CLOSE WINDOW

D3745
བོད་ཡིག

/u tsuSh+ma dzam+b+ha la zhes bya ba'i sgrub thabs rgyal po Ar+ya ma tis mdzad pa rdzogs so// //dge slong dar ma grags kyis bsgyur ba'o/ /[ ]@##/ /rgya gar skad du/ Ar+ya u tsuSh+ma dzam+b+ha la kriSh+Na sA d+ha naM/ bod skad du/ 'phags pa rmugs 'dzin 'chol ba nag po'i sgrub thabs/ rje btsun dzam+b+ha la'i zhabs la phyag 'tshal lo/ /dpal gyi dbang phyug dbang chen bcu gnyis rin chen rnam pa mang ldan pa/ /thabs mang stobs chen dri med thugs rje drang srong lha mi'i sras gyur de'i/ /sras gcig mtshungs med ma lus srid dang zhi ba'i nor bdag gter chen ni//mi'u thung cha byad thod khrag ne le 'dzin mdzad khyod kyis bdag la srungs/ /re zhig sgrub pa po dam tshig can gzhan la phan par brtson pas 'phags pa rmugs 'dzin la mi phyed pa'i dang ba thob pas skyabs su song la pad+ma'i 'dab ma mchog gi snod dang /gnod sbyin mo kun du rgyug gi lus ling+ga chen po'i rdzas dang ldan pas nor bu brtsegs pa lta bu'i gnas su 'dug ste/ thog ma kho nar mi bskyod pa'i rgyal po'i cho ga ji lta ba bzhin mnyes par bya'o/ /de'i 'og tu de'i nga rgyal gyis bdag dang gnas dang rnal 'byor bsrung ba byas la/rang gi snying gar a las zla ba'i dkyil 'khor rgyas pa la gnas pa'i hUM yig nag po gser gyi mdangs can las byung ba'i rdo rje rtse dgu pa gyen du langs shing rnam par 'gyur ba'i ngang tshul can/ dbus kyi rwa rtse rnam pa dkar po nor bu'i tog gis mtshan pa dang /rwa gzhan gnag cing kun nas bgrad pas 'jigs par byed pa de nyid kyi lta bar zla ba dri ma med pa la hUM yig bai DUr+ya'i 'od 'bar bas mtshan pa blta bar bya'o/ /yi ge de'i 'od kyis nam mkha'i dbyings khyab par bkang nas zhing gi dkyil 'khor yongs su sbyor ba'i don gnyis byas te/tshur 'dus pa las rje btsun rmugs 'dzin nag po sras dang bcas pa rdul phra rab kyi grangs dang mnyam pa spyan drangs la/ khrus gsol ba sngon du 'gro bas mchod pa'i yan lag bcu gsum yongs su rdzogs par bya'o/ /mnyes pa'i 'od kyi phreng ba bdag gi snying la zhugs te bskul ba'i yid kyis tshad med pa bzhi spel zhing /byang chub kyi sems brtan pa yang dag pa goms pa bskyed par bya'o/ /de nas rdo rje'i 'od zer chen pos brtan pa dang g.yo ba'i dngos po mtha' dag rnam par bzhu nas/ rdo rje sems dpa'i ngo bor thim pa dang /yang ches cher 'bar bas rang gi lus kyang nye bar bsregs nas gzi brjid kyi phung po sgyu ma lta bu'i bdag nyid du bsam mo/ /de'i 'og tu oM a zhes skad gsang bstod de sbran pas 'chad par 'gyur ba'i mtshan nyid can gyi mgon po byang phyogs kyi tshal rdo rje'i ri bo'i zom nas spyan drangs te/kun nas dang zhing sim la gdung ba'i yid kyis rgyu'i sems dpa' de 'od zer gyi phreng ba 'bar ba la bstim par bya'o/ /de dag yongs su gyur pa las bcom ldan 'das nor gyi dbang phyug /lha dang klu dang mi'i nor thams cad 'dzin pa mthing nag 'jigs pa'i gzugs can mi'u thung gi cha byad rigs ngan gyi rnam pa/rna ba ma phug pa/ lhag ma za zhing mi srun pa/ gsus pa cher 'phyang zhing rab tu brjid pa'i bdag nyid/ khye'u lo drug lon pa'i na tshod can/ gcer bu mtshan ma 'greng ba/ zhabs gnyis 'dor stabs su nye bar gnas pas nor 'dzin ser po kha nas nor bu skyugs pa'i mgo g.yas su rnam par mnan pa/mche ba cung zad gtsigs shing / ljags rkan phugs su nye bar 'dril ba/ zhal dang spyan