CLOSE WINDOW

D3051
བོད་ཡིག

@##/ /rgya gar skad du/ kro d+ha rA dza a gu dz+wa la a kha bi ra dza badzra maN+Da la bid+hi nA ma/ bod skad du/ khro bo'i rgyal po rdo rje gnam lcags 'bar ba zhes bya ba'i dkyil 'khor gyi cho ga/ /khro bo rdo rje gnam lcags 'bar ba la phyag 'tshal lo/ /gtum drag 'jigs pa'i sgra skad 'brug sgra sgrogs//rje btsun de la phyag 'tshal te/ de yi dkyil 'khor cho ga bri/ /dad pa dang ldan pa/ dam tshig dang rang gi brtul zhugs bsrung ba rnam par rtog pa med cing rgyud gcig pa/ bla ma dang rdo rje gnam lcags 'bar ba la mchog tu gus pa'i slob ma yon tan dang ldan pas/ dang po maN+Dal dang tshogs kyi mchod pa chen po byas nas/ bla ma la gsol ba gdab par bya'o/ /de nas bla ma khro ba med pa sngags dang phyag rgya dang rgyud la mkhas pa/ thos pa'i pha rol tu son pa/ rgyud 'dir dbang thob pa/ dam tshig dang / sdom pa dang ldan pa des khro bo bskyed la bsnyen pa la thug par byas nas/su pi tri'i sngags 'bum bzlas pa bya ba ni sngon du bsnyen pa/ de nas rgyud gzhan nas gsungs pa'i gnas yid du 'ong ba/ gang yang rung bar song nas bdud rtsi 'khyil pa'i sngags bzlas pa'i chus gtor te/ der dkyil 'khor byas te/ mchod pa dang gtor ma byas te/ rang gi khro bo dang lha mo mchod la/'byung po thams cad la gtor ma byin nas/ sa'i lha mo las blang ba ni/ skyob pa sangs rgyas thams cad kyi/ spyod pa'i tshul dang khyad par dang / /sa dang pha rol phyin pa la/ lha mo khyod ni dpang du gyur/ skyob pa shAkya seng ge yis/ /ji ltar bdud kyi sde bcom pa/ /de ltar bdag gis bdud kyi sde//pham par byas te dkyil 'khor bri/ /zhes brjod la/ thal mo sa la brdabs pa las/ sa'i lha mo sku phyed tsam 'thon nas 'dug pa las/ ngas sems can gyi don du dkyil 'khor byed pas/ bdag la sa byin cig ces brjod pa las/ khyod dkyil 'khor gyi bdag po yin pas/dkyil 'khor gyis zhes brjod nas sa la thim par bsam mo/ /sa blang ba'i rim pa'o/ /de nas bdud rtsi 'khyil pa'i rnal 'byor du gnas te/ de nas sa'i lha mo nam mkha' la gshegs par bsgoms la/ sa brko ste sa'i ro rnam lnga bsal la/ /der rin po che lnga dang 'bru lnga dang ldan pa'i bum pa gcig la slar rang gis sa dgang ngo //de nas dkyil 'khor nyis 'gyur du spos chu'i chag chag dang ba'i rnam pa lngas byug go/ /de nas rdo rje slob dpon gyis dkyil 'khor gyi dbus su gnas nas/ stong pa nyid sngon du 'gro bas lha'i nga rgyal bya'o/ / sa gzhi thams cad stong pa'i rang bzhin las/ hUM las rdo rje'i sa gzhir bsgoms nas/ de'i dbus su nga rgyal gyis gnas par byas la/ lha'i nga rgyal can dag gis dkyil 'khor bris par gsol ba btab nas/ dkyil 'khor nam mkha' la bteg la/ rdo rje slob dpon gyi mig tu ma dang /a las grub pa'i nyi ma dang / zla ba 'od zer 'bar ba dang bcas par bsams te/ rkang pa'i 'og tu hU~M las rdo rje rgya gram 'od 'bar ba dang bcas pa bsgoms nas langs te/ byang shar gyi mtshams nas bskor ba byas te/ rdo rje'i lta ba dang / /rdo rje'i 'gros dag gis bgegs gzhom par bya'o//de nas yang dkyil 'khor gyi dbus su 'dug nas/ rdo rje 'bar ba'i nga rgyal du byas