CLOSE WINDOW

D3142
བོད་ཡིག

@##/ /rgya gar skad du/ dz+ye tirmany+dza ri nA ma ho ma pa yig /bod skad du/ sbyin sreg gi cho ga 'od kyi snye ma zhes bya ba/ dpal rdo rje sems dpa' la phyag 'tshal lo/ /de nyid bsdus sogs rgyud rnams su/ /rdo rje 'dzin pas sbyin sreg las/ /rab gtor 'jigs med shes rab dang //snying rje dga' bas yang dag bsdu/ /gzhan gyis byas pa yod mod kyi/ /rgyu skar khrod na zla ba yi/ /'od zer ltar gsal khyad par du/ /dga' ba ster 'di legs brtag bya/ /de la nyi ma bzang po la ji ltar brjod pa'i cho gas rang gi 'dod pa'i lha'i bdag nyid can gyis mchod pa dang gtor ma 'bul ba sngon du 'gro bas/lag pa g.yas pas la bzhag ste/ oM AHhUM zhes pa 'dis dang / oM ha na ha na krod+ha hUM phaT ces pa'am/ rang gi lha'i sngags brgya rtsa brgyad bzlas te/ kun rdzob kyi dag pa'i thab kyis sam/ stong pa nyid kyis kyang rung ste/ thab khung rnams brko bar bya ba'i don dus rnam par sbyangs te/yang na yon bdag gi dbang gis rdo rje phreng bar brjod pa'i cho ga rnams kyis sa sbyang ba dang / sa yongs su gzung ba dang / bgegs la phur bus gdab pa dang / sa'i lha mo lhag par gnas pa yang ji ltar rigs par 'dod pas/ rgyas pa'am bsdus pa byas nas sa bdag klu'i mchan la thab khung rnams brko bar bya'o//de la zhi ba'i thab khung ni sa dkar po la rgyar khru gang zabs su sor bcu gnyis pa zlum po ste/ de'i dbus su sor bcu drug pa'i pad+ma'i steng du 'khor lo'am mgo shar du bstan pa'i rdo rje rtse lnga pa ste/ sor brgyad pa'i tshad tsam pa dpangs su sor gcig pa'o//thab khung gi steng du sor bzhi'i bar dor bar rgya dang dpangs su sor bzhi pa thab khung gi dbyibs can kha bags kyis nang du gzhol ba'i kha khyer khor yug ste/ phyi'i zur rnams su zur gsum rnams la 'khor lo'am rdo rje rtse gsum pas mtshan pa'o/ /thab khung las sa dkar po dang phyi rol du sa gzhi khru phyed du kun nas pa'i lci bas nye bar byugs te/de nyid las bdud rtsi dkar po dang ldan pa'i dri dkar pos nye bar byugs la thun gsum du me tog dkar po'i sil ma gcal du dgram par bya'o/ /rgyas pa'i thab khung ni sa gzhi ser po la rgyar khru do zabs su khru gang pa gru bzhi pa'am rin po che zur brgyad pa lta bu ste/de'i dbus su 'khor lo rtsibs brgyad pa'i lte ba la gnas pa'i sor drug pa'i rin po che rdo rjes mtshan pa'o/ thab khung gi steng du sor brgyad dor bar rgya dang dpangs su sor brgyad pa'i tshad kyi thab kyi dbyibs can la/ phyi zur rnams su rin po ches mtshan pa'i kha khyer ro//thab khung las ser po dang de'i phyi rol du ba'i lci bas nye bar byugs nas de dag la bdud rtsi ser po dang ldan pa'i dri ser pos nye bar byugs la me tog ser po dgram par bya'o/ /dbang gi thab ni sa dmar po'am gzhan yang rung ste b+ha ga'i rnam pa rtse mo shar du bstan pa la a shwad+tha'i lo ma lta bu'am zla ba phyed pa'i rnam pa'i dbus su pad+ma dmar po rdo rjes mtshan pa'o//dbang gis dgug pa la yang thab khung 'di dag gam yang na rdo rje rtse gcig pa'i rnam pa can gyi dbus su pad+ma dmar po rdo rje'i lcags kyus mtshan pa ste/ thab khung gsum ka la yang gtso bo'i mtshan mas mtshan pa'i lcags kyus mtshan pa'i thab khung gi rnam pa'i kha khyer gyis bskor ba'o//sa dmar po bdud rtsi dang bcas pa'i dri dmar pos nye bar byugs la me tog dmar po sil ma dgram par bya'o/ /thab khung gsum po ni zabs dang kha khyer la sogs pa'i tshad ni zhi ba'i thab khung bzhin du shes par bya'o//mngon spyod kyi thab khung ni gas pa tsha sgo can dang rtsub pa dang nam mkha' ltar nag pa'i sa la gru gsum byang du phyogs pa/ logs rnams la sor nyi shu pa zabs su sor bcu pa dbus su pad+ma nag po la gnas pa'i sor brgyad pa'i khro bo'i rdo rjes brgyan pa'am/ dbus su rtse gsum pa la gnas pa'i khro bo'i rdo rjes brgyan pa'o/ /thab khung gi steng gi sor gsum dor bar rgya dang dpangs su sor gsum pa kha phyir gzhol ba'i kha khyer khro bo'i rdo rjes mtshan pas yongs su bskor ba'o/ /bdud rtsi dang bcas pa'i sa nag po dang ro bsregs pa'i thal ba dang / bong bu dang rnga mo la sogs pa'i spangs gang rnyed pas byugs te/ dri ngan pa'am dri med pa'i me tog sngon po'am dmar po dag dang 'bru'i phub ma la sogs pa gtor la/ 'bar ba 'khrug pa 'jigs su rung ba/ mi'i zhun la sogs pa'i mar me dang ldan par bya'o/ /las thams cad pa'i thab khung ni/las dang rjes su mthun pa'i sa gzhi la/ zhi ba'i thab khung dang mtshungs pa ste/ 'on kyang chur ge sar dang bcas pa'i ze'u 'bru dang kha khyer la pad+ma'i 'dab ma rnams so/ /de bas na rab tu rgyas pa'i pad+ma'i rnam pa phyi rol gyi phyogs dang phyogs bral du rdo rjes mtshan pa'am/ sna tshogs rdo rje'am/ ral gris mtshan pa'i kha khyer gyis bskor ba dbus su rdo rje phreng bas bskor ba'i 'dab ma la gnas pa'i 'dab ma'i tshad kyis de bzhin gshegs pa bzhi'i mtshan ma'i nang du rgya dang dpangs su sor brgyad dang sor gcig pa'i rang rang gi mtshan ma dang yang dag par ldan pa'o/ /mtshan ma yang rnam par snang mdzad kyi 'khor lo'am/de kho na nyid bsdus par gsungs pa'i rdo rje'o/ /rin chen 'byung ldan gyi rin po che'o/ /'od dpag tu med pa'i pad+ma'o/ /mi bskyod pa'i khro bo'i rdo rje'o/ /don yod grub pa'i ral gri 'am sna tshogs rdo rje'o/ /kha cig ni phyogs kyi rdo rje dang bral bar khor yug tu phyi rol rdo rje'i phreng bas kun nas bskor ba'i kha khyer te/thab kyi dbus su rdo rje'i phreng ba med do zhes zer ro/ /gzhan yang 'di la phyogs gzhan ni thab khung thams cad kyi dbus kyi cha rnams la pad+ma la gnas pa'i rang gi 'dod pa'i lha'i mtshan mas brgyan pa'o/ /de yang gtso bo'i mtshan ma ni srid dang dpangs su sor brgyad dang gcig gi tshad rnams te cig shos kyi ni sor drug pa'o//zhes so/ /'di dang sngar brjod pa'i phyogs la khyad par ma smos pa la kha khyer la gtso bo'i mtshan ma'i phreng ba'o/ /dkyil 'khor gyi khang pa la sogs pa'i shar gyi phyogs su zhi ba'i thab khung ngo / /lhor rgyas pa'i'o/ /nub tu dbang dang dbang gis