CLOSE WINDOW

D3710
བོད་ཡིག

rgya gar gyi mkhan po pad+mA ka ra warma dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa'o//[ ]@##/ /rgya gar skad du/ man+t+ra na ya A lo ka /bod skad du/ gsang sngags kyi tshul gyi snang ba/ bcom ldan 'das 'jam pa'i rdo rje la phyag 'tshal lo//rnam dag dga' ba yang dag 'bab/ /rab mdzes rgya che'i sku mnga' ba/ /shes rab thabs bdag nyid rdo rje/ /sku gsung thugs la phyag 'tshal lo/ /dus kyi bdag nyid ngan pa dang / /'gro ba 'ang skal ba med pa dag /gzigs nas bdag gi bla ma yis/ / gsang sngags tshul bshad bkag pa yin/ /'di ltar de nyid kyis mdzad pa'i/ /de nyid snying po bsdus par ni/ /de ma bshad pa'i rigs pa dang / /dgongs pa yang ni bstan pa yin/ /gang yang blo dman kha cig ni/ /der des ma rtogs pa nyid dam/ /phrag dog yin par dogs byed cing //rmongs pa yis kyang de brnyas byed/ /de spang sdig pa'i me nang du/ /phye ma leb ltar ji srid ni/ /ltung bar ma gyur de srid du/ /de skyob pa la bdag 'bad do/ /'di na chos bdag med pa ni/ /thos pa tsam gyis blo ngan rnams/ /phal cher rgyang pan grub mtha' yi/ / gzhung lugs la ni kun du brten/ /zas dang spyod lam la sogs pa/ /ngan pa rang dga' nyid du byed/ /bla ma dge ba'i bshes gnyen yang / /mi shes dregs pas smod par byed/ /bdag dang bdag gir 'dzin smyo byed/ /cung zad tsam yang btsal bar ni/ /mi nus bzhin du chos rnams kyi//ngo bo med pa nyid du'ang smra/ /thub pa chen po'i bstan pa yi/ /de nyid don ni mi shes par/ /mi bzad las kyis bcom pa rnams/ /gzhan dag kyang ni rlag par byed/ /bde gshegs gzhung du bcos pa yi/ /bstan pa 'jig byed bdud de ni/ /gzhom pa'i don du bdag cag gis//de nyid cung zad bstan par bya/ /'jig rten grags lam bzang spong ba/ /'jig rten rgyang pan ma gtogs pa/ /mu stegs pa yang 'dod min na/ /sangs rgyas rjes 'brang smos ci dgos/ /nyon mongs shes bya'i sgrib 'jig cing / /bdud rnams 'joms pa'i bstan pa ni//nyes pa kun las rnam grol ba/ /blo gros ngan pas dri mas gos/ /bde gshegs gzhung ni gang yin la/ /zas spyod ngan 'di ga la yod/ /nyi ma dag dang mun nag ni/ /lhan cig gnas par snang ba yin/ /'on te de nyid rnal 'byor pa/ /bdag cag la ni kha zas dang //spyod lam sogs kun ci dga' bar/ /rnal 'byor rgyud las skyob pas gnang / /de yang 'di ni gsal nyid du/ /zla gsang thig le la sogs las/ /rnal 'byor pa yis mi bya ba/ /ci yang med ces gsungs pa yin/ /gzhan yang / chos dang chos min la sogs pa//thams cad bsam pas brtag par zad/ /dngos po de lta'i rang bzhin yin/ /khyod kyi tshad ma ci yang med/ /bya ba'i 'bras bu bsam pa la/ /rag las de phyir de bzhin gshegs/ /brtser ldan de nyid gzigs pa yis/ /bkag pa rnams kyang gnang bar mdzad//gzhan yang 'di dag rang bzhin gyis/ /chos rnams thams cad bdag med de/ /nam mkha'i ut+pal sogs bzhin gsog /nyon mongs ci zhig byed par 'gyur/ /yang na 'di dag khyad par 'phags pa'i/ /tshogs pa dang ni ldan gyur pas/ /'bras bu khyad 'phags nyid 'byin te//rgya skyegs kyis bsgos sa bon mtshungs/ /rdzas sogs mnyam nyid goms pa las/ /nges par dag pa nyid gyur pa'i/ /sems kyis byang chub thob 'gyur zhes/ /de ltar de nyid shes rnams gnas/ /chos rnams sgyu ma lta bu yi/ /don dam pa nyid mthong na ni//rdzogs sangs rgyas ltar 'jig rten 'dir/ /ci bde bar ni gnas par bya/ /dka' ba'i las ni gang ci yang rung / /gang zhig nyon