CLOSE WINDOW

D3776
བོད་ཡིག

/slob dpon dza ya se nas mdzad pa rdzogs so// //zhu chen gyi lo tsA ba dge slong rin chen bzang pos bsgyur cing zhus te gtan la phab pa'o//[ ]@##/ /rgya gar skad du/ ma hA mu dra yo ga a ba tA ra piN dA r+tha/bod skad du/ phyag rgya chen po'i rnal 'byor la 'jug pa'i man ngag tu bshad pa/ sangs rgyas dang byang chub sems dpa' thams cad la phyag 'tshal lo/ /chos nyid zab mo'i rgya mtsho chen por rab bzhugs pa'i/ /ye shes mtsho chen ma lus de snyed bdag po mdzad/ /shes rab bdud rtsi las byung dri med byis pa'i gzugs//bde gshegs sras po 'jam pa'i dbyangs la phyag 'tshal lo/ /bdag dang gzhan gyi don ma lus par myur du rdzogs par 'gyur bar 'dod pa'i rnal 'byor pa rnams kyi don du/ rab tu bsdu ba mdzad pa'i cho ga'i rim par phye ba la som nyi spangs pa'i blos 'jug par bya ba'i phyir 'di brtsams so//gang dag bstan bcos rtsom par 'dod pa dag kyang ya rabs dang tshul mthun par bya ba'i phyir bla ma dang dad pa'i lha la phyag btsal ba dang po kho nar nges par byed do/ /'dir yang slob dpon gyis 'jug par 'dod pa'i gang zag rnams kyi phyir rnam par bsdus pa mdzad pa la tshogs kyi rgyur 'gyur ba'i phyir dang po kho nar dkon mchog gsum la phyag 'tshal lo zhes smos te/'di ni bdag dang gzhan gyi don la yon tan gyi rnam pa mtha' yas pa'i phyir yid bzhin gyi nor bu dang 'dra bas de brjod pa yin no snyam du bsams nas de bshad pa'i phyir/ dkon mchog gsum zhes bya ba la sogs pa smos te/de yang rnyed par dka' ba dang / rin che ba dang / don chen po nyid du 'gyur ba dang / rab tu snang ba'i don gyis na yid bzhin gyi nor bu rin po che dang 'dra bas na dkon mchog ste/ ji ltar zhe na bsod nams dang ye shes kyi tshogs dpag tu med pa'i rin gyis rnyed par 'gyur bas na rin po che'o//phyi dang nang gi mun pa thams cad ma lus par yang dag par sel bar byed pa'i don dang / 'khor ba thams cad kyi dbul ba la sogs pa thams cad gcod par byed pa'i 'jig rten dang 'jig rten las 'das pa thams cad kyi bde ba dang / yid bde ba shin tu rnam par dag pa'i gnas su 'gyur ba'i don gyis na rab tu snang ba dang / don chen po nyid du 'gyur bas na yid bzhin gyi nor bu'o/ /de yang dus yun ring po zhig nas thos pa la sogs pa las byung ba'i phyir rnyed par dka' ba ste/ ji skad du/ /thams cad mkhyen nyid 'jig rten du//udum+bA ra'i me tog bzhin/ /brgya lam na yang res 'ga' zhig/ /'byung 'gyur yang na mi 'byung zhing / /zhes 'byung ba'i phyir ro/ /de bas na sangs rgyas bcom ldan 'das rnams ni yid bzhin gyi nor bu'i dpes dkon mchog nyid du grub bo/ 'dir gsum zhes pa ni chos dang dge 'dun yang dkon mchog nyid du bshad pa'i phyir te/de yang thog mar de khong du chud pas 'khor ba'i rgya mtsho chen po las rab tu sgrol ba dang / rgyu dang bcas pa'i sdug bsngal dang gtan du bral ba'i bdag nyid de so sor brtags pa'i 'gog pa mngon du byas pa'i mtshan nyid pas gzhan gyi 'khor ba'i chu bo'i rgyun bzlog pa'i mtshan nyid kyis tha dad pa ma gtogs par khyad par ci yang med pa'i phyir chos kyang dkon mchog nyid du grub po/der zhugs shing de las byung nas 'bras bu rnams la rim pa bzhin gnas te/ thob par bya ba la gegs su gyur pa'i gnyen pos 'bras bu mthar phyin par 'dod pa dag kyang 'das pa la sogs pa'i dus kyi khyad par ma gtogs par don dang smon lam dang gdul bya la mi mtshungs par gyur pa 'ga' yang ma mthong bas dge 'dun yang dkon mchog nyid du brjod la de'i phyir dkon mchog gsum du nges par grub bo//nyan thos kyang dkon mchog nyid du bshad pa ni rang gi las kyi sgrib pa'i phyogs gcig spangs te/'bras bu 'khor ba'i dgra ma lus pa bcom nas zhi ba la gnas pas 'phags pa'i khongs su 'gro bas de'i phyir 'di yang dge 'dun dkon mchog ces bshad do/ /de la sangs rgyas ni 'dir nyon mongs pa dang shes bya'i sgrib pa bag chags dang bcas pa drungs phyung zhing spangs pa dang /de'i gnyen po zag pa med pa'i chos kyi sa bon rab tu rgyas pas sangs rgyas te/ gnas gyur pa'i mtshan nyid chos thams cad la mnga' brnyes pa'i kun gzhi med pa zhes bya ba ni sangs rgyas rnams kyi chos kyi sku'o/ /mdor na me long lta bu'i ye shes shin tu dri ma med pa'i de bzhin nyid du gnas 'gyur ba'i mtshan nyid do//longs spyod rdzogs pa'i sku ni de'i snang ba ste/ sku gang la bzhugs nas mngon par byang chub pa'i mtshan nyid de/ mthar phyin pa'i byang chub sems dpa' rnams dang thabs cig tu 'khor gyi dkyil 'khor rnams ni theg pa chen po'i chos kyi bgro ba myong bar 'gyur ba 'di ni sangs rgyas rnams longs spyod rdzogs pa'i sku ste/gzung ba dang 'dzin pa rnam par dag pa'i mtshan nyid mnyam pa nyid kyi ye shes so/ /sprul pa'i sku ni sems can gyi bsam pa la gzigs nas thugs rje'i dbang gis gdul ba'i phyir bya ba la zhugs pa dang /rab tu bya ba mtha' yas pa ni