194a4 /[ ]@##/ /rgya gar skad du/ man+ta a ba ta ra/ bod skad du/ gsang sngags la 'jug pa/ 'phags pa 'jam dpal gzhon nur gyur pa la phyag 'tshal lo/ /dngos po'i de nyid rang bzhin 'od gsal mngon mdzad nas/ /gdul
194a5 bya'i dbang gis sku yi cha byad sna tshogs dang //tshig dang yi ge dag gis de nyi de ston mdzad pa/ /rdo rje mi phyed gsum dngos sku la phyag 'tshal nas/ /rab tu gsang ba blo mchog yul gyur gsang sngags don/ /log par rtogs pa'i dbang gis sgro 'dogs skur 'debs shing / /
194a6 nyon mongs dbang gis sgra bzhin 'jug par byed pa rnams/ /go bar bya phyir mdor bsdus cung zhig bdag gis bris/ /bskal pa chen po rab mang bas/ /bgrod par bya ba'i sa rnams dang / /'og min la sogs zhing dag par/ /bsgom dang bzlas dang mchod stsogs kyis/ /skye ba
194a7 'di 'am gzhan dag la//sngags pa myur du 'jug 'gyur ba'i/ /rgyu dang rkyen ni gang dang gang / /bya ba dang bcas byed pa gang / /de yi grub pa gang zhig yin/ /grub pa de yis spyod pa gang / /grub pa'i dus ni nges pa gang / /'bras bu dman 'grub ci lta bu/ /bdag dang lha de'i bdag nyid gang / /
194b1 sngags kyi de nyid ji lta bu/ /lam dang lam min gang dang gang / /gzhi dang yan lag dam tshig dang / /cho ga'i bya ba rnam nges gang / /dper na skyes bu stobs chung ba'am/ /phyugs kyi shing rtas dus ring gis/ /bgrod par bya ba'i gnas der ni/ /rkang mgyogs grub pa'am nyi zlas ni/ /myur ba nyid
194b2 du 'gro bar 'gyur//de bzhin pha rol phyin pa'am/ /lam gzhan dag la brten nas ni/ /yun rings 'jug par gyur pa der/ /sngags pas tshe 'dir 'jug pa na/ /mnyam med mthu la brten phyir ro/ /de yang rgyu rkyen phun tshogs kyis/ /rgyu dang lus ngag yid kyi las/ /sngon tshe legs par
194b3 spyad pa yis//da ltar rnam par smin pa'i rgyud/ /mtshan dang ldan pa'i lus thob cing / /tshangs dbyangs ka la ping+ka'i ngag /'dod chags zhe sdang gti mug tshogs/ /nyon mongs bsrabs pa'i sems ldan pa'o/ /rkyen yang rnam pa gsum nyid de/ /'jug dang sbyor dang sgrub pa yi/ /spyod pa
194b4 rnam pa gsum nyid do//de la 'jug pa'i spyod pa ni/ /sngags la dad pa'i slob ma yis/ /bla ma yon tan ldan pa la/ /dus ring bsnyen pa sngon 'gro bas/ /mnyes nas gsol ba gdab byas la/ /dkyil 'khor 'jug dang dbang bskur zhing / /rang gi 'dod lha gzung ba ste/ /de ni gzhi yi
194b5 rkyen zhes bya//de la sbyor ba'i spyod pa ni/ /mthun pa'i gnas stsogs de dang der/ /dang por stong nyid byams stsogs dang / /rang 'dod lha yi cho ga yis/ /thun gsum mam ni thun bzhi ru/ /bsgom dang bzlas dang kha don dang / /gtor ma sbyin pa'am mchod stsogs brtson/ /sdig chen kun las
194b6 grol nas ni//bskal pa du mar spyad pa yis/ /byang chub sems dpa' dang mtshungs 'gyur/ /'di ni yongs 'gyur rung ba'i rkyen/ /gnyis pa yin par bstan pa yin/ /de la sgrub pa'i spyod pa ni/ /dper na legs par bkrus pa'i ras/ /kha dog rnams su bsgyur ba na/ /tshigs ni chung
194b7 ste gzab 'os ltar//sgrub pa'i spyod pa'am bsgrims dgos kyi/ /ha cang dka' ba'ang ma yin no/ /sbyor ba'i spyod pas rgyud smin pa'i/ /gang zag bsgrub la 'jug pa ni/ /gnas dang grogs dang longs spyod dang / /bsam pa ma yin pa rnams spangs/ /dmigs pa'i don la rtse gcig