dgug pa'i thab khung ngo //byang du mngon spyod kyi thab khung ngo / /drag pos dgug pa'i yang ngo / /phyogs gzhan yang dpal sam+bu Ta'i rgyud las/ shar gyi phyogs su zhi ba'o/ /de bzhin lhor ni mngon spyod dang / /nub tu dbang dang dgug pa dang / /byang du rgyas pa'i thab khung ngo / /zhes gsungs so//yang na las dang rjes su mthun pa'i thab tshon gyis bri bar bya'o/ /'di ni thab khung gi rab tu byed pa'o/ /pa la sha dang u dum+WA ra dang / a shwat+tha dang / kash+ma ri dang / a mra dang / ka dam+ba dang / sha mI dang / blak+Sha dang / pa Ta la sogs pa'i shing lo ma can gyi rtse mo'i cha las skyes pa'o/ / lo ma gnyis dang ldan pa/ rlan dang bcas pa/ mnyam par bcad pa sor bcu gnyis pa/ mthe'u chung tsam du sbom pa/ rtse mo gnyis sbrang rtsi dang 'o ma dang mar du bsnyugs pa bdud rtsi dang de'i chus bran pa rtse mo la lo ma zung dang bcas pa'i yam shing rnams srin lag dang mthe bong gis bzung ste rtse mo gcig sbyin sreg bya'o//ku sha'i dang a mra'i lo ma dang / dUr wa ste 'di rnams kyang rtse mo dang bcas pa gnyis sbyar bas so/ /rnying lci phra dang kyog pa dang / /ring thung lo ma med pa dang / /srog chags kyis zos brul ba dang / /shun bral chag dang bu ga can/ /rtse mo gnyis ldan sbom pa spang / /rnying pa yi ni 'chi bar 'gyur//kyog pas skal ba ngan par 'gyur/ /ring thung rig pas 'phral du nyams/ /lo ma med pas na tsha 'byung / /sbom pos phun sum tshogs pa nyams/ /skam pos gzhan yang mi 'dod par/ /shes bya bsreg bya gzhan bshad bya/ /'bru mar gyis byugs ku sha dang / /til zho 'o ma sA lu'i zan//dUr ba tsan+dan pri yang ku/ /thang chu dri zhim me tog dang / /'bras yos a mra'i 'dab ma rnams/ /rtse gnyis sbrang rtsi sogs su bsnyugs/ /ji ltar rnyed pas sbyin sreg bya/ /nang gi bdud rtsi zhi ba'i'o/ /kha cig tu ni phyi rol gyi bdud rtsi lnga'o zhes so/ /rgyas pa la yang mam shing ni de rnams nyid de dbus kyi cha la skyes pa chang pa'i tshad srid du khru gang ba bdud rtsi dang bcas pa'i dri ser po'i chus bran pa zho dang 'o ma dang mar du bskugs pa dang /mngar gsum dang 'dres pa'i zas mchog zho dang sbrang rtsi dang zhun mar dang ldan pa dang til nag po dang zho zan dang / zhun mar dang bcas pa'i sha ta puSh+pa dang /bil pa'i 'bras bu dang / 'bras sA lu dang / pad+ma dang / nA ga ge sar dang / kArni kA ra dang 'bru rnams so/ /zhir bshad skyon med yon tan can/ /so sor 'dab ldan pri yang ku/ /tsam pa ka dang pU nA ga /klu shing ge sar la bu tsa/ /ka sho ka rnams yam shing ste/ /de bzhin nags las byung ba dang //'bras bu me tog skyur ba dang / /dmar po yang na gzhan yang ni/ /rang gi rtog pa las gsungs pa/ /dbang gi las la shes par bya/ /de rnams nyid ni lcags kyu lta'i/ /tsher ma can rnams snga ma bzhin/ /dbang gis dgug pa la'o/ /mngon spyod la ni nim pa dang / /seng ldeng ku bi dA ra dang //b+hi lo Ta ka dang myos byed rnams sam/ /gzhan yang tsha ba dang tsher ma can dang / kha ba'i shing rnams sam/ /ro bsregs pa'i mgal dum de rtsa ba'i cha las byung ba/ bkas pa sor bcu pa'i rtse mo gnyis rno ba la dug dang khrag dang yungs kar gyis bskus pa'i yam shing rnams so/ /yungs kar dang tsha ba dang til mar dang khrag dang lan tshwa dang ske tshe dang nim pa'i lo ma dang /ro bsregs pa'i thal ba dang / rkang pa'i rdul dang / bong bu dang / rnga mo la sogs pa'i sbangs dang / skra dang khyim bya'i tshil dang / khwa ta la sogs pa'i gshog pa dang / bshang gci dang tsher ma dang rus phye dang glang po che'i sha la sogs pa las ci ltar rnyed pa'am/rdzas re re la dug dang lan tshwa dang khrag dang bsres pa'am rdzas de rnams kyis sam/ thal ba dang sol ba dang phub ma la sogs pa rnams la dgra'i gzugs byas la/ dug la sogs pas bskus te rkang pa g.yon pa'i mthe'u chung nas brtsams te mtshon rnon pos bcad cing sbyin sreg bya'o//drag po'i dgug pa la ni gzugs mi bya'o/ /las thams cad pa la ni pA la sha dang / u dum+WA ra dang / p+lak+Sha dang / seng ldeng dang / arka dang / n+ya gro d+ha dang / bai kaM ka ta dang / a mra dang / sha mi dang / kA sh+ma ri dang / a pa mArga dang / a shwat+tha las skyes pa mngon par gsar zhing mdzub gang ba drang po bdud rtsi dang bcas pa'i dri bzang gi chus byugs pa/las dang rjes su mthun pa'i snum la sogs pa rtse mo gnyis la byugs pa'i yam shing rnams so/ /las thams cad pa la zhi ba la sogs pa'i las la gsungs pa'i nas dang 'o ma la sogs pa rnams kyang bsreg par bya'o/ / zhi ba dang rgyas pa'i rdzas gang cung zad dang / gang yang bdag nyid kyi kha zas de thams cad dang / mar gyis byugs pa'i gu gul lam sA la'i thang chu yang nyin re bzhin zhi ba la sogs pa'i sngags tha dad pas sbyin sreg bya'o/ /dri dang me tog la sogs pa nye bar spyod pa rnams la yang las dang rjes su mthun pa'i rang rang gi sngags ji lta ba bzhin bzlas par bya'o//de ltar yang / arka seng ldeng bai kAM ka /a rdzun a pA marga sogs/ /zhir gsungs ka taM pa dor te/ /ci ltar drang dang cig shos 'dod/ /yam shing zhi bzhin yang dag gzhan/ /thun mong gi ni cho ga las/ /zhes gsungs so/ /rdzas kyi rab tu byed pa'o//bud shing ni zhi ba la mchod sbyin gyi shing rnams las/ srog chags med pa thab khung bas cung zad kyis thung ba'am 'brog dgon pa'i ba lang gi lci ba'o/ /rgyas pa la ni 'brog dgon pa'i ba lang gi lci ba ma gtogs pa'i ci snyed bshad pa bud shing 'bras bu dang bcas pa'o//dbang du bya ba'i bud shing ni nim pa dang shing skyur ba dang gzhan yang me tog dang bcas pa'o/ /dgug pa la ni tsher ma dang bcas pa'o/ /mngon spyod la ni tsha ba dang tsher ma can dang kha ba dang dri ngan pa dang dri ma med pa'i shing rnams dang / dur khrod kyi shing ngam bong bu 'am rnga mo la sogs pa'i sbangs dang shing shun skam pos so//las thams cad pa'i bud shing ni las dang rjes su mthun pas so/ /bud shing gi rab tu byed pa'o/ /dgang gzar ni gser ram zangs las byas pa 'am/ /mchod sbyin