CLOSE WINDOW

D3722
བོད་ཡིག

/[ ]@##/ /rgya gar skad du/ gu rwA rA d+ha na pany+tsi ka /bod skad du/ bla ma'i bsnyen bkur gyi dka' 'grel/ 'jam pa'i rdo rje la phyag 'tshal lo/ /sangs rgyas kun gyi rang bzhin gyi/ /yon tan rnams kyi yon tan ldan/ /blar 'os bla mar phyag byas nas//bla ma'i bsnyen bkur dka' 'grel brjod/ /de la 'dod pa'i lha gzhan dag gis ni mngon par 'dod pa'i 'bras bu grub par mi 'gyur bas/ brjod par bya ba la sogs pa nye bar bstan pas mchog tu 'dod pa sngon du 'gro ba'i sgrub pa la 'jug par bya ste/ mnyan par bya zhes bya bas yid la bya ba slob dpon gyi gdams pa byin pa dang por re zhig de ston par byed pa'i tshigs su bcad pa/dpal ldan rdo rje sems dpa'i zhes bya ba la sogs pa gsungs te/ de la 'di'i rkang pa dang pos ni dgos pa bstan to/ /gnyis pas ni 'dod pa'i lha la mchod pa bstan to/ / gsum pa dang bzhi pa dag gis ni brjod par bya ba bstan pa yin la/ brjod bya dang rjod byed kyi mtshan nyid kyi 'brel pa ni gzhung gi khong na gnas pa nyid kyi phyir logs su ma gsungs so zhes bya ba ni spyi'i don to/ /yan lag gi don yang brjod par bya ste/ bla ma'i zhabs kyi pad+mar btud nas zhes sbrel te/bla ma'i zhes bya ba ni zab pa dang rgya che ba'i chos kyi man ngag sbyin pa'i phyir dang / phan pa dang bde ba skyed par byed pa nyid kyis phar gyur pa'i phyir na mchod pa bkur sti la sogs pa rigs pas na bla ma yin la/ de'i zhabs kyang yin la pad+ma yang yin pas zhabs pad do/ /de la btud nas ni phyag byas nas so//ji ltar zhe na/ de ni ji bzhin zhes bya bas bshad de/ cho ga'i rim pa las ma 'das pas ji ltar rigs pa ste/ lhag par dga' bas maN+Dal sngon du 'gro bas dul ba'i rnam 'gyur la sogs pa'o/ /de la 'di'i bla ma'i zhabs kyi pad+ma zhes bya bas ni bstod pa bstan la/btud nas zhes bya bas ni phyag bya ba bstan to/ /'di dag gis ni mchod pa rnam pa gsum bstan te/ phyag bya ba ni lus kyi dang / bstod pa ni ngag gi yin la/ lus dang ngag ni yid sngon du btang nas 'jug pa'i phyir yid kyi ni shugs kyis bstan to/ /'o na sangs rgyas la sogs pa rnams 'dod pa'i lha yin mod/ji ltar na bla ma rang gi 'dod pa dam pa yin zhe na/ 'dir bla ma 'dod pa'i lha yin te/ lhag par byas pa nyid kyi phyir ram sangs rgyas thams cad kyi rang bzhin gyi sku yin pa nyid kyi phyir ro/ /'chad par 'gyur ba de lta'i mgon la bsam bcas pas//zhes bya ba la sogs pa'o/ /de bas na bla ma la mchod pa kho na grol ba'i byed pa po yin no/ /de ltar bla ma'i zhabs kyi pad+ma la phyag byas nas ci bya zhe na/ dri med ces bya ba gsungs te/ dri med ni rnam par dag cing skyon med pa nyid kyi phyir ro/ /yang na/ 'di la mi dge ba'i dri ma yod pa ma yin pa ste/ dri ma yin pa ni dri ma dang bral ba'i rgyu'o zhes bya ba'i don to/ /'on kyang 'di dag rang gi yid kyi 'dod pa kho nas brtags pa ma yin nam zhe na/ de ma yin pa ni rgyud mang las gsungs pa zhes bya bas bshad de/ rgyud ni rgyun chags pa yin la/ de yang rgyu la sogs pa'i dbye bas rnam pa gsum ste/ rgyu dang 'bras bu dang thabs zhes bya ba'o/ /de la rigs kyi dbye ba ni rgyu'i rgyud de/ rigs can gyi sems can rnams rab tu mang ba nyid kyi phyir rgyun chags par brjod do/ /rigs kyi dbye ba las 'bras bur gyur pa'i rdo rje 'chang chen po'i dbye ba ni 'bras bu'i rgyud de/mtha' yas pa'i sangs rgyas kyi chos kyi rang bzhin yin pa nyid kyi phyir ro/ /rgyu las 'bras bu 'grub pa'i ched du sngags dang phyag rgya dang dkyil 'khor la sogs pa'i rkyen rnams ni thabs kyi rgyud de/ sngags dang phyag rgya la sogs pa'i thabs chen po rnams kyi cho ga dpag tu med pa'i phyir ro//de yang gtso bo nyid kyi dbye bas cho ga mang po ste/ bya ba dang / spyod pa dang / rnal 'byor dang / rnal 'byor bla ma dang / rnal 'byor bla na med pa'i rgyud ces bya ba de dag thams cad du 'brel pa rnams so/ /rgyud mang po de dag tu gsungs shing bshad pa ni rgyud mang las gsungs pa'o//'o na bcom ldan 'das nyid kyis de dang de las gsungs pa'i phyir 'di brtsams pa la dgos pa med do zhes bya bar dogs pa la/ mdor bsdus nas bshad par gsungs te/ rgyud mang po lta bas 'jigs pa'i skye bo rnams la phan pa'i phyir rgyud mang po las/lus pa med par phyung nas gcig tu bsdus te 'dir mngon par brjod pa yin no zhes bya bar dgongs so/ /'di zhes pa ni 'dod pa'i bla ma bsten pa rgyas par bshad pa'o/ /de ltar 'di zhes pa ni de nyan pa la skal ba dang ldan pa'i sems can rnams sbyar bar bya ba'i phyir mnyan par gyis zhes bya ba gsungs te/mnyan par gyis ni rna ba spags la'o/ /de zhes pa ni lhag ma'o/ /ji lta bu zhe na/ gus pas zhes bya ba gsungs te/ gus pa ni 'dir nyan pa'i tshul te/ phyin ci ma log pas yi ge dang don 'dzin pa dang dad pas yang dag par 'dzin pa yin pas khyed cag gis bla ma las mnyan par gyis shig ces bya bar sbyar ro//rnam pa gzhan du khas sbubs pa dang mi gtsang ba dang rdol ba'i bum pa la sogs pa rnams su char bab pa lta bur don dang bral ba nyid yin pas de'i gtam mi bya ba'i phyir ro/ /gang gi ched du 'di gus pas mnyan par bya zhe na/dpal ldan rdo rje sems dpa' zhes bya ba gsungs te/ dpal ni bsod nams kyi tshogs dang ye shes kyi tshogs gsum la skyabs su 'gro ba la sogs pa bsod nams dang / don dam pa'i byang chub kyi sems bsgom pa la sogs pa ye shes kyi tshogs so/ /pha rol tu phyin pa'i tshul gyis na sbyin pa dang tshul khrims dang bzod pa gsum ni bsod nams kyi tshogs yin la/shes rab dang thabs dang smon lam dang ye shes dang stobs kyi pha rol tu phyin pa lnga ni ye shes kyi tshogs so/ /brtson 'grus kyi pha rol tu phyin pa dang bsam gtan gyi pha rol tu phyin pa ni gnyi gar gtogs so/ /rdo rje sems dpa' zhes pa la/mi phyed pa nyid kyis rdo rje dang chos mthun pas rdo rje yin la/ mi 'jig cing nyams par mi 'gyur bas sems dpa'o/ /rdo rje yang 'di yin la sems dpa' yang yin pas rdo rje sems dpa' ste/ rang bzhin gyis 'od gsal zhing rang bzhin gyis rtag pa nyid kyis rtag pa'i rdo rje 'dzin pa'o zhes bya ba'i don to//yang na chos thams cad la khyad par 'gro ba'i phyir na rdo rje ste chos kyi dbyings yin la/ de la rtag par rab tu 'jug pa nyid kyi phyir rdo rje sems dpa' de nyid do/ /nges pa'i tshig gis yi ge rnams phyis pa dang bstan pa yang yin no/ /dpal dang ldan pa'i rdo rje sems dpa' ni dpal ldan rdo rje sems dpa' ste/bar gyi tshig phyis pa'i bsdu ba'o/ /de'i go 'phang ni rdo rje sems dpa'i gnas te rdo rje 'chang nyid do zhes bya ba'i don to/ /de thob pa ni brnyes par gyur pa ste/ de'i rgyu ni byed pa de las so/ /'o na de mnyan pa tsam gyis 'dod pa'i don grub pa'i rgyur 'gyur ram zhe na/bden mod kyi 'on kyang brgyud pas 'gyur ba kho na ste/ 'di ltar de thos nas bya ba dang bya ba ma yin pa yongs su shes la/ de dag las ni tshogs so/ /de las kyang 'dod pa'i don grub pa'i rgyur 'gyur ba yin no/ /de'i phyir bla na med pa'i 'bras bu'i don du bla ma bsten pa mnyan nas gus pa dang bcas pas brtson par bya ba yin la/de ston par byed pa'i gzhung la yang de skad ces bya ste/ rol rnyed ma 'phrogs pa'i snyan ngag bzhin no/ /mchog tu 'dod pa'i lha la mchod pa dang brjod par bya ba la sogs pa'i don gyi tshigs su bcad pa nye bar bkod nas/dbang bskur mchog ces bya ba la sogs pas slob dpon gyi che ba'i bdag nyid bstan pa gsungs te/ rdo rje'i slob dpon la ni de bzhin gshegs/ /rnams la phyag 'tshal zhes sbrel lo/ /rdo rje ni rdo rje 'chang gi brtul zhugs yin la/ de kun du spyod pa'i phyir rdo rje'i slob dpon no/ / yang na gzhan dag 'byed par byed cing gzhan dag gis dbye bar bya ba ma yin pas rdo rje dang chos mthun pa'i phyir gnyis su med pa'i ye shes ni rdo rje yin la/ de la slob ma rnams 'dzud par byed cing kun du spyod par byed pas na rdo rje'i slob dpon no/ /de ji lta bur gyur pa zhig ce na/ dbang bskur zhes gsungs te/dbang bskur ni khrus yin la/ de yang phyi lus kyi dri ma 'khrud par byed pa'i phyir dbang bskur zhes brjod par bya'o/ /mchog ni gtso bo ste bla na med pa'i 'bras bu 'thob pa'i rgyu yin pa nyid kyi phyir ro/ /dbang bskur ba yang yin la/ mchog kyang 'di yin pas dbang bskur mchog go//yang na dbang bskur ba rnams kyi mchog ni rtse mo ste mthar thug pa'i bzhi pa zhes bya ba ni dbang bskur mchog go/ /de dag gis thob pa de ni dbang bskur mchog thob bo/ /ni ni gang gi phyir gyi don la'o/ /yang na kho na dang rigs pa la'o/ /de bzhin gshegs pa ni bgrod par bya ba ji lta ba de lta bu kho nar gshegs pas na de bzhin gshegs pa ste/dus thams cad dang / rnam pa thams cad dang / shes bya thams cad yang dag par mkhyen pa'i phyir ro/ /ngo mtshar la kha cig tu ldog pas na/ ta yig da yig ste/ bsam pa ji lta ba dang /rigs ji lta ba dang / dus ji lta bar gdul bya'i skye bo rnams la yang dag pa'i chos ston par mdzad pa'i phyir ji skad du gsung bar 'os pa de skad du gsung bas de bzhin gshegs pa ste/ de bzhin gshegs pa de rnams kyis so/ /ji lta bur gyur pa de rnams kyis she na/ phyogs bcu'i zhes gsungs te/bcu ni shar la sogs pa bzhi dang / me la sogs pa bzhi dang / steng dang 'og gnyis te/ de ltar phyogs kyang yin la bcu yang yin pas phyogs bcu'o/ /'jig rten khams zhes bya ba ni yongs su dag pa dang yongs su ma dag pa'i sangs rgyas kyi zhing 'phags pa dang 'phags pa ma yin pa rnams te/'jig rten 'dzin par byed do zhes byas nas so/ /phyogs bcu'i 'jig rten gyi khams de dag na bzhugs pa ste phyogs bcu'i 'jig rten gyi khams na gnas pa de rnams kyis so/ /dus gsum zhes bya ba ni dus gsum po rnams te/ snga dro dang gung dang phyi dro'i dus rnams su zhes bya ba'i don to//de rnams nas byon nas phyag 'tshal ba ni mngon phyag 'tshal ba ste 'dud pa zhes bya ba'i don to/ /'o na slob dpon gyis de bzhin gshegs pa rnams la phyag bya ba ma yin nam/ de la ji ltar na de rnams kyis 'di la phyag mdzad ce na/ rdo rje 'chang gi sku yin pa'i phyir dang /rdo rje 'chang de yang de bzhin gshegs pa thams cad kyi bdag nyid yin pa'i phyir te/ slob dpon dang ni rdo rje 'dzin/ /tha dad par ni mi brtag go/ /zhes 'chad par 'gyur ba yin no/ /dpal 'dus pa las gsungs pa/ byis pas gsol pa/ bcom ldan 'das rnams de bzhin gshegs pa thams cad kyi sku dang gsung dang thugs rdo rje gsang ba 'dus par dbang bskur ba'i rdo rje'i slob dpon la de bzhin gshegs pa thams cad dang byang chub sems dpa' thams cad kyis ji ltar blta bar bgyi/de bzhin gshegs pa thams cad kyis bka' stsal pa/rigs kyi bu de bzhin gshegs pa thams cad dang byang chub sems dpa' thams cad kyis byang chub kyi sems rdo rje bzhin du blta bar bya'o zhes bya ba la sogs pa le'u bcu bdun pa las rgya cher gsungs so/ /de bzhin gshegs pa rnams kyis rdo rje'i slob dpon la phyag mdzad do zhes bya ba 'di la mkhas pa rnams kyis som nyi mi bya'o//de ltar slob dpon mnyes par byed pa'i cho ga de rab tu bsdus nas dus gsum zhes bya ba la sogs pa gsungs pa yin te/ bsten pa zhes bya ba dang 'brel lo/ /de zhes bya ba ni dbang bskur ba mchog thob pa'i rdo rje'i slob dpon no//bsten pa zhes bya ba ni yang dag par mnyes par byed pa'o/ /de ci 'dra ba zhig ce na/ ston pa bla ma zhes bya ba ste/ sems can rnams la mngon par mtho ba dang nges par legs pa'i lam gyi man ngag ston pa'i sgo nas ston pa po yin pa'i phyir ston pa ste slob pa po'o/ /yon tan gcig pu'i rang bzhin yin pa'i phyir bla ma'o//ci zhig gis she na/ dkyil 'khor me tog thal mos zhes bya ba gsungs te/ dkyil 'khor ni snying po yin la/ de len zhing 'dzin pas na snying po yang dag par 'dzin pa'i maN+Dal rnams te/ pha rol tu phyin pa drug bsdus pa'i rang bzhin yin pa'i phyir chu dang bcas pa'i ba byung sbyin pa ste zhes bya ba la sogs pa gsungs pa ltar ro//maN+Dal ni zlum po'i rnam pa'am gru bzhi'i rnam pa gang yang rung ba chu dang ba byung la sogs pa rnams byugs pa'o/ /ma l+li ka la sogs pa'i me tog rnams ni me tog yin la/ thal mo ni lag pa kha sbyar ba ste/me tog rnams kyi thal mo ni me tog thal mo'o/ /me tog thal mo dang dkyil 'khor rnams ni dkyil 'khor me tog thal