CLOSE WINDOW

D3719
བོད་ཡིག

/ //paN+Di ta dz+nyA na A ka ra nyid dang / lo tsA ba dge slong tshul khrims rgyal bas bsgyur cing zhus te gtan la phab pa'o//[ ]@##/ /rgya gar skad du/ man+t+rA ba ta ra pr-it+tiH/ bod skad du/ gsang sngags la 'jug pa'i 'grel pa/'phags pa 'jam dpal gzhon nur gyur pa la phyag 'tshal lo/ /nyon mongs shes bya'i sgrib pa dag /bag chags bcas par gtan spangs kyang / /thugs rjes 'gro ba'i don bzhugs pa'i/ /skyob pa rnams la phyag 'tshal nas/ /dgongs don zab mo bsdus pa'i don//tshig re nas ni dbye bar bya/ /dngos po'i de nyid rang bzhin 'od gsal mngon mdzad nas/ /zhes bya ba la sogs pa la/ dngos po ni gzung ba dang 'dzin pa'i mtshan nyid can rnams so/ /de'i de nyid ni skye ba med pa'o/ /sems rang bzhin gyis 'od gsal ba des de nyid mngon sum du mdzad pa ni de'i bdag nyid du gyur pa'o//de lta bu mngon sum du mdzad na yang / thugs rje chen pos gdul bya'i dbang gis sku'i cha byad sna tshogs dang / tshig dang yi ge du mas de kho na nyid ji ltar 'os pa ston par mdzad pa'i sku dang / gsung dang / thugs rdo rje gsum mi phyed pa'i bdag nyid can gyi sku la phyag 'tshal nas so//ci zhig bya zhe na/ rab tu gsang ba blo mchog yul gyur gsang sngags don/ /zhes bya ba la sogs pa smos te/ rab tu gsang ba ni dngos por mngon par zhen pa rnams la'o/ /blo mchog yul gyur zhes bya ba ni zab cing rgya che ba la mos pa rnams kyi spyod yul yin pas so//gsang sngags don zhes bya ba ni dgongs pa sna tshogs kyis bstan pa'i tshig rnams so/ /log par rtogs pa ni phyin ci log tu bzung ba dang / dam pa ma yin pa'i bla ma'i gdams ngag gi dbang gis sgro 'dogs skur pa 'debs shing /'dod chags la sogs pa nyon mongs pa'i dbang gis sgra ji bzhin 'jug par byed pa rnams phyin ci ma log pa'i don rtogs shing go bar byed pa'i phyir dris pa'i lan gdab pa'i tshul gyis/ rgyud yang dag pa rnams las btus nas cung zad cig tsam bdag gis bri bar bya'o zhes bya ba'i don to//bskal pa chen po rab mang bas/ /zhes bya ba la sogs pa la pha rol tu phyin pa'i tshul lam/ lam gzhan gyis bskal pa chen po rab tu mang pos bgrod par bya ba'i sa rnams dang / 'og min la sogs pa sangs rgyas kyi zhing yongs su dag pa rnams su ji ltar bsgom pa dang /bzlas pa dang / mchod pa la sogs pas bsdus pa dam tshig dang / lha'i nga rgyal la sogs pas/ skye ba 'di'am zhes bya ba tshe 'di la'am/ gzhan dag ces bya ba tshe gsum gyis so/ /sngags pa zhes bya ba ni sgo 'dir zhugs pa'i rnal 'byor pa'o//myur du 'jug pa ni tshe 'di'am/ skye ba 'gas so/ /rgyu dang rkyen ni gang dang gang zhes bya ba ni/ de ltar myur du 'jug pa'i rgyu ni gang yin/ /rkyen ni gang yin zhes dris pa'o/ /de bzhin du 'og ma dag la yang sbyar bar bya ste/ bya ba dang bcas pa'i byed pa po lta bu ni gang yin/de'i grub pa'i dngos grub ni gang zhig yin/ grub pa thob pa'i skyes bu de'i spyod pa ni ji lta bu yin/ 'grub pa'i dus kyi nges pa ni ji tsam gyis yin/ gsang sngags kyi tshul la zhugs pa las/ 'jig rten pa'i dngos grub 'grub pa'am/ nyan thos sam rang sangs rgyas su 'gyur ba ni ji lta bu yin/bdag gi de kho na nyid ni ji lta bu yin/ lha'i de kho na nyid ni gang yin/ sngags kyi de kho na nyid ni ji lta bu yin/ lam ni gang yin/ lam ma yin pa ni gang yin/ gzhi'i dam tshig ni gang yin/ yan lag gi dam tshig ni gang yin/ rtag tu bya ba'i cho ga'i rnam par nges pa ni gang yin zhes dri tshig bco lngas dris pa dang /de dag re re nas lan gdab pa'i phyir/ dper na skyes bu stobs chung ba'am/ /zhes bya ba la sogs pa smos te/ dper na skyes bu bkres pa'am/ skom pa'am/ nad kyis mnar ba nyam chung bar gyur pa'am/ phyugs te ba lang la sogs pas drangs pa shing rtas lo'am zla ba mang pos bgrod par bya ba'i gnas der/ rkang mgyogs grub pa'i skyes bu'am nyi ma dang zla bas ni skad cig ma 'gas 'gro bar 'gyur ro zhes bya ba'i don to/ /de bzhin pha rol phyin pa'am/ /zhes bya ba la sogs pa la/ de bzhin zhes bya ba ni dpe bzhin du'o/ /pha rol tu phyin pa'i theg pa'am/ lam gzhan te nyan thos dang / rang sangs rgyas kyi lam mam/ pha rol tu phyin pa'i theg pa dag la brten nas so/ /yun rings 'jug par zhes bya ba ni bskal pa grangs med pa gsum mam/ de bas kyang lhag par 'jug pa'i gnas der ro//sngags pa zhes bya ba ni brtson 'grus brtul ba can gyi rnal 'byor pas yin gyi sngags kyi sgor zhugs pa tsam gyis ni ma yin no/ /tshe 'dis 'jug ces bya bas ni/ tshe 'di nyid la yon tan 'di dag 'thob pa'o/ /de yang rgyu ci zhig yin zhe na/sngags kyi tshul ma nor bar bsgrubs pa'i mnyam pa med pa'i mthu la brten pa'i phyir ro/ /de yang 'phags pa zhi ba'i blo gros kyis dris pa las dper na skyes bu stobs chung ba'am/ phyugs kyi shing rtas yun ring zhig gis bgrod par bya ba'i gnas der rkang mgyogs grub pa'am nyi ma'am/zla bas ni myur du 'gro bar byed do/ /de bzhin du pha rol tu phyin pa la spyod pa'i rigs kyi bu dag bskal pa rab 'byam dag gis 'da' ba'i sa de dag rig sngags 'chang rab tu brtul bas 'jug pas tshe 'di nyid la 'thob pa ni mthu mi mnyam pa la brten pa yin pa'i phyir ro zhes gsungs pa yin no//de yang rgyu rkyen phun tshogs kyis/ /zhes bya ba la sogs pa la/ de la rgyu gang dag yin zhe na/ rgyu yang lus ngag yid kyi las/ /zhes bya ba ste/ sngon gyi skye ba rnams su srog gcod pa spong ba la sogs pa dge ba bcu la legs par spyad pas/de ltar rnam par smin pa'i dbang gis thob pa'i rgyu 'di mtshan dang ldan pa'i lus thob cing zhes bya ba la sogs pa bstan te/ lus mtshan sna tshogs 'bar ba dang / ngag tshangs pa'i dbyangs dang / ka la ping+ka'i skad dang / 'brug gi sgra dang / sems 'dod chags srab cing zhe sdang gi zug rngu phyung ba dang / gti mug gi mun pa bsal ba yin te/ de ltar lus ngag yid gsum phun sum tshogs pa gsum dang ldan pa ni sgrub pa'i mchog gi rten du 'dod do/ /de