chen po rnam pa thams cad mkhyen pa nyid kyi bar la slob par byed pa'i 'thad pas so zhes bstan pa yin no//bcu pa ni gang gser sa le sbram 'byung ba'i gnas drug pa'i dpes sangs rgyas kyi rigs rtse mo'i mngon par rtogs pa mngon par 'phel ba thob pa'i snod du rung ba shin tu nyung ba nyid yin par shes par bya ba'i phyir ro zhes bstan pa yin no/ /bcu gcig pa ni gang 'khor los sgyur ba'i rgyal por 'gyur ba'i las yang dag par blangs te/gnas pa nyung ba'i dpes rtse mo'i mngon par rtogs pa'i sangs rgyas kyi 'bras bu nyid thob pa rnyed pa ni ches nyung ba nyid du shes par bya ba'i phyir ro zhes bstan pa yin no/ /bcu gnyis pa ni gang yang pha rol tu phyin pa drug gi mi mthun pa'i phyogs kyi sems mi skyed pa'i phyir ro zhes bstan pa yin no//bcu gsum pa ni gang gzugs la sogs pa dang ldan pa'i sems mi skyed pa'i phyir ro/ /de ci'i phyir zhe na/ rtse mo'i mngon par rtogs pa'i mtshan nyid can gyi shes rab kyi pha rol tu phyin pa 'di la spyod pa'i byang chub sems dpa' chen po ni chos thams cad dmigs su med pa nyid kyis so zhes bstan pa yin no//bcu bzhi pa ni gang 'jig tshogs la lta ba'i dpes shes rab kyi pha rol tu phyin par thams cad du 'dus pa nyid kyi phyir ro zhes bstan pa yin no/ / bco lnga pa ni gang shes rab kyi pha rol tu phyin pa la slob pa ni/ phun sum tshogs pa thams cad thob pa'i rgyu nyid kyi phyir ro zhes bstan pa yin no/ /gal te de lta yin na nyan thos sam/ rang sangs rgyas su 'gyur ro zhe na/ de'i phyir nyan thos dang / rang sangs rgyas kyi phun sum tshogs pa rnams shes pa dang /mthong bas de dag bltas te 'da' bar bya'o zhes bstan pa yin no/ /rjes su dpag pa'i shes pa bsal ba'i phyir mthong ba zhes smos pa yin la/ 'khrul par snang ba bsal ba'i phyir shes pa smos pa yin no/ /shes pa dang mthong ba'i tshig ni yang nyan thos dang /rang sangs rgyas kyis ni byang chub sems dpa'i bsgom pa'i lam du shes par bya ba'i phyir ro/ /yang ci'i phyir de dag 'di'i bsgom pa'i lam du bkag ce na/ rgyun du zhugs pa nas rang sangs rgyas kyi bar gyi shes pa dang /spangs pa ni byang chub sems dpa'i bzod pa yin zhes gsungs pa'i phyir ro/ /gtso bo gzhan yin no zhes bya ba'i don to/ /yang 'da' bar byed pa ni rnam pa thams cad mngon par rtogs pa la 'jug pa'o/ /rnam par 'phel ba bcu drug pa ni gal te yang 'di snyam du 'di ni shes rab kyi pha rol tu phyin pa'o zhes bya ba nas brtsams te/de'i yul gyi rnam par rtog pa bkag pa la slob par rjes su gnang ngo zhes bstan pa yin no/ /bla na med pa yang dag par rdzogs pa'i byang chub tu nye bar gyur pa nyid kyi phyir ro zhes gsungs pa yin no/ /rnam par 'phel ba'i 'grel pa'o// //rtse mo'i mngon par rtogs pa'i rnam par 'phel ba ji lta ba bzhin du/ bogs dbyung ba bstan nas/ da ji ltar 'gyur ba'i nges pa brjod pa'i phyir/ sems can don yongs mi gtong ba/ /kun mkhyen nyid gsum chos rnams kyis/ /yongs su rdzogs pa bla na med//nges pa zhes ni mngon par brjod/ /ces bstan pa ni gang de ni 'di ltar byang chub sems dpa' sems dpa' chen po sbyin pa'i pha rol tu phyin pa dang zhes bya ba nas sangs rgyas kyi chos ma 'dres pa rnams la spyod cing / sems can thams cad zil gyis gnon na/ bla na med pa yang dag par rdzogs pa'i byang chub tu mngon par rdzogs par sangs rgyas par gyur nas/lta ci smos zhes bya ba'i bar dang / thams cad kyi yid du 'ong ba yin no/ /zhes bya ba ni rtse mo'i mngon par rtogs pa la/ nges pa'i gnas skabs thob pa ni rnyed par dka' bar shes par bya ba'i phyir ro zhes bstan pa yin no//de ston pa lha'i me tog man da ra ba nye bar gtor ba dang / mngon du phyogs nas gtor ba dang / rab tu khyab par gtor nas mchod pa'i dge ba'i rtsa ba byang chub sems dpa' rnams kyi sangs rgyas kyi chos rnams yongs su rdzogs par bsngos pa'i tshig gis/rnam pa thams cad mkhyen pa nyid kyi chos rnams dang / rang 'byung gi chos rnams dang / zag pa med pa'i chos rnams yongs su rdzogs par gyur cig ces bya ba/ thams cad mkhyen pa gsum yongs su rdzogs par bsngos pas de bshad pa'i phyir ro zhes bstan pa yin no//ji ltar na sems can gyi don yongs su mi gtong ba yin zhe na/ de lta bu'i rtogs pa dang ldan pa'i gnas skabs su mya ngan las 'das pa spang ba'i phyir dang / thugs rje chen po mngon du bya ba'i dgongs pas sems can ma bsgral ba bsgral ba la sogs pa'i sems bskyed pas/theg pa la gsar du zhugs pa dang / spyod pa la zhugs pa dang / phyir mi ldog pa dang / skye ba gcig gis thogs pa rnams/ ci rigs par rtogs pa bzhi'i gnyen po'i phyogs mthong ba dang bsgom pa'i lam rtogs pa'o/ /rnam pa bzhi bstan pas bzhi po de dag bshad pa nyid kyi phyir ro zhes bstan pa yin no//nges pa'i rnam par 'grel pa'o// //ting nge 'dzin bstan pa'i phyir/ gling bzhi pa ni stong dag dang / /stong gnyis gsum dag dper mdzad nas/ /bsod nams mang po nyid kyis ni/ /ting 'dzin yongs su bsgrags pa yin//zhes bstan pa ni gang rjes su yi rang ba'i bsod nams mang po nas brtsams te/ gling chen po bzhi pa'i 'jig rten gyi khams srang gis gzhal ba'i dpe dang / de bzhin du stong chen po dang / stong gnyis pa dang / de bzhin du stong gsum gyi stong chen po'i 'jig rten gyi khams kyi rgya mtsho chen po'i chu'i phung po ji snyed yod pa de dag skra'i rtse mo brgyar gshags pa'i cha gcig gis/chu'i thigs pa blangs pa'i tshad gzung ba'i dpes/ de dag gi rjes su yi rang ba dang ldan pa'i sems bskyed pa'i bsod nams mang ba nyid dang /sems bskyed pa 'di dag dang ldan pa dag ni/ gang dang gang du skyes pa de dag tu zhes bya ba nas brtsams te/ dge ba'i rtsa ba la rjes su yi rang bar byas shing bla na med pa yang dag par rdzogs pa'i byang chub tu yongs su bsngo bar bya'o/ /sems ma yin pa gzhan yang med par bla na med pa yang dag par rdzogs pa'i byang chub tu bsngo bar bya'o zhes bya ba'i bar du phan yon rnam pa mang po zhig bstan pa'o zhes bstan pa yin no//rtag pa la sogs pa de dag ni dro ba la sogs pa nges par 'byed pa'i cha dang mthun pa bzhi dang 'dra ba'i mtshan nyid du go rims bzhin du shes par bya'o//ting nge 'dzin gyi rnam par 'grel pa'o// //da ni mthong ba'i lam gyi mi mthun pa'i phyogs dang / gnyen por bcas pa rnam pa bzhi po gzung ba dang / 'dzin pa'i rnam par rtog pa bstan pa'i phyir/'jug pa dang ni ldog pa la/ /gzung ba'i rnam rtog so sor te / /dgu yi bdag nyid yin zhes bya/ /zhes bya ba la/ de la gzung ba'i rnam par rtog pa ni rnam pa gnyis te/ ma lus pa la 'jug pa'i phyogs kyi rten can dang po ni/ gang gnyis dang gnyis su med pa'i 'du shes dang bral ba'i sems bskyed pa de lta bus bla na med pa yang dag par rdzogs pa'i byang chub tu yongs su bsngos par nges par sbyor ba'i phyir ro zhes bstan pa yin no//ma lus pa las ldog pa'i phyogs kyi rten can rnam pa gnyis ni/ gang tshe dang ldan pa shA ri'i bu/ shes rab kyi pha rol tu phyin pa la spyod pa ni rnam par mi rtog pa'o zhes bya ba nas brtsams te/rnam par mi rtog pa'i shes rab kyi pha rol tu phyin pa la spyod pas/ rnam par mi rtog pa'i mngon par rdzogs par 'tshang rgya'o zhes bya ba'i bar gyis rnam par byang ba'i yul gyi rnam par rtog pa bkag pa'i phyir ro zhes bstan pa yin no//yang rgyu gang gis de dag rnam par rtog pa zhes bstan ce na/ gang gi phyir/ ji lta ba bzhin yul min bdag /ces bya ba smos te/ phyin ci log tu rtog pas na rnam par rtog pa zhes bya'o/ /'dzin pa'i rnam par rtog pa gnyis bstan pa'i phyir/ sems can rdzas dang btags yod par/ /rnam rtog 'dzin pa dag tu 'dod/ /so so'i skye bo 'phags dbye bas/ /so sor de dag dgu dag nyid/ /ces smos te/ de la so so'i skye bo'i rdzas su yod pa'i rten can 'dzin pa'i rnam par rtog pa dang po ni gang / kye ma tshe dang ldan pa rab 'byor byang chub sems dpa' chen po gang shes rab kyi pha rol tu phyin pa la spyod pa ni gang snying po la spyod do zhes bya ba nas brtsams te/thams cad mkhyen pa nyid kyi bar gyi chos thams cad dben par bshad pa la mi zhum/ yongs su zhum par mi 'gyur ba la sogs pas/ skyes bu rdzas yod pa'i rten can gyi rnam par rtog pa bkag pa'i phyir ro zhes bstan pa yin no//chos thams cad bdag med pa'i shes pa 'di ni so so'i skye bo la yod pa'i phyir/ 'dzin pa'i rnam par rtog pa'i skabs su bzhag pa dang po 'di ni khyad par ma yin no zhe na/ de rnams kyi de kho na nyid yid la byed pa de ni mos pa yid la byed pa yin par 'dir bshad pa'i phyir snying po med pa'o//brtags par yod pa 'phags pa'i gang zag gi rten can gyi 'dzin pa'i rnam par rtog pa gnyis pa ni gang sems zhum pa de'i rgyu dris pa la/ bcom ldan 'das chos thams cad ma mchis pa'i slad du zhes bya ba nas brtsams te/gang du skye ba dang / gnas pa dang / gzhan du 'gyur bar mi dmigs na su zhig de bzhin nyid la gnas par 'gyur/ su zhig de bzhin nyid la gnas nas/ bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ba'am/chos ston par 'gyur zhes 'phags pa'i gang zag thams cad du rnam par rtog pa bkag pa'i phyir ro zhes bstan pa yin no/ /'phags pa'ang de lta bu yod de/ dge slong dag mtshan mo 'das nas nang par gyi dus su ngas srog chags ce spyang sgra 'byin pa'i skad thos so//de bzhin du nga ni de'i tshe de'i dus su ri dgas kyi rgyal po seng ge yan lag ma smad pa zhes bya bar gyur to zhes gsungs pa yin no/ /tshig de dag ni tha snyad yin gyi/ don dam pa ma yin pas snying po med do/ /'dzin pa'i rnam par rtog pa'i skabs su bzhag par gyur pa ni khyab pa can ma yin no//ci'i phyir 'di dag rnam par rtog pa zhes brjod ce na/ gang gi phyir/ gal te gzung don de bzhin med/ /de dag gang gis 'dzin par 'dod/ /de ltar de dag 'dzin pa yi/ /ngo bos stong pa'i mtshan nyid do/ /de ltar rnam par rtog pa 'di bzhi yang / / re re yang rnam pa dgu dgur shes par bya'o/ /de la gzung ba'i rnam par rtog pa dang po dgu po gang zhe na/ ngo bo nyid rigs de dang ni/ /kun nas yang dag bsgrub pa dang / /shes pa'i dmigs pa ma 'khrul dang / /mi mthun pa dang gnyen po dang / /rang gis rtogs dang byed pa dang //de yi las bya'i 'bras bu la/ /'jug pa'i phyogs kyi rten can gyi/ /rtog pa de ni rnam dgur 'dod/ /ces bstan pa la/ de la ngo bo nyid kyi rnam par rtog pa ni gang / rab 'byor de ji snyam du sems/ khyod kyis sgyu ma lta bu'i sems de yang dag par rjes su mthong ngam zhes bya ba nas brtsams te/ji ltar dben pas dben pa 'tshang rgya bar 'gyur zhes bya ba'i bar gyis 'tshang rgya bar yang mi 'thad pa dang / rab 'byor de de bzhin no/ /rab 'byor ci shes rab kyi pha rol tu phyin pa ni shin tu dben pa'i phyir zhes bya ba nas brtsams te/rab 'byor gal te shes rab kyi pha rol tu phyin pa dben par ma gyur zhes bya ba nas brtsams te/ rnam pa thams cad mkhyen pa nyid kyi bar du dben par ma gyur na/ de shes rab kyi pha rol tu phyin pa nas rnam pa thams cad mkhyen pa nyid kyi bar du mi 'gyur ro zhes bya ba'i bar du mngon par rdzogs par byang chub pa ni de'i mtshan nyid can yin par bstan pa'i phyir/de ltar spyod pa ni don zab mo la spyod pa'o zhes bstan pa yin no/ /rigs kyi rnam par rtog pa ni gang yang nam mkha'i dpes rigs su rnam par rtog pa bsal ba'i phyir ro zhes bstan pa yin no//yang dag par bsgrub pa'i rnam par rtog pa ni gang yang sgyu ma'i skyes bu'i dpes bsgrub pa'i yang dag par 'grub pa'i rnam par rtog pa bkag pa'i phyir ro zhes bstan pa yin no/ /dmigs pa'i rnam par rtog pa ni gang yang gzugs brnyan gyi dpes dmigs pa'i rnam par rtog pa bsal ba'i phyir ro zhes bstan pa yin no//mi mthun pa'i phyogs dang gnyen po'i rnam par rtog pa ni gang yang dag par rdzogs pa'i sangs rgyas kyi dpes gnyen po dang mi mthun pa'i phyogs kyi rnam par rtog pa bsal ba'i phyir ro zhes bstan pa yin no//rang gis rtogs pa'i rnam par rtog pa ni gang yang de'i dpes rang rang gis rtogs pa'i rnam par rtog pa bkag pa'i phyir ro zhes bstan pa yin no/ /byed pa po'i rnam par rtog pa ni gang yang de'i sprul pa'i dpes sprul pa'i rigs byed pa'i rnam par rtog pa bsal ba'i phyir/ nyan thos dang / rang sangs rgyas kyi byang chub ring ba dang nye ba bkag pa'i don gyis so zhes bstan pa yin no/ /bya ba'i rnam par rtog pa ni gang yang de bzhin gshegs pa'i sprul pa'i bya ba'i dpes las kyi rnam pa bkag pa'i phyir ro zhes bstan pa yin no/ /bya ba 'bras bu dang bcas pa'i rnam par rtog pa ni gang yang shing gi 'khrul 'khor gyi dpes bya ba 'bras bu dang bcas pa'i rnam par rtog pa bsal ba'i phyir ro zhes bstan pa yin no//de la gzung ba'i rnam par rtog pa gnyis pa'i rnam pa dgu gang zhe na/ srid dang zhi bar ltung ba'i phyir/ / rtogs pa dman pa nyid dang ni/ /yongs su 'dzin pa med pa dang / /lam gyi rnam pa ma tshang dang / /gzhan gyi rkyen gyis 'gro ba dang / /ched du bya ba log pa dang / /nyi tshe ba dang sna tshogs nyid/ /gnas dang 'jug la rmongs pa dang / /rjes la 'gro zhes bya ba la/ /rnam rtog dgu yi bdag nyid ni //ldog pa'i phyogs kyi rten can te/ /mdo las ji skad gsungs pa bzhin/ /zhes bstan pa la/ de 'khor ba dang mya ngan las 'das pa gang yang rung ba zhig tu ltung ba nyid kyis dman pa'i rnam par rtog pa ni gang rab 'byor 'di lta ste dper na nyi ma dang zla ba'i dkyil 'khor ni gling bzhir las byed cing rjes su 'gro'o zhes bya ba dang /shes rab kyi pha rol tu phyin pa'i shes rab dang snying rje dag gis pha rol tu phyin pa lnga pos 'khor ba dang mya ngan las 'das pa gang yang rung bar ltung bar mi byed pa'i phyir/ 'khor los sgyur ba'i dpes rtogs pa ma lus pa la byed pa'i yul shes par bya ba'i phyir ro zhes bstan pa yin no//yongs su 'dzin pa'i rnam par rtog pa ni gang bud med khyim thab med pa'i dpes yongs su 'dzin pa'i khyad par shes par bya ba'i phyir ro zhes bstan pa yin no/ /bsgrub pa ma tshang ba'i rnam par rtog pa ni gang yang g.yul du zhugs pa'i mi dpa' bo'i dpes bsgrub pa'i khyad par shes par bya ba'i phyir ro zhes bstan pa yin no//gzhan gyi rkyen gyis 'gro ba'i rnam par rtog pa ni gang yang 'khor los sgyur ba'i rgyal po la/ khams kyi rgyal po rjes su 'brang ba'i dpes rtogs pa'i dbang du gyur pa shes par bya ba'i phyir ro zhes bstan pa yin no//ched du bya ba log pa'i rnam par rtog pa ni gang yang chu bo rnams gang gA'i chu bo dang lhan cig rgya mtsho chen por 'gro ba'i dpes/ grogs gtso bo rnams dang lhan cig tu 'gro ba'i tshul gyis phyir mi ldog par 'gro ba dang /theg pa gzhan du 'gro ba med pas thams cad mkhyen pa nyid kyi ched du bya ba las yongs su nyams pa'i phyir ro zhes bstan pa yin no/ /nyi tshe ba byed pa'i rnam par rtog pa ni gang skyes bu'i lag pa g.yas pa dang / g.yon pa'i dpes nyi tshe ba ma yin pa'i byed pa shes par byed pa'i phyir ro zhes bstan pa yin no//rtogs pa tha dad nyid kyi rnam par rtog pa ni gang chu klung phra mo dang / chu klung chen po'i chu rnams rgya mtsho chen por phyin na ro gcig par 'gyur ba'i dpes pha rol tu phyin pa lnga de'i bdag nyid can du 'gyur bar shes par bya ba'i phyir ro zhes bstan pa yin no//gnas pa dang 'jug pa mi shes pa'i rnam par rtog pa ni gang yang 'khor lo rin po che gnas pa dang / 'gro ba'i dpes gnas pa dang / 'gro ba dag ni pha rol tu phyin pa lnga de'i rjes su 'brang bar shes par bya ba'i phyir ro zhes bstan pa yin no//rjes la 'gro ba'i rnam par rtog pa ni gang yang de nyid dpung gi tshogs kyis mdun du 'gro ba'i dpes de'i rjes su 'brang bar shes par bya ba'i phyir ro zhes bstan pa yin no/ /gal te de ltar yin na/ chos thams cad ngo bo nyid kyis stong pa yin pa'i phyir pha rol tu phyin pa dag gis bla na med pa yang dag par rdzogs par byang chub pa ni med do zhes brgal ba la rab 'byor 'di la byang chub sems dpa' chen po pha rol tu phyin pa drug la spyod pa'i tshe 'di snyam du 'jig rten na gnas pa 'di ni phyin ci log tu gyur pa ste zhes bya ba nas brtsams te/shes rab kyi don gyi dbang ma gtogs par sems can yongs su smin par bya bar mi nus pa'i phyir/ shes rab kyi pha rol tu phyin pa la spyod pa yin no zhes bya ba ni don gyi lan yin no/ /tha dad du byed pa med pa thams cad las gcig gtso bor gyur pa yod pa ma yin no zhes brgal ba la/lus tha dad pa rnams ri'i rgyal po ri rab kyi drung du phyin pa'i dpes lnga po de ni khyad par med pa'i thob pa 'dis gtso bor 'thad pa'i lan gyis gsungs la/ yang don rjes su zhugs nas khyad par du shes pa med pas/ zhes bya ba ni don dam pa dang 'brel ba bye brag tu rnam par rtog pa la kun tu spyod pa yod pa ma yin no zhes bya ba'i don to//'on kyang 'jig rten gyi tha snyad dang brdar byas na zhes bya ba nas brtsams te/ bud med rin po che'i dpes dge ba'i chos thams cad yongs su bsdus shing mi gnas pa'i tshul gyis rnam pa thams cad mkhyen pa nyid ga na ba der mi gnas pa'i tshul gyis gnas par dgongs pa mchog nyid yin par 'thad pa'i lan gsungs pa yin no//da ni 'dzin pa'i rnam par rtog pa gnyis po re re zhing dbye ba rnam par dgur 'gyur bar brjod par bya'o/ /de la re zhig /'dzin pa dang ni 'dong ba dang //yid la byed dang khams gsum ni/ /gsum char nye bar 'brel pa dang / /gnas dang mngon par zhen pa dang / /chos kyi dngos po btags pa dang / /chags pa dang ni gnyen po dang / /ji ltar 'dod bzhin 'gro nyams dang / /'dzin pa dang por shes par bya//zhes bya ba la de la 'dzin pa dang thar pa'i rnam par rtog pa ni/ gang bcom ldan 'das shes rab kyi pha rol tu phyin pa ni chos gang yang 'dzin pa'am gtong ba ma mchis so zhes bya ba la sogs pas bstan pa yin no/ /yid la byed pa'i rnam par rtog pa ni/ gang gzugs nas rnam pa thams cad mkhyen pa nyid kyi bar du yid la mi byed pas/ yongs su ma bzung ma btang ba nyid kyis yid la byed pa med par dge ba'i rtsa ba rnams rnam par 'phel ba dang / pha rol tu phyin pa rnams yongs su rdzogs pa dang / rnam pa thams cad mkhyen pa nyid thob par byed pa med pa thal bar 'gyur bas/gang rab 'byor nam gzugs yid la mi byed ces bya ba nas brtsams te/ de'i rnam pa thams cad mkhyen pa nyid thob par 'gyur ro/ /de ci'i slad du zhe na/ yid la mi byed pa ni bla na med pa yang dag par rdzogs pa'i byang chub tu mngon par rdzogs par sangs rgya'o zhes bya ba'i 'thad pa'i lan gyis so zhes bstan pa yin no//khams gsum pa dang nye bar 'brel pa'i rnam par rtog pa ni gang bcom ldan 'das ci'i slad du de ltar gzugs yid la ma bgyis zhes bya ba nas 'dren mar 'gyur ba'i yid la byed pas khams gang du yang 'dre bar mi 'gyur ba nyid kyi bar du'o zhes bstan pa yin no//gnas pa'i rnam par rtog pa ni gang de ltar spyod pa de / rnam pa thams cad mkhyen pa nyid kyi bar la yang gnas par mi 'gyur ba nyid kyi phyir ro zhes bstan pa yin no//dngos po la mngon par zhen pa'i rnam par rtog pa ni gang bcom ldan 'das ci'i slad du mngon par chags par mi 'gyur/ mngon par chags par bya ba'i gnas kyi rgyu nyid med pa'i phyir ro zhes bstan pa yin no/ /dngos por brtags pa'i rnam par rtog pa ni gang gal te yang byang chub sems dpa' chen po 'di snyam du sems shing zhes bya ba nas brtsams te/de ci'i phyir zhe na/ 'di ltar de bzhin gshegs pas chos gang yang ma gzigs pas 'dogs par ma mdzad do/ /de bzhin gshegs pas thugs su chud pa ni rjod par byed pa dang brjod par bya ba brtags par rab tu phye ba yin no zhes bya ba'i don to//de ci'i phyir zhe na/ 'di ltar de bzhin gshegs pas ni chos gang yang mngon par rdzogs par sangs rgyas pa med do zhes bya ba dngos po nyid du'o zhes bya ba'i don to/ /de ltar mngon par zhen pa la spyod pa las nyams pa'i tshig gis na mngon par zhen pa med pa gtsor bya bar shes par bya ba'i phyir ro zhes bstan pa yin no//chags pa'i rnam par rtog pa ni gang bcom ldan 'das byang chub sems dpa' shes rab kyi pha rol tu phyin pa la spyod pa na ji ltar sbyin pa sbyin pa la sogs pa'i skyon 'di dag ma mchis par 'gyur ba lags/rab 'byor gang gi tshe 'di ltar chos thams cad la chags pa med cing yongs su 'dzin pa med par shes pa yin no/ /zhes bya ba la sogs pa bstan pa yin no/ /gnyen po'i rnam par rtog pa ni gang gnyen po'i phyogs kyi chos rnams de la dmigs pa dang /mnyam pa nyid kyi dbang du byas nas/ shes rab kyi pha rol tu phyin pa dang / rnam pa thams cad mkhyen pa nyid kyi bar de dang ma bral ba nyid kyi phyir ro zhes bstan pa yin no/ /ji ltar 'dod pa bzhin du 'gro ba la thogs pa'i rnam par rtog pa ni gang dmigs par bya ba dang /dmigs par byed pa dag dbyer med pas mngon par rtogs pa bsgrub pa med na/ mngon par rtogs pa dang / mngon par sgrub pa med par thal bar 'gyur bas rab 'byor byang chub sems dpa' sems dpa' chen po gzugs zhe 'am/'di ni gzugs so/ /'di'i gzugs so zhes bya ba nas brtsams te/ 'khor los sgyur ba'i rgyal po ji ltar 'dod par 'gro ba'i dpes pha rol tu phyin pa lnga po ni nyan thos la sogs pa'i lam du ji ltar 'dod par 'gro ba'i rgyu nyid yin pa'i bar gyis rjes su 'brang ba gzhan dbang yin pa'i phyir ro zhes bstan pa yin no//da ni 'dzin pa'i rnam par rtog pa dgu pa gnyis pa bstan pa'i phyir/ ched bzhin nges par mi 'byung dang / /lam la lam min nges 'dzin dang / /'gog dang bcas pa'i skye ba dang / /dngos po ldan dang mi ldan dang //gnas dang rigs ni 'jig pa dang / /don du gnyer dang rgyu med dang / /phyir rgol ba ni dmigs pa la/ /'dzin pa'i rnam rtog gzhan yin no/ /zhes bya ba la/ ched du bya ba la ji lta ba bzhin du nges par 'byung ba'i rnam par rtog pa ni gang yang kha lo bsgyur ba'i dpes/de dag rnam pa thams cad mkhyen pa nyid kyi lam mchog gis rab tu khrid pa des rang dbang du byed pa'i phyir ro zhes bstan pa yin no/ /lam la lam ma yin par nges par 'dzin pa'i rnam par rtog pa ni gang nyan thos la sogs pa'i lam dang / rnam pa thams cad mkhyen pa nyid kyi lam ni/byang chub sems dpa'i lam ma yin pa dang lam yin pa nyid kyi phyir ro zhes bstan pa yin no/ /skye ba dang / 'gog pa'i rnam par rtog pa ni gang shes rab kyi pha rol tu phyin pa 'di ni/ byang chub sems dpa' sems dpa' chen po rnams kyi don chen po'i slad du nye bar gnas pa zhes bya ba nas brtsams te/shes rab kyi pha rol tu phyin pa 'di ni skye ba ma yin 'gog pa ma yin no zhes bya ba'i bar gyis ni chos nyid tshad mar bya ba'i phyir ro/ /de lta na ni pha rol tu phyin pa drug yod par mi 'dod par mi 'dod do zhe na/rnam pa thams cad mkhyen pa nyid dmigs par byas nas/ dge ba'i rtsa ba de dag thams cad dang thun mong du byas nas/ bla na med pa yang dag par rdzogs pa'i byang chub tu yongs su bsngo zhing / 'khor gsum mi dmigs pa'i rnam par bsgoms pas/ pha rol tu phyin pa drug la mngon par brtson par yang dag par brtson pa'i phyir ro zhes bstan pa yin no//dngos po dang ldan pa dang / mi ldan pa'i rnam par rtog pa ni gang de'i rgyu yongs su zhus nas/ lan bka' stsal pa nas brtsams te/ gzugs nas rnam pa thams cad mkhyen pa nyid kyi bar du ldan pa bkag pas mngon par brtson par bya ba bstan pa'i phyir ro