mo ste de rnams so/ /yang ci zhig gis she na/ zhabs la ste rkang pa dag la phyag 'tshal zhing mngon par 'dud par bya ba de rnams kyis so/ /spyi bo ni spyi gtsug ste zhabs la spyi bos so//ji ltar zhe na/ mchog tu zhes bya ba gsungs te/ ji ltar rigs pa de lta bu'i gus pas bsten zhing bsnyen pa na dam par nges pa dang / rgya chen po nyid kyis zhes bya ba'i don to/ /ci nas gcig gam zhe na/ dus gsum du zhes bya ba gsungs te/thun mtshams gsum mo/ /ji ltar zhe na/ me tog dang bcas pa'i snyim pa bskor ba las zhes bya ba ni me tog dang bcas pa'i thal mo ni bya ba'i khyad par ste me tog gi snyim pa zhes bya ba'i don to/ /'o na bstan pa'i rtsa ba dge slong ste zhes gsungs pa'i phyir bcom ldan 'das kyi bstan pa la dge slong rnams tshad ma ma yin nam/de la ci ltar na slob dpon la bsnyen par mngon par brjod ce na/ de rnams tshad ma yin pa ni theg pa dman pa kho na la yin gyi theg pa chen po la ni ma yin no/ /de bas na slob dpon thams cad du mnyes par byas pa kho nas bstan pa yin no//yang dpung bzang gi rgyud du/ rgyal bas so so thar par gang gsungs pa'i/ /tshul khrims rnam dag 'dul ba ma lus la/ /khyim pa'i rtags 'chang rnams kyis rtags drug gis/ /g.yogs pa spangs nas lhag ma bsgrub par bya/ /zhes gsungs so/ /dge slong tshul khrims sdom pa kun//'dzin pas gos dkar 'chang ba la/ /phyag mi bya'o phyag gi 'os/ /rdo rje 'dzin gtso rang nyid do/ /gang nas brtsams te dag pa'i yid kyis ni/ /ma nyams byang chub sems ni bzung gyur pa/ /de nas bzung ste lha dang lha min bcas/ /'jig rten kun gyi phyag bya'i 'os yin no//de bas bdag nyid legs pa yi/ /don 'dod dam pa rnams kyis ni/ /mtha' yas 'bras bu rtsol mdzad pa'i/ /slob dpon dngos po kun gyis so/ /rdzogs pa'i byang chub nges byas pa/ /rnams kyis phrag dog ser sna dang / /nga rgyal ngar 'dzin dor bya zhing / /g.yo dang sgyu yang de bzhin no//rtag tu ngu yis mi 'dar ba'i/ /sems kyis slob dpon bsnyen bkur bas/ /'gro ba'i mgon po bla ma yis/ /don kun grub pa stsal ba'o/ /de lta bas na rdo rje'i slob dpon zhes bya ba yang dag par mnyes par bya'o/ /da ni bla ma bsten pa thun mong ba bstan nas dge slong rnams la ji ltar bya ba de/de lta bur bstan par bya ba'i phyir dam chos zhes bya ba la sogs pa gsungs te/ brtul zhugs 'dzin pas khyim pa'am gsar bu la phyag bya zhes sbrel te/ bstan bcos su rnam par bzhag pa'i sdom pa ni brtul zhugs te rab tu byung ba nyid do/ /de 'dzin par byed pa'i phyir brtul zhugs 'dzin pa rnams te/gsol ba dang bzhis lnga'i tshogs kyis bsnyen par rdzogs pa blangs pa yongs su rdzogs pa'i tshul khrims kyi sdom pa 'jig rten gyis mchod par bya ba ngur smrig gi gos can dge slong rnams zhes bya ba'i don to/ /de skad du yang bshad pa/gang zhig tshul khrims legs mnyam gzhag /de la ngur smrig dang ldan te/ /bden dang dul ba dang ldan pa/ /de nyid mchod 'os ngur smrig yin/ /zhes gsungs so/ /gzhan du na ming gi dge slong dang khas 'che ba'i dge slong dang slong ba'i ngang tshul gyi dge slong rnams brtul zhugs 'dzin pa'i sgras brjod par mi bya'o//tshul khrims la ni mnyam ma bzhag /de la ngur smrig mi ldan te/ /bden dang dul dang mi ldan pa/ /de ni mchod 'os ngur smrig min/ /zhes so/ /gang la phyag bya ba yin zhe na/ khyim pa'am ni gsar bu la'ang / /zhes bya ba gsungs te/ 'di la khyim yod pa'i phyir khyim pa ste/ khyim gyi nang na gnas shing phyag gi gnas ma yin pa 'dod pa'i yon tan la zhen pa khyim gyi gnas zhes bya ba'i don to/ /gsar bu zhes bya ba ni/ /rab tu byung ba gsar pa ste dge tshul lo/ /'am gyi sgra ni phyogs gzhan pa gnyis la'o/ /'ang gi sgra ni brjod pa'i dbye ba la'o//phyag bya zhes pa ni 'jig rten gyis mchod par 'os pa rnams kyis te bdag cag rnams ni dge slong gnas brtan no snyam pa'i nga rgyal spangs nas mngon par phyag bya'o/ /ji ltar byas nas she na/ dam chos la sogs zhes bya ste/ sems can rnams ngan 'gror phyogs pa las 'dzin par byed pa'i phyir chos so//dam pa sangs rgyas dang byang chub sems dpa' rnams kyi chos ni dam pa'i chos so/ /yang na 'di 'jig rten las 'das pa'i phyir dam pa yin la/ rang gi mtshan nyid 'dzin pa'i phyir chos yin pas dam pa'i chos te/ de yang lung dang rtogs pa dang / chos kyi dbyings te rnam pa gsum mo/ /de la lung ni gsung rab yan lag dgu'o/ /rtogs pa ni sa dang pha rol tu phyin pa rnams dang / nyon mongs pa'i sgrib pa dang shes bya'i sgrib pa spangs pa dag go/ /chos kyi dbyings dang de bzhin nyid dang yang dag pa'i mtha' dang don dam pa zhes pa dag rnam grangs so//de dag ston par byed pas na glegs bam la de skad ces brjod par bya'o/ /dam chos la sogs te thang ka dang sku gzugs gang gi dang po yin pa de dag ni dam chos la sogs pa'o/ /de rnams mdun bdar nas zhes bya ba ni sngun du bkod pa ste mdun du bzhag nas zhes bya ba'i don to//de nas ci zhe na blos te bsam pa'am shes rab kyi stobs kyis so/ /'o na dge slong gi phyag bya ba ni sangs rgyas dang sngar bsnyen par rdzogs pa gnyis kho na yin par/ phyag bya gnyis te bde gshegs rgan po'o//zhes de skad du gsungs pa ma yin nam zhe na/ bden mod kyi/ de skad du gsungs pa ni nyan thos kyi tshul la yin gyi phyi nas byang chub sems dpa'i tshul la ni ma yin la/ 'di ni byang chub sems dpa'i tshul yin zhing bye brag tu sngags kyi tshul yin te de bas na skyon med do/ /yang na sangs rgyas kyi sgras ni sangs rgyas 'ba' zhig bsdus pa ma yin gyi/byang chub sems dpa' rnams kyang bsdus la/ rgan po'i sgras kyang bsnyen par rdzogs pas rgan pa 'ga' zhig bsdus pa ma yin gyi/ ye shes kyis rgan pa dang dka' thub kyis rgan pa yang bsdus pa yin no/ /rnam pa gzhan du na 'phags pa byams pa dang 'jam dpal la sogs pa'i byang chub sems dpa' khyim na bzhugs pa'i rtags can rnams phyag bya ba'i 'os ma yin par 'gyur ro snyam du dgongs so//de bas na tshig 'di dag ni nyan thos kyi theg pa dang yang 'gal ba med do/ /dgongs pa'i skad ni mi shes par//sgra tsam gyis ni rmongs pa dag /rgyal dbang rnams kyi so thar la/ /smad pa byas nas ngan 'gror 'gro/ /zhes gsungs pa yang yin no/ /de bas na rdo rje'i slob dpon khyim pa'am gsar bu la dge slong gis kyang rnam pa thams cad du phyag bya ba yin no/ /de skad du kye'i rdo rje'i rgyud las/slob ma gang gis grub thob kyang / /mnar med spang ba'i rgyu yi phyir/ /yang dag ye shes snang mdzad pa'i/ /bla mar grub pas phyag bya'o/ /zhes so/ /gal te de ltar yin nam/ dam pa'i chos la sogs pa mdun du byas pa la dgos pa ci yod ce na//'jig rten gnod pa zhes bya ba gsungs te/ 'jig rten pa rnams la gnod pa ni 'jig rten gnod pa ste 'gro ba sun 'byin par byed pa de dag spong zhing nyams par byed pa de'i phyir ni 'jig rten gnod pa spang ba'i phyir ro/ /'o na rang gi bla ma la phyag bya ba la 'jug pa rnams kyis 'jig rten la gnod pa yod dam zhe na yod do//ji ltar yod ce na/ 'jig rten phal mo che 'di ni bstan bcos ma thos shing ma rig pa'i phyir don dam pa'i chos la gnas pa yongs su mi shes so/ /de las de rnams kyis slob dpon dge slong nyid du gyur pa bsnyen bkur pa'i 'os ma yin par yid la byed do//de bas na de rnams kyis khyim pa la phyag byas pas rab tu byung ba rnams sun 'byin par byed la/ sun phyung bas 'jig rten rnams phyir phyogs par 'gyur ro/ /'jig rten phyir phyogs pas kyang 'jig rten las rnyed pa dang bkur sti nyams par byed do/ /ma dad pa na rnyed pa dang bkur sti sdug bsngal bas 'tshol/sdug bsngal ni 'jig rten na mthar gyur pa yin no/ /rnyed pa dang bkur sti dang mi ldan pa la sogs pa'i 'jig rten la gnod pas 'jigs pas phyag byed pa na dam pa'i chos la sogs pa mdun du bdar ba la don med pa ma yin no/ / gal te na yang ci bya ba bstan pa'i phyir stan bstabs pa dang zhes bya ba la sogs pa gsungs te/ brtul zhugs can gyis thams cad bya/ /zhes sbrel lo/ /brtul zhugs can ni brtul zhugs 'dzin pa yin la/ bya ba ni nyams su blang ba'o/ /thams cad ces bya ba de dag gang la bya zhe na/stan bstabs pa zhes bya ba la sogs pa yin no/ /'di la 'dug par bya bas na stan te/ ma sU ra ka la sogs pa'i gdan no/ /de bstabs pa ni dang po dbul ba yin la/ ldang ba ni de'i don du nan tan byed pa'o/ /yang na ldang ba ni yang dag par ldang ba ste/ 'grengs te 'dug pa zhes bya ba'i don to//stan yang stobs la ldang ba yang yin pas stan bstabs pa dang ldang ba'o/ /yang gsungs pa/ ma dang pha dang bla ma la/ /su zhig ldang bar mi byed pa/ /'jig rten kun gyis smod 'gyur bas/ /tha shal dag dang mtshungs par 'gyur//zhes so/ /don bya zhes bya ba la don te rdzas kyi bya ba byed pa ni don bya yin la/ skyed 'phel yang don no/ /de la skyed ni gtong ba la sogs pas yin la/ 'phel ni tshong la sogs pas so/ /sogs pa'i sgras ni bsrung ba la sogs pa yang ngo / /yang na don zhes bya ba ni gos dang stan la bya la/bya zhes bya ba ni nan tan no/ /sogs pa'i sgras ni bangs pa dang mchil ma dang snabs 'dor ba la sogs pa la sgrib pa'o/ /bsnyen bkur zhes pa ni bla ma la gus shing dad pas zhes bya ba'i don te/ don gyi bya ba sogs pa gang gi yin pa de ni don gyi bya ba sogs te/ de ni don gyi bya ba sogs kyang yin la bsnyen bkur yang yin pas don gyi bya ba sogs bsnyen bkur ro//yang na tshig 'di dag rim pa bsnor nas so/ /yang na don yang byed la/ bsnyen yang bkur bas don gyi bya ba sogs bsnyen bkur ro/ /thams cad nyid ni ma lus par te/ nyid kyi sgra ni nges par gzung ba'o//'di dag thams cad byas nas brtul zhugs can gyi nga rgyal med par bya'o zhes dgongs so/ /yang gsungs pa/ de bas nges pa kho nar ni/ /brtul zhugs brten pas 'di kun bya/ /de bzhin nang dang phyi yis ni/ /rtag par rnal 'byor mchod la dga'/ / phyag sogs bya ba thams cad dag /dus rnams kun du bya ba yin/ /de ltar yongs su brtags nas ni/ /bla ma rnams la bsnyen bkur bya/ /'on kyang / gzugs dang lang tsho phun tshogs dang / /longs spyod dbang phyug dag dang stobs/ /skye dang rigs rgyud mi bsam ste/ /nga rgyal dag ni dor bar bya//bzo yi cha shas 'di kun la/ /blo dang ldan zhing mkhas snyam dang / /bdag ni sa skyong dge ba'o zhes/ /sems la sbyar bar mi bya'o/ /zhes so/ /ci byas nas she na/ dam pa min las phyag spong ngo / /zhes bya ba gsungs te/ sku dang gsung dang thugs la gnod pa'i las ni dam pa min pa zhes bya ste/mi mdzes pa'i phyag ni sdig pa'i rgyu yin pa'i phyir ro/ /de dam pa min pa yang yin la/ las kyang yin pas dam pa min las te/ srog gcod pa la sogs pa'i mi dge ba zhes bya ba'i don to/ /de la stan bstabs pa la sogs pa 'di dag thams cad nam gyi tsha na bya ba yin zhe na/phyag byas nas zhes bya ba gsungs te/ gus par smras nas so/ /dam min phyag gi las zhes bya bar 'don pa de la ni/ las kyang yin la phyag kyang yin pa ste/ de dam pa min pa yang yin la phyag gi las kyang yin pas na dam min phyag gi las so//dam pa ma yin pa ni bshad zin te/ dam pa ma yin pa'i phyag ni ma gus pa sngon du song bar nges par mtshon pa'i thal mo sbyor ba tsam byed pa'o/ /yang na dam pa ma yin pa tha mal pa'i skye bo rnams kyi phyag gi la ste/ de ni lo ma rnying pa lhags shing 'bras bu 'bab pa'i khur gyis dud pa'i rnam par sbyong ba la sogs pa dam pa ma yin pa'i las te/mgo bo dud pa tsam ni dam min phyag go/ /gzhan dag ni/ dam min las dang phyag ces bya ste/ dam pa ma yin pa'i las rkang pa bkru ba la sogs pa dang / yan lag brgyad kyis btud pa'i phyag ste gnyis po 'di dag spangs nas bya ba thams cad bya'o zhes so//de ltar bla ma'i rab tu dbye ba bshad nas slob dpon zhes bya ba la sogs pas/ bla ma dang slob ma dag yongs su brtag par gsungs te/ slob dpon dang slob ma'i 'brel ba bya zhes bya ba la 'brel ba'i dang por te sngon du'o//nye ba'i dbang las slob ma ste bla ma ni slob dpon zhes bya ba bla ma dang ni slob ma dag go/ /slob dpon dang slob ma de dag gi 'brel pa ni 'grogs pa ste/ slob dpon dang / slob ma'i 'brel pa brtag par bya ni dpyad par bya'o/ sus snyam na/dpa' bos zhes bya ba gsungs te/ blo dang ldan zhing mkhas pa rnams kyis zhes bya ba'i