27a2 bden pa'i tshig brjod do/ /dpa' bo gcig pa'i dkyil 'khor du dbang bskur ba'i bdud rtsi bum pa'i cho ga dpal mar me mdzad kyis mdzad pa rdzogs so//[ ]@##/ /dpal rdo rje rnam par 'joms pa la phyag 'tshal lo/ /dpal rdo rje rnam par 'joms pa yab yum gnyis su med
27a3 pa'i dkyil 'khor du dbang bskur bar 'dod pa'i sgrub pa po dam tshig dang ldan pas gnas khang yid dang mthun par sa'i cho ga la sogs pa sngon du song bas/dpal rdo rje rnam par 'joms pa yab yum gyi dkyil 'khor bzhengs te/ sa stegs gru bzhi pa me long gi ngos ltar byas la thig btab la
27a4 tshon dgye ste/dbus su 'khor lo rtsibs bzhi pa dkar po/ mu khyud ser bo mdung rtse gsum pas bskor ba/ de'i phyi rim pad+ma bcu drug pa dmar po/ mu khyud ser po phur bus bskor ba/ gru chad ljang gu mu khyud dang bcas pa mtha' ma me ris bskor ba/ grwa rnams su bum pa bzang po bri bar bya'o/ /
27a5 de ltar bris la dkyil 'khor gyi mtha' ma rnams su shu gu brgya rtsa brgyad kyis bskor ba gzugs so/ /de dag kyang ras kyi skud pa sgril mas sbrel lo/ /mtshan nyid dang ldan pa'i bum pa gnyis la rgyan thams cad kyis brgyan pa 'khor lo dang pad+ma'i steng du gzhag go/ /bum pa gnyis la yang
27a6 dar tshon sna lngas sprel lo//dkyil 'khor gyi kho ra khor yug tu rtswa ku sha gsar pa bting ba'i steng du spos chu dang 'o ma'i chus bsang bar bya'o/ /de nas khrus kyi cho ga nas byung ba bzhin du nye reg dang 'thor 'thung la sogs pa byas la bdag nyid lag pa gnyis khong stong du sbyar la mthe bong gnyis
27a7 bslang la mthe'u chung nang du bskum la/oM ma hA yak+Sha senA pa ta ye badzra pA Ni hUM phaT/ ces brgya rtsa brgyad brjod pas rdo rje rnam par 'joms pa sku mdog ser po rgyan sna tshogs pas brgyan pa/ dar kyi cod pan dang mu tig gi dra bas brgyan pa/ dbu la rigs lnga'i sangs rgyas kyis brgyan pa/
27b1 thugs ka nas khro chung me ltar 'bar ba/ dpag tu med pa 'phro ba yab zhal bgrad ljags 'gyu ba phyag g.yas bum pa'i steng na khro bo'i zhal gnyis phyung ba/ g.yon rdo rje dang lcags kyu lhan cig tu 'dzin pa bskyed do/ /de nas lag pa'i sor mo bsnol srin lag gnyis bsgrengs la mthe
27b2 bong dang /mdzub mo gnyis sbyar la/ oM badzra d+ha ra tiSh+Tha tiSh+Tha hUM phaT/ ces brjod pas yum lu gu rgyud ma sku mdog dmar mo rgyan sna tshogs pas brgyan pa g.yas lcags sgrog rdo rje rtse gsum pas mtshan pa bsnams te yab la 'khyud pa g.yon bdud rtsi'i bum pas chu rgyun 'bebs pa yab kyi
27b3 bum pa dang gnyis med du bskyed do//de nas sgrub pa po dam tshig dang ldan pa bzhis phyogs bzhi nas mchod pa dang bstod pa byas la bgegs zhi bar bya ba'i don du gtor ma re re btang / de nas yab yum gyi ye shes sems dpal la dmigs la shug pa re la rgyud re bton la/ g.yas na sa gcig
27b4 cig la bskor ba/de ltar bzhi rdzogs pa dang re re la dbang du gyur pa'i sbyin sreg bya'o/ /de'i du ba la slob ma bdugs te khrus re yang bya'o/ /de nas dbang lugs bzhin du bskur ro/ /gtor ma btang / dkyil 'khor bsnyu/ bkra shis gsol/ khrus re yang bya'o/ /slob mas bla ma la
yon dbul lo/