CLOSE WINDOW

D3773
བོད་ཡིག

dam tshig sems dpa' mi dmigs par bsam/ gtor ma sa gtsang sar bskyal/ rgyal po chen po bzhi'i gtor ma rdzogs so// //paN+Di ta dIpaM ka ra shrI dz+nyA na dang / lo tsA ba dge bshes ston pas bsgyur ba'o/ /[ ]@##/ /rgya gar skad du/ ma hA ba liM karma kra m-i brat+ti/ bod skad du/gtor ma chen po'i las kyi rim pa'i 'grel pa/ 'phags pa 'jam dpal gzhon nur gyur pa la phyag 'tshal lo/ /dngos po kun bdag rdo rje sems/ /ston ka'i zla ba ltar dkar ba/ /sangs rgyas kun gyi bdag nyid che/ rgyud bdag mgon por phyag 'tshal bstod/ /'jam dbyangs la sogs thams cad la//rdo rje gus par phyag 'tshal nas/ /gtor ma chen po'i rim pa 'di/ /blo dman rnams la phan phyir bshad/ /nyan pa po rtog pa dad ldan pa rnams dgos pa la sogs pa med pa la mi 'jug pas dang po re zhig dgos pa la sogs pa brjod par bya ste/ de la dgos pa ni gtor ma chen po'i las kyi rim pa shes par bya'o//des bdag dang gzhan gyi don phun sum tshogs pa ni dgos pa'i dgos pa'o/ /de yang slob dpon gyi gzhung 'dis rtogs pa 'brel pa'o/ /brjod bya las kyi rim pa nyid do/ /shes rab ye shes 'od ldan pa/ /yan lag thams cad bsdus pa yi/ /'phags pa 'jam dpal gzhon nur btud//ces bya ba ni slob dpon gyis yi dam gyi lha la mchod pa byas pa'o/ /de yang shes rab ni stong pa nyid kyi ye shes kyi rang bzhin yum shes rab kyi pha rol tu phyin pa'o/ /de yang / shes rab spros dang bral ba'o/ /zhes pa dang / stong pa nyid ni shes rab brjod/ /ces 'byung ba'i phyir ro/ /ye shes ni rnam pa lnga'o//shes rab ye shes 'od gsal ba yod pas na de skad ces bya'o/ /yan lag ni mtshan dang dpe byad de bsdus pa ni tshang ba'o/ /thams cad ni ma lus pa'o/ /yang na yan lag ni/ stobs dang mi 'jigs pa dang gzungs dang ting 'dzin dang / /so so yang dag rig dang bsrung ba med pa dang / sangs rgyas chos ma 'dres pa bco brgyad 'od ldan pas/rgyu dang 'bras bu'i yon tan khyad par kun ldan pa'o/ /zhes pa ni sangs rgyas kyi yan lag go/ /ma lus par tshang shing rdzogs pas na thams cad 'dus pa ste shing rta'i yan lag bzhin no/ /sdig pa rnams las ring du song bas 'phags pa'o/ /'jam zhing mnyen pa dang ldan pas 'jam dpal lo//sra zhing rtsub pa med pa'i dpal mnga' bas bgres shing 'gyur ba med pa'i sku na tshod lo brgyad pa lta bu gnyis su med pa'i bde ba'o/ /yang na shes rab ni spros pa dang bral ba stong pa nyid ye nas gnas pa'o/ /de yang de bzhin gshegs pa rnams byung yang rung ma byung yang rung chos rnams kyi chos nyid ni gnas pa nyid do zhes pa dang /sems can thams cad bde bar gshegs pa'i snying po can zhes gsungs pa'i phyir ro/ /de gsal zhing rtogs pas shes rab ye shes 'od ldan no/ /shes rab ye shes nyid yan lag ste/ bsdus pa'i sgra bsres pa la yang 'jug pas dbyer med do//de nyid 'phags pa 'jam dpal gzhon nu ste/ 'khor ba'i nyes pa bral ba gzugs skus 'gro ba'i don rdzogs pa/ chos sku bde ba zag pa med pa la phyag 'tshal bas na btud pa'o/ /gzhung rdzogs pa dang le lo med par bya bas na/ /gtor ma bdag gis brtsams zhes pa ste rdzas mang pos bsres pa la mi 'dzin pas gtor ma ste/mi 'dzin gtor bas gtor ma'o/ /zhes gsungs so/ /las dang po pas shes par bya ba'i phyir las kyi rim pa bri ba'o/ /slob dpon gyis grags pa dang chags pas ma yin gyi ma rtogs pa'i gang zag la snying rje bas brtsams pa ni/snying rje chen po'i sems bskyed pas/ /'gro ba ma lus don du ni/ /gtor ma chen po'i rim pa 'di/ /zhi ba'i rgyud kyi don bsdus yin/ /zhes bya'o/ /snying rje ni sems can la dmigs pa dang chos la dmigs pa'o/ /de la sems can sdug bsngal gyis sdug bsngal ba la snying rje ba dang /phyin ci log la yang dag tu 'dzin pa la snying rje ba ste go rims bzhin no/ /thams cad khyab pas chen po'o/ /'gro ba ris drug ni lha dang lha ma yin dang mi dang dud 'gro dang yi dags dang dmyal ba ste spyi la gtong bas ma lus don to/ / chen po zhes bya ba ni snga ma bzhin no/ /'jam dpal khri drug stong pa ni zhi ba dang khro bo'i rgyud kyi rtog pa mang bas na zhi ba'i rgyud kyi don bsdus pa'o/ /rgyud ni rgyu dang thabs dang 'bras bu'o/ /de la rgyud ni smin par byas pa dam tshig dang ldan pa'o/ /thabs ni de kho na nyid bcu la sogs pa'o/ / 'bras bu ni mchog bsgrub pa'o/ /gang zhig snying rje'i rlan sems kyis/ /bdag dang gzhan don sgrub 'dod pas/ /zhes bya ba ni 'jug pa'i gang zag gi mtshan nyid de/ theg pa chen po la snying rje dang mi ldan pas mi 'grub pas rtsa ba ni snying rje chen po zhes gsungs so/ /bdag bla na med pa'i byang chub 'dod pa dang /sems can gyi don bya bar 'dod pas bla ma dam pa bsten par bya zhing rgyud kyi don btsal bar bya ba yin pas/ dang po mkhas la bslab par bya/ /zhes smos te/ dbang dang dam tshig thob pa'i slob mas bla ma mkhas pa snying rje dang ldan pa mang du thos pa mnyes par byas la/bla ma'i bka' dang mi 'gal bar spyad cing rgyud kyi dgongs pa btsal bar bya'o/ /lobs nas gtor ma'i rdzas bsogs te/ rin chen snod mdzes chu gtsang dang / /rin chen lnga dang sman lnga dang / /'bru lnga dang ni snying po lnga/ /spos dang me tog mdzes pa lnga/ /dkar gsum mngar gsum phye 'am zan//'bras la sogs pa'i chan khrol dang / khur ba la sogs gtsang ma'i zas/ /ji tsam 'byor tsam bsham par bya/ /zhes bya ba ni bla ma mnyes par byas shing rgyud thos nas las kyi rim pa shes nas rin po che'i snod la sogs pa'i rdzas 'byor pa yongs su bsogs te/snod rin po che las byas pa bzo legs pa'i nang du chu ma 'bags pa mi gtsang ba la sogs pas sme bar ma gyur pa dang / gser dang byu ru dang dngul dang mu tig dang shel la sogs pa rin po che sna tshogs pa dang / kan+ta ka ri dang / ha sa de ba dang / br-i ha ti dang / daN+Dot+pa la dang / shwe ta a pa ra tsi ta la sogs pa'i sman thams cad dang / 'bras dang nas dang til dang gro dang ma sha sran ma sogs pa'i 'bru thams cad dang / tsha dang mar dang sbrang rtsi dang bu ram dang gser la sogs pa snying po thams cad dang / ga bur dang tsan+dan dang / gur kum dang /a ka ru dang / tu ru ska la sogs pa'i spos thams cad dang / ut+pa la dang / pad+mo dang / man+dA ra ba dang / tsam pa ka dang / a shwa ka la sogs pa me tog thams cad dang / mar dang / 'o ma dang / zho dang / ka ra dang / bu ram dang / sbrang rtsi dang / 'bras dang / nas la sogs pa 'bras bu rnams kyi chan dang /khur ba dang / la du dang hwags dang / thud sna tshogs pa dang / gzhan yang dri zhim zhing gtsang ma'i zas sna tshogs pa dang / phye dang zan ni gnyis ka dgos pa ma yin gyi yang na zhes pa'i don to/ /de yang rnam pa thams cad du dgos pa ma yin gyi nus tshad