don to/ /'di'i don ni 'di yin te/ bla mas re zhig cha lugs dang / brjod pa dang / spyod lam la sogs pa rnams kyis ci 'di bsam pa dag pa yin nam/bsam pa ma dag pa yin snyam du yongs su brtag par bya zhing / ci 'di brtsam par bya ba'am mi bya snyam du dang / de'i khyim gyi mtshams na gnas pa'i skye bo rnams la 'di'i bya ba yongs su dris shing brtags nas ci 'di la shog cig bya'am/mi bya snyam du dpyod pa'i tshul gyis kyang yongs su brtag par bya'o/ /de lta bu la sogs pa rnams kyis yongs su brtags na 'jig rten pa'i bsam pa shes par 'gyur te/ cha byad rtags dang spyod lam dang / /skad kyis kyang ni rtogs bya zhing / /mig dang gdong gi rnam 'gyur gyis//nang na gnas pa'i bsam pa shes/ /zhes kyang gsungs so/ /de yongs su brtags pa la dgos pa ci yod ce na/ 'jig rten phal mo che ni bsam pa yongs su ma dag pas bla ma la sri zhu byas pa med par de kho na nyid 'dod pas rgyal po ltar kun du spyod de/ de skad du/ sgyu yis dri mar byas pa'i sems/ /ngan pa'i bsam pas 'bul byed cing / /gtan du bla ma bsnyen bkur yang / /bkur sti med cing phyag kyang min/ /mnyam par gzhag pa thob pa'i bar/ /'o ma la sogs 'bul bas mchod/ /sangs rgyas kun gyi yon tan gzhi//de nyid rin chen thob pa na/ /bzhugs sam zhes kyang mi 'dri la/ /skyon nyid rtag tu tshol bar byed/ /ces so/ /de bas na de ltar yang dag par brtags nas bsam pa yongs su dag par gyur na de'i tshe de dang 'brel par bya ba yin gyi/ de lta ma yin na ni mi bya'o zhes dgongs so//de bzhin du slob mas kyang yongs su brtags nas bla ma dang lhan cig pa'i 'brel pa bya'o/ /de ci'i phyir zhe na/ 'jig rten phal mo che ni bsam pa ma dag pas kho bo cag ni slob dpon no zhes bcos ma'i tshig snyan po dang 'di'i don sna tshogs pa la chags pas dam pa min pa'i chos ston pas sam/tshul 'chos pa'i gtam gyis sems can rnams slu bar byed do/ /de bas na slob mas kyang ci 'di bsam pa dag pa yin nam/ bsam pa ma dag pa yin snyam du bla ma yongs su brtag par bya ste/ gal te bsam pa ma dag na de'i tshe de dang lhan cig pa'i 'brel pa mi bya'o//yang gsungs pa/ bla mar bya ba min par bshad/ /log pa'i shes rab mngon par khengs/ /chags pa'i dbang gis gzhan dag la/ /chos ston pa yang rab tu 'jug /byis pa de dag sems can gyi/ /mi dge'i bshes gnyen de dag ni/ /bdud kyi phyogs dang ris su gnas//rang dang gzhan dag nyams byed pa/ /de dag rtag par sems can gyis/ /spang zhing bsnyen bkur bya ba min/ /de rnams la ni phyag mi bya/ /kun du myang bar yang mi bya/ /zhes so/ /de bas na bsam pa ma dag pas ming tsam gyi slob dpon ni legs pa 'dod pa rnams kyis rnam pa thams cad du yongs su spang bar bya'o//gal te bsam pa ma dag pa'i slob ma'am bla ma lhan cig pa'i 'brel pa byas pa de'i tshe gnyis ka la cir 'gyur/ /spyod pa ma yin pa las dam tshig nyams par 'gyur ro/ /dam tshig nyams par gyur na de la cir 'gyur zhe na/mtshungs pa zhes bya ba la sogs pa gsungs te/ mtshungs pa ni mnyam pa'o/ /dam tshig ni slob dpon gyis 'gong bar bya ba ma yin pa'o/ /de dam tshig kyang yin la mtshungs pa yang yin pa'i phyir mtshungs pa dam tshig ste mtshungs pa nyid ni gnyis ka yang 'di'i bya ba'i rang bzhin yin pa'i phyir ro//rnam pa gnyis po de yang bsrung bar bya ba dang bza' bar bya ba'o/ /de la bsrung bar bya ba yang rnam pa gnyis te/ blang bar bya ba dang / dor bar bya ba'o/ /de la blang bar bya ba ni dge ba'i rang bzhin rnams dang / dor bar bya ba ni mi dge ba'i rang bzhin rnams so/ /blang bar bya ba yang rnam pa gsum ste/ lus dang ngag dang yid kyi'o/ /de la srog gcod pa la sogs pa ni lus kyi'o/ /brdzun du smra ba la sogs pa ni ngag gi'o/ /brnab sems la sogs pa ni yid kyi'o/ /bza' ba'i dam tshig kyang rnam pa gnyis te/rtag tu nye bar spyad pa dang / skabs su nye bar spyad pa'o/ /de la rtag tu nye bar spyad pa ni sgron ma lnga la sogs pa'o/ /skabs su nye bar spyad pa ni rdo rje bzung ba la sogs pa'o/ /yang na mtshungs pa'i dam tshig ces bya ba la mtshungs pa ni 'dra ba ste/ mnyam pa dang mthun pa zhes bya bar gcig pa'i don to/ /dam tshig gi don tshig rnam par sbyar ba ni snga ma bzhin no/ /mtshungs pa'i dam tshig de yang rnam pa gnyis te/ bla ma'i bya ba dang / slob ma'i bya ba'o/ /de la slob ma'i bya ba ni cho ga ji lta ba bzhin dbang nod pa'o//de nas brtsams te khyod kyi phyag na rdo rje nga yin gyi gang ngas 'di bya dgos so/ /sngags dang phyag rgya dang dkyil 'khor la sogs pa 'di dag kyang khyod kyis dbang bskur ba ma thob cing dkyil 'khor ma mthong ba rnams la smra bar mi bya ste/ ya nga ba ma spangs par dus kyi bya ba byas nas dmyal ba la sogs par 'gyur ta re zhes bya ba la sogs pa brjod par byed pa ni bla ma'i bya ba'o//bla ma la sogs pa mtho ba rnams kyi yang dag pa'i spyod pa gang yin pa de slob ma'i bya ba'o/ /mtshungs pa'i dam tshig nyams pa ni 'khyams pa'o/ /mtshungs pa'i dam tshig nyams pa de yang skyon te/ltung ba dang mi dge ba zhes bya ba'i don to/ /hi ni gang gi phyir gyi don la'o/ /su'i skyon du 'gyur zhe na/ slob dpon dag ces bya ba gsungs te/ slob dpon dang slob ma ni dpon slob ste de dag gi'o/ /dgongs pa ni 'di yin te/ dam tshig nyams na slob dpon gyi dngos grub nyams pa'i rgyu yin pa'i phyir skyon yin la/slob ma'i yang 'dir lus dang sems gzir ba'i nye bar 'tshe ba skyed par byed pa'i phyir dang / phyi ma la yang ngan 'gro'i sdug bsngal skyed par byed pa'i phyir na skyon chen po ste/ de bzhin du dam pa ma yin pa'i kun du spyod pa yang yin no//slob ma'i skyon bstan pa'i phyir/ brtse ba med ces bya ba la sogs pa gsungs te/ bla mas slob mar mi bya'o/ /zhes 'brel lo/ /bla ma ni bshad zin la/ bslab pa la slob pas na slob ma ste slob bu'o/ /de la mi bya ba mi sgrub pa'o/ /bla ma ji lta bus she na/ blo ldan zhes bya ba la blo ni blo gros dri ma med pa yin la/ de 'di la yod pa'i phyir blo ldan no/ /slob ma'i khyad par ci 'dra ba zhig ce na/ brtse ba med ces bya ba la sogs pa gsungs te/ sdug bsngal dang sdug bsngal gyi rgyu las 'don par 'dod pa'i mtshan nyid kyi snying rje ni brtse ba yin la/de las 'das pa gang gis na brtse ba med pa de ni brtse ba med do/ /khro ba ni khong khro zhing 'khrug pa ste mi bzod par gyur pas 'phral du gnod pa byed pa zhes bya ba'i don te de ni khro ba'o/ /gdug pa ni sems rtsub mo ste/ brtse ba med pa zhes bya ba'i don to/ /khengs pa ni cung zad kyis dregs pa zhes bya ba'i don to//chags pa ni pha rol gyi rdzas 'dod pa'o/ /ma bsdams pa ni g.yo zhing mnyam par ma bzhag pa'o/ /bkag par gyur pa ni bdag nyid mchog yin no zhes bdag nyid bsngags shing gzhan la smod pa ste/ tshul khrims 'di la bdag mchog tu gyur pa'o zhes bya bar ro//gsungs pa/ mchog yin zhes ni rab smra ba'i/ /yon tan rnams ni sbyin par byed/ /ces so/ /dang yig ni kun bsdus pa'i don to/ /dang yig las 'di lta bu dag ni bla mar yang mi bya'o zhes ni gzhan dag go/ /bla ma'i rang bzhin bstan pa'i phyir/brtan zhing zhes bya ba la sogs pa gsungs te/ bsam pa dang blos shin tu zin pa'i phyir bstan pa ste blo dang ldan pa'o/ /dul ba ni 'dul ba bzhin du'o/ /blo gros ni rnam par dpyod pa ste shes rab yin la de 'di la yod pa'i phyir blo gros ldan pa ste rnam par dpyad pa zhes bya ba'i don to//bzod pa ni bzod par gyur ba ste/ de yang sdug bsngal la ji mi snyam pa'i bzod pa dang / gzhan gyi gnod pa dang du len pa'i bzod pa dang / chos la nges par rtog pa'i bzod pa dang rnam pa gsum mo/ /de lta bu'i mtshan nyid kyi bzod pa gang la yod pa de ni bzod ldan no//drang ba ni 'phags pa'i sa la rab tu bzhugs pa'i phyir gya gyu med pa'i lta ba can te/ gya gyu ni sdig pa can gyi lta ba'o/ /gya gyu ci yin sdig can lta/ /zhes gsungs pa'o/ /g.yo sgyu med pa ni rang gi skyon sgrib pa'i thabs kun du 'dzin pa'i sems kyi gya gyu nyid g.yo yin pas de la zhugs pa ni g.yo ste/g.yo dang bral zhing g.yo med la gya gyu med pa'i sems zhes bya ba'i don to/ /sngags rgyud kyi ni rab sbyor shes te sngags ni shes pa ste/ de kho na nyid kyi don yid la byas pas 'gro ba skyob pa'i phyir na sngags so/ /de yang phreng ba'i sngags dang btus pa'i sngags dang snying po'i sngags zhes bya ba rnam pa gsum mo//rgyud ni phyir bzlog gi 'khor lo la sogs pa'o/ /sngags dang rgyud ni sngags rgyud de/ /de rnams kyi rab sbyor ni zhi ba la sogs pa'i las te/ de shes pa'i phyir sngags rgyud kyi ni rab sbyor shes pa'o//snying rjer ldan pa ni sems can thams cad la snying rje ba dang ldan pa'o/ /bstan bcos mkhas pa ni 'chos pa'i phyir bstan bcos te/ gzhung du spel ba yin la/ /de yang mdor bsdu na rnam pa bcu gnyis te/ chos dang / rtog ge dang / don dang / sgra dang / gar dang /ro bcud dang / yongs su brtag pa dang / 'dod pa dang / gso ba dang / rtsis dang / bzo dang / rnam par shes pa'i bstan bcos dag go/ /bstan bcos la mkhas pa ni 'chos pa la mkhas pa'o/ /slar yang slob dpon gyi khyad par bstan pa'i phyir/ de nyid bcu zhes bya ba la sogs pa gsungs te/bcu ni rab tu grags pa'i grangs te bgrang ba la 'jug go/ /de nyid ni phyin ci ma log pa'i rang bzhin no/ /de rnams de nyid kyang yin la bcu yang yin pas na bcu'i grangs su 'chad pa'i de nyid dag ni de nyid bcu'o/ /de nyid bcu po dag kyang dkyil 'khor dang /ting nge 'dzin dang / phyag rgya dang / sngags dang / stang stabs dang / 'dug stangs dang / bzlas pa dang / sbyin sreg dang / mchod pa'i las la sbyor ba dang / slar bsdu ba dag go/ /dkyil 'khor yang rnam pa gsum ste/ sku'i dkyil 'khor dang / gsung gi dkyil 'khor dang /thugs kyi dkyil 'khor ro/ /ting nge 'dzin ni rnam pa gsum ste/ dang po sbyor ba dang / dkyil 'khor rgyal po mchog dang / las rgyal po mchog rnams ngo bo nyid dang / longs spyod rdzogs pa dang sprul pa'i sku'i dbye bas so/ /phyag rgya ni rnam pa gnyis te/ lag pa'i phyag rgya dang / yid kyi sku'i phyag rgya'o/ /sngags ni bshad zin to/ /stang stabs ni rnam pa mang ste/ bung ba'i dra ba la sogs pa'o/ /'dug stangs ni mdor bsdus na rnam pa bzhi ste/ pad+ma'i 'dug stangs dang rdo rje'i 'dug stangs dang sems dpa'i 'dug stangs dang khro bo'i 'dug stangs so//bzlas pa ni rnam pa bzhi ste/ khro bo'i bzlas pa dang rdo rje'i bzlas pa dang spro ba'i bzlas pa dang 'gog pa'i bzlas pa'o/ /sbyin sreg ni rnam pa bzhi ste/ zhi ba dang rgyas pa dang dbang dang mngon spyod do/ /mchod pa'i las la sbyor ba ni/ phyi nang gsang ba'i mchod pa'i nan tan la rab tu sbyor ba'o//slar bsdu ba ni rnam pa gnyis te/ ye shes kyi dkyil 'khor gshegs su gsol ba dang dam tshig gi dkyil 'khor bsdu ba'o/ /de nyid bcu po rnams yongs su shes shing khong du chud pas ni de nyid bcu ni yongs su shes pa'o/ /dkyil 'khor bri ba'i las la mkhas//dkyil 'khor ni bri bya'i dkyil 'khor te ri mor bri ba'i dkyil 'khor dang / bri ba ni dkyil 'khor bri ba ste de dag gi las ni bya ba yin la/ de dag rig cing shes pa'i phyir dkyil 'khor bri ba'i las la mkhas pa'o/ /de la dkyil 'khor gyi las ni phyi dang nang gi sa sbyang ba dang yongs su gzung ba dang /bgegs la phur bus gdab pa dang / phyogs bcing ba dang / mtshams bcing ba dang / lha lhag par gnas pa dang / thig dang rdul tshon gdab pa dang / bum pa lhag par gnas shing dgod pa dang / dkyil 'khor sgrub pa la sogs pa'o/ /bri ba'i las kyang snam bu dang dar dpyang dang 'khor lo la sogs pa bri ba'o/ /gsang sngags 'chad byed nam oM yig la sogs pa de kho na nyid gsum ro gcig pa'i gsang chen gyis bshad par bya ba'i sngags rnams 'chad pa la mkhas shing rtogs pa'i phyir gsang sngags 'chad byed de/yang gsungs pa/ sngags dang sngags shes rab gsungs pa/ /de nyid bskul bar gsungs pa ste/ /skye ba med cing snang ba med/ /mtshon bya dang ni mtshan nyid spangs/ /'di la sngags zhes brjod pa yin/ /gsang chen don ni rtogs pa yin//zhes so/ /slob dpon zhes bya ba ni/ dbang bskur ba la sogs pa'i las la 'jug pa'i phyir slob dpon te/ yang gsungs pa/ chos kyi kha ton klog pa dang / /'chad dang man ngag sbyin pa dang / /dbang bskur ba dang las byed pa/ /slob dpon zhes byar brjod pa yin/zhes so/ /dang ba zhes pa ni ser sna dang bral zhing snying nas dga' ba'o/ /dang yig las ngo bzhin gsal ba'o/ /dbang po thul zhes bya ba la gang gis mig la sogs pa'i dbang po rnams dbang du byas nas thul ba de ni dbang po thul ba'o/ /ba'ang zhes bya ba ni lhag par sdud pa'o//slob dpon la smod pa'i skyon/ mgon de zhes bya ba la sogs pas gsungs te/ de zhes bya ba ni de lta bu'i yon tan gyis khyad par du byas pa'i slob dpon gang yin pa de'o/ /mgon zhes pa ni sangs rgyas dang byang chub sems dpa' la sogs pa rnams kyi mgon du gyur cing mnyes par bya ba yin pa'i phyir mgon te mgon de'o//gang gis zhes bya ba ni slob mar rmongs pas so/ /brnyas pa ni smod par byas pa'o/ /cir gyur nas she na/ slob gyur phyi nas zhes gsungs te/ slob ma ma yin pa las slob mar gyur nas zhes bya ba slob gyur phyi nas so//bsam bcas pas ni bsam pa dang lhan cig tu 'jug pas bsam bcas te bsam pa thag pa nas yin gyi smyo ba'am ma shes pa'am rnam par g.yengs pa'i sems kyis ni ma yin pa'o/ /sangs rgyas thams cad smod pas na sangs rgyas ni de bzhin gshegs pa rnams te/chos thams cad kyi don dam pa thugs su chud pa'i phyir sangs rgyas yin pa'am/ 'di dag dri ma med pa'i blo can yin pa'i phyir sangs rgyas so/ /yang na dus thams cad mkhyen cing skyon thams cad dang bral bas na yang dag par rlom pa'i seng ge dang 'phrog byed dang dbyig gi snying po la sogs pa'i lha rnams pas rgyas shing thugs su chud pa'i dgongs pa dang ldan pa'i phyir sangs rgyas rnams so//thams cad ni ma lus pa ste/ phyogs bcu'i 'jig rten gyi khams ji srid par bzhugs pa de dag thams cad do/ /de dag ni sangs rgyas kyang yin la thams cad kyang yin pas sangs rgyas thams cad de sangs rgyas de dag thams cad la brnyas shing smod la 'phya ba des ni sangs rgyas thams cad la smod pa yin no//de ni zhes pa ni su zhig bla ma la brnyas pa byed pa 'di de'o/ /rtag tu ni rgyun du'o/ / sdug bsngal ni nye bar 'joms pa ste/ da yang 'di pa dang 'jig rten pha rol pa rnam pa gnyis so/ /de la mthong ba'i chos la lus dang sems gzir ba nye bar 'tshe ba la sogs pa rnams ni 'di pa'o/ /dmyal ba la sogs pa rnams su gcod pa dang gshegs pa dang sreg pa dang 'tshod pa la sogs pa'i sdug bsngal rnams ni 'jig rten pha rol pa'o//'thob ces bya ba ni myang bar bya zhing nyams su myong dgos so zhes bya ba'o/ /slob dpon ni de kho na nyid thugs su chud pas sangs rgyas zhes de skad du brjod pa de ni sangs rgyas thams cad kyi rang bzhin yin pas na de la smod pa las sangs rgyas thams cad smad pa las skyes pa'i sdug bsngal 'byung ba yin no//de gang las she na/ slob dpon ni de bzhin gshegs pa thams cad lta bur blta bar bya'o zhes pa'i bcom ldan 'das kyi gsung tshad ma yin pa'i phyir ro/ /yang gsungs pa//brtan g.yo'i 'jig rten gsum po na/ /slob dpon las mchog bla ma med/ /gang gi drin las dngos grub kun/ /'phral nyid du ni thob par byed/ ces so/ /slar yang bla ma smod pa'i nyes dmigs bye brag tu bstan pa'i phyir yams dang nyer 'tshe zhes bya ba gsungs te/bla ma'i zhabs la smod pa 'chi bar 'gyur ro zhes 'brel lo/ /bla ma ni slob dpon yin la/ de'i zhabs ni zhabs dag ste de dag la smod cing sun 'byin pa ni bla ma'i zhabs la smod pa'o/ /'chi bar 'gyur ba ni 'chi ba'i 'os te rnam par nyams par 'gyur ro zhes bya ba'i don to/ /ci zhig dag gis she na/de'i phyir/ yams dang nyer 'tshe dgra rnams kyis/ /zhes bya ba gsungs te/ yams ni rdo rje'i me 'bab pa dang chu dang rlung dang mu ge dang gshed ma la sogs pa rnams kyis gzir bar byas pa'o/ /nyer 'tshe ni 'byung po dang yi dags dang 'dre dang srin po dang sbrul dang gcan gzan gtum po la sogs pa las byung ba'i nye bar 'tshe ba rnams so//dgra ni sha 'khon can gyi dgra rnams so zhes bya ba'i don to/ /yams dang nye bar 'tshe ba dang dgra rnams te yams dang nyer 'tshe dgra rnams kyis so/ /dang yig las gnyan rnams kyis kyang ngo //yang gang dag gis she na/ gdon dang rims zhes bya ba gsungs te/ gdon ni nyi ma la sogs pa'i gza' dgu po dag gam yang na ma mo la dga' ba la sogs pa bcu gnyis po dag ste/ sems can rnams kyi mdangs dang stobs len par byed pa'i phyir gdon no//rims ni nad rnams te sems can rnams la gdung ba skyed par byed pa'i phyir na rims so/ /de dag kyang mdor bsdu na rlung dang mkhris pa dang bad kan dang 'dus pa ste rnam pa bzhi'o/ /slar yang phye na ni rnam pa mang ngo / /dug ni shas che ba ste/ de yang mdor bsdu na brtan pa dang g.yo ba dang bcos ma dang gyur pa ste rnam pa bzhi'o//de la brtan pa ni nag po brtsegs pa la sogs pa'o/ /g.yo ba ni sbrul la sogs pa rnams kyi'o/ /bcos ma ni kun du sbyar ba dag go/ /gyur ba ni rnam par rtog pa las byung ba'o/ /sogs pa'i sgras ni/'gyegs pa la sogs pas so/ /gdon rnams dang rims rnams dang dug la sogs pas na/ gdon dang rims dang dug sogs kyis/ /de rnams kyis bla ma'i zhabs la smod pa 'di 'chi bar 'gyur ro/ /de ci 'dra ba zhig ce na rmongs chen te/ de rmongs pa yang yin la chen po yang yin pas rmongs chen te shin tu blun pa'o//de ltar shes nas legs pa 'dod pa dag gis slob dpon la smod par mi bya bar yon tan kho na gzung bar bya'o/ /yang gsungs pa/ slob dpon yon tan gzung bya ste/ /skyon ni nam yang ma yin no/ /yon tan gzung bas dngos grub ste//skyon rnams las ni grub pa nyams/ /zhes so/ /slar yang rgyal po zhes bya ba la sogs pas bla ma la smod pa'i rnam par smin pa gsungs te/ bla ma'i zhabs la smod pa zhes sbyar nas bsad nas dmyal bar 'gro zhes sbrel lo/ /bsad nas ni shi nas dmyal ba na 'gror 'gro zhing 'bor bar byed do//su dag gis bsad nas she na/ rgyal gtum zhes bya ba ste/ rgyal po ni sa skyong ba yin la/ gtum po ni mdzod spung ba dang / dum bu srung ba la sogs pa rnams te/ rgyal po dang gtum po ni rgyal gtum mo/ /yang na rgyal po ni rnam thos kyi bu la sogs pa gsang ba pa'i gtso bo rnams te 'dir rgyal po'i sgras ni gsang ba rnams so//gtum po ni gsheg par byed pa dang / gzir bar byed pa rnams te/ rgyal po dang gtum po ni rgyal gtum gnod sbyin gyi mngag gzhug pa rnams zhes bya ba'i don to/ /me ni me nyid do//sbrul gdug ni phyugs dang bya dang sdig sbrul la sogs pa rmug par byed pa rnams so/ /rgyal gtum dang me dang sbrul gdug pa dag ni/ rgyal gtum me dang sbrul gdug ste/ /de rnams kyis so/ /yang su dag gis she na/ mkha' 'gro zhes bya ba ste/ mkha' 'gro ni khrag la dga' ba'i rnal 'byor ma'i bye brag go//chu ni chu nyid do/ /rkun po ni chom po ba'o/ /mkha' 'gro ma dang chu dang rkun po rnams ni mkha' 'gro chu dang rkun po ste de rnams kyis so/ /gdon ni tshangs pa la sogs pa'i lha'i dpung ste gdon de rnams kyis so/ /yang gsungs pa/ tshangs pa dbang po zla nyi skra 'greng bas/ /mtha' dag pa yi gzhi la bgegs byed do/ /zhes so/ /log 'dren ni tshogs kyi bdag po la sogs pa gtso bor gyur pa'i log 'dren de rnams kyis so/ /kyang zhes pa ni kun sdud pa ste mi'am ci dang lto 'phye chen po rnams kyis kyang bsad nas dmyal bar 'gro'o//de bas na bla ma la rmi lam du yang smad par mi bya bar rgyun du mchod par bya'o/ /gang smod par byed pa de dag ni 'jig rten du yang gces spras byed par mi 'gyur ro/ /yang gsungs pa/ slob dpon smod pa gang yin de/ /bgegs dang log 'dren gyis 'joms shing //khro zhing las ni ngan pa'i bdag /rtag tu sa steng dag na spang / /zhes so/ /slar yang nam yang zhes bya ba la sogs pas rnam pa gzhan gyis slob dpon la smod pa'i 'bras bu gsungs te/ slob dpon gyi thugs dkrugs par mi bya'o zhes sbrel lo/ / thugs dkrugs pa ni yi gsod pa ste lus sam ngag gis yid mi bde bskyed par byed pa de mi bya zhing mi sgrub bo/ /su'i zhe na/ slob dpon dag gis ni zhes bya ba gsungs te/ slob dpon ni bla ma'o/ /nam yang ni 'gar yang ngo / /gal te slob dpon gyi thugs dkrugs par byed na de'i tshe cir 'gyur snyam na/gal te shes 'chal zhes bya ba la sogs pa gsungs te/ gal te na 'di la blo ngan dang gdug pa'i shes rab yod pas shes 'chal gyis byas shing bsgrubs na dmyal bar gtub cing 'tshed par 'gyur te/ bum par 'tshed pa la sogs pa bshad pa dag tu'o//nges par ni the tshom med pa ste bya ba'i khyad par ro/ /ci slob dpon la smod pa gcig pu kho nas dmyal bar ltung ngam zhe na/ mnar med la sogs zhes bya ba la sogs pa gsungs te/ mnar med la sogs zhes bya ba gtso bo yin pa nyid kyi phyir 'dir mnar med gzung gi /dang po yin pa'i phyir ni ma yin pas mnar med pa'i mthar thug pa ni mnar med pa la sogs so/ /sogs pa'i sgras yang sos dang thig nag dang bsdus 'joms dang ngu 'bod dang ngu 'bod chen po dang tsha ba dang rab tu tsha ba ste bdun po rnams so/ /mnar med dang bcas pas tsha ba'i dmyal ba brgyad do//chu bur can dang chu bur rdol ba dang so thams thams pa dang kyi hud zer ba dang a chu zer ba dang ut+pa la ltar gas pa dang pad+ma ltar gas pa dang pad+ma ltar cher gas pa zhes bya ba dag ni grang ba'i dmyal ba brgyad do/ /me ma mur dang ral gri lo ma'i tshal dang spu gris gang ba'i lam dang shAl ma li'i sdong po dang bum par 'tshed pa la sogs pa dag ni nye ba'i dmyal ba rnams so//nyi tshe ba'i dmyal ba ni rab tu mang ba'o/ /dmyal bar bstan pa gang yin pa ni/ sems can rnams mi dge ba'i dbang gis der shin tu dmyal zhing gtub pa gang yin pa'o//bshad pa ni bsgrags pa'o/ /de rnams ci 'dra zhe na/ 'jigs rung ste 'jigs par byed pa sreg pa la sogs pa'i sdug bsngal mi bzad cing bdo ba skyed par byed pa'i phyir ro/ /der ni gnas par yang dag bshad/ /der ni dmyal ba de rnams su'o//gnas pa ni 'dug pa dang sdod pa zhes pa'i don to/ /yang dag bshad ni bstan pa ste/ /bsam pa ma dag pas 'phangs nas bskal pa'i grangs kyis bgrang bar bstan pa rnams su zhes bya ba'i don to/ /yang gsungs pa/ /gang zhig de 'dra'i rgyal sras sbyin bdag la//gal te ngan sems skyed par byed na de/ /ngan sems bskyed pa'i grangs bzhin bskal bar ni/ /dmyal bar gnas par 'gyur zhes thub pas gsungs/ /zhes pa'o/ /gang las she na/ slob dpon la zhes bya ba ste/ de bzhin gshegs pa'i bstan pa la rang kun du spyod cing legs par bslabs pas sam kun du spyod par byed pa'i phyir slob dpon te/yang gsungs pa/ bstan la kun du yang dag spyod/ /gzhan dag la yang spyod byed pas/ /mkhas pa rnams kyis bla ma la/ /slob dpon zhes byar yongs su brjod/ /ces so/ /slob dpon bla ma de la'o//ni ni gang gi phyir gyi don la'o/ /smod pa las te sun 'byin zhing skyon 'dogs pa las zhes bya ba'i don to/ /de bas zhes bya ba la sogs pas nye bar bsdu ba gsungs te/ de bas gang gi phyir bla ma la smod pa las 'di dang phyi mar yang sdug bsngal chen por 'gyur ba'i rgyu mtshan de las so//'bad pa yang de yin la thams cad kyang yin pas 'bad pa thams cad de gnas skabs kun du'o/ /rdo rje slob dpon zhes pa ni ye shes lnga'i rang bzhin rtse lnga pa'i rdo rje dang ldan pa'i slob dpon ni rdo rje slob dpon no/ /'di ni zhi ba pa la sogs pa rnams slob dpon yin pa bkag ste/ci'i phyir zhe na/ rdo rje 'dzin pa ni de rnams kyi dbang du ma byas pa'i phyir ro/ /de skad du yang / bde bar gshegs pa'i nyan thos theg pas min/ /rang rgyal rjes su brtse ba yis kyang min/ /ma dad sbyin dang tshul 'chos ser snas min/ /nga yi rdo rje 'di ni gzung mi bya//zhes bshad do/ /rdo rje slob dpon de yang ci lta bu zhig yin snyam na/ bla ma che zhes bya ba gsungs te/ bla ma ni bshad zin to/ /chen po nyid dang ldan pas chen po ste/ chen po nyid kyang rig pa chen po nyid dang spong ba chen po nyid dang dka' thub chen po nyid dang spro ba chen po nyid dang brtson 'grus chen po nyid dang mkhas pa chen po nyid do//de la rang dang gzhan gyi grub pa'i mtha' legs par shes pa ni rig pa chen po nyid do/ /nyon mongs pa thams cad rnam par 'joms pa ni spong ba chen po nyid do/ /tshul khrims legs par goms pa ni dka' thub chen po nyid do//bla ma bsten pas dul pa med pa ni spro ba chen po nyid do/ /dge ba tshol ba na mgo'am gos la me 'bar ba lta bus gnas pa ni brtson 