sangs rgyas rnams ni sprul pa'i sku ste/ sgo lnga'i rnam par shes pa gnas gyur pa'i mtshan nyid so sor rtog pa dang bya ba nan tan gyi ye shes rnam par dag pa'o/ /mdor na sems rnam par shes pa tshogs brgyad lam khyad par can gyis 'grub pa'i mtha' gnas gyur pa'i mtshan nyid ye shes bzhi'i bdag nyid yin no//chos ni bstan pa dang lam dang don dam pa ste de yang bstan pa ni bstan pa ste/ gdul bya'i gnyen por gang de bzhin gshegs pas gsungs pa'i chos de lan gsum du gang gi rgyud la bskor bas gang gi rgyud la rnam par rig pa 'byung ste/gcig la gcig gi dbang gis na/ /rnam par rig pa phan tshun nges/ /zhes pa lta bu'o/ /de dag gi khyad par ni yi ge'i tshogs mangs su dogs nas 'dir ma bris pas gzhan las shes par bya'o/ / lam ni 'phags pa'i lam yan lag brgyad pa ste/ mthong ba'i lam gyi rjes las thob pa'i mtshan nyid yang dag pa'i lta ba la sogs pa'o/ /de yang yang dag pa'i lta ba ni mngon pa'i nga rgyal dang bral bar 'gyur te/ rang gi rtog pa yang dag par ji lta ba bzhin du yongs su shes pa'o//yang dag pa'i rtog pas kun nas bslab pa'i tshig gis seng ge'i sgra yang dag par sgrogs so/ /yang dag pa'i ngag dang las kyi mtha' dang / 'tsho ba rnams kyis ni rang gi dam bcas pa yang dag par brjod do/ /yang dag pa'i rtsol ba dang dran pa dang ting nge 'dzin ni mi mthun pa'i phyogs bsgom pas sbar bar bya ba'i nyon mongs pa dang nye ba'i nyon mongs pa dang /snyoms par 'jug pa'i sgrib pa dag gi go rims bzhin du gnyen por gyur pa dag go/ /de yang mnyam par gzhag pa'i dus 'ba' zhig na gnyen po 'di dag mngon du byed do/ /langs pa'i tshe ni rnam pa lnga'i sgo nas sems can rnams la dmigs so//'di dag ni byang chub sems dpa'i lam khyad par du 'phags pa dag yin no/ /don dam pa ni don dam pa ste ye shes dam pa'i yul yin pas na don te de yang dag pa'i 'jig rten las 'das pa'i ye shes so/ /de'i yul yin pa'i phyir don dam pa ste de bzhin nyid ces bya ba'i tha tshig go//yang na dam pa yang yin la don yang yin pas don dam pa ste lam gyi dgongs pa yin pas don to/ /'dus byas dang 'dus ma byas kyi chos kyi mchog yin pas na dam pa'o/ /gnod pa'i nyes pa thams cad dang bral ba'i phyir mya ngan las 'das pa nyid don to//mdor na so sor brtags pa'i 'gog pa mngon du byas pa'i mtshan nyid yin no/ /'di dag ni chos te ji snyed pa gsungs pa'i chos ma lus pa dag kyang 'dir 'dus par 'gyur ro zhes bya ba'i tha tshig go/ /byang chub sems dpa'i dge 'dun ni zad la mi skye ba'i ye shes yin la/der sems pa ni byang chub yid la byed pa ste de thob par 'dun pa zhes bya ba'i don to/ /yang na byang chub dang sems can la dmigs pas na byang chub sems dpa' ste/ byang chub mngon par rtogs nas sems can rnams 'khor ba'i btson ra las gdon par bya'o zhes gang la de lta bu'i sems yod pa de byang chub sems dpa'o//ji skad du/ bdud rtsi thob phyir lam 'di ma yin pas/ /lam ngan spongs la lam la mnos shig ces/ /lta ngan sems can mthong nas go 'byed do/ /rgyu des byang chub sems dpa' zhes brjod do/ /zhes tshigs su bcad pa'o/ /de bas na gang la de lta bu'i sems pa yod pa thun mong dang khyad par gyi lam la gnas pa'i byang chub sems dpa' rnams yin no//gang de'i khongs su 'gro ba nyid kyis rang gi lam thun mong bas 'gro bas 'bras bu mngon du byed pa nyan thos kyang ste/ bden pa rtogs pa'i rgyus mthong ba dang bsgom pa mngon du byas pa'i 'bras bu gang zag rnam pa brgyad dag ste/'di dag la rim gyis sam cig car du 'jug cing sprul pa'i sku 'ba' zhig gi 'khor du gyur pa rnams yin te/ de ltar na ji skad du bshad pa'i dkon mchog gsum po'i yon tan rin po che'i 'byung gnas la/ bla ma'i zhal snga nas gzhan la phan gdags pa'i bsam pa la bar chad med cing /tshogs kyi rgyur 'gyur ba'i phyir phyag btsal ba sngon du btang ba yin no snyam du bsam pa yin no/ /de ltar tshogs kyi rgyur gyur pa brjod nas de'i 'og tu rnal 'byor pa brjod pa de bshad par bya ste/ de'i phyir dad pa can gang zhig las su bya ba smos te/de yang rnal 'byor pa ni 'dod pa'i 'bras bu yon tan dang bcas pa ste de brjod pas gzhan dag 'jug pa'i yan lag tu 'gyur ro snyam du bsams nas dang po kho nar yul 'di nyid bstan pas 'jug par 'gyur ba dang shes par bya ba la tshigs chung ba nyid yin no zhes 'dir bstan nas/de'i rab tu dbye ba ni 'di ste/ de yang 'di'i sgra 'jug pa'i rgyun mtshan ni bstan bcos las/ las dang 'bras bu dang bden pa dang dkon mchog la yid ches pa dang 'dod pa dang sems dad pa'o zhes 'byung ba nyid do/ /de yang las dang 'bras bu dang bden pa gnyis la ni yid ches pa'i dad pa skye la/bden pa gnyis dang dkon mchog la ni 'dod pa dang sems dad pa'i dang ba skye ste/ de la las ni 'dir lus dang ngag dang yid kyi las te de yang dge ba dang mi dge ba dang mi g.yo ba'o/ /de la lus dang ngag