nas/ de'i snying gar gnas pa'i sa bon las byung ba'i khro bo'i phur bu bskyed nas/ bdag gis ske nas bzung nas phyogs bcur phur bu gdab par bya'o/ /oM g+ha g+ha g+hA ta ya g+hA ta ya/ sarba duSh+TA na phaT/ kI la ya kI la ya/ sarba pA paM phaT/ hUM hUM hUM badzra kI la ya/ /badzra d+ha ro da adz+nyA pa ya ti sarba big+h+nAM kA ya bA k+tsi t+ta badzra kI la ya hUM phaT/ ces bdud rtsi 'khyil pa'i sngags kyis gdab par bya'o/ /sa gzung ba'i rim pa'o/ /de nas dkyil 'khor gyi dbus su khru gang ba'i dkyil 'khor zlum por byas la/lha'i grangs dang mnyam pa'i dri'i thig le byas la/ der me tog gi tshom bu bkram la sa bon las lhar bskyed la/ nam mkha'i lha bstims la/ ye shes kyi lha spyan drangs la/ nam mkhar bgegs bskrad nas bstims nas/ mchod bstod bdud rtsi myangs la/gsol ba gdab pa ni/ hUM bcom ldan rdo rje gnam lcags 'bar ba ni/ /rig sngags bdag po phyag 'tshal lo/ /snying rje'i yid kyis dkyil 'khor bri bar 'tshal/ /de nas byin brlabs gnang ba mdzad par gsol/ /dgongs shig sangs rgyas sde dang tshogs//lha rnams bstan la mngon dga' ba/ /dkyil 'khor byin brlab dngos grub mdzod/ /len gsum brjod do/ /lha lhag par gnas pa'o/ /de nas gser dang dngul la sogs pa'i bum pa mtshan nyid dang ldan pa la lha'i grangs dang mnyam pa'am/ yang na gnyis la sna tshogs pad+ma'i steng du rang gi mtshan nyid bri/las kyi bum pa la pad+ma'i dbus su sna tshogs rdo rje bri bar bya'o/ /gtso bo'i bum par sman lnga/ 'bru lnga/ rin po che lnga/ dri chu bdud rtsi lngas bkang la/ bum pa gzhan du 'ang de bzhin te/ mgul chings ras zung gcig gis bcing bar bya'o/ /me tog phreng ba dang gdugs kyis brgyan te/gdugs dkar po re re dbub par bya'o/ /tsu ta la sogs te 'bras bu dang bcas pa'i shing gis kha brgyan par bya'o/ /de nas gtso bo'i bum par pad+ma'i sku bskyed/ phyag rgya bzhi dang ldan par byas la/ ye shes sems dpa' spyan drangs bstims la/ mchod bstod dang bzlas pa bya/dam tshig gi khro bo dang / ye shes kyi bdud rtsi gnyis 'dres pas ye shes kyi bdud rtsi'i rang bzhin du bya'o/ /de nas bum pa gzhan du yang shes par bya'o/ /las kyi bum pa la pad+ma'i steng du las thams cad pa'i khro bo bskyed la/ ye shes bcug la mchod pa dang bzlas pa byas nas/ma zhu bar skur bzhugs par bsgoms nas ma grub bar du bgegs ma rungs pa bsrung bar gsol ba gdab bo/ /bum pa lhag par gnas pa'i cho ga'o/ /de nas slob ma shar phyogs su maN+Dal phul la der 'dug la/ rdo rje slob dpon gyis gtso bo'i nga rgyal byas la gsol ba gdab bo//dga' chen khyod bdag ston pa bas/ /slob dpon khyod ni dgongs su gsol/ /byang chub chen po'i tshul bstan pa/ /mgon po chen po bdag 'tshal lo/ /dam tshig de nyid bdag la stsol/ /byang chub sems kyang bdag la stsol/ /sangs rgyas chos dang dge 'dun te/ skyabs gsum dag kyang bdag la stsol//thar pa chen po'i grong mchog tu/ /mgon po bdag ni 'jug par 'tshal/ /zhes gsol ba gdab bo/ /de nas slob dpon gyis slob ma'i lag pa nas bzung nas/ bu tshur theg pa chen po la/ /khyod ni tshul chen snod yin te/ /gsang sngags spyod tshul