316a5 /[ ]@##/ /rgya gar skad du/ sA d+ha naM sarba karma nA ma/ bod skad du/ sgrub thabs thams cad kyi las ka zhes bya ba/ dkon mchog gsum la phyag 'tshal lo/ /dus gsum mgon po 'gro don mdzad/ /ston pa de la gus btud
316a6 de//sgrub pos nang dang nub sogs su/ /tshogs chen dag ni bsags pa dang / /sgrub thabs kun na mi gsal ba'i/ /bdun po rnam dag gsal bar bstan/ /bde gshegs mtha' dag mkha' la dmigs/ /dus gsum gyi ni bla ma dang / /phyogs rnams kun gyi
316a7 bde gshegs dang //phyag 'os kun la phyag 'tshal bstod/ /mi mjed 'jig rten 'di 'am ni/ /'jig rten khams ni thams cad na/ /mchod pa bla na yod pa dang / /mchod pa bla na med pa yis/ /de dag la ni mchod par bgyi/ /'khor ba thog ma med pa nas/ /
316b1 nyon mongs srad bus bcings gyur pas/ /mi shes dbang gis bgyis pa yi/ /lci dang yang ba'i sdig bsags pa/ /mgon po'i tshogs la so sor bshags/ /'das dus sangs rgyas ji snyed dang / /da ltar phyogs bcu'i zhing na bzhugs/ /de bzhin gang dag ma
316b2 byon dang //dus gsum sangs rgyas de dag gis/ /zab cing rgya che'i chos bstan gsol/ /dus gsum sangs rgyas de dag gis/ /'khor bar 'khyams pa'i sems can rnams/ /thugs rje'i dbang gis gzigs mdzod la/ /mya ngan mi 'da' bzhugs
316b3 su gsol//dus gsum sangs rgyas dge ba dang / /byang chub sems dpa'i dge ba dang / /nyan thos rang rgyal dge ba dang / /'jig rten dge ba ci spyod pa/ /de dag la yang yi rang ngo / /zag bcas dge ba ci bsags pa/ /de bzhin zag med dge ba
316b4 gang //dge ba'i tshogs ni ci bsags pa/ /byang chub sems dpar bsngo bar gyis/ /bdun po rnam dag re re la/ /se gol gyi ni sgra yang bsgrags/ /de ltar bsod nams tshogs bsags nas/ /ye shes tshogs ni 'di lta ste/ /mu stegs skye bo tha mal
316b5 bzhin//stong pa tsam gyis bsgyur nas ni/ /phyal bar bya ba'i ma yin te/ /dman pa yi ni byang chub bzhin/ /'ga' zhig stong pa'i tshul la ni/ /'ga' zhig yod pa ma yin te/ /shes rab pha rol phyin pa bzhin/ /gzugs las stong pa gzhan mi btsal/ /
316b6 'khrul ngor bstan pa'i gzugs su snang / /gzugs dang stong pa dbyer med na/ /gzugs ni rnam par dag pa yin/ /gzugs nyid stong par shes par bya/ /dper na chu yi zla ba bzhin/ /de ltar ye shes tshogs bsags bya/ /tshogs gnyis bsags
316b7 pas sgrib gnyis byang //bskyed rim 'byung ba'i dgos pa yin/ /de nas so so'i sgrub thabs bzhin/ /bskyed tshul lha de gsal bar bskyed/ /bskyed rim bsgom pa'i rnam gnyis te/ /rtogs pa can dang rtogs pa dman/ /rtogs pa can gyis 'di ltar bsgom/ /
317a1 gang bskyed pa yi lha de ni/ /nam mkha' yi ni 'ja' tshon bzhin/ /gsal la rang bzhin med par bsgom/ /chu la zla ba shar ba bzhin/ /snang la rang bzhin med par bsgom/ /rtogs pa dman pas 'di ltar bsgom/ /yod par rag pa'i rnam pa
317a2 dang //'bur btod ris su bris bzhin du/ /gong ltar gsal ba'i rnam par bsgom/ /de ltar bskyed rim bsgoms nas ni/ /bzlas pa'i tshul ni rnam pa gnyis/ /don dam dang ni kun rdzob dang / /don dam bzlas pa 'di lta ste/ /rtogs pa can gyi bskyed rim bzhin/ /