dang yid kyi las mi dge ba rkyen tshang ba las bskyed pa ni lus ngag yid gsum gyi las mi dge ba ste/des 'phangs pa'i 'bras bu ni sdig pa'i las kyis 'phangs pa'i 'bras bu ste/ 'bras bu ngan pa gsum du sdug bsngal chen po myong bar byed do/ /'di la skur pa 'debs pa ni rgyu 'bras la yid mi ches pa'o/ /de las bzlog pa ni yid ches pa ste yid 'byung ba'i rten byed pa'i las can no zhes bya'o//lus dang ngag dang yid kyi las dge ba ni lus ngag yid gsum gyi las dge ba ste de las bzlog pa'o/ /des 'phangs pa ni lus ngag yid gsum gyi las dge bas 'phangs pa'i 'bras bu ste 'dod pa na spyod pa'i mngon par mtho ba'i 'bras bu dang bcas pa rnams so//'di la skur pa 'debs pa ni lus ngag yid gsum gyi las 'bras bu dang bcas pa la skur pa 'debs pa ste bde 'gro la rgyab kyis phyogs pa'o/ /de las bzlog pa ni yid ches pa ste brtson 'grus 'byung ba'i rten byed pa'i las can no/ /mi g.yo ba ni lus dang ngag dang yid kyi las mi g.yo ba ste rnam par smin pa mi g.yo ba zhes bya ba'i tha tshig go//des 'phangs pa'i 'bras bu ni bsam gtan gyi gnas rnams te/ 'di dag 'grub par byed pa'i ting nge 'dzin 'dod pa'i khams na mngon par 'du byed pa rnams so/ /'di dag kyang med do zhes skur pa 'debs pa ni 'di la yid mi ches pa ste gzugs yod pa na spyod pa'i bsam gtan rnams la rgyab kyis phyogs pa'o//de las bzlog pa ni 'di las yid ches pa ste tshangs pa'i gnas rnams mngon par 'grub pa la brtson 'grus skye ba'i rten can yin no/ / bden pa ni bzhi ste/ sdug bsngal dang kun 'byung dang 'gog pa dang / /lam mo/ /de la sdug bsngal dang kun 'byung la yid mi ches pa ni 'khor ba mngon du 'grub par byed pa ste/ mya ngan las 'das pa la rgyab kyis phyogs pa'i rgyur 'gyur ba'o/ / de las bzlog pa ni mngon par yid ches pa ste yid 'byung ba'i rten byed pa'i las can no/ /'gog pa dang lam la yid mi ches pa ni khams gsum las mi 'da' ba ste/ yang 'byung ba dang bcas pa'i skye ba yongs su 'dzin pa'o/ /de las bzlog pa ni yid ches pa ste nges par 'byung ba dang 'byung ba'i lam dang 'bras bu dang bcas pa mngon par 'dod pa'o//dkon mchog ni gsum ste ji skad bshad pa'i yon tan gyi 'byung gnas su gyur pa dag ste/ de yang sangs rgyas dkon mchog ni yon tan dang nyes pa thams cad phul du phyin pa dang ma lus par bsal ba'i mthar thug pa'i gnas su gyur pa dang /chos ni 'khor ba'i rgya mtsho las rab tu sgrol ba dang / rgyu dang bcas pa'i sdug bsngal dang gtan tu bral ba'i bdag nyid dang / de khong du chud par yongs su shes par byed pa dang / dge 'dun ni dge sbyong gi 'bras bu la gnas pa dang der zhugs pa dang / bla na med pa dang /sbyin gnas kyi zhing yin par yongs su shes nas sems rab tu dang bar 'gyur ba'i gnas yin zhes bya ba'i tha tshig go/ /'dir sngags kyi spyod pa la mos pa rnams kyi ni khyad par du 'dod pa nyid du gzung bar bya ste/ 'dir 'dod pa ni 'dod pa ste 'dod pa 'dod par bya ba zhes bya ba'i tha tshig go//'di ni phyag rgya chen po'i rnal 'byor te/ des don ma lus par yongs su grub pa'i phyir ro/ /can zhes bya ba ni de dang ldan pa ste rnal 'byor pa zhes bya ba'i tha tshig go/ /'di ni gang zhig ste khyad par med pa nyid du bstan pa yin no/ /gis zhes bya ba ni 'dir byed par sbyar te de yis zhes bya ba'i tha tshig go//las su bya ba zhes bya ba'i las su bya ba ste lus dang ngag dang yid kyi las so/ /de ni 'dir rnal 'byor la mngon du byas pas don chen po ma lus par yongs su rdzogs par 'gyur ba ste/ sku gsung thugs rgyud la mngon sum du bya'o zhes bya bar 'gyur ba yin no//gzhan du na ji srid 'tsho'i bar du lus ngag yid gsum phyag rgya'i mtshan ma mngon du bya ba las mi 'da' ba'o zhes bya bar yang 'gyur ro zhes bya ba'i don ni/ 'dod par bya ba la rnal 'byor du bya ba yin par shugs nyid kyis bshad zin to/ /de'i 'og tu de nyid kyis don chen po yongs su rdzogs par 'gyur ba dang de'i rgyu yang tshegs chung bar bstan pa'i phyir phan yon che zhing bla ba ni zhes bya ba smos te/de la bla ba ni sla ba ste nyams su blang ba la tshegs chung ngus don yongs su rdzogs par 'gyur ro zhes bya ba'i the tshig ste/ 'dir slob dpon gyis dad pa can gang zhig gis zhes sngar bshad pas/phyag rgya'i rnal 'byor nyams su len pa nyid dang / 'chad par 'gyur ba'i yo byad cung zad tsam gyi rgyus 'jig rten dang 'jig rten las 'das pa'i don mtha' dag ma lus par yongs su rdzogs par 'grub par bstan te 'dir 'khor ba thams cad kyi dbul ba la sogs pa'i sdug bsngal thams cad yang dag par gcod par byed pa'i don dang /bsod nams dang ye shes kyi tshogs dpag tu med pa yongs su rdzogs par 'gyur ba'i don gyis don mtha' dag bsdus pas de dag ma lus par 'dir 'grub par 'gyur ro zhes bya ba bstan pa yin no//de nyid ni chu gtor 'di yin pas zhes pa ste/ 'di zhes bya ba ni mngon sum pa'i mtshan