cho ga ni//khyod la yang dag bstan par bgyi/ /rdzogs pa'i sangs rgyas gang 'das dang / /gang dag de bzhin ma byon dang / /da ltar byung ba'i rdzogs sangs rgyas/ /'gro la phan phyir bzhugs pa rnams/ /de dag kun gyis gsang sngags kyi/ /tshogs mchog bzang po 'di mkhyen nas/ / dpa' bos byang chub shing drung du/ /thams cad mkhyen pa tshad med brnyes/ /gsang sngags spyod pa mnyam med pa/ /skyob pa rdo rje gnam lcags 'bar ba yis/ /bdud sde shin tu mi bzad pa/ /dpung chen dag kyang 'di yis bcom/ /de nas kun mkhyen thob pa'i phyir/ /bu yis blo gros 'di gyis shig /de nas nyan par rna ba gtod pa dang / sdig pa bshags pa la sogs pa byed du bcug ste/ de nas bya ba'i rgyud la sogs pa dang thun mong gi sdom pa dang / rnal 'byor bla na med pa'i phas pham pa bcu bzhi dang / sdom pa dbog pa la sogs pa dag kyang bya'o/ /de nas slob ma'i gnas gsum du dri'i thig le byas te/rdo rje dang 'khor lo dang pad+ma dag bskyed de/ de dag gi lte bar sa bon gsum bsam zhing / oM AHhUM zhes gnas gsum du rdo rje gzhag par bya'o/ /de nas mchod de so shing me tog gi phreng bas brgyan pa/ bdud rtsi 'khyil pa'i sngags kyis btab la sbyin no//slob mas rtse 'cha' zhing rtsa ba brud la dkyil 'khor gyi dbus su dor ro/ /zhi ba la sogs te las dang dngos grub kyi rtags shes par bya'o/ /srung skud la bdud rtsi 'khyil pa'i mdud pa bor te/ dpung pa g.yon pa la gdags par bya'o/ /de nas ku sha la las thams cad pa'i sngags kyis byin la/shar lho mtshams su mgo bstan la nyal te rmi lam dran par bya'o/ /slob ma lhag par gnas pa'i rim pa'o/ /de nas yol ba'i nang du log la mchod bstod dang bzlas pa bya'o/ /de nas nang par dkyil 'khor gyi lha nam mkhar bteg la thig gdab par bya'o/ / tshon sna lnga'i skud pa so sor stong pa nyid las yi ge lngar gyur par bsam/ de nas de dag gcig tu bsgril la/ gser la sogs pa'i snod du bzhag la bdud rtsi lnga'am/ spos chus bsangs te g.yas g.yon dbus dang gsum du oM AHhUM gis rim par bkod de bzhag/ de ni dam tshig gi skud pa'i rim pa'o/ /de nas ma dun gyi nam mkha' la bzhugs pa'i rigs lnga'i thugs ka nas ye shes kyi skud pa 'od du gnas par bsams te/ rang gi mig gnyis su nyi ma bsams te/ de'i steng du dzaHdmar po bsam/ de nas mig gi rdzi ma 'dren pas/ ye shes kyi skud pa dzaHsa drangs nas dam tshig gi skud pa la gzhug go//de nas mchod pa lngas mchod do/ /ye shes kyi skud pa'i rim pa'o/ /de nas slob dpon nub tu 'dug nas/ skud pa rdo rje'i khu tshur g.yon pas bzung la/ gtso bor bsgoms la/ lte bar khu tshur bzhag la dzaHgsum gyis slob ma'i lag tu g.yas pas drangs te byin la/tshangs pa'i thig dang po gdab bo/ /oM badzra sa ma ya mA ti kra ma hUM/ zhes gyen du btab pa'i sgras de bzhin gshegs pa rnams 'gro ba'i don gyi dus la bab po bar bskul lo/ /de nas tshangs thig gnyis pa yang de bzhin du gdab par bya'o/ /de nas kha dog gcig pa'i skud pa las thams cad pas byin gyis brlabs la sa'i thig btab la/de'i steng du ye shes kyi thig btab la snga ma'i thig byin gyis brlab par bya'o/ /de nas ye shes kyi thig la