CLOSE WINDOW

D2937
བོད་ཡིག

@##/ /rgya gar skad du/ badzra bi dA ra nA ma d+ha ra Ni maN+Dal pra kr-i ya ya thA kra ma nA ma/ bod skad du/ rdo rje rnam par 'joms pa zhes bya ba'i dkyil 'khor gyi lag len go rims ji lta ba zhes bya ba/ byang chub sems dpa' phyag na rdo rje la phyag 'tshal lo/ /na mo rat+na tra yA ya/ na maHtsaN+Da badzra pA Na ye/ rdo rje rnam par 'joms pa'i cho gas rang ngam 'gro ba gzhan gyi gdon dang nad rnams las grol bar 'dod pa'i rdo rje rigs kyi sgrub pa pos phyugs lhas sam/shing gcig dang lha khang ngam/ lam gyi bzhi mdo'am/ khang stong ngam nags tshal gang yang rung / bsam gtan gyi khang par chag chag dang ba'i rnam lnga dang / spos dri zhim pos byug ris byas la/maN+Dal dang mchod pa thams cad rdzogs par bshams nas/ khrus dang 'thor 'thung dang nye reg byas te/ stod g.yogs dang / smad g.yogs gtsang zhing sar pa gon la/ phyag na rdo rje'i nga rgyal gyis mchod pa byin gyis brlabs la/yungs kar lag tu thogs te/ na mo rat+na tra yA ya/ nas bin+d+ha bin+d+ha badzra hUM phaT ces pa'i bar du lan gsum mam bcu brjod do/ /de nas bum pa bca' ste/ gser dang dngul lam ma rnyed na zangs sam sa las byas kyang rung ste/ lto ba che la mgrin pa ring ba zhabs zhum pa kha yel ba/ nag po ra ri med pa/ grangs lha grangs dang mthun pa drug gam/ yang na bdun nam gcig kyang rung ste/gu gul gyis bdugs pa dang / yungs kar gyis bgegs bzlog la/ der 'o ma dang chu nyung zad blugs pa der rin po che rnams dang / dri lnga dang / sman lnga dang 'bru lngas dgang la mgrin pa gos kyi shing las byung ba'i kha tshar phun tshar ma nyams pa'i mthing shun gyis kha bsgyur ba'am/dkar po gsar zhing gtsang bas mgul pa bcings la/ me tog sngon po dang bcas pas kha brgyan la mgul pa ras kyi steng du yungs kar dang rtswa dUr ba nyag ma bdun dang bcas pa dri zhim po'i me tog phreng bas bcings la/mdud pa la hUM bris pa'i ba'i lci bas lam lhung bas so/ /gdugs dang ba dan kyang ngo / /de nas maN+Dal gyi steng du gzhag go/ /yang khrus dang 'thor 'thung nye reg byas la/ las kyi rdo rje dang / gsang gdub dang / gdu bu'i cho ga rnams byas la/der rang gi snying gar nyi ma la sa bon bltas pa des rigs gsum 'khor dang bcas pa dmigs la/ bde bar gshegs pa dam pa'i chos/ /tshogs chen bcas la phyag 'tshal lo/ /gtum po phyag na rdo rje la/ /khyad par du yang phyag 'tshal lo//yid 'ong mchod rdzas ji snyed rnams/ /rigs gsum 'khor dang bcas la 'bul/ /'khor ba thog ma med pa nas/ /da lta sdig pa bgyis pa dang / /bgyid du stsal dang yi rang ba/ /shin tu 'gyod pas bshags shing sdom/ /bdag dang gzhan gyis gang bgyis pa'i//dge ba kun la rjes yi rang / /byang chub snying po nyer gnas te/ /gang yang byang chub mchog rtogs pa'i/ /bdag gis gsol ba rgyal ba kun/ /'khor lo dam pa bskor du gsol/ /bya ba thams cad byas nas ni/ /sangs rgyas mya ngan 'da' ba rnams/bdag gis gsol ba rgyal ba kun/ /sangs rgyas mya ngan mi 'da' gsol/ /phyag 'tshal la sogs bsod nams gang / /ji snyed bdag gis bgyis