gyi shing las byas pa ste/ de'i yu ba ni skyes bu tshad dang ldan pa'i mthe bong gi sor nyi shu rtsa bzhi pa la rdo rje la sogs pa dang bcas pa'i khu tshur gyis gzung du rung ba'o//yu ba las steng du rgyar sor bzhi gru bzhi pa zabs su sor gnyis kyis dma' ba la rdo rje rtse lnga pa sor gnyis pas mtshan pa/ gru bzhi pa'i steng gi rgya la sor phyed la rdo rje'i phreng ba'o/ /gru bzhi pa'i steng du pad+ma'i 'dab ma'i dbyibs can sor bzhi pa zabs su mthe'u chung gi tshad la sor bzhi pa'i rdo rjes mtshan pa'o//yang na yu ba'i steng gi char pad+ma'i 'dab ma'i rnam pa srid du sor brgyad pa'i tshad dang ldan pa ji ltar mdzes pa la rgyar gru bzhi sor bzhi pa zabs su sor gnyis kyis dma' ba'i dbus su rdo rje sor bzhi pa rtse gsum pa'am/ rtse lnga pas mtshan pa'o/ /srid du bcud 'dzag pa'i bu ga mthe bong ngam/yang na mthe'u chung gi tshad de de'i steng du rdo rje rtse gsum pa sor bzhi pa'o/ /yu ba las 'og tu rin po che sor gsum pa dang / de'i 'og tu sor gsum pa'i rdo rje ni 'dod pa gnyis ka la ste/ blugs gzar gyi yu ba'i 'og tu'ang de bzhin no/ /blugs gzar kyang sngar smos pa'i rdzas sam shing las byas pa ste/dgang gzar gyi yu ba'i phyed kyis phra ba khru gang ba'i yu ba ste/ 'di'i kha pad+ma'i 'dab ma lta bu rgyar sor gnyis pa zabs su sor gcig pa dbus su rdo rje rtse lnga pas mtshan pa'o/ /yu ba'i 'og tu rdo rje dang rin po ches ci ltar mdzes par bya'o/ /dgang gzar blugs gzar med na sor mo lnga yang dag par sbyar bas kyang dgang blugs dbul zhing /sor mo gsum sbyar bas ni cig shos sreg blugs so/ de skad du yang / yang na sor lnga yang dag par/ /sbyar bas dgang blugs dran bya ste/ /de ltar sor mo gsum sbyar bas/ /gzhan de dgang gzar blugs gzar ro/ /zhes gsungs so/ / pi pa la'i lo mas kyang sreg blugs gnyis bya'o zhes gsungs so/ /blugs gzar med na cig shos kyi sreg blugs kyang dgang gzar gyis bya'o/ /dgang gzar blugs gzar gyi rab tu byed pa'o/ /de nas sgrub pa pos byams pa dang snying rje dang ldan pas khrus bya zhing lus dri zhim pos byugs la gos dkar po gon te/las dang rjes su mthun par 'dod pa'i lha'i rnal 'byor gyis srung ba'i cho ga dang bzlas pa bya zhing mi smra bar 'jam zhing shin tu bde ba'i stan la pad+ma'i 'dug stangs kyis 'dug la srod la kha shar du bltas la blos bsgrub bya la dmigs nas dkar po'i tshes gcig nas brtsams te zhi ba'i yid kyis zhi ba'i las bya'o//de bzhin du rgyan dang rjes su byug pa dang / phreng bser po dang mtho zhing bde ba'i stan la 'dug ste/ gos sna tshogs pa gon la/ bzang po'i 'dug stangs kyis 'dug la dga' ba'i yid kyis kha byang du bltas te nya nas brtsams nas snga dro rgyas pa bya'o/ /chags pa'i sems kyis rgyan dmar po la sogs pas bklubs la kha nub phyogs su blta zhing /mtho zhing bde ba'i stan la 'dug ste/ mtshan phyed dam gzhan du dbang gi las bya'o/ /dbang gi dgug pa la yang de bzhin te 'on kyang kha gyen du blta'o/ /lha mnyes par bya ba la yang kha nub tu phyogs par bya'o/ /khros shing rgyan dang gos sngon po'am khrag gam chus gsher ba'i gos gon te/stan srab pa la lho phyogs su bltas te 'dug pa 'am/ bsgrub bya'i gzugs brnyan gyi brang la gnas pa'am/ stan med par tsog pur gnas te rkang pas rkang pa mnan/ so yis so 'cha' zhing mig gdong tshugs su blta zhing khro gnyer can snying rje chen po dang ldan pas/dkon mchog gsum la gnod pa bzlog pa'i don du nag po'i nyin zhag yang rung ba'i nyin phyed dang mtshan phyed la khro bo'i skyil krung dang khro bo'i rnal 'byor gyis gang gi tshe bsgrub bya'i snying ga'i pad+ma'i nang na gnas pa'i bsrung ba de rang gi hUM yig las skyes pa'i rdo rje'i lcags kyus bcad de phyir bton nas rang nyid la bstim pa'am/rang gi shes rab kyi pad+mar rang gi rdo rje'i phur pas yang dag par btab nas/ bsgrub bya yang lha thams cad kyis spangs par bsams te/ de yang sdig pa las bzlog par 'dod pa'i brtse bas sangs rgyas kyi zhing yongs su dag pa'am/ gzhan yang phan pa dang bde ba la spro ba bzang po'i rigs su skye bar byas pa de'i tshe mngon par spyod pa bya'o/ de bzhin du/ drag pos dgug pa la yang ngo / /rengs dang rmongs dang dbang ldan lta/ /de bzhin rdo rje skyil krung ste/ bauShaT sngags kyi mthar ldan pas/ /thab khung gru bzhir byas pa la/ /ser dang dkar po'i rgyan gyis spras//rgyas mtshungs cho gas yang dag gnas/ /bskrad la de bzhin mer phyogs pas/ /rnga mo la sogs sbangs kyis byugs/ /dkar nag gis brgyan dug gis bri/ /bsreg pa'i rdzas ni 'di yin te/ /khwa ta la sogs gshog pa mchog /spel tshig dang ni yang dag ldan/ /'dir ni khwa ta'i gshog pa la sogs pa'i mthar che ge mo uts+tsha ta ya hUM phaT/ces pa'i sngags bris pa dang ldan pa'o/ /dbye ba de ltar bden bral du/ /phyogs te rkang pa bzlog pas 'dug /ser po nag pos rnam par brgyan/ /tsha ba'i til mar dug gis bri/ /thams cad phyogs dang phyogs bral gang du phyogs pa de'i thad ka'i phyogs dang phyogs bral gzhan rnams su gnas pas so//yang na don dam par phyogs rang rgyud pa ma yin pa'i phyir/ ji ltar rnam par gnas pa kho nas chen po yid kyi nga rgyal gyis ting nge 'dzin du zhugs pas de kho na ltar de dag thams cad bya'o/ /sgrub pa po'i rab tu byed pa'o/ /gser dngul rdo dang zangs dang shing //sa snod nya phyis dung dang ni/ /'dab ma'i skyor bu mchod yon dang / /bsang gtor zhal bsil zhabs bsil snod/ /der nas dang 'o ma dang me tog dkar po dang til dang ku sha dang 'bras yos dang ldan pa bdud rtsi dang bcas pa'i dri dkar po'i chu rnam par rgyal ba'i bum pa na gnas pa blugs la spos kyis bdug ste/rang gi lha'i sngags sam las thams cad pa'i sngags kyi mthar swA hA dang bcas pa zhi ba'i don lan brgyar bzlas par bya'o/ /rgyas pa la ni de bzhin du til dang bcas pa'i zho dang me tog ser po dang dri ser po la sogs pa'i chu la yi ge oM gyi mtha' can gyis so/ /dbang la ni dri dmar po la sogs pa'i chu la yi ge hoH'i mtha' can gyis so//de kho na