mchod pa byas la slar gshegs su gsol lo/ /de nas tshangs pa'i thig dang po btab la bya rog rjes gnyis lho byang du bri'o//de nas gnyis pa btab ste/ des zur bzhi'i bya rjes btsal lo/ /dang po shar gdab/ de nas nub gdab/ de nas byang / de nas lho gdab/ de nas me rlung gi gru gdab/ srin po dang dbang ldan gdab/ de nas cha chen nyi shur btab na bde ba yin/ de la dbus kyi pho brang dang sgo rta babs dang bcas pa'o//rdo rje rab me ri gnyis bco brgyad ma gtogs phyi nas btsal ba thig gi rim pa'o/ /de nas tshon sna lnga'i rim par bzhag ste/ stong pa nyid las yi ge lnga las bskyed de/ dri dang bdud rtsis bsangs la/ de nas snga ma bzhin du ye shes tshon 'bar ba'i lta bas snga ma bzhin du bkug la bstim la/oM badzra tsi tras ma ya s+t+waM zhes bzlas/ de nas byang shar mtshams nas dkar po drangs te/ mdzub gang bla ma'i lag pa g.yon pas bri'o/ /de nas/ chos dbyings 'di ni dag pa ste/ /sems can khams kun sgrol byed pa/ /rgyal ba rdo rje gnam lcags mchu 'bar nyid//de bzhin gshegs pa kun gyi gnas/ /zhes brjod de/ des mchod la rin po che'i snod kyis bkab la gzhag go/ /de nas dbus nas bri bar bya ste/ rdo rje rtse lnga rgya gram rdo rje ra bar ldan pa/ de ni dbus kyi dkyil 'khor yin/ /de nas phyi yi zlum po ni/ /'khor lo rtsibs bcu'i lte ba bya//de yi phyi rim rdo rje'i rab bya/ /gru chad snam bu bzhi dang ldan/ /gru bzhi pa la sgo bzhi pa/ /rta babs bzhi dang yang dag ldan/ /dril bu dang ni 'phan la sogs/ /me tog phreng ba rnams kyis brgyan/ /grwa rnams dang ni sgo khyud du/ /rdo rje rin chen spras pa dang / / de bzhin zla ba phyed pas brgyan/ /rdo rje'i phreng ba dang pad+ma'i phreng ba bya'o/ /mtshan ma dgod pa yang rdo rje rgya gram gyi lte ba la rdo rje dril bu dgod par bya/ shar gyi rdo rje'i rtsibs rtsa la ral gri bri/ lho'i rdo rje'i rtsibs rtsa la seng ldeng gi phur bu/ nub kyi rdo rje'i rtsibs rtsa la gnam lcags kyi tho ba/ byang gi rdo rje'i rtsibs rtsal lcags kyu zhags pa dgod de/ de dag ni nang gi phyag rgya dgod pa'o/ /'khor lo'i rtsibs bcu dgod pa ni/ khro bo bcu'i phyag mtshan dgod de rgyud gzhan dang mthun/ 'khor lo'i grwa bzhir nang gi lha mo bzhi'i phyag mtshan dgod/ lha snam gyi gzhir phyi yi lha mo bzhi'i phyag mtshan dgod/sgo bzhir sgo srung bzhi'i phyag mtshan dgod de rgyud gzhan dang mthun/ dkar po ser po dmar po dang / /de bzhin du ni ljang dang sngo/ /sngon po nang du shes bya ste/ /'di ni tshon gyi rim pa yin/ /shar phyogs su ni dkar po che/ /lho phyogs su ni ser po che/ /byang ni ljang gu yang dag ldan//dbus kyi sa yi cha nyid ni/ /nag po mig sman bcag dang mtshungs/ /'di dag ni dkyil 'khor bri zhing phyag rgya dgod pa'i rim pa'o/ /de nas bum pa dgod de/ gtso bo'i bum pa dbus su dgod/ las kyi bum pa byang shar mtshams su gzhag ste/ khyod kyis bgegs bsrung ba gyis shig ces brjod nas/big+h+nAM ta kr-i ta bzlas/ bum pa gzhan rnams ni dang po lha gang bsgoms pa'i phyogs su gzhag go/ /de nas sbyin sreg gi cho ga ni/ sgrub pa'i thabs su rgyas par bshad pas 'dir ma