yang kye rgyal ba'i sras 'di la rgyu ni rigs gtso bo gsum thob pa/sngon shin tu las legs par spyad cing byas pas 'phags pa can yin no zhes rgyud las gsungs pa yin no/ /de ltar rgyu phun sum tshogs pa bstan nas/ rkyen phun sum tshogs pa bstan par 'dod nas/ rkyen yang rnam pa gsum nyid de/ /zhes bya ba la sogs pas bstan to//gsum po de dag kyang gang zhe na/ 'jug dang sbyor dang sgrub pa yi/ /spyod pa rnam pa gsum nyid do/ /zhes bya bas smras so/ /de dag re re nas bstan par 'dod nas/ de la 'jug pa'i spyod pa ni/ /zhes bya ba la sogs pa smos te/ dang por ji ltar bya zhe na/ sngags la dad pa'i slob ma yis//zhes bya ba ni gsang sngags kyi tshul la mos shing yid ches pa'i slob mas/ bla ma yon tan dang ldan pa/ /zhes bya ba ni shes rab dang snying rje la sogs pa'i yon tan dang ldan pa la'o/ /dus ring bsnyen pa sngon 'gro bas/ /zhes bya ba la lo'am zla ba mang por dus gsum du maN+Dal bya ba dang /phyag 'tshal ba dang / gos dang / zas dang / so rtsi la sogs pa 'bul zhing mnyes par byas nas bla ma'i bya ba bsgrub pa'o/ /mnyes nas gsol ba gdab byas la/ /zhes bya ba ni de la dus ring por bsnyen bkur la sogs pa byas pas bla ma'i thugs mnyes pa dang gsol ba gdab par bya ste/ci'i phyir gsol ba gdab ce na/ dkyil 'khor 'jug dang dbang bskur zhing / /zhes bya ba la sogs pa smos te/ de ltar don du gnyer ba'i slob ma la dkyil 'khor du gzhug pa dang / dbang bskur ba dang / dam tshig dang sdom pa la sogs pa bla mas byin la rang gang 'dod pa'i lha bzung nas bzlas pa byed pa ni/rang gi 'dod lha gzung ba ste/ /zhes pa'o/ /da ni rkyen rnam pa gsum las gzhi'i rkyen zhes bya ba la/ de ltar 'jug pa'i spyod pas bdag nyid zhing sa gshin pa ltar bsgrub pa'i snod du rung bar byas nas dngos grub sgrub par 'dod na/ de la sbyor ba'i 'dod pa ni//mthun pa'i gnas sogs de dang der/ /zhes bya ba la sogs pa smos te/ phug gam/ lha khang stong pa'am/ sman ljongs sam/ sngar grub pa thob pa'i gnas la sogs par gnas la/ 'jig rten pa'i las kyi mtha' ngan pa rnam par g.yengs pa'i rgyu thams cad spangs nas/ rang gi 'dod pa'i lha'i ras bris la sogs pa bris nas/dang por swa b+hA ba shud+d+haH zhes bya ba la sogs pa'i sngags bzlas la/ stong pa nyid du sgom zhing / byams pa la sogs pa tshad med pa rnams bsgom pa dang / rang gi 'dod pa'i lha dpa' bo gcig pu'am/dkyil 'khor gyi lha yang rung / cho ga bzhin du thun gsum mam/thun bzhir bsgom pa dang bzlas pa byas la/ langs pa'i dus su yang kha ton dang /gtor ma gtang ba dang / dkon mchog la mchod pa dang / sbyin pa gtang ba la sogs pa bya'o/ /de ltar spyad pas cir 'gyur zhe na/ sdig chen kun las grol nas ni/ /zhes bya ba smras te/ mtshams med pa lnga la sogs pa byas pa'i sdig rnams byang bar 'gyur ro/ /de tsam du zad dam zhe na/ bskal pa du mar spyad pa yi/ /byang chub sems dpa' dang mtshungs 'gyur/ /zhes bya ba la/ pha rol tu phyin pa'i tshul la zhugs pa'i byang chub sems dpa' rnams kyis bskal pa mang por 'bad pa byas pa dang /tshe 'di nyid la mtshungs par 'gyur ro/ /'di ni yongs 'gyur rung ba'i rkyen/ /gnyis pa yin par bstan pa yin/ /zhes bya ba la/ 'di ni zhes bya ba ni sbyor ba'i spyod pa 'di'o/ /yongs 'gyur rung ba'i rkyen zhes bya ba ni ming dang / rus dang / rigs dang / bdag 'dzin la sogs pa dang ldan pa'i sems can gyi rgyu 'di la sangs rgyas dang byang chub sems dpa'i sku dang /yon tan dpag tu med par 'gyur du rung ba'i rkyen gyis sbyor ba'i spyod pa yin pas yongs 'gyur du rung ba'i rkyen zhes bya ba'o/ /gnyis pa zhes bya ba ni/ 'jug pa'i spyod pa la ltos nas so/ /de ltar sbyor ba'i spyod pa bstan nas/da ni bsgrub pa'i spyod pa bstan pa'i phyir/ de la sgrub pa'i spyod pa ni/ /dper na legs par bkrus pa'i ras/ /kha dog rnams su bsgyur ba na/ /tshegs ni chung ste gzab 'os ltar/ /sgrub pa'i spyod pa bsgrims dgos kyi/ /ha cang dka' ba'ang ma yin no/ /zhes bya ba smos te/ sgrub pa'i spyod pa ni dper na legs par bkru bshal byas pa'i ras dang /snam bu la sogs pa tshon rnams su kha dog bsgyur ba na/ dka' blas ni chung la gzab ni dgos pa yin pa ltar sgrub pa'i spyod pa yang shin tu bsgrims shing ma yengs par ni bya dgos la/ ha cang dka' zhing tshegs che ba ni ma yin no/ / de yang byang chub sems dpa' zhi ba'i blo gros kyis dris pa las 'di lta ste dper na yongs su sbyangs pa'i ras la tshon gyis kha bsgyur ba ni rab tu gzab par rigs la/ tshegs che bas ni ma yin no/ /de bzhin du bsgrub pa'i spyod pa 'di yang rab tu bsgrims pas 'jug dgos kyi ches dka' bar ni mi brjod do zhes gsungs pa yin no//de yang ci'i phyir zhe na/ sbyor ba'i spyod pas rgyud smin pa'i/ /gang zag bsgrub la 'jug pa ni/ /zhes bya ba smos te/ 'di ltar sngar sbyor ba'i dus su tshogs khyad par can ring du bsags pas rgyud smin par byas pa'i sgrub pa po yin pas so//de lta bu'i gang zag de yang bsgrub pa la 'jug pa na/ ji ltar bya zhe na/ gnas dang grogs dang longs spyod dang / /bsam pa ma yin pa rnams spang / /zhes bya ba smras te/ gnas ma yin pa ni byang chub chen po la sogs pa bsgrub pa'i gnas bstan pa las gzhan pa mu stegs byed kyi gnas dang /tshong 'dus dang skye bo mang po 'du ba'i sa rnams spangs pa'o/ /grogs ma yin pa ni 'dod pa dang gnyid dang / rmugs pa la dga' ba dang / zhe sdang dang phrag dog che ba dang / dbang ma bskur ba dang / gsang sngags la dad pa med pa rnams spangs la/ bdag pas yon tan lhag par gyur pa'am/bdag dang mnyam pa dang lhan cig gnas pa'o/ /longs spyod ma yin pa ni sngags pa sems rnam par g.yeng bar byed pa'i rgyu bud med dang / chang la sogs pa lhag par zhen pa skye ba'i gnas su gyur pa rnams spang ba'o/ /bsam pa ma yin pa ni 'dod chags dang /zhe sdang dang / gti mug dang / nga rgyal dang / phrag dog la sogs pa sngon du song ba'i sems kyi 'jug pa spang