nyid do/ /rdzas cung zad la brten pa'i rnal 'byor pa 'di nyid de ming 'di skad ces bya ba'i rnal 'byor nyid 'dod pa'i bdag nyid ma lus par 'grub par 'gyur ba nyid yin pas na 'di la brtson par bya'o zhes bya ba yin te/'dis ni dmigs par bya ba'i yul 'bras bu dang bcas pa bstan pa yin te/ de nyams su len pa la brtson 'grus 'byung ba'i rgyur 'gyur ba bstan par 'gyur ro/ /de'i 'og tu de nyid nyams su blang ba'i thabs bstan pas de bshad par bya ste/ de'i phyir de la rin po che'i snod mdzes par zhes bya ba smos te de yang rdzas la brten pa'i rnal 'byor la chu gtor zhes bshad pas de'i phyogs gcig 'dir 'chad pas de la zhes 'di brtsams pa yin no/ /rin po che'i snod ni rin po che'i snod de rin po che las byas pa 'am/ rin po che lta bur byas pa 'am rin po ches spras pa'o//de la rin po che las byas pa ni rin po che'i rgyu las byas pa ste gser la sogs pa la bzo'i khyad par du mas mdzes par byas pa'o/ /rin po che lta bur byas pa ni rin po che'i dbyibs su byas pa ste rin po che 'dra ba zhes bya ba'i tha tshig go//rin po ches spras pa ni rin po ches brgyan pa ste mdzes par byas pa'o/ /mdzes pa ni yid du 'ong ba'i khyad par dang ldan pa'o/ /tshul 'dis rnal 'byor pa rab 'bring gsum la ci rigs su bstan pa yin te/ sngar sla bas zhes bshad pas de dang 'gal ba'i nyes pas mi brdzi bar bstan pa'o//kha na ma tho ba med pa'i snod de'i nang du chu blugs la/ gzhan yang phye dang me tog la sogs pa ci 'byor pa zhes smos te/ 'di yang ci rigs par bshad pa ste/ 'gro ba dbul ba nyon mongs pas sems zhum par 'gyur ba'i nyes pa spangs pa'i phyir 'di bstan pa yin te/ de bas na rang gi rnal 'byor pa shin tu chung ba rnams la khyad par du 'di bstan pa yin no//gzhan yang gser la sogs pa rin po che sna lnga bdar ba dang zhes bya ba la sogs pas 'di yang ci rigs pa ste/ 'byor pa dam par gyur pa la sogs pa rnams te/ rang gi ji ltar 'byor pa shin tu kha zas ma smas pa ma sme ba sna tshogs pa dang /gzhan yang sman dang 'bru dang gzhan yang dri sna tshogs 'byor na lhag par yang bzang ngo zhes bya ba yin no/ /de la ma smas pa ni gzhan du longs ma spyad pa'o/ /ma sme ba ni kha na ma tho ba'i nyes pa dang bral ba'o/ /de ltar yo byad ci rigs par bstan nas de'i phyogs gcig po rnal 'byor la mngon sum du bya ba de bstan pa'i phyir/spyir gtor ma'i las bgyi'o 'tshal la brtag pa rnam pa drug ste zhes bya ba la sogs pa smos te/ rim par bkod pa 'di dag ni dkrugs pa'i mtshan nyid de ci'i phyir zhe na/ sngags kyi spyad pa spyod par 'dod pa'i gang zag rnams la sngags kyi spyod pa ni slob dpon la rag las kyi rang nyid mtshan ma thug thub tu gzung bar bya ba ma yin no zhes bya bar bstan pa'i phyir ro//'dis cir 'gyur zhe na/ sngon gyi rnal 'byor pa rgyud dag par gyur pa'i gang zag rnams kyang bla ma'i man ngag las rgyud yongs su dag par gyur to zhes 'byung ba'i phyir ro//de ltar ma yin na ni yongs su rdzogs pa'i dngos grub kyi rgyur mi 'gyur te/ de bas na bla ma'i man ngag las 'dod pa'i dngos grub kyi rgyur 'gyur ro snyam du shes par bya'o/ /de ni 'di lta ste/ dam tshig gi phyag rgya'i rnal 'byor sngon du bya ba'i bsam rgyud kyi rim pa bstan pa dang mchod pa dang sbyin pas mnyes shing tshim pas yongs su bsngo bar bstan pa'o//de'i rim pa yang / de yang bsam rgyud ni zhes bya ba la sogs pa ste/ de yang dang por snying rje chen pos 'gro ba'i don bya ba dran par bya'o/ /de'i 'og tu dkon mchog gsum la skyabs su gsol/de'i 'og tu tshad med pa bzhis byang chub tu sems bskyed do/ /de'i 'og tu lha'i sku phyag rgya chen por dran par bskyed do/ /de nas lus bsrung bar bya'o zhes bya ba'i rim pa 'di sbyar bar bya'o/ /ci'i phyir rim pa 'di sbyar bar bya zhe na/ 'dod par bya ba mngon du bya ba la phyin ci ma log par 'gyur ba'i phyir ro ji ltar zhe na/'gro ba ma lus pa'i don bya bar 'dod pa des dang po kho nar 'khrul ba'i dbang gis dngos po la mngon par zhen pas khams gsum 'khor ba'i 'gro ba lnga po 'di dag la snying rje chen po bskyed de/ sdug bsngal sna tshogs kyis gdungs pa las dgrol bar bya'o snyam du yid la dran par bya'o//de yang las kyi rnam par smin pa'i lus 'dis nus par mi 'gyur bas 'dod par bya ba la mngon sum du byas te des 'gro ba'i don nus par 'gyur bas de mngon sum du bya'o snyam du yid la bya'o/ /de'i rgyu yang gsum la skyabs su 'gro ba yin pas de'i phyir dus gsum gyi 'phags pa mdun gyi nam mkhar mngon sum du dmigs nas de'i spyan sngar gsum la skyabs su 'gro bar bya ste/de yang nye bar mtshon pa tsam du zad de/ de bas na sdig pa bshags pa la sogs pa yang bya'o/ /de ni 'di lta ste/ dkon mchog gsum la phyag 'tshal lo//dkon mchog gsum la skyabs su mchi/ /sdig pa thams cad so sor bshags/ /dge ba kun gyi rjes su smon/ /sangs rgyas byang