317a3 yengs med gsal bar bsgoms nas ni/ /yul gzung 'dzin pa yongs spangs nas/ /rtogs pa thams cad bkag nas ni/ /nam mkha' stong las sgra 'byung zhing / /sgra de yang ni rang bzhin med/ /chos nyid kyi ni rang sgra'o/ /kun rdzob phrin las bzhi bzlas
317a4 pas//zhi ba'i bzlas pa 'di lta ste/ /sngags brjod sngags kyi 'od zer ni/ /nyi zer lta bur phyogs bcur 'phro/ /ma lus kun la phog pas ni/ /kun gyi gnod sems zhi byas te/ /phan sems byams sems ldan gyur nas/ /sgrub po nyid la 'dug par bsam/ /
317a5 rgyas pa'i bzlas pa 'di lta ste/ /sngags 'od nyi zer lta bu ni/ /'dom gang tshad nas khugs pa'i tshul/ /rang gi lus la phog pas ni/ /lus kyi tshe bsod rgyas par bsam/ /dbang gi bzlas pa 'di lta ste/ /sngags 'od lcags kyu lta bus ni/ /phyogs
317a6 bcur 'phros te ma lus bkug /sgrub pa'i las ka ci bya zhes/ /phyag dang bcas pas 'dud par bsam/ /drag po'i bzlas pa 'di lta ste/ /sngags 'od me lce lta bus ni/ /phyogs bcu kun du 'phros pa ste/ /rang gnod bgegs rnams thams cad bsreg /
317a7 mi bzad skad ngan chen po yis/ /sgrub pa po la skyabs gsol bsam/ /de skye thun mtshams 'di lta ste/ /gtor dbul ye shes nam mkhar dbyung / /yid kyis phar mchod byin gyis tshur brlabs bsam/ /se gol sgra dang bcas pa yis/ /ye shes mchog
317b1 'byung mgon po khyod kyis ni//dngos grub chen po stsal du gsol/ /slar gshegs slar yang 'byon du gsol/ /bstan bcos brtsam pa rnam gnyis te/ /sgra tshad dag las phul byung bas/ /lung dang mi 'gal don de gtan la 'bebs/ /mdo rgyud lung dang bstan
317b2 bcos nas drangs te//de nas rten dang de dang mi 'gal ba/ /des kyang 'ga' zhig brtsam par rigs pa yin/ /sgo drug gis ni bstan bcos brtsam pa ni/ /yi dam lha yi zhal mthong dang / /de yis gnang ba byin pa dang / /dngos grub kun la dbang thob
317b3 pas//mdo rgyud lung dang bstan bcos las drangs nas/ /de la rten dang de dang mi 'gal bas/ /des ni brtsam par rigs pa yin/ /bde gshegs rnams kyi bka' las kyang / /bskyed rim gsal bar ma bstan te/ /bskyed rim gsal bar ma gyur
317b4 na//don rnams 'grub par mi 'gyur te/ /de bskyed gsal bar bstan gyur nas/ /shes rab 'chal ba'i gang zag gis/ /slob dpon med par zhugs gyur nas/ /bdag nyid phung ba kho nar zad/ /yang na de dus 'khor rnams kyis/ /bde gshegs
317b5 kyi ni byin rlabs kyis//de ni gsol ba kho na yin/ /bde gshegs mya ngan 'das 'og tu/ /blo chung sems can mang gyur te/ /mdo sde rnams las lung bstan te/ /da ni mya ngan 'das 'og tu/ /blo chung sems can mar gyur te/ /de la dgongs te bde
317b6 gshegs kyis//nga dang 'dra ba'i gang zag gis/ /nga yi lung rnams 'grol bar bya/ /de skad lung nas 'byung ba ste/ /mtshan nyid ldan gyis bstan bcos brtsam/ /mtshan nyid mi ldan brtsams gyur nas/ /kun kyang dgongs par ma gyur pas/ /