ba'o/ /de yang rgyud las rang rgyud rab tu smin par bya ba'i sngags pa bsgrub pa'i spyod pa la 'jug pa na/ gnas mi mthun pa dang / grogs ma yin pa dang / rdzas ma yin pa dang /bsam pa ma yin pa rnams spang bar bya'o zhes gsungs pa yin no/ /dmigs pa'i don la rtse gcig gzhag /ces bya ba ni mnyam par gzhag pa'i tshe ni bdag gi de nyid dam/ lha'i de nyid la rtse gcig tu byas la/ langs pa'i tshe ni thams cad sgyu ma lta bur mos pas spyod pas so//'di ni myur du 'phags pa'i rkyen/ /gsum pa yin par bstan pa yin/ /zhes bya ba la 'di ni zhes bya ba ni bsgrub pa'i spyod pa 'di'o/ /myur du 'phags pa'i rkyen zhes bya ba ni grub pa mngon sum du byed pa'i rkyen yin pa'o/ /gsum pa zhes bya ba ni 'jug pa dang sbyor ba'i spyod pa la ltos nas gsum pa yin pas so//da ni spyod pa gsum po dag gi ngo bo ji lta bu yin pa dang / rgyu'i gtso bo gang yin pa bstan pa'i phyir/ de la 'jug pa'i spyod pa ni/ /dngos grub skye ba zhing dang 'dra/ /de la sbyor ba'i spyod pa ni/ /dngos grub 'byung ba myu gu 'dra/ /de la bsgrub pa'i spyod pa ni/ /'bru yi tshogs rnams smin pa bzhin//de dag kun la'ang gtso bo ni/ /las bzang du mas smin byas pa'i/ /sems ni sa bon 'dra ba'i phyir/ /phul du byung ba'i rgyur rab gnas/ /zhes bya bas bstan te sngar rkyen rnam pa gsum rgyas par bstan pa'i 'jug pa'i spyod pas ni zhing sa bzang po ltar sems dngos grub skye ba'i zhing du byas pa yin la/sbyor ba'i spyod pas ni sa bon dang bcas pa'i zhing sa bzang po las myu gu 'byung ba lta bu yin no/ /bsgrub pa'i spyod pa ni rim gyis 'bru'i tshogs smin pa lta bu yin te/ spyod pa de dag kun la'ang gtso bo ni sngon gyi tshe rabs dag tu las bzang po du mas smin par byas pa'i sems kho na sa bon dang 'dra ba yin pa'i phyir/phul du byung ba'i rgyur rab tu gnas pa yin te/ rgyas par gong du bstan pas yang ma spros pa yin no/ /de ltar rgyu rkyen phun sum tshogs pa dang ldan pa'i sngags pas 'bras bu ci zhig 'thob par 'gyur zhe na/ sngags pas sa rnams rab gnon cing / /mngon par shes pa lngas rtse la/ /dag pa'i sangs rgyas zhing du 'gro/ /zhes bya ba smras te/ de ltar rgyu rkyen phun sum tshogs pa dang ldan pa'i sngags pa de ni skye ba 'di las rnams rab tu gnon cing mngon par shes pa lngas rtse zhing 'og min gyi 'jig rten nam/mngon par dga' ba la sogs pa'i sangs rgyas kyi zhing yongs su dag pa rnams su yang tshe 'di nyid la 'gro bar nus par 'gyur ro/ /'o na de ltar rgyu rkyen phun sum tshogs pa'i spyod pa de dag thams cad la gtso bor gyur pa'i byed pa po gang zhig yin zhe na/ de la bya ba dang bcas pa'i//byed pa po dang 'dra bar ni/ /rnam pa gsum du shes bya ste/ /zhes bya ba smras so/ /gsum po nyid gang dang gang yin zhe na/ brtson 'grus shin tu 'bar ba dang / /sems ni dmigs la rtse gcig dang / /yang dag lta dang ldan pa'o/ /de la brtson 'grus shin tu 'bar ba ni mgo la me 'bar ba gsad pa la shin tu brtson pa ltar dge ba'i phyogs la gcig tu brtson pa'o//sems dmigs pa la rtse gcig pa ni dmigs pa la mnyam par gzhag pa'i tshe char dang / nyi ma dang / rlung dang / rnga dang / dung gi sgra la sogs pas kyang mi g.yo ba'o/ / yang dag pa'i lta ba dang ldan pa ni rgyu dang 'bras bu la skur pa mi 'debs shing rnam par smin pa la yid ches pa'o/ /de lta'i bya ba dang ldan pa'i/ /grub pa'i dngos grub gang zhe na/ /zhes bya ba ni/ 'o na de ltar dka' ba sna tshogs dang ldan pa'i bya ba sgrub pa'i dngos grub de ji lta bu zhig yin zhes dris pa dang /lus dang gnas dang longs spyod dag /ces bya ba la sogs pas bstan to/ /mi las khyad par 'phags pa ste/ /zhes bya ba la lus mi las khyad par du 'phags pa ni gser gyi kha dog dang / mtshan dang dpe byad kyis brgyan pa la sogs pa la'o/ /gnas dang longs spyod ni lha'i gzhal yas khang la sogs pa dang /chos kyi longs spyod pa la sogs pa dag go/ /tshe la dbang sgyur ba ni 'dod na bskal par yang gnas shing sems can gyi don mthong na lus gzhan len pa'o/ /mi khom par skye ba las gtan du grol zhes bya ba mi khom pa brgyad po de dag tu sems can gyi don mthong nas rang gi 'dod pa'i dbang gis skye ba len pa ni srid kyi/las dang nyon mongs pa'i rgyus de dag tu mi skye ba'o/ /sangs rgyas 'byung dang phrad sogs dang / /zhes bya ba ni tshe rabs thams cad du sangs rgyas 'byung ba dang phrad pa'am/ de'i dam pa'i chos gnas pa dang phrad pa'o//sogs pas bsdu ba ni byang chub sems dpa' rnams dang 'grogs pa dang mi 'bral ba'o/ /'dod yon lnga po shes bzhin du/ /spyod la 'ching bar mi 'gyur dang / /zhes bya ba la 'dod pa'i yon tan lnga po rang gi sems gzung bar snang ba nyid gzugs rdo rje la sogs pa longs spyod du shes shing /phung po dang / khams dang / skye mched rnams sangs rgyas dang byang chub sems dpar rtogs pas mchod pa dang / mchod pa'i gnas rnams sems gzung 'dzin gyi rnam pa can du ro gcig par shes pas longs spyod kyang 'ching bar yang mi 'gyur la bsod nams chen por yang 'gyur ba'o//bdag gzhan phan skyed nus pa'o/ /zhes bya ba ni/ ma 'ongs pa'i dus ring po dag tu bdag dang gzhan gyi mtho ris dang / thar pa'i bde ba skyed nus pa'o/ /grub pa'i spyod pa gang zhe na zhes bya ba la de lta bu'i grub pa thob pa'i grub pa'i skyes bu de spyod pa ji lta bu yin zhe na/ yul dang dus ni de dang der//zhes bya ba la sogs pa smos te/ sangs rgyas kyi zhing yongs su dag pa rnams sam lha'i gnas la sogs pa de dang der ro/ /'byor pa'i bde ba la spyod cing / /zhes bya ba la/ mi las khyad par du 'phags pa'i gzugs la sogs pa'i longs spyod kyi bde ba gya nom pa la bdag nyid spyod pa'o//de bzhin 'phags pa rnams la yang / /ci nus par ni chod pa dang / /zhes bya ba la/ bdag spyod pa de bzhin du 'phags pa rnams la yang ste/ sangs rgyas dang byang chub sems dpa' rnams dang / dgra bcom pa dang / rang sangs rgyas rnams la yang