zhes bstan pa yin no//gzugs la sogs pa la gnas pa'i rnam par rtog pa ni gang yang gzugs nas rnam pa thams cad mkhyen pa nyid kyi bar la gnas par bya'o zhes brtson par mi bya ste/de ci'i phyir zhe na/ gzugs nas rnam pa thams cad mkhyen pa nyid kyi bar te / thams cad mkhyen pa nyid gsum char ni gang na yang mi gnas so zhes bya ba ni 'thad pa'o zhes bstan pa yin no/ /rigs rnam par 'jig pa'i rnam par rtog pa ni gang a mra la sogs pa'i 'bras bu'i dpes/chos rnam par mi 'jig par shes par bya ba'i phyir ro zhes bstan pa yin no/ /don du mi gnyer ba'i rnam par rtog pa ni gang chos thams cad kyi bar la dbang du gyur pa thob par 'dod pas/ shes rab kyi pha rol tu phyin pa la bslab par bya ba nyid do zhes bstan pa yin no//rgyu med pa'i rnam par rtog pa ni gang de ci'i phyir zhe na/ rgya mtsho chen po ni 'dzam bu'i gling gi rin po che thams cad kyi rgyu yin pa'i dpes/ shes rab kyi pha rol tu phyin pa ni 'phags pa'i gang zag gis rtogs pa'i rgyu nyid yin pa'i 'thad pas so zhes bstan pa yin no//phyir rgol ba'i chos la dmigs pa'i rnam par rtog pa ni gang yang 'phong gi slob dpon gyi dpes/ phyir rgol ba'i chos thub par dka' bar ston cing / de bzhin du mi dmigs pa la spyod pa'i byang chub sems dpa' ni sangs rgyas thams cad kyis mi dmigs pa'i rnam par dgongs pa mdzad pa dang /'dzin pa'i rnam par rtog pa gnyis po'i gnyen po'i phyogs shes par bya ba'i phyir ro zhes bstan pa yin no/ /mu bzhi las dang po ni gzung ba'i rnam par rtog pa yin la/ 'dzin pa'i rnam par rtog pa ma yin pa ni gzugs la sogs pa'i yul dag go//gnyis pa ni rnam par shes pa'i skad cig ma gcig go / /gsum pa ni rnam par shes pa'i skad cig ma gzhan no/ /bzhi pa ni rnam pa de dag dang bral ba'i shes rab kyi pha rol tu phyin pa'o/ /rigs gnyis yin la/ rigs kyi rnam par rtog pa ma yin pa zhes bya ba ni tshig phyi ma can no//gang de las re zhig rigs kyi rnam pa de nyid rigs yin no/ /'di ltar 'di lta ste/ gnyen po'i phyogs yang dag par rtogs pa'i dus ni rigs te/ de rigs nyid yin gyi/ rigs kyi rnam par rtog pa ni ma yin no//'di lta ste/ yang dag par rtogs pa'i dus ma yin pa ni rigs tsam nyid do/ /yang dag par rtogs pa'i rnam par rtog pa yin la/ dmigs pa'i rnam par rtog pa ma yin pa ni tshig snga ma can no/ /gang de las re zhig yang dag par rtogs pa'i rnam par rtog pa yin la/dmigs pa'i rnam par rtog pa'ang yin pa ni 'di lta ste/ yang dag par rtogs par byed pa ni dmigs pa la yang sbyor ba yin no/ /yang dag par rtogs pa'i rnam par rtog pa yin la/ dmigs pa'i rnam par rtog pa ma yin pa ni 'di ltar dmigs pa yongs su ma rdzogs pa'o//phyogs 'dis lhag ma rnams kyang rjes su dpag par bya'o/ /rtse mo'i mngon par rtogs pa mthong ba'i lam gyi mi mthun pa'i phyogs kyi rnam par 'grel pa'o// //yang ci'i phyir de la mthong ba'i lam du 'dod ce na/byang chub chen po thob pa'i phyir ro/ /de thob pa yang rgyu gsum gyis yin te/ yang rgyu gsum ni byang chub gzhan la ston pa dang zhes smos pa ni/ gang bcom ldan 'das shes rab kyi pha rol tu phyin pa ni zab la/ byang chub sems dpa' chen po de dag ni dka' ba bgyid pa lags so zhes bya ba nas brtsams te/mthong ba'i lam thob pa dge slong brgya drug cu lung bstan pa nyid kyis so zhes bstan pa yin no/ /de'i rgyu ni yongs su gtod dang zhes bya ba ni gang 'phags pa kun dga' bo la de la shes rab kyi pha rol tu phyin pa mang du gtad pas gsungs so zhes bstan pa yin no//de'i mdo ni kun dga' bo ngas khyod la shes rab kyi pha rol tu phyin pa 'di yongs su gtad do/ /ci nas phyi ma'i dus lnga brgya pa tha ma'i dus su rgyas par 'gyur ro zhes gsungs pa yin no/ /de thob bar chad med pa'i rgyu/ /bsod nams mang po'i mtshan nyid do//zhes bya ba ni gang stong gsum gyi stong chen po'i 'jig rten gyi khams kyi sems can ji snyed pa dgra bcom pa'i 'bras bu thob par gyur cing / de dag la sbyin pa la sogs pa'i bsod nams bya ba'i dngos po dper bya ba nas brtsams te/ rgya cher skad cig dang yud tsam dang /thang cig tsam shes rab kyi pha rol tu phyin pa'i chos ston par byed pa bsod nams mang du 'phel lo zhes bstan pa yin no/ /skad cig la sogs pa smos pas ni go rims bzhin du gang zag dbang po rnon po dang / 'bring dang / tha ma shes par bya ba'i phyir te/ bya ba yongs su rdzogs pa 'dir skad cig mar shes par bya ste/tha snyad gcig pa yin pa'i phyir ro/ /de bzhin gshegs pa mi bskyod pa mthong bar 'gyur ba'i rdzu 'phrul mngon du mdzad pa'i dpes ni rnam par rtog pa rnams ni mthong ba'i lam gyi ye shes kyi yul ma yin pa nyid du shes par bya ba'i phyir ro//de ltar na yang dag par rdzogs pa'i byang chub thob pa'i rgyu ni gsum po de dag yin no/ /yang byang chub chen po zhes bya ba 'di gang yin zhe na/ dri ma zad dang mi skye ba'i/ /ye shes byang chub ces brjod do/ /zhes bstan pa la/ yang zad pa shes pa ni gang zhig yin mi skye ba shes pa ni ci zhig yin zhe na/zad med skye med phyir de dag /go rims bzhin du shes par bya/ /zhes bstan pa ni/ gang kun dga' bo nam mkha' zad par 'dod pa gang yin pa de ni shes rab kyi pha rol tu phyin pa zad pa shes pa'o/ /rgya che ba'i ye shes brjod pa dang /chos de rnams ni skye ba yod pa ma yin no zhes mi skye ba shes pa brjod pas yang dag par rdzogs pa'i byang chub nye bar dgongs pa'i phyir ro zhes bstan pa yin no/ /de la ji ltar yid ches par bya zhe na/ bden par mtshon pa'i ljags rgya chen po bstan nas/ 'phags pa kun dga' bo shes rab kyi pha rol tu phyin pa ston pa la sogs par nges par sbyor ba dang / de gzung bas gzungs dang ting nge 'dzin gyi sgo thams cad gzung ba nyid kyi phyir ro zhes bstan pa yin no/ /yang ji ltar na mi zad pa'i rnam pa zad pa shes pa yin zhing dngos po 'jig pa'i rnam pa yin zhe na/gang gi phyir sbyor ba'i dus kyang / rab 'byor gzugs mi zad pas shes rab kyi pha rol tu phyin pa mngon par bsgrub par bya'o zhes bya ba nas brtsams te/ snying po byang chub la 'dug pa'i ma 'dres pa'i chos te/ de ltar rten cing 'brel par 'byung ba nam mkha' ltar zad mi shes pas mngon par bsgrub par rnam par blta ba ni/rnam pa thams cad mkhyen pa nyid kyi ye shes thugs su chud pa nyid yin pa'i phyir/ de ltar lta ba ni bdag dang / chos thams cad du 'dzin pa spangs pas mthong ba'i lam gsal bar bsten pa'i don dang /de ltar spyod pa'i byang chub sems dpa' la ni pha dang ma shi ba'i skyes bu'i dpes bdud rnams kyi rang gi spyod yul las 'da' bar sems pa dang / mya ngan gyi zug rngu zug pa nyid kyi phyir ro zhes bstan pa yin no/ /gang gi phyir de lta yin pa de bas na zad pa dang / mi skye ba shes pas ni gang yang zad pa'am/mi skye ba med pas/ 'gag pa med pa'i rang bzhin la/ /mthong zhes bya ba'i lam gyis ni/ /rnam par rtog rigs ci zhig zad/ /skye med rnam pa ci zhig 'thob/ /ces bya ba la/ dngos po gang 'jig pa la dgongs nas zad pa la ni zad pa shes pa yin pa zad pa shes zhes brjod la/ma 'ongs pa'i dngos po mi skye ba la dgongs nas mi skye ba shes pa zhes bstan pa de la ci zhig ni zad pa'am/ mi skye ba med pa ni ci zhig 'thob ces dris pa yin no/ /de nyid kyi phyir/ chos rnams kyang yod ces bya ba dang /shes bya la yang sgrib zad par / /ston pa gzhan gyi brjod pa gang / /'di la kho bos mtshar du rtsis / /zhes bstan pa la/ des na 'di nyid kho na legs pa yin te/ 'di la bsal bya ci yang med/ /gzhag par bya ba cung zad med/ /yang dag nyid la yang dag lta/ / yang dag mthong na rnam par grol/ /zhes bya ba la/ skad cig ma gcig po 'di ni mthong ba'i lam yin te/ de'i phyir/ sbyin la sogs pa re re la/ /de dag phan tshun bsdus pa gang / /skad cig gcig gi bzod pa yis / /bsdus pa de 'dir mthong ba'i lam/ /zhes bstan pa ni/gang rab 'byor 'di la byang chub sems dpa' sems dpa' chen po sbyin pa yongs su gtong ba'i tshe/ rnam pa thams cad mkhyen pa nyid du yongs su bsngo zhing sbyin pa yongs su gtong ste zhes bya ba nas brtsams te/ shes rab kyi pha rol tu phyin pa la spyod cing / pha rol tu phyin pa drug yongs su rdzogs par 'gyur te/'di ltar sbyin pa'i pha rol tu phyin pa nas/ shes rab kyi pha rol tu phyin pa la gnas pa'i bar du drug po re re zhing drug tu byas nas rnam pa sum cu rtsa drug gis bsdus pa thams cad du 'khor gsum yongs su dag pa'i yongs su bsngo ba'i gtso bo yin pa'i phyir thams cad gcig gis gcig bsdus pa yin no//'di'i mdo ni/ rab 'byor 'di la byang chub sems dpa' sems dpa' chen po sbyin pa gtong ba ni sems can rnams la byams pa'i lus dang / ngag dang / yid kyi las nye bar 'gyur ba ni tshul khrims kyi pha rol tu phyin pa'o//de nyid la len pa po rnam par gshe zhing 'khyal bar smra ba la sogs pa bzod pa ni bzod pa'i pha rol tu phyin pa'o/ /de nyid kyi slong mo'i mtshang 'dru ba dang / yongs su smra ba la sogs pas sbyin pa la spro ba mi 'dor ba ni brtson 'grus kyi pha rol tu phyin pa'o/ / de nyid kyi sbyin pa de rnams rnam pa thams cad mkhyen pa nyid du yongs su bsngo zhing / nyan thos dang / rang sangs rgyas kyi sa'i rnam par g.yengs pa'i sems med pa ni bsam gtan gyi pha rol tu phyin pa'o/ /de nyid kyi sbyin pa byin pa na sgyu ma'i blos gnas pas gang gi yang phan pa dang /gnod par bya ba ma mthong ba ni shes rab kyi pha rol tu phyin pa'o/ /de bzhin du tshul khrims bsrung ba nas shes rab bsgom pa'i bar du re re zhing pha rol tu phyin pa drug po yongs su rdzogs par bsdus pa mdo ji lta ba bzhin du brjod par bya'o/ /de ltar na drug tshan cha drug po 'di dag ni rnam pa sum cu rtsa drug tu 'gyur ro//mthong ba'i lam gyi bzod pa 'di skyes pa na 'dod pa dang / gzugs dang / gzugs med pa'i khams kyis bsdus pa'i nyon mongs pa mthong bas spang bar bya ba rnam par rtog pa bzhis bsdus pa brgya rtsa brgyad spong bar 'gyur ro//de la dbang du bya ba'i phyir ting nge 'dzin la snyoms par zhugs pa ni/ de nas seng ge rnam par bsgyings pa'i ting nge 'dzin la snyoms par zhugs nas/ rten cing 'brel 'byung lugs mthun dang / /lugs mi mthun la rtog par byed/ /ces bstan pa la/ de la lugs dang mthun pa ni/ma rig pa'i rkyen gyis 'du byed ces bya ba la sogs pa'o/ /lugs dang mi mthun pa ni gang de rnams med pas/ mya ngan dang / smre sngags 'don pa la sogs pa mi 'byung ngo zhes bya ba la sogs pa'o/ /rtse mo'i mngon par rtogs pa'i mthong ba'i lam gyi rnam par 'grel pa'o// //mthong ba'i lam bstan nas/ da ni bsgom pa'i lam gyi mi mthun pa'i phyogs kyi rnam par rtog pa bzhi brjod par bya'o/ /de la re zhig bsgom pa'i lam bsgoms nas 'di phyis brjod par bya'o/ /bsgom pa'i lam mthar gyis gnas pa'i snyoms par 'jug pa dgus bsdus pa yin la/de yang thod rgal gyi snyoms par 'jug pas bsdus pa yin pas de'i phyir de bstan pa'i sgo nas bsgom pa'i lam mdor bstan pa'i dbang du mdzad de/ 'gog dang bcas pa'i snyoms 'jug dgur//rnam pa gnyis su song 'ongs nas/ /'dod par gtogs pa'i rnam par shes/ /mnyam gzhag min pa'i mtshams bzung ste/ /thod rgal du ni snyoms 'jug pa/ /gcig dang gnyis gsum bzhi dang lnga/ /drug dang bdun dang brgyad rgal nas/ / 'gog pa'i bar du mi 'drar 'gro/ /zhes bstan pa yin no/ /rnam pa gnyis su zhes bya ba ni lugs dang mthun pa dang / lugs dang mi mthun pa'o/ /de nas seng ge rnam par bsgyings pa'i ting nge 'dzin pa snyoms par zhugs nas/ rten cing 'brel par 'byung ba la so sor brtags pa'i rjes mthar gyis gnas pa'i snyoms par 'jug pa dgu nas mnyam par gzhag pa'i sems dang /lugs dang mthun pa dang / lugs dang mi mthun pa gcig dang / gnyis dang / gsum dang / bzhi dang / lnga dang /drug dang / bdun dang / brgyad dang / dgu po la thod rgal du snyoms par 'jug pas mngon du byed pa na/ ji ltar 'dod pas dbang du bya ba mang du thob pa yin te/ 'di'i mdo ni/ rab 'byor 'di la byang chub sems dpa' sems dpa' chen po 'dod pas dben/ sdig to mi dge ba'i chos kyis dben pa rtog pa dang bcas pa/dpyod pa dang bcas/ dben pa las skyes pa'i dga' ba dang / bde ba can bsam gtan dang po nye bar bsgrubs te gnas so/ /de bzhin du 'du shes dang / tshor ba 'gog pa'i snyoms par 'jug pa la nye bar bsgrubs te gnas so//de 'gog pa'i snyoms par 'jug pa las langs nas/ 'du shes med 'du shes med min gyi skye mched kyi snyoms par 'jug pa la snyoms par 'jug go/ /de las langs nas ci yang med pa'i skye mched la snyoms par 'jug go/ /de nas rnam shes mtha' yas skye mched la snyoms par 'jug go//de nas nam mkha' mtha' yas skye mched la snyoms par 'jug go/ /de nas ni bsam gtan bzhi pa la'o/ /de nas bsam gtan gsum pa la/ de nas gnyis pa la/ de nas bsam gtan dang po la snyoms par zhugs te/seng ge rnam par bsgyings pa'i ting nge 'dzin 'di rnam par dbye ba byas nas thod rgal gyi ting nge 'dzin la snyoms par 'jug go/ /rab 'byor gzhan yang byang chub sems dpa' sems dpa' chen po'i thod rgal gyi ting nge 'dzin de yang gang zhe na/ de la byang chub sems dpa' bsam gtan dang po la snyoms par 'jug pa nas/de bzhin du 'gog pa'i bar la snyoms par 'jug go/ /de las langs nas bsam gtan dang po nye bar bsgrubs te gnas so/ /de las langs nas 'gog pa la snyoms par 'jug go/ / de nas ni bsam gtan gnyis pa la'o/ /de nas ni 'gog pa la'o/ /de nas ni gsum pa la'o/ /de nas ni 'gog pa la'o/ /de nas ni bsam gtan bzhi pa la'o / /de nas ni 'gog pa la'o/ /de nas nam mkha' mtha' yas skye mched la'o/ /de nas 'gog pa la'o//de nas rnam shes mtha' yas skye mched la'o/ /de nas 'gog pa la'o/ /de nas ci yang med pa'i skye mched la'o/ /de nas 'gog pa la'o/ /de nas 'du shes med 'du shes med min gyi skye mched la'o/ /de las langs nas 'gog pa'i snyoms par 'jug pa la snyoms par 'jug go//de las langs nas 'du shes med 'du shes med min skye mched kyi snyoms par 'jug pa la snyoms par 'jug go/ /de las langs nas 'dod pa na spyod pa'i mnyam par ma bzhag pa'i sems mngon du byed do/ /mnyam par ma bzhag pa'i sems las 'gog pa'i snyoms par 'jug pa la snyoms par 'jug go//de las langs nas mnyam par ma bzhag pa'i sems la gnas so/ /de nas 'du shes med 'du shes med min skye mched la snyoms par 'jug go/ /de las langs nas mnyam par ma bzhag pa'i sems la gnas so//de nas cung zad med pa'i skye mched la'o/ /de nas ni mnyam par ma bzhag pa'i sems la gnas so/ /de bzhin du bsam gtan dang po las langs nas mnyam par ma bzhag pa'i sems la gnas so zhes bya ba'i bar du'o/ /gang sa brgyad rnam gnyis rjes 'brel dang //gcig rgal song zhing 'ongs nas ni/ /rigs mi mthun par gsum par 'gro/ /thod rgal gyi ni snyoms 'jug min / /zhes bstan pa de ji ltar yin zhe na/ khwa dang 'ug pa gnyis mtshan nyid mtshungs pa yin nam/ /de'i skabs gzhan ma yin te/thabs la mkhas pa de lta bu thob pas bskal pa grangs med pa bye ba khrag khrig stong phrag brgya snyed du 'jug cing / sangs rgyas dpag tu med pa la bsnyen bkur byed pa nyid kyis rgya che ba yin pa'i phyir bsgom pa'i lam rgyun chags pa nyid yin par shes par bya ba'i phyir gsungs pa yin no//bsgom pa'i lam gyi rnam par 'grel pa'o// //bsgom pa'i lam bstan nas da ni de'i mi mthun pa'i phyogs rnam pa bzhi brjod par bya'o/ /de la re zhig mdor bsdus rgyas dang sangs rgyas kyi/ /mgon dang bcas pa med nyid dang //dus gsum yon tan med pa dang / /legs pa'i lam ni rnam gsum dang / /gzung ba'i rnam rtog 'di gcig ste/ /sbyor ba'i rnam pa'i spyod yul can/ /zhes bstan pa la/ de la chos rnams kyi mdor bsdus pa mi shes pa'i rnam par rtog pa ni gang /bcom ldan 'das de ltar de bzhin gshegs pas chos 'di dag mdo dang rgyas par bstan pa de la/ byang chub sems dpa' chen po pha rol tu phyin pa drug po 'di dag mdo dang rgyas par kun chub par bya'o zhes bya ba nas brtsams te/ thams cad mkhyen pa nyid gsum char mngon par rtogs pa gcig gis mdor bsdus pa bstan nas/mngon par rtogs pa re re yang rgyas par bstan pas so zhes bstan pa yin no/ /da ni rtse mo'i mngon par rtogs pa la mdor bsdus pa dang / rgyas par bsgom pa'i lam gyi dbang du mdzad nas nye bar bkod pa dang /des spang bar bya ba'i rnam par rtog pa spangs par shes par bya ba'i don du/ bcom ldan 'das byang chub sems dpa' sems dpa' chen po thams cad kyis mdo dang rgyas pa 'tshal bar 'gyur ba lags zhus pas/ chos thams cad kyi de bzhin nyid mdor bsdus pa shes pa dang /rgyas pa shes pa nyid dang / byang chub sems dpa' dbang po rnon po la sogs pa 'jug pa nyid kyis mdor bsdus pa dang / rgyas pa brjod pa la 'jug pa'i rgyu nyid shes par bya ba'i phyir ro zhes bstan pa yin no/ / sangs rgyas kyis dgongs pa med pa'i rnam par rtog pa ni gang / rnam pa thams cad mkhyen pa nyid thob pa la ji skad bstan pa bzhin du slob pa ni bdud kyi las mi byed pa dang / yongs su mi nyams pa dang / sangs rgyas kyi dgongs pas stong gsum gyi stong chen po'i 'jig rten gyi khams kyi sems can rnams la zang zing gi sbyin pas tshims par bya ba dang /tshul khrims la sogs pa'i phung po dang / rgyun du zhugs pa la sogs pa'i 'bras bu dang / rang sangs rgyas kyi byang chub la bkod pas / gang de shes rab kyi pha rol tu phyin pa zab mo 'di se gol gtogs pa tsam du bsgoms pa'i bsod nams de mang du 'phel ba nyid dang /sangs rgyas kyi dgongs pa'i rgyu nyid shes par bya ba'i don gyi phyir te/ de ci'i phyir zhe na/ chos thams cad rtag pa'i rgyu can yin pas/ sangs rgyas rnams kyang 'di las 'khrungs pa nyid kyi phyir ro zhes bstan pa yin no//sbyor ba'i lam med pa'i rnam par rtog pa ni gang ji skad bshad pa la gnas pa ni phyir mi ldog pa yin pas sangs rgyas kyi dgongs pa dang / de la bsnyen bkur byas pa dang / dge ba'i rtsa ba bskyed pa dang / dge ba'i bshes gnyen gyis yongs su gzung ba dang / pha rol tu phyin pa drug la sogs pa'i chos kyi rnam pa dpag tu med pa bsgom pa nas brtsams te/ 'di ni shes rab kyi pha rol tu phyin pa la spyod pa de la phan yon 'di dag yod pa yin no zhes bya ba'i bar du gang gsungs pa ni sbyor ba'i lam gyi dus su'o zhes bstan pa yin no//mthong ba'i lam med pa'i rnam par rtog pa ni/ gang shes rab kyi pha rol tu phyin pa mngon par bsgrub pa'o zhes bstan pa yin no/ /de mthong ba'i lam gyi dus su'o/ /bsgom pa'i lam med pa'i rnam par rtog pa ni gang shes rab kyi pha rol tu phyin pa bsgom pa de la bsgom pa'i lam gyi dus su sems kyi phan yon mang po zhig bstan pa'i phyir ro zhes bstan pa yin no//sbyor ba'i lam mi shes pa'i rnam par rtog pa ni gang gzugs la sogs pa zhi ba dang / rag las pa dang /gsog dang / snying po med pas shes rab kyi pha rol tu phyin pa la spyad par bya ba nyid sbyor ba'i bdag nyid ji lta ba bzhin du shes par bya ba'i phyir ro zhes bstan pa yin no/ /de la dngos po rnams 'gog pas na zhi ba'o/ /rkyen gyi dbang gis na rag las pa'o/ /rang bzhin stong pa nyid yin pas na gsog go//rnam par dpyad mi bzod pas na snying po med pa'o/ /mthong ba'i lam mi shes pa'i rnam par rtog pa ni gang nam mkha' stong pa nyid mngon par bsgrubs pas/ shes rab kyi pha rol tu phyin pa bsgrub par bya ba nyid kyis mthong ba'i lam gyi bdag nyid ji lta ba bzhin du shes par bya ba'i phyir ro zhes bstan pa yin no//bsgom pa'i lam mi shes pa'i rnam par rtog pa ni gang nam mkha' stong pa nyid du bsgoms pas shes rab kyi pha rol tu phyin pa nyid dang / bsgom pa'i lam gyi ji lta ba bzhin du shes par bya ba'i phyir ro zhes bstan pa yin no//yang nam mkha' zhes smos pa ni bsgom pa'i lam ni mthong ba'i lam las dngos po tha mi dad par shes par bya ba'i phyir ro/ /de la nam mkha' stong pa nyid mngon par bsgrub pa zhes bya ba ni nam mkha' zhes smos pas ni gcig yin no/ /nam mkha' stong pa nyid bsgom pa zhes bya ba ni gnyis pa yin no//de ni bsgom pa'i lam gyi mi mthun pa'i phyogs kyi rnam pa gnyis brjod par bya ste/ de'i phyir/ gnyis pa sems dang sems byung rnams/ /'jug pa'i yul can yin bzhed de/ /zhes bstan pa yin no/ de yang gang zhe na/ sems mi skye dang byang chub kyi/ /snying po yid la mi byed dang / /theg pa dman pa yid byed dang / /rdzogs pa'i byang chub yid mi byed/ /bsgom dang bsgom pa med pa dang / /de dag las ni bzlog nyid dang / /ji bzhin don min rnam rtog pa/ /bsgom pa'i lam la shes par bya//zhes bstan pa yin no/ /de la byang chub kyi sems mi skye ba'i rnam par rtog pa ni gang sems dang po bskyed pa nas nye bar bzung ste zhes bstan pa yin no/ /byang chub kyi snying po yid la mi byed pa'i rnam par rtog pa ni gang byang chub kyi snying po yid la mi byed do zhes bstan pa yin no/ / nyan thos dang / rang sangs rgyas kyi theg pa yid la mi byed pa'i rnam par rtog pa ni gang theg pa gzhan gyi yid la bya ba go skabs med pa'i phyir ro zhes bstan pa yin no/ /yang dag par rdzogs pa'i byang chub yid la mi byed pa'i rnam par rtog pa ni gang rnam pa thams cad mkhyen pa nyid yid la bya ba mi 'dor bas shes rab kyi pha rol tu phyin pa la spyad par bya ba nyid dang /sems dang sems las byung ba'i chos mi rgyu ba de ltar spyad pa dang / de ltar mngon par bsgrub par gsungs pa dang / de'i spyod pa dang / mngon par bsgrubs pa dang / bsgoms pas rnam pa thams cad mkhyen pa nyid thob pa bkag pa dang / theg pa chen po skad cig ma gcig gis mngon par rtogs pa yin par shes par bya ba'i phyir ro zhes bstan pa yin no/ /bsgom pa'i rnam par rtog pa ni de ltar bsgoms pa nyid kyis de ni rgyun chags pa nyid yin pa'i phyir ro//'dod pa'i don yin par mi 'thad pa shes par bya ba'i phyir ro zhes bstan pa yin no/ /bsgom pa med pa'i rnam par rtog pa ni gang de ltar bsgoms pa nyid kyis mi slob pa'i dus su dor ba'i sbyor ba shes par bya ba'i phyir ro zhes bstan pa yin no//bsgom pa yang med/ bsgom pa ma yin pa yang med pa'i rnam par rtog pa ni gang bsgoms pas kyang ma yin/ ma bsgoms pas kyang ma yin pa'i phyir/ rnam pa thams cad mkhyen pa nyid thob pas bar du chod pa dang / ma chod pa 'dren mar bsgoms pas de'i rgyu nyid ma yin par shes par bya ba'i phyir ro zhes bstan pa yin no//don ji lta ba bzhin ma yin pa'i rnam par rtog pa ni gang zhig mya ngan las 'das pa yang gzhan la/ thob pa yang gzhan par sems pa'i dbang du mdzad pa ni de bzhin nyid ji lta ba de bzhin du rnam pa thams cad mkhyen pa nyid thob par 'gyur zhes bya ba la sogs pa'o zhes bstan pa yin no//da ni bsgom pa'i lam gyi mi mthun phyogs 'dzin pa'i rnam par rtog pa bshad par bya'o/ /de la re zhig /sems can btags pa'i spyod yul dang / / chos btags pa dang stong min nyid/ /chags dang rab 'byed bdag nyid dang / /dngos por byed dang theg gsum dang / /yon ni dag pa ma yin dang / /spyod pa rnam par 'khrugs pa la/ /'dzin par byed pa dang po ni/ /shes par bya ba nyid dang ni/ /zhes bstan pa la/de la sems can du btags pa'i rnam par rtog pa ni gang sems can la sogs pa mi dmigs pa nyid kyi phyir/ sems can gyi khams su gtogs pa bkag pa'i phyir yin no/ /de lta yin na sems can dmyal ba nas brtsams te/ yang dag par rdzogs pa'i sangs