gsum me'i phung po ltar 'bar zhing / spyan kun nas zlum zhing bzlog la rnam par bsgyur ba can/ dbral ba la rin po che mig gsum pa'i gzugs can gyi khro gnyer gyi rim pa dang ldan pa/dbu skra dang sma ra dang smin ma rnams kyi spu kham pa re re nas gyen du langs shing 'od 'phro ba'i me stag thur du 'dzag pa/ phyag g.yas dang g.yon gyis pad+ma'i snod du ti ras bkang ba dang / ne'u le'i rkyal pa lha dang klu dang mi'i nor bu rin po che'i rigs mi 'dra ba du mas khengs par byas pa'i kha nas rin po che'i rgyun sna tshogs skyugs pa 'dzin pa/sangs rgyas mi bskyod pa'i cod pan gyi rgyan can/ klu'i rgyal po mtha' yas dang / 'jog po dang / pad+ma chen po dang / stobs kyi rgyu dang / rigs ldan dang /dung skyong dang / nor rgyas dang / pad+ma rnams nag po dang / dmar po dang / dkar po dang / ser po dang / sngon po dang / khra bo dang / ser po dang / dmar po rnam pa brgyad kyis go rims ltar thor tshugs dang / rna ba dang / do shal dang / tshangs skud dang / dpung pa dang /lag pa dang / rked pa dang / rkang pa rnams la brgyan pa'o/ /thugs kar zla ba la ji skad bshad pa'i snying po can gyi mtshan ma bsgom par bya'o/ /de nas rdo rje'i yi ge bcu'i go cha bgo bar bya ste/ dpral ba dang / zhal dang / dpung pa g.yas pa dang / g.yon pa dang / thugs ka dang /zhabs ngar g.yas g.yon dang / chu so dang / zhabs bol gong g.yas dang / g.yon dang / grangs bzhin du/ oM dang / dzaM dang / b+ha dang / la dang / dza dang / len dang / dra dang / ye dang / swA dang / hA rnams kyi yig 'bru rnams zla ba'i gdan dang / rdo rje phyed pa la gnas pa nyi ma'i snying po 'bar ba'am gser gyi mchod sdong rnam par dag pa ltar bsam par bya'o//thugs dkyil mi phyed yi ge las 'phros phyogs bcu'i 'dren pa kun mchod cing / /go cha bcur bcas skyob dbang nyid 'phros ma lus 'gro rnams rang 'drar byas/ /ne'u le klu dbang nor bdag 'od ldan lha klu mi yi nor rnams bsdus//zos shing zos te 'grangs gyur btsir bas de skyugs dngos grub yang yang blang / /de nas chu sbyin par bya ste/ lag pa'i mthil du baM ser po las gser gyi bum pa bzang po rin po che sna tshogs skyugs pa kha phyir bsgyil ba'i yi ge baM de nyid kyis mtshan par blta'o//baM gyi nang du dzaM yig go/ /mkhrig ma la ni oM mo/ /mdzub mo la ni b+ha'o/ /gung mo la ni la'o/ /srin lag la dza'o/ /mthe'u chung la len no/ /mthe bong la dra'o/ /nor bu mching ba'i gnas su ye'o/ /lag mthil gyi lto g.yon du swA'o/ /de'i g.yas su hA'o//thams cad kyang zla ba la gnas shing / gser 'od dri ma dang bral ba lhag par 'tsher ba ltar bsam mo/ /de nas yang chu khyor ba gang kha la nye bar gtugs te/ oM in+d+ra ni mu khaM b+h+ra ma ri swA hA zhes bya bas sor mo lnga la lan re re dang / kha dang lag pa byin gyis brlab pa la gnyis te bdun gyis byin gyis brlab bo//de'i 'og tu nag po chen po mdzes pa'i sku yongs su rdzogs pa zhig mdun gyi pad+ma'i rin po che'i snod du zhugs te/ rang gi thugs ka nas ci 'dra ba'i sku gzugs phyung ste bstims la/ rin po che'i bum pa rgyan thams cad kyis spras pa yongs su gang bas rgyun mi 'chad pas chu sbyin par bya'o//'di ltar bya ste/ oM dz+luM swA hA zhes bya bas rin po ches brgyan pa'i lag pa nas zhal du'o/ /zhal nas rdo rje nor bu'i rtse mo ru'o/ /de nas slar lag mthil du 'bab pa'i rim