CLOSE WINDOW

D3132
བོད་ཡིག

/[ ]@##/ /de bzhin gshegs pa bdun gyi sngon gyi smon lam gyi khyad par rgyas pa'i mdo sde'i man ngag bzhugs/ @##/ /de bzhin gshegs pa bdun gyi sngon gyi smon lam gyi khyad par rgyas pa zhes bya ba'i mdo sde bklag cing de bzhin gshegs pa bdun mchod de smon lam gdab pa'i cho ga mdo sde las bsdus te rim par bklag pa/de bzhin gshegs pa bdun gyi mdo bklag cing cho ga rim par mdzad pa/ de bzhin gshegs pa bdun gyi smon lam gyi mdo bklag cing smon lam gdab pa la/ mgo mjug dus kun du gnod sems dang / 'khon dang / brnab sems dang / ma dad pa dang / le lo dang / yid gnyis la sogs te nyon mongs pa'i skyon dang / sems ma 'dres par bsdam zhing bag bya/ gzhu rdeg la sogs pa chad pa dang / gnod pa'i las ming yang mi grag par bya/de bzhin gshegs pa de dag gi yon tan dang / mthu'i khyad par la yid ches shing mos par bya ste/ bka' drin gzo zhing dang pa dang / dad pa dang gus pa'i sems cher bskyed/ mdo sde'i phan yon la yid ches pa nges par gzung / sems can la byams pa dang /snying rje'i sems bskyed la/ khyim pa zhig yin na bsnyen gnas kyi khrims bzung / btson dang bu lon can bdag la dbang yod pa rnams thar bar bya zhing / phongs pa rnams la dpung gnyen bya/ de bzhin gshegs pa brgyad dang / 'phags pa 'jam dpal dang / phyag na rdo rje dang /skyabs grol gyi sku gzugs rgyu ci 'byor pa las gsar du bya/ gsar du ma 'byor na sku gzugs rnying pa ci bzhugs spyan drangs/ de bzhin gshegs pa bdun gyi sngon gyi smon lam khyad par rgyas pa'i mdo sde/ mchod pa zhag dus zin gyi bar du nyin mtshan rgyun mi 'chad par tshar bzhi bcu rtsa dgu las mi nyung bar bklag /'phags pa chos skyong ba dang gnod sbyin rnams la chos kyi sbyin pa dbul ba'i mdo sde bzang po grwa gcig kyang rgyun du bklag /dge slong gi dge 'dun la zas dang skom dang yo byad thams cad kyis ci nus su mchod pa dang rim gro bya'o//mchod pa bya ba'i zhag grangs ni zhag bdun nam/ zhag nyi shu rtsa gcig gam/ sum cu rtsa lnga'am bzhi bcu rtsa dgu'i bar du bya ste/ lcogs par byed na nyin lan gsum mtshan lan gsum du mchod cing smon lam gdab/ dam chos bklag pa dang mchod pa gzhan rgyun mi 'chad par bya/cho ga 'di sngon gyi smon lam gyi stobs kyis de bzhin gshegs pa bdun po'i mtshan thos shing brjod pa las phan yon 'byung ba yin pas phyag 'tshal ba dang bsngo ba'i bar du skabs ci yod par mtshan lan mang du smos shing / ci nas kyang mang du thos shing brjod pa'i tshul du bya'o//mchod pa'i yo byad 'og nas 'byung ba bzhin du bshams shing gtsang sbra che bar bya/ mchod pa rnam pa lnga dang sil snyan dang / pheg rdob pa la sogs pa se yi ma shing rnga dang gar la sogs pa rol mo ci 'byor pa rgyas par bya/ /yon bdag dang mchod pa'i las la gtogs pa rnams khrus bya zhing gos gtsang ma nyin mchod pa lan du byed pa'i tshe spo zhing bgo'o//mchod pa'i rim pa ni yo byad tshul bzhin bshams kyi 'og tu dge 'dun dang yon bdag tshogs nas sems can thams cad la byams pas khyab par bya ba'i phyir ting nge 'dzin bsgom/de nas mchod pa'i tshogs rnams bden pa brdar zhing byin gyis brlab/ de nas 'phags pa spyan drang / de nas 'phags pa'i tshogs gdan 'dzom ste/ so so'i gdan la bzhugs par bsam/ de nas 'phags pa'i tshogs mngon du dmigs la gdan 'dzom pa'i spyi la phyag 'tshal ba dang mchod pa lnga dbul/bskul ba'i smon lam bklag /de bzhin gshegs pa brgyad la sogs pa re re la mchod pa dbul zhing mdo las 'byung bzhin smon lam gdab par tshar phyin par bya/ de nas kun gyis gzungs kyi snying po logs shig tu phyung ba bzhi bcu rtsa dgu man chad bdun yan chad ci nus su bklag /de'i rjes la spyi la mchod pa lan cig byas nas bsod nams bsngo ba'i smon lam gdab/ de nas bzod par gsol te slar gshegs pa'i tshogs bcad bklag ste gyes/ mchod pa bshams pa'i thabs 'byor pa'i stobs kyis ci nus pa dang sbyar te/maN+Dal chen po'i steng du tshon phye'am/ me tog las rin po che sna lnga'i pho brang rta babs dang / mu tig gi phreng ba dang / rgyan sna tshogs kyis brgyan pa/ gzhi pad+ma'i gdan dang bcas pa bris pa snam bu bar ma gzhal med khang gi gung la an 'tsham pa'i seng ge'i khri dang sbyar te/ tshon sna lnga'i tshas kyis dkris pa'i mdo sde'i pu sti dang /de bzhin gshegs pa brgyad kyi sku gzugs bzhugs/ g.yas g.yon du'ang an khri 'tsham pa bzhag la/ g.yas g.yon gyi gral stod du ni de bzhin gshegs pa rnams kyi 'khor byang chub sems dpa' bzhugs par bsham/g.yas gral smad du ni lha'i dbang po brgya byin dang / rgyal po chen po bzhi dang / phyogs skyong ba bcu dang / dam pa'i chos skyong ba thams cad bzhugs su gsol/ g.yon gral smad du ni gnod sbyin gyi sde dpon bcu gnyis bzhugs par bsham/ shar phyogs kyi ngos su an chung ngu'am/gzhong bu'am man 'ji las gzhi blangs pa'i steng du/ 'phags pa 'jam dpal dang / phyag na rdo rje dang / skyabs grol gdan 'dzom pa la sngon gyi thugs dam bskul zhing mdo sde'i don las 'byung ba'i phrin las mdzad pa'i tshul du bzhugs pa ltar gdan bsham zhing so so'i sku gzugs kyang bzhugs par bya/lha bzhugs pa'i snam bu'i gzhi yang pad+mas 'khor bar bya/ dbus kyi pad+ma la'am spyan sngar sgreng ba/ gar sdug cing bde bar gzungs chu'i bum pa kha rgyan dang bcas pa dgu gzhag /phyi rol gyi snam bu'i nang du bkra shis dang /shing ljon pa la sogs pa'i rgyan la 'os pa'i khol ma bkram la/ phyi tshon sna lnga'i gzhal med khang sgo khyud dang / rta babs su bcas pa bri zhing mu tig gi phreng ba dang / do shal gyi khol ma bkod la/ de dag gi steng du lha bshos dang yon chab la sogs pa mchod pa rnams kyang dgram/tshon gyis bri bar dka' na me tog dgram pa'am/ maN+Dal tsam bya/ steng du yang bla re dang gdugs ci 'byor pas klu bas/ ngos su yang rgyal mtshan dang / tshon sna lnga pa'i ba dan pa'i bzhi bcu rtsa dgu las lhag pa yan chad ci 'byor pa rgyas par dgram/mar me'i kha grangs ni lnga bcu rtsa bzhi man chad du bya ste/ de las kha grangs dgu yan chad ci nus pa nyin mtshan du bar ma chad par gtang / lha bshos ni de bzhin gshegs pa brgyad la cha re re/ 'phags pa 'jam dpal dang / phyag na rdo rje dang / skyabs grol la cha re re/lha'i dbang po brgya byin dang rgyal po chen po bzhi la cha re re/ dam pa'i chos skyong ba spyi la cha gcig /chos gnyis la cha re re/ gnod sbyin gyi sde dpon bcu gnyis la cha re re/ spyi gtor chen po gcig 'di rnams so so'i spyan sngar gar 'os par dbab/ngos gnyis su de bzhin gshegs pa bdun gyi smon lam gyi mdo sde nyin mtshan du bar ma chad par thun du bklag /chos kyi sbyin pa dbul ba mdo sde grwa gcig gdan khri bshams te ci nus su bklag /mchod pa bshams pa'i mdun du mchod pa la 'du ba rnams kyi stan bshams te/mdun mdun du mchod pa rnam pa lnga dbul ba legs par bshams la/ rol mo dang sil snyan byed pa'i grwa gcig kyang zla ba bstar te phyed du gzhug /mchod pa bshams pa ni mdor na tshad nges pa med de/ /bde ba can gyi zhing gi yon tan gyi bkod pa dang mthun par nus kyang rung /tha ma maN+Dal byas te/ me tog chu phor gang tsam gyis mchod kyang rung ste/ rang gi 'byor pa'i nyams kyis ci lcogs su 'bad de bya'o/ /yid kyi mchod pa ni ci nas kyang rgya che zhing bzang bar bsam zhing bden pa bdar te/ smon lam yang gdab/ lha bshos kyi cha dang /mar me'i grangs kyang mi 'byor na nyung du bsdur yang rung / 'byor na ci 'os pa mang du bskyed kyang rung ngo / /dang po mdo sde las 'byung ba'i cho ga bzhin du/ sems can thams cad la byams pa dang snying rjes khyab par bsgom mo/ /mchod pa bshams te/ dge 'dun 'tshogs nas phyogs bcu'i 'phags pa thams cad la phyag bya/de nas rig pa'i tshul gang la goms pa'i sgo nas chos thams cad dmigs su med par stong pa nyid kyi ting nge 'dzin ci ran cig bsgom mo/ /de'i 'og tu ting nge 'dzin las langs nas 'di snyam du chos thams cad dmigs su med pa'i don de lta bu yin la/'phags pa rnams kyis de kho na nyid thugs su chud pas sku dang gsung dang thugs nam mkha' dang 'dra bar gyur te/ sgrib pa mi mnga' zhing mthu dang / byin gyi rlabs bsam gyis mi khyab pa'i go 'phang brnyes par yang rung na/ kye ma sems can 'di rnams chos kyi de kho na nyid ma rtogs te/rmongs pas nyon mongs pa dang sdug bsngal mang pos gzir te/ nyam thag pa'i gnas su lhung bar gyur la/ sems can thams cad kyang thog ma med pa'i 'khor ba nas 'gro ba brgyud pa rnams su bdag gi bshes gnyen dam pa drin gyi zhing du ma gyur pa 'ga' yang med de/bdag gis kyang dang po byang chub kyi sems dam pa bskyed de/ 'gro ba mang po'i phan pa dang bde ba'i don dpag tu med pa bsgrub par dam bcas pa'i dus kyi tshe/ sems can thams cad bdag gir blangs zin pas 'di lta bu la byang chub sems dpa' rnams kyis yal bar 'dor ba ni mi rigs na/'di dag ji ltar sdug bsngal las ni gdon/ bde ba la ni dgod par bya snyam du snying rje dang / byams pa chen po dang ldan pa'i brtson pa'i sems drag tu bskyed par bya'o/ /yang 'di snyam du bsams te/ bdag ni dus ngan pa'i sems can spyod pa dang mthu dman pa yin pas/bdag nyid gcig pus 'phral du don rlabs po che 'di lta bu ni mi lcogs kyi/ ston pa bde bar gshegs pas sngon ci ltar phyi ma'i dus lnga brgya pa tha ma la dam pa'i chos 'grib pa na sems can thams cad rjes su gzung ba'i slad du de bzhin gshegs pa bdun gyi thabs mkhas pa dang sngon gyi smon lam gyi khyad par rgyas pa bcom ldan 'das kyis ji skad gsungs pa las byung ba bzhin du/bcom ldan 'das sman gyi bla bai DUr+ya 'od kyi rgyal po la sogs pa de bzhin gshegs pa bdun la mthu brtan dpung gnyen du gsol te/de ltar ni 'phags pa rnams kyi mthu dang byin gyi rlabs kyis/ 'gro ba rnams la phan pa bsgrub par bya la/ phyis ni bdag nyid gcig pus gzhan la ltos pa med par sems can thams cad la phan pa dang bde ba bla na med pa bsgrub par bya'o snyam du bsam mo//snying rje dang byams pa'i sems bskyed pa'i 'og tu/ sems can gyi don bya bar brtsam pa'i phyir 'phags pa gdan 'dzom pa'i pho brang dang / mchod pa'i tshogs bshams shing bsam pa rnam par dag pa'i yid kyis bden pa bdar zhing yid kyis bsngo ba/dkon mchog gsum gyi bden pa dang / sangs rgyas dang byang chub sems dpa' thams cad kyis byin gyi rlabs dang / tshogs gnyis yongs su rdzogs pa'i mnga' thang chen po dang / chos kyi dbyings rnam par dag pa'i stobs dang / bcom ldan 'das sman gyi bla bai DUr+ya'i 'od kyi rgyal po la sogs pa de bzhin gshegs pa bdun dang /ston pa bde bar gshegs pa dpal shAkya thub pa 'khor dang bcas pa gdan 'dzom pa'i pho brang gi dkyil 'khor dang / mchod pa'i tshogs sbyar ba 'di rnams/ ji ltar de bzhin gshegs pa de dag gi sngon gyi smon lam khyad par can gyis bsgrubs pa'i sangs rgyas kyi zhing rnam par dag pa dang /bcom ldan 'das 'od dpag med kyi zhing gi bkod pa'i yon tan lta bu dang ldan par gyur te/ sa gzhi rin po che sna tshogs kyi rang bzhin lag mthil ltar mnyam pa/tha gru che ba yangs pa/ reg na 'jam zhing bde ba dang / dri ma med cing 'od gsal ba/ tsan+dan sbrul kyi snying po'i dri bsung dang ldan pa/ lha'i me tog sna tshogs kyis gcal bkram pa/ mtha' rin po che'i pha gus brtsigs shing gser dang mu tig gi gram bu dang bye ma bdal ba dang /ut+pa la dang / ku mu ta dang / pad+ma 'gying zhing ldem pas khebs par gyur cig /chu bya sna tshogs skad snyan pa sgrogs pa dga' la 'phyo zhing lding bas brgyan pa'i yan lag brgyad dang ldan pa'i mtsho dang rdzing dang lteng ka dag gis mdzes par byas pa/ rin po che'i dpag bsam gyi shing ljon pa lha'i nor bu dang /mu tig gi rgyan phreng dang / rin po che dpyangs pa/ /me tog gi mgo lcogs dang / 'bras bus mdzes par chags pas g.yur za zhing ldem la/ gser gyi dril bu g.yer kha 'khrol ba las dam pa'i chos kyi sgra 'byung ba dang ldan pa tshar du sbrengs pas legs par brgyan pa'i sa gzhi la gzhal med khang chen po/rin po che sna bdun mchog tu 'bar bar bkod pa/ 'jig rten gyi khams dpag tu med par rgyas par 'od zer chen po rab tu 'byung ba/ gnas tha dad pa shin tu rnam par phye ba mtha' yas par rnam par gnas pa/ rgya yongs su ma chad pa khams gsum las yang dag par 'das pa'i spyod yul/ 'jig rten las 'das pa de'i bla ma'i dge ba'i rtsa ba las byung ba shin tu rnam par dag cing dbang sgyur pa'i rnam par rig pa'i mtshan nyid/ de bzhin gshegs pa'i gnas/ byang chub sems dpa' dpag tu med pa'i dge 'dun dang ldan pa/lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / mi dang mi ma yin pa mtha' yas pa rnam par rgyu ba/ chos kyi ro'i dga' ba dang bde ba chen pos brten pa/ sems can thams cad kyi don thams cad yang dag par thob par byed pa/ nye bar gnas pa/ nyon mongs pa'i dri ma'i gnod pa thams cad dang bral ba/ bdud thams cad yongs su spangs pa/ /thams cad kyi bkod pa las lhag pa/ de bzhin gshegs pa'i bkod pa'i gnas dran pa dang blo gros dang /rtogs pa chen pos nges par 'byung ba/ zhi gnas dang lhag mthong chen po'i bzhon pa yin pa/ rnam par thar pa'i sgo chen po stong pa nyid dang / mtshan ma med pa dang / smon pa med pa nas 'jug pa/ rin po che'i pad+ma'i rgyal po'i yon tan mtha' yas pas brgyan pa'i bkod pa la brten pa'i gzhal med khang chen por gyur pa'i nang du/gung la de bzhin gshegs pa brgyad bzhugs par 'os pa'i rin po che'i seng ge'i gdan khri lha'i dar zab dang ras bcos bus g.yogs pa ne ma zhing 'phar ba'i rlong dang ldan pa'i sku rten dang bcas pa brgyad 'byung zhing g.yas g.yon du yang 'khor gyi gtso bo byang chub sems dpa' rnams dang /chos skyong thugs dam can bzhugs pa'i pad+ma'i gdan brgya stong mang po dang / mdun gyi ngos su 'phags pa 'jam dpal dang / phyag na rdo rje dang / skyabs grol bzhugs pa'i pad+ma'i gdan bzang po 'byung ba dang /phyi nang thams cad cha rigs dang 'tsham pa mi dang / lha'i yo byad dam pa zhal zas dang / na bza' dang / rgyan dang / rol mo la sogs pa phul du phyin pa sna tshogs phung po gsum pa'i mdo dang / bzang po spyod pa'i smon lam las 'byung ba rgya mtsho thams cad kyis rgyas par gang zhing rgyan klubs pa dang ldan par gyur cig /'phags pa gdan 'dzom pas kyang / de bzhin du byin gyis brlabs shing bzhes te longs spyod par gyur cig /de skad lan