mongs skyed 'gyur ba/ /de ni 'jig rten mgon po yis/ /sngags spyod gnas pa rnams phyir bkag /bde bas byang chub thob 'gyur sogs//gsung la ma gus pa rnams ni/ /bstan bcos mi shes 'di ci zhes/ /dam tshig sdang rnams bdag la smos/ /de ltar yid ni ma rig pa'i/ /gnyis kyis ye shes mig rgya btab/ /sad ma gyur pas blo ngan rnams/ /de dang de'i smra bar byed/ / spyir ni rgyud rnams thams cad las/ /'di 'dra'i dam tshig sdom pa ni/ /mgon pos gsung ba bden mod kyi/ /'on kyang 'di de rnams dpyad bya/ /bza' min bgrod min bsten la sogs/ /gal te byang chub 'grub 'gyur na/ /tha mal ba dang dud 'gro yang / /ci phyir da dud grol ma gyur//dug gi nus pa 'chi ba dang / /'khru ba'i nus pa 'khru ba ltar/ /bza' min sogs pa sdig bskyed de/ /dngos rnams nus pa sna tshogs yin/ /la las dug ni zos pa yis/ /de yi mthu rtogs ma yin gyis/ /'on kyang 'jig rten grags phyir ram/ / bstan bcos las ni shes pa yin/ /gur gum la sogs ser ba dang / /bshang ba la sogs smad pa nyid/ /ngo bo nyid kyis grub pa la/ /gzhan du bya bar su yis nus/ /dug sogs nus pa de yang ni/ /mthong ba nyid na nyams myong 'gyur/ /bza' mi na sogs ni mi mthong yang //de ni de bzhin rtogs par 'gyur/ /phyin ci log gi las byed na/ /re zhig 'jig rten smod byed la/ /de bzhin rgyal po la sogs kyi/ /chad pas rmongs pa 'jig par 'gyur/ /ji ltar bcos ma'i gser la sogs/ /gsang ste 'tsho bar byed pa yin/ /de bzhin sngags spyod rang gi ni//nyams su len la 'jug par 'os/ /bkres skom tsha grang rmugs pa dang / /gnyid sogs kyis rab gdungs gyur pa/ /snang na de ru khyod kyi ni/ /dngos po med pa gang du song / /chos rnams thams cad bdag med la/ /rnyed dang bkur sti 'dod pa nyid/ /snang na rnal 'byor pa dag ni//shin tu ngo mtshar cis mi byed/ /phan byed sdug par mthong ba dang / /la la gnod byed mthong ba dag /dngos la dbang po 'das shes la/ /ma mthong ba la'ang nges pa 'di'o/ /khyed kyis spang bya spang ba dang / /blang bya blang bar cis mi snang / /'jig rten pha rol dag tu yang //'di la ci phyir mngon mi dga'/ /bya ba rnams kyi 'bras yod ces/ /khyed rnams kyis kyang nges par bya/ /de ltar min na zas skom sogs/ /'thob phyir spyod pa ci ste byed/ /thub pa'i bstan pa nges pa dang / /drang ba'i don gyi dbye bas phye/ /dam tshig la sogs drang don ni//min zhes nges nyid ji ltar byed/ /'di ni gsal bar drang don ni/ /yin par ye shes grags pas bshad/ /de ni de nyid 'jug pa las/ /de yi tshig 'di mnyan par gyis/ /gnod sbyin srin po sha za sogs/ /dam tshig bstan par mdzad pa ni/ /yid rton sems kyis zhen pa dag /de rnams de bsgrub phyir yin no/ /log rtog dra ba thams cad las/ /nges par zlog phyir skyob pa yis/ /rigs kyi dbye ba la brten la/ /dam tshig nges par gsung ba yin/ /gal te dngos rnams stong nyid du/ /yang dag nyid du khas len na/ /ci phyir la lar mngon zhen pas/ / 'di nyid la ni khas 'ches byed/ /'on te sems can chen po 'ga'/ /dam tshig la sogs bsten pa yis/ /dngos grub nye bar thob ces thos/ /bdag cag rnams kyang de rjes 'breng / /khyed 'dra'i blo gros chung ngu dag /de nyid mthong ba de lta bu'i/ /bsam pa'i rgya mtsho gting zab par//'jug par nus pa ga la yin/ /byis pa sa rdul tsam la ni/ /bza' ba 'di dang btung ba 'di/ /tshod ma sna tshogs kyang zo zhes/ /rtsed mo byed pa ji lta bar/ /de bzhin de nyid mi shes pa'i/ /sngags kyi