CLOSE WINDOW

D3743
བོད་ཡིག

@##/ /rgya gar skad du/ u tsuSh+ma dzam+b+ha la sA d+ha naM nA ma/ bod skad du/ rmugs 'dzin 'chol ba'i sgrub thabs zhes bya ba/ dpal ldan rmugs 'dzin 'chol ba la phyag 'tshal lo/ /gang zhig spyan gsum grags pa'i gtsug phud kyi/ /rgyan gyi nor bu la reg zhabs ldan pa/ /thub pa'i gzhon nu des ni thub dbang sras//rnams kyis phun tshogs mchog mang rgyas mdzad gyur/ /bla med yon tan gnyis med pa'i/ /rin chen grong khyer 'dren pa ste/ /'gro ba rang gis phun tshogs la/ /myur du len 'dod 'di bstan bya/ /de la dang po re zhig bdag gis dzam+b+ha la mnyes par byas nas/sa rtogs pas de'i bdag nyid du gyur te/ 'gro rnams mngon par mtho ba dang nges par legs pa'i phun sum tshogs pa la rab tu dgod par bya'o zhes bya ba'i bsam pa dang ldan pas snying gi nang gi bu gar thig le dang bral ba'i yi ge a dkar po 'od zer 'phro ba de las skyes pa'i zla ba'i dkyil 'khor ro//der hUM yig dbus sngo ba phyi rol kun nas cung zad ser ba/ 'od zer gyi tshogs 'gro ba mgo gyen du bstan pa ste/ de las byung ba'i rdo rje rtse dgu pa/ kha dog dang bya ba hUM yig dang 'dra ba ste lte ba'i nang du son pa'i zla ba la gnas pa'i hUM de lta bu dang ldan pa bsgom par bya'o//de nas oM a zhes bya ba'i sngags brjod pa sngon du 'gro bas hUM yig dang rdo rje dag las 'od zer 'phros te/ phyogs bcu nas sems can gyi don mdzad pa'i dzam+b+ha la'i gzugs mtha' yas pa rnams mar me blang ba'i tshul gyis spyan drangs nas mdun du de'i sku gcig tu rnam par bsgoms la/'od zer rnams kyis mchod pa lngas mchod pa dang / sdig pa bshags pa nas btang snyoms kyi bar du bsgom par bya'o/ /de'i rjes su hUM dang rdo rje'i 'od zer rnams la lus mtha' dag bstims la spros pa thams cad dang bral ba nyid kyis stong pa nyid kyi rang bzhin zla ba dang rdo rje dang /sa bon gyi 'od zer rnams la oM a zhes bya ba 'di dang / 'od zer spros pas bcom ldan 'das spyan drangs la gzhug par bya'o/ /gzhug pa'i mjug thogs su skad cig gis zla ba la sogs pa rnams kyis rdzogs pa'i bcom ldan 'das rmugs 'dzin 'chol ba gzhon nu lo lnga lon pa lta bu mi'u thung gi rnam pa can sna tshogs pad+ma la gnas pa'i zla ba'i steng du nor sbyin ser po rgyan thams cad kyis brgyan pa rin po che'i dbu rgyan can/zhal nas rin po che skyug cing gan rkyal du nyal ba'i dpral bar zhabs g.yas pa dang rkang pa gnyis kyi steng du g.yon pas mnan pa/g.yon brkyang gi gom stabs can/ gcer bu rtags gyen du 'greng ba/ gsus pa 'phyang ba thugs kar phyag g.yas na thod pa khrag gis gang ba bsnams pa la g.yon du phyogs nas gzigs pa/ brla g.yon pa la brten pa'i phyag g.yon pas ne'u le kha nas 'og tu rin po che'i tshogs skyugs pa bsnams pa snyan ma phug cing gug pa/zhal mche ba zla ba phyed pa lta bur gtsigs pa/ spyan dmar la zlum pa/ dpral ba'i dbyes su khro gnyer byas pa/ dbu skra dmar ser gyen du 'greng ba/ dbu la thub pa mi bskyod pa sngon po sa gnon gyi phyag rgya can gyis rgyas btab pa/mtha' yas sngon po ta ma la'i lo ma lta bus dbu skra bcings pa/ 'jog po dmar pos rna ba dkris pa/ pad+ma chen po pad+ma'i rtsa ba ltar dkar bas do shal byas pa/ stobs kyi rgyu ljang gu dUr ba lta bus tshangs skud byas pa/ nor rgyas dkar pos ske rags byas pa/pad+ma me tog kun+da ltar mdzes pas rkang gdub byas pa/ dung skyong ser pos lag gdub byas pa/ rigs ldan du ba'i mdog can khra bos dpung rgyan byas pa/ sku mdog sngon po 'od zer ser po'i tshogs 'phro ba bsgoms nas dpral ba dang / kha dang dpung pa g.yas g.yon dang /snying ga dang / rdo rje'i steng dang / brla g.yas g.yon dang / zhabs g.yas pa dang g.yon pa'i nang gi rtsa'i bu gar zla ba'i dkyil 'khor bcu rnams la/ oM dzam+b+ha la dza len+d+ra ye swA hA zhes bya ba'i yi ge ser po rnams ni 'od zer ser po can du blta bar bya'o/ /de'i