gsum bzlas/ yang de'i rjes la dkon mchog gsum gyi bden pa dang /sangs rgyas dang byang chub sems dpa' thams cad kyi byin gyi rlabs dang / tshogs gnyis yongs su rdzogs pa'i mnga' thang chen po dang / chos kyi dbyings rnam par dag pa'i stobs kyis de bzhin du gyur cig /ces lan gsum bzlas/ mchod pa'i tshogs bden pas byin gyis brlabs pa'i 'og tu 'phags pa spyan drang ba/pus mo btsugs te me tog blangs thal mo sbyar nas tshig 'di skad ces/ shar phyogs kyi 'jig rten gyi khams gzhan gyis mi thub pa na/ de bzhin gshegs pa dgra bcom pa yang dag par rdzogs pa'i sangs rgyas mtshan legs par yongs bsgrags dpal gyi rgyal po zham 'bring ba byang chub sems dpa'i 'khor bye ba khrag khrig bzhugs pa dang /shar phyogs kyi 'jig rten gyi khams rin po che dang ldan pa na/ de bzhin gshegs pa dgra bcom pa yang dag par rdzogs pa'i sangs rgyas rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po/byang chub sems dpa'i 'khor dpag tu med pa bzhugs pa dang / shar phyogs kyi 'jig rten gyi khams spos kyis yongs su gang ba rin chen bsags pa na/ de bzhin gshegs pa dgra bcom pa yang dag par rdzogs pa'i sangs rgyas gser bzangs dri med rin chen snang brtul zhugs grub pa/byang chub sems dpa' bye ba khrag khrig brgya stong du mas kun nas bskor te bzhugs pa dang / shar phyogs kyi 'jig rten gyi khams mya ngan med pa na de bzhin gshegs pa dgra bcom pa yang dag par rdzogs pa'i sangs rgyas mya ngan med mchog dpal byang chub sems dpa'i tshogs dpag tu med pas bskor te bzhugs pa dang /shar phyogs kyi 'jig rten gyi khams chos kyi rgyal mtshan de bzhin gshegs pa dgra bcom pa yang dag par rdzogs pa'i sangs rgyas chos bsgrags rgya mtsho'i dbyangs/byang chub sems dpa'i tshogs dpag tu med pas kun nas bskor te bzhugs pa dang / shar phyogs kyi 'jig rten gyi khams rin po che'i rgya mtshor legs par gnas pa na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas chos rgya mtsho mchog gi blos rnam par rol pa mngon par mkhyen pa/byang chub sems dpa'i tshogs grangs med pas kun nas bskor te bzhugs pa dang / shar phyogs kyi 'jig rten gyi khams bai DUr+ya snang ba na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas sman gyi bla bai DUr+ya'i 'od kyi rgyal po 'khor byang chub sems dpa' nyi ma ltar rnam par snang byed dang /zla ba ltar rnam par snang byed la sogs pa byang chub sems dpa'i tshogs grangs med pa bzhugs pa la sogs te/ de bzhin gshegs pa bdun po 'khor dang bcas pa rnams dgongs su gsol/bcom ldan 'das thugs rje chen po dang ldan pa rnams kyis slad ma'i dus lnga brgya ba tham la dam pa'i chos ltar bcos pa 'byung ba na/ sems can las kyi sgrib pa sna tshogs kyis bsgribs pa/ nad sna tshogs kyis lus gzir ba/mya ngan dang sdug bsngal sna tshogs kyis gtses pa/ phongs par gyur pa'i sems can thams cad rjes su bzung zhing lha dang mi rnams kyi don dang / phan pa dang bde ba'i slad du de bzhin gshegs pa rnams kyi thabs mkhas pa mang po dang / sngon gyi smon lam gyi khyad par rgyas pa bzang zhing rlabs che ba dang /mthu dang byin gyi rlabs dpag tu med pa mchis pa mnga' ba la brten te/ che ge mo la sogs pa 'gro ba mang po bskyab pa'i slad du/ mgon skyabs dang dpung gnyen du spyan 'dren cing mchis na/ mchod pa'i tshogs sbyar ba'i pho brang gi dkyil 'khor 'dir gshegs shing gdan 'dzom pa chen po mdzad de byin gyis brlab tu gsol/da ltar bdag cag gi ston pa sangs rgyas bcom ldan 'das dpal shAkya thub pa gdul bya'i dbang du 'dzam bu'i gling 'dir mya ngan las 'das pa'i tshul bstan kyang 'jig rten gyi khams gzhan dag tu de bzhin gshegs pa'i rnam par rol pa sna tshogs kyis 'gro ba'i don mdzad cing bzhugs pa yang /de bzhin gshegs pa'i thugs rje chen po dang / sngon gyi smon lam chen po dang / sngon gyi smon lam khyad par can las glengs te/ bdag cag rnams mnga' ris kyi gdul bya phyag mtshan du bzhes pa'i nang du gtogs te/ bka' drin thob pa'i 'phro ma mchis pa tsam la brten te/ che ge mo la sogs pa 'gro ba mang po bskyab pa'i slad du/ mgon skyabs dang dpung gnyen du spyan 'dren cing mchis na/ mchod pa'i tshogs sbyar ba'i pho brang gi dkyil 'khor 'dir gshegs shing gdan 'dzom pa chen po mdzad de byin gyis brlab tu gsol/byang chub sems dpa' sems dpa' chen po 'phags pa 'jam dpal gzhon nur gyur pa dang / dpal phyag na rdo rje dang / rgyal ba'i sras po skyabs grol la sogs pa byang chub sems dpa' sems dpa' chen po gang dag sngon de bzhin gshegs pa bdun gyi smon lam gyi khyad par rgyas pa'i mdo sde bka' stsal pa'i tshe gdan 'dzom par 'dus te/mdo sde byin gyis brlabs shing de bzhin gshegs pa'i bka' sgrub par thugs bskyed pa de dag thams cad kyang che ge mo la sogs pa 'gro ba mang po bskyab pa'i slad du mgon skyabs dang dpung gnyen du spyan 'dren zhing mchis na/mchod pa'i tshogs sbyar ba'i pho brang gi dkyil 'khor 'dir gshegs shing gdan 'dzom pa chen po mdzad de byin gyis brlab tu gsol/ /sngon de bzhin gshegs pa gdan 'dzom pa chen pos bkas gtad cing so so nas kyang lha'i tshig bden pas mdongs gsol du zhal gyis bzhes te/dam pa'i chos dang 'khor rnam bzhi skyong bar mdzad cing / de bzhin gshegs pa bdun gyi sngon gyi smon lam gyi khyad par rgyas pa'i mdo sde 'di yang lhag par phyag mtshan du bzhes pa tshangs pa dang /lha'i dbang po brgya byin dang / rgyal po chen po yul 'khor srung dang / 'phags skyes po dang / mig mi bzang dang / rnam thos kyi sras la sogs pa 'phags pa chos skyong ba thams cad kyang che ge mo la sogs pa 'gro ba mang po bskyab pa'i slad du mgon skyabs dang dpung gnyen du spyan 'dren cing mchis na/mchod pa'i tshogs sbyar ba'i pho brang gi dkyil 'khor 'dir gshegs shing gdan 'dzom pa chen po mdzad de byin gyis brlab tu gsol/ sngon de bzhin gshegs pa gdan 'dzom pa chen po'i spyan sngar/de bzhin gshegs pa bdun gyi sngon gyi smon lam gyi khyad par rgyas pa'i mdo sde 'chang ba dang mchod pa la sogs pa'i sems can de dag phyag mtshan du bzhes shing bsrung bar zhal gyis bzhes pa gnod sbyin gyi sde dpon chen po ji 'jigs dang / gnod sbyin gyi sde dpon chen po rdo rje dang /gnod sbyin gyi sde dpon chen po rgyan 'dzin dang / gnod sbyin gyi sde dpon chen po gza' 'dzin dang / gnod sbyin gyi sde dpon chen po rlung dang / gnod sbyin gyi sde dpon chen po gnas bcas dang / gnod sbyin gyi sde dpon chen po dbang 'dzin dang / gnod sbyin gyi sde dpon chen po ltung 'dzin dang /gnod sbyin gyi sde dpon chen po smra 'dzin dang / gnod sbyin gyi sde dpon chen po bsam 'dzin dang / gnod sbyin gyi sde dpon chen po g.yo ba 'dzin dang / gnod sbyin gyi sde dpon chen po rdzogs byed de/ gnod sbyin gyi sde dpon bcu gnyis po thams cad la yang sngon gyi thugs dam bzang po las glengs te/che ge mo la sogs pa 'gro ba mang po bskyab pa'i slad du/ mgon skyabs dang dpung gnyen du spyan 'dren zhing mchis na/ mchod pa'i tshogs sbyar ba'i pho brang gi dkyil 'khor 'dir gshegs shing gdan 'dzom pa chen po mdzad de/byin gyis brlab tu gsol/ skabs 'dir lha klu spyan drang ste/ phyogs skyong 'jig rten skyong ba dbang dang ldan/ /thugs rje thabs mkhas thugs bsgom dkyel po che/ /lha dang drang srong gshin rje srin po klu/ /rlung lha gnod sbyin bgegs gza' rgyu skar bcas//de dag so so'i dbang po'i skur ston pa/ /phyogs bcu'i 'jig rten skyong ba bzhugs so 'tshal/ /bstan pa rgyas pa'i slad du spyan 'dren na/ /'gro ba'i don phyir mchod kyis gshegs su gsol/ /sa mA dzaH/ de ltar spyan drangs pa thams cad kyang rdzu 'phrul gyis nam mkha' la byon par bsam mo//spyan drang ba'i cho ga rdzogs pa'i rjes la/ de bzhin gshegs pa thams cad mkhyen pa dang / 'phags pa lha'i snyan dang spyan rnam par dag pa mnga' ba rnams kyi gsol tshig 'das ma thag tu rdzu 'phrul gyis nam mkha' nas gshegs te/gzhal yas khang gi dbus kyi seng ge'i khri chen po brgyad la de bzhin gshegs pa brgyad bzhugs/ g.yas g.yon gyi gral stod du 'khor byang chub sems dpa' rnams bzhugs/ g.yas g.yon gyi gral smad du tshangs pa dang / lha'i dbang po brgya byin dang / rgyal po chen po bzhi dang / gnod sbyin gyi sde dpon bcu gnyis bzhugs/ gdan 'dzom pa'i dbus su pad+ma'i gdan la byang chub sems dpa' 'jam dpal dang / phyag na rdo rje dang / skyabs grol gsum ldan 'dzom pa la/ sngon gyi thugs dam bskul zhing gsol ba'i phrin las mdzad cing bzhugs par sngon du dmigs shing bsam/pho brang gi dkyil 'khor dang mchod pa'i tshogs kyang sngar bden pa bdar ba'i tshul dang 'dra bar gyur par bsam zhing mos pa bskyed de spyan drangs pa'i rjes la/ 'phags pa gdan 'dzom pa la spyir phyag 'tshal zhing mchod nas bskul zhing gsol ba/de nas mchod pa'i tshogs kyis brgyan pa'i pho brang na/ 'phags pa gdan 'dzom pa bzhugs par mngon du dmigs bzhin du/ mchod yon la sogs pa mchod pa ci 'byor pa dbul zhing rol mo bya/ de nas phyag 'tshal ba 'greng phyag bdun bdun bya ste/ de bzhin gshegs pa dgra bcom pa yang dag par rdzogs pa'i sangs rgyas mtshan legs par yongs bsgrags dpal gyi rgyal po zham 'bring ba byang chub sems dpa'i 'khor bye ba khrag khrig dang bcas pa la phyag 'tshal lo//skyabs su mchi'o/ /de bzhin gshegs pa dgra bcom pa yang dag par rdzogs pa'i sangs rgyas rin po che dang / zla ba dang pad+mas rab tu brgyan pa mkhas pa gzi brjid sgra dbyangs kyi rgyal bo byang chub sems dpa'i 'khor dpag tu med pa dang bcas pa la phyag 'tshal lo//skyabs su mchi'o/ /de bzhin gshegs pa dgra bcom pa yang dag par rdzogs pa'i sangs rgyas gser bzang dri med rin chen snang brtul zhugs grub pa byang chub sems dpa' bye ba khrag khrig brgya stong du mas kun nas bskor ba dang bcas pa la phyag 'tshal lo//skyabs su mchi'o/ /de bzhin gshegs pa dgra bcom pa yang dag par rdzogs pa'i sangs rgyas mya ngan med mchog dpal byang chub sems dpa'i tshogs dpag tu med pas bskor ba dang bcas pa la phyag 'tshal lo/ /skyabs su mchi'o/ /de bzhin gshegs pa dgra bcom pa yang dag par rdzogs pa'i sangs rgyas chos bsgrags rgya mtsho'i dbyangs byang chub sems dpa'i tshogs dpag tu med pas bskor ba dang bcas pa la phyag 'tshal lo//skyabs su mchi'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas chos rgya mtsho mchog gi blos rnam par rol pa mngon par mkhyen pa byang chub sems dpa'i tshogs grangs med pas kun nas bskor ba dang bcas pa la phyag 'tshal lo//skyabs su mchi'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas sman gyi bla bai DUr+ya'i 'od kyi rgyal po 'khor byang chub sems dpa' nyi ma ltar rnam par snang byed dang /zla ba ltar rnam par snang byed la sogs pa byang chub sems dpa'i tshogs grangs med pa dang bcas pa la phyag 'tshal lo/ /skyabs su mchi'o/ /ston pa bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dpal shAkya thub pa la phyag 'tshal lo//skyabs su mchi'o/ /byang chub sems dpa' sems dpa' chen po 'phags pa 'jam dpal gzhon nur gyur pa dang / phyag na rdo rje dang / skyabs grol la sogs pa la gus par phyag 'tshal lo//skyabs su mchi'o/ /tshangs pa dang / lha'i dbang po brgya byin dang / rgyal po chen po bzhi la sogs pa dam pa chos skyong ba thams cad la phyag 'tshal lo/ /skyabs su mchi'o/ /gnod sbyin gyi sde dpon chen po ji 'jigs la sogs te/gnod sbyin gyi sde dpon chen po bcu gnyis la phyag 'tshal lo/ /skyabs su mchi'o/ /'phags pa'i tshogs de dag thams cad la mchod yon dang byug pa/ me tog dang bdug spos/ zhal zas dang mar me/ rol mo dang sil snyan/ gdugs dang ba dan la sogs pa dngos su ci 'byor ba 'di dag dang / phyogs bcu na bdag pos ma bzung zhing lha dang mi'i rdzas dam pa bde ba'i yo byad phun sum tshogs pa thams cad dang gzungs dang / rigs pa'i mthu dang / mos pa'i stobs kyis bskyed pa'i mchod pa'i sprin bzang po spyod pa'i smon lam las 'byung ba rgya mtsho thams cad kyis nam mkha'i mthas klas pa/chos kyi dbyings su gtogs pa thams cad rgyas par bkang ste/ dbul lo mchod do/ /ming 'di zhes bgyi ba dang / bdag cag gis thog ma ma mchis pa nas 'khor ba'i tshe rabs thams cad du sdig pa mi dge ba'i las mdor na mi bgyi bar rigs pa'i las ni bgyis/bgyi bar 'os pa'i las ni ma bgyis pa la sogs pa'i dngos sdig ci mchis pa thams cad yang dag par 'chags so/ /dus gsum gyi 'phags pa dang skye bo'i dge ba mtha' dag gi bsod nams thams cad la rjes su yi rang ngo //phyogs bcu'i rgyal ba thams cad la chos kyi 'khor lo bla na med pa bskor bar bskul lo/ /'jig rten gyi sgron ma gang dag mya ngan las 'da' ba'i tshul ston par bzhed pa de dag thams cad la mya ngan las mi 'da' bar 'jig rten gyi don mdzad cing yun ring du bzhugs par gsol ba 'tshal lo//bcom ldan 'das gdan 'dzom pa chen po dgongs su gsol/ /bcom ldan 'das thugs rje chen po rnams kyis slad ma'i dus lnga brgya pa tha ma la dam pa'i chos ltar bcos pa 'byung ba na/ sems can las kyi sgrib pa sna tshogs kyis bsgribs pa/nad sna tshogs kyis lus gzir ba/ mya ngan dang sdug bsngal sna tshogs kyis gtses pa/ phongs par gyur pa'i sems can thams cad rjes su bzung zhing lha dang mi rnams kyi don dang phan pa dang bde ba'i slad du/ sngon bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bdun gyi thabs mkhas pa dang /sngon gyi smon lam gyi khyad par rgyas pa rlabs po che ji ltar btab cing byin gyis brlabs pa dang / don de nyid de ltar bdag cag gi ston pa bcom ldan 'das dpal shAkya thub pas ji ltar bka' stsal cing byin gyis brlabs pa dang /'phags pa 'jam dpal dang / phyag na rdo rje dang / skyabs grol la sogs pa byang chub sems dpa' sems dpa' chen po rnams kyis/ bcom ldan 'das de dag gi bka' lung yang dag par bsgrub pa dang / so so'i dgongs spyod rgya chen po rdzogs par bskang ba'i slad du/ mdo sde'i don bsgrub pa'i phrin las mdzad par 'phags pa'i bka' btags pa'i zhal gyis bzhes shing ji ltar byin gyis brlabs pa dang / tshangs pa dang / lha'i dbang po brgya byin dang / rgyal po chen po bzhi dang / gnod sbyin gyi sde dpon chen po bcu gnyis la sogs te/ lha'i dge bsnyen chen po thams cad kyis gdan 'dzom pa'i spyan sngar mdo sde dang / mdo sde 'dzin pa'i sems can bsrung ba dang bskyab par zhal gyis bzhes pa la sogs pa/ sngon 