pas mthar chu'i bdag po'i zhal du 'jug par bsams te/cho ga de nyid kyis khyor ba brgya rtsa brgyad 'khrul pa med par sbyin par bya'o/ /de'i tshe phyag gi mthil gyi bum pa dang / ne'u le dang ltos 'gro rnams kyi kha dang sna'i sgo la sogs pa bu ga'i rnam pa thams cad las rin po che'i rigs mi 'dra ba sdug cing yid du 'ong ba rnam pa du ma'i char chen po phab pas gnas khang la sogs pa mtha' dag yog cing nor gyis gang bar gyur par bsam mo//de'i rjes la yi ge bcu pa la mchod pa rnam pa lnga'i sngags sbyar bas mchod cing / thun mong dang khyad par gyi sgo nas bstod do/ /sngags de dag nyid kyis gtor ma byin gyis brlabs te dbul bar bya'o//na mo rat+na tra yA ya/ oM ma Ni b+ha drA ya/ ma hA yak+Sha se nA pa ta ye/ oM dzaM m+b+ha la dza len+d+ra ye swA hA/ zhes lan bdun nam brgya rtsa brgyad kyi bar du bzlas te ji ltar 'dod pa'i don la gsol ba gdab po/ /de nas yang mchod pas gtang rag phul te me tog dbu la bzhag nas yi ge brgya pas lhag chad kha bskang la rten spyi bo dang chu'i phud srin lag gis reg ste lce la bzhag cing /chu'i tshogs rgya mtshor 'jug pa'i ngogs su dor bar bya'o/ /de ltar zla ba drug la sogs par nyin lan gsum mtshan lan gsum du bar ma chad par chu sbyin pa la brtson par byed na/des ji ltar mngon par 'dod pa'i 'byor pa thams cad gdon mi za bar 'grub par 'gyur ro/ /dbang phyug snying po gter bum las/ /lcags kyus lcag btab zas nor ster/ /bram ze'i tshangs skyogs lnga tshan lngas/ bkang te bcud bsdus dngos grub len/ /rin chen snying po nyi zla dang //pad+ma rab sbyangs bde chen thob/ /rim bzhin gnod sbyin ne+e'u le mo/ /thod khrag pur ling sbyor bar bshad/ /dbyar dgun ston zla tha chungs dang / /dpyid zla 'bring la rten bzhengs nas/ /'di nyid rgyal ba'i ting 'dzin gyis/ /dam tshig ye shes mnyam sbyor bya//rna ba mnan dang mdangs 'phrog dang / /dgra bo byis pa'i gzugs 'jigs pas/ /rigs ngan gdug pa'i las gsum byed/ /khro zhal phrin las bgegs skrod yin/ /klu rgyal gdon 'grol char 'bebs byed/ /nor bdag gzir bas nor rnams 'phrog /rig 'dzin dgug dang gter 'byed dang //'jigs skyob rkun po srung ba nyid/ /bu ster tshe ni bsring ba dang / /phyugs skyong bskyed cing gzugs pa dang / /dbang bskur bkra shis gsol ba ste/ /rim bzhin oM nas swA hA'i bar/ /'od dang lhan cig rjes 'gro dang / /slar bzlog yi ge bcu yis so//rdo rje hUM mdzad khros pa yis/ /tsha ba dug dang khrag ske tshe/ /mar khus lus byugs pur ling gdung / /bdun phrag gcig gis spogs na 'grub/ /ye ya d+ha na me d+he baM swA hA/ snyigs dus sgrub rnams rab dbul nyen rnams kyis/ /phan 'dod bzhin yang rang gzhan don nyams par//mthong nas rmugs 'dzin cho ga tshul bzhin bris/ /dge bas kun la 'dod sbyin ster gyur cig/ dpal rmugs 'dzin 'chol ba nag po'i sgrub thabs gsang ba las kyang ches gsang ba sbas pa'i bum pa 'khyil ba zhes bya ba/ slob dpon nor sbyin gyis mdzad pa rdzogs so// //dpal chos kyi rje sa'i steng na 'gran zla dang bral ba'i paN+Di ta chen po shAkya shrI b+ha dra dang / bod kyi lo tsA ba byams pa'i dpal gyis/ bod yul gyi dbus/ ngam shod kyi mthil/ bsam yas lhun gyis grub pa'i gtsug lag khang rgyal po'i pho brang yid bzhin nor bu'i mdzod dbu rtse rim gsum lha khang gi steng du bkra shis pa'i nyi ma la bsgyur cing gtan la phab pa'o/