du 'byor tshad do//mi nus pa dang mi 'byor na ji lta bu snyam pa la de dag med na chu nyid la/ rin chen sna 'ga' bdar la btang / /zhes bya'o/ /'ga' ni gcig tsam de las lhag pa'o/ /don ni 'di skad ston pa yin te/ 'byor tshad kyi rdzas yin gyi rgya chad pa ni ma yin no//ting nge 'dzin nam dngos su ni/ /rnam lnga'i mchod pa'ang mdun du gzhag /ces pa ni rnal 'byor rgyud la phyi rol gyi bya ba gtso bo ma yin pas so/ /rdzas dang ldan pas ting nge 'dzin gyi yan lag tu lus bde bar bya ba nas/ de nas stan bde ba la 'dug ste zhes smos so//thams cad kyi don du snying rje 'gro bas na snying rje'i sems kyis mnyam par bzhag la zhes bshad do/ /mngon par rdzogs par byang chub ni tshogs rdzogs pas 'grub kyi gzhan du ma yin pas tshogs bsag dgos la/ de la yang rten khyad par can dgos pas bde bar gshegs pa spyan drangs pa ni ting nge 'dzin kho nas 'grub pas/de nas rang snying paM pad dkar/ /de dkyil a las zla dkyil 'khor/ /de dkyil d+hIHlas ral grir gyur/ /chang pa'i d+hIHlas 'od zer 'phros/ /bde gshegs sras bcas 'od kyis bkug /mdun gyi mkha' la gsal bar bsam//zhes smos te/ de'i don 'di yin te/ rang gi snying gar paM dkar po bsams la/ de yongs su gyur pa las pad+ma dkar po 'dab ma bzhi pa'i steng du a dkar po gyur pa las zla ba'i dkyil 'khor bsams pa'i steng du/ d+hIHdkar po gyur pa las ral gri'i chang pa la d+hIHdkar pos mtshan pa'o//thams cad du dkar po ni skyon gyis ma gos pa'o/ /pad+ma ni shes rab kyi pha rol tu phyin pa pad+ma'i rigs so/ /zla ba ni byang chub kyi sems so/ /ral gri ni shes rab rno ba'o/ /d+hIHlas 'od zer lcags kyu'i dbyibs can gyis sangs rgyas dang byang chub sems dpa' dang nyan thos thams cad mdun gyi nam mkha' la bzhugs par bsams la/phyag dang mchod pa la sogs pa rgyan dang ldan pas mchod pa dbul te spro bsdu gong dang 'dra'o/ /de yang phyogs bcu'i rgyal ba sras dang bcas pa la sems kyis sprul te phyag 'tshal lo/ /de yang snying ga'i d+hIHlas ni mchod pa'i lha mo mang po spros te/mchod pa dpag med dbul bar bya/ /zhes bya'o/ /bdag ni skye gnas thams cad du/ /zhes bya ba ni skye gnas bzhi'o/ /mngal dang drod gsher dang sgo nga dang rdzus pa las skyes pa thog ma med pa nas skye ba blangs pa kun du sdig pa srog gcod pa dang /ma byin par blangs pa dang / mi tshangs par spyad pa dang / brdzun dang / phra ma dang / tshig rtsub smras pa dang / ngag 'khyal pa dang / brnab sems dang / gnod sems dang / log par lta ba dang / pha gsod pa dang / ma gsod pa dang / dgra bcom pa gsod pa dang / de bzhin gshegs pa la ngan sems kyis khrag bton pa dang /dam pa'i chos spong ba la sogs pa thams cad rang gis byas pa dang / gzhan la bcol ba dang / gzhan byed pa la rjes su yi rang ba byas pa thams cad bshags so/ /sdig pa bgyis pa thams cad so sor bshags/ /zhes pa'i don to/ / bdag gi dge ba spel ba'i phyir gzhan dge ba byed pa la rjes su yi rang ba ni sangs rgyas dang byang chub sems dpa' thams cad dge ba rgya chen po'i stobs kyis mchog bsgrub cing da ltar rgyun mi chad pa dang / 'gro ba gya nom pa rnams dge ba rgyun mi 'chad pa dang / phal pa rnams dge ba bag 'ga' byed pa la dga' ba'o//bde gshegs sras bcas bsam dag pa'i/ /'gro ba'i dge la rjes yi rang / /zhes smras so/ /bsam dag ni nyon mongs pa'i dri ma dag pa'o/ /sems can thams cad la phan 'dogs pas na mgon po'o/ /de nyid thugs rje chen po mnga' bas na sems can thams cad la snod kyi rim pa dang 'tsham pa'i chos kyi 'khor lo bskor cig pa'o//ji snyed ces bya ba ni mtha' dag ces pa'i don to/ /de nyid kyis na sangs rgyas ma lus pa zhes bya'o/ /sems can ma rig pa'i mun nag gi nang na gnas pa rnams la ye shes kyi snang bas gsal bar mdzad cing bzhugs shig pa ni/mya ngan mi 'da' bzhugs su gsol/ /zhes bshad do/ /de ltar ma yin na skye shi med pa'i sku la grongs pa mi mnga'o/ /mya ngan 'das pa'i tshul ston pa ni rtag par lta ba sun dbyung ba dang le lo can la phan gdags pa'i phyir ro/ / bdag gi dge ba 'di dag gis/ 'gro rnams thams cad myur rdzogs shog /ces bya ba ni sems can thams cad la bsngo ba dang bla na med pa'i byang chub tu bsngo ba thabs khyad par can yin pas so/ /oM badzra muHzhes pa ni gong gi spyan drang ba rnams gshegs su gsol ba'o/ /gzhan dag ni rang gi snying gar bsdu bar 'dod do//de ni bdag la byin gyis rlob par dgongs pa'o/ /gshegs su gsol ba ni bsod nams bsags pas dgos pa grub par dgongs pa'o/ /da ni ye shes kyi tshogs kyi yan lag tu 'gyur ba byang chub kyi sems bskyed par bya ste/ de yang smon pa dang 'jug pa'o/ /de la smon pa ni bla na med pa'i byang chub dang / de las grub par 'dod do/ /'di ni 'jug pa'i sems so/ /de yang / byang chub sems de mdor bsdu na/ /rnam pa gnyis su shes bya ste/ /smon pa byang chub sems dang ni/ /'jug pa byang chub sems nyid do/ / 'gro bar 'dod dang 'gro ba yi/ /bye brag ji ltar shes pa ltar/ /de bzhin mkhas pas 'di gnyis kyi/ /bye brag rim bzhin shes par bya/ /zhes bshad pa'o/ /de las kyang dang po kun rdzob byang chub kyi sems su gyur pa tshad med pa'i byams pa la sogs pa'o/ /sems bskyed pa ni gzhan don phyir//yang dag rdzogs pa'i byang chub 'dod/ /ces byams pas gsungs so/ /tshad med pa ni tshad gzhal du med pa ste khams gsum pa thams cad la'o/ /de yang sems can thams cad la chos dang zang zing gi phan gdags pa dang / nad la sogs pa'i gnod pa zhi bar bya zhing nyon mongs pa spang bar bya ba dang /de ltar phan btags pa dang gnod pa spangs pas sems can thams cad bde ba dang ldan zhing tshogs rdzogs pas de la dga' bar bya ba dang / dgra zun thams cad mnyam pa bsgoms pas na/ de nas tshad med bzhi bsgom bya/ / 'gro la phan sems byams pa'o/ /pha rol gnod sel snying rje'o/ /sems can don grub dga' ba ni/ /de ni dga' ba tshad med yin/ /gzhan gyis gnod pa tshad med byed/ /de la mnyam gzhag btang snyoms so/ /zhes bshad pa'o/ /de ltar tshad med bzhi rdzogs nas/ / de bzhin nyid kyi ting 'dzin bsgom/ /zhes bya ba ni mtshams sbyar ba ste/ /de bzhin nyid ni chos thams cad kyi chos nyid do/ /shes rab kyi pha rol tu phyin pa'i mtshan brgya rtsa brgyad bshad pa ni de bzhin nyid kyi rnam grangs so/ /de nyid bshad pa na/ phyi nang snod bcud thams cad kun//ngo bo nyid kyis rnam par stong / /zhes bya ba ste/ phyi ni ri dang khang pa la sogs pa sems kyi gnas yin pas snod ces bya'o/ /de thams cad ngo bo nyid kyis stong pa nyid ni stong pa nyid las ma 'das pa'o/ /de yang shes rab kyi pha rol tu phyin pa las/ /de la phyi stong pa nyid gang zhe na/ phyi'i chos gzugs dang sgra dang dri dang