'phags pa rnams kyis ji ltar byin gyis brlabs shing bka' stsal pa/mdo sde las 'byung ba bzhin du/ bcom ldan 'das de bzhin gshegs pa sras dang bcas pa de rnams gdan 'dzom par mdzad pa'i pho brang gi dkyil 'khor bshams/ 'byor pa'i stobs ci mchis pas sbyar nas/ gdan 'dzom pa'i spyan sngar mtshan nas brjod de mchod pa 'bul/bskul zhing smon lam gsol te bka' drin nod cing mchis na/ gdan 'dzom pas sngon ji ltar byin gyis brlabs shing bka' stsal pa bzhin du/ mdo sde'i cho ga yongs su rdzogs par mdzad cing phan yon ji skad 'byung ba'i bka' drin thams cad che ge mo la sogs pa bdag cag gis 'phral du thob par mdzad du gsol/de'i 'og tu 'phags pa rnams la re re nas mchod pa 'bul zhing smon lam gdab ste/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas mtshan legs par yongs bsgrags dpal gyi rgyal po la phyag 'tshal zhing skyabs su mchi'o zhes lan bdun brjod de ci 'byor pa'i mchod pa phul la smon lam 'di skad ces gdab po//deng rgyal ba sras dang bcas pa'i tshogs gdan 'dzom pa'i spyan sngar/ de bzhin gshegs pa mtshan legs par yongs bsgrags dpal gyi rgyal po'i mtshan thos te/yid la dran zhing lan bdun brjod pa dang / phyag 'tshal zhing mchod pa la sogs pa'i mthus/ de bzhin gshegs pa mtshan legs par yongs bsgrags dpal gyi rgyal po de'i ston gyi smon lam khyad par can dang mthun par bdag cag la sogs pa sems can gang dag nad sna tshogs kyis lus yongs su gzir zhing /rims dang gshed byed dang / byed dang ro langs dang / 'jigs pa sna tshogs kyis gtses pa de dag thams cad kyi gnod pa dang /nad thams cad 'phral du byang zhing gtan du rab tu zhi bar gyur cig /byang chub kyi mthar thug gi bar du rims dang sdig pa can gyi gdon rnams med par gyur cig /rab tu zhi bar gyur cig /bdag cag la sogs pa sems can gang dag long ba dang / 'on pa dang / smyon pa dang /sha bkra dang / nad tshabs po ches btab par gyur pa de dag thams cad byang chub kyi mthar thug gi bar du dbang po thams cad yongs su tshang bar gyur cig /sdug bsngal dang nad thams cad rgyun chad par gyur cig /bdag cag la sogs pa sems can gang dag 'dod chags dang /zhe sdang dang / gti mug gis bsgribs pa/ mtshams med pa lnga byed pa/ bya ba ma yin pa'i spyod pa mang ba/ dam pa'i chos spong ba/ sdig pa mi dge ba'i las sna tshogs byed pa/ ngan song gsum dang / sems can dmyal bar 'gro bar 'gyur ba dang / sems can dmyal ba chen por skyes nas sdug bsngal gyi tshor ba myong ba de dag thams cad kyi mtshams med pa lnga la sogs pa las kyi sgrib pa thams cad yongs su byang zhing zad par gyur cig /sdug bsngal sna tshogs kyi rgyun 'phral du chad cing bde ba mchog dang ldan par gyur cig /bla na med pa'i byang chub tu sangs rgyas kyi bar du su yang sems can dmyal ba dang ngan 'gror 'gro bar ma gyur cig /lha yul ba'i bde ba dang / mi'i bde ba myong bar gyur cig /bdag cag la sogs pa sems can gang dag dbul por gyur te/ zas dang / skom dang / nor dang / 'bru dang / mal cha dang / spos dang / phreng ba dang / yo byad mi bdog pa de dag thams cad byang chub kyi mthar thug gi bar du dbyig dang / gos dang / nor dang / 'bru dang / mal cha dang / spos dang / phreng ba dang / yo byad 'phel bar gyur cig /bdag cag la sogs pa'i sems can gang dag bcing ba dang /brdeg pa dang / go rar bzhug pa dang / mtshon cha'i tshogs rnam pa sna tshogs kyis lus yongs su gzir ba de dag thams cad byang chub kyi mthar thug gi bar du bcing ba dang / brdog pa thams cad las yongs su thar bar gyur cig /lus kyi gdung ba thams cad rgyun chad par gyur cig /bdag cag la sogs pa sems can gang dag mgon med par gyur pa lus la gdung ba'i me 'bar ba dang / seng ge dang / stag dang / dom dang / dred dang / sbrul gdug pa'i nang du chud de/ srog la 'bab cing nyam thag pa de dag thams cad byang chub kyi mthar thug gi bar du lus la gdung ba'i me thams cad rab tu zhi bar gyur cig /seng ge dang / stag dang / dom dang / dred dang / sbrul gdug pa de dag kyang byams pa la gnas par gyur cig /bdag cag la sogs pa sems can gang dag phan tshun 'thab rtsod cing 'gyed la/'khrugs shing 'jigs skrag nas sngangs pa de dag thams cad byang chub kyi mthar thug gi bar du 'thab rtsod dang 'gyed pa thams cad rab tu zhi bar gyur cig /phan tshun byams pa la gnas par gyur cig /bdag cag la sogs pa sems can gang dag chu'i nang du son te grur zhugs pa/gling med par phyin pa/ srog 'dod pa/ chu klung dang / rgya mtsho'i nang du son te/ smre sngags sna tshogs 'don pa/ de dag thams cad byang chub kyi mthar thug gi bar du chu klung chen po de dag las dbugs 'byin pa sbyin par gyur cig /'jigs pa med par rgal bar gyur cig /'di nas shi 'phos nas kyang de bzhin gshegs pa dgra bcom pa yang dag par rdzogs pa'i sangs rgyas mtshan legs par yongs bsgrags dpal gyi rgyal po'i sangs rgyas kyi zhing du pad+ma'i snying po'i seng ge'i khri la rdzus te skye zhing skyes ma thag tu gzungs dang ting nge 'dzin la sogs pa'i yon tan gyi tshogs thams cad mngon du gyur te/ston pa bla na med pa mtshan legs par yongs bsgrags dpal gyi rgyal po la sogs pa phyogs bcu'i sangs rgyas thams cad las bka' lung yang dag par nod pa dang / thugs mnyes par byed cing skad cig skad cig la sangs rgyas kyi zhing thams cad du thogs pa med par 'jug par gyur cig /gzhan yang bdag cag la sogs pa sems can thams cad re ba thams cad yongs su rdzogs par gyur cig /sangs rgyas kyi byang chub las phyir mi ldog par gyur cig /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po la phyag 'tshal ba dang / mchod pa snga ma bzhin du byas te/ smon lam 'di skad ces gdab bo//deng rgyal ba sras dang bcas pa'i tshogs gdan 'dzom pa'i spyan sngar de bzhin gshegs pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po'i mtshan yid la dran zhing lan bdun brjod pa dang / phyag 'tshal zhing mchod pa la sogs pa'i mthus/bcom ldan 'das rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po de'i sngon gyi smon lam khyad par can dang mthun par/ bdag cag la sogs pa sems can gang dag zhing las kyi mtha' dang tshong la dga' ste/g.yeng ba sna tshogs mang bas dge ba'i chos rnams dang / byang chub kyi sems yid la byed pa las yongs su nyams te 'khor ba na 'khyams la/ so sor 'gro ba'i sdug bsngal rgal ba dang / na ba dang / rgud pa dang / 'chi ba dang / sdug bsngal ba dang / yid mi bde ba dang /mya ngan dang / sme sngags 'don pa dang / 'khrug pa sna tshogs so sor myong ba de dag thams cad bla na med pa'i byang chub tu sangs rgyas kyi bar du bsams ma thag tu bza' ba dang / bgo ba dang / btung ba dang / longs spyod dang / nor dang / 'bru dang / dbyig dang / gser rnams 'byung zhing 'byor pa phun sum tshogs par gyur cig /dge ba'i chos rnams kyis rnam par 'phel bar gyur cig /byang chub kyi sems yid la byed pa dang mi 'bral bar gyur cig /ngan song gsum dang / sems can dmyal ba la sogs pa 'khor ba'i sdug bsngal thams cad las yongs su thar bar gyur cig /bdag cag la sogs pa sems can gang dag grang ba dang / tsha ba dang / bkres pa dang / skom pas lus yongs su gdungs shing sdug bsngal gyi tshor bas nyam thag pa de dag thams cad kyi sngon gyi las kyi sgrib pa de dag yongs su byang bar gyur cig /skye ba de yang tha mar gyur cig /bla na med pa'i byang chub tu sangs rgyas kyi bar du skye ba'i sdug bsngal thams cad las yongs su thar bar gyur cig /lha'i bde ba myong bar gyur cig /bud med gang dag nad sna tshogs kyis lus yongs su gang zhing bud med kyi skye gnas la smod pa dang /sems can gang dag btsas pa'i dus kyi sdug bsngal gyi tshor ba myong ba de dag thams cad dang sdug bsngal thams cad rgyun chad par gyur cig /skye ba de yang tha ma par gyur cig /byang chub kyi mthar thug gi bar du skyes pa nyid thob par gyur cig /bdag cag la sogs pa sems can gang dag 'chi ba dang /dgra dang dgon pa'i gnod pas gtses pa dang / phan tshun du pha ma dang / sring mo dang / mdza' bshes dang / nye du'i mya ngan myong zhing sdug bsngal ba dang / mya ngan gyi zug rngus lus la zug pa de dag thams cad byang chub kyi mthar thug gi bar du 'chi ba dang /dgra dang / dgon pa'i gnod pa thams cad rab tu zhi bar gyur cig /mya ngan dang sdug bsngal dang bral bar gyur cig /bdag cag la sogs pa sems can gang dag mtshan mo mun pa mun nag na rnam par rgyu ba/ las kyi mtha' rnam pa sna tshogs la zhugs pa/sdig pa can gyi gdon sna tshogs kyis gtses pa/ 'jigs pas smre sngags sna tshogs 'don pa dang / de dag thams cad byang chub kyi mthar thug gi bar du mun pa mun nag thams cad med par gyur cig /sdig pa can gyi gdon thams cad byams pa la gnas par gyur cig /mchod pa dang rim gro bya ba sna tshogs la mngon par brtson par gyur cig /bdag cag la sogs pa sems can gang dag dman pa la mos shing shes rab chung la dran pa rmongs te/ dge ba'i chos rnams dang stobs dang / byang chub kyi yan lag dang /ting nge 'dzin dang / gzungs kyi sgo rnams dang / sangs rgyas dang / chos dang / dge 'dun rjes su dran pa las yongs su nyams pa de dag thams cad byang chub kyi mthar thug gi bar du ting nge 'dzin dang / dran pa dang / stobs dang / byang chub kyi yan lag dang / gzungs kyi sgo rnams mngon du gyur cig /shes rab chen po rjes su rgyu bar gyur cig /bdag cag la sogs pa sems can gang dag dman pa la mos shing nyan thos kyi theg pa dang / rang sangs rgyas kyi theg pa la 'dod pa bskyed de/ de la gnas shing bla na med pa yang dag par rdzogs pa'i byang chub la rgyab kyis phyogs par gyur pa de dag thams cad byang chub kyi mthar thug gi bar du bla na med pa yang dag par rdzogs pa'i byang chub las phyir mi ldog par gyur cig /nyan thos dang rang sangs rgyas kyi sa las yang dag par 'da' bar gyur cig /byang chub yid la byed pa dang /mi 'bral bar gyur cig /bdag cag la sogs pa sems can gang dag bskal pa chen po zad pa'i tshe 'dzam bu'i gling kun du 'bar zhing rab tu 'bar bar 'khrugs par gyur te/ ngu zhing mya ngan byed la sngon gyi mi dge ba'i las kyi rgyus sdug bsngal myong zhing skyabs med mgon med pa de dag thams cad sdug bsngal dang /mya ngan dang bral bar gyur cig /bsil ba'i dngos po thob par gyur cig /de nas shi 'phos nas kyang bcom ldan 'das de bzhin gshegs pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po de'i sangs rgyas kyi zhing rnam par dag par pad+ma'i snying po'i seng ge'i khri la rdzus te skye bar gyur cig /skyes ma thag tu gzungs dang / ting nge 'dzin la sogs pa yon tan gyi tshogs thams cad mngon du gyur te/ ston pa bla na med pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal bo la sogs pa phyogs bcu'i sangs rgyas thams cad las bka' lung yang dag par nod pa dang /thugs mnyes par byed cing skad cig skad cig la sangs rgyas kyi zhing thams cad du thogs pa med par 'jug par gyur cig /gzhan yang bdag cag la sogs pa sems can thams cad de bzhin gshegs pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po dang /byang chub sems dpa' thams cad kyis dgongs par gyur cig /sdig pa dang las kyi sgrib pa thams cad byang bar gyur cig /'dod chags dang / zhe sdang dang / gti mug bsrabs par gyur cig /yun ring du 'tsho zhing nad med par gyur cig /gang bsams pa'i bsam pa thams cad yongs su rdzogs par gyur cig /'thab pa dang / 'thab mo dang / rtsod pa dang / 'gyed pa thams cad rab tu zhi bar gyur cig /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas gser bzangs dri med rin chen snang brtul zhugs grub pa la phyag 'tshal ba dang / mchod pa snga ma bzhin du byas te smon lam 'di skad ces gdab bo/ / deng rgyal ba sras dang bcas pa'i tshogs gdan 'dzom pa'i spyan sngar/ de bzhin gshegs pa gser bzangs dri med rin chen snang brtul zhugs grub pa'i mtshan yid la dran zhing lan bdun brjod pa dang / phyag 'tshal zhing mchod pa la sogs pa'i mthus/ de bzhin gshegs pa gser bzangs dri med rin chen snang brtul zhugs grub pa de'i sngon gyi smon lam khyad par can dang mthun par bdag cag la sogs pa sems can gang dag srog gcod pa/srog gcod pa'i mi dge ba'i las rnam pa sna tshogs byed pa/ srog chags rnam pa sna tshogs kyi srog gcod par byas pas tshe thung zhing nad mang ba dang /chu dang / dug dang / mtshon dang / me dang / nad sna tshogs kyis 'chi bar 'gyur ba de dag thams cad las kyi sgrib pa de yongs su byang ste tshe ring bar gyur cig /su yang dus ma yin par 'chi ba'i dus byed par ma gyur cig /bdag cag la sogs pa sems can gang dag sdig pa mi dge ba sna tshogs bya ste/ gzhan gyi rdzas brkus phrogs pas dbul po'i khyim du skyes te/ sgren mo dang / bkres pa dang / skom pas lus yongs su gdungs shing sdug bsngal myong ba de dag thams cad 'phral du sdig pa thams cad byang ste/byang chub kyi mthar thug gi bar du dbang phyug phun sum tshogs shing ma tshang ba med pa thob par gyur cig /bdag cag la sogs pa sems can gang dag gcig la gcig gnod sems dang ldan zhing phan tshun srog gcod par byed pa dang /'thab pa de dag thams cad bla na med pa'i byang chub tu sangs rgyas kyi bar du phan tshun pham ltar byams pa la gnas par gyur cig /bdag cag la sogs pa sems can gang dag 'dod chags dang / zhe sdang dang / gti mug gis bsgribs te/ tshul khrims 'chal bar gyur nas/sdig pa kun tu spyod cing bslab pa dral la dad pas byin pa longs spyod pas ngan song gsum du ltung zhing sems can dmyal bar 'gro bar 'gyur ba de dag thams cad 'phral du las kyi sgrib pa thams cad yongs su byang bar gyur cig /nye ba'i nyon mongs pa rnams dang bral bar gyur cig /byang chub kyi snying po la thug gi bar du tshul khrims yang dag par 'dzin cing lus dang ngag dang yid sdom pa la gnas par gyur cig /byang chub kyi sems yid la byed pa dang mi 'bral bar gyur cig /tar+ya thA/ sid+d+he sid+d+he/ su sid+d+he/ mo tsa ni mok+Sha ni/ muk+te/ bi muk+te/ a ma le/ bi ma le/ mang+ga l+ye/ hi raN+ye gar+b+he/ rat+na gar+b+he/ sarbAr+tha sA d+ha ni/ pa ra mAr+tha sA d+ha ni/ ma na se/ ma hA ma na se/ ad bud+d+he/ a t+yang bud+d+he/ b+hi ta b+ha ye/ su bar+Ne brah+ma g+hoShe/ brah+ma d+h+yu Shi te/ sarbAr+the ShA pa rA dzi te/ sarba tra a pra ti ha ta/ tsa tuSh+Ti bud+d+ha/ ko Ti b+ha Shi te/ namaHsarba ta thA ga rta tri mA na swA hA/bcom ldan 'das de bzhin gshegs pa gser bzangs dri med rin chen snang brtul zhugs grub pa des byang chub kyi shing drung du bzhugs te/ sems can 'dod chags dang / zhe sdang dang / gti mug gis bsgribs pa/ nad sna tshogs kyis lus gzir ba/'ching ba dang / dgra dang / dgon pas gnod par gyur pa/ tshe bskal par thub pa'i sems can dmyal bar gzhol ba'i sems can rnams gzigs nas/ de dag gi don dang / sangs rgyas kyi byang chub la dgod pa dang / las kyi sgrib pa thams cad zad par bya ba'i phyir/gzungs sngags kyi gzhi gsungs pa 'di dag bzlas pa'i mthu dang / bcom ldan 'das gser bzangs dri med rin chen snang brtul zhugs grub pa'i byin gyi rlabs kyis bdag cag la sogs pa sems can thams cad kyi mtshams med pa lnga la sogs pa sdig pa thams cad yongs su byang bar gyur cig /nad thams cad rab tu zhi bar gyur cig /'chi ba dang / dgra dang / dgon pa'i gnod pa thams cad rab tu zhi bar gyur cig /re ba dang bsam pa thams cad yongs su rdzogs par gyur cig /'chi ba'i tshe yang bcom ldan 'das gser bzangs dri med rin chen snang brtul zhugs grub pas dgongs par gyur cig /shi 'phos nas kyang de bzhin gshegs pa gser bzangs dri med rin chen snang brtul zhugs grub pa'i sangs rgyas kyi zhing du pad+ma'i snying po'i seng ge'i khri la rdzus te skye zhing skyes ma thag tu gzungs dang / ting nge 'dzin la sogs pa yon tan gyi tshogs thams cad mngon du gyur te/ston pa bla na med pa gser bzangs dri med rin chen snang brtul zhugs grub pa la sogs pa phyogs bcu'i sangs rgyas thams cad las bka' lung yang dag par nod pa dang / thugs mnyes par byed cing skad cig skad cig la sangs rgyas kyi zhing thams cad du thogs pa med par 'jug par gyur cig /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas mya ngan med mchog dpal la gus par phyag 'tshal ba dang / mchod pa snga ma bzhin du bya ste/smon lam 'di skad ces gdab bo/ /deng rgyal ba sras dang bcas pa'i tshogs gdan 'dzom pa'i spyan sngar/ de bzhin gshegs pa mya ngan med mchog dpal gyi mtshan yid la dran zhing lan bdun brjod pa dang / phyag 'tshal zhing mchod pa la sogs pa'i mthus/de bzhin gshegs pa mya ngan med mchog dpal de'i sngon gyi smon lam khyad par can dang mthun par bdag cag la sogs pa sems can gang dag mya ngan dang / sdug bsngal dang / yid mi bde ba dang / 'khrug pa mang ba sdug bsngal sna tshogs myong ba de dag thams cad mya ngan dang /sdug bsngal ba dang / yid mi bde ba dang / 'khrug pa thams cad rab tu zhi bar gyur cig /su yang sdug pa dang bral ba'i sdug bsngal myong bar ma gyur cig /tshe ring bar gyur cig /bdag cag la sogs pa sems can gang dag sdig pa mi dge ba rnam pa sna tshogs byas te/mnar med pa'i sems can dmyal ba chen po mun pa mun nag chen po can du skye bar 'gyur pa'am/ skyes pa de dag la de bzhin gshegs pa mya ngan med mchog dpal gyi sku las 'od zer gyi snang ba 'phros pa byung bas reg cing mthong bar gyur te/ de ma thag tu sdig pa thams cad byang nas sems can dmyal ba chen po'i sdug bsngal de dag las yongs su thar bar gyur cig /sdug bsngal gyi tshor ba thams cad rgyun chad par gyur cig /byang chub kyi snying po la thug gi bar du lha dang mi'i bde ba myong bar gyur cig /bdag cag la sogs pa sems can gang dag sngon sdig pa mi dge ba bgyis te/gzhan gyi rdzas phrogs pas dbul po dman pa'i khyim du skyes nas/ gos dang / bza' ba dang / btung ba dang / mal cha dang / rgyan mi bdog pa grang ba dang / tsha ba'i sdug bsngal myong ba/ bkres pa dang / skom pas lus gzir cing mdog ngan par gyur pa'am 'gyur ba de dag thams cad byang chub kyi mthar thug gi bar du bgo ba dang / bza' ba dang / btung ba dang / mal cha thams cad la yid bzhin du longs spyod par gyur cig /lus la lha'i lus kyi kha dog gis brgyan par gyur cig /bdag cag la sogs pa sems can gang dag gnod sbyin dang / srin po dang / 'byung po dang / sha za rnams kyis gtses shing mdongs phrogs te/ nad kyi sdug bsngal sna tshogs myong ba de dag thams cad byang chub kyi mthar thug gi bar du/ gnod sbyin dang / srin po dang / 'byung po dang / sha za rnams kyis mdongs phrogs pa de dag thams cad rab tu zhi zhing byams pa la gnas par gyur cig /nad kyi sdug bsngal sna tshogs las yong sus thar bar gyur cig /'di nas shi 'phos nas kyang de bzhin gshegs pa mya ngan med mchog dpal gyi sangs rgyas kyi zhing du pad+ma'i snying po'i seng ge'i khri la rdzus te skye zhing skyes ma thag tu gzungs dang ting nge 'dzin la sogs pa yon tan gyi tshogs thams cad mngon du gyur te/ston pa bla na med pa mya ngan med mchog dpal la sogs pa phyogs bcu'i sangs rgyas thams cad las bka' lung yang dag par nod pa dang /thugs mnyes par byed cing skad cig skad cig la sangs rgyas kyi zhing thams cad du thogs pa med par 'jug par gyur cig /gzhan yang bdag cag la sogs pa sems can thams cad kyi sgrib pa thams cad yongs su byang bar gyur cig / byang chub kyi mthar thug gi bar du nam yang su yang log par ltung bar 'gro bar ma gyur cig /skye ba dran par gyur cig /lha thams cad kyis rjes su gzung bar gyur cig /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas chos bsgrags rgya mtsho'i dbyangs la gus par phyag 'tshal ba dang /mchod pa snga ma bzhin du byas te/ smon lam 'di skad ces gdab bo/ /deng rgyal ba sras dang bcas pa'i tshogs gdan 'dzom pa'i spyan sngar/ de bzhin gshegs pa chos bsgrags rgya mtsho'i dbyangs kyi mtshan thos te yid la dran zhing lan bdun brjod de phyag btsal ba dang /mchod pa la sogs pa'i mthus/ de bzhin gshegs pa chos bsgrags rgya mtsho'i dbyangs de'i sngon gyi smon lam khyad par can dang mthun par/ bdag cag la sogs pa sems can gang dag log par lta ba can gyi khyim du skyes pas/sangs rgyas dang chos dang dge 'dun la sems ma dad pa byang chub kyi sems yid la byed pa las ring du gyur pa de dag thams cad kyi las kyi sgrib pa de zad par gyur nas/ byang chub kyi mthar thug gi bar du yang dag pa'i lta ba can du gyur cig/ sangs rgyas dang chos dang dge 'dun la dad pa mi phyed pa dang ldan par gyur cig /byang chub kyi sems yid la byed pa las phyir mi ldog par gyur cig /bdag cag la sogs pa sems can gang dag gang na sangs rgyas kyi sgra mi grag pa/ chos kyi sgra mi grag pa/ dge 'dun gyi sgra mi grag pa'i yul mtha' 'khob tu skyes te/mi dge ba'i bshes gnyen gyi dbang gis sdig pa'i las byed pa de dag /de nas shi 'phos nas ngan song du ltung zhing / dge ba'i chos rnams las yongs su nyams par gyur pa de dag la/ de bzhin gshegs pa chos bsgrags rgya mtsho'i dbyangs kyi mtshan rna lam du grags par gyur cing /chos kyi sprin dang / rgya mtsho'i sgra 'byung bar gyur cig /de dag gis chos kyi sgra de thos nas sngon gyi las zad par gyur te/ byang chub kyi mthar thug gi bar du byang chub kyi sems yid la byed pa dang mi 'bral bar gyur cig /bdag cag la sogs pa sems can gang dag /gos dang / rgyan dang / spos dang / phreng ba dang / byug pa dang / mal cha dang / na ba'i gso sman dang bral zhing mi ldan pa'i dbang gis sdug bsngal myong zhing sdig pa'i las byed pa de dag thams cad gos dang /rgyan dang / spos dang / phreng ba dang / byug pa dang / mal cha dang / na ba'i gso sman dang / yongs su spyad pa dang / longs spyod rnams bsags ma thag tu 'byung zhing mi ldan pa med par gyur cig /byang chub kyi mthar thug gi bar du su yang ci la yang mi ldan pa med de/dpal phun sum tshogs pa la dbang 'byor bar gyur cig /bdag cag la sogs pa sems can gang dag sngon gyi las kyi rnam par smin pas phan tshun 'thab mo dang 'thab pa dang / rtsod pa dang / 'gyed par gyur cing gcig la gcig gnod par bya ba dang / gsad par bya ba'i phyir brtul ba mtshon dang mda' dang dbyug pa dag gis bsnun pas sdug bsngal bar gyur pa'am 'gyur ba de dag thams cad mda' dang mtshon dang dbyug pa la sogs pa slar log cing phyir phyogs par gyur cig /dgra thams cad kyang byams pa la gnas par gyur cig /su'i srog gi dbang po yang 'gag par ma gyur cig /byang chub kyi mthar thug gi bar du rang rang gi rdzas dang / longs spyod dang dbang phyug dag gis chog shes par gyur cig /'di nas shi 'phos nas kyang de bzhin gshegs pa dgra bcom pa yang dag par rdzogs pa'i sangs rgyas chos bsgrags rgya mtsho'i dbyangs kyi sangs rgyas kyi zhing du pad+ma'i snying po seng ge'i khri la rdzus te skye zhing skyes ma thag tu gzungs dang /ting nge 'dzin la sogs pa'i yon tan gyi tshogs thams cad mngon du gyur te/ ston pa bla na med pa chos bsgrags rgya mtsho'i dbyangs la sogs pa/phyogs bcu'i sangs rgyas thams cad las bka' lung yang dag par nod pa dang / thugs mnyes par byed cing skad cig skad cig la sangs rgyas kyi zhing thams cad du thogs pa med par 'jug par gyur cig /gzhan yang bdag cag la sogs pa sems can thams cad kyi sdig pa thams cad yongs su byang bar gyur cig /sangs rgyas kyi byang chub las phyir mi ldog par gyur cig /skye ba thams cad du tshe rabs dran par gyur cig /tshe rabs thams cad du de bzhin gshegs pa dang phrad par gyur cig /rtag tu nad med cing tshe ring bar gyur cig /log par ltung bar nam yang 'gro bar ma gyur cig /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas chos rgya mtsho mchog gi blos rnam par rol pa mngon par mkhyen pa la phyag 'tshal ba dang / mchod pa snga ma bzhin du byas te/smon lam 'di skad ces btab bo/ /deng rgyal ba sras dang bcas pa'i tshogs gdan 'dzom pa'i spyan sngar/ de bzhin gshegs pa chos rgya mtsho mchog gi blos rnam par rol pa mngon par mkhyen pa'i mtshan thos te yid la dran zhing len bdun brjod de phyag 'tshal ba dang / mchod pa la sogs pa'i mthus de bzhin gshegs pa chos rgya mtsho mchog gi rnam par rol pa mngon par mkhyen pa de'i sngon gyi smon lam khyad par can dang mthun par/ bdag cag la sogs pa sems can gang dag zhing las dang sa bon 'debs pa dang / tshong byed pa dang /'thab mo dang rtsod pa la spro ba/ sdig pa'i las byed pa de dag thams cad bsams ma thag tu 'tshog chas thams cad 'byor par gyur cig /gnod sems med par gyur cig /rtag tu dge ba'i sems spyod par gyur cig /bdag cag la sogs pa sems can gang dag mi dge ba bcu'i las kyi lam yang dag par blangs pas sems can dmyal bar 'gro bar 'gyur ba de dag thams cad dge ba bcu'i las kyi lam dang ldan par gyur cig /sems can gang yang dmyal bar 'gro bar ma gyur cig /bdag cag la sogs pa sems can gang dag gzhan gyi dbang du song ste/chad pas bcad pa dang / brdeg pa dang / go rar gzhug pa dang / bsad pa'i 'os su gyur pa de dag thams cad byang chub kyi mthar thug gi bar du bcing ba dang brdeg pa la sogs pa las thar bar gyur cig /bla na med pa'i rang dbang phun sum tshogs pa dang ldan par gyur cig /bdag cag la sogs pa sems can gang dag tshe thung bar 'gyur ba'i sdig pa mi dge ba rnam pa sna tshogs byas te/ 'chi bar 'gyur ba de dag thams cad sdig pa'i las thams cad yongs su byang ste tshe ring zhing dus ma yin par 'chi bar 'gyur bas nam yang 'ga' yang 'chi bar ma gyur cig /'chi kar yang de bzhin gshegs pa chos rgya mtsho mchog gi blos rnam par rol pa mngon par mkhyen pa'i mtshan rna lam du grags shing rjes su dran nas/ bde 'gro mtho ris kyi 'jig rten du skye bar gyur cig /byang chub kyi mthar thug gi bar du lha dang mi'i bde ba myong bar gyur cig /'di nas shi 'phos nas kyang bcom ldan 'das de bzhin gshegs pa dgra bcom pa yang dag par rdzogs pa'i sangs rgyas chos rgya mtsho mchog gi blos rnam par rol ba mngon par mkhyen pa'i sangs rgyas kyi zhing du pad+ma'i snying po'i seng ge'i khri la rdzus te skye zhing /skyes ma thag tu gzungs dang ting nge 'dzin la sogs pa yon tan gyi tshogs thams cad mngon du gyur te/ ston pa bla na med pa chos rgya mtsho mchog gi blos rnam par rol pa mngon par mkhyen pa la sogs pa phyogs bcu'i sangs rgyas thams cad las bka' lung yang dag par nod pa dang /thugs mnyes par byed cing skad cig skad cig la sangs rgyas kyi zhing thams cad du thogs pa med par 'jug par gyur cig /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas sman gyi bla bai DUr+ya 'od kyi rgyal po la gus par phyag 'tshal ba dang /mchod pa snga ma bzhin du byas te smon lam 'di skad ces gdab bo/ /deng rgyal ba sras dang bcas pa'i tshogs gdan 'dzom pa'i spyan sngar de bzhin gshegs pa sman gyi bla be+e DUr+ya 'od kyi rgyal po'i mtshan thos te/ yid la dran zhing lan bdun brjod de phyag btsal ba dang /mchod pa la sogs pa'i mthus/ de bzhin gshegs pa sman gyi bla bai DUr+ya'i 'od kyi rgyal po de'i sngon gyi smon lam khyad par can dang mthun par bdag cag la sogs pa sems can thams cad skyes bu chen po'i mtshan sum cu rtsa gnyis dang /dpe byad bzang po brgyad cus legs par brgyan pa/ de bzhin gshegs pa de ci 'dra ba de bzhin du/ sems can thams cad kyang de 'dra bar gyur cig /lus kyi 'od kyis 'jig rten gyi khams grangs med dpag gis mi lang ba/ lham me/ lhan ne/ lhang nger gyur cig /bdag cag la sogs pa sems can thams cad lus nor bu rin po che be+e DUr+ya ci 'dra ba de 'dra bar phyi nang shin tu yongs su dag pa dang / dri ma med la 'od gsal ba dang / kho lag yangs shing che ba dang / dpal dang gzi brjid 'bar ba dang / legs par gnas pa dang /nyi ma dang zla ba las lhag pa'i 'od zer gyi dra ba rnams kyis legs par brgyan par gyur pa/ de bzhin gshegs pa sman gyi bla bai DUr+ya'i 'od kyi rgyal po ci 'dra ba de 'dra bar gyur cig /sems can gang dag 'jig rten gyi bar dag tu skyes pa dag dang / mi'i 'jig rten na mtshan mo mun pa mun gnag gi nang na/ phyogs tha dad par 'gro ba de dag de bzhin gshegs pa de'i 'od kyis phyogs bcu'i dga' dgur 'gro zhing las kyang byed par gyur cig /de bzhin gshegs pa sman gyi bla be+e DUr+ya'i 'od kyi rgyal po de shes rab dang thabs dpag tu med pas/bdag cag la sogs pa sems can gyi khams dpag gis mi lang ba dag longs spyod zad mi shes pa dang ldan par gyur te/ su yang cis kyang brel ba med par gyur cig /bdag cag la sogs pa sems can gang dag lam ngan par zhugs pa dang /nyan thos dang rang