pa rnams/ /ji ltar mgon pos mkhyen pa ltar/ /byang chub tu ni yongs su bsngo'o/ /de nas rang gis rang ma rtogs pa stong par bsgom/a ser pos gser gyi sa gzhir bsam/ de'i steng du baM las 'o ma can gyi rgya mtsho bsam/ de nas suM las ri rab/ de steng du b+h+rUM las gzhal yas khang gru bzhi sgo bzhi pa rta babs dang bcas pa/ dbus dang mtshams bzhir 'khor lo rtsibs bzhi dang phyogs bzhi ni gri gug bzhis mtshan pa'o//de'i dbus su raM las stong par song ba'i ngang las chos thams cad rdul dang bral ba'i sgra byung bar bsam/ oM badzra dz+wa lA na lA ya swA hA/ de las sna tshogs rdo rje ngos gcig med pa/ de las rdo rje rnam 'joms kyi skur grub/ sku yongs su rdzogs pa ni sku mdog ljang sngon yid tsam khro ba/g.yas na rdo rje rgya gram la ngos gcig med pa thugs kar 'dzin pa/ g.yon dkur brten cing 'gying ba/ mgul rgyan dang dpung brgyan la sogs pa dang ldan pa/ stod g.yogs dar la smad g.yogs dang tshi gu can bsnams pa'o/ /oM tsu ru tsu ru tsaN+Da ki li kI lA ya swA hA/oM trA sa ya trA sa ya badzra ki li kI lA ya swA hA/ oM ha ra ha ra badzra d+ha rA ya swA hA/ oM pra ha ra pra ha ra badzra pra b+hany+dza nA ya swA hA zhes pa las/ dbang ldan dang me dang srin po dang rlung rnams kyi 'khor lo'i steng du go rims bzhin du rdo rje gdengs pa dang / rdo rje ka na ka dang / rdo rje be con dang / rdo rje tho ba rnams so/ /de rnams la go rims bzhin du rdo rje gtum mo dang / rdo rje ki li kI la dang / rdo rje be con dang / rdo rje tho ba rnams kyi skur grub po/ /khro bo rdo rje gtum po smug nag bzhin khro gnyer can/ g.yas pa khro bo rdo rje rtse lnga pa phyar te thogs pa'o/ / lha thams cad g.yon bstan nas 'gying ba'o/ /rdo rje ki li kI la ya mdog ljang nag khro gnyer can/ g.yas na rdo rje rtse gcig pa/ rdo rje be con mthing nag khro gnyer can/ smar ser po can/ g.yas na be con gyi rtse mo rdo rjes mtshan pa/ rdo rje tho ba mdog nag po shin tu khro ba mche ba gtsigs pa/g.yas na rdo rje tho ba thogs pa'o/ /de nas mchod yon lag tu thogs te/ dad pa dang ni dam tshig gis/ /tshur gshegs tshur gshegs khro rgyal rnams/ /bdag la mchod yon pa zhes nas kyang / /bdag la byin gyis brlab tu gsol/ /oM A ha ra A ha ra sarba bid+ya d+ha ra swA hA zhes pas mchod yon gyis spyan drangs la rang la bstims la/phyag rgya gsum gyis rgyas gdab ste/ gong ma'i sngags lnga brjod cing lag pa gnyis thal mo khong stong du sbyar la srin lag gnyis nang du bkug la phan tshun bsnol ba'i rtse mo mdzub mo'i drung du cung zad byung bar byas la/gung mo gshibs pa'i phyi rol nas mdzub mo gnyis bkug ste/ bar nas gang tsam gyis ma reg par byas la/ mthe bong gnyis gshibs pa ni rdo rje rnam 'joms kyi'o/ /g.yon pa ni sdigs mdzub snying gar bzhag pa/ g.yas pa sor mo gsum bsgreng la mthe chung gi sen mo mtheb mos mnan pa'o//lag pa gnyis khu tshur nang du bcings la/ cung zad bsnol ba'i tshul du bcug ste/ mthe bong gnyis gyen du gshibs la bsgreng ngo / /lag pa thal mo phyag 'tshal ba'i thal mo sbyar ba las/ mthe bong gnyis bsgreng ste tshigs pa bkug nas srin lag gi drung du gzugs so//lag pa gnyis khu tshur bcangs te mthe bong gnyis bsgrengs/ mthe'u chung gnyis nang du gzhug go/ /phyag rgya chen po rnams gong ma bzhin bsgoms pas rgyas gdab/ de nas mchod pa dang bstod pa bya/ de nas b+h+rUM las rin po che'i bum pa la nang 'o ma can gyi rgya mtsho las pad+ma 'khrungs par bsams la pad+ma'i steng du zla ba/de'i steng du sngags lngas lha lnga bskyed la ye shes kyi lha rnams mchod yon gyis spyan drangs la bstim/ phyag rgya gsum gyis rgyas btab nas mchod bstod byas la/ bum pa'i steng du bzhag la/de la gzungs thag btags la/ rang dang lha'i thugs kar sngar gyi sngags lnga po gang zlos pa gsal bar dmigs la/ phreng ba snyim par bcug la gzungs thag nas bzung la/ oM badzra a ts+tshin+d+ha ye swA hA zhes brjod la phreng ba lag pa g.yas pas bzung la so so'i sngags bzlas pas yi ge phreng ba gzungs thag la 'khril nas ye shes sems dpa' mnyes shing bum par ye shes kyi chu rgyun gyis khengs par bsam/thun rel glal dang sbrid pa gsang sbubs la sogs pa spangs la ma yengs par 'dzab tu dbul lo/ /glal la sogs byung na khrus sogs byas la bzlas pa bskyar/ yang na kun la thun mong du yang snying thun re la brgya rtsa brgyad dam ji ltar nus pa dbul/ de nas mchod bstod byas la/ phyi rol du dpung bzangs las 'byung ba bzhin gtor ma btang la/ lus ngag gi kun spyod bya/ thun gnyis phan chod la rang khrus sogs byas la mchod bstod bzlas pa bya'o/ / thun tha ma la mchod bstod gtor ma btang ba'i rjes la bzod par gsol la/ slar yang bdag la nges par ni/ /rjes su bzung bar mdzad nas kyang / /mgon po rig dang sngags bcas pas/ /ci bde bar ni gshegs su gsol/ /zhes thabs kyi ye shes pa gshegs su gsol/ / khro bo bzhi bo rang la bsdu/ rang bdud rtsi 'khyil par bsgyur la nyal/ yang tho rangs khrus dang 'thor 'thung nye reg dang las kyi rdo rje cho ga nas bzung la thams cad sngar bzhin byas la/ me long gi ngos ltar mnyam pa la rnam lnga dang dri zhim pos byugs las gzung bya'o/ /de nas khrus dang 'thor 'thung nye reg byas la/sa gzung nyi ma nas brtsams te/ /slob ma dkyil 'khor 'jug gi bar/ /slob dpon rtogs par 'jug par bya/ /dri dang bcas pa'i zas bza' zhing / /zhes gsungs pas/ smyung ba la gnas pa'am/ yang dkar gsum la dris bsgos pa nyung zad tsam bza'o//dkyil 'khor gyi dbus sam nub phyogs su ku sha'i stan la 'dug ste/ lha drug gi sgo nas rang lha lngar bskyed cing ye shes bcug nas rgya gsum gyis btab pa la/ shar phyogs nas slob ma'am yon gyi bdag pos khrus la sogs pa byas nas gos gtsang zhing gsar pa gon la me tog gi phreng ba dri zhim pos bsgos pa lag tu thogs la tsog pur 'dug ste/mdo sde dam pa mnyan par bya/ /mdo sde 'di yi gzi brjid kyis/ /srog chags 'byung po thams cad kyi/ /mi bzad pa yi nad rnams kyang / /de dag thams cad zhi bar blta//tshe dang bsod nams 'phel bar 'gyur/ /sdig pa kun las rnam par thar/ /de bas rdo rje rigs mchog gis/ /rnam 'joms dkyil 'khor bshad du gsol/ /zhes