ro dang reg dang chos rnams te/mi rtag mi 'jig pa'i phyir gzugs gzugs kyis stong ngo / /sgra sgras stong ngo / /dri dris stong ngo / /ro ros stong ngo / /reg reg gis stong ngo / /chos chos kyis stong ngo zhes gsungs pa'i phyir ro/ /nang gi sems can du gtogs pa rnams te snod na yod pas bcud do//de yang stong pa nyid de/ yang de nyid las nang gi chos mig dang / rna ba dang / sna dang / lce dang / lus dang / yid do/ /de yang mi rtag mi 'jig pa'i phyir mig mig gis stong ngo / /rna ba rna bas stong ngo / /sna snas stong ngo / /lce lces stong ngo / / lus lus kyis stong ngo / /yid yid kyis stong ngo zhes gsungs pa'i phyir ro/ /gzugs rnam par rtog pa ni gzugs la sogs pa 'byung ba dang 'byung ba las gyur pa'o/ /de thams cad ni rnam par rtog pa tsam ste phyi rol na med do/ /ci'i phyir zhe na/ gcig dang du ma dang bral ba'i phyir ro/ /gal te gzugs la sogs pa de dag yod na gcig pu zhig gam/du ma zhig ces de dang por bya'o/ /gal te gcig pu zhig yin na ni zin pa dang ma zin pa dang / rags pa dang phra ba dang dman pa dang gya nom pa'i cha tha dad pa mi 'thad do/ /du ma yang mi 'thad pa nyid de phra rab phyogs cha tha dad pa'i phyir ro/ / tha dad med pa yang ma yin te gegs byed pa'i phyir ro/ /gegs mi byed na ni gcig gi go de nyid gzhan gyi go yang yin pas thams cad phra rab gcig gi tshad du yang 'gyur la de nyid kyang mi snang bas gzugs la sogs pa phyi rol na mi snang ba nyid do/ /de'i phyir phra rab la cha shas dang bcas pas phra rab gcig tu mi 'grub la/ma grub pas du ma mi 'grub ste du ma yang khas mi blang ngo / /yang na gzugs la sogs pa mi 'grub pa yin te 'brel pa med pas so/ /'brel pa yod pa yang ma yin te/ sems nyid ma yin pa dang / sems dang rgyu 'bras ma yin pa'i phyir ro//rgyu 'bras kyis kyang 'grub pa ma yin te dus mi mtshungs pa'i phyir ro/ /'brel pa med pa rtogs pa ni ha cang thal bar 'gyur ba'i phyir ro/ /de'i phyir yul thams cad rnam par rtog pa tsam mo/ /de bas na stug po bkod pa las/ sems ni rnam pa gnyis dngos su/ /gzung dang 'dzin ltar snang ba ste//bum pa snam bu la sogs la/ /yul ni gang yang yod ma yin/ /zhes gsungs pa dang / sa bcu pa las kyang / kye rgyal ba'i sras dag khams gsum pa ni sems tsam mo zhes gsungs pa dang / 'phags pa lang kar gshegs pa las kyang / phyi rol gzugs ni yod ma yin//bdag gi sems ni phyi rol snang / /zhes gsungs pa'i phyir ro/ /'o na bcom ldan 'das kyis gzugs la sogs pa bshad pa ji ltar zhe na/ de ni bdag med pa tsam bstan pas 'dul ba'i nyan thos la phan gdags pa'i ched du dgongs pa can no/ /bdag med pa rtogs pas mya ngan las 'das pa'i 'bras bu thob po zhe na/des ni thar pa tsam thob kyi bla na med pa thams cad mkhyen pa ni ma yin no re zhig pa'o/ /de yang / dmyal bar 'gro ba byang chub la/ /gtan du gegs byed ma yin te/ /rang sangs rgyas kyis rnams dang / /nyan thos rnams kyis gegs byed do//zhes gsungs pa'i phyir ro/ /sems kyang rnam par rtog pa tsam las don dam par grub pa ma yin no/ /bdag dang gzhan dang gnyis ka dang rgyu med pa las mi skye ba'i phyir ro/ /bdag las mi skye ste/ skyes zin pa ni skye mi dgos la/ ma skyes pa ni dngos po med pas rgyu ru mi 'thad pa nyid do//gzhan las kyang ma yin te gal te gzhan skyon rtag pa'am mi rtag pa de dpyad do/ /rtag pa las mi skye ste rim gyis mi 'byung bar thal ba'i phyir ro/ /rim gyis 'byung na rtag pa ma yin no/ /cig car skye na ni thams cad dus cig car skye bas sngon dang da ltar med do//yang na sngar skyes pa rnams phyis kyang skye'o/ /snga phyi tha dad na mi rtag pa la mi skye bar 'grub po/ /mi rtag pa la skye na 'das pa dang ma 'ongs pa las mi skye ste med pa'i phyir ro/ /da ltar ba ni dus mnyam pa rgyu 'bras su mi 'thad do/ /dus mi mnyam pa da ltar ba ma yin no//yang na 'brel ba las sam ma 'brel ba las zhes de dpyad par bya'o/ /lam 'brel pa ni ha cang thal bar 'gyur ro/ /'brel na yang phyogs gcig gam thams cad phyogs gcig na 'brel pa tha dad pas da ltar ba mi 'thad pa nyid do/ /phyogs thams cad do zhe na/ de yang mi 'thad pa nyid de snga phyi gcig pa'i phyir ro//de nyid kyis na gnyis ka la ba skye ba yang ma yin te long ba 'dus pa bzhin no/ /rgyu med pa la skye na rag las pa med pas dus thams cad du skye'o/ /de'i phyir bcom ldan 'das kyis kyang / /dngos rnams skye ba kun rdzob tu/ /dam pa'i don du rang bzhin med//rang bzhin med la 'khrul pa gang / /de ni yang dag kun rdzob po/ /zhes gsungs pa dang / 'phags pa 'jig rten las 'das pa'i le'u las/ kye rgyal ba'i sras dag khams gsum pa 'di dag sems tsam ste dus gsum yang sems su rtogs shig ces gsungs pa dang /'phags pa lang kar gshegs pa las kyang / sems tsam la ni brten nas su/ phyi rol don la mi brtag go/ /de bzhin nyid la gnas nas su/ /sems tsam las kyang bzla bar bya/ /sems tsam las ni 'das nas su/ /snang ba med las bzla bar bya//snang med gnas pa'i rnal 'byor pa/ /de yis theg pa chen po mthong / /zhes gsungs pa dang 'phags pa shes rab kyi pha rol tu phyin pa las kyang / gzugs kyang rmi lam lta bu sgyu ma lta bu zhes pa nas/ mya ngan las 'das pa yang rmi lam lta bu sgyu ma lta bu/ mya ngan las 'das pa las lhag pa'i chos zhig yod na yang rmi lam lta bu sgyu ma lta bu'o zhes gsungs pa'i phyir ro/ /de'i phyir gzung ba dang 'dzin pa rnam par rtog pa yin pas de las 'das pa ni yul du mi byed cing ma chags pa ste/ stong pa nyid bsgom pa nas sems nyid mnyam pa'i ngang du bsgom zhes bya'o//mnyam pa'i ngang ni sems kyi mtshan nyid stong pa nyid do/ /de nyid byin gyis brlab pa ni gsang sngags kyi mthus bsam gyis mi khyab pa'o/ /de nyid kyis na oM swa b+hA wa zhes pa gzhan gyis dag par byed pa dbang phyug lta bus ma yin pas rang bzhin gyis dag la de yang gcig 'ga' ma yin pas chos thams cad rang bzhin gyis dag pa zhes bya ste/chos thams cad rang bzhin stong pa nyid yin gyi gzhan gyis stong par byas pa ma yin pas oM swa b+ha wa shud+d+haHsarba d+harmAHswa b+hA wa shud+d+hou0f85 haM zhes pa'o/ /sngags de brjod pas bdag nyid dang ni chos rnams thams cad d ag par bsam zhes bya ba ni bdag ni sems so//de yang / bdag ni legs par dul gyur na/ /mkhas pas mtho ris thob par 'gyur/ /zhes gsungs pa dang / yang / sems dul ba ni dge ba ste/ /sems dul bde ba thob par byed/ /ces gsungs pa'i phyir ro/ /chos ni gzugs dang sgra la sogs pa'o//rnams zhes pa ni mang po'i tshig ste ma lus pa la mi 'jug pas thams cad ces bsnan pa'o/ /dag pa'i don ma rtogs pa la gsang sngags kyi byin gyi rlabs kyis rtogs pa ni bsam gyis mi khyab po/ pha rol