sangs rgyas kyi lam du zhugs pa de dag thams cad theg pa chen po bla na med pa'i lam la zhugs par gyur cig /bdag cag la sogs pa sems can gang dag de bzhin gshegs pa de'i drung na tshangs par spyad pa spyod pa dang / sems can dpag tu med cing dpag gis mi lang ba de dag thams cad byang chub kyi mthar thug gi bar du/sdom pa gsum gyis bsdoms pa dang / tshul khrims nyams pa med par gyur cig /su yang tshul khrims log par zhugs te ngan 'gror 'gro bar ma gyur cig /bdag cag la sogs pa sems can gang dag lus ngan pa dang /dbang po ma tshang ba dang / mdog mi sdug pa dang / bems po dang / yan lag skyon can dang / skur po dang / sha bkra can dang / zhar ba dang / long ba dang / 'on pa dang / smyon pa dang / lus la nad kyis btab pa de dag thams cad las kyi sgrib pa thams cad byang nas dbang po tshang zhing yan lag yongs su rdzogs par gyur cig /bdag cag la sogs pa sems can gang dag nad sna tshogs kyis lus gzir ba/ skyabs med pa/ mgon med pa/ 'tshog chas dang / sman mi bdog pa/ dpung gnyen med pa/dbul ba/ sdug bsngal ba de dag gi nad thams cad rab tu zhi bar gyur cig /byang chub kyi mthar thug gi bar du nad med cing gnod pa med la/ yo byad phun sum tshogs pas gnas par gyur cig /bud med gang dag bud med kyi skyon brgya dag gis kun nas nyon mongs par gyur pa/bud med kyi dngos po la mi dga' ba/ bud med kyi skye gnas las thar bar 'dod pa de dag thams cad bud med kyi dngos po las log par gyur cig /byang chub kyi mthar thug gi bar du skyes pa'i dbang po dang ldan par gyur cig /bdag cag la sogs pa sems can gang dag bdud kyi zhags pa las yongs su thar bar gyur cig /lta ba tha dad pa mi mthun pa gzing gzing bas mi mthun pa dag spangs te/ yang dag pa'i lta ba la gnas par gyur cig /byang chub kyi spyod pa rlabs po che rdzogs par gyur cig /bdag cag la sogs pa sems can gang dag rgyal pos 'jigs skrag pa bcing ba dang /brdeg pa dang / go rar gzhug pa dang / bsad par 'os pa rgyu du mas kun du gtses pa/ nga rgyal dang bral ba/ lus dang ngag dang / sems sdug bsngal gyis nyen pa de dag thams cad gnod pa thams cad las yongs su thar bar gyur cig /bdag cag la sogs pa sems can gang dag bkres pa dang / skam pa'i me rab tu 'bar ba/ kha zas tshol ba la rab tu brtson pa/ sdig pa'i las byed pa de dag thams cad kha dog dri dang ror ldan pa'i bza' btung gis tshim par gyur cig /dam pa'i chos kyi ros shin tu bde ba la gnas par gyur cig /bdag cag la sogs pa sems can gang dag sgren mo bgo ba med pa/ dbul ba/ sdug bsngal ba/ grang ba dang / tsha ba dang / sbrang bu dang / sha sbrang dag gis nyin mtshan du sdug bsngal gyi tshor ba myong ba de dag thams cad gos sna tshogs dang /rin po che'i rgyan dang / spud pa dang / phreng ba dang / byug pa dang / rol mo sna tshogs kyis bsam pa thams cad yongs su rdzogs shing 'phags pa dgyes pa'i tshul khrims kyi dga' ba dang yang ldan te/ nyon mongs pa sna tshogs kyi gnod pas mi brdzi bar rnam par grol ba'i bde ba la gnas par gyur cig /'di nas shi 'phos nas kyang de bzhin gshegs pa sman gyi bla bai DUr+ya'i 'od kyi rgyal po'i sangs rgyas kyi zhing du pad+ma'i snying po'i seng ge'i khri la rdzus te skye zhing / skyes ma thag tu gzungs dang / ting nge 'dzin la sogs pa yon tan gyi tshogs thams cad mngon du gyur te/ston pa bla na med pa sman gyi bla bai DUr+ya'i 'od kyi rgyal po la sogs pa phyogs bcu'i sangs rgyas thams cad las/ bka' lung yang dag par nod pa dang / thugs mnyes par byed cing skad cig skad cig la sangs rgyas kyi zhing thams cad du thogs pa med par 'jug par gyur cig /gzhan yang bdag cag la sogs pa sems can gang dag chags pa dang / ser snas zil gyis non pa'i dbang gis yi dags sam/ dud 'gror skyes pa'am/ skye bar 'gyur ba de dag thams cad mi'i 'jig rten du skye zhing tshe rabs dran pa dang /ngan 'gro'i 'jigs pas skrag nas 'dod pa'i yon tan don du mi gnyer ba dang / sbyin pa la dga' ba dang / sbyin pa'i bsngags pa brjod pa dang / bdog pa thams cad yongs su btang ste/ nor gyi phung po gzhan lta ci smos te/rang gi mgo dang yan lag dang sha khrag kyang slong ba rnams la rab tu sbyin par 'gyur ba'i ngang tshul can du gyur cig /bdag cag la sogs pa sems can gang dag de bzhin gshegs pa'i bslab pa'i gnas log par 'dzin te/ tshul khrims dang ldan pa/ tshul khrims tsam srung gi /mang du thos pa yongs su mi tshol ba rnams dang / mang du thos pa mdo sde rnams kyi don zab mo mi shes shing lhag pa'i nga rgyal can du gyur pa/ gzhan dag la phrag dog byed cing / dam pa'i chos la dbang za zhing spong ba'i dbang gis sems can dmyal ba mi bzad par ltung pa'am/'gro bar 'gyur ba de dag thams cad ngan 'gro'i gnas nas thar la/ mi'i 'jig rten du skye zhing yang dag pa'i lta ba can dang / brtson 'grus dang ldan pa'i dge ba'i bsam pa can du gyur cig /khyim spangs te sangs rgyas kyi bstan pa la rab tu byung nas/byang chub sems dpa'i spyad pa spyod par gyur cig /bdag cag la sogs pa'i sems can gang dag bdag la bstod cing gzhan la smod pa'i dbang gis ngan song gsum po dag tu lo stong phrag mang por sdug bsngal zhing de las thar nas kyang / ba lang dang / rta dang / rnga mo dang bong bu la sogs pa dud 'gro dbyug lcag gis brdeg pa dang / bkres skom gyis nyen pa dang / khal chen pos gzir bar gyur pa dang / brgya la mir skyes na yang rtag tu rigs dma' ba dang / bran du 'gyur zhing gzhan gyi dbang du 'gyur bar skye bar 'gyur ba'am/ skyes pa de dag thams cad sdug bsngal thams cad las yongs su thar bar gyur nas dbang po rno ba dang / mkhas pa dang / gsal ba dang / yid gzhungs pa dang / dge ba yongs su btsal ba la brtson pa dang / rtag tu dge ba'i bshes gnyen dang 'grogs pa dang / bdud kyi zhags pa gcod pa dang /ma rig pa'i sgo nga'i sbubs gcog pa dang / nyon mongs pa'i chu klung skems par gyur cig /skye ba dang / rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams las yongs su thar bar gyur cig / sems can gang dag phra ma la dga' zhing phan tshun 'thab pa dang / rtsod pa'i sems su gyur pas phan tshun gnod par bya ba'i phyir lha tha dad pa dang / 'byung po tha dad pa dag 'gugs par byed pa/ dud 'gro dag gi srog gcod cing sha dang khrag za ba'i srin po rnams mchod nas dgra bo'i ming nas brjod de/gzugs byas nas rig sngags drag po bsgrub cing byad dang ro langs kyi sbyor bas srog gi bar chad bya ba dang / lus rnam par gzhig par 'dod pa de dag thams cad gang gis kyang gcig la gcig bar chad byed mi nus te/ phan tshun byams pa dang / phan pa'i sems su gyur cig /gnod sems med par gyur cig /lha 'dre dang / byad dang / ro langs dang / phra men gyi sbyor ba ngan pa thams cad rang zhig cing rang zhi bar gyur cig /rang rang gi bdog pas chog shes par gyur cig /bdag cag la sogs pa sems can gang dag /de bzhin gshegs pa tshe dpag med bzhugs pa'i 'jig rten gyi khams bde ba can du skye bar smon pa de dag thams cad 'chi kar byang chub sems dpa' brgyad rdzu 'phrul gyis lhags nas lam ston cing bde ba can du rdzus te skye bar gyur cig /de las gang dag lhar skyes pa dag gi sngon gyi dge ba'i rtsa ba zad par mi 'gyur zhing ngan 'gror mi ltung ba dang /'di nas shi 'phos nas mi'i 'jig rten 'dir gling bzhi pa'i dbang phyug 'khor los sgyur ba'i rgyal por gyur nas/ sems can bye ba khrag khrig brgya stong mang po dge ba bcu'i las kyi lam la 'god par gyur cig /gzhan du na yang rgyal rigs dang / bram ze dang / khyim bdag shing sA la chen po lta bu'i khyim dag dang / nor dang / 'bru dang bang ba mang po 'byor pa'i khyim dag tu skye zhing / gzugs dang dbang phyug dang / g.yog 'khor phun sum tshogs pa dang /dpa' ba dang / brtul phod pa dang / tshan po che chen po'i stobs kyi shugs dang ldan par gyur cig /bu 'dod pa thams cad bu rnyed par gyur cig /sdig ba can gyi rmi lam rmis pa dang / ltas ngan sna tshogs mthong ba dang / gnas gang du bkra mi shis pa brgya snyed gnas pa de dag thams cad kyang rmi lam ngan pa dang /ltas ngan pa dang / bkra mi shis pa'i dbang po thams cad mthong bar mi 'gyur zhing zhi bar gyur cig /chu dang / me dang / mtshon dang / dug dang / g.yang sa dang / glang po che gtum bo dang / stag dang / dom dang / dred dang / sbrul gdug pa dang / sdig pa dang / rkang lag brgya pa dang / pha rol gyi dmag tshogs dang / rkun po dang / tshom po'i 'jigs pa thams cad las thar bar gyur cig /bdag cag la sogs pa sems can gang dag skyabs gsum mam/ bslab pa'i gzhi lnga'am/ bcu'am/ byang chub sems dpa'i sdom pa bzhi brgya po'am/ dge slong gi bslab pa nyis brgya lnga bcu'am/ dge slong ma'i bslab pa'i gzhi lnga brgya po yongs su 'dzin pa de las/ bslab pa'i gzhi gzung ba gang yang rung ba zhig nyams te/ ngan song ngan 'gros 'jigs skrag pa de thams cad ltung ba dang sdig pa dang sgrib pa de dag thams cad byang zhing bsal bar gyur cig /ngan song gsum gyi sdug bsngal gtan nas mi 'byung bar gyur cig /bud med gang dag bu btsa' ba'i sdug bsngal drag po myong ba de dag sdug bsngal de rab tu zhi bar gyur cig /bu yang yan lag yongs su tshang bar btsas shing gzugs bzang ba blta na sdug pa dang dbang po rno zhing blo dang ldan pa dang /nad med cing gnod pa med par gyur cig /de la mi ma yin pas mdangs phrogs mi nus par gyur cig /tad+ya thA/ g+hu me g+hu me/ i me ne mi hi ma ti ma ti sap+ta ta thA ga ta sa mA d+h+yad+hiSh+Thi te/a te ma te/ pA le pA paM sho d+ha ni/ sarba pA pan+nA sha ya/ ma ma bud+d+he bud+d+hot+ta me/ u me ku me/ bud+d+ha k+She tra pa ri sho d+ha ni d+ha me nir d+ha me/ me ru me ru me ru shi kha re/ sarba a kA la/ mr-i t+yu ni ba ra ni/ bud+d+he su bud+d+he/ bud+d+ha a d+hiSh+Thi te na rak+Shan+tu me sarba de bA/ sa me a sa me/ sa ma n+wA ha ran+tu me/ sarba bud+d+ha bo d+hi satwa/ sha me sha me/ pra sha man+tu me/ sarba i t+yu pa dra ba byA d+hA ya/ pA ra Ni pU ra Ni/ pU ra ya me/ sarba A sha bai DUr+ya pra ti b+ha se/ sarba pA pak+Sha yaM ka ri swA hA/ bdag cag la sogs pa sems can thams cad de bzhin gshegs pa dang / byang chub sems dpa' thams cad kyis dgongs par gyur cig /rdo rje 'dzin pa thams cad kyis yang dag par bsrung bar gyur cig /lha dang brgya byin dang / tshangs pa thams cad dang / rgyal po chen po bzhis yongs su bskyangs par gyur cig /mtshams med pa lnga la sogs pa las kyi sgrib pa thams cad yongs su byang bar gyur cig /nad thams cad kyis mi thebs par gyur cig /yun ring du 'tsho zhing dus ma yin par 'chi ba'i 'jigs pa thams cad las thar bar gyur cig /'chi ba dang / dgra dang / dgon pa'i gnod pa dang / 'thab pa dang / rtsod pa dang / 'gyed pa thams cad rab tu zhi bar gyur cig /dgra thams cad kyi dbang du mi 'gro bar gyur cig /ci bsams pa dang / gang smon pa'i bsam pa thams cad yongs su rdzogs par gyur cig /ston pa bcom ldan 'das dpal shAkya thub pa nas bzung ste/ gnod sbyin gyi sde dpon bcu gnyis kyi bar du phyag 'tshal ba dang /mchod pa snga ma bzhin du byas la so sor zhal gyis bzhes pa dang / thugs dam bcas pa bzhin du gsol ba gdab par bya'o/ /ston pa bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dpal shAkya thub pa la phyag 'tshal zhing skyabs su mchi'o//ston pa bcom ldan 'das de bzhin gshegs pa dpal shAkya thub pas bdag cag la sogs pa sems can gang dag las kyi sgrib pa sna tshogs kyis bsgribs pa/ nad sna tshogs kyis gzir ba/ mya ngan dang sdug bsngal sna tshogs kyis gtses pa/phongs par gyur pa thams cad rjes su bzung zhing lha dang mi rnams kyi don dang / sman pa dang bde ba'i slad du/ de bzhin gshegs pa bdun gyi thabs mkhas pa dang / sngon gyi smon lam khyad par rgyas pa'i byin gyis brlabs shing dpal gyi mgur nas 'di skad du/'jam dpal de lta bas na yon tan don du gnyer ba rnams kyis nyon mongs pa dang ma 'dres par de bzhin gshegs pa mtshan legs par yongs bsgrags dpal gyi rgyal po de'i mtshan gzung bar bya/ bklag par bya/ rab tu gus pas mchod par byas na/ de'i sdig pa thams cad dang /las kyi sgrib pa thams cad dang / nad thams cad rab tu zhi bar 'gyur/ re ba thams cad yongs su rdzogs par 'gyur/ sangs rgyas kyi byang chub la phyir mi ldog par 'gyur ro zhes ji skad bka' stsal pa dang / yang 'di skad du 'jam dpal de lta bas na/ bcom ldan 'das de bzhin gshegs pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po de'i mtshan nyin lan gsum mtshan lan gsum yid la bya/ gus par gzung zhing dad par bya/ sku gzugs bya/ me tog dang / bdug pa dang / spos dang /phreng ba dang / byug pa dang / rol mo'i sgra dang / mar me rnams kyis mchod par bya/ yan lag brgyad pa'i bsnyen gnas la nye bar gnas la nyin bdun gtsang mar byas te/ sa phyogs gtsang mar byas shing sangs rgyas kyi zhing der skye bar smon lam gdab/ sems can thams cad la byams pa dang /snying rje ba'i sems su byas nas/ de la de bzhin gshegs pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po des dgongs par 'gyur/ byang chub sems dpa' chen po rnams kyang sems par 'gyur/ sdig pa thams cad dang las kyi sgrib pa thams cad byang bar 'gyur/byang chub kyi sems yid la byed pa dang mi 'bral bar 'gyur/ 'dod chags dang zhe sdang dang gti mug dang bral bar 'gyur/ yun ring du 'tsho zhing nad med par 'gyur/ gang bsams pa'i bsam pa thams cad yongs su rdzogs par 'gyur/'thab pa dang / 'thab mo dang / rtsod pa dang / 'gyed pa thams cad rab tu zhi bar 'gyur/ 'di nas shi 'phos nas kyang sdig pa thams cad zad par 'gyur nas/ de bzhin gshegs pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po de'i sangs rgyas kyi zhing der pad+ma'i snying po'i seng ge'i khri la rdzus te skye bar 'gyur zhing skyes ma thag tu ting nge 'dzin dang /gzungs kyi sgo rnams mngon du 'gyur ro zhes ji skad bka' stsal pa dang / yang 'di skad du grogs po dag de bzhin gshegs pa gser bzangs dri med rin chen snang brtul zhugs grub pa'i mtshan dang /gzungs kyi tshig 'di dag nyin lan gsum mtshan lan gsum du sems can thams cad la snying rje ba'i sems kyis me tog la sogs pas mchod de/ gtsang mar byas nas 'phags pa'i lam yan lag brgyad dang ldan par byas na/de'i mtshams