mchod pa'i sprin rab 'byams dpag tu med pa dbul zhing /rang 'dod pa'i lha mnyes par byed pa la yang skad cig re res kyang gong nas gong du khyad par du 'phags par 'jug pa'o/ /phan gdags tshar gcod kyis 'dul ba'i/ /zhes bya ba la sogs pa la nad dang 'tshe ba sna tshogs kyi gnod pa rnams la ni sdug bsngal sna tshogs zhi bar byed cing tshe dang longs spyod la sogs pa rgyas par byed do//shin tu gdug cing gtum la rang bzhin ngan pa gzhan la 'tshe ba rnams la ni khro bo shin tu mi bzad pa lag na mtshon cha sna tshogs 'dzin cing gsod pa la dga' ba lta bur sprul nas 'dul bar byed do//gzhan yang sems can rnams dang rjes su mthun par nam mkha' la 'gro ba dang / me 'bar ba dang / chu 'bebs pa la sogs pa rdzu 'phrul sna tshogs bstan pas 'dul bar byed do/ /dmyal la sogs par yud tsam la'ang / /bsil dang drod sogs sbyin pa dang //zhes bya ba na/ tsha ba'i dmyal ba rnams su ser bu'i bsil ba dang spos kyi char la sogs pa 'bebs pas bsil ba sbyin par byed do/ /grang ba'i dmyal ba rnams la ni me'i phung po la sogs pa sprul nas dro ba sbyin par byed do/ /de bzhin sems can sna tshogs la/ / chos rnams sna tshogs ston pa ste/ /zhes bya ba la/ lha dang / mi dang / lha ma yin la sogs pa sems can mos pa dang / skad sna tshogs can rnams la so so'i skad kyis mos pa bzhin du chos sna tshogs ston pa'o/ /sman gyi ljon shing chen po ltar/ /mthong dang thos dang reg pa dang //dran pas kun la phan 'gyur ba'o/ /zhes bya ba la/ dper na sman gyi ljon shing chen po la zhe sdang gis gcad dam dga' bas bcad kyang rung ji ltar yang phan 'dogs par byed pa yin pa ltar grub pa'i skyes bu de la yang sems can rnams kyi chags pa'i sems sam/ sdang ba'i sems kyis kyang rung / mig gis mthong ngam/ rna bas thos sam/ lus kyis reg gam/ sems kyis dran yang rung / ci nas kyang phan pa 'byung bar 'gyur ba yin no/ /de ltar dngos grub thob pa'i spyod pa ji lta bu yin pa bstan nas/ dus ji tsam gyis 'grub par bstan pa'i phyir/grub pa'i dus ni gang zhe na/ /zhes bya ba dris pa dang / rgyu dang rkyen rnams phun tshogs shing / /zhes bya ba la sogs pa smras te/ rgyu sngon gyi las bzang po du mas bskyed pa'i lus dang / ngag dang / sems yon tan mang po 'byung ba'i rten du rung ba dang ldan pa dang /rkyen spyod pa rnam pa gsum la go rims bzhin du legs par slob pa ni/ rgyu dang rkyen phun sum tshogs pa'o/ /de yang rgyun du bzlas pa dang / bsgom pa dang ldan zhing / sangs rgyas dang byang chub sems dpa' rnams la dad pa'i dka' thub can yin na/ de'i dngos grub ni tshe 'di nyid la 'grub par 'gyur ro//de'i phyir/ rgyun du bzlas dang bsgom pa dang / /rgyal ba sras bcas la dad pa'i/ /dka' thub can gyis dngos grub ni/ /tshe 'di nyid la 'grub par 'gyur/ /zhes smras pa yin no/ /rgyu dang ldan yang rkyen 'ga' zhig /sman gyi ljon shing chen po ltar//ma tshang ba ni tshe gsum gyis/ /stong nyid legs mthong dus med grol/ /zhes bya ba la/ las bzang po du mas bskyed pa'i rgyu skye mched khyad par can yod cing / spyod pa 'ga' zhig las spyad kyang sgrub pa'i spyod pas ma bsgrubs na ni/ tshe gsum nas 'grub pa'o//stong pa nyid la legs par mthong ba'i sgrub pa po la ni grol ba la dus nges pa yod pa ma yin no/ /de ltar grub pa'i ngo bo dang / /grub pa thob pa'i spyod pa dang / 'grub pa'i dus nges pa bstan nas/ da ni 'dir dpyad par bya'o/ /gsang sngags kyi tshul la zhugs shing dpyad par 'dra ba las kha cig gis ni zhi ba dang rgyas pa la sogs pa dang /'jig rten pa'i dngos grub chen po brgyad 'grub la/ kha cig gis ni nyan thos dang / rang sangs rgyas kyi 'bras bu 'grub pa ji ltar yin snyam du sems na/ de'i phyir/ 'bras bu dman pa rnam mang las//nyan thos rang rgyal 'grub pa ni/ /zhes smras te/ 'bras bu dman pa ni 'jig rten pa'i dngos grub la sogs pa sngar bstan pa rnams so/ /de rnams kyi nang nas nyan thos la sogs pa 'grub pa ji lta bu yin zhe na/ tsan+dan shing ni bsil mod kyang //byug pa'i sbyor bas ma bsten par/ /bud shing sbyor bas bsten na ni/ /shin tu sreg cing gdung bar 'gyur/ /zhes bya ste/ dper na tsan+dan gyi shing shin tu bsil ba yin na yang brdar nas lus la bsku zhing byug pa'i tshul gyis ma bsten par bud shing du byas nas me spar na sreg cing gdung bar 'gyur ro//dpes mtshon pa'i don bstan pa'i phyir/ de bzhin gsang sngags sgor spyod pas/ /sems can kun gyi nyon mongs pa'i/ /gdung ba zhi byed yin na yang / /snying rje'i lcags kyu dang bral zhing / /mtshan med dgon par zhugs gyur na/ / theg pa dman pas mya ngan 'da'/ /des na 'bras bu dman zhes bya/ /zhes bya ba smos te/ dpe bstan pa de bzhin du gsang sngags kyi sgor zhugs shing / spyod pa yang nam mkha'i khams kyi mthas gtugs pa'i sems can thams cad kyi las dang nyon mongs pa'i gdung ba thams cad zhi bar bya ba'i phyir zhugs shing sems bskyed pa yin na yang snying rje chen pos sems can yongs su mi gtong ba'i lcags kyu dang bral zhing /byang chub sems dpa' chen po'i sems dang bral bas 'khor bas skyo la mtshan ma med pa'i dgon par 'jug par gyur na/nyan thos dang / rang sangs rgyas kyi theg pas mya ngan las 'da' bar 'gyur ro/ /de bzhin du 'jig rten pa'i 'bras bu don du gnyer ba rnams kyang de tsam zhig thob nas zad par 'gyur ro/ /de bzhin du zhe sdang sngon du song bas ma gnang ba'i mngon spyod byed cing / srog gcod pa la dga' ba rnams ni dmyal ba'am/srin po'am/ gnod sbyin la sogs par skye bar 'gyur ro/ /de ltar bsam pa dang las kyi khyad par gyis gzhan yang mtshon par bya'o/ /de yang 'og nas rgyas par ston pas 'dir ma brjod do/ /de'i phyir gsang sngags kyi sgor zhugs so cog thams cad kyis rdo rje 'chang gi go 'phang thob pa ma yin gyi/'gal bar spyod pa kha cig ni ngan song du skye bar yang nges so/ /des na gsang sngags kyi sgor zhugs kyang dman pa'i gnas thob par 