chub yid kyis gzung / /byang chub mchog gi sems ni bskyed par bgyi/ /sems can ma lus bdag gis mgron du gnyer//byang chub spyod mchog yid 'ong spyad par bgyi/ /'gro la phan phyir sangs rgyas 'grub par shog /ces brjod pas de'i 'og tu tshad med pa bzhis byang chub mchog tu sems bskyed pa 'di bya ste/ des 'di ltar khams gsum gyi sems can ji snyed pa sdug bsngal gyi phung po dang bral bar bya'o snyam du bsam par bya'o//de yang sdug bsngal dang bral nas kyang bde ba dang phrad par bya'o snyam du mos par bya'o bde ba dang phrad nas kyang nam du yang mi 'bral bar bya'o snyam du bsam par bya'o/ /mi 'bral bar gyur nas kyang de dag la phan pa dang bde bar bya'o/ /snyam du bsam par bya'o/ / de dag la tshad med pa ni 'di ltar sems can gyi khams la tshad med pas de dag la yang tshad med pa'i ngo bo nyid du mos par bya'o/ /de ltar sems bskyed nas de'i 'og tu lha'i sku phyag rgya chen por dran pa bskyed de/ de yang 'di ltar lha'i sku ni lha'i sku ste phyag rgya chen po nyid do//de mngon sum du byed pa ni dran pa bskyed pa'o/ /dran pa ni dran pa ste de shin tu nye bar gnas pas bying rgod gnyis dang bral ba'o/ /de'i stobs kyis 'dod par bya ba las mi g.yeng ba yin te/ 'dod pa la rtse gcig tu byed ces bya ba'i tha tshig go/ /de yang rim gyis sam cig car du ste las dang po pa dang mngon du gyur pa dag gi khyad par gyis yin no//de ni 'di lta ste/ lha drug gi sgo nas dran pa bskyed de/ de la phyi nang gi chos thams cad don dam par stong pa nyid du mos pa 'di ni rnam par mi rtog pa'i lha'o/ /stong pa nyid las wA gI shwa ri muM zhes bya ba'i sgra tsam grag par mos pa ni sgra'i lha'o/ / de'i 'og tu rang gi snying ga'i tshod tsam gyi nam mkha' la zla ba'i dkyil 'khor nya gang ba gcig tu mos pa byas la de'i dkyil du wA gI shwa ri muM zhes bya ba'i yig 'bru dngul gyi glegs bam la gser chu gcig tu zhen pa bzhin du mos par bya ba 'di ni yi ge'i lha'o/ /de'i 'og tu zla ba'i dkyil 'khor yig 'bru dang bcas pa 'phros shing 'dus pa las bdag nyid 'phags pa 'jam dpal sku mdog dmar ser phyag g.yas na ral gri/g.yon na ut+pa la'i me tog bsnams pa/ rgyan thams cad kyis brgyan pa/ gdan pad+ma la bzhugs pa cig tu gyur par bsam pa 'di ni gzugs kyi bye brag gi lha'o//de nas lag pa gnyis sor mo phan tshun bsnol te gung mo gnyis bsgrengs la rtse sprad de mdzub mo gnyis gung mo'i rgyab tu sbyar la/ mthe bong gnyis gung mo la sbyar ba spyi bor bzhag la/ na maHsa man+ta bud+d+ha hAM hUM hUM zhes brjod pas dbu gtsug tor dang ldan par bsam mo/ /de nas yang lag pa gnyis khu tshur bcangs la gung mo dang srin lag bsgrengs te mthe bo'i drung du sbyar la/na maHsa man+ta bud+d+hA nAM ga ga na spar lak+Sha Na kA ru Na/ ma hA ta thA ga ta tsa k+Sha swA hA zhes brjod do/ /ye shes kyi spyan dang ldan par bsam pa 'di ni phyag rgya'i lha'o/ /des shin tu yan lag rdzogs par snga ma las khyad par du gyur par bsam pa 'di ni rnam par rtog pa dang bcas pa'i lha'o//yang na dran pa 'di ni 'dris pa dngos po nyid ma brjed pa ste/ sngar lha'i sku la mngon sum du byas pa'i dbang gis phyis snying po tsam brjod pa'i sgo nas dran pa bskyed de/ mngon sum du byed pa 'di ni cig car yid la byed pa dag gi mos pa yin no//gzhan dag ni tshul gnyis thal mo gang yang rung ba'i sgo nas las kyi lha gang yang rung ba dran pa bskyed do zhes bya ba yang 'chad do zhe'o/ /mdor na rnal 'byor pa'i mos pa ji lta ba bzhin phyag rgya chen por dran pa bskyed do zhes bya ba'i tha tshig go/ /de'i 'og tu lus bsrung bar bya ste de yang rdo rje go cha dang /srung ba chen pos bsrung bar bya ste/ lag pa gnyis thal mo sbyar la mdzub mo gnyis gung mo'i rgyab tu sbyar la/ mthe bong gnyis kyang gung mo la sbyar la/ na maHsa man+ta badzrA NAM badzra ka ba tse hUM zhes brjod pas rdo rje'i go zhu lub tu gon par gyur par bsam mo//de nas yang lag pa gnyis sbyar la mdzub mo gnyis nang du bcug ste/ gung mo dang mthe bong gnyis rtse sprad la srin lag gnyis brkyang la mthe'u chung gnyis bkug ste/ na maHsarba ta thA ga te b+h+yo/ sarba bi ka Ta b+h+yo/ /bi shwa mu khe b+h+yaH/ sarba tad khaM rak+Sha ma hA ba le/ sarba ta thA ga ta pu na ni rA dza te/hUM hUM tra tha a pra ti ha te swA hA zhes brjod pas bar du gcod pa'i bgegs thams cad kyis mi tshugs par bsam mo/ /de ltar phyag rgya dran pa sngon du byas nas de'i 'og tu thugs rje dang sngon gyi smon lam gyi dbang gis dus gsum gyis 'phags pa dang khams gsum gyi 'gro ba ma lus pa mnyes shing tshim par bya ba'i phyir rim pa 'di bya ste/de yang bsngo ba ni rnal 'byor gyi rim pa nyid du brjod zin pas/ bsngo bar bya ba dang spyir yongs su bsngo bar bya ste/ de la bsngo bar bya ba ni bsngo bar bya ba ste bsngo ba'i gnas zhes bya ba'i tha tshig