tu phyin pa las stong nyid rtogs pa dang / sbyin pa la sogs pas bsod nams bsags pa dang /snying rjes sems can gyi don byed na gsang sngags zhes bya ba dgos pa med pa yin nam zhe na ma yin te/ thabs khyad par can bsam gyis mi khyab pa'i phyir ro/ /thabs ji lta bu zhe na/ 'di lta ste dam tshig dang dbang thob pa thog mar ro/ /de nas ni bsgom pa dang /bzlas brjod dang / sbyin sreg dang / gtor ma dang / sAts+tsha dang / dkyil 'khor dang / gzhan bsrung ba dang / gang dag mi 'dul ba rnams la rdzu 'phrul la sogs pa 'dul ba'i thabs bsam gyis mi khyab pa'o/ /theg pa chen po nyid nas gtor ma la sogs pa sbyin pa dang /gzhan bsrung ba la sogs pa'i sems can gyi don byed pa'i tshul khrims dang / mchod rten la sogs pa yang yod do zhe na/ de thams cad du dbang dang dam tshig med pas gdol pa can gyi ngag dang 'dra bas med pa nyid do/ /yang de rnams thabs dang bral bas de thams cad la rmongs pa nyid kyi phyir ro//de nyid kyi phyir dpal de kho na nyid bsdus pa las/ ji ltar phyag rgyas 'grub 'gyur ba/ /de ltar byang chub spyod la sogs/ /thabs kun cho ga'i rim pas kyang / /sangs rgyas sems can don mi 'grub/ /ces gsungs so/ /des na lha'i rnam pa med pas nyan thos bzhin du lus ngag gtso bor byed pas rmongs pa nyid do//sems nyid sgyu ma lta bu de nyid thabs kyi dam pa lha dang mi bral bas thams cad 'grub pas na/ bsam pa gang dang gang dag gis/ /mi rnams yid ni yang dag sbyor/ /des ni de yi rang bzhan 'gyur/ /sna tshogs nor bu ji bzhin no//zhes gsungs so/ /thams cad mkhyen pa nyid 'grub pa'i rgyu ni thabs dang shes rab yin la/ de la yang tshogs pas 'grub kyi ma tshogs pas ma yin no/ /thabs dang shes rab med pa ma yin te/ thabs ni pha rol tu phyin pa'o/ /shes rab ni rang bzhin med pa'o zhe na/de yang 'brel pa yod pa ma yin te/ mnyam gzhag thabs dang bral ba dang / gzhan du shes rab dang bral ba'i phyir ro/ /de'i phyir sa bon rkyen dang bral ba lta bu'o/ /sbyin pa la sogs pa bsam pas kyang 'grub pa thams cad lha dang mi bral bas sgyu ma lta bur shes pa ni rgyu tshogs pa ste/gang la yang mi 'dzin pa'i shes pa de nyid lha'i rnam pas sbyin pa la sogs pa dngos su dang / sems kyi sprul pas thabs khyad par can zhes bya'o/ /lha'i rnam pa ni kun brtags pa ste smig rgyu lta bu'o/ /dngos po med pas don dang phrad pa yang med la/ brtags pas snang ba yang dngos po ste keng rus kyi gzugs brnyan la sogs pa lta zhe na yin te/longs spyod rdzogs pa'i sku dang sprul pa'i sku yang snang ba yod la/ sems can thams cad kyi don yang byed pas don dang phrad pa yin no/ /keng rus ni zhes pas dngos po lha'i rang bzhin med par ma rtogs so/ / de'i phyir gzhag pa 'di ni mthun pa ma yin no/ /gal te longs spyod rdzogs pa'i sku la sogs pa yod na 'dus byas yin pas sangs rgyas ma yin no zhe na/ dngos po yang dag par grub pa ma yin pa snang ba tsam sgyu ma lta bu dang / yang dag par rdzogs pa'i sangs rgyas la 'gag pa yod pa ma yin pas ha cang yang thal bar 'gyur ro//gzugs kyi snang ba tsam med na sems can gyi don yang med cing bka' thams cad kyang med pas de ni skur ba'o/ /de nyid kyi phyir 'phags pa chos yang dag par sdud pa las/ dper na sgyu ma'i mkhan po zhig / sprul pa thar bar bya phyir brtson/ /des ni snga nas de shes pas/ /sprul pa de la chags pa med/ /srid gsum sprul pa 'dra bar ni/ /rdzogs pa'i sangs rgyas mkhas pas shes/ /'gro ba'i ched du go bgos te/ /'gro ba de ltar snga nas shes/ /zhes gsungs pa dang / 'phags pa lang kar gshegs pa las kyang /ji ltar me long dag las gzugs/ /gcig dang gzhan yang rnam spangs par/ /snang yang de ni yod ma yin/ /de bzhin dngos po'i ngo bo nyid/ /ces gsungs so/ /lha'i rnam pa med pa la brtags pa yin no zhe na/ de kho na nyid bsgom pa yang de bzhin te mtshungs so//las dang po pa la de kho na nyid mos pa'i sgo nas sam rnam rtog brtan po'i sgo nas yin gyi mngon sum ma yin te/ mngon pa'i nga rgyal can mngon sum mo snyam du log par rtogs pa nyid do/ /dbang dam tshig gi thabs ni thabs dang shes rab tu mi 'dod de/shes rab ni rang bzhin med par shes pa thabs ni sbyin pa la sogs pa yin/ thams cad mkhyen pa'i rgyu ma yin no zhe na/ 'phags pa dang bla ma la mchod pa rgya chen po phul ba dang / sbyin gtong bya ba dang / zhi ba dang dul ba dang / sems can gyi don bya zhing gnod pa spang ba dang /dge ba la brtson par bya ba dang / bsam pa rnam rtog gzhan gyis g.yengs pa ma yin pa dang / ye shes phab pa la sogs pa bsam gyis mi khyab pa yin zhing yang dag par rdzogs pa'i sangs rgyas kyi bag chags 'jug pa'o/ /de yang byang chub tu sems bskyed pa dang /so sor thar pa'i sdom pa'i cho ga bzhin te gzhi de la brten pa'o/ /de bas na gsang sngags kyi theg pa ni rdo rje'i theg pa zhes bya ba ste mi phyed pa'o/ /'bras bu lam du byed pa yin zhing tshe gcig la sogs pas 'grub pas lam nye ba'o/ /de nyid kyang / kun du snang gi ting 'dzin ni/ / de yi rjes la bsgom par bya/ /zhes bya ba la sogs pa'o/ /kun ni ma lus pa ste snang ba ni snying rje'i sems so/ /rjes ni phyi nas te bar ma chad pa'o/ /sems can la dmigs pa yang yod pas de ma rtogs pa'i sems can la snying rje chen po bskyed pa ni/ nam mkha' lta bur khyab par bsgom//zhes bshad do/ /de zhes bya ba ni 'das ma thag pa'o/ /ma rtogs pa ni ma shes pa ste stong pa nyid ma go zhes bya ba'i don to/ /de yang sems can thams cad la bsgom gyi gcig la 'ga' ma yin pas chen po'o/ /de nyid kyis nam mkha' dang 'dra'o/ /de rjes rgyu yi ting 'dzin ni/ / shel ltar dkar ba'i yi ge a/ /nam mkha'i dkyil du gsal bar bsam/ /de la 'od 'phros 'phags pa mchod/ /sems can don byas 'dus gyur nas/ /a la thim nas 'od du zhu/ /muM yig 'od dang ldan pa zhig /nam mkha'i dkyil du gsal bar bsam/ /zhes bya ba ni de rjes bsam zhes 'brel te/rgyu ni nye ba'i rgyu ste de las skye zhes bya ba'i don to/ /shel ni gsal zhing 'tsher ba ste de lta bu'i a dkar po ni rgyu'o/ /ting nge 'dzin ni de'i rnam par sems rtse gcig pa'o/ /nam mkha' ni stong pa nyid de de'i ngang la skye ba med pa'i yi ge a'o/ /de nyid ni 'od gsal ba dang ldan pas 'jig rten khams su spro ba'o//'phros nas sems can gyi don bya ba dang 'phags pa la mchod pa ste de yang sems can la zang zing dang / chos dang byams pa dang skyabs kyis phan gdags la/ 'phags pa rnams thams cad mchod pa dbul ba yin pas so/ / de nas 'od a nyid la 'dus pa ni thim pa'o/ /zhu zhes bya ba ni a'i dngos po med pa'o/ /'o na ci'i dngos por gyur snyam pa la muM yig 'od dang ldan pa zhes bya'o/ /'od la sogs pa ni snga ma bzhin no/ /'di skad