bris so/ /de nas mchod pa'i rdzas ni/ me tog snod ni brgya 'am stong ngam bcu'o/ /bdug spos dang mar me dang dri chab dang / zhal zas kyi snod brgya 'am/ stong ngam bcu las nyung du mi rung ngo / /ar+g+haM dang zhal bsil dang rol mo'i bye brag rnam pa sna tshogs pa dung dang / rdza rnga dang / 'khar rnga dang / pi wang dang / gling bu dang / Dam ru dang /dril bu g.yer ka dang / pheg rdob pa dang / rnga rings la sogs pa yang 'byor tshad do/ /gdugs dang / rgyal mtshan dang / ba dan dang / bla re dang / 'phan dang / sprin chen po la sogs pa yang bri'o/ /slob ma'i grangs dang bstun pa'i gtor ma du 'byor ba dang / gzhan yang lha rnams la 'bul ba'i tshogs kyi rdzas dang /bdud rtsi lnga dang / ras zung dang bcas pa mchod rdzas 'byor tshad pa yang gzhag go/ /mchod pa'i rdzas kyi rim pa'o/ /de nas rdo rje slob dpon gyis dkyil 'khor cha rkyen thams cad phun sum tshogs par shes nas ni/ de nas rgyan gyis brgyan pa'i gu rus khams gsum rnam par rgyal ba'i nga rgyal byas te/me tog gi phreng ba sngon po blangs te hUM bzhi'i sngags zlos shing rdo rje dril bu dkrol zhing dkyil 'khor lan gsum bskor te/ bltas la phreng ba de bcom ldan 'das la phul la/ yang gar bya ba'i tshul gyis rang gi mgo la bcings nas phyag bya'o//rang lha'i rnal 'byor du 'jug par bya ste/ dang por khro bo gnod mdzes kyis bgegs bsal ba'i sbyor ba sngon du byas nas bla ma mchod pa dang / stong pa nyid dang / ye shes kyi yan lag bsgoms nas/ 'byung ba rim brtsegs dang / gzhal yas khang bsgom pa dang / dam tshig bskyed la ye shes spyan drangs shing bstims la/mchod bstod bdud rtsi myang ba yan chad byas la/ gtor mas 'byung po thams cad tshim par byas la/ de nas sgom pa sngon du 'gro bas slob ma dkyil 'khor du 'jug pa'i dkyil 'khor slob dpon gyis bsgom par bya'o/ /ye shes kyi dkyil 'khor dang bsres nas bsang gtor dang mchod pa dang bdud rtsi myang ba dang /ras zung thams cad dbul bar bya'o/ /mchod pa'i rim pa'o/ /de nas rang dbang blangs la/ dkyil 'khor lha la dngos grub thams cad bsgrub pa'i phyir/ sems can don mdzod cig ces gsol ba gdab par bya'o//yang / rdo rje slob dpon dka' thub che/ /sems can kun la phan pa'i phyir/ /slob ma rnams ni gzhug par bgyi/ /zhes rtse mo nas 'byung ba bzhin du gsol ba btab la dpal mchog dang po nas 'byung ba'i glus nye bar bskul ba zhes bya ste/ nam mkha' las byung mtshan ldan phyir/ / thog ma tha ma med pa'i mchog /sems dpa'i rdo rje che rang bzhin/ /rdo rje 'dzin par bdag sgrubs shig /dngos grub chen po kun gyi mchog /dbang phyug chen po lhag pa'i lha/ /rdo rje 'dzin pa kun gyi rgyal/ /mi 'gyur mchog tu bdag sgrubs shig /nyes pa med pa rtag pa ste/ /'dod chags kun gyi rjes su chags//'dod chags chen po dga' ba che/ /bcom ldan de nyid bdag sgrubs shig /shin tu dag pa kun gyi mchog /gdod nas grol ba de bzhin gshegs/ /kun du bzang po kun bdag nyid/ /byang chub sems su bdag sgrubs shig /dngos grub chen po mchog gi mchog /dbang phyug chen po rgyal bas rgyal/ /grub pa'i rdo rje che gsal ba/ /rdo