195a1 gzhag /'di ni myur du 'phags pa'i rkyen/ /gsum pa yin par bstan pa yin/ /de la 'jug pa'i spyod pa ni/ /dngos grub skye ba zhing dang 'dra/ /de la sbyor ba'i spyod pa ni/ /dngos grub 'byung ba myu gu 'dra/ /de la sgrub pa'i spyod pa ni/ /'bru yi tshogs rnams smin pa bzhin/ /
195a2 de dag kun la'ang gtso bo ni/ /las bzang du mas smin byas pa'i/ /sems ni sa bon 'dra ba'i phyir/ /phul du byung ba'i rgyur rab gnas/ /de ltar rgyu rkyen phun tshogs pa'i/ /sngags pas sa rnams rab gnon cing / /mngon par shes pa lngas rtse la/ /dag pa'i sangs rgyas zhing du 'gro/ /de
195a3 la bya ba dang bcas pa'i//byed pa po dang 'dra bar ni/ /rnam pa gsum du shes bya ste/ /brtson 'grus shin tu 'bar ba dang / /sems ni dmigs la rtse gcig dang / /yang dag lta dang ldan pa'o/ /de lta'i bya ba dang ldan pa'i/ /grub pa'i dngos grub gang zhe na/ /lus dang gnas dang
195a4 longs spyod dag /mi las khyad par 'phags pa ste/ /tshe la dbang bsgyur mi khom par/ /skye las gtan du grol ba dang / /sangs rgyas 'byung dang phrad stsogs dang / /'dod yon lnga po shes bzhin du/ /spyod la 'bying bar mi 'gyur dang / /bdag gzhan phan pa bskyed nus pa'o/ /grub pa'i
195a5 spyod pa gang zhe na//yul dang dus ni de dang der/ /'byor pa'i bde ba la spyod cing / /de bzhin 'phags pa rnams la yang / /ci nus par ni mchod pa dang / /phan gdags tshar gcod kyis 'dul ba'i/ /sems can rnams la rjes mthun par/ /rdzu 'phrul sna tshogs kyis 'dul zhing / /
195a6 dmyal la sogs par yud tsam la'ang / /bsil dang drod sogs sbyin pa dang / /de bzhin sems can sna tshogs la/ /chos rnams sna tshogs ston pa ste/ /sman gyi ljon shing chen po ltar/ /mthong dang thos dang reg pa dang / /dran pas kun la phan gyur pa'o/ /grub pa'i dus ni gang zhe na/ /rgyu
195a7 dang rkyen ni phun tshogs shing //rgyun du bzlas dang bsgom pa dang / /rgyal ba sras bcas la dad pa'i/ /dka' thub can gyis dngos grub ni/ /tshe 'di nyid la'ang 'grub par 'gyur/ /rgyu dang ldan yang rkyen 'ga' zhig /ma tshang ba ni tshe gsum gyis/ /stong nyid legs mthong dus med grol/ /
195b1 'bras bu dman pa rnam mang las/ /nyan thos rang rgyal 'grub pa ni/ /tsan+dan shing ni bsil mod kyang / /byug pa'i sbyor bas ma bsten par/ /bud shing sbyor bas bsten na ni/ /shin tu sreg cing gdung bar 'gyur/ /de bzhin gsang sngags sgor spyod pas/ /sems can kun gyi nyon mongs pa'i/ /
195b2 gdung pa zhi byed yin na yang / /snying rje'i lcags kyu dang bral zhing / /mtshan med dgon par zhugs gyur na/ /theg pa dman pas mya ngan 'da'/ /des na 'bras bu dman zhes bya/ /bdag lus sha khrag rus pa dang / /rtsa rgyus spu sogs 'dus pa tsam/ /bdag tu brjod par bya ba yin/ /
195b3 chos dbyings sbyor ba'i gsang sngags dang / /de nyid la ni mos pa'i mthus/ /lha yi gzugs su 'byung ba'i rten/ /khyad par can du gnas pa ni/ /rags pa'i bdag gi de nyid yin/ /gzhan yang rtog pa zhib pa dag /'khor bar mngon par phyogs pa'i sems/ /lus dang gnas
