CLOSE WINDOW

D3478
བོད་ཡིག

/sa mtha' i yi dbyangs kyis mdzes/ /zla phyed thig les mnan par bri/ /bla ma'i man ngag blta zhing bzlas/ /yi ge gcig pa'i rab tu sbyor ba cung zad pa rdzogs so//[ ]@##/ /rgya gar skad du/ tsaN+Da ma hA ro Sha Na sA d+ha na kalpa/ bod skad du/gtum po chen po'i sgrub thabs cho ga dang bcas pa/ 'phags pa mi g.yo ba la phyag 'tshal lo/ /pus mo'i lha nga sar btsugs phyag g.yas ral gri bsnams/ /cig shos phyag ni khu tshur sdigs mdzub zhags pa bsnams/ /sku lus sra mkhregs gtum zhing 'bar ba khro ba'i spyan//bgegs 'joms mi g.yo srid pa'i bgegs rnams zhi bar mdzad/ /phyogs bcur bzhugs pa'i sangs rgyas dang / /byang chub sems dpa' 'dren pa rnams/ /de rnams rnam pa sna tshogs pa'i/ /me tog la sogs blo yis mchod/ /sdug bsngal rnams bltas bskyab pa'i phyir//bdag gi lus nyid dbul bar bgyi/ /sngags pas dge ba spel ba'i phyir/ /sdig pa rnams ni bshags par bgyi/ /rdzogs sangs rgyas dang byang sems tshogs/ /slob dang mi slob sems can gyi/ /bsod nams rang bzhin ma lus pa/ /de la rjes su yi rang ngo / / dkon mchog gsum la skyabs su 'gro/ /rdzogs pa'i byang chub nges par bsten/ /tshad med pa yi gnas bzhi po/ /rim pa ji bzhin bsgom par bya/ /mtshan nyid dang bral stong pa nyid/ /rgyu dang bral bas mtshan ma med/ /smon lam las kyang rnam grol ba'i/ /ngo bo nyid kyi rang bzhin bsgom//sna tshogs pad+ma nyi ma'i dbus/ /hUM yig las byung bzhugs par bsgom/ /dpa' bo spyan gnyis dmar po ste/ /phyag gnyis rin chen cod pan can/ /mgon po sdig pa 'phral du spang / /ji ltar 'dod pa yongs su skong / /zar ma'i me tog lta bu'i mdog /sangs rgyas dri med 'od zer 'gyed//mche bas mchu ni nges par mnan/ /rgyan rnams kun gyis rnam par brgyan/ /g.yon pa sdigs mdzub zhags pa ste/ /pus mo g.yon pa sa la btsugs/ /phyag na ral gri bsnams pa yi/ /dpal ldan khro bo gtum po che/ /'jigs byed chen po zur gyis gzigs//mi bzad 'jigs par byed pa po/ /ye shes sems dpa' gzi brjid che/ /dam tshig sems dpa' mtshungs par blta/ /sngags pas de yi thugs ka ru/ /sa bon mtshan ma yang dag ldan/ /lha yi rnam par sbyor ba yis/ /bsam gtan skyo na sngags bzlas bya/ /de las gsungs pa'i dngos grub ni//the tshom med pa nyid du 'thob/ /de la sngags kyi rgyal po ni 'di yin te/ oM tsaN+Da ma hA ro Sha Na hUM phaT/ /sngags kyi rgyal po 'di lan cig brjod pas/ sdig pa thams cad nges par sreg cing thams cad du nges par srung ba dang / sbed par byed do/ /sran ma la sogs pa rnams kyis brabs na 'byung po la sogs pa'i 'jigs pa 'joms par byed do//kham phor so ma btang ba la thod le kor gyis mngon par bris nas sgo ltag la dpyangs na byis pa gsar du skyes pa rnams srung bar byed do/ /spra tshil gyis gzugs sor bzhi'i tshad du byas nas de'i snying gar bsgrub bya'i ming dang bcas pa'i sngags gro ga la mngon par bris te bcug nas de'i khar tsher ma bcug na phyir rgol ba phur bus 'debs par 'gyur ro//rkang pa la btsugs na 'gro 'phro la rengs par 'gyur ro/ /snying gar btsugs na khros pa zhi bar 'gyur ro//mi'i rje ngar gyi phur bu'am/ lcags kyi phur bu gang dang gang gis ming bzung ste lus la btab na de dang de rnam par 'jig par 'gyur ro/ /dgra'i sgo khar sbas na brlag par 'gyur ro/ /khyi nag po'i thod pa la ming dang bcas pa bris nas klu'i gnas su sbas na mdzes zin par 'gyur ro//rabs chad kyi thod pa la sngags dang bcas te bris nas rabs chad kyi dur khrod du sbas na rabs chad par 'gyur ro/ /ro mtsho lkugs par sbas na thams cad rengs par 'gyur ro/ /me thab tu sbas na rims kyis 'chi'o/ /dur khrod kyi thal ba la mngon par bsngags nas dgra bo'i sgo glegs la btags na de skrod par 'gyur ro//ral gri la mngon par bsngags nas g.yul du zhugs na rgyal bar 'gyur ro/ /bya ba gang la 'jug pa na gtor ma btang na de 'grub par 'gyur ro/ /sngags pas dge ba dang mi dge ba'i las gang dang gang 'dod pa bzlas pa tsam gyis 'grub par 'gyur ro/ / bdag gis bris las gang thob pa'i/ /dge bas sems can don grub cing / /des 'dir 'jig rten ma lus pa/ /rdzogs pa'i byang chub snod ldan shog /gtum po chen po'i sgrub thabs cho ga dang bcas pa rdzogs so// //slob dpon 'od zer 'byung gnas grags pas mdzad pa'o//