'grus chen po nyid do/ /rmad du byung ba'i chos mngon sum du byed pa ni mkhas pa chen po nyid do/ /de skad du yang /rig ldan dpa' bo dka' thub spyad/ /spro chen de nas brtson 'grus ldan/ /rmad byung dang ni byed pa po/ /chen po zhes byar mngon par brjod/ /ces gsungs so/ /de bla ma yang yin la chen po yang yin pas bla ma che'o/ /bla ma chen po de yang ci 'dra ba zhig ce na/ bsgribs shing zhes bya ba la sogs pa gsungs te/ bsgribs pa ni mi'i rnam pas g.yogs pa'o/ /mchog ni thams cad kyi mchog go/ /dge ba ni bkra shis pa dang bzang ba dang zhi ba zhes bya ba rnams don gcig go/ /de sgrib pa yang yin te mchog kyang yin la dge ba yang yin pas na bsgribs shing mchog ste dge ba ni'o//smad par mi bya'o ni bshung bar mi bya ba ste/ pa rasmai'i tshig tu byas pa ni lung ngo / /nam yang ni 'gar yang ste/ /dus nam gyi tshe yang zhes bya ba'i don to/ /kha cig ni 'gar yang smad par mi bya'o zhes 'don to/ 'dul ba mngon par shes pa'i dran pa nyams pa med pas zur gyis smod pa'i tshig kyang nam yang mi bya'o zhes dgongs so//slob dpon la smod pa'i nyes pa phyir bcos par bya ba'i phyir/ rjes mthun zhes bya ba la sogs pa gsungs te/ rjes mthun ni 'byor pa dang bstun pa ji ltar rigs pa zhes bya ba'i don to//dang yig las yang na nor thams cad do/ /de zhes pa'i tshig phrad ni/ de las na zhes pa'i don to/ /de las ci zhig ce na/ bla ma'i zhal zas zhes bya ba gsungs te/ bla ma slob dpon la g.yos byas nas zhal zas te zan ni bla ma'i zhal zas te/ ston mo gya nom phul zhes bya ba'i don to//bla ma rnams las mnyan nas zhes sbyar ro/ /ci zhig gis khyad par du byas nas she na/ yon ni nor dang 'bru dang ba lang dang ma he la sogs pa'i yon dbul ba na ci 'byor ba'i yon dang bcas pa ni yon bcas te yon dang 'brel par zhes bya ba'i don to//dbul bar bya ba ni sbyin par bya'o/ /ston mo la sogs pa phul ba las ci zhig 'byung zhe na/ de las rims sogs zhes bya ba la sogs pa gsungs te/ de las ni ston mo la sogs pa phul ba de las so/ /rims la sogs pa'i gdung ba ni rims la sogs pa'i gnod pa ste gdung bar byed pa gang dag gi dang po rims yin pa de ni rims sogs so//gdung bar byed pa dag ni sngar bshad pa'i nye bar 'tshe ba la sogs pa rnams so/ /ni zhes pa ni nges par ro/ /phyir zhing phyi nas so/ /'byung ba ni skye ba ste mi zhes pa ni dgag pa'o/ /'di skad gsungs pa yin te/gang gi phyir bla ma la smad na 'di dang phyi mar yang sdug bsngal sna tshogs par 'gyur ba de bas na de nye bar zhi bar bya ba'i phyir bla ma la yon dang bcas pa'i ston mo dbul bar bya'o/ /de las bla ma dgyes par 'gyur la bla ma dgyes pa ni de bzhin gshegs pa thams cad dgyes pa yin no//dgyes nas yang 'dod pa thams cad tshim zhing rab tu zhi bar 'gyur ba yin la/ mngon par 'dod pa'i dngos grub rnams kyang 'byung bar 'gyur ro zhes bya'o/ /kha sbyor las byung ba'i rgyud du yang / gang phyir phyogs bcur bzhugs pa yi/ /sangs rgyas byang chub sems dpa' yis//bsod nams gang de slob dpon gyi/ /ba spu'i bu ga gcig na snang / /de phyir slob dpon mchod pa las/ /sangs rgyas byang chub sems dpa' dgyes/ /'on tang dam tshig rdo rje dang / /'dod pa'i dngos grub stsol par mdzad/ /ces gsungs so/ /slar yang slob ma'i bya ba bye brag tu bstan pa'i phyir/rang gi zhes bya ba la sogs pa gsungs te/ rang gi dam tshig kun spyod na/ /dam tshig ni bshad zin to/ /yang na dam tshig ces bya ba ni/ byang chub kyi sems la sogs pa bsrung ba ste/ 'dis byang chub tu yang dag par 'gro zhing thob par byed pa'i phyir ro//dam tshig sdom pa grub pa 'di/ /khyod kyis rtag tu bsrung bar bya/ /sangs rgyas kun gyis mthun par gsungs/ /dam pa rtag pa'i bka' yin no/ /rdo rje'i phyag rgya gang yin pas/ /gang zhig bskyed pa tsam gyis ni/ /sangs rgyas nyid du dogs med pa'i//byang chub sems ni gtang mi bya/ /dam pa'i chos ni mi smad cing / /nam yang dor bar mi bya'o/ /mi shes pa'am rmongs pa yis/ /de ni smad par mi bya'o/ /rang gi bdag nyid yongs spangs nas/ /dka' thub kyis ni gdung mi bya/ /ci bde bar ni bde bar gzung //'di ni ma byon rdzogs sangs rgyas/ /rdo rje dril bu phyag rgya rnams/ /nam yang dor bar bya'o/ /zhes rgyas par ro/ /kun spyod ces bya ba ni kun du spyod par byed pas na kun spyod de bla ma'i rjes su 'jug par byed pa'o/ /dam tshig dang kun spyod ni dam tshig kun spyod de rang gi dam tshig dang kun du spyod pa'o//yang na rang dang mthun pa'i dam tshig ste/ de'i kun spyod ni nan tan yin pas rang gi dam tshig kun spyod de'o/ /srog gis zhes pa ni nus pa ste/ yang na 'tsho ba rnams kyis so/ /kyang gi sgra ni kun sdud pa la'o/ /su'i srog gis she na rang ste bdag nyid kyi'o/ /bsten pa ni bsnyen pa'o//rang gi srog 'ba' zhig gis bsten pa nyid dam zhe na/ ma yin no zhes gsungs pa/ sbyin min zhes bya ba la sogs pa'o/ /sbyin min ni gtong mi phod pa'o/ /bu dang chung ma ni sras dang btsun mo'o/ /sogs pa'i sgras ni gnyen bshes dang 'khor yang gzung ngo / /'byor pa smos ci dgos ni rdzas de rnams thams cad ni smos ci dgos pa'o//ji ltar zhe na/ g.yo ba zhes te g.yo ba ni mi rtag pa'o/ /'di dag gis ni 'di bstan pa yin te/ gal te bu la sogs pa gtong ba las gzhan gyis rang gi dam tshig kun du dpyad par ma nus na de'i the tshom med par de dag yongs su btang nas kyang bstan par bya'o zhes bya ba yin no//yang gsungs pa/ pha ma rang gi skye bo bu dang gnyen gyi mtshams/ /gos dang bza' btung nor 'bru khyim la sogs pa'i sa/ /rang gi yan lag chu shing 'dab ma rlung bskyod ltar/ /rnam par bltas nas mkhas pa dam pa'i chos sgrub bo//zhes so/ /bla ma lhag par bsnyen bkur ba'i rgyu mtshan gsungs pa/ gang phyir zhes bya ba la sogs pa'o/ /gang phyir ni rgyu mtshan gang las so/ /rnyed par dka' ba ni sdug bsngal bas rnyed pa'i phyir rnyed dka' ba ste rnyed par dka' ba'o/ /'jig rten ni 'gro ba'o/ /dus ji tsam gyis she na/bskal pa bye ba ni zhes bya ba la sogs pa gsungs te/ gong nas gong du bcur bsgyur ba'i gnas brgyad pa la gnas pa'i grangs ni bye ba yin la/ de rnams bgrang ba la zhugs pa na grangs med de bgrang bar mi nus pa'o/ /grangs med kyang de yin la bye ba yang yin pa'i phyir grangs med bye ba'o//bskal pa grangs med pa bye ba ni bskal pa grangs med bya ba ste bskal pa grangs med bye ba de rnams kyis so/ /bskal pa brgya ni 'dir bar gyi bskal par gzung bar bya'o/ /de ci'i phyir zhe na/ pha rol tu phyin pa'i tshul la bskal pa chen po grangs med pa gsum gyis sangs rgyas nyid thob par 'gyur bar grags la/bar gyi bskal pa gang yin pa de ni bskal pa chen po'i bye brag ste/ 'di ltar dang por mar 'grib pa'i bar gyi bskal pa gcig go/ /mar 'grib pa dang yar 'phel ba'i bar du bar gyi bskal pa bco brgyad do/ /mthar yar 'phel ba'i bar gyi bskal pa gzhan te/de ltar na bar gyi bskal pa nyi shu'o/ /bar gyi bskal pa nyi shur 'chags so/ /bar gyi bskal pa nyi shur chags nas gnas so/ /bar gyi bskal pa nyi shur 'jig go/ /bar gyi bskal pa nyi shur 'jig rten gyi khams zhig nas gnas so/ /de ltar bar gyi bskal pa brgyad cu la bskal pa chen po gcig ste/bskal pa chen po grangs med pa gsum gyis sangs rgyas nyid do/ /'di'i don 'di yin te/ gong nas gong du bcur bsgyur ba'i drug cu'i gnas pa'i grangs ni grangs med pa ste/ grangs med pa zhes bya ba grangs su bgrangs pa'i grangs med pa'o//bskal pa chen po kho na bgrangs pa'i bskal pa chen po grangs med pa gsum po'i grangs de rnams kyis sangs rgyas kyi byang chub thob par 'gyur ro zhes bya ba yin no/ /bskal pa grangs med pa bye ba rnams kyis rnyed par dka' ba de ci zhig ce na/ sangs rgyas nyid ces bya ba gsungs te/sangs rgyas nyid ni byang chub yin la/ de yang chos kyi sku brnyes par gyur pa dang / longs spyod rdzogs pa'i sku brnyes par gyur pa dang / sprul pa'i sku brnyes pa ste rnam pa gsum mo/ /de la ye shes kyi tshogs kyi dbang gis zag pa dang bcas pa'i chos thams cad kyi sa bon yongs su zad cing gnas yongs su gyur pa'i mtshan nyid sangs rgyas kyi yon tan thams cad kyi sa bon gyi rten spros pa med cing snang ba med pa rab tu gsal ba tsam/zhing yang dag par 'gro ba'i don gyi bya ba zhes pa rang bzhin gyis rtag pa nyid kyis rtag pa'i sku brnyes pa ni chos kyi sku brnyes par gyur pa'o//shin tu yongs su dag pa'i sangs rgyas kyi zhing rnams su dpe med pa'i skyes bu chen po'i mtshan sum cu rtsa gnyis dang dpe byad brgyad cus rnam par mdzes shing / byang chub sems dpa' sems dpa' chen po 'phags pa rnams dang thabs cig tu dam pa'i chos kyi longs spyod chen po'i dga' bas tshim zhing bde ba kun nas rdzogs la/rgyun mi 'chad pas rtag pa nyid kyis rtag pa dag pa 'jig rten pa'i sku brnyes pa ni longs spyod rdzogs pa'i sku brnyes par gyur pa'o/ /'gro ba mtha' dag gi don sgrub pa'i ched du 'ga' zhig tu bltams pa dang /'ga' zhig tu byang chub kyi spyod pa dang / 'ga' zhig tu byang chub pa dang / 'ga' zhig tu chos kyi 'khor lo bskor ba dang / 'ga' zhig tu mya ngan las 'das par ston pa sangs rgyas la sogs pa'i gzugs kyis gdul bya dang mthun par bzhugs pa rgyun gyi rtag pa nyid kyis rtag pa'i gzugs kyi sku brnyes par ni sprul pa'i sku brnyes par gyur pa'o//gzugs kyi sku gnyis brnyes pa yang bsod nams kyi tshogs kyi dbang gis yin par rig par bya ste/ de dag ni sangs rgyas nyid do/ /brtson ldan zhes bya ba la brtson pa ni gus pa dang bcas shing rgyun mi 'chad par yun ring du goms pa ste/de 'di la yod pa'i phyir brtson no/ /brtson ldan de la tshe 'di nyid de mthong ba'i chos la ster bar byed cing rab tu sbyin par byed do zhes bya ba'i don to/ /yang gsungs pa/ phar phyin tshul la nyon mongs rnams kyi yun ring 'bras bur 'gyur/ / sngags kyi tshul la nyon mongs med pa kho nar myur du grub/ /ring dang thung ba'i stobs ldan dang po 'di la yid ches pa'i/ /dad pa 'phel byas blo ldan rnams kyi lam ni gzhan yin no/ /zhes so/ /rtag par yang ni zhes bya ba la sogs pas slob mas rtag tu bya ba gsungs te/ rtag par yang ni dam tshig bsten/rtag par ni rgyun du ste/ yang gi sgra ni nges par gzung ba la'o/ /dam tshig ni bshad zin to/ /bsten ni gnas par bya ba'o/ /de bzhin nyid du gshegs nas de nas byon pas de bzhin gshegs pa yin pa'am/ yang na sems can gyi don gyi rgyur gshegs pa de bzhin du sems can gyi don mdzad nas byon pa'i phyir de bzhin gshegs pa ste sangs rgyas rnams so//rtag tu ste nyi ma so sor mchod ni sna tshogs pa'i mchod pa rnams kyis mchod par bya'o/ /rtag tu ni dus thams cad du'o/ /bla ma ste slob dpon la dbul ba ni stobs shing sbyin par bya'o/ zhes bya ba'i don to/ /sangs rgyas dang byang chub sems dpa' rnams yod bzhin du ci ltar bla ma la dbul lo zhes bya zhe na/ 'di ni zhes bya ba la sogs pa 'dir gsungs pa yin te/ 'di zhes bya ba ni bla mar bshad pa'o/ /ni ni gang gi phyir gyi don to/ /sangs rgyas kun ni de bzhin gshegs pa thams cad de/'dra ba ni mtshungs pa'o/ /de bzhin gshegs pa la sogs pa ni bag chags dang bcas pa'i sgrib pa thams cad spangs shing shes bya thams cad thogs pa med par mkhyen pa yin la/ gzhan ni dman pa'i sgrib pas chos thams cad kyi ngo bo nyid ma rig pa yin na ji ltar na de dag dang 'di la mtshungs pa nyid yod ce na/chos nyid kyi lus kyis mtshungs pa nyid kyi phyir te/ chos nyid ni gnyis kyis stong pa nyid de rtag tu de kho na bzhin du yod pa'i phyir de bzhin nyid do/ /yang gsungs pa/ de bzhin gshegs pa rnams byung yang rung ste chos rnams kyi chos nyid chos gnas pa nyid 'di ni gnas pa nyid do zhes so//'phags pa'i de bzhin nyid dang slob dpon gyi de bzhin nyid dag la dbye ba med de/ de bas na bla ma dang sangs rgyas thams cad 'dra ba yin no/ /yang gsungs pa/ de bzhin gshegs pa'i de bzhin nyid gang yin pa dang so so skye bo'i de bzhin nyid gang yin pa 'di ni gcig ste/gnyis su med cing gnyis su byar med do zhes so/ /gal te de lta na seng ge dang 'phrog byed dang dbyig gi snying po la sogs pa'i lha rnams dang so so'i skye bo rnams dang de bzhin gshegs pa rnams kyang mtshungs par 