go//de ni 'di lta ste bsngo ba yang bla na med pa'i byang chub chen por bsngo ste zhes bya ba la sogs pa smos te/ de yang bla na med pa zhes bya ba'i sgra ni khyad par du 'phags pa'i rnam grangs su gtogs pa'o/ /ji ltar nyan thos dang rang rgyal ba'i byang chub pas khyad par du 'phags pa'i byang chub chen po ste rgyu dang 'bras bu shin tu mchog tu gyur pa'i phyir ro//de yongs su bsngo ba ni bla na med pa'i byang chub chen por yongs su bsngo ba ste/ 'dis ni sems can gyi khams brjod kyis mi lang ba'i don bskal pa'am bskal pa las lhag pa 'am/ nam 'khor ba las ma grol gyi bar du ma lus pa med par 'gyur ro//de ltar spyir yongs su bsngo ba bstan nas khyad par du yongs su bsngo ba bstan pa'i phyir/ de yang dmigs kyis bsngo ba ni zhes bya ba la sogs pa smos te/ de ni 'dir rnam pa bzhi ste/ gang zhe na sri zhu'i mgron sangs rgyas dang byang chub sems dpa' dang nyan thos dang rang rgyal la sogs pa ji snyed pa brjod pas rdzogs pa dag go//'dis ni mchod sbyin gyi gnas spyi dang khyad par du bstan pa ma lus par bsdus pa yin no/ /de yang rim pa kha cig las ni mchod pa la sogs pa'i gnas rnams ting nge 'dzin la sogs pa'i gnas su spyan drangs te mnyes pa'i yan lag gis mnyes par bya bar 'byung na 'dir ni de lta ma yin te/rnal 'byor pa'i mos pa nyid dang chos thams cad kyi rten 'brel la sogs pas rang rang pho brang la sogs pa rnams su'am/ sangs rgyas kyi zhing yongs su dag pa rnams su yid du 'ong ba'i mchod pa'i sprin phung la sogs pa mngon par sprul pas mnyes pa dang tshim pa nyid du brtag go//'di nyid las kyang nam mkha' mdzod la sogs pa dang mchod gnas bla ma khyod kyi pho brang du zhes bya ba'i gtan tshigs kyi rang gi gzhal yas khang la sogs pa nyid du 'byung bar 'grub bo zhes bya ba yin no/ /sngags kyi tshul kha cig las kyang de bzhin gshegs pa ni sngon gyi smon lam gyi dbang gis sems can re re'i mdun na yang rtag tu bzhugs te/rang gi nyon mongs pa la sogs pa'i dbang gis 'di la mngon sum gyi blo ma skyes par zad do zhes bshad do/ /sku ji lta ba bzhin du gsung dang thugs kyang ste rtag tu 'gro ba'i don la bzhugs so zhes bshad pa'i phyir ro//gzhan yang 'di skad du de bzhin gshegs pa rnams ni sngon gyi smon lam gyi shugs kyi dbang gis sems can yongs su smin par mdzad pa'i phyir byung bas sems can gyi khams ji tsam na spyod pa de thams cad na bzhugs pa yin te/ rnam pa thams cad du sems can gyi don mdzad par kun tu snang ngo zhes 'byung ba'i phyir ro//de ltar bsngo ba byas par bstan nas de'i 'og tu spyir yongs su bsngo ba'i rdzas de bshad par bya ste de yang gtor ma nyid yin te/ de'i phyir spyir gtor ma'i las bgyi'o 'tshal la zhes bya ba spyir bstan te/ de nyid brtag pa rnam pa drug ste/ de bstan pa'i phyir de yang gang zhe na zhes dris pa nas sbyang ba dang zhes bya ba la sogs pa drug po rdzas nyid du brtag go/ /de ltar brtag par bya ba bstan nas de'i 'og tu gang gis brtag pa de bstan pa'i phyir/ de la sbyang ba ni zhes bya ba dang po ste/ chos nyid rnam par dag pa'i sngags dang phyag rgyas so zhes bya ba la sogs pa ste/'di dag gis de'i byed pa nyid du bstan pa yin no/ /de'i 'og tu 'dis ji ltar yongs su brtag pa de bstan te/ de la chos nyid rnam par dag pa'i sngags dang phyag rgya ni gang yin snyam pa la/ lag pa thal mo khong stong du sbyar la sngags 'di brjod do/ /oM sA b+hA wa bi shud+d+haHsarba d+har+m+mAHswa b+hA wa bi shud+d+hou0f85 haM zhes bya ba la sogs pa'i tshul gyis so//des rnal 'byor pa'i mos pa nyid ji ltar snang bar gyur par brtag pa bstan te de ni 'di dag gis shes par bya ste/ de yang dang pos ni gtor ma'i nyes skyon med cing dag pa chen por byin gyis brlab po zhes bya ba la sogs pa ji ltar gyur pa rnams yin no//bsngo ba'i ting nge 'dzin de ltar bshad nas sems can gyi mos pa ji lta ba bzhin du gyur pa de nyid tshigs su bcad pas kyang bsngo ba'i phyir de nas tshigs su bcad pa 'di dag gis kyang bsngo bar bya'o zhes bya ba ste/ de yang 'dir tshul 'dis yongs su bsngo bar bya ste/gang gang gi dbang gis gang la yongs su bsngo ba'i tshul gyis te de brtag par bya ba'i phyir/ gtan pa med pa'i mchod sbyin rgyal po 'di/ /ye shes lnga yi 'od zer rnam par 'phro/ /zhes bya bar sbyar te/ rgyu gang dang rkyen gang gis snyam pa la 'dir rnam pa drug gis te/chos nyid rnam par dag pa'i byin rlabs dang / /zhes bya ba la sogs pas so/ /gang la yongs su bsngo ba'i ji skad bshad pa'i rnam pa bzhi po nyid la/ dbang po lnga yi longs spyod mkho dgur ldan/ /zhes bya ba dag gis so/ /de ltar mdo'i don bstan nas tshig gi don bstan pa'i phyir/ gtan pa med pa'i mchod sbyin rgyal po 'di/ /zhes smos so/ /de la gtan pa ni bdag la sogs pa blo rnam pa gsum gyis dmigs pa ste/ de med pa ni gtan pa med pa ste