'gyur bas na 'bras bu dman pa zhes bya'o/ /da ni bdag gi de kho na nyid gang yin/lha yi de kho na nyid gang yin snyam pa la/ de la dang por bdag gi de kho na nyid bstan pa'i phyir/ bdag lus sha khrag rus pa dang / /rtsa rgyus spu sogs 'dus pa tsam/ /bdag tu brjod par bya ba yin/ /zhes smras te/ rtog pa rtsing ba dag bdag ces 'dogs pa'i gzhi ni/bdag gi lus sha dang / khrag dang / rus pa dang / rtsa rgyus dang / mi gtsang ba la sogs pa 'dus pa tsam la bdag tu nga rgyal byed cing bdag ces brjod pa yin no/ /chos dbyings sbyor ba'i gsang sngags dang / /de nyid la ni mos pa'i mthus//lha yi gzugs su 'byung ba'i rten/ /khyad par can du gnas pa ni/ /rags pa'i bdag gi de nyid yin/ /zhes bya ba ni/ de ltar rtog pa rtsing bas bdag tu brtags pa de la/ oM shU n+ya tA dz+nyA na badzra swa b+hA ba At+ma kou0f85haM/ zhes bya ba chos kyi dbyings la sbyor ba'i gsang s ngags dang /de kho na nyid la mos pa'i mthus/ phyis lha'i gzugs khyad par can 'byung ba'i rten stong pa nyid kyi rnam pa can du gnas pa'i blos khyad par can gyi rags pa'i bdag gi de kho na nyid ces bya'o/ /gzhan yang rtog pa zhib pa dag /'khor bar mngon par phyogs pa'i sems/ / lus dang gnas dang longs spyod dang / /dba' rlabs ldan pa 'di kho na/ /bdag tu brjod pa'i gzhir 'dod do/ /zhes bya ba ni/ gzhan yang rtog pa zhib pa dag ni 'khor ba la mngon par phyogs pa'i sems lus dang gnas dang / longs spyod kyi dba' rlabs dang ldan pa 'di kho na bdag ces brjod pa'i gzhir 'dod do//de bdag gi de kho na nyid gang yin zhe na/ de ni gzung 'dzin dang bral zhing / /rang rig 'od gsal dngos gyur pa/ /bdag gi de nyid ces brjod do/ /zhes bya ba smras te/ phung po dang / khams dang / skye mched thams cad kyi rang bzhin gcig la gzung 'dzin dang bral ba/rang rig pa 'od gsal ba nyid ni bdag gi de kho na nyid ces brjod do/ /'o na lha'i de kho na nyid gang yin zhe na/ bye brag tu dbye na mang du yod na yang spyir phyogs gcig tu bstan par bya ba'i phyir/ de la lha yi de nyid ni/ /rang sngags chos dbyings thugs chud cing //nam mkha'i ngos ltar gyur pa las/ /klu rnams kyi ni byin rlabs kyis/ /mdog dang dbyibs ni tha dad pa'i/ /sprin rnams nam mkhar 'byung ba ltar/ /lha yi sku ni 'byung ba yin/ /zhes bya ba la lha'i de kho na nyid ni sngar bstan pa'i sngags brjod cing de'i don la mos pa'i mthus chos kyi dbyings kyi rang bzhin du rtogs shing khong du chud pa las sngon du bsod nams kyi tshogs bsags pa dang /smon lam khyad par can gyi mthus/ lha'i sku mtshan dang dpe byad kyis brgyan pa 'byung bar 'gyur te/ dper na klu rnams kyi byin gyi rlabs kyis rnam par rtog pa med bzhin du nam mkha'i dkyil du mdog dang /dbyibs tha dad pa'i sprin gyi phung po 'byung ba bzhin no/ /de lta bu'i bdag gi de kho na nyid de dang / lha'i de nyid zung du 'jug pa bstan pa'i phyir/ rnam thar sgo gsum gyis brtags pas/ /yod med gnyis las 'das par 'gyur//zhes bya ba smos te/ de ltar bdag tu brtags pa'i gzhi lus sam/ sems sam/ 'byin pa po'i mtshan dang dpe byad kyi rnam pa can gyi lha'i sku la dpyad pa na/ dngos po 'ga' yang ma rnyed pas/ dngos por 'dzin pa'i blo log pa ni rnam par thar pa'i sgo stong pa nyid do//de bzhin du de dag gi rgyu ci zhig yin zhes dpyad pa na/ ngo bo 'ga' yang ma mthong ba ni mtshan ma med pa'o/ /de bzhin du rgyu dang bcas pa'i 'bras bu la smon par bya ba'i gnas 'ga' yang legs par brtags na ma mthong ba ni rnam par thar pa'i sgo smon pa med pa'o//de lta bu'i tshul gyis yod med gnyis las 'das pa de ni zung du 'jug pa'i gnyis su med pa'i ye shes shes rab kyi pha rol tu phyin pa zhes bya'o/ /da ni sngags kyi de nyid bstan par 'dod nas/ de la sngags kyi de nyid ni/ /thabs dang shes rab tshul gnas lha/ /mi rtog bzhin du der ston cing //spyan drangs mchod nas gshegs gsol ba'o/ /zhes smras te/ sngags zhes bya ba ni thabs dang shes rab kyi tshul du byung ba'i lha rnams so/ /de'i de nyid ni mi rtog bzhin du yul dang dus de dang der gdul bya'i bsam pa smin pa'i dbang gis thogs pa med par sku sna tshogs kyi snang ba ston cing yid la re ba rdzogs par bya ba'i phyir brtan pa dang /g.yo ba dang / skyes pa dang / bud med kyi gzugs su ston pa la/ rang rang gi cho ga ji lta ba bzhin du spyan drangs shing bzhugs su gsol te mchod nas/ bzlas pa byas la gshegs su gsol ba ni/'di'i go rims yin no/ /da ni lam dang lam ma yin pa bstan par 'dod nas/ lam ni spyod pa rnam gsum sogs/ /ji skad gong du sngar bstan pa'o/ /zhes bya ba smras te/ de la lam ni 'jug pa dang / sbyor ba dang / bsgrub pa'i spyod pa la sogs pa sngar bstan pa thams cad de/phyi nang gi sde snod thams cad dang mi 'gal bar bstan pa rnams so/ /lam ma yin pa gang zhe na/ lam ma yin pa 'di lta ste/ /log par 'jug cing tshol ba ste/ /bkag pa'i mi dge bcu spyod pa'o/ /dper na mu stegs can kha cig /'jug pa'i spyod pa'i dus na yang //bud med bsten pa'i dbang bskur bzhin/ /zhes bya ba smras te/ lam ma yin pa ni dge ba bcu las bzlog pa ma gnang ba'i mi dge ba rnams spyod pa dang / gzhan yang dper na gzhan mu stegs can kha cig dang po 'jug pa'i dus na yang / bud med bsten pa'i mngon par dbang bskur ba len par byed pa lta bu'o//thog ma med nas der zhen pas/ /zhes bya ba la/ de dag bud med kyi lus la thog ma med pa'i dus nas zhen pa dam pos bcings shing rang gi sems kyi dba' rlabs su ma shes nas/ lhag par chags pas de la brten pa'i lam du 'gro zhing /log pa'i lam dbang bskur bas dbang bskur te dus de'i phyi nas/ sbyor ba'i spyod pa'i dus su yang sgrub pa po de dag bud med kyi mgul nas 'khyud cing / sgom pa dang / bzlas brjod byed na yang rim gyis 'dod chags 'phel bar 'gyur ro/ / de'i phyir/ de la 'khyud cing zhen pa yis/ /bsgom dang bzlas brjod byed na yang / /chags pa phyir zhing 'phel bar 