bzhin du dgug pa la mthar yi ge dzaHzhes pas so/ mngon spyod la longs spyod pa'i rdza phor gyi dum bu la sogs pa'i snod du khrag dang bcas pa'i ko dra ba dang ba'i lci ba dang bcas pa'i chu dang dring ba dang / dri med pa'i me tog nag po la sogs pa dang ldan pa'i chu la mthar yi ge phaT ces pas so//de ltar drag pos dgug pa la yang ngo / /rgyas pa la sogs pa thams cad du las thams cad pa la dri dang / me tog dang til dang ku sha dang 'bras yos dang chu rnams las dang rjes su mthun pa ci ltar rnyed pa gzhug par bya'o/ /mchod yon gyi rab tu byed pa'o//zhi ba dang / rgyas pa dang / dbang gis dgug pa'i las rnams la bdud rtsi 'khyil pa'i sngags dang yi ge hUM bzlas pa'i chu snod dang / mchod yon la sogs pa'i snod gsum yang rang gi g.yon du'o/ /de dag gi mdun du bzed zhal gyi snod gsum yang many+ji la sogs pa'i steng du bkod la/de nyid bzlas pa'i chu lag pa g.yas pa na gnas pa'i ku sha'i rtse mos blangs pas yam shing dang bud shing la sogs pa'i sreg rdzas thams cad bsang zhing rang gi g.yas phyogs su dgod par bya'o/ /rang dang dgang gzar blugs gzar yang bsang bar bya'o/ /rnam par rgyal ba dang las thams cad pa'i bum pa la sogs pa lhag par gnas pa ni rdo rje phreng bar brjod pa'i chogs bya'o//cho ga bsdus pa la dga' ba ni bum pa med do zhes kha cig go/ gsad pa dang bskrad pa la sogs pa'i las dang drag po'i dgug pa la yang lag pa g.yon gyis bsang gtor bya'o/ /g.yas phyogs su las thams cad pa dang bsang gtor la sogs pa'i snod dang g.yon logs su rdzas thams cad gzhag par bya'o//dgod pa'i rab tu byed pa'o/ /zhi ba la ni shing 'o ma can dang gtsub shing las byung ba'i me dang / dgon pa'i me dang sbyin sreg gi me yang rung ngo / /rgyas pa la ni rgyal po'am/rgyal rigs kyi khyim nas byung ba dang / nags mes tshig pa dang / nor bu las byung ba dang / dge 'dun gyi tshong bong las blangs pa'i mes so/ /dbang la ni smad 'tshong ma dang / rje'u rigs kyi khang pa las byung ba'i mes so/ /dbang gi dgug pa la gar mkhan dang mgron pos bus pa'i mes so//drag po la mi'i rus pa bsregs pa dang rdo dang gdol pa la sogs pa'i khyim nas byung ba'i mes so/ /drag pos dgug pa la yang me de dag gzung ngo / /las thams cad la yang rang rang gi ci lta ba bzhin no/ /me'i rab tu byed pa'o/ /rdo rje phreng bar brjod pa'i cho gas rdo rje dang dril bu gsor ba dang dkrol ba byas la gtor ma phul te/bsrung ba dang ldan pa'i yi ge gsum gyis snod kyi nang du me bzhag la/ de nas bdud rtsi 'khyil pa'i sngags kyis zhun mar gyi mar me rab tu sbar nas de brjod pa'i ku sha'i rtse mos blangs pas lan gsum du g.yas su bskor ba dang / drag po'i las la g.yon du bskor bas bsang gtor byas la/thab tu gtsang zhing shin tu skam pa'i rtsa'i chun po dang bcas pa du ba med pa gzhug cing drag po la bzlog pas bcug nas/ oM dz+wa la dz+wa la hUM zhes pa 'di dang yi ge hUM gis kyang rlung g.yab kyi rlung gis me rab tu sbar nas rigs kyi snying po lan bdun bzlas pa'i blugs gzar gyi mar gyis kyang rab tu sbar bar bya'o//drag po la tshwa ba'i til mar gyis de gong du yang ngo / /de nas ku sha rnams oM badzra satwa AHzhes pa 'di brjod nas ku sha ljang gu gnyis gnyis rtse mo gshibs pa dri ma med pa ma gas pa ma grugs pa ha cang yang ring ba ma yin pa rnams dang por sgrub pa po'i g.yon gyi kha khyer la rtse mo shar du bstan pa dang /gshin rjer phyogs pa dang rtse mo nub tu blta ba dang / byang du phyogs pas dgram par bya'o/ /de nas thab khung du rtse mo shar du bstan pa'i ku sha ba lang gi rna ba lta bu ha cang mi ring bas g.yogs so/ /rgyas pa dang dbang du bya ba dang / mngon spyod kyi thab khung rnams su rim pa bzhin du rtse mo byang dang nub dang lhor bstan pa rnams te dang por g.yon gyi kha khyer la ku sha gnyis kyi rtse mo yang de ltar ro//'dir yang sgrub pa po gang du mngon du phyogs pa de la ltos nas shar la sogs pa'i tha snyad bya ste/ don dam par shar la sogs pa'i phyogs med pa'i phyir ro/ /de nas lha'i bdag nyid can gyis rang gi snying ga'i sa bon gyis thab bskyed nas me 'bar ba rig nas de'i dbus su bdag med par bsams te ra~M las byung ba'i me'i dkyil 'khor gru gsum pa la pad+ma dang nyi ma la gnas pa'i ra~M yig las byung ba'am skad cig gis rdzogs pa lto ba 'phyang ba sha rgyas pa sku bong thung ba zhal gsum pa zhal re re zhing yang spyan gsum pa phyag g.yas pa gnyis kyis mi 'jigs pa dang bgrang phreng bzung ba/g.yon pa gnyis kyis dbyug pa dang ril ba spyi blugs 'dzin pa/ phyag gtso bo gnyis kyis rang 'od kyi shes rab la 'khyud pa las dang rjes su mthun pa'i sku mdog dang gos dang rgyan dang ldan pa/ rnam par shes pa'i 'od zer gyi phreng ba dang rgyas 'debs kyi rigs kyi bdag po can sma ra dang smin ma ral pa'i tshogs dang ldan pa me'i dkyil 'khor la gnas pa'i sa bon gyi snying gar brgyan pa'i me lha rnam par bsgoms la/dam tshig sems dpa'i snying ga'i sa bon gyi 'od zer lcags kyus nam mkha' la dam tshig sems dpa' dang 'dra ba'i ye shes sems dpa'i me lha me mtshams nas byon pa drang srong gi tshogs kyis yongs su bskor ba rtsa ba'i zhal ni sku mdog dang mthun pa ste/de dkar po nyid yin na g.yas dang g.yon gyi zhal nag po dang dmar po dang / ser po dang dmar po/ ljang gu yin na sngon po dang dkar po ste sngon po la ni dkar po dang dmar por rnam par bltas nas g.yas pa'i mthe bong mi 'jigs pa bskyod pa dang /sngags 'dis spyan drang bar bya'o/ /oM tshur spyon tshur spyon 'byung bo che/ /lha yi drang srong bram ze mchog /sreg blugs zhal zas bzhes slad du/ /'dir ni yang dag bsnyen par mdzod/ /ces pa dang / oM Ag+na ye/ A dI bya/ A dI bya A bi sha A bi sha ma hA shrI ye ha byA ka byA bA hA nA ya swA hA/ zhes pa'i sngags 'dis spyan drangs la de dang lhan cig lhags pa'i bgegs thams cad gshin rje gshed la sogs pas bskrad nas/ de rnams kyis dzaHhUM baM hoHzhes pa'i sngags brjod pas go rims bzhin du dgug pa dang