ston pa yin te stong pa nyid kyi ngang las rang rang gi sems a dkar por snang ba las 'od 'phros pas sems can dang 'phags pa la phan gdags pa dang mchod pa byas te 'dus pas muM du gyur pa'o//de'i don ni 'di yin te/ chos kyi sku skye ba med pa'i ngang las thugs rje chen pos don mdzad pa'i gzugs sku dang ldan pas na de bzhin nyid bsgoms nas/ma rtogs pa la snying rje zhing de'i don du snang bar ldang la a la sogs pa yang de bzhin no/ /de ni don dam pa byang chub kyi sems su gyur pa gnyis su med pa'o/ /da ni gzugs kyi sku nyid sems can gyi don mdzad cing gdul bya la snang ba bshad par bya ste/ de las kyang dang po rten bshad pa ni//de las e yi sgra byung bas/ /'og gi phyogs su yi ge e/ /de las gru gsum dkar po ni/ /gyen du 'greng ba tshad med bsam/ /zhes bya ste/ de zhes bya ba ni muM ste e zhes grags pa las chad pa lta bur 'og phyogs su grub pa ni dbyibs gru gsum mo/ / kha dog dkar po'i gzhal yas khang dpangs mtho zhing rgya che bas na gyen du 'greng ba tshad med ces bya'o/ /gzhal yas khang du gdan bsam pa ni/ /de nas paM gyi sgra byung bas/ /de dkyil paM byung pad 'dab ljang / /'dab ma bzhi pa nyi zlar ldan/ /zhes pa'o/ /de nas zhes bya ba ni gzhal yas khang grub nas so//sgra la sogs pa ni snga ma bzhin no/ /dkyil gyi snying po ste gzhal yas khang gi snying po la bya'o/ /paM nyid gyur pa las pad+ma 'dab ma bzhi pa kha dog ljang gu 'dab ma gnyis dang snying po la nyi ma 'dab ma gnyis la zla bas brgyan te gru gsum ni chos kyi dbyings so//pad+ma ni nyes pas ma gos pa'o/ /nyi ma thams cad mkhyen pa yin zhing zla ba byang chub kyi sems so/ /rten de lta bu dang ldan nas lha nyid sgom pa ni/ de rjes d+hIHyi sgra byung bas/ /nyi ma'i dkyil du d+hIHdkar bsam/ /de las ral gri d+hIHldan bsam/ /de las 'jam dpal zhes bya ste//sgra la sogs pa snga ma bzhin no/ /shes rab kyis thams cad gcod pa ral gri'i chang ba la d+hIHyis mtshan pa'o/ /de yongs su gyur pa las 'jam dpal lo/ /mtshan nyid ji lta bu zhe na/ sku mdog dkar po g.yas na ral gri g.yon na glegs bam/ gzhon nu'i gzugs can zur phud lnga//phyag rgya lnga ldan bdag nyid bsam/ /zhes bshad pa'o/ /'di skad ston pa yin te/ muM las e grags pa las/ e kha dog dkar po gru gsum gyi gzhal yas khang du/ muM las paM grags pas pad+mar gyur pa'i dkyil du d+hIHgyur pa'i ral gri las 'jam dpal sku mdog dkar po zhal gcig pa/phyag gnyis pa ral gri dang shes rab kyi pha rol tu phyin pa'i po ti bsnams pa/ na tshod lo brgyad pa'i mtshan nyid can ral pa'i thor tshugs can/ /dbu rgyan rigs lngas mtshan pa phyag dang zhabs kyi le'u dang mgul rgyan dang sku'i se mo do la sogs pa'i rgyan dang ldan pa'i//mdun du ma yin pas bdag nyid ces pa'o/ /de la sku gsung thugs kyi rgyas gdab pa ni/ dpral pa mgrin pa snying ga ru/ /go rims bzhin du oM AHhUM ni bsam par bya/ /zhes bya'o/ /de nas nam mkha'i muM yig thams cad kyi 'byung gnas de bdag 'jam dpal gyi dbus su babs te gyur pa las ye shes sems dpar gyur par bsam pa'o//'khor rnams bskyed pa ni/ /de nas bdag gis tsa brjod pas/ /g.yas kyi pad 'dab zla dkyil du/ /lha mo skra can sku mdog dkar/ /zhal gcig phyag gnyis rin chen g.yas/skyil krung phyed bcas rgyal mtshan g.yon/ /zhes bya ste/ tsa zhes brjod pas zla ba'i steng du tsa byung nas de gyur pa las lha mo dkar mo ming skra can ma'o/ /g.yas brkyang g.yon bskum pa'i skyil krung phyed do/ /skra ni tsha reg dang grang reg las skyob pas na de bzhin du me long lta bu'i ye shes kyi rnam rtog gi tsha grang las skyob pa'o//de rjes bdag gis ra brjod pas/ mdun gyi pad 'dab nyi dkyil du/ /lha mo dra can sku mdog dmar/ /g.yas na ral gri g.yon bad sngon/ /skyil krung phyed pa'i gar du bzhugs/ /yang ni bdag gis pa brjod pas//rgyab kyi pad 'dab zla dkyil du/ /lha mo zla 'od sku mdog ser/ /skyil krung phyed bcas ral gri g.yas/ /ut+pal sngon po g.yon pa na/ /bdag gis na yi sgra brjod pas/ /g.yon gyi pad 'dab nyi dkyil du/ /nye ba'i skra can sku mdog ljang / /g.yas na ral gri po ti g.yon//g.yas brkyang g.yon bskum stabs su bzhugs/ /zhes bya ba'i rjes ni phyi nas te lha mo dra can bskyed nas so/ /ral la sogs pa'i yi ge rnams ni snga ma bzhin no/ /mdun la sogs pa'ang ni go sla'o/ /dra ba can ni nyon mongs pa dang bral bas so sor rtog pa'i ye shes te de yang nyon mongs 'phrog pas dra ba can te/nyon mongs phyed 'phrog dra phyed yin/ /zhes gsungs pa'i phyir ro/ /de dang ldan pas dra ba can no/ /dmar ba ni sems can gyi don la chags pa'o/ /zla 'od ces bya ba ni mnyam pa nyid kyi ye shes te/ zla ba'i 'od thams cad la gsal zhing bsil ba ltar thams cad mnyam pa nyid kyi ye shes so//ser ba ni rin po che'i rigs sems can thams cad kyi tshe dang bsod nams 'phel bar byed pa'o/ /nye ba'i skra can ni bya ba grub pa'i ye shes te me long lta bu'i ye shes kyi shugs kyis byung bas nye ba'o/ /ljang gu kha dog sna tshogs zhes bya ste las thams cad pa'o//da ni de rnams kyi phyag mtshan bshad par bya ste/ rin po che ni dgos 'dod sdod pa'o/ /rgyal mtshan ni chos mi nub pa'o/ /ral gri shes rab kyis thams cad gcod pa'o/ /pad+ma sngon po ni 'gro ba'i don byas kyang nyes pas ma gos pa las mi 'gyur ba'o/ /ut+pal ni thams cad phan 'dogs shing lan la re ba med pa'o//po ti ni chos kyi char 'bebs pa'o/ /lha mo bzhi po de rnams kyang phyag rgya dang ldan par bsam zhes bya ba ni snga ma bzhin no/ /rnal 'byor pa'i lus ni rgya mtsho'i gzings bzhin du bskyang bar bya ba yin na bsrung ba'i de kho na nyid ji lta bu snyam pa la bdag nyid 'jam dpal yin phyir dang / yi ge gsum gyis byin brlabs phyir/ /lus bsrung cho ga bya mi dgos/ /zhes bya ste/ bdag 'jam dpal gyi rnal 'byor nyid bsrung ba'i cho ga yin pas/ gzhan gyi bsrung ba la rag ma lus pa dang / sku gsung thugs byin gyis brlab pa yang bsrung ba mchog tu gyur pa'o zhes pa'i don to//tho rangs la sogs pa thog ma 'jug pa'i dus dang / gnas skabs gzhan gyi bya ba dang / mchod pa la sogs pa'i yan lag tu khrus dang phyogs dang dus dang skar ma dang rdzas rnams kyang rkyen du gyur pa yin na ci'i phyir ma bshad ce na/ snying rje'i sems kyis mnyam 'jog phyir//zhes bya ste gtan tshigs de'i phyir ro/ /de'i phyi rol kyi khrus dang phyogs dang dus dang skar ma dang rdzas kyi kha dog ni sogs pa zhes bya bar bsdu'o/ /de rnams kyi rtsol ba bya mi dgos te snying rje chen po dang / stong pa nyid dang lha'i rnal 'byor nyid kyis grub pa'i phyir ro//de yang / khrus dang gtsang sbra 'dir mi dgos/ /dka' thub dka' spyad mi dgos te/ /sangs rgyas kun dang sems