'gyur/ /zhes bya ba smras so/ /bsgrub pa'i spyod pa'i dus na yang / /de yi tha snyad la dga' zhing / /tshul bzhin ma yin yid byed pas/ /'dod khams 'da' bar yang mi nus//rmad byung thob par ga la 'gyur/ /zhes bya ba smos te/ de bzhin du bsgrub pa'i spyod pa'i dus na yang 'khrig pa'i tha snyad kyis sgom par byed pas 'dod chags phyir zhing brtas par 'gyur te/ tshul bzhin ma yin pa yid la byed pa dang ldan pa'i phyir ro/ / des na 'dod pa'i khams las kyang 'da' bar nus pa ma yin na rmad byung zhes bya ba rdo rje 'chang gi go 'phang 'thob par lta ga la 'gyur zhes bya ba'i don to/ /de bzhin zhe sdang gti mug sogs/ /sngon du song bas byas pa'i las/ /srog gcod ma byin len pa dang / /brdzun du smra dang phra ma sogs//de dag thams cad lam min bstan/ /de bzhin du zhe sdang dang / gti mug dang / nga rgyal dang / phrag dog dang / lta ba la sogs pa sngon du song bas byas pa'i las sngags dang sman la sogs pa'i mthus srog gcad dam/ thabs gzhan gyis kyang rung ste/ srog gcod pa dang / ma byin par len pa dang / brdzun dang phra ma la sogs pa ci byas pa thams cad lam ma yin par bstan pa yin no/ /'o na rnal 'byor chen po'i rgyud dpal gsang ba 'dus pa la sogs pa las/ bu mo lo ni bcu drug pa/ /byin gyi rlabs kyis gnas bsams te//dben par mchod pa brtsam par bya/ /zhes gsungs pa dang / de bzhin du/ b+ha ga la ni ling+ga gzhag /dbang po gnyis ni mnyam sbyor te/ /zhes bya ba la sogs pa gsungs pa dang / khyod kyis srog chags gsad par bya/ /ma byin par yang blang bar bya//brdzun gyi tshig kyang smra bar bya/ /gzhan gyi bud med spyad par bya/ /zhes gsungs pa ci lta bu yin zhe na/ de dag ni sgra ji bzhin pa dang / ci bzhin pa ma yin par shes par bya ste/ sgra ji bzhin pa ni gcig tu bud med kyi yul la sred cing zhen pa rnams de la ma brten par ye shes tshol ba'i skabs med pa'i khyim pa rnams rim gyis drang ba'i phyir gsang ba'i dbang bskur la sogs pa bstan pa yin te/dper na nad pa'i nad la gnod pa'i nya la sred pa la sman pa mkhas pas nyi ma'i kha dog dang ro dang ldan par bcos pa'i sman dang por byin nas de la goms pa dang /phyis sman dngos ster bar byed pa ltar/ bud med kyi yul la lhag par zhen pa rnams la dang po de dang bsten pa'i bde ba dmigs pa la sems goms par bslabs nas phyis de kho na nyid dngos su ston par byed pa yin no/ /sgra ci bzhin ma yin pa ni dgongs pa lung bstan pa'i rgyud las/nang stong la sogs bcu drug pa/ /ma skyes pa yi zhi ba gang / /de ni bud med yin par gsungs/ /zhes gsungs pas/ stong pa nyid bcu drug gam/ sdug bsngal la chos shes pa'i bzod pa la sogs skad cig ma bcu drug gis rtogs par bya ba'i skye ba'i skye ba med pa'i don de nyid bud med kyi sgras bstan pa yin no//b+ha ga la ni ling+ga gzhag /ces bya ba'i don yang 'di yin no/ /b+ha ga ni don dam par bden pa'o/ /ling+ga ni kun rdzob kyi bden pa'o/ /bzhag pa ni bden pa gnyis gnyis su med par dmigs pa yin gyi dbang po gnyis sbyang ba la ni mi bya'o//'jam dpal gyi rgyud chen po las kyang / gang tshe thub pa nod pa dang / /'phags pa'i skye bo chen po zad/ /sa steng mun pas khyab pa ste/ /de tshe 'jig rten rab tu mdongs/ /rgyal ba'i sras po khyod ltos shig /yang dag lam rnams rab gcod cing //dge slong dge slong ma rnams dor/ /nga yi dka' thub mi zad par/ /don chen byed par mi nus pas/ /yang dag dka' thub rab sun 'byin/ /de dag 'khrig par dga' ba yis/ /log pa'i lam ni 'dzin byed cing / /'jug par byed bcas dus kun du/ /bud med bsten pa'i lam 'jug byed//de tshe rtog ge pa dag dang / /gcer bu gsang tshig la brten pa'i/ /sngags kyi gzhung spyod du ma dag /log pa'i lam chen 'dren pa 'byung / /zhes gsungs pas/ de lta bu dag ni phyi rol pa'i lugs la brten pa'i 'khrul pa dang bcas pa'i lam yin par bstan pa yin no//de bzhin du rdo rje'i tshig gzhan dag gi don la 'khrul par spyod pa 'byung ba dag kyang lung gis cung zhig bstan par bya'o/ /de yang dgongs pa lung ston pa las/ de nas bcom ldan rdo rje can/ /'od chen ldan pas bka' stsal pa/ / ma 'ongs skye bo mthong nas ni/ /gang zhig khyod kyis nga dris pas/ /legs so legs so dpa' bo che/ /gsang ba'i bdag po khyod legs so/ /zhus don de ni ci lta ba dang / /de ltar spyod la lung bstan bya/ /ma 'ongs dus na mi rnams ni/ /'jig rten rgyang 'phen mchog gzhol 'gyur//log par lta la gnas pa ste/ /ci dga' ba yang gnas par byed/ /la la glu dang gar la dga'/ /dgod dang sgeg la mchog tu gzhol/ /dri dang phreng ba la dga' zhing / /de bzhin 'khrig pa la dga' 'gyur/ /rmongs pa la la sdang ba dang / /de bzhin gti mug la rab gzhol//la la de bzhin 'dod chags zhen/ /shes pa gzhan dag 'dod par 'gyur/ /nya dang sha dang de bzhin chang / /bshang gci khu ba khrag rnams ni/ /skyes bu glen pas za bar byed/ /med par smra ba chos su sgrogs/ /ma dang sring mo la sogs pa/ /bgrod min la ni bgrod pa dang //pha ma la yang gsod pa dang / /de bzhin srog chags gzhan rnams gsod/ /brdzun gyi tshig ni smra ba dang / /khyad par du yang rku ba dang / /gzhan gyi chung ma'i thad 'gro ba/ /smad pa gzhan yang byed par 'gyur/ /la la dam tshig spong ba dang //de bzhin mtshams med byed pa dang / /sna tshogs sdig pa byas nas kyang / /sngags pas dngos grub 'dod par 'gyur/ /rab tu dga' dang ldan pa yis/ /rnal 'byor pa ni bdag ces smras/ /mngon pa'i nga rgyal la rtag dga'/ /rgyu dang bcos ma'i chos la dga'//gsang sngags smra ba la brten nas/ /gcig la gcig ni rtsod par 'gyur/ /tshogs pa'i nang du rtsod pa dang / /khyi bzhin kha zas la spyod 'gyur/ /khyi dang phag dang khwa rnams kyi/ /spyod pa dag ni ston par byed/ /gsang ba 'dus pa mi shes par/ / dam tshig la sogs spyod par byed/ /gsang ba srung bar mi byed par/ /thams cad du ni ston par byed/ /bdag nyid sba bar mi byed pas/ /dam tshig 'das par byed par 