dmigs pa dang bral ba'i yongs su bsngo ba zhes bya ba'i tha tshig go/ /de lta bu'i 'dzin pa rnam pa gsum dang bral ba'i mchod pa dang sbyin pa ni mchod sbyin gyi rgyal po ste/gtso bor gyur pa dang dbang bsgyur ba'i phyir ro/ /gtso bo ni thabs kyis brjod pa dang bsngags pa'o/ /dbang bsgyur ba ni mthu thogs pa med pa mnga' ba'am ldan pa'o/ /'di zhes bya ba ni 'dzin pa dang bral ba'i mos pa'i blo ste gang la de lta bu'i mngon du gyur pa yod pa'i mtshan nyid can yin no//rkyen 'di dag gi byin gyi rlabs 'di dag gis kyang sems can gyi don du 'gyur ba nyid dang rjes su mthun par mthu bskyed pa'i phyir/ chos nyid rnam par dag pa'i byin rlabs dang / zhes bya ba la sogs pa rnams yin no/ /'di ltar chos thams cad rang bzhin gyis rnam par dag pa'i bden pa'i byin gyi rlabs dang /sangs rgyas la sogs pa'i yon tan yid bzhin gyi nor bu rin po che ltar dgos pa thams cad kyi gnas su gyur pa'i bden pa'i byin gyi rlabs dang / snying po dang phyag rgya la mngon sum du gyur pa rnal 'byor pa'i bden pa'i byin gyi rlabs dang /chos thams cad kyi rten cing 'brel te 'byung ba dang / mos pa dang ting nge 'dzin rten cing 'brel te 'byung ba mthu thogs pa med pa'i bden pa'i byin gyi rlabs dang / drang srong dang rig 'dzin rnams rang gi 'dod pa la the tshom mi za ba'i bden pa'i byin gyi rlabs dang / rang gi shes rab kyis chos spyi dang rang gi mtshan nyid phyin ci ma log pa dang /don dam par rang bzhin med par rtogs pa'i bden pa dang / sems can gyi don du bla na med pa'i byang chub chen por smon te mngon par rdzogs nas smon lam gyi dbang gis snod bcud yongs su sbyang zhing / sems can yongs su smin par bya ba'i phyir thabs sna tshogs kyis 'dul bar gyur cig ces smon lam gyi bden pa'i byin gyi rlabs dang /nam mkha' mdzod la sogs pa'i ting nge 'dzin gyi dbang gis de dang rjes su mthun pa'i mchod pa'i sprin gyis sangs rgyas kyi zhing yongs su bkang nas dus gsum gyi 'phags pa thams cad mnyes shing /khams gsum pa'i 'gro ba thams cad kyi bsam pa yongs su rdzogs par 'gyur ba'i bden pa dang / de lta bu'i bden pa'i byin gyi rlabs kyis gang rnal 'byor pa'i mos pa yongs su dag pa 'di nyid ye shes lnga'i 'od zer rnam par 'phro bar gyur nas dus gsum gyi 'phags pa dang /khams gsum pa'i 'gro ba lnga po'i dbang po lnga'i longs spyod mkho dgur ldan te/ yid du 'ong ba'i rdzas phun sum tshogs par snang bar gyur to/ /de yang kha cig la snang bas thams cad la snang bar 'gyur ram snyam pa la/ nam mkha'i mthas klas gter chen gyur pa 'di/ /zhes bya ba smos te/nam mkha'i mthas ji tsam du khyab pa de tsam du sems can gyi khams kyis khyab la sems can gyi khams ji tsam na yod pa de thams cad du rnal 'byor pa'i mos pas khyab par snang ste de ltar bsam pa yongs su dag pa'i rnal 'byor pa'i mos pa las byung ba'i gter chen po nam mkha'i mtha' dang mnyam par sprul pa'i mchod pa'i sprin phung phyogs bcur 'khrigs par gyur pa 'di sri zhu'i gnas dang yon tan gyi mgron du gyur pa'i mchod gnas bla ma khyod kyi pho brang du/mchod pa'i sprin gyis gtibs shing rgyas par bsngo zhes bya ba yin te/ bsam pa dang bde ba'i mthus dus thams cad du 'byung bar gyur cig ces yongs su bsngo ba yin no//de nas yang sems can thams cad la thun mong du bsngo ba'i phyir/ sems can thams cad bde gyur cig /kun kyang gnod pa rnams dang bral/ /zhes bya ba smos te ji ltar mos pa las byung ba'i longs spyod dang de'i bsod nams kyi dbang gis 'gro ba lngar gtogs pa'i sems can thams cad gnod pa mi mthun pa dang bral nas/bde ba'i longs spyod phun sum tshogs pa dang ldan par gyur cig ces bya bar yongs su gzung ba med par bsngo ba yin no/ /yang na/ de bzhin gshegs pa bsngags pa yi//'dod pa phun sum tshogs gyur cig /ces bya ba yin te/ gzhan du yang sangs rgyas kyis rab tu bsngags pa'i longs spyod sems can gyis kha na ma thob med pa'i rdzas rnams la nye bar longs spyod pa'i bde bas tshim par gyur cig ces yongs su bsngo ba yin no/ /yang na/ sems can thams cad kyi//bsam pa yid bzhin 'grub gyur cig /ces bya ba ste/ gzhan du na dpag bsam gyi shing dang / yid bzhin gyi nor bur bsam pa'i dngos po la yid bzhin du 'byor bas tshim par gyur cig ces yongs su bsngo ba yin te/ de ltar na dang pos ni gnod pa'i nyes pa dang bral ba dang /gnyis pas ni kha na ma tho ba med pa'i 'dod pas tshim pa dang / gsum pas ni bsam pa ji ltar 'dod pa bzhin du 'byung bar 'gyur ba yongs su gzung ba med pas bsngo ba yin no/ /de ltar thun mong ba bstan nas kyang khyad par du bsngo ba bstan pa/ byol song gcig la gcig za ba'i//gnod pa de dag yong ma gyur/ /zhes bya ba la sogs pa smos te/ byol song gi 'gro ba ji snyed pa dag rang gi las kyis gcig la gcig phan tshun du zas la sogs par mthong nas de'i sems kyis gcig la