rgyas kyi bar du btags pa med par thal bar 'gyur ro zhe na/rab 'byor de ji snyam du sems/ sems can du gdags pa dmigs su yod dam/ zhes bya ba'i bar gyis ni sems can du btags pa ni dngos po med par shes par bya ba'i phyir ro zhes bstan pa yin no/ /chos su btags pa'i rnam par rtog pa ni gang chos su btags pa la slob pa ni rnam pa thams cad mkhyen pa nyid thob pa brjod pa'i phyir/bcom ldan 'das 'o na byang chub sems dpa' sems dpa' chen po shes rab kyi pha rol tu phyin pa la spyod pas/ gzugs la bslab par bgyi 'am zhes bya bas nye bar dmigs pa la bslab pa thams cad bkag pas so zhes bstan pa yin no//stong pa nyid ma yin pa'i rnam par rtog pa ni gang gzugs nas rnam pa thams cad mkhyen pa nyid kyi bar du dbri ba dang / bsnan pa med par bslab par gsungs pa'i phyir/ chos thams cad rang gi mtshan nyid kyis stong pa nyid du mthong bas/de slob pa nyid kyis rang gi mtshan nyid stong pa nyid yin na/ shes rab kyi pha rol tu phyin pa la spyod pa med par thal bar 'gyur bas/ rab 'byor spyod pa med pa ni shes rab kyi pha rol tu phyin pa la spyod pa'o zhes bya ba nas brtsams te/rnam pa thams cad mkhyen pa nyid kyi bar du bsgom pa de'i tshe/ mi dmigs pa'i tshul gyis bsgom par bya'o zhes bya ba'i lan gyi bar gyis gnyis dang gnyis su med pa dag dmigs pa dang mi dmigs pa nyid du'o zhes bstan pa yin no/ /chags pa'i rnam par rtog pa ni gang dmigs pa dang /mi dmigs pa dag la chags pa bkag pas de lta na ni sa nas sa gzhan du 'pho zhing de yongs su rdzogs par 'gyur ba med de/ dmigs pa la gnas na de yongs su rdzogs par mi nus pa'i phyir ro/ /de ci'i phyir zhe na/ shes rab kyi pha rol tu phyin pa yang dmigs su med ces gang gsungs pa'i lan gyi 'thad pas so zhes bstan pa yin no//chos rab tu rnam par 'byed pa'i rnam par rtog pa ni gang de ltar chos rab tu rnam par 'byed pa med pas/ ji ltar nye bar dmigs pa med pa de ltar chos rnam par 'byed par mi byed do zhes mi dmigs pa rab tu rnam par 'byed pa yin par gnang ngo zhes bstan pa yin no//dngos po'i ched du bya ba byed pa'i rnam par rtog pa ni gang de yin na sangs rgyas kyi mdzad pa mtha' dag mdzad par mi rigs pas spyod pa de ni su yang byed par mi 'gyur ro/ /de ci'i phyir zhe na/ de ni 'di ltar chos thams cad ni ma byas pa ste / mngon par ma byas pa'i phyir ro zhes bstan pa yin no/ /theg pa gsum gyi nges par 'byung ba'i rnam par rtog pa ni gang de lta yin na theg pa gsum du rnam par gzhag pa med par 'gyur ba dang / gzugs la mngon par zhen nas de rnams la rlom sems dang ldan pa'i theg pa gsum du rnam par gzhag par 'gyur ba dang /de ci'i phyir zhe na/ chos thams cad ni sangs rgyas kyi spyan lngas kyang ma gzigs pa dang / de lta na ni bcom ldan 'das sems can gyi phung po gsum du lung ston par mdzad pa med pa dang /rdzas ma yin pa la rdzas su 'du shes pa de zlog par byed pa'i don dang / de ltar bstan pas don dam pa'am de las bzlog pa la zhugs nas/ bla na med pa yang dag par rdzogs pa'i byang chub bkag pa dang / de bzhin gshegs pa'i sprul pa'i dpes 'dus byas dang /'dus ma byas la gnas pa bkag pas bla na med pa yang dag par rdzogs pa'i sangs rgyas kyi mdzad pa mtha' dag mdzad par gsungs pa dang / de lta na ni de bzhin gshegs pa dang sprul pa la khyad med par thal bar 'gyur bas/byed pa po'i sprul pa dang bcas pa'i dgongs pa shes par bya ba'i don dang / de gnyi ga'i don byed pa'i khyad par bye brag med par gsungs pas/ de bzhin gshegs pa bzhugs pa'i smon lam gyi rjes su byed pas de gnyi ga'i khyad par brjod pa dang / sprul par mdzad pa'i de bzhin gshegs pa dang sprul pa'i dpes byed pa po'i rnam par rtog pa bsal ba'i dpes zhes bstan pa yin no/ yon ma dag pa'i rnam par rtog pa ni gang de lta yin na yon yongs su dag pa med pas/ de bzhin gshegs pa dang sprul pa de dag chos nyid kyi dbye ba med pa'i phyir/yon gyi gnas khyad par du 'gyur ba med pa nyid dang / de bzhin gshegs pa la dmigs pa'i byams pa'i sems dang / de yid la byas shing nam mkha' la me tog 'thor bar byed pa dang / sangs rgyas yid la byed pa dag kyang yon phul ba des sdug bsngal gyi mthar byed pa nyid do zhes bstan pa yin no//dgu pa spyod pa rnam par 'khrugs pa'i rnam par rtog pa ni gang pha rol tu phyin pa drug gi chos nyid mi 'khrugs pa'i spyod pa gsungs pa dang / de lta na ni gzugs la sogs pa'i chos la nges par rtogs pas de bzhin gshegs pa'i chos nyid rnam par 'khrugs par 'gyur ba dang /gzhan dag rnam pa med pa de la 'jug par bya ba'i don du de bzhin gshegs pa chos rnams kyi ming dang mtshan ma ston pas chos nyid 'khrugs pa med pa'i phyir ro zhes bstan pa yin no/ / rigs kyi bu'am/ rigs kyi bu mo zhes bya ba ni skyes pa dang / bud med smos pas za ma dang / ma ning dang / 'bras bu ston pa la sogs pa'am/ gtogs pa'i don yin no/ /rigs kyi khyad par smos pa ni rigs bzhi rnam par dag pa shes par bya ba'i don no/ / bu dang bu mo zhes smos pa ni rab tu byung ba'i skye bo dang / rjes su mthun par smra ba shes par bya ba'i don yin no/ /rigs smos pas ni rgyud phun sum tshogs pa dam pa'i chos la dbang du bya ba shes par bya ba'i don no/ /yang 'am zhes smos pa ni skye gnas dang / lan grangs gzhan la myong bar 'gyur ba'i dpes ni skal ba can du gyur pa'i nyes pas rigs ngan par gyur pa dag kyang 'dir skal ba dang ldan pa'i dbang du byas par shes par bya ba'i don yin no zhes bstan pa yin no//da ni 'dzin pa'i rnam par rtog pa gnyis pa brjod par bya ba yin pas de'i phyir/ sems can btags pa de yi rgyu'i//yul can bsgom pa'i lam 'brel pa/ /de la gnod pa byed pa yis/ /mi mthun phyogs rnams rnam pa dgu/ /zhes bstan pa la/ gang rab 'byor tha snyad dang / ming dang mtshan ma la mngon par chags pa ma yin te zhes bya ba nas brtsams te/ rnam pa thams cad mkhyen pa nyid thob par bstan pa'i bar gyis so zhes bstan pa yin no//ji ltar rnam pa dgu yin zhe na/ de'i phyir/ thams cad mkhyen nyid gsum dag gi/ /bdag nyid ji bzhin sgrib rnam gsum/ /zhi ba de bzhin nyid sogs dang / /mtshungs par ldan dang mi ldan dang //mi mnyam sdug bsngal la sogs dang / /nyon mongs rnams kyi rang bzhin dang / /gnyis su med la kun rmongs dang / /rnam par rtog pa tha mar bzhed/ /ces bstan pa yin no/ de la rnam pa thams cad mkhyen pa nyid la kun du rmongs pa ni gang ci'i slad du de bzhin gshegs pa dgra bcom pa yang dag par rdzogs pa ni rnam pa thams cad mkhyen pa nyid ces bgyi zhes bya ba nas brtsams te/rnam pa gang dang / rtags gang dang / mtshan ma gang gis de bzhin gshegs pas thugs su chud pas/ de'i phyir rnam pa thams cad mkhyen pa nyid ces bya'o zhes bstan pa yin no//lam shes pa nyid la kun du rmongs pa ni gang / rab 'byor lam thams cad byang chub sems dpa' sems dpa' chen pos bskyed par bya zhes pa la sogs pas so zhes bstan pa yin no/ /thams cad shes pa nyid la kun du rmongs pa ni gang /rab 'byor chos thams cad ces bya ba ni nang dang phyi'i bdag nyid can gyi chos 'di dag yin la/ de dag thams cad nyan thos dang / rang sangs rgyas rnams kyis shes te zhes bya ba la sogs pas so zhes bstan pa yin no/ /lam la kun du rmongs pa ni gang lam la gnas pa nas brtsams te/'phags pa'i lam gang zag thams cad kyi mya ngan las 'das pa mchog gi pha rol tu 'gro ba yin pas shes rab kyi pha rol tu phyin pa nyid yin no zhes bstan pa yin no/ /dmigs pa ni dmigs pa'o/ /de dag dang ldan pa dang /mi ldan pa la kun du rmongs pa ni gang yang de bzhin nyid dang / yang dag pa'i mtha' dang / chos kyi dbyings 'di khongs su chud pa'i don dang / chos gang gis kyang ldan pa dang / mi ldan pa la sogs pa'i don gyis shes rab kyi pha rol tu phyin pa nyid yin pa'i phyir ro zhes bstan pa yin no//mi mnyam pa nyid ni thun mong ma yin pa nyid do/ /de la rmongs pa ni gang yang phyir rgol ba dang / mu stegs pa dang / bdud dang / theg pa gzhan thams cad kyis mi chod pa dang / mi mthun pa'i don gyis shes rab kyi pha rol tu phyin pa nyid yin pa'i phyir ro zhes bstan pa yin no//sdug bsngal la sogs pa'i bden pa la kun du rmongs pa ni gang yang sdug bsngal gyi don nam / sgra ji bzhin pa shes pa'i don la spyad par bya ba nyid kyi phyir ro zhes bstan pa yin no/ /nyon mongs pa'i rang bzhin la kun du rmongs pa ni gang yang 'dod chags dang /zhe sdang dang / gti mug gi don la spyod pa nyid kyi phyir te/ de ci'i phyir zhe na/ 'dod chags dang / zhe sdang dang / gti mug gi de bzhin nyid ni gang gi yang don mi byed/ don ma yin pa yang mi byed do zhes 'thad pa bstan pa yin no//de ltar na chos thams cad kyi don dang don ma yin pa la spyod pa bkag pa yin no/ /de ci'i phyir zhe na/ de bzhin gshegs pa mngon par rdzogs par sangs rgyas nas/ chos gang don du bya ba'am/ don med par bya ba ma dmigs ste / 'dus byas kyi chos rnams sam/ 'dus ma byas kyi chos gang yang mi byed pas/ shes rab kyi pha rol tu phyin pa don dang don mi byed pa bkag pas/ 'phags pa thams cad 'dus ma byas kyi don gyis na de'i don nam mkha' dang 'dra ba'i dpes phan pa dang / gnod pa med pas don dang don ma yin pa gnyis su med pa'i tshul gyis rnam pa thams cad mkhyen pa nyid 'thob pa nyid kyi phyir ro zhes bstan pa yin no//gnyis su med pa ni gnyis su med pa ste/ don dam pa'o/ /de la kun du rmongs pa ni gang gnyis su med pa'i chos kyis gnyis su med pa'i chos thob pa bkag pa dang / gnyis kyi chos shig gnyis kyi chos kyis thob pa bkag pa dang /gnyis dang gnyis su med pa'i chos mi dmigs pa na thob pa yin par bshad pa'i phyir ro zhes bstan pa yin no/ /gang gi phyir ji ltar yin pa'i rnam par rtog pa'i dbye ba rgya cher bshad pas dngos po thams cad la mngon par zhen pa ni mi mthun pa'i phyogs yin pa'i phyir te/rab 'byor rnam pa thams cad mkhyen pa nyid ni dmigs su med pa'o zhes bstan pa yin no/ /de ltar byas na dngos po med pa la dmigs pa'i ye shes 'thad pa yin no/ /'dir lam dang / mya ngan las 'das pa med pa nyid kyis 'phags pa'i gang zag thams cad med par 'gyur zhes zhus pa la/thams cad 'dus ma byas kyis rab tu phye ba'i phyir/ 'dus ma byas pa ni 'byung ba med pa nyid kyis 'jig rten gyi mtshan mar byas pa yin no zhes bya ba ni lan yin no/ /de ci'i phyir zhe na/ don dam pa'i tshig gis don du btags pa med pa nyid do zhes bya ba ni 'thad pa yin no//phyi ma'i mtha' shes pas mtha' yongs su chad pa ni zhus pa yin la/ rang gi mtshan nyid kyi chos rnams la de'i mtha' mi shes pas mi shes pa dang ldan pa la de bstan to zhes bya ba ni lan yin no/ /de bas na dngos po med pa la dmigs pa'i ye shes ni 'thad pa yin no//de nyid kyi phyir bcom ldan 'das byang chub sems dpa' sems dpa' chen po gang sems can rnams kyi phyir/ bla na med pa yang dag par rdzogs pa'i byang chub tu yang dag par 'jug pa la sems can du btags pa yang mi dmigs shing /sems can du 'dzin pa las yongs su 'brel pa ni dka' ba byed pa'o zhes bya ba la sogs pas bstan pa yin no/ /yams nad 'di rnams zad nas ni/ /yun ring lon nas dbugs phyin ltar/ /rnam pa kun du 'gro ba yi/ /bde bsgrub yon tan phun tshogs kun//rgya mtsho che la chu bo bzhin/ /'bras bu mchog gis dpa' ba yi/ /sems dpa' chen po de la ni/ /rnam pa kun du rten par byed/ /ces bya ba ni/ gang ljang bu'i sdong bu dang / 'dab ma dang / me tog dang / 'bras bu phun sum tshogs pa'i dpes byang chub sems dpa' bsod nams kyi zhing nyid yin pa'i phyir/'gro ba ma lus pa'i bde ba'i longs spyod mchog mang zhing / sna tshogs pa'i don gyis na skyed mos tshal bzang po dang 'dra bar 'bras bu mchog gis dpa' zhing mdzes pa de lta bu ni de bzhin gshegs pa nyid du gzung bar bya ba yin no//de ci'i phyir zhe na/ chos thams cad kyi de bzhin nyid las rnam pa thams cad mkhyen pa nyid rnam par dag pa 'thob pa'i 'thad pa dang / de ltar de bzhin nyid shes rab kyi pha rol tu phyin pa la slob pa na / dbang po yongs su rdzogs pa dang / las rang gis byas pa dang /smon pa'i ye shes dang / dus kyi ye shes rnam par dag pa dang / sems can rnams kyi don dang / sangs rgyas kyi zhing yongs su dag pa dang / rnam pa thams cad mkhyen pa nyid thob pa dang / chos kyi 'khor lo bskor ba dang / sems can yongs su mya ngan las 'da' ba'i phan yon thob pa'i phyir ro zhes bstan pa yin no//'di'i mdo ni/ rab 'byor 'di lta ste dper na/ skyes bu la la zhig ljang bu bskyed par 'dod la/ skyes bu des ljang bu de'i rtsa ba ma dmigs/ yal ga dang / sdong bu dang / lo ma dang / me tog dang / 'bras bu ma dmigs par ljang bu de'i sdong bu bskyed de/ dus dus su chus bran zhing / de'i sdong bu de rim gyis yal ga dang / lo ma dang / me tog dang / 'bras bu la spyod pa de bzhin du byang chub sems dpa' sems dpa' chen po rnams kyang sems can rnams kyi phyir/bla na med pa yang dag par rdzogs pa'i byang chub la yang dag par 'jug ste/ de dag rim gyis pha rol tu phyin pa drug la spyod cing / rnam pa thams cad mkhyen pa nyid thob par byed de/ de dag lo ma dang / me tog dang / 'bras bu ltar sems can thams cad 'tsho bar 'gyur ro//de la lo ma ni byang chub sems dpa' sems dpa' chen po gang la brten cing sems can rnams ngan song gsum las yongs su sgrol ba'o/ /me tog ni gang la brten cing rgyal rigs shing sA la chen po lta bu nas/ 'du shes med 'du shes med min skye mched kyi bar gyi lha rnams su skye'o//de la 'bras bu ni 'di yin te/ byang chub sems dpa' chen po gang la brten nas/sems can rnams rgyun du zhugs pa'i 'bras bu nas dgra bcom pa dang / rang byang chub dang / rnam pa thams cad mkhyen pa nyid kyi bar la rab tu gnas so//rab 'byor de ltar spyod pa'i byang chub sems dpa' chen po ni sems can thams cad kyi 'bras bu mchog du 'gyur ba zhes bya ba la sogs pa'o zhes bstan pa yin no/ /rtse mo'i mngon par rtogs pa'i bsgom pa'i lam gyi mi mthun pa'i phyogs kyi rnam par rtog pa'i rnam par 'grel pa'o// //sangs rgyas nyid thob pa'i rtse mo'i de ma thag bar chad med pa'i ting nge 'dzin yin pas de bstan pa'i phyir/ bar chad med pa'i ting nge 'dzin/ /stong dang stong gnyis gsum skye bo/ /slob ma'i phun sum tshogs pa dang / /byang chub sems dpa'i skyon med la//bkod pa'i dge rnams dper mdzad nas/ /bsod nams mang po nyid kyis ni/ /sangs rgyas nyid kyi bar med de/ /bar chad med pa'i ting nge 'dzin/ /zhes bstan pa ni/ gang de ni stong gsum gyi stong chen po'i 'jig rten gyi khams kyi sems can ji snyed yod pa de dag thams cad nyan thos kyi sa la gnas par gyur pa dang /rang sangs rgyas kyi sa la gnas par gyur pa bas/ de rnams ni byang chub sems dpa' las byung ba nyid kyis na/ sems can thams cad la dmigs te/ bla na med pa yang dag par rdzogs pa'i byang chub tu sems bskyed pa ni/bsod nams mang du 'phel ba nyid yin no/ /de bzhin du stong gsum gyi stong chen po'i 'jig rten gyi khams kyi sems can thams cad dkar po rnam par mthong ba'i sa la bkod pa dang / de bzhin du rigs kyi sa dang / de bzhin du brgyad pa'i sa dang / de bzhin du mthong ba'i sa dang /de bzhin du bsrabs pa'i sa dang / de bzhin du 'dod chags dang bral ba'i sa dang / byas pa rtogs pa'i sa dang / rang sangs rgyas kyi sa dang / byang chub sems dpa'i skyon med par zhugs pa la bzhag pa bas byang chub sems dpa'i byang chub la zhugs pa'i bsod nams mang du skye ba nyid kyis bar chad med pa'i ting nge 'dzin ni de'i rjes thogs nyid la 'tshang rgya ba nyid yin par shes par bya ba'i phyir ro zhes bya ba yin no//byang chub sems dpa' byang chub la zhugs pa ni 'bras bu bzhi'i gnas la zhugs par gyur pa yin gyi gnas brgyad pa la ni ma yin no//de ji ltar khong du chud par bya zhe na/ gang gi phyir rjes thogs nyid la de bzhin gshegs pa'i khyad par smos te/ 'di ltar byang chub sems dpa' byang chub tu zhugs pa rnam pas de bzhin gshegs pa'i bsod nams ches mang du rab tu sdud pa nyid do zhes bstan pa yin no//yang ting nge 'dzin 'di'i rjes thogs la de ma thag pa'i rgyu yin pa'i phyir 'tshang rgya ba nyid do/ /gang yin zhe na/ de ni rnam pa kun mkhyen nyid/ /ces bstan pa ni gang / rab 'byor 'di ltar rnam pa thams cad mkhyen pa nyid yid la bya'o/ / zhes bstan pa yin no/ /'di yi dmigs pa dngos med de/ /bdag po dran pa yin par bzhed/ /rnam pa zhi nyid ces bya ba ni gang de'i dmigs pa dang / bdag po dang / rnam pa la lan du dmigs pa ni dngos po med pa nyid yin pa dang / bdag po ni dran pa nyid yin no//rnam pa ni zhi ba nyid yin no zhes bstan pa yin no/ /'gog pa shes pa'ang zhi ba nyid yin no zhe na/ mtshan nyid ni mtshan nyid pa yin zhes bya ba smos te/ 'dis ni 'dir rang bzhin gyis zhi ba yin par bshad kyi dngos po 'gog pa'i zhi ba ni ma yin no zhes bshad do/ /da ni log par rtog pa brjod par bya ba yin pas/'di la ni/ rab tu smra rnams brgyud mar rgol/ /zhes bstan pa la/ 'di la zhes bya ba ni gnas 'di la'o/ /rab tu smra rnams zhes bya ba ni log par zhugs pa rnams so/ /gcig nas gcig tu brgyud mar sna tshogs par rgol ba'i sgo nas 'jug pa'i rtogs pa'am/de la sel ba tsam du smra bar rgol zhing / tshig tu smra ba'i lam mthar thug pa med pas shas cher smra ba rtsod par byed do/ /ji lta zhe na/ de'i phyir brjod pa yin te/ dmigs pa 'thad dang de yi ni/ /ngo bo nyid nges bzung ba dang / / rnam kun mkhyen nyid ye shes dang / /dam pa'i don dang kun rdzob dang / /sbyor dang dkon mchog gsum po dang / /thabs dang bcas pa'i rtogs pa dang / /phyin ci log ni lam bcas dang / /gnyen po mi mthun phyogs dag dang / /mtshan nyid dang ni bsgom pa la/ / smra ba rnams kyi log rtog pa/ /rnam pa kun mkhyen nyid rten can/ /rnam pa bcu drug dag tu bzhed/ /ces bstan pa la/ dbye ba bcu drug tu bzhed ces bya ba'i don no/ /de la rnam pa thams cad mkhyen pa nyid la rten pa'i dmigs pa 'thad pa la log par rtog pa ni gang rnam pa thams cad mkhyen pa nyid kyi yum shes par bya ba'i phyir de nyid nas brtsams te 'dus byas dang /'dus ma byas kyi khams kyang dngos po med pa nyid do/ /de ci'i phyir zhe na/ de'i ngo bo nyid med pas dngos po med pa'o zhes gsungs la/ gzhan dag de la dngos po med pa'i ngo bo nyid yin par 'dri bar bcom ldan 'das ci'i slad du rnam pa thams cad mkhyen pa nyid ngo bo nyid ma mchis pa lags zhes zhus pa gang yin pa la/bcom ldan 'das kyis 'das pa'i ngo bo nyid med par bstan pas/ chos thams cad ni dngos po med pa'i ngo bo nyid de zhes bstan pa yin no//mi dmigs pa'i ngo bo nyid la log par rtog pa ni gang yang de rnams de bzhin nyid la sogs pa'i ngo bo nyid du med pa nyid dang / de lta yin na byang chub sems dpa'i pha rol tu phyin pa la spyod pa nas/ rnam pa thams cad mkhyen pa nyid thob pa med par zhus pa dang /rab 'byor chos thams cad dngos po med pa'i ngo bo nyid du shes pa de nyid/ byang chub sems dpa' sems dpa' chen po'i thabs la mkhas pa ste zhes bya ba de ni lan yin no/ /yang shes rab kyi pha rol tu phyin pa la sogs pa nas stobs dang /mi 'jigs pa la sogs pa thob kyi bar du dus de srid du byang chub kyi lam la yongs su 'dris par byed do/ / des pha rol tu phyin pa yongs su rdzogs par byed cing / skad cig ma gcig dang yang dag par ldan pa'i shes rab kyis rnam pa thams cad mkhyen pa nyid thob par gyur nas/bag chags kyis mtshams sbyor ba'i nyon mongs pa thams cad mi skye bar spangs pas yongs su spong ba nyid kyi phyir ro zhes bstan pa yin no/ /rnam pa thams cad mkhyen pa nyid kyi ye shes la log par rtog pa ni gang de nas sangs rgyas kyi spyan gyis gzigs pa na/dngos po dang dngos po med pa ma gzigs pas/ pha rol tu phyin pa la sogs pa spyad pa nas/ rnam pa thams cad mkhyen pa nyid thob pa'i bar la spyod pa'i tshe/ pha rol tu phyin pa la sogs pa dngos po dang dngos po med par yid la mi byed do//de ci'i phyir zhe na/ 'di ltar chos thams cad ni dngos po med pa'i ngo bo nyid do/ /'phags pa'i gang zag thams cad kyis kyang dgongs shing yid la ma byas pa nyid kyis chos rnams chos rnams nyid dang mi 'bral ba'o/ /chos kyi chos la dngos po med pa'i bdag nyid dang //chos kyis chos la dngos po med par shes par bya ba la sogs pa mu bzhi'i tshul gyis/ 'jig rten gyi kun rdzob nye bar bzung nas/ dngos po dngos po med ces bya bar ston par rjes su gnang ba'i phyir ro zhes rjes su bstan pa yin no/ /bden pa gnyis la log par rtog pa ni gang kun rdzob dang /don dam pa dag gis de bzhin nyid mngon par mi shes pa rnams kyi phyir dngos po dang dngos po med par ston par mdzad pa'i phyir ro zhes bstan pa yin no/ /sbyor ba la sogs par rtogs pa ni gang byang chub kyi spyod pa zhes bya ba la gzugs nas 'dus byas dang /'dus ma byas kyi khams la spyod pa dang / rjes su spyod pa dag la gnyis su med cing gnyis su byar med pa ni byang chub kyi spyod pa'o zhes bstan pa yin no/ /sangs rgyas dkon mchog la log par rtog pa ni/ gang sangs rgyas zhes bya ba ni yang dag pa'i don brjod pa la 'jug pa'i rgyu yin par bstan pa dang /yang dag pa'i chos la mngon par rtogs pa dang / yang dag pa'i don rab tu rtogs pa dang / chos thams cad ji lta ba bzhin du mngon par rtogs pa'i go rims bzhin du thams cad mkhyen pa gsum gyi dbang du mdzad nas/sangs rgyas zhes brjod pa 'jug pa'i rgyu yin no zhes bstan pa yin no/ /chos dkon mchog la log par rtog pa ni gang byang chub ces bya ba'i tshig bla dgas lus pa la/ stong pa nyid la sogs pa byang chub kyi tshig bla dgas nyid yin pa dang /yang byang chub ni ming tsam nyid dang / yang mi byed pa'i don ni byang chub kyi don yin pa nyid dang / yang de bzhin nyid la sogs pa byang chub yin pa dang / yang ming dang mtshan ma tsam byang chub yin pa dang / yang sangs rgyas rnams kyi byang chub yin pa/ sangs rgyas rnams kyi mngon par rdzogs par sangs rgyas pas na byang chub nyid kyi phyir ro zhes bstan pa yin no/ /dge 'dun dkon mchog la log par rtog pa ni gang shes rab kyi pha rol tu phyin pa la spyod pa nang byang chub la dmigs pa nyid bkag pa dang / de lta yin na pha rol tu phyin pa la sogs pa yongs su 'dzin pa med na de nyid du gnyis kyi spyod pa spangs pa dang /de lta yin na dge ba'i rtsa ba rnam par 'phel bar bya ba'i don du gnyis su med pa la brten pa 'phel bar bstan pa dang / byang chub sems dpa' gnyis su med par spyod pa ni/ dge ba'i rtsa ba rnam par 'phel zhing / mi 'jigs pa yin pa'i lan gyis phyir mi ldog pa'i dge 'dun bstan pa'i don dang / sangs rgyas la bsnyen bkur byas pa dang / gzungs rab tu thob pa dang ldan pa dang / sangs rgyas dang / byang chub sems dpa' dang mi 'bral ba dang / rnam pa thams cad mkhyen pa nyid thob par brjod pa'i phyir ro zhes bstan pa yin no/ /thabs la mkhas pa la log par rtog pa ni gang de thob pa'i rgyu'i thabs la mkhas pa dang de bstan pa nas brtsams te/ dang po sems bskyed pa nas nye bar bzung ste/rnam pa thams cad mkhyen pa nyid dang ldan pa'i yid la byed pas/ sangs rgyas la sogs