'gyur/ /nyes pa cung zad tsam gyi phyir/ /mngon spyod rab tu byed par 'gyur/ /rang gi dam tshig yongs spangs nas//lcags kyu med pa bzhin du spyod/ /sngags dang phyag rgya'i sbyor ba yis/ /de rnams 'tsho ba bsgrub par 'gyur/ /gang du rnyed par thob 'gyur ba/ /dam pa'i chos ni ston par byed/ /de rnams yang dag 'dul ba'i phyir/ /gsang ba'i dgongs pa bshad pa yin//dam tshig nyams te bshad pa rnams/ /'di yis thams cad dgug par bya/ /zhes gsungs pa dang / /yang de kho na nyid bcu pa las/ chags dang zhe sdang gti mug gis/ /gang gis log par bzung gyur nas/ /'gro ba rnams ni gsad byas nas/ / 'og tu bltas te mnar med 'gro/ /zhes gsungs pa yin no/ /de la brdzun du smra ba la sogs pa bstan pa'i dgongs pa yang dgongs pa lung bstan pa'i rgyud las/ nang dang de bzhin phyi rol dag/ /rten 'byung gnyis su bstan pa ni/ /de ni brdzun smra dga' ba ste/ /gnas med la gnas rnal 'byor pa'o//rdzogs sangs rgyas kyi ye shes gang / /de ni rjes su shes bya ste/ /de 'phrog dang tshul gang yin pa/ /gzhan gyi nor la chags par 'dod/ /gang zhig de nyid dngos gcig pu/ /de bzhin nyid la rtag sbyor ba/ /sems can de de 'dod la dga'//bsgrub pa mchog la dam par 'gyur/ /phung po la sogs med ston tshig /mnyam min gang yin ngag rtsub sogs/ /de don rnal 'byor pas bslabs na/ /myur du byang chub thob par 'gyur/ /zhes bya ba gsungs pa yin no/ /de lta bu'i dgongs pa can gyi don mi shes bzhin du sgra tsam gyi rjes su zhugs nas spyad pa'i nyes pa ni/slob dpon ye shes grags pas kyang / /tshig tsam la ni brten nas su/ /chags sogs zhen pa'i sems kyis ni/ /bsod nams ma yin byed pa gang / /de dag 'og nas 'og tu 'gro//zhes bshad pa yin no/ /'o na de bzhin gshegs pas kyang / /btsun mo dang sras la sogs pa'i longs spyod phun sum tshogs pa bzung nas/ /longs spyod pa'i tshul bstan pa ji lta bu yin zhe na/ de ni de bzhin gshegs pa nyon mongs pa'i dbang du gyur nas/sras dang btsun mo la sogs pa 'khor gyi nang na 'dod pa la dngos su longs spyod pa ma yin gyi/ /'dod pa'i dbang phyug la sogs pa'i lha rnams bu dang chung ma la sogs pa longs spyod kyis dregs pa rnams kyi nga rgyal bsal ba'i phyir/ lha de bas kyang ches khyad par du 'phags pa'i 'khor dang longs spyod la sogs pa bstan pas/de dag yid byung zhing nga rgyal dang bral nas/ de bzhin gshegs pa'i phun sum tshogs pa la 'dod pa skyes nas/ de'i rgyu tshad med pa bzhin dang / pha rol tu phyin pa drug la sogs pa la nan tan du byas nas de thob par bya ba'i phyir bstan pa yin gyi/de bzhin gshegs pa chags sdang ngam/ rmongs pas de ltar spyod pa ni ma yin no/ /da ni dam tshig rnams bstan par 'dod nas/ de la gzhi yi dam tshig ni/ /rnam pa bzhir ni shes par bya/ /zhes smos te/de dag kyang gang zhe na/ yang dag lta dang ldan pa dang / /dkon mchog gsum po mi spong dang / /byang chub sems dang ldan pa dang / /dbang bskur yang dag mi spong ba'o/ /zhes bya ba smras so/ /de la rgyu dang 'bras bu la skur pa mi 'debs shing /rnam par smin pa la yid ches pa ni chos 'di pa'am/ phyi rol pa yang rung / mtho ris dang thar pa 'dod pa thams cad kyi dam tshig yin pas gzhi zhes bya'o/ /des na yang dag pa'i lta ba dang bral bar gyur na/ dam tshig thams cad nyams shing bcom par brjod par bya'o//de las gzhan yang / dkon mchog gsum la skyabs su 'gro zhing / lha gzhan mi 'dzin pa 'di ni bstan pa 'di la zhugs pa rnams kyi thun mong ma yin pa'i dam tshig ste/ des gang gi tshe dkon mchog gsum btad na/ de'i tshe de'i chos 'di'i dam tshig thams cad nyams shing zhig par brjod par bya'o//gzhan yang gzhi khyad par can la gnas pa des/ de nas gong du byang chub chen por sems bskyed par gyur na/ de'i tshe gzhi shin tu khyad par can gyi dam tshig blangs pa yin no/ /gang gi tshe des byang chub kyi sems btang na/de'i tshe theg pa chen po'i dam tshig thams cad rtsa ba nas nyams par brjod par bya'o/ /de'i phyir rab tu byung ba'i bslab pa thams cad rab tu byung ba nyid la brten pa yin pa bzhin du/ gsang sngags kyi sgo nas spyod pa'i dam tshig thams cad kyang sngar bstan pa'i chos gsum po de la brten pa yin pas/dam tshig gsum po de dag srog gi phyir yang gtang bar mi bya'o/ /de'i steng du 'jug pa'i spyod pa'i tshul gyis mngon par dbang bskur ba ni gzhi khyad par can gyi dam tshig ste/ dbang ma bskur ba la sngags pa zhes bya ba tha snyad med pa'i phyir ro/ /de nyams pa ni sngar chos gsum po spangs pa dang / bla mas nang dbang bskur ba nyid spangs pas nyams par 'gyur ro/ /de ni yan lag gi dam tshig bstan pa'i phyir/ de la yan lag dam tshig ni//bzhi po de la brten pa yis/ /thun mong thun mong ma yin pa'i/ /bye brag lhag pa thams cad do/ /zhes bya ba smos so/ /de la yan lag gi dam tshig thun mong ba nyid gang zhe na/ khyim pa dang / rab tu byung ba dang / skyes pa dang / bud med thams cad la khyad par med par bstan pa bzhi po'am/ srog gcod pa spong ba la sogs pa'o/ /de la thun mong ma yin pa bye brag gi dam tshig gang zhe na/ gang dag yul tha dad pa la gsungs pa ste/ rab tu byung ba dang / khyim pa dang / skyes pa dang /bud med dag la so sor bcas pa'am/ rigs dang lha'i bye brag gis bsgom pa dang / bzlas pa dang / bsam rgyud tha dad du bstan pa rnams so/ /de la lhag pa'i dam tshig gang zhe na/ yul dang dus thams cad du gang zag thams cad la bstan pa ni ma yin gyi/yul dang dus la lar gang zag 'ga' la bstan pa ni lhag pa'i dam tshig ces bya'o/ /da ni dus thams cad du bya ba'i las bstan pa'i phyir/ cho ga'i bya ba rnam nges ni/ /yang dag lta sogs gsum ldan zhing / /bla ma mnyes byed bslab la gus//dus gsum lha mchod klog 'don zlos/ /rnam thar sgo gsum la gzhol zhing / /dmigs pa gcig la brtan par bya/ /zhes bya ba smos te/ de la cho ga'i bya ba rnam par nges pa ni 'di dag ste/ yang dag pa'i lta ba