rje snyems par bdag sgrubs shig /sems can kun gyi yid khyab pa/ /sems can kun gyi snying la gnas/ /sems can kun gyi yab nyid de/ /'dod chags mnyam pa'i dam tshig mchog / bden pa gang gis ye shes mchog /shes rab thabs kyi dkyil 'khor yin/ /bden pa de yis mgon bdag la/ /khyed kyi 'dod pa rab rdzogs mdzad/ /chos rnams gzugs brnyan lta bu ste/ /dag cing gsal la rnyog pa med/ /gzung du med cing brjod du med/ /rgyu dang las las kun du 'byung //de bzhin nyid las nges par skyes/ /bden pa 'di yis dkyil 'khor du/ /gzugs brnyan gsal bar slob ma ni/ /kun gyis dri ma med mthong shog /de nas bden pa bsgrag par bya ste/ shes rab thabs dang dkyil 'khor gyi/ /bden pa'i byin rlabs gang yin pa'o//mgon po khyod kyi bden pa des/ /bdag gi 'dod pa skongs gyur cig /de nas slob ma phyi rol na gnas pa'i drung du/ las kyi slob dpon gyis mar me gdong g.yogs spos chu rnams bshams te/ slob ma re re nas bkug la maN+Dal phul lag na me tog thogs pa'i slob mas gsol ba lan gsum gdab bo//sangs rgyas rnams kyi rang bzhin sku/ /slob dpon la ni bdag skyabs mchi/ /gtso bo khro bor bcas pa yi/ /la sogs pa brjod cing bsams la/ /gdong g.yogs la/ rdo rje nas bzung ste nang du gzhug /de nas slob dpon gyis/de bzhin gshegs pa kun gyi gnas zhes pa la sogs pas gsol ba gdab bo/ /khyod su yin zhes kyang dri'o/ /dkyil 'khor gyi lha la sgo bzhi nas phyag byed du bcug /de nas slob ma rnam par snang mdzad du bskyed la/ de nas A khaM bI ra hU~M/ rdo rjer gyur pa'i yid kyis su//byang chub tshogs ni rdzogs bya'i phyir/ /lag pa stong pas mi bya'o/ /zhes me tog 'dzin du bcug la/ shar sgor stan la hU~M gis gzhag par bya'o/ de nas sdig pa bshags pa nas/ dge ba'i rtsa ba bsngo ba'i bar du byed du bcug la/ de nas sdom pa sbyin par bya ste/ sangs rgyas chos dang dge 'dun te//zhes pa nas mchod pa'i las kyang ci nus bgyi ba'i bar dang / gang phyir rdo rje 'dzin pa yis/ /dngos grub slob dpon rjes 'brangs nas/ /sngags pas 'di dag spangs nas ni/ dngos grub nges par thob par 'gyur gyi bar du phog la/ slob mas gtso bo 'di ni bdag la gson nas/sems can mya ngan 'das la dgod kyi bar du brjod la khas blang ngo / /de nas oM AHbig+h+nA n+ta kr-i ta hUM gis bsangs la/ de nas sarba yo ga tsi t+to t+pA da yA mi zhes pas rnal 'byor du sems bskyed la/ de'i snying gar hUM las rdo rje bskyed de/ su ra ta sam ya s+t+waM ho/ bo d+hi tsit+ta badzra sid+h+ya ya thA su khaM zhes brjod de/snying gar rdo rje gzhag go/ /dus 'dir khyod nyid ni sangs rgyas grub par gsungs/ gang zhig 'di nyid ma mthong ba'i/ /mdun du smra bar ma byed cig /bag med smras na nyams par 'gyur/ de bas nan tan gnas par bya'o/ /rdo rje gnam lcags 'bar ba'i deng //khyod kyi snying la yang dag zhugs mdzad de/ /gal te tshul 'di smras na ni/ /de ma thag tu bkas te gshegs/ /de nas pad+ma'i snod nas dri dang bdud rtsi lnga'i chu sbyin mgor rdo rje bzhag la/ /'di ni khyod kyi dmyal ba'i chu/ /dam tshig 'das na sregs par byed/ /dam tshig bsrungs na dngos grub thob/ /'thungs shig rdo rje chu 'thungs