dang ba'i dad pa dang ldan pas lan gsum gsol ba gdab bo/ /de nas sngags 'chang 'greng ste/ rang gi lha'i 'khor lo nam mkha' la bteg la/ rang bdud rtsi 'khyil par bsgyur la/ mig la hUM bkod la nyi zla 'bar bar bya zhing / rkang pa gnyis su hUM las sna tshogs rdo rje kha gyes par bsams la/ se gol gyi sgra brdabs shing khro bo'i lta bas phyogs mtshams thams cad lta zhing rdo rje lan gsum du gsor la/e ma sangs rgyas thams cad kyi/ /thugs rje can gyi thabs chen de/ /zhi yang sems can gdul don du/ /dri ma med pa'i khro bor gyur/ /bcom ldan 'das bdud rtsi 'khyil ba de la phyag 'tshal lo/ /bdud rtsi 'khyil pa'i sngags ring brjod do/ / de nas seng ldeng gi phur bu stong bdud rtsi 'khyil pa'i rnam pa la smad zur gsum par 'dug pa la/ na ma rat+na tra yA ya nas/ kro d+ha kro d+ha ki li kI lA ya swA hA zhes bya ba'i bar lan nyi shu rtsa gcig gam brgya rtsa brgyad dam ma nus na lan gsum btab la/ dbus dang mtshams bzhir gdab/ cod pan dang tsan+dan dmar pos thig le gsum dang gu gul dang / yungs kar dang / dri sngon du 'gro ba'i mchod pa lnga dang / dbu'i gtsug tor rnams rdzogs par bya'o/ /de nas brtan ma lhag gnas bya ste/ g.yas pa'i srin lag gi haM gis bkug la/ dri sngon du song ba'i rnam lngas mchod la/spos thogs la/ skyob pa sangs rgyas la sogs kyis/ /mkhyen pa gsol ba lan gsum bya/ /de nas lha lnga'i sa dang / phyogs skyong gi gnas su dri'i thig le dang me tog gi tshom bu byas la lha lnga nam mkha' nas phab la bzhugs su gsol/ phyogs skyong rnams yid tsam mam/yang na/ ri rgyal gnya' shing 'dzin gyi tshul lto nas/ /phyogs skyong 'jig rten skyong ba bzhugs so 'tshal/ /bstan pa rgyas pa'i slad du spyan 'dren na/ /log 'dren gzhom pa'i slad du 'dir gshegs shig /e h+ye hi da sha lo ka sa pa ri bA ra sa ma ya s+t+waM zhes brjod do//de nas mchod pa thams cad kyis mchod cing bstod pa kun gyis kyang bstod la/ bum pa gtsang ma 'dir bca' zhing bum pa la mchod la/ brgya rtsa brgyad dam nyi shu rtsa gcig tu snga ma bzhin du bzlas so/ /yon bdag dang slob ma yang khrus la sogs pa byed du bcug la/gsum la skyabs 'gro sbyin/ gtor ma btang la pus mo g.yas pa btsugs la/ dril bu gsil zhing rdo rje dang spos thogs la/ /rdo rje rnam 'joms bcom ldan 'das/ /rig sngags rgyal la phyag 'tshal bstod/ /rig rgyal khro bo'i tshogs rnams dang / /gang yang gsang sngags lha rnams dang //'jig rten skyong ba mthu chen rnams/ /ma lus bdag la dgongs su gsol/ /rdo rje rnam 'joms dkyil 'khor ni/ /'gro ba'i sdug bsngal bsal ba'i phyir/ /khyed rnams la yang mchod pa'i phyir/ /yo byad ci 'byor pas 'dri na/ /khyod kyis gnang ba mdzad pa dang //las kyi dngos grub stsal du gsol/ /zhes lan gsum brjod/ nyi ma 'char ka sngags 'chang g.yog dang bcas pa thig ji lta ba bzhin du bsgrubs la/ ye shes kyi thig dang las kyi thig dang / kun la slob dpon kha nub tu lta ba lhag ma'o/ /seng ldeng gi phur bus dbus su btab la/srad bu brtod pas bskor phyogs su/ rnam 'joms kyi gnas cha chen gcig la bskor/ mu