gzhug pa dang bcing ba dang dgyes par bya'o//oM ag+na ye/ A dI bya/ A dI bya/ A bi sha A bi sha /ma hA shrI ye ha byA ka byA bA ha nA ya ar+g+haM pra tIts+tsha hUM swA hA/ zhes pa'i sngags sam/ oM AHhUM ar+g+haM pra tIts+tsha hUM/ zhes pa 'dis sam/ oM a hrIHpra ba ra sat+ka ra ar+g+haM pra tIts+tsha hUM swA hA/ zhes bya bas mchod yon dbul lo//ar+g+haM zhes pa'i gnas su pA d+yaM dang / Any+tsa ma naM dang a bu khya naM zhes pa bcug nas/ zhabs bsil dang / zhal bsil dang bsang gtor dbul lo/ /las dang rjes su mthun pa'i me tog la sogs pa dang / gsang ba'i mchod pa la sogs pa rnams kyis kyang mchod par bya'o/ /ji ltar rigs par yang /ku sha'i chun pos snod dang por/ /las kun byed las chu yis ni/ /bsang gtor lan gsum dbul bar bya/ /de nyid du ni zhal bsil te/ /mdzub mos me tog blangs nas ni/ /khu tshur 'og tu kha bstan nas/ /mthe'u chung srin lag gung mo dang / /mdzub mo rim gyis dgrol zhing dbul//gnyis pa'i dung gi chu yis ni/ /mchod yon bzed zhal gnyis pa ru/ /rdo rje'i snyim pa kha phye bas/ /dbul zhing zhabs bsil gsum par ni/ /khu tshur bcas nas mthe ba mdzub kyi/ /skam pas me tog blangs nas su/ /sangs rgyas rnams kyi spyan sngar ni/ /lan gsum bskor ba'i sor mo ni//mdzub mo gung mo ming med dang / /mthe'u chung rim gyis dkrol bas so/ /zhes bya ba'i gdams pa khyad par kho bo'i bla ma rnams kyis gsungs so/ /phyogs gzhan ni dpal saspu Ta'i rgyud las/ sngon du mchod yon gyi snod ces gsungs pa'i dgongs pa'o/ /mdor bsdus pa'i rim pa'o//rgyas par ni oM AHdzaHhUM zhes pa 'dis bkug nas thab khung gi me'i phyogs kyi logs na ku sha'i chun po la 'dug pa la/ mchod yon la sogs pa phul te/ de nyid gsum gyis spel ba'i dzaHhUM baM hoHzhes bya ba'i rim gyis rdo rje dang bcas pa'i rdo rje dril bus 'khyud pa'i tshul dang ldan pa'i phyag gnyis kyis se gol gtogs pa sngon du 'gro bas dam tshig sems dpa' la rab tu bcug la bcing ba dang dbang du byas nas yang mchod yon la sogs pa thams cad bya'o//de nas oM badzra a na la ma hA b+hU ta dz+wa la dz+wa la ya sarba b+ha sma'i ku ru sarba duSh+TAn hUM phaT dr-i sh+ya dzaHhUM baM hoHsa ma ya s+t+waM sa ma ya haM zhes lan gsum du dam tshig bsgrag par bya'o//de'i rjes la lag pa g.yon pa gan rkyal du byas la byang chub mchog gi khu tshur gyis mar gyis gang ba'i dgang gzar bzung nas lag pa g.yas pa ni kha sbub pas blugs gzar gan rkyal du byas pa mar gyis gang ba dang / de bzhin du drag po'i las la ni dug dang bcas pa'i tsha ba'i mar nag gis gang ba'i dgang gzar g.yas kyis bzung zhing g.yon pas blugs gzar yang ste dgang gzar blugs gzar gyi kha la rang gi lha'i sa bon/yi ge gsum gyis spel ba'i 'od zer dang bcas pa dang / me lha'i zhal du ra~M rnam par bkod la dgang gzar gyi khar blugs gzar gyi kha bzhag ste lag pa gnyis pus mo'i nang du dang /drag po la phyir bya ste/ zhi ba dang rgyas pa dang / dbang gis dgug pa'i las rnams la swA hA dang oM dang hoHdang dzaHdang drag po la hUM hUM ngam phaT ces pa sngags kyi mthar brjod cing zhal cung zad gdangs pa dang / drag po dang drag po'i dgug pa la ni zhal shin tu gdangs par dgang gzar g.yas skor dang /drag po la g.yon skor byas te yon bdag gi nus pa ji lta bas dgang blugs lan gsum mam lan bdun dbul bar bya ste/ oM Ag+na ye/ A dI bya/ a bi sha a bi sha ma hA shrI ye ha bya ka bya ba ha nA ya swA hA/ zhes pa me lha'i sngags sam/ oM na maHsa man+ta bud+d+hA nAM ag+na ye swA hA/ zhes bya bas dgang blugs kyi sngags kyis dang /oM ag+na ye swA hA/ zhes pa cig shos kyi mar gyi sreg blugs kyi sngags kyis so/ /de nas me la bgegs dang bral ba dang bgegs dang ldan par rtags kyis mtshon par bya ste/ rab sngags dge ba mi yi 'od/ /dpal gyi be'u dang rnga yab gdugs/ /rgyal mtshan pad+ma bum lta bu//rtse gsum ral gri nya lta bu/ /bkra shis in+d+ra nI la dang / /rdo rje dung la sogs pa dang / /dgang gzar blugs gzar rnam pa dang / /dkar dang 'jam 'dra mdog sdug dang / /g.yas su 'khyil dang shin tu snum/ /byi ru dang ni gser mdog 'dra/ /lug ru dngul dang bai DUr+ya/ /nyi 'od 'bar mtshungs dri ma med//du ba med cing dri zhim pa/ /pi wang rdza rnga'i sgra ldan mchog /zhi bar kha dog dkar por snang / /rgyas pa la ni gser dang mtshungs/ /dbang la dmar po rtse mo mchog /mngon spyod la ni sngo nag go/ /zhi ba'i las la sogs pa la/ /gser 'dra rtse gcig dam pa ste/ /rtse gnyis 'bar ba 'bring du bstan//rtse gsum sprin 'dra shin tu dman/ /du ba che ba mi dge ste/ /'bar dka' me lce chad pa dang / /rtsub nag pA la sha yi mdog /gsal zhing ba lang mgo lta bu/ /me stag 'phro dang drag po'i sgra/ /ro yi dri nga mi dge ba/ /drag po'i las la shis pa ni/ /de ltar mi dge ba'i ltas bgegs dang bcas pa nyid ni me la bsang gtor dang /srung ba las thams cad pa'i sngags kyis mar gyi sreg blugs lan bdun byas la/ de nas slar yang me lha'i sngags sam/ las thams cad pa'i sngags kyis bsang gtor byas nas dgang blugs gsum mam bdun nam len gcig gam ci 'byor pa me lha'i sngags kyis bsregs te blugs gzar la sogs pa rnams kyis mar gyis sreg blugs gsum mam bdun nam gcig ci ltar rnyed pa bsreg par bya'o//de ltar yang / blugs gzar gyis ni mar bsreg cing / /'bru rnams de nyid kyis dbul bya/ /zhes gsungs so/ dang po yam shing la sogs pa sbyang bar bya ste/ de la oM AHswA hA/ yam shing sbyang ba'i sngags so/ /oM shrIHswA hA/ zhun mar sbyang ba'i sngags so/ /oM AswA hA/ rdzas bkru ba'i sngags so/ /oM dzi swA hA/ 'bru dag par bya ba'i sngags so/ /oM ku ru ku ru swA hA/ rdzas gzhan rnams sbyang ba'i sngags so//'dir ni go rims yam shing dag /bsregs na yam shing me la mar/ /til dang dUr ba 'bras zho zan/ /ku sha la sogs bsreg par bya/ /'chad par 'gyur ba'i rang rang gi sngags kyis yam shing dang / dUr ba dang ku sha mthe bong dang ming med kyis blangs nas so/ /thams cad du khu ba'i rdzas rnams ni zhal du'o//yam shing dang ni mi rus kyi