shig /oM badzro t+ka hUMTha Tha Tha Tha/ deng nas brtsams te khyod kyis rdo rje gnam lcags 'bar bang yin gyis/ ngas gang gyis shig bsgo ba de khyod kyis bya dgos so/ /khyod kyis nga la brnyas pa'i las ma byed cig /khyod mi bde ba ma spangs par tshe'i dus byas nas/ /sems can dmyal bar skyes par gyur ta re/dam chu blud pa'i rim pa'o/ /de nas slob ma a mi de bar bsgoms la/ de bzhin gshegs pa thams cad kyis byin gyis brlabs la/ rdo rje sems dpa' bdag la dbab par gyur cig ces brjod nas man ngag ji lta ba bzhin du ye shes dbab bo/ /de nas mthong ba dri bar bya'o//de nas me tog dor ba ni/ ji ltar de bzhin bsod nams lha'i/ /rigs kyi bye brag 'di la'o/ /rigs kyi nang na 'di bzang ngo / /de yi dngos grub 'di 'byung bas/ /de yi bsod nams rjes 'byung ba'o/ /de 'dra ba'i dkyil 'khor 'di la'o/ /zhes brjod nas me tog dor bar bya'o//pratI ts+tsha badzra hoHzhes brjod par bya'o/ /lha gang la 'bebs pa dang / sku'i stod smad la sogs pa'i bye brag gis dngos grub bzang ngan dag 'byung bar shes par bya'o/ /me tog dang ltas kyi rim pa'o/ /gdong g.yogs dgrol ba ni/ rdo rje sems dpa' deng khyod kyi/ /mig 'byed par ni brtson mdzad de//rdo rje mig ni blan med/ /phye bas thams cad mthong bar 'gyur/ /he badzra pA sh+ya/ oM badzra ga sha na tsak+Shu tsak+Shu pra be sha phaT/ ces pas gdong g.yogs dgrol lo/ /de nas/ dkyil 'khor bzang po 'di la ltos/ /da ni dad pa rab tu bskyed/ /bya ba la sogs pa brjod la lha ngo bstan to//de nas bum pa rnams kyi chu lhan cig tu bsdus la/ slob ma'i spyi bor dbang bskur ba sbyin te/ oM a b+hiShi ny+tsa spyi bor chu blugs la rigs kyi bdag po mi bskyod pas brgyan par bsam mo/ /de nas dbu rgyan stong pa nyid las bU~M dzI A~M khaM hUM las rigs lngar bskyed do/ /sangs rgyas lnga der bcug la slob ma'i mgo la bzhag la/oM rat+na ku la mu dra a b+hi Shiny+tsA mi zhes brjod de dbu rgyan gyi dbang bskur ro/ /de nas rdo rje stong pa nyid las paM las a mi de bar bskyed/ bkug la mchod de gyur pa las rdo rjer byas la sbyin no/ /oM badzra sa ma ya a b+hi Shiny+tsA mi zhes bas lag tu sbyin no//de nas dril bu stong pa nyid las don yod grub par bskyed pa dang / bkug la mchod de slar dril bur byas la/ lag pa g.yon par dril bu gtad la/ oM a d+hi ba ti a b+hi Shiny+tsA mi zhes bdag po'i dbang sbyin no/ /de nas rdor dril gnyis slob ma'i mgor bsnol te bzhag nas/ming gi dbang rnam par snang mdzad kyi rang bzhin chos kyi rnam par snang ba'i bdag nyid sbyin par bya ste/ oM badzra satwa a b+hi Shiny+tsA mi badzra nA ma a b+hi She ka ta zhes byin la kye dpal che ge mo zhes lha gang la me tog babs pa'i zhabs kyis mtshan pa'i ming gi dbang bskur ro/ / 'di ni rig pa'i dbang lnga'o/ /rdo rje slob dpon du dbang bskur ba sbyin par bya ste/ bdag gzhan don ni rdzogs byed pa/ /rdo rje slob dpon dbang yin te/ /thugs rje'i bdag po stsal du gsol/ /zhes zhus pas de nas hUM las rdo rje sems dpa' bskyed la mchod de slar rdo rjer bskyed la/ thog mtha' med pa'i sems dpa' ni/ /rdo rje sems dpa' dga' ba che/ /kun