pa la sbyin pa yongs su gtong zhing / sbyin par bya ba dang / gtong ba po dang / len pa po mi dmigs pa'i thabs la mkhas pas sems can yongs su skyob pa nyid dang /de bzhin du tshul khrims la sogs pa'i pha rol tu phyin pa la thabs la mkhas pa brjod par rgya cher sbyar bar bya'o/ /de ltar thabs la mkhas pa ni gzugs la sogs pa'i chos thams cad rang bzhin med par dmigs pa nyid yin pa'i phyir/ rnam par smin pa mi mdzad pas blo mchog dang ldan pa nyid yin no//de ci'i phyir zhe na/ chos rnams kyi rang bzhin ni med pa nyid kyi phyir ro zhes bstan pa yin no/ /mngon par rtogs pa la log par rtog pa ni gang dngos po med pas dngos po med pa mngon par byang chub par bya bar mi nus pa nyid dang / dngos pos dngos po mngon par byang chub par mi nus pa nyid dang / dngos pos dngos po byang chub pa bkag pa dang / de bzhin du dngos po dang / dngos po med pa dang / dngos po med pas dngos po med pa mngon par byang chub par bkag pa yin no/ /de lta na ni mngon par rtogs pa med par thal bar 'gyur bas mu bzhi la go bzlog pa dngos po dang /dngos po med pa mnyam pa nyid du mthong ba ni/ mngon par rtogs pa nyid yin par dam bcas pa'i phyir ro zhes bstan pa yin no/ /phyin ci log gi log par rtog pa ni gang gzugs la sogs pa'i phung po rnams rtag pa dang /mi rtag pa dang / bde ba dang / sdug bsngal ba dang /bdag dang / bdag med pa dang / zhi ba dang / ma zhi ba nyid dang / mngon par zhen pa'i spros pa nyid dang / de bzhin du yongs su shes pa dang /yongs su ma shes pa nyid du mngon par zhen pa'i spros pa dang /de bzhin du skye mched dang / khams la sogs pa nas rnam par thar pa'i sgo gsum du bsgom pa bsgom par mngon par zhen pa dang / de bzhin du rnam par thar pa brgyad dang / mthar gyis gnas pa'i snyoms par 'jug pa dgu bsgom pa la mngon par zhen pa dang / rgyun du zhugs pa'i 'bras bu nas brtsams te/rang sangs rgyas kyi byang chub las 'da' ba'i bar la mngon par zhen pa dang / byang chub sems dpa' sa bcu yongs su rdzogs par bya ba la mngon par zhen pa nas brtsams te/ skyon med par zhugs pa dang / sangs rgyas kyi zhing yongs su dag pa dang /sems can yongs su smin pa dang / pha rol tu phyin pa drug gi spyod pa dang / stong pa nyid thams cad bsgom pa dang / stobs dang / mi 'jigs pa dang / sangs rgyas kyi chos ma 'dres pa rnams bskyed pa dang / rnam pa thams cad mkhyen pa nyid rjes su thob pa dang / bag chags kyis mtshams sbyor ba'i nyon mongs pa thams cad spang bar bya ba la mngon par zhen pa ni spros pa nyid yin pa nyid du shes pas/ byang chub sems dpa' ji skad du bshad pa'i spros pa dang mi ldan pa nyid kyi phyir te/ de ci'i phyir zhe na/ ngo bo nyid ni ngo bo nyid la spros par mi byed la/dngos po med pa yang dngos po med pa la spros par mi byed do zhes bya ba'i 'thad pas gzugs la sogs pa ni/ gzugs la sogs pa'i spros pa med pa nyid kyi shes rab kyi pha rol tu phyin pa ni/ spros pa med par rjes su gnang ba dang / chos thams cad spros pa med pa'i lta bar zhugs pa la/rab 'byor 'di ltar gzugs la yang ngo bo nyid med do zhes bya ba nas brtsams te/ ngo bo nyid med pa nyid kyis na spros pa med par lta ba'i rgyu nyid yin pa dang / skyon med par brjod pas dngos po med pa nyid yin no/ byang chub sems dpa' skyon med pa la 'jug pa'i lam med pas/ma skyes pa la sogs pa'i 'bras bu'i lam dgra bcom pa'i dpes bstan pas lam shes pa nyid la byang chub sems dpa'i skyon med par 'jug pa'i 'bras bu thob par bstan pa yin la/ de nas rdo rje lta bu'i ting nge 'dzin gyi rjes thogs nyid kyi skad cig ma gcig la rnam pa thams cad mkhyen pa nyid thob par 'gyur ba yin no//'di'i mdo ni rab 'byor 'di lta ste dper na dgra bcom pa ni lam thams cad la bslabs shing / yang dag pa'i skyon med par 'jug ste/ nam 'bras bu'i lam ma grub kyi bar du thob par mi byed do//rab 'byor de bzhin du byang chub sems dpa' sems dpa' chen po yang lam bsgrubs shing byang chub sems dpa'i skyon med par 'jug ste/ nam rdo rje lta bu'i ting nge 'dzin ma thob kyi bar du rnam pa thams cad mkhyen pa nyid thob par mi byed do zhes bya ba la sogs pa gsungs pa yin no//lam la log par rtog pa ni gal te lam shes pa yongs su rdzogs par byas nas/ byang chub sems dpa'i skyon ma mchis par 'jug na brgyad pa la sogs pa'i lam ni gzhan yin pa'i phyir/ lam de yongs su rdzogs par byed pa'i byang chub sems dpa' ni de 'bras bu mngon sum du byed par 'gyur bas brgyad pa dang /rgyun du zhugs pa la sogs pa nyid du thal bar 'gyur ba'i phyir/ byang chub sems dpa' ni sems dang po bskyed pa nas nye bar bzung ste/ pha rol tu phyin pa drug la spyod pa'i tshe/shes pa dang mthong ba dag gis dkar po rnam par mthong ba'i sa la sogs pa'i sa brgyad po las yongs su 'das nas/ lam gyi rnam pa shes pa nyid kyis byang chub sems dpa'i skyon med par zhugs nas/ rnam pa thams cad mkhyen pa nyid kyi ye shes thob par bshad pa'i phyir ro//de ci'i phyir zhe na/ brgyad pa la sogs pa nas rang sangs rgyas kyi bar gyi shes pa dang / spong ba dag ni byang chub sems dpa' chen po'i bzod pa'i mtshan nyid yin pa'i phyir dang po kho nar nyan thos kyi lam gyis de'i rtogs pa thob pa mngon du mi byed pa'i don gyis lam gyi rnam pa shes pa nyid yongs su rdzogs par byed pa'i 'thad pas/rim pa 'dis mngon par rdzogs par sangs rgyas shing / 'bras bu ltar sems can thams cad kyi nye bar 'tshe bar 'gyur ro zhes bya ba sems can thams cad la skal ba ji lta ba bzhin du 'bras bu nye bar 'tsho ba'i rgyu nyid du 'gyur ro zhes bya ba'i don to//nyan thos la sogs pa'i lam dang / tha dad pa'i bsam pas lam gyi rnam pa shes pa'i lam la zhugs pas/ lam thams cad kyi rnam pa dang / rtags dang / mtshan ma rnams kyis mngon par rdzogs par 'tshang rgya zhing /de gzhan dag la brjod pa dang / bstan pa la sogs pa ni lam gyi rnam pa shes pa nyid kyi lam nyid yin pas/ stong gsum gyi stong chen po'i 'jig rten gyi khams kyi sems can thams cad go bar 'gyur ba dang / rjes su mthun pa'i skad dang / brda bya ba'i sgra ni sgra brnyan dang 'dra bar shes par bya ba'i dgos pa bskyed par bya ba'i phyir/ gzhan gyi don gyi thabs phun sum tshogs par shes par bya ba'i don dang / lam gyi rnam pa shes pa nyid yongs su rdzogs par byas nas/ sems can thams cad kyi bsam pa shes pas gzhan gyi don gyi sbyor ba don yod par bya ba nyid shes par bya ba'i don dang /dmyal ba la sogs pa'i ngan 'gro rnams kyi lam dang / de'i 'bras bu shes nas de'i rgyu dang 'bras bu las bzlog pa nas brtsams te/ 'du shes med 'du shes med min skye mched kyi lha rnams kyi lam dang /'bras bu la sogs pa shes par bya ba dang / byang chub kyi phyogs nas snying rje chen po'i bar du shes par bya ba nyid kyi phyir/ sems can lam ji lta ba bzhin du 'bras bu la bkod pa'i phyir te/ de ci'i phyir zhe na/ de ni 'di ltar des skyes pa'i dbang po shes par bya ba'i phyir zhes bya ba'i 'thad pas so//shin tu shes par byas pa zhes bya ba ni rigs kyi bu rnam par dbye bas rab tu rnam par shes pa nyid kyis zhes bya ba'i don to/ /skyes pa smos pa ni bud med kyang dgag pa yod pa ma yin te/ sgra las skyes pa smos par bud med kyang sdud pa yin pa'i phyir ro//dbang po de dag kyang dad pa la sogs pa yin no/ /byang chub kyi phyogs kyi chos dang byang chub pa'i chos de dag ni ldan pa yang ma lags/ mi ldan pa yang ma lags/ gzugs ma mchis pa/ bstan du ma mchis pa/ mtshan nyid gcig pa lags na ji ltar byang chub 'grub par 'gyur ba lags zhes zhus pa la sems can rang gi mtshan nyid kyis stong pa'i chos mi shes pa de dag gi don du 'di skad du/'di dag bdag gis bshad pa shes par bya ba'i phyir ro zhes bstan pa yin no/ /mi mthun pa'i phyogs dang /gnyen po'i phyogs la log par rtog pa ni gang rab 'byor de ni 'dir gzugs gang yin pa dang zhes bya ba nas brtsams te/ rnam pa thams cad mkhyen pa nyid ces bya ba'i bar gyi chos gang yin pa de dag thams cad ni 'phags pa'i chos 'dul ba 'di la ni ldan pa yang ma yin/mi ldan pa yang ma yin pa nyid kyis sems can rnams gzung bar bya ba'i don du 'jig rten gyi tha snyad kyis brjod do/ /de rnams kyis btags pas nyan thos dang / rnam pa thams cad mkhyen pa nyid shes pa dang / mthong ba dag gis rtogs par mi bya ba dang /rtogs par bya ba nyid kyis so/ /'dod chags dang ldan pa yang ma yin/ bral ba yang ma yin zhes bya ba nas brtsams te/ nyon mongs pa 'dul ba la ni 'phags pa'i chos 'dul ba zhes bya ba nyid dang / bsam gtan bzhi dang ldan pa yang ma yin/bral ba yang ma yin zhes bya ba nas brtsams te/ rtogs pa'i chos thams cad dang ldan pa yang ma yin mi ldan pa yang ma yin no/ /de ci'i phyir zhe na/ de ni 'di ltar chos de dag thams cad ni gzugs med pa/ bstan du med pa/ thogs pa pa med pa/'di ltar mtshan nyid med par mtshan nyid gcig pa ste/ de dag ni gzugs med pa dang / bstan du med pa la sogs pa dang / gzugs med pa dang / bstan du med pa la sogs pa dag dang lhan cig ldan pa dang bral ba yang ma yin no zhes bya ba'i 'thad pas so zhes bstan pa yin no//mtshan nyid la log par rtog pa ni gang 'dir gzugs med pa/ bstan du med pa/ thogs pa med pa/ mtshan nyid med par mtshan nyid gcig par pha rol tu phyin pa la bslabs nas/ chos thams cad kyi mtshan nyid dmigs su med pas chos thams cad kyi mtshan nyid la bslab par bya ba yin na ni nyan thos la sogs pa'i sa las 'da' bar bya ba med par 'gyur ro//chos thams cad mtshan nyid med pa/ gzugs med pa/ bstan du med pa/ thogs pa med pa'i mtshan nyid kyis mtshan nyid med pa la yang bslab par mi bya'o//de ci'i phyir zhe na/ gal te sngon mtshan nyid med par gyur pa de phyis mtshan nyid yod par 'gyur ba ni ma yin gyi zhes bya ba'i 'thad pas mtshan nyid dang / mtshan nyid med par bslab pa bkag pa yin no/ /de ci'i phyir zhe na/ de bzhin gshegs pa rnams byung yang rung / de bzhin gshegs pa rnams ma byung yang rung ste/ mtshan nyid med pa'i dbyibs 'di ni de bzhin du gnas pa'i phyir ro zhes bya ba'i 'thad pas so zhes bstan pa yin no/ /bsgom pa'i lam la log par rtog pa ni gang chos thams cad mtshan nyid med par mtshan nyid gcig pa yin na ni de bsgoms pas shes rab kyi pha rol tu phyin pa bsgom par mi 'thad pas nyan thos la sogs pa'i sa las 'das nas/byang chub sems dpa'i skyon med par 'jug pa la sogs pa med par 'gyur te/ mtshan nyid gcig pa dang / mtshan nyid tha dad pa gnyis ka bkag pas de ltar bsgom pa ni mtshan nyid med pa'o zhes bstan pa yin no//ji lta zhe na zhes bya ba ni zhus pa'o/ /gzugs rnam par bsgom pa bsgom pa ni shes rab kyi pha rol tu phyin pa nyid yin pa dang / de bzhin du tshor ba la sogs pa dang / gzugs la sogs pa dang / mig gi rnam par shes pa la sogs pa dang /de'i 'dus te reg pa la sogs pa dang / de'i rkyen gyis tshor ba la sogs pa dang / sa la sogs pa'i khams drug dang / rten cing 'brel par 'byung ba dang / de'i yan lag mya ngan la sogs pa dang / sgrub pa dang / spang ba'i mtshan nyid blang ba dang /dor ba dang / dang po la sogs pa'i bsam gtan rnams dang / byams pa dang / snying rje dang / dga' ba dang / btang snyoms dang / gzugs med pa'i snyoms par 'jug pa rnams dang / rjes su dran pa drug nas bzung ste/ thabs rjes su dran pa rnams dang / mi rtag pa dang / sdug bsngal ba dang / bdag med pa'i 'du shes dang / bdag dang / sems can la sogs pa'i 'du shes dang / rtag pa dang / mi rtag pa dang / bde ba dang / sdug bsngal ba dang / zhi ba dang / ma zhi ba'i 'du shes dang / dran pa nye bar gzhag pa la sogs pa dang / byang chub kyi phyogs rnams dang / stong pa nyid dang / mtshan ma med pa dang / smon pa med pa dang / rnam pa thar pa brgyad dang / mthar gyis gnas pa'i snyoms par 'jug pa dgu dang / rtog pa dang bcas/ dpyod pa dang bcas pa dang /rtog pa med cing dpyod pa tsam dang / rtog pa med cing dpyod pa yang med pa'i ting nge 'dzin dang / 'phags pa'i bden pa bzhi po sdug bsngal ba dang / kun 'byung ba dang / 'gog pa dang / lam dang / zad pa dang / mi skye ba shes pa dang / chos dang / rjes su 'gro ba dang /kun rdzob dang / 'dris pa dang / sgra ji bzhin shes pa dang / pha rol tu phyin pa rnams dang / stong pa nyid thams cad dang / mngon par shes pa dang / ting nge 'dzin dang / gzungs kyi sgo rnams dang / stobs dang / mi 'jigs pa dang / so so yang dag par rig pa dang /sangs rgyas kyi chos ma 'dres pa rnams dang / gzungs dang / ting nge 'dzin gyi sgo thams cad dang / byams pa chen po dang / snying rje chen po dang / rgyun du zhugs pa la sogs pa'i 'bras bu dang / rang byang chub dang / rnam pa thams cad mkhyen pa nyid dang / bag chags kyis mtshams sbyor ba'i nyon mongs pa thams cad spangs pa bsgom pa rnam par bsgom pa ni shes rab kyi pha rol tu phyin pa bsgom pa nyid yin no//bsgom pa smos pa ni rnam pa thams cad mkhyen pa nyid gsum gyi mdor bsdus pa dang / rgyas pa'i mngon par rtogs pa'i dbang du mdzad pa'i phyir/ji skad du bstan pa'i bsgom pa'i lam shes par bya ba'i phyir ro/ /rnam par bsgom pa smos pa ni bsgom pa'i lam gyi bdag nyid ji lta ba bzhin shes par bya ba'i ched du yin no/ /gzugs la sogs pa spyi'i mtshan nyid dang / rang gi mtshan nyid kyi dbye ba mang po smos pa ni sngar bsgom pa'i lam gyi yul du shes par bya ba'i ched yin no//ji lta zhe na zhes dris pa la ji skad du bshad pa'i gzugs la sogs pa dang / rnam pa thams cad mkhyen pa nyid de'i mi mthun pa'i phyogs kyi bag chags la sogs pa'i bsgom pa med pa yin pas dngos po med pa rgya cher bstan pa yin no//de ci'i phyir zhe na/ rab 'byor dngos po'i 'du shes can la shes rab kyi pha rol tu phyin pa bsgom pa med do/ /de ci'i phyir zhe na/ ji ltar dngos po la ni bdag go zhes bya bar mtha' gnyis la chags pa'i phyir ro zhes bya ba'i 'thad pas so//gnyen po'i phyogs thams cad bsgom pa med pa la dngos po yod pa dang / dngos po med pa'i mtshan nyid zhus pa la/ gnyis po de dag la ni gnyis kyi mtshan nyid yin par bstan pa dang / gnyis dang gnyis ma yin pa zhus pa dang / gzugs kyi 'du shes nas 'dus byas dang /'dus ma byas kyi khams kyi 'du shes kyi bar du go rims bzhin du gnyis dang gnyis med pa bstan nas/ ji tsam du gnyis pa de tsam du dngos po'o/ /ji tsam du dngos po yod pa de tsam du 'dus byas so/ /ji tsam du 'dus byas pa de tsam du sems can rnams kyi dge ba'i rtsa ba can gyi sdug bsngal las mi 'grol lo//gnyis kyi 'du shes can ni sbyin pa la sogs pa rnam par byang ba'i chos thams cad med do/ /gal te de lta yin na dngos po med pa'i 'du shes can la rnam par byang ba'i chos thams cad med par 'gyur bas //rab 'byor de de bzhin no/ /ji skad smras pa de bzhin te zhes zhal gyis bzhes nas shes rab kyi pha rol tu phyin pa byang chub sems dpa' ni dngos po thams cad yod pa dang med pa'i 'du shes bkag pas mthun pa'i bzod pa'i lam dang / 'bras bu bstan pas lam dang / dngos por rtog pa med pa nyid kyi rnam grangs kyi chos thams cad dngos po med pa'i ngo bo nyid yin pas/ mngon par rtogs pa'i ye shes dmigs pa las tha dad pa'i chos med par shes par byed pa'i don yin no/ /gal te de lta yin na de bzhin gshegs pa chos thams cad la mngon par rdzogs par sangs rgyas nas/de la dbang bsgyur ba'i yul brnyes pa la sogs pa med par thal bar 'gyur ro zhe na/ sngon byang chub sems dpa'i spyad pa spyod pa na pha rol tu phyin pa drug la spyod pa'i tshe/ 'dod pa rnams las dben sdig pa mi dge ba'i chos rnams las dben pa/rtog pa dang bcas pa/ dpyod pa dang bcas pa/ dben pa las skyes pa'i dga' ba dang / bde ba dang ldan pa'i bsam gtan dang po nye bar bsgrubs te gnas so zhes bya ba nas brtsams te/ sems can rnams phung po gsum du lung bstan par gyur to zhes bya ba nas brtsams nas/nga nyid dbang du gyur pas dngos po med pa'i ngo bo nyid thugs su chud pa'i chos bstan pa yin no/ /ji ltar zhes bya ba ni de lta bu'i rnam pa thugs su chud par zhus pa'o/ /rab 'byor gal te 'dod pa rnams la sogs pa dngos po zhig yod de/ngo bo nyid yod pa'am zhes bya ba nas brtsams te/ mngon par 'dod pa'i thugs su chud pa bstan pa yin no/ /de la dngos po ni gang gi dngos po'i ngo bo nyid ni bya ba'o/ /med pa ni dngos po'i rgyun chad pa'o/ /de ltar 'di dag ni rnam pa thams cad mkhyen pa nyid kyi rten du byas nas rab tu smra ba rnams kyi ma nges pa dang bcas pa'i skabs rgyas par 'phros pa'i log par bsgrub pa'i gnas rnam pa bcu drug tu gyur pa yin no//de ltar byas nas/ de yi rtags dang rnam 'phel dang / /brtan dang sems kun gnas pa dang / / mthong zhes bya dang bsgom pa zhes/ /bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dang ni/ /bar chad med pa'i ting nge 'dzin/ /log par bsgrub dang bcas pa ni/ /rtse mo'i mngon par rtogs zhes bstan pa de bshad pa yin par shes par bya'o//mngon par rtogs pa'i rgyan shes rab kyi pha rol tu phyin pa'i man ngag gi bstan bcos las rtse mo'i mngon par rtogs pa'o// //da ni mthar gyis gnas pa'i mngon par rtogs pa brjod par bya ste/ gal te de ltar rtogs pa'i chos ni dngos po med pa'i ngo bo nyid yin na/bcom ldan 'das ji ltar shes rab kyi pha rol tu phyin pa la spyod na mthar gyis spyod pa dang / mthar gyis slob pa dang / mthar gyis nan tan du bgyi bar 'tshal zhing zhes zhus pa gsungs pa ni/ mthar gyis pa'i mngon par rtogs pa nye bar dgongs pa'i don yin no//de la sems bskyed pa shes par bya ba'i don du spyod pa smos so/ /nges par 'byed pa'i cha dang mthun pa/ shes par bya ba'i don du ni bslab pa smos so/ /mthong ba'i lam dang bsgom pa'i lam shes pa'i don ni nan tan du bya ba smos so/ / mngon par rtogs pa'i go rims shes par bya ba'i phyir/ gsum char smos pa yin no/ /rab 'byor 'di ltar byang chub sems dpa' sems dpa' chen pos thog mar sangs rgyas bcom ldan 'das rnams dang zhes bya ba nas brtsams te/ gal te bdag bla na med pa yang dag par rdzogs pa'i byang chub tu mngon par rdzogs par sangs rgyas kyang rung ma rgyas kyang rung ste/chos thams cad dngos po med pa nyid kyis zhes nges par bzung ba la/ sems can dngos po'i 'du shes can la spyod pa thams cad de las bzlog par bya ba'i phyir/ bla na med pa yang dag par rdzogs pa'i byang chub la 'jug cing mthar gyis spyod pa la sogs pa brtson par bstan pas/ mngon par rtogs pa'i go rims kyis gzhan gyi don bya ba'i thabs yin par brdar byas pa'i dngos po'i dngos po shes par bya ba'i phyir ro zhes bstan pa yin no/ / mthar gyis pa'i mngon par rtogs pa de yang rnam pa bcu gsum du shes par bya'o/ /ji lta zhe na/ sbyin dang shes rab bar dag dang / /sangs rgyas la sogs dran dang chos/ /dngos med ngo bo nyid kyis te/ /mthar gyis pa yi bya bar bzhed/ /ces bstan pa yin no/ /de la sbyin pa'i pha rol tu phyin pa'i mngon par rtogs pa ni/gang de sbyin pa'i pha rol tu phyin pa la mngon par spyod pa'i tshe/ bdag kyang sbyin pa yongs su gtong ba'i tshe zhes bya ba nas brtsams te/ sbyin pa mthar gyis spyod pa'i bya ba la 'jug pa shes pas so zhes bstan pa yin no//tshul khrims kyi pha rol tu phyin pa ni gang bdag kyang tshul khrims kyi pha rol tu phyin pa la spyod do zhes bya ba nas brtsams te/ tshul khrims kyis mthar gyis spyod pa la 'jug pa la sogs pa la shes pa'i phyir ro zhes bstan pa yin no/ /bzod pa'i pha rol tu phyin pa ni gang bdag kyang bzod pa'i pha rol tu phyin pa la spyod do zhes bya ba nas brtsams te/bzod pas mthar gyis spyod pa'i shes pa la 'jug pa dang / de bzhin du brtson 'grus dang / bsam gtan dang / shes rab ste/ pha rol tu phyin pa'i spyod pa re re zhing mthar gyis pa'i rnam par 'phel ba re res mthar gyis pa'i mngon par rtogs pa'o zhes bstan pa yin no//sangs rgyas rjes su dran pa'i mngon par rtogs pa ni gang yang de sems dang po bskyed pa nyid kyi tshe/ rnam pa thams cad mkhyen pa nyid dang ldan pa'i yid la bya bas/ chos thams cad dngos po med pa'i ngo bo nyid du lhag par mos shing / de bzhin gshegs pa la gzugs kyi sku la sogs par byed pa la mi byed pas/ sangs rgyas rjes su dran pa med pa ni sangs rgyas rjes su dran pa'o/ /de ci'i phyir zhe na/ gzugs la ngo bo nyid med pas dngos po med pa nyid yin no//de ci'i phyir zhe na/ dran pa med cing yid la byed pa med pa ni sangs rgyas rjes su dran pa nyid yin pa dang / de bzhin du re re zhing rgyu'i drug pa'i sbyor ba gnyis yin no/ /de ni mtshan dang dpe byad la sogs pa'i yid la mi byed pa'i sangs rgyas rjes su dran pa dang /de bzhin du tshul khrims kyi phung po la sogs pa yid la mi byed pas de rjes su dran pa dang / de bzhin du stobs bcu la sogs pa yid la mi byed pas de rjes su dran pa dang / rten cing 'brel par 'byung ba yid la mi byed pas/ de rjes su dran pa zhes bstan pa'i sangs rgyas rjes su dran pa rnam pa lngas de bshad pa byas pa yin no//de la dang pos ni sems bskyed pa'o/ /lhag ma bzhis ni nges par 'byed pa'i cha dang mthun pa bzhis yin te/ de ltar bslabs shing dran pa nye bar gzhag pa la sogs pa'i byang chub kyi phyogs yongs su rdzogs te/mthong ba'i lam nas rnam pa thams cad mkhyen pa nyid kyi ye shes yongs su rdzogs pa ni bsgom pa'i lam zhes bya ste/ de ltar dngos po med pa'i ngo bo nyid ni yod du zin kyang thar pa'i spyod pa la sogs pa rab tu shes pa ni sangs rgyas rjes su dran pa bsgom par rtogs par bya'o//de bzhin du dge ba dang / mi dge ba dang / lung ma bstan la sogs pa'i chos yid la mi byed pa ni chos rjes su dran pa'o/ /skyes bu zung bzhi dngos po med pa'i ngo bo nyid du rab tu bsgoms pas dngos po med pa nyid du yid la byed pas rjes su dran pa yid la bya ba med pa ni dge 'dun rjes su dran pa'o//dang po sems bskyed pa nas bzung ste/ ma ral ba dang / ma zhig pa dang / ma 'dres pa dang / skyon med pa dang / ma nyams pa/ mthu dang ldan pa/ mkhas pas bsngags pa/ shin tu rtogs pa ting nge 'dzin yongs su bsgrub pa'i tshul khrims la gnas pa yin te/de tshul khrims de dngos po med pa'i ngo bo nyid du yid la byed pa'i rjes su dran pa yid la mi byed pa ni tshul khrims rjes su dran pa'o/ /de la theg pa gzhan la mi rten pa nyid kyis na ma ral pa'o/ /yang srid par skye ba rnam par spangs pas rnam par ma zhig pa'o//skye bo ngan pa dang / nyon mongs pa dang / ma 'dres pa nyid kyis na ma 'dres pa'o/ /dkar po'i chos kyi cha gcig tu rnam par 'phel ba na skyon med pa'o/ /skye bar smon lam mi 'debs pa nyid kyis na ma nyams pa'o/ /ji ltar 'gro bar 'dod pa nyid kyis na mthu dang ldan pa'o//mkhas pa rnams kyis ma smad pas na mkhas pas bsngags pa'o/ /dbang po rnams bsrungs pas na shin tu rtogs pa'o/ /bsam gtan gyi yan lag gi tshogs rgyas pa nyid kyis na ting nge 'dzin yongs su bsgrub pa'o//chos dang zang zing gi sbyin pa bdag la dngos po med pa'i ngo bo nyid du yid la byed pas rjes su dran pa yid la byed pa med pa ni gtong ba rjes su dran pa'o/ /'dod pa na spyod