phye ma la sogs ni 'od kyi dkyil 'khor la'o/ /zho zan dang bza' ba dang / zhal bsil dang / til la sogs pa ni phyag tu'o/ /dri ni thugs kar ro/ /me tog ni dbu la'o/ /bdug spos ni 'bar ba la'o/ /zhabs bsil ni zhabs dag la'o//mar me dang mchod yon mdun du dbul bar bya'o/ /mchod yon gyi chu snod du yang dbul bar bya'o/ /kha cig ni/ kun du lus la bsang gtor dang / /mdun du spos kyis bdug pa dang / /zhal bsil zhal du lan gsum ste/ /mchod yon dbul dbul bar bya/ /zhes zer ro/ / de'i rjes su zhal bsil dang bsang gtor byas la/ me lha thab tu 'bar ba'i rnam pas sam/ rang gi gzugs kyis me'i phyogs su gzhag par bya'o/ /de nas yi ge hUM dang bdud rtsi 'khyil pa'i sngags kyis kyang sngar bzhin du cho ga ji lta bar yo byad la yang bsang gtor byas nas/ zhi ba la rigs kyi bdag po dkar po dang shin tu zhi ba pad+ma dkar po dang zla ba la gnas pa rnam pa thams cad du gos dang rgyan dang 'od dkar po dang ldan pa 'khor lo can snyoms par 'jug pa'am/gcig pu'i gzugs can 'od zer spros pa las sprul pa'i spyan ma la sogs pa'i lhas zla ba shel gyi bum pa byang chub sems kyi bdud rtsis gang ba/phyag gis bzung ba'i rgyun rnams kyis bsgrub bya la dbang bskur bas de'i rims la sogs pa ma lus par sel bar mdzad pa'o/ /rgyas pa la ni ser po shin tu rgyas pa gos dang rgyan ser po dang gdan ser po dang / shin tu dgyes shing rangs pa ste/ sngar bzhin du gser gyi bum pa las 'bab pa'i bdud rtsi'am rat+na'i char pa rnams kyis bsgrub bya'i lus sam/khang pa yang dag par gang bar byas te rid pa la sogs pa 'am dbul ba 'jig par byed pa'o/ /dbang la ni stan dmar po la sogs pa dang ldan pa sngar bzhin du ut+pal dmar po kha bye ba lta bu'i mdas snying phug nas dbang du sdud par byed pa'o//dbang gis dgug pa la zhags pa dang lcags kyu dag gis bcings shing phug nas 'gugs pa'o/ /mngon spyod la gdan nag po la sogs pa dang ldan pa khros pa bsgrub bya'i steng du rdo rje me'i char phab nas bsgrub bya thal bar byed pa'o/ /drag pos dgug pa la yang de ltar bsam par bya'o//de bzhin du las thams cad pa nyid rang gi lhag pa'i lha nyid las dang rjes su mthun pa'i rnal 'byor dang ldan pa'am/ yang na thab khung du bkod pa'i lha'i rnal 'byor dang ldan pa'o/ /khyad par du zhi ba la bcom ldan 'das rnam par snang mdzad dang / rgyas pa la rin chen 'byung ldan dang /dbang dang dbang gis dgug pa la 'od dpag med dang / bsad pa dang / yams dang nye bar 'tshe ba bsal ba la don yod grub pa dang / yang na rnam par snang mdzad dang / mngon spyod la ni mi bskyod pa 'am gshin rje mthar byed la sogs pa'i khro bo rnams kyi rnal 'byor dang ldan pas so//zhi ba la sgrub thabs dang mngon par rtogs pas ji ltar gsungs pa'i rim pas dam tshig sems dpa' bskyed pa dang ye shes sems dpa' spyan drang ba la sogs pa'i cho ga dang dbang bskur ba'i mthar thug pa byas la/ dri bzang po dang me tog dkar po la sogs pa de'i sngags dang rang gi lha'i sngags kyis mngon par bsngags pa rnams kyis mchod par bya'o//de bzhin du rgyas pa la yang ste khyad par de dag nyid ser pos so/ /dbang dang dbang gis dgug pa la yang dmar po rnams kyis so/ /drag po la ni dri med pa dang / dri ngan pa dang / bil pa dang / arga dang dza ba la sogs pa'i me tog rnams dang / spos dkar la sogs pa'i spos dag dang / mi dang nya la sogs pa'i zhag gi mar me rnams dang / kha ba dang tsha ba la sogs pa'i yid du mi 'ong ba'i zas rnams kyis so/ /zhes pa khyad par ro/ /de nas oM AHhrIHpra bar sat+kA raM ar+g+haM pra tIts+tsha hUM swA hA/zhes pa'i sngags kyis sngar bzhin du mchod yon dang zhabs bsil dang bsang gtor byas nas/ yang dag par mchod pa las dang rjes su mthun pa'i mdog can gyi ljags rdo rje'i rnam pa la rang gi lha'i sa bon du bkod de rang gi sngags kyis dgang blugs gong bzhin du phul la/mar la sogs pa rdzas rnams re re'i sreg blugs gsum mam bdun nam nyer gcig bsregs te bdud rtsi dang bcas pa mar gyi sreg blugs ci ltar snyed pa bsreg par bya'o/ /dkyil 'khor bri ba la sogs pa'i las la dkyil 'khor gyi gtso bo'am/ rab tu gnas par bya ba'am bsgrub bya'i lha rnams sam/zhi ba la sogs pa'i las kyi dbang du byas pa'i lha rnams sam/ rang gi 'dod pa'i lha rnams thab khung du go rims ji lta ba bzhin du bkod la/ bdag nyid kyang rang gi lhag pa'i lha'i rnal 'byor dang ldan pa'am yang na thab khung du bzhugs pa'i lha'i rnal 'byor dang ldan par bya'o//de nas zhi ba la rang sngags kyi mthar che ge mo'i shIn+taM ku ru swA hA/ zhes pa dang / rgyas pa la puSh+TiM ku ru oM dang / dbang la pa shaM ku ru hoHdang / dgug pa la a kriSh+Ti ku ru dzaHzhes pa dang / drag po dang drag pos dgus pa la yang mA ra ya phaT ste yang na hUM hUM dang / de bzhin du dgug par gyis shig bskrad par mdzod cig /ces pa la sogs pa'i tshig dregs pa dang bcas shing nga ro chen po dang bcas pa rang gi sngags la rang gang 'dod pa'i ming spel bcug pa'am yang na ma bcug par rang bzhin gyis zhi ba la sogs pa'i bsam pas lhag par mos par bzlas shing sreg rdzas rnams brgya'am stong ngam dpag tu med pa bsreg par bya'o//yang na thab khung gi dbus su rang bzhin gyis gnas pa'i de bzhin nyid kyi ye shes kyi rang bzhin gyi me lha'i thugs ka kho nar rang gis bon las byung ba'i rang gi 'dod pa'i lha'i bdag nyid dam dkyil 'khor gyi 'khor lo'am/yang na sngar brjod pa'i dkyil 'khor gyi gtso bo la sogs pa'i lha bsgoms te/ ye shes kyi dkyil 'khor spyan drangs nas gzhug pa la sogs byas la de'i zhal du sreg blugs bya'o/ /phyogs 'di la gsungs pa ni sdom pa 'byung bar/ me ni nges par lha yi zhal/ /sbyin sreg dngos grub rab tu ster//zhes gsungs so/ /de nas me lha la sogs pa'i sreg blugs kyi sngags ni/ oM sarba pA paM da ha na badzrA ya sarba pA paM da ha da ha swA hA/ zhi ba'i don du til rnams kyi'o/ /oM badzra A yu She swA hA/ tshe ring ba'i don du dUr ba rnams kyi'o/ /oM badzra puSh+Ta ye swA hA/ rgyas par bya ba'i phyir