du bzang po kun bdag nyid/ /rdo rje snyems tshul bdag nyid bdag /phyag na rdo rje'i skyes bu'o/ /zhes brjod nas rdo rje sbyin no/ /'di ni sangs rgyas thams cad kyi/ /shes rab dbyangs kyi rjes 'gror bshad/ / rtag par khyod kyis gzung ba yin/ /rgyal ba'i byang chub mchod par gyis/ /zhes dril bu g.yon par sbyin no/ /srid pa ngo bo nyid las dag /brjod la dkrol lo/ /de nas lhag par lha'i sku phyag rgya chen po bsgom pa sbyin te/ srid pa'i bde ba shin tu chung / /sdug bsngal chen po zhi bya'i phyir//shin tu bde ba dam pa'i thabs/ /dam tshig 'di ni rtag tu bskyed/ /ces brjod la gzhal yas khang dang lha'i rnam par dag pa bstan te/ gdams ngag bzhin no/ /de nas rjes gnang sbyin pa ni/ /'jig rten khams ni ma lus pa/ /sems can kun la phan pa'i phyir//chos kyi 'khor lo rab tu bskor/ /de bzhin du rdo rje'i 'khor lo dang / rin po che dang / pad+ma dang / las kyi bar du bskur ro/ de nas dngos grub kyi brtul zhugs sbyin par bya ste/ 'di de sangs rgyas thams cad kyi/ /phyag na rdo rje'i lag na 'dug /rtag tu khyod kyis gzung bar gyis//phyag na rdo rje'i brtul zhugs brtan/ /de nas slob ma sangs rgyas shAkya thub pa'i skur bskyed la bla gos kyi mtha' ma lag pa g.yon pas bzung ba'i khu tshur snying gar bzung la/ g.yas pa mchog sbyin du byas la/ lung bstan par bya ste/ sangs rgyas byang chub sems dpa' dang / / 'phags pa rnams kyis mgrin gcig tu/ /rdo rje 'dzin par lung bstan gyis/ /shes rab kyi lung bstan sbyin no/ /de nas gsang ba'i ye shes bslab pa ni/ /'dod chags bral ba lta bu yi/ /khams gsum na yang sdig med do/ /de bas 'dod chags bral bar bya/ /khyod ni nam yang ma byed cing //bde chen theg pa 'di la ni/ /phyin chad shi ba yod min te/ /sdug bsngal bsris pas mya ngan 'das/ /srid pa gtan du dngos grub 'gyur/ /rang bdag yongs su bor nas ni/ /dka' thub spyad par mi bya ste/ /ji ltar bde bar bsgrubs nas ni/ /sangs rgyas dngos grub thob par 'gyur//de ltar slob dpon dkyil 'khor ni/ /sngags dang rgyud kyi phrin las can/ /sangs rgyas dang ni byang chub sems/ /snying rje'i dbang gis sems can don/ /khyed kyis dkyil 'khor cho ga dag /brtson par bri dang rgyud la ni/ /nyan dang bsgrub pa dag tu gyis/ /zhes gnang ba sbyin no//dbang dag rdzogs nas dkyil 'khor gyi lha dang / bla mal sgra sna tshogs dang / rol mo'i bye brag gis mchod nas bskor ba byas la/ dkyil 'khor gyi lha rnams rang gi snying gar bkod la/ tshogs dang nang gi sbyin sreg gis tshim par bya'o/ /de nas yi ge brgya pa gdon/ /bzod par gsol/oM AHhUM muHsa gshegs su gsol lo/ /dkyil 'khor phyags la dman ma la sogs pa gtor ma dang rol mos chu bo chen por dor ro/ /bdag gis dkyil 'khor cho ga legs sbyar bas/ /bsgyur ba bsod nams gang thob pa/ /de yis khams gsum 'gro ba kun//dpal ldan gnas su 'gro bar shog /nor par gyur na mkhyen pa rnams la bzod par gsol/ khro bo'i rgyal po rdo rje gnam lcags 'bar ba zhes bya ba'i dkyil 'khor gyi cho ga /rgya gar gyi slob dpon chen po lho phyogs dpal gyi ri la bzhugs pa'i bla ma mai tri pas mdzad pa rdzogs so/