dpa' che/ /rtag tu sbyor bas 'grub par 'gyur/ /zhes gsungs pa lta bu'o/ /snying rje dang ldan na sdom pa gsum la gnas te/ de yang khrus kyi cho ga yin pas na sdom pa gsum la gnas pa ni//dang po khrus su bshad pa yin/ /zhes gsungs so/ /byas pas nyes par 'gyur ram snyam pa la byas pa la yang nyes pa med de de lta bu la dga' ba dang rnal 'byor gyi rkyen du 'gyur na bya ba nyid do/ /rnam pa thams cad du dgos pa ma yin gyis bya ba ni yin no zhes pa'i don to//de ltar lha'i rnal 'byor dang ldan pas bsgom pa dang / bsgoms pas dub na bzlas pa bya ba la sogs pa ni/ bdag gi nang gi snying ga ru/ /muM yig 'od dang ldan pa bsam/ /de las 'khor lo rtsibs brgyad bsam/ /zhes bshad do/ /bdag 'jam dpal gyi nang gi ye shes sems dpa' ste/de'i thugs kar muM dkar po 'od zer sna tshogs can gyur pa las/ 'khor lo rtsibs brgyad dang ldan par bsam zhes pa'i don to/ /mdo sde dang / 'dul ba dang / mngon pa theg pa che chung gi drug dang gsang sngags las bya ba gtso bo dang /rnal 'byor gtso bo ste brgyad kyis chos kyi 'khor lo skyon med par bskor bas dkar po rtsibs brgyad pa'o/ /de'i mtshan nyid ji lta bu zhe na/ mu khyud gnyis dang ldan par bsam/ /zhes bya ste mu khyud rim pa gnyis kyis bskor ba'o/ /de yang yig 'bru dgod pa ni phyi rol gyi mu khyud la kA li zhes bya ste/ka kha ga g+ha nga / tsa tsha dza dz+ha nya/ Ta Tha Da D+ha Na/ ta tha da d+ha na/ pa pha ba b+ha ma/ ya ra la wa/ sha Sha sa ha/ k+Sha/ de rnams bsam mo/ /mu khyud nang ma la ni A li zhes bya ste/ a A i I u Ur r-i r-I l-i l-I e i o au aM aH/ de rnams bsam pa'o/ /dbus kyi lte ba ste 'khor lo'i snying po la oM bsam mo zhes pa ni gzhan 'dren pa ste 'khor lo'i rtsibs kyi yig 'bru'o//de nyid bshad pa/ a ra pa tsa na d+hIHdang / mthar ni swA hA yod pa rnams zhes bya ste dang ni swA hA bsdu'o/ /snying po las mthar gyur pa ni rtsibs nyid do/ / kha cig ni swA hI mtha' can zhes bya bar 'dod do/ /don ni 'di yin te/ a ra pa tsa na d+hIHswA hA brgyad rtsibs re la yig 'bru re dgod pa'o/ /de nyid kyis ni/ rtsibs brgyad la ni klag phyogs su/ /sems kyis bri zhing bsam par bya/ /zhes bshad pa'o/ /klag phyogs ni mdun nas g.yas phyogs nas phar rim pas so//rim gyis bri ba ni gsal bar bsam pa'o/ /de yang gang gi tshe bar skabs su skyo bar gyur pa de'i tshe mchod pa dang / bstod pa byas la bsgom par bya'o/ /de nas kyang skyo bar gyur na bzlas pa bya ste/ oM a ra pa tsa na d+hIHswA hA zhes bzlas so//'di skad ston pa yin te/ tho rangs kyi dus su khrus la sogs pa byas sam ma byas kyang rung ste/ stan bde ba la 'dug nas snying rje'i sems kyis mnyam par bzhag la mchod pa rnam pa lnga dang ras ris la sogs pa'i sku gzugs dang maN+Dal byi dor legs par byas par me tog tshom bur dgram pa dang /sngar bshad pa'i gtor ma bsham pa'am/ yang gtor ma ma bshams pa yang rung ste sngar bshad pa'i yan lag bdun pa la sogs pa byas pa ste tshad med pa bzhi bsgom pa dang / yang na yan lag bcu gcig pa bya ste/ phyogs dus kun na bzhugs pa yi//sangs rgyas chos dang dge 'dun te/ /dkon mchog gsum la skyabs su mchi/ /bdug pa me tog mar me sogs/ /dngos su bshams dang sprul pas mchod/ /bdag gi skye gnas thams cad du/ /sdig pa ci bgyis thams cad bshags/ /bde gshegs sras bcas bsam dag pa'i//'gro ba'i dge la rjes yi rang / /mgon po thugs rje che rnams kyis/ /chos kyi 'khor lo bskor du gsol/ /ji snyed sangs rgyas ma lus pa/ /mya ngan mi 'da' bzhugs su gsol/ /bla na med pa'i byang chub tu/ /dus 'di phan chad sems bskyed bgyi//mgon po rnams la lus 'di dbul/ /thugs la bzhes shing dngos grub stsol/ /bdag gi dge ba de dag gis/ /'gro rnams thams cad myur rdzogs shog /so sor thar dang byang chub sems/ /rig 'dzin sdom la gnas par bgyi/ /zhes brjod la gshegs su gsol lo//de nas tshad med pa bzhi la sogs pa nas snying gar 'khor lo bsgom pa'i bar du snga ma bzhin du byas la/ lte ba'i oM las 'od 'phros pas ye shes sems dpa' spyan drangs la mchod pa rnam pa lnga la sogs pa dbul zhing bstod la de nas gsal bar bsgom pa'o/ /de nas skyo bar gyur na mchod pa la sogs pa bya ste/de nyid bshad pa/ de las oM las 'od zer ni/ /lcags kyu'i dbyibs 'phros yi dam lha/ /'khor bcas bkug nas nam mkhar bsam/ /zhes bya'o/ /snying ga'i oM las 'od zer lcags kyu'i dbyibs 'dra ba 'phros pas yi dam gyi lha 'jam dpal 'khor lha mo bzhis bskor ba'i ye shes sems dpa' spyan drangs la mdun du bzhugs su gsol ba'o//de yang sgom pa gtso bor byed pas dzaHhUM baM hoHzhes brjod pas dgug pa dang gzhug pa dang bcing ba dang dbang du bya bas gnyis su med par bsgom mo/ /bzlas pa gtso bor byed na mdun nyid du'o/ /de nyid mchod par 'dod pas de la dngos sam ting nge 'dzin gyis/phyag dang mchod pa dbul bar bya/ /zhes bya ste/ snyan sngags dang bcas pa'i phyag byas pas bdag gi snying ga'i oM las lus mdzes pa rgyan dang ldan pa grangs med pas phyag byas par bsam pa dang / yang de nyid du thim par bsam pa la lha mo dpag tu med pa yang oM las 'phros te mchod pa byed par bsam zhing dngos su dbul lo//de nas yang oM nyid la thim pa'o/ /dngos su ma 'byor na ting nge 'dzin gyis kyang dbul lo/ /mdun gyi lha rnams gsal bsams la/ /rang gi snying ga'i sngags gsal bar/ /zhes bya ba ni bzlas brjod bya ste/rang gi snying ga'i sngags ni oM dang rtsibs brgyad kyi yi ge'o/ /mdun gyi lha ni 'jam dpal 'khor dang bcas pa'o/ /de thams cad gsal bar bsgom zhing bzlas zhes pa'i don to/ /bzlas pa'i bsam pa ni/ bzlas pa yi ni mchod pa 'di/ /yid kyis bzlas pas 'od 'phros te//'od las lha mo mang spros te/ /mdun gyi lha rnams mchod bsam zhing / /lha mo nyid kyang der thim par/ /zhes bya ste/ bzlas pa byas pas snying ga'i yig 'bru las 'od 'phros pas lha mor gyur nas mchod pa phul nas slar 'dus pa'o/ /brgya rtsa brgyad kyi grangs su bya//zhes bya ba ni mchod pa tsam du zad kyi nges pa kho na ma yin no/ /de yang bsgom pa gtso bor byed pa ni snying ga'i yig 'bru kho na gsal bar bya zhing bzlas la/ bzlas brjod gtso bor byed pas mdun gyi lha dang sngags kyi 'od zer spro bsdu gsal bar bya'o/ /kha cig na 'od 'phros pas thugs dam bskul nas slar 'dus pas dngos grub stsol bar gsungs so//de nas yang skyo bar gyur na mchod pa 'bul/ rdo rje gnod sbyin yongs su bzlas pa'i chus mchod pa'i yan lag rnams bsangs la oM badzra d+hU pe hUM zhes spos byin gyis brlab/ oM badzra puSh+pe hUM/ oM badzra A lo ke hUM oM badzra ga n+d+he hUM zhes me tog dang mar me dang dri chab byin gyis brlabs te/de rnams rang rang gi lha mor ro/ /oM a kA ro mu khaM sarba d+ha rma