ma btsos shing ma grugs pa'i 'bras rnams kyi'o/ /oM sarba saM pa de swA hA/ phun sum tshogs pa'i don du zho zan dang 'bras mchog gi'o/ /oM a pra ti ha ta badzra ya swA hA/ bsrung ba'i don du til mar gyis byugs pa'i ku sha rnams kyi'o/ /oM badzra bI dzA ya swA hA/ so ba dri ma med pa'i'o/ /oM ma hA bi d+yA swA hA/ nas kyi'o/ /oM ma hA ba lA ya swA hA/ sran ma sha'i'o/ /oM badzra g+ha sma rI swA hA/ gro'i'o/ /oM badzra ya dz+nyA ya swA hA/ u dum+WA ra'i'o/ /oM bo ti prik+ShA ya swA hA/ a shwat+tha'i 'o/ /oM badzra la tA yai swA hA/ p+lak+Sha'i'o/ /oM badzra ku be+e rA ya swA hA/ n+ya gro d+ha'i'o/ /oM sa hA kA rA ya swA hA/ a mra'i'o/ /oM badzra arkA ya swA hA/ arga'i yal ga'i'o/ /oM badzra brasma Ne swA hA/ pA la sha'i'o/ /oM badzra gA trA ya swA hA/ seng lding gi'o/ /oM badzra shrA ba ya swA hA/ bai kaM ka'i'o/ /oM badzra shrI bA ya swA hA/ shing sha ma'i'o/ /oM sarba ta b+ha trA ya swA hA/g+haM b+ha ri'i'o/ /oM badzra shi kha rA ya swA hA/ a pA marga'i'o/ /yang na so ba la sogs pa rnams ni tshim par bya ba'i lha'i sngags kyis so/ /rdzas lhag ma rnams ni tshim par bya ba'i lha'i sngags kho na sa bsreg par bya'o/ /bsreg bya'i rdzas thams cad bshad pa la sogs pa bdud rtsi lngas bran cing bdud rtsi'i dngos por bsgoms pas sreg blugs bya'o/zhes man ngag rig cing mang du mkhyen pa rnams gsung ngo / /de ltar rang dang gzhan gyis rtog pa'i cho gas ji ltar rnyed pas sbyin sreg bya ste/ rang gi rigs kyi snying po lan gsum mam lan bdun nam nyer gcig tu mar gyi sreg blugs rnams dbul bar bya'o//de'i mthar dgang blugs phul nas/ rigs kyi bdag po'i snying po brjod pas mchod yon dbul bar bya'o/ /de nas bsang gtor dang zhabs bsil dang gos gsar pa dang rdo thal med pa'i so rtsi dang drag po'i las la rdo thal dang bcas pa phul la sngar bzhin mchod nas yang dag par bstod de/phyag byas nas mchod yon phul nas me tog dang bcas pa'i thal mo snying gar sbyar la ma tshang ba la sogs pa'i nyes pa zhi bar bya ba'i phyir bcom ldan 'das la bzod par gsol te/ gang yang bdag blo rmongs pa yis//nyes byas cung zad gang bgyis pa/ /gang phyir lus can skyabs yin phyir/ /mgon khyed de kun bzod par mdzod/ /ma rnyed yongs su ma shes dang / /gang yang nus pa ma mchis pas/ /'dir ni bya ba gang bgyis pa/ /de kun gtso bos bzod mdzad rigs/ /zhes brjod cing bzod par gsol nas//mngon par 'dod pa'i dngos grub kyi phyir gsol ba btab ste/ lhag pa dang chad pa'i nyes pa zhi bar bya ba'i phyir thar pa'i sems kyis oM badzra satwa aHzhes lan mang du brjod nas yi ge brgya pa bklag par bya ste/ oM badzra sa twas ma ya/ ma nu pA la ya/ badzra satwa twe no pa tiSh+Tha dr-i D+ho me b+ha ba/su toSh+yo me b+ha ba/ a nu rak+to me b+ha ba/ su poSh+yo me b+ha ba/ sarba sid+d+hi m+me pra yats+tsha/ sarba karma su tsa mi tsit+taM shri ya/ ku ru hUM/ ha ha ha ha hoH/ b+ha ga bA na/ sarba ta thA ga ta badzra mA me muny+tsa badzI b+ha ba ma hA sa ma ya satwa AH de nas rjes la/ oM khyed kyis sems can don kun mdzod//rjes su mthun pa'i dngos grub stsol/ /sangs rgyas yul du gshegs nas kyang / /slar yang 'byon par mdzad du gsol/ /zhes bya bas yang dag par bskul nas rang gi sngags yi ge gsum gyi nang du byas pa'i mthar yi ge muHzhes pa brjod cing rang gi bdag po'i mgon po yid kyis cho ga bzhin du gshegs su gsol bar bya'o//de nas me lha thab khung du spyan drangs te/ slar yang dag par mchod nas bsang gtor dang zhabs bsil dang rdo thal med pa'i so rtsi dang / drag po la rdo thal dang bcas pa'i so rtsi dang gos gsar pa phul la sreg rdzas lhag ma sbyin sreg byas nas mthar dril bu dkrol zhing bstod par bya'o//cho ga 'di ni phal che bar rang gi mngon par 'dod pa'i dngos grub kyi ched du'o/ /rab tu gnas pa la sogs gzhan don 'dod pas/ yon phul ba'i slob ma'i mthe bong g.yas pa g.yon pa'i mthe'u chung gis bzung ste/thab khung du lan gsum du g.yas su bskor ba byas la blugs gzar gyi mgo la g.yas skor gyis 'jug pas lan bdun du sreg blugs kyang dbul du gzhug par bya'o/ /'khyil pas bsngags pa'i srung skud dkar po de'i lag pa la bcings la bsang gtor bya'o/ /bdag por gyur na rgyal po la sogs pa'i dge bar dmigs la dgang blugs dbul lo//de ltar yang rgyal po dang 'jig rten skyong ba rnams dang sems can thams cad dang slob ma rnams dang / gang la mngon par 'dod pa rnams kyi yang re re zhing lan gsum mam re re cho ga sreg blugs dbul bar bya'o//yon yang dbul du gzhug go/ /zhes gsungs so/ /'di ni khyad par ro/ /de'i rjes su zhal bsil phul la bsang gtor byas te yang dag par mchod nas mchod yon phul te bzod par gsol la mngon par 'dod pa'i dngos grub zhus nas oM badzra satwa aHzhes brjod de sngar bzhin gshegs pa'i ched du yang dag par bskul la/oM badzra muHzhes brjod cing cho ga bzhin gshegs su gsol lo/ /gang gi tshe de ltar 'jig rten pa'i lha rnams thab khung du dgod par 'dod na yang / de'i tshe dam tshig sems dpa' bskyed pa dang / ye shes sems dpa' dgug pa dang dam tshig la rab tu gnas par bya ba dang mchod pa dang sbyin sreg la sogs pa me lha'i bzhin du sbyor ba ji lta bar rjes su bsgrub cing /phyis kyang me lha bzhin du gshegs su gsol lo/ /de ltar nyin re bzhin nam bshad pa'i dus sam thun gsum mam thun bzhir bya'o/ /de nas 'o ma dang 'bras ma chag pa dang /mar dang sbrang rtsi dang ka ra rnams rang gi 'dod pas rjes su mthun pa'i dris byugs la mgul par me tog phreng bas bcings pas snod nag po ma yin pa man+ji'i steng du bzhag pa'i nang du dgang gzar ram blugs gzar gyis blugs te/ rdo rje phreng bar bshad pa'i cho gas bdud rtsi'i rang bzhin gyi'o thug thab khung gi me la bsgrub par byas nas rang nyid ci lta ba bzhin du rnal 'byor la snyoms par zhugs te/de bzhin gshegs pa'i lhag ma 'di/ /sdig pa rnam par nyams phyir gsol/ /zhes pas lha dang 'jig rten skyong ba dang rang yang tshim par bya'o//lhag ma ni sbyin bdag dang lhag ma