khyud cha bran lnga pa bskor/ de nas lha snam la thug pa la 'khor lo'i mu khyud cha bran gnyis bskor/ de nas phyi rol rdo rje ra ba dang me ri rta babs kyi phyi rol du cha bran gnyis gnyis la bskor/de nas 'grus thig btab la 'khor lo rtsibs bzhi'i thig btab/ phyogs bzhir gri gug re bya/ de nas tshon bsgrubs la/ phyogs tshon la shar dkar/ lho ser/ nub dmar/ byang ljang / dbus mthing / 'khor lo bzhi dang gri gug sngo skya/ pad+ma rA ga dang por sngo/ /de'i phyi rol ljang / de'i phyi rol dmar/ de'i phyi rol ser/ kun gyi phyi rol dkar po/ de nas 'khor lo'i dbus dang 'dab ma rnams la zla ba'i dkyil 'khor re re bris la/ dbus su rdo rje rgya gram ljang sngon la ngos gcig med pa bri/byang shar gyi rtsibs la rdo rje rtse lnga pa smug nag /shar lho'i rtsibs la rdo rje rtse gcig pa ljang nag /lho nub kyi rtsibs la be con mthing nag /nub byang gi rtsibs la tho ba nag po bri/ 'khor lo'i mu khyud dkar po la/ gru chad ljang gu la bum pa bri/ lha'i snam bur phyogs skyong dgod//de yang gsang ba'i spyi rgyud las/ /brgya byin gyi ni rdo rjer gsungs/ /me lha'i phyag mtshan me thab yin/ /gshin rje yi ni be con te/ /bden bral gyi ni ral gri ste/ /chu bdag gi ni zhags par bya/ /rlung lha'i phyag mtshan rgyal mtshan yin/ /ku be+e ra yid byug sngon no//dbang phyug gi ni tri shU la/ /sa yi lha mo bum pa'o/ /nyi zla'i phyag mtshan de nyid do/ /de rnams gdan byas pa'i steng du dgod par bya'o/ /de nas sgo bzhir nub kyi sgor dpal be'u dang 'khor lo/ byang gi sgor gdugs dang rgyal mtshan/ shar gyi sgor pad+ma dang bum pa/lho'i sgor dung dang nya bri/ de nas rta babs la sogs rdzogs par ro/ /de nas dkyil 'khor gyi gnas rnam lnga dang dri zhim pos nye bar byugs la/ bla re dang / rgyal mtshan dang / ba dan dang / lhab lhub kyis dkyil 'khor gyi gnas brgyan cing / me tog sil ma gtor zhing mchod pa'i yan lag thams cad bshams la dra phur bres la/de nas sngags 'chang bdag nyid khrus la sogs pa thams cad la/ nub sgor rtsa ku sha'i stan la 'dug la/ las kyi rdo rje'i cho ga dang gsang gdub dang gdu bu'i cho ga rnams byas la maN+Dal blang la mtshan ma dang sta gon gyi lha bsres la/me tog sngon po'i phreng ba thogs la rdo rje dril bu dkrol zhing / oM badzra dz+wa lA na lA ya swA hA zhes brjod cing lan gsum gsum bskor ba byas la/ me tog rdo rje rnam 'joms kyi dbu la phul/ slar rang gi mgo la bcings la/ nub sgor 'greng la khro bo'i bstod pa btang la/bgegs la la zhig sngon gyi de bzhin gshegs pa'i dkyil 'khor la/ dngos grub kyi bar chad rtsom pa/ rig pa'i rgyal bo drag po'i rdo rje rab tu 'bar ba 'dis mgo bo tshal pa bdun du 'gas so zhes brjod cing / a mo g+ha badzra/ oM h+ye hi badzra zhes pa nas badzra rA ga dz+wa lA ya swA hA'i bar du lan cig brjod pas mtshams bcad/de nas sngags 'chang nub sgor ku sha'i gdan nyid la bsdad la/ dril bu gsil zhing sbos snod thogs la/ ye shes bskal ba me ltar 'bar ba'i 'od/ /ma rig 'dod pa'i bdud khams thams cad bsregs/ /zhe sdang gshin rje'i 'jig rten