bstan bcos la bsgom pa/ /rang gi rtog pas kun bskyed pa'i/ /'bras bu med par de ltar snang //bstan bcos bden pa la brten cing / /bla ma'i lung ni bsgom pa dag /byed na rnal 'byor 'bras bu 'di/ /med ces ci phyir sems par byed/ /yang dag pa yi rnal 'byor pa/ /dngos med rtogs shing brtser ldan la/ /rgyal bas 'di gsungs bden mod kyi//de ltar 'di 'dra 'ga' ma mthong / /rdzogs sangs rgyas ltar 'jig rten 'dir/ /ci bder gnas bya gang smra ba/ /khyod la rdzogs sangs mtshan ma'i cha/ /yod par ci yi phyir mi snang / /gal te sngags kyi bstan pa la/ /smod du gyur pa khyod yin na/ /bdag cag dam tshig la snang bas//'gal bar smra bar 'gyur ba yin/ /gal te zas skom sgo nas ni/ /rdzas sogs mnyam par slob byed na/ /sbyin la sogs pa'i lam gyis ni/ /mi slob ces pa ngo mtshar che/ /gal te sgyu ma ltar gnas pa/ /'di la khyod kyis brten byas na/ /bkres skom grang sogs gnod pa la//khyed kyis sgyu ma gang du song / /'jig rten gnyen gyis bsngags pa la/ /tshogs pa khyad par can gsungs pa/ /de'i cha khyod la yod min pa/ /rgyu med 'bras bu ga las byung / /bde bas byang chub thob 'gyur dang / /dka' ba spyod pa'ang spang ba ni//nyin mtshan bsgom brtson rnal 'byor pa/ /gang yin de la de gsungs so/ /rgyal bas gsung tshig gang gang yin/ /snga ma'i phyogs su bstan pa rnams/ /rang nyid gsad phyir gshed byed ni/ /rang nyid ji lta slong bar byed/ /de bzhin nyid kyi rnal 'byor pa/ /shes rab thabs mchog bdag nyid can//de la gsungs pa de'i nang nas/ /khyed la chung ngu'ang 'ga' ma mthong / /gang yang mgon pos sngags tshul las/ /dgag pa mang po gsungs pa dag /de ni skal med phyir yin na/ /rmongs pa khyod kyis cis ma mthong / /rab brtags shin tu legs dpyad nas//mkhas pa rnams ni 'jug bya yin/ /gzhan du 'di ni mer 'jug pas/ /bcu drug char yang mi phod do/ /de nyid de nyid kyis shes nas/ /gang zhig lhag mas nges ston pa/ /de 'grub 'gyur gyi gzhan du de/ /dmyal ba chen por ltung bar 'gyur/ /'jig rten 'das spyod gsang bar ni//rnam par mi rtog nyid du spyad/ /gzhan du bag med par gyur na/ /de ni rnam rtog 'phyos par 'gyur/ /gal te shes rab thabs dag las/ /sems ni gzhan du mi 'phro na/ /de ni nges par byang chub che/ /rab tu sbyin byed yin par bshad/ /ston byed skye bo ngan pa dang //phrad pas bstan pa dkrugs gyur pas/ /bdag gi bla mas sems can rnams/ /de bzhin lam sogs song bar gzigs/ /des na sngags tshul gsang bar ni/ /bya zhes de ltar bstan pa ni/ /gang zhig skal dang ldan pa des/ /bla ma'i kha las shes par 'gyur/ /de ltar gsang sngags tshul snang ba//bla ma'i bka' yi rjes 'brangs te/ /byas pa 'dis ni mkhas pa rnams/ /dga' bar 'dir ni nges par 'gyur/ /gang zhig cung zad shes pa yi/ /dregs pas 'di la brnyas mi rigs/ /bdag nyid che dang su zhig 'gran/ /rnal 'byor can de bzod par mdzod//blo can gang zhig gsang sngags kyi/ /spyod la yang dag 'jug 'gyur ba/ /des na bdag gi tshig gi ni/ /gces dang mi gces rtogs par 'gyur/ /de ltar bla ma'i tshig gi snying po legs par brtags nas ni/ /rgya chen sems ldan dga' bar byed pa 'di ni bshad byas pas//'di las bdag gis dge ba gang bsags des ni 'jig rten rnams/ /thub pa'i khyu mchog gsung gis mun pa thams cad 'jig byed shog /gsang sngags kyi tshul snang ba zhes bya ba/ rdo rje slob dpon chen po mtho btsun btso yags kyi zhal snga nas mdzad pa rdzogs so/