don du gnyer ba rnams la bgo bsha' bya'o/ /zhi ba la ni 'o mas me/ /gzhil bya rgyas pa bsgrub pa la/ /ser po'i chab kyis dbang dag la/ /'o mar dmar dang nag pos so/ /de nas sbyin sreg gi thab kyi thal ba dang sol ba rnams las thams cad pa'i bum par blugs la chu bo la sogs pa'i chu la bskur bar bya'o//zhes pa lha tshim par byed pa'i rab tu byed pa'o/ /'di ni phyi rol gyi sbyin sreg gi cho ga'o/ /'di rnams thams cad lhag chad med pa'i sems kho nas bya ste nges par mngon par 'dod pa 'grub par 'gyur ro/ /'di ni yid kyi sbyin sreg gi khyad par cig go//rnam pa gzhan ni ci lta ba bzhin rang gi 'dod pa'i lha'i rnal 'byor dang ldan pas bris pa'i dkyil 'khor gyi gtso bo las dang rjes su mthun pa'i gdan la sogs pa dang ldan pa ji skad bshad pa'i me la gnas pa'i ngo bo mdun gyi nam mkhar gnas pa'i dkyil 'khor gyi dbus su gnas par byas la/ rang gi logs su rin po che sna bdun gyi rang bzhin gyi snod sbrang dang zhun mar gyis gang ba nas rin chen sna bdun gyi rang bzhin gyi dgang gzar dang blugs gzar gyis dgang blugs dbul bas yid kyi sbyin sreg byas pa yang de bzhin du rang gi 'dod pa'i lha'i 'khor lo yang bsgoms nas dgug pa la sogs pa'i cho ga yin gyis rjes su bsgrub par bya ste/sbyin sreg gis tshim par bya'o/ /sbyin sreg gi cho ga 'di ni bla na med pa ste bla na med pa'i yid mngon par 'du byed pa'i rgyu yin pa'i phyir dang / phyi rol gyi cho ga la yang don de nyid yin pa'i phyir dang / sangs rgyas dang rig pa 'dzin pa la sogs pa'i dngos grub kyang sna tshogs pa sgyu ma lta bu'i 'od gsal ba rnam par dag pa'i mtshan nyid yin pa'i phyir ro//zhes yid kyi sbyin sreg gi cho ga'o/ /rang gi 'dod pa'i lha'i rnal 'byor dang ldan pas de'i ngo bo'am rdo rje sems dpa'i rang bzhin rim pa ci lta bar rang bzhin gyis rnam par dag pa'am rnam par snang mdzad la sogs pa'i rang bzhin gzugs la sogs pa'i 'dod pa'i yon tan rnams ci ltar rnyed pa la the tshom med par nye bar longs spyad par bya'o//bza' ba'i dus su ni rang gi zas thams cad mnyam pa nyid kyis rnam par dag pas bdud rtsir byas nas lte ba'i thab khung gi mes 'khyud pa'i snying gar son pa'i rang gi lhag pa'i lha'i 'khor lo la lag pa'i dgang gzar la sogs pa cho ga bzhin du yang dag par tshim par bya'o//zhes pas phyi rol gyi rdzas kyis nang gi sbyin sreg go/ /phyi rol gyi rdzas la ma ltos pa'i nang gi sbyin sreg mchog tu dga' ba phun sum tshogs pa'i rgyu ni dpal kha sbyor gyi rgyud kyi 'grel par kho bos gsal bar byas pas der shes par bya'o//khams gsum pa stong pa nyid dang snying rje gnyis su med pa'i 'khor lo'i rnam pa'i ye shes kyi me la gdams pa ci lta bar phung po la sogs pa'i bud shing bsregs pa ni bla na med pa'i sbyin sreg go/ /'di ni lha thams cad kyi cho ga thams cad spros te bshad pa'o/ /gang yang rnal 'byor dang rnal 'byor ma'i rgyud kha cig tu cho ga'i dbye ba cung zad tha dad pa bstan pa de yang 'di dag gi rjes su 'brangs nas ji ltar rigs par bya'o//'dir bsdu ba ni 'di yin te/ /lha yi bdag nyid kyis mchod cing / /gtor ma sa sbyangs thab khung bya/ /zhi rgyas dbang dang mngon spyod la/ /dkyil 'khor gyi ni shar dang lho//nub dang byang du thab khung rnams/ /shar byang nub lhor kha bltas pa'i/ /slob dpon g.yon du chu dang ni/ /mchod yon la sogs snod rnams dgod/ /g.yas su yam shing mar la sogs/ /sreg rdzas rnams te me sbar nas/ /thab tu ku sha dgram shing g.yogs//bud shing mar gyis rab sbar te/ /me dang de yi ye shes sku/ /gcig byas mchod yon sogs kyis mchod/ /dgang gzar blugs gzar kha la 'thon/ /mar gyi dgang blugs kyis tshim bya/ /yon bdag nus pa'i rjes mthun pas/ /g.yas su bskor ba'i sbyor bas so//de nas mar sogs kyis kyang gzhan/ /sreg blugs blugs gzar gyis kyang dbul/ /zhabs bsil zhal bsil bsang gtor chu/ /mchod yon zhabs phyag sku dang mdun/ /khu ba zhal du yam shing 'od/ /bza' ba la sogs phyag tu dbul/ /me tog dbu la bdug spos dang //mar me mdun du dri chab thugs/ /me lha dang ni lhag pa'i lha/ /de dag tshim pa la sogs bya/ /mar dang til dang dUr ba'i rtse/ /'bras dang bza' ba'o thug dang / /ku sha so ba nas dang ni/ /ma shA gro dang u dum bAr/ /pi pal p+lak+Sha n+ya gro d+ha/ /a mra arga tshangs shing dang //seng ldeng pai kAM ka sha mI/ /g+haM bi ra a pA marga/ /rim bzhin bsregs nas gos stsogs dang / /klog dang dril bu dkrol zhing bstod/ /bzod gsol lha dang me lha la/ /dngos grub blangs nas gshegs su gsol/ /zhi ba sogs la dge ba ni/ /bzlog pa dag las mi dge ba//ji ltar rigs par yid dang lus/ /bklag dang las la yang dag brtsams/ /yang na thams cad yid kyis so/ /nang du snying rje'i bdag nyid dang / /stong nyid ye shes me la ni/ /'gro ba sbyin sreg rgyal ba mchod/ /ces pa'o/ /shes rab 'od zer 'bar bas yod med 'dzin pa'i rlabs kyis sreg rdzas zad byed pa//rab tu 'char ba'i pad+ma kha bye dgod pa phun sum tshogs pa'i tshul/ /gang gi de nyid de ltar legs par brjod pa'i dge ba'i bdud rtsi dbang bstan nas/ /'gro bas rdo rje 'chang gi sku yi phun sum tshogs pa rab tu thob gyur cig / ces pa sbyin sreg gi cho ga 'od kyi snye ma zhes bya ba/ rje btsun ma rdo rje rnal 'byor mas byin gyis brlabs pa'i paN+Di ta chen po a b+ha yA ka ra gup+ta'i zhal snga nas mdzad pa rdzogs so// //rgya gar gyi mkhan po paN+Di ta chen po thams cad mkhyen pa'i dpal bzang pos bod yul gyi dbus drang srong srin bu rir rang 'gyur du mdzad pa la/slad kyi paN+Di ta chen po rig pa'i gnas rnams thugs su chud pa'i mkhas pa dag dang / grub pa brnyes pa'i skyes bu chen po rnams kyi gsung gi bdud rtsi'i rgyun gyis thugs gtams shing de kho na nyid la gzhol ba'i slob dpon nyi ma'i dbang po'i 'od zer dang /chag lo tsA ba dge slong chos rje dpal gyis legs par bsgyur cing gtan la phab pa/ dus phyis shong lo tsA ba dge slong blo brtan gyis legs par bcos shing dag par byas so/ /tshigs su bcad pa nyis brgya bdun cu rtsa lnga pa'o// //