'gyur ro//bden mod kyi de lta na yang de rnams la byang chub kyi sems skyes pa nyid yin pas 'di lta bu rnams la phyag dang mchod pa bya bar ma bshad de/ byang chub kyi sems kyi rang bzhin la de bzhin gshegs pa zhes bya'o/ /yang gsungs pa/ gang zhig byang chub sems bskyed gti mug gis//bde gshegs min la phyag byed dge 'dun lha/ /de rnams de la byams min sems skye ste/ /sngags su gyur pa bcom nas grub pa min/ /drag dbang brgya byin rlung sgra sogs kyang rung / /'jigs ster lha de dag ni phyag 'os min/ /de chos bsten min de ni gya nom min//de dag rtags 'chang rnams kyang mchod bya min/ /sdang ba'i chos kyis brtul zhugs mi spyad cing / /de yi de lta'i spyod la dga' mi bya/ /de dag bstod pa mi 'don sngags mi bzlas/ /nga rgyal spangs nas snying rje'i sbyin pa sbyin/ /zhes so/ /yang na de rnams la sangs rgyas kyi rigs med pa'i phyir/de dag la sangs rgyas lta bur blta bar mi bya ba yin no/ /de rnams la rigs med par ji ltar shes par bya zhe na/ rtags ma mthong ba las so/ /sangs rgyas kyi rigs kyi rtags ni mdor na rnam pa bzhi ste/ sbyor ba'i sngon nyid nas sems can thams cad la snying rje ba dang /theg pa chen po la mos pa dang / dka' ba spyad pa la ji mi snyam pa'i don gyi bzod pa dang / pha rol tu phyin pa'i tshul gyi dge ba yang dag par spyod pa rnams so/ /de skad du yang / sbyor ba'i sngon du snying rje dang / /mos pa dang ni bzod pa dang / / dge ba yang dag spyod pa ni/ /rigs kyi rtags su nges par bshad/ /ces gsungs pa yin no/ /yang na de rnams kyis bla na med pa'i dbang bskur ba ma thob pa nyid kyi phyir te/ sangs rgyas kyi rigs can gang bla na med pa'i dbang bskur ba thob pa de nyid de bzhin gshegs pa thams cad gyis mgrin gcig tu sangs rgyas nyid du lung bstan pas na sangs rgyas lta bur blta bar bya ba yin no//de lta bas na sangs rgyas kyi rigs can byang chub tu thugs bskyed la bla na med pa'i dbang bskur ba thob pa nyid kyi phyir bla ma kho na la sangs rgyas lta bur mchod cing phyag bya'o/ /gang gang zhes bya ba la sogs pas dbul bar spro ba gsungs te/gang gang thugs bab cung zad dang / /gang gang zhes gnyis nyid ni zlos pa ste/ dngos po dang / nor dang 'bru la sogs pa gang dang gang la nye bar sbyar zhing brjod do/ /thugs bab ni lhag par dgyes pa ste/ bla ma bdag nyid kun nas mngon par bzhed pa zhes bya ba'i don to//cung zad ni ma bstan pa'o/ /shin tu khyad par 'phags pa nyid ni shin tu gtso bo'o/ /de dang de ni dngos po de dang de nyid do/ /nyid ni kho na'i sgra'i don la'o/ /bla mar zhes bya ba ni slob dpon la dbul bar rtogs par bya'o/ /ci zhig 'dod pas she na/de nyid mi zad 'dod pa yis/ /zhes bya ba gsungs te/ de nyid ces pa ni gang thugs la bab pa'am/ shin tu khyad par 'phags pa'o/ /de ji 'dra bar snyam pa la/ mi zad ces bya ba gsungs te/ mi zad pa ni dpag tu med pa'o/ /'dod pa yis ni mngon par tshol bas te/ slob mas zhes pa lhag ma'o//dngos po gang dang gang bla ma la phul ba de dang de ni 'di dang phyi mar yang zad par mi 'gyur ro zhes bya ba 'di bstan pa yin no/ /de byin zhes bya ba la sogs pas mi zad pa'i rgyu mtshan gsungs te/ sbyin pa ni bshad ma thag pa ste/ de ni bla med dag la'o/ /sangs rgyas thams cad ni de bzhin gshegs pa ma lus pa la sbyin par 'gyur bar bstan to//rtag tu ni gtan du'o/ /'o na bla ma yang gzhan yin la/ sangs rgyas thams cad kyang gzhan yin na/ de la ji ltar na bla ma la sbyin pas sangs rgyas thams cad la byin par 'gyur zhe na/ bla ma dang sangs rgyas dag dbyer med pa'i phyir te/dbyer med pa nyid yin kyang rnam pa tha dad du bshad pas na kho bos 'dir yang brjod par mi bya'o/ /byin pa'i dgos pa ci yin zhe na/ de byin zhes bya ba la sogs pa gsungs te/ de byin ni bla ma de la byin pa las sam/ yang na de'i thugs la bab pa dang shin tu khyad par 'phags pa'i sbyin pa de sbyin pa'o//de las bsod nams tshogs zhes bya ba gso zhing dag par byed la yang dang yang du phun sum tshogs pa thob par byed pa'i phyir bsod nams te dge ba rnams so/ /bsdus nas sangs rgyas pas na tshogs te bsod nams kyi tshogs so//'gyur ro zhes lhag par brjod do/ /tshogs las ni bsod nams dang ye shes kyi tshogs las so/ /dngos grub ces bya ba ni mngon par 'dod pa'i don thob pa ste/ dngos grub de yang dman pa dang mchog rnam pa gnyis te/ 'dir bye brag tu bya ba'i phyir mchog ces gsungs te/mchog ni thams cad kyi gtso bo phyag rgya chen po'i dngos grub dang yang dag par rdzogs pa'i byang chub kyi dngos grub ces bya ba'i don to/ /slar yang de bas zhes bya ba la sogs pas bla ma'i che ba'i bdag nyid gsungs te/ rgyu mtshan gang gi phyir na bla ma la byin pa las mchog gi dngos grub tu 'gyur ba de bas na'o//slob ma ni nyan pa'i skye bo'am slob par byed pa'o/ /de ci lta bur gyur pa zhe na/ snying rje gtong zhes bya ba la sogs pa gsungs te/ snying rje ni brtse ba ste/ de yang sems can la dmigs pa dang chos la dmigs pa dang dmigs pa med pa rnam pa gsum mo//gtong ba ni sbyin pa ste/ de yang chos kyi sbyin pa dang zang zing gi sbyin pa dang byams pa'i sbyin pa rnam pa gsum mo/ /tshul khrims ni tshul khrims 'chal ba dang bral ba ste/ de yang sdom pa'i tshul khrims dang / sems can gyi don bya ba'i tshul khrims dang /dge ba'i chos sdud pa'i tshul khrims rnam pa gsum mo/ /bzod pa ni zhi ba ste/ de yang chos la nges par rtog pa'i bzod pa dang / sdug bsngal dang du len pa'i bzod pa dang / gzhan gyis gnod pa la ji mi snyam pa'i bzod pa rnam pa gsum mo/ /snying rje dang gtong ba dang tshul khrims dang bzod pa ni snying rje gtong /tshul khrims bzod pa'o/ /de rnams nyid yon tan te/ spel bar bya zhing goms par bya bas na zhes byas nas so/ /de rnams 'byor ba ni ldan pa ste/ snying rje gtong / tshul khrims bzod pa'i yon tan ldan pa'o/ /tha dad nyid ni gcig ma yin par ro//mi zhes pa dgag pa la ste/ kho na'i sgra ni nges par gzung ba la'o/ /bya'o ni sgrub pa'o/ /bla ma zhes bya ba ni slob dpon te/ rdo rje 'dzin pa ni rdo rje sems dpa'o/ /dang gi sgra ni kun bsdu ba la'o/ /'di skad du bstan par gyur pa yin te/ snying rje la sogs pa'i yon tan dang ldan par gyur pa dngos grub 'dod pa'i slob mas/bla ma yang gzhan la rdo rje 'dzin pa yang gzhan no snyam du rmi lam du yang rnam pa thams cad du bsam par mi bya ste/ des ji ltar bsam par bya na/ gang kho na bla ma yin pa de kho na rdo rje 'dzin pa yin no snyam du bsam par bya ba yin no/ /yang gsungs pa/de nyid rtag tu rdo rje 'chang / /de bzhin gshegs pa rin chen tog /de ni ye shes rgya mtsho che/ /don chen sbyin pa'i yid bzhin nor/ /zhes so/ /da ni mchod rten zhes bya ba la sogs pas bla ma'i che ba'i bdag nyid bshad pas slob ma 'dul bar byed pa gsungs pa ste/ mchod rten ni mchod rten no//de bshig pa ni rnam par bcom zhing drungs phyung ba zhes bya ba'i don to/ /de las sdig par 'gyur la de las 'jigs shing sdug bsngal dang bcas par 'gyur te/ des na mchod rten bshig 'dra'i sdig 'jigs pas so/ /grib ma yang ni gzugs brnyan yang ngo //'gong bar mi bya ba ni 'da' bar mi bya ba'o/ /lham stan zhes pa lham ni mchil lham mo/ /stan ni gdan no/ /bzhon pa ni khyogs la sogs pa ste/ 'dis 'gro bar byed do zhes byas nas so/ /sogs pa'i sgras ni gos dang rgyan la sogs pa rnams kyang ste/ lham dang stan dang bzhon pa la sogs pa rnams ni lham stan bzhon pa la sogs pa rnams so/ /de dag 'gong ba ni lham dang stan dang bzhon pa la sogs pa de dag 'gong ba'o/ /ni'i sgra ni bye brag la'o/ /smos ci dgos ni gtam des ci bya ste brjod mi dgos so zhes bya ba'i don to/ / slar yang de nyid blo gros chen po zhes bya ba la sogs pa gsungs te/ blo gros ni blo yin la che ba ni rgya che ba ste gang gi blo gros che ba de yis te thogs pa med pa'i blo zhes bya ba'i don to/ /dga' sems kyis ni yid rab tu dga' bas so/ /bla ma ste slob dpon gyi bka' ni rjes su bstan pa dang gsungs pa zhes bya ba'i don to//'bad de ni bsod nams 'dod pas so/ /bya ni bsgrub par bya ba'o/ /mi nus pa ni rgyu dang 'bras bu mi nus shing mi bzod pa'o/ /tshig gis sbyang ni zhu bar bya ba'o/ /de la zhes pa ni bla mar bstan pa'i bla ma de la'o/ /sgrub par byed pa'i dpe dang 'byor pas ni rigs pa yis so//ni'i sgra ni khyad par la'o/ /mi nus pa nyid ni mi bzod pa nyid do/ /dgongs pa ni 'di yin te/ gang bla ma gsungs pa de nyid bzod na de nyid slob mas 'bad nas bsgrub par bya'i/ gal te yang nus pa med cing mi lcogs la rgyu gzhan gyis kyang bya bar mi bzod par gyur pa de'i tshe mi dge ba la 'jigs pas de'i rgyu mtshan go bar bya ste bdag la 'di'i nus pa yod pa ma yin no zhes bla ma la brjod par bya ba yin no//bla mas zhes bya ba la sogs pas mnyes par byas pa'i phan yon gsungs te/ bla mas ni slob dpon las so//dngos grub ni 'dod pa'i dngos grub thob par 'gyur ba ste/ de yang 'jig rten pa dang 'jig rten las 'das pa rnam pa gnyis so/ /de la ral gri dang mig sman dang rkang pa byug pa la sogs pa ni 'jig rten pa'o/ /byang chub gsum thob pa ni 'jig rten las 'das pa'o/ /dngos grub de rnams thob par 'gyur zhing yang dag par rnyed par 'gyur te/bla ma ni sangs rgyas dang 'dra ba nyid kyi phyir ro/ /bla ma yis mtho ris ni bla mar bshad pa las te/ mtho ris ni lha'i 'jig rten no/ /de yang 'dod khams dang gzugs kyi khams dang gzugs med pa'i khams te rnam pa gsum mo//de la 'dod pa'i khams ni rnam pa drug ste/ rgyal chen rigs bzhi dang / sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed rnams so/ /gzugs kyi khams kyang rnam pa bzhi ste/ bsam gtan dang po dang / bsam gtan gnyis pa dang /bsam gtan gsum pa dang / bsam gtan bzhi pa rnams so/ /de la bsam gtan dang po la gnas gsum ste/ tshangs ris dang / tshangs pa 'dun na 'don dang / tshangs chen rnams so/ /bsam gtan gnyis pa la gnas gsum ste/ 'od chung dang / tshad med 'od dang / 'od gsal rnams so//bsam gtan gsum pa la gnas gsum ste/ dge chung dang / tshad med dge dang / dge rgyas rnams so/ /bsam gtan bzhi pa la gnas brgyad de/ sprin med dang / bsod nams skyes dang / 'bras bu che dang / mi che ba dang / mi gdung ba dang / gya nom snang dang / shin tu mthong dang /'og min rnams te/ de la gsum ni so so skye bo'i gnas yin la/ lnga ni gnas gtsang ma rnams so/ /gzugs med pa'i khams kyang rnam pa bzhi ste/ nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min gyi skye mched rnams so//mtho ris kyi 'jig rten de dag thob par 'gyur te bla ma ni chos kyi ngo bo yin pa'i phyir ro/ /bla mas bde ba ste/ bla ma ni bshad zin la/ bde ba ni 'dra ba ste de yang 'jig rten dang 'jig rten las 'das pa rnam pa gnyis so/ /de la rgyal srid kyi bde ba dang lha'i bde ba ni 'jig rten pa'o//thar pa'i bde ba ni 'jig rten las 'das pa'o/ /bde ba de dag yang dag par 'thob ste/ bla ma ni dge 'dun gyi ngo bo nyid yin pa'i phyir ro/ /mngon par 'dod pa'i 'bras bu skyed par byed pa nyid kyi phyir na bla ma ni dkon mchog gsum gyi ngo bo nyid kho na'o/ /de bas na mngon par 'dod pa gang dang gang yin pa de dang de las slob mas thob par 'gyur ro//snang ba rdo rjer 'char ba las kyang gsungs pa/ bla ma sangs rgyas bla ma chos/ /bla ma dge 'dun bla ma pha/ /bla ma sbyin bdag gtso bo ste/ /bla med yid bzhin nor bu yin/ /zhes so/ /de bas zhes bya ba ni rgyu mtshan gang gi phyir bshad zin pa'i bla ma las dngos grub la sogs pa'i 'bras bu thob par 'gyur ba de bas na 'bad pa thams cad kyis te/gnas skabs thams cad du yang dag pa'i bsod nams don du gnyer bas zhes bya ba'i don to/ /bla ma ste slob dpon gyi bka' rjes su bstan pa las 'gong par mi bya zhing 'da' bar mi bya'o//bla ma'i zhes bya ba la sogs pas tshul khrims bsrungs te/ bla ma bshad zin pa'i rdzas ni nor te/ de yang nang gi nor dang / phyi'i nor rnam pa gnyis so/ /de la gser dang dngul la sogs pa ni nang gi nor ro/ /zhing dang khyim la sogs pa ni phyi'i nor ro//srog ni srog gi dbang po yin la/ ji bzhin gyi sgra ni 'dra ba nyid do/ /srog ji bzhin ni srog gi dbang po dang 