thams cad 'joms//log 'dren srin po ma lus gdul ba yin/ /dpa' bo dpa' mtshan stag lpags rlon pa gsol/ /rig pa'i rgyal po khro bo bzhugs so 'chal/ /log 'dren 'joms pa'i slad du spyan 'dren gyis/ /'gro ba'i don phyir mchod kyis gshegs su gsol//badzra bi dA ra ma hA kro d+ha sa pa ri bA ra sa ma ya s+t+waM zhes brjod/ de nas mchod yon phul la/ dam tshig la ye shes gzhug pa ni ma tis+thi ra badzra/ shru tis+thi ra badzra/ pra tis+thi ra badzra/ ma hA badzra/ a pra ti ha ta badzra zhes pas bzhugs su gsol/ de nas dam tshig chen po de'i phyag rgya bstan te/lag pa g.yas pa'i mthe bong mthe'u chung mnan la lhag ma rdo rje rtse gsum pa'i tshul du bsgreng ba'o/ /oM shaM ka re ma hA sa ma ye swA hA zhes brjod pa ni dam tshig chen po'i sngags dang phyag rgya'o/ /de nas phyag rgya gsum gyis gdab/ de nas bum pa sngar bzhin bzlas la gzhug go//dam tshig gso ste lag pa gnyis rgyab tu thal mo sbyar ba'i tshul du byas la mthe bong dang mthe'u chung gnyis so sor 'khyud la lte ba'i thad kar bzhag la/ oM badzrod b+ha ba ya swA hA zhes brjod pa rdo rje rigs kyi dam tshig bskang zhing gso ba'o/ /sku khrus gsol/ mchod yon phul/ dri sngon du 'gro bas rnam lnga dbul/ 'dod yon dang rin po che sna bdun dang / 'phra mchod dbul/ de nas bstod de/ chos nyid stong pa gnyis med ngang nyid las/ /'jig rten spyod pa'i tshul yang mi spong ste/ /thabs la mkhas pa'i 'jigs byed skur ston pa/ khro chen 'bar ba'i tshogs la phyag 'tshal bstod/ /ye shes zhi ba'i ngang las ma g.yos kyang / /sku yi cha lugs za byed rngam stabs can/ /gsung gi nga ro 'brug stong ldir ba'i sgra/ /ma lus dbang du sdud la phyag 'tshal bstod/ /lha yi ye shes rol pas rab ston cing / bsdigs pa'i mtshon cha mang po phyag na bsnams//nyon mongs dug chen sna tshogs 'joms mdzad pa/ /dug sbrul rgyan gyis brgyan la phyag 'tshal bstod/ /hUM gtum chen 'bar ba bskal pa'i me ltar 'bar/ /khro gnyer glog stong 'od zer 'gyur ba bzhin/ /rngam pa'i nga ro 'brug stong bzhin du sgrogs//khro rgyal bgegs tshogs 'dul la phyag 'tshal bstod/ /bskal pa me ltar 'bar ba'i klong dkyil nas/ /dpa' bo'i stong stabs brkyang bskum tshul du bzhugs/ /nyi zla 'bar ba'i spyan gyi sdang mig gis/ /bgegs dpung sreg par mdzad la phyag 'tshal bstod//de nas dpung bzangs nas 'byung ba bzhin/ shar phyogs rdo rje can gyi lha tshogs bcas/ /zhes bya ba la sogs pa dang / dbang bo rdo rje 'chang ba'i lha/ zhes pa la sogs kyis phyogs skyong la gtor ma dang bstod pa bya/ 'byung po gang dag ri rab steng gnas la sogs kyis 'byung po'i gtor ma btang /de nas gang zag de khrus dang 'thor 'thung dang nye reg byed du bcug la gos gtsang ma gon du bcug /dkyil 'khor dang sngags 'chang gnyis la phyag byed du bcug la/ lag tu me tog gi phreng ba dang bcas pas/ rig sngags 'chang chen dgongs su gsol//bdag ni sdug bsngal las thar phyir/ /rdo rje 'dzin de 'khor bcas la/ /bdag ni gus pas skyabs su mchi/ /zhes lan gsum du brjod do/ /de nas sngags 'chang gis dkyil 'khor gyi lha