la sogs pa gsum ni sngar bstan pa dag go//bla ma mnyes par byed pa ni yod cing bdog na rgyal srid dam/ rgyal srid kyi phyed dam/ bu dang / bu mo dang / chung ma dang / bdag nyid dam/ rta'am/ glang po'am/ gos sam/ zas sam/ lus kyi bsnyen bkur gyis kyang bsnyen bkur byed pa'o//bslab pa gus pa ni sngar bstan pa'i dam tshig rnams sam/ so sor thar pa'i sdom pa'am/ 'og nas bstan pa rnams la gus pas nan tan byed pa'o/ /dus gsum du lha mchod pa ni/ snga dro dang / phyi dro dang / nyi ma gung la yi dam gyi lha bsgom pa dang /bzlas pa dang / mchod pa la sogs pa byed cing de dag rdzogs pa'i mthar/ rgyal po dang ni yon bdag dang / /sems can phung po gzhan dag kyang / /tshe ring nad med phun sum tshogs/ /rtag tu bde ba thob gyur cig/ ces bya ba la sogs pa'i smon lam dag kyang brjod par bya'o/ /rnam par thar pa'i sgo gsum ni sngar bstan pa rnams so/ /de la gzhol ba ni lha'i rnal 'byor la 'jug pa'i sngon dang phyis kyang de'i rang bzhin du lta ba'o/ /dmigs pa gcig la brtan pa ni dang por dmigs pa gcig la zhi gnas brtan par bya ba'am/'dod pa'i lha yang dang yang spong bar mi bya ba'am/ res 'ga' ni lha'i sku bsgom/ res 'ga' ni stong pa nyid bsgom pa la yang dang yang mi spong ba'o/ /byang chub sems dpa' rab byung bas//rang gi 'dul dang cho ga las/ /ma 'das par ni 'bad pa yis/ /sngags kyi dngos grub la reg bya/ /zhes bya ba 'dis ni/ sdom pa gsum la gnas par byas la dngos grub bsgrub par bstan te/ byang chub sems dpa' rab tu byung ba des so sor thar pa'i sdom pa dang /byang chub sems dpa'i sdom pa dang / sngags kyi dam tshig gsum la gnas te/ de dag las ma 'das par 'bad la gsang sngags kyi dngos grub myur du bsgrub par bya'o/ /gal te rdo rje slob dpon khyim pa yin la slob ma rab tu byung ba yin na/ji ltar bya zhe na/ khyim par gyur pa'i sngags pa yis/ /rab tu byung ba'i sngags pa dag /bdag gi slob mar gyur pa na/ /rkang pa bkru dang phyag la sogs/ /nam yang bdag gir mi bya'o/ /de dag ni go sla ba'i phyir ma bshad do/ /'o na ci ltar bya zhe na/rtag tu rab tu byung ba la/ /shAkya'i dbang po ltar 'dzin pas/ /gus pas bsnyen bkur bya ba yin/ /zhes bya ba smos te/ rtag tu zhes bya ba dus thams cad du'o/ /shAkya'i dbang po ni shAkya'i rigs kyi gtso bo ste/ bcom ldan 'das shAkya thub pa'o//de dang 'dra bar bltas la gus pa dang bcas pas bsnyen bkur thams cad bya ba'o/ /de ci'i phyir zhe na/ sangs rgyas bstan pa rin chen sgron/ /'bar ba'i snod ni dka' thub can/ /ngur smrig 'dzin pa shAkya'i sras/ /dge slong rnams ni yin phyir ro//zhes bya ba smras te/ sangs rgyas kyi bstan pa dam pa'i chos ni nor bu rin po che dang 'dra ba yin te/ de la brten nas 'jig rten dang 'jig rten las 'das pa'i bde ba thams cad 'byung ba'i phyir ro/ /de'i phyir de ni nor bu rin po che 'od 'bar ba lta bu yin la/de 'dzin cing 'chang ba'i snod gser gyi za ma tog lta bu ni shAkya'i sras te/ bcom ldan 'das kyi slob ma dka' thub can ngur smrig gyon pa'i dge slong rnams yin pa'i phyir ro/ /byang chub sems dpa'i spyod pa la 'jug pa las kyang / bstan rtsa dge slong nyid yin na//dge slong nyid kyang dka' bar gnas/ /zhes bstan pas/ dge slong ni bstan pa 'dzin pa'i rtsa ba yin par bstan pa yin no/ /gzhan yang rtag tu bya ba'i cho ga ni/ gtor ma gtang ba dang / sAts+tsha gdab pa dang / bzang po spyod pa la sogs pa smon lam rgya chen po gdab pa dang /tshad med pa bzhi sgom pa la sogs pa dge ba'i las thams cad bya ba kho na'o/ /de ltar dgongs pa can gyi gsung / /dgongs bcas dgongs min ji lta bar/ /bsdus nas bdag gis bris pa las/ / ston ka'i zla ba dkar ba'i/ /dge ba cung zhig gar thob des/ /'gro bas ma nor lam rtogs shog /ces bya la dgongs pa can gyi gsung zhes bya ba ni/ rdo rje'i tshig don sna tshogs ston pa rnams so/ /dgongs bcas dgongs min ji lta bar/ /zhes bya ba la/dgongs bcas ni gsang ba'i rgyan zhes bya ba'i rgyud las/ sangs rgyas thams cad chags las 'khrungs/ /de bzhin sdang dang rmongs las 'khrungs/ /zhes gsungs pa dang / zla gsang thig le las kyang / 'dod chags zhe sdang gti mug rnams//bsten na dngos grub myur du 'thob/ /ces gsungs pa lta bu'o/ /dgongs pa can ma yin pa ni/ srog chags dag ni gsad mi bya/ /ma byin par yang mi blang ngo / /'dod spyod dag ni mi bya zhing / /brdzun du smra bar mi bya'o//gnod pa kun gyi rtsa ba yi/ /chang ni rnam par spang bar bya/ /zhes gsungs pa lta bu'o/ /gzhan yang sgra ji bzhin par bstan pa dang / sgra ji bzhin ma yin par bstan pa rnams so/ /mdor bsdus pa ni rgyas par bstan pa'o/ /ston ka'i zla ba ltar dkar ba'i//zhes bya ba la sogs pa ni go bla'o/ /ma nor rgyud kyi don brtan nas/ /blo chung rnams phyir bris pa la/ /tshig dang don la 'khrul pa dag /mkhas pa rnams kyis bzod par mdzod/ /ces bya ba rgyud ma nor ba gsang ba 'dus pa dang /dgongs pa lung ston pa dang / 'jam dpal gyi rgyud la sogs pa'o/ /de dag gi don phyin ci ma log pa la brten nas bdag las blo chung ba dang / shes rab dman pa rnams kyi phyir bris pa ste bstan pa la tshig dang don la 'khrul pa ste/ /tshig sdebs ma legs pa dang /don log par bstan pa yod na mkhas pa rnams kyis te/ mang du thos shing mkhyen pa che ba rnams kyis bzod par mdzod cig ces bya ba ni/ so so'i skye bo la 'khrul pa 'byung ba ngo mtshar mi che bas bzod pa mdzad par 'os so zhes bya ba'i don te//'jig rten gsum gtso thams cad mkhyen pa'i gsung / /bdud rtsi lta bu'i tshig 'bru 'ga' bstan pas/ /gzhan la phan pa byung na dge ba des/ /'gro ba kun gyis sangs rgyas thob par shog /gsang sngags la 'jug pa'i rab tu byed pa drug cu pa'i 'grel pa paN+Di ta A tsar+ya dz+nyA na A ka ras mdzad pa rdzogs so// //rgya gar gyi mkhan po dz+nyA na A ka ra nyid dang / lo tsA ba dge slong tshul khrims rgyal bas bsgyur cing zhus te gtan la phab pa// //