pa'i lha'i ris drug tu skyes pa'i rgyun du zhugs pa dang / gzugs dang gzugs med pa na spyod pa'i phyir mi 'ong ba dag dngos po med pa'i ngo bo nyid du yid la byed pas rjes su dran pa yid la byed pa med pa ni lha rjes su dran pa ste/mthar gyis pa'i spyod pa la sogs pa shes pas so zhes bstan pa yin no/ /gal te de lta yin na/ mdo sde gzhan las lha'i ris gnyis rjes su dran par byas te/dga' ldan dang / gtsang ma'o zhes gsungs pa de ji ltar drang zhe na/ de ni ma 'dres pa'i gang zag la dgongs nas gsungs pa yin pas nyes pa med do/ /chos rnams la dngos po med pa'i ngo bo nyid du shes pas mthar gyis pa'i mngon par rtogs pa ni/de ltar dngos po med pa'i ngo bo nyid kyi tshul gyis pha rol tu phyin pa drug dang / stong pa nyid thams cad dang / byang chub kyi phyogs rnams dang / 'phags pa'i bden pa bzhi dang / bsam gtan dang /tshad med pa dang / gzugs med pa'i snyoms par 'jug pa dang /rnam par thar pa dang / mthar gyis gnas pa'i snyoms par 'jug pa dang / rnam par thar pa'i sgo dang / mngon par shes pa dang / ting nge 'dzin dang / gzungs kyi sgo dang / stobs dang / mi 'jigs pa la sogs pa dang / snying rje chen po la slob pa na dngos po med pa'i ngo bo nyid kyis mthar gyis spyod pa la sogs pa shes pas so zhes bstan pa yin no//chos thams cad dngos po ma mchis pa'i ngo bo nyid lags na ni gang thams cad med pa'i phyir gcig tu chad par smra bar thal bar 'gyur ba dang / chos thams cad dngos po med pa'i ngo bo nyid la yod pa'am/med pa mi dmigs par de'i lan gsungs pa dang / rang nyid la nem nur med kyang ma 'ongs pa'i 'gro ba la ltos nas gnas brtan rab 'byor gyis zhus pa dang / dngos po med pa'i ngo bo nyid lags na ni sems can rnams kyi don gyi slad du/ bla na med pa yang dag par rdzogs pa'i byang chub tu 'jug pa med pa dang /de nyid kyis yang dag par 'grub pa yin te/ de ci'i phyir zhe na/ dmigs pa'i 'du shes can la thob pa dang mngon par rtogs pa bkag pa dang mi dmigs pa nyid kyis chos kyi dbyings 'khrugs pa med pa dang / de thob pa dang mngon par rtogs pa nyid yin pa dang / de lta yin na sa bcu la sogs pa gzhag pa med pa dang / de nyid kyi phyir mngon par 'dod pa yang dag par 'grub pa dang / ma dmigs pa la sbyin pa la sogs pa tha dad du bya ba bkag pa dang / de mi dmigs par sgom par byed pa'i khyad par shes pas bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ba nyid kyi phyir ro zhes bstan pa yin no//de de ltar byas na/ mthar gyis pa/ rnam gsum rnam bcu zhes bstan pa de 'thad pa dang bcas par shes par bya'o//mngon par rtogs pa'i rgyan shes rab kyi pha rol tu phyin pa'i man ngag gi bstan bcos las/ mthar gyis pa'i mngon par rtogs pa'i rnam par 'grel pa'o// //da ni sems kyi skad cig ma gcig pa'i mngon par rtogs pa brjod par bya ste/ gang bcom ldan 'das byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ sems bskyed pa gcig gis pha rol tu phyin pa drug yongs su 'dzin pa lags zhes zhus pas/ skad cig ma gcig pa'i mngon par rdzogs par byang chub par rtogs par nye bar bkod pa'i don gyis so zhes bstan pa yin no//skad cig ma gcig gi mngon par byang chub pa de yang rnam pa bzhir shes par bya ste/ sbyin pa la sogs pa zag pa med pa gang yang rung ba'i zag pa med pa'i chos thams cad skad cig ma gcig gis bsdus pa'i mtshan nyid gang yin pa'i dbang du mdzad nas/sbyin pa la sogs pa re res kyang / /zag med chos kun bsdus pa'i phyir/ /thub pa'i skad cig gcig pa yi/ /rtogs pa 'di ni shes par bya/ /zhes bstan pas ni gang shes rab kyi pha rol tu phyin pas yongs su zin pa'i sbyin pa la sogs pa'i pha rol tu phyin pa nas/dpe byad bzang po brgyad cu'i bar yongs su 'dzin pa dang / gnyis su med pa'i 'du shes ni skad cig ma gcig gis mngon par rdzogs pa'i phyir ro/ /dkar po'i chos thams cad khongs su 'dus pa nyid kyis zag pa med pa'i chos la gnas pa ni ci zhig gis sbyin par bya zhes mtshan ma de mi mthong bar sbyin pa gtong ba ni/chos thams cad dmigs su med pa'i rnam pas skad cig ma gcig pa'i mngon par rtogs pa nyid yin pa dang / de lta yin na mtshan ma med pa dang / mngon par 'dus ma byas pa la sogs pas ni/ pha rol tu phyin pa la sogs pa yongs su rdzogs pa med par thal bar 'gyur ba dang / khyed kyi sbyin pa de ltar phan pa med pa/ mi brten pa des ci zhig bya zhes zer na zhes bya ba slu ba yin du zin kyang mi dmigs par yongs su bsngo ba dang /sbyin pa la sogs pa las yongs su ldog par mi byed par ni gzhan 'phrul dbang byed kyi dpes pha rol tu phyin pa thams cad la sogs pa rnam par byang ba'i phyogs yongs su rdzogs par gsungs pas de'i lan btab pa dang /de bzhin du tshul khrims la sogs pa'i pha rol tu phyin pa rnams la rgya cher mdo ji lta ba bzhin du brjod par bya'o/ /'di'i mdo ni/ rab 'byor 'di lta ste dper na/ gzhan 'phrul dbang byed kyi lha'i yo byad phun sum tshogs pa thams cad ni bsams pa tsam gyis 'byung ngo //rab 'byor de bzhin du byang chub sems dpa' sems dpa' chen po'i yo byad phun sum tshogs pa thams cad kyang bsams pa tsam gyis pha rol tu phyin pa rnams yongs su rdzogs par 'byung ngo zhes bya ba la sogs pas so zhes bstan pa yin no/ /yang ji ltar na zag pa med pa'i chos gcig dmigs nas bsgom pa ni zag pa med pa'i chos thams cad sdud pa yin zhe na/don 'di la 'jig rten pa'i dpe byad kyang re zhig bstan dgos so/ /ji ltar skyes bus zo chun brgyud/ /rdog thabs gcig gis bskyod pa na/ /thams cad cig car 'gul ba ltar//skad cig gcig shes de bzhin no/ /zhes bstan pa ni sngon gyi 'phen pa'i shugs kyis zhes bya ba ni de'i dgongs pa yin no/ /rnam par smin pa'i chos nyid gnas skabs kyi zag pa med pa'i chos thams cad skad cig ma gcig gis mngon par rdzogs par byang chub pa'i dbang du mdzad nas/gang tshe chos dkar thams cad kyi/ /rang bzhin shes rab pha rol phyin/ /rnam smin chos nyid gnas skabs skyes/ /de tshe skad cig gcig ye shes/ /zhes bstan pa ni gang rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe yang dag pa'am/yongs su grub pa'i chos gang yang yang dag par rjes su mthong ba med de zhes bya ba nas brtsams te/ rnam par smin pa las byung ba'i phyogs thams cad chos nyid kyi gnas skabs su mtshan ma med pa'i sbyor bas shes rab kyi pha rol tu phyin pa yongs su rdzogs pa'i phyir/skad cig ma gcig gis mngon par rtogs pa nyid kyis na/ rnam par smin pa dus gcig tu skyes pa dang mi 'gal bar shes par byed pa'i phyir zhes rgya cher gsungs so zhes bstan pa yin no/ / mtshan ma med pa'i chos thams cad skad cig ma gcig la mngon par rtogs pa gang yin pa'i dbang du mdzad nas/ sbyin la sogs pa'i spyod pa yis/ /chos kun rmi lam 'drar gnas nas/ /chos rnams mtshan nyid med pa nyid/ /skad cig ma ni gcig gis rtogs/ / zhes bstan pa ni ji skad du bshad pa'i phan tshun tha dad pa'i chos kyi mtshan nyid chos gcig gi khongs su 'dus pa mi 'thad pas/ skad cig ma gcig mngon par rtogs pa med par thal bar 'gyur la/ rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/rmi lam lta bu'i nye bar len pa'i phung po lnga la gnas shing / sbyin pa yongs su gtong ngo zhes bya ba nas brtsams te/ chos thams cad mtshan nyid med par shes so zhes bya ba'i bar du rgya cher gsungs pas/ chos thams cad mtshan ma med par skad cig ma gcig la mngon par rtogs pa nyid yin pa'i phyir ro//rmi lam lta bu zhes bya ba ni rmi lam gyi rang bzhin no/ /mtshan nyid med pa zhes bya ba ni dngos po med pa ste/ 'di ltar chos mthun pa'i dpe don yin no/ /sbyin pa la sogs pa de'i dus su bar chad dang bcas pa dang /bar chad med par stong pa nyid yid la byed pas kun du spyod pa'i phyir te/ chos bsags pa yang dgos par shes par bsam pa dang bcas pa dang / rtogs pa'i gnas skabs su ni chos rnams ro gcig pa nyid yin pa'i phyir ro/ / dbye ba med pa nyid kyi phyir ngo bo nyid kyi don rtogs par 'gyur ro/ /de phung po rnams ni shin tu mya ngan las 'das pa'o/ /byang chub kyang rmi lam lta bu shin tu mya ngan las 'das pa zhes ji skad gsungs pa lta bu yin pas/ phung po rnams dang byang chub ni gnyis su med cing gnyis su byar med do zhes bstan pa yin no//de bzhin du rmi lam la sogs pa'i dpes tshul khrims kyi pha rol tu phyin pa la sogs pa lnga po mdo ji lta ba bzhin du brjod par bya'o/ /gnyis su med pa'i mtshan nyid chos thams cad skad cig ma gcig la mngon par rtogs pa'i dbang du mdzad nas/rmi lam dang ni de mthong nyid/ /gnyis kyi tshul du mi mthong ltar/ /chos rnams gnyis su med pa yi / /de nyid skad cig gcig gis mthong / /zhes bstan pa ni rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/rmi lam mi mthong / rmi lam mthong ba mi mthong ngo zhes bya ba nas brtsams te/ de ni chos de dag dang shes rab kyi pha rol tu phyin pa 'di la gnyis su med de gnyis su byar med do zhes bya ba nas brtsams te/ chos thams cad gnyis su med pa'i mtshan nyid kyis skad cig ma gcig la mngon par rtogs pa nyid dang /chos thams cad dbyer med na mi dge ba'i chos bstan pa med par thal bar 'gyur ba dang / de brjod pa de 'jug pa'i rgyu btsal ba'i don dang / chos rnams kyi chos nyid brjod du med pa nyid kyi phyir te/de bzhin du chos thams cad kyi rang bzhin la mkhas pa ni chos kyi skur brtags pa 'byor pa nyid yin pa'i phyir ro zhes bstan pa yin no/ / de ltar byas na skad cig ma/ /gcig gis mngon rdzogs byang chub pa/ /mtshan nyid kyis ni rnam pa bzhi/ /zhes bstan pa/de 'das pa'i 'brel pa yin par blta bar bya'o/ /skad cig ma gcig gis mngon par rtogs pa'i don ni 'phags pa nyan thos kyi sdug bsngal la sdug bsngal du yid la byed pa dang / kun 'byung la kun 'byung zhes bya ba nas/ lam la lam du yid la byed pa'i bar du zag pa med pa'i yid la byed pa dang /yang dag par ldan pa'i chos rnams la rnam par dpyad do zhes bya ba la sogs pa gsungs pa'i mdo dang 'gal lo zhe na/ de ni 'phags pa nyan thos kyi yin par bshad pas kho bo cag dang 'gal ba med de/ 'di ni byang chub sems dpa'i mngon par rtogs pa yin no//'dir mkhas pa rnams kyis brjod par bya ba mang du yod mod kyi skad cig ma gcig la mngon par byang chub pa'i mtshan nyid bdag gis nye bar sbyar ba'i rjes su 'brangs te/ de lta bu'i 'khor ba thog ma med pa gcig nas gcig tu brgyud par goms pas rab tu zhen cing bsngags pa'i nye bar dmigs pa la mngon par zhen pa'i dug gis zin pa las bzlog pa la 'bad par bya ba'i rigs so//mngon par rtogs pa'i don ci zhig yin zhe na/ mngon par rtogs pa zhes bya ba ni mngon du 'phags pa'o/ /sam gyi sgra ni nges par brjod pa'o/ /a'i sgra ni 'gro ba'i don no//'di skad ston pa yin te/ mngon du phyogs pas yang dag pa ji lta bar nges par 'gro ba'i ye shes rtogs pa ni mngon par rtogs pa zhes bya'o / /mngon par rtogs pa'i rgyan shes rab kyi pha rol tu phyin pa'i man ngag gi bstan bcos las/ skad cig ma gcig gis mngon par rtogs pa'i rnam par 'grel pa'o// //da ni chos kyi sku brjod par bya ste/ de yang sku gsum du shes par bya ste/ ngo bo nyid kyi sku dang / longs spyod rdzogs pa'i sku dang / sprul pa'i sku'o/ /gang gi phyir ngo bo nyid kyi sku'i dbang du mdzad nas/ thub pa'i ngo bo nyid sku ni//zag pa med chos rnam kun du/ /rnam par dag 'gyur gang dag yin/ /de dag de yi rang bzhin can/ /zhes bstan pa ni zag pa med pa'i chos thams cad rnam pa thams cad du rnam par dag pa'i chos dbyings yang dag pa'i rang bzhin te/ngo bo nyid gang yin pa 'di ni bcos ma ma yin pa'i don gyis na/ bcom ldan 'das kyi ngo bo nyid kyi sku yin par shes par bya ste/ ngo bo nyid ces bya ba ni bcos ma ma yin par 'jig rten la grags so/ /'jig rten las 'das pa'i lam ni de thob par byed pa po ni ma yin no//gang yang rnam pa thams cad du rnam par dag pa'i ngo bo nyid de/ chos kyi sku zag pa med pa'i chos rnams kyang gang zhe na/ byang chub phyogs mthun tshad med dang / /rnam par thar dang mthar gyis ni/ /snyoms 'jug dgu yi bdag nyid dang / /zad par bcu yi bdag nyid dang //zil gyis gnon pa'i skye mched ni/ /rab tu dbye ba rnam brgyad dang / /nyon mongs med dang smon med dang / /mngon mkhyen so so yang dag rig /rnam pa thams cad dag bzhi dang / /dbang bcu dang ni stobs bcu dang / /mi 'jigs pa ni bzhi dag dang //bsrung ba med pa gsum dag dang / /dran pa nyer gzhag rnam gsum dang / /bsnyel ba med pa'i chos nyid dang / /bag chags yang dag bcom pa dang / /skye la thugs rje chen po dang / /thub pa kho na'i ma 'dres chos/ /bco brgyad bshad pa gang yin dang / /rnam pa pa thams cad mkhyen nyid dang //chos kyi sku zhes brjod pa yin/ /zhes bstan pa la/ bdag nyid phyis pas chos kyi sku la chos kyi sku zhes bya'o/ /gzhan du na chos kyi sku ni chos kyi sku'o zhes byas pa na ngo bo nyid bkag par gyur pa dang / sku'i don bsags pa la yang 'gro bas 'dus byas su 'gyur ba'i nyes pa yod do//de bas na sku zhes brjod pa de la sngon gyi gnas skabs kyi rjes su 'brangs pa'i nye bar gdags pa yin par shes par bya'o/ /de la byang chub kyi phyogs dran pa nye bar gzhag pa la sogs pa ni bshad pa dang bcas pa'i skabs rgyas par lam gyi tshogs las/ji skad du bshad pa de bzhin du shes par bya'o/ /tshad med pa ni byams pa la sogs pa ste/ tshad med pa la 'jug pa las ji skad du bshad pa'o/ /rnam par thar pa brgyad ni gzugs can gzugs la blta ba 'di ni dang po'o/ / nang du gzugs su 'du shes pas phyi rol gyi gzugs rnams la blta ba 'di ni gnyis pa'o/ /sdug pa'i rnam par thar pa lus kyi mngon sum du byas nas/ rdzogs par byas te gnas pa 'di ni gsum pa'o/ /nam mkha' mtha' yas pa dang / /rnam shes mtha' yas pa dang /ci yang med pa dang / 'du shes med 'du shes med min skye mched ces bya ba'i rnam par thar pa bzhi dang / 'du shes dang / tshor ba 'gog pa'i zhes bya ba gcig te / de ltar na brgyad du 'gyur ro/ /de la zad pa dang / yongs su chad pa dang / kun du bskor bas 'di'i mtha' yod pa ma yin pas/nam mkha' mtha' yas pa'i phyir/ nam mkha' mtha' yas pa ste/ 'di ni nam mkha' rgyur byas pa'o/ /nam mkha' mtha' yas pa de la bsam gtan brten pa'i don gyis ni skye mched de / lha rnams kyi gnas dang 'dra bas na nam mkha' mtha' yas skye mched do//rnam par shes pa mtha' yas pa nyid ni rnam shes mtha' yas skye mched do/ /de yongs su chad pa dang / kun du bskor bas 'di'i mtha' yas pa ma yin pas rnam shes mtha' yas so/ /ming nas nam mkhar rnam par shes pa 'jug pa ste snga ma bzhin no/ / 'di'i rnam par shes pa mtha' yas pa yin pas na rnam shes mtha' yas skye mched do/ /'di la yan lag tsam yang lus pa med pas na ci yang med pa ste/ rnam shes mtha' yas skye mched dang / rnam par shes pa dang bral ba la de skad ces ming btags pa yin no//bsam gtan 'di yang med pa la brten pas na/ ci yang med pa'i skye mched ces bya ba la sogs pa ni snga ma bzhin no/ /rgya che ba'i 'du shes ni med la phra mo ni yod pas na/ 'du shes med 'du shes med min te/ de dang yang dag par ldan pa'i bsam gtan ni 'du shes med 'du shes med min no//'du shes med 'du shes med min yang yin la/ de ni chos kyi skye mched du gtogs pa nyid kyi skye mched kyang yin pas na 'du shes med 'du shes med min skye mched ces bya'o/ /'di dag thams cad kyang dmigs pa las yang dag par 'da' ba nyid kyis 'thob kyi/yan lag las 'das pa ni ma yin no/ /dper na bsam gtan dang po la sogs pa dang /zad par sa la sogs pa dmigs pa gcig la dmigs pa ma spangs par rtogs pa la sogs pa'i yan lag las yang dag par 'das par gyur pa yin na/'di rnams ni de lta ma yin no/ /gang gzugs kyi mtshan ma las 'das pa dang po'o/ /nam mkha' las 'das pa ni gnyis pa'o/ /nam mkhar zhugs pa'i rnam par shes pa las 'das pa ni gsum pa'o//nam mkhar zhugs pa'i rnam par shes pa dngos po med pa las 'das pa ni bzhi pa'o/ /de ltar na 'di dag thams cad dmigs pa 'di las 'das pa nyid las thob kyi yan lag las 'das pas ni ma yin te/ de dag thams cad kyang btang snyoms dang / sems rtse gcig pa nyid la rag las pa yin pas de dag gi yan lag gnyis pa'o / /ji ltar spom pa dang / phra ba dang / rab tu phra ba dang / shin tu phra ba'i dog pa las chu dang / zheng mnyam pa'i ras gos bzhi po la tshad kyi khyad par med du zin kyang / bde ba'i reg pa dang bral ba'i ngo bo dang /che ba nyid kyis snga ma las cig shos dang / phyi ma las phyi ma phul du byung bar gyur pa yin no/ /de bzhin du 'di dag gi khyad par med du zin kyang bsgom pa'i khyad par gyis phra ba dang / zhi ba'i ngo bo nye bar dmigs pa'i phyir snga ma las phyi ma cig shos dag tu phul du byung ba dang /mchog tu phul du byung ba nyid yin par shes par bya'o/ /rnam par thar pa'i lhag ma bshad pa ni/ rnam pa thams cad mngon par rdzogs par rtogs par ji skad bshad pa bzhin no/ /mthar gyis gnas pa'i snyoms par 'jug pa dgu ni bsam gtan bzhi dang /gzugs med pa'i snyoms par 'jug pa dang / 'gog pa'i snyoms par 'jug pa zhes bya'o/ /zad par gyi skye mched bcu ni 'di lta ste/ sa dang / chu dang / me dang / rlung dang / sngon po dang / ser po dang / dmar po dang / dkar po ste zad par brgyad dang / zad par rnam par shes pa dang / zad par nam mkha' zhes bya'o/ /de la zad par sa ni rnal 'byor goms pa gang zhig dbang du gyur pas bsam gtan dang ting nge 'dzin las 'das nas sgrib pa cung zad lus pas snyoms par 'jug pas na rnam par rtog pa rags pa'i phyir/ yan lag nyam chung ba zhes bya ba'i nyes pa de mthong nas/bsam gtan gnyis pa zhi ba nyid du yid la byed pas de gnyis pa rtogs par bya ba'i phyir/ dang po la 'dod pa med pa yongs su bzung nas bsam gtan gyi yan lag la so sor rnam par rtog pa na rnam par rtog pa tsam gyi rags pa lam spyod pa la sogs pa zhi ba nyid du nye bar gnas so//de'i tshe rags pa'i yan lag spang bar bya ba'i phyir dang / mtshan ma de nyid sa yin no zhes yang dang yang du yid la byed pas zad par sa la rnam par 'jog go/ /de bzhin du zad par chu la sogs pa dgu po la yang tshul de nyid ltar blta bar bya'o//sngar bsgoms pa goms pa dang / chu bo dang / rdzing bu dang / mtsho la sogs pa las ni ma byas pa nyid du zad par chu 'byung ba dang / de bzhin du nags kyi me 'bar ba'i du ba'i rtse mo la sogs pa las ni zad par me 'byung ngo / /rlung gis phyogs pa'i 'od ma dang /ljon shing gi lo ma la sogs pa la rlung 'di gnas te/ 'di rab tu 'jig par byed do zhes pa las ni zad par rlung 'byung ngo / /me tog dang / nor bu dang / gos la sogs pa sngon po bting ba las ni zad par sngon po'o/ /de ltar ser po dang / dmar po dang / dkar po las ni zad par ser po la sogs pa dang /tshon steng dang / dngul dang / zla ba'i dkyil 'khor la sogs pa las ni zad par dkar po'o/ /skar khung gi nang du zhugs pa'i zla zer dang / nyi ma'i 'od kyi sa dang / rtsig pa'i phyogs kyi snang ba'i tshogs byung ba dang / shing gi lo ma'i tshogs kyi gseb nas byung ba'i snang ba dang /rlung gis bskyod pa'i zla ba'i 'od zer lta ba las ni zad par rnam par shes pa'o/ /skar khung gi nang gi bu ga dang / rtsig khung dang / khung bu la sogs pa las ni zad par nam mkha' skye bar 'gyur ro/ / gang yang bsgom pa ma byas pa'i las dang po pa la ni rnal 'byor 'di lta bu skye bar mi 'gyur bas/ de yongs su sbyang ba'i khyad par shes par bya'o/ /des sngon po la sogs pa'i kha dog gi dbye ba dang bral ba'i bar snang ngam/ gos gtsang ma las 'dzag pa'i gzhong pa la sogs pa'i snod gang yang rung ba chus bkang ba gnas shin tu bzang por bzhag la bde bar 'dug nas yid la byed pa brtsams par bya ste/de ni zad par chu la yongs su sbyang ba'o/ /yang snying po dang ldan pa dum bur gtubs la shing drung ngam/ stegs bu zla med pa la lhung bzed rtsi btang ba'i tshul gyis 'bar bar byas la bug pa mtho gang ba'am/sor bzhi pa zhig btod de/ pags pa'am/ re lde gang yang rung ba'i stan mdun du bzhag pa la bde bar 'dug nas 'og rdza dang / shing rnams la steng na du ba'i rtse mo yod pa yid la byas la/ dbus su me 'bar ba'i phung po stug po'i mtshan ma gzung bar bya ba ni zad par me'i yongs su sbyang ba'o//rtsig pa'i bu ga phug pa'am/ med na yang bug pa'i skar khung gi nang khong seng byas pa dang / nye bar 'dug pa la yan lag gi phyogs gang du rlung gis reg pa der dran pa gtad par bya ste/ de ni zad par rlung gi yongs su sbyang ba'o//ut+pa la sngon po'am/ gi ni ga na ri ka la sogs pa'i sdong bu la sogs pa dang / ge sar bsal la ras sngon po'am/ za ma tog kha sbyar la sogs pa snod gang yang rung ba bting zhing khengs par byas la/ ras sngon po de rnga bo che'i kha ltar g.yogs pa'am/gzhan kha dog 'bar ba'i g.ya' 'am/ pa sha la sngon po'am/ mig sman sngon po la sogs pa'am/ tshon gyi rigs gang yang rung ba bsku zhing rtsig ngos la dkyil 'khor byas shing / bsku ba zlum po byas shing kha dog mi mthun pa gang yang rung bas yongs su chod par byas la/de dang nye bar stan bde ba la 'dug ste/ yid la byed pa la 'jug par byed pa 'di ni zad par sngon po las su rung bar bya'o/ /zad par ser po dang / dmar po dang / dkar po yang tshul de nyid de khyad par ni 'di yin te/ gang dang gang du sngon po yin pa de dang der ser po la sogs pa'i kha dog tu sbyar bar bya'o//yang bum pa'i nang du mar me btang la de'i kha bkab ste/ bu ga ha cang mi che ba zhig byas la/ rtsig pa la mngon du phyogs par bzhag nas mar me de las byung ba'i snang bas rtsig ngos la phog pa'i 'od kyi dkyil 'khor yun ring du gnas par gyur pa la/de la yid gtod par byed pa de ni zad par rnam par shes pa las su rung bar bya ba'o/ /yang stegs bu dang / rtsig pa dang / rtswa stan dang / gos la sogs pas ma bkab pa'am/ kun nas ma bkab pa'am/ kun nas bkab pa der bu ga mtho gang ba 'am/sor bzhi pa byas pa de la yid gtad par bya ste/ yongs su bcad pa 'di ni zad par nam mkha' las su rung bar bya ba'o/ /de ltar na re zhig de dag ni yongs su sbyang ba'i khyad par yin par shes par bya'o/ /de yang rnam pa dgu char yang zad par byas pa'am/ma byas pa la 'dzin pa dang / so sor snang ba zhes bya ba'i mtshan nyid gnyis su 'byung bar 'gyur ro/ /zad par chu gang yin par 'dzin pa'i mtshan ma ni rab tu g.yo ba'i rnam pa ste/ lbu ba dang / chu bur dang / 'dres pa'i char snang ba de lta bu kho nar gyur nas nye bar gnas pa ni zad par gyi nyes pa yin par shes par bya'o//so sor snang ba'i mtshan ma ni nam mkha' la bkab pa'i g.yo 'gul med pa ni nor bu'i rlung g.yab 'dra ba'am/ nor bu las byas pa'i me long gi dkyil 'khor lta bur gyur nas gnas so/ /zad par me'i 'dzin pa'i mtshan ma ni rtse mo'i cha g.yo ba'am/chad pa ltar gnas pa'o/ /'dir ma byas pa la zad par gyi nyes par shes par bya ba ni mgal me dang / me mdag gi dum bu dang / thal ba dang / du ba la cung zad gnas nas so/ /so sor snang ba'i mtshan ma ni nam mkha' ltar bzhag pa'i la ba dmar po lta bu'am/gser gyi rnga yab lta bu'am/ gser gyi ka ba 'dra bar nye bar gnas so/ /zad par rlung gi 