gcig gsod pa la sogs pa'i gnod pa 'di dag rgyun chad nas phan tshun du 'tshe ba med par bya ba dang /snying rje'i sems dang ldan par gyur cig ces yongs su bsngo ba yin no/ /sems can dmyal ba'i sdug bsngal gang / /mi bzad rnam pa sna tshogs pa/ /zhes bya ba gang du rang gi las kyi rnam par smin pa'i 'bras bu sa bon gyi mthus rab tu rgyas par gyur pa shin tu mi bzad pa'i sdug bsngal drag po rab tu ma rungs pas nyen par gyur pa'i dmyal ba tsha ba dang grang bas bsdus pa ji snyed pa rnams/bsod nams byin pa'i byin rlabs kyis te bsod nams sbyin pa ni bsod nams kyi sbyin pa ste de yongs su bsngos pa dang / tshim par byas pa'i mthus/de dag myur du zhi gyur cig /ces bya bar yongs su bsngo ba yin no/ /de ltar khyad par du yongs su bsngo ba 'dis ni ngan 'gro gsum gyi sems can rnams rang rang gi sdug bsngal dang bral nas/ bde 'gro'i 'jig rten du lha dang mi'i lus mngon par grub nas/ las kyi lam kha na ma tho ba med pas nges par 'byung bar gyur cig ces yongs su bsngo ba yin no//de ltar gzung ba med pa'i yongs su bsngo ba bstan nas/ de'i 'og tu lha la sogs pa ste brgyad du bsdus pa dang / mi ma yin pa dag rang gi lus kyi rdzu 'phrul mngon par ston cing / sems can gyi srog ma rung bar byed cing 'tshe bar byed nyams par byed pa rnams sa'am bar snang la sogs pa la brten nas zhe sdang la sogs pa'i bsam pas thams cad du mtshan mo la sogs par rgyu bar byed pa dag de las bzlog par yongs su bsngo ba'i phyir/sa'am mkha' la 'khod pa yi/ /lha klu gnod sbyin dri za dang / /'byung po mang po gang 'khod pa//dge ba'i bsam pa rdzogs gyur cing / /ces rang gi nyon mongs pa las byung ba'i sems gnod pa'i bsam pa nye bar gnas pa de dag sdig pa dang bral bar bya'o snyam pa'i bsam pa yongs su rdzogs par gyur cig ces bzlog par yongs su bsngo ba bstan pa yin no/ /de ltar zang zing gi sbyin pas tshim par gyur nas rang rang gi las mi dge ba las bzlog pa'i phyir/de nas chos kyi sbyin pa yang rgya cher bya'o zhes smos pa yin te/ 'dir nye bar mtshon pa tsam du bstan pa 'di yin te/ chos rnams thams cad rgyu las byung / /zhes bya ba la sogs pa ste/ de la chos rnams ni 'bras bur gyur pa'i chos te/de thams cad ni chos rnams thams cad de/ ngan 'gro dang bde 'gro la sogs par smin pa rnams so/ /de dag rang rang gi las kyi rgyu las skyes pa'i 'bras bu rnams yin no zhes rigs pas shes par bya'o zhes bya ba yin no/ /de nges par rtogs par the tshom spang ba'i phyir/de rgyu de bzhin gshegs pas gsungs/ /zhes pa ste ngan 'gro la sogs pa de'i rgyu sdig pa las byung ngo zhes de bzhin gshegs pa don thams cad la tshad mar gyur pas kyang gsungs te/ de bas na rgyu dang 'bras bu ni gcig med na gcig mi 'grub pas yod pa nyid du grub po/de bzhin du sdig pa dang dge ba yang phan tshun 'gal ba yod pas/ gang na me shas che ba de na chu mi gnas so snyam du rtogs pa dang / de la 'gog pa gang yin pa/ /zhes bya ba smos te/ phyogs gnyis las gcig 'gog pas na de la zhes bya'o/ /'gog pa ni bral bar gyur pa'i rnam grangs te/sdig pa'i las mi byed ces bya ba'i tha tshig go/ /gang yin pa zhes bya ba ni tshul 'di ltar spong ba'o/ /dge sbyong chen pos 'di skad gsungs/ /dge sbyong ni de bzhin gshegs pa nyid de de bas dge sbyong chen po'o/ /des ji skad gsungs she na/ sdig pa ci yang mi bya ste/ /dge ba phun sum tshogs par spyad//rang gi sems ni yongs su gdul/ /zhes bya ba 'di gsungs te/ lus dang ngag dang yid kyi las lam ngan pa'i phyogs ma lus par spangs nas/ de'i gnyen po dge ba phun sum tshogs pa spyad cing / 'dod chags la sogs pas kun nas bslang ba'i sems mi gtsang ba'i gnyen pos rim gyis btul nas 'dod chags med pa'i dge ba'i rtsa ba la sogs pa'i spyod pa'i khyad par du 'gro ba can du nye bar gnas pa 'di ni sangs rgyas bstan pa yin zhes bya ba yin no//gzhan yang mdo sde la sogs pa zhal nas gsungs pa'i tshigs su bcad pa'i chos kyi sbyin pas kyang zhes pa ni rgyud brlan par bya'o//gsang sngags don rnams ma nor blos 'byed pa'i/ /snying rjer ldan pa'i 'gro ba dbul rnams la/ /phan phyir rim pa 'di dag legs par mdzad/ /blo ldan de la bdag kyang gus pa ste/ /khyod kyi bsam pa bdag gis mi dpogs kyang / /shin tu blo dman bdag pas rmongs rtul ba'i//'gro la phan phyir gsal bar cis mi dbye/ /bka' dang mi 'tsham nyid kyis bzod par mdzod/ /bdag ci'i shes rab blo dang mi ldan yang / /'gro la phan phyir blo yi stobs bskyed de/ /ci nus mthu yis rim par gsal bshad pa'i/ /bsod nams tshogs gyur 'gro bas rab thob nas//sgrib pa gnyis spangs tshogs chen yongs rdzogs te/ /bla med chos kyi 'khor lo bskor bar shog /chu gtor gyi las byang rim par phye ba gsal bar bshad pa slob dpon shAkya mi tras mdzad pa rdzogs so// //dge slong rin chen bzang pos bsgyur cing zhus ba'o// //