195b4 dang longs spyod dang //dba' rlabs ldan pa 'di kho na/ /bdag tu brjod pa bzhi ru 'dod/ /de ni gzung 'dzin dang bral zhing / /rang rig 'od gsal dngos gyur pa/ /bdag gi de nyid ces brjod do/ /de la lha yi de nyid ni/ /rang sngags tshes dbyings thugs chud cing / /nam mkha'i ngos
195b5 ltar gyur pa las//klu rnams kyi ni byin rlabs kyis/ /mdog dang dbyibs ni tha dad pa'i/ /sprin rnams nam mkhar 'byung ba ltar/ /lha yi sku ru 'byung ba yin/ /rnam thar sgo gsum gyis brtags pas/ /yod med gnyis las 'da' bar 'gyur/ /de la sngags kyi de nyid ni/ /thabs dang
195b6 shes rab tshul gnas lha//mi rtog bzhin du der ston cing / /spyan drangs mchod nas gshegs gsol pa'o/ /lam ni spyod pa rnam gsum sogs/ /ji skad gong du sngar bstan pa'o/ /lam ma yin pa 'di lta ste/ /log par 'jug cing tshol ba ste/ /bkag pa'i mi dge bcu spyod
195b7 pa'o//dper na mu stegs can 'ga' zhig /'jug pa'i spyod pa'i dus na yang / /bud med bsten pa'i dbang bskur bzhin/ /thog ma med nas der zhen pas/ /sbyor ba'i spyod pa'i dus na yang / /de la 'khyud cing zhen pa yis/ /bsgom dang bzlas sogs byed na yang / /chags pa
196a1 phyir zhing 'phel bar 'gyur//sgrub pa'i spyod pa'i dus na yang / /de yi tha snyad la dga' zhing / /tshul bzhin ma yin yid byed pas/ /'dod khams 'da' ba'ang mi nus na/ /rmad byung thob par ga la 'gyur/ /de bzhin zhe sdang gti mug sogs/ /sngon du song bas
196a2 byas pa'i las//srog gcod ma byin len pa dang / /brdzun du smra dang phra ma sogs/ /de dag thams cad lam min bstan/ /de la gzhi yi dam tshig ni/ /rnam pa bzhir ni shes bya ste/ /yang dag lta dang ldan pa dang / /dkon mchog gsum po mi spong dang / /byang chub sems dang
196a3 ldan pa dang //dbang bskur yang dag mi spong ba'o/ /de la yan lag dam tshig ni/ /bzhi po de la brten pa yis/ /thun mong thun mong ma yin pa'i/ /bye brag lhag pa thams cad do/ /cho ga'i bya ba rnam nges ni/ /yang dag lta sogs gsum ldan zhing / /bla ma mnyes byed
196a4 bslab la gus//dus gsum lha mchod klog 'don zlos/ /rnam thar sgo gsum la gzhol zhing / /dmigs pa gcig la brtan par bya/ /byang chub sems dpa' rab byung bas/ /rang gi 'dul dang cho ga las/ /ma 'das par ni 'bad pa yis/ /sngags kyi dngos grub
196a5 la reg bya//khyim par gyur pa'i sngags pa yis/ /rab tu byung ba'i sngags pa dag /bdag gi slob mar gyur pa na/ /rkang pa bkru dang phyag la sogs/ /nam yang bdag gir mi bya'o/ /rtag tu rab tu byung ba la/ /shAkya'i dbang po ltar 'dzin pas/ /gus pas bsnyen bkur bya ba
196a6 yin//sangs rgyas bstan pa rin chen sgron/ /'bar ba'i snod ni dka' thub can/ /ngur smrig 'dzin pa shAkya'i sras/ /dge slong rnams ni yin phyir ro/ /de ltar dgongs pa can gyi gsung / /dgongs bcas dgongs min ji lta bar/ /mdor bsdus bdag gis bris pa las/ /ston
196a7 ka'i zla ba ltar dkar ba'i//dge ba cung zhig gang thob des/ /'gro bas ma nor lam rtogs shog /ma nor rgyud kyi don brten nas/ /blo chung rnams phyir bris pa la/ /tshig dang don la 'khrul pa dag /mkhas pa rnams kyis bzod par mdzod/ /gsang sngags la 'jug pa'i rab tu
byed pa drug cu pa slob dpon dz+nyA na A ka ras mdzad pa rdzogs so/