rjes la sna'i rlung phyir 'byung ba'i dus su oM yig la sogs pa'i 'od zer rnams dang thugs ka'i hUM dang /rdo rje'i 'od zer rnams phyogs thams cad du spros te rig pa tsam gyis sems can thams cad kyi sems dang sems las byung ba bcom ldan 'das kyi ngo bor gyur pa rnams rlung 'jug pa'i dus su hUM yig la bcug la sems brtan par byed pas brtan par bya'o//'jig rten gyi khams thams cad na gnas pa'i rin po che sna tshogs pa rnams kyang klu dang / ne'u le dang / nor sbyin kha rnams su gzhug par bya'o/ /slar rlung 'byung ba na klu la sogs pa rnams kyis mid pa'i rin po che rnams mdun du skyugs par bsgom par bya'o//de ltar yang dang yang du spro ba dang bsdu ba la sogs pa yang ngo / /de'i rjes su dal bar gyur na/ na mo rat+na tra yA ya/ na mo ma Ni b+ha drA ya/ ma hA yak+Sha se nA pa ta ye/ oM dzam+b+ha la dza len+d+ra ye swA hA/ zhes pa'i sngags sam/ yang na dgod pa'i sngags yi ge bcu pa bzla bar bya'o//chu sbyin pa'i dus su ni lag pa g.yas pa gan rkyal gyi dbus su baM yig gi 'od zer rnams kyis lag pa bum pa bzang po lta bur byas la/ lag pa'i rtsa bar oM yig gi 'od zer rnams kyis gdu bu'i rnam pa dang ldan pa dang / baM yig gi dbus su dzaM dang /mdzub mo dang / gung mo dang / ming med dang / mthe'u chung dang / mthe bo rnams kyi rtse mo la dzam+b+ha la dza len+d+ra zhes bya ba'i yi ge rnams rim pa ji lta ba dang / oM dang baM gyi yi ge dag gi bar du ya yig dang / ya yig gi g.yon dang g.yas ngos dag tu swA hA zhes bya ba'i yi ge dag ste/oM yig la sogs pa 'di rnams rang rang gi gnas kyi bu ga rnams su zla ba la gnas pa ser po can du bsgoms nas/ lag pa'i nang du me tog chu dang bcas pa kha dang nye bar byas la/ oM in+d+ra ni mu khaM b+h+ra ma ri swA hA zhes bya ba'i sngags kyis lan bdun du mngon par bsngags par bya'o//de'i rjes lag pa brkyang bas sbyin par bya ba'i chu rang gi kha nas zhugs pa dzaM yig gi 'od zer rnams dang / thugs kar gnas pa'i rdo rje dang / hUM yig gi 'od zer rnams kyis kha dog ser por byas pa rdo rje'i kha nas 'thon nas lag par son pa skad cig gis mdun du bcom ldan 'das zhal mngon du phyogs par bsgom pa'am/sku gzugs kyi zhal gyi nang du oM dz+luM swA hA zhes bya ba'i sngags kyis lan brgya rtsa brgyad dang / na mo rat+na tra yA ya zhes bya ba la sogs kyis lan bdun du dbul bar bya'o/ /na mo rat+na tra yA ya zhes bya ba la sogs pa lan cig brjod pas 'bras rngos pa bu ram dang bsres pa la sogs pa rnams kyi gtor ma bcom ldan 'das la dbul bar bya'o//de ltar ji ltar nus par thun gsum mam/ thun gcig la rjes su bsgrubs te bstod pa dang smon lam gdab par bya'o/ /de'i rjes la bsgoms pa'i bcom ldan 'das oM badzra muHzhes bya bas gshegs su gsol bar bya'o//gzhan yang smin drug gi zla ba dang / dpyid zla ra ba dang / dpyid zla tha chungs dang / dbyar zla 'bring po rnams gang yang rung ba'i nya'am/ dge ba'i nyi ma gzhan la yang rdo ma gas pa la skad cig gis bcom ldan 'das kyi ngo bor bsgrubs te yang dag par mchod nas gshegs su gsol bar bya'o//bzo bo bsnyen gnas kyi sdom pa bzung bas nyin zhag gcig nyid la dpa' bo'i yon gyis sku gzugs byed du gzhug go/ /byas pa la yang bdag nyid la bkod pa bzhin du rim pa ji lta bar bcom ldan 'das kyi gzugs la yi ge dgod pa dang bcas pa rnam par bsgoms nas/chu sbyin pa la sogs pas mnyes par bya'o zhes bya ba ni man ngag go/ /de'i tshe ni gshegs su gsol bar mi bya ste/ bcom ldan 'das sku gzugs kyi rnam par rtag tu bzhugs pa la bkur sti dang mchod par bya'o//paN+Di ta a b+ha ya ka ra gup+tas mdzad pa'i u tsuSh+ma dzam+b+ha la sgrub pa'i thabs rdzogs so// //rgya gar gyi mkhan po paN+Di ta a laM ka de ba dang / lo tsA ba shAkya'i dge slong tshul khrims 'byung gnas sbas pas chos 'khor shong ma'i gtsug lag khang du bsgyur te gtan la phab pa'o/