'dzin pa'i mtshan ma ni 'o ma bskol ba phog ma thag pa'i rlangs pa'i rtse mo bzhin du gnas so/ /so sor snang ba'i mtshan ma ni legs par 'dug pa ltar mi g.yo bar 'gyur ro//zad par sngon po ni me tog ge sar sdong bu med pa dang / ge sar sdong bu bcas pa dag cig shos 'dab ma phye ba lta bu de zad par gyi nyes par shes par bya'o/ /so sor snang ba'i mtshan ma ni zad par dkyil 'khor gyen du 'phags te/ nam mkha' la nor bu'i rdul yab lta bur snang ba'o//zad par ser po la sogs pa la yang tshul 'di nyid yin no/ /zad par rnam par shes pa'i 'dzin pa'i mtshan nyid ni sa rtsig pa las gyen du 'phags te/ zlum po lta bu nyid du 'gyur ro/ /so sor snang ba'i mtshan ma ni sdug cing dngas pa dang /snang ba'i tshogs lta bu'o/ /zad par nam mkha'i 'dzin pa'i mtshan ma ni rtsig pa'i mtha'i bu ga dang 'dra ba nyid du 'gyur la/ bskyed na yang 'phel bar mi 'gyur ro/ /so sor snang ba'i mtshan ma ni nam mkha'i dkyil nyid du gyur nas gnas la/ bskyed na yang 'phel bar mi 'gyur ro//de ltar 'dir byang ba dang / ma byang ba'i zad par 'dzin pa dang / so sor snang ba'i mtshan ma dag gi khyad par shes par bya'o/ /mtshan ma de dgu char la yang bde bar 'dug nas kha dog la brtag pa'i yid la byed pa spangs nas/ zad par sa zhes bya ba la mig gis ma bltas par brtags pa tsam la sems gzhag par bya'o//chu chu me me zhes bya ba dang / de dang de'i ming gsal ba'i dbang nyid kyis bslab par bya'o/ /de ltar de rnams kyi de dang de la bslabs pa'i khyad par yin par shes par bya'o/ /de ltar bslabs pa na de rnams la snga ma ltar nye bar spyod pa dang bcas pa'i ting nge 'dzin de rnams 'byung bar 'gyur ro//yang gang zad par sa zhes bya ba 'di la dbang thob pa ni mngon par shes pa thob pa yang gcig tu gyur nas mang por 'gyur ba dang / nam mkha' 'am/ chu la sar sprul nas rkang pa gnyis kyis 'gro ba la sogs pa dang /g.yo ba la sogs pa'i khyad par 'di 'byor par 'gyur ro/ /yang zad par chu la dbang thob pas sa la byi zul byed pa dang / steng du 'byung ba dang / chu'i tshogs kyi char 'bebs pa dang / chu bo dang rgya mtsho la sogs par sprul pa dang /sa dang ri bo la sogs par ston par nus par 'gyur ro/ /zad par me la dbang thob pa ni du ba 'thul ba dang / me rab tu 'bar zhing me mdag gi char rab tu 'bebs pa dang / me dang me rnams zil gyis gnon cing gang dang gang 'dod pa de dang de bsreg par nus pa nyid dang /lha'i mig gi yul gyi snang ba bskyed par nus pa dang / snang bar byed pa dang / yongs su mya ngan las 'das pa'am/ dus su lus bsreg pa la sogs pa la 'byor par 'gyur ro/ /zad par rlung la dbang thob pa ni rlung gi 'gros ltar 'gro ba dang /rlung gi tshogs bskyed par nus pa la sogs pa'o/ /zad par sngon po la dbang thob pas ni gzugs sngon por sprul zhing mun par byed pa la sogs pa'o/ /zad par ser po la dbang thob pas ni gzugs ser por sprul pa dang / gser du bsgyur nus pa la sogs pa'o//zad par dmar po la dbang thob pas ni gzugs dmar por sprul pa la sogs pa'o/ /zad par dkar po la dbang thob pas ni gzugs dkar por sprul nus pa dang / gnyid dang rmugs pa thag ring du spong ba dang / mun par rnam par 'jig pa dang / lha'i mig gi yul snang bar byed pa la sogs pa'o//zad par rnam par shes pa la dbang thob pas ni gzugs 'od gsal bar sprul pa dang / gnyid dang rmugs pa rgyang ring du byed pa dang / mig gi yul gyi snang ba bskyed pa la sogs pa'o/ /zad par nam mkha' la dbang thob pas ni sgrib g.yogs rnams sgrib g.yogs med par byed pa dang /sa dang ri la sogs pa'i bar nam mkhar sprul nas/ spyod lam ston par byed pa dang / rtsig pa la sogs pa la thad kar thogs pa med par 'gro ba la sogs par 'byor par 'gyur ro/ /rgyun mi 'chad par zad par spros pa na zad par skye mched do//zil gyis gnon pa'i skye mched ni brgyad do/ /nang gzugs su 'du shes shing / phyi rol gyi gzugs kha dog phra mo sdug pa dang / kha dog mi sdug pa mthong yang gzugs de dag zil gyis mnan te shes/ zil gyis mnan nas mthong zhing de ltar 'du shes pa 'di ni zil gyis gnon pa'i skye mched dang po'o//de bzhin du nang gzugs med par 'du shes shing phyi rol gyi gzugs rags pa ste/ de bzhin du 'di la bzhir bya ba'am/ nang gzugs med par 'du shes pa nyid la sngon po dang / ser po dang / dmar po dang /dkar po mthong ste/ rnam pa brgyad du 'gyur ba yin no/ /de sngon po zhes bya ba ni bstan pa'i tshig go/ /kha dog sngon po zhes bya ba ni lhan cig skyes pa'i sngon po nye bar gzung ba'i phyir ro/ /sngon por snang ba zhes bya ba ni sbyar ba las byung ba'i sngon po nye bar gzung ba'o/ / mdog sngon po zhes bya ba ni de gnyi ga'i 'od 'phro bar 'ong ba de nye bar gzung ba'i phyir ro/ /zil gyis mnan zhes bya ba ni dbang du byas pa nyid kyi phyir ro/ /zil gyis mnan te zhes bya ba ni zhi gnas kyi lam gyis so/ /zil gyis mnan te mthong zhes bya ba ni lhag mthong gi lam gyis so//de ltar 'du shes pa zhes bya ba ni zil gyis mnan pa dang / zil gyis mnan pa ma yin pa de la mngon pa'i nga rgyal med pa'i 'du shes pa nyid yin pa'i phyir ro/ /dpe gnyis las gcig ni lhan cig skyes pa'o/ /gnyis pa ni sbyar ba'i mdog las byung bar bstan pa'i phyir ro//'di lta ste dper na/ zhes bya ba me tog dang / gos dag kha dog sngo ba nyid du bstan pa'i tha tshig go/ /kha dog sngon po zhes bya ba ni me tog gi dbang du byas pa ste/ de'i sngo ba ni lhan cig skyes pa yin pa'i phyir / sngon por snang ba zhes bya ba ni gos kyi dbang du byas pa ste/de'i sngon po ni sbyar ba las byung ba'i phyir ro/ /mdog sngo bar mthong zhes bya ba ni me tog dang gos gnyi ga'i dbang du byas pa ste/ gnyi ga yang mdog tu snang ba nyid yin pa'i phyir ro/ /de ltar dper byas pa bas kyang 'di lta ste/ o ma ka lta bu'i me tog phun sum tshogs pa dang /yul bA rA Na sI'i gos ltar sngo ba/ kha dog sngo zhes bya ba la sogs pa gsungs pa rigs pa yin no/ /ser po la kar ni ka'i me tog dang / dmar po la ban du dzi ba ka'i me tog dang / dkar po la skar ma pa ba sangs kyi 'od phun sum tshogs pa dang / gos zhes bya ba dmigs pa zil gyis mnan pa de'i dbang du gyur pa yin pa'i phyir ro/ /zil gyis gnon pa'i skye mched do/ /nyon mongs pa med pa gang zhe na/ bsam gtan la gnas nas pha rol po nyon mongs pa mi skye zhing rjes su bsrung bar gnas pa'i rnal 'byor pa'i ting nge 'dzin gang yin pa'i shes rab de dang yang dag par ldan pa'i sems dang /sems las byung ba'i chos rnams ni gzhan gyi rgyud la yod pa'i nyon mongs pa'i dgra mi bskyed pas/ nyon mongs pa med pa'o/ /de la nyan thos rnams las sangs rgyas kyi nyon mongs pa med pa'i khyad par ni 'di yin te/ji skad du/ nyan thos nyon mongs med pa'i lha/ /mi yi nyon mongs yongs spong nyid/ /rgyal ba'i grong sogs de dag ni/ /nyon mongs rgyun gcod nyon mongs med/ /ces bstan pa yin no/ /'di ltar nyan thos rnams ni grong la sogs par sems can gang dag mthong nas nyon mongs pa skye bar 'gyur na mi rung zhes mi'i nyon mongs pa yongs su spong bar 'dod pa yin gyi/de rnams la lta ba ni ma yin no/ /sangs rgyas bcom ldan 'das rnams ni rang la dmigs nas nyon mongs pa'i rgyur 'byung bar ma gyur cig snyam du dgongs te/shin tu de dag lta bar bzhed nas gzigs nas nyon mongs pa'i rgyu drungs nas 'byin par mdzad pa yin no/ /smon nas mkhyen pa gang zhe na/ bsam gtan la de gnas te 'di shes par bya'o zhes smon lam 'byor pas snga ma bzhin du thob ste dus gsum shes pa'am/ shes par gang dang gang 'dod par 'gyur ba de dang de la shes par bya'o zhes yid kyis smon par byas nas/ ting nge 'dzin la snyoms par zhugs pas de nas ldang ba dang / smon lam de 'grub par 'gyur zhing shes bya de yang shes so/ /de la nyan thos rnams las sangs rgyas kyi smon gnas mkhyen pa'i khyad par 'di yin te/ji skad du/ sangs rgyas smon gnas mkhyen pa ni/ /lhun gyis grub dang bag chags spangs/ /thogs pa med dang rtag gnas dang / /'dri la kun lan 'debs par bzhed/ /ces bstan pa yin no/ / de la lhun gyis grub pa zhes bya ba ni rang gi ngang gis 'jug pa'o/ /bag chags spangs zhes bya ba ni rgyun mi 'chad pa'o/ /thogs pa med pa zhes bya ba ni shes bya thams cad la 'jug pa'o/ /rtag gnas zhes bya ba ni rtag tu mnyam par gzhag pa la 'jog pa'o/ /'dri ba lan kun 'debs par bzhed pa ni zhus pa'i lan thams cad 'debs par mdzad pa'o//nyan thos rnams kyi sgo nas zhes pa ni de las bzlog pa yin par shes par bya'o/ /mngon par shes pa drug gang zhe na/ rdzu 'phrul gyi yul mngon par shes pa dang / lha'i mig dang / lha'i rna ba dang / pha rol gyi sems shes pa dang / sngon gyi gnas rjes su dran pa dang / zag pa zad pas mngon par shes pa'o/ /'di dag bshad pa ni gdams ngag rnam par 'grel pa las ji skad bshad pa nyid yin no/ /so so yang dag par rig pa bzhi ni chos so so yang dag par rig pa ni bsam gtan la gnas te/'di ltar rnam grangs ma rig pa nas brtsams te/ mi shes pa dang / mi mthong ba dang / mngon par mi rtog pa zhes bya ba la sogs pa thogs pa med par byon pa'i ting nge 'dzin to zhes bya ba ni thams cad do/ /don so so yang dag par rig pa ni rang dang spyi'i mtshan nyid kyi chos rnams kyi don gzhan la sogs pa'i dgongs pa la thogs pa med par mkhyen pa zhes bya ba la sogs pa la rgyas par bstan pa yin no//nges pa'i tshig so so yang dag par rig pa ni/ gang yul skye bo rnams kyi skad kyis so so'i yul dang / rang dang spyi'i 'du shes tha dad pa'i tha snyad kyi chos kyi nges pa'i tshig ste/'di ltar 'jig cing rab tu 'jig pas de'i phyir 'jig rten zhes bya ba dang / gzugs su rung bas gzugs so zhes bya ba la sogs pa'o/ /spobs pa so so yang dag par rig pa ni gang chos kyi rab tu dbye ba la thogs pa med pa zhes bya ba la sogs pa snga ma bzhin no//de la rab tu dbye ba ni rdzas su yod pa dang / btags par yod pa dang / don dam par yod pa zhes bya ba ste de dag la sogs pa'o/ /rnam pa thams cad yongs su dag pa bzhi gang zhe na/ rten gyi len pa dang /gnas pa dang / yang dag par phan 'dogs par mdzad pa la ji ltar bzhed par bzhugs pas na rten yongs su dag pa'o/ /dmigs pas sprul pa dang / yongs su bsgyur ba la ji ltar bzhed pa'i spyod pas 'jug pa'i phyir dmigs pa yongs su dag pa'o/ /ye shes la mnga' brnyes pa dang /ting nge 'dzin la mnga' brnyes pas na thugs yongs su dag pa dang / ye shes yongs su dag pa'o/ /dbang bcu gang zhe na/ 'di lta ste/ tshe la dbang ba ni 'tsho ba bzhed pa la rag las pas bsdus pa ni sbyin pa'i pha rol tu phyin pa yongs su rdzogs pas thob ste/de ci'i phyir zhe na/ longs spyod byin pas sems can rnams tshe dang nges par 'brel pa yin pa'i phyir ro/ /sems la dbang ba ni ji ltar mngon par 'dod par sems pas yang dag par bsdus pa'i ngo bo nyid de/ longs spyod byin pas sems can rnams kyi bsam pa ji lta ba'i sems kyi rjes su 'jug pa yin pa'i phyir ro//yo byad la dbang ba ni/ ji ltar mngon par 'dod pa'i mchog gi yang dag par nye bar bsdus pa de thob pa nyid yin te/ sems can rnams la yo byad ji ltar 'dod pa bzhin du yang dag par byin pa'i phyir ro/ / las la dbang ba ni/ lus dang / ngag gi las ji ltar 'dod pa bzhin du nye bar gnas pa yang dag par bsdus pa nyid kyis thob pa ste/ tshul khrims kyi pha rol tu phyin pa dang ldan pa'i smon lam yongs su rdzogs pas thob pa ste/ de ci'i phyir zhe na/ sems can rnams kyi lus kyi las dang /ngag gi las kha na ma tho ba med pas mngon par 'dod pa'i sbyor ba'i phyir ro/ /skye ba la dbang ba ni ji ltar mngon par 'dod pa'i 'gro ba'i skye bas yang dag par bsdus pa nyid kyis thob pa ste/ de ci'i phyir zhe na/ tshul khrims dang ldan pa'i smon lam grub pa yin pa'i phyir ro//mos pa la dbang ba ni sa la sogs pa gser la sogs par dngos po ji ltar mos pa de'i rjes su 'jug pas yang dag par bsdus pa / bzod pa'i pha rol tu phyin pa yongs su rdzogs pas thob pa yin no/ /de ci'i phyir zhe na/ sngon gyi tshe rabs su de bzod pas sems can gyi mos pa'i rjes su zhugs pa yin pa'i phyir ro//smon lam la dbang ba ni ji ltar smon pa bzhin du grub pas yang dag par bsdus pa/ brtson 'grus kyi pha rol tu phyin pa yongs su rdzogs pas thob pa yin te/ de ci'i phyir zhe na/ des sngon sems can thams cad kyi brtson 'grus nyams pa med par spyad pa'i phyir ro//mngon par shes pa lngas yang dag par bsdus pa/ bsam gtan gyi pha rol tu phyin pa yongs su rdzogs pas thob pa yin te/ sngon sems can rnams kyi dgos pa ji lta ba bzhin bsam gtan la snyoms par zhugs pa'i phyir ro//ye shes la dbang ba ni/ ji ltar 'dod pa bzhin du ye shes mngon du byed pas yang dag par bsdus pa/ shes rab kyi pha rol tu phyin pa yongs su rdzogs pas thob pa yin te/ sngon chad sems can rnams ji ltar mngon par 'dod pa bzhin du mdo la sogs pa'i chos la yang dag par sbyor ba'i phyir ro//stobs bcu ni 'di lta ste/ gnas dang gnas ma yin pa mkhyen pa'i stobs dang / las dang rnam par smin pa mkhyen pa'i stobs dang / bsam gtan dang / ting nge 'dzin dang / snyoms par 'jug pa mkhyen pa'i stobs dang /dbang po mchog dang mchog ma yin pa mkhyen pa'i stobs dang / mos pa sna tshogs mkhyen pa'i stobs dang / khams sna tshogs mkhyen pa'i stobs dang / thams cad du 'gro ba'i lam mkhyen pa'i stobs dang / 'chi 'pho ba dang skye ba mkhyen pa'i stobs dang /sngon gyi gnas rjes su dran pa mkhyen pa'i stobs dang / zag pa zad pa mkhyen pa'i stobs so/ /de rnams kyi don ni gzungs kyi dbang phyug rgyal po'i mdo las rgya cher blta'o/ /mi 'jigs pa rnam pa bzhi ste/ kye ma bdag ni yang dag par rdzogs par sangs rgyas zhes dam bcas na/de la chos 'di mngon par rdzogs par sangs rgyas zhes bya bas bdag la gang gis kyang chos dang ldan par rgol bar 'gyur ba zhes bya ba'i rgyu yang dag par rjes su mi mthong bas bdag bde ba dang / bag tsha ba med pa thob pa dang / mi 'jigs pa thob pa 'di ni dang po'o//de bzhin du kye ma bdag gi zag pa thams cad zad do zhes dam bcas pa la/ de la zag pa 'di rnams zad par ma gyur to zhes bya bar 'dir bdag la gang gis kyang / chos dang ldan par rgol bar 'gyur ba'i rgyu yang dag par rjes su ma mthong bas zhes bya ba la sogs pa snga ma bzhin te/de ni gnyis pa'o/ /yang gang bdag gis nyan thos rnams nges par 'byung ba'i lam ston pa na de 'gags par byed cing / sdug bsngal yang dag par zad par 'gyur ba'i phyir nges par 'byung ba ma yin no/ /zhes dam bcas pa de la sdug bsngal gyi mthar byed pa ma yin no zhes gang yang rgol bar mi 'gyur ba ni snga ma bzhin te/de ni gsum pa'o/ /yang gang zhig bdag gis nyan thos rnams la bar du gcod pa'i chos su bstan pa la de 'gegs par byed cing bar du gcod pa ni ma yin no zhes bdag la sus kyang 'dir chos dang ldan par rgol bar mi 'gyur ro zhes bya ba snga ma bzhin no//de ni mi 'jigs pa bzhi pa'o/ /bsrung ba med pa gsum ni 'di lta ste/ de bzhin gshegs pa ni sku'i spyod pa yongs su dag pa dang ldan pa ste/ de bzhin gshegs pa la sku'i spyod pa yongs su ma dag pa mi mnga' bas zhes gang zhig bcas par dgongs pa de bzhin gshegs pa la mi mnga' ste/de ni bsrung ba med pa dang po'o/ /sku'i phrin las ji lta ba bzhin du gsung dang / thugs kyi phrin las kyang de bzhin du brjod par bya'o/ /dgongs pa nye bar gzhag pa gsum ni 'di lta ste/de bzhin gshegs pa chos ston pa'i tshe la la rna ba btud de gus par nyan cing bka' nyan pa'i sems nye bar 'jog pa dang / chos dang don du gnyer ba'i chos nan tan du byed pa dang des de bzhin gshegs pa dgyes par yang mi 'gyur/ yid bde bar mi 'gyur/thugs yeng yeng por mi 'gyur ba nyid dang / gzhan dag rna ba btud de gus par nyan pa las go bzlog pa rgyas par gsungs pa des/ de bzhin gshegs pa'i thugs khong khro bar mi 'gyur/ mi bzod par mi 'gyur thugs mi ches par mi 'gyur ba nyid dang /la la gcig tu gus par nyan pa dang / gcig tu gus par mi nyan pa de dag la de bzhin gshegs pa dgyes pa'am/ thugs khong khro ba'am/ gnyis su mi 'gyur te/ thams cad du btang snyoms su rnam par spyod pa 'di ni dgongs pa nye bar gzhag pa gsum pa'o//bsnyel ba med pa'i chos nyid ni sangs rgyas rnams kyis sems can thams cad kyi don mdzad pa la dus las mi 'da' ste/ de nyid kyi phyir 'di ni bya ba mdzad pa gzhan mi mnga' bar 'thad pa yin no/ /bag chags yang dag par bcom pa ni 'di na nyon mongs pa spangs pa yongs su zin kyang /nyon mongs pa ma spangs pa ltar spyod pa ni nyon mongs pa'i bag chags yin par bshad do/ /sangs rgyas bcom ldan 'das 'di ni de yang spangs shing mi mnga' bas/ nyon mongs pa'i bag chags mi mnga' zhes bstan to//thugs rje chen po ni phan par dgongs pa nyid de/ gang gis dus thams cad du bcom ldan 'das 'jig rten la nyin lan gsum mtshan lan gsum rtog par mdzad do/ /ji ltar rtog par mdzad ce na/ /su'i dge ba'i rtsa ba ni yongs su ma smin/ su'i dge ba'i rtsa ba ni yongs su smin/su zhig mngon par mtho ba bstan pa'i snod yin/ su zhig ni nges par legs pa bstan pa'i snod yin/ su zhig ni sangs rgyas su 'byor pa'i snod yin/ gang zhig la ci zhig bya zhes rtog par mdzad do/ /sangs rgyas kyi chos ma 'dres pa bco brgyad ni/ de bzhin gshegs pa la 'khrul pa mi mnga'o/ /ca co mi mnga'o/ /dgongs pa nyams pa mi mnga'o/ /'du shes sna tshogs mi mnga'o/ /thugs mnyam par ma bzhag pa mi mnga'o/ /so sor ma brtags pa'i btang snyoms mi mnga'o/ /'dun pa yongs su nyams pa mi mnga'o//brtson 'grus yongs su nyams pa mi mnga'o/ /dran pa yongs su nyams pa mi mnga'o/ /ting nge 'dzin yongs su nyams pa mi mnga'o/ /shes rab yongs su nyams pa mi mnga'o/ /rnam par grol ba yongs su nyams pa mi mnga'o/ /sku'i phrin las thams cad ye shes sngon du 'gro zhing ye shes kyi rjes su 'brang ngo //gsung gi phrin las thams cad ye shes sngon du 'gro zhing ye shes kyi rjes su 'brang ngo / /thugs kyi phrin las thams cad ye shes sngon du 'gro zhing ye shes kyi rjes su 'brang ngo / /'das pa'i dus la ma chags ma thogs pa'i ye shes gzigs pa 'jug go//ma 'ongs pa dang da ltar byung ba'i dus la ma chags ma thogs pa'i ye shes gzigs pa 'jug go/ /ma 'dres pa'i bshad pa ni rnam pa thams cad mngon par rdzogs par rtogs par rnam par 'grel pa las ji skad bstan pa bzhin no/ /rnam pa thams cad mkhyen pa nyid gang zhe na/la la ni bden pa bzhi la dmigs pa'i rnam par shes pa rnam pa bcu drug gis bsdus pa yin no zhes zer ro/ /gzhan dag ni de dag dang yang chos thams cad dngos po med pa dang / skye ba med pa dang / 'gag pa med pa dang / gzod ma nas zhi ba dang /rang bzhin gyis mya ngan las 'das pa'i rnam pa'i ye shes kyis bsdus pa yin no zhes zer ro/ /kha cig na re 'dir gnyen po'i phyogs kyis bsdus pa'i rnam par 'chad par 'dod pa ni ma yin te/ de lta mod kyi don thams cad yongs su rdzogs pa nyid du 'chad de/de bas na yid bzhin gyi nor bu dang 'dra bar sems can thams cad kyi 'dod pa'i don kha na ma tho ba med pa 'grub par 'gyur ro zhes zer ro/ /yang gzhan dag ni rnam pa thams cad spangs pa'i dbang du byas pa nyid yin pa'i phyir de ni rnam pa thams cad mkhyen pa nyid ces bya'o zhes zer ro//de yang 'di ltar gzhan ni nyon mongs pa'i sgrib pa dang / shes bya'i sgrib pa dang / bag chags kyi sgrib pa spangs pa rnam pa gsum char yang mnga' ba yin no zhes zer ro/ /rnam pa thams cad mkhyen pa nyid bshad pa 'di dag thams cad kyang legs mod kyi/skabs kyi shes bya'i gnas skabs la sogs pa rnam pa bcu pa kun gzhi'i rnam par shes pa la sogs pas bsdus pa'i snying po yod pa'i phyir/ rnam pa thams cad mkhyen pa nyid ni shin tu legs so zhes slob dpon bzang skyong gis bshad do//'di nyid ni shin tu legs pa yin te/ dmigs pa yongs su grub pa ni/ rnam pa thams cad mkhyen pa'i dbang du mdzad nas/ rab 'byor gang la dmigs pa'i ngo bo nyid med pa dang / bdag po'i rkyen dran pa yin pa dang /rnam pa zhi ba dang ldan pa'i mtshan nyid med pa'i mtshan nyid ni/ rnam pa thams cad mkhyen pa nyid ces bya'o zhes bstan pa yin no/ /de la dran pa bdag po'i rkyen ces bya ba ni/ gang de dang der rnam pa thams cad mkhyen pa nyid dang / rab tu ldan pa'i yid la byed pa'i phyir ro zhes bstan pa yin no//de yang 'dir ngo bo nyid chos kyi sku yin no/ /rgyu ni yongs su smin gyur nas/ /gang dang gang la gang dang ni/ /gang tshe bya ba phan gyur pa/ /de dang de la de snang ngo / /zhes bya ba ni sprul pa snang ngo zhes dgongs pa yin no/ / de ltar byas na byang chub sems dpa' sems dpa' chen po nam mkha'i mdzod la sogs pa'i sems can thams cad la ji ltar bya zhes pa'i tshul du gnas te/ sems can dman pa rnams lam la gnas su zin kyang rang gi rgyu yongs su smin pa dang bral bas da rung yang dge ba'i rtsa ba can gyi sdug bsngal las rnam par grol bar ma gyur pas 'thad pa yin no//de ltar yang / lha yi rgyal pos char phab kyang / /sa bon mi rung mi 'khrungs ltar/ /sangs rgyas rnams ni byung gyur kyang / /skal ba med pas bzang mi myong / /de ltar mdzad pa rgya che'i phyir/ /sangs rgyas khyab par nges par brjod//de nyid zad pa med pa'i phyir/ /rtag pa zhes kyang brjod pa yin/ /zhes bstan pa yin no/ /dgongs pa 'dis sangs rgyas ni thams cad du son pa dang / rtag pa yin par bshad pas spros pa dang 'gal bar gyur pa ma yin no/ /ngo bo nyid kyi sku bstan nas//da ni longs spyod rdzogs pa'i sku bstan par bya ba'i phyir ro / /mtshan ni sum cu rtsa gnyis dang / /dpe byad brgyad cu'i bdag nyid 'di/ /theg chen nye bar longs spyod phyir/ /thub pa'i longs spyod rdzogs skur bzhed/ /ces bstan pa la/ sku des sangs rgyas bcom ldan 'das byang chub sems dpa' sems dpa' chen po sa chen po la zhugs pa rnams dang /thabs cig tu theg pa chen po'i chos kyi longs spyod kyi dga' ba dang / bde ba shin tu kha na ma tho ba med pa nye bar longs spyod par mdzad pa yin no/ /yang skyes bu chen po'i mtshan sum cu rtsa gnyis po de dag kyang gang zhe na/phyag zhabs 'khor lo'i mtshan dang rus sbal zhabs/ /phyag dang zhabs sor dra bas 'brel pa dang / /phyag ni zhabs bcas 'jam zhing gzhon sha chags/ /'di yi sku ni bdun dag mtho ba dang / /sor mo ring dang rting yangs sku che drang //zhabs long mi mngon spu ni gyen du phyogs/ /byin pa e na ya 'dra phyag ring mdzes/ /mdoms kyi sba ba sbubs su nub pa'i mchog /pags pa gser mdog pags pa srab pa dang / /spu ni re re nas g.yas legs par 'khrungs/ /zhal mdzod spus brgyan ro stod seng ge'i 'dra//'di yi dpung pa'i mgo zlum thal gong rgyas/ /'di la ro mi zhim pa ro mchog snang / /sku ni n+ya gro d+ha ltar chu zheng gab/ /gtsug tor yar 'phags ljags ring mdzes pa dang / /tshangs dbyangs 'gram pa seng ge'i 'dra dang tshems/ / shin tu dkar dang tshad mnyam thags bzangs dang / /grangs ni bzhi bcu tham par tshang ba dang / /spyan ni mthon mthing spyan rdzi ba mchog gi /'dra ba 'di dag sum cu rtsa gnyis mtshan/ /zhes bya ba la/ de la phyag zhabs 'khor lo'i mtshan dang zhes bya ba ni/ de bzhin gshegs pa'i phyag dang zhabs kyi mthil la 'khor lo rtsibs