med pa lnga la sogs pa sdig pa thams cad yongs su byang bar 'gyur/ 'di nas shi 'phos nas kyang 'jig rten gyi khams der pad+ma'i snying po'i seng ge'i khri la rdzus te skye bar 'gyur/ nad thams cad rab tu zhi bar 'gyur/ 'chi ba dang / dgra dang / dgon pa'i gnod pa thams cad rab tu zhi bar 'gyur/ 'chi ba'i dus kyi tshe yang de bzhin gshegs pas dgongs par 'gyur/ re ba dang bsam pa thams cad yongs su rdzogs par 'gyur ro zhes ji skad bka' stsal pa dang / yang 'di skad du 'jam dpal gang dag gis bcom ldan 'das de bzhin gshegs pa mya ngan med mchog dpal de'i mtshan thos te/nyin lan gsum mtshan lan gsum brjod pa dang / sems can thams cad la byams pas gnas par bya ste/ de bzhin gshegs pa mya ngan med mchog dpal de la mchod pa byed pa de dag gi las kyi sgrib pa thams cad yongs su byang bar 'gyur/mya ngan dang / sdug bsngal dang / 'khrug pa thams cad las yongs su thar bar 'gyur/ byang chub kyi mthar thug gi bar du log par ltung bar 'gro bar mi 'gyur/ de bzhin gshegs pa mya ngan med mchog dpal de'i sangs rgyas kyi zhing du rin po che sna bdun gyi pad+ma'i snying po'i seng ge'i khri la rdzus te skye bar 'gyur/lha thams cad kyis rjes su gzung bar 'gyur ro zhes ji skad bka' stsal pa dang / yang 'di skad du de bzhin gshegs pa chos bsgrags rgya mtsho'i dbyangs de'i mtshan thos pa dang / 'dzin pa dang /dad par byed pa dang / rab tu gus pas mchod par byed pa de sdig pa thams cad yongs su byang nas sangs rgyas kyi byang chub las phyir mi ldog par 'gyur/ tshe rabs thams cad du tshe rabs dran par 'gyur/ nam du yang byang chub kyi sems dang 'bral bar mi 'gyur/ skye ba thams cad du de bzhin gshegs pa dang phrad par 'gyur/rtag tu nad med cing tshe ring bar 'gyur/ 'di nas shi 'phos nas kyang de bzhin gshegs pa chos bsgrags rgya mtsho'i dbyangs kyi sangs rgyas kyi zhing der skye bar 'gyur/ gzhan yang log par ltung bar 'gro bar mi 'gyur/ gang dang gang du skyes par bsams ma thag tu gos dang /rgyan dang / spos dang / phreng ba dang / mal cha dang / na ba'i gsos sman dang / yo byad dang / longs spyod dang / dbang phyug dang ldan par 'gyur ro zhes ji skad bka' stsal pa dang / yang 'di skad du/ 'jam dpal gang la la zhig gis yang dag par rdzogs pa'i sangs rgyas bdun po de dag gi mtshan thos la thos nas kyang 'dzin pa dang /nang par langs nas yid la byed pa dang / dad par byed pa dang / me tog dang / spos dang / phreng ba dang / byug pa dang / rol mo'i sgra dang / sil snyan dang / pheb rdob pa dag gis mchod pa dang /glegs bam du bris te 'chang ba dang / chos kyi rnam grangs 'di yi ger 'dri ba dang / yi ger 'drir 'jug pa dang / sems btud de gzhan las nyan pa dang / chos smra ba de dag la yang 'tshog chas dang / yo byad thams cad kyis mchod pa byed pa de sangs rgyas thams cad kyis byin gyis brlabs par 'gyur te/sangs rgyas kyi byang chub kyi bar du mngon par rdzogs par 'tshang rgya bar 'gyur ro zhes ji skad bka' stsal pa dang / yang 'di skad du/ 'jam dpal de bzhin gshegs pa sman gyi bla bai DUr+ya'i 'od kyi rgyal po de'i smon lam dang thabs mkhas pa tshad med cing bskal pa bas lhag par yang brjod mi nus so//'jam dpal so so'i skye bo gang dag dge ba dang mi dge ba mi shes pa dag yod de/ de dag ni chags pas zil gyis non cing / sbyin pa dang sbyin pa'i 'bras bu mi shes te/ nor sog cing bsrung ba la brtson gyi sbyin pa yang dag par 'gyed pa la sems mi 'gro ste/sbyin pa'i dus nye bar gnas pa na rang gi lus kyi sha las bcad pa bzhin du yid mi dga' bar 'gyur ba/ bdag nyid kyang du ma yongs su mi spyod na/ pha ma dang / bu smad dang / g.yog 'khor la ltag la ster/ gzhan slong ba rnams la lta smos kyang ci dgos pa'i sems can de lta bu dag ni shi 'phos nas yi dags sam dud 'gror skye bar 'gyur ro/ /de la gang dag sngon mir gyur pa na de bzhin gshegs pa sman gyi bla bai DUr+ya'i 'od kyi rgyal po de'i mtshan thos pa de dag ni yi dags sam/ dud 'gro'i skye gnas gang yang rung ba der de bzhin gshegs pa sman gyi bla bai DUr+ya'i 'od kyi rgyal po de'i mtshan mngon du 'gyur zhing dran ma thag pa tsam gyis tshe 'phos nas kyang mi'i 'jig rten du skye zhing tshe rabs dran par 'gyur/ngan 'gro'i 'jigs pas skrag nas 'dod pa'i yon tan don du mi gnyer ba dang /sbyin pa la dga' ba dang / sbyin pa'i bsngags pa brjod pa dang / bdog pa thams cad yongs su gtor bar 'gyur/ rim gyis rang gi mgo dang yan lag dang / sha khrag kyang slong ba rnams la rab tu sbyin par 'gyur na/ nor gyi phung po gzhan lta smos kyang ci dgos/'jam dpal gzhan yang sems can gang dag de bzhin gshegs pa rnams kyi bslab pa'i gnas log par 'dzin pa dag yod de/ gang dag tshul khrims dang ldan pa de dag ni tshul khrims tsam srung gi mang du thos pa yongs su mi tshol/ mang du thos pa dag ni mdo sde rnams kyi don zab mo mi shes shing lhag pa'i nga rgyal can du gyur te/gzhan dag la phrag dog byed cing dam pa'i chos la dbang za zhing spong bar 'gyur ro/ /mi blun po bdud kyi phyogs rang yang lam ngan par zhugs la/ gzhan bye ba khrag khrig brgya stong phrag du ma dag kyang g.yang sa chen por ltung bar byed pa de lta bu de dag ni sems can dmyal ba mi bzad par 'gro bar 'gyur ro//gang dag sngon de bzhin gshegs pa sman gyi bla be+e DUr+ya'i 'od kyi rgyal po'i mtshan thos pa de dag ni sems can dmyal ba'i gnas der/ de bzhin gshegs pa sman gyi bla bai DUr+ya'i 'od kyi rgyal po de'i mtshan mngon du 'gyur te/de nas shi 'phos nas kyang mi'i 'jig rten du skye zhing yang dag pa'i lta ba can dang / brtson 'grus dang ldan pa dang / dge ba'i bsam pa can du 'gyur/ /khyim spangs nas sangs rgyas kyi bstan pa la rab tu byung nas/byang chub sems dpa'i spyad pa spyod par 'gyur ro/ /'jam dpal gzhan yang sems can gang dag bdag la bstod cing gzhan la smod pa de dag ni ngan song gsum po dag tu lo stong phrag mang por sdug bsngal myong zhing 'di nas shi 'phos nas kyang / ba lang dang / rta dang rnga mo bong bu la sogs pa dud 'gror skyes te/dbyug lcag gis brdeg pa dang / bkres skom gyis nyen pa dang / khal chen pos gzir bar 'gyur ro/ /brgya la mir skyes na yang rtag tu rigs dma' ba dang / bran du 'gyur zhing gzhan gyi dbang du 'gyur ro/ /gang dag sngon de bzhin gshegs pa sman gyi bla be+e DUr+ya'i 'od kyi rgyal po'i mtshan thos pa de dag ni dge ba'i rtsa ba des sdug bsngal thams cad las yongs su thar bar 'gyur/dbang po rno bar 'gyur/ mkhas pa dang gsal ba dang / yid gzhungs pa dang / dge ba yongs su btsal ba la mngon par brtson pa rtag tu dge ba'i bshes gnyen dang 'grogs pa rnyed par 'gyur/bdud kyi zhags pa gcod pa dang / ma rig pa'i sgo nga'i sbubs gcog pa dang / nyon mongs pa'i chu klung skems par 'gyur/ skye ba dang / rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams las yongs su thar bar 'gyur ro/ /'jam dpal gzhan yang sems can gang dag phra ma la dga' zhing phan tshun 'thab pa dang / rtsod pa dang 'gyed par byed du 'jug pa dag yod de/ sems can de dag rtsod pa'i sems su gyur pas/lus dang ngag dang yid kyis mi dge ba rnam pa sna tshogs 'du byed de/ phan tshun gnod par bya ba'i phyir/ nags tshal gyi lha dang / shing gi lha dang / ri'i lha dang / dur khrod kyi 'byung po tha dad pa 'gugs par byed/ dud 'gro dag gi srog gcod cing / sha dang khrag za ba'i srin po rnams mchod par byed de/ dgra bo de'i ming nas brjod de gzugs byas nas der rig sngags drag po sgrub cing byad dang ro langs kyi sbyor bas srog gi bar chad bya ba dang / lus rnam par gzhig par 'dod pa la gang dag gis de bzhin gshegs pa sman gyi bla bai DUr+ya'i 'od kyi rgyal po de'i mtshan thos par gyur pa de dag la gang gis kyang bar chad bya bar mi nus te/de dag phan tshun byams pa'i sems dang / phan pa'i sems dang / gnod sems med pa'i sems su gnas par 'gyur/ rang rang gi bdog pas chog shes par 'gyur ro/ / 'jam dpal gzhan yang 'khor bzhi po rnams dang / gzhan yang dad pa'i rigs kyi bu'am/ rigs kyi bu mo gang dag yan lag brgyad dang ldan pa'i bsnyen gnas pa gang dag bdag gi dge ba'i rtsa ba 'dis nub phyogs gang na de bzhin gshegs pa tshe dpag med bzhugs pa'i 'jig rten gyi khams bde ba can du skye bar shog shig ces smon lam btab pa de dag las/gang dag gis de bzhin gshegs pa sman gyi bla bai DUr+ya'i 'od kyi rgyal po de'i mtshan thos pa de dag 'chi kar yang byang chub sems dpa' brgyad rdzu 'phrul gyis lhag nas lam ston te/ bde ba can der pad+ma tshon sna tshogs can la rdzus te skye bar 'gyur ro//gang la la lha'i 'jig rten du skyes pa de dag ni sngon gyi dge ba'i rtsa ba zad par mi 'gyur zhing / ngan 'gror 'gro bar mi 'gyur te/ de nas shi 'phos nas kyang mi'i 'jig rten 'dir gling bzhi pa'i dbang phyug 'khor los sgyur ba'i rgyal por 'gyur te/sems can bye ba khrag khrig brgya stong mang po dge ba bcu'i las kyi lam la dgod par 'gyur ro/ /gzhan du na yang rgyal rigs dang / bram ze dang / khyim bdag gi rigs shing sA la chen po lta bu'i khyim dag dang / nor dang / 'bru dang / mdzod dang / bang ba mang po 'byor pa'i khyim dag tu skye bar 'gyur te/ gzugs dang dbang phyug dang / g.yog 'khor phun sum tshogs pa dang / dpa' ba dang / rtul phod pa dang / tshan po che chen po'i stobs kyi shugs dang ldan par 'gyur ro/ /bud med gang gis de bzhin gshegs pa sman gyi bla bai DUr+ya'i 'od kyi rgyal po'i mtshan thos pa de'i bud med kyi dngos po de tha ma yin par shes par bya'o//'jam dpal de bzhin gshegs pa sman gyi bla bai DUr+ya'i 'od kyi rgyal po de'i sku gzugs byas te/ nyin zhag bdun du bsnyen gnas la gnas la kha zas gtsang ma bza' zhing lus legs par bkrus te/gos dri ma med pa bgo zhing phyogs gtsang mar me tog sna tshogs kyi sil ma bkram pa/ spos sna tshogs kyis bdugs pa/ ras dang gdugs dang rgyal mtshan sna tshogs kyis brgyan pa'i sa phyogs su dri ma dang / rnyog pa dang / gnod sems med pa'i sems dang byams pa dang btang snyoms dang mnyam pa'i sems su bya/ rol mo'i sgra dang sil snyan dang / glu dbyangs blang zhing de bzhin gshegs pa'i sku gzugs de la bskor ba byas te/ de'i sngon gyi smon lam yang yid la bya zhing mdo 'di yang bton na gang bsam pa dang /gang smon pa'i bsam pa thams cad yongs su rdzogs par 'gyur te/ tshe ring bar smon na ni tshe ring bar 'gyur ro/ /longs spyod dang ldan par smon na ni longs spyod 'byor par 'gyur ro/ /dbang phyug dang ldan par smon na ni tshegs chung ngus rnyed par 'gyur ro/ /bu 'dod na ni bu rnyed par 'gyur ro//gang dag sdig pa can gyi rmi lam rmis sam/ gang du bya khwa'am ltas ngan mthong ngam/ gnas gang du bkra mi shis pa brgya dag gnas par gyur pa la/ gang dag gis de bzhin gshegs pa sman gyi bla bai DUr+ya'i 'od kyi rgyal po de la mchod pa rnam pa sna tshogs kyis bkur stir byed na rmi lam ngan pa dang /ltas ngan pa dang / bkra mi shis pa'i dbang po thams cad mthong bar mi 'gyur ro/ /gang dag me dang / chu dang / mtshon dang / dug dang / g.yang sa dang / glang po che gtum po dang / seng ge dang / stag dang / dom dang / dred dang / sbrul gdug pa dang /sdig pa dang / rkang lag brgya pas 'jigs pa dang / pha rol gyi dmag tshogs dang / rkun po dang / chom po'i 'jigs pa de dag gis kyang de bzhin gshegs pa sman gyi bla bai DUr+ya'i 'od kyi rgyal po de la mchod pa byas na 'jigs pa de dag thams cad las yongs su thar bar 'gyur ro/ / 'jam dpal gzhan yang gang dag skyabs gsum 'dzin pa dang / bslab pa'i gzhi lnga po dag dang / bslab pa'i gzhi bcu po dag dang / byang chub sems dpa'i sdom pa bslab pa'i gzhi bzhi brgya po dag dang / dge slong gi bslab pa'i gzhi nyis brgya lnga bcu po dag dang / dge slong ma'i bslab pa'i gzhi lnga brgya po dag 'dzin pa de dag ji ltar yongs su bzung ba'i bslab pa'i gzhi gang yang rung ba zhig nyams te/ngan 'gro ngan song gis 'jigs skrag pa de dag gis de bzhin gshegs pa sman gyi bla bai DUr+ya'i 'od kyi rgyal po de la mchod pa sna tshogs byed na/ de dag la ngan song gsum po'i sdug bsngal med par shes par bya'o//bud med gang bu btsa' ba'i dus na sdug bsngal drag po myong ba des/ de bzhin gshegs pa sman gyi bla bai DUr+ya'i 'od kyi rgyal po de la mchod na/ de sdug bsngal las myur du thar bar 'gyur/ bu yang yan lag yongs su tshang bar btsa' zhing gzugs bzang la lta na sdug pa dang /dbang po rno zhing blo dang ldan pa dang / nad med cing gnod pa med par 'gyur ro/ /de la mi ma yin pas mdangs 'phrog par mi nus so/ /gzhan yang kun dga' bo ma dad cing yid mi ches te spong du zin kyang de bzhin gshegs pa sman gyi bla bai DUr+ya'i 'od kyi rgyal po de'i mtshan su'i rna lam du grags par gyur pa de ngan 'gro ngan song du 'gro bar 'gyur pa ni gnas ma yin te go skabs med do//kun dga' bo sangs rgyas rnams kyi sangs rgyas kyi spyod yul ni yid ches par dka' ba'o zhes ji skad bka' stsal pa dang /tad+ya thA/ g+hu me g+hu me/ i mi ne/ mi hi/ ma ti ma ti/ sap+ta ta thA ga ta sa mA d+h+ya d+hiSh+Thi te/ a te ma te/ pA le pA paM sho d+ha ni/ sarba pA paM na nA sha ya/ ma ma bud+d+he/ bud+d+hot+ta me/ u me ku me/ bud+d+ha/ k+She tra pa ri sho d+ha ni d+ha me nir d+ha me/ me ru me ru/ me ru shi kha re/ sarba a kA la mr-i t+yu ni/ b+ha ra Ni/ bud+d+he su bud+d+he/ bud+d+hA d+hiSh+Thi te na rak+ShaM tu me/ sarba de bA/ sa me a sa me/ sa ma n+wA ha ran+tu me/ sarba bud+d+ha bo d+hi satwa/ sha me sha me/ pra sha man+tu me/ sarba i t+yu pa dra ba byA d+ha yaH/ pUr+Ne pUr+Ne/ pU ra ya me/ sarba A sha bai DUr+ya shApra ti b+ha se/sarba pA paM k+Sha yi ka ri swA hA/ bcom ldan 'das de bzhin gshegs pa'i ting nge 'dzin gyi stobs bskyed pa bai DUr+ya'i 'od ces bgyi ba'i gzungs 'di gang la la zhig sems can thams cad la mchog tu snying rje ba'i sems kyis de bzhin gshegs pa bdun po de dag gi sku gzugs byas te/me tog la sogs pas mchod pa byed cing 'chang ngam/ klog gam/ mchod dam/ nyin zhag bdun du gso sbyang yan lag brgyad la gnas te/ gzungs kyi tshig lan stong rtsa brgyad du bton na de la de bzhin gshegs pa rnams dgongs par 'gyur/byang chub sems dpa' thams cad sems par 'gyur/ rdo rje 'dzin pa thams