'dra'o/ /de yi sdug pa'ang bla ma bzhin/ /zhes bya ba la bla ma bzhin ni bla ma lta bur ro/ /'ang yig ni kun bsdu ba la'o/ /bla ma de'i sdug ma ni dgyes pa'i btsun mo ste/de ni de'i sdug ma'o/ /de'i 'jig rten yang gnyen bzhin du/ /zhes bya ba la bla ma de'i 'jig rten ni nye 'khor ro/ /yang yig ni kun bsdu ba la ste yang na tshig rdzogs pa la'o/ /mnyam par gzhag pa ste rnam par g.yeng ba med pas rtag tu ste rgyun du blta zhing brtag par bya'o//'di skad du bstan pa yin te/ slob ma mnyam par bzhag pas ji ltar rang gi srog bsrung ba de bzhin du bla ma'i rdzas kyang bsrung bar bya la/ ji ltar bla ma la bkur sti byed pa de bzhin du bla ma'i btsun mo la yang de bya zhing ji ltar rang gi gnyen rnams mgu bar byed pa de bzhin du bla ma'i 'khor rnams kyang mgu bar bya ba dag rtag par ro//mal zhes bya ba la sogs pas lus kyi sdom pa gsungs te/ mal ni stan yin la/ de la 'dug pa ni steng du gnas pa ste mal la 'dug pa de ni mal 'dug go/ /sngon te mdun la 'gro ba ni sngon du 'gro'o/ /gtsug tor ni mgo dkris so/ /dpyangs pa ni bla gos kyi rnam pas sam/dpal gyi dar dpyangs bcings te stan la 'dug pa'o/ /mi bya ba ni mi sgrub pa ste/ snga ma dang phyi mar sbrel lo/ /stan la rkang pa ni gdan la rkang pa'o/ /rked par lag ces pa ni rked pa ste tshang ra la lag pa ni rked lag go/ /yang na rtsib logs su dpung pa dang lag pa dag bkod pa la rked lag tu brjod do//yang na rgyab las 'og gi rked pa der lag pa zhes bya ba'i don te de ni rked lag go/ /dang ni kun bsdu ba pa'o/ /snye ba ni sngas la ste bla ma'i drung du'o zhes bya ba'i don to/ /yang de nyid gnyid ces bya ba la sogs pa gsungs te/ gnyid log pa ni lam du'o/ /'am gyi sgra ni phyogs gzhan pa la'o//'dug pa min ni sdod par mi bya ba ste min ni dgag pa la'o/ /gnas par bya ba ni 'dug par bya ba'o/ /bla ma ni ston pa ste bzhengs pa ni gyen du son zhing 'greng ba'o/ /mkhas pa ni nges pa'o/ /rtag tu ni dus thams cad du de'i bya ba ste bla ma'i bya ba rnams la spro zhing nus pa dang bstun nas ldang ba phun sum tshogs par bya bar 'gyur te/slob mas zhes pa lhag ma'o/ /mchil ma zhes bya ba la sogs pas de nyid ngag gi sdom pa dang sbyar nas gsungs te/ mchil ma la sogs pa ni lud pa la sogs te sogs pa'i sgras ni ngar snabs dang so dang lce'i dri ma rnams kyang ngo //'dor ba ni phyir 'byin pa'o/ /stan te gdan la rkang pa rkyong pa ni rkang pa rnam par 'byed pa'o/ /cung zad 'chag pa ni zhes pa la cung zad kyi sgras 'gro ba dang 'ong ba'o/ /rtsod par smra ba ni mi mthun pa'i tshig gi ca co'o/ /dang yig ni kun bsdu ba'i don to/ /ston pa'i spyan snga ni mdun te mngon par ro//mi bya ba'o ni mi sgrub pa'o/ /phan tshun phrad pa'i zhes bya ba la sogs pas lus dang ngag gi sdom pa gsungs te/ phan tshun ni gcig gcig dang ngo / /phrad pa'i gtam ni ji skad thos pa lhan cig tu smra ba'o/ /glu ni dbyangs su len pa yin la rol mo ni pi wang dang rdza rnga brdung ba la sogs pa dang gar ni sgeg chos te mi bya ni mi bya ba kho na'o//gtam gyi brjod pa ni sde ris kyi gtam mo/ /mi bya'o ni dgag pa ste mi sgrub pa'o/ /thos pa'i nye 'khor ni gsan pa'i yul du ste bla mas zhes bya ba ni lhag ma'o/ /btud de zhes bya ba la sogs pas 'jug pa'i tshul khrims gsungs te/btud de ni phyag byas nas so/ /stan te gdan las ldang zhing langs pa dang 'byung zhing phyir 'gro ba na gus shing ri mor bya ba ste/ bzhin phyogs pa la sogs pas zhes bya ba'i don to/ /mtshan mo ni nam la'o/ /chu ni chu bo'o/ /'jigs bcas sam ni 'jigs pa dang ldan pa'i shul lo//zhus shing gsol ba btab nas bsgo ba ste bka' yis so/ /mdun ni sngun la 'gro bar bya'o/ /slob dpon zhes bya ba la sogs pas ldog pa'i tshul khrims gsungs te/ blo dang ldan pas ni blo gros dang ldan pas so/ /lus gcu ba ni khog pa g.yo ba ste/min ni brtan por bya'o zhes bya ba'i don to/ /ka ba la ni brten pa min ni ka ba la mi brten zhing mi snye ba'o/ /ka ba ni mtshon pa ste rtsig pa dang mi la sogs pa rnams la yang brten par mi bya'o/ /sor ni lag pa'i sor mo ste/ bkas pa ltar 'byed cing rnam par rgyas par mi bya'o//slob dpon ni ston pa'o/ /gzigs pa ni spyan lam du'o/ /mdun ni spyan sngar ro/ /rkang pa bkru dang zhes bya ba 'di nas brtsams te/ slob mas bla ma la ji ltar rigs par bya ba de gsungs pa yin te/ rkang pa bkru ba ni chus zhabs kyi dri ma med par byed pa'o//lus bsku ba ni til mar gyis byugs pa'o/ /de ni rkang pa bkru ba yang yin la lus bsku ba yang yin pas rkang pa bkru dang lus bsku dang ngo / /dril ba ni dri la sogs pa'i tshigs mas dril ba'o/ /mnye ba ni dri ma sel ba'o/ /sogs pa'i sgras ni dal bus 'tshir ba dang reg pa yang ngo //dril ba dag dang mnye ba dag la sogs pa ni dril dang mnye ba la sogs pa'o/ /rang gi don la i ka byas nas dril dang mnye ba la sogs nyid do/ /de la bya ba bya'o/ /ji lta bur gyur pas she na/ phyag ni sngon du 'gro bas zhes bya ba gsungs te/ 'di la phyag gi mngon par brjod pa sngon nas yin pa de ni phyag sngon du 'gro ba yin pa'am/yang na phyag sngon du 'gro ba ni bya ba'i khyad par ro/ /de bzhin mthar zhes bya ba ni/ ji ltar sngon du phyag byas pa de bzhin du mthar te rkang pa bkru ba la sogs pa'i mthar phyag bya ba'o zhes bya bar dgongs so/ /bya ba ci zhe na/ci bder zhes bya ba gsungs te/ bde ba las ma 'das pas ji ltar rigs par ro/ /dgongs pa ni 'di yin te/ gal te bla ma la 'jim pa'am rnam pa gzhan gyis bde bar 'gyur na/ de'i tshe de lta bus zhabs bkru ba la sogs pa bya ste/ 'bras la mi gnod par 'gyur ba de'i de lta bu nyid do//de mtshan zhes bya ba la sogs pa la/ mtshan de bzung nas mi brjod kyi/ /zhes bya ba gzung ba ni len pa'o/ /mi ni dgag pa la'o/ /brjod pa ni rim par 'don pa'o/ /de mtshan zhes bya ba ni bla ma de'i mtshan du btags pa de ni mtshan no/ /de ji lta bus gzung zhe na/mtshan mthar zhal snga sbyar ba ste/ /zhes bya ba gsungs te/ mtshan gyi mtha' ste tha ma ni mtshan mtha'o/ /mtshan mtha' de dang zhal snga'i sgra mnyam par son pa'o/ /'di lta ste/ dpal rin chen 'byung gnas zhi ba zhes pa 'di la zhi ba'i zhal snga nas zhes bya ba'o/ /gal te de lta bus go bar ma gyur na de'i tshe ji ltar bya zhe na/gzhan gyis go bar bya ba'i phyir/ khyad par gyi ni tshig brjod do/ /zhes bya ba gsungs te/ 'dis khyad par du byed pa'i phyir khyad par ni bye brag go/ /de ci zhe na/ tshig ste tshig go/ /gzhan te pha rol po dag gis go bar bya zhing yongs su shes par bya ba'i phyir du'o//dgongs pa ni 'di yin te/ gnas che ge mo dang khyim gyi gnas che ge mo dang 'dug sa che ge mo dang spyod lam che ge mo dang nye 'khor che ge mo dang / dkar ba'am gnag pa dang / ring ba dang thung ba dag ste/ de lta bu'i yon tan gyi khyad par du byas pa zhes bya ba la sogs pa'i tshig smra bar bya ste khyad par kho nas so zhes bya'o//bla ma la zhes bya ba la sogs pa la bla ma ni ston pa'o/ /bka' ni rjes su bstan pa'o/ /stsol ni gsungs shig pa ste/ bka' ci lags zhes bya ba dang / zhal ta ci lags zhes bya ba'o/ /zhu ba ni myur ba ste bya ba'i khyad par ro/ /thal mo sbyar ba byas gyur nas//zhes bya ba la/ mdzes pa'i thal mo sbyar te thal mo sbyar ba dang bcas shing 'dab ma bcings pa zhes bya ba'i don to/ /gyur nas zhes bya ba ni gnas su bkod nas so/ /bka' ni legs par gsungs pa'o/ /bgyid pa ni dang du len pa'o/ /bla ma ni slob dpon gyi'o/ / lag pa ni thal mos so/ /kha ni kha sgo ste/ dgab pa ni 'gebs pa'o/ /kha ci 'dra ba zhe na/ dgod lud skyigs bu la sogs nyid/ /ces bya ba ste dgod pa ni gad mo'o/ /lud pa ni lud pa 'thon pa ste/ dbugs yang dang yang du drag pa la sogs pa'o/ /skyigs bu ni ig bu'o//sogs pa'i sgras rnyil dang so dang lce'i dri ma rnams kyang ngo / /sogs pa kho na sogs pa nyid do/ /dgod pa dang lud pa dang skyigs bu la sogs pa nyid ni dgod lud skyigs bu la sogs nyid de/ de gang la yod pa de la de skad ces bya'o/ /kha cig ni dgod lud skyigs bu la sogs pas zhes 'don te/'di ni sa b+ha mi yod pa'o/ /snyan pa'i tshig ni zhes pa la tshig ni ngag yin la/ snyan pa ni yid 'phrog pa ste de bya bas na bya zhes so/ /bde ba'am ni rmed pa'o/ /dang yig las gzhan yang ngo / /zhu ba ni yongs su dri ba'o/ /'di skad du bstan pa yin te/snga dro'i tshe nam la bde'am zhes dang / gung gi tshe bza' bas bde'am zhes pa dang / phyi dro'i tshe gdugs la bde'am zhes pa'o/ /bzhugs pa ni gnas pa'o/ /gzims mal bde'am zhes kyang gus pa dang bcas pas snyan pa'i tshig nye bar phyung nas bla ma la dri bar bya'o//mdun du zhes bya ba la sogs pa la mdun ni mngon sum du'o/ /dul ba ni mnyam par gzhag pa'o/ /'dug pa ni nye bar 'khod pa'o/ /gos dang spyi bo skyes rnams bsdams/ /zhes pa ni gos mnabs pa rnams dang spyi bo skyes ni skra rnams so//gos rnams dang spyi bo skyes rnams bsdams pa ni sdom pa ste/ gang gis gos dang spyi bo skyes rnams bsdams pa'o/ /nyan sogs 'dod la zhes bya ba la sogs pa la/ nyan sogs 'dod pa ni thos pa yang dag par 'dzin 'dod pa'o/ /pus mo ni brla'i rten no/ /btsugs pa ni sa la bzhag pa ste der pus mo btsugs pa'am de nas so//gang gis mdzes pa'i thal mo sbyar ba byas pa de ni pus btsugs thal mo sbyar ba yis so/ /gsol gsum bya ni gsol ba lan gsum du gdab par bya ba'o/ /'dis ni 'di skad du bstan par gyur pa yin te/ dam pa'i chos nyan par 'dod pa'i slob mas bla ma'i zhabs la phyag byas te/bla gos phrag pa gcig tu byas nas thal mo sbyar te gsol ba lan gsum du gdab par bya'o/ /'di skad du yang brjod par bya ste/ slob dpon dgongs su gsol/ ji srid sems can du bsdu bas bsdus pa'i sems can de rnams kyi don gyi phyir dang phan par bya ba'i phyir dang bde bar bya ba'i phyir dang /ji srid shin tu mthar thug pa'i mya ngan las 'das pa de bzhin gshegs pa'i ye shes la rab tu 'god pa'i phyir/ bdag la chos kyi rnam grangs che ge mo zhes bya ba gsal zhing rab tu gsal bar bstan du gsol zhes so//bsnyen bkur zhes bya ba la sogs pa la bsnyen bkur spyod pa thams cad la/ yid ni nga rgyal med par bya/ /zhes pa ni bsnyen bkur ni gzhan gyi rjes su 'jug pa'o/ /de rnams kyi spyod pa ni rab tu 'jug pa'o/ /bsnyen bkur yang yin spyod pa yang yin thams cad kyang yin pas bsnyen bkur spyod pa thams cad do//nga rgyal med pa'i yid gang yin pa de ni nga rgyal med pa ste/ kun nas mtho ba'i sems dang bral ba zhes bya ba'i don to/ /de rnams bya ni bsgrub par bya ba'o/ /bu mo gzhon nu'i tshul zhes bya ba la sogs pa la/ bu mo gzhon nu ni bag ma sar pa ste/de'i tshul ni lus dang ngag dang yid mnyam par bzhag pas rab tu spyod pa'i kun du spyod pa'o/ /bu mo gzhon nu de'i tshul du gnas par bya'o zhes sbyar te/ gnas pa ni 'dug par bya'o/ /spyod lam dang spyod lam zhes pa lhag ma'o/ /spyod lam ji lta bur gyur pa zhe na/ngo tsha ldan dang 'jigs pas zhes bya ba gsungs te/ ngo tsha'i spyod lam ni chos kyi dbang du byas nas kha na ma tho bas ngo tsha ba ste de la zhugs pa'o/ /'di la de shes pa yod pa'i phyir na ngo tsha ldan no/ /'jigs pa ni 'jigs par gyur pa ste de ni mdor bsdu na chad pas 'jigs pa dang gzhan gyi skur pas 'jigs pa dang /ngan song gis 'jigs pa dang / chos nyan pa ma thob pa'i 'jigs pa dang rnam pa bzhi'o/ /snga ma bzhin du spyod lam las 'jigs pa'o/ /bsdams ni sdom pa ste mi 'da' ba'i phyir ro/ /yang na sems kyi sdom pas ni ngo tsha ldan no//ngag gi sdom pas ni 'jigs pa'o/ /lus kyi sdom pas ni bsdams pa'o/ /sgeg pa la sogs zhes pa la sgeg pa la sogs pa'i yul la chags pa la sogs pa'i bya ba ste rab tu 'jug pa ni sgeg pa la sogs bya ba'o/ /yang na sgeg pa la sogs bya ba zhes pa sgeg pa dang dpa' ba dang mi sdug pa dang drag shul dang 'jigs pa rnams dus ma yin zhing don med pa'i nyams kyi bya ba gnod pa'i gtam rnams so//sgeg sogs nyid kyi rnam pa zhes gzhan dag 'don to/ /kun ni ma lus pa'o/ /spang bar bya ni dor bar bya ba'o//ston pa'i mdun ni bla ma'i spyan sngar ro/ /gzhan yang de 'dra'i zhes bya ba la sogs pa la/ gzhan yang ni gzhan dag kyang ngo / /de 'dra'i