la bstod par bya ste/ ji ltar sngon tshe bde gshegs pho brang du/ / gdug pa 'dul phyir rdo rje can gyis ni/ /rjes mthun phrin las khyad par gang bsgo ba/ /dam bcas phrin las de ni grub par mdzod/ /de slad bgegs dang log 'dren tshar bcad ltar/ /'gro ba nyam thag 'di ni gzung ba'i phyir/ /sdug bsngal nges bsal bde mchog la sbyar ba'i/ / khro rgyal khyed kyis deng 'dir byin brlabs gsol/ /de nas 'gro ba de rtswa ku sha'i steng du bzhag la/ gdug pa'i sngags kyis bgegs bskrad de/ na mo rat+na tra yA ya nas hUM phaT kyi bar du brjod/ de nas las bum gyis bkru zhing / sdig pa thams cad byang byas nas/ /zhes pa nas/ sdig pa kun las rnam par thar//zhes pa'i bar du khrus kyi phan yon brjod cing bkru'o/ /de nas khrus sa'i stegs bu khru gsum pa la khru do stong par dbang su bzhag la khru phyed lha snam la phyogs skyong rnams bkod la/ khru gang la rta babs med pa'i sgo bzhi bris te/ dbus su rtswa ku sha bting bar 'gro ba der bzhag pa'am/khrus sa'i stegs bu ma 'byor na/ dkyil 'khor gyi lha lnga bum par yid kyis spyan drangs la/ rma bya'i sgro la sogs pa mtshan ma lnga pos phyis la/ der rtswa ku sha'am ras dkar po bting la/ 'gro ba der bzhag la bum pa rnams thogs te/ gang la ser sna rnams chags pa'i/ /rnam 'joms dri med mdzad pa yi/ /thugs zhi gnod pa mi mnga' des/ /khyod la bde legs mdzad par 'gyur/ /'dren pa gang zhig 'gro ba rnams/ /thar pa'i lam du sdud mdzad cing / /chos rnams thams cad ston pa des/ /khyod la bde legs byed par 'gyur//ston pa 'gro ba rnams kyi rten/ /sems can kun gyi don gyi phyir/ /gang gis bde ba mnga' mdzad des/ /khyed la bde legs byed par 'gyur/ /skyob pa gang gis byams pa yi/ /thugs kyis 'gro ba 'di dag kun/ kha gcig bzhin du rtag bskyangs des/ / khyed la bde legs mdzad par 'gyur/ /gang gis 'khor bar 'khor ba yi/ /sems can kun gyi rten gyur cing / /gling dang dpung gnyen gyur pa des/ /khyed la bde legs byed par 'gyur/ /ston pa 'gro ba rnams kyi rten/ /brgya byin bcas pa'i lha rnams dang / /'byung po kun gyi bde legs ni//khyed la rtag tu byin gyur cig /sangs rgyas bsod nams mthu dag dang / /lha rnams kun gyis bsams pa yis/ /khyed kyi 'dod 'dod gang yin pa/ /don de de ring 'grub gyur cig /khyed cag lam 'gro bde legs shog /phyir 'ong dag kyang bde legs shog /nyin mo bde legs mtshan bde legs/ /nyi ma'i gung la bde legs shog /ces brjod la/ na mo rat+na tra yA ya nas na maHtsaN+Da badzra pA Na ye/ ma hA yak+Sha se nA ba ta ye/ oM badzra dz+wa lA na lA ya shAn+tiM ku ru swA hA zhes khro bo bzhi'i sngags dang 'bru spel la bkru/ sdig pa dang nad dang gdon la sogs pa dag par bsams la/ shar sgo nas bton la gsum la skyabs su 'gro ba byin la snying gar rdo rje rnam 'joms kyi phyag mtshan bskyed cing bcug la bzhag /de nas slob ma rdo rje'i rwa la 'dzin du bcug la/ ya gcig nas slob dpon gyis bzung la/ 'gro ba 'di la nga yis bsrungs zin gyis/ /da ni 'di la sus kyang gnod ma byed/ /gal te 'di la gnod pa byas gyur na/ /mgo bo tshal ba brgyar