stong dang ldan pa/mu khyud dang ldan pa/ lte ba dang bcas pa/ rnam pa thams cad yongs su rdzogs pa/ rus pa'am/ ba so la brkos pa dang 'dra ba skyes par gyur pa mnga' bar gyur pa yin no/ /zhabs gnyis kyi mthil sa la mnyam par 'jog cing zhabs 'khums pa med pas zhabs shin tu gnas pa dang /ngang pa'i rgyal po ltar phyag dang zhabs kyi sor mo dra bas 'brel pa dang / phyag dang zhabs kyi mthil shing bal gyi 'dab ma ltar shin tu 'jam zhing gzhon sha chags pas phyag dang zhabs gzhon zhing 'jam pa dang /phyag dang / zhabs dang /dpung mgo gnyis dang / ltag pa'i phyogs mtho ba'i phyir bdun shin tu mtho ba dang / phyag dang zhabs kyi sor mo ring bas sor mo ring ba dang / rting pa ring bas rting pa yangs pa dang /mtho zhing mdun du 'phags la sku drang bas sku che zhing drang ba nyid dang / pus mo'i lha nga dang / long bu mdzes par nub pas na zhabs legs par mtho ba dang / spu gyen du g.yas phyogs su 'khyil bas na spu gyen du phyogs pa dang / ri dgas shar ba dang e na ya'i byin pa lta bu ni drang zhing mnyam la rim gyis gzhol bar grub cing byin pa zlum pas ri dgas e na ya'i byin pa lta bu dang /brla drang por bzhag ste ma btud kyang phyag gnyis kyis pus mo'i lha nga la sleb pas phyag ring zhing mdzes pa nyid dang / glang po che dang rta cang shes ltar gsang ba'i gnas shin tu mdzes par sbubs su nub pas mdoms kyi sba ba sbubs su nub pa dang /shin tu sbyangs pa'i gser gyi kha dog dang ldan pas gser gyi kha dog dang 'dra ba nyid dang / gser dang dngul shin tu sbyangs pa ltar 'jam zhing snyoms pa'i mdog tu 'dug pa dang /sku la rdul mi gos pa dang / pags pa 'jam pa nyid dang / shin tu rnam par phye ba'i sdu re re nas skyes shing gnyis su med pas sdu re re nas phyogs g.yas su 'khyil pa nyid dang / me tog kun da dang / kha ba dang / 'o ma dang /zla ba brgya las 'phags pa'i 'od gsal ba'i mdzod spus smin mtshams su brgyan pas zhal mdzod spus brgyan pa nyid do/ /mdzod spus zhes bya ba ni spu 'jam zhing dkar ba g.yas phyogs su 'khyil pas gnas pa nyid do/ /sku'i ro stod seng ge dang 'dra ba nyid dang / mgur dang rgyud legs par 'brel zhing phrag pa mdzes par grub pas dpung mgo shin tu zlum pa nyid dang / gser gyi gtan pa phyis pa lta 'phrag so legs par grub pas thal gong rgyas pa nyid dang / rlung dang mkhris pa dang / bad kan gyis ljags ma nyams pa dang / ro'i dbye ba mkhyen pa nyid dang rnam par shes pa 'dra ba med pas ro bro ba'i mchog mkhyen pa nyid dang / sku'i chu dang zheng 'dom du mnyam pas na n+ya gro d+ha ltar chu zheng gab pa nyid dang / spyi gtsug zlum zhing legs la g.yas phyogs su 'khyil pa dang ldan pa'i dbu mnyam zhing legs par grub la blta na mdzes par mnga' bas dbu gtsug tor dang ldan pa nyid dang /me tog ut+pa la dmar po'i 'dab ma'i mdog ltar 'dug cing shin tu yangs pas ljags ring zhing srab pa nyid dang / tshangs pa dang ka la ping ka lta bu'i gsung mnga' bas tshangs pa'i dbyangs nyid dang /'gram pa me long gi dkyil 'khor ltar legs par grub cing mdzes par 'khrungs te blta na sdug pas 'gram pa seng ge'i 'dra ba nyid dang / me tog kun da dang / zla ba dang / dung gi bcag 'phro ltar shin tu dkar ba'i tshems mnga' bas tshems dkar ba nyid dang / tshems la mtho dman med pas tshems mnyam pa nyid dang / tshems bar 'tshams dod pa med pas tshems thags bzang ba nyid dang / bla 'og dgye sgu med pas tshems mnyam shing bzhi bcu tshang ba nyid dang / dkar nag gi cha ma 'dres pa dang shin tu rnam par dag cing mdog dmar pos ma g.yogs par spyan dkar nag 'byes pas spyan mthon mthing nyid dang /rdzi ma steng 'og tu ma 'dzings shing ba'i rdzi ma lta bu mnga' bas na de bzhin gshegs pa'i rdzi ma ba'i lta bu nyid do/ /'di la mtshan ni gang gang gis / /'grub par byed pa'i rgyu gang yin//de dang de ni rab rdzogs pas/ /mtshan ni 'di dag yang dag 'gyur/ /zhes bya ba la/ longs spyod rdzogs pa'i sku de'i mtshan rnams kyi sngon gyi rgyu las de dag yang dag par grub pas/ mtshan yongs su rdzogs par shes par bya'o//yang mtshan gang gis sngon rgyu yongs su sbyangs pa'i las de dag gang zhe na/ bla ma skyel la sogs pa dang / /yang dag blangs la brtan pa dang / /bsdu ba bsten dang gya nom pa'i/ /dngos po sbyin dang gsad bya ba/ /thar par byed pa dge ba ni//yang dag blangs pa spel la sogs/ /sgrub byed rgyu yi mtshan nyid ni/ /mdo las ji skad 'byung ba bzhin/ /zhes bya ba la/ de la mdo las/ bla ma bsu ba dang skyel ba dag dang / chos nyan pa la sdod pa dang / gtsug lag khang dang / mchod rten la phreng ba dang / bshos bu dbul ba dang / /bskor ba la sogs byas pa dang / /g.yog 'khor byin pas phyag dang zhabs 'khor lo'i mtshan dang ldan par 'gyur te/ de ni 'khor shin tu mnga' ba'i snga ltas so/ /yi dam la shin tu brtan pas zhabs shin tu gnas pa ste/ de ni mi g.yo zhing shin tu brtan pa'i snga ltas te/gang gis rang gis rtogs pa'i chos las gzhan gyis g.yo bar mi nus pa'o/ /bsdu ba'i dngos po kun tu bsten pas phyag dang zhabs dra bar 'brel pa ste/ de ni myur du 'du ba'i snga ltas te gang gis ma bsdus pa'i sems can rnams myur du sdud pa'o//bza' ba dang / bca' ba dang / btung ba ro zhim zhing bsod pa byin pas phyag dang zhabs 'jam zhing gzhon sha chags pa dang / bdun shin tu mtho ba ste/ de gnyis ni bza' ba dang / bca' ba dang / btung ba ro zhim zhing bsod pa byin pa'i snga ltas so/ / bcings pa bkrol ba dang / srog gi rim gro byas pa dang / srog gcod pa spangs pas sor mo ring ba dang / rting pa yangs pa dang / sku che zhing drang ba dang / sku tshe ring ba'i snga ltas so/ /dge ba'i chos yang dag par blangs pa dang / dge ba bzung ba spel zhing 'grib par ma byas pas/zhabs kyi long bu mi mngon pa nyid dang / sku'i spu gyen du phyogs pa ste/ de ni mi mnyam pa'i chos dang ldan pa'am/ gdul bya rnams 'dul ba'i snga ltas so/ /'dir gdul bya ni gang zhig yang dag par bsdus pa'i sems can gyi khams de yongs su smin par mdzad pa'o//rig pa dang bzo la sogs pa gus par byas te byin pa dang / mchil lham byin pas byin pa ri dgas e na ya lta bu ste/ de ni myur du 'dzin pa'i snga ltas te/ gang zhig gzhan gyis smras pa'am / brdar byas pa'i don myur du 'dzin pa'o/ /nor bdog pa la slong mo'i skye bo phyir ma bzlog par sbyin pa la sogs pa byas pas phyag ring zhing mdzes pa ste/phyag ring zhing drang ba zhes bya ba'i tha tshig go/ /de la drang ba ni nor bdog cing yod pa blangs pa na sbed pa'i gya gyu med pa'i phyir ro/ /ring ba ni slang mo ba'i skye bo phyir ma bzlog pa dang skabs rnyed par bya ba'i phyir ro//de ni yo byad mang ba dang / dul ba'i snga ltas so zhes bya ba ni sems la dbang bas ser sna gzhan gyi dbang du mi 'gro ba'i phyir dang / nyon mongs pa thul bas rnam pa thams cad du mi mthun pa'i phyogs dang ma 'dres pa'i phyir ro/ / grogs po dang / mdza' bshes dang / gnyen 'dab ma phye ba dang / bye bar gyur pa'i sems can bsdums pa dang / tshangs par spyod pa la yang dag par bskul ba dang / gsang ba'i tshig yongs su bsrungs pas mdoms kyi sba ba sbubs su nub pa ste/ de ni bu mang ba'i snga ltas so zhes bya ba ni 'khor ba ji srid par sangs rgyas kyi gdung rgyun mi 'chad pa yin pa'i phyir ro//stan dang / gos dang / khang pa dang / gzhal med khang dang / gnas bzang po byin pas/ mdog gser dang 'dra ba dang / pags pa shin tu 'jam pa ste/de gnyis ni gdan dang / na bza' dang / gzhal med khang dang / gnas bzang po thob pa'i snga ltas so/ /'du 'dzi spangs pa dang / mkhan po dang / slob dpon dang /pha ma dang / phu nu dang / sring mo la sogs pa bla ma rnams la ji ltar 'jam par rim gro byas pa dang /btsun par byas pa dang / bcol ba la bsgo ba rna la ma gzan pas/ spu re re nas g.yas phyogs su 'khyil pa dang / zhal mdzod spus brgyan pa ste/ de ni mnyam pa med pa'i snga ltas so/ /mi snyan pa mi zer zhing mi smod par snyan par smra zhing legs par bshad pa la mthun par 'dzin pas ro stod seng ge'i lta bu dang /dpung mgo shin tu zlum par grub pa ste/ de ni thub pa med pa'i snga ltas so zhes bya ba ni ye shes dang mthu thogs pa med pa'i phyir ro/ /nad pa rnams la sman dang / rim gro dang / sman pa dang / phan pa'i zas byin pa dang / rim gro byas pas thal gong rgyas pa'o zhes bya ba 'di ni phrag so gnyis kyi phyogs sha rgyas pa yin pa'i phyir ro/ /ro bro ba'i mchog mkhyen pa zhes bya ba ni rnam par smin pa brnyes pa nges pa nyid kyis bcom ldan 'das kyi ljags kyi dbang po ro mi zhim pa dag dang / ljags kyi dbang por phyin pa dang /ro mchog nyid du so sor bdar bar mdzad pa ste/ de ni nad nyung ba'i snga ltas so/ /skyed mos tshal dang / kun dga' ra ba dang /btung ba dang / rdzing bu dang / rgal dka' ba la zam pa dang / kha zas dang / gtsug lag khang gi phreng ba dang / stegs dang / gtsug lag khang la sogs pa gzhan mos par bya ba sngon du song zhing bdag gis gzhan la byin pas/ shing n+ya gro d+ha ltar chu zheng gab pa zhes bya ste/ phyag gi 'dom brkyang ba'i zheng gi tshad ji tsam pa zhabs nas brtsams te/ dbu'i bar du dkyus tshad de tsam kho na yod pa'i phyir ro//dbu spyi gtsug dang ldan pa ste/ de ni mnga' thang chen po brnyes pa'i snga ltas so/ /yun ring por tshig snyan zhing 'jam pa dang / yid du 'ong ba gsungs pas ljags shin tu yangs shing srab pa zhes bya ba ni bzhed na stong gsum gyi stong chen po'i 'jig rten gyi khams ljags kyis khebs par mdzad pa'i phyir ro//gsung gcig brjod pas rnam pa du mar go bar mdzad pa'i tshangs pa'i dbyangs zhes bya ba ni/ 'jig rten gyi khams mang po'i nang na bar chad pas/ gnas pa'i gdul bya rnams kyi rna ba'i dbang po'i yul du mtshungs par gyur pa'i gsung dbyangs mnga' ba'i phyir ro//de gnyis ni yan lag lnga dang ldan pa'i gsung mnga' ba'i snga ltas so/ /gsung dbyangs yan lag lnga dang ldan pa zhes bya ba ni yongs su shes shing / rnam par shes par 'gyur ba dang / mnyan na dga' zhing mi mthun pa med pa nyid dang / zab cing dbyangs rjes su 'gro ba dang / gtang mi bra zhing rnar snyan pa dang / ma 'khrugs shing gsal ba'o/ /ma 'khrugs pa zhes bya ba ni legs par go bar byed pa'o/ /de nyid kyi phyir gsal ba zhes bya ste/ gdul bya'i skye bo rnam pa sna tshogs kyi rgyud la go bar mdzad pa yin pa'i phyir ro//yun ring po nas tshig 'khyal pa spong zhing dus su smra bar gsungs pas na 'gram pa seng ge 'dra ste/ de ni tshig kun gyis gzung bar 'os pa'i snga ltas so/ /rim gro byas pa dang / brnyas pa med pa nyid kyis 'tsho ba yongs su dag pas/ tshems shin tu dkar ba nyid dang /tshems mnyam pa ste/ de ni 'khor snga nas bsags pa'i snga ltas so/ /yun ring po nas bden pa'i tshig dang / phra ma med pa'i tshig tu spyod pas tshems thags bzang ba dang / tshems bzhi bcu mnga' ba ste/ de ni 'khor mi phyed pa'i snga ltas so/ /bang gis 'khyud pa bzhin du nyes par bsam pa med la ma chags mi sdang ba dang /rmongs pa med pa'i mig gis lta lta bas spyan dkar nag 'byes pa dang / ba'i rdzi ma lta bu ste/ de ni kun nas mdzes pa'i snga ltas so zhes bya ba spyan phye ba'i tshul dang chos mthun pa'i phyir ro/ /skyes bu chen po'i mtshan sum cu rtsa gnyis bstan nas/dpe byad bzang po brgyad cu bstan par bya ba'i phyir gsungs pa ni/ sangs rgyas bcom ldan 'das rnams ni mngon par 'du bya ba thams cad las dben pa ste sen mo zangs kyi mdog lta bu dang / gnyen bshes byams pa dang 'dra bar sems can thams cad la phan pa dang bde ba'i thugs mnga' ba ste sen mo mdog snum pa dang /rigs rgyud mthon po 'byung ba ste sen mo mtho ba yin/ spyod tshul kha na ma tho ba mi mnga' ba ste sor mo zlum pa yin/ dge ba'i rtsa ba shin tu bsags pa nyid kyis sor mo rgyas pa dang / dge ba'i rtsa ba rim gyis zhugs pa nyid kyis sor mo rnams byin gyis phra ba dang /sku dang gsung dang thugs kyi phrin las kyi mtha' dang 'tsho ba rab tu bsrungs pas rtsa mi mngon pa dang / nyon mongs pa'i mdud pa 'grol bar mdzad pa nyid kyis rtsa mdud pa med pa dang / chos shin tu gtsang ba'i blo gros can nyid kyis long bu mi mngon pa nyid dang /bgrod dka' ba'i gnas thams cad las sgrol bar mdzad pa nyid kyis zhabs mi mnyam pa med pa dang / mi'i seng ge nyid kyis ni seng ge'i stabs su bzhud pa nyid dang / mi'i glang po nyid kyis glang po che'i stabs su gshegs pa nyid dang /ngang pa'i rgyal po ltar nam mkha' la gshegs pa nyid kyis ngang pa'i rgyal po'i stabs su gshegs par mkhas pa nyid dang / mi'i khyu mchog tu gyur pa nyid kyis khyu mchog gi stabs su gshegs pa nyid dang / skor phyogs kyi lam dang mthun par gshegs pa nyid kyis g.yas phyogs su ldog cing gshegs pa nyid dang /blta na mdzes pa ste mdzes par gshegs pa nyid dang / rtag tu thugs yon po mi mnga' ba ste drang por gshegs pa nyid dang / yon tan yang dag par brjod pa nyid kyis sku 'khril bag chags pa nyid dang /sdig pa'i chos dang ma sbags pa nyid kyis sku byi dor byas pa lta bu nyid dang / gdul bya dang 'tsham par chos ston par mdzad pa nyid kyis sku rim par 'tsham pa nyid dang / sku dang / gsung dang / thugs kyi kun tu spyod pa gtsang ba'i phyir sku gtsang ba nyid dang / rang bzhin gyis thugs 'jam pa dang ldan pa'i phyir sku 'jam pa nyid dang /thugs rang bzhin gyis rnam par dag pa'i phyir sku rnam par dag pa nyid dang / chos 'dul ba yongs su rdzogs pa'i phyir mtshan rdzogs pa nyid dang / yangs shing mdzes pa'i yon tan brjod pa'i phyir sku yangs shing bzang ba nyid dang /thams cad la thugs snyoms pa'i phyir/ gom pa snyoms pa nyid dang / rnam par dag pa'i chos ston pa'i phyir/ spyan rnam par dag pa nyid dang / chos shin tu go sla ba ston pa'i phyir/ sku shin tu gzhon sha can nyid dang /thugs rtag tu ma zhum pa'i phyir/ sku zhum pa med pa nyid dang / dge ba'i rtsa ba yang dag par 'phags pa'i phyir/ sku rgyas pa nyid dang / yang srid pa zad pa nyid kyis sku shin tu grims pa nyid dang / rten cing 'brel par 'byung ba shin tu rnam par phye ba rab tu ston par mdzad pa nyid kyis/yan lag dang nying lag shin tu rnam par 'byes pa nyid dang / tshig don rnam par dag pa ston pas gzigs pa rab rib med cing rnam par dag pa nyid dang / slob ma phun sum tshogs par gyur pa nyid kyis dku zlum pa nyid dang / 'khor ba'i skyon gyis ma sbags pa nyid kyis dku skabs phyin pa nyid dang /nga rgyal gyis 'gying ba bcom pa nyid kyis dku ma rnyongs pa nyid dang / chos zad pa rnam par ldog pa nyid kyis phyal phyang ba nyid dang / chos zab mo rtogs pa nyid kyis lte ba zab pa nyid dang / slob ma mthun par mdzad pa nyid kyis lte ba g.yas phyogs su 'khyil pa nyid dang /slob ma'i tshogs kun nas mdzes par gyur pa nyid kyis kun nas mdzes pa nyid dang / thugs shin tu gtsang ba nyid kyis kun tu spyod pa gtsang ba nyid dang / dus ma yin pa'i chos 'dul ba nyid dang bral ba nyid kyis sku la sme ba gnag bag med pa nyid dang /lus la sogs pa zo mdog bde ba nyid kyis phyag shing bal ltar 'jam pa nyid dang / rang gi skye bo dang skye bo phal pa la byams pa nyid kyis dge sbyong chen po brnyes pa nyid kyi phyir phyag gi ri mo mdangs yod pa nyid dang / mchog tu zab pa'i chos la gnas pa nyid kyis phyag gi ri mo zab pa nyid dang / phyi rjes su yang dag par yongs su dag pa'i chos ston par mdzad pa nyid kyis phyag gi ri mo ring ba nyid dang / bslab pa ha cang mi ring bar 'cha' ba nyid kyis zhal ha cang mi ring ba nyid dang / 'jig rten thams cad gzugs brnyan dang 'dra bar gzigs pa nyid kyis mchu bim pa ltar dmar ba nyid dang /tshig 'jam po sngon du 'gro bas 'dul ba nyid kyis ljags mnyen pa nyid dang / yon tan 'thad pa mang po mnga' ba nyid kyis ljags srab pa nyid dang / chos 'dul ba la byis pa ltar chags pa nyid kyi gting dpag dka' ba nyid kyis ljags dmar ba nyid dang /glang po'i sgra dang / 'brug gi sgra lta bus bsnyengs pa mi mnga' ba nyid kyis glang po che'i nga ro dang / dbyangs dang ldan pa nyid dang / snyan cing 'jam la yid du 'ong bar smra ba'i slob ma mnga' ba nyid kyis gsung snyan cing mnyen la 'jam pa nyid dang /srid pa kun du bsdams pa bcad pa nyid kyis mche ba zlum pa nyid dang / skye bo gdul bar dka' ba rnams 'dul ba la mkhas pa nyid kyis mche ba rno ba nyid dang / chos 'dul ba shin tu dkar bas na mche ba dkar ba nyid dang /mnyam pa'i sa la bzhag pa nyid kyis mche ba mnyam pa nyid dang / mthar gyis mngon par rtogs pa yang dag par ston par mdzad pa nyid kyis mche ba byin gyis phra ba nyid dang / shes rab kyi ri bo mthon po la bzhugs pa nyid kyis shangs mtho ba nyid dang /'dul ba'i skye bo gtsang ma phun sum tshogs pa nyid kyis shangs gtsang ba nyid dang / sangs rgyas kyi chos shin tu rgya che ba mnga' ba nyid kyi spyan yangs pa nyid dang / sems can gyi tshogs drangs pa nyid kyis rdzi ma stug pa nyid dang / spyan dkar nag 'byes pa dang / pad+ma'i 'dab ma rgyas pa ltar 'dug pa'i spyan gyis lha dang / lha ma yin dang / skyes pa dang / na chung mchog mngon par dga' bar mdzad pa nyid kyis spyan dkar nag 'byes pa dang / pad+ma'i 'dab ma rangs pa lta bu nyid dang rtag tu phyi rjes su gzigs pa nyid kyis smin mtshams ring ba nyid dang /chos 'dul ba dkar po la mkhas pa nyid kyis 'jam pa nyid dang / kun gzigs pa nyid kyis smin ma'i spu mnyam pa nyid dang / dge ba'i rtsa ba'i snum gyis bskus par gyur pa'i skye bo 'dul ba nyid kyis smin ma snum par gyur pa nyid dang / mchog tu gnod pa bzlog par mdzad pa nyid kyis phyag ring zhing rgyas pa nyid dang /nyon mongs pa'i g.yul las rnam par rgyal ba nyid kyis snyan mnyam pa nyid dang / sems can bsam pa ma nyams pa thams cad 'dul bar mdzad pa nyid kyis snyan gyi dbang po ma nyams pa nyid dang / lta bas byas pa thams cad kyi gzhan du mi 'gyur ba nyid kyis dpral ba legs par 'byes pa nyid dang /phas kyi rgol ba'i dge sbyong dang / bram ze rab tu 'joms pa nyid kyis dpral ba'i dbyes che ba nyid dang / smon lam gyi mchog yongs su rdzogs pa nyid kyis dbu shin tu rgyas pa nyid dang /yul gyi bung ba'i dga' ba bzlog par mdzad pa nyid kyis dbu bung ba ltar gnag pa dang / mthong ba dang bsgoms pas spang bar bya ba'i bag la nyal spangs pa nyid kyis dbu skra stug pa nyid dang / bstan pa thugs 'jam pas thugs su chud pa nyid kyis dbu skra 'jam pa nyid dang /'dod chags la sogs pas ma 'khrugs pa nyid kyis dbu skra ma 'dzings pa nyid dang / rtag tu tshig mi rtsub pa nyid kyis dbu skra mi bshor ba nyid dang / byang chub kyi yan lag gi me tog g.yas su phyogs nas bkram pa nyid kyis dbu skra dri zhim pa nyid dang / rnam pa thams cad mdzes par gyur pa nyid kyis phyag dang [(]zhab [,]zhabs [)]la dpal be'u dang /bkra shis dang / g.yung drung dang / g.yung drung 'khyil pas brgyan pa nyid yin no/ /mdo lhug pa 'di bsdu bar bya ba'i don du tshig le'ur byas pa sbyar ba ni 'di yin te/ thub pa'i sen mo zangs mdog dang //mdog snum mtho dang sor mo rnams/ /zlum rgyas byin gyis phra ba dang / /rtsa mi mngon dang mdud pa med/ /long bu mi mngon zhabs mnyam dang / /seng ge glang chen bya dang ni/ /khyu mchog stabs gshegs g.yas phyogs dang / /mdzes gshegs drang dang 'khril bag chags//byi dor byas 'dra rim par 'tsham / /gtsang dang 'jam dang dag pa'i sku/ /mtshan ni yongs su rdzogs pa dang / /sku yi kho lag yangs shing bzang / /gom snyoms spyan ni dag pa dang / /shin tu gzhon mdog spyan nyid dang / /sku zhum med dang rgyas pa dang //shin tu grims pa'i sku nyid dang / /yan lag shin tu rnam 'byes dang / /gzigs pa mun med dag pa dang / /dku zlum skabs phyin ma rnyongs dang / /phyang nge ba dang lte ba ni/ /zab dang g.yas phyogs 'khyil ba dang / /kun nas blta na sdug pa dang / /kun spyod gtsang dang sku la ni//sme ba gnag bag med pa dang / /phyag ni shing bal ltar 'jam dang / /phyag ring mdangs yod zab ring dang / /zhal ni ha cang mi ring dang / /mchu ni bim pa ltar dmar dang / /ljags mnyen pa dang srab pa dang / /dmar dang 'brug gi sgra nyid dang / /gsung mnyen 'jam dang mche ba zlum//rno dang dkar dang mnyam pa dang / /byin gyis phra dang shangs mtho dang / /mchog tu dag pa dag dang ni/ /spyan yangs pa dang rdzi ma stug /pad+ma'i 'dab ma 'dra ba dang / /smin dkyus ring dang 'jam pa dang / /snum dang spu ni mnyam pa dang / / phyag ring rgyas dang snyan mnyam dang / /nyams pa rnam par spangs pa dang / /dpral che legs par 'byes pa dang / /dbyes che ba dang dbu rgyas dang / /dbu skra bung ba ltar gnag dang / /stug 'jam ma 'dzings ngo bo dang / /mi bshor dri zhim skyes bu yi/ /yid ni 'phrog par byed pa dang / /dpal gyi be'u dang bkra shis ni//sangs rgyas dpe byad bzang por bzhed/ /longs spyod rdzogs pa'i sku bstan nas sprul pa'i sku ji lta bu zhig ce na/ gang gis 'khor ba ji srid par/ /'gro la phan pa sna tshogs dag /mnyam du mdzad pa'i sku de ni/ /thub pa sprul sku rgyun mi 'chad/ /de bzhin las kyang rgyun mi 'chad//'khor bar ji srid bzhugs par 'dod/ /ces bstan to/ /de bas na de las gzhan pa rnam pa thams cad du yongs su rdzogs pa'i chos kyi sku'i 'bras bu gnas skabs pas 'khor ba ji srid par phyogs bcu'i 'jig rten gyi khams su sprul pa lhun gyis grub par 'jug cing / sems can gyi don rgyun mi 'chad par sna tshogs mdzad pa'i sgo nas gnas gyur pas yongs su gyur pa'i las kyi dbang du mdzad de/ bcom ldan 'das chos thams cad rmi lam lta bur dngos po ma mchis pa dngos po ma mchis pa'i ngo bo nyid rang gi mtshan nyid kyis stong pa'i chos rnams la dge ba dang / mi dge ba dang / 'jig rten pa dang / 'jig rten las 'das pa la sogs pa zhes bgyi ba ji ltar rnam par gzhag par 'gyur zhes zhus pa ni byed pa de nye bar dgongs pa byed pa'i phyir/ rab 'byor 'di la byis pa so so'i skye bo thos pa dang mi ldan pa rnams ni/ rmi lam yang mi dmigs zhes bya ba nas brtsams te/'khor ba rmi lam lta bur dgongs nas rmi lam mthong ba mi dmigs so zhes bya ba dang / de sad pa'i 'phags pa'i gang zag la dgongs nas/ yang dag par rdzogs pa'i sangs rgyas kyis de nye bar ma dmigs pa'i dpes/ rmi lam ltar bshad pas go rims bzhin du nyon mongs pa dang shes bya'i sgrib pa'i gnyen po nye bar dmigs su med pa shes par bya ba'i phyir/chos rnam par bzhag pa dka' ba byed pa yin te ngo mtshar che'o zhes bstan to/ /yang chos kyi sku'i phrin las rnam pa du zhig yin zhe na/ 'gro rnams zhi ba'i las dang ni/ /bsdu ba rnam bzhi la 'god pa//kun nas nyon mongs bcas pa yi/ /rnam par byang ba rtogs pa dang / /sems can rnams don ji bzhin du/ /don dang pha rol phyin drug dang / /sangs rgyas lam dang rang bzhin gyis/ /stong pa nyid dang gnyis zad dang / /brda dang dmigs pa med pa dang / /lus can rnams ni yongs smin dang //byang chub sems dpa'i lam dang ni/ /mngon par zhen pa bzlog pa dang / /byang chub thob dang sangs rgyas shing / /rnam par dag dang nges pa dang / /sems can don ni tshad med dang / /sangs rgyas bsten sogs yon tan dang / /byang chub yan lag las dang ni/ /chud mi za dang bden mthong dang //phyin ci log ni spangs pa dang / /de gzhi med pa'i tshul dang ni/ /rnam par byang dang tshogs dang ni/ /'dus byas 'dus ma byas pa las/ /tha dad yongs su mi shes dang / /mya ngan 'das la dgod pa dang / /sangs rgyas sku yi phrin las 'di/ /rnam pa nyi shu bdun du 'dod/ / ces bstan to/ /de la 'gro ba rnam par zhi ba'i las ni 'gro ba lngas bsdus pa yin te/ gang gi phyir dmyal ba'i 'gro ba zhi ba'i dbang du mdzad nas/ rab 'byor ngas 'di nas sangs rgyas kyi spyan gyis 'jig rten la gzigs nas/ phyogs bcu'i 'jig rten gyi khams gang gA'i klung gi bye ma snyed dag na/byang chub sems dpa' sems dpa' chen po dag ched du bsams te/ sems can dmyal ba chen po dag tu song nas zhes bya ba de dag nas 'phos te/ lha dang mi dag dang skal ba mnyam par skyes shing rim gyis theg pa gsum gyis sdug bsngal mthar 'byin pa mthong ngo zhes bya ba'i bar dang /phyogs bcu'i 'jig rten gyi khams kyi byol song gi skye gnas pa'i sems can rnams kyi don du bdag yongs su gtong ba la sogs pas byol song gi skye gnas zhi ba'i las dang / de bzhin du yi dags kyi yul de dag na sdug bsngal ji snyed yod pa de dag rab tu 'joms shing gshin rje'i sdug bsngal zhi ba'i las dang /'dod pa na spyod pa'i lha'i ris drug la chos bstan pa'i rim gyis theg pa gsum gyi rim gyis yongs su mya ngan las 'da' bar 'gyur ba dang / tshangs pa'i lta ba la mngon par zhen pa de dag la chos bstan pas lha'i 'gro ba zhi ba'i phrin las yin te/rab 'byor ngas yang 'di nas sangs rgyas kyi spyan gyis rnam par gzigs nas/ byang chub sems dpa' sems dpa' chen po dag mi rnams bsdu ba'i dngos po bzhis sdud pa mthong ste zhes bya ba nas brtsams te/sems can rnams rnam pa thams cad mkhyen pa nyid kyi bar thob par mdzad pa de ni 'phags pa'i chos rnams kyi 'bras bu la rab tu 'god do zhes bya ba'i bar du rgya cher gsungs pa 'di ni mi'i 'gro ba zhi ba'i phrin las so/ /gal te byang chub sems dpa' yang sems can rnams rnam pa thams cad mkhyen pa nyid thob par byed pa yin na de lta na ni sangs rgyas dang byang chub sems dpa' la khyad par med par 'gyur ro zhes brgal ba la/gnyi ga yang gcig tu bstan pas mngon sum du mdzad pa dang / ma mdzad pa dag la khyad par med par khas blangs pa ma yin pas lan btab pa yin no//bsdu ba rnam pa bzhi la 'god pa ni gang phyogs bcu'i 'jig rten gyi khams kyi sems can rnams sbyin pa dang / snyan par smra ba dang / don spyod pa dang / don mthun pa rnams kyis zhes bya ba nas stong pa nyid la sogs pas rjes su bzung ba ni ngo mtshar rmad du byung ba'i chos nyid yin no zhes bya ba'i bar du bstan pa yin no//kun nas nyon mongs pa dang / rnam par byang ba la 'god pa ni rab 'byor gzhan yang byang chub sems dpa' sems dpa' chen po/ /byang chub sems dpa' gzhan dag la 'di skad 'dems shing 'di skad bstan te zhes bya ba nas brtsams te/yi ge bsgrub pa'i gzungs la mkhas pa'i dbang du mdzad nas zhus pa dang / lan rgya cher gsungs pa dang / de bzhin gshegs pa'i sprul pa'i dpe dang bcas pas/ chos thams cad ma bcings ma grol ba nyid kyis gnas pa med pa'i tshul dang /'phags pa'i gang zag thams cad skyon med pa pa nas chos kyi dbyings sam/ de bzhin nyid dam/ yang dag pa'i mtha' las 'das pa med pa yin no/ /mi ldog par brjod do/ /gal te chos kyi dbyings la sogs pa 'da' ba med pa nyid yin na de ji snyam du sems//chos kyi dbyings kyang gzhan la gzugs kyang gzhan nam/ chos thams cad chos kyi dbyings la gzhan ma yin par zhus pas / de gzhan ma yin pa dgongs nas gzugs la sogs pa la yang ldog pa med par thal bar 'gyur bas kun nas nyon mongs pa dang rnam par byang ba'i bdag nyid can du bstan par bya ba'i don gyis rab 'byor kun rdzob kyi bden pa tshad mar byas nas/de rnam par gzhag pa dang 'bras bu rnam par gzhag pa kun rdzob yin gyi/ don dam pa ma yin na byis pa so so'i skye bo thams cad rgyun du zhugs pa'i 'bras bu thob par thal bar 'gyur ba dang /de rnams gnyi ga yongs su shes par yang dag pa nas brtsams te/ 'dus byas dang 'dus ma byas kyi khams ris su gcad cing 'bras bu rnam par dgod pa med na/ chos kyi dbyings la kun tu sbyor ba gsum spangs pas 'bras bu dang po dang / 'dod pa'i 'dod chags dang gnod sems srabs pas/lan cig phyir 'ong ba'i 'bras bu dang / tha ma'i cha dang ldan pa'i kun du sbyor ba lnga spangs pas phyir mi 'ong ba'i 'bras bu dang / gong ma'i cha dang ldan pa'i kun tu sbyor ba lnga spangs pas dgra bcom pa'i 'bras bu nyid nas yang dag par rdzogs pa'i byang chub kyi bar du rgya cher gsungs pa'i 'bras bu rnam par gzhag pa ma mchis par zhus pa dang /dus gang gi tshe skad cig ma gcig gis chos thams cad rtogs pa na de bzhin gshegs pa'i sprul pa'i dpes/ chos rnams kyi chos nyid kyi mtshan nyid ji snyed pa khong du chud do zhes lan gsungs pa dang /chos rnams kyi mtshan nyid rab tu rdzogs par zhus pa la de bzhin gshegs pa'i sprul pa'i dpes de bstan pa sprul lam bsgom pa la brten kyang kun nas nyon mongs pa dang / rnam par byang bar mi 'gyur ba dang 'dra bar dngos po med pa'i chos rab tu rtogs pa dang /chos thams cad sprul pa lta bu yin na yang / byang chub sems dpa' sgyu ma lta bu'i chos mthong ba'i skyes bu byed pa nyid dang / de lta yin na sems can rnams kyi don byed pa la 'jug pa don med par 'gyur ba dang / sems can rnams kyis de ltar ma shes pas de 'bras bu dang bcas pa yin par bstan to zhes bstan pa yin no//de bzhin du 'og ma 'og ma rnams la brgal ba dang / lan rjes su sbyar te/ gcig nas gcig tu brjod pa'i gnas mdo las ji skad gsungs pa bzhin du rgya cher brjod par bya ste/kho bos ni gzhung mangs kyi dogs pa'i phyir bsdu ba tsam byas pa yin no/ /sems can rnams kyi don ji lta ba bzhin du bkod pa ni gang sgyu ma mkhan gyi dpes sems dang po bskyed pa dang / bsgrub pa dang / rtogs pa'i mtshan nyid can thog ma dang bar dang / tha ma rnams su chos kyi dbyings 'khrug pa med pa nyid kyis sems can thams cad kyi don ji lta ba bzhin du rtogs pa dang /gzhan rnams yang dag pa'i mtha' rab tu 'jog pa'i phrin las mdzad do zhes bstan pa yin no/ /pha rol tu phyin pa drug la 'god pa ni gang de'i rjes la pha rol tu phyin pa drug la rab tu zhugs pa'i phrin las mdzad pa'o zhes bstan pa yin no//sangs rgyas kyi lam la dgod pa dang / gang de'i 'og tu dge ba bcu'i las kyi lam nas brtsams te/ yang dag par rdzogs pa'i byang chub kyi bar du 'jog pa'i phrin las mdzad pa'o zhes bstan pa yin no//rang bzhin gyis stong pa nyid la 'god pa ni gang de'i 'og tu de'i rang bzhin gyis stong pa nyid la rab tu 'jog pa'i phrin las mdzad pa'o zhes rgya cher bstan pa yin no/ /gnyis su med pa'i chos la 'god pa ni gang de'i 'og tu de bzhin gshegs pa'i sprul pa'i dgra bcom pa dang /rmi lam gyi nang gi dpe gnyis kyis gnyis su med pa la mngon par rtogs pa la 'jog pa'i phrin las mdzad pa'o zhes bstan pa yin no/ /brdar btags pa shes pa la 'god pa ni gang de'i 'og tu gnas brtan rab 'byor bdag nyid dbang du gyur pa'i dpes chos thams cad tha snyad du btags pa la rab tu 'jog pa'i phrin las mdzad pa'o zhes bstan pa yin no//sems can yongs su smin par byed pa la 'god pa ni gang de'i 'og tu pha rol tu phyin pa drug gis sems can yongs su smin par byed pa la rab tu 'jog pa'i phrin las mdzad pa'o zhes bstan pa yin no//byang chub sems dpa'i lam la 'god pa ni gang de'i 'og tu pha rol tu phyin pa la sogs pa byang chub sems dpa'i lam la rab tu 'jog pa'i phrin las mdzad pa'o zhes bstan pa yin no/ /chos thams cad la mngon par zhen pa spang ba la 'god pa ni gang de'i rjes la chos thams cad la mngon par zhen pa med pa la rab tu 'jog pa'i phrin las mdzad pa'o zhes bstan pa yin no//yang dag par rdzogs pa'i byang chub la 'god pa ni gang de'i 'og tu byang chub la rab tu 'jog pa'i phrin las mdzad pa'o zhes bstan pa yin no/ / sangs rgyas kyi zhing rnam par dag pa la 'god pa ni gang de'i 'og tu sangs rgyas kyi zhing rnam par dag pa la rab tu 'jog pa'i phrin las mdzad pa'o zhes bstan pa yin no/ /yang dag par rdzogs pa'i byang chub la nges par 'jog pa ni gang de'i 'og tu sems dang po bskyed pa dang phyir mi ldog pa dang srid pa tha mar so sor nges pa la 'jog pa'i phrin las mdzad pa'o zhes bstan pa yin no//sems can gyi don tshad med pa la 'god pa ni gang de'i 'og tu phyogs bcu'i 'jig rten gyi khams tshad med pa'i sems can gyi don mdzad pa'i phrin las mdzad pa'o zhes bstan pa yin no//sangs rgyas kyi drung du nye bar 'gro ba dang / bsnyen bkur bya ba la sogs pa la dgod pa ni gang de'i rjes thogs la 'jig rten gyi khams sna tshogs su sangs rgyas kyi drung du nye bar 'gro ba dang / bsnyen bkur bya ba nas brtsams te/ mngon par shes pa bsgrubs pa'i sgo nas pha rol tu phyin pa drug gi mi mthun pa'i phyogs rnam par spong ba dang /pha rol tu phyin pa rnams la nges par sbyor bar 'god pa'i phrin las mdzad pa'o zhes bstan pa yin no/ /byang chub kyi yan lag la dgod pa ni gang de'i 'og tu byang chub kyi yan lag tu gyur pa sbyin pa la sogs pa'i dge ba'i chos rnams la rab tu 'jog pa yin no zhes bstan pa yin no//las dang 'bras bu 'brel pa chud mi za ba la dgod pa ni gang de'i rjes la las dang 'bras bu 'brel pa'i tha snyad 'gro ba lnga'i 'khor ba rnam par 'jig pa la rab tu 'jig pa'i phrin las mdzad pa'o zhes bstan pa yin no//bden pa mthong ba la dgod pa ni gang de'i rjes la 'phags pa'i bden pa bzhi mnyam pa nyid rjes su rtogs pa la rab tu 'jog pa'i phrin las mdzad pa'o zhes bstan pa yin no//phyin ci log spang ba la dgod pa ni gang de'i rjes la phyin ci log bzhi spang ba la rab tu 'jog pa'i phrin las mdzad pa'o zhes bstan pa yin no/ /phyin ci log bzhi med pa spang ba'i ye shes la dgod pa ni gang de'i rjes la sku'i cha shas tsam gyis dngos po bkag pa dang rmi lam dang gzugs brnyan dang sgra brnyan dang smig rgyu dang sgyu ma dang sprul pa'i dpes phyin ci log bzhi med pa spong ba'i ye shes la rab tu dgod pa'i phrin las mdzad pa'o zhes bstan pa yin no//rnam par byang ba la rab tu 'jog pa ni gang de'i rjes su tha snyad la brten te/rnam par byang ba la rab tu 'god pa'i phrin las mdzad pa'o zhes bstan pa yin no/ /de'i tshogs la nye bar 'god pa ni gang de'i rjes la tshogs yongs su rdzogs pa la rab tu 'jog pa nas brtsams te/ mtha' gnyis mnyam pa nyid du rtogs pa la rab tu 'jog pa'i phrin las mdzad pa'o zhes bstan pa yin no//'dus byas dang 'dus ma byas tha mi dad par yongs su shes pa la 'god pa ni gang 'dus byas dang / 'dus ma byas kyi chos dag gcig la gcig tha dad pa nye bar dmigs par sngon du song ba'i phyir te/de ci'i phyir zhe na/ de gnyis su rtogs pa'i dus su mtshan nyid med par mtshan nyid gcig pa nyid dang / don dam pa rtogs pa nas 'dus byas dag rnam grangs gzhan med pas zhes gsungs pa dang / chos rnams stong pa nyid yin pas gang la yang ci yang byed pa yang med pas sems can rnams su 'du shes pa thams cad dang bral bar byed pa dang /de bzhin gshegs pa'i skyes bu byed pa yin par bstan pas so zhes bstan pa yin no/ /nyi shu bdun pa mya ngan las 'das pa la dgod pa'i phrin las ni gang chos thams cad sprul pa lta bu yin pa nyid kyis skye ba dang 'gag pa las rnam par grol ba dang /ma 'dus pa'i chos mya ngan las 'das par sprul pa nyid yin pa dang / rang bzhin gyis stong pa nyid ni mya ngan las 'das pa nyid yin pa dang / shes rab kyi pha rol tu phyin pa'i gzhung ji ltar rdzogs par rnyed pa'i tshig gis ni sems can thams cad mya ngan las 'das pa la rab tu 'jog pa'i phrin las mdzad pa'o zhes bstan pa yin no//phrin las 'di rnams kyi ni so so'i rang gi ngo bo'i khyad par de dang phrin las kyi mtshan nyid kyi rjes su 'brang ste dpyad par bstan to/ /don yongs su gsal bas kho bo cag gi rnam par ma phye ste/btags zin pa btags pas ci zhig bya/ de ltar byas na/ ngo bo nyid longs rdzogs bcas dang / /de bzhin gzhan ni sprul pa dang / /sangs rgyas sku mdzad bcas pa ste/ /rnam pa nyi shu bdun du 'dod/ /ces bstan pa gang yin pa de bshad pa yin par shes par bya'o//mngon par rtogs pa'i rgyan shes rab kyi pha rol tu phyin pa man ngag gi bstan bcos las chos kyi sku'i rnam par 'grel pa'o// //de nas da ni gleng gzhi'i le'u gang yin pa las/ phyogs bcu'i 'jig rten gyi khams kyi de bzhin gshegs pa rnams kyis byang chub sems dpa'i tshogs tshad med pa la rin po che sna tshogs pas spras pa'i pad+ma skyes su bskur ba de la dgos pa ci zhig yod ce na/sems bskyed pa nas brtsams te/ shes rab kyi pha rol tu phyin pa rdzogs kyi bar du bstan pa/ 'jig rten gyi khams thams cad du byin gyis brlabs pa nyid yin par shes par bya ba'i phyir dang /'jig rten gyi khams sna tshogs pa'i sems can thams cad rnams bsdu bas sems can gyi bsdu bas bsdus pa sems can gyi khams brjod du med pa la dmigs pa'i byang chub tu sems bskyed par shes par bya ba'i don dang / chos yongs su rdzogs par mnyam pa'i byang chub sems dpa' rnams yod pa'i phyir/sangs rgyas kyi zhing sna tshogs su bla na med pa yang dag par rdzogs pa'i byang chub tu 'gyur ba srid pas/ sangs rgyas mang po nyid du shes par bya ba'i phyir dang / 'jig rten gyi khams gcig nas gcig tu sangs rgyas blta ba'i phyir 'gro ba dang /chos nyan pa dang / mchod pa dang / bsnyen bkur byed pas byang chub sems dpa' rnams kyi mngon par shes pa'i rnam par rol pa dang / sems can gyi khams yongs su smin par bya ba'i phyir dang /rang gi chos yongs su rdzogs par bya ba'i phyir ji ltar mngon par 'dod pa'i sangs rgyas kyi zhing rnam par dag pa yang dag par yongs su gzung ba'i dgos pa la sogs yin par bstan to/ /gang gi phyir dang po 'di skad bdag gis zhes bya ba'i skabs nas brtsams te/nyi khri lnga stong pa'i gzhung 'di yongs su rdzogs pa'i bar 'di ni dngos po gcig tu byas pa ni/ rnam pa thams cad mkhyen pa nyid la sogs pas na / chos kyi sku mdzad pa dang bcas pa'i bar du dngos po brgyad du gyur pa yin/ de'i phyir/ shes rab pha rol phyin pa la//dngos po brgyad kyis yang dag bshad/ /rnam kun mkhyen nyid lam shes nyid/ /thams cad mkhyen pa nyid dang gsum/ /rnam kun rtse mor bcas pa dang / /mthar gyis pa dang skad cig bdag /chos sku mdzad par bcas pa ste/ /rnam pa brgyad du bsdus pa yin//zhes bstan pa yin no/ /yang mtshan nyid dang ldan pa ni shes rab kyi pha rol tu phyin pa rnam pa gsum mo/ /sbyor ba dang ldan pa ni rnam pa kun mngon par rdzogs par rtogs pa'o/ /rab kyi mthar 'gro ba ni rtse mo'i mngon par rtogs pa'o/ /go rims dang ldan pa ni mthar gyis pa'i mngon par rtogs pa'o//mthar thug pa ni skad cig ma gcig pa'i mngon par rtogs pa'o/ /rnam par smin pa ni chos kyi sku mdzad pa dang bcas pa yin no/ /de ni bshad pa'i rnam grangs gzhan yin no/ /mtshan nyid de yi sbyor ba dang / /de rab de yi go rims dang //de mtha' de yi rnam smin ni/ /de bsdus gzhan de rnam pa drug /ces bstan pa yin no/ /gzhan yang dngos po gsum gyis shes rab kyi pha rol tu phyin pa bsdus par gyur pa yin te/ dngos po gsum ni rgyu dang / 'bras bu dang / las kyis so/ /thams cad mkhyen pa gsum ni yul yin no//rnam pa kun mngon par rdzogs par rtogs pa la sogs pa la sbyor ba bzhi po dag ni rgyu yin no/ /ngo bo nyid dang / longs spyod rdzogs pa dang / sprul pa'i sku gsum ni 'bras bu yin no/ /las ni 'gro ba zhi ba la sogs pa rnam pa nyi shu rtsa bdun ni chos kyi sku'i phrin las yin te/rnam grangs gzhan no/ /de bas na/ yul ni gsum yin rgyu rnams te/ /sbyor ba bzhi yi bdag nyid dang / /sangs rgyas sku 'bras phrin las dang / /don bsdus gzhan yin rnam pa gsum/ /de ltar bstan pa yin no/ /de la gang 'dir de dang der nges par 'byed pa'i cha dang mthun pa du ma bstan pa las de rnams kyi so so'i khyad par ji lta bu zhe na/re zhig rnam pa thams cad mkhyen pa nyid kyi dbang du mdzad nas/ byang chub sems dpa' rnams kyi nges par 'byed pa'i cha dang mthun pa gang yin pa de ni/ nyan thos rnams kyi nges par 'byed pa'i cha dang mthun pa'i las kyi khyad par gyi mtshan nyid rnam pa drug gis khyad par du 'phags te/dmigs pa'i khyad par ni 'phags pa'i bden pa bzhi la mi rtag pa la sogs pa'i rnam pa la dmigs pa yin pa'i phyir ro/ /rnam pa'i khyad par ni mngon par zhen pa med pa la sogs pa'i rnam pa nyid yin pa'i phyir ro//rgyu'i khyad par ni theg pa gsum gyi rgyu nyid yin pa'i phyir ro/ /yang dag par 'dzin pa'i khyad par ni thabs la mkhas pa dang / dge ba'i bshes gnyen gyis yongs su zin pa'i phyir ro/ /yang dag par sbyor ba'i khyad par ni rnam par rtog pa rnam pa bzhi dang yang dag par ldan pa yin pa'i phyir ro//rnam pa'i khyad par ni chung ngu dang / 'bring dang / chen po'i rnam pa rnams nges par 'byed pa'i cha dang mthun pa cig shos las khyad par du 'phags pa yin pa'i phyir te/ de nyid las ji skad du dmigs pa dang ni rnam pa dang //rgyu dang yongs su 'dzin pa yin/ /zhes bya ba la sogs pa bstan pa yin no/ /lam shes pa nyid gang yin pa'i dbang du mdzad nas/ nyan thos kyi lam du nges par 'byed pa'i cha dang mthun par bstan pa de rnams kyi yang dmigs pa dang rnam pa'i khyad par dag snga ma las khyad par du 'phags te/dmigs pa'i khyad par ni gzugs la sogs pa'i phung po la stong pa nyid du dmigs pa'i phyir ro/ /rnam pa'i khyad par ni gzugs stong pa nyid gnyis su med de gnyis su byar med pa'i phyir ro/ /de la ji skad du/'phags pa nyan thos lam la ni/ /gzugs la sogs pa stong pa'i phyir/ /stong pa nyid rnams dbyer med pas/ /zhes bya ba la sogs pa bstan pa yin no/ /gang rang sangs rgyas kyi byang chub kyi lam gyi nges par 'byed pa'i cha dang mthun pa bstan pa de dag gi yang dmigs pa dang /rnam pa'i khyad par dag snga ma las khyad par du 'phags te/ dmigs pa'i khyad par chos thams cad btags pa tsam du dmigs pa yin pa'i phyir ro/ /rnam pa'i khyad par ni btags pa dang mi 'gal bar chos nyid bstan pa ni rnam pa yin pa'i phyir te/de nyid las ji skad du btags pa'i chos nyid mi 'gal bar/ ston pa'i rnam par dro gyur pa/ /zhes bya ba la sogs pa bstan pa yin no/ /gang rnam pa kun mngon par rdzogs par rtogs pa'i nges par 'byed pa'i cha dang mthun pa bstan pa de ni sems can thams cad brten pa'i sbyor ba'i lam gyis bsdus pa yin te/sems can thams cad la dmigs pa'i khyad par dang / de dag nyid sems can mnyam pa la sogs pa rnam pa'i khyad par gyis ci rigs par khyad par du 'phags pa yin te/ de nyid las ji skad du/ dro ba rnams kyis dmigs pa 'dir//sems can thams cad yin par bsngags/ /de dag nyid la sems mnyam sogs/ /rnam pa dag ni bcur bshad do/ /zhes bya ba la sogs pa bstan pa yin no/ /de ni re zhig nges par 'byed pa'i cha rnams kyis mtshan nyid kyi khyad par yin no/ /de la gang 'dir de dang der mthong ba'i lam rnam pa mang po zhig bstan pa la tha dad pa'i khyad par ci zhig yod ce na/gang re zhig lam gyi rnam pa shes pa nyid kyis mthong ba'i lam gang yin pa de ni/ 'khor ba dang mya ngan las 'das pa dag /gang yang rung bar mi ltung ba'i phyir mi gnas pa'i lam yin no//yang de nyid ji skad du/ rab 'byor byang chub sems dpas lam thams cad bskyed par bya ste/ des yang dag pa'i mtha' mngon du mi bya'o zhes bya ba la sogs pa gsungs pa yin no/ /thams cad shes pa'i mthong ba'i lam gang yin pa de ni theg pa dman pa las 'da' ba'i lam yin no//yang de nyid las nyan thos dang / rang sangs rgyas kyi phun sum tshogs pa ni byang chub sems dpa'i shes pa dang mthong bas bltas nas 'da' bar bya'o zhes gsungs pa dang / yang rgyun tu zhugs pa nas rang sangs rgyas kyi bar gyi shes pa dang / spangs pa ni byang chub sems dpa'i bzod pa yin zhes gsungs so/ /rnam pa kun mngon par rdzogs par rtogs pa'i khyad par gyi mtshan nyid kyi dbang du mdzad nas/ mthong ba'i lam bstan pa gang yin pa de ni khyad par gyi lam yin te/ de nyid las ji skad du/ bsam gyis mi khyab khyad sogs kyis//khyad zhugs bden pa'i spyod yul can/ /skad cig ma ni bcu drug gi /khyad par mtshan nyid bshad pa yin/ /zhes bstan pa yin no/ /gang yang phyir mi ldog pa'i byang chub sems dpa'i dge 'dun gyi dbang du mdzad nas/ slob ma dang bcas pa'i lam slob ma'i gnas skabs su gyur pa yin te/de nyid las ji skad du/ mthong ba'i lam dang bzod pa dang / /shes pa'i skad cig bcu drug ni/ /byang chub sems dpa' mi ldog pa'i/ /mtshan nyid yin par shes par bya/ /zhes bstan pa yin no/ /skad cig ma smos pa thams cad kyang bya ba rdzogs pa'i mtshan nyid can du shes par bya ste/ji srid kyis zhes bya ba shes pa skye bar 'gyur ba de srid do/ /yang rtse mo'i mngon par rtogs pa'i mthong ba'i lam bshad pa de ni/ gnyen po'i phyogs kyi lam yin par shes par bya ste/ de nyid las ji skad du/ mthong zhes bya dang bsgom pa zhes/ /bya ba'i lam ni so so la/ /rnam par rtog pa rnam bzhi yi/ /gnyen po'i rnam pa bzhi dang ni/ /zhes bstan pa yin no/ /de ltar de dag gis mthong ba'i lam gyi khyad par yin par shes par bya'o/ /de ni phyogs tsam yin te/ phyogs de thams cad shes pa nyid dang /rnam pa kun mngon par rdzogs par rtogs pa'i bsgom pa'i lam gyi sbyor ba bstan pa de dang de'i rnam par rtog pa'i rab tu dbye ba'i khyad par gyi mtshan nyid brtags shing bshad par bya'o/ /mngon par rtogs pa'i rgyan shes rab kyi pha rol tu phyin pa'i man ngag gi bstan bcos las/khyad par gyi mtshan nyid kyi rnam par 'grel pa'o// //ji ltar grags pa'i lam bzung nas ni 'jig rten pa yi lam gyi rjes su 'jug pa yin/ /sangs rgyas lam ni gang phyir blo sbyongs ldan pa'i mkhas la'ang 'di ni mngon sum las ldog gyur//de phyir bdag gis 'di ni sngon gyi mkhas pas nyams su myong ba med pa 'gro la phan pa'i phyir/ /shes rab pha rol phyin pa'i tshul ni gang yin phyogs tsam mkhas la gsal bar byas pa yin/ mche ldan glang po'i rgyal po khro ba dang bcas gnod pa gang gis bzlog par nus/ /stobs chen gang gis gnod pa brag ri 'phen med stobs kyis bzod par byed nus pa//de ltar bdag dang 'gal ba'i skye bos rab tu gnod pa phra mo yang ni med/ /sa las mkha' ltar skye bo dam pa dag ni thag ring khyad par 'phags/ /kye ma gzhung lugs sna tshogs kyis/ /dub pa dag gi ngal so'i gnas//shes rab pha rol phyin pa'i lugs/ /ring mo zhig nas mthong ba yin/ /shes rab kyi pha rol tu phyin pa stong phrag nyi shu lnga pa'i man ngag gi bstan bcos mngon par rtogs pa'i rgyan gyi rnam par 'grel pa/ mkhas pa chen po mos pas spyod pa'i sa brnyes pa/ slob dpon rnam par grol ba'i sdes mdzad pa rdzogs so // //rje btsun byang chub 'od kyi bka' lung gis/ /bal yul gyi paN+Di ta mkhas pa chen po shAn+ti b+ha dra'i zhal snga nas dang / 'bro seng dkar dge slong shAkya 'od kyis bsgyur/ 'di la sho lo ka lnga stong bzhi brgya yod// //