cad kyang yang dag par bsrung bar 'gyur/ lha dang brgya byin dang tshangs pa thams cad dang / rgyal po chen po bzhi po dag gis yongs su bskyang bar 'gyur/ mtshams med pa lnga la sogs pa las kyi sgrib pa thams cad kyang yongs su byang bar 'gyur/nad thams cad kyis mi thebs par 'gyur/ yun ring du 'tsho bar 'gyur/ dus ma yin par 'chi ba'i 'jigs pa thams cad las yongs su thar bar 'gyur ro/ /'chi ba dang / dgra dang / dgon pa'i gnod pa dang /'thab pa dang / rtsod pa dang / 'gyed pa thams cad rab tu zhi bar 'gyur/ dgra thams cad kyi dbang du mi 'gro bar 'gyur/ ci bsams pa'i bsam pa thams cad yongs su rdzogs par 'gyur ro zhes ji skad bka' stsal pa 'di ltar nyi zla ni dog sar ltung yang gda'/ ri rab ri'i rgyal po ni gnas nas 'pho yang gda'/ rgya mtsho chen po ni dus las yol yang gda'/ nam mkha' ni dog sar 'gyur/ dog sa ni nam mkhar 'gyur/ chab ni zhugs su 'gyur/ zhugs ni chab tu 'gyur/ bser ma ni zhags pas bzung du rung bar 'gyur yang gda'i/ lha dang mi'i ston pa yang dag par rdzogs pa'i sangs rgyas bcom ldan 'das thams cad mkhyen cing thams cad gzigs pa sku dang gsung dang / thugs kyi kun du spyod pa la yongs su ma dag pa mi mnga' ba de bzhin gshegs pas legs par gsungs pa'i bka' ni gzhan du 'gyur ba ma mchis pa lags na/che ge la sogs pa'i don du dpal gyi mgur nas gsungs pa'i mdo sde las 'byung ba'i tshul bzhin du de bzhin gshegs pa bdun dang / ston pa bde bar gshegs pa rnams gdan 'dzom pa'i spyan sngar mchod pa ci 'byor pa bshams te/ mchod nas smon lam du gsol ba rngo ci thogs pa'i nyams kyis dpags te bgyis pa 'di tsam zhig sngon ji ltar byin gyis brlabs shing bka' stsal pa bzhin du/da yang gdan 'dzom pa chen pos cho ga yongs su rdzogs par bskangs te/ byin gyis brlab cing phan yon ji skad bka' stsal pa thams cad bdag cag la sogs pa sems can thams cad kyis 'phral du thob par mdzad cing stsal du gsol/de bzhin gshegs pa'i bka' yang dag pa tshad mar gyur pa 'gyur ba mi mnga' ba'i bden pa mngon sum du bstan du gsol/ byang chub sems dpa' sems dpa' chen po 'phags pa 'jam dpal gzhon nur gyur pa thugs dri ma dang skyon thams cad dang bral ba sku yon tan dri ma med pa'i tshogs kyi 'od zer gyis brgyan pa/zhabs rten gyi pad+ma la lha dang / mi dang / lha ma yin dang / klu dang / rig sngags 'chang rnams kyi thor tshugs dang / cod pan gyis gtugs pa/ ngan song gi 'gro ba sna tshogs 'joms pa la phyag 'tshal lo/ /mchod do skyabs su mchi'o/ /bcom ldan 'das 'phags pa 'jam dpal dus ngan pa'i sems can las kyi sgrib pa sna tshogs kyis bsgribs pa/ nad sna tshogs kyis gzir ba/ mya ngan dang sdug bsngal sna tshogs kyis gtses pa/ lta ba ngan pa sna tshogs kyis bklags pa/ lam dang sa dman par 'og nas 'og tu ltung bar 'gyur ba'i sems can rnams la thugs brtse bar dgongs te/ gang thos pa tsam gyis ci nas kyang sems can thams cad bla na med pa'i byang chub las phyir mi ldog par 'gyur ba dang /sdig pa dang las kyi sgrib pa thams cad yongs su byang zhing bas par 'gyur ba dang / bdud sdig can gyis mi brdzi bar 'gyur ba dang / gnod pa dang mi bde ba thams cad rab tu zhi bar 'gyur ba dang / 'dod dgu'i re ba rdzogs shing bsam pa thams cad yid bzhin du 'grub par 'gyur ba de bzhin gshegs pa bdun gyi mtshan dang sngon gyi smon lam gyi khyad par rgyas pa'i mdo sde ston pa bcom ldan 'das dpal shAkya thub pa la dmigs kyis zhu ba mdzad cing gdan 'dzom pa'i dbus su 'di skad ces bcom ldan 'das slad ma'i tshe slad ma'i dus na/gang dag mdo 'di 'chang ba dang / klog pa dang / 'chad pa dang / gzhan dag la rgya cher yang dag par ston pa dang / yi ger 'dri ba dang / yi ger 'drir stsol ba dang / glegs bam la bris te me tog dang / bdug pa dang /spos dang / phreng ba dang / byug pa dang / gdugs dang / rgyal mtshan rnams kyis bkur stir bgyid pa'i rigs kyi bu'am rigs kyi bu mo de dag la/ bdag gis de bzhin gshegs pa sman gyi bla bai DUr+ya'i 'od kyi rgyal po de'i mtshan rnam pa sna tshogs bsgrag par bgyi'o/ / tha na rmi lam du yang sangs rgyas kyi mtshan rna lam du nye bar bsgrag par bgyi'o/ /tshon sna lnga pa'i ras rnams kyis dkris te/ phyogs gtsang mar bzhag na gang na mdo sde 'di gnas pa der rgyal po chen po bzhi 'khor dang bcas pa dang / lha bye ba khrag khrig brgya stong gzhan yang mchi bar 'gyur ro//mdo sde 'di 'dzin pa de dag dus ma lags par 'gum par mi 'gyur/ sus kyang mdangs phrogs par mi nus te/ phrogs na yang slar 'phrog par 'gyur ro zhes bgyi ba la sogs pa gsungs shing / 'phags pa'i bka' yang dag pa tshad mar gyur pas zhal gyis bzhes pa bzhin du deng 'dir yang mchod pa'i tshogs sbyar ba'i pho brang gi dkyil 'khor 'dir bzhugs te mchod pa bzhes shing /de bzhin gshegs pa gdan 'dzom pa la thugs dam las glengs te bskul ba dang / mdo sde'i cho ga rdzogs par bskang ba'i phrin las mdzad de/mdo sde'i phan yon ji skad bka' stsal pa thams cad bdag cag la sogs pa sems can thams cad kyis thob par byin gyis brlab cing stsal du gsol/ byang chub sems dpa' sems dpa' chen po skyabs grol la phyag 'tshal zhing skyabs su mchi'o/ /bcom ldan 'das 'phags pa skyabs grol dus ngan pa'i sems can phongs shing sdug bsngal ba rnams la thugs brtse bar dgongs nas/ston pa bcom ldan 'das gdan 'dzom pa'i spyan sngar/ 'di skad du btsun pa bcom ldan 'das slad ma'i tshe slad ma'i dus na/ sems can bro nad sna tshogs kyis lus yongs su gzir te/yun ring po'i bro nad kyis lus kyi sha bas shing / bkres pa dang / skom pas gre ba dang mchu ni bskams/ 'gum pa la ni mngon du phyogs/ mdza' bshes dang / nye du dang / snag gi gnyen mtshams du ba rnams kyis ni bskor/ phyogs rnams ni mun par mthong / gshin rje'i mi rnams kyis ni sgor drangs te/ de'i lus 'di na nyal yang rnam par shes pa chos kyi rgyal po gshin rje'i mdun du khrid cing / mi de dang lhan cig skyes pa'i lha slad bzhin du 'brang ba gang lags pa de ni dge ba dang mi dge ba bgyis pa de dag thams cad legs par yi ger bris nas chos kyi rgyal po gshin rje la phul ba dang /chos kyi rgyal po gshin rjes de la dris shing brtags nas/ dge ba'am mi dge ba ji ltar bgyis pa de bzhin du bsgo ba la/ gang dag nad pa de'i don du bcom ldan 'das de bzhin gshegs pa sman gyi bla be+e DUr+ya'i 'od kyi rgyal po de la skyabs su mchi zhing /'di 'dra ba'i sbyor bas mchod pa bgyis na/ de'i rnam par shes pa slar ldog cing rmi lam rmis pa bzhin du/ bdag nyid kyis 'tshal bar 'gyur ba'i gnas der mchis te/ yang na ni gdugs bdun/ yang na ni gdugs nyi shu rtsa gcig / yang na ni gdugs sum cu rtsa lnga/ yang na ni gdugs bzhi bcu rtsa dgu la/ de'i rnam par shes pa slar bzlog cing dran pa rnyed la/ de dge ba dang mi dge ba'i rnam par smin pa bdag nyid kyis mngon sum du 'gyur te/ srog gi slad du yang sdig pa'i las mi bgyid do/ /mchod pa'i sbyor ba ni btsun pa kun dga' bo gang dag nad chen po las yongs su thar bar 'dod pa de dag gis/nad pa de'i don du nyin bdun du yan lag brgyad dang ldan pa'i gso sbyong gi sdom pa blang bar bya/ dge slong gi dge 'dun la zas dang skom rnams dang / yo byad thams cad kyis ci nus su mchod pa dang rim gro bya/nyin lan gsum mtshan lan gsum du bcom ldan 'das sman gyi bla bai DUr+ya'i 'od kyi rgyal po la sogs pa de bzhin gshegs pa bdun gyi mtshan yid la bya/ mdo sde 'di lan bzhi bcu rtsa dgur gdon par bya'o/ /zhag bzhi bcu rtsa dgur mar me bud par bya'o/ /sku gzugs bdun bya'o//sku gzugs re re'i spyan sngar mar me bdun bdun gzhag go/ /mar me re re'i tshad kyang shing rta'i 'phang lo tsam du bya ste/ ci nas kyang zhag bzhi bcu rtsa dgur mar me mi zad par bya'o/ /tshon sna lnga pa'i ba dan bzhi bcu rtsa dgu las lhag par bya'o/ /btsun pa kun dga' bo gzhan yang rgyal po rgyal rigs spyi bo nas dbang bskur ba rnams la nad kyis gnod pa'am/rang ngam pha rol gyi dmag tshogs kyis gnod pa'am/ rgyu skar ram/ gza' zla ba'am/ gza' nyi ma'i gnod pa'am/ dus ma yin pa'i rlung ngam/ char ram than pa'i gnod pa yang rung ste/ gnod pa dang /nad 'go ba dang / 'khrug pa zhig nye bar gnas par gyur na rgyal po rgyal rigs spyi bo nas dbang bskur ba des sems can la byams pa'i sems su bya/ btson du bzung ba rnams gtang bar bya zhing gang du smos pa bzhin du/ bcom ldan 'das sman gyi bla be+e DUr+ya'i 'od kyi rgyal po de la de lta bu'i mchod pa byas na/rgyal po de'i dge ba'i rtsa ba de dang / bcom ldan 'das sman gyi bla be+e DUr+ya'i 'od kyi rgyal po de'i sngon gyi smon lam gyi khyad par gyis/ yul bde ba dang lo legs par 'gyur/ rlung dang char dus su ldang zhing lo tog 'grub par 'gyur/ yul de na gnas pa'i sems can thams cad kyang nad med pa dang /bde ba dang / mchog tu dga' ba mang bar 'gyur ro/ /yul der gnod sbyin dang / srin po dang / 'byung po dang / sha za ma rungs pas sems can rnams la gtse bar mi 'gyur ro/ /ltas ngan thams cad mthong bar mi 'gyur ro/ /rgyal po de'i tshe dang mdog dang stobs dang /nad med pa dang dbang phyug rnams 'phel bar 'gyur ro zhes bgyi ba la sogs pa gsungs shing 'phags pa'i bka' yang dag pa tshad mar gyur pas zhal gyis bzhes pa bzhin du/ deng 'dir yang mchod pa'i tshogs sbyar ba'i pho brang gi dkyil 'khor 'dir bzhugs te/ mchod pa bzhes shing de bzhin gshegs pa gdan 'dzom pa la thugs dam las glengs te bskul ba dang /mdo sde'i cho ga rdzogs par bskang ba'i phrin las mdzad de/ mdo sde'i phan yon ji skad bka' stsal pa thams cad bdag cag la sogs pa sems can thams cad kyis 'thob par byin gyis brlab cing stsal du gsol/byang chub sems dpa' sems dpa' chen po dpal phyag na rdo rje la phyag 'tshal lo/ /mchod do skyabs su mchi'o/ /tshangs pa dang / lha'i dbang po brgya byin dang / rgyal po chen po yul 'khor srung dang / 'phags skyes po dang / mig mi bzang dang / ku be ra la sogs pa dam pa'i chos song ba'i lha'i dge bsnyen thams cad la phyag 'tshal lo//mchod do skyabs su mchi'o/ /byang chub sems dpa' sems dpa' chen po phyag na rdo rje dang / tshangs pa dang / lha'i dbang po brgya byin dang / rgyal po chen po yul 'khor srung dang / 'phags skyes bo dang / mig mi bzang dang / ku be ra la sogs pa dam pa'i chos skyong ba lha'i dge bsnyen chen po rnams kyis/ ji ltar sngon gdan 'dzom pa chen po'i spyan sngar/ lha'i tshig bden pas mdangs gsol du gsung gcig kho nar 'di skad ces/ bcom ldan 'das bdag cag gis de bzhin gshegs pa bdun gyi smon lam gyi khyad par rgyas pa yang thos/de bzhin gshegs pa rnams kyang mngon sum du mthong ste/ mchod pa bgyis so/ /yang bcom ldan 'das sa phyogs gang na de bzhin gshegs pa rnams kyi mtshan dang / gzungs kyi tshig 'di dag spyod pa der bdag cag g.yogs 'khor dang bcas te mchi bar bgyi'o//rigs kyi bu'am rigs kyi bu mo gang zhig 'chang ba dang / klog pa dang / mchod pa bgyid pa dang / yi ger 'drir stsol ba der bdag cag mthun par lhan cig tu mchis te/ rigs kyi bu'am rigs kyi bu mo'am/ rgyal po'am/ rgyal po'i blon po mdo sde'i dbang po 'dzin pa dang /'dri ba de la de bzhin gshegs pa'i byin gyi rlabs kyis bsrung bar bgyi/ grong dang grong khyer dang / phyogs kyang yongs su bskyang bar bgyi/ 'chi ba dang / dgra dang dgon pa dang nad thams cad rab tu zhi bar bgyi'o/ /bdag cag ni de bzhin gshegs pa dang / sems can thams cad la byas pa gzo ba lags te/dus ma lags par 'gum pa thams cad bzlog par bgyi/ 'thab pa dang / 'thab mo dang / rtsod pa dang / 'gyed pa thams cad rab tu zhi bar bgyi/ ji ltar bsams pa bzhin du 'grub pa dang / sems dang lus bde zhing longs spyod dang / dbang phyug dang / nor dang / 'bru rnams 'phel bar bgyi/ thams cad du bsrung bar bgyi'o/ /bcom ldan 'das bdag cag gis rang gi bro bor ba dang dam bcas pa 'di dag rigs kyi bu'am rigs kyi bu mo des rjes su dran par bgyi'o/ /tad+ya thA/ a g+hu/ ma g+hu/ ta ra g+hu/ ma ma g+hu/ g+hu re/ ha hu he/ mra mra mra mra/ dzu dzu re dzu re swA hA/ gang la la zhig de bzhin gshegs pa'i mtshan rnams dang / gzungs kyi tshig 'di dag 'chang ba dang / klog pa dang / yi ger 'dri ba dang / yi ger 'drir stsol ba dang / rab tu gus par mchod par bgyid pa de dag ngan song gsum du mi mchi bar rig par bgyi ste/ de bla na med pa yang dag par rdzogs pa'i byang chub las slar mi ldog par 'gyur/ji ltar 'tshal ba'i sangs rgyas kyi zhing de dag tu skye bar 'gyur/ de bzhin gshegs pa rnams mthong bar 'gyur/ tshe rabs dran par 'gyur/ ting nge 'dzin dang gzungs kyang 'thob par 'gyur ro zhes gsungs shing zhal gyis pa zhes pa dang / de nas byang chub sems dpa' phyag na rdo rjes de bzhin gshegs pa de dag la 'di skad ces/gang mdo sde'i dbang po 'dzin pa de dag gi don du bdag gis gzungs kyi gsang sngags kyi gzhi rnams rab tu stsal bar bgyi/ sangs rgyas bcom ldan 'das rnams bdag la dgongs su gsol/ yang dag par rdzogs pa'i sangs rgyas bdun po dag la phyag 'tshal lo//rdo rje 'dzin thams cad la phyag 'tshal lo/ /tad+ya thA/ oM badzre badzre/ ma hA badzre/ badzra pA sha d+ha ri Ni/ sa ma sa ma/ sa man+ta a pra ti ha ta badzre/ sha ma sha ma/ pra sha man+tu/ sarba byA d+ha yaH/ ku ru ku ru/ sarba karma Ni/ sa ma ya ma nu sma ra b+ha ga wAn badzra pA Ni/sarba A shaM me pa ri pU ra ya swA hA/ bcom ldan 'das gang la la zhig de bzhin gshegs pa 'di dag gi mtshan dang / sngon gyi smon lam gyi khyad par rgyas pa'i chos kyi rnam grangs 'di 'chang ba dang / klog pa de'i re ba thams cad bdag gis yongs su bskang bar bgyi/ don thams cad kyang bsgrub par bgyi'o/ /gal te des bdag mthong bar 'tshal na chos kyi rnam grangs 'di yi ger 'drir stsal bar bgyi/ de bzhin gshegs pa 'di dag gi sku gzugs bdun yang bgyi/ rdo rje 'dzin yang sku gdung dang bcas par bgyi/ de bzhin gshegs pa de dag la yang ji skad gong du smos pa bzhin du spos dang /bdug pa dang / mar me dang / phreng ba dang / rgyan dang / rol mo'i sgra dang / sil snyan dang / pheg rdob pa rnams kyis mchod de bskor bar bgyi/ gzungs kyi gsang sngags kyi gzhi 'di dag kyang gdon par bgyi/ sems can thams cad la yang phan pa'i sems dang /byams pa'i sems su bgyi/ 'phags pa'i lam yan lag brgyad pa'i bsnyen gnas la gnas te lan gsum