ni 'gas par 'gyur/ /zhes brjod la srung ba'i 'khor lo'am srung skud gdags/ nyi ma gza' las grol ba bzhin du che ge mo 'di yang nad dang gdon la sogs pa las grol bar gyur cig /rgyal bar gyur cig /mang du brjod cing rol mo mang du yang rdung du gzhug go/ /de nas ras dkar po gtsang ma'i steng du bkra shis kyi rdzas rnams bzhag ste/ yungs kar dang / dUr ba dang / bil ba dang / gi wang dang / li khri dang /zho dang / me long dang / dung g.yas su 'khyil ba dang brgyad byin te/ yungs kar rdo rje'i rigs te thams cad du/ /bgegs rnams ma lus 'joms par byed pa'o/ /mthu stobs yon tan phun sum tshogs 'gyur bar/ /bkra shis des kyang thams cad zhi bar shog /dUr bas tshe ni 'phel bar byed pa ste/rdo rje sems dpa'i tshe ni rab grub nas/ /nyon mongs skye shi rgyun chad gyur pa yi/ /bkra shis des kyang tshe ni 'phel bar shog /bil bas rgyu rkyen 'bras bur gyur pa'i chos/ /'jig rten pa las 'das pa'i spyod pa kun/ /byang chub snying po mchog tu gyur pa yi//bkra shis des kyang mchog tu grub gyur cig /gi wang dug gsum 'joms pa'i nad kyi sman/ /chos kyi chos nyid rab tu rtogs nas ni/ /nyon mongs zug rngu med par gyur pa yi/ /bkra shis des kyang sdug bsngal bral gyur cig /li khri dmar po dbang gi rang bzhin te//chos rnams ma lus dbang du bsdus nas kyang / /chos kyi rgyal srid rab brtan gyur pa ste/ /bkra shis des kyang khyod srid brtan gyur cig /zho ni kun gyi snying por gyur pas na/ /snying po rnam dag ye shes rnam rtogs nas/ /yon tan chos kyi dbyings su gyur pa yi/ / bkra shis des kyang dug gsum zhi bar shog /me long ye shes chen po'i rgya mtsho yis/ /ye shes rgya mtsho mchog tu bdag gyur te/ /rnam dag chos la thogs med longs spyod pa'i/ /bkra shis des kyang deng khyod dga' gyur cig /dung ni chos kyi sgra rnams sgrogs pa'i tshul/ / ye shes rgya mtsho nyid du bdag gyur te/ /chos rnams ma lus yongs su ston pa yi/ /bkra shis des kyang tshig la dbang thob shog /ces blangs la slob ma la sbyin no/ /de ma 'byor na dkar gsum tsam mam 'bras chan la bkra shis brjod la sbyin/ /slob mas kyang 'byor tshad kyis mchod sbyin bya//de nas slar bum pa'i lha dang dkyil 'khor dang bum pa'i lha la gang yang bdag blo gti mug la sogs kyis bshags/ oM khyed kyis sems can don kun mdzad/ /la sogs kyis ye shes pa gshegs su gsol la/ dam tshig pa rnams rang la bsdus la rang bdud rtsi 'khyil par bya'o//de nas chos thams cad ni gdod ma nas dag pa'o/ /rang bzhin gyis zhi ba'o zhes brjod cing rdul tshon phyags la bum pa dang / dman pa rnams chu bo'am gnas mthon por bskyal lo/ /dam pa rnams kyi gzhung bzung nas/ /sna tshogs rgyud la rab brtan te//rdo rje rnam par 'joms pa yi/ /dkyil 'khor cho ga ldan pa yi/ /khrus kyi cho ga brtsams pa las/ /dri med dge ba gang thob des/ /'gro kun sdug bsngal zhi nas kyang / /lam mchog rnams la zhugs gyur cig /rig sngags 'chang gi slob dpon rat+na shI las mdzad pa'i rdo rje rnam par 'joms pa'i khrus kyi cho ga gzhan la phan par byed pa zhes bya ba rdzogs so/