NAM Ad+ya nu t+pan+na twAd ces pa lha'i zhal zas ro brgya dang ldan pa mi rtog pa'i ye shes thob par byin gyis brlabs la/ de nas dung la sogs pa chu gtsang dri dang me tog dang sman sna tshogs dang ldan pa la rdo rje sems dpa' yongs su bzlas pa dbul te/de yang kha cig tu ni khrus kha cig tu ni byang chub kyi mchod pa'o/ /de nas mchod pa thams cad dbul bar bya ste/ oM sarba ta thA ga ta d+hU pa pU dza me g+ha sa mu dra spar Na sa ma ye hUM zhes bdug spos dbul/oM sarba ta thA ga ta pu Sh+pa pU dza me g+ha sa mu dra spa ra Na sa ma ye hUM/ oM sarba ta thA ga A lo ke pU dza me g+ha sa mu dra s+pha ra Na sa ma ye hUM/ oM sarba ta thA ga ta ga n+d+he pU dza me g+ha sa mu dra s+pha ra Na sa ma ye hUM zhes me tog dang / mar me dang / dri chab rnams go rims bzhin dbul/ oM sarba ta thA ga ta nai bi d+ye pU dza me g+ha sa mu dra spa ra Na sa ma ye hUM zhes zhal zas dbul/gzhan yang na bza' la sogs pa yang oM dang mngon par bzlas la dbul lo/ /de nas bstod pa bya ba ni/ gzhon nu mdzes pa'i sku 'chang zhing / /shes rab sgron mas rab brgyan pa/ /'gro ba'i gti mug mun sel ba//'jam pa'i dbyangs la phyag 'tshal bstod/ /ces bya'o/ /gzhon nu snga ma bzhin no/ /mdzes pa ni tha dad pa dang / tha mi dad pa'i rgyan tshang ba'o/ /tha dad pa ni dbu rgyan la sogs pa'o/ /tha mi dad pa ni mtshan dang dpe byad de de lta bus mdzes par byas pa'i sku dang ldan pas 'chang zhes pa ste sku la bstod pa'o//shes rab ni shes bya thams cad las phul du gyur pa ste gnyis su med pa'i ye shes so/ /de nyid sgron ma ste ma rig pa'i mun nag 'joms pa dang / thams cad gsal bas na thugs la bstod pa'o/ /rang nyid kyis rtogs pa gzhan la bstod pas gzhan gyi ma rig pa 'joms shing ye shes gsal bar byed pas 'gro ba'i gti mug gi mun pa sel ba zhes gsung la bstod pa'o//gzhan dag ni longs spyod rdzogs pa'i sku dang / chos kyi sku dang sprul pa'i sku la bstod pa ste go rims bzhin du 'dod do//de lta bu dang ldan pas 'jam pa'i dbyangs zhes bya ste snyan ngag gis bstod pa'o/ /de la gtor ma tsam gtong bar 'dod pas ni 'khor lo dang yig 'bru la nga rgyal tsam byas la bzlas brjod brgya rtsa brgyad tsam byas nas bstod pa bya'o/ /gtor ma la mi 'jug pa rnams kyis ni 'di nyid du lha rnams gshegs su gsol te rgyas par 'og nas 'byung ngo //de nas langs la mtshan yang dag par brjod pa yang lha'i nga rgyal dang ldan pas dus gsum du gdon no/ /spyod lam gzhan du yang lha'i nga rgyal gyis gnas par bya'o/ /kha zas la sogs pa yang raM gyis nyes pa dang bral bar bsam/oM sarba d+ha rma te badzra si d+d+hi hUM zhes brjod/ a las bdud rtsir gyur par bsam/ oM a mr-i te hUM phaT ces brjod pa'o/ /gzhan dag ni oM sarba ka ri zhes pas nyes pa dang bral zhing / oM sarba sid+d+hi zhes brjod pas yon tan thams cad kyi 'byung gnas bdud rtsir bsam zhes gsung ngo //de nas lha'i nga rgyal gyis bza' bar bya'o/ /gzhan yang sbyin sreg la sogs pa gsang sngags kyi bya ba thams cad dang klog pa la sogs pa chos spyod bcu'i bdag nyid kyi mdo don dran pa'i blo bzhag nas zhes gsungs pa thams cad kyang nga rgyal shes par bya ste lha'i nga rgyal de nyid kyis bya'o//de yang / gang dag tu ni rnam pa med/ /las kyi cho ga rnams med pa/ /der ni spyi rgyud las gsungs pa'i/ /cho ga mkhas pas brten par bya/ /zhes gsungs pa lta bu'o/ / gtor ma gtong bar 'dod pas gtong ba'i rim pa ji lta bu zhe na/ bstod pa'i rjes la gtang bar bya ba yin te/ de nyid bshad pa/ de rjes gtor ma byin brlabs te/ /lag pa rdo rje thal sbyar nas/ /zhes bya ste bstod pa'i rjes te phyi nas bar ma chad par gtor ma byin gyis brlab pa'i phyag rgya lag pa rdo rje thal mo sbyar ba ste/thal mo sbyar ba'i sor mo phan tshun rtse bsnol ba'o/ /de yang thal mo dam du bsdams pa las sor mo thams cad bsnol ba ni rdo rje thal mor bka' stsal te zhes gsungs so/ /lag sor rnams la raM kha dog dmar po bsam mo/ /lag sor kho na la 'am zhe na/ gtor mar yang ni zhes bsnan pa'o/ /raM kha dog dmar po bsgoms te/ de nas lag sor gyi raM las 'od 'phros pas gtor ma'i la raM la phog ste/ 'od zer de rnams kyis gtor ma'i nyes pa dang / skyon du gyur pa 'bags pa dang / nyams pa dang / rme ba dang / dri ma can du gyur pa dang / mi mthun pa thams cad dag par bsam mo/ /sngags bdun bzlas shing phyag rgya bca'/ /zhes pa ni/ lus ngag yid gsum gyi spyod pa nus pa can du bya ba'i phyir lan grangs bdun no/ /de nyid kyi sngags ni oM swa b+hA wa shud+d+haHsarba d+harmAHswa b+hA wa shud+d+hou0f85 haM zhes bya ba'o/ /lag pa rin chen sgrom bu zhes bya ba ni snyim pa mdun du gzhag pa'i sor mo rnams rtse mo sbyar te tshigs zur can du bya ba'o//de lta bur byas pa'i tshigs kyi bar dang gtor ma'i nang du swa kha dog ser po bsam pa'o/ /swa las 'od zer byung ste 'phros pas gtor ma'i swa la phog pas rgya chen po 'jig rten thams cad gang ba 'dod pa'i yon tan gzugs mdzes pa dang /sgra snyan cing yid du 'ong ba dang / dri zhim pa dang / ro mngar zhing zhim pa dang / reg bya 'jam zhing yid du 'ong ba lnga'i rang bzhin du gang bar bsam mo/ /sngags dang phyag rgya lan bdun bzlas/ /zhes bya ba ni snga ma bzhin no//oM na maHsarba ta thA ga ta b+h+yo bi shwa mu khe b+h+yaHsarba tad khaM ung+ga te s+pha ra Na hi maM ga ga na khaM swA hA/ zhes bya ba ni sngags so/ /lag pa thal sbyar gshog par gdengs/ /zhes bya ba ni thal mo sbyar ba las bskyed la gshog pa gdengs pa ltar byas pa'o/ /lag sor dang gtor ma'i nang du a dkar po bsams pa las 'od 'phros pas gtor ma'i a la phog pas bdud rtsir gyur pa'o//de nyid kyis/ lag sor dang ni gtor mar a/ /de nas bdud rtsi'i rgya mtshor 'khyil/ /zhes bya ba'o/ /phyag rgya sngags ni lan bdun bzlas/ /zhes bya ba ni bshad zin to//sngags ni oM a mr-i te kuN+Da li ha na ha na hUM phaT ces bya'o/ /lag pa lcags kyu'i phyag rgya bcas/ /zhes bya ba ni lag pa gnyis khu tshur bcangs pa'i mkhrig ma bsnol la/ mthe chung lu gu rgyud du sprel/ /mdzub mo lcags kyu ltar byas pa'o/ /snying ga'i 'khor lo'i lte ba'i oM las 'od zer lcags kyu'i dbyibs can 'phros pas 'od zer dang sngags 'og nas 'byung ba 'di gnyis kyis spyan drangs te zhes bya ba'i don to//oM A hUM/ e h+ye hi b+ha ga wAn ma hA kA ru Ni ka dr-i sh+ya ho sa ma ya hoH zhes bya ba ni sngags so/ /spyan drang snyam pa la/ bde gshegs sras bcas 'khor bcas kun//zhes bya ba ste/ sangs rgyas rnams bde bas bde bar gshegs pa'o/ /sras ni byang chub sems dpa'o/ /'khor ni nyan thos dang rang sangs rgyas rnams so/ /yang na thams cad kyang bde bar gshegs pa'i 'khor te khams gsum ni sems