ni sgeg pa sogs dang 'brel ba'i bya ba 'di lta bu'o/ /bya ba ni bya bar gyur pa ste/ rang gis brtags nas ni bdag nyid kyis yongs su phye nas 'di lta bu ni bya ba'i cha ma yin no snyam du dor bar bya zhing yongs su spang bar bya'o//rab gnas zhes bya ba la sogs pa la/ rab gnas ni mchod rten dang sku gzugs dang thang ka dang glegs bam dang khang bzangs la sogs pa rnams la lha gzhug pa'o//dkyil 'khor ni ri mo'i dkyil 'khor ro/ /sbyin sreg ni me'i mchod pa'o/ /'chad pa ni chos ston pa'o/ /slob ma bzung ba ni slob ma dbang bskur ba'o/ /rjes ma gnang bar zhes bya ba ni rjes su ma gnang ba ste gzhan du gsung ba'o/ /mi bya ba ni bsgrub par mi bya ba ste/grong gang du slob ma gnas pa gtan du ba'i grong der ro/ /grong der bla ma ston pa bzhugs pa na ste/ byas pa gzo zhing byas pa shes pa'i slob dpon gyi sdom pa dang ldan pa'i slob mas zhes bya ba'i don to/ /rjes su gnang na grong der dang rjes su gnang ba las gzhan gyis gzhan du rab tu gnas pa dang dkyil 'khor la sogs bya bar rigs so zhes bya ba 'di gsungs pa yin no//rab tu gnas pa la sogs pa las gang byung ba'i rdzas de ji ltar bya zhe na/ rab gnas zhes bya ba la sogs pa gsungs te/ rab gnas dang dkyil 'khor dang sbyin sreg dang 'chad pa dang slob ma 'dzin pa na ji ltar rnam pa gang gis rnyed pa byung ba'o//ji ltar rnyed ces kha cig go/ /de la gang zhes ni rnyed par bstan pa'o/ /de lta bu de ni dbul bar bya ste go bar bya'o/ /kun ni thams cad do/ /de yis de las zhes bya ba la sogs pa ni bla ma des rnyed pa'i nor gyi nang de nas bzhed cing mngon par 'dod pa blangs nas gzhan te blangs pa'i lhag ma gzhan rnams ni ci bder te rnam pa gang gis slob ma bde ba de lta bur bya'o//bla ma'i zhes bya ba la sogs pa ni/ bla ma'i slob ma ni bla ma'i slob ma rnams te/bla ma'i slob ma de dag go/ /dang yig ni tshig sbyor ba'o/ /slob ma ni rang dang nye bar gnas pa ste slob ma dang nye bar gnas pa'o/ /bla ma'i mdun du mi bya ni mi sgrub pa'o/ /bsnyen bkur zhes bya ba la sogs pa la bsnyen bkur ni rim gro'o/ /de ci zhe na/khrus sogs zhes pa ste/ khrus te mngon par 'thor ba gang gi dang po yin pa de ni khrus sogs te/ sogs pa'i sgras ni lus dril ba dang mnye ba dang rkang pa bkru ba la sogs pa yang ngo / /bsnyen bkur gyi khyad par ci zhe na/ phyag sogs nyid ces bya ba gsungs te/gang gi dang po phyag yin pa de ni phyag sogs nyid de rang gi don la dka'o/ /khrus la sogs pa dang phyag la sogs pa'i bsnyen bkur slob mas sam gzhan gyis kyang rung ste/ bla ma ston pa'i spyan snga ste mdun du bzlog par bya zhing dgag par bya'o//gang zhig cung zad ces bya ba la sogs pa la/ gang zhig ni dbul bar bshad pa'o/ /cung zad ni ma bshad pa'o/ /bla ma'i phyir ni ston pa'i ched du'o/ /dbul ba ni sbyin par bya'o/ /blang bar bya ba ni gzung bar bya ba'o/ /'ang gi sgra ni kun bsdu ba la'o//gang zhes pa ni blang bar bshad pa'o/ /bla mas ni ston pas te mngon sum du'o/ /btud nas de ni lag gnyis kyis/ /zhes pa ni btud nas te phyag byas nas so/ /lag gnyis kyis ni lag pa zung gis so/ /de ni zhes pa ni dbul bar bya ba dang blang bar bya ba'o//dbul bar bya ba ni sbyin par bya ba yin la/ blang bar bya ba ni gzung bar bya ba'o/ /dang yig ni kun bsdu ba'i don to/ /blo dang ldan pas ni blo gros ldan zhes mkhas pas zhes bya ba'i don to/ /dran pa brjed med ces bya ba la sogs pa la/ brjed med ni dran pa ma nyams pa ste/ sngon nyams su myong ba'i dngos po la gnas nas ma brjed pa gang yin pa de ni dran pa brjed med do/ /gyur pa yis ni gyur cing bzhag nas so/ /rang ste bdag nyid kyi kun spyod de 'dul ba la brtson zhing 'bad pa ni rang gi kun spyod la brtson pa'o//spun ni rdo rje'i spun te bla ma mtshungs par gyur pa rnams so zhes bya ba'i don to/ /yang ni kun bsdu ba la'o/ /kun spyod las 'das pa ni 'dul ba las 'gongs pa'o/ /phan tshun ni gcig la gcig gis te bzlog par bya ni dgag par bya ba'o//dga' zhing mnyen pas dang smad pas kyang ngo / /'dul ba mngon par shes pas 'di dag ni 'di las bkag pa yin na/ khyed kyis 'di lta bu 'di dag bya ba ma yin no zhes 'jam po'i tshig gis bya ba ma yin pa byed pa'i bla ma'i bya ba'i rgyu las so/ /rjes su gnang ba ni bla mas bsgo ba las so//'ang gi sgra ni phyogs gzhan la'o/ /bkag par gyur kyang ni bzlog par gyur kyang ngo / /spyad pa ni bsgrubs pa'o/ /ci byas nas she na/ btud nas zhes gsungs te/ btud nas ni phyag byas nas so//'dis ni 'di dag bstan par gyur pa yin te/ bla ma gang mngon sum na bzhugs kyang rung ste/ de'i bya ba dang bya ba ma yin pa dag la re zhig na ba la nyes pa med do/ /rang nyid de'i bya ba la dad dam/ des bsgo bas kyang rung ste nyes pa med do/ / ji ltar na nyes par mi 'gyur zhe na/ dge sems la ni ltung ba med/ /ces bya ba gsungs te/ dge ba ni ma mthong ba'i dge ba la sems pa'i sems sam bsam pa gang yin pa de ni dge ba'i sems te/ de la dge sems zhes bya'o/ /dge bar gyur pa'i sems la ltung ba med de/ltung ba med pa ni nyes pa med pa'o/ /'di ni bsam pa ring ba nyid kyis bkag pa la spyod par byed pa ma yin gyi 'o na ci zhe na/ mi lcogs pa nyid las so/ /gzhan pa dag kyang bla ma'i bya ba yin pas sam/ bla mas bsgos pas bkag pa la spyod pa byed pa ste/de dag kyang sems ring ba nyid kyis ma yin gyi bsam pa dge ba kho nas yin no/ /de lta bas na bkag pa la spyad kyang ltung bar mi 'gyur ro zhes bya'o/ /'dir zhes bya ba la sogs pas bsdu ba gsungs te/ 'dir ta bla ma bsnyen bkur ba las so//mang du ni yang dang yang du'o/ /smras pas ni bshad pas so/ /ci zhes bya ba ni spong ba ste dgos pa med do zhes bya ba'i don to/ /bla ma ston pa ci 'dra bas dgyes byed de tshim par byed pa bya bar bshad pa gang yin pa'i bya ba de kho na bya bar bshad pa yin no/ /'bad pas ni bsod nams la'o//thams cad ni sna tshogs pa'o/ /kun spyod ni nan tan no/ /ci zhig byas nas she na/ nyes par byed pa kun spangs nas/ /zhes bya ba gsungs te/ nyes par byed pa ni mi dgyes par byed pa kun te mtha' dag spangs shing dor nas gang gis bla ma dgyes par 'gyur ba de bsgrub par bya'i/gang gis mi dgyes par 'gyur ba de ni bsgrub par ni mi bya'o zhes dgongs pa yin no/ /dngos grub ces bya ba la sogs pas de'i sngon du 'gro ba'i gtan tshig gsungs te/ dngos grub ni bshad zin la/ slob dpon ni bla ma'o/ /rjes 'brang ni rjes su lhung bas na slob dpon rjes su 'brang ba'o/ /rdo rje 'dzin pa zhes pa la rdo rje ni stong pa nyid de de bzhin nyid do/ /de de'i bdag nyid kyis 'dzin pas na rdo rje 'dzin pa ste/ rdo rje 'dzin pa rdo rje 'chang des so/ /ji ltar na rdo rje'i sgras stong pa nyid ce na/rdo rje dang mi phyed par chos mthun pa'i phyir te/ yang gsungs pa/ brtan zhing snying po khong stong med/ /mi chod mi phyed mtshan nyid de/ /bsreg tu med cing 'jig pa med/ /stong nyid rdo rjer brjod par bya/ /zhes so/ / nyid ni bdag nyid kyis so/ /shes nas zhes bya ba la sogs pa la/ shes nas ni 'di dag gam 'di lta bu rtogs nas so/ /dngos po thams cad kyis ni rnam pa thams cad kyis sam lus dang ngag yid gcig pa nyid kyis so/ /bla ma ni ston pa'o/ / kun nas yongs su mnyes par bya ste/ kun nas thams cad du dgyes par bya'o/ /gang gi phyir dngos grub rnams slob dpon gyi rjes su 'brang ba de'i phyir dngos grub 'dod pa'i slob mas rnam pa ji lta bus bla ma dgyes par 'gyur ba'i rnam pa de bya'o/ /de yongs su dgyes pa las ni mngon par 'dod pa'i dngos grub bo//bla ma bsnyen bkur ba mngon par brjod nas/ da ni de yang dag par gtad pa'i gnas bstan pa'i phyir/ bsam pa dag pa'i zhes bya ba la sogs pa gsungs te/ bsam pa dag pa'i slob ma ni/ /gsum la skyabs su song ba la//zhes pa la dag pa ni dri ma med pa'o/ /bsam pa ste sems 'di'i yin pa de ni bsam pa dag pa ste de'i ched du'o/ /bsam pa dag pa'i slob ma ni nye bar gnas pa'o/ /gsum la skyabs zhes bya ba ni 'di dag skyob par byed par khas blangs na nyon mongs pa thams cad dang ngan song thams cad skyob pa'o//gsum ni sangs rgyas dang chos dang dge 'dun no/ /gsum po de dag ni gsum la skyabs so/ /song ba ni mchis so/ /gsum po de la skyabs su song ba ni rdzogs pa'i sangs rgyas dang chos dang dag 'dun la skyabs nyid du khas blangs pa zhes bya ba'i don to//de la ci zhig bya zhe na/ bla ma'i zhes bya ba la sogs pa gsungs te/ bla ma'i rjes su 'jug pa 'di ste/ bla ma bsnyen bkur bar gyur pa 'di dag go/ /mgrin par son pa ni mgrin son te mgrin par gnas pa'i gzhung dang don to//rtogs pa'i phyir du yin pas bya phyir ro/ /de gzhan la mtshon par mi bya'i nye bar gnas pa la sbyin par bya zhing stsal bar bya'o zhes dgongs so/ /bya ba gzhan yang bstan pa'i phyir/ de nas zhes bya ba la sogs pa gsungs te/ de nas zhes pa ni bla ma bsnyen bkur ba bshad pa'i de ma thag tu'o//sngags sogs byin pa yis te/ dbang bskur ba sbyin pas sam/ sngags dang phyag rgya dang bzlas pa dang bsgom pa dang dkyil 'khor gyi de kho na nyid la sogs pa bshad pas so/ /dam chos snod du byas nas ni/ / zhes pa la/ dam chos ni sngags kyi theg pa chen po ste/ de'i 'am de la snod de snod spyad du bya'o zhes bya ba'i don te/ byas nas ni bsgrubs nas so/ /slob ma zhes pa lhag ma'o/ /rtsa ba'i ltung ba zhes bya ba la sogs pa la/ de dag gtso bo yin pa nyid kyi phyir rtsa ba yang yin la mi dge ba nyid kyi phyir ltung ba yang yin pas rtsa ba'i ltung ba rnams te/'di rnams kyis ltung bar byed do zhes byas nas rtsa ba'i ltung ba'o/ /bcu bzhi ni bdun nyis 'gyur gyi cha'o/ /'di lta ste/ slob dpon la smod pa dang / de bzhin gshegs pa'i bka' las 'da' ba dang / rdo rje'i spun gyi nyes pa brjod pa dang / sems can yongs su spong ba dang / byang chub kyi sems bskyed pa yongs su gtong ba dang / chos spong ba dang / snod ma yin pa'i sems can la gsang ba'i chos ston pa dang / phung po la brnyas pa dang / rang bzhin gyis yongs su dag pa'i chos la the tshom za ba dang /gdug pa la byams pa dang / rtag pa dang chad pa'i lta ba dang / dad pa can gyi sems can sun 'byin pa dang / dam tshig mi spyod pa dang / rang bzhin gyis dag pa'i bud med zhig tu smod pa rnams so/ /rtsa ba'i ltung ba bcu bzhi po 'di dag gsal bar byed pa'i phyir/gzhung la yang rtsa ba'i ltung ba bcu bzhi zhes bya ba bklag cing gzung bar bya zhes pa'i don to/ /bklag dang gzung ba nyid du bya/ /zhes pa ni gzhung bklag pa ste/ kha ton du bya ba la/ don gzung ba ste/ sems kyis nges par rtogs par bya ba'o/ /de ltar zhes bya ba la sogs pas bsod nams bsngo ba gsungs te/ de ltar zhes bya ba ni de ltar ji skad du bshad pa'i rim pas bya ba byas nas so/ /bla ma'i rjes su 'jug pa ni bla ma bsnyen bkur bar gyur pa'o/ /ci lta bur gyur pa zhe na/ma lus slob ma zhes bya ba la sogs pa gsungs te/ ma lus pa yang yin la slob ma yang yin pas ma lus slob ma ste/ de rnams la phan pa ni legs pa yin la bskyed pa ni spel ba'o/ /'di la sdig pa'i zug rngu zhi bar byed pa'i tshul khrims yod pa'i phyir/ma lus pa'i slob ma la phan pa bskyed pa skyon med pa'o/ /deng du dge ba bdag gis gang bgyis pa/ /des ni 'gro ba myur du rgyal gyur cig /ces pa la gang zhes pa ni dge ba la bshad pa la/ deng du ni da ltar ro/ /dge ba bgyis pa ni legs byas brtsams pa'o//bdag gis ni bdag cag gis zhes bya'o/ /des ni dge ba des so/ /'gro ba ni 'jig rten no/ /myur du ni mgyogs par ro/ /rgyal ba zhes pa ni sdig pa las rgyal ba'i phyir sangs rgyas bcom ldan 'das te/ sdig pa'i chos las nga rgyal bas/ /de bas nyer 'gro nga rgyal ba//zhes gsungs pa'i phyir ro/ /gyur cig ni shog shig pa'o/ /bla ma'i bsnyen bkur rnam par 'grel pa ni/ /byas las bdag la bsod nams gang skyes pa/ /des ni 'gro bas bla ma'i zhabs bsten cing / /de bzhin gshegs pa nyid du 'gyur bar shog /bla ma lnga bcu pa'i dka' 'grel 'di ni rdzogs so// //rgya gar shar phyogs kyi mkhas pa chen po dpal nags kyi rin chen gyi bka' drin las legs par sbyar ba'i skad kyi cha shas rig pa gzhon nu dpal gyis dpal ldan bla ma dam pa'i dben gnas lha khang steng du bsgyur ba'o/