khrus bgyi zhing gos lan gsum brje bar bgyi/ tshes brgyad nas brtsams te zla ba phyi'i bco lnga'i nya'i bar du nyin gcig bzhin du rig sngags lan brgya rtsa brgyad bzlas na de la bdag gis rmi lam du mthong bar stsal bar bgyi/'phel ba'i bka' mchid kyang bgyi/ re ba thams cad yongs su bskang bar bgyi'o zhes 'phags pa'i bka' mi 'gyur ba tshad mar gyur par zhal gyis bzhes pa bzhin du/ deng 'dir yang mchod pa'i tshogs sbyar ba'i pho brang gi dkyil 'khor 'dir bzhugs shing mchod pa bzhes te/gdan 'dzom pas mdo sde'i cho ga yongs su rdzogs par bskang ba'i phrin las mdzad de/ phan yon ji skad bka' stsal pa thams cad bdag cag la sogs pa sems can thams cad kyis thob par byin gyis brlab tu gsol/ /lhag par yang de bzhin gshegs pa bdun gyi sngon gyi smon lam gyi khyad par rgyas pa'i mdo la sogs pa gsung rab dam pa'i chos yun ring du rgyas par bgyi ba dang /sgo thams cad nas chos spyod pa rnams la bar chad dang bgegs su gyur pa bdud kyi phyogs thams cad dang / yul phyogs su mi nad dang phyugs nad gtong ba dang /than pa dang sad dang ser ba la sogs pas lo thog ma rungs par bgyid pa dang / gnod pa dang mtshan ma ngan pa dang / bkra mi shis pa mang po ston cing / sems can la sdang bar sems pa'i gdon bgegs kyi rigs tha dad pa yul phyogs 'di na rgyu zhing gnas pa ci mchis pa thams cad dang /che ge mo la sngon gyi las kyis bsangs pa'am/ 'phral gyi rkyen las gyur pa'am/ yul phyogs dang pha tshan dang rigs rgyud kyi sri can du gyur pa yang rung ste/ che ge mo'i lus dang / srog dang / chus srid dang / dbang phyug dang / 'khor dang / yo byad la sogs pa gang yang rung ba la ci yang rung ba'i sgo nas gnod pa bgyid pa'i gdon bgegs ci mchis pa thams cad gang la gang 'tsham pa'i thabs kyis gdul zhing 'khon dang gnod pa'i bsam pa 'dor du stsal te zhi ba dang dge ba dang byams pa'i bsam pa can du 'gyur zhing /sngon chad bkra mi shis pa dang gnod pa'i sbyor ba bgyis pa rnams kyang 'jog cing 'dor du stsal/slan chad kyang gnod pa'i bag ci yang mi bgyid par so so'i rigs kyi bro dam pos bsgag cing gdan 'dzom pa'i spyan sngar dam tshig chen po stsal ba'i phrin las mdzad du gsol/ mthu dpal dang ldan pa'i lha'i dge bsnyen dam pa gnod sbyin gyi sde dpon bcu gnyis po la 'di lta ste/gnod sbyin gyi sde dpon chen po ji 'jigs la phyag 'tshal lo/ /mchod do skyabs su mchi'o/ /gnod sbyin gyi sde dpon chen po rdo rje la phyag 'tshal lo/ /mchod do skyabs su mchi'o/ /gnod sbyin gyi sde dpon chen po rgyan 'dzin la phyag 'tshal lo/ /mchod do skyabs su mchi'o/ / gnod sbyin gyi sde dpon chen po gza' 'dzin la phyag 'tshal lo/ /mchod do skyabs su mchi'o/ /gnod sbyin gyi sde dpon chen po rlung la phyag 'tshal lo/ /mchod do skyabs su mchi'o/ /gnod sbyin gyi sde dpon chen po gnas bcas la phyag 'tshal lo/ /mchod do skyabs su mchi'o/ /gnod sbyin gyi sde dpon chen po dbang 'dzin la phyag 'tshal lo//mchod do skyabs su mchi'o/ /gnod sbyin gyi sde dpon chen po btung 'dzin la phyag 'tshal lo/ /mchod do skyabs su mchi'o/ /gnod sbyin gyi sde dpon chen po smra 'dzin la phyag 'tshal lo/ /mchod do skyabs su mchi'o/ /gnod sbyin gyi sde dpon chen po bsam 'dzin la phyag 'tshal lo//mchod do skyabs su mchi'o/ /gnod sbyin gyi sde dpon chen po g.yo ba 'dzin la phyag 'tshal lo/ /mchod do skyabs su mchi'o/ /gnod sbyin gyi sde dpon chen po rdzogs byed la phyag 'tshal lo/ /mchod do skyabs su mchi'o/ /mthu dpal dang ldan pa'i dge bsnyen dam pa/ gnod sbyin gyi sde dpon chen po bcu gnyis po re re la yang g.yog gnod sbyin bdun 'bum dang bcas pa rnams dgongs su gsol/ /ji ltar sngon gdan 'dzom pa chen po'i spyan sngar lha'i ngag bden pas gsung gcig tu 'di skad ces/ sangs rgyas kyi mthus bdag cag gis bcom ldan 'das de bzhin gshegs pa sman gyi bla be+e DUr+ya'i 'od kyi rgyal po de'i mtshan thos te/bdag cag la yang ngan 'gror mchi ba'i 'jigs pa 'byung bar mi 'gyur ro/ /de nas bdag cag lhan cig tu mthun par ji srid 'tsho'i bar du/ sangs rgyas la skyabs su mchi'o/ /chos la skyabs su mchi'o/ /dge 'dun la skyabs su mchi'o//sems can thams cad kyi don dang / phan pa dang / bde ba'i slad du spro bar bgyi'o/ /bye brag tu ni grong ngam grong khyer ram/ grong rdal lam/ dgon pa'i gnas gang na mdo sde 'di spyod pa dang / gang bcom ldan 'das de bzhin gshegs pa sman gyi bla be+e DUr+ya'i 'od kyi rgyal po de'i mtshan 'chang ba dang /mchod pa dang / rim gro byed pa'i sems can de dag la bdag cag gis bsrung bar bgyi/ yongs su bskyang bar bgyi/ gnod pa thams cad las yongs su thar bar bgyi/ bsam pa thams cad yongs su rdzogs par bgyi'o zhes 'phags pa'i ngag brtags pas zhal gyis bzhes shing thugs dam du glengs te/ston pa bcom ldan 'das kyis kyang gang gi phyir khyod de bzhin gshegs pa sman gyi bla bai DUr+ya'i 'od kyi rgyal po de la byas pa gzo zhing rjes su dran la/ sems can thams cad la phan pa'i phyir zhus pa legs so zhes rjes su gnang ba de bzhin du/deng 'dir yang mchod pa'i tshogs sbyar ba'i pho brang gi dkyil 'khor 'dir dul zhing zhi ba'i sems dang ldan par byams pa dang thugs brtso bas mchod pa bzhes shing mdo sde'i cho ga yongs su rdzogs par bskang ste/ phan yon ji skad bka' stsal pa thams cad bdag cag la sogs pa sems can thams cad kyis thob par byin gyis brlab tu gsol/lhag par yang de bzhin gshegs pa bdun gyi sngon gyi smon lam gyi khyad par rgyas pa'i mdo la sogs pa/ gsung rab dam pa'i chos yun ring du rgyas par bgyi ba dang / sgo thams cad nas chos spyod pa rnams la bar chad dang bgegs su gyur pa bdud kyi phyogs thams cad dang /yul phyogs su mi nad dang phyugs nad gtong pa dang than pa dang sad ser la sogs pas ma rungs par bgyid pa dang / gnod pa dang / mtshan ma ngan pa dang / bkra mi shis pa mang po ston cing / sems can la sdang bar sems pa'i gdon bgegs rigs tha dad pa mang po khams dang yul phyogs 'dir rgyu ba mchis so 'tshal dang che ge mo la sngon gyi las kyis 'das pa'am/'phral gyi rkyen las gyur pa'am/ yul phyogs dang / pha tshan dang / rigs rgyud kyi sri can du gyur pa yang rung ste/ che ge mo'i lus dang srog dang /chab srid dang / dbang phyug 'khor dang / yo byad la sogs pa gang yang rung ba la ci yang rung ba'i sgo nas gnod pa bgyid pa'i gdon bgegs ci mchis pa thams cad gang la gang 'tsham pa'i thabs kyis gdul zhing 'khon dang gnod pa'i bsam pa 'dor du stsal te/ zhi ba dang dge ba dang byams pa'i bsam pa can du bgyi zhing sngon chad bkra mi shis pa dang /gnod pa'i sbyor ba ngan pa ci bgyis pa rnams kyang 'jig cing mdor du stsal/ slan chad gnod pa'i bag ci yang mi bgyid par so so'i rigs kyi bro dam pos dgag cing / gdan 'dzom pa'i spyan sngar dam tshig chen po stsal ba'i phrin las mdzad du gsol/re re nas mchod pa 'bul zhing smon lam gdab pa rdzogs pa'i skabs 'dir/ gzungs kyi snying po logs shig tu byung ba lan bdun yan chad bzhi bcu rtsa dgu man chad ci nus su bklag /ston pa bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa la phyag 'tshal ba dang /mchod pa snga ma bzhin du byas te/ mdor bsdus pa'i gsol ba 'di skad gdab bo/ /ston pa bcom ldan 'das de bzhin gshegs pa dpal shAkya thub pas bdag cag la sogs pa sems can las kyi sgrib pa sna tshogs kyis bsgribs pa/nad sna tshogs kyis gzir ba/ mya ngan dang sdug bsngal sna tshogs kyis gtses pa/ phongs par gyur pa thams cad rjes su bzung zhing / lha dang mi rnams kyi don dang phan pa dang bde ba'i slad du de bzhin gshegs pa bdun gyi thabs mkhas pa dang / sngon gyi smon lam khyad par rgyas pa byin gyis brlabs shing dpal gyi mgur nas yang dag par gsungs nas/phan yon dpag tu ma mchis pa rgyas par bka' stsal pa 'di ltar nyi zla ni dog sar lhung yang gda'/ ri rab ri'i rgyal po ni gnas nas 'pho yang gda'/ rgya mtsho chen po ni dus las yol yang gda'/nam mkha' ni dog sar 'gyur/ dog sa ni nam mkhar 'gyur/ chab ni zhugs su 'gyur/ zhugs ni chab tu 'gyur/ bser ma ni zhags pas gzung du rung yang gda'i/ lha dang mi'i ston pa yang dag par rdzogs pa'i sangs rgyas thams cad mkhyen nyid thams cad gzigs pa/sku dang gsung dang thugs kyis kun du spyod pa la yongs su ma dag pa mi mnga' ba/ de bzhin gshegs pas legs par gsungs pa'i bka' ni gzhan du 'gyur pa ma mchis pa lags na/ che ge mo la sogs pa'i don du dpal gyi mgur nas gsungs pa'i mdo sde las 'byung ba ba'i tshul bzhin du/de bzhin gshegs pa bdun dang / ston pa bde bar gshegs pa rnams gdan 'dzom pa'i spyan sngar mchod pa ci 'byor pa bshams te/ mchod nas smon lam gsol ba rdo ci thogs pa'i nyams kyis dpag ste bgyis pa 'di tsam zhig /sngon ji ltar byin gyis brlabs shing bka' stsal pa bzhin du/da yang gdan 'dzom pa chen pos tshog yongs su rdzogs par bskangs te/ byin gyis brlab cing phan yon ji skad bka' stsal pa thams cad bdag cag la sogs pa sems can thams cad kyi don 'bral du mdzad cing stsal du gsol/ de bzhin gshegs pa'i bka' yang dag pa tshad mar gyur ba/'gyur ba mi mnga' ba'i bden pa mngon sum du bstan du gsol/ 'phags pa rnams la so sor re re nas mchod pa phul zhing smon lam btab pa dang / gzungs kyi snying po bzlas pa rdzogs pa'i 'og tu/ spyir mchod pa dbul zhing bsod nams dmigs kyis bsngo ba'i smon lam gdab pa/'phags pa gdan 'dzom pa'i spyir mchod pa ci 'byor pa phul ba dang / de bzhin gshegs pa bdun gyi smon lam gyi khyad par rgyas pa'i mdo sde las 'byung ba bzhin du mchod pa'i tshogs sbyar ba'i pho brang gi dkyil 'khor 'dir/ de bzhin gshegs pa dgra bcom pa yang dag par rdzogs pa'i sangs rgyas mtshan legs par yongs bsgrags dpal gyi rgyal po dang /de bzhin gshegs pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po dang / de bzhin gshegs pa gser bzangs dri med rin chen snang brtul zhugs grub pa dang /de bzhin gshegs pa mya ngan med mchog dpal dang / de bzhin gshegs pa chos bsgrags rgya mtsho'i dbyangs dang / de bzhin gshegs pa chos rgya mtsho mchog gi blos rnam par rol ba mngon par mkhyen pa dang / de bzhin gshegs pa sman gyi bla bai DUr+ya'i 'od kyi rgyal po dang /ston pa bcom ldan 'das dpal shAkya thub pa 'khor dang bcas pa spyan drangs nas mtshan nas brjod de phyag btsal ba dang / mchod cing 'phags pa de dag gi sngon gyi smon lam khyad par can dang / bka' lung dang mthun par smon lam gsol ba dang /gzhan yang 'phags pa de dag gi spyan sngar sdig pa bshags pa dang / rjes su yi rang ba phul ba dang bskul zhing gsol ba btab pa la sogs pa'i bsod nams ci mchis pa'i stobs dang / 'phags pa de dag gi mthu dpal dang byin gyi rlabs kyis/ lha sras kyi zhal snga nas kyis thog ma ma mchis pa'i 'khor ba nas bsags pa'i dngos sdig dang /sgrib pa ci mnga' ba thams cad byang bar gyur cig /sku la bsnyun mi mnga' zhing sku tshe dpag tu med pa ring ba dang / dbu rmog btsan pa dang / chab srid 'byam par rgya che zhing / 'jig rten dang 'jig rten las 'das pa'i dpal phun sum tshogs pa la mnga' brnyes par gyur cig /mthar yang tshogs gnyis yongs su rdzogs pa'i g.yung drung gi sku chos kyi rgyal po chen po sangs rgyas bcom ldan 'das kyi go 'phang brnyes par gyur cig /chab 'og tu gtogs pa'i 'bangs thams cad kyang phyi nang gi gnod pa thams cad rab tu zhi zhing bde zhing skyid pa dang /'phral yun du legs pa'i chos bzang po la gnas par gyur cig /mnga' ris kyi yul khams thams cad du yang mi nad dang / phyugs nad dang / lo nyas dang dgra'i tshogs la sogs pa'i gnod pa dang / bkra mi shis pa'i bag ci yang mi 'byung ba dang /char chu dus su bab ste/ lo phyugs 'phel zhing rgyas pa dang / bde skyid kyi dpal phun sum tshogs pa dang ldan par gyur cig /dam pa'i chos yun ring du gnas shing / sgo thams cad nas dar zhing rgyas par gyur cig /sgo'i bsod nams bgyid pa la ni mjug gi bsngo bas so so nas ji ltar dad pa bzhin du bris te 'debs su stsal lo//smon lam thams cad yongs su rdzogs pa'i 'og tu/ gyes khar bzod par gsol zhing slar gshegs par gnas par bgyi ba/ bcom ldan 'das de bzhin gshegs pa mtshan legs par yongs bsgrags dpal gyi rgyal bo dang /de bzhin gshegs pa rin po che dang zla ba dang pad+mas rab tu brgyan pa mkhas pa gzi brjid sgra dbyangs kyi rgyal po dang / de bzhin gshegs pa gser bzangs dri med rin chen snang brtul zhugs grub pa dang / de bzhin gshegs pa mya ngan med mchog dpal dang / de bzhin gshegs pa chos bsgrags rgya mtsho'i dbyangs dang /de bzhin gshegs pa chos rgya mtsho mchog gi blos rnam par rol pa mngon par mkhyen pa dang / de bzhin gshegs pa sman gyi bla be+e DUr+ya'i 'od kyi rgyal po dang / ston pa bcom ldan 'das dpal shAkya thub pa 'khor dang bcas pa gdan 'dzom pa spyan drangs nas mtshan nas brjod de/phyag btsal zhing mchod pa dang / mdo dang mthun par smon lam gsol ba dang / che ge mo la sogs pa 'gro ba mang bo'i don mdzad par gsol ba'i skabs 'dir/ bdag cag dus ngan pa'i sems can spyod pa dman zhing ma dag par gyur pas ma 'tshal ba dang /bag ma mchis pa la sogs pa'i dbang gis lus dang ngag dang / yid kyi spyod pa thams cad nyon mongs pa rnams dang 'dres pa dang / mchod pa'i dngos po chung zhing ngan la gtsang sbras ma phyed pa dang / mdo las 'byung ba'i cho ga bzhin du ma lcogs pa la sogs pa 'khrul zhing nongs par gyur pa thams cad 'phags pa thugs rje chen po dang ldan pa thams cad la bzod par gsol zhing mchis na/thugs brtse bar mdzad de bzod par bzhes shing / 'phral yun gnyis su bdag cag la sgrib pa dang gnod par mi 'gyur bar byin gyis brlab tu gsol/ 'phags pa rnams kyis kyang deng ngam dgung 'di'i bar du bdag cag la sogs pa 'gro ba phongs shing nyam thag pa'i sems can thams cad kyis phan pa dang bde ba'i don mdzad cing bka' stsal pa yang /da dung yang bdag cag la thugs brtse bas yang dang yang du gdan 'dzem par mdzad par dgongs shing / so so'i sangs rgyas kyi zhing rnam par dag pa rnams su 'gro ba'i don la gshegs su gsol/mjug 'dir bsngo ba'i tshigs bcad kyang bklag go/ /rdzogs so// //dbang phyug dam pa'i mnga' bdag dpal lha btsan po lha sras khri srong lde'u btsan gyi sku tshe bsring ba dang / dbu rmog btsan pa dang / chab srid mtho ba dang /