can thams cad dang bcas pa zhes pa kha cig 'dod do//kun zhes bya ba ni ma lus pa'o/ /mdun gyi nam mkha'i gdan thog tu yid kyis mngon sum dang 'dra bar gsal ba ni gzhug pa'o/ /de nas ting nge 'dzin gyi spro bsdus de la phyag 'tshal ba dang / mchod pa dbul ba'o/ / spro bsdu gang las she na/ thugs ka'i oM las spro bsdu zhes bya'o/ /ji lta bu zhe na/ bdag lus dpag tu med pa dang / /lha mo dpag tu med pa spro/ /zhes bya ste/ dpag tu med pa ni grangs dang mtshan nyid do/ /ting nge 'dzin 'ga' zhig gam zhe na ma yin te/ mchod pa dngos su yod na yang //tshigs bcad dang ni sngags kyis dbul/ /zhes bya ste tshigs su bcad pa ni/ bdug spos phal cher bdug spos bla re ste/ /bdug spos bkod pa'i 'od zer rab brgyan zhing / /bdug spos sna tshogs bdug spos gcal du bkram/ / bdag nyid chen po rgyal ba de dag mchod/ /ces bya ba la sogs pa'o/ /sngags ni sngar bstan pa rnams so/ /da ni 'gro ba la gtor ma sbyin pa bshad par bya ste/ de rjes gtor ma bsngo bar bya/ /zhes dam bcas pa'o/ /de nyid bshad pa ni lag pa g.yas pa rdo rje khu tshur bcangs mdzub mo bsgrengs nas rtse mo hUM dkar po bsam mo//hUM las 'od 'phros pas so so'i gnas su 'byung ba ni ji ltar mos pa dang / ji ltar dga' bar spyod pa'o/ /sngags dang phyag rgya lan bdun bzlas/ /zhes bya ba ni bshad zin to/ /oM sarba ta thA ga ta a wa lo ki te sam+b+ha ra sam+b+ha ra hUM zhes bya ba ni sngags so//lag pa g.yas pa rdo rje khu tshur snying gar bcas la g.yon pa mchod sbyin gyi snod 'degs pa ltar byas la g.yon pa'i sor mo bre ga la ste rtse mo'i nang lnga la yi ge hUM dkar po lnga ni sor mo re la hUM re bsam mo/ /hUM rnams las 'od 'phros pas mchod pa'i lha mo dpag tu med pa 'thon nas de rnams ni byon pa ltar thams cad la ster bar byed pas lag tu lhan lhan gtad par bsam zhing sngags dang phyag rgya lan bdun bca' zhes bya'o//sngags ni oM dz+nyA na a wa lo ki te sa man+ta s+pha ra Na rasmi b+ha wa sa ma ya ma hA ma Ni du ru du ru hr-iM da ya dza la ni swA hA zhes bya ba'o//lag gnyis so sor nang du bsnol/ /zhes bya ba ni gcig gi nang du gcig gi sor mo rnams bcug pa'i mthe bong gnyis brkyang ste lto gnyis la dza dmar po re bsam mo/ /dza de gnyis las 'od zer lcags kyu lta bu 'phros pas 'phags pa dang sems can thams cad dbang du bsdus nas de nas ni thams cad la ci bcol ba'i phrin las mdzad pa dang byed par bsam mo//de nas sngags 'og nas 'byung ba 'di phyag rgya dang bcas pa lan bdun bzlas so/ /oM na maHsa man+ta bud+d+hA nAn gra he shwa re pra dzo ti ni ma hA sa ma ya swA hA/ de nas sngags thams cad nus pa brtan pas na rten cing 'brel par 'byung ba'i snying po bsngags/ye d+harmA he tu bra b+ha wA he tu n+te ShA n+ha thA ga to h+ya wa data/ /te ShA ny+tsa yo ni ro d+ha e waM bA dI m-i hA shra ma NaHzhes bya ba bzlas so/ /kyang zhes bya ba ni bsdu ba ste chos kyi sbyin pa yang kha ton bya zhes bya ba'i don to/ /de nyid bshad pa de nas chos kyi sbyin pa ni//rgya chen rab zab mdo gdon bya/ /zhes bya bas bstan to/ /chos bshad pas thams cad kyis mnyan pas thams cad byang chub sems su ldan par bsam pa dang / bdag gis kyang nyan pa dang / gsal ba dang / thams cad du thos pa dang /thams cad kyi skad du go ba dang / chos kyi sgo mo mtha' yas pa dus gcig la ston par bsams la/ kha ton bya ba'am klag pa yang rung ste/ zab pa dang don dam pa spros pa dang bral ba ston pa dang / rgya che ba thams cad phun sum tshogs pa ston pa'o/ /ni zhes bya ba ni bsnan pa'am go rims bzlog pa'o//da ni gshegs su gsol bar bya ste/ de yang de rjes mdun gyi lha 'jam dpal 'khor dang bcas pa dang sangs rgyas dang byang chub sems dpa' la sogs pa rnams ting nge 'dzin gyis gsal bar ni mchod pa dang ni bskor ba dang / phyag bya ba dang /bstod pa byas par bsams nas yi ge brgya pa'i bshags pa/ oM badzra satwa sa ma ya/ ma nu pA la ya/ badzra satwa twe no pa tiSh+Tha/ dr-i D+ho me b+ha wa/ su toSh+yo me b+ha wa/ a nu rak+to me b+ha wa/ su bo Sh+y+ao me b+ha wa/ sarba sid+d+hi m+me bra yats+tsha/ sarba ka rma su tsa me tsi t+taM shre yaH ku ru hUM/ ha ha ha ha ho b+ha ga wAn/ sarba ta thA ga ta/ badzra mA me su ny+tsa/ bi dzrA b+ha ba/ ma hA sa ma ya sa hwa AHzhes bya ba bzlas la/ de nas gshegs su gsol ba ni oM badzra muHzhes bya'o/ /ji ltar zhe na thams cad rang rang gi gnas su gshegs pa ni dgyes nas snyan ngag dang bcas pas gshegs par bsam mo/ /'o na bdag nyid lha'i 'khor dang bcas pa ci lta bu zhe na/bskyed pa'i lha mo bzhi po ni snying ga'i 'khor lo yi ge rang rang gi sa bon du gyur pa ra dang / pa dang / tsa dang / na la bsdu'o/ /'khor lo rtsibs brgyad kyi yi ge brgyad po ni lte ba'i oM la bsdu bar bya'o/ /de nas oM las bsdus pas oM las 'od byung ste lus thams cad la 'od kyis khyab nas de yang slar 'dus pas oM nyid la 'od dang lus su bcas pa thim nas oM nyid kyang 'od du zhu ste/chos thams cad stong pa nyid kyi rang bzhin te gzung ba dang 'dzin pas stong pa stong pa nyid rnam par thar pa'i sgo dang / rgyu mtshan dang bral ba mtshan ma med pa'i sgo dang / 'bras bu re re smon pa med pas smon pa med pa rnam par thar pa'i sgo gsum dang ldan par bsam mo/ /las kyi rim pa gang byed kyang sngon 'gro'i cho ga gtor ma 'di yin la/ 'di rtsom pa'i gang zag la phan yon ni shes bya dang nyon mongs pa'i sgrib pa gnyis byang /bsod nams dang ye shes kyi tshogs gnyis rdzogs nas bla na med pa'i byang chub chen po ni shin tu myur bar thob par 'gyur ro/ /srid pa nyid gti mug gi dgon pa ste chos kyis dben pa yin la/ des na rnal 'byor pa rnams kyang lam gyi rab gsang sngags kyi lam stor na gzhan rnams lta ci smos zhes bya'o//lam stor ba rnams la de bstan pa'i don du bdag gis lam 'di brtsams pas 'gro ba sems can tshad med gzhal du med pa grol bar shog cig pa'o/ /rgyud dang slob dpon dgongs pa dang / /klu sgrub la sogs man ngag dang / bla ma brgyud pa'i rim pa rnams/ /mi 'gal tshul du brtsams pa yin/ /'di don ma rtogs gang zag rnams/ /lam gyi sgron mas dga' bya'i phyir/ /chos kyi rgyal mtshan gus pa yis/ /rdo rje bdag gis 'bad de bris/ /bkra shis mar me brtsoms pa bshad pa'i dge ba 'dis//rmongs pas de don rtogs shing 'jam dpal grub par shog /bla ma dam pa yun ring bsten cing gzhan 'grol shog /gzhan rgyud pa krol pas 'gro rnams 'jam dpal nyid thob shog /gtor ma chen po'i las kyi rim pa'i 'grel pa slob dpon rdo rje mi bskyod pas mdzad pa rdzogs so// //rgya gar gyi mkhan po badzra kI rti dang bod kyi lo tsA ba dge slong dge ba'i blo gros kyis bsgyur cing zhus te gtan la phab pa'o/